གསུང་འབུམ་པོད་བཞི་པ།

སྔ་འགྱུར་རྒྱལ་བ་ཕུག་ཁང་པའི་དཔེ་ཚོགས།

དཔལ་སྤྲུལ་ནམ་མཁའ་འཇིགས་མེད།

Nitartha international

མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །
—རྫོགས་ཆེན་དཔོན་སློབ།

འཇིགས་གཤེད་གཤིན་རྗེ་གཤེད་ཀྱི་ལས་བྱང་རྡོ་རྗེའི་ཐོག་ཆར།

རིག་འཛིན་དགོངས་པ་འདུས་པ་ལས༔ འཇིགས་གཤེད་གཤིན་རྗེ་གཤེད་ཀྱི་ལས་བྱང་རྡོ་རྗེའི་ཐོག་ཆར་ཞེས་བྱ་བ་བཞུགས་སོ༔

ན་མོ་གུ་རུ་པདྨ་ཀཱ་ར་ཡ༔ བརྡ་ཡིག །མ་འོངས་སྙིགས་མའི་མཐར་ཐུག་ཉེ་བ་ན༔ བར་ཆད་སྦུ་ཡུག་བཞིན་ཏུ་འཚུབས་ཅིང་ལྡང་༔ ནད་མུག་མཚོན་གསུམ་ཤིན་ཏུ་དར་བ་དང་༔ རྒྱ་འདྲེ་འགོང་བོས་བོད་ཁམས་ཕུང་བྱེད་ཅིང་༔ བསྟན་པའི་གཞི་མ་ཆོས་འཁོར་གཉན་པོ་བཤིགས༔ བསྟན་འཛིན་དབུ་འཕང་སྨད་པའི་དུས་ཀྱི་ཚེ༔ གཉེན་པོ་སྟོབས་ཀྱི་ལྷ་འདི་མེད་པ་ན༔ རྒྱལ་བའི་ཕྲིན་ལས་དུས་ལས་ཡོལ་བར་གྲང་༔ དེ་ཕྱིར་ཨོ་རྒྱན་མཁན་པོ་པདྨ་ངས༔ རྒྱུད་ལུང་མན་ངག་སྙིང་པོའི་བཅུད་བསྡུས་ནས༔ བརྒྱུད་ཐག་ཉེ་ཞིང་བྱིན་རླབས་དངོས་གྲུབ་ཆེ༔ ཕྲིན་ལས་མྱུར་མགྱོགས་རྡོ་རྗེའི་ཐོག་ཆར་སྤྲོས༔ འདི་ཉིད་སྒྲུབ་པའི་གནས་ཀྱི་མཚན་ཉིད་ནི༔ དུར་ཁྲོད་བས་མཐའ་ས་རྩུབ་འཇིགས་སུ་རུང་༔ དུར་ཤིང་རྩུབ་ཤིང་ཚེར་མ་ཅན་གྱི་ཤིང་༔ ཨེ་ཡི་དབྱིབས་ཅན་རི་རྩེ་གཡའ་སྔོན་བཟུང་༔ གཅནགཟན་མི་རྒོད་ལྷ་འདྲེའི་རྒྱུ་བ་དྲག༔ གནམ་ས་འཁོར་ལོ་རྩིབས་གསུམ་མཆེ་བ་ཟུག༔ མདོག་ནག་གྲུ་གསུམ་སྐྱི་བུང་བྱེད་པ་དང་༔ ཆུ་བོ་རྦ་རླབས་འཕྱོ་འུར་སར་ཕྱིན་ཏེ༔ ས་བརྟགས་བསླང་བཟུང་བསྲུང་དང་རླབས་བྱས་ཏེ༔ ཐིག་གདབ་དཀྱིལ་འཁོར་བྲི་ཞིང་ཚོན་དགྱེ་བ༔ བཀའ་བརྒྱད་དང་ནི་གཤིན་རྗེ་སྤྱི་ལྟར་བྱ༔ བཅའ་བཤོམ་ཉེར་བསྡོགས་ཡན་ལག་ཞལ་ཤེས་བཞིན༔ སྒྲུབ་པའི་དུས་གཉན་སྲོད་འཁོར་མགོ་བཟུང་ནས༔ ལྷོ་ཕྱོགས་ཁ་བལྟས་སམ་ནི་འདུན་པས་བསྐྱང་༔ དམ་སེལ་མེད་པའི་གྲོགས་དང་ཡོ་བྱད་ལྔ༔ ཚོགས་པའི་གསང་བཅུའི་དམ་ཚིག་མ་ཉམས་ངང་༔ འདུག་གནས་དུར་ཁྲོད་ཆེན་པོ་ཞིག་ཏུ་བསྒོམ༔ སྦྱོར་བ་དང་ནི་དངོས་གཞི་རྗེས་དང་གསུམ༔ དང་པོ་ས་བཅད་རྣམ་པ་བཅུ་གཅིག་སྟེ༔ ཐོག་མར་གསུམ་ལ་སྐྱབས་སུ་འགྲོ་བ་ནི༔ ཨེ་མ༔ རྒྱལ་མཛད་རྣམ་རྒྱལ་བདུད་ལས་རྒྱལ༔ བདུད་ལས་རྒྱལ་བའི་གཟི་བྱིན་གྱིས༔ འཇིགས་པ་གསུམ་གྱི་གཡང་ས་ལས༔ དབུགས་དབྱུང་མཛད་ཕྱིར་སྐྱབས་སུ་མཆི༔ ཐེག་ཆེན་ལམ་གྱི་རྩ་བ་སེམས་བསྐྱེད་པ༔ ཀྱེ་མ༔ ཉོན་མོངས་འཁྲུལ་བའི་སེམས་ཅན་ཀུན༔ སྡུག་བསྔལ་ཉམ་ཐག་བདེ་བས་དབུལ༔ གཏན་བདེའི་གོ་འཕང་ལ་འགོད་ཕྱིར༔ བྱང་ཆུབ་སེམས་བསྐྱེད་བསླབ་སྡོམ་བཟུང་༔ སྒྲིབ་སྦྱངས་ཚོགས་གཉིས་བསགས་པ་བདུན་རྣམ་དག༔ ན་མོ༔ འཇམ་དཔལ་སྲིད་ཞི་མཉམ་ཉིད་ཀློང་༔ འདུ་འབྲལ་མེད་པས་ཕྱག་འཚལ་ལོ༔ བླ་མེད་མཆོག་གི་དམ་པ་ཡི༔ ཡེ་ཤེས་འོད་ཟེར་འབར་བས་མཆོད༔ མ་རིག་ཉོན་ཤེས་སྒྲིབ་དབང་གིས༔ སྡིག་ལྟུང་ཉམས་ཆགས་མཐོལ་ལོ་བཤགས༔ སུ་དག་རྣམ་པར་དཀར་བའི་ལས༔ ཇི་སྙེད་བསྒྲུབ་ལ་རྗེས་ཡི་རང་༔ འགྲོ་ཁམས་དབང་ཆེན་རྡུལ་སྙེད་གྲངས༔ གདུལ་ཐབས་ཆོས་འཁོར་བསྐོར་དུ་གསོལ༔ ཐུགས་བསྐྱེད་བྱང་ཆུབ་སྤྱོད་པའི་གྲོགས༔ ངེས་འབྱུང་བསྐུལ་བའི་ཐུགས་དམ་དགོངས༔ འདིས་མཚོན་དུས་གསུམ་བསགས་པའི་དགེ༔ འཁོར་གསུམ་དམིག་མེད་ངང་དུ་བསྔོ༔ བསླུ་མེད་རྟེན་ཅིང་འབྲེལ་འབྱུང་མཐུས༔ འགྲོ་ཀུན་སངས་རྒྱས་ས་ཐོབ་ཤོག༔ བདག་འཛིན་རྣམ་རྟོག་བར་ཆད་བགེགས་བསྐྲད་པ༔ ཧཱུྃ༔ ང་རྒྱལ་གཤིན་པོ་ཀུན་གྱི་རྗེ༔ ཆོ་འཕྲུལ་ཁྲི་ཕྲག་བརྒྱད་ཀྱི་གདོན༔ སྐྱེ་འགྲོའི་ཚེ་རྐུ་སྲོག་ལ་རློམ༔ རྣལ་འབྱོར་བྱང་ཆུབ་བསྒྲུབ་པའི་གེགས༔ གཉུག་གནས་གློ་བུར་ལྷག་པ་ཀུན༔ ཟག་མེད་ཡེ་ཤེས་རྒྱུ་འཕྲུལ་སྤྲིན༔ ཅི་འདོད་དངོས་པོའི་འདོད་ཡོན་དུ༔ རྟག་འཆར་འཛད་པ་མེད་པའི་གཏེར༔ འདི་དག་འབུལ་གྱི་བསྣམ་ནས་ཀྱང་༔ དེང་ནས་ཕྱིན་ཆད་བགེགས་མ་བྱེད༔ ཅི་ཕྱིར་བདག་གཞན་ཀུན་དོན་སླད༔ ངས་ནི་བསམ་པ་རྣམ་དཀར་བས༔ བཅོམ་ལྡན་བྱམས་པའི་ཏིང་འཛིན་གྱིས༔ བདུད་སྡེའི་མཚོན་ཆར་ཕབས་པའང་༔ མེ་ཏོག་སིལ་མའི་བསྟི་སྟིངས་ ༼ སྟང་དཔྱད། ༽ གྱུར༔ བདེན་པ་དེ་ཡིས་གླགས་མ་མཆིས༔ ཨོཾ་སརྦ་བིགྣཾ་ཨ་གཙྪ་ཡ་ཕཊ༔ ཧཱུྃ་བཞིའི་སྔགས་ཀྱིས་བསྐྲད༔ རྐུན་པོ་ཕྱིར་ཕྱུང་ཁྱིམ་གྱི་སྒོ་བསྡམ་ཚུལ༔ ཧཱུྃ༔ འཁོར་འདས་བྱང་ཆུབ་སེམས་ཀྱི་ངང་༔ ཕྱག་རྒྱ་ཆེན་པོའི་དཀྱིལ་འཁོར་ཀྱང་༔ རང་ས་མ་ཟིན་གསུམ་གྱིས་ལན༔ བསྲུང་དང་བསྲུང་བྱར་ཨ་འཐས་པའི༔ གཟུང་དང་འཛིན་པའི་འདུ་འཛི་ཀུན༔ ཕྱོགས་བཅིངས་ང་རྒྱལ་མ་ལགས་པར༔ ཡེ་སངས་རྒྱས་པ་ཡང་སངས་རྒྱས༔ རྒྱ་གྲོལ་ཆོས་སྐུའི་ཡོ་ལང་ལ༔ རེ་དོགས་སྤངས་བླང་མཚན་མ་ཀུན༔ རྨི་ལམ་སྒྱུ་མའི་སྤྲོས་རྟོགས་ལྟར༔ ཨོཾ་བཛྲ་མུ་ག་རཱ་ཛ་དནྟྲི་ཧཱུྃ༔ པདྨ་བམ་ཁརྒ་ཧོ༔ ཛཿཧཱུྃ་བཾ་ཧོ༔ མ་རིག་མུན་བསལ་ཡེ་ཤེས་སྒོ་ཕྱེས་པ༔ ཀྱཻ༔ འཇམ་དཔལ་ཡེ་ཤེས་རང་གནས་ཀྱང་༔ མ་རིག་འཁྲུལ་པའི་རྫས་ཀྱི་རྨོངས༔ ཤེས་རབ་ལྟ་བའི་སྨན་ཆེན་གྱིས༔ འཁོར་སྒོ་བསྡམས་ནས་ཡང་དག་འཆར་སྒོ་ཕྱེས༔ ཧཱུྃ༔ དོན་དམ་ཀུན་རྫོབ་དབྱེར་མེད་པའི༔ རང་གནས་སྐུ་བཞིའི་དཀྱིལ་འཁོར་ཀྱང་༔ ཡེ་དང་རང་བཞིན་དངོས་པོའི་གསང་༔ ད་ནི་རང་ཞལ་མཐོང་བ་བརྟོལ༔ ཨོཾ་བཛྲ་ཛྙཱ་ན་པྲ་ཝེ་ཤ་ཡ་ཕཊ༔ དཀྱིལ་འཁོར་ལྷ་ལ་བརྡའ་ཕྱག་འཚལ་བ་ནི༔ རང་བཞིན་བཟང་ངན་མེད་མཉམ་པས༔ ལྟ་བའི་ངར་བསྐྱེད་བརྡའ་ཕྱག་འཚལ༔ ཧཱུྃ༔ བདག་ཉིད་ཡེ་ནས་རྡོ་རྗེ་ལྡན༔ རང་བཞིན་གཞི་ཡི་ཧེ་རུ་ཀའི༔ འབྲས་བུ་མངོན་གྱུར་དོན་མཚོན་པས༔ བསྒྲུབ་པ་ཐབས་ཀྱི་བརྡའ་ཕྱག་འཚལ༔ ཨོཾ་བཛྲ་ས་མ་ཡཱ་ཛྙཱ་ན་མནྜ་ལ་ས་མ་ཏི་ན་མ་ཧོ༔ ནོངས་བ་བཤགས་པར་བྱ་བ་ནི༔ ཧཱུྃ༔ སྒྲིབ་པའི་དབང་བྱས་འཁྲུལ་པའི་བག༔ ཆུ་བོ་བཞི་ཡི་རྒྱུན་ཕྱོགས་གཡེངས༔ དེ་ཡང་མགོན་པོའི་འོད་ཟེར་གྱིས༔ བཟུང་བྱས་ཡང་དག་ལྟ་ལ་གནས༔ བཛྲ་བི་ཤུུངྡྷེ་ཨཱཿ ཡང་ཅིག་མི་འདའ་རྡོ་རྗེའི་དམ་བཅའཿ ཧཱུྃཿ བྱང་ཆུབ་སེམས་མཆོག་ཤེས་རབ་སྙིང་རྗེ་དང་༔ རྡོ་རྗེ་སློབ་དཔོན་རྡོ་རྗེའི་མཆེད་ལྕམ་དྲྭལ༔ ཡི་དམ་རྒྱལ་བ་ཁྱེད་ནི་སྲོག་ཕྱིར་ཡང་༔ སྤང་བར་མི་བགྱིད་མགོན་ཁྱོད་བསླུ་མ་ལགས༔ ས་མ་ཡཱ༔ ཏིཥྛ་བཛྲ༔ ཡེ་ཤེས་ཆེན་པོའི་བྱིན་ཆེན་དབབས་པ་ནི༔ ཀྱེ་ཀྱེ་ཀྱེ༔ ཆོས་རྣམས་རང་བཞིན་འཇམ་དཔལ་ཀུན་གྱི་དངོས༔ སྐྱེ་མེད་འགགས་མེད་འགྲོ་འོང་མེད་པའི་བདག༔ ནམ་མཁའ་བཞིན་དུ་འཕོ་འགྱུར་ཀུན་བྲལ་ཡང་༔ ཆུ་ཟླའི་ཚུལ་བཞིན་དེར་སྣང་བྱིན་ཆེན་ཕོབ༔ རྒྱལ་ཀུན་ཐུགས་བཞུགས་རྗེ་བཙུན་མཁྱེན་པའི་གཏེར༔ འཆི་བདུད་སྡེར་གཏོགས་མ་ལུས་འདུལ་བྱེད་པ༔ ལས་མཛད་རང་རྩལ་གཤེད་ཆེན་འཁོར་དང་བཅས༔ རྣམ་འབྱོར་བརྩེ་བྱིན་རློབས་པའི་དུས་ལ་བབས༔ དད་དང་ཤུགས་བྱུང་ཐུགས་རྗེའི་སྒྲོལ་བའི་དམ༔ མགོན་ཁྱོད་སྟོང་ཉིད་བཞུགས་པའི་དགྱེས་ཚོལ་ལ༔ བསེ་རུ་ལྟ་བུའི་བརྟུལ་ཞུགས་རྗེས་དགོངས་སམ༔ ཨོཾ་ཨཱཿཧཱུྃ༔ བཛྲ་ཛྙཱ་ན་ཙཀྲ་མནྜ་ལ་ཨ་ཝཱེ་ ༼ བེ་དཔྱད། ༽ཤ་ཡ་ཕེཾ་ཕེཾ༔ རང་བྱུང་ཡེ་ཤེས་དག་པའི་ཕབ་བྲན་པ༔ ཧཱུྃ༔ གཙང་དམེ་གཉིས་སུ་སྣང་བའི་ཡུལ་རྣམས་དང་༔ ཇི་ལྟར་དེ་བཞིན་འཛིན་པའི་སེམས་རྟོག་ཀུན༔ མེད་མཉམ་དག་མཉམ་བདག་ཉིད་ཆེན་པོར་མཉམ༔ ཨརྒྷཾ་ནས་ཤབྟ་རཱུ་པ་སོགས་སྤརྴེ་སརྦ་པཉྩ་རཀྟ་བྷ་ལིངྟ་ཏཱ་ན་ག་ན་གུ་ཧྱ་བྷོ་དྷི་ཨ་ཧཱུྃ༔ ད་ནི་དངོས་གཞིའི་རིམ་པ་ལ༔ རྡོ་རྗེ་ལྟ་བུའི་ཏིང་འཛིན་ནི༔ ཧཱུྃ༔ ཐམས་ཅད་མ་ལུས་འཁོར་འདས་ཆོས་སོ་ཅོག༔ བཱཻ་ཏ་ཡུམ་གྱི་མཁའ་ཀློང་ཡངས་པར་འཁྱིལ༔ སྐྱེ་འགགས་འགྱུར་མེད་སེམས་ཡིད་རྣམ་རྟོག་བྲལ༔ མ་ལུས་རང་གི་ཡང་དག་མཐའ་ལ་བལྟ༔ ཨོཾ་མ་ཧཱ་ཤུ་ནྱ་ཏ་ཛྙཱ་ན་བཛྲ་སྭཱ་བྷ་ཝ་ཨཱཏྨ་ཀོ྅་ཧཾ༔ སྙིང་རྗེ་སྒྱུ་མའི་རྣལ་འབྱོར་ནི༔ ཧཱུྃ༔ མ་རྟོགས་སྲིད་པའི་འཁོར་ལོ་སྙིང་རྗེའི་ཡུལ༔ རྒྱུ་བ་ཀུན་ལ་དམིགས་པའི་སྒྱུ་མ་ནི༔ དམིགས་མེད་རང་མདངས་རྩལ་སྟོབས་གཞི་ལ་རྫོགས༔ རང་བྱུང་ཡེ་ཤེས་ཆེན་པོའི་ཡེ་ནས་བརྡལ༔ ཨོཾ་བཛྲ་ས་མཎྟ་ལོ་ཀ་མ་ཧཱ་ཀ་རུ་ཎི་ཀ་ས་མ་ཏི་ཨཱ༔ ལྟ་བའི་ངར་གདེངས་བསྐྱེད་པ་གཞི༔ ཧཱུྃ༔ རང་གྲོལ་གནས་པ་གཞི་ཡི་འཁོར་ལོ་ནི༔ བཅོས་མེད་སྙིང་རྗེ་རྡོ་རྗེའི་དོན་དང་ལྡན༔ སྐུ་དང་ཡེ་ཤེས་འཁོར་འདས་བདེན་པ་གཉིས༔ ལྟ་བསྒོམ་ཐབས་ཤེས་ཞི་ལྷག་ཤེར་ཏིང་འཛིན༔ འཇམ་དཔལ་ཡ་མནྟ་ཀའི་ཐུགས་ལ་གནས༔ ཀུན་གྱི་སྟོང་སྲོག་བདེ་ཆེན་བྱང་ཆུབ་སེམས༔ ཧཱུྃ་ཧེ་རུ་སྱ་ཏྱ་ཡ༔ ཨ་ན་བྷོ་ག༔ སུ་ག་ཏ་གརྦྷ་བུདྡྷ་མ་ཧརྨཱ་ཀོ྅་ཧཾ༔ རྒྱ་གཅིག་ཕྲ་བ་ཡིག་འབྲུ་ལ་བསླབས་པ༔ ཧཱུྃ༔ ཆོ་འཕྲུལ་སྤྲུལ་བ་མཆོག་གི་འཁོར་ལོ་ནི༔ སེམས་དཔའ་གཉིས་ཀྱིས་ཞབས་ཀྱི་འོག་ན་གནས༔ ཡེ་ཤེས་ལྔ་ཡི་ཡོན་ཏན་ཟེར་ཐིག་ལེའི༔ ཐུགས་ལྔའི་དེ་ཉིད་རྒྱུ་ཡི་ཡི་གེ་འབར༔ གཟི་བྱིན་རབ་འབར་ནུས་པ་རྩལ་ལྡན་བྷེཾ༔ རགས་པ་ལྷ་ཡི་སྐུ་ལ་བསླབས་པ་ཉིད༔ དང་པོ་བདག་གི་སྲས་སུ་གཞན་བྱ་བ༔ དེ་ཉིད་གནས་འགྱུར་རྒྱུ་ཡི་རྡོ་རྗེ་འཛིན༔ མངོན་སྤྱོད་དབང་ཕྱུག་འཇམ་དཔལ་དྲག་པོ་རྩལ༔ དབུ་གསུམ་གཡས་དཀར་གཡོན་དམར་དབུས་ཀྱི་ཞལ༔ མཐིང་ནག་ཁྲོ་གཏུམ་རྔམ་བརྗིད་འབར་བའི་སྐུ༔ རྩ་བའི་ཕྱག་གཉིས་གྲི་གུག་ཐོད་ཁྲག་འཛིན༔ ལྷག་མ་གཡས་གཉིས་རྡོ་རྗེ་རལ་གྲི་དང་༔ གཡོན་པས་འཁོར་ལོ་ཆུ་སྐྱེས་བསྣམས་ནས་རྔམ༔ ཞབས་གཉིས་ཕྱེད་ཀྲུང་རང་འོད་ཡུམ་དང་འཁྲིལ༔ སྟག་ཤམ་རུས་རྒྱན་སྦྲུལ་དང་ཐོད་པས་ཐོད༔ ནམ་མཁའི་དབྱིངས་ནས་ཕཻཾ་དང་ཀ་ར་སྒྲོགས༔ ཐུགས་ལྔའི་རང་འོད་འབྱུང་ལྔའི་ས་བོན་ནི༔ ཨེ་ཡཾ་ར་སུཾ་རཾ་དང་ཀཾ་འཕྲོས་པས༔ ཨེ་ལས་ནམ་མཁའ་མཐིང་ནག་གཟུགས་བྲལ་དབྱིངས༔ ཡཾཿལས་རླུང་དཀྱིལ་ལྗང་གུ་གཞུ་ཡི་དབྱིབས༔ རཿལས་རཀྟའི་རྒྱ་མཚོ་གྲུ་གསུམ་དམར༔ སུཾཿལས་ཞིང་ཆེན་ས་གཞི་ཟླ་གམ་སེར༔ ཀཾཿལས་རུས་པའི་རི་རབ་གྲུ་བཞི་དཀར༔ རཾཿལས་རྡོ་རྗེའི་མེ་ཡི་རྭ་བའི་དཀྱིལ༔ དབྱངས་ཅན་བཻཾ་ཏ་ཡུམ་ལྔའི་མཁའ་དབྱིངས་སུ༔ ཏྲི་ཤུལ་ལ་སོགས་མཚོན་ཆའི་རྭ་བའི་དབུས༔ གཏུམ་དྲག་ལ་སོགས་དུར་ཁྲོད་རྣམ་བརྒྱད་དུ༔ ཤིརྵ་ལ་སོགས་ཤིང་བརྒྱད་རྩ་བ་རུ༔ བརྒྱ་བྱིན་ལ་སོགས་ཕྱོགས་སྐྱོང་ཆེན་པོ་བརྒྱད༔ ཤིང་རྩེར་རྫུ་འཕྲུལ་ཆེ་སོགས་ཞིང་སྐྱོངས་བརྒྱད༔ ཤིང་གི་གཡས་སུ་ཐུགས་རྗེའི་ཆུ་བོ་བརྒྱད༔ དེ་ལ་ནོར་རྒྱས་ལ་སོགས་ཀླུ་བརྒྱད་གནས༔ གཡོན་ཕྱོགས་མ་ལ་ཡ་སོགས་རི་བརྒྱད་ཀྱི༔ གཤམ་དུ་མེ་བརྒྱད་རྐེད་པར་རིག་འཛིན་བརྒྱད༔ རྩེ་མོར་བྱང་ཆུབ་ཆེན་པོའི་མཆོད་རྟེན་བརྒྱད༔ མཁའ་ལ་སྒྲོགས་ལྡན་ལ་སོགས་སྤྲིན་བརྒྱད་དེ༔ གཞན་ཡང་ཀེང་རུས་ཕྱེད་ཚལ་རོ་ལངས་དང་༔ བམ་རིལ་གསར་རྙིང་ར་རི་གྲམ་ཁྲོད་བརྡལ༔ གནོད་སྦྱིན་སྲིན་པོ་ཤ་ཟ་ཡི་དྭགས་དང་༔ འབྱུང་པོ་སྟག་གཟིགས་ཁྱི་སྤྱང་བྱ་རོག་རྒོད༔ ཁྭ་ཏ་འུག་པ་དུར་བྱ་ཀང་ཀ་ཡིས༔ ཅ་ཅོ་སྒྲོགས་ལྡན་རབ་ཏུ་འཇིགས་པའི་དབུས༔ གཞལ་ཡས་ས་བོན་འཁོར་ལོ་བྷྲུཾ་མཚན་ཅན༔ ཡོངས་གྱུར་གཏི་མུག་གཤིན་རྗེ་སྐུ་མདོག་ནག༔ འཁོར་ལོའི་ཐུགས་བསྣོལ་རང་འདྲེའི་ཡུམ་ལ་འཁྱུད༔ བདེ་སྟོང་དབྱེར་མེད་རྗེས་ཆགས་འཇུ་འདུལ་ལས༔ སྐད་ཅིག་ཡོངས་གྱུར་དྲག་པོའི་གཞལ་ཡས་ཁང་༔ ཕྱི་ནང་ཐབས་དང་ཤེས་རབ་མཚོན་པའི་བརྡར༔ ནང་དུ་ཐོད་པ་སྐམ་རློན་རྙིད་གསུམ་དང་༔ ༼ འགའ་ཞིག་ལས་ཕྱི་རིན་ཆེན་ནང་ཐོད་མཁར་དུ་གསུངས་ཀྱང་འདིར་ནི་རྒྱུད་སྒྱུ་འཕྲུལ་རྒྱས་པ་ལྟར། ༽ ཕྱི་རིམ་ཐོད་རློན་རྩིག་པ་རིམ་པ་ལྔ༔ ཁ་ནས་མེ་འབར་མིག་ནས་ཁྲག་ཆར་འབེབས༔ སྣ་ནས་དུད་འཐུལ་རཀྟའི་སྤྱིན་ཐབས་སྦྱར༔ གནམ་ལྕགས་གཟེར་གདབས་རྩིག་གསེང་ཁྲོ་ཆུང་དང་༔ སྣ་ཚོགས་མཚོན་ཆ་འབར་བའི་རྩེ་རྣོན་གཟེངས༔ རྩིག་སྟེང་ཐོད་པ་སྣ་ཚོགས་ཕ་གུ་བསྒྲིགས༔ སྦྲུལ་ཆེན་མགུལ་འཁོར་དཀར་ནག་ཁྲ་བོའི་སྟེང་༔ སྒལ་ཚིག་ཀ་ཐུང་རྩིབ་ཆེན་གདུང་ལེབ་བརྟེན༔ ནང་དུ་ལྷ་བརྒྱད་ཀ་བ་ཀླུ་བརྒྱད་གདུང་༔ གཟའ་བརྒྱད་ཀ་གཞུ་སྡེ་བརྒྱད་ཀ་བའི་གདན༔ ལྷ་ཕྲན་ཕྱམ་དང་རྒྱུ་སྐར་གྲལ་ཟིབ་བྱས༔ ཕྱམ་སྣེར་ཆུ་སྲིན་ཁ་ནས་སྦྲུལ་ཆུན་སྐྱུགས༔ དེ་ཉིད་ལ་བརྒྱུས་ཐོད་ཕྲེང་དྲྭ་བ་ཕྱེད༔ ཙིཏྟའི་ཕོ་ལོང་རོ་ཡི་སྐྲའི་རྔ་ཡབ༔ མུན་པར་ཉི་ཟླའི་སྒྲོན་མེའི་འོད་ཟེར་འབར༔ ཕྱ་འདབས་ལས་འཕྱང་རྐང་ལག་ཤར་བུ་བསྒྲིགས༔ མཆོག་ཕྲན་སྤང་ལེབ་མཆོག་ཆེན་ཐོག་སར་བཀྲམ༔ རཱུ་ཏྲའི་ལྷུ་ཆེན་དཱ་རི་ཀ་ཡི་སྟེང་༔ བྲང་གི་པུ་ཤུ་ཁ་ཁྱེར་མུ་རན་ལ༔ མི་ནུབ་རྒྱལ་མཚན་བཅུ་ཡི་རབ་ཏུ་རྔམ༔ སླག་ཆེན་བླ་བྲེ་རུ་ཏྲའི་ཞིང་གི་སྟེང་༔ རྡོ་རྗེ་ཏྲི་ཤུལ་འབར་བའི་ཏོག་གིས་གཟིར༔ རྒྱུ་ཞགས་རློན་པའི་རྟ་བབས་མཆོད་རྟེན་སྦྲེལ༔ གློ་མཚེར་མཁལ་སྙིང་མཆིན་པའི་རྒྱན་གྱིས་སྤུད༔ སྒོ་བཞི་རུས་སྦལ་མ་ཐེམ་ཆུ་སྲིན་གྱི༔ ཡ་ཐེམ་སྦྲུལ་ནག་སྐྱེས་བུའི་བམ་སྨུག་འདེགས༔ ཞིང་གི་སྒོ་གླེགས་སྟེང་དུ་རྟ་བབས་ནི༔ སོ་དང་སོར་མཛུབ་གསོན་མས་མི་མགོ་དང་༔ མཆོག་དབང་བཅུ་གཅིག་རྡོ་རྗེའི་གསང་མ་ལ༔ ཉི་ཟླ་ནོར་བུ་སྒྲོན་གསུམ་འོད་ཟེར་འགྱེད༔ མིག་དང་རྣ་བ་སྣ་ལྕེ་སྙིང་དབང་པོ༔ ཆུ་སྲིན་སེང་གེ་ཁྱུང་མགོ་རིམ་པར་དཀྲིགས༔ ཚར་ནོན་འཁོར་ལོའི་རྩིབས་ཀྱི་ཤར་བུ་ཅན༔ ཐོག་ཕུབ་གཤིན་རྗེའི་ཐོད་པ་ཁ་སྦུབ་སྟེང་༔ ཆོས་འཁོར་གདུགས་ཏོག་རཀྴའི་རོ་བརྒྱང་བ༔ གཡས་གཡོན་ཆུ་སྲིན་ཕྲུ་གུའི་ཆོས་སྒྲ་ཉན༔ འདོད་སྣམ་མཆོད་པའི་ལྷ་མོའི་གར་བསྐོར་སྒེག༔ གྲྭ་བཞིར་ཟླ་ཕྱེད་རྡོ་རྗེའི་མཚན་པས་སྤྲས༔ ཕྱི་ནང་གསེར་དང་ཁྲག་ཁྱམས་རིམ་པ་གཉིས༔ མཐའ་བསྐོར་ལྕགས་མཁར་ཚ་བསྲེགས་དྲུག་ཅུ་དང་༔ འཁོར་ས་འོབ་ཆེན་བཅུ་གཉིས་ལ་སོགས་པ༔ རང་གི་ཁམས་དང་བྱེད་པ་དང་མཐུན་ཅིང་༔ གདུལ་བྱ་དང་ནི་འདུལ་བར་བྱེད་པའི་ཚུལ༔ གང་ལ་གང་ཞིག་བསྔགས་པ་དེར་སྣང་ཞིང་༔ རྒྱ་ཁྱོན་ཚད་མེད་རྫོགས་པ་ཉིད་ཀྱིས་གསལ༔ བྷྲཱུྃ་བྷ་ཡ་ན་ཀ༔ ཀ་པཱ་ལ་ཨ་མ་ཏྲཾ་ཤ་མ་ཤ་ན་ཨ་ལངྐ་རིཥྞ་སྭཱ་ཧཱ༔ ཧཱུྃ༔ རང་སྔགས་སྙིང་པོ་ལས་ཀྱི་གཞི༔ བྱིན་རླབས་ཆོ་འཕྲུལ་འབྱུང་བ་ནི༔ འཁོར་ལོ་རྩིབས་བཞིའི་ལྟེ་བ་རུ༔ ཨཿམཿཔཾཿདང་ཧ་སྤྲོས་པས༔ མ་ཧེ་བརྒྱད་ཀྱིས་བཏེགས་པའི་ཁྲིར༔ གསལ་བྱེད་སྙིང་པོ་བསིལ་བྱེད་དང་༔ ཆུ་གླང་གཤིན་རྗེ་བརྫིས་པའི་སྟེང་༔ བདག་ཉིད་རྒྱུ་ཡི་ཧེ་རུ་ཀ༔ ཡབ་ཡུམ་དབུས་ཀྱི་གདན་ལ་བབས༔ མཉམ་སྦྱོར་འཁོར་འདས་མཁར་སྡུད་ཅིང་༔ གཉིས་མེད་ཆེ་བའི་ང་རྒྱལ་བསྐྱེད༔ འཇམ་དཔལ་མཁའ་ལས་བྱུང་བ་ཡི༔ ལྷ་ཚོགས་ཡོངས་རྫོགས་མངལ་འབྱིན་ནས༔ གཙོ་འཁོར་སོ་སོའི་གདན་ལ་བཀོད༔ གཞན་གྱི་སྲས་སུ་བདག་བྱ་བ་ལ་བརྒྱད༔ གཙོ་ཆེན་བདེ་སྟོང་ངོ་བོར་ཞུ༔ ཐུགས་སྲོག་ཧཱུྃ་མཚན་ཐོད་དབྱུག་ལས༔ ཡོངས་གྱུར་འབྲས་བུའི་ཧེ་རུ་ཀ༔ གཤིན་རྗེའི་གཤེད་པོ་བགེགས་ཀྱི་རྒྱལ༔ མཐིང་ནག་དུག་ཆེན་ཧ་ལའི་མདོག༔ ༼ མགྲིན་པ་གསུམ་ཡོད་པ་ཡིན། ༽ ཞལ་གསུམ་ཕྱག་དྲུག་ཞབས་བཞི་བསྒྲད༔ གཡས་ཞལ་དཀར་པོ་ཞི་ཞིང་སྒེག༔ རྩ་ཞལ་འཇིགས་རུང་མ་ཧེའི་གདོང་༔ ༼ རྭའི་ནང་ན་དབུ་རྒྱན་ཡོད། ༽ གླང་རྭ་སྔོན་པོ་གནམ་དུ་གཟེངས༔ གཡོན་ཞལ་དམར་པོ་དཔའ་གཏུམ་རྔམ༔ སྤྱན་དགུའི་སྡང་མིག་ཕྱོགས་བཅུར་གཟིར༔ སྤྱན་རྩ་དམར་པོ་གློག་སྟོང་འཁྱུགས༔ སྨྲ་ར་སྨིན་མ་མེ་ཞགས་འཕྲོ༔ བཅུ་གཉིས་མཆེ་བ་རབ་ཏུ་གཙིགས༔ ཤངས་ནས་ཡེ་ཤེས་འཐོར་རླུང་འཚུབས༔ ཞལ་ནས་ཧཱུྃ་དང་ཕེམ་ཀ་ར༔ འབྲུག་སྟོང་དུས་གཅིག་ལྡིར་བ་ལྟས༔ དགོད་དང་གཤེ་དང་དྲག་ཤུལ་ལྡན༔ ཚེམས་ཕྲེང་བཞི་བཅུའི་ཟླ་ཚེས་ལ༔ དམར་ནག་རཀྟའི་འདམ་གྱི་བསྒོས༔ ཚེམས་གསེང་ཤ་རུས་དུམ་བུར་འཁྲིགས༔ གཡས་ཀྱི་ཕྱག་གསུམ་རིམ་པ་བཞིན༔ བེ་ཅོན་རལ་གྲི་དགྲ་སྟྭ་ལ༔ གཡོན་གསུམ་སྡིགས་མཛུབ་མདུང་རིང་དང་༔ འཁོར་འདས་དབང་བསྒྱུར་ཐོད་ཁྲག་བསྣམས༔ རྡོ་རྗེ་རིན་ཆེན་གཤོག་པ་གདེངས༔ སྐུ་གསུམ་སྐུ་གསུང་ཐུགས་ཡོན་ཏན༔ ཕྲིན་ལས་རང་བཞིན་ལྷུན་གྲུབ་པའི་༔ ཐོད་སྐམ་བཅོ་ལྔས་དབུ་བརྒྱན་ཅིང་༔ དེ་ལ་རིན་ཆེན་ཟེ་སྲོག་བཙུགས༔ ནང་ན་རྒྱལ་བ་རིགས་ལྔ་བཞུགས༔ ཁྲག་འཛག་ལྔ་བཅུའི་དོ་ཤལ་གསོལ༔ སྐམ་གཤེར་སྤེལ་མའི་མགུལ་ཆུན་དང་༔ ཐུགས་ཀར་སླེབ་པའི་སེ་མོ་དོ༔ དབུ་སྐྲ་རལ་པའི་ཐོར་གཙུག་ལྔ༔ མཐའ་ཡས་སྔོན་པོའི་སྐྲ་ཆིངས་བྱས༔ འཇོག་པོ་དམར་པོའི་རྣ་ཆ་བྱས༔ རིགས་ལྡན་ཁྲ་བོའི་དཔུང་བ་བརྒྱན༔ དུང་སྐྱོང་སེར་པོའི་ཕྱག་གདུབ་མཛེས༔ པདྨ་དཀར་པོའི་མགུལ་རྒྱན་གསལ༔ སྟོབས་རྒྱུ་ལྗང་གུའི་མཆོད་བྱུར་ཏོག༔ ནོར་རྒྱས་བདུད་རྩིའི་སྐེད་རགས་བཅིངས༔ པདྨ་ཆེན་པོའི་ཕྱག་ཞབས་གདུབ༔ དུག་སྦྲུལ་གསོན་མའི་རྒྱན་བརྒྱད་པོའི༔ ཁ་ནས་ཕུད་སྒྲའི་རྒྱང་གྲགས་འགེངས༔ ལྕེ་གཉིས་བ་དན་དགུང་ལ་གཡུག༔ ཁ་རླངས་དུག་གི་བུ་ཡུག་འཚུབས༔ སྐུ་སྟོད་གླང་ཆེན་གོ་རློན་གཡོགས༔ རྐེད་པར་ཞིང་ཆེན་གཡང་གཞི་གསོལ༔ སྟག་གི་ལྤགས་པའི་ཤམ་ཐབས་གྲོལ༔ དཔྲལ་བར་ཐལ་ཆེན་ཚོམ་བུ་དང་༔ མཁུར་ཚོས་རཀྟའི་ཐིག་ལེ་རྔམ༔ ཞལ་ལ་ཞག་གི་ཟོ་རིས་བྱུག༔ དཔལ་གྱི་ཆས་བཅུ་ལྷུན་གྱིས་གྲུབ༔ སྐུ་ལ་བསྐལ་བའི་མེ་ཆེན་འབར༔ སྤྱི་བོར་མགྲིན་པ་སྙིང་ཀ་དང་༔ ལྟེ་བ་གསང་གནས་རིམ་པ་བཞིན༔ འཇམ་དཔལ་ཞི་བ་རྟ་མགྲིན་རྒྱལ༔ ཡང་དག་ཆེ་མཆོག་བདུད་རྩི་འཁྱིལ༔ དཔལ་ཆེན་བཛྲ་ཀུ་མ་ར༔ ཕྱག་གཡས་རལ་གྲི་དབྱུག་ཏོ་དང་༔ རྡོ་རྗེ་བྱ་ཁྱུང་ཕུར་བུ་བསྣམས༔ གཡོན་རྣམས་སྡིགས་མཇུབ་ཕྱོགས་བཅུར་གཟིར༔ ཞབས་བཞིའི་འཆི་བདུད་སྟེང་ན་འགྱིངས༔ དབྱངས་ཅན་རབ་འཁྲོས་བཻ་ཏཱ་ལི༔ ནག་མོ་གཏུམ་ཆེན་འབར་བའི་ཉམས༔ ཁྲོ་གཉེར་ཆུ་བོའི་རླབས་བཞིན་འཁྲུགས༔ སྐུ་གསུམ་རྫོགས་པའི་སྤྱན་གསུམ་ལྡན༔ དབུ་སྐྲ་ཁམ་ནག་རབ་ཏུ་འཚེར༔ ཟ་བྱེད་རྔམ་ཞིང་རོལ་པའི་སྟབས༔ ཞལ་གདེངས་ལྗགས་འགྲིལ་མཆེ་བ་གཙིགས༔ འགེམས་བྱེད་དགྲ་སྟྭ་འབར་བ་གཡས༔ གཡོན་པས་བྷན་དྷ་ཁྲག་བཀང་བ༔ ཡབ་ཀྱི་ཞལ་དུ་སྟོབས་པར་བྱེད༔ ནུ་མ་འབུར་ཞིང་པདྨོ་རྒྱས༔ ཞབས་གཡོན་ཡབ་ཀྱི་རྐེད་ལ་འཁྲིལ༔ གཡས་པས་འཁོར་བའི་སྒོ་འཕར་གནོན༔ གཟིག་ཤམ་རུས་རྒྱན་གཡང་གཞི་གསོལ༔ མེ་དཔུང་འབར་བའི་དབུས་ན་རོལ༔ གཡོན་ཏུ་སྒྲོལ་ཡུམ་ཨེ་ཀ་ཛ༔ མཐིང་ནག་ཞལ་གཅིག་ཕྱག་གཉིས་པ༔ གཡུ་ཡི་རལ་བ་གཙུག་ཏུ་འཁྱིལ༔ གཡས་ཕྱག་ཏྲི་ཤུལ་འབར་བ་ལ༔ ཞིང་ཆེན་གཡང་གཞིའི་རུ་མཚོན་ཅན༔ གཡོན་པས་གཡུ་སྤྱང་ཁྲ་ཐབས་འགྱེད༔ ཁྲོ་གཉེར་དུག་ ༼ དྲུག་ ༽གི་རླབས་ཕྲེང་འཁྲུགས༔ གཡང་གཞི་རློན་པའི་ནབ་བཟའ་ཀླུབས༔ ཕྱག་རྒྱ་ལྔ་ཡིས་སྐུ་ལ་བརྒྱན༔ ཡབ་ཀྱི་རྟོག་པ་ཡི་གེར་གྱུར༔ ཧི་ཧིའི་གད་མོའི་གླུས་བསྐུལ་ཞིང་༔ རིན་ཆེན་པདྨོ་རྒྱས་པར་མཛད༔ འཁོར་གྱི་ལྷ་ཚོགས་ཐམས་ཅད་ཀུན༔ འོད་ཞུ་གཙོ་བོའི་ཐུགས་སུ་གྱུར༔ ཡབ་ཡུམ་ཐབས་ཤེས་མཉམ་སྦྱོར་བའི༔ བདེ་བ་ཆེན་པོའི་འོད་ཟེར་གྱིས༔ ཆོས་འབྱུང་ཀློང་དུ་རྟེན་བརྟེན་པའི༔ དཀྱིལ་འཁོར་འཁོར་ལོ་ཡོངས་རྫོགས་ཤར༔ ཡཿཀྵེ་མ་མེ་ད་ཡཙྪ་ནི་རཱ་ཛ་ས་དོ་རུ༔ ཡི་གེའི་རྣམ་པའི་ཆོ་འཕྲུལ་གྱིས༔ ཕྱིར་བྱོན་རང་རང་གདན་ལ་བཀོད༔ གཙོ་བོ་འབྲས་བུ་ཧེ་རུར་ཐིམ༔ ཕྱོགས་བཞི་འཁོར་ལོའི་རྩིབས་སྟེང་དུ༔ མཐིང་ནག་ཧཱུྃ་གི་ཡི་གེ་འཕྲོས༔ ཉི་ཟླ་པདྨའི་ལྟེ་བ་རུ༔ གདུག་པ་སྦྲུལ་མགོའི་བམ་གྱི་སྟེང་༔ ཐུགས་སྲས་ཡ་མ་རཱ་ཛ་ནི༔ ཞལ་གསུམ་ཕྱག་དྲུག་ཞབས་བཞི་བསྒྲད༔ མཐིང་དཀར་དམར་བའི་ཞལ་གསུམ་པ༔ སྐུ་མདོག་དབྱར་ཁའི་ཆར་སྤྲིན་འདྲ༔ གཡས་གསུམ་འཁོར་ལོ་རལ་གྲི་དང་༔ དྲེགས་ཚོགས་འགུགས་པའི་ལྕགས་ཀྱུ་བསྣམ༔ གཡོན་གསུམ་ཁ་ཊྭཱཾ་དགྲ་སྟྭ་ཞགས༔ སྦྱོར་ཡུམ་གཡུ་ཡི་རལ་གཅིག་མ༔ གཡས་པས་ཁ་ཊྭཱཾ་གཡོན་དུང་དམར༔ སྒྲོལ་ཡུམ་ནག་མོ་རེ་མ་ཏི༔ རལ་གྲི་ནེའུ་ལེའི་རྐྱལ་བ་བསྣམས༔ ལྷོ་རུ་པདྨ་ཟླ་ཉི་དང་༔ ང་རྒྱལ་སེང་མགོའི་ཏི་རའི་སྟེང་༔ ཡོན་ཏན་སྲས་མཆོག་མྱོས་བྱེད་འབར༔ སེར་ནག་ཞལ་གསུམ་ཕྱག་དྲུག་པ༔ གཡས་དཀར་གཡོན་དམར་དབུས་ཞལ་སེར༔ བེ་ཅོན་རལ་གྲི་དགྲ་སྟྭ་གཡས༔ ཐོད་ཁྲག་ཚར་རྣོན་རྒྱུ་ཞགས་གཡོན༔ གཏུམ་མོ་གྲི་ཐོད་འཛིན་པས་འཁྱུད༔ སྒྲོལ་ཡུམ་སེར་ནག་ཁྲག་གི་བདག༔ གཡས་ན་སྙིང་དང་གཡོན་ཞགས་པ༔ ནུབ་ཏུ་པདྨ་ཉི་ཟླའི་སྟེང་༔ དྷརྨ་སྤྲེལ་མགོའི་གདན་སྟེངས་སུ༔ གསུང་སྲས་འཕགས་པ་མ་རུ་རྩེ༔ དམར་ནག་ཞལ་གསུམ་ཕྱག་དྲུག་པ༔ གཡས་དཀར་གཡོན་སྔོ་དབུས་དམར་ནག༔ བེ་ཅོན་དབྱུག་ཏོ་ཁ་ཊྭཱཾ་གཡས༔ བྷན་དམར་འཁོར་ལོ་རྒྱུ་ཞགས་གཡོན༔ སྦྱོར་བའི་ཡུམ་མཆོག་འོད་ཟེར་ཅན༔ གཡས་པས་གཙོ་འཁྱུད་གཡོན་དུང་དམར༔ སྒྲོལ་ཡུམ་གླིང་བཞི་གཙུག་འབྱམས་དམར༔ མི་སྙིང་གཡས་ལ་ཐོད་ཁྲག་གཡོན༔ བྱང་དུ་པདྨ་ཉི་ཟླའི་སྟེང་༔ ཡཀྴ་ཕག་མགོའི་ཏི་རའི་སྟེང་༔ ཕྲིན་ལས་རལ་བ་ཚར་དགུ་ནི༔ ལྗང་ནག་ཞལ་གསུམ་ཕྱག་དྲུག་པ༔ གཡས་དཀར་གཡོན་དམར་དབུས་ཞལ་ལྗང་༔ བེ་ཅོན་གཏུན་ཤིང་རྒྱ་གྲམ་གཡས༔ འཁོར་ལོ་དམར་གྱི་དུང་ཆེན་དང་༔ བ་སུ་ཏ་ཡི་ཞགས་པ་གཡོན༔ སྦྱོར་བའི་ཡུམ་མཆོག་རེ་མ་ཏི༔ གཡས་པས་རལ་གྲི་གཡོན་ཐོད་ཁྲག༔ སྒྲོལ་ཡུམ་ལྗང་ནག་མགོ་འཕྱང་མ༔ དགྲ་སྟྭ་ཕྱར་ཞིང་དུང་ཁྲག་སྟོབས༔ དེ་ལྟར་སྲས་མཆོག་ཆེན་པོ་རྣམས༔ ཞབས་བཞིའི་རུ་ཏྲ་ཕོ་མོ་བརྫིས༔ དུར་ཁྲོད་རོལ་བའི་ཆས་ཀྱིས་བརྒྱན༔ གཙོ་ཆེན་ཡབ་ཡུམ་ཇི་བཞིན་པས༔ རྒྱན་དང་ཆ་ལུགས་ཚུལ་ལྡན་རྫོགས༔ ཤིན་ཏུ་བསྡུ་ན༔ གཞན་ཡང་སྤྲུལ་འཁོར་བཀའ་སྡོད་བཅས༔ བདེ་གཤེགས་གཅིག་གི་སོགས་ནས་འགྱུར་བ་མེད་པར་བསྒོམ༔ གནས་གསུམ་བྱིན་རླབས་དང་དབང་བསྐུར་བསྡུས་པ༔ ཨོཾ་ཨཱཿཧཱུྃ༔ ཨོཾ་ཧཱུྃ་ཏྲཾ་ཧྲཱི་ཨཱཿ ཨ་བྷི་ཥིཉྩ༔ དེ་ལྟར་ལྷ་ཚོགས༴ སོགས་ནས་འཇུག །རྒྱས་སྤྲོས། དེ་ཡི་ཕྱི་རིམ་གསེར་ཁྱམས་ལ༔ འཁོར་ལོ་འབར་བ་བཅུ་གཉིས་དང་༔ ཕྱོགས་སྐྱོང་ཕོ་མོའི་གདན་སྟེང་དུ་དཔལ་ཆེན་མཆོག་གི་སྤྲུལ་བ་ནི༔ གདུལ་བྱའི་གཤིན་རྗེའི་ཚུལ་འཛིན་པ༔ སྟེང་གི་ཕྱོགས་ན་གནས་པ་ནི༔ ནག་པོའི་ཚོགས་འཇོམས་མཐིང་ནག་ཞལ༔ གཡས་གཡོན་རིན་ཆེན་དགྲ་སྟྭ་བསྣམས༔ ཞབས་གཉིས་གྱད་ཀྱི་དོར་སྟབས་མཛད༔ ནག་མོ་རལ་གཅིག་གཡོན་ནས་འཁྲིལ༔ ༼ ཁ་ཊྭཱཾ་མཆན། ༽ གཡས་གཡོན་ཡབ་འཁྱུད་དུང་དམར་སྟོབས༔ གཤིན་རྗེ་ཕྱ་སངས་སྐུ་མདོག་དཀར༔ གཡས་གཡོན་ཚེ་བུམ་རྡོ་རྗེའི་གཤོལ༔ གདོང་དགུ་མ་ནི་སྦྱོར་བའི་ཡུམ༔ ཤེལ་གྲི་ཐོགས་ནས་བདེ་སྐྱོང་སྟོབས༔ ཀོང་ཚེ་བྲག་འཇོམས་དཀར་སེར་མདོག༔ རྡོ་རྗེ་བྲག་ནག་མེ་འཁོར་བསྣམས༔ ཤེལ་མིག་ལྕགས་ཀྱུ་བྷན་སྟོབས་འཁྲིལ༔ དཀར་མོ་སྒེག་པའི་ཉམས་ཀྱིས་དགྱེས༔ སྨུག་ནག་གླང་གདོང་ཁ་ཊྭཱཾ་གཡས༔ གཡོན་པའི་ཕྱག་ན་ལྕགས་ཀྱུ་འཛིན༔ མཆེ་གཙིགས་མ་དང་འཁྲིལ་སྦྱོར་རོལ༔ གཡས་གཡོན་སྐར་མདའ་བྷནྡྷ་སྟོབས༔ ཡ་བཱ་ཏི་ནི་སྔོ་ནག་ལས༔ གཡས་གཡོན་རལ་གྲི་ལྕགས་ཀྱུ་འཛིན༔ དྲེད་ཀྱི་ཨབ་ཤམ་ཅན་དང་འཁྲིལ༔ ཁྲམ་ཤིང་གིས་འཁྱུད་དུང་ཞལ་སྟོབས༔ གཤིན་རྗེ་མིག་དམར་སྐུ་མདོག་སྨུག༔ གཡས་གཡོན་རལ་གྲི་དབུགས་བྲལ་དབྱུག༔ དམར་མོ་ཁྲག་གི་རལ་གཅིག་ཡུམ༔ གཡས་པས་གཏུན་ཤིང་གཡོན་དུང་དམར༔ རབ་ཏུ་རྨིག་པ་དུད་ཁའི་མདོག༔ ཐོད་ཕྲེང་དང་ནི་ལྕགས་སྒྲོག་སྡོམ༔ ནག་མོ་པུས་འགྲོ་ཀླུ་ཡི་ཡུམ༔ སྤྲིར་མགོ་གཡས་ལ་དུང་ཞགས་གཡོན༔ འཇིགས་བྱེད་ཏིལ་བ་སྐུ་མདོག་སྔོ༔ སྤུ་གྲི་དང་ནི་དབྱུག་ཏོ་འཛིན༔ སྦྱོར་ཡུམ་སྤྱན་གསུམ་མཆེ་གཙིགས་མ༔ གཡས་པས་ཡབ་འཁྱུད་གཡོན་བྷནྡྷ༔ གཤིན་རྗེ་བདུད་འཇོམས་སྐུ་མདོག་སྨུག༔ དགྲ་སྟྭ་གཡས་ལ་ཐོ་བ་གཡོན༔ སྨུག་ནག་རལ་གཅིག་ཆེན་མོ་ཡུམ༔ བམ་ཆེན་གྱིས་འཁྱུད་དུང་ཕོར་སྟོབས༔ ཆོས་ཀྱི་རྒྱལ་པོ་དཀར་སེར་ལ༔ རྡོ་རྗེ་རྩེ་གསུམ་ཁྲམ་ཤིང་འཛིན༔ སྦྱོར་ཡུམ་རྡོ་རྗེ་རལ་གཅིག་མ༔ ཉི་ཟེར་ཞགས་པ་རུ་དྷི་ར༔ འབར་བ་ཆེན་པོ་སྐུ་མདོག་དམར༔ རྩིས་བྱང་གཡས་ལ་གཏུན་ཤིང་གཡོན༔ དམར་མོ་མགོ་དགུ་འཁྲིལ་སྦྱོར་རོལ༔ ཏྲི་ཤུལ་དང་ནི་དུང་ཁྲག་འཛིན༔ དབྱུག་ཏོ་གཤིན་རྗེ་གཤེད་མཐིང་ནག༔ བམ་དབྱུག་གཡས་ལ་རྩིས་རྡིལ་གཡོན༔ ནག་མོ་ཕག་གི་མགོ་ཅན་མ༔ གཡས་པས་སྦྲུལ་ཞགས་གཡོན་ཁྲག་སྐྱེམས༔ སྒོ་བཞི་སྲུང་བའི་ཕྲ་མེན་གཟུགས༔ དུང་གི་སྒོ་མ་བྱ་རྒོད་མགོ༔ དཀར་འཚེར་རྡོ་རྗེ་ལྕགས་ཀྱུ་འཛིན༔ མཐིང་ནག་འབར་བ་སྟག་གི་མགོ༔ གཡས་གཡོན་དབྱུག་པ་རྒྱ་ཞགས་ཐོགས༔ ལེ་བརྒན་འབར་བ་ཀིངྐའི་ ༼ ཀང་ཀའི་དཔྱད། ༽མགོ༔ མེ་ཡི་པདྨ་ལྕགས་སྒྲོག་འབར༔ བྱང་དུ་ལྕགས་ཀྱི་སྤྱང་གདོང་ལྗང་༔ རྒྱ་གྲམ་ཤེལ་གྱི་དྲིལ་བུ་འཛིན༔ དེ་ལྟར་ལྷ་ཚོགས་ཐམས་ཅད་ཀྱང་༔ ཁྲོ་བོའི་གར་དང་ལྡན་པ་ལ༔ ཞབས་གཉིས་གྱད་ཀྱི་འདོར་སྟབས་བསྒྲད༔ སྐམ་རློན་ཐོད་པའི་དབུ་བརྒྱན་ཕྲེང་༔ ཞལ་རེར་སྤྱན་ནི་གསུམ་གསུམ་ལྡན༔ སྦྲུལ་རིགས་ལྔ་ཡི་སྐུ་ལ་བརྒྱན༔ དུར་ཁྲོད་རོལ་བའི་ཆས་དང་ལྡན༔ འབྲིང་པོ་ལྟར་ན་འདི་ནས་བསྡས་ཏེ༔ གཞན་ཡང་སྤྲུལ་འཁོར་སོགས་ནས་འཇུག་ཀྱང་རུང་༔ ༈ཤིན་ཏུ་སྤྲོ་ན༔ ཕྱི་རིམ་ཁྲག་ཁྱམས་ལ་རྫོགས་པའི༔ ཐོད་མཁར་ཉེར་ལྔའི་ནང་རོལ་དུ༔ སྦྱོར་སྒྲོལ་ཀིང་གི་བཀའ་བསྲུང་བཞི༔ དབུ་ནི་ཀིང་རུས་མཆེ་བ་གཙིགས༔ ཤར་བདུད་དཀར་བོ་དུང་ཁྲབ་ཅན༔ ཕྱག་ན་དུང་གི་རལ་གྲི་བསྣམས༔ ལྷོར་ཀིང་སེར་པོ་གསེར་ཁྲབ་ཅན༔ ཕྱག་ན་གསེར་གྱི་རལ་གྲི་བསྣམས༔ ནུབ་ཀིང་དམར་པོ་བསེ་ཁྲབ་ཅན༔ ཕྱག་ན་བསེ་ཡི་རལ་གྲི་ཅན༔ བྱང་ཀིང་སྔོན་པོ་གཡུ་ཁྲབ་ཅན༔ ཕྱག་ན་གཡུ་ཡི་རལ་གྲི་བསྣམས༔ ཀུན་ཀྱང་དགྲ་བགེགས་བམ་སྟེང་དུ༔ གར་སྟབས་འགྱིང་བག་ཚུལ་གྱིས་རོལ༔ གསོད་པར་བྱེད་པའི་ཕོ་ཉ་བཞི༔ ཕོ་ཉ་དགྲ་བགེགས་སྙིང་འབྱིན་ནི༔ དམར་སྙིང་དང་ནི་མཚེར་བ་འཛིན༔ ཕོ་ཉ་མ་ཧཱ་ཀཱ་ལཱ་ནི༔ དུག་རི་དང་ནི་རླུང་ཞགས་འཛིན༔ ཕོ་ཉ་ཡབ་རྗེ་ནག་པོ་ནི༔ ཕྱག་ན་རྒྱུ་ཞགས་མཁལ་མ་བསྣམས༔ ཕོ་ཉ་སྐུ་མཆོག་ནག་པོ་ནི༔ མགོ་རློན་དང་ནི་གློ་བ་འཛིན༔ ཁྲམ་ཐོགས་བདུད་ཀྱི་ཕོ་ཉ་ནི༔ ཤར་བདུད་རོལ་པོ་རལ་བ་ཅན༔ ཕྱག་ན་བདུད་ཀྱི་ཁྲམ་ཤིང་ནག༔ ཁྲམ་ནག་སྲོག་བདུད་མཆེ་བ་གཙིགས༔ དུད་ཁ་གཡས་ན་ཁྲམ་ཤིང་འཛིན༔ ཟླ་བ་གཡོར་པོ་ཞགས་པ་ཅན༔ བདུད་ཀྱི་ཁྲམ་ཤིང་ཧོམ་རིས་ཅན༔ ཚེ་བདུད་གསེར་གྱི་སྟྭ་རེ་ཅན༔ བདུད་ཀྱི་ཁྲམ་ཤིང་རླུང་རིས་ཅན༔ གཡོན་རྣམས་ཁྲག་སྐྱོག་འབར་བ་བསྣམས༔ ཡུམ་ནི་བདུད་མོ་ནག་མོ་བཞི༔ གཡང་གཞི་གྱོན་ནས་རཀྟ་འཐུང་༔ ཤྭ་ཐོགས་རྩིས་ཀྱི་བདག་པོ་བཞི༔ ཞག་གཅིག་ཞག་གཉིས་ཞག་གསུམ་བཞི༔ སང་ཕོད་ལོ་ཟླ་ཞག་དུས་འཆི༔ ད་ལོ་རྩིས་ལ་འདེབས་བྱེད་པ༔ དཀར་སེར་དམར་དང་མཐིང་ཀའི་མདོག༔ ལག་ན་ཤྭ་དང་རྡེའུ་ཐོགས༔ ནད་གཏོང་ཤན་པ་སྡེ་བཞི་ནི༔ མ་མོ་ཁ་གདེངས་སྐུ་མདོག་ནག༔ ལག་ན་ཐུན་དང་རལ་གྲི་འཛིན༔ ནད་རྐྱལ་བརྡེག་ཅིང་དུག་གི་ཁ་ཕྲུས་འདེབས༔ མྱོས་བྱེད་བཙན་གྱི་ཤན་པ་ནི༔ དམར་པོའི་ལག་ན་ཤན་གྲི་ཐོགས༔ གདོང་དང་ཟུར་ཐུག་རྒྱུགས་འགྱེལ་གཏོང་༔ གླེན་པ་ཀླུ་ཡི་ཤན་པ་ནི༔ སྔོན་པོ་སྦྲུལ་གྱི་ལྤགས་པ་གྱོན༔ སྦྲུལ་ཞགས་བསྣམས་ནས་རེག་དུག་གཏོང་༔ གདུག་རྩུབ་གཟའ་ཡི་ཤན་པ་ནག༔ གཡས་གཡོན་མདུང་དར་སྙིང་ཞགས་བསྡམ༔ ཁ་རླངས་དུག་གི་སྤུ་གྲི་གཏོང་༔ ཟ་བར་བྱེད་པའི་མོན་པ་བཞི༔ དུང་གི་མོན་པ་སེང་གེའི་གདོང་༔ དགྲ་སྟྭ་གདེངས་ཤིང་སྡེར་མོ་གཟེངས༔ ལྕགས་ཀྱིས་མོན་པ་སྟག་གི་མགོ༔ ཕྱག་གཉིས་སྤུ་གྲི་བྷ་ལ་ཧ༔ ཟངས་ཀྱི་མོན་པ་དྲེད་མོང་ཞལ༔ ཕྱག་ན་ཀིང་རུས་གསལ་ཤིང་བསྣམས༔ གསེར་གྱིས་མོན་པ་ཁྱུང་གི་གདོང་༔ ཕུང་ཟོར་གཡས་ལ་དུག་སྡོང་ ༼ དུག་སྦྲུལ་གྱིས་དཀྲིས་པ། མཆན། ༽གཡོན༔ ཡུམ་ནི་མོན་མོ་ནག་མོ་བཞི༔ དུག་གི་མདའ་གཞུའི་ཡབ་ལ་འཁྱུད༔ ཞལ་ནས་དྲག་སྔགས་འབྲུག་ལྟར་ལྡིར༔ མ་འདྲེས་ཡོངས་སུ་རྫོགས་པར་བསྒོམ༔ བསྡུ་ན། ༈ སྦྱོར་སྒྲོལ་གིང་གི་བཀའ་བསྲུང་བཞི༔ གསོད་པར་བྱེད་པའི་ཕོ་ཉ་བཞི༔ བར་ཆད་བྱེད་པའི་བདུད་བཞི་དང་༔ ཁྲམ་ལ་འདེབས་པའི་རྩིས་པ་བཞི༔ སྲོག་ལ་དབང་བྱེད་ཤན་པ་བཞི༔ ཟ་བྱེད་མོན་པ་བཞི་དང་བཅས༔ མ་འདྲེས་ཡོངས་སུ་རྫོགས་པར་བསྒོམ༔ ༈ མཐའ་བསྐོར་ལྕགས་མཁར་དྲུག་ཅུ་ལ༔ ལོ་ཟླ་ཞག་གི་འཆི་བདག་དང་༔ ཕོ་གཤེད་མོ་གཤེད་ཤ་ཟ་ཀིང་༔ འོབ་བསྲུང་བཅུ་དྲུག་སྒོ་བསྲུང་སོགས༔ བདུན་བརྒྱ་ཉི་ཤུའི་འཁོར་བཅས་གསལ༔ ༈ བདེ་གཤེགས་གཅིག་གི་སྒྱུ་འཕྲུལ་གར༔ གང་ལ་གང་འདུལ་ཐབས་ཀྱི་སྒོ༔ འོག་མིན་གནས་སུ་གོ་ཕྱེད་དོན༔ ཇི་ལྟར་སྣང་བ་དེ་བཞིན་དུ༔ གཟུགས་བརྙན་ཏིང་འཛིན་དཀྱིལ་འཁོར་བཀོད༔ སྣང་སྟོང་དབྱེར་མེད་ཆུ་ཟླ་བཞིན༔ ལྷུན་གྲུབ་འགྱུར་བ་མེད་པར་བསྒོམ༔ བྱིན་རླབས་དབང་བསྐུར་རྒྱས་གདབས་པ༔ ཧཱུྃ༔ མ་བཅོས་རང་བྱུང་ཡེ་ཤེས་ལྷ༔ རྟོགས་པ་མངོན་གྱུར་སངས་རྒྱས་སུ༔ རང་དབང་རང་བཞིན་ཉིད་བསྒྱུར་བའི༔ དགོངས་པ་མངོན་པར་མཛད་པའི་ཕྱིར༔ ཨོཾ་སརྦ་ཏ་ཐཱ་ག་ཏ་མནྜ་ལ་ཨ་བྷི་ཥིཉྩ་ས་མ་ཡ་ཛ་ཛ༔ ཨོཾ་ཨཱཿཧཱུྃ༔ རྡོ་རྗེ་རིན་ཆེན་དབང་བསྐུར་དཔལ༔ རིན་ཆེན་ཀུན་བདག་དབང་ཕྱུག་སྟེ༔ འཇིག་རྟེན་དབང་ཕྱུག་ཀུན་གྱི་བདག༔ རྡོ་རྗེ་འཆང་བ་ཀུན་གྱི་རྗེ༔ སངས་རྒྱས་ཀུན་གྱི་ཐུགས་ཆེ་བ༔ སངས་རྒྱས་ཀུན་གྱི་ཐུགས་ལ་གནས༔ སངས་རྒྱས་ཀུན་གྱི་སྐུ་ཆེ་བ༔ སངས་རྒྱས་ཀུན་གྱི་གསུང་ཡང་ཡིན༔ ཨོཾ་སརྦ་ཏ་ཐཱ་ག་ཏ་མ་ཧཱ་ཀ་ཡཱ་ཝཀྐ་ཙིཏྟ་སྭཱ་བྷ་ཝ་ཡ་མནྟ་ཀ་ཨཱཏྨ་ཀོ྅་ཧཾ༔ ཧཱུྃ༔ ཐམས་ཅད་མཁྱེན་པའི་ཡེ་ཤེས་མཚོ༔ མ་རིག་སྒོ་ངའི་སྦུབས་འབྱེད་པ༔ སྲིད་པའི་དྲྭ་བ་འཇོམས་པ་པོ༔ ཉོན་མོངས་མ་ལུས་ཞི་བྱེད་པ༔ འཁོར་བའི་རྒྱ་མཚོའི་ཕ་རོལ་ཕྱིན༔ ཡེ་ཤེས་དབང་བསྐུར་ཅོད་པན་ཅན༔ རྫོགས་པའི་སངས་རྒྱས་རྒྱན་དུ་ཐོགས༔ ཨོཾ་མ་ཧཱ་ཛྙཱ་ན་པཉྩ་བཛྲ་སྭཱ་བྷ་ཝ་ཨཱཏྨ་ཀོ྅་ཧཾ༔ སྡུག་བསྔལ་གསུམ་གྱི་སྡུག་བསྔལ་ཞི༔ གསུམ་སེལ་མཐའ་ཡས་གྲོལ་གསུམ་ཐོབ༔ སྒྲིབ་པ་ཀུན་ལས་ངེས་པར་གྲོལ༔ མཁའ་ལྟར་མཉམ་པ་ཉིད་ལ་གནས༔ ཉོན་མོངས་དྲི་མ་ཀུན་ལས་འདས༔ དུས་གསུམ་དུས་མེད་རྟོགས་པ་པོ༔ སེམས་ཅན་ཀུན་གྱི་ཀླུ་ཆེན་པོ༔ ཡོན་ཏན་ཐོད་ཅན་རྣམས་ཀྱི་ཐོད༔ ༼ ཀིང་རུས་ཀྱི་ཐོད་པ་ན་བརྒྱན་ཡོད་པ་ལ་འཇམ་དཔལ་གཡས་རལ་གྲི་གཡོན་པུ་ཏི་བསྣམས་པ༔ ༽ ༈ དེ་ལྟར་ལྷ་ཚོགས་འཁོར་བཅས་ཀྱི༔ སྤྱི་བོར་ཨོཾ་དང་མགྲིན་པར་ཨཱ༔ ཐུགས་ཀར་ཧཱུྃ་གི་ཡི་གེ་ལས༔ འོད་ཟེར་ཕྱག་རྒྱའི་ལྷ་མོ་བཞིའི༔ རང་བཞིན་དབྱིངས་ན་བཞུགས་པ་ཡི༔ ཡེ་ཤེས་ལྷ་ཚོགས་ཐུགས་དམ་བསྐུལ༔ མཁྱེན་བརྩེ་ནུས་པའི་རྗེས་དགོངས་ནས༔ དབྱིངས་ལས་དགོངས་པ་བསྐྱོད་དེ་གཤེགས༔ ཡེ་ཤེས་ལྷ་ཚོགས་སྤྱན་འདྲེན་པ༔ ཧཱུྃ༔ འཁོར་འདས་མཉམ་ཉིད་དོན་དམ་ཡེ་ཀློང་དུ༔ སངས་རྒྱས་སེམས་ཅན་གཉིས་སྣང་སྤྱོད་ཡུལ་ཀུན༔ ཡིན་དང་གྲུབ་པ་མེད་པའི་བྱང་ཆུབ་སེམས༔ གཤེགས་བཞུད་འབྱོན་པར་སྨོན་པའི་རྣམ་ཐར་སྒོའི༔ ཚུལ་བཞིན་ཞུགས་ལ་དགོངས་རྩལ་སྟོབས་ཞན་པ༔ གློ་བུར་མ་རིག་འཁྲུལ་འཁོར་འདིའི་བྱས་ངོར༔ སྤྲོས་མེད་སྤྲོས་པའི་རྒྱུ་འཕྲུལ་ཅིར་ཡང་བསྒྱུར༔ འཇམ་པའི་ངང་ལས་འཁྲོས་དཔལ་ཧེ་རུ་ཀ༔ ཡབ་ཡུམ་སྲས་དང་གཙོ་འཁོར་སྤྲུལ་བར་བཅས༔ སངས་རྒྱས་བསྟན་པའི་གཉེན་ཏུ་གཤེགས་སུ་གསོལ༔ སྐྱེ་འགྲོ་ཡོངས་ཀྱི་མགོན་པོར་གཤེགས་སུ་གསོལ༔ ལོག་འདྲེན་གདུག་པ་བསྒྲལ་ཕྱིར་གཤེགས་སུ་གསོལ༔ ཨོཾ་ཨ་ཀྲོ་ཏེ་ཀ་ཡ་མནྟ་ཀ་ས་པཱ་རི་ཝ་ར་བཛྲ་ས་མ་ཡཱ་ཛ་ཛ༔ རབ་བརྟན་གནས་པར་བྱ་བའི་རིམ༔ ཧཱུྃ༔ རང་བཞིན་ལྷུན་གྱིས་གྲུབ་པའི་ཕོ་བྲང་ན༔ གཉིས་མེད་ཡེ་ཤེས་དཀྱིལ་འཁོར་ཡངས་བ་ཆེ༔ ལོག་རྟོག་ཐ་དད་མཚན་འཛིན་སྦྱོང་བའི་ཕྱིར༔ ཆུ་ལ་ཆུ་བཞག་ཚུལ་གྱི་རྗེས་ཞུགས་ནས༔ དུར་ཁྲོད་རབ་འཇིགས་དྲག་པོའི་དཀྱིལ་འཁོར་འདིར༔ བདག་ལྟའི་ཡི་དྭགས་སྤྱི་ཆིངས་བསྣོལ་བ་དང་༔ ཆུ་གླང་ཉི་ཟླ་པདྨ་རྔམ་མཛེས་སྟེང་༔ བཅོམ་ལྡན་གཤིན་རྗེའི་གཤེད་པོ་འཁོར་དང་བཅས༔ འདུ་འབྲལ་མེད་པའི་དམ་ཚིག་མཆོག་ཏུ་དགོངས༔ ཡེ་ཡིན་ལྟ་བའི་གདེངས་ཐོག་བརྟུལ་ཞུགས་རོལ༔ ཨོཾ་བཛྲ་ཀ་ལ་རུ་པ་ས་མ་ཡ་ཏིཥྛ་ལྷན༔ ལས་ཀྱི་སེམས་དཔས་ཕྱག་འཚལ་བ༔ ཧཱུྃ༔ གཟོད་ནས་རྣམ་དག་དཀྱིལ་འཁོར་འཁོར་ལོ་ལ༔ རང་གདངས་དཔའ་བར་འགྲོ་བའི་ཏིང་འཛིན་གྱིས༔ རྣལ་འབྱོར་ཆེན་པོའི་ངང་དུ་བརྟན་གྱུར་བར༔ གཉིས་མེད་ཡེ་ཤེས་ནན་ཏན་འདྲེས་པའི་ཆོ༔ འཇིག་རྟེན་སྒོར་བསྟུན་བརྡའ་དང་བརྡའ་ལན་གྱིས༔ མཆོད་འོས་བརྗོད་འོས་ཕྱག་གནས་བླ་མའི་རབ༔ བདེ་ཆེན་ངོ་བོ་འཇིགས་པའི་གར་མཛད་པ༔ སྙིང་རྗེ་འཁྲོས་པའི་དད་ ༼ ངང་དཔྱད། ༽སྒྲོལ་དབྱིངས་ཕྱག་འཚལ༔ ཨོཾ་ཡ་མནྟ་ཀ༔ ཨ་ཏི་པཱུ་ཧོ༔ པྲ་ཏི་ཛ་ཧོ༔ ཐུན་མོང་ཕྱི་ཡི་མཆོད་པ་བཟང་༔ ཧཱུྃ༔ དངོས་སུ་བཤམས་དང་ཡིད་སྤྲུལ་ཏིང་འཛིན་མཐུས༔ སྣང་སྲིད་ཀུན་བཟང་རྒྱན་གྱི་རང་བཞིན་ཅན༔ མཆོད་ཡོན་ཞབས་བསིལ་མེ་ཏོག་བདུག་སྤོས་དང་༔ སྣང་གསལ་དྲི་ཆབ་ཞལ་ཟས་རོལ་མོ་སོགས༔ གཤེད་པོ་ཁྲོ་བོ་དྲག་པོའི་ལྷ་ཚོགས་ལ༔ འགྲོ་ཀུན་ཚོགས་གཉིས་རྫོགས་ཕྱིར་མཆོད་པར་འབུལ༔ དགྱེས་པར་བཞེས་ནས་མཆོག་དང་ཐུན་མོང་གི༔ དངོས་གྲུབ་མ་ལུས་སྩོལ་ཅིག་ཐུགས་རྗེའི་བདག༔ ཨོཾ་ཧྲིཥྚི་ཝིཥྚི་ཏ་ན་ན་ཨརྒྷཾ་སོགས་ནས་རཱུ་པ་ནས་སྤརྴེ་ཨ་ཧཱུྃ༔ ཐུན་མིན་དྲག་པོའི་མཆོད་པ་ནི༔ ཧཱུྃ༔ མ་རུང་མི་སྲུན་གདུག་པའི་འབྱུང་པོ་ཡི༔ ཁྲག་གི་ཡོན་ཆབ་ཆུ་བཞིའི་ཆུ་སེར་བསིལ༔ དབང་པོའི་མེ་ཏོག་ཤ་ཚིལ་བདུག་སྤོས་སྤྲིན༔ ཞུན་ཆེན་མར་མེ་མཁྲིས་པའི་དྲི་ཆབ་དང་༔ ཤ་རུས་ཞལ་ཟས་སླག་ཆེན་ན་བཟའ་སྟེ༔ རང་བྱུང་ནང་གི་ཉེར་སྤྱོད་རྣམ་པ་བདུན༔ རྡོ་རྗེ་སྲིན་པོའི་ལྷ་ལ་མཆོད་པར་འབུལ༔ དུག་གསུམ་གནས་དག་གསང་གསུམ་དངོས་གྲུབ་སྩོལ༔ ཨོཾ་རུ་ཏྲ་ཨནྟར་ཨརྩི་ཏ་བྱེ་ཏརྵ་ཡུ་ཀ་ཧོ༔ སྤྱོད་མཐུན་གྲོལ་བའི་མཆོད་པ་ནི༔ཧཱུྃ༔ མཆོད་པ་ཆེན་པོ་ཞེ་སྡང་ཆེ༔ ཉོན་མོངས་ཀུན་གྱི་དགྲ་ཆེ་བ༔ མཆོད་པ་ཆེན་པོ་གཏི་མུག་ཆེ༔ གཏི་མུག་བློ་སྟེང་གཏི་མུག་སེལ༔ མཆོད་པ་ཆེན་པོ་ཁྲོ་བ་ཆེ༔ ཁྲོ་བ་ཆེན་པོ་དགྲ་ཆེ་བ༔ མཆོད་པ་ཆེན་པོ་ཆགས་པ་ཆེ༔ ཆགས་པ་ཐམས་ཅད་སེལ་བར་བྱེད༔ ཨོཾ་དཱེ་ཥ་མོ་ཧ་རོ་ཥ་ཎ་སཾ་ག་ཛྙཱ་ན་པཉྩ་པཱུ་ཛ་ཧོ༔ གསང་བའི་དབང་སྨིན་མཆོད་པ་ནི༔ ཧཱུྃ༔ ཐབས་དང་ཤེས་རབ་གཉིས་མེད་རོལ་བ་ལས༔ བདེ་བ་ཆེན་པོ་བྱང་ཆུབ་སེམས་ཀྱི་སྤྲིན༔ གསང་ཆེན་རྡོ་རྗེའི་དམ་ཚིག་རྨད་པོ་ཆེ༔ ཉོན་མོངས་དུག་ལྔ་འཇོམས་པའི་བདུད་ཆེན་པོ༔ རྒྱུད་དྲུག་སྡུག་བསྔལ་མ་ལུས་སེལ་བའི་རྩི༔ རིགས་ལྔ་དམ་ཚིག་ལྔ་ཡི་ངོ་བོ་ཉིད༔ ཡེ་ཤེས་ལྔ་རྫོགས་སྐུ་ལྔ་གྲུབ་པའི་རྫས༔ རྩ་བརྒྱུད་བླ་མ་ཡི་དམ་མཁའ་འགྲོའི་དངོས༔ འཇིགས་བྱེད་གཤིན་རྗེའི་གཤེད་པོའི་ལྷ་ཚོགས་ལ༔ མྱོང་གྲོལ་བདུད་རྩི་དམ་རྫས་མཆོད་པར་འབུལ༔ བཞེས་ནས་མཆོག་ཐུན་དངོས་གྲུབ་སྩལ་དུ་གསོལ༔ ཨོཾ་ཨ་དྷི་དེ་ཝ་མཉྫུ་ཤྲི་ཡ་མནྟ་ཀ་ས་པཱ་རི་ཝ་ར་སརྦ་པཉྩ་ཨ་མྲ་ཏ་ལ་ཁ་རཾ་ཁཱ་ཧི༔ མཉམ་པའི་བརྟུལ་ཞུགས་བསྐྱང་བ་ནི༔ ཧཱུྃ༔ གསང་བའི་དབང་གི་དམ་ཚིག་ཆེན་པོ་ནི༔ ཡིན་པ་གསུམ་དང་གྲུབ་པ་བཞི་ལྡན་ཏེ༔ མཉམ་པའི་བརྟུལ་ཞུགས་མཆོག་གིས་བླངས་ཟོས་ན༔ སྐུ་གསུང་ཐུགས་ཀྱི་དངོས་གྲུབ་དབང་གི་མཆོག༔ ཨོཾ་སརྦ་ཏ་ཐཱ་ག་ཏ་ཀ་ཡ་སིདྡྷི་ཨོཾ༔ ཝཀྐ་སིདྡྷི་ཨཱ༔ ཙིཏྟ་སིདྡྷི་ཧཱུྃ༔ བ་ལིང་གཏོར་མའི་འདོད་ཡོན་སྤྲིན༔ ཧཱུྃ༔ ཕུན་ཚོགས་འབྱོར་དགུ་སྤུངས་བའི་གཏོར་མ་ལས༔ འདོད་ཡོན་ལྷ་མོའི་ནམ་མཁའ་དོག་པོར་བྱས༔ ཟིལ་གནོན་དྲག་པོའི་དཀྱིལ་འཁོར་ཐམས་ཅད་ཀྱི༔ སྤྱན་སོགས་ཡུལ་ལ་ཐིམ་པའི་དགྱེས་པ་བསྐྱེད༔ ཨོཾ་མ་ཧཱ་བྷ་ལིངྟ་ཏེ་ཛྭ་བྷ་ལིངྟ་ཀཱ་མཱཾ་ས་ལཀྵིཾ་ཀཱ་ར་དེ་ཝི་སྭཱ་བྷ་ཝ་པཱུ་ཛ་ཁཱ་ཧི༔ བྷནྡྷ་རཀྟའི་མཆོད་པ་ནི༔ ཧཱུྃ༔ བདག་དང་ཁམས་གསུམ་རྒྱུ་དང་མི་རྒྱུ་བའི༔ ཆགས་རྟོག་མཚན་མར་ལྟ་བའི་རཱུ་ཏྲ་ཀུན༔ བསྒྲལ་བའི་རྩ་བརྒྱད་སྟོང་སྦྱར་རཀྟའི་རྒྱུན༔ ཁྲོ་བོའི་རྒྱལ་པོ་འཁོར་དང་བཅས་ལ་མཆོད༔ ཏྲི་དྷ་རུ་རཱ་ག་ཨུརྟ་ར་ཎཾ་རཱུ་དྷི་ར་ཧེ་ལ་ཁཱ་ཧི༔ སྐབས་འདིར་དྲག་པོའི་ཁཱ་ཧི་སྦྱར༔ ཚར་གསུམ་དགོས་པ་དོན་གྱིས་སྦྲེང་༔ ཧཱུྃ༔ དངས་མ་ཚར་གཅིག་བདུད་རྩིའི་རང་བཞིན་ལ༔ ཚར་གཉིས་ཞིང་བཅུའི་དགྲ་བགེགས་ངོ་བོ་ཉིད༔ ཚར་གསུམ་རྣམ་སྨིན་ལྷག་མའི་འཁྲུལ་འཁོར་ལོ༔ གདུལ་དཀའི་དགྲ་བགེགས་བསྒྲལ་འདྲེན་འཕྲིན་ལས་མཛོད༔ ཛཿཧཱུྃ་བཾ་ཧོ༔ ཀ་ལ་རཱུ་པ་བཛྲ་ས་མ་ཡ༔ མ་ཧཱ་མཾ་ས་ལ་ཁཱ་ཧི༔ མ་ཧཱ་རཀྟ་ལ་ཁཱ་ཧི༔ མ་ཧཱ་ཀིང་ནི་རི་ཏི་ལ་ཁཱ་ཧི༔ མ་ཧཱ་ཙིཏྟ་ལ་ཁཱ་ཧི༔ མ་ཧཱ་ཀཉྩ་ལ་ཁཱ་ཧི༔ མ་ཧཱ་པགྩ་ལ་ཁཱ་ཧི༔ མ་ཧཱ་ཙ་ཁུག་ལ་ཁཱ་ཧི༔ མ་ཧཱ་བ་སུ་ཏ་ལ་ཁ་རཾ་ཁཱ་ཧི༔ ཞིང་གྱུར་བསྒྲལ་བའི་མཆོད་པ་ནི༔ ཧཱུྃ༔ བདག་མེད་ལྟ་བ་གྱད་ཀྱི་ཧེ་རུ་ཀས༔ བདག་ལྟ་གཉིས་སུ་འཛིན་པའི་རཱུ་ཏྲ་ཀུན༔ སོར་རྟོགས་ཤེས་རབ་ཡེ་ཤེས་མེ་ཡིས་བསྲེགས༔ སྙིང་རྗེའི་གཞན་དོན་འཁོར་འདས་དུས་གཅིག་བསྒྲལ༔ ཨོཾ་མ་ཧཱ་ཏཱ་ར་པཱུ་ཛ་ཧོ༔ བདེ་བ་ཆེན་པོའི་མཆོད་པ་ཉིད༔ ཧཱུྃ༔ སྐུ་གསུང་ཐུགས་དང་ཡོན་ཏན་ཕྲིན་ལས་ཀྱི༔ རིགས་ཅན་གསང་མཆོག་རིག་མ་གྲངས་མེད་ཀྱིས༔ ཕྱག་རྒྱའི་གར་བསྐོར་སྐུ་ལ་དགྱེས་པར་འཁྲིལ༔ བདེ་སྟོང་མཆོག་གི་མཆོད་པ་བཞེས་སུ་གསོལ༔ ས་མ་ཡ་སྟྭཾ༔ ས་མ་ཡ་ཧོ༔ ཨ་ན་རཱ་གོ་ཧཾ༔ ཨ་ནུ་རཱ་ག་ཡ་མྱེ༔ ཛཿཧཱུྃ་བཾ་ཧོ༔ བྷོ་དྷི་ཙིཏྟ་སྥ་ར་ཎ་ཕཊ༔ སཾ་ཧ་ར་ཎ་ཧཱུྃ༔ ཨོཾ་སརྦ་ཏ་ཐཱ་ག་ཏ་མ་ཧཱ་ཨ་ནུ་རཱ་ག་ཎ་བཛྲ་སྭཱ་བྷཱ་ཨཱཏྨ་ཀོ྅་ཧཾ༔ ཡེ་ཤེས་རོལ་མོའི་གླུའི་བསྟོད་པ༔ ཨྱཻེ་ཨྱཻེ་ཨྱཻེ་ཀྱཻེ༔ འཇམ་དཔལ་མཁའ་ལས་བྱུང་བ་མུན་པའི་མདོག༔ མཚན་མའི་ལུས་ལྔའི་འཇམ་མཛད་ལུས་ཀྱི་མཆོག༔ སྒེག་དཔའ་འཇིགས་རུང་ཆས་བཅུའི་མཚན་དཔེ་འབར༔ མཐོང་བའི་ངོ་མཚར་འཇིགས་པའི་སྐུ་ལ་བསྟོད༔ འཇམ་དཔལ་ཀློང་ལས་བྱིན་གྱི་རླབས་པའི་བརྡའ༔ སྒྲ་ཚིག་རྩོལ་བྱུང་འཇམ་མཛད་ན་དཱའི་ངང་༔ དགོད་གཤེ་དྲག་ཤུལ་གད་རྒྱང་ཧ་ཧི་ཧཱུྃ༔ ཐོས་པས་རྣམ་གྲོལ་ཚངས་པའི་དབྱངས་ལ་བསྟོད༔ འཇམ་དཔལ་ཐིག་ལེ་ཉག་གཅིག་བྱང་ཆུབ་སེམས༔ སེམས་དང་སེམས་བྱུང་འཇམ་པའི་ཡེ་ཤེས་ལྔ༔ སྟོབས་བཅུ་མི་འཇིགས་སྙིང་རྗེ་རྔམ་དང་ཞིའི༔ ཐུགས་རྗེའི་ཐབས་ཚུལ་མཁྱེན་པའི་དབྱིངས་ལ་བསྟོད༔ ཐབས་དང་ཤེས་རབ་གཉིས་མེད་རང་མདངས་ལས༔ ཆགས་ཅན་འདོད་ཆགས་ཆེན་པོས་འདུལ་བའི་ཕྱིར༔ ཡུམ་ཆེན་བཻ་ཏཱ་ལི་དང་རལ་གཅིག་སྟེ༔ སྦྱོར་སྒྲོལ་ཕྲིན་ལས་མཛད་ལ་ཕྱག་འཚལ་བསྟོད༔ གཉིས་མེད་ཐུགས་ལས་སྤྲུལ་པའི་སྲས་མཆོག་ནི༔ ཞེ་སྡང་གཏི་མུག་འདོད་ཆགས་ཕྲག་དོག་གི༔ ཡེ་ཤེས་ཁྲོས་པ་གཤེད་ཆེན་རིགས་བཞི་དང་༔ སྦྱོར་སྒྲོལ་ཕྱག་རྒྱར་བཅས་ལ་ཕྱག་འཚལ་བསྟོད༔ རྫུ་འཕྲུལ་སྟོབས་ལྡན་ཤུགས་ཆེན་ཡིད་ལྟར་མགྱོགས༔ སྲིད་པ་གནས་སྟོང་མི་འགྱུར་སྲ་ཞིང་མཁྲེགས༔ རྡོ་རྗེའི་ཆོས་ལྡན་བྱམས་ཆེན་སྲིན་པོའི་གཟུགས༔ རྒྱལ་བྱེད་དཔའ་རྟགས་ཆས་ཀྱིས་བརྒྱན་ལ་བསྟོད༔ ལག་བརྒྱས་གར་གྱིས་ཚངས་པ་ཟིལ་གནོན་མཛད༔ ཞབས་སེན་ཁྱོན་གྱིས་ཁྱབ་འཇུག་ཁེངས་པ་འཕྲོག༔ རྗེས་ཆགས་ཟོལ་གྱིས་ཚོགས་བདག་གླང་སྣ་འདུལ༔ ཆེ་དགུ་དཔའ་བསྐྱུངས་ ༼ བཀོང་དཔྱད། ༽ མཛད་ལ་ཕྱག་འཚལ་བསྟོད༔ གཤིན་རྗེའི་ཚོགས་དང་བྱི་ན་ཡ་ཀ་དང་༔ གཏུམ་པོ་ཀླུ་དང་སྡེ་བརྒྱད་མ་རུང་བ༔ བདུད་དང་བར་ཆད་ཡི་དྭགས་འབྱུང་པོའི་སྡེ༔ མཐར་བྱེད་དཔའ་བོ་ཆེ་ལ་ཕྱག་འཚལ་བསྟོད༔ ཕོ་རྒྱུད་དྲེགས་པ་མཐའ་དག་སྒྲོལ་བས་འདུལ༔ མོ་རྒྱུད་གཡོན་ཅན་རིགས་ཀུན་སྦྱོར་བས་བསྡུད༔ ཏ་ན་གྷཱ་ཎའི་བརྟུལ་ཞུགས་གསལ་མཛད་པ༔ ང་རྒྱལ་རཱུ་ཏྲའི་གཤེད་པོར་ཕྱག་འཚལ་བསྟོད༔ བཅོམ་ལྡན་སྔོན་གྱི་ཕྱག་རྒྱ་ཅིར་ཡང་སྤྲུལ༔ གཏུམ་ཆེན་རྔམ་འབར་ལས་བྱེད་བཅུ་གཉིས་དང་༔ སྒོ་བཞི་བསྲུངས་མཛད་ཕྲ་མེན་ཆེན་པོ་བཞི༔ ཐབས་མཁས་འགྲོ་འདུལ་མཛད་ལ་ཕྱག་འཚལ་བསྟོད༔ ཕོ་ཉ་ཀིང་བདུད་ཤན་པ་ཁྲམ་བདག་དང་༔ མོན་པ་ལོ་ཟླ་ཞག་གཤེད་འོབ་བསྲུང་སོགས༔ བདུན་བརྒྱ་ཉི་ཤུའི་ཆོ་རོལ་ཡང་སྤྲུལ་འཁོར༔ ངོ་བོ་ཐ་མི་དད་ལ་ཕྱག་འཚལ་བསྟོད༔ ཆ་ལུགས་སྣ་ཚོགས་སྣང་ཐབས་མ་འགགས་ཀྱང་༔ ཀུན་ཁྱབ་བྱང་ཆུབ་ཨེཿདབྱིངས་ཆ་ལུགས་བྲལ༔ འཁོར་འདས་རོ་གཅིག་མཉམ་པ་ཉིད་མཉམ་པའི༔ འཇམ་དཔལ་ཡ་མནྟ་ཀའི་ཀློང་ལ་བསྟོད༔ འཇིགས་བྱེད་སྲིན་པོའི་གད་རྒྱང་གིས༔ དུས་དགྲའི་འོ་དོད་སློང་བྱེད་སྔགས༔ འཛབ་བཟླས་གད་ཆེན་གད་རྒྱང་ནི༔ ཧཱུྃ༔ རང་ཉིད་གཤེད་པོ་ཁྲོ་བོའི་ཐུགས་ཀ་རུ༔ གནམ་ལྕགས་འཁོར་ལོ་རྩིབས་བརྒྱད་ལྟེ་བ་བཅས༔ ལྟེ་བར་ཡེ་ཤེས་སེམས་དཔའ་འཇམ་དཔལ་དབྱངས༔ རྩིབས་ལ་སྐུ་ཡི་སྙིང་པོའི་རིགས་སྔགས་འཁོར༔ འོད་འཕྲོས་འཕགས་མཆོད་དབང་བྱིན་དངོས་གྲུབ་བསྡུས༔ འགྲོ་ཀུན་རགས་པའི་སྒོ་གསུམ་སྡིག་སྒྲིབ་སྦྱངས༔ ཀུན་ཀྱང་ཡ་མཱནྟ་ཀའི་སྐུ་རུ་བྱས༔ ཚུར་འདུས་དམ་ཚིག་དབྱིབས་ཀྱི་སེམས་དཔར་བསྟིམས༔ བསྐྱེད་རིམ་རགས་པའི་རྣལ་འབྱོར་མཐར་ཕྱིན་ནས༔ ལྷ་སྐུ་ཕྱག་རྒྱ་ཆེན་པོ་མངོན་གྱུར་ཅིང་༔ སྤྲུལ་བ་སྐུ་ཡི་གོ་འཕང་ཐོབ་པར་བསམ༔ ཨཱོཾ་ཀ་ལ་རཱུ་པ་ཡཱ་ཧཱུྃ་ཕཊ༔ འདི་ནི་སྐུ་ཡི་སྙིང་པོ་སྟེ༔ གསལ་བརྟན་གྱད་དུ་གྱུར་ན་ཚད༔ ཨཱ༔ ཡེ་ཤེས་སེམས་དཔའ་འཇམ་དཔལ་ཐུགས་ཀ་རུ༔ ཨུཏྤལ་དམར་སེར་འདབ་མ་བརྒྱད་པའི་ལྟེར༔ ཏིང་འཛིན་སེམས་དཔའ་ཐོད་དབྱུག་རྡོ་རྗེའི་མཚན༔ གསུང་གི་སྙིང་པོ་གཟུངས་སྔགས་འབྲུ་བརྒྱད་གསལ༔ བཟླས་པས་རྒྱལ་ཀུན་གསུང་གི་དབང་ཕྱིན་ཐོབ༔ མཐའ་ཀླས་འགྲོ་བའི་ཕྲ་བའི་སྒོ་གསུམ་གྱི༔ སྒྲིབ་བྱང་ཡེ་ཤེས་སེམས་དཔའི་གསུང་དུ་བྱས༔ ཚུར་འདུས་ཆོས་ཀྱི་ཕྱག་རྒྱ་ལ་ཐིམ་པས༔ ནང་ལ་གཞོལ་བའི་རྣལ་འབྱོར་མཐར་ཕྱིན་ནས༔ ལོངས་སྤྱོད་རྫོགས་སྐུའི་སངས་རྒྱས་ཐོབ་པར་བསམ༔ ཨཱོཾ་ཡ་མཱནྟ་ཀ་ཨཱཿཧཱུྃ་ཕཊ༔ འདི་ནི་གསུང་གི་བཟླས་པ་སྟེ༔ ངག་ལ་བདེན་པ་གྲུབ་ན་ཚད༔ཧཱུྃ༔ ཏིང་འཛིན་སེམས་དཔའ་ཐོད་དབྱུག་རྡོ་རྗེའི་མཚན༔ ལྟེ་བར་ཉི་ཟླའི་གའུ་ཁ་སྦྱོར་དབུས༔ མི་ཤིག་ཐིག་ལེའི་ཁོང་སེང་ཡི་གེ་ཧཱུྃ༔ མཐའ་མར་ཐུགས་ཀྱི་སྙིང་པོའི་གསང་སྔགས་ནི༔ འབྲུ་བརྒྱད་བཀླག་ཐབས་འཁོར་བའི་འོད་ཟེར་གྱིས༔ རྒྱལ་ཀུན་ཐུགས་ལ་བདེ་སྟོང་རོལ་མོའི་མཆོད༔ ཤིན་ཏུ་ཕྲ་བའི་སྒོ་གསུམ་སྒྲིབ་པ་སྦྱངས༔ དམ་ཚིག་ཕྱག་རྒྱའི་ཡེ་ཤེས་མངོན་གྱུར་ནས༔ སངས་རྒྱས་ཆོས་ཀྱི་སྐུ་གསུམ་ཐོབ་པར་ཤོག༔ ཨཱོཾ་ཧྲཱིཿཥྚཱི་ཝི་ཀྲི་ཏཱ་ན་ན་ཧཱུྃ་ཕཊ༔ སྤོབས་པའི་གཏེར་བརྒྱད་གྲོལ་ན་ཚད༔ གཞན་ཡང་ངེས་རྫོགས་མ་ཐོབ་ཀྱང་ཿ བསྙེན་བསྒྲུབ་ཚུལ་གྱིས་མོས་བསྒོམས་ལ༔ སྐུ་ཡི་སྙིང་པོའི་བསྙེན་པ་ཙམ༔ གསུང་ནི་ཉེ་བའི་བསྙེན་པ་ཞེས༔ ཐུགས་ཀྱི་སྙིང་པོའི་བསྒྲུབ་པར་འདྲེན༔ འདིར་བསྟན་བསྒྲུབ་པར་ཆེན་པོ་ལ༔ མཆོག་ཐུན་དངོས་གྲུབ་བསྒྲུབ་བསྐུལ་བླང་༔ ཕྱི་དང་ནང་དང་གསང་བ་ཡིས༔ ལས་ཀྱི་རྒྱལ་མཆོག་སྒྲུབ་པ་ནི༔ དཀྱིལ་འཁོར་རྒྱལ་མཆོག་སྒྲུབ་པ་གཅེས༔ གཞན་ཏུ་སྐྱེ་མཆེད་ཐམས་ཅད་ཀུན༔ རྫོགས་རིམ་ལྷ་རུ་སྨིན་མི་སྲིད༔ དེས་ན་བསམ་ཡས་ལྷུན་གྲུབ་སོགས༔ སྤྲོ་བའི་རིམ་པའི་ས་བོན་ཙམ༔ དཀྱིལ་འཁོར་ཡོངས་རྫོགས་རྒྱས་པར་བསྒོམ༔ ཧཱུྃཿ དེ་ལྟར་ལྷ་ཚོགས་གཙོ་འཁོར་ཐམས་ཅད་ཀྱི༔ ཐུགས་ཀར་རང་རང་སྲོག་གི་སྙིང་པོའི་མཐར༔ བསྐྱེད་དང་ལས་དང་མཚན་སྔགས་ཀྱིས་བསྐོར་བའི༔ འཕྲོ་འདུ་འཕྲིན་ལས་གཟེར་གྱིས་རབ་བསྒྱུར་བའི༔ སྣང་སྲིད་གཞིར་བཞེངས་དཀྱིལ་འཁོར་ཆེན་པོར་དག༔ སྔགས་ཀྱི་རང་སྒྲ་འབྲུག་སྟོང་ལྡིར་བ་ལྟར༔ ལྷ་སྔགས་ཆོས་ཉིད་དབྱེར་མེད་རོལ་བར་རྫོགས༔ ཐུགས་ནི་སྒྲིབ་བྲལ་ཡེ་ཤེས་རྡོ་རྗེའི་ངང་༔ ཆོས་ཉིད་སྙིང་པོའི་དེ་ཁོ་ན་རུ་སྨིན༔ སྔགས་ཀྱི་དོན་དམ་མངོན་གྱུར་ངང་ནས་བཟླའ༔ གཙོ་བོ་སྦྱོར་སྒྲོལ་ཡུམ་བཅས་སྔགས༔ ཨོཾ་ཨ་ཀྲོ་ཏེ་ཀ་ཧཱུྃ་ཕཊ༔ ཨཱོཾ་བྷེ་ཏཱ་ལི་རཀྴ་མ་ན་ཧཱུྃ་ཕཊ༔ ཨེ་ཀ་ཛ་ཊི་ཏྲག་རཀྴ་སྙིང་ཁ་རཀ་མོ་རུ་ལུ་རུ་ལུ་བྷྱོ་ཧཱུྃ་ཕཊ༔ སྲས་བཞི་སྦྱོར་སྒྲོལ་ཡུམ་བཅས་སྔགས༔ ཨཱོཾ་ཡ་མ་རཱ་ཛ་ཏི་ཏ་ཐ་ཐོ་ལ་ཡ་ཧཱུྃ་ཕཊ༔ ཨཱོཾ་རག་མོ་རག་མོ་སྙིང་རྩ་ལ་ཤ་ལ་བྷྱོ་ཧཱུྃ་ཕཊ༔ ཨཱོཾ་ཧེ་མ་དེ་བྷྱོ་ཧཱུྃ་ཕཊ༔ ཨོཾ་ཡ་མ་རཱ་ཛ་པྲེ་ཏ་བྷི་ཏྲི་ཏི ༼ བི་དཔྱད། ༽མ་ར་ཏ་ཀ་ཧཱུྃ་ཕཊ༔ ཨཱོཾ་རག་མོ་རག་མོ་ཁྲག་ལ་མུ་ཤམ་བྷྱོ༔ ཨཱོཾ་ཡ་མ་དེ་ཕྱིང་ཧཱུྃ་ཕཊ༔ ཨཱོཾ་ཡ་མ་རཱ་ཛ་པྲེ་ཏེ་ཛ་ལ་ཧཱུྃ་ཕཊ༔ ཨཱོཾ་རག་མོ་རག་མོ་ཏི་ས་མ་མ་མ་བྷྱོ༔ ཨཱོཾ་ནཱ་ག་དེ་བྷྱོ་ཧཱུྃ༔ ཨཱོཾ་ཡ་མ་ར་ཛ་ཀ་ལ་ཀྵེ་པྲེ་ཏོད་ཀ་ཏ་ཧཱུྃ་ཕཊ༔ ཨཱོཾ་རག་མོ་རག་མོ་ཏིང་ཏིང་ཀ་ལ་མ་བྷྱོ༔ ཨོཾ་ཁ་རག་དེ་བྱི་ཧཱུྃ༔ ཕྱོགས་སྐྱོངས་བཅུ་གཉིས་ཀྱི་སྔགས་ནི༔ ཨཱོཾ་ཡ་མ་བཛྲ་ཀྲོ་ཏ་རཀྵ་ཧཱྃ་ཕཊ༔ ཨོཾ་མ་མ་རག་མོ་རུ་ལུ་བྷྱོ༔ ཨཱོཾ་ཡ་མ་ཧྲི་ཏི་ཧཱུྃ་ཕཊ༔ཨཱོཾ་རག་མོ་རཀྴ་རུ་ལུ་བྷྱོ༔ ཨཱོཾ་ཡ་མ་མ་ཧཱ་པ་ཏ་ཧཱུྃ་ཕཊ༔ ཨཱོཾ་མ་མ་ཡག་མོ་རུ་ལུ་བྷྱོ༔ ཨཱོཾ་ཡ་མ་ཧྲི་ཀུ་རུ་ཧཱུྃ་ཕཊ༔ ཨཱོཾ་མ་མ་རཀྵ་ཧྲི་ཏི་སྙིང་རུ་ལུ་བྷྱོ༔ ཨཱོཾ་ཡ་མ་ཡ་བ་ཏི་ཧཱུྃ་ཕཊ༔ ཨཱོཾ་མ་མ་རཀྵ་མ་ཧེ་རུ་ལུ་བྷྱོ༔ ཨཱོཾ་ཡ་མ་ཨརྱ་ད་ར་ཧཱུྃ༔ཕཊ༔ ཨཱོཾ་རག་མོ་སྟ་ན་རུ་ལུ་བྷྱོ༔ ཨཱོཾ་ཡ་མ་རཀྵ་ཙ་ལི་ཧཱུྃ་ཕཊ༔ ཨཱོཾ་མ་མ་ན་ག་རུ་ལུ་བྷྱོ༔ ཨོ་ཡ་མ་སརྦ་པ་ཏ་ཧཱུྃ་ཕཊ༔ ཨཱོཾ་བ་ཡ་དྷེ་བ་རུ་ལུ་བྷྱོ༔ ཨཱོཾ་ཡ་མ་ཨ་སྨྲི་ར་ར་མ་ཧཱུྃ་ཕཊ༔ ཨཱོཾ་ཡག་མོ་ཡག་མོ་རུ་ལུ་བྷྱོ༔ ཨཱོཾ་ཡ་མ་ད་ན་རི་ཙ་ཧཱུྃ་ཕཊ༔ ཨཱོཾ་མ་མ་བཛྲ་ཨེ་ཀ་རུ་ལུ་ཧཱུྃ༔ ཨཱོཾ་ཡ་བ་དེ་བ་རཾ་ཧཱུྃ་ཕཊ༔ ཨཱོཾ་ཨེ་ཀ་རག་མོ་རུ་ལུ་བྷྱོ༔ ཨོཾ་ཡ་མ་ཧྲི་ཏི་བཾ་ཧཱུྃ་ཕཊ༔ ཨོཾ་ཀ་ལི་རག་མོ་རུ་ལུ་བྷྱོ༔ སྒོ་བཞིའི་སྔགས་ནི༔ ཨཱོཾ་ཡ་མ་ཨཾ་ཀུ་ཤ་ཛ༔ ཨོཾ་ཡ་མ་པ་ཤ་ཧཱུྃ༔ ཨོཾ་ཡ་མ་སྥོ་ཊ་བཾ༔ ཨཱོཾ་ཡ་མ་གྷནྡྷེ་ ༼ གྷནྜེ་ ༽ཧོ༔ ཞེས་དང་ཡང་ན་དཀྱིལ་འཁོར་སྤྱི་དྲིལ་གྱི༔ རབ་ཏུ་གསང་བའི་སྙིང་པོ་ནི༔ ཨཱོཾ་ཡ་མ་རཱ་ཛཱ་ས་དོ་མེ་ཡ༔ ཡ་མེ་དོ་རུ་ཎ་ཡོ་ད་ཡ༔ ཡ་ད་ཡོ་ནི་ར་ཡ་ཀྵེ་ཡ༔ ཡ་ཀྵེ་ཡཙྪ་ནི་རཱ་མ་ཡ་ཧཱུྃ་ཧཱུྃ་ཕཊ་ཕཊཿསྭཱ་ཧཱ༔ བསྡུ་ན་འདིས་ཀྱང་ཆོག་གོ༔ ཡཿཀྵེ་མ་མེ་ད་ཡཙྪ་ནི་རཱ་ཛ་ས་དོ་རུ༔ རྒྱུ་མ་ནོར་བ་རྩ་བའི་སྔགས་སོ༔ བསྙེན་བསྒྲུབ་ལས་གསུམ་ཡོངས་རྫོགས་པས༔ ཡང་གསང་སྔགས་རྒོད་འདི་ཉིད་དོ༔ ཨྱཻ་ཨྱཻ་ཨྱཻ༔ ཨ་ཀྲོ་ཏེ་ཀ་ཡ་མཱནྟ་ཀ་ཡ་མ་ཡེ་ཨོཾ༔ ཧཱུྃ༔ ཟིལ་གནོན་ཐུགས་ཀར་རིན་ཆེན་གུར་ཁང་དབུས༔ རྟ་བདུན་ལ་གནས་ཧཱུྃ་མཐར་གསང་སྔགས་འཁོར༔ འོད་འཕྲོས་ཡེ་ཤེས་སེམས་དཔའི་ཞལ་ནས་ཐོན༔ སྒོ་གསུམ་སྒྲིབ་དག་རྒྱལ་ཀུན་དབང་བྱིན་བསྡུས༔ སེམས་ཅན་སྒྲིབ་སྦྱངས་གདུག་པ་ཚར་བཅད་ནས༔ མཐུ་སྟོབས་གཟི་བརྗིད་མ་ལུས་ཚུར་བསྡུས་ཏེ༔ རང་ལུས་ཁྲོ་ཆུང་རྡོ་རྗེས་གཏམས་བསམ་ཞིང་༔ ཆོས་ཉིད་རོལ་བའི་ངང་ནས་དྲག་སྔགས་བཟླའ༔ ཨྱཻ་ཨྱཻ་ཨྱཻ༔ཨ་ཀྲོ་ཏེ་ཀ་ཡ་མཱནྟ་ཀ་ཡ་མ་ཡེ་ཨོཾ༔ ཀཱ་ལ་རཱུ་པ་ཡེ་ཨཱ༔ ཧྲཱིཿཥྚི་ཨ་པ་ཡ་ཧཱུྃ༔ ཨ་ཨ་ཨ་ནི་ཨ་ནི༔ ཨཱུ་ཨཱུ༔ ཨཱུ་ནི་ཨཱུ་ནི༔ དུ་དུ༔ དུ་ནི་དུ་ནི༔ ཨ་ཨི༔ ཨུ་ཨེ༔ ཨོ་ཨཾ༔ ར་རི༔ ལ་ལི༔ དུ་རི་ཡེ༔ བྱ་ཚ་ཡེ༔ སིང་ཧ་ཡེ༔ ཧྲཱི་ཧ་ཡེ༔ བི་ད་ཡེ༔ ཧ་ལ་ཡེ༔ མུ་ཁ་ཡེ༔ ཨུ་ཨུ་ནི་ཨུ་ནི༔ བུ་ཌི་ཏ༔ ཨ་ཨ་ན་ན༔ ཡ་མ་རཱ་ཛ༔ ཡ་མ་རཀྵ༔ ཡ་མ་རཀ་ཨ༔ ཡ་མ་རཀྵ༔ བེ་ཏཱ་ལི་ཀྲོ་ཏཱི་ཤྭ་རི་མ་མ་ཨེ་ཀ་ཛ་ཊི་དྷེ་མ་ཀཱ་ལི་བཾ་རིལ་རུ་ལུ་རུ་ལུ་ཤྲཱི་བཛྲ་ཀྲོ་དྷ་ཡ་མ་ཀརྨ་རོ་ཥ་ཎ་ཀྲོ་དྷི་ཙཎྚ་རཀྵ་མོནྟ་ཨ་ཧཱུྃ་ཛ༔ ཧཱུྃ༔ དེ་དག་ཀུན་གྱི་ཕྲིན་ལས་ཚོགས༔ མ་ལུས་སྒྲུབ་བྱེད་ནུས་པ་ནི༔ དམིགས་པའི་ཡུལ་གྱི་བྱ་བ་དང་༔ ལམ་དང་གང་ཟག་འབྲས་བུ་རྣམས༔ འཐོབ་བྱེད་གསང་སྔགས་འདི་ཉིད་དོ༔ ཨཱོཾ་ཨ་ཀྲོ་ཏེ་ཀ་ཡ་མཱནྟ་ཀ་ཧ་ན་མ་ཐ་བྷཉྫ་ཧཱུྃ་ཕཊ༔ གཙོ་སྔགས་བྱེ་བ་གཅིག་གི་ཚད༔ སྲས་སྔགས་རེ་རེར་འབུམ་ཕྲག་གཉིས༔ འཁོར་རྣམས་འབུམ་ཕྲག་གཅིག་གི་གྲུབ༔ སྤྱི་དྲུལ་ས་ཡ་དྲག་པོའི་སྔགས༔ འབུམ་ཕྲག་གཅིག་གི་བསྙེན་ཚད་གྲངས༔ དུས་ཀྱི་བསྙེན་པར་བཅས་པ་རྫོགས༔ རྟགས་བསྙེན་བདེན་པ་མཐོང་བ་དང་༔ ཕྲིན་ལས་རང་དབང་གྱུར་བ་ཡིན༔ ས་མ་ཡཱ༔ རྗེས་ལ་བསོད་ནམས་ཡེ་ཤེས་ཀྱི༔ ཚོགས་གཉིས་ཡོངས་སུ་རྫོགས་པའི་ཕྱིར༔ སྔགས་ཀྱི་སྤྱོད་པའི་ཐབས་མཁས་སྒོ༔ གཱ་ཎ་ཙཀྲའི་མཆོད་པ་ལ༔ བྱིན་གྱི་བརླབས་ཀྱིས་ས་མ་ཏི༔ ཧཱུྃ༔ རྒྱུ་གཅིག་འབྱེད་མེད་རྩ་བ་བས༔ ག་ཎའི་དངོས་པོ་འཇམ་པའི་སྒྲའི༔ བླ་དག་ན་དཱའི་དབྱིངས་སུ་ཟད༔ རྟོག་ཚོགས་མཚན་མ་གཞི་ལ་མེད༔ སོར་རྟོགས་ཤེས་རབ་མེ་ཡིས་བསྲེགས༔ ངོ་བོ་ཀ་དག་ཆུ་ཡིས་བཀྲུས༔ ཕྱོགས་མེད་ཐུགས་རྗེའི་རླུང་གིས་གཏོར༔ ཐིག་ལེ་ཉག་གཅིག་གདལ་བ་ཆེ༔ རཾ་ཡཾ་ཁཾ༔ ཧཱུྃ༔ ཚོགས་ཀྱི་རང་བཞིན་རྟག་ཆད་མེད༔ རྐྱེན་ལ་མ་ལྟོས་སྲིད་ཞིའི་དཔལ༔ བདག་ཉིད་ཆེན་པོ་ལོངས་སྤྱོད་རྫོགས༔ སྤྱོད་ཡུལ་ཀུན་ཏུ་བཟང་པོ་དག༔ ཨོཾ་ཨཱཿཧཱུྃ༔ ཧཱུྃ༔ཆོས་རྣམས་ཀུན་གྱི་ཡང་དག་མཐའ༔ རྒྱ་ཆད་ཕྱོགས་ལྷུང་བྲལ་བའི་མཁའ༔ ཚོགས་ཀྱི་གན༵ས་ནི་ཞིང་ཁམས་གསུམ༔ ཕུན་སུམ་ཚོགས་པའི་དཔལ་ཡོན་ལྡན༔ མིང་མེད་མཐར་སྟོང་ཡེ་ཤེས་སེམས༔ རྒྱལ་བ་ཀུན་གྱི་ཐུགས་ཀར་བཞུགས༔ འཆི་མེད་གཉུག་མ་གཤིན་རྗེ་གཤེད༔ གཱ་ཎའི་སྟོན༵་པ༵་ཕུན་སུམ་ཚོགས༔ རྟོག་ཚོགས་བྱང་ཆུབ་སེམས་ཀྱི་རྩལ༔ སྤྲུལ་བ་བཀའ་སྡོད་ཕྱོགས་སྐྱོང་དང་༔ སྒོ་སྲུང་གདུལ་བྱའི་ཡི་དྭགས་སོགས༔ གཱ་ཎའི་ཕུན་སུམ་ཚོགས་པའི་འཁོར༵༔ གནས་པ་བཞི་ལྡན་འཁོར་ལོའི་ཐུགས༔ ཆོས་ཉིད་ཨ་ཀྲོ་ཏ་ཀ་ཡཱ༔ རྒྱལ་བའི་གསུངས་དང་ལོག་འགྲོའི་སྐད༔ གཱ་ཎའི་ཆོས༵་འཁོར་ཕུན་སུམ་ཚོགས༔ ཐོག་མ་བར་དང་ཐ་མའི་མཐའ༔ གང་དུ་མ་ངེས་ཀ་དག་དུས༔ མཉམ་པ་ཉིད་ལ་སྤྲོས་པ་མེད༔ གཱ་ཎའི་ཕུན་སུམ་ཚོགས་པའི་དུས༵༔ ཕྱོགས་དང་དབུས་མཐའ་བྲལ་བའི་ཀློང་༔ འགྲོ་འོང་འདུ་འབྲལ་མེད་པའི་སྐུ༔ གཤེགས་བཞུགས་སྒོར་བསྟུན་ཀུན་ཏུ་བཏགས༔ ཟིལ་གནོན་དཀྱིལ་འཁོར་འཆར་སྒོ་ཕྱེས༔ མགྲོན་ཐབས་དཀྱིལ་འཁོར་སྤྱན་འདྲེན་པ༔ ཧཱུྃ༔ སེམས་ཀྱི་རྡོ་རྗེ་གཤིན་རྗེའི་གཤེད༔ སྤྲོས་པ་མེད་ལས་སྤྲོས་པའི་ཚུལ༔ རྒྱལ་བ་རྒྱ་མཚོའི་སྐུར་བཞེངས་ནས༔ འདུས་པ་ཆེན་པོའི་ཚོགས་སུ་བྱོན༔ ཕྱི་ལྟར་སྣང་སྲིད་སྐྱེ་འགྲོའི་གཟུགས༔ སྐལ་ལྡན་འདུས་པའི་ཚོགས་སུ་བྱོན༔ འཁོར་འདས་གཉིས་ཀྱི་དཔལ་ཡོན་ཀུན༔ འབྱོར་ལྡན་ཡོ་བྱད་ཚོགས་སུ་བྱོན༔ བསོད་ནམས་ལྡན་པ་བསོད་ནམས་ཚོགས༔ ཡེ་ཤེས་ཡེ་ཤེས་འབྱུང་གནས་ཆེ༔ ཡེ་ཤེས་ལྡན་པ་ཡོད་མེད་ཤེས༔ ཚོགས་ཆེན་པོ་ཡི་ཚོགས་ལ་བྱོན༔ ཨཱོཾ་ཡ་མཱནྟ་ཀ་ས་པཱ་རི་ཝ་ར་གཱ་ཎ་ཙཀྲ་ས་མ་ཡ་ཛ་ཛ༔ ཧཱུྃ༔ ཚོགས་ཁང་དུར་ཁྲོད་རོལ་བའི་གནས༔ རྣལ་འབྱོར་དམ་གཙང་རྡོ་རྗེའི་གྲོགས༔ ཤགས་དང་རྩོད་པ་ཀུ་ཅོ་མེད༔ སྡིག་ཟས་ལོག་འཚོའི་མ་བསླད་ཅིང་༔ དམ་སྲི་ངན་པའི་ལག་མ་འགྲིམས༔ དམ་ཚིག་གསོ་བའི་རྫས་སུ་འོས༔ ཟག་མེད་ཡེ་ཤེས་ཕབས་ཀྱིས་བྲན༔ བརྟུལ་བཞུགས་རིག་པའི་ཉམས་དང་ལྡན༔ དམ་ཚིག་འདི་ནི་དང་དུ་བཞེས༔ གཱ་ཎ་ཚོགས་ཀྱི་མཆོད་པ་ནི༔ ཧཱུྃ༔ སྲིད་པར་གཏོགས་པའི་འཚོ་བྱེད་སྨན༔ རྡོ་རྗེའི་ཚེ་དང་གལ་ཕྱེ་དང་༔ གཉིས་མེད་མཐུན་སྡེབ་ཐུགས་ཀྱི་རྫས༔ འཇམ་དེས་ཟླ་རྒྱས་ཟླ་བའི་ཕྲུམ༔ ཚེ་ཁྲིད་ཛ་གད་ཛ་གྲི་བ༔ བྲན་མོ་ཤ་མོ་ཀུན་ཏུ་རྒྱུག༔ བཟའ་བཅའ་བཏུང་བ་ཕྱི་ཡི་ཚོགས༔ ཡེ་ཤེས་བདུད་རྩིར་ཕབས་ཀྱིས་བྲན༔ འཇོམས་བྱེད་སྐུ་གསུམ་ལྷ་ལ་འབུམ༔ ཨཱོཾ་ཨ་ལི༔ ཨུ་ལི༔ ཏཱ་ལི་ཏ་པཱ་ལི་དཾཥྚ་གོ་ནཱ་རཽ་ཏྲི་ཡ་མནྟ་ཀ་ཁ་རཾ་ཡོ་གི་ནཱི་ཁཱ་ཧི་ཧོ༔ ཧཱུྃ༔ སྲིད་ཞི་ཀུན་གྱི་དམ་ཚིག་ནི༔ ཉེར་སྤྱོད་བདུན་དང་འདོད་ཡོན་ལྔ༔ རྡོ་རྗེའི་ལྷ་མོ་བཅུ་དྲུག་གི༔ ཕྱག་རྒྱ་གར་དང་གླུ་ཚིག་བྲོ༔ འཇོམས་བྱེད་ལྷ་ཚོགས་རྒྱུ་འཕྲུལ་གར༔ སངས་རྒྱས་ཆོས་དང་དགེ་འདུན་སྡེ༔ རྩ་གསུམ་སྐུ་གསུམ་ལྷ་ཚོགས་ལ༔ འགྲོ་ཀུན་ཚོགས་གཉིས་རྫོགས་ཕྱིར་འབུལ༔ སྐུ་གཉིས་མངོན་གྱུར་དངོས་གྲུབ་སྩོལ༔ ཨཱོཾ་ཨཱཿཧཱུྃ༔ ཤནྟ་ས་པ་རི་ཨ་ན་ནཱ་ཨརྩི་ཏ་བྱ༔ སུ་མ་བྷ་ལ་བྷ་ལར་ཨརྟ་གཱ་ཎ་ཙཀྲ་ལ་ཁཱ་ཧི༔ ཧཱུྃ༔ སངས་རྒྱས་དམ་ཚིག་རྨད་པོ་ཆེ༔ ཨ་མྲ་རྒུན་འབྲུམ་ཨ་ཀ་རུ༔ ན་ལིང་གེར་རྒྱས་རྣམ་སྣང་མཛད༔ དཀར་རྩི་དམར་རྩི་མཱཾ་ས་དང་༔ མི་བསྐྱོད་རང་བཞིན་རྫོགས་སངས་རྒྱས༔ བདུད་རྩི་སྨན་དང་རཀྟ་འཁྱིལ༔ བྷ་ལིང་ཞི་དྲག་མཆོད་འོས་ཀུན༔ འཇིགས་བྱེད་དཀྱིལ་འཁོར་ལྷ་ལ་མཆོད༔ ཧཱུྃ༔ རྡོ་རྗེ་ཕུང་པོའི་གྲོང་ཁྱེར་དང་༔ འབྲེལ་བའི་རྩ་གསུམ་ལྷ་ཚོགས་ལ༔ བདེ་ཆེན་བདེ་བའི་འབྱུང་གནས་ཀྱིས༔ དགའ་ཆེན་རོལ་མོའི་མཆོད་པ་འབུལ༔ ཕྱི་དང་ནང་གི་ཉེ་རྒྱུ་ཡིས༔ ཚོགས་ཀྱི་སྤྱོད་པ་མཐར་ཕྱིན་ནས༔ ལྷན་ཅིག་སྐྱེས་པ་མཆོག་གི་དངོས༔ ཕྱག་རྒྱ་ཆེན་པོའི་སིདྡྷི་སྩོལ༔ ཨ་ཧོ་མ་ཧཱ་སུ་ཁ་གྷཱ་ན་ཙཀྲ་ཁཱ་ཧི༔ བར་བ་བཤགས་པ་བྱ་བ་ནི༔ ཀྱཻ་ཨྱཻ༔ འཇམ་དཔལ་ཡ་མནྟ་ཀ་བྱང་ཆུབ་སེམས༔ རང་བཞིན་རྫོགས་པ་ཆེན་པོ་ཆོས་སྐུ་ཡི༔ རང་ཞལ་མ་རིག་གློ་བུར་དྲི་མས་བསྒྲིབ༔ ལུས་གསུམ་བག་ཆགས་བརྟེན་པ་དེ་སྲིད་དུ༔ ཉོན་མོངས་དབང་གིས་མི་དགེ་སྡིག་བགྱིས་དང་༔ ཁྱད་པར་སྡོམ་གསུམ་བརྟུལ་ཞུགས་བཟང་མནོས་ནས༔ རང་ལྡོག་མ་ཉམས་སོ་སོར་བསྲུང་རྒྱུ་ལ༔ བཀའ་བཅག་ལུང་བོར་བླ་མ་མཁན་སློབ་བསླུས༔ བསླབ་སྡོམ་དམ་ཚིག་ཉམས་ཆགས་འགལ་འདས་རལ༔ ཁྱད་པར་རྡོ་རྗེའི་རྣལ་འབྱོར་ཆེན་པོ་ཡི༔ སྐུ་གསུང་ཐུགས་སུ་སྒྲུབ་པར་དམ་བཅས་ཀྱང་༔ སྒྲུབ་དང་བསྲུང་བྱའི་དམ་ཚིག་ཉམས་པ་དང་༔ འཁྱེར་སོ་གསུམ་དང་སྤྱི་དང་ཁྱད་པར་ལྷག༔ འགལ་འཁྲུལ་ཉམས་ཆགས་ཉེས་ལྟུང་ཐམས་ཅད་ཀུན༔ ཡེ་ཤེས་ལྷ་ལ་རྣམ་རྟོག་མི་མངའ་ཡང་༔ མ་གཤིན་ལས་ལ་དབང་བ་གཡར་དམ་ཅན༔ ལེགས་ཉེས་སྟངས་འཛིན་དམ་ཚིག་རྗེས་གཅོད་པས༔ མཁའ་འགྲོ་དམ་ཅན་སྔགས་བདག་རྒྱ་མཚོ་ཡི༔ ཐུགས་དང་འགལ་གྱུར་ནོངས་པ་ཅི་མཆིས་པ༔ གྷ་ཎ་ཚོགས་ཀྱི་མཆོད་པས་བསྐང་ཞིང་བཤགས༔ དག་ཚངས་མཆོག་གི་དངོས་གྲུབ་སྩལ་དུ་གསོལ༔ གཤིན་རྗེ་གཤེད་ཀྱི་ཡིག་བརྒྱ་བཟླའོ༔ ཨོཾ་ཡ་མཱནྟ་ཀ་ས་མ་ཡ༔ མ་ནུ་པཱ་ལ་ཡ༔ ཡ་མཱནྟ་ཀ་ཏྭེ་ནོ་པ་ཏིཥྛཿ དྲ་ཌྷོ་མེ་བྷ་བ༔ སུ་ཏོ་ཥྱོ་མེ་བྷ་བ༔ སུ་པོ་ཥྱོ་མེ་བྷ་བ༔ ཨ་ནུ་རཀྟོ་མེ་བྷ་བ༔ སརྦ་སིདྡྷི་མྨེ་པྲ་ཡ་ཙྪ༔ སརྦ་ཀརྨ་སུ་ཙ་མེ་ཙིཏྟཾ་ཤྲཱི་ཡཾ་ཀུ་རུ་ཧཱུྃ༔ ཧ་ཧ་ཧ་ཧ་ཧོ༔ བྷ་ག་ཝཱན༔ སརྦ་ཏ་ཐཱ་ག་ཏ་ཡ་མཱནྟ་ཀ་མཱ་མེ་མུཉྩ༔ ཡ་མཱནྟ་ཀ་བྷ་ཝ་མ་ཧཱ་ས་མ་ཡ་ས་ཏྭ་ཨཱ༔ ཚོགས་ཕུད་གསུམ་པ་བསྒྲལ་བསྟབས་ནི༔ གནོད་བྱེད་དགྲ་བགེགས་འགུགས་གཞུགས་བྱ༔ དོན་སྟོང་སེམས་དང་ལྡན་པའི་ངང་༔ ཧཱུྃ༔ འཇིགས་ཚོགས་ཀུན་ཀྱང་འཇིགས་པར་བྱེད༔ འཁོར་འདས་དབང་ཕྱུག་ཧེ་རུ་ཀ༔ དྲག་པོ་མངོན་སྤྱོད་ཕྲིན་ལས་བདག༔ སྲིད་པའི་འཁོར་ལོ་ཡོངས་བསྒྲལ་ཕྱིར༔ ཐམས་ཅད་གཤིན་རྗེའི་ལྟོ་བར་གནས༔ དེ་ཡང་ཁྱོད་ཀྱི་ཀློང་ན་འགུམ༔ སྲིད་པ་གསུམ་པོ་གར་གནས་ཀྱང་༔ སྐུ་གསུང་ཐུགས་ཡོན་ཕྲིན་ལས་ནི༔ ཧཱུྃ༔ ཞེ་སྡང་གཤིན་རྗེ་འཁོར་བཅས་ཀྱི༔ དགྲ་བགེགས་འགུགས་པའི་ཕྲིན་ལས་མཛོད༔ སེར་སྣ་གཤིན་རྗེ་འཁོར་བཅས་ཀྱི༔ དགྲ་བགེགས་འཆིང་པའི་ཕྲིན་ལས་མཛོད༔ འདོད་ཆགས་གཤེད་པོ་འཁོར་བཅས་ཀྱི༔ དགྲ་བགེགས་སྡོམ་པའི་ཕྲིན་ལས་མཛོད༔ གཏི་མུག་གཤེད་པོ་འཁོར་བཅས་ཀྱི༔ དགྲ་བགེགས་མྱོས་པའི་ཕྲིན་ལས་མཛོད༔ དབྱུག་ཏོ་གཤེད་པོ་འཁོར་བཅས་ཀྱི༔ དགྲ་བགེགས་སྐྱོབས་བྱེད་ལྷ་དང་ཕྲོལ༔ ང་རྒྱལ་གཤེད་པོ་འཁོར་བཅས་ཀྱི༔ དགྲ་བགེགས་སྨྱོ་བརྒྱལ་རེངས་སུ་ཆུགས༔ པདྨ་མཐར་བྱེད་འཁོར་བཅས་ཀྱི༔ དགྲ་བགེགས་གྲུ་གུ་ཐུལ་དུ་ཆིངས༔ ཧཱུྃ༔ ཐོ་བ་གཤིན་རྗེ་གཤེད་ཆེན་གྱིས༔ དགྲ་བགེགས་རྡོ་རྗེའི་གཏུན་དུ་བརྡུང་༔ རལ་གྲི་གཤིན་རྗེ་གཤེད་པོ་ཡི༔ དགྲ་བགེགས་དུམ་བུ་སྟོང་དུ་གཏུབ༔ ནག་འཇོམས་ལ་སོགས་གཤེད་ཆེན་གྱིས༔ ཕྱོགས་བཅུར་གནས་པའི་དགྲ་བགེགས་སྒྲོལ༔ གསོད་པར་བྱེད་པའི་ཕོ་ཉ་བཞིས༔ དགྲ་བགེགས་ལུས་སེམས་འབྲེལ་ཐག་ཆོད༔ བར་ཆད་བྱེད་པའི་བདུད་པོ་བཞིས༔ སྐྱེ་བ་ཕྱི་མར་དུས་མ་བཏབ༔ ཁྲམ་ལ་འདེབས་པའི་རྩིས་པ་བཞིས༔ བྱད་ཁྲམ་ཧོམ་ཟོར་གདོང་ལ་སྤྲོད༔ སྲོག་རྩ་གཅོད་པའི་ཤན་པ་བཞིས༔ དགྲ་བགེགས་སོྲོག་དབུགས་ད་ཆོད་ཅིག༔ མོན་ནག་ཨ་ཙར་ནག་པོ་བཞིས༔ ངན་སྔགས་དུག་ཆུའི་འོལ་ཁ་སྟོན༔ ལོ་ཟླ་ཞག་གི་འཆི་བདག་གིས༔ དུས་ལས་མ་ཡོལ་ཕྲིན་ལས་མྱུར༔ ཕོ་གཤེད་མོ་གཤེད་ཚོགས་ཀུན་གྱིས༔ སྐད་ཅིག་གཅིག་གི་ཤོལ་མ་འདེབས༔ འོབ་བསྲུང་བཅུ་གཉིས་སྒོ་བསྲུང་སོགས༔ བདུན་བརྒྱ་ཉི་ཤུའི་ལྷ་ཚོགས་ཀྱིས༔ བསྟན་དགྲ་ལང་ལ་མ་ཤོར་ཅིག༔ སངས་རྒྱས་བསྟན་པ་ཡལ་མ་དོར༔ སྔགས་འཆང་རྣལ་འབྱོར་ཡིད་མ་བཅད༔ ལྷ་དང་བསྲུངས་མ་མཐུ་མ་ཆུང་༔ འཛིན་སྦྱོར་སྒྲོལ་བའི་གིང་ཆེན་བཞིས༔ བསྒྲལ་འདྲེན་དྲག་པོའི་དགོངས་ཀློང་སྐྱོད༔ ཨཱོཾ་ཨ་ཀྲོ་ཏེ་ཀ་ཡ་མཱནྟ་ཀ་བཛྲ་རཏྣ་པདྨ་ཀརྨ་བུདྷ་མུད་ག་ར་དཎྚ་པདྨ་ཁརྒ་ཡ་མ་ར་ཛ་ས་པཱ་རི་ཝ་ར་སརྦ་ཤ་ཏྲུན་ཛཿཧཱུྃ་བཾ་ཧོ་དེ་ཝ་བྷྲི་ཏ་ཡ་ཕཊ༔ ཀ་ཁོ་དྷ་བྲིནྟཾ་བྷནྡྷ་བཾ་ཏྭ་ཊ་ཡ་ཏ་ཐ་ཡཙྪད་ཏ་མ་ར་ཡ་ཕཊ༔ ཚེ་ཁྲུས་ཀྱི་དགོངས་པ་བསྐྱངས༔ རྒྱས་པར་སྤྲོ་ན་སྨད་ལས་ཏེ༔ རྣ་རྒྱན་རྣམ་པ་བཅུ་གཉིས་སྤྲད༔ གཤོལ་གྱི་འཁྲུལ་འཁོར་རྣམ་བདུན་ཡང་༔ ཟླ་གསང་རྒྱུད་ལས་བདག་གིས་བསྟན༔ རྗེས་འབྲེལ་ཞལ་དུ་བསྟབས་པ་ནི༔ ཧཱུྃ༔ འཇམ་དཔལ་རང་བཞིན་བྱམས་སྡང་ལ་སོགས་པའི༔ རྩོལ་རྟོག་བཞེས་སྤྲོའི་མཚན་མ་མི་དམིགས་ཀྱང་༔ འགྲོ་ལ་དགོངས་པའི་སྔོན་རབས་ཐུགས་རྗེའི་ཤུགས༔ མ་འགགས་བདེན་དོན་རྣམ་པར་སྨིན་པའི་དབང་༔ ཨྱཻ་ཞེས་བྱ་བ་དུས་གསུམ་རྒྱལ་བའི་ཞལ༔ ཉོན་མོངས་རྣམ་སྨིན་སྡུག་བསྔལ་ཟ་བའི་ཧོམ༔ ཁྲོ་ཆེན་གཅོད་པའི་འཁོར་ལོའི་ཕྲིན་ལས་ཀྱིས༔ བདག་མེད་རྟོགས་པའི་ཀིང་རུས་མཆེ་བ་གཙིགས༔ འཁོར་འདས་ཀ་དག་ཀློང་དུ་རོལ་བར་མཛོད༔ ཧཱུྃ༔རང་བཞིན་ཏིང་འཛིན་གཟུགས་བརྙན་དབྱེར་མེད་པའི༔ ཐུགས་རྗེ་དགྱེས་པ་བདེ་འཁྲོས་ཧེ་རུ་ཀ༔ འཇམ་དཔལ་ཡ་མནྟ་ཀའི་དཀྱིལ་འཁོར་དུ༔ ང་རྒྱལ་རུ་ཏྲའི་གཤེད་པོར་དབང་སྤྱོད་ནས༔ གཟུགས་པོར་སྒྱུ་མའི་དཔུང་ཚོགས་འཇིགས་པའི་དགྲའི༔ རྣམ་སྨིན་ལྷག་མ་ཡེ་ཤེས་དབྱིངས་སྡུད་ཕྱིར༔ དགྲ་བོའི་ཤ་ནི་བུར་སྦྲང་ལས་ཀྱང་མངར༔ གཏི་མུག་འཁྲུལ་འཁོར་ཆོས་དབྱིངས་ཀློང་དུ་སྟོབས༔ དགྲ་བོའི་ཁྲག་ནི་ཛ་གད་ལས་ཀྱང་ཚིམས༔ འདོད་ཆགས་སོར་རྟོགས་ཡེ་ཤེས་ཀློང་དུ་སྟོབས༔ དགྲ་བོའི་རུས་པ་རོ་བརྒྱའི་བཅུད་ལས་དངར༔ ཞེ་སྡང་མེ་ལོང་ཡེ་ཤེས་ཀློང་དུ་སྟོབས༔ ལྔ་ཕུང་སྐྱེ་མཆེད་དོན་སྣོད་མ་ལུས་པ༔ ཁྲོ་རྒྱལ་འབར་བ་ཆེན་པོའི་ཞལ་དུ་སྟོབས༔ རྟོག་ཚོགས་ཉོན་མོངས་བརྒྱད་ཁྲི་བཞི་སྟོང་ཀུན༔ ཆོས་ཀློང་ཡངས་བ་ཡེ་ཤེས་ཞལ་ཏུ་སྟོབས༔ སེམས་ཅན་དོན་དུ་དགོངས་ཏེ་བཞེས་སུ་གསོལ༔ ཕྱིན་ཆད་འཁྲུལ་མི་ཤེས་པའི་རྒྱས་ཐོབ་ཅིག༔ ཨོཾ་མ་ཧཱ་མཱཾ་ས་རཀྟ་ཙིཏྟ་ཀོ་རོ་ཙ་ན་ཛྙཱ་ན་པཉྩ༔ ཀ་ཡ་པཉྩ༔ པཉྩ་པཱུ་ཛ༔ ལཱ་ལི་ཏ་ཁ་རཾ་ཁཱ་ཧི༔ དེ་ནས་ལྷག་མ་བསྔོ་བ་ནི༔ ཞིང་ལྤགས་སྟེང་དུ་ཆོས་འབྱུང་ལྟེར༔ གཙང་དང་དམེ་པའི་གཏོར་མ་བཤམས༔ ལྷག་དཀྱིལ་གཞལ་ཡས་ཁང་གི་ནང༔ ཡར་གྱི་མཆོད་གནས་གསལ་གདབས་ལ༔ དམ་ཚིག་རྫས་ཀྱི་འོད་ཟེར་གྱིས༔ ཡེ་ཤེས་བདུད་རྩི་བཀུགས་བསྟིམས་བརླབས༔ འཁོར་འདས་མགྲོན་ཀུན་སྤྱན་དྲངས་གྱུར༔ ཨོཾ་ཨཱཿཧཱུྃ༔ ཨུཥྩི་ཊ་མནྜ་ཎ་པུ་ནུ་བ་ར་ས་མ་ཡ་ཛ་ཛ༔ ཧཱུྃ༔ ལྷག་ཕུད་མཆོད་པར་འོས་པ་ཡར་གྱི་གནས༔ ཡོངས་རྫོགས་འཇིགས་བྱེད་དུས་དགྲའི་དཀྱིལ་འཁོར་དང་༔ རིགས་ལྔ་གནས་ཡུལ་སྒོ་དབང་བཅས་པ་ལ༔ འདོད་ཡོན་རྣམ་པའི་ཡེ་ཤེས་དགའ་སྟོན་འགྱེད༔ དགྱེས་བཞེས་དངོས་གྲུབ་རྒྱ་མཚོའི་གཏེར་སྒོ་ཕྱེས༔ ཨོཾ་མ་ཧཱ་གཱ་ཎ་ཙཀྲ་ཨུཥྩི་ཊ་པཱུ་ཛ་ཁ་ཧཱི༔ ཅེས་བརྗོད་ཡར་གྱི་གནས་བདུན་མཆོད༔ དེ་ནས་ངེས་པ་བརྗོད་པ་ནི༔ ཀྱཻ༔ ཚོགས་ཀྱི་ཕུད་ལ་རྩ་གསུམ་དཀྱིལ་འཁོར་དབང་༔ དེ་ནས་རྣལ་འབྱོར་དམ་ཚིག་གཉན་ལ་གཟེས༔ རྟོགས་པས་བདག་བསྒྲལ་ཐུགས་རྗེས་གཞན་སྒྲོལ་བས༔ ཕྲིན་ལས་ཆོ་ག་གཞུང་བཞིན་བགྱིད་འོས་པ༔ དང་དུ་བླང་ནས་ད་ལྟ་ལྷག་མས་མཆོད༔ འཇིག་རྟེན་ཆོས་མཐུན་རྗེ་འབངས་རིམ་པས་དབང་༔ དེ་ནས་འཁོར་འདས་རོ་གཅིག་དགོངས་སྤྱོད་ཀྱིས༔ ཐམས་ཅད་གཉིས་སུ་མེད་པར་བསྲེ་བར་བྱ༔ ཆོས་ཉིད་རྣམ་དག་ཡེ་ནས་རྒྱུ་འབྲས་གཅིག༔ དེ་ནས་རྡོ་རྗེ་རྒྱལ་པོའི་ཞལ་ཆབ་བྲན༔ ཧཱུྃ༔ སྔོན་ཚེ་དྲེགས་པའི་སྡེ་དཔོན་འདུལ་བའི་ཚེ༔ དཔལ་གྱིས་སྤྲུལ་བ་ཐབས་མཁས་རྣམ་རོལ་དུ༔ འབར་མ་དབང་ཕྱུག་ཉི་ཤུ་རྩ་བརྒྱད་པོ༔ ཡེ་ཤེས་འཇིག་རྟེན་ཚུལ་དུ་སྣང་མཛད་པའི༔ ཕུད་དང་ལྷག་ལ་དབང་བ་ཕྱི་མོའི་ཚུལ༔ ལྷག་གཏོར་བཞེས་ལ་ཕྲིན་ལས་འགྲུབ་པར་མཛོད༔ ཕེཾ༔ ཡེ་ཤེས་མཁའ་འགྲོ་ཤུགས་འགྲོ་རྟག་འགྲོ་མ༔ ཟ་བྱེད་ཁ་འབར་རེ་ཏི་གསལ་འགྲོ་བདུན༔ ༼ མ་མོ་མཆན། ༽ འཚོ་བྱེད་འཆིང་བྱེད་སྡོམ་བྱེད་རླུང་འབྱིན་བཞི༔ ༼ སྲིང་མོ་མཆན། ༽རིགས་བཞིར་སྟེང་འོག་ཀིང་ཆེན་བཅོ་བརྒྱད་དང་༔ སྐུ་འབར་མེ་ཁྱེར་གློག་ཕྲེང་སྐར་མདའ་གདོང་༔ སྲིན་མོ་མདུང་ཐུང་འཕེན་དང་ཀླུ་མོ་ནི༔ ལྕེ་འབེབས་རྡོ་རྗེ་རིན་ཆེན་པདྨ་ལས་ཀྱི་རིགས༔ བཅུ་དྲུག་བཞི་སྟེ་ཕོ་ཉ་དྲུག་ཅུ་བཞི༔ དགའ་བྱེད་ལ་སོགས་ཞི་བའི་མཁའ་འགྲོ་བརྒྱད༔ འཇོམས་བྱེད་ལ་སོགས་རྒྱས་པའི་མཁའ་འགྲོ་བརྒྱད༔ གནོད་སྦྱིན་ལ་སོགས་དབང་གི་མཁའ་འགྲོ་བརྒྱད༔ ཕག་གདོང་ལ་སོགས་དྲག་པོའི་མཁའ་འགྲོ་བརྒྱད༔ མགྲིན་བཅུ་ལ་སོགས་ལིང་ཀ་ཆེན་པོ་འབུམ༔ རྡོ་རྗེ་རྣམ་རྒྱལ་ ༼ ལ་སོགས་ཁྲོ་ཚུལ་མཆན། ༽ རྡོ་རྗེ་འབར་བ་ ༼ བའི་ཕོ་ཉ་དྲུག་ཅུ་མཆན། ༽དང་༔ མཐོང་བྱེད་ཀྱིས་མཚོན་དུང་གི་ཕོ་ཉ་༦༠བ༔ རྡོ་རྗེ་དབང་ཕྱུག་དབུར་བཞུགས་གསེར་གྱི་ཕོ་ཉ་༦༠བ༔ རྡོ་རྗེ་ཐོག་འབེབས་དང་བཅས་བསེ་ཡི་ཕོ་ཉ་༦༠བ༔ འཇོམས་མ་ལ་སོགས་གཡུའི་ཕོ་ཉ་༦༠བ༔ རལ་གཅིག་ལ་སོགས་མ་མོའི་ཕོ་ཉ་༦༠སྟེ༔ དྲུག་ཅུ་དྲུག་ཅུ་སུམ་བརྒྱ་དྲུག་ཅུའི་ཚོགས༔ དཀར་མོ་མིག་གཅིག་ལ་སོགས་མགྱོགས་མ་བཞི༔ གཞན་ཡང་ལྷག་ལ་དབང་བ་ཐམས་ཅད་ཀྱིས༔ ལྷག་གཏོར་བཞེས་ལ་ཕྲིན་ལས་གྲུབ་པར་མཛོད༔ ཧཱུྃ༔ སྐུ་ལྔ་མཐར་ཕྱིན་ཡེ་ཤེས་སར་བརྟན་ནས༔ ཉོན་ཤེས་སྒྲིབ་པའི་བདུད་བཞི་དབྱིངས་རོལ་ཞིང་༔ རྣལ་འབྱོར་དགོངས་པའི་རྩལ་གྱི་ཤུགས་རྫོགས་པའི༔ འབྱུང་ལྔའི་ལྷག་མ་ཡུམ་ལྔའི་ཀློང་དུ་རོལ༔ ཕུང་ལྔའི་ལྷག་མ་སྐུ་ལྔའི་ཀློང་དུ་བསྡུས༔ རྟོག་ཚོགས་སྐྱེ་མཆེད་སེམས་དཔའ་སེམས་མའི་ངང་༔ བརྒྱད་ཁྲི་བཞི་སྟོང་ཆོས་ཕུང་ངོ་བོར་རོལ༔ ཟག་མེད་རྡོ་རྗེ་ལྟ་བུའི་ཏིང་འཛིན་གྱིས༔ ལྷག་མེད་མངོན་རྫོགས་སངས་རྒྱས་དཔལ་ཐོབ་ཕྱིར༔ ལྷག་གཏོར་བཞེས་ལ་འཕྲིན་ལས་འགྲུབ་པར་མཛོད༔ ཐུགས་དམ་གཉན་པོ་གནད་བསྐུལ་ནི༔ ཧཱུྃཿབྷྱོ་ཛ༔ ཆོས་དབྱིངས་སྤྲོས་པ་བྲལ་བའི་ཕོ་བྲང་ནས༔ ཆོས་སྐུ་འཇམ་དཔལ་ཞི་ཁྲོའི་དཀྱིལ་འཁོར་ཀུན༔ རྩོལ་རྟོག་མེད་པའི་ཕྲིན་ལས་མ་འགགས་པས༔ འགྲོ་བའི་དོན་ཕྱིར་དགོངས་པ་གནད་ནས་བསྐུལ༔ རང་བྱུང་རྡོ་རྗེ་བཀོད་པའི་སྒྱུ་འཕྲུལ་ལས༔ ངེས་པ་ལྔ་ལྡན་བཅོམ་ལྡན་འབར་བའི་ཉམས༔ ཁྲོ་བདག་གསང་ཆེན་རོལ་བའི་རང་མདངས་སྐུ༔ འགྲོ་བའི་དོན་ཕྱིར་དགོངས་པ་གནད་ནས་བསྐུལ༔ གཟུགས་བརྙན་བཟང་ངན་སྣ་ཚོགས་ཅིར་སྣང་ཡང་༔ དོན་ལ་རང་བཞིན་མཉམ་པའི་དཔེས་མཚོན་ཏེ༔ དུས་གསུམ་རྒྱལ་བའི་དགོངས་ཀློང་གཅིག་ཏུ་འཁྱིལ༔ ཡ་མཱནྟ་ཀའི་ཐུགས་དམ་གནད་ནས་བསྐུལ༔ སེམས་ཅན་ཐམས་ཅད་ཕྲིན་ལས་ཞིང་ཡིན་ན༔ བཏང་སྙོམས་ཡལ་བར་འདོར་བ་ག་ལ་སྲིད༔ གཙོ་བོ་རྒྱལ་བ་ཕྲིན་ལས་མངའ་བདག་ནི༔ ཕྱོགས་གཅིག་ཞི་ལ་གཞོལ་བར་མཛད་དམ་ཅི༔ གཅོད་པའི་འཁོར་ལོ་ཕྲིན་ལས་དངོས་ཡིན་ན༔ ནུས་པའི་སྟོབས་ཤུགས་ཕྱུང་བར་མི་མཛད་དམ༔ དེ་བས་རིགས་དྲུག་སྡུག་བསྔལ་ཉམ་ཐག་འགྲོ༔ གཡང་ས་ཆེ་ལས་ཐུགས་རྗེའི་ཕྱག་གིས་ཟུངས༔ ཁྱད་པར་ཕན་བདེའི་རྩ་ལག་གཅིག་གྱུར་བ༔ བསྟན་པའི་མངའ་ཐང་ཕྱོགས་བཅུར་རྒྱས་པར་མཛོད༔ དེར་འཛིན་དགེ་འདུན་སྡེ་ཚོགས་དར་ཞིང་རྒྱས༔ ཉམས་རྟོགས་རིག་པའི་རྩལ་ཆེན་སྦར་ནས་ཀྱང་༔ སྣོད་བཅུད་དུས་ཀྱི་རྒུད་པ་ཀུན་བསལ་བས༔ ས་ལམ་བར་ཆད་མི་མཐུན་དབྱིངས་སུ་སོལ༔ མཐར་ཐུག་ཡིད་ཅན་ཀུན་ལ་འཚེ་བའི་དགྲ༔ དུས་ཀྱང་འཇོམས་པའི་དཔའ་བོའི་གོ་འཕང་ཉིད༔ སྒྲུབ་པའི་འབྲས་བུ་ཡང་དག་མཆིས་པར་མཛོད༔ ཨཱོཾ་ཡ་མཱནྟ་ཀ་ཀརྨ་ཤིནྟཾ་པུཥྚཾ་ཝ་ཤཾ་མ་ར་ཡ་དྲ་ཡ་ཡ་ཀུརྦནྟུ༔ དེ་ནས་ཆད་ཐོ་བསྐྱངས་བ་ནི༔ ཧཱུྃ༔ སྔོན་ཚེ་འདས་དུས་བསྐལ་པའི་ཐོག་མ་ལ༔ བཅོམ་ལྡན་འཇམ་དཔལ་རྡོ་རྗེ་སྲིན་པོ་ཡིས༔ འཆི་བདག་གཤིན་རྗེའི་སྡེ་དཔུང་བཏུལ་བའི་ཚེ༔ འདུལ་བྱེད་ཡེ་ཤེས་ཁྲོ་བོའི་ཚུལ་བསྟན་ཟོལ༔ ཕོ་ཉ་མོན་པ་བདུད་དང་གནོད་སྦྱིན་ཚོགས༔ ཀིང་དང་ཤན་པ་ལོ་ཟླ་ཞག་གི་གཤེད༔ ཁྲམ་བདག་རྩིས་ཀྱི་བདག་པོ་ཐམས་ཅད་ཀྱིས༔ རང་རང་གཟུགས་ཀྱི་སྐུ་མཆོག་མངོན་མཛད་དེ༔ ཁས་བླངས་དམ་བཅས་དམོད་པའི་བརྫུ་བག་ཀྱིས༔ བཀའ་ཡི་བསྟན་པ་བསྲུང་བར་གཉེར་བླང་སྟེ༔ སངས་རྒྱས་བསྟན་པ་བསྲུང་བར་མ་ཆད་དམ༔ རྣལ་འབྱོར་དབུ་འཕང་བསྟོད་པར་མ་བྱས་སམ༔ བསྒྲུབ་མཆོག་བར་ཆད་བསྲུང་བར་མ་ཆད་དམ༔ རབ་འབྱམས་ཕྲིན་ལས་བསྒྲུབ་ཞེས་མ་བྱས་སམ༔ སྔོན་ཚེ་ཚུལ་བསྟན་དགོངས་གཞི་ཅི་ཞིག་ན༔ དེང་འདིར་དེ་བཞིན་གཡར་དམ་མི་སྐྱོང་ན༔ ཕྲིན་ལས་དུས་ལས་ཡོལ་བར་མ་གྱུར་རམ༔ ཐུགས་བསྐྱེད་དམ་བཅའ་ཉམས་པར་མ་གྱུར་དམ༔ དེ་ཕྱིར་བཅོལ་བའི་ཕྲིན་ལས་འགྲུབ་པར་མཛོད༔ ཧཱུྃ༔ དེ་འོག་རིག་འཛིན་རྒྱལ་བོ་རྡོ་རྗེ་ཆོས༔ ཕྲིན་ལས་སྤེལ་བའི་མདུན་འདོན་ཕོ་ཉར་བཞེངས༔ འཇམ་དཔལ་སྒྱུ་འཕྲུལ་ལྷ་ཚོགས་གར་བསྒྱུར་ནས༔ དམ་པའི་རིགས་ཅན་ལྔ་ལ་དབང་བསྐུར་ནས༔ འཇམ་དཔལ་སྐུ་ཡི་དཀྱིལ་འཁོར་ཞལ་ཕྱེས་ཚེ༔ ཆོ་འཕྲུལ་སྤྲུལ་བའི་འཁོར་ཚོགས་ཐམས་ཅད་དང་༔ ལྷ་བརྒྱད་ཀླུ་བརྒྱད་གཟའ་བརྒྱད་རྒྱུ་སྐར་སྡེ༔ ཕྱོགས་སྐྱོང་བཅུ་དང་འཇིགས་བྱེད་ཆེན་པོ་དགུ༔ རྒྱལ་ཆེན་བཞི་སྟེ་དཔལ་མགོན་དྲེགས་ཆེན་གྱིས༔ རང་རང་གཟུགས་མཆོག་དམ་པ་བསྟན་ནས་ཀྱང་༔ བཀའ་ཡི་གཏོར་མ་ལེན་པར་མ་ཆད་དམ༔ སངས་རྒྱས་བསྟན་པ་བསྲུང་བར་མ་ཆད་དམ༔ སྒྲུབ་མཆོག་མཐུན་རྐྱེན་བསྒྲུབ་པར་མ་ཆད་དམ༔ ས་ལམ་བར་ཆད་བཟློག་པར་མ་ཆད་དམ༔ ལོག་འདྲེན་དམ་སྲི་འདུལ་བར་མ་ཆད་དམ༔ གནོད་བྱེད་དགྲ་བགེགས་བསྒྲལ་བར་མ་ཆད་དམ༔ ཆད་དོན་དམར་གྱི་གཏོར་མ་འདིར་བཞེས་ལ༔ རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད༔ ཧཱུྃ༔ དེ་འོག་རིག་འཛིན་མཉྫུ་མི་ཏྲ་ལ༔ རང་བྱུང་མཆོད་རྟེན་རིན་ཆེན་འོད་འཕྲོའི་དྲུང་༔ མཁའ་འགྲོའི་གཙོ་མོ་ལས་ཀྱི་དབང་མོ་ཡིས༔ ཚེ་བདག་ཆེན་པོའི་སྒྲོམ་བུ་མངོན་གཏད་དེ༔ མཁའ་འགྲོའི་རྒྱ་མཚོ་ཀློང་གི་རྒྱ་བཀྲོལ་ནས༔ བཀའ་བབས་ཆོས་ཀྱི་བདག་པོར་མངའ་གསོལ་ནས༔ གཤིན་རྗེའི་གཤེད་ཀྱི་དངོས་གྲུབ་བརྙེས་པ་ན༔ ལས་གཤིན་ཆོས་ཀྱི་རྒྱལ་པོའི་དབུར་མཛད་པའི༔ བསྲུངས་མ་དམ་ཅན་རྒྱ་མཚོ་ཐམས་ཅད་ཀྱིས༔ རང་རང་གཟུགས་མཆོག་དམ་པ་བསྟན་ནས་ཀྱང་༔ བཀའ་ཡི་གཏོར་མ་ལེན་པར་མ་ཆད་དམ༔ སངས་རྒྱས་བསྟན་པ་བསྲུང་བར་མ་ཆད་དམ༔ སྒྲུབ་མཆོག་མཐུན་རྐྱེན་བསྒྲུབ་པར་མ་ཆད་དམ༔ ས་ལམ་བར་ཆད་བཟློག་པར་མ་ཆད་དམ༔ ལོག་འདྲེན་དམ་སྲི་འདུལ་བར་མ་ཆད་དམ༔ གནོད་བྱེད་དགྲ་བགེགས་བསྒྲལ་བར་མ་ཆད་དམ༔ ཆད་དོན་དམར་གྱི་གཏོར་མ་འདི་བཞེས་ལ༔ རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད༔ ཧཱུྃ༔ དེ་འོག་སངས་རྒྱས་པདྨ་འབྱུང་གནས་ཀྱིས༔ བོད་ཡུལ་ཁ་བ་ཅན་གྱི་གནས་མཆོག་ཏུ༔ ཆོས་རྒྱལ་ཚངས་པ་ལྷ་ཡི་མེ་ཏོག་དང༔ རྗེ་འབངསགྲུབ་ཆེན་ཉི་ཤུ་རྩ་ལྔ་ལ༔ འཇིགས་བྱེད་ཆེན་པོའི་དཀྱིལ་འཁོར་ཞལ་ཕྱེས་ནས༔ དབང་བསྐུར་བསྒྲུབ་མཆོད་ཕྲིན་ལས་གཞུང་བསྲང་ཚེ༔ རྡོ་རྗེ་ཐེག་པའི་བསྲུངས་མ་ཐམས་ཅད་ཀྱིས༔ རང་རང་གཟུགས་མཆོག་དམ་པ་བསྟན་ནས་ཀྱང་༔ བཀའ་ཡི་གཏོར་མ་ལེན་པར་མ་ཆད་དམ༔ སངས་རྒྱས་བསྟན་པ་བསྲུང་བར་མ་ཆད་དམ༔ སྒྲུབ་མཆོག་མཐུན་རྐྱེན་བསྒྲུབ་པར་མ་ཆད་དམ༔ ས་ལམ་བར་ཆད་བཟློག་པར་མ་ཆད་དམ༔ ལོག་འདྲེན་དམ་སྲི་འདུལ་བར་མ་ཆད་དམ༔ གནོད་བྱེད་དགྲ་བགེགས་བསྒྲལ་བར་མ་ཆད་དམ༔ ཆད་དོན་དམར་གྱི་གཏོར་མ་འདི་བཞེས་ལ༔ རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད༔ ཧཱུྃ༔ སླར་ཡང་སློབ་དཔོན་པདྨ་འབྱུང་གནས་ཀྱིས༔ སློབ་མ་མཐུ་སྟོབས་སངས་རྒྱས་ཡེ་ཤེས་དང་༔ ཏིང་འཛིན་བཟང་དང་ལྷུན་གྱིས་རྒྱལ་མཚན་ལ༔ དུས་དགྲའི་དབང་པོའི་དཀྱིལ་འཁོར་ཞལ་ཕྱེས་ནས༔ དབང་བསྐུར་སྒྲུབ་མཆོད་ཕྲིན་ལས་གཞུང་བསྲང་ཚེ༔ རྡོ་རྗེ་ཐེག་པའི་བསྲུངས་མ་ཐམས་ཅད་ཀྱིས༔ རང་རང་གཟུགས་མཆོག་དམ་པ་བསྟན་ནས་ཀྱང་༔ བཀའ་ཡི་གཏོར་མ་ལེན་པར་མ་ཆད་དམ༔ སངས་རྒྱས་བསྟན་པ་བསྲུང་བར་མ་ཆད་དམ༔ སྒྲུབ་མཆོག་མཐུན་རྐྱེན་བསྒྲུབ་པར་མ་ཆད་དམ༔ ས་ལམ་བར་ཆད་བཟློག་པར་མ་ཆད་དམ༔ ལོག་འདྲེན་དམ་སྲི་འདུལ་བར་མ་ཆད་དམ༔ གནོད་བྱེད་དགྲ་བགེགས་བསྒྲལ་བར་མ་ཆད་དམ༔ ཆད་དོན་དམར་གྱི་གཏོར་མ་འདི་བཞེས་ལ༔ རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད༔ ཧཱུྃ༔ དེ་འོག་དུས་གསུམ་སངས་རྒྱས་པད་འབྱུང་གིས༔ སྐྱབས་མེད་ཕྱི་རབས་དོན་དུ་ཉེར་དགོངས་ནས༔ གཏེར་རིགས་བྱེ་བ་བཅོ་བརྒྱད་སྦས་ནས་ཀྱང་༔ ཆོས་བདག་འདོན་དུས་ལ་སོགས་ལུང་བསྟན་ཏེ༔ གཞི་བདག་དབང་བསྡུས་གཏེར་གྱི་གཉེར་གཏད་ཚེ༔ རང་རང་གཟུགས་མཆོག་དམ་པ་བསྟན་ནས་ཀྱང་༔ བཀའ་ཡི་གཏོར་མ་ལེན་པར་མ་ཆད་དམ༔ སངས་རྒྱས་བསྟན་པ་བསྲུང་བར་མ་ཆད་དམ༔ སྒྲུབ་མཆོག་མཐུན་རྐྱེན་བསྒྲུབ་པར་མ་ཆད་དམ༔ ས་ལམ་བར་ཆད་བཟློག་པར་མ་ཆད་དམ༔ ལོག་འདྲེན་དམ་སྲི་འདུལ་བར་མ་ཆད་དམ༔ གནོད་བྱེད་དགྲ་བགེགས་བསྒྲལ་བར་མ་ཆད་དམ༔ ཆད་དོན་དམར་གྱི་གཏོར་མ་འདི་བཞེས་ལ༔ རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད༔ ཧཱུྃ༔ དེང་སང་སྨོན་ལམ་དུས་སུ་སྨིན་པའི་ཚེ༔ རང་སྣང་འོག་མིན་ཟངས་མདོག་དཔལ་གྱི་རིར༔ སྣང་བ་མཐར་ཡས་གུ་རུ་རིན་པོ་ཆེས༔ རིག་འཛིན་སྔགས་འཆང་ནམ་མཁའ་འཇིགས་མེད་ལ༔ དགོངས་བརྒྱུད་བྱིན་རླབས་ཟབ་གཏེར་བདག་པོ་རུ༔ དབང་བསྐུར་དབུགས་དབྱུང་མངའ་གསོལ་མཛད་པའི་དུས༔ ལྷན་གཅིག་གྲོགས་སུ་སྦྲན་པའི་བསྲུང་མ་ནི༔ དབང་ཆེན་རྣམ་སྤྲུལ་གནོད་སྦྱིན་དམར་ནག་དང་༔ ཡིད་བཞིན་དབང་རྒྱལ་གཟའ་བདུད་རཱ་ཧུ་ལ༔ ཀུན་ཏུ་བཟང་མོ་དབྱིངས་ཀྱི་རྗེ་མོར་བཅས༔ འགྲོ་དོན་རྒྱ་ཆེན་འགྲུབ་པར་ཞལ་བཞེས་ཤིང་༔ རྫོགས་ཆེན་བསྟན་པ་སྐྱོངས་བར་གཉེར་བླང་ཞིང་༔ བཀའ་ཡི་གཏོར་མ་ལེན་པར་མ་ཆད་དམ༔ སངས་རྒྱས་བསྟན་པ་བསྲུང་བར་མ་ཆད་དམ༔ སྒྲུབ་མཆོག་མཐུན་རྐྱེན་བསྒྲུབ་པར་མ་ཆད་དམ༔ ས་ལམ་བར་ཆད་བཟློག་པར་མ་ཆད་དམ༔ ལོག་འདྲེན་དམ་སྲི་འདུལ་བར་མ་ཆད་དམ༔ གནོད་བྱེད་དགྲ་བགེགས་བསྒྲལ་བར་མ་ཆད་དམ༔ ཆད་དོན་དམར་གྱི་གཏོར་མ་འདི་བཞེས་ལ༔ རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད༔ ཞེས་དང་བསྟན་མ་སྐྱོང་བ་ནི༔ བཤལ་ཆུའམ་གཏོར་མར་བྱིན་གྱིས་རླབས་ལ༔ ཧཱུྃ༔ སྔོན་ཚེ་ཆེ་མཆོག་ཚོགས་ཆེན་དཀྱིལ་འཁོར་དུ༔ འཇིག་རྟེན་འདས་ཀྱང་འཇིག་རྟེན་གར་མཛད་པས༔ ཕྱེ་བ་ཕྲག་བརྒྱའི་སྤྲུལ་སྐུའི་ཞིང་ཁམས་སུ༔ པད་འབྱུང་བྱེ་བ་ཕྲག་བརྒྱའི་བཀའ་སྡོད་ཚུལ༔ དུས་གསུམ་སངས་རྒྱས་བསྟན་པ་བསྲུང་པ་དང་༔ རྣལ་འབྱོར་ཅན་ལ་དངོས་གྲུབ་གེགས་བསལ་ཞིང་༔ མུ་སྟེགས་ཀླ་ཀློའི་སོ་ཁ་བསྡམ་པའི་སླད༔ སེམས་ཅན་ཀུན་ལ་ཕན་ཅིང་བདེ་མཛད་པའི༔ རྡོ་རྗེ་ཀུན་གྲགས་རྡོ་རྗེ་གཡའ་མ་སྐྱོང་༔ རྡོ་རྗེ་ཀུན་བཟང་རྡོ་རྗེ་བགེགས་ཀྱི་གཙོ༔ བདུད་མོ་ཆེན་མོ་མཐུ་ཆེན་རྣམ་པ་བཞི༔ འདིར་གཤེགས་དམ་རྫས་བཤལ་ཆུའི་གཏོར་མ་ལོངས༔ རྡོ་རྗེ་སྤྱན་གཅིག་རྡོ་རྗེ་དཔལ་གྱི་ཡུམ༔ རྡོ་རྗེ་ཀླུ་རྒྱལ་རྡོ་རྗེ་དྲག་མོ་སྟེ༔ གནོད་སྦྱིན་ནོར་གྱི་གཏེར་དབང་ཁྱེད་བཞི་ཡང་༔ འདིར་གཤེགས་དམ་རྫས་བཤལ་ཆུའི་གཏོར་མ་ལོངས༔ རྡོ་རྗེ་བདེ་སྐྱོང་རྡོ་རྗེ་སྨན་གཅིག་མ༔ རྡོ་རྗེ་གཡུ་རིང་རྡོ་རྗེ་གཡར་མོ་བསིལ༔ མཛེས་པས་རྨོངས་སེལ་སྨན་མོ་ཆེན་མོ་བཞི༔ འདིར་གཤེགས་དམ་རྫས་བཤལ་ཆུའི་གཏོར་མ་ལོངས༔ འཕྱོར་བག་རྒྱན་བཅས་སྲབ་འཇམ་ལྷབ་ལྷུབ་གོས༔ སིལ་སྙན་སྒྲར་བཅས་ངོ་མཚར་མཚན་དཔེར་བཅས༔ དགྱེས་པའི་གར་བཅས་མཐུ་སྟོབས་རྫུ་འཕྲུལ་བཅས༔ འདིར་བྱིན་དམ་སྐོངས་ཕྲིན་ལས་མཛད་དུ་གསོལ༔ སྔོན་ཚེ་ཡང་ལེ་ཤོད་ཀྱི་གནས་མཆོག་ཏུ༔ ཨོ་རྒྱན་ཆེན་པོ་པདྨ་ཐོད་ཕྲེང་དང་༔ ཐུགས་རྗེ་ཡེ་སྤྲུལ་རྦ་མི་ཁྲི་གཞེར་གྱིས༔ ཞིང་ཆེན་གདན་བཀོད་ལག་ཏུ་རྡོ་རྗེ་གཏད༔ དབང་བསྐུར་གསང་མཚན་རྡོ་རྗེའི་བརྒྱན་པར་བཀོད༔ གསང་སྔགས་དཀྱིལ་འཁོར་རྡོ་རྗེའི་གྲྭལ་དུ་བཅུག༔ ཁྱད་པར་བོད་ཁམས་བསྲུང་སྐྱོབས་མགོན་ཏུ་གསོལ༔ རང་རང་རྣམས་ཀྱི་ཁས་བླངས་ཚུལ་བསྟན་ཟོལ༔ གཡར་དམ་གཉན་པོ་དེ་དག་རྗེས་དགོངས་ལ༔ དམ་རྫས་བཀའ་ཡི་བཤལ་ཆུའི་གཏོར་མ་ལོངས༔ བཅོལ་བའི་ཕྲིན་ལས་སྒྲུབ་པའི་ཡལ་གམ་སྐྱོངས༔ ཨོཾ་ལ་ལ་ལེ་ལེ་ཏཾ་ཏཾཿཏེ་ཏེཿརཾ་རཾ༔ ཁ་རགཿམ་མ་མ་སྲིང་འགྲོ་མ་ཧཱུྃ་བྷྱོ་ཧཱུྃ༔ དེ་ནས་རྟ་བྲོ་བརྡུང་བ་ནི༔ ཧཱུྃ༔ ཆོས་དབྱིངས་ཁྱབ་བརྡལ་ཨེ་ཡི་ཧོམ་ཁུང་དུ༔ འཁོར་གསུམ་འཛིན་པའི་བར་ཆད་དམ་སྲི་བྲུབ༔ དུས་གསུམ་རྒྱལ་བའི་དཀྱིལ་འཁོར་བྲོ་ལ་བསྐུལ༔ བཞེངས་ཤིག་ཕུང་འདྲེའི་གཡོ་འགུལ་མེད་པར་ཆོམས༔ བསྡུ་ན༔ ཧཱུྃ༔ ཕྱོགས་དང་ཕྱོགས་བྲལ༴ སོགས། ཧཱུྃ༔ དབུས་ཕྱོགས་མཉམ་ཉིད་ཡེ་ཤེས་དཀྱིལ་འཁོར་ནས༔ མི་འགྱུར་རྡོ་རྗེའི་འཇམ་དཔལ་གཤིན་རྗེ་གཤེད༔ ཐུགས་ཀྱི་ལྷ་ཚོགས་གླུ་བྲོ་གར་ལ་དགྱེས༔ སེམས་སུ་ལྟ་བའི་རུ་ཏྲ་མནན་ནོ་རྒྱ༔ གྲགས་སྟོང་རྡོ་རྗེ་ཧཱུྃ་སྟེ་ཧཱུྃ་ཞེས་གྲགས༔ ཚིག་ནི་དོན་དམ་ལྟ་བ་རྟོགས་པའི་ཚིག༔ བྲོ་ནི་ཕྱག་རྒྱ་ཆེན་པོར་བཅོམ་ལྡན་མ༔ གར་ནི་རྣམ་པར་རྒྱལ་བའི་དཔའ་རྟགས་གོ༔ རྟ་བྲོ་འདི་ལས་ནམ་ཡང་ལྡང་བ་མེད༔ ཧཱུྃ༔ ཤར་ཕྱོགས་མེ་ལོང་ཡེ་ཤེས་དཀྱིལ་འཁོར་ནས༔ ཡེ་ཤེས་ཆོས་སྐུ་ཞེ་སྡང་གཤིན་རྗེའི་གཤེད༔ སྐུ་ཡི་ལྷ་ཚོགས་གླུ་བྲོ་གར་ལ་དགྱེས༔ ལུས་སུ་ལྟ་བའི་རུ་ཏྲ་མནན་ནོ་རྒྱ༔ གླུ་ནི་སྐྱེ་མེད་ཡིད་དྲུག་རྡོ་རྗེའི་སྒྲ༔ ཚིག་ནི་དག་ཆེན་ལྟ་བ་རྟོགས་པའི་ཚིག༔ བྲོ་ནི་འགྱུར་མེད་ཡེ་གྲོལ་བཅོམ་ལྡན་འདས༔ གར་ནི་རྣམ་པར་རྒྱལ་བའི་དཔའ་རྟགས་གོ༔ རྟ་བྲོ་འདི་ལས་ནམ་ཡང་ལྡང་བ་མེད༔ ཧཱུྃ༔ ལྷོ་ཕྱོགས་ཆོས་དབྱིངས་ཡེ་ཤེས་དཀྱིལ་འཁོར་ནས༔ མངོན་པར་བྱང་ཆུབ་སེར་སྣ་གཤིན་རྗེའི་གཤེད༔ ཡོན་ཏན་ལྷ་ཚོགས་གླུ་བྲོ་གར་ལ་དགྱེས༔ ཡུལ་དུ་ལྟ་བའི་རུ་ཏྲ་མནན་ནོ་རྒྱ༔ གླུ་ནི་རིག་པ་བྱིན་རླབས་གད་རྒྱང་ཆེ༔ ཚིག་ནི་དབྱེར་མེད་ལྟ་བ་རྟོགས་པའི་ཚིག༔ བྲོ་ནི་འཇིགས་ཆེན་འཇིགས་པར་བྱེད་པ་པོ༔ གར་ནི་རྣམ་པར་རྒྱལ་བའི་དཔའ་རྟགས་གོ༔ རྟ་བྲོ་འདི་ལས་ནམ་ཡང་ལྡང་བ་མེད༔ ཧཱུྃ༔ ནུབ་ཕྱོགས་སོར་རྟོགས་ཡེ་ཤེས་དཀྱིལ་འཁོར་ནས༔ ལོངས་སྤྱོད་རྫོགས་སྐུ་འདོད་ཆགས་གཤིན་རྗེའི་གཤེད༔ གསུང་གི་ལྷ་ཚོགས་གླུ་བྲོ་གར་ལ་དགྱེས༔ ངག་དུ་ལྟ་བའི་རུ་ཏྲ་མནན་ནོ་རྒྱ༔ གླུ་ནི་དགོངས་པ་བརྡ་ཡིས་ཧ་ཧ་འཇིགས༔ ཚིག་ནི་ཅིར་ཡང་མ་ཡིན་རྟོགས་པའི་ཚིག༔ བྲོ་ནི་ཆོས་ཀྱི་ཕྱག་རྒྱ་བཅོམ་ལྡན་འདས༔ གར་ནི་རྣམ་པར་རྒྱལ་བའི་དཔའ་རྟགས་གོ༔ རྟ་བྲོ་འདི་ལས་ནམ་ཡང་ལྡང་བ་མེད༔ ཧཱུྃ༔ བྱང་ཕྱོགས་བྱ་གྲུབ་ཡེ་ཤེས་དཀྱིལ་འཁོར་ནས༔ སྤྲུལ་བའི་སྐུ་མཆོག་ཕྲག་དོག་གཤིན་རྗེའི་གཤེད༔ ཕྲིན་ལས་ལྷ་ཚོགས་གླུ་བྲོ་གར་ལ་དགྱེས༔ ལས་སུ་ལྟ་བའི་རུ་ཏྲ་མནོན་ནོ་རྒྱ༔ གླུ་ནི་བརྗོད་པ་ཚིག་གི་ཧི་ཧཱི་རྔམ༔ ཚིག་ནི་ཅིར་ཡང་མ་ཡིན་རྟོགས་པའི་ཚིག༔ བྲོ་ནི་ལས་ཀྱི་ཕྱག་རྒྱ་བཅོམ་ལྡན་འདས༔ གར་ནི་རྣམ་པར་རྒྱལ་བའི་དཔའ་རྟགས་གོ༔ རྟ་བྲོ་འདི་ལས་ནམ་ཡང་ལྡང་བ་མེད༔ ཧཱུྃ༔ ཤར་ལྷོ་ཡེ་གྲོལ་ཡེ་ཤེས་དཀྱིལ་འཁོར་ནས༔ ཐོ་བ་གཤིན་རྗེ་གཤེད་པོའི་ལྷ་ཚོགས་ཀྱིས༔ ཉོན་མོངས་བདུད་དང་རུ་ཏྲ་མནོན་ནོ་རྒྱ༔ གླུ་ནི་ཚངས་པའི་དབྱངས་ཀྱི་འདྲེན་སྟངས་ཀྱིས༔ ཐམས་ཅད་མ་ལུས་དབང་དུ་སྡུད་པར་བྱེད༔ ཚིག་ནི་ཡུལ་མེད་ཟང་ཐལ་ཆེན་པོའི་ཚིག༔ བྲོ་ནི་རྡོ་རྗེའི་འགྲོས་སྟབས་ཆེམས་སེ་ཆེམ༔ གནོད་བྱེད་མ་ལུས་ཕྱེ་མར་འཐག་པའི་བྲོ༔ གར་ནི་རྣམ་པར་རྒྱལ་བའི་དཔའ་རྟགས་གོ༔ རྟ་བྲོ་འདི་ལས་ནམ་ཡང་ལྡང་བ་མེད༔ ཧཱུྃ༔ ལྷོ་ནུབ་མི་གནས་ཡེ་ཤེས་དཀྱིལ་འཁོར་ནས༔ དབྱུག་པ་གཤིན་རྗེ་གཤེད་པོའི་ལྷ་ཚོགས་ཀྱིས༔ ཕུང་པོའི་བདུད་དང་རུ་ཏྲ་མནན་ནོ་རྒྱ༔ གླུ་ནི་འཁུར་བ་དབུགས་ཀྱིས་དབྱིངས་སུ་བླང་༔ ཁྲོ་བོ་ཁྲོ་མོའི་སྤྲུལ་བ་གྲངས་མེད་འཕྲོ༔ ཚིག་ནི་གཞི་མེད་རྩ་བ་བྲལ་བའི་ཚིག༔ བྲོ་ནི་མ་རུང་དྲེགས་པ་འདུལ་བ་ཡིས༔ དགྲ་བགེགས་དམ་སྲིའི་མགོ་ལུས་འགེམས་པའི་བྲོ༔ གར་ནི་རྣམ་པར་རྒྱལ་བའི་དཔའ་རྟགས་གོ༔ རྟ་བྲོ་འདི་ལས་ནམ་ཡང་ལྡང་བ་མེད༔ ཧཱུྃ༔ ནུབ་བྱང་རང་གྲོལ་ཡེ་ཤེས་དཀྱིལ་འཁོར་ནས༔ པདྨ་གཤིན་རྗེ་གཤེད་པོའི་ལྷ་ཚོགས་ཀྱིས༔ དགའ་བྲོད་ལྷའི་བདུད་རུ་ཏྲ་མནན་ནོ་རྒྱ༔ འབྲུག་ལྟར་ཟབ་ཅིང་རྒྱ་ཆེའི་གླུ་བླང་བའི༔ གཏུམ་དང་གདུག་པ་མ་ལུས་ལྷན་ནེར་འགྱུར༔ ཚིག་ནི་མིང་མེད་སྤྲོས་ལས་འདས་པའི་ཚིག༔ བྲོ་ནི་དམ་སྲི་ཐལ་བར་བརླག་པ་ཡི༔ གར་ནི་རྣམ་པར་རྒྱལ་བའི་དཔའ་རྟགས་གོ༔ རྟ་བྲོ་འདི་ལས་ནམ་ཡང་ལྡང་བ་མེད༔ ཧཱུྃ༔ བྱང་ཤར་བྱང་ཆུབ་སེམས་ཀྱི་དཀྱིལ་འཁོར་ནས༔ རལ་གྲི་གཤིན་རྗེ་གཤེད་པོའི་ལྷ་ཚོགས་ཀྱིས༔ འཆི་བདག་བདུད་ཀྱི་རུ་ཏྲ་མནན་ནོ་རྒྱ༔ གླུ་ནི་རྡོ་རྗེ་སྲིན་པོའི་ངུར་སྐད་ཀྱིས༔ སྲི་གདོན་རྒབ་འདྲེ་མ་ལུས་དཔའ་སྐོང་འདུལ༔ ཚིག་ནི་ལ་བཟླའ་ཨ་ཏི་ཡོ་གའི་ཚིག༔ བྲོ་ནི་རྡོ་རྗེའི་ཟིལ་གནོན་འབར་བ་ཡིས༔ དགྲ་བགེགས་དམ་སྲིའི་བརྟན་པ་འཕྲོག་པར་ཕྱེད༔ གར་ནི་རྣམ་པར་རྒྱལ་བའི་དཔའ་རྟགས་གོ༔ རྟ་བྲོ་འདི་ལས་ནམ་ཡང་ལྡང་བ་མེད༔ ཧཱུྃ༔ ཕྱོགས་དང་ཕྱོགས་བྲལ་དཀྱིལ་འཁོར་ཡངས་བ་ཆེར༔ ཤེས་རབ་མཚོན་ཆེན་རྣམ་པར་འཇོམས་པའི་བདག༔ བདུན་བརྒྱ་ཉི་ཤུའི་དཀྱིལ་འཁོར་ལྷ་ཚོགས་ཀྱིས༔ གླུ་ནི་འཁུན་གདུང་ཧཱུྃ་ཧཱུྃ་སྒྲ་འབྱིན་ཅིང་༔ དྲེགས་པའི་གདུག་ཅིང་སྡང་ལྡན་རྡུལ་དུ་རློགས༔ ཚིག་ནི་ཁྱབ་བརྡལ་ནམ་མཁའི་འཁོར་ཡུག་ཁྱོན༔ བྲོ་ནི་དྲེགས་པ་བདུད་དཔུང་འདུལ་བྱེད་པའི༔ ལོག་འདྲེན་ཡིད་སྲུབ་རྨེག་མེད་བརླགས་པའི་བྲོ༔ གཏུམ་ཆེན་ཁྲོ་བོའི་གར་སྟབས་ལོག་གེ་ལོག༔ གར་ནི་རྣམ་པར་རྒྱལ་བའི་དཔའ་རྟགས་གོ༔ ཕྱག་རྒྱ་འདི་ལས་ནམ་ཡང་འདའ་བ་མེད༔ ཧཱུྃ༔ རྟ་བྲོ་འཁོར་ཅིག་གནམ་ནས་བརྡུང་༔ སྙོམས་འཇུག་འཁྲུལ་རྟོག་མནན་ནོ་རྒྱ༔ གཟུགས་མེད་མུ་བཞི་ཟིལ་གྱིས་གནོན༔ ཆོས་ཀྱི་སྐུ་ཡི་བྲོ་རྒྱས་གདབས༔ རྟ་བྲོ་འཁོར་ཅིག་བར་ནས་བརྡུང་༔ བསམ་གཏན་འཁྲུལ་རྟོག་མནན་ནོ་རྒྱ༔ གཟུགས་ཁམས་བཅུ་བདུན་ཟིལ་གྱིས་གནོན༔ ལོངས་སྤྱོད་རྫོགས་སྐུའི་བྲོ་རྒྱས་གདབས༔ རྟ་བྲོ་འོག་མ་ས་ནས་བརྡུང་༔ འདོད་ཡོན་འཁྲུལ་རྟོག་མནན་ནོ་རྒྱ༔ འདོད་ཁམས་ཉི་ཤུ་ཟིལ་གྱིས་གནོན༔ སྤྲུལ་བ་སྐུ་ཡི་བྲོ་རྒྱས་གདབས༔ ཐབས་ཀྱི་བྲོ་བརྡུང་གཡས་སུ་བརྡུང་༔ ཞེ་སྡང་དགྲ་བགེགས་བསད་མནན་རྒྱ༔ ཤེས་རབ་བྲོ་བརྡུང་གཡོན་ཏུ་བརྡུང་༔ འདོད་ཆགས་དགྲ་བགེགས་བསད་མནན་རྒྱ༔ ཟུང་འཇུག་བྲོ་བརྡུང་བསྣོལ་མར་བརྡུང་༔ གཏི་མུག་དགྲ་བགེགས་བསད་མནན་རྒྱ༔ དགྲ་ནི་ཐལ་བར་བརླགས་པའི་བྲོ༔ བགེགས་ནི་ཕྱེ་མར་རློག་པའི་བྲོ༔ གླུ་བྲོ་གར་གྱི་ཕྱག་རྒྱ་ཆེས༔ བྱང་ཆུབ་སེམས་ནི་མ་སྐྱེས་པར༔ ནམ་ཡང་ལྡང་མེད་བརྟུལ་ཞུགས་སྤྱོད༔ ཨོཾ་ཕེཾ་ཀ་ར༔ ཧ་ཧ༔ ཧི་ཧི༔ ཧཱུྃ་ཧཱུྃ༔ ཨོཾ་ཡ་མཱནྟ་ཀ་ཧཱུྃ༔ སརྦ་ཤ་ཏྲུན་ཀ་ཡ་ཝཀྐ་ཙིཏྟ་སྟྭཾ་བྷ་ཡ་ནན་མ་ར་ཡ་ནན ༔ ལུག་རྒྱུད་དལ་སྦྲེལ་རྒྱས་པའི་བྲོ༔ མནན་བསྲེགས་འཕང་གསུམ་ཕྲིན་ལས་ནི༔ སྤྲོས་ཤིང་དགོས་གལ་དུས་མ་གཏོགས༔ གཞན་དུ་བསྡུས་པ་ཙམ་གྱིས་ཆོག༔ དངོས་གྲུབ་བླང་བའི་རིམ་པ་ནི༔ ཧཱུྃ༔ རྒྱལ་ཀུན་རྒྱལ་མཛད་ཡང་དག་མཆོག་གི་སྐུའི༔ རྟེན་གྱུར་རྟེན་འབྲེལ་འདུས་བྱས་མཐའ་ལས་གྲོལ༔ ཟག་མེད་ཟག་བཅས་ཉེར་ལེན་སྡུག་བསྔལ་མཐའི༔ འཇིག་རྟེན་འཇིགས་བྱེད་འཇོམས་པའི་དགེ་མཚན་གྱིས༔ རྡོ་རྗེའི་རང་བཞིན་མི་འགྱུར་ཆོས་ཁམས་སུ༔ རྣམ་སྨིན་སྐྱེས་པའི་ཟུག་རྔུ་ངང་གྲོལ་ཁྱོད༔ ཡིད་ཅན་ཀུན་ལ་ཉེ་བར་མཛད་ནས་ཀྱང་༔ གཟུགས་མེད་གཟུགས་བཟང་དམ་བའི་དངོས་གྲུབ་སྩོལ༔ ཨོཾ་ཨཱཿབཛྲ་ཡ་མཱནྟ་ཀ་སརྦ་སིདྡྷི་ཕ་ལ་ཧཱུྃ༔ ཨཱ༔ མ་སྐྱེས་མ་འགགས་གྲགས་སྟོང་ན་དཱའི་དབྱངས༔ རྩོལ་མེད་རྩོལ་བྱུང་འཁྲུལ་བའི་འཁོར་ལོ་གཅོད༔ རྣམ་རིགས་རྣམ་པའི་གཟུགས་དོན་ཅིར་ཡང་སྟོན༔ བརྗོད་མེད་བརྗོད་པའི་བརྡར་གྱུར་དགེ་མཚན་གྱིས༔ པདྨའི་རང་བཞིན་སངས་རྒྱས་དགྱེས་བཞད་རོལ༔ ཡང་དག་མཐའ་སྟེ་བདག་མེད་སེངྒེའི་སྒྲ༔ ཡི་གེ་མེད་པ་སྒྲ་དང་ལྡན་པའི་མཆོག༔ ཟབ་དང་རྒྱ་ཆེ་གསུང་གི་དངོས་གྲུབ་སྩོལ༔ ཨོཾ་ཨཱཿབཛྲ་ཡ་མཱནྟ་ཀ་སརྦ་སིདྡྷི་ཕ་ལ་ཧཱུྃ༔ ཨ་ཧཱུྃ༔ མཆོག་སྦྱིན་མཆོག་ཁྱོད་སངས་རྒྱས་བྱང་ཆུབ་ཐུགས༔ སྟོང་ཉིད་སྟོང་སྨོན་མཚན་མའི་རྣམ་དབེན་ཀྱང་༔ དེ་བཞིན་དེ་དང་རོ་མཉམ་རྟོགས་པ་རྒྱས༔ དུས་གསུམ་དུས་མེད་འཁོར་ལོ་སྡོམ་པའི་དཔལ༔ སྐད་ཅིག་ཆ་མེད་ཆོས་སུ་ཞེན་པའི་བློ༔ སེམས་དང་སེམས་བྱུང་ཁམས་གསུམ་རྟོག་བཏགས་ཀུན༔ སྒྲོ་བསྐུར་གཉིས་ཀྱི་སྣང་ཞེན་རང་གྲོལ་བའི༔ ཁྱད་ཆོས་དྲུག་གིས་གྲོལ་བའི་དངོས་གྲུབ་སྩོལ༔ ཨོཾ་ཨཱཿབཛྲ་ཡ་མཱནྟ་ཀ་སརྦ་སིདྡྷི་ཕ་ལ་ཧཱུྃ༔ སྡིག་ལྟུང་ནོངས་པ་བཤགས་པ་ནི༔ ཧཱུྃ༔ ལུས་ཀྱི་དགེ་དང་མི་དགེའི་སྤྱོད་པ་ཀུན༔ འཇམ་དཔལ་ཡ་མཱནྟ་ཀའི་སྐུ་ཡི་ངང་༔ དེ་ལྟར་མ་རྟོགས་གཟུང་དང་འཛིན་པས་བཅིངས༔ ཅེར་གྲོལ་ཆེན་པོའི་ངང་དུ་ནོངས་མཛད་སུན༔ ཧཱུྃ༔ ངག་གི་དགེ་དང་མི་དགེའི་སྤྱོད་པ་ཀུན༔ འཇམ་དཔལ་ཡ་མཱནྟ་ཀའི་གསུང་གི་ངང་༔ དེ་ལྟར་མ་རྟོགས་གཟུང་དང་འཛིན་པས་བཅིངས༔ མཐའ་གྲོལ་ཆེན་པོའི་ངང་དུ་ནོངས་མཛད་སུན༔ ཧཱུྃ༔ སེམས་ཀྱི་དགེ་དང་མི་དགེའི་སྤྱོད་པ་ཀུན༔ འཇམ་དཔལ་ཡ་མཱནྟ་ཀའི་ཐུགས་ཀྱི་ངང་༔ དེ་ལྟར་མ་རྟོགས་གཟུང་དང་འཛིན་པས་བཅིངས༔ རང་གྲོལ་ཆེན་པོའི་ངང་དུ་ནོངས་མཛད་སུན༔ ཧཱུྃ༔ ཀུན་ཏུ་སྦྱོར་བའི་མཆོག་འཛིན་སྤྱོད་པ་ཀུན༔ འཇམ་དཔལ་ཡ་མཱནྟ་ཀའི་ཡོན་ཏན་ངང་༔ དེ་ལྟར་མ་རྟོགས་གཟུང་དང་འཛིན་པས་བཅིངས༔ ཡོངས་གྲོལ་ཀུན་ཏུ་སྤྱོད་པའི་ནོངས་མཛད་སུན༔ ཧཱུྃ༔ ཅིར་སྣང་ཅི་སྤྱོད་སྤྲུལ་བའི་མཛད་སྤྱོད་ཀུན༔ འཇམ་དཔལ་ཡ་མཱནྟ་ཀའི་ཕྲིན་ལས་ངང་༔ དེ་ལྟར་མ་རྟོགས་གཟུང་དང་འཛིན་པས་བཅིངས༔ གཅིག་གྲོལ་ཆེན་པོའི་ངང་དུ་ནོངས་མཛད་སུན༔ རྟེན་གྱི་སྟོབས་འདི་དུས་གསུམ་ཀུན་ཏུ་བཙུན༔ ཞེས་ཡིག་བརྒྱ་བཟླའོ༔ སྟོབས་ལྔ་ལྡན་པས་བཤགས་སོ༔ དགེ་བ་བསྔོ་བ་ནི༔ ཧཱུྃ༔ ཚོགས་བརྒྱད་ཡེ་ཤེས་ལྔ་རུ་སངས་རྒྱས་ཤིང་༔ ཕུང་པོ་འཇམ་དཔལ་རིགས་ལྔར་མངོན་བྱང་ཆུབ༔ འབྱུང་ལྔ་དབྱངས་ཅན་རིགས་ལྔར་ཡེ་གྲོལ་བས༔ ཁ་དོག་དབྱིངས་ཀྱི་ངོ་བོར་དག་རྫོགས་སྨིན༔ ཡུལ་དྲུག་ཀུན་བཟང་རྒྱན་གྱི་འཁོར་ལོ་ལ༔ རྟེན་འབྲེལ་དུས་སྦྱོར་བདེན་དོན་དེ་ཉིད་རིག༔ རྣམ་པ་ཉི་ཤུ་བྱང་ཆུབ་ལྷ་ཡི་ངང་༔ ཤེས་པས་སྲིད་འབྱུང་སྐྱེ་གནས་ཟད་པའི་དངོས༔ བདེན་དོན་དེས་གོ་སེམས་ཅན་གཅིག་ཀྱང་མེད༔ ཕྱམ་གཅིག་རང་གྲོལ་རྡོ་རྗེའི་ས་ལ་གནས༔ མ་རྟོགས་རྨི་ལམ་འཁྲུལ་བའི་བརྫུ་བག་ཀྱང་༔ ཅེར་གྲོལ་མཐོང་ཡལ་ཆེན་པོའི་ཀློང་དུ་ཨཱ༔ བསྔོ་ཞིང་སྨོན་ལམ་གདབ་པ་ནི༔ ཧཱུྃ༔ སངས་རྒྱས་ཀུན་དངོས་འཇམ་དཔལ་ཡེ་ཤེས་སེམས༔ འགྲོ་བ་ཡོངས་ལ་ཕྲི་བསྣན་མེད་པར་བཞུགས༔ དབྱེར་མེད་རང་བྱུང་ཡེ་ཤེས་དེ་བཞིན་ཉིད༔ འབྲས་བུ་ངོ་བོ་སྨོན་པ་མེད་པར་རྫོགས༔ ངང་བཞག་ལྷུན་འབྱམས་བརྡལ་བ་ཆེན་པོ་ཡིས༔ ངོ་བོ་མངོན་གྱུར་ལ་བཟླ་མཆོག་གི་མཐུས༔ རང་ཐོག་རང་གདེངས་ཐོབ་པའི་རྒྱལ་ས་ལས༔ མི་གཡོའི་གཏན་སྲིད་ཟིན་པའི་དགེ་མཚན་དེས༔ གདུལ་བྱའི་མངའ་རིས་ཡོངས་ལ་དབུགས་འབྱིན་གྱི༔ དགའ་ཆེན་རོལ་མོའི་དུས་སྟོན་རྒྱ་ཆེ་བ༔ གནས་སྐབས་ཕྱོགས་དུས་འཇིག་རྟེན་ཐམས་ཅད་དུ༔ ངན་སོང་ངན་འགྲོ་ལོག་པ་རྒྱུན་ཆད་ནས༔ གཞན་འཕྲུལ་ལྷ་ཡི་དཔལ་ལ་ལོངས་སྤྱོད་ཤོག༔ མཐར་ཐུགས་སྲིད་ཞིའི་གདུང་བ་ཀུན་བསལ་ཞིང་༔ འཆི་མེད་རྡོ་རྗེ་འཇིགས་བྱེད་ཚེ་ཡི་བདག༔ དམ་པ་དང་པོའི་སངས་རྒྱས་བླ་མེད་ཀྱི༔ གོ་འཕང་མཆོག་གི་བགོ་སྐལ་ཐོབ་པར་ཤོག༔ རྫོགས་པའི་རིམ་པའི་རྣལ་འབྱོར་ནི༔ ཨཱ༔ འཁོར་བའི་སྣང་བ་དག་པ་རབ་འབྱམས་ཀྱི༔ ལྷ་སྔགས་ཡེ་ཤེས་འཁོར་ལོར་ཡེ་གྲོལ་ཏེ༔ མྱང་འདས་མཚན་མར་ཞེན་པའི་རྟོག་སྒྲིབ་ཀྱང་༔ ཆོས་སྐུ་རྒྱ་ཆད་ཕྱོགས་ལྷུང་མེད་པར་ཡན༔ དམ་ཚིག་འདི་ཉིད་རྔོ་མ་ཐོགས་པ་ཡིས༔ ཞིང་ཁམས་ལྷ་དང་འཁོར་རྣམས་གཙོ་བོ་ལ༔ སེམས་དཔའ་སུམ་བརྩེགས་རིམ་ཡལ་གདོད་མའི་གཤིས༔ ཡུམ་ཆེན་བཱཻ་ཏ་ལི་ཡི་ཀློང་དུ་བཞག༔ སླར་ཡང་ཟུང་འཇུག་ཕྱག་རྒྱར་ལྡང་༔ ཧཱུྃ༔ སྦྱང་བྱ་དྲི་བཅས་གཞི་ཡི་འོད་གསལ་ལས༔ ལུགས་འབྱུང་སྣང་བ་གསུམ་གྱི་རྟེན་འབྲེལ་སྒོ༔ རྣམ་པར་སྨིན་པའི་རྒྱུད་དང་འབྲས་བུ་རུ༔ ཤར་བའི་རྣམ་པ་ཉིད་དང་མཐུན་པ་ཡི༔ སྦྱོང་བྱེད་ཆོས་སྐུའི་བསྲེ་བ་ལས་བཞེངས་ནས༔ གཟུགས་སྐུའི་བསྲ་བ་གསུམ་གྱི་ཉམས་ལེན་གྱིས༔ སྟོང་བ་ཆད་པོའི་གཡང་ས་ལས་བཟུང་སྟེ༔ ཟུང་འཇུག་ལམ་གྱི་གྲུབ་མཐའ་སྙོགས་པར་སྨོན༔ སྦྱང་འབྲས་ཆོས་ཀྱི་སྐུ་ལ་ལོངས་སྤྱོད་རྫོགས༔ འགྲོ་ལ་ཕན་མཛད་སྤྲུལ་སྐུའི་སྤྲིན་འཕྲོས་ནས༔ འགགས་མེད་ཕྲིན་ལས་སྲིད་ཞི་ཀུན་ཁྱབ་པའི༔ ཧེ་རུ་ཀ་དཔལ་རྡོ་རྗེའི་ཕྱག་རྒྱར་ལྡང་༔ ཨོཾ་བཛྲ་ཨ་ར་པ་ཙ་ན་ཡ་ཏེ༔ ན་མ་ཡ་མཱནྟ་ཀ་ཧོ༔ དེ་ནས་བཀྲ་ཤིས་བརྗོད་པ་ནི༔ ཧཱུྃ༔ བཀྲ་ཤིས་ཀུན་གྱི་གཏེར་འབྱུང་ཀ་ནས་དག༔ མཁྱེན་པའི་ཡེ་ཤེས་ནོར་བུའི་སྒྲོན་གཅིག་པུ༔ སྲས་བཅས་རྒྱལ་བའི་རིགས་བདག་བཅོམ་ལྡན་འདས༔ འཇམ་དཔལ་ཡེ་ཤེས་སེམས་དཔའི་བཀྲ་ཤིས་ཤོག༔ ཆོས་དབྱིངས་མཁའ་ལ་ཐུགས་རྗེའི་འོད་སྟོང་འབར༔ འགྲོ་བའི་འཆི་བདག་མུན་པའི་སྡེ་དཔུང་བཅིལ༔ ཁྲོ་ལ་ཁྲོས་པས་ཞི་མཛད་འབར་བའི་རྒྱལ༔ ཆེ་མཆོག་དུས་འགྲའི་དབང་པོའི་བཀྲ་ཤིས་ཤོག༔ ཤེས་རབ་ཕ་རོལ་ཕྱིན་པའི་ཡུམ་ཆེན་མོ༔ སྦྱོར་དང་སྒྲོལ་བའི་གར་མཛད་ཁྲོས་པའི་ཚུལ༔ ཆགས་མེད་ཆགས་པས་འདུལ་ཚུལ་ཐབས་ལ་མཁས༔ དགྱེས་བསྐྱེད་རྡོ་རྗེ་བཙུན་མོའི་བཀྲ་ཤིས་ཤོག༔ སྐུ་གསུང་ཐུགས་དང་ཡོན་ཏན་ཕྲིན་ལས་ཀྱི༔ སྒྱུ་འཕྲུལ་འཁོར་ལོའི་འདུལ་མཛད་གཤེད་ཆེན་བཞི༔ བཀའ་སྡོད་བཅུ་གཉིས་སྒོ་བསྲུང་གཤེད་བདུད་ཀིང་༔ བདུན་བརྒྱ་ཉི་ཤུའི་ལྷ་ཡི་བཀྲ་ཤིས་ཤོག༔ འཇམ་དཔལ་འཁོར་ལོའི་དབང་ཕྱུག་དཀོན་མཆོག་གསུམ༔ དགེ་མཚན་བཀྲ་ཤིས་དཔལ་གྱི་འཛད་མེད་གཏེར༔ གང་ལ་ཡོད་པའི་མཆོག་དང་ཐུན་མོང་གི༔ དངོས་གྲུབ་རྒྱ་མཚོའི་བརྒྱན་པའི་བཀྲ་ཤིས་ཤོག༔ གསང་ཆེན་བླ་ན་མེད་པའི་རྒྱུད་སྡེའི་དབྱིངས༔ མ་ལུས་ཀུན་འབྱུང་ཀུན་གྱི་སྤྱི་ཕུད་བསྡུས༔ གང་ལ་ཡོད་པའི་ཕན་བདེའི་དགེ་མཚན་དཔྱིད༔ དེང་འདིར་འཇིག་རྟེན་ཀུན་ལ་བཀྲ་ཤིས་ཤོག༔ རྣམ་སྨིན་ཚེ་དབང་ཕྱག་རྒྱ་ལྷུན་གྱིས་གྲུབ༔ བྱང་ཆུབ་སེམས་དཔའ་སྔགས་ཀྱི་རིག་པ་འཛིན༔ གང་ལ་ཡོད་པའི་ཕན་བདེའི་དགེ་མཚན་དཔྱིད༔ དེང་འདིར་འཇིག་རྟེན་ཀུན་ལ་བཀྲ་ཤིས་ཤོག༔ ཕན་བདེའི་རྩ་ལག་བསྟན་དང་བསྟན་འཛིན་རྣམས༔ ཞབས་པད་སྲིད་པ་ཇི་སྲིད་བརྟན་པ་དང་༔ བསྟན་པའི་མངའ་ཐང་ཕྱོགས་བཅུར་རྒྱས་པ་ཡིས༔ དེང་འདིར་འཇིག་རྟེན་ཀུན་ལ་བཀྲ་ཤིས་ཤོག༔ སྒྲུབ་སྡེ་མཆོད་བསྟོད་འདི་ཡི་གཟི་བྱིན་གྱིས༔ མ་རུང་མི་སྲུན་དུས་ཀྱི་ཆར་གཏོགས་པ༔ ཚར་གཅོད་རྡུལ་དུ་བརླག་པར་མཛད་པ་ཡི༔ དེང་འདིར་འཇིག་རྟེན་ཀུན་ལ་བཀྲ་ཤིས་ཤོག༔ ལྔ་བདོའི་རྒུད་པའི་ནད་མུག་མཚོན་འཁྲུགས་དང་༔ བྱང་ཆུབ་བསྒྲུབ་པའི་འགལ་རྐྱེན་བར་ཆད་ཞི༔ མཐུན་རྐྱེན་སྨོན་དགུ་ཡིད་བཞིན་འགྲུབ་པ་ཡི༔ དེང་འདིར་འཇིག་རྟེན་ཀུན་ལ་བཀྲ་ཤིས་ཤོག༔ མཐར་ཐུག་འཆི་བདག་ལ་སོགས་བདུད་བཞི་བཅོམ༔ འཆི་མེད་གཉུག་མའི་རྡོ་རྗེ་འཇིགས་བྱེད་ཀྱི༔ གོ་འཕང་ཡང་དག་མཆོག་གི་གནས་ཐོབ་ནས༔ ཁམས་གསུམ་འཁོར་བ་དོང་སྤྲུགས་བཀྲ་ཤིས་ཤོག༔ འདི་ལྟར་རྣམ་པར་བརྩོན་བྱས་ན༔ ཀླ་ཀློ་གདུག་པའི་རྒྱུ་སྲང་ཆད༔ རྣལ་འབྱོར་ཆོས་བྱེད་བར་ཆད་སེལ༔ གནས་སྐབས་འཆི་བའི་འཇིགས་ལས་སྐྱོབས༔ མཐར་ཐུག་མགོན་པོའི་སྐུ་ཐོབ་འགྱུར༔ གལ་ཏེ་བདེན་སྟོབས་མ་མཐོང་ན༔ པདྨས་བསླུས་སོ་ཕྱི་རབས་རྣམས༔ ས་མ་ཡཱ༔ རྒྱ་རྒྱ་རྒྱ༔ ཅེས་པ་འདི་ནི་རིག་འཛིན་ཆེན་པོ་ཤེས་རབ་མེ་འབར་གྱིས་གསུངས་བསྐུལ་ངོར་སྔགས་སྨྱོན་ག་གཱ་ཨ་བྷྱེས་སོ། །དགེའོ། །དགེའོ། །དགེའོ། །

