cover

གསུང་འབུམ་པོད་བརྒྱད་པ།

སྔ་འགྱུར་རྒྱལ་བ་ཕུག་ཁང་པའི་དཔེ་ཚོགས།

དཔལ་སྤྲུལ་ནམ་མཁའ་འཇིགས་མེད།

Nitartha international

མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །
—རྫོགས་ཆེན་དཔོན་སློབ།

བར་དོ་དྲུག་གི་ཁྲིད་ཡིག་ལས་ཉོན་ཆུ་བོ་རྒྱུན་གཅོད།

ཡེ་ཤེས་སྒྱུ་འཕྲུལ་དྲྭ་བ་ལས༔ བར་དོ་དྲུག་གི་ཁྲིད་ཡིག་ལས་ཉོན་ཆུ་བོ་རྒྱུན་གཅོད་ཅེས་བྱ་བ་བཞུགས་སོ༔

ན་མོ་གུ་རུ་པདྨ་སམ་བྷ་ཝེ༔ ཨོ་རྒྱན་མཁན་པོ་པདྨ་ཀཱ་ར་ངས༔ མ་འོངས་སྙིགས་མ་ལྔ་བཅུ་ང་དྲུག་གི༔ སྐྱེ་དགུ་མི་ཡི་ཚེ་ཚད་མཐར་ཕྱིན་དུས༔ ཕྲིན་ལས་སྦས་པའི་རྣལ་འབྱོར་སྐལ་པ་རུ༔ ལས་ངན་༼ ཉོན་དཔྱད། ༽ཆུ་བོ་རྒྱུན་གཅོད་འདི་ཉིད་ནི༔རིགས་དྲུག་སྐྱེ་གནས་བཞི་བོ་དབུགས་དབྱུང་མཆོག༔ སྐྱེ་གཉིས་མི་འཐོག་སངས་རྒྱས་ལེགས་བརྙེས་ཕྱིར༔ བསྟན་པའི་བཙས་སུ་བཞག་གོ་དགའ་སྟོན་མཛོད༔ དེ་ཡང་རྒྱུད་དང་ལུང་དང་མན་ངག་གསུམ༔ རྒྱ་ཆེ་གྲངས་མང་གཏིང་ཟབ་རྟོགས་དཀའ་ཞིང་༔ གཅུས་དཀྲུགས་གབ་པའི་ཁུང་སྙིང་ལེགས་བསྡེབ་སྟེ༔ ཤིན་ཏུ་གསལ་ཞིང་བདུད་རྩི་མ་རྙིང་བ༔ དཔའ་བོ་སྟོང་གི་གྲུབ་པ་ཐོབ་པ་འདི༔ དགོས་ཆེན་དོན་གྱི་ཁྱད་པར་བླ་ན་མེད༔ སངས་རྒྱས་ཀུན་གྱི་མཁྱེན་བརྩེ་ནུས་པའི་མཐུ༔ གཅིག་བསྡུས་པདྨ་ང་ཡི་ཁྱད་ཆོས་ཡིན༔ གཞན་གྱི་ལྟར་ན་བསྒྲིགས་ཆོག་འགའ་ཞིག་པ༔ བཀའ་དང་མཐུན་ཡང་སོ་སྐྱེ་སྙན་ཚིག་འཆེལ༔ བྱིན་རླབས་ཚན་ཁ་མེད་དང་རྒྱལ་བའི་བཀའ༔ དམ་ཉམས་འགའ་ཡི་སྨེ་བོར་བྱས་པ་ཡི༔ སྔར་བྱོན་དྲང་སྲོང་གཏེར་ཆེན་བརྒྱ་རྩ་དང་༔ ཕྲན་གཏེར་སྟོང་དང་ཡང་གཏེར་བསམ་ལས་འདས༔ བྱིན་རླབས་བཀའ་དང་དག་སྣང་ཉེ་བརྒྱུད་དང་༔ གཞན་ཡང་གློ་བུར་སྐུལ་པ་དགེ་ལ་བབས༔ རྟོག་གེ་ངན་པས་བདུད་དུ་བལྟ་བ་སྟེ༔ སངས་རྒྱས་ཕྲིན་ལས་དུས་ལས་མི་ཡོལ་བར༔ བཟློས་བཞིན་ཕྲིན་ལས་རྒྱུན་ཆད་འདོད་པ་དང་༔ བློན་པོའི་རང་རྟགས་སྟོན་པར་ཐེ་ཚོམ་བྲལ༔ ས་པཎ་ལ་སོགས་མཁས་འགའ་ཞིག་གིས་ནི༔ གཏེར་ནས་བྱུང་བའི་གླེགས་བམ་སྨད་པ་ཡང་༔ བརྒྱུད་པ་རྡོ་རྗེ་འཆང་ལ་འདེད་མིན་པས༔ རྒྱས་པ་འབུམ་དམ་ཙུནྡྷ་མ་ཎི་དང་༔ མདོ་སྔགས་ཕལ་ཆེར་གཏེར་ནས་བྱུང་བ་ཀུན༔ དྲི་མ་ཅན་དུ་བྱས་པ་ག་ལ་ཡིན༔ དེ་དག་སྒེར་དུ་མུན་སྤྲུལ་འགའ་ཞིག་ཏུ༔ དགོངས་ནས་ཕུར་བའི་རྩ་དུམ་གཏེར་དུ་བཞེས༔ འདི་ལ་དཔེ་ནི་གཞལ་དུ་མེད་པ་སྟེ༔ རྒྱ་ཆེན་ནམ་མཁའ་ཁབ་མིག་འཛུད་པའི་བློས༔ འཇམ་དབྱངས་པདྨའི་དགོངས་པ་མཐར་ཐུག་མེད༔ གཟུ་བོར་གནས་ན་དམ་ཆོས་མི་སྤོངས་འཚལ༔ ཁྱད་པར་བར་དོ་དྲུག་གིས་བསྡུས་པའི་འགྲོ༔ ཡེ་ཤེས་དྲུག་གི་ཀུན་ནས་ཁྱབ་བདལ་བས༔ གདམས་ངག་དྲུག་གི་ཆུ་དྲུག་རྒྱུན་བཟང་པོའི༔ དག་བྱེད་འདི་ནི་སྐབས་སུ་བབས་པའོ༔ དག་ནས་ཐོབ་པ་རང་གནས་འཕྲལ་གསལ་བ༔ ཆོས་རྣམས་ཀུན་གྱི་འབྲས་བུ་མཐར་ཐུག་ནི༔ སྐུ་དང་ཡེ་ཤེས་མཛད་པ་རྨད་དུ་བྱུང་༔ འདི་ལས་ཐོབ་པ་རྡོ་རྗེ་སྙིང་པོ་རྒྱལ༔ ས་མ་ཡཱ༔ དེ་ལ་གནས་ཕུན་སུམ་ཚོགས་པ་སྤྲོས་བྲལ་དབྱིངས་ཀྱི་བདེ་ཆེན་དུ༔ སྟོན་པ་ཕུན་སུམ་ཚོགས་པ་རིག་སྟོང་པདྨ་འབྱུང་གནས་ཀྱིས༔ འཁོར་ཕུན་སུམ་ཚོགས་པ་རིག་རྩལ་རོལ་པ་རྒྱ་མཚོ་ལ༔ ཆོས་ཕུན་སུམ་ཚོགས་པ་ཡེ་ཤེས་སྣང་བ་གསུམ་གྱི་དགོངས་པ་འཕོས་ནས༔ དུས་ཕུན་སུམ་ཚོགས་པ་མཉམ་ཉིད་རྒྱུད་ཆད་པ་ལ༔ ཕྱི་རྒྱ་རལ་བའི་དབྱིངས་སུ་འཕོས་འཕགས་ཀྱི་ཆེད་དུ་བརྗོད་པ་རྟོན་པ་ཕྱིན་ཅི་མ་ལོག་པར་ཀུན་ལ་ཕན་པས་བརྡའ་སྡེབས་ཀྱིས་བཀྲོལ་བའི་སྐལ་ལྡན་རིག་པ་དོན་བརྒྱུད་ཁྱད་པར་ཅན་ལས་འཕོས་པས་སྙན་བརྒྱུད་དམར་འབྱིན་ཁྱད་པར་བའི་ཆ་རྐྱེན་གྱི་ཡི་གེ་ནི༔ འབྱུང་བས་ཁུང་དག་པའི་ད་ལྟ་བ་ཞིག་གོ༔ མན་ངག་འདི་སྔ་ན་འགྲོ་བ་རྒྱུད་སྦྱངས་དབང་གིས་སྨིན་པར་བྱ་དགོས་པས་དེ་དག་གི་རིམ་པ་སྤྱི་ལྟར་གྲུབ་པ་དང་༔ ཐོག་མར་སྦྱངས་གཞི་བར་དོ་དྲུག་གི་རྣམ་གྲངས་ཀྱི་གནས་སྣང་༔ སྦྱོང་བྱེད་གདམས་ངག་དྲུག་ག་ཁྱད་པར༔ སྦྱངས་འབྲས་ཡེ་ཤེས་དྲུག་གི་རྒྱན་སྣང་སད་ཚུལ་དེ་གསུམ་གྱིས་བསྡུས་པར་ཤེས་པར་བྱེད་དགོས་སོ༔

དང་པོ་ལ་སྣང་ཚུལ་དང་༔ གནས་ཚུལ༔ སེམས་ཅན་འཁྲུལ་ཚུལ༔ རྣལ་འབྱོར་གྲོལ་ཚུལ་བཞི་ལས༔ དང་པོ་བར་དོ་དྲུག་གི་སྣང་ཚུལ་ལ་བར་དོའི་ངོ་བོ་དང་༔ ངེས་ཚིག༔ དབྱེ་བ༔ ས་མཚམས༔ གྲངས་ངེས༔ གོ་རིམ༔ འཆར་ཚུལ་དང་བདུན་ལས༔

དང་པོ་ནི༔ བར་དོ་ཐམས་ཅད་ཀྱི་ངོ་བོ་ནི་རྣམ་པ་གཉིས་སུ་འདུ་སྟེ༔ ཆོས་ཉིད་རྣམ་དག་གི་སྣང་བ་དག་པ་ཡེ་ཤེས་ཀྱི་བར་དོ་གཞི་སྣང་གཟུགས་སྐུ་གཉིས་སུ་སྟོན་པའི་མཛད་པ་དང་༔ མ་དག་འཁྲུལ་པའི་བར་དོ་གཞི་སེམས་ཅན་དང་༔ མ་དག་དག་པའི་བར་དོ་ལམ་གདུལ་བྱའི་སྣང་བའོ༔ དེ་ཡང་གཞི་སྣང་དག་པའི་ཆ་ལ་བདག་ཏུ་བཟུང་བས་ཐག་ཁྲ་སྦྲུལ་ལ་འཁྲུལ་བ་ལྟར་དུ་དག་པའི་བར་དོ་ཉིད་འཁྲུལ་རྐྱེན་དུ་སོང་བ་འདི་འཁོར་འདས་ཀྱི་གྱེས་མདོ༔ གྲོལ་འཁྲུལ་རིག་མ་རིག་གི་ཁྱད་པར་འབྱེད་པའི་གནམ་ཐིག༔ གཞི་ལ་མ་རིག་མེད་ཀྱང་ལམ་ནས་འབྱུང་བས་འཐད་པ༔ འཁྲུལ་པ་ཟད་པ་ཡོད་པའི་ངེས་འབྱེད༔ རྒྱུད་སྡེ་ཐམས་ཅད་ཀྱི་དག་ལྡོག་ལ་དཔྱིས་སུ་འབྱིན་པས་རྒྱུད་འགྲོལ་གྱི་ལྡེ་མིག༔ སྣང་བ་སེམས་ཀྱི་འཁྲུལ་སྣང་དུ་ངེས་པའི་ཚད་མ་ལ་སོགས་པར་གནས་ཤིང་མདོར་ན་བར་དོ་ཐམས་ཅད་ཀྱི་ངོ་བོ་ནི་གཞི་སྣང་ཡིན་ལ་དེའི་ངོ་བོ་ཉིད་ནི་བྱང་ཆུབ་ཀྱི་སེམས་ཀ་དག་ཆེན་པོ་ལས་མ་ཉམས་པ་སྟེ་ལྷག་པའི་བདེན་གཉིས་ཀྱི་གནད་ཀྱང་འདི་ནས་འཛིན་ནོ༔

གཉིས་པ་བར་དོའི་ངེས་ཚིག་ལ༔ སྤྱིར་དབུས་སུ་ཞུགས་པ་ལ་བར་དོའི་སྒྲ་ཞུགས་ལ༔ ནང་དབྱིངས་ཀ་དག་གཞི་འབྲས་ཀྱི་བར་དུ་ཡོད་པས་ཐུགས་རྗེས་གཞན་སྣང་གི་ལམ་ཡང་བར་དོ་ཡིན་ནོ༔ བར༵་ཞེས་པ་བར་ན་ཡོད་པའི་ཕྱིར་དང་༔ མ༵་ཞེས་སྣང་བ་དག་མ་དག་འཆར་བའི་ཕྱིར་དང་༔ དོ༵་ཞེས་དོ་ཐག་གི་གཏོད་ཕུར་བཞིན་དུ་ཐོག་མཐའི་སྦྲེལ་འཛིན་དུ་གྱུར་བའོ༔ ཁྱད་པར་དུ་ནི་རང་བཞིན་སྐྱེ་གནས་ཀྱི་བར་དོ་ཞེས་པ་སྐྱེ་གནས་རིགས་དྲུག་གི་སེམས་ཅན་གྱི་ལུས་རྟེན་བླང་ནས་མ་ཤིའི་བར་དུ་སྤྱི་བཙན་གྱི་སྣང་བའི་རང་བཞིན་རྣལ་བར་གནས་པ་ནི་སྲིད་པ་བར་དོ་དང་༔ འཆི་ཀའི་དབུས་སུ་ཚུད་པས་ནའོ༔ འཆི་ཀའི་བར་དོ་ནི་སྐྱེ་གནས་དང་ཆོས་ཉིད་ཀྱི་བར་ན་ཆུད་པས་འཆི་མ་རག་པའོ༔ ཆོས་ཉིད་བར་དོ་ནི་མ་དག་འཁྲུལ་བའི་སྣང་བ་དབྱིངས་སུ་ཞིག་ནས་ཆོས་ཉིད་གཞི་སྣང་གི་བཀོད་པ་རབ་འབྱམས་མུ་མཐའ་མེད་པར་འཆར་བ་དང་འཆི་ཀ་དང་སྲིད་པའི་བར་ན་ཡོད་པས་སོ༔ སྲིད་པ་བར་དོ་ནི་སྐྱེ་གནས་དང་ཆོས་ཉིད་ཀྱི་བར་ན་ཡོད་ལ༔ ཡར་རང་བཞིན་སྤྲུལ་སྐུར་སྐྱེ་སྲིད༔ བར་མཐོ་རིས་གསུམ་དུ་སྐྱེ་སྲིད༔ མར་ངན་སོང་གི་གླིང་གསུམ་དུ་སྐྱེ་སྲིད༔ སྣང་བ་མི་འདྲ་བ་མང་པོ་འཆར་སྲིད༔ བདེ་སྡུག་མ་ངེས་པ་མང་པོ་འབབ་སྲིད་པས་ན་སྲིད་པ་བར་དོ་ཟེར་རོ༔ རྨི་ལམ་བར་དོ་ནི་གཉིད་དུ་སོང་བས་མཆེད་པའི་གདངས་རླུང་གི་ཁུར་བས་འཁྲུལ་སྣང་ངེས་མེད་རྨི་བ་འཁྲུལ་བ་ལས་ཀྱང་ཉིང་འཁྲུལ་ལམ་ལམ་པར་ཐ་མལ་བས་ཀྱང་བལྟ་བ་ཞིག་སྟེ་གཉིད་དུ་མ་སོང་བ་དང་སད་པའི་བར་དེར་ཡོད་པས་ན་བར་དོར་བཞག་ལ༔ བསམ་གཏན་བར་དོ་ནི༔ བསམ་རྟོག་འགྱུ་འཕྲོའི་ཚོགས་ཀྱི་འཁྲུལ་བ་རྒྱུན་མི་ཆད་པར་སྤེལ་ཞིང་ཕྱི་ཕྱིར་སྟོབས་བལྟས་དེ་ཉིད་ཀྱི་གཉུག་མའི་རང་ཞལ་ལ་འགེབ་པས་ན་ཀུན་རྟོག་གི་རྒྱུན་གཅོད་པས་བསམ་བྱུང་གིས་གཏན་ལ་ཕབ་པའི་ཡུལ་ཆོས་ཉིད་ལྷག་མཐོང་གི་དོན་ལ་གཏན་པོར་གནས་པས་རྟེན་གྱི་ལས་ཅན༔ འཁྲུལ་བ་སྔ་མ་འགགས་ནས་ཕྱི་མ་མ་ལྡང་བའི་བར་དེར་ཡོད་པའོ༔ དེ་དག་ནི་ངེས་ཚིག་གོ༔ ས་མ་ཡཱ༔

དབྱེ་བ་ནི་དྲུག་དུ་ཕྱེད་དེ༔ སྤྱིར་བར་དོ་ལ་སྐྱེ་ཤི༔ རྨི་ལམ༔ ཆོས་ཉིད༔ སྲིད་པ་བཞིར་གསུངས༔ ཐེག་པའི་རྒྱལ་བོ་ལས༔ རང་བཞིན་སྐྱེ་གནས་ཀྱི༔ འཆི་ཁ་སྡུག་བསྔལ་གྱི༔ ཆོས་ཉིད་སྐུ་གསུམ་གྱི༔ སྲིད་པ་རྣམ་སྨིན་གྱི་བར་དོ་དང་བཞིར་བཤད་དེ༔ དེའི་སྟེང་དུ་རྨི་ལམ་བག་ཆགས་ཀྱི་བར་དོ་དང་༔ བསམ་གཏན་ཞི་ལྷག་གི་བར་དོ་དྲུག་བྱས་ནས་བསྟན་པར་བྱའོ༔

ས་མཚམས་ནི༔ རིགས་དྲུག་གི་སྐྱེ་གནས་གང་རུང་ཞིག་ཏུ་སྐྱེས་ནས་མ་འཆི་བའི་ཐིམ་རིམ་སྔ་མ་ཉེ་བའི་འཆི་ལྟས་ལ་མ་ཐུག་གི་བར་དུ་སྐྱེ་གནས་བར་དོ་ཡིན༔ འཆི་ནད་ཀྱི་ཐིམ་རིམ་སྔ་མའི་གཏུག་པ་ནས་བཟུང་སྟེ་ནང་དབུགས་ཁྲོག་གི་མ་ཆད་ཀྱི་བར་འཆི་ཁ་བར་དོ༔ སྟོང་བཞིས་དྲངས་པའི་སྣང་སྟོང་ཡེ་ཤེས་ཀྱི་རྒྱུ་འཕྲུལ་སྣ་ཚོགས་པ་ནས་གཞི་སྣང་ཐིམ་རིམ་གྱི་མཇུག་ཏུ་མིང་བཞི་སྲིད་པའི་ཤ་གཟུགས་ཅན་མ་ཐོབ་ཀྱི་བར་ཆོས་ཉིད་ཀྱི་བར་དོ༔ མིང་གཟུགས་གྲུབ་ཕྱེད་སྔ་མའི་ལུས་ལྟར་ཡོད་པར་གྲུབ་པ་ནས་རྟེན་སྐྱེ་གནས་བཞི་གང་རུང་ལ་བརྟེན་མ་ཆོས་ཀྱི་བར་དུ་སྲིད་པའི་བར་དོ་ཡིན་ནོ༔ དེ་ལྟར་སྐྱེ་གནས་དེ་ནས་རང་བཞིན་གྱི་བསམ་གཏན་ཁྲ་ཚང་ན་ཉལ་བ་དང་མདའ་སྲོང་གི་མིག་ལ་ཡོད་པ་ལྟ་བུ་དང་༔ དམིགས་པ་རྒྱུད་བརྟེན་གྱི་བསམ་གཏན་བསམ་གཟུགས་དང་འདོད་སེམས་ཙམ་དང་༔ ཞི་ལྷག་བྱང་སེམས་ཀྱི་བསམ་གཏན་རྒྱུན་ལ་ཅི་ཙམ་གནས་ཀྱི་བར་ཡེངས་འབྱམས་སུ་མ་འཁྲུལ་རིང་དང་༔ དེ་བཞིན་གཤེགས་པའི་དགོངས་པ་བསམ་གཏན་མཆོག་གི་ངང་ཉིད་དུ་ཅི་ཙམ་རང་ས་ཟིན་པའི་བར་དུ་ཡོད་པར་བཤད་དོ༔ བསམ་གཟུགས་ཀྱི་འགྲོ་བའི་རྒྱུད་ལ་ཡོད་པས་བསམ་གཏན་དེ་ནི་སྔར་གྱི་འཕངས་འབྲས་རྒྱུ་མཐུན་ཏེ༔ སྐྱེ་བ་དེས་བསྡུས་པ་དང་སླར་གྱི་སྐྱེ་བ་འཁོར་ལོར་རྟགས་པའི་རྒྱུར་མི་འགྱུར་བས་ཤས་ཆེར་གྱིས་དབང་བཙན་པས་བསམ་གཏན་བར་དོར་མ་བཞག་གོ༔ དེ་ནི་བསམ་གཏན་བར་དོའི་ས་མཚམས་སོ༔ གཉིད་སད་སྔ་ཕྱིའི་བར་དུ་ཅི་ཙམ་གཏི་མུག་གི་འཇུག་པས་རླུང་སེམས་རྨུགས་རྩར་ཆུད་རིང་རྨི་ལམ་གྱི་བར་དོའི་ས་མཚམས་སུ་ངེས་སོ༔

གྲངས་ངེས་ནི༔ གནས་རིགས་གང་དུའང་སྐྱེ་བ་བླངས་ནས་མཐར་འཆི་བས་གཏུག་ནས་དུས་བྱེད་དེ་བར་དོ་འཆར་ལ༔ དེ་ཡང་སྲིད་པའི་བར་དོ་ཡོད་མེད་ལས་ཡོད་པའི་གཙོ་ཆེ་བས་ཡ་གྱལ་དུ་བྱས་ནས་བཞིར་བཤད་པ་རྩ་བ་ལ༔ གཉིད་དང་བསམ་གཏན་ཡང་རེ་འགའ་བ་བར་དོ་བཞི་བོ་ལ་བསམ་གཏན་སྲིད་པ་དང་༔ གཉིད་ཀྱང་དམྱལ་བ་དང་ཡི་དྭགས་སོགས་ཡོད་མེད་མང་བས་ན་རྣམ་པ་ཀུན་ཏུ་རྩ་བ་མིན་ནོ༔ འོ་ན་དམྱལ་བ་ལ་གནད་གཅོད་ཀྱི་སྡུག་བསྔལ་མེད་པའང་སྡུག་བསྔལ་ཆེ་ཆུང་གི་དགག་སྒྲར་སོང་བ་ཞིག་གོ༔ དེ་བས་ན་གྲངས་དྲུག་ཏུ་ངེས་སོ༔

གོ་རིམ་ནི༔ སྐྱེས་ནས་འཆི༔ ཤི་ནས་འོད་གསལ་ཤར་པ་ལ་བདག་ཏུ་བཟུང་བས་གོ་རིམ་གྱི་ངེས་པ་བཞི་དང་༔ སྐྱེ་གནས་སུ་གཉིད་དང་བསམ་གཏན་ཡོད་མེད་ཀྱི་མ་ངེས་པ་གཉིས་སུ་བཞག་གོ༔

ད་ནི་བར་དོ་འཆར་ཚུལ་ལམ་སྣང་ཚུལ་བསྟན་པ་དངོས་ལ༔ སྐྱེ་གནས་བར་དོ༔ འཆི་ཀ་བར་དོ༔ ཆོས་ཉིད་བར་དོ༔ སྲིད་པ་བར་དོ་དང་༔ རྨི་ལམ་དང་བསམ་གཏན་གྱི་བར་དོ་གཉིས་དང་དྲུག་གི་འཆར་ཚུལ་ལས༔ སྤྱི་ཚན་དུ་དྲུག་པོ་དེ་དག་གི་འཆར་གཞི་ནི་ངོ་བོ་རང་བཞིན་ཐུགས་རྗེ་གསུམ་ལ་བདག་ཏུ་བཟུང་བས་སོ༔ འཆར་ཚུལ་ནི་མེད་ལ་ཡོད་པར་སྣང་བ་སྒྱུ་མ་ལྟ་བུར་སྣང་བའོ༔ མིན་ལ་ཡིན་པར་བཟུང་བ་ཐོ་ཡོར་མིར་འཁྲུལ་བ་ལྟ་བུའོ༔ མི་བདེན་བདེན་པར་བཟུང་བ་རྨི་སེམས་ལྟ་བུའོ༔ མི་གཅིག་གཅིག་པར་བཟུང་བ་ཆུ་བོའི་རྒྱུན་ལྟ་བུའོ༔ མ་ངེས་ངེས་པར་བཟུང་བ་འབྱུང་བ་ལ་འདུ་ཤེས་ཐ་དད་ལྟ་བུའོ༔ ས་མ་ཡཱ༔ སྤྱི་ཚན་ལ་ཁམས་གསུམ་གྱི་སྣང་བ༔ དགོས་བཙན་དུ་གང་ཟག་གི་རང་ངོའི་སྣང་བ༔ ཡང་སྒོས་སུ་བར་དོ་རང་གི་སྣང་བས་ཁྱད་པར་རེ་རེ་མ་ཡིན་ཐ་དད་བསམ་གྱིས་མི་ཁྱབ་པ་ཡོད་དོ༔ ས་མ་ཡཱ༔

བར་དོ་དང་པོ་སྐྱེ་གནས་ཀྱི་བར་དོ་ལ་ཁམས་གསུམ་གང་ལའང་༔ ཕུང་པོ་ལྔའི་སྐུ་ལྔ་ལོག་པར་བསྒྲིབས༔ ཁམས་དང་སྐྱེ་མཆེད་ཀྱིས་འོད་དང་ཁ་དོག༔ ལས་ཉོན་གྱིས་ཡེ་ཤེས་དང་ཆོས་ཉིད་སྒྲིབ་སྟེ་སྣང་ཞེན་གྱི་དབང་གིས་འཁོར་བར་བཅིངས་པས་ཕྱིན་ཅི་ལོག་བཞིའི་ཆུ་ཀླུང་དུ་འཕྱན་ནས་བག་ཆགས་ལས་ཉོན་ལ་སྤྱོད་པ་སྟེ༔ གནས་ཚུལ་གྱི་དབང་གི་ཡེ་ཤེས་ཀྱི་རང་བཞིན་ལས་ཉོན་གྱི་སྦུབས་རྒྱ་བཞུགས་ཚུལ་ལས་གཞལ་ན༔ ཁྱད་པར་དུ་སྙིང་ཀ་ན་ངོ་བོ་སྐུར་བཞུགས༔ རང་བཞིན་འོད་དུ་བཞུགས༔ ཐུགས་རྗེ་འོད་ཀྱི་ཐིག་ལེར་བཞུགས༔ རྟོག་ཚོགས་རྡོ་རྗེའི་དཀྱིལ་འཁོར་དུ་བཞུགས༔ སྤྱིར་བཏང་དུ་ཕུང་པོ་ལྔ་སྐུ་ལྔར་བཞུགས༔ འབྱུང་ལྔ་ཡུམ་ལྔར་བཞུགས༔ རྒྱུད་ཚོགས་བྱང་སེམས་སུ་བཞུགས༔ ལུས་ཀྱི་ཆོས་བཞི་སྒོ་བ་ཡབ་ཡུམ་དུ་གནས་པ་དེ་དག་གནས་འགྱུར་ཁྲག་འཐུང་གི་དཀྱིལ་འཁོར་དུ་སངས་རྒྱས་པར་བཞུགས་པའི༔ ད་ལྟ་སྤྱི་བོ་ན་ཟེར་གྱི་སྐུ༔ སྙིང་ཀ་ན་ངོ་བོའི་སྐུ༔ རྩ་རྣམས་ནས་འཁོར་མཐའ་གྲངས་མེད་དུ་ཐིག་ལེ་དཀར་དམར་ལ་བརྟེན་ནས་མཁའ་འགྲོ་ཡབ་ཡུམ་བསམ་གྱིས་མི་ཁྱབ་པར་བཞུགས་ཚུལ་དང་༔ སྤྱི་བོ་སྐུ༔ མགྲིན་པ་གསུང་༔ སྙིང་ཀ་ཐུགས༔ ལྟེ་བ་ཡོན་ཏན༔ གསང་གནས་ཕྲིན་ལས་ཀྱི་འཁོར་ལོ་ལྔར་བཞུགས་ཚུལ་རྣམས་རྣལ་མར་གསུངས་པ་ལས་དག་བྱ་དང་སྨིན་འབྲས་ལྟར་ལྟ་བ་ནི༔ སྙིང་རྗེའི་གནས་འཁྲུལ་བའི་ཁ་འཛིན༔ ཐེག་དམན་གྱི་རིགས་པདྨའི་དགོངས་པ་ལས་རིང་བར་ཤེས་པར་བྱ་དགོས་སོ༔ དེ་ནི་མྱ་ངན་ལས་འདས་པའི་བཞུགས་ཚུལ་ལོ༔ དེ་ཉིད་མ་དག་སེམས་ཅན་ལ་སྣང་ལུགས་ནི༔ ཡུམ་ཆེན་ལྔ་ཕྱི་ཡུལ་གྱིས་བསྡུས་པའི་ཁམས་སུ་སྣང་༔ སྐུ་གསུམ་སེམས་སྡུད་པར་བྱེད་པའི་ཁམས་སུ་སྣང་༔ སྐུ་ལྔ་རྟོག་པས་སྦགས་པས་ཕུང་པོ་རྣམས་དང་༔ དེ་ཉིད་ཟད་པའི་ཡེ་ཤེས་ཀྱི་རང་རྩལ་རྟོག་མེད་ཀྱི་ཕུང་ལྔར་སྣང་༔ བྱང་ཆུབ་ཡབ་ཡུམ་ནི་ཁམས་དང་སྐྱེ་མཆེད་དུ༔ སྒོ་བསྲུང་བཞི་རེག་ཁམས་ཡུལ་ཤེས་སུ་ནི་སྣང་༔ དཔའ་བོ་ཡབ་ཡུམ་རྟོག་ཚོགས་བརྒྱད་ཁྲི་བཞི་སྟོང་དུ་སྣང་༔ ཁྲག་འཐུང་ལྔ་བཅུ་རྩ་བརྒྱད་རྟོག་ཚོགས་ལྔ་བཅུར་སྣང་༔ ཡེ་ཤེས་ལྔ་ཉོན་མོངས་ལྔར༔ རིགས་ལྔ་མི་རིགས་ལྔ༔ ཚད་མེད་བཞི་ཕྱོགས་གཞིར་སྣང་བ་ལ་སོགས་པར་འཁྲུལ་ཞིང་སྣང་བ་ཡིན་ནོ༔ ཡང་གཞི་གནས་ཀྱི་ཡེ་ཤེས་གསུམ་མ་རིག་གསུམ་དུ་སྣང་༔ ཡུལ་ཁྱབ་ཀྱི་ཡེ་ཤེས་གཉིས་ཡོད་མེད་འཛིན་པར་རྟོག་དཔྱོད་ཀྱིས་རང་བཞིན་དུ་སྣང་ངོ་༔ གཉིས་པ་བྱེ་བྲག་ཏུ༔ ལུས་ནི་རགས་པ་འདོད་པའི་སྲིད་པ་ལྷ་མི་སོགས་ན་ཤ་ཁྲག་འབྱུང་བཞིའི་རང་བཞིན་གྱི་གཟུགས་ཆེ་ཆུང་ཚད་མ་ངེས་པ༔ དམྱལ་བ་ན་མྱོང་རིག་སྡུག་བསྔལ་གྱི་ལུས༔ བསམ་གཟུགས་ན་ཏིང་འཛིན་སྟོང་གསལ་རིག་ཡིད་ཀྱི་ལུས་ཡོད་དོ༔ ངག་ནི་འདོད་པ་ནི་རགས་པ་ཡོད་ལ༔ གཞན་ལ་ཕྲ་བ་བག་ཆགས་ཙམ་དུ་ཡོད་དོ༔ སེམས་ནི༔ འདོད་པ་ན་སེམས་དང་ཡིད་དང་རྣམ་ཤེས་རྣམས་ཡོད་ལ༔ གཞན་གཉིས་ན་དེ་ལས་ཚོགས་དྲུག་རགས་པའི་ཕྱོགས་བྲིའི་བར་མཚམས་པར་གོང་འཕེལ་དུ་ཇེ་སྲབ་བོ༔ གནས་ནི༔ འདོད་ཁམས་ཀྱི་མཚེ་མ་ལ་སོགས་པ་བཞི་མ་གཏོགས་པ་ས་ལ་བརྟེན་ནོ༔ གནས་ཀྱི་ཁྱད་པར་ནི༔ དམྱལ་བ་ལྕགས་བསྲེགས་མེ་འབར༔ ཡི་དྭགས་མྱ་ངན་ནམ་སྐྱི་གཡའ༔ དུད་འགྲོ་བྱིང་གནས་རྒྱ་མཚོ༔ ལྷ་མིན་ཁོང་སེང་མུན་པས༔ ལྷ་རྣམས་བསོད་ནམས་ཁྱད་པར་བས༔ མི་ཡུལ་གླིང་བཞི་ཕྲག་བརྒྱ་ས་སྟེང་གི་ཆ་ལ་བརྟེན་པ་ཞིག་གོ༔ གྲོགས་ནི་རང་རང་དང་བག་ཆགས་མཐུན་པར་སད་པའོ༔ སྣང་བའི་འཆར་ཚུལ་ནི༔ དམྱལ་བ་ལ་ཚ་གྲང་སྡུག་བསྔལ་གྱི་འཁྲུལ་སྣང་༔ ཡི་དྭགས་ལ་བཀྲེས་སྐོམ་འདུ་ཤེས་ལོག་པའི་སྣང་བ༔ དུད་དེ་འགྲོ་བ་ལ་གླེན་ལྐུགས་བཀོལ་སྤྱོད་གཅིག་ཟའི་སྡུག་བསྔལ་གྱི༔ ལྷ་མིན་ཕམ་རྒྱལ་དགའ་སྡུག་ཕྲག་དོག་མི་བཟད་ཀྱི༔ ལྷ་ལ་བདེ་སྐྱིད་འཕོ་ལྟུང་ཉེན་གྱི་འགྱུར་བ༔ མི་ལ་འདྲེས་མ་སྣ་ཚོགས་སྡུག་བསྔལ་བཅུ་གཅིག་གི་འཁྲུལ་སྣང་རྣམས་ཡོད་པའོ༔ རྒྱས་པ་ཕྱིའི་སྔོན་འགྲོ་ལས་གསལ་ལོ༔ ཀུན་ལའང་ཡུལ་ཡུལ་ཅན་དུ་སྣང་བ་ཤས་ཆེའོ༔ ༈ ལས་ཀྱི་སོགས་ཚུལ་ནི༔ ཤས་ཆེར་འདོད་པ་ན་སྣ་ཚོགས་པ༔ གོང་མ་ན་ཏིང་ངེ་འཛིན་གྱི་བག་ཆགས་སོག་གོ༔ ཁམས་ཟས་རགས་པ་ཡོད་ན་འདོད་པ་ན༔ ཡིད་ཟས་ཕྲ་བ་ལས་མེད་ན་གཟུགས་མེད་པ་རུའོ༔ རང་བཞིན་བར་དོ་ཞེས་པ་གཙོ་ཆེ་བར་སྐྱེ་གནས་བཞི་གང་རུང་དུ་སྲིད་པ་བཟུང་ནས་ཅི་ཙམ་གནས་ཀྱི་བར་ལ་རིགས་དྲུག་གི་སེམས་ཅན་སོ་སོའི་སྣང་བ་རྣམས་སོ༔ ཚེ་ཆད་ནི་གཟུགས་མེད་བསྐལ་ཆེན་བརྒྱད་ཁྲིར་འགོག་པ་ནས༔ དམྱལ་བ་བསྐལ་པ༔ མི་ཚེ་ལོ་དཔག་མེད་ནས་བཅུ་པའི་བར་སོགས༔ དུད་འགྲོ་རིང་པོའི་བསྐལ་པ༔ ཐུང་ངུ་ཉིན་ཞག༔ ལྷ་འདོད་གཟུགས་ཀྱང་བསྐལ་ཕྱེད་དང་རང་ལོ་ལྔ་བརྒྱ་སོགས་མ་ངེས་པའམ༔ རྒྱས་པར་པདྨ་ང་ཡི་མངོན་པའི་ཆོས་ནས་བསྟན་པ་ལྟར་རོ༔ འདིའི་གདམས་པ་ནི་སྐྱེ་གནས་རྣམ་སྦྱོང་བསྐྱེད་པའི་རིམ་པ་ལྟར་རོ༔

གཉིས་པ་འཆི་སྲིད་ཀྱི་བར་དོ་འཆར་ཚུལ་ལ༔ འཆི་ངེས་པའི་རྒྱུ་མཚན༔ འཆི་བའི་རྟགས༔ སྡུག་བསྔལ་དངོས་དང་གསུམ་ཡོད་དོ༔ དང་པོ་ནི༔ སྤྱིར་འདུས་བྱས་ཐམས་ཅད་ཀྱི་ནང་ན་རྟག་པར་གནས་པ་གཅིག་ཀྱང་མེད་པས་རང་གི་འདུས་བྱས་རྗེན་པ་ལ་རྟག་པའི་རྒྱུ་མཚན་མེད་ལ༔ བྱེ་བྲག་ཏུ་རང་རེ་མི་རྣམས་ཀྱི་སྐྱེ་གནས་འདི་ཡང་ཕ་མའི་ཁུ་ཁྲག་སོགས་རྒྱུ་རྐྱེན་གྱིས་འདུ་བྱས་པའི་ཕུང་བོ་གཅིག་ཏུ་མ་གྱུར་བའི་དུ་མ་མ་འཕྲད་མ་རེག་མ་འབྱར་བ་ལ་བདག་ཏུ་བཟུང་བ་ནི་དང་པོ་ཉིད་ནས་མི་རྟག་པ་བདག་གིར་བྱས་ཟིན་པས་རྒྱུ་མཚན་ཡོད་ལ༔ རྐྱེན་གློ་བུར་བ༔ ནད་བཞི་བརྒྱ་རྩ་བཞི༔ གདོན་སྟོང་ཕྲག་བརྒྱད་ཅུ༔ ཡེ་འགྲོགས་སུམ་བརྒྱ་དྲུག་ཅུ་ལ་སོགས་པ་བསམ་གྱིས་མི་ཁྱབ༔ འཚོ་བའི་རྐྱེན་ནི་ཉུང་བ་མ་ཟད་དེ་ཡང་འཆི་རྐྱེན་དུ་ལྡོག་པས་ན་ངེས་པ་མེད་པ༔ འདུ་བ་བཞིའི་ནད་ཁམས་ཀྱི་འབྱུང་བའི་གནོད་པ་རང་བཞིན་གྱིས་ཉེན་པ་ན༔ འདི་ལ་རྟག་པ་ཅི་ཡང་མེད་ལ༔ ལོ་བརྒྱ་ལོན་པའི་མི་ལ་མ་ཤི་བར་ད་ལྟ་གནས་པ་གཅིག་ཀྱང་མེད་པ་དང་༔ མཐོ་དམན་དྲག་ཞན་ཐམས་ཅད་འཆི་བས་མ་ཟིན་པར་ཚེ་ཐར་ལ་སོང་བ་མེད་པ་དང་༔ རྨི་ལམ་ལྟར་གྲུབ་པ་མེད་པས་མི་རྟག་པ་དང་༔ འབབ་ཆུ་ལྟར་སྡོད་པ་མེད་པས་མི་རྟག་པ་དང་༔ རྫིང་བུ་ལྟར་སྣོན་པ་མེད་པས་མི་རྟག་པ་དང་༔ རླུང་ལྟར་གནས་པ་མེད་པས་མི་རྟག་པ་དང་༔ སྤྲུལ་བ་ལྟར་ཡུན་ཐུང་བས་གནས་པ་མེད་པས་མི་རྟག་པ་དང་༔ སྒྱུ་མ་ལྟར་བདེན་པ་མེད་པས་མི་རྟག་པ་དང་༔ མགྲོན་པོ་ལྟར་སྡོད་པ་མེད་པས་མི་རྟག་པ་དང་༔ སྤྲིན་ལྟར་དུས་ཚོད་གཟུང་བ་མེད་པས་མི་རྟག་པ་དང་༔ དུས་ལ་ངེས་བཟུང་མེད་པས་མི་རྟག་པ་དང་༔ ལུང་བསྟན་གཅིག་ཏུ་གསུང་པས་མི་རྟག་པ་དང་༔ ཕྱིའི་དུས་འགྱུར་བ་མངོན་པས་མི་རྟག་པ་དང་༔ ན་ཚོད་འགྱུར་བ་མྱོང་བས་མི་རྟག་པ་དང་༔ དུས་ལ་གོད་པ་མྱུར་བས་མི་རྟག་པ་དང་༔ ཅིས་ཀྱང་ཕན་པ་མེད་པས་མི་རྟག་པ་དང་༔ སུས་ཀྱང་ཕྱིར་མ་ཟློག་པས་མི་རྟག་པ་དང་བཅས་པར་པདྨ་ང་ཡི་གསང་ཚིག་ངེས་པའོ༔ ས་མ་ཡཱ༔

གཉིས་པ་འཆི་བའི་རྟགས་དང་བསླུ་བ་དང་གདམས་ངག་བསྟན་པ་གསུམ་ ༼ འདིར་ས་བཅད་ལ་རྒྱུད་དོན་གཟིགས་པ་རྣམས་ཀྱིས་གཟིགས་འཚལ། ༽ ལས༔ འཆི་བའི་རྟགས་ལ༔ ཕྱི་ནང་གསང་བ་ཡང་གསང་གི་རྟགས་བཞི་དང་༔ ཉེ་རིང་ཤིན་ཏུ་ཉེ་བའི་རྟགས་གསུམ་དུ་རྒྱུད་དང་མན་ངག་ཐམས་ཅད་ཞལ་མཐུན་པས༔ ཕྱི་རྨི་ལམ་ལས་འཆི་བའི་རྟགས་འབྱུང་བར་འགྱུར་བ་དེ༔ རྒྱ་སྐེགས་ཀྱི་རི་ལ་འཛེགས་པ་རྨིས་པ་ན་འཆི་ལྟས་༡༔ མེ་ཏོག་དམར་པོ་ཐུ་བ་རྨིས་པ་འཆི་ལྟས་༢༔ མཆོད་རྟེན་ལ་འཛེགས་པ་༣༔ བྱེ་བའི་རི་ལ་འཛེགས་པ༤༔ ཐལ་ཕུང་ལ་འཛེགས་པ༥༔ སྤྲེའུ་ལ་ཁ་ཕྱིར་བལྟས་སུ་ཞོན་པ་༦༔ བོང་བུ་ལ་ཁ་ཕྱིར་བལྟས་སུ་ཞོན་པ་༧༔ ཕག་ལ་ཁ་ཕྱིར་བལྟས་སུ་ཞོན་པ༨༔ རྔ་མོ་ལ་ཁ་ཕྱིར་བལྟས་སུ་ཞོན་པ་༩༔ མ་ཧེ་ལ་ཁ་ཕྱིར་བལྟས་སུ་ཞོན་པ་༡༠༔ བུད་མེད་ནག་མོ་ངོ་མི་ཤེས་པའི་གོས་ནག་ཅན་ལ་ཉལ་བོ་བྱ་བ༡༡༔ བུད་མེད་ནག་མོས་བདག་གི་ལྟོ་བ་ཕྲལ་བ་༡༢༔ མི་ནག་པོ་དབྱུག་པ་ཅན་གྱིས་གསོད་པ་དང་༡༣༔ ཁྱེར་བ་ཁྲིད་པ་༡༤༔ རྒྱུས་མེད་པའི་རྒྱལ་ཁམས་སྟོང་བར་སྐྱི་བུང་བར་འཁྱམས་པ་ལ་སོགས་རྨི་བ་དང་༡༥༔ གཅན་གཟན་སོགས་ཀྱི་སྙིང་ཁྱེར་བ་རྨི་བ་དང་༡༦༔ རང་གི་རང་སྲོག་གཅོད་པ་རྨི་བ་དང་༡༧༔ ལྷོ་ཕྱོགས་སུ་འགྲོ་བ་རྨི་བ་དང་༡༨༔ གཅེར་བུ་ཐལ་བས་བྱུག་པ་དང་༡༩༔ ལུས་ལ་རེ་ནག་གྱོན་པ་དང་༢༠༔ མགོ་ལ་གྲོད་པུ་ཀླུབ་པ་༢༡༔ རྐེ་ལ་ཞགས་པ་བཞག་པ་༢༢༔ གཤིན་པོ་མང་པོ་དང་ལྷན་དུ་རྩེ་བ་རྨི་བ་༢༣༔ དེ་དག་གིས་བཟའ་བཏུང་སྟེར་པ་དང་༢༤༔ ཡང་རྨི་ལམ་དུ་ནམ་རུབ་པ་ཤ་སྟག་རྨི་བ་དང་༢༥༔ ཐང་སྟོང་༢༦༔ ལུང་སྟོང་༢༧༔ གྲོག་སྟོང་སོགས་སུ་གཅིག་པུར་སྙིང་མི་དགའ་བར་འདུག་པ༢༨༔ གཞན་དུ་འགྲོ་ཞིང་གནས་ཁང་ཚོལ་བ་དང་༢༩༔ གོས་དམར་གྱོན་ནས་ནུབ་ཏུ་འགྲོ་བ༣༠༔ གཞན་གྱི་སྐྱེལ་ཐུང་བྱེད་པ་༣༡༔ ས་མཁར་སྒོ་མེད་དུ་འདུག་པ་རྨི་བ་༣༢ལ་སོགས་པ་འབྱུང་བ་ནི་ལན་རེ་གཉིས་ཙམ་ལ་ངེས་པ་མེད་པའི་ཕྱིར་དང་༔ ཉིང་འཁྲུལ་གྱི་ལམ་ཡིན་པའི་ཕྱིར་དང་༔ ལོ་གསུམ་ཚུན་ཆད་ལ་བལྟ་བས་ཕྱིའི་རྟགས་ཟེར་རོ༔ ནང་གི་རྟགས་ནི་ལུས་ལ་འབྱུང་བ་སྟེ༔ མ་བརྟགས་པའི་རྟགས་དང་བརྟགས་པའི་རྟགས་གཉིས་སུ་ཡོད་དོ༔ དང་པོ་ནི༔ ནད་མེད་པའི་དུས་སུ་སེན་མོའི་འོད་དང་དམར་མདངས་ཤོར་བས་ཟླ་བ་དགུ་ན་༡འཆིའོ༔ མིག་གི་སྤྲིས་མའམ་མིག་སྐྱག་མེད་ན་ཟླ་བ་ལྔ་ན་འཆི་བ་དང་༢༔ ལྟག་པའི་བདུད་སྒོ་ནས་སྐྲ་ཚོམ་གྱེན་ལངས་བྱུང་ན་འཆི་བདག་གི་བདུད་ལངས་པ་ཞེས་བྱ་བ་སྟེ་ཞག་ཉེར་གཅིག་ན་འཆི་༣༔ དེ་ལ་བཟློག་པའི་ཐབས་ཀྱང་མེད་པར་གསུངས་སོ༔ རྐང་བའི་རྒྱ་ཚིགས་ཀྱི་ལོང་བུ་ཕྱིར་འགྱུར་བ་ནི་ཟླ་བ་གཅིག་ན་མི་གནས་སོ༤༔ ཡང་གཞན་ལ་མིག་གིས་བརྟགས་ཀྱང་༔ རང་ལ་མེ་ལོང་གི་ངོས་སུ་བརྟགས་ཀྱང་གང་ལྟར་ཡང་རང་གཞན་ནད་ཀྱི་ཐེབ་པ་དག་ལ༔ སོ་རྩ་ལ་དྲེག་པ་ནག་པོ་སྔར་མེད་ཆགས་ན་ཞག་དགུ་ནའོ༡༔ སྣ་ཡི་གཤོགས་པ་མེད་པར་ཞོམས་ཤིང་ལྡིབ་ན་ཞག་ལྔ་ནའོ༢༔ ཡན་ལག་བརྐྱང་བརྐུམ་ཡང་ཡང་རང་དབང་མེད་ན་ཞག་བདུན་ནའོ༣༔ མིག་འབྲུ་ཚུགས་སུ་བལྟས་ནས་འབྱེད་བཙུམ་མི་ནུས་ན་ཞག་གསུམ་ན་ཏྲོ་ཏ་ཧོ༤༔ མིག་གི་ཚིགས་འཁྲུལ་ནས་ལོག་ལོག་བྱེད་ན་ཞག་བཅོ་ལྔ་ནའོ༥༔ འགྲམ་པ་ཡི་རྒྱུད་ཆད་ནས་ཤ་གཤོང་བུར་སོང་ན་ཞག་བཅུ་དགུའི་ནུབ་མོ་ཙམ་ལ༦༔ སྣ་ཡི་མ་སི་ཀི་ཆད་པ་ཞེས་བྱ་བ་སྣ་ཡོ་བར་འགྱུར་ན་ཞག་བདུན་ན་འགུམ་པར་འགྱུར་རོ༧༔ མིག་གི་བར་ར་ན་ཆད་པ་ཞེས་བྱ་བ་མཆིལ་མ་རྒྱུན་མི་ཆད་པར་འབབ་པ་ན་ཞགས་ལྔ་ན་འགུམ་པར་འགྱུར་རོ༨༔ འགྲམ་པ་གཡོན་པའི་ཤ་ཤོར་ནས་བཤོང་བུར་གྱུར་ནས་གཡས་སུ་ཡོ་ན་ཞག་གཅིག་ལས་མི་གནས༩༔ སྟེང་འོག་གི་སོ་འཐམས་ན་ཞག་གསུམ་ན་གདོན་མི་ཟའོ༡༠༔ ལྕེ་ཐོག་ཏུ་ཐིག་ལེ་ནག་པོ་ཅིག་བབས་ན་ཞག་གཉིས་ན་དང་༡༡༔ རྣ་བ་ལེབ་མོར་གྱུར་ཏེ་མགོ་ལ་འབྱར་ན་དེ་ནི་ནུབ་དེའི་ནམ་ཕྱེད་དོ༡༢༔ བྲང་གི་ལྷེན་སྣ་ཞོམ་ཏེ་སྐོང་བུར་གྱུར་ན་ཟླ་བ་ཕྱེད་པས་འཆི་ལྟས་སུ་གདོན་མི་ཟའོ༡༣༔ རང་གི་མཇིང་བའི་ཕྱི་རོལ་ན་རྩ་གཉིད་ལོག་ཡོད་པ་གཏེམ་ཡང་མེད་ན་དེ་ཡང་ཟླ་བ་ཕྱེད་ནའོ༡༤༔ འདི་དག་གི་དོན་ནི་གང་ཉམས་ཀྱང་དེའི་ཐད་ཀྱི་རླུང་དབུ་མར་ཐིམ་ཟིན་པའི་རྟགས་སུ་ངེས་པའོ༔ ཡང་རྒྱུ་མེད་པར་སྐྱེས་པ་ལ་དམར་ཆ་དང་བུད་མེད་ལ་དཀར་ཆ་འཛགས་པ་ཁམས་འཛིན་བྱེད་ཀྱི་རླུང་ཉམས་པ་ལས་བྱུང་བ་ན་ཟླ་བ་གཅིག་པའི་རྟགས་ཡིན་ནོ༡༥༔ སྦྲིད་པ་བྱུང་བ་དང་གཅིན་དང་བཤང་ལྕི་འཆོར་བ་གསུམ་དུས་མཉམ་ན་རླུང་འཆོལ་བ་ཡིན་པས་ན་ཟླ་བ་ཕྱེད་ནའོ༡༦༔ རང་གི་སྣ་རྩེ་རང་གི་མི་མཐོང་བ་དང་༡༧༔ རང་གི་ལྕེ་རྩེ་རང་གིས་མི་མཐོང་བ་དང་༡༨༔ གཉིས་ནི་མིག་གི་རླུང་ཉམས་པ་ལས་བྱུང་བས་ན་ཞག་བཅུ་ནའོ༔ ལུས་ལས་འོད་འབྱུང་བ་ནི་དྲན་པ་འོད་རྩ་ལ་རྒྱུ་བ་ཡིན་པས་ན་ཞག་གསུམ་པས་སོ༡༩༔ འདི་འདྲ་རྒྱལ་གདོན་གྱི་ཆོ་འཕྲུལ་དུ་ཡང་སྲིད་པས་ན་ངེས་པ་རླུང་ལས་བཟུང་ངོ་༔ ཡང་གཞན་ནད་པའི་ལུས་ལ་བརྟགས་དུས་གཉིད་ཟིན་པ་དང་༔ རྩ་ལ་བརྟགས་པས་རྩ་ཆད་ན་འཆི་ལྟས་ཟླ་ཕྱེད་པའོ༢༠༔ དེ་ལྟར་ཉི་ཤུ་པོ་ནི་མ་བརྟགས་གསལ་བ་ཞིག་ཡིན་ནོ༔ བརྟགས་པའི་རྟགས་ནི༔ ཚེ་གཟུགས་ལ་དང་༔ ལྗོན་ཤིང་དང་༔ གསང་བ་རླུང་དང་༔ ཡང་གསང་སེམས་དང་ཡེ་ཤེས་ཀྱི་རྒྱུན་དང་གདངས་ལ་དང་༔ ཐོར་བུ་པ་ལ་བརྟགས་པས་གསལ་ཏེ༔ དང་པོ་ལ༔ ནམ་མཁའ་དྭངས་པའི་ཟླ་འོད་དམ༔ སྨག་ནག་གི་གནམ་ལྡིང་ངམ་ཉི་མ་སོགས་ལ་བརྟགས་པས༔ གཡས་ན་པོ་ཏི༔ གཡོན་ན་ཕྲེང་བ་ཐོགས་ལ་བརྟགས་པས༔ ཟླ་ཉི་ལ་གྲིབ་མ་སྨག་རུམ་དུ་གཟུགས་ནམ་མཁའི་ཁམས་ལ་ཤར་བའི་སྙིང་ཀར་མིག་གཏད་དེ་མིག་མི་འཛུམ་པར་གནས་པས་སྦྲིད་ཆལ་བ་བྱུང་དུས་མཁའ་དྭངས་པ་ལ་བལྟས་པས་སྐྱ་ཝ་ལེ་བས་ལུས་ཅི་ལྟ་བས་སྤྱི་རྣམས་ཚང་ཞིང་ཡིད་དུ་འོང་བ་ཡོད་ན་ནི་ལོ་བདུན་དུ་མི་སྐྱོན་པའི་རྟགས་སོ༔ དེ་ལས་གྲིབ་མ་མེད་ན་ཟླ་བ་གཅིག་གི་འཆི་ཡང་བསྐྱར་བཟློས་ཡང་ཡང་མ་བྱས་ན་བལྟ་མ་ཐུབ་མ་ཤེས་རྟགས་འཁྲུལ་བའི་ཁ་དམར་ལོག་པར་འགྲོའོ༡༔ མགོ་མེད་ན་ཟླ་བ་ལྔ་༢༔ མགོའི་ཕྱེད་ཚལ་གཡས་མེད་ན་ཟླ་བ་དགུ༣༔ གཡོན་མེད་ན་ཟླ་བ་བདུན༤༔ སྐེ་ཡན་ཆད་མེད་ན་ཟླ་བ་གསུམ༥༔ རོ་སྟོད་མེད་ན་ཟླ་བ་གཉིས༦༔ སྨད་མེད་ན་ཟླ་བ་གཅིག༧༔ ལུས་གཡས་མེད་ན་ཞག་ཉེར་དགུ༨༔ གཡོན་མེད་ན་ཉེར་གཅིག་གི༩༔ ལག་གཡས་མེད་ན་ལོ་ལྔ༡༠༔ གཡོན་མེད་གསུམ་ན༡༡༔ རྐང་པའི་པུས་མོ་མཚམས་ནས་སྨད་མེད་ན་ལོ་གསུམ༡༢༔ རྐང་གཡས་མེད་ན་ཟླ་བ་བཅུ་དྲུག༡༣༔ གཡོན་མེད་ན་ཟླ་བ་བརྒྱད༡༤༔ རྐང་ལག་ཐམས་ཅད་མེད་ན་ཟླ་བ་གཅིག་གོ༡༥༔ ལག་ཆ་རྗེན་པ་མེད་ན་ལོ་བདུན་ནའོ༡༦༔ ཡང་འཕྲེད་གཡས་སུ་ཉལ་བའམ་ཡོ་ན་ན་ངོ་༡༧༔ གཡོན་དུ་འཆི་ངོ་ཡོད་ཉེ་བཟློག་ཡོད༡༨༔ མགོ་ཐུར་བསྟན་བཟློག་མེད་ཀྱི་ལྟས་སོ༡༩༔ དབྱིབས་གྲུ་བཞི་ཟླ་གམ་ཟླུམ་པོ་ནར་མོ་རྣམས་བཟློག་ཏུ་ཡོད༔ གྲུ་གསུམ་དང་རོ་བཏུམ་པ་ནི་འདྲ་ན་མི་བཟློག་གོ༔ ཁ་དོག་ལས་གདོན་བརྟགས་པའང་ཡོད་དེ་འདིར་དེ་ཙམ་མོ༔ ཡང་ལྗོན་ཤིང་ལ་བརྟགས་པ་ནི༔ ཉིན་ཕྱེད་ཁ་ལྷོ་བལྟས་སུ་ཙོག་པུར་གནས་པའི་པུས་སྟེང་གྲུ་མོ་བཞག་ལ༔ སྨིན་མཚམས་སུ་ལག་སྐེ་བཞག་པ་ལ་མིག་གཉིས་མཉམ་པར་བལྟས་པས་ཕྲ་མོ་ཙམ་གྱི་རྒྱུན་མ་ཆད་ན་སྐྱོན་མེད༔ ཆད་དེ་ཞག་བཅུ་དགུ་ནའོ༡༔ ཡང་ལག་པ་དང་རྐང་པའི་བླ་རྩ་མེད་ན་ཞག་བདུན་ལས་མི་གནས་སོ༢༔

གསུམ་པ་གསང་བ་རླུང་ལ་བརྟགས་པ་ལ༔ འགྲོ་འོང་གི་རླུང་དང་༔ ཡན་ལག་གི་རླུང་གཉིས་ལས་སྔར་བསྟན་པ་ལྟར༔ གྱེན་རྒྱུའི་རླུང་རྒོད་དེ་བརྩེགས་མར་ཉི་མ་རྩེ་ཤར་ལ་བྱུང་ན་ཟླ་བ་དྲུག་ནའོ༡༔ ཐུར་སེལ་ཉམས་པས་དྲི་བཤང་ཤོར་བ་དབང་མེད་ན་ཟླ་བ་བརྒྱད་ན༢༔ སྣ་རྩེར་རླུང་གི་ཁ་དོག་ནང་མོ་མེད་ན་ཞག་བདུན་ནའོ༣༔ སྣ་གཡོན་ནས་མང་དུ་རྒྱུ་ན་ཚེ་རིང་༔ གཡས་ནས་མང་ན་ཐུང་བ་སྤྱིར་བཏང་ལ༔ ཁྱད་པར་ཐོ་རངས་ནས་ཉི་ཤར་བར་དུ་ཚེས་གཅིག་གཉིས་གསུམ་རྣམས་གཡོན་ནས་རྒྱུ་ལ༔ དེ་ཕན་ཞག་གསུམ་ལ་གཡས་ནས༔ དེ་ལྟར་གསུམ་གསུམ་སྤེལ་བས་མར་ངོས་ཚེས་གཅིག་གི་ཉི་མའི་རླུང་རྒྱུ་བའི་བར་དུ་གོ་རིམ་བརྗེ་བ་བཞིན་ནོ༔ སྣ་བུག་གང་རུང་ཞིག་ནས་ཞག་ཁ་ཡར་བཏུད་དེ་རྒྱུ་ན་ཉེས་པ་ཡེ་མེད་ཅིང་༔ གོ་ལྡོག་པ་ལ་ཉེས་པ་ཆེ་སྟེ༔ ཞག་མ་དྲུག་ལ་གོ་ལྡོག་ན་འཐབ་རྩོད་འོང་༔ ཡང་ན་སྡུག་བསྔལ་དྲག་པོ་ཡོང་༔ ཟླ་ཕྱེད་དུ་ན་ནད་གདོན་འབྱུང་༔ ཟླ་གཅིག་ཉེ་བ་འཆི༔ ཟླ་བ་ཕྱེད་གཉིས་ཀྱི་བར་དུ་གོ་ཟློག་ན་ཟླ་བ་དྲུག་གི་འཆི་བར་འགྱུར་རོ༤༔ ཡང་སྣ་བུག་གཡས་ཁོ་ན་ནས་རླུང་ཞག་གཅིག་རྒྱུན་ལོ་གསུམ་དང་ཟླ་བ་གསུམ་ན་འཆི་༥༔ ཞག་ལྔར༔ བཅུ༔ བཅོ་ལྔ༔ ཉི་ཤུ༔ ཉེར་ལྔར་རྒྱུ་ན་རིམ་བཞིན་དུ༔ ལོ་གསུམ་༦༔ གཉིས༧༔ གཅིག༨༔ ཟླ་བ་དྲུག༩༔ གསུམ་རྣམས་སུ་འཆི༡༠༔ ཞག་ཉེར་དྲུག་ནས་སོ་གཅིག་གི་བར་གྱི་རིམ་བཞིན་ཟླ་བ་གཉིས༡༡༔ གཅིག༡༢༔ ཕྱེད༡༣༔ ཞག་བཅུ༡༤༔ ལྔ་༡༥༔ གསུམ་དག་ན་འཆི་ལ༡༦༔ དེ་ནས་གོ་ལྡོག་སྟེ་གཡོན་ནས་ཞག་གཅིག་རྒྱུ་ནས་དབུ་མར་ཞག་གཅིག་རྒྱུ་སེ་འཆིའོ༔ ཡང་གཡོན་ལའང་དེ་འདྲའི་འགྲེས་ཤེས་པར་བྱའོ༔ སྣ་གཤོགས་ཉམས་པ་སོགས་ནི་སྣ་ལ་འབྱུང་ལྔའི་རླུང་གི་ཤས་ཡོད་པ་ནང་སྙིང་ཀའི་རླུང་ལ་ཐིམ་པས་སོ༔ ཡན་ལག་གི་རྒྱུ་བའི་རླུང་དེ་མིག་ལ་གནས་པ་ཉམས་པས་གཟུགས་ལ་སོགས་པ་མི་མཐོང་བ་དང་མིག་གི་དབུས་སུ་སྔར་མེད་པའི་རི་མོ་འབྱུང་བ་ཞག་བཞི༢༧༔ རྣམ་རྒྱུ་བ་རྣ་བ་ལ་གནས་པ་ཉམས་པས་སྒྲ་མ་རུང་བ་ཐོས་པ་དང་རང་ཀར་གྱི་སྒྲ་རྒྱང་རིང་བར་གྱུར་པ་འདྲ་བས་ཞག་བདུན་ན་༢༨༔ ཡང་དག་པར་རྒྱུ་བ་སྣ་ན་ཡོད་པ་ཐིམ་པས་དྲི་མི་ཚོར་བར་གཤིན་དྲི་མནམ་པ་དང་ཞག་གསུམ་གྱིས་སོ༢༩༔ རབ་ཏུ་རྒྱུ་བ་ལྕེ་ན་ཡོད་པ་ཐིམ་པས་རོ་བྲོ་བ་མེད་པ་དང་༔ ལོག་པར་བྲོ་བ༔ སྐྱུག་བསྣངས་བརྫང་བ་རྣམས་འབྱུང་༣༠༔ ཤུན་ཏི་རྒྱུ་བ་ལུས་བྱིང་དང་ཁྱད་པར་གསང་གནས་སུ་ཡོད་པས་འཁྲིགས་བདེ་མེད་ན་ཞག་གཅིག་གི་འགྲོའོ༣༡༔ དེ་དག་ནི་ཐུར་སེལ་ནམ་མཁའ༔ མེ་མཉམ་ས༔ སྲོག་འཛིན་ཆུ༔ གྱེན་རྒྱུ་མེ༔ ཁྱབ་བྱེད་རླུང་གི་རླུང་ལྔའི་ཡན་ལག་གི་ཡན་ལག་ཏུ༔ མེ་མཉམ་ལས་རྒྱུ་བ་ས༔ སྲོག་འཛིན་ལས་རྣམ་རྒྱུ་ཆུ༔ ཁྱབ་བྱེད་ལས་ཡང་དག་རྒྱུ་རླུང་༔ གྱེན་རྒྱུ་ལས་རབ་རྒྱུ་མེ༔ ཐུར་སེལ་ལས་ཤིན་ཏུ་རྒྱུ་ནམ་མཁའི་རླུང་རྣམས་བྱུང་ངོ་༔ དེ་ཐམས་ཅད་ཀྱི་རྩ་བ་ནི་སྙིང་ཀ་ན་རྩ་བ་ས་ཆུ་མེ་དང་ནམ་མཁའི་རླུང་ལྔ་ཡོད་པ་དེ་རེད་པས་སྦྲའི་ཆོན་ཐག་བཏུལ་བ་ལྟར་ནང་དུ་སྡུད་པས་བྱེད་ལས་སོ་སོ་ནས་ཀྱང་འགགས་པ་ཡིན་ནོ༔ གཡས་གཡོན་ནས་ཕོ་མོའི་རླུང་རྒྱུ་བས་གཅིག་ཏུ་གོ་ལྡོག་པ་དེ་ཡང་རོ་རྐྱང་གང་རུང་གི་རླུང་དབུ་མར་ཐིམ་པ་ལས་བྱུང་བས་འཆི་ལྟས་དང་༔ ལག་རྐང་རང་རང་གི་ལས་ཤེས་ཡས་པའང་ཁྱབ་བྱེད་ཐིམ་པ་དང་༣༢༔ ཕྱིར་དྲོད་ཁོལ་བུར་འདུ་བའང་མེ་མཉམ་ཉམས་པ་དང་༣༤༔ དཀར་ཆ་མེད་པ་ཐུར་སེལ་ཉམས་པ་དང་༣༥༔ དྲན་པ་འཁྲུལ་བ་སྲོག་འཛིན་ཐིམ་པའི་སྔ་རབས་ཡིན་པའི་བྱང་བ་གལ་ཆེའོ༣༦༔

ཡང་གསང་སེམས་རིག་ལ་རྟགས་ཡོད་དེ་དང་པོ་ནི་སེམས་ལ་རྒྱུན་འགྱུར་བ་ཞེས་སྔར་མི་བརྟན་པོའང་ད་ལྟར་གློ་བུར་དུ་ཡིད་རྩང་བོར་ཐལ་བ༡༔ རྩང་པོ་བརྟན་པོར་འགྱུར་བ་དང་༢༔ ཡང་རྒྱུད་ལོག་པ་སྔར་སྡིག་སེམས་ཅན་ཀྱང་གློ་བུར་ཆོས་དད་ཅན་དང་༣༔ དེ་ལས་ལྡོག་པ་དང་༤༔ ཡང་རྒྱུད་རྩུབ་པའང་མཉེན་པར་ལོག༥༔ དེ་ལྡོག་དང་༦༔ ཡང་ཕྱི་ཐག་རིང་བའང་ཐུང་ངུར་འགྱུར༧༔ ཐུང་ངུའང་རིང་པོར༨༔ བཟའ་མས་མ་མནར་ཡང་ཐག་རིང་དུ་འགྲོ་སྙིང་འདོད་པ་དང་༩༔ གར་འགྲོ་ཆ་མེད་པ་དང་༔ འདུག་སྙིང་མི་འདོད་པ་རྣམས་འབྱུང་༔ ཁྱད་པར་བསམ་ངན་མི་དགོས་པ་སྣ་ཚོགས༡༠༔ སྔར་གྱི་སྙིང་རྗེ་ཆོས་དད་འཆི་བར་བློ་སྦྱངས་པ་ཐམས་ཅད་ཡལ་བའང་༡༡དེ་ལྟར་འཆི་བའི་རྟགས་དེ་ལོ་གཅིག་གཉིས་ཚུན་གྱིས་སོ༔ གཉིས་པ་རིག་པ་ལ་ནི༔ ཡེ་ཤེས་ཀྱི་རང་སྒྲ་རྣ་བ་ན་སྒྲ་ཡོད་པ་མཁའ་འགྲོ་མའི་སྒྲ་ཟེར་བ་དེ་ལག་པས་རྣ་བ་བཀག་པ་ན་རྔ་སྒྲ་དང་འདྲ་ན་སྐྱོན་མེད༔ རླུང་ཆེན་དང་འདྲ་ན་ཞག་བདུན༔ སྒྲ་དེ་མེད་ན་ཞག་ལྔ་ན་འཆིའོ༡༔ ཡེ་ཤེས་ཀྱི་རང་འོད་མིག་གི་སྒྲོན་མ་སྤྱི་དང་ཁྱད་པར་མིག་བཙིར་བས་རི་རྩེའི་ཉི་མ་མི་འགྱུར་བ་ཟེར་བས་འོད་སྐོར་རེ་མེད་ན་ཞག་གསུམ་ནའོ༢༔ དེ་གཉིས་ནི་ཡེ་ཤེས་ཀྱི་གདངས་ནང་དུ་ཐིམ་པའི་རྟགས་ཡིན་ནོ༔ ཁྱད་པར་དུ་ཐོར་བུར་བརྟགས་ན་ནང་བར་ས་སྟེང་དུ་དྲི་མ་བཏང་བ་ལ་རླངས་པ་མེད་ན་དགེ་སྦྱོང་དུ་བ་ཆད་པ་ཟེར་བས་ཞག་དགུ༡༔ འཆི་བ་བརྟགས་ཕྱིར་གནང་བས་ཁམས་ནག་པོ་བབས་ན་ཞག་གསུམ་༢༔ མེད་ན་རི་རབ་ཀྱི་རྩེ་༣ནས་སེང་གེ་དཀར་མོ་མི་འབབས་པ་ཟེར་བ་དངོས་འདི་ཡིན་ཡང་དགོངས་བཤད་གཉན་དེ་ཞག་བཅུ་དྲུག་གམ༔ ཞག་གཅིག་ནས་ཀྱང་འཆིའོ༔ དགོངས་བཤད་ལྟར་ཤར་ནས་ཆུ་ལ་ཉི་མ་ཤར་བའི་ནུབ་ངོས་མུན་པའི་གྱང་ལོགས་ལ་གཟུགས་བརྙན་འཆར་ཕྱིར་ཆུ་དང་གྱང་གི་བར་དུ་ལངས་སྟབས་ཀྱིས་གནས་པས་གྲིབ་མ་ཉིས་བརྩེགས་ཡོད་ན་སྐྱོན་མེད༔ མེད་ན་ཞག་བཅུ་དྲུག་གི་དུས་བྱེད་དོ༤༔ ཡང་ནང་མོ་ཉི་གྲིབ་ཀྱི་སྤྱི་བོ་ན་རླངས་པའི་གྲིབ་མ་མེད་ན་ཟླ་བ་ཕྱེད་པའི་ལྟས་སོ༥༔ ལག་མཐིལ་དུ་ཧས་བཏབ་གྲང་༦༔ ཕུས་བཏབ་དྲོ༧༔ མར་མེ་ཤི་བའི་དྲི་མེད༨༔ སེ་གོལ་གཏོགས་པའི་སྒྲ་མེད་པ་དང་༩༔ གྲིབ་མ་མར་མེ་ལ་གཉིས་ཡོད་པ༡༠༔ གྲིབ་མ་མེད་པ༡༡༔ ཡོད་ཀྱང་སྲབ་པ༡༢༔ རླུང་མིག་སོང་ནས་སིར་བ༡༣༔ ས་འབོལ་ལ་རྐང་རྗེས་མེད་པ་དང་༡༤༔ ཐལ་ཕུང་དུ་མི་དོད་པ༡༥༔ དོད་ཀྱང་ཆད་པ༡༦༔ གསུར་དྲི་ལ་དགའ་གདུང་ཆེ་བ༡༧༔ རྒྱུ་མེད་པར་བག་གྲངས་ཤིང་ངུ་སྙིང་འདོད་པ་དང༡༨༔ ཡང་ཆུ་ཡི་སྤྲིས་མེད་ན་ཉི་མ་བདུན་ནའོ༡༔ ཆུའི་རླངས་པ་ལ་བརྟགས་པས་སྔོ་དམར་ནི་མི་སྐྱོན༔ རླངས་པ་མེད་ན་ཞག་བཅོ་ལྔ༢༔ རླངས་པ་མདོག་ནག་པོ་ཞག་བཅུ་གཅིག༣༔ དམར་པོ་ཐིག་ལེ་ཅན་ནི་ཞག་དགུའོ༤༔ ཉོན་གོང་སྣ་བུག་གཡས་ནས་ཁྲག་འོང་གྲངས་མང་ན་ཞག་བརྒྱ༥༔ དེ་ལ་སོགས་བསམ་གྱིས་མི་ཁྱབ་པོ༔ དེ་ལྟ་ཕྱི་ནང་གསང་བ་ཡང་གསང་གི་ཁྱད་པར་གྱི་དབྱེ་བས་དུས་རིང་ཐུང་བསྒོས་པས༔ ཉེ་བ་དང་རིང་བའི་འཆི་ལྟས་ནི་ཐལ་ལོ༔ དེ་ལྟར་རྨི་ལམ་གྱི་ལྟས་སོ་གསུམ༔ ལུས་ཀྱི་མ་བརྟགས་པའི་ཉེར་ལྔ༔ བརྟགས་པའི་ཉེར་གཅིག༔ རླུང་གི་ཉེར་ལྔ༔ སེམས་ཀྱི་བཅུ་གཅིག༔ ཡེ་ཤེས་ཀྱི་གཉིས༔ ཐོར་བུའི་ཉེར་གསུམ་རྣམས་བསྡོམ་པ་བརྒྱ་དང་བཞི་བཅུ་ནི་འབྲིང་བོའི་དབང་དུ་བྱས་ལ་བརྟགས་པའོ༔

གཉིས་པ་བསླུ་བའི་ཐབས་ཅུང་ཟད་ཀྱི་ས་ཁུང་ཙམ་དུ་སྲོག་རྩོལ་གྱི་རླུང་ཐུན་བརྒྱ་རེ་ནང་མོ་བཟུང་བ་དང་༔ བུམ་ཅན་གྲངས་བཟུང་བསྒོམ་པས་ཀྱང་བཟློག༔ ནམ་མཁའ་ཟས་སུ་ཟ་བའི་བཅུད་ལེན་གྱིས་ཀྱང་བཟློག༔ རྡོ་རྗེའི་ཚེ་སྒྲུབ་པས་ཀྱང་བཟློག་གོ༔ སོ་སོའི་སྒོས་བཀར་གྱི་འཆི་བ་བསླུ་ཐབས་རྣམས་གཞན་དུ་ཤེས་སོ༔

གསུམ་པ་སྡུག་བསྔལ་དངོས་སྤྱིར་བཤད་པ་དང་༔ འབྱུང་བའི་ཐིམ་ཚུལ་བྱེ་བྲག་ཏུ་བཤད་པ་གཉིས་ལས་དང་པོ་ལ༔ ལུས་ཀྱི་འབྱུང་བ་འཐབ་པས་ཁང་རུལ་ཞིག་པ་ལྟར་སོ་སོར་གྱེས་པས་ཉེར་ལེན་སེམས་ཀྱིས་བྱས་ཏེ་ལུས་སེམས་གཉིས་ཆར་སྡུག་བསྔལ༔ སེམས་ཀྱི་ཚོར་བ་ནི་གནད་གཅོད་བཟོད་པར་དཀའ་བས་གདུང་བའི་རྒྱུ་ངག་གི་རྩ་བ་རླུང་རང་བཞིན་དུ་གནས་པ་བཙན་ཐབས་སུ་ཆད་པ་ལས་སྡུག་བསྔལ་དེ་གཉིས་པོ་ནི་ལུས་ངག་གི་སྡུག་བསྔལ་ལོ༔ བློ་རང་གི་ཆོས་སུ་སྐྱེས་པའི་སྡུག་བསྔལ་ནི་བསམ་གྱིས་མི་ཁྱབ་པ་ཡོད་དེ༔ བསྡུ་ན་ཀྱེ་མ༔ ཕྱོགས་བཅུའི་འཇིག་རྟེན་གྱི་ཁམས་ན་ལུས་རྟེན་ཞིག་ལ་འབྲས་བུ་ཐོབ་སླ་བ༔ སྡོམ་གསུམ་གྱི་རྟེན་དུ་རུང་བ༔ ཐར་པ་སྒྲུབ་པའི་སྟོབས་དང་རྣམ་པར་དཔྱོད་པའི་བློ་དཀྱིལ་ལ་བདག་ལས་བཟང་བ་མེད་པའི་མི་ལུས་རིན་པོ་ཆེ་ལྟ་བུ་ཐོབ་པ་བསམ་བཞིན་ཤེས་བཞིན་དུ་ཆུད་ཟོས་སུ་བཏང་བ་འདི་ཕུང་ཆེ་སྙམ་པའི་སྡུག་བསྔལ་ཤིན་ཏུ་འགྱོད་པ་དང་༔ མཇལ་དཀའ་བའི་བླ་མ་དམ་པས་ཟིན་པ་ལ་དད་མོས་ཙམ་ཡང་མ་ནུས་པར་ལོག་ལྟས་རྒྱུད་བཟུང་༔ ཐོབ་དཀའ་བའི་གདམས་ངག་ཐོབ་པ་དེ་ལ་དོ་ཚགས་མ་བྱས་དགོས་མེད་ཚེ་འདིའི་དོན་དུ་རྣམ་གཡེང་ལ་ཤོར་བ་་འདི་ཕུང་ཆེ་སྙམ་པའི་སྡུག་བསྔལ་ཤིན་ཏུ་འགྱོད་པ་དང་༔ ཐ་ན་དགེ་བཅུ་བླང་བ༔ སྡིག་བཅུ་སྤོངས་པ༔ ཕྱག་སྐོར་ཚྭ་ཚྭ༔ ཉ་དང་གྲོག་སྦྱིན༔ ཕན་སེམས་ཡི་རང་ཙམ་དང་༔ མ་ཎི་རྡོག་གཅིག་ཡན་ཆད་ལ་བརྙས་བཅོས་ཀྱིས་མ་བྱས་པ་གསེར་གླིང་ནས་སྟོང་ལོག་བྱས་པས་ཀྱང་ཐུ་བ་འདི་རབ་ཏུ་ཕུང་ཆེ་སྙམ་པའི་བློ་ལྷག་གིས་འགྱོད་པའི་སྡུག་བསྔལ༔ ཁྱད་པར་དུ་ད་ང་ལ་ཅུང་ཡོད་ཀྱང་ཕན་པ་ཆོས་ཡིན་ཡང་ཅི་ཡོད་སྙམ་པ་དང་༔ ཅུང་ཟད་ཀྱིས་ཀྱང་ཤིན་ཏུ་གནོད་པ་སྡིག་པ་ཡིན་པས་ཅི་ཡོད་སྙམ་དུ་བློ་རྒྱུག་ཅིག་བླང་བས༔ དགེ་བ་ཁ་གྲངས་ནི་ཉིན་སྐར་བས་ཉུང་༔ སྡིག་པ་ནི་ས་ཆེན་པོའི་རྡུལ་ལས་གྲངས་མང་༔ དགེ་བ་རེ་ཟུང་ཡོད་ཀྱང་ལ་ལ་ཞེ་སྡང་གིས་འཇོམས༔ ལ་ལ་ངོམ་ཆོས་མངོན་མཚན་གྱིས་འཇོམས༔ ལ་ལ་འགྱོད་པས་འཇོམས༔ ལ་ལ་མ་བསྔོས་པས་འཇོམས༔ ལ་ལ་ལོག་བསྔོས་ཀྱིས་འཇོམས༔ ལ་ལ་ཐོག་མའི་ཀུན་སློང་མི་དགེ་བའི་མཚན་ཉིད་དགེ་བར་མ་གྱུར༔ ལ་ལ་བར་དུ་སྡིག་པ་དང་འདྲེས་པས་རྣམ་དག་གི་ཆོས་ཅུང་ཟད་ཀྱང་མ་ལྷག་ལ༔ ལུས་ཀྱིས་དངོས་ཤུགས་མཐུན་རྐྱེན་དུ་གྱུར་བ༔ ངག་གིས་དངོས་ཤུགས་རྗེས་བརྗོད་དུ་གྱུར་བ༔ སེམས་ཀྱིས་དངོས་ཤུགས་ཡི་རང་བྱས་པ་ལ་སོགས་པ་སྡིག་ལྟོས་རི་རབ་བས་ཆེ༔ གཏིང་རྒྱ་མཚོ་བས་ཟབ༔ གྲངས་སྐར་ཚོགས་ལས་མང་༔ རྒྱུན་ཆུ་བོ་ལས་རིང་༔ ད་ཅི་ཚུགས་བྱ་སྙམ་སྟེ་ནག་ཅན་རྒྱལ་པོས་བཟུང་བ་ལྟར་སྡུག་བསྔལ་ལ༔ ཡང་ཚེ་ད་སྔོན་གྱི་སྐྱིད་པ་དྲན་ནས་དེ་རིང་ཕན་ཆོད་འདུག་དབང་མེད་སྙམ་དུ་ཡུལ་ལ་ཆགས་ཤིང་འགྲོ་མི་ཐུབ་པས་སྡུག་བསྔལ༔ ཕྱོགས་ཐམས་ཅད་ནས་སྐྱབས་མགོན་དཔུང་གཉེན་མ་རྙེད་པས་བྱ་ཐབས་བྲལ་བའི་སྡུག་བསྔལ༔ གཉེན་ཉེ་བ་ལ་འགྲོགས་པའི་བག་ཆགས་ཀྱིས་འབྲལ་དུ་མི་ཕོད་པར་གྱུར་ཡང་རང་དབང་མེད་ལ་ད་ཕྱིན་མི་འཕྲོད་པའི་སྡུག་བསྔལ༔ རྒྱུ་རྫས་ལོངས་སྤྱོད་སྡིག་གིས་བསགས་ཀྱང་སྤྱོད་དབང་ནི་བྲལ་དེ་རྒྱུ་ནི་མ་སོགས་པ་དང་འདྲ་ལ༔ སྡིག་པ་ནི་སོགས་ཟིན་པས་འགྱོད་པ༔ ནོར་རྫས་ཐམས་ཅད་གཞན་གྱི་ཐོབ་བྱ་བྱེད་པས་ཆགས་ཞེན་བློས་མི་འཁྱུད་པས་སྡུག་བསྔལ༔ ཕར་བལྟས་པས་གཤིན་རྗེ་མི་འགྲེང་བདུན་ཙམ༔ ཤ་ཚུགས་འཇར་འཇུལ་བ་གཅེར་བུ་སྐྲ་དམར་བོ་གནམ་དུ་གཟེང་བ༔ ཨམ་ཚིག་ ༼ གཙིགས་དཔྱད། ༽བསྡམ༔ སོ་ཞོ་ངོམས༔ བེ་ཅོན་གྱིས་བསྡིགས༔ ཞབས་ནག་སྐེ་ལ་བཞག༔ མུན་ནག་གིས་སྔུན་བསུས༔ རླུང་ནག་གིས་དེད་པ་ལ་འཇིགས་སྐྲག་བཟོད་བརླག་མེད་པའི་སྡུག་བསྔལ༔ ཡང་ད་སྔོན་གཅེས་པར་བསྐྱང་བའི་ཞེན་འཛིན་གྱིས་ལུས་དང་བྲལ་བ་ཚད་བཟུང་གི་ཕ་མཐའ་བྲལ་བའི་སྡུག་བསྔལ༔ དེ་ལས་སྡིག་ཆེན་རྣམས་ཀྱི་དམྱལ་བའི་ལས་མཁན་གྱིས་སོད་རྒྱོབ་ཀྱི་སྒྲ་ཐོས་པས་སྡུག་བསྔལ༔ སེམས་ཅན་གྱི་འོ་དོད་ཀྱི་སྒྲ་ཐོས་པས་སྡུག་བསྔལ༔ མེ་དཔུང་གི་འུར་ཚོགས་ཀྱི་སྒྲ་ཐོས་པས་བྲེད་དངངས་ཀྱི་སྡུག་བསྔལ་བསམ་གྱིས་མི་ཁྱབ་ལ༔ གལ་ཏེ་དེ་ལྟ་མིན་ཡང་ད་ངན་འགྲོར་ཅི་མྱོང་སྙམ་པའི་སྡུག་བསྔལ་མྱོང་བ་དང་༔ རང་གཅིག་པུར་འགྲོ་དགོས་པས་འཚེར་བ་དང་བཅས་པ་སྟེ༔ ལུས་ཀྱི་སྡུག་བསྔལ་ནི་དཔེར་ན་ནད་ཆེན་པོས་ཐེབ་བའི་བརྒྱ་ཆར་ཡང་མི་ཕོད༔ ངག་གི་སྡུག་བསྔལ་ནི་དཔེར་ན་མཆུ་ལག་པས་བཙུམ་སྟེ་ཐུབ་ཐང་དུ་བསྲན་པའི་བརྒྱ་ཆར་ཡང་མི་ཕོད༔ སེམས་ཀྱི་སྡུག་བསྔལ་ནི་དཔེར་ན་བུ་ཤི་བའི་བརྒྱ་ཆར་ཡང་མི་ཕོད༔ འབྲལ་བའི་སྡུག་བསྔལ་ནི་བཟའ་ཚང་གསོན་པོར་བྲལ་བའི་བརྒྱ་ཆར་ཡང་མི་ཕོད༔ ལུས་པའི་སྡུག་བསྔལ་ནི་དཔེར་ན་དགྲས་བཅོམ་པའི་བརྒྱ་ཆར་ཡང་མི་ཕོད༔ བློ་ཉེས་པའི་སྡུག་བསྔལ་ནི་ཕ་ཆུས་ཀྱི་འདུས་མ་ཉེས་པའི་བརྒྱ་ཆར་ཡང་མི་ཕོད༔ གྲུབ་པའི་སྡུག་བསྔལ་ནི་དུག་ཁོང་དུ་སོང་བའི་བརྒྱ་ཆར་ཡང་མི་ཕོད་དོ༔ ས་མ་ཡཱ༔

གཉིས་པ་འབྱུང་བའི་ཐིམ་ཚུལ་བཤད་པ་ལ༔ ཕྱི་འབྱུང་ནང་འབྱུང་ལ་ཐིམ་པས་འཁོར་བའི་ཆོས་རགས་པ་ཉི་ཤུ་ཐིམ་ཚུལ༔ ནང་འབྱུང་བྲ་བའི་ཐིམ་ཚུལ་ཉེར་ལྔ༔ ཡང་ཕྲ་སྟོང་བཞིའི་སྣང་བ་ཀ་དག་ལ་བརྒྱད་རྣམས་ནི་འཆི་སྲིད་ཀྱི་བར་དོ་ཡིན་ལ༔ ལྷུན་གྲུབ་སྐུ་དང་ཡེ་ཤེས་སོགས་ཆོས་ཉིད་སྣང་བའི་བར་དོར་བཞག་གོ༔ ཀ་དག་སྟོང་བའང་ཐིམ་ཚུལ་གྱི་འཆི་སྲིད་ལུགས་འབྱུང་གི་ཆོས་ཉིད་ཏེ་ལྟོས་བརྟགས་སོ༔ གཟུགས་ཐིམ་པས་ཕྱི་གཟུགས་འགགས༔ ཚོར་བ་ཐིམ་པས་བདེ་སྡུག་བར་གསུམ་ལ་མི་རྟོགས༔ འདུ་ཤེས་ཐིམ་པས་རྒྱ་ཆེ་ཆུང་བར་མར་མི་རྟོགས༔ འདུ་བྱེད་ཐིམ་པས་ལུས་སེམས་དཀར་ནག་གི་བྱ་བ་ལ་མི་འཇུག་གོ༔ རྣམ་ཤེས་ཐིམ་སྟེ་ཉེ་བས་འཁོར་བ་སྤྱི་དམིགས་ཀྱི་རྣམ་སྨིན་བསྡུས༔ མིག་དབང་ཐིམ་སྟེ་གཟུགས་དང་རྣམ་ཤེས་ཀྱི་འཚམས་ ༼ མཚམས་དཔྱད། ༽ མི་སྦྱོར༔ རྣ་དབང་ཐིམ་པས་སྒྲ་དང་རྣམ་ཤེས་ཀྱི་འཚམས་ ༼ མཚམས་དཔྱད། ༽ མི་སྦྱོར༔ སྣ་དབང་ཐིམ་ནས་དྲི་དང་རྣམ་ཤེས་ཀྱི་འཚམས་ ༼ མཚམས་དཔྱད། ༽ མི་སྦྱོར༔ ལྕེ་དབང་ཐིམ་སྟེ་རོ་དང་རྣམ་ཤེས་ཀྱི་འཚམས་ ༼ མཚམས་དཔྱད། ༽ མི་སྦྱོར༔ ལུས་དབང་ཐིམ་སྟེ་རེག་དང་རྣམ་ཤེས་ཀྱི་འཚམས་ ༼ མཚམས་དཔྱད། ༽ མི་སྦྱོར༔ མིག་གི་རྣམ་ཤེས་ཐིམ་ལ་ཉེ་བས་གཟུགས་འབྱེད་པར་མི་འཛིན༔ རྣ་བའི་རྣམ་ཤེས་ཐིམ་པར་ཉེ་བས་སྒྲ་འབྱེད་པར་མི་འཛིན༔ སྣའི་རྣམ་ཤེས་ཐིམ་པར་ཉེ་བས་དྲི་འབྱེད་པར་མི་འཛིན༔ ལྕེའི་རྣམ་ཤེས་ཐིམ་པར་ཉེ་བས་རོ་འབྱེད་པར་མི་འཛིན༔ ལུས་ཀྱི་རྣམ་ཤེས་ཐིམ་པར་ཉེ་བས་རེག་འབྱེད་པར་མི་འཛིན་ནོ༔ དེ་དག་ནི་འབྱུང་བའི་ཐིམ་རིམ་གྱིས་རྒྱུའི་ཕྱི་གསལ་ནང་དུ་བསྡུས་པ་མར་མེའི་རང་འོད་འདུས་པ་ལྟར་ཇེ་ཆུང་ལ་འགྲོ་བ་ཡིན་ལ༔ འབྱུང་ལྔའི་ཐིམ་ཚུལ་ལ༔ ས་ཁམས་ཐིམ་པས་ལུས་ལྕི་ཞིང་ལྡང་དང་འགྲོ་བ་མི་ནུས་པ་དང་༔ ལུས་སྐམ་ཅིང་རིད་པ་དང་༔ ལུས་ས་ལ་བྱིང་ངོ་སྙམ་སྟེ་ཡར་ཁྱོགས་ཟེར་བ་དང་༔ ཆུ་ཁམས་ཐིམ་པས་ཁ་ཆུ་དང་སྣ་ཆུ་ཟག་ཅིང་ཨ་ཆུ་ལ་སོགས་ཟེར་ནས་ལུས་ཆུ་ལ་བྱིང་སྙམ་འབྱུང་ཞིང་དེ་ནས་སྐམ༔ མེ་ཁམས་ཐིམ་པས་ཟས་མི་ཞུ༔ དྲོད་མཐའ་ནས་སྡུད་ཅིང་ཨ་ཚ་སོགས་ཟེར་ཁ་སྣ་སྐམ༔ རླུང་ཁམས་ཐིམ་པས་དབུགས་ངར་ངར་ཁག་ཁག་ཟེར་ཞིང་ཡན་ལག་གཡོབ༔ མིག་གྱེན་ལ་ལྡོག༔ དབུགས་ཕྱིར་རིང་དུ་རྒྱུ་ཞིང་ནང་དུ་རྩུབ་མོ་ལས་སྡུད་མི་ཤེས་སོ༔ ཁྱད་པར་དུ༔ གྱེན་རྒྱུ་ཐིམ་པས་ཕྱིར་རིང་༔ ཐུར་སེལ་མེད་པས་ཁམས་དང་རྩ་ཆུ་ལྷོད༔ སྲོག་འཛིན་ཐིམ་པས་རྒྱུ་བ་ཅད༔ མེ་མཉམ་ཐིམ་པས་བཟའ་བཏུང་མིད་པར་མི་ནུས༔ ཁྱབ་བྱེད་ཐིམ་པས་རྡོ་ལྟར་རེངས་སོ༔ རྒྱུ་བ་རྣམ་རྒྱུ་སོགས་ཉིང་ལག་གི་རླུང་ཐིམ་པས་དབང་ལྔའི་ནུས་པ་ཞན༔ ཡང་ས་རླུང་རྩ་ཕྲན་ནས་དབུ་མར་ཐིམ་པས་བན་བུན་ལང་ལོང་གྱི་རབ་རིབ་འཆར༔ ཆུ་རླུང་རྩ་ཕྲན་ནས་ཞུགས་པས་སྨིག་རྒྱུ་ལྟ་བུ་རབ་རིབ་འཆར༔ མེ་རླུང་རྩ་ཕྲན་ནས་ཞུགས་པས་མེ་ཁྱེར་ལྟ་བུའི་གསལ་ལམ་འབྱུང་༔ རླུང་གི་རླུང་རྣམ་པར་ཐིམ་པས་མར་མེ་ལྟར་ཤེས་པ་གསལ་བ་ཡང་འབྱུང་ལ༔ ནང་འབྱུང་ཕྲ་བའི་ཐིམ་ཚུལ་རླུང་ལས་ཕྱེ་བ་ཉེར་ལྔ་ནི་པདྨ་ང་ཡི་སྔར་རང་ཤར་ཆེན་པོ་ལས་བཤད་དེ༔ འདིར་གོ་རྒྱུ་ཆུང་བས་མ་བཟློས་སོ༔

བརྒྱད་པ་ཡང་ཕྲ་སྟོང་བཞིའི་སྣང་བ་ཀ་དག་ཏུ་ཐིམ་པའི་ཚུལ་ལས༔ དང་པོ་རྣམ་ཤེས་ཏེ་འཇུག་ཤེས་ལྔ་ཡིད་ལ་ཐིམ་པ་དང་༔ ད་ལྟའི་འདི་ལྟར་མ་ཡིན་པའི་གཟུང་བའི་རྣམ་རྟོག་རགས་པ་འགགས་ཤིང་༔ སེམས་ཤིན་ཏུ་གསལ་བར་སྣང་བ་དང་མེ་ལོང་ཡེ་ཤེས་ཀྱི་ངོ་བོ་ཡིན་པས་ན་སྣང༵་བའི༵་ཡེ༵་ཤེས༵་ཞེས་བྱ༔ ཞེ་སྡང་གི་རྟོག་པ་སོ་གསུམ་དང་གཟུང་རྟོག་རགས་པ་དང་སྒོ་ལྔ་འགགས་པས་སྟོང༵་པའི༵་འོད༵་གས༵ལ་ཟེར༔ རླུང་ལྔ་དབུ་མར་ཞུགས་པས་འོད་ལྔ་འཆར་ཆ་རབ་རིབ་ཏུ་འབྱུང་ངོ་༔ དེ་ནས་དབུ་མའི་ཡར་སྣར་ཕ་ལས་ཐོབ་པའི་ཐིག་ལེ་དཀར་ཆ་ཐུར་དུ་བབས་ནས་སྙིང་ཀར་སླེབ་པ་ན་ཁམས་དཀར་པོ་དང་འབྲེལ་བའི་དབང་གིས་ཟླ་འོད་ལྟ་བུའི་དཀར་ལམ་པ་ཞིག་འབྱུང་བ་སྟེ༔ ལེགས་པར་དཔྱད་ན་སྙིང་ཀའི་ཤར་རྩ་ན་འོད་དཀར་པོ་ཡོད་པའི་གདངས་དང་༔ ཡིད་ཀུན་གཞི་ལ་ཐིམ་པས་ཀྱང་སྣང་བ་མཆེད་པ་ཐིམ་ཟེར་ལ༔ སེམས་ཤིན་ཏུ་གསལ་བར་སྣང་བས་ཀྱང་མཆེ༵ད་པ༵ས་ཡེ༵་ཤེས༵་ཀྱི་སྣང་བ་ཟེར་ཏེ༔ སྔར་གྱི་སྣང་བའི་ཡེ་ཤེས་དེ་ལས་ཀྱང་ཆེར་མཆེད་བའི་དབང་གིས་ཡིན་ལ༔ སྣང་བ་འདི་ལ་ཡེ་ཤེས་གོང་འོག་གཉིས་ཀྱི་ཆ་ཡོད་པས་ན་སོར་རྟོགས་ཡེ་ཤེས་རང་བཞིན་ཡིན་པས་ན་གསལ་བའི་ཡེ་ཤེས་བྱས་ཀྱང་ཆོག་ལ༔ འདོད་ཆགས་ཀྱི་རྟོག་པ་བཞི་བཅུ་འགགས་པས་དང་འཛིན་པའི་རྣམ་རྟོག་རགས་པ་དང་བྲལ་བས་ཆེན༵་པོ༵་སྟོང༵་པ༵་ཡང་ཟེར་རོ༔ དེ་ནས་མཆེད་པ་ཐོབ་པ་ལ་ཐིམ་པ་ཞེས་བྱ་སྟེ་མ་ལས་ཐོབ་པའི་དམར་ཆ་ཕྱི་ནས་སྙིང་གར་ལྡོག་པ་དང་༔ ནང་ནས་སོར་རྟོགས་བདེ་བའི་ཡེ་ཤེས་འཆར་ཏེ་དེའི་རྩའི་འོད་གདངས་དམར་སེར་དུ་སྣང་སྟེ་ཉོན་ཡིད་ཀུན་གྱི་གཞི་ལ་ཐིམ་པ་དང་༔ བདེ་གསལ་འཛིན་མེད་ཀྱི་ཡེ་ཤེས་སྐྱེས་ཏེ་གཉིས་འཛིན་ཕྲ་བ་ཡང་འགགས་པའི་ཕྱིར་དང་༔ ཡེ་ཤེས་དེའི་སྟོབས་ཀྱིས་གཏི་མུག་གི་རྟོག་པ་བདུན་བཅོམ་པས་ཤིན༵་ཏུ༵་སྟོང༵་པ༵་དང་༔ སྤྲོས་བྲལ་གྱི་ཡེ་ཤེས་སུ་སྣང་བའི་སེམས་རང་ས་ན་གསལ་བས་ཐོབ༵་པའི༵་ཡེ༵་ཤེས༵་བྱའོ༔

དེ་ནས་དཀར་དམར་སྙིང་ཀར་འདྲེས་པ་དང་མཉམ་དུ༔ ཕྱི་རྟགས་མཐིང་ལྗང་ནག་པོའི་ཤས་ཀྱི་ཆེ་བ་མུན་སྲོས་པ་ལྟ་བུ་བྱ་གྲུབ་ཆོས་དབྱིངས་ཡེ་ཤེས་ཀྱི་རྩའི་རང་གདངས་དང་༔ དེ་དུས་ཉེ༵་བ༵ར་ཐོབ༵་པ༵ས་ཡེ༵་ཤེས༵་རྣམ་པར་མི་རྟོག་པའི་ཏིང་འཛིན་ཞེན་རྟོག་གི་མཐའ་དང་བྲལ་བར་འཆར་བས་ངོ་བོ་སྟེ་ཆོས་དབྱིངས་ཡེ་ཤེས་སུ་བཞུགས་པའི་ཨ་ཧཾ་གི་ནུས་པ་དང་༔ ཀུན་གཞི་ཡང་ཆོས་དབྱིངས་ཡེ་ཤེས་སུ་ཐིམ་པའི་ཕྱིར་དང་གཉིས་འཛིན་དང་གཉིས་སྣང་ཕྲ་བའང་དབྱིངས་སུ་ཞིག་ཏེ་མ་དག་པའི་འཁོར་བའི་བག་ཆགས་ཐམས་ཅད་འོད་གསལ་དུ་ཐིམ་པས་ཐ༵མས་ཅད༵་སྟོང༵་པ༵་ཞེས་བྱ་བའི་འོད་གསལ་སྐད་ཅིག་བཞི་པ་སྟེ༔ མ་དག་པའི་སེམས་སྣང་བཞི་རིམ་གྱིས་འགགས་པ་སྟོང་བཞིའི་ཐིམ་རིམ་བཞི་ཟེར་བ་ལ༔ འོད་གསལ་ཉམས་དམའ་བས་སྣང་བ་སྔ་མ་རྣམས་ཀྱི་ཟད་མཚམས་ལས་ཆེར་བརྒལ་ཏེ་རབ་ཏུ་འཕེལ་བས་སྣང་བའི་ཟད་པ་བཞིར་རྣམ་གྲངས་སྣང་དངོས་བཞིར་བཞག་སྟེ་བརྒྱད་ཀྱི་ཀུན་རྟོག་ཕྲ་རགས་ཐམས་ཅད་ཟད་པ་དང་གདོད་མའི་ཀ་དག་སྤྲོས་མཐའ་བྲལ་བའི་དོན་དམ་པའི་འོད་གསལ་མངོན་པར་གསལ་བ་ནི་སྟོན་གནམ་སློང་སྐྱོན་དང་བྲལ་བ་ལྟ་བུར་ཆོས་སྐུའི་གནས་ལུགས་རྣལ་མ་སྟོང་ཉིད་ཉི་ཤུའི་བདག་ཉིད་པ་ཡེ་ཅི་བཞིན་པ་ལགས་ཀྱིས་འདི་ནི་བར་དོ་དངོས་མིན་ནོ༔ དེ་ཡན་ཆད་ཀྱི་འཆི་སྲིད་ཀྱི་བར་དོའི་གནས་ཅུང་ཟད་བཤད་ཟིན་ནོ༔

གསུམ་པ་ཆོས་ཉིད་སྐུ་གསུམ་གྱི་བར་དོ་འཆར་ཚུལ་ནི༔ གཞི་གནས་ཆོས་སྐུའི༔ རང་སྣང་ལོངས་སྐུའི༔ རང་བཞིན་སྤྲུལ་སྐུའི་བར་དོ་གསུམ་མོ༔ དང་པོ་ནི༔ སྔར་བཤད་པ་ལྟ་བུ་ཉེ་བར་ཐོབ་པའི་མཐར་ཐུག་ཀ་དག་གི་རང་བཞིན༔ ངོ་བོ་སྟོང་པ་རང་བཞིན་ཐུགས་རྗེ་སྤྲིན་མེད་པའི་ནམ་མཁའ་ལྟ་བུ་མཁའ་དག་ཀློང་ཡངས༔ ལས་དང་བག་ཆགས་ཉོན་མོངས་གཟུང་འཛིན་ཕྲ་བ་ཙམ་ཡང་མེད་པ་སེམས་ཀྱི་ཆོས་ཐམས་ཅད་དང་རྒྱབ་གྱེས་པ་སྟེ༔ སེམས་ཀྱི་རྟ་རླུང་གི་ཆ་མ་ལུས་པ་མྱིད་པ་དཀར་ནག་གི་ལམ་ནས་ཐོན་ཏེ་རིག་གདངས་ནང་དུ་ཐིམ་ནས་སེམས་མེད་པ་དང་༔ བག་ཆགས་ཐམས་ཅད་ཀྱང་མ་སྤང་བ་ཙམ་ལས་མི་ལྡན་པས་ན་གྲོལ་བས་ཀ་དག་དང་ཤེས་རབ་ཆོས་ཀྱི་སྐུར་སྨིན་མ་སྨིན་ལས་ཁྱད་མེད་པ་རྣམ་ཐར་གསུམ་ལྡན་གྱི་རྡོ་རྗེ་བཙུན་མོའི་བྷ་ག་དུས་གསུམ་གྱི་རྒྱལ་བ་ཐམས་ཅད་སངས་རྒྱས་པའི་རྡོ་རྗེའི་གདན་ལ་སླེབ་པ་ཡིན་པས་གཞིའི་འོད་གསལ་དབྱིངས་ཡེ་གཉིས་སུ་མེད་པའི་ཆོས་སྐུ་རང་ལ་ཡོད་པ་དུས་དེ་ཉིད་དུ་གསལ་བའི་རང་བཞིན་གནས་རིག་སྟེ༔ ཁྲེགས་ཆོད་ཀྱི་གདམས་པའི་ངོ་ཏི་ཟང་མ་ནི་དེ་ཡིན་པས་གོམས་པ་འབྲིང་ཡན་ཆད་ཀྱི་དབང་རྣོན་ཐམས་ཅད་དེ་ཉིད་ངོ་ཤེས་པས་གྲོལ་བའོ༔ དེ་ཡན་ཆད་ཀྱི་སྟོང་བཞི་ཐམས་ཅད་ཀྱང་ཀ་དག་འཆར་རིམ་ལས་ཡིན་པས་ཆོས་སྐུའི་བར་དོར་བཞག་ཀྱང་འགལ་བའང་མེད་དོ༔

གཉིས་པ་གཞི་སྣང་ལོངས་སྐུའི་བར་དོ་ལ་ནི༔ རང་སྣང་ལོངས་སྐུའི༔ ཕྱེད་སྤྲུལ་ལོངས་སྐུའི་གཉིས་སུ་ཡོད་པ་ལས༔ དང་པོ་ལ་འོད་གསལ༔ ཟུང་འཇུག༔ ཡེ་ཤེས༔ ལྷུན་གྲུབ་བཞིའི་སྣང་ལུགས་ལས་ཐོག་མར་འོད་གསལ་ནི༔ དེ་ནས་གཞི་ཀ་དག་གི་ཡེ་ཤེས་ངོ་མ་འཚལ་བས་ནམ་མཁའ་འོད་གསལ་ལ་ཐིམ་པ་ཞེས་བྱ་སྟེ༔ དོན་དུ་སྙིང་ཀའི་འོད་གསལ་ལ་རིགས་ལྔའི་སྐུ་དང་ཞིང་ཁམས་ཡོད་པའི་གནད་དང་༔ ཆོས་ཅན་རང་བཞིན་གནས་རིགས་ཡོད་པ་ལུས་ངག་ཡིད་གསུམ་གྱི་འཆིང་རྒྱ་ལས་གྲོལ་བས་དང་༔ ཡུལ་དང་སྣང་བའི་རྒྱ་ལས་གྲོལ་བས་སྣང་བ་ཡིན་ཏེ༔ དེ་ཡང་ཤར་ཕྱོགས་ཐམས་ཅད་མེ་ལོང་ཡེ་ཤེས་དང་སངས་རྒྱས་སྤྱན་མའི་ངོ་བོ་ས་རྣམ་པར་དག་པའི་འབྱུང་ཆེན་གྱི་རང་གདངས་འོད་དཀར་པོ་ཤིན་ཏུ་གསལ་བ་མཛེས་པ༔ འོད་འཚེར་པ༔ མིག་གིས་མི་བཟོད་པ༔ རྒྱ་ཆེ་བ་ཤར་ཕྱོགས་ཐམས་ཅད་འགེབས་པ༔ འོད་ཟེར་བསྣོལ་མ་དང་༔ གྱེན་བསྒྲེང་དུ་ཡོད་པ༔ རྩིབ་ཤར་དུ་ཡོད་པ༔ མ་ངེས་པ་མགུལ་བཞིན་པ༔ ཕྱི་ནང་ཟང་ཐལ་པ༔ ལྡེམ་བཞིན་དུ༔ མེར་བཞིན་དུ་ཡོད་པ༔ མནན་ནེམ་པར་སྣང་༔ བཏེགས་ན་སྤར་བར་སྣང་༔ ཤིན་ཏུ་ཡིད་འཕྲོག་པ༔ ལྷུན་བརྗིད་པའོ༔ དཔག་ཡས་དམིགས་སུ་མེད་པ༔ དཔང་མཐོ་ལ་རྩེ་མོ་ཡངས་པའོ༔ དེ་འདྲ་བསམ་གཏན་གྱི་ཞག་ལ་འཆར་རོ༔

ཡང་ལྷོ་ཕྱོགས་སུ་མཉམ་ཉིད་ཡེ་ཤེས་ཀྱི་རང་གདངས་རིན་ཆེན་མཁའ་འགྲོ་མ་མ་ཀིའི་ངོ་བོ་ཆུ་རྣམ་དག་གི་འབྱུང་ཆེན་སེར་པོ་ཤིན་ཏུ་གསལ་བ་མཛེས་པ༔ འོད་འཚེར་པ༔ མིག་གིས་མི་བཟོད་པ༔ རྒྱ་ཆེ་བ་ལྷོ་ཕྱོགས་ཐམས་ཅད་འགེབས་པ༔ འོད་ཟེར་བསྣོལ་མ་དང་༔ གྱེན་བསྒྲེང་དུ་ཡོད་པ༔ རྩིབ་ཤར་དུ་ཡོད་པ༔ མ་ངེས་པ་མགུལ་བཞིན་པ༔ ཕྱི་ནང་ཟང་ཐལ་པ༔ ལྡེམ་བཞིན་དུ༔ མེར་བཞིན་དུ་ཡོད་པ༔ མནན་ན་ནེམ་པར་སྣང་༔ བཏེགས་ན་སྤར་བར་སྣང་༔ ཤིན་ཏུ་ཡིད་འཕྲོག་པ༔ ལྷུན་བརྗིད་པའོ༔ དཔག་ཡས་དམིགས་སུ་མེད་པ༔ དཔང་མཐོ་ལ་རྩེ་མོ་ཡངས་པའོ༔ དེ་འདྲ་བསམ་གཏན་གྱི་ཞག་གཅིག་ལ་འཆར་རོ༔

ཡང་ནུབ་ཕྱོགས་སུ་སོ་སོར་རྟོགས་པའི་ཡེ་ཤེས་ཀྱི་རང་གདངས་པདྨ་མཁའ་འགྲོ་གོས་དཀར་མོའི་ངོ་བོ་མེ་རྣམ་པར་དག་པའི་འབྱུང་ཆེན་འོད་དམར་པོ་ཤིན་ཏུ་གསལ་བ་མཛེས་པ༔ འོད་འཚེར་པ༔ མིག་གིས་མི་བཟོད་པ༔ རྒྱ་ཆེ་བ་ནུབ་ཕྱོགས་ཐམས་ཅད་འགེབས་པ༔ འོད་ཟེར་བསྣོལ་མ་དང་༔ གྱེན་བསྒྲེང་དུ་ཡོད་པ༔ རྩིབ་ཤར་དུ་ཡོད་པ༔ མ་ངེས་པ་མགུལ་བཞིན་པ༔ ཕྱི་ནང་ཟང་ཐལ་པ༔ ལྡེམ་བཞིན་དུ༔ མེར་བཞིན་དུ་ཡོད་པ༔ མནན་ན་ནེམ་པར་སྣང་༔ བཏེགས་ན་སྤར་བར་སྣང་༔ ཤིན་ཏུ་ཡིད་འཕྲོག་པ༔ ལྷུན་བརྗིད་པའོ༔ དཔག་ཡས་དམིགས་སུ་མེད་པ༔ དཔང་མཐོ་ལ་རྩེ་མོ་ཡངས་པའོ༔ དེ་འདྲ་བསམ་གཏན་གྱི་ཞག་གཅིག་ལ་འཆར་རོ༔

ཡང་བྱང་ཕྱོགས་སུ་བྱ་གྲུབ་ཡེ་ཤེས་ཀྱི་རང་བཞིན་ལས་ཀྱི་ལྷ་མོ་དམ་ཚིག་སྒྲོན་མའི་ངོ་བོ་རླུང་རྣམ་དག་གི་འབྱུང་ཆེན་འོད་ལྗང་གུ་ཤིན་ཏུ་གསལ་བ་མཛེས་པ༔ འོད་འཚེར་པ༔ མིག་གིས་མི་བཟོད་པ༔ རྒྱ་ཆེ་བ་བྱང་ཕྱོགས་ཐམས་ཅད་འགེབས་པ༔ འོད་ཟེར་བསྣོལ་མ་དང་༔ གྱེན་བསྒྲེང་དུ་ཡོད་པ༔ རྩིབ་ཤར་དུ་ཡོད་པ༔ མ་ངེས་པ་མགུལ་བཞིན་པ༔ ཕྱི་ནང་ཟང་ཐལ་པ༔ ལྡེམ་བཞིན་དུ༔ མེར་བཞིན་དུ་ཡོད་པ༔ མནན་ན་ནེམ་པར་སྣང་༔ བཏེགས་ན་སྤར་བར་སྣང་༔ ཤིན་ཏུ་ཡིད་འཕྲོག་པ༔ ལྷུན་བརྗིད་པའོ༔ དཔག་ཡས་དམིགས་སུ་མེད་པ༔ དཔང་མཐོ་ལ་རྩེ་མོ་ཡངས་པའོ༔ དེ་འདྲ་བསམ་གཏན་གྱི་ཞག་གཅིག་ལ་འཆར་རོ༔

ཡང་སྟེང་འོག་དབུས་ཀྱི་ཆ་ཐམས་ཅད་ཆོས་དབྱིངས་ཡེ་ཤེས་ཀྱི་རང་བཞིན་སངས་རྒྱས་མཁའ་འགྲོའི་ངོ་བོ་ནམ་མཁའ་རྣམ་དག་གི་འབྱུང་ཆེན་འོད་གདངས་མཐིང་ཀ་ཤིན་ཏུ་གསལ་བ་མཛེས་པ༔ འོད་འཚེར་པ༔ མིག་གིས་མི་བཟོད་པ༔ རྒྱ་ཆེ་བ་སྟེང་འོག་ཐམས་ཅད་འགེབས་པ༔ འོད་ཟེར་བསྣོལ་མ་དང་༔ གྱེན་བསྒྲེང་དུ་ཡོད་པ༔ རྩིབ་ཤར་དུ་ཡོད་པ༔ མ་ངེས་པ་མགུལ་བཞིན་པ༔ ཕྱི་ནང་ཟང་ཐལ་པ༔ ལྡེམ་བཞིན་དུ༔ མེར་བཞིན་དུ་ཡོད་པ༔ མནན་ན་ནེམ་པར་སྣང་༔ བཏེགས་ན་སྤར་བར་སྣང་༔ ཤིན་ཏུ་ཡིད་འཕྲོག་པ༔ ལྷུན་བརྗིད་པའོ༔ དཔག་ཡས་དམིགས་སུ་མེད་པ༔ དཔང་མཐོ་ལ་རྩེ་མོ་ཡངས་པའོ༔ དེ་འདྲ་བསམ་གཏན་གྱི་ཞག་ལ་འཆར་རོ༔ འོད་དེ་དག་ཀྱང་མ་འབྱར་ལ་མ་རེག་པ་སོ་སོ་ནས་ཁ་དོག་རང་གསལ་བའོ༔ དེ་དག་ཀྱང་ཡེ་ནས་ཆོས་ཉིད་ལ་དྲི་མ་མེད་པས་དཀར་བོ༔ ཡོན་ཏན་རྫོགས་པས་སེར་བོ༔ ཆགས་པ་བྲལ་བས་དམར་བོ༔ ཕྲིན་ལས་བཞི་རྫོགས་པས་ལྗང་གུ༔ ལྷུན་གྲུབ་ཀྱི་ཆོས་ཉིད་ཡེ་ནས་རྫོགས་པས་མཐིང་ཀའོ༔ དེ་ནས་དེ་རེ་རེ་ན་དང་མཚམས་རྣམས་སུ་ཡང་རིགས་ཀྱི་ཁ་དོག་ལྔ་ལྔ་ནང་གསལ་དུ་མ་འདྲེས་པར་ཡོད་ཀྱང་གཅིག་གིས་གཅིག་མི་སྒྲིབ་པ་ཞིག་དུ་འགྱུར་བ་ནི་འོད་གསལ་སྣ་ཚོགས་ཀྱི་བར་དོ་ཟེར་རོ༔

དེ་ནས་འོད་དེ་དག་ལ་ཐིག་ལེའི་བརྒྱན་པར་འཆར་ཏེ༔ དེ་ཡང་ཤར་ན་དཀར་པོ་ལས་གཞིར་ཆེ་བས་ཐིག་ལེ་ལྔ་ཚོམ་གྱིས་བརྒྱན་པ་ཁ་དོག་སྣ་ལྔ་ཤིན་ཏུ་མཛེས་པ་འཚེར་བ༔ བཀྲག་པ༔ མེར་བ༔ འགུལ་འཕྲིག༔ ཟེར་འཕྲོ་བ་འཆར་རོ༔

ལྷོ་ཕྱོགས་ན་སེར་བོ་གཞིར་ཆེ་བས་ཐིག་ལེ་ལྔ་ཚོམ་གྱིས་བརྒྱན་ཁ་དོག་སྣ་ལྔ་ཤིན་ཏུ་མཛེས་པ་འཚེར་བ༔ བཀྲག་པ༔ མེར་བ༔ འགུལ་འཕྲིག༔ ཟེར་འཕྲོ་བ་འཆར་རོ༔ ༈ ནུབ་ཕྱོགས་ན་དམར་བོ་གཞིར་ཆེ་བས་ཐིག་ལེ་ལྔ་ཚོམ་གྱིས་བརྒྱན་པ་ཁ་དོག་སྣ་ལྔ་ཤིན་ཏུ་མཛེས་པ་འཚེར་བ༔ བཀྲག་པ༔ མེར་བ༔ འགུལ་འཕྲིག༔ ཟེར་འཕྲོ་བ་འཆར་རོ༔

བྱང་ཕྱོགས་ན་ལྗང་གུ་གཞིར་ཆེ་བས་ཐིག་ལེ་ལྔ་ཚོམ་གྱིས་བརྒྱན་པ་ཁ་དོག་སྣ་ལྔ་ཤིན་ཏུ་མཛེས་པ་འཚེར་བ༔ བཀྲག་པ༔ མེར་བ༔ འགུལ་འཕྲིག༔ ཟེར་འཕྲོ་བ་འཆར་རོ༔ དབུས་ཕྱོགས་ན་མཐིང་ཀ་གཞིར་ཆེ་བས་ཐིག་ལེ་ལྔ་ཚོམ་གྱིས་བརྒྱན་པ་ཁ་དོག་སྣ་ལྔ་ཤིན་ཏུ་མཛེས་པ་འཚེར་བ༔ བཀྲག་པ༔ མེར་བ༔ འགུལ་འཕྲིག༔ ཟེར་འཕྲོ་བ་འཆར་རོ༔ ཐམས་ཅད་ཀྱང་བསམ་གཏན་གྱི་ཞག་རེ་ལ་འཆར་རོ༔ དེ་ནི་ཐིག་ལེའི་བར་དོ་ཡིན་ནོ༔

དེའི་འོད་གསལ་གྱི་བར་དོ་བཤད་ཟིན་ནས༔ ད་ནི་ཟུང་འཇུག་གི་བར་དོ་འཆད་དེ༔ དེ་ལ་ཐུགས་ཀྱི་བར་དོ༔ སྐུའི་བར་དོ༔ གསུང་གི་བར་དོ༔ ཡོན་ཏན་གྱི་བར་དོ༔ ཕྲིན་ལས་ཀྱི་བར་དོ་སྟེ་ལྔ་ལ༔ ཞི་ཁྲོའི་དབྱེ་བས་བཅུར་འགྱུར་རོ༔ དེ་ལ་སྔ་བར་ཞི་བ་འཆར་བ་དང་ཁྲོ་བོ་འཆར་བ་གཉིས་ལས་འདིར་ཞི་བ་འཆར་བའི་དབང་དུ་བྱ་བ་སྟེ༔ དང་པོ་ལ་ཐུགས་ཞི་བའི་དཀྱིལ་འཁོར་འཆར་ཏེ༔ དེ་ཡང་ཐིག་ལེ་སྟོང་བའི་སྒྲོན་མ་མཐིང་ཀ་ཁྱབ་པ་ཆེན་པོའི་འོད་ཀྱི་དབུས་སུ་ལྔ་ཚོམས་སུ་བཀྲ་བའི་ནང་དུ་སེང་གེ་བརྒྱད་དང་རིན་ཆེན་ཉི་མ་ཟླ་བ་པདྨ་སྟེ་གདན་ལྔ་བརྩེགས་ཀྱི་སྟེང་དུ་རྣམ་པར་སྣང་མཛད་ཀྱི་སྐུ་ཡུམ་དབྱིངས་ཕྱག་མ་དང་བཅས་པ་གྲངས་མེད་བསམ་གྱིས་མི་ཁྱབ་པ་འཆར་བའི་ཐུགས་ཀར་རྫོགས་པའི་རིགས་ཆུང་ལྔ་ཡབ་དང་བཅས་པ༔ ཡུམ་དང་བཅས་པ༔ རྒྱན་དང་བཅས་པ༔ ཆ་ལུགས་ཞི་བ༔ གསལ་བ་འཚེར་བ༔ ལྷུན་སྡུག་པ༔ མཉེན༔ ལྕུགས༔ འཁྲིལ་ལྡེམ༔ གཞོན་ཚུལ༔ གསལ་འཚེར་གཟི་བརྗིད་འོད་ཟེད་འཕྲོ་བ་སྟེ༔ ཞི་བའི་ཚུལ་དགུ་དང་༔ རིན་པོ་ཆེའི་རྒྱན་བརྒྱད༔ དར་གྱི་ཆས་གོས་ལྔ་ལ་སོགས་པ་ཞི་བའི་ཆ་ལུགས་ཅན༔ ཁ་དོག་མཐིང་ཀ་རྒྱན་དང་བཅས་པ༔ དེ་ཡང་དང་པོ་ཕྱེད་སྐུ༔ གཉིས་པ་རང་རྐྱང་༔ གསུམ་པ་རྒྱན་དང་བཅས༔ བཞི་བར་ཡུམ་དང་བཅས་ནས་རིམ་པར་རྒྱས་པར་འགྱུར་ལ༔ གཙོ་བོ་ཁྲུ་སུམ་ཅུ་རྩ་གཉིས༔ འཁོར་རྣམས་དེའི་ཕྱེད་ཕྱེད་པ༔ གཙོ་བོ་གཙོ་བོ་ལས་མི་ཆེ་བ༔ འཁོར་འཁོར་ལས་མི་ཆུང་བར་མཉམ་པར་སྣང་ངོ་༔

གཉིས་པ་སྐུ་ཞི་བའི་དཀྱིལ་འཁོར་འཆར་ཏེ༔ དེ་བཞིན་འོད་དང་ཐིག་ལེ་སྟོང་སྒྲོན་ལྔ་ཚོམ་ལྔ་ཚོམ་གྱི་བཀྲ་བའི་ནང་དུ༔ གླང་ཆེན་རིན་ཆེན་ཉི་ཟླ་པདྨ་སྟེ་གདན་ལྔ་བརྩེགས་ཀྱི་སྟེང་དུ་རྡོ་རྗེ་མི་བསྐྱོད་པའི་སྐུ་གྲངས་མེད་ཡུམ་སངས་རྒྱས་སྤྱན་དང་བཅས་པ་བསམ་གྱིས་མི་ཁྱབ་པ་འཆར་བའི་ཐུགས་ཀར་རྫོགས་པའི་རིགས་ཆུང་ལྔ་ཡབ་དང་བཅས་པ༔ ཡུམ་དང་བཅས་པ༔ རྒྱན་དང་བཅས་པ༔ ཆ་ལུགས་ཞི་བ༔ གསལ་བ་འཚེར་བ༔ ལྷུན་སྡུག་པ༔ མཉེན༔ ལྕུགས༔ འཁྲིལ་ལྡེམ༔ གཞོན་ཚུལ༔ གསལ་འཚེར་གཟི་བརྗིད་འོད་ཟེར་འཕྲོ་བ་སྟེ༔ ཞི་བའི་ཚུལ་དགུ་དང་༔ རིན་པོ་ཆེའི་རྒྱན་བརྒྱད༔ དར་གྱི་ཆས་གོས་ལྔ་ལ་སོགས་པ་ཞི་བའི་ཆ་ལུགས་ཅན༔ ཁ་དོག་དཀར་པོ་རྒྱན་དང་བཅས་པ༔ དེ་ཡང་དང་པོ་ཕྱེད་སྐུ༔ གཉིས་པ་རང་རྐྱང་༔ གསུམ་པ་རྒྱན་དང་བཅས་པ༔ བཞི་པ་ཡུམ་དང་བཅས་ནས་རིམ་པར་རྒྱས་པར་འགྱུར་ལ་གཙོ་བོ་ཁྲུ་སུམ་ཅུ་རྩ་གཉིས༔ འཁོར་རྣམས་དེའི་ཕྱེད་ཕྱེད་པ༔ གཙོ་བོ་གཙོ་བོ་ལས་མི་ཆེ་བ༔ འཁོར་འཁོར་ལས་མི་ཆུང་བར་མཉམ་པར་སྣང་ངོ་༔

གསུམ་པ་ལ་ཡོན་ཏན་ཞི་བའི་དཀྱིལ་འཁོར་སྣང་བ་ནི༔ དེ་བཞིན་དུ་འོད་དང་ཐིག་ལེ་སྟོང་སྒྲོན་ལྔ་ཚོམ་གྱིས་བཀྲ་བའི་ནང་དུ༔ རྟ་མཆོག་རིན་ཆེན་ཉི་ཟླ་པདྨ་སྟེ་གདན་ལྔ་བརྩེགས་ཀྱི་སྟེང་དུ་རིན་ཆེན་འབྱུང་ལྡན་གྱི་སྐུ་གྲངས་མེད་པ་ཡུམ་མ་མ་ཀི་དང་བཅས་པ་བསམ་གྱིས་མི་ཁྱབ་པར་འཆར་བའི་ཐུགས་ཀར་རྫོགས་པའི་རིགས་ཆུང་ལྔ་ཡབ་དང་བཅས་པ༔ ཡུམ་དང་བཅས་པ༔ རྒྱན་དང་བཅས་པ༔ ཆ་ལུགས་ཞི་བ༔ གསལ་བ་འཚེར་བ༔ ལྷུན་སྡུག་པ༔ མཉེན༔ ལྕུགས༔ འཁྲིལ་ལྡེམ༔ གཞོན་ཚུལ༔ གསལ་འཚེར་གཟི་བརྗིད་འོད་ཟེད་འཕྲོ་བ་སྟེ༔ ཞི་བའི་ཚུལ་དགུ་དང་༔ རིན་པོ་ཆེའི་རྒྱན་བརྒྱད༔ དར་གྱི་ཆས་གོས་ལྔ་ལ་སོགས་པ་ཞི་བའི་ཆ་ལུགས་ཅན༔ ཁ་དོག་སེར་པོ་རྒྱན་དང་བཅས་པ༔ དེ་ཡང་དང་པོ་ཕྱེད་སྐུ༔ གཉིས་པ་རང་རྐྱང་༔ གསུམ་པ་རྒྱན་དང་བཅས༔ བཞི་བར་ཡུམ་དང་བཅས་ནས་རིམ་པར་རྒྱས་པར་འགྱུར་ལ༔ གཙོ་བོ་ཁྲུ་སུམ་ཅུ་རྩ་གཉིས༔ འཁོར་རྣམས་དེའི་ཕྱེད་ཕྱེད་པ༔ གཙོ་བོ་གཙོ་བོ་ལས་མི་ཆེ་བ༔ འཁོར་འཁོར་ལས་མི་ཆུང་བར་མཉམ་པར་སྣང་ངོ་༔

བཞི་པ་གསུང་ཞི་བའི་དཀྱིལ་འཁོར་ནི༔ དེ་བཞིན་དུ་སྟོང་སྒྲོན་ལྔ་ཚོམ་གྱི་བཀྲ་བའི་ནང་དུ༔ རྨ་བྱ་རིན་ཆེན་ཉི་ཟླ་པདྨ་སྟེ་གདན་ལྔ་བརྩེགས་ཀྱི་སྟེང་དུ་སྣང་བ་མཐའ་ཡས་ཀྱི་སྐུ་གྲངས་མེད་པ་ཡུམ་གོས་དཀར་མོ་དང་བཅས་པ་བསམ་གྱིས་མི་ཁྱབ་པ་འཆར་བའི་ཐུགས་ཀར་རྫོགས་པའི་རིགས་ཆུང་ལྔ་ཡབ་དང་བཅས་པ༔ ཡུམ་དང་བཅས་པ༔ རྒྱན་དང་བཅས་པ༔ ཆ་ལུགས་ཞི་བ༔ གསལ་བ་འཚེར་བ༔ ལྷུན་སྡུག་པ༔ མཉེན༔ ལྕུགས༔ འཁྲིལ་ལྡེམ༔ གཞོན་ཚུལ༔ གསལ་འཚེར་གཟི་བརྗིད་འོད་ཟེད་འཕྲོ་བ་སྟེ༔ ཞི་བའི་ཚུལ་དགུ་དང་༔ རིན་པོ་ཆེའི་རྒྱན་བརྒྱད༔ དར་གྱི་ཆས་གོས་ལྔ་ལ་སོགས་པ་ཞི་བའི་ཆ་ལུགས་ཅན༔ ཁ་དོག་དམར་རྒྱན་དང་བཅས་པ༔ དེ་ཡང་དང་པོ་ཕྱེད་སྐུ༔ གཉིས་པ་རང་རྐྱང་༔ གསུམ་པ་རྒྱན་དང་བཅས༔ བཞི་བར་ཡུམ་དང་བཅས་ནས་རིམ་པར་རྒྱས་པར་འགྱུར་ལ༔ གཙོ་བོ་ཁྲུ་སུམ་ཅུ་རྩ་གཉིས༔ འཁོར་རྣམས་དེའི་ཕྱེད་ཕྱེད་པ༔ གཙོ་བོ་གཙོ་བོ་ལས་མི་ཆེ་བ༔ འཁོར་འཁོར་ལས་མི་ཆུང་བར་མཉམ་པར་སྣང་ངོ་༔

ལྔ་པ་ཕྲིན་ལས་ཞི་བའི་དཀྱིལ་འཁོར་ནི༔ ཡང་སྟོང་སྒྲོན་མ་གསལ་བའི་དབུས་བྱང་ཕྱོགས་སུ་རིན་ཆེན་ཤང་ཤང་ཉི་ཟླ་པདྨའི་གདན་ལ་བཅོམ་ལྡན་འདས་དོན་ཡོད་གྲུབ་པ་ཡུམ་དམ་ཚིག་སྒྲོལ་མ་དང་བཅས་པ་བསམ་གྱིས་མི་ཁྱབ་པ་འཆར་བའི་ཐུགས་ཀར་རྫོགས་པའི་རིགས་ཆུང་ལྔ་ཡབ་དང་བཅས་པ༔ ཡུམ་དང་བཅས་པ༔ རྒྱན་དང་བཅས་པ༔ ཆ་ལུགས་ཞི་བ༔ གསལ་བ་འཚེར་བ༔ ལྷུན་སྡུག་པ༔ མཉེན༔ ལྕུགས༔ འཁྲིལ་ལྡེམ༔ གཞོན་ཚུལ༔ གསལ་འཚེར་གཟི་བརྗིད་འོད་ཟེད་འཕྲོ་བ་སྟེ༔ ཞི་བའི་ཚུལ་དགུ་དང་༔ རིན་པོ་ཆེའི་རྒྱན་བརྒྱད༔ དར་གྱི་ཆས་གོས་ལྔ་ལ་སོགས་པ་ཞི་བའི་ཆ་ལུགས་ཅན༔ ལྗང་གུའི་ཁ་དོག་ཅན་རྒྱན་དང་བཅས་པ༔ དེ་ཡང་དང་པོ་ཕྱེད་སྐུ༔ གཉིས་པ་རང་རྐྱང་༔ གསུམ་པ་རྒྱན་དང་བཅས༔ བཞི་བར་ཡུམ་དང་བཅས་ནས་རིམ་པར་རྒྱས་པར་འགྱུར་ལ༔ གཙོ་བོ་ཁྲུ་སུམ་ཅུ་རྩ་གཉིས༔ འཁོར་རྣམས་དེའི་ཕྱེད་ཕྱེད་པ༔ གཙོ་བོ་གཙོ་བོ་ལས་མི་ཆེ་བ༔ འཁོར་འཁོར་ལས་མི་ཆུང་བར་མཉམ་པར་སྣང་ངོ་༔ རིགས་ལྔ་རེ་རེའི་མཐའ་བསྐོར་དུ་ཕྱོགས་མཚམས་བརྒྱད་དེ༔ སེམས་དཔའ་སེམས་མ་བཅུ་དྲུག་དང་སྒོ་བ་ཡབ་ཡུམ་བརྒྱད༔ དེའི་ཁྱམས་སུ་སངས་རྒྱས་སྟོང་གི་དཀྱིལ་འཁོར༔ དེའི་ཡུམ་ལྔའི་ཐུགས་ཀ་ནས་མཁའ་འགྲོ་བྱེ་བ་ས་ཡའི་གཙོ་མོ་རྫོགས་ལ༔ ཁྱམས་གྱི་ནང་གྲུ་ཆད་ཀྱི་ཕྱོགས་འཁོར་ལ་མཁའ་འགྲོ་བྱེ་བ་ས་ཡ༔ དཀྱིལ་འཁོར་མ་འདྲེས་ཤིན་ཏུ་ཕྲ་བ་ཏིལ་འབྲུ་བས་ཞིབ་པར་སྣང་ངོ་༔ དེ་དུས་ཙ་ན་རང་ལུས་ཀྱང་འོད་དུ་གསལ་བ་དང་༔ ཟང་ཐལ་སྒྲིབ་བྲལ་དུ་དག་པ་དང་༔ རྒྱལ་པོ་རྣམས་སྐྱིལ་ཀྲུང་༔ རྒྱལ་མོ་རྣམས་པད་སྐྱིལ༔ བློན་པོ་ཕོ་མོ་རྣམས་རྟ་བབས་བསྣོལ་མར་གྱུར་པ༔ འོད་ཟེར་གྱིས་སྟོང་གསུམ་སྣང་བ་འགོགས་པ་དང་༔ དེའི་སྐུ་ལ་དགའ་ན་འདོད་པར༔ འོད་ལ་བདེ་ན་གཟུགས༔ ཉམས་སྟོང་གསལ་ལས་གཟུགས་མེད་པར་འཁྲུལ་རྒྱུར་འགྲོ་བའམ༔ སྐྲག་ནས་འདམ་ཀར་སྡང་བའོ༔ དེ་ནས་ཡང་དག་པར་དེ་དག་རེ་རེའང་བསམ་གཏན་གྱི་ཞག་རེ་འཆར་རོ༔

གཉིས་པ་ལོངས་སྐུ་ཁྲོ་བོའི་འཆར་ཚུལ་ནི༔ དབྱིངས་ཐིག་མི་མགོ་སྐམ་རློན་རྙིད་པས་མཁར་ཐབས་ཕྱི་ནང་ཉིས་རིམ་གྱི་ནང་དུ༔ བྱོལ་སོང་གཙོ་བརྒྱད་པདྨ་ཉི་མ་ཏི་ར་ཕོ་མོ་སྤྱི་ཆིངས་སུ་བརྫིས་པས༔ ཁྲོ་བོ་རོལ་བའི་ཚོགས་ཆེན་པོ་ཆེ་མཆོག་དཔལ་དགུའི་ལྷ་གཙོ་འཁོར་ཡོངས་སུ་རྫོགས་པ་དང་༔ ཁྱད་པར་དུ་སྐུ་གསུང་ཐུགས་ཡོན་ཏན་ཕྲིན་ལས་ཀྱི་ཞི་བའི་ལྷ་ཚོགས་རྣམས་ཁྲོས་པའི་རང་གདངས༔ ཞག་དང་པོ་ལ་བུདྡྷ་རིགས་ཀྱི་ལྷ་ཚོགས་སྐུ་མདོག་སྨུག་ནག་མེ་རི་དང་མེ་དཔུང་འབར་འཁྲིགས་བསྣོལ་འཛིང་གི་དབུས་སུ་ཡོད་པ༔ ཁྲོ་ཚུལ་དྲུག་ཅུས་བརྒྱན་པ༔ ཆེ་བ་ནི་རི་རབ་ཙམ༔ ཆུང་བ་ཉུང་འབྲུ་ཙམ༔ ཤིན་ཏུ་མང་པོ་མགོ་བརྙན་སྣ་ཚོགས་པས་མཚོན་ཆ་སྣ་ཚོགས་ཐོགས་པ༔ རང་ཉིད་གང་དུ་འགྲོ་བའི་མདུན་ནས་བལྟས་པ་དང་༔ བདས་པ་དང་༔ བརྡེག་ཆ་སྣ་ཚོགས་པས་བརྡེག་པར་སྣང་བ༔ འོད་ཟེར་མཚོན་ཆ་འདྲ་བ་སྙིང་ལ་གཟིར་བ༔ འོད་ཀྱི་ནང་ན་ད་ལྟ་མཁའ་འགྲོའི་སྒྲ་དེ༔ འབྲུག་སྟོང་དུས་གཅིག་ལ་ལྡིར་བ་ལྟ་བུ༔ སོད་ཅིག༔ རྒྱོབས་ཤིག༔ ཟུངས་ཤིག༔ རྡུངས་ཤིག༔ ཆིངས་ཤིག༔ ཟོ་ཞིག༔ གཏུབས་ཤིག་གི་སྒྲ་མི་སྙན་པ་སྣ་ཚོགས་པས་སྐྱི་བུང་བྱེད་པ༔ འོད་ཀྱིས་དངངས༔ སྒྲ་ཡིས་འཇིགས༔ ཟེར་གྱིས་སྐྲག་གོ༔ དེ་ཡང་མ་ཤེས་པ་རྣམས་ལ་འདིར་བདུད་དང་གཤིན་རྗེ་ལ་སོགས་པར་སྣང་ནས་ལྡོག་པའི་ས་ཡོད་དོ༔ དེ་ནི་ཞག་གཅིག་ལ་སྣང་ངོ་༔

ཞག་གཉིས་པ་ལ་སྐུ་བཛྲ་རིགས་ཀྱི་ལྷ་ཚོགས་སྐུ་མདོག་དཀར་པོ་མེ་རི་དང་མེ་དཔུང་འབར་འཁྲིགས་བསྣོལ་འཛིང་གི་དབུས་སུ་ཡོད་པ༔ ཁྲོ་ཚུལ་དྲུག་ཅུས་བརྒྱན་པ༔ ཆེ་བ་ནི་རི་རབ་ཙམ༔ ཆུང་བ་ཉུང་འབྲུ་ཙམ༔ ཤིན་ཏུ་མང་པོ་མགོ་བརྙན་སྣ་ཚོགས་པས་མཚོན་ཆ་སྣ་ཚོགས་ཐོགས་པ༔ རང་ཉིད་གང་དུ་འགྲོ་བའི་མདུན་ནས་བལྟས་པ་དང་༔ བདས་པ་དང་༔ བརྡེག་ཆ་སྣ་ཚོགས་པས་བརྡེག་པར་སྣང་བ༔ འོད་ཟེར་མཚོན་ཆ་འདྲ་བ་སྙིང་ལ་གཟིར་བ༔ འོད་ཀྱི་ནང་ན་ད་ལྟ་མཁའ་འགྲོའི་སྒྲ་དེ༔ འབྲུག་སྟོང་དུས་གཅིག་ལ་ལྡིར་བ་ལྟ་བུ༔ སོད་ཅིག༔ རྒྱོབས་ཤིག༔ ཟུངས་ཤིག༔ རྡུངས་ཤིག༔ ཆིངས་ཤིག༔ ཟོ་ཞིག༔ གཏུབས་ཤིག་གི་སྒྲ་མི་སྙན་པ་སྣ་ཚོགས་པས་སྐྱི་བུང་བྱེད་པ༔ འོད་ཀྱིས་དངངས༔ སྒྲ་ཡིས་འཇིགས༔ ཟེར་གྱིས་སྐྲག་གོ༔ དེ་ཡང་མ་ཤེས་པ་རྣམས་ལ་འདིར་བདུད་དང་གཤིན་རྗེ་ལ་སོགས་པར་སྣང་ནས་ལྡོག་པའི་ས་ཡོད་དོ༔

དེ་ནས་ཞག་གསུམ་པ་ལ་ཡོན་ཏན་རཏྣ་རིགས་ཀྱི་ལྷ་ཚོགས་སྐུ་མདོག་སེར་ནག་མེ་རི་དང་མེ་དཔུང་འབར་འཁྲིགས་བསྣོལ་འཛིང་གི་དབུས་སུ་ཡོད་པ༔ ཁྲོ་ཚུལ་དྲུག་ཅུས་བརྒྱན་པ༔ ཆེ་བ་ནི་རི་རབ་ཙམ༔ ཆུང་བ་ཉུང་འབྲུ་ཙམ༔ ཤིན་ཏུ་མང་པོ་མགོ་བརྙན་སྣ་ཚོགས་པས་མཚོན་ཆ་སྣ་ཚོགས་ཐོགས་པ༔ རང་ཉིད་གང་དུ་འགྲོ་བའི་མདུན་ནས་བལྟས་པ་དང་༔ བདས་པ་དང་༔ བརྡེག་ཆ་སྣ་ཚོགས་པས་བརྡེག་པར་སྣང་བ༔ འོད་ཟེར་མཚོན་ཆ་འདྲ་བ་སྙིང་ལ་གཟིར་བ༔ འོད་ཀྱི་ནང་ན་ད་ལྟ་མཁའ་འགྲོའི་སྒྲ་དེ༔ འབྲུག་སྟོང་དུས་གཅིག་ལ་ལྡིར་བ་ལྟ་བུ༔ སོད་ཅིག༔ རྒྱོབས་ཤིག༔ ཟུངས་ཤིག་རྡུངས་ཤིག༔ ཆིངས་ཤིག༔ ཟོ་ཞིག༔ གཏུབས་ཤིག་གི་སྒྲ་མི་སྙན་པ་སྣ་ཚོགས་པས་སྐྱི་བུང་བྱེད་པ༔ འོད་ཀྱིས་དངངས༔ སྒྲ་ཡིས་འཇིགས༔ ཟེར་གྱིས་སྐྲག་གོ༔ དེ་ཡང་མ་ཤེས་པ་རྣམས་ལ་འདིར་བདུད་དང་གཤིན་རྗེ་ལ་སོགས་པར་སྣང་ནས་ལྡོག་པའི་ས་ཡོད་དོ༔

ཞག་བཞི་པ་ལ་ནི་གསུང་པདྨ་ཧེ་རུ་ཀའི་ལྷ་ཚོགས་སྐུ་མདོག་དམར་ནག་མེ་རི་དང་མེ་དཔུང་འབར་འཁྲིགས་བསྣོལ་འཛིང་གི་དབུས་སུ་ཡོད་པ༔ ཁྲོ་ཚུལ་དྲུག་ཅུས་བརྒྱན་པ༔ ཆེ་བ་ནི་རི་རབ་ཙམ༔ ཆུང་བ་ཉུང་འབྲུ་ཙམ༔ ཤིན་ཏུ་མང་པོ་མགོ་བརྙན་སྣ་ཚོགས་པས་མཚོན་ཆ་སྣ་ཚོགས་ཐོགས་པ༔ རང་ཉིད་གང་དུ་འགྲོ་བའི་མདུན་ནས་བལྟས་པ་དང་༔ བདས་པ་དང་༔ བརྡེག་ཆ་སྣ་ཚོགས་པས་བརྡེག་པར་སྣང་བ༔ འོད་ཟེར་མཚོན་ཆ་འདྲ་བ་སྙིང་ལ་གཟིར་བ༔ འོད་ཀྱི་ནང་ན་ད་ལྟ་མཁའ་འགྲོའི་སྒྲ་དེ༔ འབྲུག་སྟོང་དུས་གཅིག་ལ་ལྡིར་བ་ལྟ་བུ༔ སོད་ཅིག༔ རྒྱོབས་ཤིག༔ ཟུངས་ཤིག༔ རྡུངས་ཤིག༔ ཆིངས་ཤིག༔ ཟོ་ཞིག༔ གཏུབས་ཤིག་གི་སྒྲ་མི་སྙན་པ་སྣ་ཚོགས་པས་སྐྱི་བུང་བྱེད་པ༔ འོད་ཀྱིས་དངངས༔ སྒྲ་ཡིས་འཇིགས༔ ཟེར་གྱིས་སྐྲག་གོ༔ དེ་ཡང་མ་ཤེས་པ་རྣམས་ལ་འདིར་བདུད་དང་གཤིན་རྗེ་ལ་སོགས་པར་སྣང་ནས་ལྡོག་པའི་ས་ཡོད་དོ༔

དེ་ནས་ཞག་ལྔ་པ་ལ་ཕྲིན་ལས་ཀརྨ་རིགས་ཀྱི་ཁྲོ་བོ་སྐུ་མདོག་ལྗང་གུ་མེ་རི་དང་མེ་དཔུང་འབར་འཁྲིགས་བསྣོལ་འཛིང་གི་དབུས་སུ་ཡོད་པ༔ ཁྲོ་ཚུལ་དྲུག་ཅུས་བརྒྱན་པ༔ ཆེ་བ་ནི་རི་རབ་ཙམ༔ ཆུང་བ་ཉུང་འབྲུ་ཙམ༔ ཤིན་ཏུ་མང་པོ་མགོ་བརྙན་སྣ་ཚོགས་པས་མཚོན་ཆ་སྣ་ཚོགས་ཐོགས་པ༔ རང་ཉིད་གང་དུ་འགྲོ་བའི་མདུན་ནས་བལྟས་པ་དང་༔ བདས་པ་དང་༔ བརྡེག་ཆ་སྣ་ཚོགས་པས་བརྡེག་པར་སྣང་བ༔ འོད་ཟེར་མཚོན་ཆ་འདྲ་བ་སྙིང་ལ་གཟིར་བ༔ འོད་ཀྱི་ནང་ན་ད་ལྟ་མཁའ་འགྲོའི་སྒྲ་དེ༔ འབྲུག་སྟོང་དུས་གཅིག་ལ་ལྡིར་བ་ལྟ་བུ༔ སོད་ཅིག༔ རྒྱོབས་ཤིག༔ ཟུངས་ཤིག༔ རྡུངས་ཤིག༔ ཆིངས་ཤིག༔ ཟོ་ཞིག༔ གཏུབས་ཤིག་གི་སྒྲ་མི་སྙན་པ་སྣ་ཚོགས་པས་སྐྱི་བུང་བྱེད་པ༔ འོད་ཀྱིས་དངངས༔ སྒྲ་ཡིས་འཇིགས༔ ཟེར་གྱིས་སྐྲག་གོ༔ དེ་ཡང་མ་ཤེས་པ་རྣམས་ལ་འདིར་བདུད་དང་གཤིན་རྗེ་ལ་སོགས་པར་སྣང་ནས་ལྡོག་པའི་ས་ཡོད་དོ༔དེ་དག་གི་རྗེས་སུ་ཞག་དྲུག་པ་ལ་ཀོ་རི་བརྒྱད༔ བདུན་པ་ལ་སིངྷ་བརྒྱད༔ བརྒྱད་པ་ལ་སྒོ་མ་བཞི༔ དགུ་པ་ལ་དབང་མོ༔ བཅུ་པར་སྤོར་བྱེད་ཐམས་ཅད་འཆར་བས་ན་གལ་ཏེ་དེ་དག་ལ་སྐྲག་ནས་འབྲོས་པར་བརྩམས་ཀྱང་མི་ཕན་པར་མ་ཟད་གར་ཕྱིན་དུ་སླེབས་སོ༔ དེ་དག་གི་ཐུགས་དཀྱིལ་འཁོར་ཆ་ཚང་རེ་རྫོགས་པའོ༔ ས་མ་ཡཱ༔