གསོལ་འདེབས་དངོས་གྲུབ་བང་མཛོད།

དྲེགས་པ་འཇོམས་མཛད་ཆེན་པོའི་གསོལ་འདེབས་དངོས་གྲུབ་བང་མཛོད་བཞུགས་སོ༔

ཨེ་མ་ཧོ༔ ཆོས་སྐུའི་སྟོན་པ་ཀུན་བཟང་ཡབ་ཡུམ་ལ༔གསོལ་བ་འདེབས་སོ་དངོས་གྲུབ་རྣམ་གཉིས་སྩོལ༔ ལོངས་སྐུའི་སྟོན་པ་རིགས་ལྔའི་སངས་རྒྱས་ལ༔ གསོལ་བ་འདེབས་སོ་དངོས་གྲུབ་རྣམ་གཉིས་སྩོལ༔ སྤྲུལ་སྐུའི་སྟོན་པ་རིགས་གསུམ་མགོན་པོ་ལ༔ གསོལ་བ་འདེབས་སོ་དངོས་གྲུབ་རྣམ་གཉིས་སྩོལ༔ སྒྲུབ་སྡེའི་སྟོན་པ་རྡོར་འཆང་རྡོ་རྗེ་ཆོས༔ གསོལ་བ་འདེབས་སོ་དངོས་གྲུབ་རྣམ་གཉིས་སྩོལ༔ བཀའ་ཡི་སྡུད་པོ་ལས་ཀྱི་དབང་མོ་ལ༔ གསོལ་བ་འདེབས་སོ་དངོས་གྲུབ་རྣམ་གཉིས་སྩོལ༔ དམ་པའི་རིགས་ཅན་དྲ་མ་རྣམ་ལྔ་ལ༔ གསོལ་བ་འདེབས་སོ་དངོས་གྲུབ་རྣམ་གཉིས་སྩོལ༔ བཀའ་བབས་ཆེན་པོ་མཉྫུ་མི་ཏྲ་ལ༔ གསོལ་བ་འདེབས་སོ་དངོས་གྲུབ་རྣམ་གཉིས་སྩོལ༔ སྟོན་པའི་ཞལ་སྐྱིན་རྡོ་རྗེ་ཐོད་ཕྲེང་ལ༔ གསོལ་བ་འདེབས་སོ་དངོས་གྲུབ་རྣམ་གཉིས་སྩོལ༔ ཡོན་ཏན་མཆོག་གཉིས་ ༼ བརྙེས་དཔྱད། ༽ པདྨ་སཾ་བྷ་ལ༔ གསོལ་བ་འདེབས་སོ་དངོས་གྲུབ་རྣམ་གཉིས་སྩོལ༔ མུ་སྟེགས་ཚར་གཅོད་སེངྒེ་སྒྲ་སྒྲོགས་ལ༔ གསོལ་བ་འདེབས་སོ་དངོས་གྲུབ་རྣམ་གཉིས་སྩོལ༔ རིག་འཛིན་ཀུན་མཆོག་བི་མ་མི་ཏྲ་ལ༔ གསོལ་བ་འདེབས་སོ་དངོས་གྲུབ་རྣམ་གཉིས་སྩོལ༔ སྐུ་ཡི་རིག་འཛིན་སངས་རྒྱས་ཡེ་ཤེས་ལ༔ གསོལ་བ་འདེབས་སོ་དངོས་གྲུབ་རྣམ་གཉིས་སྩོལ༔ ཡོན་ཏན་རིག་འཛིན་ཛྙཱ་ན་ཀུ་མ་ལ༔ གསོལ་བ་འདེབས་སོ་དངོས་གྲུབ་རྣམ་གཉིས་སྩོལ༔ པདྨའི་བཀའ་གཏད་ལྷ་ལྕམ་པདྨ་ལ༔ གསོལ་བ་འདེབས་སོ་དངོས་གྲུབ་རྣམ་གཉིས་སྩོལ༔ དུས་བབས་གཏེར་བདག་ནམ་མཁའ་འཇིགས་མེད་ལ༔ གསོལ་བ་འདེབས་སོ་དངོས་གྲུབ་རྣམ་གཉིས་སྩོལ༔ བདུད་བཞི་དབྱིངས་སྒྲོལ་རྡོ་རྗེ་ཤུགས་ཆེན་ལ༔ གསོལ་བ་འདེབས་སོ་དངོས་གྲུབ་རྣམ་གཉིས་སྩོལ༔ སྐུ་གསུང་ཐུགས་ཡོན་གཤེད་ཆེན་རྣམ་བཞི་ལ༔ གསོལ་བ་འདེབས་སོ་དངོས་གྲུབ་རྣམ་གཉིས་སྩོལ༔ གང་འདུལ་ཚུལ་བསྟན་སྒྱུ་འཕྲུལ་བཅུ་གཉིས་ལ༔ གསོལ་བ་འདེབས་སོ་དངོས་གྲུབ་རྣམ་གཉིས་སྩོལ༔ བཀའ་སྡོད་ཚུལ་འཛིན་བདུན་བརྒྱ་ཉི་ཤུ་ལ༔ གསོལ་བ་འདེབས་སོ་དངོས་གྲུབ་རྣམ་གཉིས་སྩོལ༔ དེ་ལྟར་གསོལ་བ་བཏབས་པའི་མཐུ་བྱིན་གྱིས༔ འཆི་མེད་ཚེ་ཡི་རིག་འཛིན་མཆོག་གྲུབ་ཅིང་༔ བསྟན་པའི་དགྲ་བགེགས་མཐའ་དག་རྨེག་མེད་འཇོམས༔ མཐར་ཐུག་ཡ་མནྟ་ཀའི་གནས་ཐོབ་ནས༔ ཁམས་གསུམ་འགྲོ་བ་ཀུན་གྱི་ལམ་སྟོན་དུ༔ གྱུར་ནས་ས་གསུམ་ཕན་བདེའི་ཁྱབ་གྱུར་ཅིག༔ ཅེས་དང་༔ ཤིན་ཏུ་བསྡུ་ན༔ ཀུན་བཟང་རིགས་ལྔ་རིགས་གསུམ་མགོན་པོ་དང་༔ ལས་ཀྱི་དབང་མོ་རིགས་ཅན་རྣམ་པ་ལྔ༔ འཇམ་བཤེས་པད་འབྱུང་བི་མ་ལ་མི་ཏྲ༔ སངས་རྒྱས་ཡེ་ཤེས་གཉགས་ཆེན་ཛྙཱ་ནའི་ཞབས༔ པདྨ་གསལ་དང་ནམ་མཁའ་འཇིགས་མེད་པ༔ རྡོ་རྗེ་འཇིགས་བྱེད་དཀྱིལ་འཁོར་ལྷ་ཚོགས་ལ༔ གསོལ་བ་འདེབས་སོ་དངོས་གྲུབ་རྣམ་གཉིས་སྩོལ༔ དེ་ལྟར་གསོལ་བ་བཏབས་པའི་མཐུན་བྱིན་གྱིས༔ འཆི་མེད་ཚེ་ཡི་རིག་འཛིན་མཆོག་གྲུབ་ཅིང་༔ བསྟན་པའི་དགྲ་བགེགས་མཐའ་དག་རྨེག་མེད་འཇོམས༔ མཐར་ཐུག་ཡ་མཱནྟ་ཀའི་གནས་ཐོབ་ནས༔ ཁམས་གསུམ་འགྲོ་བ་ཀུན་གྱི་ལམ་སྟོན་དུ༔ གྱུར་ནས་ས་གསུམ་ཕན་བདེའི་ཁྱབ་གྱུར་ཅིག༔

ཅེས་ཀྱང་ག་གཱས་སོ། །

གཤིན་རྗེ་གཤེད་ཀྱི་ལས་བྱང་བསྡུས་པ་དུས་དགྲའི་དཔུང་འཇོམས།

ཡེ་ཤེས་སྒྱུ་འཕྲུལ་དྲྭ་བ་ལས༔ གཤིན་རྗེ་གཤེད་ཀྱི་ལས་བྱང་བསྡུས་པ་དུས་དགྲའི་དཔུང་འཇོམས་བཞུགས་སོ༔

ན་མོ་དཀོན་མཆོག་གསུམ་ལ་སྐྱབས་སུ་མཆི༔ བྱང་ཆུབ་སེམས་བསྐྱེད་བསླབ་བྱ་བསྒྲུབ༔ ཧཱུྃ༔ འཁོར་འདས་སྟོང་ཉིད་ཆེན་པོར་ཞིག༔ སྤྲོས་བྲལ་དོན་གྱི་ཧེ་རུ་ཀའི༔ སྙིང་རྗེ་རྔམ་པའི་བརྟུལ་ཞུགས་གཟུགས༔ དུར་ཁྲོད་འབར་བའི་ཕོ་བྲང་དབུས༔ ཆུ་གླང་གཤིན་རྗེ་བརྗིས་པའི་སྟེང་༔ བདག་ཉིད་སྐད་གཅིག་དྲན་རྫོགས་སུ༔ རྡོ་རྗེ་ཤུགས་ཅན་འཇིགས་བྱེད་པ༔ མཐིང་ནག་དུག་ཆེན་ཧ་ལའི་མདོག༔ ཞལ་གསུམ་ཕྱག་དྲུག་ཞབས་བཞི་བགྲད༔ གཡས་དཀར་ཞི་ཞིང་གཡོན་དམར་རྔམ༔ དབུས་མཐིང་ཤིན་ཏུ་ཁྲོས་པའི་ཉམས༔ བེ་ཅོན་རལ་གྲི་དགྲ་སྟྭ་གཡས༔ སྡིགས་མཛུབ་མདུང་རིང་ཐོད་ཁྲག་གཡོན༔ སྐུ་ལ་དུར་ཁྲོད་ཆས་ཀྱིས་བརྒྱན༔ བཱེ་ཏ་ཟ་བྱེད་ནག་མོ་ཡུམ༔ ཕྱག་གཡས་དགྲ་སྟྭ་གཡོན་བྷན་ཁྲག༔ ཡབ་ཀྱི་ཞལ་དུ་སྟོབས་པར་བྱེད༔ སྒྲོལ་ཡུམ་ཨེ་ཀ་ཛ་ཊི་གཡོན༔ སྐུ་གསུང་ཐུགས་ཡོན་ཕྲིན་ལས་ཀྱི༔ སྲས་མཆོག་ཡ་མ་ར་ཛ་དང་༔ མྱོས་བྱེད་འབར་བ་མ་རུ་ཙེ༔ རལ་པ་ཚལ་དགུ་གཤེད་བཅུ་གཉིས༔ སྒོ་མ་བཞི་དང་ཡང་སྤྲུལ་འཁོར༔ ཀིང་བཞི་གསོད་པའི་ཕོ་ཉ་བཞི༔ བདུད་ཤན་མོན་པ་རྩིས་འདེབས་སོགས༔ བདུན་བརྒྱ་ཉི་ཤུའི་འཁོར་བཅས་གསལ༔ གཙོ་ཆེན་འབར་བ་ཆེན་པོ་ཡི༔ གནས་གསུམ་རྡོ་རྗེ་སྙིང་པོ་ལས༔ འོད་ཟེར་དཀར་དམར་མཐིང་གསུམ་འཕྲོས༔ འཁོར་འདས་རང་བཞིན་ཨེ་ཀློང་ནས༔ སྤྱན་འདྲེན་གནས་འདིར་གཤེགས་སུ་གསོལ༔ གདན་གསུམ་དཀྱིལ་འཁོར་ཆེན་པོར་བཞུགས༔ སྒོ་གསུམ་གུས་པས་ཕྱག་འཚལ་ལོ༔ ཕྱི་ནང་མཆོད་པ་རྒྱ་མཚོའི་མཆོད༔ མཐོང་བའི་ངོ་མཚར་འཇིགས་པའི་གཟུགས༔ ཐོས་པའི་རྣམ་གྲོལ་ཚངས་དབྱངས་དང་༔ ཐུགས་རྗེ་ཐབས་ཚུལ་མཁྱེན་པའི་དབྱིངས༔ ཡབ་ཡུམ་འཁོར་དང་བཅས་ལ་བསྟོད༔ གཤེད་པོ་ཁྲོ་བོའི་ཐུགས་ཀ་རུ༔ ཡེ་ཤེས་སེམས་དཔའ་ཞི་འཛུམ་མཛེས༔ ཐུགས་ཀར་ཉི་དཀྱིལ་འཁོར་ལོའི་དབུས༔ ཐུགས་སྲོག་ཧཱུྃ༔མཐར་སྔགས་ཀྱིས་བསྐོར༔ ཨཱོཾ་ཀ་ལ་རཱུ་པ་ཡ་ཧཱུྃ་ཕཊ༔ ཡ་མ་མཱནྟ་ཀ་ཨ་ཧཱུྃ་ཕཊ༔ ཧྲིཥྚི་ཝི་ཀྲི་ཏ་ན་ན་ཧཱུྃ་ཕཊ༔ ཡང་ན་སྤྱི་དྲིལ་སྔགས་ཀྱིས་མཆོག༔ ས་མ་ཡཱ༔ ཡང་ཅིག་ཚོགས་མཆོད་བསྡུས་པ་ནི༔ རཾ་ཡཾ་ཁཾ༔ ཨོཾ་ཨཱཿཧཱུྃ༔ སྣང་སྲིད་གཞིར་བཞེངས་ཀུན་བཟང་ཚོགས་མཆོད་ལ༔ སྐུ་གསུམ་རྩ་གསུམ་རིག་འཛིན་ལྷ་ཚོགས་དང་༔ འཇམ་དཔལ་ཞི་དྲག་དཀྱིལ་འཁོར་སྤྱན་འདྲེན་གཤེགས༔ ཟག་མེད་བདེ་ཆེན་དམ་རྫས་མཉེས་མཆོད་འབུལ༔ སྡིག་ལྟུང་དམ་ཚིག་ཉམས་ཆགས་མཐོལ་ལོ་གཤགས༔ འཁོར་འདས་དཔལ་ཡོན་རྒྱ་མཚོའི་ཐུགས་དམ་བསྐང་༔ དགྲ་བགེགས་གནོད་བྱེད་བར་ཆད་དབྱིངས་སུ་སྒྲོལ༔ རྣམ་སྨིན་ཕུང་ཁམས་ཡེ་ཤེས་ཀློང་དུ་སྟོབས༔ ལྷག་སྐྱོངས་ཕོ་མོའི་ལྷག་རོལ་ཕྲིན་ལས་སྒྲུབ༔ ཚངས་པ་མཆོག་ཐུན་དངོས་གྲུབ་སྩལ་དུ་གསོལ༔ ཨོཾ་བཛྲ་གྷཱ་ཎ་ཙཀྲ་ས་མ་ཡཱ་ཁཱ་ཧི༔ དཔལ་མགོན་དྲེགས་ཆེན་བསྟན་མ་བཅུ་གཉིས་ཀྱི༔ ཆད་དོན་བཀའ་ཡི་གཏོར་མའི་བཤལ་ཆུ་བཞེས༔ བཅོལ་པའི་ཕྲིན་ལས་སྒྲུབ་མཛོད་ས་མ་ཡཱ༔ ལོག་འདྲེན་དམ་སྲི་རྒབ་འདྲེ་བསྒྲལ་འདྲེན་ནོན༔ བིག་ནན་མ་ར་ཡ་ནན་ནན༔ ཧཱུྃ༔ དངོས་གྲུབ་ཀུན་བདག་བླ་མ་གཤིན་རྗེ་གཤེད༔ སྐུ་གསུང་ཐུགས་ཀྱི་སིདྡྷི་སྩལ་དུ་གསོལ༔ བསྲུང་ཉམས་བཤགས་པའི་འཁོར་གསུམ་ཉོན་ཤེས་སྒྲིབ༔ ཡང་དག་དོན་མཐོང་སྐད་ཅིག་རྫོགས་སངས་རྒྱས༔ ཡིག་བརྒྱ་མཆོད་བསྟོད་མཐར༔ འདིའི་མཚོན་དགེ་ཚོགས་མ་གྱུར་སེམས་ཅན་ཀུན༔ འཇམ་དཔལ་གཞོན་ནུའི་གོ་འཕང་ཐོབ་ཕྱིར་བསྔོ༔ སྤྲོས་བྲལ་རང་མདངས་ཕྱག་རྒྱ་ཆེན་པོ་ནི༔ གདོད་ནས་བསྐྱེད་རྫོགས་དབྱེར་མེད་ངང་དུ་འབྱམས༔ དྷཱི༔ རྒྱལ་ཀུན་ཡེ་ཤེས་སེམས་དཔའ་འཇམ་དཔལ་དབྱངས༔ མ་རིག་རྨོངས་པའི་མུན་སེལ་ཧེ་རུ་ཀ༔ འཆི་བདག་བདུད་འཇོམས་མགོན་པོ་ཚེ་ཡི་བདག༔ བཀྲ་ཤིས་དེས་ཀྱང་གོ་འཕང་མཆོག་སྦྱིན་མཛོད༔ ཅེས་ཀྱང་ག་གཱས་སོ། །ཧཱུྃ༔ ཆོས་ཉིད་ངང་གིས་ཁྲོ་བོ་ཆེན་པོ་ནི༔ དུས་དགྲ་ལ་སོགས་བགེགས་རིགས་འཇོམས་པའི་གཤེད༔ མཚན་མ་རྟགས་ཀྱི་ཕྱག་རྒྱར་ཡོངས་བཞེངས་བ༔ འཇམ་དཔལ་གཤིན་རྗེའི་གཤེད་ལ་ཕྱག་འཚལ་ལོ༔ གཉིས་སུ་མེད་པའི་ཡེ་ཤེས་ལ༔ མཚན་མའི་རྣམ་རྟོག་མེད་པས་འཇམ༔ སྤང་རྟོགས་ཡོངས་སུ་རྫོགས་པའི་དཔལ༔ གཞོན་ནུ་བུམ་པའི་སྐུ་རུ་ཤར༔ ཨོཾ་ཡ་མཱནྟ་ཀ་ཡ་མ་རཱ་ཛ་ཧཱུྃ་ཕཊ༔ ཨ་མོ་གྷ་ཤི་ལ་ཤུདྡྷེ་བི་ཤུདྡྷེ་སྭཱ་ཧཱ༔ ཞེས་དང་༔ ཧྲཱིཥྚི་སོགས་གང་ལྟར་བཟླས་ཀྱང་ཆོག་གོ༔ མཇུག་ཀྱང་དགེ་བ་འདི་ཡིས་སོགས་གོ༔ བརྡ་ཡིག །འཇམ་དཔལ་ཡེ་ཤེས་གྲུབ་པ་ཞེས་བྱ་བ་རྫོགས་སོ༔ ག་གཱས་སོ། །

འཕགས་པ་འཇམ་དཔལ་གྱི་དཀྱིལ་འཁོར་དུ་འཇུག་པ་བྱིན་རླབས་འོད་ཕྲེང་།

ཡེ་ཤེས་སྒྱུ་འཕྲུལ་དྲྭ་བ་ལས༔ འཕགས་པ་འཇམ་དཔལ་གྱི་དཀྱིལ་འཁོར་དུ་འཇུག་པ་བྱིན་རླབས་འོད་ཕྲེང་ཞེས་བྱ་བ་བཞུགས་སོ༔

རྗེ་བཙུན་འཕགས་པ་འཇམ་དཔལ་གྱི་ཡེ་ཤེས་མྱུར་དུ་འཇུག་པའི་ཐབས་འདི་ལ༔ ཐོག་མར་གཏོར་མ་རལ་གྲིའི་གཟུགས༔ ཨུཏྤལ་མེ་ཏོག་དཀྱིལ་དུ་བཞུགས༔ པུ་ཏིའི་མཆོག་ཏུ་རྒྱུད་ཡང་ཏི༔ བསྒྲུབ་ནས་བཅིངས་པས་བྱིན་རླབས་ཉེ༔ དེ་ལ་མཆོད་པའི་ཚོགས་ཀྱི་བསྐོར༔ བྱིན་རླབས་བྱས་ནས་བཀོད་པར་བྱ༔ བློ་གྲོས་སྤེལ་པའི་མ་དཱ་ན༔ འདི་ལས་བྱང་ཆུབ་སེམས་ལ་བྱ༔ ཤེས་རབ་གསོ་བའི་རིལ་བུ་ནི༔ སྙིང་རྗེ་ཅན་གྱི་མེ་ཏོག་དང་༔ གནས་གཙང་ཆུ་དང་སིན་དྷུ་ར༔ དབང་པོ་ལག་པ་སྨན་མཆོག་དང་༔ ཁྱད་པར་དུ་ཡང་གུར་གུམ་རྒྱལ༔ མ་ནུའི་སྙིང་དབང་རྫས་ཀྱི་མཆོག༔ བདུད་རྩི་ལྔ་ཡི་ཤ་ཆེན་ཕྲི༔ དེ་ནས་སྐྱབས་ཡུལ་ཚོགས་ཞིང་གསལ༔ ཨེ་མ་ཧོ༔ རྒྱལ་ཀུན་ཡེ་ཤེས་རྡོ་རྗེའི་གཟུགས་སྐུ་ནི༔ འཇམ་དཔལ་རིགས་ཀྱི་སྤྱི་ལ་སྐྱབས་སུ་མཆི༔ སེམས་ཅན་ཀུན་ཀྱང་ཉིད་ཀྱི་གོ་འཕང་ལ༔ འགོད་ཕྱིར་སྨོན་འཇུག་བདེན་གཉིས་བྱང་སེམས་བསྐྱེད༔ དེ་ནས་བགེགས་བསྐྲད་བསྲུང་འཁོར་བསྒོལ༔ ཧཱུྃ༔ མ་རིག་ཀུན་འབྱུང་རང་གཟུགས་གདོན་དང་བགེགས༔ ཤེས་རབ་རིག་སྟོང་ངང་དུ་རང་སར་དེངས༔ འདའ་དཀའ་རྡོ་རྗེ་ཐུགས་ཀྱི་བསྲུང་འཁོར་ལོ༔ ཕྱོགས་བཅིང་མཚན་མ་ཐིག་ལེ་ཉག་གཅིག་གཟུད༔ ཨོཾ་ཕཊ་དྷརྨ་དྷརྟུ་རཀྵ༔ དེ་ནས་བྱིན་བསྡུས་མཆོད་བརླབས་ནི༔ ཨོཾ་ཨཱཿཧཱུྃ༔ ཡེ་ཤེས་ཕྱག་རྒྱ་ཆེན་པོ་ནས༔ འཇམ་དཔལ་འཁོར་བཅས་བྱིན་ཆེན་ཕོབ༔ སྣོད་བཅུད་སྐུ་དང་ཡེ་ཤེས་ཀྱི༔ རང་བཞིན་ཆེན་པོའི་རླབས་ཀྱིས་བརླབས༔ ཨོཾ་བུདྡྷ་མཉྫུ་ཤྲཱི་པྲཛྙཱ་ཛྙཱ་ན་ཨ་བེ་ཤ་ཡ་ཕཻམ༔ ཅེས་བརྗོད་ལྷ་བསྐྱེད་རིམ་པ་ནི༔ ཨཱ༔ སྟོང་ཉིད་རང་གཟུགས་སྙིང་རྗེའི་ཧེ་རུ་ཀ༔ མུྃ་ཧྲཱིཾ་སྐུར་བཞེངས་རྒྱུ་ཡི་ཡི་གེ་ལས༔ འོད་འཕྲོས་བྷྲཱུཾ་ལས་ཤེས་རབ་འབྱུང་རིམ་བརྩེགས༔ རྒྱ་ཁྱོན་མཁའ་མཉམ་ཞིང་ཁམས་ལྷུན་གྲུབ་དབུས༔ དེ་བཅུད་ཡེ་ཤེས་གཞལ་ཡས་ཁང་པ་ནི༔ འཇའ་འོད་དྲྭ་བ་དྲྭ་ཕྱེད་གཏིབས་པའི་དབུས༔ པདྨ་ཉི་ཟླའི་གདན་ལ་རོལ་བ་ནི༔ རང་ཉིད་བླ་མ་ཡི་དམ་དབྱེར་མེད་པ༔ ཇི་ལྟ་ཇི་སྙེད་འབྲས་བུར་སྨིན་པའི་སྐུ༔ འཕགས་པ་འཇམ་དཔལ་སྐུ་མདོག་གསེར་ལྟར་འབར༔ ཞལ་གཅིག་ཕྱག་བཞི་དང་པོའི་ཕྱག་གཉིས་ཀྱིས༔ ཤེས་རབ་རལ་གྲི་པུསྟི་ཨུཏྤལ་བསྣམས༔ འོག་མ་གཉིས་ཀྱིས་ཐལ་འབྱིན་མདའ་གཞུ་འགེངས༔ ཞབས་གཉིས་མི་གཡོ་རྡོ་རྗེའི་སྐྱིལ་ཀྲུང་བཞུགས༔ མཚན་དཔེ་མཛེས་གཟུགས་ཞི་ཚུལ་དགུ་དང་ལྡན༔ ཐུགས་དབུས་བླ་མ་རྣམ་སྣང་ཡབ་ཡུམ་གསལ༔ གཉིས་མེད་དབྱངས་ཅན་དཀར་མོ་སྒྲ་སྙན་སྦྲེང་༔ པདྨའི་སྐྱིལ་ཀྲུང་གཉིས་མེད་དམ་པར་འཁྱུད༔ ཡབ་ཀྱི་གནས་ལྔར་འཇམ་དཔལ་རིགས་ལྔ་ནི༔ དཀར་སེར་དམར་ལྗང་མཐིང་ཀ་ཧེ་རུའི་ཆས༔ ཕྱག་ན་རལ་གྲི་པུ་ཏི་འཛིན་གར་སྟབས༔ རུས་རྒྱན་གར་ཆས་སྤྲས་ཤིང་བསྒྱུར་ལྡེམ་བག༔ གནས་གསུམ་རྡོ་རྗེ་གསུམ་གྱི་ཡི་གེ་དང་༔ ཁྱད་པར་ཡེ་ཤེས་སེམས་དཔའི་འོད་ཟེར་ལས༔ དབྱིངས་བཞུགས་ཕྱོགས་བཅུའི་རྒྱལ་བའི་དཀྱིལ་འཁོར་ཀུན༔ སྤྱན་དྲངས་དམ་ཚིག་སེམས་དཔར་གཉིས་མེད་གྱུར༔ དེ་ནས་སྤྱན་འདྲེན་བཞུགས་གསོལ་ནི༔ ཧཱུྃ༔ མཉམ་ཉིད་ཡེ་ཤེས་དཀྱིལ་འཁོར་དང་༔ རྒྱ་ནག་རི་བོ་རྩེ་ལྔ་ནས༔ འཇམ་དཔལ་རིགས་ལྔའི་ལྷ་ཚོགས་ཀུན༔ དམ་ཚིག་ཐུགས་དམ་དབང་གིས་ནི༔ བསྒྲུབ་པའི་གནས་འདིར་གཤེགས་སུ་གསོལ༔ བཛྲ་མཉྫུ་ཤྲཱི་ས་པཱ་རི་ཝ་ར་ཛ་ཛ༔ ཧཱུྃ༔ ཡེ་ཤེས་དཀྱིལ་འཁོར་ཐམས་ཅད་ཀུན༔ དམ་ཚིག་ཏིང་འཛིན་གཉིས་མེད་ལ༔ ཆུ་ལ་ཆུ་བཞག་ཇི་བཞིན་དུ༔ དབྱེར་མེད་ངང་དུ་བརྟན་པར་བཞུགས༔ མཉྫུ་ཤྲི་ས་མ་ཡ་ཏིཥྛ་ལྷན༔ དེ་ནས་ཕྱག་འཚལ་མཆོད་པ་ནི༔ ཨོཾ༔ སྐུ་མཆོག་འཇམ་དཔལ་ཞི་བའི་ལྷར༔ ཕྱི་མཆོད་ཉེར་སྤྱོད་རྣམ་དག་གར༔ ནང་མཆོད་འདོད་ཡོན་ལྷ་མོའི་ཚོགས༔ གསང་བ་སྨན་གཏོར་རཀྟ་དང་༔ སྦྱོར་ཡུམ་བདེ་སྟོང་ལྷ་མོའི་གར༔ ཡེ་ཤེས་རྒྱན་དང་རོལ་མོ་མཆོག༔ རྣམ་འགྱུར་མ་ཚང་མེད་པ་ཡི༔ འཇིག་རྟེན་འདས་དང་མ་འདས་ཀྱི༔ མཆོད་ཆེན་དམ་པ་རྒྱ་ཆེན་འབུལ༔ དགྱེས་པ་ཆེན་པོའི་བདག་གིར་བཞེས༔ ཕྱག་རྒྱ་གར་དང་གུས་པའི་ཕྱག༔ རྣམ་གསུམ་རང་བཞིན་བརྗོད་པའི་གླུའི༔ མཉམ་པ་ཆེན་པོའི་བསྟི་སྟང་ནི༔ རྫོང་འཕྲང་སྲོག་གསུམ་བརྟན་པོའི་བགྱིད༔ བདག་སོགས་སེམས་ཅན་ཐམས་ཅད་ཀྱི༔ མི་ཤེས་མུན་པ་ཀུན་བསལ་ནས༔ ཤེས་བྱའི་དཀྱིལ་འཁོར་ཐམས་ཅད་ལ༔ ཤེས་རབ་ཡེ་ཤེས་སྣང་བ་སྩོལ༔ ཨོཾ་མཉྫུ་ཤྲཱི་པ་ཏི་ས་པ་རི་ཝ་ར་ཨརྒྷཾ༴ ཤབྟ་རུ་པ༴ སྤརྴེ་ཨཱཿཧཱུྃ༔ མ་ཧཱ་མུ་དྲ་ཏ་ན་ག་ཎ་ཛྙཱ་ན་མ་ཧཱ་ན་མ་པཱུ་ཛ་ཁཱ་ཧི༔ དེ་ནས་བསྟོད་པ་ནི༔ ཧོ༔དུས་གསུམ་སངས་རྒྱས་ཐམས་ཅད་ཀྱི༔ སྐུ་མཆོག་གསུང་གི་དབང་ཕྱུག་རྒྱལ༔ ཐུགས་ཀ་དཔལ་གྱི་བེའུར་བཞུགས༔ མཁྱེན་པའི་དཀྱིལ་འཁོར་ཁྱོད་ལ་བསྟོད༔ ཐུགས་བསྐྱེད་འགྲན་ཟླ་བྲལ་བའི་མཐུས༔ སངས་རྒྱས་ཀུན་གྱི་འདྲེན་བྱེད་གཅིག༔ རྒྱལ་སྲས་གཞོན་ནུའི་ཆ་ལུགས་ཅན༔ འཇམ་དཔལ་སྤྱོད་པའི་གཏེར་ལ་བསྟོད༔ སེམས་ཅན་ཀུན་གྱི་མ་གཅིག་པུ༔ སྤོབས་པའི་གཏེར་གྱི་བུམ་པ་བཟང་༔ གཟུངས་ཀྱི་སྒོ་བརྒྱའི་བང་མཛོད་མཆོག༔ ཡང་དག་རིག་པའི་ལྗོན་པ་བཟང་༔ བདེ་གཤེགས་གཅིག་བསྒྲུབ་ཀུན་འདུས་ཀྱི༔ ཡིད་བཞིན་ནོར་བུ་རིན་པོ་ཆེ༔ འཇམ་དཔལ་སྐུ་ལྔའི་ཁོ་ན་ཉིད༔ རང་བཞིན་ཆེན་པོ་ཁྱོད་ལ་བསྟོད༔ ཅེས་བསྟོད་པ་རྒྱས་པ་གཞན་ཡང་བྱའོ༔ འཛབ་བཟླས་ནི༔ མཱུྃ༔ ཐུགས་ཀྱི་སྐུ་མཆོག་འཇམ་དཔལ་དབྱངས༔ སྐུ་དབུས་ཙིཏྟའི་གཞལ་ཡས་སུ༔ ཉི་ཟླའི་གའུ་ཁ་སྦྱོར་དབུས༔ ཐུགས་ཀྱི་ཐུགས་ཏེ་རྣམ་སྣང་མཛད༔ ཐུགས་ཀར་མཉམ་ཉིད་ཡེ་ཤེས་ནི༔ རང་གྲོལ་ཀ་དག་ཡི་གེའི་གཟུགས༔ མཱུྃ་ཧྲིཾ་མཐའ་མར་སྔགས་ཀྱིས་བསྐོར༔ བཟླས་པས་འོད་ཟེར་རབ་ཏུ་འཕྲོས༔ དུས་གསུམ་རྒྱལ་བ་སྲས་བཅས་ཀྱི༔ མཁྱེན་བརྩེ་ནུས་པའི་ཡེ་ཤེས་འོད༔ གསེར་སྦྱངས་བཙོ་མའི་ཁ་དོག་གིས༔ བདག་ཉིད་དྲི་བཅས་དམ་ཚིག་པའི༔ མཚོན་དེ་ཁམས་གསུམ་སེམས་ཅན་གྱི༔ མི་ཤེས་མུན་པ་ཀུན་བསལ་ཏེ༔ བྱིན་བརླགས་ཡེ་ཤེས་རྒྱུད་ལ་ཞུགས༔ སྤོབས་པའི་གཏེར་བརྒྱད་གྲོལ་བ་དང་༔ ཤེས་རབ་རྣོ་མྱུར་ཐོགས་མེད་གསལ༔ ཟབ་ཅིང་རྒྱ་ཆེའི་མཐུ་ཐོབ་ནས༔ བདག་གཞན་དོན་གཉིས་ལྷུན་གྲུབ་ཅིང་༔ ཇི་ལྟ་ཇི་སྙེད་འབྲས་བུ་ཡི༔ ཡེ་ཤེས་ཆེན་པོ་རྒྱས་པར་དམིགས༔ ས་མ་ཡཱ༔ དེ་ནས་རིལ་བུ་བྱང་ཆུབ་སེམས༔ ཀུན་ཀྱང་ལྷར་བསྐྱེད་བཞུ་བཏུལ་ལས༔ དངོས་གྲུབ་རྒྱུན་དུ་བླངས་པ་ཡིས༔ རིག་པའི་གནས་ཀུན་ཐོགས་མེད་ཤེས༔ ས་མ་ཡཱ༔ ཨོཾ་བཛྲ་བུདྡྷ་རཏྣ་མཉྫུ་ཤྲཱི་པྲཛྙཱ་ཛྙཱ་ན་མཱུྃ་ཧྲིཾ༔ སརྦ་སིདྡྷི་ཕ་ལ་ཨ་ཧཱུྃ༔ འདི་ནི་བཟླ་བཞིན་མཉམ་པར་བཞག༔ ལྟ་བ་ཟབ་མོ་དྲན་པའམ༔ ཡང་ན་གྱད་དུ་གྱུར་བ་ནི༔ ཤེས་རབ་རྩལ་ཆེན་འབར་བར་ངེས༔ ཞེས་ཀྱང་ག་གཱ་ཨ་བྷྱེ་ནས་སོ། །དེ་ནས་ཚོགས་བསྡུས་ནི༔ བྱང་ཆུབ་སེམས་ཀྱི་གཙོ་བྱས་པའི༔ ཚོགས་རྫས་ལོངས་སྤྱོད་ཕུན་སུམ་ཚོགས༔ ཤེས་རབ་ལྷ་མོའི་ལས་སློབ་ཀྱིས༔ སེར་པོའི་རྫས་ཀྱིས་བསྒྱུར་ཏེ་བཞག༔ དེ་ནས་སྦྱངས་སྤེལ་བསྒྱུར་བ་ནི༔ རཾ་ཡཾ་ཁཾ༔ ཨོཾ་ཨཱཿཧཱུྃ༔ སྣང་བ་ཡུམ་ལྔའི་བདེ་ཆེན་ལ༔ མ་དག་མཚན་མའི་མིང་ཡང་མེད༔ དག་ཆེན་སྐུ་གསུམ་ཡེ་ཤེས་ཀྱི༔ འོད་ཟེར་ཆེན་པོའི་དབང་བསྐུར་རོ༔ ཞེས་བརྗོད་ཚོགས་ལ་སྤྱན་འདྲེན་ནི༔ ཧཱུྃ༔ འཇམ་དཔལ་རྡོ་རྗེའི་ཐུགས་ཀྱི་ངང་༔ རྣམ་པར་སྣང་མཛད་ཀུན་ཏུ་བཟང་༔ སངས་རྒྱས་རིགས་ཀྱི་ལྷ་ཚོགས་སྐུ༔ ཡེ་ཤེས་ཚོགས་ལ་བཤེགས་སུ་གསོལ༔ ཨོཾ༔ འཇམ་དཔལ་རྡོ་རྗེའི་སྐུ་ཡི་ངང་༔ རྡོ་རྗེ་སེམས་དཔའ་ཀུན་ཏུ་བཟང་༔ བཛྲ་རིགས་ཀྱི་ལྷ་ཚོགས་སྐུ༔ ཡེ་ཤེས་ཚོགས་ལ སྭཱ༔ འཇམ་དཔལ་རྡོ་རྗེའི་ཡོན་ཏན་ངང་༔ རིན་ཆེན་འབྱུང་ལྡན་ཀུན་ཏུ་བཟང་༔ རཏྣ་རིགས་ཀྱི་ལྷ་ཚོགས་སྐུ༔ ཡེ་ཤེས་ཚོགས༴ ཨཱཾ༔ འཇམ་དཔལ་རྡོ་རྗེའི་གསུང་གི་ངང་༔ སྣང་བ་མཐའ་ཡས་ཀུན་ཏུ་བཟང་༔ པདྨ་རིགས་ཀྱི་ལྷ་ཚོགས་སྐུ༔ ཡེ་ཤེས་ཚོགས་ལ༴ ཧཱ༔ འཇམ་དཔལ་རྡོ་རྗེའི་ཕྲིན་ལས་ངང་༔ དོན་ཡོད་གྲུབ་པ་ཀུན་ཏུ་བཟང༔ ཀརྨ་རིགས་ཀྱི་ལྷ་ཚོགས་སྐུ༔ ཡེ་ཤེས་ཚོགས་ལ་གཤེགས་སུ་གསོལ༔ ཧཱུྃ༔ འཇམ་དཔལ་ཡེ་ཤེས་ཆོས་ཀྱི་སྐུ༔ རང་བྱུང་རྣམ་དག་ཀུན་ཏུ་ཞལ༔ ཕྱག་རྒྱ་ཆེན་པོའི་རིག་མཆོག་གི༔ ཡེ་ཤེས་ཚོགས་ལ་བཤེགས་སུ་གསོལ༔ ཨཱ༔ འཇམ་དཔལ་ལོངས་སྤྱོད་རྫོགས་པའི་ངང་༔ གཏིང་རྫོགས་རིག་སྐུ་ཐིག་ལེ་འབར༔ རིགས་ཆེན་གཙུག་ཏོར་ཆེན་པོའི་ཚོགས༔ ཡེ་ཤེས་ཚོགས་ལ་བཤེགས་སུ་གསོལ༔ ཨོཾ༔ འཇམ་དཔལ་གང་འདུལ་སྤྲུལ་པའི་སྐུ༔ ཡེ་ཤེས་སེམས་དཔའ་དྲི་མ་མེད༔ སྨྲ་བའི་སེང་གེ་མཚུངས་པ་མེད༔ རྡོ་རྗེ་རྣོན་པོ་ཐོགས་པ་མེད༔ སྐུ་འཇམ་གསུང་འཇམ་ཐུགས་ཀྱང་འཇམ༔ ཡེ་ཤེས་ཚོགས་ལ་བཤེགས་སུ་གསོལ༔ ཤེས་རབ་ཡེ་ཤེས་མེ་བོ་ཆེ༔ འཆི་བདག་བདུད་དཔུང་འཇོམས་པའི་དཔལ༔ གཤིན་རྗེ་གཤེད་པོའི་ལྷ་ཚོགས་ཀྱི༔ ཡེ་ཤེས་ཚོགས་ལ་བཤེགས་སུ་གསོལ༔ མཉྫུ་མི་ཏྲ་ལ་སོགས་པའི༔ འཇམ་དཔལ་གྲུབ་པའི་རིག་འཛིན་ནི༔ མ་ལུས་ལུས་པ་མེད་པ་ཀུན༔ ཡེ་ཤེས་ཚོགས་ལ་གཤེགས་སུ་གསོལ༔ ཡེ་ཤེས་ཚོགས་ལ་གཤེགས་ནས་ཀྱང་༔ བདག་དང་སེམས་ཅན་ཐམས་ཅད་ཀྱི༔ མ་རིག་མུན་པ་དྲུངས་འབྱིན་ནས༔ ཤེས་རབ་སྤྱན་གྱི་རྒྱས་པར་མཛོད༔ ཆགས་པ་མེད་པ་ཉག་གཅིག་སྤྱན༔ ད་ལྟ་ཉིད་དུ་བྱིན་གྱིས་རློབས༔ ཐོགས་པ་མེད་པ་ཟང་ཐལ་སྤྱན༔ ད་ལྟ་ཉིད་དུ་བྱིན་གྱིས་རློབས༔ མཆོག་གི་དངོས་གྲུབ་སྤྱན་རྒྱས་པ༔ ད་ལྟ་ཉིད་དུ་བྱིན་གྱིས་རློབས༔ ཨོཾ་མཉྫུ་ཤྲཱི་པྲཛྙཱ་ཛྙཱ་ན་གཱ་ཎ་ཙཀྲ་ས་པཱ་རི་ཝ་ར་ས་མ་ཡ་ཨ་ཝེ་ཤ་ཡ་ཕེཾ་ཕེཾ༔

དེ་ནས་ཚོགས་མཆོད་ལ་སོགས་ནི༔ ཧཱུྃ༔ མུ་ཏིག་དྲི་མ་མེད༔ རྡོ་རྗེ་རིགས་ཀྱི་ཚོགས༔ མི་བརྗེད་གཟུངས་ཀྱི་རྩི༔ རྡོ་རྗེ་སེམས་དཔའི་སྐུ༔ མེ་ལོང་ཡེ་ཤེས་ཆེ༔ ཁྱོད་ལ་མཆོད་པ་འབུལ༔ བདག་དང་སེམས་ཅན་གྱི༔ ཞེ་སྡང་བདུད་ལ་ཐེབས༔ ཐུགས་མཆོག་མངོན་གྱུར་དངོས་གྲུབ་སྩོལ༔ ཚེ་ཡི་ཨ་མྲི་ཏ༔ གལ་དང་མཉམ་པར་བསྡེབས༔ འདོད་ཡོན་གླུ་མའི་སྐུ༔ ཡེ་ཤེས་རྒྱན་དུ་བསྲེལ༔ བདེ་མཉམ་བདེ་བའི་རོ༔ ཐིམ་གསལ་གཉིས་སུ་མེད༔ ཡོན་ཏན་ཆེན་པོའི་རྩི༔ བདག་དང་སེམས་ཅན་གྱིས༔ མི་མཉམ་དེང་ལེན་གྱི༔ འདོད་ཞེན་བདུད་ལ་ཐེབས༔ པདྨ་སྐུ་འབར་དངོས་གྲུབ་སྩོལ༔ ཨ་ལ་ལ་ཧོ་བཞེས་སུ་གསོལ༔ བཛྲ་ར་ཏི་ཙཀྲ་པཱུ་ཙ་གྷ་ཎ་ཙཀྲ་ཁཱ་ཧི༔ ཧཱུྃ༔ ཡེ་ཤེས་ཚོགས་ཀྱི་འཁོར་ལོ་འདིས༔ ཁམས་གསུམ་སེམས་ཅན་ཐམས་ཅད་ཀྱི༔ ཀུན་འབྱུང་རྒྱུ་འབྲས་དང་བཅས་པ༔ ཆོས་དབྱིངས་ངང་དུ་དག་གྱུར་ཅིག༔ ཨོཾ་བཛྲ་ས་ཏྭ་ཧཱུྃ༔ མཉྫུ་ཤྲཱི་སརྦ་པ་པཱཾ་ཤིནྟཾ་ཀུ་རུ་ཡེ་སྭཱ་ཧཱུ༔ ཧཱུྃ༔ གཟི་བྱིན་ལོག་པའི་མིག་ལ་ནི༔ ཧེ་རུ་ཀ་ཡིས་རྟ་བྲོ་བརྡུང་༔ ཁམས་གསུམ་བདུད་རྩིའི་རྒྱ་མཚོར་བསྒྱུར༔ གཉིས་མེད་ཆོས་དབྱིངས་ཀློང་དུ་མཆོད༔ ཅེས་བརྗོད་དེ་ནས་ཚོགས་ལ་རོལ༔ ཕཻཾ༔ ལྷག་སྐྱོང་གནས་ཉུལ་ཕོ་མོའི་ཚོགས༔ རང་དབང་དམ་རྫས་འདོད་ཡོན་སྤྲིན༔ བསྣམས་ནས་རྣལ་འབྱོར་བདག་ཅག་ལ༔ མཆོག་ཐུན་ཕྲིན་ལས་ལྷུན་འགྲུབ་མཛོད༔ ཨོཾ་ཨུཙྪིཥྚ་བྷ་ལིང་ཏ་པཱུ་ཛ་ཁཱ་ཧི༔ ཧཱུྃ༔ མི་མངོན་ཆོས་དབྱིངས་ཞིང་ཁམས་ནས༔ འཇམ་དཔལ་ལྷ་ཚོགས་སྐུར་བཞེངས་ཤིག༔ སྙིགས་མ་ལྔ་བདོའི་གཞན་དབང་གིས༔ ལྟ་བ་ངན་པ་མཐའ་དག་ཀུན༔ མངོན་སུམ་རིག་པའི་བྱིན་རླབས་ལས༔ ད་ལྟ་ཉིད་དུ་དབྱིངས་སུ་སོལ༔ མཉྫུ་ཤྲཱི་བཛྲ་ས་མ་ཡ་ཛ་ཛ༔ ཧཱུྃ༔ ཤ་ཁྲག་དམར་གྱི་གཏོར་མ་འདིས༔ ཆད་ཐོ་དམ་ཅན་བསྲུང་མའི་ཚོགས༔ བོད་ཡུལ་བསྟན་མ་བཅུ་གཉིས་འཁོར༔ མ་ལུས་ཐུགས་དམ་གཉན་པོ་བསྐངས༔ ཤེས་རབ་ཡེ་ཤེས་མིག་གཅིག་པུ༔ སྒྲུབ་པའི་བར་ཆད་དབྱིངས་སུ་སོལ༔ མཐུན་རྐྱེན་བསམ་དོན་ཆོས་བཞིན་བསྒྲུབ༔ མ་མ་ཧྲིཾ་ཧྲིཾ་དྷཱརྨ་པ་ལ་ཨེ་དམ་བྷ་ལིངྟ་ཁཱ་ཧི༔ ཅེས་དང་དེ་ནས་འགུགས་གཞུགས་མཐར༔ གནོད་བྱེད་སརྦ་བིགྣན་སྟྭམ་བྷ་ཡ་ནན༔ ཧཱུྃ་ཨུ་ཨཱུ༔ སྐུ་མཆོག་འཇམ་པའི་དཔལ༔ འཁོར་དང་བཅས་པ་ཡི༔ སྒྱུ་འཕྲུལ་དྲྭ་བའི་དབྱིངས༔ བདག་སོགས་སེམས་ཅན་ལ༔ མཆོག་ཏུ་རྒྱ་ཆེ་བའི༔ ཤེས་རབ་ཆེན་པོའི་དངོས་གྲུབ་སྩོལ༔ ཁྱབ་བྱེད་ཡེ་ཤེས་རང་ཞལ་མངོན་དུ་སྟོན༔ ཨཾ་ཨེ་ཨཻ༔ གསུང་མཆོག་འཇམ་པའི་དཔལ༔ དྲྭ་བ་འབྲེལ་བའི་དབྱིངས༔ འཁོར་དང་བཅས་པ་ཡིས༔ བདག་སོགས་སེམས་ཅན་ལ༔ མཆོག་ཏུ་རྣོ་བའི་དཔལ༔ ཤེས་རབ་ཆེན་པོའི་དངོས་གྲུབ་སྩོལ༔ འབྱེད་བྱེད་ཡེ་ཤེས་རང་ཞལ་མངོན་དུ་སྟོན༔ ཧཱུྃ་ཨ་ཨཱཿ ཐུགས་མཆོག་འཇམ་དཔལ་དབྱངས༔ དྲྭ་བ་དྲྭ་འབར་འཕྲོ༔ འཁོར་དང་བཅས་པ་ཡིས༔ བདག་སོགས་སེམས་ཅན་ལ༔ མཆོག་ཏུ་གསལ་བ་ཡི༔ ཤེས་རབ་ཆེན་པོའི་དངོས་གྲུབ་སྩོལ༔ བསྐྱོད་བྱེད་ཡེ་ཤེས་རང་ཞལ་མངོན་དུ་སྟོན༔ སྭཱ་ཨི་ཨཱི༔ ཡོན་ཏན་འཇམ་པའི་དཔལ༔ ལུ་གུ་རྒྱུད་ཀྱི་ངང་༔ འཁོར་དང་བཅས་པ་ཡི༔ བདག་སོགས་སེམས་ཅན་ལ༔ མཆོག་ཏུ་གཏིང་ཟབ་པའི༔ ཤེས་རབ་ཆེན་པོའི་དངོས་གྲུབ་སྩོལ༔ སྡུད་བྱེད་ཡེ་ཤེས་རང་ཞལ་མངོན་དུ་སྟོན༔ ཧཱ་ཨོ་ཨཽ༔ ཕྲིན་ལས་འཇམ་པའི་དཔལ༔ ཁྱབ་འཇུག་རླུང་གི་སྐུ༔ འཁོར་དང་བཅས་པ་ཡི༔ བདག་སོགས་སེམས་ཅན་ལ༔ མཆོག་ཏུ་མྱུར་བའི་ཤུགས༔ ཤེས་རབ་ཆེན་པོའི་དངོས་གྲུབ་སྩོལ༔ སྒྲོལ་བྱེད་ཡེ་ཤེས་རང་ཞལ་མངོན་དུ་སྟོན༔ སྠི་ཏོ་སོགས་ནས་ཤྭ་ར་ཀ་ཡ་ཝཀྐ་ཙིཏྟ་གུ་ཎ་ཀརྨ་སིདྡྷི་ཧཱུྃ༔ ཧཱུྃ༔ འཇམ་དཔལ་རིགས་དྲུག་རྡོ་རྗེ་འཆང་གི་སྐུ་དྲུག་ལ༔ ཡེ་ཤེས་མིག་དྲུག་ཐིག་ལེ་སྒྲོན་དྲུག་རང་གདངས་རྫོགས༔ རིགས་དྲུག་དབྱིངས་སྒྲོལ་ཡིད་དྲུག་གནས་དག་ཧེ་རུ་ཀ༔ ཉོན་དྲུག་གཞི་སྟོང་མ་རིག་དྲུག་གི་རུ་ཏྲ་འདུལ༔ བདག་སོགས་སེམས་ཅན་གྱི༔ ཚོགས་དྲུག་ཡུལ་དྲུག་དག༔ སངས་རྒྱས་ས་དྲུག་གི༔ རིག་མཆོག་འགྲུབ་པ་ཡི༔ དངོས་གྲུབ་དམ་པ་དེ་འདྲ་དེང་འདིར་སྩལ་དུ་གསོལ༔ ཨོཾ་ཨ་ར་པ་ཙ་ན་དྷཱི༔ ཙིཏྟ་གྷརྦྷ་དྷརྟུ་སརྦ་སིདྡྷི་ཕ་ལ་ཨཱཿཧཱུྃ༔ ཧཱུྃ༔ འཇམ་དཔལ་དཀྱིལ་འཁོར་ལྷ་ཚོགས་དྲུང་༔ སྡོམ་དང་བསླབ་པ་དམ་ཉམས་བཤགས༔ ལྷར་སྣང་ཆོས་ཉིད་ཆེན་པོར་བསྡུ༔ རིག་སྟོང་དོན་གྱི་འཇམ་དཔལ་དང་༔ འདུ་འབྲལ་མེད་པར་ཡེ་ཡིན་ངང་༔ མ་བཙལ་མ་བསྒོམ་ལྷུན་གྱིས་རྫོགས༔ ་བསོད་ནམས་ཡེ་ཤེས་ཚོགས་ཆེན་འདིས༔ འགྲོ་ཀུན་འཇམ་དཔལ་གནས་ཐོབ་ཤོག༔ ཨོཾ༔ སྐུ་ཡི་བཀྲ་ཤིས་རྗེ་བཙུན་འཇམ་དཔལ་དབྱངས༔ དུས་གསུམ་རྒྱལ་བ་ཀུན་གྱི་ཐུགས་ན་བཞུགས༔ རང་བྱུང་ཡེ་ཤེས་ངོ་བོ་ཀ་ནས་དག༔ འགྲོ་ཀུན་གཏི་མུག་མུན་སེལ་བཀྲ་ཤིས་ཤོག༔ ཨཱ༔ གསུང་གི་བཀྲ་ཤིས་ཝ་ཀི་ཤྭ་ར་ཡེ༔ བརྡ་སྤྲོད་གྲགས་སྟོང་མི་ཤིགས་འོད་མཐའ་ཡས༔ དུས་གསུམ་རྒྱལ་ཀུན་གསུང་གི་དབྱིངས་ལ་རོལ༔ བདག་སོགས་མཐའ་ཡས་སེམས་ཅན་ཐམས་ཅད་ཀྱི༔ འདོད་ཆགས་མུན་པ་སེལ་བའི་བཀྲ་ཤིས་ཤོག༔ ཧཱུྃ༔ ཐུགས་ཀྱི་བཀྲ་ཤིས་འཇམ་དཔལ་ཡེ་ཤེས་སེམས༔ དུས་གསུམ་རྒྱལ་བ་ཀུན་གྱི་བསྐྱེད་པའི་ཡུམ༔ སྣང་སྟོང་ཡེ་གྲོལ་ཆོས་ཉིད་བདེ་ཀློང་འཁྱིལ༔ ཁམས་གསུམ་མཐའ་ཡས་སེམས་ཅན་ཐམས་ཅད་ཀྱི༔ ཞེ་སྡང་མུན་པ་སེལ་བའི་བཀྲ་ཤིས་ཤོག༔ ཁམས་གསུམ་དུག་གསུམ་གདོན་གསུམ་རུ་ཏྲ་བཅོམ་པ་དང་༔ རིགས་གསུམ་སྐུ་གསུམ་བརྙེས་པའི་ཡོན་ཏན་དྲུག་ལྡན་ཅིང་༔ སྲིད་དང་ཞི་བའི་བདེ་སྡུག་མཐའ་ལ་མི་གནས་པའི༔ འཇམ་དཔལ་རྡོ་རྗེའི་གོ་འཕང་མྱུར་དུ་ཐོབ་པར་ཤོག༔ བཀྲ་ཤིས་ཀུན་གྱི་བཀྲ་ཤིས་པ༔ གྲགས་པའི་བཀྲ་ཤིས་སྙན་གྲགས་དགེ༔ ཁམས་གསུམ་མཐའ་ཡས་སེམས་ཅན་ཀུན༔ དབུགས་འབྱིན་ཆེན་པོའི་བཀྲ་ཤིས་ཤོག༔ ཅེས་པ་འདི་ཡང་དགེ་ལེགས་པས་བསྐུལ་ངོར་དུས་མཐའི་སྔགས་མིང་ག་གཱ་ཨ་བྷྱེས་བརྡ་རང་སོར་བཞག་པས་བྱིན་རླབས་ཤིན་ཏུ་ཆེ་བ་འདི་ནི་བླུན་པོ་གཏི་མུག་ཅན་དང་༔ རྟོག་གེ་ཐེ་ཚོམ་ཅན་ལ་ཤིན་ཏུ་མི་འབེན་པས༔ མཁའ་འགྲོ་རྒྱ་མཚོའི་ཆོས་མཛོད་པོ་ཏི་ཐེར་འབུམ་དགུ་ཕྲག་ལས་སྡེབ་གཅིག་པ་ལ་བསྟུང་བའི་ཁོང་སེང་ཨ་མིག་གཅིག་གི་རྣམ་པར་ཐར་བ་ཕྱོགས་སུ་བཀོད་པའི་རྣམ་པར་རིག་པའི་འདུ་བྱེད་ཀྱི་རྫུ་འཕྲུལ་མཁན་པོ་ཤེས་རབ་བློ་འཕེལ་མིང་གིས་བགྱིས་པ་དུས་གསུམ་ཀུན་ཏུ་དགེ་བར་གྱུར་ཅིག །སརྦ་མངྒ་ལཾ། །

རྗེ་བཙུན་འཕགས་པ་འཇམ་དཔལ་གྱི་དབང་ཆོག་བསྡུས་པ་དངོས་གྲུབ་གཏེར་མཛོད།

རྗེ་བཙུན་འཕགས་པ་འཇམ་དཔལ་གྱི་དབང་ཆོག་བསྡུས་པ་དངོས་གྲུབ་གཏེར་མཛོད་ཅེས་བྱ་བ་བཞུགས་སོ༔

ཐོག་མར་བྱ་བའི་སྔོན་འགྲོ་ནི༔ དཀྱིལ་འཁོར་མདའ་གང་ཚད་དུ་བྱ༔ དེ་སྟེང་བུམ་པ་མ་དཱ་ན༔ དཀར་དམར་ཚོན་ནམ་དངོས་ཀྱིས་བྱ༔ གླེགས་བམ་བསྟོད་རྒྱུད་དམ་ཡང་ཏི༔ ཕྱག་མཚན་རལ་གྲི་འོད་འབར་བ༔ སྐུ་གཟུགས་འཇམ་དཔལ་སྡེ་ལྔ་དང་༔ དབྱངས་ཅན་ཡུམ་གྱི་སྣང་བརྙན་དང་༔ རྩ་སྔགས་གཏོར་མ་མཐའ་རྟེན་བཤམས༔ མེ་ཏོག་མིག་རས་ཤེས་རབ་རིལ༔ མ་ལུས་ཡོངས་སུ་རྫོགས་པར་བཀྲམ༔ དཀྱིལ་འཁོར་བསྒྲུབ་མཆོད་བཞུ་འདུལ་དང་༔ བདག་འཇུག་ཆོག་གཞུང་བཞིན་བྱ༔ ཁྲུས་བྱས་བགེགས་བསྐྲད་བསྲུང་འཁོར་བསྒོམ༔ ཆོས་བཤད་མེ་ཏོག་བཀྱེ་བསྡུད་མཐར༔ གསོལ་བ་འདེབས་པ་འདི་ལྟ་སྟེ༔ ཀྱཻ༔ དུས་གསུམ་རྒྱལ་བའི་ཡེ་ཤེས་སྐུ༔ ཁྱབ་བདག་འཇམ་དཔལ་དཔའ་བོ་དང་༔ དབྱེར་མེད་བླ་མ་རིན་པོ་ཆེ༔ བརྩེ་བ་ཆེན་པོའི་ཐུགས་རྗེ་ཡིས༔ མ་རིག་རྨོངས་པའི་མུན་ཁམས་གསུམ༔ སྡུག་བསྔལ་གསུམ་གྱིས་གཟིར་བ་ལ༔ གཟིགས་ནས་རྗེས་སུ་བཟུང་དུ་གསོལ༔ མགོན་པོའི་སྐུ་གསུང་ཐུགས་མཆོག་གི༔ བྱིན་རླབས་དབང་བསྐུར་སྩལ་དུ་གསོལ༔ མ་དག་འཁྲུལ་བའི་སྒོ་གསུམ་ལ༔ སྐུ་གསུམ་ཕྱག་རྒྱས་གདབས་མཛད་གསོལ༔ ཞེས་གསོལ་བླ་མས་གནང་བ་ནི༔ ཧོ༔ རྒྱལ་ཀུན་མཁྱེན་པའི་ཡེ་ཤེས་ཀྱི༔ རང་དབང་ཁྱོད་ལ་སྦྱིན་པར་བྱ༔ རྡོ་རྗེ་ཐེག་པའི་བླ་མེད་ཀྱི༔ དམ་ཚིག་རྣམས་ཀྱང་ཡང་དག་བསྲུང་༔ དེ་ནས་དམ་ཚིག་སྦྱིན་བཟུང་ནི༔ ཀྱཻ༔ སྐྱབས་མཆོག་དམ་པ་དཀོན་མཆོག་གསུམ༔ བྱང་ཆུབ་བར་དུ་མི་གཏོང་བསྒྲུབས༔ ཀུན་རྫོབ་དོན་དམ་བྱང་ཆུབ་སེམས༔དམ་པ་བདག་གིས་བསྐྱེད་པར་བྱ༔ རྡོ་རྗེ་ཐེག་པའི་འདུལ་བ་ཡི༔ ཉེས་སྤྱོད་ཀུན་སྡོམ་དགེ་ཆོས་སྡུད༔ གཞན་ཕན་བྱང་ཆུབ་བསླབས་ལ་གནས༔ གཙོ་བོའི་བདག་རྒྱུད་སྨིན་པར་མཛོད༔ ཅེས་བརྗོད་ཡེ་ཤེས་དབབ་པ་ནི༔ སྭ་བྷ་ཝ་ཡིས་སྟོང་བར་སྦྱངས༔ སྟོང་པའི་ངང་ལས་སྐད་ཅིག་དྲན་རྫོགས་སུ༔ སོགས་གཞུང་གི་ཇི་བཞིན་སློབ་མ་ལྷར་བསྐྱེད་བྱིན་ཕབས་ལ༔ བརྟན་པར་ཏིང་ངེ་འཛིན་གྱིས་བཅིངས༔ དེ་ནས་རིགས་མེད་དོར་བ་ནི༔ ཀྱཻ༔ རྡོ་རྗེ་བླ་མའི་ཡེ་ཤེས་ཀྱི༔ རྣམ་པར་ཐར་པའི་སྒོ་གང་ནས༔ འཇུག་པའི་དབང་སྐལ་ཡོད་པ་བཞིན༔ ལྷག་ལྷའི་ཐུགས་ཀར་ཕོག་གྱུར་ཅིག༔ ཞེས་དང་མིག་རས་བསལ་བ་ནི༔ ཨེ་སངས་རྒྱས་ཐུགས་རྗེ་ཆེན་པོ་ཡི༔ འོད་ཟེར་གསེར་གྱི་ཐུར་མའི་རྟེན༔ ཁྱོད་ཀྱི་མ་རིག་ཉོན་ཤེས་སྒྲིབ༔ རང་ཞལ་ཆོས་སྐུའི་སྤྱན་རྒྱས་པ༔ སྒྲིབ་བྱེད་ལིང་ཐོག་མཚོན་འདི་བསལ༔ རྟེན་འབྲེལ་འདི་ཡི་གཟི་བརྗིད་ཀྱིས༔ ཡེ་ཤེས་ལྷ་དང་འཕྲད་པར་ཤོག༔ པྲཛྙཱ་ཛྙཱ་ན་ཙཀྵུ་པྲ་ཝེ་ཤ་ཡ་ཕཊ༔ ཅེས་བརྗོད་དེ་ནས་ལྷ་ངོ་བསྟན༔ ཧཱུྃ༔ རང་རིག་ཡེ་ཤེས་ཆེན་པོ་འདི༔ སྲིད་ཞིའི་མཐའ་ལས་འདས་པའི་ཕྱིར༔ དབྱངས་ཅན་ཡུམ་གྱི་བྷ་གར་རྫོགས༔ དོན་གྱི་མགོན་པོ་འཇམ་དཔལ་དབྱངས༔ རང་མདངས་འགགས་མེད་དཔལ་ཡོན་གྲུབ༔ ཀུན་རྫོབ་རྟགས་ཀྱི་འཇམ་དཔལ་དབྱངས༔ ཟུང་འཇུག་ཐུགས་རྗེའི་གདུལ་བྱ་འདུལ༔ བཅོས་མ་ཉེར་སྟོན་འཇམ་དཔལ་དབྱངས༔ ཡེ་ཤེས་ཆོས་སྐུའི་སེམས་གསུམ་སྒྲོལ༔ འཇམ་དཔལ་དཔའ་བོ་ཧེ་རུ་ཀ༔ འཁོར་བའི་སྐྱོན་ཀུན་ཀ་ནས་དག༔ འཇམ་དཔལ་དྲི་མ་མེད་པ་ཡིན༔ འགགས་མེད་སྐུ་ཡིས་ཆོས་འཁོར་བསྐོར༔ གསུང་ཐུགས་བརྡ་སྤྲོད་གཞིར་ནི་རྒྱས༔ འཇམ་དཔལ་སྨྲ་བའི་སེང་གེ་སྟེ༔ ཉོན་ཤེས་སྒྲིབ་པ་དབྱིངས་སུ་འབིགས༔ དེ་ཡིས་འཇམ་དཔལ་རྣོན་པོར་གྲགས༔ ཡེ་ཤེས་སྒྱུ་འཕྲུལ་དྲྭ་བ་ཀུན༔ འཇམ་དཔལ་སྲིད་ཞི་གཞིར་བཞེང་ལྷ༔ འཆི་བདུད་རྒྱུ་བ་རྩད་ནས་ཆོད༔ འགྱུར་མེད་སྐྱེ་མེད་གཤིན་རྗེ་གཤེད༔ ཁྱོད་ལས་གཞན་དུ་མ་དམིགས་སོ༔ མཁྱེན་པའི་ཤེས་རབ་རྒྱས་པའང་༔ ཡེ་ཤེས་ལྔ་ཡི་ཐུགས་ལ་རོལ༔ ཇི་ལྟ་ཇི་སྙེད་རང་གི་རྩལ༔ རྒྱལ་བ་ཀུན་གྱི་ཐུགས་ཀྱང་ཡིན༔ ཤེས་པར་གྱིས་ལ་སྤྲོ་བ་བསྐྱེད༔ ད་ནི་རང་ངོ་མངོན་པར་སྐྱོངས༔ ཅེས་བརྗོད་དེ་ནས་བུམ་དབང་དངོས༔ ཨོཾ༔ སངས་རྒྱས་སྐུ་ཡི་བུམ་པ་ནི༔དུས་གསུམ་ཤེས་རབ་སྤྱན་ལ་འཁྱིལ༔ མཁྱེན་བརྩེ་ཡེ་ཤེས་བཅུད་ཀྱིས་གཏམས༔ སྐལ་ལྡན་བུ་ལ་དབང་བསྐུར་བས༔ ལུས་ཀྱི་སྡུག་སྒྲིབ་ཀུན་དག་ནས༔ སྤྲུལ་སྐུའི་གོ་འཕང་ཐོབ་པར་ཤོག༔ རྩ་སྔགས་ཨོཾ་མཉྫུ་ཤྲཱི་བི་མ་ལ་ཛྙཱ་ན་ས་ཏྭ་ཏིཀྵ་ཧྲཱི་དྷཱི་མ་མེ་དྷི་བཾ༔ མཐར་ཀ་ཡ་ཀླེ་ཤ་ཨ་བྷི་ཥིཉྩ་ཧཱུྃ༔ དེ་དང་རྗེས་འབྲེལ་སྐུ་གཟུགས་དབང་༔ ཧཱུྃ༔ རྒྱལ་ཀུན་སྐུ་ཡི་དབང་ཕྱུག་ནི༔ དབྱངས་ཅན་ཡུམ་གྱི་བྷ་ག་རུ༔ རྗེ་བཙུན་འཇམ་དཔལ་གཞོན་ནུར་ཤར༔ ཐབས་ཤེས་དབྱེར་མེད་བདེ་བ་ཆེ༔ སྣང་སྟོང་སྐུ་ཡི་དབང་བསྐུར་བས༔ རང་ལུས་ལྷ་སྐུའི་འབྲས་སྨིན་ཤོག༔ ཨོཾ་མཉྫུ་ཤྲཱི་བི་མ་ལ་ཛྙཱ་ན་ས་ཏྭ་ཏིཀྵ་ཧྲཱི་དྷཱི་མ་མེ་དྷི་བཾཿཀ་ཡ་ཤྭ་ར་ཨ་བྷི་ཥིཉྩ་ཧཱུྃ༔ དེ་ནས་རིགས་བཞིའི་སྐུ་ཐོགས་ལ༔ ཨོཾ་རིགས་འདུས་འཇམ་དཔལ་སྒྱུ་འཕྲུལ་གར༔ རིགས་བཞིའི་ཞི་དྲག་ཚུལ་དུ་བཞེངས༔ རིགས་ཀྱི་བུ་ལ་དབང་བསྐུར་བས༔ རིག་འཛིན་མཆོག་གི་སར་བརྟན་ཤོག༔ ཨོཾ་མཉྫུ་ཤྲཱི་བི་མ་ལ་ཛྙཱ་ན་ས་ཏྭ་ཏིཀྵ་ཧྲཱི་དྷཱི་མ་མེ་དྷི་བཾཿཀ་ཡ་ཨ་བྷི་ཥིཉྩ་ཧཱུྃ༔དེ་ནས་བྱང་ཆུབ་སེམས་ཀྱི་དབང་༔ ཧཱུྃ་ཨཱ༔ བདེ་སྟོང་ཟིལ་མངར་འཁྲིགས་པའི་ཨ་མྲ་ཏ༔ བདེ་བཞི་རྒྱུད་ལ་སྤོར་བས་བྱེད་སྟོབས་རག༔ བདེ་གྲོལ་རྒྱུན་ལྡན་རྟག་ཁྱབ་འཇམ་པའི་དཔལ༔ བདེ་ཀློང་གཡོ་རླུང་ཆིངས་བའི་དབང་བསྐུར་རོ༔ ཨ་མྲ་ཏ་བོ་དྷི་ས་ཏྭ་མ་ཧཱ་སུ་ཁ་རསྨི་ཛྭ་ལ་ཨ་བྷི་ཥིཉྩ་ཧཱུྃ༔ དེ་ནས་གླེགས་རལ་ཕྱག་གི་ཆ༔ གཏད་དེ་སྟོང་ཚིག་འདི་ལྟར་བརྗོད༔ ཧཱུྃ༔ དཀྱིལ་འཁོར་ཆེན་པོ་ཡངས་པ་ཆེ༔ ཤེས་རབ་མཚོན་ཆས་སྲིད་རྩ་གཅོད༔ དམ་ཆོས་ཆོས་རྒྱལ་གསལ་བར་སྟོན༔ ཉོན་མོངས་མི་ཤེས་གཡུལ་ངོ་སེལ༔ འཇམ་དཔལ་ཐུགས་ཀྱི་སྐུ་བརྙན་འདིའི༔ སྐལ་ལྡན་བུ་ལ་དབང་བསྐུར་བས༔ དཔའ་བོ་བདུད་དགྲ་བདུད་འདུལ་བ༔ བདུད་བཞིའི་འཇིགས་པ་སེལ་བར་བྱེད༔ སངས་རྒྱས་བྱང་ཆུབ་ཐོབ་པར་ཤོག༔ རྩ་སྔགས་ཙིཏྟི་ཏི་ལ་ཨ་བྷི་ཥིཉྩ་ཧཱུྃ༔ དེ་ནས་མདའ་གཞུ་ཐོགས་ལ༔ ཧཱུྃ༔ ཐབས་ཤེས་མདའ་གཞུ་འགེང་བ་ཡི༔ མི་ཤེས་མུན་པ་ཟང་ཐལ་འབྱིན༔ ཆོས་སྐུའི་ཡེ་ཤེས་རྒྱུད་ལ་འདེབས༔ སྐལ་ལྡན་བུ་ལ་དབང་བསྐུར་བས༔ ཤེས་སྒྲིབ་ཆོས་ཉིད་དབྱིངས་སུ་བཅོམ༔ ཀུན་ཏུ་འོད་ཀྱི་ས་ཐོབ་ཤོག༔ བཛྲ་ཕཊ༔ ཨ་བྷི་ཥིཉྩ་ཧཱུྃ༔ དེ་ནས་ཤེས་རབ་རིལ་བུ་ཐོགས་ལ༔ ཧཱུྃཿཧྲཱི༔ རྗེ་བཙུན་འཕགས་པ་འཇམ་དཔལ་གྱི༔ ཐུགས་རྗེ་བྱིན་རླབས་ནུས་པའི་སྟོབས༔ མཁྱེན་རབ་ཡེ་ཤེས་ཡོན་ཏན་ཀུན༔ བཅུད་དུ་འདྲིལ་བའི་འབྲས་བུ་འདུས༔ སྐལ་ལྡན་བུ་ལ་དབང་བསྐུར་བས༔ ཡེ་ཤེས་མིག་གཅིག་དྲི་མ་མེད༔ རང་རྩལ་མངོན་རྫོགས་དབང་ཐོབ་ཤོག༔ རྩ་སྔགས་ཙིཏྟི་ཧྲཱིཿདྷ་ཡ་ཨ་བྷི་ཥིཉྩ་ཧཱུྃ༔ དེ་ནས་རིག་པ་རྩལ་གྱི་དབང་༔ ཧོ༔ ཁྱོད་རང་སེམསཉིད་སྤྲོས་བྲལ་འདི༔ གནས་ལུགས་ངོ་བོའི་འཇམ་དཔལ་ཡིན༔ སྐྱེ་འགགས་བྱུང་གནས་འགྲོ་གསུམ་བྲལ༔ ཤེས་པར་གྱིས་ཤིག་རིགས་ཀྱི་བུ༔ རང་མདངས་སྐུ་ཐིག་ངོ་བོར་བཞུགས༔ རྟགས་ལ་སྣང་བ་ལམ་གྱི་སྐུ༔ བར་དོ་ཀུན་གྱི་རང་ངོས་གཟུགས༔ སྣང་ལུགས་འོད་ཀྱི་འཇམ་དཔལ་དབྱངས༔ ཟུང་འཇུག་ཤར་གྲོལ་རིས་ལས་འདས༔ ཀུན་མཁྱེན་ཤེས་རབ་ཁྱབ་པར་འཇུག༔ ཕྲིན་ལས་བྱུ་གྲུབ་འཇམ་དཔལ་དབྱངས༔ སྤྲུལ་པ་སྐུ་ཡི་ཧེ་རུ་ཀ༔ བླ་མ་དམ་པའི་ཐུགས་ལ་རག༔ ཁྱོད་ནི་ངོ་བོ་ཉིད་དུ་འབྱམས༔ ཡང་དག་ཉིད་ལ་ཡང་དག་ལྟོས༔ ཡང་དག་མཐོང་ན་རྣམ་པར་གྲོལ༔ ཨ་ཨ་ཕཊ༔ བཞག་དུ་མེད་པའི་མཉམ་བཞག་གི༔ སྤྲོས་པ་ཐག་ཆོད་ངང་དུ་ཞོག༔ གནས་ལུགས་རང་གི་ངང་ལ་ཞོག༔ མཐོང་མེད་མཐོང་ན་མཐོང་བ་ཆེ༔ བསྒྲུབ་མེད་འབྲས་བུ་མངོན་དུ་གྱུར༔ ཉམས་སུ་མངོན་སུམ་མྱོང་བ་ལ༔ སྨྲ་བསམ་བརྗོད་དུ་མེད་པ་འདི༔ རིག་པ་རྩལ་གྱི་དབང་ཆེན་ཡིན༔ དེ་རང་ཁྱོད་ལ་སྦྱིན་པ་སྟེ༔ ཡལ་བར་མ་དོར་བསྒྲུབ་བརྩོན་ལ༔ འབྲས་བུའི་ས་ལ་རག་པར་གྱིས༔ སྐལ་ལྡན་སྙིང་གི་བུ་གཅིག་པོ༔ ས་མ་ཡ་ས་མ་ཏི་ཨ་བྷི་ཥིཉྩ་ཧཱུྃ༔ ཅེས་བརྗོད་དེ་ནས་གཏོར་དབང་ནི༔ ཧཱུྃ༔ སེམས་གསུམ་དག་པའི་གཏོར་གཞོང་དུ༔ ཡེ་ཤེས་གསུམ་གྱི་གཏོར་མར་བཤམས༔ ཁམས་གསུམ་དབྱིངས་གྲོལ་རང་དབང་དུ༔ སྐལ་ལྡན་ཁྱོད་ལ་བསྐུར་བ་ཡི༔ རྗེ་བཙུན་འཕགས་པ་འཇམ་དཔལ་གྱི༔ གསང་བ་བསམ་གྱིས་མི་ཁྱབ་པའི༔ ཡེ་ཤེས་མཆོག་དང་གཉིས་མེད་ཤོག༔ ཨོཾ་བཛྲ་བ་ལིངྟ་གུ་ཧྱ་སརྦ་ཨ་བྷི་ཥིཉྩ་ཧཱུྃ༔ དེ་ནས་མཐའ་རྟེན་རྫས་རྟགས་དབང་༔ ལོངས་སྐུའི་རྒྱན་ཆས་ལག་ཏུ་ཐོགས༔ ཧཱུྃ༔ སྐལ་ལྡན་རིགས་ཀྱི་བུ་ཁྱོད་ལ༔ རིན་ཆེན་རྒྱན་བརྒྱད་དབང་བསྐུར་བས༔ བཀྲ་ཤིས་རྫས་ཀྱི་རྟགས་བརྒྱད་འདིས༔ རྣམ་ཐར་བརྒྱད་ལྡན་ཡེ་ཤེས་ལ༔ རང་དབང་འབྱོར་བའི་གཟུངས་ཐོབ་ནས༔ མགོན་པོ་འཇམ་དཔལ་གཞོན་ནུ་ཡི༔ རྒྱལ་ཐབས་སྤྱི་བོར་དབང་བསྐུར་བས༔ ཇི་ལྟར་དེ་བཞིན་གཤེགས་པར་ཤོག༔ ཨོཾ་རཏྣ་ཨ་ལཾ་ཀ་ཨ་བྷི་ཥིཉྩ་ཧཱུྃ༔ དེ་ནས་དར་ཆས་མངའ་འབུལ་ནས༔ ཧཱུྃ༔ ལམ་ལྔ་མཐར་ཕྱིན་སྐུ་ལྔ་མངོན་དུ་མཛད༔ རིག་འཛིན་ལྔ་པོ་མཐར་ཕྱིན་འགྲོ་ལྔ་འདྲེན༔ ཡེ་ཤེས་ལྔ་རྫོགས་ལྔ་ཚན་བརྒྱ་ཕྲག་གི༔ ཡོན་ཏན་ལྷུན་གྲུབ་འཇམ་དཔལ་གཞོན་ནུ་ཡི༔ མངའ་ཐང་ཆེ་ལ་རང་དབང་བསྒྱུར་བ་ནི༔ རྒྱལ་ཐབས་སྤྱི་བླུགས་རིན་ཆེན་དར་གྱི་ཆས༔ ཕུལ་བས་ཁམས་གསུམ་ཆོས་ཀྱི་རྒྱལ་ས་རུ༔ དེ་རིང་ཉིད་ནས་ཁྱོད་ཉིད་བཀོད་པ་འདིས༔ སྤྲུལ་སྐུའི་ས་ལས་འདས་པའི་གངས་ཆེན་མཚོར༔ ཐོབ་པ་འདི་ལས་ལུང་བསྟན་མཆོག་བླངས་དེ༔ དེ་མ་ཐག་དུ་སྨིན་གྲོལ་ཅིག་ཆོད་ཤོག༔ ཨོཾ་པཉྩ་ར་ས་པཱུ་ཛ་ཨ་བྷི་ཥིཉྩ་ཧཱུྃ༔ དེ་ནས་ཡོན་དབུལ་དམ་ཚིག་ཁས་བླངས་བྱ༔ བཀྲ་ཤིས་སྨོན་ལམ་དག་གིས་མཐའ་བརྒྱན་ནོ༔ ཚུལ་འདི་སྔགས་འཆང་ནམ་མཁའ་འཇིགས་མེད་ཀྱིས། །རངགཞན་ཀུན་ལ་ཕན་པའི་བློས་བཀོད་དོ། །

འཕགས་པ་འཇམ་དཔལ་གྱི་ཡང་གསང་གི་རྩ་དཀྱིལ་ལས་ཁོལ་བྱུང་བློ་གྲོས་ཉི་མའི་སྣང་བ།

འཕགས་པ་འཇམ་དཔལ་གྱི་ཡང་གསང་གི་རྩ་དཀྱིལ་ལས་ཁོལ་བྱུང་བློ་གྲོས་ཉི་མའི་སྣང་བ་བཞུགས་སོ༔

ན་མོ་གུ་རུ་པདྨ་ཀཱ་ར་ཡེ༔ སངས་རྒྱས་ཀུན་གྱི་ཡེ་ཤེས་སྐུ༔ རང་བཞིན་འཇམ་དཔལ་དཔའ་བོ་ནི༔ དུས་བཞི་མཉམ་པ་ཉིད་ཀྱི་དབྱིངས༔ བདེ་ཆེན་འགྱུར་བ་མེད་པ་སྟེ༔ རྩ་བ་རང་བཞིན་གཟུགས་བརྙན་དུ༔ བསྒྲུབ་པ་བསམ་གྱིས་མི་ཁྱབ་ཀྱང་༔ ཀུན་ལས་ཁྱད་འཕགས་རིན་པོ་ཆེ༔ ཉི་མའི་སྣང་བ་འདི་ན་སྤྲོ༔ དཀྱིལ་འཁོར་གཏོར་མ་མི་དགོས་ཀྱང་༔ འཇམ་དཔལ་ལྔ་ཡི་ངོ་བོ་ཉིད༔ དྲན་པས་ས་མ་ཏི་ལྡན་ཅིང་༔ སྔོན་རྗེས་དངོས་གཞི་སྟབས་གཅིག་ཏུ༔ ཨེ་མ༔ སངས་རྒྱས་ཀུན་གྱི་ཡེ་ཤེས་མིག༔ ལུས་ཀྱི་མཆོག་ཏུ་སྐྱབས་སུ་ཚོལ༔ སེམས་ཅན་མ་ལུས་ཐམས་ཅད་པ༔ ཅིག་ཆོད་གྲོལ་ཕྱིར་ཡེ་ཤེས་བསྐྱེད༔ དེ་ཉིད་སེལ་བྱེད་ཉོན་མོངས་འདྲེ༔ ལྡོག་མེད་ཆེན་པོའི་མཚམས་ཀྱིས་བཅད༔ རང་བྱུང་བདེ་བ་འཁོར་ལོའི་ཐུགས༔ མཁའ་ཁྱབ་ཆེན་པོར་སད་བྱིན་ཕོབ༔ ཡེ་དག་དངོས་པོ་ཆོས་དབྱིངས་རྒྱན༔ ངོ་ཤེས་ངང་རྟོགས་བྱིན་གྱིས་རླབས༔ ཨོཾ༔ མཉམ་པ་ཉིད་ནི་གཏི་མུག་ཆེ༔ མཚན་མ་འཇོམས་པའི་ཧེ་རུ་ཀ༔ སྐུ་ཡི་མཆོག་ཏུ་གཞིར་བཞེངས་པ༔ འཇམ་དཔལ་རྡོ་རྗེ་འཁོར་པའི་དབྱིངས༔ ངོ་བོ་ཀ་དག་ཆོས་ཀྱི་སྐུ༔ ལུས་མཐར་གྲོལ་བ་རིན་ཆེན་སྦུབས༔ འཁོར་འདས་ཀུན་གྱི་རྟེན་དུ་རྫོགས༔ འདུས་མ་བྱས་པས་སྐྱེ་ཤི་མེད༔ ཨཱ༔ བདེ་བའི་པདྨ་འདོད་ཆགས་རྒྱལ༔ ཆགས་གསལ་དག་པའི་བུམ་པ་ལྔ༔ ཤེས་རབ་སྤྱན་གྱི་བཀྲ་འབར་བཞིན༔ གསུང་གིས་མཆོག་ཏུ་རང་བཞིན་སྒྲར༔ འཇམ་དཔལ་ཚངས་པ་ཆེན་པོར་ཤར༔ ལྷུན་གྲུབ་ཡོན་ཏན་ལོངས་སྤྱོད་རྫོགས༔ བར་མའི་སྦུབས་ཀྱི་སྒྲིབ་བྲལ་སྐུ༔ རླུང་ལྔ་དབྱིངས་འཁྱིལ་འགགས་པ་མེད༔ ཧཱུྃ༔ དབྱེར་མེད་འཁོར་ལོ་ཞེ་སྡང་ཞི༔ བེམ་སྟོང་འཇོམས་པའི་ཡེ་ཤེས་སེམས༔ ཐུགས་མཆོག་རང་རྟགས་གཞིར་གྲོལ་བདག༔ འཇམ་དཔལ་ཡེ་ཤེས་ཟུང་འཇུག་དབྱིག༔ ཐུགས་རྗེ་ཀུན་ཁྱབ་སྤྲུལ་པའི་སྐུ༔ དམར་སེར་ཕྱག་གཉིས་རལ་གྲི་དང་༔ ཨུཏྤལ་གྱིས་བརྟེན་པུསྟེའི་མཚན༔ དཔལ་གྱི་བེའུར་འཁྱིལ་པར་ལྡན༔ ཞབས་གཉིས་སྐྱིལ་ཀྲུང་ཕྱེད་པར་དགྱེས༔ དབྱིབས་སྔགས་ཆོས་སུ་འབྲལ་མེད་ལྷ༔ དཔའ་བོ་གཅིག་གི་རྒྱན་རྫོགས་སུ༔ སྐུ་གསུམ་རྒྱལ་བའི་གཟི་བྱིན་འདུས༔ འོད་འཕྲོས་ཏིང་འཛིན་རྩ་བ་བརྟན༔ ལྷུན་གྲུབ་ཡེ་ཤེས་འབྲེལ་མར་རོལ༔ ལྟ་བ་གྱད་ཀྱིས་གཉིས་སྣང་བསྒྲལ༔ སེམས་དཔའི་ཁྱེའུ་ལྔའི་བླང་མཆོད༔ ཀློང་ཡངས་བདེ་བ་ཆེ་ལ་ཧོ༔ དོན་རྟགས་འབྲེལ་བའི་མཚན་ཉིད་དུ༔ ཐབས་ཤེས་ཟུང་འཇུག་ཉི་ཟླའི་དཀྱིལ༔ འཁོར་ལོ་རྩིབས་དྲུག་ལྟེ་བ་རུ༔ གསང་སྔགས་རྒྱལ་པོའི་གཟི་བརྗིད་ཀྱིས༔ ལོག་རྟོགས་གཉིས་སྣང་ཞེན་པ་བཅོམ༔ རང་བྱུང་མངོན་གྱུར་དངོས་གྲུབ་སྩོལ༔ དྷཱི༔ ཅི་འགྲུབ་ལྟ་བའི་ངང་ནས་བཟླ༔ དེ་ཡིས་རིགས་ཆེན་གཙིག་ཏོར་ཐོབས༔ ཏིང་འཛིན་འཁོར་གྱི་སེམས་དཔའ་ནི༔ རྩིབས་དྲུག་ཁོང་བུར་ཡི་གེ་དྲུག༔ ཤེས་རབ་ཡེ་ཤེས་ངོ་བོ་ཉིད༔ མ་རིག་འཇོམས་པའི་དཔའ་བོར་ཤར༔ བཟླས་པས་ཉོན་ཤེས་དྲི་མ་དག༔ སོར་རྟོགས་ཤེས་རབ་དངོས་གྲུབ་སྩོལ༔ ཨོཾ་ཨ་ར་པ་ཙ་ན་དྷཱི༔ མཐའ་བསྐོར་འཁོར་ལོ་དྲུག་ཏུ་བཀོད༔ ཨོཾ་སརྦ་བུདྡྷ་གྷརྦྷེ༔ ཛྙཱ་ན་ཀ་ཡ༔ ར་ཧཾ་མུ་ནེ༔ ཨཏྨ་ཀོ྅་ཧཾ༔ པྲཛྙཱ་དཱ་ན༔ ཨོཾ་ཧཱུྃ་སྭ་ཨཱཾ་ཧཱ༔ མཆན་དུ་ཕྲིན་ལས་ཙཀྲ་དྲུག༔ རྣོ་དབལ་ཁ་དོག་དྲུག་གི་མཚན༔ རིགས་དྲུག་ས་བོན་གཉིད་དང་བཅས༔ ཁྱད་པར་དྲན་ཉམས་ཤེས་སྒྲིབ་བསལ༔ དྲན་དང་གཟུངས་སྤོབས་ཡང་དག་རིགས༔ ཕུན་སུམ་ཚོགས་པའི་ཡོན་ཏན་ཐོབ༔ སྟོབས་བཅུ་མི་འཇིགས་དངོས་གྲུབ་སྩོལ༔ ཨོཾ་བཛྲ་ཏིཀྵ༔ དུཿཁཙྪེ་དྷ༔ པྲཛྙཱ་ཛྙཱ་ནཱ་མུཏྟ་ཡེ༔ ཛྙཱ་ན་ཀ་ཡ༔ ཝ་ཀི་ཤྭ་རི༔ མཉྫུ་ཤྲཱི་པྲཛྙཱ་པཉྩ༔ པ་ར་མཱ་ས་ཏྭ་སིདྡྷི་ཕ་ལ་ཨཱཿཧཱུྃ༔ ཞེས་བརྗོད་དེ་ནས་སྔགས་དེ་གསུམ༔ དང་པོ་འབུམ་ཕྲག་བཅོ་ལྔ་དང་༔ གཉིས་པ་འབུམ་གསུམ་ཐ་མ་ལ༔ ཁྲི་ཕྲག་གཅིག་གིས་གྲངས་བསྙེན་ཐེམ༔ རྟགས་མ་མཐོང་བར་ཅི་ནུས་བསྒྲུབ༔ དུས་སུ་བསྙེན་པ་བཞི་འགྱུར་གྱི༔ གསང་སྔགས་སྒྲུབ་པ་ངེས་པར་བྱ༔ དེ་ཡིས་རྡོ་རྗེའི་ཕྱག་རྒྱ་འགྲུབ༔ ས་མ་ཡཱ༔ འདི་ཡིས་སྤོབས་པའི་གཏེར་བརྒྱད་གྲོལ༔ མ་རིག་མུན་པ་དབྱིངས་སུ་སོལ༔ རྒྱལ་ཀུན་ཡེ་ཤེས་སེམས་དཔའ་འགྲུབ༔ ཅིག་ཆོད་ཀུན་བཟང་མགོན་པོར་རྒྱས༔ ཅེས་ཀྱང་བླ་ཁོའི་གསུང་ངོར་ག་གཱས་སོ། །

འཇམ་དཔལ་ཤེས་རབ་བློ་འཕེལ།

འཇམ་དཔལ་ཤེས་རབ་བློ་འཕེལ་བཞུགས༔

མཱུཾ༔ རང་སྣང་རྣམ་དག་འཇམ་པའི་མགོན་པོ་རུ༔ རང་ཉིད་སྐད་ཅིག་རྗེ་བཙུན་མཁྱེན་པའི་གཏེར༔ ཞལ་གཅིག་ཕྱག་གཉིས་རལ་གྲི་པུསྟི་བསྣམས༔ ལོངས་སྐུའི་རྒྱན་རྫོགས་ཐུགས་ཀར་ཨུཏྤ་ལའི༔ ལྟེ་བར་ཉི་ཟླའི་གའུ་ཁ་སྦྱོར་ནང་༔ མཱུཾ་མཐར་སྔགས་ཀྱི་ཕྲེང་བས་གཡས་སུ་འཁོར༔ དེ་ལས་འོད་འཕྲོས་དུས་གསུམ་རྒྱལ་བའི་ཚོགས༔ ཐུགས་དམ་རྒྱུད་བསྐུལ་མཁྱེན་བརྩེའི་ནུས་སྟོབས་ཀུན༔ དམར་སེར་འོད་ཀྱིས་རྣམ་པར་བསྡུས་ཏེ་བསྟིམ༔ རྣོ་མྱུར་ཟབ་གསལ་རྒྱ་ཆེ་ཐོགས་མེད་ཀྱིས༔ ཤེས་རབ་ཇི་ལྟ་ཇི་སྙེད་ཤེས་བྱ་ལ༔ རབ་རྒྱས་དྲན་དང་གཟུངས་སྒོ་སོ་སོ་རིགས༔ སྤོབས་པའི་གཏེར་ཆེན་མཐའ་དག་ཡོངས་ཐོབ་ནས༔ དོན་གཉིས་ལྷུན་གྲུབ་གོ་འཕང་མཆོག་གྲུབ་བསམ༔ ཨོཾ་ཨཱཿམཉྫུ་ཤྲཱི་པྲཛྙཱ་ཛྙཱ་ན་མ་ཧཱ་སརྦ་སིདྡྷི་སིདྡྷི་ཕ་ལ་ཧཱུྃ༔ མཐར་ནི་མི་དམིགས་ངང་ལ་བཞག༔ པདྨ་མ་ཏིའི་ངོར་ག་གཱས་སོ། །ཨོཾ༔ མཆོད་པ་ཆེན་པོ་ཞེ་སྡང་ཆེ༔ ཁྲོ་བ་ཐམས་ཅད་སེལ་བར་བྱེད༔ མཆོད་པ་ཆེན་པོ་འདོད་ཆགས་ཆེ༔ ཆགས་པ་ཐམས་ཅད་སེལ་བར་བྱེད༔ མཆོད་པ་ཆེན་པོ་གཏི་མུག་ཆེ༔ མ་རིག་ཉོན་ཤེས་སྒྲིབ་པ་སེལ༔ མཉྫུ་ཤྲཱི་པཉྩ་རཀྟ་བྷ་ལིངྟ་མ་ཧཱ་པུ་ཛ་ཁཱ་ཧི༔ ཞེས་མཆོད་ཅིང་བསྟོད་པ་ནི༔ ཧཱུྃ༔ ཡེ་ཤེས་ལུས་ཅན་དེ་བཞིན་གཤེགས༔ ཡེ་ཤེས་ལུས་ལ་བག་ཆགས་མེད༔ བཟང་ངན་མེད་མཉམ་འཇམ་དཔལ་ཉིད༔ ཀུན་ལ་འཆར་བྱེད་ཁྱོད་ལ་བསྟོད༔ སྒྱུ་འཕྲུལ་དྲྭ་བ་ཁྱོད་ལ་བསྟོད༔ སངས་རྒྱས་རོལ་སྟོན་ཁྱོད་ལ་བསྟོད༔ ཐམས་ཅད་ཐམས་ཅད་ཁྱོད་ལ་བསྟོད༔ ཡེ་ཤེས་སྐུ་ཉིད་ཁྱོད་ལ་བསྟོད༔ ག་གཱས་སོ། །

འཇམ་དཔལ་ལུས་དཀྱིལ་ཤེས་རབ་བློ་གཏེར།

འཇམ་དཔལ་ལུས་དཀྱིལ་ཤེས་རབ་བློ་གཏེར་བཞུགས་སོ༔

ཧཱུྃ༔ རང་ཉིད་སྐད་གཅིག་དྲན་རྫོགས་སུ༔ སངས་རྒྱས་ཀུན་གྱི་ཡེ་ཤེས་སྐུ༔ མཁྱེན་པའི་གཏེར་ཆེན་འཇམ་དཔལ་དབྱངས༔ དམར་སེར་ཞལ་གཅིག་ཕྱག་གཉིས་ཀྱི༔ གཡས་པས་ཤེས་རབ་རལ་གྲི་དང་༔ གཡོན་པས་ཨུཏྤལ་པུསྟི་འཛིན༔ ཞབས་གཉིས་རྡོ་རྗེའི་སྐྱིལ་ཀྲུང་བཞུགས༔ ལོངས་སྤྱོད་རྫོགས་པའི་རྒྱན་ཆས་སྤྲས༔ དབྱངས་ཅན་ཡུམ་དང་གཉིས་མེད་འཁྲིལ༔ རིགས་བདག་རྣམ་པར་སྣང་མཛད་དང་༔ གནས་གསུམ་སྐུ་གསུང་ཐུགས་ཀྱི་ལྷའི༔ རྡོ་རྗེའི་སྙིང་པོ་འབྲུ་གསུམ་ལས༔ འོད་འཕྲོས་དབྱིངས་ནས་ཡེ་ཤེས་ལྷ༔ དུས་གསུམ་རྒྱལ་བའི་ཚོགས་རྣམས་ཀུན༔ འཇམ་དཔལ་རིགས་ལྔའི་རྣམ་པར་བྱོན༔ དམ་ཡེ་དབྱེར་མེད་རོ་གཅིག་གྱུར༔ ཐུགས་ཀར་ཡེ་ཤེས་སེམས་དཔའ་ནི༔ རང་འདྲ་རྒྱན་མེད་འོད་ཕུང་འབར༔ འཁོར་ལོའི་མཚན་པའི་རལ་གྲིའི་ལྟེར༔ མཱུྃ་མཐར་འཁོར་ལོ་རིམ་དྲུག་གི༔ སྔགས་ཀྱི་འཁོར་བའི་འོད་ཟེར་གྱིས༔ དུས་གསུམ་རྒྱལ་བ་ཐམས་ཅད་ཀྱི༔ མཁྱེན་བརྩེ་ནུས་པའི་ཡོན་ཏན་ཀུན༔ བསྡུས་ཏེ་ཐུགས་སྲོག་ལ་ཐིམ་པས༔ རྟོགས་དང་གཟུངས་དང་སྤོབས་པའི་གཏེར༔ མ་ལུས་རབ་ཏུ་རྒྱས་པ་ཡི༔ ཀུན་བཏགས་ལྷན་སྐྱེས་སྒྲིབ་པ་ཀུན༔ བཅོམ་ནས་ཡེ་ཤེས་སྐུ་ཐོབ་པས༔ མཐུ་ཆེན་སྣང་གྲགས་རིག་པ་ཀུན༔ སངས་རྒྱས་དཀྱིལ་འཁོར་གཅིག་དུ་བཟླུམ༔ ཨོཾ་མཱུཾ་ཧྲིཾ་པྲཛྙཱ་ཝརྡྷི་ནི་ཧཱུྃ༔ སརྦ་སིདྡྷི་ཕ་ལ་ཧཱུྃ༔ འམ་ཡང་ན་འཁོར་ལོ་དྲུག་ཚན་དུ༔ ཨ་ཨཱ་ཨུ་ཨཱུ་སོགས་མཚན་བརྗོད་རིགས་སྔགས་དྲུག་བཟླ༔ འདིས་ནི་སོ་སོ་ཡང་དག་པའི༔ རིག་པ་བཞི་ལ་མངའ་དབང་འབྱོར༔ རྣོ་མྱུར་ལག་ཏུ་ལོངས་དང་ཤེས༔ ས་མ་ཡཱ༔ ཡང་ན་མཱུུྃ་དང་དྷཱི་བརྗེས་ལ༔ སྔགས་ཕྲེང་ཨ་ར་པ་ཙར་གསལ༔ བཟླས་པས་བྱིན་རླབས་གོང་དང་འདྲ༔ ཅེས་ཀྱང་ག་གཱ་ཨ་བྷྱེས་སོ། །

རྣལ་འབྱོར་གྱི་དབང་ཕྱུག་ཆེན་པོ་ཐང་སྟོང་རྒྱལ་པོའི་གསང་བའི་བསྒྲུབ་པ་མ་རྒྱུད་འབུམ་གྱི་སྙིང་པོ།

རྣལ་འབྱོར་གྱི་དབང་ཕྱུག་ཆེན་པོ་ཐང་སྟོང་རྒྱལ་པོའི་གསང་བའི་བསྒྲུབ་པ་མ་རྒྱུད་འབུམ་གྱི་སྙིང་པོ་ཞེས་བྱ་བ་བཞུགས་སོ༔

ན་མོ་གུ་རུ་པདྨ་ཀ་ར་ཡེ༔ སངས་རྒྱས་པདྨ་འབྱུང་གནས་ཀྱི༔ ཡང་སྤྲུལ་སྦས་པའི་རྣལ་འབྱོར་བ༔ གྲུབ་ཆེན་ཐང་སྟོང་རྒྱལ་པོ་ཡི༔ གསང་བསྒྲུབ་མ་རྒྱུད་སྙིང་པོ་བསྟན༔ འདི་ལ་སྦྱོར་དངོས་རྗེས་གསུམ་ལས༔ དང་པོ་བླ་མའི་གཏོར་ཟླུམ་ལ༔ མཁའ་འགྲོའི་བཤོས་དང་རིལ་བུས་བསྐོར༔ མཎྜལ་ལ་རུ་ཤོམས་བཀོད་སོགས༔ ཐུན་མོང་ཐུན་མིན་མི་འགལ་ཀྱང་༔ ཁྱད་པར་སྨན་གཏོར་རཀྟ་གཙོ༔ རྟེན་གཏོར་ཀ་པཱ་ལ་རུ་བཤམས༔ མཆོད་སྣོད་སྤྱི་ཡང་བྷནྡྷ་གཙོ༔ ཤ་ལྔ་བདུད་རྩི་ལྔ་ཡི་མཆོག༔ དབུ་དྲངས་མ་རྒྱུད་གཞུང་དང་སྦྲེལ༔ སྦྱོར་བའི་སྔོན་འགྲོ་འདི་ལྟ་སྟེ༔ དང་པོ་སྐྱབས་སུ་འགྲོ་བ་ནི༔ ཧོ༔ སངས་རྒྱས་ཀུན་གྱི་ཡེ་ཤེས་སྐུ༔ འཇའ་ལུས་རིག་འཛིན་པདྨ་འབྱུང་༔ དཀོན་མཆོག་ཀུན་གྱི་ངོ་བོ་ལ༔ སྒོ་གསུམ་གུས་པས་སྐྱབས་སུ་མཆི༔ གཉིས་པ་སེམས་བསྐྱེད་ནི༔ ཧོ༔མཁའ་འགྲོའི་དབང་ཕྱུག་པདྨ་འབྱུང་༔ ཆོས་འབྱུང་དབྱིངས་ཀྱི་ཡེ་ཤེས་ཉིད༔ སེམས་ཅན་ཀུན་གྱིས་མངོན་བརྙེས་ཕྱིར༔ སྐུ་གསུང་ཐུགས་དང་མཉམ་པར་སྦྱོར༔ ན་མོ༔ བླ་མ་མཆོག་ལ་ཕྱག་འཚལ་ལོ༔ ཕྱི་ནང་གསང་བའི་མཆོད་པ་འབུལ༔ སྒོ་གསུམ་མི་དགེ་མཐོལ་ལོ་བཤགས༔ སྐྱེ་འཕགས་དགེ་ལ་རྗེས་ཡི་རང་༔ རྟག་པ་རྒྱུན་གྱིས་ཆོས་འཁོར་བསྐོར༔ འགྲོ་བའི་དོན་ཕྱིར་རྟག་བཞུགས་གསོལ༔ དགེ་ཚོགས་བྱང་ཆུབ་ཆེན་པོར་བསྔོ༔ ཀུན་ཀྱང་བླ་མའི་གནས་ཐོབ་ཤོག༔ གཉིས་པ་བགེགས་བསྐྲད་ནི༔ ཕཊ༔ ང་བདག་རྣམ་པར་རྟོག་པའི་འདྲེ༔ ཤེས་རབ་རིག་པའི་མཚོན་གྱིས་བསྒྲལ༔ ཐུན་མོ་བདག་གཞན་དོན་བསྒྲུབ་ལ༔ ཀུན་ཀྱང་བརྩོན་པས་མཐུན་རྐྱེན་སྦྱོར༔ བྱང་ཆུབ་སེམས་ཀྱི་ཏིང་ངེ་འཛིན༔ འཁོར་ལོ་མཆོག་གི་གུར་ཁང་ལ༔ བགེགས་ཀྱི་སྦྱོར་བ་ཡོངས་མི་སྣང་༔ ཐམས་ཅད་ཀུན་ཀྱང་རང་བཞིན་མཉམ༔ སརྦ་བིགྣཾ་ཕཊ༔ རཀྵ་རཀྵ༔ ཧཱུྃ༔ གསུམ་པ་ཕྱི་ནང་བྱིན་བརླབས་ནི༔ ཕེཾ༔ ལུས་ངག་ཡིད་གསུམ་རང་བཞིན་ནི༔ རྡོ་རྗེ་གསུམ་དུ་ལྷུན་གྱིས་གྲུབ༔ ལས་དང་ཉོན་མོངས་ཀྱི་བསྐལ་བ༔ ལྡོག་པ་མེད་པའི་འཁོར་ལོར་སད༔ མ་དག་མཚན་མ་ཐམས་ཅད་ཀུན༔ རང་བཞིན་ཡེ་ནས་རྫོགས་སངས་རྒྱས༔ རྟོག་པའི་གཉིས་འཛིན་གྱིས་བསླད་པ༔ སྒྱུ་མ་རྒྱན་གྱི་འཁོར་ལོར་ཤར༔ གུ་རུ་དཱེ་ཝ་ཊཱཀྐི་ནི་སརྦ་ས་མ་ཡ་ཕེཾ་ཛ་ཕཊ༔ པཱུ་ཙ་སྥ་ར་ན་ཕཊ༔ སཾ་ཧ་ར་ཎ་ཧཱུྃ༔ ཛྙཱ་ན་ཨ་ལིངྐ་ར་ཙཀྲ་ཨ་ཧཱུྃ༔ གཉིས་པ་དངོས་གཞིའི་རིམ་པ་ནི༔ ཏིང་འཛིན་གསུམ་གྱིས་མངལ་ནས་བཏོན༔ ས་མ་ཡཱ༔ ཧཱུྃ༔ ཀ་དག་ཆེན་པོ་མཉམ་པ་ཉིད༔ འཁོར་འདས་མཚན་མ་དབྱིངས་སུ་སངས༔ ཕྱོགས་ལྷུང་མེད་པའི་ནམ་མཁའ་ནི༔ དམིགས་བསམ་བརྗོད་པ་ཀུན་ལས་འདས༔ ཨཱ༔ སྟོང་པ་ཉིད་ཀྱི་རང་གདངས་ནི༔ ཕྱོགས་རིས་བྲལ་བའི་སྙིང་རྗེར་ཤར༔ རང་གསལ་བདེ་བ་ཆེན་པོ་སྟེ༔ ཀུན་ཏུ་བཟང་པོ་ཡབ་ཀྱི་ངང་༔ ཧཱུྃ༔ སྣང་སྟོང་ཟུང་འཇུག་ཡེ་ཤེས་ནི༔ ཡེ་ཤེས་འཁོར་ལོ་མཁའ་ཁྱབ་སྤྲིན༔ གསལ་བརྟན་རབ་དཀར་རྣམ་པར་དག༔ བཾ་དང་ཧ་རི་ནི་ས་ལས༔ པདྨ་བཾ་གྱིས་མཚན་པར་གྱུར༔ ལུས་སེམས་སྐད་ཅིག་དྲན་རྫོགས་སུ༔ རྟེན་དང་བརྟེན་པའི་འཁོར་ལོར་ཤར༔ ཕྱི་སྣོད་དུར་ཁྲོད་རབ་འཇིགས་དབུས༔ བམ་རིལ་རྙིང་སྐམ་རློན་པ་ཡི༔ ཐོད་པ་ལྔ་བརྩེགས་གཞལ་ཡས་ཁང་༔ གྲུ་བཞི་སྒོ་བཞི་མཚན་ཉིད་ལྡན༔ ཕྱི་ནས་རྡོ་རྗེའི་གུར་ཁང་གཏམས༔ སུརྱ་ཀ་མ་ལ་ཡི་སྟེང་༔ རིག་འཛིན་རྒྱལ་པོ་ཧེ་རུ་ཀ༔ ལུང་སྟོང་སྨྱོན་པ་ཞེས་སུ་གྲགས༔ སྐུ་མདོག་དམར་སྨུག་རབ་ཏུ་བརྗིད༔ ཞི་མ་ཁྲོ་འཛུམ་གཟི་བརྗིད་འབར༔ ཞལ་གཅིག་ཕྱག་གཉིས་མཉམ་བཞག་སྟེང་༔ འཆི་མེད་ཚེ་ཡི་བུམ་པ་འཛིན༔ ཁ་རྒྱན་གུ་རུ་པདྨས་མཛེས༔ ཞབས་གཉིས་རྡོ་རྗེའི་སྐྱིལ་ཀྲུང་བཞུགས༔ རུས་པའི་རྒྱན་དྲུག་སྐུ་ལ་གསོལ༔ ཧེ་རུ་ཀ་དཔལ་རྔམ་པའི་ཆས༔ ཤར་དུ་རྡོ་རྗེའི་རྒྱ་གྲམ་སྟེང་༔ པདྨའི་གདན་ལ་གར་སྟབས་ཀྱིས༔ རྡོ་རྗེའི་རིགས་ཀྱི་མཁའ་འགྲོ་མ༔ ཕྱག་གཡས་རྡོ་རྗེའི་གྲི་ཁུག་དང་༔ གཡོན་པས་བྷནྡྷ་ཁྲག་བཀང་འཛིན༔ ལྷོ་རུ་རཏྣ་པདྨའི་སྟེང་༔ རིན་ཆེན་རིགས་ཀྱི་མཁའ་འགྲོ་མ༔ ནོར་བུའི་མཚན་པའི་གྲི་ཐོད་འཛིན༔ ཞབས་གཉིས་གར་སྟབས་ཚུལ་དུ་འགྱིང་༔ ནུབ་ཏུ་པདྨའི་གདན་སྟེང་དུ༔ གསུང་མཆོག་རིགས་ཀྱི་ལྷ་མོ་ནི༔ པདྨའི་མཚན་པའི་གྲི་ཐོད་འཛིན༔ ཞབས་གཉིས་གར་སྟབས་ཚུལ་དུ་འགྱིང་༔ བྱང་དུ་ཆོས་འབྱུང་པདྨའི་མཁའ༔ ཀརྨའི་རིགས་ཀྱི་ཊཱཀྐི་ནི༔ རྒྱ་གྲམ་མཚན་པའི་གྲི་ཐོན་འཛིན༔ ཞབས་གཉིས་གར་སྟབས་ཚུལ་དུ་འགྱིང་༔ མཐའ་བསྐོར་གྲུ་ཆད་བཞི་ལ་ནི༔ བསོད་ནམས་རྩེ་མོའི་གཤོག་པ་གདེངས༔ དཀོན་མཆོག་ལྷུན་གྲུབ་ཐོད་དབྱུག་འཛིན༔ པིརྦ་དཔའ་བོ་བམ་རོ་བསྣམས༔ བི་ན་ས་བ་ཆོས་འབྱུང་གདེངས༔ ཁྱམས་སུ་རྒྱ་དང་བོད་ཡུལ་གྱི༔ གྲུབ་ཐོབ་བརྒྱ་དང་དྲུག་ཅུས་བསྐོར༔ ཀུན་ཀྱང་རུས་པའི་རྒྱན་དྲུག་གསོལ༔ སྒོ་བཞིར་ཤུགས་འགྲོ་ཆེན་པོ་བཞི༔ ལྕགས་ཀྱུ་ཞགས་པ་ལྕགས་སྒྲོག་དྲིལ༔ གཡོན་རྣམས་ཐོད་པ་ཁྲག་བཀང་གསོལ༔ གནས་གསུམ་སྐུ་གསུམ་མཁའ་འགྲོ་མའི༔ ཐུགས་ཀར་ཨོཾ་ཨཱཿཧཱུྃ་གསུམ་གསལ༔ དབུ་ལ་རིགས་ལྷའི་སངས་རྒྱས་བཞུགས༔ འབྲུ་གསུམ་རྡོ་རྗེའི་སྙིང་པོ་ལས༔ འོད་འཕྲོས་དབྱིངས་ནས་ཡེ་ཤེས་པ༔ སྤྱན་དྲངས་གཉིས་སུ་མེད་པར་གྱུར༔ བཞི་པ་སྤྱན་འདྲེན་སོགས་ནི༔ ཧཱུྃ༔ རང་བཞིན་ཆོས་དབྱིངས་མཉམ་པ་ནས༔ ཆོས་སྐུའི་བླ་མ་གཤེགས་སུ་གསོལ༔ རང་གསལ་འགགས་མེད་ཕོ་བྲང་ནས༔ ལོངས་སྐུའི་བླ་མ༴ གང་འདུལ་སྣ་ཚོགས་སྒྱུ་འཕྲུལ་གར༔ སྤྲུལ་སྐུའི་བླ་མ༴ གནས་གསུམ་དག་པའི་གཞལ་ཡས་ནས༔ འབུམ་ཕྲག་མཁའ་འགྲོ༴ རང་སྣང་འོག་མིན་ཕོ་བྲང་ནས༔ གྲུབ་ཐོབ་རྒྱ་མཚོ༴ སྐད་ཅིག་ཉིད་ལ་གཤེགས་སུ་གསོལ༔ བྱིན་གྱི་བརླབ་ཕྱིར༴ མ་དག་སྙིགས་མའི་རྣམ་སྨིན་སྐྱེས༔ དག་དབྱིངས་དྭངས་མར་འཕོ་པ་དང་༔ ཐུན་མོང་མཆོག་གི་དངོས་གྲུབ་ཀུན༔ ཡོངས་སུ་སྩོལ་ཕྱིར་གཤེགས་སུ་གསོལ༔ ཨོཾ་བཛྲ་ས་མ་ཡ་ཡོ་གི་ཧེ་རུ་ཀ་བཛྲ་ཊཱཀྐི་ནི་ས་པཱ་རི་ཝ་ར་མ་ཧཱ་ཀ་རི་ཎི་ཀ་དྲ་ཤ་ཧོ༔ ཛ་ཛ༔ ཧཱུྃ༔ བདག་ཉིད་གཞི་ཡི་སངས་རྒྱས་ལ༔ རྟོགས་པ་མངོན་གྱུར་ཧེ་རུ་ཀའི༔ དེ་བཞིན་གཤེགས་པ་གདན་འཛོམ་པར༔ ཆུ་ལ་ཆུ་བཞག་ཅི་བཞིན་གྱུར༔ རྡོ་རྗེ་གསུམ་གྱིས་རྒྱས་འདེབས་ཕྱིར༔ དུ་མ་རོ་གཅིག་བརྟན་པར་བཞུགས༔ ཨོཾ་བཛྲ་ས་མ་ཡུ་ཏིཥྛ་ལྷན༔ ཧཱུྃ༔ སྣང་སྟོང་ཡུལ་གྱི་ལྷ་མོ་ལ༔ རིག་སྟོང་བྱང་ཆུབ་ཁྱེའུ་ལྔ༔ འདོད་ཡོན་རྣམ་པའི་དམིགས་པར་བཅས༔ ཐིམ་པའི་ཚུལ་གྱིས་དགྱེས་པར་འཁྲིལ༔ ཨརྒྷཾ་ནས་ཤབྟའི་བར་དང་རུ་པ་ནས་སྤརྴེ་དྷརྨ་དྷརྟུ་སརྦ་པཉྩ་རཀྟ་བྷ་ལིངྟ་ཏ་ན་གཱ་ན་པཱུ་ཙ་ཁཱ་ཧི༔ འམ་བསྡུ་ན༔ ཨོཾ་སརྦ་དེ་ཝི་པཉྩ་པཱུ་ཛ་ཁཱ་ཧི༔ ཧཱུྃ༔ ༼ ཨོཾ༔དཔྱད། ༽ སྣང་སྟོང་རྡོ་རྗེའི་སྐུ་ཡི་དབྱིག༔ མི་འགྱུར་མི་ཤིགས་སྤྲུལ་པའི་སྐུ༔ ཨཱ༔ གྲགས་སྟོང་རང་ཤར་གསུང་གི་དབྱིག༔ མ་འགགས་མི་རྟོག་ལོངས་སྤྱོད་རྫོགས༔ ཧཱུྃ༔ རིག་སྟོང་རྡོ་རྗེ་ཐུགས་ཀྱི་དབྱིག༔ ཟང་ཐལ་སྤྲོས་བྲལ་ཆོས་ཀྱི་སྐུ༔ སྭཱ༔ མ་འདྲེས་ཡོངས་རྫོགས་ཡོན་ཏན་དབྱིག༔ མཉམ་ཉིད་ལྷུན་གྲུབ་མངོན་བྱང་ཆུབ༔ ཧཱ༔ མི་འགྱུར་མི་ཕྱེད་འདུས་མ་བྱས༔ རྡོ་རྗེ་ཀུན་འབྱུང་ཧེ་རུ་ཀ༔ ངང་རྫོགས་རྫུ་འཕྲུལ་ཆེན་པོ་ལ༔ ཡེ་ཤེས་འཛད་མེད་དགུ་ལྡན་པའི༔ རྣམ་པར་འཕྲུལ་ལ་ཕྱག་འཚལ་བསྟོད༔ མཚན་གྱི་རྣམ་པ་སུམ་ཅུ་ཕྲག༔ གནས་གསུམ་ཡེ་ཤེས་མཁའ་འགྲོར་ཤར༔ དཔེ་བྱད་བཟང་པོ་བརྒྱད་ཅུ་ལས༔ རྒྱ་བོད་གྲུབ་པ་ཐོབ་པའི་ཚུལ༔ སྣ་ཚོགས་རྣམ་པར་འཕྲུལ་ལ་བསྟོད༔ བདེ་གཤེགས་སྙིང་པོའི་རང་གཟུགས་ནི༔ གཟུགས་སྐུ་གཉིས་ཀྱི་བཀོད་པ་ངོམ༔ འགྲོ་འདུལ་ཕྲིན་ལས་བསམ་མི་ཁྱབ༔ ཆོས་ཚུལ་རྒྱ་མཚོའི་འདུལ་ལ་བསྟོད༔ ལྔ་བ་འཛབ་བཟླས་ནི༔ ལྷ་ཚོགས་འཁོར་བཅས་ཐུགས་ཀ་རུ༔ ཉི་ཟླའི་གའུ་ཁ་སྦྱོར་ནང་༔ ཡེ་ཤེས་སེམས་དཔའ་ཚེ་དཔག་མེད༔ དམར་གསལ་ཚེ་ཡི་བུམ་པ་འཛིན༔ རྒྱན་མེད་གཅེར་བུ་འོད་ཕུང་འབར༔ ཐུགས་དབུས་ཏིང་འཛིན་སེམས་དཔའ་བཾ༔ ཐ་མར་སྔགས་ཕྲེང་གཡས་སུ་བཀོད༔ བཟླས་པས་སྒྲར་བཅས་གཡོན་དུ་འཁོར༔ འོད་ཟེར་འཕྲོ་འདུས་དོན་གཉིས་བྱས༔ ཚུར་འདུས་བདག་ལ་ཐིམ་པ་ཡི༔ དུས་གསུམ་སངས་རྒྱས་ཐམས་ཅད་ཀྱི༔ ཐབས་ཤེས་སྣང་སྟོང་ཟུང་འཇུག་གི༔ ངོ་བོ་སྔགས་གསུམ་དབྱེར་མེད་པའི༔ གསུང་གསང་རྡོ་རྗེའི་ཡེ་ཤེས་དལ༔ དབྱིབས་སྔགས་དོན་གྱི་ལྷ་སྣང་ཀུན༔ ངེས་པ་གཅིག་དྲིལ་ངང་ནས་བཟླ༔ ཨོཾ་ཨཱཿཧཱུྃཿབཛྲ་གུ་རུ་ཡོ་ག་ཤྭ་ར་བཾ་ཧ་རི་ནི་ས་ཚེ་བྷྲུཾ་སརྦ་ཛྙཱ་ན་གུ་ཎ་སིདྡྷི་ཕ་ལ་སྭཱ་ཧཱ༔ ཡང་ན༔ ཨོཾ་ཨཱཿཧཱུྃ་བཛྲ་གུ་རུ་ཡོ་ག་ཤྭ་ར་བཾ་སརྦ་སིདྡྷི༔ ཕ་ལ་ཧཱུྃ༔ ཅེས་བརྗོད་བསྙེན་བསྒྲུབ་ལས་སྦྱོར་དུ༔ འོད་ཟེར་དཀར་སེར་དམར་ལྗང་ནི༔ འཕྲོས་བསྣོལ་བསྡུས་བའི་རིམ་པ་ཡིས༔ ཚར་གཅོད་རྗེས་འཛིན་ཕྲིན་ལས་བསྒྲུབ༔ ས་མ་ཡཱ༔ གཉིས་པ་ཚོགས་ཀྱི་བསྒྲུབ་པ་ནི༔ ཧཱུྃ༔ ཕུན་སུམ་ཚོགས་པ་ལྔ་ལྡན་པའི༔ ལྷ་སྔགས་ཡེ་ཤེས་འཁོར་ལོའི་སྤྲིན༔ མངོན་དུ་མ་གྱུར་རྟོག་པས་སྒྲིབ༔ གཞི་འབྲས་དབྱེར་མེད་ངང་དུ་སྦྱངས༔ རཾ་ཡཾ་ཁཾ༔ ཨོཾ་ཨཱཿཧཱུྃ༔ཧ་ཧོ་ཧྲི༔ ཛ༔ བདེ་བ་ཅན་གྱི་ཞིང་ཁམས་ནས༔ འཆི་མེད་མགོན་པོ་གཤེགས་སུ་གསོལ༔ རི་བོ་ཏ་ལའི་ཕོ་བྲང་ནས༔ སྤྱན་རས་གཟིགས་དབང་གཤེགས་སུ་གསོལ༔ པདྨ་འོད་ཀྱི་ཕོ་བྲང་ནས༔ པདྨ་འབྱུང་གནས་གཤེགས་སུ་གསོལ༔ གང་འདུལ་སྤྲུལ་པའི་ཞིང་ཁམས་ནས༔ ཐང་སྟོང་རྒྱལ་པོ་གཤེགས་སུ་གསོལ༔ ཡེ་ཤེས་ལྔ་ལྡན་ཕོ་བྲང་ནས༔ རིགས་ལྔའི་མཁའ་འགྲོ་གཤེགས་སུ་གསོལ༔ བརྟུལ་ཞུགས་གྲུབ་པའི་ཕོ་བྲང་ནས༔ གྲུབ་ཐོབ་རྒྱ་མཚོ་གཤེགས་སུ་གསོལ༔ གནས་གསུམ་དག་པའི་ཕོ་བྲང་ནས༔ འབུམ་ཕྲག་མཁའ་འགྲོ་གཤེགས་སུ་གསོལ༔ ཡོངས་སུ་རྣལ་འབྱོར་ཕོ་བྲང་ནས༔ མ་རྒྱུད་རྒྱ་མཚོ་གཤེགས་སུ་གསོལ༔ འཁོར་དང་བཅས་པ་ཐམས་ཅད་ཀུན༔ མཐོན་མཐིང་ཅོད་པཎ་པུ་རུ་རུ༔ རུས་པའི་རྒྱན་ཆ་ཁྲོ་ལོ་ལོ༔ དྲིལ་བུ་གཡེར་ཁ་སི་ལི་ལི༔ གར་དབྱངས་རོལ་མོ་དི་རི་རི༔ གླུ་དབྱངས་སྙན་པའི་སྒྲ་དང་བཅས༔ བསོད་ནམས་ཡེ་ཤེས་ཚོགས་རྫོགས་ཕྱིར༔ བསོད་ནམས་དམ་པའི་ཞིང་ས་རུ༔ ཡེ་ཤེས་ཚོགས་ལ་གཤེགས་སུ་གསོལ༔ ཡེ་ཤེས་ཚོགས་ལ་གཤེགས་ནས་ཀྱང་༔ རྟགས་དང་མཚན་མ་བསྟན་པ་དང་༔ མཆོག་དང་ཐུན་མོང་དངོས་གྲུབ་སྩོལ༔ ཨོཾ་ཨཱཿཧཱུྃ་མ་ཧཱ་གུ་རུ་ཡོ་ག་ཤྭ་ར་ཊཱཀྐི་ནི་ག་ན་ཙཀྲ༔ ས་མ་ཡ་ཛ་ཛ༔ ཧཱུྃ༔ བླ་མ་རིག་འཛིན་རྒྱ་མཚོ་ལ༔ ཕྱི་ནང་གསང་བའི་ཚོགས་མཆོད་འབུལ༔ མ་རྒྱུད་མཁའ་འགྲོའི་ལྷ་ཚོགས་ལ༔ དམ་རྫས་ཕྱི་ནང་གསང་མཆོད་འབུལ༔ དམ་ཅན་ཆོས་སྐྱོང་རྒྱ་མཚོ་ལ༔ ཤ་ཁྲག་དམར་གྱི་གཏོར་མ་འབུལ༔ ཚོགས་རྫོགས་སྒྲིབ་པ་ཀུན་དག་ནས༔ གཏན་བདེ་འགྱུར་མེད་ས་ལ་སྦྱོར༔ ཨོཾ་གཱ་ཎ་ཙཀྲ་པཉྩ་པཱུ་ཙ་ཁཱ་ཧི༔ ཧཱུྃ༔ ཚེ་རབས་ཐོག་མ་མེད་པ་ནས༔ ཐ་མ་ད་ལ་ཐུག་གི་བར༔ སྒོ་གསུམ་བག་མེད་དབང་གྱུར་ཏེ༔ སྤྱི་དང་ཁྱད་པར་ལྷག་པ་ཡི༔ དམ་ཚིག་ཉམས་ཆགས་འགལ་འཁྲུལ་དང་༔ རྟོག་སྒྲིབ་བག་ཆགས་ཐམས་ཅད་ཀུན༔ འདོད་ཡོན་ཚོགས་ཀྱི་མཆོད་པས་བཤགས༔ དག་ཚངས་མཆོག་གི་དངོས་གྲུབ་སྩོལ༔ གཱ་ཎ་ཙཀྲ ༴ སོགས། ཧཱུྃ༔ བདག་གཉིས་ཕྱི་ནང་གཟུང་འཛིན་གྱིས༔ མ་རིག་ལོག་རྟོག་དགྲ་འདྲེ་གདོན༔ བདག་མེད་ཤེས་རབ་མཚོན་གྱིས་བསྒྲལ༔ རྣམ་ཤེས་ཆོས་ཀྱི་དབྱིངས་སུ་དྲོངས༔ ཕཊ་ཕཊ་ཕཊ༔ ཧཱུྃ༔ ཕུང་ཁམས་བདུད་རྩི་ལྷ་མོའི་སྤྲིན༔ སྐུ་གསུམ་ལྷ་ཚོགས་ཞལ་དུ་བསྟབས༔ དུག་གསུམ་ཞིང་དུ་བསྒྱུར་ནས་ཀྱང་༔ མཉམ་སྦྱོར་བདེ་བ་ཆེན་པོར་བཞེས༔ ཏ་ན་ག་ན་མ་ཧཱ་མཾ་ས་རཀྟ་ཙིཏྟ་ཀོ་རོ་ཙ་ན་ཀེཾ་ནི་རི་ཏི་པགྩ་ཙ་ཁུག་བ་སུ་ཏ་ཨ་མྲི་ཏ་ལ་ཁ་རཾ་ཁཱ་ཧི༔ དངོས་གྲུབ་ཡོ་བྱད་ཆེན་པོ་ཡིས༔ སྐལ་ལྡན་མི་ཡི་ཚོགས་མཆོད་ལ༔ ཤགས་དང་ཀུ་ཅོ་ཚོགས་སྤྱང་སོགས༔ སྤངས་ཤིང་ཚིམ་པ་དྲུག་གིས་སྤྱོད༔ ལྷག་མ་མྱོང་གྲོལ་བདུད་རྩིར་བརླབས༔ ཕེཾ༔ གནས་ཡུལ་དུར་ཁྲོད་ཞིང་སྐྱོང་བའི༔ འབར་མ་དབང་ཕྱུག་ཀིང་ལིང་ཀ༔ ཕོ་ཉ་མགྱོགས་མ་དུར་ཁྲོད་བདག༔ ལྷག་ལ་དབང་བ་ཐམས་ཅད་ཀུན༔ སྐད་ཅིག་ཉིད་ལ་གཤེགས་སུ་གསོལ༔ ཡེ་ཤེས་ཚོགས་ཀྱི་འཁོར་ལོར་རོལ༔ དགྱེས་ཚིམ་རབ་འབྱམས་ཕྲིན་ལས་མཛོད༔ ཨུཥྩི་ཊ་གཱ་ཎ་ཙཀྲ་ཁཱ་ཧི༔ ཧཱུྃ༔ སྔོན་ཚེ་སྣང་བ་མཐའ་ཡས་ཀྱིས༔ འདོད་ཆགས་རྟོགས་པ་ཐམས་ཅད་ཀུན༔ བདེ་སྟོང་རང་གྲོལ་རྒྱས་གདབས་ཚེ༔ སྲིད་ཞི་མཉམ་ཉིད་རང་རྒྱས་ཆོད༔ དེ་རྗེས་སློབ་དཔོན་པདྨ་ཡིས༔ སྣང་སྲིད་དབང་དུ་བསྡུ་བའི་ཚེ༔ བཀའ་དམ་རྡོ་རྗེའི་ཐ་ཚིག་བླངས༔ དམ་ལྡན་སྐྱོང་བའི་ཆད་ཐོ་བཙུག༔ སླར་ཡང་གྲུབ་པའི་རྒྱལ་པོ་ཡིས༔ གང་འདུལ་ཕྲིན་ལས་མཛད་པའི་ཚེ༔ བདེ་སྟོང་ཡེ་ཤེས་གྲོགས་དན་མཛད༔ ཐུགས་བསྐྱེད་དམ་བཅའི་གསོས་སུ་སྨིན༔ ད་ལྟ་རྣལ་འབྱོར་བདག་གིས་ཀྱང་༔ ཚུལ་བཞིན་བསྒྲུབ་མཆོད་གསང་སྔགས་ཀྱི༔ ཏིང་འཛིན་མི་འབྲལ་རྒྱུན་བརྟེན་ན༔ བུ་གཅིག་པ་ཡི་མ་བཞིན་དུ༔ བར་ཆད་སེལ་ཞིང་མཐུན་རྐྱེན་སྦྱོར༔ ཐ་ཚིག་རྡོ་རྗེའི་དམ་བླངས་བཞིན༔ བདེན་དོན་མངོན་རྟགས་བསྟན་དུ་གསོལ༔ འགལ་རྐྱེན་བར་ཆད་ཐམས་ཅད་ཀུན༔ བཟློག་བསྒྱུར་ཕྲིན་ལས་མཛད་དུ་གསོལ༔ དྷརྨཱ་པ་ལ་ས་པཱ་རི་ཝ་ར་ཨེ་དམ་བྷ་ལིངྟ་ཁ་ཁ་ཁཱ་ཧི༔ སརྦ་ཀརྨ་སིདྡྷི་སིདྡྷི་ཧཱུྃ༔ མ༔ བརྟན་མ་ཡ་མ་སྐྱོང་མའི་ཚོགས༔ བཤལ་ཆུའི་གཏོར་མ་འདི་བཞེས་ལ༔ རྣལ་འབྱོར་དཔོན་སློབ་འཁོར་བཅས་ཀྱི༔ རྐྱེན་སོལ་བསམ་པ་ཐམས་ཅད་བསྒྲུབ༔ རླུང་སེམས་དབུ་མར་བཅིངས་བ་ཡིས༔ ཁུ་རྡུལ་རླུང་གསུམ་རྒྱུ་བ་དང་༔ བཅུ་གཉིས་འཕོ་བའི་རྒྱུན་བཅད་དེ༔ རྟེན་འབྲེལ་སྲིད་པ་སྟོང་རྒྱས་ཐོབ༔ བདེན་དོན་བསྟན་པ་དར་ཞིང་རྒྱས༔ བཀྲ་ཤིས་བདེ་ལེགས་ཕུན་ཚོགས་མཛོད༔ མ་མ་ཧྲིཾ་ཧྲིཾ་ཨེ་དམ་བྷ་ལིངྟ་ཁཱ་ཧི༔ ཧཱུྃ་ཛ༔ དབྱིངས་བཞུགས་བླ་མ་རིག་འཛིན་ཚོགས༔ ཡི་དམ་མཁའ་འགྲོ་ཆོས་སྐྱོང་བཅས༔ སྙིང་རྗེའི་ཞི་ལ་མ་གཞོལ་བར༔ བཞེངས་ཤིག་རབ་འབྱམས་ཕྲིན་ལས་མཛོད༔ ཁམས་གསུམ་སྐུ་གསུམ་ཧོམ་དུ་བྲུབ༔ ལྟ་སྒོམ་སྤྱོད་པ་དབྱེར་མེད་ཀྱི༔ ལུག་རྒྱུད་སྦྲེལ་བའི་དལ་བསྐོར་ཏེ༔ དཔའ་བོའི་བྲོ་བརྡུང་གཡས་སུ་བརྡུང་༔ ཞེ་སྡང་གསལ་སྟོང་ཆེན་པོར་བཅོམ༔ དཔའ་མོའི་བྲོ་བརྡུང་གཡོན་དུ་བརྡུང་༔ འདོད་ཆགས་བདེ་སྟོང་ཆེན་པོར་བཅོམ༔ རྒྱལ་བྱེད་ཧ་ཧེའི་གད་རྒྱང་དང་༔ དགྱེས་རྟགས་ཧི་ཧིའི་གླུ་དབྱངས་ཀྱིས༔ གླུ་བྲོ་གར་གྱི་བརྟུལ་ཞུགས་སྤྱོད༔ བྱང་ཆུབ་སེམས་ནི་མ་སྐྱེས་པར༔ ནམ་ཡང་ལྡང་བར་མ་གྱུར་ཅིག༔ སྟྭམ་བྷ་ཡ་ནན༔ གསུམ་པ་རྗེས་ཀྱི་ཆོ་ག་ནི༔ ཨོཾ་ཨཱཿཧཱུྃ༔ དུས་གསུམ་སངས་རྒྱས་ཐམས་ཅད་ཀྱི༔ རྡོ་རྗེ་སྐུ་ཡི་དངོས་གྲུབ་སྩོལ༔ གྲགས་སྟོང་གསུང་གི་དངོས་གྲུབ་སྩོལ༔ འཁྲུལ་མེད་ཐུགས་ཀྱི་དངོས་གྲུབ་སྩོལ༔ སྒྲིབ་གཉིས་བག་ཆགས་ཀུན་སྤངས་ནས༔ རྟོགས་པ་མཐའ་རུ་ཕྱིན་ནས་ཀྱང་༔ དོན་གཉིས་ལྷུན་གྲུབ་དངོས་གྲུབ་སྩོལ༔ ཀ་ཡ་ཝཀྐ་ཙིཏྟ་སརྦ་སིདྡྷི་ཕ་ལ་ཧཱུྃ༔ ཧཱུྃ༔ གདོད་ནས་ཡེ་སངས་རྒྱས་པ་ལ༔ ཉམས་དང་བསྲུང་བའི་མཁན་པོ་མེད༔ མ་རྟོགས་གཟུང་འཛིན་བག་རྡུལ་ལས༔ མཚན་འཛིན་མཚན་མ་མེད་པར་བཤགས༔ ཡི་གེ་བརྒྱ་བ་བརྗོད༔ ཧོ༔ རང་ལས་ཤར་བའི་དཀྱིལ་འཁོར་ལྷ༔ མཚན་མ་ཚིག་བྲལ་ཆེན་པོ་རུ༔ ཡེ་ཤེས་དབྱིངས་སུ་འཁྱིལ་ནས་ཀྱང་༔ འོད་གསལ་ཆེན་པོའི་ངང་དུ་བཟླུམ༔ ཨ་ཨ་ཨཱཿ ཨོཾ༔ སླར་ཡང་མཁའ་ལ་འཇའ་ཚོན་བཞིན༔ ཕྱག་རྒྱ་གཅིག་པའི་ཧེ་རུ་ཀ༔ རྣལ་འབྱོར་དབང་ཕྱུག་ཆེན་པོ་ནི༔ མ་བསྐྱེད་མ་བསྒོམ་རང་ཤར་ངང་༔ རྩ་སྔགས་བཟླ་རྟེན་འབྲེལ་སྙིང་བོའི་མཐར༔ ཨེ་མ་ཧོ༔ གྲུབ་ཐོབ་བརྒྱུད་པའི་བྱིན་བརླབས་དང་༔ མ་རྒྱུད་མཁའ་འགྲོའི་ཐུགས་རྗེ་ཡིས༔ བདག་ཅག་དཔོན་སློབ་འཁོར་བཅས་ལ༔ གནས་སྐབས་བསམ་པ་ཀུན་འགྲུབ་ཅིང་༔ ཚེ་རིང་ནད་མེད་བདེ་སྐྱིད་ལྡན༔ ཡོན་ཏན་ཡེ་ཤེས་གཟི་བརྗིད་འབར༔ མཐར་ཐུགས་སྐུ་གསུམ་ཡེ་ཤེས་ངང་༔ མངོན་གྱུར་གདོད་མའི་སར་ཕྱིན་ཏེ༔ འཁོར་ལོའི་མགོན་པོའི་གོ་འཕང་ལ༔ མཐའ་ཡས་འགྲོ་བ་ཐམས་ཅད་ཀུན༔ འདྲེན་པའི་ཕྲིན་ལས་རྨད་བྱུང་གིས༔ འཁོར་བའི་རྒྱ་མཚོ་དོང་སྤྲུགས་པའི༔ བཀྲ་ཤིས་དམ་པ་མཆོག་གྱུར་བ༔ གྲགས་པའི་བཀྲ་ཤིས་སྙན་གྲགས་དགེ༔ དབུགས་འབྱིན་ཆེན་པོའི་བཀྲ་ཤིས་ཤོག༔ དེ་ལྟར་དཀྱིལ་འཁོར་བསྒྲུབ་མཆོད་ནི༔ བར་ཆད་མེད་པའི་ཚོགས་བསྒྲུབས་ཀྱིས༔ སྲོད་ནས་ཐོ་རངས་བརྒལ་བ་ལ༔ མཆོག་གི་དངོས་གྲུབ་ཐོབ་པར་འགྱུར༔ ས་མ་ཡཱ༔ རྣལ་འབྱོར་དབང་ཕྱུག་ཆེན་པོས་ནི༔ དབང་ཐོབ་གནས་བརྟན་རྒན་པོ་མཆོག༔ རྡོ་རྗེའི་གསུང་ལ་གདོང་བཟློག་ཏུ༔ མ་ནུས་ག་གཱ་ཨ་བྷྱེའི་སྨྲས༔ དགེའོ། །དགེའོ། །དགེའོ། །སརྦ་མངྒ་ལཾ། །རྣམ་པར་རིག་པའི་སྒྱུ་འཕྲུལ་ཀྱང་། །ཐུགས་རྗེ་ཆེན་པོའི་མིང་ཅན་གྱི། །གསང་སྔགས་དོན་ཐོབ་དེ་ཡིས་སོ། །བཀྲ་ཤིས་ཕྱོགས་ཀྱི་མཐའ་ཁྱབ་ཤོག །