དེ་ལ་ཁ་ཅིག་ན་རེ༔ བར་དོ་ཤར་བ་ཐམས་ཅད་བསམ་གཏན་གྱི་ཞག་བདུན་དུ་ཟེར་བས་ཞག་ཐལ་དྲག་ཟེར་ནས་ལོག་པར་ལྟ་སྲིད་མོད་དེ༔ དེ་ལ་གཅིག་ཏུ་མ་ངེས་པ་རབ་ཀྱི་རབ་རྩེ་སྐད་ཅིག་གསུམ་ལ་བསམ་གཏན་གྱི་ཞག་དང་མ་འབྲེལ་བར་གྲོལ་བ་དང་༔ ཐ་མའི་འབྲིང་ཞག་བཅུ་དགུ་ལ་ཐོགས་ཏེ་མ་ངེས་པ་ལ་བློ་གྲོས་ཀྱི་མིག་ཟུམ་པའོ༔ ཟུང་འཇུག་ལས་ཡེ་ཤེས་བཞི་སྦྱོར་སྣང་བ་ནི་འདི་ལྟ་སྟེ༔ དེ་ནས་སྐུའི་སྣང་བ་དེ་དག་ལས་དང་པོ་རྣམ་པར་སྣང་མཛད་ཀྱི་ཐུགས་ཀ་ནས་འོད་ཟེར་སྔོན་པོའི་ཐག་པ་མིག་གིས་བལྟར་མི་བཟོད་པ་གསལ་བ་ཟེར་འཕྲོ་བ་ཞིག་གི་སྟེང་དུ་ཐིག་ལེ་མུ་མུན་གྱི་ཕོར་བ་ཁ་སྦུབ་པ་ལྟ་བུ་ཞིག་གི་སྟེང་ངམ་ནང་ལ་སྔོན་པོ་ཤས་ཆེ་བའི་ཐིག་ལེ་ཁ་དོག་ལྔ་ལྡན་ལྔ་རེས་བརྒྱན་པ༔ དེ་འདྲ་བའི་ཐིག་ལེ་མཐིང་ཀ་དགུ་རེས་བརྒྱན་པའི་འོད་ཀྱི་སྣམ་བུ་དེ་ནི་རྣམ་པར་སྣང་མཛད་ཁོང་སེང་གི་ལམ་ཞེས་བྱ་སྟེ༔ དེ་ཉིད་དུ་ཆོས་དབྱིངས་ཡེ་ཤེས་ཀྱི་འོད་ཡིན་པར་ཤེས་ན་དང་༔ དེ་ཉིད་ལ་འཕོ་བའམ་གང་རུང་གི་ཐུགས་དེ་བཞིན་གཤེགས་པའི་རིགས་སུ་གྲོལ་བར་འགྱུར་བའམ༔ འདི་དང་མཉམ་དུ་དུད་འགྲོའི་ལམ་སྔོན་པོ་ཐལ་མོག་ཅིག་ཡོད་པ་གཉིས་གཤིབ་སྟེ་ཡོང་བས༔ འོད་ཆེན་པོ་དེས་དངངས༔ ཟེར་གྱིས་འཇིགས་ནས༔ འོད་ངན་པ་དེ་ལ་སྔོན་གྱི་དུད་འགྲོ་དུད་འགྲོའི་རིས་ཀྱི་ལྷ་མིན་དུ་སྐྱེ་བའི་ལས་བསགས་པའི་བག་ཆགས་ཀྱིས་དགའ་གདུང་སྐྱེས་ཏེ་ཞེན་ནས་སྐྱེ་བ་འཕེན་པར་འགྱུར་རོ༔ དེའི་སྟེང་དུ་རྡོ་རྗེ་སེམས་དཔའི་ཐུགས་ཀ་ནས་འོད་ཟེར་དཀར་པོའི་ཐག་པ་མིག་གིས་བལྟར་མི་བཟོད་པ་འཚེར་བ་གསལ་བ་ཟེར་འཕྲོ་བ་ཞིག་གི་སྟེང་དུ་ཐིག་ལེ་ཤེལ་གྱི་ཕོར་བ་ཁ་སྦུབ་པ་ལྟ་བུ་ཞིག་གི་སྟེང་ངམ་ནང་ལ་དཀར་པོ་ཤས་ཆེ་བའི་ཐིག་ལེ་ཁ་དོག་ལྔ་ལྡན་ལྔ་རེ་ཡིས་བརྒྱན་པ༔ དེ་འདྲ་བའི་ཐིག་ལེ་དཀར་པོ་དགུ་རེས་བརྒྱན་པའི་འོད་ཀྱི་སྣམ་བུ་དེ་ནི་རྡོ་རྗེ་སེམས་དཔའ་ཁོང་སེང་གི་ལམ་ཞེས་བྱ་སྟེ༔ དེ་ཉིད་མེ་ལོང་ཡེ་ཤེས་ཀྱི་འོད་ཡིན་པར་ཤེས་ན་དང་༔ དེ་ཉིད་ལ་འཕོ་བ་གང་རུང་གི་སྐུ་རྡོ་རྗེ་རིགས་སུ་བྱང་ཆུབ་པར་འགྱུར་རོ༔ དེ་དང་མཉམ་དུ་དམྱལ་བར་སྐྱེ་བའི་འོད་ལམ་དཀར་པོ་ཞིག་ལ་མོག་མོག་པོ་བཀྲག་མེད་པ་ཞིག་འཆར་བ་གཉིས་གཤིབ་སྟེ་ཡོང་བས༔ འོད་ཆེན་པོ་དེས་དངངས༔ ཟེར་གྱིས་འཇིགས་ནས༔ འོད་ངན་པ་དེ་ལ་སྔོན་དམྱལ་བའི་གནས་སུ་སྐྱེ་བའི་ལས་དང་བག་ཆགས་ཀྱིས་དགའ་གདུང་སྐྱེས་ཏེ་ཞེན་ནས་སྐྱེ་བ་འཕེན་པར་འགྱུར་རོ༔ དེའི་སྟེང་དུ་རིན་ཆེན་འབྱུང་ལྡན་གྱི་ཐུགས་ཀ་ནས་འོད་ཟེར་སེར་པོའི་ཐག་པ་མིག་གིས་བལྟར་མི་བཟོད་པ་འཚེར་བ་གསལ་བ་ཟེར་འཕྲོ་བ་ཞིག་གི་སྟེང་དུ་ཐིག་ལེ་སུ་ཝརྞའི་ཕོར་བ་ཁ་སྦུབ་པ་ལྟ་བུའི་སྟེང་ངམ་ནང་ལ་སེར་བོ་ཤས་ཆེ་བའི་ཐིག་ལེ་ཁ་དོག་ལྔ་ལྡན་རེས་བརྒྱན་པ་དེ་འདྲ་བའི་ཐིག་ལེ་སེར་པོ་དགུས་བརྒྱན་པའི་འོད་ཀྱི་སྣམ་བུ་དེ་ནི་རིན་ཆེན་འབྱུང་ལྡན་ཁོང་སེང་གི་ལམ་ཡིན་པས་ན་མཉམ་ཉིད་ཡེ་ཤེས་ཀྱི་འོད་ལམ་ཡིན་པར་ཤེས་ན་དང་༔ དེ་ཉིད་ལ་འཕོ་བས་ཡོན་ཏན་རིན་ཆེན་རིགས་ཀྱི་ཐུགས་སུ་བྱང་ཆུབ་པོ༔ དེ་དང་མཉམ་དུ་ལྷར་སྐྱེ་བའི་བག་ཆགས་ཀྱི་ལམ་སེར་མོག་པ་འོད་མེད་པ་ཞིག་ཡོད་པ་གཉིས་གཤིབ་སྟེ་ཡོང་བས༔ འོད་ཆེན་པོ་དེས་དངངས༔ ཟེར་གྱིས་འཇིགས་ནས༔ འོད་ངན་པ་དེ་ལ་སྔོན་ལྷ་དང་ལྷའི་རིས་སུ་གཏོགས་པའི་ལྷ་མིན་དུ་སྐྱེ་བའི་ལས་དང་བག་ཆགས་ཀྱིས་དགའ་གདུང་སྐྱེས་ཏེ་ཞེན་ནས་སྐྱེ་བ་འཕེན་པར་འགྱུར་རོ༔ དེའི་སྟེང་དུ་སྣང་བ་མཐའ་ཡས་ཀྱི་ཐུགས་ཀ་ནས་འོད་ཟེར་དམར་པོའི་ཐག་པ་མིག་གིས་བལྟར་མི་བཟོད་པ་འཚེར་བ་གསལ་བ་ཟེར་འཕྲོ་བ་ཞིག་གི་སྟེང་དུ་ཐིག་ལེ་པདྨ་རཱ་གའི་ཕོར་བ་ཁ་སྦུབ་པ་ལྟ་བུ་ཞིག་གི་སྟེང་ངམ་ནང་ལ་དམར་པོ་ཤས་ཆེ་བའི་ཐིག་ལེ་ཁ་དོག་ལྔ་ལྡན་ལྔ་རེས་བརྒྱན་པ༔ དེ་འདྲ་བའི་ཐིག་ལེ་དམར་པོ་དགུས་བརྒྱན་པའི་འོད་ཀྱི་སྣམ་བུ་དེ་ནི་སྣང་བ་མཐའ་ཡས་ཁོང་སེང་གི་ལམ་ཞེས་བྱ་སྟེ་སོར་རྟོགས་ཡེ་ཤེས་ཀྱི་འོད་ཡིན་པར་ཤེས་ན་དང་༔ དེ་ཉིད་ལ་འཕོ་བས་གསུང་པདྨའི་རིགས་ཀྱི་ཐུགས་ལ་བྱང་ཆུབ་པར་འགྱུར་རོ༔ གཞན་ཡང་བྱང་ཆུབ་པའི་མི་འགྲོ་བས་འོད་ལམ་ནི༔ དེ་དང་མཉམ་དུ་དམར་སྐྱ་མོག་པོ་ཞིག་ཡོད་པ་ནི་ཡི་དྭགས་ཀྱི་ལས་དང་བག་ཆགས་ཀྱི་ལམ་ཡིན་པས་དེ་ལ་བག་ཆགས་ཡོད་པས་ཞེན་ནས་གཏད་ཆེས་པའི་ཆགས་པས་སྐྱེ་བ་འཕེན་ནོ༔ བྱ་གྲུབ་ཡེ་ཤེས་ཀྱི་སྣང་བ་ནི་དངོས་སུ་མི་སྣང་བར་ཡང་བཞག་པས་ལྷ་མིན་སྟོད་སྨད་བསྒོས་ཏེ་རྒྱུད་ལྔར་བསྡུས་པའོ༔ ཡང་པདྨ་ང་ཡི་ཐིག་ལེ་ཀུན་གསལ་དུ་བསྟན་པ་ལྟར་ཡེ་ཤེས་ལྔ་སྦྱོར་དུ་བཤད་ན༔ དེའི་སྟེང་དུ་དོན་ཡོད་གྲུབ་པའི་ཐུགས་ཀ་ནས་འོད་ཟེར་ལྗང་གུའི་ཐག་པ་མིག་གིས་བལྟར་མི་བཟོད་པ༔ འཚེར་བ༔ གསལ་བ༔ ཟེར་འཕྲོ་བ་ཞིག་གི་སྟེང་དུ་ཐིག་ལེ་མར་གད་ཀྱི་ཕོར་བ་ཁ་སྦུབ་པ་ལྟ་བུའི་སྟེང་ངམ་ནང་ལ་ལྗང་གུ་ཤས་ཆེ་བའི་ཐིག་ལེ་ཁ་དོག་ལྔ་ལྡན་རེས་བརྒྱན་པ༔ དེ་འདྲ་བའི་ཐིག་ལེ་ལྗང་གུ་དགུ་དགུས་བརྒྱན་པའི་འོད་ཀྱི་སྣམ་བུ་དེ་ནི་དོན་ཡོད་གྲུབ་པ་ཁོང་སེང་གི་ལམ་ཡིན་པས་ན་བྱ་གྲུབ་ཡེ་ཤེས་ཀྱི་འོད་ལམ་ཡིན་པར་ཤེས་ན་དང་༔ དེ་ཉིད་ལ་འཕོ་བས་ཕྲིན་ལས་ཀྱི་རིགས་ཀྱི་ཐུགས་ལ་བྱང་ཆུབ་པར་འགྱུར་རོ༔ དེ་དང་མཉམ་དུ་ལྷ་མིན་ཏུ་སྐྱེ་བའི་བག་ཆགས་ཀྱི་ལམ་ལྗང་མོག་པའི་འོད་མེད་པ་ཞིག་ཡོད་པ་གཉིས་གཤིབ་དེ་ཡོང་བས༔ འོད་ཆེན་པོ་དེས་དངངས༔ ཟེར་གྱིས་འཇིགས་ནས༔ འོད་ངན་པ་དེ་ལ་སྔོན་གྱི་ལྷ་མིན་དུ་སྐྱེ་བའི་བག་ཆགས་བསགས་པའི་དབང་གིས་དགའ་གདུང་སྐྱེས་ཏེ་ཞེན་ནས་སྐྱེ་བ་འཕེན་པར་འགྱུར་རོ༔ དེའི་རྗེས་སུ་ལོངས་སྐུ་ཐམས་ཅད་ཀྱི་འཆར་གཞི་ཐོག་མའི་སངས་རྒྱས་ཀུན་ཏུ་བཟང་པོ་སྐུ་མདོག་མཐིང་ནག་ཡུམ་ཀུན་ཏུ་བཟང་མོ་དང་མཉམ་པར་སྦྱོར་བ་ཞིག་གི་ཐུགས་ཀ་ནས་ཟུང་འཇུག་གི་དུས་སུ་ཞག་གཅིག་ལ་འོད་སྣ་ལྔ་འཕྲོ་བར་འགྱུར་བ་དང་༔ ཡེ་ཤེས་ཀྱི་དུས་སུ་འོད་ལྔའི་གདུགས་གུར་ཐབས་རྨ་བྱའི་རྒྱལ་མཚན་ལྟ་བུར་གྱུར་བ་ལ་མིག་གིས་བལྟར་མི་བཟོད༔ འཚེར་བ༔ གསལ་བ༔ ཟེར་འཕྲོ་བ་ཞིག་གི་སྟེང་དུ་ཐིག་ལེ་ཁ་དོག་སྣ་ལྔའི་ཕོར་བ་ཁ་སྦུབ་པ་ལྟ་བུ་ཞིག་གི་སྟེང་ངམ་ནང་ལ་སྣ་ལྔའི་ཐིག་ལེ་ཁ་དོག་ལྔ་ལྡན་ལྔ་རེས་བརྒྱན་པ༔ དེ་འདྲ་བའི་ཐིག་ལེ་སྣ་ལྔ་བ་དགུས་བརྒྱན་པའི་འོད་ཀྱི་སྣམ་བུ་དེ་ནི་ཀུན་ཏུ་བཟང་པོ་ཁོང་སེང་གི་ལམ་ཞེས་བྱ་སྟེ་རང་བྱུང་ཡེ་ཤེས་ཀྱི་འོད་ཡིན་པར་ཤེས་ན་དང་༔ དེ་ཉིད་ལ་འཕོ་བས་དྲུག་པ་རྡོ་རྗེ་འཆང་ཆེན་པོའི་ཐུགས་ལ་བྱང་ཆུབ་པར་འགྱུར་རོ༔ དེ་དང་མཉམ་དུ་མི་ཡི་བག་ཆགས་ཀྱི་ལམ་ཁ་དོག་སྣ་ཚོགས་མོག་མོག་པོ་ཞིག་འཆར་བ་ལ་བག་ཆགས་ཀྱི་དབང་ལས་དགའ་གདུང་སྐྱེས་ཏེ་ཞེན་ནས་སྐྱེ་བ་འཕེན་པར་འགྱུར་རོ༔ གཞན་ཡང་བྱང་ཆུབ་འཁོར་དང་བཅས་པ་ཐམས་ཅད་ཀྱི་ཐུགས་ཀའི་འོད་ལམ་དང་༔ འཇོམས་པ་ཡུམ་དང་བཅས་པའི་ཐུགས་ཀའི་འོད་ལམ་ཡང་མེད་པ་ནི་མིན་ཡང་༔ ཐམས་ཅད་ཀྱང་ཡེ་ཤེས་དྲུག་དུ་འུབ་ཆུབ་པས་རིགས་བསྡུས་པ་ཡིན་ནོ༔ དེ་བཞིན་དུ་ཁྲོ་བོ་ཆེན་པོ་རྣམས་ཀྱི་མཚོན་ཆའི་འོད་ཟེར་རྣམས་ཡང་ཡེ་ཤེས་དྲུག་གི་སྣང་བ་ཡིན་ཡང་ཞིབ་པར་མ་དབྱེ་བ་ཙམ་མོ༔ སངས་རྒྱས་སྟོང་དང་མཁའ་འགྲོ་ཕོ་མོ་གྲངས་མེད་པ་དག་གི་འོད་ཟེར་ཡང་ནི་དེ་བཞིན་ནོ༔ ཡང་ན་ཡེ་ཤེས་བཞི་སྦྱོར་གྱི་རྗེས་སུ༔ རང་ལུས་ལྗང་གུར་གསལ་བའི་སྙིང་ཀ་ནས་ཕྱོགས་བཞིར་དཀར༔ སེར༔ དམར༔ ལྗང་རྣམས་ཀྱི་སྟེང་དུ་གཞན་གསུམ་བརྩེགས་མར་ཡོད་པར་གསུང་བས༔ ལྷོར་དཀར་པོ༔ ནུབ་ཏུ་སེར་པོ༔ བྱང་དུ་དམར་པོ༔ ཤར་དུ་ལྗང་གུ་རྣམས་མི་སྣང་དེ་བཞི་རེ་ལས་མི་སྣང་བར་འོད་གཉིས་འདྲེས་སུ་གྱུར་བ་དང་༔ ཡེ་ཤེས་བཞི་ཀའི་རྩལ་མ་རྫོགས་པས་ན་བཞི་རེ་ལས་མི་སྣང་བ་ནི་ཞིབ་པར་བཤད་པའོ༔ འོ་ན་རྩལ་མ་རྫོགས་བྱ་བ་ཅི་ལ་སྣང་ཟེར་ན༔ ཡང་ན་སྔར་འོད་གསལ་དང་ཚོམ་བུའི་དུས་ཀྱི་འོད་ལྗང་དང་༔ དོན་གྲུབ་ཀྱང་བྱ་བ་གྲུབ་པའི་ཡེ་ཤེས་ཀྱི་སྣང་བ་ཡིན་པར་སུས་འགོག་བསམ་པར་བྱའོ༔

དོན་གསུམ་ ༼ བཞི་དཔྱད། ༽ པ་ཡེ་ཤེས་ཀྱི་རྗེས་སུ་ལྷུན་གྲུབ་ནི༔ འཆར་ལུགས་དང་ཐིམ་ལུགས་གཉིས་ལས༔ དང་པོ་ནི༔ གཞི་སྣང་ཆེན་པོའི་སྣང་བ་ཞེས་བྱ་བ་གོང་གི་ཡེ་ཤེས་ཀྱི་སྣང་བ་དེ་དག་སྟེང་གི་ཆ་ལ་འདུས་ནས་རང་ས་སྟེང་གི་ཀ་དག་གི་སྣང་བའི་ངང་ལས་ཁྲོ་བོའི་ཞིང་ཁམས༔ ཞི་བའི་ཞིང་ཁམས༔ རང་བཞིན་སྤྲུལ་པ་ཕྱེད་སྤྲུལ་དབུགས་འབྱིན་ལྔ༔ དེའི་འོག་ཏུ་འགྲོ་བ་དྲུག་གི་སྣང་བ་བསམ་གྱིས་མི་ཁྱབ་པ་འཆར་བ་སྟེ༔ དང་པོ་ལྷུན་གྲུབ་སྒོ་བརྒྱད་ཀྱི་སྣང་བ་ནི༔ ཐུགས་ལྟར་ཤར་བས་འཁོར་འདས་རྒྱ་ཆད་དུ་མ་སོང་༔འོད་ལྟར་ཤར་བས་སྣང་བ་ཐམས་ཅད་ནང་གསལ༔ སྐུ་ལྟར་ཤར་བས་ཤེས་པས་ཁ་ཕྱིར་མ་ཤོར༔ ཡེ་ཤེས་ལྟར་ཤར་བས་སྣང་བ་ཐམས་ཅད་ཟང་ཐལ༔ གཉིས་མེད་ལྟར་ཤར་བས་རང་གི་ཤེས་པ་རྩེ་གཅིག་ཏུ་གནས༔ མཐའ་གྲོལ་ལྟར་ཤར་བས་མཐའ་གང་ལའང་མི་གནས༔ མ་དག་པ་འཁོར་བའི་སྒོ་ལྟར་ཤར་བས་ཤེས་བྱའི་སྲིད་པའི་འབྱུང་ཁུངས་མ་འགགས༔ དག་པ་ཡེ་ཤེས་ཀྱི་སྒོ་ལྟར་ཤར་བས་ཐམས་ཅད་ཆོས་ཉིད་དུ་འབྲེལ་བའོ༔ སྒོ་བརྒྱད་པོ་དེ་ལས་ལོངས་སྐུའི་དཀྱིལ་འཁོར་ནི་སྔར་ལྟར་ལ༔

གསུམ་པ་སྤྲུལ་སྐུའི་བར་དོ་ནི༔ རང་བཞིན་སྤྲུལ་པ་སྐུའི་སྣང་བ་ཞེས་བྱ་བ་ཕྱོགས་བཞི་ན་རིན་པོ་ཆེ་སྣ་བཞི་ལས་གྲུབ་པའི་ཁང་པ་གྲུ་བཞི་སྒོ་བཞི་ལྡན་པ༔ གཞལ་ཡས་ཁང་གི་བཀོད་པ་ཐམས་ཅད་ཡོངས་སུ་རྫོགས་པ༔ གཞལ་ཡས་ཁང་དེའི་ཕྱི་རོལ་གྱི་ས་གཞི་ཐམས་ཅད་རིན་པོ་ཆེ་སྣ་བཞི་རང་རང་དང་རྒྱུ་མཐུན་པ༔ ཡན་ལག་བརྒྱད་ལྡན་གྱི་རྫིང་བུས་བསྐོར་བ༔ དེའི་ཕྱི་རིམ་ན་མཚོའུ་བརྒྱད་ཡོད་དེ༔ དེའི་ནང་ན་བྱ་སྐད་སྙན་པ་སྣ་ཚོགས་རྩེ་བ༔ རིན་པོ་ཆེ་སྣ་བདུན་གྱི་ལྕགས་རིས་བསྐོར་བ༔ དེ་རྣམས་ཀྱི་དབུས་ན་རིན་པོ་ཆེ་སྣ་བདུན་གྱི་ཁྲི་ཆོས་འཆད་བའི་སྟན་དང་བཅས་ལྡན་པ་ཡོད་དོ༔ དེ་དག་དུ་སྤྲུལ་པའི་སྐུ་རིགས་བཞི༔ སྲོད་ལ་རྒྱུའི་སོགས་ཆོས་ཐུན་བཞི་བཞིར་འཆད་པ་དེ་ན་ཉན་པའི་བྱང་ཆུབ་སེམས་དཔའ་ཐམས་ཅད་ཀྱང་སྐྱེ་བ་གཅིག་གི་ཐོགས་པ་ཤ་སྟག༔ ལོ་ལྔ་བརྒྱ་ཤེས་ཆེར་ཐུབ་པ་ལ་སོགས་པ་ཡོད༔ དེ་ན་གནས་པ་ཐམས་ཅད་ནད་མེད་པས་མཆོག་དུ་བདེ་ལ༔ མེ་ཏོག་སྣ་ཚོགས་ཀྱི་སྤྲུལ་བའི་སྐུ་དེ་དག་ལ་མཆོད་པ༔ ཕྱོགས་བཞི་མཆོད་རྟེན་དང་བཅས་པས་བསྐོར་བ་བཞི་དང་བརྒྱད་ཀྱང་འཆར་རོ༔ འགྲོ་འདུལ་སྤྲུལ་པའི་བར་དོ་ནི༔ དམྱལ་བ༔ ཡི་དྭགས༔ དུད་འགྲོ༔ ལྷ༔ ལྷ་མིན༔ མི་རྣམས་ཀྱི་གནས་དང་སྡུག་བསྔལ་ལ་སོགས་པའང་མཐོང་ལ༔ དེ་དག་དུ་འགྲོ་བ་འདྲེན་པའི་ཐུབ་པ་ཡང་༔ ཆོས་ཀྱི་རྒྱལ་པོ༔ ཁ་འབར་མ༔ རུ་རུ་རྨུགས༔ ཐག་བཟང་རིས༔ དབང་པོ༔ ཤཱཀྱ་ཐུབ་པ་རྣམས་ཀྱང་རང་རང་གི་ཕྱག་མཚན་ཆ་བྱད་དུ་བཅས་ནས་སྣང་བ་ནི་སྣ་ཚོགས་པའོ༔ དེ་ཐམས་ཅད་ཀྱང་རང་སྣང་གཟུགས་བརྙན་ལྟར་སྣང་བའོ༔ དེ་ལྟ་བུའི་ཆོས་ཉིད་ཀྱི་བར་དོ་འདི་ནི་ཡེ་ནས་གཞི་སྣང་ལ་ལྷུན་གྲུབ་ཏུ་ཡོད་པ་ཉིད་དུས་འདིར་ཤར་བ་ཡིན་གྱི༔ མེད་ན་འཆར་དོན་མེད་ལ༔ དེ་ཉིད་རྣལ་འབྱོར་བས་ཏིང་ངེ་འཛིན་གྱི་དཀྱིལ་འཁོར་གྱིས་ཡུལ་དུ་བྱས་པས་ལམ་གཞན་ལས་ནང་རྒྱུད་མྱུར་བའི་ཐ་ཚིག་དང་༔ སེམས་ཅན་ལ་སངས་རྒྱས་ཀྱི་སྙིང་པོ་ཡོད་པར་གསུང་པ་དང་༔ མ་འོངས་བའི་འབྲས་བུ་སྐུ་ལྔ་ལྷུན་གྱིས་གྲུབ་བའི་གོ་འཕང་ཐོབ་རྒྱུ་ཡོད་པའི་རྒྱུ་མཚན་ཡང་དེ་ཡིན༔ འོད་གསལ་ཐོད་རྒལ་དུ་དེ་ཉིད་གཞི་སྙིང་ཀ་ན་ཡེ་ཤེས་སུམ་བརྩེགས་སུ་ཡོད་པའི་རང་ཞལ་གྱི་མཐོང་བ་ཡེ་ཤེས་ཀྱི་རླུང་གི་ཕྱེ་བ་དང་༔ རྒྱུད་སྡེ་གཞན་ནས་ཀྱང་རྟགས་བཅུའི་སྟོང་གཟུགས་ལ་དག་གྲོལ་ངེས་འབྱིན་དུ་བྱེད་པའི་རྒྱུ་མཚན་དེ་ཡིན་ནོ༔

གཉིས་པ་ལྷུན་གྲུབ་ཐིམ་ཚུལ་ནི་ཁོ་བོས་བྱས་པའི་དེ་ཉིད་གསལ་བའི་རྒྱན་བཞིན་ནོ༔ དེ་དག་གིས་ཆོས་ཉིད་ཀྱི་བར་དོའི་སྣང་ལུགས་བཤད་ཟིན་ནོ༔

དོན་བཞི་བ་སྲིད་པ་བར་དོའི་སྣང་ལུགས་བཤད་པ་ལ༔ དེ་ཡི་ཆོས་ཀྱི་ཁྱད་པར་ཉེར་གཉིས་སོགས་བཤད་ཀྱང་༔ འདིར་ནི་ལུས་ཀྱི་སྲིད་པ་རྨི་ལམ་གྱི་སྣང་བ་ལྟར་ས་ཟིན་མེད༔ སེམས་ཀྱི་སྲིད་པ་ཀུན་ཏུ་རྟོག་པ་རླུང་ལྟར་འཚུབས༔ ལུས་སེམས་གཉིས་འདུས་ཀྱི་སྲིད་པ་ཐོགས་མེད་རྫུ་འཕྲུལ་གྱི་ཤུགས་ཅན་སྡུག་བསྔལ་དངངས་སྐྲག་བྱེ་བ་སྟེ་ཡུལ་དྲུག་དགྲར་ལངས་ཀྱི་སྣང་བ༔ ཡ་ང་བའི་གཡང་ས་གསུམ༔ འཇིགས་པའི་སྒྲ་བཞི༔ མ་ངེས་པའི་རྟགས་དྲུག་སྟེ་གསུམ་ལས༔ གཟུགས་ཁམས་དགྲར་ལངས་བའི་དོན་དང་པོ་སྣང་གསུམ་རིམ་པར་མཆེད་དེ༔ ཐོབ་པའི་ནག་ལམ་མུན་པའི་གཡང་ས་གཏི་མུག་གི་རང་བཞིན་གྱིས་བསྐྱེད་པ་མཐོ་ཁྱད་མི་མངོན་པར་ལས་ཀྱི་རླུང་གིས་རྒྱབ་ནས་དེད༔ གོང་དུ་ལྷ་ཚོགས་རྣམས་ཀྱང་རང་སྣང་དུ་མ་ཤེས༔ ཐོག་བརྫིས་སུ་མ་ཆོད་པ་དང་༔ ཐ་ན་འཕོ་བས་ཀྱང་སྟོངས་མ་ཐེབ་པར་འཇིགས་སྐྲག་གིས་ལོག་པར་འཁྲུལ་བའི་དགྲ་གཉེན་མ་ཕྱེད་པ་ལྟར་གྱི་ད་ནི་གཤིན་རྗེའི་སྐྱེས་བུ༔ ལུས་ན་མི་ལུས་འབུམ་ཙམ་ཡོད་པ༔ སྐྲ་དམར་སེར་གྱེན་ལ་ཟེང་བ༔ ཚུགས་འཇལ་འཇུར་ཁྲོ་བོའི་ཉམས་ཅན༔ མཆེ་བ་རི་ཙམ་དུ་གཙིགས་པ༔ མིག་ཁྲག་གིས་བྲིས་པ༔ བ་སྤུ་ཐམས་ཅད་ལྕགས་ཀྱི་རྩངས་ལྟར་རྣོ་བ༔ ལག་ན་དབྱུག་ཏོ་འབར་བ་འཛིན་པ༔ མགོ་བརྒྱ་སྟོང་གྲངས་མེད་པ༔ ལག་པ་བརྒྱ་སྟོང་གྲངས་མེད་པ་མཚོན་ཆ་བརྒྱ་སྟོང་གྲངས་མེད་པར་འཛིན་པ་དང་༔ ཁ་ནས་སོད་རྒྱོབ་གཏུབས་ཆོད་བཟུང་བརྡུངས་ལ་སོགས་འབྱིན་པ་བསམ་གྱིས་མི་ཁྱབ་པ་ཆེ་བ་ལ་འབྲུག་སྟོང་ལྟ་བུ༔ མང་བ་ལ་གྲངས་ཀྱིས་མི་ཆོད་པ༔ ངར་བ་ལ་མགོ་བོ་འགེམས་པ་ལྟ་བུའི་ཚགས་དིར་དུ་འཁྲབ་པ༔ ཁྱད་པར་མི་བསད་པའི་ལན་ཆགས་འདེད་པ་མི་ནག་པོ་མཆེ་བ་གཙིགས་པ་དང་༔ འཕྲོག་བཅོམ་དཀོར་དང་བུ་ལོན་རྙོགས་པ་ལག་པ་ཟེད་པ༔ ཆོ་ངེ་འདོན་པའི་བུད་མེད་མ་རུང་བ༔ གཅན་གཟན་གྱི་རིགས་སྣ་ཚོགས་པ༔ མཆེ་སྡེར་བགྲད་དེ་འབྱུང་བ་ལ་སོགས་པས་དེད་དེ་ལྟུང་བ་དང་རྨས་པ་ན་ཚ་སྡུག་བསྔལ་བཟོད་པར་དཀའ་བ་མྱོང་བ་དང་༔ ཡང་ངོ་བོ་འདོད་ཆགས་ཀྱི་རང་གཟུགས་ཐོབ་པའི་དམར་ལམ་དེ་འཁྲུལ་བ་ལས་བྱུང་བ་དམར་ཟེར་ངེ་བ༔ མཐོ་ཁྱད་མི་མངོན་པ་རུ༔ སྐྱེས་བུ་དང་༔ གཅན་གཟན་དང་༔ སྒྲ་དང་༔ ལས་རླུང་དང་༔ ཤ་དེད་དེ་ལྟ་བུའི་བདས་པས་ལྟུང་བ་དང་རྨས་པ་ན་ཚ་སྡུག་བསྔལ་བཟོད་པར་དཀའ་བ་མྱོང་བ་དང་༔ ཡང་ངོ་བོ་སྣང་བའི་དཀར་ལམ་དེ་ལས་འཁྲུལ་བས་ཞེ་སྡང་ཀྱི་རང་གཟུགས་གཡང་ས་དཀར་ལམ་མེ་བ་ཞིག་ལ་མཐོ་ཁྱད་མི་མངོན་པ་རུ༔ སྐྱེས་བུ་དང་༔ གཅན་གཟན་དང་༔ སྒྲ་དང་༔ ལས་རླུང་དང་༔ ཤ་དེད་དེ་ལྟ་བུའི་བདས་པས༔ ལྟུང་བ་དང་རྨས་པ་ན་ཚ་སྡུག་བསྔལ་བཟོད་པར་དཀའ་བ་མྱོང་བ་དང་༔ ཡང་གཉིས་པ་འཇིགས་པའི་སྒྲ་བཞི་ཞེས་འབྱུང་བཞི་དགྲར་ལངས་ཀྱི་འཁྲུལ་སྣང་ཡང་འདི་ལྟར་འབྱུང་སྟེ༔ དེ་ཡང་ས་ཁམས་དགྲར་ལངས་ཀྱི་ཕྱོགས་ཀྱི་ས་གཞི་ཐམས་ཅད་ཤིག་ཤིག་ཡོམ་ཡོམ་དུ་འགུལ་བརྡེག་ཞིག་པའི་འཐུག་ཆགས་ཀྱི་སྒྲ་རི་བོ་ཞིག་པའི་སྒྲ་ལྟ་བུ་མགོ་བོ་འགས་པ་ཙམ་དང་༔ རྒྱ་མཚོ་ཆེན་པོའི་རླབས་གཡོ་བ་དང་རྫ་བྲག་གི་བར་ནས་བཏོན་པའི་ཆུ་བོའི་གཤང་ཆལ་གྱི་སྒྲ་ལས་བརྒྱ་འགྱུར་གྱི་ཆེ་ཞིང་རྩུབ་པ་དང་༔ མེ་ཆེན་པོ་འབར་བའི་སྒྲ་ལྟ་བུའི་འུར་ཚེགས་ཆེམ་པའི་སྒྲ༔ རླུང་ཆེན་པོ་བསྐལ་པ་དུས་མཐའི་འཐོར་བྱེད་ཀྱི་ཤུགས་སྒྲ་ཧས་སྒྲ་འུར་བས་འབུམ་ཆར་དུ་མི་མཚོན་པ་ཞིག་ལྡང་ངོ་༔ དེ་དག་ནི་གོང་གི་ཁྲོ་བོའི་སྒྲ་རང་ངོ་མ་ཤེས་པར་དགྲ་རུ་བལྟས་པ་ལས་ཡིན་ཞིང་༔ སྒྲ་ཁམས་དགྲར་ལངས་པའི་སྒྲ་བཞིའི་ཐ་སྙད་དུ་ཐོབ་བོ༔ དེ་ནས་མ་ངེས་པའི་རྟགས་སྣ་ཚོགས་པ་ནི་ཡུལ་གཞན་དང་ཁམས་ལྷག་མ་དགྲར་ལྡང་བའང་ཡིན་ཏེ༔ དེ་ལ་ནང་གི་ཉི་ཟླ་མེད་པའི་དོན་གྱིས༔ ཕྱི་རོལ་ཏུ་ཉི་མ་དང་ཟླ་བ་མེད་པར་མུན་པས་གཏིབ་པ་དང་༔ རང་ལ་ལུས་མེད་པས་ན་ས་ལ་རྐང་རྗེས་དང་གྲིབ་མ་གཟུགས་བརྙན་མེད་པ་དང་༔ ཡང་རི་བྲག་གི་དངོས་པོ་ཐམས་ཅད་ལ་ཐོགས་རེག་མེད་པར་ཟང་ཐལ་བས་སྣང་བ་འབྱུང་བ་དང་༔ ཡང་རླུང་ལ་རྟེན་མེད་པས་ཁ་རྒྱལ་དུ་འཕྱོ་བས་ལས་ཀྱི་རླུང་གིས་དེད་དེ་གང་དུའང་ཕྱད་ཕྱོད་ཡད་ཡུད་དུ་རྒྱུ་བ་དང་༔ སྔར་སླེབ་མ་མྱོང་བའི་ཡུལ་རིགས་མི་འདྲ་བར་སྐད་ཅིག་སླེབས་པ་དང་༔ གང་ཡང་མྱུར་བའི་ཤུགས་ཀྱི་དཔེར་ན་རྨི་ལམ་དུ་འགྲོ་བ་ན་གང་དུའང་བསམ་པས་སླེབས་པ་བཞིན་རྫུ་འཕྲུལ་སྣང་ཤུགས་དང་༔ ཡང་སྐབས་ཐིག་ཏུ་ལུས་ཀྱང་ཡོད་པར་སྣང་ཡང་བར་དོའི་ཡར་ཕྱེད་སྔ་མའི་ལུས་ལྟར་དང་༔ མར་ཕྱེད་དུ་ཕྱི་མ་དམྱལ་བར་སྐྱེ་ན་ཐུར་འཕྱང་ཡི་དྭགས་དང་དུད་འགྲོ་སྣྲེལ་ཞི༔ མཐོ་རིས་མགོ་གྱེན་དུ་བསྟན་པ་ལྟ་བུས་ལུས༔ ལས་དག་པ་རྣམས་བྱིས་པ་ལོ་བཅུ་དྲུག་ཙམ་པ༔ ལས་མ་དག་པ་རྣམས་ལོ་བརྒྱད་པ་ཙམ་གྱི་ཚད༔ ཁ་དོག་ལྷ་ལ་དཀར་བོ༔ མི་ལ་སྔོ་སྐྱ༔ ལྷ་མིན་ལ་ལྗང་གུ༔ དུད་འགྲོ་ལ་དམར་ནག༔ ཡི་དྭགས་ལ་ཐལ་སྐྱ༔ དམྱལ་བ་ལ་དུད་ཁའི་མདོག་ཅན་༔ ཡང་ལས་མ་དག་པའི་འོད་མོག་མོག་པོ༔ དག་པའི་དཔག་ཚད་དུ་འཕྲོ་བའི་ལུས་མེད་ཀྱང་ཡོད་དོ་སྙམ་ནས་དེ་ལ་གནོད་ཀྱི་དོགས་པས་འཇིགས་སྐྲག་བྲོས་པ་ལ་སོགས་བ་བྱེད་དོ༔ གནས་ཀྱི་ཁྱད་པར་ཡང་གྲོག་སྟོང་བྱུར་བོ་དུར་ཁྲོད་ལ་སོགས་པར་རྒྱུ་བ་དང་༔ ས་གཅིག་ཏུ་མི་ཚུགས་པར་ངེས་མེད་དུ་བག་གྲང་ངེ་གནས་འཆའ༔ ཟས་ཀྱི་ཁྱད་པར་ཀྱང་མ་བསྔོས་ན་མི་ཐོབ༔ བསྔོས་པ་ཐོབ་ལ་དེ་ཡང་དྲི་གསུར་གྱིས་ཚིམ་པ་ཞིག་ཡོད་དོ༔ གྲོགས་ནི་གཤིན་གསོན་མ་ངེས་པ་ལ་འགྲོགས་པ་དང་༔ དེ་ཡང་གཤིན་པོ་རྣམས་དང་ཕན་ཚུན་མཐོང་ཐོས་གཏམ་བྱ་བའི་སྣང་བ་སོགས་ཀྱང་འཆར་ལ༔ གསོན་པོ་དག་ཕར་མཐོང་ཡང་ཚུར་མི་མཐོང་བ་དང་༔ ངག་ཀྱང་རང་ལ་ཡོད་པར་སྣང་ནས་གསོན་པོ་རྣམས་ཀྱི་དྲུང་དུ་ཕྱིན་ནས་གཏམ་སྨྲས་ཀྱང་མི་ཐོས་པ་ན་ང་ལ་ཁ་ལན་མི་བྱེད་པར་འདུག་སྙམ་སྟེ་ཞེ་སྡང་བ་དང་༔ ཡང་རང་གི་ཕོར་བ་ཁ་སྦུབ་པ་དང་༔ ཟས་མི་སྟེར་བ་ན་ང་རང་གི་སྐལ་པ་ཅི་ལ་བཅད་སྙམ་སྟེ་ཞེ་སྡང་བ་དང་ཡང་མངོན་ཤེས་ཀྱིས་སྟོང་གསུམ་ཐམས་ཅད་དུས་གཅིག་ལ་མཐོང་བ་དང་༔ དེ་དུས་སུ་དབང་པོ་ལ་སྔར་སྐྱོན་ཆགས་ཀྱང་ད་ནི་མིག་གིས་གཟུགས་མཐོང་༔ རྣ་བས་སྒྲ་ཐོས༔ སྣས་དྲི་ཚོར༔ ལྕེས་རོ་མྱོང་༔ ལུས་ཀྱི་རེག་བྱ་མྱོང་༔ ཡིད་ཀྱི་རྣམ་རིག་ཀྱང་ལས་ངན་ཕལ་ཆེར་མ་གཏོགས་ད་ལྟ་བས་དགུ་འགྱུར་བཀྲའོ༔ དེ་ནས་འདི་ཅི་འདྲ་སྙམ་པའི་དཔྱད་པ་ཞུགས་པ་ན་ཤི་བ་ཡིན་ནམ་སྙམ་དུ་སེམས་པས་ངེས་པར་འདུག་ད་ནི་ཅི་ཚུགས་བྱ་སྙམ་པས་དེ་མ་ཐག་ཏུ་བརྒྱལ་ལོ༔ སངས་པ་ན་ཐབས་སྣ་ཚོགས་སེམས་ཀྱང་བྱ་ཐབས་མེད་པ་ཤེས་ནས༔ མི་ཡི་དབང་དུ་བྱས་ན༔ འོ་བདག་གི་མི་ཡི་ལུས་རྟེན་ཁྱད་པར་བ་དེ་འདྲ་རྙེད་ཀྱང་ཆུད་ཟོས་སུ་བཏང་༔ ད་ནི་སྡིག་པའི་དཔུང་གྲངས་འདི་ཙམ་དུ་བསགས་པས་བློ་ཉེས་ན་འབྲས་བུ་ངན་པ་ཅི་འདྲ་ཡོད་སྙམ་དུ་ཡི་མུག༔ གཉེན་ལ་ཆགས་པས་བློས་མི་ཐོངས་པར་དྲན་པ་ཙམ་གྱིས་སྔར་གྱི་བག་ཆགས་ལས་མཐོང་སྣང་ཤར་ཡང་ཚུར་མི་མཐོང་བས་སྡུག་བསྔལ༔ ལུས་ལ་ཆགས་པས་སྣ་བུག་སོགས་སྒོ་དགུ་ནས་ཕར་འཇུག་ཚུར་ཕྱུང་བས་ལུས་འཁྱགས་པ་རོ་རུ་སོང་བ་དང་༔ རུལ་བ་དང་༔ མེ་ལ་བསྲེགས་པས་ཚིག་སྔ་ཕྱི༔ བྱ་ལ་སྦྱིན་པས་ཟ་སྔ་ཕྱི་ཙམ་ལ་ཡང་དགའ་སྡུག་བྱེད་ཅིང་༔ རྒྱུ་རྫས་སྡིག་གིས་བསགས་པ་ལ་དངུལ་ཞོ་གང་ཙམ་ཁྱེར་དབང་མེད་པའི་སྡུག་བསྔལ༔ གཞན་གྱི་བསྒོ་བཤའ་བྱེད་པས་ཕྲག་དོག༔ བླ་མ་དང་གྲོགས་མཆེད་ཨ་མཆོད་སོགས་ལ་སྐྱབས་འཚོལ་ཡང་མ་མཐོང་པས་ཡི་མུག༔ ཕར་བསམ་པ་ན་རྣམ་འགྱུར་གྱི་སྒོ་དང་མངོན་ཤེས་ཕྲ་བས་དེ་དག་གི་རློམ་སེམས་སོགས་བྱེད་པ་དང་སྐྱོན་ལྐོག་གྱུར་ཐམས་ཅད་ཤེས་པར་སྣང་ནས་ཕྱིར་ཞིང་སྡུག་བསྔལ༔ ཁྱད་པར་དུ་ཡང་ལོག་ལྟ་ཅན་ལ་ནི་དད་ཡུལ་གཅིག་ཀྱང་མི་མཐོང་བར་ངན་པ་ཤ་སྟག་མཐོང་བར་འགྱུར་རོ༔ ལར་ད་ལྟ་ནས་དད་པ་འབྱོངས་དགོས་པའི་རྒྱུ་མཚན་ཡང་དེ་ཡིན་ནོ༔ གཞན་དག་ན་རེ༔ ལར་བར་དོའི་སེམས་ཅན་དང་གསོན་པོ་ལ་མཐུན་སྣང་གི་བག་ཆགས་སད་པ་ཡོད་དམ་མེད༔ ཡོད་ན་ཕར་བར་དོ་བ་མཐོང་དགོས་ལ༔ མེད་ན་ཚུར་མཐོང་བས་ཁྱབ་པ་མེད་དེ༔ དཔེར་ན་བར་དོར་ཡང་རིགས་མཐུན་ནང་ཚན་ལས་མི་མཐོང་བས་ཤེས་སོ༔ ཁྱད་པར་དུ་ཉེ་དུ་སོགས་མཐོང་བ་དང་མངོན་ཤེས་ཀྱིས་སྣོད་བཅུད་ཐམས་ཅད་ཤེས་ན༔ ཉི་ཟླ་རྐྱང་པ་མི་མཐོང་བས་ཁྱད་པར་ཅི་ཡོད༔ དབང་པོ་ཀུན་ཚང་ད་ལྟའི་ལུས་རྟེན་ལ་བརྟན་པོར་ཆགས་པས་གཞན་སེམས་མི་ཤེས་ན་བླ་མཆོད་སོགས་ཀྱི་ཤེས་རྒྱུད་དབང་པོ་མེད་པ་དེའི་ཀོ་ཅི་ལ་མཐོང་སྟེ་མི་སྲིད་སྙམ་མོ༔ ཀྱཻ༔ བཞིན་བཟང་དག༔ ལར་རང་གཞན་ཀུན་ལ་མཚུངས་ནས་སྲིད་པ་བར་དོ་འདོད་ན་ལྟག་ཆོད་དེའི་ཀོ་ཅི་བྱ༔ དོགས་པ་ཙམ་ལ་བསལ་དུ་ཡོད་དེ༔ ཡང་རང་གཞན་སུས་ཀྱང་རིགས་མཐུན་མཐོང་བར་འདོད་ན༔ དོན་ཡོད་མ་ཡིན་སེམས་ཉིད་ནི༔ ཕྱི་རོལ་དོན་དུ་སྣང་ངོ་ཟེར་བ་དང་༔ དབུ་མ་རྒྱན་སོགས་ལས་ཀྱང་བཤད་པ་དང་༔ དྲི་ཟ་ཉེ་བར་འཁོར་དུ་ཟེར་བས་དྲི་བས་བསྔོས་པ་དེ་ཐོབ་ཅིང་ཚོར་བས་མཐུན་སྣང་ཁྱད་པར་བ་དག་ཀྱང་སྒྲུབ་ཏུ་ཡོད་དགོས་ལ༔ ཐོགས་མེད་རྒྱུ་བའི་ཡུལ་དེ་ཡང་ཅི་ཡིན་ཆ་གཅོད་རྒྱུ་གཞན་ཞིག་ཀྱང་ཡོད་དེ༔ ཡང་རིགས་མཐུན་དེ་རྒྱུད་གཞན་པོ་ཞིག་གམ་མ་ཡིན༔ སྔ་མ་ལྟར་ན་ཐམས་ཅད་སེམས་སྣང་སུ་ངེས་པའི་ཚད་མས་གནོད་ལ༔ ཕྱི་མ་ལྟར་ན་མཐུན་གཞི་མ་གྲུབ་པའི་མགོ་མཚུངས༔ གནད་འདི་ཐམས་ཅད་ཀྱི་རྩ་བ་ནི་རང་སྣང་ཉག་གཅིག་ལས་འཁོར་འདས་རང་རྒྱུད་པར་གྲུབ་པ་མེད་པའི་དོན་དུ་ཐུགས་ལ༔ ཡང་གསོན་པོ་ངེས་པའི་སྣང་བ་དང་༔ གཤིན་པོ་མ་ངེས་པའི་སྣང་བ་ལ་དཔེར་བྱ་རྒྱུ་མེད་པ་དག་ཀྱང་ཕྱོགས་གཅིག་ཏུ་ལྟ་བའི་མིག་རྒྱངས་ལ་ལྟོས་ཤིག༔ རྒྱུ་མཚན་ཞིབ་ཏུ་དཔྱད་ན་སྤྲོས་པས་ཆོག་གོ༔

སྲིད་པ་བར་དོ་བ་དེའི་ཆེ་ཚད་ནི༔ འཕོ་ཆེ་ཆུང་གཉིས་ལས༔ ཆུང་བ་ནི་དམྱལ་བ་དང་མཐུན་པར་ཞག་བདུན་རེ་ན་སྔར་གྱི་འཆི་རྐྱེན་དང་འཆི་བ་དྲན་པའི་མོད་དུ་རེ་རེ་འཆི་བ་དང་༔ སྔ་མའི་བག་ཆགས་ཇེ་བརྗེད༔ ཕྱི་མའི་བག་ཆགས་ཇེ་གསལ་དུ་འགྲོ་བ་དང་༔ འཕོ་ཆེན་ནི༔ ཞག་བདུན༔ ཉེར་གཅིག༔ ཞེ་དགུ་ཚུན་ཆད་ལ་ལུས་ལེན་པས་རིང་ཚད་དོ༔ སྐྱེ་བ་ཐམས་ཅད་བརྫུས་ཏེ་སྐྱེ་བ་དང་༔ ལས་ཀྱི་སོགས་ཚུལ་ཡང་རགས་པ་མངོན་གྱུར་མི་སོགས་ཀྱང་༔ ཕྲ་བ་བག་ཉལ་ནི་སོག་གོ༔ བག་ཆགས་ནི་སྔ་མ་གང་ལ་གོམས་པ་དེ་ལ་ཤས་ཆེར་གོམས་སོ༔ དེ་བཞིན་དུ་སྔར་དགེ་བ་བསགས་པ༔ མཆོད་སྦྱིན་བྱས་པ༔ བྱམས་པ་གོམས་པ་རྣམས༔ གྲོགས་ཕན་བྱེད༔ གནས་སྐྱིད་པོ༔ ཡོ་བྱད་སོགས་ཀྱང་ཚིམ་པར་འཕྲད་པ་ཡོད༔ སྔར་མི་དགེ་བ་བྱས་པ་དག་དེ་ལས་ལྡོག་པར་འབྱུང་བས་དགེ་ལས་ཀྱི་ཕན་ཡོན་དང་སྡིག་པའི་ཉེས་དམིགས་སོགས་ཀྱང་དེར་མངོན་ལ༔ གཟུགས་ལས་གཞན་པས་མིང་བཞི་ལ་བརྟེན་པའི་གཟུགས་མེད་པའི་ཆར་གཏོགས་ལ༔ དེ་ནས་སྲིད་པ་བར་དོར་གནས་པར་ཤེས་ནས་སྡུག་བསྔལ་བཟོད་བརླག་མེད་པ་མྱོང་ངོ་༔ ཁྱད་པར་དུ་ད་ནི་སྐྱེ་བ་ཞིག་ཨེ་ལོན་སྙམ་པའི་རེ་དོགས་ཀྱིས་ཕྱོགས་ཐམས་ཅད་དུ་རྒྱུ་ལ༔ དེ་ནས་སྐྱེ་གནས་གང་དུ་སྐྱེ་བ་ལེན་པའི་སྔ་རྟགས་ཀྱང་འབྱུང་སྟེ༔ མངལ་གང་དུ་སྐྱེ་སྐལ་ཡོད་ཀྱང་དེ་སྡུག་པར་མཐོང་བས་ན་ད་ལྟ་ནས་ཡིད་འོང་ལ་ཆགས་པ་བཅད་དགོས་པའི་རྒྱུ་མཚན་དང་༔ རང་གི་ལུས་ལ་ཡང་རྟགས་ཡོད་དེ༔ མགོ་བོའི་ལྟ་ལུགས༔ ལུས་ཀྱི་ཚད༔ འོད༔ ཁ་དོག་སོགས་བཤད་མ་ཐག་པ་ལྟར་ལ༔ ཉམས་ལ་ཡང་སྐྱེ་རྟགས་ཡོད་དེ༔ འདོད་པར་སྐྱེ་ན་ཡུལ་ལ༔ གཟུགས་སུ་སྐྱེ་ན་འོད་ལ༔ གཟུགས་མེད་དུ་སྐྱེ་ན་ཅི་ཡང་མེད་པའི་སེམས་གནས་ལ་དགའ་གདུང་སྐྱེ་བ་དང་༔ བརྫུས་ཏེ་སྐྱེ་ན་གནས་ལ༔ དྲོད་གཤེར་དུ་སྐྱེ་ན་དྲི་རོ་ལ༔ མངལ་སྒོང་ལས་སྐྱེ་ན་ཕོ་མོ་འདུ་འཕྲོད་ལ་ཆགས་སྡང་བྱེད༔ དེ་འང་ཕོར་སྐྱེ་ན་མོ་ལ་ཆགས་ཕོ་ལ་སྡང་༔ མོར་སྐྱེ་ན་ཕོ་ལ་ཆགས་ནས་མོ་ལ་སྡང་༔ དེ་ལྟ་བུའི་སྐྱེ་གནས་དག་ལ་ཆགས་སྡང་བྱུང་མ་ཐག་ཏུ་དེས་ཤི་རྐྱེན་བྱས་ཏེ་ཅུང་ཟད་བརྒྱལ་བ་དང་མཉམ་པོར་སྐྱེ་བ་ལེན་ནོ༔ ཡང་ལུས་འཕགས་པོ་ལ་རྟ་ཕོ་མོ༔ བ་ལང་སྤྱོད་པར་བ་ཕོ་མོ༔ སྒྲ་མི་སྙན་པར་ཉའམ་ངང་པ༔ འཛམ་གླིང་དུ་མི་ཕོ་མོ་སྐྱེ་བོ་འཁྲིག་པ་སྤྱོད་པ་ལ་སོགས་པ་སྣང་ངོ་༔ དེ་དག་ནི་མངལ་དུ་ཆུད་གྲབ་བྱེད་པ་ཡིན་པས་སྒོ་དགག་པ༔ རུ་ལོག་དྲན་པ༔ རང་བཞིན་སྤྲུལ་པར་འཕོ་བ༔ འདམ་པ༔ ཞུགས་པ་རྣམས་བྱ་ཐེབ་ཡོད་དོ༔ དེ་ཡི་རྗེས་སུ་རང་རང་གི་ཡུལ་སོ་སོ་མཐོང་བ་དང་༔ ཁྱད་པར་དུ་ལྷར་སྐྱེ་ན་རིན་པོ་ཆེའི་ཁང་བཟང་གི་ཡང་ཐོག་ཏུ་ཡོད་པ༔ ལྷ་མིན་དུ་འགལ་མེའི་འཁོར་ལོའི་ནང་དང་༔ ཆར་འབེབས་པའི་དཀྱིལ་དུ༔ མི་ལ་རབ་འབྲིང་ཐ་མའི་དབང་ལས༔ སྐྱེ་བོ་འདུས་པའི་ཅ་ཅོའི་ནང་༔ ནམ་རྨུགས་པའི་དཀྱིལ༔ གྲང་ཤུམ་བྱེད་པའི་གནས་སུ་འདུག་པར་སེམས་པ་དག་ནི༔ མངལ་དུ་ཞུགས་ཟིན་པའི་རྟགས་ཡིན་པས་འགྲོ་དབང་མེད་པའོ༔ བྱོལ་སོང་ལ་བྱིལ་བོའམ༔ ཕུག་གམ༔ ན་བུན༔ ཡི་དྭགས་ལ་གྲོག་པོ་ཕུག་རྡུག་གི་ནང་དུ་འདུག་པ་སྙམ་འབྱུང་བ༔ དམྱལ་བ་ལ་ལྕགས་ཁང་གྲུ་བཞི་སོགས་ཀྱི་དབུས་སུ་འདུག་པར་སྣང་བ་དག་ནི་སྐྱེ་བ་བླང་ཚར་བས་མངལ་འདམ་པ་སོགས་ཀྱི་ཐེབ་མེད་པར་ཤེས་སོ༔ དེ་དག་ཏུ་སྐྱེ་བ་ཡང་༔ སྔར་བཤད་ལྟ་བུའི་ཞུགས་ཁའི་སེམས་ཅན་གྲངས་མེད་མངལ་ལ་འདུ་བས་ལས་འཕྲོ་ཅན་མིའི་བཤང་ལམ་ནས་ཞུགས་པར་གསུངས་པ་དང་༔ ཁྱད་པར་ཆགས་སྡང་གི་དབང་གིས་བསྙེགས་ཏེ་སོང་བ་དང་༔ ལས་མཁན་ཁྱི་བྱ་གཅན་རིགས་ཀྱིས་དེད་དེ་དགའ་དུངས་དེ་ལ་སྐྱབས་པའི་བློ་སྐྱེས་ནས་གབ་པ་སོགས་མོས་པས་དེ་མ་ཐག་ཏུ་ཤི་རྐྱེན་དུ་གྱུར་ནས་བར་དོའི་ཡིད་ལུས་ཀྱི་གཡོ་རླུང་ཐིམ་པས་ཀྱང་རང་སྣང་གི་ཐིམ་རིམ་བག་ཙམ་ཡོད་པས་འོད་གསལ་ལས་ཉེར་ཐོབ་མཆེད་པ་དང་མཉམ་དུ་སྐྱེ་བ་ལེན༔ དེ་ལས་རང་བཞིན་བརྒྱད་ཀྱི་ལུགས་སུ་འབྱུང་ལ༔ གཞན་ཡང་དེ་ལས་མི་ཡིན་ན་ཁམས་དྲུག་གི་འདུས་པ་སྐྱེ་བའང་ཡིན་ནོ༔ དེ་ཐམས་ཅད་ཀྱང་ནི་ངེས་པས་ས་ཟིན་མེད་པས་མ་ངེས་པའི་རྟགས་སུ་བཤད་དོ༔ དེ་དག་གིས་སྲིད་པ་བར་དོའི་སྣང་ལུགས་སྨོས་གྲུབ་པའོ༔

ད་ནི་གནས་སྐབས་ཀྱི་བར་དོ་གཉིས་ནི༔ རྨི་ལམ་གྱི་བར་དོ་དང་༔ བསམ་གཏན་བར་དོ་གཉིས་ཏེ༔ དང་པོ་རྨི་ལམ་བར་དོ་ནི༔ གང་གིས་ཤར་བའི་རྒྱུ་མཚན༔ ཇི་ལྟར་ཤར་བའི་ཚུལ་གཉིས་ལས༔ གང་གིས་ཤར་བའི་རྒྱུ་ནི་ཉེ་རིང་གཉིས་ཏེ༔ གཞི་བདེ་གཤེགས་སྙིང་པོ་ནི་འཆར་བའི་གཞི་ཡིན་ཏེ༔ དེའི་རང་ངོ་ལ་ཤེས་རབ་ཡེ་ཤེས་ཆེན་པོའི་ངང་རྒྱས་པའི་རང་མདངས་མ་རིག་པའི་གཉིད་ཀྱིས་ནོངས་ནས་ལས་དང་བག་ཆགས་ཀྱི་མལ་དུ་དུབ་པའི་སྡུག་བསྔལ་འཁོར་བའི་འཁྲུལ་སྣང་གི་རྨི་ལམ་སྣ་ཚོགས་ཤར་བ་ནི་རིང་བའི་རྒྱུ་དེ༔ ཀུན་གཞི་ལ་གནས་དོན་ལུས་གསུམ་གྱི་བག་ཆགས་སྔར་ནས་བཞག་པ་གོམས་དབང་གི་རྨི་ལམ་སྣ་ཚོགས་པའི་བག་ཆགས་ཀྱི་ལམ་དུ་གནས་སྐབས་སུ་ཡང་འཁྲུལ་བའོ༔

དེ་ཡང་རྒྱས་པར་དབྱེ་ན༔ གཞི་ཡེ་ཤེས་ལྔ་དང་ལྡན་པའི་དཀྱིལ་འཁོར་རང་ངོ་མ་ཤེས་པའི་དུག་ལྔ་དེའི་རྩལ་ལས་གནས་རིགས་ལམ་རྒྱུད་ལྔ་དང་གདོན་ལྔ༔ དེ་ཅི་བཞིན་པའི་སྣང་བ་ལས་ཡེ་ཤེས་དག་པའི་སྣང་བ་སྐུ་ལྔ་ལ་སོགས་པའི་ལྔ་ཚན་ལྔའི་སྣང་བ་རབ་འབྱམས་པ་འཕྲུལ་བ་ཡིན་ཡང་༔ དེ་ལས་ཞིང་ཁམས་གནས་སུ༔ སྐུ་ལུས་སུ༔ གསུང་ངག་ཏུ༔ ཐུགས་ཡིད་དུ་འཁྲུལ་བའི་རིང་རྒྱུ་ལས་རྨི་ལམ་ད་ལྟ་བྱེ་བྲག་པ་འདི་དག་ཀྱང་ཤར་བ་སྟེ༔ ཉེ་བའི་རྒྱུ་ནི་གཉིས་ཏེ༔ རྒྱབ་གཉིད་རྨུགས་ཀྱི་རྩའི་རླུང་གི་བྱེད་པ་སྟོབས་སུ་རྒྱས་པའི་ཐིམ་རིམ་གྱི་གྲངས་ནས་ཐོབ་པའི་ངང་དུ་ལྷན་གྱི་གནས་པ་ནི་གོ་ཕྱེ་བའི་རྒྱུ༔ སྣང་བ་འབྱེད་པའི་རྒྱུ་ནི༔ དེ་ལས་ཀུན་གཞི་ལས་ཡིད་གཅིག་པོ་ལངས་ནས་རྣམ་ཤེས་སོ་སོར་རྒྱུག་པ་ལ་དཔྱོད་དོ༔ དེ་ཡང་ལུས་ཀྱི་དྭངས་མ་རྩ༔ རྩའི་དཀྱིལ་དུ་ཐིག་ལེ༔ དེ་ལ་སེམས་བརྟེན་པ་ཉིད༔ རྩ་ཡུར་པ་འདྲ༔ རླུང་ཁ་ལོ་འདྲ༔ ཐིག་ལེ་ཆུ་འདྲ་བ་འཁྲིད་པས་སེམས་འདུ་ལུགས་ཀྱི་འཁོར་འདས་ཀྱི་སྣང་བ་རབ་འབྱམས་པ་འཆར་བ་ཡིན་ནོ༔ དེ་ཡང་ཕྱིར་འཁྲུལ་བ་ནི་བར་དོ་དྲུག་པོ་ཡིན་ཡང་༔ ཇི་ལྟར་ཤར་བའི་རྨི་ལམ་ནི༔ རྟོག་བཅས་དང་རྟོག་མེད་གཉིས་ལས༔ རྨི་ལམ་འདི་རྟོག་མེད་འཁྲུལ་བ་ཡིན་ཡང་རྣམ་པ་རྟོག་རྟོག་ལྟར་ཡོད་དོ༔ སྤྱི་བོར་ལྷ་ཡི་ས་བོན༔ མགྲིན་པར་ལྷ་མིན་གྱི༔ སྙིང་ཀར་མི་ཡི༔ ལྟེ་བར་དུད་འགྲོའི༔ གསང་བར་ཡི་དྭགས་ཀྱི༔ རྐང་མཐིལ་དུ་དམྱལ་བའི་རྩ་དང་ས་བོན་ཡོད་པས༔ དེ་དག་ཏུ་རླུང་སེམས་འདུས་པའི་རྐྱེན་གྱིས་རིགས་དྲུག་གི་སྣང་བ་འཆར་བ་ཡིན་ནོ༔ སྙིང་ཀའི་དབུས་སུ་རྩ་རྣམ་པ་བརྒྱད་ཡོད་པའི་ནང་དུ་འདུས་པས་འོད་གསལ་ཡེ་ཤེས་ཀྱི་སྣང་བ་དང་༔ སྤྱི་བོར་འདུས་པས་ནི་ཁྲོ་བོའི་དཀྱིལ་འཁོར་འཆར་རོ༔ ལྟེ་བས་སྟོང་པའི་རྩ་བཞིར་འདུས་པས་དབྱིངས་སྟོང་ཉིད་ཀྱི་ཉམས་དང་༔ མཁའ་འགྲོ་འདུས་པའི༔ གསང་བ་ཨེ་ཝཾ་དུ་བདེ་བ་དང་༔ ཆོས་སྐྱོང་༔ མགྲིན་པར་རོ་འབབས་ཀྱི་གནས་སུ་འཁྱིལ་བས་ཏིང་འཛིན་རྟོག་མེད་དང་གསུང་དཀྱིལ༔ ལུས་གནས་སུ་རྩ་སྟོང་ཕྲག་བདུན་ཅུ་རྩ་གཉིས་སོ་གསུམ་སོགས་སུ་འདུས་པས༔ ཡུལ་སུམ་ཅུ་གནས་ཉི་ཤུ༔ རོ་རྐྱང་གི་མདུད་མཚམས་བཅུར་ཧེ་རུ་ཀའི་གནས་བཅུ་ལ་སོགས་པ༔ རྩ་ཆེན་པོ་བཞི་ལ་གནས་པས་ནི༔ ཡང་དག་པའི་སྐུ་གསུམ་ཡེ་ཤེས་ལྔའི་སྣང་བ་ནི་ཐིམ་རྗེས་ཅུང་འཆར་བ་ངོས་མི་ཟིན་ནོ༔ ཡང་སྤྱི་བོའི་ཤར་གྱི་རྩ་འདབས་སུ་ནི་ལྷའི་སྣང་བ་དཀར་པོ་རྟ་དཀར་མདུང་དར་ཅན་གྱི་དང་༔ ཡུལ་འཁོར་བསྲུང་དྲི་ཟ༔ ལྷོ་ཕྱོགས་སུ་འཕགས་སྐྱེས་པོ་དྲིལ་བུམ༔ ནུབ་ཕྱོགས་དམར་པོའི་སྣང་བ་སྤྱན་མི་བཟང་ཀླུ་དབང་༔ བྱང་ཕྱོགས་སུ་ལྗང་གུ་རྣམ་སྲས་སོགས་ཀྱི་སྣེ་མི་གནོད་སྦྱིན༔ དཀྱིལ་ཀྱི་ཨ་ལ་ཚངས་དབང་བརྒྱ་བྱིན༔ སྒབ་ཀྱི་རྩ་ཆུང་སོ་གཉིས་ལ་ཉེ་དབང་༔ འཁོར་མཐའི་གྲངས་མེད་ལ་ལྷ་ཕྲན་དེ༔ གླུ་གར་རོལ་མོ་རྩེན་པ༔ ལུང་སྟོན་པ༔ འདོད་པའི་ཡོན་ཏན་ལ་སྤྱོད་པ་ལ་སོགས་པ་བསམ་གྱིས་མི་ཁྱབ་པ་སྣང་ངོ་༔ མགྲིན་པའི་ས་བོན་དུ་ཐག་བཟང་རིས༔ ཤར་དུ་མཐུ་དཔལ་ལྷའི་རིགས༔ ནུབ་ཏུ་གདུག་པ་ཀླུའི་རིགས༔ ལྷོར་ནག་པོ་བདུད་ཀྱི་རིགས༔ བྱང་དུ་སྟོབས་ཆེན་གནོད་སྦྱིན་གྱི་རིགས༔ མཚམས་བཞིར་དེའི་ཚན་དུ་གཏོགས་པ་ཕོ་གདོན་མོ་གདོན་ཀླུ་གདོན་ལ་སོགས་པ་དང་༔ དེའི་སྒབས་སུ་བསམ་གྱིས་མི་ཁྱབ་པའི་གདུག་རྩུབ་ཀྱི་སྡེ་ཚན་འཆར་རོ༔ ཡང་སྙིང་ཀའི་ཤར་དུ་ལུས་འཕགས༔ ལྷོར་འཛམ་གླིང་༔ བྱང་དུ་སྒྲ་ངན༔ ནུབ་གླང་པོ་སྐྱོང་ལ་སོགས་གླིང་ཕྲན་དང་བཅས་པ༔ དེའི་སྒབ་རྩར་གླིང་བཞི་བྱེ་བ་ཕྲག་བརྒྱ་ལ་སོགས་པ་དང་༔ ཁམས་རྩ་རྣམས་སུ་ཕོ༔ ཁྲག་རྩར་མོ༔ རླུང་རྩ་རྣམས་སུ་མ་ནིང་གི་སྣང་བ་འཆར་བ་དང་༔ སྙིང་དབུས་སུ་འབྱུང་བཞིའི་རྩ་ལ་ཟད་པར་ཁ་དོག་གི་སྣང་བ༔ སྨིན་ཕྲག་ཏུ་གཟི་མདངས་ཀྱི་རླུང་གི་རྩལ་ལུས་རྒྱན་དང་ལྡན་པ༔ ཕོ་བ་མེ་མཉམ་གྱི་རྩ་ལ་ཚ་ཐིབ་ཀྱི་སྣང་བ༔ གྱེན་དུ་རྒྱུ་བའི་སྟོད་རྩ་ལ་གྱེན་དུ་རྒྱུག་པ༔ ཐུར་སེལ་གྱི་རྩ་ལ་ཐུར་དུ་འབབས༔ ཁྱབ་བྱེད་དུ་ཕྱོགས་ཀུན་ལ་བསྐོར་བསྐོར་དུ་མྱུར་བ༔ འཁོར་ལོ་ལྔའི་ཁྱམས་འབྱུང་བཞིའི་རྩ་དག་ཏུ་དེ་དག་གི་སྣང་བ༔ དེ་བཞིན་དུ་རིགས་དྲུག་གི་རྩ་དབུས་ས་བོན་གྱི་ཕྱིའི་བག་ཆགས་ཀྱི་འོད་ལ་འདུས་པས་སྣང་བ་དང་༔ ཉོན་མོངས་པ་ལྔའི་རྩ་སྨིན་སོ་དྲུག་ལས་སྐྱེ་བ་རྣམས་སུ་ཀུན་འབྱུང་སོ་སོའི་ཁྱད་པར༔ སུམ་སྐོར་དུ་སྒབ་ན་ཀུན་གཞིའི་རྣམ་ཤེས༔ འདོམ་མ་ལ་ཡིད༔ འཁྱིམ་མ་ལས་སྒབ་འཇུག་ཤེས༔ གཏུམ་མ་ལས་སྒབ་རྒྱུ་ཉོན་ཡིད་ཀྱི་རྩ་རྣམས་སུ་འདུས་པས༔ རྟོག་མེད་རྩེ་གཅིག༔ ཡིད་རྟོག་མེད་རྟོགས་པར་འཁྲུལ་པ༔ ཤེས་པ་སོ་སོའི་ཡུལ་ཞུགས་པ་བཟང་དགུ་དང་༔ ཉོན་མོངས་སྟོབས་ཕྲ་བར་སྐྱེ་བ་དང་༔ དེ་དག་མི་འགྱུར་བ་དང་༔ དབང་པོ་དྲུག་དུ་ཞུགས་པའི་ཡུལ་དྲུག་འབྲིང་དགུ་དང་ངན་དགུ་རྩ་དྭངས་སྙིགས་ལས་འགྱུར་བ་དང་༔ ལྟེ་བའི་འཁོར་ལོའི་ས་བོན་ལས་དུད་འགྲོ་བྱིང་གནས༔ ཤར་དུ་གཙོ་ཆེར་གླང་པོ༔ ལྷོར་རྟ༔ ནུབ་ཏུ་བྱ༔ བྱང་དུ་ཁྱི་སོགས༔ མདོར་ཤར་དུ་ར་ཆགས༔ ལྷོར་རྔོག་ཆགས༔ ནུབ་ཏུ་མཆུར་ཆགས༔ བྱང་དུ་སྡེར་ཆགས༔ མཚམས་ཐམས་ཅད་དུ་རྨིགས་ཆག་གི་ཚན༔ མཆེ་བ་ཅན་ལ་སོགས་པས་བསྐོར་བ་དེའི་ཡང་མཐའ་ལ་མཁའ་ལ་འཕུར་བ་སྟེང་༔ ས་ལ་འཛུལ་བ་ཞབས་སུ༔ རྐང་བཞི་རྩ་འདོམ་ན༔ རྐང་མེད་རྩ་གཏུམ་ན་ཞུགས་པས་རྨི་བ་དང་༔ ཡང་གསང་གནས་སུ་ཡི་དྭགས་ཀྱི་ས་བོན་དུ་འདུལ་པའི་ཡི་དྭགས་ཀྱི་ཡུལ་ནས་གནས་པ་ཤར་ངོས་ནས་བལྟས་པས་ཕྱིའི་སྒྲིབ་པ༔ ལྷོར་ནང་གི༔ ནུབ་ནས་མེ་ལྕེའི་འཁོར་ལོ༔ བྱང་ནས་སྒོས་ཁུར་གྱི་སྒྲིབ་པ་ཅན༔ འཁོར་མཐར་འདྲེ་རྒྱལ་པོ་བཙན་མ་མོ་གཉན་ཀླུ་བདུད་ཡ་མ་སྣྲེལ་ཞིར་འགྲོ་བ༔ འཇིགས་པའི་གཟུགས་སྟོན་པ༔ རྒྱལ་པོ་བ་བླ་མར་བརྫུ་བ༔ ཡ་མ་མི་སྐྱ་ནག་པོ་དང་དབྱུག་བཟུང་ལ༔ བཙན་བནྡྷེ་ལ༔ མ་མོ་བུད་མེད་ལ་བརྫུས་ནས་སྲོག་ལ་གཟེས་པ༔ བདས་པ་ལ་སོགས་སྣང་བ་དང་༔ རྐང་མཐིལ་དུ་དམྱལ་བ་མནར་མེད་གཡོན་དང་༔ པདྨ་ལྟར་ཆེར་གས་གཡས༔ ཕྱོགས་མཚམས་སུ་གཡོན་དུ་ཚ་དམྱལ་བརྒྱད༔ གཡས་སུ་གྲང་དམྱལ་བརྒྱད༔ ཕྱི་འཁོར་ལ་ཉེ་འཁོར་ལྷག་པ༔ ཉི་ཚེ་བ་སོགས་སུ་རླུང་སེམས་འདུས་པའི་སྣང་བ་དང་༔ དྭངས་མ་འདུས་པའི་རྒྱང་ཞགས་སུ་འདུ་ན་གཟུགས་ཁམས་དང་༔ གཟུགས་མཐོང་བ་བར་བ་དང་ཐ་མ༔ རྣ་བ་ལ་དྭངས་མ་ལས་ཆོས་ཀྱི་གཏམ་བྱ་བ༔ སྙིགས་མ་ལས་ཐ་མལ་པ་འབྲིང་ཐ༔ སྣ་ལ་དྲི་ཞིམ་མི་ཞིམ་བར་མ་གསུམ༔ ལྕེ་ལ་རོ་ཞིམ་མི་ཞིམ་བར་མ༔ རེག་རྩ་ལ་འཇམ་རྩུབ་བར་མ༔ གློ་བའི་རྩ་སྦུབས་ན་སེམས་ཡོད་པས༔ དེ་རིང་དུ་འཁོར་མཐའ་ལ་ཁྲིད་པས་ཐག་རིང་པོ༔ འཁོར་དབུས་སུ་ཉེ་བ༔ སྟེང་གྱེན༔ འོག་ཐུར་དུ་འགྲོ་བ༔ རྩ་བསྒལ་བས་ལ་བསྒལ་བ༔ ཁྲག་གི་རྩར་འདུས་པས་ཆུ་ལ་འབོག༔ ཆུ་བོ་དམར་པོ་ལ་སོགས་པར་བྱིང་བ༔ མེའི་རྩ་ལ་འདུ་བས་མེ་ཤོར་བ་རྨི་བས་ཆམ་རིམས་འབྱུང་བ་ཡང་མཁྲིས་པ་མེ་ཁམས་ཡིན་པའི་རྟེན་འབྲེལ༔ ཡང་རོ་མ་ལ་གསལ་བ༔ རྐྱང་མ་ལ་བདེ་བ༔ དབུ་མ་ལ་རྟོག་མེད༔ དེ་དག་གི་གཤམ་གསུམ་ལས་དྲི་བཤང་གི༔ རྩེ་གསུམ་ལས༔ ཟས་དང་༔ སྐད་སྙན༔ ཡེ་ཤེས་ཀྱི་བཀྲ་བ༔ རླུང་གི་རྩ་ལ་ཞུགས་པས་འཕྱོ་རྒོད་ཀྱི་རླུང་ནག་གི་འུར་སྒྲ༔ རྩ་གཏུམ་པ་ལ་ལུང་པ་དེ་དང་༔ འདོམས་པ་ལ་དང་༔ འཁྱིལ་བ་ལ་དང་༔ མདུད་པ་དང་༔ ཐིང་བ་དང་༔ གྲིམ་པ་དང་༔ འབུར་པོ་ལས་རི་སོགས་དང་༔ རྩ་ཡིག་ལས་ཆོས་ཀྱི་རྣམ་གྲངས་དང་༔ གཞན་ཡང་གློ་བའི་རྩ་སྦུབ་ལས་ཁུང་བུ་གཅིག་ནས་གཅིག་འབྲེལ་བརྒྱུད་པ་གནམ་མི་མཐོང་བ་སོགས་རྒྱས་པ་རྩ་གནས་འཁོར་ལོ་ནས་པདྨ་རྡོ་རྗེ་འཆང་བ་བདག་གིས་བཤད་པའི་རྩ་དེ་དག་ཏུ་གང་གནས་ཀྱི་སྣང་བ་འཆར་བར་འགྱུར་བ་ཡིན་ནོ༔ རྒྱུ་རླུང་གི་རྩ་ལ་རྨི་ལམ་མ་ངེས་ཟ་ཟི་ད་ལྟ་བ་ཤ་དག་རྨི་བས་བག་ཆགས་སྲབ་པའི་རྟགས༔ མཁྲིས་པའི་རྩ་ལ་སྔ་མོ་རྣམས་འབྲིང་དུ་གསལ་བ་བག་ཆགས་འབྲིང་༔ བད་ཀན་གྱི་རྩ་ལ་བག་ཆགས་རབ་ཏུ་བརྟན་པས་ཕྱིས་འབྱུང་ཤ་སྟག་གསལ་བ་ཡིན༔ འདི་རྣམས་ཀྱང་དུག་གསུམ་གྱི་ངོ་བོའི་ཁྱད་པར་ཅན་ནོ༔ དེ་དག་ཀུན་གཞིའི་ངང་དུ་ནག་ཐོམ་མེ་བ་གཏི་མུག་གི་ས་བ་ལས་ཡིད་ལངས་པས་དགག་སྒྲུབ་བྱེད་ལ་མི་བདེན་པ་སྒྱུ་མ་ལྟ་བུ་རྫུན་པ་བསླུ་བ་མི་རྟག་པ་དྲན་བརྗེད་ཀྱི་མཚན་ཉིད་ཅན་ཞིག་གོ༔

དྲུག་པ་བསམ་གཏན་གྱི་བར་དོའི་སྣང་ཚུལ་ནི༔ དམིགས་པའི་ཡུལ་གང་ཞིག་ལ་སེམས་བཟུང་བས་ལྷན་ནེར་གནས་པའི་རང་བཞིན་ཅན་ཏེ༔ དེ་ཡང་བསམ་གཏན་གྱི་ཉེར་བསྡོགས་མི་ལྕོག་མེད་པ་ནས་བསམ་གཏན་བཞི་གང་རུང་གི་ལྷག་མཐོང་གི་རྟེན་བྱེད་པའི་ཕྱིར་ན༔ རྟོག་དཔྱོད་དགའ་བདེ་ལ་སོགས་པ་ཞི་བས་བསམ་གཏན་མཆོག་ལ་མིན་ཡང་འདོད་སེམས་རྩེ་གཅིག་ཙམ་གྱིས་ཀྱང་ལྷག་མཐོང་གི་རྟེན་ལྕོག་ཙམ་དང་༔ འདིར་མན་ངག་གི་སྒོ་ནས་རིག་འཛིན་སྔགས་ཀྱི་དགོངས་པ་ནི༔ བསྐྱེད་རིམ་གྱི་དག་པ་རབ་འབྱམས་ལྷའི་དཀྱིལ་འཁོར་དུ་མཉམ་པར་བཞག་པས་མ་དག་པའི་མཚན་མ་ཞི་བ་དང་༔ རྫོགས་རིམ་སྣང་མེད་ཀྱི་འོད་གསལ་སྤྲོས་པ་དང་བྲལ་བའི་དོན་ལས་མི་གཡོ་བར་བཞག་པ་དང་༔ སྣང་བཅའ་རླུང་ལས་སྐྱེས་པའི་མི་རྟོག་པའི་ངང་དང་༔ ཐིག་ལེ་ལས་སྐྱེས་པའི་བདེ་གསལ་གྱི་ངང་ལ་ལྷན་ནེར་གནས་པ་དང་༔ བྱང་ཆུབ་སེམས་དཔའི་ཞེན་པ་བཞི་གཅོད་པས་ཞི་ལྷག་གི་ཏིང་འཛིན༔ དེ་བཞིན་གཤེགས་པའི་དགོངས་པ་ནི་དབྱིངས་རིག་དབྱེར་མེད་སྐུ་གསུམ་ཆོས་ཉིད་ཀྱི་དཀྱིལ་འཁོར་ལ་འབྱམས་ཀླས་པ་བསམ་གཏན་ཐམས་ཅད་པས་རྩེ་མོར་ཕྱིན་པ་ལགས་སོ༔ དེ་དག་གིས་བར་དོ་དྲུག་གི་སྣང་ཚུལ་རྒྱས་པར་བཤད་པའོ༔

གཉིས་པ་བར་དོ་དྲུག་གི་གནས་ཚུལ་ནི༔ དེ་ལྟ་བུའི་བར་དོ་དེ་དག་ཐམས་ཅད་རྒྱུ་འབྲས་ངོ་བོ་ཉིད་ཀྱིས་གཏན་ལ་ཕབ་པས༔ ཡེ་ནས་སྟོང་བ་ཉིད་ཀ་དག་ཆེན་པོར་གནས་པ་དེ་ཡེ་གྲོལ་ཆེན་པོའི་བདག་ཉིད་ཟེར་རོ༔ རང་བཞིན་འགགས་མེད་ལྷུན་གྱིས་གྲུབ་པ༔ སྣང་སྟོང་ཟུང་འཇུག་བདེན་པ་དབྱེར་མེད་རང་བྱུང་གི་ཡེ་ཤེས་ཉག་གཅིག་ཏུ་སངས་རྒྱས་པ་ཉིད་ཀྱི་ཚུལ་སྒྱུ་མའི་དཔེ་བཅུ་དྲུག་གིས་གཏན་ལ་ཕབ་པའི་རྙེད་དོན་ལ་གཉིས་མེད་རང་བྱུང་གི་ཡེ་ཤེས་ཤེའོ༔ དེ་གསུམ་ལ་ངོ་བོ་མཐའ་གྲོལ་ཆོས་སྐུ༔ རྟོགས་པ་རང་གྲོལ་རྒྱུད་ཆེན༔ འབྲས་བུ་རང་སངས་རྣམ་དག་གི་ཐ་སྙད་ཀྱང་ཐོབ་ལ༔ རྟོག་པས་གསར་དུ་ཀུན་བརྟགས་མིན་པས་མུ་སྟེགས་ཀྱི་གྲུབ་མཐའི་ཕྱོགས་སུ་མ་ལྷུང་༔ རྡུལ་དང་ཤེས་པའི་ཆོས་སུ་གྲུབ་པ་མེད་པས་སེམས་ཙམ་པ་མན་ཆད་ཀྱི་ཕྱོགས་སུ་མ་ལྷུང་༔ ཅི་ཡང་མི་སྣང་བའི་མཉམ་བཞག་སྤྲོས་བྲལ་ལྐོག་གྱུར་ལ་ཡིད་སྨོན་བྱེད་པའི་དབུ་མའི་ཕྱོགས་སུ་མ་ལྷུང་པས་ན༔ སངས་རྒྱས་ཀྱི་ཇི་ལྟ་ཇི་སྙེད་ཀྱི་ཡེ་ཤེས་གཉིས་ཀྱི་མཁྱེན་པ་རྫོགས་པའི་གནས་ལུགས་འདི་ཡིན་ནོ༔

ཁ་ཅིག་གིས་སྤྲོས་བྲལ་མཁྱེན་པ་དང་༔ དེས་ཀུན་ཏུ་ཁྱབ་པར་གཟིགས་པ་ལ་གསུང་བ་ནི་སྒྲ་ཇི་བཞིན་ན༔ སྐུ་དང་ཡེ་ཤེས་རྒྱུན་ཆད་པ་དང་༔ སངས་རྒྱས་ལ་གཉིས་འཛིན་ཡོད་པས་མི་འགྲིགས་སོ༔ བར་དོ་དྲུག་ནི་གནས་ལུགས་དེ་ལྟ་བུ་ལ་བདག་ཏུ་བཟུང་བས་སྣང་ཆ་ཐོ་ཡོར་ལ་མིར་འཁྲུལ་བ་ལྟ་བུ་ཞིག་ཡིན་གྱི༔ གཞན་དུ་སྣང་བ་མི་འབྱུང་བ་རྒྱུ་རྐྱེན་རྟེན་འབྲེལ་མེད་པའི་དངོས་པོ་མི་སྲིད་པས་སོ༔ རྒྱས་པར་འོག་ཏུ་ལྟ་བས་གཏན་ལ་ཕབ་པའི་སྐབས་སུ་འཆད་དོ༔ གོང་གི་བར་དོའི་ངོ་བོ་དང་འདི་གཉིས་གཞི་དང་གཞི་སྣང་གི་ཁྱད་པར་གྱིས་མི་བཟློས་སོ༔

གཉིས་པ་ ༼ གསུམ་དཔྱད། ༽ མ་དག་སེམས་ཅན་གྱི་འཁྲུལ་ཚུལ་ནི༔ གཞི་ལས་གཞི་སྣང་ཤར་བ་ཉིད་ངོ་བོ་མི་རྟོག་པའི་ཆ་ལ་བདག་ཉིད་གཅིག་པའི་མ་རིག་པས་སྒྲིབ༔ རང་བཞིན་འོད་ཀྱི་ཆ་ལས་ལྷན་སྐྱེས་ཀྱི༔ ཐུགས་རྗེ་རིག་པའི་ཆ་ལས་ཀུན་བརྟགས་སུ་སོང་བས་འཁྲུལ་ཚུལ་སྔར་སྐྱེ་གནས་ཀྱི་བར་དོའི་སྣང་ལུགས་དང་དེ་ཉིད་གསལ་རྒྱན་དུ་ཤེས་པར་གྱིས་ཤིག༔

གསུམ་པ་ ༼ བཞི་དཔྱད། ༽རྣལ་འབྱོར་གྲོལ་ཚུལ་ནི༔ མ་རིག་གསུམ་སངས་བས་རིག་པ་གསུམ་གྱི་ཁྱད་ཆོས་དྲུག་གི་ཚུལ་གྱིས་སངས་རྒྱས་པ་རྣལ་འབྱོར་རབ་དང་༔ འབྲིང་ལམ་སྣང་སྐུ་གསུམ་གྱི་བར་དོ་ལས་བརྒལ་ཏེ་ལོངས་སྐུར་ལྡང་བ་དང་༔ ཐ་མ་མངལ་གྱི་སྒོ་བཟང་པོ་ལས་ལམ་གྱི་འཕྲོ་མཐུད་པའི་ཚུལ་གྱིས་སམ་གྲོལ་བའི་རྒྱུར་བྱེད་པ་ཙམ་ནི་འོག་ཏུ་འབྲས་བུའི་སྐབས་ལྟར་རོ༔ བར་དོ་དྲུག་པོ་འདི་དག་ནི་གཞི་སེམས་ཅན་གྱི་དུས་སུ་ཡང་སྣང་བས་ན་སྦྱང་གཞིའི་གྲངས་སུ་གཞུག་ཀྱང་ཞིབ་ཏུ་དཔྱད་ན་སྐུ་གསུམ་གདོད་མའི་གཞི་ནི་སྦྱང་གཞི་ཡིན་ལ༔ དེ་བར་དོ་དྲུག་གི་སྡུག་བསྔལ་དུ་ཞེན་པའི་སྣང་བ་ནི་སྦྱང་བྱའོ༔ དེ་ལྟར་ན་ཆ་གཉིས་སུ་འགྱུར་བ་དཔེར་ན་གཡའ་ཡི་གོས་པའི་མེ་ལོང་ལ༔ མེ་ལོང་ཕྱིའོ་ཟེར་བ་ལ༔ ཕྱི་གཞི་མེ་ལོང་༔ ཕྱི་རྒྱུ་གཡའ་ཡིན་ཡང་ཆ་མ་ཕྱེས་པ་ལྟ་བུའོ༔

གཉིས་པ་སྦྱོང་བྱེད་གདམས་ངག་དྲུག་གི་ཁྱད་པར་གྱི་ལམ་ལ༔ སྤྱིར་སྐྱེ་བའི་རིམ་པ་དང་སྐྱེ་གནས་སྦྱོང་བྱེད་ཀྱི་ལམ་ཁྱད་པར་བ་བསྐྱེད་རིམ༔ འཆི་སྲིད་སྦྱོང་བྱེད་ཀྱི་ལམ་ཁྱད་པར་པ་རྫོགས་རིམ་ཡིན་ཅིང་༔ ཆོས་ཉིད་སྐུ་གསུམ་གྱི་སྣང་བ་སྦྱོང་བྱེད་ཁྱད་པར་བ་རྫོགས་པ་ཆེན་པོ་དང་༔ སྲིད་པ་བར་དོ་སྦྱོང་བྱེད་ཀྱི་ལམ་ལ་ཁྱད་པར་བ་སྒྱུ་ལུས་ཀྱི་བར་དོ་རང་བཞིན་མེད་པར་སྦྱོངས༔ བདུད་གཅོད་ཀྱིས་འཇིགས་སྐྲག་ཐོག་བརྫིས་སུ་དགྲོལ་ཞིང་༔ ཆགས་སྡང་གི་བདུད་གཅོད༔ དེ་ནས་སྐྱེ་བ་སྤྲུལ་སྐུར་འབྱིན་པའི་དབང་ཕྱིན་པ་དང་༔ རྨི་ལམ་བར་དོ་སྦྱོང་བྱེད་ཀྱི་བཞི་པོ་དེ་དག་ངོ་ཤེས་པ་དང་༔ ལྷ་དང་༔ འོད་གསལ༔ སྒྱུ་མ༔ རང་བཞིན་སྤྲུལ་བར་སྦྱོང་བསྒྱུར་གྱི་འདྲ་འབག་གི་ངེས་པ་སྟེར་བ་དང་༔ ཉིན་མཚན་ཏིང་འཛིན་ལ་འཁོར་ཡུག་ཏུ་བྱེད༔ བསམ་གཏན་བར་དོའི་ཁྲིད་ཀྱི་དེ་དག་ཐམས་ཅད་ཀྱི་རྟེན་བྱེད་པ་དང་དྲུག་ཏུ་གནས་ཀྱང་༔ འཕོ་བས་ནི་ཀུན་ལའང་སྟོང་འདེབས་པ་ཡིན་ན་ཡང་༔ དེ་ཁོང་དོན་དུ་ལྡན་པར་འདིར་ནི་རང་བཞིན་སྐྱེ་གནས་ཀྱི་བར་དོ་ལ་བར་དོ་དྲུག་གི་གཞི་ལྟ་བས་གཏན་ལ་ཕབ་ནས་ཐག་བཅད་པ༔ བསམ་གཏན་ཏིང་འཛིན་གྱི་བར་དོ་ལ་བར་དོ་དྲུག་གི་གདམས་ངག་གི་དགོངས་པའི་ངང་སྐྱོང་བ༔ ཉིང་འཁྲུལ་རྨི་ལམ་གྱི་བར་དོ་ལ་གྲོལ་བའི་ཚད་དྲུག་བཟུང་བ༔ འཆི་སྲིད་སྡུག་བསྔལ་གྱི་བར་དོ་ལ་བར་དོ་དྲུག་གི་འཕོ་བས་སྟོང་འདེབས་པ༔ ཆོས་ཉིད་སྐུ་གསུམ་གྱི་བར་དོ་ལ་འབྲས་བུ་ཡེ་ཤེས་རང་ས་བཟུང་བ༔ དགུ་སྲིད་སྲིད་པའི་བར་དོ་ལ་གྲོགས་སྤྱོད་པས་འཁོར་བའི་སྐྱེ་རྒྱུན་བཅད་པའོ༔

དང་པོ་བར་དོ་དྲུག་གི་གནས་ལུགས་ལྟ་བས་གཏན་ལ་ཕབ་པ་ལ༔ རྒྱུ་འབྲས་ངོ་བོ་ཉིད་གསུམ་གྱི་བར་དོ་དྲུག་གིས་ངོ་བོ་སྟོང་ཉིད་དུ་གཏན་ལ་ཕབ་པ༔ དཔེ་དོན་རྟགས་གསུམ་གྱིས་བར་དོ་དྲུག་གི་སྣང་ཆ་ལྷུན་གྲུབ་སྐུ་དང་ཡེ་ཤེས་སུ༔ སྒྱུ་མའི་དཔེ་བཅུ་དྲུག་གིས་བར་དོ་དྲུག་སྣང་སྟོང་ཟུང་འཇུག་རང་བྱུང་གི་བྱང་ཆུབ་སེམས་སུ་གཏན་ལ་ཕབ་པའོ༔ དང་པོ་ལ་ནང་བདག་འཛིན་སྟོང་ཉིད་དུ་དང་༔ ཕྱི་བདག་གི་བ་སྟོང་ཉིད་དུ་གཏན་ལ་ཕབ་པ་གཉིས་ཡོད་པ་ལས༔ དང་པོ་རང་ཅག་རྣམས་ཚེ་རབས་འཁོར་བ་ཐོག་མ་མེད་པ་ནས་འཁོར་བའི་གནས་སུ་ཐར་བའི་གོ་སྐབས་མི་སྟེར་བར་སུས་བཅིང་ན་བདག་ཏུ་འཛིན་པ་འདིས་བཅིང་བ་ཡིན་ཏེ༔ བདག་འཛིན་འདི་ནི་སེམས་ཅན་ཐམས་ཅད་ཀྱི་དགྲ་གཅིག་པུར་གྱུར་བར་རྒྱུད་ལས་བཤད་དེ༔ དེ་ལ་དཔྱད་ན་དང་པོ་རྒྱུ་གང་ལས་ང་ཞེས་བྱ་བ་དེ་བྱུང་བརྟགས་པས་རང་ལས་མི་འབྱུང་སྟེ༔ གྲུབ་ཟིན་པའི་ཕྱིར་དང་༔ གཞན་ལས་མི་འབྱུང་སྟེ༔ རྒྱུ་འབྲས་འགལ་བ་དང་༔ གཉིས་ལ་སྐྱོན་གྱི་ཕྱོགས་ཉེས་ཆར་དང་༔ རྒྱུ་མེད་ནི་གང་གི་རྒྱུར་མི་སྲིད་པའི་ཕྱིར་རི་རྭ་བཞིན་དུ་གྱུར་པ་དང་༔ འཁོར་བའི་ཆོས་ཐམས་ཅད་ང་ལས་འབྱུང་བ་ཡིན་གྱི༔ གཞན་ལས་ང་མ་བྱུང་བར་ཤེས་སོ༔ རྒྱུ་མ་དམིགས་པས་རྟགས་འདི་བདག་གི་བ་ལའང་མཚུངས་ཏེ༔ རྒྱུ་མཚན་མ་མེད་ཚུལ་ལ་ངེས་ཤེས་སྐྱེ་བར་བྱེད་པའོ༔

གཉིས་པ་ངོ་བོ་སྟོང་པ་ཉིད་དུ་གཏན་ལ་ཕབ་པ་ནི་ལ་ ༼ དཔྱད་། ༽༔ གནས་ས་ལ་བརྟགས་པ་དང་༔ གནས་ཚུལ་ལ་བརྟགས་པ༔ གནས་མཁན་ལ་བརྟགས་པ་གསུམ་ལས༔ དང་པོ་ནི༔ སེམས་ཅན་ཐམས་ཅད་ལ་སེམས་མེད་པའི་གནས་སྐབས་ལྔ་མ་གཏོགས་པར་ངའོ་སྙམ་པའི་འཛིན་པ་རྒྱུན་ཆགས་པ་ཞིག་ཡོད་པ་དེ་ལ་མཁོ་བས་ཡོ་བྱད་ཐམས་ཅད་ལའང་ངའི་སྙམ་སྟེ་བདག་གིར་འཛིན་པར་བྱེད་པས་གཞི་དེ་ལུས་ངག་ཡིད་གསུམ་གང་ལ་གནས་བརྟགས་པར་བྱ་སྟེ༔ ལུས་ཀྱི་མགོ་མཇུག་ཕྱི་ནང་ཐམས་ཅད་བསིལ་ཏེ་ཞིབ་པར་བཙལ་བ་ནི༔ ནང་ན་གནས་ན་ཕྱིའི་སྣང་བ་ཐམས་ཅད་མི་མཐོང་སྟེ༔ ཁྱིམ་ནང་གི་མིས་ཕྱིའི་སྣང་བ་བཞིན་ནོ༔ ཕྱི་ནས་ནང་མི་མཐོང་བ་མིག་གི་ནང་ཁྲོལ་བཞིན་ནོ༔ སྟོད་ནས་སྨད་མི་མཐོང་ཏེ་དམྱལ་ཁམས་དང་༔ སྨད་ནས་སྟོད་ལྷ་ལ་ཡུལ་བཞིན༔ དེ་ལྟར་ན་ལུས་ཀྱི་ཚ་ན་འཁྱགས་ལྟོག་ཐམས་ཅད་ཀྱང་སེམས་ཀྱིས་མི་ཚོར་བར་ངེས་ཏེ༔ གང་ན་གནས་པ་དེ་ལས་གཞན་ན་མེད་པས་སོ༔ ཡང་ང་དེ་ལུས་ཐམས་ཅད་ལ་ཁྱབ་པར་གནས་ན་མཛུབ་མོ་བཅད་པ་ལ་ང་ཡི་དུམ་བུ་ཞིག་ཐལ་བ་དང་༔ རྣ་བ་མེད་པ་སོགས་ལ་ང་དུམ་གཅིག་མེད་པ་དང་༔ ཡང་རྨི་ལམ་གྱི་ལུས་ང་དེས་ཁྱབ་བམ་མི་ཁྱབ༔ ཁྱབ་ན་ང་ཡི་ཕྱོགས་གཅིག་ཉིན་དུས་ཀྱི་ལུས་འདི་ལ་མེད་པར་འགྱུར་རམ༔ མི་ཁྱབ་ན་དེའི་བདེ་སྡུག་ཉེ་བར་ལེན་མི་འོས་པའམ༔ ཡང་ན་འདིའང་དེ་ལྟར་མ་ཁྱབ་པར་རུང་བའམ༔ ལུས་ཀུན་ལ་ཁྱབ་པའི་ལུས་ཀྱི་རྡུལ་ཕྲན་རེ་རེ་ནས་ཀྱང་ཐ་དད་པས༔ དེ་རེ་རེ་ནས་ཁྱབ་པས་ང་དེ་ཡང་ཅིའི་ཕྱིར་ཐ་དད་པར་མང་པོ་མེད་དེ༔ དེ་ལྟར་ཅིའི་ཕྱིར་མི་ཤེས༔ གཅིག་གིས་མང་པོར་ཁྱབ་པ་ནི་མི་སྲིད་དོ༔ ཡོད་དེ་ལན་ཚྭ་རྡོག་གཅིག་ཆུ་ཕོར་གང་ཁྱབ་པ་འདྲ་ན་སྙམ་པ་ནི་མི་རིགས་ཏེ༔ ལྕེའི་ལྡག་ངོས་གཅིག་གི་ཚའི་རོ་དེས་ཕོར་བ་ཐམས་ཅད་གང་ན་མི་སྲིད་པས་རྡུལ་ཤིན་ཕྲ་མང་པོ་ཡོད་པར་རིགས་སོ༔ འོ་ན་ང་དེ་མགྱོགས་པས་རྒྱུག་པ་ཡིན་ནོ་སྙམ་ན༔ ཤིན་ཏུ་མི་འཐད་དེ༔ བར་གྱི་རྡུལ་དེ་དག་བརྒལ་བ་མི་མྱོང་བའི་ཕྱིར་དང་༔ སྟོད་སྨད་ལྷུན་ཅིག་ཏུ་སེན་མོའི་རྩེན་པ་མྱོང་བའི་ཕྱིར་དང་༔ ནང་ནས་ཁོང་སྟོང་དུ་འགྲོ་བའི་ལམ་མེད་པས་དང་༔ ཕྱི་ན་འགྲོ་བའི་ཤུལ་དུ་ལུས་སེམས་བྲལ་བར་མི་འགྱུར་བས་ཕྱིར་ཡང་མི་འཐད་དོ༔ ལུས་ལ་མི་གནས་ན༔ ངག་སྟོང་བ་བྲག་ཆ་ལྟ་བུ་དང་༔ སེམས་སྟོང་ཉིད་ལ་རི་རྭ་ལ་མོ་གཤམ་གྱི་བུས་ཉལ་པོ་བྱ་བ་ནི་མཚར་རོ༔ དེ་ལྟ་ན་ཡང་ལུས་ལ་གནས་ན༔ ངག་དང་སེམས་ལ་བདག་ཏུ་འཛིན་པར་ཡང་མི་ཐང་ན་དེ་ཡང་འཛིན་པས་མི་འཐད་དོ༔

གཉིས་པ་གནས་ཚུལ་ལ་བརྟགས་པ་ནི༔ འོན་ཀྱང་ད་དུང་བདག་དེ་གནས་ན༔ ལུས་སོགས་དང་གཅིག་གམ་ཐ་དད་དུ་གནས་བརྟགས་ན༔ གཅིག་ཏུ་གནས་ན་མི་འཐད་དེ༔ ལུས་ཤི་བའི་དུས་བདག་མེད་པར་འགྱུར་བའམ༔ ཡང་ན་ནི་འཆི་བ་མེད་པར་གྱུར་རམ་ལུས་བེམ་པོ་ལྟ་བུ་ལ་ང་གཅིག་ན་བེམ་པོར་གདོད་མི་ཟ་བ་དང་ང་དངོས་མེད་བརྟགས་ཡོད་དང་གཅིག་པས་ལུས་དངོས་མེད་དུ་གྱུར་བའམ༔ ལུས་ཞེས་བྱ་བ་ནི༔ དུ་མ་གྲངས་མེད་པ་དང་གཅིག་པས༔ ང་དེ་གྲངས་མེད་པར་འགྱུར་བ་དང་༔ ཆ་མེད་ཀྱི་ང་དང་གཅིག་པས་ན་ལུས་མེད་པར་འགྱུར་བ་དང་༔ ཕ་མའི་ཁུ་ཁྲག་གི་རྐྱེན་གློ་བུར་བ་ལས་བྱུང་བས་ཕྱིར་ང་དེ་འཕྲལ་བྱུང་དུ་འགྱུར་བ་དང་༔ སེམས་སྐད་ཅིག་མའི་ཕྲེང་བ་དང་༔ ངག་སྐད་ཅིག་མའི་སྒྲ་དང་ནི་གཅིག་པ་མ་ཡིན་དེ་དཔྱད་ན་དེ་དག་ཀྱང་མ་གྲུབ་པས་མི་འཐད་དོ༔ འོན་ཀྱང་སེམས་དང་གཅིག་ཡིན་ནམ་སྙམ་ན༔ བློ་ཆོས་ཚོར་འདུ་སེམས་པ་གང་དང་གཅིག་ཡིན་ངོས་བཟུང་རྒྱུ་ཡོད་དགོས་པ་དང་༔ བཟུང་ཡང་སྐད་ཅིག་སྔ་ཕྱིའི་གང་དང་གཅིག་གི་ངོས་བཟུང་དགོས་ལ༔ དེ་ལྟ་ནའང་ཚོགས་པའི་ལུས་སེམས་ལ་བཏགས་སོ་སྙམ་པ་ཞིག་བྱུང་ན༔ དེ་ལྟ་ན་ང་མེད་པར་ཟད་དེ༔ མིང་གི་ཁྱད་པར་དུ་བྱས་པ་ཕྲེང་བ་དང་འདྲ་བའི་ཕྱིར་རོ༔ དེ་དང་མི་འདྲ་སྟེ་ཤིང་ཞེས་པ་ཐམས་ཅད་པས་ཤིང་ལ་འཇུག་པ་བཞིན་ནོ་ཞེ་ན༔ དེ་ནི་དེ་འདྲ་སྟེ་མིང་ཙམ་ལས་སྤྱིའི་ཤིང་ཞེས་པས་རྣམ་དབྱེའི་གཞི་ཞིག་ཡོད་ཚེ༔ དངོས་པོ་སྣང་རུང་ལ༔ མ་དམིགས་པས་རྒྱུ་མཚན་ཅི་ཡོད༔ དེས་ན་ཤིང་ཡང་མང་པོའི་སྤྱི་མིང་ཡིན་གྱི༔ དོན་མིན་པས་ན་རིལ་པོ་གཅིག་ཏུ་མི་འགྱུར་བ་ཡིན་ཡང་༔ མིང་སྒྲ་སྤྱི་དངོས་མེད་རྟ་ཡི་རྭ་དང་འདྲ་བ་ལས་གྲུབ་པ་མེད་པས་ང་ཞེས་བྱ་བའི་མིང་ཙམ་དེ་ཡང་རང་མཚན་གྱིས་གྲུབ་པ་མེད་ཅིང་ལུས་སེམས་ཚོགས་པ་ལ་ང་ཞེས་བཏགས་པས་གོམས་ཏེ་ང་བློ་འབྱུང་བ་ནི་དཔེར་ན་མི་ཞིག་ལ་གུ་ཧྱ་ཨ་བྷྱ་ཡ་དང་ཀརྨ་སོགས་བཏགས་ཀྱང་ཁོ་རང་གི་སྟེང་ནས་གང་ཡང་མིན་ལ་ཡིན་པར་ཞེན་ནས་ཨ་ལན་འབྱུང་བ་ལྟ་བུའོ༔ འོན་ཏེ་གཅིག་ཏུ་མི་རིགས་ཀྱང་ཐ་དད་པར་ཡོད་སྙམ་ན༔ ཤིན་ཏུ་ཡང་མི་འཐད་དེ༔ ཕུང་པོ་ལྔ་ལས་ཐ་དད་དུ་ཡོད་ན་སྔ་མའི་ཉེས་པ་ཐམས་ཅད་ཀྱི་སྟེང་དུ༔ རྗེས་སུ་འགྲོ་ལྡོག་གི་འབྲེལ་བ་མེད་པར་འགྱུར་བ་དང་གཅིག༔ བདེ་སྡུག་ཉེར་ལེན་པ་མི་འབྱུང་བ་དང་གཉིས༔ ལུས་ལ་རྨ་སྲོལ་གཏོད་པ་དང་༔ མཚང་འབྲུ་བ་ཐམས་ཅད་ང་ལ་དོན་མ་མཆིས་ཏེ༔ ལྷ་སྦྱིན་དང་མཆོད་སྦྱིན་རྒྱུད་ཐ་དད་པས་སོ༔ འོན་ཀྱང་ང་ཡི་ལུས་ཡིན་པས་སྙམ་ན༔ གཞན་གྱིས་ཁྱོད་ལ་སྦྱིན་ནས་ཐོབ་པ་ཞིག་གམ༔ ཁྱོད་ཀྱི་གནས་རྟེན་ཞིག༔ སྔ་མ་ནི་མ་ཡིན་སུས་ཀྱང་སྦྱིན་པ་མ་བྱས་པས་མ་བྱིན་བླང་བར་གྱུར་ལ༔ རྟེན་ཁང་པ་དང་འདྲ་ན་སྐྱོན་སྔར་བཞིན་ནོ༔ འོན་ཏེ་ཇི་ལྟར་གནས་མི་ཤེས་ཀྱང་ང་ཡོད་ན༔ ལུས་དང་ཕྱི་ནང་དུ་ཡོད་དམ༔ སྟེང་འོག་ཏུ་ཡོད་དམ༔ བསྒྲིགས་ནས་སམ༔ གྲོགས་ཀྱི་ཚུལ་ལམ་བདག་པོར་ཡོད་བརྟགས་ཤིང་དཔྱད་པས་གནས་ཚུལ་འདི་འདྲར་མེད་པར་ཐག་ཆོད་པ་ན༔ ཕྲག་དོག་གིས་ལུས་སེམས་བརྒྱང་བ་ངོ་མཚར་ཡ་མཚན་པས་ལྟ་བའི་དོན་རྒྱུད་ལ་འཁྲུངས་པ་ཁ་ཅིག་གི་ང་ཡོད་དེ༔ ངས་ཁྱོད་ལ་གནོད་པ་བྱས་ན་ཟེར་ཡང་༔ འཇིག་རྟེན་རྒན་པོའི་ངོར་བདག་མེད་བཞིན་བདག་འཛིན་འབྱུང་བའི་གནས་ལུགས་གཏན་ལ་ཕབ་པ་ཡིན་གྱི༔ སྣང་ཚུལ་དེ་མ་ཐག་པ་ནས་འགགས་འགྲོ་དགོས་ན༔ ཁྱོད་ཀྱང་ཆོས་ཐམས་ཅད་མེད་དོ་སྙམ་པར་གཏན་ལ་ཕབ་པ་ལ་བརྒྱུད་ཆུ་ཐོག་ཏུ་འཁྲིད་པ་འདི་མ་གོ་བའམ༔ ཡང་ན་སུན་ཅི་ཕྱིན་གྱི་ཚིག་དོན་ལ་ཐུགས་གཏད་དམ༔ རིག་པས་བཟློག་རིན་མི་ཆོག་གོ༔

གསུམ་པ་གནས་པ་རང་གི་ངོ་བོའམ་མཁན་པོ་ལ་བརྟག་པར་བྱ་སྟེ༔ མིག་ལ་སོགས་པའི་དབང་པོ་དྲུག་གི་གཟུགས་ལ་སོགས་པའི་ཡུལ་གྱི་ཚུལ་དུ་མཐོང་ངམ་མ་མཐོང་༔ དང་པོ་ལྟར་ན༔ གཟུགས་དབྱིབས་ཁ་དོག་བྱད་བཞིན་ཆེ་ཆུང་སོགས་ཅི་འདྲ་འདུག་ཁ་ནང་དུ་འཁོར་ནས་དཔྱད་དེ་ཅི་ཡང་མ་མཐོང་ན་ང་ཡོད་པར་གང་གིས་ཤེས༔ རྒྱལ་བ་རྫོགས་བའི་སངས་རྒྱས་ཀྱིས་ང་དེའི་ཚེ་ལ་སོགས་གསུངས་པས་སོ་སྙམ་ན༔ དེ་ནི་ཐ་སྙད་དང་སྒོ་བསྟུན་ནས་དགོས་དབང་གིས་གསུང་པ་ལས༔ སངས་རྒྱས་བདག་མེད་སེང་གེའི་སྒྲ་དང་ལྡན་པ་ལ་སྒྲོ་སུས་གདགས༔ འོན་ཀྱང་སེམས་ཅན་ཐམས་ཅད་ཀྱིས་བདག་ཏུ་འཛིན་པའི་ཕྱིར་ཐེ་ཚོམ་ཟའོ༔ འོ་ན་དྷ་དྷི་ར་ཟོས་པ་ཐམས་ཅད་ཀྱི་འབུ་སྲིན་མཐོང་བ་དང་༔ སྒྱུ་མ་ཐམས་ཅད་ཀྱི་མཐོང་བས་ཅི་ཉེས་ནས་དགག༔ ཡང་གལ་ཏེ་ཡོད་པ་ལ་དངོས་པོ་ཞིག་གམ་གཉིས་གཉིས་མིན༔ དངོས་མེད་ཞིག༔ དངོས་པོ་ནི་མེད་དེ་སྣང་རུང་མ་དམིགས་པས་སོ༔ དངོས་མེད་ནི་ཁྱོད་ལ་བསྐལ་དོན་དུ་སོང་ན་ནི་བདག་ཏུ་ཅིའི་ཕྱིར་འཛིན་ཏེ་ཤ་ཟ་བཞིན༔ གཉིས་གཉིས་མིན་ནི་དོན་འགལ་བ་ཕྱོགས་གཅིག་ཏུ་ནམ་ཡང་མི་འདུ་བས་སྲིད་མཐའ་འང་ཁེགས་སོ༔ ཡང་ང་དེ་ལ་ཁྱབ་བྱེད་གཅིག་ཐ་དད་ལས་མི་སྲིད་ན་ཇི་ལྟར་ཡོད༔ གཅིག་དུ་ན་དུས་མེད་རིལ་པོའི་བདག་ཉིད༔ གཉིས་སུ་ན་ཕྲེང་བ་ལྟར་མང་པོ་ལས་གང་དུ་ངོས་འཛིན༔ དེ་ལྟར་ཞིབ་དུ་རྟོག་དཔྱོད་དྲི་བརྩད་ཀྱི་སྒོ་ནས་གཏན་ལ་ཕབས་པ་འདི༔ ཐོག་མར་བླ་མ་ལས་ཐོས་པ་ཙམ་གྱིས་བདག་ཏུ་འཛིན་པའི་རི་བོ་འཇོམས་པའི་ཐོ་ཆེན༔ བར་དུ་བསམས་པས་གཏན་ལ་ཞིབ་ཏུ་ཕབ་པས་ནས་བཟོད་པ་རྗེས་མཐུན་ཐོབ་པའི་མན་ངག་གི་ཟབ་གནད༔ ཐ་མ་གོམས་པས་མཐོང་ལམ་མྱུར་དུ་ཐོབ་པའི་ཉེ་ལམ་འདི་ཡང་གནས་པ་མེད་པའམ་ངོ་བོ་སྟོང་པ་ཉིད་ཟེར་རོ༔

འདི་ལྟ་བུའི་ངར་འཛིན་ཡེ་ནས་མེད་པ་ལས་ཡོད་པ་ལ་གཞོམ་ཞིང་བཤིག་ཏུ་མ་དགོས་པས་ཡེ་གྲོལ་ལམ་ཤེས་པ་ཙམ་གྱིས་ཆོག་པར་སྟོང་ཉིད་ཀྱི་འབྲས་བུར་གྲུབ་ཟིན་པས་ཐ་མ་འགྲོ་བའམ་སྨོན་པ་མེད་པའོ༔ དེ་ནས་ཕྱི་བདག་གི་བ་སྟོང་ཉིད་དུ་གཏན་ལ་ཕབ་པ་ལ༔ རྒྱུ་འབྲས་ངོ་བོ་ཉིད་གསུམ་སྟེ༔ དང་པོ་ནི༔ དངོས་པོ་དང་ཤེས་པས་བསྡུས་པའི་ཆོས་ཐམས་ཅད༔ བདག་དང་གཞན་དང་གཉིས་གཉིས་མིན་ལས་མི་འབྱུང་བ་སྔར་བསྟན་པ་ལྟར་ལ༔ རྐྱེན་ནི་ཡུལ་དབང་ཤེས་གསུམ་ལ་དཔྱད་པས་འཐུས་པས་ན༔ སྤྱིར་རྐྱེན་རེ་རེ་བ་ལ་འབྲས་བུ་མེད་པ་དང་༔ ཚོགས་པ་ལ་མེད་པའི་སྤྱི་འགྲོས་ཀྱིས་ཐག་ཆོད་སླའོ༔ དེ་ནི་རྒྱུ་མཚན་མ་མེད་པའོ༔ ངོ་བོ་ལ་དཔྱད་ན༔ སྤྱིར་ཕྱི་དང་ནང་གི་ཁྱད་པར་དུ་བྱས་པའི་གཟུགས་སྒྲ་དྲི་རོ་རེག་བྱ་ཐམས་ཅད་མེད་དང་མ་གྲུབ་པ་ཞིག་སྟེ༔ ཅིས་ཕྱིར་ན་གཟུགས་ནི་མི་བདེན་ཏེ༔ མང་པོ་ལ་གཅིག་ཏུ་ཞེན་པས་སྣང་བ་ཡིན་པས་སོ༔ དེ་ཡང་རགས་པ་ཐམས་ཅད་ལ་ཕྱོགས་དམིགས་ཀྱི་བར་དུ་ཐ་དད་པ་མང་པོ་ཡིན་པ་དང་༔ཕྱོགས་མེད་ན་མེད་པའི་ཕྱིར་རོ༔ དེ་ལྟར་རི་བོ་ཞེས་སྤོམ་ཡོར་དུ་བཟུང་བ་ཙམ་ལ་དངོས་པོར་ཞེན་པ་ལས་ཞིབ་ཏུ་དཔྱད་ན་ཅུང་ཟད་ཀྱང་གཅིག་ཏུ་གྲུབ་པ་མེད་དོ༔ འོན་ཀྱང་དུ་མ་ཚོགས་པ་ནི་ཡོད་དོ་སྙམ་ན༔ དུ་མ་ནི་དེ་བས་བསགས་གཞི་གཅིག་མེད་པས་བསགས་ཆོས་མེད་པ་འཇིམ་པ་མེད་པའི་བུམ་པ་བཞིན་ནོ༔ འོན་ཀྱང་ཡོད་སྙམ་ན༔ སྣང་བ་ཐམས་ཅད་ནི་དངོས་སུ་གྲུབ་པ་མེད་པའི་སྣང་ཚུལ་ཐ་དད་འོང་བ་ཡིན་ཏེ༔ ཆུ་རང་མཚན་གྱིས་མ་གྲུབ་པས་རིགས་དྲུག་ལ་མཐོང་སྣང་ཐ་དད་པར་ཡོད་པ་དང་༔ མེ་རང་མཚན་གྱིས་མ་གྲུབ་པས་གནས་སུ༔ ཟས་སུ༔ ཚ་བསྲེགས་སུ་འདུ་ཤེས་པ་ལ་སོགས་པ་ཡོད་ལ༔ ས་མ་གྲུབ་པས་ཟས་དང་གནས་དང་ནམ་མཁར་འདུ་ཤེས་པ་ཡོད་པ་དང་༔ ནམ་མཁའ་ལ་སར༔ ནམ་མཁའ་ལ་གནས་སུ༔ ནམ་མཁར་འདུ་ཤེས་པ་ཡོད་པའོ༔ འོ་དེ་ཡོད་པའི་འབྱུང་བ་བཞི་ལ་མཐོང་ཚུལ་ཡིན་ནོ་སྙམ་པའི་ཐེ་ཚོམ་དུ་གྱུར་ན༔ དེ་ནི་མ་ཡིན་ཏེ༔ ཡོད་ན་མཐོང་ཚུལ་གཅིག་ལས་གཞན་མི་སྲིད་ཀྱང་༔ མེད་པའི་དབང་གིས་གང་ཡང་འཆར་རུང་བ་དང་༔ ཉི་མ་ལ་གནས་སུ༔ སྒྲོན་མེར་མུན་པར་མཐོང་བ་དག་ཀྱང་ཡོད་པའོ༔ གལ་ཏེ་སྣང་བ་ཡོད་ན་རྨི་ལམ་དང་བར་སྲིད་ཀྱི་སྣང་བ་དེ་དག་གང་དུ་ཡོད༔ དམྱལ་བ་ལ་སོགས་པ་ཡང་གསོན་པོར་བལྟར་མེད་པའི་རྒྱུ་མཚན་དང་༔ བར་དོའི་ཉི་ཟླ་སོགས་མི་མཐོང་བའི་རྒྱུ་མཚན་ཡན་གར་བ་ཡོད་དགོས་སོ༔ འོན་ཀྱང་དངོས་པོ་ཡོད་དེ༔ གཟུགས་སོགས་མངོན་སུམ་དུ་མཐོང་ཐོས་སུ་གྲུབ་པའོ་སྙམ་ན༔ ཟླ་གཉིས་དེ་མངོན་སུམ་དུ་མཐོང་ཅིའི་ཕྱིར་མེད༔ དེས་དོན་བྱེད་པར་མི་འགྱུར་ན༔ མིག་ཤེས་བསྐྱེད་པས་སོ༔ གཟུགས་སོགས་ཡོད་དེ་ཆེ་ཆུང་༔ སྒྲ་སྙན་མི་སྙན༔ དྲི་ཞིམ་མི་ཞིམ༔ རོ་ཞིམ་མི་ཞིམ༔ རེག་བྱ་འཇམ་རྩུབ་ལ་སོགས་པ་ཡོད་པས་སོ་སྙམ་ན༔ དེ་ནི་མི་བདེན་ཏེ༔ གཟུགས་མཛེས་པ་ལ་སོགས་པ་ལྟོས་ནས་བཏགས་པ་ཡིན་པའི་ཕྱིར་དང་༔ གཅིག་ལ་མཛེས་པའི་ཉི་ཟླ་འདི་གཅིག་ལ་མི་་མཛེས་པ་མུན་པ་དང་༔ ཙུ་ཏ་རྐང་གཅིག་དང་རྐང་གཉིས་བཞིན་ནོ༔ སྒྲ་ནི་སྙན་མི་སྙན་ལ་སོགས་པའང་དེ་ལྟར་རང་ལ་མི་ཤི་བའི་སྐད་ངན་དེ་མི་སྙན་ཡང་དགྲ་ལ་སྙན་པ་དང་༔ ཤ་སྦྲང་སོགས་ལ་རུལ་པའི་དྲི་ཞིམ་པ་དང་༔ ཁྱི་ལ་ཚྭ་མི་ཞིམ་པ་དང་༔ མི་ལ་ཞིམ་པ༔ ཕག་ལ་བྲུན་ཞིམ་པ་ལ་སོགས་པའོ༔ འོན་ཀྱང་དབང་པོའི་མངོན་སུམ་མཐོང་ཐོས་སུ་གྱུར་སྙམ་སྟེ༔ དབང་པོ་དེ་ཁང་བ་འདྲ་བ་ལ༔ ཤེས་པ་མི་འདྲ༔ ཡུལ་རྣམས་ཕྱིའི་འདོད་ཡོན་དང་འདྲ་ན༔ དབང་ཤེས་དང་ཡུལ་འཕྲད་ནས་མི་མཐོང་སྟེ་མིག་གི་རང་བཞིན༔ མ་འཕྲད་ནས་མི་མཐོང་སྟེ་དམྱལ་ཡུལ་བཞིན༔ ཕུང་སུམ་མེད་དེ་འགལ་བའི་ཕྱིར༔ གལ་ཏེ་འདུས་པ་ལས་མངོན་ན་འདུས་པའང་མེད་དེ་དབང་པོ་ཡུལ་དང་འདུ་བ་ལ་ཕར་མ་ཕྱིན་ཡུལ་ཚུར་མ་སླེབས་སོ༔ ཤར་བ་ཡིན་ནོ་ཞེ་ན་མིན་ཏེ༔ མིག་ཏུ་ཚུར་སླེབ་ནས་ཤར་ན་ཐག་ཉེ་རིང་གི་གཟུགས་ལ་ཁྱད་མི་འབྱུང་༔ མིག་ཕར་དྲུང་དུ་སླེབ་ནས་ཤར་ན་དེ་འདྲ་ལ༔ སྒྲ་སོགས་ལྷག་མ་ཡང་དེ་བཞིན་ནོ༔ དོན་ཕྱི་རོལ་བ་དག་དང་དབང་པོ་ལ་འབྲེལ་བ་ཡོད་དམ་མེད་ཀྱང་དཔྱད༔ ཡོད་ན་གང་ཡིན༔ དབང་ཤེས་ཀྱི་ཕྱི་ནང་བར་གསུམ་གང་གིས་ཀྱང་ངེས་པས་མཐོང་ཚུལ་མེད་པ་དང་༔ ཡང་རབ་རིབ་དང་སྐྲ་ཤད་དེ་མཐོང་ངམ་མི་མཐོང་༔ མཐོང་བས་ཡོད་དགོས་ན་དེ་ཡང་ཡོད་དོ༔ ཐོས་པས་ཡོད་ན་བྲག་ཆ་དེ་ཡང་ཡོད་དགོས༔ འདུས་པ་གཟུགས་ཀྱང་ཕུང་པོ་ཀུན་བརྟགས་ཙམ་ལ་དཔྱད་ན༔ མགོ་དང་ཡན་ལག་ཕྱི་ཁོག་ནང་ཁྲོལ༔ སོ་སོར་བསལ་བས་གདགས་གཞི་ཡུལ་མེད་པར་གྱུར་པ་དང་༔ སོར་མོ་སོགས་ཀྱང་ཚིགས་ཀྱི་ཚོགས་ཡིན་པས་ན༔ དེ་ཡང་ཤ་རུས་རྩ་རྒྱུས་ལ་སོགས་པ་ལས་གྲུབ་པ་ལས་འདི་ཞེས་གྲུབ་པ་མེད་པ་དེ་དག་ཀྱང་རྡུལ་ཕྲན་ཙམ་འདུས་པ་ལས་མེད་པས་ན༔ ལུས་ཞེས་པ་ཅུང་ཟད་ཙམ་ཡང་མེད་ལ༔ ཚོར་བ་ལ་སོགས་པ་བློ་ཆོས་དག་མི་རྟག་པ་སྐད་ཅིག་མ་ཡིན་པ་དང་༔ འགྱུར་ཞིང་མི་བདེན་པ་ཞིག་ཡིན་པས་ཀྱང་ཡོད་པ་མ་ཡིན་ནོ༔ ཚོར་བ་ཡུལ་ན་མེད་པའི་རྟགས་སུ་སྣ་དུད་འཐེན་པས་སྡུག་བསྔལ་ཚ་བ་དེ་བདེ་བར་རློམ་པ་དང་༔ མེད་ན་སྡོད་མི་ཚུགས་ཤིང་གཉིད་མི་འོང་བ་དང་༔ ཁ་ཚ་བའི་ཤ་སྨན་ལ་སོགས་པ་བཞིན་དུ་དང་༔ ཡང་སྒོས་དྲོ་འཇམ་དེ་དགའ་བ་བསྐྱེད་ཀྱང་རེ་ཞིག་དེས་གདུང་བ་ཡོད་པའང་ཚོར་བ་ཡུལ་ན་ཡོད་ན་མི་འགྱུར་བ་ཞིག་གོ༔ བློ་ན་མེད་དེ༔ ཡོད་ན་རྟག་ཏུ་དགའ་གདུང་གང་རུང་ལས་མི་རུང་བ་དང་༔ གཉིས་འགལ་བ་འདུ་བ་གཞི་མི་སྲིད་པར་འགྱུར་བ་དང་༔ སེམས་དང་གཅིག་ཐ་དད་གང་དུའང་མྱོང་བ་མེད་པ་དང་བཅས་པས་ནའོ༔ སེམས་ཀྱི་ཆོས་ཐམས་ཅད་སེམས་དྲན་པ་ཉེར་བཞག་གིས་འཐུས་པས་ན༔ དེ་གཅིག་གཏན་ལ་ཕབ་ཀྱང་སེམས་དེ་ཉིད་ཡོད་པར་གང་གིས་ཤེས༔ དམིགས་པས་སོ་སྙམ་ན༔ ཇི་ལྟར་དམིགས༔ ཡུལ་སྣ་ཚོགས་ཤེས་ཤིང་དམིགས་པས་སྙམ་ན༔ ཡུལ་དེ་གཏན་ལ་ཕབ་ཟིན་པས་དམིགས་བྱ་མེད་པ་དང་༔ ཡུལ་ཤེས་ཐ་དད་ན་དམིགས་མི་སྲིད་པ་རྒྱུད་ཐ་དད་པས་མི་བཞིན༔ གཅིག་ན་མི་སྲིད་པས་བེམ་པོ་ལ་གཟུགས་ཡོད་པ་དང་༔ རྗེས་སུ་འགྲོ་ལྡོག་གི་ངེས་པ་མེད་པ་དང་༔ ཡུལ་དང་བྲལ་བའི་སེམས་ཡན་གར་བ་ནམ་ཡང་མ་དམིགས་ན་དམིགས་པས་ཟེར་བ་ཅི་ཡིན༔ གལ་ཏེ་དམིགས་ན་ཅི་འདྲའི་གཟུགས་དབྱིབས་ཁ་དོག་མགོ་འཇུག་ཕྱི་ནང་སྔུན་རྒྱབ་བྱད་བཞིན་གྱི་ཁྱད་མེད་པ་མི་འཐད་ན་དེ་གང་ལྟར་ཡོད༔ ཡང་དབང་པོ་ལྔའི་སྤྱོད་ཡུལ་དུ་མ་གྱུར་བར་ཁོ་འདི་ན་ཡོད་ཅིའམ༔ འོ་སེམས་ནི་ཡོད་དེ༔ མྱོང་བ་གསལ་རིག་གི་ངོ་བོ་ཅན་དུ་སེམས་ཡོད་དོ་སྙམ་ན༔ ཅི་མྱོང་བ་དེ་རང་ཡིན་གྲངས་ན་དུས་སྐད་ཅིག་མ་གཅིག་ལ་རང་མྱོང་དང་མྱོང་བྱར་ཆ་གཉིས་སུ་ཅི་ལ་འཐད་དེ༔ ལར་སྐད་ཅིག་སྔ་ཕྱིའི་ཕྲེང་བ་མིན་པས་དངོས་པོ་མི་འགྱུར་བ་མེད་པས་རྣམ་རྟོག་གི་རང་གི་དུས་སུ་རིག་དུ་ཆུག་དང་༔ གྲངས་མེད་པ་དེ་ལས་ཁྱོད་ཀྱི་རང་གི་སེམས་ངོས་བཟུང་དགོས་པས་ཁས་བླང་བྱ་དེ་གང་༔ དེ་ཐམས་ཅད་ང་རང་གི་སེམས་ཡིན་སྙམ་ན༔ འཛམ་བུའི་གླིང་གི་ལུས་ཐམས་ཅད་ཁྱོད་ཀྱི་ལུས༔ སེམས་ཅན་ཐམས་ཅད་ཁྱོད་ཀྱི་སེམས་སུ་བདག་ཏུ་འཛིན་པ་ཁྱི་རྒན་གྱིས་གཞིའི་དེ་ཚང་གི་མི་རྒྱུ་ཐམས་ཅད་ངའི་ཡིན་སྙམ་པ་འདྲའོ༔ ལུས་སེམས་གཅིག་ཐ་དད༔ སེམས་ཁོ་རང་ཡང་དེ་ལྟར་བརྟགས་པ་ན་མི་སྲིད་དེ་མེད་ལ་ཡོད་པར་བཟུང་བའི་སྣང་བ་རྡུལ་ལ་རིར་བཟུང་བ་ལྟ་བུའི་གཟུགས་དང་༔ ཐིག་པ་ལས་ཆུ་བོར་བཟུང་བ་ལྟ་བུའི་འཁྲུལ་བས་རང་བཅིང་པ་ཞིག་གོ༔

དེ་ལྟར་ཡུལ་དབང་ཤེས་པས་བསྡུས་པའི་ཆོས་ཐམས་ཅད་ལ་ཡུལ་མེད་བཞིན་སྣང་བ་ནི༔ དཔེར་ན་སྨྱོན་པས་ཤ་ཟ་མཐོང་སྣང་ལ་ཤར་བ་དང་གྲིབ་མ་ལྟ་བུ༔ དབང་པོ་མེད་བཞིན་སྣང་བ་ནི་བར་དོའི་མཐོང་བྱེད་ལྟ་བུ༔ ཤེས་པ་མེད་བཞིན་སྣང་བ་ནི་རྨི་སེམས་རྟོག་བཅས་མེད་པ་ལ་ཡོད་པར་འདྲ་བར་སྣང་བ་འོང་བ་ལྟ་བུའོ༔ ཡང་འདི་ལྟར་འཁོར་བའི་ཆོས་ཐམས་ཅད་ལ་གྲུབ་དང་བདེན་པ་ཡོད་དེ༔ གཅིག་ཏུ་དོན་བྱེད་པ་ལ་མི་བསླུ་བའི་ཕྱིར་དང་༔ གཉིས་སུ་ན་གལ་ཏེ་སེམས་ཅན་ཐམས་ཅད་རྒྱུད་གཅིག་དུ་འགྱུར་བས་སོ༔ སྙམ་པའི་བློ་ཞིག་འབྱུང་བ་ལ༔ གྲིབ་མས་མུན་པར་བྱེད་པ་དང་༔ འཇའ་ཚོན་གྱིས་མིག་ཤེས་བསྐྱེད་པ་ལ་སོགས་པ་སྔར་བསྟན་པ་ལ་བསྐྱར་བཟློས་ཡང་ཡང་མ་བྱས་ན་ལ་ཟློ་དཀའ་བས་ན་འདིར་བརླན་པར་བྱ་བ་དང་༔ གལ་ཏེ་སེམས་ཅན་དུ་སྣང་བའི་བློ་དེ་ཉིད་དེའི་སེམས་ཡིན་ནམ་མ་ཡིན༔ མ་ཡིན་པས་བེམ་པོའི་ཆོས་སུ་སྣང་བས་འཛིན་པ་ནི་ནམ་ཡང་མི་སྲིད་པའི་ཕྱིར་ན་འཐད་པ་མེད་པར་འབྲེལ་བས་གྲུབ་ལ༔ དཔེར་བྱས་ནས་མཚོན་ན་ཡང་༔ དམྱལ་བའི་གཤིན་རྗེའི་དཔུང་ཚོགས་འཇིགས་པར་རུང་བ་དང་༔ ལྕགས་བསྲེགས་ཀྱི་ས་གཞི་དང་༔ མེ་ལྕེའི་འཁོར་ལོ་དང་༔ ཤལ་མ་རིའི་མོ་ཚོགས་རང་ལ་དགའ་བས་འབོད་པ་དེ་དག་ཡོད་དགོས་ཏེ༔ ཡོད་ན་ཡུལ་ལམ་ཕྱོགས་གང་ན་ཡོད་པ་དང་༔ གལ་ཏེ་ས་འོག་ཏུ་ཡོད་སྙམ་པ་ཞིག་ན་ས་ཆེན་པོ་འདི་ཐལ་བའང་ལུས་པར་མི་འགྱུར་བ་དང་༔ བར་སྣང་སྟོང་བས་བར་ཆོད་དོ་སྙམ་ན༔ དེ་ཡིན་དུ་ཆུགས་ཀྱང་༔ ཤལ་མ་རིའི་མོ་ཚོགས་དེ་སྔར་ནས་ཡོད་པའམ་མེད་པས་བག་ཆགས་ཡིན་དཔྱད་ན༔ ཡོད་ན་ཁྱོད་ལ་དགའ་བའི་ཆགས་ཡུལ་དེ་སྣང་མི་རུང་སྟེ་དེ་མ་ཡིན་པས་སོ༔ མེད་ན་བག་ཆགས་ཀྱི་གནས་དོན་ལུས་སུ་སྣང་བའང་དེ་བཞིན་དུ་འཐད་པ་དང་༔ བར་དོའི་འཇིགས་གཟུགས་ཅན་གྱི་གཤིན་རྗེ་དེ་ལ་སེམས་ཡོད་དམ་མེད༔ ཁྱོད་ལས་རྒྱུད་ཐ་དད་པས་བསྡུས་སམ་མ་བསྡུས༔ རྨི་ལམ་གྱི་སྣང་བའང་དེ་འདྲ་བ་ཞིག་གོ༔ ཁྱད་པར་དུ་ང་མེད་ལ་ཡོད་པར་བཟུང་བས་ཚུར་རི་ལྟ་བུ་སེམས་ཡོད་པར་སྣང་བ་དང་༔ དེ་ལ་ཕན་གནོད་བར་མར་སྣང་བས་རང་གི་གཟུགས་བརྙན་རྣམ་པ་ཆ་འདྲ་བའི་སེམས་ཅན་ཡོད་པར་སྣང་བ་དང་༔ ལུས་མེད་པར་ཡོད་པར་ཞེན་པའི་བེམ་པོའི་གཟུགས་བརྙན་གྱིས་ས་རྡོ་རི་བྲག་ཏུ་སྣང་བ་དག་ལ་འཐད་པའི་ཁྱད་པར་མེད་པ་དང་༔ བདེན་རྫུན་མེད་པའོ༔ དེ་ལྟ་ན་གཞན་དང་རང་གི་བདེ་སྡུག་ཐམས་ཅད་འདྲེས་པར་འགྱུར་བ་དང་༔ གོ་ས་ཐ་དད་པ་དང་༔ ཡང་ཡུལ་ཐམས་ཅད་སེམས་ཡིན་ན་བེམ་ཤེས་འཆོལ་བ་དང་༔ རང་ལ་མང་པོ་འགྱུར་བ་དང་༔ བཅོམ་ལྡན་འདས་སངས་རྒྱས་པས་སེམས་ཅན་ཐམས་ཅད་སངས་རྒྱས་པར་ཐལ་བ་དང་༔ བདག་འཁོར་བར་ལྟུང་བས་དུས་གསུམ་གྱི་སྐྱབས་ཡུལ་ལ་འོ་བརྒྱལ་བྱེད་པ༔ རང་ཤི་བས་འཁོར་བ་ཐམས་ཅད་རྒྱུན་ཆད་པ་འདི་མི་རུང་སྙམ་པ་ཞིག་སྣང་སྟེ༔ དེ་ལ་དཔྱད་ན༔ སེམས་ཅན་རང་རྒྱུད་པ་མེད་ན་བདེ་སྡུག་ཐ་དད་པར་ཡོད་པའི་སྒྲུབ་བྱེད་ཡང་དག་པར་འདིའོ་ཟེར་བ་ཞིག་ཀྱང་དགོས་ན༔ དེ་ནི་མི་སྲིད་དོ༔ དེ་ལ་མེ་ལ་བསྲེགས་པ་སོགས་ཀྱི་འོ་དོད་འབོད་པས་ཤེས་ན༔ འོ་དོད་འབོད་པ་དེ་ཁྱོད་ཀྱི་ཐོས་པ་མེད་པར་སྒྲ་སོགས་བཀག་པ་ལྟ་བུ་ཡིན་པས་འཁྲུལ་སྣང་ཡིན་པར་ཟད་དོ༔ གོ་ས་ཐ་དད་པས་ཐ་དད་པར་ཤེས་ན་ཤེས་པ་སྔ་ཕྱིའང་ཁྱོད་ཀྱི་ཡིན་པར་མི་ངེས་ཏེ༔ དུས་སོགས་གོ་ས་ཐ་དད་པས་སོ༔ ལུས་ཐ་དད་པས་ན་སྐྱེ་བ་སྔ་ཕྱིའི་ལུས་སོགས་ཐ་དད་པ་དང་༔ རྒྱུན་ནི་མི་བདེན་ཏེ་ཆུ་བོ་བཞིན་དང་༔ སྐད་ཅིག་ཏུ་མིན་པས་རྟག་དངོས་མེད་པ་དང་༔ བེམ་ཤེས་གཞི་མཐུན་མེད་ཅེས་པའང་བརྟགས་ན་ནི་མིན་ཏེ༔ གནས་སྐབས་སྣང་ཚུལ་ཙམ་ལས་ངེས་པར་དེ་བདེན་ན་གནས་དོན་ལུས་ཀྱི་བག་ཆགས་བཞག་པའི་ཀུན་གཞི་དེ་ནི་ལུང་མ་བསྟན་ལ་བེམ་པོའི་བག་ཆགས་བཞག་པ་མི་སྲིད་དེ༔ ཁོ་རང་རྟོག་མེད་ཡིན་པས་སོ༔ ཤེས་པས་བཞག་པར་ཐེ་ཚོམ་མེད་དེ༔ བདེ་སྡུག་ལ་སོགས་པ་ཐམས་ཅད་ཀྱི་རྟེན་དང་བྱེད་པ་པོ་ཡིན་པས་སོ༔ དེ་ཡིན་ཕན་ཆད་སེམས་ལས་མ་གཏོགས་མི་རུང་བ་ཡིན་ཏེ༔ འདུ་ཤེས་པའི་བག་ཆགས་ཡིན་པའི་རྒྱུ་མཚན་ནོ༔ སྔར་ངས་ཟླ་བ་གྲགས་པ་ལ་སོགས་པའི་ཚུལ་བསྟན་ནས་སེམས་ཉིད་ཀྱི་སེམས་ཅན་འཇིག་རྟེན་དང་སྣོད་ཀྱི་འཇིག་རྟེན་བཀོད་པར་བཤད་པའང་དེའི་ཕྱིར་རོ༔ དེ་ཡང་སྤྱི་འཐུས་ཀྱི་སྣོད་ཀྱི་འཇིག་རྟེན་ཞིག་བཀོད་པ་ནི་མེད་དེ༔ རྨི་ཡུལ་བཞིན་ནོ༔ འཁོར་འདས་རང་སྣང་ཡིན་པས་སྣང་ཚུལ་མང་པོ་ཡང་གནས་ཚུལ་ལ་དེ་ལྟར་མ་གྲུབ་པ་ཡིན་ནོ༔ ལར་མང་པོ་ལ་སེམས་གཅིག་པུ་དང་༔ ལུས་གཅིག་ཏུ་བདེན་པར་འཛིན་པ་ལྟར་མི་སྣང་བའང་མིན་ནོ༔ དོན་དུ་གཅིག་གཞིའི་བདག་གམ་སེམས་ཀྱང་མེད་པས༔ སེམས་ཅན་རྒྱུད་གཅིག་དུ་དང་༔ རང་མང་པོར་གྱུར་པའང་ག་ལ་ཡིན༔ གཅིག་ཤི་བས་ཐམས་ཅད་འཆི་བར་འགྱུར་བའང་གཞན་འཆི་རྒྱུ་རང་མཚན་པ་མེད་པས་འབྲེལ་མེད་དང་༔ ཡུལ་རང་མཚན་པ་ཡོད་ན་སེམས་ཅན་ཐམས་ཅད་སངས་རྒྱས་པའི་འོག་ཏུ་བརྟན་པའི་སྣོད་ཡོད་པའི་སྟོང་པ་དེ་ཡང་མི་འཐད་པ་དང་༔ རྗེས་སུ་འགྲོ་ལྡོག་མི་བྱེད་པར་སེམས་པ་ཙམ་ལས་ཡུལ་མེད་ན་སུ་ཞིག་འགྲོ༔ སངས་རྒྱས་རང་མཚན་པར་གྲུབ་པར་འདོད་པ་ཡང་ཞེན་སྣང་ཡིན་པས་གོང་གི་བསམ་གཞི་ཐམས་ཅད་དོན་མེད་རྗེན་པར་ངེས་སོ༔

དེ་ལྟར་སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་ཡེ་ནས་སྟོང་པ་ཉིད་དུ་གཏན་ལ་ཕབ་པས་ངེས་པ་ནང་ནས་འདྲེན་མ་ཐུབ་པར་དུ་བསམ་པའི་ཤེས་རབ་ཀྱིས་ནང་ལ་སེམས་པ་ན༔ ངོ་བོ་སྟོང་པ་ཉིད་དོ༔

གསུམ་པ་འབྲས་བུ་སྨོན་པ་མེད་པ་ནི༔ དེ་ལྟ་བུའི་དངོས་པོ་ཐམས་ཅད་རྒྱུས་འབྲས་བུ་བསྐྱེད་དེ་འབྱུང་བ་མིན་པ་ནི་འབྱུང་བའི་ཚུལ་དུ་སྣང་བའི་དུས་ལ་དཔྱད་ན༔ འབྲས་བུ་ཡོད་མེད་གཉིས་སམ་གཉིས་མིན་ཞིག་བསྐྱེད་པ་མ་ཡིན་ནོ༔ དེ་ལྟར་རྒྱུ་འབྲས་ངོ་བོ་ཉིད་གསུམ་གྱི་དཔྱད་པས་ཡོད་མེད་སྣང་སྟོང་གང་དུ་གྲུབ་པ་མེད་པར་ཤེས་པར་ནུས་ཀྱང་ཁྱད་པར་རྣམ་གྲངས་ཀྱི་སྟོང་ཉིད་དུ་ངེས་ཤེས་ཡང་དག་པར་འདྲོངས་བར་འགྱུར་རོ༔ མ་ཟད་སྣང་བ་དཀར་དམར་གྱི་ཁམས་སྣ་ཚོགས་པ་འགགས་པ་མེད་པར་སྣང་༔ སྣང་བ་ཉིད་ན་དེའི་རང་བཞིན་སྟོང་ཉིད་དུ་ངེས༔ སྟོང་ཉིད་དང་སྣང་བ་གཉིས་འདུ་འབྲལ་མེད་པར་དཔྱོད་པ་ལ༔ འོག་དུ་བཤད་པ་དང་སྦྲེལ་ཤེས་པ་འདི་གལ་ཆེའོ༔

དོན་གཉིས་པ་དཔེ་དོན་རྟགས་གསུམ་གྱི་བར་དོ་དྲུག་གི་རང་བཞིན་ལྷུན་གྲུབ་སྐུ་དང་ཡེ་ཤེས་སུ་གཏན་ལ་ཕབས་པ་ལ་གཉིས་ཏེ༔ སྟོང་ཉིད་འགགས་མེད་དུ་གཏན་ལ་ཕབས་པ༔ འགགས་མེད་སྐུ་དང་ཡེ་ཤེས་སུ་བཤད་པ་གཉིས་ལས༔ དང་པོ་ནི༔ གཞི་སྤྲོས་པ་ཐམས་ཅད་དང་བྲལ་བ་ཞིག་ལ་དབུ་མ་ཟེར་གྱི་དེ་འདྲའི་སྟོང་རྐྱང་ལ་མ་ཡིན་ཏེ༔ གལ་ཏེ་ཡིན་ན་ཐམས་ཅད་སྟོང་པར་ལྟ་བ་དང་ཁྱད་མེད་པས་གནས་ལུགས་ལ་འདི་ལྟར་གཞོལ་བར་བྱ༔ ཀྱཻ་དེ་ལྟར་དཔྱད་ན་ཐམས་ཅད་སྟོང་བར་གྲུབ་པ་ལས་སྣང་བ་རབ་འབྱམས་འདི་འཆར་དོན་མེད་པས་ཅི་ཞིག་ཡིན༔ འཁྲུལ་བའི་རྒྱུའི་གློ་བུར་དུ་སྣང་ཞིག་ན་འཁྲུལ་བ་ཐམས་ཅད་ཟད་པའི་སངས་རྒྱས་དེ་ནམ་མཁའི་ཡིད་ཅན་ཞིག་དུ་སུས་འདྲེན༔ འགའ་ཞིག་གིས་སངས་རྒྱས་ཆད་པ་ཉག་གཅིག་ཏུ་ལྟ་ན་དེ་ལས་ཐུ་བ་མེད་པ་ཞིག་ཡིན་ཚུལ༔ སྟོབས་བཅུ་ལ་སོགས་པའི་ཟག་མེད་ཀྱི་ཆོས་ཐམས་ཅད་ཀྱི་སངས་རྒྱས་ཁོ་ན་ལས་ཐུན་མིན་དེ་དག་མཁྱེན་བརྩེ་ནུས་གསུམ་གྱིས་བསྡུས་པ་དང་༔ སྐུ་ལྔ་ཡེ་ཤེས་ལྔ་ལ་སོགས་པའི་ཁྱད་པར་དང་༔ མཚན་དཔེ་ལ་སོགས་པ་ཐམས་ཅད་ཆད་པ་ཉག་གཅིག་གི་དབྱིངས་ལ་སྦྱོར་དོན་ཡང་མ་དམིགས་པས་སྒྲོ་འདོགས་སུ་འགྱུར་བ་དང་༔ ཡང་འགགས་པ་མེད་པ་ཟེར་བ་དེ་སྣང་བ་ཅི་ཡང་མི་སྲིད་ན་བརྗོད་གཞི་མེད་པའི་རྗོད་བྱེད་ཞིག་ཀྱང་ཡིན་ཞེས་དཔྱད༔ འཁོར་བའི་ཆོས་སུ་སྣང་བ་ཐམས་ཅད་རྒྱུ་རྐྱེན་ལས་འབྱུང་བ་ལས་འགགས་མེད་དུ་ཡོད་པ་མིན་པ་དང་༔ དག་པ་མྱང་འདས་ཀྱི་ཆོས་ཐམས་ཅད་ཀྱང་ཚོགས་གཉིས་ཀྱི་རྒྱུ་རྐྱེན་དག་པ་ལས་བྱུང་བས་ན་འགགས་མེད་མི་འཐད༔ དེ་ཕྱིར་རྣམ་པ་ཀུན་ཏུ་དོན་དམ་རྟོགས་ནས་སྟོང་ཉིད་ཡིན་པ་དང་༔ མ་རྟོགས་ན་ཀུན་རྫོབ་ཡིན་པར་འཛིན་པ་གཅིག་འབྱུང་ཉེ་ཡང་༔ རྒྱུ་རྐྱེན་ཐམས་ཅད་ཕུག་དེད་ན་སྟོང་ཉིད་ལས་རང་ཤར་དུ་འབྱུང་དོན་མེད་པ་ནི་རི་རྭ་ལས་སུ་ཡང་འབྱུང་བ་མེད་པ་དང་༔ སྟོང་བཞིན་དུ་སྣ་ཚོགས་ཀྱི་སྣང་བ་དག་མ་དག་ཐམས་ཅད་བཀག་པ་མེད་པར་སྣང་བ་ཉིད་འགགས་མེད་ཡིན་པའི་གནད་ཀྱིས་སོ༔ དེ་ལྟར་སྟོང་པ་ཉིད་དེ་འཁོར་འདས་ཀྱི་སྣང་བ་འགགས་པ་མེད་པ་དང་༔ འགགས་པ་མེད་པ་དེ་ཐོག་མ་ནས་སྟོང་པ་ཉིད་ཡིན་པ་དང་༔ བཟང་ངན་མེད་པར་གཉིས་ཆར་ཡེ་ནས་མཉམ་པ་ཉིད་དེ་བདེན་གཉིས་ཟུང་འཇུག་བདེན་གཅིག་སྤྲོས་བྲལ་ཆེན་པོ༔ འཕགས་པའི་མཉམ་བཞག་གི་སྤྱོད་ཡུལ་ཤེས་རབ་ཀྱི་ཕ་རོལ་ཏུ་ཕྱིན་པ་ཡིན་པར་པདྨ་ཀ་རཱ་ངའི་གཏན་ཚིག་གོ༔ ས་མ་ཡཱ༔

གཉིས་པ་འགགས་མེད་སྐུ་དང་ཡེ་ཤེས་སུ་བཤད་པ་ནི༔ གོང་དུ་བསྟན་པའི་འཁོར་བའི་སྣང་བ་འགགས་མེད་དེ་ལ་སྣང་གཞི་ཞིག་ངེས་པར་ཡོད་པར་འགྱུར་ཏེ༔ དཔེར་ན་ཐོ་ཡོར་མེད་ན་མིར་འཁྲུལ་བ་མི་གནས་པ་དང་ཐག་ཁྲ་མེད་ན་སྦྲུལ་དུ་དང་༔ ཟླ་བ་མེད་ན་གཉིས་སྣང་དུ་མི་འབྱུང་བ་བཞིན་ནོ༔ དེ་ལ་མ་ངེས་ཏེ་རབ་རིབ་བཞིན་སྙམ་པ་ལ༔ རབ་རིབ་རྒྱུ་མེད་མིན་ཏེ༔ གཞི་ནམ་མཁའ༔ རྐྱེན་ནད་གཞི༔ བདག་རྐྱེན་དབང་པོ་ལས་བློས་རྣམ་པ་དེ་ལྟར་འབྱུང་གི་གང་རུང་ཞིག་མ་དམིགས་ན་མེད་པའི་ཕྱིར་རོ༔ སྣང་གཞི་དེ་འཁོར་བ་དང་༔ མྱ་ངན་འདས་གང་རུང་ལས་མ་འདས་པས་ཅི་ཡིན་ན༔ འཁོར་བ་མེད་སྣང་ཡིན་པས་ན་དུང་ལ་སེར་འཛིན་ལྟ་བུ་སྟེ་དེ་བས་ན་མྱ་ངན་ལས་འདས་པར་ཤེས་པར་བྱའོ༔ དེ་ཡིན་པའི་གནད་ཀྱིས་སྣང་སྟོང་དང་༔ སྒྱུ་འོད་དང་༔ བསྐྱེད་རྫོགས་སོགས་བསྒོམ་པ་ཐམས་ཅད་དོན་དང་མཐུན་པ་དང་༔ སྒོ་གསུམ་སྐུ་གསུང་ཐུགས་སུ་བཤད་པ་དང་༔ ཕུང་ལྔ་རིགས་ལྔར༔ འབྱུང་ལྔ་ཡུམ་ལྔར༔ ཉོན་མོངས་ཡེ་ཤེས་ཡིན་པས་མི་སྤངས་ཚུལ་གསུངས་བ་ལ་སོགས་པ་ཐམས་ཅད་མིན་པ་བྱིན་གྱི་རློབ་བྱེད་རྗེན་པར་བསྒོམ་པ་དང་༔ ལྟ་བ་ནི་སྟོང་ཉིད་རྐྱང་པ་ཡིན་པ་གཉིས་མ་འབྲེལ་བ་འབྲེལ་བར་བསྒོམ་པས་ཅི་ཡང་མི་གྲུབ་སྟེ༔ རྒྱུ་མཚན་དེ་ཉིད་ཀྱིས༔ དེ་དག་རང་ངོ་མ་ཤེས་པས་སྐུ་ལུས་ཀྱི་འཁྲུལ་རྐྱེན་དུ༔ གསུང་ངག་གི༔ ཐུགས་ཡིད་ཀྱི༔ ཡོན་ཏན་ཡུལ་གྱི༔ ཡེ་ཤེས་ཉོན་མོངས་ཀྱི༔ ཕྲིན་ལས་ལས་ཀྱི་འཁྲུལ་རྐྱེན་དུ་སོང་བའི་ཞེན་སྣང་སྦྱོང་བྱེད་དུ༔ ཕྱག་རྒྱ་བཞིའི་དགོངས་ཀློང་དང་བཅས་པ་གསུངས་པ་དང་༔ སྐུས་རྟེན་བྱེད་ལྟར་ལུས་ཀྱི་རྟེན་བྱེད༔ སྐུ་ལ་སྤྱན་ནི་མཐོན་མཐིང་སོགས་མཚན་དཔེ་ཡོད་པས་ས་དམིགས་ཀྱི་མིག་སོགས་ལུས་ལ་ཡོད་པས་རྣམ་པ་མཐུན་པ་དང་༔ གསུང་ལ་ངག་གི་སྒྲ་ཐམས་ཅད་ཨ་ལི་ཀ་ལི་ལས་མ་སྐྱེས་པ་མི་སྲིད་པ་དང་བརྡ་སྤྲོད་པ༔ ཐུགས་ལ་ཡིད་ཀྱི་ཤེས་བྱ་སྣང་སྟོང་ཡོད་མེད་མཁྱེན་པའི་ཆ་འདྲ་ཡོད་པ༔ མཁྱེན་པའི་ཡེ་ཤེས་དང་ཆ་མཐུན་པའི་སེམས་ཅན་ཕྲ་བ་ལའང་ཅུང་ཟད་ཤེས་པས་སྲོག་གི་ཕང་པ་ཙམ་ནས་མང་པོ་དང་༔ བརྩེ་བའི་ཐུགས་རྗེའི་རང་བཞིན་ངན་དུ་སོང་བ་ལས་རྣམ་པ་མ་དོར་བ་ནི་རང་གི་བུ་ལ་སྙིང་རྗེ་བ་ལ་སོགས་པ་དང་༔ ནུས་པའི་ཕྲིན་ལས་ངན་དུ་སོང་ཡང་དུད་འགྲོས་ཀྱང་གཡོ་འགུལ་དང་རྩ་འཐུ་བ་ལ་སོགས་པ་དང་༔ ཡང་སྤྲུལ་སྐུ་གཞན་ལ་སྣང་བ་ལྟར་ལུས་རགས་པ་གཞན་ལའང་སྣང་སྲིད་པ་དང་༔ ལོངས་སྐུ་ཕྱེད་སྣང་ལྟར་ངག་ཕྱེད་སྣང་༔ ཆོས་སྐུ་མི་སྣང་བ་ལྟར་སེམས་མི་སྣང་བས་ཐ་ཚིག་དང་༔ ཁྱད་པར་དུ་འཁོར་འདས་རྫོགས་པ་ཆེན་པོའི་ལྷུན་གྲུབ་སྒོ་བརྒྱད་ལས་བདག་ཏུ་བཟུང་རིམ་གྱིས་འབྱུང་བར་དེ་ཉིད་གསལ་བ་ལས་བསྟན་པས་ཀྱང་ཤེས་སོ༔ ཡང་སངས་རྒྱས་ཀྱི་བཀའ་ཐ་མ་ལས་བསྟན་པ་དེ་ཉིད་གབ་པའི་ཚུལ་དང་༔ རྡོ་རྗེ་ཐེག་པ་ལས་གསལ་བར་བྱས་པ་ཡིན་པས་ན༔ སྒྲུབ་གཞི་རླུང་འོད་ཟེར་ལྔ་པ་དང་༔ མི་ཤིགས་པའི་ཐིག་ལེ་དང་༔ ཀྱཻ་རྡོ་རྗེར་ཡེ་ཤེས་སུམ་བརྩེགས་ལ་སོགས་པར་གསུངས་པ་ཐམས་ཅད་དང་༔ རྫོགས་པ་ཆེན་པོའི་ཡེ་ཤེས་སུམ་བརྩེགས་ལ་སོགས་པ་ཐམས་ཅད་ཀྱང་གནད་གཅིག་པས་ན་ཕན་ཚུན་ཆོས་སྤངས་པའི་ཉམས་ཉེས་ལས་ཕྱག་གི་གཟུང་པའི་གང་ཟག་དཔྱོད་པ་དང་ལྡན་པ་རེ་ཡོད་ན་དུས་མཐའི་སངས་རྒྱས་ཡིན་པར་གོར་མ་ཆག་གོ༔ དེ་ལྟ་བུའི་ཡེ་ཤེས་འོད་གསལ་སྐུ་གསུམ་ལྷུན་གྱིས་གྲུབ་པས་བདག་ཉིད་ནང་ན་ཡོད་པ་ནི་འཆར་གཞི་འམ་འཁྲུལ་བའི་ཆོས་ཐམས་ཅད་ཀྱི་གནས་ལུགས་སངས་རྒྱས་པ་དེ་ཡིན་པ་ལ༔ དེ་དག་བདག་ཏུ་བཟུང་བས་གོལ་བའི་རྒྱུ་ལས་ལུས་ངག་ཡིད་དུ་སྣང་བ་ནི་ཤར་ལུགས་ཡིན་ནོ༔ ལར་ཡེ་ཤེས་ཀྱི་ཆོ་འཕྲུལ་དུ་ལོངས་སྐུ་དང་སྤྲུལ་སྐུ་འབྱུང་བ་ཉིད་ཡེ་ཤེས་སེམས་སུ་འཁྲུལ་ནས་འཁོར་བར་འཁྱམས་པ་ན་སེམས་ཀྱི་རྩལ་སྣང་དུ་ལུས་ངག་གི་སྣང་བ་རྒྱུན་མི་འཆད་པ་འབྱུང་བའི་དོན་ཡང་དེ་ཡིན་པས་དོན་གྱི་ལུས་སྐུ་རུ་བཤད་པ་ན༔ སྐུ་ཤུལ་དུ་ལུས་འགྲོ་སྙམ་པ་དང་༔ ཕ་མའི་ཁུ་ཁྲག་ལས་གྲུབ་པས་གསར་དུ་གཞན་ལས་འབྱུང་ཟེར་བ་དང་༔ སྐུ་གསུང་ཐུགས་ཡེ་ནས་ཡོད་ན་རྟག་པར་འགྱུར་སྙམ་པས་གཞན་སྟོང་ལ་ཐལ་བ་འཕེན་པ་དང་༔ རང་སྟོང་དུ་གདེངས་འཆའ་ནའང་༔ འཁོར་འདས་རང་སྣང་ཡིན་པར་གཏན་ལ་ཕབ་པས་ལུས་ཤུལ་དུ་ལུས་པས་ཤུལ་ཞེས་པ་དང་ཕ་མ་གཞན་དུ་མེད་པའི་དོན་རང་གིས་མ་རྟོགས་པའི་མཚང་སྟོན་པ་དང་༔ ལུས་དོར་ལེན་དུ་སྣང་ཡང་རང་བཞིན་གྱིས་མ་གྲུབ་པ་དང་༔ གལ་ཏེ་སངས་རྒྱས་ལོངས་སྐུ་ངེས་པ་ལྔ་ལྡན་གྱི་བདག་ཉིད་འདུས་མ་བྱས་པ་ཉིད་རྒྱུ་རྐྱེན་གྱིས་མ་བསྐྱེད་པར་རྣམ་པ་ཀུན་ཏུ་མེད་ན་འདུས་བྱས་ཀྱི་སངས་རྒྱས་ཏེ་སྐུར་འདེབས་ཅིས་ཕྱིར་མིན་ཏེ༔ རྣམ་མཁྱེན་སོགས་འདུས་བྱས་སུ་འདོད་པ་ནི་འདུས་བྱས་མི་རྟག༔ མི་རྟག་སྡུག་བསྔལ་གྱི་བཀའ་རྟགས་ཀྱི་ཕྱག་རྒྱ་ལ་ངེས་སོ་མེད་པར་སྟོན་པས་གང་རུང་གི་ཉེས་པ་ལ་ཐོགས་པར་ངེས་པ་དང་༔ ལོངས་སྐུ་འདུས་བྱས་མི་རྟག་པར་འདོད་པ་མཚན་ཉིད་ཐེག་ཆེན་པས་ཀྱང་མི་བྱེད་ན་དེ་ལ་སུ་ཡིད་སྟོན་སོམས་དང་སྤྲོས་པས་ཆོག་གོ༔

དེ་ལྟར་ངོ་སྤྲད་པའི་ཕྱིར་དཔེ་དོན་རྟགས་ཀྱི་ངོས་ནས་སྤྱིར་སྨྲོས་ན༔ དོན་ནི་འབྲས་ཆོས་ལྔ་རང་ལ་ཡོད་པ་འདུས་མ་བྱས་ཡིན་པས་གནད་དུ་བསྟན་ཏོ༔ དཔེ་ནི་རས་བྲིས་དང་ཆུ་ཚོན་ལ་སོགས་པའོ༔ རྟགས་ནི་སྒོ་གསུམ་སྐུ་གསུང་ཐུགས་དང་ཆ་མཐུན་ཡོད་པས་སོ༔ དེ་ཡང་དུང་སེར་པོ་མཐོང་ཡང་རྣམ་པ་ཙམ་མི་འདོར་བ་དང་༔ ཉི་མ་སྤྲིན་གྱིས་བསྒྲིབས་ཀྱང་མུན་མི་སྲོས་པ་ལྟར་བརྟག་གོ༔ ཡང་རྣམ་ཆ་མ་དོར་བ་ཡོད་དེ༔ ཆོས་སྐུ་རང་ལ་ཡོད་པའི་གནད་ཀྱིས་སྤྲོས་པ་ཐམས་ཅད་དང་བྲལ་བའི་བར་དོ་སྟོང་བཞིའི་མཐའི་ཆོས་སྐུ་ཡང་དག་པར་འཆར་བ་དང་འབྱུང་བ་ཟད་ནས་རྒས་པ་དང་ཕྲ་བ་ནི་ཆོས་སྐུའི་བར་དོ་ལས་རང་སར་མཆེད་པ་དང་༔ རྨི་ལམ་འོད་གསལ་འཆར་རིམ་བསྡུ་རིམ་སོགས་ཡོད་པ་ནི་གཞིའོ༔ ལོངས་སྐུ་རང་ལ་ཡོད་པའི་གནད་ཀྱིས་ཟུང་འཇུག་སྐུ་དང་ཡེ་ཤེས་སུ་འཆར་བ་ཡིན་པའི་ཕྱིར་དང་༔ ད་ལྟ་ལུས་རྫོགས་པ་ན་ཡེ་ཤེས་རྒྱས་པའི་རྟགས་སུ་དཔྱོད་རྒྱ་དང་སེམས་ཤེས་དཀྱིལ་ཡངས༔ ཟུང་དུ་འཇུག་པའི་རྟགས་སུ་ཕོ་མོའི་སྣང་བ་མ་འགགས༔ སྟངས་དཔྱལ་ལས་སྤྲུལ་སྐུ་འགྱེད་པའི་རྟགས་སུ་བུ་ཚའི་དཔལ་བསྐྱེད་པ་དང་༔ འོད་ཟེར་འཕྲོ་བས་རྟགས་སུ་ཐབས་ཀྱི་རྣམ་པའི་བློ་སྤྲོ༔ ཡོན་ཏན་རྫོགས་པའི་ཞིང་ཁམས་བཀོད་ལེགས་པའོ༔ དང་པོ་ལུས་འཁྲུངས་པའི་དུས་སུ་ནི་ས་བཅུའི་རྟོགས་པ་སྦྱངས༔ སངས་རྒྱས་པས་རྟགས་སུ་ཆ་འདྲར་ཟླ་བཅུར་ལྷུམས་སུ་གནས༔ གཞན་དོན་དུ་སྤྲུལ་པ་ལེན་པའི་རྣམ་ཆ་བཙས་པར་སྣང་༔ རང་བྱུང་གི་དགེ་སློང་དེ༔ དེ་ཡང་ཆོས་གོས་གསུམ་གྱིས་ལུས་ལ་བརྒྱན་པའི་ཆ་འདྲར་ཕྲུ་བས་ཆོས་གོས་གསོལ༔ སྡེ་སྣོད་གསུམ་གྱིས་ངག་ལ་བརྒྱན་བའི་ཆ་འདྲར༔ ཨ་ཧཾ་སྣང་སྟོང་ཐབས་ཤེས་དབྱེར་མེད་ཟུང་འཇུག་བདེ་བ་ཆེན་པོར་སྟོན་པའི་ཆོས་སྒྲ་སྒྲོགས་པས༔ ཚུལ་ལ་གནས་པས་བྱ་བ་ཉུང་༔ ཏིང་ངེ་འཛིན་ལ་གནས་པས་སྣང་བརྟག་བསྲེ་བས་འཛིན་པ་ཆུང་༔ ཤེས་རབ་ལ་གནས་པའི་རྣམ་ཆར་ཤེས་རིག་བཀྲའོ༔ འདི་ལྟར་དོན་རང་བཞིན་དང་འབྲེལ་བས་རྟགས་ཀྱི་ངེས་པས་ལམ་གྱི་བསྒྲུབ་ན་སྒོ་གསུམ་བྱ་བ་དང་བཅས་པ་སྐུ་གསུང་ཐུགས་མཛད་པར་གོ་འཕོ་ཞིང་ཡེ་སངས་རྒྱས་པའི་རང་ཐོག་ཏུ་བཙན་ས་ཟིན་པ་ནི་དཔེར་ན་ནོར་བུའི་འོད་ལ་དོན་དུ་དཔོག་ནས་ཕྱིན་པས་ནོར་བུ་ཐོབ་པ་བཞིན་ནོ༔ གཞན་དུ་སྐུ་གསུམ་འདུས་མ་བྱས་པ་རྒྱུ་རྐྱེན་གྱིས་བསྐྱེད་པར་འགལ་བའི་ཕྱིར་སངས་རྒྱས་མི་ཐོབ་པ༔ དཔྱོད་ན་ལྟ་བ་སྤྲོས་བྲལ་ཡིན་པས་དེ་དང་རྗེས་སུ་མཐུན་པར་བསྒོམ་པ་ཙམ་ལས་མི་མཐུན་པས་ལྷའི་ཞལ་ཕྱག་གོམས་པས་འཛིན་པ་དེ་ལ་དོན་མེད་པ་དང་༔ རྒྱུ་ནས་ལྟ་བུའི་འདུས་བྱས་ལས༔ འབྲས་བུ་འདུས་མ་བྱས་པ་འབྱུང་ན་ཧ་ཅང་ཐལ་བ་ནམ་མཁའ་བསྐྱེད་པར་ཟད་དོ༔ འཁོར་བའི་རྣམ་པར་སྣང་བ་ནི་གཤིས་ཀྱི་གནས་ལུགས་མ་ཡིན་པས་ཟད་ཅིང་དག་པ་ཡོད་ལ༔ མྱ་ངན་ལས་འདས་པ་ནི་ཟད་པ་དང་འཕེལ་བ་མེད་པར་གཤིས་སུ་བཞུགས་པས་སོ༔ འབྲས་བུ་མངོན་གྱུར་ཡང་དག་པའི་སྣང་བ་གཏན་ནས་མེད་པའི་ཡོད་མིན་མེད་མིན་གྱི་སེམས་ལ་ལྟོས་འཆའ་བའི་ཏིང་ངེ་འཛིན་ཐོབ་པའི་སངས་རྒྱས་ཞིག་ཡིན་པར་མི་འདོད་ཀྱང་ཅི་ལྟར་སྤོང་དུ་ཡོད༔ དེ་བས་ན་སྣང་བ་སྐུ་དང་ཡེ་ཤེས་ཀྱི་དཀྱིལ་འཁོར་དུ་ཡེ་གནས་ཆེན་པོ་ལ༔ འཁོར་བའི་གནས་དོན་ལུས་སུ་སྣང་བའི་ཞེན་སྣང་དང་དེའི་ངོ་བོ་སྟོང་བཞིན་དུ་སྣང་བ་ཡིན་པར་མ་ཤེས་པར་ཡོད་པར་འཛིན་པའི་ཞེན་སྣང་སྦྱོང་བྱེད་དུ་བསྐྱེད་རྫོགས་ཀྱི་ལམ་བསྒོམ་པ་འཛིན་སྟངས་དོན་མཐུན་རྒྱུད་ལ་བརྟེན་པས་ཞེན་སྣང་དེ་ཇེ་དག་ཏུ་སོང་བས་དག་སྣང་ཇེ་མངོན་ལ་འགྲོ་བ་མུན་པའི་རུམ་ན་གནས་པའི་བུམ་པ་དེ་ཉི་མ་ཤར་བས་གསལ་བ་བཞིན་དག་པར་གནས་འགྱུར༔ སངས་རྒྱས་ཀྱི་སར་མཐར་ཐུག་པ་ཡིན་གྱི༔ སེམས་ཅན་གྱི་དུས་ན་ཡིད་ཀྱི་གཟུགས་བརྙན་དུ་གནས་ཚུལ་ལ་ལྷ་མིན་བཞིན་ཆ་ལུགས་ལྷར་བསྒོམ་པས་འཛིན་པ་འཁྲུལ་རྒྱ་ཇེ་ཆེ་ཇེ་བརྟན་ཇེ་སྲ་ཇེ་འཐས་སུ་སོང་ནས་འཁྲུལ་རྟོག་དེས་བཙན་ས་ཟིན་པར་གྱུར་ཏེ་གོང་དུ་གནས་འགྱུར་དང་སངས་རྒྱས་ཀྱི་གོམས་པ་མཐར་ཐུག་པར་འགྱུར་རོ་སྙམ་པ་ནི་བཞད་གད་ཀྱི་གནས་ཤིག་སྟེ༔ རྣལ་འབྱོར་པས་ཀེང་རུས་གོམས་པ་དེའི་སངས་རྒྱས་ཀྱི་རྣམ་མཁྱེན་དང་༔ འཕགས་པ་བས་གནས་འགྱུར་ལ་བརྟན་པ་མཐར་ཐུག་གི་འཁྲུལ་བ་བསྐྱེད་པར་གདོན་མི་ཟ་བའི་ཁས་བླང་གི་གྲུབ་མཐའ་ཐོབ་པོ༔ ཞེས་པདྨ་ངས་སྨྲའོ༔ རྫོགས་སྨིན་སྦྱངས་གསུམ་མཐར་ཐུག་པའི་སངས་རྒྱས་ཀྱི་གཟིགས་པ་ནི་མཐོང་བ་ཇེ་བཟང་ཡིན་གྱི་འཁྲུལ་སྣང་མིན་པ༔ དཔེར་ན་མིག་ཡོངས་སུ་དག་པའི་གང་ཟག་གིས་གཟུགས་ཀྱི་མཚན་ཉིད་ཚུལ་བཞིན་དུ་དང་༔ ཅུང་ཟད་དག་པས་དབྱིབས་ཙམ་དང་༔ ཤིན་ཏུ་མ་དག་པས་དེ་ཡང་མི་མཐོང་བ་ལྟར་ཡིན་པས་སྟོན་པ་ཡང་དག་པའི་ཚད་མར་གྱུར་པ་ལགས་སོ༔ ས་མ་ཡཱ༔

དེ་ནས་ཡང་རྒྱུད་ཀྱི་དོན་རྣམས་གཅིག་ཏུ་སྡོམ་ནས༔ དཔེ་དོན་རྟགས་གསུམ་གྱི་རྫོགས་ཆེན་གྱི་རྒྱུད་ལས༔ དཔེ་ནམ་མཁའ་ལྟ་བུ༔ རྟགས་སེམས་ཉིད་འགགས་མེད༔ དོན་རང་བྱུང་གི་ཡེ་ཤེས་བྱང་ཆུབ་ཀྱི་སེམས་སུ་ཐག་ཆོད་སྟོང་ཕྱོགས་ནས་བསྟན་པ་དང་༔ སྣང་ཕྱོགས་ཀྱི་དཔེ་མན་ཤེལ་གྱི་འོད་ལྔ༔ རྟགས་བ་སྤུའི་བུ་ག་ཐམས་ཅད་དང་༔ ཁ་རླངས་དང་༔ སྦྲིད་པས་རྟགས་སྣ་ནས་འོད་འབྱུང་བ་ནི་ཟེར་རང་ལ་ཡོད་བའི་རྟགས་དང་༔ ཐིག་ལེ་མིག་གི་འོད་གོར་བཙིར་བ་ལས་འབྱུང་བས་དང་༔ སྒྲ་ནི་རྣ་བ་གཏེམས་པས་འུར་འཐུག་གི་རྟགས་ཀྱིས་ཤེས་པར་བྱ་བ་ནི་འབྲས་རྟགས་ཡིན་པས་མར་མེའི་འོད་བཞིན་ནོ༔ རྟགས་བཅུའི་སྟོང་གཟུགས་ཀྱང་དང་འདྲའོ༔ དོན་ནི་ལྷུན་གྱིས་གྲུབ་པའི་རང་བཞིན་སྐུ་ལྔ༔ གསུང་ལྔ༔ ཐུགས་ལྔ༔ འོད་ལྔ༔ མཁའ་འགྲོ་ལྔ༔ ལ་སོགས་པར་གནས་པའོ༔ ཚུལ་རྒྱས་པར་ཟུར་བ་ལས་ཤེས་དགོས་སོ༔ ༼ འདི་དག་གི་བྱ་བྱེད་ལྟོས་པ་ཆོས་ཉིད་ཀྱི་རིགས་པའང་ཤུགས་ལ་ཐལ་ལོ། །མཆན། ༽

དོན་གསུམ་པ་སྒྱུ་མའི་དཔེ་བཅུ་དྲུག་གིས་བར་དོ་དྲུག་སྣང་སྟོང་ཟུང་འཇུག་རང་བྱུང་ཡེ་ཤེས་སུ་གཏན་ལ་ཕབ་པ་ལ༔ འཁོར་བ་སེམས་སུ༔ མྱང་འདས་རིག་པར༔ སེམས་རིག་དབྱེར་མེད་དུ༔ དབྱིངས་ཡེ་དབྱེར་མེད་དུ་བསམ་པའི་ཤེས་རབ་ཀྱིས་གཏན་ལ་ཕབ་པ་བཞི་ལས༔ དང་པོ་ནི༔ དེ་ལྟར་ན་འཁོར་བའི་སྣང་བ་ཐམས་ཅད་སེམས་ཀྱིས་བཟོས་པས་འཁྲུལ་སྣང་སེམས་དང་གཅིག་ཐ་དད་གང་དུ་ཡང་གྲུབ་པ་མེད་པ་ཡིན་ཏེ་དེའི་ངོར་སྣང་བས་འབྲེལ་བས་གྲུབ་པའོ༔

གཉིས་པ་ནི༔ ཇི་ལྟར་མྱ་ངན་ལས་འདས་པའི་སྐུ་དང་ཞིང་ཁམས་ལ་སོགས་པ་ཐམས་ཅད་ཀྱང་ནི་རང་བྱུང་གི་ཡེ་ཤེས་གཅིག་གི་རང་བཞིན་ལས་གཞན་དུ་གྲུབ་པ་མེད་པ་དེའི་སྣང་བ་ཡིན་པས་སོ༔

གསུམ་པ་ནི༔ སེམས་ནི་ཡེ་ཤེས་ཀྱི་རོལ་བའི་རྩལ་དུ་ཤར་བ་ཡིན་པས་ན་ཆུ་བུར་ཆུ་ལས་གཞན་དུ་མ་གྲུབ་པ་ལྟ་བུའོ༔

བཞི་པ་ནི༔ འོ་ན་གོང་དུ་དངོས་པོ་ངོ་བོ་སྟོང་བ་དབྱིངས་རྣམ་པར་དག་པ་ཉིད་དུ་མེད་པར་གཏན་ལ་ཕབ་པ་དེ་དང་༔ དེའི་རྗེས་སུ་ཡེ་ཤེས་ཀྱི་རང་རྩལ་རང་བཞིན་ལྷུན་གྱིས་འགྲུབ་པར་ཡོད་པར་གཏན་ལ་ཕབ་པས་དེ་གཉིས་ཇི་ལྟར་མི་འགལ་སྙམ་ན༔ འགལ་བ་མ་མཐོང་བའི་ཚུལ་དཔེར་བྱས་ཏེ་མཚོན་པ་དང་༔ དོན་དུ་གནད་ལ་ཕབ་པ་གཉིས་ཀྱིས་རྫོགས་པར་འགྱུར་ན༔ དཔེ་ནི༔ སྒྱུ་མ་ནི་སྣང་ཡང་ཡོད་པ་མ་ཡིན༔ མེད་ཀྱང་རྒྱུ་རྐྱེན་རྟེན་འབྲེལ་གྱི་མི་སྣང་བའང་མ་ཡིན་པ་དང་མེད་བཞིན་དུ་སྣང་༔ སྣང་བཞིན་དུ་སྟོང་༔ སྨིག་རྒྱུའམ་གྲིབ་མ༔ རྨི་ལམ༔ གཟུགས་བརྙན༔ དྲི་ཟའི་གྲོང་ཁྱེར༔ ཆུ་ཟླ༔ མིག་ཡོར༔ སྤྲུལ་པ༔ སྒྲ་བརྙན༔ འཇའ་ཚོན་ལྟ་བུ༔ དྷ་དྷུ་ར་ཟོས་པས་སྣང་བ་ལྟ་བུ་དང་༔ འགལ་མེའི་འཁོར་ལོ་བསྐོར་བས་སྣང་བ་ཀོར་ཀོར་མོར་འབྱུང་བ་ལྟ་བུ་དང་༔ ཐག་སྦྲུལ་དང་ཐོ་ཡོར་ལ་མིར་བཟུང་བ་ལྟ་བུ་དང་༔ ཆང་གིས་བཟི་བས་ཐམས་ཅད་འཁོར་བར་སྣང་བ་ལྟ་བུ་དང་༔ རབ་རིབ་ཀྱིས་སྣང་བའི་སྐྲ་ཤད་འཛག་པ་ལྟ་བུ་དང་༔ དུང་ལ་སེར་པོར་སྣང་བ་ལྟ་བུར་སྣང་སྲིད་འཁོར་བ་སྣང་བཞིན་དུ་སྟོང་༔ སྟོང་བཞིན་དུ་སྣང་བ་ནི་ཟུང་འཇུག་དབུ་མ་ཆེན་པོའི་གནས་ལུགས་ཡིན་པས་དེ་ལས་བོག་དབྱུང་དུ་མེད་པའི་སྤྲོས་བྲལ་ཆེན་པོར་ཤེས་པར་གྱུར་ན་ལྟ་བ་རྟོགས་པ་ཟེར་རོ༔ གཞན་དུ་སྣང་བ་འདི་བཅད་པས་སྤྲོས་བྲལ་གྱི་བློར་འཆོས་པ་ནི་སྣང་བ་མེད་ན་ཆད་པ་ཡིན་པས་མེད་དགག་རྣམ་གྲངས་ཀྱི་དོན་དམ་པར་ངེས་ཏེ༔ དེ་གནས་ལུགས་ཀྱི་ཟུར་གཅིག་གོ༔ མེད་དོ་སྙམ་པའི་འཛིན་སྟངས་དོན་མཐུན་དགོས་ཟེར་བའང་༔ དོན་དང་མི་མཐུན་ཏེ༔ དོན་དེ་སྤྲོས་བྲལ་ཡིན་གྱི་མེད་རྐྱང་མ་ཡིན་པས་སོ༔ སྣང་བ་སྤངས་པའི་སྟོང་ཉིད་ནི་མུ་སྟེགས་ཉི་མ་བའི་ལུགས་ཡིན་ནོ༔ ཡང་དངོས་པོར་ཞེན་ནས་རྟག་པར་བལྟ་ན་གྲངས་ཅན་པའི་ཕྱོགས་ལ་ཉེ་བས་དེ་ལ་དངོས་དངོས་མེད་གཉིས་ཀ་འཇིག་པའི་ཐོ་ལུམ་ནི་སྒྱུ་མའི་དཔེ་འདི་དག་གོ༔ བདེན་སྟོང་ཙམ་ལས་ཁྱད་པར་འཕགས་པ་ཅི་སྙམ་ན༔ དེས་ནི་སྣང་ཡང་བདེན་པ་མེད་པར་བཏགས་པ་ཙམ་ལས༔ སྣང་བཞིན་སྟོང་པར་གྲུབ་པ༔ སྟོང་བཞིན་སྣང་བས་མི་འགགས་པ་དེ་གཉིས་ཟུང་འཇུག་སྤྲོས་བྲལ་ཆེན་པོར་མི་རྟོགས་པས་ཁྱད་པར་དང་གཞན་ཡང་ངོ་༔

གཉིས་པ་དོན་གནད་ལ་ཕབ་པ་ནི་འཁོར་བའི་སྣང་བ་ཐམས་ཅད་མེད་བཞིན་དུ་སྣང་བའི་སྣང་སྟོང་ཟུང་འཇུག་དང་༔ འཁོར་བའི་གནས་ཚུལ་སྐུ་དང་ཡེ་ཤེས་ལྷུན་གྱིས་གྲུབ་པ་ཡིན་པས༔ དེ་ཡང་སྣང་སྟོང་ཟུང་འཇུག་ཡིན་ལ༔ མདོར་ན་སྣང་སྟོང་ཟུང་འཇུག་མ་ཡིན་པའི་ཆོས་ཅུང་ཟད་ཀྱང་མ་གྲུབ་པ་དང་༔ ཁ་ཅིག་གི་ཅི་ཡང་མེད་པའི་རང་སྟོང་ཡིན་ཟེར་ནས་གཞན་དག་ལ་རྩོད་དོ༔ ཁ་ཅིག་གིས་ཡོད་པ་རྟག་པ་ཉག་གཅིག་ཟེར་ནས་གཞན་ལ་རྩོད་དོ༔ དེ་ཡང་འཁོར་བ་མེད་སྣང་ལོག་རྟོག་གི་གཟུགས་བརྙན་གྱི་གནས་ལུགས་ལྷུན་གྱིས་གྲུབ་པ་ལ་སྟོང་བས་གཞན་སྟོང་ཡང་ཡིན་ལ༔ ལྷུན་གྱིས་གྲུབ་པའི་ཆོས་ཉིད་དེའི་ངོ་བོ་སྟོང་ཉིད་ཡིན་པའི་གནད་ཀྱིས་རང་སྟོང་ཡང་ཡིན་ཏེ༔ རང་སྟོང་ཡིན་ན་སྣང་བ་འགག་མེད་དུ་འཆར་མི་སྲིད་པ་མིན་པས་སྐུ་དང་ཡེ་ཤེས་ཡོད་པ་ཙམ་གྱི་རྟག་དངོས་སུ་མི་འགྱུར་བར་རང་སྟོང་དུ་བཞག་པ་དེ་རྐྱང་བ་ལ་ཁྱད་ཆོས་མེད་པ་དང་༔ སྐུ་དང་ཡེ་ཤེས་མི་རྟག་པ་ཡིན་ན་ཤིན་ཏུ་ཡང་མི་རུང་བ་དང་༔ གཞན་སྟོང་ཡིན་ན་ངོ་བོ་སྟོང་ཉིད་དུ་མི་གནས་པས་ཐ་ཚིག་ཀྱང་མ་གྲུབ་པས་ན༔ ཡབ་མེས་ཀྱི་ལུགས་སངས་རྒྱས་ཀྱི་དགོངས་པ་མཐར་ཐུག་པ་ནི་ཡོད་མེད་ཡིན་མིན་རྟག་ཆད་གཅིག་ཐ་དད་ཀྱི་ཕྱོགས་གང་དུའང་མ་གྲུབ་པར་ཤེས་པར་བྱའོ༔ དེ་ཡང་སྐུ་དང་ཡེ་ཤེས་འགོག་པ་མེད་པར་སྣང་བས་ཆད་མཐའ་སེལ༔ དེ་ཉིད་ངོ་བོ་སྟོང་པ་ཉིད་དུ་གྲུབ་པས་རྟག་མཐའ་སེལ༔ སངས་རྒྱས་ཀྱི་ཡུལ་དང་ཡུལ་ཅན་གཉིས་སུ་མེད་པར་ཡེ་ཤེས་རང་རིག་གིས་ཚུལ་གྱི་མཁྱེན་པ་མ་འགགས་ཀྱང་༔ བློ་དེ་ཡང་མི་རྟག་པ་མ་ཡིན་ན༔ ཡུལ་དེར་མི་རྟག་པར་བཞག་ཏུ་མི་བཏུབ་ངེས་པ་ཅན་ཞིག་སྟེ༔ མི་རྟག་པས་སེམས་ཅན་གྱི་ཁམས་སངས་རྒྱས་ཀྱི་རྣམ་མཁྱེན་གྱི་མཁྱེན་དུས་གཉིས་སྣང་མེད་པར་བཞག་མི་བཏུབ་ཀྱང་ཡོད་པ་ནི་མིན་པས་མཁྱེན་ཚུལ་ཞིག་ཡོད་པ་བཞིན་དུ་རང་སྣང་ལོངས་སྐུ་ངེས་པ་ལྔ་ལྡན་ཞེས་པ་དང་༔ གཞན་སྟོང་ཞེས་པ་ཙམ་ཚིག་གི་སྤུ་རིས་ལས་དོན་དུ་ཐ་དད་མེད་པའི་གནད༔ སྣང་སྟོང་ཟུང་འཇུག་འདིའི་བཟུང་བ་དང་༔ སྟོང་པ་དབྱིངས་དང་འདུ་འབྲལ་མེད་པའི་འགགས་མེད་དོན་དམ་པའི་སྐུ་དང་ཡེ་ཤེས་ནི་དབྱིངས་མ་ཟད་ཀྱི་བར་ལ་འགགས་མི་སྲིད་པ་དང་༔ གལ་ཏེ་འགགས་ན་སྟོང་རྐྱང་གི་ཕྱོགས་སུ་འཇིག་པས་ན་རྟག་པའང་ཡིན་ལ༔ སོ་སྐྱེས་ཀྱི་ངོར་སྐྱེ་བར་སྣང་དུས་ཉིད་ནས་དོན་ལ་སྐྱེ་བ་མེད་པ༔ འགགས་པར་སྣང་དུས་ཉིད་ནས་སོགས་ཀྱི་གནད་ལ་གཏུག་པར་བྱ་ཡི༔ གདོང་གཏད་རེ་རེ་བས་ཕྱོགས་ཀྱིས་བཟུང་བས་འདོད་ཞེན་སངས་རྒྱས་ཀྱི་དགོངས་པའི་ཕྱོགས་ལས་རིང་བར་གྱུར་པ་ཞིག་གོ༔ དེ་ཡི་ཕྱིར་བར་དོ་དྲུག་གི་ངོ་བོ་སྣང་བ་སྐུ་དང་ཡེ་ཤེས་དང་སྟོང་པ་དོན་དམ་བདེན་པ་གཉིས་དབྱེར་མེད་ངོ་བོ་ཉིད་མེད་པའི་རང་གཞན་གྱི་སྟོང་པའི་དབྱིངས་ཡེ་འདུ་འབྲལ་མེད་པའི་རང་བྱུང་གི་ཡེ་ཤེས་ཀྱི་སྣང་སྟོང་ཐ་དད་པས་ལྡོག་ཆ་ནས་ཡིན་གྱི་གཞན་དུ་སྤྲོས་པ་དང་བྲལ་བའི་གནས་ལུགས་དཔྱིས་སུ་ཕྱིན་པར་མི་འགྱུར༔ གྲུབ་མཐའ་རེ་ལ་ཞེན་ཆ་རེ་ཡོད་པ་རྫོགས་པ་ཆེན་པོ་འདིའི་བཅད་པར་ཚུལ་བཞིན་གཏན་ལ་ཕབ་པར་གྱིས་ཤིག༔ དེ་ལྟར་འཁོར་འདས་ཀྱི་ཆོས་ཐམས་ཅད་ཀྱི་ངོ་བོ་སྟོང་ཉིད་དུ་གྲུབ་པར་གཏན་ལ་ཕབས་པའི་རྙེད་དོན་ལ་མེད་པས་གནས་ལུགས་རྟོགས་པ་ཞེས་བྱ༔ སྟོང་བཞིན་ཏུ་སྣང་བ་སྐུ་དང་ཡེ་ཤེས་སུ་ལྷུན་གྱིས་གྲུབ་པར་གཏན་ལ་ཕབས་པའི་རྙེད་དོན་ལ་ལྷུན་གྱིས་གྲུབ་པའི་གནས་ལུགས་རྟོགས་པ་ཞེས་བྱ་བ་དང་༔ དེ་གཉིས་ཀྱང་བདག་ཉིད་ཆེན་པོ་རང་བྱུང་གི་ཡེ་ཤེས་གཅིག་ཏུ་འུབ་ཆུབ་པར་གཏན་ལ་ཕབ་པའི་རྙེད་དོན་ལ་གཅིག་པུའི་གནས་ལུགས་རྟོགས་པ་ཞེས་བྱ་ལ༔ ཡེ་ནས་འཁོར་བ་སྤངས་མི་དགོས་པར་ཀ་ནས་དག་པ་དང་༔ མྱང་འདས་བསྒྲུབ་མི་དགོས་པར་ལྷུན་གྱིས་གྲུབ་པ་དངོས་གཅིག་ངོ་བོ་ཉིད་དུ་གདལ་བར་མཉམ་པའི་ཚུལ་གཏན་ལ་ཕབ་པའི་རྙེད་དོན་དེ་ཕྱལ་བའི་གནས་ལུགས་རྟོགས་པ་ཞེས་བྱ་བས་ན༔ དམ་ཚིག་ཞེས་བྱ་བཞི་པོ་འདིའི་ཕྱག་རྒྱའི་བར་དོ་དྲུག་ལ་ཡེ་རྒྱས་ཐེབ་པའི་ཚུལ་གཏན་ལ་འབེབས་བྱེད་ཤེས་རབ་ཀྱི་དབང་པོའི་དོན་རང་མཚན་ལ་མི་འཁྲུལ་བར་རྗེས་སུ་དཔོག་ནུས་པ་ཡིན་ནོ༔ འདི་ལྟར་གཏན་ལ་ཕབ་པའི་རྗེས་སུ་བསྒོམ་པའི་དུས་ན་བསྐྱེད་རིམ་ཐམས་ཅད་ལྷུན་གྱིས་གྲུབ་པའི་སྣང་ཆ་ལམ་དུ་བྱེད་པ༔ རྫོགས་རིམ་ཐམས་ཅད་ཀ་དག་གི་ལྡོག་ཆ་ལམ་དུ་བྱེད་པ་ཡིན་པ་དང་༔ དེའི་གེགས་ཐམས་ཅད་གཅོད་པར་བྱེད་པ་ལ་དང་༔ གདམས་པས་རང་སྐྱ་ཐུབ་ན་ངང་དེར་མཉམ་པར་བཞག་པ་དང་༔ སྦྱངས་པ་དམན་ན་འཕོ་བས་སྟོང་འདེབས་པ་དག་འབྱུང་གི༔ ལྟ་བའི་གཞི་མེད་ན་གྱང་མེད་པའི་རི་མོ་ལྟར་གང་བསྒོམ་པ་དང་༔ གང་ལ་འཕོ་བ༔ གང་ལ་བཙན་ས་འཛིན་པ་དག་མི་འབྱུང་བས་འདི་འབའ་ཞིག་ཐོག་མར་གལ་ཆེ་བས་ན་རང་བཞིན་གྱི་བར་དོ་ལ་བསམ་བྱུང་གིས་གཏན་ལ་ཕབ་ངེས་པ་ཚིག་ཏུ་མ་ལུས་པ་ཅིག་དགོས་ཤིང་༔ གོམས་པའི་མཐུས་རྨི་ལམ་སོགས་ཀྱི་འཇིགས་སྐྲག་སྟོང་ཉིད་དུ་ཆོད་པའམ༔ ཐོག་བརྫིས་ཀྱི་གདེངས་མི་འཆོར་བ་ཞིག་ཡོད་ན༔ དེ་ཁོ་ནས་བར་དོའི་སྣང་བ་ཆོད་པ་དང་བཅས་པ་འབྱུང་བ༔ ལེགས་པ་ཐམས་ཅད་ལ་ཞེན་པ་མེད་པའི་བློ་ཐོག་ནས་ཚུལ་ཁྲིམས་སོགས་རྫོགས་པ་འདི་ལ་འབུངས་ཤིག༔

གཉིས་པ་རང་བཞིན་བསམ་གཏན་གྱི་བར་དོ་ལ༔ བར་དོ་དྲུག་གི་གདམས་ངག་གི་ངང་སྐྱོང་བ་ལ་དྲུག་ལས༔ གཞི་ཏིང་ངེ་འཛིན་གྱི་བཟུང་བ༔ དེའི་རྗེས་འབྲེལ་དུ་གདམས་ངག་བསྒོམ་པ་གཉིས་སོ༔ དང་པོ་ནི༔ ཏིང་ངེ་འཛིན་གྱི་སྔོན་འགྲོ་དངོས་གཞི༔ རྗེས་སུ་བོགས་འདོན་པ་གསུམ་ཡོད་དོ༔ དང་པོ་སྔོན་འགྲོ་ལ༔ བྱ་བའི་སྔོན་དུ་འགྲོ་བ་དང་༔ ཐུན་གྱི་སྔོན་དུ་འགྲོ་བ་གཉིས་ལས༔ དང་པོ་ནི༔ གནས་ཤིན་ཏུ་དབེན་པ་སྔོན་གྲུབ་ཐོབ་གོངས་མའི་ཞབས་ཀྱིས་བཅག་པའམ༔ མིན་ཡང་ཉིན་མོ་མིའི་རྒྱུ་འགྲུལ༔ མཚན་མོ་དགྲའི་གླག་ཅོར་མེད་པ་ཞིག་དགོས་པས་ན༔ ཕྱི་ནང་གི་ཆགས་པ་རང་ཤུགས་ཀྱིས་གྲོལ་བས་ཐབས་ཟབ་མོ་ཞེས་བྱ་སྟེ་དང་པོའོ༔ དེ་ནས་དེ་ལའང་འདམ་ཀའི་རྟེན་འབྲེལ་ཡོད་དེ༔ རི་རྩེ་ནི་ཏིང་ངེ་འཛིན་བྱིང་འཐིབས་ཀྱི་སྐྱོན་དང་བྲལ་བའི་བསྐྱེད་རིམ་བསྒོམ་པའི་གནས་སུ་གསུངས༔ གངས་ཁྲོད་ཤེས་མཐོང་གསལ་བོར་སྐྱེ་བའི་གནས་སུ་དང་༔ ནགས་ཁྲོད་སེམས་གནས་པའི་ཞི་གནས་ཀྱི༔ བྲག་རི་མི་རྟག་སྐྱོ་ཤས་འཕེལ་བས་ཞི་ལྷག་ཟུང་འབྲེལ་ལ༔ ཆུ་ངོགས་ནི་ངེས་འབྱུང་འཕྲལ་བ་སྐྱེ་བའི་གནས་སུ་དང་༔ དུར་ཁྲོད་ནི་རྐྱེན་སྣང་ཐོག་བརྫིས་སུ་གཅོད་པའི་གནས་སུ་བཤད་དོ༔ གཞན་གངས་ལ་བརྟེན་པའི་དུས་དབྱར༔ རོང་ལ་བརྟེན་པའི་དུས་དགུན༔ སྟོན་དཔྱིད་དབང་པོ་ལ་གང་འཚམ༔ མི་ཚ་བ་ཅན་རྣམས་ཞེ་སྡང་ཆེ་བས་གངས་ལ༔ གྲང་བའམ་འདོད་ཆགས་ཆེ་བས་རོང་ལ༔ བད་ཀན་ནམ་གཏི་མུག་ཆེ་བས་བྲག་གམ༔ འདུས་པའམ་ང་རྒྱལ་ཆེ་བས་ཆུ་ངོགས་སུ་གནས་པར་བྱའོ༔ ཡང་གྲོང་དང་དགོན་པ་ལ་སོགས་པར་རྣམ་པར་གཡེང་བ་འདུ་འཛིའི་སར་གཉེན་པོའི་ཟུངས་མ་ཐུབ་ཀྱི་བར་དུ་གནས་པར་མི་བྱའོ༔ ཐོག་མར་ཞི་གནས་བསྒོམ་པ་ལ་གནས་ཁང་ཀྱང་ཡང་ཟད་གནག་པ༔ ཕྱིའི་སྒྲ་མི་ཐོས་པའི་འཐུག་པོ་གཉིས་བརྩེགས་སོགས་བརྩིག་གོ༔ དེ་ནས་ཡོ་བྱེད་བཞི་ལ་སོགས་ཚང་པར་བྱས་ནས་གནས་དགོས་ལ༔ དེ་ཡང་ཚུལ་ཁྲིམས་དམ་ཚིག་གི་རིམ་པ་མ་བསྲུང་ན་ཏིང་ངེ་འཛིན་མི་འགྲུབ་པས༔ སྔར་ཉམས་ཆག་ཡོད་པའམ་ད་ལྟ་སྐྱེས་པ་ཐམས་ཅད་བཤགས༔ ཕྱིན་ཆད་འགྱོད་སྡོམ་བྱེད་པ་གལ་ཆེ་བས་ཐུན་ཚོད་དུ་ཡང་ཡང་བཤགས་པ་ལ་སོགས་པ་བྱའོ༔ དེའི་རྗེས་སུ་ཚོགས་བསྐངས་སོགས་རྒྱབ་རིམ་དཔུང་བསྐྱེད་དོ༔ དེ་དག་ནི་བྱ་བའི་སྔོན་འགྲོའོ༔

གཉིས་པ་ཐུན་གྱི་སྔོན་འགྲོ་ནི༔ ཚེ་མི་རྟག་པ་ལ་ངེས་པ་ནང་ནས་མ་སྐྱེས་བར་དུ་ཐོག་མར་བསྒོམས་པས་ཆོས་མཐར་ཕྱིན་པའི་ལྕག་བྱེད༔ བླ་མའི་རྣལ་འབྱོར་བསྒོམ་པས་བར་ཆད་སེལ་ཞིང་དངོས་གྲུབ་འབྱུང་བའི་རྒྱུ་བྱེད་པས་ན་གཉིས་པོ་དེ་ལ་འབད་པར་བྱ་བ་དང་༔ ཁྱད་པར་དུ་བྱང་ཆུབ་མཆོག་ཏུ་སེམས་བསྐྱེད་པ་ནི་གལ་ཆེ་བས་ན༔ འདི་ལྟར་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་བདག་གི་ཕ་མར་མ་གྱུར་པ་གཅིག་ཀྱང་མེད་པས་ཕ་མར་གྱུར་པའི་དུས་ན་དྲིན་ཆེན་པོས་བསྐྱང་བ་ལ་ད་ལྟའི་ཕ་མ་དང་ཁྱད་པར་སྤུ་ཙམ་མེད་པས་མ་རྒན་འདི་རྣམས་སྡུག་བསྔལ་སྣ་ཚོགས་ལ་སྤྱོད་པ་སྙིང་རེ་རྗེ༔ ཁྱད་པར་དུ་ཡང་ང་མེད་པ་ལ་ང་རུ༔ བདག་མེད་པ་ལ་བདག་ཏུ༔ ཕུང་ཡུལ་མེད་པ་ལ་དེ་ལྟར་བཟུང་ནས་རང་གིས་རང་བཅིངས་བའི་སེམས་ཅན་འདི་རྣམས་ལྷག་པར་ཡང་སྙིང་རེ་རྗེ་ཞེས་དེ་ཡང་སྙིང་རྗེ་མ་སྐྱེས་ཀྱི་བར་དུ་བསྒོམས་ནས་ཤས་མི་བཟོད་པ་ཅིག་འབྱུང་བ་ན༔ བདག་གིས་འདི་ཐམས་ཅད་གཏན་བདེ་སངས་རྒྱས་ཀྱི་གོ་འཕང་ལ་བཀོད་པར་བྱ་ཞེས་སྙིང་ཐག་པ་ནས་དམ་བཅའ་བའི་སྨོན་པ་བྱང་ཆུབ་ཏུ་སེམས་བསྐྱེད༔ དེའི་ཆེད་དུ་འཁོར་བའི་ཉོན་ཤེས་ཀྱི་ལས་སྒྲིབ་ཐམས་ཅད་མགོ་གནོན་པ་དང་༔ ས་བོན་དྲུང་ཕྱུང་གི་གཉེན་པོར་ཞི་ལྷག་གི་རྣལ་འབྱོར་བསྒོམ་པར་བྱའོ་སྙམ་དུ་འཇུག་སེམས་བསྐྱེད་དོ༔ དེ་མི་ཉམས་པ་གོང་དུ་འཕེལ་བའི་སླད་དུ་བསྒོམ་པ་དངོས་ལ་འདི་ལྟར༔

དང་པོ་ཕྱི་ནང་གི་རྟེན་འབྲེལ་གཅིག་པས་ཕྱི་ལུས་ལ་བསྒྲིགས་པ་ལ༔ ལུས་ངག་ཡིད་ཀྱི་གནད་བཅུན་པ་ནི༔ ལུས་ཀྱི་གནད་ལ༔ སྒོ་ཡི༔ ལུས་ཀྱི༔ ཡུལ་གྱི་གནད་དོ༔ ལུས་ནི་ཆོས་བདུན་གཡོ་མེད་དུ་བཅིང་པ་སྟེ༔ སྐྱིལ་ཀྲུང་དུ་གནས་པས་ཐུར་སེལ་དབུ་མར་འཇུག་པའི་དགོས་པ་དང་༔ མཉམ་བཞག་ལྟེ་འོག་ཏུ་བཅས་པས་མཉམ་གནས་དབུ་མར་འཇུག་པའི་དགོས་པ༔ སྲོག་འཛིན་དབུ་མར་འཛུད་པའི་གནད་དུ་སྒལ་ཚིགས་དུང་ཚེ་བརྩེགས་པ་ལྟར་དྲང་པོར་བསྲིང་༔ གྱེན་རྒྱུ་དབུ་མར་འཛུད་པའི་གནད་དུ་མགྲིན་པ་ཡུད་ཙམ་དགུག༔ ཁྱབ་བྱེད་དབུ་མར་འཛུད་པའི་གནད་དུ་རྒྱུ་མ་སྒལ་བ་ལ་བཅར་བ་དང་༔ རྒྱུ་བ་དབུ་མར་འཛུད་པའི་གནད་དུ་མིག་སྣ་རྩེ་ལ་ཕབ༔ རྣམ་པར་རྒྱུ་བ་དབུ་མར་འཛུད་པའི་གནད་དུ་རྣ་བ་སྒྲ་ལ་མི་གཏོད་ཕྱིར་ཅུང་ཟད་རོ་སྟོད་དགྱེ༔ ཡང་དག་པར་རྒྱུ་བ་དབུ་མར་འཛུད་པའི་གནད་དུ་རླུང་ཁ་ནས་རང་བབས་སུ་གཏང་༔ རབ་ཏུ་རྒྱུ་བ་དབུ་མར་འཛུད་པའི་གནད་དུ་ལྕེ་ཡ་རྐན་ལ་སྦྱར་བར་བྱ༔ ཤིན་ཏུ་རྒྱུ་བ་དབུ་མར་གཅོད་པའི་སླད་དུ་ཆ་ཆ་ནས་ལྷོད་ཆགས་པ་དང་ཡན་ལག་གི་སོར་མོ་རྣམས་བསྐུམ་པ་ཞིག་དགོས་སོ༔ ཡང་དེའི་དགོས་པ་གཞན་ཡང་༔ སྐྱིལ་ཀྲུང་གི་ཕྱི་བདུད་བཞི་འཇོམས་པས༔ ནང་གི་བར་ཆད་སེལ་བས༔ གསང་བ་རྩ་ཐིག་རླུང་གསུམ་དབུ་མར་འཛུད་པ༔ ཁོ་ན་ཉིད་གཟུང་འཛིན་གཉིས་མེད༔ མཐར་ཐུག་ཐབས་ཤེས་གཉིས་མེད་མཉམ་པར་སངས་རྒྱས་པའི་འདུག་སྟངས༔ གསང་བའི་རྩ་མདུད་གྲོལ་བའི་གནད་དོ༔ མཉམ་བཞག་གི་ནི༔ ལས་ཀྱི་བག་ཆགས་དང་ཉེས་དམིགས་གཅོད་པའི་གནད༔ ཚངས་པའི་མེ་སྦར་བའི་གནད༔ མཐེ་བོང་ལྟོ་སྦྱོར་བ་ནི་སེམས་རྩེ་གཅིག་ཏུ་གནས་པའི་གནད༔ ཁམས་གསུམ་དབང་དུ་སྡུད་པའི་རྟེན་འབྲེལ་ལོ༔ ལྟེ་བའི་རྩ་མདུད་གྲོལ་བའི་གནད་སྒལ་བ་དྲང་པོར་བསྲིང་བས་དྲང་པོ་གསུམ་མམ་བཞི་ལྡན་གྱི་རླུང་སྟོང་བའི་རྩ་ལ་གདབ་པས་གནད༔ སྐྱོན་ཅན་ཕྱིར་བསལ་བའི་གནད༔ འདུ་འཁྲུགས་བྲལ་བའི་གནད༔ མགྲིན་པ་དགུག་པས་འཁོར་བའི་རླུང་མ་ལ་གསོད་པའི་གནད༔ ལྐོག་མས་ཨོལ་མདུད་མནན་པས་བཅུད་ལེན་ལ་རང་དབང་ཐོབ་པས་མི་རྟོག་པའི་ཏིང་འཛིན་སྐྱེ་བའི་གནད༔ ལོངས་སྤྱོད་ཀྱི་རྩ་མདུད་གྲོལ་བའི་གནད༔ ལུས་བྱིང་རྒྱུ་ཞབས་སྒལ་བ་ལ་བཅར་བས་རྟོག་པ་འགགས་སྟོབས་ཆེ་བ༔ སྙིང་གའི་རྩ་ཁ་ཕྱེ་བས་རྩ་གནད༔ ལྕེ་ཡ་རྐན་ལ་སྦྱར་བས་ཁམས་གསོ་བའི་གནད༔ ཡ་རྐན་གྱི་བ་འཇོའི་བས་གནད༔ ངག་གི་ལས་དག་པའི་གནད་དང་སླད་ནས་མི་སོགས་པའི་གནད༔ སྒོ་ཡི་གནད་ལ་མིག་སྣ་རྩེ་ལ་ཕབ་པས༔ རྒོད་པ་སེལ་བའི་གནད༔ དབྱིངས་སུ་བསྟོད་པས་བྱིང་བ་གསེང་བའི་གནད༔ ཐད་ཀར་བལྟས་པས་ཞི་ལྷག་ཟུང་འཇུག་གི་གནད་ཡོད༔ སྒོ་གནད་གཞན་ཡང་མིག་གྱེན་ལ་ནམ་མཁའི་དབྱིངས་སུ་འཕང་པས་སྙིང་ཀའི་ཡེ་ཤེས་ཀྱི་རྩ་ཁ་འབྱེད་པའི་གནད་ཀྱིས་གཏི་མུག་འགགས་པས་བྱིང་རྨུགས་དང་གཉིད་སངས་པའོ༔ མིག་ཐད་ཀར་བལྟས་པས་འོད་ཀྱི་རྩ་འབྱེད་པས་ལོངས་སྐུའི་ཞིང་ཁམས་ལ་སྤྱོད་ཅིང་ཞེ་སྡང་འགགས་པས་གནོད་སེམས་དང་འགྱོད་པ་སེལ་བའོ༔ ཐུར་སྣ་རྩེར་ཕབ་པས་ཡོན་ཏན་གྱི་རྩ་ཁ་འབྱེད་ཅིང་ཐེ་ཚོམ་དང་ཡུལ་ལ་མི་སྤྱོད་པས་འདོད་ཆགས་སེལ་བས་རྒོད་པ་དང་འདོད་འདུན་མི་འབྱུང་བའོ༔ དེ་ལྟར་སྒྲིབ་པ་ལྔ་པོ་སེལ་བ་ལ་མཆོག་ཏུ་གྱུར་པས་འདི་ཡང་མགོ་གནོན་གྱི་གཉེན་པོའོ༔

ཁྱད་པར་དུ་ཡུལ་གྱི་གནད་ནི་སྣང་བཅས་དང་སྣང་མེད་གཉིས་ལས༔ སྣང་བཅས་ནི༔ སྣ་ཚོགས་པའི་ཡུལ་ལམ་སྐུ་གསུང་ཐུགས་རྟེན་ལ་སེམས་འཛིན་པ་ཡིན་ལ༔ སྣང་མེད་ནི་རྟེན་ཅན་རྟེན་མེད་ལ་སེམས་འཛིན་པའོ༔ དང་པོ་སྣང་བཅས་ཐ་མལ་གྱི་མ་དག་པའི་གཟུགས་སོགས་ཡུལ་ལ་འཛིན་པ་དང་༔ སྣང་བཅས་ཀྱི་དག་པའི་སྐུ་གསུང་ཐུགས་ལ་འཛིན་པའོ༔ དང་པོ་ནི་གཟུགས་སོགས་ཡུལ་ལྔའོ༔ དག་པའི་སྐུ་ལ་འཛིན་པ་ནི༔ བླ་མའི་འདྲ་འབགས་ཡོད་ན་རབ༔ མིན་ཡང་སངས་རྒྱས་ཀྱི་སྐུ་ལའོ༔ གསུང་ནི་ཡི་གེ་འཛིན་པའི་ཡུལ་གང་ཡིན་བྲི་བ་འམ༔ ཐུགས་ནི་མཆོད་རྟེན་བརྩིགས་པ་ལ་སོགས་པའོ༔ ལར་སྣང་བཅས་ཀྱི་དམིགས་པའི་ཡུལ་བྲིས་འབུར་མངོན་དུ་བཞག་པའོ༔ སྣང་མེད་བློའི་བསྒོམ་པའོ༔ རྟེན་མེད་ཅེས་པ་ནི་བཞག་ཐབས་ཀྱི་གནད་ཁྱད་པར་ཅན་ནམ་མཁའ་སུམ་སྤྲུགས་སུ་མཉམ་པར་བཞག་པའོ༔

གཉིས་པ་ཏིང་ངེ་འཛིན་དངོས་བསྒྲུབ་པ་ལ༔ ཞི་ལྷག་གཉིས་ལས༔ ཐོག་མར་ཞི་གནས་སྒྲུབ་པ་ལ༔ རྟེན་དང་དམིགས་པའི་ཁྱད་པར་གྱི་རིམ་པར་བསྒྲུབ་པ༔ དེས་གྲུབ་པའི་ཏིང་ངེ་འཛིན་དང་གཉིས་ལས༔ དང་པོ་ལ་མ་གྲུབ་པ་གྲུབ་པར་བྱེད་པ༔ གྲུབ་པ་མི་ཉམས་པར་གོང་འཕེལ་དུ་བྱ་བ་གཉིས་ལས༔ དང་པོ་ལ་ཐ་མལ་གྱི་དངོས་པོ་ལ་བཟུང་བ་དང་༔ རྟེན་ཁྱད་པར་ཅན་ལ་བཟུང་བའོ༔ དང་པོ་ནི༔ འདི་ལྟར་མདུན་དུ་གཟུགས་ཤིག་བཞག་ལ་དེ་ལ་སེམས་བཟུང་བ་དང་༔ དེའི་དབྱིབས་ལ་བཟུང་༔ ཁ་དོག་ལ་བཟུང་བ་ལ་སོགས་པར་བྱའོ༔ དེ་བཞིན་དུ་པི་ཝཾ༔ གླིང་བུ༔ རྔ་ཟླུམ་ལ་སོགས་པའི་སྒྲ་ལ་སེམས་བཟུང་བ་དང་༔ ལྷན་སྐྱེས་སྦྱར་བྱུང་གི་དྲི་ལ༔ བུ་རམ་དང་ལན་ཚྭ་ཆང་སྐྱུར་ལ་སོགས་པའི་རོ་ལ༔ གོས་འཇམ་རྩུབ་ལ་སོགས་པའི་རེག་བྱ་ལ་སེམས་བཟུང་བའི་ཕྱག་ལེན་ཚུལ་བཞིན་དུ་བྱའོ༔ ཡང་སྒྲ་བཞི་ལ་བསླབ་པར་བྱ་སྟེ༔ དེ་ཡང་རང་ཉིད་ཀྱིས་མིག་བཙུམ་སྟེ་ལག་པས་ས་ལ་རེག་པས་ལྕི་ཞིང་བསིལ་བས་ཉམས་གྱི་རེག་བྱ་ལས་སེམས་གཞན་དུ་མ་ཡེངས་བར་བཟུང་བ་དང་༔ ཡང་ཆུ་ཡི་སྒྲ་ཉན་པའི་ཕྱིར་སྟོན་དུས་སུ་རྫ་ཆུ་དྲག་པོ་འབབས་པའམ༔ མིན་ཡང་ཆུ་མཐོ་བའི་ཕྱམ་ནས་དམའ་བའི་དུང་དུ་ལྷུང་ནས་སྒྲ་ཆེན་པོ་གྲག་ས་ནས་མཉན་ནོ༔ མེའི་སྒྲ་ནི་མདུན་དུ་མེ་ཆེན་པོ་བུས་ལ༔ རྣ་བས་གཏད་དེ་མཉན་པ་དང་༔ རླུང་སྒྲོན་གྱི་དཀར་ཁུང་རང་གིས་བཅའ་བའམ༔ མིན་ཡང་ཤིན་ཏུ་འཁྱག་སར་རླུང་ཆེ་བའི་གསེང་ཁ་སོགས་ནས་སྒྲ་ལ་ཉན་པས་ཀྱང་འགྲུབ་ལ༔ ཡང་སྒྲའི་ཁྱད་པར་ནི༔ སའི་སྒྲ་ནི་ལྕི་ཞིང་བསིལ་བ༔ ཆུ་སྒྲ་ནི་བྱིང་ཞིང་གཡེང་བ༔ མེ་སྒྲ་ནི་འུར་ཞིང་འཐུག་པ༔ རླུང་སྒྲ་ཤུགས་པ་བསིལ་དྲག་པ་ལ་བཟུང་བས༔ སའི་བྱོལ་སོང་༔ མེའི་ཡི་དྭགས་དང་དམྱལ་བ༔ ཆུའི་ལྷ༔ རླུང་གིས་མི་དང་ལྷ་མིན་གྱི་སྐད་ཤེས་པས་མངོན་ཤེས་དང་༔ སས་སྒྲ་མཉན་པས་འབྱུང་བ་ས་ལ་རང་དབང་ཐོབ༔ དངོས་པོ་དངོས་མེད༔ དངོས་མེད་དངོས་པོར་འགྱུར་བ༔ ས་སྤོ་བ༔ བསྒྱུར་བ༔ ས་ལ༔ འཛུལ་བ་ལ་སོགས་པ་སས་མི་ནོན༔ གཡང་ལ་མི་ལྷུང་ངོ་༔ ཆུས་ཆུ་ལ་དབང་༔ མེས་མེ༔ རླུང་གིས་རླུང་ལ༔ མེས་མངོན་ཤེས༔ ཆུས་སྐྱེ་མེད་སྟོང་ཉིད་སྙིང་རྗེའི་སྙིང་པོ་ལ་ཐེ་ཚོམ་ཆོད༔ རླུང་གིས་ཉམས་མྱོང་གོང་དུ་འཕེལ་བའི་སྐལ་བ་རྒྱུད་ལ་ཐེབ་པོ༔ འབྱུང་བའི་གཟུགས་ལ་བསླབ་པ་ནི༔ མིག་གིས་གཏད་དེ་བལྟ་བ་ལས་མ་ཡེངས་པ་དང་༔ དབྱིབས་ས་གྲུ་བཞི༔ ཆུ་ཟླུམ་པོ༔ མེ་གྲུ་གསུམ༔ རླུང་ཟླ་གམ་དུ་བཟོས་པ་ལ་བསླབ་པོ༔ ཁ་དོག་དཀར་སེར་དམར་ལྗང་ངོ་༔ དེའི་ཟད་པར་ཟིལ་གནོན་ཡང་འགྲུབ་པོ༔ བཞུགས་སྟངས་ནི་གླང་ཆེན་ནམ་ཆོས་བདུན་ནོ༔ གཟིགས་སྟངས་སྒྲ་སྦྱངས་ལ་མི་དགོས་ཀྱང་༔ གཟུགས་སྦྱངས་ལ་ཐད་སོར་རོ༔ དེ་དག་ནི་མཐར་ཕྱིན་པའམ༔ མ་བྱས་ཀྱང་ཆོག་ལ༔

གཉིས་པ་དེ་བཞིན་གཤེགས་པའི་སྐུ་གསུང་ཐུགས་ལ་བཟུང་བ་ལ་གསུམ་ལས་དང་པོ་ནི༔ སྐུ་ཞི་བའི་རྣམ་པ་ཅན་གྱི་ཐང་སྐུ་ནི་ཕུལ་དུ་ཕྱིན་པ་སྟེ༔ བློས་རྣམ་པ་གཉིས་པ་ཞིག་མེད་པར་དེ་ལ་སེམས་གཏད་པར་བྱས་པས་རྣམ་རྟོག་ཞི་བའི་དགོས་པ༔ ཁྲོ་བོའི་རྣམ་པ་ཅན་ལ་བཟུང་བས་ཚེ་འདི་ཕྱིའི་བར་ཆད་སེལ་བའི་དགོས་པ༔ ཡང་ཞི་བ་ལ་བཟུང་བས་ཞེ་སྡང་ང་རྒྱལ་ཕྲག་དོག་ཞི་བ་དང་༔ ཁྲོ་བོའི་འདོད་ཆགས་སེར་སྣ་གཏི་མུག་ཞི་བའི་དགོས་པ༔ ཡང་ཞི་བས་ཉོན་མོངས་པ་དང་༔ འཆི་བདག་གི་བདུད་འཇོམས་ལ༔ ཁྲོ་བོས་ལྷ་བདུད་དང་ཕུང་བོ་འཇོམས་སོ༔ ཡང་ཞི་བས་ཐོགས་བཅས་དང་ཐོགས་མེད་འཇིགས་སྐྲག་དང་༔ ཁྲོ་བོས་དགའ་བྲོད་དང་སྙེམས་བྱེད་ཀྱི་རྣམ་རྟོག་བདུད་འཇོམས༔ ཞི་བས་ལྷག་མཐོང་དང་ཐབས༔ ཁྲོ་བོས་ཞི་གནས་དང་ཤེས་རབ༔ དབྱིངས་དང་ཡེ་ཤེས་ཟུང་འཇུག་གི་རང་བཞིན་མངོན་དུ་འགྱུར་བ་ལ་བྱིན་གྱིས་རློབ་པའི་དགོས་པ་ཁྱད་པར་ཅན་ཡོད་པའོ༔

གཉིས་པ་གསུང་ལ་སེམས་བཟུང་བ་ཨ་དཀར་བོ་བྲི་བ་ལ་སོགས་པ་སེམས་འཛིན་ཉེར་གཅིག་གི་ཡི་གེ་རྣམས་སམ་དང་པོ་བདུན་གྱི་གཟུགས་བྲི་བའམ་དེ་ལ་གཏད་པས་སོ་སོའི་ཡོན་ཏན་ཉི་ཟླ་ཁ་སྦྱོར་ནས་གསུངས་པ་ཐོབ་པའོ༔ ཡང་མཆོད་རྟེན་སོགས་ཀྱི་རྣམ་པ་བཟོས་ནས་གཏད་པ་དང་བཅས་པ་ལ་མ་གོམས་བར་དུ་གཏད་དོ༔ ཡང་ན་གོང་གི་རྟེན་བཀྲམ་པ་དེ་འདྲ་བ་ཡིད་ཀྱི་ཡུལ་དུ་བྱས་ཏེ་བསྒོམ་པ་དང་༔ ལུས་ཀྱི་དབུས་སུ་རྩ་གསུམ་འཁོར་ལོ་ལྔ་པ་ཕྱག་མཚན་ཕྲ་མོའི་རྣལ་འབྱོར་དང་༔ སྐུ་དང་༔ གསུང་དང་ཐིག་ལེ་ཕྲ་མོའི་རྣལ་འབྱོར་ལ་སེམས་གཞོལ་བའོ༔ དེ་དག་གོམས་པ་ན༔ སེམས་གང་དུའང་མི་རྟོག་པར་བཞག་པ་དང་ཐབས་ཁྱད་པར་ཅན༔ ནམ་མཁའི་སྒྲ་ལ་སེམས་སྦྱོང་བ་ཞེས་ཀྱང་བྱ༔ ནམ་མཁའ་སུམ་སྤྲུགས་ཀྱི་དགོངས་པ་ཞེས་ཀྱང་བྱ་བ༔ སེམས་ཕྱིའ་ནམ་མཁར་དྭངས་པ་ལ་བསྲེ་འཕོ་ཟུང་འཇུག་བྱས་ནས༔ རྟོག་པ་བཙན་ཐབས་སུ་གཅོད་པར་ཀ་མ་ལ་ཤཱི་ལ་ཡིས་ཀྱང་གསུངས༔ རྡོ་རྗེ་འཆང་གི་མཐར་ཐུག་གི་རྒྱུད་བཅུ་བདུན་ལས་ཀྱང་གསུངས་པ་བཞིན་སེམས་བཟུང་བ་དང་བཅས་པ་དག་ཀྱང་༔ ཞལ་ཤེས་ལྟར་ཕྱག་ལེན་ལ་ཐེབ་པ་གལ་ཆེའོ༔ ངག་གི་གནད་ནི་བཟང་ངན་བར་གསུམ་གྱི་ངག་ཐམས་ཅད་སྤངས་བ་དང་༔ ཐ་ན་རླུང་འབྱུང་རྔུབ་ཀྱང་སྒྲ་མི་ཐོས་བར་མཆུ་སོ་མ་རེག་པའི་བར་ནས་བྱ་བའམ་སྣ་ནས་དབྱུང་རྔུབ་བྱ༔ སེམས་ཀྱི་གནད་ནི་ཞི་གནས་རྐྱང་པ་ལ་རྟེན་དེ་ལ་འཛིན་པ་ལས་རྣམ་པར་རྟོག་པ་གཞན་མི་སྐྱེ་བར་བྱ་བ་དང་༔ དྲན་པས་དམིགས་རྣམ་ལ་སེམས་བཟུང་ཞིང་མི་བརྗེད༔ ཤེས་བཞིན་གྱིས་ཡེངས་མ་ཡེངས་རྟོགས་པར་བྱས་ནས་བརྩོན་འགྲུས་ཀྱི་ཡུན་བསྲིང་བ་དང་ཏིང་ངེ་འཛིན་བསྒོམ་པ་ལ་ལེ་ལོ་སྒྱིད་ལུགས་མི་བྱའོ༔ གཉིས་པ་གྲུབ་པ་མི་ཉམས་པར་གོང་དུ་སྤེལ་བ་ལ༔ རྣམ་རྟོག་རྒོད་པའི་དབང་དུ་གྱུར་ནས་སྔར་གྱི་དྲན་པའི་དམིགས་རྣམ་ལས་ཡེངས་ན༔ ཡང་དེ་ལ་སེམས་འཇོག་པ་དང་༔ རྒྱུན་བསྲིང་ནས་འཇོག་པ་དང་༔ ཕྱིར་འཕྲོ་ན་སེམས་བརླན་ཏེ་འཇོག་པ༔ ཤེས་བཞིན་ཡང་དང་ཡང་དུ་རྟོག་དཔྱོད་བྱ་ར་བྱས་ཏེ་ཕྱི་ཕྱིར་བརྟུན་ཏེ་འཇོག་པ༔ ཏིང་འཛིན་དེ་ལ་དགའ་བ་བསྐྱེད་ནས་འདུལ་བ༔ རྣམ་གཡེང་གི་ཉེས་པ་ཞི་བར་བྱེད་པ༔ གཉིད་རྨུགས་སོགས་བསལ་ནས་རྣམ་པར་ཞི་བར་བྱེད་པ༔ མི་འཕྲོ་བར་རྩེ་གཅིག་ཏུ་བྱེད་པ༔ དེ་ལ་མི་རྩོལ་བར་མཉམ་པར་འཇོག་པ་སྟེ་དགུའི་སྒོ་ནས་མི་ཉམས་གོང་འཕེལ་དུ་བྱེད་དེ་རྒོད་པ་ཞི་བར་བྱས་པས༔ རྒོད་འགྱོད་གནོད་སེམས་འདོད་འདུན་ཐེ་ཚོམ་རྣམས་སེལ་བར་བྱེད་དོ༔ བྱིང་བ་སེལ་ཕྱིར་ཡིད་ཕྱེད་བཅུ་གཅིག་ནི་ལྷག་མཐོང་གི་སྐབས་སུ་ཤེས་པར་བྱའོ༔

དེའི་གྲུབ་པའི་ཏིང་ངེ་འཛིན་ནི་བྱིས་པ་ཉེར་སྤྱོད་ཀྱི་བསམ་གཏན་ཏེ༔ སེམས་ལས་སུ་རུང་བར་ཟིན་པའི་ཆ་ནས་ཡིན་གྱི་གཡོ་ཐོབ་གོམས་བརྟན་གྱི་མཐར་ཐུག་པ་ལ་འདོད་སེམས་རྩེ་གཅིག་བཏང་འགྲོ་བཞག་སྡོད་ལ་བཀོལ་དུ་བཏུབ་པ་ཞིག་མ་བྱུང་བར་དེ་བསྒོམ་པ་དེའི་ལྷག་མཐོང་གི་རྟེན་ལྕོགས་ཙམ་དང་ཁྱད་པར་ཞི་རགས་རྣམ་ཅན་དུ་གོམས་པས་འདོད་ཉོན་དྲུག་སྤངས་པ་ཉེར་བསྡོགས་མི་ལྕོགས་མེད་པ་དགུ་པ་སྤངས་ནས་བསམ་གཏན་དངོས་གཞིའི་སེམས་ཐོབ་ཕྱིན་ཆད་སྔ་མ་སྔ་མའི་ཕྱི་མ་ཕྱི་མའི་ཉེར་བསྡོགས་བྱེད་པ་ནས་འགོགས་པའི་བར་ཡང་འགྲོའོ༔ དེ་དག་ལས་བསམ་གཏན་མ་ཐོབ་ཀྱང་འདོད་སེམས་རྩེ་གཅིག་ཙམ་མེད་པར་གང་ཡང་བསྒོམ་པ་ལ་རང་མི་དབང་བས་ན་དེ་ཉིད་མ་གྲུབ་བར་དུ་གོམས་པར་བྱས་ལ༔ དེ་ནས་སེམས་རྟེན་མེད་གང་དུའང་མི་རྟོག་པར་བཞག་ཀྱང་སྡོད་པའི་ཚེ་སེམས་སེམས་བྱུང་གི་རྣམ་རྟོག་རགས་པ་ཞི་བ་དང་༔ ལྷན་ནེར་གནས་པས་ཞི་གནས་ཟེར་བ་ཡིན་ནོ༔ འདི་བྱང་སེམས་དང་ངེས་འབྱུང་གིས་ཟིན་ཡང་བདག་མེད་ཀྱི་ཤེས་རབ་བསྒོམ་པ་དང་མ་འབྲེལ་བའི་ཕྱིར་ན་བྱིས་པ་ཉེར་སྤྱོད་དུ་བཞག་གོ༔ སེམས་སྤྲོ་བསྡུ་མེད་པའི་རང་བཞིན་དེ་ཉིད་ཞི་གནས་ཀྱི་ངོ་བོ་དང་གཙོ་བོ་ཡིན་ལ༔ ཡུལ་གཅིག་ལས་གཞན་ལ་མི་རྟོག་པ་ནི་དེ་གྲུབ་པའི་ཐབས་ཡིན་པའི་འཁོར་གྱི་ཚུལ་ལོ༔

དེ་ལྟ་བུའི་ཞི་གནས་གྲུབ་ནས་དེ་ལ་གཞི་བྱས་ཏེ༔ ཀུན་རྫོབ་ཏུ་ཆོས་ཐམས་ཅད་སྒྱུ་མར་སྦྱངས་པ་དཔེ་བཅུ་དྲུག་གི་ཚུལ་དུ་ཉམས་སུ་བླང་བས་ངང་ལ་མཉམ་པར་བཞག༔ དོན་དམ་པར་སྤྲོས་བྲལ་ནམ་མཁའ་ལྟ་བུའི་ངང་ལ་མཉམ་པར་བཞག་པ་གཉིས་སྔར་ལྟ་བ་གཏན་ལ་ཕབ་པའི་དུས་སུ་བཤད་པ་དག་ཚིག་ཏུ་མ་ལུས་པར་འདིར་ཉམས་སུ་ལོངས་བར་བྱའོ༔ འདི་དག་འོག་ཏུ་ཅུང་ཟད་འབྱུང་བས་འདིར་དེ་ཙམ་མོ༔ འོན་ཀྱང་ཞི་གནས་དེ་ལྷན་ནེར་གནས་ཆ་ཡིན་པས་དེའི་དུས་འདའ་བས་ལྷག་མཐོང་ལ་གནོད་པས་འདྲེ་རུ་གཉིད་རྨུགས་གཉིས་འབྱུང་བས་སོ་སོར་བརྟགས་པས་གང་འདུལ་དུ་ཡིད་ལ་བྱེད་པ་ལ་བཅུ་གཅིག་ཡོད་པས༔ དེའང་སྟོང་རྟེན་འབྱུང་གི་དོན་ལ་རྟོག་དཔྱོད་ཡིད་ལ་བྱ༔ ཡང་སེམས་འཕྲོ་ན་ཞི་གནས་ལ་བཞག་ཅིང་དཔྱོད་པ་ཅུང་ཟད་རེ་ཡིད་ལ་བྱ༔ རྣམ་རྟོག་མཆེད་ན་མི་རྟོག་པ་ཡིད་ལ་བྱ༔ མི་རྟོག་པའི་དོན་ལས་མི་ཡེངས་བར་ཡིད་ལ་བྱ༔ ཡང་གསལ་ངར་དང་བཅས་པའི་ལྷག་མཐོང་ཡིད་ལ་བྱ༔ དེའི་ཚེ་གསལ་སྟོང་གཉིས་སུ་མེད་པའི་ཞི་ལྷག་ཟུང་འཇུག་ཡིད་ལ་བྱ༔ དེ་ལ་སེམས་རབ་ཏུ་འཛིན་པའི་རྒྱུ་མཚན་ཡིད་ལ་བྱ༔ ཞི་གནས་ཀྱི་རྒྱུ་མཚན་ཡིད་ལ་བྱ༔ ལྷག་མཐོང་གི་རྒྱུ་མཚན་ཡིད་ལ་བྱ༔ ཟུང་འཇུག་གི་རྒྱུ་མཚན་ཡིད་ལ་བྱ༔ བཏང་སྙོམས་ཀྱི་རྒྱུ་མཚན་ཡིད་ལ་བྱ་བའི་སྒོ་ནས༔ རྟེན་ཞི་གནས་དབྱིངས་ཀྱི་བྲལ་རྒྱུ་ལ༔ ལྷག་མཐོང་ཡེ་ཤེས་ཀྱི་བྲལ་རྒྱུ་སྐུ་གཉིས་ཀྱི་ཉམས་ལེན་ཟུང་འཇུག་ཏུ་གྲུབ་པའང་ཅུང་ཟད་གོམས་པས་བསྐྱེད་རྫོགས་ལ་སོགས་པ་རྡོ་རྗེ་ཐེག་པའི་ཉམས་ལེན་ཐམས་ཅད་ཀྱང་རྣམ་རྟོག་གི་གཡོ་བས་དྲི་མ་ཅན་དུ་མི་བྱེད་པ་དང་༔ བདག་འཛིན་དང་གྱ་ནོམ་ལྷར་ཞེན་སྦྱོང་བ་ལ་ཟབ་མོ་མཐར་ཐུག་པ་དང་༔ འདིའི་ལྷག་མཐོང་གསལ་སྟོང་ཟུང་འཇུག་སྤྲོས་བྲལ་དེ་སྟོང་བ་ཆེན་པོའམ་རྡོ་རྗེ་ལྟ་བུའི་དངོས་རྒྱུའང་ཡིན་པས་སྦྲེལ་ཏོ་རྫོགས་པའི་རིམ་པས་སྦུབས་ནས་དོན་པས་ཟུང་འཇུག་གི་ལྷ་སྐུའི་ཆ་རྐྱེན་དུ་ཡང་གྱུར་པ་དང་༔ བླ་མས་བརྩེ་བར་གདམས་པས་ཐོས་པའི་ཤེས་རབ་དང་༔ བདག་གིས་གཏན་ལ་ཕབ་པས་མཐོང་བས་རྗེས་ལ་འཇོག་པ་འདི་ལ་མ་བརྟེན་པར་རིག་པ་སྤྱི་བླུགས་སུ་འཇོག་པ་མི་མཐོང་བ་དང་༔ གོལ་པ་དང་༔ ཐེ་ཚོམ་མ་སྤངས་པས་ལྡོག་པ་ཡོང་བས་ན་ཡང་ཤིན་ཏུ་ཟབ་པོ༔

རྗེས་སུ་བོགས་དབྱུང་བ་ནི༔ རང་གི་རྣལ་འབྱོར་རྐྱེན་དང་བསྲེ་བའང་ཡིན་ཏེ༔ རྐྱེན་གང་བྱུང་གི་སྟེང་དུ་སྒྱུ་མ་དང་རྨི་ལམ་དུ་ཤེས་པའི་དྲན་འདུན་གྱི་སྟོང་ཉིད་དུ་ལ་བཟླས་པའི་ལྷག་མཐོང་ལ་བློ་ཆོད་དུ་ཆེ་བ་ཞིག་གོ་དང་༔ ཞི་གནས་ལ་རྟིངས་པ་མེད་བའི་བོགས་འབྱིན་ལ༔ ཡང་གཡོ་བ་མེད་པའི་ངང་ངམ་བབས་ས་ལེ་བ་ཉིད་གཙོ་བོར་བཟུང་བས༔ སེམས་གང་དུའང་མི་རྟོག་པའི་འཁོར་དུ་ལྡན་པའི་བློས་སྟོང་གི་ཡུལ་དེའི་ཡུལ་མེད་རྟོགས་བའི་སྒོམ་བྱུང་ཆ་འདྲའི་སྟོབས་ཀྱི་མི་གནོད་པར་མ་ཟད༔ དབང་པོ་མ་འགགས་པར་བཞག་པས་སྤྱན་དང་མངོན་ཤེས་སོགས་རང་ཤུགས་ཀྱིས་འཆར་བ་དང་༔ ཡུལ་སྟོང་གི་བློ་དེའི་ངོ་བོ་ལ་གྲུབ་པ་མེད་པར་གྲྭ་ཟང་ངེར་བདག་མེད་རྟོགས་པའི་སྒོམ་བྱུང་ཆ་འདྲའི་གང་ལ་ཡང་རྟིངས་པ་མེད་པར་བོགས་འབྱིན་ནོ༔ ཡང་རྟིངས་ན་ལྷག་མཐོང་ལ་རྩལ་སྦྱངས༔ རྒོད་ན་ཞི་གནས་བསྒོམ་པས་བོགས་འདོན་པར་འགྱུར་རོ༔ ཡང་ཞི་གནས་མེད་པ་དང་ལྷག་མཐོང་མི་གསལ་བ་གང་ལའང་རླུང་སྦྱོར་བསྒོམ་པར་གསུངས་ཀྱང་༔ འདིར་དེ་དག་ནི་བསམ་གཏན་གྱི་བར་དོའི་ཉམས་ལེན་དུ་བཞག་པའི་འདིར་དང་མི་འདྲ་སྟེ༔ རྟེན་དང་བརྟེན་པའི་ཁྱད་པར་ཙམ་དུ་བཞག་པར་བྱའོ༔ འོན་ཀྱང་རྟེན་བརྟན་པོའི་སེམས་གནས་ལ་ཞི་གནས་སུ་བཤད་པ་དང་༔ དེའི་རང་བཞིན་ཡོངས་ཤེས་སྟོང་བ་ཉིད་ཀྱི་གོ་མྱོང་གི་ཐོག་ཏུ་ཅུང་ཟད་རེ་བཞག་པ་ལ་ལྷག་མཐོང་གི་ཡེ་ཤེས་ཏེ༔ ཞི་ལྷག་ཟུང་འཇུག་གི་ཏིང་ངེ་འཛིན་བྱས་པ་འདི་རྒྱུ་མཚན་ཉིད་ཐེག་པའི་ཚུལ་དང་མཐུན་པའི་རྟེན་ཞེས་བྱའོ༔

གཉིས་པ་དེའི་རྗེས་འབྲེལ་དུ་གདམས་ངག་བསྒོམ་པ་ལ༔ སྤྱིར་འདུན་པའི་སྒོ་ནས་བར་དོ་དྲུག་སྦྱོངས་བའི་གདམས་ངག༔ བྱེ་བྲག་ཏུ་རང་རང་དང་མཐུན་པའི་ལམ་གྱི་སྒོ་ནས་སྦྱོང་པ་གཉིས་སུ་ཡོད་པ་ལས༔ དང་པོ་ལ་དྲུག་ལས༔ སྐྱེ་གནས་ཀྱི་བར་དོ་འདུན་པས་སྦྱོང་པ་ལ༔ ཡུལ་སྣང་སྟོང་དུ་སྦྱང་བ་དང་༔ ཡུལ་ཅན་རིག་སྟོང་དུ་སྦྱངས་བ་སྟེ༔

དང་པོ་ནི༔ སྔ་བར་རང་གི་མདུན་དུ་མེ་ལོང་ཞིག་བཏགས་ནས་དེའི་ནང་དུ་རང་གི་ཁྱིམ་གྱི་ཀ་ཆ་དཀོར་ཆ་ཐམས་ཅད་ཤར་བར་བྱས་ཏེ༔ ལུས་པོ་གན་རྐྱལ་གྱིས་གནས་པའི་མིག་གིས་ཆེད་དུ་བལྟས་ནས་བསམ་བློ་འདི་ལྟར་བྱེད༔ ཨེ་མ༔ འདི་ལྟ་བུའི་སྣང་བ་ལེགས་ཤོས་ལས་བཟུང་ན་ནི༔ མཛེས་ཤིང་ལྟ་ན་སྡུག་པ༔ མིག་ལ་དགའ་བ་བསྐྱེད་པར་བྱེད་པ་ཞིག་ཞེས་ཡང་ཡང་གོམས་པས་གཟུགས་བློ་ཡང་དག་པར་འབྱུང་བས་དུས་སུ་འདི་དག་ང་རང་གི་ཡིན་སྙམ་ནས་བདག་ཏུ་འཛིན་པའི་བློ་འཐིས་པར་བཅག༔ རེ་ཞིག་ན་ཅུང་ཟད་ཆགས་པའི་བློ་བྱུང་ངམ་མ་བྱུང་ཡང་༔ ཨ་ཡེ་ང་འཁྲུལ་བར་འདུག༔ འདི་ལ་སྟོད་སྨད་བར་གྱི་དབྱེ་བ་བསམ་གྱིས་མི་ཁྱབ་པ་ཞིག་མཆི་ཡི༔ བདག་འདིའི་གང་ལ་ཆགས་པར་འདུག་གམ༔ ཡང་ན་འདི་ཅི་འདྲ་བ་སྙམ་དུ་སེམས་པ་ན༔ ལག་པས་རེག་པའི་ཚུལ་ཡང་བྱས་ལ༔ རེག་བྱ་ནི་འདི་ལ་མི་འདུག༔ ད་ཅི་ཤར་གཞི་ནི་མེ་ལོང་འདིར་འདུག༔ འཆར་བ་འདི་ཕྱི་ནང་གང་དུ་འདུག༔ གཟུགས་དང་དབྱིབས་ཁ་དོག་དུ་ནི་ངེས་པར་ཡོད་པ་འདིར༔ རེག་པ་ཙམ་མེད་པས་མེད་པར་སུས་བྱེད༔ ད་དུང་ཡང་ངེས་པར་ཡོད་སྙམ་དུ་བསྒོམ་ཞིང་༔ ཤིན་ཏུ་ཡང་བལྟ་ཐུབ་པ་དང་༔ གཟུགས་གཞན་ལ་ཅུང་ཟད་ཀྱང་མ་ཡེངས་པས༔ ངེས་པར་གཟུགས་ལ་མགོ་མཉམ་པ་ཤིག་ནི་འོང་སླ་བས༔ དེ་ལྟར་དཔྱོད་རྟོག་གི་བསམ་བྱུང་གིས་ཡང་ཡང་སྦྱངས་སྐབས་སུ་འདི་ནི་གཟུགས་བརྙན་ཡིན་པས༔ མི་བདེན་པ་མངོན་སུམ་དུ་གྱུར་ཡང་བསླུ་ཚབ་འདི་འདྲ་འདུག་སྙམ་དུ་སེམས་པ་དང་མཉམ་པར་སྤེལ་ཏེ༔ འདི་ལྟར་སྣ་ཚོགས་པའི་ཆོས་ཐམས་ཅད་ཀྱང་དེ་དང་འདྲ་བ་ལ༔ བྱིས་པས་གཟུགས་བརྙན་ལ་བདེན་པར་བཟུང་བ་དང་འདྲ་བས༔ སེམས་ཅན་འདི་དག་སྙིང་རེ་རྗེ་བསམ་དུ་སྙིང་རྗེ་བསྒོམ༔ འདི་ནི་དགོས་པ་མེད་པའི་ངལ་བ་མིན་ཏེ༔ ཅིའི་ཕྱིར་ན༔ གཟུགས་ཀྱི་སྣང་བ་ནི་འགགས༔གཟུགས་བརྙན་ནི་མེད་པར་གོམས་སྟོབས་ཆེ་བས་ན་མེད་བཞིན་སྣང་བའི་བློ་ཤུགས་བྱུང་གི་ཡོད་པས༔ དེ་ལ་གཉུག་བསྲིང་བས༔ བར་ཞིག་གཟུགས་དངོས་ལའང་ཆགས་པ་ཇེ་ཆོམ་ལ་འགྲོ་བ་ངེས་པ་ཡིན་པ་དང་༔ དེ་ལས་བྱ་བ་ལ་འཇུག་པ་ན་ཡང་༔ འདི་ལྟ་བུའི་ཆོས་སུ་སྣང་བ་ཐམས་ཅད་གཟུགས་བརྙན་ཡིན་སྙམ་དུ་སྦྱོང་བ་དང་མཉམ་རྗེས་བསྲེ་བས་རྩལ་སྦྱངས་ཀྱིས་གྲོལ་བར་འགྱུར་རོ༔ དེ་བཞིན་དུ་ནང་རང་གི་ལུས་ལ་ཡང་རྩལ་སྦྱངས་ཏེ༔ ལུས་རྒྱན་གྱིས་སྤྲས༔ ཁ་བཞིན་ཡང་མཛེས་པར་བཀྲུས་ལ་ཤར་བ་དེ་ལ་བལྟས་ཤིང་༔ ངའི་ལུས་དང་འདི་གཉིས་ལ་བདེན་རྫུན་ཅི་ཡང་མེད་དེ༔ མེད་བཞིན་སྣང་བ༔ སྣང་བཞིན་མེད་པ་ཞིག་གོ༔ འདི་ནི་ང་རང་གི་ལུས་མ་ཡིན་ཏེ༔ རྒྱུ་རྐྱེན་མེ་ལོང་གི་གཟུགས་བརྙན་དུ་བྱུང་བས་སོ༔ ཡིན་སྙམ་པས་ལུས་འདི་ཡང་ངའི་མ་ཡིན་ཏེ༔ ཕ་མའི་ཁུ་ཁྲག་གིས་བསྐྱེད་པས་རྒྱུ་རྐྱེན་དུ་གྲུབ་པས་སོ༔ ཁུ་ཁྲག་ལ་རྣམ་པ་འདི་འདྲ་མེད་པའི་ཕྱིར་དང་༔ ཆེ་ཆུང་མི་མཉམ་པའི་ཕྱིར་དང་༔ ཡང་མ་གྲུབ་པའི་ཕྱིར་རོ་སྙམ་སྐབས་སུ་གཟུགས་བརྙན་དེ་ལ་ངར་འཛིན་བྱས་པས་ཀྱང་བདག་འཛིན་ཤུགས་ཀྱིས་ཆོད་ལ༔ ཡང་རང་གི་ལུས་ལ་ཞིབ་བར་བལྟས་པས༔ བ་སྤུའི་ཁུང་བུ་ཡན་ཆད་མ་འདྲེས་པར་མཐོང་བས༔ གཅིག་གིས་དངོས་པོ་ཏིལ་ཉག་མ་ཙམ་ཡང་མ་མཐོང་ནས༔ དུ་མ༔ འཐོར་བ༔ མ་འབྱར་བ༔ སྙིང་བོ་མེད་པ་ཆུ་ཤིང་ལྟར་དངོས་པོ་མེད་པ་ངེས་ཤེས་ཐེ་ཚོམ་དང་བྲལ་བར་འབྱུང་བ་དང་༔ ཡང་སྔར་བཞིན་མེ་ལོང་དུ་བལྟ་བ་མ་ཡེངས་བར་རེས་མོས་བསྐོར་བའི་དཔྱད་བསྒོམ་སྤེལ་མའི་རྗེས་སུ་ཡང་ལུས་སྣང་སྟོང་གཟུགས་བརྙན་ལྟ་བུར་འདུ་ཤེས་པ་དང་༔ དེའི་ལུས་རང་བཞིན་མེད་པར་རྟོགས་པའི་དགོས་པ་ཡོད་དོ༔ དེ་ནས་ངག་གྲགས་སྟོང་བྲག་ཆ་ལྟ་བུར་ཕྱི་ནང་བསྒོམ་པ་ནི༔ བྲག་རི་བ་གམ་མཐོ་བའི་རྩ་རུ་སླེབས་ནས༔ ཐག་རིང་པོ་ནས་རྔ་སྒྲ་སྒྲོགས་པའི་བརྙན་ལ་ཉན་ནས༔ སྒྲ་དང་བྲག་ཆ་གཉིས་ལ་དཔྱད་དེ༔ སྒྲ་འདི་རྔ་ཡི་ཕྱི་ནང་བར་གསུམ་གང་ནའང་མེད་ལ་རྐྱེན་གྱི་སྣང་བ་དང་༔ བྲག་ཆ་དེ་བྲག་གི་ཕྱི་ནང་བར་གསུམ་གང་ནའང་མེད་པ་ལ༔ ཁྱད་ཅི་ཡང་མི་དམིགས་པས་བསྲེ་ནས་དཔྱད་བསྒོམ་དང་༔ ནང་རང་གི་ངག་གི་བརྗོད་པས་སེམས་ལ་བབས་ཚད་ཀྱི་སྒྲ་ཚིག་ཐམས་ཅད་པའི་བརྙན་ལའང་ཉན་ཏེ་བྲག་ཆ་ལྟར་སྦྱོངས་པས༔ བདག་གཞན་གྱི་ངག་དེ་ལུས་ཀྱི་ཕྱི་ནང་བར་གསུམ་གང་ན་ཡོད་དཔྱད་པའི་སྒོ་ནས༔ བྲག་ཆ་དང་མགོ་མ་མཉམ་བར་མཉན་འཇོག་སྤེལ་ཞིང་ཡང་སྔ་མ་ལྟར་གོམས་ཤིང་ངེས་ཤེས་འདྲེས་པ་ན༔ བསྟོད་སྨད་སྣ་ཚོགས་པ་བྱའོ༔ འོན་ཀྱང་བྲག་ཆའི་སྒྲ་དེ་ལ་བསྟོད་སྨད་གང་ཡང་འདོད་པ་མེད་ཀྱང་རང་ཤར་བ་ལྟར༔ སྒྲ་དངོས་མེད་ལ་ཆགས་ཞེན་གྱི་ཡུལ་མེད་པ་དང་༔ ཆགས་སྡང་གི་བསམ་པ་མེད་པ་དང་༔ གཞི་ཨ་ལི་ཀ་ལི་ནི་བསྟོད་སྨད་གཉིས་ཀ་མ་ཡིན་པ་དང་༔ བསྟོད་སྨད་ཀྱི་སྒྲ་དེ་བདག་གི་ལུས་ངག་ཡིད་གསུམ་དང་འཕྲད་པ་མེད་པར་ཇི་ལྟར་འཛོམས་ཀྱང་མིན་པ་ཡིན་པར་བཟུང་ནས་ཉེ་བར་ལེན་པའི་སེམས་ཅན་འདི་དག་སྙིང་རེ་རྗེ་སྙམ་ནས་ཤུགས་ཀྱིས་འབྱུང་བ་ན་གོམས་པའི་ཚད་དོ༔ རྗེས་ཐོབ་སྒྲ་ཐམས་ཅད་ཀྱང་མགོ་མཇུག་དང་ཕྱི་ནང་འགྲོ་འོང་སྟེང་འོག་གང་མེད་ལ༔ ཆེ་ཆུང་ལྟོས་པའི་མེད་པ་དང་༔ སྙན་མི་སྙན་ཡང་མེད་དེ༔ གང་ཟག་གཅིག་ཤི་བའི་སྒྲ་དེ༔ དེའི་དགྲ་ལ་སྙན་པར་སྣང་༔ གཉེན་ལ་མི་སྙན་པར་སྣང་བ༔ བར་མ་ལ་བཏང་སྙོམས་ངག་འཁྱལ་ཙམ་ལས་རང་སྐྱ་མི་ཐུབ་པས་གྲུབ་པ་མེད་པའི་ཚུལ་ལ་སེམས་པའི་བློའི་འདུན་པ་མི་ཤོར་བར་དྲན་པའི་ཐག་པས་བཏགས༔ ཤེས་བཞིན་གྱི་བྱ་ར་བཅོལ༔ བརྩོན་འགྲུས་ཀྱི་གུས་རྟག་གིས་ཡང་དག་པར་བསྒྲུབ་པར་བྱའོ༔

དེ་ནས་གསང་བ་སེམས་སྤྲིན་དང་རླུང་ལྟར་སྦྱང་བ་ནི༔ སྤྲིན་འབྱུང་བ་ལ་བརྟགས་ནས་རྒྱུ་རྐྱེན་མེད་བཞིན་དུ་སྣང་བ་འདི༔ དང་པོ་གང་ནས་བྱུང་སོགས་དཔྱད་པ་དང་༔ ཡང་ན་རླུང་འབྱུང་བ་ལ་དཔྱད་དེ༔ ཕྲ་རགས་གི་དངོས་པོ་གང་དུ་ཡང་གྲུབ་པ་མེད་པ་འདི་དང་པོ་བསྐྱེད་པའི་རྒྱུ་རྐྱེན༔ བར་དུ་གནས་པའི་རང་ངོ་༔ ཐ་མ་འགྲོ་བའི་ཡུལ་ལ་བརྟགས་ནས༔ བདག་གི་སེམས་ཀྱང་དེ་དང་ཁྱད་པར་མེད་པའི་དགག་སྒྲུབ་སྣ་ཚོགས་སུ་སྣང་བ་ཐམས་ཅད་ཀྱང་སྤྲིན་དང་རླུང་ལྟ་བུའོ༔ དེའི་རྟགས་སུ༔ འདོད་པ་རང་སྐྱ་ཐུབ་པ་མེད་པས༔ བདག་དང་སྔར་མི་དགའ་བ་ལ་མི་འདོད་པ་བྱུང་ན་དགའ་བའི་གང་ཟག༔ ཕྱིས་དགའ་བར་གྱུར་ཚེ༔ དེ་ལ་མི་འདོད་པ་མི་འདོད་པ་དང་༔ སྡུག་བསྔལ་སོགས་ཀྱང་དེ་བཞིན་དུ་གཞིག་པར་བྱའོ༔ ཡང་སྤྲིན་ནི་དུམ་བུ་བ༔ མི་སྡོད་པ༔ མ་ངེས་པའི་དབྱིབས་ཅན༔ ནམ་མཁའི་ངོས་ལ་མ་འབྱར༔ གཤིས་ལ་མ་གྲུབ་པ་ལྟར༔ སེམས་ཀྱང་མང་པོ་སྣ་ཚོགས་པས་དུམ་བུ་བ༔ སྐད་ཅིག་ཀྱང་སྐྱེ་འགགས་མེད་པར་མི་སྡོད་པ༔ མ་ངེས་པའི་དབྱིབས་སམ་སྣང་བ་དང་༔ འདྲེས་མར་འབྱུང་བ༔ ཆོས་ཉིད་སྤྲོས་བྲལ་གྱི་ངོས་ལ་མ་རེག་པ༔ གཤིས་ལ་མ་གྲུབ་པ་ཞིག་པས་ན༔ བདག་དུ་བཟུང་བས་འཁྲུལ་ཚབ་ལ་སྙམ་དུ་དཔྱད་བསྒོམ་དཔེ་དོན་འདྲེས་པར་བྱ༔ གཉིས་པ་ནི༔ དེ་ནས་དགག་སྒྲུབ་སྣ་ཚོགས་པ་སྤྲོ་བར་བྱས་ལ༔ ཡང་ངལ་ཞིང་ཆད་པས་ལྷན་ནེར་གནས་དུས་ངོ་ལ་བལྟས་ཏེ་བཙལ་བས༔ གང་ཡང་མ་རྙེད་པར་བརྗོད་བསམ་ལས་འདས་པར་སོང་བ་ན༔ དྲན་པ་རང་ཟད་ཀྱི་དགོངས་པ་ཟེར་བ་ཡིན་ནོ༔

ཏིང་ངེ་འཛིན་གྱི་བར་དོ་འདུན་པས་སྦྱངས་བ་ནི༔ སྔར་བཤད་པ་ལྟར༔ ཏིང་ངེ་འཛིན་ལ་གནས་པས༔ སྐབས་ཤིག་ཏུ་ནི༔ ཤིན་སྦྱངས་ཐོབ་པས་བདེ་བ་ཁྱད་པར་ཅན་ཞིག་ལ་འབྲལ་མི་ཕོད་པ་ཡང་དང་ཡང་དུ་ཨེ་འཆར་དུ་སྙམ་པ་ཞིག་འབྱུང་དུ་ཡོད་པས༔ དེའི་དུས་སུ་ཆགས་པའི་སྐྱོན་འབྱུང་བས་ལྷ་བདུད་དུ་ཤེས་པས་རང་སར་དཀྲོལ་བ༔ ལོག་པའི་སྐྱོན་གང་བྱུང་འཆོས་བར་བྱའོ༔ དེ་ཡང་བདེ་བ་འདི་ཉིད་ཀྱང་གཅིག་གམ༔ ཐ་དད་པའི་ཡུལ་སེམས་གང་རུང་ཞིག་ནི་ཡོད་གྲངས་བས༔ གར་གནས་བརྟགས་ཤིང་བསྒོམ་བཤིག་ལ་བལྟའོ༔ དེ་བཞིན་དུ་རྨི་ལམ་གྱི་བདེ་འབྱོར་ལྟ་བུ་འདིས་ད་སྔོན་འཁོར་བ་ཐོག་མ་མེད་པ་ནས་བདག་ཤིན་ཏུ་བསླུས་སོ༔ ཞེས་རྐྱེན་ངན་དུ་ཤེས་ཤིང་འཁྲི་བ་བཙན་ཐབས་སུ་བཅད་དེ༔ དེའི་འགྲེས་སུ༔ གསལ་ཆགས་གསལ་ལོག༔ མི་རྟོག་ལ་ཆགས་ལོག་ལ་སོགས་པ་ཡང་སྦྱང་བར་བྱའོ༔

འཆི་ཀའི་བར་དོ་འདུན་པས་སྦྱང་བ་ནི༔ རང་གི་གནས་དབེན་པར་ཁ་སྣ་ལག་པས་བསྡམ་སྟེ་ཅུང་ཟད་རིང་བར་མྱོང་བས་ཅི་ཞིག་ན་སྡུག་བསྔལ་བསམ་དུ་མེད་པ་ནི་འབྱུང་བས༔ འོ་དེ་ལྟ་བུའི་སྡུག་བསྔལ་འདི་སེམས་ཅན་ཐམས་ཅད་ལའང་མེད་པ་གཅིག་ཀྱང་མེད་པས་ཐམས་ཅད་དང་༔ ཁྱད་པར་བདག་གི་ཁ་ལག་སྤྱོད་པས་འབྲེལ་བའི་སེམས་ཅན་རྣམས་ལ་ཡོད་པ་དང་༔ རང་ལའང་ཡོད་ངེས་པ་ཡིན་པ་དང་༔ ད་སྐབས་ངས་ཅུང་ཟད་ལས་མ་མྱོང་བས་ཅི་འདྲ་བ་ལ་ལྟོས་སུ་མེད་ཀྱང་༔ ཆ་ཤས་ཙམ་ཡང་མི་བཟོད་པ་འདི་ལ་ལྟོས༔ སེམས་ཅན་ཐམས་ཅད་སྙིང་རེ་རྗེ༔ བདག་གིས་འཆི་མེད་གཉུག་མའི་རྒྱལ་ས་ལ་འདི་དག་དགོད་པར་བྱའོ་སྙམ་དུ་སེམས་བསྐྱེད༔ དེའི་ཆེད་དུ་བློས་ཀྱང་ད་ནི་བདག་གི་གཡས་གཡོན་མདུན་རྒྱབ་ཐམས་ཅད་ཀྱང་གཉེན་བཤེས་ཀུན་གྱིས་མཐའ་བསྐོར་ནས་འཆི་རུ་ཡོད་པས༔ ད་ང་ཅི་ལའང་མི་ཆགས་སྙམ་ནས༔ ཡོ་བྱད་ལྷག་མ་གང་ཡོད་སེམས་ཅན་ལ་སྦྱིན་སེམས༔ སངས་རྒྱས་ལ་ཆོད་༼ མཆོད་དཔྱད། ༽སེམས་ལ་སོགས་པ་བྱས་ཤིང་༔ དེའི་རྗེས་ཐོག་ཏུ༔ འཆི་བ་འདི་རང་བཞིན་མེད་པ་ཡིན་པས་འཇིགས་པའི་ཡུལ་མེད་ལ༔ འཆི་བ་པོ་ང་ཡང་ལུས་ནི་ཡེ་ནས་བེམ་པོ་ཡིན༔ སེམས་ནི་གཏན་ནས་འཆི་རྒྱུ་མིན་པས༔ ད་ཅི་ལ་སྐྲག་སྙམ་དུ་ལྟ་བའི་གདེངས་བསྐྱེད་ནས༔ འཆི་བ་འདི་ཆོས་སྐུ་ཡིན་པར་འདུག་པས༔ སྣང་མཆེད་ཐོབ་གསུམ་ངོས་ཟིན་པར་བྱ༔ དེ་ལ་ང་རང་ལ་སྣང་བ་འདི་ཅི་སྣང་བ་དཀར་ལམ་ཞེས་བྱ་བ་ཞིག་ཡོད་པས་ན༔ དེ་ཉིད་ངོ་མ་ཤེས་པས་འདོད་ཁམས་སུ་གོལ་བར་འགྱུར་བ་དང་༔ ཤེས་པས་སྤྲུལ་སྐུར་དབུགས་འབྱིན་པས་དེ་ཡིན་པ་འདྲ༔ འདི་མེ་ལོང་ཡེ་ཤེས་སྣང་བ་ཡིན༔ བདག་ཀྱང་འདི་ལ་འཕོའོ་སྙམ་ནས་དཀར་པོ་ཐམས་ཅད་ནམ་མཐོང་ཡང་ངེས་པར་དྲན་པ་ཐ་ན་རྨི་ལམ་དུ་ཡང་དེ་འདྲ་འབྱོང་བར་བྱའོ༔ དེའི་གདམས་ངག་ཏུ་རླུང་བསྒོམ་ན་ཡང་རྗེས་ཐོབ་དུ་འདི་ལྟར༔ དཀར་ལམ་ཤར་དུས་རྟོག་པ་ཚོགས་དྲུག་འགགས་པས་རླུང་གི་རྟོག་མེད་ཤར་བ་འདི་དེའི་ཉམས་ཡིན་པར་གོར་མ་ཆག་པས་ན༔ རྣམ་པ་ཀུན་ཏུ་རྣམ་རྟོག་ཟག་ཙམ་མེད་ཀྱང་དེར་འདུན་པ་བཞག་གོ༔ ཡང་དམར་པོའི་སྣང་བ་མཐོང་ན་འདི་དམར་ལམ་རེད༔ ངོ་མ་ཤེས་ན་གཟུགས་ཁམས་དང་ཤེས་ན་ལོངས་སྐུ་ཡིན་པས༔ ང་ཤི་འགྲོ་བར་འདུག་པས་འདི་སོ་སོར་རྟོགས་པའི་རང་གདངས་སུ་འདུག༔ ངོ་ཤེས་པར་བྱས་ནས་དེའི་ངང་དུ་འཕོའོ་སྙམ་པའི་འདུན་པ་སྔར་ལྟར་འབྱོངས་པར་བྱ༔ དེའི་དུས་སུ་ཡིད་ཀྱང་འགགས་པས་ན་གཟུགས་མེད་དུ་གནས་པ་གང་གི་དུས་ཀྱང་དེར་འདུན་པ་བྱེད༔ དེ་བཞིན་དུ་ལྗང་ནག་སོགས་ཐམས་ཅད་ཀྱང་ཆོས་སྐུའི་སྣང་བ་ཆོས་དབྱིངས་ཡེ་ཤེས་སུ་རྩལ་སྦྱངས༔ དེའི་ཉམས་མི་རྟོག་པ་འཐུམ་པོ་ཞིག་པས་དེ་ཉིད་ངོ་ཤེས་པས་འདུན་པ་བསྒྱུར་རོ༔ ཡང་ནང་སྔ་ནི་ཉི་མ་ཤར་བ་དང་༔ དམར་ལམ་དུ་སྦྱངས༔ ནུབ་མོ་ནི་ཟླ་བ་ཤར་བ་དང་དཀར་ལམ་དུ༔ ནང་ནུབ་ཏུ་མུན་པ་འཆར་བས༔ ཉེར་ཐོབ་ནག་ལམ་དུ་འདུན་པས་སྦྱངས་སོ༔ དེ་ནས་ཆོས་ཉིད་བར་དོ་འདུན་པས་སྦྱོང་བ་ནི༔ སྔོན་ནམ་མཁའི་སྒྲ་སྦྱོང་བ་དེ་དང་འདྲ་བར་རི་མཐོན་པོ་ལ་ཕྱིན་ཏེ་གན་རྐྱལ་དུ་མིག་གིས་ནམ་མཁའ་སྤྲིན་དང་བྲལ་བ་ལ་མ་ཡེངས་པར་བལྟས་ཏེ༔ སྐྱོན་མེད་པའི་ཤེས་པ་རྟོག་བྲལ་དེ་ལ་ཆོས་ཉིད་བར་དོ་དང་པོ་ཆོས་སྐུ་མངོན་སུམ་དུ་ཤར་འདུག་གི༔ ངོ་ཤེས་ནས་ངང་དུ་གྲོལ་བར་བྱ་སྙམ་དུ་འདུན་པ་བྱས་ལ་ཆོས་སྐུ་ཡིན་པའི་ངེས་ཤེས་བྱེད་ཅིང་དེ་ལ་འཕོ་བར་བྱ་བ་སོགས་དང་༔ དེ་ནས་མན་ཤེལ་མིག་ལ་བཙུག་རྒྱུ་གཉིས་མེད་ཀ་མེད་ཡིན་པས༔ དེས་བལྟས་ནས་གནས་པར་བྱས་པས་སྟེང་འོག་ཕྱོགས་མཚམས་ཐམས་ཅད་འོད་ཀྱིས་གང་བ་ལ་ཆགས་པ་མི་བསྐྱེད་པར༔ འདི་ཅི་བར་དོ་འོད་ཀྱི་ཁང་པ་ཅན་འོད་མཐའ་མེད་པའི་གཞལ་ཡས་ཁང་བྱ་བ་ཞིག་ཡོད་པས་དེར་སླེབ་པར་འདུག་པས༔ ད་ཅི་ཚུག་བྱ་སྙམ་དུ་སེམས་ཤིང་༔ ཤིན་ཏུ་བལྟ་ཐུབ་པའི་གནད་ཀྱིས་བར་དེར་སྣང་བ་འགྱུར་ན༔ འོད་གསལ་གྱི་སྣང་ཆ་ལོངས་སྤྱོད་རྫོགས་པའི་རང་གདངས་ཡིན་པས་འདི་ལ་མ་སྐྲག་མ་དངངས་ན་སངས་རྒྱས་མངོན་དུ་འགྱུར་བའི་སུན་མ་ཡིན་ངེས་པའི་ཕྱིར་ན༔ བདག་ནི་འདི་ལ་འཕོའོ་སྙམ་པའི་འདུན་མ་བསྐྱེད་པ་དང་༔ ཡང་དེ་གོམས་པ་ན་ཐང་སྐུ་ཞི་ཁྲོ་ཐུགས་དམ་གྱི་རྟེན་མདུན་དུ་བཀྲམ་ལ༔ མན་ཤེལ་མིག་ལ་བཙུག་ནས་བལྟས་ལ༔ ཟུང་འཇུག་གི་བར་དོ་ཡིན་པའི་ངེས་ཤེས་བསྐྱེད་ཅིང་༔ བཅོམ་ལྡན་འདས་ཞི་ཁྲོ་རབ་འབྱམས་ཁྱེད་ཀྱི་ཐུགས་རྗེས་ལས་ངན་པ་བདག༔ དབྱེར་མེད་ཡེ་ཤེས་ཆེན་པོའི་དགོངས་ཀློང་དང་༔ གཉིས་སུ་མེད་པར་ལམ་སྣ་དྲངས་པར་མཛད་དུ་གསོལ༔ ཞེས་རྒྱུན་དུ་སྐྱབས་འགྲོ་བརྗོད་པ་དང་༔ འཇའ་ཐག་དཀར་སེར་དམར་མཐིང་བཟོས་ལ༔ དེའི་སྟེང་དུ་ཐིག་ལེ་དགུ་དགུ་བྲིས་ཏེ་རྟེན་གྱི་སྐུ་ལ་བཏགས་ནས༔ དེ་དང་མཉམ་དུ་རས་ཀྱི་ལྕུགས་ཕྲན་དཀར་སེར་དམར་མཐིང་མདོག་ངན་དྲུག་བཞག་ལ༔ སྣ་ཀ་རང་གི་སྙིང་ལ་བཏགས་ནས་མན་ཤེལ་གྱིས་བལྟས་ཏེ༔ འདི་ཡེ་ཤེས་བཞི་སྦྱོར་གྱི་སྣང་བ་དང་༔ མ་དག་འཁོར་བའི་ལམ་དྲུག་གཤིབ་ཡོད་པས༔ མ་དག་འོད་འདི་ལ་བག་ཆགས་ཀྱིས་ཆགས་ནས་སྐྱེ་བ་ལེན་སྲིད༔ ཡེ་ཤེས་བཞི་སྦྱོར་གྱི་སྣང་བ་འདི་ལ་ཞལ་འདྲེས་མེད་པའི་སྐྲག་པ་སྐྱེ་ཉེན་པས་བདག་འདི་ཡར་དེད་ན་སྣ་ཁ་གོང་དུ་བཅོམ་ལྡན་འདས་རྒྱལ་བ་རིགས་ལྔ་འཁོར་དང་བཅས་པའི་ཐུགས་ཀར་ཟུག་ཡོད་པ་དེ་ཡེ་ཤེས་ཀྱི་ལམ་ཡིན་པས་ན་དེར་འཕོ་བར་བྱ་སྙམ་ཞིང་༔ དེ་དང་མཐུན་པའི་ཚིག་གིས་གསོལ་བ་འདེབས་པར་བྱས་པས་བཙན་ས་ཟིན་པ་དང་༔ ཡང་དེ་ལས་གཞན་མདུན་ནམ་སྟེང་དུ་ཁྲོ་བོའི་སྣང་བརྙན་དྲུག་ཅུ་བཞག་ལ༔ བཟོ་རིག་ཀྱིས་འོད་ཟེར་རལ་གྲི་ལྟ་བུ་ལ་སོགས་པ་བྱ་བ་དང་༔ དེ་ཐམས་ཅད་རྩེ་མོ་རང་ལ་བསྟན་པ་བཟོས་ལ༔ རྒྱབ་ཏུ་རྔ་ཆེན་པོ་གཅིག་མི་ཞིག་གིས་བརྡུང་ནས༔ ཕཊ་ཕེམ་སོད་རྒྱོབ་ལ་སོགས་པ་ཆེ་ཆུང་མང་པོ་སྒྲོག་པ་དང་༔ གྲོགས་མང་ན་དུང་ཆེན་སོགས་བུད་པ་དང་༔ ཐམས་ཅད་ཀྱིས་ཧཱུྃ་རུ་ལུ་ལ་སོགས་པ་བརྗོད་པ་དང་༔ ཞི་ཁྲོའི་རྒྱན་བྱས་པ་ལ་མན་ཤེལ་བཙུག་པས་བལྟ་བ་དང་༔ མགོ་བརྙན་སྟོན་པ་སོགས་ཀྱང་ཟབ་པ་ཡིན་ནོ༔ མིན་ཡང་བཞིན་ལ་ཁ་དོག་སྣ་ཚོགས་བྱུག་ལ་ཁྲོ་གཉེར་བཅའ་བ་དང་༔ འདོར་སྟབས་སོགས་ཀྱང་བྱེད༔ དེ་ཀུན་ཀྱང་བར་དོར་ཡི་དམ་ཁྲོ་བོ་སུན་མ་ལ་བྱོན་པ་ཡིན་པར་འདུན་པ་བསྒྱུར༔ འཇིགས་པར་མི་བྱ་འདི་བར་དོ་སྟོང་པའི་རང་གཟུགས་ང་བར་དོ་ལུས་མེད་སེམས་ལ་ཇི་ལྟར་གནོད་སྙམ་དུ་མི་དགའ་བ་དོར་ལ༔ སྐྱབས་འགྲོ་བརྗོད༔ རྗེས་ཀྱང་ཀུན་ལ་བར་དོའོ༔ ངོ་ཤེས་པར་བྱའོ༔ ཞེས་སྦྱར་ནས་ཐ་ན་རྨི་ལམ་དུ་ཡང་ཅུང་ཟད་ཙམ་མི་ཡེངས་བས་བར་དོའོ་སྙམ་པས་འདུན་པ་གོམས་པར་བྱས་ནས་སྐྱབས་འགྲོ་བརྗོད་པ་དང་༔ གོམས་པའི་ཚད་དེ༔ དེའི་བར་དོ་ཆོད་པར་གདོན་མི་ཟའོ༔

དོན་ལྔ་པ་སྲིད་པ་བར་དོ་འདུན་པས་བཅད་པ་ལ༔ སྒྲ་བཞི༔ གཡང་ས་གསུམ༔ རྟགས་དྲུག་ཡོད་པ་ལས་དང་པོ་ནི༔ མུན་ཁང་དུ་རང་གི་རྣ་བའི་སྒྲ་གཏེམ་དེ་སྐབས་ཤིག་འཇིགས་པ་སྐྱེ་དུས༔ འདི་སྲིད་པ་བར་དོ་ལ་འཁྱམས་པའི་རྟགས་རེད་པས༔ རི་རབ་འབུམ་ཉིལ་བ་ལྟ་བུའི་ཆགས་སྒྲ་ཡོད་པས་ས་ཡི་སྒྲ་ཡིན༔ ཆུ་བོ་སྟོང་འཁྲུགས་པ་ལྟ་བུའི་ཆལ་སྒྲ༔ དུས་མཐའི་མེ་འབར་བ་ལྟ་བུའི་འུར་སྒྲ་ཡོད༔ བསྐལ་བའི་རླུང་ནག་འཚུབ་པ་ལྟ་བུའི་ལྡིར་སྒྲ༔ ཡང་མཛུབ་མོ་རས་ཀྱི་མགོ་ལ་བྲབ་པས་དུས་སུ་ཐོག་སྟོང་དུས་གཅིག་ལ་འཚེར་བ་ལྟ་བུའི་མཐུག་སྒྲ་ཡོད་པས་འདི་དེ་རེད༔ ད་འབྱུང་བ་དགྲ་ལངས་ཀྱི་བར་དོ་ཡིན་པར་འདུག་པས་བར་དོ་འདི་ལ་རང་མཚན་གྱིས་གྲུབ་པ་མེད་པའི་ཕྱིར་ན་འཇིགས་མི་དགོས༔ ང་ལ་ལུས་ནི་མེད༔ སེམས་ནི་མི་འཆི་སྙམ་པས་དཔའ་གདེངས་བསྐྱེད་ལ་དེ་མ་ཐག་ཏུ་བླ་མའི་ཐུགས་ཀར་འཕོ་བ་སོགས་བྱ་བ་དང་༔ དེ་ལྟ་བུའི་སྡུག་བསྔལ་མྱོང་པའི་སེམས་ཅན་ལ་སྙིང་རྗེ་བྱ་བ་དང་གཉིས་ཟུང་འཇུག་གི་གྲོལ་བ་ཐོབ་པའམ༔ མིན་ཡང་སྐྱེ་གནས་རེ་འདམ་པའི་དབང་ཡོད་པར་འགྱུར་རོ༔ མ་ཎི་འདོན་མི་རྣམས་ཀྱིས་ཐུགས་རྗེ་ཆེན་པོ་ལ་གསོལ་བ་འདེབས་པའམ༔ ཞིང་སྒྲུབ་ཐོབ་མི་རྣམས་ཀྱིས་འོད་དཔག་མེད་པ་ལ་ཞིང་ཁམས་གཉིས་པོ་དེར་འདྲེན་པར་འགྱུར་བའི་གསོལ་བ་འདེབས་པ་དང་ཞིང་ཁམས་སུ་འགྲོ་བའི་འདུན་པ་བསྒྱུར༔

གཉིས་པ་ནི༔ ཡང་མིག་བཙུམ་སྟེ་གཅུར་བས་དམར་ལམ་འཆར་ལ༔ མ་གཅུར་བས་ནག་ལམ༔ ཡུན་དུ་གཅུར་ནས་ལྷོད་པས་དཀར་ལམ་འཆར་བ་དག་ཀྱང་བར་དོར་བསྒྱུར་ནས་བསྒོམ་ལ་བསྲེ་བ་དང་༔ ཡང་རླུང་དྲག་པོ་གཡོ་བ་ན༔ རྒྱབ་ཏུ་རླུང་སྒྲོན་བྱས་ཏེ༔ དེའི་སྒྲ་དང་བཅས་པ་ལས་འཇིགས་པའི་མུན་ནག༔ ལས་ཀྱི་རླུང་དམར་སོགས་སུ་བློས་བཞག་ནས་དེ་དེ་ངོ་ཤེས་པར་བྱ་བའི་དྲན་འདུན་གྱིས་བླ་མ་དང་མགོན་པོ་འོད་དཔག་ཏུ་མེད་པ་ལ་བདེ་བ་ཅན་དུ་འདྲེན་པར་མོས་གུས་དང་གསོལ་འདེབས་བྱའོ༔

གསུམ་པ་ནི༔ ཡང་གསུར་བདུག་ནས་འདི་བདག་ལ་མ་ངེས་པའི་རྟགས་སོ་སྙམ་པ་དང་༔ སེམས་རིའི་ཕར་ནང་སོགས་སུ་འགྲོ་བར་བྱས་ལ་དེ་ལྟར་བསམ་པ་དང་སྦྱོང་པའི་འདུན་པ་སྔར་ལྟར་རོ༔ དེ་ནས་ང་ལ་ལུས་མེད་པས་འཇིགས་སྐྲག་ཆེ་བ་ཅི་ཙམ་བྱུང་ཡང་༔ མངལ་ངན་པ་ལ་སྐྱེ་བ་ལེན་མི་རུང་སྙམ་ནས་འདུན་པ་སྦྱོངས༔ ཕྱི་ནས་ཁྱི་སོགས་ཀྱི་སྒྲ་ཐོས་པ་ན་ཡང་བར་དོའི་ཁྱི་དང་གཤིན་རྗེས་དེད་པའི་འདུན་པ་བྱས་ལ་འཇིགས་སྐྲག་ལ་ཐོག་བརྫིས་སུ་བྱ་བའམ༔ བླ་མ་ཡི་དམ་ལ་གསོལ་འདེབས་སྐྱབས་འགྲོ་སོགས་བྱ་བ་དང་༔ སྐབས་སུ་ཡང་ཕོ་མོ་ཆགས་པ་སྤྱོད་པ་བླ་མ་ཡབ་ཡུམ་རོལ་བས་ཕྲིན་ལས་བྱེད་པར་བསྒོམ་ལ༔ དེའི་མངལ་གཞལ་ཡས་ཁང་དུ་ཐིག་ལེ་དཀར་དམར་ཉི་ཟླའི་གདན་དུ་བསམ་པར་རྣམ་ཤེས་ཧཱུྃ་གི་རྣམ་པར་ཞུགས་ནས་ཧཱུྃ་དེ་རྡོ་རྗེ་སྔོན་པོ་དེ་ཡི་དམ་གྱི་སྐུར་བསྐྱེད་པ་ལ་འདུན་པ་ཡང་ཡང་བྱ་བ་དེའི་རྗེས་སུ་ཐོབ་པའང་བར་དོ་ཡིན་པར་བློ་བཞག་པར་བྱའོ༔ རྨི་ལམ་བར་དོ་ནི་དངོས་སུ་ཡོད་པས༔ སྣང་བ་ཐམས་ཅད་རྨི་ལམ་དུ་གཏན་ལ་ཕབ་པའི་དོན་ལ་ངེས་ཤེས་བསྐྱེད་ནས་གང་ཡང་རྨི་ལམ་ཡིན༔ ངས་ངོ་ཤེས་པར་བྱ་སྙམ་ནས་ཉིན་པར་འདུན་པ་རྒྱུན་ཆགས་པས་རྨི་ལམ་དུ་ཤེས་པ་འབྱུང་བ་དང་༔ དེ་ནས་འཇིགས་སྐྲག་ལ་ཐོག་བརྫིས་སུ་བྱ་བའི་ཚུལ་ལ་སོགས་པ་རྨི་ལམ་སྦྱངས་བསྒྱུར་བཅད་གསུམ་གྱིས་ཤེས་པར་བྱ་བ་གཞུང་དུ་འབྱུང་བ་ལྟར་རོ༔ གཞན་ཡང་ཐོད་རྒལ་གྱི་རུ་ཤན་ནང་ལྟར་བྱ་བའང་སྐྱེ་གནས་བར་དོ་སྦྱངས་པར་འགྲོའོ༔ དེ་ཡན་ཆད་སུས་ཀྱང་ཉམས་སུ་བླང་ཀྱངས་རུང་ལ༔ བྱིན་རླབས་ཕན་ཐོག་ཀྱང་ཤིན་ཏུ་ཆེའོ༔ འདི་མན་གྱི་འདུ་ཤེས་དྲུག་ལྡན་གྱི་འཕོ་བ་མ་གཏོགས་པ་ཐོས་པར་མི་བྱའོ༔ ས་མ་ཡཱ༔

དེ་ནས་བྱེ་བྲག་ཏུ་རང་རང་དང་རྗེས་སུ་མཐུན་པའི་ལམ་བསྒོམ་པ་ནི༔ སྐྱེ་གནས་བཞི་དང་རྗེས་སུ་མཐུན་པར་སྦྱོང་བས་ལམ་ནི་བསྐྱེད་པའི་རིམ་པ་ཡིན་ཏེ༔ དེ་ཡང་སྐྱེ་གནས་གང་དུ་སྐྱེས་ཀྱང་གནས་དོན་ལུས་གསུམ་དུ་ཞེན་པ༔ ཞིང་ཁམས་གཞལ་ཡས་ཁང་ལྷ་གསུམ་གྱིས་སྦྱངས་པར་བྱས་པས༔ རྣམ་པ་གསལ་བས་མ་དག་པའི་རྣམ་པ་འགོག༔ རྣམ་དག་དྲན་པས་གྱ་ནོམ་ལྷར་ཞེན་པའི་རྟོག་པ་འགོག་སྟེ་ཆོས་ཀྱི་བདག་རང་བཞིན་མེད་པར་འཛིན་སྟངས་འགལ་བ་དང་ངོ་བོ་ལ་སེམས་པས་སྦྱོངས་ཤིང་༔ ང་རྒྱལ་བརྟན་པས་ངར་འཛིན་གང་ཟག་གི་བདག་གཅོད་པ་དང་༔ ཡང་རྣམ་དག་དྲན་པས་དེ་ཡང་སྦྱོང་པའི་ཕྱིར་ན་གཞི་འབྲས་ལྟོ་སྦྱོར་དུ་སངས་རྒྱས་རོ་གཅིག་པར་འབྲས་བུ་གཞི་ལ་རྫོ༵གས་པའི་ཁྱད་ཆོས་ཡོད་པ་དང་༔ གཞན་ཡང་སྒོ་གསུམ་བྱ་བ་དང་བཅས་པ་དང་༔ འདོད་ཡོན་ལྔ་ལྷར་དག༵་པར་བྱེད་པ་དང་༔ ལམ་རིམ་རང་རང་གི་ངོ་སྐལ་གྱི་རྫོགས་པའི་རིམ་པས་སྨིན༵་བྱེད་དུ་འགྲོ་བ་དང་༔ སྐྱེ་བའི་རིམ་པ་གསུམ་དང་ལུས་རྫོགས་པ་དང་༔ འབྱུང་བ་རྒན་ནས་འཆི་བའི་བར་ཏིང་ངེ་འཛིན་གསུམ་གྱི་མངལ་ནས་འདོན་པས༔ རྡོ་རྗེའི་ཆོ་ག་གསུམ་བསྐྱེད་ལ་སོགས་པས་ལྷ་ལེགས་པར་རྫོགས་ནས༔ མཐར་ཚོགས་མཆོད་འདོད་ཡོན་ལ་དགྱེས་པར་རོལ་བ་སྦྱོར་སྒྲོལ་སོགས་རང་གཞན་གྱི་དོན་དུ་ཕྲིན་ལས་རྣམ་བཞིའི་ཆོ་འཕྲུལ་བསམ་གྱིས་མི་ཁྱབ་པ་བསྒྱུར་བ་དང་༔ རྗེས་སུ་རིལ་འཛིན་དང་རྗེས་གཞིག་གི་བསྡུ་རིམ་གྱི་བར་བྱ་བ༔ རྒྱས་པར་ཆོ་གའི་དོན་ལྟར་ཤེས་པར་བྱའོ༔

ལམ་འདིས་ཀྱང་བར་དོ་གཞན་སྦྱོང་ཐུབ་ཀྱང་གཙོ་བོའི་དབང་དུ་བྱས་པ་དང་༔ བསྐྱེད་རིམ་འདི་རྫོགས་རིམ་ཆེ་ཆུང་ཐམས་ཅད་ཀྱི་གཞི་དང་༔ འཕོ་བ༔ བདུད་གཅོད་ཐམས་ཅད་ལ་མེད་ཐབས་མེད་པར་ཤེས་དགོས་སོ༔

གཉིས་པ་བསམ་གཏན་གྱི་བར་དོ་སྦྱོང་བའི་གདམས་ངག་ནི༔ བསྐྱེད་རྫོགས་ཀྱི་ཏིང་ངེ་འཛིན་ཐམས་ཅད་ཀྱང་ཡིན་པས་སྤྱིར་གྱུར་པས་ལོགས་སུ་མ་སྤོས་ཀྱང་༔ ལར་གང་ལ་གསལ་བརྟན་གྱི་ཚད་ཐོབ་ནས་སེམས་ཟིན་ཡང་གནས་ཆའི་བསམ་གཏན་དང་༔ དེ་ཉིད་སོ་སོའི་ང་རྒྱལ་ལ་སོགས་པ་མ་བྲལ་བར་སྣང་སྟོང་ཟུང་འཇུག་གི་རྣམ་པ་བཀྲ་བར་ཤེས་མཐོང་གི་ཆ་ནས་ལྷག་མཐོང་ཡིན་པས་ཟུར་བ་མི་དགོས༔ ཡང་བསྐྱེད་རྫོགས་གང་གིས་ཀྱང་བསམ་གཏན་སྐྱེ་བར་ནུས་པས་ནའང་ཟུར་བའི་གོ་ས་མ་ཐོབ་པ་དང་༔ གཞིར་སོང་བ་ནའང་༔ དཔེར་ན་ས་བོན་ལས་འབྲས་བུ་གྲུབ་ཟིན་ནས་ས་བོན་ཟུར་བ་མེད་པ་ལྟ་བུའོ༔

གལ་ཏེ་ཟུར་བ་སྦྱོར་ན་རླུང་ཁྲིད་ལྟར་ཉམས་སུ་བླང་ངོ་༔ འོན་ཀྱང་འདིར་ནི་མཚན་ཉིད་དང་མཐུན་པའི་ཞི་ལྷག་གི་བསམ་གཏན་གཞིར་ལྡན་གྱི་གསང་སྔགས་བསྒོམ་ན་མཆོག་ཏུ་གྱུར་བའི་ཕྱིར་དང་༔ དབང་པོའི་རིམ་པས་བསམ་གཏན་བསྒྲུབ་ཚུལ་དང་གྲུབ་པ་མདོ་སྔགས་དང་༔ དོན་རབ་འབྱེད༔ དེ་བཞིན་གཤེགས་དགེས༔ རྡོ་རྗེ་ལྟ་བུ་ལ་སོགས་ཏིང་འཛིན་ཚད་མེད་པའི་ངོ་བོ་དང་བྱེད་ལས་ཅན་དེ་དག་རྒྱུ་མེད་དུ་མི་འབྱུང་བའི་ཕྱིར་ན་རྟེན་དང་བརྟེན་པ་རྒྱུ་དང་འབྲས་བུའི་འབྲེལ་འབྱུང་དང་མཐུན་པར་ཐབས་སྣ་ཚོགས་ཀྱང་འགལ་མེད་དུ་བཤད་པ་ཞིག་ལགས་སོ། །

སྐབས་འདི་ནས་ཟུར་པའི་གདམས་ངག་རྣམས་འཕྲོས༔ དེ་དག་གིས་བསམ་གཏན་གྱི་བར་དོ་བཤད་གྲུབ་པོ༔ གསུམ་པ་ཉིང་འཁྲུལ་རྨི་ལམ་གྱི་བར་དོ་ལ་བར་དོ་དྲུག་གི་གྲོལ་ཚད་བཟུང་བ་ནི༔ དེ་ཉིད་ཉམས་སུ་བླངས་བས་བསྐྱེད་རིམ་པས་ལྷ་སྐུར་འོད་གསལ་ལས་རྨི་ལམ་གྱི་ལུས་ལྷར་ལྡང་བ་དང་༔ སླར་ཡང་སྟོང་ཉིད་ལ་འཇུག་པ་སྟེ༔ དེ་དག་གི་གནད་ལ་ནམ་ཡང་མི་འཁྱོལ་བ་ཞིག་བྱུང་དུས་ནི་ངེས་པར་བར་དོ་ལ་སངས་རྒྱས་པའང་མིན་ཡང་སྐྱེ་བ་སྤྲུལ་སྐུ་འགྲུབ་པའི་ཚད་དང་༔ ཡང་རྫོགས་རིམ་པས་དཔེ་དོན་གྱི་ཡེ་ཤེས་གང་རུང་ངོ་འཕྲོད་པས་གདམས་ངག་ལས་མ་འཁྲུལ་ན་དེར་རྒྱ་ཆེན་དུ་ལྡང་ནས་གྲོལ་ལམ༔ མིན་ཡང་འཕོ་བས་ཡང་དག་པར་སྟོངས་ཐེབས་པའི་རྟགས་ཡིན་ནོ༔ ཐ་མས་ཀྱང་རྨི་ལམ་འདི་ངོ་ཤེས་པ་དང་སྦྱངས་བསྒྱུར་བཅད་པའི་ཐོག་བརྫིས་ནུས་དུས༔ ཉིན་སྣང་བར་དོའི་འདུན་པ་བྱས་པས་དེ་རྨི་ལམ་དུ་བྱུང་ནས༔ རྨི་ལམ་ཡིན་པར་ཡང་ངོ་ཤེས་ནས་སྦྱངས་བསྒྱུར་བཅད་པ་སྤོག་པའི་སྟོབས་ཀྱིས་རང་ཉིད་རྡབ་མི་ཤོར་བར་རྨི་ངན་ཆོད༔ དེ་བར་དོར་བསྒྱུར་བས་ཀྱང་བར་དོ་ཆོད་དོ༔ ཡང་ད་ལྟ་གདངས་གཉིས་ཀྱི་ཉམས་ལེན་ཉིན་པར་སྦྱངས་པས་མཚན་མོ་དང་འདྲེས་པས་ཆོས་ཉིད་ཀྱི་བར་དོ་ལ་གྲོལ་བ་ཐོབ་པས༔ ཚུལ་དེ་དག་གི་འདྲ་འབགས་གམ་ཚོད་འཛིན་ནི་རྨི་ལམ་ཡིན་པའི་ཕྱིར༔ ད་ལྟ་རྨི་ལམ་ཇི་ལྟར་ལམ་གོམས་རིམ་གྱིས་ཆོད་པ་དེ་བར་དོ་ཡང་དེ་ཙམ་ཡིན་པའི་རྟགས་སུ་གདོད་མི་ཟའོ༔ ཁྱད་པར་དུ་དང་པོ་རྨི་ལམ་ངན་གོམས་མང་བ༔ བར་དུ་བཟང་ངན་སྤེལ་མ༔ ཐ་མ་དག་པ་མང་བས་ངེས་པའི་ཡིད་ཆེས་སྦྱིན་པའོ༔

བཞི་པ་འཆི་སྲིད་སྡུག་བསྔལ་གྱི་བར་དོ་ལ་བར་དོ་དྲུག་གི་འཕོ་བས་སྟོངས་འདེབས་པ་ནི༔ ལར་བར་དོའི་གདམས་ངག་གང་ལ་ཡང་བསྐྱེད་རིམ་པས་འདའ་ཀ་འོད་ཀྱི་གོང་བུ་དང་སྒྲའི་འཕོ་བ༔ རྩ་རླུང་བས་དཔེའི་འོད་གསལ་གྱི་ངང་དུ༔ ཁྱད་པར་ཤེར་དབང་འོག་སྒོ་བས་འདའ་ཀ་བདེ་སྟོང་དབྱེར་མེད༔ བཞི་བའི་ལམ་པས་གསང་ཆེན་ཕྱག་རྒྱ་ཆེན་པོའི་ཉམས་ལེན་གྱི་ངང་དུ་འཕོ་བ་ལ༔ འདིར་ནི་དེ་དག་དང་གནད་གཅིག་པར་རྣལ་འབྱོར་བ་བསྐྱེད་རིམ་ཞི་ཁྲོའི་བསྒོམ་ཁོག་ལ་གོམས་འདྲེས་ཡོད་པས་སྐྱེ་གནས་བར་དོའི་ཉམས་ལེན་སྐུ་གསུང་ཐུགས་ཀྱི་ངང་དུ་འཕོ་བ་དང་༔ རྫོགས་རིམ་བསམ་གཏན་གྱི་ཉམས་ལེན་པས་དཔེ་དོན་གྱི་འོད་གསལ་ཅུང་ཟད་ཡོད་པ་དེ་དང་༔ ཁྱད་པར་དུ་ཁྲེགས་ཆོད་ཀྱི་ཉམས་ལེན་ཡོད་པས་གྲོང་འཕོ་གྲོང་འཇུག་དང་༔ ཐོད་རྒལ་བས་ཡུལ་དང་གནས་ལ་འཇུག་པའི་འཕོ་བ་རྣམ་དག་གི་དང་༔ སྲིད་པ་བར་དོ་ལ་རང་བཞིན་སྤྲུལ་སྐུའི་ཞིང་དུ་འཕོ་བའམ༔ འདུ་ཤེས་དྲུག་ལྡན་གྱི་འཕོ་བ་དག་གི་ལམ་གང་ཡང་རུང་བས་རྨི་ལམ་དུ་འོད་གསལ་འཕོ་བ་དང་བཅས་ཏེ་སྔར་གདམས་ངག་གི་གནད་བཞིན་ནོ༔

ལྔ་བ་ཆོས་ཉིད་སྐུ་གསུམ་གྱི་བར་དོ་ལ་བར་དོ་དྲུག་གི་འབྲས་བུ་རང་ས་བཟུང་བ་ནི༔ ཡང་དག་པར་གྲོལ་བའི་དབང་དུ་བྱས་ན༔ བསྐྱེད་རིམ་པ་སྣང་བའི་བར་དོ་ལ་ཆོས་ཅན་རྟགས་ཀྱི་ལྷ་སྐུ་སྣང་སྟོང་ཟུང་འཇུག་ཆེན་པོར་གྲོལ་བ་དང་༔ རྫོགས་རིམ་པས་ཆོས་ཉིད་དོན་གྱི་ལྷ་སྐུ་སྐུ་གསུམ་ལྷུན་གྲུབ་གྱི་རང་བཞིན་དུ་སངས་རྒྱས་པ་གཉིས་མཐར་གནད་གཅིག་ཟུང་འཇུག་གི་ངོ་བོ་ཉིད་དུ་བྱང་ཆུབ་པ་ལ་དབྱེ་བ་མེད་པས་ན་མཐར་འབྲས་ལ་ཁྱད་མེད་དོ༔ འདིར་ལམ་གང་ལ་ཞུགས་ཀྱང་རང་དབང་ཐོབ་པ་ལས་བར་དོ་འདིར་གྲོལ་བ་ཡིན་ཏེ༔ ལ་ལ་སྐུ་ལ༔ ལ་ལ་འོད་དུ༔ ལ་ལ་ཐིག་ལེ་ལས༔ ལ་ལ་བཞི་སྦྱོར་དུ༔ ལ་ལ་ལྷུན་གྲུབ་ཏུ་གྲོལ་ལོ༔ དེ་དག་ལ་ཁྱད་པར་ཡེ་མེད་པར་ཆོས་ཉིད་ཀྱི་བར་དོར་གྲོལ་བ་ཐམས་ཅད་སངས་རྒྱས་སུ་འགྲོ་ཡང་༔ ཁྲེགས་ཆོད་ཀྱིས་ནམ་མཁའ་ལ་གྲོལ་བས་རྡོ་རྗེ༔ ཐོད་རྒལ་གྱིས་འོད་གསལ་ཟུང་འཇུག་ཚོམ་བུ་གསུམ་ལ་གྲོལ་བས་མངོན་བྱང་༔ རྫོགས་རིམ་པས་བཞི་སྦྱོར་ལ་གྲོལ་ན་ཆོས་སྐུ༔ བསྐྱེད་རིམ་པས་ལྷུན་གྲུབ་ལ་ལོངས་སྐུ༔ རང་བཞིན་སྤྲུལ་སྐུར་གྲོལ་བ་རྣམས་དངོས་འབྲས་ཐུན་མིན་ཡིན་ཡང་དེ་མ་གཏོགས་ཚེ་དབང་བའང་ཟག་ལྡོག་མེད་པའི་ཕྱིར་ལྡོག་མི་སྲིད་པ་དང་༔ གོང་མ་ལམ་ལ་འབད་རྩོལ་ཞི་བ་རྒྱ་ཆེན་ནའང་ཡོད་པས་ན་སངས་རྒྱས་ཀྱི་ས་ཐོབ་ནས་ད་དུང་སྐུ་གཞན་མི་ཐོབ་པ་མི་སྲིད་པ་དང་༔ ལམ་གྱི་རྣམ་པ་ལ་རྨོངས་པའི་སྒྲིབ་པ་མི་སྲིད་པས་ཐ་དད་དུ་བཞག་དཀའ་བར་གྱུར་ཏོ༔

དགུ་སྲིད་སྲིད་པའི་བར་དོ་ལ་བར་དོ་དྲུག་གི་གྲོགས་སྤྱོད་པས་འཁོར་བའི་སྐྱེ་རྒྱུན་གཅོད་པ་ནི༔ སྐྱེ་གནས་ངན་པ་ལ་མི་འཇུག་པར་ཆགས་པ་བཅད་ནས་ཞིང་ཁམས་འདེམས་པའམ༔ སྐྱེ་བ་བཟང་པོ་བླངས་ནས་དེ་ཉིད་ལས་ལམ་དྲུག་གི་གང་གོམས་པའི་རྟགས་སུ་བྱས་ནས་སླན་ཆད་སྐྱེ་བ་ཕྱིར་བསྙིལ་བའོ༔ དེ་དག་གིས་ལམ་བཤད་གྲུབ་པོ༔

དོན་གསུམ་པ་འབྲས་བུ་བདེ་གཤེགས་དྲུག་གི་རྒྱན་སྣང་སད་ཚུལ་ནི༔ སངས་རྒྱས་ཀྱི་ས་དྲུག་མངོན་དུ་བརྙེས་ནས་རང་ཐོག་ཏུ་རང་ས་ཟིན་པ་ཡིན་ཏེ༔ དེ་ལ་མདོར་བསྟན་རྒྱས་བཤད་དོན་བསྡུ་གསུམ་ལས་དང་པོ་ནི༔ དེ་ཡང་གོང་དུ་བར་དོ་དྲུག་གི་གཞི་ཤེས༔ ལམ་གོམས་པ་སྟོབས་སུ་གྱུར་པས་འཁོར་འདས་དབྱེར་མེད་ཀྱི་འབྲས་བུ་མངོན་དུ་གྱུར་ཏེ་ཡེ་སངས་རྒྱས་པ་ལ་ཡང་སངས་རྒྱས་པའི་ཐ་སྙད་སྒྲིབ་པ་བྲལ་འབྲས་ལས་གཞི་རྒྱུད་མ་འགྱུར་བཞིན་དུ་ཡོད་དེ་ལུས་ངག་ཡིད་གསུམ་གྱི་སྐུ་གསུང་ཐུགས་དང་སྐུ་གསུམ་ལ་སྒྲིབ་པ་བྲལ་བའི་བུམ་པ་ཆགས་པས་ནམ་མཁའ་དང་དབྱེར་མེད་དུ་གྱུར་པ་ལྟ་བུ་འམ༔ པདྨ་ཁ་ཕྱེ་བའི་དུས་ནང་གི་སྐུ་མཐོང་བ་ལྟར༔ དབྱིངས་ནང་གསལ་གྱི་སྐུ་དང་ཡེ་ཤེས་དང་༔ དེའི་རྩལ་ལས་གདུལ་བྱ་ཡོད་ན་འདུལ་བྱེད་ཀྱི་མཚན་དཔེ་གཞན་སྣང་གི་ལོངས་སྤྲུལ་དང་བཅས་པ་འབད་རྩོལ་མེད་པར་ལུགས་སུ་རང་འབྱུང་སྟེ༔ དེ་ལ་རང་བྱུང་གི་ཡེ་ཤེས་ཀྱི་ནང་དབྱིངས་རང་གསལ་བས་ངོ་བོར་སྐུར་ཡོད་པས༔ ནང་གསལ་གསུམ་ནི་ངོ་བོ་སྟོང་པ་ལས་རྡོ་རྗེ༔ རང་བཞིན་གསལ་བ་ལས་མངོན་བྱུང་༔ ཐུགས་རྗེ་ཀུན་ཁྱབ་ལས་ཆོས་སྐུ་སྟེ་གཞན་ལ་མི་སྣང་བར་རགས་པའི་ས་ལས་འདས་པའི་ཀ་དག་གཞོན་ནུ་བུམ་པ་ཆོས་སྐུའི་སྐུ་གསུམ་གྱི་རྒྱན་ལས༔ རང་བཞིན་གསལ་པའི་མདངས་ཡེ་ཤེ་ལྔ་དང་༔ དེའི་རྒྱན་དུ་རང་སྣང་ལོངས་སྐུ་དང་༔ དེའི་རྩལ་ལས་ས་བཅུ་པ་ལ་སྣང་བའི་ཕྱེད་སྤྲུལ་ལོངས་སྐུར་སྣང་ལ༔ དེ་ལས་རོལ་བ་སྤྲུལ་སྐུའི་ཚུལ་རྣམ་བཞི་ནི་ཡེ་ཤེས་མཁྱེན་པ་མ་འགགས་པའི་ཐུགས་རྗེ་ལས་ཕྱི་ནང་ལྟ་བས་ཡེ་ཤེས་དང་བཅས་པ་ཐམས་ཅད་ཤར་བདག་དབྱེར་མེད་པ་གཅིག་དང་དུ་བྲལ་བློ་ལས་འདས་པའི་དབྱིངས་རྟག་པ་རང་བྱུང་གི་ཡེ་ཤེས་འགྱུར་བ་མེད་པའི་ཆོས་ཉིད་ཀྱིས་བསྡུས་པས་ན་ཐམས་ཅད་ཀྱང་མཐར་སྡུད་བུམ་པའི་རྒྱལ་པོར་ལྷུན་གྱིས་གྲུབ་པའོ༔ དེ་ལྟ་ན་ཇི་ལྟ་ཇི་སྙེད་ནང་ལྟ་ནི་ཆོས་སྐུ་འབའ་ཞིག་པའི་ཡེ་ཤེས་ཏེ༔ གནད་འདི་མ་རྟོགས་པར་ཐུགས་རྗེ་སྤྲུལ་སྐུའི་ཡེ་ཤེས་སུ་བྱས་ཏེ་མི་འགྲིགས་པ་མང་པོའི་འགལ་བ་སྡུད་དོ༔

གཉིས་པ་བྱེ་བྲག་ཏུ་བཤད་པ་ནི༔ རྟེན་སྐུ༔ བརྟེན་པ་ཡེ་ཤེས༔ མཛད་པ་ཕྲིན་ལས་ཀྱི་རིམ་པས་རྒྱས་པར་བཤད་པ་གསུམ་ལས༔ དང་པོ་ལ༔ གང་གིས་སྒྲིབ་པ་ནི༔ སྔར་བཤད་པ་ལྟར་ལ༔ གང་བསྒྲིབ་པའི་སྐུ་ནི་ལྔ་སྟེ༔ དང་པོ་དབྱིངས་ནང་གསལ་གྱི་སྐུ་གསུམ་ནི༔ ཆོས་སྐུ་གཅིག་གི་ལྡོག་པ་ནས་བཏགས་པའི་སྐུ་ཡང་མཚན་ཉིད་པ་མཐར་ཐུག་དུ་གནས་སོ༔ ཕྱི་མ་གཉིས་གདུལ་བྱ་ལམ་སྣང་གི་སྐུ་ཡིན་པས༔ མཚན་ཉིད་པ་མིན་ཞིང་བཅོས་མ་བཏགས་པ་ཞིག་གོ༔ དེ་ལ་དང་པོ་མི་འགྱུར་རྡོ་རྗེ་ནི་སྐུ་ཐམས་ཅད་ཀྱི་རང་བཞིན་གཅིག་དང་དུ་མ་མེད་པའི་ཆོས་ཉིད་ཟག་མེད་བདེ་བ་ཆེན་པོ༔ དབྱེར་མེད་ཐིག་ལེ་ཉག་གཅིག༔ རིག་སྟོང་བྱང་ཆུབ་ལས་ཉམས་པ་དང་འཕོ་འགྱུར་མེད་པའི་དོན་མངོན་དུ་གྱུར་པའོ༔ འདི་ནི་སྐུ་ཕྱི་མ་ཐམས་ཅད་ཀྱི་འཆར་གཞི་དབྱིངས་ཀྱི་ཆར་གནས་སོ༔ གཉིས་པ་མངོན་པར་བྱང་ཆུབ་པའི་སྐུ་ནི༔ རང་གསལ་འགགས་པ་མེད་པ་ལོངས་སྐུའི་འཆར་གཞི་སྒྲིབ་གཉིས་མ་ལུས་པ་བྱང་ཞིང་༔ ཡོན་ཏན་རྫོགས་པར་ཆུབ་པ༔ དེ་ཡང་ཕྱི་གསལ་དུ་ནི་མ་འཕྲོས༔ ནང་ན་སྟོབས་སོགས་ཟག་མེད་ཀྱི་ཆོས་ཀུན་མ་ཚང་བ་མེད་པའི་སྤང་རྟོགས་ཀྱི་ཆ་མངོན་དུ་གྱུར་པའི་ཡོན་ཏན་ཅན་ནོ༔

གསུམ་པ་ཐུགས་རྗེ་ནང་ལྟའི་ངོ་བོ་ཡེ་ཤེས་ཆོས་སྐུ་ནི༔ དབྱིངས་ངོ་བོ་སྟོང་པ་རྟག་ཆད་ཡོད་མེད་གཉིས་གཉིས་མིན་སོགས་ཀྱི་མཐའ་ཐམས་ཅད་དང་བྲལ་ཡང་བེམ་སྟོང་བྱིང་ཆད་དུ་མ་སོང་བར༔ ཡེ་ཤེས་འགགས་མེད་གཏིང་གསལ་འཆར་གཞི་ཤིན་ཏུ་ཕྲ་བའི་སྙིང་པོ་ཅན་སྤྲོས་པ་མཐའ་དག་ཞི་ལ༔ མཁྱེན་ཆ་ནང་གསལ་ཐིམ་ལ་མ་རྨུགས་པ་མཉམ་བཞག་གི་ཆ་ཡུལ་ཡུལ་ཅན་གྱི་གཉིས་འཛིན་མེད་པ་རྟོག་མེད་ཀྱི་ཡེ་ཤེས་ཁྱད་པར་ཅན་ཞིག་གོ༔ དེ་དག་ལས་ཤར་བ་ནི་ཡེ་ཤེས་ཕྱི་གསལ་གྱི་སྐུ་གཉིས་སོ༔

དེ་ལ་བཞི་བ་ལོངས་སྐུ་ནི༔ རང་བཞིན་གསལ་བའི་ཡེ་ཤེས་ཀྱི་རང་མདངས༔ ཡེ་ཤེས་ལྔའི་རྒྱན་སྣང་༔ ཆོས་སྐུའི་ངང་ལས་མན་ཤེལ་གྱི་འོད་ཉི་ཟེར་གྱི་རྐྱེན་དང་འཕྲད་པས་གསལ་བ་ལྟར༔ མཚན་དང་དཔེ་བྱད་ཡོན་ཏན་རྒྱ་མཚོའི་གང་བའམ༔ འབྲས་ཆོས་སྣ་ཚོགས་སུ་ཤར་བས་རྒྱལ་ཚབ་རིགས་ལྔའི་སྟོན་པ་སངས་རྒྱས་ཉིད་ཀྱིས་རང་སྣང་སྟོང་གཟུགས་ཀྱི་རྣམ་པས་རྟག་པ་རྒྱུན་གྱི་འཁོར་ལོ་སྤྱོད་པ་ཐུན་མིན་ཏེ་རང་སྣང་ཡུལ་ལ་ཤར་ནས་ཕྱི་གསལ་དུ་གཟིགས་པའི་ཆའོ༔

ལྔ་པ་ཆོས་སྐུ་ཀུན་ཁྱབ་ཀྱི་ཐུགས་རྗེ་ཕྱི་ལྟའི་ཇི་ལྟ་ཇི་སྙེད་པའི་ཡེ་ཤེས་སྐུར་ཤར་བ་ཅིར་ཡང་སྤྲུལ་པའི་སྐུ་ནི༔ རང་ངོར་ལོངས་སྐུ་ལས་མ་གཡོས་ཀྱང་༔ དེ་དང་རྣམ་པ་མཐུན་པར་གཞན་ས་བཅུའི་སེམས་དཔའ་ལ་དེའི་གཟུགས་བརྙན་དུ༔ ཤར་མངོན་དགའ༔ ལྷོ་དཔལ་ལྡན༔ ནུབ་བདེ་ཆེན༔ བྱང་ལས་རབ་གྲུབ་པ༔ དབུས་སྟུག་པོ་བཀོད་པའི་ཞིང་ལྔར༔ སྟོན་པ་རྣམ་སྣང་༔ རྡོར་སེམས༔ རིན་འབྱུང་༔ སྣང་མཐའ༔ དོན་གྲུབ་རྣམས་ཀྱིས༔ ཆོས་ཐུན་བཞི་བཞི་སོགས་སྟོན་པ་བཞིའི་སྐབས་སུ་བཤད་པ་ལྟར་སྣང་བ་དང་༔ དེའི་ངང་ལས་འགྲོ་འདུལ་སྤྲུལ་པ་ཐུབ་པ་དྲུག་སོགས་རང་རང་གི་གཙོ་བོའི་ཚུལ་གྱིས་མཛད་པ་བཅུ་གཉིས་སྟོན་པ་དང་༔ གཞན་ཡང་སྐྱེ་བ་ཉ་བོ་ཆེ་དང་རྟ་མཆོག་བ་ལ་ཧ་སོགས་གང་འདུལ༔ བཟོ་སྤྲུལ་པ་རིས་སུ་བྲིས་པ༔ འབུར་དུ་བཏོད་པ་སོགས་དང་༔ སྣ་ཚོགས་སྤྲུལ་པ་དཔག་བསམ་གྱི་ཤིང་དང་སྒྲོན་མེ་གྲུ་གཟིང་ནོར་བུ་སོགས་སེམས་ཅན་གྱི་རེ་བ་སྐོང་བ་དག་འབྱུང་བའོ༔

གཉིས་པ་བརྟེན་པ་ཡེ་ཤེས་རྒྱས་པར་བཤད་པ་ནི༔ སྒྲིབ་པ་གང་བྲལ་བས་སྣང་བ་དང་༔ རྒྱུ་གང་གིས་བྲལ་བས་དང་༔ འབྲས་བུ་གང་མངོན་དུ་གྱུར་པ་གསུམ་ལས་དང་པོ་ནི༔ རྒྱུ་མ་རིག་པ་གསུམ་ལས༔ བདག་ཉིད་གཅིག་པུའི་ངོ་བོ་སྟོང་པ་ལ་སྒྲིབ་པས་དེ་བྲལ་ནས་ཆོས་སྐུ་མངོན་དུ་གྱུར་པ་དང་༔ ལྷན་སྐྱེས་ཀྱིས་རང་བཞིན་འོད་དང་ལོངས་སྐུ༔ ཀུན་བཏགས་ཀྱིས་ཐུགས་རྗེ་ཐིག་ལེ་དང་རིག་པར་བཞུགས་པ་ལ་སྒྲིབ་པས་དེ་བྲལ་ནས་སྤྲུལ་སྐུ་མངོན་དུ་གྱུར་པའོ༔ དེ་དག་ལས་གཉིས་པ་ལ་བྱེ་བྲག་ཏུ་ཕྱེ་བས་ཡེ་ཤེས་ལྔ་ཡིས་གཟུགས་དང་གཏི་མུག་གི་ཆོས་དབྱིངས༔ ཞེ་སྡང་དང་རྣམ་ཤེས་ཀྱིས་མེ་ལོང་༔ ང་རྒྱལ་དང་ཚོར་བས་མཉམ་ཉིད༔ འདུ་ཤེས་དང་འདོད་ཆགས་ཀྱིས་སོར་རྟོགས༔ འདུ་བྱེད་དང་ཕྲག་དོག་གིས་བྱ་གྲུབ་ཡེ་ཤེས་ལ་སྒྲིབ་པ་བྲལ་འབྲས་ལས་རང་ཐད་ཀྱི་ངོ་བོ་མངོན་དུ་གྱུར་བའོ༔ ཡང་ཀུན་གཞིས་ཆོས་དབྱིངས༔ རྣམ་ཤེས་ཀྱིས་མེ་ལོང་༔ ཡིད་ཀྱིས་མཉམ་ཉིད༔ ཉོན་ཡིད་ཀྱིས་སོར་རྟོགས༔ སྒོ་ལྔས་བྱ་གྲུབ་ཡེ་ཤེས་སྒྲིབ་པ་རྣམས་བྲལ་འབྲས་ལས་སོ་སོའི་ཐད་ཀྱི་ཡོན་ཏན་གསལ་ལོ༔