ཐང་རྒྱལ་སྐུ་གསུམ་དཀྱིལ་འཁོར་རྩ་བསྡུས་རིག་འཛིན་རིང་བསྲེལ།

ཡེ་ཤེས་སྒྱུ་འཕྲུལ་དྲྭ་བ་ལས༔ ཐང་རྒྱལ་སྐུ་གསུམ་དཀྱིལ་འཁོར་རྩ་བསྡུས་རིག་འཛིན་རིང་བསྲེལ་བཞུགས་སོ༔

ཧཱུྃ༔ ཕྱི་ནང་དངོས་པོ་ཐམས་ཅད་ཀུན༔ ལྷུན་གྲུབ་རྒྱལ་བའི་དཀྱིལ་འཁོར་དུ༔ སྐད་ཅིག་དྲན་རྫོགས་རང་ཉིད་ནི༔ གྲུབ་ཐོབ་རྒྱ་མཚོའི་སྤྱི་གཟུགས་མཆོག༔ བརྩོན་འགྲུས་སྨྱོན་པའི་ ༼ ཐང་སྟོང་རྒྱལ་པོའི་ཞེས་པའང་གསུངས། ༽སྐུ་རུ་གསལ༔ སྨུག་ནག་ཞལ་གཅིག་ཕྱག་གཉིས་པ༔ ཧེ་རུ་ཀ་པའི་ཆ་ལུགས་ཅན༔ པདྨ་ཉི་མའི་གདན་ལ་བཞུགས༔ མཉམ་བཞག་ཚེ་ཡི་བུམ་པ་འཛིན༔ སྤྱི་བོར་ཚེ་དཔག་མེད་མགོན་དང་༔ ཐུགས་དབུས་གུ་རུ་པདྨ་གསལ༔ མཐའ་བསྐོར་གྲུབ་ཐོབ་རྒྱ་མཚོ་དང་༔ འབུམ་ཕྲག་ཡངས་པའི་མཁའ་འགྲོའི་བསྐོར༔ འོད་འཕྲོས་དབྱིངས་ནས་སྤྱན་དྲངས་བསྟིམ༔ ཕྱག་འཚལ་དངོས་ཡིད་མཆོད་པ་འབུལ༔ རྡོ་རྗེ་སྒྲ་དབྱངས་ན་དཱས་བསྟོད༔ ཡེ་ཤེས་སེམས་དཔའི་ཐུགས་ཀ་རུ༔ ཏིང་འཛིན་རྡོ་རྗེ་ཧཱུྃ་མཚན་ལ༔ སྔགས་ཀྱི་ཕྲེང་བས་བསྐོར་བ་ལས༔ འོད་འཕྲོས་དོན་གཉིས་ལྷུན་གྱིས་གྲུབ༔ ཕྲིན་ལས་རབ་འབྱམས་གྲུབ་པར་བསམ༔ སླར་ཐིམ་སྔགས་འཕྲེང་འོད་དུ་འབར༔ སྔགས་གསུམ་ཕྱག་རྒྱ་བཞི་ལྡན་ཞིང་༔ ངོ་བོ་ཉིད་ཀྱི་རང་སྒྲ་རྫོགས༔ ཨོཾ་ཨཿབཛྲ་གུ་རུ་དྷརྨཱ་སཾ་བྷི་ནིརྨ་ཀ་ཡ་ཨཱ་ཡུཿཧཱུྃ་བྷྲཱུྃ་ཎི་ཛ༔ སརྦ་སིདྡྷི་ཕ་ལ་ཨཱཿཧཱུྃ༔ ཅེས་ཀྱང་བླ་མ་རིན་པོ་ཆེ་ཐེག་མཆོག་ལ་ག་གཱས་སོ། །

བླ་མའི་གསོལ་འདེབས་བསྡུས་པ།

བླ་མའི་གསོལ་འདེབས་བསྡུས་པ་ནི༔ ཨེ་མ་ཧོ༔ དུས་གསུམ་རྒྱལ་བའི་གསུང་གི་བདག་ཕྱུག་ཆེ༔ སོར་རྟོག་ཡེ་ཤེས་རྣམ་པ་རྟགས་ཀྱི་སྐུར༔ ཡོངས་བཞེངས་ཆོས་སྐུ་འོད་དཔག་མེད་པ་ལ༔ གསོལ་བ་འདེབས་སོ་བདག་རྒྱུད་བྱིན་གྱིས་རློབས༔ རྒྱལ་ཀུན་སྙིང་རྗེའི་རང་གཟུགས་སྤྱན་རས་གཟིགས༔ གངས་ཅན་འགྲོ་ལ་ཐུགས་རྗེའི་ལྷག་པར་བརྩེ༔ གསང་བ་ཡེ་ཤེས་བདེ་ཆེན་ཡུམ་གྱི་ངང་༔ གསོལ་བ་འདེབས་སོ་བདག་རྒྱུད་བྱིན་གྱིས་རློབས༔ སླར་ཡང་མི་བསྲུན་གདུག་བ་འདུལ་ཕྱིར་དུ༔ འཇིགས་མེད་བརྟུལ་ཞུགས་གྲུབ་པའི་ཧེ་རུ་ཀ༔ པདྨ་གར་གྱི་དབང་ཕྱུག་རིན་པོ་ཆེར༔ གསོལ་བ་འདེབས་སོ་བདག་རྒྱུད་བྱིན་གྱི་རློབས༔ སྲིད་ལམ་མ་རིག་མལ་དུ་དུབ་པ་དང་༔ སྡུག་བསྔལ་ཆུ་བོ་བཞི་ལ་བྱིང་བའི་འགྲོ༔ ཐུགས་རྗེ་ཆེན་པོའི་གྲུ་ཆེན་གྱིས་སྒྲོལ་བའི༔ ལྕགས་ཟམ་སྤྲུལ་པའི་སྐུ་ལ་གསོལ་བ་འདེབས༔ མཚན་དཔེ་དོན་རྟགས་རྒྱན་གྱི་འཁོར་ལོ་རུ༔ གནས་གསུམ་མཁའ་འགྲོ་གྲུབ་པའི་དབང་ཕྱུག་གཟུགས༔ དུས་གསུམ་རྒྱུན་ཆད་མེད་པའི་རང་བཞིན་ལ༔ གསོལ་བ་འདེབས་སོ་བདག་རྒྱུད་བྱིན་གྱིས་རློབས༔ རྩ་རླུང་ཐིག་ལེ་རགས་པའི་འགྲོས་ཐིམ་ནས༔ ཞུ་བདེ་བྱང་ཆུབ་སེམས་ཀྱི་དཀྱིལ་འཁོར་དུ༔ རང་གྲོལ་དག་པ་རབ་འབྱམས་འཁོར་ལོའི་ངང་༔ སྣང་སྲིད་གཞིར་བཞེངས་མཉམ་པའི་དོན་རྟོགས་ནས༔ རིག་འཛིན་རྣམ་བཞིའི་གོ་འཕང་མངོན་བརྙེས་ཏེ༔ ལྕང་ལོ་ཅན་གྱི་ས་ལ་ལྷུན་གྲུབ་ཤོག༔ ཅེས་ཀྱང་ག་གཱས་སོ། །

ཨོ་རྒྱན་གྱི་མཁན་པོ་པདྨའི་སྤྲུལ་བའི་གཏེར་ཆེན་གྲུབ་ཐོབ་ཐང་སྟོང་རྒྱལ་བོའི་དབང་ཆོག་བྱིན་རླབས་འོད་ཕྲེང་།

ཨོ་རྒྱན་གྱི་མཁན་པོ་པདྨའི་སྤྲུལ་བའི་གཏེར་ཆེན་གྲུབ་ཐོབ་ཐང་སྟོང་རྒྱལ་བོའི་དབང་ཆོག་བྱིན་རླབས་འོད་ཕྲེང་བཞུགས་སོ༔

ན་མོ་གུ་རུ་པདྨ་ཀ་ར་ཡེ༔ བརྡ་ཡིག །རྣལ་འབྱོར་གང་ཞིག་སྐལ་ལྡན་པ༔ རང་ཉིད་དེ་ལ་ལྷག་པར་མོས༔ དེ་དེ་སྔོན་ནས་འབྲེལ་བའི་རྟགས༔ མེ་ཏོག་གང་བབས་དེའི་ཕྲིན་ལས༔ སྐུ་གསུང་ཐུགས་ཡོན་ཕྲིན་ལས་ཏེ༔ གཞན་གྱི་བབས་བས་ལྷ་ཉིད་དེ༔ རྒན་མོའི་རིལ་མོ་བཏབས་པ་དང་༔ གསང་སྔགས་མེ་ཏོག་འདྲ་བ་ལས༔ རྒྱུ་མཚན་མེད་ཕྱིར་དོན་གཟིགས་པའི༔ སྤྱན་སྔར་བབས་བཅོལ་འཐད་མི་བལྟའ༔ འདི་ནི་རིགས་དང་རྒྱུ་མཐུན་ལས༔ དུ་བས་མེ་རྗེས་དཔོག་པ་འདྲ༔ དེ་བཞིན་གྲུབ་པའི་བྱེད་འབྲས་ཀྱང་༔ བཟོ་ནི་འཕྲོ་ཡོད་ལས་འཇུག་དང་༔ དེ་བཞིན་སར་བ་རྩོམས་པ་ལྟའི༔ ཁྱད་པར་མཁས་ལྡན་དམ་པས་ཤེས༔ ས་མ་ཡ༔ འདི་ལ་དཀྱིལ་འཁོར་བཞེངས་བསྒྲུབ་སོགས༔ བདག་ཉིད་ཆེན་པོའི་རང་འཇུག་བཅས༔ ཇི་ལྟར་རྒྱུད་དང་མན་ངག་ལྟར༔ སྤྱི་མཐུན་གཞུང་བསྲང་དེ་ནས་ནི༔ ཁྲུས་བྱས་བགེགས་བསྐྲད་བསྲུང་འཁོར་བསྒོམ༔ རིགས་བརྟགས་མེ་ཏོག་བཀྱེ་བསྡུ་དང་༔ མ་རིག་མཚོན་ཕྱིར་མིག་དར་དགབ༔ ས་མ་ཡཱ༔ དེ་ནས་དབང་ཡོན་མཎྜལ་ཕུལ༔ དབང་ཕྱུག་ཉིད་ལ་གསོལ་འདེབས་པ༔ ཨེ་མ་ཁྱབ་བདག་རྡོ་རྗེ་འཛིན༔ བདག་ཅག་སྒོ་གསུམ་སྒྲིབ་སྦྱངས་ནས༔ གྲུབ་ཐོབ་རྒྱ་མཚོའི་གསང་གསུམ་གྱི༔ གོ་འཕང་མཆོག་ལ་དབང་བསྐུར་གསོལ༔ འཆི་མེད་གཉུག་མ་བྱང་ཆུབ་སེམས༔ བཅོམ་ལྡན་འདས་ཀྱི་ཡེ་ཤེས་སྐུ༔ ད་ལྟ་ཉིད་དུ་གསལ་བར་མཛོད༔ གུ་རུ་རཏྣ་ན་མོ་ཧོ༔ ནན་ཏན་ལྡན་ནམ་ཆེད་བཏགས་གནང་༔ ཧོ༔ ཉོན་ཅིག་ཆ་མེད་འགྲོ་བ་ཁྱོད༔ གསང་སྔགས་འདི་ནི་ཁེ་ཉེན་བཙུན༔ དམ་ཚིག་ལྡན་ནས་བསྒྲུབ་བརྩོན་ན༔ ཕྱོགས་བཅུའི་རྒྱལ་བས་བྱིན་གྱིས་རློབས༔ གལ་ཏེ་བཏང་སྙོམས་གནས་ན་ཡང་༔ དམྱལ་མེའི་སྡུག་བསྔལ་ཉེན་ཡོད་ན༔ དམ་ཉམས་ལྡོག་སྤྱོད་སྨོས་ཅི་དགོས༔ གཏན་དུ་ཐར་བའི་རིགས་མེད་འགྱུར༔ དབང་མེད་ཕྱག་རྒྱ་དཔེ་མཐོང་ཤོར༔ ཚེ་ཐུང་ནད་མང་བསྲུང་མའི་ཚོགས༔ མཁའ་འགྲོ་གྲུབ་པའི་བཀའ་ཆད་བཙུན༔ དེ་བས་ད་ལྟ་བཏང་སྙོམས་རིགས༔ ལན་དུ་མེ་ཏོག་དང་བཅས་ཏེ༔ ཀྱེ༔ མནོག་ཆུང་ཚེ་འདིའི་བདེ་བའི་ཆེད༔ སྐྱེ་བོའི་སྲོག་ལ་མི་ལྟ་ན༔ གཏན་གྱི་མགོན་པོ་བདག་རྙེད་ལ༔ དོ་གལ་ཅི་ལའང་མི་བསྙེལ་བར༔ གླང་ཆེན་སྨྱོན་པའི་བརྟུལ་ཞུགས་ཀྱིས༔ རིག་འཛིན་གྲུབ་ཐོབ་རྒྱ་མཚོ་ཡི༔ མཛད་སྤྱོད་དམ་པའི་རྗེས་སུ་སློབས༔ གཙོ་བོའི་བཀའ་དྲིན་བདག་ལ་སྩོལ༔ དེ་ནས་གནང་བ་སྦྱིན་པ་ནི༔ ཧོ༔ རྡོ་རྗེ་འཆང་གི་གང་བསྒྲགས་པའི༔ ཕྱི་ནང་གསང་བ་ཡང་གསང་དང་༔ རྒྱུད་ལུང་མན་ངག་ཐམས་ཅད་ཀྱི༔ དམ་སྡོམ་མཐའ་དག་ཁྱོད་ལ་སྦྱིན༔ རྟག་ཏུ་དྲན་ཤེས་བག་ཡོད་ཀྱི༔ གུས་པས་ཡང་དག་མ་ཉམས་བསྲུང་༔ དེ་ཡིས་ཉམས་ཆགས་ཉེས་ལྟུང་དག༔ རིག་འཛིན་བླ་མ་འགྲུབ་པར་འགྱུར༔ དེ་ནས་དམ་ཚིད་དམོད་བྲོ་ནི༔ ཧོ༔ འདི་ནི་རྡོ་རྗེ་གནོད་སྦྱིན་ཆུ༔ སྙིང་གནས་དམ་བསྲུང་བསྒོམ་བརྩོན་ན༔ རྡོ་རྗེ་སེམས་ཞུ་བྱིན་རློབས་ཅིང་༔ ཉམས་ན་དམྱལ་མེའི་སྙིང་བསྲེགས་ཤོག༔ ས་མ་ཡ་བཛྲ་ས་ཏྭ་ཛྭ་ལ༔ ན་ར་ཀན་ཧཱུྃ་ཕཊ༔ དེ་ནས་མ་རིག་ལིང་ཐོག་བསལ༔ ཧཱུྃ༔ ཤེས་རབ་མཚོན་ཆའི་སྲ་འབར་བས༔ མ་རིག་སྒོང་ངའི་སྦུབས་འབྱེད་ཅིང་༔ རང་རིག་ལྷ་ཞལ་མངོན་མཐོང་བས༔ ཐུགས་རྗེའི་འོད་ཟེར་གདུགས་གྱུར་ཅིག༔ བཛྲ་ཧཱུྃ་པྲཛྙཱ་ཛྙཱ་ན་ཙཀྵུ་ཨ་བྷི་ཥིཉྩ་ཕཊ༔ དེ་སླད་དཀྱིལ་འཁོར་འཇུག་པ་ནི༔ ཨེ༔ དཀྱིལ་འཁོར་ཆེན་པོ་ཕྱོགས་བཞིའི་སྒོ༔ བདུད་བཞིའི་རང་བཞིན་སྒྲིབ་པ་བཞིའི༔ བཅད་དེ་ཡང་དག་མ་འཐོང་བ༔ ཡེ་ཤེས་ཕྱག་རྒྱའི་འཆར་སྒོ་ཕྱེས༔ མཎྜ་ལ་པྲ་ཝེ་ཤ་ཡ་ཛྙཱ་ན་དྷེ་ཝ་ཨ་བྷི་ཥིཉྩ་ཕཊ༔ ཅེས་བརྗོད་ལྷ་མཇལ་འབྲེལ་བརྟགས་སླད༔ ཨོཾ༔ སྐུ་མཆོག་རྩེ་མོ་རྣམ་པར་བཀོད༔ གཟུགས་བརྒྱན་དམ་པ་འདིས་མཛེས་བྱེད༔ སྔོན་ནས་འབྲེལ་འདྲེས་གང་ཉེ་བའི༔ རིགས་བདག་དམ་པས་བཞེས་པར་མཛོད༔ གུ་རུ་བིཏྱ་དྷ་ར་པུཥྤེ་མཎྜ་ལ་པུཥྤེ་ཨཿཧཱུྃ༔ ཀྱཻ་ཧོ་སྐལ་ལྡན་བུ་ཁྱོད་ཀྱི༔ ཅོད་པཎ་ལྷུན་གྱི་གྲུབ་པར་བབ༔ མིང་ཡང་རིགས་ལྔའི་རིག་འཛིན་ཡིན༔ མ་འོངས་མཚན་དེའི་སངས་རྒྱས་ཐོབ༔ དགའ་སྤྲོ་དད་པ་རབ་ཏུ་བསྐྱེད༔ ཁྱོད་ནི་དངོས་གྲུབ་མཆོག་ལ་དབང་༔ རྟག་ཏུ་རྣལ་འབྱོར་མ་བཏང་ཞིག༔ དེ་ནས་ལྷ་ངོ་བསྟན་པ་ནི༔ ཨེ་མ་ཧོ༔ སེམས་ཉིད་རྡོ་རྗེ་དྲི་བྲལ་འདི༔ བྱང་ཆུབ་ཕྱོགས་ཀྱི་ཆོས་ཀུན་རྫོགས༔ མཚན་རྟོག་གང་གི་འོག་མ་གྱུར༔ རང་བཞིན་དོན་གྱི་བླ་མ་ཡིན༔ སྣང་བ་ཆོས་དབྱིངས་དཀྱིལ་འཁོར་འདི༔ རྒྱ་ཆད་ཕྱོགས་བྲལ་རྣམ་པར་དག༔ བག་ཆགས་དོན་མེད་འོག་མིན་ས༔ ངེས་པ་ལྔ་ལྡན་བླ་མའོ༔ གཉིས་མེད་རྟོག་བྲལ་ཟང་ཐལ་གྱི༔ ཀུན་ཏུ་བཟང་པོ་རང་རིག་པ༔ འབྲས་བུ་མཆོག་གི་སྐུར་བཞེངས་སུ༔ མཚོན་པ་དཔེ་དང་གཟུགས་བརྙན་ནོ༔ དཔེ་གཟུགས་རང་བཞིན་བདག་གཅིག་ཏུ༔ འབྲེལ་བའི་དམ་པ་འདི་མཐོང་ནས༔ རང་བརྙན་ཕྱི་རུ་མ་གོལ་བར༔ ངོ་ཤེས་གདེངས་ཐོབ་བཙན་ས་ཟུངས༔ ལྷ་དང་བླ་མའི་ཐུགས་རྗེ་ཡིས༔ ཧེ་རུ་ཀ་དང་མཉམ་ཉིད་ཤོག༔ ཨ་ཨཱ་ཕཊ༔ དཀྱིལ་འཁོར་ལྷ་ཡི་གྲོང་འཇུག་ཏུ༔ དམ་ཚིད་སློབ་མ་ལྷར་གསལ་ནི༔ གཞུང་ནས་ཇི་ལྟར་བྱུང་བཞིན་ལ༔ ཡེ་ཤེས་སྤྱན་དྲངས་གཉིས་མེད་བསྟིམ༔ དེ་ལ་ཐུན་མོང་དབང་སྦྱིན་པ༔ ཧཱུྃ༔ མི་བསྐྱོད་ཡབ་ཡུམ་རང་བཞིན་ལས༔ མེ་ལོང་ཡེ་ཤེས་ངོ་བོ་ཉིད༔ རྡོ་རྗེ་བདུད་རྩིའི་དབང་བསྐུར་བས༔ ཞེ་སྡང་རྫོགས་སངས་རྒྱས་གྱུར་ཅིག༔ ཧཱུྃ་བི་ཤུདྡྷེ་ཨ་བྷི་ཥིཉྩ་ཧཱུྃ༔ སྭཱ༔ རིན་འབྱུང་ཡབ་ཡུམ་རང་བཞིན་ལས༔ མཉམ་ཉིད་ཡེ་ཤེས་ངོ་བོ་ཉིད༔ རིན་ཆེན་འོད་འབར་རིགས་བདག་དབང་༔ ང་རྒྱལ་རྫོགས་སངས་རྒྱས་གྱུར་ཅིག༔ སྭཱ་རཏྣ་ཨ་ལཾ་ཀ་ར་ཀ་ཡ་ཨ་བྷི་ཥིཉྩ་ཧཱུྃ༔ ཨཱཾ༔ སྣང་མཐའ་ཡབ་ཡུམ་རང་བཞིན་ལས༔ སོར་རྟོགས་ཡེ་ཤེས་ངོ་བོ་ཉིད༔ མ་ཆགས་ཐོགས་མེད་རྡོ་རྗེའི་དབང་༔ འདོད་ཆགས་རྫོགས་སངས་རྒྱས་ཕྱིར་བསྐུར༔ ཨཱཾ་པདྨ་བཛྲ་ཨ་བྷི་ཥིཉྩ་ཧཱུྃ༔ ཧཱ༔ དོན་གྲུབ་ཡབ་ཡུམ་རང་བཞིན་ལས༔ བྱ་གྲུབ་ཡེ་ཤེས་ངོ་བོ་ཉིད༔ ཀརྨ་ལས་ཀྱི་དྲིལ་བུའི་དབང་༔ ཕྲག་དོག་རྫོགས་སངས་རྒྱས་ཕྱིར་བསྐུར༔ ཧཱ་ཀརྨ་གནྜེ་ཨ་བྷི་ཥིཉྩ་ཧཱུྃ༔ ཨོཾ༔ རྣམ་པར་སྣང་མཛད་ངོ་བོ་ཉིད༔ ཆོས་དབྱིངས་ཡེ་ཤེས་རང་བཞིན་ལས༔ སྔར་སྦྱིན་མིང་གི་དབང་བསྐུར་གྱི༔ གཏི་མུག་རྫོགས་སངས་རྒྱས་གྱུར་ཅིག༔ ཨོཾ་ཨཱཿཧཱུྃ༔ དེ་རིང་ཕྱིན་ཆད་སྐྱེས་བུ་ཁྱོད༔ རིག་འཛིན་ཀུན་གྱི་རྒྱལ་ཚབས་སུ༔ རྡོ་རྗེ་སློབ་དཔོན་ངས་བསྔགས་ཀྱི༔ རང་བཞིན་དོན་ནི་རབ་འབྱམས་བསྒྲུབ༔ ཞེས་ཆོས་དུང་ཕུལ་ལ་འབུད་དུ་བཅུག༔ ཡང་ནི་ནང་གི་དབང་བསྐུར་བ༔ སྐུ་གསུང་ཐུགས་ཀྱི་གོ་རིམ་ལས༔ ཧཱུྃ༔ ཕྱི་ལྟར་རིན་ཆེན་བུམ་པ་མཛེས༔ ནང་དུ་རིག་འཛིན་སྐུའི་རང་བཞིན༔ གསང་བ་པདྨ་གངས་ཆེན་འཚོ༔ ཡང་གསང་གཞོན་ནུ་བུམ་པའི་སྐུ༔ ཞུ་བླུགས་བྱིན་རླབས་ཡེ་ཤེས་དངོས༔ སྐལ་ལྡན་བུ་ལ་དབང་བསྐུར་བས༔ ཁྱོད་ལུས་བུམ་པ་བཟང་པོ་རུ༔ བརྒྱན་ལ་བརྒྱན་གྱི་བརྟན་རྒྱས་གདབས༔ ཁྱོད་སེམས་གཞོན་ནུ་བུམ་པའི་སྐུར༔ བཅུད་ལ་བཅུད་ཀྱི་གསོས་ཐེབས་ནས༔ འཁྲུལ་པའི་མ་རིག་དྲི་མ་དག༔ འཁོར་འདས་དབྱེར་མེད་ལྟ་བ་རྟོགས༔ ཉོན་མོངས་ཕུང་པོའི་རྒྱུ་འབྲས་བདུད༔ བཅོམ་ལྡན་རྡོ་རྗེའི་སྐུ་ཐོབ་ཤོག༔ ཨོཾ་བཛྲ་ཛྙཱ་ན་ཀ་ཡ་ཨ་བྷྱེ་ཧོ༔ ཨ་བྷི་ཥིཉྩ་ཧཱུྃ༔ སྐབས་འདིར་ལྷ་དབང་རྒྱས་པ་བཏགས་ནའང་ཆོག༔ ཚེ་དབང་ལ༔ ཚེ་དཔག་མེད་ཀྱི་སྐུ་ཐོགས་ལ༔ གཞན་ཨུ་རྒྱན་ལ་དེའི་སྐུ༔ རྩ་བའི་ཐང་སྟོང་ལ་གཙོ་བོ་རྒྱན་ཅིག༔ ཞི་ཁྲོ་འབྲིང་ལའང་འདིའི་རིགས་ལྔའི་ཐུན་མོང་ལྔ་བླངས་ན་འཐད་ལ༔ མྱུར་བདེར་མཁའ་འགྲོ་སྡེ་ལྔ་གྲུབ་ཐོབ་བརྒྱུད་ཅུ༔ སངས་རྒྱས་སྟོང་ལ་སོགས་པར་རང་རང་གི་སྐུ་དེའི་དབང་ཐོབ་པར་འགྱུར་རོ༔ དེའི་ཕྱིར༔ ཧྲཱི༔ སྐྱེ་མེད་གཉུག་མ་ཀ་དག་བྱང་ཆུབ་སེམས༔ འགགས་མེད་ཚེ་མཐའ་ཡས་པའི་རྣམ་རོལ་གྱི༔ མི་འཇིགས་སྐྱབས་སྦྱིན་མཛད་དེའི་དབང་བསྐུར་བས༔ ཟག་མེད་རྡོ་རྗེ་ལྟ་བུའི་ཚེ་ཐོབ་ཤོག༔ བཛྲ་ཛྙཱ་ན་ཨ་ཡུརྫྙཱ་ཏེ་ཀ་ཡ་ཨ་བྷི་ཥིཉྩ་ཧཱུྃ༔ ཡང་ནི་པདྨ་འབྱུང་གནས་ལ༔ ཧྲཱི༔ འཁོར་བའི་སྐྱོན་གྱིས་མ་གོས་པདྨ་འབྱུང་༔ གསང་སྔགས་རྡོ་རྗེའི་མངོན་མཛད་སྟོན་པ་པོ༔ སྐྱེ་འཆིའི་བདུད་བཅོམ་མཛད་དེའི་དབང་བསྐུར་བས༔ རྐྱེན་གྱིས་མི་འཇིག་གཡུང་དྲུང་ལུས་ཐོབ་ཤོག༔ ཨོཾ་གུ་རུ་པདྨ་བཛྲ་ཨ་བྷི་ཥིཉྩ་ཧཱུྃ༔ གྲུབ་ཐོབ་རིག་འཛིན་སྤྱི་འདུས་ལ༔ ཧཱུྃ༔ གང་ཞིག་སྲིད་པའི་སྡུག་བསྔལ་ཆུ་ཆེན་ལས༔ ཐུགས་རྗེ་མི་ཟད་ཆོ་འཕྲུལ་ཡ་མཚན་གྱི༔ བཀོད་པ་བརྒྱ་སྟོང་དུ་མའི་འཆར་སྒོ་ཕྱེས༔ བློ་སེམས་དགེ་ལ་བསྒྱུར་ནས་བདེ་མཆོག་སྦྱིན༔ གྲུབ་པའི་དབང་ཕྱུག་ཐང་སྟོང་རྒྱལ་པོ་ནི༔ ཕྱི་ནང་སྙོམས་འཇུག་ཕྱག་རྒྱར་བཅས་པ་ཡི༔ རིགས་ཀྱི་བུ་ལ་དབང་གིས་མཚམས་སྦྱར་ན༔ ཏིང་འཛིན་མི་ཟད་འཕྲུལ་གྱི་རང་དབང་གིས༔ མཐའ་ཡས་བསྐལ་བར་སེམས་ཅན་དོན་སྤྱོད་ཤོག༔ ཨོཾ་ཊཱཀྐི་ནི་ཤྭ་རི་ཡ་ཨ་བྷི་ཥིཉྩ་ཧཱུྃ༔ དེ་ནས་གསུང་དབང་བསྐུར་བ་ལ༔ རྒྱས་པར་གསེར་ཆོས་བཅུ་གསུམ་དང་༔ བསྡུ་ན་ས་སྐྱ་ནད་གྲོལ་སོགས༔ གྲུབ་ཐོབ་དངོས་ཀྱི་གསུང་གི་ཡང་ཆོག༔ ཤིན་ཏུ་བསྡུས་ན་སྲོག་གི་སྔགས༔ བདེ་སྐྱོང་མ་དཱ་ན་བ་དང་༔ ཚེ་དང་གལ་སྡེབ་ཟས་ཀྱི་ཚོགས༔ པདྨ་རཀྟའི་མདངས་བསྐྱེད་མཛོད༔ གཙང་རྨེ་བྲལ་བའི་བདུད་རྩི་ལྔ༔ ལག་ཏུ་ཐོགས་ནས་ལྕེ་ལ་བཞག༔ ངག་གི་རླུང་ལ་ཐིམ་བསམ་འཐེར༔ སྤྲོས་པས་སྔགས་ཕྲེང་བཟླས་ལུང་བཞི༔ སྐབས་འདིར་སྦྱོར་བ་རིག་པས་འཕུར༔ ཤིན་ཏུ་བསྡུས་སྔགས་བྷནྡྷའི་ཆོག༔ ཚེ་དབང་སྐབས་བཞིན་འདི་ན་སྟེ༔ ཨཱ༔ སྐུ་གསུམ་ཚེ་ལྷ་རྒྱ་མཚོ་དང་༔ བླ་མ་ཡབ་ཡུམ་བྱང་ཆུབ་སེམས༔ ཡི་གེ་ལོངས་སྐུའི་ཕྲེང་བ་འདིས༔ དགྱེས་མཉམ་བདེ་བའི་རང་སྒྲར་བཅས༔ སྐལ་ལྡན་བུ་ལ་དབང་བསྐུར་བས༔ ཚེ་རབས་ངག་གི་སྒྲིབ་པ་དག༔ འཆི་བདུད་བཅོམ་ནས་ཚེ་ལ་དབང་༔ འགགས་མེད་གསུང་གི་དབང་ཐོབ་ནས༔ ངོ་བོ་ཉིད་གསུམ་ལྟ་བ་རྟོགས༔ པདྨ་ལྟ་བུའི་བཀྲག་མདངས་ཀྱིས༔ མཚོན་པས་མཚན་དཔེ་ཡོངས་རྫོགས་ཤོག༔ ཨོཾ་བཛྲ་པདྨ་ཝཀྐ་ཨ་བྷི་ཥིཉྩ་ཧཱུྃ༔ གསུམ་པ་ཐུགས་ཀྱི་དབང་བསྐུར་ལ༔ ཚེ་བུམ་བདུད་རྩི་དམ་པས་གསོས༔ རྫས་མཆོག་རིལ་བུའི་བཀང་བ་དང་༔ གུ་རུ་རྡོ་རྗེ་ཐོད་བུམ་མཚོན༔ སྤྲུལ་པ་མཆོག་ལའང་སྔ་བཞིན་ཏེ༔ གྲུབ་ཐོབ་ཀུན་ལ་རྣལ་འབྱོར་ཆས༔ མཁའ་འགྲོ་རྒྱ་མཚོར་གྲི་ཐོད་དང་༔ སངས་རྒྱས་སྟོང་ལ་གསེགས་པར་གྱིས༔ རང་རང་ཐུགས་ཀྱི་རང་གཟུགས་མཚོན༔ ཕྱག་རྒྱ་ཕོ་མོའི་གཟུགས་བརྙན་སྦྱིན༔ མྱོང་རེག་འཁྲིལ་སྦྱོར་བདེ་བ་ལས༔ ལྷན་ཅིག་སྐྱེས་པའི་འོད་གསལ་བཟུང་༔ སྔགས་ཚིག་སྨོན་ལམ་འདི་ལྟར་བཏབ༔ ཧཱུྃ༔ མཚོན་བྱ་ཐུགས་ཀྱི་ཡེ་ཤེས་ལྔ༔ མཚོན་བྱེད་ཕྱག་རྒྱའི་རྣམ་པ་དང་༔ རྟེན་མཆོག་རིག་མ་ཆོས་འབྱུང་གནས༔ འདི་ལ་མ་བརྟེན་ཐར་བ་མེད༔ དབབས་བཟུང་ལྡོག་འགྲམ་ལ་བཟླའི་མཐའ༔ གྲྭ་ཟུར་མཉམ་པའི་ཐིག་ལེ་ཆེ༔ མ་བསྒྲིལ་རང་འདྲིལ་རིལ་བུ་འདི༔ སྒྲིབ་བྲལ་ལྷན་སྐྱེས་བདེ་ཆེན་པོ༔ མཚན་གཞི་མངོན་པར་ཉམས་སུ་མྱོང་༔ རང་བྱུང་ཡེ་ཤེས་ལྟ་བ་རྟོགས༔ ཚེ་རབས་སེམས་ཀྱི་སྡིག་སྒྲིབ་དག༔ འཁོར་གསུམ་ལ་སོགས་ཆོས་རྣམས་ལ༔ བདེ་ཚིག་ཆགས་བཅིང་ལྷའི་བུའི་བདུད༔ བཅོམ་ལྡན་ཕྱག་རྒྱ་ལྷུན་གྱིས་གྲུབ༔ རིག་འཛིན་ཆེན་པོ་ཐོབ་པར་ཤོག༔ མཐར་ཐུག་ཆོས་སྐུ་ངོ་བོ་ཉིད༔ འགྱུར་བ་མེད་པ་ཐོབ་པར་ཤོག༔ བཛྲ་ཛྙཱ་ན་ཙིཏྟ་ཨ་བྷི་ཥིཉྩ་ཧཱུྃ༔ བཞི་པ་ཕྲིན་ལས་མཆོག་གི་དབང་༔ ལྕགས་ཐག་ལུ་གུ་རྒྱུད་ཐོགས་ལ༔ ཧཱ༔ འཁོར་བ་མཐའ་མེད་སྡུག་བསྔལ་གྱི༔ ཆུ་བོ་ཆེ་ལ་བྱིང་བའི་འགྲོ༔ ཐུགས་རྗེའི་ཀུན་ཁྱབ་འབྲེལ་ཐག་གི༔ ལུག་རྒྱུད་ཞགས་པས་ཡོངས་བཟུང་ནས༔ ཐར་བའི་སྐམ་སར་དབྱུང་བར་མཚོན༔ སྐལ་ལྡན་ཁྱོད་ལ་དབང་བསྐུར་བས༔ འཆི་མེད་ལྕགས་སྲོག་ཐོབ་པ་དང་༔ ཕྲིན་ལས་རབ་འབྱམས་ལྷུན་གྲུབ་ནས༔ འགྲོ་བ་འདུལ་བའི་དཔལ་ཐོབ་ཤོག༔ སརྦ་ཀརྨ་ཨ་བྷི་ཥིཉྩ་ཧཱུྃ༔ ཞེས་མཐར་བཀྲ་ཤིས་རྟགས་བརྒྱད་དང་། །རྒྱལ་སྲིད་རྫས་ཀྱི་དབང་བསྐུར་བྱ། །དམ་ཚིག་ཁས་བླང་སྤྱི་ལྟར་དང་། །བཀྲ་ཤིས་དམ་པས་མཐའ་ཡང་བརྒྱན། །ཚུལ་འདི་རྣལ་འབྱོར་དབང་ཕྱུག་ཆེ། །ཐེག་མཆོག་དང་ནི་ལོ་ཕུག་གཉིས། །རྡོ་རྗེའི་གསུང་བཟློག་མ་ཕོད་པར། །སྔགས་སྨྱོན་ག་གཱ་ཨ་བྷྱེས་སོ། །མངྒ་ལཾ། །

རྡོ་རྗེ་ཕུར་བའི་བརྒྱུད་འདེབས།

རྡོ་རྗེ་ཕུར་བའི་བརྒྱུད་འདེབས་ནི༔ ཨེ་མ་ཧོ༔ ཀུན་བཟང་དོན་གྲུབ་ཀརྨ་ཧེ་རུ་ཀ༔ ཕྲིན་ལས་དབང་ཕྱུག་བཛྲ་ཀཱི་ལ་ཡ༔ པྲ་ཆེན་ཧསྟི་རྡོ་རྗེ་ཁྲོ་ལོད་རྩལ༔ བདུད་འཇོམས་རྡོ་རྗེ་ནམ་མཁའ་འཇིགས་མེད་ལ༔ གསོལ་བ་འདེབས་སོ་བདག་རྒྱུད་བྱིན་གྱིས་བརློབས༔ གནས་ལུགས་སྟོང་ཉིད་གཞི་ཡི་ཕུར་བུ་ཡིས༔ ཆོས་ཀུན་མཚན་མ་དབྱིངས་རྒྱས་རང་ཐེབས་ནས༔ སྣང་ལུགས་རིག་སྟོང་རྡོ་རྗེ་གཞོན་ནུའི་སྐུ༔ མངོན་གྱུར་གདོད་མའི་ས་ལ་བྱང་ཆུབ་ཤོག༔

འགྱུར་སྐལ་ངོར་ག་གཱས་སོ། །

ཐུགས་བསྒྲུབ་བར་ཆད་དབྱིངས་སྒྲོལ།

དཔལ་ཆེན་རྡོ་རྗེ་ཕུར་བའི༔ ཐུགས་བསྒྲུབ་བར་ཆད་དབྱིངས་སྒྲོལ་ཞེས་བྱ་བ་བཞུགས་སོ༔

ན་མོ་གུ་རུ་པདྨ་ཀ་ར་ཡེ༔ བརྡ་ཡིག །ལྔ་བརྒྱའི་ཐ་མའི་དུས་ཀྱི་ཚེ༔ ཆོས་ལ་བར་ཆད་རླུང་ལྟར་འཚུབས༔ མཐའ་ཡི་རྒྱ་འདྲེའི་ཆོ་འཕྲུལ་མོད༔ དེ་དུས་ཡི་དམ་འདི་ཉིད་གནད༔ དཔལ་ལྡན་དུས་འཁོར་ཀྱེ་རྡོ་རྗེ༔ ཕྱག་ན་རྡོ་རྗེའི་དཀྱིལ་འཁོར་ཀྱང་༔ འདི་ལས་གཞན་པར་མ་བསམ་ཏེ༔ ཡེ་ཤེས་ཀློང་དུ་རོ་གཅིག་ཕྱིར༔ བསྒྲུབ་རྟེན་སེང་ལྡེང་ཕུར་བུའམ༔ དཔལ་གཏོར་བྷ་ལིང་ལྷ་ཡི་གྲངས༔ ཕྱི་ནང་ཉེར་སྤྱོད་མཆོད་པས་བསྐོར༔ ཡང་ན་ལུས་དཀྱིལ་བཀོད་ཀྱང་རུང་༔ ས་མ་ཡཱ༔ འདི་ལ་སྔོན་འགྲོ་དངོས་རྗེས་ལས༔ སྦྱོར་བ་རྣམ་གྲངས་བདུན་གྱིས་བསྟན༔ དང་པོ་སྐྱབས་སུ་འགྲོ་བ་ནི༔ བློ་སྙིང་ལིང་བཀའ་འདི་སྐད་དོ༔ ན་མོ༔ འགྱུར་མེད་རྡོ་རྗེ་ཆོས་བདུན་ལྡན༔ ཁྱབ་བདག་གཞོན་ནུ་བུམ་པའི་སྐུ༔ དཔལ་ཆེན་དཀོན་མཆོག་ཀུན་ངོ་བོར༔ བྱང་ཆུབ་བར་དུ་སྐྱབས་སུ་མཆི༔ གཉིས་པ་བྱང་ཆུབ་སེམས་བསྐྱེད་ནི༔ ཧོ༔ སེམས་ཅན་ངོ་བོར་མཐོང་བ་ཀུན༔ མགོན་པོ་ཧེ་རུ་ཀ་པ་སྟེ༔ མ་རྟོགས་འཁྲུལ་འཁོར་བཤིགས་པའི་ཕྱིར༔ སྙིང་རྗེ་ཁྲོས་པའི་དཀྱིལ་འཁོར་བསྒོམ༔ དེ་ནས་ཡན་ལག་བདུན་པ་ནི༔ རྡོ་རྗེ་སྲིན་པོ་སངས་རྒྱས་དཔལ༔ གཤེགས་བཞུགས་འབྱོན་ལ་ཕྱག་འཚལ་ལོ༔ དངོས་སུ་འབྱོར་དང་ཡིད་སྤྲུལ་པའི༔ དག་པའི་མཆོད་འབུལ་བཞེས་སུ་གསོལ༔ དངོས་གྲུབ་ཆུ་རྒྱུན་གཅོད་པའི་བགེགས༔ ཉམས་ཆགས་ཉེ་ལྟུང་མ་ལུས་བཤགས༔ ཕྱོགས་བཅུར་འཁོར་གསུམ་དག་བའི་ཆོས༔ མ་ཆགས་སྤྱོད་ལ་རྗེས་ཡི་རང་༔ མྱ་ངན་འདའ་སྟོན་གང་བཞེད་ལ༔ བསྐལ་བ་རྒྱ་མཚོར་བཞུགས་གསོལ་འདེབས༔ ཐེག་པའི་རིམ་པ་བཅོ་བརྒྱད་ཀྱིས༔ འཁོར་ལོ་རྒྱུན་ཆད་མེད་བསྐོར་བསྐུལ༔ ཟག་བཅས་ཟག་མེད་དགེ་བསགས་པ༔ འགྲོ་ཀུན་སངས་རྒྱས་ཐོབ་ཕྱིར་བསྔོ༔ བཞི་བ་གནོད་བྱེད་བགེགས་བསྐྲད་པ༔ ཧཱུྃ༔ ང་ནི་སྟོབས་ཆེན་ཀཱི་ལ་ཡ༔ འཁོར་འདས་དུས་གཅིག་སྒྲོལ་བའི་ཀིང་༔ ལོག་འདྲེན་རུ་ཏྲ་དབྱིངས་སུ་དེངས༔ བཀའ་ལས་འདའ་ན་ཐལ་བར་རློག༔ ཧཱུྃ་བཞིའི་བསྐྲད་དོ༔ ལྔ་བ་མཚམས་གཅོད་ནི༔ རཾ༔ བསྲེགས་བྱེད་མེ་དཔུང་འབར་འཁྲིགས་དབུས༔ ཕོ་ཉ་མཚོན་ཐུན་རྭ་བར་བརྟན༔ ཅེས་ཀྱང་མི་ཆོད་མི་ཤིགས་པའི༔ བདེ་ཆེན་མཆོག་གིས་མཚམས་བཅད་དོ༔ བཛྲ་ཙཀྲ་རཀྵ་རཀྵ་བྷྲཱུྃ༔ དྲུག་པ་བྱིན་ཆེན་ཕབ་པ་ནི༔ ཧཱུྃ༔ དུར་ཁྲོད་མེ་རི་འབར་བ་ནས༔ གཞོན་ནུ་དཔའ་བོ་སྟོབས་ལྡན་ཞེས༔ རང་བཞིན་གྲུབ་པའི་ཕུར་བུ་ཡིས༔ རྟེན་དང་བརྟེན་པའི་བྱིན་ཆེན་ཕོབ༔ སྐུ་གསུང་ཐུགས་ཡོན་ཏན་ཕྲིན་ལས་ཀྱི༔ ཞི་ཁྲོ་རྒྱལ་བའི་དཀྱིལ་འཁོར་ཀུན༔ ཀཱི་ལ་རིགས་ལྔའི་སྐུར་བཞེངས་ལ༔ སྲིད་པའི་ཕུར་བུས་བྱིན་ཕོབས་ཅིག༔ ཨོཾ་བཛྲ་ཀུ་མ་རཱ་ས་མ་ཡེ་ཕེཾ་ཕེཾ༔ བདུན་པ་་མཆོད་པ་བྱིན་རླབས་ནི༔ ཧཱུྃ༔ ཚོགས་བརྒྱད་དག་པ་ཡེ་ཤེས་ལྔའི༔ ཡུལ་བརྒྱད་རྒྱན་གྱི་ནམ་མཁའ་མཛོད༔ མ་ཚང་མེད་པའི་མཆོད་སྤྲིན་དུ༔ ཆོས་ཉིད་དགོངས་པས་བྱིན་གྱིས་རློབས༔ ཨོཾ་བཛྲ་ཀྲོ་ཏ་པཱུ་ཛ་སརྦ་ས་མུ་ཌ་སྭཱ་ཧཱ༔ གཉིས་པ་དངོས་གཞི་ལྷ་བསྐྱེད་ལ༔ གཞི་རྟེན་བརྟེན་པའི་འཁོར་ལོ་གསུམ༔ དང་པོ་ཏིང་འཛིན་རྣམ་གསུམ་ནི༔ ཧཱུྃ༔ རྡོ་རྗེ་ཁྲོས་པས་ཞེ་སྡང་གཅོད༔ མཚོན་ཆེན་སྔོན་པོ་འབར་བའི་ངང་༔ ནམ་མཁའི་དཀྱིལ་ནས་ཐིག་པ་ཤར༔ སྲོག་གི་སྒོ་ ༼ གོ་དཔྱད། ༽ རུ་ཤར་བ་དང་༔ སྙིང་གི་སྒོ་རུ་བསྒོམ་པར་བྱ༔ སྙིང་རྗེའི་བསྒྲལ་བའི་དམ་ཚིག་ནི༔ བསད་ཅིང་མནན་པ་མ་ཡིན་ཏེ༔ ཕུང་པོ་རྡོ་རྗེ་གཏམས་བྱས་ནས༔ རྣམ་ཤེས་རྡོ་རྗེ་ཕུར་བར་བསྒོམ༔ ཨོཾ་བཛྲ་ཀཱི་ལ་ཀཱི་ལ་ཡ་སརྦ་བིགྣན་བཾ་ཧཱུྃ་ཧཱུྃ་ཕཊ༔ རྒྱུ་ཡི་ས་བོན་ཧཱུྃ་མཐིང་ལས༔ བྷྲཱུྃ་སེར་འཕྲོ་འདུས་ཞིང་ཁམས་ཀུན༔ དཔལ་དང་ཡོན་ཏན་གཅིག་བསྡུས་ཤིང་༔ རིགས་དྲུག་ཁམས་གསུམ་ཞེན་འཁྲུལ་སྦྱངས༔ འགྱུར་བ་རིམ་བརྩེགས་རི་རབ་དང་༔ མི་འཇིག་རྡོ་རྗེ་འཁོར་ལོའི་སྟེང་༔ ཡོངས་གྱུར་དྲག་པོའི་གཞལ་ཡས་ཁང་༔ སྐམ་རློན་རྙིད་པའི་ཐོབ་མཁར་བརྗིད༔ གནམ་ལྕགས་ཨུར་མོའི་གཟེར་བུའི་གདབས༔ རཀྟའི་སྤྱིན་ཐབས་སྦྱར་བ་ལ༔ མི་ནུབ་རྒྱལ་མཚན་བཅུ་ཡིས་བརྒྱན༔ གྲུ་བཞི་སྒོ་བཞི་སེང་སྐར་ཞལ༔ ༼ ཧར་དཔྱད། ༽ འདོད་སྣམ་མཆོད་པའི་ལྷ་མོའི་གཏམས༔ ཙིཏྟའི་མཆོད་ཕྱིར་ཕྲེང་བས་དཀྲིས༔ མགོ་དང་མིག་གིས་དྲྭ་ཕྱེད་ཅན༔ ཉི་ཟླའི་སྣང་བྱེད་སྦྲུལ་བཀྲིས་པའི༔ ཀ་གདུང་ལྷ་ཀླུ་གཟའ་སྐར་གྱིས༔ གཤམ་དང་ཀ་ཞུ་གྲྭལ་ཟིབ་མཛེས༔ རྩེ་མོ་ཆོས་ཀྱི་མཆོད་རྟེན་དབྱིབས༔ ཕ་གུ་ཤར་བུ་མདའ་ཡབ་དང་༔ རྟ་བབས་རྒྱུ་འབྲས་བཅུ་དྲུག་མཛེས༔ རྡོ་རྗེ་འཁོར་བའི་ལྷ་གདན་བཅས༔ དྲེགས་པ་ཆེ་དགུ་བྱོལ་སོང་བརྫིས༔ རིན་ཆེན་ཁྲི་རྐང་པད་ཟླ་ཉི༔ བདུད་ཆེན་བསྣོལ་བའི་གདན་ཁྲིར་བཅས༔ ཞིང་ཁམས་གཞལ་ཡས་མཚན་རྫོགས་པའི༔ མཐའ་མར་དུར་ཁྲོད་རོ་གླིང་བསྐོར༔ བྱང་ཆུབ་ཕྱོགས་ཆོས་ལྷུན་གྲུབ་དབུས༔ རྒྱུ་ཡི་ས་བོན་ཕྱག་མཚན་གྱུར༔ དེ་ཉིད་འཕྲོ་འདུས་དོན་གཉིས་བྱས༔ ཚུར་འདུས་ཕྱག་རྒྱ་ཆེན་པོའི་འབྲས༔ དཔལ་ཆེན་རྡོ་རྗེ་གཞོན་ནུ་ནི༔ མཐིང་ནག་ཞལ་གསུམ་ཕྱག་དྲུག་པ༔ གཡས་ཞལ་དཀར་པོ་དཔའ་བའི་ཉམས༔ གཡོན་ཞལ་དམར་པོ་སྒེག་ཅིང་མཛེས༔ དབུས་ཞལ་མཐིང་ནག་འཇིགས་སུ་རུང་༔ གཡས་ཕྱག་རྡོ་རྗེ་རྩེ་དགུ་དང་༔ རྩེ་ལྔའི་ས་དགུའི་ཉོན་མོངས་འཇོམས༔ གཡོན་གཉིས་ཁ་ཊྭཱཾ་མེ་དཔུང་གིས༔ མཚན་མའི་དངོས་བསྲེགས་གདོན་གསུམ་གཅོད༔ ཐ་གཉིས་རི་རབ་ཕུར་བུ་འདྲིལ༔ རྟོག་གཉིས་རུ་ཏྲ་དབྱིངས་སུ་འབིག༔ མཐའ་གཉིས་མི་གནས་ཁྱུང་གཤོག་གདེངས༔ གླང་ཆེན་མི་ལྤགས་སྟོད་གཡོགས་དང་༔ སྟག་ཤམ་གདགས་རྒྱན་བྱུག་རྩི་གསུམ༔ གསལ་རྒྱན་ཧེ་རུའི་ཆས་བཅུའི་བརྒྱན༔ དབུ་སྐྲ་གྱེན་བརྗེས་རིགས་བདག་ལྷ༔ ཁྱད་པར་རིགས་མཆོག་ཡེ་ཤེས་ཁྱུང་༔ རྭ་བར་ཀུན་བཟང་ཡབ་ཡུམ་བཞུགས༔ ཞབས་བཞིའི་བདུད་བཞི་ནན་དུར་མནན༔ འཁོར་ལོ་རྒྱས་འདེབས་སྔོ་སྐྱའི་འཁྲིལ༔ ཨཏྤལ་དུང་ཁྲག་ཡབ་ལ་མཆོད༔ གཟིག་ཤམ་རུས་རྒྱན་གར་ཆས་ཅན༔ གཡོན་དུ་སྒྲོལ་ཡུམ་ཨེ་ཀ་ཛ༔ མཐིང་ནག་གཡུ་སྤྱང་ཅིཏྟ་བསྣམས༔ ཕྱོགས་བཞི་དབུས་ལྔར་ཀཱི་ལ་ལྔ༔ དཀར་སེང་དམར་ལྗང་མཐིང་ཀའི་མདོག༔ ཕྱག་གཉིས་གདབས་པའི་ཕུར་བུ་བསྣམས༔ རང་འདྲའི་ཡུམ་དང་གཉིས་མེད་རོལ༔ སྟེང་འོག་ཕྱོགས་བཞི་མཚམས་བརྒྱད་དུ༔ ཡེ་ཤེས་ཁྲོ་བོ་ཆེན་པོ་བཅུ༔ ཞལ་གཅིག་ཕྱག་གཉིས་རྡོ་དྲིལ་འཛིན༔ ཡུམ་བཅས་སྐུ་སྨད་དབལ་ཕུར་འབར༔ གཡས་གཡོན་ཟ་གསོད་མཆེ་གཤོག་བཅུ༔ མཐའ་བསྐོར་ཤྭ་ན་ས་བདག་མོ༔ ཕྱག་བརྙན་བདག་ཉིད་རེ་ཏི་བཞི༔ བསེ་མོ་སྐྱེས་ཀིང་དབང་ཕྱུག་མོ༔ སྒོ་མ་བཞི་དང་ཕུར་བསྲུང་འཁོར༔ མ་ལུས་ཁྲོམ་འཚོགས་བཞིན་དུ་གསལ༔ གནས་གསུམ་རྡོ་རྗེའི་སྙིང་པོ་ལས༔ འོད་འཕྲོས་ཡེ་ཤེས་སྤྱན་དྲངས་གྱུར༔ དེ་ནས་སྤྱན་འདྲེན་འདི་སྐད་དོ༔ ཧཱུྃ༔ སྲིད་པའི་ཕུར་བུ་བསྒྲུབ་པ་དང་༔ དབང་དང་དངོས་གྲུབ་བླངས་བའི་ཕྱིར༔ ཡེ་ཤེས་ཁྲོ་རྒྱལ་འཁོར་དང་བཅས༔ རང་བཞིན་དབྱིངས་ལས་གཤེགས་སུ་གསོལ༔ ཁྲོ་བོ་ཆེན་པོ་གཤེགས་ནས་ཀྱང་༔ རྟགས་དང་མཚན་མ་བསྟན་པ་དང་༔ ཀཱི་ལ་ཡ་ཡི་དངོས་གྲུབ་སྩོལ༔ རྣལ་འབྱོར་བདག་ལ་བརྟན་པར་གསོལ༔ ཨོཾ་བཛྲ་ཀུ་མ་ར་ས་པཱ་རི་ཝ་ར་ཛ་ཛ༔ གཉིས་པ་བཞུགས་སུ་གསོལ་བ་ནི༔ ཧཱུྃ༔ ཐབས་ཀྱི་སྤྱོད་པས་གཞན་དོན་དུ༔ བྱམས་དང་སྙིང་རྗེའི་གང་འདུལ་བ༔ སངས་རྒྱས་ཕྲིན་ལས་རྫོགས་མཛད་ཕྱིར༔ དམ་ཚིག་དབང་ལ་བརྟན་པར་བཞུགས༔ ས་མ་ཡ་ཏིཥྛ་ལྷན༔ དེ་ནས་གུས་ཕྱག་འཚལ་བ་ནི༔ ཧཱུྃ༔ རང་བྱུང་ཡེ་ཤེས་ཡེ་རྫོགས་ལྷ༔ དོན་དམ་མི་ཤིགས་དཔའ་བོའི་ངང་༔ འདུ་འབྲལ་མེད་པའི་དབྱིངས་མཐོང་གི༔ ལྟ་བ་མཇལ་བའི་ཕྱག་འཚལ་ལོ༔ ཨ་ཏི་པུ་ཧོས་ཕྱག་འཚལ༔ པྲ་ཏིཙྪ་ཧོས་ཕྱག་ལན་འཚལ་ལོ༔ དེ་ནས་མཆོད་བ་འབུལ་བ་ནི༔ ཧཱུྃ༔ བདག་རྟོག་དབུ་མར་བསད་པ་ཡིས༔ ཕུང་ཁམས་སྐྱེ་མཆེད་མ་ལུས་པ༔ ཡེ་ཤེས་བདུད་རྩིར་བྱིན་རླབས་ཏེ༔ རྡོ་རྗེ་སྲིན་པོའི་ཚོགས་ལ་མཆོད༔ མ་ཧཱ་ཏ་ན་ག་ཎ་པཉྩ་པཱུ་ཛ་ཧོ༔

དེ་ནས་བསྟོད་པ་བྱ་བ་ནི༔ ཧཱུྃ༔ ཞེ་སྡང་རྣམ་དག་སྐུ་ཡི་གར་གསུམ་ལྡན༔ འདོད་ཆགས་རང་གྲོལ་གསུང་གི་གར་གསུམ་གསལ༔ གཏི་མུག་བདུད་འཇོམས་ཐུགས་ཀྱི་གར་གསུམ་བཀྲ༔ སྐུ་གསུམ་ཡོངས་རྫོགས་རྗོ་ ༼ རྡོ་དཔྱད། ༽རྗེ་ཕུར་བུར་བསྟོད༔ རྒྱུ་རྐྱེན་སྲིད་པ་བདུད་ཀྱི་གཟེས་པོ་ལ༔ རྟགས་དོན་རྫས་ཀྱི་རྡོ་རྗེ་ཕུར་བུ་ལྔས༔ ཐལ་འབྱིན་རྒྱུད་ལྔ་གདོན་གཟུགས་རྡུལ་ཕྲན་འཐག༔ འཁོར་དང་སྲས་སྤྲུལ་ཡང་འཁོར་བཅས་ལ་བསྟོད༔ གཞན་ཡང་ཕུར་བ་བསྒྲུབ་པའི་རིག་འཛིན་དང་༔ བཀའ་ཡི་ཕོ་ཉ་དྲེགས་ཚོགས་དལ་འཁོར་འཁོད༔ ཀུན་ཀྱང་དབང་བྱིན་དངོས་གྲུབ་གཏེར་གྱི་མཛོད༔ ཡེ་ཤེས་སྐུ་གསུང་ཐུགས་མངའ་རྣམས་ལ་བསྟོད༔ དེ་ནས་འཛབ་བཟླ་བ་ནི༔ ཧཱུྃ༔ བདག་མདུན་ཐུགས་ཀར་པདྨ་དང་༔ ཉི་ཟླའི་གདན་ལ་ཡེ་ཤེས་སེམས༔ རྒྱན་མེད་གཅེར་བུ་རྡོར་དྲིལ་བསྣོལ༔ ཐུགས་དབུས་རྡོ་རྗེའི་ལྟེ་བ་རུ༔ ཉི་ཟླའི་གའུ་ཁ་སྦྱོར་ནང་༔ ཧཱུྃ་ལ་སྔགས་ཀྱི་ཕྲེང་བས་བསྐོར༔ བཟླས་པས་སྔགས་ཀྱི་འོད་ཟེར་ལས༔ འཕགས་མཆོད་དབང་བྱིན་བསྡུས་ཏེ་བསྟིམ༔ ཕར་འཕྲོས་དགྲ་གདོན་གནོད་བྱེད་བགེགས༔ ཚར་བཅད་རྡུལ་དུ་བརླག་ནས་ཀྱང་༔ ཁམས་གསུམ་སེམས་ཅན་ཐམས་ཅད་ཀྱི༔ འཁྲུལ་སྣང་ལམ་གྱི་རུ་ཏྲ་ཀུན༔ ངོ་བོ་སྐྱེ་མེད་དབྱིངས་སུ་བསད༔ རྣམ་པར་ཤེས་པ་རྡོ་རྗེར་གྱུར༔ གཞིར་བཞེངས་ཀཱི་ལ་རིགས་ལྔའི་སྐུར༔ ཕྱམ་གཅིག་རྫོགས་སངས་རྒྱས་བསམ་ཞིང་༔ ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིགྣན་བཾ་ཧཱུྃ་ཧཱུྃ་ཕཊ༔ ཅེས་ཀྱང་ཞག་བཅུ་བསྒྲུབ་ནས་སུ༔ རྟག་ཏུ་གསང་ཞིང་ཡི་དམ་བྱ༔ ཆོས་བྱེད་གེགས་ལས་ངེས་པར་རྒྱལ༔ བགེགས་རྣམས་ཀུན་གྱི་ཚུགས་མི་སྲིད༔ འཆི་འཕོའི་ཆོས་ཉིད་བར་དོ་ལ༔ ཀརྨ་ཧེ་རུའི་ཐུགས་གསང་དུ༔ འཕོ་བ་འདི་ལ་ཐེ་ཚོམ་མེད༔ ས་མ་ཡཱ༔ འགྱུར་མེད་སྐལ་ལྡན་བཟང་པོ་ཡིས། །ལོ་གཉིས་གོང་ནས་བསྐུལ་བ་དང་། །མ་ཁོམ་ལེ་ལོའི་དབང་འཐབ་ནི། ། རེ་ཞིག་ཕྱི་བཤོལ་ལུས་པ་ན། །ཁོང་རང་ཁྲོས་པས་གྱོད་བསྡིགས་ནི། ཁ་འཇམ་ཁོང་དུ་རྩུབ་མོའི་ཚིག །རུས་ཅན་ལན་གྲངས་གཉིས་གསུམ་བྱོན། །སྐྲག་ཚབ་ངང་ནས་ག་གཱས་སོ། །དགེ་འདིའི་འགྲོ་བ་ཐམས་ཅད་ཀུན། །རྡོ་རྗེ་ཕུར་བའི་གནས་ཐོབ་ཤོག །དགེའོ། །མངྒ་ལཾ། །

དཔལ་ཆེན་རྡོ་རྗེ་གཞོན་ནུའི་ཚོགས་མཆོད་དངོས་གྲུབ་བང་མཛོད།

དཔལ་ཆེན་རྡོ་རྗེ་གཞོན་ནུའི་ཚོགས་མཆོད་དངོས་གྲུབ་བང་མཛོད་བཞུགས་སོ༔

ན་མོ་གུ་རུ་པདྨ་ཀཱ་ར་ཡེ༔ བརྡ་ཡིག །ཚོགས་བཞིའི་མཚན་ཉིད་ཚང་བ་དང་༔ ཕུན་སུམ་ཚོགས་པ་ལྔ་ལྡན་པའི་བསྙེན་བསྒྲུབ་ཡན་ལག་རྫོགས་བྱས་པས༔ རྣལ་འབྱོར་ཅན་གྱི་གང་ཟག་གིས༔ ལྟ་དགོངས་ཏིང་འཛིན་གསལ་བའི་ངང་༔ ཤཊ་དང་ཀུ་ཅོ་མེད་པ་དང་༔ ཚོགས་ཀྱི་སྤྱང་ཀིར་མ་སོང་བས༔ དམ་ཚིག་ཚུལ་ལྡན་འདི་ལྟར་གྱེར༔ ས་མ་ཡཱ༔ ཚོགས་འཁོར་བྱིན་གྱིས་བརླབས་པ་ནི༔ ཧཱུྃ༔ བདག་ཉིད་ཧེ་རུའི་ཐུགས་ཀ་ནས༔ ཛྭ་བཾ་ཡཾ་གི་ཡི་གེ་འཕྲོས༔ ཐ་མར་དངོས་འཛིན་དྲི་མ་སྦྱངས༔ ཡེ་ཤེས་བདུད་རྩིར་བྱིན་གྱིས་རླབས༔ དེ་ཝི་མུ་ཌ་རཱ་ག་ཧོ༔ རཱ་ག་ར་ཏི་བྷྲཱུཾ་ཧཱུྃ་ཨཱ༔ ཨོཾ་ས་མ་ཏི་ཛྙཱ་ན་ཨ་བྷི་ཥིཉྩ༔དེ་ནས་ཚོགས་ཞིང་སྤྱན་འདྲེན་ནི༔ ཧཱུྃ༔ སྣང་སྟོང་གཉིས་མེད་རྡོ་རྗེའི་ངང་༔ རང་རིག་གཞོན་ནུ་བུམ་པའི་སྐུ༔ ཡེ་ཤེས་རྒྱ་མཚོའི་འཁོར་དང་བཅས༔ ཚོགས་ལ་སྤྱན་འདྲེན་གཤེགས་སུ་གསོལ༔ བཛྲ་ཀུ་མ་ར་ས་པཱ་རི་ཝ་ར་ཕཻམ་ཛ༔ མ་ཧཱ་ཀ་རུ་ཎི་ཀ་དྲ་ཤྱ་ཧོ༔ ཚོགས་ཀྱི་མཆོད་པ་འབུལ་བ་ནི༔ ཧཱུྃ༔ འདོད་ཡོན་ལྷ་མོའི་ངོ་བོ་ཉིད༔ འཁོར་འདས་མཆོད་པའི་གར་བསྒྱུར་བ༔ བདེ་ཆེན་གཟི་བྱིན་འབར་བའི་སྤྲིན༔ འཁོར་གསུམ་རྣམ་དག་མཆོད་པ་འབུལ༔ མ་ཧཱ་གྷ་ཎ་ཙཀྲ་པཱུ་ཙ་ཁཱ་ཧི༔ ཉམས་ཆགས་བཤགས་པའི་ལུང་བྱང་ནི༔ ཨཱ༔ གཞི་ནས་མ་བྱུང་མ་སྐྱེས་པས༔ བཤགས་བྱ་བཤགས་བྱེད་བཤགས་ཡུལ་བྲལ༔ རྣམ་དག་མི་དགེ་མེད་པའི་ངང་༔ རྡོ་རྗེ་གཞོན་ནུའི་དམ་ཚིག་དུའོ༔ བཛྲ་ཀུ་མ་ར་ཤུདྡྷེ་བི་ཤུདྡྷེ་ཨདྨ་ཀོ྅་ཧཾ༔ རྨད་བྱུང་ཏ་ནའི་མཆོད་པ་ནི༔ ཧཱུྃ༔ བདག་གཉིས་རྟོག་གཟུགས་ཁམས་གསུམ་པའི༔ ཕྱི་ནང་གསང་བའི་རུ་ཏྲ་ཀུན༔ སྲོག་མེད་སྐུ་རུ་ཡོངས་རིག་པས༔ བསྒྲལ་བའི་ཡུལ་མེད་རྫོགས་སངས་རྒྱས༔ རུ་ཏྲ་མ་ར་ཡ་ཕཊ༔ བདག་མེད་དོན་གྱི་ཧེ་རུ་ཀའི༔ སྐུ་གསུང་ཐུགས་ཀྱི་ཀློང་ཆེན་དུ༔ སྣང་སྲིད་འབྲས་བུས་གཞི་ལ་ཐིམ༔ ཚོགས་ཆེན་ཡེ་རྫོགས་ལྷུན་གྱིས་གྲུབ༔ མ་ཧཱ་ཏ་ན་པཱུ་ཛ་ཁཱ་ཧི༔ དེ་ནས་ཐུགས་དམ་བསྐང་བ་ནི༔ ཧཱུྃ༔ རང་བྱུང་ཡེ་ཤེས་ངོ་བོ་ཉིད༔ ཆོས་ཉིད་ངང་གིས་ཁྲོ་བོ་ཡི༔ རང་རྩལ་སྒྱུ་འཕྲུལ་རོལ་བ་ལ༔ བསྐང་དང་མ་བསྐང་ཡེ་ནས་མཉམ༔ ཀློང་ཆེན་ཡངས་པའི་ཆོ་རོལ་དུ༔ སྣང་སྲིད་གཞིར་བཞེངས་ཆེན་པོར་བསྐངས༔ མ་ཧཱ་ཡ་ན་ས་མ་ཡ་སྟྭཾ༔ ཡང་ཅིག་ལྷག་མའི་ཆོ་ག་ནི༔ ཨ་ཀ་རོ་ཡིས་བྱིན་གྱིས་བརླབས༔ ཧཱུྃ༔ གྱང་ལོག་རི་མོའི་ཚུལ་བཞིན་དུ༔ གནས་ལུགས་ངོས་ནས་མཐོ་དམན་མེད༔ འོན་ཀྱང་འཁོར་བའི་སྒོར་བསྟུན་ཏེ༔ ལྷག་གཏོར་བཞེས་ལ་ཕྲིན་ལས་མཛོད༔ མ་ཧཱ་ཨུཙྪིཥྚ་ཁཱ་ཧི༔ བསྐུལ་བ་ནི༔ ཧཱུྃ༔ ཆོས་ཀྱི་དབྱིངས་ལས་མ་གཡོས་མི་རྩོལ་བཞིན༔ ངང་བྱུང་ཐུགས་རྗེ་ཁྲོས་པའི་རྔམ་གཟུགས་སུ༔ དུས་བབས་སྙིགས་མའི་རྒུད་པ་ཡོངས་བསལ་ཞིང་༔ མཆོག་ཐུན་དངོས་གྲུབ་སྩོལ་ཕྱིར་ཐུགས་དམ་བསྐུལ༔ ད་ལྟ་ཉིད་དུ་གཟུགས་སྐུར་མངོན་འདུ་ཞིང་༔ ཕྲིན་ལས་རབ་འབྱམས་སྒྲུབ་འབྲས་འབྱིན་དུ་གསོལ༔ བཛྲ་ཀུ་མ་ར་སརྦ་ཀརྨ་ཀུརྦནཏུ་ཧོ༔ ཡལ་གམ་ཆད་མདོ་བསྐྱང་བ་ནི༔ ཧཱུྃ༔ འདོད་དོན་རྒྱན་གྱི་གཏོར་མ་ནི༔ ཐ་ཚིག་གསུམ་གྱིས་བསྲུང་བ་འདི༔ དམ་ཅན་རྒྱ་མཚོའི་ཚོགས་ལ་འབུལ༔ ཁས་བླངས་དམ་བཅས་ཕྲིན་ལས་མཛོད༔ བྷ་ལིངྟ་ཁཱ་ཧི༔ བསྟན་མ་སྐྱོང་མ་བརྔན་པ་ནི༔ ཧཱུྃ༔ བོད་སྐྱོང་བསྟན་མ་བཅུ་གཉིས་ནི༔ གཡའ་མ་བཅུ་གཉིས་ལ་སོགས་པ༔ སྔོན་ཚེ་རང་གི་དམ་བཅས་བཞིན༔ ཐ་ཚིག་རྒྱན་གྱི་མཆོད་པ་བཞེས༔ སངས་རྒྱས་བསྟན་དང་བསྟན་འཛིན་སྐྱོངས༔ རྣལ་འབྱོར་བདག་གི་སྡོང་གྲོགས་མཛོད༔ རྒྱལ་ཁམས་འཇིག་རྟེན་ཆོས་བཞིན་སྐྱོངས༔ མཆོག་དང་ཐུན་མོང་དངོས་གྲུབ་སྩོལ༔ མ་མ་ཧྲིང་ཧྲིང་ཨི་དཾ་བྷ་ལིངྟ་ཁཱ་ཧི༔ དེ་ནས་རྟ་བྲོ་བརྡུང་བ་ནི༔ ཧཱུྃ༔ གཞི་མེད་རྩ་བྲལ་ཧེ་རུ་ཀའི༔ བདག་མེད་ལྟ་བའི་བྲོ་བརྡུང་བས༔ བདག་ལྟ་ལོག་པར་འདྲེན་པའི་ཚོགས༔མཐར་བྱེད་ཨེ་ཝཾ་མ་ཡ་སྟྭཾ༔ ཏིཥྛ་བཛྲ་མཱཾ༔ དངོས་གྲུབ་ནི༔ ཧཱུྃ༔ རྡོ་རྗེ་ཕུར་པའི་ལྷ་ཚོགས་འཁོར་བཅས་ཀྱིས༔ སྒྲུབ་པའི་རྣལ་འབྱོར་རིག་འཛིན་བདག་ཅག་ལ༔ གྲུབ་པ་བརྒྱད་དང་རིག་འཛིན་རྣམ་པ་བཞི༔ དབང་བཅུ་ཕྱི་ནང་ཁ་སྦྱོར་བདེ་ཆེན་བདུན༔ ཁྱད་ཆོས་དྲུག་ལྡན་གཞོན་ནུ་བུམ་པ་སྐུའི༔ རྡོ་རྗེ་མཆོག་གི་དངོས་གྲུབ་སྩལ་དུ་གསོལ༔ བཛྲ་ཀུ་མ་ར་ཀ་ཡ་ཝཀྐ་ཙིཏྟ་སརྦ་སིདྡྷི་ཕ་ལ་ཧོ༔ སླར་ཡང་བཤགས་པ་བྱ་བ་ནི༔ རིགས་སྟོང་རྡོ་རྗེ་ཡེ་སངས་རྒྱས༔ བསྲུང་མེད་ཉམས་པའི་མཚན་དང་བྲལ༔ ཐ་མལ་མཚན་འཛིན་ཉམས་ཆགས་ཀུན༔ བཤགས་བྱ་བཤགས་བྱེད་བྲལ་བས་ཨཱ༔ རྫོགས་རིམ་ལྷ་སྐུ་གསལ་བ་ནི༔ ཧཱུྃ༔ མཚན་མ་བཟང་ཞེན་བཅོས་པའི་གཟུགས༔ ཏིང་འཛིན་སྤྲོས་བསྡུས་མ་བྱས་པར༔ མ་བཅོས་རང་བྱུང་ཡེ་རྫོགས་ལྷ༔ དཀྱིལ་འཁོར་འཁོར་ལོ་གདོད་ནས་གྲུབ༔ མ་ཧཱ་དེ་ཝ་ཙཀྲ་སན་ཏི་ཨོཾ༔ སྨོན་ལམ་བཀྲ་ཤིས་མཐའ་རྒྱན་ནི༔ ཧཱུྃ༔ བྱང་ཆུབ་སེམས་ཀྱི་རྡོ་རྗེ་ཆེ༔ རྣམ་ཀུན་སྐྱེ་རྒ་ན་འཆི་བྲལ༔ སྲིད་པའི་ཆུ་བོ་རྒྱ་མཚོ་བརྒལ༔ བདེན་པ་དེ་ཡིས་འགྲོ་བ་ཀུན༔ རྣམ་ཀུན་བདེ་ལེགས་བཀྲ་ཤིས་ཤོག༔ ཕྱམ་གཅིག་རྫོགས་པའི་བྱང་ཆུབ་ཀྱི༔ ཡེ་ཤེས་སེམས་དཔའ་རྟག་ཁྱབ་དེའི༔ ངོ་བོ་མངོན་གྱུར་བྱངཆུབ་ཤོག༔

ཅེས་ཀྱང་འགྱུར་མེད་སྐལ་བཟང་བསྐུལ་ངོར་ག་ག་ཨ་བྷྱེས་སོ། །

ཕུར་སྲུང་གསོལ་བསྡུས།

ཕུར་སྲུང་གསོལ་བསྡུས་ནི༔ ཛ༔ ཕུར་པའི་སྲུང་མ་དམ་ཚིག་ཅན༔ སློབ་དཔོན་བཀའ་ཡི་བྱ་ར་བ༔ ཤྭ་ན་མ་བཞི་གཤེགས་སུ་གསོལ༔ ས་བདག་མ་བཞི་གཤེགས་སུ་གསོལ༔ སྐྱེས་བུ་གིང་བཞི་གཤེགས་སུ་གསོལ༔ རེ་ཏི་མཆེད་བཞི་གཤེགས་སུ་གསོལ༔ བསེ་མོ་མཆེད་བཞི་གཤེགས་སུ་གསོལ༔ བདག་ཉིད་མ་བཞི་གཤེགས་སུ་གསོལ༔ ཀིང་ཆེན་བཅོ་བརྒྱད་གཤེགས་སུ་གསོལ༔ བསེ་ལྕགས་དུང་གི་སྐྱེས་བུ་གཤེགས་སུ་གསོལ༔ བསྟན་མ་བཅུ་གཉིས་གཤེགས་སུ་གསོལ༔ དམ་ཚིག་གཉན་བཙུན་ཁྱེད་རྣམས་ལ༔ བདུད་རྩི་གསེར་སྐྱེམས་མཆོད་པ་འབུལ༔ བྷ་ལིང་གཏོར་མས་མཆོད་པ་འབུལ༔ སྤྱན་གཟིགས་དཀོར་ཆའི་མཆོད་པ་འབུལ༔ ཡོ་བྱད་བཟང་དགུའི་མཆོད་པ་འབུལ༔ འདོད་ཡོན་ལོངས་སྤྱོད་མཆོད་པ་འབུལ༔ དམ་རྫས་བདུད་རྩིའི་མཆོད་པ་འབུལ༔ དགྲ་ཤ་ཁྲག་གི་མཆོད་པ་འབུལ༔ བརྩེ་བའི་ཐུགས་ཀྱིས་དང་དུ་བཞེས༔ ཕྲིན་ལས་རབ་འབྱམས་ཐོགས་མེད་བསྒྲུབ༔ མ་འདའ་བཛྲ་ས་མ་ཡཱ༔ ཅེས་ཀྱང་འགྱུར་མེད་སྐལ་བཟང་བས་བསྐུལ་ངོར་ཨ་ག་གཱས་སོ། །གསོལ་འདེབས་ནི༔ རྒྱལ་ཀུན་བྱ་གྲུབ་ཡེ་ཤེས་ཧེ་རུ་ཀ༔ སྤྲུལ་འཁོར་ཕུར་བ་སྒྲུབ་པའི་རྒྱ་བོད་ཀྱི༔ རིག་འཛིན་གྲུབ་ཐོབ་རྩ་བརྒྱུད་བླ་མ་ལ༔ གསོལ་བ་འདེབས་སོ་ཡེ་ཤེས་སྐུ་འགྲུབ་ཤོག༔ ཅེས་ཀྱང་ག་གཱས་སོ། །

དཔལ་ཆེན་ཕུར་བུའི་ལུས་དཀྱིལ་བསྡུས་པ་ཉོན་མོངས་ཐལ་འབྱིན།

ཡེ་ཤེས་སྒྱུ་འཕྲུལ་དྲྭ་བ་ལས༔ དཔལ་ཆེན་ཕུར་བུའི་ལུས་དཀྱིལ་བསྡུས་པ་ཉོན་མོངས་ཐལ་འབྱིན་བཞུགས་སོ༔

ན་མོ་གུ་རུ་པདྨ་ཀཱ་ར་ཡེ༔ བརྡ་ཡིག །རྒྱལ་ཀུན་ཕྲིན་ལས་ཧེ་རུ་ཀ༔ དཔལ་ཆེན་བཛྲ་ཀུ་མ་ར༔ རུ་ཏྲ་སྡེ་གསུམ་འདུལ་བའི་གཉེན༔དེ་ལ་གུས་པས་ཕྱག་འཚལ་ནས༔ ལུས་ཀྱི་དཀྱིལ་འཁོར་རྒྱུན་ལྡན་ཆོས༔ ཧཱུྃ༔ རང་ཉིད་སྐད་ཅིག་དྲན་རྫོགས་སུ༔ སྣོད་ཀྱི་འཇིག་རྟེན་དྲག་པོའི་ཞིང་༔ གཞལ་ཡས་རྒྱན་བཀོད་ཕུན་ཚོགས་དབུས༔ དྲེགས་པ་རུ་ཏྲ་བྱོལ་སོང་སྟེང་༔ དཔལ་ཆེན་རྡོ་རྗེ་གཞོན་ནུ་ནི༔ མཐིང་ནག་ཞལ་གསུམ་ཕྱག་དྲུག་པ༔ གཡས་དཀར་གཡོན་དམར་དབུས་མཐིང་ནག༔ ཤིན་ཏུ་ཁྲོ་གཏུམ་གར་དགུའི་ཉམས༔ གཡས་ཀྱི་དང་པོའི་ཕྱག་གཉིས་ན༔རྡོ་རྗེ་རྩེ་དགུ་རྩེ་ལྔ་བསྣམས༔ གཡོན་གཉིས་ཁ་ཊྭཱྃ་མེ་དཔུང་འབར༔ ཐ་གཉིས་རི་རབ་ཕུར་བ་འདྲིལ༔རྡོ་རྗེ་རིན་ཆེན་གཤོག་པ་གདེངས༔ ཞབས་བཞིར་བདུད་བཞི་སྤྱི་ཆིངས་མནན༔ གར་དང་དུར་ཁྲོད་ཆས་ཀྱི་བརྒྱན༔ མེ་རི་མེ་དཔུང་ཀློང་ན་འགྱིང་༔ ཡུམ་མཆོག་འཁོར་ལོ་རྒྱས་འདེབས་མ༔ སྔོ་སྐྱ་ཨུཏྤལ་དུང་ཁྲག་འཛིན༔ ཞབས་གཡས་ཡབ་ཀྱི་རྐེད་ལ་འཁྲིལ༔ གཡོན་པས་བརྐྱང་ནས་རོ་གདན་བརྫིས༔ རུས་པའི་རྒྱན་ལྡན་སྒེག་པའི་ཉམས༔ ཡབ་ཡུམ་སྤྱི་བོར་བྱ་ཁྱུང་གི༔ རྭ་བར་ཀུན་བཟང་ཡབ་ཡུམ་ནི༔ ངོ་བོ་རྡོ་རྗེའི་བླ་མར་ཤར༔ གནས་ལྔར་ཀི་ལ་རིགས་ལྔ་དང་༔ མཐའ་བསྐོར་ཁྲོ་བཅུ་ཟ་གསོད་ནི༔ ཕྲ་ཐབས་སྒོ་སྐྱོང་ཤྭ་ན་མ༔ ས་བདག་བདག་ཉིད་བསེ་ལྕགས་དུང་༔ གིང་དང་དབང་མོར་བཅས་པ་ཀུན༔ ཉི་ལས་འོད་ཟེར་འཕྲོ་བཞིན་དུ༔ རང་རྩལ་ཡེ་རྫོགས་རང་ཤར་བསྒོམ༔ གནས་གསུམ་འོད་ཟེར་རབ་འཕྲོས་པས༔ ཡེ་ཤེས་སྤྱན་དྲངས་དབང་བསྐུར་ཞིང་༔ བྱིན་རླབས་དབང་རྟགས་རང་རིགས་གཙོའི༔ དབུ་བརྒྱན་སླར་ཡང་འཕྲོས་པ་ལས༔ རང་བཞིན་གནས་ནས་སྤྱན་དྲངས་གྱུར༔ དེ་ནས་སྤྱན་འདྲེན་འདི་ལྟ་སྟེ༔ ཧཱུྃ༔ སྐྱེ་མེད་ཆོ་འཕྲུལ་འགགས་མེད་དུ༔ བཞེངས་ནས་གནས་འདིར་གཤེགས་སུ་གསོལ༔ དམ་ཚིག་སེམས་དཔའ་གདན་མཆོག་ལ༔ མཉམ་ཉིད་རིག་པས་བརྟན་པོར་བཞུགས༔ ཕྱག་མཆོད་ནི༔ རང་རིག་རྡོ་རྗེ་གཞོན་ནུ་བུམ་པའི་སྐུར༔ ཐོག་མ་ཉིད་ནས་བཞུགས་ལ་ཕྱག་འཚལ་ལོ༔ དུག་ལྔ་ཉོན་མོངས་རུ་ཏྲ་སྡེ་གསུམ་པོ༔ ལྟ་བས་བསྒྲལ་ནས་སྡུག་བསྔལ་བདེ་བར་མཆོད༔ དེ་ནས་བསྟོད་པ་ནི༔ ཧཱུྃ༔ འགྱུར་མེད་བྱང་ཆུབ་རྡོ༵་རྗེ༵་ཆོས་བདུན་ལྡན༔ སྐྱེ་མེད་འགགས་མེད་གཞོན༵་ནུའི༵་བདུད་བཞི་བཅོམ༔ འཁོར་བ་སྟོང་ཉིད་ཆེན་པོའི་ཡེ་རྒྱས་འདེབས༔ རང་རྩལ་འཁོར་དང་བཅས་པ་ཐམས་ཅད་ཀུན༔ བསྐྱེད་པ་ཙམ་མིན་རང་བྱུང་གདོད་ནས་རྫོགས༔ རྒྱལ་ཀུན་ངོ་བོ་ཉིད་ལ་ཕྱག་འཚལ་བསྟོད༔ ཞེས་བརྗོད་དེ་ནས་འཛབ་ནི༔ ཧཱུྃ༔ ཐུགས་ཀར་ཡེ་ཤེས་སེམས་དཔའ་ནི༔ རྒྱན་མེད་གཅེར་བུ་འོད་ཟེར་འབར༔ ཐུགས་དབུས་ཐུགས་མཚོན་རྡོ་རྗེའི་སྦུབས༔ ཉི་ཟླའི་གའུར་ཐུགས་སྲོག་ཧཱུྃ༔ མཐའ་མར་སྔགས་ཀྱི་ཕྲེང་བས་བསྐོར༔ འོད་ཟེར་འཕྲོ་འདུ་བསྣོལ་མ་ཡིས༔ འཁོར་འདས་རྡོ་རྗེ་ཕུར་པས་བསྒྲལ༔ གཅིག་པུའི་ཀློང་དུ་རོལ་བར་བསྡུས༔ དེ་ལས་མི་འདའ་ང་རྒྱལ་ངང་༔ ཨོཾ་བཛྲ་ཀཱི་ལི་ཀཱི་ལ་ཡ་ཧཱུྃ་ཨཱ༔ ཞེས་བཟླས་གནོད་བྱེད་ཡོད་ན༔ སརྦ་བིགྣན་བཾ་ཕཊ༔ ཞེས་བཏགས་གོ༔ གཉིས་པ་ཚོགས་བསྡུས་ནི༔ ཧཱུྃ༔ རྫས་རྣམས་སྟོང་ཉིད་རྡོ་རྗེའི་ལྷ་མོར་བཞེངས༔ ཡེ་ཤེས་ཚོགས་ཀྱི་ལྷ་ཚོགས་རྣམས༔ རྣལ་འབྱོར་གདུང་བས་སྤྱན་དྲངས་ངོ༔ མཉེས་མཆོད་ཟག་མེད་ཆེན་པོར་འབུལ༔ མ་ཧཱ་གྷ་ན་ཙཀྲ་ཁཱ་ཧི༔ ཚེ་རབས་བསགས་པའི་སྡིག་པ་བཤགས༔ རྟོག་གཉིས་རུ་ཏྲ་དབྱིངས་སུ་བསད༔ དུག་གསུམ་ཚོགས་ཀྱི་མཆོད་པར་འབུལ༔ དཀྱིལ་འཁོར་ལྷ་ཚོགས་ཐུགས་དམ་བསྐངས༔ མ་ཧཱ་གྷ་ན་རུ་ཏྲ་ཁཱ་ཧི༔ ལྷག་མ་ནི༔ ཧཱུྃ༔ ལྷག་སྐྱོངས་ཆད་མདོ་ལ་གནས་པའི༔ བསྟན་པ་སྐྱོངས་བ་ཐམས་ཅད་ལ༔ དཔལ་གྱི་ཕམ་ཕབ་རྣལ་འབྱོར་གྱི༔ ཚོགས་མཆོད་འབུལ་ལོ་ཕྲིན་ལས་མཛོད༔ ཅེས་སོ༔ དེ་ནས་བྲོ་བརྡུང་དང་༔ དངོས་གྲུབ་བསྐུལ་བླང་འདི་ལྟར་རོ༔ ཧཱུྃ༔ བདག་ལྟ་གཞི་ནས་དག་པར་ཤེས༔ ལྟ་བ་འགྱུར་མེད་བྲོ་རྒྱས་གདབས༔ ཡེ་ཤེས་ལྷ་ཚོགས་དབྱིངས་ནས་བཞེངས༔ རྣལ་འབྱོར་ཅན་ལ་མཆོག་དངོས་སྩོལ༔ བཛྲ་བིགྣན་ནན་ནན༔ མ་ཧཱ་ཀ་རི་ནི་ཀ་དྲ་ཤྱ་སིདྡྷི་ཕ་ལ༔ རྗེས་ཆོག་ནི༔ ཧཱུྃ༔ ཆད་ལྷག་ཉམས་ཆགས་ཉེས་ལྟུང་བཤགས༔ རང་ཤར་ཐུགས་རྗེ་ཀློང་དུ་གདལ༔ ཆད་པ་མ་ཡིན་ལྷ་ཡི་ངང་༔ དགེ་འདིའི་མངོན་བྱས་སེམས་ཅན་ཀུན༔ གཏན་བདེ་འགྱུར་བ་མེད་པར་ཤོག༔ གནས་སྐབས་དགེ་མཚན་ལྷུན་གྲུབ་ནས༔ རྣམ་མཁྱེན་རྒྱ་མཚོར་འབབས་པ་ཡི༔ བཀྲ་ཤིས་དེས་ཀྱང་དགེ་ལེགས་ཤོག༔ ཚུལ་འདིའི་ཕྲིན་ལས་ལྷ་ཚོགས་ཀུན༔ གྲུབ་ནས་ཚེ་གཅིག་སངས་རྒྱས་འགྱུར༔ ས་མ་ཡཱ༔ རྒྱ་རྒྱ་རྒྱ༔ པདྨ་མ་ཏི་ལ་ག་གཱས་སོ། །

ཕུར་བའི་རྒྱུན་ཁྱེར་གསང་བ་ཡོངས་རྫོགས།

ཕུར་བའི་རྒྱུན་ཁྱེར་གསང་བ་ཡོངས་རྫོགས་བཞུགས་སོ༔

བརྡ་ཡིག །ན་མོ་གུ་རུ་པདྨ་ཀ་ར་ཡེ༔ ཧཱུྃ༔ སྣང་སྲིད་དུར་ཁྲོད་རོལ་པའི་མཁར༔ བརྡ་རྟགས་ཕུན་ཚོགས་གཞན་ཡས་དབུས༔ རྡོ་རྗེའི་བྲག་སྟེང་བྱོལ་སོང་གིས༔ རིན་ཆེན་ཉི་མ་པདྨ་བམ༔ བཏེགས་པའི་ཁྲི་ལ་བདག་པོས་བརྒྱན༔ རང་ཉིད་སྐད་ཅིག་དྲན་རྫོགས་སུ༔ རྡོ་རྗེ་གཞོན་ནུ་སྐུ་མདོག་མཐིང་༔ ཞལ་གསུམ་ཕྱག་དྲུག་ཞབས་བཞི་བསྒྲད༔ གཡས་དཀར་གཡོན་དམར་དབུས་མཐིང་ནག༔ རྒོད་གཤེ་རྔམ་པའི་རང་བཞིན་ཞལ༔ གཡས་གཡོན་སྟེང་ནས་རིམ་འགྱེད་དུ༔ རྡོ་རྗེ་རྩེ་དགུ་རྩེ་ལྔ་བ༔ ཁ་ཊྭཱྃ་ཀ་དང་མེ་དཔུང་བསྣམས༔ ཐ་གཉིས་རི་རབ་ཕུར་བ་འདྲིལ༔ ཞབས་བཞི་བདུད་བཞི་ཁྱོ་ཤུགས་ཟུང་༔ བསྣོལ་མནན་སྦྱོར་བའི་ཡུམ་མཆོག་མ༔ འཁོར་ལོ་རྒྱས་འདེབས་མཐིང་སྐྱའི་མདོག༔ ཨུཏྤལ་དུང་ཁྲག་ཡབ་སྟོབས་ཅིང་༔ ཞབས་གཡོན་ཡབ་འཁྱུད་གཡས་བརྐྱང་གིས༔ འཁོར་བའི་སྒོ་འཕར་གནོན་མཚོན་འགྱིང་༔ གནས་ལྔར་ཀཱི་ལ་རིགས་ལྔ་དང་༔ དབང་ཤེས་ཁྲོ་བཅུ་ཟ་གསོད་ཚོགས༔ ཡན་ལག་སྒོ་སྐྱོང་མོ་རྣམས་དང་༔ ཉིང་ལག་བདག་ཉིད་ཤྭ་ན་མ༔ ས་བདག་སྐྱེས་གིང་དབང་ཕྱུག་སོགས༔ མ་འདྲེས་ཡོང་སུ་རྫོགས་པར་བསྐྱེད༔ འོད་འཕྲོས་དབྱིངས་ནས་ཡེ་ཤེས་པ༔ སྤྱན་དྲངས་གཉིས་སུ་མེད་པར་བསྟིམ༔ སྒོ་གསུམ་གུས་པས་བདག་ཕྱག་འཚལ༔ དངོས་ཡིད་སྲིད་ཞིའི་མཆོད་པ་འབུལ༔ རྡོ་རྗེའི་གྲགས་སྟོང་ན་དཱའི་བསྟོད༔ ཐུགས་ཀར་ཡེ་ཤེས་སེམས་དཔའ་མཐིང་༔ སྐྱིལ་ཀྲུང་མཉམ་བཞག་ཀུན་ཏུ་བཟང་༔ ཐུགས་གསང་རྡོ་རྗེ་རྩེ་དགུ་བའི༔ ལྟེ་བར་ཧཱུྃ་མཐིང་མཐའ་མ་རུ༔ སྔགས་ཀྱི་ཕྲེང་བ་ལུག་རྒྱུད་འཁོར༔ བཟླས་པས་འཁོར་འདས་ཐམས་ཅད་ཀུན༔ དུས་གཅིག་སྒྲོལ་པའི་ནུས་ཐོབ་ཅིང་༔ གཟི་བྱིན་རབ་ཏུ་འབར་བར་དམིགས༔ ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིགྣན་བཾ་ཧཱུྃ་ཕཊ༔ ཅེས་བཟླས་དགོངས་པའི་གཟེར་ལྡན་ན༔ དཀྱིལ་འཁོར་ཐམས་ཅད་དུས་གཅིག་འགྲུབ་༔ འཇམ་དཔལ་པ་ཡི་བསྐུལ་བཞིན་དུ༔ ཁྲག་འཐུང་ག་གཱ་ཨ་བྷྱེས་བྲིས༔ ས་མ་ཡཱ༔ རྒྱ་རྒྱ་རྒྱ་སརྦ་མངྒ་ལཾ༔

རྡོ་རྗེ་ཕུར་པའི་ལུས་དཀྱིལ་ཤིན་ཏུ་བསྡུས་པ་རྡོ་རྗེ་ཕྲེང་བ།

རྡོ་རྗེ་ཕུར་པའི་ལུས་དཀྱིལ་ཤིན་ཏུ་བསྡུས་པ་རྡོ་རྗེ་ཕྲེང་བ་བཞུགས་སོ༔

ཧཱུྃ༔ ཕྱི་སྣོད་དུར་ཁྲོད་གཞལ་ཡས་སུ༔ པད་ཉི་བདུད་བཞི་བསྣོལ་བའི་སྟེང་༔ རང་རིག་རྡོ་རྗེ་གཞོན་ནུའི་སྐུ༔ མཐིང་ནག་ཞལ་གསུམ་ཕྱག་དྲུག་པ༔ རྡོ་རྗེ་རྩེ་དགུ་རྩེ་ལྔ་གཡས༔ འབར་བའི་མེ་དང་ཁ་ཊྭཱྃ་གཡོན༔ མཐའ་གཉིས་རི་རབ་ཕུར་བ་འདྲིལ༔ ཞབས་བཞི་གྱད་ཀྱི་འདོར་ཐབས་བསྒྲད༔ ཡུམ་ཆེན་འཁོར་ལོ་རྒྱས་འདེབས་མ༔ མཐིང་སྐྱ་ཨུཊྤལ་དུང་ཁྲག་སྟོབས༔ གཡོན་བསྐུམ་གཡས་བརྐྱང་གར་སྟབས་ཀྱིས༔ བདེ་ཆེན་ཡབ་དང་གཉིས་མེད་འཁྲིལ༔ ཡབ་ཡུམ་གཉིས་སུ་མེད་པ་ཡི༔ སྐུ་ལ་སྲས་མཆོག་རིགས་ལྔ་དང་༔ ཁྲོ་བཅུ་ཟ་གསོད་ཕྲ་མེད་འཁོར༔ སྤྲུལ་པའི་སྒོ་མ་བཞི་དང་བཅས༔ རྒྱ་མཚོར་གཟའ་སྐར་བཀྲ་བཞིན་རྫོགས༔ ཀུན་ཀྱང་དུར་ཁྲོད་དཔལ་ཆས་དང་༔ འབར་བའི་གར་དགུ་རྫོགས་པར་བསྐྱེད༔ གནས་གསུམ་འོད་ཟེར་རབ་འཕྲོས་པས༔ མེ་རི་འབར་བའི་དུར་ཁྲོད་ནས༔ ཡེ་ཤེས་ལྷ་ཚོགས་སྤྱན་དྲངས་བསྟིམས༔ གནས་ལུགས་རྡོ་རྗེ་གཞོན་ནུ་ཡི༔ རང་ཞལ་མཇལ་བས་ཕྱག་འཚལ་ལོ༔ སྦྱོར་སྒྲོལ་རྨད་བྱུང་མཆོད་པ་འབུལ༔ གསང་གསུམ་ཡོན་ཏན་ལྡན་ལ་བསྟོད༔ ཐུགས་དབུས་ཡེ་ཤེས་སེམས་དཔའ་ཡི༔ ཐུགས་གསང་རྡོ་རྗེ་རྩེ་དགུུའི་རྩེར༔ ཏིང་འཛིན་སེམས་དཔའ་ཧཱུྃ་མཐིང་གིས༔ ཐ་མར་སྔགས་ཀྱི་ཕྲེང་བས་བསྐོར༔ འོད་ཟེར་འཕྲོ་འདུས་དོན་གཉིས་བྱས༔ བདག་ཐིམ་གཟི་བརྗིད་རབ་འབར་ཞིང་༔ ཕྲིན་ལས་རྡོ་རྗེའི་ཕུར་པ་ལྔ༔ གདབས་པའི་ཡུལ་ལ་ཡོངས་ཐེབས་ནས༔ ཁམས་གསུམ་དུས་གཅིག་སྒྲོལ་བ་ཡི༔ མཐུ་བྱིན་ནུས་པ་ཡོངས་རྫོགས་གྱུར༔ ཨོཾ་བཛྲ་ཀཱི་ལི༴ ཐུན་མཐར་མཆོད་བསྟོད་གཞུང་བཞིན་བྱ༔ འདི་ཡང་བི་ཏོ་ཏ་མ་སོགས༔ རྒྱུད་སྡེ་ཀུན་གྱི་སྙིང་པོ་སྟེ༔ བསྐུལ་བོའི་ངག་མ་ལྡོག་པ་ཙམ༔ ག་གཱ་ཨ་བྷྱེས་སྨྲས་པའོ༔ སརྦ་མངྒ་ལཾ༔

དཔལ་ཆེན་རྡོ་རྗེ་གཞོན་ནུའི་ལུས་དཀྱིལ་ནོར་བུ་མིག་གཅིག

ཡེ་ཤེས་སྒྱུ་འཕྲུལ་དྲྭ་བ་ལས༔ དཔལ་ཆེན་རྡོ་རྗེ་གཞོན་ནུའི་ལུས་དཀྱིལ་ནོར་བུ་མིག་གཅིག་བཞུགས་སོ༔

ཧཱུྃ༔སྣང་སྲིད་ཐམས་ཅད་རྡོ་རྗེ་ཕུར་པའི་དལ༔ ཡེ་རྫོགས་ལྷུན་གྱིས་གྲུབ་པའི་རང་བཞིན་ཏེ༔ མཚན་ཉིད་ཡོངས་རྫོགས་དྲག་པོའི་གཞལ་ཡས་ཁང་༔ དེ་དབུས་བྱོལ་སོང་བརྒྱད་ཀྱིས་བཏེགས་པའི་ཁྲིར༔ པད་ཟླ་ཉི་སྟེང་བདུད་བཞི་བསྣོལ་བའི་སྟེང་༔ རང་ཉིད་དཔལ་ཆེན་རྡོ་རྗེ་གཞོན་ནུ་ནི༔ སྐུ་མདོག་མཐིང་ནག་ཞལ་གསུམ་ཕྱག་དྲུག་པ༔ གཡས་དཀར་དགོད་ཅིང་གཡོན་དམར་གཤེ་བའི་ཉམས༔ རྩ་ཞལ་མི་སྡུག་རབ་ཏུ་ཁྲོས་པའི་གདོང་༔ ཕྱག་གཡས་རྡོ་རྗེ་རྩེ་དགུ་རྩེ་ལྔ་དང་༔ གཡོན་གཉིས་མེ་དཔུང་དང་ནི་ཁ་ཊྭཱྃ་ཀ༔ ཐ་མ་གཉིས་ཀྱི་རི་རབ་ཕུར་བུ་འདྲིལ༔ དབུ་སྐྲ་དམར་སེར་གྱེན་བརྫེས་མེ་དཔུང་འབར༔ ཚར་གསུམ་ཐོད་རྒྱན་སྦྲུལ་རིགས་ལྔའི་ཆུན་པོ༔ ཞིང་གླང་སྟག་གི་ལྤགས་པའི་ན་བཟའ་གསོལ༔ ཐལ་ཆེན་རཀྟ་ཞག་གི་སོར་རིས་གདབ༔ རྡོ་རྗེ་རིན་ཆེན་གཤོག་པ་མེ་དཔུང་དང་༔ གསལ་བའི་རྒྱན་གཉིས་མཐིང་དམར་ཅོད་པཎ་འཕུར༔ སྤྱི་གཙུག་རྡོ་རྗེ་བསེ་ཁྲབ་རྒྱ་གྲམ་ལྕགས༔ ཟ་བྱེད་རྔམ་པའི་མཆེ་བ་མན་དུ་གཙིགས༔ སྦྱོར་བའི་ཡུམ་མཆོག་འཁོར་ལོ་རྒྱས་འདེབས་མ༔ མཐིང་སྐྱ་ཨུཏྤལ་དུང་ཁྲག་སྟོབས་ཅིང་འཁྲིལ༔ གཟིག་ཤམ་གཡང་གཞི་མནབ་ཅིང་རུས་རྒྱན་མཛེས༔ གཡོན་དུ་སྒྲོལ་ཡུམ་ཨེ་ཀ་ཙི་ཏི་མ༔ རལ་གཅིག་སྤྱན་གཅིག་ཚེམ་གཅིག་ནུ་གཅིག་འཕྱང་༔ ཕྱག་གཡས་དགྲ་སྙིང་གཡོན་པས་གཡུ་སྤྱང་འགྱེད༔ གྲུ་མོར་ཁ་ཊྭཱྃ་ཞབས་གཉིས་གར་སྟབས་འགྱིང་༔ གནས་ལྔར་སྐུ་གསུང་ཐུགས་ཡོན་སྤྲུལ་པའི་སྲས༔ ཀཱི་ལ་རིགས་ལྔ་རྐང་ལག་ཚིགས་ཆེན་བརྒྱད༔ སྤྱི་བོ་རྐང་མཐིལ་ཁྲོ་བཅུ་ཟ་གསོད་དང་༔ ཚིགས་ཕྲན་དྲུག་ཅུར་ཕུར་བསྲུང་བཅུ་གཉིས་དང་༔ རྡོ་རྗེ་ཕོ་ཉ་མཁྲིག་མ་བཞི་ལ་ནི༔ སྒོ་མ་བཞི་སོགས་མ་འདྲེས་ཡོངས་སུ་རྫོགས༔ གཙོ་བོའི་སྤྱི་བོར་བྱ་ཁྱུང་རྭ་བར་དུ༔ དོན་ཡོད་གྲུབ་པ་ལོངས་སྐུའི་ཆ་བྱད་ཅན༔ གནས་གསུམ་འོད་འཕྲོས་ཡེ་ཤེས་སྤྱན་དྲངས་གྱུར༔ ཧཱུྃ༔ ཆོས་ཀྱི་དབྱིངས་ནས་རིག་སྟོང་ཀུ་མ་རའི༔ གཞོམ་མེད་ན་དཱ་ཀཱི་ལའི་སྒྲ་སྒྲོགས་ཤིང་༔ ཕུར་བ་རྣམ་པ་བཞི་ཡི་ཕྱག་རྒྱ་ཡིས༔ ཐལ་འབྱིན་ཕྲིན་ལས་མཛད་ཕྱིར་གཤེགས་སུ་གསོལ༔ ཕུང་ཁམས་སྐྱེ་མཆེད་ཡེ་རྫོགས་གདན་ལ་བཞུགས༔ གཉིས་མེད་རང་བཞིན་རིག་པས་ཕྱག་འཚལ་ལོ༔ བདག་རྟོག་རུ་ཏྲ་བསྒྲལ་བའི་ཤ་ཁྲག་རུས༔ ཚིལ་ཞག་བཀྲག་མཛེས་ལང་ཚོའི་མེ་ཏོག་དང་༔ དྲོད་དང་དབང་ཤེས་གསལ་བའི་སྒྲོན་མེ་རྣམས༔ ཟན་ཆང་སྦྲང་ལས་ཞིམ་མངར་ཕུན་སུམ་ཚོགས༔ རྡོ་རྗེ་སྲིན་པོའི་ལྷ་ལ་མཆོད་པ་འབུལ༔ ཡོན་ཏན་ལྷུན་གྱིས་གྲུབ་པའི་ཆེ་རྔོམས་ལ༔ ཚིག་ཏུ་མ་ཡིན་ཆོས་ཉིད་རང་སྒྲ་ཡིས༔ ཡེ་ཤེས་སྙན་པའི་གླུ་ཡིས་བསྟོད་པའི་ངང་༔ ཤེས་མཐོང་རྣལ་འབྱོར་ཆེན་པོའི་མཉམ་བཞག་བརྟན༔ ཧཱུྃ༔ ཐུགས་ཀར་པདྨ་ཉི་ཟླའི་སྟེང་༔ རང་འདྲ་ཞལ་གཅིག་ཕྱག་གཉིས་པ༔ རྒྱ་གྲམ་དྲིལ་བུ་བསྣོལ་ཐབས་འཛིན༔ དེ་ཡི་ཐུགས་ཀར་ཕུར་པའི་སྦུབས༔ ཉི་སྟེང་ཧཱུྃ་མཐར་སྔགས་ཀྱི་བསྐོར༔ བཟླས་པས་འཁོར་འདས་ཕུར་བས་བསྒྲལ༔ ཤ་ཁྲག་ཕུར་བའི་ཞལ་དུ་རོལ༔ རྣམ་ཤེས་ཕུར་བའི་ཀློང་དུ་བསྟིམ༔ ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིགྣན་བཾ་ཧཱུྃ་ཕཊ༔ བསྙེན་བསྒྲུབ་ལས་སྦྱོར་དམིགས་པའི་དབྱེ༔ འདི་ཡིས་གནས་སྐབས་བར་ཆད་སེལ༔ མཐར་ཐུག་ཤེས་དང་ཤེས་བྱ་སྟེ༔ འཁོར་འདས་ཉོན་ཤེས་དགྲ་བགེགས་ཀུན༔ ཆོས་ཉིད་རྡོ་རྗེ་ཕུར་བའི་ཀློང་༔ མངོན་སངས་རྒྱས་པའི་ཁྱད་ཆོས་ཡོད༔ ས་མ་ཡཱ༔ རྒྱ་རྒྱ་རྒྱ༔ དཔལ་ཆེན་ཐུགས་ལས་སྤྲུལ་སྲས་ཀྱི། །བསྐུལ་བཞིན་ག་གཱ་ཨ་བྷྱེས་སོ། །བརྩོན་འགྲུས་ཆེན་པོའི་གུས་སྦྱོར་མཁན། །བཛྲ་དྷ་ཛ་ཡ་ཡིས་སོ། །དགེའོ། །དགེའོ། །དགེའོ། །སརྦ་མངྒ་ལཾ། །

ཟབ་གསང་མཁའ་འགྲོའི་སྙིང་ཐིག་གི་དཔལ་ཆེན་ཕུར་པའི་ཁ་བསྐང་སྲི་མནན།

ཟབ་གསང་མཁའ་འགྲོའི་སྙིང་ཐིག་གི་དཔལ་ཆེན་ཕུར་པའི་ཁ་བསྐང་སྲི་མནན་བཞུགས་སོ༔

ན་མོ་གུ་རུ་པདྨ་ཀ་རཱ་ཡེ༔ བརྡ་ཡིག །འདི་ལ་བྱ་བ་ཆོ་གའི་སྔོན་འགྲོ་གཉིས༔ དངོས་གཞིའི་རིམ་པ་དང་ནི་རྗེས་ཆོག་བཞི༔ དང་པོ་ལ་ནི་ཆས་གསོགས་མནན་དོང་བརྐོ༔ ཆས་ལ་ལིང་ཀ་མནན་སྣོད་ཕུང་རེ་དང་༔ བྱད་ཐག་རོ་གཡམ་རྡོ་རྗེ་རྒྱ་གྲམ་མཚན༔ ལིངྐ་དབང་པོ་ཀུན་ཚང་རང་བཞིན་ཅན༔ མན་ངག་སྤྱི་འགྲོ་ལྟར་རམ་དམིགས་བསལ་དུ༔ དུག་ཤོག་ངོས་ལ་དུག་ཁྲག་འདྲེས་མས་བྲིས༔ རུ་པ་ཁ་ངུ་ཤི་མིག་མྱ་ངན་རྒྱ༔ རྐང་ལག་ལྕགས་སུ་བཅུག་པ་སྤྱི་ལྟར་ཡང་༔ ཤ་རྒྱས་ལུས་ཁམས་དར་བས་མི་ཐུལ་ལ༔ མགོ་བོ་གཞོན་སྟོབས་ལོ་གསུམ་མི་ནོན་ནོ༔ ཡན་ལག་གཉེན་ལྕུག་ལོ་རེ་ཕྱོགས་ཀྱི་འགོར༔ ཡན་ལག་རིང་ན་སྲིད་རྒྱུད་རིང་བར་གནས༔ རྐེ་རིང་པ་ཡིས་ད་དུང་ལན་གཅིག་ལྡང་༔ རྐེད་པ་སྦོམ་ན་གཏན་ནས་མི་ནོན་ཏེ༔ ཕྲ་ཡང་རིང་ན་ཟུག་ཀྱི་བསྲིང་སྟེ་འཚེ༔ དབང་པོ་བཀྲ་མཛེས་ལན་གཉིས་ཕྱིར་ལ་འཁོར༔ ཉིང་ལག་ཕོ་མོའི་དབང་པོའང་རིག་པས་དཔག༔ ཆེ་སྲི་གཟུགས་ཆེ་ཆུང་སྲི་ཆུང་བ་ལ༔ དགྲ་སྲི་ཕོ་དང་མོ་སྲི་མོ་ཡི་གཟུགས༔ དམ་སྲི་ཕོ་དང་གོད་སྲི་ལ་སོགས་པ༔ ཕོ་མོ་གང་ལ་འཚེ་ཆེས་གཟུགས་སུ་བྱ༔ ན་འཆི་དུར་སྲི་ཕུང་སྲི་མཚོན་ལའང་མཐུན༔ གྱོད་འདྲེ་ཅན་གྱིས་དགྲ་གཟུགས་ཅི་བཞིན་ལ༔ གྲི་སྲི་བཅོ་བརྒྱད་གང་ལའང་ཕོ་མོའི་དཔག༔ ༈ཡང་ན་གཞོན་སྲི་གཞོན་ལ་རྒན་བྱས་སྲི༔ ཕོ་མོ་གང་ཡིན་མཚན་མར་བྱས་པ་ལ༔ ཆུང་སྲི་བྱ་མགོ་དམ་སྲི་སྲེ་མོང་གདོང་༔ གོད་སྲི་རི་བོང་གྱོད་འདྲེ་སྤྲེའུར་བྱ༔ དགྲ་སྲི་མི་ཕོ་འགགས་སྲི་མི་མོའི་དབང་༔ ཕུང་སྲི་རྔ་མོང་བྱུར་སྲི་ལུག་གི་མགོ༔ ན་སྲི་རྟ་བླ་ཤི་སྲི་གཤིན་རྗེའི་གདོང་༔ ཡན་ལག་རྣམས་ལ་ཆག་དང་ཉིང་ལག་ལ༔ ཞ་ཡི་ཡི་གེ་དབང་པོ་སྒོ་ལྔ་ལ༔ ༼ རྣ་བ། ༽འོན་ ༼ མིག ༽ལོང་ ༼ སྣ། ༽འགགས་ ༼ ལྕེ། ༽ཆད་ ༼ངག་གི་གནས་འགྲིན་པ་ལ། ༽ལྐུགས་༼ ཡིད་ཀྱི་གནས་སྙིང་གི་གཡས་སུ། ༽འགགས་ཞེས་མིང་ཡིག་བྲི༔ སྤྱི་བོར་ལུས་ཀྱི་ཡི་གེ་ཆིངས་ཞེས་དང་༔ སྙིང་དབུས་ཏྲི་ཡིག་ལྟེ་བར་མིང་བྲིས་ཤིང་༔ གསང་བའི་གནས་སུ་ཁམས་མཚོན་ཐིག་ལེ་བྲི༔ དེ་རྣམས་སྟེང་དུ་སྤྱི་བོར་ཏྲིག་ནན་དང་༔ སྙིང་ཀར་ཏྲི་ཇ་ཧུར་ཐུམ་རྦད༔ ཕུར་པའི་མནན་གཞུང་ནས་ནི་བྱུང་བ་ཡི༔ ན་སྲི་ནི་དང་གྲི་སྲི་ལ་སོགས་པ༔ ཆིངས་ཆིངས་ནན་ཤབ་ཚབ་མར་ཨ་ཀརྴ་ཛ༔ ཛཿཧཱུྃ་བཾ་ཧོ་ཞེས་པའི་མཐར༔ ཡིག་མགོ་ཕྱི་དང་མཇུག་ནང་བསྟན་པར་བྲི༔ དེ་མཐར་བསྐོར་ཏེ༔ གནོད་བྱེད་འབྱུང་པོ་ལོ་ཟླ་ཞག་ཟ་མ་ཡུད་ཙམ་གྱི་གེགས་དང་ཕུང་སྲི་འདྲེ་གནོད་ཐམས་ཅད་ཁུག་ཛ༔ ཞེས་བསྐོར༔ སྤྱི་བོར་ཅུང་དཔག་ཕཊ་ཅེས་དང་༔ ཡན་ལག་ལྷུ་མཚམས་ཛཿཧཱུྃ་བཾ་ཧོས་མཚན༔ མཚན་མར་ཕཊ་དང་རྐང་ཞབས་ཡཾ༔ བྲིས་པའི་མཐའ་མར་སྤྱི་བོར་ནན་ཞེས་དྲངས༔ གནོད་བྱེད་འབྱུང་པོ་མཐོ་རྒྱལ་བློན་དམངས་གཙང་ཤ་ཟའི་སྲི་ལངས་བ་ནན༔ ཕོ་མོའི་ཆེ་ཆུང་ན་ཤི་དུར་ ༼ སྲི་དཔྱད། ༽གོད་ཡམས་ཕུང་འདྲེ་ཞང་ཉེ་དགྲ་སྲི་མཚོན་སྲི་བྱུར་གདོན་ལངས་བ་ཐམས་ཅད་མཱ་ར་ཡ་རྦད་ནན༔ ཚེ་བསོད་སྲོག་ལུས་དབང་ཐང་རླུང་རྟ་བླ་གཟའ་ལ་སྲི་ལངས་པ་ཐམས་ཅད་རྦད་ནན༔ ཕྱི་ལ་ཁྲམ་རིས་མཚམས་ཀུན་ལཾ་ནན་བྲིས༔ ལིང་ཁྲུས་ལ་སོགས་སྤྱི་འགྲོ་བསྟུན་པའོ༔ གཉིས་པ་མནན་སྣོད་ཕོ་སྲི་གཟིག་ཐོད་དང་༔ མོ་སྲི་སྟག་ཐོད་དགྲ་ལ་ཁྱི་ཡིས་ཆོག༔ དུར་སྲི་ཝ་མོ་གོད་སྲི་སྤྱང་ཐོད་རུང་༔ ཕུང་སྲི་ཕུང་ཐོད་༩གཞོན་སྲི་བ་ལང་ཐོད༔ ཆུང་སྲི་འགགས་སྲི་ལ་ནི་རྟོལ་ལེ་དང་༔ གྲི་སྲི་གཡག་ཐོད་རྒབ་སྲི་རྫ་སྣོད་རལ༔ ན་ཤི་དུར་གསུམ་གྲི་ཐོད་གང་ཡང་འདྲ༔ ཕུང་ས་དུག་སྣ་རྫས་ངན་སྣ་ཚོགས་བཅས༔ སྟ་གོན་བྱ་ཞིང་རང་མིན་དགྲ་ཕྱོགས་ཀྱི༔ རེ་མཐའ་རྫས་ངན་བྱུག་དང་ཁྱི་ཕག་པ༔ རྔ་མོང་ཡུག་འགབ་སྤུ་ཡི་ཐག་པས་དཀྲིས༔ དུར་ཁྲོད་རོ་བརྡུང་གཏན་གྱི་རྡོ་གཡམ་ལ༔ རྡོ་རྗེ་རྒྱ་གྲམ་མཚན་པ་བྲིས་པ་དང་༔ རི་རབ་བང་རིམ་གསུམ་ལྡན་བྱས་པ་བཞག༔ དེ་དག་བྱ་བའི་སྔོན་འགྲོའི་ཆོ་ག་ལ༔ སྔོན་དུ་ལས་གཞུང་བསྲང་ནས་ཚོགས་བསྒྲལ་མཚམས༔ བསད་པ་རྒྱས་བསྡུས་གང་ཡིན་ལིང་ཚལ་བཟུང་༔ དེ་ནས་ཚོགས་རོལ་ལྷག་མར་དུམ་གཅིག་བསྟབས༔ ཐུན་གཏོར་ལ་བརྟགས་ ༼ དཔྱད། ༽ཟོར་གྱི་ལས་ཀའི་མཐར༔ ཁ་བསྐང་སྦྱིན་བསྲེགས་ནང་དུའང་དུམ་རེ་ཕུལ༔ བསྟན་མའི་མཇུག་ཏུ་བྲོ་མནན་རྒྱས་པ་ལ༔ དགྲ་སྲི་གང་ཡང་རུང་བ་མནན་པའོ༔ མནན་པའི་རྗེས་སུ་རྟ་བྲོ་བརྡུང་བར་བྱ༔ བསྟོད་དང་དངོས་གྲུབ་བླང་སོགས་མཇུག་བསྐྱང་གིས༔ གར་ཐོད་བྱས་ན་ཆོ་གའི་ལག་ལེན་འཆོལ༔ འོན་ཀྱང་རང་རང་ལུགས་ལ་ཞེན་ཅིང་ཆགས༔ དེ་ཕྱིར་འདིར་ནི་བྲོ་མནན་མཚམས་ཕྱིན་དུས༔ སྔར་༼ སླར་དཔྱད། ༽ཡང་ལིངྒ་གསུམ་ལ་འགུགས་བསྟིམ་ཀྱང་༔ གཞི་ནས་མནན་དོང་ཁར་ཕྱིན་བྲུབ་ཁུང་གི༔ ནང་དུ་མནན་སྣོད་དང་བཅས་བཅུག་པར་བྱ༔ ཡུལ་གཞིའི་བདག་པོར་གསེར་སྐྱེམས་ཐུན་གཏོར་བརྔན༔ འཁུ་ལྡོག་གདུག་རྩུབ་བར་ཆད་བསལ་བར་བསྒོ༔ གཉིས་པ་དངོས་གཞི་ཐུགས་དང་བསྐུལ་བ་དང་༔ དགྲ་བགེགས་འགུགས་བསྒྲལ་གཏད་མནན་རིམ་པ་ལས༔ དང་པོ་གཉིས་ནི་སྨད་ལས་ནང་ཚན་བཞིན༔ མཐའ་མར་འགུགས་པའི་སྔགས་ལ་སྟོང་ཚིག་ནི༔ གནོད་བྱེད་འབྱུང་བོ་སྲི་ངན་མཐོ་ནམ་མཁའི་ཁམས་ནས་འཚེ་ཞིང་ལྡང་བ་ཐམས་ཅད་མ་ར་ཡ་རྦད༔ ཆིང་ཆིངས་ནན་ནན༔ ཁུག་ཛ༔ དམའ་རྒྱ་མཚོའི་གཏིང་ནས་འཚེ་ཞིང་ལྡང་བ་ཐམས་ཅད་མ་ར་ཡ་རྦད༔ ཆིང་ཆིངས་ནན་ནན༔ ཁུག་ཛ༔ བར་འབྱུང་བཞིའི་ཁམས་ནས་འཚེ་ཞིང་ལྡང་བ་ཐམས་ཅད་མ་ར་ཡ་རྦད༔ ཆིང་ཆིངས་ནན་ནན༔ ཁུག་ཛ༔ ལོ་ཟླ་བའི་ཁམས་ནས་འཚེ་ཞིང་ལྡང་བ་ཐམས་ཅད་མ་ར་ཡ་རྦད༔ ཆིང་ཆིངས་ནན་ནན༔ ཁུག་ཛ༔ ཞག་ཟ་མའི་ཁམས་ནས་འཚེ་ཞིང་ལྡང་བ་ཐམས་ཅད་མ་ར་ཡ་རྦད༔ ཆིང་ཆིངས་ནན་ནན༔ ཁུག་ཛ༔ དུས་ཚོད་དང་འབྱུང་བའི་གཡོ་འཁྲུགས་ཀྱིས་ལྡང་ཞིང་འཚེ་བ་ཐམས་ཅད་ཁུག་ཛ༔ བྱ་ཉེས་དང་ཕྱོགས་ངན་གྱིས་ལྡང་ཞིང་འཚེ་བ་ཐམས་ཅད་ཁུག་ཛ༔ ཕོ་སྲི་རི་རྩེ་ནས་ལྡང་ཞིང་འཚེ་བ་ཐམས་ཅད་ཁུག་ཛ༔ མོ་སྲི་ཆུ་འགྲམ་ནས་ལྡང་ཞིང་འཚེ་བ་ཐམས་ཅད་ཁུག་ཛ༔ ཆུང་སྲི་འགབ་འོག་གིས་ལྡང་ཞིང་འཚེ་བ་ཐམས་ཅད་ཁུག་ཛ༔ གོད་སྲི་སླས་མལ་ནས་ལྡང་ཞིང་འཚེ་བ་ཐམས་ཅད་ཁུག་ཛ༔རྒྱལ་སྲི་ནམ་མཁའ་ནས་ལྡང་ཞིང་འཚེ་བ་ཐམས་ཅད་ཁུག་ཛ༔ བློན་སྲི་གྲོས་ཁང་ནས་ལྡང་ཞིང་འཚེ་བ་ཐམས་ཅད་ཁུག་ཛ༔ གྲི་སྲི་འཐབ་ར་ནས་ལྡང་ཞིང་འཚེ་བ་ཐམས་ཅད་ཁུག་ཛ༔ ཉེ་སྲི་ཆོ་རུས་ནས་ལྡང་ཞིང་འཚེ་བ་ཐམས་ཅད་ཁུག་ཛ༔ གྱོད་སྲི་ཤཊ་ཁ་ནས་ལྡང་ཞིང་འཚེ་བ་ཐམས་ཅད་ཁུག་ཛ༔ དུར་སྲི་རོ་གླིང་ནས་ལྡང་ཞིང་འཚེ་བ་ཐམས་ཅད་ཁུག་ཛ༔ དམ་སྲི་སྒྲུབ་ཁྱུ་ནས་ལྡང་ཞིང་འཚེ་བ་ཐམས་ཅད་ཁུག་ཛ༔ ཕུང་སྲི་ཡུལ་ཁམས་ནས་ལྡང་ཞིང་འཚེ་བ་ཐམས་ཅད་ཁུག་ཛ༔ དགྲ་སྲི་མདུན་ནས་ལྡང་ཞིང་འཚེ་བ་ཐམས་ཅད་ཁུག་ཛ༔ རྐུན་སྲི་རྒྱབ་ནས་ལངས་ཞིང་འཚེ་བ་ཐམས་ཅད་ཁུག་ཛ༔ འགགས་སྲི་བཟའ་ཚོ་ནས་ལྡང་ཞིང་འཚེ་བ་ཐམས་ཅད་ཁུག་ཛ༔ གདོན་སྲི་གྲོགས་ཕྱོགས་ནས་ལྡང་ཞིང་འཚེ་བ་ཐམས་ཅད་ཁུག་ཛ༔ དར་སྲི་གཞོན་ལ་ལྡང་ཞིང་འཚེ་བ་ཐམས་ཅད་ཁུག་ཛ༔ ཆུང་གེགས་ཆེ་ལ་ལྡང་ཞིང་འཚེ་བ་ཐམས་ཅད་ཁུག་ཛ༔ ན་སྲི་ཚད་ལ་ལྡང་ཞིང་འཚེ་བ་ཐམས་ཅད་ཁུག་ཛ༔ གནོད་བྱེད་འབྱུང་བོ་སྲི་ངན་སྣ་འདྲེན་ལ་འཁྲི་ཞིང་རྒྱབ་བརྟེན་དུ་གནོད་པ་ལས་རྐྱེན་གྱིས་ལྡང་ཞིང་འཚེ་བ་ཐམས་ཅད་མ་ར་ཡ་རྦད༔ ཆིང་ཆིངས་ནན་ནན༔ ཁུག་ཛ༔ བླ་ཤ་རེ་མ་ཏི་འགྲིམ་འགྲིམ༴སོགས་གང་འཐད་ཀྱི་སྔགས་ཀྱང་གྲངས་བསྐྱལ་ལོ༔ དེའི་ཁུག་རྟགས་ཡང་དག་བྱུང་ན་སྨད་ལས་ཀྱི་ལྷ་དབྱེ་བྱ་ཞིང་༔ རྒྱས་པར་སྤྲོ་ན་བསད་པ་དང་ཐུན་གདབས་ཚང་བར་བྱས་རྗེས་རྣམ་སྨིན་གྱི་ལྷག་མ་ལ་དམིགས་ཏེ་བསྟབ་པའི་གོ་སར༔ བདག་ཉིད་ཡི་དམ་རྡོ་རྗེ་གཞོན་ནུའི་ལྷ་ཚོགས་འཁོར་དང་བཅས་པར་གསལ་བའི་སྐུ་གསུང་ཐུགས་གཏུམ་དྲག་རོལ་པའི་ཚུལ་སྒོ་རབ་ཏུ་བཟོད་པར་དཀའ་བ་ངོམ་ནས་གནོད་བྱེད་སྲི་ངན་རྣམས་ཀྱི་ལུས་ངག་ཡིད་གསུམ་བྱ་བ་ནུས་སྟོབས་དང་བཅས་པ་ཐམས་ཅད་མནན་པའི་ལས་མཛད་པར་གྱུར༔ རཱུ་པ་གནོད་བྱེད་སྲི་ངན་ཐམས་ཅད་འདུས་པའི་ངོ་བོར་ཉམ་ཐག་པར་གསལ་བའི་རྐང་ལག་ཐམས་ཅད་སྤྲུལ་པའི་ཕོ་ཉས་ལྕགས་ཀྱུའི་བཟུང་༔ ཞགས་པས་བསྡམས༔ ལྕགས་སྒྲོག་གིས་བཅིངས༔ དྲིལ་བུའི་བདེ་བ་ཆེན་པོའི་ངང་དུ་མྱོས་པར་བྱས་པ་ལ་སྙིང་ཀར་རྡོ་རྗེ་རྒྱ་གྲམ་གྱིས་མནན་པས་འཕར་ལྡང་གཡོ་འགུལ་མེད་པར་བསམ་ལ༔ ཨོཾ་བཛྲ་ཀཱི་ལི་ཀཱི་ལ་ཡ་ཧཱུྃ༔ གནོད་བྱེད་ཕོ་མོ་མཱ་ར་ཡ་ནན་ནན༔ སརྦ་ཏྲི་ཛ་ཏྲིག་ནན༔ ན་ཏྲི་ནི་ནན༔ དུ་ཏྲི་ནི་ནན༔ ཀ་ཏྲི་ནི་ནན༔ ཤ་ཏྲུ་ནི་ནན༔ ཡ་ཏྲི་ནི་ནན༔ མ་ཏྲི་ནི་ནན༔ སརྦ་བིགྣན་ཀ་ཡ་ཝཀྐ་ཙིཏྟ་ཛཿཧཱུྃ་བཾ་ཧོ༔ ཆིང་ཆིངས༔ སྟྭམ་བྷ་ཡ་ནན་ནན༔ བཀུགས་བསྒྲལ་མནན་པའི་སྔགས་གང་ཡང་༔ སྔ་ནས་ལས་སྦྱོར་དྲག་པོའི་གཤམ༔ རྟགས་ཐོན་བར་དུ་བྱ་བ་གནད༔ སྐབས་འདིར་དེ་ཉིང་ཅི་འགྲུབ་མཐར༔ བྱད་ཐག་གིས་དཀྲིས་ཕུང་རེའི་དྲིལ༔ དོང་ཚད་ཁྲུ་ནི་ཕྱེད་དང་གསུམ༔ མུ་རན་ཁྲུ་ནི་ཕྱེད་དང་གི༔ ཕྱོགས་རེ་ལྡན་པར་བྱ་བ་གནད༔ དེ་ནས་གཏད་ཡུལ་མེད་ཀྱང་རུང་༔ ཡང་ནི་ཡོད་པའི་དབང་བྱས་ན༔ ཧཱུྃ༔ བདག་ཉིད་དཔལ་ཆེན་རྡོ་རྗེ་ཀུ་མ་རའི༔ ཕྱག་གི་ཕུར་པ་རི་རབ་མཉམ་པ་ཡིས༔ རིམ་བརྩེགས་འབྱུང་བའི་དཀྱིལ་འཁོར་ལ་བཏབས་པས༔ ནམ་མཁའ་སྟོང་པའི་བར་དུ་ཐལ་མར་འབྱིན༔ དེ་དབྱིངས་འཆི་བདག་ནག་པོ་ཏི་པ་ཙ༔ འབྲུག་གི་གདོང་ཅན་ཁྲམ་བྱང་ཞགས་པ་འཛིན༔ འཁོར་དང་བཅས་པ་སྐད་ཅིག་བཞེངས་པ་ལ༔ ཡེ་ཤེས་ཕྱག་རྒྱའི་ཏིང་འཛིན་གྱིས་གཟིར་བས༔ བདག་ཉིད་ཡི་དམ་བཀའ་ཉན་གསུངས་སྡོད་གྱུར༔ ཨོཾ་མ་ཧཱ་ཡ་མ་རཱ་ཛ་ནཱ་ག་དུ་ཕུ་ཀཱ་ལ་ཏི་པ་ཙ་ས་པཱ་རི་ཝ་ར་ཛ་ཛ༔ ཛྙཱ་ན་མུ་དྲ་ས་མ་ཏི་ས་མ་ཡ་ཏིཥྛ༔ ཞེས་ཅི་མང་བརྗོད་ལ༔ དེ་ལ་བརྔན་པ་འདི་ཉིད་སྦྱིན༔ ཧཱུྃ༔ ཡཀྴ་ཛྭ་ལ་ཏི་པ་ཙ༔ འཆི་བདག་འབུམ་གྱི་སྡེ་དཔོན་པོ༔ ཀླུ་སྲིན་གདོལ་བའི་འཁོར་དང་བཅས༔ དཔལ་ཆེན་ཧེ་རུའི་དམ་ལ་འདུ༔ ང་ནི་དོན་ཡོད་གྲུབ་པ་སྟེ༔ ང་ནི་ཀརྨ་ཧེ་རུ་ཀ༔ ཆེ་མཆོག་རྡོ་རྗེ་ཀུ་མ་ར༔ འཁོར་འདས་དབང་ཕྱུག་ང་ཡིན་ཏེ༔ ཁྱོད་ཀྱི་སྲོག་ཀྱང་ང་ལ་ཡོད༔ བརྔན་སྦྱིན་ཤ་ཁྲག་དམར་གཏོར་འདི༔ དགྲ་ཤ་ཁྲག་གི་ངོ་བོ་ལ༔ དཔལ་འབྱོར་འདོད་དགུའི་བརྒྱན་པ་སྟེ༔ རང་བཞིན་ཡེ་ཤེས་བདུད་རྩིར་བརླབས༔ ཆེ་ཐང་སྲིད་ན་དབེན་པའི་མཆོག༔ འདོད་དགུར་འགྱུར་བའི་ངོ་མཚར་འབར༔ གོང་དུ་འཕེལ་བའི་དཔག་བསམ་ལྗོན༔ འཛད་མེད་ནམ་མཁའ་མཛོད་ཀྱི་གཏེར༔ སངས་རྒྱས་བསྟན་པ་བསྲུང་ཕྱིར་འབུལ༔ དཀོན་མཆོག་དབུ་འཕང་བསྟོད་ཕྱིར་འབུལ༔ སྔགས་འཆང་འདོད་དོན་བསྒྲུབ་ཕྱིར་འབུལ༔ དགྲ་བགེགས་བརྡུལ་དུ་བརླག་ཕྱིར་འབུལ༔ བཀའ་ལོག་ཆམ་ལ་འབབས་ཕྱིར་འབུལ༔ སྲི་གདོན་རྨེག་མེད་མཛད་ཕྱིར་འབུལ༔ ཡོངས་ལ་འཚེ་བ་ཞི་ཕྱིར་འབུལ༔ ཐར་པའི་ས་བོན་འདེབས་ཕྱིར་འབུལ༔ ཐབས་མཁས་དྲེགས་བྱེད་ཚུལ་བཟུང་ནས༔ སངས་རྒྱས་བསྟན་འཛིན་ཆེན་པོ་ཁྱོད༔ སྐྱེ་དགུ་ངེས་འབྱུང་བསྐུལ་བོ་ཁྱོད༔ དུས་གསུམ་རྒྱལ་བའི་ཞལ་ཡང་མཐོང་༔ རྣལ་འབྱོར་རྡོ་རྗེའི་ལུང་བསྟན་ཐོབ༔ ད་དུང་འཁོར་བ་མ་སྟོང་བར༔ གང་འདུལ་ཕྲིན་ལས་མཛད་པོར་བསྐུལ༔ དམ་ཚིག་ཅན་གྱི་སྡོང་གྲོགས་མཛོད༔ ངས་ནི་བྱང་ཆུབ་སེམས་བསྐྱེད་དེ༔ ཕྲིན་ལས་དབང་ཕྱུག་ཆེན་པོར་གྱུར༔ སླད་ཀྱི་སྣང་སྲིད་དབྱིངས་སྒྲོལ་ཕྱིར༔ ལས་བྱེད་ཕོ་ཉར་ཁྱོད་བསྐོས་ཀྱིས༔ གཉེར་འདི་ལོངས་ཤིག་ཡལ་གམ་ཅན༔ དཔལ་ཆེན་ང་ཡི་རིག་འཛིན་པས༔ ཅི་བཅོལ་རབ་འབྱམས་ཕྲིན་ལས་ཀུན༔ བསྒྲུབ་ཤིག་བཛྲ་ས་མ་ཡཱ༔ ཅེས་རཀྟ་སྦྲེང་ལ་ཕུལ་ལོ༔ དེ་ནས་མནན་དོང་ཀླུ་བདུད་ཀྱི་སྐུར་གསལ་བའི་ཞལ་དུ་དགྲ་བགེགས་སྲི་ངན་ཐམས་ཅད་བསྟབས་བར་མོས་ལ༔ ཧཱུྃ༔ འཆི་བདག་ནག་པོ་འཁོར་དང་བཅས༔ སངས་རྒྱས་བསྟན་ལ་དགྲ་བྱུང་བས༔ ཞིང་བཅུ་ཚང་ཞིང་གཤིས་ངན་གྱིས༔ ཉམས་པ་བདུན་ལྡན་དམ་སྲི་གདོན༔ འདི་ཡིས་བྱང་ཆུབ་མྱུ་གུ་གཅོད༔ སྐྱེ་འགྲོ་ཀུན་ལ་སྲི་བྱེད་པས༔ དུས་གསུམ་རྒྱལ་བའི་གདུང་གསོབ་ངས༔ ཐབས་ཀྱི་སྤྱོད་པའི་གཞན་དོན་དུ༔ བྱམས་དང་སྙིང་རྗེའི་གང་འདུལ་དཔལ༔ ཤུགས་སྒྲོལ་དྲག་པོའི་དུས་ལ་བབས༔ ལས་ཐབས་བྱེད་པོར་ཁྱེད་བསྟོད་དོ༔ མ་ཤོར་མནན་པའི་ཕྲིན་ལས་མཛོད༔ ཀྱཻ༔ ཆུ་སྲིན་འབར་བའི་ཞལ་ཧོམ་དུ༔ སྲི་ངན་ལུས་ངག་ཡིད་གསུམ་བསྟབས༔ གནམ་ས་གདེངས་འདྲའི་ཞལ་ཕྱེས་ཤིག༔ ཕུང་འདྲེ་བསྒྲལ་མནན་ཟས་སྐལ་གཏད༔ བསྐལ་བ་སྟོང་ཀྱང་མ་བཏང་ཤིག༔ ཁྱོད་མཐུ་སྟོབས་ནུས་པའི་རྩལ་ཤུགས་ཕྱུང་༔ བན་བོན་འབུམ་གྱིས་བཀྲོལ་ཀྱང་མ་བཏང་ཞིག༔ ལྷ་ཀླུའི་དཔུང་བསྒྲིལ་ཕྱུང་ཀྱང་མ་བཏང་ཞིག༔ འབྱུང་བའི་གཡོ་འཁྲུགས་རྐྱེན་ཀྱང་མ་བཏང་ཞིག༔ བྱང་ཆུབ་སེམས་གཉིས་རྒྱུད་ལ་མ་སྐྱེས་བར༔ ནམ་ཡང་མནར་བ་མེད་པར་ཆིངས་ལ་ནོན༔ ལུས་ཀྱི་གཡོ་བའི་རྩལ་ཤུགས་ནོན༔ ངག་གི་སྨྲ་སྒོའི་གཡོ་བ་ནོན༔ སེམས་ཀྱི་དྲན་བསམ་ངན་རྒྱུན་ནོན༔ རྣམ་པར་སྨིན་པའི་ལྷག་མ་རོལ༔ ཐར་མེད་ལས་ཀྱི་བཙོན་རར་ཚུད༔ ལས་མགོན་དམ་ཚིག་གཉན་པོའི་རྒྱ༔ དཔལ་ཆེན་སྐུ་གསུང་ཐུགས་ཀྱི་རྒྱ༔ ཆོས་ཉིད་འགྱུར་བ་མེད་པའི་རྒྱ༔ ཆོས་ཅན་བསླུ་བ་མེད་པའི་རྒྱ༔ གསང་སྔགས་ཟབ་མོའི་བདེན་སྟོབས་རྒྱ༔ མ་ཞིག་མ་ལྷོད་སྟྭམ་བྷ་ཡ་ནན༔ ཅེས་པའི་མཐར་སྤྲོ་ཞིང་ནུས་ན་བཀའ་གཏེར་ལ་གྲགས་པའི་མི་ཁུར་མ་སོགས་ཀྱང་ཅི་ནུས་སུ་གྲངས་བསགས་ལ་མནན་ནོ༔ ཡང་ན་སྔར་གྱི་མནན་སྔགས་མཐར༔ གནོད་བྱེད་འབྱུང་པོ་སྲི་ངན་མཐོ་ནམ་མཁའི་ཁམས་ནས་འཚེ་ཞིང་ལྡང་བ་ཐམས་ཅད་མཱ་ར་ཡ་རྦད༔ ཆིང་ཆིངས་ནན་ནན༔ ཞེས་སོགས་རྣམས་ཁུག་ཛ༔ ཞེས་པ་ཁ་བསྒྱུར་ཏེ་གྲངས་རེ་ལ་ས་སྤར་རེ་སོགས་གང་བབས་ཀྱིས་མནན་ནོ༔ དེ་ལྟར་གྲངས་ཅི་མང་རྫོགས་མཐར༔ ཧཱུྃ༔ སྟོབས་ལྡན་སྲིད་གསུམ་སྲོག་གི་བདག༔ བསྟན་པའི་ཟས་སྐལ་འདི་རོལ་ལ༔ ད་ནི་རང་གི་གནས་སུ་སོང་༔ རིམ་དགུ་ས་ཡི་འོག་རོལ་ན༔ གཤིན་རྗེའི་འཇིག་རྟེན་ཆེན་པོ་རུ༔ ས་སྟེང་སྲི་གདོན་ཀུན་ཁྱེར་ལ༔ སྐྱེ་དགུ་བདེ་བའི་ཕྲིན་ལས་མཛོད༔ དུས་གསུམ་རྒྱལ་བའི་བཀའ་མ་བཅག༔ སརྦ་ནཱ་ག་ཡ་མ་རཱ་ཛ་ས་པཱ་རི་ཝ་ར་གཙྪ༔ ཅེས་བརྗོད་ལ༔ དེ་ནས་རོ་གཡམ་རྡོ་རྗེ་རྒྱ་གྲམ༔ བརྟེན་བྱེད་རླུང་གི་རང་བཞིན་སྦུབས༔ མནན་སྔགས་སྟོང་ཚིག་བཅས་པ་བསགས༔ དེ་ནས་ཆུ་དཀྱིལ་ངོ་བོ་ཡི༔ ཆུ་ཡིས་རྒྱས་གདབས་མནན་སྔགས་གཤམ༔ སླར་ཡང་དབང་ཆེན་ངོ་བོ་ས༔ དེ་སྟེང་རི་རབ་མཚན་པའི་གཡམ༔ སླར་ཡང་ས་ཡིས་ཁོད་སྙོམས་མོ༔ དེ་ནས་མནན་པའི་རྔམ་གླུ་བླངས༔ ཡང་ན་གཏད་དེ་མ་བརྒྱབ་ཀྱང་༔ ཧཱུྃ༔ ང་ནི་དཔལ་ཆེན་བཛྲ་ཀུ་མ་ར༔ འཁོར་འདས་མ་ལུས་ང་ཡི་དབང་དུ་འདུས༔ དུས་གསུམ་སངས་རྒྱས་ང་ཡིས་རིག་པའི་རྩལ༔ ཁམས་གསུམ་རྒྱུད་དྲུག་སེམས་ཅན་ང་ལས་གོལ༔ གནོད་བྱེད་སྲི་རྐུན་འབྱུང་པོ་ཀུན་གྱི་གཤེད༔ ང་ལས་ཆེ་བའི་དབང་ཕྱུག་གཞན་མེད་ཀྱི༔ བདག་སྣང་དབང་དུ་མ་འདུས་སྲི་གདོན་བགེགས༔ མངོན་སྤྱོད་དྲག་པོའི་འདུལ་བའི་དུས་ལ་བབས༔ རེ་ཞིག་དཀྱིལ་འཁོར་གྲྭལ་ཐོབ་སྐལ་མེད་ཀྱང་༔ ལས་ངན་རྒྱུན་གཅོད་རྣམ་སྨིན་ཡུན་ཐུང་ཞིང་༔ བསྐལ་མང་སྡིག་ཟད་ཉོན་མོངས་མེད་པའི་སླད༔ གདུང་ཞིང་གཡོ་བ་མེད་པའི་ངང་དུ་མནན༔ ཞེས་རྔམ་གླུ་བླང་ལ༔ ཕཊ༔ རི་རབ་ཕུར་བས་འབྱུང་བཞི་ཐལ་འབྱིན་ཏེ༔ གཟེས་པོའི་སྙིང་གར་ཚད་དེ་འུབ་འདུས་པ༔ རྡོ་རྗེ་རྒྱ་གྲམ་རླུང་གི་འོག་ཏུ་བསྐྱལ༔ ནམ་ཡང་ལྡང་མེད་ཕྱག་རྒྱ་ཆེན་པོའི་བཏབས༔ ཨོཾ་བཛྲ་ཀཱི་ལི་ཀཱི་ལ་ཡ་ཕཊ༔ དགྲ་བགེགས་འབྱུང་པོ་མ་ར་ཡ་ནན་ནན༔ ཞེས་པའི་མཐར་གོང་གི་མནན་སྔགས་དང་འགུགས་ཚིག་ཁ་བསྒྱུར་གྱིས་མནན་པ་གྲངས་བསགས་སོ༔ དེ་རྗེས་བྲོ་མནན་ནས་འཇུག་གོ༔ ཅེས་པ་འདི་ཡང་བླ་མ་དམ་པ་ཨོ་མུག་ནས་བཀའ་སྩལ་བ་མ་ལྡོག་སྟེ་སྔགས་མིང་ག་གཱ་ཨ་བྷྱེ་ནས་སོ། །དགེའོ། །དགེའོ། །དགེའོ། །

གནོད་བྱེད་དགྲ་བགེགས་སྲི་ངན་བྱད་མའི་བླ་ཤ་རེ་མ་ཏི་འགྲིམ་འགྲིམ།

གནོད་བྱེད་དགྲ་བགེགས་སྲི་ངན་བྱད་མའི་བླ་ཤ་རེ་མ་ཏི་འགྲིམ་འགྲིམ༔ ཤ་མ་རུ་ཏི་ཐུལ་ཐུལ༔ མྱོགས་མྱོགས༔ ཡེད་ཡེད༔ ཤ་མ་རུ་ཏི་ཁུག་ལིང་༔ མྱོགས་ལིང་༔ ཤ་ལིང་ཐུན༔ ཙ་མུནྚི་བྷྱོ་ཛ༔ ཛཿཧཱུྃ་བཾ་ཧོ༔ རྣྲ་ཛ༔ ཏིར་བཾ་རིལ༔ ཨ་ཀརྴ་ཡ་ཛ་ཛ༔ རྣྲ་ཤ་ཀུ་རུ་རྣྲ་ཤ་ཀུ་རུ༔ ཁ་སོ་བ་ཏི༔ ཡཾ་རུ་ཏི༔ ཡམ་སེ་ཡམ་སེ༔ མེན་ཡམ་སེ༔ མེན་ཡམ་སེ༔ སྙིང་ཚལ་པ་བམ་རིལ་རྦད༔ དགྲ་བགེགས་སྲི་ངན་བྱད་མའི་བླ་རྟེན་ཚེ་རྟེན་སྲོག་རྟེན་ཐམས་ཅད་ཁུག་ཅིག་ཛ་ཛ༔ ༈ རྩ་སྔགས་མཐར༔ རྒྱལ་སྲི་གངས་དཀར་ཀྱི་རྩེ་ནས་ལྡངས་པ་ཐམས་ཅད་མ་ར་ཡ་རྦད་ནན་ནན༔ བློན་སྲི་གྲོས་ར་ནས་ལྡངས་པ་ཐམས་ཅད་མ་ར་ཡ་རྦད་ནན་ནན༔ དམངས་སྲི་ཡུལ་ལས་ལྡངས་པ་ཐམས་ཅད་མ་ར་ཡ་རྦད་ནན་ནན༔ དཔོན་སྲི་མཐོ་ས་ནས་ལྡངས་པ་ཐམས་ཅད་མ་ར་ཡ་རྦད་ནན་ནན༔ གཡོག་སྲི་དམན་ས་ནས་ལྡངས་པ་ཐམས་ཅད་མ་ར་ཡ་རྦད་ནན་ནན༔ དབུལ་སྲི་མི་རྒྱུད་ནས་ལྡངས་པ་ཐམས་ཅད་མ་ར་ཡ་རྦད་ནན་ནན༔ ལྟོག་འགོང་ཁྱིམ་ནས་ལྡངས་པ་ཐམས་ཅད་མ་ར་ཡ་རྦད་ནན་ནན༔ ཕུང་སྲི་གྲོང་ལྗོངས་ལས་ལྡངས་པ་ཐམས་ཅད་མ་ར་ཡ་རྦད་ནན་ནན༔ ནད་སྲི་ལུས་ལ་ལྡངས་པ་ཐམས་ཅད་མ་ར་ཡ་རྦད་ནན་ནན༔ ཤི་སྲི་སྲོག་ལ་ལྡངས་པ་ཐམས་ཅད་མ་ར་ཡ་རྦད་ནན་ནན༔ དར་སྲི་ཁ་རྗེ་ལ་ལྡངས་པ་ཐམས་ཅད་མ་ར་ཡ་རྦད་ནན་ནན༔ ཆུ་སྲི་མལ་ནས་དབང་ཐང་ལ་ལྡངས་པ་ཐམས་ཅད་མ་ར་ཡ་རྦད་ནན་ནན༔ དམན་སྲི་སྟོབས་དང་འབྱོར་བ་ལ་ལྡངས་པ་ཐམས་ཅད་མ་ར་ཡ་རྦད་ནན་ནན༔ གྱོད་སྲི་ཁ་ལྕེའི་བར་ནས་ལྡངས་པ་ཐམས་ཅད་མ་ར་ཡ་རྦད་ནན་ནན༔ གྲི་སྲི་འཐབ་རར་ནས་ལྡངས་པ་ཐམས་ཅད་མ་ར་ཡ་རྦད་ནན་ནན༔ ཆེ་སྲི་རི་བོའི་རྩེ་ནས་ལྡངས་པ་ཐམས་ཅད་མ་ར་ཡ་རྦད་ནན་ནན༔ གཞོན་སྲི་རྒྱ་མཚོའི་གཏིང་ནས་ལྡངས་པ་ཐམས་ཅད་མ་ར་ཡ་རྦད་ནན་ནན༔ འགགས་སྲི་ཉེར་སྤྱད་ནས་ལྡངས་པ་ཐམས་ཅད་མ་ར་ཡ་རྦད་ནན་ནན༔ ལྕེབ་སྲི་གཡང་ལས་ལྡངས་པ་ཐམས་ཅད་མ་ར་ཡ་རྦད་ནན་ནན༔ རྦབ་སྲི་སྟེང་ནས་ལྡངས་པ་ཐམས་ཅད་མ་ར་ཡ་རྦད་ནན་ནན༔ རྡབས་ ༼ རྡབ་དཔྱད། ༽སྲི་འོག་ནས་ལྡངས་པ་ཐམས་ཅད་མ་ར་ཡ་རྦད་ནན་ནན༔ གོད་སྲི་སླས་ནས་ལྡངས་པ་ཐམས་ཅད་མ་ར་ཡ་རྦད་ནན་ནན༔ དུར་སྲི་དུར་ཁྲོད་ནས་ལྡངས་པ་ཐམས་ཅད་མ་ར་ཡ་རྦད་ནན་ནན༔ དམ་སྲི་མཆོད་གྲྭལ་ནས་ལྡངས་པ་ཐམས་ཅད་མ་ར་ཡ་རྦད་ནན་ནན༔ དམེ་སྲི་བར་ནས་ལྡངས་པ་ཐམས་ཅད་མ་ར་ཡ་རྦད་ནན་ནན༔ ཕོ་སྲི་གཡས་ནས་ལྡངས་པ་ཐམས་ཅད་མ་ར་ཡ་རྦད་ནན་ནན༔ མོ་སྲི་གཡོན་ནས་ལྡངས་པ་ཐམས་ཅད་མ་ར་ཡ་རྦད་ནན་ནན༔ རྒབ་སྲི་ཟུར་ནས་ལྡངས་པ་ཐམས་ཅད་མ་ར་ཡ་རྦད་ནན་ནན༔ ལོ་རྒྱལ་པོ་ལ་སྲི་ལངས་བ་ཐམས་ཅད་མ་ར་ཡ་རྦད་ནན་ནན༔ ཟླ་བ་བློན་པོ་ལ་སྲི་ལངས་བ་ཐམས་ཅད་མ་ར་ཡ་རྦད་ནན་ནན༔ ཞག་དམག་མི་ལ་སྲི་ལངས་བ་ཐམས་ཅད་མ་ར་ཡ་རྦད་ནན་ནན༔ དུས་ཚོད་མཚོན་ཆ་ལ་སྲི་ལངས་བ་ཐམས་ཅད་མ་ར་ཡ་རྦད་ནན་ནན༔ སྤར་སྨེ་ཚེས་གྲངས་ལ་སྲི་ལངས་བ་ཐམས་ཅད་མ་ར་ཡ་ཕཊ༔ སརྦ་ཏྲི་ཛ་ཏྲིག་ནན༔ ན་ཏྲི་ནན༔ ༼ འདི་ནས་སྔགས་བྱང་ཆད་པའམ་ཡང་ན་ཞལ་ཤེས་ཡིན་པས་གབ་པ་གང་ཡིན་རིག་པ་འཛིན་པ་རྣམས་ཀྱི་དཔྱད་མཚལ། ༽ ཆིང་ཆིངས་རྦད་ནན་ནན༔ སངས་རྒྱས་ཀྱིས་ནི་བདུད་ཕམ་མཛད། །ཆོས་མ་ཡིན་རྣམས་ཆོས་ཀྱིས་ཕམ། །དགེ་འདུན་གྱིས་ནི་མུ་སྟེགས་ཕམ། །དབང་པོའི་ལྷ་མ་ཡིན་རྣམས་ཕམ། །མེ་ཡི་ཤིང་རྣམས་ཕམ་པ་དང་། །རླུང་གི་སྤྲིན་རྣམས་གཏོར་བ་ལྟར། །དེང་འདིར་རིག་སྔགས་འདི་དག་གིས། །བདེན་པ་མངོན་དུ་གསལ་གྱུར་ཅིག །ནམ་མཁའ་མེད་པར་གྱུར་ནའང་། །སྔགས་ཀྱི་དངོས་གྲུབ་མེད་མི་སྲིད། །ལྷ་དང་དྲང་སྲོང་གིས་བཤད་པའི། །རིག་སྔགས་བསླུ་བར་མི་འགྱུར་ན། །འདོད་ཆགས་བྲལ་བའི་བཤད་པ་ཡིས། །གསང་སྔགས་སྤྱོད་པའི་བསླུས་པ་ནི། །མ་བྱུང་འབྱུང་བར་མི་འགྱུར་རོ། །འ་ཨ་ཧ་ཤ་ས་མ་ཡ། ག་གཱས་སོ། །བསྡུ་ན་རྩ་སྔགས་མཐར༔ རྒྱལ་སྲི་གངས་དཀར་ཀྱི་རྩེ་ནས་ལངས་བ་ཐམས་ཅད་མ་ར་ཡ་རྦད་ནན་ནན༔ བློན་སྲི་གྲོས་རར་ནས་ལངས་བ་ཐམས་ཅད་མ་ར་ཡ་རྦད་ནན་ནན༔ གྲི་སྲི་འཐབ་རར་ནས་ལངས་བ་ཐམས་ཅད་མ་ར་ཡ་རྦད་ནན་ནན༔ གྱོད་སྲི་ཉེ་འཁོན་བར་ནས་ལངས་བ་ཐམས་ཅད་མ་ར་ཡ་རྦད་ནན་ནན༔ ནད་སྲི་ནང་གི་ཁམས་ལྔ་ལས་ལྡངས་བ་ཐམས་ཅད་མ་ར་ཡ་རྦད་ནན་ནན༔ ཤི་སྲི་ཉེ་བ་ནས་ལྡངས་བ་ཐམས་ཅད་མ་ར་ཡ་རྦད་ནན་ནན༔ གོད་སྲི་སླས་ནས་ལངས་བ་ཐམས་ཅད་མ་ར་ཡ་རྦད་ནན་ནན༔ ཆེ་སྲི་རྒན་རབས་ནས་ལངས་བ་ཐམས་ཅད་མ་ར་ཡ་རྦད་ནན་ནན༔ ཆུང་སྲི་མལ་ནས་ལངས་བ་ཐམས་ཅད་མ་ར་ཡ་རྦད་ནན་ནན༔ གཞོན་སྲི་དར་ལས་ལྡངས་བ་ཐམས་ཅད་མ་ར་ཡ་རྦད་ནན་ནན༔ ཕུང་སྲི་ཡུལ་ལས་ལྡངས་བ་ཐམས་ཅད་མ་ར་ཡ་རྦད་ནན་ནན༔ དུར་སྲི་ཁྱིམ་ནས་ལྡངས་བ་ཐམས་ཅད་མ་ར་ཡ་རྦད་ནན་ནན༔ ཕོ་སྲི་གཡས་ནས་ལྡངས་བ་ཐམས་ཅད་མ་ར་ཡ་རྦད་ནན་ནན༔ མོ་སྲི་གཡོན་ནས་ལྡངས་བ་ཐམས་ཅད་མ་ར་ཡ་རྦད་ནན་ནན༔ དམ་སྲི་བླ་སློབ་བར་ནས་ལྡངས་བ་ཐམས་ཅད་མ་ར་ཡ་རྦད་ནན་ནན༔ དམེ་སྲི་ཁ་ལག་བར་ནས་ལྡངས་བ་ཐམས་ཅད་མ་ར་ཡ་རྦད་ནན་ནན༔ ལོ་རྒྱལ་པོ་ལ་སྲི་ལངས་བ་ཐམས་ཅད་མ་ར་ཡ་རྦད་ནན་ནན༔ ཟླ་བ་བློན་པོ་ལ་སྲི་ལངས་བ་ཐམས་ཅད་མ་ར་ཡ་རྦད་ནན་ནན༔ དུས་ཚོད་མཚོན་ཆའི་སྲི་ལངས་བ་ཐམས་ཅད་མ་ར་ཡ་རྦད་ནན་ནན༔ ག་གཱས་སོ། །

བྲོ་མནན་ལ་བཏགས་ན།

བྲོ་མནན་ལ་བཏགས་ན༔ མཐོ་རྒྱལ་ས་ནས་སྲི་ལངས་པ་ཐམས་ཅད་མ་ར་ཡ་རྦད་ཆིང་ཆིངས་ནན་ནན༔ གོང་དཔོན་པོའི་ས་ནས་སྲི་ལངས་པ་ཐམས་ཅད་མ་ར་ཡ་རྦད་ཆིང་ཆིངས་ནན་ནན༔ ཐད་རྗེ་བློན་གྱི་ས་ནས་སྲི་ལངས་པ་ཐམས་ཅད་མ་ར་ཡ་རྦད་ཆིང་ཆིངས་ནན་ནན༔ དམའ་འབངས་སྡེ་ལས་སྲི་ལངས་པ་ཐམས་ཅད་མ་ར་ཡ་རྦད་ཆིང་ཆིངས་ནན་ནན༔ བྲན་འཁོར་གཡོག་ལས་སྲི་ལངས་པ་ཐམས་ཅད་མ་ར་ཡ་རྦད་ཆིང་ཆིངས་ནན་ནན༔ སྐྱེས་ཕོ་ས་ནས་སྲི་ལངས་པ་ཐམས་ཅད་མ་ར་ཡ་རྦད་ཆིང་ཆིངས་ནན་ནན༔ དམན་མོ་ས་ནས་སྲི་ལངས་པ་ཐམས་ཅད་མ་ར་ཡ་རྦད་ཆིང་ཆིངས་ནན་ནན༔ བུ་ཚ་ཆུང་གསུམ་གྱི་ས་ནསསྲི་ལངས་པ་ཐམས་ཅད་མ་ར་ཡ་རྦད་ཆིང་ཆིངས་ནན་ནན༔ དམ་སྲི་སློབ་དཔོན་དང་མཆད་ཀྱི་བར་ནས་ལངས་པ་ཐམས་ཅད་མ་ར་ཡ་རྦད་ཆིངས་ཆིངས་ནན་ནན༔ དགྲ་སྲི་ཕྱི་ནས་ལངས་པ་ཐམས་ཅད་མ་ར་ཡ་རྦད་ཆིང་ཆིངས་ནན་ནན༔གྱོད་སྲི་ནང་ནས་ལངས་པ་ཐམས་ཅད་མ་ར་ཡ་རྦད་ཆིང་ཆིངས་ནན་ནན༔ རྐུན་སྲི་མཚམས་ནས་ལངས་པ་ཐམས་ཅད་མ་ར་ཡ་རྦད་ཆིང་ཆིངས་ནན་ནན༔ ཕམ་སྲི་གཡུལ་དང་ཤཊ་ར་ནས་ལངས་པ་ཐམས་ཅད་མ་ར་ཡ་རྦད་ཆིང་ཆིངས་ནན་ནན༔ གྲི་སྲི་འཐབ་ར་ནས་ལངས་པ་ཐམས་ཅད་མ་ར་ཡ་རྦད་ཆིང་ཆིངས་ནན་ནན༔ ཆེ་སྲི་རྒན་ལས་ལངས་པ་ཐམས་ཅད་མ་ར་ཡ་རྦད་ཆིང་ཆིངས་ནན་ནན༔ ཆུང་སྲི་རྒབ་ནས་ལངས་པ་ཐམས་ཅད་མ་ར་ཡ་རྦད་ཆིང་ཆིངས་ནན་ནན༔ གོད་སྲི་སླས་ནས་ལངས་པ་ཐམས་ཅད་མ་ར་ཡ་རྦད་ཆིང་ཆིངས་ནན་ནན༔ ནད་སྲི་ལུས་ལ་ལྡངས་བ་ཐམས་ཅད་མ་ར་ཡ་རྦད་ཆིང་ཆིངས་ནན་ནན༔ ཤི་སྲི་སྲོག་ལ་ལྡངས་བ་ཐམས་ཅད་མ་ར་ཡ་རྦད་ཆིང་ཆིངས་ནན་ནན༔ དབུལ་སྲི་དཔལ་ལ་ལྡངས་བ་ཐམས་ཅད་མ་ར་ཡ་རྦད་ཆིང་ཆིངས་ནན་ནན༔ དམན་སྲི་དབང་ཐང་ལ་ལྡངས་བ་ཐམས་ཅད་མ་ར་ཡ་རྦད་ཆིང་ཆིངས་ནན་ནན༔ དུར་སྲི་ཁྱིམ་ནས་ལྡངས་བ་ཐམས་ཅད་མ་ར་ཡ་རྦད་ཆིང་ཆིངས་ནན་ནན༔ འགགས་སྲི་རྫས་ལས་ལྡངས་བ་ཐམས་ཅད་མ་ར་ཡ་རྦད་ཆིང་ཆིངས་ནན་ནན༔ ལྕེབ་སྲི་གཡང་ལས་ལྡངས་བ་ཐམས་ཅད་མ་ར་ཡ་རྦད་ཆིང་ཆིངས་ནན་ནན༔ ཆག་སྲི་ཉེར་སྤྱད་ལས་ལྡངས་བ་ཐམས་ཅད་མ་ར་ཡ་རྦད་ཆིང་ཆིངས་ནན་ནན༔ སྨྱོ་སྲི་སེམས་ལས་ལྡངས་བ་ཐམས་ཅད་མ་ར་ཡ་རྦད་ཆིང་ཆིངས་ནན་ནན༔ ཡུག་སྲི་བུ་སྲིང་ནས་ལྡངས་བ་ཐམས་ཅད་མ་ར་ཡ་རྦད་ཆིང་ཆིངས་ནན་ནན༔ ཕུང་སྲི་ཡུལ་ནས་ལྡངས་བ་ཐམས་ཅད་མ་ར་ཡ་རྦད་ཆིང་ཆིངས་ནན་ནན༔ ལོ་རྒྱལ་པོའི་སྲི་ལངས་པ་ཐམས་ཅད་མ་ར་ཡ་རྦད་ཆིང་ཆིངས་ནན་ནན༔ ཟླ་བ་བློན་པོའི་སྲི་ལངས་པ་ཐམས་ཅད་མ་ར་ཡ་རྦད་ཆིང་ཆིངས་ནན་ནན༔ ཞག་དམག་མིའི་སྲི་ལངས་པ་ཐམས་ཅད་མ་ར་ཡ་རྦད་ཆིང་ཆིངས་ནན་ནན༔ དུས་ཚོད་མཚོན་ཆའི་སྲི་ལངས་པ་ཐམས་ཅད་མ་ར་ཡ་རྦད་ཆིང་ཆིངས་ནན་ནན༔