གཉིས་པ་རྒྱུ་གང་གིས་བྲལ་བ་ནི༔ འོད་གསལ་སྟོང་ཉིད་ཀྱི་དོན་ལ་རྫོགས་རིམ་དང་༔ ཁྲེགས་ཆོད་དུ་མཉམ་པར་བཞག་པས་ངོ་བོ་སྟོང་བའི་ཡེ་ཤེས་དང་མི་འགྱུར་རྡོ་རྗེའི༔ བསྐྱེད་རིམ་དང་ཐོད་རྒལ་གྱིས་རང་བཞིན་གསལ་བ་དང་མངོན་བྱང་༔ རྩལ་ཕྱིར་གསལ་གྱི་ལོངས་སྐུ་དང་བཅས་པའི༔ ཏིང་འཛིན་བསམ་གཏན་སྣ་ཚོགས་པའི་འདུ་འཕྲོ་དང་རྫུ་འཕྲུལ་གྱི་རྐང་པས་ཐུགས་རྗེ་ཀུན་ཁྱབ་ཇི་ལྟ་ཇི་སྙེད་པའི་ཆོས་སྐུ་དང་༔ དེའི་རྩལ་ལས་སྤྲུལ་སྐུ་རྣམ་པ་བཞི་ལ་སོགས་པའི་མཛད་པས་འགྲོ་དོན་ཐོགས་པ་མེད་པ་ལ་དབང་བའི་བྲལ་རྒྱུ་བྱེད་པའོ༔ ཡང་རང་བཞིན་གསལ་བའི་ལྡོག་པས་ནང་གསེས་ལས་བཤད་ན༔ ཆོས་ཀྱི་ཚིག་དོན་འཛིན་པའི་མེ་ལོང་ཡེ་ཤེས་ཀྱི༔ སེམས་ཅན་ཀུན་ལ་མཉམ་ཉིད་བྱང་ཆུབ་ཀྱི་སེམས་བསྒོམ་པས་མཉམ་ཉིད༔ གཞན་ལ་ཆོས་སྟོན་པས་སོར་རྟོགས༔ གཞན་གྱི་དོན་བྱས་པས་བྱ་གྲུབ༔ ཁོ་ན་ཉིད་ཀྱི་དོན་བསྒོམ་པ་ཆོས་དབྱིངས༔ བདེན་གཉིས་ཟུང་འཇུག་གི་དོན་ལ་ཐོས་བསམ་སྒོམ་གསུམ་གྱིས་ཇི་ལྟ་ཇི་སྙེད་ཀྱི་ཡེ་ཤེས་ཏེ༔ དེ་རྣམས་རྟགས་ཀྱི་ཕྱག་རྒྱར་ཤར་བའི་སྐུ་དང་ཞིང་ཁམས་ལ་སོགས་པས་རྒྱན་སྣང་བསམ་གྱིས་མི་ཁྱབ་པ་ཡང་སངས་རྒྱས་རང་སྣང་གི་ལོངས་སྤྱོད་དུ་མངོན་པར་སྣང་བ་དང་དེའི་རོལ་བ་ལས་སྤྲུལ་སྐུར་ལྷུན་གྱིས་གྲུབ་པའོ༔

གསུམ་པ་འབྲས་བུ་གང་མངོན་དུ་གྱུར་པ་ནི༔ ངོ་བོ་སྟོང་པ་སྤྲོས་པ་ཐམས་ཅད་དང་བྲལ་བ་དབྱིངས་ཡེ་ཟུང་འཇུག་གི་དོན་མཁྱེན་པ་དང་༔ རང་བཞིན་གསལ་བ་འགགས་མེད་ཀྱི་དོན་ཁ་དོག་དབྱིབས་མཚན་ལས་འདས་པ་མཁྱེན་པ་དང་༔ ཐུགས་རྗེ་ཀུན་ཁྱབ་ཀྱི་ཡེ་ཤེས་ཇི་ལྟ་ཇི་སྙེད་ནང་ལྟ་སྟེ༔ ཆོས་ཅན་དོན་དང་ཆོས་ཉིད་ཞི་བའི་རྣམ་པ་མཁྱེན་པའི་ཡེ་ཤེས་གཏིང་གསལ་ཕྱིར་མ་འཕྲོས་པ་མངོན་དུ་གྱུར་པ་དང་༔ ཆོས་ཀྱི་དབྱིངས་ཀྱི་ཡེ་ཤེས་ཤེས་བྱ་ཐམས་ཅད་ལ་ཡོད་ཅིང་༔ སྤྲོས་པ་དང་བྲལ་ཡང་སྣ་ཚོགས་པ་མ་ཡིན་པའི་ཕྱིར༔ བརྗོད་བསམ་ལས་འདས་པའི་ངོ་བོར་མཁྱེན་པའོ༔ མེ་ལོང་ལྟ་བུའི་ཡེ་ཤེས་ཀྱིས་ནི་ཐམས་ཅད་མཁྱེན་པའི་གཟུགས་བརྙན་སྣ་ཚོགས་པ་བྱུང་ཞིང་༔ ངང་གིས་འོད་གསལ་བར་མངོན་པར་འདུ་བྱ་བ་དང་རྩོལ་བ་མེད་བཞིན་མཁྱེན་པ་དང་༔ མཉམ་པ་ཉིད་ཀྱི་ཡེ་ཤེས་ཀྱིས་ནི་ཆོས་ཐམས་ཅད་མཚན་ཉིད་མེད་པར་ཁོང་དུ་ཆུད་ཅིང་བདེ་བ་དང་སྡུག་བསྔལ་རོ་གཅིག་པར་མཁྱེན་པ་དང་༔ སོར་རྟོགས་ཡེ་ཤེས་ཀྱིས་ནི་སྲིད་ཞིའི་ཕུན་ཚོགས་ཐམས་ཅད་དང་རྒྱུ་དང་འབྲས་བུར་བཅས་པའི་ཤེས་བྱའི་ཆོས་རྣམས་ཀྱང་སྤྱི་དང་རང་གི་མཚན་ཉིད་མ་འདྲེས་པར་མཁྱེན་པའོ༔ ཐུགས་རྗེ་ཀུན་ཁྱབ་ཀྱི་ཡེ་ཤེས་ཕྱིར་ལྟ་བའི་ཇི་སྙེད་པའི་འགྲོ་བའི་ཁམས་དབང་བསམ་པ་ཐབས་ལམ་རྒྱུ་འབྲས་སོགས་མཁྱེན་པ་དང་༔ ཇི་ལྟ་བའི་ངོ་བོ་རྣམ་དག་གཞི་མེད་ནམ་མཁའ་ལྟར་མཁྱེན་པ་དང་༔ དེ་གཉིས་མི་འགལ་བར་བདེན་གཉིས་ཀྱི་རིམ་པའི་ཆོས་སྤང་བླང་ཡོད་མེད་དུ་སྟོན་པའི་ཕུང་པོ་བརྒྱད་ཁྲི་བཞི་སྟོང་སོགས་སྟོན་པ་དང་༔ སྤྲུལ་པའི་རྣམ་པ་གང་འདུལ་གྱིས་འཁོར་བ་མ་སྟོངས་ཀྱི་བར་དུ་འགྲོ་དོན་ཐོགས་པ་མེད་པར་མཛད་པའོ༔

དོནགསུམ་པ་མཛད་པའི་ཕྲིན་ལས་བཤད་པ་ནི༔ རྒྱ་ཆེ་བ་དང་༔ སྣ་ཚོགས་གྲངས་མང་བ་དང་༔ རྒྱུན་རིང་བ་དང་༔ རླབས་ཆེ་བ་དང་༔ དུས་ལས་མི་ཡོལ་བ་ལྔ་ལས༔ དང་པོ་ནི༔ ནམ་མཁའ་དང་མཉམ་པ་མཐའ་ཡས་པའི་སེམས་ཅན་གྱི་གནས་རིགས་ཐམས་ཅད་ལ་ཁྱབ་པར་འཇུག་པའི་ཕན་པ་དང་བདེ་བའི་དོན་ཐམས་ཅད་འབད་མེད་ལྷུན་གྲུབ་ཏུ་མཛད་པའོ༔

གཉིས་པ་ནི༔ དེ་ཡང་ཚུལ་གཅིག་ལྟ་བུ་མ་ཡིན་པར་སྐུ་གསུང་ཐུགས་བསམ་གྱིས་མི་ཁྱབ་པ་དང་༔ རྣམ་པ་ཐམས་ཅད་པའི་སྐུ་རྫུ་འཕྲུལ་གྱི༔ གསུང་རྗེས་བསྟན་གྱི༔ ཐུགས་ཀུན་ཏུ་བརྗོད་པའི་ཆོ་འཕྲུལ་སྣ་ཚོགས་པས་ལམ་ཐེག་པ་དགུ་ལ་སོགས་པ་ཚད་མ་ངེས་རྣམ་པ་གྲངས་མང་པོའི་ཁྱད་པར་དུ་བྱས་པ་དང་༔ ལོངས་སྐུ་དང་སྤྲུལ་སྐུ༔ ཞི་བ་དང་ཁྲོ་བོ་ཕྲ་མེན་སྣ་ཚོགས་ཀྱི་གཟུགས་དང་སྤྲུལ་སྐུ་རྣམ་པ་བཞིའི་ཕྲིན་ལས་ཞི་རྒྱས་དབང་དྲག་ལྷུན་གྱིས་གྲུབ་པའི་གདུལ་ཐབས་སྟོན་པ་དང་༔ ཕན་བདེའི་ཐབས་ཚུལ་གྱི་རིམ་པ་ཚད་བཟུང་དུ་མེད་པའི་ཕྲིན་ལས་ལ་མངའ་དབང་བསྒྱུར་བའོ༔

གསུམ་པ་ནི༔ དུས་ཀྱི་ཁྱད་པར་འཁོར་བ་མ་སྟོངས་ཀྱི་བར་དུ་རྒྱ་དང་རྒྱུན་མི་ཆད་པར་རྩོལ་མེད་འགོག་པ་དང་བྲལ་བ་ལྷུན་གྲུབ་ཏུ་འབྱུང་བའོ༔ བཞི་པ་ནི༔ ཐབས་དང་སྟོབས་ཀྱི་རྣམ་པ་ཤུགས་བཙན་པོས་འཁོར་བ་དོང་ནས་སྤྲུགས་པ་སྟེ༔ ལྷ་དང་ཚངས་དབང་མིར་བཅས་འགྲོ་བའི་སྟོབས་དང་༔ ཉན་རང་བྱང་སེམས་ཐམས་ཅད་ཀྱི་ནུས་མཐུ་གཅིག་ཏུ་བསྡོམས་པས་ཀྱང་དེ་བཞིན་གཤེགས་པའི་སྟོབས་ཀྱི་ཆ་ཤས་ཙམ་ལ་ཡང་མཚོན་དུ་མེད་པའོ༔ དེ་ལྟ་བུའི་སྒོ་ནས་ཕན་པ་འབའ་ཞིག་མཛད་དོ༔ ལྔ་བ་ནི༔ དེ་ཡང་ལེ་ལོ་ཕྱི་བཤོལ་མ་བརྟགས་པའི་བཏང་སྙོམས་མི་མངའ་བས་སྐད་ཅིག་ཙམ་ཡང་གདུལ་བྱ་འདུལ་བའི་དུས་ལས་མི་ཡོལ་བར་གང་ལ་གང་གི་དུས་ནམ་དུ་ཆེ་ཆུང་རིམ་པའི་ཇི་ལྟར་འཚམས་པས་འདུལ་བ་དེ་ལྟར་འབྱུང་བའོ༔ དེ་ལས་གཞན་དུ་སྐུ་གསུམ་ལ་སྐུ་གསུང་ཐུགས་ཡོན་ཏན་ཕྲིན་ལས་ལྔའི་གནས་ཀྱི་དབྱེ་བ་དང་༔ སྐུ་གསུམ་རེ་རེ་ལ་གསུམ་གསུམ་ཕྱེ་ཞིང་ཕུན་སུམ་ཚོགས་པ་ལྔའི་ཁྱད་པར་གྱི་རྣམ་པར་འཕྲུལ་བའི་དབྱེ་བ་སོགས་ཡོད་ཀྱང་འདིར་འདུས་སོ༔ དེའི་མཛད་པའི་ཕྲིན་ལས་སྤྲུལ་སྐུའི་རོལ་པ་དང་བཅས་པའི་སྒོ་ནས་བསྟན་པའོ༔

གསུམ་པ་དོན་བསྡུ་བ་ནི༔ དེ་ལྟར་སྐུ་གསུང་ཐུགས་མཛད་པ་དང་བཅས་པ་ཡང་རང་བྱུང་གི་ཡེ་ཤེས་གཞིར་ལྡན་པའི་ཡེ་ཤེས་དྲུག་གིས་བསྡུས་པ་སྟེ༔ ཆོས་དབྱིངས་ཆོས་སྐུ༔ མེ་ལོང་ལོངས་སྐུ༔ མཉམ་ཉིད་རྡོ་རྗེ༔ སོར་རྟོགས་དང་བྱ་གྲུབ་མངོན་བྱང་སྟེ༔ སྤྲུལ་སྐུའི་རྣམ་པ་ཅན་གྱི་ཇི་ལྟ་ཇི་སྙེད་ཀྱི་ཡེ་ཤེས་ཡིན་ལ༔ ཡང་ཆོས་དབྱིངས་དང་མཉམ་ཉིད་ངོ་བོ་སྟོང་པའི༔ མེ་ལོང་རང་བཞིན་གསལ་བ༔ ལྷག་མ་གཉིས་ཐུགས་རྗེ་ཀུན་ཁྱབ་ཀྱིས་བསྡུས་པ་སྟེ༔ ངོ་བོ་གཅིག་ཐ་དད་གང་དུ་ཡང་མ་གྲུབ་པས་རང་བྱུང་གི་ཡེ་ཤེས་རིགས་ཆེན་གཙུག་ཏོར་རྫོགས་པ་ཆེན་པོ་གཅིག་གིས་བསྡུས་པའི་རྒྱན་སྣང་སད་པའམ་མངོན་དུ་གྱུར་པ་ནི་བར་དོ་དྲུག་གི་གདམས་པ་ཉམས་སུ་བླངས་པའི་འབྲས་བུའོ༔ འདིར་མངོན་བྱང་གི་ཡེ་ཤེས་ལས་སྤྲུལ་སྐུའི་རྣམ་པར་བཞག་པ་དང་༔ སྔ་མ་མངོན་བྱང་ཆོས་སྐུ་ལ་བསྡུས་ཤིང་དེའི་མདངས་ལས་ལོངས་སྐུ་འཆར་བར་བསྟན་པ་ནི༔ རྒྱུད་སྡེའི་དགོངས་པ་ཐ་དད་གཅིག་ཏུ་མི་འགལ་བས་ཀྱང་ཡིན་ལ༔ ནང་གསལ་གྱི་སྐུ་གསུམ་ངོ་བོ་དབྱེར་མེད་པ་ཆོས་སྐུ་གཅིག་གི་ལྡོག་ཆའི་དབྱེ་བས་ཆོས་སྐུ་ལས་སྤྲུལ་སྐུ་ཤར་བ་མི་འགལ་བའི་ཚུལ་ཤེས་པའི་ཆེད་དུ་རྣམ་པར་སྤྲོ་བ་གཞན་ཡིན་ནོ༔ ས་མ་ཡཱ༔ རྒྱ་རྒྱ་རྒྱ༔

དེ་ལྟར་བར་དོ་དྲུག་གི་ཁྲིད་ཡིག་འདི༔ སྔ་ན་མེད་པའི་གསར་པ་མ་ཡིན་ཡང་༔ རྒྱལ་བའི་དམ་ཆོས་ཀུན་གྱི་སྙིང་པོ་ནི༔ གཅིག་བསྡུས་མན་ངག་ཁྲིགས་སུ་བསྡེབས་ཏེ་བླངས༔ འདི་ནི་གནད་ཀྱི་རོ་ནུས་ལྷན་ཅིག་པར༔ འགལ་མེད་བསྡེབས་ནས་འཐུས་ཀ་ཚང་པའི་སླད༔ ཉོན་མོངས་ཉེས་ཀུན་འཇོམས་པའི་ལམ་བདེན་སྨན༔ གཞན་ལས་ཁྱད་པར་འཕགས་པའི་ངེས་པ་ཐོབ༔ གཞུང་མང་ཁུར་གྱིས་དུབ་པའི་མགྲོན་པོ་འགས༔ ཆོས་སྨྲས་གོ་དྲེད་ལྟ་བ་ལོག་པ་དང་༔ ཉམས་ལེན་ནོར་གྱིས་དབུལ་བས་སྲ་སྲེའི་ངག༔ འཆི་ཁ་ཐ་མལ་ལུས་དང་འདི་མི་འདྲ༔ རྣམ་ཤེས་ཡུལ་དུ་བྱེད་པའི་སྒོམ་ཆེན་གྱིས༔ རྟོག་གཟུགས་གོམས་དེ་ཚད་མེད་འཁྲུལ་བསྐྱེད་པ༔ ཤིང་གི་ནོར་བུའི་དགོས་འདོད་སྩོལ་བ་ཡི༔ ལྟོག་ཆེན་དེ་དང་ལྟ་བསྒོམ་འདི་མི་མཚུངས༔ སྔོན་ཞིག་ཡོད་ཀྱང་དམ་ཉམས་བར་གྱིས་ཆོད༔ ད་ལྟ་ཕྱེད་ཡོད་ཕྱེད་ཀྱི་བརྒྱུད་པ་ཆད༔ ཉམས་ལེན་ཡང་དག་ཆོས་ལ་དཔང་ཟ་བས༔ བདུད་རྩི་རོ་ཉམས་དེ་དང་འདི་མི་མཚུངས༔ བསམ་གཏན་ཏིང་འཛིན་རྩ་བ་བརྟན་པོ་ལ༔ ཤེས་རབ་ལྷག་མཐོང་འདྲིལ་བའི་སྡོང་པོ་རྒྱས༔ བསྐྱེད་རྫོགས་འབྲས་བཟང་གྲུབ་གཉིས་རོའི་བདའ་བས༔ མན་ངག་འདི་ནི་དཔག་བསམ་རྒྱས་པ་ཡིན༔ མ་རིག་མུན་པར་ཡེ་ཤེས་རྩིས་ཐེབས་པས༔ གཞི་ནས་གཞན་བྱུང་འཁོར་བ་ཀ་ནས་དག༔ སྐུ་གསུམ་ཡོན་ཏན་ལམ་དུ་བྱེད་པའི་ཆོས༔ མན་ངག་འདི་ནི་སྣང་གསལ་ཉི་ཟླ་དངོས༔ གཅིག་དུ་མ་ཡིན་བརྡ་དང་གདམས་པའི་ཐབས༔ རེ་རེས་ཀྱང་ནི་སྐུ་གསུམ་ལྷུན་གྱིས་གྲུབ༔ ཡིད་བཞིན་ནོར་བུའི་མཆོག་གྱུར་ཕན་བདེའི་གཞི༔ འབྱུང་བའི་བང་མཛོད་བཟང་པོ་འདི་གཅིག་གོ༔ དེ་ཕྱིར་མཐའ་ཡས་སེམས་ཅན་ཐམས་ཅད་ཀུན༔ གནས་སྐབས་མཐར་ཐུགས་འདོད་པ་འཇོ་བ་དང་༔ འཛད་མེད་གོང་ནས་གོང་དུ་འཕེལ་བ་ཡི༔ གདམས་པ་འདི་ནི་གཏེར་ཆེན་བུམ་བཟང་ཡིན༔ ཀྱཻ་ལགས་སྐལ་བ་བཟང་པོ་དགེར་སད་པས༔ འདི་དང་འཕྲད་པ་དལ་འབྱོར་དོན་ལྡན་ཡིན༔ དུས་གསུམ་རྒྱལ་བའི་སྲས་སུ་འཁྲུངས་པ་ཡིན༔ སྲས་ཀྱི་ནང་ནས་ཐུགས་ལས་སྐྱེས་པ་ཡིན༔ གང་གིས་འདི་ལ་བག་ཆགས་བཟང་འཇོག་པ༔ ཉམས་ལེན་སྙིང་པོས་དབུལ་བར་གྱུར་ན་ཡང་༔ སྲིད་པ་བར་དོར་གདམས་པར་རྗེས་དྲན་ནས༔ དེང་ནས་ཕྱིན་ཆད་སྐྱེ་བ་གཅིག་གི་ཐོག༔ གལ་ཏེ་བསྒོམ་ཞིང་ཉམས་སུ་བླངས་པ་ན༔ མི་ལོ་གསུམ་བདུན་ལྔ་ལས་མི་འགྱང་བར༔ གནས་སྐབས་འབྲས་བུ་སྣང་བཞིའི་རིག་པ་འཛིན༔ མཐར་ཐུག་གདོད་མའི་རྒྱལ་སར་གོམ་གཅིག་བསྒྲོད༔ མགྱོགས་པའི་ཁྱད་ཀྱང་སྐྱེན་པོའི་མདའ་འཕང་དང་༔ ཉན་རང་སངས་རྒྱས་རྫུ་འཕྲུལ་ཅི་བཞིན་དུ༔ འགྲན་གྱི་ཟླ་མེད་འཕུར་འགྲོའི་བརྟུལ་ཞུགས་རྩེ༔ འཕགས་ལམ་མཆོག་གི་རྩེ་སྦྱོར་མཐར་ཕྱིན་འགྱུར༔ དེ་སྐད་མ་ཧཱ་གུ་རུ་པད་འབྱུང་གིས༔ སྙིགས་མའི་འགྲོ་ལ་རྗེས་སུ་བརྩེ་བས་གདམས༔ སྨོན་ལམ་དབང་བསྐུར་གཏད་རྒྱ་གྲོལ་བ་ལས༔ ག་ག་ཨ་བྷྱེ་དེ་ཡི་སྐལ་བར་བབས༔ རྡོ་རྗེ་དབྱུ་གུས་རྔ་ཟླུམ་བརྡུང་བ་བཞིན༔ པདྨ་མ་ཏི་དེ་ཡིས་ཡང་ཡང་བསྐུལ༔ སྙིགས་མའི་སྐྱེ་བོའི་ཐེ་ཚོམ་སྒྲིབ་པ་ཡིས༔ དོན་འགྱུར་མིན་པའི་ཡི་མུག་དང་བཅས་སྨྲས༔ འོན་ཀྱང་སྔོན་ནས་སྨོན་ལམ་ཟབ་ཕྱིར་དང་༔ ཉོན་མོངས་ཞིང་སར་གསང་སྔགས་འབྲས་སྨིན་ཕྱིར༔ ཀུན་བཟང་ཐུགས་བསྟན་དུས་ལ་བབས་ཕྱིར་གྱི༔ པདྨའི་ཕྲིན་ལས་གྱི་ནར་ཆུད་མི་ཟ༔ ཚུལ་འདི་གནས་བརྟན་དོན་གྱི་དགེ་སློང་མཆོག༔ འགྱུར་མེད་རྣམ་པར་རྒྱལ་བའི་མཚན་ཅན་གྱིས༔ ཡི་གེའི་འདུ་བྱེད་བརྒྱུད་འཛིན་གང་ཟག་གི༔ བཙས་སུ་བཞག་ཕྱིར་དག་པར་གཏན་ལ་ཕབ༔ བདག་གཞན་འབྲེལ་བཅས་རྣམ་གཡེངས་མེད་ཡིད་ཀྱིས༔ དོན་མེད་དོན་ལོག་ཐོས་རྩོད་ཀུན་སྤངས་ཏེ༔ བསྒྲུབ་པ་ལྷུར་ལེན་སྙིང་པོ་བསྒྲུབ་བརྒྱུད་ཀྱི༔ རང་ལུགས་དྲི་མེད་སྐྱོང་བའི་འཁྲི་ཤིང་ཡིན༔ དགེ་བས་མཐའ་ཡས་འགྲོ་བ་སེམས་ཅན་ཀུན༔ གདོད་མའི་དབྱིངས་སུ་མངོན་པར་བྱང་ཆུབ་ནས༔ དོན་གཉིས་ལྷུན་གྲུབ་འབྱོར་བ་རྒྱ་ཆེན་པོ༔ ཡོངས་སུ་གྲུབ་པའི་བཀྲ་ཤིས་རྟག་ཁྱབ་ཤོག༔ དགེའོ། །ཨོཾ་སྭ་སྟི༔ རབ་འབྱམས་རྒྱལ་བའི་མཁྱེན་བརྩེ་ནུས་པའི་དཔལ། །གཅིག་བསྡུས་གངས་ཅན་འགྲོ་བའི་སྒྲོན་མེ་མཆོག །སངས་རྒྱས་གཉིས་པ་པདྨ་འབྱུང་གནས་ཀྱི། །ཞབས་ལ་དད་བརྒྱའི་གཙུག་གིས་རྟག་ཏུ་བསྙེན། །གང་གི་ཐུགས་རྗེ་སྒྱུ་མའི་རོལ་བ་ལས། །ཟབ་གཏེར་བྱེ་བའི་སྒོ་འབྱེད་རྣམ་འཕྲུལ་བ། ཁྲག་འཐུང་ནམ་མཁའ་འཇིགས་མེད་ཅེས་བྱ་བའི། །དགོངས་གཏེར་ནམ་མཁའ་མཛོད་ཀྱི་ཆོས་སྡེ་ལས། །བར་དོ་དྲུག་གི་ཁྲིད་རིམ་རབ་གསལ་བ། །ཟབ་དང་རྒྱ་ཆེའི་ཆོས་ཚུལ་རྨད་བྱུུང་འདི། །གཅིག་ལས་དུ་མ་འཆར་བའི་དཔར་གྱི་འཕྲུལ། །ཉེ་བར་བསྒྲུབས་པའི་དགེ་འབྲས་གངྒཱའི་རྒྱུན། །རྣམ་མཁྱེན་སྐུ་བཞིའི་རྒྱ་མཚོར་ཆེར་བབས་ཏེ། །མ་ལུས་འགྲོ་བའི་དཔལ་དུ་འགྱུར་བར་ཤོག །ཟབ་མོའི་ཆོས་འདིའི་ཕྲིན་ལས་རབ་དཀར་གྱིས། །ཕྱོགས་ཀྱི་འཁོར་ཡུག་མཐའ་དག་ཀུན་ཁྱབ་སྟེ། །འཁོར་བའི་རྒྱ་མཚོ་མ་སྟོང་བར་དག་ཏུ། །སྲིད་པའི་མགོན་དང་མིག་ཏུ་འགྱུར་བར་ཤོག །སརྦ་མངྒ་ལཾ་བྷ་ཝནྟུ། དགེའོ། །དགེའོ། །དགེའོ། །

ཆོས་ཉིད་དོན་གསལ།

ཡེ་ཤེས་སྒྱུ་འཕྲུལ་དྲྭ་བ་ལས༔ ཆོས་ཉིད་བར་དོའི་ཉམས་ལེན༔ ལྟ་བའི་ཡང་སྙིང་༔ ཆོས་ཉིད་དོན་གསལ་ཞེས་བྱ་བ་བཞུགས༔

ན་མོ་གུ་རུ་པདྨ་ཀཱ་ར་ཡེ༔ རང་བཞིན་བསམ་གཏན་བར་དོའི་གདམས་པ་ལས༔ སྐྱེ་གནས་སྦྱོང་བྱེད་བསྐྱེད་པའི་སྒོམ་ཁོག་དང་༔ འཆི་སྲིད་སྦྱོང་ལ་ཟབ་ལམ་འཕོ་བ་དང་༔ འོད་གསལ་སྟོང་སྣང་ཟིན་པའི་སྲོག་རྩོལ་ཐིག༔ གཞི་གནས་དོན་གྱི་རང་ཞལ་ཁྲེགས་ཆོད་ཀྱི༔ མ་བུ་དབྱེར་མེད་ཀ་དག་དབྱིངས་ལ་རོལ༔ ལྷུན་གྲུབ་ཐོད་རྒལ་གཞི་སྣང་ཉམས་སུ་ལེན༔ ཁྱད་པར་འཇིགས་སྐྲག་གཡང་ས་གཅོད་པ་དང་༔ སྲེད་པས་སྐྱེ་བའི་ཉིང་མཚམས་སྦྱོར་བ་གཅོད༔ སྙེམས་བྱེད་རྣམ་རྟོག་གཡོ་བའི་ཁ་རྒྱལ་རླུང་༔ ཕུང་བོ་ཕྱི་མ་དོན་གཉེར་ཟབ་མོའི་གཅོད༔ ས་མ་ཡཱ༔ བརྡ་ཡིག །འདིར་ནི་ཀུན་ལས་ཁྱད་པར་མཆོག་གི་ལམ༔ རྩོལ་མེད་ལེ་ལོ་ཅན་གྱི་ངོ་སྐལ་དུ༔ འོད་གསལ་རྫོགས་ཆེན་ཏནྟྲ་ལས་བཏུས་ནས༔ སྣང་བ་ཡུལ་དང་རིག་པ་རང་སྣང་གི༔ བློ་ཅན་གང་ལའང་ཤིན་ཏུ་འབྱོར་བའི་ཚུལ༔ བལྟས་པ་ཙམ་གྱིས་འོད་གསལ་རང་འཁྲུངས་པ༔ དོན་དམ་མཐར་ཐུག་ལྟ་བའི་ཡང་སྙིང་མཆོག༔ ཆོས་ཉིད་དོན་གསལ་ཆེན་པོ་བསྟན་པར་བྱ༔ འདི་ལའང་ནང་གསེས་བར་དོ་དྲུག་གི་དུས༔ ཕན་པའི་གདམས་པ་སོ་སོར་སྦྱོར་ཡོད་ཀྱང་༔ གཙོ་བོའི་དབང་གིས་འོད་གསལ་བར་དོ་རུ༔ བཞག་པ་ཡིན་པས་འགྲེས་འདི་ཤིན་ཏུ་གཅེས༔ ས་མ་ཡཱ༔ ལམ་ལ་སྐད་ཅིག་གཅིག་གིས་རྫོགས་པའི་ཕྱིར༔ དེ་དང་བསྟུན་ཏེ་རྣམ་པར་བཤད་པ་ནི༔ གཅུས་དཀྲུགས་གབ་པ་བཤིག་བསྡེབ་མངོན་དུ་བྱུང་༔ སྔོན་ཆད་མེད་པའི་ཨུ་དུམ་ཝ་རའོ༔ ས་མ་ཡཱ༔

འདིར་ལམ་ཐམས་ཅད་ཀྱི་མཐར་ཐུག་གི་སྐྱེལ་སོ་ནི་འོད་གསལ་རྡོ་རྗེ་སྙིང་པོ་ཀུན་ལས་ཕུལ་དུ་ཕྱིན་པ་འདི་ཡིན་ཏེ༔ སྤྲོས་བྲལ་དོན་གསལ་ཆེན་པོའི་རྒྱུད་ལས༔ སྔར་བཤད་གཞན་གྱིས་བསྟན་པ་མེད་པ་ཡི༔ ཐོས་བསམ་བསྒོམ་པར་རག་ལུས་མེད་པའི་དོན༔ རང་རིག་ཆོས་སྐུ་བཅར་ཕོག་བསྟན་པ་ཡི༔ ཚེགས་ཆུང་དོན་ཆེ་གོ་བར་སླ་བའི་ཆོས༔ བསྟན་པ་ཙམ་གྱི་བློ་དམན་ཀུན་གྱི་རྟོགས༔ ཆོས་རྣམས་ཀུན་གྱི་སྙིང་པོའི་དོན་ཆེན་ཡིན༔ འཁོར་འདས་ཐེག་པ་ཀུན་གྱི་རྩ་བ་ཡིན༔ ཞེས་སོ༔ དེ་བཤད་པ་ལ་སྐྱེ་འཕགས་ཀྱི་ལམ་གསུམ་དུ་ལྟ་བས་གཏན་ལ་ཕབ་པ་དང་༔ འཕགས་ལམ་བར་བ་ལ་བསྒོམ་པས་ཉམས་སུ་ལེན་པ༔ མཐར་ཕྱིན་དུ་འབྲས་བུ་བཙན་ས་འཛིན་པ་གསུམ་དུ་བཤད་དེ༔ བདེ་བའི་འཁོར་ལོ་དང་ཡེ་ཤེས་ནམ་མཁའ་དང་མཉམ་པའི་རྒྱུད་དང་༔ སྤྲོས་བྲལ་དོན་གསལ་ཆེན་པོའི་རྒྱུད་རྣམས་དང་དགོངས་པ་བཀའ་བསྒྲོས་དང་བཞི་ལས༔ དད་ལྡན་འགྱུར་མེད་ལས་ཅན་གྱིས༔ ལུང་ལྡན་རྡོ་རྗེ་སློབ་དཔོན་ལ༔ ཡིད་འཐད་ཕོངས་མེད་དབུལ་བ་ནི༔ ཚོགས་ཀྱི་ལམ་ཞེས་བསྟན་པ་ཡིན༔ བླ་མས་གང་ལ་གནང་སྦྱིན་པ༔ ཡིད་གཉིས་ཐེ་ཚོམ་བློ་སྤངས་ཏེ༔ མཁའ་འགྲོ་མཆོད་ཅིང་དོན་ཞུས་ཚེ༔ སྦྱོར་བའི་ལམ་ཞེས་བསྟན་པ་ཡིན༔ ད་ཡང་འདུས་པའི་འཁོར་རྣམས་ཉོན༔ ངེས་པའི་བཅུད་ལྡན་སློབ་དཔོན་གྱིས༔ ཡང་དག་གདམས་པ་ལུང་བསྟན་ནས༔ སྣོད་ལྡན་ཡིད་ཆེས་དོན་རྟོགས་ཕྱིར༔ མཐོང་བའི་ལམ་ནི་ཡིན་པར་གསུང་༔ དེ་དོན་གོ་ན་རྒྱུན་དུ་ནི༔ ངེས་དོན་ཆོས་སྐུར་སྤོང་བ་མེད༔ རང་རིག་ཡེ་ཤེས་གདངས་ཐེབ་པའི༔ བསྒོམ་པའི་ལམ་ནི་ཡིན་པར་གསུངས༔ ཡང་དག་ངེས་པའི་གདམས་ངག་ནི༔ རང་གི་ཐུགས་ལ་དོན་གསལ་བ༔ འགྱུར་མེད་གདངས་ཆུད་ཡེ་ཤེས་ཀློང་༔ མཐར་ཕྱིན་ལམ་དུ་བཤད་པ་ཡིན༔ ཞེས་དང་༔ ཐིག་ལེ་ཀུན་གསལ་ལས༔ སྒྲ་མཐུན་དོན་དཔག་ལམ་ལྔ་བཤད༔ བླ་མའི་བསྙེན་བཀུར་ཡོངས་རྫོགས་ནས༔ དམ་པའི་དྲུང་ན་འདུག་པ་ནི༔ ཚོགས་ཀྱི་ལམ་དུ་ང་ཡིས་བཤད༔ བླ་མས་གདམས་ངག་དོན་བཤད་དེ༔ གདམས་ངག་རྣམ་གཉིས་རྒྱུད་ལ་སྦྱོར༔ སྦྱོར་བའི་ལམ་དུ་ང་ཡིས་བཤད༔ ངོ་སྤྲད་རྣམ་པ་བཞིའི་སྒོ་ནས༔ ཚེ་འདིར་ངེས་པའི་བདེན་མཐོང་བ༔ མཐོང་བའི་ལམ་ཞེས་ང་ཡིས་བཤད༔ བསྒོམ་དུ་མེད་པའི་བསྒོམ་པ་དང་༔ བསྒོམ་དུ་ཡོད་པའི་མེད་པ་ཡི༔ བསྒོམ་པའི་ལམ་དུ་ང་ཡིས་བཤད༔ སངས་རྒྱས་དགོངས་པ་གདངས་ཆེན་བཞི༔ མི་གནས་ཚུལ་གྱིས་མཐར་ཕྱིན་པ༔ མཐར་ཕྱིན་ལམ་དུ་ང་ཡིས་བཤད༔ ཅེས་པ་ལྟར༔

དང་པོ་ཚོགས་ལམ་དུ་བླ་མ་བརྟེན་པ༔ སྦྱོར་ལམ་དུ་གདམས་ངག་འཚོལ་བ༔ མཐོང་ལམ་དུ་ཡེ་ཤེས་རང་རིག་པའི་མངོན་སུམ་དུ་བྱ་བ་དང་གསུམ་ལས༔ དང་པོ་ནི༔ རང་བཞིན་གྱི་བར་དོར་བབས་ཚུལ་སྔར་བཤད་པ་དེས་ཀྱང་ཅུང་ཟད་འཐེར་ཏེ༔ ཕྱི་ཆོས་ཅན་ལྟ་བས་ལྟ་བ་ནང་ཆོས་ཉིད་ལྟ་བས་ལྟ་བ་ཙམ་སོང་ཟིན་ཡང་༔ ངེས་དོན་འདུས་པ་ལས༔ སྐྱེ་ཤི་གཉིས་ཀྱི་བར་དོར་ནི༔ ཆོས་སྐུ་ངོ་སྤྲོད་མ་ཤེས་ན༔ མ་རིག་གཏི་མུག་སངས་དུས་མེད༔ སྒྲོན་མེ་མེད་པའི་མུན་ཁུང་འདྲ༔ ཞེས་གསུངས་པས་ན༔ ད་དུང་རྫོགས་པ་ཆེན་པོའི་ཁྱད་ཆོས་བླ་ན་མེད་པ་གསང་བ་རང་རིག་ལྟ་བས་ལྟ་བ་རྒྱས་པར་གཏན་ལ་མ་ཕབ་པས་སྐྱེ་གནས་ཀྱི་བར་དོར་འདི་དག་གཏན་ལ་དབབ་ཅིང་ངོ་སྤྲོད་པར་བྱ༔ དེ་ཡང་བླ་མའི་བྱིན་རླབས་དང་༔ རང་གི་མོས་གུས་ལས་འཕྲོ་རྣམས་གོང་འཛོམ་དགོས་པས་ན༔ སྔར་མི་གཞི་ངན་པ་ཞིག་ཡིན་ན་ཡང་འཆོས་པ་གལ་ཆེའོ༔ བླ་མ་ལ་སྐྱོན་དུ་མི་བལྟ་བར་ཡོན་ཏན་ལ་སེམས་དགོས་པ་ནི༔ བདེ་བ་འཁོར་ལོའི་རྒྱུད་ལས༔ རྒས་པས་ཉམ་ཆུང་བརྟེན་པ་བཞིན༔ བླ་མ་མཁས་པ་དོན་ལྡན་ལ༔ རྟག་ཏུ་བསྙེན་ཅིང་གུས་བྱས་ན༔ འབྲས་བུ་ཆོས་སྐུ་མྱུར་དུ་སྟོན༔ ཞེས་དང་༔ རྫོགས་པ་ཆེན་པོ་ཡེ་ཤེས་ནམ་མཁའ་དང་མཉམ་པའི་རྒྱུད་ལས༔ དང་པོ་དད་པས་སྔོན་སོང་ནས༔ ལུས་སྲོག་མི་ལྟ་གཏོང་ཕོད་ཅན༔ འཁོར་འདས་གཅིག་ཏུ་བསྟན་པ་ལ༔ སྐྲག་ཅིང་འཇིགས་པ་མེད་པ་ཡི༔ ཐེ་ཚོམ་མེད་པར་དུས་ཚོད་ཟིན༔ རྟོགས་པར་བྱ་བའི་ཐབས་སུ་བསྟན༔ གླང་ཆེན་མི་ལྡོག་དགྲ་འཇོམས་ལྟར༔ བླ་མ་རྡོ་རྗེ་སློབ་དཔོན་གྱི༔ སྤྱོད་པ་མི་བརྟགས་ཆོས་ལ་བརྟགས༔ ཞེས་སོ༔ དེ་ལྟ་བུའི་བླ་མ་སྟེ་མཉེས་པ་གསུམ་དང་ལྡན་པའི་སྒོ་ནས་བརྟེན་པར་བྱས་ནས་དགོངས་སྤྱོད་ཚུལ་བཞིན་བསླབས་དགོས་སོ༔

གཉིས་པ་སྦྱོར་ལམ་ནི༔ གང་གཏན་ལ་ཕབ་པའི་གཞི་ངོས་བཟུང་བ་དང་༔ ཇི་ལྟར་ཕབ་པའི་ཚུལ་ལོ༔ དང་པོ་ནི༔ དེ་ནས་གཏན་ལ་ཕབ་པ་ལ༔ ཀ་དག་རང་བྱུང་གི་ཡེ་ཤེས་ཀྱི་ངོ་བོ་གཏན་ལ་ཕབ་པ་དང་༔ སྣང་ཆ་སྐུ་དང་ཡེ་ཤེས་དེ་ད་ལྟ་སེམས་ཅན་ལ་ཇི་ལྟར་བཞུགས་པ༔ གཏན་ལ་ཕབ་པ་གཉིས་སུ་ཡོད་པ་ལས་འདི་དང་པོ་སྟེ་ཁྲེགས་ཆོད་ཀྱི་གཞིའོ༔

གཉིས་པ་ལ་རྒྱུ་ལས་མ་བྱུང་བའི་འབྲས་བུ་རང་ལ་གནས་པར༔ དེ་སེམས་ལས་མ་བྱུང་བའི་སངས་རྒྱས་ཡེ་ནས་ཡིན་པར༔ དེ་ལུང་ལས་མ་བྱུང་བའི་གདམས་ངག་གི་རྟོགས་པར་བཤད་པ་གསུམ་སྟེ༔ ཡེ་ཤེས་ནམ་མཁའ་དང་མཉམ་པའི་རྒྱུད་ལས༔ སེམས་ལས་མ་བྱུང་སངས་རྒྱས་དང་༔ རྒྱུ་ལས་མ་བྱུང་འབྲས་བུ་དང་༔ ལུང་ལས་མ་བྱུང་གདམས་ངག་དང་༔ ཁྱད་ཕར་འཕགས་པའི་མན་ངག་རྣམས༔ ཞེས་བསྡུས་པའི་དོན་གྱི་ངེས་པ་བཟུང་སྟེ༔ གཞན་ལས་གཞི་ལམ་འབྲས་གསུམ་དུ་བཞག་ཀྱང་འདིར་གསུམ་པོ་གཏན་ལ་དབབ་བྱ་དང་འབེབས་བྱེད་དུ་བྱས་ནས༔ ཁྱད་འཕགས་ཀྱི་གདམས་ངག་ནི་བསྒོམ་པའི་ལམ་དུ་བསྟན་ན་འཐད་པར་ཁོ་བོས་མཐོང་ངོ་༔

དེ་ལ་གསུམ་པོའི་ཕྱོགས་སོ་སོ་ནས་བཤད་པ་དང་༔ གནད་བསྡུས་ཏེ་སྤྲོས་བྲལ་གྱི་མཛུབ་ཚུགས་སུ་བསྟན་པ་གཉིས་ལས༔ དང་པོ་ལ་གསུམ་གྱི་རྒྱུ་ལས་མ་བྱུང་བས་འབྲས་བུ་ནི་རྒྱུ་ལས་མི་བྱུང་ཚུལ་དང་༔ འབྲས་བུ་རང་གི་ངོ་བོ་གནས་ལུགས་གཏན་ལ་ཕབ་པ་གཉིས་ལས༔ དང་པོ་ནི༔ ཆོས་སྐུ་རྒྱུ་རྐྱེན་ལ་མི་གནས་པ་དཔེའི་སྒོ་ནས་གཞལ༔ རྒྱུ་རྐྱེན་མི་འཐད་པར་དོན་གྱི་སྒོ་ནས་གཞལ་པའོ༔ དང་པོ་ནི༔ ཆོས་སྐུ་རྒྱུ་ལ་གནས་པ་མ་ཡིན་པའི་དཔེ་ནི༔ དཔེར་ན་ནོར་བུ་རིན་པོ་ཆེ་རྒྱུ་རྐྱེན་གྱིས་བསྐྱེད་མི་དགོས་པར་རྒྱ་མཚོར་གནས་པ་ལྟར༔ ཆོས་སྐུ་རྒྱུ་རྐྱེན་གང་གིས་ཀྱང་མ་བསྐྱེད་པར་སེམས་ཅན་ཐམས་ཅད་ལ་ཁྱབ་པའི་ཕྱིར་ནི༔ མདོ་ལས༔ བདེ་གཤེགས་སྙིང་བོས་འགྲོ་བ་ཡོངས་ལ་ཁྱབ༔ ཞེས་དང་༔ ངེས་དོན་འདུས་པ་ལས༔ རྒྱུ་རྐྱེན་མེད་པའི་མཐུན་དཔེ་ནི༔ ནོར་བུ་རིན་ཆེན་ཀུན་ལྡན་བཞིན༔ ཆོས་སྐུ་རྒྱུ་ལ་རག་མ་ལུས༔ རྐྱེན་ལ་མི་ལྟོས་སྨོས་ཅི་དགོས༔ ཞེས་དང་༔ ནམ་མཁའ་ཀློང་ཡངས་ཆེན་པོའི་རྒྱུད་ལས༔ རང་བྱུང་སྙིང་པོ་ཆོས་སྐུ་ང་༔ སངས་རྒྱས་རྣམས་ཀྱིས་ང་མ་མཛད༔ སེམས་ཅན་རྣམས་ཀྱིས་ང་མ་བཅོས༔ འབྱུང་བ་ལྔ་ལ་རག་མ་ལུས༔ ད་ཡང་འདུས་པའི་སྙིང་པོ་ཉོན༔ ཐིག་ལེ་ཆོས་སྐུའི་གཞི་ཉིད་ནས༔ རྒྱུ་རྐྱེན་གཉིས་ལས་འདས་པ་དང་༔ གཉེན་པོ་ཅིས་ཀྱང་མི་ཚུགས་དང་༔ དུས་གསུམ་མི་འགྱུར་ཡང་དག་ཡོད༔ ཅེས་དང་༔ མུ་ཏིག་ཕྲེང་བ་ལས༔ སྟོང་བས་ཁྱབ་དང་གསལ་བས་ཁྱབ༔ ཞེས་པའོ༔

གཉིས་པ་ནི༔ དེ་ལྟ་བུའི་གཞི་རྒྱུད་སེམས་ཅན་ཐམས་ཅད་ལ་ཁྱབ་པ་དེ་ཉིད་ཡེ་ནས་ཡོད་པ་མ་ཡིན་པར་འཕྲལ་དང་སླད་ནས་རྒྱུ་ཚོགས་གཉིས་ཀྱིས་བསྐྱེད་པར་འདོད་པ་ནི་ཤིན་ཏུའང་མི་རིག་སྟེ་ཆོས་སྐུ་འཇིག་པར་འགྱུར་བས་སོ༔ ཅིས་ཕྱིར་དཔེར་ན་རྒྱུ་རྐྱེན་འདུས་པས་བྱས་པའི་འབྲས་བུ་ནི་མེད་པ་ཞིག་ནས་ཡོད་པར་འགྱུར་བའམ༔ མཐར་ཡོད་པའི་རྒྱུ་འབྲས་ལྡོག་པའི་མེད་པར་འགྱུར་བ་བཞིན་དུ༔ དེ་ལྟ་ན་སྔར་མེད་པས་ཆོས་སྐུ་རྒྱུས་རྐྱེན་གྱིས་བྱས་པས་འཇིག་པ་དང་༔ རྒྱུ་རྐྱེན་ལྡོག་པས་དེ་ཡང་ཟད་པར་འགྱུར་ན་མི་རུང་བའི་ཕྱིར་རོ༔ ལར་ཕྱི་ནང་གནས་དོན་ལུས་གསུམ་གྱི་ཆོས་ཐམས་ཅད་བག་ཆགས་མ་རིག་པས་རྒྱུ་བྱས་པས༔ རྐྱེན་བཞིའི་དམིགས་པ་མ་དག་པས་བྱུང་བ་ཡིན་པར་ཕྱིར་ན་སླར་ཡང་དེ་དག་དང་མཚུངས་བར་ལྡན་པའི་ཡེ་ཤེས་ཀྱི་ཚོགས་དམིགས་པ་མེད་པ་ལ་བློ་བཞག་པ་དང་༔ བསོད་ནམས་ཀྱི་ཚོགས་བདག་གཞན་མཚན་འཛིན་ལ་གཡེངས་པ་ནི་སངས་རྒྱས་ཐོབ་པ་ལ་དངོས་རྒྱུར་མི་འགྱུར་ཏེ༔ ཡེ་ཤེས་ནམ་མཁའ་དང་མཉམ་པའི་རྒྱུད་ལས༔ རྒྱུ་ནི་འདུས་བྱས་མི་རྟག་པས༔ གཉེན་པོས་འཇིག་ཕྱིར་རྐྱེན་ཁར་འགྲོ༔ དེ་ཕྱིར་རྐྱེན་གྱིས་མ་བསྐྱེད་པའི་༔ རང་བྱུང་ཆོས་སྐུ་འགྱུར་མེད་དེ༔ ཆོས་རྣམས་ཀུན་གྱི་སྙིང་པོ་ཡིན༔ ཕྱི་ནང་ཀུན་གྱི་བག་ཆགས་ཀྱི༔ རྒྱུ་རྐྱེན་ངན་པས་བསྐྱེད་པས་ན༔ རང་གིས་རང་བསླུས་འཛིན་པ་ཡི༔ འཁྲུལ་བ་ཡིན་པར་ཐེ་ཚོམ་བྲལ༔ དེ་ཕྱིར་འཁོར་འདས་མ་རེག་པས༔ ངེས་དོན་ཆོས་སྐུ་སྙིང་བོའི་དོན༔ རྒྱུ་ལས་མ་བྱུང་རང་བྱུང་སྐུ༔ རྐྱེན་གྱིས་མ་བསྐྱེད་འབྲས་བུ་ཡིན༔ ཞེས་དང་༔ དྲང་དོན་སངས་རྒྱས་རྒྱུ་རྐྱེན་ནི༔ ཐབས་དང་ཤེས་རབ་ཡིན་ཞེས་ཟེར༔ ཇི་སྲིད་ཐབས་ནི་བརྟེན་གྱི་བར༔ ཆང་དང་དུག་འདྲེས་འཆི་བ་འདྲ༔ དེ་ཕྱིར་རང་བྱུང་ཐབས་མི་དགོས༔ ཞེས་སོ༔

གཉིས་པ་འབྲས་བུ་རང་གི་ངོ་བོས་གནས་ལུགས་གཏན་ལ་དབབ་བ་ནི༔ མདོ་རྒྱས་བསྡུས་གསུམ་ལས༔ དང་པོ་ནི༔ དེ་ལྟ་བུའི་གཞི་དེ་སྟོང་གསལ་ཟུང་འཇུག་ཏུ་བསྟན་པ་ནི༔ གཞི་ནི་སྤྲོས་པ་ཐམས་ཅད་དང་བྲལ་པའི་བེམ་སྟོང་ངམ་སེམས་གསལ་རིག་ཙམ་གང་གིས་ཕྱོགས་སུ་མ་ལྷུང་བ་སྟེ༔ ཡེ་ཤེས་གསལ་བར་སྟོན་པའི་རྒྱུད་ཕྱི་མ་ལས༔ སྟོང་གསལ་རིག་པ་བཤད་ཀྱི་ཉོན༔ གཞི་ཉིད་སྟོང་པ་གསལ་བ་སྟེ༔ དེ་ཉིད་མ་རྟོགས་འཁྲུལ་བ་ཡིན༔ དེས་ན་སྟོང་གསལ་ངོ་ཡི་བཟུང་༔ ཞེས་སོ༔

གཉིས་པ་ལ༔ གནས་ལུགས་རང་དུ་ངོ་སྤྲོད་པས་ཕྱི་འབྱམས་གཤིས་ཤོར་གྱི་མུན་པ་བསལ༔ དེའི་ཟུར་གསུམ་རྒྱས་པར་བཀྲལ་བས་སྐུ་གསུམ་ལ་ངེས་པ་སྦྱིན་པ་གཉིས་ལས༔ དང་པོ་ནི༔ དེ་ཡང་ཁ་ཕྱིར་བལྟས་ཏེ་ག་ཤེད་ན་ཅི་ཡང་མི་མཐོང་བ་ཞིག་མ་ཡིན་པར་སེམས་ཀྱི་གནས་ལུགས་རང་བཞིན་གྱི་བབས་སུ་ལྷུན་གྱིས་གྲུབ་པ་ནི༔ རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས༔ ཡིན་ནི་ད་ལྟའི་ཤེས་པ་ལ༔ དེ་དོན་ཀུན་ལ་གནས་པའི་ཕྱིར༔ འཆར་ནུབ་འབྲལ་པ་མེད་པའི་མཆོག༔ ལ་བཟློས་སྤངས་ལེན་ངོ་ཤེས་པའི༔ སྐྱོན་མེད་ཐམས་ཅད་མེད་པར་དག༔ དེ་ཕྱིར་དུས་འདིར་འབྲས་བུ་གྲུབ༔ རང་གི་སེམས་ཉིད་ཡིན་པ་དེ༔ གང་དང་འདྲ་མེད་ངེས་པའོ༔ ཞེས་སོ༔

གཉིས་པ་ལ༔ སོ་སོར་བཤད༔ དོན་བསྡུས་པ་གཉིས་ལས༔ དང་པོ་ལ་གསུམ་གྱི་ངོ་བོ་སྟོང་པར་བཤད་པའི༔ ཆོས་སྐུ་རྒྱུ་ལས་མ་བྱུང་བར་རང་ལ་ཡོད་པར༔ རང་བཞིན་གསལ་བར་བཤད་པས༔ ལོངས་སྐུ་རྒྱུ་ལས་མ་བྱུང་བར་རང་ལ་ཡོད་པར༔ ཐུགས་རྗེ་ཀུན་ཁྱབ་ཏུ་བཤད་པས༔ སྤྲུལ་སྐུ་རྒྱུ་ལས་མ་བྱུང་བར་རང་ལས་ཡོད་པར་ངེས་པ་སྦྱིན་པའོ༔

དང་པོ་ནི༔ དེ་ཡང་སྤྲོས་པའི་གྲྭ་ཟུར་ཐམས་ཅད་ལས་འདས་པའི་རང་གི་རིག་པ་འདི་ལས་བཟང་ངན་གྱི་དབང་དུ་མ་སོང་བའི་དབང་གིས་སངས་རྒྱས་ལ་བཟང་པོར་ཡོད་པ༔ དམྱལ་སོགས་ལ་ངན་པར་ཡོད་པ་མ་ཡིན་པར་མཉམ་པ་ཉིད་ཕྱལ་བ་ཡེ་གནས་ཆེན་པོ་ཡིན་ཏེ༔ དེ་ལྟར་གནས་པ་ནི་ཀ་དག་སྤྲོས་བྲལ་གྱི་ཆོས་སྐུར་ཤེས་པར་བྱའོ༔ ནམ་མཁའ་ཀློང་ཡངས་ལས༔ ཐོག་མ་མ་ཡིན་ཐ་མ་མིན༔ ད་ལྟའི་ཤེས་པ་འདི་ཉིད་ལས༔ བཟང་པོར་སོང་པ་གང་ཡང་མེད༔ ཅེས་དང་༔ ཡོན་ཏན་ཀུན་འབྱུང་གི་རྒྱུད་ལས༔ སངས་རྒྱས་སྙིང་པོ་ཆོས་སྐུ་ནི༔ འགྲོ་དྲུག་སེམས་ཅན་ཐམས་ཅད་ལ༔ རང་བྱུང་ཡེ་ཤེས་ངོ་བོ་ཡོད༔ ཀུན་ཏུ་ཁྱབ་པའི་ནམ་མཁའི་འདྲ༔ ཞེས་དང་༔ ནམ་མཁའ་འབྲུག་སྒྲོག་གི་རྒྱུད་ལས༔ ཆོས་རྣམས་སེམས་ཀྱི་འཁྲུལ་སེམས་ཡིན༔ བྱར་མེད་བློ་འདས་ཆོས་རྣམས་མེད༔ སེམས་མེད་ཀ་དག་ཀློང་དུ་གྱུར༔ ཞེས་སོ༔ དེས་ན་ཀ་དག་ངོ་བོ་ཉིད་ཀྱི་ལྡོག་ཆ་ནས༔ སེམས་ཉིད་རང་བྱུང་གི་ཡེ་ཤེས་ནི༔ སྟོང་པ་ལྷུན་གྲུབ་ཆེན་པོ༔ རྒྱུ་མེད་པ༔ རྐྱེན་མེད་པ༔ འཕོ་འགྱུར་མེད་པ༔ དངོས་པོ་ཅིར་ཡང་མེད་པ༔ དཔེས་མཚོན་དུ་མེད་པ༔ གཅིག་པུ་ཟླ་མེད་པ༔ ཁ་དོག་མེད་པ༔ དབྱིབས་མེད་པ༔ ཕྱོགས་མེད་པ༔ ཕྱི་ནང་མེད་པ་ཞིག་ཡིན་པས་ན༔ ནམ་མཁའ་འབར་པའི་རྒྱུད་ལས༔ རང་བཞིན་སྟོང་པ་ལྷུན་གྲུབ་ཡིན༔ རང་བཞིན་རྒྱུ་རྐྱེན་མེད་པ་ཡིན༔ རང་བཞིན་འཕོ་འགྱུར་མེད་པ་ཡིན༔ རང་བཞིན་ཅིར་ཡང་མེད་པ་ཡིན༔ རང་བཞིན་དངོས་པོ་མེད་པ་ཡིན༔ སེམས་ལ་དཔེ་མེད་ཟླ་མེད་གྲུབ་པ་མེད༔ སྟོང་གསལ་དངོས་མེད་ཁ་དོག་དབྱིབས་ཀྱང་མེད༔ སྐྱེ་མེད་ཀ་དག་ཕྱོགས་དང་མུ་མཐའ་མེད༔ དངོས་མེད་ཟང་ཀ་གཏད་མེད་གཏིང་མཐའ་ཡས༔ ཞེས་སོ༔

གཉིས་པ༔ ལོངས་སྐུ་རང་བཞིན་ལྷུན་གྲུབ་སྐུ་དང་ཡེ་ཤེས་གཏིང་གསལ་གྱི་ཚུལ་ལ༔ སྐུ་དང་ཡེ་ཤེས་འོད་དང་ཐིག་ལེ་ལ་སོགས་པ་ཡོན་ཏན་ཐམས་ཅད་ཡེ་ནས་སེམས་ཉིད་ལ་ལྷུན་གྲུབ་ཏུ་ཡོད་པ་ཡིན་པས་ན་རྒྱུ་ཚོགས་གཉིས་ཀྱིས་བསྐྱེད་མི་དགོས་ཏེ༔ ངེས་དོན་འདུས་པ་ལས༔ སྐྱེ་མེད་རང་བྱུང་དོན་རྟོགས་པས༔ ཚོགས་གཉིས་བསགས་ལས་ཁྱད་པར་འཕགས༔ དེ་ཕྱིར་ཚོགས་བསགས་རྩེད་མོ་འདྲ༔ དྲང་དོན་ཚོགས་བསགས་གཡེང་བས་ཕུང་༔ གཟུགས་སྐུ་ཚོགས་གཉིས་ལས་མ་བྱུང་༔ དེ་ཕྱིར་ཆོས་སྐུ་རྟོགས་གྱུར་ན༔ ཚོགས་མ་བསགས་པར་གཟུགས་སྐུ་རྫོགས༔ དེ་ཕྱིར་རྒྱུ་མེད་འབྲས་བུ་ཡོད༔ ད་ཡང་འདུས་པའི་འཁོར་རྣམས་ཉོན༔ ངོ་བོ་གཅིག་ལ་ཐ་དད་མེད༔ བྱད་དང་མེ་ལོང་གཟུགས་བརྙན་བཞིན༔ ཆོས་སྐུའི་རང་རྩལ་གཟུགས་སྐུ་གཉིས༔ ཚོགས་མ་བསགས་པར་ཤུགས་ལ་ཡོད༔ སྐུ་གསུམ་འགྲོ་དོན་ཐ་དད་ཀྱང་༔ དེ་ཕྱིར་ཆོས་སྐུའི་རང་རྩལ་ནི༔ མཐོང་སྣང་སྣ་ཚོགས་ཅིར་ཡང་འཆར༔ དེ་ཙམ་ཉིད་ན་རྒྱུ་རྐྱེན་བྲལ༔ ཞེས་དང་༔ རང་ཤར་ཆེན་པོ་ལས༔ སེམས་ཅན་ཀུན་གྱི་རང་རྒྱུད་ལ༔ ཡང་དག་སངས་རྒྱས་དགོངས་པ་ནི༔ སྐུ་དང་ཡེ་ཤེས་ཚུལ་དུ་གནས༔ ཞེས་སོ༔

གསུམ་པ་ནི༔ སྤྲུལ་སྐུ་ཐུགས་རྗེ་ཀུན་ཁྱབ་ཀྱི་བདག་ཉིད་ནི༔ དེ་ལྟ་བུའི་ཟུང་འཇུག་གི་བདག་ཉིད་རིག་པ་བྱང་ཆུབ་སེམས་ཀུན་ལ་ཁྱབ་པའི་ཕྱིར་ཤེས་རིག་གི་རང་རྩལ་ཤེས་རབ་ཀྱི་རྩལ་བཞི་དང་བཅས་པའང་ལྷུན་གྱིས་གྲུབ་པ་ཡིན་ཏེ༔ ཐལ་འགྱུར་ལས༔ ཐོག་མའི་ངོ་བོ་རང་བཞིན་དང་༔ ཐུགས་རྗེ་རྣམ་པ་གསུམ་དུ་གནས༔ ཞེས་སོ༔

གཉིས་པ་ལ༔ རྒྱུད་སྡེ་ཆུ་བོ་གཅིག་འདྲེས་སུ་དགོངས་པ་བླངས་པས༔ གང་དུ་གནས་པའི་རྩ་བའི་དཀྱིལ་འཁོར་ངོས་བཟུང་བས༔ རྒྱུ་མཚན་གྱི་སྒོ་ནས་ཆོས་རྗེས་སུ་འབྲང་བས་རྒྱུ་ལས་མ་བྱུང་བས་འབྲས་བུ་ལ་ངེས་པ་སྦྱིན་པའོ༔

དང་པོ་ནི༔ དོན་གྱི་གནད་བསྡུས་ན༔ ངོ་བོ་སྟོང་པས་འཁོར་འདས་གང་དུའང་ཕྱོགས་སུ་མ་ལྷུང་༔ རང་བཞིན་གསལ་བའི་ཡེ་ཤེས་ཀྱི་གདངས་མ་འགགས༔ ཐུགས་རྗེ་ཀུན་ཁྱབ་ཀྱི་སྣང་སྟོང་དབྱིངས་ཡེ་ཟུང་འཇུག་གི་བདག་ཉིད་ཆེན་པོ་བསྟན་པས༔ དོན་སྒྲུབ་བྱེད་དུ༔ ཕྱི་མཚན་ཉིད་ཐེག་པ་ལས༔ རྣམ་པར་ཐར་པའི་སྒོ་སྟོང་པ་ཉིད་དང་༔ མཚན་མ་མེད་པ༔ སྨོན་པ་མེད་པ་གསུམ་དང་༔ བཀའ་ཐ་མའི་དགོངས་འགྲེལ་ལས༔ ཆོས་ཉིད་ཀྱི་རིགས་པ༔ ལྟོས་པའི་རིགས་པ༔ བྱ་བ་བྱེད་པའི་རིགས་པ་གསུམ༔ སྒྱུ་འཕྲུལ་ལས༔ རྒྱུ་གཅིག་པ༔ ཡིག་འབྲུ༔ བྱིན་རླབས༔ མངོན་སུམ་བཞི་རྣམས་དང་༔ ལྟ་བ་ཐམས་ཅད་ཀྱི་སྙིང་པོའི་རྒྱུད་ལས༔ ཡིད་ཆེས་པ་ཡི་གཏན་ཚིག་ནི༔ རང་སེམས་སྐྱེ་མེད་གཏན་ཚིག་གི༔ ལྷུན་གྱིས་གྲུབ་པར་ཡིད་ཆེས་བྱ༔ རོལ་བ་འགགས་མེད་གཏན་ཚིག་གིས༔ གང་ཡང་མི་འགག་ཡིད་ཆེས་བྱ༔ མཚན་ཉིད་གཉིས་མེད་གཏན་ཚིག་གིས༔ ཆོས་རྣམས་གཅིག་པར་ཡིད་ཆེས་བྱ༔ ངོ་བོ་བློ་བྲལ་གཏན་ཚིག་གིས༔ རྩོལ་བ་མེད་པར་ཡིད་ཆེས་བྱ༔ ཞེས་སོགས་དང་༔ ཐིག་ལེ་ཀུན་གསལ་ལས༔ ང་ཡི་དོན་གྱི་ཕྱོགས་རེ་ནས༔ ཐེག་བརྒྱད་རང་བཞིན་སོ་སོར་སྣང་༔ ཐམས་ཅད་ང་ཡི་དབང་དུ་འདུས༔ ཞེས་སོགས་ཀྱི་བསྟན་པའི་མཐར་ཐུག་པའོ༔ དེ་ལྟ་བུའི་རྒྱུད་དེ་སེམས་ཅན་ཐམས་ཅད་ཀྱི་རྒྱུད་ལ་ཏིལ་ལ་མར་གྱིས་ཁྱབ་པ་ལྟར་ཡེ་ནས་གནས་ཀྱང་མ་མཐོང་བ་ཡིན་པས་ཐེག་པ་སོ་སོའི་ཟུར་རེ་བསྟན་པས་རིམ་གྱི་གོ་བས་རྣམ་གཅོད་མཐར་ཐུག་བསྟན་པར་མ་བཞག་ཀྱང་འདིར་ཡོངས་སུ་གབ་སྦས་མེད་པར་ཡོངས་གཅོད་དུ་བཞག་པའི་ཁྱད་ཙམ་དུ་བས་སོ༔ རང་བྱུང་བདེ་བ་འཁོར་ལོའི་རྒྱུད་ལས༔ ང་ཡི་རྒྱུད་ཆེན་ངེས་དོན་འདིས༔ རྩ་བ་རང་བྱུང་ཡེ་ཤེས་དོན༔ ཀུན་ལ་ཡོད་ཀྱང་རྟོགས་དཀའ་བ༔ དོན་གྱི་གནས་ལུགས་ངོ་བོ་ནི༔ ད་ལྟའི་ཤེས་པ་སོ་མ་ལ༔ ཅི་ཡང་མ་བསམ་མ་འགགས་པ༔ དེར་ནི་དོན་གྱི་སྙིང་པོ་བསྡུས༔ དེ་དོན་རྟོགས་ཐབས་ལུང་ལྡན་གྱིས༔ ངེས་དོན་མ་ནོར་བསྟན་པས་གོ༔ ཞེས་སོ༔

གཉིས་པ་ཡེ་ཤེས་ལུས་ལ་གནས་པའི་ཚུལ་བསྟན་པ་ནི༔ གོང་དུ་བསྟན་པའི་ཡེ་ཤེས་དེ་ཉིད་ལུས་ལ་ཅི་ལྟར་གནས་ན༔ ཙིཏྟ་རིན་པོ་ཆེ་མཆོག་གི་གུར་ནང་ན་ཡེ་ཤེས་སུམ་བརྩེགས་ཀྱི་ཚུལ་དུ་གནས་སོ༔ དགོངས་པ་བཀའ་བསྒྲོས་ལས༔ ད་ལྟའི་ལུས་སེམས་འདི་ཉིད་ལ༔ ཆོས་སྐུ་གཞི་ལྡན་ཡོད་པའི་ཕྱིར༔ འབྱུང་བ་ལྔ་ཡི་དྭངས་མ་ནི༔ སྙིང་ཀ་ཆོས་ཀྱི་འཁོར་ལོ་ན༔ རྟེན་བཅས་གཟུགས་ཀྱི་ནང་ནས་ནི༔ ཙིཏྟ་རིན་ཆེན་གཞལ་ཡས་ཁང་༔ གུར་ཕུབ་འདྲ་བའི་ནང་ཤེད་ན༔ ཆོས་སྐུ་བཞི་ལྡན་ཡོད་པ་སྟེ༔ ཞེས་དང་༔ ཐལ་འགྱུར་ལས༔ སྙིང་ནང་ཡེ་ཤེས་ཆེན་པོར་གནས༔ ཞེས་སོ༔ རྒྱུ་མཚན་དེ་ལྟ་བུའི་སངས་རྒྱས་རྒྱུས་མ་བསྐྱེད་པར་རང་ལ་གནས་པ་ཞེས་བྱའོ༔

གསུམ་པ་ནི༔ འོ་ན་རྒྱུ་མེད་པའི་འབྲས་བུ་སྲིད་དམ༔ སྲིད་ན་མུ་སྟེགས་པ་དང་ཁྱད་པར་མེད་དེ་རྟག་པར་ལྟ་བའི་ཕྱིར་ཞེ་ན༔ སྐལ་མེད་དག་ལ་ཡིན་ཡང་༔ གཞི་ནི་དཔེའི་སྒོ་ནས་བསྟན་ན༔ ནམ་མཁའ་ལ་རྒྱུ་མེད་པས་རྐྱེན་གྱིས་འཇིག་པ་མེད་པ་ལྟར༔ ཆོས་སྐུ་འགྱུར་བར་མི་རུང་བའི་གཏན་ཚིག་གིས་རྐྱེན་ལ་མ་རེག་པར་ཡོད་པ་ཡིན་ཏེ༔ བདེ་བའི་འཁོར་ལོའི་རྒྱུད་ལས༔ ནམ་མཁའ་སྟོང་བ་རྒྱུས་མ་བསྐྱེད༔ རིག་པ་སྟོང་ལ་རྒྱུས་མ་བསྐྱེད༔ ནམ་མཁའ་འབྱུང་བའི་རྐྱེན་མི་ཚུགས༔ དེ་བཞིན་ཆོས་སྐུ་འགྱུར་མེད་ཕྱིར༔ དེ་ཕྱིར་རྐྱེན་ལས་མ་སྐྱེས་པའི༔ འབྲས་བུ་ངེས་པར་ཡོད་པའོ༔ ཞེས་སོ༔ ལོངས་སྐུ་དང་སྤྲུལ་སྐུའི་ཡེ་ཤེས་ཀྱང་རྒྱུ་ལ་མ་ལྟོས་པར་ཡོད་པ་སྟེ༔ རིག་པའི་གསལ་ཆ་མ་འགགས་པའི་མདངས་ཡེ་ཤེས་ལྔ་དང་༔ ཡུལ་སོ་སོར་རྟོགས་པའི་ཤེས་རབ་ཐུགས་རྗེ་ཕྱོགས་མེད་དུ་རིག་པའི་སྙིང་པོར་ཤར་བས་ན་རྒྱུ་མེད་པར་ཡོད་ཚུལ་མེད་ན་མི་རུང་བར་འགྱུར་ཏེ༔ རྐྱེན་གདུལ་བྱའི་ལས་སྨོན་དང་སངས་རྒྱས་ཀྱི་ཐུགས་རྗེ་འཕྲད་ནས་འབྱུང་བར་འདོད་པ་ནི་ཆོས་སྐུ་འགྱུར་བར་མི་རུང་བས་གཏན་ཚིག་གིས་མི་འགྲུབ་པ་སྟེ༔ དེའི་ཕྱིར་ན༔ རྒྱ་མཚོའི་གསེར་ལ་རྒྱུ་མེད་བཞིན་ཡོད་པ་དང་༔ དེ་ལ་གཡའ་ཡིས་མི་གོས་པའི་དཔེར་བྱས་ནས་མཚོན་ཏེ༔ བདུད་རྩི་རྒྱ་མཚོ་ལས༔ རྒྱ་མཚོའི་གསེར་ལ་རྒྱུ་མེད་ལྟར༔ རིག་པ་རང་གྲོལ་རྒྱུས་མ་བསྐྱེད༔ གསེར་དེ་གཡའ་ཡིས་མི་གོས་ལྟར༔ ཆོས་སྐུ་རྐྱེན་གྱིས་མི་འགྱུར་བས༔ དེ་ཕྱིར་རྒྱུ་ལས་མ་བྱུང་བས༔ གཟུགས་སྐུ་ངེས་པར་ཡོད་པའོ༔ ཞེས་སོ༔ དེ་ལྟ་བུའི་རྒྱུ་ལས་མ་བྱུང་བའི་འབྲས་བུ་ནི་སྔར་ཡང་ནས་ཡང་དུ་བཤད་ཀྱང་དེང་སང་གླན་ཀ་ཚོལ་བ་མང་དུས་དེར་གཟི་བརྗིད་ངོམ་པ་ཞེས་བྱའོ༔

གསུམ་པ་དོན་བསྡུ་བ་ནི༔ འདི་དག་ལ་ནི་རྫོགས་པ་ཆེན་པོའི་རྒྱུད་ཀྱི་གནད་འདུས་པ་ཡིན་པས་བཟུང་བར་འོས་པ་སྟེ༔ ཡེ་ཤེས་མཁའ་མཉམ་ལས༔ ངེས་པ་བཞི་ཡི་ཁྱད་འཕགས་པ༔ ཁྱོད་ལ་ལེགས་པར་ངས་བསྟན་གྱི༔ ཡིད་ལ་ཟུངས་ལ་ངེས་པར་འཆོང་༔ ཞེས་སོ༔

གཉིས་པ་སེམས་ལས་མ་བྱུང་བའི་སངས་རྒྱས་བཤད་པ་ལ༔ མདོར་བསྟན་པ༔ རྒྱས་པར་བཤད་པ༔ དོན་བསྡུ་པའོ༔ དང་པོ་ནི༔ ཐེག་པ་ཐུན་མོང་ལས་སེམས་ལ་སངས་རྒྱས་ཞེས་བཏགས་པ་དང་ཕྱག་ཆེན་དང་འདིར་སེམས་ཉིད་དང་ད་ལྟའི་ཐ་མལ་གྱི་ཤེས་པ་ཞེས་བྱ་བ་དག་ཚིག་མཐུན་ཡང་དོན་གྱིས་མི་མཚུངས་ཏེ༔ འདི་ནི་རང་བྱུང་གི་ཡེ་ཤེས་ལ་བརྗོད་པ་དང་༔ གཞན་ནི་གཞན་བྱུང་གི་ཤེས་པ་ལ་འདོད་པས་དེ་ལྟ་ན༔ སེམས་ནི་གཞི་ལས་ལོག་པར་གོལ་བ་ཡིན་པས་ངོ་བོ་ཉིད་ཀྱི་འཁྲུལ་བ་དེ་ལ་སྟེགས་འཆའ་ན་ནམ་ཡང་སངས་རྒྱས་དུས་མེད་པ་ཞིག་སྟེ༔ རང་བྱུང་གི་ཡེ་ཤེས་ནི་སེམས་མེད་པ་ཡེ་རིག་དོན་དམ་པའི་ངོ་བོ་སྐུའི་དཀྱིལ་འཁོར་དུ་བཞུགས་པའོ༔ དེ་སྐད་དུ་ཡང་༔ རང་བྱུང་བདེ་བ་འཁོར་ལོ་ལས༔ སེམས་ནི་འཁྲུལ་པ་ཡིན་པའི་ཕྱིར༔ ཆོས་ཀུན་གོལ་སེམས་ཡིན་པས་ན༔ ཡང་དག་ཉིད་ནི་སེམས་དང་བྲལ༔ སེམས་མེད་རང་བྱུང་རིག་པའི་སྐུ༔ ཞེས་སོ༔

གཉིས་པ་ནི་སེམས་སངས་རྒྱས་ཡིན་པར་མི་རུང་བར་བསྟན༔ སེམས་ཀྱི་ཕྱོགས་ལས་བཙལ་བས་རྙེད་པར་བསྟན༔ སེམས་དང་ཡེ་ཤེས་ཕྱེད་པ་བྱེ་བྲག་ཏུ་བསྟན༔ དེ་ཉིད་སངས་རྒྱས་དང་གྲུབ་ཐོབ་ཀུན་གྱི་དགོངས་ཀློང་དུ་བཤད་དོ༔ དང་པོ་ནི་སེམས་སུ་སྣང་བ་ཉིད་ནི་རང་བྱུང་གི་ཡེ་ཤེས་ལ་སྒྲིབ་པར་བྱེད་པའི་དྲི་མ་སྟེ༔ ཇི་ལྟར་ན་ཐུགས་རྗེ་ལྟར་ཤར་བའི་སྒོ་ལོག་པར་གོལ་བས་དྲང་པོ་ཇི་ལྟ་ཇི་སྙེད་ཀྱི་མཁྱེན་པར་ཤར་པ་བསྒྲིབ་པས་ཕྱིར་སྤྲིན་དང་འདྲའོ༔ རང་བྱུང་གི་ཡེ་ཤེས་ནི་དེ་དང་མི་གཅིག་སྟེ་སེམས་དང་བྲལ་བའི་ཕྱིར་རོ༔ དེའི་ཕྱིར་རྒྱུད་ལས༔ དེ་ཕྱིར་ཆོས་ཀུན་རྩ་བ་ནི༔ ཆོས་སྐུ་རང་གི་སེམས་ཀྱིས་སྒྲིབ༔ སེམས་ནི་དོན་མེད་འཁྲུལ་བའི་ཕྱིར༔ ཆོས་སྐུའི་གོལ་ས་སེམས་ཡིན་ནོ༔ རང་བྱུང་ཆོས་ཉིད་སེམས་དང་བྲལ༔ ཞེས་སོ༔ གལ་ཏེ་ངེས་དོན་སེམས་ཡིན་ན་མི་རུང་སྟེ༔ སེམས་ནི་རྒྱུ་རྐྱེན་གྱིས་བསྐྱེད་པའི་ཕྱིར༔ ཆོས་སྐུ་རྒྱུ་རྐྱེན་ལས་སྐྱེས་པར་འགྱུར་བས་སྐྱེ་བ་མེད་པ་དང་འགལ་ཏེ༔ ཀུན་བྱེད་ལས༔ སེམས་ཉིད་སྐྱེ་བ་མེད་པར་ཀུན་སྟོན་ཡང་༔ སྐྱེ་མེད་སྔོན་དུ་ཀུན་གྱིས་རྟོགས་པ་མེད༔ ཅེས་དང་༔ ངེས་དོན་འདུས་པ་ལས༔ སྣ་ཚོགས་སེམས་ནི་གཞན་དབང་ཅན༔ རང་གི་སེམས་ཞེས་དེ་ལ་བྱས༔ སྐྱོན་གྱི་རྩ་བ་སེམས་ཡིན་པས༔ དེ་ཕྱིར་སེམས་ཀྱི་སངས་མི་རྒྱ༔ སེམས་ནི་རྒྱུ་རྐྱེན་སྐྱེས་པའི་ཕྱིར༔ ངེས་དོན་མ་ཡིན་འཁྲུལ་བའི་བློ༔ ཞེས་སོ༔ ཡང་སེམས་ནི་ཡུལ་སྣ་ཚོགས་སུ་མེད་ལ་ཡོད་པར་ཞེན་པའི་རྟོག་པ་སྣ་ཚོགས་པ་ཞིག་སྟེ༔ དུ་མ་སྐྱེ་འགགས་གི་རང་བཞིན་ཅན་དང་༔ ཡོད་མེད་རྟག་ཆད་དུ་འཛིན་པའི་བློ་ཡིན་པས་ན་ཆོས་སྐུར་འདོད་ན༔ དུ་མའི་མཐའ་ལ་ལྟུང་བ་དང་སྐྱེ་འགགས་ཀྱི་མཐའ་དང་རྟག་ཆད་འཛིན་པས་མཐའ་ལ་རྟོགས་པས་ཀྱང་མི་རུང་སྟེ༔ དེ་ཉིད་ལས༔ སེམས་ནི་འཁོར་བའི་རྩ་བ་སྟེ༔ ཡུལ་ནི་སྣ་ཚོགས་སྣང་བ་ལ༔ སེམས་ཀྱི་རྟོག་པ་སྣ་ཚོགས་ཞེན༔ དེ་ཕྱིར་སེམས་ནི་འཁོར་བའི་རྒྱུ༔ རྟག་ཆད་འཛིན་པ་སེམས་ཡིན་པས༔ ལྟ་བའི་གོལ་བ་སེམས་ལས་བྱུང་༔ ཞེས་སོ༔ ཡང་སེམས་ལས་བྱུང་བས་རྣམ་རྟོག་ཆགས་སྡང་རྨོངས་གསུམ་ཐམས་ཅད་ཀྱི་གཞིར་གྱུར་པ་དང་༔ འཁོར་བ་དང་མྱང་འདས་ཀྱི་འབྲས་བུ་ཐམས་ཅད་རེ་དོགས་སེམས་ཀྱིས་བྱས་ཏེ་མཉམ་པ་ཉིད་དང་འགལ་བ་དང་༔ ཆོས་སྐུ་ཉོན་མོངས་ཅན་དུ་འགྱུར་བའི་སྐྱོན་གྱིས་མི་རུང་སྟེ༔ དེ་ཉིད་ལས༔ སེམས་ལས་བྱུང་བས་རྣམ་རྟོག་གིས༔ ཆགས་སྡང་ཐམས་ཅད་སྐྱེད་པར་བྱེད༔ འཁོར་འདས་རེ་དོགས་སེམས་ཀྱིས་བྱས༔ དེ་ཕྱིར་འཁོར་བའི་རྒྱུར་སེམས་གོལ༔ ཞེས་སོ༔ ཡང་སེམས་ཀྱི་སྲེད་པས་སྐྱེ་བ་འཕེན་པས་སྡུག་བསྔལ་གྱི་རྒྱུར་གྱུར་པ་དང་༔ སེམས་ཀྱི་སྐྱེ་བ་གྲངས་མེད་པ་གློ་བུར་བར་མེད་ལ་ཡོད་པར་བཟུང་ནས་བྱས་པས་ན༔ ཆོས་སྐུ་དང་གཅིག་ན་ཆོས་ཀུན་འབྱུང་དུ་འགྱུར་བ་དང་༔ གློ་བུར་བས་འཁྲུལ་པར་འགྱུར་བས་མི་རུང་སྟེ༔ དེ་ཉིད་ལས༔ སེམས་ཀྱིས་བྱས་པ་རྟོགས་པ་ཡི༔ སྐྱེ་བ་བརྒྱུད་པ་གྲངས་མེད་ཀྱང་༔ སེམས་འདིས་བྱས་ཕྱིར་སྡུག་བསྔལ་རྒྱུ༔ དེ་ཕྱིར་སེམས་ནི་གློ་བུར་འཁྲུལ༔ ཞེས་སོ༔

གཉིས་པ་ནི༔ འོན་ཀྱང་སེམས་ཀྱི་ཕྱོགས་ལས་བཙལ་ན་རྙེད་པ་ཡིན་ཏེ༔ དཔེར་ན་གླང་པོ་ཆེ་ཞིག་བོར་པ་ལ༔ དེའི་རྗེས་ལ་མ་བརྟེན་རྙེད་པ་མེད་ན་ཡང་༔ རྗེས་ལས་དེད་པས་རྙེད་པ་བཞིན༔ སེམས་ཀྱི་བྱུང་གནས་འགྲོ་གསུམ་གྱི་རྗེས་ལྟ་བུ་ལས་དེད་པས་རང་བྱུང་གི་ཡེ་ཤེས་སེམས་མེད་པ༔ གཟུང་འཛིན་མེད་པ༔ སྤྲོས་བྲལ་བདེ་བ་ཆེན་པོ་རྣམ་ཀུན་མཆོག་ལྡན་གྱི་སྟོང་ཆེན་ཡེ་ནས་འབྲལ་པ་མེད་པར་གནས་པ་ཉིད་རྙེད་པར་འགྱུར་ཡང་༔ རྗེས་དེ་གླང་བོ་ལ་ནོར་ན་བཞད་གད་ཀྱི་གནས་སུ་འགྱུར་བ་ལྟར༔ སེམས་ནི་རང་རིག་འོད་གསལ་བའི་དགོངས་པའོ་ཞེས་མི་བྱ་བ་ཁོ་ན་ཡེ་ཤེས་འཁོར་ལོའི་རྒྱུད་དང་བདེ་བ་འཁོར་ལོའི་རྒྱུད་གཉིས་མཐུན་པར༔ དེ་ཉིད་བཙལ་པའི་མཐུན་དཔེ་ནི༔ རྗེས་བཙལ་བས་ནི་གླང་པོ་རྙེད༔ སེམས་ཀྱི་ཕྱོགས་ནས་དོན་བཙལ་བས༔ རང་རིག་རྒྱལ་པོ་ཡེ་ཤེས་རྙེད༔ དེ་རྙེད་སེམས་ཀྱི་འཛིན་པ་བྲལ༔ འཛིན་བྲལ་སེམས་མེད་རང་རིག་སྐུ༔ དེ་དོན་འབྲལ་མེད་བྱང་ཆུབ་ཀློང་༔ སེམས་བྲལ་ཏིང་འཛིན་རྒྱུན་དུ་གནས༔ ཞེས་སོ༔

དོན་གསུམ་པ་སེམས་དང་ཡེ་ཤེས་ཕྱེད་པ་བྱེ་བྲག་ཏུ་བཤད་པ་ནི༔ སེམས་དང་ཡེ་ཤེས་ཕྱེད་པ་འདི་ཨ་ཏིའི་ཁྱད་ཆོས་སུ་བཤད༔ དེ་ལྟར་ཕྱེད་པ་དངོས་བཤད༔ དེའི་ཡོན་ཏན་གྱི་སྒོ་ནས་བཤད་པ་གསུམ༔ དང་པོ་ནི༔ ཐེག་པ་འོག་མ་བརྒྱད་པོ་ཐམས་ཅད་ཀྱིས་སེམས་ཆོས་སྐུ་ཡིན་པས༔ དེ་ཉིད་སེམས་ཀྱི་དམིགས་པ་ལུས་ཀྱི་ཚོགས་བསགས་སོགས་ཐབས་ཤེས་ཁྱད་པར་ཅན་གྱིས་ཟིན་པས་སེམས་གནས་སུ་གྱུར་ནས་སངས་རྒྱས་པར་འདོད་པ་དང་༔ བསྐྱེད་རྫོགས་ཁྱད་པར་ཅན་དུ་བློས་བཅོས་པས་འཛིན་སྟངས་དོན་མཐུན་པའི་སྒོ་ནས་ཕྲིན་ལས་རྣམ་བཞི་སྤྱོད་ཅིང་འབྲས་བུ་ཡང་དག་པར་ཐོབ་པར་འདོད་པ་ནི་ཀུན་བཏགས་འབའ་ཞིག་པ་སྟེ༔ མ་རིག་པའི་རྩ་བ་ཅན་འཁོར་བའི་སེམས་ཀྱི་ལས་སྣ་ཚོགས་པ་དེ་དག་གི་འབྲས་བུ་མྱུར་དུ་མི་ཐོབ་པར་འབྱང་ ༼ འགྱང་དཔྱད། ༽ བར་འགྱུར་བ་ནི་འདུ་བྱེད་ཀྱི་ལས་སྣ་ཚོགས་པ་དེ་ལ་སྣོན་མ་ཙམ་དུའང་འགྱུར་ཉེན་ཆེ་བས་ན༔ ཐམས་ཅད་ཀྱང་སེམས་ལས་མ་བྱུང་བའི་སངས་རྒྱས་མ་ཡིན་ཏེ༔ དཔལ་ནམ་མཁའ་དང་མཉམ་པའི་རྒྱུད་ལས༔ མ་རིག་ཆོས་ནི་བདེན་གཉིས་སུ༔ བློ་ཡི་ནན་ཏན་སེམས་ཀྱིས་བརྟགས༔ ཚོགས་བསགས་སྒྲིབ་སྦྱང་ཀུན་བརྟགས་པས༔ སེམས་བྲལ་རང་བྱུང་ཆོས་ཀྱི་སྐུ༔ སེམས་ལས་མ་བྱུང་སངས་རྒྱས་འདི༔ ཐེག་པ་ཀུན་ལས་ཁྱད་པར་འཕགས༔ ཕྱི་ནང་གསང་སྔགས་བསྐྱེད་རྫོགས་ནི༔ ཏིང་འཛིན་གསུམ་གྱི་ལྷར་བསྒོམ་ནས༔ ཕྲིན་ལས་རྣམ་བཞིའི་ལོངས་སྤྱོད་ཀུན༔ འབྲས་བུ་མི་ཐོབ་ཀུན་བརྟགས་པས༔ ཡིད་སྨོན་ཀུན་བརྟགས་དཀྱིལ་འཁོར་ཀུན༔ དྲང་དོན་ཡིན་ཕྱིར་འཁྲུལ་བའི་སེམས༔ གསལ་བརྟན་ཏིང་འཛིན་གོམས་གྱུར་ཡང་༔ སེམས་ལས་མ་བྱུང་སངས་རྒྱས་མིན༔ ཞེས་སོ༔

གཉིས་པ་ཕྱེད་པ་དངོས་ནི་མན་ངག་ཁྱད་པར་ཅན་དེ་ཉིད་གསལ་རྒྱན་ལྟར་དང་༔ འདིར་ཅུང་ཟད་ཙམ་བྱེད་ན༔ ངོ་བོ་དང་༔ གནས་ཀྱི་སོགས་དང་༔ དུས་གསུམ་གྱི་རྟོག་པས་ཁྱད་པར་ཕྱེད་པའོ༔ དང་པོ་ངོ་བོའི་ཁྱད་པར་ནི་སེམས་ཀྱི་ངོ་བོ་མ་རིག་པ་འཁྲུལ་པའི་རྟོག་པ་དང་༔ རིག་པའི་ངོ་བོ་ཆོས་སྐུའི་ཆ་ལས་ཤེས་རིག་གི་ལྡོག་པ་ལ་བཤད་དེ༔ ཐལ་འགྱུར་ལས༔ སེམས་ཞེས་བྱ་བ་འཁྲུལ་རྟོག་ལ༔ ངོ་བོ་འཇུག་ཅིང་ཁྱབ་པ་ལ༔ དྲན་བསམ་རྣམས་ཀྱི་གཞི་མའོ༔ ཡེ་ཤེས་རྟོགས་པ་མ་ཡིན་ཏེ༔ ངོ་བོ་རང་གསལ་སྙིང་པོའི་དོན༔ ཞེས་དང་༔ འཁོར་ལོའི་རྒྱུད་ལས༔ སེམས་ནི་མ་རིག་མུན་པ་ཡིན༔ སངས་རྒྱས་སེམས་བྲལ་ཡེ་ཤེས་སྐུ༔ ཞེས་སོ༔ ཡང་སེམས་ཀྱི་ངོ་བོ་ནི་རྟག་ཆད་གཉིས་འཛིན་རིག་པའི་ངོ་བོ་གཉིས་མེད་ཆོས་སྐུ་སྟེ༔ སྒྲོན་མ་སྣང་བ་ལས༔ རྟག་ཆད་འཛིན་པ་མ་རིག་པ༔ དེ་ལས་མ་བྱུང་སྒྲོ་སྐུར་བྲལ༔ རྟག་ཆད་སེམས་མེད་ཆོས་ཀྱི་སྐུ༔ སེམས་ལས་མ་བྱུང་སངས་རྒྱས་ཡིན༔ ཞེས་དང་༔ དོན་འདུས་ལས༔ ད་ལྟའི་ཆོས་སྐུ་འདི་ལས་ནི༔ འདུས་མ་བྱས་ཕྱིར་རྟག་ཆད་མེད༔ ཅེས་སོ༔ ཡང་སེམས་ནི་བྱིང་རྒོད་སྣ་ཚོགས་པས་བྲི་གང་ཅན༔ རིག་པ་ནི་དེ་དག་དང་བྲལ་བ་སྟེ༔ ཡོན་ཏན་ཀུན་འབྱུང་ལས༔ ཕྱོགས་མེད་ཆོས་སྐུ་རང་གསལ་བས༔ བྱིང་རྨུག་བྱ་བའི་མིང་ཡང་མེད༔ དངོས་པོ་མེད་པའི་གསལ་དོན་གྱི༔ བཏང་སྙོམས་རྟིང་པོའི་མུན་པ་སེལ༔ ཞེས་དང་༔ ཡེ་ཤེས་ནམ་མཁའ་དང་མཉམ་པར༔ སངས་ནི་བྱིང་རྨུག་རྒོད་པ་སངས༔ རྒྱས་ནི་ཆོས་སྐུ་གསར་བ་རྒྱས༔ དེ་ཕྱིར་སེམས་ལས་མ་བྱུང་བས༔ ཡེ་ཤེས་རང་སངས་རྒྱས་པ་ཡིན༔ ཞེས་སོ༔ ཡང་སེམས་ནི་འཁྲུལ་བའི་ཡུལ་ལ་སོ་སོར་མིང་བརྟགས་དོན་བཟུང་དངོས་པོར་བལྟས་ཤིང་འཛིན་པ་ཞིག་ལ༔ རིག་པ་ནི་འཛིན་པ་ཐམས་ཅད་དང་བྲལ་ཞིང་གཡོ་འགུལ་མེད་པའི་ཡེ་ཤེས་ངང་གི་རྒྱས་པ་སྟེ༔ དེ་ཉིད་ལས༔ སངས་ནི་འཁྲུལ་པར་འཛིན་པས་སངས༔ རྒྱས་ནི་ཆོས་སྐུ་མི་གཡོ་རྒྱས༔ དེ་ཕྱིར་སེམས་ལས་མ་བྱུང་བས༔ ཡེ་ཤེས་རང་སངས་རྒྱས་པ་ཡིན༔ ཞེས་སོ༔ ཡང་སེམས་ནི་དུས་གསུམ་གྱི་ཆ་སྐྱེ་འགགས་གནས་པར་སྣང་བའི་རང་བཞིན༔ ཡེ་ཤེས་སྐྱེ་བ་མེད་དུས་གསུམ་མཉམ་པ་ཉིད་ཀྱི་ཆོས་ཉིད་ཏེ༔ ནམ་མཁའ་མཉམ་པ་ལས༔ སེམས་ལ་དུས་གསུམ་ཡོད་པས་ན༔ དེ་ལ་སྔ་ཕྱི་ད་ལྟ་བྱུང་༔ སེམས་ལ་འཕོ་འགྱུར་ཡོད་པས་ན༔ དེ་ཕྱིར་ལུས་ལ་སྐྱེ་འཆི་བྱུང་༔ ཞེས་དང་༔ སྐྱེ་མེད་རང་བྱུང་ཡེ་ནས་གནས༔ དེ་ཉིད་ལམ་གྱི་ཡེ་ཤེས་གནས༔ ཐོག་མཐའ་ཆོད་ན་དུས་གསུམ་གཅིག༔ ཆོས་སྐུ་གཅིག་ཕྱིར་འཕོ་འགྱུར་མེད༔ དོན་ལ་འགྱུར་མེད་སྡུག་བསྔལ་བྲལ༔ སྔ་ཕྱི་མེད་པའི་རང་བྱུང་སྐུ༔ སེམས་ལས་མ་བྱུང་ཆོས་སྐུའོ༔ ཞེས་སོ༔ སེམས་ལ་བདེ་སྡུག་བར་གསུམ་ཡོད་པ་དང་༔ ཡེ་ཤེས་ལ་དེ་དག་མེད་པའི་ཁྱད་པར་ཡང་ཡོད་སྟེ༔ ཀུན་ཏུ་བཟང་པོ་ཡེ་ཤེས་གསལ་བར་སྟོན་པའི་རྒྱུད་ལས༔ བརྗོད་མེད་རང་གི་ངོ་བོ་ལ༔ ཚོར་བ་བདེ་སྡུག་གང་ཡང་མེད༔ དེ་ཕྱིར་ཆོས་ཉིད་བདེན་པའི་ངང་༔ སེམས་ལས་མ་བྱུང་སངས་རྒྱས་ཡིན༔ ཞེས་སོ༔ ཡང་སེམས་ནི་ཕྱིའི་ཡུལ་ལ་འདི་དང་འདིའོ་སྙམ་དུ་གཟུང་འཛིན་གཉིས་སུ་རྟོག་པའི་རྣམ་རྟོག༔ རིག་པ་ནི་གཟུང་འཛིན་དང་བྲལ་བ་སྟེ༔ ནམ་མཁའ་ཀློང་ཡངས་ལས༔ ད་ལྟའི་ཤེས་པ་འདི་ཉིད་ལས༔ གཟུང་འཛིན་མེད་པའི་བྱང་ཆུབ་སེམས༔ ཞེས་སོ༔ སེམས་ནི་ཡུལ་འདོད་པ་དང་མི་འདོད་པ་ལ་དགག་སྒྲུབ་སྣ་ཚོགས་སུ་འཛིན་པའི་བློ་ལ༔ ཡེ་ཤེས་ནི་ཆགས་སྡང་དགག་སྒྲུབ་ལས་འདས་པ་སྟེ༔ འཁྲུལ་པའི་རྟོག་པ་ཆགས་སྡང་ཡུལ༔ དགག་སྒྲུབ་རྣམ་རྟོག་བྲལ་པའོ༔ ཞེས་སོ༔ ཡང་སེམས་ནི་ཡུལ་ལ་ལྟོས་ནས་འཕྲལ་བྱུང་ཡིན་ལ༔ རིག་པ་རང་བྱུང་རྒྱུ་རྐྱེན་ལས་འདས་པ་ཡེ་ཤར་ཡེ་གདལ་ཆེན་པོ་དང་གཅིག༔ སེམས་ནི་ཡུལ་ཡོད་མེད་བཟང་ངན་ཡིན་མིན་གྱིས་མཐའ་རྣམ་པར་འབྱེད་པ་དང་༔ ཡེ་ཤེས་ནི་མཐའ་དང་བྲལ་བའོ༔ གཞན་ཡང་ཤན་དབྱེ༔ འབྱེད་པ་མེད་པ༔ འཛིན་པ་མེད་པ༔ རང་གསལ་བ༔ རྒྱ་མ་ཆད་པ༔ ལྷུན་གྱིས་གྲུབ་པ་རིག་པའི་མཚན་ཉིད་ལྔ༔ ཡེ་ཤར་ཡེ་གདལ༔ སྟོང་པ་འགྱུར་མེད༔ ཡོན་ཏན་འབྱུང་བ༔ དྲི་མ་མེད་པ༔ ཟང་ཐལ་ཐོགས་པ་མེད་པ༔ མཚན་མའི་ཆོས་དང་བྲལ་བའི་སྟོང་པ༔ སྤྲོས་པའི་མཐའ་བྲལ་བའི་ཆོས་སྐུའི་ཁྱད་པར་བདུན་ལྡན་སོགས་ཀྱང་སྤྲོས་བྲལ་དོན་གསལ་ལས་པདྨ་ཀ་ར་ངས་བཤད་པ་ལྟར་ཤེས་པར་གྱིས་ཤིག༔

གཉིས་པ་གནས་སོགས་ཀྱི་དབྱེ་བ་ནི༔ འོད་གསལ་གནད་ཡིག་ལས་ཤེས་པར་བྱའོ༔ གསུམ་པ་དུས་གསུམ་གྱི་ཤེས་པ་དང་ཕྱེས་ནས་ངོ་སྤྲོད་པས༔ སེམས་ལས་མ་བྱུང་བའི་སངས་རྒྱས་རང་ངོ་འཕྲོད་པ་སྟེ༔ སྤྲོས་བྲལ་དོན་གསལ་ལས༔ དུས་གསུམ་ཕྱེ་ལ་ངོ་སྤྲད་པ༔ གང་ཟག་གཅིག་གི་ཤེས་རྒྱུད་ལ༔ བསམ་གྱི་མི་ཁྱབ་གྲངས་མེད་ཀྱང་༔ ཤེས་པ་བཞི་རུ་འདུས་པའོ༔ དུས་གསུམ་དག་གི་ཤེས་པ་དང་༔ དུས་མེད་རྟོག་པའི་ཤེས་པའོ༔ ཞེས་སོ༔ དེ་དག་ནི་འདས་པ་དང་མ་འོངས་པ་དང་ད་ལྟར་གྱི་ཤེས་པ་གསུམ་ནི་འཁོར་བའི་ཆོས་སོ༔ དེ་གསུམ་གྱི་རང་བཞིན་མཉམ་ཉིད་བདག་མེད་པ་འཛིན་པ་གྲོལ་བ༔ མ་བྱས་པ་མ་བཅོས་པ་མ་བསྒྱུར་བ་ཡེ་གནས་པ་སྤྲོས་བྲལ་གྱི་ངོ་བོ་མ་འགགས་པས་འོད་གསལ་བ༔ དེ་ཉིད་ལ་ངོ་སྤྲད་པར་བྱ་སྟེ༔ དེ་ཡང་རྣམ་རྟོག་མེད་པར་རང་ཤེས་རང་གནས་པས་ཝལ་པོ༔ གཟུང་འཛིན་མེད་པས་ཧད་དེ་བ༔ འགགས་པ་མེད་པས་སལ་ལེ་བ༔ རྒྱུ་རྐྱེན་མེད་པས་རང་བྱུང་བ་ཉིད་དེ༔ དེ་ཉིད་ལས༔ བདག་འཛིན་གྲོལ་བ་དུས་གསུམ་དག༔ ཧད་དེ་ཝལ་ལེ་སལ་ལེ་བ༔ དེ་ལས་རང་བྱུང་ཡེ་ཤེས་ཏེ༔ རྒྱུ་རྐྱེན་མེད་པའི་རང་བྱུང་ཡིན༔ ཞེས་སོ༔ ཁྱད་པར་ད་ལྟའི་ཤེས་པའི་གནས་ལུགས་སྣང་སྟོང་ཟུང་འཇུག་བརྗོད་དང་བྲལ་བ་ལ་ངོ་སྤྲད་དེ་ཆོས་སྐུ་བཞི་ལྡན་གྱི་དགོངས་པ་ཞེས་བྱའོ༔ སྟོང་པ༔ གསལ༔ ཟུང་འཇུག་གི་རྩལ་གཉིས་སྟེ་བཞི་ཚོགས་པའོ༔ ཡོན་ཏན་ཀུན་འབྱུང་ལས༔ ད་ལྟའི་ཤེས་པ་འདི་ཉིད་ལ༔ ཡིད་ཆེས་གདེངས་ལྡན་མ་རིག་སངས༔ ཆོས་སྐུ་བཞི་ལྡན་ངོས་བཟུང་ངོ་༔ དཔེར་ན་མིག་གི་འབྲས་བུ་བཞིན༔ ཧྲིག་གེ་བ་ལ་དྲན་པས་ཟིན༔ ཡེ་རེ་བ་ལ་ཤེས་པ་དལ༔ རང་རིག་ཞེན་མེད་གདེང་གི་གསལ༔ སྤྲིན་མེད་སྟོན་ཀའི་ནམ་མཁའ་བཞིན༔ སེང་ངེ་བ་ལ་མཐའ་དབུས་མེད༔ གང་གི་མནོ་བསམ་མ་བཏང་ཕྱིར༔ བྱིང་རྨུགས་སྤྲོས་པ་གང་ཡང་མེད༔ ཉི་མ་གཟའ་བྲལ་ལྷང་ངེ་བཞིན༔ སལ་ལེ་པ་ལ་འགྱུ་བ་མེད༔ བདེ་ལ་མི་རྟོག་རྒྱུན་དུ་གནས༔ དེ་ཕྱིར་རང་བྱུང་འགྱུར་བ་མེད༔ གཡའ་མེད་མེ་ལོང་བྱད་བལྟ་བཞིན༔ ཝ་ལེ་བ་ལ་དངོས་པོ་མེད༔ དེ་ཙམ་ཉིད་ན་ཆོས་ཀྱི་དབྱིངས༔ ཞེས་སོ༔

ཞར་ལ་སེམས་དང་ཡེ་ཤེས་ཀྱི་རྣམ་གྲངས་བཤད་པ་དང་༔ ངེས་ཚིག་བཤད་པ་ནི༔ སེམས་ཀྱི་གྲངས་ནི་ཚོགས་བརྒྱད་དང་༔ ཡེ་ཤེས་ལ་གསུམ་ལྡོག་པས་དབྱེ་བའོ༔ དགོངས་པ་འདུས་པའི་རྒྱུད་ལས༔ སེམས་ནི་རྣམ་ཤེས་ཚོགས་བརྒྱད་དེ༔ འགགས་མེད་ནམ་མཁའི་ཆོ་འཕྲུལ་འདྲ༔ ཞེས་དང་༔ ཐལ་འགྱུར་ལས༔ གཞི་ལ་གནས་པའི་ཡེ་ཤེས་དང་༔ མཚན་ཉིད་འཛིན་དང་ཡུལ་ཁྱབ་བོ༔ ཞེས་འབྱུང་བ་ལྟར་རོ༔

སེམས་ཀྱི་ངེས་ཚིག་ནི༔ ཡུལ་ལ་གཟུང་འཛིན་དང་བཅས་པར་སེམས་པ་དང་༔ ཡེ་ཤེས་ཀྱི་ངེས་ཚིག་ནི་ཡེ་ནས་གཞི་ལ་གནས་པའི་ཆ་ནས་བཞག་པ་སྟེ༔ དོན་དུ་གཟུང་འཛིན་མེད་པའི་ཤེས་པ་ཡུལ་མེད་རང་གསལ་ཆེན་པོ༔ གཞི་མེད་རྩ་བ་དང་བྲལ་བའོ༔ ངེས་ཚིག་བསམ་པས་དྲན་ཡུལ་སྐྱེ༔ གང་ལ་སེམས་དང་གང་གིས་སེམས༔ གང་སེམས་པ་དང་གང་ཕྱིར་སེམས༔ ཞེས་དང་༔ ངེས་ཚིག་ཡེ་ནས་གནས་པའི་དོན༔ དེ་ལྟར་གནས་པའི་ཡེ་ཤེས་སོ༔ ཞེས་སོ༔

དེ་ལྟར་སེམས་དང་ཡེ་ཤེས་ཕྱེད་པའི་ཡོན་ཏན་ནི༔ ཡེ་ཤེས་ཀྱི་ངོ་བོ་ཅི་ལྟ་བ་བཞིན་དུ་མཐོང་བས་དེ་ཕྱིན་ཆད་མ་བརྗེད་མ་ཡེངས་ཙམ་ནས་མ་རིག་པའི་སྐྱོན་ཐམས་ཅད་ཀྱིས་གོས་པར་མི་འགྱུར་བར་གཞི་ནས་དག་པ་དང་༔ དེའི་རྩ་བ་ཅན་གྱི་ཉོན་མོངས་གཞི་ནས་གྲོལ་བ་དང་༔ ལས་ངན་པ་བསགས་པའི་རྒྱུ་དང་༔ བག་ཆགས་དང་འབྲས་བུ་ངན་པ་དག་གིས་ཀྱང་མི་གོས་པར་ད་ལྟ་ཉིད་ནས་སངས་རྒྱས་ཀྱི་ས་ལ་གནས་པའང་ཡིན་ཏེ༔ རྫོགས་ཆེན་གྱི་ངེས་དོན་ཐམས་ཅད་འདུས་པའི་སྙིང་པོ་ཡེ་ཤེས་ཀློང་གི་རྒྱུད་ལས༔ ཀུན་བཟང་རྟོགས་པ་ངེས་པའི་དོན༔ ནམ་མཁའི་མཐོངས་སུ་ཉི་ཤར་འདྲ༔ གདོད་ནས་མ་རིག་སྐྱོན་མ་གོས༔ ལུང་ལ་མ་བརྟེན་རིག་ཅིང་རྟོགས༔ སངས་མ་རྒྱས་པའི་རིག་པ་ལས༔ རང་བྱུང་ཡེ་ཤེས་དེ་ལ་བྱ༔ ཞེས་དང་༔ བདེ་བའི་འཁོར་ལོ་ལས༔ ངོས་ཟིན་དོན་ལ་གནས་ཐབས་ནི༔ མར་མེ་མུན་སེལ་སྣང་བ་བཞིན༔ སྐད་ཅིག་གཅིག་གི་ཏིང་འཛིན་གྱིས༔ བག་ཆགས་ལས་ཀྱི་མ་རེག་པས༔ དོན་ཉིད་ཡེ་ཤེས་དྲན་པ་ཡིན༔ ཉོན་མོངས་ལས་ཀྱིས་གོས་པ་མེད༔ དེ་བས་གདམས་ངག་དྲན་པས་ནི༔ སྒྱུ་མ་སངས་ནས་འཁྲུལ་བྲལ་ནས༔ མཚན་འཛིན་རྟོག་བྲལ་དོན་ཤེས་པས༔ སྤྲོས་བྲལ་དོན་གྱི་སྙིང་པོར་གནས༔ ཞེས་དང་༔ ཡེ་ཤེས་གཏིང་རྫོགས་ལས༔ ཡེ་ཤེས་རྟོགས་ནས་མཉམ་པའི་དོན་ཉིད་ལ༔ རྒྱུན་དུ་མ་བརྗེད་རིག་པའི་གསལ་ཐེབ་ནས༔ བག་ཆགས་ཉོན་མོངས་རྟོག་པའི་སྐྱོན་གྱིས་ཀྱང་༔ དེ་ལ་རྡུལ་ཙམ་མི་སྒྲིབ་ཡེ་ཤེས་གསལ༔ ཞེས་དང་༔ རི་བོ་བརྩེགས་པའི་རྒྱུད་ལས༔ སེམས་རིག་ཕྱེད་པས་ཡེ་ཤེས་དོན་རྟོགས་ན༔ སེམས་དང་སེམས་བྱུང་ཉོན་མོངས་ཐམས་ཅད་ཀྱང་༔ དེ་མ་ཐག་ཏུ་བག་ཆགས་ལས་ཉོན་བཅས༔ མིང་མཐར་མི་གནས་ཐོད་རྒལ་རང་སར་གྲོལ༔ ཞེས་སོ༔

བཞི་པ་དེ་ཉིད་སངས་རྒྱས་དང་གྲུབ་ཐོབ་ཐམས་ཅད་ཀྱི་དགོངས་ཀློང་དུ་བཤད་པ་ནི༔ དེ་ལྟ་བུའི་ཡེ་ཤེས་འདི་ཉིད་ལ་དུས་གསུམ་གྱི་སངས་རྒྱས་ཐམས་ཅད་ཀྱི་དགོངས་པ་འདུས་པ་ཡིན་ཏེ༔ མདོ་ལས་སེམས་ཀྱི་རང་བཞིན་འོད་གསལ་བ་ཞེས་བྱ་ལ༔ སྔགས་སུ་གཞི་རྒྱུད་བདེན་པ་དབྱེར་མེད་ཅེས་བྱ་ཞིང་༔ ཕྱག་རྫོགས་དབུ་མ་ལ་སོགས་མིང་ཅི་ལྟར་བརྗོད་ཀྱང་༔ དོན་དུ་སེམས་མེད་པའི་ཡེ་ཤེས་ཉག་གཅིག་ལ་ཡེ་ཤེས་ཆོས་སྐུ་ཡིན་པའི་ཕྱིར་ནའོ༔ འདིར་སྤྲོས་གཅོད་རྒྱས་པར་མཐུན་སྒྲུབ་དང་བཅས་པ་ཡོད་ཀྱང་དེ་ཙམ་གྱིས་མ་འཐེར་བ་མེད་དོ༔ ཀུན་བྱེད་ལས༔ ང་ཡི་རང་བཞིན་འདི་ལ་ནི༔ སྐུ་འདུས་གསུང་འདུས་དགོངས་པ་འདུས༔ ཞེས་དང་༔ དུས་གསུམ་སངས་རྒྱས་ཐམས་ཅད་ཀྱི༔ ཐུགས་བརྟོལ་ཉག་གཅིག་དགོངས་དོན་གཅིག༔ ཅེས་དང་༔ གཞན་ལས་ཀྱང་༔ སྔ་རབས་འདས་པའི་སངས་རྒྱས་རྣམས་ཀྱིས་ཀྱང་༔ རང་གི་སེམས་ལས་གཞན་དུ་ཆོས་བཙལ་མེད༔ ད་ལྟ་བཞུགས་དང་སླད་ནས་འབྱོན་པའང་༔ རྟོག་མེད་མཉམ་པ་ཉིད་ཀྱིས་གྲུབ་པའོ༔ དུས་གསུམ་སངས་རྒྱས་ཐམས་ཅད་ཀྱི༔ དགོངས་པའི་དོན་ནི་ང་ལ་འདུ༔ ཞེས་དང་༔ མཚན་བརྗོད་ལས༔ སངས་རྒྱས་ཀུན་གྱི་ཐུགས་ཆེ་བ༔ སངས་རྒྱས་ཀུན་གྱི་བསྟན་པ་གཅིག༔ རྣམ་པར་ཤེས་པས་ཆོས་ཉིད་འདས༔ ཡེ་ཤེས་གཉིས་མེད་ཚུལ་འཆང་པ༔ རྣམ་པར་རྟོག་མེད་ལྷུན་གྱིས་གྲུབ༔ དུས་གསུམ་སངས་རྒྱས་ལས་བྱེད་པ༔ སངས་རྒྱས་ཐོག་མ་ཐ་མ་མེད༔ ལ་སོགས་པས་བསྟན་པའོ༔

གསུམ་པ་དོན་བསྡུ་བ་ནི༔ ད་ལྟའི་རིག་པ་བཞི་ཆ་གསུམ་བྲལ་ཆེན་པོ་སེམས་ལས་འདས་པ་འདི་ཡིན་ཏེ༔ ཡེ་ཤེས་ཀློང་རྒྱུད་ལས༔ དུས་གསུམ་གཅིག་པའི་ཆོས་སྐུ་ལ༔ རང་ལ་རང་དུ་ཆོས་སྐུར་ཤེས༔ ད་ལྟའི་རིག་པ་འདི་ཡིན་ཏེ༔ དུས་རྣམས་ཀུན་ཏུ་འདུ་འབྲལ་མེད༔ སེམས་ལས་མ་བྱུང་སངས་རྒྱས་ནི༔ རང་བྱུང་ཀུན་ཏུ་བཟང་པོ་བྱ༔ ཞེས་སོ༔

གསུམ་པ་ལུང་ལས་མ་བྱུང་བའི་མན་ངག་བཤད་པ་ནི༔ ལུང་ལས་མ་བྱུང་པའི་མན་ངག་གཞི་ལ་ལྷུན་གྱིས་གྲུབ་པར་བཤད༔ ལུང་ལས་མན་ངག་གི་ལམ་ནས་རྟོགས་ཚུལ་བཤད་པ་གཉིས་ལས༔ དང་པོ་ལ་ཡེ་ནས་གཞི་ལ་གྲུབ་ཚུལ༔ སྔོན་གྱི་སངས་རྒྱས་ཀྱིས་རྟོགས་ཚུལ་ལོ༔

དང་པོ་ནི་ལུང་ལ་མ་བརྟེན་པའི་གདམས་ངག་གི་ངོ་བོ་སྟོང་ཞིང་འོད་གསལ་བདག་མེད་པའི་དོན་སྐུ་གསུམ་ལྷུན་གྲུབ་ཀྱི་སངས་རྒྱས་ནི་ཡེ་ནས་རང་ལ་ཡོད་པའི་ཕྱིར་རྒྱུ་རྐྱེན་གྱིས་མ་བསྐྱེད་པའི་ཆོས་སྐུ་དམ་པས་ཕྱག་གི་ཡེ་རྒྱས་ཐེབ་པ་ཡིན་ཏེ༔ རྒྱུ་ཚོགས་གཉིས་ལས་འབྲས་བུ་གསར་དུ་བཅོས་མི་དགོས་ན་དབང་པོ་ཡང་རབ་ཀྱི་དེ་རྟོགས་པར་རུང་ཏུ་གནས་པས་ན་ལུང་ལས་མ་བྱུང་བའི་མན་ངག་གཞི་ན་ཡོད་པ་ཡིན་ལ༔ གཞི་དེ་ངོ་བོ་ཡེ་ནས་དག་ཅིང་སྒྲིབ་བྱེད་མ་རིག་པས་མིང་ཙམ་ཡང་མེད་པས་ཀྱང་རྟོགས་སུ་རུང་བར་སྐྱེས་པ་དང་༔ རྟོགས་ཕྱིན་ཆད་གྲོལ་བ་ཡང་རྡོ་རྗེའི་དམ་བཅའ་བཞི་དང་ལྡན་པའི་གནད་ཀྱི་སྟེ༔ ནམ་མཁའ་དང་མཉམ་པའི་རྒྱུད་ལས༔ སངས་རྒྱས་ཀུན་གྱི་ཡེ་ཤེས་སྐུ༔ རང་བྱུང་ངོ་བོ་རྟོགས་ལས་བྱུང་༔ འདུས་མ་བྱས་ཀྱི་ནམ་མཁའ་འདྲ༔ གང་ཡང་མེད་པའི་སྔོན་རོལ་དུ༔ རང་བྱུང་ངོ་བོ་ཉིད་ཀྱི་སྐུ༔ ལུང་ལས་མ་བརྟེན་གདམས་ངག་ཆོས༔ རང་གི་རིག་པས་རང་རྟོགས་ཕྱིར༔ འཁྲུལ་མ་མྱོང་ལ་རྟོགས་མ་མྱོང་༔ དེ་ཚེ་འཁོར་འདས་འབྱུང་བ་མེད༔ གཞི་ཤེས་རང་བྱུང་རིག་པ་ལ༔ གཞི་ནས་མ་རིག་མེད་པའི་ཕྱིར༔ རྐྱེན་གྱི་སྔོན་འཁྲུལ་མ་མྱོང་བས༔ ལུང་ལྡན་ཀུན་གྱི་བསྟན་མི་དགོས༔ དེ་ཕྱིར་ལུང་ལས་མ་བྱུང་ཆོས༔ ཡ་མཚན་རྨད་དུ་བྱུང་བའི་བཀའ༔ སངས་རྒྱས་ཐམས་ཅད་དེ་ལས་སྐྱེས༔ ཞེས་སོ༔ འོན་ཀྱང་ཆོས་ཐམས་ཅད་ཀྱི་གནས་ལུགས་སྤྲོས་བྲལ་བདག་མེད་པ་དེ་མཚན་ཉིད་པས་ཀྱང་འདོད་པ་དང་༔ གཞི་རྒྱུད་ཟུང་འཇུག་སྐུ་དང་ཡེ་ཤེས་དབྱིངས་སུ་འདུ་འབྲལ་མེད་པ་སྔགས་སུ་འདོད་པའི་ཕྱིར༔ དེ་དག་གི་རང་ངོ་ལ་མ་རིག་པ་མེད་པས་ན་མི་མཐོང་བས་ཁྱད་མེད་པར་རིགས་སོ༔ ལྟ་ཞིག་ན་ནི་ཁྱོད་ཁོ་ནས་ཁྱད་ཆོས་སུ་མ་ཐལ་ལོ་སྙམ་ན༔ ཡོད་དེ་མཚན་ཉིད་པས་ཆོས་ཉིད་ཀྱི་གནས་ལུགས་ཡོངས་གཅོད་དུ་བསྟན་མ་བྱུང་ལ༔ རྡོ་རྗེ་ཐེག་པའི་གནས་འགྱུར་འདོད་པ་དང་གཉིས་ཀས་ཀྱང་དྲི་བཅས་དྲི་མེད་ཀྱི་གཞི་ཞེས་བརྗོད་པས་ན་འཁོར་འདས་གཞི་མཐུན་པས་སེམས་ལ་ལམ་དངོས་སུ་བཟུང་བས་སྤྲོས་བྲལ་མཛུབ་བཙུག་གི་ཚུལ་དུ་དྲི་བྲལ་ཀུན་ཏུ་བཟང་པོ་མ་མཐོང་བའི་ཕྱིར་དང་༔ གལ་ཏེ་ཆོས་སྐུ་འདུས་མ་བྱས་ཡིན་པའི་ཕྱིར་ཐབས་ཤེས་རྒྱུ་རྐྱེན་ལ་ལྟོས་དགོས་པ་མི་འཐད་པ་དང་༔ དེ་ལྟ་ན་སྔགས་དང་མཚན་ཉིད་གཞི་ལ་མ་གྲུབ་ཤིང་ལུང་སྤང་བྱར་ཡང་འགྱུར་བ་དང་༔ གྲོལ་བ་ཐམས་ཅད་ཀྱང་སོ་སོ་རང་རིག་རྟོགས་པས་གྲོལ་ན་གྲོལ་ཚུལ་གཞན་པོ་མ་ཤེས་པས་ཀྱང་གནོད་པ་མེད་ལ་འཐད་པ་དང་བཅས་པའོ༔ ཡང་གལ་ཏེ་དབྱིངས་ཡེ་འདུ་འབྲལ་མེད་པའི་ཆོས་སྐུ་རང་ལ་ཡོད་པ་ཡེ་ཤེས་རང་རིག་གི་ཚུལ་དུ་མཐོང་ནས་གྲོལ་ན་ནི་ལུང་ལས་མ་བྱུང་བས་མན་ངག་ཡིན་པར་འུབ་ཆུབ་པས་དེ་ལྟར་འོག་མ་ན་གབ་པ་གོང་མས་གསལ་བར་ཤིན་ཏུའང་ཁས་བླང་བར་བྱའོ༔

གཉིས་པ་སྔོན་གྱི་སངས་རྒྱས་ཀྱིས་རྟོགས་ཚུལ་ནི༔ དེ་ཡང་ཆོས་སྐུ་ཀུན་ཏུ་བཟང་པོ་ནི༔ སྟོན་བྱེད་སློབ་དཔོན་མེད་པར་ཁྱད་ཆོས་དྲུག་གིས་སངས་རྒྱས་པས་ན་སྔོན་གྱི་རྟོགས་ཚུལ་ལོ༔ ཇི་ལྟར་ན་གཞིའི་ཆོས་སྐུ་ཀུན་ཏུ་བཟང་པོ་རྒྱུ་ལས་མ་བྱུང་བས་སངས་རྒྱས་ཡིན་པའི་གནད་ཀྱིས་ཡེ་ནས་སྣང་སྟོང་ཟུང་འཇུག་ཆེན་པོར་ལྷུན་གྱིས་གྲུབ་པས་སྐུ་དང་ཡེ་ཤེས་ཀྱི་སྣང་བ་རབ་འབྱམས་པ་ལ༔ སེམས་ལས་མ་བྱུང་པས་རང་རིག་པའི་ཡེ་ཤེས་བརྗོད་པ་དང་བྲལ་བའི་ལུང་ངམ་སྟོན་བྱེད་ཀྱི་སློབ་དཔོན་གཞན་མེད་པར་གཉིས་འཛིན་དང་བྲལ་བར༔ རང་གི་སེམས་ཉིད་ཀྱི་སྣང་ལྡོག་དེ་ལྟར་ཡེ་ནས་རང་ཤར་ཆེན་པོ་དབྱིངས་སེམས་ཉིད་འོད་གསལ་གྱི་ངོར་སྣང་བ་ཡིན་པར་ཤེས་པའི་འབྱེད་བྱེད་ཀྱི་ཤེས་རབ་ཆེན་པོ་སྐྱེས་ནས་གྲོལ་བ་ཡིན་ན༔ རང་སྣང་བ་ཡིན་པར་ཤེས་པས་གཟུང་བ་ཡུལ་མེད་དུ་རྟོགས༔ རང་ཤར་བ་ཡིན་པས་འཛིན་པ་རང་ཞིར་གྲོལ་ཏེ༔ མ་རིག་པ་གཞི་ནས་སངས་བས་རང་གྲོལ་བ་ཡིན་ཏེ༔ སྟོན་པ་ཀུན་ཏུ་བཟང་པོའི་དེ་ལྟར་རྟོགས་ནས་སངས་རྒྱས་པའོ༔ ཡེ་ཤེས་ནམ་མཁའ་དང་མཉམ་པའི་རྒྱུད་ལས༔ རང་བྱུང་ཀུན་ཏུ་བཟང་པོ་ལ༔ ཡུལ་མེད་འཛིན་པ་མེད་པའི་ཕྱིར༔ དུས་དེ་ཉིད་ནས་མ་རིག་སངས༔ དེ་ཕྱིར་ལུང་ལས་མ་བྱུང་བས༔ ངེས་དོན་སྙིང་པོའི་ཆོས་ཞེས་བྱ༔ ཀུན་བཟང་སློབ་དཔོན་མེད་པའི་ཕྱིར༔ ཕྱི་ནང་ཆོས་ཀུན་བཤད་ལུང་མེད༔ དེ་ཕྱིར་གཞན་ལ་མ་བརྟེན་པའི༔ རང་གི་རིག་པས་ཤེས་པའི་ཕྱིར༔ ལུང་ལ་མ་བརྟེན་མན་ངག་ཆོས༔ རྒྱལ་བ་རྣམས་ཀྱི་རྟོགས་ཚུལ་ཡིན༔ ལུང་ལ་མ་བརྟེན་ཆོས་སྐུ་ལ༔ འཁོར་བ་བཙལ་གྱིས་མ་རྙེད་པས༔ སངས་རྒྱས་ཀུན་ཏུ་བཟང་པོ་བྱ༔ བག་ཆགས་ཀུན་གྱིས་མ་གོས་ཕྱིར༔ རྟོག་པ་མེད་ཕྱིར་ཡེ་ཤེས་རྒྱས༔ ལུང་ལ་མ་བརྟེན་གདམས་ངག་ཡིན༔ ཞེས་སོ༔

གཉིས་པ་དེ་ཉིད་ལམ་རྣལ་འབྱོར་བས་རྟོགས་ཚུལ་ལས་ཀྱང་ལུང་ལས་མ་བྱུང་བའི་མན་ངག་ཡིན་ཏེ༔ མཚན་ཉིད་པས་ནི་རྟགས་དང་གཏན་ཚིགས་ལ་བརྟེན་ནས་རྣམ་གཅོད་ཀྱི་གོ་ཡུལ་ཙམ་ལས་རང་གནས་ཀྱི་ཡེ་ཤེས་རང་ལ་བརྟེན་ནས་ཡོངས་གཅོད་དུ་གཏན་ལ་ཕབ་པ་མེད་པ་དང་༔ དེ་ནས་དང་པོ་རྟོག་པས་བཟོས་པའི་སྤྲོས་བྲལ་ལ་བློ་བཞག་ནས་དེའི་བག་ཆགས་གོམས་པས་མཐར་གནས་ལུགས་མཐོང་བས་ལམ་དུ་རེ་སྨོན་འདེབས་ན༔ འདིར་ནི་བླ་མའི་བརྡ་ཙམ་སྦྱར་བས་རྐྱེན་བྱས་ཏེ༔ ནང་རང་གནས་ཀྱི་ཡེ་ཤེས་ཉིད་ཀྱིས་མཚན་དཔེ་གདམས་པར་ཤར་བ་ལས་ལམ་བྱེད་ཅོག་བཞག་རང་མལ་དུ་འགོད་པས་ཁྱད་པར་ཡོངས་སུ་གཅོད་པ་ཞེས་བྱ་བས་ན་རྟོགས་པའང་དངོས་དང་གཟུགས་བརྙན་དུ་ཁྱད་ཆེ་བས་དམན་པ་ལ་དགག་སྒྲ་སྦྱར་ནས༔ ལུང་གིས་གཏན་ལ་མི་ཕབ་སྟེ་དད་པས་རྗེས་སུ་འགྲོ་བ་ཡིན་ཟེར་གྱི་བླ་མའི་ཞལ་ལུང་ཙམ་དང་༔ རྡོ་རྗེ་འཆང་གི་རྒྱུད་དུ་བསྟན་པ་དག་ཀྱང་མཐོང་མ་དགོས་ཞེས་པ་དོན་དུ་ངེས་པ་མེད་པ་དང་༔ ཡང་ཨ་ཏི་རང་མ་གཏོགས་པའི་ལུང་གཞན་ལས་མ་བྱུང་བའི་སྤྲོས་བྲལ་མཛུབ་བཙུག་ལ་གོ་ཡང་རུང་བའོ༔ རྒྱ་མཚོ་ཀློང་གསལ་ལས༔ དཔེར་ན་མུན་ནག་རྫས་སྟོར་ལ༔ ལག་ནོམ་བཙལ་བས་རྙེད་པར་དཀའ༔ སྣང་གསལ་སྒྲོན་མེ་ལ་བརྟེན་ནས༔ བཙལ་བས་རྙེད་པར་ཐེ་ཚོམ་མེད༔ དེ་བཞིན་མ་རིག་མུན་ནག་ཏུ༔ ཆོས་ཉིད་ནོར་བུ་སྟོར་བ་དེ༔ ཐ་སྙད་ཚིག་གིས་རྙེད་པར་དཀའ༔ མ་ནོར་བླ་མའི་ཞལ་དྲིན་གྱི༔ རིན་ཆེན་བརྡ་ཡིས་རྙེད་པར་འགྱུར་ཞེས་སོ༔ ༜ དེ་ཡང་ཀུན་མཁྱེན་གྱིས་སྔར་གྲོལ་བ་དང་ད་འོངས་ཐམས་ཅད་དུ་ལམ་འདིས་གྲོལ་པ་ཁྱད་ཆོས་དྲུག་གི་ཀུན་ཏུ་བཟང་པོ་བཞིན་གྲོལ་བར་གསུངས་པས་ན་ལུང་ལས་མ་བྱུང་བའི་མན་ངག་ཞེས་བྱ་སྟེ༔ ༜ ཡེ་ཤེས་ཀློང་གི་རྒྱུད་ལས༔ གདོད་ནས་མ་རིག་སྐྱོན་མ་གོ༔ ལུང་ལ་མ་བརྟེན་རིག་ཅིང་རྟོགས༔ སངས་མ་རྒྱས་པའི་རིག་པ་ལ༔ རང་བྱུང་ཡེ་ཤེས་དེ་ལ་བྱ༔ ཞེས་སོ༔

སྐབས་འདིར་རྒྱུད་སྡེ་གཞན་ལས་སྟོང་ཐུན་ཅུང་ཟད་བླང་ན༔ འཇམ་དཔལ་གྱི་རྒྱུད་ཐུན་མོང་པ་ལས༔ སངས་རྒྱས་ཐོག་མ་ཐ་མ་མེད༔ དང་པོའི་སངས་རྒྱས་རྒྱུ་མེད་པ༔ ཡེ་ཤེས་མིག་གཅིག་དྲི་མ་མེད༔ ཡེ་ཤེས་ལུས་ཅན་དེ་བཞིན་གཤེགས༔ ཞེས་གསུངས་ཏེ༔ ཡེ་ནས་མ་འཁྲུལ་མ་མྱོང་བ་སྤྲོས་བྲལ་གཞིའི་སང༵ས་རྒྱས༵་ཉིད་སྔར་མེད་པ་ལས་དུས་རེ་ཞིག་ན་འབྱུང་པ་དང་༔ བྱེད་རྩོལ་གྱིས་བསླད་ནས་བསྒྲུབ་ནས་གྲུབ་པ་མིན་པར་ཐོ༵ག་མ༵་ནས་སངས་རྒྱས་སུ་ཡོད་པ་དང་༔ ཐ༵་མ༵་འདི་ཙམ་ནས་རྒྱུད་ཆད་པ་མེ༵ད་པས་ཐོག་མ་དང་ཐ་མ་མེད་པ་ཞེས་བྱ་ལ༔ ད༵ང་པོ༵འི་དུས་ནས་མ་རིག་པ་གཞི་ལ་མ་གྲུབ་པས་སང༵ས་པ་དང་༔ སྐུ་དང་ཡེ་ཤེས་ཡོན་ཏན་གྱི་ངང་མ་བཙལ་ལྷུན་གྱིས་གྲུབ་པར་རྒྱས༵་ཤིང་༔ སྐྱེད་བྱེད་རྒྱུ༵་རྐྱེན་གྱི་དངོས་པོ་ཚོགས་གཉིས་སོགས་གང་ཡང་དགོས་པ་མེ༵ད་པ༵འི་རང་བྱུང་བ༔ ངོ༵་བོ༵་སྤྲོས་པ་དང་བྲལ་བའི་སྟོང༵་པ༵་ཆོས༵་ཀྱི་སྐུ༵་དང་འདུ་འབྲལ་མེད་པར་ར༵ང་བཞི༵ན་འོད་གས༵ལ་ཡེ༷་ཤེས༷་ཀྱི་སྣང་ཆ་མ་འགགས་པས་རང་གསལ་བ༵་ལོང༵ས་སྤྱོད་རྫོགས་པའི་སྐུ༵༔ ཐུགས༵་རྗེ༵་ཇི་ལྟ་ཇི་སྙེད་དབྱེར་མེད་མཁྱེན་པའི་ཡེ་ཤེས་མི༷ག་གཅི༷ག་སྤྲུལ༵་བའི་སྐུའི༵་འཁོར་འདས་ཀུན༵་ལ་ཁྱབ༵་པའི་རྩལ་ཉིད་རྩོགས་པའི་བག་ཆགས་དང་བདག་གཞན་དུ་འཛིན་པའི་མ་རིག་པ་དང་༔ དེའི་རྒྱུ་ལས་བྱུང་བའི་ལས་དང་ཉོན་མོངས་ཀྱིས་དྲི༷་མ༷་ཀུན་གྱི་གོས་པ་མེ༷ད་པ༔ འབྲས་ཆོས་ཀྱི་ཡོན་ཏན་ཐམས་ཅད་པའི་རྟེན་དུ་གྱུར་བས་ཡེ༷་ཤེས༷་ངོ་བོ་སྐུར་གནས་པའི་ཆ་ནས་ལུས༷་ཅ༷ན་དུ་བླ་དག་སྦྱར་བ་དེ་ནི་རྒྱུ༵་ལ༵ས་མ༵་བྱུང༵་བ༵ས་འབྲས༵་བུ༵་རང་ལ་ཡོད་པའི་དེ༷་བཞི༷ན་གཤེ༷གས་པ་ཞེས་བྱའོ༔

ཡང་༔ རྣམ་པར་ཤེས་པ་ཆོས་ཉིད་འདས༔ ཡེ་ཤེས་གཉིས་མེད་ཚུལ་འཆང་པ༔ རྣམ་པར་རྟོག་མེད་ལྷུན་གྱིས་གྲུབ༔ དུས་གསུམ་སངས་རྒྱས་ལས་བྱེད་པ༔ ཞེས་གསུངས་པས༔ སྣང་ལུགས་རྣ༷མ་པ༷ར་ཤེས༷་པ༷་ཚོགས་བརྒྱད་ཀྱི་གནས་ལུགས་ཆོས༷་ཉིད༷་ནི༔ ཕྱོགས་སམ་སྤྲོས་པའི་གྲྭ་ཟུར་ཐམས་ཅད་ལས་འདས༷་པ་དབྱིངས་དང་ཡེ༷་ཤེས༷་སྣང་སྟོང་གཉིས༷་མེ༷ད་མཉམ་པ་ཉིད་ཀྱི་ཚུལ༷་འཆ༷ང་པ༷་རང་རིག་པའི་ཡེ་ཤེས་ལ༔ བློའི་ཡུལ་ལ་རྣམ༷་པར༷་རྟོག༷་པའི་གཟུང་འཛིན་ངང་གིས་མེ༷ད་ཅིང་ཡོན་ཏན་ལྷུན༷་གྱིས༷་གྲུབ༷་པར་རྫོགས་པའོ༔ བདེ་བར་གཤེགས་པའི་སྙིང་པོ་དེ་ཉིད་ཡོད་པའི་གནད་ཀྱིས་དེ་ཐོག་མ་ནས་ཡེ་སངས་རྒྱས་པ་དང་ད་ལྟའང་ཉམས་པ་མེད་པ་དང་༔ ཐ་མ་མངོན་དུ་འགྱུར་རུང་བའི་ལས་ཀྱང་བྱེད༔ རང་ངོར་དུས་གསུམ་སངས་རྒྱས་སྔར་བྱོན་པ་ཐུབ་པའི་དབང་པོ༔ ད་ལྟ་དགེ་བའི་བཤེས་གཉེན༔ མ་འོངས་པ་ན་ཚོགས་སྦྱོར་སྤྲུལ་སྐུ༔ མཐོང་བསྒོམ་དུ་ལོངས་སྐུ༔ དེ་ཡན་ཆད་ཆོས་སྐུའི་སྣང་བ་འགོག་མེད་དུ་སྣང་བའང་དེའི་དབྱིངས་ཀྱི་གཟུགས་བརྙན་ཡིན་པ་དང་༔ གཞན་ཡང་དུས༷་གསུམ༷་གྱི་སང༷ས་རྒྱས་འབྱུང་བ་ཐམས་ཅད་ཀྱང་འདི་ཉིད་ལ་རང་ས་ཟིན་པའི་སྟོབས་ལས་ཡིན་པས་ན༔ ལ༷ས་བྱེད༷་པ༷་ཞེས་སེམས༵་ལ༵ས་མ༵༵་བྱུང༵་བ༵འི་དུས་གསུམ་གྱི་སངས༵་རྒྱས༵་བསྟན་པ་དང་༔ ཡང་ཤེས་རབ་ཆེན་པོའི་སྐད་ཅིག་ལ༔ ཆོས་ཀུན་ཁོང་དུ་ཆུད་པར་འཆང་༔ ཞེས་དང་རྒྱུད་དཀྲུགས་པས་དབང་གི༔ སྐད་ཅིག་གཅིག་གིས་བྱེ་བྲག་ཕྱེད༔ སྐད་ཅིག་གཅིག་གིས་རྫོགས་སངས་རྒྱས༔ ཞེས་བསྡུས་ཏེ་འཆད་ན༔ གཞི་ལས་གཞི་སྣང་ཤར་བ་ལ་ཤེས༷་ར༷བ་ཆེན༷་པོ༷འི་སྐད༷་ཅི༷ག་དེ་མ་ཐག་པ་ལ༷་ར༵ང་ངོ༵ར་རང་སྣང༵་བ༵ས་ཆོ༷ས་ལྷུན་གྲུབ་སྒོ་བརྒྱད་པོ་དེ་དག་ཀུན༷་གཞན་དུ་མ་བཟུང་བར་རང་སྣང་ཡིན་པར་ཤེས་ནས་གྲོལ་འཁྲུལ་གང་དུ་ཡང་ལུང་མ་བསྟན་པའི་གཞི༵་ལ༵ས་འཕ༵གས་ཏེ་གྲོལ་གཞི་རུ་སོང་བ༵་དང་༔ རང་སྣང་དེ་ཡང་དབྱིངས་ལ་ཡོན་ཏན་ལྷུན་གྱིས་གྲུབ་པར་ཡོད་པ་ཉིད་ཤར་པ་ཡིན་པ་ཁོང༷་དུ་ཆུད༷་པ༷འི་ཤེས་རབ་ཀྱི་རྩལ་འཆ༷ང་གིས་སྐད༷་ཅིི༷ག་གཅི༷ག་གི༷་འགྱུ་བ་རང་ཐོག་ཏུ་ཆོད་བྱེ༵་བྲག༵་ཕྱེད༵་པའི་རྟོགས་པ་སྐྱེས༔ བྱེ་བྲག་ཕྱེད༵་པས་ཐོ༵ག་ཏུ༵་སྐད༷་ཅི༷ག་གཅི༷ག་གི༷ས་ཤེས་རབ་སྐུར་སྨིན་ནས་ཡེ་ཤེས་ཆོས་ཀྱི་སྐུ་དང་དབྱེར་མེད་མངོན་པར་རྫོགས༷་པར་གྲོལ༵་བ༵་ཐོབ་སྟེ་གཞ༵ན་གྱིས་བསྟན་པས་ལུང༵་ལ༵ས་མ༵་བྱུང༵་བ༵ས་དཔལ་རང་བྱུང་གི་སང༷ས་རྒྱས༷་རང་ཐོག་ཏུ་ར༵ང་ས༵ར་ཟིན་ནས་ཕྱིན་ཆད་འཁྲུལ་མི་ཤེས་པར་གནས༵་པ༵་ནི༔ ལུང་ལས་མ་བྱུང་བའི་མན་ངག་གོ༔ ཁྱད་ཆོས་དྲུག་གི་གྲོལ་བ་འདི་སྔ་ཕྱིར་སངས་རྒྱས་པ་ཐམས་ཅད་ལ་ཡོད་པ་ཡིན་ནོ༔

ད་ནི་དེ་དག་གི་གནད་བསྡུས་ཏེ་སངས་རྒྱས་མཛུབ་བཙུག་ཏུ་བཤད་པ་ནི༔ རང་གི་ད་ལྟར་གྱི་རིག་པ་བསམ་དུ་མེད་པ༔ འདུས་མ་བྱས་པ་ཡུལ་དང་ཡུལ་ཅན་གཉིས་སུ་མེད་པ༔ རྣམ་རྟོག་གི་གཡོ་བ་མེད་པ༔ ངོ་བོ་འགྱུར་བ་མེད་པ༔ རང་བཞིན་སྐྱེ་བ་མེད་པ༔ ངག་གིས་བརྗོད་དུ་མེད་པ༔ རྒྱུ་རྐྱེན་གྱིས་སྒྲུབ་དུ་མེད་པ་སྟེ༔ གཡོ་རྩོལ་དང་དགག་སྒྲུབ་དང་༔ ཡིད་དཔྱོད་དྲན་རྟོག༔ ཆགས་འཛིན་ཞེན་པ༔ འབད་རྩོལ་བཅས་བཅོས་ཐམས་ཅད་སངས་ཤིང་༔ སྤྲོས་བྲལ་གྱི་ངང་རྒྱས༔ རིག་ཡིད་ཀྱི་སེམས་པ་མེད་པར༔ འགྱུར་མེད་ཀྱི་བདེ་ཆེན་དུ༔ གཞི་གནས་བྱར་མེད་ཀྱི་ཡེ་ཤེས་རྒྱས་པ་སྟེ༔ སལ་ལེ་སང་ངེ་ཝལ་ལེ་རིག་གེ་རྗེན་ནེ་ཡེ་རེ་བས་མཚན་ཉིད་དྲུག་དང་སངས་རྒྱས་ཀྱི་ཡོན་ཏན་བརྒྱད་ལྡན་འདི་སྤྲོས་བྲལ་མཛུབ་ཀྱི་བཙུག་པ་ཡིན་པར༔ སྣང་སྲིད་ཁ་སྦྱོར་བདུད་རྩིའི་ཐིག་པ་འཁོར་བ་ཐོག་མཐའ་གཅོད་པའི་རྒྱུད་ལས༔ སངས་རྒྱས་ཡེ་ནས་སེམས་ལ་གྲུབ༔ གྲུབ་ཟིན་དོན་ལས་མ་ཡེངས་པ༔ གཞན་ནས་སངས་རྒྱས་བཙལ་མི་དགོས༔ ཆོས་རྣམས་ཐམས་ཅད་སེམས་ལ་འདུས༔ ཞེས་དང་༔ སྣང་སྲིད་སེམས་ལ་འདུས་པས་སངས་རྒྱས་མཛུབ་བཙུག་ཡིན༔ ཞེས་སོགས་སངས་རྒྱས་མཛུབ་བཙུག་གི་ལེའུ་ལས་གསུངས་པ་ལྟ་བུའོ༔

གསུམ་པ་མཐོང་ལམ་དུ་ཡེ་ཤེས་རང་རིག་མངོན་དུ་གྱུར་པ་ནི༔ བླ་མས་བསྟན་པ་ལྟར་ཆོས་སྐུ་མངོན་སུམ་དུ་མཐོང་བ་ཡིན་ནོ༔

གཉིས་པ་བསྒོམ་ལམ་དུ་ལམ་བསྒོམ་པས་ཉམས་སུ་བླང་བ་ལ༔ དེ་ཉིད་བར་དོ་གང་གི་ཉམས་ལེན་ཡིན་པ་དང་༔ ཉམས་སུ་ལེན་པ་དངོས༔ དེའི་དགོས་པའམ་ཡོན་ཏན་གསུམ་ལས༔ དང་པོ་ནི༔ ལར་ཁྲེགས་ཆོད་དང་ཐོད་རྒལ་གྱི་ཉམས་ལེན་འདི་ནི་བར་དོ་དང་པོ་གཞི་དབྱིངས་ནམ་མཁའ་ལྟ་བུར་སྤྲོས་པ་ཐམས་ཅད་དང་བྲལ་བ་ཀ་དག་གི་རང་བཞིན་གང་གི་ཡང་ཕྱོགས་སུ་མ་ལྷུང་བ་ཞིག་སྐད་ཅིག་གསུམ་ལ་འཆར་བ་དེ་ནི་འཁོར་འདས་བར་དོ་ཟེར་བས་ན་དེ་ཉིད་དང་རྗེས་སུ་མཐུན་པས༔ འོད་གསལ་དཔེ་དོན་གང་རུང་ནི་ཁྲེགས་ཆོད་ཀྱི་སྐྱོང་བས་སྟོངས་ཐེབ་སྟེ་དེ་དུས་འོད་གསལ་ཡང་དག་པར་ཤར་བ་ལ་སྔར་ལྟར་ཉོན་ཤེས་ཕྲ་བ་ཙམ་ཡང་མེད་པའི་རང་ངོ་ཤེས་པ་དང་མཉམ་དུ་ཀ་དག་གི་ས་ལ་བྱང་ཆུབ་པ་དང་༔ ལྷུན་གྲུབ་སྐུ་དང་ཡེ་ཤེས་ཀྱི་རང་མདངས་འགགས་པ་མེད་པ་བར་དོ་གཉིས་པ་ཕན་ཆད་ལ་འཆར་བ་དེ་ཐོད་རྒལ་བསྒོམ་སྟོབས་ཀྱི་རང་ངོ་ཤེས་པས་འཇུག་པ་གཉིས་ལྡན་གྱི་སྒོ་ནས་གྲོལ་བ་ཐོབ་པར་འགྱུར་བས་དེ་གཉིས་ཁོ་ན་འོད་གསལ་སྣང་སྟོང་གི་ངོ་ཏི་ཟངས་མས་ཉམས་ལེན་ཡིན་ཏེ༔ འཇམ་དཔལ་ཡང་ཏི་ནག་པོའི་རྒྱུད་ལས༔ ངེས་དོན་རྟོགས་པའི་རྣལ་འབྱོར་པས༔ ལན་གཅིག་སྐྱེ་འཆིའི་བདུད་བྱུང་ཚེ༔ ཡེ་ཤེས་ཆོས་སྐུ་གཟུགས་བརྙན་ནི༔ ལོངས་སྤྱོད་རྫོགས་དང་སྤྲུལ་པ་འབྱུང་༔ ཞེས་སོ༔

གཉིས་པ་ལམ་ཉམས་སུ་ལེན་པ་ལ༔ ལེན་དགོས་པའི་རྒྱུ་མཚན་དང་༔ ཇི་ལྟར་ལེན་པའི་ཐབས་དང་༔ དགོངས་པའི་ངོ་བོ་གསུམ་ལས༔ དང་པོ་ནི༔ ད་ལྟ་དལ་འབྱོར་ཕུན་སུམ་ཚོགས་པ་ཐོབ་པའི་དུས་འདིར་རང་མགོ་ཆོས་ཀྱིས་འདོན་དགོས་ཀྱི༔ གཞན་སུས་ཀྱང་སངས་རྒྱས་སུ་བཙན་ཐབས་བྱེད་རྒྱུ་དཀོན་ལ༔ དེ་ཡང་ཐོས་པའི་ཤེས་རབ་ནི༔ རང་གང་ཉམས་སུ་བླང་རྒྱུ་དེ་ལ་ངེས་པར་ཐབས་མི་སྡུག་པ་ཞིག་དགོས་ཀྱི༔ དེ་ལས་མང་མི་དགོས་དེ་མི་ཚེ་ཡུད་ཙམ་དུ་གནས་ཤིང་དེ་ལ་སྤྲོས་རྒྱ་བསྐྱེད་ཆེས་པས་འཆི་བདག་གི་སླེབ་ན་ཅི་ཡང་མི་ཕན་པའི་སྟེང་དུ་བློ་ལྷག་རི་ཙམ་ཡོད་པའི་ཕྱིར་རོ༔ བསམ་པའི་ཤེས་རབ་ཀྱང་དེ་ལས་གལ་ཆེ་བར་རང་རྒྱུད་ལ་སྦྱོར་དགོས་ཤིང་༔ འབྱོར་བར་ཡང་འགྱུར་ན་ཧ་ཅང་སྤྲོས་པ་ཆེ་ན་མདས་བརྒྱབ་པའི་དུག་སོ་ལ་ཡོད་དམ་སྒྲོ་ལ་ཡོད་བསམ་གྱིས་བསྡད་ཀྱང་མི་ཕན་པར་དུག་གིས་ཟིན་ནས་འཆི་བར་དཔེ་བཞག་པར་མཛད༔ བསྒོམ་པའི་ཤེས་རབ་ནི་དེ་གཉིས་ལས་མཆོག་ཏུ་གྱུར་པ་ཡིན་ཏེ༔ དཔེར་ན་ཟས་ཡོད་ཀྱང་མ་ཟོས་ན་ལྟོག་ཕུང་མི་སེལ་བ་དང་༔ ཟོས་ན་སེལ་བ་འདྲ་བས་ན་ཤིན་ཏུ་གལ་ཆེ༔ དུས་ངན་གྱི་མཐའ་མ་ལ་བཤད་བསྒྲུབ་གཉིས་ལས༔ བཤད་པ་ལ་གཙོ་བོར་འདོད་པ་འདི༔ བལྟ་སྣང་གྲགས་འདོད་ཀྱི་བདུད་ཀྱིས་ཟིན་པ་དང་འབྲས་བུ་སངས་རྒྱས་ཐོབ་པའི་གེགས་སུ་དེ་ལས་ཆེ་བ་མེད་པར་ངེས་ཏེ༔ བསྒོམ་པའི་ཐབས་སུ་མིན་ན་མདོ་རྒྱུད་མན་ངག་དོན་མེད་པ་དང་བཅས་པར་འགྱུར་ཏེ་སྨྲ་ལ་དགའ་བས་ཤུན་པ་མི་བསྡུ་བར་མཉམ་པར་བཞག་པའི་སྙིང་པོ་ཚོལ་བ་འདི་གནད་གལ་པོ་ཆེ་ཡིན་ནོ༔ ཕལ་ཆེན་ལས༔ ཇི་ལྟར་འོན་པ་རོལ་མོ་མཁན༔ གཞན་དག་དེ་ཡིས་དགའ་བྱེད་ཅིང་༔ རང་ཉིད་ཀྱིས་ནི་མི་ཐོས་ལྟར༔ མ་བསྒོམ་ཆོས་ཀྱང་དེ་དང་འདྲ༔ ཇི་ལྟར་སྐོམ་པས་གདུང་པ་ཡིས༔ ཆུ་ནི་མཐོང་དང་ཐོས་ཙམ་གྱིས༔ སྐོམ་པའི་གདུང་བ་མི་སེལ་ལྟར༔ མ་བསྒོམ་ཆོས་ཀྱང་དེ་དང་འདྲ༔ ཇི་ལྟར་མཉེན་པ་མཁས་པ་ཞིག༔ གཞན་དག་དེ་ཡིས་སྒྲོལ་བྱེད་ཀྱང་༔ རང་ཉིད་དེར་ནི་འཆི་བ་ལྟར༔ མ་བསྒོམ་ཆོས་ཀྱང་དེ་དང་འདྲ༔ ཞེས་སོ༔ ཁྱད་པར་དུ་ཡང་རྟོག་གེའི་བློ་ལས་འདས་པ་དེ་བཞིན་གཤེགས་པའི་དགོངས་པ་ཟབ་མོ་ཐོས་བསམ་གྱི་ཡུལ་མ་ཡིན་པའི་ཕྱིར་གཞོན་ནུ་མ་ཡི་བདེ་བ་དམ་པ་ལྟ་བུའི་དབང་ཕྱུག་དམ་པ་ཉམས་སུ་མྱོང་བ་མེད་པའི་ཚུལ་གྱིས་ཉམས་སུ་མྱོང་བ་ནི་བསྒོམ་པ་ཡིན་པའི་ཕྱིར་ཡང་བསྒོམ་དགོས་པ་དང་༔ དེ་ལྟ་ནའང་སྤང་བྱ་ཉོན་མོངས་ཀྱི་བློ་མགོ་གནོན་པ་སེམས་ཀྱི་བསྒོམ་པ་དང་༔ དྲུང་ནས་འབྱིན་པ་མུན་པའི་སྨག་ལ་སྒྲོན་མེ་ལྟ་བུའི་ཡེ་ཤེས་རང་བྱུང་གི་ངང་དུ་འབྱམས་ཀླས་པའི་བསྒོམ་པ་གཉིས་སུ་ཡོད་པའི་མཆོག་ཡེ་ཤེས་ཀྱི་ངང་ལ་རྟོན་པ་ཉིད་ཡིན་གྱི་གཞན་ཐོས་བསམ་བཟང་འཁྲུལ་གསེར་སྒྲོག་གིས་འཁོར་བར་བཅིང་བའང་སེམས་སེམས་བྱུང་གི་བློ་དང་རྫས་མི་འགལ་ཞིང་སྣོན་མར་གྱུར་པ་དང་༔ ཡང་དེ་ལྟ་ན་དམིགས་གཏད་སེམས་ཀྱི་བསྒོམ་པའང་སེམས་དང་འཛིན་སྟངས་འགལ་ཡང་བློ་རྫས་སུ་མི་འགལ་བས་ན་ཕན་པ་ཆུང་ཞིང་༔ རྫོགས་པ་ཆེན་པོའི་ལམ་མྱུར་བའང་འདི་ནས་འགྲུབ་བོ༔ ཇི་སྐད་དུ༔ ཐོས་དང་བསམ་དང་བསྒོམ་པས་ནི༔ དེ་ཡི་དོན་ཉིད་ཤེས་མི་འགྱུར༔ སྒྲ་ཚད་རྣམས་ཀྱི་སྤྱོད་ཡུལ་མིན༔ ལུང་དང་རིག་པའི་སྤྱོད་ཡུལ་མིན༔ ཞེས་དང་༔ བསམ་དུ་མེད་པའི་ཆོས་ཉིད་བྱང་ཆུབ་སེམས༔ བསམ་དང་བསྒོམ་པས་གཏན་ལ་དབབ་དུ་མེད༔ ཅེས་དང་༔ སྤྲོས་གཅོད་སྡེ་ལྔ་ལས༔ ཡིད་ཀྱི་བཙོན་བཟུང་བསྒོམ་པ་དེ༔ དྲན་པ་བཞི་འགྱུར་བསྒོམ་པས་ཡིན༔ ཡིད་དཔྱོད་བློས་བསྒོམ་རྩོལ་བ་དང་༔ བསྒོམ་ཡུལ་སྒོམ་མཁན་རྩོལ་བ་དང་༔ བཅས་བཅོས་ཡིད་སྨོན་བསྒོམ་པ་དང་༔ དེ་དག་སེམས་ཀྱི་རྩོལ་བ་སྟེ༔ བསམ་དུ་མེད་པའི་དོན་མ་རྟོགས༔ ཞེས་སོ༔

གཉིས་པ་ཇི་ལྟར་ལེན་པའི་ཐབས་ལ༔ བཞག་ཐབས་ཀྱི་སྒོ་ནས་ཡེ་ཤེས་མངོན་དུ་འཆར་བའི་མན་ངག༔ ཏིང་འཛིན་གྱི་སྒོ་ནས་སྐུ་གསུམ་དུ་བཙན་ས་འཛིན་པའི་གདམས་ངག༔ དགོངས་སྤྱོད་ཀློང་དུ་སྐྱོལ་བའི་སྒོ་ནས་འོད་གསལ་མ་བུ་སྤྲད་པ༔ གྲོལ་ཚུལ་གྱི་སྒོ་ནས་སྣང་སྤྱོད་ཡེ་ཤེས་ཀྱི་གྲོགས་སུ་འཁྱེར་བའི་མན་ངག༔ ཟིལ་གནོན་གྱི་སྒོ་ནས་ལྟ་བསྒོམ་སྤྱོད་པ་ཉམས་བྱུང་གི་བདུད་གཅོད་པའི་མན་ངག་གོ༔

དང་པོ་ནི༔ དེ་ལ་ཡེ་ཤེས་ཀྱི་ངོ་བོ་བློས་བསྒོམ་དམིགས་ཀྱི་ཡུལ་དུ་མ་གྱུར་བས་ཅི་ཙམ་དུ་རྩོལ་བས་བསྒོམ་ཀྱང་ཕན་པ་མེད་པས་མ་བསྒོམ་པ་ཁོ་ན་གནད་ཡིན་ཏེ༔ སྣང་སེམས་ཐམས་ཅད་ཅོག་གིས་བཞག་པའི་སྤྲོས་བྲལ་ཡེ་ཤེས་ཆེན་པོའི་གཤིས་མཉམ་པ་ཉིད་ལ་རྣལ་འབྱོར་གྱི་བློ་ཡང་ཐོག་ཏུ་ཕོག་པ་ཞེས་བྱ་སྟེ༔ དོན་དུ་ཡེ་ཤེས་ཀྱི་གནས་ལུགས་ཀྱི་སྟེང་དུ་སླེབ་པ་ཡིན་ནོ༔ དེ་བས་བསྒོམ་དུ་མེད་པའི་བཞག་ཐབས་ལ་བརྩོན་པར་བྱ་སྟེ༔ ཡེ་ཤེས་གཏིང་རྫོགས་ལས༔ དེ་ལྟར་བསྒོམ་ཆེན་སེམས་ལ་དངོས་མེད་ན༔ མི་གནས་མི་རྟོགས་འཇོག་པ་རྣལ་འབྱོར་ཡིན༔ རྣལ་འབྱོར་ཅི་ཡང་ཡིད་ལ་མ་བསྒོམ་ན༔ ཡང་དག་ལྟ་བས་དོན་དང་མཐུན་པར་འགྲུབ༔ ཞེས་སོ༔

དེ་ལྟ་བུའི་བཞག་ཐབས་དེ་ལ༔ མདོ་དང་རྒྱས་པ༔ གནད་བསྡུས་གསུམ་ལས༔ དང་པོ་ནི༔ འདས་པའི་རྣམ་པར་རྟོག་གི་རྗེས་སུ་མི་འབྲང་༔ མ་འོངས་པའི་སྔོན་མི་བསུ༔ ད་ལྟ་བ་ལ་བློས་མི་དཔྱོད་པར་བཞི་ཆ་གསུམ་བྲལ་གྱི་ཡེ་ཤེས་ཆེན་པོའི་སྤྲོས་བྲལ་དབྱིངས་ཀྱི་བདེ་ཆེན་རིག་པ་ཡེ་ཤེས་བླ་མས་ངོ་སྤྲད་པ་དེ་ཉིད་ཀྱི་ངང་ལ་བཞག་པ་ནི༔ རིག་པ་ ༼ རིག་པ་ཅོག་བཞག །༽སྐྱེ་མེད་དུ་བཞག་པ་ཞེས་བྱ་བ་དང་༔ རིག་པ་དེའི་ངང་ལ་བཞག་གོ་སྙམ་ནས་ངོ་ལ་བལྟ་བ་ངང་ལ་བསྒོམ་པ་ཡིན་སྙམ་དུ་ཀུན་སྦྱོར་གྱི་དཀྲིས་པ་འོག་ཏུ་འགྱུ་བ་དང་༔ ཕྱིའི་ཡུལ་ལ་མངོན་དུ་རྒྱུ་བ་ཐམས་ཅད་རང་སར་བཞག་སྟེ་བསྒོམ་པའི་ཆ་ནས་ཡིད་འགྱུ་བ་མེད་པར་བཞག་པ་ ༼ སྣང་བ་ཅེར་བཞག །༽ ཞེས་བྱ་བ་དང་༔ སེམས་དང་ཡེ་ཤེས་ཕྱེད་པའི་གནད་ཀྱིས་ཚོགས་བརྒྱད་དང་གཟུང་འཛིན་རྩེ་གཅིག་གི་སེམས་གནས་ཙམ་དུའང་ལྟོས་མི་འཆའ་བར་དྭངས་ཕྱིན་པས་སེམས་ཉིད་ཟང་ཐལ་རྗེན་པའི་རིག་ཆ་གཅེར་བུ་བསམ་གཞིག་དམིགས་འཛིན་གྱི་མིང་དང་བྲལ་དེ་བཞག་པས༔ སེམས་མིང་མེད་དུ་ ༼ རྒྱ་མཚོ་ཅོག་བཞག །༽བཞག་པ་ཞེས་བྱའོ༔ སྣང་སྲིད་ཁ་སྦྱོར་བདུད་རྩིའི་བཅུད་ཐིག་འཁོར་བ་ཐོག་མཐའ་གཅོད་པའི་རྒྱུད་ལས༔ རིག་པ་སྐྱེ་བ་མེད་པའི་ངང་དུ་ ༼ རིག་པ་ཅོག་བཞག །༽ཞོག༔ ཡིད་ནི་འགྱུ་བ་མེད་པའི་ངང་ལ་ ༼ སྣང་བ་ཅེར་བཞག །༽ཞོག་སེམས་ནི་མིང་མེད་འཛིན་བྲལ་ངང་ ༼ རྒྱ་མཚོ་ཅོག་བཞག །༽ དུ་ཞོག༔ ངང་བཞག་ཐབས་ཀྱིས་དྲིལ་ན་གསུམ་པོར་འདུས༔ ཞེས་སོ༔ རྒྱས་པར་བཤད་པ་ནི༔ སྤྱིར་ལྟ་བ་རི་བོ་ཅོག་བཞག༔ བསྒོམ་པ་རྒྱ་མཚོ་ཅོག་བཞག༔ སྤྱོད་པ་སྣང་བ་ཅེར་བཞག༔ འབྲས་བུ་རིག་པ་ཅོག་བཞག་བཞི་སྟེ༔

དང་པོ་ནི༔ ལྟ་བས་ཐབས་སུ་རི་བོ་ཅོག་བཞག་ལ༔ ཕྱི་ལྟར་ན་ལུས་མི་འགུལ་རི་བོ་ཅོག་བཞག་ཅེས་ཆོས་བདུན་ནམ༔ སྐུ་གསུམ་གྱི་བཞུགས་སྟངས་ལས་མི་གཡོ་བས་ལུས་དྲང་བས་རྩ་དྲང་༔ རྩས་རླུང་༔ དེས་ཐིག་ལེ་དྲང་ཞིང་བརྟན་པ༔ དེས་ཐིག་ལེ་དེ་ལ་བརྟེན་པའི་སེམས་དྲང་༔ དེས་ཡེ་ཤེས་ཀྱི་རྩལ་གཞི་ལ་ཐིམ་ནས་འགྱུ་བ་རང་སར་དག་པའི་ཆོས་ཉིད་མ་ལས་གསལ་བས་ན་རི་བོ་ཅོག་བཞག་དུ་ཟབ་ལ༔ ཡང་རིག་པ་བླ་མས་ངོ་སྤྲད་པ་དེ་ལ་གནས་ནས་བསྒོམ་པ་ན་སྣང་སེམས་ཀྱི་དམིགས་པས་མི་བསྒུལ་བར་བརྟན་པོར་གནས་པའི་ཆ་ནས་ཀྱང་རི་བོ་ཅོག་བཞག་དུ་འགྱུར་བ་དང་༔ ཡང་ན་དེ་ཉིད་ལས༔ མཆོག་རབ་རྩེ་ནས་བལྟས་པས་རི་ཕྲན་ཐམས་ཅད་མཐོང་༔ རྒྱ་མཚོ་ཆེན་པོར་བལྟས་པས་ཆུ་ཕྲན་ཐམས་ཅད་མཐོང་༔ ཞེས་པ་ལྟར་ལྟ་བས་ཐག་ཆོད་དེ་རི་རབ་ཀྱི་རྩེ་ནས་རི་ཕྲན་མཐོང་བ་ལྟར་ཐེག་པ་འོག་མ་ཐམས་ཅད་ཀྱི་དགོངས་པ་ཡོངས་སུ་འདུས་པར་ཐག་ཆོད་པས་གཅིག་ཤེས་ཀུན་གྲོལ་གྱི་ངང་ལ་གནས་པས་ཀྱང་ལྟ་བ་རི་བོ་ཅོག་བཞག་ཅེས་བྱའོ༔ འཁོར་བ་ཐོག་མཐའ་གཅོད་པའི་རྒྱུད་ལས༔ ང་ལ་སྒོམ་པར་བྱེད་པ་རྣམས༔ སྒོམ་པར་མ་བྱེད་གཡོ་མེད་ངང་ལ་ཞོག༔ ཞེས་དབུས་མ་ལས་དགོངས་པ་བཟུང་ན་རྒྱུ་འབྲས་ངོ་བོ་ཉིད་དུ་ཡོད་པས་ཐོག་མཐའི་གཉིས་ཀྱི་གནད་དེར་འདུས་ལ་ཅོག་བཞག་འདི་གཞུང་གི་ཅོག་བཞག་བཞི་པོ་ཐམས་ཅད་ཀྱི་སྤྱི་ཆིངས་སུ་ཐིམ་པས༔ གནས་ལུགས་ཐམས་ཅད་འགྱུར་མེད་ངང་དུ་ཞོག༔ ཞེས་པས་འདིར་གསུམ་དུ་བཞག་པས་ཆོག་གོ༔

གཉིས་པ་རྒྱ་མཚོ་ཅོག་བཞག་ལ་སོགས་པ་ནི་བསྡུས་དོན་ལྡོག་པའི་གོ་རིམ་ཏེ༔ དང་པོ་ལ༔ ཕྱི་ལྟར་ན་མིག་གི་དབང་པོ་ན་ཡེ་ཤེས་ཀྱི་རྩ་དར་དཀར་སྣལ་མ་དང་ཕྲ་ལ་འཁྲིལ་གཉིས་ཡོད་པས༔ མར་སྣ་ཡེ་ཤེས་ཀྱི་དཀྱིལ་འཁོར་གསེར་གྱི་རྩ་ཆེན་དུ་རིག་པའི་ཡེ་ཤེས་བཞུགས་པ་ལས་ལམ་བྱུང་ནས་ཡུལ་ལ་འཆར་བའི་མིག་ཕྱེས་ཏེ་མ་འགུལ་བས་རིག་པའི་འོད་གསལ་གཡོ་བ་མེད་པས་ཀྱང་རྒྱ་མཚོ་ཅོག་བཞག་ཞེས་བྱ་ལ༔ ཁྱད་པར་དུ་ཤེས་པ་དྭངས་བ་རྒྱ་མཚོ་ལྟ་བུའི་ངང་ལ་རྟོག་པའི་རྦ་རླབས་རང་སར་དྭངས་ནས་མ་བསྒུལ་པར་གནས་པས་ཀྱང་རྒྱ་མཚོ་ཅོག་བཞག་ལ༔ རིག་པ་སྤྲོས་པ་དང་བྲལ་བའི་ངང་དྭངས་འོད་གསལ་གྱི་ཆ་ལ་རང་བཞིན་བབ་ཀྱི་བསམ་གཏན་འདུ་འབྲལ་མེད་པའི་ངང་དུ་ཕོག་པ་ནི་ཏིང་ངེ་འཛིན་གྱི་རླན་གྱིས་བརླན་པས་ན་རྒྱ་མཚོ་ཅོག་བཞག་དེའི་ངོ་བོ་བླ་ན་མེད་པའོ༔ འདིར་དབུས་མ་ལས་བཟུང་བས་གཞན་གཉིས་རྒྱུ་འབྲས་སུ་ལྡན་པས༔ དེ་ཉིད་ལས༔ སེམས་ལ་མིང་འདོག་མེད་པ་ཡི༔ ཆགས་འཛིན་སྤྲོས་པ་བརྟགས་ཞེན་མེད་པའི་ངང་ལ་བཞག༔ བརྟགས་སྣང་རྣམ་རྟོག་ཐམས་ཅད་ཀྱང་གཉིས་མེད་ངང་དུ་ཐམས་ཅད་ཞོག༔ སྤྲོས་པ་ཐམས་ཅད་ཐག་ཆོད་ངང་དུ་ཞོག༔ ཡིད་དཔྱོད་སེམས་ཀྱི་དྲན་རིག་རྣམས༔ རང་དྭངས་ཆེན་པོའི་ངང་ལ་ཞོག༔ རྟོག་ཚོགས་སེམས་ཀྱི་ཆོ་འཕྲུལ་རྣམས༔ རང་སང་ཆེན་པོའི་ངང་ལ་ཞོག༔ འགྱུ་བ་རིག་པ་རྟོགས་པ་རྣམས༔ གསལ་དྭངས་ཆེན་པོའི་ངང་ལ་ཞོག༔ ཞེས་རྒྱུད་དཀྲུགས་སྡེབས་སུ་ཡོད་དོ༔ རིན་པོ་ཆེའི་བཅུད་ཐིག་ལས༔ མཁའ་གསལ་དཔེ་ནི་ནམ་མཁའ་ལ༔ འཆར་སྒོ་གསལ་བྱེད་མིག་བསྐྱོད་བགྲད༔ ཆོས་དབྱིངས་གསལ་ཁྱབ་དྭངས་པ་ལ༔ རིག་པ་གཏིང་གསལ་ཆེན་པོར་ཞོག༔ མ་བཅོས་སྤྲོས་བྲལ་ཀློང་ཡངས་སུ༔ འགྱུ་བ་དྭངས་སངས་ཆེན་པོར་བཞག༔ ཅེས་སོ༔

གསུམ་པ་སྣང་བ་ཅེར་བཞག་ནི༔ ཕྱི་དཀར་དམར་སྣ་ཚོགས་པས་ཆོས་ཡིད་ཀྱི་རྟོག་པས་སྒྲ་དོན་བསྲེས་ནས་འདྲེས་འཛིན་གྱི་འདི་དང་འདིའོ་ལ་སོགས་པ་ངོ་བོ་དང་༔ དེའི་ཁྱད་པར་ལ་རགས་ཕྲའི་ཚུལ་དུ་འཛིན་ཅིང་འགྱུ་བས་རྣམ་རྟོག་སློང་བྱེད་ཐམས་ཅད་ལ་དེར་འཛིན་ཡུལ་རྗེས་སུ་མི་འབྲང་༔ ཡུལ་མི་དགག༔ མི་བསྒྲུབ༔ སེམས་ཀྱིས་མི་བཟུང་བར༔ ཡུལ་སེམས་སྤྲོས་བྲལ་དུ་རྟོགས་པའི་གདེང་གིས་འགྲོ་བས་སྣང་ལ་རང་བཞིན་མེད་པར་གསལ་ལ་དེར་འཛིན་དང་བྲལ་བར་ཆོས་ཅན་སྤྱི་དང་དུམ་བུ་ལ་བསླབས་པས་ཅེར་ས་འམ་སྣང་ས་དེར་ཅེར་གྱིས་བཞག་པ་སྟེ་རྩལ་ཕྱི་ཤར་ལ་བསླབ་པའི་ཕྱོགས་སུ་ངེས་སོ་༡༔ རྡོ་རྗེ་དང་ཤེས་རབ་ཀྱི་མིག་གི་བསླབ་པས་ཅེར་བཞག་ཟེར་ལ་༢༔ ངོ་བོ་ལས་རིག་པ་སྣང་བ་ཅེར་འཛིན་ཤར་གྲོལ་དུ་ཡོད་པ་རྟོགས་འབྲས་ལས་༣སྔ་མ་གཞིར་བཟུང་ནས༔ རྒྱུ་འབྲས་ཕྱི་མ་གཉིས་སོ༔ དེ་ཉིད་ལས༔ གནས་ལུགས་འགྱུར་མེད་ངང་ལ་ཞོག༔ སྣང་བ་སོར་བཞག་ངང་ལ་ཞོག༔ དེ་གཉིས་དབྱེ་བསལ་མེད་པར་ཞོག༔ གནས་ལུགས་དངོས་པོ་མེད་པར་ཞོག༔ སྣང་བ་དགག་སྒྲུབ་མེད་པར་ཞོག༔ དེ་གཉིས་རྩིས་ལས་འདས་པར་ཞོག༔ ཕྱི་ཡི་དཀར་དམར་ཡུལ་རྣམས་ཀུན༔ སྣང་ལ་རང་བཞིན་མེད་པར་ཞོག༔ ཞེས་དང་༔ ཡིད་ལ་འགྱུ་བ་མེད་པ་ཡི༔ གཡོས་པ་མེད་པའི་ངང་ལ་ཞོག༔ བར་གྱི་གཉིས་སྣང་རང་བཞིན་ཀུན༔ སྤྲོས་པ་ཐག་ཆོད་ངང་ལ་ཞོག༔ རྟོག་ཚོགས་བློ་ལ་སྣང་བའི་ཡུལ་སྣང་རྣམས༔ སྣང་ལ་རང་བཞིན་མེད་པའི་ངང་དུ་ཞོག༔ ཞེས་དང་༔ རིན་ཆེན་བཅུད་ཐིག་ལས༔ སྣང་ཡུལ་མེ་ལོང་ལྟར་གནས་ལ༔ རྐྱེན་སྣང་སྐྱེ་མེད་རང་གྲོལ་བཞག༔ ཅེས་སོ༔ འདི་ནི་སྣང་ཤེས་དབྱེར་མེད་རོ་མཉམ་དུ་དག་པར་བྱེད་པའི་ལྟ་བས་ཟིན་པ་གལ་ཆེ་ཡི་རང་གར་བློས་མི་གཏད་དོ༔ ཞེས་པདྨ་ངས་སྨྲའོ༔

དོན་བཞི་པ་རིག་པ་ཅོག་བཞག་ནི༔ རིག་པ་སྐྱེ་མེད་དང་༔ ལྟ་བསྒོམ་ལྷུན་རྫོགས་སུ་བཞག་པ་སྟེ་གཉིས་ལས༔ དང་པོ་ལ་དངོས་དང་དེའི་ཁྱད་འདོན་གཉིས་ལས་དང་པོ་ནི༔ སེམས་རྣམ་རྟོག་གི་རླུང་གིས་མི་གཡོ་བ་རི་བོ་ཅོག་བཞག་དང་༔ རྨུགས་འཐིབ་སྐྱོན་དང་བྲལ་བ་རྒྱ་མཚོ་ཅོག་བཞག༔ སྣང་བའི་རྗེས་སུ་མ་ཤོར་བ་ཅེར་བཞག་མཉམ་པ་གསུམ་གྱི་གྲུབ་པའི་འབྲས་བུ་ནི་རིག་པ་ཟང་ཐལ་རྗེན་ལ་བུད་དེ་འཆར་བ་དེ་ལས་མི་གཡོ་བར་རྒྱལ་པོ་གདན་ས་ཟིན་ཏེ་མི་འགྱུར་བ་ལྟར༔ རྩལ་གཞི་ལ་ཐིམ་སེམས་རིག་ནང་འཕྲད་དུ་འཁོར་འདས་རྒྱབ་གྱེས༔ བློན་པོ་བཙོན་དུ་བཟུང་ནས་མི་འགྱུར་བ་ལྟར༔ སེམས་ཡིད་ཀྱི་རྣམ་ཤེས་འགྱུ་བ་རྒྱུན་ཆད་པས་རིག་པ་ལ་རང་དབང་བསྒྱུར༔ རིག་པ་རང་ས་ཟིན་པ་དང་དམངས་ཆམ་ལ་འབེབས་སྟེ་མི་འགྱུར་བ་ལྟར་དུ༔ སྒོ་ལྔའི་འཆར་གཞི་སེམས་ཡིན་པས་དེ་ཉིད་དག་པའི་སྟོབས་ཀྱིས་སྒོ་ལྔ་མཚན་གཞི་མེད་པས་འཁོར་བ་སྟོངས་པའོ༔ ཅིའི་ཕྱིར་ན་རིག་པ་ཡེ་སངས་རྒྱས་པའི་སྟེང་དུ་བཞག་པས་རིག་པ་ཅོག་བཞག་ཟེར་རོ༔ དེ་སྐད་དུ་སྤྲོས་བྲལ་དོན་གསལ་ཆེན་པོའི་རྒྱུད་ལས༔ དེ་ནི་རྒྱལ་པོ་གདན་ལ་བཞུགས་ཤིང་གདན་ཐོག་ཏུ་བཏང་བའི་ཐབས་སོ༔ དེའི་རིག་པ་ནི་རྒྱལ་པོ་དང་འདྲ་སྟེ་རང་ས་ཟིན་པའོ༔ བློན་པོ་ནི་སེམས་སྟེ༔ ལུས་དང་མ་བྲལ་བར་དབུགས་ཡོད་དེ༔ རིག་པ་ལ་རྟ་ཡོད་པས་བློན་པོ་ལྟ་བུའོ༔ བཙོན་དུ་ཟིན་པ་དང་འདྲ་སྟེ༔ རྟོག་པའི་རླུང་ཡོད་ལ་རྒྱུ་མི་ནུས་པས་སོ༔ སྒོ་ལྔ་འབངས་དང་འདྲ་བས་ལས་བྱེད་པ་ཡིན་ནོ༔ དུས་དེར་གསལ་ལ་རྟོག་པ་མེད་དོ༔ དེ་ནི་འབངས་ཆམ་ལ་འདེབས་པ་ལྟ་བུའོ༔ ཞེས་དང་༔ རིན་པོ་ཆེའི་བཅུད་ཐིག་ལས༔ ཀ་དག་དོན་གྱི་ཆོས་ཉིད་ལ༔ སེམས་ཀྱི་འཛིན་པ་མེད་པར་བཞག༔ ངང་དྭངས་ཀུན་ཁྱབ་ཟང་ཐལ་ལ༔ ཆོས་སྐུ་གཅེར་བུ་གློད་དེ་བཞག༔ ཅེས་སོ༔

ཡང་ཐོད་རྒལ་དང་སྦྱར་ན་ཤེས་རབ་རང་བྱུང་སྒྲོན་མའི་ངོ་བོ་རིག་པ་རྣམ་དག་ཆེན་པོ་ནི་རྒྱལ་པོ་དང་འདྲ་ལ༔ དབྱིངས་རྣམ་པར་དག་པ་ནི་གདན༔ བློན་པོ་ནི་སེམས་དང་༔ སྒོ་ལྔ་ཡུལ་དང་བཅས་པ་འབངས་འདྲ་ན༔ སེམས་ཀྱི་འཁྲུལ་སྣང་༔ སྒོ་ལྔའི་ཡུལ་དང་ཤེས་པ་ཐམས་ཅད་དག་སྣང་མཐོང་དུས་འགགས་པ་ལའང་སྦྱར་ན༔ དེ་ཉིད་ལས༔ རྒྱལ་པོ་གདན་ལ་བཞག་པ་དང་༔ བློན་པོ་བཙོན་དུ་བཟུང་བ་དང་༔ དམངས་རྣམས་ཆམ་ལ་ཤུགས་ཀྱིས་ཕབས་སོ༔ རྡོ་རྗེ་འཛིན་པ་ལེགས་པར་ཟུང་ཤིག༔ རྒྱལ་པོ་ནི་རང་རིག་དག་པ་ཆོས་ཀྱི་སྐུའོ༔ གདན་ནི་རང་བཞིན་རྣམ་པར་དག་པ་ནམ་མཁའི་ཡུལ་དུ་སྣང་བ་འདིའོ༔ དོན་དུ་དབྱིངས་ཀྱི་ཐིག་ལེ་ཡུལ་དུ་སྣང་བ་འདིའོ༔ ཞེས་སོགས་ནས༔ རྣམ་རྟོག་ཆོམ་པའོ་སོགས་སྦྱར་ཏེ་གསུངས་སོ༔ ཞེས་སོ༔ འདིར་ནི་རིག་པ་སྐྱེ་མེད་འཛིན་མྱང་གང་ཡང་མེད་པ་ཐིག་ལེ་ཉག་གཅིག་གི་བདེ་ཀློང་དུ་འཁྱིལ་པ་ལ་བྱ་ཡི༔ ཆེད་དུ་དགག་ནས་བཟུང་བ་དང་འདི་དང་འདིའོ་རུ་ངོས་བཟུང་དུ་ཡོད་ན་རྣམ་པར་རྟོག་པ་ལས་མ་འདས་པས་རྩོལ་བློ་དམིགས་འཛིན་གང་ཡང་མེད་པར་སེམས་ཀྱི་ཤུན་པ་དང་བྲལ་དུས་ཀྱི་གསལ་སྟོང་རིག་པ་བརྗོད་བསམ་ལས་འདས་པའི་རང་ཐོག་ཏུ་སླེབ་པ་ནི༔ ཡུལ་དང་ཡུལ་ཅན་དབྱེར་མེད་པའི་ཡེ་ཤེས་རང་རིག་གི་བསྒོམ་པ་ཡིན་པར་ཤེས་དགོས་སོ༔ སྔ་མ་ལས༔ རིག་པ་སྐྱེ་བ་མེད་པ་ཡི༔ མྱང་པ་མེད་པའི་ངང་ལ་ཞོག༔ ཞེས་དང་༔ སྙིང་པོ་ཆོས་སྐུའི་རང་བཞིན་ནི༔ མི་སྣང་རང་བཞིན་མེད་པའི་ངང་ལ་ཞོག༔ ཡིད་དཔྱོད་སེམས་ཀྱི་དྲན་རིག་རྣམས༔ རང་དྭངས་ཆེན་པོའི་ངང་ལ་ཞོག༔ ཞེས་སོ༔

གཉིས་པ་དེའི་ཁྱད་པར་འདོན་པ་ནི༔ དེང་སང་རིག་པ་ཅོག་བཞག་ཟེར་ཞིང་སེམས་གསལ་རིག་ཙམ་ལམ་དུ་བྱེད་པས་གཟུགས་ཁམས་ཀྱི་གོལ་ས་ལྡང་༔ ཀུན་གཞི་རྟོག་མེད་ལམ་དུ་བྱེད་པས་གཟུགས་མེད༔ བདེ་གསལ་གྱི་རྟོག་པ་ལམ་དུ་བྱེད་པས་འདོད་པར་འཁོར་བས་ན༔ གཞན་སེལ་གྱི་ཤེས་རབ་མཆོག་གི་དེ་དག་བཅད་དེ་ཁྱད་འདོན་དགོས་པ་ལ༔ སྣང་ཡང་མ་མཐོང་བ་༡༔ ཀུན་ལ་ཁྱབ་ཀྱང་ངོས་བཟུང་མེད་པ་༢༔ དངོས་གཞིར་གྲུབ་པ་མེད་པ་༣༔ མ་ཕྱེ་པ་༤༔ མི་སྣང་པ་༥༔ མ་བྱས་པ་༦༔ མ་བཙལ་བ་༧༔ མ་སྤང་པ་༨༔ མ་བསྒྲུབ་པ་༩༔ མ་བརྟགས་པ་༡༠༔ མ་མཚོན་པ་༡༡༔ མ་ཤེས་པ་༡༢༔ སུས་ཀྱང་མ་བསྐྱེད་པར་རྫོགས་པ་༡༣༔ སྐྱེ་བ་མེད་པ་༡༤༔ མ་རྟོགས་པ་༡༥སྟེ་སྤྲོས་པ་ཐམས་ཅད་དང་བྲ་བའི་ངང་ལ་བཞག་པར་བྱ་བར་གསུངས་པ་ལྟར་ལ་བཟླ་ཞིང་བཞག་པར་བྱའོ༔ དེ་ཉིད་ལས༔ སྐྱེ་བ་མེད་པའི་ངང་དུ་ཞོག༔ སྨྲ་བསམ་བརྗོད་མེད་ངང་དུ་ཞོག༔ འགགས་མེད་ཆོས་སྐུའི་ངང་དུ་ཞོག༔ ཅེས་པས་སྐྱེ་མེད་ཀྱི་ངང་དུ་བཞག་པས་ལུས་སྣང་བའི་གྲོང་ཁྱེར་འདོད་ཁམས་ཀྱི་སེམས་དང་༔ སྨྲ་བསམ་མེད་པའི་ངང་དུ་བཞག་པས་ངག་ཕྱེད་སྣང་གཟུགས་ཁམས་ཀྱི༔ འགགས་པ་མེད་པའི་སེམས་མི་སྣང་བ་གཟུགས་མེད་ཀྱི་སེམས་ཀྱི་བསྒོམས་པའི་ཕྱོགས་སུ་མི་གོལ་བར་ཁྱད་པར་འདོན་པའོ༔ འདི་དག་གི་གནད་ནི༔ གཟུགས་མེད་ལ་རྟོག་མེད་གཏི་མུག་མཚུངས་ལྡན་གྱི་རྟིང་བ་དེ་རྒྱ་མཚོ་ཅོག་བཞག་ ༼ མིང་མེད་འགགས་མེད། ༽ གིས་སྦྱོང་༔ གཟུགས་ཁམས་ཡུལ་ལ་ཆགས་པ་ ༼ ཡིད་འགྱུ་མེད་ཀྱི་ ༽ སྣང་བ་ཅེར་བཞག་གིས་སྦྱོང་༔ འདོད་ཁམས་སེམས་རགས་པར་རྩེན་པ་སེམས་རིག་ ༼ རིག་པ་སྐྱེ་མེད་ ༽ ཁྱད་ཕྱེ་ནས་རིག་པ་ཅོག་བཞག་གིས་སྦྱོང་ངོ་༔ ༼ ཡང་གོ་ལྡོག་ཏུ་ ༽ ཡང་སྐྱེ་མེད་ཀྱི་གཟུགས་མེད་པས་ ༼ རིག་པ་ཅོག་བཞག་ ༽ སེམས་ལས་འཕགས༔ བརྗོད་མེད་དམ་འགྱུ་མེད་ ༼ སྣང་བ་ཅེར་བཞག །༽ ཀྱི་གཟུགས་ཁམས༔ འགགས་མེད་ཀྱི་ ༼ རྒྱ་མཚོ་ཅོག་བཞག་ ༽ འདོད་ཁམས་ཀྱི་སེམས་རྙོགས་པ་ལས་འཕགས་པའི༔ འདི་དག་གི་གནད་ཀྱང་གཟུགས་མེད་ལ་འཛིན་པ་ཕྱོགས་གཅིག་ཡོད་མིན་མེད་མིན་ནོ་བསམ་ནས་བསྒོམ་པའི་འཛིན་པ་ཡོད་པ་དང་༔ གཟུགས་ཁམས་ཡུལ་ཆགས་པའི་བདེ་བ༔འདོད་ཁམས་རྣམ་རྟོག་དག་གི་ཁྱད་པར་འདོན་ནོ༔

གཉིས་པ་ལྟ་བསྒོམ་ལྷུན་རྫོགས་སུ་བཞག་པའི་ཡོན་ཏན་རང་གནས་མངོན་སུམ་དུ་བྱེད་པ་ནི༔ རང་གནས་ཀྱི་རིག་པ་ངོ་བོ་ལྟ་བསྒོམ་སྤྱོད་འབྲས་བཞི་ལས་འདས་ཤིང་༔ རང་བཞིན་གྱི་གཞིའི་ཡོན་ཏན་རྫོགས་པར་ལྷུན་གྱིས་གྲུབ་པས་ན༔ བལྟས་པས་ནི་མི་མཐོང་སྟེ་མཐོང་བའི་ཡུལ་མེད་པའི་ཕྱིར་དང་༔ བསྒོམ་པས་མི་མཐོང་སྟེ་བློ་རྫས་འགལ་བའི་ཕྱིར་དང་༔ བསྒོམ་བྱའོ་ཆོས་མ་གྲུབ་པའི་ཕྱིར་རོ༔ སྤྱད་བྱའི་ཡུལ་དང་བྲལ་བའི་ཕྱིར་དང་༔ རྩོལ་བས་སྤྱད་ཀྱང་འཆིང་བའི་ཕྱིར་སྤྱད་པར་མི་བྱ་ལ༔ ཡེ་ནས་སངས་རྒྱས་པའི་ཆོས་ཉིད་རང་གི་ངོ་བོ་ལ་སྐྱེད་བསྲིང་དུ་མེད་པའི་ཐོབ་རྒྱུའི་འབྲས་བུ་ལོག་ནས་མི་འབྱུང་བས་རྒྱུ་མཚན་དེ་དག་གི་གོ་རིམ་ལྟར་ལྟ་བསྒོམ་སྤྱོད་འབྲས་ཀྱི་རྩོལ་བ་གང་གིས་ཀྱང་མ་དཀྲུགས་པར་བཞག་པས་བལྟར་མེད་ཀྱི་ལྟ་བ་མཆོག༔ བསྒོམས་མེད་ཀྱི་བསྒོམ་པ་མཆོག༔ སྤྱོད་མེད་ཀྱི་སྤྱོད་པའི་མཆོག༔ སྒྲུབ་དུ་མེད་པའི་འབྲས་བུ་མཆོག་རང་ལ་ལྷུན་གྱིས་གྲུབ་པའི་གཤིས་སུ་ཕྱིན་ཏེ་ལྟ་བསྒོམ་སྤྱོད་འབྲས་ཐམས་ཅད་དང་མཇལ་བ་ནི་རང་ཡིན་པས་གཞན་དུ་ཚོལ་ཕྱིན་པས་མི་རྙེད་ཀྱང་ཚུར་རང་ངོ་ཤེས་པས་མ་བཙལ་བར་རྙེད་པ་དང་འདྲ་བས་ན༔ ཁྱུང་ཆེན་ལས༔ རང་གམ་བཞག་ནས་གཞན་ལ་རྒྱང་དུ་ཚོལ༔ བྱར་མེད་བདེ་བོར་རྩོལ་བ་དང་དུ་ལེན༔ ཚི་ཆད་ནད་དུ་དེ་ལས་ཆེ་བ་མེད༔ ཅེས་དང་༔ ཡེ་ཤེས་ཀློང་གི་རྒྱུད་ལས༔ ང་ལ་བལྟས་པས་མཐོང་བའི་ཡུལ་མེད་ཀྱི༔ མ་བལྟས་བཞག་པས་ལྟ་བ་ཉིད་དང་མཇལ༔ བསྒོམ་པར་མ་བྱེད་གཡོ་མེད་ཞོག༔ འགྱུ་མེད་ངང་ལ་བཞག་པས་བསྒོམ་པ་ཉིད་དང་མཇལ༔ སྤྱོད་པར་བྱ་བྱེད་བྱར་མེད་ངང་ལ་ཞོག༔ བྱར་མེད་ངང་ལ་བཞག་པས་སྤྱོད་པ་ཉིད་དང་མཇལ༔ ང་ལ་ཐོབ་པར་འདོད་པ་རྣམས༔ ཐོབ་རྒྱུ་མེད་ཀྱི་རང་སར་ངང་ལ་ཞོག༔ བཞག་ཏུ་མེད་པའི་འབྲས་བུ་ཆེན་པོ་ཐོབ༔ ཐོབ་ཏུ་མེད་པས་ཐོབ་པའི་དོན་དང་མཇལ༔ ཞེས་སོ༔

གནད་བསྡུས་ཏེ་ཡོན་ཏན་བཤད་པ་ནི༔ བཞག་ཐབས་བཞི་ཡི་གནད་བསྡུས་པ་དང་༔ ཡོན་ཏན་ལས༔ དང་པོ་ནི༔ རིག་པ་རྗེན་པའི་ ༼ རིག་པ་ཅོག་བཞག །༽ ངང་དུ་བཞག་པས་སེམས་ཡུལ་ ༼ སྣང་བ་དང་རྒྱ་མཚོ། ༽ དང་བཅས་དབྱིངས་སུ་གྲོལ་ཏེ་བྱིང་རྒོད་སོགས་ཀྱི་སྐྱོན་མ་བྱུང་བར་བརྟན་པོར་ ༼ རི་བོ། ༽ གནས་པ་གཅིག་པུ་ལ་བཞི་པོ་རྫོགས་པ་ཡིན་པར༔ ཡི་གེ་མེད་པའི་རྒྱུད་མཆོག་ལས༔ རྩ་བའི་དགོངས་པ་ཆེན་པོ་ནི༔ གྲངས་ནི་བཞི་ཡིས་གཏན་ལ་ཕབ་པར་འགྱུར༔ ཞེས་དང་༔ ཐད་ཀ་གྲོགས་སུ་ཤེས་ན་ཅོག་བཞག་གཅིག་གི་ངང་༔ ཞེས་སོ༔ གཉིས་པ་ཡོན་ཏན་ནི༔ སྐྱེ་བ་མེད་པའི་ཅོག་བཞག་གི་དུས་དེ་ཉིད་ནས་ ༼ ལྷག་མཐོང་གི་ཤེས་རབ་དེའི་ ༽ གཏི་མུག་རྩད་ནས་ཆོད༔ སྟེང་ལྷའི་སྲིད་པ་ཟིལ་གྱིས་གནོན༔ ཀུན་གྱི་གཞི་མཚན་ཉིད་པ་དག་པའི་འབྲས་བུ་གཟུགས་མེད་པའི་ཁམས་སུ་མི་སྐྱེ་བས་ཕྱགས་མས་བཏབ་སྟེ༔ ངོ་བོ་སྟོང་པ་ཉིད་ཆོས་སྐུའི་སྣང་བ་ལམ་བྱེད་དང་༔ སྣང་བ་ཅེར་བཞག་གི་འགྱུ་མེད་བསམ་བྲལ་དགག་སྒྲུབ་བྲལ་བར་བཞག་པས་བར་མིའི་སྲིད་པ་ཟིལ་གྱིས་གནོན༔ འདོད་ཆགས་རྩད་ནས་ཆོད༔ གཟུགས་ཁམས་ཕྱགས་མས་བཏབ༔ རང་བཞིན་གསལ་བའི་ཡེ་ཤེས་ཀྱི་རང་སྣང་ལོངས་སྐུའི་ལམ་བྱེད༔ སེམས་མིང་མེད་སྤྲོས་བྲལ་གཏིང་གསལ་རྣམ་རྟོག་རང་སངས་ཆེན་པོར་རྒྱ་མཚོ་ལྟར་ཅོག་གིས་བཞག་པས༔ འོག་དམྱལ་བའི་སྲིད་པ་ཟིལ་གྱིས་གནོན༔ ཞེ་སྡང་རྩད་ནས་བཅད༔ འདོད་ཁམས་ཕྱགས་མས་བཏབ་པས་ཐུགས་རྗེ་ཀུན་ཁྱབ་སྤྲུལ་སྐུ་ལམ་དུ་བྱེད་པའི་ཀུན་ཏུ་འོད་སྤྲུལ་སྐུའི་ས༔ པདྨ་ཅན་ལོངས་སྤྱོད༔ འཁོར་ལོ་ཚོགས་ཆེན་ཆོས་སྐུའི་རང་སར་ནོན༔ སྐུ་གསུམ་ཐོབ་ཏུ་མེད་པར་རང་སར་གྲོལ་བ་ད་ལྟ་མཉམ་བཞག་ཐུན་གཅིག་ལའང་ཡེ་ཤེས་བླ་མའི་ས་ལ་ཕྱིན་པར་བཤད་པ་དང་འདྲ་བར་བསྟན་ནོ༔ སྤྱན་རས་གཟིགས་ཏིང་འཛིན་རྩེ་གཅིག་གི་རྒྱུད་ལས༔ ཐམས་ཅད་གཅིག་ཏུ་དྲིལ་བའི་བཞག་ཐབས་རྣམ་གསུམ་འདི༔ ཐོབ་ཏུ་མེད་པའི་སྐུ་གསུམ་འདིས༔ སྲིད་གསུམ་ཟིལ་གནོན་ས་གསུམ་གནོན༔ དུག་གསུམ་རྩད་ཆོད་ཁམས་གསུམ་ཕྱགས་མས་བཏབས༔ ངོ་བོ་རང་བཞིན་ཐུགས་རྗེའི་སྣང་བའོ༔ ཞེས་པའོ༔ ཡང་རི་བོ་ཅོག་བཞག་གི་སྐུ་ཐོབ་པ་ནི་དབྱེར་མེད་རྡོ་རྗེ་ལྟ་བུའི་དོན་དམ་སྤྲོས་བྲལ་དབྱིངས་དང་༔ ཀུན་རྫོབ་བདེ་བ་མངོན་བྱང་སྣང་ཆའི་ཟུང་འཇུག་ཏུ་བཞག་པའི་ཐོབ་པ་ཡིན་ནོ༔

གཉིས་པ་ཏིང་ངེ་འཛིན་གྱི་སྒོ་ནས་སྐུ་གསུམ་དུ་བཙན་ས་འཛིན་པའི་མན་ངག་ལ་གསུམ་ལས་དང་པོ༔ རང་གནས་ཆོས་སྐུ་རྡོ་རྗེ་ལྟ་བུའི་ཏིང་ངེ་འཛིན༔ ཚོགས་དྲུག་གི་ཡུལ་གང་ལའང་འཛིན་པའི་བཟོ་རྒྱ་མི་བསྐྱེད་པར་ཕྱི་ནང་བར་མེད་ཧར་སངས་ཀ་དག་ཆེན་པོའི་ངང་ལས་རྟོག་བྲལ་དུ་བཞག་པའི་ཆོས་སྐུ་ལ་བཙན་ས་ཟིན་པ་སྟེ༔ ཀློང་དྲུག་པ་ལས༔ མདོར་ན་ལུས་ངག་རང་སོ་ལ༔ ཡིད་འབྱུང་ཆ་རྣམས་ཕྱིར་མ་ཤོར༔ དབང་པོའི་ཡུལ་རྣམས་དྲུག་ལ་ཡང་༔ ཤེས་བཞིན་དཔྱོད་པའི་ཡིད་མ་འགྱུའི༔ རང་སྣང་མི་རྟོག་ཆེན་པོ་ལ༔ གསལ་ལ་རྟོག་མེད་ཉམས་སྐྱེས་པའོ༔ ཞེས་སོ༔

གཉིས་པ་ཡེ་ཤེས་ཕྱག་རྒྱའི་ཏིང་ངེ་འཛིན་ནི༔ ལུས་སྐྱིལ་ཀྲུང་མིག་ཕྱིའི་བར་སྣང་ལ་ཧྲིག་གེར་བལྟས་ནས་བཞག་པའི་གནད་ཀྱིས་ནང་སེམས་ཉིད་སྤྲོ་བསྡུ་བྲལ་བར་དྭངས་སང་ཕྱེད་པའི་གསང་བ་ཆོས་ཉིད་དོན་གྱི་ནམ་མཁའ་གསལ་སྟོང་དག་པར་འཆར་བའི་རང་བཞིན་གསལ་བ་ལོངས་སྤྱོད་རྫོགས་སྐུའི་ངང་དུ་བཙན་ས་ཟིན་པའི་རྣལ་འབྱོར་ཏེ༔ དེ་ཉིད་ལས༔ སྣང་བ་རྒྱས་འདེབས་ཏིང་འཛིན་ནི༔ ལུས་དང་ཡུལ་དང་རིག་པ་ཡི༔ རང་སྣང་དག་པའི་ཚད་རྣམས་བཟུང་༔ ཞེས་སོ༔

གསུམ་པ་ཐོག་ཆེན་ཡུལ་འབེབས་ཀྱི་ཏིང་ངེ་འཛིན་ནི༔ རྣམ་རྟོག་གི་སྤྲོས་པ་ཤར་བ་ན་དེ་ཡི་ངོ་ལ་མི་བལྟ༔ ངང་ལ་མི་བསྐྱང་བར་གང་ཤར་བཅར་ཕོག་ཏུ་རང་སང་དུ་བཏང་ནས་ཡེ་ཤེས་ཀྱི་ཐོག་ཏུ་ལྷོད་པའམ་རང་ངོས་བཟུང་བ་ནི་རིག་སྟོང་དབྱེར་མེད་སྤྲུལ་པ་སྐུའི་རྣལ་འབྱོར་ཞེས་བྱ་བར་གྱུར་ཏོ༔ དེ་ཉིད་ལས༔ ཐོག་བབས་ཆེན་པོའི་ཏིང་འཛིན་ནི༔ ལུས་ནི་ཐ་མལ་ལྟ་བུ་ལ༔ ངག་ནི་སྨྲ་བརྗོད་ཚིག་དང་བྲལ༔ སེམས་ནི་དམ་དུ་མ་བཅིང་བས༔ རང་ཤར་ངང་ལ་མ་ཡེངས་བའོ༔ ཞེས་སོ༔ དེ་དག་གི་ཚུལ་ཡང་༔ དེ་ཉིད་ལས༔ ཏིང་ངེ་འཛིན་འདི་སུས་བཟུང་བ༔ སྐུ་གསུམ་ལའང་མངོན་པར་དགའ༔ ཞེས་སོ༔ འདིར་ཐོག་བབས་དང་རྒྱས་འདེབས་གཉིས་འགའ་ཞིག་གི་བརྗོད་ཚུལ་དང་ཅུང་ཟད་བསྣོལ་ཡང་༔ སྣང་བ་ལོངས་སྐུ་ཡིན་པ་དང་༔ གཟིགས་སྟངས་གླང་ཆེན་ཡིན་པ་དང་༔ མཐོང་སྣང་ཡེ་གདངས་ལས་གཙོ་བོར་བཟུང་བས་ཀྱང་འགལ་བ་མེད་པར་གནས་སོ༔

གསུམ་པ་དགོངས་སྤྱོད་དུ་སྐྱོལ་པས་སྒོ་ནས་འོད་གསལ་མ་བུ་སྤྲད་པའི་མན་ངག་ལ༔ སྤྲོས་པ་བསྡུ་བ་དང་༔ ངང་ལ་སྐྱེས་བ༔ ཡུལ་མེད་དུ་བསྐྱང་བ་གསུམ༔ དང་པོ་ནི༔ ལྟ་བས་གཏན་ལ་ཕབ་པའི་དོན་བཞིན་སྟོང་ཉིད་ཆེན་པོ་བསྡུ་བའམ་རྟོགས་པའི་ཡིན་ལུགས་ཤེས་བཞིན་པས་ངང་ཚུགས་མ་ཤོར་བས་གདངས་རང་ཤུགས་ཀྱིས་གོམས་པར་གནས་པ་དང་༔ ཡུལ་མེད་བཞིན་དུ་བློས་ཡུལ་སྣ་ཚོགས་སུ་བརྟགས་པའི་བློ་ཆོས་ཙམ་ཡང་མིང་མེད་སྤྲོས་བྲལ་རྣམ་གྲངས་བའི་དོན་དམ་གྱི་གཟེབ་ཏུ་མི་འཛུད་པར་བློ་ཡིས་དཔྱད་རྟོག་གི་ལ་བརྒལ་ཏེ་འཛིན་པ་ཐམས་ཅད་དང་བྲལ་བའི་བློ་འདས་ཆེན་པོར་ཧར་སངས་ཡན་པ་དང་༔ ཡང་ན་ཕྱིའི་ཆོས་ཐམས་ཅད་རང་ས་ནས་ཡེ་གྲོལ་མཉམ་པ་ཉིད་དུ་བསྡུ་ཞིང་ཕྱིར་མི་རྟོགས་མི་དགག་མི་གྲུབ་མི་ཞེན་པར་གནས་པ་དང་༔ ནང་བློའི་རང་བཞིན་ཡོད་པར་སྲིན་བུའི་ཁ་ཆུས་རང་འཆིང་བ་ལྟར་སྣ་ཚོགས་སུ་ཞེན་པས་མིང་བརྟགས་དོན་བཟུང་དངོས་པོར་བལྟས་པས་མ་མཉམ་པ་ཉིད་མིང་གདགས་བྱ་འདོགས་བྱེད་གདགས་ཡུལ་གསུམ་ཀའི་འཛིན་པས་མ་བསླད་པར་ཡེ་གྲོལ་ཆེན་པོ་བསྟན་དུ་མེད་པའི་སར་ཐག་ཆོད་པར་གདེངས་ཀྱིས་རང་ཤུགས་ཀྱིས་བསྡུ་པ་སྟེ༔ ནམ་མཁའ་འབར་བ་ལས༔ སྣང་བའི་ཆོས་ཀུན་སྟོང་པར་བསྡུ༔ བློའི་བརྟགས་ཆོས་ཀུན་བློ་འདས་བསྡུ༔ ཡང་ན་ཆོས་ཀུན་རང་སར་གྲོལ་བར་བསྡུ༔ མིང་བརྟགས་བསྟན་དུ་མེད་པར་བསྡུ༔ ཞེས་སོ༔ ཡང་ན་དེ་གཉིས་ཀྱི་གནད་བསྡུས་ཏེ་ཕྱི་སྣང་བ་ཐམས་ཅད་དགག་སྒྲུབ་བཟང་ངན་མེད་པར་ཅེར་སའམ་སྣང་ས་དེ་ནས་ཡུལ་གྱི་སྤྲོས་པ་རང་ཆོད་དེ་བློ་ལ་མི་ཆགས་པ་དང་༔ ནང་བརྟགས་ཆགས་སེམས་ཀྱི་ཚོགས་པའང་ཅེར་སའམ་སྣང་ས་དེ་ནས་བློ་མ་ཡིན་པར་སྤྲོས་པ་རང་ཆོད་དེ་ཡུལ་ལ་མི་རྟོག༔ སྣང་སེམས་གཞི་ནས་སངས་བས་རིག་པ་མཚོན་བརྗོད་མེད་པའི་ཡེ་ཤེས་ཀྱི་གཉེན་པོ་ཡེ་ལྷག་པའི་མ་བསྡུས་པར་རང་འདུས་པ་ཞེས་བྱ་སྟེ༔ གནད་ཕྱི་ནང་གི་དམིགས་འཛིན་ཐམས་ཅད་མི་སྤྲོ༔ བར་མི་བཅད་པར་རང་བྱུང་ངོ་ཤེས་པའི་རང་འདུས་སོ༔ དེ་ལས༔ ཡང་ན་སྣ་ཚོགས་ཆོས་རྣམས་ཀུན༔ བཟང་ངན་དགག་སྒྲུབ་མེད་པར་བསྡུས༔ བརྟགས་ཆགས་མཚོན་བརྗོད་བྲལ་བར་བསྡུ༔ ཞེས་སོ༔ ༼ འདི་ཅུང་ཟད་ཟུར་ཕྱིན་དུ་ཡོད་པས་སླད་ཞུ་དག་དགོས། ༽

གཉིས་པ་ནི་དགོངས་པའི་ངོ་བོའི་ཕུག་གང་ལ་སྐྱོལ་ན༔ ཆོས་རྣམས་ཀྱི་གྲུབ་མཐའ་མེད་པ་ཐེག་པའི་ཕུག་ཏུ་བསྐྱལ་བའི་ངང་དུ་གདེངས་འཆོས་པ་དང་༔ བློ་དང་རྣམ་རྟོག་ཟད་པ་ཆོས་ཉིད་ཀྱི་ཕུག་ཏུ་སྐྱོལ་བ་དང་༔ ཡུད་རིག་སེམས་ཀྱི་ཆགས་སྡང་དགག་སྒྲུབ་མེད་པ་ངང་དྭངས་ཀྱི༔ ཐེག་པ་བློའི་བཅོས་ཀྱི་འཇུག་སྒོ་མེད་པ་ཡང་ཏི་རྫོགས་པ་ཆེན་པོའི་ཕུག་ཏུ་སྐྱེལ་ཞིང་༔ གང་ལའང་རེ་སྨོན་ཡིད་གཉིས་བཅས་བཅོས་དགག་སྒྲུབ་དང་བྲལ་བར་སྐྱོང་དུ་མེད་པའི་སྐྱོང་བ་ཆེན་པོར་བྱའོ༔

གསུམ་པ་ནི༔ རང་བྱུང་གི་ངོ་བ་སྐྱོང་བ༔ དེ་བསྒོམ་དུ་མེད་པའི་བསྒོམ་པར་བསྟན་པའོ༔ དང་པོ་ནི༔ རང་བབས་ཀྱི་རིག་པ་རྗེན་ནེ་བཞག་པ་ལས༔ ཕྱིར་མི་བསམ༔ ནང་དུ་མི་བསྡུ༔ བར་དུ་མི་རྟོག་པར་རང་ངོ་ལ་བལྟས་པས་ཟང་ཐལ་རང་གསལ་དུ་རྗེན་རྗེན༔ བདེན་གསུམ་དང་བྲལ་བའི་ཀ་དག༔ རང་བྱུུང་རང་ཤར་གྱི་ཡེ་ཤེས༔ ལྟ་བ་དང་བསྒོམ་པས་མ་བསླད༔ རྣམ་རྟོག་དང་བཟོ་བཅོས་སུ་མ་སོང་བར༔ གཟུང་འཛིན་གྱི་སྤྲོས་པ་མེད་པ༔ སེམས་ཡིད་ཀྱི་རྟོག་པ་མེད་པ༔ རང་གནས་ལ་འཛིན་པ་མེད་པ༔ མཉམ་པ་ལ་བར་མེད་པ༔ རང་བཞིན་བབས་ཀྱི་གནས་ལུགས༔ སྣང་བས་མ་བསྒྱུར་བར་དྲན་པ་འགགས་མེད༔ དྭངས་ཤིང་གསལ་བ་རྒྱ་མཚོ་ལྟ་བུ༔ མཐའ་ཡིས་མ་རེག་པ་ནམ་མཁའ་ལྟ་བུ་སལ་ལེ༔ སང་ངེ༔ ཝལ་ལེ༔ རིག་གེ༔ རྗེན་ནེ༔ ཧད་དེ་ཁྱད་པར་བཞི་ལྡན་གྱི་ཆོས་སྐུ་ངོས་བཟུང་བའི་ཐོག་ཏུ་གཞིའི་འོད་གསལ་ཡེ་ནས་དེ་ལྟ་བུར་གནས་པ་ལ་བུའི་འོད་གསལ་རིག་པའི་ངང་ལས་བསྐྱོད་པས་འདྲེ་ས་དང་འདྲེ་མཁན་མེད་པར་ཆོས་ཟད་རང་ས་ཟིན་པ་དུས་གསུམ་ཡིད་ཀྱིས་འབྲེལ་ཐག་ཆོད་པའི་རང་བཞིན་བར་མེད་ཀྱི་གསམ་གཏན་རྐྱེན་ཁ་ན་མེད་པ་ཞེས་བྱ་བར༔ ལྟ་བ་ཡེ་ཤེས་གཏིང་རྫོགས་ལས༔ ཨ་ཏི་རྫོགས་ཆེན་ཆོས་སྐུ་བདེན་གཉིས་བྲལ༔ ངོ་བོ་ཉིད་ཀྱི་རང་བྱུང་རང་ཤར་བས༔ ཡོད་མེད་དབུས་ཀྱི་ཡེ་ཤེས་མཐའ་གསུམ་བྲལ༔ ཡུལ་ལ་སྤངས་སྡུད་གཉིས་པོ་གདོད་ནས་མེད༔ དཔེར་ན་ནམ་མཁའི་ངང་དུ་ཤེས་པར་བྱ༔ ཅི་བཞིན་མ་ནོར་རང་སེམས་རྟོག་པ་ཡི༔ ལུས་ངག་མ་སྐྱེས་རྟོག་པའི་གཞི་མེད་ཕྱིར༔ སྐྱིལ་ཀྲུང་དྲང་འདུག་སྨྲ་བཅད་ཁ་ན་མེད༔ དེ་ཕྱིར་སེམས་ཀྱང་དངོས་མེད་རྟག་ཆད་བྲལ༔ རྟོག་སྤངས་མི་རྟོག་བསྒོམ་པས་ཁར་མི་འོང་༔ རྣལ་འབྱོར་དམིགས་པའི་སེམས་ཀྱིས་བསྒོམ་མི་དགོས༔ ཞེས་དང་༔ ལྟ་བ་ཐམས་ཅད་ཀྱི་སྙིང་པོའི་རྒྱུད་ལས༔ རྣམ་པར་མི་རྟོག་སལ་ལེ་བ༔ ས་ལེ་བ་ལ་རྟོག་པ་མེད༔ དེ་ནི་རང་བྱུང་ཡེ་ཤེས་ཡིན༔ མིང་དུ་མི་ཐོག་ཉམས་མྱོང་ཞིང་༔ འཁུར་བ་ཆུ་ཡི་ཅི་བཞིན་དུ༔ ཡེ་ཤེས་སྣང་བས་དོན་ལ་ཕེབས༔ ཞེས་སོ༔ དེའི་དུས་སུ་འཆར་རམ་གནས་ཀྱང་གང་ལྟར་ཡང་ཟང་ཐལ་གྱི་ཡེ་ཤེས་རྗེན་ལ་བུད་པའི་མི་རྟོག་སྤྲོས་བྲལ་ཆེན་པོའི་ངང་མ་བརྗེད་པས༔ ཤར་བ་ལ་བསྐྱང་ན་རིག་པ་བཞེངས་པ་དང་འདྲ་བས་ཐད་ཀ་ན་རིག་པ་མ་གཏོགས་མེད་པ་ངོས་ཟིན་དུས་བཟང་ངན་བདེ་ཆེན་དུ་རང་གྲོལ་བའི་ཆོས་སྐུ་འཆར་ཏེ༔ ཀུན་བྱེད་ལས༔ དོན་ནི་ཀུན་དོན་སྐྱེ་བ་མེད་ཤེས་ན༔ རྣམ་རྟོག་མཚན་མ་དེ་བཞིན་རིག་ཤེས་ན༔ དྲན་བསམ་ཡིད་ལ་འགྱུར་བ་མ་ལུས་པ༔ སྐྱེ་བ་མེད་པའི་ངང་ལས་མ་ཡེངས་ན༔ གང་ལྟར་བསམ་ཡང་བསྒོམ་པ་ཡིན་ཤེས་ན༔ མ་བསྒོམ་གང་ལྟར་བཞག་ཀྱང་ཡེངས་པ་མེད༔ ཅེས་དང་༔ ལྟ་བའི་སྙིང་པོ་ལས༔ རྣམ་རྟོག་མཚན་མ་སྐྱེས་པའི་ཚེ༔ ཆོས་སྐུ་རྟོག་པ་མེད་པའི་ངང་༔ འབྱུང་བའི་ཡོན་ཏན་ལྔ་སྤྱོད་ཚེ༔ ལོངས་སྤྱོད་རྫོགས་པ་སྐུ་ཡི་ངང་༔ འགྲོ་དྲུག་གཟུགས་སུ་སྣང་བའི་ཚེ༔ སྤྲུལ་སྐུ་ཐུབ་པ་ཆེན་པོའི་ངང་༔ སྡུག་བསྔལ་སྣ་ཚོགས་སྐྱེས་པའི་ཚེ༔ ཡེ་ཤེས་བདེ་བ་ཆེན་པོའི་ངང་༔ རྐྱེན་གྱིས་ཆགས་སྡང་སྐྱེས་པའི་ཚེ༔ རང་བྱུང་ཡེ་ཤེས་ཤར་པ་ཡིན༔ ཞེས་དང་༔ ལྟ་བ་ལ་ཤན་རིན་ཆེན་སྒྲོན་མེ་ལས༔ ལོག་པའི་རྒྱུད་ལས་གྲོལ་བའི་བདེ་ཆེན་དོན༔ འཁྲུལ་ཞེན་གྲོལ་ཚེ་བདག་གཞན་ཡོད་མ་ཡིན༔ ཞེས་དང་༔ ལྟ་བ་ལ་ཐལ་ལས༔ གང་ཡང་ཆེད་དུ་མི་བསྒྲུབ་པས༔ དེས་ན་ལྟོས་པ་དགག་མི་སྤྱོད༔ དེ་ནི་མིང་གི་ལྷུན་གྲུབ་སྟེ༔ དེ་ཡི་མཚན་ནི་རྫོགས་ཆེན་ཡིན༔ གསང་བའི་མཚན་དུ་ཡང་ཏི་ལགས༔ ཞེས་སོ༔ ཡང་གནས་པའམ་མི་རྟོག་པའི་དུས་ཀྱི་རིག་ཆ་རྗེན་སང་ངེ་བས་ཆོས་སྐུ་རང་གནས་ཆེན་པོ་ཞེས་བྱ་བ་ལས་ཆེད་དུ་བཟུང་བའི་མི་རྟོག་པ་དེ་བསྒོམ་པ་མིན་པས་ཁྱད་པར་ཡང་ཤེས་ལ༔ དེ་ལྟར་མི་རྟོག་པའི་དུས་ཀྱི་རིག་པ་ཟང་ཐལ་གྱི་ངང་ཚུགས་མ་ཤོར་བར་ཐོག་བབ་ཀྱི་ཏིང་འཛིན་ལས་བསྐྱང་བར་བྱ་བ་སྟེ༔ ཀློང་ཆེན་དྲུག་པར༔ འཛིན་པ་མེད་པའི་སེམས་ཉིད་ལ༔ རང་ཤར་ཆེན་པོའི་སྣང་བ་ནི༔ མ་འགགས་མི་རྟོག་དགོངས་པ་ཞེས༔ ཀུན་ཏུ་བཟང་པོ་ང་ཡིས་བསྟན༔ ཞེས་སོ༔ འདི་ལྟ་བའི་དོན་ལ་གོམས་པས་སེམས་ལས་འདས་པའི་སེམས་ཀྱི་ཆོས་ཀྱིས་མི་གོས་པས་བྱིང་རྒོད་ལ་སོགས་པའི་སྐྱོན་འབྱུང་མི་སྲིད་པའི་ཡོན་ཏན་དང་༔ ལྟ་བ་དེའི་ཕྱག་རྒྱས་ཐེབ་པས་སྐྱོན་དུ་མི་འགྱུར་པ་དང་༔ མཐར་གསེར་གླིང་དུ་ས་རྡོ་མི་རྙེད་པ་ལྟར༔ རྣམ་རྟོག་ཐམས་ཅད་སེམས་སྤྲོས་བྲལ་དུ་དག་མཉམ་པའི་ཏིང་ངེ་འཛིན་ལ་དོར་བ་མེད་པའི་གནད་དང་ལྡན་པ་སྟེ༔ ལྟ་བ་ལ་ཐལ་གྱི་རྒྱུད་ལས༔ དེ་བཞིན་ཡེ་ཤེས་ངོས་ཟིན་པས༔ བྱིང་རྒོད་མི་འབྱུང་ཡེ་ཤེས་གསལ༔ དུག་ལ་སྨན་བཏབས་ནད་སེལ་ལྟར༔ ཆགས་སྡང་ལ་སོགས་དུག་ལྔ་ལ༔ དེ་ཉིད་གསལ་བཏབས་བལྟ་བས་སྟོངས༔ ཞེས་དང་༔ ལྟ་བའི་སྙིང་པོ་ལས༔ དཔེར་ན་རིན་ཆེན་གསེར་གླིང་ལ༔ ས་རྡོ་བཙལ་ཀྱང་མི་རྙེད་བཞིན༔ ཐམས་ཅད་སེམས་སུ་དོན་རྟོགས་པའི༔ ཏིང་འཛིན་དག་ལ་འབྱུང་འཇུག་མེད༔ ཅེས་སོ༔

གཉིས་པ་དེ་བསྒོམ་དུ་མེད་པའི་བསྒོམ་པར་བཤད་པ་ནི༔ དེ་ལྟ་བུའི་དོན་ལ་གནས་པ་ནི་བྱར་མེད་རང་བཞག་རང་ཤར་ཆེན་པོ་ཡིན་པས་རྣམ་རྟོག་འཕྲོ་འདུས་བསྐྱེད་པའི་ཏིང་འཛིན་མ་ཡིན་ལ༔ གལ་ཏེ་དེའི་སྒོ་ནས་ཅི་ལྟར་བསྒོམ་ཡང་མི་མཐོང་བའི་ཕྱིར་དང་༔ སེམས་གནས་ངལ་བསོའི་བསྒོམ་པས་རྐྱེན་མི་ཐུབ་ཅིང་སྔར་བཤད་པ་ལྟར་བློ་རྫས་འགལ་བའི་ཕྱིར་ཡང་བསྒོམ་དུ་མེད་པ་འབའ་ཞིག་ལ་གདེངས་ཆོས་པར་བྱའོ༔ དེ་སྐད་དུའང་ཏིང་འཛིན་རྩེ་གཅིག་གི་རྒྱུད་ལས༔ ཉག་གཅིག་རྟོགས་སྒོམ་ཉམས་ལས་འདས༔ ཡེ་ཤེས་བསྒོམ་པ་མ་ཡིན་ཏེ༔ ཡེ་ཤེས་བསྒོམ་མེད་བློ་སྣང་མེད༔ བློ་སྣང་བསྒོམ་པས་རྐྱེན་མི་ཐུབ༔ ངོ་བོ་བློ་སྣང་རང་སྒོ་སྟེ༔ ཡེ་ཤེས་རང་ཤར་ཏིང་འཛིན་རྐྱེན་ཐུབ་ཡིན༔ ཞེས་དང་༔ ཀུན་བྱེད་ལས༔ སྒྲོ་སྐུར་འདས་པས་དོན་གྱི་སྙིང་པོ་ལ༔ བསྒོམ་དང་མི་བསྒོམ་མཁའ་ལ་རྩོད་པ་འདྲ༔ རྟོག་པའི་དོན་ལས་མ་ཡེངས་དགོངས་པ་སྟེ༔ དངོས་པོ་མ་ཡིན་དངོས་པོ་མེད་མ་ཡིན༔ ཞེས་དང་༔ བསྒོམ་དུ་མེད་པའི་དོན་ལ་མ་བསྒོམ་ན༔ མཚན་མའི་གྲངས་ལ་བསྐལ་བ་བརྒྱར་བསྒོམས་ཀྱང་༔ ཀུན་བྱེད་ང་ཡི་དགོངས་པ་རྟོགས་མི་འགྱུར༔ རྣམ་རྟོག་ཡུལ་ལ་མཚན་མའི་གྲངས་ལས་འདས༔ ཀུན་བྱེད་བྱ་མི་དགོས་པར་བྱར་ཡང་མེད༔ བྱ་བ་མཚན་མའི་རྣམ་རྟོག་རྗེས་ཞུགས་ཤིང་༔ བྱ་བས་མི་ཟིན་རྟོག་པས་རྟོག་པ་འཇིལ༔ ཆུ་ལས་རྙོགས་མ་བཞིན་དུ་བྱིས་པ་བསླུས༔ ཞེས་སོ༔

བཞི་བ་གྲོལ་ཚུལ་གྱི་སྒོ་ནས་སྣང་སྤྱོད་ཡེ་ཤེས་ཀྱི་གྲོགས་སུ་འཆར་བའི་མན་ངག་ལ༔ གྲོལ་ལུགས་བཞིའི་གནད་སྤྱིར་བཤད༔ རང་གྲོལ་ཆེན་པོའི་དགོངས་པའི་འགགས་བྱེ་བྲག་ཏུ་བསྡམ་པའོ༔

དང་པོ་ལ་ཡེ་གྲོལ་ཆེན་པོའི་ལྟ་བས༔ མཐའ་གྲོལ་ཆེན་པོའི་དགོངས་པས༔ ཅེར་གྲོལ་ཆེན་པོའི་སྤྱོད་པས༔ གཅིག་གྲོལ་ཆེན་པོའི་འབྲས་བུ་གདེང་གིས་གྲོལ་ཐོག་ཏུ་རང་མལ་འཆའ་བའོ༔ དང་པོ་ནི༔ འགྲོ་བའི་ལུས་སོགས་གཟུགས་སྣང་བ་ཐམས་ཅད་འབྱུང་བ་རང་གནད་ཀྱི་སྣང་སྟོང་བདེ་གཤེགས་ཀྱི་སྐུ་རུ་གྲོལ༔ སྒྲ་སྐད་ཐམས་ཅད་གསལ་དག་སྒྲ་དོན་གྱི་གྲགས་སྟོང་བདེ་བར་གཤེགས་པའི་གསུང་གི་རྡོ་རྗེ་གྲོལ༔ ཅི་བསམ་དགོངས་གནད་ཀྱི་དྲན་སྟོང་སངས་རྒྱས་ཀྱི་ཐུགས་རྣམ་པར་མི་རྟོག་དུ་ཡེ་ནས་གྲོལ་བ་སྟེ༔ དེའི་ཕྱིར་ན་བསྐྱར་ནས་གྲོལ་མི་དགོས་པར་རིག་པས༔ འབད་རྩོལ་གྱི་མཐའ་ལ་མི་གནས་པར་བློ་བདེ་བའོ༔ དེ་བས་ན་རང་བྱུང་གི་རིག་པ་དང་༔ དེའི་རྩལ་ལས་རོལ་པར་ཤར་བའི་ཆོས༔ སྣང་ཞེན་ཐམས་ཅད་ཀྱང་ཡེ་ནས་གྲོལ་བ་ཤེས་པས་གཞི་མེད་རྩ་བྲལ༔ མེད་སྣང་སྟོང་པའི་རང་གཟུགས༔ ཤར་གྲོལ་རིས་མེད་དགག་སྒྲུབ་བཅས་བཅོས་སུ་མེད་པར་བཞག་པས༔ དཔེར་ན་ཆུ་ཟླ་སྣང་བ་དང་འགགས་པ་ལ་མེད་པར་ཁྱད་མེད་པ་ལྟར༔ དེ་ལས་གཞན་དུ་སྔར་མ་གྲོལ་བ་སླད་ནས་གྲོལ་རྒྱུ་མེད་པའི་གདེངས་རང་མལ་དུ་འཆོས་པའོ༔ ལྟ་བ་ལ་ཐལ་ལས༔ ལམ་གྱི་བཅོས་སུ་ག་ལ་ཡོད༔ ཡེ་ནས་གྲོལ་བའི་ཆོས་སྐུ་ལ༔ ལྟ་བསྒོམ་སྤྱོད་པ་འཆིང་བའི་རྒྱུད༔ ཡེ་གྲོལ་ཆེན་པོ་ཕྱོགས་མེད་ལ༔ ཕྱོགས་སུ་འཛིན་པ་འཁྲུལ་པའི་ལམ༔ ཞེས་དང་༔ དེ་སྐད་དུ་རྒྱ་མཚོ་ཀློང་གསལ་ལས༔ སྡུག་བསྔལ་མ་སྤང་སྐུ་ལྔར་གྲོལ༔ དུག་གསུམ་མ་སྤང་སྐུ་གསུང་ཐུགས་སུ་གྲོལ༔ མ་རིག་ཡེ་ཤེས་ཆེན་པོར་གྲོལ༔ སྒྲིབ་གཡོག་མ་སྤངས་འོད་གསལ་ཆེན་པོར་གྲོལ༔ རྣམ་རྟོག་མ་སྤངས་ཆོས་ཉིད་ཆེན་པོར་གྲོལ༔ སེམས་ཅན་མ་སྤངས་སངས་རྒྱས་ཆེན་པོར་གྲོལ༔ འཁོར་བ་མ་སྤངས་མྱང་འདས་ཆེན་པོར་གྲོལ༔ སྣང་བ་མ་སྤངས་ཞིང་ཁམས་ཆེན་པོར་གྲོལ༔ ཕྱི་ནང་མ་སྤང་ཡུལ་མེད་ཆེན་པོར་གྲོལ༔ བཟང་ངན་མ་སྤངས་དགག་སྒྲུབ་མེད་པར་གྲོལ༔ གཟུང་འཛིན་མ་སྤངས་དབྱེ་བསལ་མེད་པར་གྲོལ༔ དངོས་པོ་གཤིས་ཀྱི་གནས་ལུགས་ནི༔ བཅོས་པས་འགྲུབ་པར་མ་གསུངས་བས༔ དངོས་པོ་མེད་པ་ཡེ་ནས་གྲོལ༔ ཟང་ཐལ་ཆེན་པོར་ཡེ་ནས་གྲོལ༔ ཞེས་དང་ཀློང་གསལ་ལས༔ སྟོང་ལས་ཀུན་འབྱུང་སྟོང་པར་གྲོལ༔ མེད་ལས་སྣ་ཚོགས་མེད་པར་གྲོལ༔ ཐོལ་བྱུང་ཡིད་རིག་བྱུང་ཚད་གྲོལ༔ ཝལ་བྱུང་དྲན་རྟོག་སྙིང་པོར་གྲོལ༔ ཁམས་གསུམ་སེམས་ཅན་ལུས་ངག་ཡིད་གསུམ་སྟེ༔ དུས་གསུམ་སངས་རྒྱས་སྐུ་གསུང་ཐུགས་སུ་གྲོལ༔ ཞེ་འདོད་རྩོལ་སྒྲུབ་བྱས་ནས་གྲོལ་མིན་ཏེ༔ ཐོག་མ་ཉིད་ནས་མ་སྤངས་མི་གནས་གྲོལ༔ ཞེས་དང་༔ ལྟ་བ་ལ་ཐལ་ལས༔ ཡེ་གྲོལ་ཆེན་པོར་ཤར་བ་ལ༔ རྩོལ་སྒྲུབ་བྱེད་པ་འཁྲུལ་པའི་ལམ༔ ཞེས་པས་མཚན་ཉིད་སོགས་ཀྱི་ཡེ་གྲོལ་གྱི་གནད་ལ་མ་ཕབ་པར་རྩོལ་སྒྲུབ་བྱས་ཆོས་ཀྱི་སྤྲིན་དཀར་པོས་ཉི་མ་བསྒྲིབ་པ་ལྟར་སོང་བས་ཤར་གྱི་དོན་གཉེར་ལ་ཁ་ཤར་དུ་བལྟས་ནས་འགྲོ་བ་སྤངས་ཏེ་ནུབ་ཏུ་ཕྱིན་པ་དང་འདྲ་སྟེ་དོན་མེད་པའོ༔ དེས་ན་ཡེ་གྲོལ་སོར་བཞག་འདི་གནད་རབ་ཏུ་ཟབ་པོ༔ འཁྲུལ་སྣང་རྩད་གཅོད་སྣང་གསལ་སྤུ་གྲིའི་རྒྱུད་ལས༔ དཔེར་ན་དོན་ཡོད་ལམ་ཞུགས་ན༔ ཤར་ན་དོན་ཡོད་ནུབ་ལ་ཕྱིན༔ ནུབ་ཀྱིས་ཤར་གྱི་དོན་མི་འགྲུབ༔ ལམ་རྒྱུས་མི་ཤེས་འཁྲུལ་པ་འབྱུང་༔ ཞེས་པ་ལྟར་རོ༔ འཇམ་དཔལ་ཡང་ཏི་ནག་པོ་ལས༔ ཐམས་ཅད་ཡེ་གྲོལ་བསྟན་པ་ལ༔ ཡང་ཏི་ནག་པོ་འབྲུ་གཅིག་ཤར༔ བྱིན་གྱིས་བརླབ་ཀྱི་བྱུང་བ་ཡི༔ འབྲས་བུ་ཡེ་གྲོལ་རྒྱུད་ཆེན་ལ༔ ངང་ངམ་ཤུགས་ཀྱིས་ཤར་བའོ༔ ཞེས་སོ༔ འདི་ནི་ལྟ་བའི་ངོས་ནས་ཡེ་གྲོལ་ཡིན་པའི་རྗེས་སུ་འཇོག་པས་ཕྱིར་ཡེ་གྲོལ་ཆེན་པོའི་དབང་གི་ཉམས་ལེན་ནོ༔

གཉིས་པ་མཐའ་གྲོལ་ཆེན་པོའི་དགོངས་པ་ནི༔ ཡོད་པ་དང་མེད་པ༔ གཉིས་གཉིས་མིན་གང་དུའང་རིག་པའི་ངོ་བོ་གྲུབ་པ་མེད་པ་དང་༔ དེའི་རྩལ་ལས་བྱུང་བ་ཐམས་ཅད་ཀྱང་མཐའ་ལས་གྲོལ་ཟིན་པས༔ ད་ལྟ་བསྒོམ་པའི་དུས་སུའང་གང་དུའང་ལྟོས་མི་འཆའ་པར་འདི་ཡིན་མིན་གྱི་རྩིས་གདབས་མི་སྤྲོ་བར་ཆོས་ཉིད་རང་ལ་ཤར་བ་ཉིད་བསྒོམ་མི་བསྒོམ་གྱི་སྤྲོས་པ་དང་བསྡུ་བ་སོགས་དམིགས་པའི་འཛིན་སྟངས་ཐམས་ཅད་དང་བྲལ་བར་ཅོག་གིས་བཞག་པ་སྟེ་སྣང་རིག་མཐའ་གྲོལ་ཀུན་ཏུ་བཟང་པོའི་དགོངས་པ་རང་ལ་རྙེད་པ་ཡིན་ནོ༔ དེ་ཡང་མཐའ་གྲོལ་གྱི་དགོངས་པའི་ངོ་བོ་རིག་པ་རང་བྱུང་གི་སངས་རྒྱས་རང་ངོ་ཅེར་གྱིས་མཐོང་བས་རྩལ་གཞི་ཐིམ་མཐའ་གྲོལ་དུ་དག་པ་ཤུགས་ལས་འབྱུང་བར་འགྱུར་རོ༔ མུ་ཏིག་ཕྲེང་བ་ལས༔ འབད་པས་གྲོལ་བ་མ་ཡིན་ཏེ༔ ཡེ་ཉིད་ནས་ནི་གྲོལ་བར་གནས༔ ཞེས་གཞི་ལྟ་བ་མཐའ་གྲོལ་ཆེན་པོ་བསྟན༔ ཉི་ཟླ་བཀོད་པ་ལས༔ དངོས་པོར་སྣང་བའི་ཆོས་རྣམས་ལ༔ མིང་མེད་མཐའ་སྟོང་གྲོལ་བར་བཞག༔ དབང་པོ་འབྲིང་གིས་འདི་ལྟར་ཤེས་པར་བྱ༔ བྱར་མེད་གཏད་མེད་མཐའ་ལས་གྲོལ་བར་བསྟེན༔ ཞེས་ལམ་བསྒོམ་པ་མཐའ་གྲོལ་ཆེན་པོ༔ དེ་ལྟར་བསྒོམ་པས་རིག་པ་མཐའ་གྲོལ་ཀུན་ཏུ་བཟང་པོ་རང་ལ་རྙེད་པ་ནི་འབྲས་བུ་མུ་མེད་མཐའ་སྟོང་རྟོགས་པར་བཞག་སྟེ༔ ཉི་ཟླ་བཀོད་པ་ལས༔ ཡེ་ཤེས་ཉི་མ་ཤར་བས་མུ་མེད་མཐའ་སྟོང་རྟོགས༔ མ་རིག་གཏི་མུག་སངས་བས་མུ་མེད་མཐའ་སྟོང་རྟོགས༔ དུག་ལྔ་རང་སར་གྲོལ་བས་མུ་མེད་མཐའ་སྟོང་རྟོགས༔ འཁྲུལ་སྒོ་འཁྲུལ་སྣང་མེད་པས་མུ་མེད་མཐའ་སྟོང་རྟོགས༔ སྣང་སྟེ་གྲུབ་པ་མེད་པས་མུ་མེད་མཐའ་སྟོང་རྟོགས༔ རིག་ཀྱང་ངོས་བཟུང་མེད་པས་མུ་མེད་མཐའ་སྟོང་རྟོགས༔ སེམས་ཀྱང་དངོས་གཞི་མེད་པས་མུ་མེད་མཐའ་སྟོང་རྟོགས༔ སྣང་བ་རང་སོར་བཞག་པས་མུ་མེད་མཐའ་སྟོང་རྟོགས༔ རིག་པ་མིང་མེད་རིག་མེད་མུ་མེད་མཐའ་སྟོང་རྟོགས༔ ཞེས་སོ༔ འདི་ནི་བསྒོམ་པ་ཐམས་ཅད་ཀྱི་མཆོག་སྟེ༔ རྒྱལ་བ་ཀུན་གྱི་ལམ་པོ་ཆེ་ཡིན་ནོ༔ བསྒོམ་པ་མིང་མེད་མཐའ་སྟོང་ངོ་༔ ཞེས་ཉི་ཟླ་འོད་འབར་ལས་གསུངས་སོ༔ རིན་ཆེན་སྒྲོན་མེ་ལས༔ མིང་མེད་མཐའ་གྲོལ་བློ་འདས་རང་ངོ་འདི༔ མ་རྟོགས་གཉིས་འཛིན་གྲུབ་མཐས་བཅིང་པ་རྣམས༔ བློས་བཏགས་མཐར་འཛིན་རང་སར་གྲོལ་བའི་ཕྱིར༔ དེ་ཡི་འཛིན་པའི་མཐའ་ལས་འདི་ལྟར་གྲོལ༔ ཞེས་གསུངས་སོ༔

གསུམ་པ་ཅེར་གྲོལ་ནི༔ ལར་རྣམ་རྟོག་ཐམས་ཅད་རྒྱུན་ཆད་མེད་པའི་རིག་རྩལ་ཡིན་པས་འགགས་མེད་དུ་ཡུལ་ལ་ཤར་དུས༔ ཤར་གྲོལ་དུ་ས་ལ་ལ་ཡོད་པའི་མཐོང་སའམ་ཅེར་ས་དེར་ཡེ་ནས་མ་གྲོལ་བ་མེད་ཀྱང་ངོ་མ་ཤེས་པས་སེམས་ཅན་འཁྲུལ་པ་ལ༔ རྣལ་འབྱོར་པས་རྒྱུ་འབྲས་མེད་པར་རྟོགས་ནས་ཤར་སའམ་ཅེར་ས་དེར་བཞག་པའི་སྐད་ཅིག་ལ་རང་ཡལ་རྗེས་མེད་དུ་སངས་ངེ་བའི་ངང་ནས་རིག་པ་ཟང་ཐལ་ལྷག་གེར་ཤར་བ་ངོས་བཟུང་པ་ནི་ཅེར་གྲོལ་གྱི་འགགས་ཆོས་ཉིད་དུ་བསྡམ་པ་ཞེས་བྱའོ༔ ཅེར་གྲོལ་གྱི་ལུགས་ནི་འོད་གསལ་མ་བུ་འཕྲད་པས་གྲོལ་བ་ཡིན་པས་མཐོང་བ་དང་འོད་གསལ་ཡིན་པར་ཤེས་བའི་ཆོས་ཉིད་མངོན་སུམ་གྱི་རྩིས་ཐེབ་ནས་བཅས་བཅོས་དགག་སྒྲུབ་གང་ཡང་མི་དགོས་པར་གདེང་གི་བློ་བདེ་ཁོང་ནས་ཤར་བས་ཡུལ་སེམས་ཀྱི་སྤྲོས་པ་ཆོད་པ་ཞིག་གོ༔ འདི་ནི་རིག་པ་ཐོག་ཐབས་སུ་ཡུལ་དང་ཤེས་པའི་བར་ལ་དབབ་པ་ཡིན་པས་སྤྱོད་པའི་རྩལ་སྦྱོང་དུ་འགྲོ་བའོ༔ དེའི་ཐབས་ནི་ཡུལ་དྲུག་གང་ལ་ཤེས་པ་སྐྱེ་པ་ན་སེམས་ཀྱི་སྐད་ཅིག་དང་༔ མིག་གི་ལྟ་སྟངས་ཐོག་བབས་ཀྱི་གཟིར་ཏེ་ཅེར་གྱིས་གཏད་ནས་ཅོག་གིས་བཞག་པས་སྤྱི་དང་དུམ་བུ་གང་ལའང་སྣང་སེམས་བར་ལག་བྲལ་ནས་ཆོས་ཟད་བློ་འདས་ཀྱི་རང་བཞིན་དུ་ལྟོས་གཞི་མེད་པར་གྲོལ་བ་ཡིན་ཏེ༔ བཞག་ཐབས༔ སྣང་བ་ཅེར་བཞག་གི་གྲོལ་ལུགས་དང་སྔར་འདྲེས་ཀྱི་མི་དང་འཕྲད་པ་ལྟར་གྲོལ་བ་དང་༔ ཏིང་འཛིན་ཐོག་བབས་ཆེན་པོའི་གནད་ཀྱང་འདིས་ཡིན་པར་ཤེས་དགོས་སོ༔ ཐལ་འགྱུར་ལས༔ ཅེར་གྱིས་གྲོལ་བས་མཐོང་སར་གྲོལ༔ ཞེས་དང་༔ གསེར་གྱི་སྙིང་པོ་ལས༔ ཅེར་གྲོལ་ཆེན་པོའི་ལྟ་སྟངས་ཀྱིས༔ སངས་རྒྱས་སེམས་ཅན་གཉིས་ཀ་གྲོལ༔ ཞེས་དང་༔ ཁྱུང་ཆེན་ལས༔ ཅེར་གྲོལ་རང་དག་མཐའ་གྲོལ་ཡོངས་སུ་རྫོགས༔ གང་གི་མཐའ་བྲལ་གང་གཉིས་རང་གསལ་བས༔ བྱ་བྲལ་ཀློང་ཆེན་མ་བཙལ་ཆེན་པོའི་འགགས༔ ལུས་ངག་བྱ་བྲལ་སྣང་སྟོང་བར་དེར་བསྡམ༔ ཞེས་སོ༔ ཡང་ཅེར་གྲོལ་ནི༔ ཡུལ་མ་བཀག་པར་ལྟ་ལྟངས་དང་བཅས་ཅེར་གྱིས་གཏད་ནས་རིག་ངོ་ལ་བཞག་པས་ཡུལ་གྱི་འཛིན་པ་རང་ཞིག་གཏན་ཡལ་ལ་ ༼ དབང་པོའི་ཤེས་པ་རྟོག་མེད་ཀྱི་གྲོལ་ཚུལ་དུ། མཆན། ༽ སོང་བ་ལ་བྱས་ཀྱང་བློ་ལ་གོ་བ་བཟུང་བདེ་བའོ༔ ཡང་དབང་པོ་ལྔས་ཀྱང་བསླབ་ཏུ་རུང་སྟེ༔ སྒྲོན་མ་བརྩེགས་པ་ལས༔ དབང་པོ་ལྔ་ཉིད་ཅེར་གྲོལ་བས༔ ཡུལ་སྣང་གསལ་དག་ངང་དུ་གྲོལ༔ ཞེས་སོ༔

བཞི་བ་གཅིག་གྲོལ་ནི་འབྲས་བུ་གྲོལ་བ་སྟེ༔ རང་བྱུང་གི་རིག་པ་བདེན་པ་དབྱེར་མེད་སྤྲོས་པའི་གྲྭ་ཟུར་མེད་པ་ཐིག་ལེ་ཉག་གཅིག་ནི་འཁོར་འདས་ཀྱི་ཆོས་ཐམས་ཅད་པས་གཞི་རྒྱུད་དེ་དེ་ལས་གཞན་དུ་གྱུར་པའི་ཡན་གར་བའི་ཆོས་གང་ཡང་རང་རྒྱུད་པར་མེད་པའི་རིག་པ་དེའི་ངང་དུ་ཡེ་ནས་གྲོལ་བས་ཆོས་ཀྱི་སྐུ་དེའི་ངང་ཚུགས་མ་ཤོར་ན༔ འགྲོ་བ་དང་༔ འདུག་པ༔ ཉལ་བ་དང་༔ ཟ་བ་དང་༔ སྡུག་བསྔལ་དང་༔ བདེ་དགའ་སྐྱིད་གསུམ་མྱོང་བ་ཐམས་ཅད་མེད་སྣང་རིག་པ་གཅིག་གི་ངང་ལས་མ་གཡོས་པས་སྟེ༔ རིག་པ་ནི་འགྲོ་འདུག་ཟ་ཉལ་སྐྱིད་སྡུག་ཐམས་ཅད་མེད་པའི་བདག་ཉིད་རྒྱལ་བའི་ཆོས་སྐུ་རུ་རང་ཤར་པ་ཡིན་པས་དེའི་ཕྱིར་མ་གྲོལ་བ་མེད་པར་སྐུ་རྡོ་རྗེའི་ངོ་བོ་རང་སར་གྲོལ་བ་དང་༔ ཡང་སྨྲས་དང་ཐོས་པ་ཐམས་ཅད་ཀྱང་རིག་པའི་ངང་ལས་གཞན་མེད་ལ༔ རིག་པ་བརྗོད་དུ་མེད་པའི་གྲགས་སྟོང་གསུང་རྡོ་རྗེའི་ངོ་བོར་རམ་རང་སར་སྒྲ་ཐམས་ཅད་གྲོལ་བ་དང་༔ དྲན་པ་དང་༔ ཤེས་པ་དང་༔ ཡིད་འགྱུས་པ་དང་༔ བློ་དང་རྟོག་པ་ཐམས་ཅད་ཀྱང་རྨི་ལམ་གྱི་རྟོག་པ་དང་ཁྱད་མེད་པར་མེད་ལ་ཡོད་པར་འཛིན་པས་འཁྲུལ་པ་ཙམ་དུ་ཟད་ཀྱི༔ དོན་ལ་རིག་པའི་ངང་ལས་མ་གཡོས་པའི་རིག་པ་དྲན་རྟོག་གི་ཡུལ་ལས་འདས་པས༔ རྣམ་པར་མི་རྟོག་པའི་ཡེ་ཤེས་སངས་རྒྱས་ཐམས་ཅད་ཀྱི་ཐུགས་རྡོ་རྗེའི་ངོ་བོར་རྣམ་རྟོག་རང་སར་གྲོལ་བ་དང་༔ དེ་ལྟ་ན་འཁོར་བ་མེད་སྣང་རྫུན་ལ༔ རིག་པའི་སྣང་ཚུལ་ལྷག་པ་ཀུན་རྫོབ་པས་བདེན་པ་སྐུ་གསུང་ཐུགས་ལྷུན་གྱིས་གྲུབ་པ་ཞེས་བྱ་བས་ན་འཁོར་འདས་ཐམས་ཅད་རིག་པ་ལས་གཞན་ན་མེད་པས༔ རིག་པ་གཅིག་གྲོལ་ན་འཁོར་འདས་ཀུན་གྲོལ་བའི་གནད་ཟབ་མོ་སྟེ༔ ཉི་ཟླ་འོད་འབར་མཁའ་ཀློང་རྣམ་དག་གི་རྒྱུད་ལས༔ འགྲོ་ཡིན་འགྲོ་ཡིན་རང་སར་གྲོལ༔ སྡོད་ཀྱིན་སྡོད་ཀྱིན་རང་སར་གྲོལ༔ ཉལ་གྱིན་ཉལ་གྱིན་རང་སར་གྲོལ༔ ཟ་ཡིན་ཟ་ཡིན་རང་སར་གྲོལ༔ སྡུག་གིན་སྒུག་གིན་རང་སར་གྲོལ༔ སྐྱིད་ཀྱིན་སྐྱིད་ཀྱིན་རང་སར་གྲོལ༔ གང་ན་གནས་ཀྱང་རྡོ་རྗེའི་སྐུར་ནི་གྲོལ༔ ཅི་ལ་སྤྱོད་ཀྱང་མ་ཞེན་རང་སར་གྲོལ༔ ཇི་ལྟར་སྨྲས་ཀྱང་གྲགས་སྟོང་གྲོལ༔ ཇི་ལྟར་ཐོས་ཀྱང་མ་ཉན་གྲོལ༔ སྒོ་ལྔ་གསལ་བའི་ཤེས་པ་ལ༔ ཡིད་ལྔ་མ་སྒྲུབ་ཟང་ཐལ་གྲོལ༔ ཡིད་རིག་འགྱུས་ཀྱང་མ་བཟུང་གྲོལ༔ འགྱུ་བ་དྲན་པ་བློ་རྟོག་རྣམས༔ ཅིག་ཆོད་ཆོས་སྐུ་ལྷུན་གྲུབ་ཟང་ཐལ་ཡེ་ནས་གྲོལ༔ ཞེས་སོ༔ འཁོར་འདས་ཀྱི་ཆོས་རྣམས་རིག་པ་ཆོས་སྐུ་གཅིག་གི་ངང་དུ་ཡེ་ནས་གྲོལ་བས་བདེན་གཉིས་དབྱེར་མེད་ཆེན་པོ་ངོས་ཟིན་ནས་ངང་དུ་མ་བཅོས་པར་བཞག་པས་སྐུ་གསུམ་གྱི་བཙན་ས་ཟིན་པ་ཡིན་པས་ཀྱང་གཅིག་གྲོལ་འཐད་དེ༔ ཆོས་ཉིད་དུ་ངོ་ཤེས་པའི་སྣང་ཤེས་ཀུན་གྲོལ་བ༔ དཔེར་ན་ཚྭ་གཅིག་གི་རོ་ཤེས་པས་ཀུན་གཏན་ལ་ཕབ་པ་ལྟར་དུ་མ་རོ་གཅིག་ཏུ་ཤེས་པས་ཀྱང་ངོ་༔ རིག་པ་ཆོས་སྐུ་གཅིག་གི་ངང་དུ་བཞག་པས་སྣང་སེམས་ཐམས་ཅད་ཀྱི་སྤུན་ཐག་ཆད་དེ༔ གཟུང་འཛིན་མེད་པའི་ཡེ་གྲོལ་རང་མལ་དུ་ཕོག་པས་ཀྱང་གཅིག་གྲོལ་ལོ༔ དེ་ཡང་སྒྲོན་མ་བརྩེགས་པའི་རྒྱུད་ལས༔ གཉིས་འཛིན་རྟོག་པ་མ་ལུས་ཀུན༔ དབྱེར་མེད་ཤེས་རབ་ཡེ་ཤེས་མེ༔ རྒྱུ་རྐྱེན་མེད་པར་རང་འབར་བས༔ སྤངས་ཐོབ་དགག་སྒྲུབ་ཀུན་ལས་འདས༔ རྣམ་རྟོག་ཆོས་ཉིད་ངང་དུ་དེངས༔ གཉིས་མེད་འཛིན་པའི་རྒྱར་མ་ཆད༔ དེ་ལྟར་གཅིག་གིས་གྲོལ་བའི་ཕྱིར༔ མུ་མཐའ་མ་ལུས་རང་སར་གྲོལ༔ གྲོལ་དང་མ་གྲོལ་གཉིས་ལས་འདས༔ ཞེས་དང་༔ མུ་ཏིག་རིན་པོ་ཆེ་ཕྲེང་བའི་རྒྱུད་ལས༔ གཅིག་གྲོལ་ཡིན་པས་དུ་མ་སྟོངས༔ ཞེས་དང་༔ གསེར་གྱི་སྙིང་པོ་ལས༔ གཅིག་པུ་གྲོལ་བའི་སེམས་ཉིད་ནི༔ དུ་མ་རོ་གཅིག་ཡིན་པའི་ཕྱིར༔ ཞེས་སོ༔

གཉིས་པ་རང་གྲོལ་ཆེན་པོའི་དགོངས་པའི་འགགས་བྱེ་བྲག་ཏུ་བསྡམས་པ་ནི༔ གོང་དུ་བཤད་པའི་གྲོལ་ལུགས་བཞི་བོ་ཐམས་ཅད་ཀྱང་རྩ་བ་རང་གྲོལ་གཉེན་པོ་མེད་པ་ལ་ཐུག་པས་འདི་ལྟར་རྩལ་སྦྱངས་བས་ཐམས་ཅད་ཀྱང་གྲུབ་པར་འགྱུར་རོ༔ དེ་ལ་རྣམ་རྟོག་ཐམས་ཅད་ཡེ་ཅི་བཞིན་དུ་ཡོད་མ་མྱོང་དུ་མ་ཤེས་ན༔ སྤངས་སྦྱངས་བསྒྱུར་བ་ལ་སོགས་པ་གང་གིས་མི་གྲོལ་ཏེ༔ ཡེ་ཤེས་ཀྱིས་མི་སྤོང་བར་སེམས་ཀྱི་ཡེ་ཤེས་མི་མཐོང་༔ ཡེ་ཤེས་ཀྱིས་སེམས་མི་མཐོང་བས་སོ༔ སེམས་ཀྱིས་མི་སྤོང་སྟེ་སྤངས་གཉེན་རྫས་གཅིག་པས་དག་པར་མི་རུང་བའི་ཕྱིར་དང་༔ སེམས་སྔ་མ་ཕྱི་མས་མི་སྤོང་ཏེ༔ འདས་འོངས་རྫས་འགལ་བའི་ཕྱིར་དང་༔ དུས་མཉམ་པ་མི་སྤོང་སྟེ་ཕན་ཚུན་འཆོལ་བའི་ཕྱིར་དང་སེམས་རྒྱུན་གཅིག་ལ་དུས་མཉམ་པའི་ཕྱིར་རོ༔ ཡང་སེམས་དེ་ཉིད་ལས་ཉོན་མོངས་འབྱུང་བ་ལུས་དང་གྲིབ་མ་བཞིན་པས་སྤོང་སྦྱོང་བསྒྱུར་བར་མི་རུང་པའི་ཕྱིར་ན༔ གྲོལ་བ་ཐམས་ཅད་རང་གྲོལ་ཡིན་དེ༔ ཆུའི་རི་མོ་ལྟར་རང་གིས་རང་གྲོལ་བའི་གནད་དུ་ཤེས་པར་བྱའོ༔ དེ་ཡང་རང་གིས་གྲོལ་བའི་བྱ་བ་བྱས་པའི་རང་གྲོལ་ཡང་མིན་ཏེ༔ སྣང་སྲིད་འཁོར་འདས་ཀྱི་ཆོས་ཐམས་ཅད་བྱུང་ཡང་རང་ལས་བྱུང་༔ གྲོལ་ཡང་རང་གྲོལ་པས༔ སྣང་བ་སྣང་བ་ནས་རང་གྲོལ༔ སྟོང་པ་སྟོང་པ་ནས་གྲོལ་བ་སྟེ༔ དེ་ལས་མ་གཏོགས་པའི་ཆོས་ཉིད་གང་ཡང་མེད་པའི་ཕྱིར་རོ༔ དེས་ན་ཐོག་མ་ནས་ངོ་བོ་ཡོད་མ་མྱོང་བས་རང་གྲོལ༔ ཐབས་ཤེས་ལམ་རྐྱེན་བླ་མའི་མན་ངག་གི་གྲོལ་བྱེད་ལ་རག་མ་ལུས་པ་ཡིན་པས༔ ལམ་འདིར་ཞུགས་པའི་སྐལ་ལྡན་གྱིས་རིག་པ་ཟང་ཀ་ཀ་དག་རྗེན་པ་དེ་ངོ་ཤེས་ནས་རང་ས་ཟིན་ན༔ རྩལ་གྱི་རྣམ་རྟོག་ཐམས་ཅད་སྦྲུལ་མདུད་དམ་རྟ་རྔའི་མདུད་པ་ལྟར་རང་ཞིག་དུ་གྲོལ་བའི་ཕྱིར༔ མདོར་ན་དེ་ཉིད་ལས་མ་གཏོགས་པའི་གྲོལ་རྒྱུའམ་གྲོལ་རྐྱེན་མེད་པར་ཤར་དུས་ཉིད་ནས་ཡོད་མེད་རྟག་ཆད་ལས་འདས་པའི་ཆོས་ཉིད་རང་ལ་གྲུབ་ཟིན་པ་འདི་ཤེས་པའི་གདེང་གིས་ཤར་གནས་གྲོལ་གསུམ་རིག་པ་རྗེན་པར་འགགས་བསྡམ་པར་བྱའོ༔ དེ་ཡང་རང་བཞིན་གྱིས་མ་གྲོལ་ན་སླད་ནས་གྲོལ་བར་བཅོས་སུ་མེད་པ་སོལ་བ་ལ་བྱི་དོར་གྱིས་དཀར་པོ་མི་འགྱུར་བ་ལྟ་བུ་ཡིན་ཡང་༔ རང་གྲོལ་རང་ངོ་མ་ཤེས་ན་ཕན་མི་ཐོགས་པ་རིན་ཆེན་ངོ་མ་ཤེས་པས་དབུལ་བ་མི་སེལ་བ་ལྟ་བུ་དང་༔ ཤེས་ན་སླད་ནས་བཅོས་སུ་མེད་པ་བུམ་པ་གྲུབ་ཟིན་ན་བཅའ་མི་དགོས་པ་ལྟ་བུའོ༔ སྤྱན་རས་གཟིགས་ཏིང་འཛིན་རྩེ་གཅིག་གི་རྒྱུད་ལས༔ རང་བྱུང་གྲོགས་སུ་ཤར་བས་རྐྱེན་ཐུབ་ཡིན༔ སྣང་བ་འོད་གསལ་ཕྱི་ཡི་རྐྱེན་ཐུབ་ཡིན༔ ཚོགས་དྲུག་རང་དག་ནང་གི་རྐྱེན་ཐུབ་ཡིན༔ འགྱུ་བ་རང་སང་གསང་བའི་རྐྱེན་ཐུབ་ཡིན༔ རོལ་བ་རང་གྲོལ་ངོ་བོའི་རྐྱེན་ཐུབ་ཡིན༔ ཞེས་དང་༔ མཁའ་ཀློང་རྣམ་དག་གི་རྒྱུད་ལས༔ ཉོན་མོངས་བརྒྱད་ཁྲི་བཞི་སྟོང་གྲོལ༔ དཔེར་ན་སྦྲུལ་གྱི་མདུད་པ་བཞིན༔ བཅིང་མཁན་གྲོལ་མཁན་མེད་པར་གྲོལ༔ དེ་བཞིན་རྟག་ཆད་ཆོས་རྣམས་མ་ལུས་ཀུན༔ མ་བཅིང་མ་གྲོལ་སྙིང་པོར་གྲོལ༔ དཔེར་ན་རྔ་མའི་བདུད་པ་བཞིན༔ མཚན་མ་སྣ་ཚོགས་རང་གྲོལ་ཉིད༔ ཅེས་དང་༔ ནམ་མཁའ་ཀློང་ཡངས་ལས༔ དོན་གྱི་ངོ་བོ་གནས་ལུགས་ལ༔ སྒྲོ་སྐུར་གཉིས་ཀྱི་སྐྱོན་མེད་པའི༔ དུག་ལྔ་ཀུན་བརྟགས་རང་སར་གྲོལ༔ དེ་ཕྱིར་ཆོས་སྐུ་སྙིང་པོར་གསུངས༔ ཞེས་དང་༔ རང་གྲོལ་ཆེན་པོར་གནས་པ་ཉིད༔ རྒྱུ་རྐྱེན་གཉེན་པོ་མེད་པར་གནས༔ ཞེས་སོ༔ འདི་ལའང་དང་པོ་དང་བར་བ་དང་ཐ་མའི་གོམས་སྟོབས་ཀྱིས༔ སྔར་འདྲེས་ཀྱི་མི་ལྟར་གྲོལ་བ་དང་༔ སྦྲུལ་མདུད་ལྟར་གྲོལ་བ་དང་༔ ཁང་སྟོང་གི་རྐུན་པོ་ལྟ་བུ་གསུམ་ལས་འབད་བཅས་ཀྱི་ཉོན་མོངས་གང་སྐྱེས་ངོས་བཟུང་ནས་རང་སར་བཞག་པས་འགྱུ་བ་གནས་དག་དུ་སྦྱངས་པ་དང་༔ ཕྱི་མ་འབད་མེད་ནི་སྦྲུལ་འདུད་ལྟ་བུའོ༔

འདིར་གྲོལ་ལུགས་ལྔ་པོ་ཐམས་ཅད་ཀྱི་འགགས་རང་གྲོལ་ཆེན་པོ་འདིར་འདུས་པ་སྟེ༔ རིག་པ་བྱང་ཆུབ་ཀྱི་སེམས་ལས་རྩལ་སྣང་ཉོན་མོངས་དང་རྣམ་རྟོག་ཅེར་གྱི་སྣང་ཙམ་ནས་མཐའ་འམ་ཕྱོགས་གང་དུའང་གྲུབ་པ་མེད་པར་ཡེ་ནས་བཅིང་མཁན་རང་རྒྱུད་པ་ཆོས་ཉིད་དུ་སངས་རྒྱས་པའི་གཞི་རིག་པ་གཅིག་གི་ངང་དུ་རང་ས་ཟིན་པས་ཆོས་ཉིད་མ་བུ་འཕྲད་དེ་རང་གྲོལ་བ་ཡིན་པས་རང་གྲོལ་འབའ་ཞིག་ཏུ་གནད་འདུས་པ་ཡིན་ནོ༔ དེའི་རྒྱུ་མཚན་གྱི་དེ་འབའ་ཞིག་ཏུ་རྩལ་སྦྱངས་ཀྱང་མཆོག་ཏུ་གྱུར་ལ༔ ལར་གྲོལ་ལུགས་བཞི་པོའང་གང་ཟག་གཅིག་ལ་བརྩི་དགོས་པ་མ་ཡིན་གྱི་རང་རང་གང་ལ་མོས་པ་དེ་ཉིད་ཀྱིས་འདུལ་ཞིང་གནད་འདུས་སོ༔ དེ་ལྟར་གཅིག་གིས་ཀུན་གྲོལ་བའི༔ རང་གྲོལ་ཡེ་གྲོལ་ཡོངས་གྲོལ་དང་༔ ཅེར་གྲོལ་མཐའ་གྲོལ་བླ་མེད་པས༔ ཞེས་གཅིག་ཤེས་ཀུན་གྲོལ་གྱི་རྒྱུད་ལས་གསུངས་སོ༔

ལྔ་པ་ཟིལ་གནོན་གྱི་སྒོ་ནས་ལྟ་སྒོམ་སྤྱོད་པ་ཉམས་བྱུང་གི་བདུད་གཅོད་པའི་མན་ངག་ནི༔ བདུད་རྟགས་དང་༔ དེ་གཅོད་པའོ༔ དང་པོ་ལ་བཞི་ལས༔ དང་པོ་ལྟ་བའི་བདུད་ནི༔ མཉམ་བཞག་རྗེས་ཐོབ་གང་རུང་རུང་དུ་འབྱུང་བས་བཞི་ལས༔ མཉམ་བཞག་ཏུ་མཚན་མོ་མུན་པའི་སྨག་ཏུ་ཡང་ནམ་ལངས་བ་ལྟར་གསལ་བས༔ ཁམས་གསུམ་སེམས་ཅན་ཐམས་ཅད་ཀྱི་ལས་དགེ་སྡིག་གང་ཡང་མ་ལུས་པར་སྔ་ཕྱི་མེད་པར་ཤེས་ནས་དེའི་ཚེ་སྙིང་རྗེའི་བདུད་ཞུགས་ཏེ༔ ཏིང་འཛིན་བཏང་ནས་གཞན་དོན་བྱ་བར་བརྩམས་པས་གཡེང་ནས་བདུད་ཞུགས་པ་དང་༔ ཡང་ནམ་མཁའ་ནས་སྒྲ་ཆོས་ཀྱི་ཚིག་སྣ་ཚོགས་སྟོན་པ་དང་༔ ཞིང་ཁམས་རྒྱན་གྱིས་བརྒྱན་པ་དང་༔ ཡིད་དུ་འོང་བའི་སྒྲ་ཐོས་པར་འགྱུར་ཞིང་ཏིང་འཛིན་བཏང་ནས་གླུ་གར་བྱེད་པ་དང་༔ གཞན་ལ་ངོམས་ཤིང་ངོ་མཚར་མགུ་བས་གཡེངས་ནས་བསླུ་བ་དང་༔ ཡང་ཉམས་དང་རྨི་ལམ་གང་རུང་དུ༔ འཇིགས་པའི་གཟུགས་སྣ་ཚོགས་མི་དགེ་བས་ངང་ལ་གནས་པར་སྡིག་པར་འགྱུར་པས༔ བསམ་གཏན་བཏང་ནས་མྱ་ངན་གྱིས་ནོན་པས་འཆི་བདུད་ཞུགས་ནས་བསླུ་བ་དང་༔ ལྕེབ་པ་སོགས་བྱེད་དོ༔ ཡང་དངོས་ཉམས་རྨི་ལམ་གང་རུང་དུ་ཡིད་འོང་གི་གཟུགས་བསྟན་ནས་དུས་གསུམ་ལུང་བསྟན་ཏེ༔ དང་པོ་ཐམས་ཅད་བདེན༔ བར་དུ་ཕྱེད་བདེན༔ ཐ་མ་ཐམས་ཅད་རྫུན་པར་འགྱུར་བས་བསླུ་བདུད་སྙིང་ལ་ཞུགས་པས་ལྟ་བའི་བདུད་བཞི་སྟེ༔ ངེས་དོན་འདུས་པ་ལས༔ སྣང་བ་འོད་དང་གྲགས་པ་སྒྲ༔ འཇིགས་པའི་གཟུགས་དང་བསླུ་བའི་བདུད༔ ཅེས་པས་དེ་དག་ནི་ཡུལ་གོལ་སར་མ་ཤེས་པས་ལན་པ་ཡིན་པས་ཡུལ་ཟིལ་གྱིས་གནོན་པར་བྱ་དགོས་སོ༔

གཉིས་པ་བསྒོམ་པའི་བདུད་ལ་གསུམ་ལས༔ འབྲས་བུ་ཐོབ་པ་ལ་རེ་ནས་དྲག་ཏུ་བསྒོམ་ཉེས་པས་གསལ་བའི་བདུད་ཞུགས་ནས༔ སྒོ་ལྔ་བྱིང་སྟེ་གཉིད་དུ་གཡུར་བ་དང་༔ འཐིབ་ཆའི་རྟིང་པ་དང་༔ རང་རིག་པའི་ཡེ་ཤེས་ངོས་མ་ཟིན་པའི་ཕྱིར་དང་༔ བདེ་བ་ཉམས་ཤིང་ངང་བསྒོམ་རྨུགས་པར་འགྱུར་བ་དང་༔ ལྷག་མཐོང་གི་དོན་དང་བྲལ་བས་བསྒོམས་ཀྱང་དོན་མེད་པ་དང་༔ ཡང་རྐྱེན་ཡུལ་འདུ་འཛི་སོགས་ལ་དགའ་བས་གཡེངས་ནས་ཏིང་ངེ་འཛིན་བཏང་བ་དང་དྲན་བསམ་སྣ་ཚོགས་པས་མི་རྟོག་པས་ཞི་གནས་མེད་པས་ཉོན་མོངས་འབྱུང་བ་དང་༔ ཡང་འཕྲོ་བ་རྐུན་བུའི་བདུད་གང་ཡང་རུང་བས་ཚིག་ཙམ་ཡིད་ལ་བྱས་ནས་མི་གཡོ་བས་ཉམས་དང་བྲལ་ཏེ་འོག་འགྱུ་ལང་ལོང་ཡང་ནས་ཡང་དུ་འབྱུང་བ་སྟེ༔ བདེ་བ་འཁོར་ལོའི་རྒྱུད་ལས༔ ཏིང་འཛིན་མྱུར་དུ་ཐོབ་འདོད་ན༔ སྒོ་ལྔ་བྱིང་བ་གསལ་བའི་བདུད༔ རྐྱེན་གྱི་རྒོད་པ་མི་རྟོག་བདུད༔ འཕྲོ་པ་མི་གཡོའི་བདུད་རྣམས་འབྱུང་༔ ཞེས་པས་དེ་ཐམས་ཅད་ཀྱང་གདམས་ངག་གི་ངེས་པའི་གདེངས་དང་མ་ལྡན་ཞིང་མེད་པའི་ལན་གྱིས་ཡིན་པས་གདམས་ངག་གིས་ཆགས་པ་བཅད་པར་བྱ་དགོས་སོ༔

གསུམ་པ་སྤྱོད་པའི་བདུད་ནི༔ རང་ཉིད་དབེན་པར་གནས་ན་འཁོར་འདུ་བ༔ ལོངས་སྤྱོད་འདུ་བ་ལ་སོགས་པའི་དབང་དུ་གྱུར་ནས་གཞན་གྱི་སེམས་བཟུང་སྟེ༔ ཟས་ནོར་འདོད་པ་དང་༔ གཞན་ལ་ཁ་ལེན་འདེབས་པས་གཡེངས་བས་བསླུ་པ་དང་༔ ཡང་རང་གི་གནས་ཡིད་དང་མཐུན་པར་ཉམས་དགའ་བའི་ཁང་བ་བརྩིགས་པ་དང་༔ དེ་ལ་ཆགས་ནས་གཞན་དུ་འགྲོ་དབང་མེད་པར་གནས་ལ་ཆགས་པའི་ཞེན་པ་སྐྱེ་བ་དང་༔ ཡང་གཞན་དོན་བྱང་ཆུབ་ཡིན་ཟེར་ནས་སྨན་བསླབ་བྱ་སློབ་པ་གནས་ལྔ་སོགས་ཀྱིས་གཡེངས་ན་བདུད་ཡིན་པ་དང་༔ ཡང་ཁོང་འཁྲུགས་ནས་འཁོར་ངན་ལ་བཀྱོན་པ་རྩུབས་པས་གཞན་གྱི་ལོག་ལྟ་བྱས་པས་སེམས་འཁྲུགས་ཏེ་བདུད་ཀྱི་བསླུ་བར་འགྱུར་རོ༔ དེ་སྐད་དུ་ཀུན་ཏུ་བཟང་པོ་ཡེ་ཤེས་ཀློང་གི་རྒྱུད་ལས༔ བྱ་བ་འདུ་འཛི་ལོངས་སྤྱོད་བདུད༔ ཉམས་དགའ་ཞེན་པ་གནས་ཀྱི་བདུད༔ བསླབ་པའི་ཡོན་ཏན་གཡེངས་པའི་བདུད༔ སེམས་འཁྲུགས་འཁོར་ངན་བདུད་རྣམས་འབྱུང་ཞེས་སོ༔ དེ་ལྟ་བུའི་སྤྱོད་པའི་བདུད་དེ་དག་ནི་འཇིག་རྟེན་ཆོས་བརྒྱད་ལ་ཆགས་པ་ལས་བྱུང་བས་ན་ཟིལ་གྱིས་གནོན་པར་བྱའོ༔

བཞི་པ་ཉམས་ཀྱི་བདུད་ལ་དྲུག་ལས༔ མཁའ་འགྲོ་མས་ལུང་སྟོན་པ་དང་༔ གཟུགས་སྟོན་པ་ནི་བསླུ་བ་མཁའ་འགྲོའི་བདུད་དོ༔ ཟབ་ཅིང་ཆ་ཕྲ་བའི་ཉམས་ཞི་གནས་སུ་ཆགས་པས་ལྷག་མཐོང་མེད་པའི་བདུད་ཞུགས་པ་དང་༔ རང་རིག་པའི་ཡེ་ཤེས་ཀྱི་རང་མདངས་སྐྱོང་བ་ལས་ཉམས་པ་དང་༔ ཡང་གཞན་ངོར་ཚུལ་འཆོས་ཀྱི་ཆོས་ལྟར་བཅོས་ནས་གཞན་བྲིད་པ་དང་༔ གསང་དོན་གྱི་གནད་འཁྱོགས་པོར་སྟོན་པ་དང་༔ དབང་གསུམ་པའི་དགའ་བཞིའི་བདེ་བ་ལ་ཞེན་པས་འདོད་སྲེད་ཀྱི་བདུད་ཞུགས་ནས་བསླུས་པ་དང་༔ ལུང་ལྡན་གྱི་རྣལ་འབྱོར་ལ་མཉམ་པར་རེ་ནས་འགྲན་པའི་ཕྱིར་དུ་སྨད་པ་དང་ཞེ་སྡང་གི་བདུད་ཞུགས་ཏེ༔ གཞན་ལ་སྐུར་པ་འདེབས་པས་རང་ལྟུང་བ་དང་༔ ང་རྒྱལ་ཆེན་པོ་བསྐྱེད་ནས་བཀའ་རྐུན་ལ་སོགས་པ་བྱེད་པ་དང་དྲུག་གོ༔ རྫོགས་པ་ཆེན་པོའི་དོན་འདུས་རང་བྱུང་བདེ་བ་འཁོར་ལོ་ལས༔ འཇིག་རྟེན་མཁའ་འགྲོའི་ལུང་སྟོན་བདུད༔ ཉམས་སུ་མྱོང་བ་ཞེན་པའི་བདུད༔ ཞེ་འདོད་ཚུལ་འཆོས་བདུད་དང་ནི༔ བསྐམ་ཆགས་བདེ་བ་བོགས་འདོན་བདུད༔ གདེངས་མེད་སྐུར་འདེབས་ཞེ་སྡང་བདུད༔ ང་རྒྱལ་སྒྲོ་འདོག་བདུད་རྣམས་འབྱུང་༔ ཞེས་སོ༔ དེ་ལྟ་བུའི་བདུད་རྣམས་ལྟ་བ་མ་རྟོགས་པའི་དབང་གིས་འབྱུང་བ་ནི༔ བདུད་བཅོ་བརྒྱད་པོའི་དེ་དག་ཇི་ལྟར་འདུལ་ན༔ ཟིལ་གནོན་བཅོ་བརྒྱད་ཀྱིས་འདུལ་བ་དང་༔ གསུམ་དུ་བསྡུ་བ་དང་༔ གཅིག་གིས་ཆོད་པར་འདུལ་པ་གསུམ་ལས༔ དང་པོ་ནི༔ གཟུགས་སྒྱུ་མའམ་གཟུགས་བརྙན་ལྟ་བུར་ཟིལ་གྱིས་མནན༔ སྒྲ་བྲག་ཆ་ལྟར་ཤེས་པས་ཟིལ་གྱིས་མནན༔ འཇིགས་པའི་གཟུགས་རྨི་ལམ་ལྟར་ཟིལ་གྱིས་གནོན༔ བསླུ་བའི་ཚིག་ཆོས་ཉིད་ཚིག་འདས་སུ་རྟོགས་པས་མནན་ནོ༔

བསྒོམ་པའི་བདུད་ནི༔ འཐིབ་ན་བླ་མ་བསྒོམ་ལ་ཡར་ཐུགས་ཡིད་བསྲེ༔ ལྟ་སྟངས་མཐོ་བར་བྱ༔ སེམས་ལྷོད་ཅིང་སྤྲོ་བ་དང་༔ ལུས་ཆུའི་འོལ་ཀ་ལ་བཟེད༔ རྡོ་ཐོག་ཏུ་བསྒོམ༔ ལྷག་མཐོང་རིག་པའི་ངར་བཏོན༔ རྨུགས་པ་བདེ་བའི་བདུད་བྱུང་ནའང་དེ་བཞིན་དུ་ཟིལ་གྱིས་མནན་ཏེ་རིག་པ་ལ་ལྟ་བས་སོ༔ རྒོད་པ་མི་རྟོག་གྱི་བདུད་བྱུང་ན་ལྟ་སྟངས་སྨད༔ ཞ་མགོ་ཐོག་ཏུ་བཞག༔ བླ་མ་རང་ལ་བསྟིམ༔ དལ་ཅིག་སྙིང་གར་ཐིག་ལེ་ལ་སེམས་བཟུང་པས་དང་༔ རང་རིག་འཕྲོ་རྒོད་མེད་པས་བསམ་གཏན་གྱི་རྟེན་ལ་གཏད་པས་སེལ་ལོ༔ འཕྲོ་བ་མི་གཡོ་བའི་བདུད་བྱུང་ན༔ ཡེ་ནས་མི་འགྱུར་བའི་རང་བྱུང་གི་ཡེ་ཤེས་ངོས་ཟིན་ནས་འོག་འགྱུ་བྱུང་མ་བྱུང་རྟོགས་པའི་དྲན་པས་མི་བརྗེད་པའི་གཟུངས་དང་ལྡན་པས་ཟིལ་གྱིས་མནན་ནོ༔

སྤྱོད་པའི་བདུད་ནི༔ འདུ་འཛི་ཏིང་འཛིན་གྱི་དགྲ་རུ་ཤེས་པས་འདོད་ཆུང་ཆོག་ཤེས་ཀྱིས་ཟིལ་གྱིས་མནན༔ ཡུལ་ཆགས་རི་དྭགས་ལྟ་བུའི་སྤྱོད་པས་ངེས་མེད་གཉན་ཁྲོད་འགྲིམས་ནས་ཟིལ་གྱིས་མནན་ཞིང་༔ ལྟ་བ་རང་རིག་ཡུལ་མེད་ཆེན་པོའི་གདེང་གི་ཟིལ་གྱིས་མནན༔ གཡེང་བདུད་རང་དོན་མ་འགྲུབ་པར་གཞན་དོན་མི་འགྲུབ་པར་ཤེས་ནས་གཞན་དབང་དུ་མི་གཏོང་བར་ཟིལ་གྱིས་མནན་ནོ༔ འཁོར་ངན་སེམས་འཁྲུགས་ལ༔ མཐར་ཐུག་འགྱེས་ཆོས་ཅན་འབྲེལ་བ་མེད་པ་དང་༔ གནས་སྐབས་འབྲེལ་བ་རང་བཞིན་གྱི་དགྲར་ཤེས་ནས་སྤངས་བར་བྱས་ཏེ་ཆགས་པ་གཅོད་པས་ཟིལ་གྱིས་མནན་ནོ༔

ཉམས་ཀྱི་བདུད་ནི༔ མཁའ་འགྲོའི་ལུང་བསྟན་ན་རང་རིག་འགྱུར་མེད་ལས་གཞན་དུ་ལུང་སྟོན་ན་བསླུ་བར་ཤེས་ནས་རེ་དོགས་མེད་པར་ཟིལ་གྱིས་མནན་པར་བྱའོ༔ ཉམས་མྱོང་རྐྱེན་གྱི་བདུད་བྱུང་ན༔ སྔ་ཕྱི་མེད་པའི་ཆོས་སྐུ་འགྱུར་མེད་ཏིང་འཛིན་གྱི་འགྱུར་མི་རུང་བའི་ཕྱིར༔ བདུད་དུ་ཤེས་ནས་ཞེན་མེད་ལྟ་བས་ཟིལ་གྱིས་མནན་ནོ༔ ཚུལ་འཆོས་ཀྱི་བདུད་བྱུང་ན༔ མ་བཅོས་རང་བྱུང་གི་དོན་དྲན་པས་ཆོས་སྐུའི་གདེང་གི་རྟོགས་པ་བཞག་པའི་རྣལ་འབྱོར་གྱིས་མནན་ནོ༔ བོག་དབྱུང་གི་བདུད་བྱུང་ན༔ རང་བྱུང་གི་རྟེན་མེད་པར་ཤེས་པས་དབང་ལ་མི་ལྟོས་པར་ལྷུན་གྱིས་གྲུབ་པའི་དོན་དྲན་ནས་རྒྱུ་རྐྱེན་གྱིས་འབྱུང་བར་འདོད་ནས་རྩོལ་བ་ཟིལ་གྱིས་མནན་ནོ༔ བདེན་མེད་སྐུར་འདེབས་ཀྱི་བདུད་ནི༔ ཆོས་སྐུ་སྒྲོ་སྐུར་དང་བྲལ་བའི་ལུང་ལྡན་ལ་གནོད་མི་ནུས་པའི་ཚུལ་ཤེས་པས་ཟིལ་གྱིས་མནན་ནོ༔

ང་རྒྱལ་སྒྲོ་འདོག་གི་བདུད་ནི་སྣོད་ངན་ལ་གསང་བ་མི་འཆལ་བ་དང་༔ གསང་དོན་ལ་གཅེས་སྤྲས་ཀྱིས་མི་བསླད་པར་ཟིལ་གྱིས་གནོན་པར་བྱའོ༔

གཉིས་པ་གསུམ་དུ་བསྡུས་ན་དེ་དག་ཀུན་ཀྱང་ཡུལ་དང་ཤེས་པས་བསྡུས་པའི་སྣང་བ་དང་ཆོས་བརྒྱད་ལ་བདེན་པར་བཟུང་ནས་དགག་བསྒྲུབ་ཀྱི་ལན་ཡིན་པས༔ ཕྱི་སྣང་བའི་ཡུལ་བཟང་ངན་བསྟོད་སྨད་ཐམས་ཅད་སྒྱུ་མའི་དཔེ་བརྒྱད་ལྟ་བུར་ཤེས་པས་དེ་ལ་ཐོབ་ཤོར་ལ་སོགས་པ་མེད་པར་རེ་དོགས་རང་སར་བཅད་དེ་ཟིལ་གྱིས་གནོན༔ དེ་ལྟར་སྣང་མཁན་ནམ་དགག་སྒྲུབ་མཁན་གྱི་སེམས་ཡང་བར་སྣང་གི་སེར་བུ་ལྟར་སྐད་ཅིག་ཆ་མེད་བྱུང་ཞིག་གི་ངོ་བོ་ངོས་བཟུང་གི་ཆོས་སུ་གྲུབ་པ་མེད་པར་ཤེས་ནས༔ དེ་གཅིག་རྗེས་གཅིག་ཞེན་དུ་མི་སྤྲོ་བར་ཟིལ་གྱིས་གནོན་པ་དང་༔ གསང་བ་རང་རིག་པའི་བདེ་ཆེན་ཡང་སྤྲོས་བྲལ་ཟང་ཐལ་ནམ་མཁའ་ལྟ་བུར་འཛིན་ཞེན་ནམ་དམིགས་པ་མེད་པར་ཟིལ་གྱིས་མནན་པ་སྟེ་གསུམ་པོ་འདིས་ཚར་ཕྱིན་ཏེ༔ ཕྱི་སྣང་བ་མེད་པའི་ཡུལ་གང་ལའང་དགག་སྒྲུབ་ཆགས་སྡང་འཛིན་ཞེན་བྲལ་བར༔ ནང་འཛིན་པ་མེད་པའི་ཡུལ་ཅན་གང་གིས་ཀྱང་དེ་དག་བྱེད་པོ་བྲལ་བར་གསང་བ་ཡེ་ཤེས་ཙམ་དུའང་གྲུབ་པ་མེད་པའི་དམིགས་གཏད་མཚན་མ་ཐམས་ཅད་ཧར་སངས་བས་དགོངས་པ་མངོན་དུ་གྱུར་དངོས་གྲུབ་རང་ལ་བརྙེས་པར་འགྱུར་རོ༔ སེངྒེ་རྩལ་རྫོགས་ལས༔ རྫོགས་ཆེན་གསང་སྔགས་ངོ་བོ་ཉིད༔ མཆོད་པའི་དངོས་གྲུབ་མི་འབྱུང་སྟེ༔ ཟིལ་གནོན་རྣམ་པ་གསུམ་ལ་ཐུག༔ ཅེས་དང་༔ ཡེ་ཤེས་ནམ་མཁའ་མཉམ་པ་ལས༔ ཆོས་ཉིད་རང་རིག་དོན་ཤེས་ན༔ དུག་ལྔ་ཡེ་ཤེས་རྩིས་ཟིན་པས༔ ཉོན་མོངས་རང་རྒྱུད་ཟིལ་གནོན་ཉམས༔ བ་མོ་ལ་ནི་ཉི་ཤར་འདྲ༔ སྣང་བ་ཆོས་དབྱིངས་ཉམས་མྱོང་ནི༔ སྒྱུ་མ་འདྲ་སྟེ་དངོས་པོ་མེད༔ ལྟ་བ་གདེང་ལྡན་ཉམས་མྱོང་བ༔ སྤྲིན་དང་ཆུ་བུར་ཉམས་མྱོང་འདྲ༔ ཞེས་སོ༔

གསུམ་པ་གྲོལ་བ་ཅིག་ཆོད་ཀྱིས་འདུལ་བ་ནི༔ དེ་ལྟ་བུའི་བདུད་དེ་དག་ཐམས་ཅད་ལྟ་བ་ཀློང་དུ་མ་གྱུར་བས་ལན་པས་ན༔ ཀུན་ཏུ་བཟང་པོ་ཀློང་གི་རྒྱུད་ལས༔ བདུད་ཀྱི་སྤྱོད་པ་བཅོ་བརྒྱད་ཀྱང་༔ ལྟ་བའི་བདུད་ཉིད་གཅིག་པུ་ཡིན༔ དེ་ཕྱིར་ལྟ་བ་དམན་པའི་བདུད༔ ཅེས་སོ༔ དེས་ན་ལྟ་བ་རང་རིག་པའི་ཡེ་ཤེས་ལ་འཁོར་བ་ཉིད་སྒྲིབ་པའི་ཚུལ༔ མྱང་འདས་ཉིད་ཡོན་ཏན་གྱི་ཚུལ་དུ་རྫོགས་པར༔ དེ་གཉིས་ཀྱང་མཐོང་བ་ཡང་ལོག་གི་ཚུལ་དུ་རྫོགས་པར་ཤེས་ནས་རེ་དོགས་དབྱིངས་སུ་གཅོད་པ་དང་བསམ་ན་བློ༔ བསྒོམ་ན་འཆིང་རྒྱ༔ དགག་ན་རྩོལ་བ༔ སྒྲུབ་ན་ཚི་ཆད༔ རྟོགས་ན་འཁོར་བ༔ བཞག་ན་གྲོལ་བའི་ཚུལ་ཤེས་པས་གདེངས་ཀྱིས་གང་བྱུང་མེད་སྣང་བསླུ་ཆོས་སུ་ཤེས་པས་ཟིལ་གྱིས་མནན་ནོ༔ དེའི་འབྲས་བུ་ཡེ་ཤེས་ཆོས་ཀྱི་སྐུའི་ངོ་བོ་ལྷུན་གྱིས་གྲུབ་པའི་དངོས་གྲུབ་ཐོབ་པར་འགྱུར་རོ༔ བདེ་བ་འཁོར་ལོ་ལས༔ ལྟ་སྒོམ་བདུད་ནི་དེ་དག་ཀྱང་༔ རང་བྱུང་ཆོས་སྐུ་འདི་རྟོགས་པས༔ གང་བྱུང་ཟིལ་གནོན་རང་བརླགས་པས༔ འབྲས་བུ་ཡེ་ཤེས་ལྷུན་གྱིས་གྲུབ༔ རྟོགས་ན་རང་བྱུང་ཆོས་སྐུ་ཡིན༔ དེ་ཕྱིར་དོན་དྲན་བདུད་མེད་པས༔ ཟིལ་གྱིས་མནན་པས་ཐབས་མི་དགོས༔ ཞེས་སོ༔

གསུམ་པ་དགོངས་པའི་ངོ་བོ་ནི༔ དེ་ལྟ་བུའི་ཐབས་དག་ལས་རང་ཤར་བ་སྟེ༔ རང་སེམས་སྙིང་པོ་ཆོས་ཀྱི་སྐུའི་གཤིས་ཐོག་ཏུ་སླེབ་པ་ལས་དམིགས་གཏད་མཚན་མའི་གཟུང་བྱ་མེད་དེ༔ མཉམ་བཞག་ཏུ་གཉིས་སྣང་མེད་པའི་ཅི་ཙམ་དུ་འཛིན་རྩོལ་བསྒོམ་དམིགས་ཡོད་རང་ལ་ཡང་དག་པ་མིན་ནོ༔ ཡེ་ཤེས་གཏིང་རྫོགས་ལས༔ རྫོགས་ཆེན་གོལ་ས་བཅད་པའི་ཕྱིར༔ ཡེ་ཤེས་བསྒོམ་མེད་དག་ཏུ་རབ་རྟོགས་ན༔ རང་སེམས་དོན་རྟོགས་སྙིང་པོ་ཆོས་སྐུ་ལས༔ བསྒོམ་བྱའི་ཡེ་ཤེས་ཆོས་སྐུ་གུད་ན་མེད༔ ཅེས་པ་ལྟར་རོ༔ དེ་ལྟར་བཞག་པའི་ཐོག་མར་ཞི་ལྷག་ཟུང་དུ་ཆུད་ནས་མཉམ་བཞག་གི་ཚེ་འཁོར་འདས་ཀྱི་ཆོས་ལ་རྟོག་དཔྱོད་ཀྱི་སྤྲོས་པ་དང་བྲལ་བར་གཉིས་འཛིན་རང་སར་གྲོལ་བ་ནི་སྣང་སྲིད་གཞིར་བཞེངས་ཀྱི་དགོངས་པ་གནས་ལུགས་དང་པོ་ཤར་བ་ཡིན་ལ༔ དེ་ནས་ཡང་སྤངས་རྟོགས་གཉུག་བསྲིང་སྟེ་གོམས་པས༔ བར་དུ་སྣང་སྲིད་གཞིར་བཞག་དུ་སོང་ནས་མཉམ་རྗེས་ཁྱད་མེད་དུ་གྱུར་སྒོམ་ཆེན་བསྒོམ་གྱིས་མི་གཏོང་བར་གདེངས་ཐོབ༔ ཡང་གོམས་མཐོང་ཇེ་བཟང་གི་ངེས་པས་ཁམས་གསུམ་ཡོངས་གྲོལ་དུ་འཆར་བས་འཁོར་བ་མིང་མེད་དུ་འགྱུར་བའི་གདེངས་ཐོབ༔ མཐར་ནི་ཡིད་ལ་བྱ་རྒྱུའི་ཆོས་ཐམས་ཅད་བོར་བ་དང་༔ ཡང་གོམས་པས་ཉོན་མོངས་པ་ཀུན་ནས་ལྡང་བའི་དྲི་མ་སྒོ་གསུམ་ལ་མངོན་གྱུར་དུ་མེད་པས་སྲིད་གསུམ་ཀ་དག་གི་དགོངས་པ་ཤར་བ་ཞེས་བྱའོ༔ འདི་ལ་ཁྱད་པར་ནི་སྔ་མ་ལ་མཉམ་བཞག་དུ་འཁྲུལ་སྣང་ཡོད་ཀྱང་ཆོས་ཉིད་ཀྱི་ངང་དུ་ལ་ཟློ་ཐུབ་པ་ཙམ་དང་༔ དེ་ནས་རྗེས་ཐོབ་དུའང་སོ་སོར་རྟོགས་པའི་ཤེས་རབ་དེའི་ངང་ཚུགས་མི་ཤོར་བ་དང་༔ དེ་ནས་མཉམ་བཞག་དུ་འཁྲུལ་སྣང་འཁྲུལ་འཛིན་འགགས་པ་དང་༔ དེ་ནས་མཉམ་རྗེས་གང་དུའང་སྲིད་གསུམ་ཀ་དག་འབའ་ཞིག་ཏུ་འཆར་བ་ཡིན་ནོ༔ རིན་པོ་ཆེ་སྤུངས་པ་ཡི་རྒྱུད་ལས༔ བཞག་ཐབས་མན་ངག་རྣམ་བཞི་ཡིས༔ རིག་པ་རྟེན་མེད་གནས་སུ་བཞག༔ དེ་དོན་དགོངས་པ་རྣམ་བཞི་ཡི༔ སྣང་སྲིད་ཆོས་ཀུན་གདར་ཤ་བཅད༔ དུས་ཚོད་གང་ཟག་རྣམ་བཞི་ཡིས༔ ཆོས་རྣམས་ཀུན་ལ་རང་བྱན་ཚུད༔ དག་ལུགས་གྲོལ་ལུགས་རྣམ་བཞི་ཡི༔ ཉོན་མོངས་རྣམས་ལས་རང་དབང་བསྒྱུར༔ ཞེས་སོ༔ གཞན་དུ་སྣང་བ་ཡུལ་གྱི་བློ་ཅན་ལ་ཚན་དུ་ཕྱེ་བས་བསྟན་ཀྱང་༔ རང་སྣང་གི་བློ་ཅན་ལ་མེད་པ་ནི་མ་ཡིན་ཏེ༔ བཞག་ཐབས་དང་གྲོལ་ལུགས་བཞིན་ནོ༔ འདི་ལས་གཞན་དུ་དགོངས་པ་དང་པོ་ལ་འཁོར་འདས་ཀྱི་ཆོས་ཐམས་ཅད་བློ་ཐོག་ཏུ་བུང་གི་ཤར་ནས་རྟོག་དཔྱོད་ཀྱི་གང་སྣང་ལམ་དུ་བྱས་དེ་གང་ལའང་ཐོགས་པ་མེད་པར་གྱུར་ནས་ཉོན་མོངས་ཤར་བ་དང་ཡེ་ཤེས་ཤར་བ་ཁྱད་མེད་པར་ཉོན་མོངས་ཡེ་ཤེས་སུ་གྲོལ་བར་ཕྱེད་ཐུབ་པས་མི་གནོད་པ་དང་༔ གཉིས་པ་ལ་གཞི་བཞག་དུ་སོང་ནས་རྟོག་དཔྱོད་ཀྱི་སྤྲོས་པ་ཡོད་དམ༔ སྤྲོས་པ་མེད་པའི་གཞི་དངོས་པོའི་གཤིས་ཀྱི་ངང་ལ་ལྷན་ནེར་གནས་ནུས་ནས་ཉོན་མོངས་རྩོལ་མེད་དུ་གྲོལ་ཐུབ་པ་དང་༔ དེ་ནས་དགོངས་པ་ཁམས་གསུམ་ཡོངས་གྲོལ་དུ་ཤར་ཏེ༔ རྟོགས་ལྡན་གྱི་ངོར་མ་གྲོལ་བ་ཆ་ཙམ་ཡང་མེད་པར་རྟོགས་པ་དང་༔ མཐར་གནས་འགྱུར་ཐོབ་ནས་ལས་ཉོན་བག་ཆགས་ཐམས་ཅད་མེད་པར་གྲོལ་བས་ཁམས་གསུམ་གྱི་མིང་ཙམ་ཡང་དག་པ་དང་བཞི་ལས༔

དང་པོ་ནི༔ མཉམ་བཞག་དུ་ཆོས་ཟད་ཀ་དག་གི་ངོ་བོ་མཐོང་བ་དང་༔ གཉིས་པ་ནི་མཉམ་རྗེས་འདྲེས་པ་ལ་ཕྱོགས་པས་རིག་པ་ཚད་ལ་ཕེབས་པ༔ གསུམ་པ་ནི་འདྲེས་ནས་ཡེ་ཤེས་ཀྱི་སྣང་ཉམས་གོང་དུ་འཕེལ་བ་དང་༔ བཞི་པ་ནི་འཁོར་བའི་གཤིས་ཉམས་དང་༔ ཤེས་པ་མཐར་འགྱུར་གྱི་ཉམས་ཐམས་ཅད་དག་པས་ཆོས་ཉིད་མངོན་སུམ་པས་གཤིས་ཐོག་ཏུ་ཕེབས་པ་ཡིན་ནོ༔ དེ་བས་ན་བཞི་པོ་དེ་དགོངས་པས་ངོ་བོར་བཟུང་ངོ་༔ ལར་མཉམ་བཞག་ཐུན་གཅིག་ལའང་དགོངས་ཀློང་དེ་དག་གི་ཤས་སུ་རྫོགས་པ་དང་༔ སྣང་བཞི་ཡང་རྫོགས་པའོ༔ མི་རྟོག་པ་དང་རྒོད་པ་མེད་པའི་ཞི་གནས༔ རིག་ཆ་སྤྲོས་བྲལ་གྱི་ངོ་བོ་ལས་མ་བྱིང་བས་ལྷག་མཐོང་དང་ལམ་རིག་སྐུ་བཞི་ཡེ་ཤེས་ལྔ་ལྡན་ཕ་རོལ་ཕྱིན་བཅུ་དང་ས་བཅུ་ལྷུན་གྱིས་གྲུབ་པའི་རང་བཞིན་དུ་བཞུགས་པ་ནི་དགོངས་པའི་ངོ་བོ་ཡིན་ནོ༔ སྔ་མ་ནི་ངོ་བོ་དེ་ཤར་རིམ་གྱིས་བཞག་གོ༔

གསུམ་པ་དེའི་དགོས་པའམ་ཡོན་ཏན་ནི༔ སྲིད་པ་ལྟོ་ནས་བསྒྱུར་བ་དང་༔ ཉོན་མོངས་ཇ་ལོག་ཏུ་སངས་རྒྱས་པས༔ དངོས་མེད་རྣལ་མ་ཐོབ་པ༔ རྒྱལ་བའི་དགོངས་པ་འདུས་པ་སྟེ༔ དང་པོ་ནི༔ ཕྲག་དོག་ཁྱི་དང་༔ འདོད་ཆགས་བྱ་དང་༔ ཞེ་སྡང་སྦྲུལ་དང་༔ གཏི་མུག་ཕག་རྣམས་ཡེ་ཤེས་ཀྱི་ཀློང་དུ་བསད་ནས༔ རང་བྱུང་གི་ཡེ་ཤེས་ཤེས་རབ་ལྔའི་རྩལ་དང་བཅས་པའི་མེ་སྤར་བས་སྲིད་པའི་མཚོ་བསྐམ༔ མ་རིག་པའི་མུན་པ་བསལ་ཏེ༔ སྐྱེ་མེད་ཀ་དག་རྗེན་པའི་རང་ཞལ་ཡང་དག་པར་རྟོགས་པ་ཡིས་སྲིད་པ་སྐྱེ་མེད་དུ་འགྱུར་བ་དང་༔ རྩལ་སྣང་ཐམས་ཅད་སྐྱེ་འགགས་འགྱུར་མེད་ཡེ་ཤེས་ཆེན་པོའི་ངང་དུ་གྲོལ་ལུགས་ཀྱི་གནད་བཞིའི་སྒོ་ནས་དང་པོ་ཉམས་སུ་བླངས་ཤིང་ལ་བཟློས་པས༔ མཐར་སྲིད་པ་སངས་རྒྱས་ཀྱི་དགོངས་པར་བསྒྱུར་ནུས་པ་སྟེ༔ དེ་ལྟ་བུའི་ཡོན་ཏན་དག་ཀྱང་བསྒོམ་མེད་ཡེངས་མེད་དུ་མཉམ་པར་བཞག་པས་འཐོབ་པར༔ བདུད་རྩི་རྒྱ་མཚོ་འཁྱིལ་བའི་རྒྱུད་ལས༔ སྲིད་པ་ལྟོ་བསྒྱུར་འདི་ལྟར་བསྒྱུར༔ ཁྱི་ཕག་བྱ་དང་སྦྲུལ་བསད་ལས༔ མེ་འབར་མཚོ་སྐེམས་མུན་པ་བསལ༔ སྐྱེ་མེད་ཀ་དག་རྟོགས་པ་ཡིས༔ སྲིད་པ་སྐྱེ་བ་མེད་པར་བསྒྱུར༔ སྐྱེ་འགགས་གཉིས་མེད་རང་གྲོལ་བས༔ སྲིད་པ་སངས་རྒྱས་དགོངས་པར་བསྒྱུར༔ ཞེས་སོ༔

གཉིས་པ་ནི༔ ཉོན་མོངས་པ་ཐམས་ཅད་རང་སར་གྲོལ་ནས་ཡེ་ཤེས་ལྔར་སངས་རྒྱས་པས་དུག་ལྔ་ཇ་ལོག་སྐུ་ལྔར་གྱུར་པ་ནི༔ དཔལ་རི་བོ་བརྩེགས་པ་ལས༔ དེ་ཡང་ཇི་ལྟར་འགྱུར་ཞེ་ན༔ གཏི་མུག་ཇ་ལོག་ཆོས་སྐུར་གྱུར༔ ཞེ་སྡང་ཇ་ལོག་ལོངས་སྐུར་འགྱུར༔ འདོད་ཆགས་ཇ་ལོག་སྤྲུལ་སྐུར་འགྱུར༔ ང་རྒྱལ་ཇ་ལོག་མཉམ་པ་ཉིད༔ ཕྲག་དོག་ཇ་ལོག་བདེ་ཆེན་སྐུ༔ ཞེས་སོ༔

གསུམ་པ་དངོས་མེད་ཐོབ་པ་ནི༔ སྒོ་གསུམ་རྩོལ་མེད་དུ་བཞག་ལ༔ ལྟ་སྒོམ་སྤྱོད་པ་སྤང་ལེན་བསལ་བཞག་མེད་པར་དངོས་མེད་ཡེ་ཤེས་བློ་འདས༔ གསལ་སྟོང་སང་ངེ་སལ་ལེ་དངོས་མཚན་མེད་པ༔ བསམ་རྟོགས་ལས་འདས་པ༔ ཟང་ཀ་མའི་ངང་དུ༔ ཡུལ་གང་ལའང་འཛིན་རྟོག་མེད་པར༔ ཡིད་རིག་དྲན་བསམ་ལས་འདས་ཤིང་ཞེ་འདོད་རྩིས་གདབ་མེད་པར་བཞག་པས་དངོས་མེད་རྣལ་མ་ཐོབ་པ་ནི༔ དྲི་མེད་ཀ་དག་གི་རྒྱུད་ལས༔ ལུས་ངག་ཡིད་གསུམ་རྩོལ་བཞག་ལ༔ མི་བལྟ་མི་བསྒོམ་སྤྱོད་ཐོབ་མེད༔ དངོས་མེད་ཡེ་ཤེས་བློ་ལས་འདས༔ གསལ་སྟོང་ང་ལ་མི་འབྲལ་བ༔ སང་ངེ་སལ་ལེ་དངོས་མཚན་མེད༔ གང་ཡང་མི་རྟོག་བསམ་ལས་འདས༔ དངོས་མེད་རྣལ་མ་ཟང་ཀ་ལ༔ གང་ལ་སེམས་མེད་འཛིན་རྟོག་མེད༔ ཡིད་རིག་དྲན་བསམ་བློ་ལས་འདས༔ ཞེ་འདོད་རྩི་གདབས་མེད་པའི་ཐོབ༔ ཐོབ་པའི་དུས་ན་དངོས་མེད་བློ་ལས་འདས༔ སྣང་སྲིད་ཆོས་ལ་དབྱེ་བསལ་འདས༔ ཞེས་སོ༔

རྒྱལ་བའི་དགོངས་པ་ཟིན་པ་ནི༔ རྒྱལ་བ་ཐམས་ཅད་ཀྱི་དགོངས་པ་འདུས་པ་དང་༔ དེ་ལ་བཞག་པས་དགོངས་ཀློང་དུས་གཅིག་ལ་ཟིན་པ་ནི༔ དེ་ཉིད་ལས༔ ཆོས་ཉིད་རྣམ་པར་དག་པས་ན༔ ཆོས་ཀུན་རང་བཞིན་ཀ་ནས་དག༔ དེ་བཞིན་གཤེགས་པ་ཐམས་ཅད་ཀྱི༔ ཐུགས་ཀྱི་ཡང་བཅུད་འདིར་འདུས་བས༔ དགོངས་པའི་མདོ་རྣམས་གཅིག་བསྡུས་པས༔ ཡེ་ནས་ཟིན་པ་སོགས་སོ༔ རང་ཤར་ལས༔ རང་བྱུང་རིག་པའི་དོན་རྟོགས་ན༔ སངས་རྒྱས་མ་བསྒོམ་གཅིག་ཀྱང་མེད༔ ཅེས་སོ༔

དེ་དག་གི་སྒོམ་ལམ་དུ་གོང་ནས་གོང་དུ་སྤེལ་བའི་གདམས་ངག་རྫོགས་ནས༔ ད་ནི་མཐར་ཕྱིན་པའི་ལམ་དུ༔ ཤར་གྲོལ་སྤྲུལ་པ་སྐུའི་ཡེ་ཤེས་དེ་ཉིད་གོང་དུ་འཕེལ་ནས་ལོངས་སྐུ་ཡོངས་གྲོལ་ཀ་དག་ལ་ཐིམ་པ་ན་མི་འཇིགས་པའི་གདེངས་ཆེན་བཞི་ཐོབ༔ དེ་ནས་ཤེས་སྒྲིབ་ཕྲ་བ་ཡན་ཆད་རྡོ་རྗེ་ལྟ་བུའི་ཏིང་ངེ་འཛིན་གྱིས་མཐར་བྱས་ཏེ་སངས་རྒྱས་ཀྱི་ས་དྲུག་མངོན་དུ་གྱུར་པའི་བར་ནི་མཐར་ཕྱིན་ལམ་དུ་བཞེད་དོ༔ དེ་ལྟ་ན་ལྷུན་གྲུབ་རིག་འཛིན་མདོ་ལམ་གྱི་ས་བཅུ་གཅིག་པ་མི་སློབ་པའི་ལམ་སྣང་སྐུ་ལྔ་ལྷུན་གྲུབ་རྡོ་རྗེ་འཆང་གི་ཆ་ལུགས་འཛིན་པ་བྱ་བ་རྫོགས་པའི་སྤྲུལ་སྐུའམ་བསོད་ནམས་བསགས་པའི་ཆོས་སྐུ་ཞེས་བྱ་བ་དེ་ནང་དབྱིངས་གདོད་མའི་ཀ་དག་དུ་དབྱེར་མེད་པར་འདྲེས་པ་ནི་མཐར་ཐུག་གི་འབྲས་བུ་སྟེ༔ ལམ་གྱུར་གྱི་འབྲས་བུ་མཐར་ཐུག་པ་ནི་མཐར་ཕྱིན་ལམ༔ འབྲས་བུ་མཐར་ཐུག་ནི་ཁྱད་ཆོས་དྲུག་ལྡན་གཞོན་ནུ་བུམ་པའི་སྐུ་བརྙེས་པར་བཟུང་བར་བྱའོ༔

དེ་ལྟར་ཚིག་ཉུང་དོན་འདུས་སྙིང་པོའི་བསྟན༔ རབ་ཏུ་གསལ་བྱེད་ཆོས་ཉིད་དོན་གསལ་འདི༔ མན་ངག་སྡེ་གསུམ་ཐིག་ལེར་བཅས་པའི་གནད༔ རྒྱ་མཚོ་ཆེན་པོར་ཆུ་ཕྲན་འདུ་བ་བཞིན༔ སྤྲོས་པའི་ཚིག་གིས་མང་པོར་བྱས་པ་རྣམས༔ དཔེ་ཆར་ལུས་ཤིང་ཉམས་སུ་མི་འཆུན་པས༔ ཁོང་སྙིང་སྡེབ་པོ་པདྨ་ཀ་རའི་ལུགས༔ གཞན་ལ་ཉམས་མྱོང་སྲོག་གི་དབུལ་པོར་ཡོད༔ ཀྱེ་ལགས་མང་ཐོས་བསྒོམ་པའི་སྙིང་པོ་ནི༔ གཅིག་ཏུ་མ་བརྟན་གཞར་འདེབས་ཆུ་ཤིང་ལས༔ དཔག་བསམ་ལྗོན་པའི་འབྲས་བུ་བཟར་འདོད་པ༔ ཐོབ་ཤོར་མེད་པས་ཚིག་ཆད་ཡི་མུག་དགོད༔ དེ་ཕྱིར་སྒྲུབ་བརྒྱུད་རང་ལུགས་དྲི་མ་མེད༔ གཞུང་མང་ཚིག་འཁྲིའི་ཚོལ་བས་བསྒྲིབ་བསྒྲིབ་ནས༔ འཆི་ཁ་བྲང་ལག་འཐམ་ནས་མཆི་མ་དཀུ༔ དེ་ལས་ཕ་ཁྱིམ་བུ་འགྲོའི་རྣལ་འབྱོར་སྐྱིད༔ བཤད་ཡང་སྙན་སྙན་གྲགས་པའི་རྔ་སྟོང་ལྡིར༔ ང་རྒྱལ་དཔང་མཐོའི་རི་བོའི་སྤོ་ལ་འགྱིང་༔ མི་རྟག་འཆི་བ་དྲན་ནས་མ་ཎི་ཙམ༔ ཁ་ཏོན་ཆགས་མེད་མ་མྱོང་སྙིང་རྗེའི་གནས༔ ལྟ་བའི་སྙིང་པོ་ཁོ་ལ་ཡོད་དོ་སྐད༔ སྡང་ཞུགས་ཙམ་གྱི་ཁ་ནས་མ་བྲི་བའི༔ དགེ་སློང་དེ་འདྲ་གྲུབ་མཐའ་འཛིན་པའི་རིགས༔ བདག་ཕྱོགས་ཆགས་པའི་ཁ་སྐྱོང་མ་གཡེལ་ཙམ༔ ཁྱད་པར་སྭཱ་མཾ་ཡ་ནཾ་ཀརྟ་ཀ༔ སྟོང་ལྟ་འཆད་དང་བྷ་སིང་ཧསྟ་ཡིས༔ རྟག་པར་ལྟ་བ་སྔགས་ཀྱི་སྒྲོལ་བའི་མཐུ༔ མ་སྨད་པདྨའི་ཕོ་ཉའི་ཕྲན་གཏེར་བ༔ ག་ག་ཨ་བྷྱེས་ཡང་ཏིའི་རང་སྲོག་ནི༔ དོན་ལ་རྣལ་འབྱོར་བྱེད་པས་འཛིན་པར་ངེས༔ དེ་དུས་ཚིག་གི་སྤུན་ལ་རྟོགས་ཡོད་ཀྱང་༔ ལྟ་བ་ཀློང་ཡངས་ངང་དུ་བཟོད་པར་མཛོད་ས་མ་ཡཱ༔ རྒྱ་རྒྱ་རྒྱ༔ སྐུ་གསུང་ཐུགས་ཡེ་ཤེས་རྡོ་རྗེའི་ཟབ་གསང་སྦས་གཏད་སྨོན་ལམ་དབང་བསྐུར་གྱི་རྒྱ་རྒྱ་རྒྱ༔ དགེའོ། །དགེའོ། །དགེའོ། །སརྦ་མངྒ་ལཾ། །

མན་ངག་སྒྲོན་མ་སྤུངས་བ།

ཡེ་ཤེས་སྒྱུ་འཕྲུལ་རོལ་པ་ལས༔ རང་སྣང་ལོངས་སྐུའི་རང་ཞལ་མངོན་དུ་བྱེད་པའི་མན་ངག་སྒྲོན་མ་སྤུངས་བ་ཞེས་བྱ་བ་བཞུགས་སོ༔