རྡོ་རྗེ་ཕུར་པའི་དབང་གི་ལྷན་ཐབས་རིན་ཆེན་ཕྲེང་བ།

རྡོ་རྗེ་ཕུར་པའི་དབང་གི་ལྷན་ཐབས་རིན་ཆེན་ཕྲེང་བ་བཞུགས་སོ། །

འོ་ནམ་མཁའ་དང་མཉམ་པའི་སེམས་ཅན་ཐམས་ཅད་རྫོགས་པའི་སངས་རྒྱས་ཐོབ་པར་བྱ། དེའི་ཆེད་དུ་གསང་སྔགས་རྡོ་རྗེ་ཐེག་པའི་སྨིན་གྲོལ་ལམ་གྱི་དང་པོ་ལ་འཇུག་པར་བྱ་སྙམ་པའི་ངང་ནས་གནས་ངན་ལེན་གྱི་རྒྱུར་གྱུར་པའི་ཀུན་སློང་དང་ཀུན་སྤྱོད་ཐམས་ཅད་སྤངས་ནས་གསན་འཚལ། དེ་ལ་ལོ་རྒྱུས་ཀྱི་སྒོ་ནས་ཡིད་ཆེས་ཅུང་ཟད་སྦྱིན་ན། སྤྱིར་སྟོན་པ་ཐུགས་རྗེ་ཅན་དང་རང་བྱུང་པདྨ་ཡབ་ཡུམ་སོགས་དབང་འབྱོར་གྱི་སྐྱེས་བུ་དམ་པ་རྣམས་ཀྱིས། འགྲོ་བ་མཐའ་ཡས་པའི་དོན་དུ་དངོས་སུ་གསུངས་པའི་བཀའ་དང་བྱིན་རླབས་གཏེར་གྱི་ཐབས་ཚུལ་བསམ་གྱིས་མི་ཁྱབ་པ་ཞིག་གི་སངས་རྒྱས་ཀྱི་བསྟན་པ་རིན་པོ་ཆེ་མི་ཉམས་པར་གོང་འཕེལ་དུ་མཛད་པ་ལ་སུས་ཀྱང་འགོག་དུ་མེད་པ་དང་། བྱེ་བྲག་ཏུ་ཨོ་རྒྱན་སངས་རྒྱས་གཉིས་པ་ཡི་དམ་འདི་དང་ངོ་བོ་དབྱེར་མེད་པར་བཞུགས་པས་དགོངས་བརྒྱུད་ཁྱད་པར་བ་དང་ལྡན་པའི་ཕྱིར་འདི་ཉིད་ཀྱི་སྐུར་དངོས་སུ་བཞེངས་ནས་ལྷ་སྲིན་ཐམས་ཅད་དམ་ལ་བཏགས་པར་མཛད་པ་དང་། བཀའ་བབས་ཆེན་པོ་པྲ་བྷ་ཧསྟི་ལས་བརྡ་དང་སྙན་བརྒྱུད་ཀྱི་ཆུ་བོ་མི་ནུབ་པའི་བཀའ་སྲོལ་བླངས་ཏེ། ཕྱི་རབས་སུ་བསྟན་པའི་རྒྱལ་མཚན་རྗེ་འབངས་གྲུབ་ཐོབ་རྒྱ་མཚོ་ལ་བསྒྲེངས་ཤིང་། ༼ སྦྲེང་ཞིང་དཔྱད། ༽ རྩ་བཤད་རྒྱུད་སྡེ་ཀུན་གྱི་ཁོང་སྙིང་བསྡེབ་ནས་ནོ་པི་ཀ་ལག་ལེན་འབྲེལ་བ་བཞི་ལྡན་དུ་སྦྱར་ཏེ། སྨོན་ལམ་དབང་བསྐུར་གཏད་རྒྱ་དང་བཅས་པས་རྒྱས་པར་བྱས་ནས་གཏེར་རིགས་བྱེ་བ་བཅོ་བརྒྱད་ཀྱི་གྲངས་ལྡན་དུ་སྦས་པའི་ནང་ཚན་རིག་འཛིན་ཨོ་རྒྱན་པདྨ་ཐེག་མཆོག་གི་དགོངས་གཏེར་ནམ་མཁའ་མཛོད་ཀྱི་ཆོས་སྡེ་ལས། ཕུར་བ་བདུད་དགྲའི་དཔུང་འཇོམས་ཀྱི་དཀྱིལ་འཁོར་དུ་སྨིན་བྱེད་ཀྱི་དབང་བསྐུར་ཞུ་བའི་དོན་དུ་མཎྜལ་འབུལ་བ་ཐུགས་ལ་གདགས་པར་འཚལ། ཅེས་ཀྱང་ག་གཱའི་མིང་གི་བསྟི་སྟངས་སུ་བྱས་ཏེ་བརྗོད་པའོ། །བཀྲ་ཤིས་པར་གྱུར་ཅིག །

བརྒྱུད་འདེབས།

བརྒྱུད་འདེབས་ནི༔ ན་མོ༔ ཀུན་བཟང་ཚེ་དཔག་མེད་དང་རྡོ་རྗེ་ཆོས༔ དགའ་རབ་ཤྲཱི་སེང་པདྨ་འབྱུང་གནས་ལ༔ གསོལ་བ་འདེབས་སོ་བདག་རྒྱུད་སྨིན་གྲོལ་ནས༔ རྡོ་རྗེའི་ཚེ་མཆོག་འགྲུབ་པར་བྱིན་གྱིས་རློབས༔ མནྡ་ར་བ་ཡེ་ཤེས་མཚོ་རྒྱལ་དང་༔ བི་མ་མི་ཏྲ་ཏིང་འཛིན་བཟང་པོ་ལ༔ གསོལ་བ་འདེབས་སོ་བདག་རྒྱུད་སྨིན་གྲོལ་ནས༔ རྡོ་རྗེའི་ཚེ་མཆོག་འགྲུབ་པར་བྱིན་གྱིས་རློབས༔ ཁྱད་པར་ཟབ་མོ་གཏེར་གྱི་བཀའ་བབས་པ༔ གཏེར་སྟོན་བརྒྱ་རྩ་རྩ་བའི་བླ་མ་ལ༔ གསོལ་བ་འདེབས་སོ་བདག་རྒྱུད་སྨིན་གྲོལ་ནས༔ རྡོ་རྗེའི་ཚེ་མཆོག་འགྲུབ་པར་བྱིན་གྱིས་རློབས༔ མཐར་ཐུག་འཆི་མེད་མགོན་པོའི་གསང་གསུམ་དང་༔ དབྱེར་མེད་མ་ཆགས་པདྨའི་ས་ཐོབ་ཤོག༔ འགྱུར་མེད་རྣམ་རྒྱལ་གསུངས་བསྐུལ་ངོར། །ག་གཱ་ཨ་བྷྱེའི་ཤར་མར་སྤེལ། །དགེའོ། །དགེའོ། །དགེའོ། །

རྡོ་རྗེ་ཚེ་ཡི་བསྒྲུབ་པ་འཆི་མེད་མཆོག་སྩོལ།

ཡེ་ཤེས་སྒྱུ་འཕྲུལ་དྲྭ་བ་ལས༔ རྡོ་རྗེ་ཚེ་ཡི་བསྒྲུབ་པ་འཆི་མེད་མཆོག་སྩོལ་ཞེས་བྱ་བ་བཞུགས་སོ༔

ཨཱ་ཡུ་ནི་ཕཊ༔ ན་མོ་གུ་རུ་པདྨ་ཀཱ་ར་ཡེ༔ དུས་གསུམ་རྒྱལ་བའི་སྤྱི་གཟུགས་མཆོག༔ སོར་རྟོགས་ཡེ་ཤེས་བྱང་ཆུབ་སེམས༔ མངོན་གྱུར་ངང་ལ་ཕྱག་འཚལ་ནས༔ རྡོ་རྗེའི་ཚེ་ཡི་བསྒྲུབ་པ་བསྟན༔ མཚན་ཉིད་ཚང་པའི་གནས་མཆོག་གམ༔ དམ་པའི་ཞབས་ཀྱིས་བཅག་པའི་ས༔ བཀྲ་ཤིས་བྱིན་ཆགས་ཉམས་དགའ་བ༔ བརྟགས་བསླང་སྦྱངས་བཅུག་དབང་དུ་སྤྱོད༔ མཐུན་རྐྱེན་ཡོ་བྱད་ཚང་བར་བསགས༔ དཀྱིལ་འཁོར་གྲུ་བཞི་མདའ་གང་ཚད༔ བཀོད་ལེགས་ཡིད་འོང་བརྒྱན་བྱས་ཏེ༔ སྟེགས་སྟེང་གཏོར་མ་ཚེ་ཞལ་ནི༔ རིན་ཆེན་པདྨ་ཁ་འབུས་དབྱིབས༔ ཐུགས་ཀར་རྟ་ཞལ་མཚན་པ་ཅན༔ བུམ་པ་བདུད་རྩིའི་བཀང་པ་དང་༔ ཚེ་ཆང་ཚེ་རིལ་ལ་སོགས་པ༔ སྤྱི་དང་མཐུན་བྱས་ཞི་དྲག་གི༔ མཆོད་པས་ཡོངས་སུ་བསྐོར་བྱས་ཏེ༔ ཉིན་གུང་རྒྱས་པའི་དུས་སུ་ནི༔ མཚམས་བཅད་བདེ་བའི་གདན་ལ་འཁོད༔ དང་པོ་ཆོ་གའི་སྔོན་འགྲོ་ལ༔ ཐོག་མར་སྐྱབས་སུ་འགྲོ་བ་ནི༔ ན་མོ༔བདག་སོགས་མཁའ་མཉམ་སེམས་ཅན་རྣམས༔ བླ་མ་དཀོན་མཆོག་རྩ་བ་གསུམ༔ ཡོངས་འདུས་ཚེ་ཡི་ལྷ་ཚོགས་ལ༔ ཡིད་ཆེས་དད་པས་སྐྱབས་སུ་མཆི༔ ལན་གསུམ་གཉིས་པ་སེམས་བསྐྱེད་ནི༔ ཀྱེ་མ་སྡུག་བསྔལ་སེམས་ཅན་ཀུན༔ བདུད་བཞི་དབྱིངས་སུ་བཅོམ་ནས་ཀྱང་༔ མགོན་པོའི་གོ་འཕང་ལ་འགོད་ཕྱིར༔ ཀུན་རྫོབ་དོན་དམ་བྱང་སེམས་བསྐྱེད༔ ལན་གསུམ་ཡན་ལག་བདུན་པ་ནི༔ ཨོཾ་འཆི་མེད་ལྷ་ལ་ཕྱག་འཚལ་ལོ༔ ཕྱི་ནང་གསང་བའི་མཆོད་པ་འབུལ༔ སྐྱེ་འཕགས་དགེ་ལ་རྗེས་ཡི་རང་༔ ཆོས་འཁོར་རྒྱུད་ཆད་མེད་བསྐོར་བསྐུལ༔ མྱ་ངན་མི་འདའ་རྟག་བཞུགས་གསོལ༔ དགེ་ཚོགས་བྱང་ཆུབ་ཆེན་པོར་བསྔོ༔ འགྲོ་ཀུན་སངས་རྒྱས་ས་ཐོབ་ཤོག༔ དེ་ནས་བགེགས་བསྐྲད་པ་ནི༔ ཧྲཱི༔ འཁོར་འདས་ཐམས་ཅད་ང་ཡི་དབང་༔ རྩལ་དང་རོལ་བའི་ཆོ་འཕྲུལ་ཏེ༔ ལྟ་རྟོགས་མཉམ་པ་ཉིད་དུ་གྲོལ༔ གནོད་བྱ་གནོད་བྱེད་རྫོགས་སངས་རྒྱས༔ ཨོཾ་བཛྲ་ཀྲོ་ཏ་པདྨ་ཧེ་རུ་ཀ་ཧོ༔ སརྦ་བིགྣཾ་མ་ར་ཡ་ཕཊ༔ ཡང་ཅིག་མཚམས་བཅད་དཀྱིལ་འཁོར་ནི༔ ཧྲཱི༔ ཕྱོགས་རིས་བྲལ་བ་ཆོས་ཀྱི་དབྱིངས༔ ཕྱི་དང་ནང་མེད་ཀུན་ཏུ་གདལ༔ ཕྱག་རྒྱ་ཆེན་པོའི་དམ་ཚིག་ལ༔ སུ་ཡང་འདའ་མེད་ཆིངས་ཀྱིས་བཅིངས༔ ཨོཾ་བཛྲ་ཛྙཱ་ན་རཀྵ་རཀྵ་ཧཱུྃ༔ ཞེས་དང་༔ བྱིན་ཆེན་དབབས་པ་ནི༔ ཧྲཱི༔ འགྱུར་མེད་རྡོ་རྗེའི་ཆོས་བདུན་ལྡན༔ ཀུན་རྟོག་ཡེ་ཤེས་བྱིན་ཆེན་ཕོབ༔ འགགས་མེད་སྒྱུ་འཕྲུལ་ཅིར་ཡང་བསྒྱུར༔ ཀུན་སྣང་ཕྱག་རྒྱའི་བྱིན་ཆེན་ཕོབ༔ དམན་སྤྱོད་གང་འདུལ་ཐབས་ཚུལ་མཁས༔ དུས་གསུམ་ཕྱོགས་དུས་སྐྱབས་ཡུལ་གྱི༔ རྟེན་དང་བརྟེན་པའི་འཁོར་ལོ་ཀུན༔ ཕྱག་རྒྱ་ཡི་གེ་ཕྱག་མཚན་དང་༔ འོད་ཟེར་ཁ་དོག་སྣ་ཚོགས་སུ༔ བྱོན་ནས་བདག་མདུན་གནས་ཡོ་བྱད༔ ཞིང་དང་གཞལ་ཡས་ཡེ་ཤེས་ལྷའི༔ སྐུ་གསུང་ཐུགས་སུ་རྡོ་རྗེ་དང་༔ ཀུན་བཟང་རྒྱན་གྱི་མཆོད་པ་རུ༔ ཡོངས་གྲུབ་བདེན་དོན་མངོན་གྱུར་བའི༔ དབང་བསྐུར་མཆོག་ཐུན་དངོས་གྲུབ་སྩོལ༔ ཨོཾ་བཛྲ་ཨ་ཡུ་ཛྙཱ་ན་ཧྱ་གྷ་ཝ་ས་པཱ་རི་ཝ་ར་ས་མ་ཡ་ཕཻ༔ ཨརྒྷཾ་ནས་རཱུ་པ་ནས་ཤབྟ་སརྦ་པཉྩ་བྷ་ལིངྟ་མ་ཧཱ་རཀྟ་པཱུ་ཙ་བི་ཤུདྡྷེ་ཨཱ་ཧཱུྃ༔ དེ་ནས་དངོས་གཞིའི་རིམ་པ་ནི༔ ཧྲཱི༔ ཚ་བ་མེད་པར་བསྲེགས་པའི་མེ༔ གོས་དཀར་ཡུམ་གྱི་བདེ་ཀློང་དུ༔ གསུང་གི་ཐུགས་མཆོག་ཡི་གེ་ཨཱ༔ དང་པོའི་མགོན་པོ་དཔག་མེད་འོད༔ རང་མདངས་སྣང་བ་ཆོས་ཀྱི་དབྱིངས༔ རིན་ཆེན་སྣ་ཚོགས་གཅལ་བཀྲམ་པའི༔ ཆུ་སྐྱེས་འོད་འབར་གེ་སར་ལ༔ གཙུག་ཏོར་འཁོར་ལོའི་བསྒྱུར་བ་ནི༔ དབང་གི་ཁ་དོག་རབ་ཆགས་པས༔ ཕོ་བྲང་གྲུ་བཞི་སྒོ་བཞི་བ༔ བརྡ་རྟགས་མཚན་ཉིད་ཡོངས་རྫོགས་ཤིང་༔ སྦྲུལ་ཆེན་བརྒྱད་ཀྱིས་བཏེགས་པའི་ཁྲིར༔ པདྨ་ཟླ་ཉི་རོ་གདན་སྟེང་༔ རྒྱུ་ཡི་རྡོ་རྗེ་འཛིན་པ་ནི༔ ཡོངས་གྱུར་འབྲས་བུ་ཧེ་རུ་ཀ༔ ༼ བདག་ཉིད་དམ་རང་ཉིད་ལྷར་གསལ་ཞེས་པའི་ཚིག་ཟུར་མེད་པ་ནི་བདག་མེད་པའི་དོན་ལྟར་ཤར་བ་ཆོས་ཉིད་དོན་གྱི་ཡེ་ཤེས་ལ་བསྙེགས་པའོ། མཆན། ༽བཅོམ་ལྡན་པདྨ་དབང་ཆེན་ནི༔ སྐུ་མདོག་དུས་མཐའི་མེ་ལྟར་འབར༔ ཞལ་གསུམ་ཕྱག་དྲུག་ཞབས་བཞི་བསྒྲད༔ གཡས་ལྗང་གཡོན་སྔོ་དབུས་དམར་ཞལ༔ ཤིན་ཏུ་སྒེག་ཁྲོ་རྔམ་པ་ཡི༔ ཐོད་སྐམ་དབུ་རྒྱན་ཅོད་པཎ་ཅན༔ རལ་བ་དམར་སེར་གྱེན་དུ་འབར༔ དབུ་སྟེང་རྟ་མགོ་ལྗང་ཞུར་གསུམ༔ རྟ་སྐད་ཐེང་གསུམ་ཁམས་གསུམ་འཇིལ༔ དཔལ་དང་དུར་ཁྲོད་ཆས་ཀྱིས་བརྗིད༔ དགྲ་སྟྭ་མདུང་དང་རལ་གྲི་གཡས༔ བམ་དང་དབྱུག་ཏོ་གཤོལ་མདའ་གཡོན༔ ཞབས་མཐིལ་རྟ་རྨིག་བཅུ་གཉིས་བརྩེགས༔ འགལ་བྱེད་སྙིང་ལ་གདུལ་བྲོ་བརྡུང་༔ གཟི་ལྡན་གྲི་ཁུག་པད་འཛིན་འཁྲིལ༔ ཐུགས་ཀར་ཡེ་ཤེས་སེམས་དཔའ་ནི༔ བཅོམ་ལྡན་མགོན་པོ་ཚེ་དཔག་མེད༔ སྐུ་སྟོད་བཙོ་མ་གསེར་གྱི་མདོག༔ ལྟེ་བ་མན་ཆད་སྐུ་སྨད་ནི༔ ཨིནྡྲ་ནི་ལའི་ཁ་དོག་འབར༔ དར་དང་རིན་ཆེན་རུས་པས་རྒྱན༔ ལོངས་སྤྱོད་རྫོགས་སྐུའི་ཆ་ལུགས་ཅན༔ ཞི་ཚུལ་དགུ་ལྡན་འོད་ཟེར་འབར༔ ཕྱག་གཡས་ཚེ་ཡི་བུམ་པ་བཟང་༔ གཡོན་པས་རིན་ཆེན་འོད་འབར་བསྣམས༔ གོས་དཀར་ཡུམ་དང་གཉིས་མེད་སྦྱོར༔ ཕྱག་ན་མདའ་དར་ཚེ་བུམ་བསྣམས༔ ཤར་གྱི་ཚེ་བདག་ཆེན་མོ་ནི༔ དཀར་གསལ་འོད་ཟེར་མུ་མཐར་འཕྲོ༔ ཕྱག་ན་རྡོ་རྗེའི་ཚེ་བུམ་འཛིན༔ འབྱུང་བ་ས་ཡི་བཅིབས་ལ་རོལ༔ ལྷོ་ཡི་ཚེ་བདག་ཆེན་མོ་ནི༔ སེར་གསལ་རིན་ཆེན་རྒྱན་གྱིས་བརྒྱན༔ ཕྱག་ན་རིན་ཆེན་ཚེ་བུམ་བསྣམས༔ འབྱུང་བ་ཆུ་ཡི་ཆིབས་ལ་རོལ༔ ནུབ་གྱི་ཚེ་བདག་ཆེན་མོ་ནི༔ དམར་གསལ་ཉིད་བྱེད་འོད་ཟེར་འཕྲོ༔ ཆིབས་སུ་འབྱུང་བ་མེ་ལ་རོལ༔ ཕྱག་ན་པདྨའི་ཚེ་བུམ་ཅན༔ བྱང་གི་ཚེ་བདག་ཆེན་མོ་ནི༔ ལྗང་གསལ་མར་གད་ཏ་ཡི་མདོག༔ ཕྱག་ན་རྒྱ་གྲམ་ཚེ་བུམ་བསྣམས༔ འབྱུང་བ་རླུང་གི་ཆིབས་ལ་རྔམ༔ གཡོན་རྣམས་པདྨ་བྷནྡྷའི་ནང་༔ འཆི་མེད་ཚེ་ཡི་རིལ་བུའི་བཀང་༔ གཙོ་བོ་ཆེན་པོའི་སྟེང་གི་མཁར༔ པདྨ་ཚེ་བདག་སྐུ་མདོག་མཐིང་༔ ཕྱག་གཡས་འཁོར་ལོའི་ཚེ་བུམ་འཛིན༔ འཇའ་ཚོན་འཁྱིལ་བ་ཆིབས་སུ་ཆིབ༔ སྒོ་བཞིར་སྒོ་མ་ཆེན་མོ་བཞི༔ ལྕགས་ཀྱུ་ཞགས་པ་ལྕགས་སྒྲོག་དྲིལ༔ གཡོན་རྣམས་ཚེ་ཡི་བུམ་པ་འཛིན༔ རང་རང་ལས་མདོག་ཆས་མཐུན་པས༔ ཚེ་ཡི་ལྷ་ཚོགས་དཔག་མེད་པ༔ མཐའ་ཀླས་དཀྱིལ་འཁོར་རབ་འབྱམས་པའི༔ གནས་གསུམ་རྡོ་རྗེའི་སྙིང་པོ་ལས༔ འོད་འཕྲོས་དབྱིངས་ནས་སྤྱན་དྲངས་བསྟིམ༔ དེ་ནས་ལྷ་ཚོགས་སྤྱན་འདྲེན་པ་ནི༔ ཧྲཱི༔ སྐྱེ་མེད་ཆོས་དབྱིངས་གཞལ་ཡས་ནས༔ སྣང་བ་མཐའ་ཡས་གཤེགས་སུ་གསོལ༔ འགགས་མེད་ལྷུན་གྲུབ་ཕོ་བྲང་ནས༔ པདྨ་དབང་ཆེན་གཤེགས་སུ་གསོལ༔ འགྱུར་མེད་གཞོན་ནུ་བུམ་པའི་སྐུ༔ ཚེ་ལྷ་རིགས་ལྔ་གཤེགས་སུ་གསོལ༔ ཐུགས་རྗེའི་རང་རྩལ་གང་འདུལ་ཚུལ༔ འཁོར་དང་བཅས་པ་གཤེགས་སུ་གསོལ༔ ཨོཾ་བཛྲ་པུཎྱཻ་ཨ་ཡུརྫྙཱ་ན་ཀྲོ་ཏ་བུདྡྷ་བཛྲ་རཏྣ་པདྨ་ཀརྨ་དེ་ཝི་ཙ་ཏུ་ར་ས་པཱ་རི་ཝ་ར་ས་མ་ཡ་ཛ་ཛ༔ བརྟན་ཅིང་ལྷག་པར་གནས་པ་ནི༔ ཧྲཱི༔ ཕུང་ཁམས་སྐྱེ་མཆེད་གཞི་ཡི་ཆོས༔ མ་བཅོས་ཡེ་གྲོལ་རྫོགས་སངས་རྒྱས༔ མཚུངས་ལྡན་རྒྱུ་འདི་ཐ་ཚིག་གཉན༔ རྟོགས་པ་མངོན་གྱུར་ངང་བརྟན་གསོལ༔ བཛྲ་ས་མ་ཡ་ཏིཥྛ་ལྷན༔ དག་མཉམ་ལྟ་བ་མཇལ་བའི་ཕྱག༔ ཧྲཱི༔ ཐམས་ཅད་མ་ལུས་སྐུ་གསུང་ཐུགས༔ དམན་མཆོག་ཐ་དད་མ་དམིགས་པས༔ རང་སྣང་ཡེ་ཤེས་དཀྱིལ་འཁོར་ལ༔ ལྟ་བ་མཇལ་བས་ཕྱག་འཚལ་ལོ༔ ཨ་ཏི་པཱུ་ཧོ༔ པྲ་ཏི་ཙ་ཧོ༔ བཀུར་བསྟི་རིམ་གྲོ་བྱ་བ་ནི༔ ཨོཾ་ཨཱཿཧཱུྃ༔ ཉེར་སྤྱོད་བདུན་དང་འདོད་ཡོན་ལྔ༔ སྨན་གཏོར་རཀྟ་གཱ་ཎ་ཚོགས༔ རྡོ་རྗེ་ལྷ་མོའི་སྦྱོར་སྒྲོལ་དང་༔ ཕྱག་རྒྱ་གར་སྐོར་གླུ་ཡེ་ཤེས༔ ཀུན་བཟང་རྒྱན་གྱི་རོལ་བ་ཡི༔ རྣམ་དག་མཆོད་པའི་ཕྱག་རྒྱ་ནི༔ འཁོར་གསུམ་སྣང་ཞེན་འཛིན་བྲལ་བས༔ རྡོ་རྗེ་ཚེ་ཡི་ལྷ་ལ་འབུལ༔ བཞེས་ནས་འཆི་མེད་མཆོག་གྲུབ་བའི༔ དབང་དང་དངོས་གྲུབ་སྩལ་དུ་གསོལ༔ ཨརྒྷཾ༴ སོགས་རུ་པ་སོགས་སྤརྴེ་མ་ཧཱ་སརྦ་པཉྩ་ཨ་མྲི་ཏ་རཀྟ་བྷ་ལིངྟ་ཏ་ན་གཱ་ཎ་མ་ཧཱ་མུ་དྲ་བྷོ་དྷི་ཙིཏྟ་ཁ་རཾ་ཁཱ་ཧི༔ བསྟོད་ཅིང་བསྔགས་པས་བསྟི་སྟང་ནི༔ ཧྲཱི༔ ལྷ་ནི་བསམ་ཡས་གྲངས་མེད་ཀྱང་༔ ལྷ་རྣམས་ཐམས་ཅད་རྩ་བའི་ལྷ༔ མི་ཤིགས་ཐིག་ལེར་དབྱེར་མེད་རོལ༔ སྣང་བ་མཐའ་ཡས་་ཐུགས་ལ་བསྟོད༔ བདག་རྟོག་ཤི་བའི་དུར་ཁྲོད་ནས༔ བདེ་ཆེན་རྡོ་རྗེའི་གར་དགུ་རྩེན༔ འདོད་ཆགས་འཁྲོས་པའི་བཅོམ་ལྡན་འདས༔ པདྨ་དབང་ཆེན་སྐུ་ལ་བསྟོད༔ ཆགས་མེད་སྙིང་རྗེའི་རང་མདངས་ལས༔ འགྲོ་ཀུན་འཆི་བདག་བདུད་ལས་སྐྱོབས༔ འཆི་མེད་གཞོན་ནུ་བུམ་པའི་སྐུ༔ ཚེ་མཐའ་ཡས་པའི་གསུང་ལ་བསྟོད༔ ཐུགས་རྗེའི་རྩལ་ཤུགས་ཅིར་ཡང་འཆར༔ སྒྱུ་འཕྲུལ་དྲྭ་བའི་འཁོར་ལོར་བསྒྱུར༔ ཞི་རྒྱས་དབང་དྲག་ཕྲིན་ལས་མཛད༔ འཁོར་དང་ཡང་འཁོར་བཅས་ལ་བསྟོད༔ བཟླས་པ་སྔགས་ཀྱི་བྱང་བུ་ནི༔ ཧྲཱི༔ རགས་པའི་སྒོ་གསུམ་དམ་ཚིག་སེམས༔ དབང་ཆེན་རྣམ་པར་གནས་དག་པའི༔ ཐུགས་ཀར་འོད་ཀྱི་གུར་ཁང་ནང་༔ པདྨ་དང་ནི་ཟླ་གདན་ལ༔ ཕྲ་བའི་སྒོ་གསུམ་ཡེ་ཤེས་སེམས༔ ཚེ་མཐའ་ཡས་པའི་རྣམ་པར་ཤར༔ དེ་ཡི་ཐུགས་ཀར་མི་ཤིགས་བའི༔ རང་བཞིན་ཡི་གེ་ཨཱཿདང་ཧྲཱི༔ མཐའ་མར་སྔགས་ཀྱི་ཕྲེང་བས་བསྐོར༔ འོད་འཕྲོས་བརྟན་གཡོ་དག་པར་སྦྱངས༔ ལྷ་སྔགས་ཆོས་ཉིད་དབྱེར་མེད་པའི༔ ངོ་བོ་མངོན་གྱུར་ངང་ནས་བཟླ༔ ཨོཾ་ཨཱཿཔུཎྱཻ་ཨ་ཡུརྫྙ་ན་ཧྱ་གྷྲི་ཝ་ཧྲཱིཿསརྦ་སིདྡྷི་ཕ་ལ་ཧོ༔ བསྙེན་པ་ཉེ་བསྙེན་བསྒྲུབ་པ་དང་༔ བསྒྲུབ་པ་ཆེན་པོ་ལ་སོགས་པ༔ ཏིང་འཛིན་དམིགས་བའི་མདེ་ཁ་བསྒྱུར༔ ལས་བཞིའ་བསྙེན་དམིཊ་གཞན་དུ་ཤེས༔ ས་མ་ཡཱ༔ རྗེས་ལ་ག་ཎ་ཙཀྲ་ནི༔ ཧྲཱི༔ སྣང་སྲིད་ཐམས་ཅད་ཆོས་སྐུའི་ཡོ་ལང་ལ༔ གློ་བུར་དྲི་མའི་མཚན་འཛིན་དངོས་པོར་སྤྱོད༔ ཁྱབ་ཆེན་ལྟ་དང་དགོངས་པའི་བརྟུལ་ཞུགས་ཀྱིས༔ འདོད་ཡོན་ལྷ་མོར་རྣམ་དག་ ༼ དགྱེས་རྒུར་རོལ་བའི་མཆོད་པའམ་འདོད་ཡོན་གཞི་ལ། མཆན། ༽ རྫོགས་སངས་རྒྱས༔ ཨོཾ་ཨཱཿཧཱུྃ༔ ༼ སྤྱིར་ཨོཾ་ཨཱཿཧཱུྃ་དང་དོན་གཅིག་གིས་སྦྱངས་སྤེལ་བསྒྱུར་གསུམ་མོ། །མཆན། ༽ སྭ་བྷ་ཝ་ཤུདྡྷ་གྷ་ཎ་ཙཀྲ་དྷེ་ཝ་བི་ཤུདྡྷེ་ཨཏྨ་ཀོ྅་ཧཾ༔ ༼ མ་དག་མཚན་མའི་འཛིན་རྟོག་དབྱིངས་སུ་དག་པ་དང་། རྫོགས་རིམ་ཕྱག་རྒྱའི་མཆོད་པའི་སྨིན་བྱེད་དུ་འགྱུར་བའོ། ༽ གཉིས་པ་ཚོགས་ལ་སྤྱན་འདྲེན་པ་ནི༔ ཧྲཱི༔ དབྱིངས་མེད་དབྱིངས་ཉིད་སྤྲོས་པ་བྲལ་བ་ལས༔ རྣམ་མེད་རྣམ་པ་ཐམས་ཅད་པ་ཡི་ཚུལ༔ བླ་མེད་བླ་མ་མཆོག་གསུམ་ཚེ་ཡི་ལྷ༔ གཉིས་མེད་གཉིས་སུ་འཛིན་པའི་འགྲོ་ཀུན་གྱིས༔ ཚོགས་གཉིས་རྫོགས་ཕྱིར་ཚོགས་ཀྱི་ཞིང་ལ་བྱོན༔ ཐུགས་བསྐྱེད་དགོངས་མཛོད་ཐུགས་རྗེ་ཆེན་པོའི་ལྷ༔ ཨོཾ་ཨཱཿཧྲཱིཿསརྦ་ཏ་ཐཱ་ག་ཏ་པུཎྱཻ་ཨ་ཡུརྫྙཱ་ན་ཤིནྟཾ་ཀྲོ་ཏ་མ་ཧཱ་ཀ་རུ་ཎི་ཀ་ཏྲ་ཤྱ་ཧོ༔ ས་མ་ཡ་ཕེཾ་ཛ༔ གསུམ་པ་ཚོགས་མཆོད་འབུལ་བ་ནི༔ ཧྲཱི༔ གྷཱ་ཎའི་དམ་ཚིག་བླང་དོར་མེད་པའི་རྫས༔ བདེ་ཆེན་ཡུམ་གྱི་དགྱེས་སྤྲིན་བླ་ན་མེད༔ ཁྲོ་གཉེར་རིམ་པར་ལྡན་པའི་ལྷ་ལ་འབུལ༔ བདག་སོགས་ཉེར་གཅིག་ཁམས་ཀྱི་གཡོ་འགྱུར་དག༔ རྡོ་རྗེ་གཙུག་ཏོར་མངོན་གྱུར་དངོས་གྲུབ་སྩོལ༔ ཨོཾ་མ་ཧཱ་རཱ་ག་གྷཱ་ཎ་ཙཀྲ་དྷེ་ཝ་སུ་ར་ས་མུ་དྲ་པཱུ་ཙ་མེ་གྷ་ཁ་ཁ་ཁཱ་ཧི་ཁཱ་ཧི༔ བཞི་བ་ནོངས་པ་བཤགས་པ་ནི༔ ཧྲཱི༔ བདག་སོགས་འཁོར་བའི་སེམས་ཅན་ཐམས་ཅད་ཀྱིས༔ ཐོག་མེད་དུས་ནས་དུག་གསུམ་དབང་གྱུར་ཏེ༔ སྒོ་གསུམ་སྡིག་སྒྲིབ་བག་ཆགས་བཅས་པ་དང་༔ ཁྱད་པར་རྡོ་རྗེ་མཆོག་གསུམ་དམ་ནོས་ཤིང་༔ ལྷན་ཅིག་སྐྱེས་སྦྱོར་བསྒྲུབ་པར་ཁས་འཆེ་ཡང་༔ ཚོད་ཡོད་ལེ་ལོ་བག་མེད་དབང་གྱུར་བས༔ སྐུ་གསུང་ཐུགས་དང་རྩ་བ་ཡན་ལག་གི༔ དམ་ཚིག་ཉམས་ཆགས་འགལ་འཁྲུལ་ཅི་མཆིས་པ༔ གྷཱ་ཎ་ཚོགས་ཀྱི་འཁོར་ལོས་བསྐང་ཞིང་བཤགས༔ དག་ཚངས་སོར་ཆུད་དགོངས་ཀློང་མཐར་འཁྱོལ་ཤོག༔ གྷཱ་ཎ་ཙཀྲ་ས་ཏྭ༴ སོགས། ལྔ་བ་བསྒྲལ་བའི་དེམ་སྦྱོར་ནི༔ འགུགས་གཞུགས་ལན་གསུམ་བྱས་ནས་སུ༔ ཧྲཱི༔ དབང་ཆེན་ཕྱག་ ༼ འདི་ནི་དཔེར་ན་འཇིགས་བྱེད་ཀྱི་རྒྱུད་ལས། བགེགས་བསྐྲད་དུས་ཐོ་བ་གཤིན་རྗེའི་གཤེད་ཀྱིས་ཐོ་བ་གཡར་ནས་ཊཱཀྐིའི་བགེགས་བརྡུང་བ་ལྟར་འཛིན་སྒྲོལ་གྱི་ཀིང་ཆེན་སོགས་ཀྱིས་གཙོ་བོའི་ཕྱག་ཆ་གཡར་ནས་བསྒྲལ་ལས་མཛད་བའོ། །མཆན། ༽ གི་གཤོལ་ ༼ ལྕགས་ཀྱུའམ། ༽མདའ་ཡིས༔ གནོད་བྱེད་རང་དབང་མེད་པར་བཀུག༔ བམ་གྱིས་སྐྱོབ་བྱེད་ལྷ་དང་ཕྲལ༔ དབྱུག་ཏོ་འབར་བའི་ཐོ་བས་བརྡུང་༔ མདུང་གིས་སྐྱེ་མེད་དབྱིངས་སུ་བསད༔ རལ་གྲིས་ཤ་རུས་དུམ་བུར་གཏུབ༔ འཁྲུལ་མི་ཤེས་པའི་ངང་ཐོབ་ཤོག༔ མ་ཏྲཾ་རུ་ཏྲ་མ་ར་ཡ་ཕཊ༔ དྲུག་པ་ཞལ་དུ་བསྟབ་པ་ནི༔ ཧྲཱི༔ རྟོག་ཚོགས་ལྷག་མའི་འཁྲུལ་བ་ཀུན༔ མི་གནས་ཆོས་དབྱིངས་ཀློང་དུ་བསྟབ༔ འཚེངས་བ་གསུམ་ལྡན་བརྟུལ་ཞུགས་ཀྱིས༔ སྐྱེ་བའི་མ་རིག་རྒྱུན་ཆོད་ཅིག༔ མ་ཧཱ་མཾ་ས་རཀྟ་ཙིཏྟ་བ་སུ་ཏ་ཀིཾ་ནི་རི་ཏི་ཁ་རཾ་ཁཱ་ཧི༔ བདུན་པ་ལྷག་མའི་ཕྲིན་ལས་ནི༔ བྷྱོ༔ སྔོན་ཚེ་ཚོགས་ཀྱི་དཀྱིལ་འཁོར་ཆེན་པོ་ཡིས༔ མ་རུང་རུ་ཏྲའི་སྡེ་དཔུང་བརྟུལ་བའི་ཚེ༔ སླས་དང་ཕྱི་མོ་བྲན་མོའི་ཐབས་ཚུལ་གྱིས༔ ཏ་ན་ག་ཎའི་བརླང་སྤྱོད་མཐར་ཕྱིན་གྲོགས༔ གསང་སྔགས་བསྟན་པའི་སྒྲོན་མེ་གསལ་མཛད་ཅིང་༔ སླར་ཡང་ཅི་བགྱི་གཉེར་བླང་བསྟན་སྐྱོང་ཚོགས༔ འབར་མ་གིང་ལང་དབང་ཕྱུག་ཉེར་བརྒྱད་སོགས༔ ཕམ་འབབ་བཀའ་ཡི་ལྷག་གཏོར་འདི་བཞེས་ལ༔ རྣལ་འབྱོར་བསྒྲུབ་པའི་བར་ཆད་སེལ་བ་དང་༔ ཕྲིན་ལས་རྣམ་བཞི་ལྷུན་གྱིས་གྲུབ་པར་མཛོད༔ ཨུཙྪིཥྚ་བ་ལིངྟ་ཁཱ་ཧི༔ བརྒྱད་པ་ཐུགས་དམ་བསྐུལ་བ་ནི༔ ཧཱུྃ༔ དགུ་ཀློང་རྔམ་པའི་དུར་ཁྲོད་ཆེན་པོ་ནས༔ གཤེགས་བྱོན་བཞུགས་པའི་རྩོལ་རྟོག་མི་མངའ་བཞིན༔ ཐུགས་རྗེ་ཁྲོས་པས་སེམས་ཅན་དོན་མཛད་ཕྱིར༔ གང་ལ་གང་འདུལ་སྒྱུ་འཕྲུལ་རོལ་གར་བསྒྱུར༔ པདྨ་ཀྲོ་ཏ་ཧྱ་གྷྲི་ཝ་ཀརྨ་ཧོ༔ དགུ་པ་གཏོར་མའི་ཕྲིན་ལས་ནི༔ ཧཱུྃ༔ སྔོན་ཚེ་གསང་ཆེན་བབས་སོ་རྣམ་དྲུག་ཏུ༔ ཀུན་བཟང་རྡོར་འཆང་དབང་ཆེན་རྡོ་རྗེ་ཆོས༔ པད་འབྱུང་བརྒྱུད་པར་བཅས་པའི་སྤྱན་སྔ་རུ༔ དཀར་དམར་ནག་གསུམ་ ༼ སྡེ་དཔོན་སུམ་ཅུ་ལས་དཀར་པོ་གསུམ་ལྷ་དམར་པོ་གསུམ་བཙན་ནག་པོ་གསུམ་བདུད་གཙོ་བོར་སྨོས་པ་ཙམ་མོ། མཆན། ༽ སྡེ་དཔོན་ཐམས་ཅད་ཀྱིས༔ རང་རང་སྲོག་གི་སྙིང་པོ་ཕུལ་ནས་སུ༔ སངས་རྒྱས་བསྟན་སྐྱོང་རྣལ་འབྱོར་སྐུ་ཚེ་བསྲིང་༔ རྒྱུ་སྦྱོར་རྐྱེན་བཟློག་བསྒྲུབ་མཆོག་བར་ཆད་བསལ༔ རྣམ་བཞིའི་ཕྲིན་ལས་རབ་འབྱམས་བསྒྲུབ་པར་ཆད༔ གཡར་དམ་གཅིག་དུ་སྦྲེལ་བའི་བརྗེད་ཐོ་འདི༔ རྩལ་ཆུང་དངོས་ངན་བདག་གིས་སྐྱོང་བ་ལ༔ ཡལ་བར་མ་འདོར་ཐུགས་དམ་གྲོགས་དན་མཛོད༔ ཨོཾ་དྷརྨ་པཱ་ལ་ས་པཱ་རི་ཝ་ར་ཨེ་དམ་བྷ་ལིངྟ་ཁཱ་ཧི༔ བཅུ་པ་བསྟན་མ་སྐྱོང་བ་ནི༔ ཧཱུྃ༔ སློབ་དཔོན་པདྨའི་བཀའ་ཡི་བྱ་ར་བ༔ བོད་ཁམས་སྐྱོངས་པའི་བསྟན་མ་བཅུ་གཉིས་དང་༔ གཡའ་མ་བཅུ་གཉིས་སྐྱོང་མ་བཅུ་གཉིས་སོགས༔ བྲན་གཡོག་ཚུལ་བཟུང་ལས་མཛད་ཡལ་གམ་ཅན༔ ཀུན་ལ་ཟག་མེད་དམ་རྫས་མཆོད་གཏོར་འབུལ༔ སྔོན་ཚེ་ཁས་བླང་དམ་བཅས་ཇི་བཞིན་དུ༔ མུ་སྟེགས་ཀླ་ཀློའི་རྒྱུ་བ་ཕྱིར་བཟློག་ལ༔ བོད་ཁམས་བདེ་ལ་འགོད་པའི་ཕྲིན་ལས་མཛོད༔ ཨོཾ་བཛྲ་ཤ་སཱ་ན་པཱ་ལ་ཨེ་དམ་བྷ་ལིངྟ་ཁཱ་ཧི༔ བཅུ་གཅིག་ལུ་གུ་རྒྱུད་ཀྱི་བྲོ༔ ཧཱུྃ༔ རྡོ་རྗེའི་ཚེ་མཆོག་བསྒྲུབ་པ་ལ༔ བདུད་བྱེད་དམ་སྲི་རྒབ་འདྲེའི་སྡེ༔ ཆེ་མཆོག་དཔལ་གྱི་མཐུ་རྩལ་གྱིས༔ རྒྱ་མཚོ་ཆེན་པོའི་གཏིང་དུ་བསྐྱུར༔ རུས་པའི་རི་རབ་འོག་ཏུ་མནན༔ ཨེ་ཝཾ་མ་ཡས་དལ་བསྐོར་ཏེ༔ སྟེང་དུ་ཕྲིན་ལས་རོལ་པའི་རྒྱ༔ གླུ་བྲོ་གར་གྱིས་སྡིག་ཟད་བྱེད༔ ཧཱྃ༔ རྟ་ཡི་མདུར་འགྲོས་བཅུ་གཉིས་ཚུལ༔ རྡོ་རྗེའི་རྨིག་པའི་བརྟུལ་ཞུགས་ཀྱིས༔ སྐུ་ཡི་གར་གསུམ་ལུས་ལ་བརྡུང་༔ འདོད་པའི་འཁྲུལ་བ་དབྱིངས་སུ་ཆོམས༔ ཨི་ཧིའི་མཚེར་སྐད་བཅུ་གཉིས་ཚུལ༔ ཐང་གསུམ་དགུ་དང་བཅུ་གཉིས་གླུའི༔ གསུང་གི་གར་གསུམ་ངག་ལ་བརྡུང་༔ གཟུགས་ཀྱི་འཁྲུལ་བ་དབྱིངས་སུ་ཆོམས༔ ཅང་ཤེས་བརྟུན་སྟབས་བཅུ་གཉིས་ཚུལ༔ མངོན་གྱུར་ཡེ་ཤེས་ ༼ ཡེ་ཤེས་ལྔ་ཀློང་གྱུར་འདས་ཀ་དབྱིངས་གྲོལ་མཐའ་གྲོལ་མི་གནས་པའི་དབྱིངས་རང་བྱུང་གི་རྩལ་རང་གྲོལ་གྱི། མཆན། ༽ རོལ་བའི་བྲོ༔ ཐུགས་ཀྱི་གར་གསུམ་སེམས་ལ་བརྡུང་༔ གཟུགས་མེད་འཁྲུལ་བ་དབྱིངས་སུ་ཆོམས༔ སྐྱེ་མཆེད་བཅུ་གཉིས་འཁྲུལ་འཁོར་ཆོམས༔ ཡན་ལག་བཅུ་གཉིས་སྲིད་རྩ་བཏོན༔ བདེན་དོན་བཅུ་གཉིས་མངོན་གྱུར་བར༔ ནམ་ཡང་ལྡངས་བར་མ་གྱུར་ཅིག༔ ཨོཾ་ཨཱཿཧཱུྃ༔ ཧ་ཧཿ ཧི་ཧིཿ ཧེ་ཧེཿ ཧོ་ཧོ༔ ཧཱུྃ་ཧཱུྃ༔ ཕཊ་ཕཊཿ བིགྣན་ཤ་ཏྲིཾ་མ་ར་ཡ་ནན་ནན༔ བཅུ་གཉིས་དངོས་གྲུབ་བླང་བ་ནི༔ ཨོཾ༔ ཇི་ལྟར་སྟོན་པས་བྱུང་ཆུབ་ཤིང་དྲུང་དུ༔ ཐོ་རངས་ནང་གི་མངོན་བྱང་མངོན་མཛད་ནས༔ ཟག་མེད་ཞི་བ་མཆོག་གི་གོ་འཕང་བརྙེས༔ སྲིད་ཞིའི་དཔལ་དུ་གྱུར་བ་ཇི་བཞིན་དུ༔ རྩ་རླུང་ཐིག་ལེ་ནང་གི་འདུ་བ་བཟང་༔ གྲངས་དུས་རྟགས་ཀྱི་དམ་ཚིག་ལེགས་པར་ཐེམ༔ ཕུན་ཚོགས་ལྔ་ལྡན་ཚེ་ཡི་སྟོན་འཁོར་ལྷ༔ དགོངས་པ་དབྱེར་མེད་ཆེན་པོར་བྱིན་རློབས་ཅིང་༔ རྒྱུ་ ༼ གཞི་དཔྱད། ༽ ལམ་འབྲས་བུའི་དབང་བཞི་དུས་གསུམ་བསྐུར༔ ཁ་སྦྱོར་བདེ་ཆེན་དབང་ཕྱུག་ ༼ སྐུའི་དབང་ཕྱུག་སོགས་མཆན། ༽ བདུན་ལྡན་གྱི༔ དངོས་གྲུབ་དམ་པ་ད་ལྟ་ཉིད་དུ་སྩོལ༔ ཨོཾ་བཛྲ་པུཎྱེ་ཨ་ཡུརྫྙཱ་ན་ཧྱ་གྷྲི་ཝ་ཀ་ཡ་ཝཀྐ་ཙིཏྟ་སརྦ་སིདྡྷི་ཕ་ལ་ཨ་ལ་ལ་ཧོ༔ བཅུ་གསུམ་ནོངས་བ་བཤགས་པ་ནི༔ ཧྲཱི༔ རྒྱལ་ཀུན་གསུང་འདུས་དམ་ཚིག་གཉེར་བླང་ཀྱང་༔ རྒྱུ་ཆུང་ཕུད་ཉམས་མཆོད་རྫས་འབག་རྩོག་ ༼ བཙོག་དཔྱད། ༽གཡོས༔ ཕྱག་རྒྱ་མ་གསལ་བསྙེན་བསྒྲུབ་གྲངས་མ་འཁྱོལ༔ ཆོས་ཉིད་ལྟ་བའི་གདེངས་དང་མ་ལྡན་ཅིང་༔ ཏིང་འཛིན་དགོངས་པ་ཀློང་དུ་མ་གྱུར་བས༔ དམ་ཚིག་ཉམས་ཆགས་འགལ་འཁྲུལ་གྱུར་བ་དང་༔ ཁྱད་པར་སྒྲུབ་པའི་དུས་ཀྱི་བསྲུང་བྱ་ལ༔ ནོངས་པ་གང་མཆིས་ཡེ་ཤེས་ལྷ་ལ་བཤགས༔ དག་ཚངས་སོར་ཆུད་དབུགས་དབྱུང་སྩལ་དུ་གསོལ༔ ཡི་གེ་བརྒྱ་བས་བཤགས་སྦྱོངས་དང་ཨ་ལི་ཀ་ལིའི་བསྙེན་ཁ་གསོ༔ བཅུ་བཞི་རྫོགས་རིམ་བསྡུ་བ་ནི༔ ཨཱ༔ ལྷ་སྔགས་ཆོས་ཉིད་སྣང་བའང་༔ རིག་སྟོང་དོན་གྱི་རང་རྩལ་དུ༔ སྒྱུ་མ་རྨི་ལམ་ཆུ་ཟླ་བཞིན༔ སྣང་དུ་ཉིད་ན་སྟོང་བ་ཉིད༔ སྤྲོ་བ་མེད་ཅིང་བསྡུ་བ་མེད༔ ཐམས་ཅད་མ་ལུས་མཉམ་པ་ཉིད༔ སྤྲོས་མཐའ་བྲལ་བའི་ངང་དུ་ཨཱ༔ བཅོ་ལྔ་སླར་ལྡང་རྒྱུན་སྤྱོད་འཇུག༔ ཧྲཱི༔ སྟོང་པ་ཉིད་ལ་ཡོན་ཏན་རྫོགས༔ ཕྱག་རྒྱ་གཅིག་སྐུའི་འབྲས་བུར་བཞེངས༔ སྤྱོད་ལང་རྣམ་བཞི་ཐམས་ཅད་ཀུན༔ ཕྲིན་ལས་འགྲོ་བའི་མགོན་པོར་ཤར༔ བཅུ་དྲུག་བསྔོ་ཞིང་སྨོན་ལམ་ནི༔ ཧཱུྃ༔ འདིའི་མཚོན་དུས་གསུམ་བསགས་པའི་དགེའི༔ ཀུན་བཟང་སྨོན་ལམ་མཐར་ཕྱིན་ཏེ༔ འགྲོ་ཀུན་སངས་རྒྱས་ཐོབ་པའི་རྒྱུར༔ འཁོར་གསུམ་དམིགས་མེད་དབྱིངས་སུ་བསྔོ༔ འཁོར་བའི་རྒྱ་མཚོ་དོང་སྤྲུགས་ནས༔ རྣམ་གྲོལ་འབྲས་བུའི་ས་ཐོབ་ཤོག༔ བཅུ་བདུན་ཤིས་པ་བརྗོད་པ་ནི༔ ཨོཾ༔ བཀྲ་ཤིས་ཀུན་འབྱུང་གཞི་ཡི་འོད་དཔག་མེད༔ ལྷུན་གྲུབ་ཡོན་ཏན་རྒྱ་མཚོའི་བཀྲ་ཤིས་མཛོད༔ འགྲོ་ཀུན་རྒྱུད་ལ་འདུ་འགོད་མེད་པར་རྫོགས༔ བདེན་པ་དེའི་ཀྱང་དེང་འདིར་བདེ་ལེགས་ཤོག༔ བཀྲ་ཤིས་ཀུན་བསྐྱེད་ལམ་གྱི་ཚེ་དཔག་མེད༔ ཟག་གསུམ་ཟད་པའི་ཚེ་དབང་དངོས་གྲུབ་མཛོད༔ འགྲོ་ཀུན་མི་འཇིགས་སྐྱབས་སྦྱིན་སྙན་སྨྲའི་དབྱངས༔ བདེན་པ་དེའི་ཀྱང་དེང་འདིར་བདེ་ལེགས་ཤོག༔ བཀྲ་ཤིས་མཐར་ཐུག་འབྲས་བུ་ཧྱ་གྷྲ༔ སྤངས་རྟོགས་ཕུལ་ཕྱིན་དོན་གཉིས་དཔལ་གྱི་མཛོད༔ ཕན་བདེའི་གྲུ་ཆར་འབབ་པས་དུས་སྟོན་འགྱེད༔ བདེན་པ་དེའི་ཀྱང་དེང་འདིར་བདེ་ལེགས་ཤོག༔ སྐུ་ནི་མི་འགྱུར་འཆི་བདག་བདུད་ལས་རྒྱལ༔ གསུང་ནི་ཆགས་མེད་ལྷ་བུའི་བདུད་ལས་རྒྱལ༔ ཐུགས་ནི་འཁྲུལ་མེད་ཉོན་མོངས་བདུད་ལས་རྒྱལ༔ ཡེ་ཤེས་མི་འཇིག་ཕུང་པོའི་བདུད་ལས་རྒྱལ༔ ཚེ་འཕྲེང་བར་ཆད་སེལ་བའི་བཀྲ་ཤིས་ཤོག༔ ཚེ་དབང་རིག་འཛིན་འགྲུབ་པའི་བཀྲ་ཤིས་ཤོག༔ འཆི་མེད་གཉུག་མ་གཞོན་ནུ་བུམ་པའི་སྐུ༔ ཚེ་ལུས་འདི་ལ་འགྲུབ་པའི་བཀྲ་ཤིས་ཤོག༔ ཚེ་སྒྲུབ་ཀུན་གྱི་སྙིང་པོའི་དོན༔ རང་བཞིན་རྫོགས་པ་ཆེན་པོར་གཅིག༔ འདི་ཉིད་མངོན་དུ་གྱུར་བ་ན༔ སྡུག་བསྔལ་ཆུ་བོ་བཞི་ལས་སྒྲོལ༔ རང་བྱུང་རྒྱུད་ཀྱི་བཅུད་དྲིལ་ནས༔ ཨོ་རྒྱན་སློབ་དཔོན་བདག་གིས་བཀོད༔ ད་ལྟ་དགོངས་པའི་རྩལ་རྒྱས་གདབས༔ མ་འོངས་ལས་ཅན་དང་འཕྲད་ནས༔ འགྲོ་ཕན་རྒྱ་ཆེན་འབྱུང་བར་ཤོག༔ ཅེས་པ་འདི་ཡང་རང་སློབ་དམ་པ་ཕྱུག་རྡིས་དང་རིག་འཛིན་ཆེན་པོ་ཨཀྵ་རས་བསྐུལ་ངོར་ག་གཱས་སོ། །དགེའོ། །དགེའོ། །དགེའོ། །སརྦ་མངྒ་ལཾ། །དབང་ལུང་ཡོངས་རྫོགས་སྦྱིན་པ་ཡིན་པས་ཐོབ་པར་གྱུར་ཅིག །ཨོཾ་སུ་པྲ་ཏིཥྛ་བཛྲ་ཡེ་སྭཱ་ཧཱ། ཡང་ན་དཀྱིལ་འཁོར་རྒྱས་པའི་སྔགས༔ ཨོཾ་བཛྲ་མཱ་མ་ཨ་ཡུརྫྙཱ་ན་ཧྲཱིཿསྭཱ་ཧཱ༔ ཨོཾ་བཛྲ་ཊཱཀྐི་ནི་ཨ་ཡུརྫྙཱ་ན་ཧྲཱིཿསྭཱ་ཧཱ༔ ཨོཾ་བཛྲ་ཁཎྜ་རོ་ཧི་ཨ་ཡུརྫྙཱ་ན་ཧྲཱིཿསྭཱ་ཧཱ༔ ཨོཾ་བཛྲ་མ་ཧཱ་རུ་པན་ཎ་ཨ་ཡུརྫྙཱ་ན་ཧྲཱིཿསྭཱ་ཧཱ༔ ཨོཾ་བཛྲ་ཨངྐུ་ཤ་ཨ་ཡུརྫྙཱ་ན་ཧྲཱིཿསྭཱ་ཧཱ༔ ཨོཾ་བཛྲ་པ་ཤ་ཨ་ཡུརྫྙཱ་ན་ཧྲཱིཿསྭཱ་ཧཱ༔ ཨོཾ་བཛྲ་སྥོ་ཌ་ཨ་ཡུརྫྙཱ་ན་ཧྲཱིཿསྭཱ་ཧཱ༔ ཨོཾ་བཛྲ་གཎྜེ་ཨ་ཡུརྫྙཱ་ན་ཧྲཱིཿསྭཱ་ཧཱ༔ ཡང་ལས་སྦྱོར༔ ཨོཾ་བཛྲ་ཨ་ཡུཿགཎྜ་ཤིནྟཾ་ཀུ་རུ་ཨ་ཡུརྫྙཱ་ན་ཧྲཱིཿསྭཱ་ཧཱ༔ ཨོཾ་བཛྲ་ར་མོ་ན་ཏྭ་པུཥྚིཾ་ཀུ་རུ་ཨ་ཡུརྫྙཱ་ན་ཧྲཱིཿསྭཱ་ཧཱ༔ ཨོཾ་བཛྲ་མེ་ཧ་ག་ན་བཀྩ་ཝ་ཤཾ་ཀུ་རུ་ཨ་ཡུརྫྙཱ་ན་ཧྲཱིཿསྭཱ་ཧཱ༔ ཨོཾ་བཛྲ་པཎྜི་མ་ར་ཡ་ཨ་ཡུརྫྙཱ་ན་ཧྲཱིཿསྭཱ་ཧཱ༔ ཞེས་བཏགས་པས་ཚར་ཕྱིན་ཏོ༔

འདོན་མཐར་ཚེ་འགུགས།

སྔ་ཐུན་ལ་ལས་བྱང་རྒྱས་པའི་བསྙེན་པ་ཅི་འགྲུབ་མཐར་དཀྱིལ་འཁོར་རྒྱས་པའི་སྔགས་རེ་ཟུང་འདོན་མཐར་ཚེ་འགུགས། ཕྱོགས་བཞི་དབུས་ནས་ཚེ་འགུགས་མ་སོགས་དང་། རྒྱས་གདབ། ཧཱུྃ། བཅོམ་ལྡན་ཚེ་དཔག་མེད་པ་དང་༴ སོགས། དེ་ནས་གཞུང་མཇུག་འདོན། ཐུན་རྗེས་མ་རྣམས་ལ་བརྒྱུད་འདེབས་དང་། ཚེ་འགུགས་རྡོ་རྗེའི་རྒྱ་ཅན། བདག་ཉིད་སྐད་ཅིག་སོགས་འདོན། ལྷ་བསྐྱེད་འདྲ་མིན་གཉིས་ཡོད་པ་གཅིག་གིས་ཆོག །གིརྟི་ཧོའི་བར་འདོན་དེ་ནས་གཞུང་གི་བསྙེན་པ། ཨོཾ་ཨ་པུཎྱེ་ཨ་ཡུརྫྙཱ་ན་ཧྱ་སོགས་གཙོ་བོར་འདོན། ཐུན་མཐར་ཙམ་ལ། ཨོཾ་ཨཱཿཧཱུྃ་བུདྡྷ་བཛྲ་སོགས། རྡོ་རྗེའི་རྒྱ་ཅན་བསྙེན་པ་ཅི་ནུས་མཐར། དཀྱིལ་འཁོར་རྒྱས་པའི་སྔགས་གཅིག་ཙམ་མམ། རེ་ཟུང་མཐར་ཚེ་འགུགས་སོགས༴ ཕྱི་ཐུན་མཐར་ཚོགས་སོགས་ཅི་ཙམ་སྡོད་པའི་མཐའི་ཞག་ལྔའམ་བདུན་ཙམ་ལ། སྔགས་ཐམས་ཅད་གཅིག་རྗེས་གཅིག་མཐུད་ཀྱིས་སྦྲེལ་མར་ཚང་བར་བཟླའོ། །ཞལ་རྒྱུན་ནོ། །

ཚེ་སྒྲུབ་འཆི་མེད་མཆོག་གྲུབ།

ཚེ་སྒྲུབ་འཆི་མེད་མཆོག་གྲུབ་ཞེས་བྱ་བ༔ ཧྲཱི༔ སྐད་ཆིག་དྲན་རྫོགས་རང་ཉིད་ཚེ་དཔག་མེད༔ དམར་གསལ་མཉམ་བཞག་ཚེ་ཡི་བུམ་པ་འཛིན༔ སྐྱིལ་ཀྲུང་ལོངས་སྐུའི་རྒྱན་རྫོགས་ཐུགས་ཀར་ཧྲཱིའི༔ མཐའ་མར་སྔགས་ཀྱི་ཕྲེང་བས་བསྐོར་བ་ལས༔ འོད་འཕྲོས་དོན་གཉིས་བྱས་ནས་འཁོར་འདས་ཀྱི༔ དངས་བཅུད་བྱིན་རླབས་ཚེ་དཔལ་མ་ལུས་པ༔ བདག་ཐིམ་རྡོ་རྗེ་ལྟ་བུའི་ཚེ་ཐོབ་བསམ༔ རྒྱལ་ཀུན་རིགས་གཅིག་ཡོངས་རྫོགས་ཆེན་པོར་བསྒྲུབ༔ ཨོཾ་བཛྲ་སརྦ་ཨ་ཡུརྫྙཱ་ན་སིདྡྷི་ཕ་ལ་སྭཱ་ཧཱ༔ ཅེས་དང་༔ ཨོཾ་བཛྲ་ཨཱ་ཡུཿཥེ་སྭཱ་ཧཱ༔ མཐར༔ དངོས་བཤམས་ཏིང་འཛིན་མཆོད་སྤྲིན་དམ་པ་འབུལ༔ སྐུ་གསུང་ཐུགས་ཡོན་ཕྲིན་ལས་མཆོག་ལ་བསྟོད༔ འགྲོ་ཀུན་འཆི་མེད་མགོན་པོའི་གནས་ཐོབ་ནས༔ སྲིད་ཞིའི་རྒུད་པ་སེལ་བའི་བཀྲ་ཤིས་ཤོག༔ ཅེས་ཀྱང་འགྱུར་མེད་རྣམ་པར་རྒྱལ་བ་དང་། ཚུལ་ཁྲིམས་ཤེས་རབ་བློ་འཕེལ་རྣམས་ཀྱི་བསྐུལ་བའི་ངོར་ག་གཱས་སོ། །

ཚེ་འགུགས་རྡོ་རྗེའི་ཕྱག་རྒྱ་ཅན།

ཚེ་འགུགས་རྡོ་རྗེའི་ཕྱག་རྒྱ་ཅན་ཞེས་བྱ་བ་བཞུགས་སོ༔

བདག་ཉིད་སྐད་ཅིག་དྲན་རྫོགས་སུ༔ མགོན་པོ་ཚེ་དཔག་མེད་པ་ནི༔ སྐུ་མདོག་དམར་སྐྱ་མཛེས་རྒྱན་ལྡན༔ དཔེན་ན་མཚལ་ཉིད་བཟང་པོ་ལ༔ ཁ་བ་དག་ནི་བབས་པ་བཞིན༔ དམར་སྐྱ་འོད་ཟེར་འཕྲོ་བར་བསམ༔ ཞེས་སམ་ཡང་ན༔ སྐུ་སྟོད་སེར་ལ་འོད་ཟེར་འབར༔ ལྟེ་བ་མན་ཆད་ལྗང་གུ་སྟེ༔ གཡས་ན་ཚེ་ཡི་བུམ་པ་འཛིན༔ གཡོན་པས་རིན་ཆེན་འོད་འབར་བསྣམས༔ ལོངས་སྤྱོད་རྫོགས་སྐུའི་རྒྱན་ཆས་ཅན༔ ཞབས་གཉིས་རྡོ་རྗེའི་སྐྱིལ་ཀྲུང་བཞུགས༔ ཤར་དུ་རྡོ་རྗེ་ཡིད་གཟུགས་ཆེ༔ ལྷོ་རུ་རྡོ་རྗེ་ཡིད་མགྱོགས་མ༔ ནུབ་ཏུ་རྡོ་རྗེ་ཡིད་འཕྲོག་མ༔ བྱང་དུ་རྡོ་རྗེ་ཡིད་བསྐྱོད་མ༔ དབུས་སུ་རྡོ་རྗེ་སྣ་ཚོགས་མ༔ དཀར་སེར་དམར་ལྗང་མཐིང་སྔོན་མདོག༔ ས་ཆུ་མེ་རླུང་འཇའ་མཚོན་ཆིབས༔ གཡས་ན་སྣ་ཚོགས་མདའ་དར་དང་༔ གཡོན་ན་ལས་བཞིའི་ཚེ་བུམ་འཛིན༔ གནས་གསུམ་རྡོ་རྗེ་སྙིང་པོ་ལས༔ འོད་འཕྲོས་དབྱིངས་ནས་སྤྱན་དྲངས་བསྟིམ༔ བུདྡྷ་བཛྲ་རཏྣ་པདྨ་ཀརྨ་ཨ་ཡུཿཛྙཱ་ན་བྷྲཱུ་ཏྲཱཾ་ཧཱུྃ་ཨཱ་ཧྲཱི༔ ཏིཥྛ་བཛྲ་ན་མོ་ཛྙཱ་ན་པཱུ་ཙ་སྟྭ་ཏྲ་གིརྟི་ཧོ༔ ཨོཾ་ཨཱཿཧཱུྃ་བཛྲ་བུདྡྷ་བཛྲ་རཏྣ་པདྨ་ཀརྨ་ཨ་པ་རི་མི་ཏ་ཨཱ་ཡུཿཛྙཱ་ན་ཧཱུྃ་སྭཱ་ཧཱ༔ ཅི་ནུས་བརྗོད༔ དེ་ནས་ཚེ་འགུགས་ནི༔ ཧཱུྃ༔ ཕྱོགས་བཞི་དབུས་ནས་ཚེ་འགུགས་མ༔ དཀྱིལ་འཁོར་སྟོན་ཅིང་ཚེ་བཀྲག་སྡུད༔ ཚེ་དང་རྫས་ལ་དབང་བསྒྱུར་བ༔ ཚེ་དབང་རིག་འཛིན་འཁོར་བཅས་ཀྱིས༔ ཕྱོགས་སྐྱོངས་བཅུ་ཡི་ལག་པ་ནས༔ ཚེ་ཁུག་རྣལ་འབྱོར་བདག་ལ་སྩོལ༔ རིགས་ལྔའི་ཚེ་ཡི་དངོས་གྲུབ་བདག་ལ་སྩོལ༔ རྡོ་རྗེ་ཚེ་ཡི་སྒོ་ཕྱེས་ལ༔ བདུད་རྩི་ཚེ་ཡི་དངོས་གྲུབ་སྩོལ༔ ཚེ་མཆོག་དཀྱིལ་འཁོར་བབ་དུ་གསོལ༔ བཛྲ་ཨཱ་ཡུ་ཥེ་སརྦ་སིདྡྷི་ལོ་ཀ་སིདྡྷི་ཛྙཱ་ན་སིདྡྷི་ཕཱ་ལ་ཨཱཿཧཱུྃ༔ བཛྲ་ཨཱ་ཡུར་ཛྙཱ་ན་སྭཱ་ཧཱ༔ དེ་ནས་རྒྱས་གདབས་བཀྲ་ཤིས་ནི༔ ཧཱུྃ༔ བཅོམ་ལྡན་ཚེ་དཔག་མེད་པ་དང་༔ རིགས་ལྔའི་ལྷ་མོ་སེམས་དཔའི་འཁོར༔ མ་ལུས་ལུས་པ་མེད་པ་ཡིས༔ ཚེ་ཁུག་བསྟིམ་བརྟན་འགྱུར་མེད་ཀྱི༔ རྒྱས་གདབས་བཀྲ་ཤིས་བདེ་ལེགས་མཛོད༔ རྡོ་རྗེའི་ཚེ་དབང་མཆོག་གྲུབ་ནས༔ ནམ་མཁའ་ཇི་སྲིད་བརྟན་གྱུར་ཅིག༔ ཨོཾ་ཨཱ་ཡུ་ཛྙཱ་ན་བིདྱཱ་དྷ་ར་ཨ་བྷི་ཥིཉྩ་མངྒ་ལཾ་ཏིཥྛ་ལྷན༔ ཅེས་བརྗོད་མགོན་པོའི་ཐུགས་ཀ་ནས༔ འོད་ཟེར་དམར་པོའི་ཚྭ་ཚྭ་ཡི༔ ཕྱོགས་བཅུའི་ཞིང་ཁམས་རབ་འབྱམས་ནས༔ ཚེ་བཅུད་རང་དབང་མེད་པར་བསྡུས༔ རྒྱལ་ཀུན་ཚེ་ལ་དབང་བ་ཡི༔ བདེན་སྟོབས་ནུས་པ་ཀུན་བསྡུས་ཤིང་༔ རྣམ་སྨིན་ལུས་ལ་རྒྱས་གདབས་པས༔ རང་ལུས་ཚེ་དཔག་མེད་པར་གྱུར༔ རྣམ་རིག་སོར་རྟོགས་ཡེ་ཤེས་ངང་༔ དབྱེར་མེད་དུ་མ་རོ་གཅིག་བསམ༔ སངས་རྒྱས་ཀུན་གྱི་སྟོང་སྲོག་ཐོབ༔ འདི་ནི་རྫོགས་པ་ཆེན་པོའི་རྒྱུད༔ ཀུན་གྱི་ཡང་སྙིང་འདུས་པ་སྟེ༔ རྡོ་རྗེའི་སྲོག་ཐོབ་ཐེ་ཚོམ་མེད༔ ས་མ་ཡཱ༔ རྒྱ་རྒྱ་རྒྱ༔ ཅེས་ཀྱང་རྫོགས་པ་རང་བྱུང་ནས་བསྡུས་ཏེ་འགྱུར་མེད་རྣམ་པར་རྒྱལ་བའི་གསུང་བསྐུལ་དོན་ཡོད་པའི་ཕྱིར་དུས་མཐའི་སྔགས་མིང་ག་གཱ་ཨ་བྷྱེ་ནས་བྲིས་པས་འགྲོ་ཀུན་འཆི་མེད་གཉུག་མའི་ཡེ་ཤེས་གྲུབ་པའི་རྒྱུར་གྱུར་ཅིག །སརྦ་མངྒ་ལཾ། །ཨེ་མ་ཧོ༔ སྐུ་གསུམ་རྩ་གསུམ་མཆོག་གསུམ་ཚེ་ཡི་ལྷ༔ རྒྱལ་བ་རིགས་ལྔ་འཆི་མེད་མཆོག་གྲུབ་པའི༔ ཕྱོགས་བཅུའི་སངས་རྒྱས་པད་འབྱུང་བི་མ་སོགས༔ སྤྱི་གཟུགས་རྩ་བའི་བླ་མར་གསོལ་བ་འདེབས༔ ནད་གདོན་འཇིགས་བརྒྱད་རྐྱེན་དང་བར་ཆད་སོལ༔ དུས་མིན་འཆི་བའི་མཚན་མ་ཀུན་ཞི་ནས༔ གནས་སྐབས་ལོ་བརྒྱ་ཐུབ་པའི་ཚེ་དཔལ་དང་༔ མཐར་ཐུག་འཆི་མེད་མགོན་པོའི་གནས་ཐོབ་ཤོག༔ ཨོཾ་བཛྲ་གུ་རུ་རཏྣ་སརྦ་ཨ་ཡུརྫྙཱ་ན་བྷྲཱུཾ་འདུས༔ སརྦ་བིགྣན་མ་ར་ཡ་ཕཊ༔ ཞེས་བཟླས་ཉེར་འཚེ་མཐའ་དག་ཞི༔ ཚེ་ལ་དབང་བའི་རིག་འཛིན་ཐོབ༔ འབྱོར་བ་དྲུག་གི་རྩེ་མོར་ཕྱིན༔ དེ་ཝའི་མིང་གིས་བསྐུལ་བའི་ངོར། སྔགས་རྒན་ག་གཱ་ཨ་བྷྱེས་སོ། །དགེའོ། །

ཚེ་སྒྲུབ་སྤྱི་ལ་སྦྱར་རུང་གི་སྦྱིན་བསྲེག་འདོད་དགུའི་ལྗོན་བཟང་།

ཚེ་སྒྲུབ་སྤྱི་ལ་སྦྱར་རུང་གི་སྦྱིན་བསྲེག་འདོད་དགུའི་ལྗོན་བཟང་ཞེས་བྱ་བ་བཞུགས་སོ། །

ན་མོ་གུ་རུ་ས་མནྟ་བྷ་དྲ་ཤྲཱི་ཡེ། །སོ་སོར་རྟོགས་པའི་ཡེ་ཤེས་ཆོས་ཀྱི་སྐུ། །ངེས་པ་ལྔ་ལྡན་ལྷུན་གྲུབ་ཚེ་དཔག་མེད། །སྤྲུལ་སྐུ་སྣང་བ་མཐའ་ཡས་པདྨ་འབྱུང་། །དབྱེར་མེད་རང་སྣང་སྟོན་པ་བླ་མར་འདུད། །རིགས་གཅིག་པདྨའི་དབང་ཕྱུག་ཆེན་པོ་ཡི། །བསྙེན་སྒྲུབ་ཁ་སྐོངས་ཚེ་བསོད་ཡེ་ཤེས་གཏེར། །ཡོངས་སུ་རྒྱས་བྱེད་བྱིན་ཟའི་མཆོད་འབུལ་བ། །ཡིད་བཞིན་འདོད་དགུའི་ལྗོན་བཟང་འདི་ན་དགོད། །དེ་ལ་བསྙེན་སྒྲུབ་མཐར་ཕྱིན་སྦྱིན་བསྲེག་གི་མཆོད་པས་ཁ་བསྐོང་བ་དང་། ལས་སྒྲུབ་པའི་མཆོག་ལ། འདི་ཚེ་དཔལ་ཡེ་ཤེས་རྒྱས་པར་བྱེད་པ་དང་། ལྷའི་ངོ་བོ་པདྨ་གསུང་གི་རིགས་ཡིན་པས་ན་གཙོ་ཆེར་དེའི་སྦྱིན་བསྲེག་དུ་འོས་ཀྱང་། འདིར་དེ་གཉིས་ཟུང་འཇུག་གི་སྦྱིན་བསྲེགས་སུ་བྱས་ན་མཆོག་ཏུ་འགྱུར་བས་སྔོན་འགྲོ་ནི། གང་དུ་བྱ་བའི་གཞི་མ་དུལ་བ་ཞིག་ཡིན་བདག་ཉིད་ལྷའི་རྣལ་འབྱོར་སྔོན་དུ་འགྲོ་བས། ས་བརྟགས་བསླང་དབང་བྱ་བརླབས་བཟུངས་བསྲུང་བ་སོགས་བྱ་བ་དང་། དུལ་བ་ཡིན་ན། དཀར་ཕྱོགས་ལ་གཏོར་མས་བརྔན་ཅིང་། བགེགས་བསྐྲད། རྡོ་རྗེའི་ཕྱག་རྒྱས་ས་ལ་རེག་པས་རྟ་མགྲིན་གྱི་སྔགས་དང་། བདེན་པ་དབྱེར་མེད་དག་མཉམ་གྱི་ལྟ་བས་འདུལ་སྦྱོངས་དབང་སྤྱོད་བྱིན་བརླབས་ཐམས་ཅད་འཐུས་སོ། དེ་ཡང་སྤྱིར་དཔྱད་ལེགས་པའི་ས་བཀྲ་ཤིས་པ་དང་། བྱེ་བྲག་ཏུ་དམིགས་བསལ་གྱི་ལས་གང་སྒྲུབ་ལ་བསྔགས་པའི་ས་རུ། སྟེགས་གྲུ་བཞི་བ་བ་བྱུང་དང་བདུད་རྩིའི་གོ་མ་ཡེས་ཁྱེམ་ཅིང་། ས་རྩི་ལས་མདོག་གིས་མཛེས་པར་བརྡལ་ཏེ་ཐིག་ཆེན་བརྒྱད་གདབས་ཏེ། ལྟེ་བ་ཟླ་གམ་གྱིས་དམར་པོ་བཅད་ཉམས་པའི་དབུས་སུ་པདྨ་དམར་པོའི་མཚན་པ། དེའི་ཕྱིར་རིམ་སེར་པོ་གྲུ་བཞི་གཅིག་གི་ཕྱོགས་བཞིར། ཤར་དུ་རྡོ་རྗེ། ༼ དཀར། ༽ རྷོར་རིན་ཆེན། ༼ སེར། ༽ ནུབ་ཏུ་འཁོར་ལོ། ༼ སྔོ། ༽བྱང་དུ་རྒྱ་གྲམ། ༼ ལྗང་། ༽དེའི་ཕྱི་ལ་མུ་ཁྱུད། ༼ དཀར་པོ། ༽ འདབ་བཞི་ལ། མེ་ཏོག་ཕྲེང་བ། པི་ཝཾ། ཞལ་ཟས་ཀྱི་གཟུགས་དང་བཞི། དེའི་ཕྱི་རིམ་ཟླུམ་པོའི་ཕྱོགས་བཞིའི་གནས་ལ་བུམ་པ་བཞི། དེའི་ཕྱི་རིམ་གྲུ་བཞི་ལྗང་གུ་ལ་ལྕགས་ཀྱུ། ཞགས་པ། ལྕགས་སྒྲོག །དྲིལ་བུ་བཞི་བྲི། དེའི་ཕྱི་ལ་རྡོ་ར་འོད་ཕྲེང་ཟླ་ཕྱེད་རྡོ་རྗེ་སོགས་ཀྱིས་མཛེས་པར་བྱས་ལ། རང་གི་གཡས་ཕྱོགས་སུ་མཆོད་སྟེགས་ལ། མར་ཁུ། ཡམ་ཤིང་ ༼ སོར་བཅུ་གཉིས་པ། ༽ ཏིལ། ཀུ་ཤ་དུརྦ། འབྲས་སོ་བ། ནས། མོན་སྲན། གྲོ་ཞོ་ཟན་རྣམས་གཙོ་བོར་ཚང་དགོས། གཞན་དུག་རིགས་མ་ཡིན་པའི་སྨན་སྣ། རིན་ཆེན་ཚོགས་ཚད་ཀྱི་ཕྱེ་མ། སྤོས་བཟང་པོའི་རིགས། ཤིང་ཐོག་སོགས་མངར་གསུམ། དཀར་གསུམ། གང་ལ་སེར་པོ་དང་། འོད་ལྡན་སོགས་མེ་ཏོག །གོས་ཀྱི་རིགས་བྱེ་བྲག་མང་པོ། དར་ཟབ་སོགས་འབྱོར་དགུས་ཚོགས་དང་། འཇིག་རྟེན་འདས་མ་འདས་ཀྱི་གཏོར་མ་སོགས་དང་། ཕྱི་ནང་གི་མཆོད་པ། ཚོགས་ཀྱི་ཡོ་བྱད་ལས་བུམ་སོགས་ཚོགས་པར་བྱས་ནས། གོང་འོག་མ་འདྲེས་པར་ཚར་གཉིས་བཤམས་ནས་བཞག་གོ །གཉིས་པ་དངོས་གཞི་ནི། དེ་ལས་ཞི་བ་ལ་བ་ལུ་སོགས། རྒྱས་པ་ལ་ཨ་ཀ་རུ། །དབང་ལ་ཙནྡན། དྲག་པོ་ལ་འོད་མ་སོག། ལས་ལྷུན་གྲུབ་ལ་ཐམས་ཅད་ཚོགས་པའི་བརྩིགས་ཤིང་སོར་བརྒྱད་ཀྱི་ཟུར་བརྒྱད་དམ་མ་བདེ་ན་གྲུ་བཞིར་བརྩིགས་པའི་ ༼ སྟེང་དུ་ཀུ་ཤའི་ཆུན་པོ་བ་ལང་གི་རྣ་བ་འདྲ་བ་གཉིས་བསྣོལ་ཏེ། རྒྱབ་མའི་རྩེ་མོ་མདུན་མའི་རྩ་བས་ནོན་པར་བྱས་ཏེ་བཀབ། ༽ནེ་ཐབ་ཀྱི་ཕྱོགས་བཞིར་མདའ་བཞི་ལ་དར་ཕྱོགས་མདོག་གིས་བརྒྱན། ཡམ་ཤིང་ཡང་རྒྱུ་དེ་དང་འདྲ། ནང་རོལ་དུ་ཤར་ལྷོར་ཏིང་ལོ་བཞག །རྩུབ་ཤིང་གི་སྒྲོན། ནུབ་བྱང་དུ་རླུང་གཡབ་ལྗང་གུ་བཅུག །གཞན་ཡང་ཐོད་དང་། པང་ཁེབ་རྡོར་དྲིལ་ཐམས་ཅད་ལྡན་པར་བྱ། རྣལ་འབྱོར་པའི་ཆས། ཐབ་དཀྱིལ། མཆོད་རྫས་མ་ལུས་པ་དམར་སེར་དུ་བྱ་བ་དང་། ཁ་ནུབ་བམ་ལྷོ་ནུབ་ཏུ་གྱུ་ཞིང་། དོན་སྟོངས་ཀྱི་སེམས་དང་ལྡན་པས། འདུག་སྟངས་སྐྱིལ་ཀྲུང་གིས། ཕྱི་ནང་གསང་བའི་སྦྱིན་བསྲེག་ཅིག་ཆར་ལྡན་པའམ། མིན་ཀྱང་ཕྱི་དཀྱིལ་འདི་ལ། ཇི་སྐད་དུ། །གནས་རྫས་ཐབ་ཀྱི་རྣམ་པ་དང་། །གཟུངས་དང་གཙོ་སེམས་སྒྲུབ་པ་དང་། །ཕུར་བུ་ལྷ་དུས་ལས་རིམ་དང་། །ལྷག་མ་བཅུ་གཅིག་ཤེས་པར་བྱ། །ཅེས་པ་དོན་བཅུ་གཅིག་ཏུ་བཤད་དེ། སྡོམ་ཚིག་གིས་རྟོག་པ་སྤྲོ་པའི་ས་བོན་ཙམ་དུ་སྤྲོས་བཅས་ཀྱིས་ཡི་གེ་མང་བས་བཞག་གོ་དེ་ལྟར་བྱ་བ་དང་ཆོ་གའི་ཉེར་བསྡོགས་ཐམས་ཅད་སྔོན་དུ་སོང་ནས། རྡོར་དྲིལ་བྱིན་བརླབས་ནི། ཧཱུྃ༔ ཆོས་ཉིད་རང་རྟགས་སྲོག་འཁོར་ལོ༔ རྡོ་རྗེ་དྲིལ་དུ་ཡང་དག་བཟུངས༔ ཆོས་ཉིད་གསུངས་སྒྲས་ཀུན་ཁྱབ་ཅིང་༔ འགྲོ་ཀུན་མ་རིག་གཉིད་ལས་སློང་༔ དུས་གསུམ་རྒྱལ་བའི་དཀྱིལ་འཁོར་ཀུན༔ ཐབས་ཤེས་ཟུང་འཇུག་ཕྱག་རྒྱས་མཚོན༔ ལུས་དང་སེམས་ལ་རྒྱས་བཏབས་པས༔ བདེ་སྟོང་དབྱེར་མེད་ཆེན་པོར་གདལ༔ ཧཱུྃ་བཛྲ་ ༼ རྡོར་གསོལ། ༽ མ་ཧཱ་ཙིཏྟ་ཧོ༔ ཨ་བཛྲ་ ༼ དྲིལ་བསིལ། ༽ གནྜེ་དྷཱརྟུ་ཧོ༔ ཞེས་རྡོ་རྗེ་གསོལ་ཞིང་དྲིལ་བུ་དཀྲོལ་ལ་ ༼ ཨ་ནུ་རཱ་གས་འཁྱུད་རྒྱ་བྱ། ༽ འཁྱུད་རྒྱས་ཕྱག་རྒྱ་བཞི་ལྡན་གྱི་དོན་དྲན་པར་བྱ། དེ་ནས་མཆོད་བསྲེག་གི་རྫས་བྱིན་གྱིས་བརླབས་པ་ནི། ཨོཾ་སྭཱ་བྷ་ཝ་ཤུདྡྷ་སརྦ་ས་དྷ་ནཾ་སྭཱ་བྷ་ཝ་ཤུདྡྷོ྅་ཧཾ། ཨོཾ༔ གནས་ལུགས་སྤྲོས་དང་བྲལ་བ་ཡི། །རང་གདངས་འགགས་པ་མེད་པ་ནི། །དགྱེས་དགུར་རོལ་བའི་འདོད་དོན་དུ། །རང་ཤར་ཆེན་པོར་ལྷུན་གྱིས་གྲུབ། །མ་རྟོགས་གཉིས་འཛིན་རྟོག་སྒྲིབ་ཀུན། །ཡེ་ཤེས་རྒྱན་གྱི་འཁོར་ལོར་སྦྱངས། །ནམ་མཁའ་མཛོད་ཀྱི་ཏིང་འཛིན་གྱིས། །ཀུན་ཏུ་བཟང་པོའི་རྣམ་འཕྲུལ་བཞིན། །ཐུགས་རྗེའི་རང་རྩལ་ཅིར་ཡང་བསྒྱུར། །ཟག་མེད་བདུད་རྩིའི་རང་བཞིན་ཅན། །དཔག་ཡས་ནམ་མཁའི་ཁམས་གང་གྱུར། ཨོཾ་ཨཱཿཧཱུྃ། ༼ ལས་ཆབ་བྲན། ༽གཞུང་གི་མཆོད་པ་བྱིན་རླབས་ཀྱི་སྔགས་ཚང་པར་བརྗོད་རྗེས་པདྨའི་ཕྱག་རྒྱས་རེག་ལ། ཨོཾ་པདྨ་མོ་ཧ་ལམ་ ༼ མ་དག་པའི་དྲི་མ་རྣམ་པར་དག་པར་གྱུར་ཅིག་མཆན། ༽ བི་མ་ལ་བྷ་བ་ཏུ་ཨ་ཧཱུྃ། ༣ ཞེས་མ་དག་པའི་དྲི་མ་སྦྱངས། རཏྣའི་ཕྱག་རྒྱས་རེག་ལ། ཨོཾ་རཏྣ་ད་རུ་ཎ་ནི་དྷི ༼ མི་ཟད་པའི་རིན་པོ་ཆེའི་གཏེར་མཛོད་དུ་གྱུར་ཅིག །མཆན། ༽ ཀཽ་པ་ལ་སྱ་ཏྱེ་སྭཱ་ཧཱ། ༣ དེ་ནས་རྫས་སོ་སོ་ལ་ཕྱག་རྒྱ་དེ་ཉིད་ཀྱི་རེག་ཅིང་། མེ་ཐབ་ལ། ཨོཾ་ཨཀྵི་ཀུནྚཾ་ ༼ མེ་ཐབ་དག་པའི་མཆན། ༽ ཤུདྡྷེ་སྭཱ་ཧཱ། ༣ རྩིག་ཤིང་ལ། ཨོཾ་ཨིནྜ་ནཾ་བི་ཤུདྡྷེ་སྭཱ་ཧཱ། ༣ ཞེས་བརླབས། དགང་བླུགས། ཨོཾ་པུརྞ་ཧུ་ཏཱེ་དཱེ་ཝ་ཛྙཱ་ན་རིསྨ་ཧཱུྃ་སྭཱ་ཧཱ། ༣ དགང་གཟར། ཨོཾ་པཱ་ཏཱི་སིབྷ་སརྦ་སཾ་བྷ་ཝ་པ་ཡ་པ་རི་སྐ་ར་སྱ་ཏྱེ་སྭཱ་ཧཱ། ༣ ཏིང་ལོ་ལ། ཨེ་ཛ་ཤུདྡྷེ་ ༼ མེ་ལྕེ་མཆན། ༽ སྭཱ་ཧཱཿ ༣ མར་ཁུ་ལ། ཨོཾ་བྷ་ཝ་ ༼ འབྱོར་བ། ༽ ཀ་སྭཱ་ཧཱ༔ ༣ ཡམ་ཤིང་ལ། ཨོཾ་བོ་དྷི་བྲིཀྵ་ ༼ གཟི་བརྗིད་ཕུན་སུམ་ཚོགས་པ། ༽ ཡེ་སྭཱ་ཧཱཿ ཏིལ་ལ། ཨོཾ་སརྦ་པ་པཾ་ ༼ དམ་ཚིག་བསྲུང་བ། ༽ ད་ཧ་ན་བཛྲ་ཡེ་སྭཱ་ཧཱ། ༣ ཀུ་ཤ་ལ། ཨོཾ་ཨ་པྲ་ཏི་ཧ་ཏ་ ༼ སྲུང་བ། ༽ བཛྲ་ཡེ་སྭཱ་ཧཱ། ༣ དུར་ཝ་ལ། ཨོཾ་བཛྲ་ཨ་ཡུ་ཥེ་ ༼ ཚེ་ཕུན་སུམ་ཚོགས་པ། ༽ སྭཱ་ཧཱ། ༣ འབྲས་ལ། ཨོཾ་བཛྲ་པུཥྚ་ ༼ བསོད་ནམས་རྒྱས་པ། ༽ ཡེ་སྭཱ་ཧཱ། ༣ སོ་བ་ལ། ཨོཾ་བཛྲ་བི་ཛ་ ༼ ནོར་དང་འབྲུ༴། ༽ ཡེ་སྭཱ་ཧཱ། ༣ ནས་ལ། ཨོཾ་མ་ཧཱ་བཻ་ཀེ་ཡེ་ ༼ མྱུར་བའི་ཤུགས། ༽ སྭཱ་ཧཱ། ༣ སྲན་མ་ལ། ཨོཾ་མ་ཧཱ་བ་ལ་ཡེ་ ༼ སྟོབས་ཕུན་སུམ་ཚོགས། ༽ སྭཱ་ཧཱ། ༣ གྲོ་ལ། ཨོཾ་བཛྲ་གསྨ་རི་ཡེ་ ༼ ནད་མེད་པ། ༽ སྭཱ་ཧཱ། ༣ ཞོ་ཟན་ལ། ཨོཾ་བཛྲ་སྟྭཾ་ ༼ བདེ་བ་ཕུན་སུམ་ཚོགས་པ། ༽ བྷ་ཡེ་སྭཱ་ཧཱ། ལན་གསུམ་རེས་བྱིན་གྱིས་རླབས། ༼ མེ་སྦར་བཟུང་ལ། ༽རཾཿ ཆོས་སྐུ་སོར་རྟོགས་ཡེ་ཤེས་ཆེ༔ ལོངས་སྤྱོད་རྫོགས་སྐུ་གོས་དཀར་མོ༔ སྤྲུལ་སྐུ་དྲང་སྲོང་མེ་ཡི་ལྷ༔ མེ་ནི་ཡེ་ནས་མངོན་བྱང་ཆུབ༔ འགྲོ་དོན་དམ་ཚིག་སེམས་དཔར་བཞེངས༔ རཾ་ཛྭ་ལ་སྥ་ར་ཎ་ས་མ་ཡ་ཕཊ་ཛ༔ ཞེས་མེ་སྤར། ༼ རླུང་གཡབ་བཟུང་ལ། ༽ ཡཾཿ ངོ་བོ་བྱ་གྲུབ་ཡེ་ཤེས་ལ༔ རང་བཞིན་དམ་ཚིག་སྒྲོལ་མ་དང་༔ ཐུགས་རྗེ་ཤཱ་ཝ་རི་བའི་གར༔ རླུང་ནི་ཡེ་ནས་རྫོགས་སངས་རྒྱས༔ ཕྲིན་ལས་རླུང་གི་འཁོར་ལོར་བསྐུལ༔ ༼ ལན་གསུམ་གཡབ། ༽ ཨོཾ་བཛྲ་མ་ཧཱ་ཛྙཱ་ན་བ་ཡུ་ཧོ༔ ཞེས་རླུང་གཡབ་ཀྱིས་གཡབ་ཅིང་༔ ༼ དགང་བླུགས་བཟུང་ལ། ༽ མེ་རླུང་ཐབས་ཤེས་སྙོམས་འཇུག་གིས༔ འཇུ་འདུལ་སྨིན་བསྐྱེད་སྲོག་དེ་འཛིན༔ འདི་ནི་རྡོ་རྗེའི་དམ་ཚིག་སྟེ༔ ལྷ་ཚོགས་དགྱེས་ཤིང་གཟི་མདངས་བསྐྱེད༔ མ་ཧཱ་པཱུ་ཛ་ཤུདྡྷེ་ཏེ་ཛྭ་བཛྲ་ཀུ་རུ་ཧོ༔ དེ་ནས་མར་ཁུས་མེ་གསོས་ནི། ཨོཾ་ཨགྞེ་ཡེ་སྭཱ་ཧཱ། ལན་བདུན། ༼ གྱིས་དགང་བླུགས་ཕུལ། ༽ དེ་ནས་ལས་སྔགས་དང་ ༼ མེ་ཐབ་བསང་སྦྱངས། ༽སྭཱ་བྷ་ཝས་སྦྱངས་ཞིང་། སྟོང་པའི་ངང་ལས་ཧྲཱིཿ ཏྲཱཾ་ཡོངས་སུ་གྱུར་བ་ལས་རྒྱས་པའི་མེ་ཐབ་གྲུ་བཞི་བ་ཁ་ཁྱེར་དང་མུ་རན་ལ་རིན་པོ་ཆེའི་ཕྲེང་བས་བསྐོར་བ། དབུས་སུ་སྣ་ཚོགས་པདྨས་མཚན་པ་ལ། ཕྱི་རོལ་གྱི་གྲྭ་བཞིར་ཟླ་ཕྱེད་རྡོ་རྗེའི་མཚན་པ། ཁ་དོག་དམར་སེར་འོད་དང་འོད་ཟེར་འབར་བ། དྭངས་ཤིང་བསྒྲིབ་པ་དང་བྲལ་བ། མཉམ་པ་ཉིད་དང་སོར་རྟོགས་རྒྱན་དུ་ཤར་བའི་འོད་ཟེར་ཀུན་ནས་ཀུན་ཏུ་འབར་ཞིང་གསལ་བས་འགྲོ་བ་མཐའ་དག་གི་མ་རིག་པའི་མུན་ཁམས་བཅིལ་ཞིང་ཞིང་ཁམས་ཐམས་ཅད་མཆོད་པའི་སྤྲིན་གྱིས་རྒྱས་པར་འགེངས་པའི་དབུས་སུ། པདྨ་དང་ཉི་མའི་སྟེང་དུ་རཾ་ཡིག་ཡོངས་སུ་གྱུར་བ་ལས། ཕྱག་མཚན་མདའ་དར་དང་གཏེར་བུམ་ཡོངས་སུ་གྱུར་པ་ལས། མེ་ལྷ་ཨགྞེ་རཱ་ཛ་སྐུ་མདོག་དམར་སེར་གསེར་བཙོ་མའི་མདོག་ལྟ་བུའི་ཞལ་གཅིག་ཕྱག་བཞིའི་རྩ་ཕྱག་གཉིས་ཀྱིས་བསྒྲང་ཕྲེང་དང་གུནྡྷེ་བསྣམས་པ། འོག་མ་གཉིས་ན་མདའ་དར་དང་གཏེར་ཆེན་པོའི་བུམ་པ་འཛིན་པ། རྭ་སྐྱེས་སེར་པོའི་སྟེང་དུ་འགྱིང་ཞིང་དྲང་སྲོང་གི་ཆ་ལུགས་ཐམས་ཅད་ཡོངས་སུ་རྫོགས་པ་ལ། དྲང་སྲོང་གི་འཁོར་གྱིས་བསྐོར་བར་གསལ་ལོ། ༼ མེ་དཔྱད།༽ལྷ་ལ་དམིགས་ཏེ། ཨོཾ་སརྦ་ཏ་ཐཱ་ག་ཏ་མ་ཧཱ་ཀ་ཡ་བཛྲ་སྭཱ་བྷ་ཝ་ཨཏྨ་ཀོ྅་ཧཾ། ༼ རྡོ་རྗེའི་རྩེ་ལྔ་བ་རེ་རེའི་རྒྱ་བཅས། ༽ ཝཀྐ་བཛྲ་སྭཱ་བྷ་ཝ་ཨཏྨ་ཀོ྅་ཧཾ། ཙིཏྟ་བཛྲ་སྭཱ་བྷ་ཝ་ཨཏྨ་ཀོ྅་ཧཾ། ༈ ཨོཾ་མ་ཧཱ་ས་མ་ཏ༴ ༼ སྲིན། ༽ཨདྴར༴ ༼ མཛུབ ༽ཤུ་ནྱ་ཏ་༴ ༼ གུང་། ༽ པྲེ་ཏེ་བྷཀྵ༴ ༼ མཐེབ། ༽ ཀྲི་ཏཱེ་ནུཥྛ༴ ༼ མཐེའུ་ཆུང་ ༽ མཆན། དེ་ནས་གནས་གསུམ་བྱིན་བརླབས་དང་། རིན་འབྱུང་གཙོར་བོར་གྱུར་བའི་རིགས་ལྔའི་དབང་བསྐུར་ལ། ལྷ་ཚོགས་དེ་རྣམས་ཀྱི་གནས་གསུམ་དུ་རྡོ་རྗེ་གསུམ་གྱི་མཚན་པའི་ཡི་གེ་ལས་འོད་ཟེར་འཕྲོས་པས་དབྱིངས་དང་རང་བཞིན་གྱི་གནས་ནས་མེ་ལྷ་འཁོར་དང་བཅས་པ་སྤྱན་དྲངས། དེ་ནས་མདའ་དར་གཡབ་ཅིང་། ཧཱུྃ༔ དད་པ་དང་ནི་དམ་ཚིག་གིས། འབོད་དོ་བསྐུལ་ལོ་ཐུགས་དམ་ཅན། །དཔག་མེད་མགོན་དང་པདྨ་དབང་། །འཇིག་རྟེན་ཚུལ་གྱིས་དོན་གཉིས་མཛད། །མེ་ལྷའི་རྒྱལ་པོ་དྲང་སྲོང་མཆོག །འཇིག་རྟེན་འདས་ཀྱང་འཇིག་རྟེན་ཚུལ། །འདི་ཉིད་དུ་ནི་གཤེགས་སུ་གསོལ། །ཨགྞེ་དེ་ཝ་རི་ཥི་ཨཾ་ཀུ་ཤ་ཛཿ ༼ རོལ་མོ་བྱ། ༽ཛཿཧཱུྃ་བཾ་ཧོཿ ༼ རང་རྒྱ་བཅས། ༽ ཞེས་ཕྱག་རྒྱ་བཞིའི་དྲངས་དབབས་བརྟན་དགྱེས་པ་བསྐྱེད་དོ། །དེ་ནས་མཆོད་པ་ནི། ཧཱུྃཿ དཔག་ཡས་ནམ་མཁའི་རྒྱན་གྱུར་བའི། །མཆོད་པའི་བྱེ་བྲག་དམ་པ་ནི། །ཟག་མེད་ཡེ་ཤེས་ངོ་བོ་ཉིད། །སེམས་ཅན་དོན་དུ་བཞེས་སུ་གསོལ། །ཨོཾ་བཛྲ་ཨརྒྷཾ་སོགས། ༼ རོལ་མོ། ༽ མཆོད་པ་ཆ་ཚང་དང་བཅས་རྫོགས་མཐར། ཧཱུྃ༔ ༼ ཕྱེད་ཕྱག ༽ དུས་གསུམ་རྒྱལ་བའི་ཕྲིན་ལས་སྐུ། །ཐབས་ཀྱི་སེམས་ཅན་འདུལ་དོན་དུ། །དྲང་སྲོང་ཆེན་པོའི་ཆོ་རོལ་བ། །བྲམ་ཟེའུ་དབང་ཕྱུག་ཁྱོད་ལ་བསྟོད། །ཅེས་བསྟོད་པས། མེ་ལྷ་དགྱེས་པའི་འཛུམ་བག་དང་བཅས་ནས་ཞལ་ཅུང་ཟད་གདེངས་ནས་རིན་པོ་ཆེའི་སྦུ་གུའི་ལྗགས་ཀྱིས་བསྲེགས་བླུགས་ཀྱི་བདུད་རྩིའི་བཅུད་དྲངས་ཏེ་གསོལ་བར་དམིགས་ལ། །བྱང་ཆུབ་མཆོག་གི་ཕྱག་རྒྱའི་དགང་བླུགས་བཟུང་ནས། ཨོཾ་ཨགྞེ་ཡེ་སྭཱ་ཧཱ། བདུན་གྱིས་མར་ཁུ་ཕུལ་ནས། །གཟར་བླུགས་ཁ་སྦྱར་བ་པུས་མོ་ལས་ཕྱིར་མི་འདའ་བར་བསྐོར་ཏེ། ཨོཾ་ཨགྞེ་དེ་ཝཱ་རི་ཥི་ཧ་བྱཱ་ཀ་བྱཱ་མ་ཧཱ་ཡ་ན་དེ་བྱཱ་རྣལ་འབྱོར་བ་བདག་ཅག་དཔོན་སློབ་ཡོན་མཆོད་འཁོར་དང་བཅས་པའི་ཚེ་བསོད་དཔལ་འབྱོར་ཡེ་ཤེས་ཡོན་ཏན་མངོན་ཤེས་རྫུ་འཕྲུལ་སྟོབས་འབྱོར་གཟི་བརྗིད་ཐམས་ཅད་པུཥྚཾ་ཀུ་རུ་སྭཱ་ཧཱ། ཞེས་ལན་བདུན་གྱིས་དགང་བླུགས་ཕུལ་ལོ། ཡམ་ཤིང་ལ། ཨོཾ་བོ་དྷི་བྲིཀྵ་ཡེ་སྭཱ་ཧཱ། མར་ཁུ་སོགས་རྫས་གཞན་རྣམས་ལ། །ཨོཾ་ཨགྞེ་ཡེ་དེ་ཝི་རི་ཥི་ཧ་བྱཱ་ཀ་བྱཱ་མ་ཧཱ་ཡ་ན་ཝ་ཀ་པུཥྚཾ་ཀུ་རུ་ཡེ་ ༼ གོང་གི་སྔགས་རྣམས་ལ་ལན་བདུན་རེ་རྫས་ལྷག་འཇོག་དགོས། ༽ སྭཱ་ཧཱ། ཞེས་བདུན་རེའི་ཕུལ་ཀྱང་ཡང་བསྡུ་ན། ཨོཾ་ཨགྞེ་དེ་ཝི་ཨ་ཧུ་ཏེ་ཁ་ཁ་ཁཱ་ཧི་ཁཱ་ཧི་པཎྱེ་ཨཱ་ཡུརྫྙཱ་ན་པུཥྚཾ་ཀུ་རུ་ཧོ། ཞེས་རྫས་རེ་ལ་བདུན་རེ་སྟེ་བདུན་ཅུ་རྩ་བདུན་གྱིས་བདུན་མཚམས་འདོད་གསོལ་བཏགས་ཀྱང་ཆོག །དེ་ཙམ་མ་གྲུབ་ཀྱང་ཉེར་གཅིག་སོགས་སྐབས་དང་བསྟུན་ནོ། མཐར། ན་མོ།རིག་པའི་རྒྱལ་པོ་ཁྱེད་ཀྱིས་ལས་ཐམས་ཅད་མཐར་རྒྱས་སུ་འགྲུབ་པ་དང་། བསྲེགས་རྫས་ཡེ་ཤེས་ལྷའི་ཞལ་དུ་འབུལ་ཞིང་མེ་ཉིད་ཡེ་ཤེས་ཀྱི་བདུད་རྩིར་བྱིན་གྱིས་བརླབས་ནས་མཆོག་ཐུན་མོང་གི་དངོས་གྲུབ་ཐམས་ཅད་འགྲུབ་པའི་ཕྲིན་ལས་མཛོད་ཅིག །ཅེས་ཡུངས་དཀར་ཐབ་དུ་དོར་ཞིང་འདོད་དོན་གསོལ། མེ་ལྷའི་འོད་ཀྱིས་རང་དང་བསྒྲུབ་བྱའི་ཚེ་བསོད་དཔལ་ཡོན་གཟི་བརྗིད་བཀྲག་མདངས་ཐམས་ཅད་རྒྱས་པར་བསམ་ལ། ཧཱུྃ། ༼ ཕྱེད་ཕྱག ༽ ཤེས་རབ་ཡེ་ཤེས་མེ་བོ་ཆེས། །འོད་ཆེན་རྣམ་པར་སྣང་བ་ཡིས། །གཟི་བརྗིད་ཆེན་པོ་འོད་གསལ་བའི། །དྲང་སྲོང་མཆོག་ལ་ཕྱག་འཚལ་བསྟོད། །ཚངས་པར་སྤྱོད་ཅིང་ཞི་མཛད་སྐུ། །འབར་དང་བསྲེགས་བྱེད་ཟ་བ་པོ། །ཉོན་མོངས་སེམས་ཅན་གདུང་བ་སེལ། ཁྱོད་ལ་ཕྱག་འཚལ་མཆོད་ཅིང་བསྟོད། །ཅེས་བསྟོད་ཅིང་། བསྲེགས་ལྷ་མཆོད་པ་ནི། སྭཱ་བྷ་ཝ་ཡིས་སྟོང་པར་སྦྱངས། སྟོང་པའི་ངང་ལས། ཧཱུྃ༔ དཀྱིལ་འཁོར་ལྷ་ཚོགས་ཀུན་གྱི་ཞལ༔ མེ་ལྷའི་ལྟོ་བ་ཡངས་པ་རུ༔ རང་བཞིན་ལྷུན་གྲུབ་དཀྱིལ་འཁོར་དབུས༔ རྨ་བྱ་ཉི་ཟླ་པདྨའི་སྟེང་༔ ཚེ་ཡི་བདག་པོ་སྐུ་མདོག་དམར༔ མཉམ་བཞག་ཚེ་ཡི་བུམ་པ་འཛིན༔ རིན་ཆེན་རྒྱན་རྫོགས་ཅོད་པཎ་ཅན༔ གོས་དཀར་ཡུམ་དང་གཉིས་མེད་འཁྲིལ༔ དམར་སེར་གཞོན་ཚུལ་བདེ་བ་རྒྱས༔ ཚེ་མདའ་གཡས་ལ་ཚེ་བུམ་གཡོན༔ བདེ་ཆེན་ཡབ་དང་གཉིས་མེད་འཁྲིལ༔ ཚེ་དང་དཔལ་གྱི་འཕྲོ་འདུ་གསལ༔ དེ་མདུན་མི་བསྐྱོད་ཡབ་ཡུམ་མཐིང་༔ གཡས་སུ་རིན་འབྱུང་ཡབ་ཡུམ་སེར༔ རྒྱབ་ཏུ་རྣམ་སྣང་ཡབ་ཡུམ་དཀར༔ གཡོན་ཏུ་དོན་གྲུབ་ཡབ་ཡུམ་ལྗང་༔ ཡབ་རྣམས་མཉམ་བཞག་ཚེ་བུམ་འཛིན༔ སྐྱིལ་ཀྲུང་གཟི་བརྗིད་ལྡན་པར་བསྐྱེད༔ ཡུམ་རྣམས་ཡབ་དང་གཉིས་མེད་འཁྲིལ༔ ཚེ་མདའ་གཡས་ལ་ཚེ་བུམ་གཡོན༔ ཤར་དུ་ལཱ་སྱེ་དཀར་མོ་ལ༔ ལྷོ་རུ་མཱ་ལྱེ་སྔོན་མོ་བསྐྱེད༔ ནུབ་ཏུ་གཱིརྟི་དམར་མོ་སྟེ༔ བྱང་དུ་ནཱིརྟི་ལྗང་གུ་བསྐྱེད༔ དེ་ཡི་ཕྱི་རིམ་འཁོར་ཡུག་ལ༔ ཤར་ཕྱོགས་དཀར་མོ་མགྱོགས་མ་སྟེ༔ ལྷོ་ཕྱོགས་སྔོན་མོ་རྒྱས་མའི་ཚུལ༔ ནུབ་ཕྱོགས་དབང་གི་མགྱོགས་མ་དམར༔ བྱང་ཕྱོགས་ལས་ཀྱི་མགྱོགས་མ་ལྗང་༔ དེ་ཡི་ཕྱི་རིམ་པདྨ་དང་༔ མི་འགྱུར་རྡོ་རྗེའི་ཟུར་བཅས་ལ༔ ཤར་དུ་ལྕགས་ཀྱུ་ལྷོར་ཞགས་པ༔ ནུབ་ཏུ་ལྕགས་སྒྲོག་བྱང་དྲིལ་བུ༔ ཚེ་ཡི་བདག་པོ་མགྱོགས་མར་བཅས༔ ཀུན་ཀྱང་ལོངས་སྤྱོད་རྒྱན་དང་ལྡན༔ དེ་ལྟར་གཙོ་འཁོར་ལྷ་རྣམས་དང་༔ གཞན་ཡང་ཚེ་ལྷ་རིག་འཛིན་ཚོགས༔ ཉི་མ་དང་ནི་འོད་ཟེར་བཞིན༔ ཚེ་ཡི་འཕྲོ་འདུ་འོད་ཟེར་ཅན༔ ལྷུན་གྲུབ་འགྱུར་བ་མེད་པར་བསྒོམ༔ མོ་ཡང་ན་མདུན་བསྐྱེད་ནང་བསྒྲུབ་ལྟར་བྱ། རྩ་བསྒྲུབ་ཡིན་ན། གནས་གསུམ་ཡི་གེ་འབྲུ་གསུམ་དང་༔ ཐུགས་སྲོག་ཏིང་འཛིན་སེམས་དཔའ་ཧྲཱིའི༔ མཐའ་མར་སྔགས་ཀྱི་ཕྲེང་བས་བསྐོར༔ དེ་ལས་འཕྲོས་པའི་འོད་ཟེར་གྱིས༔ བདེ་བ་ཅན་ནས་ཡེ་ཤེས་པ༔ སྤྱན་དྲངས་གཉིས་སུ་མེད་པར་གྱུར༔ ཨཱ་ཡུ་སརྦ་ཏ་ཐཱ་ག་ཏ་ཛྙཱ་ན་མུ་དྲ་ས་མ་ཡ་ཛ་ཛ༔ ༼ ཚིག་བདུན་གསོལ་འདེབས་བཅས་མེ་དར་ཐོགས་ལ། ༽ ཧཱུྃ༔ ནུབ་ཕྱོགས་བདེ་ཆེན་དག་པའི་ཞིང་༔ སོགས། ཧཱུྃ༔ དེང་གི་གནས་མཆོག་སོགས་ནས་ཕྱག་འཚལ་ཡན་རྫོགས་རྗེས་བྱོན་སྐྱེམས་ནི། དཀྱིལ་འཁོར་གྱི་ལྷ་ཚོགས་ཐམས་ཅད་ལས་འོད་ཟེར་སེར་པོའི་རང་བཞིན་ཞིང་ཁམས་ཀུན་ཏུ་ཁྱབ་པར་རྒྱས་པའི་ཕྲིན་ལས་ཐམས་ཅད་ཐོགས་མེད་དུ་བསྒྲུབ་པ་ལ་ཆེས་དཔའ་ཞིང་། ཞལ་འཛུམ་པ་དང་བཅས་ཅུང་ཟད་གདེངས་པའི་ཉམས་ཀྱིས་ལྗགས་པདྨའི་སྦུ་གུ་ཅན་གྱི་བསྲེགས་བླུག་གི་བཅུད་དྲངས་ཏེ་གསོལ་བར་བསམ་ལ་རྩ་སྔགས་མཐར། ཨོཾ་ཨགྞེ་ཡེ་སྭཱ་ཧཱ༔ ཞེས་བྱོན་སྐྱེམས་ལན་བདུན་ཕུལ་ཞིང་། ཧཱུྃ༔ འཁོར་འདས་དག་མཉམ་བདེ་བ་ཆེའི༔ རྒྱན་སྣང་རྣམ་ཀུན་མཆོག་ལྡན་པ༔ ཀུན་ཏུ་བཟང་པོའི་ཆོ་འཕྲུལ་ལས༔ འདོད་ཡོན་ལོངས་སྤྱོད་རོལ་བར་བསྒྱུར༔ ཟག་མེད་ཡེ་ཤེས་བདུད་རྩིའི་སྤྲིན༔ འཛད་མེད་ནམ་མཁའི་གཏེར་ཆེན་མཛོད༔ རྣམ་པ་ཕྱི་ནང་གསང་བ་དང་༔ ཡང་གསང་བླ་ན་མེད་པ་ཡི༔ མཆོད་རྫས་བསྐང་རྫས་བཞེས་སྤྲོ་རྒྱན༔ ཡེ་ཤེས་རོལ་བས་བྱིན་རླབས་ཏེ༔ བསོད་ནམས་ཞིང་མཆོག་དམ་པ་ལ༔ མཚན་དཔེའི་གཟི་མདངས་བསྐྱེད་ཕྱིར་འབུལ༔ ཐུགས་རྗེའི་འགྲོ་བའི་དོན་དུ་བཞེས༔ དམ་ཚིག་དགྱེས་པ་ཡོངས་བསྐོངས་ནས༔ བདག་དང་སེམས་ཅན་ཐམས་ཅད་ཀྱི༔ སྡིག་སྒྲིབ་ཉམས་ཆགས་ཀུན་དག་ནས༔ ནད་དང་གནོད་པ་བར་ཆད་ཕྱོགས༔ མ་ལུས་ཞི་ཞིང་བཟློག་པ་དང་༔ ཚེ་བསོད་དཔལ་འབྱོར་གཟི་བརྗིད་སྟོབས༔ ཁ་རྗེ་དབང་ཐང་སྙན་གྲགས་མཐུ༔ ཤེས་རབ་ཡེ་ཤེས་ཡོན་ཏན་དཔལ༔ གཟུངས་སྤོབས་ཏིང་འཛིན་རྒྱས་པར་མཛོད༔ ཁམས་གསུམ་སྲིད་པ་གསུམ་གནས་དང་༔ མཁའ་འགྲོ་གྲུབ་པ་ཅན་དག་དང་༔ ཟས་ནོར་ལོངས་སྤྱོད་ཆོས་སྲིད་དཔལ༔ འཁོར་འདས་དཔལ་ཡོན་དབང་དུ་བསྡུས༔ ཕྱི་ནང་གསང་བ་ཡང་གསང་གི༔ ཡིད་སྲུབས་སྡེ་བཞིའི་རུ་ཏྲའི་དཔུང་༔ འཁྲུལ་སྣང་འཁྲུལ་འཛིན་འཁྲུལ་འབྲས་ཀུན༔ མི་གནས་ཆོས་ཀྱི་དབྱིངས་སུ་སྒྲོལ༔ ཐུན་མོང་དངོས་གྲུབ་གྲུབ་ཆེན་བརྒྱད༔ དབང་ཕྱུག་ཟད་པར་ཟིལ་གནོན་དང་༔ སྤྱན་དང་མངོན་ཤེས་རྫུ་འཕྲུལ་སོགས༔ ཕུན་སུམ་ཚོགས་པའི་དངོས་གྲུབ་སྩོལ༔ ཐུན་མིན་རིག་འཛིན་རྣམ་པ་བཞི༔ དབང་བཅུ་དབང་ཕྱུག་མཆོག་བརྒྱད་དང་༔ སྟོབས་བཅུ་མི་འཇིགས་མ་འདྲེས་ཆོས༔ ཁ་སྦྱོར་ཡན་ལག་བདུན་ལྡན་དང་༔ འགྲོ་འདུལ་ཕྲིན་ལས་ལྷུན་གྲུབ་ཀྱི༔ མགོན་པོའི་གསང་གསུམ་རྣམ་ཐར་གྱི༔ གྲུབ་མཐའི་རྗེས་སུ་སྙོགས་པ་ཡི༔ དོན་གཉིས་ལྷུན་གྲུབ་དངོས་གྲུབ་སྩོལ༔ ཞེས་བརྗོད་ཅིང་། ཡམ་ཤིང་ལ་རྩ་སྔགས་མཐར། ཨོཾ་བྷོ་དྷི་བྲིཀྵ་ཡེ་སྭཱ་ཧཱ། མར་ཁུ་ལ། རྩ་སྔགས་མཐར། ཨོཾ་བྷ་ཝ་ཀ་སྭཱ་ཧཱ། དེ་ནས་རྫས་སོ་སོར་འབུལ་ན་གོང་ལྟར་དང་། ཡང་ན། ༼ བསྡུ་ན། ༽ ཨོཾ་ཡ་ཛྱཾ་ ༼ མཆོད་ཡུལ། ༽ མཎྜ་ལཾ་དེ་ཝ་ ༼ དཀྱིལ་འཁོར་ལྷ་ཚོགས། ༽སཾ་གྷ་ ༼ འཁོར་བཅས། ༽ པུ་ནུ་བ་ར་ར་ཎ་ ༼ ཞལ་དུ་བསྲེགས་བླུག་གི ༽ ཨ་ཧུ་ཏི་ཨརྩི་ཏ་བྱཱ་ ༼ མཆོད་པ་ ༽ ས་མུ་ཊ་ ༼ རྒྱ་མཛོད། ༽ ཤྲི་ ༼ མཆོག་ ༽ཡནྟ་ནིརྱ་ཏ་ཡ་མ་ ༼ འབུལ་བར་བགྱི། ༽ དརྵ་ ༼ བཞེས་ཤིག ༽ ཁཱ་ཧི། ༼ རོལ་ཅིག ༽ ཞེས་པ་གསུམ་མཐར། རྩ་སྔགས། ཨ་མྲ་ཏཾ་ཁཱ་ཧི། བཏགས་ཏེ་རྫས་སྤུངས་སྡེར་མ་དགུར་བྱས་ཏེ། བཅུ་མཚམས་ནས་འདོད་གསོལ་དང་བཅས་ཚར་བཅུ་འགྲོ་བར་བྱ། དེའི་བསྙེན་བསྒྲུབ་ཀྱི་ཁ་བསྐོང་འོང་ངོ་། ཨོཾ་བཛྲ་ཏཾ་བུ་ལ་ཡེ་སྭཱ་ཧཱ། ཞེས་སོ་རྩི་འབུལ། དེ་ནས་དེ་ལ༴ ཝསྟྲས་ན་བཟའ་འབུལ། ལྷ་ཚོགས་རྣམས་ཀྱི་ཞལ་ནས་སྔགས་ཀྱི་སྒྲ་དང་ཐུགས་རྗེའི་འོད་ཟེར་སེར་པོ་འཕྲོས་པས་ཁམས་གསུམ་སེམས་ཅན་ཐམས་ཅད་ཀྱི་རྒྱུ་འབྲས་ཀྱི་དབུལ་བ་མཐའ་དག་བསལ་ཏེ། བླ་ཡར་བ་བཀུག་ཚེ་ཟད་པ་བསྲིངས་ཉམས་པ་གསོས་འཐོར་བ་བསྡུས་ཆད་པ་མཐུད་ནས་འཆི་མེད་རྡོ་རྗེའི་བདག་ཉིད་མགོན་པོ་ཚེ་དཔག་མེད་རིགས་ལྔའི་རྣམ་པར་བྱིན་གྱིས་བརླབས་པར་བསམ་ལ། ཡང་རྫས་བསྡུས་ལན་ལྔར་འགྲོ་ཞིང་བཅུ་རེའི་མཚམས་སུ་འདོད་གསོལ་སྔར་བཞིན་བྱའོ། །དེ་ནས་གཞུང་གི་མཆོད་པས་ཉེར་སྤྱོད་འདོད་ཡོན་སྨན་རཀ་གཏོར་གསུམ་དང་བཅས་ཐབ་ཏུ་འབུལ་ལ། ༼ ཡུངས་དཀར་བཟུང་ལ། ༽ ཧཱུྃ༔ ཆོས་དབྱིངས་མཁའ་ཀློང་ཡངས་བ་རུ། །དམ་རྫས་བདུད་རྩི་འདི་འབུལ་བས། །རྣལ་འབྱོར་བདག་ཅག་འཁོར་བཅས་ཀྱི། །ཚེ་བསོད་དཔལ་འབྱོར་རྒྱས་པ་དང་། །དམ་ཚིག་ཉམས་ཆགས་ཀུན་བྱང་ནས། །མཆོག་ཐུན་དངོས་གྲུབ་ལྷུན་གྲུབ་ནས། །ཚེ་དཔག་མེད་པའི་གནས་ཐོབ་ཤོག །ཞེས་ཡུངས་དཀར་ཐབ་དུ་དོར་རོ། གཞུང་གི་བསྟོད་པའང་བྱ་ཞིང་། ཡི་གེ་བརྒྱ་བས་ནོངས་པ་བཤགས། སྤྲོ་ན་ཚོགས་ཀྱི་འཁོར་ལོའི་མཆོད། དེ་ནས། ལྷ་ཚོགས་རྣམས་ཀྱིས་སྐུ་གསུང་ཐུགས་ནས་འོད་ཟེར་དཀར་དམར་མཐིང་གསུམ་འཇའ་སྤྲིན་གྱི་རྣམ་པར་འཕྲོས་ནས་བདག་ལ་དབང་བསྐུར་བྱིན་གྱིས་བརླབས་ནས་མཆོག་ཐུན་མོང་གི་དངོས་གྲུབ་ཐོབ་པར་དམིགས་ལ། ཡེ་ཤེས་པ་དབྱིངས་སུ་གཤེགས། དམ་ཚིག་པ་རང་ལ་ཐིམ་པར་བསམ་མོ། །དེ་ནས་མེ་ལྷའི་གཏང་རག་ནི། སྔར་གྱི་རྫས་ལྷག་བྱིན་བརླབས་ལ། །ཨོཾ་ཨགྞེ་ཡེ་ས་མ་ཡ་ཛ༔ ཛཿཧཱུྃ་བཾ་ཧོ༔ གཉིས་སུ་མེད་པར་གྱུར། དགང་བླུགས་སྔར་བཞིན་ཕུལ་ནས་སུ། རྫས་ལྷག་མ་རྣམས་གསུམ་གསུམ་གྱིས་ཕུལ་ནས། ཨོཾ་བཛྲ་ཏཾ་བུ་ལ་ཡེ་སྭཱ་ཧཱ། སོ་རྩི་དང་གོས་འབུལ། དེ་ནས་ཉེར་སྤྱོད་ཀྱིས་མཆོད་དེ། བདག་ཅག་དཔོན་སློབ་ཡོན་མཆོད་འཁོར་དང་བཅས་པས་མཆོད་སྦྱིན་གྱི་རྫས་དང་། ཡོ་བྱད་གཞུང་བཞིན་མ་ཚང་པ་དང་རྒྱུ་ཆུང་ཕུད་ཉམས་པ་ལྷ་ཉེ་བར་མ་བསྒོམ་པ་ཏིང་ངེ་འཛིན་ཐང་ལྷོད་དུ་གྱུར་བ་སྔགས་ཀྱི་གྲངས་ལྷག་ཆད་དང་། ཡི་གེའི་སྐྱེ་གནས་ལོག་པ་ཆོ་གའི་འཁྲིགས་ཆོག་སྤྱི་དང་ཁྱད་པར་ལྷག་པའི་དམ་ཚིག་ཉམས་པ། རྫོགས་རིམ་གྱི་ལྟ་བས་མ་ཟིན་པ། བསྐྱེད་རྫོགས་ཟུང་དུ་མ་འབྲེལ་བར་རིས་ཆད་དུ་གྱུར་བའི་ཉམས་ཆགས་ཐམས་ཅད་དག་པར་གྱུར་ཅིག །ཐམས་ཅད་སྐོངས་བར་གྱུར་ཅིག་སརྦ་པ་པཾ་ཤིནྟཾ་ཀུ་རུ་སྭཱ་ཧཱ། ས་མ་ཏི་པུཥྚཾ་ཀུ་རུ་ཡེ་སྭཱ་ཧཱ། དེ་ནས་ཉེར་སྤྱོད་པས་མཆོད་ཅིང་། སྔར་གྱི་བསྟོད་པས་བསྟོད་དེ། ༼ མེ་ལྷའི་གཏོར་མ ༽ ཨ་ཀཱ་རོས་གཏོར་མ་བརླབས་ལ་ཐབ་དུ་ཕུལ་ནས། ཕྲིན་ལས་བཅོལ་བ་ནི། མཆོད་སྦྱིན་གཏོར་མ་འདི་བཞེས་ལ། སོགས། མེ་ལྷ་ཡེ་ཤེས་པ་གཤེགས་དམ་ཚིག་པ་འབར་བའི་རྣམ་པར་གྱུར་བར་བསམ་མོ། །ལས་མི་འཇིག་པའི་ཕྱིར་རྒྱས་པའི་བྲོས་བསྐོར་ཞིང་། བསྔོ་སྨོན་བཀྲ་ཤིས་ཀྱིས་མཐའ་བརྒྱན་པར་བྱའོ། །སྔོན་ནས་གླིང་བཞིའི་སྒྲོན་མེ་ཡོད་བཞིན་དུ། །མེ་ཁྱེར་སྲིན་བུར་རེ་ལྟོས་ཅི་སྟེ་འཚལ། འོན་ཀྱང་ཁྱེད་ཐུགས་དགྱེས་པ་སྐོངས་བ་དང་། རྟེན་འབྲེལ་ལེགས་བསམ་བསྒྲིགས་པའི་ཤོམས་ར་ཙམ། དུས་མཐའི་སྔགས་མིང་ཕྱི་ནང་གསང་བ་ཡི། །དེ་ཉིད་མི་ལྡན་སྙམ་པའི་སོམ་ཉི་ལས། ཡིད་ཆད་རང་གནོང་དང་བཅས་ངལ་བ་བྱས། གང་ཕྱིར་གཏོ་ཡས་ལམ་དུ་མ་སྦྱངས་སླད། ཅེས་པའང་རི་བོ་དེ་ཤན་ཡ་གའི་བྲག་ཕུག་མ་ར་ཏི་ཀ་གཉིས་པ་ན་བཞུགས་པའི་འཆི་མེད་རྡོ་རྗེ་གྲུབ་པའི་ཚེ་ཡི་རིགས་སྔགས་འཆང་བ་ཆེན་པོ་ཤ་སཱ་ན་དྷ་ར་བི་ཛ་ཡས་བཞེད་སྐོང་དུ། རྒན་འཆལ་ག་གཱས་སྨྲས་པས་འགྲོ་ཀུན་འཆི་མེད་མགོན་པོའི་གོ་འཕང་ཐོབ་པའི་རྒྱུར་གྱུར་ཅིག །དགེའོ། །དགེའོ། །དགེའོ། །སརྦ་མངྒ་ལཾ། ལུང་སྦྱིན་པ་ཡིན། གོང་གི་རྫས་ཐམས་ཅད་ལ་རེག་ནས་རང་སྔགས་ལན་གསུམ་རེའི་བྱིན་གྱིས་བརླབས་ནས་རྫས་སྤུང་བྱས་ཀྱང་ཆོག །

འཆི་ལྟས་བཟློག་བའི་བྱེ་བྲག་སྨན་གྱི་ལྗོན་པ།

རྡོ་རྗེ་སེམས་དཔའི་དགོངས་ཉམས་ལས༔ འཆི་ལྟས་བཟློག་བའི་བྱེ་བྲག་སྨན་གྱི་ལྗོན་པ་ཞེས་བྱ་བ་བཞུགས་སོ༔

ན་མོ་གུ་རུ་པདྨ་ཀཱ་ར་ཡེ༔ འདི་ན་ཐབས་མཁས་དོན་གྱི་བཟློག་པ་དང་༔ ཡས་བསྔོ་བ་སྟེ་རྣམ་པའི་གྲངས་སུ་ངེས༔ དེ་ལ་དང་པོ་གདམས་ངག་རྟེན་འབྲེལ་ཏེ༔ རླུང་ཉིད་མ་ལ་ཞ་བས་བྱེད་ལས་སྟོངས༔ བྱེ་བྲག་རྟེན་འབྲེལ་ལུགས་ལྡོག་འཕོ་བའི་གཤིས༔ བཟློག་ཏུ་ཡོད་པ་སྒྱུ་མ་དེ་སྟབས་ལགས༔ མདོས་དང་མཁོ་ཆས་ཡོངས་སུ་ཚོགས་བྱས་ཏེ༔ འཇམ་དཔལ་ཚེ་ཡི་བདག་པོ་གང་རུང་ནི༔ དཀྱིལ་འཁོར་དལ་ཞལ་ཕྱེ་བའི་ང་རྒྱལ་གྱིས༔ ཐུགས་རྗེ་སྟོབས་ཤུགས་ཅན་གྱི་རྣལ་འབྱོར་བས༔ དཔུང་ཕྲག་སྤྲོད་པ་དེ་ཡང་ལག་ལེན་ནོ༔ སྐྱབས་སུ་འགྲོ་ཞིང་སེམས་བསྐྱེད་སྟ་གོན་གྲུབ༔ བསྒོམ་དམིགས་ཟུར་བཤད་བཅས་སུ་ལྡན་པའི་ངང་༔ ཧོ༔ འཁོར་འདས་ཆོས་རྣམས་ཐམས་ཅད་རླུང་ལ་བརྟེན༔ ལྷན་ཅིག་སྐྱེས་དང་འཕྲལ་དུ་བྱུང་བ་གཉིས༔ ངོ་བོ་བདག་གཅིག་ཡེ་ནས་འདུ་འབྲལ་མེད༔ རིག་དང་མ་རིག་བདེ་སྡུག་སྣ་ཚོགས་བྱེད༔ ཁྱོད་ཀྱི་ཡེ་ཤེས་གཉུག་མའི་ཤེས་རབ་ལ༔ རང་མདངས་མགོན་པོ་ལྔ་ཡི་རྣམ་རྟགས་ཀྱིས༔ སྐྱེ་བོ་ཀུན་གྱིས་ལུས་སེམས་རྩི་རུ་སྨིན༔ གཟུགས་བརྙན་ཚུལ་དུ་དཀར་དམར་སྣང་རིག་བཀྲ༔ ཟིན་དང་མ་ཟིན་ཆེ་ཞེ་ཁྱོད་ལ་ཐིམ༔ ཀྱཻ༔ སྔོན་ཚེ་ཐོག་མེད་དུས་ནས་ཡེ་ལྡན་ཀྱང་༔ རེ་ཞིག་བག་ཆགས་སྒྱུ་མའི་ཆོ་རོལ་དུ༔ མཐུན་པར་སད་ཀྱི་སྐྱེ་རྒྱུད་བདག་པོ་ཟུངས༔ འབྱུང་བའི་འཕྲད་ཚུལ་རིན་ཆེན་མི་ཡི་ལུས༔ གང་ཡང་འཕོ་བའི་གནས་སྐབས་ས་བཅུའི་དངོས༔ རླུང་བཅུར་བཞེངས་ལ་རྟེན་གནས་འཕྲོ་འདུར་སྣང་༔ རྐྱེན་དེས་དུས་བཞི་སྐྱེ་རྒ་ན་འཆིར་ཤར༔ འོན་ཀྱང་མཁའ་སྤྱོད་སྲོག་ཆེན་ཁྱོད་ནི་རྟག༔ ད་ལྟ་འདུས་བྱས་མཚན་མར་གྱུར་བས་ན༔ མཐའ་བཞིའི་ཆོ་འབྲང་ཅན་གྱི་དུས་རྟགས་སུ༔ ཁྱབ་འཇུག་དབང་པོ་རང་འོད་དབྱིངས་སུ་ཡལ༔ དབྱུག་གུ་ལྷ་མོའི་ནུས་པ་མ་ཐོབ་སོ༔ ཁྱད་པར་རྩ་ནི་སྟོང་དུ་དཀྱིལ་འཁོར་འབབས༔ ཉི་ཤུ་རྩ་བཞིར་བསྒྲིལ་བའི་ཁ་ལོ་ཡི༔ ཁམས་དང་སིདྷལ་ཚེ་སྲོག་མི་འཇིགས་རྟེན༔ བཀོད་པ་དེར་ཡང་ལྷ་མོའི་རང་དབང་བསྒྱུར༔ སྲོག་ཤིང་དབུས་རྩིབས་ཡན་ལག་དུས་མཉམ་པར༔ ཕྱེད་བཅས་ཆོས་ཉིད་ཕྲིད་པའི་ལྷག་རོལ་ལ༔ ཉི་ཤུ་རྩ་གཅིག་སྟོང་ཕྲག་གྲངས་སུ་འགྱུར༔ ཕྱི་ནང་གཞན་གསུམ་འཁོར་ལོ་འགྲོས་མཐུན་འཁོར༔ གྲལ་བཟང་སྐྱེ་བོ་དག་ལ་སྒྲ་གཅན་གྱི༔ རྩེ་མོའི་ཡལ་ཀ་དེ་ན་རྟོགས་པའི་རྟར༔ གཡས་གཡོན་མཉམ་པར་དྲག་དལ་ཡབ་ཀྱི་གསུངས༔ ནམ་མཁའ་མགོན་པོ་ཉིད་ལ་མ་ཞུགས་པའི༔ ཤར་ན་མ་ཀཱི་ལྷོ་ཕྱོགས་སྤྱན་མ་དང་༔ ནུབ་ཕྱོགས་གོས་དཀར་བྱང་ན་དམ་ཚིག་སྒྲོལ༔ བདག་པོར་འཁྲིལ་སྦྱོར་དགུ་བརྒྱར་དབང་ཆེན་ཐོབ༔ སྣང་མཛད་སྐུར་བཞེངས་བཤོལ་དུ་བརྩན་པའི་དམ༔ འཕེན་རྫོགས་ལས་ཟད་པ་ལ་ཇི་ལྟོ་སྟེ༔ རེ་ཞིག་དུས་ལ་མ་བབས་མཚན་མ་ཕྲན༔ ཉམས་པ་སྣ་ཡི་མ་སུ་ཀི་ཆད་ན༔ ལྷ་མོ་སྤྱན་མའི་བྷ་ག་ཡངས་བ་ནས༔ ཡོན་ཏན་ཚེ་བདག་རིན་ཆེན་མགོན་པོ་བྱོན༔ ཟུང་འཇུག་ཡུམ་གྱི་བདེ་ཀློང་བསྐྱེད་བསྲིངས་ཏེ༔ སེམས་ཅན་འདི་ལ་འཆི་མེད་ཚེ་དབང་བསྐུར༔ བླ་ཚེ་ཆད་ཉམས་སོར་ཆུད་དངོས་གྲུབ་སྩོལ༔ ཁྱེད་ཀྱི་སྐུ་ནི་རྟག་པ་ལྔ་ལྡན་ལ༔ ངེས་ཤེས་ཐེ་ཚོམ་མེད་པའི་དད་གུས་བསྐྱེད༔ ཁྱེད་གསུང་འབྱུང་ཆེན་ཡན་ལག་དྲུག་ཅུའི་གདངས༔ དུས་དང་རྒྱུན་གྱི་འཆད་དང་འགགས་མེད་ཅིང་༔ ཐུགས་དབྱིངས་མཁའ་ཁྱབ་སེམས་ཀྱི་རྡོ་རྗེ་ལ༔ སྐད་ཅིག་ཆ་ཤེས་འདུས་བྱས་རང་མཚན་བྲལ༔ ཀུན་ཀྱང་བསམ་བརྗོད་སྤྲོས་པའི་མཐའ་བྲལ་བའི༔ ཆེ་བའི་ཡོན་ཏན་ཟག་མེད་ལྷུན་གྲུབ་དང་༔ ཕྲིན་ལས་ངང་བྱུང་རྫོགས་པ་ཆེན་པོ་ཅན༔ སེམས་ཅན་འདི་ལ་འཆི་མེད་ཚེ་དབང་བསྐུར༔ བླ་ཚེ་ཆད་ཉམས་སོར་ཆུད་དངོས་གྲུབ་སྩོལ༔ ཀྱཻ༔ ཟ་བྱེད་འཁྱིལ་པའི་རླུང་ལ་བསྒོ་བ་མཛོད༔ བཅོམ་ལྡན་རྣམ་པར་སྣང་མཛད་ཐུགས་རྗེས་གཟིགས༔ ནམ་མཁའི་བདག་ཁྱོད་ཀློང་འཁྱིལ་ཕྱིར་མ་གཤེགས༔ ༈ ཁམས་གསུམ་ཕྱི་ནང་བླ་ཚེའི་དྭངས་མ་བསྡུས༔ འཁྱམས་དང་གློ་བུར་ཡར་བ་སླར་གཟུད་ཅིག༔ ཧཱུྃ༔ ཁམས་ཀྱི་སྲོག་གི་སྡོང་པོ་ཆུ་ཡིས་ཟུངས༔ བཅོམ་ལྡན་རྡོ་རྗེ་མགོན་པོ་ཁྱོད་ཡིན་ཏེ༔ སྐྱབས་སུ་བཞུགས་ལ་རིགས་ཆུང་དཀྱིལ་འཁོར་ཀྱང་༔ ཉི་ཟེར་འདུ་འགོད་མེད་བཞིན་ད་ངོམ་ཤིག༔ ཁམས་གསུམ་ཕྱི་ནང་བླ་ཚེའི་དྭངས་མ་བསྡུས༔ འཁྱམས་དང་གློ་བུར་ཡར་བ་སླར་གཟུད་ཅིག༔ ཨཱཾ༔ ཁམས་ཀྱི་གྲོགས་ལྷ་ཕན་བྱེད་སྨན་པའི་རྒྱལ༔ བཅོམ་ལྡན་པདྨ་མགོན་པོ་ཁྱོད་ཡིན་ཏེ༔ གསོས་སུ་བཞུགས་ལ་རིགས་ཆུང་དཀྱིལ་འཁོར་ཀྱང་༔ མེ་དང་ཚ་བསྲེགས་འགྲོགས་བཞིན་ད་ངོམ་ཤིག༔ ཁམས་གསུམ་ཕྱི་ནང་བླ་ཚེའི་དྭངས་མ་བསྡུས༔ འཁྱམས་དང་གློ་བུར་ཡར་བ་སླར་གཟུད་ཅིག༔ ཧཱ༔ ཕྱོགས་འཛིན་དབང་པོ་གནོད་སྦྱིན་ཀུན་འདུལ་དཔལ༔ བཅོམ་ལྡན་ལས་ཀྱི་མགོན་པོ་ཁྱོད་ཡིན་ཏེ༔ མགོན་དུ་བཞུགས་ལ་དགྲ་དབྱེན་མ་བཅུད་པར༔ རླུང་གི་འོད་ཟེར་གསེར་མདངས་ད་སྤྲོས་ཤིག༔ ཁམས་གསུམ་ཕྱི་ནང་བླ་ཚེའི་དྭངས་མ་བསྡུས༔ འཁྱམས་དང་གློ་བུར་ཡར་བ་སླར་གཟུད་ཅིག༔ བྷྲཱུྃ༔ ལྕགས་ཁམས་སྲོག་གི་ཡ་ལད་བཙན་པོ་ལ༔ བཅོམ་ལྡན་འཁོར་ལོའི་བསྒྱུར་བ་ཆེན་པོར་བཞུགས༔ གསོས་སུ་བཞུགས་ལ་རིགས་ཆེན་མི་གཡོ་བས༔ རྟག་ཏུ་བསྲུང་སྐྱབས་དབང་བསྐུར་བྱིན་རླབས་གསོལ༔ ཁམས་གསུམ་ཕྱི་ནང་བླ་ཚེའི་དྭངས་མ་བསྡུས༔ འཁྱམས་དང་གློ་བུར་ཡར་བ་སླར་གཟུད་ཅིག༔ ཞེས་བརྗོད༔ སྐབས་འདིར་རང་གཏེར་གྱིས་སམ་འཆི་བསླུ་གང་འགྲུབ་བྱས་ལ༔ ཡང་སྒོས་ཀྱི་ཡས་བསྔོ་ན་ཁ་བསྒྱུར་སོགས་ལོ་རྒྱུས་དང་མཐུན་པར་བྱས་ལ༔ ཡས་གླུད་ཐམས་ཅད་སྔགས་དྲུག་ཕྱག་དྲུག་གིས་བརླབས་ཏེ༔ ཀྱཻ་ཛ༔ དོན་ལ་ཕྱོགས་དང་རང་རྒྱུད་མེད་བཞིན་དུ༔ མ་རྟོགས་སྐྱར་བོས་ལོག་རྟོག་རྟེན་འབྲེལ་དུ༔ སྣང་བ་རབ་འབྱམས་མ་འགགས་ཅིར་ཡང་འཆར༔ དེ་ལས་བརྟགས་ཆགས་ལྷ་འདྲེའི་རྣམ་གྲངས་སྲིད༔ ཁྱད་པར་ལྷོ་ཕྱོགས་མེ་ཡི་ཁྲི་སྟེང་ན༔ ཡས་ཀྱི་བདག་པོ་གཤིན་རྗེ་རཱ་ཛ་བཞུགས༔ སྐུ་མདོག་སེར་པོ་ཕྱག་ན་ཁྲམ་ཤིང་བསྣམས༔ འཁོར་དུ་གཤིན་རྗེ་འབུམ་ཕྲག་བཅོ་བརྒྱད་བཅས༔ ཐུར་འཕྱང་འགྲོ་ཞིང་ཀུན་ལ་གནོད་པར་སྦྱོར༔ ཟས་སུ་སྲོག་ཟ་སྐོམ་དུ་དབུགས་ལེན་ཏེ༔ ཆོ་ལོ་རྒྱན་དུ་ཐོད་པ་བསྲེལ་བར་བྱེད༔ ཁྲོ་འཁྲུགས་གཏུམ་རྔམ་ནོར་དུ་བ་ལང་བསྲེལ༔ ནད་དང་མདངས་འཕྲོགས་ཀླུ་སྲིན་བསྡེབས་ཏེ་འབྱུང་༔ ཁྱེད་བྱོན་ཞི་བ་ཆེན་པོའི་རྗེས་དགོངས་ལ༔ འདི་ན་འཁོད་པའི་རྣལ་འབྱོར་མཆོད་པ་བཞེས༔ མི་བས་དགའ་བའི་གླུད་དང་མདོས་མདངས་གཟུགས༔ འདོད་ཡོན་ཕུན་སུམ་ཚོགས་པའི་སྤྲིན་དུ་གཏིབས༔ སྔགས་དང་ཏིང་ངེ་འཛིན་གྱིས་སྦྱངས་སྤེལ་བསྒྱུར༔ འཛད་མེད་ནམ་མཁའ་མཛོད་གྱུར་གཏེར་ཆེན་པོ༔ དམ་ཚིག་དབང་གིས་བདག་གིར་བསྣམས་སུ་གསོལ༔ གཞན་ཡང་ཕྱོགས་དབང་སྤར་སྨེ་དགྲ་གཤེད་ལྷ༔ གེགས་དང་ཕུང་སྲི་ན་ཤི་དུར་གྱི་བདག༔ ཡི་དྭགས་རྒྱལ་པོ་རྒྱལ་མོ་ཐམས་ཅད་དང་༔ ཕྲན་བུ་མཚུན་དང་འཕྲོག་མ་འབྱུང་པོའི་འཁོར༔ ནད་ཡམས་དལ་བདག་ཟ་འདྲེ་ཤི་གཤེད་དང་༔ སྲོག་གཅོད་དབུགས་ལེན་མདངས་འཕྲོགས་ཚེ་ལེན་པ༔ འཇིག་རྟེན་ཁམས་ན་སྲིད་དོ་ཅོག་གི་སྡེ༔ ཆགས་སྲེད་ཁྲོ་འཁྲུགས་སྦྱོར་བསམ་ངན་འབྱུང་ཀུན༔ ཕུད་ལྷག་རང་དབང་དགོས་འདོད་ཕུང་པོར་རོལ༔ སོ་སོའི་སྡུག་བསྔལ་མ་ལུས་ཡོངས་སུ་ཞི༔ བླ་ཚེ་བརྐུས་པ་སོར་སྩོལ་འཁུ་སེམས་དང་༔ བསམ་རེག་ཉེར་གནས་འཁོད་པ་ཀུན་སྤོངས་ཤིག༔ སོ་སོའི་སྡུག་བསྔལ་རྒྱུ་འབྲས་ཀུན་བྲལ་ཏེ༔ ཞི་བ་བྱང་ཆུབ་སེམས་ནི་རྒྱུད་ལ་བརྟེན༔ རང་སར་བཞུགས་ལ་ཡོན་བདག་སེམས་ཅན་ཀུན༔ ནད་དང་ཕྲོལ་ལ་གདོན་དང་ད་ཕྱེས་ཤིག༔ མཆོད་སྦྱིན་གཞན་འཕྲུལ་ལྷ་ཡི་དཔལ་འབར་བས༔ ཚིམ་ནས་བདེ་བས་ཤེས་རྒྱུད་ཟག་མེད་ཤོག༔ ཚེ་རབས་གཏན་གྱི་ལན་ཆགས་ཤ་འཁོན་བྱང་༔ ཕྱིན་ཆད་འཁོར་འདིར་གནོད་པ་མ་བྱེད་ཅིག༔ མཉམ་ཉིད་དབྱིངས་ཕྱུག་ཡུམ་ཆེན་ཆོས་ཀྱི་སྐུ༔ འཆི་མེད་ཞི་བསིལ་གཏན་བདེ་དོན་གྱི་སེམས༔ ཁྱོད་དང་ནད་པ་ཆོས་ཉིད་རྒྱུ་གཅིག་སྤུན༔ ཤེས་པར་གྱིས་ལབ་༼ ལ་དཔྱད། ༽ བརྩེ་ཆེན་ཡིད་བྱོས་ཤིག༔ ཁམས་གསུམ་སེམས་ཅན་ཕ་མར་མ་གྱུར་མེད༔ ཕན་ཚུན་བྱམས་བྱས་གནོད་བསྐྱབས་བསམ་མི་ཁྱབ༔ བཟང་ལན་ངན་དང་སྨན་ལན་དུག་འཇལ་ཏེ༔ སྐྱེ་བས་བསྒྲིབ་པས་ཁྱོད་ཀྱིས་མ་མཐོང་ཟད༔ བདེན་པའི་བཀའ་འདི་རྒྱལ་བ་ཀུན་དབྱངས་གཅིག༔ བསྒྲགས་བཞིན་ཐོས་བཞིན་ད་དུང་སྦྱོར་རྩུབས་ན༔ འཁོར་བའི་གནས་སུ་ལྕགས་སྒྲོག་འདིའི་བསྡམས་ཀྱི༔ མནར་མེད་མེ་དོང་སྡུག་བསྔལ་དུས་དྲོན་འགྱུར༔ རང་གཞན་ཀུན་ལ་ཁེ་ཆུང་ཕམ་གླན་ན༔ དེ་བས་དམན་དང་བདག་ཉིད་བསླུས་པ་མེད༔ དྲང་སྲོང་ཚིག་འདི་བསྒོ་བ་རྣར་མ་གཟོན༔ བཟུངས་བཅིངས་མནན་བསྡམས་ཐམས་ཅད་ད་ཁྲོལ་ཅིག༔ སྔོན་ཚེ་དཔལ་ཆེན་མངོན་རྫོགས་བཀའ་འཁོར་བཅས༔ ཆོས་རྟགས་འཆི་མེད་ཕྱག་རྒྱས་ཁྱོད་བཅིངས་ནས༔ བཀའ་བསྒོ་རང་དན་བྲོ་བོར་ཐམས་ཅད་ཀྱི༔ ཚིག་གཅིག་དེ་ལས་མ་འདའ་ས་མ་ཡཱ༔ གཤེད་པོ་ཁྲོ་བོ་ཆེན་པོའི་བཀའ་འདས་ན༔ རུལ་མྱག་ཚིག་དང་མགོ་སྙིང་ཚལ་བར་འགས༔ ཉོན་མོངས་ཉེས་དམིགས་ལས་ཀྱི་རྒྱུ་འབྲས་དང་༔ རང་གིས་དམོད་པས་བདེན་བརྡར་འགྲུབ་པར་ངེས༔ དེ་བས་རང་ལ་ཕན་པར་འདོད་པ་ཡིས༔ སྡུག་བསྔལ་རྒྱུ་འདི་ཅི་ནས་སྤང་བར་བྱ༔ གཏན་གྱི་འདུན་མ་སྐྱེ་རྒ་ན་དང་འཆིའི༔ ཆུ་བོ་བཞི་སྒྲོལ་གཞན་དོན་ལྷུར་ལེན་བཟང་༔ རང་སེམས་དུལ་ན་དམ་ཆོས་གཞན་དུ་མེད༔ རང་ངོ་རྟོགས་ན་སངས་རྒྱས་ལོགས་ན་མེད༔ ཆོས་བཞིན་གནས་ན་དགེ་འདུན་དེ་ཡིན་ཏེ༔ ཁྱོད་ཀྱང་བསྟན་པ་འདི་ལ་གནས་པར་བྱོས༔ བདག་དང་ཡོན་བདག་གཙོ་བྱས་མཁའ་ཁྱབ་འགྲོ༔ མཆོད་སྦྱིན་འདི་ཡིས་བསོད་ནམས་ཚོགས་རྫོགས་ནས༔ ན་བ་སོས་ཏེ་འཆི་བ་བསླུས་པ་དང་༔ ཡོ་བ་བསྲེང་ལ་ཤི་བ་སླར་བསླང་ཞིང་༔ དུས་དང་རྣམ་པ་ཀུན་ཏུ་བཀྲ་ཤིས་དང་༔ བདེ་ལེགས་དུས་སྟོན་ཉི་ཟླ་ལྟར་འབར་ཤོག༔ དེ་ལྟར་གྲངས་མང་བསྔོ༔ སྐབས་འདིར་ཁྱེར་ཅིག་ཅི་མང་མཐར༔ ཧཱུྃ༔ གཤེད་པོ་མི་བཟད་འབར་བ་ཡི༔ ཐུགས་ལས་འཕྲོག་བྱེད་འོད་འཕྲོས་ཏེ༔ སོ་སོའི་ལག་ནས་བླ་ཚེ་སྲོག༔ འོད་མཐིང་རྣམ་པར་བསྡུས་ཏེ་བསྟིམས༔ འཁོན་སྦྱངས་ཞི་བའི་བདེ་བ་ནི༔ ཕམ་ཕབ་ཚབ་མར་ཕྱོགས་མེད་འགྱེད༔ ཀུན་ཀྱང་དགའ་བའི་རྒྱུད་གང་ནས༔ རང་བྱུང་དགེ་སློང་ཤ་སྟག་གྱུར༔ མི་དམིགས་ཆོས་དབྱིངས་གདོད་མའི་གཞི༔ དེ་བཞིན་ཉིད་ཀྱི་ངང་དུ་འབྱམས༔ གནོད་བྱ་གནོད་བྱེད་ཡུལ་དངོས་བཅས༔ ཕྱམ་གཅིག་སངས་རྒྱས་ཐོབ་པར་གྱུར༔ ཨོཾ་སརྦ་བུདྡྷ་གཙྪ་ཨཱ༔ ཅེས་ཀྱང་ལན་གསུམ་བརྗོད་པ་ཡིས༔ ཟད་པ་གསུམ་ལ་ཐུག་པའང་༔ ལོ་གསུམ་ཕྱིར་བལྟས་མ་བྱས་ཚེ༔ པདྨ་ང་ཡིས་བསླུས་པ་ཡིན༔ འོན་ཀྱང་ཐེ་ཚོམ་ཕྲ་ཡོད་དང་༔ ཁྱད་པར་དམ་ཚིག་ཉམས་པ་ལ༔ བསྒྲུབ་པ་ཐམས་ཅད་ལོག་པར་འགྱུར༔ དེ་གཞན་ཐམས་ཅད་འདི་ཡིས་སྐྱོབས༔ ཅེས་པ་འདི་ཉིད་དགེ་རྩེ་དཔོན་ལྷ་རྒྱལ་ལ་ནད་ཀྱིས་ཉེན་ནས་ལྟས་མཚན་ངན་ཚེ་རྒྱུད་དང་མན་ངག་གི་དོན་བསྡུས་ཏེ་པདྨ་ཀ་རས་ཟབ་ཐིག་དུ་གནང་བ་རྗེས་འཇུག་རིག་འཛིན་གྱི་གྲྭལ་དུ་ཡིད་སྨོན་ཆེ་བ་ག་གཱ་ཨ་བྷྱེ་ནས་སྨྲས་པ་དགེ་བར་གྱུར་ཅིག །སརྦ་མངྒ་ལཾ། །

ཐུགས་རྗེ་ཆེན་པོའི་རྒྱུན།

ཐུགས་རྗེ་ཆེན་པོའི་རྒྱུན་ཁྱེར་ཁྱེར་བཞུགས་སོ༔

ཧྲཱིཿ རང་ཉིད་སྐད་ཅིག་དྲན་རྫོགས་སུ༔ ཕྱི་སྣོད་རི་བོ་ཏ་ལའི་ཞིང་༔ རྡོ་རྗེ་ལུས་ཀྱི་གཞལ་ཡས་ཁང་༔ དཀར་དམར་རྣམ་དག་ཉི་ཟླ་དང་༔ པད་དཀར་འདབ་དྲུག་གྱེས་པའི་དབུས༔ འཕགས་མཆོག་ཐུགས་རྗེ་ཆེན་པོ་ནི༔ ཞལ་གཅིག་ཕྱག་བཞི་སྐུ་མདོག་དཀར༔ དང་པོའི་ཕྱག་གཉིས་ཐུགས་ཀ་རུ༔ ཐལ་སྦྱར་གཡས་གཡོན་འོག་མ་གཉིས༔ སྙན་ཐད་ཤེལ་ཕྲེང་པད་དཀར་འཛིན༔ རིགས་ལྔའི་དབུ་བརྒྱན་དར་ཤམ་ཅན༔ སྐུ་སྟོད་དར་དཔྱང་སྟོད་གཡོགས་དང་༔ ཅོད་པཎ་ཟི་ལྡིར་སྐ་རགས་འཕུར༔ སྙན་དང་མགུལ་རྒྱན་འོག་པག་དང་༔ ཕྱག་ཞབས་སོར་གདུབ་དཔུང་རྒྱན་བཅས༔ དོ་ཤལ་རིན་ཆེན་སེ་མོ་དོའི༔ རབ་བརྒྱན་ཞི་ཚུལ་དགུ་དང་ལྡན༔ གསང་བ་ཡེ་ཤེས་གཡོན་ནས་འཁྲིལ༔ སངས་རྒྱས་སྟོང་དང་གྲུབ་ཆེན་བརྒྱད༔ འབུམ་ཕྲག་མཁའ་འགྲོའི་འཁོར་གྱིས་བསྐོར༔ རིགས་བདག་ཨ་མི་དེ་ཝར་ཤར༔ གནས་གསུམ་ཡི་གེའི་འཕྲོ་འདུ་ལས༔ འོད་འཕྲོས་རང་བཞིན་ཆོས་དབྱིངས་དང་༔ ལྷོ་ཕྱོགས་རི་བོ་གྲུ་འཛིན་ནས༔ ཐུགས་རྗེ་ཆེན་པོའི་དཀྱིལ་འཁོར་ལྷ༔ སྤྱན་དྲངས་དམ་ཚིག་དཀྱིལ་འཁོར་ལ༔ གཉིས་མེད་བརྟན་བཞུགས་རོ་གཅིག་གྱུར༔ དབྱེར་མེད་རིག་པས་ཕྱག་འཚལ་ལོ༔ ཕྱི་ནང་དངོས་ཡིད་ཏིང་ངེ་འཛིན༔ ཡེ་ཤེས་རྒྱན་གྱི་མཆོད་པ་འབུལ༔ ཡོན་ཏན་རྣམ་ཐར་མཆོག་རིག་པའི༔ ལུས་ངག་ཡིད་ཀྱི་གུས་པས་བསྟོད༔ ཧྲཱིཿ དང་ཨེ་མ་ཨོཾ་ཧཱུྃ་ཨཱ༔ ཐུགས་ཀར་བླ་མ་གཅེར་བུ་ཡི༔ ཁོང་སེང་པདྨེའི་ཟེའུ་འབྲུ་ལ༔ ཧྲཱིཿ མཐར་འདབ་མར་ཡིག་དྲུག་འཁོར༔ བཟླས་པས་འོད་ཀྱི་འཕྲོ་འདུ་ཡི༔ དོན་གཉིས་ལྷུན་གྱིས་གྲུབ་པར་མོས༔ ཨོཾ་མ་ཎི་པདྨེ་ཧཱུྃ༔ མཐར་ནི་མཆོད་བསྟོད་མི་དམིགས་བཞག༔ བཀྲ་ཤིས་དམ་པས་མཐའ་རྒྱན་ནོ༔ ཅེས་ཀྱང་བུདྡྷའི་བཞེད་སྐོངས་སུ༔ སྔགས་མིང་ག་གཱའི་ཐོལ་བྱུང་བའོ༔ ཡི་གེ་ཤི་ལའི་མཚན་གྱིས་སོ༔ མངྒ་ལཾ༎ ཧྲཱིཿ རང་ཉིད་འཕགས་པ་སྤྱན་རས་གཟིགས་དབང་སྐུ༔ དཀར་གསལ་ཕྱག་བཞི་ཐལ་སྦྱར་པད་ཕྲེང་འཛིན༔ སྐྱིལ་ཀྲུང་གིས་བཞུགས་ཐུགས་ཀར་ཧྲཱིཿཡིག་མཐར༔ རྩ་སྔགས་འོད་ཀྱིས་དོན་གཉིས་ལྷུན་གྲུབ་བསམ༔ ཨོཾ་མ་ཎི་པདྨེ་ཧཱུྃ༔ ག་གཱས་སྣ་ཆེན་ལ་སྤྲེང་བའོ། །

ཐུགས་རྗེ་ཆེན་པོའི་དབང་བསྡུས་འཁོར་ལོ་ཡོངས་རྫོགས།

རྡོ་རྗེ་སེམས་དཔའི་དགོངས་ཉམས་ལས༔ ཐུགས་རྗེ་ཆེན་པོའི་དབང་བསྡུས་འཁོར་ལོ་ཡོངས་རྫོགས་བཞུགས་སོ༔

ན་མོ་གུ་རུ་པདྨ་ཀཱ་ར་ཡེ༔ བརྡ་ཡིག །དཀྱིལ་འཁོར་བཞེངས་བསྒྲུབ་སྔོན་སོང་ནས༔ བདག་ཉིད་འཇུག་དང་སློབ་མ་ལ༔ ཁྲུས་བྱས་བགེགས་བསྐྲད་བསྲུང་འཁོར་སྒོམ༔ འབྲེལ་བརྟགས་མེ་ཏོག་བཀྱེ་བསྡུས་མཐར༔ ནམ་མཁའ་དང་མཉམ་པའི་སེམས་ཅན་ཐམས་ཅད་འཁོར་ལོ་ཡོངས་རྫོགས་ཐུགས་རྗེ་ཆེན་པོའི་གོ་འཕང་ལ་འགོད་བར་བྱ༔ དེའི་ཆེད་དུ་གསང་སྔགས་རྡོ་རྗེ་ཐེག་པའི་སྨིན་བྱེད་ཀྱི་དབང་བསྐུར་ཟབ་མོ་ཞུ་བར་བགྱིའོ་སྙམ་པ་དང་༔ ཕུན་སུམ་ཚོགས་པ་ལྔ་ལྡན་གྱི་ཀུན་སློང་གིས་དྲངས་ནས་ཆོས་ཉན་པའི་ཀུན་སྤྱོད་ཀྱི་རིམ་པ་སྤྱི་དང་བྱེ་བྲག་རྣམས་འཚལ་བར་བགྱིས་ནས༔ གང་གསན་བྱ་ཐབས་མཁས་ཐུགས་རྗེའི་མངའ་བདག་ཆོས་སྐུའི་དུས་ན་འོད་དཔག་ཏུ་མེད་པ་པདྨ་གངས་ཅན་མཚོ༔ ལོངས་སྤྱོད་རྫོགས་སྐུ་གསུང་གི་སྐུ་རྣམ་པར་སྣང་མཛད་ཀྱི་དཀྱིལ་འཁོར་དང་༔ སྤྲུལ་པ་སྐུའི་ལོངས་སྐུ་ཐུགས་རྗེ་ཆེན་པོ་སྤྱན་རས་གཟིགས་དབང་ཕྱུག་གི་དཀྱིལ་འཁོར་དུ་དབང་བསྐུར་བས་སྒོ་གསུམ་གྱི་དྲི་མ་གཏོར་ཞིང་༔ སྐུ་གསུང་ཐུགས་རྡོ་རྗེ་གསུམ་གྱི་དངོས་གྲུབ་ཀྱི་སྐལ་བར་བླུགས་པའི་གླགས་ ༼ བླགས་དཔྱད། ༽ ལ་བབས་པ་སྟེ༔ འདི་ལའང་ཕྱི་ནང་གི་རྒྱུད་སྡེ་བསམ་གྱིས་མི་ཁྱབ་པ་ལས་ནང་རྒྱུད༔ དེ་ལས་གསང་སྔགས་གསར་རྙིང་གཉིས་ལས་རྙིང་མ་ཕ་མ་གཉིས་མེད་དམ་རྒྱུད་ལུང་མན་ངག་གཉིས་ལས་ལུང་གི་མན་ངག་དུ་གཏོགས་པ་ལས༔ རིང་བརྒྱུད་བཀའ་མ་དང་༔ ཉེ་བརྒྱུད་གཏེར་མ༔ བྱིན་རླབས་དག་སྣང་གསུམ་ལས་ཕྱི་མ༔ ས་གཏེར་དུས་ཚིགས་ཀྱི་ཡོལ་ནས་དག་སྣང་དུ་བྱུང་བ༔ ནམ་མཁའ་འཇིགས་མེད་པའི་མཚན་ཅན་བཞིར་སྐྱེ་བ་བརྒྱུད་པའི་ཐ་མ༔ རིག་འཛིན་བདུད་འཇོམས་དཔལ་ཀྱི་རྡོ་རྗེའི་ཕྲན་གཏེར་བརྒྱད་གྱི་ནང་ཚན་བརྟུལ་ཞུགས་འཁོར་བའི་སྤྱོད་པ་མ་སྤང་རྒྱན་དུ་རྫོགས་ཤིང་སྐྱོན་གྱིས་མ་གོས་པར༔ མཁའ་འགྲོའི་ལུང་བྱང་ལས༔ དུང་གི་ཟླ་བ་དཀར་པོ་འབྱུང་༔ ཞེས་དང་༔ གསང་འདུས་ཁ་བྱང་ལས༔ རྒྱལ་པོའི་སྲས་མོ་ལྷ་ཡི་ལྕམ༔ བུ་ཆུང་ནམ་མཁའ་འཇིགས་མེད་པ༔ ཞེས་གསུངས་པ་དེ་ཉིད་ལ་བརྒྱུད་དྲུག་གཅིག་འདྲེས་སུ་གྱུར་པ་ཐུགས་རྗེ་ཆེན་པོ་འཁོར་ལོ་ཡོངས་རྫོགས་ཀྱི་དབང་ཟབ་མོ་འབུལ་བ་ལ་སློབ་དཔོན་གྱི་བགྱི་འོས་སྔོན་དུ་གྲུབ༔ ཁྱེད་རང་རྣམས་ཀྱི་ངོ་སྐལ་དུ་མཎྜལ་མཛོད༔