ན་མོ་གུ་རུ་པདྨ་ཀཱ་ར་ཡེ༔ ཨོ་རྒྱན་མཁན་པོ་པདྨ་འབྱུང་གནས་ངས༔ མ་འོངས་ལས་ཅན་རྣམས་ཀྱི་དོན་ཆེད་དུ༔ རྡོ་རྗེ་འཆང་གི་དགོངས་པའི་དོན་བསྡུས་ནས༔ འོད་གསལ་སྒྲོན་མ་སྤུང་བ་བསྟན་པར་བྱ༔ ས་མ་ཡཱ༔ དེང་སང་དུས་ན་སྟོང་ལྟའི་ཁ་འཛིན་མཁན༔ རང་བཞིན་རྒྱུད་ལ་ལོག་པར་ཞུགས་ནས་སུ༔ རྡོ་རྗེ་ཐེག་པ་ན་ཚོད་འབེབས་པ་དང་༔ ཡོ་ག་གོང་འོག་བསྲེས་ནས་འཆོལ་བར་བྱེད༔ ང་ཡི་ལུགས་ལ་འོད་གསལ་མངོན་སུམ་གྱི༔ བདེ་གཤེགས་སྙིང་བོའི་ཡོན་ཏན་བསྟན་ཡོད་ཀྱང་༔ རྫ་ཆག་བྱེའུ་འཕུར་ལྟའི་མུ་སྟེགས་ཀྱིས༔ ཀུན་བཏགས་ལོག་པའི་ཟླ་བོར་འཆད་བཟོད་པའི༔ གང་ཟག་དེ་དག་མཐའ་མེད་དམྱལ་བར་ལྟུང་༔ ས་མ་ཡཱ༔ དེ་ཕྱིར་སྐལ་ལྡན་གང་ཟག་ཕོ་མོ་རྣམས༔ ཀུན་བཏགས་གནས་ལུགས་འབྱེད་པའི་ཀེ་ཏ་ཀའི༔ མ་འཛིངས་མ་འཁྲུགས་བློ་བཟང་ནོར་བུའི་མཆོག༔ ཆུ་དང་རྙོགས་མའི་ལ་ཤན་རང་སར་ཞི༔ ཁྱད་པར་ཆོས་ཉིད་སྣང་བའི་བར་མ་དོའི༔ སྐུ་དང་ཡེ་ཤེས་མྱ་ངན་འདས་པའི་ཆར༔ འཆི་སྲིད་ཐོད་རྒལ་སྐྱེ་བའི་བར་དོན་ནས༔ བཙན་ས་བཟུང་ཕྱིར་རྒྱུད་འཛིན་བཙས་སུ་བཞག༔ ས་མ་ཡཱ༔ གུ་ཧྱ༔

དེ་ལ་འདིར་འོད་གསལ་བདེ་གཤེགས་སྙིང་བོའི་སྣང་སྟོང་ཟུང་འཇུག་སྐུ་དང་ཡེ་ཤེས་ཆེན་པོའི་དཀྱིལ་འཁོར་ལ་རྣལ་འབྱོར་དུ་བྱེད་པའི་ཉེ་ལམ་ཟབ་མོ་མདོ་སྔགས་གཞན་དག་གིས་དགོངས་པའི་གཞི་ལ་ལུས་པ་གབ་སྦས་མེད་པར་སྟོན་པ་ལ་ཆོས་བདག་དཔའ་བོ་མཁའ་འགྲོས་གནང་བར་མཛད་དུ་གསོལ༔

འདི་ལ་མཐར་ཐུག་གི་དགོངས་ཀློང་ཟབ་མོ་ཉམས་སུ་ལེན་པའི་གང་ཟག་རྣམས་ཀྱིས་ཐུན་མོང་ཕྱི་ནང་གི་སྔོན་འགྲོའི་རྒྱུད་སྦྱངས་བ་དང་༔ བརྟུལ་ཞུགས་རུ་ཤན་གྱི་སྤྱོད་པས་ཉམས་བསྐྱང་བ་དང་༔ ཁྱད་པར་དུ་དངོས་གཞིའི་སྔོན་འགྲོ་ཁྲེགས་ཆོད་ཀྱིས་གཞི་བཟུང་ནས་སྟོང་ཉིད་ཤེར་ཕྱིན་གྱི་དོན་ལ་ཅུང་ཞིག་མ་གོམས་ན༔ མཚན་མ་བཟང་ཞེན་གཟུགས་ཁམས་ཀྱི་གོལ་ས་ལྡང་བས་ལེགས་པར་གནད་དུ་དབབ༔ དེ་ནས་དགོངས་ཀློང་ལྔའི་ཆིང་གིས་བཅིངས་ཏེ་ཉམས་སུ་ལེན་པ་ལ་ལྔ་ལས༔

ཐོག་མར་ཡེ་ཤེས་སྤྱི་བླུགས་ཀྱི་དགོངས་པ་རབ་ཏུ་སྤྲོས་མེད་ཀྱི་དབང་གིས་སྨིན་པར་བྱེད་པ་ནི་ཚིག་དབང་ཟུར་པ་ལྟར་ཏེ༔ འཇམ་དཔལ་ལས༔ ཡེ་ཤེས་དབང་བསྐུར་ཅོད་པན་ཅན༔ ཞེས་གསུངས་ལ༔ གཉིས་པ་རི་བོ་སྤྱི་ཆིངས་ཀྱི་དགོངས་པ་ནི༔ ལྟ་བས་གཏན་ལ་ཕབས་པ་ཡིན་ཏེ༔ སྟོང་ཕྱོགས་ངོ་བོའི་གནས་ལུགས་དོན་གསལ་ཆེན་པོ་ལྟར་ལ༔ སྣང་ཕྱོགས་ཀུན་རྫོབ་མཐར་ཐུག་སྐུ་དང་ཡེ་ཤེས་ལོངས་སྤྱོད་རྫོགས་པའི་གནས་ལུགས་ཀྱང་འདུས་མ་བྱས་པའི་གནད་ཀྱིས་སེམས་ཅན་གྱི་ཁམས་ལ་ད་ལྟ་ནས་བཞུགས་པ་ལས༔ རྒྱུ་རྐྱེན་གྱིས་བསྐྱེད་པ་མི་འཐད་པས༔ དེའི་ཚུལ་ནི་ལྷུན་གྲུབ་ཀྱི་གནས་ཅི་བཞིན་པའི་སྤྱིར་བཤད་ཅིང་༔ དགོས་ཆོས་ཁྱད་པར་བ་ནི་འདི་ལྟ་སྟེ༔ བརྟེན་གཞི་རྡོ་རྗེའི་ལུས་ཀྱི་དཀྱིལ་འཁོར་གྱི་རྩ་གསུམ་འཁོར་ལོ་ལྔར༔ ཀུན་རྫོབ་རྒྱུ་ཡི་ཐིག་ལེ་རླུང་ཁྲིད་ཀྱི་དུས་སུ་བསྟན་པའི་ཡི་གེ་ལྔའི་རང་བཞིན་དུ་རྩ་ཐམས་ཅད་ཀྱི་དྭངས་མ་ཕྲ་ལ་འཁྲིལ་གྱི་དུམ་བུ་ལྔའི་ཆའི་དབུས་སུ་སྣང་མེད་དུ་བཞུགས་པའི་ཡེ་ཤེས་ལྔ་དང་༔ འོད་ལྔ་རླུང་ལྔ་རིགས་ཀྱི་ཆོས་ལྔ་ངོ་བོ་རང་བཞིན་ཐུགས་ཀྱི་ཆོས་ལྔ་ལྔའི་རང་བཞིན་དུ་ཡེ་ནས་གནས་པ་དེ་དག་གི་རྩ་བའི་དཀྱིལ་འཁོར་ནི༔ ཙིཏྟ་རིན་པོ་ཆེ་ཡི་སྒྲོན་མའི་དབུས་སུ༔ རྩ་ཆེན་བརྒྱད་ཀྱི་དྭངས་མ་གསེར་གྱི་རྩ་ལ་འོད་ཟེར་ལྔ་པའི་རླུང་གི་དབུས་ན་མི་ཤིགས་པའི་ཐིག་ལེ་ལྔ་ལྡན་སྟོང་པའི་སྒྲོན་མ་གསུངས་ཡི་གེའི་འཁོར་ལོ་ཆ་ཕྲ་བའི་ཐིག་ལེ་དང་གཉིས་སུ་མེད་པར་སྐུ་རྡོ་རྗེ་ལུ་གུ་རྒྱུད་ཀྱི་ངོ་བོ་ཀུན་བཟང་རིགས་ལྔ་མཚན་ཡོངས་སུ་རྫོགས་པ་ནང་གསལ་གཞོན་ནུ་བུམ་པ་སྐུའི་རང་བཞིན་དཀྱིལ་འཁོར་ཐམས་ཅད་ཀྱི་འཆར་གཞིར་བཞུགས་པ་ནི༔ འཇམ་དཔལ་ལས༔ འཇིག་རྟེན་གསུམ་ན་གཞོན་ལུས་གཅིག༔ ཅེས་པ་ནས༔ བུམ་པ་བཟང་པོ་ཆེ་བའི་མཆོག༔ ཅེས་གསུངས་པ་ལས་སྨིན་སོ་ལྔར་གདེངས་འཕྲོས་པའི་སྙིང་དབུས་ཀྱི་མདུན་ཆར་ཐུགས་ཀྱི་སྐུ་རྡོ་རྗེ་སེམས་དཔའི་དཀྱིལ་འཁོར་ཡོངས་སུ་རྫོགས་པ་དང་༔ དེ་ལས་དར་དཀར་སྣལ་མའི་སྨིན་སོ་མགྲིན་པར་ཡི་གེའི་དབུས་སུ་གསུང་རྡོ་རྗེ་མཐའ་ཡས་ཀྱི་དཀྱིལ་འཁོར༔ ཤེལ་གྱི་སྦུ་གུའི་སྨིན་སོ་ལྟེ་བའི་ཡི་གེའི་དབུས་སུ་ཡོན་ཏན་རྡོ་རྗེ་རིན་ཆེན་འབྱུང་ལྡན་གྱི་དཀྱིལ་འཁོར༔ ཕྲ་ལ་འཁྲིལ་གྱི་སྨིན་སོ་གསང་གནས་བདེ་སྐྱོང་གི་འཁོར་ལོའི་ཡི་གེའི་དབུས་སུ་ཕྲིན་ལས་རྡོ་རྗེ་དོན་ཡོད་གྲུབ་པའི་ངོ་བོ་ཅན་གྱི་དཀྱིལ་འཁོར༔ སྟོང་བ་རང་གྲོལ་གྱི་སྨིན་སོ་བདེ་ཆེན་གྱི་འཁོར་ལོའི་ཡི་གེ་ལ་སྐུ་ཡི་ཐུགས་རྡོ་རྗེ་རྣམ་པར་སྣང་མཛད་ཀྱི་དཀྱིལ་འཁོར་འདུ་འབྲལ་མེད་པར་བཞུགས་པ་ནི༔ མུ་ཏིག་ཕྲེང་བ་ལས༔ དེ་ལྟར་སྙིང་པོ་དེ་ཉིད་ལས༔ སྐུ་ལྔ་ཡེ་ཤེས་ལྔ་དང་ནི༔ འོད་ལྔ་ཁ་དོག་རྣམ་པ་ལྔ༔ ཆོས་ལྔ་ཡེ་ཤེས་རླུང་ལྔ་ཉིད༔ ངོ་བོ་ལྔ་དང་རང་བཞིན་ལྔ༔ ཐུགས་རྗེ་ལྔ་ཡིས་ཀུན་ཁྱབ་ཅིང་༔ ཞེས་དང་༔ ཕྲ་བཀོད་ལས༔ རང་རིག་ཡེ་ཤེས་ངོ་བོ་ལ༔ འོད་གསལ་དཀྱིལ་འཁོར་ལྷུན་གྱིས་གྲུབ༔ ཞེས་དང་༔ ཀློང་གསལ་ལས༔ འབྱུང་བ་ལྔ་ཡི་དྭངས་མ་འདུས༔ ཡི་གེ་སྐུ་དང་ཡེ་ཤེས་གྲུབ༔ གསང་བ་དྭངས་མ་རྣམས་ལྔ་སྟེ༔ ཡང་གསང་ལྟར་ན་སྐུ་ལྔའོ༔ ཞེས་དང་༔ གཞན་ཡང་སཾ་བྷུ་ཊི་ལས༔ རང་ལུས་རྡོ་རྗེ་སངས་རྒྱས་ཉིད༔ རང་གི་ལུས་ལ་སངས་རྒྱས་བཞུགས༔ ཞེས་སོ༔ དེ་དག་གི་ཟེར་ལས་སམ་གདེངས་ལས་སྤྱི་བོར་གཡས་སུ་འཁྱིལ་བའི་རྩ་གསུམ་གྱིས་ཁུག་པར་ཁྲག་འཐུང་ཁྲོ་བོའི་ལྷ་ཚོགས་དབུས་ནས་བུདྡྷ་བཛྲ་རཏྣ་པདྨ་ཀརྨའི་རིགས་ཀྱི་ལྷ་ཚོགས་རྣམས་ཀྱི་མཐའ་མར་གནས་ཡུལ་སྒོ་དབང་དང་བཅས་པ་སྐུ་ཡུངས་འབྲུ་ཙམ་ལ༔ སྤྱན་ཕུལ་ཐག་ཙམ་གྱི་ཚུལ་དུ་བཞུགས་པ་ནི༔ ཕྲ་བཀོད་ལས༔ རང་རང་མགོ་ལ་ཁྲོ་སྐུར་གནས༔ ཡབ་དང་ཡུམ་དུ་མངོན་པར་སྣང་༔ ཁྲོ་བོའི་ཁྲོ་མོའི་ཚུལ་འཆང་ཞིང་༔ ཞེས་དང་༔ ཀློང་གསལ་ལས༔ སྙིང་ནང་ཡབ་ཡུམ་ཞི་བའི་ཚུལ༔ དུང་ཁང་ཁྲོ་བོའི་ཚུལ་དུ་གནས༔ ཞེས་གསུངས་པས་ན༔ སྤྱིར་འཁོར་ལོ་ལྔ་པོ་ན་ཡེ་ཤེས་ཀྱི་ངོ་བོ་སྐུའི་རང་གདངས་དཀྱིལ་འཁོར་ལྔ་བཞུགས་པ་ནི་ལོངས་སྐུའི་གསུམ་ཡིན་ལ༔ ཐམས་ཅད་ཀྱི་འཆར་གཞི་ཡེ་ཤེས་ཆེན་པོའི་ཐིག་ལེ་ལ་ནང་གསལ་དུ་རྫོགས་པ་ནི༔ ཆོས་སྐུའི་སྐུ་གསུམ་ངོ་བོ་རང་བཞིན་ཐུགས་རྗེ་གསུམ་ཡིན་ནོ༔ དེ་ལྟར་ན་ངོ་བོ་སྐུར་བཞུགས་པའི་རྩ་བ་ནི་སྙིང་ཀ་ཡིན་ནོ༔ རྣམ་སྣང་ཐུགས་ཀྱི་ཐུགས་མཆོག་གིས་དཀྱིལ་འཁོར་རྩེ་མོ་རྣམ་བཀོད་དུ་ཡོད་པ་ནི་བར་དོ་ཀ་དག་གི་རང་གདངས་རྨ་བྱའི་གདུགས་ལྟ་བུ་ལས་གཞི་སྣང་གཞན་འཆར་བའི་གོ་རིམ་གྱི་ངེས་པ་ལས་གཙོ་བོ་མཐར་དབྱུང་བ་ནི་མ་ཡིན་ནོ༔ དེ་དག་ནི་ངོ་བོ་སྐུར་བཞུགས་ཚུལ་ལོ༔

གཉིས་པ་རང་བཞིན་འོད་ཀྱི་ཐིག་ལེ་བཞུགས་ཚུལ་ནི༔ རྩ་རོ་རྐྱང་དབུ་མ་ཤེལ་སྦུག་བཞི་ན་ཐིག་ལེ་དང་༔ དེའི་ཡང་ཕྲན་ཐམས་ཅད་དུའང་འོད་འཕྲོས་པས་ལུག་རྒྱུད་ཆ་ཕྲ་བ་ཞི་ཁྲོའི་གདེངས་གསུམ་ཆེ་བའི་ཚད་ནམ་མཁའི་མཐའ་དང་མཉམ་པ༔ ཆུང་བའི་ཚད་རྟ་རྔ་བརྒྱར་བཤགས་ཙམ༔ གསལ་བའི་ཚད་ཉི་མའི་དཀྱིལ་འཁོར་ཙམ༔ གསལ་འཚེར་འོད་དང་གཟི་བརྗིད་འབར་བར་ཡོད་དེ༔ ཁྱད་པར་དུ་དྭངས་མའི་རྩ་ལྔ་ན་བཟང་པོའི་རྩེ་མོའི་ཐིག་ལེ་སོགས་སུ་བཞུགས་པ་ལ༔ རང་གནས་རྒྱུའམ་གནས་པ་གཞིའི་ཐིག་ལེ་དང་༔ དེ་ལས་དར་དཀར་ཕྲ་ལ་འཁྲིལ་གཉིས་ནས་ཐུགས་རྗེ་སྒྲོན་མ་བཞི་ཕྱིར་ཡུལ་ལ་འཆར་བ་ནི༔ ངོ་བོ་ཆོས་སྐུ་ལས༔ རང་བཞིན་ལོངས་སྐུ༔ དེ་ལས་ཐུགས་རྗེ་སྤྲུལ་སྐུར་འཆར་ཞིང་༔ གཞི་སྙིང་ཀ༔ ལམ་རྩ་བཞི༔ འབྲས་བུ་ལྟ་བྱེད་མིག་གི་གཞལ་ཡས་སུ་སྨིན་པ་དང་༔ རྩ་དེ་དག་ཀྱང་ཡེ་ཤེས་ལྔའི་ངོ་བོར་གནས་པའི་སྐུ་གསུམ་མམ་ལྔ་རྫོགས་ཤིང་༔ ནང་གསལ་སྐུ་གསུམ་གྱི་རྩ་ལས་ནང་དུ་ནུབ་པ་སོགས་ཕྱིར་སྣང་དུ་ལས་མི་བྱེད་ལ༔ ཕྱེད་སྤྲུལ་ལོངས་སྐུ་དང་འགྲོ་འདུལ་སྤྲུལ་སྐུའི་རྩ་གཉིས་ལས་ཡུལ་ལ་འཆར་རོ༔ ཤར་བ་དེ་ནི་ཐུགས་རྗེའི་སྒྲོན་མར་གནས་པ་ཡིན་ནོ༔ སྟོང་པ་རང་གྲོལ་ནས་རྡོ་རྗེ་ལུག་རྒྱུད་ཀྱི་སྐུ་ཐིག་ལེ་དགུ་དགུར་འཆར་རོ༔ དེ་དག་ཀྱང་སྐུ་ནང་གསལ་བུམ་སྐུ་ལྟ་བུ་ལ༔ འོད་བར་གསལ་བུམ་པའི་མར་མེ་ལྟ་བུ༔ ཐུགས་རྗེ་སྒྲོན་མ་མཁའ་གསལ་མེ་ལོང་གི་གཟུགས་བརྙན་ལྟ་བུ༔ ཡེ་ཤེས་ཀྱི་རླུང་ལྔའི་རྩལ་དང་བཅས་ཏེ་འཆར་བ་ནི༔ ཡེ་ཤེས་ཀྱི་རིག་རྩལ་ཉིད་ཀྱང་སྦུབས་ཀྱིས་མ་ཐུམ་པར་སྒོ་ལྔའི་རྣམ་ཤེས་སུ་དུས་ལ་ལྟོས་ནས་མཁྱེན་ཆ་འགགས་མེད་དུ་ཤར་བའོ༔ ཀློང་གསལ་ལས༔ རིག་པའི་སྐུ་ནི་བུམ་སྐུ་འདྲ༔ ཡེ་ཤེས་བུམ་པའི་མར་མེ་འདྲ༔ ཐུགས་རྗེ་མེ་ལོང་ངོས་ལྟར་གསལ༔ ཞེས་དང་༔ རང་ཤར་ལས༔ ཀྱེ༔ ཐུབ་པ་ཆེན་པོ་ཁྱོད་ཉོན་ཅིག༔ རང་བཞིན་གནས་པའི་བར་དོའི་སེམས་ཅན་ལུས་ཀྱིས་བསྡུས་པ་ཐམས་ཅད་ལ་མྱ་ངན་ལས་འདས་པའི་རྒྱུ་དུས་གསུམ་ན་བཞུགས་པའི་སངས་རྒྱས་ཐམས་ཅད་དང་ཁྱད་པར་མེད་པ་གནས་པ་ཡིན་ནོ༔ དེ་ཡང་སྐུ་རྣམས་ཀྱི་བདག་ཉིད་དང་༔ ཡེ་ཤེས་དང་༔ འོད་དང་༔ ཐིག་ལེ་དང་༔ རིག་པ་རང་གི་ངོ་བོར་གནས་པ་ཡིན་ནོ༔ ཉི་ཟླ་ཁ་སྦྱོར་ལས༔ གཞི་འཛིན་པའི་རིག་པ་ཆེན་པོ་ནི༔ རྡོ་རྗེ་ལུ་གུ་རྒྱུད་དུ་སྣང་བའི་རིག་པ་ཆེན་པོ་ ༼ མངོན་སུམ་དུ་ ༽ སྟེ༔ རྒྱང་ཞགས་ཆུའི་སྒྲོན་མ་ལས་རིག་པ་གཅེར་བུར་རང་ཐོན་པའོ༔ ཞེས་སོ༔ དེ་ལྟ་བུའི་སྒྲོན་མ་དྲུག་པོ་དེ་དག༔ གཞི་ལ་མེད་ན་ལམ་དུ་སྣང་བའི་དོན་མེད་ལ༔ ལམ་དུ་མ་སྣང་ན་ལྐོག་གྱུར་དོན་སྤྱི་ཡུལ་དུ་བྱེད་པའི་རྟོག་པ་ལ་ཅི་ཙམ་གོམས་ཡང་༔ སེངྒེ་བསྒོམ་པའི་གཟུགས་བརྙན་གྱིས་ཅི་ཙམ་གྱད་དུ་གྱུར་ཡང་དངོས་མིན་པ་དང་༔ ལྕགས་རྡོ་རུ་བསྒོམ་པ་གོམས་པས་ངོ་བོ་མི་འགྱུར་བ་ལྟར༔ ལུས་ལྷ་སོགས་སུ་བསྒོམ་པ་དོན་མེད་དེ༔ འདིར་ནི་སྐུ་གསུམ་ཡེ་ཤེས་སུམ་བརྩེགས་སངས་རྒྱས་ཀྱི་དགོངས་པ་སེམས་ཅན་ལ་ངོ་བོར་སྐུར་བཞུགས་པས༔ འཇམ་དཔལ་ལས༔ སོ་སོ་རང་རིག་མི་གཡོ་བ༔ སོགས། ཅོད་པཎ་ཅན༔ ཞེས་དང་༔ རང་བཞིན་འོད་དུ་བཞུགས་པས༔ སངས་རྒྱས་ཀུན་གྱི་ཐུགས་༴སོགས་ནས། ཁ་དོག་སྣ་ཚོགས་འབར་བའི་འོད༔ ཅེས་དང་༔ ཐུགས་རྗེས་སྒྲོན་མར་བཞུགས་པ་ནི༔ ཐིག་ལེ་སྟོང་པ་ཡི་གེ་མེད༔ ཅེས་དང་༔ གནས་ནི༔ འོད་བཟང་འབར་བ་དཔལ་བེའུ༔ ཞེས་པའི་གཞི་དབྱིངས་རིག༔ ནམ་མཁའ་ལས་བྱུང་༴ ༔ ནས་འོད་གསལ་བ༔ ཞེས་ཐུགས་རྗེ་སྒྲོན་མར་གནས་ཚུལ་དང་༔ སངས་རྒྱས་ཀུན་གྱི་མངོན་སུམ་པ༔ ཡེ་ཤེས་མེ་ལྕེ་འོད་རབ་གསལ༔ ཞེས་ཐུགས་རྗེ་རིག་པའི་ཡེ་ཤེས་ཀྱི་བཞུགས་ཚུལ་བསྟན་པའོ༔ དེ་ལྟར་ན་ངོ་བོ་སྐུ་ནི་ཤེས་རབ་རང་བྱུང་གི་སྒྲོན་མ༔ རང་བཞིན་འོད་ནི་དབྱིངས་རྣམ་དག་གི་སྒྲོན་མ༔ ཐུགས་རྗེ་འོད་ཀྱི་ཐིག་ལེ་ནི་སྟོང་པའི་སྒྲོན་མ་སྟེ༔ ཆོས་ཉིད་མངོན་སུམ་མན་ཆད་དང་༔ བར་དོ་བཞི་སྦྱོར་གྱི་སྣང་བ་ལ༔ ངོ་བོ་གདེངས་ལུ་གུ་རྒྱུད་ཀྱི་ཚུལ་དང་༔ རང་བཞིན་དབྱིངས་རྣམ་དག༔ ཐུགས་རྗེ་སྟོང་པའི་སྒྲོན་མ༔ སྤྲུལ་སྐུའི་སྐུ་གསུམ་གྱི་ཚུལ་དུ་སྣང་ངོ་༔ དེ་དག་གིས་སྤྱིར་བཤད་པ་སོང་ནས༔

བྱེ་བྲག་ཏུ་བཤད་ན་སྣོད་ཀྱི་སྒྲོན་མ་གསུམ་དང་ྭ༔ བཅུད་ཀྱི་སྒྲོན་མ་གསུམ་སྟེ་དྲུག་ལས༔ ཙིཏྟ་ཤའི་སྒྲོན་མ་ནི་སྙིང་རིན་པོ་ཆེ་མཆོང་གི་གུར་ཁང་ཡེ་ཤེས་ཀྱི་བཞུགས་གནས་རྣམ་པར་སྨིན་པའི་ཆ་དང་༔ རྩ་ཀ་ཏི་ཤེལ་གྱི་སྦུ་གུ་ཡན་ལག་ལྔ་པ་དང་༔ རྒྱང་ཞགས་ཆུའི་སྒྲོན་མ་རྩ་སྣ་གཉིས་ཏེ༔ དེ་དག་ནི་བཅུད་ཀྱི་སྒྲོན་མ་གསུམ་གནས་ཤིང་སྣང་ལ་འཆར་བའི་སྣོད་ཡིན་པའི་ཕྱིར་རོ༔ དེ་ལས་ཕྱི་མ་འདི་དག་བཅུད་ཀྱི་སྒྲོན་མ་གསུམ་ལ་རྣལ་འབྱོར་བས་ལམ་དུ་བྱེད་དགོས་པས་བྱེ་བྲག་ཏུ་བཤད་ན༔ ངོ་བོ་བཞི༔ ངེས་ཚིག་བཞི༔ དབྱེ་བ་བཞི༔ མཚན་ཉིད་བཞི༔ དཔེ་བཞི༔ གནད་བཞི༔ དགོས་པ་བཞི་དང་བདུན་ལས༔

དང་པོ་ལ་རྒྱང་ཞགས་ཀྱི་ངོ་བོ་ནི་དག་མ་དག་གཉིས་ཀས་ཆ་འཛིན་པའི་འཁོར་འདས་མཐུན་པར་ལྟ་བའི་དབང་པོ་དྭངས་བ་ལས༔ སྟོང་སྒྲོན་ནི་ཐུགས་རྗེ་ཀུན་ཁྱབ་སྤྲུལ་སྐུའི་རང་བཞིན་ཅན་དང་༔ རྣམ་དག་ནི་རང་བཞིན་ལྷུན་གྲུབ་ལོངས་སྐུའི་ངོ་བོ་ཉིད་དང་༔ རང་བྱུང་ནི་ངོ་བོ་ཉིད་ཀྱི་ཀ་ནས་དག་པའི་ཆོས་སྐུའི་བདག་ཉིད་ཅན་ནོ༔

ངེས་ཚིག་བཞི་ནི་དག་པའི་སྣང་བ་རྒྱང་ནས་འཛིན་ཞིང་འཆིང་བའི་ཞགས་པ་དང་འདྲ་བས་རྒྱང་ཞག་གི༔ ཟླ་དང་བྲལ་ཞིང་ངོ་བོ་སྟོང་ཉིད་གཟུགས་སུ་ཤར་ལ་མི་འགྱུར་བའི་ཐིག༔ ཁྱབ་ཅིང་ཡུལ་ལ་གདལ་བས་ལེ་སྟེ་སྟོང་སྒྲོན་གྱི༔ རིག་པའི་རང་ཡུལ་སྣང་བའི་འཆར་གཞི་བྱེད་པ་དབྱིངས་ཀྱི༔ ཤེས་རབ་ནང་གནས་ཀྱི་དགོངས་པ་ཀུན་ཤེས་ཀུན་རིག་གི་གསལ་སྒོ་མ་འགགས་པའི་ཡེ་གནས་རང་བྱུང་ཆོས་ཀྱི་སྐུར་རང་བྱུང་བའི་དོན་རྟོགས་ན་འགྲོ་བའི་རྒྱུད་ཀྱི་མ་རིག་པའི་མུན་པ་སེལ་བའི་སྒྲོན་མར་གྱུར་པ་རང་བྱུང་གི་ངེས་ཚིག་རྣམས་ཡིན་ནོ༔

དབྱེ་བ་ནི༔ རྒྱང་ཞགས་ལ་དབང་པོ་འདུས་པ་དབང་ལྔའི་དྭངས་མ་མིག་གི་དཀྱིལ་ན་ཡོད་པའི་དབང་རྟེན་དང་༔ འབྱུང་བ་འདུས་པ་རླུང་གི་དྭངས་མ་རྐྱང་མའི་ནང་ན་ཡོད༔ ཡེ་ཤེས་འདུས་པ་འོད་རྩ་དྭངས་བ་གཡས་ཀྱི་དར་དཀར་དང་༔ གཡོན་ཕྲ་ལ་འཁྲིལ་གྱི་རྩ་སྣ་གཉིས་སོ༔ སྟོང་སྒྲོན་ལ་གཞིར་གནས་ཐིག་ལེ་སྔར་བཤད་པའི་སྙིང་ཀ་ན་ཞི་ཁྲོའི་སྐུ་རྟེན་དུ་གནས་པ་དང་༔ ལུས་གནས་རྩའི་ཐིག་ལེ་ཁྱད་པར་ཆེན་པོའི་རྩ་བཞི་ལ་ལམ་གྱི་ཐིག་ལེ་ཡོད་པར་བཤད་པ་དང་༔ ཀུན་རྫོབ་རྒྱུའི་ཐིག་ལེ་རོ་མ་ན་གནས་ཤིང་ལུས་ཟུངས་འཛིན་དུ་གནས་པ་དང་༔ དོན་དམ་སྤྲོས་མེད་ཀྱི་ཐིག་ལེ་རྐྱང་མ་ན་གནས་པའི་དབྱིངས་རིག་དབྱེར་མེད་གཅིག་ཏུ་ཟླུམ༔ རང་བྱུང་འབྲས་བུའི་ཐིག་ལེ་མིག་ན་གནས་པས་སངས་རྒྱས་ཀྱི་དགོངས་པ་དབང་པོའི་ཡུལ་ལ་མངོན་སུམ་དུ་སྣང་ཞིང་རྩལ་མེད་དུ་ལོངས་སྤྱོད་དུ་ཡོད་པས་ཟླུམ་པའོ༔ གཞན་ཡང་གསེར་གྱི་རྩ་ཆེན་ན་གཞིའི་ཐིག་ལེ་བཟང་པོ༔ དར་དཀར་ན་ལམ་གྱི་ཐིག་ལེ་བཟང་པོ༔ ཕྲ་ལ་འཁྲིལ་ན་བཟང་པོའི་རྩེ་མོའི་ཐིག་ལེ༔ ཤེལ་སྦུག་ན་བཟང་པོའི་རྒྱན་ལྡན་གྱི་ཐིག་ལེ་རྣམས་ནི་ལུས་གནས་རྩ་འམ་ལམ་གྱི་ཐིག་ལེ་ལས་བྱས་པའོ༔ དབྱིངས་རྣམ་དག་ལ༔ གཞིའི་དབྱིངས་སྙིང་ཀ་ན་རིག་པའི་ཡེ་ཤེས་ཀྱི་སྐུ་དང་ཐིག་ལེ་འཛིན་པའི་འོད་ལྔ་ལྷུན་གྲུབ༔ ལམ་གྱི་དབྱིངས་མིག་གི་འོད་རྩའི་སྣང་བ་དབྱིངས་སྣང་མུ་ཁྱུད་ལྔའི་དབུས་སུ་པད་འདབ་ཀྱིས་མཚན་པའི་རིག་པའི་ཐིག་ལེའི་དྭངས་མ་སྡུད་ཅིང་རང་ཡུལ་བྱེད༔ འབྲས་བུ་ཡུལ་ལ་སྣང་བའི་དབྱིངས་ཀྱི་ལུག་རྒྱུད་དོན་དུ་འཛིན་དེ་མཐིང་ཀ་ཁྱབ་པ་དང་ལྔ་ལྡན་མཉམ་པ་ཉིད་དོ༔ ཤེས་རབ་རང་བྱུང་གི་སྒྲོན་མ་ལ་གཞི་གནས་རང་བྱུང་གི་ཤེས་རབ་ཀྱིས་ལུས་ལ་སོགས་པའི་ཆོས་ཐམས་ཅད་ཀྱི་རྟེན་བྱེད་པའི་ནང་གནས་རིག་པའི་མཁྱེན་ཆའོ༔ སྣང་བ་ཅེར་འཛིན་གྱི་ཤེས་རབ་ནི་དབྱིངས་དང་རིག་པའི་འདུན་པ་འཛིན་པ་སྟེ་དབྱིངས་རིག་ཐད་ཀར་རྟོགས་པའོ༔ དྲན་པ་འགགས་མེད་ཀྱི་ཤེས་རབ་ཀྱིས་ཤེས་པ་རྩེ་གཅིག་ཏུ་སྡུད་ཅིང་༔ གསལ་དྭངས་ཕྱེད་པའི་ཞི་ལྷག་ཟུང་འཇུག་གིས་ཆོས་ཉིད་གཅིག་ཏུ་སྒྲོལ་བར་བྱེད་པའི་བདག་ཉིད་ཅན་ནོ༔ སོ་སོར་རྟོགས་པའི་ཤེས་རབ་ནི་སྤྱི་དང་རང་གི་མཚན་ཉིད་འཛིན་ཞིང་ཤེས་པའོ༔ འཇུག་བྱེད་རྣམ་གསུམ་གྱི་ཤེས་རབ་ནི་ཐོས་བསམ་གྱིས་གཏན་ལ་ཕབ་ཅིང་སྣང་དང་མི་སྣང་གི་ཆོས་ཐམས་ཅད་རང་བཞིན་མེད་པར་ཤེས་པའོ༔ གཞན་ཡང་ཤེས་རབ་རང་བྱུང་སྒྲོན་མའི་ངོ་བོ་ལས་དབྱེ་ན༔ མཚན་ཉིད་འཛིན་པའི་རིག་པ་མ་རིག་པ་ལས་བཟློག་པའི་རིག་པའི་ཆ་ནས་བཏགས་པ་དང་༔ གཞི་འཛིན་པའི་རིག་པ་ལུས་ལ་གནས་དུས་ཤེས་པ་ཐམས་ཅད་ཀྱི་འཆར་གཞི་གནས་པ་གཞི་གནས་ཀྱི་རིག་པ་དབྱེར་མེད་ཡེ་ཤེས་སུམ་བརྩེགས་ལྷག་མཐོང་གི་རིག་པ་རྡོ་རྗེ་ལུག་རྒྱུད་འོད་སྣང་དང་བཅས༔ ཐོད་རྒལ་གྱི་རིག་པ་ཆོས་ཉིད་ཀྱི་ངང་ལ་ཕྱམ་གྱིས་སོང་པའོ༔ སྔ་མ་གསུམ་སྔ་མ་དང་༔ ཕྱི་མ་གཅིག་ཕྱི་མར་འདུས་པས་གོང་མ་ལྔ་དང་གནད་གཅིག་ལ༔ ཡང་རྩལ་ནི་ཕྱི་གསལ་དུ་ཤར་བའི་སྣང་བ་གཅེར་འཛིན༔ དྲན་པ་འགགས་མེད༔ སོར་རྟོགས་འཇུག་བྱེད་རྣམས་ཡིན་ལ༔ དོན་དུ་ཤེས་པ་ཕྱི་གསལ་རྣོ་མྱུར་ཚིག་དོན་ཀློང་རྡོལ་དུ་འཆར་བ་རྣམས་སོ༔ བྱེད་ལས་ཀྱི་སྒོ་ནས་རྣམ་པར་སྒྲོལ་བྱེད༔ སྐྱོད་བྱེད༔ སྡུད་བྱེད༔ འབྱེད་བྱེད་བཞིར་འགྱུར་བ་དང་༔ གོང་གི་གདངས་ལུག་རྒྱུད་ལོགས་སུ་ཕྱེ་བས་བྱེ་བྲག་བཅུ་ལ་རྣམ་པ་རིག་པ་རང་གསལ་གཞི་འཛིན་པ་གཞི་གནས་ཡེ་ཤེས་སུམ་བརྩེགས་ནི་ངོ་བོ་དང་༔ ལུག་རྒྱུད་གདངས༔ གཞན་རྣམས་རྩལ༔ བྱེད་ལས་གསུམ་ཀ་ལ་འཇུག་པའམ༔ ལོགས་སུ་བསྒྲང་ན་བཞིར་འགྱུར་རོ༔

མཚན་ཉིད་ལ༔ ཚོན་གང་འོད་ཀྱི་ཐིག་ལེ་དམར་ལ་དྭངས་བ༔ ཟླུམ་ཞིང་གསལ་བ་ནི་སྟོང་སྒྲོན་གྱི༔ གཟུགས་སྣང་འཛིན་རུང་འཁྲུལ་སྣང་འགགས་ཤིང་དག་སྣང་མཐོང་བྱེད་རྒྱང་ཞགས་ཀྱི༔ འོད་སྣང་རིག་པའི་རང་ཡུལ་དུ་གྱུར་པ་དབྱིངས་ཀྱི༔ སྒྲོན་མ་ཀུན་གྱི་ཤེས་བྱེད་སྤང་བླང་འཁོར་འདས་འབྱེད་པ་རང་བྱུང་གི་མཚན་ཉིད་དོ༔

དཔེ་ནི༔ རྨ་བྱའི་སྒྲོ་ཐིག་གམ་ཀོ་མོའི་ཆུ་ལ་རྡོ་བོར་བ་ལྟ་བུ་སྟོང་སྒྲོན་གྱི༔ ལྕགས་ཀྱུ་ལྟར་འཁོར་འདས་ཀྱི་སྣ་ནས་འཛིན་པའི་རྒྱང་ཞགས་ཀྱི༔ ནམ་མཁའི་འཇའ་ཚོན་འདྲ་བ་དབྱིངས་ཀྱི༔ སྒྲོན་མ་དང་སྲེག་བྱེད་ཀྱི་མེ་ནི་ཤེས་རབ་རང་བྱུང་སྒྲོན་མེའི་དཔེ་སྟེ༔ ཀུན་ནས་གསལ་བ་དང་༔ དངོས་འཛིན་བསྲེགས་པའི་ཕྱིར་རོ༔ སྒྲོན་མ་དེ་དག་གཞི་སྙིང་ཀ་ན་གནས་པའི་ཆ་ནས་གནས་ལུགས་གཞི་ཡི་སྒྲོན་མ་དང་༔ ལམ་བར་དོ་ལ་སྣང་བའི་ཆ་ནས་བར་དོ་དུས་ཀྱི་སྒྲོན་མ་དང་༔ རྩལ་ཡོངས་སུ་རྫོགས་ནས་སྨིན་པ་མཐར་ཐུག་གི་རང་དབྱིངས་སུ་བཙན་ས་ཟིན་པ་ནི་འབྲས་བུའི་སྒྲོན་མ་ཞེས་གསུམ་དུ་དབྱེ་ཡང་གནས་སྐབས་ཙམ་ལས་ངོ་བོ་ཐ་མི་དད་པའོ༔ དེ་དག་གི་སྣང་སྟོང་ཟུང་འཇུག་གི་གཞི་མཚན་མ་དང་༔ ཉོན་མོངས་གཟུང་འཛིན་གྱི་རྟོག་པ་དང་༔ འཁོར་བའི་སྡུག་བསྔལ་སོགས་ཀྱིས་ཉམས་པ་དང་ཟད་ཅིང་སྨད་དེ་ཟིལ་གྱིས་གནོན་པ་མེད་པས་གཞི་སེང་གེ་རྣམ་པར་བསྒྱིང་ལྟ་བུ་དང་༔ གཞི་དེ་རང་ལ་ཡོད་པའི་དོན་རྟོགས་ཤིང་གནད་གསུམ་ཅོག་བཞག་གིས་བསྒོམ་པས་གཟི་བརྗིད་ཆེན་པོའི་འོད་གསལ་བས་འཁྲུལ་སྣང་བཙན་ཐབས་སུ་འགགས་ཤིང་ཟིལ་གྱིས་གནོན་པས་སེངྒེ་རྣམ་པར་བསྒྱིང་ལྟ་བུ༔ སེངྒེའི་རང་སྐད་ལྟར༔ དགོངས་པ་མི་གཡོ་པ་རྫོགས་ཆེན་རང་སྐད་བཏོན་པས་ཐེག་དམན་ཐམས་ཅད་བརྒྱལ་ཞིང་སྐྲག་ལ་ཟིལ་གྱིས་གནོན་པར་བྱེད་པས་ཀྱང་སེངྒེ་རྣམ་པར་བསྒྱིང་ལྟ་བུ་སྟེ་རིམ་པ་བཞིན་དུ༔ རི་བོ་བརྩེགས་པ་ལས༔ གཅིག་པུ་སྲ་མཁྲེགས་རྡོ་རྗེའི་བདག༔ ཉོན་མོངས་གཡུལ་དུ་གཅིག་དཔའ་བ༔ མི་ཤེས་སྒྲ་ཡི་གྲགས་པ་འཇོམས༔ བློ་ལྡན་སྒེགས་འཆང་དཔལ་དང་ལྡན༔ བརྟན་པོ་མི་སྡུག་གཟུགས་འཆང་བ༔ ཞེས་དང་༔ རྩལ་རྫོགས་ལས༔ སེངྒེའི་རང་སྐད་བཏོན་པས་གཅན་གཟན་དང་༔ རྫོགས་ཆེན་རང་སྐད་བཏོན་པས་ཐེག་དམན་བརྒྱལ༔ ཞེས་དང་༔ རི་བོ་སྤྱི་ཆིངས་གི་དགོངས་པ་ནི༔ སེངྒེ་རྣམ་པར་བསྒྱིང་ལྟ་བུའོ༔ ཞེས་གསུང་བ་ཉིད་གཞི་ལ་གནས་པ་ལྟ་བས་གཏན་ལ་ཕབ་པའོ༔

དེ་ནས་གསུམ་པ་ལ་རྒྱ་མཚོ་ཀློང་རྡོལ་གྱི་དགོངས་ཀློང་གིས་བསྒོམ་ཉམས་སུ་ལེན་པ་ལ༔ སྔོན་འགྲོ་དང་དངོས་གཞི་གཉིས་ལས༔ དང་པོ་ནི༔ ཕྱི་ནང་ཁྲེགས་ཐོད་ཟུང་འཇུག་གི་རུ་ཤན་བཞིན་ཏེ་གདམས་ངག་ཟུར་པ་བཞིན་ནོ༔ གཉིས་པ་ནི༔ ཐོད་རྒལ་གྱི་འཕགས་ཆོས་དང་༔ དེ་ལྡན་གྱི་ལམ་དངོས་བཤད་པ་གཉིས་ལས༔དང་པོ་ནི༔ འབད་མེད་ཀྱི་ཁྲེགས་ཆོད་ལས་ཐོད་རྒལ་ཉིད་ཁྱད་ཆོས་བདུན་གྱིས་འཕགས་པ་ཀུན་མཁྱེན་ཆེན་པོའི་ཉམས་ལེན་ལག་ལེན་དང་འབྲེལ་བའི་ཁྱད་པར༔ ལུས་གནད་རྩའི༔ སྣང་བྱེད་སྒོའི༔ མཐོང་བ་དབང་པོའི༔ རང་གནད་མངོན་སུམ་གྱི༔ སྣང་བ་འོད་ཀྱི༔ ཉམས་གོང་འཕེལ་གྱི་ཁྱད་པར་བདུན་དུ་གསུང་བ་དག་གོ༔

གཉིས་པ་ལ༔ ཅོག་བཞག་བཞིའི་སྒོ་ནས་མངོན་སུམ་རང་ཐོག་ཏུ་ཕབ་པ་དང་༔ རྣལ་འབྱོར་བཞིའི་རང་ས་བཟུང་པའི་དགོངས་པ་རྒྱུན་དུ་བྱེད་པ་གཉིས་ལས༔ དང་པོ་ལ་བཞི་ལས་ཐོག་མར་རི་བོ་ཅོག་བཞག་ནི༔ ལུས་ཀྱི་གནད་བསྟན་པ་ཡིན་ཏེ༔ ལུས་ཀྱི་བྱ་བ་བཟང་ངན་བར་གསུམ་གྱིས་མི་གཡོ་བའི་རི་བོ་ལྟ་བུ་དང་༔ སྐུ་གསུམ་གྱི་བཞུགས་སྟངས་ལས་མི་གཡོ་བས་ཀྱང་རི་བོ་ལྟ་བུ་དང་༔ དབྱིངས་རིག་ཐག་ཆོད་ཀྱི་དགོངས་པ་ལས་མི་གཡོ་བས་རི་བོ་ལྟ་བུ་སྟེ༔ དང་པོ་ནི་བཟང་པོས་ཕྱག་སྐོར་སོགས་དང་༔ ངན་པས་སྲོག་བཅད་པའི་མཚོན་ལུས་ཀྱི་མི་དགེ་བ་དང་༔ བར་བས་སྤྱོད་ལམ་བཞི་སོགས་འཇིག་རྟེན་གྱི་བྱ་བ་རྣམས་ཅོག་གིས་བཞག་ཅིང་མི་གཡོ་བའོ༔

གཉིས་པ་ལ་ལྔ་རུ་ཡོད་དེ༔ ཆོས་སྐུའི་བཞུགས་སྟངས་སེངྒེ་ལྟར་ལུས་འགྱིང་ཚུགས་སུ་རྐང་མཐིལ་གཉིས་དང་འཕོང་ཚོས་ས་ལ་ཕབ་པས་དུག་གསུམ་གྱི་རླུང་རྣམས་གནོན་ཞིང་༔ སྐུ་གསུམ་ཡེ་ཤེས་ཀྱི་རླུང་འཕེལ་བའི་གནད༔ མཐེ་བོས་སྲིན་ལག་གནོན་ཞིང་སོར་མོ་བསྒུང་སྟེ་ས་ལ་ཕབ་པས་ང་རྒྱལ་དང་ཕྲག་དོག་གི་རླུང་གནོན་ཞིང་བཟློག་པའི་གནད༔ མལ་ལྔ་ས་ལ་ཕབ་པས་ཡེ་ཤེས་ལྔ་དང་སྐུ་ལྔ་མངོན་དུ་གྱུར་པའི་གནད༔ རོ་སྟོད་གསེང་ལ་བོར་ཞིང་རྩལ་མཇིང་བ་ལ་བོར་བས་དབྱིངས་རིག་འདུ་འབྲལ་མེད་ཅིང་བྱིང་རྒོད་འཐིབ་གསུམ་སེལ་བའི་གནད་དོ༔ ལོངས་སྐུའི་བཞུགས་སྟངས་ནི༔ གྲུ་མོ་གཉིས་དང་པུས་མོ་གཉིས་རྐང་པའི་སོར་མོ་བསྒུང་བའི་ལྟག་གཉིས་ཏེ་དྲུག་ས་ལ་བཙུག་པས་ཉོན་དྲུག་དང་ཚོགས་དྲུག་གི་ཆོས་དང་རླུང་བཅར་ལ་གནོན་པའི་གནད༔ ལག་མཐིལ་གྱི་ཨོལ་ཀོ་བཏེགས་པས་རྦ་རླབས་དང་འོད་གསལ་གྱི་རྩའི་རླུང་ཅུང་ཟད་མནན་ཞིང་གཏེམ་པས་རྟོག་གཉིས་འགགས་པ་དང་༔ འོད་སྣང་གི་མཐོང་བ་བརྟོལ་པའི་གནད༔ མཇིང་བ་ཅུང་ཟད་དགྱེ་བས་དབྱིངས་རིག་མཐོང་བའི་གནད་དོ༔ སྤྲུལ་སྐུའི་བཞུགས་སྟངས་ནི༔ རྐང་པའི་ལོང་བུ་གཉིས་གཤིབ་པས་ཐབས་ཤེས་ཟུང་འཇུག་གི་གནད་དང་རྟེན་འབྲེལ༔ མཐིལ་གཉིས་ས་ལ་ཕབས་པས་ལས་ཉོན་གྱི་རླུང་གནོན་པའི་གནད༔ པུས་བྲང་སྦྱར་བས་ལུས་འབྱུང་སྙོམ་པའི་གནད༔ ལུས་སྤྱི་དྲང་པོར་བསྲིང་བས་དྲང་པོ་བཞི་ལྡན་གྱི་གནད༔ ལག་གཉིས་མཛུབ་མོ་རེ་མིག་ཏུ་བལྟར་བས་དབྱིངས་རིག་འབྲེལ་བའི་གནད་དང་བཅས་པའོ༔ མངོན་པར་བྱང་ཆུབ་ཀྱི་འདུག་སྟངས་ནི༔ ལུས་པོ་ཤད་བརྐྱང་སྟེ་མགོ་དང་ཡན་ལག་གི་རྒྱབ་ལྔ་ས་ལ་ཕབ་པས་རླུང་ལྔ་དབྱིངས་སུ་འཆིང་༔ ལུས་བྱིང་མཉམ་པར་ས་ལ་ཕབ་པས་འབྱུང་བཞི་ཆ་སྙོམས༔ ཡན་ལག་རྣམས་ཐད་སོར་བརྐྱང་བས་ནང་གི་རླུང་ལྔ་དབྱིངས་སུ་དག༔ ལུས་པོ་གན་རྐྱལ་དུ་ཉལ་བས་གནད་བཅུན་པ་མེད་པར་འོད་གསལ་བདེ་ལུགས་སུ་འཆར་ཞིང་ཡེ་ཤེས་ལྔ་མངོན་དུ་གྱུར་པའི་གནད་དོ༔ མི་འགྱུར་རྡོ་རྗེའི་འདུག་སྟངས་ལངས་འདུག་ཉལ་གསུམ་གྱིས་ཡར་རྩེ་ཡེ་ཤེས་གསུམ་དང་མར་རྩེ་སྐུ་གསུམ༔ རྐེད་པ་ཐབས་ཤེས་ཟུང་འཇུག་གསུམ་མཚོན་པའི་མར་རྩེ་གསུམ་གྱི་ཕོ་མོ་མ་ནིང་གི་རླུང་གསུམ་འཆིང་བ་དང་དུག་གསུམ་གནས་སུ་དག་ཅིང་༔ ཡར་རྩེ་གསུམ་གྱི་རྟོག་གསུམ་གྱི་རྒྱུ་བ་བཅད་པ་དང་ཁམས་གསུམ་དབྱིངས་སུ་སྒྲོལ༔ སྐེད་པ་གསུམ་གྱི་སྦུབས་གསུམ་གཅིག་ཏུ་འདྲིལ་དང་༔ སྐུ་གསུམ་གདངས་གསུམ་གྱི་འོད་གསལ་མངོན་པར་འཆར་རོ༔ འཇམ་དཔལ་ལས༔ རྡོ་རྗེ་སྐྱིལ་ཀྲུང་རྫོགས་སངས་རྒྱས༔ ཞེས་དང་༔ ཕྲེང་བ་ལས༔ ལུས་ཀྱི་གནད་ནི་འདི་གསུམ་སྟེ༔ སེངྒེ་དང་ནི་གླང་ཆེན་ཚུལ༔ དྲང་སྲོང་ཚུལ་དུ་གནས་པར་བྱ༔ ཞེས་སོ༔

གསུམ་པ་ནི༔ གཞི་ལ་གནས་པའི་དབྱིངས་རིག་ཇི་ལྟར་ཡོད་པ་དཔེ་དོན་རྟགས་གསུམ་གྱི་བླ་མས་ངོ་སྤྲད་དེ༔ ངེས་པ་ཐོབ་ནས་དེའི་གདངས་ལམ་དུ་སྣང་བའི་དབྱིངས་རིག་དེ་ཉིད་དེ་བཞིན་གཤེགས་པའི་གསང་མཛོད་དམ་པ་མངོན་དུ་བརྟོལ་ཐབས་ཀྱིས་ཤར་བ་ཡིན་པར་ཐག་བཅད་དེ༔ གནས་ལུགས་སྒྲོན་མ་དྲུག་གི་ངོ་བོ་དང་༔ སྣང་ཆ་ལས་མི་གཡོ་བར་རྩེ་གཅིག་དུ་བཞག་པའོ༔

གཉིས་པ་རྒྱ་མཚོ་ཅོག་བཞག་གི་དགོངས་པ་ནི༔ གང་ལ་བཞག་པའི་རྟེན་དང་༔ ཇི་ལྟར་བཞག་པའི་ཚུལ་དགོས་ཆེད་དང་བཅས་པ་གཉིས་ལས༔ དང་པོ་ནི༔ ཆོས་སྐུའི་རྟེན་ཉི་མ༔ ལོངས་སྐུའི་ཟླ་བ༔ སྤྲུལ་སྐུའི་མར་མེ༔ མངོན་བྱང་གི་མན་ཤེལ༔ རྡོ་རྗེའི་ནམ་མཁའ་སྤྲིན་བྲལ་ལ་བཞག་པས་དབྱིངས་ཡེ་སྣང་སྟོང་ཟུང་འཇུག་གི་དང་༔ བདེ་གསལ་རྟོག་མེད་དང་༔གསལ་སྟོང་དང་༔ ཡེ་ཤེས་ལྔའི་དང་༔ བརྗོད་བྲལ་འགྱུར་མེད་ཐིག་ལེ་ཉག་གཅིག་གི་དགོངས་པ་འཆར་རོ༔ དེ་དག་གིས་ཡུལ་ལྔའི་བུན་ལོང་འཇིག་ཅིང་དབྱིངས་ལྔ་གསལ་བར་བྱེད་པའི་རྟེན་བླ་ན་མེད་པའོ༔

གཉིས་པ་ནི༔ མིག་ཆུའི་དྭངས་མ་ལ་རྒྱ་མཚོ་ཞེས་བྱ་ལ༔ དེ་ཉིད་རྟེན་ལས་མ་ཡེངས་བར་བཞག་པ་དང་༔ འབྱུང་བ་དང་དབང་པོའི་བྱེད་པ་སྡོམ་པ་དང་བཅས་པས་ན་ཅོག་བཞག་ཞེ་ལ༔ དེ་ལ་ཡང་ལྔ་ལས་ཆོས་སྐུ་མཁའ་ལྡིང་རྒྱལ་བོའི་གཟིགས་སྟངས་ཀྱིས་བལྟས་པས་བག་ཆགས་ཐུར་ལ་སེལ་ཞིང་ངན་སོང་སྐྱེ་རྒྱུན་གཅོད༔ མཉམ་ཉིད་ཀྱི་དོན་རྟོགས༔ དབྱིངས་རིག་འཁྱོལ་ས་མེད་ཅིང་ཀུན་ཁྱབ་ཀྱི་སྤྱན་མངོན་དུ་གྱུར་བའི་གནད༔ ལོངས་སྐུ་པདྨ་ལྟར་ཟླུམ་པས་ཐད་ཀར་མཉམ་པར་བལྟས་པས་འཁྲུལ་སྣང་དུས་གཅིག་ལ་འགགས༔ ཡེ་ཤེས་ཀྱི་སྣང་བ་མངོན་དུ་མཐོང་༔ སྤྲུལ་སྐུ་བག་ཡོད་དྲང་སྲོང་གི་བརྟུལ་ཞུགས་ལྟ་བུའི་ལྟ་སྟང་གི་སྒྲོན་མ་མཐོང་ཞིང་༔ འཆར་ཚུལ་ཕྲིན་ལས་ལ་སྤྱོད༔ མངོན་བྱང་བུང་བ་འཕུར་ལྡིང་ལྟ་བུའི་ལྟ་སྟངས་ཀྱིས་དབྱིངས་སྣང་གཡས་སུ་ཁྲིད་དེ་བལྟས་པས་སྣང་བ་ལྔ་ལྡན་རྒྱ་ཆེར་འཕེལ༔ རྡོ་རྗེ་མདའ་སྲོང་ལྟ་བུའི་མཐིང་ཁ་ཁྱབ་ཆེན་ལས༔ ཞིང་ཁམས་ཀྱི་རྒྱན་སྣང་མངོན་པར་འཆར་བའི་གནད་དོ༔ རང་བཞིན་དུ་གཟིགས་སྟངས་ལྔ་ཡི་ཡེ་ཤེས་ཉི་ཤུ་རྩ་ལྔའི་འོད་གསལ་གྱི་སྣང་བ་མངོན་དུ་བརྟོལ་པར་བྱེད་དོ༔ བཞུགས་སྟངས་དང་གཟིགས་སྟངས་དེ་དག་ཁམས་དང་བསྟུན་ན་ཚ་བ་དང་མཁྲིས་པ་ཆེ་བས་ཆོས་སྐུ༔ གྲང་རླུང་ཆེ་བས་སྤྲུལ་སྐུ༔ འདས་སྙོམས་ཅན་གྱི་གླང་པོ༔ བད་ཀན་ཅན་གྱི་རྡོ་རྗེ༔ ཀུན་ལ་ཤེས་པ་མངོན་བྱང་༔ ཡང་ཉོན་མོངས་ལྔའི་གཉེན་པོར་ཡེ་ཤེས་ལྔའི་འགྲོས་སྦྱར་བ་དང་༔ ཡང་སྣང་བ་ལྔའི་དབང་དུ་མངོན་སུམ་མན་ཆད་གཞི་སེམས་ཅན་གྱི་སྣང་བར་སྤྲུལ་སྐུ༔ མངོན་སུམ་ལ་ལོངས་སྐུ༔ གོང་འཕེལ་ལ་ཆོས་སྐུ༔ ཚད་ཕེབས་ལ་མངོན་བྱང་༔ ཟད་པར་རྡོ་རྗེ་མི་འགྱུར་གྱི་ཤིས་པའོ༔ འཇམ་དཔལ་ལས༔ ཡེ་ཤེས་མིག་གཅིག་དྲི་མ་མེད༔ ཡེ་ཤེས་སྣང་བ་ལམ་མེ་བ༔ ཞེས་དང་༔ ཕྲེང་བ་ལས༔ སྒོ་ནི་དེ་ཉིད་མ་འགུལ་དང་༔ གསལ་བྱེད་རྣམ་གཉིས་མ་འགུལ་བའོ༔ ཞེས་སོ༔

གསུམ་པ་རིག་པ་ཅོག་བཞག་ལ་གཉིས་ཏེ༔ རླུང་དང་རིག་པའི་གནད་དོ༔ དང་པོ་ནི༔ ངག་གིས་བྱ་བ་སུམ་སྤྲུགས་སུ་བཏང་ལ༔ རླུང་རིག་བྱེད་པ་གཅིག་པས་ན༔ རླུང་གིས་གནད་བཅད་པས་བུ་མ་ལ་སྤྲོད་པའི་གདམས་ངག་ཞེས་བྱ་སྟེ༔ རྒྱུད་སྡེ་གཞན་དག་ནས་སྲོག་རྩོལ་ཀྱི་བྱེད་པ་བཅིང་བས་ལས་རླུང་དབུ་མར་ཞུགས་ཏེ༔ མཐར་ཡེ་ཤེས་ཀྱི་སྣང་བ་སྟོང་གཟུགས་ཀྱི་རྟགས་བཅུ་སོགས་མཐོང་བར་འདོད་ལ༔ འདིར་ནི་བུ་རིག་བྱེད་རྩལ་གྱི་སེམས་ཉིད་མ་འོད་གསལ་དོན་གྱི་ཡེ་ཤེས་ལ་ཐིམ་པས་རིག་གདངས་མངོན་སུམ་གྱིས་ཁྱད་པར་འཕགས་པའི་གནད་མྱུར་བུལ་ཡོད་དེ་རླུང་དང་རིག་པའི་གདང་གི་ཁྱད་པར་གྱིས་སོ༔ ལྷག་པར་ཡང་ལས་རླུང་འཁོར་བའི་རྩ་བ་དེ་མེ་ལག་ནས་མ་བཏང་བར་ཚ་བ་སྤོང་དུ་མེད་པ་བཞིན་རྣམ་རྟོག་དང་འཁྲུལ་སྣང་འགགས་སྟོབས་ཆུང་བས་དེ་དག་གི་བསླད་ཡོད་མེད་ཀྱི་ཁྱད་པར་རོ༔

གཉིས་པ་རིག་པའི་གནད་ཅོག་བཞག་དངོས་ནི༔ སེམས་ཀྱི་བྱ་བ་སུམ་སྤྲུགས་སུ་བཏང་ལ༔ རྐུན་པོ་ཡུལ་བྱུང་བས་རྒྱལ་པོ་གདན་ས་འཛིན་པའི་གདམས་ངག་ཞེས་བྱ་སྟེ༔ ཤེས་པ་གང་དུ་ཡང་བཟོ་མི་འཆོས་པར་སྔར་བླ་མས་ངོ་སྤྲད་པའི་ཁྲེགས་ཆོད་ཀྱི་ངོ་བོ་སྐྱོང་བའམ༔ བདེ་ཆེན་འཁོར་ལོའི་ཡི་གེ་ལ་གཏད་ཅིང་༔ མིག་འོད་སྣང་ལ་བཟུང་བས་རིག་པ་རང་གནས་མཉམ་པའི་ངང་ལས་མི་གཡོ་བའི་དགོངས་པ་ཁྱད་པར་ཅན་ནོ༔ དེ་ནི་རྡོ་རྗེ་ལུ་གུ་རྒྱུད་ཀྱི་ངོ་བོ་ཡིན་ལ༔ དེའི་མདངས་སུ་སྣང་བ་ཅེར་འཛིན༔ དྲན་པ་འགགས་མེད་གཉིས་དང་༔ རྩལ་དུ་རྣམ་པར་སྒྲོལ་བྱེད་སོགས་དང་༔ གདེངས་སུ་ལུ་གུ་རྒྱུད་ཀྱི་སྣང་བ་འཕྱང་འཕྲུལ་འགྲོ་འོང་གི་རྣམ་པར་འཆར་བ་རྣམས་སོ༔

སྣང་བ་ཅེར་བཞག་ནི༔ དེ་ལྟར་ན་ཕྱི་ཡུལ་དུ་སྣང་བ་བཙན་ཐབས་སུ་འགགས་ཀྱང་༔ མ་མཐོང་བ་ཙམ་ལས་ཤུལ་ན་ཡོད་པར་མི་སེམས་པར་སྣང་སྲིད་གཞིར་བཞེངས་སྐུ་དང་ཡེ་ཤེས་སུ་རྣམ་པར་དག་པའི་ངེས་ཤེས་བརྟན་པོའི་སྒོ་ནས་འོད་སྣང་ལ་སྤུ་རིས་སུ་འཛིན་པ་མི་བྱ་བར་ཅེར་མཐོང་རང་བཞག་དུ་སྒྲོལ་བའི་ཕྱིར་དང་༔ རྒྱ་མཚོ་ཉི་མ་ཅན་ནས་གསེར་གྱི་སྡོང་བོ་གྱེས་པའི་ཡལ་ག་ལ་དཔྱང་པའི་འབྲས་བུ་ངོ་མཚར་ཞིང་ཁམས་ཀྱི་བཀོད་པའི་དབུས་སུ་བརྟན་པོར་གནས་པས་ཀྱང་ངེས་ཚིག་ཅེར་བཞག་དུ་ཐོབ་པའོ༔ གང་ལ་བཞག་པའི་གནས་ནི་གསུམ་ཏེ༔ དབྱིངས་རྣམ་པར་དག་པའི་སྒྲོན་མ་མཐིང་ཀ་ཁྱབ་པ་དང་༔ ལྔ་ལྡན་མཉམ་པ་རླུང་གི་རྒྱལ་མཚན་ལྟ་བུ་དང་༔ ཐིག་ལེ་སྟོང་བའི་སྒྲོན་མ་སྲོག་ཆགས་རྐུན་པོའི་མིག་ལྟ་བུའི་གོ་རར་དུ་སྔར་བཤད་པའི་རིག་གདངས་ཨར་ལ་གཏད་པ་སྟེ༔ གསུམ་པོ་རེ་རེ་ལ་གནད་དུ་གཡས་གཡོན་སྟེང་འོག་དབུས་རྣམས་སུ་གང་ལ་རྒྱ་ཆེན་མཉམ་པར་འཆར་བའི་སར་འཁྲིད་པ་དང་༔ ཐིག་ལེའི་གནད་གཏེམ་པ་དང་༔ རིག་པའི་གནད་ཨར་ལ་གཏད་པ་དང་༔ གོམས་པའི་བརྟགས་པ་ལ་སོགས་པའི་སྒོ་ནས་ཉམས་སུ་བླང་བའོ༔

གཉིས་པ་དེ་ཉིད་རྒྱུན་བྱེད་རྣམ་པ་བཞིའི་དོན་ལྟར་ཉམས་སུ་ལེན་པ་ནི༔ ཆོས་སྐུ་ཆོས་ཉིད༔ ལོངས་སྐུ་ཡེ་ཤེས༔ སྤྲུལ་སྐུ་ཤེས་རབ་ཀྱི་སྤྱན་རྣམས་ཀྱིས་རིམ་པར༔ དངོས་དང་རང་གསལ་སྒྲ་ཚིག་དང་བྲལ་བར་མངོན་དུ་མཛད་པའི་བྱིན་རླབས་འཇུག་པའི་ལྟ་སྟངས་གསུམ་གྱིས་བག་ཆགས་ཐུར་ལ་སེལ༔ འཁོར་འདས་རོ་མཉམ་དུ་བསྲེ་ཞིང་༔ ཡེ་ཤེས་དངོས་སུ་འབེབས་པའི་རྡོ་རྗེ་ལུ་གུ་རྒྱུད་ལ་བལྟས་པས་སྤྱན་ལྔའི་དེ་ཉིད་དང་ལམ་དང་འབྲས་བུའི་ཡོན་ཏན་ཐམས་ཅད་ཐོབ་པའི་ཕྱིར༔ དེའི་གྲོགས་སུ་ལུས་རི་བོ་ཅོག་བཞག་གི་དྲང་བོ་བཞི་ལྡན་གྱིས་རྒྱང་ཞགས་མི་འགུལ་བའི་གཞི་བྱས༔ དེ་མ་འགུལ་བས་དབྱིངས་རིག་གཡོ་མེད་ཀྱི་བཞག་ཐབས་གཉིས་ཀྱིས་མི་གཡོ་བའི་སྲོག་དུས་གཅིག་དུ་ཟིན་པ་དང་༔ གཞིའི་དབྱིངས་རིག་གི་ཀློང་ནས་ཡིད་ཆེས་མངོན་སུམ་པའི་གདེངས་ཀྱི་ལྟ་བའི་མཐོང་བ་ཆུ་བུར་དང་ཤེས་རབ་ཀྱི་སྤྱན་ལ་མངོན་སུམ་དུ་བརྟོལ་བས་རྒྱ་མཚོ་ཀློང་རྡོལ་གྱི་མཚན་དོན་དང་འབྲེལ་བའམ༔ ཡེ་ཤེས་མཁའ་གསལ་གྱི་དགོངས་པ་ཞེས་ཀྱང་བྱ་སྟེ༔ དེ་ཡང་དབྱིངས་ཀྱི་གོ་རར་ལུག་རྒྱུད་ཤར་བ་ཉིད་འབྱེད་པའི་ཤེས་རབ་དུ་མ་འགགས་ཀྱང་༔ གཟུང་འཛིན་སྙེམས་བྱེད་ཀྱིས་མི་གཡོ་བར་བཞག་པ་དང་༔ གདེངས་ལུག་རྒྱུད་ཀྱི་སྐུ་ལ་འདར་བའམ་འགུལ་འཁྲིགས་མེད་པར་བསྐྱིལ་ཞིང་ཉམས་སུ་བླངས་པ་དང་༔ དག་གྲོལ་ངེས་འབྱིན་གྱི་སྒྲོགས་གཉིས་སྣང་གི་ཞེན་པས་མ་བཅིང་བར་དུས་བཞི་འབྲལ་མེད་དུ་ཉམས་བསྐྱང་བ་དང་༔ རང་ཆས་ལྷུན་གྲུབ་ཀྱི་འབྲས་བུ་རྟོགས་པའི་གདེང་གིས་འགྲོ་བ་སྟེ༔ ལྟ་བསྒོམ་སྤྱོད་འབྲས་རྒྱུན་དུ་བྱེད་པའི་རྣལ་འབྱོར་བཞི་ལ༔ གོལ་ས་བཅུ་གཉིས་ཀྱི་སྐྱོན་གྱིས་མ་གོས་པར་ཉམས་སུ་བླངས་པར་བྱའོ༔

བཞི་པ་ཉི་ཟླ་ཁད་མཉམ་གྱི་དགོངས་པས་སྤྱོད་པའི་གྲོགས་བཙལ་བ་ནི་མཉམ་རྗེས་གཉིས་ལས༔ དང་པོ་ནི༔ མི་འགུལ་བ་གསུམ་ལ་གཞི་བཅའ་བ༔ སྡོད་པ་གསུམ་གྱི་ཚད་བཟུང་བ་གཉིས་ལས༔ དང་པོ་ལ༔ ལུས་ཀྱི་མི་འགུལ་བ་བཞུགས་སྟངས་གསུམ་དང་༔ སྒོས་མི་འགུལ་གཟིགས་སྟངས་གསུམ་དང་བཅས་པ་ནི་སྔར་བཤད་ཟིན་ལ༔ གཅུད་པ་དེམ་གྱི་མི་འགུལ་བ་གསུམ་ནི༔ ཡན་ལག་བཅུད་པས་རླུང་ལྔ་དབང་དུ་འདུས་ཤིང་འགྲོ་དྲུག་གི་འཁྲུལ་འཁོར་དང་སོར་མོའི་ཚིགས་རྣམས་བསྐུམས་པས་ལུས་གཡོ་རྩོལ་ལ་ཞེན་པའི་བྱ་བ་འཇིག༔ སྐབས་སུ་འོད་རྩ་གཏེམ་པས་དག་སྣང་བདེ་ལུགས་སུ་འཆར་རོ༔ ལུས་ཀྱི་གཅུད་པ་སོར་བཞག་གིས་ཁམས་གསུམ་མིང་མེད་དུ་སྟོང་༔ ངག་གི་སྨྲ་པ་ལ་མི་གནས་པས་འགྲོ་དྲུག་ཐ་མལ་ཆགས་སྡང་གི་གཞི་སྟོང་༔ ཚིག་གི་བརྗོད་པ་སྤངས་པས་ངག་རང་བྱུང་ཡེ་ཤེས་སུ་འཆར་ཞིང་༔ རང་གི་བརྗོད་པ་སྤངས་པས་བརྗོད་མེད་ཀྱི་དོན་རྒྱུད་ལ་སྐྱེའོ༔ སེམས་དབྱིངས་རིག་གི་འབེན་ལ་གཏད་པས་སངས་རྒྱས་ཀྱི་དགོངས་པ་ཟིན༔ རིག་པ་བཙོན་དུ་བཟུང་བས་གནས་ལུགས་གཞན་དུ་མི་འཚོལ༔ རང་གདངས་དང་མ་བྲལ་བས་སྣང་བཞི་ཚད་དུ་ཕྱིན་པའོ༔

གཉིས་པ་སྡོད་པ་གསུམ་ནི༔ ལུས་བྱ་བ་ལ་མི་གནས་པས་འཁོར་བའི་རླུང་སེམས་རྒྱུན་ཆད༔ སེམས་གཡོ་མེད་དུ་སྡོད་པས་བག་ཆགས་ཀྱི་གཞི་སྟོངས༔ སྣང་བ་ལ་འཛིན་མེད་དུ་སྡོད་པས་སངས་རྒྱས་ཀྱི་དག་སྣང་དང་ཡེ་ཤེས་གཉིས་འཛིན་ཟད་པའི་དགོངས་པ་ལ་རང་བྱན་ཚུད་པའོ༔ གཉིས་པ་རྗེས་ཐོབ་ཀྱི་སྤྱོད་པ་ནི༔ དང་པོའི་ལས་ཅན་གྱིས་བརྟུལ་ཞུགས་འཁོར་འདས་རུ་ཤན་དབྱེ་བ་དང་༔ བར་དུ་ཆོས་སྤྱོད་བཅུ་སོགས་དང་སྦྲེལ་ཏེ་ཉམས་སུ་ལེན་པ་ནི་ཀུན་ཏུ་བཟང་པོའི་སྤྱོད་པ་དང་༔ ཐ་མ་ཡེ་ཤེས་འཁོར་ལོར་རོ་གཅིག་མཉམ་རྗེས་དབྱེར་མེད་པར༔ འོད་གསལ་འབའ་ཞིག་ལ་དབྱེ་བསལ་མེད་པའི་སྤྱོད་པའོ༔ དེ་དག་ནི་བར་བ་ལས་བཟུང་སྟེ༔ ཉི་མ་ལྟ་བུའི་ཤེས་རབ་ཡེ་ཤེས་གཙོ་བོར་བྱེད་པའི་མཉམ་བཞག་ཉིད༔ ཟླ་བ་ལྟ་བུའི་ཐབས་གཙོ་བོར་བྱེད་པའི་རྗེས་ཐོབ་གཉིས་ཁད་མཉམ་དུ་སྤྱོད་པས་ངེས་ཚིག་དེ་ལྟར་ཐོབ་པོ༔

ལྔ་པ་ཐིག་ལེ་མཐོང་བརྟོལ་གྱི་དགོངས་པ་ནི༔ ལམ་དང་འབྲས་བུའི་འཆར་ཚུལ་གྱི་རིམ་པ་གཉིས་ལས༔ དང་པོ་ལ་བཞི་སྟེ༔ ཆོས་ཉིད་མངོན་སུམ༔ ཉམས་གོང་འཕེལ༔ རིག་པ་ཚད་ཕེབས༔ ཆོས་ཉིད་ཟད་པའི་སྣང་བ་དང་བཞི་ལས༔ དང་པོ་ཆོས་ཉིད་མངོན་སུམ་གྱི་སྣང་བ་ནི༔ གཤིས་དོན་དམ་པའི་ཆོས༵་ཀྱི་ངོ་བོ་བཅོས་བསླད་མེད་པ་ཉིད༵་དབང་པོ་ལ་མངོ༵ན་དུ་སྒོ་ཡུལ་རླུང་གི་གནད་གསུམ༵་ལ་བརྟེན་ནས་ཅེར་གྱིས་མཐོང་བའི་ངེས་ཚིག་དང་ལྡན་པའི་ཕྱིར༔ དེ་བཤད་པ་ནི་སྤྲུལ་སྐུའི་བཞུགས་སྟངས་དང་གཟིགས་སྟངས་གསུམ་སོགས་ཀྱི་སྒོ་ནས་ཉམས་སུ་བླངས་བས་དབྱིངས་སྣང་འཇའ་འོད་ཀྱི་ནང་དུ་ཐིག་ལེ་དང་ཐིག་ཕྲན་གསུམ་འབྲེལ་དུ་འཆར༔ སྟོང་སྒྲོན་ཡང་རེས་སྣང་རེས་མི་སྣང་བ་མ་ཡིན་པར་བྱི་ལའི་མིག་ལྟར་གཡོ་འགུལ་མེད་པར་གནས་པའི་ཚེ་རྡོ་རྗེ་ལུག་རྒྱུད་གསེར་སྐུད་ལྟ་བུ་ཤ་ར་ཎ་དལ་གྱིས་འགྲོ་བ་ལྟ་བུ་དང་༔ གཟུང་རྟོག་རང་སར་གྲོལ་བ་དང་༔ ཐོས་བསམ་འཇུག་བྱེད་ཀྱི་ཤེས་རབ་ཁྱད་པར་ཅན་འཆར་བ་ཡིན་ཏེ༔ ནམ་མཁའ་སྟོང་པ་ལ་བལྟས་ན་དབྱིངས་སྣང་ཡར་མཚམས་ལས་ཕྲལ་བ་ཡིན་ཏེ༔ དེ་དུས་སུ་ཡོན་ཏན་ནི་ལུས་རུས་སྦལ་མཁར་གཞོང་དུ་བཅུག་པ་ལྟར་འདུག་སྟངས་ནས་འགུལ་བ་མི་འདོད་པ་དང་༔ ངག་པི་ཝཾ་གི་རྒྱུན་ཐག་ཆད་པ་ལྟ་བུར་སྨྲ་བརྗོད་དང་བྲལ༔ སེམས་མཁའ་འགྲོ་སྙི་ལ་ཟིན་པ་ལྟར་རིག་པ་འོད་གསལ་དང་འདྲེས་ནས་རྟོག་པ་བྲི་བ་རྣམས་ནི་ལུས་ལ་བུམ་དབང་གི་ནུསཔ་ཞུགས་པའི་རྟགས་ཡིན་ཏེ༔ ཡོན་ཏན་ནི་བསྟན་བུ་ལས༔ འདི་ལྟར་སུ་ཡིས་མཐོང་བའི་མི༔ ཐོག་མའི་ཀུན་ཏུ་བཟང་པོ་དང་༔ སྐལ་པ་ཉིད་ནི་མཉམ་པའོ༔ ཞེས་སོ༔

གཉིས་པ་ཉམས་གོང་འཕེལ་གྱི་སྣང་བ་ནི༔ དབྱིངས་འོད་ལྔའི་སྣང་བ་དང་༔ ཐིག་ལེ་སྟོང་སྒྲོན་ལྔ་ཚོམ་གྱི་རྣམ་པར་སྣང་ཞིང་༔ དབྱིངས་གྱེན་འགྲེང་དང་རྩིབ་ཤར་དང་ཟླུམ་འཁྲིགས་པདྨ་མདའ་མདུང་གི་རྩེ་མོ་ལྟ་བུ་དང་༔ རེ་ལྡེ་གྲུ་ཆད་སོགས་ཀྱི་རྣམ་པར་སྣང་ཞིང་༔ དེ་ནས་ཡུལ་རི་ཙམ་དུ་རྒྱ་ཆེ་བ་དང་༔ རེས་མིག་མང་རིས་སུ་བྲིས་པ་ལྟ་བུ༔ ཟ་འོག་བེར་ཁྱིམ་ལྟ་བུ༔ དབྱིངས་སྣང་མེ་ལོང་ལྟ་བུའི་ཐིག་ལེས་བརྒྱན་པའི་རྭ་བར་མུ་ཁྱུད་དུ་གནས་ཤིང་འཛིན་རྟོག་དབྱིངས་སུ་ནུབ་པ་དང་༔ ལུ་གུ་རྒྱུད་ཀྱང་བུང་བ་མེ་ཏོག་ལ་འཁོར་བ་ལྟ་བུ་ཞིག་ཡོད་དེ་དེ་ནི་སྣང་ཉམས་སོ༔ ཤེས་ཉམས་ནི་བདེ་གསལ་མི་རྟོག་སྟོང་རྩུབ་ཀྱིས་སྣང་བ་དག་གོ༔ མཐར་འགྱུར་ནི་རྟགས་བཅུའི་སྟོང་གཟུགས་ལ་སོགས་པའོ༔ འཁྲུལ་སྣང་ཟད་ཅིང་༔ དག་སྣང་གོང་དུ་འཕེལ་བས་མཚན་ཉམས་གོང་འཕེལ་ཟེར་རོ༔ དེ་ལ་གསང་དབང་གི་ནུས་པ་སྒོ་གསུམ་ལ་ཐེབ་པས་ལུས་སྐྱེས་བུ་ནད་ཀྱིས་གདུང་བ་ལྟར་སྒེག་ཆོས་ངོ་ཚ་དང་བྲལ་བ༔ ངག་སྨྱོན་པའི་རང་ཚིག་རྡོལ་བ་ལྟ་བུ༔ སེམས་རྟོག་པ་གཏད་ཡལ་དུ་དྭངས་བ་ཆུ་ཆད་པའི་རང་ཐག་ལྟ་བུ་སྟེ་འཇུག་ཤེས་རགས་པ་དབྱིངས་སུ་དག༔ གསུམ་པ་རིག་པ་ཚད་ཕེབས་ནི༔ དབྱིངས་སྣང་ཡུལ་གྲུ་ལྟ་བུའི་དབུས་སུ་ཐིག་ལེ་ལྔ་ཚོམ་གྱི་དཀྱིལ་དུ་དང་པོ་སྐུ་ཡར་ཕྱེད་གདོང་ཕྱེད་ནས་རྒྱན་རྫོགས་པ་དང་༔ འཁོར་རིགས་ཆུང་ལྔ་དང་བཅས་ཏེ་འཆར་བ་དང་༔ ལུག་རྒྱུད་ཁ་དོག་ལྔ་ལྡན་ཤར་ནས་དཀྲིག་གེར་གནས་པ་དང་༔ དེ་ཙམ་ན་ཞིང་ཁམས་ཚད་ལ་ཕེབས་ནས་དཀྱིལ་འཁོར་ཡོངས་སུ་རྫོགས༔ དབང་བཞིའི་ནུས་པས་ལུས་རི་བྲག་ལ་ཐོགས་པ་མེད༔ ངག་ཆོས་ཀྱི་ཚིག་གཞན་སྣང་བསྒྱུར་བའི་ཚངས་པའི་དབྱིངས་སུ་དག༔ སེམས་ཉོན་ཡིད་དབྱིངས་སུ་དག་ནས་རྟོག་པའི་འཕྲོ་འདུ་ཆད༔ ཀུན་གཞིའི་རྣམ་ཤེས་ཀྱང་རགས་པ་རེས་འགའ་བ་དང་ཕྲ་བ་རྒྱུན་ཆགས་སུ་གནས་པའོ༔ ལུས་འོད་དུ་དྭངས་ཤིང་ས་རྡོའི་སྣང་བ་ལ་རིག་པ་གཏད་པས་ཞུ་ནུས་ཤིང་༔ བེམ་པོ་ལ་གཏད་པས་འགུལ་ཞིང་སྐད་འབྱིན་པ་དང་༔ དང་པོ་ཕྱི་ནང་གཉིས་ཀྱི་རགས་པ་ཟད་པས་ནང་གི་རླུང་སེམས་ཚད་ལ་ཕེབས༔ རླུང་གི་ཡོན་ཏན་རྫུ་འཕྲུལ་མང་པོ་འགྲུབ༔ སེམས་ལ་དབང་བས་རིག་པ་གར་གཏད་དུ་ཚུད་རྟགས་བེམ་པོ་འགུལ་བ་དང་༔ ཉོན་མོངས་མེད་པ་དང་༔ ཟས་གོས་མི་དགོས་པ་རྣམས་འབྱུང་ཞིང་༔ སྙིང་ནང་དུ་ཨའི་མཚན་པ་ལས་འོད་ཟེར་དུང་ཁང་གི་ཁྲོ་བོར་སྦྲེལ་མར་གསལ་ཞིང་བ་སྤུའི་ཁུང་བུ་ཐམས་ཅད་སངས་རྒྱས་ཀྱི་ཞིང་ཁམས་སུ་སྣང་ཞིང་༔ སྙིང་ཀའི་འོད་ཀྱི་ཐག་པ་སངས་རྒྱས་རྣམས་ཀྱི་ཐུགས་ཀར་སྦྲེལ་བ་དང་ལག་སོར་འོད་གྱི་དྲྭ་བས་དཀྲིས་པ་དང་༔ ཐོར་ཚུགས་རླུང་གིས་འདེགས་པའི་གོ་བར་ནས་ཁྲོ་བོའི་འོད་ཟེར་སྙིང་ལ་གཟེས་པར་སྣང་བ་དང་༔ རྟགས་དེ་རྣམས་འབྱུང་སྟེ༔ ཐལ་འགྱུར་ལས༔ ཚད་ཕེབས་ལུས་ཀྱང་འདི་བཞིན་འགྱུར༔ སོ་སོའི་ལུས་ཀྱི་རྡུལ་ཕྲན་ནས༔ བར་སྣང་འོད་ཀྱི་སྐར་ཁུང་སྣང་༔ དེ་ལས་འོད་ཟེར་ལྕགས་ཀྱུའི་དབྱིབས༔ འཁྲིལ་ཞིང་ལྡེམ་པའི་སྣང་བ་འཛིན༔ ལུས་ཀྱི་རྡོས་པ་རང་འགགས་ནས༔ ཟང་ཐལ་དྲི་མེད་འོད་ཀྱི་ལུས༔ དབུས་ན་ཨཿཡིས་མཚན་པ་ཅན༔ མཛོད་སྤུ་འོད་ཟེར་འདོམ་གང་ཚད༔ ཐོར་གཙུགས་རླུང་གིས་འདེགས་པར་སྣང་༔ ཞི་སྐུ་ལག་པའི་སོར་མོ་རྣམས༔ འོད་ཟེར་ཕྲེང་བ་རྣམ་པར་འཁྲིགས༔ སྒྲ་མེད་སེམས་ཀྱི་སྤྱོད་པ་སྟེ༔ མགོ་བོ་ཐོད་པའི་གཞལ་ཡས་ནས༔ ཧེ་རུ་ཀ་རྣམས་མངོན་པར་འབྱུང་༔ འདི་དུས་རང་ལུས་ཚད་ལ་ཕེབས༔ ཟང་ཐལ་སྐུ་གསུམ་གཅིག་དྲིལ་བའོ༔ ཞེས་རང་ངོས་ནས་མཚན་དཔེ་ཡོངས་སུ་རྫོགས་པ་ཐོབ་པའོ༔

བཞི་པ་ཆོས་ཉིད་ཟད་པ་ནི༔ ཕྱི་ལུས་ཀྱི་འབྱུང་བ་ཟད་དེ་ཕྱི་གསལ་ལོངས་སྐུའི་བཀོད་པའང་རྫོགས༔ རླུང་ཟད་པས་སེམས་ཀྱི་འཁྲུལ་རྟོག་ཀུན་གཞིའི་རྣམ་རྟོག་ཕྲ་བ་ཡང་ཆད༔ མ་རིག་བག་ཆགས་ཀྱི་ས་ཟད༔ འཁོར་བའི་རྒྱུ་འབྲས་ལ་དོགས་པ་མེད་པའི་གདེངས་གཉིས༔ མྱང་འདས་ཀྱི་རྒྱུ་འབྲས་ལ་རེ་བ་མེད་པའི་གདེངས་གཉིས་དང་བཞི་ཐོབ༔ སྐྱེ་བ་ལ་རང་དབང་ཐོབ་ནས་སེམས་ཅན་སུམ་སྟོང་ལ་སེམས་གཏད་པ་ཙམ་གྱིས་གྲོལ༔ འཇུག་པ་རང་དབང་ཐོབ་པས་བྱིན་གྱིས་བརླབ་པའི་བཀའ་དང་༔ འོད་ཟེར་བཀྱེ་འདུན་གྱི་རྩེ་ལས་ཡི་གེའི་ཕྲེང་བའི་འགྲོ་འདུལ་གྱི་སྤྲུལ་སྐུ་གྲངས་མེད་པའི་ལམ་ནས་སེམས་ཅན་གྱི་དོན་མཛད༔ རྟེན་དེས་འགྲོ་དོན་མི་མཛད་ན་ལག་སོར་འོད་ཀྱི་དྲ་བ་ལ་གཏད་པའི་སྐད་ཅིག་གིས་ནང་དབྱིངས་གདོད་མའི་ས་ལ་འཇུག་གོ༔ དེ་དུས་ལུས་གཤེད་མ་བརྒྱས་བསྐོར་ཀྱང་ཉམས་མི་ང་བ་དང་༔ ངག་གཞན་གྱི་རྗེས་སུ་ཟློ་བ་དང་༔ སེམས་དང་སེམས་བྱུང་གི་རྟོག་པ་དབྱིངས་སུ་ནུབ་པའོ༔ དེ་ལྟ་བུའི་སྣང་བ་བཞི་པོ་འདི་དག་ལས༔ མངོན་སུམ་ནི་གདེངས་ལམ་དུ་བྱེད་པ་སྟེ་སྤྲུལ་སྐུ་དང་༔ གོང་འཕེལ་ནི་གདེངས་ལམ་དུ་བྱེད་པས་ཕྱེད་སྤྲུལ་དང་༔ ཚད་ཕེབས་ནི་གཞི་སྣང་ལྷུན་གྲུབ་ལམ་དུ་བྱེད་པས་ལོངས་སྐུ་དང་༔ ཆོས་ཟད་ནི་ཀ་དག་སྤྲོས་བྲལ་ལམ་དུ་བྱེད་པས་ཆོས་སྐུའི་ཉམས་ལེན་ཏེ་སྣང་བཞི་ལུགས་འབྱུང་༔ སྐུ་གསུམ་ལུགས་ཟློག་ལམ་དུ་སྣང་བའོ༔ ཡང་རིམ་པ་བཞིན་ཚོགས་སྦྱོར་དང་༔ མཐོང་ལམ་དང་༔ བསྒོམ་ལམ་དང་༔ མི་སློབ་པའི་ལམ་བཞི་དང་༔ རྣམ་སྨིན༔ ཚེ་དབང་༔ ཕྱག་ཆེན༔ ལྷུན་གྲུབ་ཀྱི་རིག་འཛིན་ནམ་བྱ་བ་རྫོགས་པའི་སྤྲུལ་སྐུ་དང་བསོད་ནམས་བསགས་པའི་ཆོས་སྐུ་ཐོབ་པའོ༔ ཡང་བར་དོ་བཞི་དང་སྦྱར་ན༔ མངོན་སུམ་ནི་སྲིད་པ་བར་དོའི་གཡང་ས་མི་མཐོང་བའི་རང་བཞིན་སྤྲུལ་སྐུར་དབུགས་དབྱུངས་ཤིང་༔ གོང་འཕེལ་ཡེ་ཤེས་བཞི་སྦྱོར་ལམ་དུ་བྱེད་པའི་ལོངས་སྐུར་དང་༔ ཚད་ཕེབས་ཟུང་འཇུག་ལམ་དུ་བྱེད་པའི་ལོངས་སྐུའི་ལོངས་སྐུ་དང་༔ བློ་འདས་ཆོས་སྐུའི་ངོ་བོའི་གདེངས་ལམ་དུ་གྱུར་པས་ལོངས་སྐུའི་ཆོས་སྐུ་དང་བཅས་པར་སངས་རྒྱས་པ་དང་༔ དེ་དང་བསྟུན་པའི་གྲོལ་ལུགས་ཀྱང་བཅོ་ལྔའི་ཉི་ཟླ་ཤར་ནུབ་དང་༔ བུམ་པ་ཆག་པའི་ནམ་མཁའ་དང་ན་བུན་ལྟར་གྲོལ་བ་སྣང་བ་གོང་མ་གསུམ་གྱི་དང་༔ མངོན་སུམ་ལ་ཞིང་ལྔར་དབུགས་འབྱུང་བའོ༔

ཞར་ལ་ཚད་རྨི་ལམ་གྱི་འཛིན་པ་དང་༔ བར་ཆད་དབྱིངས་སུ་བསལ་བ་དང་༔ ངེས་པ་དོན་གྱི་རྟགས་འཆར་ཚུལ་གསུམ་ལས༔ དང་པོ་ནི༔ རབ་ལ་རྨི་ལམ་འགགས་ནས་འོད་གསལ་འཁོར་ཡུག་ཏུ་འདྲེས་པར་འགྱུར་པའོ༔ འབྲིང་ལ་རྨི་ལམ་རྨི་ལམ་དུ་ཟིན་ནས་སྤྲུལ་བསྒྱུར་གོམས་པ་ལ་སོགས་པ་དང་༔ ཐ་མ་ལ་ངན་པ་རྒྱུན་ཆད་པར་གྱུར་ནས་བཟང་བོ་ཤ་སྟག་རྨི་བ་དེ༔ རིམ་པ་བཞིན་བར་དོ་དང་པོ་དང་༔ ཟུང་འཇུག་དང་༔ རང་བཞིན་སྤྲུལ་སྐུར་གྲོལ་བའི་ཚད་ཡིན་ནོ༔

གཉིས་པ་ནི༔ ལུས་སྣ་ཚོགས་སུ་སྣང་བ་དང་༔ ཁ་དོག་སྣ་ཚོགས་དང་༔ གྲིབ་མ་ཉིས་བརྩེགས་དང་༔ གཞན་སེམས་ཤེས་པ་དག་དང་༔ བདུད་ཡི་དམ་དུ་བརྫུ་བ་སོགས་སླུ་བྱེད་དང་༔ མཁའ་འགྲོ་མ་ལུང་སྟོན་པ་དང་༔ ཏིང་འཛིན་བློ་བུར་དུ་སྐྱེས་པ་དང་༔ ནམ་མཁའ་ལ་ལྷ་སྐུ་འོད་དང་བཅས་པ་འཆར་བ༔ བགེགས་བསྐྲད༔ བསྲུང་འཁོར་བསྒོམ༔ ཀུན་རྫོབ་དང་དོན་དམ་པའི་བྱང་ཆུབ་ཀྱི་སེམས་གཉིས་ལ་མཉམ་པར་འཇོག་པ་ཁོ་ནས་སེལ་ལོ༔ དེ་ལས་གཞན་དུ་འབྱུང་བས་མི་གནོད་པའི་རྟགས་བཅུ་དང་༔ སྒོ་གསུམ་གྱི་བྱ་སྤྱོད་ཐམས་ཅད་གཞན་དོན་འབའ་ཞིག་དུ་འགྱུར་བ་དང་༔ སྤྱན་དང་མངོན་ཤེས་འཆར་བ་དང་༔ སྙིང་རྗེ་བྱང་སེམས་འབྱོང་པ་དང་༔ ཏིང་འཛིན་ལོ་ཟླར་བརྟན་པ་དང་༔ ཤེས་པ་གར་གཏད་དུ་འདྲོང་བ་སོགས་འབྱུང་བ་གང་ལའང་ཞེན་པ་མེད་པ་འབའ་ཞིག་གིས་སྐྱོན་ཀུན་དག་ཅིང་ཡོན་ཏན་མཐར་འཁྱོལ་བའོ༔

གསུམ་པ་ནི༔ ཡང་ཕྱིའིསྣང་བ་སྟོང་བ་རྐྱེན་ངན་གྲོགས་སུ་འཆར༔ སྣང་བ་ལ་རང་དབང་ཐོབ་པ་རྐྱེན་སྣང་ཞིང་ཁམས་སུ་འཆར༔ ནང་ཕུང་པོ་ལ་རང་དབང་ཐོབ་པས་ཕུང་པོ་འོད་གསལ་དུ་དག༔ གསང་བ་རླུང་སེམས་དང་འོད་གསལ་ལ་རང་དབང་ཐོབ་པས་འཁྲུལ་བའི་ཀུན་རྟོག་ཆོས་དབྱིངས་སུ་ནུབ་སྟེ་རྒྱུན་གྱི་ཏིང་འཛིན་སོགས་ཐོབ་པ་ནི་མི་འགྱུར་གསང་བའི་རྟགས་ཡིན་པས་ན༔ དེ་དག་ནི་ལམ་འགྱུར་གྱི་འབྲས་བུ་སྟེ༔ ཐི༵ག་ལེ༵འི་མཐོ༵ང་བ་ཇེ་བཟང་དུ་བརྟོལ༵་བའམ་བསྒོམ་པའི་སྟོབས་ཀྱིས་མངོན་དུ་གྱུར་རིམ་ལས་མཚན་དོན་དུ་ཐོབ་ལ༔ དེ་ལས་བོག་དབྱུང་དུ་མེད་པའི་སྤྲོས་བྲལ་ཐི༵ག་ལེ༵་ཆེན་པོའི་མཐོ༵ང་བ་ཡང་དག་པ་སྤངས་རྟོགས་ལ་དབང་བསྒྱུར་བའམ་མངོན་དུ་གྱུར་བས་རང་རིག་ཏུ་བརྟོལ༵་བའོ༔

གཉིས་པ་མཐར་ཐུག་གི་འབྲས་བུ་ནི༔ དེ་ལྟར་སྣང་བཞི་མཐར་ཕྱིན་ནས༔ རབ་ཟླ་བ་གཅིག༔ འབྲིང་གསུམ༔ ཐ་མ་བདུན་དང་ཞག་བཅུ་གཅིག་ན་ཁྱད་ཆོས་དྲུག་གི་སྒོ་ནས་གཞོན་ནུ་བུམ་པའི་སྐུར་གྲོལ་ནས་སངས་རྒྱས་ཀུན་ཏུ་བཟང་པོ་དང་དབྱེར་མེད་པར་སྐུ་གསུམ་ཡེ་ཤེས་ལྔ་ལྡན་མཛད་པ་ཕྲིན་ལས་དང་བཅས་པའི་མངའ་དབང་རྫོགས་པར་ཐོབ་པའི་ཚུལ་རྒྱས་པར་གཞུང་གི་འབྲས་བུ་དང་ཁྲེགས་ཆོད་ཀྱི་སྐབས་ལྟར་ལ༔ ལར་དགོངས་ཀློང་ལྔའི་ལམ་འདིའི་རང་རྐང་གིས་ཀྱང་རབ་ལོ་གསུམ༔ ཟླ་བ་གསུམ༔ ཞག་གསུམ༔ འབྲིང་ལོ་ཟླ་ཞག་ལྔ་དང་༔ ཐ་ན་བདུན་བདུན་གྱིས་འཇའ་ལུས་འཕོ་བ་ཆེན་པོ་གདོན་མི་ཟ་བར་ཐོབ་པ་ནི་པདྨ་ཀ་ར་ངའི་གཏན་ཚིག་གོ༔ དེ་དག་ཀྱང་སེང་གེ་རྩལ་རྫོགས་ཆེན་པོའི་རྒྱུད་ལས༔ རྒྱ་མཚོ་ཀློང་བརྟོལ་གྱི་དགོངས་པ་ན༔ རི་རབ་ཀྱི་མགུལ་ནས་ཉི་མ་ཤར་བ་ལྟ་བུའོ༔ ཉི་ཟླ་ཁད་མཉམ་གྱི་དགོངས་པ་ནི༔ ཉི་མ་དང་ཟླ་བ་སྙམས་པར་བརྡལ་ཞིང་དུས་གཅིག་དུ་ཤར་བ་ལྟ་བུའོ༔ ཐིག་ལེ་མཐོང་བརྟོལ་གྱི་དགོངས་པ་ནི༔ རྨ་བྱའི་ཕྲུ་གུ་སྒོང་རྒྱ་ནས་བཏོན་པ་ལྟ་བུ་ཞེས་པའི་དོན་ཏོ༔ གཞན་ཡང་གཉིད་འོད་གསལ་དུ་སྦ་བ་དང་༔ དབང་པོ་གནད་དུ་བསྡུ་བ་དང་༔ ཐོ་རངས་འབྱུང་ཁམས་དག་སྦྱོར་དང་༔ བར་སྐབས་སུ་འཆི་བ་སྦྱང་བ་བཅས་པ་རྣམས་འོད་གསལ་སྣང་སྟོང་ཐུན་མོང་གི་བསྒོམ་པ་ཉིན་མཚན་ཁ་སྦྱོར་དུ་བྱེད་པའི་ཐབས་མཁས་ཀྱི་འཕྲུལ་གསང་ཡིན་པས་ཀལ་པ་དུམ་བུ་ལས་ཤེས་པར་བྱའོ༔ ས་མ་ཡཱ༔ རྒྱ་རྒྱ་རྒྱ༔ དེ་ལྟར་འོད་གསལ་བླ་ན་མེད་པ་ཡི༔ ངོ་བོ་གདེངས་དང་ཡོན་ཏན་རྩལ་རྫོགས་པ༔ མཐར་ཐུག་དོན་གྱི་ངེས་པའི་སྙིང་པོ་འདི༔ སངས་རྒྱས་ཀུན་གྱི་དགོངས་པ་རྨད་དུ་བྱུང་༔ གཞི་དང་སྙིང་པོའི་མེ་ཏོག་བཅུད་ཀྱི་རྒྱུད༔ གང་གིས་འདི་མཐོང་སྲིད་པ་ཐ་མ་སྟེ༔ རྫོགས་ལྡན་ཆེན་པོའི་བར་དོ་ཤར་བ་ན༔ སྐད་ཅིག་གསུམ་ལ་སྤྲུལ་པ་འབྱིན་པར་ངེས༔ ཆེ་བའི་ཡོན་ཏན་བཅུ་ཕྲག་གཉིས་ལྡན་པའི༔ བཀའ་འདི་དཀོར་སྲུང་དབང་གི་རྒྱལ་པོ་དང་༔ གནོད་སྦྱིན་དམར་ནག་འཁོར་དང་བཅས་ལ་བཏད༔ དམ་ཉམས་བཀའ་རྐུན་སྒྲོ་སྐུར་མཁན་པོ་ཡི༔ ལག་དུ་མ་བཏང་བཀད་དང་དམ་ཚིག་རྒྱ༔ རང་ཉམས་བཙན་ཐབས་ཆོས་ལ་དཔང་ཟ་བའི༔ སྲོག་དབང་བསྣུབ་ལ་མིག་འབྲས་ཐང་དུ་འཕོང་༔ སྙིང་ཁྲག་དྭངས་མ་རོལ་བའི་དགའ་སྟོན་མཛོད༔ བསྟན་འཛིན་སྐྱེས་བུའི་འགལ་རྐྱེན་དབྱིངས་སུ་སོལ༔ མཐུན་རྐྱེན་འཚོ་བ་སྦྱོར་ལ་ཉམས་མཐར་དབྱུང་༔ དེ་སྐད་རྙིང་སྔགས་རྒན་པོའི་རིགས་སྐྱེས་པ༔ ག་གཱ་ཨ་བྷྱེ་དེ་ཡིས་སྨྲས་ནས་སོང་༔ རྣམ་པར་རིག་པའི་བཟོ་ཡི་སྒྱུ་འཕྲུལ་ནི༔ འགྱུར་མེད་ཚུལ་ཁྲིམས་སྐལ་བར་བབས་པ་ཡི༔ རྣམ་གཡེངས་མེད་པའི་ཡིད་ཀྱིས་གུས་པར་སྦྱར༔ དགེ་བས་འགྲོ་ཀུན་རྡོ་རྗེ་འཆང་གྲུབ་ཤོག །སརྦ་མངྒ་ལཾ། །

ཁྲེགས་ཐོད་ཐུན་མོང་གི་རུ་ཤན༔ ཞེན་རྟོག་འཁྲུལ་པ་གཞིར་གྲོལ།

ཡེ་ཤེས་སྒྱུ་འཕྲུལ་དྲྭ་བ་ལས༔ ཁྲེགས་ཐོད་ཐུན་མོང་གི་རུ་ཤན༔ ཞེན་རྟོག་འཁྲུལ་པ་གཞིར་གྲོལ་ཞེས་བྱ་བ་བཞུགས་སོ༔

དུས་གསུམ་སངས་རྒྱས་འདུས་པའི་སྐུ༔ རྩ་བརྒྱུད་བླ་མ་རིན་པོ་ཆེར༔ གསོལ་བ་འདེབས་སོ་ཐུགས་རྗེས་གཟིགས༔ སྒོ་གསུམ་སྡིག་སྒྲིབ་དག་པ་དང་༔ སྐུ་གསུམ་ས་བོན་ཐེབ་པ་དང་༔ ཁམས་གསུམ་དོང་སྤྲུགས་ནུས་པར་ཤོག༔ ཞེས་པའི་ཚིག་གིས་དབུ་དྲངས་ཏེ་སྒོ་གསུམ་འཁོར་འདས་རུ་ཤན་དབྱེ་བ་ནི༔ དགོས་པ་ཁྱད་པར་ཅན་དང་ལྡན་པ་སྟེ༔ དཔེར་ན་དགྲ་ཡོད་དམ་སྙམ་དེ་དོགས་པ་ཆེ་བའི་སར༔ སྔོན་ལ་རྐུང་ཉུལ་ནས་ཡོད་ན་གཡུལ་སྤྲད་དེ་རྒྱལ་བར་བྱས་ནས༔ དེའི་རྗེས་ཐོག་ཏུ་མགྲོན་པོ་འཇིགས་པ་མེད་པར་འགྲོ་བ་ལྟར༔ སྔོན་འགྲོ་བྱས་པས་བར་ཆད་ཀྱི་གེགས་སེལ་བ་དང་༔ དངོས་གཞི་ལམ་དུ་འགྲོ་བའི་དོན་ཡོད་པ་དང་༔ ཡང་ས་ལེགས་པར་བསྐོས་ནས་རྨིས་བརྟན་པོ་ལ་གཞི་བཅོལ་ཏེ༔ གདོད་ཁང་པ་བརྩིགས་ནས་ནང་དུ་མི་བསྡད་ཀྱང་འཇིགས་པ་མེད་པ་ལྟར༔ སྔོན་འགྲོའི་གཞི་ལེགས་པར་ཐེངས་བས་དངོས་གཞི་ལ་བར་ཆད་མི་འབྱུང་བ་དང་༔ ཡང་ས་བོན་བཏབ་པས་འབྲས་བུ་སྨིན་པ་ལྟར༔ སྔོན་འགྲོའི་ས་བོན་བཏབ་བས་ཉམས་རྟོགས་ཀྱི་དང་༔ ལམ་དང་འབྲས་བུའི་ལོ་ཏོག་ཐམས་ཅད་སྨིན་པར་འགྱུར་པའི་ཕྱིར་དང་༔ ཡང་དཔེར་ན་རས་ལ་ཚོན་གྱིས་ཁ་དོག་བསྒྱུར་བ་ལ་དྲི་མ་འཁྲུད་དགོས་པ་ལྟར༔ སྒོ་གསུམ་གྱི་སྡིག་སྒྲིབ་བག་ཆགས་སྣང་ཞེན་ཐམས་ཅད་སྔོན་འགྲོས་དག་པར་བྱེད་ལ༔ ཡང་གསེར་དུ་བསྒྱུར་རྒྱུའི་དངོས་པོ་ལྕགས་དགོས་པ་ལྟར༔ སྔོན་འགྲོའི་གཞི་མེད་པར་དངོས་གཞི་མི་འབྱུང་བའི་ཕྱིར་ཤིན་ཏུ་གལ་ཆེ་བ་དང་༔ དེའི་ཕྱིར་ན་གཞི་ལམ་གྱི་རྣལ་འབྱོར་གང་གི་ཡང་སྔོན་དུ་འགྲོ་དགོས་པས་ལས་རུང་དུ་ཡང་བྱེད་པས༔ དེ་ལ་སྤྱི་དང་བྱེ་བྲག་གཉིས་ལས་དང་པོ་ལ་ཕྱི་ནང་གསང་བའི་རུ་ཤན་དབྱེ་བ་གསུམ་ལས༔

དང་པོ་ལ་ལུས་ངག་ཡིད་གསུམ་གྱི་རུ་ཤན་ཁྲིགས་གཅིག་ཏུ་བྱེད་པ་ལ༔ དབེན་པའི་གནས་སུ་ཕྱིན་ཏེ་དཀར་ཕྱོགས་ལ་སྡོང་གྲོགས་བཅོལ་པ་དང་༔ ནག་ཕྱོགས་ལ་ཀོ་ལོང་སྡོམ་པའི་སླད་དུ་དཀར་དམར་གྱི་གཏོར་མས་བརྔན་ཞིང་༔ དམ་ལོག་ལ་རྔམ་སྟབས་ཀྱིས་ཕྲིན་ལས་དྲག་པོར་སྤྱོད་པས་བསྐྲད་ཅིང་༔ དེ་ནས་ནམ་མཁའ་དང་མཉམ་པའི་སེམས་ཅན་ཐམས་ཅད་མྱུར་དུ་གཞོན་ནུ་བུམ་པའི་སྐུར་བདག་གིས་བསྒྲལ་ཞིང་འདྲེན་པར་བྱ༔ དེའི་ཆེད་དུ་སྒོ་གསུམ་འཁོར་འདས་རུ་ཤན་དབྱེ་ཞིང་འོད་གསལ་ཉམས་ལེན་གྱི་གནད་དུ་བརྩོན་པར་བྱ་སྙམ་དུ་དམ་བཅས༔ དེ་ནས་འཁོར་བའི་བག་ཆགས་སྦྱོང་བ་དང་༔ མྱང་འདས་ཀྱི་རྟེན་འབྲེལ་བསྒྲིགས་པ་གཉིས་ལས༔ དང་པོ་ནི་རང་གི་རྐང་མཐིལ་དུ་དམྱལ་བའི་ས་བོན་དུ་ནག་པོ་རང་མདོག་བག་ཆགས་ཀྱི་ཐིག་ལེའི་དབུས་སུ་གསལ་བ་ལ་སེམས་བཟུང་ཞིང་༔ སྔར་ཞེ་སྡང་གིས་བསླང་བའི་སྡིག་པ་ཆེ་ཤོས་ཀྱིས་གསོས་བཏབ་པས་འོད་དང་ཐིག་ལེ་ཆེར་འཕེལ་ནས་དམྱལ་བའི་སྣང་བ་བཙན་ཐབས་ཀྱིས་སད་པར་བསམ་ལ༔ མགོ་བོ་ཐུར་དུ་བསྟན༔ ཁ་ནས་ཚ་གྲང་གི་སྨྲེ་སྔགས་འདོན་ཞིང་ལུས་འགྲེ་ལྡོག་བསྒྱུར༔ སྡུག་བསྔལ་རྣམས་མངོན་སུམ་རང་ཐོག་ཏུ་སྨིན་པར་བློ་ཡིས་བླངས་ཏེ་སེམས་སྦྱངས༔ དེ་ནས་ལེགས་པར་སྐྱེས་པ་ན་སྤྱི་བོར་རྩ་བའི་བླ་མ་ཉིད་བཅོམ་ལྡན་འདས་རྡོ་རྗེ་སེམས་དཔར་གསལ་བའི་ཐུགས་སྲོག་ཧཱུྃ་ལས་འོད་ཟེར་ཁ་དོག་ལྔ་ལྡན་ཚ་དབལ་བསྐལ་པའི་མེ་ཡིས་མི་མཚོན་པས་བསྲེགས་སྦྱངས་བསྟིམས་ཏེ་དེར་ཇེན་པར་བསམ་ལ༔ དེ་ནས་ལུས་ས་བོན་དང་བཅས་པ་དངོས་མེད་དུ་གྱུར་བ་ལ༔ སླར་ཡང་སྐུ་ལས་བདུད་རྩིའི་རྒྱུན་བབས་པས་ཡིད་ཀྱི་བག་ཆགས་དང་བཅས་པ་བཀྲུས་པར་བསམ་ལ༔ ཐུགས་རྡོ་རྗེའི་སྙིང་པོས་སྣ་དྲངས་བའི་རིགས་ལྔའི་ས་བོན་བཟླས་མཐར་མི་དམིགས་པར་བཞག་པ་རྣམས་ཀྱི་དུས་སུ་འབུམ་ཐེར་གཅིག་བཟླས༔ དེ་ནས་ཡི་དྭགས་ཀྱི་ས་བོན་པྲེ་ཐལ་སྐྱ་གསང་གནས་དང་༔ དུད་འགྲོའི་ས་བོན་ཏྲི་དམར་ནག་ལྟེ་བ༔ མི་ཡི་ས་བོན་ནྲཿ ལྗང་གུ་སྙིང་ཀ༔ ལྷ་མིན་གྱི་ས་བོན་སུཾ་སེར་པོ་མགྲིན་པ༔ ལྷ་ཡི་ས་བོན་ཨ་དཀར་པོ་སྤྱི་བོར་བསྒོམ་ཞིང་༔ རང་མདོག་ཐིག་ལེ་དང་བཅས་པའི་སྟེང་དུ༔ ཉོན་མོངས་པ་སེར་སྣ༔ གཏི་མུག༔ ཁོང་ཁྲོ༔ ཕྲག་དོག༔ ང་རྒྱལ་རྣམས་ཀྱིས་མཚམས་སྦྱར་ཏེ་བསྐལ་མང་སྐད་ཅིག་ལ་གྱུར་ནས༔ གནས་རིས་དེར་སྐྱེ་བར་མོས་ལ༔ ཡི་དྭགས་ཀྱི་ལུས་མགོ་ཐུར་བསྟན༔ དུད་འགྲོ་སྣྲེལ་ཞི༔ མཐི་རིས་གསུམ་གྱེན༔ ཡི་དྭགས་ཀྱི་ངག་སྒྲ་ངན་ལྔ་འདོན་པ་ཆུ་བོ་བྱིང་བའི་སྒྲ་དབྱངས་སུ༔ བྱོལ་སོང་གི་མཁུན་གདུང་༔ མིའི་རང་སྐད་སྐྱེ་རྒ་ན་འཆིའི་སྡུག་བསྔལ་གྱི་འོ་དོད༔ ལྷ་མིན་ གྱི་སྐད་འབྲུག་སྒྲ་དང་རྫ་རི་ཆག་ལྡིར་དུ་ཉིལ་བའི་འཐབ་རྩོད་འཆི་འཕོས་སྒྲ་དང་༔ ལྷ་རྒྱུད་མང་སྙན་པའི་དབྱངས་དང་༔ ཀི་བསྭོ་ཆ་སྒྲ་འཕོ་ལྟུང་གི་འོ་དོད་རྣམས་འབོད་པ་དང་༔ སེམས་ཀྱི་ཡི་དྭགས་བཀྲེས་སྐོམ་དང་༔ ཕྱི་ནང་སྒོས་ཁུར་གྱི་སྡུག་བསྔལ༔ དུད་འགྲོ་གླེན་ལྐུགས་འཇིགས་སྐྲག་གཅིག་ལ་གཅིག་ཟ་དང་བཀོལ་སྤྱོད༔ མིའི་སྡུག་བསྔལ་བཅུ་གཅིག༔ ལྷ་འཆི་འཕོ་ལྟུང་བའི་སྡུག་བསྔལ་རང་ཐོག་ཏུ་སྨིན་པར་བསམ་ཞིང་༔ དེ་དག་གི་སྟངས་སྟབས་སོགས་བསྒྱུར༔ དེ་ནས་སྤྱི་བོར་བླ་མ་རིམ་པ་བཞིན༔ སྣང་མཐའ་དམར་པོ༔ རྣམ་སྣང་དཀར་པོ༔ ཀུན་བཟང་མཐིང་ཀ༔ དོན་གྲུབ་ལྗང་གུ༔ རིན་འབྱུང་སེར་བོ་རྣམས་ཀྱི་ཐུགས་ཀར་ཨཱཾཿཨོཾཿཧཱུྃཿཧཱཿསྭཱཿརྣམས་ལས་རང་མདོག་གི་འོད་ཟེར་འཕྲོས་པས་གནས་དོན་ལུས་གསུམ་ས་བོན་དང་བཅས་པ་བསྲེགས་སྦྱངས་བསྟིམས་ནས་ཇེན་པར་བསམ་ལ༔ རང་རིགས་ཀྱི་གསང་སྔགས་ཀྱིས་དབུ་དྲངས་ཏེ་འབུམ་ཚོ་རེ་དང་༔ དེ་ནས་བར་དོའི་བག་ཆགས་སྦྱངས་ཕྱིར་འབུམ་ཚོ་གཅིག༔ ཡང་ནས་ཨོཾ་ཧཱུྃ་སྭཱ་ཨཾ་ཧཱ་ཨཱཿཞེས་བཟླས་ཀྱང་རུང་ངོ་༔ དེ་ནས་དག་པའི་རྟེན་འབྲེལ་སྒྲིག་པ་ནི༔ བླ་མའི་ཐུགས་ཀའི་འོད་ཟེར་གྱི་རླུང་གིས་རང་སེམས་ཐིག་ལེའི་རྣམ་པར་གནས་པ་ལ་རེག་པའི་མོད་ལ་བཏེག་སྟེ༔ དཔག་ཚད་ལྔ་བརྒྱའི་ཕྱོགས་བཞི་དབུས་དང་ལྔ་རང་བཞིན་སྤྲུལ་པའི་ཞིང་ཁམས་ལྔ་དང་༔ དབུས་ཀྱི་སྟེང་ཕྱོགས་སུ་བཅོམ་ལྡན་འདས་ཀུན་བཟང་ཆོས་སྐུའི་ཞིང་ཁམས་རྣམས་སུ་ཕྱིན་ནས༔ དྲི་བཅས་ཀྱི་རྟེན་གང་གི་རྣམ་པར་བསྐོར་བ་དང་ཕྱག་འཚལ༔ ལག་མཐིལ་ནས་མཆོད་པའི་སྤྲིན་རབ་འབྱམས་སྤྲོས་ཏེ་རིགས་དྲུག་གི་ལྷ་ཚོགས་ལ་མཆོད་ནས་རིམ་པ་བཞིན་དབང་བསྐུར༔ ལུང་བསྟན༔ དབུགས་དབྱུང་༔ གཟེང་བསྟོད་དེ་ཐུགས་ཀར་འཕོས་པས་ཕུང་ལྔ་ཡེ་ཤེས་ལྔའི་རང་བཞིན་དུ་སངས་རྒྱས་པར་བསམ་མོ༔ དེ་དག་གི་དགོས་པ་ནི༔ ཐུན་མོང་དུ་རིགས་དྲུག་གི་བག་ཆགས་དང་སྒོ་གསུམ་གྱི་སྒྲིབ་པ་དག༔ མཆོག་ཏུ་རྫོགས་སྨིན་སྦྱངས་གསུམ་གྱི་རྟེན་འབྲེལ་བསྒྲིགས་པ་ཡིན་ནོ༔

གཉིས་པ་ནང་ལྟར་རུ་ཤན་དབྱེ་བ་ལ་གསུམ་ལས༔ དང་པོ་ལུས་ཀྱི་རུ་ཤན་དབྱེ་བ་ནི༔ རང་གི་ལུས་རྡོ་རྗེ་སྔོན་པོ་མེ་འབར་བ་དང་༔ འཁོར་ལོ༔ རིན་ཆེན༔ པདྨ༔ རལ་གྲིའི་ཐུགས་ཀྱི་ཕྱག་རྒྱ་རྣམས་སུ་རེས་མོས་ཀྱིས་འདུག་སྟངས་བྱས་ལ༔ ཕྱག་མཚན་ཕྲ་མོའི་འདུ་འཕྲོ་གྲངས་མེད་པས་རིགས་དྲུག་གི་གནས་རིགས་ཐམས་ཅད་བསིགས་གཏོར་ཐལ་བར་བྱས་ནས༔ འོད་ཀྱི་ཕོ་ཉའི་བཀྱེ་འདུན་ལས་དུས་གསུམ་གྱི་རྒྱལ་བ་ཐམས་ཅད་ཀྱང་བྱིན་གྱིས་བརླབས་པའི་ཐུགས་དམ་ལ་དགོངས་ནས་ཕྲ་མོ་ལ་ཐིམ་པ་ཚུར་འདུས་བདག་ལ་ཐིམ་པས་ལུས་ཀྱི་འཛིན་རྟོག་དབྱིངས་སུ་དག་ནས་ཐུགས་སྣང་སྟོང་སྣ་ཚོགས་རྡོ་རྗེའི་རིམ་པར་སྨིན་ཅིང་གྲོལ་ནས་སྐུ་གསུམ་གཅིག་འདྲིལ་གྱི་རང་བཞིན་དུ་གྱུར་པར་མོས་ལ་ཅི་ལྕོགས་སུ་གནས་པའི་མཐར༔ ཐུགས་མཚན་ཡོངས་སུ་གྱུར་པ་ལས་རྒྱལ་བ་རིགས་ལྔ་དང་༔ ཐུབ་དྲུག་གི་སྐུ་མཚན་དཔེའི་རང་བཞིན་སོ་སོའི་ཕྱག་རྒྱ་བཅའ་བ་དང་༔ མཉམ་བཞག་སྐྱིལ་ཀྲུང་ཞི་བ་ལ་གནས་པའི་སྤྱོད་པ་རྣམས་བྱ༔ དེའི་ཐུན་མོང་དུ་རིགས་དྲུག་གི་ལུས་རྟོག་ད༵ག་ཅིང་༔ མཆོག་ཏུ་རིགས་ལྔའི་སྐུར་རྫོགས༵་པ་དང་༔ ཚོགས་བརྒྱད་ཡེ་ཤེས་ལྔར་སྨིན༵་པའི་སྤངས་རྟོགས༔ སྣང་བ་བཞིར་སད་པའི་རྟེན་འབྲེལ་དང་༔ ནུས་པ་ཐོབ་པའི་དགོས་པའོ༔

གཉིས་པ་ངག་རུ་ཤན་དབྱེ་བ་ནི༔ རང་གི་གནས་དྲུག་ནས་རིགས་ཀྱི་ཡི་གེ་སོ་སོའམ་རིགས་འདུས་ཧཱུྃ་གི་རྩ་བ་ལས་ཡི་གེ་ཕྲ་མོའི་འདུ་འཕྲོ༔ ཕྱི་སྣང་བ་དང་༔ ནང་རང་ལུས་ཐམས་ཅད་ལ་རྒྱས་གདབས་པས༔ འོད་ཀྱིས་བཞུ་འདུལ་ཡི་གེའི་རྡུལ་སྙེད་བརྩེགས་པའི་རྣམ་པ་ཡིད་བྱེད་ལས་མི་ཡེངས་བར༔ ངག་གིས་ཀྱང་རླུང་འབྱུང་འཇུག་གནས་གསུམ་དང་སྦྱར་ཏེ༔ རླུང་ཡིད་བཟླས་པའམ་དབྱངས་བཟླས་སྙན་ལ་རིང་བར་བྱས་ལ༔ རླུང་སེམས་རིག་པ་གཅིག་དྲིལ་གྱི་ངང་ཚུགས་མ་ཤོར་བར་བྱ་བ་ནི་རྒྱས་གདབ་པའོ༔ ཡང་ཡི་གེ་དྲུག་གམ་ཧཱུྃ་དེ་ཉིད་ལས་རྣོ་མྱུར་ཤུགས་དང་ལྡན་པ་ཡི་གེ་ཕྲ་མོ་གྲངས་མེད་པ་འཕྲོས་པས་ཕྱོགས་བཅུའི་ཞིང་རབ་འབྱམས་ཐམས་ཅད་དུ་འགྲོ་ཞིང་སྐོར་བ་བྱེད་པ་ཡི་གེའི་མཆོད་སྤྲིན་གྱིས་རྒྱལ་བ་རྣམས་ལ་མཉེས་པའི་མཆོད་པ་འབུལ་བ་དང་༔ ཚོགས་རྫོགས་ཤིང་ཞིང་སྦྱོང་བའི་རྟེན་འབྲེལ་བསྒྲིགས་ཤིང་༔ ཡང་འགྲོ་བ་རིགས་དྲུག་གི་གནས་རིགས་མཐོང་མ་མཐོང་ཀུན་ཏུ་ཉུལ་ཞིང་སོ་སོའི་སྡུག་བསྔལ་ལས་སྣང་བག་ཆགས་ཐམས་ཅད་ཡི་གེའི་འཕྲོ་འདུས་སྦྱང་བར་བསམ་ཞིང་སེམས་ཅན་སྨིན་པའི་རྟེན་འབྲེལ་བསྒྲིགས༔ ཡང་ཡི་གེ་ཕྲ་མོ་རྡོ་རྗེའི་ཆོས་བདུན་དང་ལྡན་པའི་རང་བཞིན་ཅན་གྲངས་མེད་པ་འཕྲོས་པས་ཁམས་གསུམ་སྣོད་བཅུད་བརྟན་གཡོ་ཐམས་ཅད་ཕར་ཐལ་ཚུར་ཐལ་དུ་འབིགས་ཤིང་༔ དངོས་པོ་ཇེ་ཕྲ་ལ་ཡི་གེ་ཇེ་ཕྲས་དངོས་མེད་དུ་སྦྱངས༔ དེ་ནས་ཧཱུྃ་ཐམས་ཅད་ཚུར་འདུས་དེ་གཅིག་དུ་གྱུར་ནས་ཐུགས་ཀའི་ཧཱུྃ་ལ་བསྡུ་ཞིང་ཤིན་ཏུ་གསལ་བའི་ཡི་གེ་ལ་སེམས་སྦྱངས་བ་དང་༔ མདུན་དུ་ཤིང་བུ་རྡེའུ་བཙུགས་ལ་ཐུགས་ཀའི་ཧཱུྃ་སོགས་ཡི་གེ་ལས་འོད་ཟེར་ཕྲ་མོ་འཕྲོས་པས་དམིགས་རྟེན་ལ་དཀྲིས་ཤིང་རྟེན་གྱི་རྩེར་ཡི་གེ་ལངས་སྟབས་སུ་གནས་པ་ལ་སེམས་བཟུང་༔ ཡང་གཅིག་ཐིམ་གཉིས་ཐིམ་ཐུགས་ཀའི་སྲོག་ལ་ཐིམ་པར་མོས་ཤིང་དེ་ལ་སེམས་བཟུང་༔ དེ་ནས་དེ་དག་ཀུན་ལ་རིགས་དྲུག་གི་སྙིང་པོའམ་ཧཱུྃ་ཡིག་སྙན་ལ་རིང་བར་འདྲེན་ཞིང་སེམས་ཀྱིས་སྦྱང་ངོ་༔ དེ་དག་གི་དགོས་པ་ནི་ཐུན་མོང་དུ་ངག་གི་བག་ཆགས་དང་ཞེན་པ་སྦྱོང་ཞིང་༔ ཁྱད་པར་དུ་རྒྱལ་བའི་གསུང་རྡོ་རྗེ་འགྲུབ་པ་ལ་བར་ཆད་མེད་པར་བྱེད་དོ༔ དེ་ནས་ངག་ལོངས་སྤྱོད་རྫོགས་པའི་སྐུར་སངས་རྒྱས་ནས་འགྲོ་བའི་དོན་དུ་ཆོས་ཀྱི་འཁོར་ལོ་བརྒྱད་ཁྲི་བཞི་སྟོང་བསྐོར་བའི་འདུན་པས་ཐེག་པ་གསུམ་གྱི་ཆོས་བཤད་བྱའོ༔ དེའི་མཆོག་གི་དགོས་པ་བྱང་ཆུབ་སྙིང་པོའི་ཤིང་དྲུང་དུ་མངོན་པར་རྫོགས་པར་སངས་རྒྱས་ནས་ཆོས་འཁོར་བསྐོར་བས་དག་པའི་རྟེན་འབྲེལ་འགྲིགས་པ་ཡིན་ནོ༔

དེ་ནས་གསུམ་པ་སེམས་སྦྱོང་བ་ནི༔ སྔར་བཤད་པ་ལྟར་བྱུང་གནས་འགྲོ་གསུམ༔ གཟུགས་དབྱིབས་ཁ་དོག༔ ཡོད་མེད་རྟག་ཆད་ལ་སོགས་ཞིབ་པར་དཔྱད་པས་སྐུ་གསུམ་རང་ལས་རྙེད་པ་དེ་ཡིན་ནོ༔ ཡང་ཡོད་མེད་རྟོག་དཔྱོད་དུས་གསུམ་གྱི་རྣམ་རྟོག་ཐམས་ཅད་བསླང་ཞིང་༔ སྙིང་ནས་བསམ་རྟོག་རང་ཟད་ཀྱི་དགོངས་པ་མ་ཤར་བ་དུ་དཔྱོད་པ་དང་བཅས་པས་ཐུན་མོང་དུ་སེམས་ཀྱི་བག་ཆགས་མ་དག་པ་རྣམས་དག་པར་བྱེད་ཅིང་༔ མཆོག་ལྷག་མཐོང་རྣམ་པར་རྟོག་མེད་ཀྱི་ཡེ་ཤེས་ཐུགས་རྡོ་རྗེ་ཆོས་ཀྱི་སྐུ་འགྲུབ་པའི་སྐལ་བ་ཅན་དུ་བྱེད་དོ༔

གསུམ་པ་གསང་པ་ལྟར་རུ་ཤན་དབྱེ་བ་ནི༔ རྣལ་དུ་དབབ་པ་དང་༔ སོར་གཞུག་པ་གཉིས་ལས་དང་པོ་ནི༔ སྔར་རུ་ཤན་བྱས་པས་སྒོ་གསུམ་འཁྲུགས་ཏེ་དགེ་སྦྱོར་ལ་བརྩོན་མི་ནུས་པའི་གེགས་གསལ་བའི་ཕྱིར་བྱ་བ་དགུ་སྤྲུགས་སུ་བཏང་ནས་གནས་པར་བྱའོ༔ དེའི་ཡོན་ཏན་ནི་ལུས་རྣལ་དུ་ཕབ་པས་ཁམས་དང་བྱང་སེམས་རྒྱས་ཤིང་འདུ་འཁྲུགས་མི་འབྱུང་ངག་རྣལ་དུ་ཕབ་པས་བརྗོད་མེད་ཀྱི་དོན་ལ་གནས་ཤིང་ཚིག་གི་རྟོག་དཔྱོད་ཟད༔ སེམས་རྣལ་དུ་ཕབ་པས་དྲན་བསམ་གྱི་གཞི་སྟོང་ནས་གཞི་མེད་རང་གྲོལ་ཆེན་པོ་མངོན་དུ་གྱུར་ནས་རང་བཞིན་གྱི་བསམ་གཏན་བྱིང་རྒོད་དང་བྲལ་བ་གནས་པའི་དགོས་པ་ཡོད་དོ༔

གཉིས་པ་སོར་གཞུག་པ་ནི༔ ཀ་དག་གི་རྟོགས་པ་རྒྱུད་ལ་སྐྱེ་ཞིང་རྟོག་མེད་མཉམ་པ་ཉིད་བཙན་ཐབས་ཀྱིས་འཁྲུངས་པའི་ཕྱིར་ཉན་ཐོས་ཀྱི་ལྟ་སྟངས་ཆོས་བདུན་གཡོ་མེད་ཀྱི་དགོངས་པས་མིག་སྣ་རྩེར་ཕབ༔ དེས་ལུས་ངག་ཡིད་གསུམ་མི་གནས་པ་གནས་པར་བྱེད༔ བྱང་སེམས་ཀྱི་ལྟ་སྟངས་མིག་ཧར་བོར་བལྟ་ཞིང་སེམས་གང་དུ་ཡང་མི་རྟོག༔ དེས་རིག་པ་གནས་པ་བརྟན་པར་བྱེད༔ དེ་ནས་ཁྲོ་བོ་དང་ཁྲོ་མོའི་ལྟ་སྟངས་གྱད་ཆེན་པོས་འདོར་ཐབས་སུ་རྐང་པ་བསྒྲད་ཅིང་༔ ཁ་ནས་ཧ་ཧ་ཧི་ཧི་ལ་སོགས་པ་ཁྲོ་བོ་དང་ཁྲོ་མོའི་གད་རྒྱང་བསྒྲགས་ཤིང་༔ སེམས་གང་དུ་ཡང་མི་རྟོག་པར་བཞག༔ དེས་མ་གྲོལ་པ་གྲོལ་བར་བྱེད་པ་དང་༔ གྲོལ་པ་མཐར་ཕྱིན་པར་བྱེད་དོ༔ དེ་དག་གིས་ཕྱི་ནང་གསང་བའི་རུ་ཤན་ཐལ་ལོ༔ བྱེ་བྲག་ཁྱད་པར་དུ་རུ་ཤན་གཅིག་གིས་འཐུས་པར་བྱེད་ན༔ རྡོ་རྗེའི་གླུ་གར་གྱི་སྤྱོད་པས་རིགས་དྲུག་འཁོར་བའི་བག་ཆགས་སྦྱོང་པ་དང་༔ རྒྱལ་བ་ཀུན་ལ་མཆོད་པར་འགྱུར་པ་དང་༔ སྒོ་གསུམ་གྱི་ཞེན་པ་ལྡོག་པ་དང་༔ སྡིག་སྒྲིབ་བག་ཆགས་ཐམས་ཅད་ཟད་པར་བྱེད་པ་དང་༔ ངན་སོང་གི་སྐྱེ་སྒོ་བཀག་པ་དང་༔ སངས་རྒྱས་ཀྱི་མཛད་སྤྱོད་འགྲུབ་པ་དང་༔ རང་བཞིན་གྱི་བསམ་གཏན་བསྐྱེད་པ་དང་༔ རྣལ་དུ་འབེབས་པ་དང་༔ བྱིང་བ་བསེང་པ་དང་༔ རང་རིག་པའི་ཡེ་ཤེས་བདེ་བ་ཆེན་པོའི་རྒྱུད་ལ་རང་རྒྱས་འདེབས་པའི་འཕྲུལ་གསང་བླ་ན་མེད་པའི་སེམས་ཀྱི་དམིགས་པ་རང་སར་སྦྱོང་པར་བྱེད་པ་སྟེ༔ ཉི་ཟླ་ཁ་སྦྱོར་ཆེན་པོ་གསང་བའི་རྒྱུད་ལས༔ དྲེགས་པ་མེད་པ་རྡོ་རྗེའི་གླུས༔ རིགས་དྲུག་འཁོར་བའི་ཞེན་པ་བཟློག༔ སངས་རྒྱས་ཀུན་གྱི་ཡིད་ཀྱང་ཚིམ༔ རྣལ་འབྱོར་བ་ཡི་ཉམས་ཀྱི་གྲོགས༔ ལུས་ཅན་རྣམས་ཀྱི་སྒྲིབ་པ་སྦྱོངས༔ ངན་སོང་འཁོར་བའི་སྐྱེ་སྒོ་དགག༔ སངས་རྒྱས་ཉིད་ཀྱི་མཛད་སྤྱོད་ཡིན༔ མི་རྟོག་བསམ་གཏན་གནས་པའི་གྲོགས༔ གང་ཞིག་བསམ་གཏན་མ་ཕེབ་ན༔ འདིས་ནི་རྣལ་དུ་འབེབས་པ་ཡིན༔ གལ་ཏེ་རྣལ་འབྱོར་བྱིང་བའི་དུས༔ འདིས་ནི་བསེང་ན་ཏིང་འཛིན་བཟང་༔ རང་རིག་བདེ་བའི་རྒྱ་ཡིས་འདེབས༔ ཕྱག་རྒྱ་ཆེན་པོ་ཉིད་དང་སྦྱོར༔ སྟོང་པ་ཉིད་ནི་རྒྱུད་ལ་བརྟེན༔ དམིགས་པ་རྣམས་ནི་རང་སར་གྲོལ༔ སེམས་ཀྱི་དངོས་པོ་འབྱོང་བའོ༔ དེ་ཕྱིར་རྡོ་རྗེའི་གླུ་ལེན་ཞིང་༔ རྟག་ཏུ་རྡོ་རྗེའི་གར་ཡང་འཁྲབ༔ སྤྱོད་པ་ཀུན་གྱི་སྔོན་དུ་འགྲོ༔ གླུ་གར་རྒྱུན་དུ་སུས་བརྟེན་པ༔ འདི་ནི་རྡོ་རྗེའི་རིགས་སུ་འགྱུར༔ ཞེས་པའི་གར་གྱིས་ལུས་རྟོག་སྦྱོང་ཞིང་སྐུ་རྡོ་རྗེ་སྤྲུལ་སྐུ་འགྲུབ༔ གླུས་ཡིད་དང་ངག་སྦྱོང་ཞིང་སངས་རྒྱས་ཀྱི་གསུང་དང་ཐུགས་རྡོ་རྗེ་ལོངས་སྐུ་དང་ཆོས་སྐུ་འགྲུབ་པར་འགྱུར་རོ༔ དེ་ནས་གླུ་དྲུག་འགྱུར་གྱིས་བླངས་ཤིང་༔ ཨེ་མ་ཀེ་རི་ཀ་རི་མས་ཏ༔ བྷ་ལི་བྷ་ལི༔ ས་མི་ཏ་སུ་རུ་སུ་རུ༔ ཀུན་དྷ་ལི་མ་སུ་མ་སུ༔ ཨེ་ཀ་རས་སུ་ཏི་བྷས་ཏ་ཡེ༔ ཙ་ཀི་ར་བྷུ་ལི་ཏ་ལྕེ་ཡེ༔ ས་མུན་ཏ༔ ཙརྱ་སུ་གྷ་ཡཱེ༔ བྷི་ཏིང་ལ་ས་ན༔ བྷ་གྷུ་ལི་ཡེ༔ ས་ཏ་རི་དྷུ་ཀ་ནི༔ མ་ཏ་རི་བྷེ་ཏ་ན༔ པ་ར་ལི་ཧི་དྷི་ས་ན༔ མ་ཁ་ར་ཏེ་ཀེ་ལ་ན༔ སཾ་བྷུ་ར་ཏ་མེ་ཀ༔ ཙ་ར་དི་པ༔ སུརྱ་གྷ་ཏ་ར་ཨཱེ༔ བ་ཤ་ན༔ ར་ན་བྷི་ཏི་ས་གྷུ་ཏི་པ་ཡཱ༔ གྷུ་ར་གྷུ་ར་པག༔ ཁ་ར་ན་ལམ༔ ན་ར་ན་ར༔ ཨི་ཐ་ར་པ་ཏྲ་ལམ༔ སིརྣ་སིརྣ༔ བྷེ་ས་བྷེ་ས༔ རས་སི་ལམ༔ བུདྡྷ་བུདྡྷ༔ ཚི་ཤ་ས་གྷེ་ལམ༔ ས་སྭ་རི་རཱི༔ ལེ་ཁེ༔ ཨི་ཨཱི༔ མ་མཱ༔ རི་རཱི༔ ལ་དྷཱ་ཨཱ༔ ཨཱ་ཨཱཿཧཱུྃ༔ སྨས་ཏ་བྷ་ས་ལི་མ་སི་ཏ༔ སུ་རུ་སུ་རུ༔ ཀུན་དྷི་ལི་མ་སུ༔ ཨི་ཀ་རི་ལི་བྷ་ཏེ་ཡཱེ༔ ཙ་ཀ་བྷུ་ལི་ཏ་ལྕེ་ཡཱེ༔ ས་མུད་ཏ་ཙརྱ་སུ་གྷ་ཡེ༔ བྷི་ཏི་ས་ན་བྷ་གྷུ་ཡཱེ༔ ཀེ་རི་དྷ་ཀ་ནི་དྷ་ཀ་མ་མན་སོང་རི༔ ཏ་ན་ས་ར༔ བྷ་ལི་དྷི༔ ས་ནཾ་ཁ་ར་ཏ་ཀེ་ལ་ན༔ སཾ་བྷུད་ར་ཏ༔ ཨེ་ཀ་ཙ་ར་པ་ཏི༔ ཏ་བྷ་སུརྱ་གྷ་ཏ་ཨཱ༔ མ་ན་ས་པ་ར་བྷི་ཧོ༔ ཏི་གྷུ་ར་ལ༔ མ་སྨིན་ ༼ ས་ ༽༔ གྷུ་ཏི་ལ༔ ཏ་ཡ་མ་གྷུ་ར་གྷུ་ར༔ རླང་གྷ་ཁ་ས་ར་ན་ལམ༔ ན་ར་ན་ར་ལམ༔ ཨཱི་ཐཱ་པ་ཏ་ལམ༔ ཨི་ཐ་ར་ས་ཏ་མམ༔ པིརྣ་བྷེ་ས་ར་ལཾ༔ ས་ཀེ་ལམ༔ ས་སྭ༔ རི་རཱི༔ ལི་ལཱི༔ ཨ་ཨཱ༔ མ་མཱ༔ ར་རཱ༔ བསྡུ་ན༔ ཨོཾཿ འཿཨཱཿཧཿཤཿསཿམཿཀཿཝཿཙཿཧཱུྃཿཞེས་བརྗོད་ཅིང་དབྱངས་སུ་ཟློས་པ་དང་བསྒྲགས་ཏེ་རྡོ་རྗེའི་གར་གྱི་འཁྲུལ་འཁོར་ཡང་ཡན་ལག་ཕྱོགས་བཞིར་འཕེན་སྡུད་དང་༔ ཁྱད་པར་དུ་ཤར་གྱི་ཕྱོགས་སུ་ཁ་བལྟས་ལ་སེང་ཆེན་འགྱིངས་སྟབས་སུ་གར་བསྒྱུར་བའང་༔ ལེ་ལྷགས་ལས༔ དད་དང་ཤེས་རབ་ལྡན་གྱུར་ནས༔ ཤར་གྱི་ཕྱོགས་སུ་ཁ་བལྟས་ཏེ༔ སེངྒེའི་སྟབས་ཆེན་འཕྱོང་བར་བྱ༔ ཞེས་གསུངས་པའི་ཕྱིར་དང་༔ ཡང་ལྷོ་ཡོན་ཏན་གྱི་ཕྱོགས་སུ་ཁ་བསྟན་ལ༔ ལུས་བསྐྱོད་ཅིང་ཡན་ལག་བསྒུལ་བཙུགས་ཏེ་རྟ་མཆོག་སྤྲུག་སྟངས་ཀྱིས་རྐང་པས་སྟབས་ཆེན་བརྡུང་ཞིང་གླུ་བྲོ་བསྒྲགས་མར་བྱེད་དེ༔ དེ་ཉིད་ལས༔ ཡོན་ཏན་ཕྱོགས་སུ་ཁ་བལྟས་ཏེ༔ ལུས་བསྐྱོད་ཡན་ལག་བསྒུལ་བཙུགས་ནས༔ སྟབས་ཆེན་དག་ཀྱང་བརྡུང་བར་བྱ༔ དཀྱིལ་འཁོར་མ་ལུས་འབྱུང་བའི་གཏེར༔ འཛད་མེད་ནོར་བུ་རིན་པོ་ཆེ༔ མ་ལུས་ཀུན་གྱི་རེ་བ་སྐོང་༔ ཞེས་སོ༔ ཡང་ནུབ་ཀྱི་ཕྱོགས་སུ་རྨ་བྱའི་འཇོལ་སྒེགས་ཀྱིས་རྩེ་ཞིང་གླུ་གར་སྤེལ་མའི་སྟབས་བསྒྱུར་བ་ནི༔ དེ་ཉིད་ལས༔ ནུབ་ཀྱི་ཕྱོགས་སུ་ཁ་བལྟས་ཏེ༔ ཡན་ལག་དང་པོ་བསྐྱོད་བྱས་ཏེ༔ གར་རྣམས་ཤིན་ཏུ་གསལ་བྱས་ནས༔ སྟབས་ཆེན་དག་ཀྱང་བརྡུང་བར་བགྱི༔ ཞེས་སོ༔ ཡང་བྱང་གི་ཕྱོགས་སུ་གྱད་ཀྱི་དོར་སྟབས་དང་ཁྲོ་བོའི་གར་སྟབས་སུ་འཕྱོང་བ་ནི༔ དེ་ཉིད་ལས༔ བྱང་གི་ཕྱོགས་སུ་ཁ་བལྟས་ཏེ༔ ཡན་ལག་ལུས་བསྐྱོད་གར་བྱེད་ཅིང་༔ ཕྱག་རྒྱ་སོ་སོར་གསལ་གྱུར་ནས༔ རྐང་པའི་སྟབས་ཆེན་བརྡུང་བར་བྱ༔ ཞེས་དང་༔ དེ་དག་གི་ཕན་ཡོན་ནི༔ རྐང་ཆེན་དག་གིས་སྟབས་འཕྱོང་ན༔ འགྲོ་དྲུག་གནས་རྣམས་སྟོངས་བར་བྱེད༔ སྤྱན་གྱིས་ཕྱོགས་བཞིར་བལྟས་བྱས་ན༔ བདུད་བཞིའི་དཔུང་རྣམས་ཕམ་པར་བྱེད༔ ཅེས་སོ༔ དེ་ནས་དབུས་ཀྱི་ཕྱོགས་སུ་ཁྱུང་ཆེན་ལྡིང་སྟབས་ཀྱིས་གར་བསྒྱུར་བར་བྱ་སྟེ༔ དེ་ཉིད་ལས༔ དབུས་ནས་ཤར་ཕྱོགས་ཁ་བལྟས་ཏེ༔ རྐང་པས་སྟབས་ཆེན་བསྐྱོད་བྱས་ཤིང་༔ ལག་པས་འདུ་བྱེད་ཀུན་སྤྱོད་ནས༔ བྲོ་དང་གར་གྱི་ཕྱག་རྒྱ་བྱ༔ ཞེས་དང་༔ བཞི་བཅུ་པ་ལས༔ རྐང་པའི་སྟབས་ཆེན་རྣམས་འཕྱོང་ན༔ རྣམ་རྟོག་མི་བཟད་ཐམས་ཅད་ཞི༔ ཞེས་སོ༔ གླུ་གར་འདི་རྣམས་ནམ་ཕྱེད་པའི་དུས་ནི༔ ཁ་སྦྱོར་ཆེན་པོའི་རྒྱུད་ལས༔ རྣལ་འབྱོར་གང་ཞིག་སྐལ་ལྡན་པ༔ དུར་ཁྲོད་གནས་སུ་རྒྱུ་བ་དང་༔ མི་རྟོག་རྒྱུད་ལ་བརྟེན་དུས་སུ༔ འདི་ཉིད་སྐབས་སུ་བླངས་བར་བྱ༔ སྤྱོད་པ་ཀུན་གྱི་སྔོན་དུ་འགྲོ༔ ཞེས་སོ༔ དེ་བས་ན་འདི་ནི་རུ་ཤན་ཀུན་གྱི་མཆོག་ཏུ་གྱུར་པ་ཡིན་ཏེ༔ ཁྲེགས་ཆོད་དང་ཐོད་རྒལ་ཀུན་གྱི་སྔོན་དུ་འགྲོ་དགོས་སོ༔ དེ་ཡང་བཤད་ན༔ རིགས་དྲུག་གི་ཞེན་པ་ལྡོག་པ་དང་༔ སངས་རྒྱས་ཀྱི་མཛད་སྤྱོད་་རྫོགས་པ་གཉིས་ཀྱི་ཕྱིའི་རུ་ཤན་གྲུབ་ལ༔ ལུས་ཅན་གྱི་སྒྲིབ་པ་སྦྱོང་བས་ནང་གི་རུ་ཤན་དང་༔ ལུས་རྡོ་རྗེའི་སྐུ་འཁྲུལ་འཁོར་གྱིས་སྦྱོངས༔ ངག་རྡོ་རྗེ་གསུང་གི་རུ་ཤན་གྱིས་སྦྱོངས༔ རང་རིག་བདེ་བའི་རྒྱས་འདེབས་པ་དང་༔ སྟོང་ཉིད་རྒྱུད་ལ་བརྟན་ཅིང་དམིགས་རྣམས་རང་སར་གྲོལ་བས་སེམས་ཀྱི་རུ་ཤན་སྦྱོངས༔ བསམ་གཏན་ཕེབས་པའི་རྣལ་འབབ༔ བྱིང་བ་བསེང་བའི་སོར་གཞུག་དང་བཅས་པ་རྣམས་ཡོངས་སུ་རྫོགས་པའོ༔ དེ་ལྟར་འཁོར་འདས་རུ་ཤན་བྱེད་པའི་ཐབ༵ས༔ ཐབ༵ས་ཀྱི་རྒྱལ་པོ་བརྟུལ་ཞུགས་མཆོག་གི་རྩེ༵་རྒྱལ་ཨ་ཏི་ཡོ་གའི་སྔོན་འགྲོའི་ཆོས༵༔ ཆོས༵་ཉིད་མངོན་སུམ་འདྲེན་ལ་འདི་འདྲ་མེད༔ ཁྱད་པར་སྔོན་ཆད་མཁས་ཤིང་གྲུབ་པ་ཀུན༵༔ ཀུན༵་དོན་མཆོག་གྱུར་གླུ་བྲོ་གར་གྱི་ཚུལ༵༔ ཚུལ༵་དགུ་ཚང་བའི་རང་བཞིན་ཕྱག་བཞེས་སུ༵༔ སུ༵་ཞིག་མ་མཛད་བརྒྱུད་པས་དབུལ་བ་ན༔ རྒྱུད༵་དང་མན་ངག་སྙིང་བོའི་དོན་བསྡུས་ཏེ༔ རྒྱུད༵་འཛིན་མཆོག་གྱུར་ག་གཱ་ཨ་བྷྱེ་ལ༔ རྒྱུད༵་གསུམ་དབྱེར་མེད་པདྨ་འབྱུང་གནས་ཀྱིས༔ རྒྱུད༵་ལ་བྱིན་རླབས་སྨོན་ལམ་དབང་བསྐུར་ཐོབ༔ ས་མ་ཡཱ༔ རྒྱ་རྒྱ་རྒྱ༔ སྐལ་ལྡན་དོན་ཕྱིར་ཁྱུང་རི་གནམ་རྫོང་དུ༔ སྦས་པའི་ས་གཏེར་རྟེན་འབྲེལ་དུས་ཚིགས་ཡོལ༔ འོན་ཀྱང་དགོངས་པའི་གཏད་རྒྱ་གྲོལ་བ་ལས༔ ཅུང་ཟད་ཙམ་གྱིས་རྟེན་འབྲེལ་འགྲིགས་པའོ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གསང་རྒྱ༔ ཅེས་པ་འདི་ཡང་བར་དོའི་དྲུག་ཁྲིད་ཀྱི་ཆ་ལག་སུ་དུས་མཐའ་སྔགས་མིང་ག་ག་ཨ་བྷྱེ་ནས་དག་པར་ཕབས་པའི་ཡི་གེ་པ་ནི་ཝ་ཀི་ཤྭ་ར་ནས་སོ། །སརྦ་མངྒ་ལཾ། དགེའོ། །དགེའོ། །དགེའོ། །