དེ་ནས་གསོལ་བ་གདབས་པ་ནི༔ ཀྱེ་ཧོ༔ དུས་གསུམ་བདེ་གཤེགས་གྲངས་མེད་ཀྱི༔ དཀྱིལ་འཁོར་འཁོར་ལོའི་དབང་ཕྱུག་མཆོག༔ རྡོ་རྗེའི་བླ་མ་རིན་པོ་ཆེས༔ འཕགས་མཆོག་ཐུགས་རྗེ་ཆེན་པོ་ཡི༔ སྐུ་གསུང་ཐུགས་ཀྱི་རྡོ་རྗེ་ཡི༔ གྲོང་འཇུག་དབང་མཆོག་བསྐུར་དུ་གསོལ༔ དེ་ནས་བླ་མས་ལན་བཏབ་པ༔ ཧོ༔ གསངས་སྔགས་འཇུག་སྒོ་དབང་ཡིན་ཀྱང་༔ སྲོག་དུ་དམ་ཚིག་བསྲུང་ལ་རག༔ ཁྱོད་ཀྱིས་དེ་ལྟར་བྱ་ནུས་སམ༔ སོམ་ཉི་ལྡན་རྣམས་ཕྱིར་དེངས་ཤིག༔ ཅེས་བསྩལ་སློབ་མས་ལན་གསོལ་བ༔ ཀྱེ༔ གསང་བའི་དམ་ཚིག་གང་དང་གང་༔ རྡོ་རྗེ་རྒྱལ་བོའི་ལུང་བསྟན་གྱིས༔ བདག་ལ་སྣང་བར་མཛད་དུ་གསོལ༔ སྲོག་གི་ཕྱིར་ཡང་མི་གཏོང་ངོ་༔ དེ་ནས་དམ་ཆུ་སྦྱིན་པ་ནི༔ ཧཱུྃ༔ འདི་ནི་རྡོ་རྗེ་མེའི་དབལ་ཆུ༔ དམ་ཚིག་ལྡན་པའི་བསྲུང་འཁོར་ཡིན༔ གལ་ཏེ་ཡལ་གམ་བོར་གྱུར་ན༔ སྙིང་བསྲེགས་རྡོ་རྗེའི་དམྱལ་བར་འཚོད༔ དེ་བས་དམ་ལ་མི་འདའ་ཕྱིར༔ རྡོ་རྗེའི་བདུད་རྩིའི་ཆུ་འདི་འཐུང་༔ ས་མ་ཡཱ་ན་ར་ཀན༔ དེ་ནས་དམ་སྡོམ་སྦྱིན་བའི་ཕྱིར༔ རྣམ་དག་མཆོད་བདུན་སྔོན་སོང་བའི༔ རྗེས་ཐོག་བླ་མས་འདི་སྐད་བསྒྲགས༔ ཧོ༔ དཀོན་མཆོག་གསུམ་ལ་སྐྱབས་འགྲོ་དང་༔ གཞན་གནོད་གཞི་བཅས་སྤངས་པའི་བློས༔ རིས་བདུན་སོ་སོ་ཐར་བ་དང་༔ བྱང་ཆུབ་སེམས་བསྐྱེད་བསླབ་པ་དག༔ སྤྱི་ཡི་དམ་ཚིག་ཉིད་དུ་བཟུང་༔ མ་ལུས་ཡོངས་སུ་རྫོགས་ཐོབ་ཤོག༔ དག་པ་རྣམ་གསུམ་སྒོར་ཞུགས་ཏེ༔ གསང་སྔགས་ནང་གི་བསླབ་སྲུང་གནས༔ སྐུ་གསུང་ཐུགས་ཀྱི་རྡོ་རྗེ་ནས༔ རྩ་བ་ཡན་ལག་ལྷག་པ་ཡི༔ དམ་ཚིག་སྡོམ་པ་ཁྱོད་ལ་སྦྱིན༔ མ་ལུས་ཡོངས་སུ་རྫོགས་ཐོབ་ཤོག༔ གལ་མདོ་ངེས་དང་ལྷག་བརྟུལ་ཞུགས༔ བསྲུང་དུ་མེད་པ་ཡན་ཆད་ཀྱི༔ དམ་ཚིག་སྡོམ་པ་ཁྱོད་ལ་སྦྱིན༔ མ་ལུས་ཡོངས་སུ་རྫོགས་ཐོབ་ཤོག༔ ཆུ་སྲིན་ཕྱག་རྒྱ་ཇི་བཞིན་དུ༔ རྟག་ཏུ་འདི་འདྲ་མ་བཏང་ཞིག༔ དུས་གསུམ་སངས་རྒྱས་ཐམས་ཅད་ཀྱི༔ ཕྱག་རྒྱ་གསང་ཆེན་འདི་ཡིན་ནོ༔ ཅེས་བསྒྲགས་དེ་ནས་དཀྱིལ་འཁོར་དུ༔ འཇུག་པ་ཕྱི་ནང་གནས་གཅིག་གིས༔ ཧཱུྃ༔ དཀྱིལ་འཁོར་ཕྱོགས་བཞིའི་ཡེ་ཤེས་སྒོ༔ ཤེས་རབ་ཐུགས་རྗེའི་སྟོབས་ཀྱི་ཕྱེས༔ ཚད་མེད་བརྒྱད་དང་ལྡན་པའི་བློས༔ སྒྲིབ་བྱེད་མ་རིག་མུན་པ་ཕྲལ༔ ཛྙཱ་ན་ཙཀྲ་ཨ་བྷི་ཥིཉྩ༔ སྔོན་འབྲེལ་བརྟགས་ཕྱིར་མེ་ཏོག་དོར༔ ཧཱུྃ༔ སྐུ་གསུང་ཐུགས་ཡོན་ཕྲིན་ལས་ཀྱི༔ ལྷ་དང་སྦྱངས་རྟགས་སྡུག་བསྔལ་ལས༔ ཕྱེ་ཕྱིར་མེ་ཏོག་འདི་དོར་བས༔ སྔོན་འབྲེལ་ལྷ་ལ་འབབ་པར་ཤོག༔ པུཥྦེ་དཱེ་ཝ་པྲ་ཏི་ཙ་ཧོ༔ ཧཱུྃ༔ ཡུན་རིང་མ་རིག་ལིང་ཐོག་གིས༔ རང་གནས་མཐོང་བྱེད་ཤེས་རབ་སྤྱན༔ ལྡོང་བར་ཐུགས་རྗེའི་གསེར་ཐུར་གྱིས༔ ཕྱེས་ནས་ལྷ་ཞལ་མངོན་པར་ཤོག༔ ཙཀྵུ་པྲ་ཝེ་ཤ་ཡ་ཕཊ༔ དེ་ནས་ལྷ་ངོ་བསྟན་པ་ནི༔ རབ་འབྱམས་དཀྱིལ་འཁོར་རྒྱ་མཚོ་འདི༔ རང་གནས་སྐུ་རིག་ཡེ་ཤེས་འོད༔ གཞན་ནས་བྱུང་བ་མ་ཡིན་ཏེ༔ རང་སྣང་ལོངས་སྐུའི་བཀོད་པའོ༔ འདི་ཉིད་མཐོང་བ་ཙམ་གྱིས་ཀྱང་༔ སྡིག་རྒྱུན་ལྡོག་ཅིང་ཟག་པ་ཟད༔ རིག་པ་འཛིན་པའི་ས་ལ་གནས༔ སྐལ་བ་མཆོག་ལ་དགའ་བར་གྱིས༔ ད་ནས་སྒྲུབ་མཆོད་མཉན་སྦྱོར་ལ༔ དུས་གསུམ་ཀུན་ཏུ་མ་གཡེལ་ཅིག༔ ནང་འཇུག་ཡེ་ཤེས་དབབས་པའི་ཕྱིར༔ སྭ་བྷ་ཝ་ཡིས་སྟོང་བར་སྦྱངས༔ སློབ་མ་སྐད་ཅིག་དྲན་རྫོགས་ནས་རོ་གཅིག་གྱུར༔ གྱི་བར་རོ༔ དེ་ནས་གསོལ་བ་གདབ་པ་ནི༔ ཀྱེ་ཧོ་བླ་མ་རིན་པོ་ཆེ༔ འགྲོ་མགོན་ཐུགས་རྗེའི་བདག་ལ་དགོངས༔ ཐུན་མོང་ཐུན་མིན་མཆོག་གི་དབང་༔ བརྩེ་བ་ཆེན་པོའི་བསྐུར་དུ་གསོལ༔ དེ་ནས་དབང་བསྡུས་འདི་སྐད་དོ༔ ཨོཾ་ཆུ་དང་དབུ་རྒྱན་རྡོར་དྲིལ་མིང་༔ རྒྱལ་བ་རིགས་ལྔའི་ངོ་བོ་སྟེ༔ ཉོན་མོངས་དུག་ལྔ་སྦྱོང་མཛད་པས༔ དབང་བསྐུར་ལྷ་དང་སྐལ་མཉམ་ཤོག༔ ཛྙཱ་ན་པཉྩ་ཨ་བྷི་ཥིཉྩ༔ གཉིས་པ་ཐུན་མིན་ནང་གི་དབང་༔ ཨོཾ༔ བཅོམ་ལྡན་ཐུགས་རྗེ་ཆེན་པོ་ཡི༔ སྐུ་ཡི་རང་བཞིན་བུམ་པའི་དབང་༔ སྐལ་ལྡན་ཁྱོད་ལ་བསྐུར་བ་ཡིས༔ རྩ་དག་སྤྲུལ་སྐུར་སྨིན་པར་ཤོག༔ ཨོཾ་ཀ་ལ་ཤ་ཀཱ་ཡ་ཨ་བྷི་ཥིཉྩ༔ དེ་ཡི་རྗེས་འབྲེལ་ལྷ་དབང་ནི༔ ཨོཾ༔ ཞི་ཁྲོ་རྒྱལ་བ་རྒྱ་མཚོ་ཡི༔ སྐུ་འདུས་ཉག་གཅིག་འཁོར་ལོའི་བསྒྱུར༔ བརྩེ་བ་ཆེན་པོའི་སྤྱི་གཟུགས་འཆང་༔ ཕྱག་ན་པདྨོའི་དབང་བསྐུར་རོ༔ མ་དག་ལུས་ཀྱི་རྡོས་བཅས་སྐྱེས༔ རྡོ་རྗེའི་སྐུ་རུ་སྨིན་གྲོལ་ཤོག༔ རྩ་སྔགས་ཀཱ་ཡ་ཨ་བྷི་ཥིཉྩ་ཧཱུྃ༔ གཉིས་པ་སངས་རྒྱས་སྐུ་ཡི་དབང་༔ ཨཱཿ ལོངས་སྐུའི་འོད་ཟེར་སྤྱན་གྱི་ངང་༔ དུས་བཞི་ཕྱོགས་བཅུར་སྒྲོན་མ་བཀོད༔ སངས་རྒྱས་སྟོང་གི་དབང་བསྐུར་རོ༔ འགྲོ་དྲུག་གྲོང་ཁྱེར་རྒྱུན་ཆོད་དེ༔ སྤྲུལ་པ་སྐུ་ཡི་གཟུགས་ཅན་གྱིས༔ འཁོར་བ་དོང་སྤྲུགས་དབང་ཐོབ་ཤོག༔ རྩ་སྔགས༔ ནིརྨ་ཀ་ཡ་ཨ་བྷི་ཥིཉྩ༔ དེ་ནས་གྲུབ་ཐོབ་རིག་འཛིན་དབང་༔ ཧཱུྃ༔ མཚན་དཔེ་རྒྱན་དུ་ཤར་བའི་ངང་༔ གྲུབ་ཐོབ་བརྒྱད་ཅུ་གཉིས་ཀྱི་དབང་༔ སྐལ་ལྡན་ཁྱོད་ལ་བསྐུར་བར་བྱ༔ བརྟུལ་ཞུགས་སྤྱོད་པའི་ཐབས་མཁས་ཀྱིས༔ དཀའ་ཚེགས་མེད་པར་ས་ལམ་བསྒྲོད༔ དོན་གཉིས་མཐར་ཕྱིན་དབང་ཐོབ་ཤོག༔ ཨོཾ་མ་ཎི་པདྨེ་ཧཱུྃ༔ གུ་རུ་ཙིཏྟ་ཨ་བྷི་ཥིཉྩ་ཧཱུྃ༔ ཊཱཀྐི་སྡེ་ལྔའི་དབང་བསྐུར་ལ༔ ཧྲིཿ སྣང་བ་ཐབས་ཀྱི་ཀུན་རྫོབ་ཆོས༔ སྟོང་ཆེན་ཡུམ་གྱི་དབྱིངས་རྒྱས་ཐེབས༔ ཆོས་མཚོན་སྲིད་པ་མཁའ་འགྲོའི་དལ༔ སྐལ་ལྡན་བུ་ལ་དབང་བསྐུར་རོ༔ རྩ་རླུང་ཐིག་ལེ་བྱང་ཆུབ་སེམས༔ དབུ་མ་ཆེན་པོར་རབ་བརྟན་ཤོག༔ རྩ་སྔགས་མཐར༔ ཊཱཀྐི་ནི་ཨ་བྷི་ཥིཉྩ་ཧྲཱི༔ གསང་བའི་དབང་བསྐུར་རིམ་པ་ནི༔ ཨཾ༔ བདེ་སྟོང་ཟུང་འཇུག་བྱང་ཆུབ་སེམས༔ ཡི་གེའི་ཕྲེང་བ་ལུ་གུ་རྒྱུད༔ འབར་འཁྲུགས་བརྟན་པའི་འོད་ཟེར་འཕྲོ༔ སྐལ་ལྡན་བུ་ལ་དབང་བསྐུར་རོ༔ ངག་གི་ལས་སྒྲིབ་ཀུན་དག་ནས༔ ལོངས་སྤྱོད་རྫོགས་སྐུར་བྱང་ཆུབ་ཤོག༔ ཨོཾ་མ་ཎི་པདྨེ་ཧཱུྃ༔ ཝཀྐ་ཨ་བྷི་ཥིཉྩ་ཧྲཱི༔ ཐུགས་མཆོག་འགྱུར་མེད་ཤེས་རབ་དབང་༔ ཧཱུྃ༔ པདྨ་སྐྱོན་གྱི་དྲི་བྲལ་བ༔ འཁོར་བའི་ཆགས་པ་བྲལ་བའི་དབང་༔ སྐལ་ལྡན་བུ་ལ་དབང་བསྐུར་རོ༔ ཁམས་གསུམ་དགྲ་ལས་རྒྱལ་བར་ཤོག༔ རྩ་སྔགས་མཐར༔ ཨོཾ་པདྨ་ཙིཏྟ་ཨ་བྷི་ཥིཉྩ་ཧྲཱི༔ ཧཱུྃ༔ ཕྲེང་བ་རྒྱུད་དྲུག་སེམས་ཅན་ཀུན༔ ཉག་གཅིག་ཐུགས་རྗེའི་ཐག་པས་བཟུང་༔ དོན་རྟགས་མཚོན་པའི་བུམ་པ་འདིའི༔ སྐལ་ལྡན་བུ་ལ་དབང་བསྐུར་རོ༔ ཐུགས་རྗེ་ཆེན་པོ་ཐབས་ལྡན་པས༔ འཁོར་བ་མི་འདོར་དབང་ཐོབ་ཤོག༔ རྩ་སྔགས་མཐར༔ རཏྣ་མ་ལྱེ་ཙིཏྟ་ཨ་བྷི་ཥིཉྩ༔ ཧཱུྃ༔ རིགས་ཀྱི་རིགས་ཏེ་ཐུགས་ཀྱི་ཐུགས༔ དཀྱིལ་འཁོར་ཁྱབ་བདག་འཁོར་ལོའི་བསྒྱུར༔ ཆོས་སྐུ་འོད་དཔག་མེད་མགོན་གྱི༔ སྐལ་ལྡན་བུ་ལ་དབང་བསྐུར་རོ༔ མཐར་ཐུག་སྐུ་གསུམ་བཙན་ས་ཟིན༔ དོན་གཉིས་ལྷུན་གྲུབ་དཔལ་ཐོབ་ཤོག༔ རྩ་སྔགས་མཐར༔ ཨོཾ་ཨ་མི་དྷེ་ཝ་ཙིཏྟ་ཨ་བྷི་ཥིཉྩ་ཧཱུྃ༔ ཧཱུྃ༔ གསང་བ་ཡེ་ཤེས་དབྱིངས་ཀྱི་ཡུམ༔ བཅུ་དྲུག་དགའ་བའི་དཔལ་སྟེར་ཞིང་༔ སྟོང་པ་བཅུ་དྲུག་དོན་ལ་སྦྱོར༔ སྐལ་ལྡན་བུ་ལ་དབང་བསྐུར་རོ༔ རྒྱལ་ཀུན་ཐུགས་དང་རོ་གཅིག་ཤོག༔ ཙིཏྟ་ཨ་བྷི་ཥིཉྩ་ཧཱུྃ༔ བཞི་བ་དོན་དམ་ཚིག་གི་དབང་༔ མདོང་གིས་མཚོན་ནས་འདི་སྐད་དོ༔ ཧྲཱི༔ ཐུགས་ནི་སྤྲོས་པ་ཀུན་ལས་གྲོལ༔ དུས་ལ་མི་ལྟོས་ད་ལྟ་རང་༔ གཉུག་མའི་སེམས་ཉིད་འདི་ཀའོ༔ ངོ་ཤེས་ངང་དུ་མ་བཅོས་ཡན༔ དཔེ་དང་མཚོན་པ་ཀུན་ལས་འདས༔ ངོ་བོ་ཉིད་སྐུ་མངོན་གྱུར་ཤོག༔ ཨ་ཨ་ཨཱ་ཕཊ༔ ཨོཾ་དྷརྨ་དྷརྟུ་པྲཛྙཱ་ཛྙཱ་ན་ཨ་ཨ་བྷི་ཥིཉྩ་ཨཱ་ཧཱུྃ༔ཅེས་བརྗོད་གཉིས་མེད་མཉམ་པར་བཞག༔ མཐར་ནི་དམ་ཚིག་ཁས་བླངས་ཤིང་༔ གཏང་རག་མཎྜལ་ཕུལ་ནས་སུ༔ བསྔོ་སྨོན་བཀྲ་ཤིས་མཐའ་རྒྱས་བྱ༔ ཅེས་པ་འདི་ཡང་རྡོ་རྗེའི་བླ་མ་ཐེག་མཆོག་མཚན་ཅན་གྱི་གསུང་ངོ་མ་ལྡོག་པར་ག་གཱ་ཨ་བྷྱེ་དག་པར་ཕབ་པའི་ཡི་གེའི་འདུ་བྱེད་འགྱུར་མེད་རྣམ་པར་རྒྱལ་བའི་མཚན་ཅན་གྱིས་སོ། །

འཕགས་མཆོག་ཐུགས་རྗེ་ཆེན་པོའི་སྒོ་ནས་གཤིན་པོ་རྗེས་འཛིན་ཐུགས་རྗེའི་ཞགས་པ།

རྡོ་རྗེ་སེམས་དཔའི་དགོངས་ཉམས་ལས༔ འཕགས་མཆོག་ཐུགས་རྗེ་ཆེན་པོའི་སྒོ་ནས་གཤིན་པོ་རྗེས་འཛིན་ཐུགས་རྗེའི་ཞགས་པ་བཞུགས་སོ༔

ཎྲཿ རྟེན་བྱང་ཚེ་འདས་དངོས་སུ་གསལ༔ རྣམ་ཤེས་རིགས་དྲུག་གར་གནས་ཀྱང་༔ ཐུགས་རྗེའི་ཞགས་པས་བཀུགས་ཅིང་བསྟིམ༔ བྱིན་རླབས་སྟོབས་ཀྱིས་བག་ཕེབས་གྱུར༔ ཨཾ་ཀུ་ཤ་ཛ༔ ཏིཥྛ་ལྷན༔ ཧཱུྃ༔ ཉོན་ཅིག་ཚེ་འདས་རིགས་ཀྱི་བུ༔ འཁོར་བར་སྡུག་བསྔལ་རང་བཞིན་ལས༔ ཐང་གཅིག་ཡང་དག་བདེ་བ་མེད༔ ཤེས་པར་གྱིས་ཤིག་ངེས་འབྱུང་ཕྱིར༔ ཆགས་ཞེན་སྤོངས་ལ་བདེན་ཚིག་ཉོན༔ བླ་མ་ལྷ་ལ་མོས་པ་བསྐྱེད༔ ཧཱུྃ༔ ལོག་འདྲེན་གསོན་བདུད་གཤིན་ལྕགས་རྣམས༔ ལན་ཆགས་རྐྱེན་གྱིས་གཏོར་མ་ཁྱེར༔ འདི་ལ་མ་གནོད་ཕྱིར་དེངས་ཤིག༔ བཀའ་ལས་འདའ་ན་རྡུལ་དུ་གཞོམ༔ སུམ་བྷ༴ བཛྲ་རཀྵ་རཀྵ༔ ཀྱེ་ཧོ༔ འགྲོ་མགོན་ཐུགས་རྗེའི་བདག་སྐྱོབས་ལ༔ རིགས་དྲུག་གནས་ནས་དྲངས་དུ་གསོལ༔ ཧཱུྃ༔ ཡེ་ཤེས་དྲུག་གི་ཆུ་རྒྱུན་གྱིས༔ ཉོན་དྲུག་དྲི་མ་དག་གྱུར་ཅིག༔ ཕར་ཕྱིན་དྲུག་གི་ཆུ་རྒྱུན་གྱིས༔ རིགས་དྲུག་འདུ་བྱེད་དག་གྱུར་ཅིག༔ མཆོག་གསུམ་བདེན་པའི་བྱིན་བརླབས་ཀྱིས༔ དུག་བཅོམ་དུག་གིས་མི་ཚུག་ཤོག༔ རྩ་སྔགས་དང་ཡིག་བརྒྱ༔ སྐད་ཅིག་སྣང་བ་གནས་འགྱུར་དུ༔ རིགས་དྲུག་བག་ཆགས་རིམ་སད་གྱུར༔ ཧཱུྃ༔ འདོད་ཡོན་ལྔ་ལྡན་གཏོར་མ་འདིའི༔ རྒྱུད་དྲུག་ལན་ཆགས་སོད་གྱུར་ཅིག༔ བ་ལིངྟ་བིགྣན་ཨ་གཙྪ༔ ཧཱུྃ༔ ཡེ་ཤེས་དྲུག་གི་ཐུགས་རྗེ་སྐུའི༔ སྐལ་ལྡན་བུ་ལ་དབང་བསྐུར་བས༔ མི་འཇིགས་དྲུག་གིས་སྐྱབས་སྦྱིན་ནས༔ ཐུབ་དྲུག་ངོ་བོར་འཚང་རྒྱ་ཤོག༔ རྩ་སྔགས་དང་༔ ཨོཾ་མུ་ནེ་ཨ་བྷི་ཥིཉྩ་ཧཱུྃ༔ ཧྲཱི༔ ཐུགས་ཀའི་ཡིག་དྲུག་འོད་ཟེར་གྱིས༔ རིགས་དྲུག་ས་བོན་བག་ཆགས་བསྲེགས༔ འཁྲུལ་མི་ཤེས་པའི་གདེངས་ཐོབ་ཤོག༔ འཁོར་བ་འདི་ན་གཅོང་རེ་ཆེ༔ མ་ཆགས་བདེ་ཆེན་ཞིང་དུ་འདོང་༔ ཀྱཻ༔ སྙིང་རྗེ་ཆེན་པོའི་དཀྱིལ་འཁོར་དུ༔ ལྷར་རྗེས་བདག་ནི་འཇུག་ཏུ་གསོལ༔ ཧོ༔ དམ་ཚིག་སྡོམ་པ་ལ་གནས་ཤིང་༔ སྒོ་གསུམ་རྡོ་རྗེའི་གྲོང་འཇུག་འཚལ༔ ཀྱཻ༔ སོ་ཐར་བྱང་སེམས་སྔགས་ཕྱི་ནང་༔ སྡོམ་པ་དམ་ཚིག་བདག་གིས་བཟུང་༔ འགྲོ་མགོན་ཐུགས་རྗེའི་བཟུང་དུ་གསོལ༔ ཧོ༔ སྒྲིབ་པ་བཞི་ཡི་སྒོ་ལྕགས་ཁྲོལ༔ ཚད་མེད་བཞི་ཡི་འཆར་སྒོ་ཕྱེས༔ ཡེ་ཤེས་བཞི་ཡི་སྒོ་ནས་འཇུག༔ རང་བྱུང་ལྷ་ཞལ་མཇལ་བར་ཤོག༔ པྲ་ཝེ་ཤ་ཡ་ཕཊ༔ པུཥྤེ་པྲ་ཏི་ཙ་ཧོ༔ ཙཀྵུ་བྷནྡྷ་ཝ་ར་མ་ན་ཡེ་སྭཱ་ཧཱ༔ ཨེ་མ་ཧོ༔ རང་བཞིན་ལྷུན་གྲུབ་དཀྱིལ་འཁོར་འདི༔ མཇལ་བས་སྐལ་ལྡན་དད་སྤྲོ་བསྐྱེད༔ སྡིག་ཟད་ཉོན་མོངས་མཐོང་སྤངས་དག༔ ཐུགས་རྗེ་ཆེན་པོའི་རིགས་སུ་སྐྱེས༔ ཨོཾ་ཨཱཿཧཱུྃ༔ ཚེ་འདས་ལྷར་གསལ་གནས་གསུམ་ལས༔ འོད་འཕྲོས་ཡེ་ཤེས་སྤྱན་དྲངས་བསྟིམ༔ ཨོཾ་མ་ཎི་པདྨེ་ཧཱུྃ༔ སརྦ་ཛྙཱ་ན་དཱེ་ཝ་ཨ་བེ་ཤ་ཡ་ཕེཾ་ཕེཾ༔ ཏིཥྛ་བཛྲ༔ ཧཱུྃ༔ ཕུང་ལྔར་འཛིན་པ་རྣམ་དག་ཕྱིར༔ ཐུན་མོང་རིགས་ལྔའི་དབང་བསྐུར་རོ༔ ཨོཾ་ཧཱུྃ་སྭཱ་ཨཱཾ་ཧཱ་ཨ་བྷི་ཥིཉྩ་ཧཱུྃ༔ ཧཱུྃ༔ ཡེ་ཤེས་ལྔ་དང་སྐུ་ལྔ་རྫོགས༔ གཞོན་ནུ་བུམ་པའི་དབང་ཐོབ་ཤོག༔ རྩ་སྔགས་མཐར་ཀཱ་ཡ་ཨ་བྷི་ཥིཉྩ་ཧཱུྃ༔ ཨོཾ༔དུས་གསུམ་རྒྱལ་བའི་སྤྱི་གཟུགས་དཔལ༔ ཕྱག་ན་པདྨོའི་དབང་བསྐུར་རོ༔ གང་འདུལ་ཐབས་ཀྱིས་འགྲོ་དོན་མཛད༔ སངས་རྒྱས་སྟོང་གི་དབང་བསྐུར་རོ༔ ཕྱི་ནང་མཚན་དཔེ་གསལ་བའི་རྒྱན༔ གྲུབ་ཐོབ་རྒྱ་མཚོའི་དབང་བསྐུར་རོ༔ རྩ་རླུང་ཐིག་ལེ་རྣམ་དག་ངང་༔ རྣམ་དག་མཁའ་འགྲོའི་དབང་བསྐུར་རོ༔ རྩ་ཁམས་སྤྲུལ་སྐུར་སྨིན་གྲོལ་ཤོག༔ ཨོཾ་ཀ་ཡ་ཨ་བྷི་ཥིཉྩ་ཧཱུྃ༔ ཨཱུ༔ མཉམ་སྦྱོར་བྱང་སེམས་བདུད་རྩིའི་སྤྲིན༔ ཡི་གེ་འཁོར་ལོའི་རྒྱུན་བཟང་པོའི༔ སྐལ་ལྡན་ངག་ལ་དབང་བསྐུར་བས༔ རླུང་དག་ལོངས་སྐུར་སྨིན་གྲོལ་ཤོག༔ ཨཱ༔ ཝཀྐ་ཨ་བྷི་ཥིཉྩ་ཧཱུྃ༔ ཧཱུྃ༔ སྟོང་ཆེན་རིག་མའི་དབང་བསྐུར་བས༔ བདེ་ཆེན་འདུ་འབྲལ་མེད་པའི་དོན༔ ཐབས་མཆོག་འདི་ཡིས་མཐར་ཕྱིན་ཏེ༔ ཐིག་ལེ་ཆོས་སྐུར་སྨིན་གྲོལ་ཤོག༔ ཧཱུྃ་ཙིཏྟ་ཨ་བྷི་ཥིཉྩ་ཧཱུྃ༔ ཧྲཱི༔ བདེན་གསུམ་དབྱེར་མེད་དེ་ཁོ་ནའི༔ བདག་ཉིད་རང་རིག་བྱང་ཆུབ་སེམས༔ ཡེ་ཤེས་རྩལ་གྱི་དབང་ཐོབ་ནས༔ ངོ་བོ་ཉིད་སྐུ་སྨིན་གྲོལ་ཤོག༔ སརྦ་ཨ་བྷི་ཥིཉྩ་ཨཱ༔ ཨོཾ་མ་ཎི་པདྨེ་ཧཱུྃ་ཧྲཱི༔ ཧཱུྃ༔ འདོད་ཡོན་དྲུག་གི་ལོངས་སྤྱོད་འདིས༔ ལྟོག་འཕོངས་དབུལ་སེལ་གཏེར་ཐོབ་ཅིང་༔ ཤེས་རབ་གསལ་བའི་སྒྲོན་མེ་ཡིས༔ ཡང་དག་ཐར་བའི་ལམ་སྣང་ཤོག༔ ཧྲཱི༔ ལྷོ་ཕྱོགས་རི་བོ་ཏ་ལ་ན༔ འཕགས་མཆོག་ཐུགས་རྗེ་ཆེན་པོ་བཞུགས༔ རྣམ་ཤས་སྡུག་བསྔལ་རྟེན་དང་བཅས༔ འཕགས་པའི་སྐུ་གསུང་ཐུགས་མཆོག་དང་༔ དབྱེར་མེད་བསྲེ་འཕོ་མཐར་ཕྱིན་ཤོག༔ ཕཊ༔ རཾ༔ ཉོན་དྲུག་བསྲེགས་ཤིང་ཡེ་ཤེས་དྲུག་དང་ལྡན༔ ཤེས་རབ་རྣམ་དྲུག་ཡུམ་ཆེན་དྲུག་གི་མེའི༔ རྒྱུད་དྲུག་སྡུག་བསྔལ་ཉེར་ལེན་ཛྭ་ལ་རཾ༔ ཕྱིན་ཆད་འཁྲུལ་མི་ཤེས་པའི་གདེངས་རྙེད་ནས༔ ལྷ་ཚོགས་ཡོངས་རྫོགས་ངོ་བོར་སངས་རྒྱས་ཤོག༔ ཅེས་ཀྱང་པྲཉྫཱ་མ་ཏིའི་ངོར་ག་གཱས་སོ། །

དེ་ནས་གཏོར་དབང་བསྡུས་པ།

དེ་ནས་གཏོར་དབང་བསྡུས་པ་ནི༔ ཨོཾ༔ བཅོམ་ལྡན་ཐུགས་རྗེ་ཆེན་པོ་ཡི༔ ངོ་བོ་ཉིད་སྐུའི་བུམ་པ་ན༔ ཡེ་ཤེས་ཐུགས་ཀྱི་ལྷ་ཚོགས་བཞུགས༔ རང་མདངས་ཤེས་རབ་ཁ་མིག་ཅན༔ ཐུགས་རྗེ་འོད་ཀྱི་དབང་པོ་དང་༔ ཡང་འབྱེད་ཟེར་གྱི་ཁ་མིག་ཅན༔ ཆོས་ཉིད་དོན་དང་ཆོས་ཅན་དག༔ ཀུན་འདུས་ཡིད་བཞིན་ནོར་བུ་འདིའི༔ ཉོན་ཤེས་སྒྲིབ་པའི་དྲི་མ་གཏོར༔ ཡེ་ཤེས་མ་དང་སྤྲོད་པར་བྱེད༔ སྐལ་ལྡན་ཁྱོད་ལ་དབང་བསྐུར་བས༔ བདུད་བཞི་གཅིག་ ༼ ཅིག་དཔྱད། ༽ ཆར་དག་ནས་ཀྱང་༔ མ་རིག་བག་ཆགས་ས་ལས་འདས༔ རྒྱུ་འབྲས་དྲི་མ་དབྱིངས་སུ་དག༔ རྡོ་རྗེ་འཛིན་བའི་ས་ཐོབ་ཤོག༔ ཨོཾ་ཨཱཿཧཱུྃ་མ་ཧཱ་བ་ལིངྟ་ཀ་ཡ་ཛྙཱ་ན་པཉྩ་ན་ཨཏྨ་མ་ཧཱ་ཨ་བྷི་ཥིཉྩ་ཧཱུྃ༔ ཅེས་ཀྱང་བླ་མ་དམ་པ་པདྨ་ཡ་ནའི་གསུང་བསྐུལ་དོན་ཡོད་པའི་ཕྱིར་དུས་མཐའི་སྔགས་མིང་ག་གཱས་སོ། །

མིག་འབྱེད་ཐུགས་རྗེའི་གསེར་ཐུར།

མིག་འབྱེད་ཐུགས་རྗེའི་གསེར་ཐུར་ཞེས་བྱ་བ་བཞུགས་སོ༔

ན་མོ་གུ་རུ་ལོ་ཀི་ཤྭ་ར་ཡ༔ ལྷ་ཡི་སྤྱན་དང་ཤ་ཡི་སྤྱན་མངའ་ཞིང་༔ ཆོས་ཀྱི་སྤྱན་དང་ཤེས་རབ་སྤྱན་དག་དང་༔ སངས་རྒྱས་སྤྱན་ཀྱིས་གཟིགས་པ་རྣམ་དག་པའི༔ དྲང་སྲོང་ཆེན་པོ་རྣམས་ལ་ཕྱག་འཚལ་ལོ༔ སྤྱན་རྣམ་དག་དང་སྤྱན་རྒྱས་ཨུཏྤ་ལའི༔ དྲི་ཡིས་ཏོག་གི་རྒྱལ་པོ་ལ་ཕྱག་འཚལ༔ བདག་གི་མིག་གཉིས་རབ་ཏུ་གསལ་བར་མཛོད༔ གཟུགས་ཕུང་རྣམ་དག་བཅོམ་ལྡན་ཀུན་རིག་དང་༔ པདྨའི་མངོན་སྤྱན་དེ་བཞིན་སྤྱན་ཆེན་པོ༔ མིག་དབང་རྣམ་དག་བྱམས་མགོན་ས་ཡི་སྙིང་༔ སྙིང་རྗེའི་མིག་མི་འཛུམ་ལའང་གུས་ཕྱག་འཚལ༔ བདག་གི་མིག་གཉིས་རབ་ཏུ་གསལ་བར་མཛོད༔ སངས་རྒྱས་ཨུཏྤལ་རྒྱས་དང་པདྨའི་སྤྱན༔ པདྨ་མངོན་རྒྱས་དབང་བཅུ་མངའ་བའི་སྤྱན༔ མཁྱེན་པའི་སྟོབས་ཀྱིས་སྤྱན་མངའ་བ་ལ་ཡང་༔ བདག་ནི་གུས་པ་ཆེན་པོའི་ཕྱག་འཚལ་ལོ༔ དབང་སྐྱོན་རབ་རིབ་དྲི་མ་མཐར་མཛོད་ཅིག༔ གང་ཞིག་དབང་པོའི་ཡོན་ཏན་འགགས་པའི་རྐྱེན༔ ཀ་དག་ལྷུན་གྲུབ་ཟུང་འཇུག་གཞིར་སྣང་ལ༔ གློ་བུར་མ་རིག་རྐྱེན་གྱིས་བག་ཆགས་པས༔ རང་ངོ་མངོན་མཐོང་ངར་འཛིན་རིང་བས་རྒྱུ༔ སངས་རྒྱས་སྤྱན་གྱིས་མྱུར་དུ་སེལ་བར་མཛོད༔ དེ་བཞིན་ཉིད་ལ་རྣམ་རྟོག་མི་མངའ་ཡང་༔ སྲིད་དང་ཞི་བ་ཇི་བཞིན་མཁྱེན་པ་ཡིས༔ ཇི་ལྟ་ཇི་སྙེད་མཁྱེན་པའི་མིག་ལྡོང་བ༔ ཤེས་རབ་སྤྱན་གྱིས་སེལ་བར་མཛད་དུ་གསོལ༔ ཆོས་དང་ཆོས་མིན་གནས་དང་གནས་མིན་སོགས༔ ཀུན་གྱི་དེ་ཉིད་གཟིགས་པས་ཟུང་འཇུག་གི༔ གཟིགས་པ་ཉེར་བར་དག་པའི་མིག་ལྡོང་བ༔ ཆོས་ཀྱི་སྤྱན་གྱིས་སེལ་བར་མཛད་དུ་གསོལ༔ སྔོན་དང་ཕྱི་མའི་མུ་དང་སྐྱེ་སྲིད་སོགས༔ དབང་པོར་ལྐོག་ཏུ་གྱུར་བས་མ་མངོན་པ༔ སངས་རྒྱས་ཡེ་ཤེས་ཕུན་ཚོགས་མཐར་ཕྱིན་མཐུས༔ ལྷ་ཡི་སྤྱན་གྱིས་སེལ་བར་མཛད་དུ་གསོལ༔ གློ་བུར་རྣམ་རྟོག་མིག་སྐྱོན་ཉེ་བ་ཡི༔ དབང་པོ་ཆུ་བུར་བཅས་ལ་སྐྱོན་འཇུག་པ༔ ཤ་ཡི་སྤྱན་གྱིས་སེལ་བར་མཛད་དུ་གསོལ༔ ཡེ་ཤེས་སྤྱི་གདེངས་འོད་ཟེར་ལྔ་ཡི་མདངས༔ རིག་པའི་སྲོག་ཅན་ཤེལ་གྱི་སྦུ་གུ་ལ༔ འཁྲུལ་དང་ཤེས་ཉམས་འོད་གསལ་དབྱིངས་སུ་དག༔ རླུང་ལྔའི་རྒྱུ་བ་ཤེས་རབ་ལྔར་ཟད་ནས༔ རིགས་ལྔའི་ཚོམ་བུ་བཅུད་དུ་སྨིན་པ་ཡིས༔ ལམ་འབྲས་འོད་གསལ་མ་བུ་ཟུང་འཇུག་སྟེ༔ སྒྲིབ་བྲལ་སྐུ་ལྔའི་རང་ཞལ་མངོན་གྱུར་ཤོག༔ ན་མོ་བུདྡྷ༔ མཾ་ས་ཙཀྵུ༔ དེ་ཙཀྵུ༔ དྷརྨ་ཙཀྵུ༔ པྲཛྙཱ་ཙཀྵུ༔ བུདྡྷ་ཙཀྵུ་སརྦ་པྲ་ཝེ་ཤ་ཡ་ཕཊ༔ ཙཀྵུ་བྷིགྣན་མ་ར་ཡ་ཕཊ༔ ཙཀྵུ་དྷེ་ཝ་སརྦ་ན་མོ༔ བདག་དང་སེམས་ཅན་ཐམས་ཅད་ཀྱི་སྤྱན་ལྔའི་ཉེས་སྐྱོན་བག་ཆགས་དྲི་མ་ཐམས་ཅད་ཞི་བར་གྱུར་ཅིག༔ སྔགས་བསྡུ་ན༔ ཙཀྵུ་པཉྩ་བི་ཤུདྡྷེ་ཡེ་སྭ་ཧཱ༔ ཅི་ནུས་བཟླས་མཐར་དྭངས་ཤེལ་དྲི་མ་མེད་པ་ལ་སྔགས་བཏབ་སྟེ་མིག་ཕྱི༔ ཅེས་སྔོན་གྱི་ལས་ངན་པ་མ་གཏོགས་པའི་མིག་སྐྱོན་ཐམས་ཅད་སེལ་གྱིས་ལན་ཆགས་ལ་སེམས་ཅན་གྱི་སྲོག་བསླུས་ན་ངེས་པར་འབྱེད་དོ༔ ཞེས་ཀྱང་སྔགས་འཆང་ཨོ་རྒྱན་དགའ་རབ་ནས་ཡང་ཡང་བསྐུལ་ངོར་དུས་མཐའི་སྔགས་གཟུགས་ག་གཱ་ཨ་བྷྱེས་བྲིས། །

ཐུགས་རྗེ་ཆེན་པོའི་མིག་འབྱེད་ཡེ་ཤེས་སྣང་གསལ།

ཡེ་ཤེས་སྒྱུ་འཕྲུལ་རོལ་པ་ལས༔ ཐུགས་རྗེ་ཆེན་པོའི་མིག་འབྱེད་ཡེ་ཤེས་སྣང་གསལ་བཞུགས་སོ༔

ན་མོ་གུ་རུ་པདྨ་ཀ་ར་ཡེ༔ བརྡ་ཡིག །འདི་ལ་དཀྱིལ་འཁོར་གྲུ་བཞིའི་སྟེང་༔ གཏོར་མ་པདྨའི་དབྱིབས་སུ་བཟོས༔ མེ་ལོང་ཁྲུས་བུམ་གཡས་གཡོན་བཤམས༔ སྤྱན་དབྱེའི་གསེར་གྱི་ཐུར་མ་ལ༔ དྲི་མེད་དར་དཀར་གཙང་མས་བསྟོད༔ མཆོད་པ་སྤྱི་དང་བྱེ་བྲག་ཏུ༔ སྣང་གསལ་བརྒྱ་རྩ་ལ་སོགས་གཙོ༔ དེ་ནས་བདག་ཉིད་ལྷར་གསལ་བ༔ ན་མོ༔ རྒྱལ་ཀུན་ཐུགས་རྗེའི་མངའ་བདག་ལ༔ བྱང་ཆུབ་བར་དུ་སྐྱབས་སུ་མཆི༔ འགྲོ་ཀུན་སངས་རྒྱས་ཐོབ་བྱའི་ཕྱིར༔ སྨོན་འཇུག་བྱང་ཆུབ་སེམས་རབ་བསྐྱེད༔ ཅེས་ལན་གསུམ་དེ་ནས་ལས་གཞུང་ལ༔ ཧྲཱི༔ བདག་ཉིད་སྐད་ཅིག་དྲན་རྫོགས་སྐུ༔ ཐུགས་རྗེ་ཆེན་པོར་དྲི་མ་མེད༔ ཞལ་གཅིག་ཕྱག་གཉིས་སྐུ་མདོག་དཀར༔ ཕྱག་གཡས་དག་བྱེད་ཁྲུས་བུམ་དང་༔ གཡོན་པས་མེ་ལོང་དྭངས་གསལ་བསྣམས༔ ཞབས་གཉིས་བཞེངས་བའི་སྟབས་སུ་བཞུགས༔ ལོངས་སྤྱོད་རྫོགས་པའི་རྒྱན་ཆས་ཅན༔ སྣང་སྟོང་འོད་ཀྱི་རང་བཞིན་གསལ༔ ཐུགས་དཀར་པདྨ་འདབ་བརྒྱད་སྟེང་༔ ཤེལ་ཕྲེང་བརྒྱ་རྩ་བརྒྱད་ཀྱི་དཀྱིལ༔ ཐུགས་རྗེ་གསེར་གྱི་ཐུར་མ་ནི༔ གྱེན་དུ་བསྒྲེང་བའི་མཐའ་བསྐོར་དུ༔ སྙིང་བོ་ཡི་གེ་དྲུག་གི་མཐར༔ ལས་སྔགས་ཕྲེང་བ་སུམ་རིམ་འཁོར༔ བཟླས་པའི་འོད་ཀྱི་རྒྱལ་ཀུན་མཆོད༔ དབང་བྱིན་དངོས་གྲུབ་མ་ལུས་པ༔ འོད་ཟེར་སྣ་ལྔའི་རྣམ་པར་བསྡུས༔ བདག་ཐིམ་མིག་གི་དྲི་བག་སྦྱངས༔ སླར་ཡང་རིགས་དྲུག་གནས་རིས་ཀྱི༔ ཁམས་གསུམ་སེམས་ཅན་མ་ལུས་པའི༔ མ་རིག་ཉོན་ཤེས་ལས་སྒྲིབ་སྦྱངས༔ ཐུགས་རྗེ་ཆེན་པོའི་གོ་འཕང་ལ༔ བཀོད་ནས་འཁོར་བ་དོང་སྤྲུགས་བསམ༔ ཨོཾ་མ་ཎི་པདྨེ་ཧཱུྃ༔ མ་ཧཱ་ཀ་རུ་ཎི་ཀ་དྲ་ཤྱ་ཧོ༔ བཛྲ་ཙཀྵུ་པྲ་ཝེ་ཤ་ཡ་ཕཊ༔ སརྦ་པ་པཾ་ཤུདྡྷེ་ཤུདྡྷེ་ཡེ་སྭཱ་ཧཱ༔ ཞེས་ཅི་མང་བརྗོད་མཐར༔ མཆོད་བསྟོད་དང་བཅས་མཐར༔ ཧཱུྃ༔ ཐུགས་རྗེའི་ཆུ་ནི་བླ་ན་མེད༔ འཇིག་རྟེན་དབང་ཕྱུག་སྙིང་རྗེའི་མདངས༔ སྐལ་ལྡན་བུ་ལ་ཁྲུས་བྱས་པས༔ སྡིག་སྒྲིབ་བག་ཆགས་དག་པར་ཤོག༔ སརྦ་པ་པཾ་ཤུདྡྷེ་ཤུདྡྷེ་ཡེ་སྭཱ་ཧཱ༔ ཞེས་པས་ཁྲུས་བྱས༔ ཨཱ༔ ཐུགས་རྗེ་ཆེན་པོའི་ཐུགས་མཚོན་པའི༔ མི་འགྱུར་གསེར་གྱི་ཐུར་མ་ཡིས༔ སྐལ་ལྡན་བུ་ཁྱོད་མིག་དབྱེའོ༔ མ་རིག་ལིང་ཐོག་སེལ་བར་ཤོག༔ པྲ་ཝེ་ཤ་ཡ་ཕཊ༔ ཞེས་མིག་དབྱེས་ལ་མེ་ལོང་བསྟན༔ ཨོཾ༔ མེ་ལོང་ཡེ་ཤེས་རྣམ་པར་དག༔ ཡེ་ཤེས་སྣང་བ་སོ་སོར་རྟོགས༔ ཐུགས་རྗེ་ཆེན་པོའི་དགོངས་ཀློང་ཡངས༔ སྐལ་ལྡན་ཁྱོད་ལ་འཆར་བྱེད་བསྔགས༔ བཛྲ་ཙཀྵུ་པྲཛྙཱ་ཛྙཱ་ན་ཨ་བྷི་ཥིཉྩ་ཧཱུྃ༔ ཞེས་རེས་འགའ་དབང་ཁྲུས་སུ་བྱའོ༔ དེའི་མཐར་བཀྲ་ཤིས་གང་འཚམས་བརྗོད༔ གནས་སྐབས་རླུང་མཁྲིས་བད་ཀན་སེལ༔ མཐར་ཐུག་གཉིས་གསུམ་རྒྱུ་དང་བྲལ༔ རྣམ་དག་སྤྱན་གསུམ་མཁའ་ལ་འཆར༔ ཞེས་ཀྱང་ཨ་སྤེན་ངོར་ག་གཱས་སོ༔ འདི་ལ་རྒྱས་འདོད་ཐུགས་ཆེན་གཞུང་གིས་བསབས་སོ། །

རྩ་གསུམ་དྲིལ་བསྒྲུབ་བསྡུས་པ།

རྩ་གསུམ་དྲིལ་བསྒྲུབ་བསྡུས་པ་བཞུགས་སོ༔

ཧཱུྃ༔ ཕྱི་སྣོད་ཐམས་ཅད་འོག་མིན་གནས༔ ཁང་ཁྱིམ་རྒྱན་རྫོགས་གཞལ་ཡས་ཁང་༔ རང་ལུས་རིག་འཛིན་བླ་མའི་སྐུ༔ དབུ་ལ་ཁྲག་འཐུང་སྒྲུབ་སྡེའི་ལྷ༔ ཐུགས་ཀར་ཞི་བ་རྒྱུད་སྡེ་རྫོགས༔ བ་སྤུའི་གྲངས་མཉམ་རྩ་འཁོར་ལ༔ དཀར་དམར་ཐིག་ལེ་དཔའ་བོ་དང་༔ མཁའ་འགྲོ་ཡོངས་འདུས་དཀྱིལ་འཁོར་དུ༔ མ་འདྲེས་ཡོངས་སུ་རྫོགས་པ་ཡིས༔ གནས་གསུམ་འོད་ཟེར་རབ་འཕྲོས་པས༔ རང་བཞིན་གནས་ནས་ཡེ་ཤེས་པ༔ སྤྱན་དྲངས་གཉིས་སུ་མེད་པར་བསྟིམ༔ ཕྱག་འཚལ་མཆོད་འབུལ་གླུ་ཡིས་བསྟོད༔ གསང་སྔགས་སྙིང་པོའི་ཐིག་ལེ་ཆེ༔ མ་ཡེངས་མི་རྟོག་བྱང་ཆུབ་སེམས༔ དུ་མ་རོ་མཉམ་ངང་ནས་བཟླ༔ ཨོཾ་ཨཱཿཧཱུྃ༔ འདི་ཡི་རབ་འབྱམས་ལས་ཀུན་འགྲུབ༔ ས་མ་ཡཱ༔ ཧཱུྃ༔ ཚོགས་རྫས་འདོད་ཡོན་ལྷ་མོར་དག༔ དབྱིངས་ནས་ལྷ་ཚོགས་སྤྱན་འདྲེན་གཤེགས༔ ཞལ་ཟས་ཚོགས་ཀྱི་མཆོད་པ་འབུལ༔ ཚེ་རབས་ཉམས་ཆགས་སྡིག་ལྟུང་བཤགས༔ གཟུང་འཛིན་རུ་ཏྲ་དབྱིངས་སུ་བསྒྲལ༔ ཡེ་སངས་ཆོས་ཉིད་ཆེན་པོར་སྟོབས༔ ཚོགས་གཉིས་རྫོགས་སླད་ཐུགས་དམ་བསྐངས༔ ཚིམ་པ་དྲུག་གིས་ཚོགས་ལ་སྤྱོད༔ ལྷག་སྐྱོང་ཕོ་མོ་ལྷག་ལ་རོལ༔ སེམས་ཅན་དོན་དུ་ཐུགས་དམ་བསྐུལ༔ བསྟན་བསྲུང་རྒྱ་མཚོའི་ཚོགས་རྣམས་མཆོད༔ ཆོས་སྐྱོང་རྐྱེན་བཟློག་ཕྲིན་ལས་མཛོད༔ རྟོག་གཉིས་སྐྱེ་མེད་ངང་དུ་མནན༔ འོད་གསལ་མངོན་གྱུར་དངོས་གྲུབ་སྩོལ༔ མ་རིག་ལས་ཉོན་མཐོལ་ལོ་བཤགས༔ ལྷར་སྣང་སྟོང་ཉིད་ཆེན་པོར་བསྡུ༔ སྟོང་པའི་རང་མདངས་འོད་གསལ་ལྷ༔ ཚོགས་གཉིས་མཐར་ཕྱིན་འདི་ཡི་དགེའི༔ འགྲོ་ཀུན་རང་གྲོལ་བཀྲ་ཤིས་ཤོག༔ བདྡྷའི་ངོར་ག་གཱས་སོ། །

སྣང་མཐའི་ལུས་དཀྱིལ་བདེ་ཆེན་རང་གྲོལ།

སྣང་མཐའི་ལུས་དཀྱིལ་བདེ་ཆེན་རང་གྲོལ་ཞེས་བྱ་བ་བཞུགས༔

ན་མོ་གུ་རུ་པདྨ་ཀ་ར་ཡེ༔ གྷཏྲཿ ཧྲཱིཿ གཟུང་འཛིན་སྣང་སྲིད་སྟོང་བར་སྦྱངས༔ སྟོང་བའི་རང་མདངས་སྙིང་རྗེའི་རྩལ༔ རང་རིག་ཧྲཱི་དམར་འོད་ཟེར་ལས༔ ཞིང་ཁམས་ཚད་དང་མཚན་ཉིད་ལྡན༔ རིན་ཆེན་པདྨའི་གཞལ་ཡས་སུ༔ ཉི་ཟླ་པདྨའི་གདན་བརྩེགས་པའི༔ མཛོད་མིག་བདུན་ལྡན་རྨ་བྱའི་སྟེང་༔ ཐུགས་སྲོག་གདན་ལ་བབས་པ་ལས༔ རང་ཉིད་སྐད་ཅིག་དྲན་རྫོགས་སུ༔ སྣང་བ་མཐའ་ཡས་སྐུ་མདོག་དམར༔ ཞལ་གཅིག་ཕྱག་གཉིས་མཉམ་བཞག་མཛད༔ ཡེ་ཤེས་བདུད་རྩིའི་ལྷུང་བཟེད་བསྣམས༔ ཞབས་གཉིས་རྡོ་རྗེའི་སྐྱིལ་ཀྲུང་བཞུགས༔ སྤྲུལ་བ་སྐུ་ཡི་ཆ་བྱད་ཅན༔ ཐུགས་ཀར་ཚེ་དཔག་མེད་པ་ཡི༔ ཐུགས་གསང་པདྨ་འདབ་ལྔའི་དབུས༔ ཧྲཱིཿཨཱོཾ་ཨ་མི་དྷེ་ཝ་འཁོད༔ གནས་གསུམ་འོད་ཟེར་རབ་འཕྲོས་པས༔ ཡེ་ཤེས་སྤྱན་དྲངས་གཉིས་མེད་བསྟིམ༔ ཕྱག་འཚལ་མཆོད་འབུལ་གུས་པས་བསྟོད༔ ཐུགས་སྲོག་འོད་ཀྱི་སངས་རྒྱས་ཞིང་༔ ཀུན་ནས་བྱིན་རླབས་དངོས་གྲུབ་བསྡུས༔ མར་འཕྲོས་འགྲོ་བའི་ལས་ཉོན་སྦྱངས༔ ཁམས་གསུམ་དག་པ་རབ་འབྱམས་ངང་༔ ཨོཾ་ཨ་མི་དྷེ་ཝ་ཧྲཱི༔ ཅེས་བརྗོད་ཚེ་རབས་སྡིག་སྒྲིབ་སྦྱངས༔ པདྨ་དཔའ་བོ་མངོན་སུམ་འགྲུབ༔ ཚེ་ལུས་འདི་ལ་བྱང་ཆུབ་ཐོབ༔ གལ་ཏེ་དེ་བཞིན་མ་གྱུར་ནའང་༔ སྣང་མུན་འདྲེས་པའི་བར་དོ་རུ༔ འོད་དཔག་མེད་ཀྱི་ཞལ་མཐོང་འགྱུར༔ ས་མ་ཡཱ༔ ཅེས་ཀྱང་ག་གཱས་སོ། །

རྡོར་སེམས་ལུས་དཀྱིལ་བསྡུས་པ།

རྡོར་སེམས་ལུས་དཀྱིལ་བསྡུས་པ་བཞུགས་སོ༔

ཧཱུྃ༔ རང་ཉིད་སྐད་ཅིག་དྲན་རྫོགས་སུ༔ བརྡ་ཡིག །དཔལ་ལྡན་རྡོ་རྗེ་སེམས་དཔའ་ནི༔ སྐུ་མདོག་དཀར་གསལ་གངས་རི་ལ༔ ཉི་མ་འབུམ་གྱིས་འཁྱུད་པ་ལྟའི༔ གཟི་བརྗིད་འོད་ཕུང་རབ་ཏུ་འབར༔ ལོངས་སྤྱོད་རྫོགས་སྐུའི་ཆས་ཀྱིས་བརྒྱན༔ ཞལ་གཅིག་ཕྱག་གཉིས་གཡས་པ་ཡིས༔ རིག་སྟོང་རྡོ་རྗེ་ཐུགས་ཀར་འཛིན༔ གཡོན་པས་དྲིལ་བུ་སྐུ་ལ་བརྟེན༔ སྙེམས་མ་དཀར་མོ་གྲི་གུག་འཁྱུད༔ ཞབས་གཉིས་རྡོར་པད་སྐྱིལ་ཀྲུང་བཞུགས༔ ཕྱོགས་བཞིར་རྡོར་སེམས་རིགས་བཞི་དང་༔ སྒོ་མ་བཞི་དང་བཅས་པ་ཀུན༔ རིགས་བརྒྱ་རིགས་ལྔ་རིགས་གཅིག་གིས༔ ཞི་ཁྲོ་རྒྱལ་བ་ཡོངས་འདུས་པའི༔ བདག་ཉིད་ཆེན་པོར་ལྷུན་གྱིས་གྲུབ༔ འཁོར་འདས་སྣང་སྲིད་ཐམས་ཅད་ཀུན༔ ཉིད་ཀྱི་སྒྱུ་འཕྲུལ་རོལ་རྩལ་དུ༔ རང་རིག་ཡེ་ཤེས་ཡེ་རྫོགས་ལྷའི༔ མངོན་གྱུར་ངང་བརྟན་བཞུགས་སུ་གསོལ༔ ལྟ་བ་དོན་གྱིས་མཇལ་ཕྱག་འཚལ༔ ཀུན་བཟང་རྒྱན་གྱི་མཆོད་པས་མཆོད༔ ཆོས་ཉིད་རང་སྒྲའི་དབྱངས་ཀྱིས་བསྟོད༔ ཐུགས་ཀར་ཟླ་སྟེང་ཧཱུྃ་ཡིག་མཐར༔ སྔགས་ཀྱི་ཕྲེང་བས་གཡོན་དུ་འཁོར༔ འོད་འཕྲོས་དུས་གསུམ་རྒྱལ་བ་ཀུན༔ སྤྱན་དྲངས་དབྱེར་མེད་རོ་གཅིག་གྱུར༔ རིག་འདུས་ངོ་བོ་གཅིག་ཏུ་བསྒྲུབས༔ ཡི་གེ་བརྒྱ་བ་དང་༔ ཡང་ན་ཡིག་དྲུག་ཅི་ནུས་བཟླ༔ ཅེས་ཀྱང་མཉྫུ་དྷྭ་ཛ་ནས་བསྐུལ་བ་དོན་ཡོད་པའི་ཕྱིར་ག་གཱ་ཨ་བྷྱེས་སྨྲས་པའོ། །སརྦ་མངྒ་ལཾ། །

ཕ་དམ་པའི་ལུས་དཀྱིལ།

ཕ་དམ་པའི་ལུས་དཀྱིལ་བཞུགས་སོ༔

ཧཱུྃ༔ སྣང་བ་རྣམ་དག་ཆོས་ཀྱི་དབྱིངས༔ ཡེ་རྫོགས་ལྷུན་གྲུབ་གཞལ་ཡས་སུ༔ པདྨ་ཉི་མ་བམ་གྱི་སྟེང་༔ རང་སེམས་ཧཱུྃ་ཡིག་མཐིང་ནག་ཉིད༔ ཡོངས་གྱུར་དམ་པ་སངས་རྒྱས་ནི༔ ཞལ་གཅིག་ཕྱག་གཉིས་སྐུ་མདོག་ནག༔ ཞི་མ་ཁྲོ་འཛུམ་གཟི་བརྗིད་འབར༔ དབུ་སྐྲ་ལྕང་ལོ་རྒྱབ་དུ་བཀྲམ༔ ཕྱག་གཡས་ཙན་དན་ཅང་ཏེའུ་འཁྲོལ༔ གཡོན་པས་མཆོག་ཆེན་རྐང་གླང་བསྣམས༔ ཧེ་རུ་ཀ་པའི་ཆ་བྱད་ཅན༔ ཞབས་གཉིས་རྒྱལ་པོ་རོལ་སྟབས་བཞུགས༔ སྐུ་དབྱིངས་དྭངས་གསལ་ཆེན་པོ་རུ༔ དཔའ་བོ་མཁའ་འགྲོའི་དཀྱིལ་འཁོར་རྫོགས༔ ཐུགས་དབུས་ཉི་སྟེང་ཧཱུྃ་ཡིག་ལས༔ འོད་འཕྲོས་འོག་མིན་ཆོས་དབྱིངས་དང་༔ ས་སྤྱོད་མཁའ་སྤྱོད་གནས་གསུམ་ནས༔ མ་རྒྱུད་མཁའ་འགྲོའི་ངོ་བོ་ཉིད༔ རང་རྩལ་འཁོར་དང་བཅས་པ་ཀུན༔ སྤྱན་དྲངས་གཉིས་སུ་མེད་པར་བསྟིམ༔ ཐུགས་ཀར་རྡོ་རྗེ་ཕག་མོ་ནི༔ རྒྱན་མེད་གཅེར་བུ་འོད་འབར་བའི༔ སྲོག་གི་གོ་རུ་ཏིང་འཛིན་སེམས༔ ཧཱུྃ་མཐར་སྔགས་ཀྱི་ཕྲེང་བས་བསྐོར༔ བཟླས་པ་སྔགས་ཀྱིས་ཐུགས་དམ་བསྐུལ༔ རྣམ་སྨིན་ཆོས་ཉིད་འཁོར་ལོ་རུ༔ རང་གྲོལ་རོལ་པའི་གདེངས་ཐོབ་ཅིང༔ མངོན་གྱུར་ངང་ནས་འཛབ་དབྱངས་སྒྲོགས༔ ཨོཾ་བཛྲ་མ་ཧཱ་གུ་རུ་ཀ་ལ་ཙརྱ་བཾ་ཧ་རི་ནི་ས་ཨ་ཧཱུྃ༔ ཞེས་བཟླའོ༔ འདི་ལྟར་ཉམས་སུ་ལེན་སྲིད་ན། །གནས་སྐབས་མཐར་ཐུགས་དགོས་པ་འགྲུབ། །འོན་ཀྱང་དགོས་མེད་ཡིག་ཉོབས་ལས། །སྐྱབས་འགྲོ་ཚར་རེ་ལོས་དགའ་བསམ། །ཐེག་མཆོག་པདྨ་བློ་གྲོས་སོགས། །བསྐུལ་བོའི་དོན་དུ་དཀའ་ལས་བྱས། །ག་གཱས་སོ། །

ཐང་རྒྱལ་ལུས་དཀྱིལ།

ཐང་རྒྱལ་ལུས་དཀྱིལ་བཞུགས་སོ༔

ཧཱུྃ༔ སྣང་བ་རྣམ་དག་ཆོས་ཀྱི་དབྱིངས༔ ཡེ་རྫོགས་ལྷུན་གྲུབ་གཞལ་ཡས་སུ༔ པདྨ་ཉི་མ་བམ་གྱི་སྟེང་༔ རང་སེམས་ཧཱུྃ་ཡིག་མཐིང་ནག་ཉིད༔ ཡོངས་གྱུར་པད་འབྱུང་ཐང་སྟོང་རྒྱལ༔ སྨུག་ནག་ཞལ་གཅིག་ཕྱག་གཉིས་པ༔ ཞི་མ་ཁྲོ་འཛུམ་གཟི་བརྗིད་འབར༔ སྨྲ་ར་ཨག་ཚོམ་ཐུགས་ཀར་སླེབས༔ དབུ་སྐྲ་རལ་པའི་ཐོར་ཚུགས་བཅིངས༔ ཕྱག་གཉིས་ཐུགས་རྗེའི་ལྕགས་ཐག་བསྣམས༔ ཧེ་རུ་ཀ་པའི་ཆ་བྱད་ཅན༔ ཞབས་གཉིས་རྒྱལ་པོ་རོལ་སྟབས་བཞུགས༔ སྐུ་དབྱིངས་དྭངས་གསལ་ཆེན་པོ་རུ༔ དཔའ་བོ་མཁའ་འགྲོའི་དཀྱིལ་འཁོར་རྫོགས༔ ཐུགས་དབུས་ཉི་སྟེང་ཧཱུྃ་ཡིག་ལས༔ འོད་འཕྲོས་འོག་མིན་ཆོས་དབྱིངས་དང་༔ ས་སྤྱོད་མཁའ་སྤྱོད་གནས་གསུམ་ནས༔ མ་རྒྱུད་མཁའ་འགྲོའི་ངོ་བོ་ཉིད༔ རང་རྩལ་འཁོར་དང་བཅས་པ་ཀུན༔ སྤྱན་དྲངས་གཉིས་སུ་མེད་པར་བསྟིམ༔ ཐུགས་ཀར་རྡོ་རྗེ་ཕག་མོ་ནི༔ རྒྱན་མེད་གཅེར་བུ་འོད་འབར་བའི༔ སྲོག་གི་གོ་རུ་ཏིང་འཛིན་སེམས༔ ཧཱུྃ་མཐར་སྔགས་ཀྱི་ཕྲེང་བས་བསྐོར༔ བཟླས་པ་སྔགས་ཀྱིས་ཐུགས་དམ་བསྐུལ༔ རྣམ་སྨིན་ཆོས་ཉིད་འཁོར་ལོ་རུ༔ རང་གྲོལ་རོལ་པའི་གདེངས་ཐོབ་ཅིང་༔ མངོན་གྱུར་ངང་ནས་འཛབ་དབྱངས་སྒྲོགས༔ ཞེས་སོ༔ བཟླས་པ་ནི༔ ཨོཾ་ཨཱཿཧཱུྃཿ ཡོ་ག་ཤྭ་རི་མ་ཧཱ་བཻ་ཛྭ་སརྦ་སིདྡྷི་ཕ་ལ༔ ཞེས་བཟླའོ༔ འདི་ལྟར་ཉམས་སུ་ལེན་སྲིད་ན། །གནས་སྐབས་མཐར་ཐུག་དགོས་པ་འགྲུབ། །འོན་ཀྱང་དགོས་མེད་ཡིག་ཉོབ་ལས། །སྐྱབས་འགྲོ་ཚར་རེ་ལོས་དགའ་བསམ། །ཐེག་མཆོག་པདྨ་བློ་གྲོས་སོགས། །བསྐུལ་བོའི་དོན་དུ་དཀའ་ལས་བྱས། །ག་གཱས་སོ། །

སྨན་ལྷ་བསྡུས་པ།

སྨན་ལྷ་བསྡུས་པ་ནི༔ ཧཱུྃ༔ སྣོད་ཀྱི་འཇིག་རྟེན་བཻཌཱུརྱར་སྣང་དབུས༔ རིན་ཆེན་པདྨའི་གདན་སྟེང་རང་ཉིད་ནི༔ བཅོམ་ལྡན་སྨན་བླ་སྐུ་མདོག་མཐིང་ཀ་ལ༔ ཞལ་གཅིག་ཕྱག་གཡས་མཆོད་སྦྱིན་ཨ་རུ་རའི༔ སྡོང་པོ་ལོ་འདབ་དང་བཅས་གཡོན་མཉམ་བཞག༔ ལྷུང་བཟེད་འཆི་མེད་བདུད་རྩིའི་གང་བ་བསྣམས༔ ཞབས་གཉིས་རྡོ་རྗེའི་སྐྱིལ་ཀྲུང་གིས་བཞུགས་པའི༔ མཐའ་བསྐོར་ཕྱོགས་མཚམས་བདེ་གཤེགས་མཆེད་བདུན་དང་༔ བྱང་ཤར་ཨོ་རྒྱན་སྨན་བླ་སྐུ་མདོག་མཐིང་༔ ཕྱག་ན་ཚེ་བུམ་སྨན་གྱི་སྤར་བུ་ཅན༔ སྨན་གྱི་ལྷ་མོ་དྲང་སྲོང་རིག་འཛིན་འཁོར༔ མ་འདྲེས་ཡོངས་རྫོགས་ཏིལ་གོང་ཕྱུར་བཞིན་གསལ༔ ཐུགས་ཀའི་འོད་ཀྱིས་ཡེ་ཤེས་སྤྱན་དྲངས་བསྟིམ༔ སླར་ཡང་འོད་འཕྲོས་འགྲོ་བའི་སྒྲིབ་གཉིས་ལས༔ བྱུང་བའི་བཞི་བརྒྱ་རྩ་བཞིའི་ནད་རིགས་ཀུན༔ བ་མོར་ཉི་འོད་ཕོག་བཞིན་ཡོངས་ཀྱི་དག༔ ཀུན་ཀྱང་སྨན་གྱི་ལྷ་ཚོགས་ངོ་བོར་གྲོལ༔ ཨོཾ་མ་ཧཱ་བེ་ཥ་ཛེ་རཱ་ཛ་ས་མུངྒ་ཏེ་སྭཱ་ཧཱ༔ ཅེས་བརྗོད་རྒྱུ་འབྲས་ནད་རྣམས་ཀུན༔ བདེ་བ་ཆེན་པོའི་ངང་དུ་གྲོལ༔ ས་མ་ཡཱ༔ ཉེར་སྤྱོད་བཟང་དགུའི་མཆོད་པ་འབུལ༔ མཁྱེན་བརྩེ་ནུས་གསུམ་ལྡན་ལ་བསྟོད༔ ཡེ་ཤེས་གཤེགས་ནས་དམ་ཚིག་བསྡུ༔ སླར་ཡང་སྨན་པའི་རྒྱལ་པོར་ལྡང་༔ དགེ་དེས་འགྲོ་ཀུན་ཕྱམ་གཅིག་ཏུ༔ གོ་འཕང་མཆོག་ཐོབ་བཀྲ་ཤིས་ཤོག༔ ཅེས་ཀྱང་ཁ་ལོའི་ངོར་ག་གཱས་སོ། །དགེའོ། །

དཔལ་ཆེན་རྟ་མགྲིན་ནག་པོའི་ལུས་དཀྱིལ།

དཔལ་ཆེན་རྟ་མགྲིན་ནག་པོའི་ལུས་དཀྱིལ་བཞུགས་སོ༔

སྦྱོར་བ་སྐྱབས་སུ་འགྲོ་ཞིང་སེམས་བསྐྱེད་པ༔ ཧོ༔ འཁོར་འདས་ཐམས་ཅད་སེམས་ཀྱི་ཁྱབ༔ སེམས་ཉིད་དུས་གསུམ་སངས་རྒྱས་ལ༔ རང་རིག་རང་ངོ་ཤེས་པའི་ངང་༔ འདུ་འབྲལ་མེད་པར་སྐྱབས་སུ་མཆི༔ རྣལ་མ་མ་བཅོས་ཆེན་པོ་ནི༔ སེམས་ཅན་ཀུན་གྱི་དེ་བཞིན་ཉིད༔ ཆོས་སྐུའི་རང་གདེངས་འཚོ་བའི་ཕྱིར༔ བདག་གི་དཔལ་ཆེན་སྒྲུབ་པར་བགྱི༔ དངོས་གཞི་ནི༔ ཧོ༔ མི་དམིགས་ནམ་མཁའི་ངང་ཉིད་ལས༔ སྙིང་རྗེ་ཆེན་པོའི་རླན་བྱུང་སྟེ༔ ཕྲ་བའི་སྲོག་སྟེ་ཧྲཱི་ཡིག་མཚན༔ དོན་གཉིས་ལྷུན་གྲུབ་བཅོས་སུ་ཤར༔ བདེ་སྟོང་དྲོད་ཀྱི་རིམ་སྨིན་ཚུལ༔ ནོར་བུ་ནམ་མཁའ་བདེ་འཁོར་རླུང་༔ བསྐྱེད་བྱེད་དབང་ཆེན་རྣམ་བཀོད་ཆུ༔ ཆོས་ཀྱི་དཀྱིལ་འཁོར་ཞིང་ཁམས་དབུས༔ གསུང་སྒོ་གཞལ་ཡས་ཁང་སུ་རྫོགས༔ གོས་དཀར་ཡུམ་གྱི་བ་ག་རུ༔ ཁམས་ལུས་རྣམ་དག་པད་ཉི་ཟླ༔ ཀླུ་དབང་རོ་ཉེ་ལ་བརྫིས་སྟེང་༔ རྒྱལ་ཀུན་གསུང་གི་དབང་ཕྱུག་པོ༔ སྐུ་མདོག་བུང་བ་གཞོན་ནུས་གཟུགས༔ ཁྲོས་པའི་རྟ་སྐད་འདུལ་གླུ་ཅན༔ ཞལ་གཅིག་ཕྱག་གཉིས་རལ་གྲི་དང་༔ ལྕགས་ཀྱུའི་དགྲ་བགེགས་འགུགས་ཅིང་སྒྲོལ༔ ཞབས་གཉིས་གྱད་ཀྱི་འདོར་སྟབས་བསྒྲད༔ ཁྲོ་བོའི་ཆ་ལུགས་ཡོངས་སུ་རྫོགས༔ འབར་བའི་གར་དགུའི་བརྗིད་པར་གསལ༔ ཡུམ་མཆོག་རྡོ་རྗེ་གཏུམ་མོ་ནག༔ ཕྱག་གཉིས་གྲི་ཐོད་འཛིན་པས་འཁྲིལ༔ འཁོར་དུ་པདྨ་དཔའ་བོ་དང་༔ ཊཱཀྐི་དམར་ནག་འབུམ་གྱིས་ཚོགས༔ ཉི་མ་དང་ནི་འོད་ཟེར་བཞིན༔ ངོ་བོ་རང་རྩལ་མ་འགགས་ཤར༔ གནས་གསུམ་འོད་ཀྱི་ཡེ་ཤེས་པ༔ སྤྱན་དྲངས་གཉིས་སུ་མེད་པར་བསྟིམ༔ ལྟ་བསྒོམ་སྒྲུབ་པའི་ཕྱག་འཚལ་ལོ༔ ཀུན་བཟང་རྒྱན་གྱིས་འཁོར་ལོའི་མཆོད༔ ཆེ་བའི་ཡོན་ཏན་རྫོགས་ལ་བསྟོད༔ ཐུགས་ཀར་ཉི་སྟེང་གྲི་གུག་གི༔ རྩེ་མོ་རྡོ་རྗེའི་ཁོང་གསེང་དབུས༔ ཧྲཱི༔ མཐར་སྔགས་ཀྱི་གཡོན་དུ་བསྐོར༔ འོད་ཟེར་འཕྲོ་འདུས་དོན་གཉིས་བྱས༔ ཁྱད་པར་དྲེགས་ཚོགས་གནད་ལ་དབབས༔ འགུགས་བསྒྲལ་མནན་པའི་ཆོ་ག་རྫོགས༔ སྣང་སྲིད་དག་པ་རབ་འབྱམས་དང་༔ དབང་དྲག་འབར་བའི་འཁོར་ལོར་རོལ༔ ཨོཾ་བཛྲ་ཀྲོ་དྷ་ཧྱ་གྷ་ཝ་ཀ་ལ་ཧྲཱི༔ ཞེས་པ་འབུམ་ཕྲག་བཅུ་གསུམ་གྱི༔ རྟ་མགྲིན་རྒྱལ་པོའི་དངོས་གྲུབ་ཐོབ༔ སྣང་སྲིད་དྲེགས་པ་དབང་དུ་འདུས༔ ས་མ་ཡཱ༔

སླར་ཡང་རྒྱུན་གྱི་ཟ་ཚོགས་ནི༔ རཾ་ཡཾ་ཁཾ༔ ཨོཾ་ཨཱ་ཧཱུྃ༔ ཚོགས་རྫས་ཟག་མེད་བདུད་རྩི་འདིས༔ དབང་ཆེན་ཧེ་རུའི་ལྷ་ཚོགས་མཆོད༔ དམ་ཚིག་ཉམས་ཆགས་འགལ་འཁྲུལ་བཤགས༔ རྟོག་གཉིས་རུ་ཏྲ་དབྱིངས་སུ་བསྒྲལ༔ ཟག་བཅས་འོད་གསལ་ངང་དུ་མཆོད༔ ཐུགས་དམ་གཉན་པོ་བསྐང་གྱུར་ཅིག༔ གདན་གསུམ་ལྷ་ཚོགས་དགྱེས་པ་བསྐངས༔ ལྷག་སྐྱོང་ཕོ་མོ་ལྷག་ལ་རོལ༔ ཆད་ཐོ་དམ་ཅན་སྲུང་མ་མཆོད༔ ཕྲིན་ལས་རབ་འབྱམས་ལྷུན་གྲུབ་མཛོད༔ ཚོགས་གཏོར་ཉམས་ཆགས་ཉེ་༼ ཉེས་དཔྱད། ༽ལྟུང་བཤགས༔ དགེ་བས་འགྲོ་ཀུན་སྨིན་གྲོལ་ནས༔ ཀུན་བཟང་རྒྱལ་སྲིད་ཐོབ་པར་ཤོག༔ ཅེས་ཀྱང་ཡིད་དགེའི་ངོར་བྲེལ་འཚུབ་ངང་ནས་ག་གཱས་སོ། །དགེའོ། །

གུ་རུ་དྲག་པོའི་ལུས་དཀྱིལ་འཇིག་རྟེན་དྲེགས་པ་དྲན་འཁོལ།

རྡོ་རྗེ་སེམས་དཔའི་དགོངས་ཉམས་ལས༔ གུ་རུ་དྲག་པོའི་ལུས་དཀྱིལ་འཇིག་རྟེན་དྲེགས་པ་དྲན་འཁོལ་ཞེས་བྱ་བ་བཞུགས་སོ༔

ན་མོ་གུ་རུ་པདྨ་ཀཱ་ར་ཡེ༔ བརྡ་ཡིག །ཧཱུྃ༔ རང་ཉིད་སྐད་ཅིག་དྲན་རྫོགས་སུ༔ ཕྱི་སྣོད་དུར་ཁྲོད་རབ་འཇིགས་དབུས༔ ལྔ་ལྡན་ཐོད་བརྩེགས་གཞལ་ཡས་སུ༔ དྲེགས་པ་ཕོ་མོ་བསྣོལ་བའི་སྟེང་༔ རྗེ་བཙུན་གུ་རུ་དྲག་པོ་ནི༔ དམར་ནག་ཞལ་གཅིག་ཕྱག་གཉིས་པ༔ ཕྱག་གཡས་རྡོ་རྗེ་རྩེ་ལྔ་གསོར༔ གཡོན་པས་ལྕགས་ཀྱི་སྡིག་པ་ནག༔ རྡོ་རྗེ་རིན་ཆེན་གཤོག་པ་གདེངས༔ དུར་ཁྲོད་འཇིགས་པའི་ཆས་ཀྱིས་བརྒྱན༔ སྣང་སྟོང་གཉིས་མེད་དབྱིངས་ཀྱི་ཡུམ༔ གྲུ་གུག་ཐོད་ཁྲག་ཡབ་ལ་འཁྲིལ༔ རུས་པའི་རྒྱན་དྲུག་སྐུ་ལ་གསོལ༔ གནག་སྣུམ་དབུ་སྐྲའི་ལན་ཚར་མཛེས༔ དམར་མོ་གར་སྟབས་ཚུལ་གྱིས་རོལ༔ སྤྱི་མགྲིན་སྙིང་ཀའི་གནས་གསུམ་དུ༔ འཇམ་དཔལ་སྐུ་དང་པདྨ་གསུང་༔ ཡང་དག་ཐུགས་ཀྱི་ལྷ་ཚོགས་གསལ༔ སྤྱི་བོར་ཐོད་པའི་ཁང་བུ་ལ༔ བརྟེན་ནས་རིགས་ལྔའི་སངས་རྒྱས་བཞུགས༔ ཐུགས་དབུས་ཡེ་ཤེས་སེམས་དཔའ་ནི༔ གུ་རུ་པདྨ་འབྱུང་གནས་གསལ༔ གནས་གསུམ་རྡོ་རྗེའི་སྙིང་པོ་ལས༔ འོད་འཕྲོས་དབྱིངས་དང་པདྨ་འོད༔ སྲིན་ཡུལ་ལིངྒ་པུ་རི་ནས༔ ཡེ་ཤེས་ལྷ་ཚོགས་སྤྱན་དྲངས་གྱུར༔ གཉིས་མེད་རོ་གཅིག་བརྟན་པར་བཞུགས༔ སྒོ་གསུམ་གུས་པས་ཕྱག་འཚལ་ལོ༔ སྦྱོར་སྒྲོལ་མཆོག་གི་མཆོད་པ་འབུལ༔ གར་དགུའི་ཉམས་དང་རྔོམས་ཚུལ་སྒོ༔ ཆེ་བའི་ཡོན་ཏན་དྲན་པས་བསྟོད༔ ཡེ་ཤེས་སེམས་དཔའི་ཐུགས་ཀ་རུ༔ ཧཱུྃ་ཡིག་དམར་ནག་མེ་འབར་བའི༔ མཐའ་མར་སྔགས་ཀྱི་ཕྲེང་བས་བསྐོར༔ འོད་ཟེར་ཚྭ་ཚྭ་རབ་འཕྲོས་ནས༔ རྒྱལ་འགོང་ལོག་འདྲེན་བགེགས་ཀྱི་ཚོགས༔ གཟིར་ཞིང་དབང་བསྡུད་བྲན་ཁོལ་ནས༔ རབ་འབྱམས་ཕྲིན་ལས་བསྒྲུབ་བསམ་ཞིང་༔ ཨོཾ་ཨཱཿཧཱུྃ་མ་ཧཱ་གུ་རུ་ཨརྩིག་ནཻརྩིག་ན་མོ་བྷ་ག་ཝ་ཏེ་ཧཱུྃ་ཕཊ༔ དམིགས་བསལ་ཡོད་ན༔ སརྦ་བིགྣཾ་རཱ་ཛ་དུཥྚཾ་མ་ར་ཡ་ཕཊ༔ ཅེས་བྱ་སླར་མཆོད་པ་ནི༔ ཨོཾ་སརྦ་པཉྩ་རཀྟ་བྷ་ལིང་ཏ་བིགྣཾ་ཏ་ར་མཾ་ས་རཀྟ་ཙིཏྟ་ཁ་རཾ་ཁཱ་ཧི༔ ཅེས་པའི་མཐར༔ ཧཱུྃ༔ སྣང་བ་མཐའ་ཡས་པདྨའི་སྐུ༔ སྤྲུལ་པའི་རོལ་གར་གུ་རུ་རྗེ༔ ཐུགས་རྗེའི་ཁྲོ་བོའི་སྐུར་བཞེངས་པ༔ གུ་རུ་དྲག་པོར་ཕྱག་འཚལ་བསྟོད༔ དེ་མཐར་བཀྲ་ཤིས་བསྔོ་སྨོན་གྱི་བརྒྱན་པར་བྱ༔ ཅེས་ཀྱང་དགེ་རྩེ་འབྲུག་གྲགས་ཀྱི་བསྐུལ་བའི་ངོར་ག་གཱ་ཨ་བྷྱེ་ནས་སོ། །དགེའོ། །དགེའོ། །དགེའོ། །མངྒ་ལཾ། །

རང་ཉིད་སྐད་ཅིག་དྲན་རྫོགས་སུ༔

ཧཱུྃ༔ རང་ཉིད་སྐད་ཅིག་དྲན་རྫོགས་སུ༔ ཆེ་མཆོག་གུ་རུ་དྲག་པོ་རྩལ༔ དམར་ནག་མེ་ཡི་ཕྲེང་བ་ཅན༔ ཞལ་གཅིག་ཕྱག་གཉིས་རྡོ་རྗེ་དང་༔ ལྕགས་ཀྱི་སྡིག་པའི་རྐེད་ནས་འཆིང་༔ ཞབས་གཉིས་གྱད་ཀྱི་འདོར་ཐབས་བསྒྲད༔ ཁྲོ་ཚུལ་གཙོ་འཁོར་གཞལ་ཡས་གདན༔ མ་འདྲེས་ཡོངས་སུ་རྫོགས་པར་གསལ༔ ཐུགས་ཀར་གསེར་རྡོར་ལྟེ་བར་ཧཱུྃ༔ ཐ་མར་སྔགས་འཁོར་འོད་ཟེར་གྱིས༔ རབ་འབྱམས་འཕྲིན་ལས་སྒྲུབ་བསམ་ཞིང་༔ ཨ་རྩིག་ནེ་རྩིག་ན་མོ་བྷ་ག་ཝ་ཏེ་ཧཱུྃ་ཧཱུྃ་ཕཊ༔ མཐར༔ ཕྱི་ནང་གསང་བ་དེ་བཞིན་ཉིད་ཀྱིས་མཆོད༔ སྐུ་གསུང་ཐུགས་ཡོན་ཕྲིན་ལས་ལྡན་ལ་བསྟོད༔ ག་གཱས་སོ། །ཧཱུྃ༔ ཧཱུྃ༔ ཧཱུྃ༔ ཁམས་གསུམ་ས་དགུ་དག་པའི་ཞིང་ཁམས་སུ༔ ཚོགས་དགུ་གནས་དག་ཡེ་གྲོལ་ཧེ་རུ་ཀ༔ དཔལ་དགུ་རྔམ་པའི་དཀྱིལ་འཁོར་ལྷུན་རྫོགས་ཤར༔ ཡེ་ཤེས་ཀློང་དགུའི་གད་རྒྱང་མི་ཤིགས་གཤེ༔ ཨོཾ་བཛྲ་ཧེ་རུ་ཀ་ཀྲོ་ཏི་ཤྭ་རི་སརྦ་ཙིཏྟ་གརྦྷ་ཧཱུྃ༔ ཅེས་ཀྱང་ལུས་ཆེན་པོའི་བསྐུལ་བཞིན་ག་གཱས་སོ། །ཧཱུྃ༔ཨཱཿཨོཾ༔ སྣང་བ་ལྷ་དང་ཞིང་ཁམས་ལ༔ སྒྲ་གྲགས་ཐམས་ཅད་སྔགས་ཀྱི་ངང་༔ འགྱུ་དྲན་ཆོས་ཉིད་འཁོར་ལོ་རུ༔ ཡེ་རྫོགས་ཆེན་པོའི་གདེང་གིས་བཟླ༔ ཞེས་ལྷ་གང་ཡིན་གྱི་བསྙེན་པ་བཟླའོ༔ ཅེས་ཀྱང་ལུང་རྟོགས་ཀུན་འཕེལ་ཟུང་གི་ངོར་ག་གཱས་སོ། །

དཔལ་ཆེན་ཕྱག་ན་རྡོ་རྗེའི་ལུས་ཀྱི་དཀྱིལ་འཁོར་བསྡུས་པ།

དཔལ་ཆེན་ཕྱག་ན་རྡོ་རྗེའི་ལུས་ཀྱི་དཀྱིལ་འཁོར་བསྡུས་པ་བཞུགས་སོ༔

ཧཱུྃ༔ རང་ལུས་འཁོར་ལོ་ལྔ་པོ་ནི༔ ཡེ་ནས་འབྱུང་བ་རིམ་བརྩེགས་དང་༔ ཞིང་ཁམས་གཞལ་ཡས་བཀོད་པར་རྫོགས༔ མགོ་བོའི་ཐོད་མཁར་ཁྱོན་ཡངས་སུ༔ རང་སེམས་གཞི་ཡི་ཧེ་རུ་ཀ༔ དཔལ་ཆེན་ཕྱག་ན་རྡོ་རྗེ་ནི༔ མཐིང་ནག་ཞལ་གཅིག་ཕྱག་གཉིས་པ༔ ཁྲོས་མ་ནག་མོ་ཡུམ་དང་འཁྲིལ༔ གཡས་པས་གསེར་གྱི་རྡོ་རྗེ་གསོར༔ གཡོན་པ་སྦྲུལ་གྱི་ཞགས་པ་འཛིན༔ ཞབས་གཉིས་གྱད་ཀྱི་འདོར་སྟབས་སུ༔ སྡེ་བརྒྱད་ཉི་མར་འགྱིང་བག་དགྱེས༔ ཡུམ་ནི་གྲི་ཐོད་གར་སྟབས་བསྒྱུར༔ གཉིས་ཀ་དུར་ཁྲོད་ཆས་ཀྱིས་བརྗིད༔ འཁོར་དུ་སྒྲུབ་རྒྱུད་ཧེ་རུའི་ཚོགས༔ མ་ཚང་མེད་པས་བསྐོར་བ་ཡི༔ གནས་གསུམ་འོད་ཟེར་ལྷ་མོ་བཞིའི༔ ལྕང་ལོ་ཅན་གྱི་རྟེན་བརྟེན་པ༔ སྤྱན་དྲངས་དམ་ཚིག་འཁོར་ལོ་ལ༔ ཐུགས་དམ་དབྱེར་མེད་བཞུགས་སུ་གསོལ༔ སྒོ་གསུམ་གུས་པས་ཕྱག་འཚལ་ཏེ༔ མཉེས་མཆོད་མ་ཚང་མེད་སྤྲིན་འབུལ༔ གསང་བ་རྡོ་རྗེའི་གླུ་གར་མཆོད༔ སླར་ནི་རང་ཐིམ་གཉིས་མེད་པའི༔ ཐུགས་ཀར་ཡེ་ཤེས་སེམས་དཔའ་ནི༔ རྡོ་རྗེ་སེམས་དཔའ་ཚོན་གང་བ༔ ཐུགས་དབུས་ཉི་ཟླའི་གའུར་ཧཱུྃ༔ མཐར་མར་སྔགས་ཀྱི་ཕྲེང་བས་བསྐོར༔ འོད་འཕྲོས་རྒྱལ་ཀུན་མཐུ་སྟོབས་བསྡུས༔ སླར་ཡང་སྣང་སྲིད་དྲེགས་པ་ཡི༔ སྲོག་འཕྲོག་ཐུགས་སྲོག་གདན་ལ་བཀོད༔ བཀའ་ཉན་གསུང་སྡོད་བྲན་ཁོལ་བསམ༔ ཨོཾ་བཛྲ་ནི་ལམ་བྷ་ར་དྷ་ར་བཛྲ་པ་ཎི་རཱ་ཛྙཱ་པ་ཡི་ཏི་སྭཱ་ཧཱ༔ ཅི་འགྲུབ་མཐའ་མར་མཆོད་བསྟོད་དེ༔ བསྐྱེད་རྫོགས་ཟུང་འཇུག་ལྷ་སྐུར་བསྡུ༔ ཚུལ་འདིའི་རང་རྐང་ཐུབ་པའི་ཕྱིར༔ དེ་ཡང་བསྡུ་ན༔ ཧཱུྃ༔ སྣང་སྲིད་འདོད་ཡོན་མཆོད་པ་འབུལ༔ རྣམ་ཐར་མཆོག་ལ་རྗེས་ཡི་རང་༔ ལྷ་སྐུའི་མཚན་འཛིན་དབྱིངས་སུ་བསྡུ༔ འོད་གསལ་ལྷུན་གྲུབ་བཀྲ་ཤིས་ཤོག༔

ཅེས་པ་འདི་ཡང་དམ་པའི་མཛོད་གསུམ་འཛིན་པ་རྡོ་རྗེ་རྒྱལ་མཛན་ནས་གསུང་ངོར། སྔགས་བརྫུས་ག་གཱ་ཨ་བྷྱེས་ནས་གུས་པས་གསོལ་ལོ། །དགེའོ། །དགེའོ། །དགེའོ། །སརྦ་མངྒ་ལཾ། །

ཡེ་ཤེས་བྱ་ཁྱུང་གི་སྒྲུབ་པ་གནམ་ལྕགས་མེ་འབར་གྱི་ལུས་དཀྱིལ་བསྡུས་པ།

ཡེ་ཤེས་བྱ་ཁྱུང་གི་སྒྲུབ་པ་གནམ་ལྕགས་མེ་འབར་གྱི་ལུས་དཀྱིལ་བསྡུས་པ་བཞུགས་སོ༔

ཧཱུྃཿ འཁོར་བའི་ཆོས་ཁམས་རྒྱ་མཚོ་ཀུན༔ ཆོས་ཉིད་དབྱིངས་སུ་སངས་རྒྱས་པས༔ ཡེ་རྫོགས་ལྷུན་གྲུབ་ཞིང་ཁམས་སུ༔ རྒྱན་བཀོད་ཕུན་ཚོགས་གཞལ་ཡས་ཁང་༔ ནང་ན་རིན་ཆེན་ཁྲི་རྐང་སྟེང་༔ ཀླུ་བརྒྱད་རང་བཞིན་རོ་ཉེ་བརྒྱད༔ ཆུན་འཕྱང་འགུལ་བའི་ཁྲི་ལ་བརྫིས༔ ཡེ་ཤེས་བྱ་ཁྱུང་རིགས་ལྔ་ནི༔ དཀར་སེར་དམར་ལྗང་སྔོ་ནག་མདོག༔ ཞལ་གཅིག་ཕྱག་གཉིས་ཕྲག་གོང་དུ༔ ཀླུ་རིགས་ལྔ་ཡི་རང་བཞིན་ཅན༔ ཁ་དོག་ལྔ་འཛིན་དུག་སྦྲུལ་བཟུང་༔ མགོ་བོའི་བརྩམས་ནས་ཞལ་དུ་གསོལ༔ རྒྱན་དུ་དེ་འདྲ་སྣ་ཚོགས་ཕྲེང་༔ མེ་ཡི་རལ་བ་གནམ་དུ་ཟིང་༔ གནམ་ལྕགས་ཕ་ལམ་མཆུ་སྡེར་གཟིང་༔ རྡོ་རྗེའི་རྭ་གཉིས་རྣོ་དབལ་འབར༔ རྭ་བར་ཆེ་མཆོག་ཡབ་ཡུམ་གསལ༔ ཐུགས་ཀར་ཀུན་ཏུ་བཟང་པོ་བཞུགས༔ རལ་གྲི་འཁོར་ལོའི་གཤོག་པ་གདེངས༔ སྤྱན་ནས་དུག་ཁྲག་བྱེ་ཚན་ཆར༔ མཛིང་ ༼ འཛིང་དཔྱད། ༽ བསྣོལ་ཚྭ་ཚྭ་ནད་རླངས་འཕྲོ༔ བ་སྦུའི་བུ་ག་ཐམས་ཅད་ནས༔ ཁྱུང་གི་ཕོ་ཉ་གྲངས་མེད་གཏམས༔ ས་བདག་ཀླུ་གཉན་ཟིལ་གྱིས་གནོན༔ གནས་གསུམ་འོད་ཟེར་རབ་འཕྲོས་ཏེ༔ ཡེ་ཤེས་ཁྲོ་བོ་སྤྱན་དྲངས་བསྟིམ༔ ཕྱག་འཚལ་ཕྱི་ནང་མཆོད་པ་འབུལ༔ བཅོམ་ལྡན་ཡོན་ཏན་དཔལ་ལ་བསྟོད༔ ཐུགས་ཀའི་ཡེ་ཤེས་སེམས་དཔའ་ཡི༔ ཐུགས་དབུས་གནམ་ལྕགས་འཁོར་ལོའི་ལྟེར༔ ཁྲོཾ་དམར་མཐའ་མར་སྔགས་ཀྱི་བསྐོར༔ བཟླས་པས་འཁོར་འདས་ཁྱབ་གདལ་གྱི༔ འོད་ཟེར་འཕྲོས་པས་ཁྲོ་གཏུམ་རྔམ༔ དབང་བསྡུད་ཟིལ་གྱིས་མནན་ནས་ཀྱང་༔ ནཱ་ག་ཐུགས་སྲོག་གདན་དུ་བཀོད༔ གཟིར་བས་རབ་འབྱམས་ཕྲིན་ལས་ཀུན༔ ཡོངས་གྲུབ་བཀའ་ཉན་བྲན་ཁོལ་བསམ༔ ཨོཾ་ཁྲོཾ་ག་རུ་ཊ་ནཱ་ག་ར་ཛ་ཝ་ཤཾ་ཀུ་རུ་ཧོ༔ སརྦ་སིདྡྷི་ཕ་ལ་ཧཱུྃ་ཕཊ༔ ཅེས་བཟླས་དངོས་གྲུབ་རྣམ་གཉིས་འགྲུབ༔ ཕྱི་ནང་གསང་བའི་བར་ཆད་སེལ༔ མཆོག་དུ་ ༼ ཐུན་དཔྱད། ༽ ཡོན་ཏན་རྒྱ་མཚོ་དབང་༔ ས་མ་ཡཱ༔ ཅེས་ཀྱང་འཇིགས་དགའི་བསྐུལ་ངོར་ག་གཱ་ཨ་བྷྱེས་བྲིས་པ་རྣམ་ཀུན་དགེ་ལེགས་ཕུན་སུམ་ཚོགས་པའི་རྒྱུར་གྱུར་ཅིག །

མགོན་པོ་གཟི་བརྗིད་རྒྱལ་པོའི་རྒྱུན་ཁྱེར་བཀྲ་ཤིས་ལྷུན་གྲུབ།

ཡེ་ཤེས་སྒྱུ་འཕྲུལ་རོལ་པ་ལས༔ མགོན་པོ་གཟི་བརྗིད་རྒྱལ་པོའི་རྒྱུན་ཁྱེར་བཀྲ་ཤིས་ལྷུན་གྲུབ་བཞུགས་སོ༔

ན་མོ་གུ་རུ་པདྨ་སཾ་བྷ་ཝེ༔ བརྡ་ཡིག །རྩ་གསུམ་ཆོས་སྐྱོང་སྤྱི་འགྲོའི་སམ༔ ཡང་ན་ལྷ་བརྒྱ་གཏོར་གཅིག་ལ༔ བརྟེན་ནམ་རང་གི་ལུས་དཀྱིལ་འཁོར༔ རང་གཞིན་གྲུབ་པ་ཉིད་བརྟེན་རུང་༔ ཧཱུྃ༔ དཀོན་མཆོག་གསུམ་ལ་སྐྱབས་སུ་མཆི༔ བྱང་ཆུབ་མཆོག་ཏུ་སེམས་བསྐྱེད་དོ༔ དེ་ནས་སྐད་ཅིག་དྲན་རྫོགས་སུ༔ སྣང་སྲིད་ཡེ་ནས་དཀྱིལ་འཁོར་དུ༔ གཞིར་བཞེངས་དག་མཉམ་ཡོན་ཏན་རྫོགས༔ རྨ་བྱ་རིན་ཆེན་པདྨ་དང་༔ ཉི་ཟླ་ཏི་ར་བམ་གྱི་སྟེང་༔ རང་ཉིད་གཟི་བརྗིད་རྒྱལ་པོ་སྟེ༔ ཆེ་མཆོག་རྡོ་རྗེ་དྲག་པོ་རྩལ༔ ཞལ་གཅིག་ཕྱག་གཉིས་སྐུ་མདོག་དམར༔ གཡས་གཡོན་རྡོ་རྗེ་ལྕགས་ཕུར་གདེང་༔ ཞི་མ་ཁྲོ་འཛུམ་གཟི་བརྗིད་འབར༔ དམར་སེར་རལ་པས་སྐུ་རྒྱབ་ཁེབ༔ སྐུ་ལ་རྣལ་འབྱོར་ཆས་གོས་གསོལ༔ ཐོད་ཕྲེང་སྦྲུལ་ཆུན་རཏྣས་བརྒྱས༔ སྐུ་སྟོད་བཀའ་བརྒྱུད་བླ་མ་དང་༔ རྐེད་པར་ཡི་དམ་རྒྱུད་སྡེའི་ལྷ༔ སྐུ་སྨད་མ་རྒྱུད་མཁའ་འགྲོའི་དལ༔ མཚོ་ལ་གཟའ་སྐར་བཀྲ་བ་བཞིན༔ སྐུ་དབྱིངས་དང་གསལ་ཆེན་པོར་རྫོགས༔ མཐའ་བསྐོར་ནོར་དང་གཡང་གི་ལྷ༔ འདས་དང་མ་འདས་ཐམས་ཅད་དང་༔ ཡེ་ཤེས་འཇིག་རྟེན་དྲེགས་པའི་ཚོགས༔ འཕྲོ་འདུས་ཕྲིན་ལས་རྣམ་བཞི་བསྒྲུབ༔ དཀར་ཕྱོགས་སྐྱོངས་བའི་ཟོ་དོར་གྱིས༔ རྒྱ་འདྲེ་གདུག་པ་སྒྲོལ་ཞིང་བཟློག༔ གཟི་བྱིན་བཟོད་པར་དཀར་བ་ཡིས༔ མ་རུང་སྙིང་རྩ་འདར་བར་ཕྱེད༔ དུག་ཐུན་མཚོན་ཆའི་བུ་ཡུག་འཚུབས༔ དངོས་གྲུབ་བར་ཆད་རྡུལ་དུ་རློག༔ དེ་ལྟར་གསལ་བའི་ལྷ་ཚོགས་ཀྱི༔ ཐུགས་ལས་འོད་ཟེར་རབ་འཕྲོས་པས༔ རང་བཞིན་དམ་ཚིག་གནས་རྣམས་ནས༔ ལྷ་ཚོགས་སྤྱན་དྲངས་གཉིས་མེད་གྱུར༔ དེ་ནས་སྤྱན་འདྲེན་སོགས་ནི༔ ཧཱུྃ༔ ཆོས་དབྱིངས་ཀུན་ཁྱབ་ཆེན་པོ་ནས༔ བཅོམ་ལྡན་རིག་པའི་འཁོར་བཅས་དང་༔ འགྲོ་དོན་གང་འདུལ་གནས་མཆོག་ནས༔ སྤྲུལ་དང་ཡང་སྤྲུལ་ཕོ་ཉར་བཅས༔ འགྲོ་བ་སེམས་ཅན་དོན་སླད་དུ༔ ཐུགས་རྗེའི་ཤུགས་ཀྱིས་གཤེགས་སུ་གསོལ༔ གུ་རུ་ཀྲོ་ཏ་བཛྲ་དེ་ཝ་ཊཱཀྐི་ནི་དྷརྨཱ་པཱ་ལ་ས་མ་ཡ་ཛ་ཛ༔ དམ་ཚིག་ཐུགས་དམ་གཉན་པོ་ཡིས༔ སྐྱེ་དགུ་ཀུན་ལ་སྨན་པ་ནི༔ ཐུན་མཆོག་དངོས་གྲུབ་སྩོལ་བའི་ཕྱིར༔ ཏིང་འཛིན་ཡེ་ཤེས་གཉིས་མེད་རོལ༔ ས་མ་ཡ་ཏིཥྛ་ལྷན༔ ལྷ་དང་དེ་ནི་རྣལ་འབྱོར་བ༔ རང་བཞིན་ཆོས་སྐུར་རོ་གཅིག་ཀྱང་༔ མ་རྟོགས་གཟུང་འཛིན་མཆོག་དམན་གོལ༔ ད་ནི་དབྱེར་མེད་མཇལ་ཕྱག་འཚལ༔ ན་མོ་ན་མ༔ཧཱུྃཿ ཕྱི་ནང་གསང་བ་ཡང་གསང་གི༔ མཆོད་པའི་ཕྱག་རྒྱ་ཆེན་པོ་ནི༔ རིག་འཛིན་བླ་མ་དྲག་པོ་དང་༔ རྩ་གསུམ་ཆོས་སྐྱོང་དགྱེས་ཕྱིར་འབུལ༔ ཨོཾ་སརྦ་པཱུ་ཛ་རཱ་ཧོ་ཧཾ་ཁཱ་ཧིཿ ཨོཾཿ དུས་གསུམ་རྒྱལ་དང་རྒྱལ་བའི་སྲས༔ ཚད་མེད་སྤྲུལ་པའི་རྣམ་རོལ་ཀུན༔ དོན་དམ་ཁྱོད་དབྱིངས་འུབ་ཆུབ་བརྡལ༔ ཀུན་བྱེད་རྒྱལ་པོ་ཁྱོད་ལ་བསྟོད༔ འབྲས་ཆོས་ཟག་མེད་རྣམ་དག་དང་༔ ཚད་མེད་མཁྱེན་བརྩེ་ནུས་པའི་སྟོབས༔ མཐར་ཐུག་གྱུར་པའི་མཆོག་ལྡན་པའི༔ གསང་གསུམ་ཡོན་ཏན་རྫོགས་ལ་བསྟོད༔ དེ་ནས་བཟླས་དམིགས་ནི༔ ཧཱུྃ༔ གཙོ་བོའི་ཐུགས་ཀར་པད་ཟླའི་སྟེང་༔ ཡེ་ཤེས་སེམས་དཔའ་པདྨ་འབྱུང་༔ ཐུགས་ཀར་ཉི་ཟླའི་གའུའི་སྦུབས༔ ཏིང་འཛིན་སེམས་དཔའ་ཧཱུྃ་དམར་ནག༔ མཐའ་མར་སྔགས་ཀྱི་ཕྲེང་བས་བསྐོར༔ འོད་ཟེར་འཕྲོ་འདུས་དོན་གཉིས་བྱས༔ ཚུར་འདུས་སྲོག་གི་སྙིང་པོར་ཐིམ༔ མཆོག་ཐུན་དངོས་གྲུབ་ཐོབ་པར་དམིགས༔ ཨོཾ་གུ་རུ་བཛྲ་ཀྲོ་ཏ་སརྦ་སིདྡྷི་ཕ་ལ་ཨཱ་ཧཱུྃ༔ ཞེས་དང་ཞི་བའི་ཕྲིན་ལས་ལ༔ སརྦ་དུཿཁ་ཤིནྟཾ་ཀུ་རུ་ཧོཿ རྒྱས་པ་ལ༔ སརྦ་བ་ས་སིདྡྷི་སིདྡྷིཿ སརྦ་ཨ་ཡུར་སིདྡྷི་སིདྡྷིཿ སརྦ་ཤྲི་སིདྡྷི་སིདྡྷི༔ སརྦ་པུནྱེ་སིདྡྷི་སིདྡྷིཿ སརྦ་ཛྙཱ་ན་སིདྡྷིཿ སརྦ་གུ་ཎ་སིདྡྷི་སིདྡྷི༔ དབང་ལ༔ སརྦ་དེ་ཝ་ལོ་ཀ་མ་ནུ་ཝ་ཤཾ་ཀུ་རུ་ཧོ༔ དྲག་པོ་ལ༔ སརྦ་ཤ་ཏྲུཾ་བིགྞན་མ་ར་ཡཱ་ཕཊ༔ སོ་སོར་གཤམ་བུ་བྱས་པའམ༔ ཡང་ན་ཐམས་ཅད་རྫོགས་པར་བཟླས༔ ཕྲིན་ལས་རབ་འབྱམས་ཐོགས་མེད་འགྲུབ༔ བཀྲ་ཤིས་བདེ་ལེགས་དཔལ་གྱིས་ཕྱུག༔ སྣོད་བཅུད་སྲིད་ཞིའི་དགེ་མཚན་འཕེལ༔ རྒྱ་འདྲེ་གདུག་པའི་རྒྱུ་སྲང་ཁེགས༔ བསོད་ནམས་སྙན་གྲགས་ཞེས་བྱའི་ངོར། །སྤྲང་སྨྱོན་ག་གཱ་ཨ་བྷྱེས་སོ། །སུ་ལ་མི་བསྟན་བཀའ་རྒྱ་ཡོད་པ་ཡིན་ནོ། །ཨོཾ་བཛྲ་ལོཀྲི་པ་ལ་ནནཿ ས་ག་པ་ཤཱ་ནནཿ ན་ག་དུ་དུ་ནནཿ མཾ་མཾ་མ་མཾཿ ཙི་ཙ་ར་ཙི་ཙ་རཿ བཾ་རུ་ལུ་བཾ་རུ་ལུཿ རྦད་ཀྲ་ཀོ་ཤ་ཡཿ རྦད་ཀྲ་ཀོ་ཤ་ཡཿ ཧོ་ར་ཧོ་ར་གནོད་བྱེད་ཙི་ཏི་སོདཿ ཙི་ཏི་སོདཿ ལུས་ཤིག་ལྷུ་རུ་གཏུབཿ ཧ་ལ་པ་ཏི་ནནཿ འཁོར་བ་རུལཿ ཀ་ཡ་ཝཱཀྐ་ཙིཏྟ་བརླགཿ གནོད་བྱེད་འབྱུང་བོ་མ་རཱ་ཡ་ཕཊཿ ག་གཱས་སོ། །

རང་ཉིད་ཨོཾ་ལས་བཅོམ་ལྡན་གདུགས་དཀར་ནི༔ དཀར་གསལ་དབུ་སྟོང་རིགས་ལྔའི་ཁ་དོག་ཅན༔ ཕྱག་སྟོང་ཕྱག་མཚན་ལྔ་ཡིས་དགྲ་བགེགས་ཀུན༔ བཟློག་བསྒྱུར་སྤྱན་སྟོང་དུས་གསུམ་ས་ལེར་གཟིགས༔ དྲེགས་པ་ཆེ་དགུ་བསྣོལ་བའི་གདན་ལ་བཞེངས༔ རྒྱལ་ཀུན་མཐུ་སྟོབས་དབང་ཕྱུག་གཅིག་བསྡུས་པའི༔ ཐུགས་ལས་འོད་འཕྲོས་དབྱིངས་ནས་ཡེ་ཤེས་པ༔ སྤྱན་དྲངས་དམ་ཡེ་གཉིས་སུ་མེད་པར་བཞུགས༔ གུས་པས་ཕྱག་འཚལ་ཕྱི་ནང་མཆོད་པ་འབུལ༔ བདུད་འཇོམས་དཔའ་བོ་ཆེ་ལ་ཕྱག་འཚལ་བསྟོད༔ ཐུགས་ཀར་ཨོཾ་མཐར་སྔགས་ཀྱི་ཕྲེང་བས་བསྐོར༔ འོད་འཕྲོས་རྒྱལ་ཀུན་དབང་ཕྱིན་དངོས་གྲུབ་བསྡུས༔ དྲེགས་པ་ཚར་བཅད་དགྲ་བགེགས་བྱད་ཕུར་དང་༔ ཀེག་རིགས་སྲི་གདོན་ཐམས་ཅད་ཕྱིར་ལ་བཟློག༔ འགྲོ་ཀུན་མི་མཐུན་ཕྱོུགས་ལས་རྣམ་རྒྱལ་བསམ༔ ཨོཾ་ཧཱུྃ་མ་མ་ཧཱུྃ་ནི་སྭཱ་ཧཱ༔ སརྦ་ཤ་ཏྲུཾ་མ་ར་ཡ་ཕཊ་བྷྱོ་བཟློག༔ གདུགས་དཀར་ལུས་དཀྱིལ་འདི་འདྲ་ཞིག་དགོས་ཞེས་བསྟན་འཛིན་པས་བསྐུལ་ངོར་ག་གཱས་སོ། །

འཕགས་མ་རྡོ་རྗེ་སྡེར་མོའི་དགྲ་བཟློག

འཕགས་མ་རྡོ་རྗེ་སྡེར་མོའི་དགྲ་བཟློག་བཞུགས་སོ༔

ཨོཾཿ ཤེས་རབ་ཐབས་ཀྱི་འབྲེལ་འབྱུང་གིས༔ གསང་སྔགས་གསང་བའི་ཡེ་ཤེས་ཉིད༔ སྒྱུ་འཕྲུལ་མཁའ་འགྲོ་དྲྭ་བ་སྡོམ༔ དུས་གསུམ་རྒྱལ་བའི་བསྐྱེད་མཛད་ཡུམ༔ ཁྲོ་མོ་རྡོ་རྗེ་སྡེར་མོ་ལ༔ སྒོ་གསུམ་གུས་པས་མཉམ་པར་སྦྱར༔ བྱང་ཆུབ་བསྒྲུབ་ལ་བར་གཅོད་པའི༔ མི་མཐུན་རྐྱེན་བགེགས་དབྱིངས་སུ་སོལ༔ དབྱིངས་ཀྱི་རྟག་པ་ཀུན་བཟང་མོ༔ གནམ་ཞལ་ཁྲོས་པའི་རྒྱལ་མོ་དང་༔ སྣ་ཚོགས་ཡུམ་དང་རོ་ལངས་མ༔ རྡོ་རྗེ་ཕག་མོ་ཁྲོས་མ་ནག༔ རྗེ་བཙུན་དགྲ་དཔུང་འཇོམས་མཛད་མ༔ མ་རྒྱུད་མཁའ་འགྲོ་སྲིད་པའི་དལ༔ ཡེ་ཤེས་དབྱིངས་སུ་རྣམ་དབྱེར་མེད༔ གཞན་མི་རྒྱལ་ལ་ཕྱག་འཚལ་ལོ༔ གནས་སྐབས་རྒྱུ་རྐྱེན་ལས་བསླང་བའི༔ དགྲ་གཉེན་བར་མའི་ཕྱོགས་བཅུ་ནས༔ དགྲ་སྡང་གནོད་བྱེད་མ་ལུས་པ༔ རིག་སྔགས་གིས་བཅད་ལྡང་མེད་མནན༔ ཨོཾ་མ་ཧཱ་ཀྲོ་ཏི་བཛྲ་དྷ་རོད་སརྦ་ཤ་ཏྲུཾ་མ་ར་ཡ་ནན་ཀཱ་ཡ་ཝཱཀྐ་ཙིཏྟ་བརླག་བརླག་བསམ་སྦྱོར་ངན་པ་ཐམས་ཅད་རང་སར་ཞི་བར་གྱུར་ཅིག༔ ཞེས་ཀྱང་དགོན་བསོའི་ངོར་ག་གཱས་སོ། །

དབྱངས་ཅན་བསྒྲུབ་པ་ངག་གི་མེ་ཏོག

དབྱངས་ཅན་བསྒྲུབ་པ་ངག་གི་མེ་ཏོག་ཞེས་བྱ་བ་བཞུགས༔

བརྡ་ཡིག །ཨེ་མཿ ཡེ་ཤེས་གཟུགས་ཅན་དབྱངས་ཅན་ནི༔ བྱང་ཆུབ་བར་དུ་བདག་གི་སྐྱབས༔ འགྲོ་ཀུན་ཁྱེད་ཀྱི་གོ་འཕང་ལ༔ ད་ནས་བདག་གིས་འགོད་པར་བྱ༔ ཧོཿ སྒྲ་དབྱངས་ངག་གི་ལྷ་མོ་ནི༔ ཡེ་ནས་བགེགས་མེད་སྙན་པར་འཛིན༔ དོན་གཟུགས་རང་བཞིན་རྟགས་བཀོད་དེ༔ ཏིང་ངེ་འཛིན་གྱི་ཡུལ་ལ་འཇུག༔ ཨོཾཿ ཆོས་ཀུན་སྟོང་བ་གཞི་རྩ་མེད་པའི་དབྱངས་ཅན་མ༔ ཨེ་ཝཾ་མ་ཡ་ཚིག་ཀུན་རབ་གསལ་སྲོག་ཏུ་བརླིངས༔ དེ་ལས་སྣང་བའི་མི་སྣང་ཕྱེད་པར་ལ་ཝ་ཞེས༔ དམ་ཚིག་དེ་ལས་ཏེ་འབོར་མེད་པར་ང་སྨྲའོ༔ ཨཱཿ མི་དམིགས་དེ་བཞིན་ཉིད་ཀྱང་གྲངས་བསམ་རྒྱ་མཚོའི་རྡུལ༔ མ་སྐྱེས་དབྱངས་མཁན་མའང་རང་དགའི་གྲངས་ལས་འདས༔ ཀུན་ཏུ་དམར་བྱས་ཕྲིན་ལས་རྟག་ཐོགས་ཟག་པ་ཟད༔ ཁྱོད་གཅིག་གྲུབ་མཐའ་ཀུན་ལ་མ་ཆགས་རྗེས་སུ་འཛིན༔ ཧཱུྃཿ ཧྲཱིཾ་ཡིག་ཡོངས་གྱུར་རྒྱུད་མང་སྙན་པས་མཚན་པ་ལས༔ སྐད་ཅིག་དྲན་རྫོགས་རྒྱལ་ཀུན་གསུང་གི་ཕྱག་རྒྱ་སྙེམས༔ ཞལ་གཅིག་ཕྱག་བཞི་དང་པོ་ཨུཏྤལ་ལ་བརྟེན་པའི༔ ཤེས་རབ་རང་རྟགས་ཡེ་ཤེས་འཁོར་ལོ་རྩིབས་རྣོན་དང་༔ གཡོན་པས་ཆོས་ཕུང་བརྒྱད་ཁྲི་མཚོན་པའི་ཆོས་འབྱུང་བསྣོལ༔ འོག་མ་གཉིས་ཀྱིས་གིརྟི་རང་འཁྲོལ་ཏམ་བུ་ར༔ ཀཻ་ཤལ་རི་ལ་ལྷ་ཡི་རྣ་བས་ལྷག་བྱས་མདོག༔ རི་དྭགས་ལྤགས་པས་ནུ་མ་གཡོན་པ་བཀབ་པ་སྟེ༔ བུང་བ་བཅུད་ལ་འཁོར་བའི་ཡིད་སིམ་དྲིའི་འཕྲོག༔ མཐོན་མཐིང་སྤྱན་གྱི་མཛེས་པ་པདྨའི་འཛུམ་ཟེར་འཕྲོ༔ ཤངས་ཀྱི་དབྱིབས་མཐོ་ཚེམས་གྱི་ག་བུར་ལྔ་བཅུའི་ཕྲེང་༔ མཆུ་སྒྲོས་བིམ་པའི་མདངས་ཀྱང་མོད་ལ་འཕྲོག་གོ་ཞེས༔ སྐྱོན་བྲལ་པདྨ་ཆགས་བཅོམ་རི་དྭགས་རྟགས་ལ་ནི༔ སྲིད་ཞིར་མི་གནས་ཞབས་ཀྱིས་བློན་མོ་རོལ་བའི་སྟབས༔ དར་དང་རིན་ཆེན་རྒྱན་སྤྲས་ཟླ་བའི་རྒྱབ་ཡོལ་ལ་བརྟེན་ནས༔ མཚམས་ཀྱི་ཆུ་འཛིན་བླ་རིའི་ཀུན་འཁྲིགས་ཡིད་ཆུ་རྡུལ༔ འཁོར་དུ་རང་འདྲ་དཀར་སེར་དམར་ལྗང་གྲངས་མེད་བཅས༔ གནས་གསུམ་འོད་ཀྱིས་རང་བཞིན་མངོན་པར་དགའ་བ་དང་༔ ཤར་ཕྱོགས་རི་བོ་རྩེ་ལྔ་རི་རབ་བང་རིམ་ནས༔ རིག་བྱེད་ཀུན་སྐྱོབས་བཀྲ་ཤིས་གྲུབ་པའི་འགོ་འདྲེན་པ༔ སྐད་ཅིག་ཉིད་ལ་གཤེགས་ཤིག་བཛྲ་མ་མ་ཛ༔ ཨོཾ་པདྨ་གྷིརྟི་དཱེ་ཝ་ས་མ་ཡ་ཛ་ཛ༔ ཧཱུྃཿ དྲི་མེད་རབ་གསལ་དྲི་མེད་རབ་གསལ་ཆོས་ཉིད་ཅན༔ དྲི་མེད་རབ་དུ་གསལ་བའི་སྣང་བརྩེག་ཉེར་འགྲོགས་ཁྱོད༔ གྲོལ་གཤིགས་གཞན་སྙེམས་ལྟ་མཁྲེགས་ཕ་རོལ་ཕྱིན་པ་ཡང་༔ ཐུགས་རྗེའི་ཉི་རྡུལ་ཐོ་ཕྱི་འཁོར་ལ་ད་རོལ་ཅིག༔ གུས་རྟག་སེམས་དང་ལུས་ཀྱིས་གྱང་འགྱེལ་བརྟུལ་ཞུགས་ཀྱི༔ གཅིག་དུ་འཁྲུལ་བ་བསྐྱེད་པའི་ཕྱག་གི་གར་མཆོད་བཅས༔ ཚིག་གི་ཕ་མཐར་འཁྱམས་པའི་བུ་ལོ་མ་དགྲ་དེ༔ སྐབས་ཀྱི་ཟིང་ཟིང་དགེས་སྤྲིན་གྱིས་རྒྱས་ཨ་མ་ཧི༔ མ་ཧཱ་ན་མ་པཱུ་ཛ་ཁཱ་ཧི༔ ཧོ༔ ཁྱོད་ནི་ཤེས་བྱའི་དཀྱིལ་འཁོར་སྣང་མཛད་ཉིན་མོའི་མགོན༔ ཁྱོད་མཁའ་ལྷ་ཡི་རྫིང་རིང་མཆོག་གི་འཁོར་འདས་ཟླུམ༔ ཁྱོད་ནི་ཡིད་འོང་དྲི་ཟའི་སྒྲ་དབྱངས་འཕྲོག་པའི་སྟོབས༔ ཁྱོད་ཀྱི་གཟུགས་ཏེ་དྲན་བསམ་ཁོ་བོ་རྨོངས་པར་བྱས༔ ཧོ༔ ལྷ་མོའི་ཐུགས་ཀར་ཧྲིཾ་ཡིག་ལ༔ གཟུངས་སྔགས་ཡི་གེ་བཅུ་གཉིས་འཁོར༔ འོད་འཕྲོས་རྒྱལ་བ་སྲས་བཅས་ཀྱི༔ ཚངས་པའི་དབྱངས་ཀྱི་མགོ་འདྲེན་པའི༔ ཡེ་ཤེས་ཡོན་ཏན་ཀུན་བསྡུས་ནས༔ ངག་གི་ཐིག་ལེ་ལ་ཐིམ་པས༔ ནུས་པ་རང་འབར་དམ་ཚིག་གིས༔ གསུང་གསང་རྡོ་རྗེའི་ངག་འགྲུབ་བསམ༔ ཨོཾ་བཛྲ་དཱེ་ཝ་ཝཱཀྐ་པཱ་ཏི་ཡ་སྭཱ་ཧཱ༔ ཞེས་དང་༔ ཡང་ན༔ ཨོཾ་ཝཱ་ཀི་ཤྭ་རི་དཱེ་ཝ་ཝཀྐ་སིདྡྷི་ཧཱུྃ༔ སྐབས་སུ་ཧྲིཾ་ཅི་མང་དང་༔ སྤྱི་ཁྱབ་ནས་གསུང་པའི་གཟུངས་སྔགས་ཀྱང་བཟླས་སོ༔ ཨིམྦྷི་ནང་ལ་ལྕགས་ཐུར་ཡོད་གྱུར་ཀྱང་༔ གནམ་ལྕགས་རལ་གྲིས་བཅད་པའི་ཟུར་སྟོན་འདི༔ སྔོན་ཆད་ངག་གི་དབང་མོའི་དབུགས་དབྱུང་ལས༔ ད་དུང་ཁྱོད་དང་ང་ལ་ཤེས་པ་ཡོད༔ བཀྲ་ཤིས་སོ༔ ཁྲོམ་ཐོག་སྒྲོན་ལོ་ལ་ག་གཱས་སོ། །

དབྱངས་ཅན་ལུས་དཀྱིལ་བསྡུས་པ།

རྡོ་རྗེ་སེམས་དཔའི་དགོངས་ཉམས་ལས༔ དབྱངས་ཅན་ལུས་དཀྱིལ་བསྡུས་པ་བཞུགས༔

རྒྱལ་ཀུན་ཚངས་པའི་གསུང་གསང་འཆར་བའི་དབྱིངས་༼ དབྱངས་དཔྱད། ༽༔ གཞོམ་མེད་རྡོ་རྗེ་གསུམ་ལྡན་ན་དཱའི་དངོས༔ ཕྱག་རྒྱ་ཆེན་པོ་མཚོ་བྱུང་དགྱེས་པའི་གར༔ ཅིར་ཡང་བསྒྱུར་མཛད་ངག་དབང་དབྱངས་ཅན་མ༔ རབ་དཀར་ཟླ་བས་མི་མཚོན་མཚན་དཔེའི་ཞལ༔ ཞི་འཛུམ་གཞོན་ཚུལ་ལོངས་སྐུའི་རྒྱན་ཆས་ཅན༔ ཕྱག་གཉིས་ཏམྦུ་ར་ཡི་རྒྱུད་སྦྲེང་བས༔ བསྡུ་བ་རྣམ་བཞིའི་འགྲོ་ཀུན་རྗེས་སུ་འཛིན༔ ལུས་ལ་ཟག་མེད་བདེ་བ་ཆེན་པོ་སྤོར༔ ངག་ལ་ངག་གི་དཔལ་སྟེར་བཀྲ་ཤིས་སྦྱིན༔ ཡིད་ལ་ཡེ་ཤེས་མཆོག་གི་རྒྱས་འདེབས་པས༔ རང་བྱུང་ཡེ་ཤེས་ལྷ་མོར་རང་ཤར་པའི༔ ཐུགས་ཀར་ཟླ་བའི་གའུ་ཁ་སྦྱོར་དབུས༔ གསེར་འཁོར་རྩིབས་དྲུག་ལྟེ་བར་ཧྲཱིང་གི་མཐར༔ སྔགས་ཕྲེང་སྤུ་ཤད་ལྟ་བུའི་བསྐོར་བ་ལས༔ འོད་ཟེར་འཕྲོ་འདུས་རྒྱལ་ཀུན་དབང་བྱིན་བསྡུས༔ བདག་དང་འགྲོ་བློས་མི་ཤེས་མུན་པ་བསལ༔ ཇི་ལྟ་ཇི་སྙེད་མཁྱེན་པའི་ངང་རྒྱས་བསམ༔ གསང་སྔགས་རིག་སྔགས་གཟུངས་སྔགས་སྙིང་པོའི་སྔགས༔ གཅིག་དྲིལ་ངོ་བོ་ཉིད་དུ་སྔགས་སྒྲ་སྒྲོགས༔ རྩ་སྔགས་ནི༔ ཨོཾ་དེ་ཝི་སུ་གྷོ་ཥ་ཧྲིང་༔ ལས་སྔགས་ནི༔ པྲཛྙཱ་ཛྙཱ་ན་ཝཱ་ཀི་ཤཱ་ཁྱ་སརྦ་སིདྡྷི་ཕ་ལ་ཨ་ཧཱུྃ༔ ཞེས་བཟླའོ༔ ལར་གསུང་རྡོ་རྗེའི་མཐར་ཐུག་ངག་མི་ཤིགས་པའི་ཐིག་ལེ་བསྒྲུབ་གཞིར་བྱས་ཏེ་གནད་དུ་བསྣུན་པས་བསྐྱེད་རྫོགས་རྫོགས་ཆེན་གྱི་རྡོ་རྗེ་གསུམ་རོ་གཅིག་པའི་གནད་ཀྱིས་ལྷ་ཚོགས་མ་ལུས་པ་འགྲུབ་ཅིང་༔ ཤེས་རབ་ཡེ་ཤེས་ཆེན་པོའི་ངང་རྒྱས་པ་ནི་གཏན་ཚིག་གོ༔ འདི་ཀྲི་ཡ་སོགས་ཕྱི་རྒྱུད་ཀྱི་ལྷར་འདོད་པའང་གང་ཟག་གི་བློ་ཁྱད་ཀྱི་འབྱེད་པས་ན། འདིར་ལྷ་ལོངས་སྐུའི་ཆ་བྱད་དང་ལྡན་པས་བླ་མེད་ལུགས་སུ་འདྲེན་མི་ཆོག་ཅིང་། དེའི་ལུགས་ཀྱང་མེད་པར་རྣམ་པ་ཀུན་ཏུ་འགོགས་མི་ནུས་ཤིང་། གལ་ཏེ་ཀྲི་ཡ་ལྟར་འདོད་པ་ལ་ཡང་ལྷ་སྤྲུལ་སྐུའི་ཆ་བྱད་ལས་ལོངས་སྐུའི་རྒྱན་ཆས་ཅན་འོས་མིན་གཞན་ལའང་དཔྱད་པ་མཚུངས་སོ། །པདྨ་ཀཱ་རའི་གསུངས་དཀོན་མཆོག་མཚན་གྱི་བཞེད་སྐོངས་སུ་ག་གཱ་ཨ་བྷྱེས་དག་སྣང་ངོ་། །མངྒལཾ། །

མ་ཅིག་ཁྲོས་མ་ནག་མོའི་རྒྱུན་ཁྱེར་སྟོང་ཉིད་དོན་སྦྱོར།

མ་ཅིག་ཁྲོས་མ་ནག་མོའི་རྒྱུན་ཁྱེར་སྟོང་ཉིད་དོན་སྦྱོར་བཞུགས་སོ༔

འདི་ལ་དཀྱིལ་འཁོར་མཆོད་པ་སོགས༔ གང་ཡང་མི་དགོས་རྣལ་འབྱོར་གྱི༔ ཆས་སུ་ལྡན་པ་བཅུ་གསུམ་དང་༔ ཁྱད་པར་གྲི་གུག་ཐོད་པ་སོགས༔ སྒྲུབ་རྟེན་ཙམ་གྱི་སྤྲོས་པ་བྱེད༔ ལར་འདི་སྤྲོས་མེད་ལམ་ཡིན་པ༔ འོད་གསལ་རྫོགས་ཆེན་ཏནྟྲ་ལས༔ སེང་གི་ལྟ་བུའི་རྣལ་འབྱོར་དེའོ༔ སྐྱབས་སེམས་ལ་སོགས་སྦྱོར་བ་ནི༔ ཕཊ་ཕཊ་ཕཊ༔ ཡོད་པ་མ་ཡིན་མེད་མ་ཡིན༔ གཉིས་གཉིས་མཐའ་ལས་རྣམ་འདས་པ༔ ཤེས་རབ་ཕ་རོལ་ཕྱིན་པ་ལ༔ རྣམ་པ་ཀུན་ཏུ་སྐྱབས་སུ་མཆི༔ ཕཊ་ཕཊ་ཕཊཿ ཟབ་ཞི་སྒྲོ་འདོགས་སོ་གཉིས་བྲལ༔ འཕགས་བཞི་བསྐྱེད་པའི་ཡུམ་ཆེན་མོར༔ མཐའ་ཡས་འགྲོ་བའི་ཚོགས་ཐམས་ཅད༔ ད་ལྟ་ཉིད་དུ་སྦྱོར་བར་བྱ༔ ཕཊ་ཕཊ་ཕཊཿ ཡེ་ནས་སྤྲོས་བྲལ་གཉུག་མ་ཆེ༔ དམ་པ་དོན་གྱི་ཡུམ་ཆེན་མོ༔ འགགས་མེད་རྩལ་གྱི་སྒྱུ་འཕྲུལ་བཅས༔ རྡོ་རྗེ་གསུམ་གྱི་བྱིན་ཕོབས་ཅིག༔ བཛྲ་ཀྲོ་དྷི་ཀཱ་ལི་བཾ་ཧ་རི་ནི་ས་ཨ་ཝེ་ཤ་ཡ་ཕེམ་ཕེམ༔ ཕཊཿ ཕཊཿ ཕཊཿ སྣོད་བཅུད་དག་མཉམ་རོལ་པ་ཆེ༔ ཡེ་ནས་མ་བྱས་ལྷུན་གྲུབ་ཀྱི༔ མཆོད་པའི་མཆོག་དུ་བཞུགས་པ་ལ༔ མ་རྟོགས་བག་ཆགས་དབྱིངས་སུ་སྦྱངས༔ རཾ་ཡཾ་ཁཾཿ དངོས་གཞི་ལྷ་བསྐྱེད་བསྡུས་པ་ནི༔ ཕཊཿ ཕཊཿ ཕཊཿདངོས་ཀུན་སྟོང་ཉིད་ཆེན་པོར་གདལ༔ སྟོང་པའི་རང་བཞིན་སྙིང་རྗེར་ཤར༔ ཨོཾ་ཨཱཿཧཱུྃ་ལས་ཐོད་བརྩེགས་ཀྱི༔ གཞལ་ཡས་ཁང་དབུས་པད་ཉི་ཟླ༔ དེ་སྟེང་རོ་གདན་བརྫིས་པ་ཡི༔ ཀུན་ཤེས་རང་བཞིན་ཁྲོས་མ་ནག༔ ཇི་སྙེད་མཁྱེན་པའི་ཡེ་ཤེས་རྩལ༔ ཞལ་གཅིག་ཕྱག་གཉིས་གྲི་ཐོད་ཅན༔ སྤྱན་གསུམ་ཀུན་མཁྱེན་ཀུན་ཏུ་སྣང་༔ ཀུན་གཟིགས་འགྱུར་མེད་སྐུ་མདོག་མཐིང་༔ གར་སྟབས་རུས་རྒྱན་གར་ཆས་ཅན༔ ཤིན་ཏུ་འཇིགས་པའི་ཉམས་ཀྱིས་བརྗིད༔ ཞབས་གཉིས་གར་སྟབས་ཚུལ་དུ་བཞེངས༔ མེ་དཔུང་འབར་བའི་ཀློང་ན་འགྱིང་༔ སྤྱི་གཙུག་ཕག་ཞལ་ནག་པོ་ངུར༔ དབུ་སྐྲ་དམར་སེར་གྱེན་དུ་འཁྱིལ༔ ལམ་ཤེས་རྡོ་རྗེ་ཕག་མོ་ཡི༔ རིགས་ཀྱི་བདག་པོ་དམར་གསལ་མོ༔ གཅེར་མོ་གར་སྟབས་རུས་རྒྱན་ཅན༔ སྤྱི་བོར་རྣམ་མཁྱེན་རང་བཞིན་གྱི༔ ཡུམ་ཆེན་ཀུན་ཏུ་བཟང་མོ་མཐིང་༔ གཅེར་བུ་མཉམ་བཞག་སྐྱིལ་ཀྲུང་བཞུགས༔ འཁོར་དུ་དངོས་བརྒྱད་རྩལ་ཉིད་ལས༔ རྡོ་རྗེ་རིན་ཆེན་པདྨ་དང་༔ ལས་ཀྱི་མཁའ་འགྲོ་ཁ་དོག་བཞི༔ གར་སྟབས་གྲི་ཐོད་རྡོ་རྗེ་དང་༔ རིན་པོ་ཆེ་སོགས་མཚན་པ་ཅན༔ མཚམས་བཞིར་ཤུགས་འགྲོ་མ་བཞི་ནི༔ གཡས་རྣམས་གཡང་གཞི་གཡོན་མི་རྐང་༔ དོན་གྱི་རྣམ་པ་བདུན་ཅུ་དང་༔ འདྲེས་རྐང་བརྒྱ་རྩ་མཚོན་པའི་སླད༔ ལས་དང་དམ་ཚིག་ཤ་ཟ་དང་༔ འཇིག་རྟེན་མཁའ་འགྲོ་ས་ཡ་འབུམ༔ གནས་གསུང་རྡོ་རྗེའི་སྙིང་པོ་ནས༔ འོད་འཕྲོས་ཡེ་ཤེས་མཁའ་འགྲོའི་ཚོགས༔ སྤྱན་འདྲེན་གནས་འདིར་ས་མ་ཛ༔ སྤྱན་འདྲེན་ནི༔ ཕཊཿ ཕཊཿ ཕཊཿ ཡེ་གྲོལ་ཀ་དག་ཆོས་སྐུའི་ངང་༔ སྐྱེ་འགགས་འགྱུར་མེད་དབྱིངས་ཀྱི་ཡུམ༔ རང་རྩལ་མཁའ་འགྲོ་ཆེན་མོ་གསུམ༔ འཁོར་དང་བཅས་པ་གཤེགས་སུ་གསོལ༔ ཨོཾ་ཨཱཿཧཱུྃ་བཾ་ཧ་རི་ནི་ས་ས་པ་རི་ཝ་ར་ཛ་ཛཿ ཕཊཿ ཕཊཿ ཕཊཿགཤེགས་བྱོན་གཉིས་མེད་ཡེ་ཤེས་ལྷ༔ དམ་ཡེ་ཐ་དད་ཆོས་ལས་འདས༔ དུ་མ་རོ་གཅིག་ཁྱབ་བརྡལ་བ༔ ཕྱོགས་རིས་བྲལ་བར་ལྷུན་གྱི་གྲུབ༔ ཕཊཿ ཕཊཿ ཕཊཿ མཆོད་པའི་མཆོག་ཆེན་ཟག་བྲལ་བ༔ ཕྲ་རྒྱས་རྣམ་དག་ལྷ་ལ་འབུལ༔ དགའ་ཆེན་མཚན་མཆོག་སོ་གཉིས་ཀྱིས༔ གཙུག་ཏོར་བདེ་ཆེན་དབྱིངས་སུ་དྲོངས༔ ཕཊཿ ཕཊཿ ཕཊཿ འཕགས་བཞི་བསྐྱེད་ཡུམ་རྣལ་འབྱོར་དངོས༔ འཕོ་བ་དག་པ་རྩལ་གྱི་ལྷ༔ ཡེ་ཡིན་ཆེན་པོར་རང་རིག་པའི༔ མ་བཅོས་ལྟ་བ་མཇལ་བས་འདུད༔ ཞལ་ཕྱག་བྲལ་བ་ཕྲ་བའི་སྐུ༔ ནང་གསལ་འཆར་གཞིར་བཞུགས་པ་ཡི༔ ཕྱི་རྒྱ་མ་རལ་མཁའ་འགྲོ་ལ༔ སྣང་གསུམ་ཡེ་གྲོལ་ཆེན་པོར་བསྟོད༔ གཞི་ལ་བརྟེན་པའི་དགོངས་པ་རུ༔ མཐར་ཕྱིན་བཅུད་ཀྱི་མེ་ཏོག་བཞད༔ དོན་གཉིས་དཔལ་གྱི་ཟིལ་དངར་འཕྲོ༔ རང་སངས་རྣམ་དག་ཆེན་པོར་བསྟོད༔ དམ་ཚིག་བཞི་ཡི་བསྲུང་མེད་ལ༔ བདག་མེད་གདེངས་བཞིའི་ཡུལ་ཀྱང་བསྟོངས༔ ཆགས་ཁྲོའི་སྲིད་ཞིར་རེ་དོགས་ཀུན༔ རྣམ་སངས་གདོད་མར་གྲོལ་བར་བསྟོད༔ ཕཊཿ ཕཊཿ ཕཊཿ རྣམ་ཐར་སྒོ་གསུམ་རང་བཞིན་དུ༔ འཁོར་འདས་སྣང་སྲིད་ཆོས་རྣམས་ཀུན༔ བྱ་བྱེད་ལྟོས་དང་ཆོས་ཉིད་ཀྱི༔ གྲུབ་པའི་མངོན་སུམ་མཉམ་གནས་བཞིན༔ ཨོཾ་ཨཱཿཧཱུྃཿ སྟོང་ཉིད་ཉི་ཤུའི་གཟུགས་སུ་ཤར༔ མེད་པས་ཡོད་ཡིན་ཡེ་ཤེས་ལྷ༔ ཟུང་འཇུག་དག་པ་མཁའ་འགྲོ་ཡི༔ ཐུགས་ཀའི་སྲོག་ལ་སྔགས་ཀྱི་འཁོར༔ རྒྱུ་རྐྱེན་ལས་ཀྱི་ཕྲིན་ལས་ཀུན༔ ཅིག་ཆར་གྲུབ་པར་མི་གཏོང་ངོ་༔ བཛྲ་ཀྲོ་ཏི་ཀཱ་ལི་བཾ་ཧ་རི་ནི་ས་ཧཱུྃ་ཕཊ༔ ཞེས་བཟླའོ༔ ཟླ་བ་བཞི་ཡིས་ལྷ་མཐར་ཕྱིན༔ ས་མ་ཡཱ༔ དེ་ནས་ཚོགས་མཆོད་འབུལ་བ་ལ༔ དང་པོ་བྱིན་གྱིས་བརླབ་པ་ནི༔ ཕཊཿ ཕཊཿ ཕཊཿ ལྟོས་པ་ཟག་མེད་འཁོར་ལོའི་སྤྲིན༔ ལྟ་བ་རྟོགས་པའི་རྟེན་འབྲེལ་དུ༔ ཡོངས་ཤར་ནམ་མཁའི་མཛོད་དུ་སྤྲུལ༔ སྣང་སྲིད་མཆོད་པའི་གཞིར་བཞེངས་གྲུབ༔ ཕཊཿ ཕཊཿ ཕཊཿ ཚོགས་ལ་སྤྱན་འདྲེན་ནི༔ ཡ་ཀི་ཀུན་བཟང་མན་ཆད་ནས༔ ཁམས་གསུམ་སེམས་ཅན་ཐམས་ཅད་ཀུན༔ མེད་དང་དག་མཉམ་ཆེན་པོ་རུ༔ བཟང་ངན་བྲལ་བར་སྤྱན་འདྲེན་ནོ༔ སྟོང་ཉིད་རྩལ་འབར་སྙིང་རྗེ་ཡིས༔ ལྷག་པར་ལན་ཆགས་མགྲོན་ལ་སོགས༔ གཉུག་མ་གློ་བུར་ལྷག་པ་ཀུན༔ ཞིང་གི་དམ་པར་སྤྱན་འདྲེན་ནོ༔ ཡེ་ཤེས་ཚོགས་ལ་གཤེགས་སུ་གསོལ༔ མཆོག་ཐུན་དངོས་གྲུབ་འབད་མེད་སྩོལ༔ ཚོགས་མཆོད་འབུལ་བ་ནི༔ ཕཊཿ ཕཊཿ ཕཊཿ དུས་གསུམ་སངས་རྒྱས་ཡུལ་ཞེན་འདྲེ༔ ཁམས་གསུམ་སེམས་ཅན་ངན་ཞེན་འདྲེ༔ སྣང་སྲིད་ལྷ་སྲིན་འབྲེལ་བའི་འདྲེར༔ དག་མཉམ་རྟོགས་པའི་ཚོགས་མཆོད་འབུལ༔ ཕཊཿ ཕཊཿ ཕཊཿ བཤགས་པ་ནི༔ ཀུན་གཞི་ལུང་མ་བསྟན་པ་རུ༔ ལྷན་སྐྱེས་ཀྱི་འཕང་ཉམས་གྲིབ་རྩ༔ གཞི་མེད་རྩ་བྲལ་ཆེན་པོ་རུ༔ རིག་པས་དྲུངས་ཕྱུང་སྲིད་མཐའ་ཟད༔ ཕཊཿ ཕཊཿ ཕཊཿ བསྒྲལ་བ་ནི༔ མ་རིག་ལྷན་སྐྱེས་འདྲེ་བོ་ཆེ༔ རིག་པའི་རལ་གྲིའི་གདབ་པའི་མཐུའི༔ ངག་གོམས་སྲོག་གི་རྩ་བ་བཅད༔ རྣམ་ཤེས་མནར་མེད་བདེ་ཆེན་སྒྲོལ༔ ཨུ་ཙུ་ཏ་ཡ་ཕཊ༔ ཞལ་བསྟབས་ནི༔ ལྷ་འདྲེར་ཀུན་ལས་བདུད་ཆེན་པོའི༔ སྟོང་ཉིད་ཞལ་གྱི་ཧོམ་ཡངས་པར༔ ཁམས་གསུམ་ཡོངས་ཀྱི་ཕུང་པོ་ཕུལ༔ དུས་གསུམ་གཞི་མཉམ་ཆེན་པོར་སྟོབས༔ ཁཱ་ཧི་ཁཱ་ཧི༔ ལྷག་མ༔ ཨ་ཀ་རོའི་བརླབས༔ ལྷག་འབུལ་ནི༔ ཕཊཿ རོལ་བ་མི་བསྲུན་གཟུགས་ཤར་ཀྱང་༔ དོན་ལ་ཀུན་ཏུ་བཟང་པོ་རུ༔ ཤེས་ནས་ཁས་ཞན་མགྲོན་ལ་འབུལ༔ དབང་བཅུ་མཐར་ཕྱིན་ཕྲིན་ལས་མཛོད༔ ཨུཙྪིཥྚ་བྷ་ལིངྟ་ཁཱ་ཧིཿ ཕཊཿཕཊཿཕཊཿ ཆད་ཐོ་བསྟན་སྐྱོངས་ནི༔ དཔལ་མགོན་སྲུང་མ་ཐམས་ཅད་དང་༔ ཁྱད་པར་བསྟན་མ་བཅུ་གཉིས་སོགས༔ ཆད་དོན་གཏོར་མ་འདི་བཞེས་ལ༔ མི་མཐུན་ཐལ་བ་རྡུལ་དུ་མཛོད༔ སརྦ་དྷརྨ་པཱ་ལ་བྷ་ལིངྟ་ཁཱ་ཧིཿ ཕཊཿ ཕཊཿ ཕཊཿ བྲོཿ ཕཊཿ སྣང་སྲིད་བདག་དུ་རྟོགས་པའི་འདྲེ༔ བདག་མེད་མཐའ་བྲལ་ཧེ་རུ་ཀའི༔ ཕྱིན་ཆད་ལྡང་བ་མེད་པར་ནི༔ ཨ་ཏི་མཆོག་གསང་བླ་མེད་རྒྱ༔ སྟྭམ་བྷ་ཡ་ནན༔ དངོས་གྲུབ་བླངས་པ་ནི༔ ཕཊཿ སྐུ་གསུང་ཐུགས་ཀྱི་རྡོ་རྗེ་ཡི༔ དབང་བྱིན་དངོས་གྲུབ་མ་ལུས་པ༔ ཐུན་མོང་མཆོག་གི་རང་བཞིན་ཅན༔ ད་ལྟ་ཉིད་དུ་བདག་ལ་སྩོལ༔ རྩ་སྔགས་མཐར༔ ཀ་ཡ་ཝཀྐ་ཙིཏྟ་གུ་ཎ་ཀརྨ་སིདྡྷི་ཕ་ལ་ཨ་ཧཱུྃ༔ དེ་ནས་ནོངས་པ་བཤགས་པ་ནི༔ ཕཊཿ རང་བྱུང་གདོད་མའི་གཞི་ལས་གོལ༔ རྒྱུད་དྲུག་གནས་སུ་འཁོར་བ་ལས༔ ཉམས་ཆགས་ཉེས་ལྟུང་བྱས་སོ་ཅོག༔ ཐམས་ཅད་མ་ལུས་མཐོལ་ལོ་བཤགས༔ ཡི་གེ་བརྒྱ་བ་དང་དབྱངས་གསལ་གྱིས་ཁ་བསྐང་ལ༔ བསྡུ་རིམ་ནི༔ ཕཊཿ བསྐྱེད་པའི་དཀྱིལ་འཁོར་ལྷ་ཚོགས་རྣམས༔ མི་དམིགས་སྤྲོས་པ་བྲལ་བར་ཞི༔ ཤེར་རབ་ཕ་རོལ་ཕྱིན་པ་ནི༔ ཟབ་པ་ཆགས་བྲལ་འདུས་མ་བྱས༔ ཨ་ཨ་ཨཱཿ སླར་ལྡང་བ་ནི༔ ཕཊཿ སྟོང་པའི་ཆོ་འཕྲུལ་འགགས་པ་མེད༔ དག་པའི་རྟེན་འབྲེལ་ཁྱད་པར་འབྲས༔ ཕྱག་རྒྱ་གཅིག་གི་མཁའ་ཀློང་དུ༔ ཀུན་སྦྲུམ་ལྷུན་གྱིས་གྲུབ་པ་ཆེའོ༔ དེ་ནས་དགེ་ཚོགས་བསྔོ་བ་ནི༔ ཕཊཿ འདིས་མཚོན་དུས་གསུམ་དགེ་བའི་ཚོགས༔ འཁོར་གསུམ་དམིགས་པ་ཀུན་བྲལ་བ༔ ཕ་རོལ་ཕྱིན་པའི་གྲངས་སུ་བསྔོ༔ འགྲོ་ཀུན་སྐུ་གསུམ་ཐོབ་པར་ཤོག༔ ཕཊཿ བཀྲ་ཤིས་བརྗོད་པ་འདི་ལྟའོ༔ ཕཊཿ ཕཊཿ ཕཊཿ སྲིད་གསུམ་ཀ་དག་ཆེན་པོ་ཡི༔ འཁོར་བའི་སྡུག་བསྔལ་གཞིར་གྲོལ་ཞིང་༔ གྲོང་ཁྱེར་རྒྱུན་ཆོད་ལྟ་བ་ཡི༔ འཁོར་བའི་རྩ་བ་རྨང་བརླག་སྟེ༔ རང་སངས་ཁྱད་ཆོས་དྲུག་ལྡན་པའི༔ བཀྲ་ཤིས་དམ་པ་སྐུ་གསུམ་རྫོགས༔ ཚོགས་ཆེན་ཡེ་རྫོགས་ཞིང་རབ་འབྱོངས༔ སེམས་ཅན་སྨིན་གྲོལ་བཀྲ་ཤིས་ཤོག༔ ཅེས་ཀྱང་བརྗོད་པས་དགེ་ལེགས་འཕེལ༔ དམ་ཚིག་ཉམས་ཆགས་ཐམས་ཅད་སྐོངས༔ ཚོགས་གཉིས་ཡོངས་སུ་རྫོགས་པར་ངེས༔ དེ་ཕྱིར་བསོད་ནམས་ཚོགས་འཁོར་གཅེས༔ ས་མ་ཡཱ༔ ཅེས་ཀྱང་བླ་མ་པདྨ་བློ་གྲོས་དང་། གཞན་འགའ་ཞིག་གི་ངོར་ཚིག་གི་རྣལ་འབྱོར་པས་སོ། །དགེའོ། །

མ་ཅིག་ཁྲོས་མའི་བྱིན་རླབས་དབང་གི་རིམ་པ་བསྡུས་པ་ཐུགས་རྗེའི་ཉི་གཞོན།

མ་ཅིག་ཁྲོས་མའི་བྱིན་རླབས་དབང་གི་རིམ་པ་བསྡུས་པ་ཐུགས་རྗེའི་ཉི་གཞོན་བཞུགས་སོ༔

བཛྲ་ཀྲོ་དྷི་ཀ་ལི་ཧ་རི་ནི་ས་བྷྱེ༔ འདི་ལ་རྒྱས་བསྡུས་མང་ན་ཡང་༔ སྤྲོས་མེད་རྣལ་འབྱོར་ལྟ་དགོངས་ཅན༔ སློབ་མ་མཚན་ལྡན་འཛོམ་པ་ཡི༔ སྐུ་དང་གསུང་དང་ཐུགས་ཕྱག་མཚན༔ ཡོན་ཏན་རྣལ་འབྱོར་ཆས་བཅུ་གསུམ༔ ཕྲིན་ལས་མཐར་ཕྱིན་རྡོ་རྗེ་ལྔ༔ བུམ་པ་གསང་བ་ཤེས་རབ་དང་༔ བཞི་བ་ལས་སུ་བསྡུས་བའོ༔ དེ་ཡང་ལས་གཞུང་བསྙེན་སྒྲུབ་ཀྱི༔ ཡན་ལག་མཐར་ཕྱིན་དབང་ཐོབ་མཐར༔ ཁྲུས་དང་བགེགས་བསྐྲད་བསྲུང་འཁོར་བསྒོམ༔ མིག་དར་མེ་ཏོག་གཏད་པའི་རྗེས། ཆོས་བཤད་ལོ་རྒྱུས་ཅུད་ཟད་བརྗོད། འོཿ ནམ་མཁའ་དང་མཉམ་པའི་སེམས་ཅན་ཐམས་ཅད་ཆོས་སྐུ་ཡུམ་ཆེན་མོའི་གོ་འཕང་ལ་འགོད་པར་བྱ། དེའི་ཆེད་དུ་བདུད་གཅོད་ཟབ་མོ་ཉམས་སུ་བླངས་བར་བྱའོ་སྙམ་དུ་སེམས་བསྐྱེད་པ་དང་། ཆོས་ཉན་པའི་ཀུན་ཏུ་སྤྱོད་པ་རྣམས་བླངས་དོར་ཚུལ་བཞིན་བགྱིས་ཏེ་ལེགས་པར་གསན་འཚལ། ༧འདིར་གང་ཉན་བྱའི་ཆོས༔ བདག་དང་ཡུལ་གྱི་འཕྱང་བ་ཆེན་པོ་རང་མལ་དུ་ཞིག་པས་བདག་མེད་བདེན་པ་མངོན་མཐོང་རྩོལ་མེད་ཐད་གྲོལ་དུ་ཕྱམ་བརྡལ་བའི་གསང་བའི་ནམ་མཁའ༔ བདེ་ཆེན་ཀུན་ཏུ་བཟང་མོའི་བྷ་ག་ཡངས་པའི་ཀློང་དུ་ཨེ་ཝཾ་ཟུང་འཇུག་གི་བཀོད་པ་ངོམས་བའི་གནས་རང་སྣང་དོན་གྱི་འོག་མིན་དེ་རུ༔ སྟོན་འཁོར་རྒྱུ་འཕྲུལ་རོལ་པའི་རྒྱལ་བོ་ས་ར་ཧ་དང་༔ རོལ་རྩལ་འཁོར་དུ་ངོམས་པའི་ཐོག་མ་ཛྙཱ་ན་སུརྱ་དང་༔ པྲཛྙཱ་ཙནྡའི་དབང་པོ་ལ་བཀའ་བསྒོས་ཏེ་ཆོས་ཉིད་ཀློང་གི་ཡངས་མཛོད་ཆེན་པོའི་སྒོ་ཕྱེས་ནས༔ རིན་པོ་ཆེ་མི་ཟད་རྒྱན་འཁོར་ཞེས་བྱ་བའི་གབ་བྱང་ཆེན་པོ་བདག་ཀློང་གྲོལ་རྡོ་རྗེ་མི་འགྱུར་བ་ལ་གཅེས་ནོར་དུ་གནང་བ་ཡིན༔ དེའི་ཚེ་དེའི་དུས་ན་འོད་གསལ་བརྡལ་ཁྱབ་ཆེན་པོའི་གསལ་སྒྲོན་རང་ཤར་ནས་བྱ་ཞིང་བྱེད་རྩོལ་མེད་པའི་འོད་ཀྱི་མདངས་གདངས་འདི་ཡང་ཡུལ་ངོས་བཟུང་དང་བྲལ་བ་ཚོགས་སྨོན་ལས་འཕྲོ་འཛོམ་པའི་གདུལ་བྱ་གང་དེའི་ཟ་ཐང་དུ་རང་བྱུང་བའོ༔ དེའི་ཕྱིར་ཁྱེད་ཅག་རྣམས་ཆོས་འདིའི་སྒོ་མཐོང་བ་ལ་སྤྲོ་བ་བསྐྱེད་དེ་ཕ་རོལ་ཕྱིན་པ་དྲུག་ཉམས་སུ་ལེན་པ་དང་། བླ་མ་དང་གཙོ་བོ་ཐ་མི་དད་པའི་དྲུང་དུ་ཞིང་ཁམས་རྒྱ་མཚོའི་བཀོད་པ་འབུལ་བ་ཐུགས་ལ་བཏགས་པར་ཞུ། མཎྜལ། དེའི་ཚོགས་བསགས་པ་ཐམས་ཅད་ཀྱི་འཇུག་སྒོ་མཎྜལ་ཕུལ་བ་སོང་ནས། དེ་ནས་གསོལ་བ་འདེབས་པ་འདིའི་རྗེས་བཟློས་མཛོད། ཀྱཻཿ སངས་རྒྱས་ཐམས་ཅད་བསྐྱེད་པའི་ཡུམ༔ པྲཛྙཱ་པ་ར་མི་ཏ་ནི༔ འགྲོ་བའི་དོན་སླད་ཟོལ་གྱིས་སྣང་༔ བསམ་ཡས་དཀྱིལ་འཁོར་མཁའ་རུ་སྦྲུམ༔ སྐུ་གསུམ་བཀོད་པའི་ཁྱད་པར་གྱི༔ སྒྱུ་འཕྲུལ་རོལ་པའི་དཀྱིལ་འཁོར་གཙོ༔ རྡོ་རྗེའི་བླ་མ་རིན་པོ་ཆེ༔ རྣམ་ཐར་གསུམ་ལྡན་དོན་གྱི་དབང་༔ བྱམས་དང་སྙིང་རྗེ་རྟགས་ཀྱི་དབང་༔ རྣམ་པ་བཅུ་དྲུག་སྟོང་པ་ཉིད༔ གཞན་དོན་ལྷུན་གྲུབ་ཕྲིན་ལས་དབང་༔ ཡོངས་རྫོགས་བདག་ལ་སྩལ་དུ་གསོལ༔ ལན་གསུམ་གནང་བ་སྦྱིན་པ་ནི། ཀྱཻཿ སྐལ་ལྡན་སེམས་ཀྱི་ཁྱེའུ་ཆུང་༔ དབང་མཆོག་དམ་པ་སྦྱིན་པ་ལ༔ རྡོ་རྗེ་སེམས་དཔའ་མཆོག་གང་གི༔ སྐུ་གསུང་ཐུགས་ཀྱི་དམ་ཚིག་རྣམས༔ སྦ་བསྐོང་ ༼ སྐུང་དཔྱད། ༽མེད་པར་བསྲུང་ནུས་སམ༔ རང་ཉིད་ཞི་ལ་མི་གཞོལ་བར༔ གཞན་ཕན་སྲིད་མཐར་སྐྱོལ་ནུས་སམ༔ འཇིགས་སུ་རུང་བས་སྟོང་པ་ཉིད༔ བཟོད་པར་དཀའ་བ་བཟོད་ལགས་སམ༔ བརྟུལ་ཞུགས་སྤྱོད་པས་གཞན་དོན་དུ༔ རེ་དོགས་སྙེམས་འཁྲུགས་ཁྱོད་ལགས་སམ༔ བཟོད་ན་དབང་མཆོག་དམ་པ་སྦྱིན༔ ཞེས་པའི་མཐར༔ སློབ་བུའི༔ ཅི་གསུངས་པ་བཞིན་བཟོད་ལགས་ཏེ༔ བརྩེ་བ་ཆེན་པོའི་བཟུང་དུ་གསོལ༔ ཕ་རོལ་ཕྱིན་དང་ཡང་དག་མཐའ༔ བདག་ཅག་རྣམས་ལ་གསལ་བར་མཛོད༔ ཅེས་པའི་མཐར། སྐྱབས་སུ་འགྲོ་བ་འདིའི་རྗེས་བཟློས་གྱི། ཧོཿ ཡོད་པ་མ་ཡིན་མེད་མ་ཡིན༔ གཉིས་གཉིས་མཐའ་ལས་རྣམ་འདས་པ༔ ཤེས་རབ་ཕ་རོལ་ཕྱིན་མ་ལ༔ རྣམ་པ་ཀུན་ཏུ་སྐྱབས་སུ་མཆི༔ ལན་གསུམ། སེམས་བསྐྱེད། ཧོཿ ཟབ་ཞི་སྒྲོ་འདོགས་སོ་གཉིས་བྲལ༔ འཕགས་བཞི་བསྐྱེད་པའི་ཡུམ་ཆེན་མོར༔ མཐའ་ཡས་འགྲོ་བའི་ཚོགས་ཐམས་ཅད༔ ད་ལྟ་ཉིད་དུ་སྦྱོར་བར་བྱཿ ལན་གསུམ། ཚོགས་བསགས་པ་ནི། ཨོཾ་ཨཱཿཧཱུྃ༔ དཀོན་མཆོག་གསུམ་ལ་ཕྱག་འཚལ་ལོ། །ཕྱི་ནང་གསང་བའི་མཆོད་པ་འབུལ། །སྡིག་པ་མི་དགེ་སོ་སོར་བཤགས། །དགེ་བ་ཀུན་ལ་རྗེས་ཡི་རང་། །ཆོས་ཀྱི་འཁོར་ལོ་བསྐོར་དུ་གསོལ། །མྱ་ངན་མི་འདའ་བཞུགས་གསོལ་འདེབས། །དགེ་ཚོགས་ཟག་མེད་ཆེན་པོར་བསྔོ། །ལན་གསུམ་དེ་ནས་དམ་ཆུ། ཧོཿ དམ་ཚིག་ཆེན་པོ་རྡོ་རྗེའི་ཆུ༔ དམ་བསྲུང་བར་ཆད་སེལ་བ་དང་༔ དངོས་གྲུབ་མཆོག་སྩོལ་ཉམས་གྱུར་ན༔ སྙིང་བསྲེགས་ན་རཀ་དམྱལ་བར་ལྟུང་༔ དེ་བས་ནན་ཏན་དམ་ཚིག་བསྲུང་༔ ས་མ་ཡ་ཨི་ཏན་ན་ར་ཀན༔ ལན་གསུམ་གྱིས་དུང་ཆོས་ཀྱི་ཆུ་བཏུང་། དམ་བསྒྲགས། ཧོཿ བུ་ཁྱོད་ཉོན་དང་རྡོ་རྗེའི་དམ༔ ཕྱི་རུ་སོ་སོར་ཐར་བ་དང་༔ ནང་ལྟར་བྱང་ཆུབ་སེམས་དཔའ་ཆེ༔ གསང་བ་སྔགས་འཆང་དམ་ཚིག་སྡོམ༔ མ་ལུས་ཡོངས་སུ་བཟུང་དགོས་ཏེ༔ བརྩོན་པ་མཆོག་གིས་བསྒྲིམ་དེ་བྱ༔ ཤེས་རབ་དམ་པས་བཟོད་པར་གྱིས༔ སློབ་བུའི། ཀྱེ་ཧོ་ངོ་མཚར་མཆོག་གི་གནས༔ ཟབ་དགུའི་རང་བཞིན་ཐེག་མཆོག་གིས༔ སྡོམ་གསུམ་ཅིག་ཆར་ཐོབ་པ་ལ༔ དགའ་ཞིང་གུས་པས་བསྲུང་བར་བྱ༔ ཉིས་བརྒྱ་ལྔ་བཅུ་ཕྱི་ཡི་དབང་༔ ཉི་ཤུའི་གྲངས་ལྡན་ནང་གི་སྟེ༔ བསྲུང་དུ་ཡོད་དང་མེད་པ་སོགས༔ ཐམས་ཅད་དུ་ནི་སྡོམ་པ་བཟུང་༔ ཞེས་ལན་གསུམ། སློབ་མ་ལྷར་བསྐྱེད་ནི། སྭཱ་བྷ་ཝས་སྟོང་བར་སྦྱངས། སློབ་མ་སྐད་ཅིག་དྲན་རྫོགས་སུ༔ པདྨ་ཉི་ཟླ་རོ་གདན་སྟེང་༔ ཀུན་ཤེས་རང་བཞིན་ཁྲོས་མ་ནག༔ ཇི་སྙེད་མཁྱེན་བའི་ཡེ་ཤེས་རྩལ༔ ཞལ་གཅིག་ཕྱག་གཉིས་གྲི་ཐོད་ཅན༔ སྤྱན་གསུམ་ཀུན་མཁྱེན་ཀུན་ཏུ་སྣང་༔ ཀུན་གཟིགས་འགྱུར་མེད་སྐུ་མདོག་མཐིང་༔ གར་སྟབས་རུས་རྒྱན་གར་ཆས་ཅན༔ ཤིན་ཏུ་འཇིགས་པའི་ཉམས་ཀྱིས་བརྗིད༔ ཞབས་གཉིས་གར་སྟབས་ཚུལ་དུ་བཞེངས༔ མེ་དཔུང་འབར་བའི་ཀློང་ན་འགྱིང་༔ སྤྱི་གཙུག་ཕག་ཞལ་ནག་པོ་ངུར༔ དབུ་སྐྲ་དམར་སེར་གྱེན་དུ་འཁྱིལ༔ དེ་ཡི་རྡོ་རྗེ་ཕུང་པོའི་གྲོང་༔ སྐུ་གསུམ་དཀྱིལ་འཁོར་བསམ་ཡས་རྫོགས༔ ཕུང་པོ་ཁམས་དང་སྐྱེ་མཆེད་རྣམས༔ ཡེ་ནས་དབྱེར་མེད་རྫོགས་སངས་རྒྱས༔ གནས་གསུམ་རྡོ་རྗེའི་སྙིང་པོ་ནས༔ འོད་འཕྲོས་ཡེ་ཤེས་མཁའ་འགྲོའི་ཚོགས༔ སྤྱན་འདྲེན་གནས་འདིར་ས་མ་ཛ༔ བྱིན་དབབས་ནི་ཌཱ་དྲིལ་དང་རྐང་གླང་བཅས། ཕཊ་ཕཊ་ཕཊཿ ཡེ་ནས་སྤྲོས་བྲལ་གཉུག་མ་ཆེ༔ དམ་པ་དོན་གྱི་ཡུམ་ཆེན་མོ༔ འགགས་མེད་རྩལ་གྱི་སྒྱུ་འཕྲུལ་གར༔ རྡོ་རྗེ་གསུམ་གྱི་བྱིན་ཕོབ་ཅིག༔ རྩ་སྔགས་མཐར༔ ཨ་ཝེ་ཤ་ཡ་ཕེཾ་ཕེཾ༔ བརྟན་བཞུགས་ནི། དབྱིངས་ནས་དབབ་པའི་ཡེ་ཤེས་པ། །ཐམས་ཅད་དབྱེར་མེད་བདེ་ཆེན་དང་། །ཆུ་ཉིད་ལ་ནི་ཆུ་ཐིམ་ལྟར། །དུ་མར་སྣང་ཡང་ཡེ་ཤེས་གཅིག །ཕཊ་ཕཊ་ཕཊཿ ཅེས་བརྗོད་མེ་ཏོག་སྤྱི་བོར་བཀོད། དེ་ནས་དཀྱིལ་འཁོར་སྒོ་ཕྱེས་ལ། ཧོཿ དཀྱིལ་འཁོར་ཆེན་པོའི་སྒོ་བཞི་ནས༔ སྒྲིབ་བྱེད་དྲི་མ་རྣམ་སངས་བའི༔ ཚོགས་བསགས་ཞིང་སྦྱོངས་སེམས་ཅན་སྨིན༔ དོན་གཉིས་མཐར་བྱིན་སླད་དུའོ༔ པྲ་ཝེ་ཤ་ཡ་ཕཊ༔ དེ་ནས། ཧོཿ རིག་པ་དོན་གྱི་པུཥྤེ་ཀཿ ཡེ་ཤེས་བྱིན་ཆེན་བབས་ལས་བྱུང་༔ དེ་མཐུས་སྔོན་འབྲེལ་གཉུག་མའི་ལྷ༔ གང་ཡིན་དེ་ལ་བབས་པར་ཤོག༔ པུཥྤེ་པྲ་ཏི་ཙ་ཧོ༔ མིག་དར། ཧོཿ མ་རིག་མཚོན་པའི་མིག་དར་འདི༔ ཡེ་ཤེས་གསེར་གྱི་ཐུར་མས་བསལ༔ བརྡའ་རྟགས་ཉོན་མོངས་རབ་རིབ་དག༔ ཡེ་ཤེས་ལྷ་ཡི་ཞལ་མཐོང་ནས༔ འགྲོ་ཀུན་སྐུ་གསུམ་བཅུད་སྨིན་ཤོག༔ ཕཊ་ཕཊ་ཕཊཿ མཐོང་བསྟན། ཧོཿ སེམས་ཉིད་མ་བཅོས་རྣལ་མ་འདི༔ ཤེས་རབ་ཕ་རོལ་ཕྱིན་པ་སྟེ༔ ཡེ་ཤེས་རང་བྱན་ཆུད་པ་ཡི༔ ཐེ་ཚོམ་ཟག་པ་ཀུན་ཆོད་ཅིག༔ དེ་ཡི་རྒྱན་གྱི་འཁོར་ལོ་ཀུན༔ ཝ་ར་ཧི་ཡི་རང་བཞིན་ཏེ༔ ཡེ་ཤེས་མ་བཅོས་གྱད་དུ་ཤར༔ རང་དབང་འབྱོར་ན་རྣལ་འབྱོར་བ༔ སྤྲིན་མེད་དག་པའི་ནམ་མཁའ་འདྲ༔ རྡོ་རྗེ་ཁྲོས་པའི་རང་བཞིན་ཉིད༔ སྒོ་གསུམ་སྐུ་གསུང་ཐུགས་རྡོ་རྗེ༔ སྐུ་གསུམ་རང་ངོ་མཐོང་བར་བསྟན༔ དངོས་གྲུབ་ཡིད་བཞིན་སྤྲིན་ཆེན་པོ༔ ཡོངས་སུ་ཐོབ་པའི་སྐལ་བཟང་ཡིན༔ བརྩོན་པ་མཆོག་ཏུ་བསྐྱེད་དེ་ཟུངས༔ དེང་ནས་ཉེས་ཟད་ལམ་དུ་དབང་༔ ཕཊ་ཕཊ་ཕཊཿ བྱིན་དབབས་འདིར་བཏགས་པའི་ཕྱག་ལེན་ཀྱང་ཡོད་པས་ཤེས་རབ་ཀྱི་མིག་གིས་ལྟོས། དེ་ནས་སྐུ་གསུང་ཐུགས་ཀྱི་དབང་དང་ཡོན་ཏན་ཕྲིན་ལས་ཀྱི་དབང་རྣམས་སློབ་དཔོན་རྡོ་རྗེ་སྐུ་གསུམ་གྱི་མཁའ་འགྲོར་གསལ་བ་དང་མདུན་བསྐྱེད་ལྷའི་སྤྱི་མགྲིན་སྙིང་ག་ལྟེ་བ་གསང་གནས་རྣམས་ནས་འོད་ཟེར་གྱི་ཚུལ་དུ་འབྱུང་ནས༔ སློབ་མའི་གནས་ལྔར་ཐིམ་པས་མཆོག་ཐུན་གྱི་དངོས་གྲུབ་ཐོབ་པར་བསྒོམ་ལ༔ ཐོག་མར། ཧཱུྃ༔ བུམ་པ་སྟོང་གསལ་སྐུ་ཡི་གདངས༔ དུས་གསུམ་རྒྱལ་བའི་དཀྱིལ་འཁོར་བཞུགས༔ སྐལ་ལྡན་བུ་ལ་དབང་བསྐུར་བས༔ ཆོས་བདུན་རྡོ་རྗེའི་རང་བཞིན་ཅན༔ གཞོམ་མེད་སྐུ་ཡི་ཆོས་ཉིད་དུ༔ སྨིན་ནས་རྩ་ཁམས་རྣམ་དག་པ༔ བུམ་དབང་ཡོངས་སུ་རྫོགས་པར་ནི༔ ལྷ་སྐུ་བསྒོམ་པའི་སྣོད་རུང་གྱུར༔ རྩ་སྔགས་མཐར་ཀ་ཡ་ཨ་བྷི་ཥིཉྩ་ཨོཾ༔ དེ་ནས་སྐུ་གསུང་ཐུགས་ཡོན་ཏན་ཕྲིན་ལས་མ་ལུས་པའི་དབང་རྫས་རྣམས་རིམ་པར་འགྲིམ་ལ༔ ཨོཾ་ཨཱཿཧཱུྃ༔ གནས་ལུགས་དོན་དམ་སྤྲོས་པའི་སྒྲོ༔ རྣམ་པར་འདོགས་པ་སུམ་ཅུ་གཉིས༔ གྲོལ་བའི་རང་བཞིན་རྣམ་ཐར་གསུམ༔ ཡོངས་ལྡན་རྡོ་རྗེ་ཕག་མོ་ཡི༔ རྡོ་རྗེའི་སྐུ་ཡི་དབང་བསྐུར་རོ༔ རྣམ་པར་སྨིན་པའི་རིག་འཛིན་ཐོབ༔ མཐོང་བའི་ལམ་ལ་གྲུབ་ཐོབ་ཤོག༔ རྩ་སྔགས་མཐར། དྷརྨ་ཀ་ཡ༔ སམ་བྷོ་ཀ་ཡཿ ནིརྨ་ཀ་ཡཿ བཾཊཱཀྐི་ནི་ཀ་ཡ་ཨ་བྷི་ཥིཉྩ་ཨོཾཿ དེའི་སྐུ་གསུམ་གྱི་མཁའ་འགྲོའི་དབང་བསྐུར་རོ། ཧཱུྃ༔ མེ་ལོང་ཡེ་ཤེས་མཆོག་གི་རྒྱན༔ ཐུགས་ཀྱི་ཡེ་ཤེས་མཆོག་གི་ལྷ༔ རྡོ་རྗེ་མཁའ་འགྲོའི་དབང་བསྐུར་བས༔ ཞེ་སྡང་རྣམ་དག་སྐུ་ཐོབ་ཤོག༔ རྩ་སྔགས་དང་། ཧ་བཛྲ་ཊཱཀྐི་ནི་ཨ་བྷི་ཥཉྩ་ཨོཾ༔ ཧཱུྃཿ མཉམ་ཉིད་ཡེ་ཤེས་མཆོག་གི་རྒྱན༔ ཡོན་ཏན་ཡེ་ཤེས་མཆོག་གི་ལྷ༔ རིན་ཆེན་མཁའ་འགྲོའི་དབང་བསྐུར་བས༔ ང་རྒྱལ་རྣམ་དག་སྐུ་ཐོབ་ཤོག༔ རྩ་སྔགས་དང་། རི་རཏྣ་ཊཱཀྐི་ནི་ཨ་བྷི་ཥིཉྩ་ཨོཾ༔ ཧཱུྃ༔ སོར་རྟོགས་ཡེ་ཤེས་མཆོག་གི་རྒྱན༔ གསུང་གི་ཡེ་ཤེས་མཆོག་གི་ལྷ༔ པདྨ་མཁའ་འགྲོའི་དབང་བསྐུར་བས༔ འདོད་ཆགས་རྣམ་དག་སྐུ་ཐོབ་ཤོག༔ རྩ་སྔགས་དང་། ནི་པདྨ་ཊཱཀྐི་ཨ་བྷི་ཥིཉྩ་ཨོཾ༔ ཧཱུྃ༔ བྱ་གྲུབ་ཡེ་ཤེས་མཆོག་གི་རྒྱན༔ ཕྲིན་ལས་ཡེ་ཤེས་མཆོག་གི་ལྷ༔ ཀརྨ་མཁའ་འགྲོའི་དབང་བསྐུར་བས༔ ཕྲག་དོག་རྣམ་དག་སྐུ་ཐོབ་ཤོག༔ རྩ་སྔགས་དང་། ས་ཀརྨ་ཊཱཀྐི་ཨ་བྷ་ཥིཉྩ་ཨོཾ༔ ཧཱུྃ༔ ཞི་བའི་ལས་གྲུབ་ཕྱི་ཡི་གདངས༔ གར་མཛད་སྒྱུ་འཕྲུལ་རོལ་མོའི་དཔྱིད༔ རྡོ་རྗེ་ཤུགས་འགྲོའི་དབང་བསྐུར་རོ༔ ཞི་བའི་ཕྲིན་ལས་ལ་དབང་ཤོག༔ རྩ་སྔགས་དང་། བཛྲ་ཨཾ་ཀུ་ཤ་ཛཿཨ་བྷ་ཥིཉྩ་ཨོཾ༔ ཧཱུྃ༔ རྒྱས་པའི་ལས་གྲུབ་ཕྱི་ཡི་གདངས༔ གར་མཛད་སྒྱུ་འཕྲུལ་རོལ་མོའི་དཔྱིད༔ རིན་ཆེན་ཤུགས་འགྲོའི་དབང་བསྐུར་རོ༔ རྒྱས་པའི་ཕྲིན་ལས་ལ་དབང་ཤོག༔ རྩ་སྔགས་དང་། རཏྣ་པ་ཤ་ཧཱུྃ་ཨ་བྷི་ཥིཉྩ་ཨོཾ༔ ཧཱུྃ༔ དབང་གི་ལས་གྲུབ་ཕྱི་ཡི་གདངས༔ གར་མཛད་སྒྱུ་འཕྲུལ་རོལ་མོའི་དཔྱིད༔ པདྨ་ཤུགས་འགྲོའི་དབང་བསྐུར་རོ༔ དབང་གི་ཕྲིན་ལས་ལ་དབང་ཤོག༔ རྩ་སྔགས་དང་། པདྨ་སྥོ་ཊ་བཾ་ཨ་བྷི་ཥིཉྩ་ཨོཾ༔ ཧཱུྃ༔དྲག་པོའི་ལས་གྲུབ་ཕྱི་ཡི་གདངས༔ གར་མཛད་སྒྱུ་འཕྲུལ་རོལ་མོའི་དཔྱིད༔ ཀརྨ་ཤུགས་འགྲོའི་དབང་བསྐུར་རོ༔ དྲག་པོའི་ཕྲིན་ལས་ལ་དབང་ཤོག༔ རྩ་སྔགས་དང་། ཀརྨ་གྷནྜེ་ཧོ་ཨ་བྷི་ཥིཉྩ་ཨོཾ༔ དེ་ནས་གསུང་དབང་ལ་༔ པདྨ་རཀྟ་བདེ་ཆེན་རྫས༔ སྲིད་པའི་རྩི་དམར་ཀུན་བརླབས་ལ༔ ཨཿ ཆགས་བྲལ་གིརྟི་དམར་པོ་ཡི༔ འཁོར་འདས་སྟོང་བར་རྒྱས་འདེབས་ཤིང་༔ སྟོང་བ་བདེ་བ་ཆེན་པོར་གྲོལ༔ ཐབས་ཀྱི་མཆོག་གསང་ཟབ་པའི་རྒྱས༔ རིགས་ཀྱི་བུ་ལ་དབང་བསྐུར་བས༔ ཤེས་རབ་ཆེན་པོའི་མཐའ་བྲལ་བ༔ རྣམ་པ་ཉི་ཤུའི་སྟོབས་ཚན་པོའི༔ རླུང་ཁམས་རྣམ་དག་གསང་དབང་ཐོབ༔ ཚེ་དབང་རིག་འཛིན་ཉེར་ཐོབ་ནས༔ སྒོམ་པའི་ལམ་གྱི་བར་ཆད་པ༔ མེད་དང་ལོངས་སྤྱོད་རྫོགས་པ་ཡི༔ སྐལ་བ་བཟང་པོའི་དཔལ་ཐོབ་ཤོག༔ རྩ་སྔགས་དང་། པདྨ་རཀྟ་པཉྩ་ཝཀྐཱ་ཨ་བྷ་ཥིཉྩ་ཨཱཿ ཐུགས་ལ༔ ཧཱུྃ༔ གྲི་གུག་རྒྱུད་དྲུག་དབྱིངས་སུ་སྒྲོལ༔ བྷནྡྷ་ཁམས་གསུམ་ཁྲག་ཏུ་རོལ༔ རྡོ་རྗེ་རིན་ཆེན་པདྨ་དང་༔ རྒྱ་གྲམ་ཕྱག་རྒྱ་བཞི་ཡི་མཚན༔ རིགས་ཀྱི་བུ་ལ་དབང་བསྐུར་རོ༔ ཤེས་རབ་ཡེ་ཤེས་མཆོག་གི་མཐུས༔ ཕྱག་རྒྱ་ཆེན་པོའི་རིག་འཛིན་ཐོབ༔ ཟག་པ་འབྲས་བཅས་ཟད་པ་དང་༔ མི་སློབ་ལམ་གྱི་ཉེ་རྒྱུར་འབྱོར༔ སེམས་ཀྱི་སྒྲིབ་དག་ཆོས་སྐུར་གྲོལ༔ བདག་འཛིན་མ་རིག་རྩད་བྱུང་དེ༔ ཡུམ་ཆེན་ཐུགས་ཀྱི་དབང་ཐོབ་ཤོག༔ ཐིག་ལེ་རྣམ་དག་ཨེ་མ་ཧོ༔ བུདྡྷ་བཛྲ་རཏྣ་པདྨ་ཀརྨ་ཙིཏྟ་ཨ་བྷི་ཥིཉྩ་ཧཱུྃ༔ ཡོན་ཏན་ནི། ཧཱུྃ༔ ཡོན་ཏན་རང་བཞིན་མཐར་ཕྱིན་པ༔ བརྟུལ་ཞུགས་ཀྱིས་ནི་ཆས་བཅུ་གསུམ༔ སྐལ་ལྡན་བུ་ལ་དབང་བསྐུར་བས༔ ཕན་གནོད་མཚང་ལ་རྣམ་པར་རྒོལ༔ རྐྱེན་ཐོག་གིས་ནི་གནད་ངོ་འཕྲོད༔ རིག་པ་རྗེན་པ་ཟང་མ་ཐལ༔ རྩེར་ཡན་དྲི་མེད་རང་གསལ་བ༔ རྣམ་པ་རྟགས་འདིའི་རང་ཞལ་ལ༔ མཚོན་ན་སྣང་གསུམ་བག་ཆགས་དག༔ ཟུང་འཇུག་ངོ་བོ་ཉིད་ཐོབ་པའི༔ ལྷུན་གྲུབ་རིག་འཛིན་ཉེར་ཐོབ་ནས༔ ཡེ་ཤེས་རྨད་བྱུང་ལ་དབང་ཤོག༔ རྩ་སྔགས་དང་། སརྦ་གུ་ཎ་ཨ་བྷི་ཥིཉྩ་ཧཱུྃཿ ཞེས་པའི་མཐར་རྩལ་དབང་རྒྱས་བའང་བྱའོ། །ཧཱུྃ༔ ཕྲིན་ལས་མཐར་ཕྱིན་རྡོ་རྗེའི་དབང་༔ སྐལ་བ་ལྡན་པའི་བུ་ལ་སྦྱིན༔ སྲ་ཞིང་ཁོང་སྟོང་བྲལ་བ་ཡི༔ གཞོམ་གཞིག་མེད་པའི་རྟེན་འབྲེལ་གྱིས༔ རང་དོན་མཐར་ཕྱིན་བར་ཆད་མེད༔ ཆོས་སྐུ་དམ་པའི་གནས་ཐོབ་ཤོག༔ རྩ་སྔགས་དང་། ཨོཾ་བཛྲ་ཀརྨ་ཨ་བྷི་ཥིཉྩ་ཧཱུྃ༔ དེ་ནས་མཐའ་བརྟེན་གྱི་དབང་། ཧཱུྃ༔ སྐུ་དང་གསུང་དང་རྡོ་རྗེའི་ཐུགས༔ ཡོན་ཏན་ཕྲིན་ལས་ཡོངས་རྫོགས་པའི༔ རང་བྱུང་ལྷུན་གྲུབ་བྷ་ལིངྟ༔ སྐལ་ལྡན་བུ་ལ་དབང་བསྐུར་བས༔ གཞན་དོན་གཟུགས་སྐུ་འགགས་པ་མེད༔ མཚན་དཔེ་རྫོགས་པའི་རང་བཞིན་གྱིས༔ ལྷ་འདྲེའི་འགྲོ་དོན་ནུས་པ་དང་༔ ནམ་མཁའི་མཐར་ཐུག་སེམས་ཅན་གྱིས༔ གཅོད་ཡུལ་མཐར་ཕྱིན་བདུད་བཞི་བཅོམ༔ ཡུམ་ཆེན་ས་ལ་འགོད་ནུས་ཤོག༔ རྩ་སྔགས་མཐར། མ་ཧཱ་བྷ་ལིངྟ་བཛྲ་ཀརྨ་ལཀྵིཾ་ཨ་བྷི་ཥིཉྩ་ཧཱུྃ༔ དེ་ནས་དམ་ཚིག་གི་རིམ་པ་རྣམས་ཚུལ་བཞིན་དུ་བསྲུང་ངོ་སྙམ་དུ་འདིའི་རྗེས་བཟློས་ཀྱིས། རྩ་བ་སྐུ་གསུང་ཐུགས་མཆོག་དང་། །ཡན་ལག་དམ་ཚིག་ཉི་ཤུ་ལྔ། །མེད་དང་གཅིག་པུ་ཕྱལ་བ་སོགས། །ཆོ་ག་བཞིན་དུ་བསྲུང་བར་བགྱི། །ལན་གསུམ། གཏང་རག་མཎྜལ་ཕུལ། སླར་ལུས་ལོངས་སྤྱོད་བླ་མའི་ཕྱོགས་སུ་ཕུལ་བ་ནི། དམ་ཚིག་གི་ཐ་ཚིག་ཡིན་པས་འདིའི་རྗེས་ཟློས་གྱིས། །གཙོ་བོས་ཇི་ལྟར་བཀའ་སྩལ་པ། །དེ་དག་ཐམས་ཅད་བདག་གིས་བགྱིད། ཁྱོད་ལ་བདག་ཀྱང་ཡོངས་སུ་འབུལ། །སློབ་མར་བཟུང་ནས་སྤྱད་དུ་གསོལ། །ལན་གསུམ། རྗེས་ལ་དགེ་བ་བསྔོ་ཞིང་བཀྲ་ཤིས་ཀྱིས་མཐའ་རྒྱན་པར་བྱའོ། །ཅེས་པའང་ག་གཱ་པས་སོ། །སླད་ཀྱི་ཆོག་ཁྲིགས་སུ་སྡེབ་པ་པོ་ནི་སྣང་སྲིད་དབང་དུ་སྡུད་པའི་རྡོ་རྗེ་ཞེས་བྱའོ། །དགེའོ། །

ཁྲོས་མའི་རྒྱུན་ཁྱེར།

ཁྲོས་མའི་རྒྱུན་ཁྱེར་ནིཿ ཨཱཿ དྲན་རྫོགས་མཁའ་སྤྱོད་ཡོན་ཏན་ལྔ་ལྡན་པར༔ རང་ཉིད་རྡོ་རྗེ་ཁྲོས་མ་ནག་མོ་ནི༔ མཐིང་ནག་ཞལ་གཅིག་ཕྱག་གཉིས་གྲི་ཐོད་བསྣམས༔ ཞབས་གཉིས་གར་སྟབས་དུར་ཁྲོད་ཆས་གོས་བརྒྱན༔ ཡེ་ཤེས་སེམས་དཔའ་བཛྲ་ཝ་ར་ཧའི༔ ཐུགས་ཀར་ཉི་སྟེང་བཾ་མཐར་སྔགས་ཕྲེང་འཁོར༔ འཕྲོ་འདུས་འོད་ཀྱིས་སྒྲིབ་དག་དབང་བྱིན་བསྡུས༔ མཆོག་ཐུན་དངོས་གྲུབ་མ་ལུས་ཐོབ། ༼ དངོས་གྲུབ། མཆན། ༽ བསམ་ཞིང་༔ ཨོཾ་བཛྲ་ཝཱ་ར་ཧི་ཀྲོ་ཏི་ཀ་ལི་བཾ་ཧ་རི་ནི་ས་ཧཱུྃ་ཕཊཿ ཧཱུྃཿ སྣང་ཆ་ཐབས་ཀྱི་མཆོད་པ་འབུལ༔ སྟོང་ཉིད་དབྱིངས་ལ་ཕྱག་འཚལ་བསྟོད༔ ཟུང་འཇུག་རྣམ་ཀུན་ ༼ བསྡུ་ལྡང་མཆན། ༽ མཆོག་ལྡན་གྱིས༔ བཀྲ་ཤིས་ཀུན་ཏུ་ལྷུན་འགྲུབ་ཤོག༔ ཅེས་ཀྱང་ཕུན་ལྷའི་ངོར་ག་གཱས་སོ། །

རིག་བྱེད་ལྷ་མོའི་གསང་སྒྲུབ་བསྡུས་པ་འདོད་འབྱུང་ནོར་བུ།

རྡོ་རྗེ་སེམས་དཔའི་དགོངས་ཉམས་ལས༔ རིག་བྱེད་ལྷ་མོའི་གསང་སྒྲུབ་བསྡུས་པ་འདོད་འབྱུང་ནོར་བུ་བཞུགས་སོཿ

ན་མོ་གུ་རུ་པདྨ་ཀ་ར་ཡེ༔ བརྡ་ཡིག །དེ་ལ་སྦྱོར་དངོས་རྗེས་གསུམ་ལས༔ དང་པོ་གཡང་གཏོར་པདྨའི་མཚན༔ དེ་དྲུང་དཀར་བགེགས་ལ་སོགས་བཤགས༔ དམིགས་གནད་དང་བཅས་འདི་སྐད་དོ༔ ན་མོཿ དཀོན་མཆོག་ཀུན་འདུས་དབྱིངས་ཀྱི་སྐུ༔ རིག་བྱེད་ལྷ་མོར་སྐྱབས་སུ་མཆི༔ བདག་གཞན་སངས་རྒྱས་སར་འགོད་ཕྱིར༔ རིག་གསུང་ལྷ་མོར་བསྒྲུབ་པར་བྱ༔ དེ་ནས་བགེགས་བསྐྲད་བསྲུང་འཁོར་བསྒོམ༔ ཧཱུྃཿ ང་ནི་རྟ་མཆོག་ཧེ་རུ་ཀ༔ བཀའ་ལས་བྱེད་ལྟོག་འགོང་པོའི་སྡེ༔ མགོ་བོ་ཚལ་བ་བརྒྱར་བཀས་ནས༔ སྡིགས་བསྐྲད་རྡོ་རྗེའི་གུར་ཁང་བརྡལ༔ དེ་ནས་བྱིན་ཕེབས་པ་ནི༔ ཧྲཱིཿ རིག་བྱེད་ཡེ་ཤེས་ལྷ་མོ་ཁྱོད༔ དབུལ་ཕོངས་སྡུག་བསྔལ་སེལ་བ་དང་༔ ཡི་དྭགས་སྐྱེ་སྒོ་དགགས་པའི་ཕྱིར༔ གནས་འདིར་བྱིན་ཆེན་དབབ་དུ་གསོལ༔ དེ་ནས་མཆོད་པ་ནི༔ ཧྲཱི༔ མཆོད་རྫས་དཔག་མེད་བཀོད་ལེགས་པ༔ འཁོར་འདས་ཀུན་གྱི་ཆེ་ཐང་ཚོགས༔ ཟག་མེད་ཡེ་ཤེས་སྟོབས་ཀྱི་བརླགས༔ གཟུངས་དང་ཏིང་འཛིན་ནུས་པས་སྤེལ༔ དེ་ནས་ལྷ་བསྐྱེད་ནི༔ ཧཱུྃཿ ནམ་མཁའ་ཁྱབ་བརྡལ་སྤྲོས་པ་བྲལ༔ ཡེ་ཤེས་སྙིང་རྗེའི་ཉི་མ་ཤར༔ སྟོང་དང་སྙིང་རྗེ་ཟུང་འཇུག་གི༔ རང་མདངས་པདྨའི་གཞལ་ཡས་ཁང་༔ ཟླ་གམ་རྒྱན་དང་བཀོད་པ་རྫོགས༔ ཕུན་སུམ་ཚོགས་པའི་མཆོད་སྤྲིན་དབུས༔ རང་རིག་པདྨ་མཁའ་འགྲོ་མར༔ ཎི་པདྨ་ཊཱཀྐི་ནི་སྥ་ར་ནི་ཕཊ༔ སཾ་ཧ་ར་ནི་ཧཱུྃཿ དམར་མོ་གར་གྱི་ཆས་སུ་ཞུགས༔ ཕྱག་གཡས་པདྨའི་ལྕགས་ཀྱུ་དང་༔ གཡོན་པས་པདྨ་བྷཉྫ་ནི༔ དབང་གི་རྒྱལ་པོའི་གང་བར་གཏམས༔ རིན་པོ་ཆེ་ཡི་སྲོག་ཞུ་ཅན༔ རྟོག་མེད་བམ་གྱི་ནུ་ཕྲག་ཏུ༔ ཞབས་གཡོན་བརྫིས་ཏེ་གཡས་པ་ཡི༔ སྐྱེ་གནས་པདྨོ་དགག་པའི་གཟུགས༔ ཉི་མ་པདྨ་ཟླ་བ་བཅས༔ ཕྱོགས་བཞིར་པད་རྐྱང་གདན་སྟེངས་སུ༔ ཤར་དུ་རྡོ་རྗེ་རིག་བྱེད་དཀར༔ ལྷོ་རུ་རཏྣ་རིག་བྱེད་སེར༔ ནུབ་ཏུ་བུདྡྷ་རིག་བྱེད་མཐིང་༔ བྱང་དུ་ཀརྨ་རིག་བྱེད་ལྗང་༔ བར་མཚམས་ཤུགས་འགྲོ་ཆེན་མོ་བཞི༔ དཀར་སེར་སེར་མཐིང་མཐིང་ལྗང་ནག༔ ལྗང་དཀར་ཕྱག་ནི་ལྕགས་ཀྱུ་དང་༔ གཡོན་ཀུན་པདྨ་བྷཉྫ་འཛིན༔ མཐའ་བསྐོར་འབུམ་ཕྲག་མཁའ་འགྲོ་དམར༔ སྐུ་མདོག་ཕྱག་མཚན་གཙོ་མོ་བཞིན༔ མ་འདྲེས་ཡོངས་སུ་རྫོགས་པ་ལ༔ དུས་གསུམ་རྒྱལ་བ་སྲས་བཅས་དང་༔ ངོ་བོ་དབྱེར་མེད་ཆེནཔོར་བཞུགས༔ གནས་གསུམ་ཨོཾ་ཨཱཿཧཱུྃ་གསུམ་ལས༔ འོད་འཕྲོས་པདྨ་གསུང་གི་ལྷ༔ མ་ལུས་སྤྱན་དྲངས་དབྱེར་མེད་གྱུར༔ དེ་ནས་སྤོས་དམར་ཙནྡན་བསྲེགས༔ མདའ་དར་དམར་པོའི་གཡབ་ལ་དྲངས༔ ཧྲཱི་ནིཿ གོས་དཀར་དབྱིངས་ཀྱི་ལྷ་མོ་ནི༔ འཁོར་ལོ་སྡོམ་པ་ཆགས་བྲལ་སྐུ༔ རིག་བྱེད་ལྷ་མོར་འདུ་འབྲལ་མེད༔ གནས་འདིར་སྤྱན་འདྲེན་གཤེགས་སུ་གསོལ༔ བཛྲ་པདྨ་ཊཱཀྐི་ནི་ནི་ལ་ཨ་ཝེ་ཤ་ཡ་ཛ༔ དེ་ནས་བཞུགས་གསོལ་ཕྱག་འཚལ་ནི༔ ནིཿ འགྲོ་བ་གནས་སྐབས་མཐར་ཐུག་གི༔ དབུལ་སེལ་ལྷ་མོ་རིག་བྱེད་མ༔ འཁོར་བཅས་འབུལ་བས་གདན་ལ་བཞུགས༔ སྒོ་གསུམ་གུས་པས་བདག་ཕྱག་འཚལ༔ ནི་པདྨ་ཊཱཀྐི་ནི་ཏིཥྛ་ན་མོ་ཧོ༔ དེ་ནས་མཆོད་པའི་བྱེ་བྲག་ནི༔ ཧཱུྃཿ ཡན་ལག་བརྒྱད་ལྡན་མཆོད་ཡོན་དང་༔ དྲི་མེད་ཡིད་འོང་ཕྱག་ཞབས་བསིལ༔ བསྒྲལ་ ༼ བཀོད་དཔྱད། ༽ ལེགས་མེ་ཏོག་ཆུན་པོ་མཆོད༔ གཡང་ལྷ་འཁོར་བཅས་མཉེས་གྱུར་ཅིག༔ དྲི་ཞིམ་སྤོས་ཀྱི་རེང་བུ་སྟོང་༔ ཉི་ཟླ་གསལ་བའི་སྒྲོན་མེ་དང་༔ དྲི་བཟང་ངད་པས་ལྡན་པའི་ཆབ༔ བརྡའ་དགུའི་ཞལ་ཟས་སྣ་ཚོགས་པ༔ གཡང་ལྷ་འཁོར་བཅས་མཉེས་གྱུར་ཅིག༔ གཟུགས་སྒྲ་དྲི་རོ་རེག་བྱ་འཇམ༔ སྣང་སྟོང་ཆོས་ཀྱི་བྱེ་བྲག་དང་༔ གཞན་ཡང་མཆོག་གི་བླ་མེད་མཆོད༔ སྨན་གཏོར་རཀྟ་ཚར་དུ་བསྒྲེང་ ༼ དངར་དཔྱད། ༽ ཿ ལྷག་པར་དཀར་དམར་བདུད་རྩི་སྤྲིན༔ རྒྱལ་ཀུན་བདེ་སྐྱེད་བརྡ་དང་བཅས༔ ཨ་སིད་ཧཾ་པན་བདེ་སྒྲ་དབྱངས༔ བདེ་ཆེན་བྱང་ཆུབ་སེམས་སུ་འབུལ༔ མཉེས་ནས་བདག་ཅག་འཁོར་བཅས་ལ༔ རྒྱུ་འབྲས་དབུལ་བ་ཀུན་སེལ་ཏེ༔ སྦྱིན་པས་ཕར་ཕྱིན་མཐར་ཕྱིན་ཏེ༔ ནམ་མཁའ་མཛོད་ལ་གཏེར་དབང་ཉིད༔ ཟག་མེད་འཕགས་ནོར་གྱིས་ཕྱུག་ཤོག༔ སརྦ་པཱུ་ཛ་ཧོཿ དེ་ནས་བསྟོད་པ་གླུས་མཆོད༔ ཀྱཻཿ དུས་གསུམ་རྒྱལ་བའི་བདེ་སྟོང་ཡུམ༔ སྒྲོལ་བྱེད་ཆེན་མོ་པདྨའི་ངང་༔ རིགས་ཀྱི་ལྷ་མོ་སྐུ་མདོག་དམར༔ ཆགས་མེད་མཛོད་ལ་ཕྱག་འཚལ་བསྟོད༔ ཞེས་བརྗོད་དོཿ དེ་ནས་མཁའ་འགྲོའི་འཛབ་བཟླས་ནི༔ ཛཿ མཁའ་འགྲོའི་ཐུགས་ཀར་པདྨའི་དཀྱིལ༔ ཉི་ཟླའི་གའུ་ཁ་སྦྱོར་ནང་༔ ནི་ལ་རྩ་བའི་སྔགས་ཀྱི་བསྐོར༔ བཟླས་པས་རྒྱལ་བའི་དཀྱིལ་འཁོར་ཀུན༔ འོད་ཟེར་དམར་པོའི་ལྷ་མོ་མཆོད༔ མར་འཕྲོས་ཡི་དྭགས་བཀྲེས་སྐོམ་བསལ༔ ཁམས་གསུམ་ཐམས་ཅད་པདྨར་སྦྱོར༔ ཚུར་འདུས་བདག་ལ་ཐིམ་པ་ཡི༔ འཁོར་འདས་ལྟ་བས་ཕྱག་རྒྱར་བསྡུས༔ ཨོཾ་པདྨ་ནི་ལ་སརྦ་སིདྡྷི་ཕ་ལ་ཧཱུྃཿབྷྲཱུཾཿ ཞེས་བྱའོ༔ སྐབས་སུ་དབང་གི་སྔགས་ནི༔ རང་གི་ཐུགས་ཀའི་ནི་ལས་ཡི་གེ་ཕྲ་མོ་གྲངས་མེད་པ་འཕྲོས་པས་སྣོད་བཅུད་ཐམས་ཅད་ཀྱི་ཞིང་ཁམས་ཀྱི་དཔལ་ཡོན་ཏན་བཅུད་དང་དྭངས་མ་བསྡུས་ཏེ་བདག་གནས་ཡོ་བྱད་ཐམས་ཅད་བྱིན་གྱི་བརླབས་པས་བདེ་བ་ཅན་ལྟར་སྣོད་བཅུད་ཀྱི་ཡོན་ཏན་རྫོགས་པར་མོས་ལ༔ ཨོཾ་པདྨ་ཊཱཀྐི་ནི་ལ་ར་མ་མ་མ་སརྦ་ཏི་ལ་བསྡུས་བསྡུས༔ ཞེས་ཅི་མང་བཟླའོ༔ དེ་ནས་གཡང་འབོད་ནི༔ ཀྱཻ༔ རྒྱལ་བ་ཀུན་གྱི་པདྨའི་གསུང་༔ ཁམས་གསུམ་དབང་དུ་སྡུད་པའི་ཕྱིར༔ རིག་བྱེད་ལྷ་མོར་རྣམ་རོལ་བསྒྱུར༔ ཁྱེད་ལ་ཕྱག་འཚལ་གསོལ་བ་འདེབས༔ གཡང་གི་དངོས་གྲུབ་སྩལ་དུ་གསོལ༔ ཀྱཻ༔ དཀོན་མཆོག་གསུམ་གྱི་ཐུགས་རྗེ་ཁུག༔ བླ་མ་རྣམས་ཀྱི་བྱིན་རླབས་གཡང་༔ ཡི་དམ་ལྷ་མི་དངོས་གྲུབ་གཡང་༔ མཁའ་འགྲོ་རྒྱ་མཚོའི་ཕྲིན་ལས་གཡང་༔ དམ་ཅན་སྲུང་མའི་མཐུ་སྟོབས་གཡང་༔ དཀར་པོ་ལྷ་ཡི་དགའ་སྐྱིད་གཡང་༔ ནཱ་ག་ཀླུ་ཡི་ནོར་བུའི་གཡང་༔ ཉི་ཟླ་སྐར་གསུམ་གསལ་བའི་གཡང་༔ ནམ་མཁའ་ཡངས་བའི་རྟག་བརྟན་གཡང་༔ རྒྱ་མཚོ་ཆེན་པོ་འཁྱིལ་བསིལ་གཡང་༔ མཐའ་བཞིའི་རྒྱལ་ཁམས་ཐུག་གི་གཡང་༔ རྡོ་རྗེའི་ཕ་ལམ་སྲ་བའི་གཡང་༔ དཔག་བསམ་ལྗོན་པས་རྒྱས་པའི་གཡང་༔ པེ་ཏིང་ཀེ་ཡི་རྒྱ་བཀྲག་གཡང་༔ ས་གཞི་སེར་བོའི་ཁ་ཞིང་གཡང་༔ བརྟན་གཡོའི་དྭངས་མ་བཅུ་ཡི་གཡང་༔ ལྟོག་ཕོངས་སེལ་བ་ཟས་ཀྱི་གཡང་༔ འབྱོར་གུད་བྲལ་བ་ནོར་བུའི་གཡང་༔ མ་ལུས་ཐམས་ཅད་གཡང་ཁུག་ཅིག༔ སངས་རྒྱས་ཐམས་ཅད་མཁྱེན་བརྩེ་ཟབ༔ རིག་བྱེད་འཁོར་བཅས་ཐུགས་བསྐྱེད་གཉན༔ རྟེན་འབྲེལ་ཕྱྭ་རྫས་ནུས་པ་ཆེ༔ བདེན་པའི་བདེན་ཚིག་འདི་བརྗོད་པས༔ བདག་ཅག་དུས་ཀུན་དགེ་ལེགས་ཤོག༔ ཞེས་བརྗོད༔ དེ་ནས་བརྟན་བཞུགས་བཀྲ་ཤིས་ནི༔ འཁོར་བ་མ་སྟོང་བར་དུ་སངས་རྒྱས་རྣམས༔ འགྲོ་ཁམས་ཡལ་བར་དོར་བ་བཟོད་མེད་པས༔ ཐུགས་རྗེ་ཆེན་པོ་བཅོམ་ལྡན་འོད་དཔག་མེད༔ ཐབས་ཤེས་འདུ་འབྲལ་མེད་དེ་ཏིཥྛ་ལྷན༔ ཀྱཻ༔ དེ་རིང་བཀྲ་ཤིས་རྒྱལ་བའི་དབྱངས༔ ཡོན་ཏན་དྲུག་ལྡན་དབྱངས་ཀྱི་མཆོག༔ དཀྱིལ་འཁོར་ངག་གི་དབང་ཕྱུག་མ༔ ཡོད་དེ་རྣལ་འབྱོར་ཡོན་མཆོད་སྟོན༔ སྟོན་འདི་གཞན་ལ་ཡོད་མིན་ཏེ༔ དེ་ཕྱིར་རང་སྐལ་རང་གི་ལེན༔ སྐྱོན་དེ་ཕུང་བས་སྤྲིན་ཀྱི་བྱོལ༔ བྱོལ་ཏེ་རྣལ་འབྱོར་ཡོན་མཆོད་སྟོན༔ སྟོན་འདི་གཞན་ལ་ཡོད་མིན་ཏེ༔ དེ་ཕྱིར་རང་སྐལ་རང་གི་ལེན༔ བླང་བ་ཐམས་ཅད་ཐོབ་པ་ཀྱཻ༔ སངས་རྒྱས་རྣམས་ལ་འབྱོར་མི་དམན༔ རང་ཉིད་གཞི་ཡི་རྣལ་འབྱོར་བས༔ བསྒོམ་པའི་ལམ་འདི་ཐབས་ལ་མཁས༔ གཟུར་གནས་ཡང་དག་སྤྱོད་སྟོབས་ལེན༔ བཀྲ་ཤིས་དེས་ཀྱང་བདེ་ལེགས་ཤོག༔ ཅེས་བརྗོད་དོ། །ག་གཱ་ཨ་བྷྱེས་སོ། །དགེའོ། །བཀྲ་ཤིས་ཤོག །སརྦ་མངྒ་ལཾ། །

རིག་བྱེད་དམར་མོའི་ལུས་དཀྱིལ་བསྡུས་པ།

རིག་བྱེད་དམར་མོའི་ལུས་དཀྱིལ་བསྡུས་པ་བཞུགས་སོ། །

ཧཱུྃ་ཧྲཱིཿ རང་ཉིད་སྐད་ཅིག་ཡོངས་གྱུར་ལས། །ཕྱག་མཚན་ཨུཏྤལ་ཧྲཱིཿཡིས་མཚན། །གནས་གྱུར་རིག་བྱེད་དམར་མོའི་སྐུ། །གཅེར་བུ་པདྨའི་དོ་ཤལ་ཅན། །དབུ་ལ་པདྨའི་ཐོད་གདེངས་བརྒྱན། །ཡེ་ཤེས་སྒྱུ་འཕྲུལ་དྲྭ་བ་ལས༔ བརྡ་ཡིག །ཞབས་གཉིས་པདྨའི་སྐྱིལ་ཀྲུང་བཞུགས༔ དཀར་འཛིན་འབུར་ཞིང་བཅུད་འཛིན་རྒྱས༔ རིན་ཆེན་ཕྲེང་བའི་མདོ་ཆིངས་སུ༔ གནས་ལྔར་རུས་པའི་ཕྱག་རྒྱ་ལྔ༔ དཀར་མཐིང་སེར་ལྗང་དར་དཔྱང་སྤུངས༔ ཟླ་བའི་རྒྱབ་ཡོལ་ལ་བརྟེན་བཞུགས༔ རི་དྭགས་ལྤགས་པས་ནུ་གཡོན་ཁེབས༔ ཕྱག་ཞབས་རཏྣའི་གདུབ་བུ་གསིལ༔ སྐུ་ལ་མཁའ་འགྲོའི་དཀྱིལ་འཁོར་རྫོགས༔ ཕྱག་གཡས་མདའ་དང་གྲི་གུག་དང་༔ གཡོན་ཕྱག་གནམ་ཏུ་བྷནྡྷ་འཛིན༔ མདའི་རྩེར་ཨུཏྤལ་མཛེས་རྟགས་ངོམ༔ གནས་གསུམ་འོད་ཀྱིས་འཕྲོ་འདུ་ལས༔ དབྱིངས་ནས་ཡེ་ཤེས་སྤྱན་དྲངས་བསྟིམས༔ ཕྱག་འཚལ་མཆོད་འབུལ་གུས་པས་བསྟོད༔ ཐུགས་སྲོག་ཧྲཱིཿལ་སྔགས་ཀྱིས་བསྐོར༔ ཨོཾ་ཀུ་རུ་ཀུལླེ་ཧྲཱིཿཝ་ཤཾ་ཀུ་རུ་ཡེ་སྭཱ་ཧཱ༔ མཆོད་པས་མཆོད་ཅིང་བསྟོད་པས་བསྟོད༔ མཆོག་དང་ཐུན་མོང་དངོས་གྲུབ་སྩོལ༔ སྡིག་ལྟུང་དམ་ཚིག་ཉམས་ཆགས་བཤགས༔ མཚན་རྟོག་ཆོས་ཀྱི་དབྱིངས་སུ་བསྡུ༔ སླར་ཡང་སྒྱུ་མའི་ལྷ་སྐུར་བཞེངས༔ དགེ་བས་འགྲོ་ཀུན་སངས་རྒྱས་ཤོག༔ དུས་གསུམ་ཀུན་ཏུ་བཀྲ་ཤིས་ཤོག༔ བསོ་རྡོར་བས་བསྐུལ་ངོར་ག་གཱས་སོ། །ཚོགས་མཆོད་འབུལ་ན༔ རྃ་ཡྃ་ཁྃ༔ ཚོགས་ཀྱི་ཉེས་སྐྱོན་དྲི་མ་སྦྱངས༔ ཨོཾ་ཨཱཿཧཱུྃ༔ ཡེ་ཤེས་བདུད་རྩིར་བྱིན་གྱིས་བརླབས༔ རང་བཞིན་དབྱིངས་ནས་ཡེ་ཤེས་ལྷ༔ ཚོགས་ལ་སྤྱན་འདྲེན་གཤེགས་སུ་གསོལ༔ གཱ་ཎ་ཙཀྲ་བཛྲ་ས་མ་ཡཱ་ཛ་ཛ༔ ཡེ་ཤེས་བདུད་རྩིའི་ཚོགས་མཆོད་འབུལ༔ འགྲོ་བའི་དོན་དུ་བཞེས་སུ་གསོལ༔ དམ་ཚིག་ཉམས་ཆགས་ཉེས་ལྟུང་ཀུན༔ གཱ་ཎ་ཚོགས་ཀྱི་མཆོད་པས་བཤགས༔ བདག་ལྟ་ཁམས་གསུམ་འཁོར་བའི་འདྲེ༔ བདག་མེད་རྟོགས་པའི་སྟོབས་ཀྱིས་བསྒྲལ༔ ཆོས་ཉིད་སྟོང་པའི་དབྱིངས་སུ་བསྟབ༔ འཁྲུལ་མི་ཤེས་པའི་ངང་དུ་རོལ༔ མ་ཧཱ་ཏ་ན་པཱུ་ཙ་ཁཱ་ཧི༔ ལྷག་སྐྱོང་ཕོ་མོ་ལྷག་ལ་རོལ༔ ཆད་དོན་ཐ་ཚིག་གཏོར་མ་འབུལ༔ སྔོན་ཚེ་ཁས་བླང་དམ་བཅས་བཞིན༔ བསྟན་པ་བསྲུང་བའི་ཕྲིན་ལས་མཛོད༔ མ་ཧཱ་བྷ་ལིངྟ་ཁ་ཁ་ཁཱ་ཧི་ཁཱ་ཧི༔ དམ་སྲི་འགབ་འདྲེ་ལོག་འདྲེན་ཀུན༔ མནར་བ་མེད་པའི་ངང་དུ་མནན༔ འཕར་ལྡངས་གཡོ་མགུལ་མེད་པ་རུ༔ ཆོས་བདུན་ལྡན་པའི་བྲོ་རྒྱས་གདབས༔ ཞེས་སོ། །བླ་མ་དམ་པ་ཐེག་མཆོག་གི་གསུང་བསྐུལ་བཞིན་དུ་ཁ་ལ་བབས་བབས་སུ་ག་གཱས་སྨྲས་སོ། །ཚིག་བཅད་ཕྱི་མ་འདིའི་དོན་ཐུགས་ལ་བཅག་པར་ཞུ་ཞུ་ཞུ།

གནོད་སྦྱིན་ཛམ་བྷ་ལའི་སྒྲུབ་ཐབས་བསྡུས་པ་བཀྲ་ཤིས་དཔྱིད་དཔལ།

གནོད་སྦྱིན་ཛམ་བྷ་ལའི་སྒྲུབ་ཐབས་བསྡུས་པ་བཀྲ་ཤིས་དཔྱིད་དཔལ་བཞུགས་སོ༔

གཏོར་མ་ལ་སོགས་གང་འཛོམ་པ༔ ཁྱད་པར་ནོར་བུའི་དབྱིབས་སུ་བྱ༔ དེ་ནས་རང་ཉིད་འདི་ལྟར་གསལ༔ བཻཿ སྐད་ཅིག་དྲན་རྫོགས་ངང་ཉིད་ལས༔ རང་ཉིད་ཨརྱ་ཛཾ་བྷ་ལ༔ སྐུ་མདོག་དམར་ནག་ཆགས་ཉམས་ཅན༔ ཕྱག་གཡས་ཡིད་བཞིན་ནོར་བུ་བསྣམས༔ གཡོན་དུ་ནོར་སྐྱུགས་འཆིང་སྟབས་ལ༔ ཞབས་ནི་སྟེགས་སྟེང་ངལ་གསོའི་ཚུལ༔ སྐུ་ལ་རིན་ཆེན་རིགས་ལྔའི་ཕྲེང་༔ ཡུམ་མཆོག་ཀུ་རུ་ཀུལླེ་དམར༔ ཕྱག་ན་མདའ་དར་རཏྣ་བསྣམས༔ སེར་མོ་དཔལ་བསྐྱེད་གཡོན་དུ་རོལ༔ རྒྱན་ཆས་ལ་སོགས་སྤྱི་དང་མཐུན༔ གནས་གསུམ་འོད་ཟེར་རབ་འཕྲོས་པས༔ རང་རང་གནས་ནས་སྤྱན་དྲངས་བསྟིམས༔ བཻཿ འགྲོ་བའི་དབུལ་བ་སེལ་བའི་སླད༔ བཅོམ་ལྡན་རིན་ཆེན་འབྱུང་ལྡན་ནི༔ ཕྱོགས་གཅིག་ཞི་ལས་རབ་བཤོལ་ཏེ༔ མངོན་སུམ་མཛད་པོ་ས་མ་ཡཱ༔ འདིར་གཤེགས་བདག་ལ་འགོ་བར་མཛོད༔ ཕུན་ཚོགས་མཛད་ལ་གུས་པས་འདུད༔ འབྱོར་དང་ཡིད་སྤྲུལ་དམ་པས་མཆོད༔ སྐུ་གསུང་ཐུགས་ཡོན་ཕྲིན་ལས་ལྷར༔ སྒོ་གསུམ་གུས་པས་བསྟོད་པར་བྱ༔ ཅེས་བརྗོད་ལ༔ ཐུགས་ཀར་བཻཿཡིག་བཙོ་མའི་མདོག༔ དེ་ཉིད་ཉི་མའི་དཀྱིལ་ལ་རོལ༔ མཐའ་མ་སྔགས་ཀྱི་ཕྲེང་བས་བསྐོར༔ འོད་འཕྲོས་འཁོར་འདས་དཔལ་ཡོན་བཅུད༔ བསྡུས་ཏེ་བདག་ལ་ཐིམ་པ་ཡིས༔ བསོད་ནམས་ཡེ་ཤེས་རྒྱས་པར་བསམ༔ གཙོ་འཁོར་སྲོག་སྔགས་རོ་གཅིག་གྱུར༔ ཨོཾ་བཻཿ ཛཾ་བྷ་ལ་ཛ་ལེནྡྲ་ཡེ་སརྦ་བ་སུ་བསྡུས་བསྡུས༔ སརྦ་སིདྡྷི་བསྡུས་བསྡུས༔ སརྦ་ཨཱ་ཡུཿབསྡུས་བསྡུས༔ ཝ་ཤཾ་ཀུ་རུ་ཡེ་སྭཱ་ཧཱཿ ཞེས་བརྗོད་སྐབས་སུ༔ ཀྱཻཿ འཁོར་འདས་ཐམས་ཅད་རང་གི་རྩལ༔ དེ་ཕྱིར་རང་སྣང་དབང་འདུས་པའི༔ སྟོབས་ལས་འཁོར་འདས་དྭངས་བཅུད་དང་༔ ལྷ་ཀླུ་མི་ཡི་ལོངས་སྤྱོད་ཀུན༔ ཁབ་ལེན་རྡོ་དང་ལྕགས་འཕྲད་བཞིན༔ རང་དབང་མེད་པར་བདག་ལ་བསྟིམས༔ དཀོན་མཆོག་གསུམ་གྱི་བདེན་སྟོབས་ཀྱིས༔ ད་ལྟ་ཉིད་དུ་དངོས་གྲུབ་རྣམས༔ མ་ལུས་ཡོངས་སུ་རྫོགས་པར་མཛོད༔ བཻ་ཤྲ་མ་ཎ་སརྦ་བ་སུ་སིདྡྷི་བསྡུས་བསྡུས་ཝ་ཤཾ་ཀུ་རུ་ཡེ་སྭཱ་ཧཱ༔ དེ་ལྟར་རྒྱུན་དུ་བཅོལ་བ་ཡིས༔ ལོངས་སྤྱོད་ནོར་གྱི་དངོས་གྲུབ་འཐོབ༔ བཀྲ་ཤིས་དཔལ་གྱིས་རབ་ཏུ་བརྒྱན༔ ཐེ་ཚོམ་ཉིད་མེད་ས་མ་ཡཱ༔ སང་ཁོའི་ཞལ་ངོར་ག་གཱས་སོ། །དགེའོ། །དགེའོ། །དགེའོ། །མངྒ་ལཾ། །

གང་འདུལ་ཐབས་ཀྱི་གར་བསྒྱུར་རིན་ཆེན་རྒྱལ་པོ།

གང་འདུལ་ཐབས་ཀྱི་གར་བསྒྱུར་རིན་ཆེན་རྒྱལ་པོ་ལ་ན་མོ༔ རྒྱུན་དུ་གྱེར་བ་འདི་ལྟར༔ ཧཱུྃ༔ སྐད་ཅིག་ངང་ལས་སྒྱུ་མའི་ཆོ་འཕྲུལ་ངོམ་པ་བཞིན༔ མདུན་དུ་པདྨ་ཉི་ཟླའི་གདན་ལ་གསང་བའི་དབང་༔ ཚོམ་བུ་ལྔ་ལྡན་མཐིང་དཀར་དམར་སེར་ལྗང་གུའི་མདོག༔ མཉྫུའི་ཆ་ལུགས་མ་ངེས་རོལ་མོ་རེ་ཞིག་རྒྱུ༔ ལྷུན་གྱི་གྲུབ་པའི་ཞི་རྒྱས་དབང་གིས་ལྷ་ཡི་གར༔ དཀར་པོ་ཕྱག་ན་དབང་རྒྱལ་ནེའུ་ལེ་ཡི་སྐྱུགས༔ སེར་པོ་རིན་ཆེན་བསམ་འཕེལ་ནེའུ་ལེ་ཡི་ཚུལ༔ དམར་པོ་ཕྱག་ན་ལྕགས་ཀྱུ་ནེའུ་ལེ་དང་བཅས༔ ཨནྡྷ་ཕ་རོལ་དཔུང་བ་འཇོམས་པ་ནོར་བུ་སྐྱུགས༔ དབང་སྔོན་ཐབས་ཤེས་ཕྱག་གིས་རཏྣ་སྣ་བདུན་གྱི༔ རང་བཞིན་མཆོག་གི་ཆར་འབེབས་དགོས་འདོད་ཐམས་ཅད་འབྱུང་༔ ཟུང་ཟླའི་སྔ་མའི་ཚུལ་ཏེ་རཏྣའི་མཛོད་མར་འགྱིང་༔ ཀུན་གྱི་སྐུ་ཡི་གཡོན་དུ་ཀུ་རུ་ཀུལླེ་ནི༔ དཀར་སེར་དམར་ལྗང་མཐིང་ཀའི་གཙོ་ལ་ལག་བཅིང་ཚིམ༔ འཁོར་ཚོགས་བྱེ་བ་ཕྲག་བཅས་ཕྱག་རྒྱའི་རྣམ་པ་བཞི༔ རང་གཞན་གནས་ནས་ཡེ་ཤེས་ལྷ་ཚོགས་བསྐུལ་བྱེད་པའི༔ ལྕགས་ཀྱུའི་འོད་ཀྱི་སྤྱན་དྲངས་གཙོ་བོ་རིགས་ལྔ་པོ༔ ཆོས་ཅན་གནས་རིགས་ཁམས་ཀྱི་ཡེ་ཡོད་བསོད་ནམས་གཟུགས༔ དུ་མ་རོ་གཅིག་རྡོ་རྗེ་སྣང་སྟོང་དབྱེར་མེད་གྱུར༔ ཛཿ བཞེངས་ཤིག་བཞེངས་ཤིག་མི་མངོན་དབྱིངས་ཀྱི་དམ་པ་ནས༔ ཡེ་ཤེས་འགགས་མེད་ལོངས་སྤྱོད་རྒྱན་གྱི་འཕྲུལ་བཞད་དུ༔ རིག་སྟོང་དབྱེར་བྱེད་སྤངས་བྲལ་འབྲས་བུ་ཀ་དག་པ༔ གཞི་རྫོགས་ལྷུན་གྲུབ་ཡེ་ཡོད་མངོན་དུ་གྱུར་བ་ཙམ༔ ཨརྱ་ཛམྦྷ་ལ་ཀ་ཡ་ཝཀྐ་ཙིཏྟ་གུ་ཎ་ཀརྨ་ཛ་ཛ་ཕེཾཿ བཞུགས་གསོལ་ནི༔ ཧོཿ དུ་མར་སྣང་ཡང་ཡེ་ཤེས་གཅིག་པུ་ཕྱལ་བ་ལ༔ སླད་ཀྱི་བཟང་ངན་དབང་བསྐུར་བྱར་མེད་མཉམ་པ་བཞི༔ སྒྱུ་མ་འཕྲུལ་གྱི་སྣང་བརྙན་དགོས་དོན་ལོག་གོལ་དོན༔ ཤུགས་ཀྱིས་སེལ་བ་གསང་སྔགས་ཚུལ་ཆེན་བླ་མ་ཆེ༔ ཏིཥྛ་ལྷནཿ ཕྱག་འཚལ༔ ན་མོཿ དགའ་མས་འཁྱུད་པའི་བསམ་གཏན་བཞི་ཡི་ངོ་བོ་ལ༔ རྣམ་ཀུན་མཆོག་ལྡན་སྟོང་ཆེན་སྟོབས་འདྲེན་དོན་གྱི་ལྷ༔ སྤངས་པའི་འབྲས་བུ་རིག་པའི་དུ་མ་རོ་གཅིག་ཕྱག༔ ལས་ཀྱི་སེམས་དཔའ་དོན་ཆེད་སྦྱངས་སུ་ཤར་བས་འདུན༔ མཆོད་དངོས༔ ཨེ་མཿ རྟོག་པའི་མཆོད་པ་གར་ཡང་བསྒྱུར་བའི་བླ་མེད་པོ༔ དོན་གྱི་ལྷ་ཡི་ཐུགས་དམ་གསོས་སུ་རང་བཞིན་ཆས༔ རླབས་གསུམ་རྩེ་ལས་མིག་ཡངས་འབུམ་གྱི་རིམ་གྲོར་བཅས༔ ཕྱི་ནང་གསང་བ་ཁྱད་པར་རྨད་བྱུང་ཕང་ཕུང་བརྒྱན༔ བཛྲ་ཨརྒྷཾ་ ༴ སོགས། པཱུ་ཛ་ཧོཿ དེ་ནས་བསྟོད་པ་ནི༔ ཟབ་གསང་ཁུང་ནས་འབྱུང་བ་སྐྱེ་མེད་ཚིག་བརྗོད་སྤངས༔ གསལ་བ་ཁྱབ་བརྡལ་མཐའ་ཡི་མ་རེག་ཐིག་ལེ་དཀར༔ དེ་ལྡོག་ལྷུན་བརྗིད་ཀྱིས་ཁུར་རིན་ཐང་མཚུངས་མེད་པ༔ ཞི་བར་མི་གཟིམ་སླད་ཆར་མུར་ཡང་ཡར་ངོ་ལྡན༔ བཛྲ་ཛམ་ལྷ་སྟྭོ་ཏྲཿ བཟླས་དམིགས༔ བདག་གི་མདུན་དུ་ཛམ་ལྷ་རིགས་ལྔའི་ཐུགས་ཀར་ས་བོན་ཧཱུྃ་ངམ་ཏྲྃ་ལ་སྔགས་ཀྱི་གཡས་སུ་འཁོར་བར་བསམ་ལ༔ འོད་ཟེར་སྤྲོ་བསྡུས་དོན་གཉིས་ལྷུན་གྱིས་གྲུབ་པར་བྱས་ནས༔ ཁྱད་པར་ཕྱོགས་བཅུའི་རྒྱལ་བའི་སྐུ་གསུང་ཐུགས་ཀྱི་མངའ་ཐང་ཡོན་ཏན༔ ཁམས་གསུམ་བརྟན་གཡོས་དྭངས་བཅུད་ཐམས་ཅད་བསྡུས་ནས་བདག་གི་གནས་ཁང་དང་བང་མཛོད་ཐམས་ཅད་མེར་མེར་གང་བར་བསམ་ལ༔ བཟླས་སྔགས༔ ཨོཾ་ཛམྦྷ་ལ་ཛ་ལེནྜ་ཡེ་སྭཱ་ཧཱཿ པཉྩ་ཛམྦྷ་བ་སུ་དྷ་རི་དེ་ཝ་ནཱ་ག་མ་ནུཥྚ་ཡེ་ཝ་ཤཾ་ཀུ་རུ་ཧོཿ དམིགས་པས་ཁ་བསྒྱུར་བསྙེན་བསྒྲུབ་སོགས༔ དམིགས་པས་མདེ་ཁ་བསྒྱུར་རམ་ནི༔ ཡང་ན་ཅིག་ཆར་རྫོགས་པས་འཐེར༔ ཁྱད་པར་གནད་ཡིག་བཟའ་བ་ལ༔ རྫས་ཀྱི་རིམ་པ་སྔགས་ཀྱི་ཁྱད་པར་བྱེད༔ ཨརྱ་ཛམྦྷ་ལ་ཡི་ཤིང་༔ དེ་ནི་སུ་ཝརྞ་ཡི་དངོས༔ ཡང་ན་གསེར་གྱི་རིགས་ཀུན་ནོ༔ བསམ་འཕེལ་ཚབ་མར་བདུད་རྩི་ཆེ༔ གླ་བ་དམར་པོའི་རྩི་ཡི་བརྟགས༔ དཔྲལ་བར་དེ་ཡིས་ཧཾ་བྲིས་པས༔ ཀུན་གྱི་ཡིད་འོང་ཟས་ནོར་རྙེད༔ ལག་མཐིལ་གཡས་སུ་བྲིས༔ ཕོ་རྒྱུད་སྡུད་དམ་ བརྡ་ཡིག །ཟབ༔ དེ་ཡིས་མོ་རྒྱུད་ཐམས་ཅད་སྡུད༔ ལྷ་ལ་གྱྱ་གཉན་ལ་ བརྡ་ཡིག །བཟའོ༔ བྱ་གག་ལྟོ་ཚིལ་སོགས་ཀྱིས་ནི༔ སྔགས་བྲིས་རྐེ་ལ་བཏགས་ཀྱང་རུང་༔ ཐུན་མོང་དངོས་གྲུབ་ཐམས་ཅད་འགྲུབ༔ བླ་མ་མཆོག་གི་བཀའ་བཞིན་དུ༔ ག་གཱ་ཨ་བྷྱེ་དེ་ཡིས་བྲིས༔ མངྒ་ལཾ། །

ཡང་ཟབ་རྟ་ཕྱག་ཁྱུང་གསུམ་གྱི་དྲིལ་སྒྲུབ་འབྲེལ་ཚད་རྣམ་གྲོལ།

ཟབ་གསང་མཁའ་འགྲོའི་སྙིང་ཐིག་ལས༔ ཡང་ཁྲོས་མ་ཧཱ་ཀ་ལའི་ཆ་ལག༔ ཡང་ཟབ་རྟ་ཕྱག་ཁྱུང་གསུམ་གྱི་དྲིལ་སྒྲུབ་འབྲེལ་ཚད་རྣམ་གྲོལ་བཞུགས་སོ༔

ན་མོ་གུ་རུ་པདྨ་ཀ་ར་ཡེ༔ བརྡ་ཡིག །ལྔ་བརྒྱ་དུས་ཀྱི་སྙིགས་མ་ལ༔ ཀླུ་གཉན་ས་བདག་སྡེ་བརྒྱད་ཀྱིས༔ སྒོལ་ཞིང་གནོད་པའི་སྦྱོར་བ་ལ༔ རྣམ་པར་གྲོལ་ཞིང་རྒྱལ་བ་དང་༔ སྒོ་གསུམ་རྡོ་རྗེའི་རོལ་བ་རུ༔ འཕོས་ཤིང་སྨིན་ཏེ་གྲོལ་བའི་ཕྱིར༔ ཡང་ཟབ་རྟ་ཕྱག་ཁྱུང་གསུམ་གྱིས༔ སྒྲུབ་པ་འདི་ལ་བརྩོན་པར་གྱིས༔ ས་མ་ཡཱ༔ བསྐྱེད་གསལ་དམིགས་པའི་གནད་ལྡན་གྱིས༔ དང་པོ་སྐྱབས་འགྲོ་སེམས་བསྐྱེད་ལ༔ ན་མོཿ དཀོན་མཆོག་རིན་ཆེན་རྣམ་གསུམ་དང་༔ དྲག་པོའི་སྐུ་གསུང་ཐུགས་མཆོག་ལ༔ བྱང་ཆུབ་བར་དུ་སྐྱབས་སུ་མཆི༔ འགྲོ་བའི་དོན་ལ་བརྩོན་པར་བྱ༔ དེ་ནས་བགེགས་བསྐྲད་བསྲུང་འཁོར་ལ༔ ཧཱུྃཿ མ་རིག་གཟུང་འཛིན་རུ་ཏྲ་ཀུན༔ བདག་མེད་ཆེན་པོར་དེངས་ཤིག་ཕཊཿ འཁོར་འདས་དག་མཉམ་ཆེན་པོ་ལ༔ བགེགས་དང་ལོག་འདྲེན་མིང་ཡང་མེད༔ ཨུ་ཙ་ཏ་ཡ་ཕཊ༔ ཛྙཱ་ན་ཙཀྲ་རཀྵ་ཧཱུྃ༔ དེ་ནས་བྱིན་དབབ་མཆོད་རྫས་སྤེལ༔ ཧཱུྃ༔ ཡེ་ཤེས་རོལ་པའི་དཀྱིལ་འཁོར་འདིར༔ རྡོ་རྗེ་གསུམ་གྱི་བྱིན་ཆེན་ཕོབ༔ ཡུལ་དྲུག་འདོད་ཡོན་མི་ཟད་གཏེར༔ མཆོད་སྤྲིན་ནམ་མཁའ་མཛོད་དུ་སྤེལ༔ གུ་རུ་དྷེ་ཝ་ཊཱཀྐི་ནི་བཛྲ་ཨ་ཝེ་ཤ་ཡ་ཨཱ༔མ་ཧཱ་སརྦ་པཉྩ་གྷ་ན་ཙཀྲ་ཧོ༔ དེ་ནས་བརྟེན་དང་བརྟེན་པའི་དཀྱིལ་འཁོར་ནི༔ ཨཱ༔ རྣམ་ཐར་གསུམ་ལྡན་བཙུན་མོའི་མཁའ༔ ཁྱབ་གདལ་སྙིང་རྗེ་ཆེན་པོ་བརྡལ༔ ཐབས་ཤེས་སྙིང་པོ་ཧྲཱིཿཡིག་ལས༔ འོད་འཕྲོས་ཡེ་ཤེས་ལྔ་ལྡན་ཀློང་༔ གཟའ་ཀླུ་སྡེ་བརྒྱད་བསྣོལ་བའི་ཁྲིར༔ པདྨ་ཉི་མའི་གདན་སྟེང་དུ༔ ཧྲིཿལས་སྐད་ཅིག་དྲན་རྫོགས་སུ༔ རང་ཉིད་དབང་ཆེན་རྟ་མགྲིན་ནི༔ དམར་ནག་ཞལ་གཅིག་ཕྱག་གཉིས་པ༔ ཕྱག་གཡས་རལ་གྲི་གཡོན་སྦྲུལ་ཞགས༔ ཁྲོ་གཏུམ་རྔམ་བརྗིད་ལྟར་མི་བཟོད༔ ཞལ་གདེངས་ལྗགས་འགྲིལ་སྤྱན་གསུམ་བསྒྲད༔ ཁམ་ནག་རལ་བའི་སྐྲ་གསེབ་དུ༔ རྟ་མགོ་ལྗང་ཞུར་རྟ་སྐད་འཚེར༔ ཞབས་གཉིས་གྱད་ཀྱི་དོར་སྟབས་བསྒྲད༔ དུར་ཁྲོད་ཆས་རྫོགས་མེ་དཔུང་འབར༔ ཐུགས་ཀར་པདྨ་ཉི་གདན་ལ༔ གསང་བདག་རྡོ་རྗེ་གཏུམ་པོ་མཐིང་༔ ཕྱག་གཡས་རྡོ་རྗེ་གཡོན་སྦྲུལ་ཞགས༔ ཞལ་གདེངས་ལྗགས་འགྲིལ་སྤྱན་གསུམ་པ༔ ཞབས་གཉིས་གྱད་ཀྱི་འདོར་སྟབས་བསྒྲད༔ ཁམ་ནག་རལ་བ་གྱེན་དུ་བརྫེས༔ དུར་ཁྲོད་ཆས་རྫོགས་མེ་དཔུང་འབར༔ དབང་དྲག་འབར་བའི་སྤྱི་བོར་དུ༔ ཁྲོ་ཆུ་ཞུན་མ་ལས་གྲུབ་པའི༔ ཡེ་ཤེས་བྱ་ཁྱུང་ཀླུ་གདོན་ཟ༔ སྤྱན་གསུམ་ཉི་མའི་འོད་ལྟར་འབར༔ གཤོག་པས་ཉི་ཟླ་ཚོགས་པོར་འཕེན༔ ཁྱུང་སྐད་འདོན་པས་ས་གསུམ་གཡོ༔ ཁྱུང་གི་ཚ་ཚ་སྐར་ལྟར་འཁྲིགས༔ དེ་ལྟར་དྲག་པོའི་ལྷ་གསུམ་གྱིས༔ གནས་གསུམ་རྡོ་རྗེ་སྙིང་པོ་ལས༔ འོད་དང་འོད་ཟེར་རབ་འཕྲོས་པས༔ སྐུ་གསུམ་དག་པའི་ཞིང་ཁམས་ནས༔ རྟེན་དང་རྟེན་པའི་དཀྱིལ་འཁོར་ནས༔ སྤྱན་དྲངས་གཉིས་སུ་མེད་པར་འགྱུར༔ དེ་ནས་སྤྱན་འདྲེན་པ་ནི༔ ཧཱུྃཿ དབང་དྲག་རོལ་པའི་དཀྱིལ་འཁོར་ནས༔ པདྨ་དབང་ཆེན་གཤེགས་སུ་གསོལ༔ ཡེ་ཤེས་ཐུགས་ཀྱི་དཀྱིལ་འཁོར་ནས༔ རྡོ་རྗེ་གཏུམ་པོ་གཤེགས་སུ་གསོལ༔ ཕྲིན་ལས་མངོན་སྤྱོད་དཀྱིལ་འཁོར་ནས༔ ཡེ་ཤེས་ཁྱུང་ཆེན་གཤེགས་སུ་གསོལ༔ ཧྲཱི་ཧཱུྃ་ཁྲོཾ་བྷྱོ༔ བཛྲ་ས་མ་ཡཱ་ཛ་ཛ༔ དེ་ནས་བཞུགས་གསོལ་ཕྱག་འཚལ་མཆོད་འབུལ་ལ༔ ཧོཿ ཡེ་ཤེས་རྡོ་རྗེའི་དཀྱིལ་འཁོར་ལ༔ གདན་གསུམ་ཚང་པའི་ངོ་བོར་བཞུགས༔ སྒོ་གསུམ་གུས་པས་ཕྱག་འཚལ་ལོ༔ འདོད་དགུའི་དཔལ་གྱི་མཆོད་པ་འབུལ༔ བཛྲ་ས་མ་ཡ་ཏིཥྛ་ལྷན༔ ན་མོ་པུ་རུ་ཤ་ཡ་ཧོ༔ མ་ཧཱ་ཨརྒྷཾ ༴ སོགས། ཤབྟ་རཱ་པ་ཤབྟ ༴ སོགས། མ་ཧཱ་པཉྩ་ཨ་མྲ་ཏ་མ་ཧཱ་རཀྟ་བྷ་ལིང་ཏ་སརྦ་པུཙྪ་ཧོ༔ དེ་ནས་བསྟོད་པ་བྱ་བ་ལ༔ ཧཱུྃ་ཧྲཱིཿ ཁམས་གསུམ་དབང་བསྡུད་དབང་དྲག་རྒྱལ་པོའི་སྐུ༔ འཁོར་བཅས་འུབ་ཆུབ་རྡོ་རྗེ་གཏུམ་པོའི་ཐུགས༔ གདུག་པ་འདུལ་མཛད་བྱ་ཁྱུང་འབར་བའི་གར༔ རང་བྱུང་ལྷུན་གྲུབ་ལྷན་སྐྱེས་ལྷ་ལ་བསྟོད༔ དེ་ནས་འཛབ་དམིགས་ནི༔ ཧཱུྃ༔ རྡོ་རྗེ་གཏུམ་པོའི་ཐུགས་ཀ་རུ༔ ཉི་ཟླའི་གའུ་ཁ་སྦྱོར་སྦུབ༔ གསང་བའི་སྙིང་པོ་ཧྲཱིཿདམར་ལ༔ ལྷ་གསུམ་སྙིང་པོ་གཅིག་དྲིལ་བའི༔ སྔགས་ཀྱི་ཕྲེང་བས་བསྐོར་བ་ལས༔ འོད་འཕྲོས་བསྒོམ་པ་དང་འདྲ་བའི༔ ཡེ་ཤེས་དཔག་མེད་སྤྱན་དྲངས་བསྟིམ༔ ཨོཾ་བཛྲ་ཀྲོ་དྷ་ཧྱ་གྷྲི་ཝ་བཛྲ་པ་ཎི་ཁྲོཾ་ག་རུ་ཊ་ཡཀྴ་རཀྴ་ཧཱུྃ་ཕཊ༔ བསྒྲུབ་སྔགས་དམིགས་པའི་མདེ་ཁ་བསྒྱུར༔ ལས་སྦྱོར་ལ༔ ཧཱུྃ༔ རང་ཉིད་ལྷ་གསུམ་ཐུགས་ཀ་ནས༔ ཧྲཱི་ཧཱུྃ་ཁྲོཾཿཡིག་གསལ་བ་ལས༔ མེ་དཔུང་སྤྲུལ་པ་དཔག་མེད་འཕྲོས༔ གནོད་བྱེད་ནད་འདྲེ་གདོན་བགེགས་རྣམས༔ བསྲེགས་གཏུབ་ཧབ་ཧབ་ཟོས་པ་ཡི༔ རྗེས་ཤུལ་ཙམ་ཡང་མེད་པར་བསྒོམ༔ ཧྲཱི༔ པདྨ་ཏ་ཀྲཱི་ཏ་ཧྱ་གྷྲི་ཝ་བཛྲ་པ་ཎི་ཁྲོཾཿག་རུ་ཊ་ཡཀྴ་རཀྴ་ཧཱུྃ་ཕཊ༔ ཅེས་སླར་ཡང་དམིགས་སྔགས་འདིས་གཤམ་དུ༔ ག་རུ་ཊ་སརྦ་ཤ་ཏྲུན་མ་ར་ཡ་ཕཊ༔ ཅེས་གྲངས་ལྡན་བསྐྱལ་ཏེ་བཟླ༔ དེ་ལྟར་བསྒོམ་བཟླས་གནད་ལྡན་ནས༔ ཕྱི་ནང་བར་ཆད་ཀུན་ལས་གྲོལ༔ ཨཿཡཿམཿདུཿརུཿཙཿཤཿནཿམཿརཿཡཿཕཊཿ ན་ག་ཙིཏྟ་རྦད་ནན་ཕཊཿ ཁྱད་པར་ཀླུ་གཉན་གདོན་ལས་གྲོལ༔ ས་མ་ཡཱ༔ ༈ དེ་ནས་དབང་གི་ཆོ་ག་ལ༔ བུམ་པ་སྐུ་གཟུགས་བུམ་པའི་དབང་༔ བྷནྡྷ་བདུད་རྩི་གསང་བའི་དབང་༔ རྨ་བྱ་ལུག་རྒྱུད་ཤེར་དབང་སྟེ༔ ཁྱད་པར་འཇའ་ཤེལ་འོད་ལྡན་བཞི་པའི་དབང་༔ གཏོར་མ་སྒྲུབ་དང་དཀྱིལ་འཁོར་དབང་༔ ཚང་པར་བཀོད་དེ་སྒྲུབ་ནས་མཐར༔ སློབ་མ་གྲྭལ་འཁོད་ཁྲུས་བྱ་ཞིང་༔ བགེགས་བསྐྲད་བསྲུང་བའི་འཁོར་ལོ་བསྒོམ༔ སྐྱབས་སུ་འགྲོ་ཞིང་སེམས་བསྐྱེད་དེ༔ དང་པོ་གསོལ་བ་གདབ་པ་ལ༔ ཀྱཻ༔ དུས་གསུམ་རྒྱལ་བའི་སྤྱི་གཟུགས་མཆོག༔ བླ་མ་རྡོ་རྗེ་འཛིན་ཁྱོད་ཀྱིས༔ བདག་གི་སྒོ་གསུམ་སྨིན་གྲོལ་ཕྱིར༔ རྡོ་རྗེ་གསུམ་གྱི་དབང་བསྐུར་སྩོལ༔ ལན་གསུམ་མཐར་སློབ་དཔོན་གྱིས༔ ཀྱཻཿ སྐལ་ལྡན་རིགས་ཀྱི་བུ་ཁྱོད་ཉོན༔ མི་ལུས་ཐོབ་པ་དོན་ལྡན་ཕྱིར༔ སྒོ་གསུམ་རྡོ་རྗེའི་གྲོང་འཇུག་ནས༔ ཟབ་མོའི་དབང་མཆོག་བསྐུར་བགྱིའོ༔ ཨོཾ་མ་ཧ་ཤུ་ནྱ ༴ སོགས། གཟུང་འཛིན་གཉིས་ཀྱི་ཆོས་ཐམས་ཅད་སྟོང་པ་ཉིད་དུ་གྱུར༔ སྟོང་པའི་ངང་ལས ༴ སློབ་མ་ལྷར་བསྐྱེད་ཡེ་ཤེས་པ་དབབ་བསྟིམ་བྱས་ཏེ༔ ཏིཥྛ་བཛྲཿ གྱིས་བརྟན་པར་བྱ༔ དེ་ནས་བུམ་པ་ཐོགས་ལ༔ ཧཱུྃ༔ ཆོས་དབྱིངས་རྣམ་དག་བུམ་པ་རུ༔ ལྷུན་གྲུབ་དྲག་པོའི་ལྷ་གསུམ་གྱིས༔ རྟེན་དང་བརྟེན་པའི་འཁོར་ལོ་རྫོགས༔ སྐལ་ལྡན་བུ་ལ་དབང་བསྐུར་རོ༔ བུམ་པ་སྐུ་ཡི་དབང་ཐོབ་ཤོག༔ རྩ་སྔགས་མཐར༔ ཀ་ཡ་ཨ་བྷི་ཥིཉྩ་ཨོཾ༔ དེ་ནས་དབང་ཆེན་གྱི་སྐུ་ཐོགས་ལ༔ ཧཱུྃཿ ཁམས་གསུམ་རོལ་བ་དབང་གི་སྐུ༔ རྟ་མཆོག་འབར་བའི་དབང་བསྐུར་རོ༔ ལུས་ཀྱི་སྒྲིབ་པ་ཀུན་དག་ནས༔ རྡོ་རྗེའི་སྐུ་རུ་སྨིན་གྲོལ་ཤོག༔ རྩ་སྔགས་མཐར་ཀ་ཡ་ཨ་བྷི་ཥིཉྩ་ཨོཾཿ དེ་ནས་གཏུམ་པོའི་སྐུ་ཐོགས་ལ༔ ཧཱུྃཿ སྲིད་གསུམ་གདུག་པ་འདུལ་མཛད་པ༔ རྡོ་རྗེ་གཏུམ་པོའི་དབང་བསྐུར་རོ༔ གདོན་གསུམ་གཡུལ་ལས་རྒྱལ་བ་དང་༔ དྲེགས་པ་ཀུན་འདུལ་དབང་ཐོབ་ཤོག༔ རྩ་སྔགས་མཐར༔ ཀ་ཡ་ཨ་བྷི་ཥིཉྩ་ཨོཾཿ དེ་ནས་བྱ་ཁྱུང་རྒྱལ་པོའི་སྐུ་ཐོགས་ལ༔ ཧཱུྃཿ ཆོས་ཉིད་རྩལ་ལས་རང་ཤར་ལ༔ ཡེ་ཤེས་ཁྱུང་གི་དབང་བསྐུར་རོ༔ མངོན་སྤྱོད་ཕྲིན་ལས་ལྷན་གྲུབ་ཅིང་༔ ཀླུ་གཉན་ཀུན་འདུལ་དབང་ཐོབ་ཤོག༔ རྩ་སྔགས་མཐར༔ ཀ་ཡ་ཨ་བྷི་ཥིཉྩ་ཨོཾཿ དེ་ནས་གསང་དབང་བསྐུར་བ་ནི༔ ཧཱུྃ༔ སྟོང་ཉིད་དབྱིངས་ཀྱི་ཀ་པཱ་ལར༔ དྲག་པོའི་གསུང་གསང་བདུད་རྩི་འཁྱིལ༔ སྐལ་ལྡན་ཁྱོད་ཀྱི་ངག་དུ་བླུད༔ ངག་སྒྲིབ་དག་ནས་གསང་དབང་ཐོབ༔ རྡོ་རྗེའི་གསུང་དུ་སྨིན་གྲོལ་ཤོག༔ རྩ་སྔགས་མཐར༔ ཝ་ཀཱ་ཨཱ་྇བྷི་ཥིཉྩ་ཨཱཿ དེ་ནས་ཤེར་དབང་བསྐུར་བ་ནི༔ ཧཱུྃ༔ སྐུ་དང་ཡེ་ཤེས་རང་བྱུང་བ༔ མདངས་ལྡན་རྨ་བྱ་ལུག་རྒྱུད་ཀྱིས༔ རྣམ་པའི་འོད་ཐིག་འདི་གཏད་པས༔ཡིད་སྒྲིབ་དག་ནས་ཤེར་དབང་ཐོབ༔ ཆོས་ཀྱི་སྐུ་རུ་སྨིན་གྲོལ་ཤོག༔ རྩ་སྔགས་མཐར༔ ཙིཏྟ་ཨ་བྷི་ཥིཉྩ་ཧཱུྃ༔ དེ་ནས་ཚིག་དབང་བསྐུར་བ་ནི༔ ཧཱུྃཿ ལྷུན་གྲུབ་རང་གདེངས་འཇའ་ཤེལ་གྱིས༔ རྣམ་པར་ཤར་བའི་ཀློང་དཀྱིལ་དུ༔ འོད་ལྔ་དངས་མའི་ཐིག་ལེ་ལྔ༔ སྐལ་ལྡན་བུ་ལ་དབང་བསྐུར་རོ༔ ཉོན་ཤེས་སྒྲིབ་པ་ཀུན་དག་ནས༔ མཚན་མ་ཚིག་བྲལ་དབང་ཐོབ་སྟེ༔ ངོ་བོ་ཉིད་དུ་སྨིན་གྲོལ་ཤོག༔ རྩ་སྔགས་མཐར༔ སརྦ་ཨ་བྷི་ཥིཉྩ་ཨཱཿ དེ་ནས་གཏོར་མའི་དབང་ལ༔ ཧཱུྃ༔ ཆོས་ཉིད་བརྡལ་ཁྱབ་གཏོར་གཞོང་དུ༔ ལྷུན་གྲུབ་དབྱིངས་ཀྱི་གཏོར་མ་བཤམས༔ གང་འདུལ་ཐབས་ཀྱི་སྐུར་སྟོན་པ༔ དབང་ཆེན་ཧྱ་གྷྲི་ཝ་དང་༔ རྡོ་རྗེ་ཅན་དང་ག་རུ་ཊའི༔ རྟེན་དང་བརྟེན་པ་ཡོངས་སུ་རྫོགས༔ སྐལ་ལྡན་བུ་ལ་གཏད་པ་ཡི༔ དབང་བསྒྱུར་དབང་མཆོག་ཐོབ་པར་ཤོག༔ རྩ་སྔགས་མཐར༔ མཎྜ་ལ་གུ་ཧྱ་བྷ་ལིང་ཏ་ཨ་བྷི་ཥིཉྩ་ཨོཾ་ཨཱཿཧཱུྃ་སྭཱ་ཧཱ༔ དེ་ལྟར་དབང་བསྐུར་ཐོབ་ནས་སླར༔ མཐའ་རྟེན་གཏད་ཅིང་ཤིས་པ་བརྗོད་པ༔ བཀྲ་ཤིས་རྟག་བརྒྱད་གཏད་ལ༔ ཧཱུྃ༔ བཀྲ་ཤིས་རྟགས་བརྒྱད་འདི་གཏད་པས༔ མཚན་དང་དཔེ་བྱད་རྫོགས་པ་ཡི༔ སྤྲུལ་པའི་སྐུ་མཆོག་རབ་ཐོབ་ནས༔ གདུལ་བྱ་འདུལ་བའི་དབང་ཐོབ་ཤོག༔ སརྦ་མངྒ་ལཾ་ཨ་བྷ་ཥིཉྩ་ཧཱུྃ༔ དེ་ནས་རྒྱལ་སྲིད་སྣ་བདུན་གཏད་ལ༔ ཧཱུྃ༔ ཁམས་གསུམ་ཆོས་ཀྱི་རྒྱལ་པོའི་སྲིད༔ སྐལ་ལྡན་སྐྱེས་བུ་ཁྱོད་ལ་གཏད༔ དོན་གཉིས་ལྷུན་གྲུབ་རོལ་བ་ཡིས༔ འཁོར་བ་དོང་སྤྲུགས་དབང་ཐོབ་ཤོག༔ མ་ཎི་རཏྣ་ཨ་བྷི་ཥིཉྩ་ཧཱུྃ༔ ས་མ་ཡཱ༔ གནད་ལྡན་ཕྱི་ནང་གསང་བ་ཡི༔ བར་ཆད་གེགས་རྐྱེན་ལས་གྲོལ་ཏེ༔ འདི་ཕྱིའི་དགེ་ལེགས་ངང་གི་འབྱུང་༔ བསྐྱེད་དང་དམིགས་པའི་གནད་ལྡན་ན༔ བར་མེད་ཟླ་གསུམ་གྱིས་འགྲུབ་འགྱུར༔ བཀའ་བསྲུང་དབང་ཕྱུག་ཆེན་པོའི་བསྲུང་༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གསང་རྒྱ༔ གུ་ཧྱ༔ ཅེས་པ་འདི་ཡང་ཁྲག་འཐུང་བདུད་འཇོམས་རྡོ་རྗེའི་གཏེར་ནས་བཏོན་དེ་མི་ལོ་སུམ་ཅུ་རྩ་བདུན་བར་དུ་བཀའ་རྒྱས་བཏབ་པས་མཐར་གཏན་ལ་ཕབ་པའི་ཡི་གེ་པ་ནི་ཡེ་ཤེས་ཀློང་ཆེན་རྡོ་རྗེས་སོ། །དགེའོ། །ལེགས་སོ། །

དོན་གཉིས་ལྷན་གྲུབ་རྒྱལ་པོ།

ཟབ་གསང་མཁའ་འགྲོའི་སྙིང་ཐིག་གི །རྟ་ཕྱག་ཁྱུང་གསུམ་དྲིལ་སྒྲུབ་ཀྱི། །ཁ་བསྐང་ཚོགས་ཀྱི་རིམ་པ་ནི། །དོན་གཉིས་ལྷན་གྲུབ་རྒྱལ་པོ་བཞུགས་སོ། །

ཞིང་ལྤགས་དག་གི་སྟེང་ཉིད་དུ། །རཀྟ་དམར་ཀྱི་ཆག་ཆག་གདབ། །དེ་དབུས་ཚོགས་སྣོད་བྷནྡྷའི་ནང་། །ཚོགས་རྫས་ཤ་ཁྲག་གཙོར་ལྡན་བཤམས། །རཀྟ་དམར་གྱི་བྲན་བྱས་ལ། །རྣལ་འབྱོར་ཕྱག་རྒྱ་ལྔ་ལ་སོགས། །མ་རྒྱུད་མཐུན་པའི་ཆས་སུ་ཞུགས། །དོན་སྟོངས་སེམས་དང་ལྡན་པའི་ངང་། །དང་པོ་བྱིན་གྱིས་བརླབས་པ་ནི། །ཨོཾཿ སྣང་སྲིད་བྷནྡྷ་འབར་བའི་ནང་། །དཔལ་ཡོན་དངས་བཅུད་བཤམས་པའི་དངོས། །ངོ་བོ་ཡེ་ཤེས་བདུད་རྩི་ལ། །རྣམ་པ་འདོད་ཡོན་ལྷ་མོར་གྱུར། །སྤྲོས་པའི་ནམ་མཁའི་ཁམས་གང་པས། །ཀུན་བཟང་མཆོད་པའི་མཆོག་ཏུ་རོལ། །རཾ་ཡཾ་ཁཾཿ ཨོཾ་ཨཱཿཧཱུྃཿཧ་ཧོ་ཧྲཱིཿ གཉིས་པ་ཚོགས་མགྲོན་སྤྱན་འདྲེན་པ། ཧཱུྃཿ སངས་རྒྱས་སྐུ་གསང་ཡེ་ཤེས་ཁྱུང་ལ་འདུས། །གསུང་གི་གསང་དབང་བཅོམ་ལྡན་རྟ་མཆོག་རོལ། །ཐུགས་ཀྱི་རྡོ་རྗེ་གསང་བདག་ཧེ་རུ་ཀ །སྒྱུ་འཕྲུལ་རང་རྩལ་འཁོར་དང་བཅས་པ་ཀུན། །ཡེ་ཤེས་ཚོགས་ལ་སྤྱན་འདྲེན་གཤེགས་སུ་གསོལ། །རྩ་སྔགས་མཐར། གཱ་ན་ཙཀྲ་བཛྲ་ས་མ་ཡ་ཛ་ཛ༔ དེ་ནས་ཚོགས་མཆོད་འབུལ་བ་ནི། ཧཱུྃཿ ཕྱི་ནང་གསང་བ་བླ་མེད་ཚོགས་མཆོད་འདི། །གསང་གསུམ་ཡོངས་འདུས་ལྷ་ལ་མཆོད་པ་འབུལ། །རྣལ་འབྱོར་ཉམས་ཆགས་རྟོག་སྒྲིབ་ཡོངས་དག་ནས། །བར་ཆད་ཀུན་སེལ་མཆོག་ཐུན་དངོས་གྲུབ་སྩོལ། རྩ་སྔགས་མཐར། མ་ཧཱ་ག་ན་ཙཀྲ་ཁ་རཾ་ཁཱ་ཧི། དེ་ནས་བཤགས་པ་བྱ་བ་ནི། ཨཱཿ ཐོག་མེད་དུས་ནས་ད་ལྟའི་བར། །མ་རིག་དབང་གྱུར་བསགས་སྡིག་དང་། །དམ་ཚིག་ཉམས་ཆགས་ཉེས་ལྟུང་ཀུན། །བཤགས་སོ་བྱང་ཞིང་དག་གྱུར་ཅིག །བཛྲ་ས་མ་ཡ་ཤུདྡྷེ་ཨཱཿ དེ་ནས་ཐུགས་ཀྱི་བསྐང་བ་ནི། ཨོཾཿ གཏི་མུག་ཀླུ་གདོན་འདུལ་བའི་ལྷ། །ཡེ་ཤེས་ཁྱུང་ཆེན་ཐུགས་དམ་བསྐངས། །ཞེ་སྡང་གཟའ་གདོན་འདུལ་བའི་ལྷ། །གསང་བའི་བདག་པོའི་ཐུགས་དམ་བསྐངས། །འདོད་ཆགས་མོ་གདོན་འདུལ་བའི་ལྷ། །པདྨ་དབང་ཆེན་ཐུགས་དམ་བསྐངས། །ཉོན་མོངས་བརྒྱད་ཁྲི་བཞི་སྟོང་གི །བསྐྱེད་པའི་ཁམས་གསུམ་རུ་ཏྲའི་དཔུང་། །བགེགས་རིགས་སྟོང་ཕྲག་བརྒྱད་ཅུ་སོགས། །འདུལ་དཀའ་འདུལ་མཛད་འཁོར་དང་བཅས། །ཐུགས་དམ་གཉན་པོ་བསྐང་བའི་ཕྱིར། །ཉེར་སྤྱོད་བདུན་དང་འདོད་ཡོན་ལྔ། །སྨན་རཀ་གཏོར་མ་བདེ་ཆེན་ཡུམ། །ཡེ་ཤེས་ཆེན་པོའི་མཆོད་པ་འབུལ། །ཉམས་ཆགས་བྱང་ཞིང་རྟོག་སྒྲིབ་དག །དབང་དང་དངོས་གྲུབ་སྩལ་དུ་གསོལ། །ཞེས་བརྗོད་དེ་ནས་བསྒྲལ་མཆོད་ནི། ཧཱུྃཿ གདོན་གསུམ་ཉོན་མོངས་རུ་ཏྲ་ཀུན། །བདག་མེད་རྡོ་རྗེའི་མཚོན་གྱི་གདབས། །སྐུ་གསུམ་ལྷུན་གྲུབ་ངང་དུ་བསད། །འཁྲུལ་མི་ཤེས་པའི་དབྱིངས་སུ་སྤོར། །སརྦ་ར་ཊ་མ་རཱ་ཕཊ་ཕཊ་ཕཊ། དེ་ནས་གཟུགས་ཕུང་བསྟབས་པ་ནི། ཧཱུྃཿ ཆོས་ཅན་ཁམས་གསུམ་འཁོར་བའི་འདྲེ། །ཆོས་ཉིད་དེ་བཞིན་ཉིད་ཀྱི་ངང་། །མ་བྱུང་མ་སྐྱེས་འཁོར་གསུམ་གྱི། །བདེན་འཛིན་རང་སར་གྲོལ་བར་བསྟབས། །རྩ་སྔགས་མཐར། རཱུ་ཊ་ཀ་ལ་མཱཾ་ས་རཀྟ་ཙིཏྟ་ཁ་རཾ་ཁཱ་ཧིཿ ཚོགས་ལ་རོལ་ཞིང་རོ་སྙོམ་བསྐྱངས། སླར་ཡང་ལྷག་གཏོར་བྱིན་གྱིས་བརླབས། ཕེམ། སྔོན་ཚེ་དཔལ་ཆེན་སྤྱན་སྔ་རུ། ཁས་བླང་དམ་བཅས་ལྷག་སྐྱོངས་ཚོགས། །འདིར་གཤེགས་ཤ་ཁྲག་གཏོར་མ་བཞེས། །བཅོལ་པའི་བཅོལ་བའི་ཕྲིན་ལས་མཛོད། །ཨུཥྩི་ཊ་བྷ་ལིང་ཏ་ཁཱ་ཧིཿ དེ་ནས་ཐུགས་དམ་བསྐུལ་བ་ནི། ཧྲཱིཿཧཱུྃ་ཁྲོཾ་ཛཿ དུས་གསུམ་རྒྱལ་བ་སྲས་བཅས་དང་། །གདོན་གསུམ་འདུལ་མཛད་ཡེ་ཤེས་ལྷ། །བཞེངས་ཤིག་ཆོས་ཀྱི་དབྱིངས་ནས་བཞེངས། །མཛོད་ཅིག་རབ་འབྱམས་ཕྲིན་ལས་མཛོད། །སྣོད་བཅུད་དུས་ཀྱི་རྒུད་པ་སོལ། །མི་མཐུན་མི་འདོད་ཉེར་འཚེ་བཟློག །བསྟན་དང་འགྲོ་བའི་བདེ་སྐྱིད་སྤེལ། །གྲུབ་འབྲས་མངོན་གྱུར་དངོས་གྲུབ་སྩོལ། །བཛྲ་ས་མ་ཡ་ཛཿ མ་ཧཱ་ཀ་རི་ནི་ཀ་དྲ་ཤ་ཧོཿསརྦ་དུཿཁ་ཚེ་ད་ཕཊ། སརྦ་སུ་ཁ་སིདྡྷི་ཧཱུྃ་ཧཱུྃཿ དེ་ནས་ཆད་མདོ་སྐྱངས་བ་ནི། ཧཱུྃཿ སྔོན་ཚེ་འོག་མིན་ཆེན་པོ་རུ། །དྲག་པོ་རོལ་བའི་ལྷ་གསུམ་གྱི། །རང་སྐལ་རཱུ་ཊའི་བདུད་བཅོམ་ཚེ། །འཁོར་གྱི་དྲེགས་པ་ཐམས་ཅད་ཀུན། །དབང་བསྐུར་རྡོ་རྗེའི་དམ་ཚིག་སྦྱིན། །དེ་རྗེས་སློབ་དཔོན་པདྨ་ཡི། །ལྷ་སྲིན་སྡེ་བརྒྱད་དབང་དུ་བསྡུས། །བཀའ་བསྒོ་དམ་ལ་བཞག་ནས་ཀྱང་། །ཕྲིན་ལས་རབ་འབྱམས་གཉེར་དུ་བཅོལ། །ཐ་མ་སྨོན་ལམ་དུས་བབས་ཚེ། །ཆེ་མཆོག་རྡོ་རྗེ་བདུད་འཇོམས་ཀྱི། །ཟབ་གཏེར་གཉན་པོ་བསྟན་པ་དང་། །བསྟན་འཛིན་སྐྱོངས་པར་ཞལ་བཞེས་བཞིན། །མཆོད་གཏོར་བརྒྱན་ལྡན་འདི་བཞེས་ལ། །རྐྱེན་སེལ་སྨོན་དོན་ཡོངས་གྲུབ་མཛོད། །དེ་ནས་བརྟན་མ་སྐྱོངས་བ་ནི། ཧཱུྃཿ སྡེ་དཔོན་དྲེགས་ཆེན་བསྟན་མ་སྐྱོངས། །འཁོར་དང་བཅས་པ་ཐམས་ཅད་ཀྱིས། །འདིར་གཤེགས་བཤལ་ཆུས་གཏོར་མ་ལོངས། །མུ་སྟེགས་རྒྱུ་བའི་ལམ་འཕྲང་གཅོད། །བསྟན་དང་བསྟན་འཛིན་བུ་བཞིན་སྐྱོངས། །མ་འདའ་བཛྲ་ས་མ་ཡཱ། མ་མ་ཧྲིང་ཧྲཱིང་ཨེ་དམ་བྷ་ལིང་ཏ་ཁཱ་ཧིཿ དེ་ནས་མནན་གཏད་བྲོ་བརྡུང་ནི། ཧཱུྃཿ དྲག་པོ་རོལ་པའི་དཀྱིལ་འཁོར་དུ། །དམ་སྲི་རྒབ་འདྲེ་ལོག་འདྲེན་རིགས། །མནན་ནོ་སྐུ་གསུང་ཐུགས་ཀྱི་རྒྱ། །བྱང་ཆུབ་བར་དུ་མ་ལྡངས་ཞིག །སྟྭཾ་བྷ་ཡ་ནན། མ་ར་ཡ་སརྦ་ཤ་ཏྲུན་ཀཱ་ཡ་ཝཱ་ཀ་ཙིཏྟ་ནན་ནན། དེ་ནས་དངོས་གྲུབ་བླང་བ་ནི། ཧཱུྃཿ དྲག་པོ་རོལ་པའི་དཀྱིལ་འཁོར་ལྷས། །གསང་བ་གསུམ་གྱི་དབང་དངོས་གྲུབ། །ཡེ་ཤེས་ཡོན་ཏན་སྟོབས་ནུས་བྱིན། །མ་ལུས་བདག་ལ་སྩལ་དུ་གསོལ། །རྩ་སྔགས་མཐར། ཀཱ་ཡ་ཝཱཀ་ཙིཏྟ་སིདྡྷི་ཕ་ལ་ཧོཿ དེ་ནས་ནོངས་པ་བཤགས་པ་ནི། དྲག་པོ་རོལ་བའི་སྤྱན་སྔ་རུ། །བདག་གི་སྒོ་གསུམ་དམ་ཉམས་པའི། །ཉམས་ཆགས་སྡིག་ལྟུང་རྟོག་སྒྲིབ་ཀུན། །བཤགས་སོ་བྱང་ཤིང་དག་གྱུར་ཅིག །ཡིག་བརྒྱ་དང་དབྱངས་གསལ་གྱི། ཁ་བསྐང་སླར་ཡང་བསྡུ་རིམ་ནི། ཧཱུྃཿ མཚན་བཅས་ལྷ་དང་གཞལ་ཡས་ཞིང་། །མཚན་མེད་ཉེ་བར་ཞི་བ་ཡི། །ཆོས་སྐུ་ཁྱབ་བརྡལ་ཆེན་པོའི་ཀློང་། །མ་བཅོས་ངང་ནས་དེ་ཁོ་ན། །ཨ་ལ་ལ་ཧོཿ སླར་ལྡང་བ་ནི། འགགས་མེད་ངེས་པ་ལྔ་ལྡན་གྱི། །སྐུ་གཉིས་ཟུང་འཇུག་དཀྱིལ་འཁོར་ནས། །མ་བཅོས་མ་བཙལ་ཡེ་ཡིན་གྱི། །རྫོགས་པའི་རིམ་པའི་ལྷ་སྐུ་སྟེ། །ཟུང་འཇུག་ཕྱག་རྒྱ་ཆེན་པོ་བརྡལ། །རྗེས་ལ་དགེ་བ་བསྔོ་སྨོན་ནི། ཧཱུྃཿ འདིས་མཚོན་དུས་གསུམ་བསགས་པའི་དགེ །བྱང་ཆུབ་ཆེན་པོའི་རྒྱུ་རུ་བསྔོ། །ཁམས་གསུམ་སེམས་ཐམས་ཅད་ཀུན། །དྲག་པོའི་གོ་འཕང་མཆོག་ཐོབ་ཤོག །དེ་ནས་ཤིས་པ་བརྗོད་པ་ནི། ཧཱུྃཿ རྡོ་རྗེ་ཐུགས་ཀྱི་བཀྲ་ཤིས་ཀྱི། །སེམས་རྟོག་དམིགས་པ་སངས་པ་དང་། །རྣམ་པར་མི་རྟོག་མཆོག་འགྲུབ་པའི། །གསང་བའི་བདག་པོའི་བཀྲ་ཤིས་ཤོག །ཨཱཿ རྡོ་རྗེ་གསུང་གི་བཀྲ་ཤིས་ཀྱི། །ངག་གི་མི་དགེ་དབྱངས་སངས་ནས། །ཚངས་དབྱངས་ཀུན་ལ་ཕན་པའི་བདེ་སྨོན་པའི། །རྟ་མཆོག་རོལ་པའི་བཀྲ་ཤིས་ཤོག །ཨོཾཿ རྡོ་རྗེ་སྐུ་ཡི་བཀྲ་ཤིས་ཀྱི། །ལུས་འཛིན་ཞེན་རྟོག་མི་དགེ་དབྱངས་སངས་ཤིང་། །སྐུ་གཉིས་རྨད་བྱུང་ཕྲིན་ལས་དོན་གཉིས་གྲུབ། །ཡེ་ཤེས་ཁྱུང་ཆེན་འབར་བའི་བཀྲ་ཤིས་ཤོག །ཅེས་མཐར་ཤིས་བརྗོད་ཀྱི་འཐད་པའི་མཐར་རྒྱན། རབ་གནས་མེ་ཏོག་འཐོར། འདི་ཕྱིས་དགེ་ལེགས་ཐམས་ཅད་ཀུན། ཡར་ངོས་ཟླ་བཞིན་འཕེལ་བ་དང་། །མི་མཐུན་ཕྱོགས་ལས་རྣམ་པར་རྒྱལ། །ཅེས་པ་འདི་ཡང་ཙནྜ་ཀིརྟིའི་གསུང་བསྐུལ་བཞིན། །ག་གཱས་སོ། །དགེའོ། །

སྒྲུབ་ཆེན་གྱི་ཞལ་བཀོད་གདམས་པ་ནོར་བུའི་ཕྲེང་བ།

སྒྲུབ་ཆེན་གྱི་ཞལ་བཀོད་གདམས་པ་ནོར་བུའི་ཕྲེང་བ་ཞེས་བྱ་བ་བཞུགས་སོ། །

ཨོཾ་སྭ་སྟི། རྡོ་རྗེའི་ཡེ་ཤེས་གྲུབ་པའི་གཟི་བྱིན་གྱིས། །འགྲོ་བློའི་སྣང་ཞེན་འཁྲུལ་རྩ་དྲུངས་ཕྱུང་ནས། །གྲུབ་གཉིས་འདོད་དགུའི་སྣང་བ་མཆོག་སྦྱིན་པ། །བླ་མ་ལྷག་པའི་ལྷ་ཡིས་རྟག་དུ་སྐྱོངས། །ཞེས་མཆོད་པར་བརྗོད་པ་ཅུང་ཟད་ཀྱིས་མདུན་བསུས་ཏེ། དེ་རིང་གི་ཞལ་བཀོད་གདམས་པ་འདི་ལ་ཇི་སྐད་དུ། ཡིད་ཆེས་ངེས་པ་སྦྱིན་པའི་ཕྱིར། །ཐོག་མར་བརྒྱུད་པའི་ལོ་རྒྱུས་བཤད། །ཉམས་ལེན་སྲང་དུ་འཛུད་པའི་ཕྱིར། །སྟོང་ཐུན་སྙིང་པོར་དྲིལ་ཏེ་བཤད། །བསྙེན་སྒྲུབ་མཐའ་རུ་ཕྱིན་པའི་ཕྱིར། །རྒྱུན་གྱི་བསླབ་སྤྱོད་བསྡུས་ཏེ་བཤད། །ཅེས་པ་ལྟར་གསུམ་ལས། དང་པོ་ནི། ཉི་ཟླ་ཁ་སྦྱོར་ལས། ལོ་རྒྱུས་དོན་གྱིས་མ་བཤད་ན། གསང་ཆེན་སོགས་ལྟར། སྤྱིར་གདུལ་བྱའི་བློ་རིམ་དང་མཐུན་པའི་ཐེག་པ་ཆེ་ཆུང་གི་བབ་དང་། གསར་རྙིང་གི་རྒྱུད་སྡེའི་དགོངས་པའི་གླེང་གཞིའི་འཆད་ཚུལ་ཇི་སྙེད་ཅིག་མཆིས་ནའང་། འདིར་སྔ་འགྱུར་ཐུན་མིན་གྱི་དབང་དུ་སྤྱིར་བརྒྱུད་པ་གསུམ་དང་བྱེ་བྲག་ཏུ་དྲུག་དང་བདུན་དགུ་སོགས་ཡོད་པ་ལས། དང་པོ་བཀའ་གཏེར་ཐུན་མོང་གི་བརྒྱུད་པ་གསུམ་ནི། དེ་ཡང་ཡེ་ཤེས་རང་སྣང་འོག་མིན་གྱི་གནས་སུ་ཐོག་མའི་སངས་རྒྱས་ཀུན་ཏུ་བཟང་པོའི་ཁྱད་ཆོས་དྲུག་གི་སྒོ་ནས་མངོན་པར་བྱང་ཆུབ་དེ་རྒྱུད་དོན་མངོན་དུ་བརྙེས་ནས་རང་རྩལ་རོལ་པའི་འཁོར་གྱི་རྣམ་པ་རིགས་ལྔའི་སེམས་དཔའ་འཇོམས་པ་སོགས་ཐམས་ཅད་པ་རྒྱལ་བ་གཅིག་གི་ཐུགས་བདེ་སྟོང་གི་རོལ་མོར་སྣང་བ་ཉིད་ཀྱི་ཕྱིར་རྒྱུད་དོན་བརྙེས་པ་དང་། ནང་དབྱིངས་གདོད་མའི་བུམ་སྐུའི་ཞིང་ཁམས་སུ་འཕོ་འགྱུར་མེད་པར་བཞུགས་ནས་གཞི་སྣང་ཡེ་ཤེས་ཆེན་པོའི་སྣང་ཆར་རང་བྱུང་བས་ལྷུན་སྟུག་པོ་བཀོད་པར་སྟོན་པ་རིགས་དྲུག་པའི་མཚན་དཔེར་ཤར་པའི་རིགས་ལྔའི་ཚོམ་བུ་ལ་དུས་བཞི་མཉམ་པ་ཉིད་ཀྱི་ངང་དུ། ཆོས་ཟབ་གསང་སྣང་བ་གསུམ་གྱི་འཁོར་ལོ་བརྡའ་ཚིག་རང་མཚན་ལས་འདས་པའི་གསུང་གིས་བསྒྲོ་བ་མཛད་དེ། ཉིད་ལས་མི་གཞན་པའི་རིགས་གསུམ་སེམས་དཔའ་དང་རིགས་ལྔའི་མཁའ་འགྲོ་རྣམས་ལ་བསྟན་པ་མི་ནུབ་པའི་བཙས་སུ་གཏད་པ་ནི་རྒྱལ་བ་དགོངས་བརྒྱུད་དོ། །འདི་ལ་ཡང་གཉིས་སུ་མེད་པ་དང་ལྷན་གཅིག་པའི་འཁོར་ལ་བརྒྱུད་ཚུལ་སོགས་ཡོད་ཀྱང་སྤྱི་རྣམ་ཙམ་མོ། །གཉིས་པ་སེམས་དཔའ་རིགས་བརྒྱུད་དམ་བརྡའ་བརྒྱུད་ལ། རིག་འཛིན་མི་མ་ཡིན་པ་དང་མི་ལ་བརྒྱུད་ཚུལ་གཉིས་ལས་དང་པོ་ནི། དེ་ལྟར་རྒྱལ་བ་རིགས་དྲུག་པ་ཉིད་རིགས་གསུམ་སེམས་དཔའི་སྐུར་བཞེངས་ནས་ལྷའི་ཡུལ་དུ་འཇམ་དཔལ་གཞོན་ཚུལ་མཛེས་པའི་སྐུ་ཅན་གྱིས་ལྷ་གྲགས་ལྡན་ཕྱོགས་སྐྱོང་ལ་བཤད། སྤྱན་གཟིགས་བདུད་རྩི་སྨན་གྱི་སྐུ་དང་ལྡན་པས་ཀླུ་རྒྱལ་མགྲིན་ནག་ལ་བཤད། ཕྱག་རྡོར་འཇིགས་གཟུགས་བསྡིགས་པའི་ཉམས་ཅན་གྱིས་གནོད་སྦྱིན་ཀུན་ཏུ་བཟང་པོ་ལ་བཤད་དེ། ལྷ་ཀླུ་གནོད་སྦྱིན་གྱིས་ཡུལ་དུ་དར་རྒྱས་སུ་གྱུར་ཏོ། །དེ་ནས་མི་ཡུལ་དུ་ཇི་ལྟར་བྱུང་ན། དགོངས་པ་ལུང་སྟོན་གྱི་མདོ་དང་སྡོམ་འབྱུང་གི་རྒྱུད་ལས་གསང་སྔགས་འབྱུང་བར་ལུང་བསྟན་པ་ལྟར་མཆོག་གི་སྤྲུལ་སྐུ་འཇིག་རྟེན་ན་མི་སྣང་ནས་ལོ་ཉེར་བརྒྱད་ན། དམ་པའི་རིགས་ཅན་དྲྭ་མ་ལྔ་ནང་དུ་ཡང་དག་པར་འཇོག་པ་ལས་ལངས་ནས་སྟོན་པ་མྱ་ངན་ལས་འདས་པར་ཤེས་ཏེ། རང་རང་གི་རྫུ་འཕྲུལ་གྱིས་རི་མ་ལ་ཡ་ཡི་རྩེར་འདུས་ཏེ་ཕྱོགས་བཅུའི་བུདྡྷ་ཡིད་ལ་བྱས་ནས་གདུང་ཚིག་ཉེར་གསུམ་ ༼ ༧དགོངས་འདུས་ལེའུ་གསུམ་པ་ལྟར་མཆན། ༽ བཏོན་པས་སྟོན་པ་ཀུན་ཏུ་བཟང་པོ་ཉིད་སླར་ཡང་གསང་བདག་གི་སྐུར་བཞེངས་ནས་སྔར་འོག་མིན་དུ་གསུངས་པའི་གསང་སྔགས་རྣམས་སླར་ཡང་བསྐྱར་བཟློས་ཀྱི་ཚུལ་དུ་རིག་འཛིན་འདུས་པ་ཕལ་མོ་ཆེ་ལ་གསུངས་སོ། །དེ་རྣམས་སྲིན་པོ་བློ་གྲོས་ཐབས་ལྡན་གྱིས་གསེར་གྱི་ཤོག་བུ་ལ་བཻཌཱུརྱ་ཞུན་མས་བྲིས་ཏེ་མི་ཟད་པ་ནམ་མཁའ་མཛོད་ཀྱི་རྒྱ་ ༼ འདི་ཚངས་དབྱངས་འབྲུག་སྒྲའི་འཇོག་མཚམས་ལྟར་རོ། མཆན། ༽བདུན་གྱིས་བཏབས་སོ། །རྒྱ་བདུན་ནི། གཞི་རྒྱུ་དགོངས་སྣོད་གནས་བསྲུང་བདག་རྒྱུད་འཛིན། ཞེས་སོ། །གསུམ་པ་གང་ཟག་སྙན་བརྒྱུད་ནི། དེའི་ཚེ་དེའི་བྱིན་བརླབས་ཀྱིས་ས་ཧོ་རིའི་རྒྱལ་པོ་ཛ་ལ་རྨི་ལྟས་ངོ་མཚར་བ་བདུན་བྱུང་བ་ནི། ཇི་སྐད་དུ། སྐུ་གསུང་ཐུགས་རྟེན་ཐིམ་པ་དང་། །རིན་ཆེན་གླེགས་བམ་བབས་པ་དང་། །ཆོས་ཀྱི་བསྒྲོ་བ་བྱས་པ་དང་། །ཀུན་གྱི་དམ་པར་བསྒྲགས་པ་དང་། །མཆོད་པ་ཆེན་པོ་བྱས་པ་དང་། རིན་ཆེན་ཆར་དུ་བབས་པ་དང་། །སངས་རྒྱས་ས་ལ་ལུང་བསྟན་པའོ། །ཞེས་པ་ལྟར། དེ་དང་མཐུན་པའི་རྒྱལ་པོའི་ཁང་སྟེང་དུ་ཕྱག་རྡོར་གྱི་སྐུ་ཁྲུ་གང་བ་དང་། སརྦ་བུདྡྷ་ཡོ་གི་ལ་སོགས་པའི་མ་ཧའི་རྒྱུད་སྡེ་ཆེན་པོ་བཅོ་བརྒྱད་ཀྱི་ཆར་བབས་ཤིང་། དེ་དང་དུས་མཚུངས་པར་ཀྲི་ཡ་རྣམས་ཝ་ར་ན་སིར་བབས། ཨུ་པ་ཡ་རི་བོ་བྱ་རྐང་ཅན་དང་བསིལ་ཚལ། ཡོ་ག་མེ་རི་འབར་བ། ཨ་ནུ་སིངྒའི་ནགས་ཚལ་དུ་བབས། ཨ་ཏི་རྣམས་ཨོ་རྒྱན་དྷ་ན་ཀོ་ཤའི་མཚོ་གླིང་དུ་བབས་ནའང་། གཞན་ནི་གླེགས་བམ་དངོས་དང་། ཨ་ཏི་ནི་དེ་ལྟར་ཡང་མ་ལགས་ཏེ་འོག་ཏུ་འཆད་དོ། །དེ་ལས་རྒྱལ་པོ་ཛའི་གསོལ་བ་བཏབས་པས། རྡོ་རྗེ་སེམས་དཔའི་ཞལ་མཐོང་གི་ལེའུ་རྟོགས་ཏེ་སྐུ་དང་གསུང་རྒྱུད་ལ་བརྟེན་ནས་བསྒྲུབ་པས་རྡོ་རྗེ་སེམས་དཔའི་ཞལ་མཐོང་ཞིང་ཡེ་ཤེས་ཀྱི་དབང་བསྐུར་བས་གླེགས་བམ་གྱི་དོན་མ་ལུས་པ་མཁྱེན་ཀྱང་། ཕྱི་རབས་ཀྱི་དོན་དུ་ཚིག་བརྒྱུད་མ་ལུས་པ་སླར་ཡང་ལི་ཙ་བཱི་ནས་གསན་པར་གྲགས་སོ། །དེ་ནས་རྒྱལ་པོ་ཛས་ཀུ་ཀུ་རཱ་ཛ། དེས་རོ་ལངས་བདེ་བ། དེས་དགའ་རབ་རྡོ་རྗེ། དེས་པྲ་ཆེན་ཧསྟི། དེས་ཨོ་རྒྱན་ཆེན་པོ་ལ་བརྒྱུད་པ་དང་། གཞན་ཡང་ཀུ་ཀུ་རཱ་ཛས་སིདྷ་རཱ་ཛ། དེས་ཨུ་པ་རཱ་ཛ། དེས་སྲས་མོ་ཀོ་མ་དེ་བྱི། དེས་སྒེག་རྡོར། དེས་སངས་རྒྱས་གསང་བ། དེས་བི་མ་ལ་དང་། པད་འབྱུང་ལ་བརྒྱུད་པ་དང་། ཨོ་རྒྱན་གྱིས་ནི་རྒྱལ་པོ་ཛ་དངོས་ལས་ཀྱང་གསན་པར་གྲགས་སོ། །ཨ་ནུའི་རྒྱུད་རྣམས་ཀྱང་ཆོས་རྒྱལ་ལུང་བསྟན་རྡོ་རྗེ་ལ་གསང་བདག་གིས་དབང་བསྐུར་ཞིང་བསྟན་ནའང་ཚིག་བརྒྱུད་ལི་ཙ་བཱི་ནས་བླངས་ཏེ། དེས་རང་གི་སྲས་ཤཱཀྱ་སུ་ཏྲི། དེས་ཀུ་ཀུ་རཱ་ཛ། དེས་རོ་ལངས་བདེ་བ། དེས་པྲ་བྷ་ཧསྟི། དེས་ཨོ་རྒྱན་ཤཱཀྱ་སེང་གེ་ལ་བཤད་དེ་རིམ་པར་དར་རོ། །ཨ་ཏི་ཡོ་ག་ནི་ཇི་སྐད་དུ། ཉོན་མོངས་༡རྒྱུད་དྲག་ནུས་མཐུ་༢ཞན། །ལས་ཀྱི་ཚེ་ཐུང་༣བཀའ་དོན་སྟོར་༤། །བསྟན་རྙིང་གྲུབ་མཐའ་ངན་པས་༥བསྒྱུར། །གཉེན་པོས་མི་ནོན་སྒྲུབ་ཚུགས་༦ཞན། །དེ་ཚེ་རིག་པའི་རྣམ་རྟོག་ཤར། །ཞེས་སྙིང་པོའི་བསྟན་པ་འབྱུང་བའི་དུས་དྲུག་ལ་བབས་པའི་ཚེ་རྡོ་རྗེ་སེམས་དཔའི་སློབ་མ་ལྷའི་བུ་ཀུན་དགའ་སྙིང་པོ་ཉིད་བསམ་བཞིན་དུ་དགའ་རབ་རྡོ་རྗེའི་སྐུར་བཞེངས་ཏེ་འོག་མིན་དུ་རྡོ་རྗེ་སེམས་དཔའ་ལ་རྫོགས་པ་ཆེན་པོའི་དབང་དང་གདམས་ངག་རྫོགས་པར་ཞུས་ཏེ། རི་མ་ལ་ཡའི་རྩེ་མོར་མཁའ་འགྲོ་བདེ་བའི་རོ་ལྡན་མ་དང་། བདེ་བྱེད་སེར་མོ་གཉིས་ཀྱིས་ཞུས་ཏེ་ལོ་གསུམ་དུ་ཡི་གེར་བཀོད་ནས་མཁའ་འགྲོ་མངོན་པར་འབྱུང་བའི་ཕུག་ཏུ་བཞུགས་སུ་གསོལ་ཞིང་། སློབ་དཔོན་དགའ་རབ་རྡོ་རྗེ་ཉིད་དུར་ཁྲོད་བསིལ་པའི་ཚལ་དུ་མཁའ་འགྲོ་ཉི་མའི་འོད་ཟེར་སོགས་ལ་ཆོས་སྟོན་ཅིང་བཞུགས་ནས་འཇམ་དཔལ་བཤེས་གཉེན་ལ་བཤད། དེས་ཤྲཱི་སིངྷ། དེས་ཛྙཱ་ན་སཱུ་ཏྲ་དང་བི་མ་ལ་བཤད། དེ་ནས་དགའ་རབ་དང་ཤྲཱི་སེང་སོགས་ནས་ཨོ་རྒྱན་ཆེན་པོའི་ཞུས། འདིའི་དགོངས་བརྒྱུད་ནི་སྔ་མ་དང་གཅིག་ལ་དགའ་རབ་ནས་ཨོ་རྒྱན་གྱིས་བར་བརྡའ་བརྒྱུད་དོ། །ཉང་བན། ལྡང་མ། ལྕེ་བཙུན། ཞིང་སྟོན། ཉི་འབུམ། ཇོ་འབེར། སེངྒེ་རྒྱབ་པ། མེ་ལོང་རྡོ་རྗེ། ཀུ་མ་ར། ཀློང་ཆེན་སོགས་དང་ད་ལྟའི་བར་སྙན་བརྒྱུད་དོ། །གཞན་ཡང་སྒྲུབ་སྡེའི་བཀའ་མ་རྣམས་ནི་རིག་འཛིན་བརྒྱད་ཀྱིས་རང་རང་གི་མེ་ཏོག་ཕོག་པའི་ལྷ་སྐལ་སོ་སོར་སྒྲུབ་པས་ཟུང་འཇུག་གི་གོ་འཕང་བརྙེས་ནས་སྐལ་ལྡན་གྱི་གདུལ་བྱ་རྣམས་ལ་རྒྱ་ཆེར་བཤད་དོ། །གཏེར་མའི་ཕྱོགས་ནི་འོག་མིན་གསང་བ་མཆོག་གི་གནས་སུ་ཀུན་བཟང་ཧེ་རུ་ཀའི་འཁོར་རང་རིག་གི་ཚོམ་བུ་ལ་དུས་ཐོག་མེད་མཉམ་པ་ཉིད་དུ། ཆོས་ཉིད་རྡོ་རྗེའི་རང་སྒྲའི་བདེ་འདུས་སྤྱི་དགོས་ཀྱི་རྒྱུད་ཡན་ལག་དང་བཅས་པ་གསུངས་པ་རྣམས་གསང་བདག་གིས་ཐོག་མར་ངག་ཏུ་བསྡུས་ཤིང་། དེ་ནས་གླེགས་བམ་ལ་བཀོད་ཅིང་དགོངས་འགྲེལ་མཛད་དེ་མཁའ་འགྲོ་ལས་ཀྱི་དབང་མོ་ཆེ་ལ་གཏད། དེས་རིན་ཆེན་སྣ་བརྒྱད་ཀྱི་སྒྲོམ་དུ་བཅུག་དེ་མཆོད་རྟེན་བདེ་བྱེད་བརྩེགས་པར་གཏེར་དུ་སྦས། ཕྱིས་བཀའ་བབས་ཀྱི་རིག་འཛིན་བརྒྱད་ཀྱིས་སྒོས་རྒྱུད་རྣམས་བཏོན་ཀྱང་། སྔར་རྒྱ་མ་ཁྲོལ་བའི་རིན་ཆེན་སྣ་བརྒྱད་འདུས་པའི་སྒྲོམ་བུ་བདེར་འདུས་ཚོམ་བུ་གཅིག་དུ་སྒྲུབ་པའི་རྒྱུད་ལུང་མན་ངག་རྣམས་པདྨ་ཀཱ་རའི་སྤྱན་དྲངས་ཤིང་ཕན་ཚུན་དུ་ཆོས་ཀྱི་སྐྱེས་འགྲུལ་ ༼ འབུལ་དཔྱད། ༽རིས་ཀྱིས་གནང་ཞིང་ཨོ་རྒྱན་ལ་ཧེ་རུ་ཀ་དང་གསང་བདག་གིས། གསང་རྒྱུད་མ་ལུས་པའི་བཀའ་དབང་བསྒྱུར་བར་མངའ་གསོལ་ཞིང་ལྷུན་གྱིས་གྲུབ་པའི་རིག་འཛིན་དུ་གྱུར་བའོ། །དེ་ནས་བོད་དུ་ཇི་ལྟར་དར་ན་གཞན་ཡང་ཆོས་རྒྱལ་ཆེན་པོའི་འཕགས་ཡུལ་གྱི་པཎ་གྲུབ་ཐམས་ཅད་བོད་དུ་སྤྱན་དྲངས་ནས་ལོ་ཙ་མང་པོ་དང་བཅས་གཞི་འགྱུར་དང་རྩལ་འགྱུར་གྱིས་རྒྱ་ཆོས་མ་ལུས་པ་བོད་དུ་བསྒྱུར་ཞིང་། པཎ་གྲུབ་རྣམས་ཀྱིས་རྫུ་འཕྲུལ་དང་དབང་འབྱོར་ཆེན་པོའི་ཨོ་རྒྱན་དང་མཁའ་འགྲོའི་ཡུལ་སོགས་ནས་གསང་རྒྱུད་བཞུགས་པ་མ་ལུས་པ་བླངས་ཏེ་རྗེ་འབངས་འཁོར་བཅས་ལ་བཤད་བཀའ་དང་སྒྲུབ་བརྒྱུད་ཀྱི་སྲོལ་བཙུགས་ཏེ་འཁོར་ལོ་གཉིས་ལྡན་གྱི་བྱ་བས་དར་ཞིང་རྒྱས་པར་མཛད་པ་ལས་ནང་རྒྱུད་བླ་ན་མེད་པའི་བརྒྱུད་པའི་བཀའ་སྲོལ་དྲུག་ཏུ་བཞེད་དེ། དང་པོ་ཨོ་རྒྱན་གྱི་ལྟ་འཕྲེང་དང་གདམས་སྐོར་སོགས་གསུངས་ནས། ཉང་། སྤང་། འཁོན། གནུབས། རྨ་སོགས་ལ་གནང་། སླར་གདམས་སྐོར་གཏེར་དུ་སྦས་པ་ལས་བརྒྱུད་དོ། །གཉིས་པ་ནི། བཻ་རོས་གཡུ་སྒྲ་སྤམ་ ༼ སྤང་དཔྱད། ༽ རྒན་སོགས་ལ་སེམས་ཀློང་གསུངས། གསུམ་པ། བི་མ་ལས་ཏིང་འཛིན་བཟང་པོ་སོགས་ལ་མན་ངག་སྡེ། བཞི་བ་སངས་རྒྱས་ཡེ་ཤེས་ཀྱིས་འདུས་མདོ་དང་གཤེད་སྐོར། ལྔ་བ་ནམ་སྙིང་གིས་ཧཱུྃ་ཀར་ལས་ཡང་དག་གི་ཆོས་སྐོར་རྣམས་གསན་ཅིང་བབས་པ་དང་། མ་ཧཱ་རྣམས་དེ་དག་ཐམས་ཅད་ལས་བརྒྱུད་དེ། རྡོ་རྗེ་ཐེག་པའི་བསྟན་པ་དང་པོ་གཉགས། བར་དུ་གནུབས། ཐ་མ་ཟུར་ལ་བབས་པ་སོགས་ཆོས་བརྒྱུད་མཐའ་ཡས་པ་རོང་ཟོམ་ཆེན་པོ། ཀུན་མཁྱེན་བསམ་ཡས་པ། མངའ་རིས་པཎ་ཆེན། རྡོ་བྲག་པདྨ་ཕྲིན་ལས། སྨིན་གླིང་སྐུ་མཆེད། འཇིགས་མེད་གླིང་བ་ནས་རྗེ་བླ་མའི་བར་དུ་སྙན་ནས་སྙན། ཐུགས་ནས་ཐུགས་སུ་བརྒྱུད་དེ་འཆད་སྤེལ་རྩོམ་པའི་རྒྱུ་ལས་བསྟན་པའི་སྲོག་མཐུད་དེ་རྒྱས་པར་མཛད་པ་དང་། དྲུག་པ་ནི། དུས་ཕྱིས་རྗེ་འབངས་རྣམས་ཀྱི་སྤྲུལ་བ་སྐལ་ལྡན་གྱི་སྐྱེས་བུ་རིམ་པར་བྱོན་ནས་གཏེར་དུ་སྦས་པའི་ཟབ་ཆོས་རྣམས་སྤྱན་དྲངས་ཏེ། བོད་ཁམས་ཕན་བདེ་ལ་བཀོད་པ་ཡིན་ནོ། །གཉིས་པ་གཏེར་གྱི་དགོས་ཆོས་ཀྱི་བརྒྱུད་པ་ནི། ལར་སྔ་མ་གསུམ་གྱི་སྟེང་དུ། དྲུག་དང་། བདུན་དང་། དགུ་སོགས་འཆད་ཚུལ་མང་ཡང་། བསྐང་བཤགས་ལས། མཚོན་བྱེད་རྟགས་ཀྱི་བརྡ་ཤོག་ཆེན་པོའི་དབང་། །ལས་ཅན་སྐྱེས་བུའི་སྙིང་ལ་བསྐུར་བ་ལས། །མཚོན་བྱ་དོན་གྱི་དགོངས་པའི་གསང་མཛོད་རྡོལ། །གཏད་རྒྱ་སྨོན་ལམ་དབང་བརྒྱུད་ཐུགས་དམ་བསྐངས། །ཞེས་པ་ལྟར་གཏེར་སྟོན་སྤྲུལ་བའི་སྐུ་རྣམས་ལ་སྔོན་རབས་དང་ད་ལྟ་ཅི་རིགས་པར་ཡང་བརྒྱུད་པ་སྔ་མ་གསུམ་གཞིར་བཞག་གི་སྟེང་དུ། གཏེར་ཐོན་པའི་སྐུ་ཚེ་དེ་ལ་གུ་རུའི་འོད་གསལ་གྱི་དགོངས་པ་ཐོད་རྒལ་དུ་སྙིང་ལ་བབས་པ་དགོངས་བརྒྱུད། བརྡའི་གཏེར་རིགས་རྙེད་ནས་གུ་རུས་ཕྱི་དུས་སུ་བརྡ་དབང་འདི་ལྟར་བསྐུར་ཅེས་གནང་བ་ཐོབ་པས་བག་ཆགས་སད་པ་བརྡ་བརྒྱུད། ཤོག་སེར་གྱི་བརྡ་ཁྲོལ་བ་སྙན་བརྒྱུད་ཁྱད་པར་བ་ཉིད་དོ། །དེའི་སྟེང་དུ་ཕྱིས་དུས་ཀྱི་སྐྱེ་བ་དེ་༡བཀ༵འ་བབ༵ས་ཀྱི་སྐྱེས་བུར་ལུང༵་བསྟན༵་པའི་གསང་སྔགས་ཀྱི་བབས་སོར་རྟེན་འབྲེལ་མཐུ་ཆེན་བསྒྲིགས་པ་དང་། མཚོན་བྱ་དོན་གྱི་མན་ངག་སྐལ་ལྡན་མཆོག་གི་སྙིང་ལ་སྨོན༵་ལམ༵་༢དབ༵ང་བསྐུར༵་གྱི་རྒྱས་གདབ། མཚོན་བྱེད་༣བརྡའི་ ༼ དཔེར་ཤོག་སེར་ཚིག་བརྒྱུད། མཆན། ༽ རྒྱུད་མཁའ་འགྲོ་དམ་ཅན་མངོན་ཤེས་མངའ་བ་ལ་གཉེར་དུ་གཏད༤། ཆོས་དེ་འཆད་སྤེལ་བྱེད་པའི་བཀའ་བབས་ཆོས་བདག་ལུང་བསྟན་པ་སྟེ། རིམ་བཞིན་གཏེར་རྙེད་པའི་སྔོན་གྱི་རྒྱུ་དང་། ད་ལྟར་གྱི་རྐྱེན་དང་རྙེད་པ་དོན་ལྡན་དུ་འགྱུར་བའི་སྒོ་སྟེ་རྣམ་པ་གསུམ་དང་། དེ་ཉིད་ཉམས་སུ་བླང་བས་གྲུབ་འབྲས་མངོན་དུ་འབྱིན་པ་ཉམས་ལེན་བྱིན་རླབས་ཀྱི་བརྒྱུད་པ་སྟེ་བདུན་ནོ། །༈ཁྱད་པར་དུ་སློབ་དཔོན་ཆེན་པོ་པདྨ་འབྱུང་གནས་ཀྱིས་ཕྱི་རབས་བསྟན་པའི་འཕེལ་འགྲིབ་མཐུད་པའི་ཕྱིར་རྒྱུད་ལུང་མན་ངག་སྒྲུབ་སྡེ་དང་བཅས་པ་གཅུས་དཀྲུགས་གབ་པའི་གནད་བསལ་ཏེ། བདུད་རྩི་རོ་སྡེབ་ནུས་སྡེབ་དུ་མཛད་ཅིང་། རྒྱུད་སྒྲུབ་ཐབས་དང་ཆོག་འགྲིགས་སུ་བྱས་ནས་རྗེ་འབངས་ཐམས་ཅད་ལ་དབང་བཀའ་མན་ངག་དང་བཅས་པ་གནང་ཞིང་། སླར་ཡང་རང་རང་གི་མེ་ཏོག་ཕོག་པའི་ལྷ་སྐལ་སོ་སོ་དང་སྔོན་གྱི་ལས་འཕྲོ་གང་ཡོད་ཀྱི་བཀའ་བབས་ལུང་བསྟན་ཅིང་། གཏད་རྒྱ་སྨོན་ལམ་དབང་བསྐུར་དང་བཅས་པ་མཛད་དེ་མཆོག་གི་གླིང་བ་བཅུ་གཅིག་སོགས་རིམ་པར་བྱོན་པ་ལས། ཁྱད་པར་དུ་ཀུན་མཁྱེན་འཇིགས་མེད་གླིང་བ་ནི། ཆོས་རྒྱལ་ཚངས་བ་ལྷའི་མེ་ཏོག་ཉིད་ཀྱི་སྤྲུལ་བ་ཡིན་པས། མངའ་བདག་གི་སྐུ་སྤྲུལ་ཉིང་རལ། གསུང་སྤྲུལ་ཆོས་དབང་། ཐུགས་སྤྲུལ་མངའ་རི་པཎ་ཆེན། ཡོན་ཏན་བཀྲ་ཤིས་སྟོབས་རྒྱལ། ཕྲིན་ལས་རྒྱལ་མཆོག་ལྔ་བ་རྣམས་དང་། གཞན་ཡང་ལྷ་རྗེ་ལུང་བསྟན་པ་ལ། སངས་རྒྱས་བླ་མ། རྒྱ་ལོ་ཙ་བ། ཉི་མ་སེང་གེ ཨོ་རྒྱན་གླིང་བ། ལྷ་ལྕམ་ལུང་བསྟན་པ་ལས། པདྨ་ལས་འབྲེལ་རྩལ་དང་། ཀློང་ཆེན་པ། འཛམ་གླིང་རྡོ་རྗེ། འཇིགས་མེད་གླིང་བ་སྟེ། མདོར་ན་སངས་རྒྱས་བླ་མ་ནས། འཇིགས་མེད་གླིང་བའི་བར་གཏེར་སྟོན་བཅུ་གསུམ་གྱི་སྐུ་སྐྱེ་བ་བཞེས་པར་ཐང་ཡིག་ལས། གཏེར་སྟོན་རྐྱང་པའི་སྐྱེ་བ་བཅུ་གསུམ་འབྱུང་། །ཞེས་སོགས་ཨོ་རྒྱན་ཆེན་པོའི་ལུང་གིས་བསྔགས་པ་དང་། དངོས་གནས་འཁྲུལ་བ་མེད་པའི་ཚུལ། དགོངས་འདུས་ལུང་བསྟན་བཀའ་རྒྱ་མ་ལས། ལྷོ་ཕྱོགས་འོད་ཟེར་མིང་ཅན་སྤྲུལ་པའི་སྐུ། །ཟབ་དོན་སྙིང་ཐིག་ཆོས་ཀྱིས་འགྲོ་བ་འདྲེན། །འབྲེལ་ཚད་རིག་འཛིན་ཞིང་དུ་འཕེན་པ་འབྱུང་། །ཞེས་དང་། རིག་འཛིན་འཛམ་གླིང་རྡོ་རྗེའི་གཏེར་ལུང་ལས། དབུས་གཡོར་གཞུང་དུ་བྱང་སེམས་པདྨའི་མིང་། །བཀའ་རྙིང་བསྟན་སྐྱོང་ཐབས་མཁས་འགྲོ་བ་འདུལ། །ཞེས་ལུང་བསྟན་པ་ལྟར་གྱི་ཚད་མའི་སྐྱེས་བུར་གྲུབ་པ་དང་། ཁྱད་པར་དུ་རྗེ་འབངས་ཀྱི་དུས་སུ། ཨོ་རྒྱན་གྱིས་གང་གསུང་གི་དབང་དང་བཀའ་ཆོས་ཐམས་ཅད་མངའ་བདག་ལ་བརྙེས་པའི་གནད་ཀྱིས་གཏེར་ཁ་ཐམས་ཅད་ལ་དབང་བསྒྱུར་བ་དང་། ཀུན་གྱི་ཡང་སྙིང་བླ་མེད་སྙིང་ཐིག་གསང་བའི་གཏེར་ཁ་ལ་དབང་བ་དང་། མཁྱེན་བརྩེ་ཉིད་ལ་བཀའ་གཏེར་སྒྲུབ་སྡེ་ཐམས་ཅད་ཀྱི་རིང་བརྒྱུད་ཀྱང་ཟམ་མ་ཆད་པར་ཡང་མངའ་བ་ཡིན་ལ། ལྷག་པར་ཉེ་བརྒྱུད་ཀྱང་ཀུན་མཁྱེན་ཆེན་པོའི་ཡེ་ཤེས་ཀྱི་སྐུའི་རྗེས་སུ་བཟུང་ནས་ཞལ་ལན་གསུམ་གཟིགས་ཏེ། བརྒྱུད་གསུམ་ཅིག་ཆར་དུ་རྫོགས་པར་མཛད་ཀྱང་ཆོས་ཉིད་མངོན་སུམ་དུ་གཟིགས་པའི་ལག་རྗེས། ཇི་སྙེད་མཁྱེན་པའི་ཀློང་རྡོལ་ཏེ། བཀའ་གཏེར་བསྟན་པ་རྒྱ་མཚོའི་མངའ་བདག་ཏུ་བཞུགས་པ་དང་། ཆོས་སྐུ་ཡེ་ཤེས་ཀྱི་མཁའ་འགྲོ་མས་ཀློང་བྱང་ཡེ་ཤེས་ཀྱི་བརྡའ་རིས་མངོན་སུམ་དུ་སྤྲད་པས་ཟབ་མོའི་ཆོས་གཏེར་ལ་དབང་བསྒྱུར་ཏེ། ལས་ཅན་གྱི་གཏེར་སློབ་རིག་འཛིན་བྱང་ཆུབ་རྡོ་རྗེ་དང་། འཇིགས་མེད་རྒྱལ་བའི་མྱུ་གུ་སོགས་ལ་གནང་ཞིང་། དེ་དག་ལས་མི་འགྱུར་ནམ་མཁའི་རྡོ་རྗེས། འཁྲུལ་ཞིག་ཆེན་པོ་ཀུན་བཟང་བདེ་ཆེན་རྡོ་རྗེ་དང་པདྨ་བདེ་ཆེན་བཟང་པོ་གཉིས་དང་། དེ་དག་གིས་བདག་ཅག་གི་འདྲེན་སྟོན་རྗེ་དཔོན་དམ་པ་གནས་བརྟན་དོན་གྱི་དགེ་སློང་རྡོ་རྗེ་འཛིན་པ་ཆེན་པོ་མཚན་བརྗོད་པར་དཀའ་ནའང་། དོན་གྱི་སླད་དུ་མཚན་ནས་སྨོས་ན་ཀུན་བཟང་ཆོས་གྲགས་དཔལ་བཟང་པོ་ཉིད་ལ་སྩལ་ཞིང་། དེ་ལས་བདག་ཅག་གིས་བཀའ་དྲིན་རྗེས་སུ་ཐོབ་པ་སྟེ། མདོར་ན་ཁོ་བོ་མ་གཏོགས་བརྒྱུད་པ་དེ་དག་ཐམས་ཅད་སངས་རྒྱས་མི་གཟུགས་སུ་བྱོན་པས་སོ་སྐྱེས་ཀྱི་བསླད་མ་ཞུགས་ནའང་གཞན་ངོར་རྒྱུད་སྡེའི་གནས་ལ་སྦྱངས་བས་མཁས་པའི་གོ་འཕང་བརྙེས། འཁོར་ལོའི་ལྷ་ལ་བསྙེན་སྒྲུབ་ཐང་བས་རིམ་གཉིས་ཀྱི་དྲོད་ཚད་ཐོབ་པས་རྣལ་འབྱོར་དབང་ཕྱུག་གི་ཕྲེང་བ་བར་མ་ཆད་པར་བརྒྱུད་པ་ལས་ད་ལྟའི་བར་དུ་དབང་གི་ཆུ་བོ་མ་ཉམས། བཤད་པའི་སྒྲོན་མེ་མ་ནུབ། མན་ངག་གི་རྣོ་སོ་མ་རྟུལ། བརྒྱུད་ཐག་ཉེ་ཞིང་བརྒྱུད་པ་བར་མ་ཆད་པའི་ཕྱིར་དང་། དམ་ཉམས་ཀྱིས་སེལ་དང་། གཟུ་ལུམ་ཅན་གྱི་བསླད་མ་ཞུགས། བྱིན་རླབས་ཀྱི་གཟི་མདངས་མ་ཡལ་བས་བརྒྱུད་པ་གཙང་ཞིང་བར་མ་ཆད་པར་བྱོན་པའོ། །གཉིས་པ་སྟོང་ཐུན་སྙིང་པོར་དྲིལ་ཏེ་བཤད་པ་ལ། ཇི་སྐད་དུ། གསང་བ་ཡོངས་རྫོགས་ཆེན་པོའི་རྒྱུད་ལས། རྒྱུད་དོན་གསང་བའི་སྒྲུབ་ཆེན་ལ། །བཞི་སྟེ་ཕུན་ཚོགས་ལྔའི་གཞི་གཟུང་། །སྟ་གོན་རིམ་པས་སྒྲོམ་དུ་གཞུག །དངོས་གཞི་བསྙེན་བསྒྲུབ་གཞུང་བསྲང་ཏེ། །མཐའ་རྒྱས་ཆོ་གས་རྗེས་བསྐྱང་ངོ་། །ཞེས་པ་ལྟར་གསུམ་ལས་དང་པོ་ནི། རྡོ་རྗེ་ལས་རིམ་ལས། ཕུན་སུམ་ཚོགས་པ་ལྔ་གཞི་ལ། ཞེས་པས་བསྒྲུབ་པའི་གནས་སུམ་ཚོགས་པ་༡ནི། སྤྱིར་གནས་ཚུལ་གྱི་དབང་དུ་རང་ཉིད་གནས་སུ་འཛིན་པའི་ལོག་རྟོག་གང་དུ་དག་པའི་དུས་སུ་གནས་མ་དག་པ་ཞིག་གཏན་ནས་མི་སྲིད་དེ། དོན་གྱི་འོག་མིན་ཆེན་པོ་ཡིན་པའང་། རྒྱས་པ་ལས། ཡང་དག་ཤེས་པའི་རང་རིག་བློ་མེད་ན། །བདེ་གཤེགས་ཞིང་ཡང་ངན་སོང་གནས་སུ་མཐོང་། །ཐེག་མཆོག་མཉམ་པའི་དོན་ཉིད་རྟོགས་པ་ན། །ངན་སོང་གནས་ཀྱང་འོག་མིན་དགའ་ལྡན་གནས། །ཞེས་སོ། །འོན་ཀྱང་དེ་ལྟར་མ་རྟོགས་པ་དབང་བཙན་དུ་བྱས་ན། དུས་འཁོར་རྩ་རྒྱུད་ལས། གང་ན་ས་སྐྱོང་ཆོས་ལྡན་ཞིང་། །གང་ཞིག་ཁོ་ནར་སྐྱེ་དགུ་རྣམས། །བདེར་གནས་ས་འཛིན་རྩོད་མེད་པ། །དེར་ནི་རྣལ་འབྱོར་བརྩོམ་པར་བྱ། །ཞེས་པས་དོན་ལ་གནས་པ་དང་། ཁྱབ་བདག་རྒྱལ་བའི་མྱུ་གུ འཇམ་དབྱངས་ཆོས་ཀྱི་དབང་པོ། དུས་གསུམ་སངས་རྒྱས་ཀུན་བཟང་བདེ་ཆེན་རྡོ་རྗེ། ཨོ་རྒྱན་བསྟན་འཛིན་ནོར་བུ། འཇམ་དཔལ་དགྱེས་པའི་རྡོ་རྗེ། སྲིད་པ་ཐ་མ་པ་ཡོན་ཏན་རྒྱ་མཚོ། མཉམ་མེད་ཀུན་བཟང་ཆོས་གྲགས་སོགས་དམ་པ་དུ་མས་ཞབས་ཀྱིས་བཅག་ཤིང་དངོས་གྲུབ་བརྙེས་བས་དགེ་མཚན་བཀྲ་ཤིས་པའི་འབྱུང་གནས་སུ་གྱུར་བ་དང་། དེང་དུས་ཙ་ན་གངས་ཅན་ཙམ་གྱི་ས་བཀའ་རྙིང་གསུམ་ལ་བཤད་སྒྲུབ་འཁོར་ལོ་གཉིས་ལྡན་གྱི་འབྱུང་ཁུངས་སུ་གྱུར་བས་དོན་གྱི་མ་དགོན་དངོས་གནས་པ་གྱུར་བ། རིག་འཛིན་རྩལ་འཆང་གི་ཟམ་མ་ཆད་པ་ཕུན་ཚོགས་ནོར་བུའི་གླིང་གི་གཙུག་ལག་ཁང་མདོ་རྒྱུད་མན་ངན་ནས་བཤད་བའི་སྒྲུབ་གནས་ཀྱི་མཚན་ཉིད་ཐམས་ཅད་ཚང་བའོ། །དུས་ཕུན་སུམ་ཚོགས་པ་༢ནི། རྔམ་གློག་ལས། རིག་བྱེད་དག་གི་ཡན་ལག་ལ། །དུས་རྣམས་ཤེས་པར་བྱ་བ་ནི། །བཀྲ་ཤིས་ལྷ་ཡི་ཉི་མ་དང་། །སྦྱོར་དང་དུས་ཚོད་བཟང་བ་ནི། །མཚན་མའི་རྟོག་པ་ཡིན་མོད་ཀྱང་། །བརྟགས་ན་དངོས་གྲུབ་མཚན་མ་འབྱུང་། །ཞེས་དང་། སྒྱུ་འཕྲུལ་རྒྱས་པ་ལས། ཚེས་གྲངས་ཡར་གྱི་བརྒྱད་ལ་བརྩམ། །ཤིན་ཏུ་སྐར་མ་རྒྱལ་རྣམས་ལ། །ཞེས་དང་། བདེ་མཆོག་རྩ་རྒྱུད་ལས། །མར་གྱི་ངོ་ཡི་ཚེས་བཅུ་དང་། །ཟླ་བ་ཡར་ངོར་གང་གྱུར་ལ། །མྱུར་དུ་འབད་པས་མཆོད་པར་བྱ། །ཞེས་དང་། ཀུན་སྤྱོད་ཀྱི་རྒྱུད་ལས། དགུན་འབྲིང་ལ་སོགས་ཟླ་བ་ཡིས། །བཅུ་བ་ལ་ནི་རབ་ཏུ་མཆོད། །ཅེས་པས་བདག་ཅག་གི་སྟོན་པ་མཉམ་མེད་དོན་ཀུན་གྲུབ་པ་ཉིད་ཀྱིས་ཆོ་འཕྲུལ་ཆེན་པོ་སྟོན་པའི་དུས་ཆེན་དང་། གུ་རུ་ཉིད་ཀྱིས་ཨོ་རྒྱན་གྱི་རྒྱལ་སྲིད་སྤངས་ཏེ། བརྟུལ་ཞུགས་ཀྱི་སྤྱོད་པ་བསྐྱང་བའི་མཚན། པདྨ་ཐོད་ཕྲེང་དུ་གྲགས་པའི་དུས་དང་། ཁྱད་པར་ཞི་བའི་ཕྲིན་ལས་འགྲུབ་པའི་འཕེལ་ཕྱོགས་ཀྱི་དུས་ཆེན་ནོ། །སྟོན་འཁོར་ཕུན་སུམ་ཚོགས་པ་༣ནི། ལམ་རིམ་ལས། སྟོན་པ་མཛོད་ལྡན་ཆུ་བོ་རྫོགས། །གཉེར་ལྡན་རྒྱུད་དང་ལས་ལ་མཁས། །མན་ངག་དྲོད་དང་བརྒྱད་འཆང་བ། །རྣལ་འབྱོར་མཐར་ལྡན་ཤིན་ཏུ་བརྟེན། །ཞེས་མཚན་ཉིད་བརྒྱད་ལྡན་གྱི་རྡོ་རྗེ་སློབ་དཔོན་དང་། འཁོར་ནི་གསང་སྙིང་ལས། སྟོན་པ་མཆོད་བརྩོན་རྟོག་པ་བསལ། དམ་ཚིག་སྔགས་དང་ཕྱག་རྒྱ་རྣམས། །མ་ཉམས་ཤེས་ཤིང་ཡོ་བྱད་ལྡན། །ཞེས་པ་ལྟར། སྤྱིར་ཡོན་ཏན་དྲུག་དང་ལྡན་ཞིང་། ཁྱད་པར་སྣོད་ཀྱི་སྐྱོན་གསུམ་དང་བྲལ་བས་རྡོ་རྗེའི་མིང་གིས་ལས་སོ་སོར་མངའ་གསོལ་པའི་རྡོ་རྗེའི་རྒྱལ་ཚབ། རྒྱས་འདེབས། མངོན་ཤེས་པྲ་བརྟགས། ཉུལ་བསྐྲོད། ཐུན་མཚམས་པ། ཚོགས་བསྐུལ་པ། ཕྲིན་ལས་པ། རྡུལ་ཕྱགས་པ། བྱན་ཕོ། བྱན་མོ། ཕྱི་ནང་བརྡ་སྦྱོར་བ། ལས་ཀྱི་རྡོ་རྗེ། སྦྱོར་པའི་རྒྱུ་རྩལ་ལ་མཁས་པའི་ལས་ཆོས་དམ་ཚིག་ཕྱག་ཆེན་གྱི་གཟུངས་མ་གྲངས་སྤྲད་པ་སྟེ། མེད་དུ་མི་རུང་བ་རང་རང་གི་ལས་ལ་དབང་བསྒྱུར་བ་དག་གཞིར་བཞག་གི་སྟེང་དུ། སྔར་སྔགས་ལ་མ་ཞུགས་པ་དེར་འདུས་པ་རྣམས་ཀྱི་རྒྱུད་སྣོད་རུང་དུ་བྱེད་པའི་ཕྱིར་དཀྱིལ་འཁོར་གཙོ་བོའི་དོན་དབང་ངམ་སྐུ་གསུང་ཐུགས་ཀྱི་བྱིན་རླབས་དང་དམ་བསྲེ་བསྩལ་བ་ལ། བཀའ་མ་དག་གི་བསྙེན་དབང་ཟེར། བདེར་འདུས་སོགས་གཏེར་མ་རྣམས་སུ་སྙིང་པོ་སྒྲུབ་དབང་དུ་བཏགས། དེ་ནས་བསྒོམ་བཟླས་ཀྱི་ལུང་ཕོག་ནས་སྒྲུབ་པ་ལ་ཞུགས་པས་གསང་སྒྲོགས་སུ་མི་འགྱུར་བའི་ཕྱིར་འདིར་དམ་བསྲེ་ཉིད་བྱས་པས་དེར་འདུས་པ་ཀུན་ཀྱང་གྲོགས་ཕུན་སུམ་ཚོགས་པ་ཞེས་བྱའོ། །ཆོས་ཕུན་སུམ་ཚོགས་པ་༤ནི། ༼ བསྒྲུབ་པའི་ཐབས་ཕུན་སུམ་ཚོགས་པ་སྟེ། མཆན། ༽ སྔར་སྨོས་པ་ལྟར་གྱི་རྗེ་བཙུན་འཇམ་དབྱངས་དང་། འཕགས་པ་སེམས་ཉིད་ངལ་གསོ། མ་ཧཱ་གུ་རུ་བློ་ལྡན་མཆོག་སྲེད། ཆོས་རྒྱལ་ཚངས་པ་ལྷའི་མེ་ཏོག་གི་སྤྲུལ་བའི་ཟློས་གར་དུ་རྡོ་རྗེའི་ལུང་གིས་ཡང་ཡང་བསྔགས་པའི་གཏེར་ཆེན་འཇིགས་མེད་གླིང་བའི་དགོངས་གཏེར་ནམ་མཁའ་མཛོད་གྱི་ཆོས་སྡེ་ལས་ཀློང་ཆེན་སྙིང་གི་ཐིག་ལེ་ཞེས་མན་ངག་གི་འཐུས་ཁ་ཚང་ལ་མ་ནོར་བར་སྟོན་པས། ཚད་མ་བཞི་དང་། གསང་སྔགས་ཆུ་བོ་བཞི་དང་། འབྲེལ་བ་བཞི་ལྡན་ཆེན་པོ་ལ་བླ་རྫོགས་ཐུགས་གསུམ་ཆ་ལག་དང་བཅས་པ་བཞུགས་པ་ལས། འདིར་བླ་མ་རིག་འཛིན་འདུས་པའི་སྒོ་ནས་མཆོག་སྒྲུབ་གྱི་ནང་ཚན། རྡོ་རྗེ་སེམས་དཔའ་སྨན་སྒྲུབ་གྱི་ཆར་གཏོགས་མྱོང་གྲོལ་རིལ་བུའི་སྒོ་ནས་མཆོག་སྒྲུབ་པ་ནི་སྐབས་སུ་བབས་པའི་དོན་ནོ། །ཡོ་བྱད་ཕུན་སུམ་ཚོགས་པ་༥ནི། གསང་སྙིང་ལས། ཆོ་ག་ལྔ་ནི། ཞེས་པ་ལྟར་དང་། ལམ་རིམ་ལས། གོས་བརྒྱན་བཟའ་བཏུང་གསང་བ་དང་། སྒྲུབ་པའི་ཡོ་བྱད་ལྔ་རྣམས་དང་། །དཀྱིལ་འཁོར་ཡོ་བྱད་མཆོད་པའི་རྫས། །དངོས་གྲུབ་རྟེན་དང་བར་ཆད་བཟློག །ཡོ་བྱད་དག་པ་བསྡུ་བྱ་སྟེ། །ཞེས་པ་ལྟར། འཚོ་བ་ཟས། རྐྱེན་ཟློག་སྨན། སྒྲུབ་པ་རྫས། མཆོད་པ་རྫས་ཀྱི་ཡོ་བྱད་དམ། ཀུན་མཁྱེན་ལུགས་དགེ་བའི་བཤེས་གཉེན་གྱིས་ཟིན་པ། དབང་ཐོབ་པ། སྡོམ་ལ་གནས་པ། སྒྲུབ་པའི་མན་ངག་ལ་མཁས་པ། བརྩོན་འགྲུས་ཕུན་སུམ་ཚོགས་པ་སྟེ་ཆོ་ག་ལྔ། གནས་ཡིད་མཐུན་གྲོགས་མཚན་ཉིད་ཚང་བའོ། ༼ དཔྱད། ༽ལོག་འཚོ་མེད་པའི་འཚོ་བ། དངོས་གྲུབ་ཀྱི་རྫས་ཚང་བ། དམ་ཚིག་གིས་རྫས་ཚོགས་པ་དེ་ཡོ་བྱད་ལྔ། བདག་གི ལྷས། བཟླས་བརྗོད་ཀྱིས། གསང་སྔགས་ཀྱི། འཕྲོ་འདུས་དེ་ཁོ་ན་ཉིད་དེ་ཡན་ལག་ལྔ་ཚང་བའམ། ཡང་ཁ་ཅིག་གི་ལྟར། སྟོང་ཆེན། ཀུན་སྣང་། ཡིག་འབྲུ། སྐུ་ཡོངས་རྫོགས་ཏེ་ཆོ་ག་ལྔ། བཟའ་བཏུང་། བྲོ་གར། གོས་རྒྱན། ཨ་ལི། ཀ་ལི་སྟེ་ཡོ་བྱད་ལྔ། ཡན་ལག་ལ་ལྷ་བཅུའི་དཀྱིལ་འཁོར་བསྐྱེད་ལ། རྟོགས་པའི་ཡན་ལག་ལྷ་ཞེ་གཉིས་སུ་ཤེས་པ། ལྷ་རེ་རེ་ཡང་ཞེ་གཉིས་སུ་དབྱེ་བ། དེ་དག་གི་སྐུ་གསུང་ཐུགས་བྱིན་གྱིས་བརླབས་པ། རིགས་ལྔའི་དབང་བསྐུར་བ་སྟེ་སྔགས་ཀྱི་ཡན་ལག་ལྔར་ཡང་འདོད་དོ། །དེ་ལྟ་བུའི་ཕུན་སུམ་ཚོགས་པ་ལྔའི་གཞི་བཟུང་ནས། གཉིས་པ་དངོས་གཞི་སྟ་གོན་གྱི་སྒྲོམ་དུ་བཅུག་པ་ལ། སྔོན་འགྲོའི་ཆོ་ག་དང་། དངོས་གཞིའི་ལས་རིམ་གཉིས་ལས། དང་པོ་ལ། ས་བརྟགས། བསླང་སྦྱངས། དབང་དུ་བྱེད་པ། བསྲུང་བ་དང་ལྔའི་ཆོ་ག་སྔོན་དུ་འགྲོ་བར་བྱེད་པ་དག་གོ །གཉིས་པ་དངོས་གཞིའི་ལས་རིམ་ལ་དགུ་སྟེ། མཚམས་བཅད་སྟ་གོན་བརྟེན་བཅའ་དང་། །རྒྱན་བཀོད་འཇུག་དང་མངའ་གསོལ་དང་། །བསྲེ་བསྣན་བྱིན་རླབས་བྱིན་དབབས་སོ། །ཞེས་པ་ལྟར། ཚུལ་བཞིན་དུ་བགྱིས་པ་དག་གི་སྟ་གོན་མཐར་ཕྱིན་གྲུབ་ནས། གསུམ་པ་དངོས་གཞི་བསྙེན་སྒྲུབ་ཡན་ལག་བཞིའི་གཞུང་བསྲང་བ་ལ། སྤྱིར་དབྱེ་བ་མང་ཏེ། ཇི་སྐད་དུ། དེ་ཡང་ལམ་བསྒྲུབ་སྦྱོར་བ་ཡིས། །ཞེས་པ་སོགས། ལམ་དུས་དང་། སྦྱོར་དུས་དང་། བསྒྲུབ་དུས་ཀྱི་བཞི་བཞིར་སྦྱར་བ་སོགས་ཡོད་ཀྱང་། འདིར་བསྒྲུབ་ཆེན་གྱི་བབ་དང་འབྲེལ་ཞིང་། རྒྱུན་ཆགས་སུ་དགོས་པ་ཙམ་བཤད་ན། སྒྲུབ་བྱང་ལས། རིམ་པ་ཤོམས་དང་འབྲེལ་བའི་ཕྱིར། །བསྙེན་པ་ཞེས་སུ་བརྗོད་པ་ཡིན། །གསང་སྒོར་ཞུགས་ནས་བྱིན་ལྡན་པ། །ཉེ་བའི་བསྙེན་པ་ཞེས་སུ་བརྗོད། །གར་ཡང་བར་ཆད་མི་གཡེལ་བར། །དམ་པའི་གཞུང་གཉིས་འཛིན་པས་ན། །སྒྲུབ་པ་ཞེས་སུ་བརྗོད་པ་ཡིན། །རྣལ་འབྱོར་དྲོད་ཀྱི་རྩལ་འཆང་བ། །སྒྲུབ་པ་ཆེན་པོ་དེ་བརྗོད་དོ། །ཞེས་པ་ལྟར། ཐོག་མར་ས་ཆོག་རྣམས་དང་། ཕྱི་མཚམས་རྒྱལ་ཆེན་བཞིའི་ཐོ་བཙུགས། ནང་མཚམས་འབར་བ་ལྟ་བས་བཅད། བར་མཚམས་དམ་སྲི་མནན་ནས་ཐོ་བྱང་གདགས་པ་སོགས་བསྙེན་པའི་ཡན་ལག་ཐིག་རྡུལ་ཚོན། རྒྱན་བཀོད་བྱིན་དབབས། མཆོད་རྫས་བྱིན་རླབས་སོགས་ཉེ་བསྙེན། དེ་ནས་དུས་བཞིའམ་དྲུག་དུ་ཕྲིན་ལས་གཞུང་བསྲང་ནས། གསལ་བ་གསུམ་ལྡན་གྱིས་འཛབ་བཟླས་གཙོ་བོར་སྟོན་པའི་ཚོགས་མཆོད། ཉུལ་སྐྲོད་སོགས། ཞག་དྲུག་བདུན་བྱེད་པ་སྒྲུབ་པ། ནུབ་ཐ་མ་ལ་སྲོད་ལ་ལྷ་ལས། ནམ་གུང་དགྲ་ལས། ཐོ་རངས་ཕྱག་རྒྱ་ལས་དངོས་གྲུབ་བླང་བ་དང་། གཞན་ལ་དབང་བསྐུར་བྱེད་པ་སྒྲུབ་ཆེན་དང་འབྲེལ་བ་དང་། གཞན་ཡང་གཞི་བསྙེན་སོགས་ཆོ་ག་གཅིག་གི་དབང་དུ་བྱས་ནས། ཕུར་བ་གསང་རྒྱུད་ལས། ཏིང་འཛིན་གསུམ་བསྐྱེད་བསྙེན་པ་ཡིན། །བདག་ཉིད་ལྷར་བསྐྱེད་ཉེ་བསྙེན་ཏེ། །ཡུམ་བསྐྱེད་སྒྲུབ་པར་ཤེས་པར་བྱ། །གཞན་རྣམས་སྒྲུབ་པ་ཆེན་པོའོ། །ཞེས་དང་ཡང་ཐུན་དང་པོ་ལ་ལྷ་གང་ཡིན་དེའི་ང་རྒྱལ་བྱ་བ་གཞིར་བཞག་ནས་སྒྲུབ་པའི་དབུ་བཙུག་པ་བསྙེན་པ། ཅི་ཙམ་བསྒྲུབ་པའི་ཞག་གྲངས་ཕྱེད་ཚུན་ཆད་ཉེ་བསྙེན། དེ་ནས་ནུབ་ཐ་མ་མ་གཏོགས་པའི་བར་དངོས་གྲུབ་བསྐུལ་ཞིང་བསྡུ་བ་བསྒྲུབ་པ། ཐ་མ་ལ་དངོས་གྲུབ་བླང་བ་སྒྲུབ་ཆེན་རྣམས་ཏེ། དེ་ལ་དང་པོ་གཉིས་སུ་བདག་མདུན་གསལ་བ་གསུམ་ལྡན་གྱི་བར་དུ་འོད་ཟེར་དཀར་པོའི་འཕྲོ་འདུས་རྒྱུད་དངོས་གྲུབ་ཀྱི་སྣོད་རུང་དུ་བྱ་བ་སྐུ་དང་། སྒྲུབ་པའི་དུས་སུ་འོད་ཟེར་དམར་པོའི་སྤྲོ་བསྡུས་དངོས་གྲུབ་བསྐུལ་བ་གསུམ་དང་། ཐ་མ་ལ་ཕར་མི་སྤྲོ་བར་འོད་ཟེར་མཐིང་ཀའི་རྣམ་པར་དངོས་གྲུབ་བསྡུ་བ་འབའ་ཞིག་བྱ་བ་སྒྲུབ་ཆེན་གྱི་ཡན་ལག་ཏེ་ཐུགས་ཀྱི་དངོས་གྲུབ་བསྒྲུབ་པར་བྱེད་པའོ། །དེ་སྐད་དུ་ལམ་རིམ་ལས། ཟླ་ཕྱེད་ཕྱེད་ཞལ་ཉེ་བསྙེན་པ། །ལྷར་གསལ་འཕྲོ་འདུས་སྣོད་དུ་རུང་། །བཅོ་ལྔ་མར་ཕྱེད་བསྒྲུབ་པ་སྟེ། །འཕྲོ་འདུ་བསྣོལ་མར་བསྒྲུབ་པར་བྱ། །ཞག་གྲངས་ཚང་ནས་རྟགས་བྱུང་ན། །དངོས་གྲུབ་བླང་བ་སྒྲུབ་ཆེན་པོ། །ཞེས་ཟླ་བ་གཅིག་ལ་དཔེར་བརྗོད་ནས་གསུངས་གཞན་འཛབ་དགོང་གི་བསྙེན་སྒྲུབ་ཡན་ལག་བཞི་ནི་དེར་ཤེས་སོ། །དེ་ལྟར་བསྙེན་སྒྲུབ་ཡན་ལག་བཞིའི་ཚུལ་བཞིན་དུ་སྒྲུབ་པས། ལམ་གྱུར་གྱི་འབྲས་བུ་རིག་འཛིན་བཞི་དང་། མཐར་ཐུག་མི་སློབ་པའི་ཟུང་འཇུག་གི་མ་ཧཱ་གུ་རུ་ཆེན་པོའི་གོ་འཕང་བདེ་བླག་ཏུ་འགྲུབ་པའི་དུས་བསྟན་པའང་། གསང་སྙིང་ལས། ཞག་ནི་སུམ་ཅུ་ཕྲག་དྲུག་གམ། །བཅུ་གཉིས་བཅུ་བཞི་བཅུ་དྲུག་གི །དབང་བསྒྱུར་རིགས་ཀྱི་དམ་པ་འགྲུབ། །དེ་ཚེ་བཅུ་དྲུག་ཚུན་ཆད་ཀྱིས། །སྐུ་ལྔ་ལྷུན་གྱིས་གྲུབ་པ་ནི། །ཞེས་གསུངས་སོ། །མོས་བསྒོམ་ཙམ་གྱི་ཕན་ཡོན་ཡང་བྱང་གཏེར་ལས། ལན་གསུམ་སྒྲུབ་པས་དངོས་གྲུབ་རྣམ་གཉིས་ཐོབ། །རིག་འཛིན་ས་ལ་ཐེ་ཚོམ་ཡོད་རེ་ཀན། །ཞེས་སོ། །ཞར་ལ་དེ་དག་ཀུན་གྱི་དུས་སུ་མེད་དུ་མི་རུང་བའི་སྤྱིར་གཅེས་འགའ་ཞིག་གདམས་ན། བསླབ་པའི་མཐའ་བཅུས་གསང་སྔགས་ཀྱི་ཆོས་ལ་འཇུག་དགོས་ཏེ། དེ་ཡང་སྒོ་དབང་གིས་ཕྱེ། སྲོག་དམ་ཚིག་གིས་བཟུང་། ཐག་ལྟ་བས་བཅད། ལམ་ཉམས་སུ་ཏིང་ངེ་འཛིན་གྱིས་བླངས། ལ་སྤྱོད་པས་དོར། དོན་མན་ངག་གིས་སྒྲུབ། རྒྱུད་ཐོས་པས་གྲོལ། སྒོ་ཀུན་ནས་བསྡུར། ཤེས་བྱ་ཕྱོགས་མེད་དུ་བསླབ། དགོས་དོན་དུ་མ་རོ་གཅིག་དུ་བསྡུ་བའོ། །ཞེས་གསུངས་ཀྱང་དེ་དག་ལས་ཀྱང་ཐོག་མར་དབང་ཐོབ་པ་གལ་ཆེ་བས་ན་ཇི་སྐད་དུ། དབང་མ་ཐོབ་ན་དངོས་གྲུབ་མེད། །ཕྱེ་མ་བཙིར་བས་མར་མི་འབྱུང་། །ཞེས་མ་ཐོབ་པའི་སྐྱོན་དང་། དབང་བསྐུར་ཡང་དག་རྒྱུན་ལྡན་ལ། །སྐྱེ་ཞིང་སྐྱེ་བར་དབང་བསྐུར་ཞིང་། །དེ་ཡི་སྐྱེ་བ་བདུན་ན་ནི། །མ་བསྒོམ་པར་ཡང་སངས་རྒྱས་ཐོབ། །ཞེས་སོགས་ཕན་ཡོན་གསུང་བས་ན་དབང་བཞི་རྫོགས་པར་ཐོབ་པ་གཞིར་བཞག་ནས། དེའི་སྲོག་ཏུ་དམ་ཚིག་བསྲུང་དགོས་ཏེ་རྡོ་རྗེ་ཐེག་པའི་ས་ལམ་ཐོག་མཐའ་བར་གསུམ་དུ་དམ་ཚིག་ལ་བརྟེན་ནས་བསྒྲོད་དགོས་ཏེ། ཨ་ཏི་བཀོད་པ་ཆེན་པོ་ལས། རྣལ་འབྱོར་དམ་ཚིག་ལྡན་པ་ཡིས། །དངོས་གྲུབ་ཡ་མཚན་ཆེན་པོ་འགྲུབ། །ཕྲིན་ལས་བཞི་པོ་ཐོགས་མེད་ཅིང་། །ཐེག་པ་མཆོག་ནི་གོང་དུ་འཕེལ། །ཞེས་དང་དམ་ཚིག་བཀོད་པའི་རྒྱུད་ལས། །འདི་ལས་འགལ་བར་མ་བྱས་ན། །རྡོ་རྗེ་འཛིན་པ་རྫོགས་སངས་རྒྱས། །ཚེ་འདི་ཉིད་ལ་ཐོབ་པར་ངེས། །ཞེས་པས་དེས་ན་རྩ་བ་དང་ཡན་ལག་གི་སྤྱི་དང་ཁྱད་པར་ལྷག་པའི་དམ་ཚིག་རྣམས་མིག་གི་འབྲས་བུ་ལྟར་བཙའ་དགོས་ཤིང་ཁྱད་པར་དུ་སྒྲུབ་ཆེན་གྱི་སྐབས་སུ། ཡོངས་རྫོགས་ཆེན་པོའི་རྒྱུད་ལས། བླ་མ་བཀུར་ཞིང་གསུང་མི་བཅག །ཐུན་བཞིའི་རྣལ་འབྱོར་ཡན་མི་བྱ། །ལྷ་དང་སྔགས་ལ་ཐེ་ཚོམ་སྤངས། །མཆེད་ལྕམ་རྣམས་ལ་གདུང་སེམས་བསྐྱེད། །སེམས་ཅན་རྣམས་ལ་སྙིང་རྗེས་སྐྱོངས། །ང་རྒྱལ་རློམ་སེམས་ཞེ་སྡང་སྤངས། །འདོད་ཆགས་ཕྲག་དོག་ཁར་མི་བཏང་། །གསང་སྔགས་ལྟ་སྤྱོད་ཟུང་དུ་འབྲེལ། །རྫོགས་བསྙེན་སྒྲུབ་པ་མཐའ་རུ་དབྱུང་། །ལེ་ལོ་གཉིད་དང་ཆང་དབང་སྤངས། །ཞེས་གསུངས་པ་ལྟ་བུའི་བྱེ་བྲག་ཏུ་གནད་གལ་པོ་ཆེ་དག་ཀྱང་བསྲུང་བར་བྱ། མ་བསྲུང་བའི་ཉེས་པའང་གསང་རྙིང་ལས། ཉམས་གྱུར་ཉེས་པ་བརྗོད་མི་ལང་། །ཞེས་རྩ་བ་ཉམས་ན་རིགས་ཆད་པ་དང་། ཡན་ལག་ཉམས་ན་སྒྲུབ་པ་ཐམས་ཅད་ལོག་པར་འགྱུར་བ་སོགས་གསུངས་པ་ལྟར་རོ། །ལྟ་བ་ནི་དག་པ་གསུམ་དང་། མཉམ་པ་བཞི། རྟོགས་པ་བཞི་ལ་སོགས་པའི་གཏན་ཚིག་གིས་ལྷག་པའི་བདེན་གཉིས་དབྱེར་མེད་ཀྱི་ཆོས་སྐུ་ཆེན་པོ་བློའི་སྤྱོད་ཡུལ་དང་བྲལ་བ་གཏན་ལ་ཕབས་ནས་འཁོར་འདས་རང་སེམས་སུ་ཐག་བཅད་པ་དང་། སྤྱོད་པ་ནི། མཐའ་བཅུ་ལ་གནས་པར་གསུངས་པ་བསྡུ་ན་ལས་དང་པོ་བ་དགེ་སྦྱོངས་གཞོན་ནུ་ལྟ་བུའི་སྤྱོད་པ་བག་དང་ལྡན་པར་སྤྱོད་པ་སྟེ། རྡོ་རྗེ་རྩེ་མོ་ལས། བརྟན་པ་མ་ཐོབ་པར་དུ་ནི། ཁ་ན་མ་ཐོ་རྡུལ་ཙམ་མེད། །སྡོམ་པ་གསུམ་ལ་གནས་པར་བྱ། །ཞེས་སོ། །རྟོགས་པ་རྐྱེན་ཐུབ་ཀྱི་དུས་སུ་སྨྱོན་པ་བརྟུལ་ཞུགས་ཀྱི་སྤྱོད་པ་དང་། རྟོགས་པ་ལ་བྲི་གང་མེད་པའི་དུས་སུ་འདོད་ཡོན་གང་དགར་སྤྱོད་ཅིང་། གཞན་ཕན་བྱེད་པ་རྒྱལ་པོ་ས་འཛིན་གྱི་སྤྱོད་པ་སྟེ་ཐབས་ལམ་བརྟུལ་ཞུགས་དང་། གྲོལ་ལམ་བག་ཡོད་ཀྱི་སྤྱོད་པ་དག་ཚུལ་བཞིན་ཏུ་སྤྱོད་དོ། །ཏིང་ངེ་འཛིན་ལ་མང་དུ་ཡོད་ཀྱང་། མཁན་ཆེན་རིན་པོ་ཆེའི་འདིའི་མཇུག་གི་ཡིག་ཆུང་ལས་གལ་ཆེ་བར་གསུངས་བ་སྲོག་སྡོམ་གཟེར་བཞི་ནི་སྐབས་སུ་བབས་པ་སྟེ། ཡོངས་རྫོགས་ཆེན་པོའི་རྒྱུད་ལས། ཡེ་ཤེས་འཇིག་རྟེན་གང་སྒྲུབ་ཀྱང་། །སྲོག་སྡོམ་གཟེར་བཞིས་མ་ཐེབ་ན། །ནམ་ཡང་དོན་མེད་ཡུག་པ་རྐྱང་། །དྲང་དོན་རྫུན་གྱི་འཁྲུལ་འཁོར་ཡིན། །ཡོངས་རྫོགས་དཔལ་ཆེན་སྲོག་འཕྲོག་ཐབས། །གཅིག་ཤེས་པས་ནི་ཀུན་སྲོག་ཐོབ། །དཔེར་ན་སྒྲ་གཅན་འཛིན་གྱི་ཁས། །ནམ་མཁའི་ཉི་མ་གཅིག་ཟིན་པས། །ཆུ་ཕྲན་སྟོང་གི་ཉི་མ་ཀུན། །མ་བཟུང་བར་ཡང་སྟོང་སྲོག་ཐོབ། །དེ་ཕྱིར་སྲོག་སྡོམ་གཟེར་བཞི་གཅེས། །ཞེས་གསུངས་པས་བསྐྱེད་རྫོགས་ཐམས་ཅད་ཀྱི་སྲོག་ནི་འདི་ལ་འདུས་ཤིང་སྒོ་གསུམ་བྱ་བ་དང་བཅས་པ་ལྷའི་སྐུ་གསུང་ཐུགས་ཕྲིན་ལས་དང་བཅས་པའི་རང་བཞིན་དུ་སྡོམ་པར་བྱེད་པའི་གཟེར་བུ་ལྟ་བུ་ཡིན་པའི་ཕྱིར་རོ། །དེ་ལ་ཏིང་ངེ་འཛིན་ལྷའི་གཟེར་ནི། བསྡུ་ན་རྣམ་པ་གསལ་བ། རྣམ་དག་དྲན་པ། ང་རྒྱལ་བརྟན་པའི་བསྐྱེད་རིམ་ལ་ཉམས་ལྔ་མཐར་ཕྱིན་པའི་ཏིང་འཛིན་གྱིས་བཞག་པས་གསལ་བརྟན་གྱི་ཚད་བརྒྱད་ཐོབ་པ་དང་། དེ་སྟོབས་སུ་གྱུར་ནས། ཡིད་དང་དབང་པོ་རེག་པའི་ཡུལ་གསུམ་གྱད་དུ་གྱུར་པའི་བསྐྱེད་རིམ་ལ་བཞག་པའོ། །དེ་ལ་ལྷའི་དེ་ཁོ་ན་ཉིད་ཞེས་ཀྱང་བྱའོ། །སྙིང་པོ་སྔགས་ཀྱི་གཟེར་ནི་ལྟ་བ་དོན་དམ་པར་མ་སྐྱེས་པ་དང་། རང་བཞིན་མ་འགགས་པར་སྔགས་སུ་གསལ་བ་དང་། ཐུགས་རྗེ་གང་འདུལ་གྱི་སྒོར་ཤར་བའི་སྔགས་ཀྱིས་འགྲོ་བའི་དོན་གཉིས་འགྲུབ་པ་སྟེ། ཡི་གེ་སྐུ་གསུམ་གྱི་རང་བཞིན་དུ་སངས་རྒྱས་པ་ཚུལ་བཞིན་དུ་ཤེས་པས་བསྒྲུབ་ན་འབྲས་བུ་བདེ་མྱུར་དུ་འཐོབ་པ་དང་གཅིག །ཡང་རང་སྣང་མ་འགགས་པའི་སྒོ་སྔགས་སུ་ཤར་བ་ཙམ་ནས་ངོ་བོ་སྤྲོས་མཚན་གང་དུའང་མ་གྲུབ་པ་དང་། རང་རིག་བདེ་གཤེགས་སྙིང་པོའི་དབྱིངས་ཀྱི་གཟུགས་བརྙན་ལྷ་དང་སྔགས་སུ་ཤར་བར་མཉམ་པ་དང་། དེས་ན་ལྷ་སྔགས་ཆོས་ཉིད་དབྱེར་མེད་པའི་རང་བཞིན་ཅན་གྱི་སྔགས་བཟླས་པས་ལྷ་འགྲུབ། ལྷ་བསྒོམ་ནའང་སྔགས་གྲུབ། དེ་གཉིས་ཀྱིས་ཆོས་ཉིད་མངོན་དུ་འགྱུར་བའང་ངོ་བོ་བདག་གཅིག་གི་འབྲེལ་བའི་གནད་ཀྱིས་ད་ལྟ་ལྷ་ཉིད་སྔགས་སུ་འཕྲུལ་བ་བསྒྲུབ་པས། ཕྱིས་སྔགས་ཉིད་ལྷར་བཞེངས་ནས་འགྲུབ་པའི་ནུས་མཐུ་དང་ལྡན་པའི་དོན་ཀྱང་དེ་ཡིན་པས་ན་རྒྱུད་ལས། སྔགས་ཉིད་རྣལ་འབྱོར་མ་ཡི་གཟུགས། །རྣལ་འབྱོར་མ་ཉིད་སྔགས་ཀྱི་གཟུགས། །ཅི་སྟེ་གོ་འཕང་མཆོག་འདོད་ན། །དེ་གཉིས་དབྱེ་བར་མི་བྱའོ། །ཞེས་སོ། །ཡང་སྔགས་ཀྱི་ངོ་བོ་སྟོང་ཆེན་མཉམ་པ་ཉིད་དུ་གྲུབ་པ་ནི་ཆོས་ཉིད་ངོ་བོའི་གྲུབ་པ་དང་། ཡི་གེ་སོ་སོའི་ངོ་བོ་ཐུན་མིན་གྱི་སྣང་བའི་རང་བཞིན་བསླུ་མེད་དུ་གྲུབ་པས་ཆོས་ཅན་རང་བཞིན་གྱི་ཆོས་ཀུན་ལ་མངའ་དབང་འབྱོར་བའི་སངས་རྒྱས་རྣམས་ཀྱི་ཡེ་ཤེས་སྔགས་སུ་རྣམ་པར་འཕྲུལ་བར་བསྟན་པས་བྱིན་གྱི་རླབས་ཀྱིས་གྲུབ་པ། སྔགས་དེ་དག་ལ་དངོས་གྲུབ་བསྒྲུབ་པའི་ནུས་པ་ཐོགས་མེད་མི་བསླུ་བར་ཡོད་པ་ནི་ནུས་པའི་མཐུའི་གྲུབ་པ་སྟེ། ཐུགས་ཐིག་ལས། ཡི་གེ་འདུས་པ་གྲུབ་པ་བཞི། །མཐུ་ཆེན་རེད་པ་གང་གྱུར་བ། །ཞེས་པའི་ཚུལ་གསུམ་གྱིས་སྔགས་ལ་ངེས་པ་ཐོབ་པ་ནི་གསང་སྔགས་ཀྱི་དེ་ཁོ་ན་ཉིད་དོ། །ལྟ་བ་དེའི་གཞི་བཟུང་ནས་བློ་ཐེ་ཚོམ་དང་བྲལ་བས་བསྒྲུབ་ན་དངོས་གྲུབ་རྣམ་གཉིས་བདེ་བླག་དུ་ཐོབ་པ་ཡིན་ལ་གཞན་དུ་ནི་ལྷ་འགྲུབ་པ་སྲིད་མཐའ་མ་ཁེག་ཙམ་དུ་སྔོན་གྱི་གྲུབ་པ་དག་གི་བཞེད་པ་ལྟར་རོ། །བཟླ་ཚུལ་ནི་ལམ་རིམ་ལས། སྐྱོན་བཅུ་སྤངས་ཤིང་རྣམ་གསུམ་གྱིས། །བཟླས་པ་གྲངས་བཞིན་རྫོགས་པར་བྱ། །ཞེས་བཤད་དེ་རྣམ་གསུམ་ནི་གསལ་བ་གསུམ་དང་། རྡོ་རྗེ་གསུམ། ཕྲ་མོ་གསུམ་གྱི་བཟླ་ལུགས་སྐབས་བབས་གཞུང་འབྲེལ་གྱི་སྒོ་ནས། ཐབས་དང་ཤེས་རབ་གཉིས་སུ་མེད་པའི་རང་བཞིན་སྔགས་སུ་ཤར་བའི་གསང་སྔགས། རིག་སྔགས། གཟུངས་སྔགས། འབོད་སྔགས་ཐམས་ཅད་ངོ་བོ་ཉིད་གཅིག་ཏུ་གུ་རུ་སིདྡྷི་ཤེས་པ་བརྒྱད་ལྡན་དུ་དྲིལ་དེ་བཟླའོ། །དེ་ལའང་དབྱངས་བཟླས། ཤུབ་བཟླས། ཡིད་བཟླས། འགོགས་བཟླས། རྡོར་བཟླས་སོགས་ཡོད་ཀྱང་། སྐབས་སུ་བབས་པ་དབྱངས་བཟླས་ལའང་དྲུག་དུ་འདྲེན་ཚུལ་ཡོད་ཀྱང་འདིར་ཚངས་པའི་དབྱངས་ཀྱི་འདྲེན་སྟངས་སུ་བཟླ་བ་ལ་ཡི་གེའི་སྐྱེ་གནས་དང་། སྒྲའི་འབྱིན་ཚུལ། ལྕེ་མཆུའི་བྱེད་རྩོལ་མ་ལོག་ཅིང་སྐྱོན་བཅུ་སྤང་བས་བཟླ་བར་བྱ་སྟེ། སྐྱོན་བཅུ་ནི། རྔམ་གློག་ལས། སྒྲ་ཆེན་མ་ཡིན་ཆུང་བ་མིན། །མགྱོགས་པར་མ་ཡིན་བུལ་བར་མིན། །དྲག་པོར་མ་ཡིན་ཞན་པར་མིན། །ཡིག་འབྲུ་ཡན་ལག་ཉམས་པ་མིན། །ཡེངས་བས་མ་ཡིན་སྨྲ་བཞིན་མིན། །གླལ་སོགས་བར་དུ་ཆོད་པས་མིན། །ཞེས་སོ། །དེ་ལ་སྒྲ་དོན་ཤན་སྦྱོར་ཤེས་ན་དོན་གྱི་གཟུངས་འགྲུབ་པའི་ཕུན་སུམ་ཚོགས་པས་འདིར་སིདྡྷི་ནི། རྡོ་རྗེའི་བླ་མ་པདྨ་དངོས་གྲུབ་སྩོལ་ཞེས་པའོ། །འོན་ཀྱང་སྔོན་གསང་སྔགས་གསུངས་པ་པོའི་གང་ལྟར་གསུངས་བ་དེ་ལྟར་བྱིན་གྱིས་བརླབས་ཡོད་པས་དེ་ལྟར་བཟླ་བ་ལས་གཞན་དུ་བསྒྱུར་ནས་བཟླས་ན་དངོས་གྲུབ་མེད་པས། དེ་རང་སོར་བཞག་ནས་བཟླའོ། །ཡང་སེམས་རྣམ་པར་གཡེངས་བས་བསྐལ་བར་བཟླས་ཀྱང་ངག་སྒྲིབ་སྲབ་ཙམ་ལས་འབྲས་བུ་ཆེར་མི་འབྱུང་བས་རྩེ་གཅིག་པས་ཏིང་ངེ་འཛིན་ལ་མཉམ་པར་བཞག་དགོས་ཏེ། ཨོ་རྒྱན་ཆེན་པོའི། མ་ཡེངས་ཏིང་འཛིན་ལྡན་པས་བཟླ། །གཞན་དུ་ཡེངས་བར་གྱུར་ན་ནི། །བསྐལ་བར་བཟླས་ཀྱང་འབྲས་མི་འབྱིན། །ཞེས་སོ། །བཟླས་དམིགས་ནི་དེ་ཡང་བསྙེན་པའི་སྐབས་སུ་དེའི་ཡན་ལག་བཀོད་པའི་བཟླས་པ་ཟླ་བ་སྐར་ཕྲེང་ལྟར་བཟླའོ། །ཉེ་བསྙེན་གྱི་སྐབས་སུ་དེའི་ཡན་ལག་ཏུ། འགལ་མེ་དང་། ཁྱོགས་དང་། དོ་ལིའི་བཟླས་པ་ལྟར་བཟླ། སྒྲུབ་པའི་དུས་སུ་དེའི་ཡན་ལག །རྒྱལ་པོའི་བཀའ་ཆེམ་ལྟ་བུ་དང་། སྒྲུབ་ཆེན་གྱི་དུས་སུ་དེའི་ཡན་ལག་བུང་བ་ཚང་ཞིག་ལྟར་དུས་དང་སྦྱར་ནས་བཟླའོ། །དེའི་བཟླས༵་བརྗོད༵་ཀྱི༵་དེ༵་ཁོ༵་ན༵་ཉིད༵་བསྟན་ཟིན་ནས། ད་ནི་བད༵ག་གི༵་དེ༵་ཁོ༵་ན༵་ཉིད༵་དགོངས་པ་མི་འགྱུར་བའི་གཟེར་ནི། སློབ་དཔོན་སངས་རྒྱས་གསང་བས། བདག་གི་དེ་ཁོ་ན་ཉིད་ནི་རིག་པས་དཔྱད་པའི་སྟོང་ཙམ་ལ་མི་བྱ་ཡི་བདག་གི་དེ་ཁོ་ན་ཉིད་གཉིས་སུ་མེད་པའི་ཡེ་ཤེས་ཀྱི་མཚན་ཉིད་དེ་ཐོབ་ན་སངས་རྒྱས་སུ་འགྱུར་བས་དེ་འཛིན་ཞེས་གསུངས་ཏེ། དེ་ལ་འཁོར་འདས་ལམ་གསུམ་གྱིས་བསྡུས་པའི་ཆོས་ཐམས་ཅད་རང་སེམས་མ་འགགས་པའི་རྩལ་དང་རོལ་བར་ཤར་བ་ལས་གཞན་རང་རྒྱུད་པར་གྲུབ་པ་རྡུལ་ཙམ་ཡང་མེད་དེ། གུར་ལས། རིན་ཆེན་སེམས་ལས་ཕྱིར་གྱུར་བའི། །སངས་རྒྱས་མེད་ཅིང་སེམས་ཅན་མེད། །ཅེས་སོ། །དེའི་ན་སེམས་ཀྱི་རྡོ་རྗེ་རིག་པའི་ཡེ་ཤེས་ཀྱི་ངོ་བོ་སྟོང་པ་ཆོས་སྐུ། རང་བཞིན་གསལ་བ་ལོངས་སྐུ། ཐུགས་རྗེ་ཀུན་ཁྱབ་ཤར་གྲོལ་སྤྲུལ་སྐུ་སྟེ། སྐུ་གསུམ་དང་སྐུ་གསུང་ཐུགས་ཀྱི་རང་བཞིན་དུ་སངས་རྒྱས་པ་ཉིད་དཀྱིལ་འཁོར་ཀུན་གྱི་སྒྲུབ་གཞི་ཡིན་ཏེ། སྒྱུ་འཕྲུལ་ལས། སེམས་ཉིད་རྫོགས་པའི་སངས་རྒྱས་པས། །སངས་རྒྱས་གཞན་དུ་མ་ཚོལ་ཅིག །ཅེས་དང་། བརྟགས་གཉིས་ལས། སེམས་ཉིད་རྫོགས་པའི་སངས་རྒྱས་ཏེ། །སངས་རྒྱས་གཞན་དུ་བསྟན་པ་མེད། །ཅེས་སོ། །དེ་ལྟ་བུའི་མི་འགྱུར་བའི་བདེ་ཆེན་དང་རྣམ་ཀུན་མཆོག་ལྡན་གྱི་སྟོང་ཉིད་འདུ་འབྲལ་མེད་པ་ནི་ལྷ་ཐམས་ཅད་ཀྱི་ངོ་བོ་ཡིན་པས། གལ་བོ་ལས། བདེ་སྟོང་ཟུང་འཇུག་ཆེན་པོ་ནི། །ཧེ་རུ་ཀ་ཡི་རང་བཞིན་ཡིན། །ཞེས་དང་། ཧེ་བཛྲ་ལས། སྤྲོས་པ་མེད་པའི་རང་བཞིན་ལ། །ལྷ་དང་སྔགས་ནི་ཡང་དག་གནས། །ཞེས་སོ། །དེའི་རྩལ་ལས་ཤར་བའི་འདྲེ་དང་ལྷ་དང་སྔགས་སུ་སྣང་བ་ཐམས་ཅད་སྣང་སྟོང་རོ་མཉམ་ཡེ་ཤེས་ཀྱི་སྐུ་གསུང་ཐུགས་སྒྱུ་འཕྲུལ་དྲྭ་བའི་འཁོར་ལོ་སྣང་སྲིད་གཞིར་བཞེངས་ཀྱི་དཀྱིལ་འཁོར་གྱི་རང་བཞིན་དུ་ཡེ་ནས་སངས་རྒྱས་པ་ཉིད་ལས་གུད་ན་སྒྲུབ་བྱ་སྒྲུབ་བྱེད་དག་མ་དག་གཉིས་ཆོས་ཀྱི་རྟོག་འཛིན་ཐམས་ཅད་གཉིས་མེད་མཉམ་པ་ཉིད་ཀྱི་ཀློང་། སྤྲོས་བྲལ་ཟབ་མོ་བརྒྱད་ལྡན་དུ་རྟོགས་པའི་ལྟ་བའི་གདེངས་དང་མ་བྲལ་བའི་ངང་ནས་སྒྲུབ་པས། འདྲེ་སྒོམ་ཀྱང་ལྷ་འགྲུབ་པའི་མན་ངག་གྱ་ནོམ་ལྷར་ཞེན་གྱི་མཚན་མ་འཇོམས་པའི་ཐོ་ལུམ། ཐུགས་འོད་གསལ་གྱི་རྣལ་འབྱོར་བསྐྱེད་རྫོགས་ཐམས་ཅད་ཀྱི་སྲོག་བླ་ན་མེད་པ་ནམ་ཡང་གལ་ཆེ་བའི་གནད་ཀྱི་གཟེར་བུ་སྟེ། དཔལ་ཆེན་ཞལ་ལུང་ལས། །དགོངས་པའི་གཟེར་ནི་ཞི་ཁྲོའི་ལྷ། །ཡོངས་རྫོགས་དཔལ་ཆེན་རང་སེམས་ལས། །གུད་ན་མེད་ཀྱང་རུ་ཏྲ་ཡང་། །ལོགས་སུ་མེད་དོ་རང་གི་སེམས། །སེམས་ཉིད་སྟོང་བ་ཆོས་ཀྱི་སྐུ། །གསལ་ལ་མ་འདྲེས་ལོངས་སྤྱོད་རྫོགས། །སྣ་ཚོགས་རང་ཤར་སྤྲུལ་བའི་སྐུ། །སྣང་བ་ཡབ་ལ་སྟོང་བ་ཡུམ། །སྣང་སྟོང་དབྱེར་མེད་ཡེ་ཤེས་སྐུ། །འགྱུ་དྲན་རྣམ་རྟོག་བསམ་ཡས་ཀྱང་། །ཡོངས་སུ་རྫོགས་པ་དཔལ་གྱི་འཁོར། །བསམ་གྱིས་མི་ཁྱབ་ཡེ་སངས་རྒྱས། །རང་བཞིན་ཉིད་ལས་གཡོས་པ་མེད། །དགོངས་པ་མི་འགྱུར་གཟེར་མེད་ན། །དཔལ་ཆེན་སྒྲུབ་ཀྱང་ཐུན་མོང་ལས། །མཆོག་མི་འགྲུབ་ཅིང་རུ་ཏྲར་གོལ། །ཞེས་དང་། རྩ་རྒྱུད་པད་སྡོང་བརྩེགས་པ་ལས། དེ་ཉིད་ལྡན་པའི་རྣལ་འབྱོར་གྱིས། །དུར་ཁྲོད་འདྲེ་ངན་བསྒྲུབས་གྱུར་ཀྱང་། །མཆོག་དང་ཐུན་མོང་འབྲས་བུ་གང་། །ཅི་འདོད་རང་བྱུང་ལྷུན་གྲུབ་འབྱུང་། །དེ་ཉིད་མ་རྟོགས་ཨ་འཐས་བློས། །ཡེ་ཤེས་སེམས་དཔའ་བསྒྲུབས་གྱུར་ཀྱང་། །གནས་སྐབས་བདེན་འབྲས་ཕྲ་བུ་ལས། །ཡང་དག་འབྲས་བུ་སྲིད་མཐའ་ཙམ། །ཞེས་སོ། །༼ འཕྲོ་འདུའི་དེ་ཁོ་ན་ཉིད། མཆན། ༽ འཕྲོ་འདུ་ཕྲིན་ལས་ཀྱི་གཟེར་ནི། གོང་གི་སྐར་ཕྲེང་མ་གཏོགས་པའི་བཟླས་དམིགས་རྣམས་ཀྱང་འདིར་གཏོགས་ལ། ཁྱད་པར་དུ་ལྷའི་ཐུགས་ཀ་ནས་དུས་དང་བསྟུན་པའི་འོད་ཟེར་དཀར་དམར་མཐིང་ཀའམ་སྣ་ལྔ་སོགས་འཕྲོས་ཏེ། ཞི་རྒྱས་དབང་དྲག་ཐུན་མཆོག་གི་དངོས་གྲུབ་སྒྲུབ་པའི་འཕྲོ་འདུས་མ་མདེ་ཁ་བསྒྱུར་བའོ། །དེའི་དགོས་པ་ནི་རྒྱུད་ལས། འཕྲོ་འདུ་སྣ་ཚོགས་གཟེར་མེད་ན། དམིགས་གཏད་གཅིག་གིས་དོན་མི་འགྲུབ། །འཕྲོ་འདུ་ལས་ཁ་བསྒྱུར་ཤེས་ན། །ཐེའུ་རང་ཐ་ཆུང་ཞིག་གིས་ཀྱང་། །ཕྲིན་ལས་ཐོགས་མེད་ལས་ཀུན་འགྲུབ། །ཞེས་སོ། །ཡང་དེ་དག་གི་དོན་མདོར་བསྡུ་ན་གསལ་བརྟན་དག་གསུམ་ལྡན་པའི་བསྐྱེད་རིམ་གྱི་ལྷའི་སྐུ་ལ་སེམས་རྩེ་གཅིག་དུ་འཇོག་པ་ནི་ཏིང་ངེ་འཛིན་ལྷའི་གཟེར་དང་། གཉུག་མའི་ཡེ་ཤེས་གཞོམ་མེད་སྔགས་ཀྱི་དེ་ཁོ་ན་ཉིད་དུ་ངེས་པའི་ངང་ནས་སྔགས་བཟླ་བ། སྙིང་པོ་སྔགས་ཀྱི་གཟེར། ལྷ་སྔགས་རིག་པའི་རང་རྩལ་དུ་ཤེས་ཤིང་རིག་པ་ཆོས་ཟད་ཀ་དག་གི་དགོངས་པ་ལས་མི་གཡོ་བ་དགོངས་པ་མི་འགྱུར་བའི་གཟེར། འོད་ཟེར་སྤྲོ་བསྡུ་སྤྱི་དང་བྱེ་བྲག་ཐུན་མཆོག་གི་ཕྲིན་ལས་རབ་འབྱམས་བསྒྲུབ་པའི་མདེ་ཁ་བསྒྱུར་བ་ནི་འཕྲོ་འདུ་ཕྲིན་ལས་ཀྱི་གཟེར་ཏེ་ལྟ་བསྒོམ་སྤྱོད་གསུམ། སྐུ་གསུང་ཐུགས་ཕྲིན་ལས་དང་བཅས་པའི་རྣལ་འབྱོར་ཀྱང་ཡིན་ནོ། །ད་ནི་གལ་ཆེ་ཤོས་ཀྱི་རྩ་བ་དེ་དག་གི་ཐུགས་ལ་བཅིངས་ཏེ། དེ་དག་ལ་སྒྲོ་འདོགས་ཡོངས་སུ་ཆོད་ཅིང་སྒྲུབ་ཚུལ་གྱི་རྣམ་པ་ལ་མི་རྨོངས་མི་འཁྲུགས་པའི་ཕྱིར་ཤེས་བྱ་ཕྱོགས་མེད་ལ་སྦྱངས་ཤིང་དེ་དག་གི་སྙིང་པོ་གཅིག་དུ་བསྡུས་ནས་དེ་རྒྱུད་ཐོག་ཏུ་བསྐོར་ནས་གཞན་ལ་སྐྱོན་རྟོག་གི་མིག་སྒོར་མི་འགྲོ་བ་ཞིག་ཨེ་ཐོན་བལྟ་བ་དང་། དེ་དག་ཀུན་གྱི་གནད་རྫོགས་པའི་རྒྱུད་སྒྲུབ་ཐབས། སྒྲུབ་ཐབས་ཆོག་འགྲིགས། ཆོག་འགྲིགས་ཕྱག་བཞེས། ཕྱག་བཞེས་མན་ངག་དང་འབྲེལ་བའི་སྒོ་ནས་བསྒྲུབ་པར་བྱ་བའོ། །ལས་མཐའ་རྒྱས་ཀྱི་ཆོ་གའི་མཇུག་བསྐྱང་བ་ནི། ལས་བྱས་པ་རྣམས་དོན་ཡོད་པར་བྱ་ཕྱིར་མར་མེའི་སྨོན་ལམ། ཐོ་བྱང་བསྡུ་བ། དཀྱིལ་འཁོར་བསྡུ་ཞིང་། རྡུལ་མཚོན་ཆུར་གཤེགས་པ། སྨོན་ལམ། བཀྲ་ཤིས་ཡན་བྱ་བའོ། །གསུམ་པ་དེ་ལྟ་བའི་སྒྲུབ་པ་ཉམས་སུ་ལེན་པའི་སྐབས་སུ་རྒྱུན་གྱི་སྤྱོད་པ་རང་གཞན་གྱི་ལུས་སུ་སྣང་བ་སྐུ་ལྔ། ཟིན་མ་ཟིན་གྱི་སྒྲ་སྐད་ཐམས་ཅད་གསུང་ལྔ། དྲན་རྟོག་ཐམས་ཅད་ཐུགས་ལྔ། འདོད་ཡོན་དང་གནས་ཡུལ་ཐམས་ཅད་ཡོན་ཏན་ལྔ། ཕྱག་རྒྱ་བྲོ་གར་ལ་སོགས་ལས་སུ་བྱ་བ་ཐམས་ཅད་ཕྲིན་ལས་ལྔའི་རང་བཞིན་དུ་བལྟ་བས་སྣང་སྤྱོད་ཐམས་ཅད་དཀྱིལ་འཁོར་གསུམ་དུ་ཡེ་ནས་ཡིན་པ་ལ་ཡིན་པར་ཤེས་པར་བྱ་དགོས་ཏེ། མུ་ཏིག་ཕྲེང་བ་ལས་ཇི་ལྟར་སྨྲ་དང་བྱ་བྱེད་རྣམས། །སྟོང་རིག་གསལ་བའི་སྤྱོད་པ་ཡིན། །བཟང་དང་ངན་པའི་རྟོག་པ་རྣམས། །སྒོམ་པ་ཆུ་བོའི་ཀློང་ཆེན་ཡིན། །ལོག་ལྟ་ཡང་དག་འདོད་པ་རྣམས། །རྣལ་འབྱོར་རིས་མེད་ལྟ་བ་ཡིན། །རེ་དང་དོགས་པར་འཛིན་པ་ཀུན། །ཟང་མ་ཐལ་བྱུང་འབྲས་བུ་ཡིན། །ཕྱག་རྒྱ་ཆེན་པོ་མངོན་འདོད་པས། །བཟའ་དང་བཏུང་བ་བསྙེན་པ་ལ། །ཉལ་དང་འདུག་པ་སྒྲུབ་པའོ། །འདུ་བྱེད་རྣམས་ནི་ལྷག་གནས་ཡིན། །ཀླད་དང་ལུད་པ་དཀྱིལ་འཁོར་སྒྲུབ། །སྟོང་གསུམ་ཐམས་ཅད་དཀྱིལ་འཁོར་ལ། །ཆར་དང་ཁུ་རླངས་ཆག་ཆག་བཏབ། །འགྲོ་བའི་ལམ་དམིགས་ཐིག་ཆེན་ཏེ། །རྐང་བའི་རྗེས་ནི་རྡུལ་ཚོན་རིས། །འགྲོ་བར་འདོད་པ་སྟངས་སྟབས་ཉིད། །ཡན་ལག་བསྐྱོད་པ་ཕྱག་རྒྱའོ། །ཇི་ལྟར་སྨྲས་པ་སྔགས་ཀྱི་ཚིག །བསམ་པ་རྣམས་ནི་བསྐྱེད་རིམ་ཡིན། ཡིད་ལ་འགྱུ་བ་མཆོད་པ་ཉིད། །གཟུགས་སུ་སྣང་བ་ལྷ་ཡི་སྐུ། །སྒྲ་ཆེན་བརྗོད་པ་རོལ་མོ་ཉིད། །ཅེས་དང་། སྨིན་གཏེར་གྱིས། སྣང་གྲགས་རིགས་གསུམ ༴ དེ་དག་ནི་གཙོ་བོར་བསྐྱེད་རིམ་གྱི་ངོ་སྐལ་ཡིན་ལ། གཞན་ཡང་རྫོགས་རིམ་དང་ཟུང་དུ་འཇུག་པའི་ཤེས་པ་བཅུ་ལྡན་འཇིགས་གླིང་གིས་གསུངས་པ་ལྟ་བུའི་སྒོ་ནས་གནས་དགོས་སོ། །འདིར་མ་ཟད་བླ་མེད་གྱི་དབང་ཐོབ་པའི་རྣལ་འབྱོར་བས་རྟག་ཏུ་དག་སྣང་འདི་ལ་མ་གནས་ན་རྩ་ལྟུང་ཆེན་པོ་ཡིན་པས་ཐུགས་ལ་བཅིང་བ་དང་། གཞན་ཡང་ཕྱི་སོ་ཐར། ནང་བྱང་སེམས། གསང་བ་རིག་འཛིན་གྱི་བསླབ་སྡོམ་ལ་གནས་པ་གཞིར་བཞག་གི་སྟེང་དུ། སྔགས་ཆོག་འདི་ལྟ་བུའི་དུས་སུ་རྡོར་དྲིལ་ནི་ངེས་པར་ཡོད་དགོས་ཏེ། དཀྱིལ་འཁོར་ཐམས་ཅད་ཀྱི་ངོ་བོ་དང་ལྷའི་བླ་རྡོ་གསང་སྔགས་པ་རྣམས་ཀྱི་འབྲལ་སྤང་། རྡོ་རྗེ་རིགས་ཀྱི་དམ་ཚིག་གི་བཅིང་བའི་ཕྱག་རྒྱ་ཡིན་ཞིང་། འདིའི་བསྐུལ་བས་གསང་སྔགས་ཐམས་ཅད་འགྲུབ་ཅིང་ཆོ་གའི་ལྷག་ཆད་སྐོང་བར་བྱེད་པས་མེད་དུ་མི་རུང་བའང་རྡོ་རྗེ་རྩེ་མོ་ལས། རྡོ་རྗེ་དྲིལ་དུ་དཀྲོལ་བ་ཡིས། ཆོ་ག་ཆད་དམ་ལྷག་ཀྱང་རུང་། །འགྲུབ་འགྱུར་ཉེས་པ་མི་འབྱུང་ངོ་། །ཞེས་དང་། དཔལ་མཆོག་ལས། བསྒྲུབ་པའི་ཆོ་ག་ཐམས་ཅད་ལ། །རྡོ་རྗེ་དྲིལ་བུའི་རབ་བསྐུལ་བས། །ཆོ་ག་ལྷག་གམ་མ་ཚང་ཡང་། །འགྲུབ་འགྱུར་སྨད་པར་མི་བྱའོ། །ཞེས་དང་། བདུད་རྩི་རྒྱ་མཚོ་འཁྱིལ་བའི་རྒྱུད་ལས། ཆོས་ཉིད་རང་རྟགས་སྲོག་འཁོར་ལོ། །རྡོ་རྗེ་དྲིལ་བུ་ཡང་དག་བཟུང་། །ཞེས་སོ། །ཡང་བཞུགས་ཚུལ་ཀྱང་དྲང་པོ་བཞི་ལྡན་དུ་བཞུགས་པས་རླུང་སེམས་ཡེ་ཤེས་སུ་རྒྱུ་བས་བསྐྱེད་རྫོགས་འགྲུབ་པ་དང་། ཉམས་ཆགས་སྐོང་བ་གནས་ལུགས་རྟོགས་པ་ལ་སོགས་པའི་ཡོན་ཏན་ཡོད་པས་ཀློང་གསལ་ལས། ལུས་དྲང་བས་ནི་རྩ་དྲང་ཞིང་། །རྩ་ལས་རླུང་དང་དེ་ལས་སེམས། །དེ་ལས་ཡེ་ཤེས་མངོན་དུ་འགྱུར། །ཞེས་དང་། ཐར་མདོ་ལས། དྲང་པོར་འདུག་ལ་ཡང་དག་བལྟ། །འདི་ནི་འགྱོད་ཚངས་མཆོག་ཡིན་ནོ། །ཞེས་སོ། །དེས་ན་ལུས་ཚུགས་བཟུང་སྟེ་བཞུགས་པ་ལས། གློ་ཕབས་པ་དང་། ཉལ་འཁྲིས་སོགས་མི་བྱ་ཞིང་ཁྱད་པར་དུ་ཞལ་མར་གྱུ་ནས་མི་སྐྱ་ཕོ་མོ་ཕར་མཇལ་ནས། བལྟ་དགོད་མིག་བརྡ་མཆུ་ཚུགས་སོགས་བྱས་ནས་ཁྱིམ་པས་དད་པ་ལོག་པར་བྱེད་པ་དང་། གཞན་ཡང་དམ་ཚིག་གི་རྫས་རྣམས་དང་གྲོགས་རྣམས་ལ་འཕྱ་བ་དགོད་པ་ཤགས་དང་། གྲྭལ་སོགས་རྩོད་པ་དང་ངག་འཆལ་རྩེད་མོ་རྣམ་གཡེང་ཆགས་སྡང་འཐབ་དཀྲོལ་མཁོན་ཞེ་བཞག །གཞན་ཡང་གྲྭལ་ནས་མ་རབས་སྤྲང་བོའི་སྤྱོད་པ། ཕོར་བས་ས་བརྡུང་བ་སོགས་མི་བྱེད་ཏེ། རིན་ཆེན་ཕྲེང་བ་ལས། བཟླས་པ་བྱེད་ཚེ་ལོང་གཏམ་ཀྱལ་ཀ་དང་། ཁྲོ་དང་འཐབ་དང་ཤགས་དང་འཇག་འཛིན་དང་། །ཞུམ་དང་ལྷག་པའི་ང་རྒྱལ་རྣམ་པར་སྤངས། །སྒྲ་དང་རྣམ་རྟོག་སྤྲོས་པ་རྣམ་པར་བཅད། །ལྷ་དང་སྔགས་ལས་གཞན་ལ་མི་བསམ་མོ། །ཞེས་སོ། །ཡང་གྲྭལ་དུ་འཚོགས་དུས་བརྡ་དང་བརྡ་ལན་ལྷ་དང་བླ་མ་ལ་གྲྭལ་ཕྱག་བསླབ་པ་རྒན་རིམ་ལ་ཚུལ་ཕྱག་ཆབ་ལེན་ལྷམ་ཕུད་སོགས་ཆོས་འདུལ་བ་ནས་ཇི་སྐད་གསུངས་བ་རྣམས་ཚུལ་བཞིན་མཛད་པ་དང་། ཁྱད་པར་དབྱངས་ཁ་འགྲིགས། ཕྱག་རྒྱ་ལག་འགྲིགས། རྒྱབ་གོས་འགྲིགས། འབུད་བརྡུང་དཀྲོལ་འགྲིགས་སོགས་བྱེད་པ་ཚུལ་བཞིན་དུ་དགོས་ཏེ། འདི་དག་ཀྱང་མཛེས་འདོད་སྙན་འདོད་ཙམ་ཞིག་མིན་པར་དགོས་པ་ཆེན་པོ་ཡོད་དེ། བཅོམ་ལྡན་འདས་ཀྱི་སྦྱིན་བདག་དད་པར་བྱ་བ་དང་། དཀོན་མཆོག་མཆོད་དོན་དུ་དབྱངས་ཀྱི་ང་རོ་བྱ་བར་གསུངས་ཏེ། འདུལ་བ་ལུང་ལས། སྟོན་པའི་ཡོན་ཏན་ཡང་དག་པར་བསྒྲགས་པ་དང་རྒྱུན་ཆགས་གསུམ་པ་འདོན་པ་ལ་དབྱངས་ཀྱི་ང་རོ་བྱའོ། །ཞེས་དང་འདུལ་བ་སུམ་བརྒྱ་བ་ལས། ཆོས་སྒྲོགས་བྱེད་པའི་གླུ་ནི་ཉེས་པ་མེད། །སྟོན་པའི་ཡོན་ཏན་བརྗོད་པའང་དེ་བཞིན་ནོ། །དམ་ཆོས་ཆེད་དུ་གླུ་ནི་མི་ཤེས་ན། །དབེན་པར་སོང་སྟེ་རབ་ཏུ་བསླབ་པར་བྱ། །ཞེས་དང་། གུ་རུའི་བཀའ་ལས། །གཏེར་དུ་སྦས་པའི་གསང་སྔགས་ཆོ་ག་རྣམས། །བོན་གྱེར་མི་བྱ་ཚིག་དང་དོན་དུ་སྡེབས། །འུར་ཀློག་མི་བྱ་སྙན་པའི་དབྱངས་ཀྱི་བརྗོད། །ཅི་ཕྱིར་ཞེ་ན་གསང་སྔགས་གྱེར་ཞིང་སྒོམ། །ཞེས་དང་། རྒྱུད་ལས། ཆེན་པོ་དྲུག་ལ་མ་གྱེར་ན། །ཡོ་ག་དབྱངས་ཀྱི་བསྟན་པ་ནུབ། །ཞེས་པས་ང་རོ་བཞི་ཡན་ལག་བཅུ་གཉིས། །སྤེལ་མས་སྦྱོར་བ་བསམ་ཡས། ལེན་ཚུལ་བཅུ་གཉིས། སྐྱོན་དྲུག་སྤྱངས་བ་བྱང་འདྲེན་གྱི་རྩ་ནས་བསླབ་ཏེ་ཤེས་པར་བྱས་ལ། དེར་འཁྲི་ཞིང་ཁ་གཅིག་ནས་བུད་པ་ལྟ་བུ་ཞིག་དགོས་སོ། །དེ་བཞིན་དུ་རོལ་མོ་ཡང་བརྡུང་ཚུལ། སྤྱིར་གྱི་རོལ་མོ་གང་དཀྲོལ་ཡང་། །དམ་དུ་བཟུང་བར་མི་བྱ་ཞིང་། །བྲང་ལག་མི་སྦྱར་མན་ངག་ཡིན། །ཞེས་སོགས་ལྟར་སྒྲ་ཐབས་ཀྱི་རྣམ་དབྱེ་མཁས་པའི་འདྲེན་བཅུ་གཉིས་ལ་སྦྱར་དགོས་ཤིང་རྔ་ཐབས་ཡང་སྐྱོན་བཞི་སྤངས་ནས་ཚུལ་བརྒྱད་ལྡན་དུ་བརྡུང་བར་ཁྲོ་བོ་སྟོབས་རྒྱུད་ལས། ཧཱུྃ་ཞི་བའི་རྔ་བརྡུང་བྱེད་པ་ན། །རྔ་ཐབས་དལ་ལ་ལྷོད་པས་བརྡུང་། །རྒྱས་པའི་རྔ་བརྡུང་བྱེད་པ་ན། །རྔ་ཐབས་གསལ་ལ་འཁྲོལ་བར་བརྡུང་། །དབང་གི་རྔ་བརྡུང་བྱེད་པ་ན། །རྔ་ཐབས་སྙན་ལ་འཇེབ་བར་བརྡུང་། །དྲག་པོའི་རྔ་བརྡུང་བྱེད་པ་ན། །རྔ་ཐབས་དྲག་ལ་མྱུར་བར་བརྡུང་། །ཞེས་སོགས་གསུངས་པ་ལྟར་ཕྱག་ལེན་མ་འཁྱུག་པར་བྱ། གཞན་ཡང་དབྱངས་རོལ་དུང་རྒྱག་སོགས་གང་ལ་ཡང་སྔར་ཡོད་ཚུགས་ལྡན་ལས་བློ་བཟོས་འདྲ་འབུད་སོགས་བྱས་ན། བྱིན་རླབས་དང་དགོས་པ་ཅི་ཡང་མེད་པས་གང་ཡིན་གྱི་ལད་མོ་དང་བཅོས་བསྒྱུར་མི་བྱ། ཕྱག་རྒྱ་ནི་སྒོ་གསུམ་རྡོ་རྗེ་གྱི་རོལ་བ་ལས་མི་འདའ་བར་རྒྱས་བཏབས་པས་མཐར་ཐུག་མངོན་སངས་རྒྱས་པའི་ཕན་ཡོན་ཡོད་དེ་རྒྱས་པ་ལས། འདའ་དཀའ་ཇི་བཞིན་མི་ཤིགས་པའི་། །རྒྱལ་པོའི་ཕྱག་རྒྱ་མཆོག་གི་གནས། །བདག་ཉིད་ཆེན་པོའི་མཚན་མའི་གཟུགས། །ཕྱག་རྒྱ་ཞེས་ནི་བསྒྲགས་པ་ཡིན། །ཞེས་གྲུབ་པ་བཞི་ལྡན་དུ་ཡོད་པ་ལ་བཅས་བཅོས་ག་ལ་ཉན་དེ་འགྲིགས་གལ་ཆེ་ཡང་རྒྱབ་གོས་འགྲིགས་ལའང་དགོས་པ་ཆེ་སྟེ། དད་ལྡན་དྭངས་བ་འདྲེན་པའི་མིག་རྒྱན་ཡང་ཡིན་ལ། རང་ལུས་ལྷ་སྐུ་ཡིན་པ་དང་། དུས་མཆོད་འདི་ལྟ་བུའི་དུས་མཆོད་པའི་ཕྱག་རྒྱར་འགྱུར་བའི་ཕྱིར་རྒྱུད་ལས། རྒྱན་དང་བགོ་བའི་ཕྱག་རྒྱ་ཡིས། །འབར་བའི་རྒྱལ་པོ་ཐུབ་མེད་འགྲུབ། །ཞེས་སོ། །གཞན་ཡང་འཆམ་བྲོ་གར་བསྟོད་གླུ་ཚོགས་གླུ་སོགས་ཀྱི་དགོས་པ་བསམ་གྱིས་མི་ཁྱབ་སྟེ་རྒྱུད་ལས། བྲོ་གར་གླུ་ཚིག་ཆེན་པོ་ཡིས། །ཐམས་ཅད་ཐམས་ཅད་འགྲུབ་པར་འགྱུར། །ཞེས་དང་། གླུ་ཚིག་སྒྲ་ཡི་ཕྱག་རྒྱ་ཡིས། །ཆོས་ཀྱི་དངོས་གྲུབ་ཐོབ་པར་འགྱུར། །ཞེས་སོ། །དེས་ན་གལ་ཆུང་ཁྲལ་སྤྱོད་ལྟ་བུ་མི་བྱེད་པར་རྟོགས་ལྡན་རང་བཅའ། བ་རྔ་རང་ལྕག་ཟེར་བ་ལྟར་ཚུལ་བཞིན་སྤྱོད་ན་རང་དྲིན་རང་ལ་ཆེ་ཞིང་འདི་ཕྱི་གཉིས་སྐྱིད་ཞིག་འོང་བས་ཐུགས་ལ་བཅག་འཚལ་གཞན་ཡང་དུས་རྣམས་ཀུན་ཏུ་སྤང་བྱ་ཁྱིམ་པ་སུན་འབྱིན་གྱི་བྱ་བ་ཁྱིམ་རྟགས་སྐྱ་བཅས་ ༼ ཆས་དཔྱད་ ༽བྱེད་པ་བཤས་ཉོ་ཚོང་འཁྲིགས་ཚིག་འཆལ་བར་སྒྲོགས་པ། འཁྲིགས་སྤྱོད་མངོན་དུ་བྱེད་པ་མནའ་ཆེན་སྐྱེལ་བ་ལྐུག་ཆེན་འཇོག་པ་རྐུ་བྱེད་པ་གྲི་རིང་ཐུང་དྲང་བ་ཆང་ཁ་དུད་སྣ་དུད་ཐག་འཐག་བལ་བྲེགས་རྩིད་འབལ་རྩ་ཐུ་སོགས་བྱེད་པ་ཐོས་ཚེ་ཉེས་ཆད་ཀྱང་ཡོད་ངེས་ཡིད་འཇག་དགོས། ད་ནི་དེ་ལྟར་ཚོམ་བུ་ཚོགས་ཀྱི་སྒྲུབ་པ་ལ་ཞུགས་པའི་ཕན་ཡོན་སྔོན་བྱུང་གི་དུས། ལྷ་གྲགས་ལྡན་ཕྱོགས་སྐྱོང་ཚོམ་བུ་འབུམ་དང་བཅས། གནོད་སྦྱིན་ཀུན་ཏུ་བཟང་པོ་ཚོམ་བུ་འབུམ་དང་བཅས། ཀླུ་རྒྱལ་མགྲིན་ནག་ཚོམ་བུ་འབུམ་དང་བཅས། རྒྱལ་པོ་ཛཿ ཚོམ་བུ་འབུམ། ཨིནྡྲ་བི་དྷི་བར་མ་ཚོམ་བུ་ཁྲི། ཀུ་ཀུ་རཱ་ཛ་སྟོང་ལྔ་བཅུ། སེདྷ་རཱ་ཛ་སྟོང་། ཨུ་པ་རཱ་ཛ་བརྒྱ། སྲས་མོ་ཀོ་མི་འཁོར་ཚོམ་བུ་ལྔ་བཅུ་དང་བཅས་མངོན་པར་སངས་རྒྱས་པ་ཡིན་པས་ན་འདི་ལྟར་མོས་བསྒོམ་ཙམ་གྱིས་ཚོམ་བུར་འདུས་པའི་སྒོ་ནས་སྒྲུབ་ཀྱང་དབང་པོ་རབ་ཚེ་འདིར་འབྲིང་བར་དོ་ཐ་མའང་སྐྱེ་བ་བདུན་ཚུན་ཆད་ལ་རིག་འཛིན་གྱི་ས་ལ་གནས་པར་གསུངས་ཏེ། གསང་འདུས་ལས། ཡང་ཅིག་བཅོམ་ལྡན་བདག་ཉིད་ཆེ། །སྐུ་གསུམ་མི་ཕྱེད་ལས་བྱུང་བ། །ཡེ་ཤེས་རྒྱ་མཚོའི་རྣམ་པར་རྒྱན། །ཚེ་འདི་ཉིད་ལ་ཐོབ་པར་འགྱུར། །ཞེས་དང་། ཡེ་ཤེས་ཐིག་ལེ་ལས། ཡང་ན་ལུས་ནི་སྤང་མ་ཐག །བརྩོན་པ་མི་ལྡན་པས་ཀྱང་འགྲུབ། །ཞེས་སོ། འབྲེལ་བ་སྣ་གཅིག་ཐོགས་ནའང་། དེ་ཉིད་ལས། རྩེ་གཅིག་བསྒོམ་པའི་སྐལ་མེད་ན། །མཐོང་ངམ་ཐོས་སམ་རེག་པ་ཡིས། །བྱང་ཆུབ་ལམ་ལ་བསྒྲོད་པར་འགྱུར། །ཞེས་དང་རྡུལ་ཚོན་བྲིས་པ་ཙམ་གྱི་ཕན་ཡོན་ཡང་། དེ་ཉིད་ལས། གང་གིས་རྒྱལ་བའི་དཀྱིལ་འཁོར་མཆོག །ཐིག་དང་རྡུལ་ཚོན་འདྲི་བྱེད་པ། །ཕྱོགས་བཅུའི་སངས་རྒྱས་ཞིང་ཁམས་ཀུན། །རིན་ཆེན་བདུན་བྱིན་བསོད་ནམས་ལས། །དེ་ཡི་ཕུང་པོ་དཔག་ཏུ་མེད། །ཅེས་དང་། འཚོགས་དང་དཀྱིལ་འཁོར་མཇལ་བ་ཙམ་གྱི་ལས་འབྲེལ་བཞག་ཀྱང་བསོད་ནམས་འདི་ལྟ་བུ་ཡོད་དེ། སྒྱུ་མ་ཆེན་པོའི་རྒྱུད་ལས། །མཐོང་བ་དང་ནི་ཞུགས་པ་ཡིས། །དེ་ཀུན་སྡིག་ལས་རྣམ་པར་གྲོལ། །ཞེས་སོ། །དཀྱིལ་འཁོར་ཀུན་ལས་ཀྱང་ལམ་ཟབ་བླ་མའི་སྒྲུབ་པ་ནི་ཁྱད་པར་དུ་འཕགས་ཏེ། ཆུབ་པར་རོལ་པའི་རྒྱུད་ལས། གང་གིས་བསྐལ་པར་བྱེ་བ་རུ། །ལྷ་ཡི་སྐུ་ནི་བསྒོམ་པ་བས། །མགོན་པོ་ཀུན་གྱི་དབང་ཕྱུག་ཆེ། །བླ་མ་དྲན་པ་མཆོག་ཏུ་བཤད། །ཅེས་དང་། ཆེ་བ་རང་གནས་ལས། དྲིན་དང་ལྡན་པའི་བླ་མ་དེ། །སྙིང་གི་དཀྱིལ་ལམ་ལག་པའི་མཐིལ། །སྤྱི་བོའི་གཙུག་ཏུ་གང་བསྒོམ་པ། །སངས་རྒྱས་སྟོང་གི་ཡོན་ཏན་ཡང་། །འདི་ཡི་འགྲུབ་པོ་སྐལ་ལྡན་བུ། །ཞེས་པ་དང་། ཁྱད་པར་དུ་བོད་ཀྱི་བླ་མའི་སྐལ་བ་གུ་རུ་ཡིན་པ་དང་། བླ་མ་ཐམས་ཅད་དེའི་རྣམ་རོལ་ཡིན་པ་དང་། གུ་རུ་ཉིད་ནི་ཆོས་སྐུའི་དུས་ན་ཀུན་བཟང་སྣང་བ་མཐའ་ཡས། ལོངས་སྐུ་ཚེ་དཔག་མེད་དང་། རྡོ་རྗེ་འཆང་། སྤྱན་རས་གཟིགས། སྤྲུལ་སྐུ་མདོ་ལྟར་རྒྱལ་བ་ཤཱཀ་ཐུབ། སྔགས་ལྟར་གུ་རུ་པད་འབྱུང་ཡིན་ཏེ། ཇི་སྐད་དུ། ཆོས་དབྱིངས་གནས་སུ་ཀུན་ཏུ་བཟང་པོ་དང་། །སྟུག་པོ་བཀོད་པར་རྡོ་རྗེ་འཆང་ཆེན་པོ། །རྡོ་རྗེ་གདན་དུ་ཐུབ་པ་ཆེན་པོ་རྣམས། །དབྱེར་མེད་པདྨ་ང་རུ་ལྷུན་གྱིས་གྲུབ། །ཅེས་དང་སྔོན་ཚེ་སྣང་བ་མཐའ་ཡས་འོད་དཔག་མེད། །རི་བོ་ཏཱ་ལར་མགོན་པོ་སྤྱན་རས་གཟིགས། །རྡ་ན་ཀོ་ཤར་པདྨ་འབྱུང་གནས་དཔལ། །མཚོན་ཚུལ་ཙམ་ལ་གསུམ་དུ་སྣང་ན་ཡང་། །དོན་ལ་དབྱེར་མེད་སོ་སོར་ཐ་མི་དད། །ཅེས་དང་། བཅོམ་ལྡན་འདས་ཀྱིས། རྡ་ན་ཀོ་ཥའི་མཚོ་གླིང་དུ། །ང་ལས་ལྷག་པའི་སྤྲུལ་སྐུ་འབྱུང་། །ཞེས་གསུངས་པས་ཕྱི་ལྟར་སྟོན་པ་དང་ཉེ་སྲས་བརྒྱད་ནང་ལྟར་གུ་རུ་དང་མཚན་བརྒྱད་གསང་བ་ལྟར་ཆེ་མཆོག་དཔལ་དགུ །ཡང་གསངས་ཡེ་ཤེས་ཀློང་དགུའི་རང་བཞིན་ལྷར་ཤར་བ་ཡིན་ལ་གཞན་ཡང་འཁོར་བའི་ཆོས་རྣམ་པ་ཉི་ཤུ་བྱང་ཆུབ་པའི་རང་མདངས་ལྷའི་རྣམ་པར་འཕྲུལ་བ་འཕྲུལ་མཚན་ཉི་ཤུ་དང་། འཛམ་གླིང་བྱེ་བ་ཕྲག་བརྒྱར་པད་འབྱུང་བྱེ་བ་ཕྲག་བརྒྱ་དང་། རིགས་དྲུག་འདུལ་བའི་གུ་རུ་ཐུབ་པ་དྲུག་ལ་སོགས་པར་ལྷུན་གྱིས་གྲུབ་པར་ལྷ་འདི་གཅིག་སྒྲུབ་ན་དཀྱིལ་འཁོར་ཀུན་འགྲུབ་པའི་དོན་ལ་ངེས་ཤེས་བསྐྱེད་པར་བྱ་སྟེ། བཀྲ་ཤིས་ཁུ་བྱུག་རོལ་པའི་རྒྱུད་ལས། ཆོས་སྐུ་རོ་གཅིག་འགྲོ་དོན་བྱེ་མཉམ་སྟེ། མོས་པའི་བློ་ལ་སོ་སོ་ཉིད་དུ་གསལ། ཡེ་ཤེས་དབྱིངས་སུ་ཕྱག་རྒྱ་ཀུན་གཅིག་ཕྱིར། །བདེ་གཤེགས་གཅིག་བསྒོམ་རྒྱལ་བ་ཀུན་གྱི་ངང་། །ཞེས་དང་། གུ་རུ་ཉིད་ཀྱི་རྡོ་རྗེའི་གསུང་ལས། ང་སྒྲུབ་སངས་རྒྱས་ཐམས་ཅད་བསྒྲུབ། །ང་འགྲུབ་སངས་རྒྱས་ཐམས་ཅད་འགྲུབ། །ང་མཐོང་སངས་རྒྱས་ཐམས་ཅད་མཐོང་། །ང་ནི་བདེ་གཤེགས་འདུས་པ་ཡིན། ཞེས་གསུངས་པ་ལ་སོགས་པའི་དོན་ལ་ངེས་པའི་ཤེས་པ་ཐེ་ཚོམ་དང་བྲལ་བའི་སྒོ་ནས་མོས་པ་བླ་ལྷག་ཏུ་བསྐྱེད་དེ་སྒྲུབ་པ་སོགས་ཀྱི་དོན་ལ་འཇུག་འཚལ། བཀྲ་ཤིས་གང་ཞིག་རང་བྱུང་པདྨ་འབྱུང་། །མ་ལུས་ཀུན་གྱི་སྙིང་ལ་རྟག་བཞུགས་པའི། །བདེན་པ་དེའི་ཀོ་མཐའ་ཡས་འགྲོ་བའི་ཁམས། །འབྲེལ་འདིའི་བྱང་ཆུབ་འབྲས་བུའི་རྒྱུད་སྨིན་ཤོག །ཅེས་ཀྱང་སྐྱབས་མགོན་བླ་མ་མཆོག་གི་སྤྲུལ་པའི་སྐུའི་འདི་འདྲ་ཞིག་དགོས། རྒྱས་དགོས། ལུང་འདྲེན་མང་དགོས་གསུངས་པའི་བཀའ་མ་ཐེག་པར་ཀུན་བཟང་རྣམ་གཉིས་ཀྱི་ཞབས་རྡུལ་སྤྱི་བོའི་མཆོད་པ་གྲོང་སྔགས་རྒན་པོས་སོ། །འདི་བསྡུ་ན་བརྒྱུད་པ་གཞན་རྣམས་ཀྱི་བླ་མའི་མཚན་ཙམ་བརྗོད་ཀྱང་མ་བརྗོད་ཀྱང་། སྙིང་ཐིག་གི་བརྒྱུད་པ་ཙམ་དང་ཕུན་ཚོགས་ལྔ་དང་། གཟེར་བཞི་བསྡུས་པ་མཇུག་བསྐྱང་བ་ཡན་ཆད་ཀྱིས་ཆོག་ལགས། དགེའོ། །དགེའོ། །དགེའོ། །སརྦ་མངྒ་ལཾ།