འོད་གསལ་སྦྱོང་བ་ཞེ་སྡང་རང་གྲོལ།

ཡེ་ཤེས་སྒྱུ་འཕྲུལ་དྲྭ་བ་ལས༔ འོད་གསལ་སྦྱོང་བ་ཞེ་སྡང་རང་གྲོལ་བཞུགས༔

ན་མོ་གུ་རུ་པདྨ་ཀཱ་ར་ཡེ༔ གང་གིས་ལམ་འདི་ཉམས་སུ་བླང་འདོད་པས༔ ཐོག་མར་རྨི་ལམ་ཟིན་གོམས་བྱང་བ་གཅེས༔ གཞན་དུ་འོད་གསལ་ཤེས་པ་སྲིད་མཐའ་འདྲ༔ ཉམས་སུ་མྱོང་བ་མེད་པས་སྨྲེ་སྔགས་ལགས༔ གནད་ཆེན་འདི་ལ་སྔོན་འགྲོ་དངོས་གཞི་དང་༔ རྗེས་སུ་ཉམས་སྐྱོང་ཟེར་ཞིང་གྱི་ན་སྟེ༔ ཉིན་མོའི་རྣལ་འབྱོར་ལེགས་པར་མ་གོམས་པར༔ རྨི་དུས་མི་ཟིན་གོམས་ན་དེ་སྐྱོང་སྟོང་༔ འོད་གསལ་གཉིད་དང་བསྲེས་ཤིང་གོམས་པ་ལས༔ བར་དོའི་གཞི་ཡི་འོད་གསལ་ཟིན་ལ་བྱང་༔ དེ་ཕྱིར་འདིར་ནི་ཞེ་སྡང་སྦྱོང་བ་ཡི༔ ཉིན་མཚན་འཁོར་ཡུག་རྐྱེན་གྲོལ་བསྒོམ་པ་ལགས༔ ཉམས་ནི་རྣམ་པ་ཀུན་ཏུ་སྐྱོང་བས་ན༔ རྗེས་ཀྱི་ཐ་སྙད་མ་ཡིན་རྩལ་འབྱོང་གནད༔ འོད་གསལ་གོམས་པས་ཆོས་སྐུའི་ངོ་བོ་འགྲུབ༔ སྒྱུ་ལུས་གྲུབ་པས་ལོངས་སྤྱོད་རྫོགས་པ་དང་༔ སྤྲུལ་སྐུ་ཐོབ་སྟེ་རྣམ་པ་དེ་ཡི་སླད༔ སྔ་ཕྱིའི་ཉེར་ལྡོག་འབྲེལ་བས་རྒྱུ་རྐྱེན་དུ༔ གྲུབ་པའི་སླད་དུ་རྣམ་པར་འདིར་བཞག་གོ༔ སྔོན་འགྲོ་སྔར་བཞིན་དངོས་གཞིའི་རིམ་པ་ནི༔ ༈སྤྱིར་གྱི་འོད་གསལ་འདི་ལ་རྣམ་པ་གསུམ༔ གཞི་དང་ལམ་དང་འབྲས་བུའི་རིམ་པ་སྟེ༔ ཕྱི་དོན་སྦས་པས་རྣམ་གྲངས་དྲུག་ཏུ་དང་༔ ལྡོག་རེའི་ཕྱེ་བས་ ༼ བདེ་གསལ་མི་རྟོག་པས་ ༽གྲངས་ནི་བཟུང་བར་དཀའ༔ ༈ ༼ སྤྱི་དོན་ཀྱི་འོད་གསལ་ལས་གཞི་ལ། ༽སེམས་ལས་འདས་པའི་རང་བྱུང་ཡེ་ཤེས་ནི༔ རྒྱུ་ལས་མ་བྱུང་རྐྱེན་གྱིས་མ་བསྐྱེད་པ༔ ངོ་བོ་རང་བཞིན་ཐུགས་རྗེ་གསུམ་གྱི་དབྱིངས༔ དབྱེར་མེད་སྤྲོས་བྲལ་ལྷུན་གྲུབ་ཆེན་པོ་ལ༔ འཁོར་འདས་ཀུན་འབྱུང་བྱང་ཆུབ་ནོར་བུ་བཟང་༔ ཕྱལ་བ་ལྷུག་པ་རང་བཞིན་གཞི་ཡིན་པ༔ རྣམ་རྟོག་སྤྲོས་བཅས་ཟུག་རྔུ་ལས་འདས་པས༔ མི་རྟོག་༡པ་ཡི་འོད་གསལ་ཀ་ནས་དག༔ མ་འགགས་ལྔ་ལྔའི་ཡོན་ཏན་དཔལ་འབར་བ༔ སངས་རྒྱས་ལོངས་སྤྱོད་རྫོགས་པ་གཞིར་རྫོགས་པས༔ སྣང་ཆ་ངེས་མེད་རང་བཞིན་ཡེ་ཤེས་ལྔ༔ གསལ་བའི་༢འོད་གསལ་ཞེས་སུ་བཤད་པ་ལགས༔ ནམ་མཁའ་སྤྲིན་བྲལ་ལྟ་བུའི་ཟིལ་གནོན་ལས༔ འཁོར་འདས་ཀུན་ཁྱབ་ཇི་ལྟ་སྙེད་པའི་ངང་༔ ངོ་བོ་མི་འདའ་རྩལ་ལྡོག་སྦུབས་ཞུགས་པས༔ བདེ་བའི་འོད་༣གསལ་ཞེས་སུ་བསྟན་པར་བྱས༔ ༈གཞི་རྒྱུད་བདེ་གསལ་མི་རྟོག་འོད་གསལ་བ༔ ཟུང་འཇུག་ངོ་བོ་ཉིད་ཀྱི་བཞུགས་ཚུལ་ཏེ༔ རང་བཞིན་རྫོགས་པ་ཆེན་པོའི་གྲུབ་པའི་མཐའ༔ ཀུན་རྫོགས་ཐིག་ལེ་ཉག་གཅིག་མཚོན་པའོ༔ ༔ ༼ སྤྱི་དོན་ལམ་ལ། ༽ ལྟ་བས་རྟོགས་ནས་བསྒོམ་པས་ཉམས་ལེན་པ༔ ཅོག་བཞག་བཞི་ཡི་གྲོལ་བས་ངོ་བོ་ལས༔ ནམ་ཡང་འདའ་མེད་ཕྱག་རྒྱའི་བཅིང་བ་ནས༔ རང་གནས་བསམ་གཏན་རང་བྱུང་སྒྲོན་མ་གཉིས༔ ཟུང་འཇུག་ནམ་མཁའ་ལྟ་བུར་རྟོག་བྲལ་བ༔ ངང་ལས་མི་འདའ་རི་བོ་ ༼ རི་བོ་ཅོག་བཞག་སྐྱེས་པ། ༽སྤྱི་ཆིངས་ལ༔ རྣམ་རྟོག་རླུང་གིས་བསྒུལ་བསྐྱོད་མེད་པ་ཉིད༔ མི་རྟོག་འོད་གསལ་ཞེས་སུ་ཤེས་པར་བྱ༔ ༈ངང་དྭངས་མ་འགགས་ཉི་ཟླ་ཁད་མཉམ་པས༔ རང་གསལ་སྣང་ཆ་མ་བཏང་རིག་གེ་བ༔ ཟང་ཐལ་རྗེན་པ་རྟོག་དཔྱོད་བྲལ་པ་ཉིད༔ གསལ་བའི་འོད་གསལ་ ༼ རྒྱ་མཚོ་ཅོག་བཞག །༽ མཐའ་དབུས་མེད་པར་རིག༔ ཏིང་འཛིན་ངང་ལ་ཟུག་རྔུའི་སྤྲོས་པ་ཀུན༔ རྣམ་ཞི་ཟག་བྲལ་བདེ་བ་ལྷོད་དེ་བ༔ ཤིན་ཏུ་སྦྱང་བ་བརྒྱ་ཡི་མི་གཡོ་བ༔ བདེ་བའི་འོད་གསལ་ཁྱད་པར་འཕགས་པ་ ༼ སྣང་བ་ཅེར་བཞག་སྐྱེས་པའོ། ༽ སྟེ༔ ༈ལམ་གྱི་འོད་གསལ་ཤིན་ཏུ་ཟབ་པ་སྟེ༔ གཞན་ལས་ཁྱད་འཕགས་རྫོགས་པ་ཆེན་པོ་ཡི༔ ཏིང་འཛིན་གསུམ་གྱི་སྔོན་དུ་འགྲོ་བ་ཅན༔ རྒྱས་འདེབས་ཐོག་བབས་རང་གནས་གསལ་བདེ་སྟོང་༔ དེ་ལས་ཉམས་ཀྱི་འོད་གསལ་རྣམ་པ་གསུམ༔ གཞི་ལ་ལམ་གྱི་མཚམས་སྦྱོར་བྱེད་པ་ལས༔ ཕྱོགས་མཐོང་ཚུལ་དུ་དབང་པོ་ལ་གསལ་བ༔ རྣམ་པ་གསུམ་དུ་རྣམ་པར་འཆར་བར་རིག་པར་བྱ༔ ༈འབྲལ་བར་ཕངས་བས་བདེ་༡བ་དམ་པ་ ༼བདེ་པ། ༽ དང་༔ ཕྱི་རོལ་ཁ་དོག་དམ་༢པ་ ༼ གསལ་བ། ༽ མངོན་ཤེས་ཕྲན༔ ཡུལ་དྲུག་གང་གི་འཛིན་༣རྟོག་ ༼ མི་རྟོག་པ། ༽ནམ་མཁར་ཡལ༔ བདེ་གསལ་མི་རྟོག་འོད་གསལ་རྣམས་ལས་འབྱུང་༔ ནང་གི་རྩ་ཁམས་འོད་དུ་དེངས་སྟོབས་དང་༔ ཉོན་མོངས་དག་སྟོབས་འཛིན་པ་ཞི་སྟོབས་དང་༔ རླུང་ལྔའི་དྭངས་མ་དབུ་མར་འོད་རྩར་ཟིན༔ ཐིག་ལེ་འགྲོ་འོང་ཆད་ལས་རིམ་པར་འབྱུང་༔ ༈འབྲས་བུ་རང་བཞིན་ནང་གསལ་ཆོས་སྐུ་ལ༔ གཞི་གནས་ལོངས་སྐུའི་མཚན་ཉིད་འཛིན་པ་དང་༔ སྤྲུལ་སྐུའི་ཁྱབ་བདེ་གསལ་བའི་མི་རྟོག་སྟེ༔ ནང་ཚན་སུམ་ཅུའི་འོད་གསལ་རྫོགས་པ་ཆེ༔ ༈སྦས་པས་འོད་གསལ་ཉམས་སུ་ལེན་པ་ལ༔ སྟོང་བཞིས་ ༼ གཞིའི་འོད་གསལ། ༽དྲངས་པས་འཆི་སྲིད་སྐད་ཅིག་མ༔ ༼ ཡེ་ཤེས་བཞི་བདེ་གསལ་མི་རྟོག་པའི་རང་ ༽ ཆ་བཅུར་ ༼ བཞིན་ཅན་སྐད་ཅིག་གིས། ༽རིམ་བཞིན་འཆར་བའི་སྔོན་འགྲོ་ཅན༔ རྗེས་མཐུན་རྨི་ལམ་ ༼ ལའང་བདེ་གསལ་མི་རྟོག་གསུམ། ༽འོད་གསལ་དང་བཅས་པ༔ ༈ཉིན་མཚན་འཁོར་ཡུག་ཡེངས་མེད་ལམ་སྦྱངས་བས༔ ༼ ལམ་གྱི་འོད་གསལ། ༽རྟོགས་ཤིང་གོང་འཕེལ་ཡོན་ཏན་རྩལ་འཆང་བས༔ སྒྲིབ་པ་སྤོང་པ་ལམ་གྱི་འོད་གསལ་དུ༔ ཆ་རྐྱེན་ཚང་བར་བཟུང་བ་མཁའ་འགྲོའི་ཟབ༔ དེ་ལས་འབྲས་བུའི་འོད་གསལ། འབྱོང་བས་འཆི་བའི་འོད་གསལ་དུ༔ རང་ཐོག་རང་གྲོལ་འོད་གསལ་མ་བུ་འདྲེས༔ ཆོས་སྐུ་རྒྱལ་པོའི་གཏན་སྲིད་ཟིན་པ་ལ༔ འབྲས་བུའི་འོད་གསལ་ཞེས་སུ་ཡོངས་སུ་གྲགས༔ ༈ དེལའང་སྣང་མཆེད་ཐོབ་པའི་རིམ་པ་ལས༔ བདེ་གསལ་མི་རྟོག་རང་བཞིན་འོད་གསལ་བཞུགས༔ སྟེང་སྒོ་རྣམ་གྲོལ་འོག་སྒོ་ཁམས་གསུམ་རོལ༔ དཔེ་དང་དཔེ་ཅན་གསལ་བའི་འོད་གསལ་ཡོད༔ ༈ དེ་ལྟར་འོད་གསལ་རང་བཞིན་ཤེས་བྱས་ནས༔ ༼ ལམ་ཉམས་སུ་ལེན་པ་ལ། ༽ ཉིན་མོའི་འོད་གསལ་འབར་འཛག་ལས་གཟུངས་སམ༔ རྗེས་ལ་འཇོག་གམ་བླ་མའི་བྱིན་རླབས་ཀྱིས༔ ཐོབ་པས་རྫོགས་པ་ཆེན་པོར་འབྱམས་སུ་ཀླས༔ ༈རྨི་ལམ་ཟིན་པས་བསྲེ་བར་བྱ་བ་ལ༔ འཐུག་པོའི་འོད་གསལ་རྣམ་རྟོག་ཕྲ་རག་འགགས༔ ངོས་བཟུང་དེར་འཛིན་ཞིག་པས་སྣང་མེད་སེམས༔ ངང་དུ་མི་རྟོག་ཧར་སང་ཡན་པ་ ༼ མི་རྟོག་པས་གཙོ་ཆེར། ༽འབྱུང་༔ དེ་ནི་རབ་ཀྱི་དབང་པོ་ཅན་གྱིས་ཟིན༔ འབྲིང་གིས་བརྒྱལ་ཐབས་རྗེས་སུ་རྨི་ལམ་མེད༔ སེམས་ནི་གསལ་སྟོང་སང་སང་ངང་དུ་གནས༔ དེ་ཡང་གསལ་བའི་འོད་གསལ་ཆ་འདྲ་བས༔ སྲབ་མོའི་འོད་གསལ་ ༼ གསལ་བའི་ཆ་འབྲས། ༽ ཞེས་སུ་བསྟན་པ་ལགས༔ དེ་ལྟར་སྲབ་འཐུག་གང་ཡང་བརྟན་མ་ཐོབ༔ རྨི་ལམ་ཟད་ནས་གསལ་བདེའི་ཉམས་ཡོད་ལ༔ ལྷན་ནེར་སེམས་གནས་ཉམས་ཀྱི་འོད་གསལ་ཞེས༔ ཐ་མའི་དབང་པོ་ཅན་གྱི་དེ་འདྲར་ཟིན༔ ༼ བདེ་བས་ཆ་ཤས། ༽འདི་དག་རྟེན་དང་འབྲེལ་བར་སྐྱེ་བ་མང་༔ཉམས་ལས་སྲབ་འཐུགས་འོད་གསལ་རིམ་པ་སྟེ༔ ཐམས་ཅད་ཀུན་ཀྱང་གནས་སྐབས་འོད་གསལ་ཡིན༔ དགེ་སྦྱོར་བག་ཆགས་འཐས་པས་ཞན་པའང་ཡོད༔ ༈འཐུག་པོ་ལས་ནི་དངོས་གཞིའི་འོད་གསལ་བ༔ རང་བཞིན་ཡོངས་དག་རྫོགས་པ་ཆེན་པོའི་གཞི༔ སྒྲིབ་པ་མི་ལྡན་སྤངས་བས་བྲལ་བ་མིན༔ སྟོན་གྱི་ནམ་མཁའ་ལྟ་བུའི་སྐྱོན་གསུམ་བྲལ༔ ༈སྤྲོས་པའི་མཐའ་བརྒྱད་བྲལ་བའི་ཆོས་སྐུ་ལ༔ མཆོང་སྟབས་བརྒལ་བ་སྲིད་པ་ཙམ་ཞིག་བས༔ སྟོང་བཞི་རིམ་པར་འཆར་བ་ངོས་བཟུང་ནས༔ མཐར་ནི་དེ་ལ་འབྱམས་སུ་ཀླས་པར་བྱ༔ ༈ཐོག་མར་འདུག་སྟངས་བཅུན་ནས་ཉལ་བ་ན༔ རགས་སྣང་དག་ཕྱིར་ཆོས་ཀྱི་འཁོར་ལོ་རུ༔ མཚན་མ་རྟགས་ཀྱི་གཟུགས་སྐུ་བཅོམ་ལྡན་འདས༔ རྡོ་རྗེ་སེམས་དཔའ་དཀྱིལ་འཁོར་དྲུག་ཚན་གསལ༔ ༈དེ་ལས་འོད་འཕྲོས་འཁོར་འདས་ཡོངས་ཁྱབ་ནས༔ ཀུན་ཀྱང་སྣང་བྱས་རྡོར་སེམས་ཞིང་དུ་སྦྱངས༔ སླར་ནི་འུབ་ཆུབ་ཐིག་ལེ་གཅིག་ཏུ་གྱུར༔ ཡེ་ཤེས་འོད་རྩར་སྟོང་བས་སྒྲོན་མར་སྦ༔ ༈རང་ཞལ་མི་ཤིགས་ཐིག་ལེ་མངོན་དུ་བྱ༔ དེ་ལས་མནལ་ལམ་འོད་གསལ་ངེས་པར་ཟིན༔ རང་བྱུང་ཡེ་ཤེས་རྫོགས་པ་ཆེན་པོ་ཡི༔ ལྷུན་གྲུབ་ལམ་བྱེད་འོད་གསལ་འཛིན་པ་ལགས༔ ༈ཡང་ཅིག་རང་ཉིད་ལྷར་གསལ་རླུང་གནད་བབས༔ མཆོང་གུར་སྨུག་པོའི་དབུས་སུ་གསེར་གྱི་རྩ༔ ལམ་བྱུང་འོད་རྩ་དར་དཀར་ཕྲ་ལ་འཁྲིལ༔ བཟང་དང་རྒྱན་ལྡན་ཐིག་ལེ་ཉིད་ལ་བཟུང་༔ སྟོང་པ་རང་གྲོལ་སེམས་དཔའི་སྣ་ཐག་ལ༔ ཐིག་ལེ་གསང་ལམ་བཞི་ཡི་ཁེངས་པ་དགུ༔ ཡེ་ཤེས་རྩལ་རྫོགས་པ་ལ་སེམས་ཀྱང་བཟུང་༔ སྔ་མ་གཉིས་ལ་འོད་གསལ་རྟེན་ལ་བརྟེན༔ ༈ཀ་དག་ཁྲེགས་ཆོད་དགོངས་པར་མཉམ་བཞག་པས༔ རང་སྣང་གྲོལ་དེ་དགོངས་པའི་ངོ་བོ་ཉིད༔ འོད་གསལ་མ་བུ་འདྲེས་པ་རང་གྲོལ་ལམ༔ རྩེ་མོའི་རྣལ་འབྱོར་རིན་ཆེན་སྦུབ་ལ་རྫོགས༔ ༈སྔ་མ་ཟིན་པས་ལྷུན་གྲུབ་རིན་པོ་ཆེ༔ བདེ་གསལ་རྣམ་པར་མི་རྟོག་གཟུགས་ཀྱི་སྐུ༔ ཕྱི་མ་ལས་ནི་ཀ་དག་བུམ་པའི་སྐུ༔ ཡེ་ཤེས་ཆོས་སྐུ་ནང་གསལ་སྐུ་ལས་གྲོལ༔ ༈མས་ནས་རིམ་བཞིན་སྣང་བས་འོད་གསལ་ནི༔ སྒོ་ལྔ་ཐིམ་པས་མེ་ལོང་ཡེ་ཤེས་དངོས༔ སྣང་ཆ་དཀར་ལམ་སྟོང༵་བའི༵་དགའ་བ་ཞེས༔ གཟུང་རྟོག་ཟད་པ་གསལ་བའི་རང་བཞིན་འཆར༔ ༼ གསལ་བའི་འོད་གསལ། ༽ ཐབས་ཀྱིས་སྐུ་ཡི་ཞེ་སྡང་རྟོག་པ་འགགས༔ ཡིད་ཤེས་ཐིམ་པས་ཤར་རྩའི་གདངས་ལྡན་ལས༔ ཡེ་ཤེས་ངོས་ཟིན་ངང་ལ་མཉམ་པར་བཞག༔ སླད་ཀྱི་བརྟན་ཐོབ་གཉིས་པ་ཉིད་ལ་འཇུག༔ ༈དེ་ཡང་སྣང་བ་མཆེད་པ་ལ་ཐིམ་པས༔ སོ་སོར་རྟོགས་པའི་རང་བཞིན་ནུབ་རྩའི་གདངས༔ དམར་ལམ་འཆར་ཞིང་འཛིན་རྟོག་དང་བཅས་འགགས༔ ཤིན་ཏུ་སྟོང་པ་མཆོག་དགའི་རང་བཞིན་ནི༔ ༔རྟོག་བྲལ་མཆེད་པ་བདེ་བའི་ཡེ་ཤེས་ཆེའི༔ ༼ བདེ་བའི་འོད་གསལ། ༽ ཉོན་མོངས་ཅན་ཡིད་ཀུན་གཞིར་ཞུགས་པ་ཞེས༔གསུང་གི་བདག་ཉིད་དེ་ཡི་འདོད་ཆགས་འགགས༔ ངང་ལ་མཉམ་བཞག་བརྟན་ཐོབ་བར་དུ་སྦྱོངས༔ ༈སླར་ཡང་མཆེད་པ་ཐོབ་པ་ལ་ཐིམ་པ༔ ཆོས་དབྱིངས་རང་བཞིན་དབུས་རྩའི་གདངས་སུ་བཀྲ༔ ནག་ལམ་འཆར་ཞིང་ཀུན་གཞི་ཆོས་སྐུར་ཐིམ༔ ཞེན་པ་བྲལ་བ་ཁྱད་དགའ་མི་རྟོག་པ༔ ༈སྟོང་པ་ཆེན་པོ་ཐོབ་པའི་ཡེ་ཤེས་མཆོག༔ གཏི་མུག་རྟོག་པ་འགགས་པར་ ༼ མི་རྟོག་འོད་གསལ། ༽ བྱེད་པ་ཡི༔ ཐུགས་ཀྱི་བདག་ཉིད་དེ་ལ་མཉམ་པར་བཞག༔ བརྟན་པ་ཐོབ་ནས་བཞི་པ་ཉིད་ལ་སྟེ༔ ༈ཐོབ་པ་ཉེ་བར་ཐོབ་པ་ལ་ཐིམ་པས༔ ཨ་ཧཾ་དར་དཀར་རྩ་ལ་ཞུགས་པའི་མཐུས༔ སྣང་གསུམ་ཆ་འགགས་མི་རྟོག་ཏིང་འཛིན་བཟང་༔ ཐམས་ཅད་སྟོང་པ་ལྷན་ཅིག་སྐྱེས་པའི་དངོས༔ སྒྲིབ་པ་མཐའ་དག་མ་སྤང་མི་ལྡན་པ༔ སྟོན་གནམ་སློང་བྱེད་སྐྱོན་གསུམ་བྲལ་བ་འདྲར༔ དུག་གསུམ་དབྱིངས་སུ་ཞི་བའི་ངང་ལ་བཞག༔ འདི་ནི་འོད་གསལ་དངོས་གཞིའི་རིམ་པའོ༔ འཐུག་པོའི་འོད་གསལ་བསམ་གཏན་ལྷག་པར་འགྱུར༔ འདི་གཉིས་མ་ཕྱེད་ཐོབ་པའི་འཕྲང་ལ་འཐོག༔ རང་བཞིན་རྫོགས་པ་ཆེན་པོའི་དོན་དམ་པ༔ འདི་ལ་གོམས་པས་བར་དོ་དང་པོར་གྲོལ༔ ༈དཔེ་ཡི་འོད་གསལ་ཆུ་ཟླ་ལྟ་བུ་ནི༔ སྟོང་གསལ་འགགས་མེད་རྗེན་པར་ཤར་བ་སྟེ༔ དོན་གྱི་འོད་གསལ་ཡིད་དཔྱོད་སྒོམ་བྱུང་འདས༔ རྟགས་ཀྱི་འོད་གསལ་བྷྲི་ཏ་གཅུན་ནས་སྒྲུབ༔ ༈བཞི་པོའི་སྣང་བ་ཐབས་དང་ཡེ་ཤེས་སྐུ༔ སྟོང་བཞི་ཤེས་རབ་ཡུམ་ཆེན་དབྱིངས་ཆོས་སྐུ༔ ༼ ཐམས་ཅད་སྟོང་བས། ༽ཕྱི་མའི་རྟགས་སྣང་ལྷུན་གྲུབ་ཆོས་ཉིད་ཀྱི༔ བར་དོ་ལྷ་ཡི་རང་བཞིན་ཨེ་མ་ཧོ༔ ༈འདི་བཞི་ཡང་དག་ཟིན་པར་གྱུར་པ་ན༔ སྣང་བས་ཚོགས་དང་མཆེད་པས་སྦྱོར་བའི་ལམ༔ ཐོབ་པ་འཕགས་པ་ཉེར་ཐོབ་དག་ས་ལས༔ འོད་གསལ་མ་བུ་འདྲེས་ནས་ཆོས་སྐུ་འགྲུབ༔ ༈རྨི་ལམ་ཐིམ་རིམ་བར་དོའི་ཐིམ་རིམ་སྦྲག༔ གོམས་ནས་སད་པའི་འཆར་རིམ་ཉིད་ལ་བསྟུན༔ གཅིག་བོག་གཅིག་གི་འདོན་པས་མན་ངག་གོ༔ འདི་བཞིན་རྦ་རླབས་གཏམས་དང་འགྲོལ་བ་དང་༔ ༈རྟེན་ལས་སྦྱངས་དང་ཙཀྵུ་གཏེམ་པ་དང་༔ ཉིན་མོའི་འོད་གསལ་མུན་པའི་ཁང་པ་དང་༔ རྩ་རླུང་རྣལ་འབྱོར་རྫོགས་ཆེན་རྣལ་འབྱོར་བ༔ འདི་རྣམས་ཀྱང་ནི་གློད་གྲོལ་དེ་བཞིན་ནོ༔ ༈རྩ་རླུང་སྔར་བཞིན་མིག་གནད་ཧ་རེ་ཕྱེད༔ ཐོད་རྒལ་རྟེན་དང་ཁྲེགས་ཆོད་དགོངས་པར་གཏད༔ ལུས་གནད་ཆོས་བདུན་དྲུག་ཆིངས་སྐུ་གསུམ་གྱི༔ བཞུགས་སྟངས་དུས་སུ་ཐོ་རངས་ཉི་དྲོས་བར༔ ༈བོག་མཆོག་ཀུན་ལ་གཅེས་པ་བླ་མའི་སྐུ༔ སྙིང་དབུས་ཐིག་ལེའི་ནང་གསལ་འོད་ཟེར་གྱིས༔ རང་ལུས་འོད་གསལ་དྭངས་མ་འཕོས་པར་བྱ༔ སྦ་བསྡུ་དག་སྦྱོར་རིམ་པའང་འོད་གསལ་གནད༔ ༈འཇུ་འདུལ་ཐིག་སྤྲིན་དག་པའི་རྡུལ་སྙེད་པས༔ མི་ཤིགས་ཏི་ལ་ཀ་ཡི་གཟི་བྱིན་གྱི༔ དྲི་མ་དག་ནས་རྩ་ལ་འཕོས་པ་བསྡུས༔ ལྷར་གསལ་རྗེས་གཞིག་གིས་བསྡུས་སྣང་མེད་བསྐྱངས༔ ༈འདི་ལ་ཡོན་ཏན་རིན་ཆེན་བསམ་ལས་འདས༔ ཁ་སྦྱོར་བདེ་ཆེན་ཡན་ལག་བདུན་ལྡན་པས༔ གནས་སྐབས་མཐར་ཐུག་གྲུབ་པ་བསམ་མི་ཁྱབ༔ རིག་འཛིན་བཞི་ཡི་ངང་ལས་འདུ་འབྲལ་མེད༔ གསལ་བས་སྤྲུལ་སྐུ་བདེ་བས་ལོངས་སྤྱོད་རྫོགས༔ མི་རྟོག་ཆོས་སྐུ་ཁ་དོག་མངོན་བྱང་ཆུབ༔ འོད་གསལ་མི་འགྱུར་རྡོ་རྗེའི་འབྲས་བུ་ཐོབ༔ ཡེ་ཤེས་མཐར་ཐུག་ཕྲིན་ལས་ལྷུན་གྱིས་གྲུབ༔ རྩ་རླུང་ཡི་གེ་ཐིག་ལེའི་འགྲོས་བཞི་ཡང་༔ ཐིམ་པས་གདམས་ངག་མང་པོའི་དོན་རྡོ་སྟེ༔ སྐུར་བ་བཏབ་ནས་ཆས་ཆོད་གནས་ངན་གྱི༔ གཡང་སར་སེམས་ཡོད་འཇུག་པ་ག་ལ་སྲིད༔ ཉིན་མཚན་མཉམ་བཞག་ཡེངས་མེད་ཆེན་པོས་བསྐྱངས༔ དགེ་བ་བྱང་ཆུབ་བསྔོ་ཞིང་མཉམ་རྗེས་བསྲེ༔ གདམས་པ་འདི་ཡང་ག་ག་ཨ་བྷྱེ་ཡིས༔ པདྨ་མ་ཏིས་བསྐུལ་བ་དོན་ཡོད་བགྱིས༔ དགེ་བ་འདི་ཡིས་འགྲོ་ཀུན་རང་གྲོལ་ནས༔ རྡོ་རྗེ་འཛིན་པ་དབྱེར་མེད་སར་བརྟན་ཤོག༔ མཁའ་འགྲོ་འབུམ་གྱི་གསང་བཅུད་འདི་བླང་བས༔ ཡལ་བར་མ་དོར་རྡོ་རྗེའི་ཐ་ཚིག་གིས༔ ཟླ་བའི་དབང་པོ་ཚེ་རིང་མཆེད་ལྔར་བཅས༔ བཀའ་རྐུན་སྒྲོ་སྐུར་མཁན་ལ་མ་འགྲིམས་ཤིག༔ བསྟན་པའི་རྒྱལ་མཚན་ཕྱོགས་བཅུར་བསྒྲེང་བར་མཛོད༔ ས་མ་ཡཱ༔ ཅེས་མི་ལོ་ཉེར་ལྔ་ནས་རྒྱུད་ལ་འབྱོར་བ་གསང་ནས་ཉམས་སུ་བླང་མཐར་སོ་བདུན་པ་ལ་གསང་བརྡོལ་བའོ། །

རྨི་ལམ་བར་དོ་སྦྱོང་བའི་མན་ངག་ཟབ་གནད་སོ་གཅིག་པ།

ཡེ་ཤེས་སྒྱུ་འཕྲུལ་དྲྭ་བ་ལས༔ རྨི་ལམ་བར་དོ་སྦྱོང་བའི་མན་ངག་ཟབ་གནད་སོ་གཅིག་པ་གཏི་མུག་རང་གྲོལ་བཞུགས་སོ༔

ཡེ་ཤེས་སྒྱུ་འཕྲུལ་རོལ་པ་ལས༔ གཏི་མུག་འོད་གསལ་འཆར་བའི་ཐབས༔ མུ་ཚོད་རྨི་ལམ་དང་འབྲེལ་བ༔ ཡོན་ཏན་རྩ་ལམ་དག་བྱེད་བསྟན༔ ལར་ནི་ཐོག་མ་མེད་པ་ནས༔ ཉིང་འཁྲུལ་བག་ཆགས་བཞག་པའི་ཡུལ༔ དུད་འགྲོའི་ས་བོན་ལས་ཡིན་ཏེ༔ ཉེ་རྒྱུ་རྒྱབ་རྩའི་བརྟེན་བྱས་ནས༔ ཀུན་ནས་ཀུན་ལ་གནས་པ་ལ༔ རྣལ་འབྱོར་ལམ་ལ་སྦྱང་དུ་ཡོད༔ རྡོ་རྗེ་ཐེག་པའི་ཐབས་མཁས་སུ༔ ཆོས་དྲུག་རང་ལུས་ཞུ་བདེ་དང་༔ རྟེན་དང་འབྲེལ་འབྱུང་རྩ་ལག་དང་༔ ཞར་བྱུང་དགོས་པས་རིམ་པ་གཞན༔ གྲངས་མེད་སངས་རྒྱས་ཐུགས་བརྡོལ་བ༔ ཐབས་དང་ཐབས་བྱུང་རང་བཞིན་ཅན༔ མཁའ་འགྲོའི་གསང་མཛོད་བདག་པོར་བརྟེན༔ གང་ཟག་གཞན་གྱི་སྤྱོད་ཡུལ་མིན༔ འོལ་གྱི་ཕྱི་ལ་རྒྱུག་པ་དང་༔ རྟོག་གེ་ངན་པའི་ཁྱབ་རྟགས་དང་༔ ཕྱི་འབྱམས་སྟོང་ལྟ་སྲིད་རྩེ་ཡི༔ རྣམ་པ་ཀུན་ཏུ་དཔྱིས་སུ་ཡས༔ ས་མ་ཡཱ༔ ཐོག་མར་རྨི་ལམ་མ་ཟིན་ན༔ བར་དོ་འོད་གསལ་མི་ཟིན་པས༔ ཐོག་མའི་ཆོས་སྐུའི་སྐལ་བའང་༔ ཡོད་དང་མིན་པ་འདི་ལས་ཕྱེས༔ ༈ཟུང་འཇུག་ལྷ་རུ་འཕོས་པའང་༔ གལ་ཏེ་འདི་འདྲ་མེད་པ་ལ༔ དེ་དུས་སྤྲུལ་བསྒྱུར་མི་གོམས་པས༔ མེད་ཐབས་མེད་པའི་གནད་ཅིག་གོ༔ ༈སྒྱུ་ལུས་སྐྱེ་སྒོ་དགག་པ་ཡན༔ ངོ་མ་ཤེས་པས་དོན་གྲུབ་མེད༔ འདི་ཆོད་རང་བཞིན་མེད་གོམས་པས༔ དེ་མ་ཐག་ཏུ་དཔེའུ་འབྱོར༔ ༈དེ་སླད་ལམ་འདི་གོམས་པ་གནད༔ འདི་ལ་གཞི་ཡི་འཁོར་འདས་ཆོས༔ རྨི་ལམ་ལྟ་བུར་ལྟ་བས་རྟོགས༔ རྨི་ལམ་གཉིད་དང་བསྲེ་བཅས་ཀྱི༔ ༈ལམ་གྱི་རྨི་ལམ་ཉམས་ལེན་དེ༔ སྔོན་དུ་འགྲོ་དང་དངོས་གཞིའི་རིམ༔ རྗེས་སུ་ཉམས་སྐྱོང་དང་བཅས་པ༔ གཅུས་དཀྲུགས་གབ་བསལ་པདྨའི་ལུགས༔ ས་མ་ཡཱ༔ སྔོན་དུ་འགྲོ་བ་འདི་ལྟ་སྟེ༔ རྩ་ཐིག་རླུང་ལ་གོམས་པ་གང་༔ ཉེས་པའི་ཚོགས་ཀུན་སྤངས་བྱས་ནས༔ བདེ་བའི་སྟན་ལ་བག་ཕབ་སྟེ༔ ༈སྐྱབས་སུ་འགྲོ་ཞིང་བྱང་སེམས་བསྐྱེད༔ སྒྱུ་མ་ལུས་ཀྱི་དཀྱིལ་འཁོར་གྱི༔ དོན་སྦྱོང་མན་ངག་སྲོག་རྩོལ་གྲོགས༔ གནས་ཤིང་ཁྱད་པར་གནད་ཀྱི་ཟབ༔ ༈བླ་མའི་རྣལ་འབྱོར་༡བསྒོམ་བྱས་ཏེ༔ དེ་ནས་དུས་ཀྱི་ཁྱད་པར་ནི༔ ཐོ་རངས་ནས་གཟུང་ཉི་དྲོས་དང་༔ ནང་གི་ཉེ་བས་འདུ་བ་ལའོ༔ ༈སེང་གེ་འམ་ནི་གླང་ཆེན་དང་༔ དྲང་སྲོང་ལྟ་བུ་ཆོས་བདུན་གྱི༔ འདུག་སྟངས་གཅུན་ལ་གནད་ཀྱི་༣ཟབ༔ ཆིངས་ཆེན་ཕྱག་རྒྱ་འཆུགས་མེད་བྱེད༔ ༈དལ་འཇམ་སྟེང་འོག་ཁ་སྦྱོར་བས༔ སྔར་བསྟན་བུམ་༥ཅན་རླུང་དང་བསྒྲགས༔ འཁོར་འདས་དྲན་པའི་འཁོར་ལོར་བསྡུས༔ འབར་འཛག་བདེ་ཆེན་གནད་ཀྱི་ཟབ༔ ༈ ༼ ཟིལ་གནོན་ནི། ༽ དངོས་གཞི་རང་ཉིད་ལྷར་གསལ་བས༔ ལོངས་སྤྱོད་འཁོར་ལོའི་ལྟེ་བ་དང་༔ འདབས་མ་རྩ་བ་བཞི་པོ་ལ༔ ཨཾ་བཾ་ཧྲི་མཱུཾ་ཧྲཱི་བཾ་མཾ༔ ༈ རང་རང་གསལ་བྱེད་ལས་སྤྲུལ་པས༔ སྣང་མཐའ་གོས་དཀར་འཇམ་དཔལ་དང་༔ སྤྱན་གཟིགས་གྷིརྟི་ཡབ་ཡུམ་དྲུག༔ དམར་གསལ་ཐིག་ལེའི་འོད་ཀློང་གསལ༔ ༈ཐུགས་ཀར་པདྨའི་གདན་སྟེང་དུ༔ ཡི་གེ་ཨཾ་དམར་འོད་འབར་བས༔ མཚོན་ཏེ་རང་རང་རྒྱུའི་ཡི་གེ༔ འོད་འབར་ལུས་ཀུན་སལ་ལེ་བསྒོམ༔ ༈ གལ་ཏེ་དེ་ཡིས་མ་ཟིན་ན༔ རང་ཉིད་མགྲིན་པར་བླ་མའི་སྐུའི༔ དུང་གནས་པདྨ་ཡི་གེར་བཀོད༔ འོད་འཕྲོས་འཁོར་འདས་ཁྱབ་ཅིང་གསལ༔ ༈སླར་ནི་ཤིན་ཏུ་ཕྲ་བར་འགྲིབ༔ དེ་འདྲའི་རྗེས་སུ་གཞིག་པ་ཡི༔ ངང་ལས་མི་རྟོག་མཉམ་པར་བཞག༔ འདིས་ཀྱང་རྨི་ལམ་ཟིན་པར་ངེས༔ ༈སྟེང་དུ་ཐིག་ལེ་སྟོང་པའི་སྒྲོན༔ འོག་ཏུ་དེ་བཞིན་མཚམས་སུ་ཡང་༔ རྣམ་དག་དབྱིངས་ཀྱི་སྒྲོན་མ་འཁོར༔ དེ་དབུས་རང་ཉིད་གནས་པར་བསྒོམ༔ ༈ ཡང་ནི་རང་གི་སྨིན་མཚམས་སུ༔ འོད་ཀྱི་ཐིག་ལེ་ཁ་དོག་ལྔ༔ འགྲོ་འོང་སྦ་བ་མགྲིན་པར་བསྡུ༔ འདིས་ཀྱང་ཉིང་འཁྲུལ་ལམ་ལ་ངེས༔ དེ་ལྟར་དམིགས་པ་ཡུལ་གྱི་༧གནད༔ ཟབ་མོ་གང་གིས་བཟུང་བ་ཡི༔ གཞན་ཡང་གནད་ཀྱི་རིམ་པ་ཆེ༔ མིག་ནི་ཕྱེས་ཏེ་བབས་ཀྱིས་༨བཞག༔ ༈རྣམ་པ་ཀུན་ཏུ་ཉིན་མོའི་དུས༔ ཤེས་ཡུལ་ཚོར་བ་མ་ལུས་པ༔ རྨི་ལམ་ཚུལ་དུ་རབ་མཐོང་ནས༔ རྨི་ལམ་ཉིད་དུ་འདུན་པ་༩བཟུང་༔ ༈ཉིན་མོ་འཇིགས་གཟུགས་མཐོང་བ་ལ༔ རྨི་ལམ་འདུ་ཤེས་གོམས་པ་ཡི༔ ངན་རྐྱེན་མི་འདོད་པ་ཡི་དངོས༔ བྱུང་བས་ཐོག་མར་ཟིན་པར་༡༠འགྱུར༔ ༼ སྡུག་བསྔལ་རང་གྲོལ་གྱི་གནད། ༽ ༈དེ་ནས་རིམ་གྱིས་གོམས་པ་ཡི༔ དགའ་བས་རྐྱེན་གྱི་དངོས་པོ་ལ༔ ཐོག་མར་དགའ་བདེ་ཚད་མེད་པ༔ སྐྱེས་འཕྲལ་རྨི་ལམ་ཉིད་དུ་༡༡ཟིན༔ ༼ དགའ་བདེ་རང་གྲོལ་གྱི་གནད། ༽༈ དེ་ནས་རིམ་བཞིན་ཐམས་ཅད་ཀུན༔ རྨི་ལམ་ཉིད་ཤེས་དཀའ་སླའི་དཔེ༔ སོ་སོའི་སྐྱེ་བོའི་གཡང་ལྷུང་དང་༔ ནོར་རྙེད་རྨི་ལམ་ཤེས་པ་༡༢འདྲར༔ ༼ མུ་མཐའ་རང་གྲོལ་གྱི་གནད། ༽ ༈འཕུར་ལ་སོགས་པ་མི་སྲིད་ཀུན༔ ཟིན་གྱི་གཞན་དུ་ཅི་ལྟ་བར༔ འཇིགས་དངངས་འཆི་བདུད་ངོ་བོ་ཉིད༔ དགའ་དངོས་ལྷ་བུ་དེ་ཡིས་བསྐྱེད༔ ༈བདག་འཛིན་དགག་སྒྲུབ་སྙེམས་བྱེད་བདུད༔ བདག་གི་ཕུང་པོའི་བདུད་ཀྱིས་ཏེ༔ ༈འདི་རྣམས་རིམ་བཞིན་ཤེས་ཤིང་ཟིན༔ མཐར་ཕྱིན་དུས་ནས་རྩལ་སྦྱངས་ཀྱིས༔ བོག་འབྱིན་རང་དབང་ཐོབ་པ་དང་༔ གདོད་ཀྱི་རྨི་ལམ་བར་དོ་སྦྱངས༔ ༈ཟིན་ཕྱིར་སྤོག་པ་དུར་ཁྲོད་༡༣དུ༔ གཅེར་བུར་ཕྱུང་ལ་སྐྱོ་ཤས་བསྐྱེད༔ རང་གི་ལུས་ཀྱང་ཕྱི་ནང་བཟློག༔ མགྲིན་པར་ཡི་གེ་མངོན་བྱུང་སྟེ༔ ༈དེ་ལས་ཡེངས་བ་མེད་བརྟེན་བཟུང་༔ ༈ཡང་ཅིག་སྔར་བསྟན་རྡོ་རྗེའི་བཟླས༔ འབྱུང་གནས་འཇུག་པའི་འབྲུ་གསུམ་པོར༔ གསལ་གདབ་རྣམ་པ་ཀུན་ཏུ་ཉལ༔ ༈རྨི་ལམ་ཟིན་དུས་ས༵ད་པས༵་༡༤འབྱམས༔ དེ་ལ་མི་སད་འདུན་པས་བསྒྱུར༔ མ་ཕན་མིག་གནད་བཙུམ་པ་དང་༔ ཤེས་པ་ནང་དུ་སྡུད༵་པས་འགྲུབ༔ སད་འབྱམས་གྲོལ་བའི་གནད། གལ་ཏེ་ཟིན་སླར་འཁྲུལ་པར་འབྱམས༔ འདུན་པས་མ་འཁྲུལ་ཏིང་འཛིན་ནི༔ ཨ་ལས་ཧཱུྃ་སྔོན་འོད་འབར་རམ༔ ཡང་ན་ཡི་གེ་གཞན་དག་༡༥གིས༔ ༼ འཁྲུལ་འབྱམས་གྲོལ་བའི་གནད། ༽བརྗེད་འབྱམས་རྨི་ལམ་ཟིན་འཕྲོ་བས༔ ཕྱི་ཡི་ཁྲུས་དང་གཙང་སྦྲ་བྱ༔ ནང་དུ་མགྲིན་པར་སྟོང་སྒྲོན་གསལ༔ དེ་ལས་མ་ཡེངས་ངེས་པར་༡༦གྲོལ༔ ༼ བརྗེད་འབྱམས་རང་གྲོལ་གྱི་གནད། ༽ ༈འདུན་པ་དྲག་པོས་གཅུན་པ་ཡི༔ རྨི་ལམ་མེད་དང་གཉིད་ཡལ་ན༔ དབུ་མར་ཐིག་ལེ་དགུ་བརྩེགས་གསལ༔ སྟོང་འབྱམས་རང་གྲོལ་གནད་ཀྱི་༡༧ཟབ༔ ༈དེ་ལྟར་རྨི་ལམ་གནད་བསྣུན་པས༔ ལེགས་པར་ཟིན་ནས་དབང་འབྱོར་ཚེ༔ སྤྲུལ་བསྒྱུར་སྤེལ་དང་བཅས་པ་དང་༔ ཀུན་ཀྱང་ལམ་དུ་འགྲོ་བའི་ཐབས༔ ༈དེ་ནས་ཉིན་མོའི་འདུན་པ་ནི༔ འཕོ་བ་སྣ་ཚོགས་གཟུགས་སུ་སྤྲུལ༔ ཡི་དམ་ལྷ་ཡི་སྐུ་རུའང་སྤྲུལ༔ སྤྲུལ་བ་ཕུན་ཚོགས་གནད་ཀྱི་༡༨ཟབ༔ ༈དེ་ནས་མི་ལས་དེ་ལས་ལྷ༔ ཀླུ་ལས་དུད་འགྲོ་ཞི་ཁྲོ་སོགས༔ ཉིན་སྦྱངས་རྨི་ལམ་དེ་དང་བསྲེ༔ བསྒྱུར་བ་ངེས་པ་དོན་གྱི་༡༩གནད༔ ༈འདི་ཡང་གཟུགས་བཟང་ངན་པ་དང་༔ སྣ་ཚོགས་མཐོང་བ་ལ་བསྒྱུར་ཏེ༔ སྣང་བར་བསྒྱུར་དང་སྟོང་པར་བསྒྱུར༔ རྣམ་པ་སྣ་ཚོགས་དཔེ་ཡི་རྟགས༔ ༈དེ་ནས་བརྒྱ་སྟོང་གྲངས་མང་སྤེལ༔ ཏིང་འཛིན་འདོད་དགུ་རིམ་པས་སྦྱང་༔ རྣམ་པ་སྣ་ཚོགས་དཔག་མེད་པ༔ ཟད་མེད་གཏེར་ལ་སྤྱོད་པས་༢༠གནད༔ ༈དེ་ནས་གཞལ་ཡས་རྫས་ལྷ་མོ༔ རྣམ་པ་སྣ་ཚོགས་བཟང་དགུའི་སྤྲིན༔ སྤྲུལ་བསྒྱུར་སྤེལ་ནས་རྒྱལ་བ་མཆོད༔ ཚོགས་ཆེན་གཉིས་རྫོགས་གནད་ཀྱི་༢༡ཟབ༔ ༈ཞིང་ཁམས་ཀུན་ཏུ་ཐོགས་མེད་ཕྱིན༔ བདེ་གཤེགས་རྗེས་དྲན་ཐམས་ཅད་ལས༔ དབང་དང་གདམས་ངག་སེམས་བསྐྱེད་ནོས༔ ཞིང་སྦྱོང་ཕུན་ཚོགས་གནད་ཀྱི་༢༢ཟབ༔ ཐ་ཆད་གནས་ངན་ལེན་ཀུན་ཏུ༔ འགྲོ་བ་སོ་སོའི་སྒྲིབ་པ་སྦྱངས༔ སངས་རྒྱས་ལྔ་ཡི་དཔལ་ལ་བཀོད༔ སྨིན་པ་ཡང་༢༣ཟབ་གནད་དུ་བསྔགས༔ དེ་དག་ཀུན་བཟང་སྤྱོད་པ་སྟེ༔ བདེན་མེད་སེངྒའི་གཟོབ་པོ་ལ༔ ཕུག་ན་རྔམས་ཆ་མ་མཐོང་བས༔ མཚང་བརྡོལ་རོ་སྙོམས་བརྟུལ་ཞུགས་༢༤གནད༔ རྨི་ལམ་འོད་གསལ་སྟོང་པ་ཉིད༔ ཕ་རོལ་ཕྱིན་པས་སྤྲོས་བྲལ་དོན༔ རིག་པས་ངང་ལས་མཉམ་བཞག་པ༔ བཅད་པ་ངེས་པས་གནད་ཀྱི་༢༥ཟབ༔ ༈དེ་ལྟར་རྨི་ལམ་ངོས་བཟུང་ནས༔ རྗེས་སུ་དེ་བཞིན་ཉམས་སྐྱོང་ཞིང་༔ ཆོས་ཀུན་རྨི་ལམ་ལྟ་བུར་གནས༔ རྒྱུན་ཆད་མེད་པར་རྐྱེན་ཐུབ་གནད༔ ཡང་དགོས་ཉིན་མོའི་རྣལ་འབྱོར་དོན༔ རྩ་རླུང་ཕྱེད་བཅིང་ལ་སོགས་པས༔ བག་ཆགས་ལམ་དེ་སྦྱོང་བའང་༔ ཉམས་ལེན་འཁོར་ཡུག་གནད་ཀྱི་༢༦ཟབ༔ ༈སྐད་ཅིག་བསྐལ་བརྒྱར་སྟོན་པ་དང་༔ སྟོང་གསུམ་ཡུངས་འབྲུར་བཞུགས་ཚུལ་དུ༔ ཅིར་ཡང་བཏུབ་པས་རྨི་ལམ་ལས༔ ཏིང་འཛིན་ནམ་མཁར་སྦྱང་བར་༢༧བྱ༔ ཀུན་མཆོག་འོད་གསལ་གཉིད་ཀྱི་ངང་༔ སྟོང་བཞིས་དྲངས་པའི་རྫོགས་པ་ཆེ༔ ངོས་བཟུང་ངང་དུ་འབྱམས་ཀླས་པ༔ དགོངས་པ་ཀུན་གྱི་གྲོལ་བའི་༢༨གནད༔ དེ་དག་ཀུན་གྱི་བོག་འབྱིན་དུ༔ རྨི་ལམ་ཟིན་ཐབས་དཀྲུགས་པའི་༡༩གནད༔ འཁོར་ལོ་བཞི་རྒྱུ་རླུང་སེམས་རྣམས༔ དཀྲུགས་ཏེ་བཟུང་བ་གྲུབ་པར་འགྱུར༔ ༈སེམས་ཉིད་མགྲིན་པའི་རྩ་རུ་སྦ༔ ལུས་ཀྱི་གནད་ནི་གཅུན་པ་ཡི༔ ཡེངས་མེད་རྦ་རླབས་གཅུད་པ་ནི༔ དེམ་གྱི་གནད་དུ་ཟབ་པ་༣༠ལགས༔ ༈ཀུན་ཀྱང་ཉིན་མོ་རྩལ་སྦྱངས་ཏེ༔ འདུན་པ་ཡེངས་མེད་ལམ་གྱིས་བསྒྱུར༔ འདི་ཡང་གནད་ལ་བོར་བ་ཞེས༔ ཀུན་ལ་གཅེས་པ་གཟེར་ཆེན་༣༡པོ༔ ༈སྒྱུ་མའི་དཀྱིལ་འཁོར་ལྷར་ལྡང་དང་༔ འོད་གསལ་མ་པང་བུ་འཇུག་དང་༔ བཅས་པས་བར་དོ་ངེས་པར་ཆོད༔ འདི་འདྲ་འཇིག་རྟེན་གསུམ་ན་མེད༔ ས་མ་ཡཱ༔ རླུང་བཟུང་ལས་རླུང་ཟད་པར་གྲུབ༔ མི་རྟོག་ཏིང་འཛིན་ཉེ་བར་འགྱུར༔ ཐིག་ལེ་འབར་འཛག་ཟབ་མོ་ཡི༔ བདེ་བའི་འོད་གསལ་གམ་དུ་ཉེ༔ ཏིང་འཛིན་འཁོར་ལོ་བསྐོར་བ་ཡི༔ གསལ་བའི་འོད་གསལ་རྒྱུད་ ༼ དྲུང་དཔྱད། ༽ དུ་འདྲེན༔ ལུས་ལ་དཀྱིལ་འཁོར་བཀོད་པ་ཡིས༔ པདྨ་རྒྱལ་པོ་འཁོར་བཅས་གྲུབ༔ རྡོ་རྗེ་རྒྱལ་པོ་གོམས་པ་ཡིས༔ བྱིན་རླབས་ཆུ་བོ་ལུད་པར་འབྱུང༔ ཤིན་ཏུ་ཕྲ་ལ་སྦྱངས་པ་ཡི༔ ཆོས་སྐུ་དམ་པས་ཡེ་ཤེས་ཚོགས༔ རྫོགས་ནས་སྐུ་ཡི་གཟུགས་སྐུ་སྟེ༔ བསོད་ནམས་དམ་པར་ཨ་ལ་ལ༔ ཐིག་ལེ་ཁ་སྦྱོར་རོལ་མོ་ཡིས༔ མངོན་སུམ་གནད་ལ་ཕེབ་པ་འབྱུང་༔ ཟིན་ནས་བརྟུལ་ཞུགས་གདན་ཆེན་ལས༔ བདུད་བཞི་དབྱིངས་སུ་ཡང་དག་གཅོད༔ སྤོག་པའི་བཙན་ཐབས་རང་དབང་ཕྲོག༔ རྐྱེན་ལྔ་གྲོལ་བའི་གནད་ཀྱིས་ཀྱང་༔ སྲན་ཐུབ་བར་ཆད་ཡོན་ཏན་འགྱུར༔ སྤྲུལ་པས་ནམ་མཁའ་མཛད་པ་ཡི༔ ཏིང་འཛིན་བསྒྱུར་བས་སྒྱུ་མ་བཞིན༔ སྤེལ་ལས་དཔའ་བར་འགྲོ་བ་དང་༔ རྫོགས་སྨིན་སྦྱངས་བས་རྟེན་འབྲེལ་ལས༔ རང་སྐལ་ནུས་པ་ཕུན་ཚོགས་ཀྱི༔ མངོན་ཤེས་རྫུ་འཕྲུལ་རྗེས་དྲན་གྱི༔ སྐལ་པ་བཟང་པོ་རིགས་ཀྱི་གདུང་༔ སྤྱོད་པ་བཟང་དང་རོ་སྙོམས་པས༔ སེངྒེ་རྣམ་བསྒྱིངས་ཏིང་འཛིན་ལགས༔ ལམ་གྱི་སྦྱོངས་རྣམ་བཞི་ཡིས༔ ཡེ་ཤེས་ཕྱག་རྒྱའི་ཏིང་འཛིན་ཐོབ༔ གནད་ཀྱི་མན་ངག་རྣམ་གསུམ་གྱིས༔ ཟླ་བ་དྲི་མེད་ཏིང་འཛིན་ཐོབ༔ ཏིང་འཛིན་དྲུག་གི་རྟེན་ཉིད་ལས༔ མ་པང་བུ་འཇུག་ལྟ་བུར་གྲོལ༔ ས་མ་ཡཱ༔ དེ་ལྟར་རྨི་ལམ་བར་དོ་སྦྱང་པའི་ཐབས༔ ཀུན་ལས་བཅུད་ཟབ་འདུས་པ་རྡོ་རྗེའི་གནས༔ བདུད་འཇོམས་རྡོ་རྗེའི་གཟི་བརྗིད་ནས་བརྒྱུད་དེ༔ ནམ་མཁའ་འཇིགས་མེད་རྡོ་རྗེར་བབས་པ་འདི༔ འཆལ་བར་མ་སྤེལ་བརྒྱུད་པ་གསུམ་སྦྲེལ་དེ༔ འདི་ཡི་གྲོལ་བ་ཐོབ་པར་གདོན་མི་ཟ༔ རྗེས་སུ་དགེ་བ་བྱུང་ཆུབ་བསྔོ་བ་ནི༔ སྤྱི་བཞིན་བྱོས་ཤིག་འདིར་ནི་མ་སྨོས་ཏེ༔ རྨི་ལམ་གོམས་པས་འོད་གསལ་ངེས་པར་ཟིན༔ གཞན་དུ་དེ་ཙམ་རང་ངོ་མ་ཟིན་པར༔ སྣང་སྟོང་སྦྱོང་འདོད་གཞར་འདེབས་རྒྱུ་རུ་བས༔ དེ་སླད་འབྲེལ་བཞིན་བསྒྲུབ་པ་གྲུབ་པར་འགྱུར༔ ཅེས་ཀྱང་ག་གཱས་སྨྲས་པས་ཡི་གེ་པུཎྱེས་བྲིས་སོ། །དགེའོ། །དགེའོ། །དགེའོ། །

ཁྲེགས་ཆོད་ཀྱི་གཟེར་ཡིག་གནད་གྱི་མེ་བཙའ།

ཁྲེགས་ཆོད་ཀྱི་གཟེར་ཡིག་གནད་གྱི་མེ་བཙའ་བཞུགས་སོ། །

ཁྲེགས་ཆོད་ཀྱི་གནད་དུ་ཐོག་མར། ཕྱི་ནང་སྣོད་བཅུད་ཐམས་ཅད་སེམས་ཀྱིས་བཟོས་པའི་འཁྲུལ་སྣང་། མེད་པ་སྟོང་གཟུགས། རབ་རིབ་དང་སྐྲ་ཤད། སྒྱུ་མའི་དཔེ་བཅུ་ལ་སོགས་པ་ལྟར་སྣང་སྟོང་ཟུང་འཇུག་ཕྱི་ནང་བདེན་གྲུབ་ཀྱི་དངོས་པོ་མེད་པར་ཐག་ནང་ནས་ཆོད་དགོས། དེ་ལྟར་བཟོ་བྱེད་ཀྱི་མཁན་པོ་སེམས་ཉིད་ཀྱང་། བྱུང་གནས་འགྲོ་གསུམ་ཡུལ་དང་མཁན་པོའི་སྟོང་བས། གཟུགས་དབྱིབས་ཁ་དོག་སོགས་མཚན་མ་ཐམས་ཅད་དང་བྲལ་བར་བརྟགས་དཔྱད་གོམས་འདྲིས་མི་དམན་པར་ཐག་ནང་ནས་ཆོད་པ་ཞིག་དགོས། འོན་ཀྱང་སྟོང་ཉིད་ཆད་མཐའ་རུ་མ་ལྷུང་བར་རང་མདངས་འགགས་མེད་ལ། ངོ་བོ་སྟོང་པ་དང་ཡེ་ནས་ཟུང་དུ་འཇུག་པའི་སྣང་སྟོང་རིས་མེད་མཉམ་པ་ཆེན་པོ། ངོས་བཟུང་གི་མཚན་མ་ཐམས་ཅད་ལས་འདས་པ། གཡོ་བྱེད་རྣམ་རྟོག་གི་རླུང་རང་སར་དེངས་པ། དམིགས་གཏད་གཟུང་འཛིན་ཆེད་དུ་བློས་བྱས་ཐམས་ཅད་དང་བྲལ་ཞིང་། རྟོག་བྲལ་རང་གསལ་ཟང་ཐལ་རྗེན་པའི་ཡེ་ཤེས་སུ་ཤར་བ་ཉིད་ནི། ཐོག་མའི་སངས་རྒྱས་ཀུན་ཏུ་བཟང་པོའི་དགོངས་པ་མ་འཁྲུལ་བ་རང་ལ་གནས་པའི་དེ་བཞིན་ཉིད་ཅེས་བྱའོ། །དེ་ངོ་ཤེས་ནས་དེས་ངང་ལས་བློ་དང་ཡིད་དཔྱོད་ཀྱིས་མ༵་བཅོ༵ས། ཚོགས་དྲུག་གི་ཡུལ་ལ་ཕྱིར་མ༵་ཡེང༵ས། འགྱུ་བྱེད་གཟུང་འཛིན་གྱི་རྣམ་པར་རྟོག་པས་མ༵་བསླད༵། ནང་སེམས་གནས་ཀྱི་ངོ་བོ་ལ་འདི་དང་འདིའོ་སྙམ་ནས་ཆེད་དུ་མ༵་བཟུང༵། རྣམ་རྟོག་སྐྱོན་དུ་བལྟས་ནས་དགག་པར་རྩོམ་པའི་རྩོལ་བ་སྤངས་བས་མ༵་དག༵ག །སྣང་སྟོང་ཞི་ལྷག་ཕྱོགས་རེ་ནས་བཞག་པའི་བསྒོམ་པའི་འོད་གསལ་བ་མ༵་བསྒྲུབ༵་པའི། གནད་ཀྱི་གཟེར་བུ་ཆེན་པོ་དྲུག་གིས་མངོན་སུམ་རང་ཐོག་ལས་མི་འཆུགས་པར་གདམས་པའི་ལ་བཟློ་བའམ་ཐག་གཅིག་ཐོག་ཏུ་བཅད་པ་སྒོམ་པའི་གནད་ཟིན། རྗེས་ཐོབ་ཀྱི་དུས་སུ་རྣམ་རྟོག་གང་ཤར་ཐམས་ཅད་ངོ་བོ་ཡེ་སྟོང་འཆིང་བྱེད་མེད་པར་ཡེ་ནས་གྲོལ་བར་ཤེས་པའི་གདེངས་དང་ལྡན་པའམ། སྣང་ཆ་ཅེར་གྲོལ་ཚུག་ཐུབ་དུ་གྲུབ་པ་མེད་པར་ཤེས་པའི་གདེངས་དང་གྲོལ་བྱེད་ཀྱི་གཉེན་པོ་གཞན་མ་དགོས་པར་བཞག་པས་རང་གྲོལ་དུ་འགྲོ་བ་ཤེས་པའི་གདེང་དང་། འོད་གསལ་རིག་སྟོང་ཐིག་ལེ་ཉག་གཅིག་གི་ངང་ལ་བཞག་པས་ཀུན་གྲོལ་བར་ཤེས་པའི་གདེང་གང་རུང་གིས་སྤྱོད་པས། མཉམ་རྗེས་ཀྱི་དགོངས་པ་དབྱེར་མེད་དུ་འདྲེས་ནས་གདེང་གྲོལ་ཐོག་ཏུ་འཆོས་པར་འགྱུར་རོ། །དེ་ལྟ་བུའི་བསྒོམ་སྤྱོད་པའི་གནད་ཀྱིས་གཞི་ཇི་བཞིན་པ་མངོན་དུ་གྱུར་ནས། རང་ཐོག་རང་ས་ཟིན་ཞིང་། རང་ལ་རང་གདེང་ཐོབ་པས་གཞི་ཉིད་འབྲས་བུར་སྨིན་པའི་སངས་རྒྱས་སྐུ་གསུམ་ཕྱིར་མི་ལྡོག་པའི་ཚད་དང་ལྡན་པར་འགྱུར་རོ། །ཁྲེགས་ཆོད་ཀྱི་གཟེར་ཡིག་འཇིག་དགའི་ངོར་ག་གཱ་ཨ་བྷྱེས་སོ། །

རྙེད་དཀའི་དལ་འབྱོར།

རྙེད་དཀའི་དལ་འབྱོར་ཐོབ་དུས་འདིར། །ངེས་མེད་འཆི་བས་ཉེན་གྱིས་ནི། །ནམ་ཞིག་དུས་ན་བཏབས་ནའང་། །གློ་བུར་དུ་ཡང་ཅི་ཆ་སྟེ། །དེ་བས་བློ་རྒྱ་མ་ཆེ་ཞིག །ཚེ་འདིའི་བྱ་བ་སྔར་བསྒྲུབ་ནས། །དེ་ནས་ཕྱི་མའི་དོན་བསྒྲུབ་པར། །འདོད་པ་འགོང་པོ་རྔམས་པོ་ཆེ། །དེ་ཕྱིར་རིག་པ་རང་ཞལ་བ། །སྒྲིབ་བྱེད་གཟུང་འཛིན་སེམས་ཡིན་ཏེ། །དེ་ནི་རྣམ་རྟོག་འགྱུ་བ་ཟེར། །འགྱུ་མེད་གསལ་སྟོང་ཟང་མ་ཐལ། །བལྟས་ན་མི་མངོན་བཞག་ན་གསལ། །དེ་ལས་མེད་དོ་སྐལ་ལྡན་པ། །རིག་རིག་པོ་ལ་ཏུར་ཏུར་བོ། །སེམས་ཡིན་རིག་པ་གཟུང་འཛིན་བྲལ། །དེ་ལྟར་བཞག་ན་ཧད་དེ་བ། །ཆོས་སྐུ་སྤྲོས་བྲལ་ཆེན་པོ་ནི། །རིག་པ་དེའོ་དེའི་ངང་བསྐྱང་། །བསྒོམ་པ་ཞེས་པ་ལོག་ན་མེད། །དེ་བསྒོམ་སྤྱོད་འབྲས་མཐའ་ལ་ཕྱིན། །དེ་སྐད་པྲཛྙཱ་མ་ཏི་ཡིས། །བསྐུལ་བཞིན་ག་གཱ་ཨ་བྷྱེས་བྲིས། །དགེའོ། །

ཀ་དག་ཁྲེགས་ཆོད་ཀྱི་གཟེར་ཡིག་སྙིང་པོའི་དོན་བསྡུས།

ཀ་དག་ཁྲེགས་ཆོད་ཀྱི་གཟེར་ཡིག་སྙིང་པོའི་དོན་བསྡུས་བཞུགས་སོ། །

རང་བྱུང་རིག་པའི་ཡེ་ཤེས་ནི། །སྤྲོས་བྲལ་དོན་གྱི་ཀུན་ཏུ་བཟང་། །དེ་ལ་གུས་པས་ཕྱག་འཚལ་ནས། །སྙིང་པོའི་དོན་བསྡུས་འདི་བསྟན་ནོ། །ཞེས་སྨྲས་ནས། ད་སེམས་རིག་གི་ཤན་འབྱེད་པ་ནི། ལར་རང་སེམས་མ་བཅོས་པར་བཞག་པས། གཤིས་ཀྱི་གནས་ལུགས་ངང་དངས་གསལ་བ་དེ་ཉིད། རིག་པ་སྤྲོས་བྲལ་ཀུན་ཁྱབ་བརྡལ་བའི་ཆོས་ཉིད་ཆེན་པོ་ཡིན་ཏེ། སེམས་ལ་གཟུང་འཛིན་ཡོད། རིག་པ་ལ་གཟུང་འཛིན་མེད། སེམས་ཀྱིས་ཡུལ་ལ་སེམས། རིག་པས་ཡུལ་ལ་མི་སེམས། སེམས་ལ་སྐྱེ་འགགས་ཡོད། རིག་པ་ལ་མེད། སེམས་ལ་རྒྱ་ཆད་ཕྱོགས་ལྷུང་ཡོད། རིག་པ་ལ་མེད། སེམས་ལ་བྱིང་རྒོད་འཐིབ་གསུམ་ཡོད། རིག་པ་ལ་མེད། སེམས་མ་རིག་པའི་རྩ་བ་ཅན། རིག་པ་ཡེ་ཤེས་ཆོས་སྐུ་སྤྲོས་བྲལ་གྱི་རྩ་བ་ཅན། སེམས་ཁ་ཕྱིར་བལྟས། རིག་པ་ནང་གསལ་ཆེན་པོ། སེམས་འཕྲལ་ཤེས། རིག་པ་རང་གསལ་ཡེ་ཤེས་ཆེན་པོའི་ཁྱད་ཡོད་དོ། །འོ་ན་ཀུན་གཞི་དང་ཆོས་སྐུ་ལ་ཁྱད་ཅི་ཡོད་ཅེ་ན། ཆོས་སྐུ་སྟོང་གསལ་སྤྲོས་པ་ཐམས་ཅད་བྲལ་བ་ཞིག་གོ །ཀུན་གཞི་མ་རིག་པས་བསླད་པ་ཅན་སེམས་ཀྱི་རྩ་བའོ། །དེ་ཡང་ལུང་མ་བསྟན་པ་གནས་དོན་ལུས་གསུམ་དུ་བག་ཆགས་པའོ། །སྣོད་བཅུད་རྒྱ་ཆེན་པོ་ལ་དམིགས་པའོ། །ཁ་ཕྱིར་བལྟས་ཞིག་གོ །གཏི་མུག་གི་ས་བ་ཞིག་གོ །འཛིན་པ་མེད་ཟེར་ཡང་དམིགས་པ་དེ་མཐར་གཏུག་ན་འཛིན་པ་ལས་མ་འདས་སོ། །ཆོས་སྐུ་ནི་ཟང་ཐལ་སྒྲིབ་པ་བྲལ་བ། །ཡེ་ཤེས་ཀྱི་རང་རྩལ་མ་འགགས་པ་ཞིག་གོ །ཤེས་རབ་ཀྱི་རོལ་བ་འཕྱོ་བ། བག་ཆགས་བསྲེག་པའི་མེ་ལྟ་བུ་དང་། རིག་གེ་རྗེན་ནེ་བ་ཞིག་དུ་གནས་སོ། །ཡང་ཐ་མལ་དུ་ཡོད་དུས་སེམས་གསལ་སེང་ངེ་བ་ཞིག་ལ། རྟོག་པ་མ་འགྱུ་བ་ཞིག་ཡོད་པ་དེ་ཀུན་གཞིའི་རྣམ་ཤེས་ཞེས་བྱའོ། །མུ་སྟེགས་པ་བདག་ཤེས་རིག་གི་སྐྱེས་བུ་དེ་དེ་ཡིན། དེ་བས་ན་སེམས་གསལ་ལ་རྟོག་བྲལ་ངས་ཤེས་ཟེར་མཁན་དེ་དེ་དང་འདྲའོ། །ཡང་གང་ལྟར་ཡང་རིག་ཆ་དེ་ངོ་མ་ཤེས་ན་སྒོམ་མིན། རིག་པའི་གསལ་ཆ་བཏོན་པས་གཟུང་འཛིན་དུ་སྟིས་ཕུར་བཏོན་པས་ལྐོག་འགྱུ་དེ་མ་གོ་འོ། །ཡང་རིག་པ་སྟོང་པ་སྤྲོས་བྲལ་ལོ་ཞེས་ཀྱང་། ཡིད་ཀྱིས་མྱོང་ན་སྤྲོས་པ་མ་བྲལ་ལོ། །མ་མྱོང་ན་ནི་ཅི་ཡང་མི་ཤེས་པ་དེས་ཀྱང་ལུང་མ་བསྟན་དུ་འབྱམས་པ་ཡིན་ནོ། །དེ་བས་ན་ཡེ་ནས་དབྱིངས་རིག་གི་རོ་དང་མ་བྲལ་བ་ཞིག་ཡིན། ཡང་ཡིད་རྟོག་བཅས་ཀྱིས་དཔྱད་པས་ཟིན་པ་དེ་ལ་རྣལ་འབྱོར་མངོན་སུམ་མི་བྱའོ། །བློའི་བསམ་བརྗོད་མེད་པར་གནས་པ་ལ་རོ་མྱོང་མཚུངས་ལྡན་གྱི་ཚོར་བ་གཟུགས་ཁམས་སྨད་པ་ལ་ཡོད་པ་རྣམས་ནི་དེང་སང་གི་སྒོམ་ཆེན་པའི་ཁྱད་ཆོས་དེ་འདྲ་མིན་པར། རིག་པའི་ངོ་བོ་སྟོང་པ་ཆོས་སྐུ། རང་བཞིན་གསལ་བ་ལོངས་སྐུ། ཐུགས་རྗེ་རིག་གེ་རྗེན་ནེ་བ་དེ་སྤྲུལ་སྐུ་ཕྱོགས་ལྷུང་དང་བྲལ་བའི་དགོངས་པའོ། །དེ་ལ་མ་ཡེངས་པར་བལྟ་བས་ལྟ་བ། བསྒོམ་བློའི་རྩོལ་ཞེན་གྱིས་མ་བསླད་པས་བསྒོམ་པ། རྣམ་རྟོག་གིས་མ་བསྐྱོད་པར་བཞག་པས་དུས་གསུམ་ཡིད་ཀྱིས་འབྲེལ་ཐག་ཆོད་པ་ལ་ཕོག་པས། དེ་ཉིད་ལས་མ་ཡེངས་པར་བཞག་པས་བྱར་མེད་རང་གྲོལ་གྱི་དགོངས་པ་མངོན་དུ་འགྱུར་བ་ཡིན་ནོ། །དེ་བས་ན་ད་ལྟར་གྱི་ཤེས་པ་ཟེར་བ། རྣམ་པ་གསལ་པ་ཞེས་པ་ཐམས་ཅད་ཀྱང་གནས་ལུགས་ཡང་དག་གི་དོན་ག་ལ་ཡིན། ཁྱེད་ཀྱིས་འོད་གསལ་ལ་ཉིན་མཚན་མེད་པར་སྐྱོངས་དང་སངས་རྒྱས་ཀྱི་གོ་འཕང་མ་ཐོབ་ན་རྡོ་རྗེ་འཆང་གིས་བསླུ་བར་མི་འགྱུར་བའི་གཏན་ཚིག་གོ །ཡང་ཡེངས་བརྗེད་འཁྲུལ་འབྱམས་སུ་ཤོར་ན་རྣམ་རྟོག་འཁྲུལ་འབྱམས། འབྱམས་ཡུལ་ཅི་ཡང་མེད་དོ། །ཆོས་ཉིད་དུ་མ་གྲོལ་བ་ཞིག་མེད་པས་སོ། །དེ་ལྟར་ཉམས་སུ་ལོངས་དང་འདི་ལས་ཟབ་པ་མེད་དོ། །རྣམ་རྟོག་ཤར་དུས། ངོ་ལ་མི་ལྟ་བ། ངང་ལ་མི་བསྒོམ། སྔོན་བསུ་རྗེས་དཔྱོད་སོགས་ཅི་ཡང་མི་བྱེད་པར་སྔར་གྱི་རིག་པ་དེའི་ངང་དུ་བཞག་པས་རྐྱེན་སྣང་དང་རྣམ་རྟོག་ཐམས་ཅད་རང་ཡལ་རྗེས་མེད་དུ་དག་པ་སྟེ། རང་གྲོལ་མཉམ་པ་ཆེན་པོའི་དགོངས་པ་ཡིན་པས་དེ་རུ་ལ་བཟླ་བ་དང་། རྣམ་རྟོག་དེའི་རང་བཞིན་ཕྱིར་སྣང་ཚུལ་གྱིས་སྐྱོན་ལྟར་སྣང་ཡང་། གནས་ཚུལ་ལ་ཐད་ཀ་ན་རིག་པ་ལས་ཅི་ཡང་མེད་པས་སྐྱོན་དུ་བལྟ་མི་དགོས་ཏེ། ངོ་བོ་ཡེ་གྲོལ་དུ་ཡོད་པས་སོ། །དེ་སྐད་དུ་ཡང་ཆོས་ལིས་བསྐུལ་ངོར་ག་གཱས་སོ། །

འོད་གསལ་ཐོད་རྒལ་གྱི་བསྡུས་དོན་རིན་ཆེན་གཟེར་ཡིག

འོད་གསལ་ཐོད་རྒལ་གྱི་བསྡུས་དོན་རིན་ཆེན་གཟེར་ཡིག་བཞུགས་སོ། །

ན་མོ་གུ་རུ་པདྨ་ཀཱ་ར་ཡེ། དེ་ལ་དང་པོ་རུ་ཤན་བྱེད་པ་ལ། །བྱང་ཆུབ་སེམས་བསྐྱེད་གཞི་བདག་མགྲོན་རིགས་དང་། །བགེགས་མགྲོན་བརྔན་ནས་བསྲུང་འཁོར་བསྒོམ་པ་དང་། །དེ་ནས་འགྲོ་དྲུག་ལུས་ངག་ཡིད་སྤྱོད་དང་། །སངས་རྒྱས་ཉིད་ཀྱི་སྐུ་གསུང་ཐུགས་སྤྱོད་བྱ། །རྐང་མཐིལ་དམྱལ་བའི་ས་བོན་དུ་ནག་པོ། །གསང་གནས་ཡི་དྭགས་ས་བོན་པྲེ་ཐལ་སྐྱ། །ལྟེ་བར་དུད་འགྲོའི་ས་བོན་ཏྲི་དམར་ནག །སྙིང་ཁར་མི་ཡི་ས་བོན་ནྲ་ལྗང་ཁུ། །མགྲིན་པར་ལྷ་མིན་ས་བོན་སུ་སེར་པོ། །སྤྱི་བོར་ལྷ་ཡི་ས་བོན་ཨ་དཀར་པོ། །རང་མདོག་ཐིག་ལེའི་དཀྱིལ་ན་བསྒོམ་པ་ལ། །རིགས་དྲུག་ལས་ཉོན་སྡིག་སྒྲིབ་འདུས་པར་བསམ། །སྤྱི་བོར་ཨོཾ་དཀར་མགྲིན་པར་ཨཱཿདམར་པོ། །སྙིང་ཁར་ཧཱུྃ་མཐིང་རྣམས་ལས་འོད་དཀར་དམར། །མཐིང་གསུམ་འཕྲོས་པས་ས་བོན་བག་ཆགས་བསྲེགས། །དེ་ནི་ཕྱི་ཡི་རུ་ཤན་དབྱེ་བའོ། །འབྲུ་གསུམ་རྡོ་རྗེའི་བཟླས་པ་འབུམ་བདུན་བཟླ། །ནང་གི་རུ་ཤན་ལུས་ཉིད་རྡོ་རྗེ་ནི། །ཡར་རྩེ་སྐུ་གསུམ་མར་རྩེ་ངོ་བོ་དང་། །རང་བཞིན་ཐུགས་རྗེ་གསུམ་གྱི་བདག་ཉིད་ཅན། །སྐེད་པ་ཐབས་ཤེས་ཟུང་འཇུག་མཚོན་པ་ལས། །མེ་སྟག་འཕྲོས་པས་གདོན་བགེགས་ཚར་བཅད་དེ། །རྡོ་རྗེ་ལང་འདུག་སྐོར་གསུམ་ཉམས་སུ་བླང་། །ངག་གིས་ཧཱུྃ་བརྗོད་སྙིང་ཁའི་ཧཱུྃ་འཕྲོས་པས། ཁམས་གསུམ་སྣོད་བཅུད་ཧཱུྃ་དུ་ཞུ་བར་བསམ། །ཚུར་འདུས་བུ་ག་དགུ་ནས་ཞུགས་པ་ཡིས། །ལུས་ནང་ཐམས་ཅད་ཧཱུྃ་གིས་གང་བར་བསམ། །དེ་ནས་ཧཱུྃ་འཕྲོས་རི་བྲག་ཐམས་ཅད་འབིག །ཚུར་འདུས་རང་ལུས་གོལ་རྩེ་མེད་པར་འབིག ། མདུན་དུ་ཤིང་བཙུག་སྙིང་ཀའི་ཧཱུྃ་ལས་ནི། །ཧཱུྃ་གི་ཐག་པ་ཤིང་ལ་དཀྲིས་པར་བསམ། །ཤིང་རྩེར་ཧཱུྃ་ཞིག་ལང་ལ་སེམས་པ་གཏོད། །མཐར་ནི་གཅིག་ཐིམ་གཉིས་ཐིམ་སྙིང་ཀར་བསྡུ། །དེ་ནས་ཧཱུྃ་ཞིག་རིགས་དྲུག་གནས་སུ་སོང་། །རིགས་དྲུག་སྡུག་བསྔལ་སྦྱངས་ནས་ཞིང་ལྔར་བཀོད། །རྒྱལ་བ་རིགས་ལྔར་དབང་ཞུས་ལུང་བསྟན་ཐོབ། །ཉན་ཐོས་བྱང་སེམས་ཁྲོ་བོའི་ལྟ་སྟང་གིས། །བལྟས་ནས་རུ་ལུ་སོགས་བརྗོད་བྱ་བ་ཀུན། །དགུ་སྤྲུགས་བཏང་བའི་རིམ་པ་དང་བཅས་པ། །དེ་དག་སྔོན་འགྲོ་དེ་ནས་དངོས་གཞི་ནི། །སེམས་ཀྱི་བྱུང་གནས་བཙལ་ནས་སྟོང་བར་ཤེས། །དེ་ནས་ལུས་ཀྱིས་ཙོག་པུར་བྱས་ནས་སུ། །ལག་པའི་སོར་བསྣོལ་པུས་མོར་འཁྱུད་པ་དང་། །དེ་ལས་ལག་གཉིས་མཆན་ཁུང་རེག་པ་དང་། །ལག་རྒྱབ་ཁུ་ཚུར་ལྐོག་མར་བཏགས་པ་གསུམ། །དེ་གསུམ་དུས་སུ་ལྟ་སྟངས་སྣ་རྩེར་ཕབ། །དེ་དག་སྤྲུལ་སྐུའི་བཞུགས་སྟངས་གཟིགས་སྟང་ངོ་། །ཁ་སྦུབས་ལག་མཐིལ་འགྲམ་པ་སྐྱོར་བ་དང་། །མིག་གཉིས་ཐད་བལྟ་ལོངས་སྤྱོད་རྫོགས་པའོ། །རྐང་བ་མདུན་སྤྲད་དབུས་སུ་ཁུ་ཚུར་བཙུག ། སྒལ་ཚིགས་དྲང་བསྲིང་མིག་ནི་གྱེན་ལ་བལྟ། །ཆོས་ཀྱི་སྐུ་ཡི་བཞུགས་སྟངས་གཟིགས་སྟངས་སོ། །ཀུན་ལ་རླུང་གནད་མཆུ་སོ་མ་རེག་པར། །རླུང་ནི་དལ་བས་ཕྱི་རུ་རིང་བ་ཞིག །ཁ་ནས་གཏོང་ཞིང་མིག་གིས་ཕྱེད་བཙུམ་བལྟ། །ཡུལ་ནི་ཉི་ཟླ་མར་མེ་སྐུ་གསུམ་རྟེན། །དེ་ལ་བརྟེན་པ་ཙིཏྟ་ཤ་ཡི་སྒྲོན། །ཡེ་ཤེས་བཞུགས་གནས་སྙིང་གི་རྩེ་མོ་ནས། །སོར་བཞིའི་མཚམས་ནས་རྩ་བ་གཅིག་པ་ལས། །རྩེ་མོ་གཉིས་ཅན་སྒལ་ཚིགས་བརྒྱུད་པ་སྟེ། །དཀར་འཇམ་རྩ་ཡི་སྒྲོན་མ་དེའི་རྩ་སྣ། །མིག་གི་དཀྱིལ་ཟུག་རྒྱང་ཞགས་ཆུ་ཡི་སྒྲོན། །དེ་ནི་སྣོད་ཀྱི་སྒྲོན་མ་རྣམ་གསུམ་མོ། །དེ་ནས་བཅུད་ཀྱི་སྒྲོན་མ་རྣམ་གསུམ་ནི། །ནམ་མཁར་བལྟས་ན་སྔོ་ནག་ཉི་ཟླ་ལ། །བལྟས་ན་ཁ་དོག་ལྔ་ལྡན་རབ་རིབ་འཆར། །དེ་ནི་རྣམ་དག་དབྱིངས་ཀྱི་སྒྲོན་མའོ། །དེ་ནང་ཐིག་ལེ་ཁ་དོག་ལྔ་ལྡན་པ། །ཀོར་མོའི་གཟུགས་ཏེ་ཐིག་ལེ་སྟོང་སྒྲོན་ནོ། །བར་མཚམས་ལུག་རྒྱུད་ཐིག་ལེ་འབྲེལ་ཞིང་འཁྱོག །ཤེས་རབ་རང་བྱུང་གདེང་ཡིན་སེམས་ཀྱི་དངོས། །སྟོང་གསལ་རིག་པ་ཤེས་རབ་རང་བྱུང་གི །ངོ་བོ་ཡིན་ནོ་ཡུལ་ཀུན་ཤེས་བྱེད་པ། །ཤེས་རབ་རང་བྱུང་སྒྲོན་མའི་རྩལ་ཡིན་ནོ། །མ་ཡེངས་རྣམ་རྟོག་མི་འགྱུ་དེ་ལ་བལྟ། །དེ་ལྟར་བལྟས་ན་སྣང་བཞི་རིམ་གྱིས་རྫོགས། །མཚན་མོའི་ཉམས་ལེན་སྦ་བསྡུ་དག་སྦྱོར་ནི། །ལུས་ནང་དབུ་མའི་ཡར་སྣེ་ཧཾ་ཡིག་དང་། །མར་སྣེ་ཨ་ཐུང་གསལ་བཏབ་ཨ་ལས་མེ། །འབར་བས་སྤྱི་བོའི་ཧཾ་ལ་རེག་པ་ན། །ཧཾ་ལས་བདུད་རྩི་བབས་པས་མེ་གསོས་བྱས། །མེ་ཉིད་ཆེར་མཆེད་ལས་ཉོན་བག་ཆགས་བསྲེགས། །འོད་ལུས་དབུས་སུ་དབུ་མ་གསལ་བཏབ་བྱ། །མེ་འོད་ཀྱིས་ཁྱབ་བསམ་ཞིང་འོད་ལ་ནི། །སེམས་གཏད་པ་ཉིད་འོད་གསལ་སྦ་བའོ། །དེ་ལ་སེང་གེའི་ཉལ་སྟབས་བཞུགས་སྟངས་དགོས། །ཡང་ན་སྣ་རྩེ་ཐིག་ལེ་ཞིག་གསལ་ལ། །ལུས་ཉིད་འོད་ཞུ་དེ་ལ་ཐིམ་པར་བསམ། །སླར་ཡང་ལུས་དབུས་དབུ་མའི་ནང་ཉིད་ཀྱི། སྙིང་ཀ་སྤྱི་བོ་གཉིས་སུ་ཨ་གཉིས་གསལ། །དེ་གཉིས་བར་དུ་ཨ་དཀར་བཅུ་དགུ་ནི། །འོད་ཟེར་ཉི་མ་འབུམ་དང་འདྲ་བར་བསྒོམ། །སྤྱི་བོ་ནས་བཟུང་ཨ་རྣམས་མས་ཐིམ་དུ། །སྙིང་ཀའི་ཨར་བསྡུ་དེ་ལ་ཐམས་ཅད་ཀྱི། །འོད་དང་ཟེར་འབར་བསམ་པས་གཟི་བརྗིད་ཀྱིས། །དབུ་མའི་ནང་ཀུན་རབ་ཏུ་གང་བར་བསམ། །འོད་དེར་ཤེས་པ་གཏད་དེ་གཉིད་པར་བྱ། །དེ་ཡི་འདུག་སྟངས་གླང་ཆེན་ཉལ་སྟབས་སོ། །དེ་ནི་ཤེས་བྱ་བུམ་པར་བསྡུ་བའོ། །ཐོ་རངས་ལངས་ནས་རླུང་རོ་གསུམ་བསལ་ཏེ། །དམར་ནག་དཀར་ནག་ཁམས་ནག་རྣམ་པ་རུ། །དུག་གསུམ་ལས་བྱུང་སྡིག་སྒྲིབ་དག་པར་བསམ། །དེ་ནས་སྙིང་ཀའི་ཨ་ལས་སྨིན་མཚམས་སུ། །ཨ་མཐིང་ཞིག་གསལ་དེ་ལས་འོད་འཕྲོས་པས། །སྣོད་བཅུད་འོད་ཞུ་འོད་མཐིང་རྣམ་པར་གང་། །དེ་ནི་ནམ་མཁའི་འབྱུང་བ་དག་སྦྱོར་རོ། །ཡང་ཅིག་ཨ་དཀར་ཆུ་ཡི་རང་བཞིན་ལ། །འོད་འཕྲོས་སྣོད་བཅུད་འོད་དཀར་རྣམ་པར་ཞུ། །གསུམ་པ་ཨ་སེར་འོད་ཀྱིས་སྣོད་བཅུད་སྦྱངས། །བཞི་པ་ཨ་དམར་འོད་ཀྱིས་སྣོད་བཅུད་སྦྱངས། །ལྔ་པ་ཨ་ལྗང་འོད་ཀྱིས་སྣོད་བཅུད་ཞུ། །འོད་ཟེར་དཀར་སེར་དམར་ལྗང་མཐིང་ནག་གི །འོད་ཀྱི་འཁོར་འདས་ཁྱབ་ནས་བརྡལ་བསམ་ལ། །དེ་ཡི་བཞུགས་སྟངས་དྲང་སྲོང་ཙོག་པུར་གནས། །བར་སྐབས་འཆི་སྦྱངས་དབེན་པའི་གནས་ཉིད་དུ། །སེང་གེ་ཉལ་སྟབས་བྱས་ནས་འཆི་བའི་དུས། །གཉེན་བཤེས་ཀུན་གྱིས་མཐར་བསྐོར་འོ་དོད་འབོད། །བསམ་ཞིང་ང་ནི་ཅི་ལ་ཡང་མི་ཆགས། །ནམ་མཁའ་རྣམ་པར་དག་པའི་དབྱིངས་ཉིད་དུ། །ང་ནི་མྱ་ངན་འདའ་བསམ་མིག་གིས་ནི། །བར་སྣང་ལམ་བྱེད་དབྱིངས་རིག་བསྲེ་བའོ། །ཡང་ན་གླང་ཆེན་ཉལ་སྟབས་བྱས་ནས་སུ། །མངོན་དགའ་དཔལ་ལྡན་སྟུག་པོ་བཀོད་པ་དང་། །བདེ་བ་ཅན་དང་ལས་རབ་རྫོགས་པ་རུ། །རྡོ་རྗེ་སེམས་དཔའ་རིན་འབྱུང་སྣང་མཐང་ཡས། །དོན་གྲུབ་རྣམ་སྣང་བཞུགས་པའི་ཞབས་དྲུང་དུ། །ད་ནི་འདའ་སྙམ་དབྱིངས་ཐིག་མངོན་དུ་བྱ། །སླར་ཡང་རང་བཞིན་སྤྲུལ་པའི་ཞིང་ལྔ་གསལ། །ང་ནི་འཆི་བས་ཅི་ལ་མི་ཆགས་པར། །རང་བཞིན་སྤྲུལ་པའི་ཞིང་ལ་འགྲོ་སྙམ་ནས། །དབྱིངས་ཐིག་མངོན་བྱེད་དྲང་སྲོང་ཙོག་པུར་འདུག །དེ་ལྟར་གནད་བསྣུན་ཉིན་མཚན་ཁ་སྦྱོར་ནས། །ཟླ་བ་དྲུག་ན་ཆོས་ཉིད་མངོན་སུམ་མཐོང་། །རིག་པ་གཅེར་ལྡང་ལུས་ནི་རུས་སྦལ་བཞིན། །ངག་ནི་ལྐུགས་པ་སེམས་ནི་གར་གཏད་སྡོད། །ཉམས་སྣང་གོང་འཕེལ་དབྱིངས་ཐིག་སྐུ་རུ་སྨིན། །ཤེས་ཉམས་སྣང་ཉམས་རྟགས་གསུམ་སྒོ་གསུམ་འཆར། །རིག་པ་ཚད་ཕེབ་ཚོམ་བུ་གཅིག་ཏུ་འཆར། །སྒོ་གསུམ་རྟགས་ཐོབ་འོད་ཟེར་ཚེ་དབང་ཐོབ། །སླར་ཡང་ཆོས་ཟད་བློ་ཟད་དབང་ཡུལ་ཟད། །སྒོ་གསུམ་རྟགས་ཐོན་གདེངས་བཞི་ཐོབ་ནས་ཀྱང་། །སྐྱེ་འཇུག་ལ་དབང་སེམས་ཅན་སུམ་སྟོང་འདྲེན། །སླར་ཡང་ཤེས་སྒྲིབ་ཕྲ་བའི་ཕྲ་བ་ཉིད། །རྡོ་རྗེ་ལྟ་བུའི་ཏིང་འཛིན་གྱིས་བཅོམ་ནས། །གཞོན་ནུ་བུམ་སྐུ་ནང་གསལ་ཆེན་པོ་རུ། །སྐུ་ལྔ་ལྷུན་གྲུབ་ཡེ་ཤེས་གསུམ་དང་ལྡན། །མཛད་པ་གཞན་ངོར་སྐུ་གསུམ་ལུགས་འབྱུང་བ། །ལོ་ནི་གསུམ་བདུན་བཅུ་གཉིས་དབང་ཁྱད་ཀྱིས། །མངོན་རྫོགས་སངས་རྒྱས་འཇའ་ལུས་འོད་སྐུར་འགྲུབ། །རྟེན་ལ་ཁྱད་མེད་རྡོ་རྗེའི་ཚིག་ཆེན་ཡོད། །ཡལ་བར་མ་དོར་སྐལ་བཟང་རིགས་ལྡན་མ། །ཅེས་ཀྱང་ག་གཱས་སོ། །

ཐོད་རྒལ་བསྡུས་དོན་ནི།

ཐོད་རྒལ་བསྡུས་དོན་ནི། གཞི་རང་ལ་སྒྲོན་མ་དྲུག་གནས་པ་སྟེ། དེ་ཡང་སྙིང་ནི་ཙིཏྟ་ཤ་ཡི་སྒྲོན་མ། དེའི་རྩེ་ནས་མིག་དུ་འབྲེལ་བའི་རྩ་ནི་དཀར་འཇམ་རྩའི་སྒྲོན་མ། མིག་གི་རྒྱང་ཞགས་ཆུའི་སྒྲོན་མ། ཐད་ཀའི་བལྟས་ན་འདི་འཛིང་བསྣོལ་དུ་ཡོད་པ་དྲྭ་བ་དྲྭ་ཕྱེད་ཀྱི་རྣམ་པ་དབྱིངས་རྣམ་པར་དག་པའི་སྒྲོན་མ། དེའི་དཀྱིལ་གྱི་ཐིག་ལེ་ཟླུམ་པོ་ནི་སྟོང་བའི་སྒྲོན་མ། དེ་ན་དྲྭ་ཕྱེད་ཀྱི་རྣམ་པ་མུ་ཏིག་བལྟར་ལ་བརྒྱུས་པ་འདྲ་བ་དེ། རྡོ་རྗེ་ལུ་གུ་རྒྱུད་དམ་ཤེས་རབ་རང་བྱུང་གི་སྒྲོན་མ་ཡིན། དེ་དག་ལ་མིག་ཕྱེད་བཙུམ་གྱིས། རྟེན་ཉི་ཟླ་ལ། རླུང་ཁ་ནས་བཏང་། འདུག་སྟངས་དྲང་སྲོང་གིས་བཞག་པ་ནི་གནད་དོ། །ཁྱད་པར་དུ་ཡང་ནུབ་དུས་སུ་ཐིག་ལེ་སྟོང་སྒྲོན་ཞིག་སྙིང་ནང་དུ་དམིགས་ནས་འཕོ་ལུང་གི། དཔག་ཚད་ལྔ་བརྒྱའི་སྟེང་གི་ཕྱོགས་བཅུར་སྤྲུལ་པའི་སྐུའི་ཞིང་ན་བཞུགས་པའི་གཙོ་བོའི་ཐུགས་ཀར་བསྟིམས། སླར་ཡང་གཙོ་བོ་འོད་ཞུ་ཐིག་ལེར་གྱུར་བ་མར་བྱུང་སྟེ་བདག་གི་སྙིང་ཀར་གཏིམ་པས་རྡོ་རྗེ་ལྟ་བུའི་ཚེ་ལ་དབང་བར་བསམ་པས་འོད་ཟེར་གྱིས་ལུས་ནང་ཐམས་ཅད་གང་བར་བསམ་མོ། །བར་སྐབས་འཆི་སྦྱངས་སུ་ང་ནི་འཆི་བའི་དུས་ལ་བབས་པས་ཅིས་ཀྱང་མི་ཕན་ཅི་ལའང་མི་ཆགས་བསམ་ནས་རྣམ་ཤེས་བསྲེ་འཕོ་བྱ་ཞིང་དབྱིངས་ཐིག་གི་ངང་དུ་བདག་འཕོའོ་སྙམ་དུ་འདུན་པ་གཏད་པ་དང་ཆབས་ཅིག་མཉམ་པར་ཡང་ཡང་བཞག་གོ །དེས་བར་དོ་གཉིས་པ་ལ་གྲོལ་བ་ཐོབ་པར་འགྱུར་རོ། །ཞེས་ཀྱང་འདི་འདྲ་དགོས་ཞེས་བསྐུལ་བས་འཕྲིན་ཆོས་ཀྱི་ངོར་ག་གཱས་སོ། །

ཐོད་རྒལ་གྱི་གནད་དྲུག

ཐོད་རྒལ་གྱི་གནད་དྲུག་ནི། ལུས་གནད་སྐུ་གསུམ་གྱི་བཞུགས་སྟངས་ལ་གནས་པར་བྱ་བ་དང་། ངག་གནད་བརྗོད་མེད་ཀྱི་འཁོར་ལོ་ལ་གནས་པར་བྱ་བ་དང་། སེམས་གནད་གཟུང་འཛིན་གྱི་རྣམ་རྟོག་དང་བྲལ་བའི་ངང་ནས་དབྱིངས་ཐིག་ལ་གཏད་པ་དང་གསུམ་མོ། །ཡང་སྒོ་གནད་གཟིགས་སྟངས་གསུམ་ལས་མི་གཡོ་བས། ཡུལ་གནད་ཉི་ཟླ་མར་མེ་མན་ཤེལ་ནམ་མཁའ་ལ་གཏད་པ་དང་། རླུང་གནད་མཆུ་སོ་ཅུང་ཟད་མ་རེག་པའི་བར་ནས་འབྱུང་འཇུག་བྱེད་པ་དང་དྲུག་གོ །དེ་ལྟར་གནད་དྲུག་ལས་མ་འདས་པར་ཉམས་སུ་བླངས་བྱའི་རྩ་བ་སྒྲོན་མ་དྲུག་སྟེ། སྙིང་ཙིཏྟ་རིན་པོ་ཆེ་ཤའི་སྒྲོན་མ་ཡེ་ཤེས་གནས་པའི་རྩ་བའི་གནས་སོ། །དེའི་ནང་ན་གསེར་གྱི་རྩ་ཆེན་ཡོད་པ་དང་། དེའི་ཡར་སྣ་དབུས་སྟོང་པ་རང་གྲོལ། གཡས་དར་དཀར་སྣལ་མ། གཡོན་ཕྲ་ལ་འཁྲིལ། གསེར་གྱི་རྩ་ཆེན་མར་དུ་ ༼ སྣ་དཔྱད། ༽ སྲོག་རྩ་ལ་ཟུག་པ་རྣམས་ནི་ཡེ་ཤེས་ཀྱི་རང་མདངས་སྐུ་འོད་ཡེ་ཤེས་རྒྱུ་བའི་ལམ་ཡིན་པས་དཀར་འཇམ་རྩའི་སྒྲོན་མ། དར་དཀར་དང་ཕྲ་ལ་འཁྲིལ་གཉིས་ཀྱི་རྩ་སྣ་ཡེ་ཤེས་འཆར་བའི་སྒོ་རྒྱང་ཞགས་ཆུ་ཡི་སྒྲོན་མ་སྟེ་སྣོད་ཀྱི་སྒྲོན་མ་གསུམ། དབྱིངས་རྣམ་དག་གི་སྒྲོན་མ་འཇའ་ཚོན་སྣ་ལྔའི་རང་བཞིན་གྱེན་བསྒྲེངས་དང་རྩིབ་ཤར་དུ་སྣང་བ་དང་། ཐིག་ལེ་སྟོང་པའི་སྒྲོན་མ་ཆུ་རིས་འོད་ལྔའི་མུ་ཁྱུད་དང་། ཤེས་རབ་རང་བྱུང་ངམ་རྡོ་རྗེ་ལུ་གུ་རྒྱུད་ཤེལ་ཕྲེང་ངམ་ལྕགས་ཐག་བསྐྱངས་བ་ལྟ་བུ་གསུམ་ནི་བཅུད་ཀྱི་སྒྲོན་མ་གསུམ་ཞེས་བྱའོ། །དེ་ལྟ་བུའི་བཅུད་ཀྱི་སྒྲོན་མ་ཡུལ་དུ་སྣང་བ་ལ་མ་ཡེངས་ཤིང་རྣམ་རྟོག་མེད་པའི་ངང་ནས་བལྟས་པས་སངས་རྒྱས་ཐམས་ཅད་ཀྱི་སྐུ་གསུང་ཐུགས་དུས་གཅིག་ཏུ་མཐོང་བ་ཡིན་པས། འདིས་མྱུར་དུ་སངས་རྒྱས་ཀྱི་གོ་འཕང་ཐོབ་པར་འགྱུར་ཞིང་། འདི་ལས་ལྷག་པའི་གདམས་ངག་ནི་སངས་རྒྱས་སྟོང་གིས་བཙལ་ཀྱང་རྙེད་གནས་མེད་དོ། །ཐོད་རྒལ་གནད་བསྡུས་ཀུན་བཟང་བསྟན་འཛིན་ངོར་ག་གཱས་སོ། །

འཕོ་བ་ཡེ་ཤེས་གསང་ལམ་བར་དོ་ཟང་ཐལ།

ཡེ་ཤེས་སྒྱུ་འཕྲུལ་དྲྭ་བ་ལས༔ འཕོ་བ་ཡེ་ཤེས་གསང་ལམ་བར་དོ་ཟང་ཐལ་ཞེས་བྱ་བ་བཞུགས་སོ༔

ན་མོ་གུ་རུ་པདྨ་ཀཱ་ར་ཡེ༔ རྣལ་འབྱོར་ལྡན་དང་མི་ལྡན་ཡང་༔ གལ་ཏེ་སུན་མས་སླེབ་པའི་ཚེ༔ ཐབས་མཆོག་འདི་འདྲ་མ་ལྡན་ན༔ གོ་མེད་གཡུལ་དུ་ཞུགས་པ་འདྲ༔ དེ་ཕྱིར་མ་བསྒོམ་ཆོས་ལྔའི་རྩེ༔ མྱུར་ལམ་འཕོ་བའི་གདམས་པ་ནི༔ ཡེ་ཤེས་གསང་བའི་ལམ་བཟང་པོ༔ འདི་ཡོད་སངས་རྒྱས་ལག་བཅང་ཡིན༔ ས་མ་ཡཱ༔ འདི་ལ་སྦྱོར་བ་སྔོན་འགྲོ་དང་༔ དངོས་གཞི་རྗེས་ཀྱི་རིམ་པ་ལས༔ དང་པོ་སྦྱོར་བའི་རིམ་པ་ནི༔ སྲོག་འདོན་ཡར་མར་མཆོད་སྦྱིན་དང་༔ འཆི་སྦྱང་ཆགས་ཞེན་འཁྲི་བ་བཅད༔ བླ་མ་མཆོད་ཅིང་དབང་བཞི་བླངས༔ མྱུར་ལམ་འགྲུབ་ཕྱིར་གསོལ་བ་གདབས༔ དེ་ནས་དབེན་པའི་གནས་སུ་བསྒོམས༔ དེ་ལ་འདིར་བར་དོ་དྲུག་གི་གདམས་ངག་གང་དང་གང་བསྒོམས་ཀྱང་༔ ལམ་མཐར་མ་ཕྱིནཔར་དལ་ཁོམ་རེ་འགའི་ཆོས་ལ་བརྩིས་པས་བློ་གཏད་མེད་ན༔ ཇི་སྐད་དུ༔ ལམ་སྦྱང་བ་དམན་ན་འཕོ་བས་བསུ༔ ཞེས་པ་ལྟར་འཕོ་བས་སྟོངས་འདེབས་དགོས་ཏེ༔

དེ་ལ་དང་པོ་སྦྱང་བ་དང་༔ ལས་ལ་སྦྱར་བའམ་དངོས་གྲུབ་བླང་བ་གཉིས་ལས༔ དང་པོ་ལ་སྔོན་འགྲོ་དངོས་གཞི་རྗེས་གསུམ་གྱི་དང་པོ༔ གནས་དབེན་པར་ལུས་འདུག་སྟངས་དྲང་པོར་བསྲེང་༔ རྐང་མཐིལ་གཉིས་ཀྱིས་བཤང་བ་དགག༔ ལག་གཉིས་ལྟག་པ་སྦྱོར༔ འཆི་བའི་འདུ་ཤེས་བསྐྱེད་ཅིང་༔ ད་རེས་ཀྱི་འཆི་བ་འདི་ལ་བརྟེན་ནས་འཆི་མེད་གཉུག་མ་དོན་གྱི་ཆོས་སྐུ་འགྲུབ་པར་བྱས་ཏེ༔ མྱུར་དུ་སེམས་ཅན་ཐམས་ཅད་རྫོགས་པའི་སངས་རྒྱས་ཀྱི་ས་ལ་འགོད་པར་བྱ་སྙམ་པའི་སེམས་བསྐྱེད་དོ༔

གཉིས་པ་དངོས་གཞི་ནི༔ དེ་ནས་སྒོ་དགག་པའི་ཕྱིར་དུ༔ རང་གི་ལུས་བདེ་ཆེན་ཀུན་ཏུ་བཟང་མོ་སྐུ་མདོག་དཀར་མོ་ཕྱག་གཉིས་པདྨའི་མཉམ་གཞག་མཛད་ཅིང་༔ ཞབས་རྡོ་རྗེའི་སྐྱིལ་ཀྲུང་དུ་བཞུགས་པར་གསལ༔ དེའི་སྙིང་ཀ་ནས་བཟུང་སྟེ་སྤྱི་བོའི་བར་དུ༔ རྩ་དབུ་མ་ཕྱི་དཀར་ལ་ནང་དམར་བ༔ བར་མཐིང་ཤུན་ལྟར་སྔོ་བ༔ མདའ་ལྟར་དྲང་བ༔ མར་མེ་ལྟར་གསལ་བ༔ པདྨའི་འདབ་མ་ལྟར་སྲབ་པ་སྟེ་མཚན་ཉིད་བཞི་དང་ལྡན་པ་གཅིག་གསལ་བ་ནི་སྤྱིར་ཀུན་ལ་དགོས༔

ཁྱད་པར་གསང་ཤེར་གྱིས་འཕོ་བ་སྦྱང་བས་ནི༔ མར་སྣ་ལྟེ་འོག་ཏུ་ཟུག་པའི་གཡས་སུ་རོ་མ་དཀར་མོ༔ གཡོན་དུ་རྐྱང་མ་དམར་པོ༔ དབུ་མའི་བཞི་ཆ་ཙམ་པ༔ ཁྲག་དང་ཐིག་ལེས་མ་གོས་པ༔ དྲང་སྲབ་སྣུམ་གསལ་གྱི་མཚན་ཉིད་བཞི་དང་ལྡན་པ་གཉིས་ཀྱང་གསལ་བར་བྱ༔ དེ་ནས་སྙིང་ཀའི་ཐད་དུ་རླུང་སེམས་རྣམ་པར་ཤེས་པའི་ངོ་བོ་ཐིག་ལེ་ལྔ་ལྡན་གྱི་གོང་བུ་ཡི་གེ་ཨེ་ཡིས་མཚན་པ་ཅན་ཞིག་གསལ་བ་འཕར་འདར་ལིང་ལིང་བྱེད་པར་བསྒོམ་མོ༔ དེ་ནས་གང་ཟག་གི་བློ་ཁྱད་ཀྱིས་འཕོ་བ་རྣམ་པ་ལྔ་ལས་ཐོག་མར་གང་ཟག་ལྷའི་རྣལ་འབྱོར་ལ་གསལ་སྣང་ཐོབ་ཅིང་བརྩོན་པས་ནི༔ རང་གི་སྤྱི་བོར་ཞི་བ་བཞི་བཅུའམ༔ ཁྲག་འཐུང་ཁྲོ་བོའི་ལྷ་ཚོགས་རྒྱས་པར་རམ༔ ཡང་ན་རིགས་གཅིག་ཀུན་ཏུ་བཟང་པོ་མཐིང་ཀ་རྡོ་རྗེའི་མཉམ་བཞག་དང་སྐྱིལ་ཀྲུང་གིས་གནས་པའི་གཙུག་ཏོར་ཁོང་སྟོང་གི་ནང་དུ་ཆེ་མཆོག་ཡབ་ཡུམ་སྐུ་མདོག་མཐིང་ནག༔ ཞལ་ཕྱག་ལས་གཞུང་ལྟར་བསྐྱེད་ནུས་ན་རབ༔ མིན་ཡང་རིགས་གཅིག་ཀུན་བཟང་གི་དབུ་ལ་ཁྲོ་བོའི༔ སྙིང་ཁར་ཞི་བའི༔ མགྲིན་པར་རིག་འཛིན་གྱི༔ ལྟེ་བར་མཁའ་འགྲོའི་དཀྱིལ་འཁོར་ཐམས་ཅད་ཡོངས་སུ་རྫོགས་པར་མོས་བསྒོམས་བྱས་པའི་སྐུ་ལས་འོད་འཕྲོས་པས༔ སྟོང་གསུམ་ཡུངས་འབྲུར་འཇུག་ཚུལ་གྱིས༔ དབྱིངས་ནས་རྒྱལ་བའི་དཀྱིལ་འཁོར་ཐམས་ཅད་སྤྱན་དྲངས་ཏེ༔ ཡི་དམ་གྱི་ལྷ་ལ་བསྟིམ་པས༔ དཀྱིལ་འཁོར་ཀུན་འདུས་ཀྱི་ངོ་བོར་ངེས་ཤེས་བསྐྱེད༔ དེ་ནས་དེའི་ཐུགས་ཀ་ནས་འོད་ཀྱི་ཐིག་ལེ་དགུས༔ དམྱལ་བར་སྐྱེ་བའི་སྒོ་བཤང་ལམ༔ དུད་འགྲོ་གཅི་ལམ༔ འདོད་ལྷའི་ལྟེ་བ༔ ཡི་དྭགས་ཀྱི་ཁ༔ གནོད་སྦྱིན་གྱི་སྣ་བུག༔ མིའི་མིག་གཡས་གཡོན༔ ལྷ་མིན་གྱི་རྣ་བ༔ གཟུགས་ཁམས་མཛོད་སྤུ༔ གཟུགས་མེད་ཀྱི་སྤྱི་བོའི་གཙུག་གམ་འཚོག་མ་དགག་པར་བསམ༔ དེ་ནས་ལུས་ཀྱི་གནད་ལག་པ་འཁྱུད་པ་དྲག་ཏུ་བསྡམས༔ ལུས་སྤྱི་འཆུན་བཙལ་དྲག་ཏུ་བསྡམས༔ འོག་སྒོ་གྱེན་དུ་འཐེན༔ རྒྱ་མཚོ་ཧཾ་ལ་ཕྱོགས༔ ནེའུ་ཚོ་ཡ་རྐན་ལ་སྦྱར༔ འཕོ་བ་ཐེབ་པར་གསོལ་འདེབས་དང་གདུང་ཚིག་བརྗོད༔ སེམས་གནད་ཐིག་ལེ་དང་ཡི་གེ་ལ་གཅིག་ཏུ་དྲིལ་ནས་སྟོང་འདྲེན་ཧི་ཨེ་ཡི་སྒྲས་ཡར་ལ་རླུང་དྲངས་ཤིང་༔ དེའི་རྣམ་ཤེས་བཏེག་ནས་སྤྱི་བོར་ཐོན་ནས་ཧི་གཅིག་གིས་ཚངས་པའི་སྒོ་བསལ་བ་དང་མཉམ་དུ༔ སེམས་ཀྱི་རྟེན་དང་བརྟེན་པ་ ༼ པདྨ་ཐིག་ལེ་ཡི་གེ་དང་བཅས་མཆན། ༽ གསུམ་ག་སྤྱི་བོའི་ཡི་དམ་གྱི་ཐུགས་ཀར་འཕོས་པས་དབྱེར་མེད་རོ་གཅིག་ཏུ་གྱུར་པར་བསམ་ལ་ཡི་དམ་འོད་གསལ་དུ་གཞུགས༔ འོད་གསལ་ལས་སླར་ཡང་ཟུང་འཇུག་གི་ལྷ་སྐུར་བཞེངས་པར་མོས་ལ༔ ཀ་ཧིག་ཉེར་གཅིག་སོགས་བརྗོད༔ དེ་ནི་འདའ་ཀ་འོད་ཀྱི་གོང་བུའི་འཕོ་བ་ཡང་ཟེར་རོ༔ ཡང་གཞན་ཐམས་ཅད་སྔར་དང་འདྲ་བ་ལས་ཧི་ཨེ་ཡི་སྒྲ་ཉེར་གཅིག་གིས་སྤྱི་བོར་དྲངས་ལ༔ བླ་མའི་ཐུགས་ཀའི་འོད་ཀྱི་སྦུ་གུ་འཇའ་ཚོན་ལྟ་བུའི་སུན་མའི་ལམ་བརྒྱུད་དེ༔ ཡི་དམ་གྱི་སྙིང་པོའི་ཨཱཿཡི་རྣམ་པ་རེ་རྣམ་ཤེས་ཀྱི་ཐིག་ལེ་ལས་ཆད་ནས་བླ་མའི་ཐུགས་ཀར་འཕོ་བའི་འོད་ཟེར་འཛིང་བསྣོལ་བར་མེད་ཀྱིས༔ ཡར་འཕང་ཞིང་མར་འོད་གསལ་དུ་འཇུག་པའི་ཚུལ་གྱིས་ཅི་ཡང་མི་བསམ་པར་རྣམ་ཤེས་ལྡོག་ནས་ཐིག་ལེ་ལ་སེམས་འཛིན༔ ཡང་ཐིག་ལེ་ལས་ཟུང་འཇུག་གི་ལྷར་སྐུ་གསུང་གསང་སྔགས་ཀྱི་རང་སྒྲ་དང་བཅས་པའི་ཨཱཿཚྭ་ཚྭ་སྤྲོ་བ་ནི༔ ཟུང་འཇུག་ལས་ལྷ་སྐུར་ལྡང་བའི་ཚུལ་ཡིན་ཏེ༔ སྒྲའི་འཕོ་བ་ཟེར་རོ༔ དེ་ནི་སྐྱེ་གནས་བར་དོའི་འཕོ་བའོ༔

གཉིས་པ་རྫོགས་རིམ་གསང་ཤེར་གྱི་ལམ་ལ་གོམས་པ་ཆེ་བས་ནི༔ རོ་རྐྱང་གི་ལམ་གཉིས་ཀ་ལི་དང་ཨ་དཱི་དཀར་དམར་གྱིས་གང་བར་མོས་ལ༔ རང་ཉིད་དམ་ཚིག་སྒྲོལ་མ་ལྗང་གུ་གསལ་ལ༔ དེའི་ཐུགས་ཀ་ནས་འོད་ཟེར་འཕྲོས་པས་འཁོར་འདས་ཐམས་ཅད་སྐུ་ལ་བསྡུས༔ སྐུ་འོད་དུ་ཞུ་ནས་རླུང་ལྗང་གུས་ནམ་མཁའ་གང་བར་མོས་ལ༔ གཞན་སྔ་མ་དང་འདྲ་བ་ལས་སེམས་ཉིད་ཐིག་ལེ་ཨེ་མཚན་ཅན་གྱི་རྣམ་པ་རླུང་བཟུང་བས་ཨ་ལི་ཀ་ལིའི་ཕྲེང་བ་རྔུབ་པའི་རླུང་གིས་དེད་ནས་ཀ་ཧིཀ་བདུན་གྱིས་རིགས་བདག་དོན་གྲུབ་དུ་གསལ་བའི་ཐུགས་ཀར་བསྟིམ་པ་དང་༔ མར་འོང་དུས་རླུང་ཁ་དོག་ལྗང་གུའི་རྣམ་པར་བྱུང་ནས་དབུ་མ་ལ་ཞུགས༔ སྙིང་ཀའི་སྟོང་སྒྲོན་ལ་བསྟིམ་པ་དང་༔ ཕྱི་ནས་རླུང་རྔུབ་པ་ཅུང་ཟད་མནན་ཏེ༔ འོག་རླུང་བཀུམ་ནས་ཁ་སྦྱོར་བས་རྟོག་མེད་དཔེའི་འོད་གསལ་གསལ་སྟོང་ཆེན་པོ་ཤར་བའི་ཉམས་བསྐྱང་ལ་འདུན་པས་འདི་སྐད་དུ༔ ང་འཆི་བར་འདུག་པས་འོད་གསལ་འདི་མེ་ལོང་ཡེ་ཤེས་ཀྱི་ངོ་བོ་དྲོད་སྣང་ཐོབ་པའི་ཡེ་ཤེས་ཡིན་པས༔ འདི་ལ་འཕོ་བར་བྱ་སྙམ་དུ་ཅུང་ཞིག་མཉམ་པར་བཞག༔ ཡང་སྔར་ལྟར་སྦྱང་ངོ་༔ ཡང་ཤེར་དབང་ཐིག་ལེའི་རྣལ་འབྱོར་ལ་གོམས་པས་ནི་སྔར་ལྟར་ལས༔ རིགས་བདག་སྣང་མཐའ་དང་༔ རང་ཉིད་གོས་དཀར་དུ་བསྒྱུར༔ ཡི་གེའི་ཕྲེང་བ་ཐིག་ལེ་དཀར་དམར་འོད་འབར་བ་རྒྱུན་དུ་བསྒོམ་པ་དང་༔ རྣམ་ཤེས་འཕོ་བའི་བར་སྔར་ལྟར་ལ་རྡོ་རྗེ་མཛུབ་བར་དུ་བསྒྲེང་ནས་ཅུང་ཟད་འཕུར་ཞིང་རླུང་བཟུང་བས་བདེ་སྟོང་ལ་བདེ་གསལ་རྣམ་པར་མི་རྟོག་པ་རྩེ་མོ་མཆེད་པའི་ཡེ་ཤེས་འཛིན་མེད་དེ་ཤར་བར་འདུག་པས༔ སོ་སོར་རྟོགས་པའི་ངོ་བོ་འདི་ལ་འཕོ་བར་བྱ་སྙམ་དུ་ཅུང་ཟད་མཉམ་པར་བཞག་གོ༔ དེ་ནི་བསམ་གཏན་གྱི་བར་དོའི་འཕོ་བ་དང་༔ འདའ་ཀ་དཔེའི་ཡེ་ཤེས་དང་༔ བདེ་སྟོང་རྡོ་རྗེ་སེམས་དཔའ་འབྱོན་པ་ཞེས་བྱ་བ་སྟེ༔ གོང་མ་དང་གཉིས་པོ་བསྐྱེད་རྫོགས་ཟུང་འཇུག་གི་འཕོ་བ་ཞེས་བྱ་བའང་ཡིན་ནོ༔

གསུམ་པ་འཆི་ཀའི་བར་དོའི་འཕོ་བ་ནི༔ གང་ཟག་བསྐྱེད་རྫོགས་སོགས་གང་ཡང་མེད་པས༔ རང་ལུས་རྡོ་རྗེ་རྣལ་འབྱོར་མ་དང་༔ རིགས་བདག་སྣང་མཐའ་རུ་གསལ་ཞིང་༔ འདུ་ཤེས་དྲུག་ལྡན་གྱི་ངང་ནས་འཕོ་སྟེ༔ ཞིང་ཁམས་བདེ་བ་ཅན་ལ་གནས་ཀྱི༔ རྩ་དབུ་མ་ལ་ལམ་གྱིས༔ རང་གི་རྣམ་ཤེས་ལ་མགྲོན་པོའི༔ རྒྱལ་སྲས་སེམས་དཔའ་ལ་བསུ་མའི༔ མགོན་པོ་མཆོག་ལ་གནས་པོ༔ རྩ་བའི་བླ་མ་སྐྱེལ་མའི་འདུ་ཤེས་བསྐྱེད་ནས༔ ཡང་རླུང་ལ་གཞུ༔ ཐིག་ལེ་ལ་མདའ༔ ཧིག་གི་སྒྲ་ལ་སྐྱེན་པོའི་རྩོལ་བའི་འདུ་ཤེས་བསྐྱེད་ལ་འཕོ་བ་ནི་སྤྱི་ལྟར་དང་༔ ཐམས་ཅད་བདེ་ཆེན་ལམ་བཟང་གིས་སྦྱང་ངོ་༔

ཆོས་ཉིད་ཀྱི་བར་དོའི་འཕོ་བ་ནི༔ གནད་ཀྱི་དོན་གྱི་འཕོ་བ་སྟེ༔ ཁྲེགས་ཆོད་བསྒོམ་པའི་རྣལ་འབྱོར་ཡིན་ན༔ རང་གི་སྤྱི་བོར་བླ་མ་ཀུན་བཟུང་ཡབ་ཡུམ་དུ་གསལ་ལ༔ ལུས་རླུང་རིག་པའི་གནད་སྔར་བཞིན་ལ༔ རྣམ་ཤེས་ཐིག་ལེ་སྟོང་སྒྲོན་གྱི་དབུས་སུ་རྡོ་རྗེ་ཧཱུྃ་མཚན་ཅན་རླུང་ཐིག་གིས་འདེགས་པས༔ སྤྱི་བོའི་བླ་མའི་ཐུགས་ཀར་ཧིག་གིས་བརྒྱང་ལ༔ སླར་ཡང་སྔར་ངོ་སྤྲད་པའི་ངང་ལ་བཞག་ནས༔ འདི་འཆི་སྲིད་གཞིའི་འོད་གསལ་དངོས་ཡིན་པས༔ བདག་འདིར་འཕོ་བར་བྱ་སྙམ་དུ་འདའ་ཀ་ཕྱག་རྒྱ་ཆེན་པོ་དོན་གྱི་འོད་གསལ་རིག་སྟོང་དབྱེར་མེད་ཀྱི་ཉམས་སྐྱོང་བ་ནི་ལྟ་བ་ལ་སྟོངས་འདེབས་པས་སྟོང་པ་ཆོས་སྐུའི་འཕོ་བ་ཡིན་ལ༔

ཡང་ཐོད་རྒལ་བསྒོམ་པའི་རྣལ་འབྱོར་པ་རྣམས་ཀྱིས་ནི༔ སྔོན་འགྲོ་སྔར་བཞིན་ལ༔ དངོས་གཞིའི་དུས་སུ་རང་ལུས་འོད་ཀྱི་རང་བཞིན་བླ་མའི་སྐུར་བསྒོམ༔ མདུན་དུ་མར་མེའམ་མན་ཤེལ་ལམ༔ ཉི་ཟླའི་དཀྱིལ་འཁོར་ལ་བརྟེན་ནས་སྙིང་རིན་པོ་ཆེ་མཆོང་གུར་ཕུབ་པ་ལྟ་བུའི་དབུས་སུ༔ གསེར་གྱི་སྡོང་པོ་ལྟ་བུའི་རྩ་སོར་བཞི་པ༔ ཡར་རྩེ་གཉིས་སུ་གྱེས་པ༔ དྭངས་མའི་རྩ་དབུ་མ་གཡས་སུ་དཀར་པོ༔ གཡོན་དུ་ལྗང་གུ་སྦུབས་སྟོང་ལ༔ ཕྱི་ནང་ཟང་ཐལ་སྒྲིབ་གཡོག་མེད་པར་མཐོང་བས༔ ཇི་ལྟ་ཇི་སྙེད་ཀྱི་ལམ་གཉིས་ནས༔ བླ་མའི་ཐམས་ཅད་མཁྱེན་པའི་ཡེ་ཤེས་ཞི་ཁྲོ་དམ་པ་རིགས་བརྒྱའི་སྣང་ཆ་དང་༔ ཡེ་ཤེས་སུམ་བརྩེགས་སུ་གཞུགས་པ་ལ་བལྟ་བར་འདོད་པའི་དད་གུས་ཀྱི་ངང་ནས་དབྱིངས་ཐིག་མངོན་དུ་བྱས་ལ༔ འདི་ལྟར་ལ༔ ཨ་ཡེ་ངོ་མཚར་རྨད་དུ་བྱུང་བ༔ རྫོགས་ལྡན་ཆེན་པོའི་བར་དོ་དེ་ང་ལ་ཤར་འདུག་གི༔ འདིའི་ངང་དུ་འཕོ་བར་བྱ་སྟེ༔ གཞི་སྣང་ཡེ་ཤེས་ཀྱི་རང་མདངས༔ ཆོས་སྐུ་གཞིར་ལྡན་གྱི་དགོངས་པ༔ སངས་རྒྱས་ཐམས་ཅད་ཀྱི་ཐུགས་ཀྱི་གསང་བ༔ ཟུང་འཇུག་ཚོམ་བུའི་ཚུལ་དུ་སྣང་བ༔ ང་ལ་གདུལ་བྱར་ལམ་སྣང་དུ༔ སུན་མའི་མཚན་དཔེར་ཤར་བ་ང་རེ་དགའ་སྙམ་ནས་རྩེ་གཅིག་མཉམ་པར་འཇོག་ཅིང་༔ དེ་ལ་འཕོ་བར་ནུས་པའི་གསོལ་འདེབས་སུ༔ པདྨའི་ཕྲེང་བ་ལ་སོགས་པ་བརྗོད་ལ༔ བུ་ལམ་གྱི་ཡེ་ཤེས་རིག་བྱེད་རྩལ་གྱི་ཤེས་རབ༔ མ་དོན་གྱི་རང་ངོ་ཟུང་འཇུག་ཆེན་པོ་ལ་མཉམ་པ་ཉིད་དུ་དག་མཉམ་ཀློང་ཤར་ཀློང་ཐིམ་ཆེན་པོའི་ལྟ་བའི་ངང་ཚུགས་མ་ཤོར་བར་བཞག་པ་ནི་ཤིན་ཏུ་རྩེ་མོའི་རྣལ་འབྱོར་ཏེ༔ ཆོས་ཉིད་སྣང་སྟོང་ངོ་མཉམ་གྱི་འཕོ་བ་སྐུ་དང་ཡེ་ཤེས་སུ་འཇུག་པ་ཞེས་བྱའོ༔ དེ་ཡང་ལྟ་བ་ལྷུན་གྲུབ་དང་གཅིག་པུས་ཡེ་ཤེས་རྒྱས་འདེབས་ཡིན་པའི་ཆོས་ཉིད་བར་དོའི་འཕོ་བ་ཐལ་འགྱུར་གྱི་དགོངས་པའོ༔

དེ་ནས་སྲིད་པ་བར་དོའི་འཕོ་བ་ནི༔ ད་ལྟ་ཆོས་ཉིད་མངོན་སུམ་མ་མཐོང་༔ ཁྲེགས་ཐོད་ཀྱི་གདམས་ངག་ཐོབ་པ་དག་གིས་ཉམས་སུ་བླངས་པར་བྱ་བ་སྟེ༔ ནུབ་ཐུན་གྱི་མཐར༔ རང་གི་དཔག་ཚད་ལྔ་བརྒྱའི་སྟེང་ཕྱོགས་སུ༔ ཕྱོགས་བཞི་དབུས་དང་༔ མཚམས་བརྒྱད་སྟེང་འོག་དུ་རང་བཞིན་སྤྲུལ་སྐུའི་ཞིང་ཁམས་བཅུ་གསལ་གདབ་ནུས་ན་རབ༔ མིན་ཡང་འདི་ལྟར༔ ཞིང་ཁམས་རྣམས་ཀྱི་གཙོ་བོ་མངོན་དགའ༔ དཔལ་ལྡན༔ བདེ་ཆེན༔ ལས་རབ༔ མེ་རི་འབར་བ་རྣམས༔ དཀར་སེར་དམར་ལྗང་༔ ཤེལ་གསེར་རཱ་ག་ཨནྡྷ་སྙིལ་བཞི་དང་༔ བཻཌཱུལ་ལམ་ཁྲོ་བོའི་ཞིང་ཁམས་སུ༔ བཅོམ་ལྡན་འདས་རིགས་ལྔ་གཞོན་ནུ་དཔའ་བོ་སྟོབས་ལྡན་རྣམས་ལ༔ རྫོགས་ཆེན་སྟོན་པ་བཅུ་གཉིས་ལ་སོགས་པའི་འཁོར་གྱིས་བསྐོར་བ་དག་གི་དྲུང་དུ༔ རང་ལུས་འོད་ཀྱི་ཁང་པ༔ དབུ་མ་སྟོང་པ་རང་གྲོལ་ཐིག་ལེ་དགུ་དགུས་བརྒྱན་པར༔ ཧིག་གིས་སྙིང་ཀའི་དབུས་སུ་སྟོང་སྒྲོན་གྱི་ནང་༔ སྐུ་བླ་མ་རྡོ་རྗེ་འཛིན་པའི་ཆ་ལུགས་སམ་རྡོ་རྗེ་ཧཱུྃ་མཚན་གྱིས་བརྒྱང་སྟེ༔ རང་སྐལ་གྱི་འཕོ་བ་ཟུར་བཀོད་ལྟར་བཏབ་པས༔ བཅོམ་ལྡན་འདས་རྣམས་ཀྱི་ཐུགས་ཀར་ཐིམ་ཞིང་༔ སངས་རྒྱས་སྔ་མ་རྣམས་ཤར་ནས་རིམ་བཞིན་ཕྱི་མ་ཕྱི་མ་ལ་བསྡུ༔ མཐར་སྟེང་ཕྱོགས་ཀྱི་ཁྲོ་བོ་ལ་ཐིམ་ཞིང་༔ དེ་མི་དམིགས་པར་མཉམ་པར་བཞག་གོ༔ འདི་ནི་རང་བཞིན་རྫོགས་པ་ཆེན་པོའི་རྒྱུད་འབུམ་ཕྲག་དྲུག་ཅུ་རྩ་བཞིའི་ཡང་སྙིང་དབང་གསལ་བར་སྟོན་པ་རྫོགས་པ་རང་བྱུང་གི་དགོངས་པ་རྨད་དུ་བྱུང་བ་ཡིན་པས་མི་གྲོལ་མི་སྲིད་དོ༔ ཡང་ན་ཉི་ཟླ་ཁ་སྦྱོར་གྱི་རིགས་དྲུག་གནས་སྦྱོང་གི་ཁྲུས་ཡིག་དག་གིས་སྡིག་སྒྲིབ་བག་ཆགས་ས་བོན་དང་བཅས་པ་སྦྱངས་ནས་ཡི་གེ་ཨཱ་ཡིས་སྦྱོར་བས་རང་འཕོ་བ་ནི་རང་བཞིན་སྤྲུལ་སྐུའི་ཞིང་ལྔ་གསལ་ལ༔ ལུས་དབུས་ཤེལ་གྱི་སྦུ་གུའི་དབུ་མའི་སྙིང་ཀར་རྣམ་ཤེས་ཐིག་ལེ་སྟོང་སྒྲོན་གྱི་དབུས་སུ་ཨཱཿཡིག་དཀར་པོ་གསལ་ལ༔ རོ་རྐྱང་ཨཱཿཡིག་གི་ཕྲེང་བས་རླིད་བིར་གང་བ་ལ༔ རྔུབ་པའི་རླུང་གིས་ནང་དུ་དེད་པས་སྤྱི་བོ་ནས་རྒྱང་གིས་ཐོན་ཏེ་བསྲེ་འཕོ་སྔར་ལྟར་བྱའོ༔ དེ་དག་ནི་བར་དོ་ལྔ་ཡི་འཕོ་བ་ཡིན་ལ༔ རྨི་ལམ་འོད་གསལ་གྱི་འཕོ་བ་ནི་ཟུར་བ་མི་དགོས་ཏེ༔ ལམ་གང་བསྒོམས་ཀྱང་དེའི་འཕོ་བ་ཉིད་དུ་འདུས་སོ༔ རྟགས་སུ་སྤྱི་བོར་ཆུ་བུར་རྡོལ་བ་དང་༔ འཇག་མ་ཟུག་པ་སོགས་འབྱུང་ལ༔ དེ་ལྟར་བྱུང་དུས་སླར་རྒྱལ་བ་གཞོན་ནུ་དཔའ་བོ་སྟོབས་ལྡན་ཉིད་སྟོང་པར་བཞག་པའི་འོད་གསལ་གྱི་ངང་ལས་མགོན་པོ་ཚེ་མཐའ་ཡས་པའི་རྣམ་རོལ་དུ་བཞེངས་ཏེ༔ རང་ལ་ཐིམ་པའི་མོས་པ་བཟུང་ལ༔ སྙིང་དབུས་བུམ་པའི་ཁང་བཟང་དུ་བཞུགས་ཤིང་༔ ཐུགས་ཀའི་འོད་ཀྱིས་འཁོར་འདས་ཀྱི་ཚེ་བཅུད་ཐམས་ཅད་བསྡུས་ནས་བདག་ལ་ཐིམ་པས་ཚེ་ནམ་མཁའ་དང་མཉམ༔ མདངས་པདྨ་དང་མཉམ༔ ལུས་འཇའ་ལུས་རྡོ་རྗེ་མཆོག་གི་སྐུ་འགྲུབ་པའི་གཟི་བྱིན་ཉི་ཟླའི་དཔལ་ལས་ཀྱང་མཆོག་ཏུ་འབར་བར་མོས་ལ༔ རྫོགས་པ་རང་བྱུང་ནས་བྱུང་བའི་ཚེ་འགུགས་བསྟིམ་རྒྱས་གདབ་བྱ་བ་དང་༔ རྒྱུན་དུ་ཡང་སྔར་སྦྱངས་བའི་འཕོ་བ་མ་བརྗེད་མ་ཆགས་པའི་མཐར་གདོན་པ་དང་༔ དེ་ནས་གཉིད་འོད་གསལ་དུ་སྦ་བ་སོགས་བྱའོ༔ གཉིས་པ་ལས་ལ་སྦྱར་བ༔ འཆི་རྟགས་སྔར་བསྟན་པ་རྣམས་མངོན་དུ་གྱུར་ནས་ཅིས་ཀྱང་མ་བསླུས་ན༔ འཆི་སྦྱངས་ལྟར་ཆགས་འཛིན་དང་ཞེན་པ་བཅད་ནས༔ བླ་མ་ཡོད་ན་བདུན་རྣམ་དག་གི་མཆོད་པ་ཕུལ་ཞིང་༔ བླ་མས་གསལ་གདབ༔ བདག་གིས་ཀྱང་འདུན་པ་དྲག་པོ་བྱ་སྟེ༔ རང་གང་ལ་གོམས་པའི་ལམ་གྱིས་འཕོ་བ་དེ་སྒེར་དུ་འདེབས་པ་གནད་ཟབ་ལ༔ དེ་ནས་ཕྱིར་མི་བསྡུ་བར་རྒྱལ་བའི་སྲས་སུ་གྱུར་ནས་འགྲོ་བའི་དོན་ཕུན་སུམ་ཚོགས་པ་བྱེད་པའི་མཐུ་ནུས་དབང་བྱིན་དང་ལྡན་པར་བསམ་ལ༔ ཡང་ཡང་མ་ཤི་བར་དུ་འཕོ་བ་འདེབས་པ་འདི་ནི་དངོས་གྲུབ་བླངས་བ་ཞེས་བྱ་སྟེ༔ དབང་གསུམ་པའི་དུས་དང་༔ རྨི་ལམ་དང་༔ འཆི་བའི་དུས་ཀྱི་དངོས་གྲུབ་བླང་བ་གསུམ་ལས་འདི་ཐ་མའོ༔ ཡང་ཤི་ནས་བར་དོ་གཞིའི་འོད་གསལ་ལ་བརྟན་པ་མ་ཐོབ་ཀྱང་ཟུང་འཇུག་གི་ཚོམ་བུ་དེ་ཡི་དམ་གྱི་ལྷ་ཡིན་པར་ངོ་ཤེས་ནས་དེའི་ཐུགས་ཀར་འཕོ་བ་དང་༔ གཞི་སྣང་ཆེན་པོ་དང་༔ ཡེ་ཤེས་བཞི་སྦྱོར་གྱི་ཟེར་ཐག་ལ་སུན་མར་ངོ་ཤེས་ནས་འཕོ་བ་དང་༔ རང་བཞན་སྤྲུལ་སྐུའི་སྣང་ཆ་ངོ་ཤེས་ནས་དེར་མ་གྲོལ་ཡང་འདུན་མའི་འཕོ་བ་དང་༔ དེ་དག་གང་ཡང་ངོ་མ་ཤེས་ན་སྲིད་པ་བར་དོའི་དུས་སུ༔ ཤི་བ་ངོ་ཤེས་པ་ན༔ བླ་མས་གསང་མཚན་ནས་བོད་པའམ༔ མིན་ཡང་རང་གིས་འཇིགས་སྐྲག་སེལ་བའི་ཐབས་འཚོལ་བ་ན༔ གདམས་པ་དྲན་ནས་དེར་འཕོ་བ་བཏབ་པས༔ རང་བཞིན་སྤྲུལ་པའི་ཞིང་ལྔར་དབུགས་འབྱིན་ཏེ༔ སྐྱེ་བ་གཅིག་གི་ཐོག་པ་རྣམས་ནི༔ བར་དོ་ནས་དངོས་གྲུབ་བླང་བ་ཞེས་བྱ་སྟེ༔ ལམ་གཞན་ལ་མེད་པའི་རྫོགས་པ་ཆེན་པོའི་གསང་ལམ༔ མངལ་སྒོ་འདམས་དགག་རུ་ལོག་གིས་ཐབས་ཕུག་སྡུག་ ༼ རྡུགས་དཔྱད། ༽ ལ་ལྟོས་མི་དགོས་པ་ཡེ་ཤེས་ཟང་ཐལ་གྱི་ལམ་བཟང་ཞེས་བྱ་སྟེ༔ ཁོ་བོ་དག་གི་ཁྱད་ཆོས་བླ་ན་མེད་པའོ༔

དེ་ནས་རྗེས་ཀྱི་བྱ་བ་ནི༔ འཆི་ཁ་ཐ་མ་ལ་མི་དགོས་ཀྱང་༔ རྒྱུན་དུ་བྱེད་པས་སྔར་བསྟན་ཚེ་འགུགས་བསྟིམ་ནམ་རེས་ཆགས་མེད་དུ་བྱ་བ་རྣམས་སོ༔

དེ་ལྟ་མ་བསྒོམ་སངས་རྒྱས་འཕོ་བའི་ལམ༵༔ ལ༵མ་བཟང་བརྟེན་པའི་རྣལ་འབྱོར་རྣམས་ཀྱི་གྲོག༵ས༔ གྲོག༵ས་མེད་གང་ཟག་གདུང་ལྡན་སེམས་ཅན་ཀུན༵༔ ཀུན༵་ཀྱང་སྐྱེ་གཉིས་མི་འཐོག་ཐབས་ཀྱི་མཆོག༔ སྔ༵་འགྱུར་རང་ལུགས་རྨད་དུ་བྱུང་བ་ནི༔ སྔ༵་མོར་གབ་པ་མངོན་དུ་བྱུང་བྱས་ཏེ༔ སྔ༵་ན་མེད་པའི་རིན་ཆེན་སྒྲོན་མེ་འདི༔ སྔ༵་བཙན་ཅན་གྱི་སྙིང་གི་ཐུར་མ་ཡིན༔ དེ་སྐད་རྙིང་སྔགས་རྒན་པོའི་རིགས་སྐྱེས་པ༔ ག་ག་ཨ་བྷྱེ་སྨྱོན་པས་སྨྲས་ནས་ཐལ༔ རྟོག་གེ་ངན་པའི་དྲ་བར་ཆུད་པ་ཡི༔ རང་གི་ཆོས་སྐལ་གཅོད་པའི་གང་ཟག་གི༔ དོན་དུ་འགྱུར་སྙམ་རེ་བ་བདག་ལ་མེད༔ འོན་ཀྱང་པདྨ་ཀཱ་རའི་ཐུགས་རྗེ་ཡིས༔ བསམ་ཡས་ཕན་བདེའི་འོད་སྟོང་འབར་བའི་གཟི༔ དགག་ཏུ་སྤྱོད་པའི་སྲིན་༼ བུ་ཆད་སྙམ། དཔྱད། མེ་ཁྱེར་འགས༔ ཟིལ་གྱིས་གནོན་སྙམ་དོགས་པའང་བདག་ལ་མེད༔ རྒྱལ་ཀུན་མཐུན་སྟོབས་དབང་ཕྱུག་ཧེ་རུ་ཀ༔ བདུད་འཇོམས་དཔའ་བོའི་ཕ་ཕོག་གཏད་པ་དང་༔ ཆོས་ཉིད་བདེན་པ་མངོན་སུམ་མཐོང་ཕྱིར་དང་༔ བྱིན་རླབས་དག་སྣང་བཀའ་ལ་འགོག་མེད་ཕྱིར༔ ས་མ་ཡཱ༔ ཞིང་སྐྱོང་ཊཱཀྐིའི་དབང་མོ་ཚེ་རིང་མ༔ ཐབས་ཀྱིས་དྲེགས་པའི་སྐུར་བཞེངས་ཟླ་བའི་དབང་༔ འབུམ་ཕྲག་དགོངས་པའི་རྒྱུད་དབང་གནོད་སྦྱིན་དམར༔ དམ་ཉམས་བཀའ་རྐུན་སྲོག་ལ་ཆད་པས་ཆོད༔ དམ་ལྡན་བརྒྱུད་འཛིན་སྐལ་བཟང་བུ་བཞིན་སྐྱོང་༔ འདི་ཕྱིའི་ལེགས་ཚོགས་ཡར་ངོའི་ཟླ་བཞིན་སྤེལ༔ འཚོ་བ་སྦྱོར་ལ་གཏན་འདུན་ཡོངས་གྲུབ་ཀྱིས༔ བཀའ་དང་ཐ་ཚིག་གཉན་པོས་རྒྱས་གདབ་བོ༔ ས་མ་ཡཱ༔ རྒྱ་རྒྱ་རྒྱ༔ བརྡ་ཐིམ༔ ཅེས་པ་འདི་ཡང་སྐྱེ་བ་དུ་མར་ལས་ཀྱིས་འབྲེལ་བར་མ་ཧཱ་ཡོ་ག་སྦས་པའི་ཚུལ་འཆང་པདྨ་མ་ཏིའི་བཀས་བསྐུལ་ངོར། དུས་མཐའི་སྔགས་མིང་༧ག་གཱ་ཨ་བྷྱེ་ནས་སོ། །དགེའོ། །དགེའོ། །དགེའོ། །སརྦ་མངྒ་ལཾ། །

སྣང་སྟོང་གི་ལམ་བསྒོམ་པ་ཉིན་མཚན་ཁ་སྦྱོར་དུ་བྱེད་པའི་གདམས་ངག་འོད་གསལ་འཁོར་།

སྣང་སྟོང་གི་ལམ་བསྒོམ་པ་ཉིན་མཚན་ཁ་སྦྱོར་དུ་བྱེད་པའི་གདམས་ངག་འོད་གསལ་འཁོར་ལོ་ཞེས་བྱ་བ་བཞུགས་སོ༔

དེ་ལ་འདིར་ཉིན་མོ་འོད་གསལ་གྱི་གདེང་གཉིས་ཀྱིས་སྣང་བ་ལ་མཉམ་པར་བཞག་ཀྱང་༔ མཚན་སྣང་དང་བསྲེ་མ་ཤེས་ན་དུས་སུ་མི་སྟོངས་པའི་ཕྱིར༔ དེའི་ཐབས་ལ་རྒྱས་པར་ནི་རྨི་ལམ་གྱི་རྣལ་འབྱོར་དང་འོད་གསལ་གྱི་རྣམ་འབྱོར་གཉིས་ཡིན་ཡང་འདིར་ཐོད་རྒལ་སྤྱི་ལ་བསྟུན་ནས་འཁྱེར་བདེ་བར་ལམ་དུ་བྱེད་ན༔

དང་པོ་གཉིད་འོད་གསལ་དུ་སྦ་བ་ནི༔ ཕྱི་ནང་གསང་གསུམ་སྟེ༔ ཕྱི་ལྟར་ན་འདུན་པའི་སྒོ་ནས་འོད་གསལ་འཆར་པ་ངོས་ཟིན་པར་བྱའོ་སྙམ་དུ༔ ཐོག་མར་གཡུ་འབྲུག་ཐུར་དབབ་ཀྱིས་ནམ་མཁའི་རྣལ་འབྱོར་སྒོམ་པ་ཞེས་བྱ་སྟེ༔ རླུང་སྦྱོར་བསྒོམ་ནས་གསལ་སྟོང་མི་རྟོག་པའི་ཡེ་ཤེས་ལ་མཉམ་པར་བཞག་གོ༔ དེའི་ངང་ལས་གཉིད་པའམ༔ ཡང་ན་ནང་ལྟར་དུ་གཏུམ་མོའི་མེ་སྦར་བ་ལ་སྟེ༔ ལུས་དབུས་སུ་རྩ་གསུམ་འཁོར་ལྔ་གསལ་ཞིང་༔ ལྟེ་བའི་འོག་གི་སོར་བཞིའི་ཐད་དུ་ཨ་ཤད་དམ་ཐིག་ལེ་དམར་པོ་གསལ་བ་ལས་མེ་འབར་བས་སྤྱི་བོའི་ཧཾ་ལ་རེག་པས་ཧཾ་ལས་བདུད་རྩིའི་ཐིག་པ་བབས་པ་དང་བསྣོལ་མའི་རྒྱུད་ལ་སེམས་བཟུང་བ་ན་སེང་ཕྲུག་རྩལ་སྦྱོང་གི་གནད་ཅེས་བྱའོ༔ དེའི་བདེ་སྟོང་གི་འོད་གསལ་འཆར་བར་འགྱུར་བས་དེ་ལས་མ་ཡེངས་པར་གཉིད་དུ་ཕྱོགས་པ་དང་༔ གསང་བ་ཉི་ཟླ་ཁ་སྦྱོར་གྱི་དགོངས་པས་སྦྱང་བ་ནི༔ དེ་ནས་མེ་དང་ཐིག་ལེ་ཆེར་མཆེད་དེ༔ ལུས་ཡུལ་གྱི་དངོས་འཛིན་ཐམས་ཅད་བསྲེགས་ཤིང་འོད་ལུས་ཀྱང་ནང་དུ་སྙིང་ཀའི་འཁོར་ལོ་དཀར་དམར་རམ་མེ་ཆུ་ཁ་སྦྱོར་དུ་ཡོད་པའི་དབུས་སུ་སེམས་ཀྱི་ངོ་བོ་ཕྱི་གསལ་ནང་གསལ་གྱི་ཐིག་ལེ་ཤེལ་སྒོང་ལྟ་བུ་གཅིག་བསྒོམ་པ་ལས་མ་ཡེངས་པར་སེམས་བཟུང་བས་འོད་གསལ་སྣང་སྟོང་རིགས་གསུམ་དབྱེར་མེད་པའི་བདག་ཉིད་འཆར་བའི་འཕྲུལ་གསང་བླ་ན་མེད་པའོ༔

གཉིས་པ་ཤེས་བྱ་བུམ་པར་བསྡུ་བ་ནི༔ ཕྱི་ནང་གསང་གསུམ་ལས༔ ཕྱི་དབྱིངས་སྣང་འོད་ཟེར་གྱི་དྲྭ་བར་གཟུད་པའི་མན་ངག་ནི༔ ནམ་ཕྱེད་གྱེན་དུ་ལང་སྟེ༔ དྲང་སྲོང་གི་འདུག་སྟངས་སུ་བྱས་ལ་ལུས་པོ་ཉེད་ཉེད་པོར་གཅུན་ཏེ༔ སྟེང་རླུང་མནན་པས་བདེ་ཆེན་དང་ལོངས་སྤྱོད་འཁོར་ལོའི་རྩ་འདབས་སུ་ཡེ་རླུང་འཕྲོས་པ་དབུ་མར་བསྡུ༔ འོག་རླུང་བསྐུམ་སྟེ༔ སྙིང་གར་རླུང་བཟུང་བས་བདེ་སྐྱོང་དང་སྤྲུལ་འཁོར་གྱི་རྩ་འདབ་ཀྱི་ཡེ་རླུང་དབྱིངས་རྣམ་དག་གི་སྒྲོན་མའི་ཆ་ཐམས་ཅད་དབུ་མར་བསྡུས་ལ༔ སྙིང་གསེར་གྱི་རྩ་ཆེན་གྱི་དྲྭ་ཕྱེད་མིག་མང་རིས་སུ་བྲིས་པའི་དབྱིངས་ཀྱིས་གང་བར་མོས་ཤིང་༔ གཉིད་དུ་ཕྱོགས་པས་རླུང་ལྔ་དབྱིངས་སུ་འཆིང་ནས་རང་བཞིན་གསལ་བའི་འོད་གསལ་ཟིན་པར་འགྱུར་རོ༔ གཉིས་པ་ཐིག་ལེ་རང་མལ་དུ་བསྐྱལ་བའི་མན་ངག་མགྲོན་པོས་རང་ཡུལ་སྙོགས་པ་ལྟ་བུ་ནི༔ རྩ་ཁམས་ཀྱི་ཐིག་ལེ་རྣམས་འཁོར་དབུས་ཀྱི་ཨེ་ཡཾ་བཾ་ལཾ་རཾ་རྣམས་ལ་འདུས༔ དེ་དག་གི་འོད་ཀྱིས་ལུས་ཐམས་ཅད་ཁྱབ་པར་དམིགས་ལ༔ ཀུན་ཀྱང་ཡས་མན་སྡུད་རིམ་གྱིས་སྙིང་ཀའི་ཨེ་ལ་ཁ་སྦྱོར་ཞིང་ཐིག་ལེ་སྟོང་པའི་སྒྲོན་མ་རྨ་བྱའི་སྒོ་ང་ལྟ་བུ་ནང་སྟོང་པ༔ ཕྱིའི་འོད་ཟེར་གྱིས་ལུས་ཐམས་ཅད་ཁྱབ་པ་ཞིག་དབྱིངས་རང་མལ་གྱི་དྲྭ་བའི་ཁྱིམ་དུ་གནས་པར་བསྒོམ་ལ༔ དེ་ལས་མ་ཡེངས་པར་བྱས་པས་ཐུགས་རྗེ་ཀུན་ཁྱབ་ཀྱི་ཡེ་ཤེས་ཟིན་པར་འགྱུར་རོ༔ གསུམ་པ་སྐུ་རྡོ་རྗེ་བུམ་པ་རིན་པོ་ཆེའི་དགོངས་པའམ༔ བརྫུས་སྐྱེས་པདྨོའི་མངལ་གནས་ཀྱི་དགོངས་པས་འོད་གསལ་མ་བུ་སྤྲོད་པ་ཞེས་བྱ་སྟེ༔ ཐིག་ལེའི་ཁང་བའི་དཀྱིལ་དུ་བླ་མ་ཀུན་བཟང་ཡབ་ཡུམ་ཆོས་སྐུའི་ཆ་ལུགས་ཅན་གཅིག་བསྒོམ་པའི་ཐུགས་ཀར་ཨཱཿམཐིང་ཀ་འོད་དང་འོད་ཟེར་འབར་བ་གཅིག་གསལ་ལ༔ ལུས་ཀྱིས་དབྱིངས་མི་བསྒྲིབ༔ དབྱིངས་ཀྱིས་ཏི་ལ་ཀ་མི་བསྒྲིབ༔ ཐིག་ལེས་སྐུ་མི་བསྒྲིབ༔ སྐུས་ཡི་གེ་མི་བསྒྲིབ་པས་མི་བསྒྲིབ་རྣམ་བཞིའི་འོད་ཟེར་གྱི་གོང་བུར༔ ལུག་རྒྱུད་ཀྱི་རྣམ་པར་ཕྲ་ཞིང་འཁྱོགས་པ་མར་མེ་བཞིན་པར་སེམས་བཟུང་ལ་གཉིད་པས་ཟུང་འཇུག་ངོ་བོ་ཉིད་སྟོང་པ་ཆེན་པོའི་འོད་གསལ་ཟིན་པར་འགྱུར་རོ༔ འདི་ལ་ཅིས་ཕྱིར་ཤེས་བྱ་བུམ་པར་བསྡུ་བ་ཞེ་ན༔ ཕྱིའི་སྣང་བའི་ཁམས་གསུམ་སྒོ་གསུམ་ལས་མེད་པར་ཐག་ཆོད་ཅིང་གཉིད་ཀྱིས་ཅུང་ཟད་ནོན་པ་ན༔ ཕྱི་ཡུལ་གྱི་རྟོག་པ་ནང་དུ་བསྡུས་པའི་ཕྱིར་དང་༔ ཡེ་ཤེས་ཀྱི་རླུང་ལུས་ལ་བྱེར་བ་ཐམས་ཅད་རྩ་བའི་རྩ་བའི་རླུང་འོད་ཟེར་ལྔ་བ་ལ་བསྡུ་བའི་ཕྱིར་དང་༔ ཐིག་ལེ་མ་ལ་བསྡུ་བའི་ཕྱིར་དང་༔ སྐུ་ནང་གསལ་གཞོན་ནུ་བུམ་པ་ཡེ་ཤེས་གཞི་གནས་ཨ་ཡིག་གིས་བསྡུས་པ་ལ་ཤེས་བྱའི་བློ་ཡི་དམིགས་པ་བསྡུ་བའི་ཕྱིར་རོ༔

གསུམ་པ་ཐོ་རངས་འབྱུང་ཁམས་དག་སྦྱོར་ནི༔ མལ་ནས་ལང་སྟེ་རླུང་རོ་ལན་གསུམ་སྤྲུགས་པའི་རྗེ་ས་སུ་ཆོས་སྐུའི་བཞུགས་སྟངས་ཀྱིས་གནས་པའི་སྙིང་ཀའི་བུམ་སྐུ་ལས་ཨ་མཐིང་གཅིག་སྨིན་མཚམས་ཐད་ཀྱི་ནམ་མཁའ་ལ་སྤྲོས་པ་ཀུན་ཏུ་བཟང་མོ་གཅེར་བུ་མཉམ་བཞག་གི་ཕྱག་རྒྱ་ཅན་ཞིག་དུ་བསྒོམ་པའི་ཐུགས་ཀའི་འོད་ཀྱིས་འབྱུང་བ་ནམ་མཁའི་ཁམས་ཐམས་ཅད་འོད་མཐིང་གི་རྣམ་པར་ཁྱབ་སྟེ༔ འོད་དེ་ཇེ་ཆུང་ལ་འུབ་འདུས་ནས་བཟང་མོའི་ཐུགས་ཀར་ཐིམ་པས་ནམ་མཁར་འཛིན་པའི་རྟོག་སྒྲིབ་ཐམས་ཅད་ཡུམ་ཆེན་མོའི་རང་བཞིན་དུ་སངས་རྒྱས་པར་མོས་ཤིང་༔ སྐུ་ལ་ཅི་གནས་སུ་སེམས་བཟུང་བའི་བྱིན་རླབས་ཀྱིས་ཟླ་བ་གཅིག་ན་ཆོས་ཀྱི་དབྱིངས་ཀྱི་ཡེ་ཤེས་འཆར་རོ༔ ཡང་དེ་གྲུབ་པ་ན༔ སངས་རྒྱས་སྤྱན་དང་༔ མ་ཀི༔ གོས་དཀར༔ དམ་ཚིག་སྒྲོལ་རྣམས་ཀྱི་ཐུགས་ཀ་ནས་རང་མདོག་གི་འོད་ཟེར་འཕྲོས་པས་འབྱུང་བ་ལྷག་མ་འོད་དུ་སྡུད་དེ༔ ཡུམ་བཞི་ལ་ཐིམ་ཞིང་༔ དེའི་རང་བཞིན་དུ་སངས་རྒྱས་པར་བསྒོམ་པས་ཞག་བཅོ་ལྔ་རེ་ནས་སོ་སོའི་རྟོག་སྒྲིབ་དབྱིངས་སུ་དག་སྟེ༔ ཡུམ་ལྔའི་གོ་ལ་སྦྱོར་བས་འབྱུང་བ་རང་ཟད་ཀྱི་དགོངས་པ་འུབ་ཆུབ་ཆེན་པོ་ཞེས་བྱ་སྟེ་གནད་ཤིན་ཏུ་ཟབ་མོའོ༔ བར་སྐབས་དང་ཐུན་མཐའ་ཐམས་ཅད་དུ་མི་དམིགས་པར་འཇོག་པ་ཀུན་ལ་དགོས་པ་དང་༔ དེ་དག་གི་ཆོས་དབྱིངས་ཡེ་ཤེས་བཞི་ལྡན་གྱི་འོད་གསལ་མངོན་དུ་འགྱུར་པ་ཡིན་ནོ༔ ས་མ་ཡཱ༔