སྒྲོན་མེའི་སྟོང་ཐུན་ཡེ་ཤེས་གསལ་བྱེད།

སྒྲོན་མེའི་སྟོང་ཐུན་ཡེ་ཤེས་གསལ་བྱེད་ཅེས་བྱ་བ་བཞུགས་སོ། །

འོ་དེ་ལྟར་བླ་མའི་མཆོད་བསྒྲུབ་ཉམས་སུ་བླང་བ་ནི། ཆོས་ཀུན་གྱི་རྩ་བར་བཤད་དེ། འཁོར་ལོ་བདེ་བའི་རྒྱུད་ལས། དེ་ཕྱིར་ཆོས་ཀུན་རྩ་བར་ནི། །བླ་མ་རྡོ་རྗེ་འཛིན་པར་བཤད། །བླ་མ་དག་ལས་མ་བྱུང་བའི། །དངོས་གྲུབ་རྙེད་པར་འགྱུར་མི་སྲིད། །བླ་མ་ཉིད་ལས་མ་བྱུང་བའི། །སངས་རྒྱས་ཞེས་བྱ་འབྱུང་མི་སྲིད། །སྲིད་པའི་ཁ་ལོ་གྱེན་དུ་ནི། །བླ་མ་མཚན་ཉིད་ལྡན་པས་སྒྱུར། །ཞེས་སོ། །སངས་རྒྱས་ཐམས་ཅད་ཀྱང་མཆོད་པར་འགྱུར་ཏེ། འཇམ་དཔལ་ཞལ་ལུང་ལས། འདི་ཡི་དོན་ལྡན་འགའ་ཞིག་ལ། །ང་ནི་དེ་ཡི་ལུས་གནས་ཏེ། །སྒྲུབ་པོ་གཞན་ལས་མཆོད་པ་ལེན། །དེ་མཉེས་དེ་ཡི་རང་གི་རྒྱུད། །ལས་ཀྱི་སྒྲིབ་པ་དག་བྱེད་དོ། །ཅེས་དང་། སྙིང་པོ་ལས། དབང་ཕྱུག་ལོངས་སྤྱོད་ལྔས་མཆོད་ན། །དཀྱིལ་འཁོར་ཐམས་ཅད་མཆོད་པ་ཡིན། །ཞེས་དང་། སངས་རྒྱས་ཐམས་ཅད་མཆོད་པ་ལས་ཀྱང་ལྷག་ཏེ། དགོངས་འདུས་ལས། དེས་ན་སངས་རྒྱས་སྟོང་ཕྲག་ལ། །བསྐལ་བ་སྟོང་དུ་མཆོད་བྱས་པས། །བླ་མའི་བ་སྤུའི་ཁུང་རེ་ལ། །ཙནྡ་ཐིག་པ་གཅིག་བྱུག་པ། །སྟོང་ཕྲག་ཆར་ཡང་ཕོད་པ་མིན། །ཞེས་སོ། །ཚུལ་དེ་བཞིན་དུ། གསང་འདུས་ལས། དུས་གསུམ་སངས་རྒྱས་ཀུན་མཆོད་པས། །བླ་མའི་བ་སྤུ་ཉག་རེ་ལ། །མར་གྱི་ཐིག་པ་གཅིག་བྱུག་ནས། །དེ་ཡི་བསོད་ནམས་ཁྱད་པར་འཕགས། ཞེས་དང་། བདུད་རྩི་རྒྱ་མཚོ་འབྱུང་བའི་རྒྱུད་ལས། །ནམ་མཁའ་གང་བའི་སངས་རྒྱས་ལ། །སྣ་ཚོགས་རིན་ཆེན་སྤྲས་པ་ཡི། །སྟོང་གསུམ་གང་བ་ཕུལ་གྱུར་བས། །བླ་མའི་བ་སྤུ་ཉག་རེ་ལ། །མར་གྱི་ཐིག་པ་གཅིག་བྱུག་པ། །བསོད་ནམས་བརྒྱ་ཕྲག་ཆར་མི་ཕོད། །ཅེས་སོ། །ཚོགས་གཏོར་ཕུལ་བའི་བསོད་ནམས་ནི། །རྡོ་རྗེ་བེ་ཅོན་གྱི་རྒྱུད་ལས། བླ་མའི་མདུན་དུ་ཚོགས་གཏོར་ལ། །གཏན་དུ་ཆོ་ག་རྫོགས་བྱས་ན། །ལོངས་སྤྱོད་ལྡན་དང་ཚོགས་རྫོགས་དང་། །རང་གཞན་བར་ཆད་ཀུན་སེལ་ཞིང་། །འཕོས་ནས་གསང་བདག་འཁོར་དུ་སྐྱེ། །ཞེས་སོ། །མ་ཟད་ཇ་མཆོད་སོགས་བཟའ་བཏུང་གི་ཕུད་ཙམ་གྱིས་མཆོད་པའི་བསོད་ནམས་ཡང་། རྡོ་རྗེ་རོ་ལང་གི་རྒྱུད་ལས། གང་གིས་བླ་མ་རྡོ་རྗེ་འཆང་། །བཟའ་བཏུང་ཕུད་ཀྱིས་རྟག་ཏུ་མཆོད། །འདིར་ཡང་བཟའ་བཏུང་འཕེལ་བ་དང་། །འཁོར་ལོའི་བསྒྱུར་རྒྱལ་ཐོབ་པར་འགྱུར། །ཞེས་དང་། གསང་འདུས་རིམ་ལྔ་ལས། མཆོད་པ་ཐམས་ཅད་ཡོངས་སྤངས་ནས། །བླ་མ་མཆོད་པ་ཡང་དག་བརྩམས། །དེ་མཉེས་པས་ནི་ཀུན་མཁྱེན་གྱི། །ཡེ་ཤེས་མཆོག་ནི་ཐོབ་པར་འགྱུར། །བླ་མེད་བྱེད་པ་སློབ་དཔོན་གྱི། །རྡོ་རྗེ་སེམས་དཔའ་མཆོད་བྱས་པས། །དེ་ཡིས་བསོད་ནམས་མ་བྱས་ཅི། །དཀའ་ཐུབ་མ་བརྟེན་ཅི་ཞིག་ཡོད། །ཅེས་སོ། །དེ་བཞིན་དུ་བླ་མ་མཐོང་བའི་ཕན་ཡོན་ཡང་། སྡོང་པོ་བཀོད་པ་ལས། དགེ་བའི་བཤེས་གཉེན་མཐོང་བ་ནི། །ཡོན་ཏན་རིན་ཆེན་ཐམས་ཅད་ཀྱི་འབྱུང་གནས་སོ། །ཞེས་དང་། ཕ་དམ་པའི་ཞལ་ནས། ཡི་དམ་གྱི་ལྷ་བརྒྱའི་ཞལ་མཇལ་བ་ལས། བླ་མའི་ཞལ་རས་ལན་ཅིག་མཇལ་བ་ཕན་ཡོན་ཆེ་སྟེ་བོད་བླུན་པོ་ཚོས་མ་གོ །ཞེས་སོ། །མ་ཟད་བླ་མ་དྲན་པ་ཙམ་གྱི་ཕན་ཡོན་ནི། ཀུན་འདུས་ལས། གང་གིས་བསྐལ་བ་འབུམ་ཕྲག་ཏུ། །ལྷ་སྐུ་འབུམ་ཕྲག་བསྒོམ་པ་བས། །བླ་མ་དྲན་པ་བསོད་ནམས་མཆོག །ཞེས་དང་། འཁོར་ལོ་ཆུབ་པར། གང་གིས་བསྐལ་བ་ཕྱེ་བ་རུ། །ལྷ་ཡི་སྐུ་ནི་བསྒོམ་བྱས་པས། །མགོན་པོ་ཀུན་གྱི་དབང་ཕྱུག་ཆེ། །བླ་མ་དྲན་པ་མཆོག་ཏུ་བཤད། །ཅེས་དང་། དཔུང་བཟང་ལས། སྐྱེས་བུ་གང་ཞིག་འཆི་བའི་ཚེ། །བླ་མ་སྐད་ཅིག་དྲན་གྱུར་ན། །འཕོ་བ་ཀུན་གྱི་མཆོག་ཏུ་འགྱུར། །སྐྱེས་བུ་དེ་ནི་མངོན་སངས་རྒྱས། །ཞེས་སོ། །བླ་མའི་སྐུ་བཞེངས་པའི་ཕན་ཡོན་ནི། ཨ་ཏི་བཀོད་པའི་རྒྱུད་ལས། སངས་རྒྱས་དཔག་ཏུ་མེད་པ་ཡི། །སྐུ་གཟུགས་གྲངས་མེད་བྱས་པ་བས། །བླ་མའི་སྐུ་འབག་ལུགས་སམ་བྲིས། །འདི་ནི་མཆོག་དང་ཁྱད་པར་འཕགས། །ཞེས་སོ། །གསོལ་བ་བཏབ་པའི་ཕན་ཡོན་ནི། གསང་སྒྲོན་ལས། བསྙེན་སྒྲུབ་བཟླས་པ་ས་ཡ་བས། །བླ་མའི་གསོལ་འདེབས་ཚིག་གཅིག་དགའ། །ཞེས་དང་། ཨ་ཏི་བཀོད་པ་ལས། བསྙེན་སྒྲུབ་བཟླས་བརྗོད་ས་ཡ་དུང་ཕྱུར་བས། བླ་མའི་གསོལ་འདེབས་ལན་གསུམ་བརྗོད་པ་ནི། ནུས་པ་འབུམ་ཕྲག་ཆར་ཡང་མི་ཕོད་པས། ༼ དེང་སང་ཕྱོགས་འདིར་བླ་མ་ལ་གསོལ་བ་འདེབས་མི་རུང་ཟེར་བ་ཡང་ལུང་འདི་དག་གིས་བསལ་ལོ། མཆན། ༽ཞེས་སོ། བླ་མ་བསྒྲུབ་པའི་ཕན་ཡོན་ནི། ཆེ་བ་རང་གནས་ཀྱི་རྒྱུད་ལས། རྫོགས་པ་ཆེན་པ་ཨ་ཏི་ལས། །བྱུང་བའི་བླ་མ་དྲིན་ལྡན་ཉིད། །སྙིང་གི་དཀྱིལ་ལམ་ལག་པའི་མཐིལ། །སྤྱི་བོའི་གཙུག་ཏུ་སུས་བསྒོམ་པ། །སངས་རྒྱས་སྟོང་གི་ཡོན་ཏན་ཡང་། །གང་ཟག་དེ་ཡིས་འཛིན་པར་འགྱུར། །ཞེས་དང་། ཡིད་བཞིན་མཆོག་གི་རྒྱུད་ལས། གང་གིས་བླ་མ་འདུན་པའི་ལྷ། །སྤྱི་བོའི་གཙུག་ཏུ་བསྒོམས་པ་ཡིས། །སངས་རྒྱས་དཀྱིལ་འཁོར་སྟོང་ཕྲག་ཉིད། །ལག་མཐིལ་བཞག་ནས་སྟོང་གསུམ་བསྐོར། །སྙིང་ཁར་ལན་སྟོང་བསྟིམ་བྱས་པས། །རྒྱ་སྟོང་རྒྱུ་དང་ཆར་མི་ཕོད། །ཅེས་སོ། །ཁྱད་པར་དུ་འདས་མཆོད་ཕུལ་བའི་བསོད་ནམས་ནི། ཨ་ཏི་བཀོད་པའི་རྒྱུད་ལས། །འདས་པའི་ལོ་ཟླ་ཚེས་གྲངས་ལ། །མ་ནོར་བ་ནི་བརྩིས་བྱས་ནས། །མཆོད་པའི་རྣམ་པ་སུས་བྱས་པ། །ཚོགས་གཉིས་རབ་ཏུ་རྫོགས་པ་དང་། །ཚེ་འདིར་ལོངས་སྤྱོད་འཕེལ་བར་འགྱུར། །ཞེས་དང་། བླ་མའི་ཡོན་ཏན་ཡོངས་སུ་བཟུང་བའི་རྒྱུད་ལས། བླ་མ་འདས་ནས་གདུང་བས་མཆོད་བྱས་ན། །དགེ་བའི་རྣམ་སྨིན་བླ་མའི་རྗེས་འབྲང་སྟེ། །ཐུགས་ཀྱི་དགོངས་པ་གོང་དུ་ཡོངས་རྫོགས་ཤིང་། །སློབ་མས་བླ་མའི་རྣམ་ཐར་སྙོགས་པར་འགྱུར། །ཞེས་སོ། །དེང་གི་གནས་སྐབས་སུ་དེ་ལྟ་བུའི་ཕན་ཡོན་དང་ལྡན་པའི་མཆོད་སྒྲུབ་ཡོངས་སུ་གྲུབ་པ་ལ་དགའ་སྤྲོ་དད་མོས་ཡིད་ཆེས་དང་ལྡན་པས་སླད་ནས་ཀྱང་། ཞེས་མཁན་ཆེན་བཀའ་དྲིན་ཅན་གྱི་གསུང་གི་དཀྱུས་སུ་ཞུགས་པས་ཀྱང་ཆོག་ལ། ཁྱད་པར་རྩེད་མོས་ཚུལ་དུ་ཅུང་ཟད་ཙམ་ཞིག་སྤྲོས་ན། དཀྱིལ་འཁོར་ཀུན་གྱི་དབང་ཕྱུག་རྡོ་རྗེ་རྒྱལ་པོ་ཆེན་པོ་དང་། ཤེས་རབ་ཡེ་ཤེས་ཀྱི་དབང་གི་བུམ་པ་བཟང་པོ་རྒྱལ་ཀུན་བསྐྱེད་པའི་ཡུམ་གྱུར་ཉིད་ཀྱི་དབུར་བཞུགས། དམ་ཚིག་གི་ཏིང་འཛིན་ཡེ་ཤེས་ཀྱི་དལ་བཀྲམ་པ་བདེན་ཚིག་འགྲུབ་པའི་དབང་གྱུར་བྱིན་གྱིས་རློབས་པ་དག་གི་མདུན་དུ་བདར་དེ། མཚོན་བྱ་གཞི་རང་བཞིན་རྒྱུད་ཀྱི་སྒྲོན་མེ་དྲུག་གི་དཀྱིལ་འཁོར་བཟང་པོ་མཚོན་བྱེད་གཞི་སྣང་ཐབས་རང་བཞིན་རྒྱུད་ཀྱི་སྒྲོན་མ་དྲུག་དང་ལྡན་པའི་སྣང་འགྲོས་སུ་གསལ་བ་ཉིད། ཉམས་ལེན་ལམ་གྱི་སྒྲོན་མ་དྲུག་གིས་གཞིའི་རང་ཞལ་མངོན་སུམ་དུ་བྱས་པའི་ལམ་གྱུར་གྱི་གྲུབ་མཐའ་ས་བཅུ་དང་། རིག་འཛིན་བཞི་སྣང་བཞིའི་སྦུབས་ནས་འཕུར་འགྲོས་ཀྱི་བརྟུལ་ཞུགས་མཆོག་གིས་བསྒྲོད་དེ་རྡོ་རྗེ་ཀུན་ཏུ་བཟང་པོ་དབྱེ་བ་མེད་པའི་ས་ལ་ལྷུན་གྱིས་གྲུབ་ཅིང་སྙོགས་པའི་མཚམས་སྦྱོར་སྨོན་ལམ་དང་། གལ་ཏེ་ཚེ་འདི་ཉིད་དུ་གྲུབ་མཐའ་མ་སྙོགས་ན། མཚོན་བྱེད་སྒྲོན་མའི་རང་བཞིན་སྟོང་པ་ཉིད་གཟུགས་སུ་ཤར་བས། མཚོན་བྱ་སེམས་ཀྱི་ངོ་བོ་སྤྲོས་བྲལ་ཆོས་ཀྱི་སྐུ་ངོ་ཤེས་ནས་རྒྱུ་བདག་ཉིད་གཅིག་པའི་མ་རིག་པའི་མུན་པ་སེལ། སྒྲོན་མའི་ངོ་བོ་འོད་ཀྱི་རྣམ་པར་སྣང་བས་སེམས་ཀྱི་རང་བཞིན་རང་གསལ་ལོངས་སྤྱོད་རྫོགས་པའི་སྐུ་ངོ་ཤེས་ནས། རྐྱེན་ལྷན་ཅིག་སྐྱེས་པའི་མ་རིག་པའི་མུན་པ་སེལ། སྒྲོན་མེའི་འོད་ཟེར་ཕྱོགས་བཅུར་འཕྲོས་པས་ཐུགས་རྗེའི་ཡེ་ཤེས་ཀུན་ལ་ཁྱབ་པ་མཚོན་པའི་དོན་ངོ་འཕྲོད་དེ། ཀུན་ཏུ་བཏགས་པའི་མ་རིག་པ་གཞི་ལ་སངས་དེ་སྤྲུལ་པའི་སྐུ་མངོན་དུ་གྱུར་ནས་གཞོན་ནུ་བུམ་པའི་སྐུར་རབ་ཚེ་འདིའམ། འབྲིང་བར་དོ་དང་པོ་ལ་མ་པང་བུ་འཇུག་གི་ཚུལ་གྱིས་གྲོལ་བའི་སྟོང་འདེབས་སུ་འགྱུར་བ་དང་། གལ་ཏེ་དེ་ལ་བརྟན་པ་མ་ཐོབ་ན་ནམ་མཁའ་འོད་གསལ་ཟུང་འཇུག་བཞི་སྦྱོར་ལྷུན་གྲུབ་དང་བཅས་པའི་གཞི་སྣང་ཆོས་ཉིད་ཀྱི་བར་དོ་ལ། སྒྲོན་མེའི་ཁ་དོག་ལྔ་ཡུམ་གྱི་ངོ་བོར་སངས་རྒྱས་པའི་རྟེན་འབྲེལ་དང་སྨོན་ལམ་རྣམ་པར་དག་པའི་མཚམས་སྦྱོར་གྱི་མཐུས། འཇུག་པ་ཤེས་པའི་གནད་དང་། གྲོལ་བ་ལུས་ཀྱི་གནད་དང་། མཐར་ཕྱིན་འབྲས་བུའི་གནད་དེ་གསུམ་ཚད་དུ་འཁྱོལ་ནས་འོད་གསལ་སྦུབས་འཇུག་གི་གདམས་པ་མི་འགྱུར་བ་གསེར་གྱི་ཐུར་མ་ལྟ་བུའི་ཐབས་མཆོག་ཏུ་དྲན་ནས། ཉོན་མོངས་པ་ལྔའི་མུན་པ་སེལ། ཡེ་ཤེས་ཀྱི་རང་འོད་ལྔ་ངོ་ཤེས། ཡེ་ཤེས་ལྔ་མངོན་དུ་གྱུར། རིགས་ལྔའི་རིགས་མཆོག་ཐོབ། སྐུ་ལྔ་ལྷུན་གྱིས་གྲུབ། སྒོ་བརྒྱད་གྲོལ་སྟོབས་ཀྱིས་ནང་དུ་ཐིམ་ནས་མུན་པའི་འཁོར་སྒོ་སྟོང་། དག་པ་ཡེ་ཤེས་ཀྱི་སྒོ་ངོ་བོ་ཀ་དག་ལ་ཐིམ་ནས་སེང་གེའི་གངས་ཟིན་པ་ལྟར་ཕྱིར་མི་ལྡོག་པ་དཔག་ཆེན་གྱི་མདའ་འཕང་པ་ལྟ་བུའི་དཔེའི་མཚོན་པ་རྣམ་པར་གྲོལ་བ་མཐར་ཐུག་པ་ལ། དཔེ་གཟུགས་བརྙན་གྱི་དཀྱིལ་འཁོར་སྣང་གསལ་སྒྲོན་མེ་མཆོག་གི་རྟེན་འབྲེལ་གྱིས་མཚོན་པའི་བརྡ་ཐབས་དོན་ལ་འབྱོར་པའི་གཟུངས་ཐོབ་ནས་བར་དོར་བསྟན་པ་ཐོབ་པའི་སླད་དང་། དེ་ལས་ཐལ་ཏེ་སྲིད་པའི་བར་དོ་རུ་ཁ་འཁྱལ་ནའང་། སྣང་གསལ་སྒྲོན་མེ་མཆོག་གི་རྗེས་དྲན་གྱི་རྟེན་དུ་གྱུར་ནས་བླ་མ་ཡབ་ཡུམ་དང་། རྡོ་རྗེའི་མཆེད་ལྕམ་དང་། བླ་མས་བསྟན་པའི་གདམས་པ། ཆོས་ཉིད་དོན་དང་། ཆོས་ཅན་རྟགས་ཀྱི་ལྟ་བ་དང་ཡི་དམ་གྱི་ལྷ་རྗེས་སུ་དྲན་པའི་མོད་ལ་དམ་ཚིག་ལུ་གུ་རྒྱུད་དུ་འབྲེལ་བའི་རྟེན་འབྲེལ་གྱིས་དཔུང་ཤུགས་སུ་སད་ནས་མཁའ་སྤྱོད་དག་པའི་གནས་སུ་འདྲེན་པའི་དེད་དཔོན་མཛད་པ་དང་། གལ་ཏེ་ནའང་དལ་འབྱོར་ཕུན་སུམ་ཚོགས་པའི་རྟེན་ལ་ཚོམ་བུ་གཅིག་དུ་འཁོད་པའི་རྟེན་འབྲེལ་གྱི་སྲོག་ཤིང་གཅིག་དུ་བསྟན་ཅིང་བརླིང་བར་གྱུར་ཞིང་། རྟེན་དེ་ལ་རིགས་ཆེན་གཙུག་ཏོར་ཆེན་པོ་མངོན་དུ་མཛད་དེ་ཕྱམ་གཅིག་གདོད་མའི་མགོན་པོའི་གོ་འཕང་ལ་མཉམས་སུ་གྲོལ་བའི་ཐུགས་འདུན་རྩེ་གཅིག་པའི་ངང་ནས་མར་མེའི་སྨོན་ལམ་ཟབ་མོ་འདིའི་རྗེས་ཟློས་གནང་བར་ཞུ། ཅེས་པ་འདིའང་རིག་འཛིན་ཆེན་པོ་དབང་གྲགས་མགོན་པོའི་གསུང་བསྐུལ་གཉན་པས་ག་གཱ་ཨ་བྷྱེས་སྐྲག་ཚབས་ཀྱི་ངང་ནས་གཅོས་གཏམ་ཉབ་ཉོབ་སྲ་བསྲེལ་སྨྲས་པའོ། །དགེའོ། །མངྒ་ལཾ། །

ལྷག་གཏོར་བརྟན་གསུམ་གྱི་སྟོང་ཐུན་རྡོ་རྗེའི་ཕྲེང་བ།

ལྷག་གཏོར་བརྟན་གསུམ་གྱི་སྟོང་ཐུན་རྡོ་རྗེའི་ཕྲེང་བ་ཞེས་བྱ་བ་བཞུགས་སོ། །

ཨེ་མ་ཧོ། དུས་གསུམ་ཐོག་མཐའ་བྲལ་བའི་ཡེ་ཤེས་ཀྱི། །མཚན་དཔེ་རྡོ་རྗེའི་བླ་མའི་ལང་ཚོར་སྒེག །སྲིད་ཞིའི་གདུང་བ་མཐའ་དག་དྲུངས་ནས་འབྱིན། ཁྱབ་བདག་ཀུན་བཟང་སྒྲ་དབྱངས་རྒྱ་མཚོས་སྐྱོངས། །ཡུལ་དུས་གང་ཟག་དང་འབྲེལ་གཞན་དབང་གིས། །ལེགས་བཤད་འགྲོལ་ལ་སྤྲོ་བ་ཅང་མེད་ཀྱི། །དེང་དུས་སྐྱེ་བོའི་ཆོས་སྤང་རྒྱུར་འགྱུར་སྙམ། །འོན་ཀྱང་ཁྱེད་གསུངས་སྤྱི་བོས་མཆོད་པའི་ཁུལ། །ཞེས་མཆོད་པར་བརྗོད་ཅིང་སྐབས་དབྱེས་ནས། འདིར་ལྷག་གཏོར་བརྟན་གསུམ་གྱི་སྟོང་ཐུན་ཅུང་ཟད་སྦྱོར་ན། མཆོད་པའི་ཡུལ། མཆོད་བྱེད། མཆོད་ཚུལ། དགོས་པ་དང་བཞི་ལས། དང་པོ་ལ་ཐུན་མོང་དུ་མཆོད་ཡུལ་གྱི་ངེས་པ་སྙིང་ལ་བཅག་པ། ཐུན་མིན་ལྷག་གཏོར་བརྟན་གསུམ་སོ་སོའི་མཆོད་ཡུལ་ངོས་བཟུང་བའོ། །དང་པོ་ལ་གཞི་ཡེ་ཤེས་གཅིག་གི་སྒྱུ་འཕྲུལ་དྲྭ་བར་བཤད་པ། ལམ་ཏིང་འཛིན་གཅིག་རོལ་མོ་ཡིན་པར་བཤད་པ། འབྲས་བུ་སངས་རྒྱས་གཅིག་གི་བཀོད་པ་ཡིན་པར་བཤད་པ། དེའི་དགོས་པ་དང་བཞིའི་ཚུལ་དུ་བཤད་པའོ། །དང་པོ་ལ། མདོར་བསྟན་རྒྱས་བཤད་དོན་བསྡུ་བའོ། །དང་པོ་ནི་དཔལ་དུས་ཀྱི་འཁོར་ལོ་སོགས་ནས་ཕྱི་ནང་གཞན་གསུམ་ཡེ་ཤེས་སུ་སྦྱོར་ཚུལ་དང་། སྔ་འགྱུར་ལས་སངས་རྒྱས་སྐུ་བཞིའི་རང་བཞིན་ཕྱི་ནང་གསང་བ་ཡང་གསང་གི་ཕྱག་རྒྱའི་དཀྱིལ་འཁོར་དུ་ལྷུན་གྱིས་གྲུབ་པར་གསུངས་པ་དག་དོན་གྱི་གནད་གཅིག་པས་ན། འདིར་ནང་རྒྱུད་ཡོ་ག་གསུམ་གོང་སྦྲེལ་ཏེ་བཤད་ན། དཀྱིལ་འཁོར་གྱི་ལྷ་ཐམས་ཅད་ཀྱང་རིག་པ་བྱང་ཆུབ་ཀྱི་སེམས་ལྷག་པའི་བདེན་གཉིས་དབྱེར་མེད་ཀྱི་ཆོས་སྐུ་ཆེན་པོ་གཅིག་གི་ངོ་བོ་དང་རང་རྩལ་སྒྱུ་འཕྲུལ་དྲྭ་བའི་ཕྱག་རྒྱ་ཅིར་ཡང་སྣང་བ་ལས་གཞན་དབྱིབས་སྔགས་ཆོས་གསུམ་དང་གཙོ་འཁོར་ཐ་དད་དུ་དམན་མཆོག་མེད་པར་རྒྱུ་གཅིག་པ་དང་། ཐམས་ཅད་དེའི་དག་སྣང་ཡིན་པས་ན་དང་དེ་ཉིད་སྐུ་གསུམ་གྱི་བདག་ཉིད་དུ་ཡེ་སངས་རྒྱས་པས་ན། ཀུན་བྱེད་ལས། ཀུན་བྱེད་བྱང་ཆུབ་ང་ཡི་རང་བཞིན་ལས། །མ་བཙལ་རང་བཞིན་ལྷུན་གྱིས་གྲུབ་པ་ནི། །རྒྱལ་བ་ཀུན་གྱི་ངོ་བོ་སྐུ་གསུམ་སྟེ། །ང་ཡི་རང་བཞིན་མ་བཅོས་ཆོས་སྐུར་གྲུབ། །ང་ཡི་ངོ་བོ་མ་བཅོས་ལོངས་སྤྱོད་རྫོགས། །ང་ཡི་ཐུགས་རྗེ་མངོན་ཕྱུང་སྤྲུལ་པའི་སྐུ། །ཞེས་དང་། དཀྱིལ་ནི་མ་ནོར་དོན་གྱི་སྙིང་པོ་ལ། །འཁོར་ནི་འཁོར་འདས་བདེ་ཆེན་རྫོགས་པད་ལྡན། །དེ་ནི་དཀྱིལ་འཁོར་སྙིང་པོ་ཀུན་གྱི་རྩ། །དཀྱིལ་འཁོར་མ་ལུས་འདི་ལ་འདུས་པར་རྟོགས། །ཞེས་དང་། ཆོས་དོན་ལས། རྒྱལ་བས་གསུངས་པའི་ཡེ་ཤེས་གང་། །དེ་ནི་དཀྱིལ་འཁོར་སྙིང་པོར་གསུང་། །ཞེས་དང་། སྔགས་རྒྱུད་ལས། རིན་ཆེན་སེམས་ལས་ཕྱིར་གྱུར་བའི། །སངས་རྒྱས་མེད་ཅིང་སེམས་ཅན་མེད། །རྣམ་པར་ཤེས་པའི་གནས་དོན་སོགས། །ཕྱི་རོལ་གྱུར་བ་ཅུང་ཟད་མེད། །ཅེས་སོ། །གཉིས་པ་ལ་སྤྱི་དང་བྱེ་བྲག་ཏུ་བཤད་པའོ། །དང་པོ་ནི། དེ་ལྟ་བུའི་གཞི་ཡེ་ཤེས་ཀྱི་དཀྱིལ་འཁོར་རང་ལ་གྲུབ་པའི་གནད་ཀྱིས་སེམས་ཅན་རྣམས་འཁྲུལ་བའི་དུས་སུ་ཡང་ཕྱི་འཇིག་རྟེན་གྱི་ཁམས། ནང་ལུས་དང་སེམས་ཐམས་ཅད། གཞན་དཀྱིལ་འཁོར་གྱི་འཁོར་ལོའི་རྣམ་པར་རོལ་བ་ཚད་མེད་པར་རང་ཤར་བ་ཀུན་ཀྱང་ཡེ་ཤེས་གཅིག་གི་རོལ་གར་ཡིན་པས། ཇི་སྐད་དུ་ཀུན་སྤྱོད་ལས། གང་དུ་བདེ་ཆེན་ཡེ་ཤེས་གཅིག་པུ་ཉིད། །གཅིག་པུའི་ཉམས་ཀྱིས་དུ་མའི་གར་མཛད་དོ། །ཞེས་དང་། ཧེ་བཛྲ་ལས། རིགས་ནི་ལྔ་བོ་དེ་དག་ལས། །སྟོང་ཕྲག་དུ་མ་སྐྱེས་པ་ཉིད། །དེ་ཕྱིར་འདི་དག་རང་བཞིན་གཅིག །བདེ་ཆེན་མཆོག་ཏུ་ཕན་པའོ། །ཞེས་དང་། བྲམ་ཟེ་ཆེན་པོ་སྒྲ་གཅན་འཛིན་གྱིས། སེམས་ཉིད་གཅིག་པུ་ཀུན་གྱི་ས་བོན་ཏེ། གང་ལ་སྲིད་དང་མྱ་ངན་འདས་འཕྲོ་བ། །འདོད་པའི་འབྲས་བུ་སྟེར་བར་མཛད་པ་ཡི། །ཡིད་བཞིན་ནོར་འདྲའི་སེམས་ལ་ཕྱག་འཚལ་ལོ། །ཞེས་སོ། །དེ་ཡང་འོག་མིན་དུ་ཆོས་སྐུ་དང་། རང་སྣང་ལོངས་སྐུ། ཕྱེད་སྣང་ལོངས་སྐུ། རང་བཞིན་སྤྲུལ་བ་དང་། མི་མཇེད་བྱེ་བ་ཕྲག་བརྒྱར་སྤྲུལ་སྐུ་རྣམ་པ་བཞི་ལ་སོགས་པ་སྣ་ཚོགས་པའི་སྣང་བ་དང་། དེ་ཡེ་ཤེས་སེམས་དཔའ་རུ་ལྡན་པའི་དབང་གིས། ཧེ་རུ་ཀའི་གནས་བཅུ་དུར་ཁྲོད་བརྒྱད་གནས་ཉེར་བཞི་ཡུལ་སོ་གཉིས་ལ་སོགས་པ་ཐམས་ཅད་དུ། དཔའ་བོ་མཁའ་འགྲོ་ཞིང་སྐྱོངས་ཆོས་སྐྱོངས་སྲུང་མ། ཞིང་སྔགས་ལྷན་སྐྱེས་ཀྱི་ཊཱཀྐིའི་རྣམ་རོལ་ཚད་མེད་པ། ཅིར་ཡང་སྤྲུལ་པའི་སྐུ་རུ་རང་ཤར་བ་ཐམས་ཅད་ཀྱང་རྣམ་དག་ཡེ་ཤེས་ཀྱི་དབྱིངས་སུ་གོ་གཅིག་པ་སྟེ། མཆོད་བསྟོད་ཀྱི་རྒྱུད་ལས། ཐམས་ཅད་ཡེ་ནས་དཀྱིལ་འཁོར་ཆེ། །མ་བཅོས་རང་བཞིན་ལྷུན་གྱིས་གྲུབ། །མཆོད་བསྟོད་རབ་ཏུ་གསང་བའོ། །ཞེས་དང་མ་མོའི་རྒྱུད་ལས། །མུ་ཁ་ལེ་ཞེས་བྱ་བའང་། །མཐར་ཐུག་དོན་གྱི་གཞི་ཡིན་ཏེ། །དེ་ཉིད་ཁོ་ནས་བདག་ཉིད་དོ། །ཅེས་དང་། རིག་པའི་ཡེ་ཤེས་སྣ་ཚོགས་པ། །གཙོ་དང་འཁོར་དུ་བཅས་པར་གྲུབ། །ཅེས་དང་། ཕལ་པོ་ཆེ་ལས་ཀྱང་། ཞིང་གི་ཁྱད་པར་རྒྱ་མཚོ་རྣམས། །སེམས་ཀྱི་སྤྱོད་ཡུལ་སྣ་ཚོགས་སྣང་། །བ་སྤུའི་ཁུང་བུ་ཉག་རེ་ལའང་། །སངས་རྒྱས་ཞིང་ཁམས་རྒྱ་མཚོ་སྟེ། །ཞེས་སོ། །རྒྱུ་མཚན་དེ་ཉིད་ཀྱི་དབང་གིས། བདེ་དགྱིས་དང་བཀའ་བརྒྱད་སོགས་ནས་ཀྱང་། ཕྱི་འཇིག་རྟེན་གྱི་ཁམས། ནང་རྡོ་རྗེ་ཕུང་པོའི་གྲོང་ཁྱེར། གསང་བ་འོག་མིན་གྱི་གནས་རྣམས་སུ། ས་འོག་ཏུ་སྤྱོད་པ་སྐུའི་འཁོར་ལོ། ས་ལ་སྤྱོད་པ་གསུང་གི་འཁོར་ལོ། ནམ་མཁའ་ལ་སྤྱོད་པ་ཐུགས་ཀྱི་དཀྱིལ་འཁོར་སྟེ། གནས་གསུམ་གྱི་མཁའ་འགྲོ་མ་ཡི་འཁོར་ལོའི་སྡོམ་པར་གསུངས་པ་ཀུན་གཙོ་འཁོར་རམ་དཀྱིལ་འཁོར་གྱི་ཚུལ་དུ་སྣང་བ་ཐམས་ཅད་ལ་བཟང་ངན་དང་དམན་མཆོག་ཅུང་ཟད་ཀྱང་མེད་དེ་ཡེ་ཤེས་གཅིག་ཉིད་ཀྱི་རྩལ་གདངས་དེ་ལྟར་མངོན་པའི་རྒྱུ་མཚན་གྱིས་སོ། །གསང་སྙིང་ལས། སྟོང་ཉིད་བདག་མེད་ཡེ་མཁྱེན་རང་རིག་ཐུགས། །དམིགས་བྱ་དམིགས་བྱེད་མེད་པར་དྲན་དབང་བསྒྱུར། །ངོ་མཚར་སྐུ་གསུང་ཡོན་ཏན་ཞིང་ཁམས་ཡང་། །གཞན་ན་མེད་དེ་དེ་ཉིད་དེ་ལྟར་སྣང་། །ཞེས་དང་། རྨད་བྱུང་རྒྱལ་པོའི་རྒྱུད་ལས། སངས་རྒྱས་སྐུ་དང་ཡེ་ཤེས་ཞིང་ཁམས་ཀྱང་། །ཡེ་ཤེས་དེ་ཉིད་དེ་ལྟར་སྣང་བ་ཡིན། །ཡེ་ཤེས་ཡོན་ཏན་ཕྲིན་ལས་ཇི་སྙེད་པ། །གཞན་ན་མ་ཡིན་དེ་ལྟར་ལྷུན་གྱིས་གྲུབ། །ཞེས་སོ། །དེ་ཡང་ཆོས་སྐུའི་དབྱིངས་ན་འཆར་གཞིར་བཞུགས་པ་རང་བཞིན་ཉིད་ཀྱི་དཀྱིལ་འཁོར། ལོངས་སྐུའི་དབྱིངས་སུ་འབྲས་ཆོས་ཉེར་ལྔའི་མཚན་དཔེར་རྫོགས་པ་རང་བཞིན་ལྷུན་གྲུབ་ཀྱི་དཀྱིལ་འཁོར། །སྤྲུལ་སྐུའི་ཞིང་ཁམས་སུ་བདེ་གཤེགས་སྙིང་པོའི་དབྱིངས་ཀྱི་གཟུགས་བརྙན་བཟང་ངན་འབྲིང་གསུམ་འཇིག་རྟེན་འདས་མ་འདས་ཀྱི་ཚུལ་སྣ་ཚོགས་སེམས་ཀྱི་ངོས་ཁ་ལ་གྲུབ་པ་གཟུགས་བརྙན་གྱི་དཀྱིལ་འཁོར་ཡིན་པས་ན། ཁོག་གཞུང་ལས། ཐོག་མར་རང་བཞིན་དཀྱིལ་འཁོར་ནི། །རང་བཞིན་ཉིད་དང་ལྷུན་གྲུབ་དང་། །འབྲས་བུ་མཐར་ཕྱིན་སྐབས་ཀྱི་གསུམ། །ཞེས་སོ། །དེ་དག་ཀྱང་རྒྱས་པའི་རྒྱུད་ལས། །གཟུགས་བརྙན་དཀྱིལ་འཁོར་ཡང་དག་ནི། །ཆེན་པོ་རགས་པ་ཐབས་སུ་རྟོགས། །སོ་སོའི་མཚན་ཉིད་ཤེས་རབ་རྟོགས། །གཉིས་མེད་འབྲེལ་བ་ཐབས་ཆེན་ཡིན། །ཞེས་སོ། །གཉིས་པ་ནི། དེ་དག་གི་དོན་གྱིས་སྟོང་གཟུགས་རྣམ་ཀུན་མཆོག་ལྡན་དུ་བ་མ་ལ་སོགས་ལྷ་མོ་ལྷན་སྐྱེས་ཕྱག་རྒྱ་ཆེན་མོ་ལ་སྙོམས་པར་འཇུག་པས་ནང་གི་གནས་ཡུལ་དང་ས་ལམ་བསྒྲོད་ཚུལ་དང་། བསྐྱེད་རིམ་པས་ཀྱང་། མཁའ་སྤྱོད་དང་འདོད་གཟུགས་ཀྱི་རིག་འཛིན་གྲུབ་ནས་ཞིང་སྔགས་སྐྱེས་ཀྱི་མཁའ་འགྲོ་ལས་བདེ་ཆེན་ཚོལ་བའི་ཡུལ་རྣམས་ཀྱང་ལྷག་གཏོར་བརྟན་གསུམ་གྱི་ལྷ་མོ་འདི་དག་གི་རང་བཞིན་དང་རྣམ་འགྱུར་ལས་མ་འདས་པས་ན། ཀུན་མཁྱེན་ཆོས་རྗེས། འདི་དག་ཐུན་མོང་གིས་འཇིག་རྟེན་པར་བཤད་ཀྱང་། ཐུན་མོང་མ་ཡིན་པར་འཇིག་རྟེན་ལས་འདས་པར་བསྟན་ཅིང་། ཤིན་ཏུ་ཐུན་མོང་མ་ཡིན་པར། རྩ་གནས་ཀྱི་འཁོར་ལོའི་ནང་ན་ཡོད་པའི་སངས་རྒྱས་པའི་ཚེ་དེ་ལྟར་སྣང་བར་འདོད་པའི་ཞེས་གསུངས་ཤིང་། དེས་ན་སྔ་འགྱུར་གྱི་རྒྱུད་སྡེ་ཀུན་ནས་དམ་པ་རིགས་བརྒྱའི་གྲངས་སུ་དབང་མོ་སོགས་ཡོད་པ་དང་། རབ་འབྱམས་དང་ཀློང་གསལ་སོགས་ནས་རྩ་རླུང་བྱང་ཆུབ་ཀྱི་སེམས་དང་བཅས་པ་ལ་རྫོགས་ཚུལ་བསྟན་པས། ཐ་མལ་རང་རྒྱུད་པའི་འཇིག་རྟེན་པ་མིན་པར་ཤེས་ནུས་སོ། །དགོངས་རྒྱན་ལས། འདུལ་བྱེད་གཉེན་པོའི་འཁོར་དུ་བསྟན་པའི་ཕྱིར་དང་། ཕུར་བའི་རྒྱུད་ལས་ཀྱང་། དབང་མོ་རྣམས་གཉེན་པོའི་ཁྲོ་བོ་སྤྲོ་བའི་ཡུམ་དུ་གསུངས་པའི་ཕྱིར་དང་། མུན་སེལ་ལས། ཀུན་ཏུ་བཟང་པོ་ཁྲོ་བོའི་དཀྱིལ་འཁོར་དུ་ཡེ་ནས་གནས་པའི་རང་སྣང་ལས་དེ་ལྟར་སྣང་བ་ཡིན་ཏེ། ཁྲོ་བོ་རང་བཞིན་གྱི་དཀྱིལ་འཁོར་ཞེས་པས་གྲུབ་པོ། །ཞེས་སོ། །དེ་བས་ན་འདིར་བསྟན་གྱི་རུ་ཏྲ་འཁོར་བཅས་ ༼ དྲེགས་པའི་སྡེ་དཔོན་དང་བཅས་པ། མཆན། ༽ ནི་ཐ་མལ་བར་སྣང་ཡང་།ཐ་མལ་བ་མ་ཡིན་ཏེ། ཞེས་དང་། སྒྲོ་ཕུག་པས་འགྲེལ་བ་ལུང་བསྟན་ལས་ཀྱང་། དེ་བཞིན་གཤེགས་པ་ཉིད་ཀྱི་ཚུལ་དུ་བསྟན་པར་བྱ་སྟེ། ཞེས་དང་། ཇི་ལྟར་བཤད་པའི་མཐུ་འདི་དག་རང་རྒྱུད་པ་ལ་ཡོད་པ་མ་ཡིན་ཏེ་སྤྲུལ་པ་ཡིན་པར་སོམ་ཉི་མི་བྱའོ། །ཞེས་གསུངས་པས་ལྷག་མགྲོན་དབང་ཕྱུག་ཉེར་བརྒྱད་སོགས་དང་། ཆད་ཐོའི་མགྲོན་དྲེགས་པའི་སྡེ་དཔོན་ལ་སོགས་པ་ནི་ཡེ་ཤེས་འཇིག་རྟེན་གྱི་ཚུལ་དུ་བསྟན་པའི་བསྲུང་མར་ཆས་པ་ལ་གཅིག་པས་ཁྲོ་བོ་རང་བཞིན་གྱི་གླེང་གཞིར་དྲེགས་པ་ཅན་རྣམས་ཀྱི་ལུས་གདན་དུ་ཕུལ་ནས་བསྟན་པའི་སྲུང་མར་ཞལ་གྱིས་བཞེས་པའི་ཚུལ་བསྟན་པ་ནི། བི་ཏོ་ཏ་མའི་རྒྱུད་ལས། འབངས་སུ་མཆིའོ་གཙིགས་མ་ཆུང་། །བཀའ་ལས་འདས་ན་འཚིག་པར་འགྱུར། །མ་དང་སྲིང་མོ་བྲན་མོ་རྣམས། །འབངས་སུ་འབུལ་ལོ་བཀའ་ལ་ཐོགས། །ཞེས་དང་། དབང་མོ་ལ་སོགས་པས། དབུས་སུ་མཆིས་སྐལ་མི་ལྡན་གྱི། །འབར་བའི་དཀྱིལ་འཁོར་མཐའ་ལ་ཞོག །ཕུད་ལ་འཚལ་སྐལ་མི་ལྡན་གྱི། །ལྷག་མ་ཁ་ཆུས་བྲོན་ལ་སྩོལ། །ཞེས་དང་། གསང་སྙིང་ལས། བདག་ཅག་འཁོར་ཚོགས་ཐམས་ཅད་ཀུན། །དཔའ་བོ་ཆེན་པོའི་འབངས་སུ་མཆི། །དཔའ་བོ་ཆེན་པོའི་བདག་ཅག་ལ། །ལས་ཀྱི་དངོས་གྲུབ་སྩལ་དུ་གསོལ། །ཞེས་པ་ལྟར། ལྷག་མགྲོན་རྣམས་སླས་སུ་བཀོད་དེ་ཕམ་ཕབ་བསླང་ནས། དེ་དག་ཐམས་ཅད་དམ་ལ་བཞག་ཅིང་། ལག་ཏུ་རྡོ་རྗེ་གཏད། དབང་བསྐུར། སྤྱི་བོར་བཀའ་རྟགས་བཀོད། རྡོ་རྗེ་གསང་བའི་མཚན་གསོལ་ཚུལ་བྱས་ཀྱང་། དོན་དུ་དཔལ་ཆེན་པོའི་རང་སྣང་གི་བདུད་བཏུལ་བའི་ཚུལ་གྱིས་འཇིག་རྟེན་དུ། སྤྲུལ་སྐུའི་ཁྲོ་བོ་འབྱུང་བའི་འཕྲོ་གཞིར་བཀོད་པ་ཙམ་ལས། གཙོ་འཁོར་ཁྱད་པར་ཅུང་ཟད་ཀྱང་མེད་པས། དེས་ན་སངས་རྒྱས་ཀྱི་སྐུ་རྣམ་པ་ཐམས་ཅད་པའི་རོལ་གར་བསྒྱུར་བ་ཙམ་དུ་གོར་མ་ཆགས་སོ། །བརྟན་མ་བཅུ་གཉིས་ཀྱང་འཇིགས་གླིང་གིས་གྲགས་ཚོད་ལ་བོད་སྐྱོང་གི་ཡུལ་ལྷར་ཨོ་རྒྱན་ཆེན་པོའི་མངའ་གསོལ་བར་མཛད་པའི་ཚུལ་ཀྱང་། ངེས་དོན་དུ་ནི་འདི་དག་ཡེ་ཤེས་ཀྱི་དབྱིངས་ན་བཞུགས་པའི་མཁའ་འགྲོ་མ་ཤ་སྟག་ཡིན་ཏེ། རྟེན་འབྲེལ་བཅུ་གཉིས་ལུགས་ལས་ལྡོག་དེ་བདེན་དོན་རྣམ་པ་བཅུ་གཉིས་ཀྱི་ངོ་བོར་དག་པའི་སྣང་ཆར་བདེ་མཆོག་གི་སྒོ་མཚམས་མ་བརྒྱད་དང་སྙིང་པོའི་རྣལ་འབྱོར་མ་རིགས་བྱེད་ཀྱི་གྲངས་སུ་ཤར་བ་ལས་བོད་སྐྱོང་བརྟན་མ་བཅུ་གཉིས་སུ་གྲུབ་སྟེ། ཞེས་དང་། འཁོར་ལོ་རྒྱས་འདེབས་མའི་ཕྲིན་ལས་ཀྱི་སྤྲུལ་བ་བརྟན་མ་བཅུ་གཉིས། ཞེས་གསུངས་སོ། །ཆད་ཐོའི་མཆོད་ཡུལ་ལ། ཡང་དག་སྙིང་པོའི་གཏེར་གཞུང་ལས། ལྷ་སྲིན་དྲེགས་པ་འདི་དག་ཀྱང་། །དགོངས་པ་མྱ་ངན་འདས་མོད་ཀྱང་། །སྤྱོད་པ་འཇིག་རྟེན་དྲེགས་པའི་ཚུལ། །དམ་ལ་བཏགས་པའི་ཚུལ་གྱིས་ནི། །སངས་རྒྱས་བསྟན་པ་བསྲུང་བར་མཛད། །ཅེས་དང་བརྟན་མའི་ཡུལ་ལའང་། མ་མོའི་རྒྱུད་ལས། མ་མོ་ཆེན་མོ་འདི་རྣམས་ཀྱང་། །ཡེ་ཤེས་མངོན་དུ་བརྙེས་གྱུར་ཀྱང་། །ཕྲིན་ལས་ཚོགས་ཀྱི་གཙོ་མོ་སྟེ། །ཐུགས་ནི་དབྱིངས་ལས་འགྱུར་བ་མེད། །གསུང་ནི་གྲགས་སྟོང་ཆོས་ཀྱི་གསུང་། །སྐུ་ནི་སྣ་ཚོགས་སྤྲུལ་པའི་སྐུ། །ཡོན་ཏན་མ་ལུས་ཕུན་སུམ་ཚོགས། །ཕྲིན་ལས་དྲག་ཤུག་གདུག་པ་འདུལ། །རེས་འགའ་འཇིག་རྟེན་སྲིད་པའི་ཚུལ། །རེས་འགའ་གབ་སྦས་གསང་བའི་ཚུལ། །རེས་འགའ་རྣམ་པར་གྲོལ་པའི་ཚུལ། །རེས་འགའ་དྲེགས་པ་སྔགས་ཀྱི་ཚུལ། །ཞེས་སོ། །གཞན་ཡང་ཁོ་བོས་རྩལ་གྱིས་ཅུང་ཟད་ཅིག་དབྱེར་ན་དུས་འཁོར་ལྟར་ན་ཕྱི་ནང་གཞན་གསུམ་རྟེན་འབྲེལ་གཅིག་པ་དང་འབྲེལ་འབྱུང་དུ། ལྟེ་བའི་འཕོ་ཆེ་ཆུང་གི་རྩ་རླུང་ཐིག་ལེའི་ངོ་བོ་འཇིག་མ་དང་། ཙ་རྩི་ཀ་ལ་སོགས་པ་བདུན་ཅུ་རྩ་གཉིས་ཀྱི་རྣམ་འགྱུར་ཕྱི་ལྟར་སྨན་མོའི་ཚུལ་དང་གསང་འདུས་ཀྱི་དབང་དུ་བྱས་ན་ལྟེ་བའི་འཁོར་ལོའི་མཁྱེན་ ༼ ཁྱིམ་དཔྱད། ༽ མ་དང་གཏུམ་མོ་ལ་སོགས་པའི་འཕོ་ཆུང་དྲུག་ཅུ་རྩ་བཞིའི་རླུང་ལྷ་མོར་འཆར་བའི་རྩ་བ་བཅུ་གཉིས་ཀྱང་བརྟན་མ་བཅུ་གཉིས་འདི་དག་གོ་སྙམ་དུ་དང་། ཡང་རྙིང་མའི་རྒྱུད་གདམས་ངག་དང་བཅས་པའི་དགོངས་གཞི་བཙལ་ནའང་དེ་ལྟ་བུར་གྲུབ་པའོ། །དེ་དག་ཀྱང་འཐད་པས་གྲུབ་སྟེ། ལྟེ་བ་སྤྲུལ་སྐུའི། སྙིང་ཀ་ཆོས་སྐུའི། མགྲིན་པ་ལོངས་སྐུའི། སྤྱི་གཙུག་བདེ་བ་ཆེན་པོའི་སྐུའི་འཁོར་ལོ་ཡིན་པས། མཁའ་འགྲོ་འདི་དག་གི་རྟེན་གྱི་རྩ་རླུང་ཐིག་ལེ་ནི་ལྟེ་བར་རིགས་པའང་ཤེས་ཏེ། ཀྱེ་རྡོར་ལས། སྐྱེ་གནས་མགྲིན་པ་སྙིང་མགོར་ཡང་། །སྐུ་གསུམ་པོ་ནི་རྣམ་པར་གནས། །ཞེས་དང་། རབ་འབྱམས་ལས། ཡེ་ཤེས་མཁའ་འགྲོ་བྱེ་བ་འབུམ། །ས་ཡ་གྲངས་འདས་བརྗོད་མི་ལང་། །སྤྲུལ་པའི་གྲོང་ཁྱེར་དགུ་ཁྲི་འབུམ། །ཐིག་ལེ་རང་བྱུང་གཟུགས་ལ་བརྟེན། །རྩ་རྣམས་ཀུན་གྱི་ནང་ལ་བཞུགས། །ལུས་དང་སེམས་ལ་ཚང་བའི་ཕྱིར། །ཕྱི་རོལ་སྣང་བ་ཉིད་ལ་གྲུབ། །དེ་ལྟར་ཐོག་མའི་ཡེ་ཤེས་གསུམ། །ཀ་དག་གཞི་ཡི་སྟེང་ན་ཚང་། །དེ་ལྟར་རྟོགས་པར་གྱུར་ན་ནི། །འདི་ལྟར་ཁམས་གསུམ་འཁོར་བ་ཡང་། །སངས་མ་རྒྱས་པ་གཅིག་ཀྱང་མེད། །ཅེས་དང་། ངེས་བརྗོད་ལས། རྣལ་འབྱོར་མ་ནི་རབ་གཏུམ་སོགས། །ཐམས་ཅད་ཀུན་ཏུ་སྒྲུབ་པ་པོའི། །འཁོར་ལོར་བཞུགས་པ་ཤེས་པར་བྱ། །ཞེས་སོ། །དེས་ན་བདེར་འདུས་ལས་མ་མོའི་ལུས་དཀྱིལ་གསང་བར་གསུང་བའང་རྐྱེན་འཁོར་ལ་དགོངས་པའོ། །གསུམ་པ་དོན་བསྡུ་བ་ནི། དེ་ལྟར་འཁོར་འདས་ཀྱི་སྣང་བ་ཞིང་ཁམས་གཞལ་ཡས་ལྷ་དང་བཅས་པ་དང་། ཡུལ་ལུས་སེམས་གསུམ་ཐམས་ཅད་ཆོས་སྐུའི་རང་འོད་ཙམ་དུ་ཟད་པས་ན་ཞེན་སྣང་ལོག་མ་ལོག་ཙམ་གྱི་ཁྱད་པར་ལས་དོན་དུ་མྱ་ངན་ལས་འདས་པར་གྲོལ་ཟིན་པའི་རྒྱུ་མཚན་གྱིས། གསང་སྙིང་ལས། སྣོད་བཅུད་རྒྱུད་རྣམས་དག་རྟོགས་ཤིང་། །མཉམ་གཉིས་ལྷག་པའི་མཉམ་གཉིས་ཀྱིས། །དཀྱིལ་འཁོར་ཀུན་ཏུ་བཟང་པོའི་ཞིང་། །ཞེས་དང་། ས་ར་ཧས། སེམས་ཉིད་ལྷན་ཅིག་སྐྱེས་པ་ཆོས་ཀྱི་སྐུ། །སྣང་བ་ལྷན་ཅིག་སྐྱེས་པ་ཆོས་སྐུའི་འོད། །དེ་ཕྱིར་སྣང་སེམས་གཉིས་པོ་ལྷན་ཅིག་སྐྱེས། །ཡིད་བཞིན་ནོར་འདྲའི་སེམས་ལ་ཕྱག་འཚལ་ལོ། །ཞེས་སོ། །གཉིས་པ་ནི། ལམ་རྣལ་འབྱོར་བས་བསྒོམ་པའི་ཏིང་ངེ་འཛིན་གཅིག་གི་རྣམ་འཕྲུལ་དུ་མཚན་ཉིད་པས་སངས་རྒྱས་སྤྲུལ་སྐུའི་དཀྱིལ་འཁོར་གཞན་དུ་འཛིན་པའི་རྣམ་པ་ཡིད་བྱེད་དང་། སྤྱན་འདྲེན་པ་སོགས་བྱེད་པས་ཞིང་སྦྱོང་། ཕྱི་རྒྱུད་པས་དམ་ཡེ་ཐ་དད་དུ་བསྒོམ་བསྒྲུབ་སོགས་དང་། ནང་རྒྱུད་པས་ཀྱང་། ཏིང་ངེ་འཛིན་དང་ལྷག་ཏིང་གི་སྤྱོད་ཡུལ་ཐམས་ཅད་ལ་གཙོ་འཁོར་དུ་བཀོད་པ་དག་ཀྱང་སེམས་ཀྱིས་བྲིས་པའི་རི་མོ་ལྟ་བུ་ཡུལ་གྱི་རང་མཚན་ལ་མ་རེག་པ་འབའ་ཞིག་དང་། གཞི་སེམས་ལ་རག་ལས་པས་ན། ཕལ་པོ་ཆེ་ལས། སེམས་ནི་རི་མོ་མཁན་དང་འདྲ། །ཞེས་སོགས་གསུངས་པས་ཀྱང་སེམས་སུ་མཉམ་པའི་བཟང་ངན་ཅུང་ཟད་ཀྱང་མེད་པ། དཔེར་བྱས་ན་གྱང་ལོག་གི་རི་མོ་ལ་མཐོ་དམན་དང་། བཟང་ངན་གཙོ་འཁོར་དུ་བཅད་པ་ལྟ་བུ་ལས་མེད་པའོ། །འོན་ཀྱང་བསྒོམ་པས་དོན་མེད་པར་ཡང་མི་འགྱུར་ཏེ། གནས་འགྱུར་ཡེ་ཤེས་ཀྱི་དག་སྣང་དུ་མངོན་པའི་ཕྱིར། སྒྱུ་འཕྲུལ་ལས། ཏིང་འཛིན་རོལ་མོ་མཐའ་ཡས་མཆོག །ཞེས་པ་ལྟ་བུའོ། །གསུམ་པ་ནི། དེ་ལྟར་གདོད་མའི་མགོན་པོའི་དམིགས་མེད་ཐུགས་རྗེ་ཆེན་པོའི་རང་མདངས་གང་ལ་གང་འདུལ་གྱི་གཉེན་པོའི་རྣམ་པར་འཆར་ཚུལ་སྐུའི་འདུལ་བ་ལ་འཇམ་དཔལ་གཤིན་རྗེའི་གཤེད། གསུང་པདྨ་དབང་ཆེན། ཐུགས་ཡང་དག་བཛྲ། ཡོན་ཏན་ཆེ་མཆོག །ཕྲིན་ལས་བཛྲ་ཀུ་མ་ར། གཟི་བརྗིད་ཀྱི་བླ་མེད་མངོན་རྫོགས། དྲག་པོའི་འདུལ་བ་ལ་དྲེགས་པ་ཀུན་འདུལ། སྟོབས་ཀྱིས་སྟོབས་ལྡན་ནག་པོ། བྱིན་རླབས་ཀྱིས་འདུལ་བ་ལ་རིག་འཛིན་བླ་མའི་ཚུལ་དུ་སྣང་བར་མཛད། གཞན་ཡང་སྤྲུལ་སྐུ་རྣམ་པ་བཞིའི་འདུལ་བའི་ཚུལ་སྣ་ཚོགས་པ་ཡིན་ལ། གཞན་བཤད་ཚུལ་གཅིག་ཏུ་ན། སངས་རྒྱས་རྣམས་ཀྱིས་སློབ་པ་ལམ་གྱི་གནས་སྐབས་ན། རང་ཉིད་ཞི་བདེ་ལ་མི་གཞོལ་བར་འཁོར་བ་ཇི་སྲིད་དུ་ཐབས་ཚུལ་སྣ་ཚོགས་པས་འགྲོ་ལ་ཕན་མཛད་ཀྱི་དམ་བཅའི་དབང་གིས་ཚུལ་བསྟན་སྣ་ཚོགས་པ་ཐམས་ཅད་ཀྱང་སངས་རྒྱས་ཀྱི་སྤྲུལ་པ་ཡིན་པས། མངོན་རྟོགས་རྒྱན་ལས། གང་གི་སྲིད་པ་ཇི་སྲིད་དུ། །འགྲོ་ལ་ཕན་པ་སྣ་ཚོགས་དག །མཉམ་དུ་མཛད་པའི་སྐུ་དེ་ནི། །ཐུབ་པའི་སྤྲུལ་སྐུར་རྒྱུན་མི་འཆད། །ཅེས་པ་ལྟར་རོ། །གོང་དུ་བསྟན་པ་དེ་དག་གིས་ཀྱང་འཐུས་ལ། བྱེ་བྲག་ ༼ སྙིང་ཐིག་གིས་རྟོགས་པས་བདག་བསྒྲལ་སོགས་ལྟར། མཆན། ༽ ཏུ་མགོན་པོ་ནག་པོ་ནི་དཔལ་ཆེན་པོ་དང་། གཟའ་ དང་དམ་ཅན་ཕྱག་ན་རྡོ་རྗེ། བཙན་ནི་རྟ་མགྲིན། རལ་གཅིག་ ༼ སྙིང་ཐིག་གིས་ཀུན་ཏུ་བཟང་མོ་དབྱིངས་ཀྱི་༴ མཆན། ༽ མ་ནི་གནམ་ཞལ་དབྱིངས་ཀྱི་དབང་ཕྱུག་མ་དང་། ལྷ་ཆེན་པོ་ནི་སྤྱན་རས་གཟིགས་ཀྱི་སྤྲུལ་བ་ཡིན་པས་མཚོན་དྲེགས་པ་རང་རྒྱུད་པའི་ཟོལ་གྱིས་སྣང་བ་ཐམས་ཅད་ཀྱང་། སངས་རྒྱས་ཀྱི་ཚུལ་བསྟན་སྣ་ཚོགས་ཡིན་པས། ཀླུ་སྒྲུབ་ཀྱིས་འགྲེལ་བ་མཐའ་དྲུག་ཆེན་པོ་ལས། སྐུ་ཡི་རྡོ་རྗེ་འཛིན་ཚངས་པ། །གསུང་གི་རྡོ་རྗེ་དབང་ཕྱུག་ཆེ། །ཐུགས་ཀྱི་རྡོ་རྗེ་ཁྱབ་འཇུག་ཉིད། །རྩ་བའི་རྒྱུད་དུ་ངེས་གསུངས་པ། །རྡོ་རྗེ་སེམས་དཔར་ངེས་པར་སྦྱོར། །ཞེས་སོ། །ཁྱད་པར་དུ་བླ་མེད་མངོན་རྫོགས་སྲིད་པའི་མ་མོ་དང་། གསང་བའི་བདག་པོ་དྲེགས་པ་མཆོད་བསྟོད་ཀྱི་དཀྱིལ་འཁོར་གྱི་གཙོ་བོ་ཡིན་པས་ཉི་མ་དང་། དེའི་འོད་ཟེར་བཞིན་ཏུ་གཞན་དེའི་སྤྲུལ་བ་ཡིན་པར་སོམ་ཉི་མི་ཟ་བའང་། མཆོད་བསྟོད་ཀྱི་རྒྱུད་ལས། དྲེགས་པའི་སྡེ་དཔོན་མཆོད་ཅིང་བསྟོད། །འདི་ལྟར་སྤྱོད་པའི་རྣལ་འབྱོར་གྱིས། །དྲེགས་པའི་གཙོ་བོ་མྱུར་དུ་འགྲུབ། །རྡོ་རྗེ་འཛིན་དང་གཉིས་སུ་མེད། །ཅེས་སོ། །དེ་བཞིན་དུ་ཞུ་བ་པོ་ཚངས་པ་ཆེན་པོ་ཡང་། སྔར་རྒྱལ་པོ་ཡུལ་འཁོར་སྲུང་གི་དུས་སུ་སངས་རྒྱས་སྟོང་དང་ཐུགས་མཉམ་བསྐྱེད་ཡིན་པས་སངས་རྒྱས་ཡིན་པ་དང་། འདི་དག་རྒྱུད་སྡེ་བཞིའི་ཞིང་གྱུར་རམ་སྐལ་ལྡན་གྱི་སློབ་མ་ཡིན་པས་འཆད་ཚུལ་གང་གི་དབང་དུ་བྱས་ཀྱང་། ཚུལ་བསྟན་ཙམ་ལས་སངས་རྒྱས་སམ། རིག་འཛིན་བྱང་ཆུབ་སེམས་དཔར་ངེས་པ་དང་། བརྟན་མ་བཅུ་གཉིས་ཀྱང་། འཁོར་ལོ་རྒྱས་འདེབས་མའི་ཕྲིན་ལས་ཀྱི་སྤྲུལ་བར་འཇིགས་གླིང་གིས་གསུངས་ཤིང་། དེས་ན་དྲེགས་པ་གཞན་ཡང་དེ་དག་གི་ཚུལ་གྱིས་ཤེས་པ་ཁོ་ནའོ། །བི་ཏོ་ཏ་མ་ལས། བདེ་བར་གཤེགས་པ་གར་གྱི་བདག །འདོད་དགུར་བསྒྱུར་བས་གར་ཡང་བདེ། །གར་གྱི་དབང་ཕྱུག་ཆེན་པོ་ལ། །མཁས་པས་ཕྱོགས་རིས་མི་བརྟག་གོ །ཞེས་གསུངས། དགོངས་འདུས་ལས། རེས་འགའ་ཞི་ལ་རེས་འགའ་དྲག །རེས་འགའ་གདོན་ཆེན་བགེགས་མཛད་དེ། །སངས་རྒྱས་གར་མཁན་སྣ་ཚོགས་ཚུལ། །ཞེས་དང་། མདོ་རྒྱན་ལས། སེམས་ཅན་རྣམས་ལ་མོས་པ་བཞིན། །སངས་རྒྱས་སྐུ་ནི་ངེས་པར་སྟོན། །ཞེས་དང་། སངས་རྒྱས་སྤྲུལ་བ་དེ་རྟག་ཏུ། མཛད་པ་བསྒྲུབ་པའི་བྱེ་བྲག་དང་། གྲངས་དང་ཞིང་ནི་རྣམ་ཀུན་ཏུ། །བསམ་མི་ཁྱབ་པར་ཤེས་བྱ་སྟེ། །ཞེས་དང་། མཁྱེན་བརྩེའི་འོད་ཟེར་གྱིས། སྙིགས་མ་ལྔ་ཡི་ཡང་མཐར་ལྟུང་བའི་ཚེ། །སྐྱབས་འོས་དཀོན་མཆོག་རིན་ཆེན་རྣམ་པ་གསུམ། །དམ་ཅན་ཆོས་སྐྱོངས་སྒྱུ་འཕྲུལ་བཞེངས་ལ་འབོད། །ཅེས་སོ། །འདི་ལ་ཡང་དཀོན་མཆོག་གི་ཕྲིན་ལས་སྒྲུབ་པའི་བཀའ་ཉན་གྱི་ཕོ་ཉར་གོ་ཡང་ཡེ་མི་འགལ་ནའང་། དོན་དུ་དཀོན་མཆོག་དངོས་ཀྱི་སྤྲུལ་བ་ཡིན་པ་ནི་སྔོན་སངས་རྒྱས་གནོད་སྦྱིན་དུ་སྤྲུལ་བ་ལྟ་བུའོ། །བཞི་བ་དགོས་པ་ལ། དེ་ལྟར་མ་ཤེས་པའི་སྐྱོན་དང་། ཤེས་པའི་ཡོན་ཏན་བཤད་པ་གཉིས་ལས། དང་པོ་ནི། དེ་ལྟར་གཞི་ལམ་འབྲས་གསུམ་གྱི་ངེས་པས་བསྒྲུབ་པའི་དོན་འདི་ལྟར་མ་ཤེས་ན་དྲེགས་པ་རང་རྒྱུད་པར་བཟུང་ནས་འདི་དག་ལ་དག་རྫོགས་སྨིན་གསུམ་སྦྱོར་མི་འོས་པར་སེམས་པ་དང་། དེ་དག་མཆོད་ན་མགུ་ཞིང་སྡོང་གྲོགས་བྱེད་པར་རློམ་ཏེ་བསྟན་དོན་མ་ཡིན་པར་རང་གི་ཀོ་ལོང་ཙམ་གྱིས་བསྐུལ་བ་འདོན་ཞིང་། ལྷའི་མཐུ་ལ་འཁེང་བ་དང་། ཅུང་ཟད་ཙམ་གྱིས་རྣམ་རྟོག་རྐྱེན་ནས་ལྷ་འཁྲུགས་གོ་ཟེར་ཞིང་། བྲན་དང་ཆུང་མ་སྒོ་ཁྱི་འཁྲེན་གཟེར་ཅན་ལྟ་བུར་ལྟ་བ་དང་། བསྒོམ་ན་གཉན་ནོན་འཚོལ་བའི་ལོག་རྟོག་འདི་དག་བྱུང་བ་ཡིན་ཏེ། དེ་རྣམས་ལ་རྒྱུ་མཚན་འགལ་བ། བསྟན་འགྲོའི་ཕན་བདེའི་དོན་མ་ཡིན་པར་གཅིག་ལ་དགྲ་དང་གཅིག་ལ་གཉེན་དུ་བལྟ་བའི་ཕན་གནོད་སྦྱིན་པའི་ཕྱོགས་རིས་ཅན་དང་། ཅུང་ཟད་ཙམ་གྱིས་རུ་ང་ནས་རང་ལའང་མི་བདེའི་གཞི་མ་སློང་པའི་ངང་རྒྱུད་ངན་པ། མགོ་གནོན་མེད་ན་ལང་ལ་ཤོར་བས་ཅི་བྱེད་བློ་མ་ཁེལ་བའི་འདྲེར་རྟོག་ལས། ལྷའི་དྲི་ཙམ་ཡང་མི་བསྣམ་པའི་སྐྱོན་ཅན་དག་གིས་འོལ་རྒྱུག་སྣ་ཚོགས་པ་སྐད་དོ། །གཉིས་པ་ནི། གོང་བསྟན་དེ་དག་ལྟ་བ་དག་མཉམ་གྱི་ངོས་ནས་མཐུར་ཐུག་གི་གོ་བ་ཕྱི་ནང་ལུས་གནས་ཀྱི་སྒོ་ནས་སྤྱི་སྦས་སུ། གྲགས་ཚོད་ཕྲིན་ལས་ཀྱི་ངོས་ནས་ཚིག་དོན་གྱི་གོ་བ་འགང་གཤོགས་པའི་སླད་དུ་སྨོས་མཚོན་ཙམ་ལས་གཞན་དུ་མང་གིས་དོགས་ནས་བཞག་པ་ལས། ཟད་མཐར་ཐུག་པ་ནི་མིན་ནོ། །མདོར་ན་གནས་སྐབས་བཞིའི་རྣམ་ཤེས་དང་ཡེ་ཤེས་གཞི་ལམ་འབྲས་བུའི་འགྲེལ་ཚུལ་སོགས་གསར་རྙིང་གི་རྒྱུད་འགྲེལ་བཤད་གདམས་ངག་དང་བཅས་པ་ལས་གསུངས་པ་རྣམས་ལ་གོ་བ་དཔྱིས་བྱིན་པ་ཞིག་འབྱོར་ན་གདོད་ཀྱིས་རྟོགས་པར་འགྱུར་ཀྱང་རེ་ཞིག་དེ་ཙམ་མོ། །འདི་ལྟར་ཤེས་ན་རབ་ལྟ་བའི་གཟེར་གྱིས་ཐེབ་ནས་གང་བསྒོམ་པའི་ཏིང་ངེ་འཛིན་དང་འབོད་བཅོལ་གྱིས་བཟླས་པ་འཕྲོ་འདུའི་ཕྲིན་ལས་རབ་འབྱམས་མི་འགྲུབ་མི་སྲིད་དེ། གསང་རྫོགས་ཀྱི་རྒྱུད་ལས། ཡེ་ཤེས་འཇིག་རྟེན་གང་ལ་ཡང་། སྲོག་སྡོམ་གཟེར་བཞིས་མ་ཐེབ་ན། །ནམ་ཡང་དོན་མེད་ཡུག་པ་རྐྱང་ ༼ ཀྱང་དཔྱད། ༽། །ཡོངས་རྫོགས་དཔལ་གྱི་སྲོག་འཕྲོག་ཐབས། །གཅིག་ཤེས་པས་ནི་ཀུན་སྲོག་ཐོབ། །དཔེར་ན་སྒྲ་གཅན་འཛིན་གྱི་ཁས། །ནམ་མཁའི་ཉི་མ་གཅིག་ཟིན་པས། །ཆུ་ཕྲན་སྟོང་གི་ཉི་མ་ཀུན། །མ་བཟུང་བར་ཡང་སྟོང་སྲོག་ཐོབ། །དེ་ཕྱིར་སྲོག་སྡོམ་གཟེར་བཞི་གཅེས། ཅེས་སོ། །འབྲིང་གིས་གསང་སྙིང་ལས། ངོ་མཚར་ཆོ་འཕྲུལ་རྨད་ཀྱི་ཆོས། །གཞན་ནས་ཡོད་འོང་མ་ཡིན་ཏེ། །ཐབས་ལ་བརྟེན་པའི་ཤེས་རབ་ཉིད། །དེ་ལྟ་བུ་ཡིས་ངང་དུ་འབྱུང་། །ཞེས་པ་ལྟར་སེམས་ཏིང་ངེ་འཛིན་གྱི་རི་མོའམ་རྣམ་རྟོག་ཙམ་ལས་དྲེགས་པ་རང་རྒྱུད་མེད་པར་གོ །ཐ་མས་ཀྱང་སངས་རྒྱས་ཀྱི་སྤྲུལ་པར་མོས་པའི་བློས་རྒན་མོ་ཁྱི་སོའི་སངས་རྒྱས་པ་ལྟ་བུ་ཞིག་ནི་ངེས་པར་འོང་བ་ཡིན་ནོ། །གཞན་དུ་གཞི་རང་བཞིན་གྱིས་གནས་ཚུལ་འདི་དག་མ་ངེས་པར། གྱ་ནོམ་ལྷར་ཞེན་གྱིས་མཚན་རྟོག་ལས་ཡེ་ཤེས་པ་ཡིན་པར་རློམ་པའང་། རྒྱལ་འགོང་དང་རུ་ཏྲ་གདུག་པ་ཅན་དུ་གོལ་ཏེ་འགྲོ་བས། རྒྱུད་ལས། དགོངས་པ་མི་འགྱུར་གཟེར་མེད་ན། །དཔལ་ཆེན་བསྒྲུབ་ཀྱང་ཐུན་མོང་ལས། །མཆོག་མི་འགྲུབ་སྟེ་རུ་ཏྲར་གོལ། །ཞེས་པས་ལྟ་བའི་གཞི་མ་ཟིན་པའི་བསྐྱེད་རིམ་ཨ་འཐས་དང་། རྫོགས་རིམ་སྟོང་ལྟའི་རྒྱས་འདེབས་ཙམ་ནི་མུ་སྟེགས་བ་ལའང་ཡོད་པས་ཡ་མཚན་ཅི་ཡང་མེད་ངེས་སོ། །གཉིས་པ་ཐུན་མིན་ལྷག་གཏོར་བརྟན་གསུམ་སོ་སོའི་མཆོད་ཡུལ་ངོས་བཟུང་བ་ལ་གསུམ་ལས། དང་པོ་ནི། དབང་ཕྱུག་ཉི་ཤུ་རྩ་བརྒྱད་དང་། རྡོ་རྗེ་རིན་ཆེན་པདྨ་ལས་ཀྱི་རིགས་ཀྱི་མཁའ་འགྲོ་དཀར་སེར་དམར་སྔོ་གཡས་རྡོ་རྗེ་དང་གཡོན་རྣམས་ལྕགས་ཀྱུ་ཞགས་པ་ལྕགས་སྒྲོག་དྲིལ་བུ་ཐོགས་པའི་མཁའ་འགྲོ་སུམ་ཅུ་རྩ་གཉིས་དང་། རིགས་བཞིའི་གིང་ཆེན་བཞི་དཀར་སེར་དམར་སྔོ་དང་། སྟེང་འོག་གི་གིང་ཆེན་གཉིས་དཀར་ནག་དེ་ཀུན་ཀྱང་རལ་གྲི་ཐོགས་པ་སྟེ། གིང་ཆེན་བཅོ་བརྒྱད་ཡང་རིགས་བཞིའི་ལིངྒ་བཞི་བཞི་དང་། སྟེང་འོག་གི་ལིངྒ་གཉིས་བཅས་ཕྱག་གཡས་རྡོ་རྗེ་རིན་ཆེན་པདྨ་རྒྱ་གྲམ་སྣ་ཚོགས་རྡོ་རྗེ་དང་། གཡོན་རྣམས་ཏྲི་ཤུལ་ཐོགས་པ་འབུམ་འབུམ་གྱིས་བསྐོར་བ། འབར་མ་སྤོར་བྱེད་བརྒྱད་དང་། མ་མོ་ཆེན་མོ་ཡེ་ཤེས་མཁའ་འགྲོ་གྲི་ཐོད་ཐོགས་པ། ཡེ་ཤེས་རྟག་འགྲོ་ཞིང་དབྱུག་ཐོགས་པ། ཡེ་ཤེས་ཟ་བྱེད་ཞིང་ཆེན་ཟ་བ། ཡེ་ཤེས་ཁ་འབར་མེའི་ཁ་རླངས་འབར་བ། རེ་ཏི་ནད་རྐྱལ། ཡེ་ཤེས་མཁའ་འགྲོ་ཁྲམ་བམ་བསྣམས་པ་སྟེ་མ་མོ་བདུན། སྲིང་མོ་བྱིས་པའི་དུར་བྱེད་མ། འཚོ་བྱེད་མ། སྡོམ་བྱེད་མ། རླུང་འབྱིན་མ་རྣམས་ཐོད་ཁྲག་བསྣམས་པ། རྡོ་རྗེ་འབར་བའི་ཕོ་ཉ་དྲུག་ཅུ། དུང་གི་ཕོ་ཉ་དྲུག་ཅུ། གསེར་གྱི་ཕོ་ཉ་དྲུག་ཅུ། བསེ་ཡི་དྲུག་ཅུ། མ་མོ་དྲུག་ཅུ། གཡུའི་ཕོ་ཉ་དྲུག་ཅུ་བཅས་དང་། དཀར་མོ་མིག་གཅིག་རྒྱས་འདེབས་སོགས་མགྱོགས་མ་བཞི་དང་། ཤུགས་ཀྱིས་འགྲོ་བ་དང་། གནས་ཉུལ་གྱི་མ་ཚོགས་འཁོར་དང་བཅས་པ་རྣམས་ཡིན་ནོ། །གཉིས་པ་ནི། སྡེ་དཔོན་སུམ་ཅུ་ལ་སོགས་པ་སྟེ་ལྷ་ཆེན་ཡབ་ཡུམ། འཆི་བདག་ཡབ་ཡུམ། སྐོས་རྗེ་ཡབ་ཡུམ། སྲིན་པོ་གློག་འཕྲེང་ཡབ་ཡུམ། གནོད་སྦྱིན་ཡཀྴ་མེ་དབལ་ཡབ་ཡུམ། རཱ་ཧུ་ལ་ཡབ་ཡུམ། ཀླུ་བདུད་མགོ་དགུ་ཡབ་ཡུམ་དང་། ལྷ་རབ་ཤམ་པོ། སྐྱེས་བུ་གནམ་ཐེའུ། སྤྱི་བདུད་གུ་རུམ་རྩེ། སྲིད་རྒྱལ་མ། ཨེ་ཀ་ཛ་ཊི། མགྱོགས་བྱེད་མ། རྡོ་རྗེ་བདུད་འདུལ། སྲོག་ཟན་དམར་པོ། ཡམ་ཤུད་དམར་པོ། བི་ན་ཡ་ཀ ཀཱ་ལ་ནག་པོ། རྨུ་བདུད་བཀྲག་མེད། སྲོག་བདག་ཚངས་པ། རྒྱལ་བོ་བེ་ཧར། སྐུ་ལྷ་གསང་བ། མ་ཧཱ་ཀཱ་ལ་རྣམས་དང་། དཔལ་མགོན་བདུན་ཅུ་རྩ་ལྔ་ལ་སོགས་པའི་རྡོ་རྗེ་ཆོས་སྐྱོང་བའི་སྲུང་མ་རྣམས་སོ། །གསུམ་པ་ནི། རྡོ་རྗེ་ཀུན་གྲགས་མ། རྡོ་རྗེ་གཡའ་མ་སྐྱོང་། རྡོ་རྗེ་ཀུན་བཟང་ངམ་བཀྲ་ཤིས་ཚེ་རིང་མ། རྡོ་རྗེ་བགེགས་ཀྱི་གཙོ་མོ་སྟེ་བདུད་མོ་བཞི། རྡོ་རྗེ་སྤྱན་གཅིག་གམ་གངས་དཀར་ཤ་མེད། རྡོ་རྗེ་དཔལ་གྱི་ཡུམ། རྡོ་རྗེ་ཀླུ་མོ་རྒྱལ། རྡོ་རྗེ་དྲག་མོ་རྒྱལ་ཏེ་གནོད་སྦྱིན་མ་བཞི། རྡོ་རྗེ་བོད་ཁམས་སྐྱོང་། ཨེ་ཉམས་ར་མདོའི་སྤེན་ནམ་སྨན་གཅིག་མ། གཡར་མོ་བསིལ། བུད་ཏི་ཇོ་མོ་གཡུ་ཏིང་ངམ་སྐུ་ལེ་སྨན་ཏེ་སྨན་བཙུན་མ་བཞི་རྣམས་སོ། །གཉིས་པ་མཆོད་བྱེད་ཀྱི་གཏོར་མ་ནི། སྤྱིར་གཏོར་མའི་ངོ་བོ་དབྱིངས་དང་ཡེ་ཤེས་གཉིས་སུ་མེད་པ་སྟེ་ཆོས་ཉིད་སྟོང་པའི་རྩལ་ཆོས་ཅན་གཏོར་མར་ཤར་བའོ། །ངེས་ཚིག་ནི་འཛིན་པ་མེད་པས་གཏོར༵་ཀུན་ལ་ཁྱབ་པས་མ༵་སྟེ། རྟོག་མེད་ཡེ་ཤེས་ཀྱི་རོལ་བས་མགྲོན་རྣམས་ཚིམ་པར་བྱེད་པའོ། །དབྱེ་ན་ལྔ་སྟེ་འཁོར་འདས་ཀྱི་ཆོས་ཐམས་ཅད་རང་སྣང་འཛིན་མེད་དུ་རྟོགས་ནས། ཉོན་མོངས་པ་ཡེ་ཤེས་སུ་ཤར་བ་ནི་འགྱུར་མེད་ཡེ་ཤེས་ཀྱི་གཏོར་མ་ཆོས་ཐམས་ཅད་རང་སྣང་གཉིས་མེད་ཏུ་རྟོགས་ནས་སྡུག་བསྔལ་བདེ་བར་ཤར་བ་ནི། བདེ་ཆེན་བྱང་ཆུབ་སེམས་ཀྱི་གཏོར་མ། ཕྱི་ནང་སྣོད་བཅུད་སེམས་ཀྱིས་ཁྱབ་ཚད་ཆོས་ཉིད་ཀྱིས་ཁྱབ་པ་ནི། ཡོངས་སུ་ཁྱབ་པའི་གཏོར་མ། ཆོས་ཉིད་བྱང་ཆུབ་ཀྱི་སེམས་མ་བྱུང་མ་སྐྱེས་པ་ནི། དག་པ་ཆོས་ཉིད་ཀྱི་གཏོར་མ། ཐམས་ཅད་ཡང་དག་གཉིས་མེད་ཀྱི་ལམ་དུ་འགྲོ་བ་ནི་སྣ་ཚོགས་ལམ་ཁྱེར་གྱི་གཏོར་མ་རྣམས་སོ། །གཞན་ཡང་དོན་དང་རྟགས། དགོངས་པ་དང་སྤྱོད་ལམ། ལས་དང་རིམ་པ། སྐྱོན་དང་ཡོན་ཏན། གཏོང་ཐབས་སོགས་རྒྱ་ཆེར་གསུངས་པ་ནི་པདྨའི་ལམ་རིམ་ཆེན་མོ་སོགས་ལས་ཤེས་པར་བྱ་ལ། གསུམ་པ་མཆོད་ཚུལ་ནི། ཕྱི་ལྟར་ན་ཚོགས་ལྷག་ཏུ་བཅུད་པའི་གཙང་ལྷག་ཆ་ལྔ་བ་སྤྱི་དང་། དགོས་ཆོས་དགོངས་འདུས་སོགས་དམར་གཏོར་ཤ་ཁྲག་གིས་བརྒྱན་པའང་མཉམ་དུ་བསྔོ་བར་བཤད་དེ་གང་ལྟར་ཡང་། སྔོན་བྱུང་གི་རབ་གོང་དུ་བཤད་པ་ལྟར། སློབ་དཔོན་གྱི་ལྕེ་རྟ་མགྲིན་ཡབ་ཡུམ་རོལ་བའི་བྱང་སེམས་ཀྱིས་ཕབ་བྲན་པར་བསམ་ལ། སྔགས་རྒྱས་ཛ་གད་ཀྱི་ཁ་ཕྲུ་བཏབ་ལ་བདུད་རྩིར་སྤེལ་བ་དཀྱིལ་འཁོར་གྱི་ཤར་ལྷོའམ། བྱང་ཤར་དུ་ཞིང་ལྤགས་ཀྱི་གདན་ལ་བཀོད་དེ་སྔགས་རྒྱས་ལྷག་མགྲོན་བཀུག་ནས་མཆོད་ཅིང་ཕྲིན་ལས་བཅོལ་བ་སོགས་ཆོ་ག་རང་རང་གི་གཞུང་ལྟར་ལ། ཆད་ཐོ་ལ་ཕྱི་ལྟར་གཏོར་མ་ངོ་བོ་དགྲ་བགེགས་ཀྱི་ཤ་ཁྲག་རུས་གསུམ་རྣམ་པ་ཡེ་ཤེས་ཀྱི་བདུག་རྩིར་སྔགས་རྒྱས་སྦྱངས་སྤེལ་བསྒྱུར་བས། དམ་ཅན་ཆོས་སྐྱོངས་རྣམས་ལ་སྔོན་གྱི་ཐ་ཚིག་བསྒྲགས་ཅིང་ཕྲིན་ལས་བཅོལ་ནས་འབུལ་བ་ཡིན་ཏེ། དེ་ལ་མཁྱེན་བརྩེའི་ལྷས། ཆད༵་ཅེས་པ་ནི་སྔོན་ནས་ཁས་བླངས་པའི་དོན་དང་། ཐོ༵་ཞེས་པ་ནི་ལས་འདི་ཙམ་ཞིག་གྱིས་འདི་ཙམ་ཞིག་མ་བྱེད། ཅེས་བླང་དོར་གྱི་སྒོ་ནས་མཚམས་བཟུང་བ་སྔོན་དཔལ་ཆེན་པོ་ནས་རིམ་བཞིན་དུ་བརྒྱུད་དེ། གྲུབ་པའི་རིག་འཛིན་རྣམས་ཀྱི་སྤྱན་སྔར་ཁས་བླངས་པའི་ཐ་ཚིག་རྣམས་རིམ་པར་དྲན་གསོས་བཏབ་ནས་བསྒྲགས་པ་སྟེ། དེས་ནི་སྔོན་གྱི་དམ་བཅའ་དང་བྲོ་བོར་བ་དག་དྲན་ནས་ལས་ལ་མྱུར་དུ་འཇུག་པའི་དགོས་པའི་ཡོད་པ་དང་། དེས་ན་སངས་རྒྱས་སྲས་བཅས་རྣམས་ཀྱི་སློབ་ལམ་གྱི་ཐུགས་བསྐྱེད་དམ་བཅའི་ཐུགས་དམ་རྒྱུད་བསྐུལ་དང་། སྲུང་མ་འདི་དག་ཀྱང་དཔལ་ཆེན་པོའི་སྤྲུལ་བ་འཇིག་རྟེན་པའི་ཟོལ་དུ་བསྟན་པར་ཟད་པས་ན། དམ་ལ་བཞག་པའི་དུས་ཀྱི་ཁས་བླང་ཙམ་དུ་ཡང་མ་ཟད་དོ་སྙམ་པའི་བློ་གཟོ་དགོས་དོན། ཐོས་གྲོལ་སོགས་ལས། མ་བཅོས་རང་ཤར་རང་དམ་བཅས་པ་ལྟར། ཞེས་པའི་ཚིག་སྒྲོམ་དག་ལས་གོ་རྒྱུ་ཆེན་པོ་ཡོད་པས་སོ། །བརྟན་མ་ལ་ཆད་ཐོའི་བཤལ་ཆུས་བྲན་པའང་། ཆོས་སྐྱོང་ཡིན་པ་ལ་དབྱེ་བ་མེད་པས་ཕྱི་ནང་དམ་བསྲེའང་ཡིན་སྙམ་ཏེ། ཁྱད་པར་བརྟན་གཏོར་མེད་པའི་ཆད་ཐོའི་ཆུ་དང་། སྨན་ཕུད་འབྲུ་གསུམ་གྱིས་བདུད་རྩིར་བརླབས་པ་ཡིན་པའི་དོན་དུ་འཇིགས་གླིང་གིས་གསུངས་སོ། །མཆོད་ཡུལ་མགྲོན་ཐབས་སུ་བཀུགས་པར་གསུངས་ཀྱང་། ཚོགས་བསྐང་ཀུན་དེ་ལྟར་བཤད་ཚུལ་ཀྱང་ཡོད་པས་མི་འགལ་ལོ། །ནང་ལྟར་མཆོད་ཡུལ་ནི། ལྷག་གཏོར་བརྟན་གསུམ་གྱི་ལྷ་དེ་དག་ཀྱང་། དུང་ཁང་ཀླད་དཀྲིས་ཀྱི་ཕྱི་རོལ་དུ་དབང་ཕྱུག་ཉེར་བརྒྱད་ཡོད་པར་རབ་འབྱམས་དང་ཀློང་གསལ་སོགས་ནས་གསུངས། སྤྱི་བོའི་རྩ་ཕྲན་ཏུ་ལྷ་གནས་ཀྱི་རྨི་སྣང་འཆར་བའི་རྩལ་ཡོད་པར་འཇམ་དཔལ་རྩ་རྒྱུད་ལས་གསུངས་པ་དང་། བརྟན་མ་ནི་ལྟེ་བའི་ཁྱིམ་གྱི་རྩ་ཆེན་བཅུ་གཉིས་ཀྱི་སྨིན་སོ་རྩ་ཕྲན་ལུས་ལ་གླིང་བཞི་བྱེ་བ་ཕྲག་བརྒྱའི་བཀོད་པ་ཚང་བར་དུས་འཁོར་སོགས་ནས་བཤད་པའི་ཚིཊ་ཆེན་བཅུ་གཉིས་སོགས་རྩ་ཡང་ཕྲན་དང་བཅས་པ་ཐམས་ཅད་དུ་ཆ་ཤས་ཀྱི་རླུང་ཐིག་གིས་གདལ་བས་བརྟན་མའི་སྤྲུལ་གཞི་དང་། སྤྲུལ་བ་ཡང་སྤྲུལ་གྱི་ཚུལ་ཕྱོགས་གཅིག་ཏུ་མ་ཆད་པའི་ཡུལ་དེ་དག་ལ་མཆོད་ཚུལ། སྲོག་རྩོལ་དང་གཏུམ་མོ་དཔྱིད་ཐིག་གིས་ཚོགས་འཁོར་ཁྲེམ་པས་དགའ་བ་བཅུ་དྲུག །སྙིང་རྗེ་བཅུ་དྲུག །སྟོང་ཉིད་བཅུ་དྲུག་གི་བདེ་སྟོང་གི་རྩ་རླུང་ཐིག་ལེ་མ་དག་པའི་མདུད་གྲོལ་འགྲོས་ཐིམ་གྱིས་གཙུག་ཏོར་དཀར་པོ་ཡིད་ནང་དུ་ཚུད་པར་བྱ་བ་ཁོ་ནའོ། །གསང་བ་ལྟར་ན། འོད་གསལ་སྣང་སྟོང་གི་ལམ་ལ་མཉམ་པར་བཞག་པ་ཉིད་ནི། སེམས་དཔའི་ཁྱེའུ་ལྔའི་མཆོད་པ་བླང་བའི་གཙོ་བོས་རིག་པའི་ཡེ་ཤེས་ལ་མཆོད་པ་འབུལ་བའི་ཚུལ་ལོ། །དེ་ནི་ཤིན་ཏུ་གསང་བའི་གནས་ཡིན་པས་གཞན་དུ་བཤད་པ་སྟེ། ཉི་ཟླའི་སྙིང་པོའི་རྒྱུད་ལས། མཆོད་རྫས་གཟུགས་སྒྲ་དྲི་རོ་རེག །སེམས་དཔའི་ཁྱེའུ་ལྔས་བླངས་ནས། །རིག་བྱེད་གཉིས་མེད་ངང་དུ་ཐིམ། །རྒྱ་མཚོ་ཆུ་བོའི་འཕྲོ་འདུ་བཞིན། །མཆོད་པ་རྒྱུན་མི་འཆད་པའོ། །ཞེས་དང་། ལྟ་བའི་སྙིང་པོའི་རྒྱུད་ལས། བདེ་ཆེན་གཉིས་མེད་ངོ་བོ་ལ། །ལྷག་མའི་མཆོད་པ་དེ་ལ་རྫོགས། །ཞེས་དང་། ཆད་བརྟན་གཉིས་ལ། དེ་ཉིད་ལས། མི་བཟུང་ཡེ་ཤེས་ཆེན་པོ་ལ། །གཏོར་མ་མཆོད་པ་དེ་ལ་རྫོགས། །ཞེས་པ་དག་གི་ལྟར་རོ། །བཞི་པ་དགོས་པ་ལ། དག་རྫོགས་སྨིན་གསུམ་གྱི་དབྱིངས་སྤྱིར་འཇལ་བ། དངོས་དོན་བྱེ་བྲག་ཏུ་བཤད་པ། སྦྱོར་ཚུལ་འགལ་མེད་དུ་དྲིལ་བ། དགོངས་ཀློང་གིས་མཇུག་བསྡུ་བའོ། །དང་པོ་ལ། བསྟན་བཤད་གཉིས་ལས། དང་པོ་ནི། བསྐྱེད་རིམ་སྤྱིའི་དག་རྫོགས་གྱི་ཚུལ་དུ་བཤད་ན། མར་འཁོར་བའི་དུས་ཀྱི་ལུས་ངག་ཡིད་གསུམ་གྱི་བག་ཆགས་དག༵་པར་བྱེད། ཡར་སངས་རྒྱས་ཀྱི་གནས་སྐབས་སུ་སྐུ་གསུང་ཐུགས་ཀྱི་གསང་བ་བསམ་གྱིས་མི་ཁྱབ་དང་། སྐུ་རྣམ་པ་ཐམས་ཅད་པ་གང་ལ་གང་འདུལ་སྣང་བའི་འབྲས་བུ་གཞི་ལ་རྫོ༵གས་། བར་ལམ་གྱི་གནས་སྐབས་ན། རྩ་རླུང་སེམས་གསུམ་ལྷ་སྔགས་ཆོས་ཉིད་དུ་འཕོ་བའི་རྫོགས་རིམ་གྱི་སྨིན༵་བྱེད་དུ་འགྲོ་བའོ། །གཉིས་པ་ནི། འཁོར་བའི་གནས་ཚུལ་མྱང་འདས་ཡིན་པའི་གནད་ཀྱིས་ན། དབྱེར་མེད་རོ་མཉམ་གཞིའི་ཨེ་ཝཾ་མམ། དབྱིངས་ཡེ་ཟུང་འཇུག་གི་ངོ་བོ་དང་རང་རྩལ་རོལ་བའི་ཆོ་འཕྲུལ་དུ་ཡེ་ནས་སངས་རྒྱས་བའི་སྣང་ཆ་སྐུའི་སྒྱུ་འཕྲུལ་དྲྭ་བ་ཅིར་ཡང་བསྒྱུར་བ་ཉིད་ནི་སྦྱངས་གཞིའམ། འབྲས་བུ་གཞི་ལ་རྫོག༵ས་པའི་ཐ་སྙད་ཀྱིས་བརྗོད་ཀྱང་མི་འགལ་ཏེ་གཞི་ཇི་བཞིན་པར་མངོན་གྱུར་ལ་འབྲས་བུར་བརྗོད༵་པའི་ཕྱིར་རོ། །སྦྱངས་བྱའམ་དག་བྱ་ནི། འཁྲུལ་བ་བརྟག་པའི་གཞི་ཞེས་མྱང་འདས་སུ་སྣང་བའི་ལྷ་དང་འོད་གསལ་དེ་དག །འཁོར་བའི་ཕུང་ཁམས་སྐྱེ་མཆེད་དུ་སྣང་ཞིང་། ཞེན་པའི་སྒྲིབ་པ་ཕྲ་རགས་ཐམས་ཅད་ཡིན་ལ། དག་བྱེད་དམ་སྦྱོངས་བྱེད་ནི། ཕྱི་ནང་གསང་བ་ཡང་གསང་གི་རྡོ་རྗེའི་རྣལ་འབྱོར་གྱི་ལམ་ཡིན་ནོ། །དེ་ཉམས་སུ་བླང་བའི་བྱེད་ལས་ཀྱིས་གྲུབ་བའི་མཐའ་ནི། འཁྲུལ་བ་དག༵་པ་ལ་བྱ་སྟེ་དེ་ཡང་བླ་མེད་ཀྱི་སྦྱོར་ལམ། དྲོད་རྩེ་བཟོད་ཆོས་བཞིར། ཤེས་སྒྲིབ་ཀུན་བྱང་གཟུང་རྟོག་མངོན་ལྐོགས་དང་། རྫས་བརྟགས་འཛིན་རྟོག་མངོན་ལྐོག་འཇོམས་པ་ལ་ནུས་པ་མཐུ་ཆེན་ཐོབ། མཐོང་ལམ་མམ་རིག་འཛིན་གྱི་འཕགས་ལམ་དང་པོར། རང་བཞིན་བརྒྱད་ཅུའི་རྒྱུར་གྱུར་པའི། མངོན་པ་ནས་བཤད་པའི་སྒོམ་སྤང་གྱ་གཅིག །མཐོང་སྤང་བརྒྱད། རང་རྒྱུད་པའི་གཞུང་ནས་བཤད་པའི་མཐོང་སྤངས་ཉོན་མོངས་བརྒྱ་དང་བཅུ་གཉིས་མཐོང་སྤང་ཤེས་སྒྲིབ་བརྒྱ་དང་བརྒྱད་འཇོམས་པའི་ནུས་མཐུ་ཐོབ་པ་དང་། ཉོན་སྒྲིབ་ལས་དངོས་སུ་གྲོལ་བ་དང་། དེ་ཡན་ཆད་ཟུང་འཇུག་གཉིས་ཀྱི་གཉེན་པོ་ཆུང་འབྲིང་ཆེ་གསུམ་གྱིས་ཁམས་གསུམ་གྱི་བསྒོམ་སྤང་བཞི་བརྒྱ་བཞི་བཅུའི་ཆེ་འབྲིང་ཆུང་གསུམ་སྤངས་བའམ་དག༵་པར་བྱས། རྒྱུན་མཐར་རྡོ་ཏིང་གིས་སྣང་གསུམ་གྱི་འཕོ་བའི་བག་ཆགས་བཅོམ་ནས་དག༵་པ་སྟེ། ལྡོག་པས་དབྱེ་ན་མང་ཞིག་ཡོད་དོ། །སྦྱངས་འབྲས་ནི། ལམ་ལྔའམ། རིག་འཛིན་བཞིའི་མངོན་རྟོགས་ལམ་གྱུར་དང་། འབྲས་བུའི་ཡོན་ཏན་གནས་ལུགས་ཀྱི་མཐོང་བ་ཇེ་བཟང་དུ་སྨིན༵་པ་སྟེ། ལྟོས་འཇོག་མཐའ་དག་ཡོད་པའོ། །དེ་ཡང་ཤས་ཙམ་བརྗོད་ན། ལས་དང་པོ་པས་རྫོགས་རིམ་སམ་སྣང་མེད་ཀྱི་མོས་པ་དང་། དངོས་པོ་དང་། འོད་གསལ་དང་། ཟུང་འཇུག་གི་འོད་གསལ་དང་། མི་སློབ་པའི་ཟུང་འཇུག་གིས་དང་། སྐུ་བསམ་གྱིས་མི་ཁྱབ་པ་དང་། མཐར་ཐུག་ཆོས་སྐུའི་ཡེ་ཤེས་སུ་སྨིན་པར་བྱེད་ཅིང་། དེ་བཞིན་དུ་སྣང་བཅས་བསྐྱེད་རྫོགས་ཀྱིས་ཀྱང་མོས་པའི་ལྷ་སྐུ། རླུང་སེམས་ཀྱི་འོད་གསལ་གྱི་ཟུང་འཇུག་གཉིས་ཀྱི་སངས་རྒྱས་དུས་གཟུགས་སྐུ་གཉིས་སམ་སྐུ་རྣམ་པ་ཐམས་ཅད་པའི་སྨི༵ན་བྱེད་དང་མར་འཁོར་བའི་བག་ཆགས་དག་བྱེད་དུ་འགྱུར་རོ། །གཞན་ཡང་དེའི་ནང་ནས་ཀྱང་དངོས་པོ་ལྷན་སྐྱེས་ཙམ་ལའང་མཉམ་རྗེས་ཀྱི་དབེན་པ་གསུམ་གྱི་འོད་གསལ་དང་། དཔེའི་འོད་གསལ་ལས་ལྡོག་པ་ཅན་གྱི་བདག་བྱིན་རླབས་ཀྱི་ལྷ་སྐུ་ལའང་དག༵་བྱ་དང་དག་བྱེད་དག་པ་དང་། སྨིན༵་རྫོག༵ས་ཀྱི་རིམ་པ་སྔ་མས་ཕྱི་མའི་ཉེར་བསྡོག་གི་འགྲོས་ལྟར་དབྱེ་རྒྱུ་ཡོད་པས། གདོང་གཏད་དུ་ཤེས་བྱ་རེ་ལ་སྤར་ཟིན་གྱིས་སྦྱོར་བ་ནི་བྱིས་པའི་ངང་ཚུལ་ཙམ་དུ་ཟད་དོ། །གཉིས་པ་དངོས་དོན་བྱེ་བྲག་ཏུ་བཤད་པ་ནི། ལྷག་གཏོར་ཐུན་མོང་དུ་མར་འཁོར་བའི་གནས་སྐབས་ན་སྐྱེ་གནས་བཞིར་སྐྱེ་བའི་ལུས་དང་། ཡུལ་དུ་འཛིན་པ་དང་ལྷ་འདྲེ་རང་རྒྱུད་པར་བཟུང་ནས་ཕན་གནོད་ཀྱི་བྱེད་པོར་འཛིན་པའི་བག་ཆགས་ཀྱི་གཉེན་པོར། མཆོད་བསྟོད་ཀྱི་རྒྱུད་ལས། ངོ་བོ་རང་རིག་བྱང་ཆུབ་སེམས། །མ་སྐྱེས་དབྱིངས་ལས་གཡོ་བ་མེད། །འཇིག་རྟེན་གནས་དང་མཐུན་འཇུག་སྟེ། །མཆོད་དང་བསྟོད་པས་མཉེས་འགྱུར་བས། །འཇིག་རྟེན་མཆོད་བསྟོད་ཅེས་སུ་གྲགས། །ཅེས་དེ་དང་མཐུན་པའི་ཡེ་ཤེས་ཀྱི་རང་རྩལ་ཅིར་ཡང་སྣང་བ་ཉིད། སྲུང་མའི་ཚུལ་དུ་བཅོས་ནས་བསྒོམས་ཤིང་མཆོད་བསྐང་བྱེད་པའི་ཐབས་ཀྱི་ལམ་བསྟན་པས། གནས་སྐབས་སུ་ཚོགས་གཏོར་ཆག་པའི་ཉེས་ལྟུང་སོགས་འབྱུང་བར་སེམས་པའི་རྟོག་སྒྲིབ་དག༵་པར་འདོད་པ་ཕྱི་ལྟར་གྱི་དང་། ནང་ལྟར་མཆོད་པས་རྩ་རླུང་ཐིག་ལེ་ཡང་ཕྲན་དང་བཅས་པའི་བག་ཆགས་དག༵་པ་དང་། གསང་བ་ལྟར་གྱིས་རྟོག་ཚོགས་ལྷག་མ་ཡེ་ཤེས་ཀྱི་རང་བཞིན་དུ་དག༵་པ་ཡིན་ནོ། །ཡང་ཡར་སངས་རྒྱས་པའི་གནས་སྐབས་སུ་སྐུ་རྣམ་པ་ཐམས་ཅད་པས་གང་ལ་གང་འདུལ་དུ་སྣང་བའི་འབྲས་བུ་གཞི་ལ་རྫོག༵ས། བར་ལམ་གྱི་གནས་སྐབས་སུ་རྩའི་དྲི་མ་དག་པ་ལྷ་རུ་སྦྱངས་བའི་རྡོ་རྗེའི་ལུས་ལ་གནད་དུ་བསྣུན་པས་རྫོགས་རིམ་ཐམས་ཅད་ཀྱི་སྨིན་བྱེད་དུ་འགྲོའོ། །ཡང་བརྟན་མའི་སྐབས་སུ། མར་འཁོར་བའི་གནས་སྐབས་ཀྱི་རྟེན་འབྲེལ་བཅུ་གཉིས་དང་། ལོ་ཟླ་ཞག་དུས་ཀྱི་སྦྱོར་བ་བཅུ་གཉིས་ཀྱི་བག་ཆགས་དག༵་པར་བྱེད། ཡར་སངས་རྒྱས་ཀྱི་གནས་སྐབས་སུ་བདེན་དོན་བཅུ་གཉིས་ཀྱི་ཕྲིན་ལས་འགོགས་པ་མེད་པར་ལྷུན་གྱིས་གྲུབ་ཅིང་། མཛད་པ་བཅུ་གཉིས་རྒྱུན་མི་འཆད་པའི་འབྲས་བུ་གཞི་ལ་རྫོག༵ས། བར་ལམ་དུས་སུ་དམར་ཆ་འབབ་པའི་ཆ་ལས་དགའ་བ་བཅུ་གཉིས་ཀྱི་འབར་འཛག་སྦོར་ཞིང་། རྟེན་འབྲེལ་དང་དུས་སྦྱོར་བཅུ་གཉིས་ཀྱི་རྩ་འཁོར་ལོ་དྲུག་དང་། འཁོར་མཚམས་དྲུག་གམ། ལྟེ་བའི་ཁྱིམ་བཅུ་གཉིས་ཀྱི་རྩ་རླུང་ཐིག་ལེ་ལས་སུ་རུང་བ་དང་འབྱོངས་བ་དང་། རྩ་མདུད་གྲོལ་ཞིང་། གཙུག་ཏོར་ཡེ་ཤེས་ཀྱི་འཁོར་ལོར་བརྟན་པས་ ༼ ས་དཔྱད། ༽ བཅུ་གཉིས་དང་མཐར་འབྲས་བླ་མེད་རྡོ་རྗེ་འཛིན་པའི་གོ་འཕང་གི་དངོས་སྐལ་སོ་སོའི་མངོན་པར་རྟོགས་པ་མཐའ་དག་འཆར་བའི་བར་གྱི་སྨིན༵་བྱེད་དུ་འགྲོའོ། །གསུམ་པ་སྦྱོར་ཚུལ་འགལ་མེད་དུ་དྲིལ་བ་ནི། ཇི་སྐད་དུ་པདྨའི་དགོངས་པ། བུམ་དབང་གི་ལམ་ཁྱེར་སྐུ་རྡོ་རྗེ་བསྐྱེད་པའི་རིམ་པས་ཐ་མལ་གྱི་སྣང་ཞེན་དག༵་ནས་ལུས་ལྷ་སྐུར་གྲོལ་བ་དང་། གསང་ཤེར་གྱི་ལམ་བདག་བྱིན་གྱིས་བརླབས་པ་དང་། གཞན་ལུས་ཕོ་ཉའི་ལམ་ལ་བརྟེན་པའི་རྫོགས་པའི་རིམ་པས་རྩ་རླུང་ཐིག་ལེའི་ཁམས་རྣམས་དབུ་མར་དག་ནས་ངག་གསུང་རྡོ་རྗེར་རྫོག༵ས་པ་དང་། བཞི་པའི་ལམ་རྫོགས་པ་ཆེན་པོ་ཀ་དག་ཁྲེགས་ཆོད་དང་། ལྷུན་གྲུབ་ཐོད་རྒལ་གཉིས་ལ་བརྟེན་ནས་ཡིད་ཡེ་ཤེས་ཆེན་པོར་སྨིན༵་ནས་སྤངས་ཐོབ་དང་བྲལ་བའི་འབྲས་བུ་གཞི་ལ་རྫོགས་ཏེ། ཞེས་སོགས་གསུངས་ལ་དེས་ན་སྙིང་ཐིག་ལས། སྣང་ཞེན་ལྷ་སྐུའི་ཕྱག་རྒྱར་རྫོགས་ནས་སྨིན་གྱི་བར་སོགས་ལྟོས་འཇོག་བསྙེན་བསྒྲུབ་ཡན་ལག་བཞི་ལྟར་སྣ་ཚོགས་ཀྱང་མི་འགལ་ལོ། །རྒྱུ་མཚན་ནི། སྣང་གྲགས་རིགས་གསུམ་གྱི་རེ་རེ་ལའང་། དག༵་རྫོག༵ས་སྨིན༵་གསུམ་ཆ་ཚང་བ་རེ་ཡོད་པའི་ཕྱིར་རོ། །

བཞི་པ་དགོངས་ཀློང་གི་མཇུག་བསྡུ་བ་ནི། མདོར་ན་མཐོང་བསྒོམ་མཐར་ལམ་གྱི་སྤངས་བྱའི་དྲི་མ་མཐའ་དག་རིམ་གྱིས་སྤངས་ནས་དག༵་པའམ་བྲལ་བར་བྱེད་ཅིང་། དེའི་ལམ་འོག་མའི་གོང་མ་དང་མཐར་ཐུག་ཡོན་ཏན་དྲུག་ཅུ་རྩ་བཞིར་བྲལ་དག་གིས་འབྲས་བུར་སྨིན༵་པ་དང་། སྤྲུལ་སྐུའི་ཕྲིན་ལས་ཀྱིས་སེམས་ཅན་སྨིན༵་པ་དང་། འདུས་མ་བྱས་པའི་ཡོན་ཏན་དེ་དག་ཀྱང་རྒྱུ་རྐྱེན་གྱིས་བསྐྱེད་པ་མ་ཡིན་པར། ཡེ་ནས་གཞི་ལ་རྫོག༵ས་པ་ཉིད་དང་མངོན་དུ་འགྱུར་པའི་བྱ་བ་དཀྱིལ་འཁོར་དང་། ལས་རྒྱལ་མཆོག །སྲོག་རྩོལ། དཔྱིད་ཐིག་སོགས་རྣལ་འབྱོར་ལམ་གྱི་ཚོགས་གཉིས་རྫོག༵ས་པ་ཉིད་ཀྱིས་ནའང་། གོ་བ་བླང་དུ་ཡོད་པའོ། །རྒྱུད་སྡེ་རྒྱ་མཚོའི་དགོངས་ཀློང་ཀུན་གསལ་ཁྱོན། །ཉམ་ཆུང་མེ་ཁྱེར་འོད་ཀྱིས་ཁྱབ་མིན་ཀྱང་། །ཅུང་ཟད་སྣང་འདི་བླ་མའི་དྲིན་ཡིན་ཏེ། །མཁས་གྲུབ་མཆོག་གིས་ཐུགས་ཁྲེལ་མེད་པར་ཞུ། ཅེས་པ་འདི་ཡང་རྡོ་རྗེའི་རིག་པ་འཛིན་པ་མཉྫུ་གྷོ་ཥ་རསྨིའི་བཀའ་མ་ལྡོག་པར་དུས་མཐའི་སྔགས་འཆལ་ག་གཱ་ཨ་བྷྱེ་ཡིས་སུག་རིས་སུ་བགྱིས་པའོ། །དགེའོ། །དགེའོ། །དགེའོ། །བཀྲ་ཤིས། ཞེས་གྲོང་སྔགས་རྒན་བུ་ག་གཱ་ཨ་བྷྱེའི་ཕུལ། ན་མོ་རཏྣ་ཏྲ་ཡཱ་ཡཿ ཨུཏྟ་ར་དྷེ་ཝ་ཊཱཀྐི་ནིཿ བ་སུ་དྷེ་ཝི་བུདྡྷ་ཀརྨ་ས་པཱ་རི་ཝ་ར་ས་མ་ཡ་ཛ་ཛཿ པུཎྱེ་ཤྲཱི་ཨ་ཡུར་པུཎྱེ་སརྦ་ཝ་ཤཾ་སུ་སིདྡྷི་ཀུ་རུ་ཧོཿ ཞེས་ཀྱང་སྒྲ་བརྒྱའི་དབང་བོའི་ཎིརྨ་ཀ་ཞེས་མི་སྲིད་སྲིད་པ་དེ་ཡིས་བསྐུལ། མི་བདེན་བདེན་པས་བྱིན་གྱིས་རླབས། རིག་སྔགས་སོ། །ནོར་བརྒྱ་སྟོང་ཁྲི་འབུམ་བྱེ་བར་འགྱུར་བའི་གདམས་ངག་ག་གཱས་སོ། །

ལོངས་སྤྱོད་ག་ཎ་ཙཀྲ་བསྡུས་པ་ཚོགས་གཉིས་མྱུར་རྫོགས།

ཡེ་ཤེས་སྒྱུ་འཕྲུལ་དྲྭ་བ་ལས༔ ལོངས་སྤྱོད་ག་ཎ་ཙཀྲ་བསྡུས་པ་ཚོགས་གཉིས་མྱུར་རྫོགས་བཞུགས༔

ན་མོ་གུ་རུ་བྷྱེ༔ བཟའ་བཏུང་ཚོགས་འཁོར་རྒྱུན་བརྟེན་པས༔ ཐབས་མཆོག་བདེ་མྱུར་ཟབ་མོ་ནི༔ ཨོཾ་ཨཱཿཧཱུྃ༔ རྃ་ཡྃ་ཁྃ༔ ཡེ་ཤེས་རྒྱན་གྱི་འཁོར་ལོ་ལ༔ དག་དང་མ་དག་མཚན་མ་མེད༔ རང་ཉིད་ཡེ་ནས་དཀྱིལ་འཁོར་ཏེ༔ བྱ་བྱེད་ལས་ཀྱི་དགང་བླུགས་ཀྱི༔ ཨ་ཧཾ་ལྷ་ཚོགས་ཞལ་གྱི་མཆོད༔ གཙང་རྨེ་གཉིས་འཛིན་རྟོག་པ་བསྒྲལ༔ ཚོགས་ཀྱི་དཀྱིལ་འཁོར་དབྱིངས་སུ་བསྟིམ༔ མཚན་འཛིན་རྟོག་སྒྲིབ་མཐོལ་ལོ་བཤགས༔ རང་བཞིན་དཀྱིལ་འཁོར་དགྱེས་པ་བསྐང་༔ བདེ་སྟོང་ཡེ་ཤེས་རོ་ལ་རོལ༔ འཁོར་འདབ་ཉེར་བཞི་གནས་ཡུལ་གྱི༔ དཔའ་བོ་མཁའ་འགྲོ་ལྷག་སྐྱོངས་ལ༔ ཡེ་ཤེས་བདུད་རྩིའི་ཕམ་ཕབ་འགྱེད༔ རྩལ་སྣང་དབང་བསྡུད་ཕྲིན་ལས་མཛོད༔ ཅེས་ཀྱང་ག་གཱས་སོ། །སྔགས་ཚིག་སྤེལ་བ་འདི་ལྟ་སྟེ༔ བུདྱ་དྷ་ར་མཎྜ་ག་ཎ་ཙཀྲ་ཁཱ་ཧི༔ ཐབས་ལ་མཁས་པའི་རྣལ་འབྱོར་ལ༔ བསོད་ནམས་མི་འགྱུར་གང་ཡང་མེད༔ འདི་ཡང་རྡོ་རྗེ་ཐེག་པ་ཡི༔ ཐབས་ཆེན་བཅོ་ལྔའི་ཁྱད་པར་ཡིན༔ ས་མ་ཡཱ༔ གལ་ཏེ་ཚོགས་ཀྱི་འཁོར་ལོ་ནི༔ ཡེ་ཤེས་དཀྱིལ་འཁོར་མགྲོན་ཐབས་དང་༔ ཡང་ན་གཟུགས་བརྙན་ཏིང་འཛིན་དུ༔ རང་བཞིན་དཀྱིལ་འཁོར་གང་ཡང་རུང་༔ འདོན་པ་བསྒྱུར་བ་འདི་ལྟ་སྟེ༔ རང་བཞིན་དཀྱིལ་འཁོར་གྱི་གོ་སར༔ དཀྱིལ་འཁོར་རྣམ་བཞིའི་དགྱེས་པ་བསྐང་༔ བྱས་པས་ཉམས་ལེན་རབ་ཏུ་བདེ༔ འདི་ཡང་པདྨ་མ་ཏི་ལ༔ ག་གཱ་ཨ་བྷྱེའི་རང་གྲོལ་བརྡའོ༔ ས་མ་ཡཱ༔ རྒྱ་རྒྱ་རྒྱ༔ སརྦ་མངྒ་ལཾ། ། ཚོགས་བསྡུས་ནི༔ རཾ་ཡཾ་ཁཾཿ ཨོཾ་ཨཱཿཧཱུྃ༔ འཁོར་གསུམ་གཞིར་བཞེངས་ཚོགས་ཡུལ་ངོ་བོར་སད༔ རྩ་གསུམ་བསྲུང་མར་མཆོད་འབུལ་ཉམས་ཆགས་བཤགས༔ ཐུགས་དམ་བསྐང་གྱུར་དགྲ་བགེགས་སྒྲོལ་ཞིང་སྟོབས༔ ལྷག་གཏོར་བཞེས་ལ་ཚོགས་རྫོགས་དངོས་གྲུབ་སྩོལ༔ ཞེས་སམ། ༈ཡང་ན། ཨོཾ་ཨཱཿཧཱུྃ་མ་ཧཱ་ག་ན་ཙཀྲ་ཤུདྡྷེ་དེ་ཝ་བི་ཤྭ་ས་མ་ཡ་བི་ཤུདྡྷེ་སརྦ་བིགྣན་མ་ར་ཡ་ཁ་རཾ་ཁཱ་ཧི༔ ཨུཙྪིཥྚ་ཁཱ་ཧི༔ གཡོ་སྐྱའི་ང་རྒྱལ་ཞི། འདོད་ཆགས་སོད་པར་གྱུར་ཅིག་ཤེས་རབ་བློ་འཕེལ་སྣ་བོ་ཆེ་སྭཱ་ཧཱ། ག་གཱས་སོ། །ཡང་གཅིག་ལྷ་ཡིས་ཚོགས་བསྡུས་ནི༔ རྃ་ཡྃ་ཁྃ༔ ཨོཾ་ཨཱཿཧཱུྃ༔ ཟག་མེད་ཡེ་ཤེས་ཚོགས་མཆོད་འདི༔ ཞི་ཁྲོ་རོལ་བའི་ལྷ་ལ་མཆོད༔ སྡོམ་གསུམ་དམ་ཚིག་ཉམས་ཆགས་བཤགས༔ གནོད་བྱེད་འཛིན་རྟོག་དབྱིངས་སུ་བསྒྲལ༔ ཕྱིན་ཆད་འཁྲུལ་མེད་ངང་དུ་བསྟབས༔ དཀྱིལ་འཁོར་ལྷ་ཚོགས་ཐུགས་དམ་དང་༔ ཉམས་ཆགས་ཉེས་ལྟུང་ཐམས་ཅད་བསྐངས༔ ལྷག་གཏོར་བཞེས་ལ་ཕྲིན་ལས་མཛོད༔ ཅེས་ཀྱང་ཤྲཱི་བས་སོ། །དགེའོ། །ཡང་ཅིག་ཚོགས་བསྡུས་གྲངས་གསོགས་ན༔ རྃ་ཡྃ་ཁྃ༔ ཨོཾ་ཨཱཿཧཱུྃ༔ ནམ་མཁའི་མཛོད་ཀྱི་ཏིང་འཛིན་འཕྲུལ༔ འཁོར་འདས་དཔལ་ཡོན་ལྷུན་རྫོགས་པའི༔ ཟག་མེད་ཡེ་ཤེས་ཚོགས་མཆོད་འདིར༔ མཆོད་སྦྱིན་མགྲོན་ཀུན་གཤེགས་སུ་གསོལ༔ འདོད་ཡོན་མཆོད་སྤྲིན་རྒྱ་མཚོ་འབུལ༔ དགྱེས་བཞེས་བདག་སོགས་སེམས་ཅན་གྱི༔ མི་དགེ་ཉམས་ཆགས་སྡིག་ལྟུང་བཤགས༔ མཚན་འཛིན་མཚན་མེད་དབྱིངས་སུ་སྒྲོལ༔ འཁོར་བ་ཆོས་སྐུའི་ངང་དུ་བསྟིམས༔ ལྷག་སྐྱོངས་ཕོ་མོའི་ལྷག་ལ་རོལ༔ བདག་ཅག་ཚོགས་རྫོགས་སངས་རྒྱས་ཤོག༔ ཨོཾ་གུ་རུ་དེ་ཝཱ་ཊཱཀྐི་ནི་ག་ན་ཙཀྲ་ས་མ་ཡ་ཤུདྡྷེ་རུ་ཏྲ་མ་ར་ཡ་ཨུཙྪིཥྚ་ལ་ཁཱ་ཧི༔ ཤྲཱི་བས་སོ། །

བཟའ་བཏུང་ལམ་ཁྱེར།

བཟའ་བཏུང་ལམ་ཁྱེར་བཞུགས་སོ༔

ཨོཾ་ཨཱཿཧཱུྃ༔ རང་གི་ལུས་ངག་ཡིད་གསུམ་ནི༔ གདོད་ནས་མ་བཅོས་མངོན་སངས་རྒྱས༔ འདོད་པའི་ཡོན་ཏན་ཐམས་ཅད་ཀུན༔ ཕྱི་ནང་སྒེག་མོར་རྣམ་པར་དག༔ ཤ་ལྔ་བདུད་རྩི་རྣམ་པ་ལྔ༔ རིགས་ལྔ་དམ་ཚིག་ལྔ་ཡི་དངོས༔ ཚིམ་པ་དྲུག་ལྡན་རོལ་བ་རུ༔ དགྱེས་མཉམ་བྱང་ཆུབ་སེམས་ཀྱིས་མཆོད༔ དང་དུ་བླང་བའི་དམ་ཚིག་མཐུས༔ ཉམས་ཆགས་སྡིག་སྒྲིབ་ཀུན་བྱང་ནས༔ ཚོགས་གཉིས་ཡོངས་སུ་རྫོགས་གྱུར་ཅིག༔ མཆོག་ཐུན་དངོས་གྲུབ་ཡོངས་ཐོབ་ཅིང་༔ མཐར་ཐུག་འབྲས་བུ་མངོན་གྱུར་ཤོག༔ ཅེས་སམ་ཡང་བསྡུ་ན། ཨེ་མ་ཧོཿ འཁོར་འདས་ལུས་དང་སེམས་ལ་རྫོགས༔ འདོད་ཡོན་ལྔ་ལྡན་སྦྱིན་སྲེག་གིས༔ ཚོགས་རྫོགས་སྒྲིབ་དག་སངས་རྒྱས་ཤོག༔ བཛྲ་མ་ཧཱ་སིདྡྷི་ཧོ༔ ཅེས་ཀྱང་ཤྲཱི་བས་སོ། །

མེ་མཆོད་བསྡུས་པ་དཔལ་གྱི་བུམ་བཟང་།

མེ་མཆོད་བསྡུས་པ་དཔལ་གྱི་བུམ་བཟང་ཞེས་བྱ་བ་བཞུགས་སོ༔

ན་མོ་གུ་རུ་པདྨ་ཀ་ར་ཡེ༔ བརྡ་ཡིག །དཀྱིལ་འཁོར་ལས་གཞུང་བསྲང་བྱས་ཏེ༔ བསྙེན་པའི་འཕྲོ་ལ་མཆོད་བསྟོད་མཐར༔ དྲག་ལས་ཡིན་ན་འགུགས་གཞུགས་ལ༔ གནོད་བྱེད་དགྲ་བགེགས་ཐམས་ཅད་མཚན་མ་རྫས་ཀྱི་རྟེན་འདི་ལ་ཁུག་ཅིག༔ ཅེས་དང་༔ སྭ་བྷ་ཝས་སྟོང་བར་སྦྱངས༔ སྟོང་པའི་ངང་ལས་མཆོད་སྲེག་གི་རྫས་རྣམས་ངོ་བོ་དགྲ་བགེགས་ཀྱི་ཤ་ཁྲག་རུས་གསུམ་ཡིན་པ་ལ་རྣམ་པ་བདེ་སྟོང་ཟག་མེད་ ༴ ཅེས་བཏགས༔ གཞན་ལ༔ སྟོང་པའི་ངང་ལས་ཏྲཱཾཿལས་རིན་པོ་ཆེའི་སྣོད་དུ་མཆོད་སྲེག་གི་རྫས་རྣམས་བདེ་སྟོང་ཟག་མེད་ཀྱི་བདུད་རྩི་འདོད་པའི་ཡོན་ཏན་ཐམས་ཅད་འབྱུང་བའི་རང་བཞིན་ཅན་དུ་གྱུར༔ ཨོཾ་ཨཱཿཧཱུྃ་ཧ་ཧོ་ཧྲཱི་ལན་གསུམ་གྱིས་བརླབས་ལ༔ རཾ་ཞེས་མེ་སྦར་ནས༔ ཡཾ་ཞེས་མེ་དར་གཡབ༔ ཁཾ་ཞེས་དག་གཙང་གི་སྐྱེམས་ཀྱིས་མེ་གསོས་ལ༔ བྷྲཱུྃ༔ མེ་ཐབ་གཞལ་ཡས་ལྷུན་གྲུབ་དབུས༔ མེ་ལྷ་བསྒྲང་ཕྲེང་གུནྡྷེ་འཛིན༔ སྣ་ཚོགས་མདོག་ཅན་འོད་འཕྲོ་འབར༔ རྭ་སྐྱེས་སྟེང་ན་འགྱིང་བག་ཅན༔ སྐུ་ཡི་ལྟོ་ ༼ སྤྲོས་ན་ ༽བ་ཡངས་པ་རུ༔ པདྨ་ཉི་ཟླའི་གདན་སྟེང་དུ༔ ༼ དེ་ནས་ཡི་དམ་ལྟ་བུ་ལ་མཚོན་ན༔ རང་ཉིད་རྡོ་རྗེ་གཞོན་ནུ་ནིའམ༔ ཆོས་སྐྱོང་ལ༔ དབུས་སུ་ཀུན་གྱི་ཁྱབ་བདག་མཆོག༔ ཅེས་དང་༔ མ་མོ་ཤ་ཟ་ཧོར་མོ་ནི༔ ཞེས་དང་གཟའ་ལ༔ རཿལས་དྲང་སྲོང་རཱ་ཧུ་ལ༔ ཞེས་དང་༔ ལྷ་ཆེན་ལ༔ ཧྲཱིཿལས་དྲང་སྲོང་ལྷའི་བླ་མ༔ སོགས་ནས་རང་གཞུང་སོ་སོ་ལ་འཇུག་གོ༔ མཆན༔ ༽བར་རྩ་གསུམ་དང་༔ ཆོས་སྐྱོང་སྲུང་མ་འཁོར་དང་བཅས༔ མ་འདྲེས་ཡོངས་སུ་རྫོགས་པར་གསལ༔ འོད་འཕྲོས་གནས་ནས་སྤྱན་དྲངས་གྱུར༔ སྤྲོས་ན་རང་རང་གི་སྤྱན་འདྲེན༔ བཞུགས་གསོལ་བཅས་ཀྱིས་གྲུབ་པར་བགྱིད་དམ༔ ཡང་ན༔ ཨོཾ་གུ་རུ་དེ་ཝ་ཊཱཀྐི་ནི་ན་མོ་རཏྣ་ཏྲ་ཡཱ་ཡ༔དྷརྨ་པཱ་ལ་བཛྲ་ས་མ་ཡ་ཛ་ཛ༔ ཛཿཧཱུྃ་བཾ་ཧོ༔ པདྨ་ཙནྡྲ་སུརྱ་མཎྜ་ལ་ཏིཥྛ་ལྷན༔ དེ་ནས༔ ཨོཾ་བཛྲ་ཨ་མྲ་ཏ་ཁཱ་ཧི༔ ཞེས་བྱོན་སྐྱེམས་མཐར༔ ཕྱག་འཚལ་མཆོད་བསྟོད་གཞུང་བཞིན་ནམ༔ ན་མོ་སརྦ་པཱུ་ཛ་ས་སྟི་སྟུ་ར༔ ཞེས་ཀྱང་ཆོག་གོ༔ རྩ་སྔགས་མཐར༔ སརྦ་པཱུ་ཛ་ཁཱ་ཧི༔ ཞེས་དང་བདུན་མཚམས་སོགས་སུ༔ ཨོཾ་ཤིནྟཾ་པུཥྚཾ་ཝ་ཤཾ་མ་ར་ཡ་སརྦ་སིདྡྷི་ཕ་ལ་ཧོ༔ རྫས་སྐོར་སྤུང་བ་ཅི་འགྲུབ་མཐར༔ སོ་རྩི་ལ༔ ཨོཾ་བཛྲ་ཏཾ་བུ་ལ་ཡེ་སྭཱ་ཧཱ༔ གོས་ཟུང་ལ༔ ཨོཾ་བཛྲ་ཝཥྚ་ཡེ་སྭཱ་ཧཱ༔ ཚོགས་སམ་ཆོས་སྐྱོང་ཡིན་ན་གསོལ་མཆོད་ཀྱི་རྗེས་སུ༔ གཏང་རག་གིས་མཆོད་བསྟོད༔ བཟོད་གསོལ་གྱི་མཐར༔ ཨོཾ་བཛྲ་ཨ་མྲ་ཏ་ཁཱ་ཧི༔ གཤེགས་སྐྱེམས་ལན་གསུམ་མཐར༔ ཧཱུྃ༔ ཡེ་ཤེས་འཇིག་རྟེན་མེ་ལྷའི་ཚོགས༔ བསྒྲུབ་བརྟེན་རྫས་ལ་བརྟན་བཞུགས་ཤིང་༔ རྣལ་འབྱོར་བདག་ཅག་འཁོར་བཅས་ཀྱི༔ ཕྲིན་ལས་རབ་འབྱམས་ཁྱོད་ཀྱིས་བསྒྲུབ༔ ཞེས་བྱས་ནས་གཏོར་སྒམ་གྱི་དམ་ཚིག་གི་རྫས་རྣམས་ལ་ཐིམ་པར་བསམ༔ ཡང་ཚོགས་བཏོན་ན༔ ཚོགས་ཀྱི་རྟག་ཆད་མཐའ་བསལ་གྱི་འགོར་གཤེགས་སྐྱེམས་ཕུལ་ནས༔ དེ་མན་ཆད་བསྐྱང་བས་ཆོག་གོ༔ དེ་སྐད་རྒྱས་བསྡུས་གང་ཡང་རུང་བ་འདི༔ དཀའ་བ་མེད་པ་སྔགས་ཀྱི་ཁྱད་ཆོས་ཡིན༔ ཚོགས་རྫོགས་བསྙེན་བསྒྲུབ་ཁ་སྐོང་ཕྲིན་ལས་མྱུར༔ འདི་འདྲའི་ཐབས་ལམ་འཇིག་རྟེན་ཀུན་ན་དཀོན༔ ས་མ་ཡཱ༔ སྐུ་གསུང་ཐུགས་ལ་ཁྲོས་པའི་ཉམས་ཆགས་པས། །སུས་ཀྱང་བལྟ་བར་མི་བཟོད་ཧེ་རུ་ཀ །ཤེས་རབ་བློ་འཕེལ་ཐུགས་དམ་བསྐང་གྱུར་ཅིག །ག་གཱ་ཨ་བྷྱེས་རྩལ་ཤུགས་ཕྱུང་དེ་ཕུལ། །དགེའོ། །

སྟོང་པའི་ངང་ལས་སྐད་ཅིག་དྲན་རྫོགས་སུ༔

སྭཱ་བྷ་ཝ ༴ སྟོང་པའི་ངང་ལས་སྐད་ཅིག་དྲན་རྫོགས་སུ༔ རང་ཉིད་དཔལ་ཆེན་རྡོ་རྗེ་གཞོན་ནུའི་སྐུ༔ ཁྲོ་ཚུལ་རྒྱན་རྫོགས་རྒྱས་འདེབས་ཡུམ་དང་སྦྱོར༔ ཀཱི་ལ་རིགས་ལྔ་ཁྲོ་བཅུ་ཟ་གསོད་སོགས༔ ཕུར་པའི་ལྷ་ཚོགས་མ་ལུས་ཡོངས་སུ་རྫོགས༔ གོ་ཆའི་ཚུལ་དུ་མ་འདྲེས་ལྷུན་གྱི་གྲུབ༔ སྣང་སྲིད་དབང་བསྡུད་ལྷ་འདྲེ་བྲན་ཁོལ་གྱི༔ གཟི་བརྗིད་ཉི་མ་འབུམ་ལས་ལྷག་པ་དང་༔ འཚམས་རྔམ་བཟོད་བར་དཀའ་བའི་དངོས་པོར་གསལ༔ དེ་ནས་བཀའ་བསྒོ་དམ་ལ་བཞག་པ་ནི། ཀྱཻ༔ བཀའ་སྣང་ཞིང་སྲིད་པའི་ལྷ་འདྲེ་ཐམས་ཅད་ཉོན་ཅིག །འདི་ལྟར་མཐོ་བ་སྲིད་པའི་རྩེ་མོ་མན་ཆད། དམའ་ན་རཀ་དམྱལ་ཁམས་གདན་ལ་ཐུག་གི་བར་གྱི་ཁམས་གསུམ་སེམས་ཅན་ཐམས་ཅད་ཐོག་མ་མེད་པའི་དུས་ནས་བཟུང་ཐ་མ་ད་ལ་མ་ཐུག་གི་བར་དུ་འཁོར་བ་ལུ་གུ་རྒྱུད་དུ་ཁ་འཁོར་ནས་སྐྱེ་བ་གྲངས་མེད་པ་བླང་བའི་དུས་སུ་ཕ་དང་མ་རུ་མ་གྱུར་པ་གཅིག་ཅིང་མེད་དེ། སྐྱེ་ལུས་བརྗེས་ནས་ངོ་མ་ཤེས་པ་ཙམ་དུ་ཟད་དོ། །དེ་ལྟར་ཕ་མ་བྱས་རིས་ལ་བྱམས་པའི་ལུས་ངག་ཡིད་གསུམ་གྱིས་བསྐྱངས་ནས་རང་གི་བཟའ་མ་བྲ་བར། ཟས་ཀྱི་ཕུད་དང་བཟང་དགུ་ཞིམ་དགུ་སྦྱིན་ནས། ཐ་ན་ལུས་ཟུང་གི་འོ་མ་ཡན་ཆད་ཀྱིས་གསོས། གོས་རང་གི་གྱོན་མ་བྲ་བར་མཛེས་དགུ་དང་དྲོ་འཇམ་བཀོན་ནས། ཐ་ན་ལུས་ཟུངས་ཀྱི་དྲོད་ལ་བཅར། རྒྱུ་རང་གི་སྤྱོད་མ་བྲ་བར་ཅི་ཡོད་ཀྱི་སྐལ་བ་ཕོག་ནས་བུ་ཚ་ན་བ་ལས་རང་ཤི་བ་འདམ་ནུས། རང་གི་ཤེས་ཚོད་ཀྱི་བསླབ་བྱ་གཡོ་རྒྱུ་མེད་པའི་སྒོ་ནས་བསླབ༔ དཀའ་ཚེགས་ངལ་དུབ་ཐམས་ཅད་ཁྱད་དུ་བསད་ནས་བསམ་རྒྱུ་བུ་བརྒྱུད་ལས་མེད་པར་བྱས་དྲིན་ཆེན་པོའི་བསྐྱངས༔ གནོད་ཚད་མེད་པ་ལས་བསྐྱབས་ནས། རང་རེའི་དོན་ཏུ་བསམ་ནས་ཐ་ན་གཞན་གྱི་དཔྱ་སེམས་དང་བརྙས་བཅོས་ཀྱི་ཟུར་ཙམ་ཡང་མི་བཟོད་པར་ཞེ་སྡང་གིས་ཀུན་སློང་ངན་པས་བསླང་བའི་ལས་ངན་བསགས་ནས་བསྐལ་བར་དམྱལ་བར་མནར། བདེ་འདོད་ཀྱི་བྱམས་པས་ཀུན་ནས་བསླང་ཏེ། རྐུ་འཕྲོག་གསོད་གཅོད་ཀྱི་ལས་བསགས་པས་བསྐལ་པར་ཡི་དྭགས་ཀྱི་སྡུག་བསྔལ་ལ་ལྕེབ། རང་ཅག་གིས་གནོད་པ་རི་བོ་ཙམ་བྱས་ཀྱང་བཟོད་སྲན་བསྐྱེད་ཅིང་། ད་དུང་ཡང་ཕན་པར་བསྒྲུབ་པའི་དྲིན་ཆེན་ཤ་སྟག་ཏུ་ངེས་པས་ན། བཟང་ལན་དུ་ངན་གནོད་མ་བྱེད། སྨན་ལན་དུག་གི་མ་གསོད། ཆང་ལན་ཆུ་ཡི་མ་འཇལ། དྲིན་ཆེན་ལ་དྲིན་ལོག་མ་བྱེད་པར། བཟུང་པ་ཡོད་ན་ཐོངས། བཅིངས་བ་ཡོད་ན་ཁྲོལ། བསྡམས་པ་ཡོད་ན་ཀློད། མནན་པ་ཡོད་ན་ཁྱོགས་ཅིག །འེ་འེ། འདི་རྣམས་ཀྱང་རང་རང་བདེ་བ་འདོད་པ་ལ་ཁྱེད་རྣམས་དང་ཁྱད་པར་ཅུང་ཟད་ཙམ་ཡང་མེད། སྡུག་བསྔལ་མི་འདོད་པ་ལ་ཁྱད་པར་ཅུང་ཟད་ཙམ་ཡང་མེད། བདེ་དོན་སྒྲུབ་པའི་རྒྱུ་དགེ་བ་ཡིན་ཀྱང་བསྒྲུབ་མི་ཤེས་པ་ལ་ཁྱད་པར་ཅུང་ཟད་ཙམ་ཡང་མེད། སྡུག་བསྔལ་འབྱུང་བའི་རྒྱུ་མི་དགེ་ཡིན་ཀྱང་སྤོངས་མི་ཤེས་པ་ལ་ཁྱད་པར་ཅུང་ཟད་ཙམ་ཡང་མེད་པས་ན། རང་གི་རང་ལ་དཔེ་ལོངས་ལ་གཞན་ལ་གནོད་འཚེ་གདུག་རྩུབ་ཀྱི་བསམ་སྦྱོར་ངན་པ་དེ་ཐོང་ལ། བཟུང་པ་སོགས་ཡོད་ན་ཐོངས། བཅིངས་པ་ཡོད་ན་ཁྲོལ། བསྡམ་པ་ཡོད་ན་ཀློད། མནན་པ་ཡོད་ན་ཁྱོགས་ཅིག། འཻ། གལ་ཏེ་བཀའ་ལ་མི་ཉན། དམ་ལ་མི་གནས། གསུང་ལ་མི་སྡོད། དངོས་གྲུབ་མི་སྩོལ། དྲིན་ལ་མི་བརྩི། དངོས་གྲུབ་ལ་བར་ཆད་བྱེད། བསམ་པ་ངན་ཅིང་གནོད་པའི་སྦྱོར་བ་ངན་པ་དེ་བྱེད་ན། གཞན་ལ་གནོད་པ་བྱས་པའི་ལེ་ལན། ལས་ཀྱི་ལྷག་མ་ཙམ་གྱི་རྣམ་སྨིན་ལ། བསད་བསད་ཀྱི་ལན་ཆགས་ཚེ་ཐུང་བ། བརྡུང་བརྡུང་གི་ལན་ཆགས་ནད་མང་བ། རྐུ་འཕྲོག་གི་ལན་ཆགས་ཟས་ནོར་དབུལ་བ། གནོད་པ་བྱས་པའི་ལན་ཆགས་གནོད་པ་བྱེད་པ་ལ་སོགས་བ་འབྱུང་བས། རང་གིས་རང་ལ་བྱམས་བརྩེ་ཤེས་པའི་ངང་ནས། བཟུང་བ་ཡོད་ན་ཐོངས། བཅིངས་བ་ཡོད་ན་ཁྲོལ། བསྡམ་པ་ཡོད་ན་ཀློད། མནན་པ་ཡོད་ན་ཁྱོགས་ཅིག །ཁྱད་པར་ཁྱེད་རྣམས་ད་སྐབས་ཡི་དྭགས་ཀྱི་སྡེ་ཚན་དུ་གཏོགས་པའི་ལུས་ལ་ནད་ངན་པ་དང་། ཞག་བདུན་གྱིས་འཆི་བ་དང་། ཟས་མི་རྙེད་པ་དང་། སེམས་ལ་རྟག་ཏུ་འཇིགས་སྐྲག་དངངས་གསུམ་དང་། ལོག་པའི་འདུ་ཤེས་བཞི་དང་། རྟག་ཏུ་བརྣག་པའི་བསམ་སྦྱོར་ལ་རང་བཞིན་གྱིས། དགའ་ཞིང་གནས་པ་དང་། རང་གི་སྡུག་བསྔལ་གཞན་ལ་སྤོ་བར་སེམས་པའི་འདུ་ཤེས་དང་། ལྟོག་ཕུངས་དབུལ་བའི་དུཿཁ་དཔག་ཏུ་མེད་པ་མྱོང་བ་འདི་དག་སྔོན་ཆད་སེར་སྣ་དང་གཞན་གནོད་བརྩམས་པའི་འབྲས་བུ་མངོན་དུ་གྱུར་བ་ཡིན་པས། ད་རུང་འདི་འདྲ་བྱེད་ན། ད་གདོད་ཀྱང་འདི་འདྲ་བའི་སྡུག་བསྔལ་ལ་མཐའ་མེད་པས། རྒྱུ་འབྲས་བསླུ་བ་མེད་པའི་ཚུལ་ལ་ངེས་པ་བསྐྱེད་ལ་ངོ་ཤེས་པའི་ངང་ནས་བཟུང་བ་ཡོད་ན་ཐོངས། བཅིངས་བ་ཡོད་ན་ཁྲོལ། བསྡམ་པ་ཡོད་ན་ཀློད། མནན་པ་ཡོད་ན་ཁྱོགས་ཅིག །གཞན་ཡང་སྲིད་པ་ཕྱི་མའི་དུས་སུ་མཐོ་རིས་ཀྱི་ལུས་རྟེན་རེ་ལོན་སྲིད་ནའང་། ཁྱེད་རྣམས་ལ་ལན་ཆགས་ཀྱི་དབང་གིས་ཡོན་བདག་འདི་ལྟ་བུའི་ལུས་སུ་གྱུར། ནད་པ་འདི་ལྷ་འདྲེ་ཁྱེད་ལྟ་བུའི་རྒྱུད་ཏུ་འཁྲུལ་ནས་གནོད་བྱ་དང་གནོད་བྱེད་དུ་འབྲེལ་ནས་སྲོག་ལན་ལྔ་བརྒྱ་ལ་སོགས་པ་ད་ལྟ་ཁྱོད་ཀྱིས་གནོད་བྱས་པ་ཇི་ལྟ་བ་ལྔ་བརྒྱ་རེ་འཁོར་འོང་བར་གདོད་མི་ཟ་བས་རང་གིས་རང་ལ་བྱམས་བརྩེ་ཤེས་པའི་ངང་ནས་བཟུངས་བ་ཡོད་ན་ཐོངས། བཅིངས་བ་ཡོད་ན་ཁྲོལ། བསྡམ་པ་ཡོད་ན་ཀློད། མནན་པ་ཡོད་ན་ཁྱོགས་ཅིག །ད་དུང་གཞན་གནོད་གཞིར་བཅས་ཀྱི་བསམ་སྦྱོར་ངན་པ་འདི་མི་འདོར་ན་ནི། ཞེ་སྡང་དང་སྲོག་གཅོད་འདི་ལ་རྣམ་སྨིན་དེ་ཡིས་མི་ཚད་དེ། མནར་མེད་སྡུག་བསྔལ་གྱི་མེ་དོང་ཆེན་པོ་བཟོད་བར་དཀའ་བ་རུ་གཏན་དུ་ཐར་བ་མེད་པས་དུས་འདའ་བར་འགྱུར་བ་དེ་བས་ན། རང་གིས་རང་ལ་བྱམས་བརྩེ་ཤེས་པའི་ངང་ནས་བཟུང་པ་ཡོད་ན་ཐོངས། བཅིངས་པ་ཡོད་ན་ཁྲོལ། བསྡམ་པ་ཡོད་ན་ཀློད། མནན་པ་ཡོད་ན་ཁྱོགས་ཅིག །འོན་ཏེ་ཁྱེད་རྣམས་ཀྱི་ནད་དང་སྡུག་བསྔལ་ལ་ནི་འདི་ལ་གནོད་བྱས་པས་ཕན་པ་ཅུང་ཟད་ཀྱང་མེད་པའི་སྟེང་དུ་ཕྱིར་ཞིང་གནོད་པ་ཇེ་ཆེར་འགྲོ་བ་ལས་འོས་མེད། ཁྱོད་ཀྱི་སྡུག་བསྔལ་ནི་སྔོན་འདི་ལྟ་བུའི་བསམ་སྦྱོར་ངན་པའི་མྱོང་བ་རྒྱུ་མཐུན་གྱི་འབྲས་བུ་ཡིན། ཡོན་བདག་འདིའི་བྱས་བའང་མིན་པས། འདི་ལ་ཐོ་འཚམས་པའི་དོན་མེད། དེ་བས་ན་ཁྱོད་འདྲའི་ལས་ངན་མྱོང་བ་རྣམས་ལ་དེ་དང་བྲལ་འདོད་ཀྱི་བསམ་པ་བཟང་བོ་བྱང་ཆུབ་ཀྱི་སེམས་བསྐྱེད། སྐྱབས་གནས་དཀོན་མཆོག་གསུམ་ལ་སྐྱབས་འགྲོ་བརྗོད་དང་། དེའི་ནམ་མཁའ་མཛོད་ཀྱི་གཏེར་ཆེན་པོའི་ཟས་ནོར་ལོངས་སྤྱོད་ལ་དབང་ཐོབ་ཅིང་ལྟོག་ཕུངས་དབུལ་བའི་སྡུག་བསྔལ་དང་། འཇིགས་སྐྲག་འཁྲུལ་སྣང་གི་ནད་དང་གནོད་པ་ཞི་ཞིང་། ཟག་མེད་ཀྱི་བདེ་དཔལ་རང་དབང་བར་མ་གྱུར་ན་ངས་ཁྱོད་བསླུས་པ་ཡིན་པས་བདེན་པའི་ཚིག་ལ་མཉན་པར་བྱོས་ལ་བཟུང་བ་ཡོད་ན་ཐོངས། བཅིངས་བ་ཡོད་ན་ཁྲོལ། བསྡམ་པ་ཡོད་ན་ཀློད། མནན་པ་ཡོད་ན་ཁྱོགས་ཅིག །གལ་ཏེ་བཀའ་ལས་འདའ་ཞིང་དམ་ལ་མི་གནས་ན། བདག་ཉིད་དཔལ་ཆེན་པོ་རྡོ་རྗེ་གཞོན་ནུའི་ལྷ་ཚོགས་འཁོར་དང་བཅས་པའི་ཐུགས་ཀ་ནས་ཡེ་ཤེས་ཁྲོ་ཆུང་འབར་བའི་ཚོགས་ཆེན་རྡོ་རྗེའི་མེའི་ཚྭ་ཚྭ་དང་། མཚོན་ཆ་སྣ་ཚོགས་ཀྱི་ཆར་བ་འཕྲོས་ཏེ། ཁྱེད་རྣམས་ཐལ་བ་རྡུལ་ཕྲན་བཞིན་ཏུ་བརླག་པར་འགྱུར་ཏ་རེ། དེ་བྱས་ ༼ བས་དཔྱད། ༽ ན་ཞི་བ་དང་བྱམས་པའི་སེམས་ཀྱིས་སོ་སོ་རང་རང་གི་གནས་སུ་ཕྱིར་དེངས་ཤིག །ཧཱུྃ༔ བཞིའི་སྔགས་སོགས་བརྗོད་ཅིང་བགེགས་བསྐྲད་དོ། །མཐར་འཁོར་གསུམ་དམིགས་མེད་ཀྱི་ལྟ་བའི་ངང་དུ་བཞག་པ་ནི་བགེགས་བསྐྲད་མཆོག་དང་། སྣང་སྲིད་དག་ཆེན་དུ་བལྟ་བ་ནི་མཚམས་གཅོད་བླ་ན་མེད་པའོ། །དགོས་མེད་འདི་ཨུ་རྡོར་ངོར་ག་གཱས་སོ། །

ཟབ་དོན་གཅོད་ཀྱི་ཉམས་ལེན་ཚོགས་གཉིས་ལྷུན་གྲུབ།

རྡོ་རྗེ་སེམས་དཔའི་དགོངས་ཉམས་ལས༔ ཟབ་དོན་གཅོད་ཀྱི་ཉམས་ལེན་ཚོགས་གཉིས་ལྷུན་གྲུབ་ཞེས་བྱ་བ་བཞུགས་སོ༔

ན་མོ་གུ་རུ་པདྨ་ཀ་ར་ཡེ༔ བརྡ་ཡིག །རྣལ་འབྱོར་གང་ཞིག་སྐལ་ལྡན་བས༔ སྐྱེ་རྒ་ན་འཆིའི་ཆུ་བོ་བཞི༔ ཕུང་པོ་ཉོན་མོངས་འཆི་བ་དང་༔ དགའ་སྤྲོ་ལྷ་བདུད་བཞི་གཅོད་ཅིང་༔ བསོད་ནམས་ཡེ་ཤེས་ཚོགས་རྫོགས་ཕྱིར༔ སྒྲོལ་སྦྱོར་ཕར་ཕྱིན་དྲུག་ལྡན་པ༔ རྒྱུན་དུ་བྱེད་པའི་རྣལ་འབྱོར་ནི༔ སྦྱོར་དངོས་རྗེས་ཀྱི་རིམ་པ་གསུམ༔ དང་བོ་རྣམ་པ་ལྔ་ཡིན་ཏེ༔ དབང་བསྡུད་ཟིལ་གནོན་ནི༔ ཕཊ་ཕཊ་ཕཊཿ བདག་གཉིས་བཟུང་འཛིན་རྣམ་རྟོག་ཆོ་འཕྲུལ་ལས༔ ཉོན་མོངས་རྟོག་གཟུགས་སྟོང་ཕྲག་བརྒྱད་ཅུའི་ཚོགས༔ དབྱིངས་ཡེ་ངོ་མཉམ་ཤེས་རབ་ངང་དུ་བསྡུས༔ འདའ་དཀའ་ཕྱག་ཆེན་ལྟ་བས་ཟིལ་གྱིས་མནན༔ ཕཊ་ཕཊ་ཕཊཿ བྲོ་ར་ནི༔ དུག་ལྔའི་རྒྱུད་འཁྲུལ་གདོན་བགེགས་ཐམས་ཅད་ལ༔ ཡེ་ཤེས་ལྔ་ཡི་བརྟུལ་ཞུགས་རྔམ་པའི་བྲོ༔ རང་རྩལ་མཁའ་འགྲོའི་ཧི་ཧིའི་གད་རྒྱང་བཅས༔ འདུ་ཤེས་ལྟ་དང་ལྟ་མིན་བཟློག་ཕྱིར་བརྡུང་༔ ཕཊ་ཕཊ་ཕཊཿ ཕུར་ཁྱེར་ནི༔ བདག་འཛིན་ལྷ་འདྲེའི་མགོ་དང་ཡན་ལག་ལྔར༔ ཡེ་ཤེས་རྡོ་རྗེའི་ཐལ་འབྱིན་ཕུར་བུ་གདབས༔ རང་བྱུང་ཡེ་ཤེས་བྱང་ཆུབ་རྣམ་པ་ལྔ༔ མ་སྐྱེས་སྲིད་དུ་གཡོ་ལྡང་མེད་པར་གྱུར༔ ཕཊཿ སྐྱབས་སུ་འགྲོ་བ་འདི་ལྟར་རོ༔ ཕཊཿ རང་སེམས་ཡེ་ནས་དཀོན་མཆོག་དགུ་སྤྲུགས་ལ༔ མ་རྟོགས་རང་བཅིང་འཁོར་བའི་སྡུག་བསྔལ་མྱོང་༔ ད་ནི་གཉིས་མེད་རང་ངོ་ཤེས་པ་ཡི༔ འདུ་འབྲལ་མེད་པའི་ངང་ལ་སྐྱབས་སུ་མཆི༔ དེ་ནས་བྱང་ཆུབ་སེམས་བསྐྱེད་ནི༔ ཕཊཿ སེམས་ཅན་ངོ་བོ་ཡེ་ནས་ཆོས་ཀྱི་སྐུ༔ སྣང་བརྟགས་འཁྲུལ་པ་རྨི་ལམ་གཉིད་ཀྱིས་ནོན༔ ཆོས་ཙམ་ཉིད་ཀྱང་སྣང་ལ་གྲུབ་མ་མྱོང་༔ བདག་གི་མཐུ་ཡིས་མ་རིག་མལ་ནས་བསླང་༔ གསུམ་པ་མཎྜལ་ནི༔ ཕཊཿ ཕྱི་ནང་གསང་གསུམ་གཞི་ལམ་འབྲས་བུ་ཡི༔ སྐུ་གསུམ་སྐུ་གསུང་ཐུགས་ཀྱི་དཀྱིལ་འཁོར་ནི༔ མ་བཀོད་གཞི་ལ་ཡེ་ནས་རྫོགས་པ་ཆེ༔ མཆོད་བྱ་མཆོད་བྱེད་བྲལ་བའི་ངང་དུ་འབུལ༔ དེ་ནས་ཚོགས་བསགས་ཡན་ལག་བདུན་པ་ནི༔ ཕཊ༔ བདག་མེད་ཆོས་ཅན་ཆོས་ཉིད་དཀྱིལ་འཁོར་ལ༔ རྟོག་ཚོགས་བྱང་ཆུབ་སེམས་ཀྱི་མཆོད་པ་འབུལ༔ གཉིས་མེད་ལྟ་བ་མཇལ་བས་ཕྱག་འཚལ་ལོ༔ འདུ་བྱེད་དོན་ཡོད་གྲུབ་པའི་ངང་དུ་བཤགས༔ ཆོས་ཉིད་མི་དགེ་མེད་ལ་རྗེས་ཡི་རང་༔ སྤྲོས་བྲལ་ནམ་མཁའ་ལྟ་བུའི་ཆོས་འཁོར་བསྐོར༔ མྱ་ངན་གཞི་གྲོལ་བདེ་བ་ཆེན་པོར་བཞུགས༔ འཁོར་གསུམ་དམིགས་མཐའ་བྲལ་བའི་དབྱིངས་སུ་བསྔོ༔ འགྲོ་ཀུན་ཡེ་ཤེས་བླ་མའི་ས་ཐོབ་ཤོག༔ ལྔ་པ་བླ་མའི་རྣལ་འབྱོར་ནི༔ ཕཊཿ སྤྱི་བོར་ཡུམ་ཆེན་ཆོས་སྐུའི་བླ་མ་ནི༔ ཕྱག་གཡོན་ས་གནོན་གཡས་པ་མཉམ་བཞག་སྟེང་༔ གསེར་གྱི་རྡོ་རྗེ་རྩེ་ལྔ་བགྲེང་ ༼ བསྒྲེངས་དཔྱད། ༽ བའི་ཚུལ༔ སྐུ་མདོག་མཐིང་ནག་རིགས་ཀུན་འདུས་པར་བསྐྱེད༔ མོས་གུས་གདུང་ཤུགས་དྲག་པོའི་ཐུགས་རྒྱུད་བསྐུལ༔ བྱིན་རླབས་དབང་བཞི་འོད་ཟེར་རྣམ་པ་ཡི༔ སྨིན་གྲོལ་ལས་རུང་རྡོ་རྗེ་ཡེ་ཤེས་བཞིར༔ གྲོང་འཇུག་དབྱེར་མེད་ངོ་བོ་རོ་གཅིག་གྱུར༔ ཕཊཿ གཉིས་པ་དངོས་གཞི་སྦྱོར་སྒྲོལ་ནི༔ ཕཊ་ཕཊ་ཕཊཿ བདག་གཉིས་དངོས་འཛིན་ཁམས་གསུམ་ཉོན༵་མོང༵ས་འ༵དྲེ༔ བདག་མེད་ཤེས༵་རབ༵་ཡུམ་ཆེན་ཆོས་སྐུའི་ངང་༔ སྲོག་མེད་ན་བ་ཀ་དག་ཆེན་པོར་བསྒྲལ༔ རྣམ་སྨིན་མེད་སྣང་ཕུང༵་པོ༵་བརྟགས་ཆགས་བདུད༵༔ སེམས་ཀྱི་མི་བཟུང་གཅེས་འཛིན་ཕཊ་ཀྱིས་ཕྲལ༔ དག༵འ་བྲོད་རེ་བ་སྐྱིད་སྣང་དོན་གཉེར་བློས༔ མི་གཡོ་བས༵མ་གཏ༵ན་ཆེན་པོར་ལ་བཟླས་ཏེ༔ འཆི༵་བདག༵་བདུད༵་བཅོམ་གྲོང་དུ་འཕོ་འཇུག་གི༔ སྐྱེ༵་གནས་མངལ་དུ་རིམ་འཇུག་བདུད་བཅོམ་ཏེ༔ སྐད་ཅིག་གཅིག་ལ་རྡོ་རྗེ་ཁྲོས་མར་སྦྱོར༵༔ གཞོན་ནུ་བུམ་སྐུ་རྒ་བའི་འཇིག་དང་བྲལ༔ ཟབ་མོ་སྣང་སྟོང་གཉིས་སུ་མེད་བཟོ༵ད་པས༵༔ མཚ༵ན་རྟོག༵་སྙེམ་བྱེད་ཡེ་ཤེས་ཉིད་དུ་སྡོམ༵༔ མཐིང་ནག་ཞལ་གཅིག་ཕྱག་གཉིས་གྲི་ཐོད་འཛིན༔ གར་སྟབས་རུས་རྒྱན་སྤྱི་བོར་ཕག་ཞལ་ངུར༔ ཕཊ་ཕཊ་ཕཊཿ སྦྱིན༵་བྱའི་ཟང༵་ཟིང༵་སྒྱུ་མ་ལྟ་བུའི་ལུས༵༔ ཕྱག་གཡས་གྲི་གུག་ཚད་པས་ཐལ་གྱིས་ཞིག༔ ལྤགས་པ་དབང་ཆེན་གསེར་གྱི་གཞིར་གྱུར་སྟེང་༔ ཤར་ཕྱོགས་དཀར་གསུམ་མངར་གསུམ་རི་མཚོ་བྲག༔ ལྷོ་ཕྱོགས་མཁོ་དགུའི་ཡོ་བྱད་སྤྲིན་ཕུང་པོ༔ ཀ་ཆ་དཀོར་ཆ་ཁང་ཁྱིམ་རྐང་འགྲོ་དབྱིག༔ རྒྱན་དང་བགོ་བ་དར་གོས་བདུད་རྩི་སྨན༔ གླུ་གར་རོལ་མོ་ལྷ་ཀླུའི་ཁྱད་པར་ནོར༔ ནུབ་ཕྱོགས་ཤ་ཁྲག་རུས་པའི་ཕུང་པོའི་གཏམས༔ བྱང་ཕྱོགས་ཁུ་རླངས་བམ་རིལ་ལུས་སུ་བརྡལ༔ ཕཊཿཕཊཿཕཊཿ དབུས་ཕྱོགས་ཐོད་པ་ར་རི་སུམ་ཚུགས་ཀྱི༔ སྟེང་དུ་ཤ་ཆེན་དྭངས་མ་གཏམས་པ་ཡི༔ ཐོད་པ་ཕྱག་གི་རྒྱ་ཡི་བླངས་ཏེ་བཙུགས༔ སྒྱེད་པུའི་ཡི་གེ་ཡྃ་རྃ་འཕྲོད་སྦྱོར་གྱིས༔ ཞུ་ཞིང་ཁོལ་བའི་ཡེ་ཤེས་བདུད་རྩི་ཡི༔ རླངས་ལས་སྤྲིན་ཆགས་ཀུན་བཟང་མཆོད་པར་ཤར༔ ཕྱི་ནང་གསང་བ་བླ་ན་མེད་པ་དང་༔ སྙིགས་མ་དཀར་དམར་མཐིང་ཀའི་མྱོང་གྲོལ་ནི༔ བདེ་ཆེན་ཟག་མེད་ཆོས༵་སྦྱིན༵་རྒྱུད་ལ་འདེབས༔ དེ་ལས་མི༵་འཇིག༵ས་འཁོར་བའི་སྡུག་བསྔལ་སྐྱབ༵ས༔ ཡི་གེ་འཁོར་ལོའི་སྐུ་གསུམ་ངོ་བོར་བརླབས༔ བདག་ཉིད་ཐུགས་ལས་ལས་བྱེད་དགའ་མར་འགྱེད༔ ཕཊཿཕཊཿཕཊཿ ཕཊཿ ཅེས་ཌཱ་འུར་དང་རྐང་གླང་གི་སྤྱན་དྲངས༔ ཀྱེ༔ སེམས་ཉིད་འཁོར་འདས་ཀུན་བྱེད་རྒྱལ་པོ་ཡི༔ བཟང་ཞེན་འཁྲུལ་བ་དུས་གསུམ་སངས་རྒྱས་ལ༔ ཡེ་ཤེས་རྒྱན་གྱི་མཆོད་པ་དམ་པ་འབུལ༔ ཡར་བདུད་རེ་བ་ཆོད་པར་བྱིན་གྱིས་རློབས༔ འཁོར་འདས་དབུ་མ་ཆེན་པོར་རང་གྲོལ་ནས༔ འཇིགས་མེད་གདེངས་ཆེན་ཐོབ་པའི་རྒྱུར་གྱུར་ཅིག༔ ཕཊཿ ཕཊཿ ཕཊཿ ཕན་སྐྱོབས་ལྷ་རུ་མེད་ལ་ཡོད་པར་འཐས༔ མགོན་པོ་ཡོན་ཏན་མགྲོན་རིགས་ཐམས་ཅད་ལ༔ དམ་རྫས་འདོད་ཡོན་རྒྱན་གྱི་བསྐང་རྫས་འབུལ༔ རབ་འབྱམས་ཕྲིན་ལས་མ་ལུས་ཡོངས་གྲུབ་མཛོད༔ ཐུགས་རྗེས་སྒྱུ་འཕྲུལ་རང་རྩལ་ཡེ་ཤེས་སུ༔ ཅེར་གྲོལ་མཉམ་ཉིད་རྟོགས་པའི་རྒྱུར་གྱུར་ཅིག༔ ཕཊཿ ཕཊཿ ཕཊཿ ལྷ་འདྲེ་གཉིས་སུ་སྣང་བའི་ལྟོས་གྲུབ་དུ༔ ཕོ་གདོན་མོ་གདོན་ཀླུ་གདོན་གཟའ་བཙན་གཟེ༔ མཚུན་དང་དྲི་ཟ་མ་མོ་ཐེའུ་རང་༔ ཤ་ཟ་སྲུལ་བོ་གནས་ལུས་སྨྱོ་བརྗེད་གདོན༔ མ་ལུས་ལུས་པ་མེད་པར་ཐམས་ཅད་ལ༔ ཤ་ཁྲག་དཀར་དམར་སྡིག་སྒྲིབ་བཀྲུས་པའི་སྙིགས༔ ཡོ་བྱད་ཆ་མ་ཆོ་དགུ་ཕང་མེད་འབུལ༔ ངན་ཞེན་གནོད་བྱེད་རང་མཚན་གོལ་བའི་བདུད༔ གཞི་རྩ་བདག་མེད་རྟོགས་གྲོལ་རྒྱུ་རུ་ཤོག༔ ཕཊཿ ཕཊཿ ཕཊཿ ཁམས་གསུམ་སེམས་ཅན་ཡུལ་དུ་ཞེན་པའི་འདྲེ༔ རང་རང་སྡུག་བསྔལ་སེལ་ཞིང་གང་སྨོན་པ༔ ལྷག་བསམ་བྱང་སེམས་སྟོང་ཉིད་དབང་འབྱོར་ལས༔ རང་རང་སྒྲིབ་པས་མི་གོས་ཐོབ་པར་ཤོག༔ སྟོབས་འདིས་འཁོར་བ་ཀ་ནས་དག་པ་དང་༔ བདག་ཉིད་ཆེན་པོའི་དབྱིངས་སུ་ཚར་ཕྱིན་ཤོག༔ ཕཊཿཕཊཿཕཊ ཿ ལྷག་མའི་མགྲོན་རིགས་ཀུན་ལ་ཕ་ཕོག་འགྱེད༔ རང་ལ་གང་འཚམས་མཁོ་དགུ་ཐོབ་ནས་སུ༔ གཏན་དུ་བདེ་བ་སངས་རྒྱས་མཆོག་གྲུབ་ཏེ༔ དོན་གཉིས་ལྷུན་གྱིས་གྲུབ་པའི་རྒྱུར་གྱུར་ཅིག༔ ཕཊཿ ཕཊཿ ཕཊཿ གཅོད་འདིས་བདག་འཛིན་རྩ་ནས་ཆོད་པར་ཤོག༔ གཅོད་འདིས་ཡུལ་འཛིན་རྩད་ནས་ཆོད་པར་ཤོག༔ གཅོད་འདིས་གཉིས་འཛིན་རྩད་ནས་ཆོད་པར་ཤོག༔ གཅོད་འདིས་གཅེས་འཛིན་རྩད་ནས་ཆོད་པར་ཤོག༔ གཅོད་འདིས་སྙེམས་བྱེད་རྩད་ནས་ཆོད་པར་ཤོག༔ གཅོད་འདིས་བཟང་ཞེན་ཡུལ་དུ་གྲོལ་བར་ཤོག༔ གཅོད་འདིས་བདག་མེད་གདངས་ཆེན་ཐོབ་བར་ཤོག༔ གཅོད་འདིས་ཡུལ་མེད་ཟང་ཐལ་རྟོགས་པར་ཤོག༔ གཅོད་འདིས་རྫོགས་ཆེན་མཐའ་རུ་འཁྱོལ་བར་ཤོག༔ གཅོད་འདིས་ཚོགས་རྫོགས་སྐུ་གཉིས་མངོན་གྱུར་ཤོག༔ ཕཊཿཕཊཿཕཊཿ མཐའ་ལ་འཁྱོལ་བ་རྣལ་འབྱོར་ལྟ་ཕུགས་སུ༔ ཐམས་ཅད་ཡུམ་ཆེན་བྷ་ག་ཡངས་པར་རོལ༔ ཐ་དད་སོ་སོར་མཆོད་བྱ་ཡུལ་དངོས་རྫས༔ འཛིན་པས་གུད་ལྟ་ནམ་མཁའ་ཡངས་པར་ཟད༔ ལ་བཟླ་མཆོག་གི་ཧེ་རུ་ཀ་དཔལ་མོ༔ རྡོ་རྗེ་རྒྱན་གཅིག་སྣང་བས་གྱ་ནོམ་བཤིགས༔ མི་སྣང་ཕྱམ་ཕྱལ་འོད་གསལ་གྲོགས་གྱིས་སྤྱོད༔ དེ་ལྟ་བུ་ནི་ཀུན་འཇིག་ཡང་ཏིར་ཡན༔ ཨ་ཨ་ཨཱཿ དེ་མཐར་དགེ་བ་བྱང་ཆུབ་བསྔོ༔ ཆོས་ཀྱི་སྦྱིན་པས་མཐའ་ཡང་བརྒྱན༔ ས་མ་ཡཱ༔ ཚུལ་འདི་གྲུབ་པ་ཐོབ་པའི་རྒྱུད་གྱུར་བ། །ཆོས་དང་སྐྱེ་གནས་གཉིས་སུ་འཛོལ་མ་གྱུར། །ག་གཱ་ཨ་བྷྱེ་དཔའ་བོ་ཆེན་པོ་ཡིས། །དགའ་རབ་རྡོ་རྗེའི་བཀའ་བཞིན་བསྒྲུབ་པའོ། །སརྦ་མངྒ་ལཾ། །

ལུས་སྦྱིན་སྐུ་གཉིས་ས་བོན།

ཡེ་ཤེས་སྒྱུ་འཕྲུལ་དྲྭ་བ་ལས༔ ལུས་སྦྱིན་སྐུ་གཉིས་ས་བོན་བཞུགས་སོ༔

ཕཊཿ རང་ལུས་ཆེ་བརྗིད་ཚོ་སྣུམ་པའི༔ ལུས་ནང་དྭངས་མའི་རྩ་མཆོག་དབུས༔ རང་སེམས་འོད་ཀྱི་ཐིག་ལེ་ལས༔ རྡོ་རྗེ་ཁྲོས་མ་ཚོན་གང་བ༔ ཞལ་གཅིག་ཕྱག་གཉིས་གྲི་ཐོད་ཅན༔ མཐིང་ནག་རུས་པའི་རྒྱན་གྱིས་བརྒྱན༔ ཞབས་གཉིས་གར་སྟབས་ཚུལ་དུ་རོལ༔ སྤྱི་བོར་ཕག་ཞལ་ནག་པོ་ངུར༔ ཕཊ་ཀྱིས་མགྲིན་པའི་འཁོར་ལོར་འཕོས༔ དེ་ནས་ཇེ་མཐོ་ཇེ་མཐོ་རུ༔ སྤྱི་བོ་ཚངས་པའི་གནས་ཐོན་ཏེ༔ སྟེང་གི་ནམ་མཁར་རྒྱངས་ཀྱིས་ཐོན༔ ཡར་འཕེལ་རི་རབ་ཙམ་དུ་གྱུར༔ ཕཊཿ ཕཊཿ ཕཊཿ བེམ་པོ་དབང་ཆེན་གཞི་ལ་བསྒྱེལ༔ ཕྱག་གཡས་གྲི་གུག་ཚད་ཙམ་གྱིས༔ པགས་པ་རིན་ཆེན་སྣོད་དུ་གྱུར༔ ཕུང་པོ་ཕྱོགས་བཞིར་གཅལ་དུ་བཀྲམ༔ མཆོད་སྤྲིན་འདོད་ཡོན་རྒྱ་མཚོར་གྱུར༔ ཡི་གེ་གསུམ་གྱིས་སྦྱངས་སྤེལ་བསྒྱུར༔ རྃ་ཡྃ་ཁྃ༔ ཨོཾ་ཨཱཿཧཱུྃ༔ ཕཊཿ དབྱིངས་ནས་དཀོན་མཆོག་སྲིད་༼ སྲི་དཔྱད ༽ཞུའི་མགྲོན༔ རྒྱུད་སྡེ་བཞི་དྲུག་ཡི་དམ་དང་༔ མཁའ་འགྲོ་ཆོས་སྐྱོང་སྲུང་མའི་ཚོགས༔ མཆོད་ཡུལ་མགྲོན་དུ་སྤྱན་དྲངས་ཤིང་༔ ཕ་མ་རིགས་དྲུག་སྙིང་རྗེའི་མགྲོན༔ ལན་ཆགས་ཤ་མཁོན་བདག་པོ་ནི༔ མ་ལུས་ལུས་པ་མེད་པ་ཀུན༔ སྐད་ཅིག་ཉིད་ལ་འདུས་པར་བསམ༔ ཕཊཿཕཊཿ ཕཊཿ ཌཱ་དྲིལ་འུར་ཆེམ་དང་བཅས་ཏེ༔ སྟེང་འོག་བར་གསུམ་ཐམས་ཅད་དུ༔ ཉི་རྡུལ་འཁྲིགས་པ་བཞིན་དུ་དམིགས༔ དཀོན་མཆོག་སྲིད་༼ སྲི་དཔྱད ༽ཞུའི་མགྲོན་རྣམས་ལ༔ བསོད་ནམས་ཚོགས་ཆེན་རྫོགས་པའི་ཕྱིར༔ གཅེས་པའི་མཆོག་གྱུར་སྒྱུ་ལུས་འདི༔ ཡེ་ཤེས་ཚོགས་ཀྱི་འཁོར་ལོར་འབུལ༔ བདག་གི་དོན་དུ་བཞེས་སུ་གསོལ༔ མགོན་པོ་ཡོན་ཏན་མགྲོན་རྣམས་ལ༔ ཤ་ཁྲག་དམར་གྱི་གཏོར་མར་སྤྲུལ༔ དངོས་གྲུབ་རྣམ་གཉིས་སྩོལ་བ་ཡིས༔ བདག་གི་དོན་ཕྱིར་བཞེས་སུ་གསོལ༔ ལན་ཆགས་ཤ་མཁོན་མགྲོན་རྣམས་ལ༔ ཚེ་རབས་བུ་ལོན་བྱང་བའི་ཕྱིར༔ རང་རང་གང་འདོད་འདོད་དགུའི་རྫས༔ མ་ཚང་མེད་པར་སྤྲུལ་ཏེ་འབུལ༔ རིགས་དྲུག་སྙིང་རྗེའི་མགྲོན་རྣམས་ལ༔ ཤ་ཁྲག་བདུད་རྩིའི་མཆོད་སྦྱིན་འགྱེད༔ སོ་སོའི་སྡུག་བསྔལ་ཞི་བྱེད་པའི༔ སྤྲུལ་བསྒྱུར་གང་ལ་གང་བསམ་པར༔ དེ་མ་ཐག་ཏུ་ཡོངས་གྱུར་ནས༔ ཚིམ་ནས་བདེ་བའི་དཔལ་ཐོབ་ཤོག༔ ལྷག་མའི་མགྲོན་རིགས་ཀུན་ལ་འབུལ༔ རང་རང་འདོད་པ་ཕུན་སུམ་ཚོགས༔ གྱ་ནོམ་དངོས་པོ་སོ་སོར་གྱུར༔ མཐར་ནི་ཀུན་ཀྱང་རྒྱུད་ཚིམ་ནས༔ གཏན་བདེ་འགྱུར་མེད་རྒྱུར་གྱུར་ཅིག༔ ཕཊཿ ཕཊཿ ཕཊཿ འཁོར་གསུམ་དམིགས་པའི་དངོས་པོར་འཛིན༔ ཡེ་ནས་ཡུམ་ཆེན་ཕ་རོལ་ཕྱིན༔ རྣམ་ཐར་སྤྲོས་བྲལ་ཆེན་པོ་རུ༔ ཕྱམ་གཅིག་འཁྲུལ་བ་གཞི་ལ་སངས༔ ཨ་ཨ་ཨཱ༔ ཕཊ་ཕཊ་ཕཊཿ དེ་ནས་དགེ་བསྔོ་ཆོས་སྦྱིན་བྱ། །ཅེས་ཀྱང་པདྨ་མ་ཏི་ཡི། །དགོངས་པ་བསྐང་སླད་ག་གཱས་སོ། །

ལུས་སྦྱིན་ཚོགས་གཉིས་མྱུར་རྫོགས།

ཡེ་ཤེས་སྒྱུ་འཕྲུལ་དྲྭ་བ་ལས༔ ལུས་སྦྱིན་ཚོགས་གཉིས་མྱུར་རྫོགས་བཞུགས༔

ཕཊཿ རང་སེམས་སྐད་ཅིག་སྟེང་གི་ནམ་མཁར་འཕོས༔ དྲན་རྫོགས་རྡོ་རྗེ་བླ་མའི་ཕྱག་རྒྱར་བཞེངས༔ རྣམ་སྨིན་ཕུང་པོ་ཀུན་བཟང་མཆོད་པའི་སྤྲིན༔ གདོད་ནས་རྣམ་དག་ཡེ་ཤེས་བདུད་རྩིར་ཤར༔ ཨོཾ་ཨཱཿཧཱུྃ་ཧ་ཧོ་ཧྲཱི༔ ཕཊ་ཕཊ་ཕཊཿ མཆོད་སྦྱིན་གནས་ཡུལ་མ་ལུས་ཐམས་ཅད་ཀུན༔ སྐད་ཅིག་ཉིད་ལ་སྤྱན་འདྲེན་གཤེགས་སུ་གསོལ༔ ཕཊ་ཕཊ་ཕཊཿ རང་རྩལ་ལས་ཀྱི་སེམས་མ་དཔག་མེད་ཀྱིས༔ མཉེས་མཆོད་ཕུལ་བས་བདེ་སྟོང་རོས་ཚིམ་ནས༔ བདག་དང་མཁའ་ཁྱབ་སེམས་ཅན་ཐམས་ཅད་ཀྱི༔ ཚོགས་རྫོགས་སྒྲིབ་དག་དོན་གཉིས་ལྷུན་གྲུབ་ནས༔ སླར་ཡང་མཆོད་བྱ་མཆོད་བྱེད་མཆོད་ཡུལ་ཀུན༔ ཆོས་ཉིད་ནམ་མཁའ་རྣམ་དག་ངང་དུ་ཨཱ༔ དེ་མཐར་ཆོས་ཀྱི་སྦྱིན་པས་རྒྱས་པར་བྱ། །ཚེགས་ཆུང་དོན་ཆེ་ཟབ་ལམ་སྙིང་པོ་འདི། །ཨ་བྷྱེ་ཤཱི་ལ་ཞེས་བྱས་བསྐུལ་བའི་ངོར། །དུས་མཐའི་སྔགས་མིང་ག་གཱ་ཨ་བྷྱེས་སོ། །

ལུས་སྦྱིན་བསྡུས་པ་ཚོགས་གཉིས་མྱུར་རྫོགས།

ལུས་སྦྱིན་བསྡུས་པ་ཚོགས་གཉིས་མྱུར་རྫོགས་བཞུགས་སོ༔

ན་མོ་གུ་རུ་པདྨ་ཀཱ་ར་ཡེ༔ ཕཊཿ གཟུང་འཛིན་རྣམ་རྟོག་ཡེ་ཤེས་དབང་དུ་བསྡུད༔ རྩལ་སྣང་ལྷ་འདྲེ་གཡོ་མེད་ཟིལ་གྱིས་གནོན༔ གནས་དོན་ཆོས་ཉིད་ལྷ་ལ་སྐྱབས་སུ་མཆི༔ ཁམས་གསུམ་འཁོར་བ་དོང་སྤྲུགས་སེམས་བསྐྱེད་དོ༔ ཕཊཿ ཡེ་ཤར་གཞིར་བཞེངས་རྒྱན་རྫོགས་མཎྜལ་འབུལ༔ ཀ་དག་ཡུམ་ཆེན་བླ་མའི་རང་བཞིན་ཉིད༔ སྐུ་བཞིའི་ལམ་གྱི་ངོ་བོར་བྱང་ཆུབ་པའི༔ སྨིན་བྱེད་ཡེ་ཤེས་རྒྱུན་གྱིས་དབུགས་ཕྱིན་ལས༔ སྐད་ཅིག་ཉིད་ལ་འབྲས་བུའི་རྒྱུད་སྨིན་ཤོག༔ ཕཊཿ ཕཊཿ ཕཊཿ རང་ལུས་འདོད་དགུའི་དཔལ་ཡོན་རྫོགས་པ་ནི༔ རྡོ་རྗེའི་ལྷ་མོའི་ལང་ཚོའི་ངོ་བོ་ལས༔ སེམས་ཉིད་སྐུ་གསུམ་ལྷུན་གྲུབ་ཁྲོས་མར་ལྡང་༔ མཐིང་ནག་གྲི་ཐོད་གར་སྟབས་རུས་རྒྱན་གསོལ༔ ཏིང་འཛིན་དམ་ཚིག་ལྷ་མོར་སྙོམས་ཞུགས་ཏེ༔ རྣམ་འཕྲུལ་སྲིད་ཞིའི་རྒྱན་གྱི་འཁོར་ལོའི་སྤྲིན༔ མ་ཚང་མེད་པའི་ཡེ་ཤེས་སྒྱུ་མ་ལས༔ འོད་འཕྲོས་རྒྱལ་ཀུན་གསང་གསུམ་བྱིན་རླབས་བསྡུས༔ མཉེས་ཚིམ་མྱོང་རེག་གྲོལ་བའི་ནུས་སྟོབས་འབར༔ ཨོཾ་ཨོཾ་ཨོཾ་ཨོཾ་ཨོཾ༔ ཕཊཿ གསུམ་གྱིས་མགྲོན་རྣམས་མཁའ་ཁྱབ་ཀྱི་འཁོར་ལོར་སད་པར་མོས་ལ༔ ཕཊཿ རང་སྣང་རྣམ་དག་དཀོན་མཆོག་སྲིད་ཞུའི་མགྲོན༔ སྣང་མུན་འདྲེས་མར་མཆེད་པའི་ཡོན་ཏན་མགྲོན༔ མུན་སྣང་རྟོག་གཟུགས་གོམས་པ་སྙིང་རྗེའི་མགྲོན༔ ལོག་རྟོག་དགྲ་རུ་ལྡང་བ་ལན་ཆགས་མགྲོན༔ སྟོང་ཉིད་ལྷ་མོའི་སྦྱོར་སྒྲོལ་བདེ་སྟོང་གར༔ གྱ་ནོམ་མཚན་མ་དག་པ་མཆོད་པའི་རྫས༔ འདོད་ཡོན་སྣ་ཚོགས་འཛོམ་པ་ནམ་མཁའ་མཛོད༔ ཤ་ཁྲག་རུས་པ་དོན་སྣོད་དམར་གསུམ་ཟས༔ ཐིམ་པའི་ཚུལ་གྱིས་མཆོད་པ་འབུལ་བའི་མཐུས༔ བསོད་ནམས་ཡེ་ཤེས་ཚོགས་གཉིས་རྫོགས་པ་དང་༔ སྡིག་སྒྲིབ་བག་ཆགས་མ་ལུས་དབྱིངས་སུ་དག༔ དོན་གཉིས་འབྱོར་བ་ཡིད་བཞིན་ལྷུན་གྱིས་གྲུབ༔ ཕཊ་ཕཊ་ཕཊཿ ཡས་མགྲོན་འོད་ཞུ་སྲིད་པའི་མགྲོན་ལ་ཐིམ༔ སྐུ་གསུང་ཐུགས་ཀྱི་ཕྱག་རྒྱས་བཏབ་པ་ཡིས༔ ལས་སྣང་སྡུག་བསྔལ་ཀུན་འབྱུང་དབྱིངས་སུ་སངས༔ ཁྱབ་གཅིག་འོད་ཕུང་ལྔ་ལྡན་ཐིག་ལེར་གྱུར༔ སྐུ་གསུམ་ཡེ་ཤེས་མཁའ་འགྲོའི་ཀློང་བརྒྱུད་དེ༔ སྤྲུལ་སྐུ་དབྱིངས་དང་རང་གདངས་ངོ་བོར་བསྐྱོད༔ ཡུམ་ཆེན་མི་འགྱུར་རྡོ་རྗེའི་ངང་དུ་བསྡུ༔ ཕཊ་ཕཊ་ཕཊཿ སྒྱུ་མའི་སྒྱུ་མ་སྒྱུ་མའི་མགྲོན་ལ་འགྱེད༔ སྒྱུ་མ་ཡེ་སྟོང་བཅོས་མའི་སྣང་མ་འགགས༔ མ་བཅོས་མ་ཆོས་མ་བསྐྱོད་ཧེ་རུ་ཀ༔ ཕ་རོལ་ཕྱིན་པ་ཐོབ་པའི་རྒྱུ་རུ་བསྔོ༔ ཕཊ་ཕཊ་ཕཊཿ ཅེས་བརྗོད་དེ་ཉིད་ནས་ཆོས་སྦྱིན་གྱིས་མཐའ་རྒྱན་པར་བྱའོ། །ཅེས་པ་འདི་ཡང་དེ་ཝས་བསྐུལ་ངོར་ག་གཱས་རྒྱས་པར་འཕེལ་ལོ། །བཀྲ་ཤིས་སོ། །མངྒ་ལཾ། །

མཁའ་འགྲོ་ཁྲོས་མ་ནག་མོའི་སྒོ་ནས་དུས་མིན་འཆི་ཞགས་གཅོད་པའི་གྲི་གུག

རྡོ་རྗེ་སེམས་དཔའི་དགོངས་ཉམས་ལས༔ མཁའ་འགྲོ་ཁྲོས་མ་ནག་མོའི་སྒོ་ནས་དུས་མིན་འཆི་ཞགས་གཅོད་པའི་གྲི་གུག་ཞེས་བྱ་བ་བཞུགས་སོ༔

ན་མོ་གུ་རུ་པདྨ་ཀཱ་ར་ཡེ༔ དུར་གཅོད་རིམ་པ་མང་པོ་ལས༔ བསྡུ་ན་གཞུང་ལྟར་བྱེད་པས་འཐུས༔ དེ་ལ་ཡན་ལག་ས་བཅད་ཀྱི༔ རྣམ་གྲངས་དང་པོའི་དུམ་བུ་ནི༔ ཕཊ༔རང་ཉིད་སྐད་ཅིག་གིས་ཁྲོས་མ་ནག་མོ་སྐུ་མདོག་མཐིང་ནག་ཞལ་གཅིག་ཕྱག་གཉིས་གཡས་པས་གྲི་གུག་གིས་ཁམས་གསུམ་འཁོར་བའི་སྡུག་བསྔལ་གྱི་མྱུ་གུ་རྩད་ནས་གཅོད་པར་མཛད་ཅིང་༔ གཡོན་པས་སྲིད་རྩ་ཆགས་སྲེད་ཀྱི་ཁྲག་མཚོ་བཏུང་བར་མཛད་པའི་ཐོད་ཁྲག་ཐུགས་ཀར་བརྟེན་ཅིང་༔ ཐབས་ཤེས་གཉིས་སུ་མེད་པའི་ཁ་ཊྭཱཾ་རྩེ་གསུམ་མཆན་དུ་བསྣམས་པ༔ གར་ ༼ དར་དཔྱད། ༽ དང་དུར་ཁྲོད་ཀྱི་ཆས་ཀྱིས་བརྒྱན་པ༔ འཁོར་དུ་མ་འབུམ་ཕྲག་ཡངས་པའི་དཔའ་བོ་མཁའ་འགྲོ་གྲངས་མེད་པས་བསྐོར་ནས་གནས་པར་བསམ༔ ཕཊ༔ ཅེས་སམ༔ ཡང་ན་བསྐྱེད་ཆོག་རྒྱས་ལྟར་བྱ༔ བར་འདིར་ཚེ་འདས་རྣམ་ཤེས་ནི༔ ཁྲོས་མའི་ངོ་བོ་བསྲེ་འཕོ་བྱ༔ དེ་ནས་བདེན་པའི་སྟོབས་བརྗོད་ནི༔ ན་མོ་གྲུབ་ཐོབ་གཅོད་ཡུལ་བརྒྱུད་པའི་བླ་མ་དམ་པ༔ རྒྱལ་བ་དགོངས་པའི་བརྒྱུད་པ༔ རིག་འཛིན་བརྡའི་བརྒྱུད་པ༔ གང་ཟག་སྙན་ཁུང་གི་བརྒྱུད་པ༔ བཀའ་བབས་ལུང་བསྟན་གྱི་བརྒྱུད་པ༔ ཤོག་སེར་ཚིག་གི ༴ མཁའ་འགྲོ་གཏད་རྒྱའི ༴ སྨོན་ལམ་དབང་བསྐུར་གྱི་བརྒྱུད་པ་ལ་སོགས་པའི་བཀའ་བདེན་པ་དང་༔ རྒྱ་ཆེ་བ་ཟབ་མོའི་མདོ་དང་༔ དོན་བརླིང་བ་གསང་སྔགས་རྡོ་རྗེ་ཐེག་པ་ཀུན་གྱི་སྙིང་པོ་ཕ་བརྒྱུད་མ་བརྒྱུད་སྲས་བརྒྱུད་དོན་བརྒྱུད་ཁྱད་པར་ཅན་དམ་པའི་ཆོས་ཞི་བྱེད་བདུད་གཅོད་ཟབ་མོའི་བཀའ་བདེན་པ་དང་༔ རིམ་བརྒྱུད་བྱིན་རླབས་ཀྱི་མངའ་བདག་རྣལ་འབྱོར་རྩལ་འཆང་མཆོག་གི་དགེ་འདུན་རྒྱ་མཚོའི་བཀའ་བདེན་པ་དང་༔ གཞན་ཡང་ཡི་དམ་མ་ཅིག་ཁྲོས་མ་ནག་མོ་ཞི་ཁྲོ་རིགས་ལྔའི་དཀྱིལ་འཁོར་ལྷ་ཚོགས་རྣམས་ཀྱི་བཀའ་བདེན་པ་དང་༔ མ་འབུམ་ཕྲག་ཡངས་པའི་མཁའ་འགྲོ་ཆོས་སྐྱོང་སྲུང་མའི་ཚོགས་དང་བཅས་པའི་བཀའ་བདེན་པ་དང་༔ རྒྱུད་སྡེ་བཞི་དྲུག་གི་ཐེག་རིམ་དགུའི་ཡི་དམ་དཀྱིལ་འཁོར་གྱི་ལྷ་ཚོགས་རྣམས་ཀྱི་བཀའ་བདེན་པ་དང་༔ སྐྱབས་གནས་བསླུ་བ་མེད་པ་དཀོན་མཆོག་རིན་པོ་ཆེ་རྣམ་པ་གསུམ་གྱི་བཀའ་བདེན་པ་དང་༔ ཆོས་ཉིད་གདོད་ནས་སྟོང་ཞིང་བདག་མེད་དང་ཆོས་ཅན་རང་བཞིན་རྣམ་པར་དག་ཅིང་རྟེན་འབྱུང་རྒྱུ་འབྲས་བསླུ་བ་མེད་པའི་བཀའ་བདེན་པ་དང་༔ བདེན་པ་ཆེན་པོའི་མཐུ་བྱིན་གྱིས་ཚེ་ལས་འདས་པ་འདི་ལ་དང་པོ་ནད་ཀྱི་སྣ་འདྲེན་པ༔ བར་དུ་ནད་ཀྱི་ཚང་བཅའ་བ༔ ཐ་མ་ནད་ཀྱིས་སྲོག་འཕྲོག་པར་བྱེད་པའི་གནོད་བྱེད་འབྱུང་པོ་གྲི་སྲི་འགགས་སྲི་འགབ་འདྲེ་གཞོན་སྲི་རྒན་སྲི་དར་སྲི་ནད་སྲི་ཤི་སྲི་ཕུང་འདྲེ་ཐམས་ཅད་འགགས་ཐག་འདི་ལ་གཉིས་མེད་དུ་ཁུག་ཅིག༔ ཅེས་དང་༔ དེ་ནས་འགགས་ཐག་བཅད་པ་ནི༔ ཕཊ༔ ཕཊ༔ ཕཊ༔ ཀྱེ་མ་མི་མིན་ཡེ་ཤེས་མཁའ་འགྲོ་མ༔ མ་ཀུན་ཏུ་བཟང་པོ་དབྱིངས་ནས་བཞེངས༔ ཞི་བའི་ལས་ཀྱིས་མི་འདུལ་པའི༔ སེམས་ཅན་ལས་ངན་འདི་ཉིད་ལ༔ དྲག་པོའི་ཕྲིན་ལས་མཛད་ནས་ཀྱང་༔ བསྒྲལ་འདྲེན་སྙིང་རྗེ་རྔམ་པར་སྤྱོད༔ རྣལ་འབྱོར་དཔོན་སློབ་ཡོན་མཆོད་ལ༔ གྲི་སྲི་ཤི་སྲི་གཅད་དུ་གསོལ༔ འགགས་སྲི་ལྕེབ་སྲི་གཅད་དུ་གསོལ༔ དམ་སྲི་ཕུང་སྲི་གཅད་དུ་གསོལ༔ མ་ཁྱེད་ཀྱི་ཐུགས་དམ་དུས་ལ་བབས༔ མ་མི་མིན་ཡེ་ཤེས་མཁའ་འགྲོ་མ༔ རྡོ་རྗེ་ཕག་མོ་དབྱིངས་ནས་བཞེངས༔ ཞི་བའི་ལས་ཀྱིས་མི་འདུལ་པའི༔ སེམས་ཅན་ལས་ངན་འདི་ཉིད་ལ༔ དྲག་པོའི་ཕྲིན་ལས་མཛད་ནས་ཀྱང་༔ བསྒྲལ་འདྲེན་སྙིང་རྗེ་རྔམ་པར་སྤྱོད༔ རྣལ་འབྱོར་དཔོན་སློབ་ཡོན་མཆོད་ལ༔ གྲི་སྲི་ཤི་སྲི་གཅད་དུ་གསོལ༔ འགགས་སྲི་ལྕེབ་སྲི་གཅད་དུ་གསོལ༔ དམ་སྲི་ཕུང་སྲི་གཅད་དུ་གསོལ༔ མ་ཁྱེད་ཀྱི་ཐུགས་དམ་དུས་ལ་བབས༔ མ་མི་མིན་ཡེ་ཤེས་མཁའ་འགྲོ་མ༔ ཁྲོས་མ་ནག་མོ་དབྱིངས་ནས་བཞེངས༔ ཞི་བའི་ལས་ཀྱིས་མི་འདུལ་པའི༔ སེམས་ཅན་ལས་ངན་འདི་ཉིད་ལ༔ དྲག་པོའི་ཕྲིན་ལས་མཛད་ནས་ཀྱང་༔ བསྒྲལ་འདྲེན་སྙིང་རྗེ་རྔམ་པར་སྤྱོད༔ རྣལ་འབྱོར་དཔོན་སློབ་ཡོན་མཆོད་ལ༔ གྲི་སྲི་ཤི་སྲི་གཅད་དུ་གསོལ༔ འགགས་སྲི་ལྕེབ་སྲི་གཅད་དུ་གསོལ༔ དམ་སྲི་ཕུང་སྲི་གཅད་དུ་གསོལ༔ མ་ཁྱེད་ཀྱི་ཐུགས་དམ་དུས་ལ་བབས༔ མ་མི་མིན་ཡེ་ཤེས་མཁའ་འགྲོ་མ༔ སངས་རྒྱས་མཁའ་འགྲོ་དབྱིངས་ནས་བཞེངས༔ ཞི་བའི་ལས་ཀྱིས་མི་འདུལ་པའི༔ སེམས་ཅན་ལས་ངན་འདི་ཉིད་ལ༔ དྲག་པོའི་ཕྲིན་ལས་མཛད་ནས་ཀྱང་༔ བསྒྲལ་འདྲེན་སྙིང་རྗེ་རྔམ་པར་སྤྱོད༔ རྣལ་འབྱོར་དཔོན་སློབ་ཡོན་མཆོད་ལ༔ གྲི་སྲི་ཤི་སྲི་གཅད་དུ་གསོལ༔ འགགས་སྲི་ལྕེབ་སྲི་གཅད་དུ་གསོལ༔ དམ་སྲི་ཕུང་སྲི་གཅད་དུ་གསོལ༔ མ་ཁྱེད་ཀྱི་ཐུགས་དམ་དུས་ལ་བབས༔ མ་མི་མིན་ཡེ་ཤེས་མཁའ་འགྲོ་མ༔ རྡོ་རྗེ་མཁའ་འགྲོ་དབྱིངས་ནས་བཞེངས༔ ཞི་བའི་ལས་ཀྱིས་མི་འདུལ་པའི་༔ སེམས་ཅན་ལས་ངན་འདི་ཉིད་ལ༔ དྲག་པོའི་ཕྲིན་ལས་མཛད་ནས་ཀྱང་༔ བསྒྲལ་འདྲེན་སྙིང་རྗེ་རྔམ་པར་སྤྱོད༔ རྣལ་འབྱོར་དཔོན་སློབ་ཡོན་མཆོད་ལ༔ གྲི་སྲི་ཤི་སྲི་གཅད་དུ་གསོལ༔ འགགས་སྲི་ལྕེབ་སྲི་གཅད་དུ་གསོལ༔ དམ་སྲི་ཕུང་སྲི་གཅད་དུ་གསོལ༔ མ་ཁྱེད་ཀྱི་ཐུགས་དམ་དུས་ལ་བབས༔ མ་མི་མིན་ཡེ་ཤེས་མཁའ་འགྲོ་མ༔ རིན་ཆེན་མཁའ་འགྲོ་དབྱིངས་ནས་བཞེངས༔ ཞི་བའི་ལས་ཀྱིས་མི་འདུལ་པའི༔ སེམས་ཅན་ལས་ངན་འདི་ཉིད་ལ༔ དྲག་པོའི་ཕྲིན་ལས་མཛད་ནས་ཀྱང་༔ བསྒྲལ་འདྲེན་སྙིང་རྗེ་རྔམ་པར་སྤྱོད༔ རྣལ་འབྱོར་དཔོན་སློབ་ཡོན་མཆོད་ལ༔ གྲི་སྲི་ཤི་སྲི་གཅད་དུ་གསོལ༔ འགགས་སྲི་ལྕེབ་སྲི་གཅད་དུ་གསོལ༔ དམ་སྲི་ཕུང་སྲི་གཅད་དུ་གསོལ༔ མ་ཁྱེད་ཀྱི་ཐུགས་དམ་དུས་ལ་བབས༔ མ་མི་མིན་ཡེ་ཤེས་མཁའ་འགྲོ་མ༔ པདྨ་མཁའ་འགྲོ་དབྱིངས་ནས་བཞེངས༔ ཞི་བའི་ལས་ཀྱིས་མི་འདུལ་པའི༔ སེམས་ཅན་ལས་ངན་འདི་ཉིད་ལ༔ དྲག་པོའི་ཕྲིན་ལས་མཛད་ནས་ཀྱང་༔ བསྒྲལ་འདྲེན་སྙིང་རྗེ་རྔམ་པར་སྤྱོད༔ རྣལ་འབྱོར་དཔོན་སློབ་ཡོན་མཆོད་ལ༔ གྲི་སྲི་ཤི་སྲི་གཅད་དུ་གསོལ༔ འགགས་སྲི་ལྕེབ་སྲི་གཅད་དུ་གསོལ༔ དམ་སྲི་ཕུང་སྲི་གཅད་དུ་གསོལ༔ མ་ཁྱེད་ཀྱི་ཐུགས་དམ་དུས་ལ་བབས༔ མ་མི་མིན་ཡེ་ཤེས་མཁའ་འགྲོ་མ༔ ཀརྨ་མཁའ་འགྲོ་དབྱིངས་ནས་བཞེངས༔ ཞི་བའི་ལས་ཀྱིས་མི་འདུལ་པའི༔ སེམས་ཅན་ལས་ངན་འདི་ཉིད་ལ༔ དྲག་པོའི་ཕྲིན་ལས་མཛད་ནས་ཀྱང་༔ བསྒྲལ་འདྲེན་སྙིང་རྗེ་རྔམ་པར་སྤྱོད༔ རྣལ་འབྱོར་དཔོན་སློབ་ཡོན་མཆོད་ལ༔ གྲི་སྲི་ཤི་སྲི་གཅད་དུ་གསོལ༔ འགགས་སྲི་ལྕེབ་སྲི་གཅད་དུ་གསོལ༔ དམ་སྲི་ཕུང་སྲི་གཅད་དུ་གསོལ༔ མ་ཁྱེད་ཀྱི་ཐུགས་དམ་དུས་ལ་བབས༔ མ་མི་མིན་ཡེ་ཤེས་མཁའ་འགྲོ་མ༔ དམ་ཚིག་མཁའ་འགྲོ་དབྱིངས་ནས་བཞེངས༔ ཞི་བའི་ལས་ཀྱིས་མི་འདུལ་པའི༔ སེམས་ཅན་ལས་ངན་འདི་ཉིད་ལ༔ དྲག་པོའི་ཕྲིན་ལས་མཛད་ནས་ཀྱང་༔ བསྒྲལ་འདྲེན་སྙིང་རྗེ་རྔམ་པར་སྤྱོད༔ རྣལ་འབྱོར་དཔོན་སློབ་ཡོན་མཆོད་ལ༔ གྲི་སྲི་ཤི་སྲི་གཅད་དུ་གསོལ༔ འགགས་སྲི་ལྕེབ་སྲི་གཅད་དུ་གསོལ༔ དམ་སྲི་ཕུང་སྲི་གཅད་དུ་གསོལ༔ མ་ཁྱེད་ཀྱི་ཐུགས་དམ་དུས་ལ་བབས༔ མ་མི་མིན་ཡེ་ཤེས་མཁའ་འགྲོ་མ༔ ཤ་ཟ་མཁའ་འགྲོ་དབྱིངས་ནས་བཞེངས༔ ཞི་བའི་ལས་ཀྱིས་མི་འདུལ་པའི༔ སེམས་ཅན་ལས་ངན་འདི་ཉིད་ལ༔ དྲག་པོའི་ཕྲིན་ལས་མཛད་ནས་ཀྱང་༔ བསྒྲལ་འདྲེན་སྙིང་རྗེ་རྔམ་པར་སྤྱོད༔ རྣལ་འབྱོར་དཔོན་སློབ་ཡོན་མཆོད་ལ༔ གྲི་སྲི་ཤི་སྲི་གཅད་དུ་གསོལ༔ འགགས་སྲི་ལྕེབ་སྲི་གཅད་དུ་གསོལ༔ དམ་སྲི་ཕུང་སྲི་གཅད་དུ་གསོལ༔ མ་ཁྱེད་ཀྱི་ཐུགས་དམ་དུས་ལ་བབས༔ མ་མི་མིན་ཡེ་ཤེས་མཁའ་འགྲོ་མ༔མཁའ་སྤྱོད་མཁའ་འགྲོ་དབྱིངས་ནས་བཞེངས༔ ཞི་བའི་ལས་ཀྱིས་མི་འདུལ་པའི༔ སེམས་ཅན་ལས་ངན་འདི་ཉིད་ལ༔ དྲག་པོའི་ཕྲིན་ལས་མཛད་ནས་ཀྱང་༔ བསྒྲལ་འདྲེན་སྙིང་རྗེ་རྔམ་པར་སྤྱོད༔ རྣལ་འབྱོར་དཔོན་སློབ་ཡོན་མཆོད་ལ༔ གྲི་སྲི་ཤི་སྲི་གཅད་དུ་གསོལ༔ འགགས་སྲི་ལྕེབ་སྲི་གཅད་དུ་གསོལ༔ དམ་སྲི་ཕུང་སྲི་གཅད་དུ་གསོལ༔ མ་ཁྱེད་ཀྱི་ཐུགས་དམ་དུས་ལ་བབས༔ མ་མི་མིན་ཡེ་ཤེས་མཁའ་འགྲོ་མ༔ ས་སྤྱོད་མཁའ་འགྲོ་དབྱིངས་ནས་བཞེངས༔ ཞི་བའི་ལས་ཀྱིས་མི་འདུལ་པའི༔ སེམས་ཅན་ལས་ངན་འདི་ཉིད་ལ༔ དྲག་པོའི་ཕྲིན་ལས་མཛད་ནས་ཀྱང་༔ བསྒྲལ་འདྲེན་སྙིང་རྗེ་རྔམ་པར་སྤྱོད༔ རྣལ་འབྱོར་དཔོན་སློབ་ཡོན་མཆོད་ལ༔ གྲི་སྲི་ཤི་སྲི་གཅད་དུ་གསོལ༔ འགགས་སྲི་ལྕེབ་སྲི་གཅད་དུ་གསོལ༔ དམ་སྲི་ཕུང་སྲི་གཅད་དུ་གསོལ༔ མ་ཁྱེད་ཀྱི་ཐུགས་དམ་དུས་ལ་བབས༔ མ་མི་མིན་ཡེ་ཤེས་མཁའ་འགྲོ་མ༔ ལས་བྱེད་མཁའ་འགྲོ་དབྱིངས་ནས་བཞེངས༔ ཞི་བའི་ལས་ཀྱི་མི་འདུལ་པའི༔ སེམས་ཅན་ལས་ངན་འདི་ཉིད་ལ༔ དྲག་པོའི་ཕྲིན་ལས་མཛད་ནས་ཀྱང་༔ བསྒྲལ་འདྲེན་སྙིང་རྗེ་རྔམ་པར་སྤྱོད༔ རྣལ་འབྱོར་དཔོན་སློབ་ཡོན་མཆོད་ལ༔ གྲི་སྲི་ཤི་སྲི་གཅད་དུ་གསོལ༔ འགགས་སྲི་ལྕེབ་སྲི་གཅད་དུ་གསོལ༔ དམ་སྲི་ཕུང་སྲི་གཅད་དུ་གསོལ༔ མ་ཁྱེད་ཀྱི་ཐུགས་དམ་དུས་ལ་བབས༔ མ་མི་མིན་ཡེ་ཤེས་མཁའ་འགྲོ་མ༔ བྱེ་བ་འབུམ་ཕྲག་མཁའ་འགྲོ་དབྱིངས་ནས་བཞེངས༔ ཞི་བའི་ལས་ཀྱིས་མི་འདུལ་པའི༔ སེམས་ཅན་ལས་ངན་འདི་ཉིད་ལ༔ དྲག་པོའི་ཕྲིན་ལས་མཛད་ནས་ཀྱང་༔ བསྒྲལ་འདྲེན་སྙིང་རྗེ་རྔམ་པར་སྤྱོད༔ རྣལ་འབྱོར་དཔོན་སློབ་ཡོན་མཆོད་ལ༔ གྲི་སྲི་ཤི་སྲི་གཅད་དུ་གསོལ༔ འགགས་སྲི་ལྕེབ་སྲི་གཅད་དུ་གསོལ༔ དམ་སྲི་ཕུང་སྲི་གཅད་དུ་གསོལ༔ མ་ཁྱེད་ཀྱི་ཐུགས་དམ་དུས་ལ་བབས༔ མ་ཡེ་ཤེས་མཁའ་འགྲོའི་བཀའ་སྡོད་ཆེ༔ ཆོས་སྐྱོང་སྲུང་མ་དབྱིངས་ནས་བཞིངས༔ ཞི་བའི་ལས་ཀྱིས་མི་འདུལ་པའི༔ སེམས་ཅན་ལས་ངན་འདི་ཉིད་ལ༔ དྲག་པོའི་ཕྲིན་ལས་མཛད་ནས་ཀྱང་༔ བསྒྲལ་འདྲེན་སྙིང་རྗེ་རྔམ་པར་སྤྱོད༔ རྣལ་འབྱོར་དཔོན་སློབ་ཡོན་མཆོད་ལ༔ གྲི་སྲི་ཤི་སྲི་གཅད་དུ་གསོལ༔ འགགས་སྲི་ལྕེབ་སྲི་གཅད་དུ་གསོལ༔ དམ་སྲི་ཕུང་སྲི་གཅད་དུ་གསོལ༔ མ་ཁྱེད་ཀྱི་ཐུགས་དམ་དུས་ལ་བབས༔ ཕཊཿ ཕཊཿ ཕཊཿསངས་རྒྱས་ཐམས་ཅད་འདུས་པའི་དཔལ༔ བཀའ་བརྒྱུད་བླ་མ་དབྱིངས་ནས་བཞེངས༔ ཞི་བའི་ལས་ཀྱིས་མི་འདུལ་པའི༔ སེམས་ཅན་ལས་ངན་འདི་ཉིད་ལ༔ དྲག་པོའི་ཕྲིན་ལས་མཛད་ནས་ཀྱང་༔ བསྒྲལ་འདྲེན་སྙིང་རྗེ་རྔམ་པར་སྤྱོད༔ རྣལ་འབྱོར་དཔོན་སློབ་ཡོན་མཆོད་ལ༔ གྲི་སྲི་ཤི་སྲི་གཅད་དུ་གསོལ༔ འགགས་སྲི་ལྕེབ་སྲི་གཅད་དུ་གསོལ༔ དམ་སྲི་ཕུང་སྲི་གཅད་དུ་གསོལ༔ མ་ཁྱེད་ཀྱི་ཐུགས་དམ་དུས་ལ་བབས༔ དངོས་གྲུབ་རྒྱ་མཚོའི་གཏེར་མཛོད་མཆོག༔ ཡི་དམ་ལྷ་ཚོགས་དབྱིངས་ནས་བཞེངས༔ ཞི་བའི་ལས་ཀྱིས་མི་འདུལ་པའི༔ སེམས་ཅན་ལས་ངན་འདི་ཉིད་ལ༔ དྲག་པོའི་ཕྲིན་ལས་མཛད་ནས་ཀྱང་༔ བསྒྲལ་འདྲེན་སྙིང་རྗེ་རྔམ་པར་སྤྱོད༔ རྣལ་འབྱོར་དཔོན་སློབ་ཡོན་མཆོད་ལ༔ གྲི་སྲི་ཤི་སྲི་གཅད་དུ་གསོལ༔ འགགས་སྲི་ལྕེབ་སྲི་གཅད་དུ་གསོལ༔ དམ་སྲི་ཕུང་སྲི་གཅད་དུ་གསོལ༔ མ་ཁྱེད་ཀྱི་ཐུགས་དམ་དུས་ལ་བབས༔ ཆེ་བའི་ཡོན་ཏན་ཀུན་ལྡན་པ༔ དུས་གསུམ་སངས་རྒྱས་དབྱིངས་ནས་བཞེངས༔ ཞི་བའི་ལས་ཀྱིས་མི་འདུལ་པའི༔ སེམས་ཅན་ལས་ངན་འདི་ཉིད་ལ༔ དྲག་པོའི་ཕྲིན་ལས་མཛད་ནས་ཀྱང་༔ བསྒྲལ་འདྲེན་སྙིང་རྗེ་རྔམ་པར་སྤྱོད༔ རྣལ་འབྱོར་དཔོན་སློབ་ཡོན་མཆོད་ལ༔ གྲི་སྲི་ཤི་སྲི་གཅད་དུ་གསོལ༔ འགགས་སྲི་ལྕེབ་སྲི་གཅད་དུ་གསོལ༔ དམ་སྲི་ཕུང་སྲི་གཅད་དུ་གསོལ༔ མ་ཁྱེད་ཀྱི་ཐུགས་དམ་དུས་ལ་བབས༔རང་བཞིན་བདེན་དོན་བསླུ་བ་མེད༔ ཆོས་སྐུ་རྣམ་གཉིས་དབྱིངས་ནས་བཞེངས༔ ཞི་བའི་ལས་ཀྱིས་མི་འདུལ་པའི༔ སེམས་ཅན་ལས་ངན་འདི་ཉིད་ལ༔ དྲག་པོའི་ཕྲིན་ལས་མཛད་ནས་ཀྱང་༔ བསྒྲལ་འདྲེན་སྙིང་རྗེ་རྔམ་པར་སྤྱོད༔ རྣལ་འབྱོར་དཔོན་སློབ་ཡོན་མཆོད་ལ༔ གྲི་སྲི་ཤི་སྲི་གཅད་དུ་གསོལ༔ འགགས་སྲི་ལྕེབ་སྲི་གཅད་དུ་གསོལ༔ དམ་སྲི་ཕུང་སྲི་གཅད་དུ་གསོལ༔ མ་ཁྱེད་ཀྱི་ཐུགས་དམ་དུས་ལ་བབས༔ ཐུགས་རྒྱུད་རྟོགས་པ་འདུ་འབྲལ་མེད༔ དགེ་འདུན་རྒྱ་མཚོ་དབྱིངས་ནས་བཞེངས༔ ཞི་བའི་ལས་ཀྱིས་མི་འདུལ་པའི༔ སེམས་ཅན་ལས་ངན་འདི་ཉིད་ལ༔ དྲག་པོའི་ཕྲིན་ལས་མཛད་ནས་ཀྱང་༔ བསྒྲལ་འདྲེན་སྙིང་རྗེ་རྔམ་པར་སྤྱོད༔ རྣལ་འབྱོར་དཔོན་སློབ་ཡོན་མཆོད་ལ༔ གྲི་སྲི་ཤི་སྲི་གཅད་དུ་གསོལ༔ འགགས་སྲི་ལྕེབ་སྲི་གཅད་དུ་གསོལ༔ དམ་སྲི་ཕུང་སྲི་གཅད་དུ་གསོལ༔ མ་ཁྱེད་ཀྱི་ཐུགས་དམ་དུས་ལ་བབས༔ ཕཊཿ ཕཊཿ ཕཊཿ ཅེས་བསྐུལ་བའི་རྗེས་སུ༔ ཕཊཿ མ་ཁྲོས་མ་ནག་མོ་ལ་སོགས་པའི༔ སྐུ་གསུམ་མཁའ་འགྲོའི་ཕྲིན་ལས་མཚོན༔ ཚར་གནོན་གྲི་གུག་འབར་བ་འདིས༔ རྩེ་མོ་རྡོ་རྗེའི་ཁུང་སེང་ལ༔ རྩ་བརྒྱུད་བླ་མའི་དཀྱིལ་འཁོར་རྫོགས༔ ཡེ་ཤེས་ལྔ་ལྡན་རྭ་གདེང་ལ༔ རིགས་ལྔ་ཞི་ཁྲོ་དེ་ལ་འདུས༔ འཆང་ཟུང་པདྨ་ཁ་སྦྱོར་ལ༔ སྐུ་གསུམ་མཁའ་འགྲོ་མ་ལུས་བཞུགས༔ རྒྱ་མདུད་ཆོས་འབྱུང་འབར་བ་ན༔ ཕྲིན་ལས་སྒྲོལ་ཀིང་སྲུང་མ་སྟེ༔ ཁམས་གསུམ་སྐྱེ་ཤི་རྩད་གཅོད་ཀྱི༔ མཚོན་ཆ་ཆེན་པོ་རྡོ་རྗེ་ཆོས༔ རྡོ་རྗེ་རལ་གྲིའི་མ་ལུས་གཅོད༔ རྣོ་དབལ་རྩེ་མོའི་འོད་ཟེར་ནི༔ དཀྱིལ་འཁོར་ཐུགས་རྗེའི་བྱིན་རླབས་ཀྱིས༔ གྲི་བོ་ཤི་གཤེད་ལས་ངན་པོའི༔ ཕཊ་དྲལ་སྙིང་ཀའི་སྒོ་ཕྱེས་ནས༔ རིགས་དྲུག་ས་བོན་གཉིད་དང་བཅས༔ ལས་ངན་བག་ཆགས་ཀུན་སྦྱངས་བསམ༔ ཕཊ་ཨ་ཨ་ཤུདྡྷེ་བི་ཤུདྡྷེ་སརྦ་པཱ་པཾ་ཤུདྡྷེ་ཕཊ་སྭཱ་ཧཱ༔ ཕཊཿ གྲི་གུག་སྙིང་ཁར་གདབས་པ་ཡིས༔ ཚེ་དང་བསོད་ནམས་མཐུ་ནུས་སྟོབས༔ རྣལ་འབྱོར་གཟི་བྱིན་ཕུལ་ཕྱུང་གྱུར༔ ཕཊཿ ཕཊཿ ཕཊཿ སླར་ཡང་གཟེར་པོའི་ཡེ་ཤེས་སེམས༔ ཁུང་སེང་དཀྱིལ་འཁོར་ལྷ་ཚོགས་ཀྱི༔ ཐུགས་ཞུགས་དབྱེར་མེད་རོ་གཅིག་གིས༔ ཀློང་བརྒྱུད་སྐུ་གསུམ་འབྲས་བུའི་མཆོག༔ མངོན་གྱུར་རྫོགས་པའི་སངས་རྒྱས་ནས༔ འཁྲུལ་མི་ཤེས་པའི་གདེངས་ཐོབ་གྱུར༔ ཕཊཿ ཕཊཿ ཕཊཿ ཆོས་མིན་ཤེས་རབ་ཆེན་པོའི་ངང་༔ སྲོག་མེད་སྐུ་ལྔའི་ཕྲིན་ལས་མཚོན༔ སྐྱེ་བའི་མ་རིག་སྲོག་རྩར་གདབས༔ རྟོག་གཉིས་ཞགས་པ་འདི་བཅད་པས༔ སྡུག་བསྔལ་མྱུ་གུ་དྲུངས་ཕྱུང་ནས༔ ཡུམ་ཆེན་ས་ལ་འཁོད་པར་ཤོག༔ ཕཊཿ ཕཊཿ ཕཊཿ དེ་ནས་མདུན་དུ་མེ་ཐབ་ནི༔ དུག་ཤིང་ཚེར་མ་སོགས་ཀྱིས་བཅའ༔ ནི་པདྨ་ཊཱཀྐི་ནི་བཛྲ་ས་མ་ཡ་ཛ༔ ཞེས་བརྗོད་པས་མེ་ཉིད་ཡུམ་ཆེན་གོས་དཀར་མོར་པདྨ་མཁའ་འགྲོར་སྐད་ཅིག་གིས་གསལ་བའི་འོད་ཟེར་གྱིས་ནུབ་ཕྱོགས་རང་བཞིན་སྤྲུལ་བའི་ཞིང་ཁམས་ནས་རྟེན་དང་བརྟེན་པར་བཅས་པ་བསྟིམ་པའི་སྐུ་ལ་ལུས་དཀྱིལ་དུ༔ གནས་ལྔར་མཁའ་འགྲོ་ཁྲོས་མ་སྡེ་ལྔ༔ སྙིང་ཁར་ཞི་བ༔ སྤྱི་བོར་ཁྲག་འཐུང་༔ མགྲིན་པར་རིག་འཛིན་བླ་མའི་དཀྱིལ་འཁོར༔ ལྟེ་བར་འབུམ་ཕྲག་ཡངས་པའི་མཁའ་འགྲོ༔ གསང་གནས་སུ་ཆོས་སྐྱོང་དམ་ཅན་རྒྱ་མཚོ་བཀའ་སྲུང་དུ་བསྐྱེད་གསལ་ལ༔ ཨོཾ་ཨཱཿཧཱུྃ་བཛྲ་ཀྲོ་ཏི་ཀཱ་ལི་བཾ་ཧ་རི་ནི་ས་གུ་རུ་དྷེ་ཝ་ཊཱཀྐི་ནི་རཏྣ་ཧྲཱིཿཧཱུྃ༔ ཞེས་བརྗོད་ལ༔ ཧཱུྃ༔ དབྱིངས་ཕྱུག་ཁྲོས་མ་ལྷ་ལྔ་དང་༔ དཀྱིལ་འཁོར་ལྷ་ཚོགས་ཐམས་ཅད་ལ༔ གཤེད་པོ་ལས་ངན་སྡིག་ཅན་འདིའི༔ བསོད་ནམས་ཚོགས་གཉིས་རྫོགས་པའི་ཕྱིར༔ ཕུང་པོ་ཁམས་དང་སྐྱེ་མཆེད་ནི༔ ཤ་ལྔ་བདུད་རྩི་ལྔ་ལ་སོགས༔ ནང་གི་མཆོད་པ་རྣམ་པར་དག༔ ཏིང་འཛིན་རོལ་མོའི་བྱིན་རླབས་ཏེ༔ ཞལ་དུ་བསྟབས་པོ་ཁ་རཾ་ཁཱ་ཧི༔ གཤེད་པོའི་འཁྲུལ་པ་དབྱིངས་སུ་ཞིག༔ རྒྱལ་ཁམས་སྤྱོད་ངན་རྒྱུན་ཆོད་དེ༔ གྲི་སྲི་འགགས་སྲི་ཤི་སྲི་དང་༔ ལྕེབ་སྲི་ཕུང་སྲི་ལ་སོགས་པའི༔ འཁོར་པའི་རྒྱ་མཚོ་སྟོངས་གྱུར་ཅིག༔ མ་ཧཱ་མཾ་ས་རཀྟ་ཏི་ལ་ཨ་མྲ་ཏ་པཉྩ་པཱུ་ཛ་ཁཱ་ཧི་ཁ་ཧཱི༔ ཅེས་བརྗོད་ལ་ནི་མི་ཞིག་ཕྱིར༔ ཁྲོས་མ་གཞུང་གི་བྲོ་རྒྱས་གདབས༔ དེ་ནས་གཤིན་འཕོ་སོགས་ལ་འཇུག༔ པྲཛྙཱ་མ་ཏིའི་བསྐུལ་བའི་ངོར༔ སྔགས་རྒན་ག་གཱ་ཨ་བྷྱེ་ཡིས༔ མཁའ་འགྲོའི་ཀློང་མཛོད་ཆེ་ལས་བསྒྱུར༔ ས་མ་ཡཱ༔ རྒྱ་རྒྱ་རྒྱ༔ དགེའོ། །སརྦ་མངྒ་ལཾ། །ལེགས་སོ། །སེང་སྒྲ་གྲགས་ལེ་དགོས། འདོན་འགྲིགས་ནི། དབང་སྡུད་ཟིལ་གནོན་མཐར་སྐྱབས་འགྲོ་སེམས་བསྐྱེད་ཡན་ལག་བདུན་པ་བླ་མའི་རྣལ་འབྱོར་ཡན་གྲུབ་ནས། ཤི་གཤེད་ཕྲལ་ཞིང་འདུལ་བའི་སླད་དུ་ཕཊ་རང་ཉིད་སྐད་ཅིག་སོགས་གཞུང་ལ་འཇུག་ནས་རྫོགས་མཐར། ཚེ་འདས་ཀྱི་རྣམ་ཤེས་རྗེས་འཛིན་པའི་སླད་དུ་འཕོ་ལུང་དང་། དེའི་རྗེས་སུ་བྱ་འབོད་བྱེད་ན་དེའི་ཚུལ་ཚོགས་ལུས་སྦྱིན་དང་བཅས་པ་བྱ་འབོད་ཀྱི་གཞུང་ལྟར་འཇུག །མ་བྱས་ན། ཕུང་པོ་ཚོགས་སུ་བསྒྱུར་ནས་མགྲོན་བཞི་འཚེང་བའི་ཕྱིར་དུ་ལུས་སྦྱིན་བྱ་ཞིང་མཐར་དགེ་བ་བསྔོའོ། །ཅེས་ཀྱང་ག་གཱས་སོ། །

གཏེར་གསར་རྙིང་གི་གཅོད་དོན་བསྡུས་པ་བདག་འཛིན་གཅོད་པའི་རལ་གྲི།

རྡོར་སེམས་དགོངས་པ་འདུས་པ་ལས༔ གཏེར་གསར་རྙིང་གི་གཅོད་དོན་བསྡུས་པ་བདག་འཛིན་གཅོད་པའི་རལ་གྲི་བཞུགས་སོ། །

རྡོར་སེམས་དགོངས་པ་འདུས་པ་ལས༔ གཏེར་གསར་རྙིང་གི་གཅོད་དོན་བསྡུས་པ་བདག་འཛིན་གཅོད་པའི་རལ་གྲི་ནི༔ ཕཊ་ཕཊ་ཕཊཿ བཾ༔ རིགས་ལྔའི་མཁའ་འགྲོ་སྡེ་ལྔ་ནི༔ སྐུ་གསུམ་རྒྱལ་བའི་ཡེ་ཤེས་ལྔའི༔ དུག་ལྔའི་བསྐྱེད་བའི་ལྷ་འདྲེ་རྣམས༔ དབྱིངས་ལྔའི་ཀློང་བསྡུད་ཟིལ་གྱིས་གནོན༔ ཕཊ་ཕཊ་ཕཊཿ སྐྱབས་གནས་ཀུན་འདུས་མཁའ་འགྲོ་ལྷར༔ སྒོ་གསུམ་གུས་པས་སྐྱབས་སུ་མཆི༔ མཐའ་ཡས་ཕ་མ་སེམས་ཅན་ཀུན༔ ཡུམ་ཆེན་ས་ལ་བཀོད་པར་བྱ༔ ཕཊ་ཕཊ་ཕཊཿ རང་སེམས་ཚངས་པའི་ལམ་བརྒྱུད་དེ༔ སྐད་ཅིག་སྟེང་གི་ནམ་མཁར་འཕང་༔ ༼ འཕགས། དཔྱད། ༽རྡོ་རྗེ་མཁའ་འགྲོ་ཁྲོས་མར་བཞེངས༔ ཕཊ་ཕཊ་ཕཊཿ ཕུང་པོ་ཐང་ལ་འགྱེལ་བ་དེ༔ གྲི་གུག་གདབས་པས་ཐལ་གྱིས་བཤིགས༔ ཐུགས་ཀའི་འོད་གྱིས་མཆོད་རྫས་ནི༔ མ་ཚང་མེད་པའི་སྤྲིན་དུ་གྱུར༔ གནས་གསུམ་མཁའ་འགྲོའི་ཕོ་ཉ་ཡིས༔ མཆོད་སྦྱིན་མགྲོན་ཀུན་སྤྱན་དྲངས་གྱུར༔ ཕཊ་ཕཊ་ཕཊཿ མཆོད་རྫས་དཀར་མངར་ལྷ་མོ་ནི༔ དཀོན་མཆོག་སྲི་ཞུའི་མགྲོན་ལ་བསྟིམ༔ ཤ་ལྔ་བདུད་རྩའི་བསྐང་རྫས་སུ༔ མགོན་པོ་ཡོན་ཏན་མགྲོན་ལ་འབུལ༔ ཕཊ་ཕཊ་ཕཊཿ ཤ་ཁྲག་དྲི་གསུར་ཁུ་རླང་གིས༔ ལན་ཆགས་བགེགས་རིགས་འཁོར་བཅས་བརྔན༔ གང་འདོད་འཇོ་བའི་འདོད་ཡོན་དུ༔ རིགས་དྲུག་སྙིང་རྗེའི་མགྲོན་ལ་བསྔོ༔ ཕཊ་ཕཊ་ཕཊཿ བདག་སོགས་མཐའ་ཡས་སེམས་ཅན་ཐམས་ཅད་ཀྱི༔ ཚོགས་རྫོགས་ཉོན་ཤེས་སྒྲིབ་པ་ཀུན་དག་ནས༔ མཆོག་དང་ཐུན་མོང་དངོས་གྲུབ་ཐོབ་པ་དང་༔ བྱང་ཆུབ་སེམས་ཀྱི་འགྲོ་ཀུན་རྒྱུད་ཚིམ་ཤོག༔ ཕཊ་ཕཊ་ཕཊཿ མཐར་ནི་འཁོར་གསུམ་དམིགས་པ་མེད་པ་ཡི༔ ཡུམ་ཆེན་དགོངས་པར་ཕྱམ་གཅིག་རྫོགས་སངས་རྒྱས༔ ཨ་ཨ་ཨཱ༔

ཅེས་ཀྱང་ག་གཱས་སོ། །

ཡེ་ཤེས་མཁའ་འགྲོའི་བཞེངས་བསྐུལ་ཐབས་ཀྱི་ཞགས་པ།

རྡོ་རྗེ་སེམས་དཔའི་དགོངས་ཉམས་ལས༔ ཡེ་ཤེས་མཁའ་འགྲོའི་བཞེངས་བསྐུལ་ཐབས་ཀྱི་ཞགས་པ་ཞེས་བྱ་བ་བཞུགས་སོ༔

ན་མོ་གུ་རུ་པདྨ་ཀཱ་ར་ཡེ༔ བརྡ་ཡིག །གང་ཞིག་གཞན་གྱི་དོན་བྱེད་པའི༔ ཐབས་མཆོག་ཚོགས་ཀྱི་འཁོར་ལོ་ནི༔ ཕུང་པོ་བསྲེ་ཕྱིར་ལས་གཞུང་བསྲང་༔ དེ་ནས་ཚོགས་ཀྱི་སྤྱན་འདྲེན་མཐར༔ ཨ་བཾ་ཧ་རི་ནི་ས་ཧཱུྃ༔ ཕཊཿ མ་སྤྲོས་པ་བྲལ་བའི་ཆོས་དབྱིངས་ནས༔ ཀུན་ཏུ་བཟང་མོའི་ཐུགས་དམ་བསྐུལ༔ བྱ་རྒྱལ་རྒོད་ཀྱི་སྐུར་བཞེངས་ལ༔ བསོད་ནམས་ཞིང་དུ་གཤེགས་སུ་གསོལ༔ ཕཊཿ ཕཊཿ ཕཊཿ མ་ཡེ་ཤེས་ལྔ་ལྡན་དཀྱིལ་འཁོར་ནས༔ རིགས་ལྔའི་མཁའ་འགྲོའི་ཐུགས་དམ་བསྐུལ༔ བྱ་རྒྱལ་རྒོད་ཀྱི་སྐུར་བཞེངས་ལ༔ བསོད་ནམས་ཞིང་དུ་གཤེགས་སུ་གསོལ༔ ཕཊཿ ཕཊཿ ཕཊཿ མ་སྣ་ཚོགས་ཐུགས་རྗེའི་དཀྱིལ་འཁོར་ནས༔ ལས་དང་དམ་ཚིག་ཤ་ཟ་འབུམ༔ བྱ་རྒྱལ་རྒོད་ཀྱི་སྐུར་བཞེངས་ལ༔ བསོད་ནམས་ཞིང་དུ་གཤེགས་སུ་གསོལ༔ ཕཊཿ ཕཊཿ ཕཊཿ མ་གནས་གསུམ་དག་པའི་དཀྱིལ་འཁོར་ནས༔ ཤུགས་འགྲོ་གནས་ཉུལ་བྱེ་བ་འབུམ༔ བྱ་རྒྱལ་རྒོད་ཀྱི་སྐུར་བཞེངས་ལ༔ བསོད་ནམས་ཞིང་དུ་གཤེགས་སུ་གསོལ༔ ཕཊཿ ཕཊཿ ཕཊཿ རང་སྣང་རྣམ་པར་དག་པའི་ཀློང་༔ དགུ་ལྡན་རྩ་བརྒྱུད་བླ་མ་ཡང་༔ བྱ་རྒྱལ་རྒོད་ཀྱི་སྐུར་བཞེངས་ལ༔ བསོད་ནམས་ཞིང་དུ་གཤེགས་སུ་གསོལ༔ ཕཊཿ ཕཊཿ ཕཊཿ ཡེ་ཤེས་དགུ་ཀློང་རྔམ་པ་ནས༔ ཡི་དམ་དཀྱིལ་འཁོར་ལྷ་ཚོགས་ཀྱང་༔ བྱ་རྒྱལ་རྒོད་ཀྱི་སྐུར་བཞེངས་ལ༔ བསོད་ནམས་ཞིང་དུ་གཤེགས་སུ་གསོལ༔ ཕཊཿ ཕཊཿ ཕཊཿ མི་ཟད་བརྒྱད་ལྡན་དཀྱིལ་འཁོར་ནས༔ གྲངས་མེད་དེ་བཞིན་གཤེགས་པ་ཡང་༔ བྱ་རྒྱལ་རྒོད་ཀྱི་སྐུར་བཞེངས་ལ༔ བསོད་ནམས་ཞིང་དུ་གཤེགས་སུ་གསོལ༔ ཕཊཿ ཕཊཿ ཕཊཿ ཞིང་གྱུར་ཡེ་ཤེས་ཡོན་ཏན་ལྡན༔ ཐེག་གསུམ་དབང་འབྱོར་དགེ་འདུན་ཡང་༔ བྱ་རྒྱལ་རྒོད་ཀྱི་སྐུར་བཞེངས་ལ༔ བསོད་ནམས་ཞིང་དུ་གཤེགས་སུ་གསོལ༔ ཕཊཿ ཕཊཿ ཕཊཿ དག་མཉམ་བཟང་ངན་ཆོས་སྐུར་ཕྱལ༔ སྣང་སྲིད་ལྷ་སྲིན་སྡེ་བརྒྱད་མགྲོན༔ བྱ་རྒྱལ་རྒོད་ཀྱི་སྐུར་བཞེངས་ལ༔ བསོད་ནམས་ཞིང་དུ་གཤེགས་སུ་གསོལ༔ ཕཊཿ ཕཊཿ ཕཊཿ རང་རང་ལས་སྣང་རིགས་དྲུག་ཞེན༔ དོན་ལ་བདེ་ཆེན་ལོངས་སྤྱོད་རྫོགས༔ བྱ་རྒྱལ་རྒོད་ཀྱི་སྐུར་བཞེངས་ལ༔ བསོད་ནམས་ཞིང་དུ་གཤེགས་སུ་གསོལ༔ ཕཊཿ ཕཊཿ ཕཊཿ འཁོར་འདས་གཉིས་ཀྱི་མགྲོན་རིགས་ཀུན༔ མཆོད་སྦྱིན་བསོད་ནམས་ཞིང་དུ་བྱོན༔ ནམ་མཁའི་སྐར་ལྟར་འཁྲིགས་ལ་བྱོན༔ བར་སྣང་སྤྲིན་ལྟར་གཏིབ་ལ་བྱོན༔ སྐད་ཅིག་ཉིད་ལ་གཤེགས་སུ་གསོལ༔ ད་ལྟ་མྱུར་དུ་གཤེགས་སུ་གསོལ༔ མ་འགྱང་མ་གཡེལ་གཤེགས་སུ་གསོལ༔ ཐུགས་དམ་དབང་གིས་གཤེགས་སུ་གསོལ༔ ཨོཾ་བཛྲ་ཊཱཀྐི་ནི་གུ་རུ་དེ་ཝ་བུདྡྷ་དྷརྨ་སངྒྷ་ཡ་བིགྣན་ཏྲི་རཱ་ཛ་ན་ག་ཙ་ཤ་ཀ་ཡ་ཀྲ་ཏ་ཕཻམ་ཛ་ཛ༔ ཡང་ན་བསྡུས་བར་འདོད་པས༔ ཨོཾ་བཛྲ་ཊཱཱཀྐི་ནི་སརྦ་ཀཱ་ཡ་ཀྲ་ཏ་དྷུ་པནྩ་ཕེམ་ཛ༔ ཞེས་བཟླས་བརྒྱ་ཚོ་གཅིག་གི་འོང་༔ ༼ ཚོགས་མཆོད་མཇུག་ཏུ་མཆན་ནོ། ༽དེ་ནས་ཞལ་བསྟབས་བསྡུས་པ་ནི༔ ཕཊཿ ཕཊཿ ཕཊཿ བདེ་ཆེན་ཀུན་ཏུ་བཟང་མོ་ལ༔ ཡེ་ཤེས་བདུད་རྩིའི་ཚོགས་མཆོད་འབུལ༔ ཚོགས་རྫོགས་སྒྲིབ་པ་ཀུན་དག་ནས༔ རྣམ་ཤེས་ཆོས་ཀྱི་དབྱིངས་སུ་དྲོངས༔ ཕཊཿ ཕཊཿ ཕཊཿ རིགས་ལྔ་ཡེ་ཤེས་མཁའ་འགྲོ་ལ༔ ཕུང་པོ་འབྱུང་ལྔ་མཆོད་པ་འབུལ༔ ཚོགས་རྫོགས་སྒྲིབ་པ་ཀུན་དག་ནས༔ རྣམ་ཤེས་ཆོས་ཀྱི་དབྱིངས་སུ་དྲོངས༔ ཕཊཿ ཕཊཿ ཕཊཿ སྤྲུལ་འཁོར་གནས་གསུམ་མཁའ་འགྲོ་ལ༔ ལུས་ཟུངས་དྭངས་མ་བཅུ་བཞི་འབུལ༔ ཚོགས་རྫོགས་སྒྲིབ་པ་ཀུན་དག་ནས༔ རྣམ་ཤེས་ཆོས་ཀྱི་དབྱིངས་སུ་དྲོངས༔ ཕཊཿ ཕཊཿ ཕཊཿ དཀོན་མཆོག་སྲིད་༼ སྲི་དཔྱད ༽ཞུའི་མགྲོན་རྣམས་ལ༔ ནང་གི་དཀར་དམར་མངར་གསུམ་འབུལ༔ ཚོགས་རྫོགས་སྒྲིབ་པ་ཀུན་དག་ནས༔ རྣམ་ཤེས་ཆོས་ཀྱི་དབྱིངས་སུ་དྲོངས༔ ཕཊཿ ཕཊཿ ཕཊཿ མགོན་པོ་ཡོན་ཏན་མགྲོན་རྣམས་ལ༔ མི་ཟད་ནང་གི་རྒྱན་གཏོར་འབུལ༔ ཚོགས་རྫོགས་སྒྲིབ་པ་ཀུན་དག་ནས༔ རྣམ་ཤེས་ཆོས་ཀྱི་དབྱིངས་སུ་དྲོངས༔ ཕཊཿ ཕཊཿ ཕཊཿ བགེགས་རིགས་ལན་ཆགས་མགྲོན་རྣམས་ལ༔ ཤ་རི་ཁྲག་མཚོ་རུས་གྲམ་འབུལ༔ ཚོགས་རྫོགས་སྒྲིབ་པ་ཀུན་དག་ནས༔ རྣམ་ཤེས་ཆོས་ཀྱི་དབྱིངས་སུ་དྲོངས༔ ཕཊཿ ཕཊཿ ཕཊཿ རིགས་དྲུག་སྙིང་རྗེའི་མགྲོན་རྣམས་ལ༔ འདོད་ཡོན་མི་ཟད་གཏེར་དུ་འབུལ༔ ཚོགས་རྫོགས་སྒྲིབ་པ་ཀུན་དག་ནས༔ རྣམ་ཤེས་ཆོས་ཀྱི་དབྱིངས་སུ་དྲོངས༔ ཕཊཿ ཕཊཿ ཕཊཿ རྟོག་ཚོགས་བརྒྱད་ཁྲི་བཞི་སྟོང་དང་༔ ཕུང་པོ་ཁམས་དང་སྐྱེ་མཆེད་དེ༔ བདག་དུ་བཟུང་བའི་དྭངས་མ་འདི༔ ཡེ་ཤེས་མཁའ་འགྲོའི་དཀྱིལ་འཁོར་ལ༔ དེ་རིང་སྟོན་ཆེན་མགྲོན་ལ་འགྱེད༔ ཚོགས་གཉིས་ཡོངས་སུ་རྫོགས་གྱུར་ཅིག༔ ལན་ཆགས་བུ་ལོན་བྱང་གྱུར་ཅིག༔ ས་ལམ་བར་ཆད་ཀུན་ཞི་ནས༔ རྣམ་མཁྱེན་སངས་རྒྱས་ཐོབ་པར་ཤོག༔ ཕཊཿ ཕཊཿ ཕཊཿ ལྷག་རོལ་མེད་པར་གྱུར༔ ༼ བསྡུ་རིམ་འགོར་མཆན་ནོ། ༽ གཤེགས་གསོལ་ནི༔ ཀྱཻ༔ མི་མིན་ཡེ་ཤེས་མཁའ་འགྲོ་ཚོགས༔ སེམས་ཅན་དོན་དུ་མཛད་ལགས་ཀྱི༔ གཤེགས་བྱོན་བཞུགས་བའི་ཟོལ་སྦྱོར་བ༔ ད་ནི་ཆོས་ཀྱི་དབྱིངས་སུ་གཤེགས༔ ཕཊཿ ཕཊཿ ཕཊཿ ཨ་ནི་ཡུམ་ཆེན་ཀུན་ཏུ་བཟང་༔ སྐྱེ་བྲི་མེད་དེ་ཡེ་ནས་འབྱམས༔ བློ་ཚོགས་སེལ་གྱི་དབྱེན་པོ་ཉིད༔ རྗེས་བསྟི་མི་དམིགས་རང་སར་གྲོལ༔ ཨ་ཨ་ཨཱ༔ ཞེས་བརྗོད་ཕྱི་གནོན་ལ་སོགས་བྱ། །ལར་ནི་ཚོགས་མཆོད་རྗེས་སུ་སྤྲོད། །དེ་སྐད་ཛྙཱ་ན་ཨཀྵ་ར། །ཟུང་གི་བསྐུལ་བཞིན་ག་གཱས་སོ། །མ་དབུས་ཕྱོགས་༴ སོགས། མཆོག་ཐུན་མོང་གཉིས་ཀྱི་དངོས་གྲུབ་སྩོལ༔ ཕཊཿ དབུས་ཕྱོགས་སངས་རྒྱས་རིགས་ཀྱི་མཁའ་འགྲོ་མ་མཐིང་ནག་སེང་གེའི་གདོང་བ་ཅན་འཁོར་སྣང་སྲིད་ལྷ་འདྲེའི་བསྐོར་བ་དང་བཅས་པ་རྣམས་ཀྱིས་བདག་དང་བསྲུང་བྱ་འདིའི་ཉོན་མོངས་པ་གཏི་མུག་དང་། དེ་ལས་བྱུང་བའི་ནད་ན་ས། གདོན་སྣ་འདྲེན་དཔུང་ཚོགས་རྒྱབ་བརྟེན་དང་བཅས་པ་ཐམས་ཅད་རྗེས་མེད་ཤུལ་མེད་ལྷག་མེད་དུ་རོལ་ནས་སམ་ཟོས་ནས་ཆོས་ཀྱི་དབྱིངས་ཀྱི་ཡེ་ཤེས་ཀྱི་ངང་དུ་འབྱམས་ཀླས་པར་བསམ། ཕཊཿ ཕཊཿ ཕཊཿ མ་མི་མིན་སོགས་ ༴ དངོས་གྲུབ་སྩོལ༔ ཤར་ཕྱོགས་རྡོ་རྗེའི་རིགས་ཀྱི་མཁའ་འགྲོ་མ་དཀར་མོ་སྦྲུལ་གྱི་གདོང་བ་ཅན་འཁོར་སྣང་སྲིད་༴ བདག་དང་བསྲུང་བྱ་འདིའི་ཉོན་མོངས་པ་ཞེ་སྡང་དང་སོགས་༴ མེ་ལོང་ལྟ་བུའི་ཡེ་ཤེས་ཀྱི་ངང་དུ་འབྱམས་ཀླས་པར་བསམ། ལྷོ་ཕྱོགས་རིན་ཆེན་རིགས་ཀྱི་མཁའ་འགྲོ་མ་སེར་མོ་རྟ་ཡི་གདོང་བ་ཅན་འཁོར་སྣང་སྲིད་༴ སོགས། བདག་དང་བསྲུང་བྱ་འདིའི་ཉོན་མོངས་པ་ང་རྒྱལ་དང་༴ སོགས། མཉམ་པ་ཉིད་ཀྱི་ཡེ་ཤེས་ཀྱི་༴ སོགས། ཕཊཿ ནུབ་ཕྱོགས་པདྨ་རིགས་ཀྱི་མཁའ་འགྲོ་མ་དམར་མོ་བྱ་རྒོད་ཀྱི་གདོང་བ་ཅན་འཁོར་སྣང་སྲིད་༴སོགས། བདག་དང་བསྲུང་བྱ་འདིའི་ཉོན་མོངས་པ་འདོད་ཆགས་དང་སོགས། སོ་སོར་རྟོགས་པའི་ཡེ་ཤེས་༴ སོགས། བྱང་ཕྱོགས་ལས་ཀྱི་རིགས་ཀྱི་མཁའ་འགྲོ་མ་ལྗང་མོ་ཁྱི་ཡི་གདོང་བ་ཅན་འཁོར་སྣང་༴ སོགས། བསྲུང་བྱ་འདིའི་ཉོན་མོངས་པ་ཕྲག་དོག་དང་༴ སོགས། བྱ་བ་གྲུབ་པའི་ཡེ་ཤེས་ཀྱི་ངང་དུ་༴ སོགས། སྟེང་ཕྱོགས་མཁའ་སྤྱོད་རིགས་ཀྱི་མཁའ་འགྲོ་མ་དཀར་མོ་ཁྱུང་གི་གདོང་པ་ཅན་འཁོར་༴ སོགས། བདག་དང་བསྲུང་བྱ་འདིའི་ཉོན་མོངས་པ་རྒྱུ་བདག་ཉིད་གཅིག་པུའི་མ་རིག་པ་དང་༴ སོགས། དབྱིངས་གྲོལ་ཡེ་ཤེས་ཀྱི་ངང་དུ་༴ སོགས། འོག་ཕྱོགས་ས་སྤྱོད་རིགས་ཀྱི་མཁའ་འགྲོ་མ་ནག་མོ་ཕག་གི་གདོང་བ་ཅན་འཁོར་༴ སོགས། བདག་དང་བསྲུང་བྱ་འདིའི་ཉོན་མོངས་པ་རྐྱེན་ལྷན་ཅིག་ཚོགས་པའི་མ་རིག་པ་དང་༴ སོགས། འདའ་ཀ་ཐུགས་ཀྱི་ཡེ་ཤེས་ཀྱི་ངང་དུ་སོགས། མཚམས་ཕྱོགས་འཛིན་རིགས་ཀྱི་མཁའ་འགྲོ་མ་དཀར་སེར་དམར་ལྗང་གྲངས་མེད་པ་འཕྲོས་ཏེ་འཁོར་༴ སོགས། བདག་དང་བསྲུང་བྱ་འདིའི་ཉོན་མོངས་པ་བརྒྱད་ཁྲི་བཞི་སྟོང་དང་༴ སོགས། མཐའ་གྲོལ་ཡེ་ཤེས་ཀྱི་ངང་དུ། སོགས། བར་དམ་ཚིག་ཤ་ཟ་མཁའ་འགྲོ་མ་དཀར་སེར་དམར་ལྗང་མགོ་བརྙན་གྲངས་མེད་པ་འཕྲོས་ནས་འཁོར་༴ སོགས། བདག་དང་བསྲུང་བྱ་འདིའི་ཉོན་མོངས་པ་ཀུན་ཏུ་བརྟགས་པའི་མ་རིག་པ་དང་༴ སོགས། མི་གནས་པའི་ཡེ་ཤེས་ཀྱི་ངང་དུ་འབྱམས་ཀླས་པར་གྱུར་ཅིག །མཁའ་འགྲོ་བཅུ་འགྱེད་ཡིན་ཀྱང་། བཅུ་གཅིག་བྱས་ནས་གསུང་སྲོལ་ཡོད་པ་ལྟར་བཀོད་པ་ལ་གཏེར་གཞུང་གི་དེ་དང་ཅུང་མི་འདྲ་ཡང་། བླ་མ་ཉིད་ཀྱིས་ནད་པ་ལ་གསུང་ལུགས་ཡིན་པས་རྨོད་པར་མི་བྱའོ། །ཞེས་ཀྱང་ག་གཱས་སོ། །

གླུད་བསྔོ་འཆི་བདག་ཞགས་འགྲོལ།

ཡེ་ཤེས་སྒྱུ་འཕྲུལ་དྲྭ་བ་ལས༔ གླུད་བསྔོ་འཆི་བདག་ཞགས་འགྲོལ་ཞེས་བྱ་བ་བཞུགས༔

འཆི་ལྟས་རྣམ་པ་བརྒྱད་ཅུ་ལ༔ བཟློག་ཐབས་མདོས་དང་འཁོར་ལོ་བསྐོར༔ རྟེན་འབྲེལ་ཐབས་ཀྱི་བཅོས་པ་རྣམས༔ སོ་སོར་རང་རང་དགོས་ཆོས་བཞིན༔ རྫོགས་ཆེན་རྒྱུད་ཀྱི་དྭངས་མ་ནི༔ ཉི་ཟླ་ཁ་སྦྱོར་ཆེན་པོར་གསུངས༔ དེ་ལྟར་ཉམས་སུ་མ་ལོན་ཀྱང་༔ སྤྱི་བཅོས་འདིའི་ཀྱང་ངེས་པར་བཟློག༔ གླུད་དང་མདོས་སྒོ་རང་རང་ལྟར༔ དེ་ནས་བསྔོ་བ་འདི་ལྟ་སྟེ༔ ཀྱཻ༔ འཆི་བདག་སྡེ་རུ་གཏོགས་པ་ཡི༔ བགེགས་རིགས་སྟོང་ཕྲག་བརྒྱད་ཅུ་དང་༔ གློ་བུར་དགུ་བཅུ་རྩ་གཅིག་སོགས༔ ཚེ་ལ་རྐུ་ཞིང་སྲོག་ལ་འགམ༔ བླ་ལ་འཇབ་ཅིང་ཡིད་ལ་བརྣག༔ མདངས་དང་དབང་པོ་འཕྲོག་བྱེད་པ༔ ཁྱད་པར་བདུད་པོ་ཁྲམ་བདག་ཆེ༔ ཤྭ་རྡིལ་འགྲིམ་ཞིང་ཞགས་པ་གཡུག༔ ལས་ཀྱི་མེ་རླུང་སོ་སོར་བཟའ༔ དེ་དང་དེ་དག་ཐམས་ཅད་ལ༔ མི་ལས་དགའ་བའི་གླུད་འདི་ཉིད༔ དབང་པོ་ཡན་ལག་ཡོན་ཏན་ནི༔ བརྒྱ་ཕྲག་བཅུ་གཉིས་ཆ་འདྲར་རྫོགས༔ འདོད་པའི་ཡོན་ཏན་ཐམས་ཅད་ཚང་༔ ལྷ་ཡི་བུ་བས་གཟི་བརྗིད་ལྡན༔ དབང་པོའི་གཞུ་ལས་ཁ་དོག་འཚེར༔ ཉི་ཟླ་གཉིས་ལས་འོད་རེ་གསལ༔ ལྗོན་ཤིང་ལས་ཀྱང་ཡན་ལག་རྒྱས༔ ནོར་བུ་བས་ཀྱང་རེ་བ་སྐོང་༔ དྲི་ཟའི་གླུ་ལས་གདེང་རེ་སྙན༔ བདུག་པའི་སྤྲིན་ལས་བསུང་རེ་ཞིམ༔ འཇམ་མཉེན་པཉྩའི་བགོ་བར་ལྡན༔ གང་འདོད་དེར་འགྱུར་འཕྲུལ་སྤྱོད་ཡངས༔ རྣམ་རིག་ཡོན་ཏན་མངོན་ཤེས་ལྡན༔ གཡོས་ལེགས་བདའ་དགུའི་སྦྱིན་ལག་ཡངས༔ དེ་མ་ཐག་དུ་མོད་ལ་འབྱུང་། དེ་འདྲའི་ཏིང་འཛིན་སྒྱུ་མའི་འཕྲུལ༔ དེ་བཞིན་གཤེགས་པའི་སྨོན་ལམ་མཐུ༔ རྣལ་འབྱོར་ཡེ་ཤེས་རང་གཟུགས་ཡིན༔ བྱང་ཆུབ་སེམས་ཀྱི་བྱིན་རླབས་ལྡན༔ འབྲེལ་ཚད་དགེ་བའི་འཁྲི་ཤིང་ཡིན༔ བསྔོས་ཚད་ཀུན་གྱིས་བར་ཆད་སེལ༔ ཐོབ་ཚད་ཐམས་ཅད་གཏན་དུ་འཚེངས༔ མྱོང་ཚད་ཟག་མེད་བདེ་བས་ཚིམ༔ འདི་ཉིད་ཁྱེད་ལ་གཏེར་དུ་འབུལ༔ མི་གཙང་ལུས་བརྒྱའི་བསྐྱོད་དུ་མེད༔ མི་དགེའི་སྲོག་ནི་འགམ་པ་ལ༔ འཁོར་མེད་ལན་ཆགས་དེས་ཅི་བྱ༔ ཤེས་ཏེ་ཁྱོད་ཀྱིས་བཀོལ་མི་བཏུབ༔ འཚང་བར་རློམ་པས་ཕུང་དྲལ་ཏེ༔ བསད་ན་ཚེ་ཐུང་སྲོག་ལན་ཆགས༔ ཁྱོད་རང་ལས་ཀྱི་ཉེན་སྡུག་བསྔལ༔ སེལ་ལས་ཕྱིར་ཞིང་ནོངས་པའི་རྒྱུ༔ འདམ་ཀའི་ངེས་པ་མ་ནོར་བར༔ བདེན་པའི་ཚིག་འདི་ཉན་པར་གྱིས༔ སྔགས་འཆང་བདག་གི་བཀའ་མ་བཅག༔ ཁྱེར་ཅིག་ཁྱེར་ཅིག་སྟོབས་ལྡན་རྣམས༔ སྲེད་དང་ཆགས་དང་ཞེན་པ་དང་༔ དྲན་དང་བཟུང་དང་བསམ་དང་རེག༔ ཀློད་དང་ཞི་དང་གྲོལ་བར་མཛོད༔ ཆོས་སྦྱིན་སོགས་བྱ༔ གླུད་གཏོར་ལོ་དགྲའི་ཕྱོགས་སུ་འདོར༔ ཕྱི་མིག་མི་བལྟ་རང་གནས་སླེབས༔ བགེགས་བསྐྲད་བསྲུང་བའི་འཁོར་ལོ་བསྒོམ༔ དེས་ནི་འཆི་བ་ངེས་པར་བསླུ༔ དེ་སྐད་རྙིང་སྔགས་རྒན་པོ་ཡི། །རིགས་ཀྱི་མྱུ་གུར་སྐྱེ་སྲིད་འཛིན། །ག་གཱ་ཨ་བྷྱེའི་མིང་གིས་ནི། །དབང་ཕྱུག་རྡོ་རྗེའི་བསྐུལ་ངོར་སྨྲས། །སརྦ་མངྒ་ལཾ། །

དུས་མིན་འཆི་ཞགས་གཅོད་པའི་རལ་གྲི།

དུས་མིན་འཆི་ཞགས་གཅོད་པའི་རལ་གྲི་བཞུགས་སོ༔

འདི་མདོས་གླུད་དང་དྲི་གསུར་ལན་ཆགས་སོགས་གང་ལའང་བརྟེན་རུང་ཀྱང་༔ རང་ཉིད་ཀྱི་སྦུབས་ཀྱི་དྲི་མ་གོས་དུམ་དྲེག་པ་ཟས་སྣ་གླུད་རྫོང་སོགས་འབྱོར་ན་རབ་ཏུ་བཟང་ངོ་༔ བྱིན་རླབས་ནི༔ ན་མོ༔ སྐུ་གསུམ་རྒྱལ་བ་རྒྱ་མཚོའི་ཐུགས་རྗེ་དང་བྱིན་རླབས་སྔགས་དང་ཕྱག་རྒྱ་ཏིང་ངེ་འཛིན་གྱི་བདེན་པ་ཆེན་པོའི༔ གནོད་བྱེད་ལན་ཆགས་ཤ་མཁོན་གྱི་བདག་པོ་བདག་མོ་རྣམས་དང་༔ ནད་བདག་རིམས་བདག་ཚེ་རྐུ་སྲོག་ལེན་ཁྲལ་བདག་འཆི་བདུད་ཀྱི་སྡེ་རིས་སུ་གཏོགས་པ་ཐམས་ཅད་ཀྱི་དབང་པོ་དྲུག་གི་སྤྱོད་ཡུལ་དུ་གང་ལ་གང་འདོད་ཀྱི་ལོངས་སྤྱོད་འཛད་མི་ཤེས་པ་ནམ་མཁའ་མཛོད་ཀྱི་གཏེར་ཆེན་པོར་གྱུར་ཅིག༔ མཚན་བཞི་དང་ནམ་མཁའ་མཛོད་སྔགས་ལན་བདུན་བདུན་བརྗོད་ལ༔ ཀྱཻ༔ དཀོན་མཆོག་གསུམ་གྱི་ཐུགས་རྗེ་དང་༔ སྔགས་དང་ཏིང་འཛིན་བདེན་པ་དང་༔ བྱང་ཆུབ་སེམས་ཀྱི་བྱིན་རླབས་དང་༔ ཆོས་ཉིད་རྣམ་པར་དག་པའི་མཐུས༔ གླུད་གཏོར་འདོད་ཡོན་སྤྲིན་ཕུང་པོ༔ འཛད་མེད་ནམ་མཁའི་མཛོད་ཆེན་པོ༔ བཟའ་བཅའ་བཏུང་བ་ལྡག་གཞིབ་དཀོར༔ གོས་རྒྱན་གནས་ཡུལ་གྲོགས་སྐྱབས་ཟས༔ རྒྱན་དང་ལོངས་སྤྱོད་ཕུན་སུམ་ཚོགས༔ གང་ལ་གང་མཁོའི་འདོད་དགུའི་གཏེར༔ ཡིད་བཞིན་འབྱུང་བའི་ཕུང་པོར་འབར༔ ཟག་མེད་ཡེ་ཤེས་རོལ་བར་གྱུར༔ ཁྱད་པར་བརྒྱ་སྟོང་གྲངས་མེད་པའི༔ མི་བས་དགའ་བའི་གླུད་གཏོར་མ༔ མཛེས་སྡུག་ལྷ་ཡི་ལང་ཚོ་ཅན༔ སྙན་འཇེབ་དྲི་ཟའི་གླུ་དབྱངས་ལེན༔ ཅང་ཤེས་རྒྱུ་རྩལ་སྣ་ཚོགས་ལྡན༔ རྒྱན་ཆས་ཡོ་བྱད་ཕུན་སུམ་ཚོགས༔ འཇིག་རྟེན་འདི་ན་དཀོན་པ་ཡི༔ ཁྱད་ནོར་ཡིད་ཀྱི་འཁྲི་ཤིང་འདི༔ བདག་ཅག་མི་ནོར་འཁོར་བཅས་ཀྱི༔ ཤ་ཡི་ཚབ་དང་ཁྲག་གི་སྐྱིན༔ བུ་ལོན་འཇལ་དང་ཤ་མཁོན་ལན༔ མ་ལུས་ཡོངས་ཀྱི་གླུད་དུ་འབུལ༔ ཁྲམ་བདག་རྣམས་ཀྱི་ཁྲམ་ཕྱེས་ཤིག༔ ནད་བདག་རྣམས་ཀྱིས་ནད་བསྡུས་ཤིག༔ མདོས་བདག་རྣམས་ཀྱིས་མདོས་ལོངས་ཤིག༔ ཤ་ལན་འཁོན་ལན་བསྡུམ་པ་ཡིན༔ ཚེ་རབས་འཁོར་བ་ཐོག་མེད་ཀྱི༔ བུ་ལོན་ལན་ཆགས་བྱང་གྱུར་ཅིག༔ ཡིད་བཞིན་འདོད་པ་ཚིམ་གྱུར་ཅིག༔ གདུག་རྩུབ་ཉོན་མོངས་ཞི་གྱུར་ཅིག༔ སོ་སོའི་སྡུག་བསྔལ་བྲལ་གྱུར་ཅིག༔ ལྷ་འདྲེའི་གཙོར་བྱས་བདག་གཞན་འགྲོའི༔ དུས་མིན་འཆི་བ་བཟློག་གྱུར་ཅིག༔ ཁྲམ་ཁ་དལ་ཁ་བསྒྱུར་བ་དང་༔ ནད་དང་གནོད་པ་རྐྱེན་ངན་ཕྱོགས༔ མི་མཐུན་མི་འདོད་བགེགས་བར་ཆད༔ ཉེ་བར་འཚེ་བ་ཐམས་ཅད་ཀྱང་༔ སེམས་ཅན་ཀུན་ལ་འབྱུང་མ་གྱུར༔ སྲིད་ཞིའི་ཕན་བདེ་འབྱུང་བའི་གནས༔ དམ་པའི་ཆོས་ལ་རྟག་སྤྱོད་ཅིང་༔ འགྲོ་ཀུན་གཏན་བདེའི་རྒྱུ་གྱུར་ནས༔ དམ་པ་སྐུ་གཉིས་ཐོབ་པར་ཤོག༔ སཾ་བྷ་ར་ཅི་ནུས་ཀྱིས་བསྔོ༔ ཀྱཻ༔ འཆི་བདག་ནག་པོ་ལ་སོགས་པའི༔ ཕ་མར་གྱུར་བའི་བགེགས་མགྲོན་ཀུན༔ ངས་ནི་སྙིང་རྗེ་ཆེན་པོ་ཡིས༔ བྱང་ཆུབ་སེམས་ཀྱི་ཕབ་བྲན་ནས༔ སྔགས་དང་ཕྱག་རྒྱའི་བྱིན་གྱིས་བརླབས༔ དཀོན་མཆོག་གསུམ་གྱི་སྟོབས་སྦྲན་པའི༔ གཏན་པ་མེད་པའི་མཆོད་སྦྱིན་བཏང་༔ ཁྱེར་ཅིག་ཁྱེར་ཅིག་༴ སོགས། བདག་གི་བསམ་པའི་༴ སོགས། སྡིག་པ་ཅི་ཡང་༴ སོགས། ཧོ༔ སྦྱིན་བྱ་སྦྱིན་བྱེད་སྦྱིན་ཡུལ་གྱི༔ འཁོར་གསུམ་དམིགས་པ་ཐམས་ཅད་ཀུན༔ ཆོས་ཉིད་དེ་བཞིན་ཉིད་ཀྱི་ངང་༔ མ་བཅོས་མཉམ་པ་ཆེན་པོར་ཨཱ༔ ཡི་དམ་གང་ལ་བརྟེན་ཀྱང་རུང་༔ གྲངས་ཁ་ཁྱེར་ཅིག་རྐྱང་བས་བསགས༔ ཧྱ་གྷ་ཝའི་དགོངས་པ་ལ༔ བཀའ་བསྒྲོ་ག་གཱ་ཨ་བྷྱེའི་བགྱིས༔ དགེ་བས་ཉམ་ཐག་འགྲོ་ཀུན་གྱི༔ དུས་ཀྱི་ཕོ་ཉ་བཟློག་གྱུར་ཅིག༔ དགེའོ། །དགེའོ། །དགེའོ། །སརྦ་མངྒ་ལཾ། །ཆོས་རྣམས་གཟུགས་བརྙན་ལྟ་བུ་སྟེ། །དག་ཅིང་གསལ་ལ་རྙོག་པ་མེད། །གཟུང་དུ་མེད་ཅིང་བརྗོད་དུ་མེད། །རྒྱུད་དང་ལས་ལ་ཀུན་ཏུ་འབྱུང་། །ངོ་བོ་ཉིད་མེད་གནས་མེད་པ། །དེ་ལྟར་ཆོས་རྣམས་ཤེས་ཀྱིས་ལ། །སེམས་ཅན་དོན་ནི་མཉམ་མེད་བྱོས། །འོན་ཀྱང་སྐྱོབས་པའི་སྲས་སུ་སྐྱེ། །དེ་ལྟར་ཆོས་དང་ཟང་ཟིང་གི །སྦྱིན་པས་ཚོགས་ཆེན་གཉིས་རྫོགས་ཏེ། །སྲིད་པར་རྒྱུན་དུ་འཁོར་བ་རྣམས། །ཐམས་ཅད་མངོན་པར་སངས་རྒྱས་ཤོག །

ཛཾ་ལྷའི་ཆུ་སྦྱིན་བསྡུས་པ།

ཛཾ་ལྷའི་ཆུ་སྦྱིན་བསྡུས་པ་ནི། རང་ཉིད་བཅོམ་ལྡན་སྤྱན་རས་གཟིགས། །དཀར་གསལ་བསྒྲང་ཕྲེང་པར་དཀར་འཛིན། །མདུན་གྱི་ནམ་མཁར་ཛམ་བྷ་ལ། །དབུ་དཀར་སྟོད་སེར་སྨད་སྔོ་ནག །ཕྱག་དམར་ཞབས་ལྗང་ཞི་མ་ཁྲོ། །རཏྣ་རྒྱན་རྫོགས་སྐུའི་དབྱིངས་སུ། །དུས་གསུམ་སངས་རྒྱས་སྲས་བཅས་གསལ། །ཨོཾ་མ་ཎི་པདྨེ་ཧཱུྃ། ཛཾ་བྷ་ལ་ཛ་ལེནྟྲ་ཡེ་སྭཱ་ཧཱ། ཅི་ནུས་བཟླ། མཐའ་བསྐོར་ཆོས་སྐྱོང་སྲུང་མ་དང་། །འོག་འཁོར་ས་གཞིའི་ངོས་ལ་ནི། །བགེགས་རིགས་ལན་ཆགས་ཤ་མཁོན་བདག །ཡི་དྭགས་རིགས་དྲུག་བར་དོའི་མགྲོན། །སྟོན་མོར་ཁྲོམ་འཚོགས་བཞིན་དུ་གསལ། །རང་རང་གནས་ནས་མགྲོན་ཐབས་སུ། །སྐད་ཅིག་ཉིད་ལ་ལྷག་ནས་སུ། །གཉིས་མེད་རོ་གཅིག་འདྲེས་པར་བསམ། །ཛྙཱ་ན་ལོ་ཀ་ས་པཱ་རི་ཝ་ར་ཛ་ཛཿསྟྭཾ། ནམ་མཁའ་མཛོད་ཨ་ཀ་རོའི་འདོད་ཡོན་ཡེ་ཤེས་བདུད་རྩིར་བརླབས། ཨོཾ། ཟག་མེད་བདུད་རྩིའི་གཏོར་སྐྱེམས་འདི། །སྲིད་༼ སྲི་དཔྱད ༽ཞུའི་མགྲོན་རིགས་ཐམས་ཅད་དང་། ཁྱད་པར་གནོད་སྦྱིན་ཛཾ་བྷ་ལར། །མཆོད་པའི་ཡུལ་དུ་དམིགས་ཏེ་འབུལ། །བདག་ཅག་ཚོགས་རྫོགས་སྒྲིབ་དག་ནས། །མཆོག་ཐུན་དངོས་གྲུབ་སྩལ་དུ་གསོལ། །རཏྣ་ས་མུ་དྲ་སརྦ་པཱུ་ཙ་ཁ་ཧི། སྐུ་ཡི་ལྟོ་བར་རྨའི་གཟུགས་ལས། །བྱིན་རླབས་འོད་ཟེར་འདོད་དགུའི་སྤྲིན། །མགོན་པོ་ཡོན་ཏན་མགྲོན་རྣམས་ཀྱི། །ཐུགས་དམ་དགྱེས་པར་བསྐང་བ་ཡི། །མཆོད་པའི་རྫས་སུ་ཁྱབ་པར་འབུལ། །ཐིམ་པའི་ཚུལ་ཀྱིས་བཞེས་ནས་ཀྱང་། །བྱང་ཆུབ་སྒྲུབ་པའི་འགལ་རྐྱེན་སེལ། །མཐུན་རྐྱེན་བསྒྲུབ་པར་དམ་བླང་བསམ། །སླར་ཡང་བདུད་རྩིའི་རྒྱུན་བབས་པས། །རིགས་དྲུག་འདོད་པ་ཚིམ་པར་བྱས། ཁྱད་པར་ཡི་དྭགས་མགྲོན་རྣམས་ལ། །རོ་བརྒྱ་བདུད་རྩིའི་འོ་རྒྱུན་གྱིས། །ཟད་མི་ཤེས་པའི་གཏེར་ཆེན་པོར། །རྡོལ་བས་ངོམ་ཞིང་ཚིམ་བྱས་ཏེ། །བཀྲེས་སྐོམ་དབུལ་ཕོངས་སྡུག་བསྔལ་སེལ། །སོར་རྟོགས་ཡེ་ཤེས་རང་ངོ་འཕྲོད། །ཕྱམ་གཅིག་བདེ་ཆེན་ཞིང་དུ་བཀོད། །འཁྲུལ་སྣང་རང་ངོར་སངས་པར་གྱུར། །མཚན་བཞི་དང་སཾ་བྷ་ར་ཅི་མང་གིས་བསྡོས་ལ། ལྷག་མགྲོན་ཉམ་ཐག་ཐམས་ཅད་ཀྱང་། །ཚིམ་ནས་བདེ་བའི་དཔལ་ཐོབ་བསམ། །སཾ་བྷ་ར་ཅི་མང་བརྗོད་ཆོས་སྦྱིན་བྱ་ཞིང་དེ་ཡི་མཐར། མཆོད་སྦྱིན་དངོས་ཡུལ་ཐམས་ཅད་ཀུན། །མི་དམིགས་ཆོས་ཀྱི་དབྱིངས་སུ་ཨཱ༔ དེ་མཐར་དགེ་བ་རྫོགས་བྱང་བསྔོ། །རྣལ་འབྱོར་ཁ་ལོའི་གསུང་བསྐུལ་བཞིན། །མ་ལྡོག་ག་གཱ་ཨ་བྷྱེས་རྩམས། །དགེ་བས་ཚོགས་རྫོགས་སྒྲིབ་དག་ནས། །དམ་པ་སྐུ་གཉིས་ཐོབ་བར་ཤོག །དགེའོ། །

གཏོར་མའི་གྲངས་བསོགས་བསྡུས་པ།

གཏོར་མའི་གྲངས་བསོགས་བསྡུས་པ་ནི༔ རཾ་ཡཾ་ཁཾ༔ ཨོཾ་ཨཱཿཧཱུྃ༔ ཁཾ༔ ཟག་མེད་བདུད་བརྩིའི་སྤྲིན་ཕུང་འདི༔ ཛམྦྷ་ལ་ཡི་ཐུགས་བསྐྱེད་ཀྱིས༔ འཁོར་འདས་མགྲོན་རིགས་མ་ལུས་པའི༔ ཐུགས་དམ་དགྱེས་པར་སྐོངས་གྱུར་ཅིག༔ ཁྱད་པར་ཡི་དྭགས་སྡེ་ཚན་བཞིའི༔ ཟས་སྐོམ་སྒྲིབ་པ་ཀུན་དག་ནས༔ སྦྱིན་པའི་ལོངས་སྤྱོད་མི་ཟད་གཏེར༔ ནམ་མཁའ་མཛོད་ལ་དབང་བསྒྱུར་ཤོག༔ མཐར་ཐུག་རྒྱུད་ལྔའི་འགྲོ་བ་ཀུན༔ རྒྱུ་འབྲས་དབུལ་བ་ཀུན་སེལ་ཞིང་༔ ཨརྱ་ཛཾ་ལྷའི་གོ་འཕང་མཆོག༔ མངོན་གྱུར་གདོད་མའི་སར་ཕྱིན་ཤོག༔ མཚན་བཞི༔ དེ་བཞིན་གཤེགས་པ་རིན་ཆེན་མང་ལ་༴ སོགས་དང་སཾ་བྷ་ར་སོགས། ཆོས་ཀྱི་སྦྱིན་པ་དམ་པ་བྱ༔ དམིགས་པ་མེད་པས་རྒྱས་གདབས༔ དཔལ་སྤྲུལ་པས་སོ། །དགེའོ། །དགེའོ། །དགེའོ། །

གསུར་ཆུ་སྦྱིན་གང་ལའང་འདིས་བསྔོ།

གསུར་ཆུ་སྦྱིན་གང་ལའང་འདིས་བསྔོའོ༔ ཨོཾ་ཨཱཿཧཱུྃ༔ རང་ཉིད་སྤྱན་རས་གཟིགས་དབང་གི༔ ༼ ཡང་ན་གསུར་བྱེད་ན། ཐུགས་ཀའི་འོད་ཀྱི་རེག་པ་ཡི༔ གསུར་མཆོད་འདོད་ཡོན་རྒྱ་མཚོའི་རྡུལ༔ དཀར་དམར་མངར་གསུམ་སོགས། ༽ སྐྱབས་སྦྱིན་ཕྱག་རྒྱའི་མཛུབ་རྩེ་ལས༔ བདུད་རྩི་འོ་མའི་རྒྱུན་བབས་པས༔ སྦུ་རླངས་ཟིལ་མ་མཆོད་པའི་སྤྲིན༔ དཀར་དམར་མངར་གསུམ་རོ་དྲུག་ཟས༔ འདོད་ཡོན་ལྷ་མོའི་རྣམ་པ་ལ༔ ཟག་མེད་ཡེ་ཤེས་བདུད་རྩི་དངོས༔ ཡི་གེ་གསུམ་གྱི་འོད་དུ་ཐིམ༔ རྩིག་མ་དག་བྱེད་རྒྱུན་བཟང་པོ༔ ནམ་མཁའ་མཛོད་ཀྱི་གཏེར་དུ་གྱུར༔ ཐུགས་ཀའི་འོད་ཀྱིས་མགྲོན་བཞིའི་ཚོགས༔ སྐད་ཅིག་ཉིད་ལ་སྤྱན་དྲངས་གྱུར༔ རྩ་བའི་བླ་མ་ལ་སོགས་པའི༔ དཀོན་མཆོག་མཆོད་པས་མཉེས་གྱུར་ཅིག༔ ཛཾ་བྷ་ལ་ཡི་དབུར་བཞུགས་ཀྱི༔ དམ་ཚིག་ཅན་གྱི་ཐུགས་དམ་བསྐང་༔ དཀོར་དང་སྲོག་དང་ཞོ་ཤས་བསྐྱང་༔ ལན་ཆགས་བགེགས་རིགས་ཐམས་ཅད་དང་༔ ཡི་དྭགས་རྣམས་ཀྱི་གཙོ་བྱས་པའི༔ རིགས་དྲུག་འདོད་པ་ཚིམ་གྱུར་ཅིག༔ མི་དབང་མི་སླེབ་སྒྲིབ་པ་ཅན༔ ལྷག་མའི་མགྲོན་གྱི་ཐུགས་དམ་བསྐང་༔ སོ་སོའི་དགྱེས་པ་ཀུན་ལྡན་གྱིས༔ ཚོགས་རྫོགས་སྒྲིབ་པ་ཡོངས་དག་ནས༔ བདག་དང་སེམས་ཅན་ཐམས་ཅད་ཀུན༔ རྣམ་མཁྱེན་སངས་རྒྱས་ཐོབ་པ་དང་༔ ལན་ཆགས་ཤ་མཁོན་བུ་ལོན་སོད༔ སྡུག་བསྔལ་ཀུན་བྲལ་བདེ་ལྡན་ཤོག༔ སཾ་བྷ་ར་དང་ཆུ་སྦྱིན་སྔགས་གང་འོས་ཀྱིས་བསྔོ༔ མཐར་ནི་འཁོར་གསུམ་དངོས་པོའི་ཆོས༔ མི་དམིགས་མཉམ་པ་ཉིད་ཕྱམ་གདལ༔ ཞེས་པ་འདི་ཡང་ཀློང་ཆེན་ཡངས་བས་བསྐུལ་ངོར་ག་གཱས་སོ། །

གསུར་མཆོད་བདུད་རྩིའི་སྤྲིན་ཆེན།

གསུར་མཆོད་བདུད་རྩིའི་སྤྲིན་ཆེན་བཞུགས་སོ༔

ན་མོ་གུ་རུ་པདྨ་ཀ་རཱ་ཡེ༔ ཞེས་མདུན་བསུས་ནས་བསུར་རྫས་གཙང་བུ་སྣ་ཚོགས་བཤམས་ལ༔ རཾ་ཡཾ་ཁཾ༔ གིས་སྦྱངས་སྤེལ་བསྒྱུར་ལ༔ ཧོ༔ ཟག་མེད་ཡེ་ཤེས་བདུད་རྩི་དངོས༔ རྣམ་པ་གང་ལ་གང་འདོད་པའི༔ གནས་ཁང་ཡོ་བྱད་མལ་ཆ་གོས༔ གསོས་སྨན་དཀོར་ནོར་ཟས་སྐོམ་བཅས༔ ཡས་མགྲོན་རྣམས་ལ་མཆོད་པར་འབུལ༔ ཁྱད་པར་ས་ཕྱོགས་འདིར་གནས་པའི༔ གཞི་བདག་སྡེ་བརྒྱད་ལན་ཆགས་མགྲོན༔ ཀུན་ལ་དགྱེས་པ་བསྐྱེད་ཕྱིར་འབུལ༔ ནད་ཡམས་དལ་གྱི་བདག་པོ་སོགས༔ སྲི་དང་ནོར་ལ་བར་གཅོད་པ༔ དགའ་ཁྲོ་ཆགས་འཇུངས་མཐུན་བྱས་ནས༔ རྩ་རུ་སླེབ་དང་རྒོལ་བ་དང་༔ ནད་གཙེར་གཞན་ལ་བརྒོལ་བས་སུ༔ གནོད་བྱེད་ཆུང་གསུམ་ལ་ཐལ་བའི༔ རིགས་ལ་ཟག་མེད་མཆོད་འབུལ་བས༔ ཚིམ་ནས་བདེ་བའི་དཔལ་ཐོབ་ཏེ༔ ཕན་ཚུན་བྱམས་སེམས་ལྡན་པར་ཤོག༔ ཐམས་ཅད་ནམ་མཁའི་མཛོད་༴ སོགས། སྦྱིན་པ་རྒྱ་ཆེན་གྱུར་༴ སོགས། རང་རང་ལས་བྱུང་ནད་བསྡུས་ཏེ༔ གདོན་ཀྱང་དེངས་ནས་ཕྱིར་མ་ལྡོག༔ བཀྲ་ཤིས་ཕུན་སུམ་ཚོགས་པར་ཤོག༔ སངས་རྒྱས་ཕུན་ཚོགས་བདེན་པའི་མཐུས༔ སྐྱེ་མེད་བསམ་བྲལ་ཆེན་པོའི་ངང་༔ བདག་བཟུང་ལྷ་འདྲེ་རུ་ཏྲ་རྣམས༔ གཉིས་མེད་མཉམ་གྲོལ་རྫོགས་སངས་རྒྱས༔ རང་བྱུང་ཡེ་ཤེས་འབྱམས་སུ་ཀླས༔ བདག་གི་བསམ་པའི་སྟོབས་དག་༴ སོགས། ལན་ཆགས་མགྲོན་ལ་མཆོད་པ་དང་༔ སོགས། འབྱུང་གྱུར་ཅིག༔ མ་ཎི་བརྒྱ་རེ་འདོན༔ དེ་ཡིས་གནས་སྐབས་དོན་ཀུན་འགྲུབ༔ མཐར་ཐུག་ཚོགས་རྫོགས་ལན་ཆགས་བྱང་༔ འབྲས་བུ་སྐུ་གཉིས་ཐོབ་པ་ཡི༔ ཉེ་རྒྱུར་འགྱུར་མེད་ས་མ་ཡཱ༔ ཅེས་ཀྱང་ཐར་གཡང་ལ་ཕན་སླད་དུ་ག་གཱ་བས་སོ། །

ཤིག་གསུར་སྲིད་པ་སྒོ་འགེགས།

ཡེ་ཤེས་སྒྱུ་འཕྲུལ་རོལ་བ་ལས༔ ཤིག་གསུར་སྲིད་པ་སྒོ་འགེགས་བཞུགས་སོ༔

རང་གི་ལུས་ཀྱི་དྲི་མ་དང་བག་ཕྱེ་བསྲེས་ལ༔ ཨོཾ་སརྦ་ཧ་ཧ་ཧྲི་ནུཉྩ༔ ཞེས་མང་པོ་བརྗོད་ལ༔ ཧཱུྃ༔ བསྐལ་བ་སྲིད་པའི་དང་པོ་ལ༔ སྲིད་བའི་ཕ་མ་ཞ་ལོང་གཉིས༔ དེ་ལ་བུ་ཚ་བརྒྱད་ཁྲི་ཡོད༔ མིང་དུ་མནར་སྤྱོད་འཛིན་པ་ཟེར༔ ཡན་ལག་བ་སྤུ་བརྒྱད་ཁྲི་བསྐྱེད༔ དེ་ལས་འབྱུང་བ་རླན་གཤེར་རྐྱེན༔ ཕ་མ་ཡིད་མེད་བྱོལ་ནས་ནི༔ ལུས་སུ་ཡི་དྭགས་ཉེར་འཚེའི་གཟུགས༔ ལུས་བཅུད་དྭངས་མ་ཁྲག་ལ་བསྐམས༔ ཉི་མ་བདུན་ནི་འཇིགས་པས་བསྐལ༔ མི་སྲིད་སྲིད་པ་རབ་བུ་ཁ༔ ཁྱོད་ནི་ངན་སོང་གསུམ་ལ་གཏོགས༔ དང་པོ་བརྫུས་སྐྱེས་དམྱལ་བ་བ༔ བར་དུ་སྒོང་སྐྱེས་དུད་འགྲོའི་གཟུགས༔ བཀྲེས་སྐོམ་སྡུག་བསྔལ་ཡི་དྭགས་དངོས༔ མེ་ཉིའི་གདུང་ནས་ཚ་དམྱལ་མྱོང་༔ གྲང་བས་ཉམ་ཐག་ཆུ་བུར་ཅན༔ བརྡུང་བརྡེག་འཐག་གཅོད་བསྡུས་འཇོམས་པས༔ དེ་ལ་དྲི་ཟ་རྣམ་ཤེས་འབུམ༔ གང་ནས་ལྷན་ཅིག་ལས་ཀྱི་འཕོ༔ ལྷན་གཅིག་དྲོད་གཤེར་མངལ་ལ་འདུས༔ ཀུན་ཀྱང་བཟའ་བཏུང་སྲེད་པས་བསྡུས༔ མི་ཕྱུག་རྟ་ནོར་ར་ལུག་ལ༔ འཁྲི་བའི་སེམས་ཅན་རིགས་བྱེད་ནི༔ དེ་དང་དེ་དག་ཐམས་ཅད་ལ༔ ཟག་མེད་ཡེ་ཤེས་བདུད་རྩི་ལས༔ གསོན་ཁྲག་དམར་པོའི་རྣམ་པ་ཅན༔ བཏུང་བ་ཙམ་གྱིས་ཡིད་ཚིམ་ཞིང་༔ བྱང་ཆུབ་སེམས་མཆོག་རྒྱུད་ལ་འདེབས༔ བྲམ་ཟེ་སྐྱེ་བདུན་ཤ་ཁྲག་འབུལ༔ ཚིམ་ནས་ངན་སོང་གསུམ་པོ་རུ༔ དུས་གཅིག་སྐྱེ་བའི་སྒོ་ཆོད་དེ༔ སྐུ་གསུམ་རྒྱལ་བའི་ཞིང་ཁམས་སུ༔ དུས་གསུམ་སངས་རྒྱས་རང་ཞལ་མཐོང་༔ གཏན་བདེ་འགྱུར་མེད་ཐོབ་པར་ཤོག༔ སངས་རྒྱས་རྣམས་ཀྱི་ཐུགས་རྗེ་དང་༔ དམ་པ་ཆོས་ཀྱི་བདེན་སྟོབས་དང་༔ དགེ་འདུན་རྒྱ་མཚོའི་བྱིན་རླབས་ཀྱིས༔ བསྔོས་པ་བཞིན་དུ་ཐོབ་པར་ཤོག༔ ཐོབ་ནས་ཚིམ་པས་མཐར་ཐུག་གི༔ ཏིང་འཛིན་རོལ་མོ་མཛེས་འབར་བས༔ གཟུངས་སྤྲིན་སྟོབས་ཀྱིས་ཕུན་སུམ་ཚོགས༔ ལྷུན་གྲུབ་སྙིང་རྗེའི་གཞན་བརྟེན་པའི༔ སྒྲིབ་གསུམ་རྒྱུ་འབྲས་དང་བྲལ་ཤོག༔ ཨོཾ་ཨ་ཙ་ཁ་ལེ་བུ་ཡ་ཁྲི་ཁྲི་བྷ་ར་སྭཱ་ཧཱ༔ ཞེས་བརྗོད་བསྔོས་པས་རང་ཚིམ་ནས༔ སྲིན་བུ་ཕྱི་ནང་རྒྱུ་བ་ཆོད༔ ཐབས་འདི་ག་གཱ་ཨ་བྷྱེ་ཡིས༔ ཡོན་ཏན་ཀུན་ལྡན་པས་བསྐུལ་ངོར༔ ནམ་མཁའ་མཛོད་ལས་རང་གྲོལ་བ༔ མིང་ལ་སྲིད་པ་སྒོ་འགེགས་ཟེར༔ དགེ་ཞིང་བཀྲ་ཤིས་པར་གྱུར་ཅིག༔ སརྦ་མངྒ་ལཾ། །

བསེ་རག་ཕྲན་བུ་བསལ་བའི་བང་མཛོད་གཡང་ལྷའི་དངོས་གྲུབ།

ཡེ་ཤེས་སྒྱུ་འཕྲུལ་དྲྭ་བ་ལས༔ བསེ་རག་ཕྲན་བུ་བསལ་བའི་བང་མཛོད་གཡང་ལྷའི་དངོས་གྲུབ་ཅེས་བྱ་བ་བཞུགས་སོ༔

ན་མོ་གུ་རུ་པདྨ་ཀ་རཱ་ཡ༔ ཨྠིཔདྨ་ཧོ༔ རབ་ཀྱིས་བསང་གསུང་བྱིན་རླབས་ལས༔ རྡོ་རྗེ་ཧེ་རུ་ཀ༔ དང་པོ་ཐོ་ལའོ༔ གཉིས་པ་གསུར་བསྔོ་ནི༔ རཾ་ཡཾ་ཁཾ༔ གིས་སྟོང་བར་སྦྱངས༔ སཾ་བྷ་ར་ཡིས་བསྔོ་རྒྱུ་བྱིན་གྱི་རླབས་ནས་མང་པོར་སྤེལ་ལ༔ ཀྱཻ༔ སྔོན་ཆད་སེར་སྣ་བྱས་པ་ལས༔ དབང་འབྲས་ཡུལ་དུ་སྨིན་པ་ན༔ ས་གཞི་ཕུང་ཞིང་ཉམས་མི་དགའ༔ བསེ་རག་བཤིག་དྲལ་གཟུགས་སུ་སྨིན༔ དེ་ཡི་ལས་སུ་བཟློག་པའི་ཕྱིར༔ སྦྱིན་པས་བསོད་ནམས་ཚོགས་རྫོགས་པ༔ ཟག་མེད་ཏིང་འཛིན་མཆོད་སྤྲིན་ནི༔ མཆོད་སྦྱིན་མགྲོན་ལ་བསྐང་རྫས་སུ༔ མཐུན་ཞིང་འཚམས་པ་ཉིད་དུའོ༔ བསྔོས་པ་བཞིན་དུ་ཐོབ་གྱུར་ཅིག༔ ཐོབ་ནས་གཏན་བདེ་འགྱུར་མེད་ཤོག༔ བྱང་ཆུབ་སེམས་ནི་མཉམ་ཉིད་དུ༔ བདེན་གཉིས་ཟུང་འཇུག་ཚུལ་གྱིས་བསྐྱེད༔ སྟོབས་འདིའི་རང་བྱུང་རང་ངོ་འཕྲོད༔ བདག་གི་ཕྲིན་ལས་མྱུར་གསང་འཕྲུལ༔ ད་ལྟ་ཉིད་དུ་འབར་གྱུར་ཅིག༔ ཆོས་དབྱིངས་བདེ་ཆེན་མངོན་གྱུར་ཤོག༔ ཅེས་རྒྱུན་དུ་བསྔོས་པས་ཐམས་ཅད་འཁོར་བ་དོང་ནས་སྤྲུགས་པར་འགྱུར་རོ༔ བླ་མ་ཨཀྵ་རའི་ངོར་ག་གཱ་བས་སོ། །སྣང་ལ་རང་བཞིན་མེད་པའི་དགེ་རྩ་འདི། །སྣང་ལ་རང་བཞིན་མེད་པའི་སེམས་ཅན་ལ། །སྣང་ལ་རང་བཞིན་མེད་བའི་རྣལ་འབྱོར་ངས། །སྣང་ལ་རང་བཞིན་མེད་པའི་ངང་ནས་བསྔོ། །སྣང་ལ་རང་བཞིན་མེད་པའི་སྐུ་གཉིས་ཀྱི། །སྣང་ལ་རང་བཞིན་མེད་པའི་འབྲས་ཐོབ་ཤོག །ཅེས་ཀྱང་ག་གཱས་སོ། །དགེའོ། །དགེའོ། །དགེའོ།