༈ བར་སྐབས་སུ་འཆི་བ་སྦྱངས་པའི་མན་ངག་ནི༔ འཕོ་བའི་གདམས་པ་ལྟར་སྲོད་ཐུན་ལ་ནམ་རེས་བྱེད་དགོས་པས་ཟུར་བ་མེད་དོ༔ དེ་དག་གི་གནད་བསྡུས་ན༔ ནུབ་མོ་ཉལ་ཁ་གཅིག་པོ་ལ༔ རང་སེམས་ཀྱི་ངོ་བོ་འོད་ཀྱི་ཐིག་ལེ་ཤིན་ཏུ་འཚེར་བའི་དཀྱིལ་ན་ཨཱ༔མཚན་པ་ཡོད་པ་གཅིག་བསྒོམ་ལ༔ ཧིག་གིས་རང་བཞིན་སྤྲུལ་སྐུའི་ཞིང་ལྔའམ་སྤྱི་བོར་བླ་མ་གསལ་བའི་ཐུགས་ཀར་བརྒྱང་བ་དང་༔ བཅོམ་ལྡན་རིགས་ལྔའི་ཡེ་ཤེས་དང་བླ་མའི་ཐུགས་རྣམ་པར་མི་རྟོག་པའི་ངོ་བོ༔ རང་སེམས་འོད་ཀྱི་ཐིག་ལེ་ཕྱིར་འོང་ནས་ཚངས་བུག་ནས་ཞུགས་ཏེ་སྙིང་ཀར་གནས་པའི་འོད་ཀྱིས་ལུས་ཕྱི་ནང་ཐམས་ཅད་གསལ་བ་མར་མེ་ལྟ་བུའི་སྙིང་པོ་སྙིང་ཀའི་ཐིག་ལེ་ལ་སེམས་བཟུང་བས༔ འཕོ་བའི་འཆི་སྦྱང་དང་༔ གཉིད་འོད་གསལ་དུ་སྦ་བ་དང་༔ ཤེས་བྱ་བུམ་སྡུད་གསུམ་གྱི་གནད་འདུས་ལ༔ ཐོ་རེངས་དེ་ལས་ཐིག་ལེ་གཉིས་པ་ཞིག་སྨིན་མཚམས་སུ་ཆད་དེ༔ དེའི་འོད་ཟེར་གྱིས་ཁམས་གསུམ་སྣོད་བཅུད་འབྱུང་བཞི་དང་བཅས་པ་འུབ་ཀྱིས་བསྡུས་ནས་ཐིག་ལེ་ལ་གཞུག་པ་དང་༔ དེ་རྩ་བའི་ཐིག་ལེ་ལ་ཐིམ༔ དེ་ཡི་གེ་མེད་པ་ཆོས་ཀྱི་དབྱིངས་ཀྱི་རང་བཞིན་དུ་མི་དམིགས་པར་མཉམ་པར་བཞག་པས་ཆོས་དབྱིངས་ཀུན་ནས་བཟླུམ་པའི་ཐིག་ལེ་ཆེན་པོ་སྤྲོས་པའི་གྲྭ་ཟུར་དང་བྲལ་བ་མངོན་དུ་གྱུར་བའི་གནད་དོ༔ དེ་སྐད་དུ་ཨོ་རྒྱན་གྱི་སློབ་དཔོན་ཆེན་པོ་པདྨ་འབྱུང་གནས་ཀྱིས་གསང་ཆེན་ངེས་པའི་རྒྱུད་བཅུ་བདུན་གྱི་བུ་ཡིག་བརྒྱ་རྩ་སོགས་ནས་ཟུར་སོ་སོར་བྱུང་བ་ཁོང་སྙིང་བསྡེབ་ནས་ཕྱོགས་གཅིག་ཏུ་བཀོད་པའོ༔ དེ་ལྟར་འཁྲུལ་བ་བཙན་ཐབས་སྦྱོང་བ་དང་༔ སྣང་སྟོང་འོད་གསལ་འཁོར་ཡུག་འདྲེས་པའི་ལམ༔ བསྒོམ་པའི་རྒྱལ་པོ་ཉིན་མཚན་ཁ་སྦྱོར་འདིས༔ མ་ལུས་འཆིང་གྲོལ་མེད་པའི་བྱང་ཆུབ་ཤོག༔ ས་མ་ཡཱ༔ ཞེས་ཀྱང་དུས་མཐའི་སྔགས་མིང་ག་གཱ་ཨ་བྷྱེ་ནས་དག་པར་ཕབ་པའི་ཡི་གེ་པ་ནི་ཝ་ཀི་ཤྭ་རིའོ། །དགེའོ། །དགེའོ། །དགེའོ། །

བར་དོ་དྲུག་ཁྲིད་ཀྱི་བསྡུས་དོན་ནོར་བུའི་ཕྲེང་བ།

ཡེ་ཤེས་སྒྱུ་འཕྲུལ་དྲྭ་བ་ལས༔ བར་དོ་དྲུག་ཁྲིད་ཀྱི་བསྡུས་དོན་ནོར་བུའི་ཕྲེང་བ་ཞེས་བྱ་བ་བཞུགས་སོ༔

ན་མོ་གུ་རུ་པདྨ་ཀཱ་ར་ཡེ༔ འདིར་གནད་ལས་གནད་དུ་བསྡུས་པ་ནི༔ ཐོག་མར་བར་དོ་དང་པོ་སྐྱེ་གནས་བར་དོ་སྦྱོང་བའི་སྒྱུ་ལུས་དང་བསྐྱེད་རིམ་གཉིས་ལས༔ སྒྱུ་ལུས་ལ༔ ལུས་སྒྱུ་མ་ལྟར་སྦྱངས་བ༔ ངག་བྲག་ཆ་ལྟར༔ སེམས་ན་བུན་ལྟར་སྦྱངས་བ་གསུམ་ལས༔

དང་པོ་ནི༔ མེ་ལོང་དྭངས་བ་ཞིག་མདུན་དུ་བཤམས་ནས༔ གཟུགས་གཞན་མི་མཐོང་བར་དེ་ལ་བལྟས་ནས༔ ཅི་ཞིག་ན་ཕྱི་ནང་ཐམས་ཅད་དུ་བཙལ༔ རང་གི་ལུས་ལ་ཡང་དེ་དང་འདྲ་བར་བློ་སྦྱངས༔ ཡང་བྲག་ཆ་དེ་བྲག་གི་ཕྱི་ནང་ཐམས་ཅད་ལ་བཙལ༔ རང་གི་ངག་ཀྱང་དེ་ལྟ་བུར་བཙལ་ནས་འདྲེས་པར་སྦྱངས༔ ཡང་ནམ་མཁའི་སྤྲིན་གྱི་བྱུང་གནས་འགྲོ་གསུམ་དང་སེམས་ཀྱི་བྱུང་གནས་འགྲོ་གསུམ་མཉམ་པར་བཙལ་ཏེ་མཉམ་པར་སྦྱངས༔ དེ་དག་ལ་མཉམ་རྗེས་བསྲེ་ཕྱིར༔ རྗེས་ཐོབ་ཐམས་ཅད་སྒྱུ་མའི་དོན་དེ་གསུམ་གྱི་འདུན་པ་རྒྱུན་བསྲིང་ངོ་༔

གཉིས་པ་ནི༔ ང་ལྷ་ཡིན་བསམ་ནས་ཡི་དམ་གྱི་འདུན་པ་བྱ༔ ཀུན་བཟང་ཡབ་ཡུམ་ཟུང་འཇུག་རྒྱན་མེད་གཅེར་བུའམ༔ སྤྲོ་ཞིང་ནུས་ན་ཞི་ཁྲོ་ཡོངས་རྫོགས་ཀྱི་སྐུ་བསྒོམ་མོ༔ དེ་ཡང་སྣང་སྟོང་སྒྱུ་མ་ལྟ་བུའི་དྲན་པ་བྱ་བས་རྣམ་དག་དྲན༔ ཆ་ལུགས་འདི་ལྟ་བུའོ་བསམ་པ་ལས་མ་ཡེངས་པས་རྣམ་པ་གསལ་བ༔ ཕྱི་ནང་གི་ཆོས་ཐམས་ཅད་ལྷ་དང་ཞིང་ཁམས་སུ་ཤེས་པས༔ གང་ཟག་དང་ཆོས་ཀྱི་བདག་གཉིས་ཀྱི་འཛིན་པ་སྦྱོང་ངོ་༔

གཉིས་པ་རྨི་ལམ་བར་དོ་སྦྱོང་བ་ནི༔ ཆོས་ཐམས་ཅད་རྨི་ལམ་ལྟ་བུར་ཤེས་པ་ལྟ་བས་ཐག་བཅད་དེ༔ འདུན་པས་རྨི་ལམ་བཟུང་ཕྱིར་ཉིན་མོ་དུས་ཀུན་ཏུ་རྨི་ལམ་ངོ་ཤེས་པར་བྱ་བསམ་པའི་བློ་བརྟན་ནས༔ རྨི་ལམ་དུ་ཡང་དེ་འདྲ་འབྱོངས་ལ༔ བར་ཞིག་ན་ཉིན་སྣང་ལ་བདེན་འཛིན་དགག་སྒྲུབ་མ་ཤོར་ན་རྨི་ལམ་དང་བར་དོ་དེ་འདྲ་ལ༔ བར་ཞིག་ན་རྨི་ལམ་གྱི་དུས་ན་ཐོག་བརྫིས་བྱ་ནུས་པ་ན་བར་དོ་ཆོད་པར་འགྱུར་རོ༔ ཁྱད་པར་དུ་ཉལ་ཁ་སྒོམ་བསྐྱེད་རིམ་འོད་གསལ་སོགས་ལ་གནས་པའི་འདུན་པ་རྨི་ལམ་དང་ཡང་འདྲེའོ༔ ཡང་ན་སྙིང་ཁར་བླ་མའི་ཐུགས་ཀར་ཨཱཿཡིག་དཀར་པོ་ལ་སེམས་བཟུང་བས་རྨི་ལམ་འོད་གསལ་དུ་འཆར་ཞིང་ཟིན་པར་གསོལ་བ་བཏབ༔ གཉིད་ཁར་ཡང་ཡང་འདུན་པ་བསྒྱུར་རོ༔ དེའི་སྲབ་མའི་འོད་གསལ་གྱི་སྣང་བ་མཐོང་བ་དང་༔ བདེ་གསལ་མི་རྟོག་པ་འཆར་ལ༔ འཐུག་པོའི་འོད་གསལ་རང་བཞིན་བརྒྱད་ཅུའི་འགག་ནས༔ གཉིས་འཐུག་གཏི་མུག་གི་སྐྱོན་དང་བྲལ་བའི་རང་བཞིན་དོན་གྱི་འོད་གསལ་འཆར་བ་ཟིན་པར་འགྱུར་རོ༔ ཁྱད་པར་ཁྲེགས་ཐོད་ཀྱི་འོད་གསལ་གྱི་ངང་མ་ཤོར་པས་ཟིན་པ་ཐབས་ལམ་རྨད་བྱུང་ངོ་༔

གསུམ་པ་བསམ་གཏན་བར་དོ་ཟིན་ཕྱིར༔ རྟེན་ཤིང་བུ་རྡེའུ་ལ་སོགས་པ་ལ་གཏད་པ་དང་༔ སྐུ་གསུང་ཐུགས་རྟེན་དངོས་ལ་གཏད་པ་དང་༔ སྐུ་གསུང་ཐུགས་རྟེན་བསྒོམ་ལ༔ ལུས་སྣང་མཛད་ཀྱི་ཆོས་བདུན་དང་ལྡན་པས་གནས་ནས་མིག་མི་འགུལ་བར་བརྟན་པོས༔ སེམས་གནས་ཆའི་བསམ་གཏན་གསལ་ཆའི་ལྷག་མཐོང་ངམ་རང་བཞིན་མེད་པར་ཤེས་པའི་ངང་ལས་མ་ཡེངས་པས་ཞི་ལྷག་ཟུང་འཇུག་གོ༔ དེ་ལྟ་བུའི་སྐྱོན་བསལ་བའི་ཕྱིར༔ བྱིང་ན་ལྟ་སྟངས་བསྟོད་ནས་འཁྱག་སར་བསྒོམ༔ རྒོད་ན་ཕབ་ལ་དྲོ་སར་བསྒོམ་མོ༔ ཁྱད་པར་དུ་ལུས་དབུས་སུ་རྩ་གསུམ་འཁོར་ལྔ་གསལ་བས་སྣ་བུག་གཡས༔ གཡོན༔ མཉམ་པར་རླུང་དུག་གསུམ་བསལ་ལ༔ རང་ལྷར་གསལ༔ འབྲུ་གསུམ་རྡོ་རྗེའི་བཟླས་པས་ངག་བྱིན་གྱིས་བརླབས༔ དེ་ནས་མདུན་དུ་རྒྱལ་བ་སྲས་བཅས་ཀྱི་བྱིན་རླབས༔ ཁམས་གསུམ་སྣོད་བཅུད་ཀྱི་བཅུད་དང་དྭངས་བྱིན་ནམ་མཁའི་རླུང་གི་རྣམ་པར་སྣ་བུག་ནས་དྲངས་ནས་དབུ་མ་ལ་བཙུད་པས་ལས་རླུང་དབུ་མར་ཚུད་པར་བསམ༔ ཕྱིར་རླུང་དུག་གི་རྣམ་པར་འཕང་བ་སྒྲོགས་མདོའི་ཨ་ཤད་ལས་མེ་འབར་བ་གཏུམ་མོ༔ ཐིག་ལེ་སྤྱི་བོ་ནས་བབས་པ་འཁོར་ལོ་ལྔར་ཁྱབ་པས༔ གནས་ལྔར་རིགས་ལྔ་མཆོད༔ དབང་ལྔ་ཐོབ༔ དགའ་བཞི་དང་སྟོང་བཞི་ལ་སོགས་པ་མངོན་དུ་གྱུར༔ སྒྲིབ་བཞི་དག༔ ཡེ་ཤེས་ལྔ་མངོན་དུ་གྱུར་པར་བསམ་པ་ཐིག་ལེའི་རྣལ་འབྱོར་རོ༔ དེ་ཡིས་བདེ་གསལ་རྣམ་པར་བསམ་པ་ཐིག་ལེའི་རྣལ་འབྱོར་རོ༔ དེ་ཡིས་བདེ་གསལ་རྣམ་པར་མི་རྟོག་པའི་ཏིང་འཛིན་བསམ་གཏན་ཐོབ་བོ༔

བཞི་བ་འཆི་ཁ་བར་དོ་སྦྱོང་བ་ལ༔ ད་ལྟ་དཀར་དམར་ནག་པོ་དང་༔ ཉིན་མཚན་བར་གསུམ་དང་ཉི་ཟླ་མུན་པ་སོགས་ལ་བར་དོའི་འདུ་ཤེས་བཞག་ལ་ངོ་ཤེས་པར་བྱ༔ དཀར་དམར་ལ་སོགས་པའོ་བསམ་ནས་འཕོ་བ་སྦྱངས༔ དེ་ཡང་བསྐྱེད་རིམ་ལ་གོམས་པས་ལྷ་སྐུ་ལ༔ རྫོགས་རིམ་པས་འོད་གསལ་ལ༔ རྫོགས་ཆེན་པས་ཀ་དག་ལའམ༔ རིག་པ་རྡོ་རྗེ་ཧཱུྃ་མཚན་ཅན་སྤྱི་བོ་ནས་རང་བཞིན་སྤྲུལ་སྐུའི་ཞིང་ལྔའམ་སྤྱི་བོ་བླ་མ་ལ༔ ཐོད་རྒལ་བས་དབྱིངས་ཐིག་ལ་མིག་ནས༔ སྒྱུ་ལུས་བས་རླུང་སེམས་ཀྱི་ཐིག་ལེ་འདུ་ཤེས་བཞི་ལྡན་གྱིས་འཕོའོ༔ གསལ་འདེབས་པ་ནི་སོ་སོ་ལྟར་རོ༔

ལྔ་བ་ཆོས་ཉིད་བར་དོ་སྦྱོང་བ་ནི༔ ཞི་ཁྲོ་དབྱིངས་ཐིག་སོགས་ཀྱི་བཟོ་སྤྲུལ་སྐུ་ལ༔ ཤེལ་མིག་སྦྱར་བས་བལྟས་ཏེ་རང་སྣང་སྐུ་གསུམ་གྱི་བར་དོ་དངོས་ཡིན༔ ངོ་ཤེས་པར་བྱ་སྙམ་པའི་འདུན་པ་དྲག་པོས་སྦྱངས་བ་དང་༔ ཡང་ན་གདམས་ངག་གིས་སྦྱངས་བ་ནི༔ ཁྲེགས་ཆོད་དང་ཐོད་རྒལ་ཏེ༔ དང་པོ་ནི༔ ད་ལྟའི་རང་གི་སེམས་འདི་ཉིད་སྣ་ཚོགས་སུ་སྣང་ཡང་ཡོད་པ་ལྟར་བཟུང་ནས་དགག་སྒྲུབ་སྤངས་ལེན་སྣ་ཚོགས་སུ་བྱས་ཀྱང་༔ ངོ་བོ་ལ་བལྟས་ན་བྱུང་གནས་འགྲོ་གསུམ༔ གཟུགས་དབྱིབས་ཁ་དོག༔ ཕྱི་ནང་བར་གསུམ༔ ངོས་བཟུང་གི་ཆོས་སུ་གྲུབ་པ་ཅུང་ཟད་ཀྱང་མེད་ལ༔ སྟོང་པ་བྱིང་ཆད་དུ་མ་སོང་བས་རང་བཞིན་རང་གསལ༔ གསལ་སྟོང་དབྱེར་མེད་རང་བྱུང་གི་ཡེ་ཤེས་བདེན་པ་དབྱེར་མེད་ཆེན་པོ༔ སེམས་ཀྱི་གནས་ལུགས་རང་བཞིན་གྱི་བབས་ནི་གཞི་ཡིན་ལ༔ བློས་དགག་སྒྲུབ་སྤང་བླང་འཛིན་སྟངས་ཐམས་ཅད་བོར་བའི་བྱར་མེད་དུ་བཞག་དུས༔ དེའི་གཤིས་ཐོག་ཏུ་སླེབས་པ་ཡིན་པས་བསྒོམ་པ་ངང་བཞག་རྒྱ་ཡན་ཆེན་པོ་སྟེ༔ བཞག་ཐབས་ནི༔ ཕྱི་སྣང་བ་ལ་མི་འཛིན་མི་དགག་པས་སྣང་བ་ཅེར་བཞག །ནང་ཤེས་པ་བྱིང་རྨུགས་འཐིབ་གསུམ་གྱི་སྐྱོན་དང་བྲལ་བའི་ངང་དྭངས་རང་སངས་རྒྱ་མཚོ་ཅོག་བཞག༔ རྣམ་རྟོག་གི་རླུང་གིས་མི་བསྒུལ་བས་རི་བོ་ཅོག་བཞག༔ ངོ་བོ་ངོས་བཟུང་དགག་སྒྲུབ་སྤང་བླང་མེད་པའི་ཆོས་ཉིད་ཀྱི་རྗེས་སུ་འཇོག་པའི་ཅོག་བཞག་བཞིའི༔ རྣམ་རྟོག་གི་ངོ་བོ་སྤྲོས་པའི་མཐ༵འ་ ༼ གྲོལ༵་ ༽ཐམས་ཅད་ལས་གྲོལ་བར་ཡེ༵་ ༼ གྲོལ༵ ༽ནས་སངས་རྒྱས་པ་དང་༔ སྐྱེས་པ་ལ་གཉེན་པོ་མི་དགོས་པར་ ༼ རང༵་གྲོལ་ ༽མཐོང་ཡལ་ ༼ ཅེ༵ར་གྲོལ༵ ༽ཆེན་པོར་རང་གྲོལ༵་བའི་གནད༔ ཡུལ་སེམས་ཀྱི་བར་དུ་རིག་པ་གཅིག་གི་ངང་དུ་ ༼ གཅི༵ག་གྲོལ༵ ༽ཅོག་གེར་བཞག་པས་ཐམས་ཅད་དུས་གཅིག་ ༼ ཡོང༵ས་གྲོལ༵་ ༽ལ་ཟིན་པའོ༔ ཡང་ལུས་ཀྱི་འདུག་སྟངས་དང་༔ མིག་གི་ལྟ་སྟངས་གིས་སྣང་སེམས་ཀྱི་འཛིན་པ་དབྱིངས་སུ་རང་ཡུལ་ཆེན་པོར་རྒྱས་ཐེབ་ཅིང་༔ གལ་ཏེ་ཡུལ་སེམས་ལ་གཟུང་འཛིན་སྐྱེས་ན་ཡང་དགག་སྒྲུབ་མི་བྱེད་པར་རིག་པ་ཐོག་བབས་སུ་ཡུལ་ལ་དབབ་ནས༔ རང་གནས་ཡེ་ཤེས་ཀྱི་ངང་ལས་མི་འདའ་བའི་ཏིང་འཛིན་གསུམ་གྱི་གནད་ཚང་ལ༔ སྣང་སེམས་རིག་གསུམ་སྤྲོས་བྲལ་དུ་ཤེས་པའི་གདེངས་གིས་ཟིལ་གནོན་གསུམ་གྱི་གནད་ཚང་བའོ༔

གཉིས་པ་ཐོད་རྒལ་ནི༔ གཞི་དབྱིངས་རིག་རང་གི་སྙིང་ནང་ན་ཡེ་ཤེས་སུམ་བརྩེགས་ཀྱི་ཚུལ་དུ་ཡོད་པ་དང་༔ ལམ་རྩ་ནང་དུ་ཤར་བའི༔ འབྲས་བུ་ཉི་ཟླ་མར་མེ་མན་ཤེལ་ནམ་མཁའ་ལྔའི་ཡུལ་ལ༔ ཆོས་ལོངས་སྤྲུལ་གསུམ་གྱི་ལྟ་སྟངས་གྱེན་དང་ཟླུམ་པོ་སྣ་རྩེར་ཕབ་པ་གསུམ༔ མངོན་བྱང་གཡས༔ རྡོ་རྗེ་གཡོན་དུ་མནན་པའི་ཕྱེད་བཙུམ་གྱིས༔ བཞུགས་སྟངས་སེངྒེ༔ གླང་ཆེན༔ དྲང་སྲོང་གི་སྒོ་གསུམ་མི་འགུལ་བར་སྡོད་ཅིང་༔ རླུང་གནད་མཆུ་སོ་མ་རེག་པའི་བར་ནས་ཡུད་ཙམ་ཕྱིར་རིང་པའི༔ རིག་གནད་དབྱིངས་ཀྱི་དབུས་སུ་སེམས་མི་རྟོག་པར་ལུག་རྒྱུད་བཙོན་དུ་བཟུང་༔ དབྱིངས་གནད་ཕྱོག་བཞི་དབུས་ལྔ་གང་ལ་འཆར་བདེ་བ་དེར་ཁྲིད་ཅིང་བལྟས་པས༔ དབྱིངས་མཐིང་ཀ་དང་༔ ཁ་དོག་སྣ་ཚོགས་པའི་འཇའ་ཚོན་དུ༔ ཐིག་ལེ་ཕྱི་ནང་རིམ་པ་ལྔར་འཁོར་བའི་སྟོང་སྒྲོན་རྨ་བྱའི་སྒྲོ་ཐིག་ལྟ་བུ་དང་༔ རིག་གདངས་རྡོ་རྗེ་ལུ་གུ་རྒྱུད་ཆུན་འཕྱང་གི་ཚུལ་དུ་ཡོད་པ་རྣམས་ནང་གི་དབྱིངས་ཐིག་གི་འོད་གདངས༔ སྒོ་འོད་ཀྱི་རྩ་སྣ་རྒྱང་ཞགས་ཆུའི་སྒྲོན་མ་ལས་ཐོན་ཏེ་འཆར་བ་ལ༔ མིག་རྒྱ་མཚོ་ཅོག་བཞག་ལྟ་སྟངས་ལས་མི་གཡོ་བར༔ ལུས་རི་བོ་ཅོག་བཞག་བཞུགས་སྟངས་དང་༔ སེམས་སྣང་བ་ཅེར་བཞག་འོད་སྣང་ལ་སྤུ་རིས་མི་འབྱེད་པར་རང་སར་བཞག་པས༔ ངོ་བོ་སྤྲོས་པ་གང་དུ་ཡང་མ་གྲུབ་པའི་རིག་པ་ཅོག་བཞག་རྡོ་རྗེ་ལུ་གུ་རྒྱུད་ཀྱི་ངོ་བོ་འཆར་བ་ཡུལ་དང་བཅས་པ་ལ༔ དངོས་པོར་མི་འཛིན་པའི་ལྟ་བ༔ ངང་ལས་མི་འདའ་པའི་བསྒོམ་པ༔ རང་སར་བཞག་པའི་སྤྱོད་པ༔ འབྲས་བུ་སངས་རྒྱས་ཀྱི་སྐུ་དང་ཡེ་ཤེས་སུ་ཤེས་པའི་ངེས་ཤེས་རྒྱུད་དུ་བྱེད་པའི་རྣལ་འབྱོར་བཞིའི་ཉམས་སུ་བླང་བར་བྱའོ༔

དྲུག་པ་སྲིད་པ་བར་དོའི་ཉམས་ལེན་ནི༔ ཉིན་མཚན་ཉི་ཟླ་སོགས་གཡང་ས་གསུམ་དུ་འདུན་པས་སྦྱངས་པ་དང་༔ གྲགས་པ་ཐམས་ཅད་སྒྲ་བཞིར་འདུན་པས་སྦྱངས་པ་དང་༔ དྲན་བསམ་ཐམས་ཅད་སྲིད་པ་བར་དོའི་སྣང་བར་འདུན་པས་སྦྱངས་ཤིང་༔ འཇིགས་སྐྲག་དགའ་དངོས་ཀྱི་གཟུགས་ཐམས་ཅད་ལ་ཆགས་ཞེན་མཁན་པོ་བདག་ཡུལ་དང་བཅས་པ་སྙེམས་བྱེད་དང་ཕུང་པོའི་བདུད་དུ་ཤེས་ཤིང་འཁྲི་བ་བཙན་ཐབས་སུ་བཅད༔ སྤངས་ལེན་འདོད་སྡང་གི་རྣམ་རྟོག་ཐམས་ཅད་ཉོན་མོངས་པའི་བདུད་དང་ལྷ་བདུད་ཀྱི་གཡབ་མོར་ཤེས་པས་འཁྲི་བ་བཙན་ཐབས་སུ་གཅོད་པ་དང་༔ བརྟུལ་ཞུགས་ཐུག་ཕྲད་ཐོག་བབས་རང་གྲོལ་དུ་རྩལ་སྦྱངས་བའམ༔ ཡང་ན་ང་ཤི་འདུག་པས་རང་བཞིན་སྤྲུལ་སྐུའི་ཞིང་དུ་འགྲོའོ་སྙམ་པའི་འདུན་པ་དུང་དུང་ངེ་བའི་ངང་ནས་འཕོ་བའི་སྦྱོར་བ་དྲག་པོ་སྦྱར་བས་གྲོལ་བ་ཐོབ་པར་གདོན་མི་ཟའོ༔ ཡང་ཉམས་ལེན་ཉིན་མཚན་ཁ་སྦྱོར་དུ་འདོད་པས༔ རང་གི་སྙིང་ནང་དུ་རྣམ་ཤེས་ཐིག་ལེ་སྟོང་སྒྲོན་དུ་གསལ་བ༔ ཧིཀ་གིས་རང་བཞིན་སྤྲུལ་སྐུའི་ཞིང་ལྔར་བླ་མ་རྒྱལ་བ་རིགས་ལྔའི་ཐུགས་ཀར་བསྟིམས་པ་དང་༔ ཐུགས་ཡེ་ཤེས་ལྔའི་རང་བཞིན་འོད་ཀྱི་ཐིག་ལེ་སླར་བྱུང་ནས་རང་གི་སྙིང་ཀར་གནས་པའི་འོད་ཀྱིས༔ ལུས་དང་སྣང་བ་ཐམས་ཅད་ཁྱབ་པ་ལ་འདུན་པ་བཟུང་ནས་གཉིད་འོད་གསལ་དུ་སྦ་ཞིང་ཤེས་བྱ་བུམ་པར་བསྡུ་བར་འགྱུར༔ ནང་མོ་སད་དུས་དེ་ལས་ཐིག་ལེ་གཉིས་པ་ཞིག་སྣ་རྩེར་ཆད་ནས༔ ཕྱི་རོལ་གྱི་འབྱུང་ལྔ་འོད་དུ་ཞུ་བ་སྣ་རྩེའི་ཐིག་ལེ་ལ་ཐིམ་པར་མོས་པས་དེ་ལ་སེམས་བཟུང་༔ འབྱུང་ཁམས་དག་སྦྱོར་དུ་ཡང་འགྱུར་རོ༔ དེ་ལྟར་མན་ངག་ཀུན་གྱི་གནད་འདུས་པ༔ ཚིག་ཉུང་གོ་སླ་ཤིན་ཏུ་ཁྱེར་བདེ་འདི༔ གང་ན་པདྨའི་ཐུགས་རྗེས་ཉེར་འཚོ་བ༔ ག་གཱ་ཨ་བྷྱེའི་དུས་བབས་ཕྲིན་ལས་ཏེ༔ མ་གྱུར་འགྲོ་བའི་ཉེར་འཚོར་འགྱུར་བར་ཤོག༔ འདི་འདྲ་འབྲི་དགོས་བླ་མས་བཀའ་ཕེབས་ནས༔ བཟོ་རིགས་འདུ་བྱེད་ཀརྨའི་མིང་གིས་སོ༔ ཞེས་རང་གི་ཚེ་རབས་སྔོན་ནས་བླ་མར་གྱུར་པ་སྟུག་རྒྱ་སྤྲུལ་སྐུའི་བཀའ་མ་ལྡོག་པར་ག་གཱས་སོ། །དགེའོ། །དགེའོ། །དགེའོ། །སརྦ་མངྒ་ལཾ། །

རྩ་དབུ་མའི་ནང་དུ་སྙིང་ཀའི་དབུས་སུ་གསེར་གྱི་རྩ་ཆེན།

རྩ་དབུ་མའི་ནང་དུ་སྙིང་ཀའི་དབུས་སུ་གསེར་གྱི་རྩ་ཆེན། དེའི་དཀྱིལ་ན་དྭངས་མ་ལྔ་འདུས་ཀྱི་ཐིག་ལེ་ལ་བརྟེན་ནས་རིག་པའི་ཡེ་ཤེས་བཞུགས། དབུ་མའི་ནང་དུ་སྙིང་གི་རྩེ་མོ་ནས་སོར་བཞིའི་མཚམས་ནས་གསེར་གྱི་རྩ་དེ་གསུམ་དུ་གྱུར་ནས་གཡས་སུ་དར་དཀར་སྣལ་མ་དཀར་པོ་དྲང་པོ་དང་། གཡོན་དུ་ཕྲ་ལ་འཁྲིལ་དཀར་པོ་ཕར་འཁྱོགས་ཚུར་འཁྱོགས་བྱས་པ་གཉིས་མིག་གི་ནང་དུ་ཟུག་པའོ། །སྙིང་གི་ནང་ནས་གློ་བ་ལ་རྩ་ཞིག་འབྲེལ་བ་ལ་ཤེལ་སྦུག་ཅན་དཀར་པོ་ཟུག་ཀྱང་ཕྱི་དཀར་པོ་ལས་ནང་འོད་ལྔའི་གང་བ་རེ་རྩ་འདི་ཐམས་ཅད་ཡིན། དབུ་མའི་ནང་གི་འོད་རྩ་ལས་འོད་ཁ་དོག་སྣ་ལྔ་འཁོར་ལོ་ལྔའི་རྩ་འདབས་ཐམས་ཅད་དུ་འཕྲོས་པའོ། །གཡས་སུ་རོ་མ། གཡོན་དུ་རྐྱང་མ་གཉིས་ལྕགས་སྒྲོག་ལྟར་འཁྱུད་པའོ། །

དུས་མཐར་གདབ་པ་དང་རྒྱུན་དུ་སྦྱངས་པ༔

དུས་མཐར་གདབ་པ་དང་རྒྱུན་དུ་སྦྱངས་པ༔ རང་བཞིན་སྤྲུལ་སྐུའི་ཞིང་ཁམས་སུ་འཕོ་བའི་ཐབས་བློ་ལ་བཟུང་བདེ་བ་གནད་ལས་གནད་བསྡུས་པ་ནི༔ ལྟ་བ་རྒྱས་འདེབས་ཀྱི་དབང་དུ་བྱས་ན༔ ཁྱེད་ཀྱི་ད་ལྟའི་སེམས་ཀྱི་གནས་ལུགས་སྤྲོས་པ་ཐམས་ཅད་དང་བྲལ་བ་འདི་གཞི་ཡི་འོད་གསལ་དངོས་ཡིན་པས༔ དེའི་ངང་ལས་མ་ཡེངས་པར་ཡང་ནས་ཡང་དུ་མཉམ་པར་ཞོག་ལ༔ ཡང་སྐབས་སུ༔ ད་ཅི་ང་ཤི་བའི་དུས་སུ་བར་དོ་དང་པོའི་འོད་གསལ་ཡང་འདི་དང་འདྲ་ལ༔ ད་དུང་འདི་བས་བརྒྱ་སྟོང་གྲངས་མེད་ཡིད་ཀྱི་གསལ་བ་དང་༔ བརྟན་པ་དང་༔ དག་པ་སྟེ༔ སེམས་ཀྱི་སྒྲིབ་གཡོག་ཐམས་ཅད་བྲལ་བ་ཞིག་འཆར་ཡོང་ངེས་པ་ཡིན་པས༔དེ་ཆོས་སྐུ་ཀུན་ཏུ་བཟང་པོའི་ཐུགས་རྣམ་པར་མི་རྟོག་པའི་ཡེ་ཤེས༔ སངས་རྒྱས་ཐམས་ཅད་ཀྱི་རྒྱལ་ས་ཡིན་པས་ངོ་ཤེས་པར་བྱས་ལ༔ དེའི་ངང་དུ་འཕོའོ་སྙམ་པའི་འདུན་པ་དུང་དུང་རེ་གྱིས་ལ༔ སེམས་ཀྱི་ངོ་བོའི་ཐོག་ཏུ་མཉམ་པར་ཡང་ཡང་ཞོག་ཅིག༔ གལ་ཏེ་རྣམ་རྟོག་རྒོད་ནས་ཡེ་མི་གནས་པར་འདྲ་ན༔ ཁྱོད་རང་གི་རྩ་བའི་བླ་མ་མཆོག་གང་ཡིན་དེ་སྤྱི་བོར་བསྒོམ་ལ༔ ལུས་ཐ་མལ་གྱི་དབུས་སུ་རྩ་དབུ་མ་མཐིང་ཀ་གསལ་བའི་དབུས༔ སྙིང་ཀའི་ཐད་དུ༔ རིག་པ་རྡོ་རྗེ་ཚོན་གང་བ་ལྟེ་བ་ན་ཧཱུྃ་ཡོད་པ་ཞིག་དུ་སོམ་ལ༔ ཧིག་བརྩེགས་པ་ཅི་ནུས་ཀྱིས་བླ་མའི་ཐུགས་ཀར་འཕོས་ཏེ༔ ཐུགས་རྣམ་མཁྱེན་གྱི་ཡེ་ཤེས་དང་དབྱེར་མེད་པར་འདྲེས་པར་མོས་ལ་ཡང་སེམས་ངོ་ལ་ལྟོས༔ ཡང་ཐོད་རྒལ་གྱི་དབྱིངས་ཐིག་མར་མེ་ཞིག་སྔུན་དུ་བཞག་ལ་བསྒོམ་ནས༔ འདི་རང་སྣང་ལོངས་སྐུའི་སྣང་བ་དངོས་ཡིན་པས༔བདག་འདིར་འཕོ་སྙམ་པའི་དབྱིངས་ཐིག་གི་ངང་དུ་རིག་པ་རྡོ་རྗེ་ཧཱུྃ་མཚན་ཅན་འཕོ་བ་དང་༔ ཡང་ན་དཔག་ཚད་ལྔ་བརྒྱའི་སྟེང་དུ་འོག་མིན་སྟུག་པོ་བཀོད་པའི་ཞིང་ཁམས་སུ་བླ་མ་བཞུགས་པའི་ཐུགས་ཀར༔ ང་སྲིད་པ་བར་དོ་ལ་འཁྱམས་འདུག་པས་འཕོ་དགོས་སྙམ་ནས་འཕེན་པ་གང་ལ་ཡང་བླ་མའི་གསོལ་འདེབས་དྲན་པའི་ཧིཀ་གིས་སྦྱང་བ་ལས་ལོགས་སུ་འཕོ་བ་གཅིག་ཀྱང་མི་དགོས་པར་ཐམས་ཅད་དེར་འདུས་སོ༔ དེ་ལྟར་གྲངས་མང་བསྐྱལ་བས་བར་དོ་མེད་པར་ཡར་གྱི་ཟང་ཐལ་དུ་འགྲོ་བར་གདོན་མི་ཟའོ༔ འདི་ཀུན་ལ་ཤིན་ཏུ་མཁོ༔ གལ་ཆེ་ཆེ༔ འདི་ཁོ་ནའོ༔ འདི་ཁོ་ནའོ༔ འདི་ཁོ་ནའོ༔ ག་གཱས་སོ། །

འོད་གསལ་ཆེན་པོའི་ཐེམ་བཅུ་གཅིག་པ་ཉི་མའི་འཁོར་ལོ།

འོད་གསལ་ཆེན་པོའི་ཐེམ་བཅུ་གཅིག་པ་ཉི་མའི་འཁོར་ལོ་ཞེས་བྱ་བ་བཞུགས་སོ༔

ན་མོ་གུ་རུ་པདྨ་ཀཱ་ར་ཡེ༔ འདི་ལ་གཞིའི་ཐེམ་བུ་ཁོངས་སྤུང་དང་༔ བཅུད་སྤུང་དང་༔ བརྡ་སྤུང་གསུམ་ལས༔ དང་པོ་ནི། སེམས་ཅན་ཐམས་ཅད་ལ་གནས་ལུགས་གཞིའི་སྒྲོན་མ་དྲུག༔ ཁོང་ན་རང་བྱུང་ལ་མྱ་ངན་འདས་པའི་ཆོས་ཁམས་རྒྱ་མཚོ་བསགས་ནས་སྤུང་བ་ལྟ་བུར་འདུས་པ་ལ་བྱའོ༔

གཉིས་པ་ནི། དེ་ལ་མ་སེམས་ཅན་དང་གདུལ་བྱའི་སྣང་བ་གཉིས་ཀྱི་དུས་སུ་འོ་མའི་བཅུད་དུ་མར་འདྲིལ་བ་ལྟར༔ ལུས་གནས་རྩའི་ཐིག་ལེ་ལ་བརྟེན་ནས༔ འབྱུང་བ་དྭངས་མའི་ཚུལ་དུ་ཡོད་པའི་འོད་ཟེར་ལས་ཕྱིར་སྣང་ཟད་པར་རྫོགས་པའི་ཁ་དོག་སྣ་ཚོགས་དབྱིངས་དང་ཐིག་ལེ་ལུ་གུ་རྒྱུད་དུ་སྣང་བའང་སྤྲིན་བྲལ་ནམ་མཁའ་དང་༔ ནང་གི་སྒྲོན་མ་དེ་ཉིད་ཀྱི་ཐིག་ལེར་སྨིན་རིམ་ལས་བཅུད་ཀྱི་སྒྲོན་མ་ཡིན་ནོ༔ བརྡ་སྤུང་ནི། དབྱིངས་ཀྱི་ནམ་མཁའ༔ འོད་ཀྱི་མན་ཤེལ༔ སྐུའི་འདྲ་འབག་སྟེ་གསུམ་མོ༔ དེ་ལྟར་ངོ་སྤྲད་ནས་གཞི་གམ་སྒྲོན་མ་རང་ངོ་ཤེས་པ་ནི་བརྡ་དོན་ལ་འབྱོར་བའི་ཐེམ་བུ་ཞེས་ཀྱང་བྱའོ༔ ཡང་བསྒྲོད་པའི་ཐེམ་བུ་ནི་གནད་གསུམ་འོད་གསལ་གྱི་འཁོར་ལོ་ལ་ལོངས་སྤྱོད་པ་སྤྱི་དང་། བྱེ་བྲག་ཏུ་ཐིག་ལེ་འགག་ལ་བཙིར་བའི་ཐེམ་བུ༔ རླུང་འདར་མེད་དུ་བཅིངས་བའོ༔ སྐུ་ཨར་ལ་གཏད་པའི་ཐེམ་བུ་ནི༔ སེམས་བཙོན་དུ་འཛིན་པའི་མན་ངག་གོ༔ དབྱིངས་ཟླུམ་ལ་འཁྱིལ་བའི་ཐེབ་བུ་ནི༔ འདོད་པའི་སྒོ་གཉིས་བཅད་པའོ༔ རྟོག་པའི་སྒོ་འགག་པ་ནི་གདངས་རང་གར་བརྟན་པའི་ཐེམ་བུ༔ ཡེ་ཤེས་ངོ་གང་དུ་བྱེད་པའི་ཐེམ་བུ་ནི༔ རྒྱལ་མཚན་དབྱིངས་ལ་གཟིགས་པའི་མན་ངག་གོ༔ དེ་དག་ཀྱང་རིམ་པ་བཞིན་དུ་ལུས་བཞུགས་སྟངས་ལས་མ་གཡོས་ཐོག༔ མིག་ཟུར་འགྲམ་གྱི་རྩ་ཅུང་ཟད་བཙིར་བ་དང་༔ སེམས་བཤང་ལམ་དུ་གཏད་པ་དང་༔ སྟེང་འོག་གི་རླུང་གཉིས་ཁ་སྦྱོར་དུ་ཡིད་ཙམ་བཅིངས་པ་དང་༔ རྩེ་ཆུང་གི་རྩ་གཉིས་བག་ཙམ་སྟེ་ནས་འབྲུ་གསུམ་རེའི་ལྕིད་ཙམ་མནན་བཞིན་དུ་བསྒོམ་པ་དང་༔ རེས་འགའ་དབྱིངས་དང་སྒྲོན་མའི་མེ་ཏོག་ལ་སེམས་གཅུད་པ་རྣམས་སོ༔ གོང་དུ་འཕེལ་བའི་ཐེམ་བུ་ནི༔ ཕྱིར་ལྟར་ཚོགས་བསགས་སྒྲིབ་སྦྱངས༔ ལྷ་བསྒོམས་སྔགས་བཟླས༔ བླ་མའི་རྣལ་འབྱོར་དག་ཡིན་ལ༔ ནང་ལྟར་ཡང་དང་ཡང་གི་རུ་ཤན་དང་རྫས་ཀྱི་འཁྲུལ་འཁོར་རོ༔ གསང་བ་ལྟར་ན་སྔར་བཤད་པའི་གནད་བདུན་ནོ༔ ཐོབ་པ་བཟློག་པའི་ཐེམ་བུ་ནི༔ ལམ་བཞི་རིམ་གྱིས་བསྒྲོད་དུས་ཀྱི་རང་གནད་ངེས་པ་རྣམས་ཀྱིས་མཐར་འབྲས་མངོན་དུ་གྱུར་པའོ༔ དེ་ལྟར་ཐེམ་གྱི་མན་ངག་བཅུ་པ་འདི༔ རྡོ་རྗེ་འཆང་གི་རྒྱུད་ལྔ་གདན་བཞག་ལས༔ གསུང་བའི་དོན་ཀུན་བསྡུས་ཏེ་ཁྲིགས་སུ་བཀོད༔ འདི་ཡང་ག་ཨ་བྷྱེས་ཉམས་མྱོང་གཏམ། །

སྒྲོན་མ་རང་གསལ།

སྒྲོན་མ་རང་གསལ་ཞེས་བྱ་བ་བཞུགས་སོ༔

དེ་ཡང་ཐོད་རྒལ་གྱི་གཞི་ནི་ཡེ་ཤེས་ཀྱི་སྒྲོན་མ་རང་ལ་ཡེ་ནས་གནས་པ་དེ་ཉིད་སྙིང་ཀ་ན་ཡེ་ཤེས་འོད་འབར་བའི་གཞལ་ཡས་ཁང་ཞེས་བྱ་ལ༔ དེ་ལ་སྒྲོན་མ་མཐོང་དག་གི་ལྟ་བ་ནི་མིག་གི་ལྟ་སྟངས་ལས་ཕྱི་ན་སྒྲོན་མ་བཞི་མཐོང་བའོ༔ སྒྲོན་མ་ཡུལ་གསལ་གྱི་ཆ་དེ་དག་བདག་ཏུ་མི་འཛིན་པ་ནི་སྒྲོན་མ་གྲོལ་ཡན་གྱི་ལྟ་བ་ཞེས་བྱ༔ སྒྲོན་མ་དེ་དག་ཀྱང་གཞན་ན་མི་དམིགས་པ་ནི་སྒྲོན་མ་གཉིས་མེད་ཀྱི་ལྟ་བ་སྟེ༔ སྒྲོན་མའི་ལྟ་བ་གསུམ་གྱི་སྐབས་དང་པོའོ༔ཡང་སྒྲོན་མ་བསྒོམ་པ་ནི༔ བྱིང་རྒོད་རྣམ་རྟོག་ཡོད་མེད་གང་དུ་མི་རྟོག་ཅིང་མ་ཞེན་པ་ནི་སྒྲོན་མ་གོལ་མེད་ཀྱི་དགོངས་པ་ཞེས་བྱ༔ དེ་དུས་ཀྱི་ཡུལ་སྣང་ཕྱི་ན་རང་སྐྱ་ཐུབ་པར་ཡོད་དོ་སྙམ་པའི་ཞེན་པ་མེད་པར་ཐམས་ཅད་སྒྲོན་མའི་ངོ་བོར་ཕྱག་གཅིག་རྫོགས་སྐུའི་གནས་སུ་འཕོས་པའི་ངེས་ཤེས་སྒྲོགས་མེད་སྣང་སྲིད་གཞིར་བཞེངས་ཀྱི་བསྒོམས་པ་ཞེས་བྱ༔ ཅུང་ཟད་རྟོགས་ཀྱང་སྣང་བ་ཅེར་འཛིན་ཀྱི་ཤེས་རབ་ཡིན་པས་ངང་ཚུལ་ཤེས་ཏེ་སྤོང་ལེན་རང་ཞིར་བྱེད་པ་སྒྲོན་མ་རྩོལ་མེད་ཀྱི་དགོངས་པ་ཞེས་བྱ་བ་སྟེ་བསྒོམས་པ་གསུམ་གྱི་སྐབས་ཏེ་གཉིས་པའོ༔ དེ་ལྟར་ཉམས་སུ་ལེན་དུས་ཀྱང་ནང་གི་འཛིན་པ་རང་ཞིར་བཏང་བ་ནི་འཛིན་མེད་རང་གྲོལ་གྱི་སྤྱོད་པ་ཞེས་བྱ༔ དབྱིངས་ཐིག་གི་ངང་དུ་ལྟ་བའི་ངལ་བ་དང་ལུས་སོགས་གནད་གསུམ་གྱི་དམ་རྒྱ་མི་ལྷོད་པ་ནི་ཆུ་སྲིན་ཕྱག་རྒྱའི་སྤྱོད་པ་ཞེས་བྱ༔ ནམ་ཡང་ཡུལ་ངན་དུ་མགོ་མི་འཁོར་བ་ནི་ཐེ་ཚོམ་དྲས་གཅོད་ཀྱི་སྤྱོད་པ་ཞེས་བྱ་སྟེ་སྤྱོད་པ་གསུམ་གྱི་སྐབས་སོ༔ བཞི་བ་ནི་ད་ལྟའི་དབྱིངས་ཐིག་འདི་གཞི་སྣང་གི་བར་དོ་སྐུ་གསུམ་དངོས་ཡིན་པས་ཕྱིའི་རྐྱེན་སོགས་ལས་བྱུང་ངོ་བསམ་དུ་མི་བརྙེས་པ་ནི་འབྲས་བུ་ཐག་ཆོད་ཀྱི་གདེངས༔ གལ་ཏེ་མ་འཕེལ་ཡང་དམ་ཚིག་མ་དག་པ་དང་རང་རྒྱུད་མ་དག་པ་ལས་ཡིན་གྱི་ལམ་ལ་ལོག་ལྟ་གཅོད་པ་ནི་འབྲས་བུ་རྐྱེན་ཐུབ་ཀྱི་གདེངས༔ ཡང་འབྲས་བུ་ལ་རེ་བ་ཆེ་བ་ནི་ཡུལ་ཞེན་གཟུགས་ཁམས་ཀྱི་རྒྱུ་ཡིན་པས་དེ་འདྲའི་ངོ་བོ་འདུ་འབྲལ་མེད་པར་རིམ་པར་རྒྱན་ཡོད་རྒྱན་མེད་དུ་རུང་བས་གདང་གིས་ཟིན་པར་བྱའོ༔ ཞེས་ཀྱང་ག་གཱ་ཨ་བྷྱེ་ནས་དཔལ་གྲགས་ཀྱིས་བསྐུལ་ངོར་སྨྲས་པའོ། །

༈ ཡང་སྒྲོན་མ་ལ་རྣལ་འབྱོར་དུ་བྱེད་པ་ལས་མི་ལྷོད་པ་ནི་བརྩོན་འགྲུས་གོ་ཆའི་གཟེར༔ རྒྱུན་སྤྱོད་དུ་སྡིག་ལྟ་མི་གཙིགས་པ་སྒྲོན་མ་ལམ་འགྲོའི་གཟེར༔ བལྟ་དུས་སུ་གཞན་གྱིས་མི་མཐོང་བ་ནི་དམ་ཚིག་གི་ལམ་ཁྱེར་གྱི་གཟེར་ཏེ་གཟེར་གསུམ་མོ༔ ༈ལྟ་བ་ལ་བོགས་མེད་ན་སྣང་སྲིད་སྟོང་ཉིད་དུ་ངེས་ཤེས་བསྐྱེད་པས་ལྷག་མཐོང་གི་ཤེས་རབ་བརྟན་པའི་གནད༔ བསྒོམ་པ་ལ་བོགས་མེད་ན་བླ་མའི་རྣལ་འབྱོར་བླང་བས་སྒྲོན་མ་ལམ་གྲོལ་གྱི་གནད༔ སྤྱོད་པ་ལ་བོགས་མེད་ན་རུ་ཤན་ཡང་ཡང་བྱས་པས་ཆོས་ཉིད་རང་བྱུན་ཚུད་པའི་གནད་དང་གསུམ་མོ༔

༈ དེ་དུས་སྣང་བའི་འོད་ཀྱི་ཉམས་ཀྱིས་གཞན་རྒྱུད་ཤེས་སོ་སྙམ་པ་སོགས་ལ་བདེན་ཞེན་མེད་པ་ནི་སྒྲོན་མ་ཟིལ་གནོན༔ ལྷ་དང་མཁའ་འགྲོས་ལུང་བསྟན་སྐད་དེ་སྣང་སྲིད་སྒྲས་གང་བ་ལ་རྟོག་གོམས་མེད་པ་ནི་གྲགས་པ་ཟིལ་གནོན་གྱི་གནད༔ ཡང་སློང་ཚད་སྣ་ཚོགས་པས་འདུག་སྙིང་མི་འདོད་དུ་ལྡང་བ་ལ་གཡོ་རྩོལ་ཟིལ་གྱིས་གནོན་པའི་གདེང་དང་གསུམ་མོ༔ དེ་ལྟར་ཤེས་པས་ངེས་པར་གྲོལ་ཐོབ་ཏེ༔ ལམ་དུ་ལུང་ན་སངས་རྒྱས་ཀུན་རྗེས་ཟིན༔ སྲིད་པ་ཐ་མའི་ཆོས་ཀྱི་སྙིང་ཁུ་ནི༔ གསུམ་ཚན་བདུན་དུ་བྲེལ་བའི་ངང་ཚུལ་ལས༔ ཡི་གེ་ནོར་ནོག་བྱུང་ཡང་མ་བསྐྱུང་སྨྲས༔ དཔལ་ལྡན་གྲགས་པའི་ཐུགས་དམ་བསྐང་གྱུར་ཅིག༔ རྟོག་སྒྲིབ་བྱང་ཞིང་ལས་ཉོན་སྡིག་སྒྲིབ་དག༔ ཁམས་གསུམ་སྟོང་ནས་སྐུ་གསུམ་ཐོབ་དབང་བསྐུར༔ ཐོས་གྲོལ་བས་སོ། །ག་གཱས་སོ། །

གནད་གཅིག་ཆོས་ཉིད་འཁོར་ལོ།

གནད་གཅིག་ཆོས་ཉིད་འཁོར་ལོ་བཞུགས༔

འདིར་ནམ་ཡང་རང་ལུས་རྒྱལ་བ་ཞི་ཁྲོའི་གྲོང་ཁྱེར་བྱེ་བ་ས་ཡ་སྐུ་འོད་ཡེ་ཤེས་སུམ་བརྩེགས་སུ་གསལ་བར་བཞུགས་པ་ལ༔ བ་སྤུའི་མཐར་ཁྱབ་པའི་མིག་ཆེ་ཆུང་གྲངས་མེད་པའི་ཞལ་ནང་དུ་གྱུ་ནས་བལྟ་བ་དང་༔ མིག་ནས་འོད་དང་ཐིག་ལེ་ཕར་འགྲོ་ཚུར་འགྲོ་དང་༔ རེས་མིག་ཀྱང་ཡར་མར་བརྗེ་རེས་བྱ་བ་སྤྲོས་བཅས་དང་༔ ཐིག་ལེ་ལྟེམས་པ་སྤྲོས་མེད་གཅིག་ཆོག་གོ༔ ཞེས་ཀྱང་བསྟན་འཛིན་ངོར། ག་གཱས་སོ། །ལེགས། །

ཡེ་ཤེས་སྣང་བྱེད་ལམ་མཆོག

ཡེ་ཤེས་སྒྱུ་འཕྲུལ་རོལ་བ་ལས༔ ཡེ་ཤེས་སྣང་བྱེད་ལམ་མཆོག་བཞུགས་སོ༔

དུས་གསུམ་སངས་རྒྱས་ཐམས་ཅད་ཀུན༔ འདུས་པའི་བདག་ཉིད་པདྨ་འབྱུང་༔ མགོ་བོ་རལ་བའི་ཅོད་པཎ་དུ༔ བརྟེན་ཏེ་མན་ངག་གནད་བསྡུས་པ༔ རྣམ་པ་བཅུ་ཡི་རང་བཞིན་གསུམ༔ སྐལ་ལྡན་སློབ་མ་ཐམས་ཅད་ལ༔ ཕན་སླད་བསམ་པ་བཟང་པོ་ཡི༔ འབད་དེ་བྲི་ཞིང་ལྡོག་མི་བགྱིད༔ སངས་རྒྱས་ཀུན་གྱི་བདེ་གསང་ཉིད༔ གཞི་རྒྱུད་བཅིང་གྲོལ་མེད་པ་ནི༔ སྤྲོས་བྲལ་རི་པའི་ཐིག་ལེ་འདིས༔ སྟོང་སྣང་གཉིས་ཀྱི་ལྡོག་ཆ་ཡི༔ དབྱེ་བས་ཚོད་འཛིན་ལམ་ལ་ཐོབ༔ རེ་རེའང་གནད་རྣམས་བཅུ་རེའོ༔ ཞེས་པས་མདུན་བསུས་ནས་ཐོག་མར་ཁྲེགས་ཆོད་ཀྱི་གཞི་ངོ་སྤྲད་པ་ལས།

སྣང་བ་ལས་ངོ་སྤྲད་ན་སྣང་ལ་འཛིན་ཞེན་མེད་པའི་ནོར་ས་བྲལ་བ་དང་གཅིག༔ སྟོང་བ་ལས་ངོ་སྤྲད་ན་སྟོང་ལ་ཆད་པར་གྱུར་བ་མེད་པས་རང་མདངས་ཤར་གྲོལ་དང་གཉིས༔ ཟུང་འཇུག་ལས་ངོ་སྤྲད་ན་འདི་ཡིན་གྱི་ཡིན་སྙམ་ཡིད་དཔྱོད་ཀྱི་སྒྲོ་ལ་རེག་མ་ལུས་པར་ཟང་ཐལ་རང་རིག་ཆེན་པོའི་བདེ་ཀློང་འཁྱིལ་བ་དང་གསུམ༔

ཡང་བདེ་བ་ལས་ངོ་སྤྲད་པས་བདེ་འཛིན་ཉམས་སམ་རྣམ་རྟོག་སྤངས་བས་ཕ་རོལ་དུ་སོང་བས་རང་རིག་རང་གསལ་ཆེན་པོ་གཉིས་སྣང་མཐའ་དག་བྲལ་བའི་ཡེ་ནས་ཤེས་པ་དང་གཅིག༔ གསལ་བ་ལས་ངོ་སྤྲད་པས་སལ་སལ་ཀུན་གཞིའི་རྣམ་ཤེས་ལས་འདས་པའི་འཛིན་པ་སྤྱི་ལ་དམིགས་པ་ཡང་མེད༔ མི་རྟོག་པ་ལས་ཕྱེ་བས་ཧད་ཧད་པོ་ལས་འདས་པ་རིག་སྟོང་སྒྲོ་འདོག་ཆོད་པས་དམིགས་རྣམ་རྟེན་ཆོས་ཡུལ་དང་བཅས་པའི་སྟོང་བས་མིང་མེད་ཆེན་པོ་དང་གསུམ༔

ཡང་ཤེས་པ་འཕྲོ་དུས་ཡུལ་གྱི་སྤྱི་འཛིན་པས་ཀུན་གཞིའི་རྣམ་ཤེས་དང་༔ བྱེ་བྲག་འཛིན་པས་ཡིད་ཀྱི་རྣམ་རྟོག་ལས་ཝལ་ལེར་འཕྱོ་ཞིང་འཐོར་རླུང་ལྟར་ཡལ་བ་ལས་འདས་ནས། འཕྲོ་གཞིའི་ཡེ་ཤེས་རང་གསལ་མལ་ལས་མ་གཡོས་པ་དང་གཅིག༔ གནས་པའི་ཉམས་ཀྱི་དཔྱིས་ན་གནས་མི་གནས་ལས་འདས་པས་རིག་པ་རྩལ་ཕྱོགས་མེད་དུ་ཤར་ལ་ངོ་བོ་འགྱུར་བ་མེད་པ་མདངས་བདེ་ཆེན་གྱི་རྒྱས་པ་ཆེན་པོ་སྟེ༔ གནས་པ་ཉམས་ལ་རིག་ཆ་ཆོས་སྐུ་ལགས་སོ༔ ཡང་སེམས་ཀྱི་ཆོས་རྣམ་པར་རྟོག་པ་ཡལ་བ་ན༔ ཡལ་བ་དང་ཡལ་གཞི་ཐ་དད་པས་འཆིང་བར་བཅས་པའི་སེམས་ཀྱི་ཆ་འགག་པ་ལས་ཡེ་ཤེས་སྐྱེ་ནས་འགག་པ་གསར་དུ་བྱུང་བ་མ་ཡིན་པས་ཡེ་གྲོལ་རང་ལ་ཡོད་པ་ངོ་བཟུང་ནའང་བཟུང་རྒྱུ་ཡོད་པ་འདྲ་ཡང་མཐར་གཏུགས་ན་ཅི་ཡང་བཟུང་མི་བཟུང་ལས་འདས་པ་ཡི་རྗེན་ཁྲེས་སེ་བ་དེ་ནི་གྲོལ་མི་གྲོལ་ལས་འདས་པས་ཆོས་སྐུ༔

ཡང་གང་གི་དུས་སུ་ཡང་ཡུལ་ལ་མ་འབྲེལ་བས་གཏིང་གསལ་རང་རིག་བློ་ལས་འདས་པ་ཡེངས་མེད་འཛིན་མེད་རྟོག་མེད་གཉིས་སྣང་མེད་བཞིན་དུ་ཡེ་མཁྱེན་ནི་ཁྱད་ཆོས་ཀུན་ལས་ཁྱད་པར་འཕགས་པ་ཞིག་དང་བཅུའོ༔

ཡང་གདམས་ངག་གི་གནད་བཅུ་ཚན་གཉིས་པ་ནི༔ ད་ནི་ལམ་ཉམས་སུ་ལེན་པའི་དུས་སུ་སེམས་རིག་དྭངས་སྙིགས་ཕྱེད་པའི་བཞག་ཐབས་ནི༔ ནམ་མཁའི་རྣལ་༡འབྱོར༔ རྒྱ་མཚོའི་རྣལ་༢འབྱོར༔ ཉི་ཟླའི་རྣལ་༣འབྱོར༔ ཆུ་བོའི་རྣལ་༤འབྱོར༔ འཇའ་ཚོན་གྱི་རྣལ་༥འབྱོར་སྟེ་ལམ་གྱི་སྒོའི་རྣལ་འབྱོར་ལྔ༔ གཡོ་བའི་རྣལ་འབྱོར་ལ་རྩལ་སྦྱོང་བ༔ རང་བཞིན་རྣལ་འབྱོར་ལ་རྩལ་སྦྱོང་པ༔ ནང་འཕྲད་ཀྱི་རྣལ་འབྱོར་ལ་སྦྱང་བ༔ སྐྱོད་ངན་གྱི་རྣལ་འབྱོར་ལ་རྩལ་སྦྱངས་བ་སྟེ་རྩལ་སྦྱོང་ཐབས་ཀྱི་རྣལ་འབྱོར་བཞི༔ བརྟན་པས་གཡོ་བ་མེད་པས་རི་བོ་མཐར་ཕྱིན་གྱི་རྣལ་འབྱོར་ཏེ་བཅུའོ༔ དང་པོ་ནི༔ ནམ་མཁའི་མཐོངས་སུ་རིག་པ་འཕངས་པས་སྤྲོས་བྲལ་རྩེ་གཅིག་ཏུ་ཉམས་སུ་མྱོང་ངོ་༔ གཉིས་པ་ནི་སེམས་གྱི་གསལ་ཆ་ལ་སྦྱངས་བས་ངང་ལས་རྣམ་རྟོག་གི་རླབས་ཀྱིས་མ་བསྐྱོད༔ བསྐྱོད་ཀྱང་རང་ཞིར་བཏང་བའོ༔ གསུམ་པ་ནི༔ ཉི་མ་སྟེ་རྣམ་རྟོག་འཆར་བ་དང་༔ ཟླ་བ་སྟེ་འཆར་གཞིའི་ཆ་གཉིས་ཀྱི་འབྲེལ་མཚམས་ལ་དཔྱད་པ་དང་ཆད་ནས་ཞི་ལྷག་ཟུང་འཇུག་གི་ངང་ལ་བཞག་པ༔ བཞི་བ་ནི༔ ཆུ་བོའི་གཞུང་ལ་རིག་པ་འཕངས་པའི་སྒོ་ནས་བྱིང་བ་བསང་ནས་རིག་པས་ཡུལ་མཐོང་ལ་འཛིན་པ་མ་ཞུགས་པ་དེ་ངོས་རང་ཟིན་ལ་ཡོད་པ་ལས་མི་གཡོ་བ་ལགས་སོ༔ ལྔ་བ་ནི༔ འོད་གསལ་གྱི་མཐོང་པ་ལ་མ་ཡེངས་པའོ༔ དྲུག་པ་ནི༔ གཡོ་བ་ལ་ཁ་ནང་དུ་འཁོར་ནས་བལྟས་པས་མ་གཡོས་གཡོ་གཞི་མེད་པར་ཤེས་པའི་གཡོ་བ་ཡས་མ་ཡལ་གྱི་བར་གྱི་དྭངས་བཙལ༔ བདུན་པ་ནི༔ རང་བཞག་པས་གནས་ཆ་དེ་ཉམས་ལ༔ རིག་ཆ་ཅིར་ཡང་མ་བཟུང་བ་གང་དུ་ཡང་མ་གྲུབ་ཤར་བ་ལས་མ་ཡེངས་བའོ༔ བརྒྱད་པ་ནི༔ སེམས་ངལ་ཆད་དུས་སེམས་རིག་པ་ལ་འཕྲད་དེ་དབྱིངས་སུ་འཁྱིལ་བ་དང་༔ ཕྱིར་འཕྲོས་དུས་ཀྱང་རང་རིག་པ་དེ་རིག་པ་སེམས་ལ་འཕྲད་པས་ངང་དྭངས་བཟུང་ནས་འབྱམས་ཀླས་པར་བྱའོ༔ དགུ་བ་ནི༔ རྐྱེན་ངན་སེམས་ལ་ཤར་དུས་རིག་པ་ལ་གྲུབ་པ་དང་གོས་མ་མྱོང་བས་བདེ་བ་ཆེན་པོར་རང་ཤར་བ་ངོས་བཟུང་ལ་དེ་ལས་མ་ཡེངས་བར་བྱས་པས་གཞི་གྲོལ་མཉམ་ཉིད་དུ་འཆར་རོ༔ བཅུ་བ་ནི༔ མཐར་མི་རྟོག་པ་རི་བོ་ལྟ་བུར་ཤར་ན་ངང་དྭངས་འབྱིན་ལ༔ བདེ་ཆགས་གསལ་ཆག་གི་ངང་རི་བོ་ཙམ་ལ་བསྒོམ་བཤིགས་ཞེན་པ་ཕཊ་ཀྱིས་གཏོར༔ སྤྲོས་བྲལ་དུ་འཛིན་པའང་མེད་པའི་རང་བབས་རི་བོ་ལྟར་ཤར་ན་ངོ་ཏི་དེ་ལས་མ་ཡེངས་པར་བཞག་གོ༔

ད་ནི་འོད་གསལ་ཐོད་རྒལ་ཆེན་པོ་ལ་བཞག་པའི་དུས་དུ་མ་ཡེངས་བས་སེམས་ཀྱི་ངོ་བོ་ནི་རིག་གེ་རྗེན་ནེ་ཟང་ཐལ་བ་ཞིག་ཡོད་པ་དེ་རིག་པ་ཡེ་ཤེས་༡ཡིན༔ དེ་ཡང་འོད་སྣང་ལ་ཤེས་བྱེད་ཀྱི་ཡེ་ཤེས་འགག་པ་མེད་པ་དེ་སྣང་བ་ཅེར་འཛིན་གྱི་ཡེ་ཤེས་༢ཡིན༔ དེ་ཡང་འོད་གསལ་ལ་རྩེ་གཅིག་ཏུ་གཏད་དུས་གནས་ཆ་བསམ་གཏན་ཡིན་ལ༔ སྐབས་སྐབས་སུ་སྣང་བ་འགགས་པའི་གཤིས་ན་ཡེ་ཤེས་པ་རང་གསལ་ཡུལ་ལ་མ་འཕྲོས་པ་ཞིག་ཡོད་པ་༣དེ་གོ༔ ཡང་ཁ་སྣའི་རླུང་བསྡམས་དུས་སེམས་གང་དུ་ཡང་མི་འཕྲོ་བར་གནས་དུས་ཀྱི་གནས་པ་དེ་བསམ་གཏན་ལ༔ ངོ་རང་ཤེས་ཙམ་དེ་རིག་༤པའོ་གསུངས༔ ཡང་འོད་རྩ་ལྟེམས་པས་དྲན་པ་འགགས་ལ་ཤེས་པ་གསལ་སྟོང་དུ་ཤར་བ་དེ་ལ་གནས་༥སོ༔ ཡང་མཐོ་ས་ནས་ཕར་ལྟ་ཚུར་ལྟ་བྱས་པ་ན་བུ་ཆུང་གི་གཟུགས་མཐོང་ལྟ་བུ་མིང་བརྗོད་མི་ཤེས་ལྟ་བུ་དེ་ནི་རིག་༦པའོ༔ ཡང་གཅིག་ལ་འཁོར་ལོ་ལྟར་བསྐོར་ནས་རྟོག་མེད་དུ་གནས་སྐབས་ཀྱི་ཤེས་ངོ་གསལ་སང་ངེ་བ་དེ་རིག་༧པ༔ ཡང་འཕྲལ་དུ་སྦྲིད་པ་བྱེད་ཐབས་ཀྱིས་ཡེ་ཤེས་ཀྱི་གཟུགས་ལ་སྦྱངས་བ་༨དང་༔ དབུགས་བཟུང་བས་ཁོག་པར་ཙིར་སྒྲ་གྲགས་པ་ཡེ་ཤེས་ཀྱི་སྒྲ་ལ་སྦྱངས་བ་༩དང་༔ དེ་ནས་ཡེ་ཤེས་ཀྱི་ངོ་བོ་ལ་བཙན་ཐབས་སུ་བལྟ་བ་ནི༔ མུན་པའི་རྣལ་འབྱོར་དྲུག་སྟེ་ཐོད་རྒལ་༡༠ལ་རྣམ་པ་བཅུ་ལས༔ གང་ལ་ཡང་སེམས་ངོ་ཟིན་ཕན་ཆད་མ་ཡེངས་མ་བརྗེད་མི་འཛིན་པར་གནས་པ་ནི་ཆིང་རྨད་དུ་བྱུང་བའོ༔ དེ་ལྟར་ཡེ་ཤེས་རང་བཞིན་རྗེས་བྱེད་པ༔ ཟབ་ཅིང་རྟོགས་སླ་ཁྱད་པར་འབྱོར་བ་འདི༔ གང་ན་ཐོས་མེད་གོམས་སྟོབས་འབའ་ཞིག་ཅན༔ ག་ག་ཨ་བྷྱེས་ང་རྒྱལ་ལན་དགུར་གྲགས༔ ཞེས་ཀྱང་བླ་མ་དམ་པ་ཚུལ་ཁྲིམས་ཀྱི་ངོར་པདྨ་མཁའ་ཀློང་ཡངས་བས་སོ། །དགེའོ། །དགེའོ། །དགེའོ། །

ཚིག་གསུམ་གནད་བརྡེགས་ཀྱི་བསྡུས་དོན་པུཎྜ་རི་ཀའི་ཕྲེང་བ།

ཚིག་གསུམ་གནད་བརྡེགས་ཀྱི་བསྡུས་དོན་པུཎྜ་རི་ཀའི་ཕྲེང་བ་བཞུགས་སོ། །

དེ་ཡང་བདུད་རྩི་བཅུད་ཐིག་ལས། ང་ཡི་དགུ་རྩེ་སྤྱི་ཏི་འདིར། །སྤྲོས་པ་རང་གི་ཐོག་ཏུ་བཅད། །རང་ངོ་རང་གི་ངང་ལ་སྤྲད། །རང་གདེངས་རང་གྲོལ་ཐོག་ཏུ་བཅའ། །ཞེས་པས་ན་རང་གི་སེམས་རང་བབས་སུ་རྟོག་གཉིས་གཟུང་འཛིན་བཏང་སྙོམས་དཔྱད་རྒྱས་མ་བསླད་པར་བཞག་པས། རང་གསལ་འཛིན་མེད་སྟོང་བ་ཉམས་སུ་མྱོང་བའི་རིག་གེ་སེང་ངེ་བ་དེ་ཆོས་སྐུ་གཞི་ལྡན་གྱི་དགོངས་པ་རང་ལ་ཡོད་པ་ཉིད་ཡིན་པས་དེ་ལས་གཞན་དུ་ཚོལ་མི་དགོས་པས་ངོ་རང་ཐོག་ཏུ་སྤྲད་པ་ཟེར་རོ། །ཡང་དེའི་ངོ་བོ་ལ་ཡོད་མེད་མཐའི་དངོས་པོ་གང་གིས་ཀྱང་མ་རེག་པའི་དབུ་སེམས་སྔགས་ཀྱི་དབང་བཞི་བའི་ཡེ་ཤེས་ཚོགས་གཉིས་མཉམ་རྫོགས་ཀྱི་ཕྱག་རྒྱ་ཆེན་པོར་ཤེས་པས་བློས་སྤྲོས་པའི་གཟུང་འཛིན་མཐའ་དག་རང་བཞག་ན་ཡེ་ཤེས་ཆེན་པོ་གཅིག་གི་ཐོག་ཏུ་ཐག་ཆོད་གདེངས་ལྡན་དུ་བཞག་གོ །ཡང་རིག་པའི་རང་གདེངས་རྣམ་རྟོག་སྣང་ཞེན་གྱི་ཚོགས་ཐམས་ཅད་བཅས་བཅོས་སྤང་བླངས་བསྒྱུར་བཀོད་སྦྱོང་གཞིག་རང་ལུགས་གང་དུའང་མི་བྱེད་པར་འགྱུ་བ་གསལ་དག་ཏུ་རང་གྲོལ་བར་སྔ་ཕྱི་བསུ་གཅོད་བག་ཆགས་ཀྱི་མཐའི་འཕྲང་ལ་མི་བཤར་བར་གཏོང་ངོ། །དེའི་གཞི་འབྲས་དབྱེར་མེད་རང་གནས་ཆེན་པོ་མངོན་དུ་འགྱུར་བའོ། །དེའི་དུས་སུ་འཛིན་པས་ཕྱོགས་དང་འཁྲུལ་པ་རྩིས་གདབ་ཕྲན་གྱི་ཟུག་རྔུ་ཡང་གོལ་སྒྲིབ་འཁྲུལ་པར་འཕྱན་པས། དགོངས་པ་དམིགས་མེད་ཀྱི་ངང་ལ་སླར་བརླན་པས་སྤྲོས་སྐྱོན་ཐམས་ཅད་དུས་གཅིག་ཏུ་ཆོད་དོ། །དེ་སྐད་རིམ་པར་གསལ་ཕྱེས་མགོ་རྨོངས་ལ། །གནད་བསྡུས་ཙམ་གྱིས་ཤེས་རབ་སྒྲོག་ཡིན་ཡང་། །སྨོན་བཞིན་ག་ག་རྒྱལ་པོའི་རེ་བ་བསྐང་། །འདིས་ཀྱང་ཕན་པ་རྒྱ་ཆེར་འགྲུབ་གྱུར་ཅིག །ཕྱུག་རྡིས་ལ་ཕུལ།

ཟབ་དོན་གཅོད་ཀྱི་གནད་བསྡུས།

ཡེ་ཤེས་སྒྱུ་འཕྲུལ་དྲྭ་བ་ལས༔ ཟབ་དོན་གཅོད་ཀྱི་གནད་བསྡུས་བརྒྱུད་དྲུག་གཅིག་འདུས་བཞུགས་སོ༔

ན་མོ་གུ་རུ་པདྨ་ཀཱ་ར་ཡེ༔ བདུད་གཅོད་ཟབ་མོ་ཉམས་ལེན་པས༔ རྒྱུན་གྱི་རྣལ་འབྱོར་སྤྲོས་པ་མེད༔ བརྒྱུད་ཚུལ་ཀུན་གྱི་ལྡེའུ་མིག་དུ༔ མན་ངག་སྒོ་བརྒྱ་འབྱེད་འདི་ལོངས༔ ས་མ་ཡཱ༔ དེ་ལ་ཐོག་མར་བདག་དང་ཡུལ་གྱི་འཆིང་བ་ཐད་ཀར་དུ་གཅོད་པའི་ཕྱིར་བྱུང་གནས་འགྲོ་གསུམ་གཟུགས་དབྱིབས་ཁ་དོག་སོགས་ཀྱིས་གང་ཟག་གི་བདག་གམ་སེམས་ལ་དཔྱད་པས༔ བདག་སྟོང་ཉིད་དུ་གོ༔ གཅིག་དང་དུ་མ་དང་༔ སྒྱུ་མའི་དཔེ་བཅུ་སོགས་ཀྱིས་དཔྱད་པས༔ ཡུལ་སྟོང་ཉིད་དུ་གོ་ཡང་༔ སྟོང་པ་ཕན་མེད་གནོད་མེད་དུ་གྱུར་ནས༔ སྙེམས་ཐག་མ་ཆོད་པའི་གང་ཟག་གི༔ གཉན་སར་སོང་ནས་རྐྱེན་དང་བསྲེས་པས་བདུད་བཞི་གཅིག་ཆར་དུ་གཅོད་པའི་ཐབས་མཁས་ཡིན་པས༔ དེ་ལ་སྔ་ནོན༔ བར་ནོན༔ ཕྱི་ནོན་གསུམ་གསུམ་གྱིས་བསྡུས་པའི་ཐོག་མར་སྔ་ནོན་ནི༔ རིམ་པ་གསུམ་དང་༔ ཡང་ན་ཐམས་ཅད་ལ་ཁྱབ་པའི་གཅིག་གིས་ཀྱང་ཆོག༔ དང་པོ་རང་གི་གནས་ཁང་ནས་སྔ་ནོན་འཕེན་པ་ནི༔ རང་ཉིད་ཁྲོས་མ་ནག་མོ་ཕྱག་གཡས་གྲི་གུག་གཡོན་ཐོད་ཁྲག་འཛིན་པ་ཞབས་གཉིས་གར་སྟབས་ཀྱིས་པད་ཉི་རོའི་གདན་གྱི་སྟེང་དུ་བརྫིས་པ༔ རྣ་ལྟག་གཡས་སུ་ཕག་ཞལ་ངུར་བ༔ ཞལ་གཅིག་ཕྱག་གཉིས་པར་གསལ་བའི་ཐུགས་ཀ་ནས་མཁའ་འགྲོ་སྡེ་ལྔ་དཀར་སེར་དམར་ལྗང་མཐིང་ནག་གཡས་པས་མི་ལྤགས་ཀྱི་གཡང་གཞི་སྡེབ་པས་ཁམས་གསུམ་དབང་དུ་སྡུད་པ༔ གཡོན་མི་རྐང་གི་གླང་བུ་འབུད་པས་སྲིད་གསུམ་ཟིལ་གྱིས་གནོན་པ༔ ཤར་ལྷོ་ནུབ་བྱང་ཕྱོགས་མཚམས་སྟེང་འོག་ཏུ་འཕྲོས་པས༔ ཉོན་མོངས་ལྔས་བསྐྱེད་པའི་ལྷ་འདྲེ་ཐམས་ཅད་དབང་དུ་བསྡུས་ཤིང་བཀུག་ནས་གཉན་ས་དེར་མི་ནག་པོ་གཅིག་ཏུ་བསྒྱུར་ནས་སྲུང་བའི་འཁོར་ལོ་རིམ་པ་དྲུག་གི་ནང་དུ་ཚུད་པར་བསམ༔ གཉན་མིག་རིགས་དེ་ནས་ཡང་དེ་ལྟར་ཟིལ་ནོན་འཕེན་པ་ནི་སྔ་ནོན་བར་བ༔ གཉན་སར་སླེབ་ནས་ཡང་དེ་ལྟར་ཟིལ་ནོན་འཕེན་པ་ནི་སྔ་ནོན་ཕྱི་མའོ༔ ཡང་ན་སྔ་ནོན་གསུམ་པོ་ལ་རང་ཁྲོས་མའི་ཐུགས་ཀ་ནས་འོད་ཟེར་སྣང་སྲིད་ཐམས་ཅད་ཁྱབ་པར་འཕྲོས་པས༔ འོད་ཇེ་ཆུང་དུ་འདུས་པའི་ནང་དུ་ལྷ་འདྲེ་ཐམས་ཅད་བསྡུས་ནས་གཉན་ས་དེར་གནས་པའི་མཐར་སྲུང་འཁོར་བསྒོམ་པ་སྤྱིའི་ཟིལ་ནོན་གྱིས་འཐུས༔ བར་ནོན་དང་པོ་ནི༔ བྲོ་ར་ཕུར་ཁྱེར་དམིགས་པ་འདོན་ཆ་བཞིན༔ བར་ནོན་བར་བ་ནི༔བདག་ཟིལ་གྱིས་ནོན་ཕྱིར་བདག་འཛིན་གྱི་སྙེམས་ཐག་བཅད་དེ༔ བདག་མེད་དང་ཁྲོས་མར་བསྒོམ༔ གནས་ཟིལ་གྱིས་ནོན་ཕྱིར་ལུས་པོ་ལུང་པ་གང་བར་བསམ་པའི་འོག་ཏུ་གནས་དེའི་ལྷ་འདྲེ་མི་ནག་ཏུ་གསལ་བ་དེ་མནན་ནས་སྐད་ངན་ཙི་རི་རི་འདོན་པར་བསམ༔ ལྷ་འདྲེས་ཟིལ་གྱིས་ནོན་ཕྱིར་སྣང་སྲིད་ཀྱི་ལྷ་འདྲེ་ཐམས་ཅད་འོད་ཟེར་སྔར་ལྟར་སྤྲོས་ནས་གདན་འོག་གི་མི་ནག་ལ་ཡང་ཡང་ཐིམ་པར་བསམ༔ བར་ནོན་ཐ་མ་ནི༔ བར་བར་དུ་ལུས་སྦྱིན་བྱས་ནས་མགྲོན་གྱི་ལྷ་འདྲེ་ཐམས་ཅད་སྔར་ལྟར་བསྟིམས་པ་དང་༔ ཅི་ནས་ཀྱང་སློང་མ་ཐུབ་ན་རི་བོ་ཁམ་ཆོད་ལ་སོགས་པ་མཐར་གཏད་ཀྱི་དམིགས་པ་བྱ་བའོ༔ ཕྱི་ནོན་དང་པོ་ནི༔ ཤ་ཁྲག་མགྲོན་དུ་འགྱེད་ནས་གནས་དེའི་ལྷ་འདྲེ་དྲེགས་ཤོས་རྣམས་ལ་ངས་གནས་འདིར་སྔར་མེད་ཀྱི་ལྷ་འདྲེ་ནང་དུ་མ་བཏང་༔ འདིར་གནས་ཀྱི་ལྷ་འདྲེ་ཕྱིར་མ་བཏང་༔ ཁྱེད་རྣམས་ཀྱིས་ཕྱག་མཆོད་ཀྱི་རྟེན་འདིས་ཀྱིས་ཤིག༔ ཅེས་ཨོཾ་ཨཱཿཧཱུྃ་བྲིས་ལ་རབ་གནས་བྱས་ཏེ་བཞག་པའོ༔ ཕྱི་ནོན་བར་བ་ནི༔ ཁྲོཾ་གཅིག་བྲིས་པ་བྱ་ཁྱུང་མེ་འབར་བར་བསྒོམ་ལ་ཤ་ཁྲག་གི་ཕོག་གཏད་ནས་ངའི་རྗེས་སུ་ལྷ་འདྲེ་མ་མངག་ཞེས་ཕྲིན་ལས་བཅོལ་ལ་ཕྱི་བལྟས་མི་བྱེད་པར་འགྲོའོ༔ ཕྱི་ནོན་ཐ་མ་ནི༔ རང་གི་རྣམ་ཤེས་ཕཊ་ཀྱིས་དབྱིངས་ཀུན་ཏུ་བཟང་མོའི་མཁའ་ཀློང་དུ་བསྲེས་ཏེ་དབྱིངས་ལས་འོད་ཟེར་ཁ་དོག་ལྔ་ལྡན་ཤིན་ཏུ་ཕྲ་བའི་ནང་དུ་རིག་པ་འོད་ཀྱི་ཐིག་ལེ་འདྲིལ་ནས་རང་ཁྱིམ་དུ་སོང་བར་བསམ་པའམ༔ གཉན་ས་གཞན་དུ་འགྲོ་ན་དེ་ནས་སྔ་ནོན་འཕེན༔ ལར་གཉན་སར་འགྲོ་དུས་སྦྲུལ་ནག་འཁྱིལ་འགྲོས་ཀྱིས་ལྷ་འདྲེ་ཐམས་ཅད་དེད་དེ་འགྲོ་བར་བསམ་པ་དང་༔ མཁའ་འགྲོའི་གར་འགྲོས་ཀྱིས་ལྷ་འདྲེ་རང་ལུས་ལ་བསྟིམས་ཏེ་འགྲོ་བར་བསམ་པ་དང་༔ ལྟ་བའི་གདེང་འགྲོས་ཀྱིས་འཁོར་འདས་རང་སྣང་དུ་ཤེས་པའི་ངང་ནས་འགྲོ་བར་བསམ་པ་སོགས་འགྲོ་ལུགས་ལྔ་སོགས་གང་རུང་གིས་འགྲོ༔ དེའི་སློང་ཚད་ལ་དགའ་སྡུག་རེ་དོགས་སྐྲག་དངངས་སོགས་འབྱུང་༔ ཚར་ཚད་ལ་དབང་དུ་འདུས་པ༔ ཟིལ་གྱིས་གནོན་པ༔ བྲན་དུ་ཁོལ་བའི་རྟགས་སོགས་ཡོད་ཀྱང་ཀུན་ལ་དགའ་སྡུག་རེ་དོགས་མི་བྱ་བར༔ ལྟ་བ་སྟོང་ཉིད་ཀྱི་ངང་མདངས་དང་མ་བྲལ་བར་བྱའོ༔ ཐུན་བཞིར་ཞི་གཅོད་དཀར་འགྱེད་དང་ཁྲ་འགྱེད༔ དྲག་གཅོད་དམར་འགྱེད་དང་ནག་འགྱེད་སོགས་བྱའོ༔ ས་མ་ཡཱ༔ རྒྱ་རྒྱ་རྒྱ༔ ཞེས་པ་འདི་ཡང་གནད་དོན་གོ་སླ་བར་དྲིལ་དེ་ག་གཱ་བས་སོ། །

སེམས་འཛིན་ཉེར་གཅིག་གི་སེམས་གནས་ཐབས་བདུན།

སེམས་འཛིན་ཉེར་གཅིག་གི་སེམས་གནས་ཐབས་བདུན་ནི། ཚ་གྲང་གི་ནད་ལ་གཉེན་པོ་ཡི་གེ་ཨ་དཀར་པོ་གཅིག་སྣ་རྩེར་བསྒོམ་ལ་རླུང་དང་བསྒྲགས་ནས་ཕར་འགྲོ་ཚུར་འོང་བྱེད་པར་བསམ་པ་དང་གཅིག་རླུང་དང་འདྲ་བ་ལས། ཕཊ་ཞིག་བརྗོད་དེ་ཤེས་པ་རྟོག་མེད་དུ་གནས་པ་ལ་སེམས་བཟུང་། ཡང་རྣམ་རྟོག་སྐྱེས་དུས་ཡང་བརྗོད་པ་དང་གཉིས། ཧ་དྲག་པོས་རྣམ་རྟོག་གཏོར་ལ་སེམས་སུ་བཟུང་བ་དང་གསུམ། ལུས་ཙོག་པུས་རི་རྩེ་སོགས་སུ་མགོ་བསྒྲིལ་བ་དང་བཞི། འདི་དུས་རླུང་ཆོས་བྱེད། ཧཱུྃ་རིང་པོ་དང་ཐུང་དུ་ཡང་བརྗོད་ནས་སེམས་ཧཱུྃ་ལ་གཏད་པ་དང་ལྔ། ལུས་གནད་སྔར་ལྟར་ལ་ལྟེ་བར་རཾ་གསལ་བས་སེམས་བཟུང་བ་དང་དྲུག །སྣ་རྩེ་དང་བ་སྤུ་ཐམས་ཅད་ལ་སྐུ་ཕྲ་མོ་མང་པོ་ཕར་འཕྲོ་ཚུར་འདུས་པར་བསྒོམ་པ་དང་བདུན་ནོ། །ལུས་གནད་སྔར་ལྟར་ལ་སྨིན་མཚམས་སུ་ཐིག་ལེ་དཀར་དམར་ལ་སེམས་བཟུང་བ་དང་གཅིག །རྩ་གསུམ་གསལ་ནས་རླུང་བཟུང་བ་དང་གཉིས། སྣ་རྩེ་རླུང་དཀར་པོ་མདའ་གང་པ་ཞིག་ཕར་འགྲོ་ཚུལ་འོང་ལ་སེམས་བཟུང་བ་དང་གསུམ། ལུས་འོད་ཕུང་སྣ་ལྔར་གྱུར་བ་ལ་སེམས་བཟུང་བ་དང་བཞི། སེམས་རླུང་གཉིས་ནམ་མཁའ་ལ་འཕང་ནས། ཡི་གེ་འོད་གོང་གང་རུང་ཇེ་མཐོར་ཉི་ཟླ་ལ་ཐུག་པར་བསམ་པ་དང་ལྔ། སེམས་རྣ་བ་ལ་གཏད་དེ་གནས་པ་དང་དྲུག །སྙིང་ནང་དུ་ལྷ་སྐུ་ཕྲ་མོ་གསལ་བ་ལ་སེམས་བཟུང་བ་དང་བདུན་ནོ། །དེས་ལུས་སེམས་ཀྱི་ཞེན་པ་བྲལ་ལོ། །གསུམ་པ་ཆོས་ཉིད་མཐོང་བ་བསྟན་པའི་བདུན་ཚན་ནི། མིང་གི་གདགས་གཞི་བཙལ་ནས། འཁོར་འདས་ཀྱི་ཆོས་ཐམས་ཅད་སྟོང་ཉིད་དུ་བསྒོམ་པ་དང་གཅིག །སྣང་ཚད་ལ་བལྟས་ནས་སྟོང་བར་བསྒོམ་པ་དང་གཉིས། གང་སྣང་བདེན་མེད་མི་རྟག་པར་བསྒོམ་པ་དང་གསུམ། འབྱུང་ལྔ་གང་སྣང་གི་སྟེང་དུ་མ་ཡེངས་བར་བཞག་པ་དང་བཞི། སྣང་ཤེས་གང་ཤར་ཐམས་ཅད་སྐད་ཅིག་མའི་ཕྲེང་བར་ཤེས་ནས་རྟོག་བྲལ་དུ་ཡེ་ནས་གནས་པ་ངོས་བཟུང་བ་དང་ལྔ། གཉིས་སྣང་གཉིས་འཛིན་དུ་ཤར་དུས་ཤར་བ་དེ་ལ་བལྟ་བ་དང་དྲུག །རིག་པ་ནམ་མཁའ་ལ་ཐིམ། སྣང་སེམས་ཐམས་ཅད་ནམ་མཁའི་ངང་ན་ལང་ངེར་འདུག་བར་བསྒོམ་ལ། ནམ་མཁའ་དང་ཆོས་ཐམས་ཅད་སྟོང་པ་ཉིད་དུ་མཉམ་པའོ་སྙམ་དུ་སེམས་བཟུང་བ་དང་བདུན་ནོ། །དེ་དག་གིས་ཆོས་ཉིད་ལ་ངང་གིས་གནས་པ་ཐེག་མཆོག་མཛོད་ཀྱི་ཉི་ཟླ་ཁ་སྦྱོར་གྱི་དགོངས་པ་བླངས་ནས་གསུང་བ་མདོར་བསྡུས་པའོ། །ཞེས་པ་འདི་ཡང་སློབ་བུ་འགའ་ལ་ཕན་པའི་ཕྱིར་དུ་ག་གཱ་ཨ་བྷྱེ་ནས་བྲེལ་འཚུབ་ཀྱི་ངང་ནས་སྨྲས་པའོ། །དགེའོ། །དགེའོ། །

སྐུ་གསུམ་ཡེ་ཤེས་དང་བཅས་པའི་རྣམ་པར་ངེས་པ་ཤིན་ཏུ་རྣལ་འབྱོར་གྱི་སྙིང་པོ།

སྐུ་གསུམ་ཡེ་ཤེས་དང་བཅས་པའི་རྣམ་པར་ངེས་པ་ཤིན་ཏུ་རྣལ་འབྱོར་གྱི་སྙིང་པོ་ཞེས་བྱ་བ་བཞུགས་སོ། །

འདི་ལ་གཞི་ལམ་འབྲས་གསུམ་གྱི་གནས་ལུགས་ཡོད་པས། སྤྱི་ཁྱབ་གོ་བའི་དབྱིངས་འཇལ་བ་དང་། བྱེ་བྲག་གི་རྣམ་གྲངས་རྣམ་པར་འབྱེད་པ། དེ་དག་གི་དོན་བསྡུ་བ་དང་གསུམ་ལས།

དང་པོ་ནི། ཆོས་སྐུ་ཡེ་ཤེས་ཀྱི་ཐུགས་ནང་གསལ་ཀྱི་ཆ་ནས་བཤད་པ་ཡིན་ལ། གཟུགས་སྐུ་གཉིས་དེའི་ཕྲིན་ལས་ཕྱི་གསལ་གྱི་ངོས་ནས་བཤད་པ་ཡིན་བྱས་ན་གོ་བ་བློ་ལ་བཟུང་བདེ་ཡང་༔ རང་སྣང་ལོངས་སྐུ་ནི་ཆོས་སྐུ་དང་ཐ་དད་མེད་པས་ཤིན་ཏུ་རྣམ་དག་གི་སྣང་བ་ཡིན་པས་ཅུང་ཟད་མི་འཇུག་གོ །དེ་ལྟར་ན་ཆོས་སྐུ་ཞེས་བྱ་བ་གཞིའི་ངོས་ནས་སེམས་ཀྱི་ངོ་བོ་རང་བཞིན་ཐུགས་རྗེ་གསུམ་ལ་ཆོས་སྐུའི་ཆོས་སྐུ། ཆོས་སྐུའི་ལོངས་སྐུ། ཆོས་སྐུའི་སྤྲུལ་སྐུ་སྟེ། མི་འགྱུར་རྡོ་རྗེའི་སྐུ་དང་། མངོན་པར་བྱང་ཆུབ་ཡེ་ཤེས་ཆོས་སྐུ་གསུམ་དུ་བཤད་དོ། །ལོངས་སྐུའི་ཆོས་སྐུ་ནི་ཡེ་ཤེས་ལྔ་ཡིན་ནོ། །ལོངས་སྐུའི་ལོངས་སྐུ་ནི་འོད་ལྔའོ། །ལོངས་སྐུའི་སྤྲུལ་སྐུ་ནི་སྐུ་ལྔའོ། །ཞེས་གསུངས་ཀྱང་། དེ་ལའང་སོ་སོར་ཕྱེ་ན། ཆོས་དབྱིངས་ཡེ་ཤེས་ནི་ལོངས་སྐུའི་ཆོས་སྐུའི་ཡེ་ཤེས་དེའི་རང་གདངས་ནི་འོད་མཐིང་ཀ་དེའི་འབྲས་བུ་གཟུགས་བརྙན་དུ་ཤར་བའི་སྐུ་ནི་རྣམ་པར་སྣང་མཛད་དོ། །དེ་བཞིན་དུ་མེ་ལོང་དང་མཉམ་ཉིད་ནི་ལོངས་སྐུའི་ལོངས་སྐུའི་ཡེ་ཤེས་དེའི་རང་གདངས་འོད་དཀར་བོ་དང་སེར་པོ་འབྲས་བུ་སྐུ་ནི་རྡོར་སེམས་དང་རིན་འབྱུང་ངོ་། །སོར་རྟོགས་དང་བྱ་གྲུབ་ནི་ལོངས་སྐུའི་སྤྲུལ་སྐུའི་ཡེ་ཤེས་དེའི་རང་གདངས་འོད་དམར་པོ་དང་ལྗང་གུ འབྲས་བུ་སྐུ་ནི་སྣང་མཐའ་དང་དོན་གྲུབ་པོ། །སྤྲུལ་སྐུའི་ཆོས་སྐུའི་ཡེ་ཤེས་ནི་ཇི་ལྟ་བ་མཁྱེན་པའི་ཡེ་ཤེས་ཡིན་ལ་སྤྲུལ་སྐུའི་ལོངས་སྤྲུལ་གཉིས་ཀྱི་ཡེ་ཤེས་ནི་ཇི་སྙེད་པ་མཁྱེན་པའི་ཡེ་ཤེས་ཏེ། དེ་ཡང་སངས་རྒྱས་རང་སྣང་རྣམ་པར་དག་པ་མཐོང་བའི་ཆ་ནས་ལོངས་སྐུ་ཡིན་ལ། སེམས་ཅན་གྱི་ཁམས་དབང་བསམ་པ་མཁྱེན་པའི་ཆ་ནས་སྤྲུལ་སྐུའི་ཡིན་ནོ། །འོད་ནི་འདོམ་གང་ལ་སོགས་པའོ། །སྐུ་ནི་རང་བཞིན་སྤྲུལ་སྐུ། འགྲོ་འདུལ་བེམ་པོ་སྐྱེ་བ་བཟོ་སྤྲུལ་སྐུ་དང་བཅས་པའོ། །དེ་ལྟར་སྐུ་གསུམ་ཡེ་ཤེས་དང་བཅས་པའི་འཆར་ཚུལ་ཡང་ཆོས་སྐུ་ལས་ལོངས་སྐུ་དེའི་གཟུགས་བརྙན་ལས་སྤྲུལ་སྐུ་འཆར་བ་ཡིན་པས་སྐུ་གསུམ་གྱི་ངོ་བོ་དབྱིངས་ནང་གསལ་གྱི་སྐུ་གསུམ་ཡིན་ལ། རོལ་བ་ནི་ཡེ་ཤེས་རྒྱ་མཚོ་དང་རིགས་ལྔ་ཡེ་ཤེས་ལྔ་དང་གང་ལ་གང་འདུལ་རྣམས་ཡིན་པར་བཤད་དོ། །གཞི་དུས་ན་སྐུ་གསུམ་པོ་ས་བོན་ནམ་རྒྱུའི་ཚུལ་དུ་ལུས་ལ་ཡོད། ལམ་དུས་སུ་མངོན་སུམ་གོང་འཕེལ་གཉིས་སུ་སྤྲུལ་སྐུ་མངོན་དུ་གྱུར། ཚད་ཕེབས་ལོངས་སྐུ། ཆོས་ཟད་ལ་ཆོས་སྐུ། དེ་ནས་ཤེས་སྒྲིབ་ཕྲ་བ་ཡང་དག་ནས་མངོན་བྱང་དང་མི་འགྱུར་རྡོ་རྗེའི་ས་ལ་གནས་པ་ནི། རང་དོན་སྐུ་ལྔ་ལྷུན་འགྲུབ་ལུགས་ལྡོག་ཏུ་འཆར་ཚུལ་ཡིན་ནོ། །གཞན་དོན་དུ་ཆོས་སྐུ་ལས་གཟུགས་སྐུ་འབྱུང་བ་སྔ་མ་ལྟར་རོ། །

གཉིས་པ་ལ། གཞི་ལ་གནས་ཚུལ། ལམ་དུ་སྣང་ཚུལ། འབྲས་བུ་མངོན་དུ་གྱུར་ཚུལ་ལོ། །དང་པོ་ལ། ཆོས་སྐུ་ལོངས་སྐུ་སྤྲུལ་སྐུ་གཞི་ལ་གནས་ཚུལ་གསུམ་ལས། དང་པོ་ནི། ད་ལྟ་གཞི་སེམས་ཅན་གྱི་དུས་ན་ཆོས་སྐུ་ནི་ཡེ་ཤེས་གསུམ་ལྡན་དུ་སྙིང་ནང་དུ་ཡེ་ཤེས་སེམས་དཔའི་ཚུལ་དུ་ཡོད་དོ། །གཉིས་པ་ལོངས་སྐུ་ནི་གསེར་གྱི་རྩ་ཆེན་གྱི་དབུས་སུ་དྭངས་མ་ལྔ་ལྡན་འོད་ལྔའི་ཐིག་ལེའི་དབུས་སུ་རྣམ་སྣང་ལ་སོགས་པའི་ཞི་བ་བཞི་བཅུ་རྩ་གཉིས་ཀྱི་སྐུ་ཆ་ཕྲ་ལ་བལྟ་དཀའ་བའི་ཚུལ་དུ་ཡོད་ལ། དེ་ནས་སྟོང་བ་རང་གྲོལ་གྱི་ཡར་རྩེ་རུ་འོད་ཟེར་རམ་རིགས་བདག་གི་ཚུལ་དུ་ཡང་ཁྲོ་བོའི་སྐུ་འོད་ཡེ་ཤེས་སུམ་བརྩེགས་སུ་ཡོད་དོ། །གཞན་ཡང་འཁོར་ལོ་ལྔ་རུ་མཁའ་འགྲོའི་དཀྱིལ་འཁོར་ཡོད་དོ། །དེ་དག་ནི་ལོངས་སྐུའི་གཞི་གནས་ཚུལ་ལོ། །སྤྲུལ་སྐུའི་ཁྱབ་ཚུལ་ཁྱད་པར་ཆེན་པོའི་རྩ་བཞིའི་ཡལ་འདབ་ཕྲ་བ་སྡོང་པོ་དང་བཅས་པ་རྣམས་སུ་སྐུའི་རང་གདངས་ལུ་གུ་རྒྱུད་དང་། ཐུབ་དྲུག་གི་སྐུ་དང་། རང་བཞིན་སྤྲུལ་སྐུ་གྲངས་མེད་པ། གསུང་གི་རང་གདངས་འོད་ལྔ། ཐུགས་ཀྱི་རང་གདངས་ཐིག་ལེ་གསུམ་འདུ་འབྲལ་མེད་པར་སུམ་བརྩེགས་སུམ་བརྩེགས་སུ་ཡོད་པའོ། །དེ་དག་གི་ཡེ་ཤེས་ཆོས་སྐུའི་ཡེ་ཤེས་ཀྱི་རང་རྩལ་དུ་ལོངས་སྐུའི་ཡེ་ཤེས་རང་བཞིན་ཤུགས་ཀྱིས་རྫོགས། རྩལ་ལས་རོལ་བར་ཤར་བས་སྤྲུལ་སྐུའི་ཡེ་ཤེས་ཀྱི་སྤྲིན་འཕྲོ་བའོ། །རྩ་ནང་ཀུན་དང་ཤེས་བྱ་ཐམས་ཅད་ལའང་འཇུག་པར་བཤད། ཆོས་སྐུའི་ཡེ་ཤེས་འཆར་གཞིའི་ཚུལ། ལོངས་སྐུ་འཆར་བ་འོད་ཀྱི་ཚུལ། སྤྲུལ་སྐུ་འོད་ལས་ཟེར་གྱི་ཚུལ་དུ་འཕྲོ་བའོ། །སྙིང་དང་དུང་ཁང་ནང་དུ་གནས་པ་ནི་གཞིའི་དབྱིངས་རིག་ཐིག་ལེ་སུམ་བརྩེགས་རྩ་བཞི་དང་ཡང་ཕྲན་དང་བཅས་པ་ནས་གནས་པ་ནི་ལམ་གྱི། དེ་གཉིས་ཀའི་འབྲས་བུ་ཡུལ་ལ་སྣང་བའི་དབྱིངས་རིག་ཐིག་ལེ་རྣམས་ནི་ནམ་མཁའ་ལ་དབྱིངས་ཐིག་ལུ་གུ་རྒྱུད་དུ་སྣང་བའོ། །ཡང་ངོ་བོ་གང་དུའང་མ་གྲུབ་པས་ཆོས་དབྱིངས་ཡེ་ཤེས་སམ་སྟོང་བ་ཉིད་ཀྱི་ཡེ་ཤེས། གསལ་ལ་རྟོག་པ་མེད་པ་མེ་ལོང་ཡེ་ཤེས། སྣང་སྟོང་མཉམ་པར་བརྡལ་བས་མཉམ་ཉིད་ཡེ་ཤེས། མ་འདྲེས་སོ་སོར་མཁྱེན་པས་སོར་རྟོགས། བདག་གཞན་གྱི་དོན་གཉིས་ལྷུན་གྱིས་གྲུབ་པའི་དངོས་མཁྱེན་པས་བྱ་གྲུབ་ཡེ་ཤེས་ཏེ་ཡེ་ཤེས་ལྔའོ། །

གཞུང་ལུགས་སྤྱིའི་ཆོས་སྐད་དུ་ཡེ་ཤེས་ལྔ་ལས་མེད་པས་དེ་སྐུ་ལྔ་ལ་སྦྱར་དུས། ཆོས་དབྱིངས་རྡོ་རྗེའི། མེ་ལོང་ཆོས་སྐུའི། མཉམ་ཉིད་ལོངས་སྐུའི། སོར་རྟོགས་མངོན་བྱང་གི བྱ་གྲུབ་སྤྲུལ་སྐུའི་ཡེ་ཤེས་སོ། །ཞེས་བཤད་དོ། །ཡང་ཡེ་ཤེས་དེ་དག་གི་རྩལ་གཞིར་གནས་ཀྱི་ཤེས་རབ་ཆོས་དབྱིངས་ཀྱི། སྐྱོད་བྱེད་མེ་ལོང་གི སྡུད་བྱེད་མཉམ་ཉིད་ཀྱི། འབྱེད་བྱེད་སོར་རྟོགས་ཀྱི། སྒྲོལ་བྱེད་བྱ་གྲུབ་ཀྱི་རྩལ་ཡིན་ལ། ཤེས་རབ་ལྔའི་རྟ་དྭངས་མ་ཡེ་ཤེས་ཀྱི་རླུང་ལྔ་ནི། སྲོག་རླུང་གཞིར་གནས། གྱེན་རྒྱུ་སྐྱོད་བྱེད། མཉམ་གནས་སྡུད་བྱེད། ཐུར་སེལ་འབྱེད་བྱེད། ཁྱབ་བྱེད་སྒྲོལ་བྱེད་ཀྱི་རྟ་ཡིན་ནོ། །ཆོས་ཉིད་སྤྲོས་པ་དང་བྲལ་དེ་བཞིན་རིགས། མི་འགྱུར་བ་རྡོ་རྗེའི་རིགས། ཡོན་ཏན་འབྱུང་བ་རིན་པོ་ཆེའི་རིགས། སྐྱོན་གྱིས་མ་གོས་པ་པདྨའི་རིགས། རང་གཞན་གྱི་དོན་གཉིས་སྒྲུབ་པ་ལས་ཀྱི་རིགས་ཏེ་རིགས་ཀྱི་ཆོས་ལྔ། སྐུ་ལྔ་ཡེ་ཤེས་ལྔའི་ངང་སྟོང་བར་གནས་པས་ངོ་བོ་ལྔ། རང་བཞིན་མ་འགགས་པར་གསལ་བས་རང་བཞིན་ལྔ། བདག་ཉིད་ཐུགས་རྗེ་ཆེན་པོའི་རོལ་བ་མ་འགགས་པས་ཐུགས་རྗེ་ལྔ་ཞེས་སམ་རྟག་པ་རྒྱུན་གྱི་ཐུགས་རྗེ། རང་བཞིན་ཤུགས་ཀྱི། རྐྱེན་དང་འཕྲད་པའི། བསྐུལ་ཞིང་གསོལ་བ་བཏབས་པའི་ཐུགས་རྗེ་བཞི། ཇི་ལྟ་ཇི་སྙེད་ནང་ལྟར་མཁྱེན་ནས་རང་རྒྱུད་གྲོལ་བའི་ཐུགས་རྗེ་དབྱིངས་ཡེ་སྣང་སྟོང་དབྱེར་མེད་པ་རྡོ་རྗེའི་སྐུ། སྤང་རྟོགས་མཐའ་ཕྱིན་པ་དང་སྐུ་གསུམ་སྣང་ཆ་མ་འདྲེས་ནང་གསལ་མངོན་བྱང་གི་སྐུ། དབྱིངས་ལ་ཡེ་ཤེས་ཤར་བ་ཆོས་སྐུ། མཚན་དཔེའི་ཡོན་ཏན་རྫོགས་པ་ལོངས་སྐུ། སྤྲུལ་བ་གང་འདུལ་དུ་བྱུང་བས་སྤྲུལ་སྐུ་ཞེས་བྱའོ། །ཆོས་སྐུའི་གསུང་བརྗོད་དུ་མེད་པ་སྐྱེ་མེད་མཚོན་པ་ནམ་མཁའ་ལྟ་བུའི་གསུང་། ལོངས་སྐུའི་གསུང་འགག་མེད་རང་གསལ་ལམ་དགོངས་བརྡའི་གསུང་གི་བྱིན་གྱིས་རླབས་ཀྱིས་བཤད། སྤྲུལ་སྐུ་བརྗོད་པ་ཚིག་གི་གསུང་སྡེབས་སྦྱོར་ལེགས་པས་བཤད། མངོན་བྱང་རིག་པ་བྱང་ཆུབ་ཀྱི་བྱིན་གྱིས་རླབས་ཀྱིས་བཤད་དོ། །རྡོ་རྗེ་གྲགས་སྟོང་དབྱེར་མེད་པའི་གསུང་གིས་རང་བཞིན་སྤྲོས་བྲལ་དུ་སྟོན་ནོ། །ཐུགས་ནི་ཡེ་ཤེས་ལྔའོ། །རྡོ་རྗེའི་རིགས་ཀྱིས་ཕྲིན་ལས་ཞི་བ། རིན་ཆེན་གྱིས་རྒྱས་པ། པདྨའི་དབང་དང་། ལས་རིགས་ཀྱི་དྲག་པོ། བུདྡྷའི་ལྷུན་གྲུབ་ཀྱི་ཕྲིན་ལས། ཡོན་ཏན་ལྔ་ནི་རིགས་ཀུན་ལ་ཡོད་པས། རྣམ་པར་དག་པའི་ཞིང་ཁམས། རྒྱ་ཚད་དང་བྲལ་བའི་གཞལ་ཡས། གསལ་ཞིང་དག་པའི་འོད་ཟེར། ཁྱད་པར་འཕགས་པའི་གདན་ཁྲི། དགྱེས་དགུར་རོལ་བའི་འདོད་ཡོན་ནོ། །

གསུམ་པ་ནི། དེ་དག་ཀུན་ཀྱང་བྲལ་གཞི་ད་ལྟ་རིག་པའི་ཡེ་ཤེས་གཅིག་ལའང་རྫོགས་པས་ན་སོ་སོའི་བྲལ་རྒྱུ་ལ་གོམས་པ་མཐར་ཕྱིན་པས། བྲལ་འབྲས་སངས་རྒྱས་ཀྱི་དུས་སུ་ཡེ་ཤེས་གཅིག་གི་ཆོས་ཉིད་དང་། ཡོན་ཏན་དང་། ཕྲིན་ལས་ལ་ལྷུན་གྱིས་གྲུབ་པར་འབྱུང་ཞིང་རང་གཞན་གྱི་དོན་གཉིས་འབྱུང་བའོ། །དེ་ལྟར་རྒྱུད་ལུང་མན་ངག་སྙིང་པོའི་དོན། །ཚིག་ཉུང་དོན་འདུས་ངོ་བོར་དྲིལ་བ་འདི། །ཆོས་ཉིད་བདེན་པ་མཐོང་བའི་ལག་རྗེས་སུ། །ག་ག་ཨ་བྷྱེ་སྨྱོན་པས་སྨྲས་ནས་སོ། །དམ་པའི་རིགས་ཅན་རཏྣའི་མཚན་ཅན་སོགས། །ཆོས་ཚུལ་འདི་ལ་ཡང་དག་རིག་པ་བཞིའི། །རྡུལ་བྲལ་དྲི་མ་མེད་པའི་མིག་ཐོབ་ནས། །མཐར་ཐུག་གོ་ས་སྙེགས་པའི་རྒྱུར་གྱུར་ཅིག །ཅེས་པ་འདི་ཡང་གནམ་བསྐོས་གོང་མ་ཆེན་པོའི་ཁབ་ཀྱི་རྒྱལ་ཕྲན་རཏྣ་ཨཱ་ཡུཿརཱ་ཛའི་བཀའ་ཕེབས་སྤྱི་བོར་བླངས་ཏེ་སྔགས་བཙུན་ནམ་མཁའ་འཇིགས་མེད་པས་སྨྲས་པ་དགེའོ། །མངྒ་ལམ། །

རང་གནས་ཞི་ཁྲོའི་སྨིན་བྱེད་ཡེ་ཤེས་གསང་ལམ

ཡེ་ཤེས་སྒྱུ་འཕྲུལ་དྲྭ་བ་ལས༔ རང་གནས་ཞི་ཁྲོའི་སྨིན་བྱེད་ཡེ་ཤེས་གསང་ལམ་བཞུགས་སོ༔

ན་མོ་གུ་རུ་པདྨ་ཀཱ་ར་ཡེ༔ རྗེས་སུ་རྣལ་འབྱོར་ཆེན་པོའི་ལམ༔ གང་གིས་ཉམས་སུ་ལེན་འདོད་པས༔ བསྐྱེད་རྫོགས་ཟུང་དུ་མ་ཞུགས་པ༔ མུ་སྟེགས་བྱེད་ལ་ཡང་ཡོད་ཕྱིར༔ འདིར་ནི་ཡེ་ཡོད་ལྷུན་གྲུབ་ལྷ༔ ཞི་ཁྲོ་རྒྱལ་བའི་དཀྱིལ་འཁོར་གྱི༔ རྟེན་དང་བརྟེན་པ་རབ་བཀོད་དེ༔ ཟུང་འཇུག་༼ བསྐྱེད་རིམ་པས་ཆོས་ཀྱི་ཕྱག་རྒྱ་ལ་གོམས་ཤིང་བརྟན་པས། གཏུམ་མོ་དམ་ཚིག་གི་ཕྱག་རྒྱ་དང་། དེའི་འབྲས་བུ་ཐོད་རྒལ་རྣམ་བཅས་ཀྱི་ཕྱག་རྒྱ་ལྟོ་སྦྱོར་དུ་སྒོམ་པས་རྡོ་རྗེའི་རྣལ་འབྱོར་གྱི། ༽ སྙེམས་མ་བསྒོམས་པར་བྱ༔ སྐྱབས་སེམས་ལ་སོགས་སྔོན་སོང་ནས༔ བགེགས་བསྐྲད་བསྲུང་བའི་འཁོར་ལོ་བསྒོམ༔ རྒྱས་པར་ཞི་ཁྲོ་སྤྱི་ཡི་ལུགས༔ བསྡུ་ན་དྲོད་གཤེར་སྐྱེས་འདི་བསྒོམ༔ འདིར་ཨ་ནུའི་རང་ལམ་ལ་ཐབས་ཀྱི་ངེས་པ་དང་ཤེས་རབ་ཀྱི་རྣམ་པར་གྲོལ་བའི་ལམ་གཉིས་སུ་ངེས་པ་ལས། ཕྱི་མ་ལ་དོན་དང་ཡི་གེའི་རྗེས་སུ་འཇུག་པ་གཉིས་ལས་ཕྱི་མ་ནི། བང་མཛོད་འཕྲུལ་ལྡེ་ལས། ཨ་ནུ་ཡོ་གའི་ཐེག་པར་ནི། །སྙིང་པོ་ཙམ་ཞིག་བརྗོད་བྱས་ནས། །མ་བསྐྱེད་རྫོགས་པའི་ལྷ་རུ་བསྒོམ། །ཞེས་གསུངས་ཏེ། རྟགས་ཀྱི་རོལ་བ་ཞེས་པའི་བརྡ་ཆད་ཀྱང་མཛད་དོ། །སྤྱིར་རྫོགས་རིམ་གྱི་གཞི་ནི་བསྐྱེད་རིམ་ཡིན་ལ་དེ་ལའང་ཀུན་བཏགས་དང་རང་བཞིན་གྲུབ་པ་གཉིས་ལས། ཕྱི་མ་ཟབ་མོའི་བསྐྱེད་རིམ་ལྷན་སྐྱེས་ཡེ་རྫོགས་ཕུང་ཁམས་དཀྱིལ་འཁོར་གྱི་འཁོར་ལོར་རང་ཆས་པ་ནི་ཨ་ནུ་ཡོ་གའི་གྲུབ་མཐའ་སྟེ། དེ་ཡང་ཕྲ་བའི་ལུས་ངག་ཡིད་གསུམ་གདོད་ནས་རྡོ་རྗེ་མི་ཤིགས་པ་གསུམ་གྱི་ལྷར་རྣམ་པར་དག་པའི་དེ་གསུམ་ཡང་དོན་དམ་པའི་རིགས་དྲུག་གི་ལྷ་འབྱུང་ལྔ་སེམས་ཀྱི་དངས་མ་དང་བཅས་པའང་གཉིས་གཉིས་ཟུང་དུ་འཇུག་པའི་ས་ཆུའི་དྭངས་མ་སྐུ་རྡོ་རྗེ། མེ་རླུང་གི་གསུང་། མཁའ་སེམས་ཀྱི་ཐུགས་རྡོ་རྗེར་བཞུགས་པས་རང་བཞིན་གཉིས་སུ་མེད་པ་སྦྱང་གཞི། བང་མཛོད་འཕྲུལ་ལྡེ་ལས། རྫོགས་པ་ཨ་ནུ་ཡོ་ག་ནི། །ཕུང་པོ་ཁམས་དང་སྐྱེ་མཆེད་རྣམས། །ལྷ་དང་ལྷ་མོའི་དཀྱིལ་འཁོར་དུ། །མ་བསྐྱེད་རྫོགས་པའི་ཚུལ་དུ་འདོད། །ཅེས་སོ། །སྣང་གསུམ་འཕོ་བའི་བག་ཆགས་རྐྱེན་གྱུར་གཟུང་འཛིན་ཀུན་རྟོག་གི་གཡོ་བ་ཐ་མལ་སྣང་ཞེན་གྱི་སྒྲིབ་པས། དེ་རགས་པར་འཐས་པའི་རྩ་ཐིག་རླུང་གསུམ་ནི་སྦྱང་བྱ། ཐབས་ལམ་སྟེང་འོག་གི་སྒོ་སོགས་གནད་དུ་བསྣུན་པས་རགས་པའི་འགྱུར་བ་ཐམས་ཅད་འགྱུར་མེད་ཡེ་ཤེས་ཀྱི་དབུ་མར་བསྐྲུན་པས་དཔེ་དོན་གྱི་ཡེ་ཤེས་བཙན་ཐབས་སུ་འདྲེན་པ་ནི་སྦྱོང་བྱེད་དེ། དེས་ན་གདོད་མའི་འོད་གསལ་གཉུག་མའི་རང་གདངས་སྐུ་དང་ཡེ་ཤེས་སུ་སངས་རྒྱས་པའི་དཀྱིལ་འཁོར་བསྐྱེད་པའི་རྐྱེན་གྱི་ཡི་གེས་དྲན་པར་བྱ་བ་ཙམ་ལས་སྤྲོས་པ་ཆེར་མ་དགོས་པ་ནི་སྔར་བསྐྱེད་རིམ་གྱི་ལྷ་སྐུ་གཞིར་བཞག་གོམས་པ་ངེས་རྫོགས་དབང་བཙན་དུ་བྱས་པ་ཡིན་ལ། ལར་དེ་ཙམ་གྱིས་ཆོག་པ་གཞི་ནས་འཇུག་ནུས་པའི་དབང་རྣོན་མེད་པའང་འགོག་པ་ནི་མིན་ཏེ་གང་ཟག་གི་མོས་ཁམས་བསམ་གྱིས་མི་ཁྱབ་པའི་ཕྱིར་རོ། །དེས་ན་འདིར་དྲོད་གཤེར་སྐྱེས་སྦྱོང་བའི་ལུགས་ལྟར་རྩ་དང་རླུང་སྦྱོར་ལ་རྩ་དཀྱིལ་ཞི་བ་དང་། གཏུམ་མོ་དང་དཔྱིད་ཐིག་ལ་ཁྲོ་བོར་བསྒོམ་པ་མན་ངག་ཡིན་ནོ། །ཨོཾ་ཨཱཿཧཱུྃ་བྷོ་དྷི་ཙིཏྟ་མ་ཧཱ་མ་སུ་ཁ་ཛྙཱ་ན་དྷརྟུ་ཨཱཿ ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ༔ རང་ཉིད་པདྨ་ཉི་གདན་ལ༔བསྐྱེད་པའི་རྐྱེན་སྔགས་ཡོངས་གྱུར་ལས༔ ཆེ་མཆོག་ཧེ་རུ་སྨུག་ནག་ལ༔ ཞལ་གསུམ་ཕྱག་དྲུག་གཡས་གསུམ་གྱིས༔ རྡོ་རྗེ་ཁ་ཊྭཾ་རྔེའུ་ཆུང་དང་༔ དྲིལ་བུ་བྷན་དམར་རྒྱུ་ཞགས་གཡོན༔ གནམ་ཞལ་ཡུམ་མཆོག་ཀྲོ་དྷིར་སྦྱོར༔ ཐུགས་ཀར་ཀུན་ཏུ་བཟང་པོ་མཐིང་༔ ཆོས་ཉིད་བཟང་མོར་གཉིས་མེད་འཁྲིལ༔ ཕྱོགས་བཞིར་པད་ཉི་ཏི་རའི་སྟེང་༔ བུདྡྷ་བཛྲ་རཏྣ་དང་༔ པདྨ་ཀརྨ་ཀྲོ་དྷ་ལྔ༔ ཐུགས་ཀར་རྡོར་སེམས་རིན་འབྱུང་དང་༔ སྣང་མཐའ་དོན་གྲུབ་ཡབ་ཡུམ་གསལ༔ ཡུམ་མཆོག་ཀྲོ་དྷི་རིགས་ལྔར་འཁྲིལ༔ གནས་མ་བརྒྱད་ཀྱི་ཐུགས་ཀ་རུ༔ སེམས་དཔའ་བརྒྱད་དང་ཡུལ་མ་བརྒྱད༔ ཐུགས་ཀར་སེམས་མ་བརྒྱད་ཀྱིས་བསྐོར༔ མཐའ་བསྐོར་རྟོག་ཚོགས་གནས་འགྱུར་མཚོན༔ སྒོ་བཞིའི་ཁྲོ་བོ་ཁྲོ་མོ་ལ༔ དབང་མོ་ཉི་ཤུ་རྩ་བརྒྱད་རྫོགས༔ པདྨ་དང་ནི་ཟླ་དལ་ལ༔ རང་ཉིད་བསྐྱེད་པའི་རྐྱེན་ཡིག་ལས༔ ཀུན་བཟང་ཡབ་ཡུམ་འཁྲིལ་སྦྱོར་བས༔ ཡེ་ཤེས་ལྔ་ལྡན་རིགས་ལྔར་རྫོགས༔ ཚོགས་ཡུལ་རྣམ་དག་བྱང་སེམས་ལྕམ༔ མུ་བཞི་རྟག་ཆད་ཡེ་དག་པ༔ སྒོ་བ་ཡབ་ཡུམ་བརྒྱད་དུ་རྫོགས༔ ཉོན་དྲུག་ཡེ་གྲོལ་ཐུབ་པ་དང་༔ ཉོན་མོངས་ལྔ་པོ་གནས་འགྱུར་བས༔ ཆོས་ཉིད་ངང་གིས་ཁྲོ་ཚོགས་རྫོགས༔ དེ་ནི་གསང་འདུས་ཀྱི་རིམ་ལྔའི་ལུས་དབེན་དང་། དུས་འཁོར་གྱི་སྦྱོར་དྲུག་གི་སོར་བསམ་གྱི་དོད་ཐུབ་སྟེ། རྫོགས་རིམ་གྱི་ལྷ་སྐུ་ཡིན་པ་དང་། ཐ་མལ་གྱི་འཛིན་ཞེན་སྡུད་པའི་ཕྱིར་རོ། །དེ་ལྟར་རང་ཉིད་དབྱིབས་ཀྱི་ལྷར་གསལ་བའི་ཐབས་ཀྱི་ངེས་པའི་ལམ་ནི་སྟེང་འོག་གི་སྒོ་གཉིས་ལས་ཐོག་མར་སྟེང་སྒོ་རྣམ་གྲོལ་ལ། སྐུ་དབུས་སྐུ་གསུང་ཐུགས་ཀྱི་རྟེན༔ རྩ་གསུམ་ཀ་བ་ལྟ་བུ་རྫོགས༔ དབུས་ཀྱི་འཁོར་ལོ་དྲན་པའམ་དབུ་རྐྱང་རོ་གསུམ་གྱི་དབུས་ན༔ རྡོ་རྗེ་གསུམ་གྱི་ཡི་གེ་ཤར༔ ཨོཾ་ཨཱཿཧཱུྃ༔ འདི་བདག་བྱིན་གྱིས་བརླབས་པའི་རིམ་པའང་ཡིན་པའི་གནད་ཀྱིས་བྱིན་ཆེན་འབེབས་པ་ནི། འོད་འཕྲོས་དབྱིངས་ནས་རྒྱལ་བའི་ཚོགས༔ སྤྱན་དྲངས་གཉིས་སུ་མེད་པར་གྱུར༔ ཨོ་རྒྱན་༴པདྨ་ཀ་མ་ལ་ཡེ་སྟྭཾ༔ ན་མོ་ན་མ་ཧཱུྃ༔ ཀྱཻ༔ ཕྱོགས་བཅུ་དུས་གསུམ་རྒྱལ་བ་རྣམས༔ བདག་གི་མོས་སྔར་མཁྱེན་བརྩེའི་རོལ༔ བརྟེན་པ་རྩ་དང་དེས་བསྐྱེད་པའི༔ མ་དག་པའི་ཡུལ་ལུས་རྡོ་རྗེའི་སྐུ་རུ་སྦྱོང་དུ་གསོལ༔ གསུང་རྡོ་རྗེའི་རང་བཞིན་ལ་ཐ་མལ་བའི་ངག་དུ་ལོག་པར་བལྟས་པ་གཡོན་གྱུར་དེས་ན་དེའི་རྩ་བ་གཞོམ་མེད་ཀྱི་རླུང་མི་ཤིགས་པའང་ངག་འཕེལ་བྱེད་ལས་རླུང་གདངས་བ་ཡ་ཏ་དང་སྐད་དོད་ཀྱི༔ སོ་ཤ་ན། རླུང་སོགས་ཕྱིར་རྒྱུ་བ་ཉི་ཁྲི་ཆིག་སྟོང་དང་། ནང་དུ་རླུང་བཅུ་དང་། དེས་བསྐྱེད་པའི་སྲོག་རླུང་བརྒྱད་ཁྲི་བཞི་སྟོང་། འབྱུང་གནས་ཐིམ་གསུམ་རགས་པས་བཀོད། དེ་ཡི་སྣང་གསུམ་འཕོ་བའི་བག་ཆགས་འགྱུར་བདེར་བཅས༔ རྡོ་རྗེའི་གསུང་དུ་སྦྱང་དུ་གསོལ༔ རང་བྱུང་དངོས་པོའི་ཆོས་ཉིད་ལ༔ བཀོད་པའི་ཐིག་ལེ་དྲུག་ལ་སོགས་པ་ལ་བདག་ཏུ་བཟུང་བས་མ་དག་པར༔ ཁམས་དྲུག་ཏུ་འཕོས་པས་བརྒྱུད་དེ་ཁམས་ཐིག་ལེའི་འགྱུར་བ་འཁྲུལ་རྩར་གྱུར་ནས་ཡིད་ལ་ནོངས༔ ཤིང་འཁྲུལ་བ་རྡོ་རྗེའི་ཐུགས་སུ་སྦྱང་དུ་གསོལ༔ འཁོར་ལོ་ཚོགས་ཆེན་བཀོད་པ་བྱང་ཆུབ་ཀྱི་སེམས་དང་ཡིད་དག་པས་ཐོབ༔ མ་ཆགས་པདྨ་ཅན་ནམ་རྡོ་རྗེ་འཛིན་པ་ལུས་སེམས་ཀྱི་རྩོལ་བྱུང་ངག་ཕྱེད་སྣང་གི་བག་ཆགས་དག་པས་ཆམ་མཉམ་པས༔ ཐོབ་པོ། །ཕྲ་རགས་ལུས་དང་རྩ་ཡི་བག་ཆགས་དག་པ་ཀུན་ཏུ་འོད་ལ་སྤྲུལ་པའི་སྐུ་རྡོ་རྗེ་ཡི་རོལ༔ མཐར་ཕྱིན་བཅུ་དྲུག་ཡེ་ཤེས་བླ་མའི་འབྲས་བུ་མངོན་གྱུར་ཤོག༔ དེ་ནི་རྒྱུན་གྱི་གསོལ་གདབ་དང་༔བསྐྱེད་པའི་རིམ་པ་ཉུང་བསྡུས་གཉིས༔ ཐུན་གྱི་མགོ་མཇུག་གཉིས་སུ་གལ༔ ས་མ་ཡཱ༔ རྒྱུད་དུ་ཉམས་སུ་ལེན་དུས་ནི༔ སྣོད་ངན་བཀྲུ་བཤལ་བྱེད་པ་ལྟར། ཐོག་མར་མལ་ནས་ལྡང་བ་དང་༔ མ་དག་ཉོན་མོངས་དུག་གསུམ་རླུང་༔ ཁུ་ཚུར་གདོང་བརྒྱང་གསུམ་མཐར་ལག་པ་གཡོན་གྱི་མཛུབ་མོའི་སྣ་བུག་གཡོན་མནན་ནས་རླུང་རོ་གཡས་ནས་ལན་གསུམ་ཞེ་སྡང་རླུང་། དམར་ནག་ལན་གསུམ་གདོང་བརྒྱང་མཐར་ལག་གཡས་ཀྱིས་སྣ་བུག་མནན་ནས་འདོད་ཆགས་རླུང་། དཀར་ནག་གདོང་བརྒྱང་གསུམ་མཉམ་ནས་གཏི་མུག་རླུང་། ནག་པོའི་གཟུགས༔ དྲི་འཛིན་སྣ་བུག་གཡས་གཡོན་མཉམ་ནས་དགུར༔ སྤྲུགས་པས་བག་ཆགས་ལས་ཉོན་སྦྱངས༔ གནས་དོན་ལུས་ཀྱི་བག་ཆགས་ཀུན༔ སྦྱངས་ཕྱིར་ཧ་སྤྲུགས་དང་བསྒྲགས་ཏེ༔ སྐྱིལ་ཀྲུང་བྲང་སྟེང་ཁུ་ཚུར་བསྣོལ༔ བཤིག་པ་བསྒྲགས་པ་ལག་ལེན་ནོ༔ དེ་དག་སྔོན་དུ་འགྲོ་བའོ༔ དེ་ནས་དངོས་གཞིའི་རིམ་པ་ལ༔ འདིར་སྲོག་དང་རྩོལ་བ་ཞེས་པ་སྣ་བུག་གཡས་གཡོན་གྱི་རླུང་གཉིས་༼ འཁོར་ལོ་སྡོམ་པའི་རྒྱུད་ཕྲན་ལུགས་ ༽ དང་། ཡང་སྲོག་རླུང་དང་རྩོལ་བ་རིང་དུ་སྤྲོ་བ་ ༼ གསང་འདུས་དང་། ༽ ཡང་སྲོག་རླུང་དང་། རྩོལ་བ་སེམས་ཀྱི་རྒྱུ་བ་ ༼ དུས་འཁོར་ ༽ དང་། ཡང་སྲོག་རླུང་དང་རྩོལ་བ་ཐིག་ལེ་ ༼ པདྨའི་ལུགས་ ༽ ལ་བཞག་པའི་ལུགས་སོགས་མང་དུ་ཡོད་པ་ལས་འདིར་ཕྱི་མ་དང་། སྲོག་རྟག་པ་དང་རྩོལ་བ་ཆད་བའི་མཐའ་གཉིས་དབུ་མ་བསམ་གྱིས་མི་ཁྱབ་པའི་ཡེ་ཤེས་སུ་སྡོམ་པའོ། །རིན་ཆེན་ཕྲེང་བའི་རྒྱུད་ལས། །གཡས་ཀྱི་སྲོག་ནི་རྟག་པའི་མཐའ། །གཡོན་གྱི་རྩོལ་བ་ཆད་པའི་མཐའ། །དེ་གཉིས་གནས་པ་དབུ་མའི་དོན། །རོ་མ་རྟག་པ་བྱང་ཆུབ་སེམས། །རྐྱང་མ་ཁྲག་ནི་ཆད་པའོ། །ཀུན་འདར་མ་རུ་གང་གནས་པ། །དེ་ནི་དབུ་མར་ཤེས་པར་བྱ། །ཞེས་དང་། །ཕྱི་ཡི་རྣམ་རྟོག་རྩོལ་བ་སྟེ། །ནང་གི་རྣམ་རྟོག་སྲོག་གི་རླུང་། །སྲོག་རྩོལ་གཉིས་འགགས་དབུ་མ་སྟེ། །ཞེས་ཐམས་ཅད་གཅོད་པའི་རྒྱུད་ལས་སོ། །སྲོག་དང་རྩོལ་བའི་རྣལ་འབྱོར་གཉིས༔ རྗེས་སུ་གེགས་སེལ་དང་བཅས་པའོ༔ ཤེས་བྱ་སྲོག་གི་སྔོན་འགྲོ་ནི༔ སྲོག་གམ་རླུང་གི་རྣལ་འབྱོར་ལ་མ་གོམས་ན་གཏུམ་མོ་སྦར་མི་ནུས། དེ་མ་ནུས་ན་ཐིག་ལེ་མི་འཇུ། དེ་ལྟ་ན་ཞུ་བདེའི་ཡེ་ཤེས་ཁྱད་པར་ཅན་མི་སྐྱེ་བས། རྣམ་པ་ཀུན་ཏུ་མེད་ཐབས་མེད། རྩ་དང་རླུང་དང་ཐིག་ལེ་གསུམ༔ མཐར་ཕྱིན་འབྲས་བུའི་ཁྲེགས་ཆོད་དམ་ཐོད་རྒལ་གྱི། ཐིག་ལེ་བསྲེ༔ ཞེས་པ་ནི་ལ་བཟླ་བའོ། རྩ་ལམ་དུ་སློང་བ་ལ་རྩའི་གནས་ལུགས་ཤེས་དགོས་ཀྱི་གཞན་དུ་རླུང་དང་ཁམས་ཀྱི་གནས་དང་། སྐུ་རྡོ་རྗེའི་རིགས་ཁམས་སེམས་ལ་ཡེ་ཤེས་འཆར་བ་རྩའི་བྱེད་པ་ལ་ལྟོས་དགོས་པར་རྒྱུད་ལས་གསུང་བ་དག་མི་ཤེས་པས། དང་པོ་བརྟེན་པ་རྩ་ཡི་ཚུལ༔ རྩ་ཡུར་བ་དང་རླུང་ཁ་ལོ་བ་དང་། ཐིག་ལེ་ཆུ་དང་འདྲ་བས་རླུང་གིས་འཁྲིད་པར་འདུ་བ་ལས་རྩའི་གནས་ལུགས་ཤེས་དགོས་པས། མ་དག་པའི་དུས་སུ། དུག་གསུམ་སྒོ་གསུམ་དག་པའི་དུས་སུ་སྐུ་གསུམ་རྡོ་རྗེ་གསུམ་གྱི༔ རྟེན་བྱེད་རོ་རྐྱང་དབུ་མ་གསུམ༔ ལ་ལ་ནཱ་སོགས་རྩ་རྣམས་ཡིན། །ཤེས་རབ་རང་བཞིན་ལ་ལ་ནཱ། །ར་ས་ནཱ་ནི་ཐབས་སུ་གནས། །དབུས་ནས་ཨ་བ་དྷུ་ཏཱི་ནི། །གཟུང་དང་འཛིན་པ་རྣམས་སྤངས་བའོ། །ལོངས་སྤྱོད་རྫོགས་སྐུ་ལ་ལ་ན། །ར་ས་ནཱ་ནི་སྤྲུལ་པའི་སྐུ། །ཨ་བ་དྷུ་ཏཱི་ཆོས་སྐུ་སྟེ། །སྐུ་གསུམ་པོར་ནི་བཤད་པ་ཡིན། །ཞེས་སོ། །༼ རྒྱས་པར་རྫོགས་རིམ་སྤྱིའི་གནད་ཆིང་སྤྲད། ༽ རང་ཉིད་ལྷར་བསྐྱེད་སྟོང་རར་བསྒོམ༔ རོ་མ་དཀར་ལ་རྐྱང་མ་དམར༔ གཅུད་པས་ཟས་གོས་ཟས་ཀྱི་ཞེན་པ་གཅོད་པ་བསམ་གཏན་གྱི་ཐུན། གོས་ཀྱི་ཞེན་པ་གཅོད་པ་བསམ་གཏན་གྱི་ཐུན་ཞེས་རྫོགས་ཆེན་གྱི་རྒྱུད་ནས་འབྱུང་བ་བཞིན་དངོས་གྲུབ་འབྱུང་༔ དབུས་མ་མཐིང་སྐྱར་གནས་པ་ཡི༔ ཕྱིའི་ཟླ་ཉི་སྒྲ་གཅན་གྱིས་ཟ་བ་བཞིན་དུ་ནང་གི་ཟླ་ཉི་རླུང་ཁམས་ཀྱི་དངས་མ་དབུ་མར་འཇུག་པ་དང་། བསྡུ་རིམ་གྱིས་བསྡུ་བ་དང་། འཆི་སྲིད་ཀྱི་ཐིམ་པ་ཐམས་ཅད་དབུ་མ་ཡིན་པས། དེའི་གདོང་མཇུག་ནི་ནང་གི་སྒྲ་གཅན་དང་དུས་མེའོ། །གདོང་མཇུག་དཀར་དམར་གཡུར་དུ་ཟ༔ རྒྱུད་དུ་མདུད་པ་ཉེར་གཅིག་ཅན༔ འདི་ལ་རྡོ་རྗེ་གསུམ་དང་སྐུ་བཞི། ཕར་ཕྱིན་དྲུག་སོགས་སྦྱང་བྱ། སྦྱོར་བྱེད། སྦྱང་འབྲས་ཀྱི་རིམ་པས་འཁོར་ལོའི་ཕྲི་བསྣན་མང་ཡང་འདིར་ནི། དབུ་མའི་འཁོར་ལོ་བཞི་བོ་རུ༔ རྡོར་ཕྲེང་ལས། རྩ་ཡི་རིམ་མེད་ངེས་པར་ནི། །ཕུང་པོ་ལ་སོགས་མི་འབྱུང་ངོ་། །ཕུང་པོ་མེད་ན་ཡེ་ཤེས་ཆེ། །རྣལ་འབྱོར་བ་ཡིས་ཐོབ་མི་འགྱུར། །ཕུང་པོ་ལྔ་ཡི་བདག་ཉིད་ལུས། །མཁའ་འགྲོ་ལྔར་ནི་རབ་ཏུ་གྲགས། །དེ་ཉིད་འབྱུང་བ་ལྔ་ཡིས་ནི། །ཡེ་ཤེས་ལྔར་ནི་རྣམ་པར་གནས། །དེ་ཕྱིར་འབད་པ་ཐམས་ཅད་ཀྱི། །རྩ་ཡི་འཁོར་ལོར་ཤེས་པར་བྱ། །ཞེས་པས། སྤྱི་བོར་སུར་ཅུ་རྩ་གཉིས་ནི༔ ཆུ་ཁམས་དཀར་པོ་མགྲིན་པར་བརྒྱད་གཉིས་མེ་ཁམས་དམར༔ སྙིང་ཁར་འདབ་མ་བརྒྱད་པ་རླུང་ཁམས་མཐིང་༔ ལྟེ་བར་དྲུག་ཅུ་ས་ཁམས་སེར་པོའི་དབུས༔ རང་བྱུང་ཡི་གེ་བཾ་རཾ་ཨེ༔ ལཾ་རྣམས་དཀར་དམར་མཐིང་སེར་གནས༔ ཨེ་རྣམ་སྣང་། ཤེར་དབང་། གཉིད། ཆོས་སྐུ། ཀུན་ཏུ་བཟང་པོའི་མན་ངག་སྙིང་། ལཾ་རིན་འབྱུང་། བཞི་པ། སྙོམ་འཇུག །ཡེ་ཤེས་རྡོ་རྗེ། བདེ་ཆེན་ཐིག་ལེའི་མན་ངག་ལྟེ་བར། རཾ་སྣང་མཐའ། གསང་དབང་། རྨི་ལམ། ལོངས་སྐུ། སྦྱོར་བ་དག་པའི་མན་ངག་མགྲིན་པར། བཾ་རྡོར་སེམས། སད་པའི། བུམ་དབང་། སྤྲུལ་སྐུ། ཁྱབ་གདལ་ཆེན་པོའི་མན་ངག་སྤྱི་བོ་དང་ཁྱད་པར་དུ་རྒྱུ་རྒྱུད་ཀྱི་རྟེན་དུ་གྱུར་བའི་མི་ཤིགས་པའི་རྩ་ནི་སྙིང་ཀའི་དབུས་སུ་བཞུགས་ཚུལ་རྫོགས་ཆེན་ནས་གསུངས་པ་ལྟར་གྱི་སྤྲོས་བྲལ་རིག་པའི་ཐིག་ལེའི་རང་གདངས་སོ། །དེ་དག་ཡེ་ནས་གནས་པའི་སྟེང་༔ གང་ཞིག་རང་ལ་འཕྲོད་པ་ཡི༔ རླུང་དེ་བསྒོམ་པ་མན་ངག་གོ༔ གྱེས་པའི་རྩ་ཕྲན་ཐམས་ཅད་ལ༔ མདུད་པ་ཕྲ་མོ་གྲངས་མེད་པའི༔ སྟེང་འོག་དཔའ་བོ་ཡབ་ཡུམ་གནས༔ མངོན་དུ་མེད་ཀྱང་ཆོས་ཉིད་དུའོ༔ སྦུད་པ་ཡི་ནི་རླུང་གི་བྱ་བས་སྦྱོར༔ བསྒོམ་པའི་དབུ་མ་ཆེ་ཆུང་བསྐྱེད༔ དེ་ནི་རྩ་ལ་གནད་བསྣུན་པའོ༔ ལར་ནི་རྩ་ལ་སྒྱུ་འཕྲུལ་ཆེན་མོ་ལས། རོ་མ་རྐྱང་མ་ཀུན་འདར་མ། །འཁོར་ལོ་སོ་སོའི་དཀྱིལ་དག་ན། །ཀ་བའི་ཚུལ་དུ་གནས་པ་ལ། །ཡལ་གའི་འདབ་མ་གྲངས་ལས་འདས། ཁམས་དང་རླུང་ནི་འབབ་པ་ཡི། །ཡེ་ཤེས་རྩ་ནི་སྟོང་ཕྲག་གཅིག །བདུན་ཅུ་རྩ་གཉིས་བསྒྲེས་པ་ཡི། །ཞེས་དང་། སྒྲུབ་སྡེ་ལས། སྤྱིར་ན་རྣལ་འབྱོར་ལུས་གནད་རྩ། སྟོང་ཕྲག་ཕྱེད་དང་བཞི་བརྒྱར་འདུས། །དེ་ལས་བསྡུ་ན་སྟོང་ཕྲག་གཅིག ། བདུན་ཅུ་རྩ་གཉིས་དེ་བསྡུ་ན། །ཉིས་ཁྲི་ཆིག་སྟོང་དྲུག་བརྒྱ་ཡོད། །དེ་ཡང་བསྡུ་ན་འཁོར་ལོ་བཞི། །དེ་བསྡུས་ལ་ལ་ར་ས་ནཱ། །ཨ་ཝ་དྷུ་ཏཱི་དང་གསུམ་མོ། །ཞེས་སོ། །བསྡུ་ན་དབུ་རྐྱང་རོ་གསུམ་གྱི་རིགས་འཛིན་པའི་སྟོང་ཕྲག་གྲངས༔ བདུན་ཅུ་རྩ་གཉིས་གཞན་ཚིགས་ཆེན་བཅུ་གཉིས་ཀྱི་འཁོར་ལོ་སུམ་བརྒྱ་དྲུག་ཅུ་དང་ཚིགས་ཕྲན་གྱི་འཁོར་ལོ་དྲུག་ཅུ་པོ་ལ་སུམ་བརྒྱ་དྲུག་ཅུ་དང་། ནད་བསྐྱེད་པའི་རྩ་བརྒྱ་དང་ང་དྲུག །ཡུལ་སོ་གཉིས་ཀྱི་རྩ་སོགས་དང་གསང་སྙིང་སོགས་ལས་སྙིང་ཀར་ཞི་བ་ཞེ་གཉིས་ཀྱི་གྲངས་ལྡན་རྩ་འདབ་ཞེ་གཉིས། སྤྱི་བོར་ཁྲག་འཐུང་གི་ལྷ་གྲངས་ང་བརྒྱད། མགྲིན་པར་རིག་འཛིན་དཔའ་བོ་ཡབ་ཡུམ་བརྒྱད་ཀྱི་རྩ་དང་། གཞན་ཡང་བཀའ་བརྒྱད་༣༥༠༠༠༠དང་། ཀློང་ཆེན་རབ་འབྱམས་དུས་འཁོར་༣༥༠༠༠༠༠༠དགའ་བོ་མངལ་འཇུག་༨༠༠༠༠༠སོགས་ཀྱི་བཞེད་ཚུལ་ལ་སོགས་ཡོད༔ རྡོར་འཕྲེང་ལས། ལ་ལ་ནཱ་དང་ར་ས་ན། །ཨ་བ་དྷུ་ཏཱི་ཞེས་བྱའི་མིང་དེ་རྣམས་སྤྲོ་བའི་སྦྱོར་བ་ཡིས། རེ་རེའི་རིམ་གྱིས་ཐུན་བརྒྱད་བརྒྱད། །གསུམ་པོ་ཉི་ཤུ་རྩ་བཞི་འགྲོ། །ཐིམ་དང་ལོངས་སྤྱོད་བདག་པོའི་ཕྱིར། །རིམ་གྱིས་གྲངས་ནི་བདུན་ཅུ་གཉིས། །སླར་ཡང་དེ་སྤྲོ་སྦྱོར་བ་ཡིས། །རེ་རེའང་སྟོང་སྟོང་དབྱེ་བ་ཡིས། །རྟག་ཏུ་གྲངས་ཉིད་འགྱུར་བ་ནི། །སྟོང་ཕྲག་བདུན་ཅུ་རྩ་གཉིས་སོ། །ཞེས་དང་། །སྡོམ་འབྱུང་ལས། ལ་ལ་ནཱ་ལ་སོགས་པའི་རྩ། །རྩ་རྣམས་ཀུན་གྱི་གཙོ་བོ་སྟེ། །དེ་ཉིད་ཕྱིར་ན་གཞན་གྱི་རྟེན། །གངྒ་སིནྡྷུར་གཞན་འཇུག་བཞི། །ཞེས་པས་ཀུན་གྱི་མ་ནི་ལ་ལ་ར་ས་ཀུན་སྤངས་འདི་གསུམ་ཡིན༔གསང་རྫོགས་ལས། དེ་ལྟར་གཡས་གཡོན་མར་སྣ་གཉིས། དྷུ་ཏཱིའི་སྒོར་ཚུད་དེའི་ཡོན་ཏན། །རྩ་རླུང་བསྒོམ་པས་དྷུ་ཏཱིར་རླུང་། །ཚུད་པས་ཕྱག་རྒྱ་ཆེན་པོར་འཆར། །དེ་བཞིན་དྷུ་ཏཱིར་རླུང་ཚུད་ཚེ། །རྟོག་པ་རང་འགག་ཡེ་ཤེས་འཆར། །ཞེས་རྩ་ལམ་དུ་བྱས་པའི་དགོས་པའོ། །ས་མ་ཡཱ༔ བརྟེན་པ་རླུང་གི་ངག་དབུགས་ཆུ་སྲང་དུས་སྦྱོར་དབྱུ་གུ་དབྱངས་གསལ་ཀུན་གྱི་གཞིར་གྱུར་བ་ནི་དོན་དམ་ཡེ་ཤེས་ཀྱི་རླུང་ངམ་སྲོག་ཆེན་པོའི་རླུང་ཞེས་བྱ་བ་རྒྱུ་རྒྱུད་གྱི་རྟེན་དུ་གྱུར་བ་ལ་གློ་བུར་གྱི་དྲི་མས་སྦག་པས་ཀུན་གཞིའི་རྣམ་ཤེས་ཡུལ་ལ་གཡོ་བ་ལས་རླུང་སྟེ། དེ་བྱད་བཅིང་གི་ཐབས་ཀྱིས་མི་ཤིགས་པའི་ངོ་བོར་དག་པར་བྱེད་པས་རླུང་གི་གནས་ཚུལ་ཤེས་བྱ་ནི༔ རླུང་ལ་ཕྱི་དང་ནང་གི་རླུང་༔ ༼ སྒྲུབ་སྡེ་ལས་བརྒྱད་བརྒྱད་དུ་གསུངས་ཀྱང་འདིར་ཐལ་འགྱུར་ལས་གསུངས་པ་ལྟར། ༽ ཕྱི་ལ་ཆེ་ཆུང་རྣམ་པ་གཉིས༔ ཆེ་བ་ཉིན་ཞག་ཕྲུག་གཅིག་ལ༔ དེ་ཡང་བ་སྤུའི་མཐར་ཐུག་པའི་རྩ་ལམ་ནས་རླུང་ཐམས་ཅད་ལྟེ་བའི་ཁྱིམ་བཅུ་གཉིས་ཀྱི་རླུང་དང་འདྲེས་ནས་རོ་རྐྱང་གི་ལམ་ནས་སྣ་བུག་གཡས་གཡོན་གཉིས་ལས་སྣོད་བཅུད་སྐྱེད་སྡུད་ཀྱི་རིམ་པས་མགོན་པོ་ལྔའི་རང་བཞིན་ཅན་གྱི་རླུང་ཁྲི་དང་བཞི་བརྒྱ་དྲུག་ཅུ་གཉིས་དང་ཕྱེད་བཅས་རེའི་སྐུ་དང་གསུང་ཐབས་དང་ཤེས་རབ་ཉི་ཟླའི་རླུང་དུས་སྦྱོར་བཅུ་གཉིས་ཀྱི་རིམ་པས་རྒྱུ་ཞིང་། དུས་སྦྱོར་རམ་འཕོ་བ་རེ་ལ་ཆུ་ཚོད་ལྔ་རེ་ཆུ་ཚོད་རེ་ལ་དབུགས་སུམ་བརྒྱ་དྲུག་ཅུ་རེ་རྒྱུ་བ་དང་། དེའི་སྟེང་དུ་གཉིས་མེད་ཐུགས་རྡོ་རྗེའི་རང་བཞིན་ཡེ་རླུང་དྲུག་བརྒྱ་དོན་ལྔ་བསྣན་པས་ཁྱོན་ཉི་ཁྲི་ཆིག་སྟོང་རང་བཞིན་རྒྱུ༔ རྒན་ལ་ལྔ་བཅུ་བྱིས་པ་ལ༔ སུམ་ཅུ་འབྱུང་བ་ཕྲི་མ་སྨིན༔ སྟོབས་ཀྱིས་ཆད་པ་འབྱུང་བའོ༔ དུས་འཁོར་གྱི་སྐོར་ནས་ཞག་གཅིག་གི་རླུང་ལ། དཀྱིལ་འཁོར་དང་། སྣ་བུག །རྩ་འདབ་ཀྱི་འཕོ་བ་གསུམ་ཀ་ལ་བཅུ་གཉིས་སུ་ཕྱེད་ཅིང་། དེ་ཡང་རླུང་འབྱུང་འཇུག་གཉིས་གཅིག་ཏུ་བརྩི་བས་ཉི་ཁྲི་ཆིག་སྟོང་དྲུག་བརྒྱ་བྱེད་པ་རྡོར་ཕྲེང་དགོངས་པ་ལུང་བསྟན་དང་རྙིང་མའི་རྒྱུད་ཐམས་ཅད་མཐུན་པ་ཡིན་ལ་༢༡༦༠༠ཉིན་ཞག་གཅིག་གི་རླུང་དེ་ལ་ཕ་རྒྱུད་ལས་མགོན་པོ་བཞིའི་རླུང་འཕོ་བ་ཉེར་བཞི། འབྱུང་ཆུང་སངས་རྒྱས་སྤྱན་སོགས་ལྷ་མོ་བཞིའི་རླུང་ལ་གོ་དྲུག །སྣ་བུག་འཕོ་བ་བཅུ་གཉིས་སུ་བྱེད། མ་རྒྱུད་སྡོམ་འབྱུང་དང་བརྟགས་གཉིས་སོགས་ཀྱི་ལུགས་ལ་འཕོ་ཆེན་བཅུ་དྲུག །འབྱུང་ཆུང་ལྷ་མོ་བཞིའི་རླུང་གི་འཕོ་བ་རེ་བཞི་དང་། སྣ་བུག་འཕོ་བ་བརྒྱད་དུ་འདོད། རྩ་ནང་གི་རྣམ་རྟོག་གི་རྟེན་དུ་གྱུར་བའི་ནང་རླུང་ཆིག་འབུམ་ཉི་ཁྲི་དང་༔ དྲུག་སྟོང་དྲུག་བརྒྱ་འགྱུ་བའོ༔ ཐལ་འགྱུར་ལས། རྩ་ལ་བརྟེན་པའི་རླུང་དག་ནི། །ཉི་ཁྲི་དང་ནི་སྟོང་ཕྲག་གཅིག །དྲུག་བརྒྱ་དག་ཏུ་འགྱུ་བ་ནི། །འགྱུ་བ་ཆེན་མོའི་རླུང་དུ་འདོད། །རྩ་ནས་ངེས་པར་འགྱུ་བ་ནི། །འབུམ་ཕྲག་གཅིག་དང་ཁྲི་ཕྲག་གཉིས། །སྟོང་ཕྲག་དྲུག་དང་བརྒྱ་ཕྲག་དྲུག །རྩ་ནས་ངེས་པར་འགྱུ་་བ་སྟེ། །འགྱུ་བ་ཆུང་བའི་རླུང་དུ་འདོད། །ཅེས་སོ། །འདི་དག་ནི་ནང་རླུང་ཡིན་ཀྱང་ཕྱིར་རྒྱུའི་རླུང་གི་ཡང་གཞི་རུ་གྱུར་བའོ། །གཞན་ཡང་རྩ་འདབ་ནས་འཕོ་བའི་ཚུལ་ནི། གཙོ་བོ་བདེ་ཀྱེ་སོགས་ཀྱི་ལུགས་ཏེ། སྙིང་ཀའི་རྩ་འདབ་བརྒྱད་ཀྱི་རེ་རེ་ནས་རླུང་གཉིས་སྟོང་བདུན་བརྒྱ་རེ་རྫོགས་ནས་རྩ་འདབ་གཞན་དུ་འཕོ་བར་བྱེད་པ་ལ་ཐུན་ཚོད་ཀྱི་རླུང་། མགྲིན་པའི་རྩ་འདབ་བཅུ་དྲུག་གི་རྩ་འདབ་རེ་རེ་སྟོང་ཕྲག་གཅིག་ཕྱེད་དང་བཞི་བརྒྱ་རེ་རྫོགས་ནས་རྩ་འདབ་གཞན་དུ་འཕོ་བ་ལ་འཕོ་བ་བཅུ་དྲུག་གི་རླུང་དང་། དེ་བཞིན་དུ་སྤྱི་བོའི་རྩ་འདབ་སོ་གཉིས་ཀྱི་རེ་རེ་ནས་རླུང་དྲུག་བརྒྱ་དོན་ལྔ་རེ་རྒྱུ་བ་ལ་ཆུ་ཚོད་དམ་ཡུད་ཙམ་རེའི་རླུང་དང་། ལྟེ་བའི་རྩ་འདབ་རེ་བཞིའི་རེ་རེར་སུམ་བརྒྱ་དང་ཕྱེད་བཅས་སོ་བདུན་རེ་རྒྱུ་བ་ལ་དབྱུ་གུ་རེའི་རླུང་དུ་གསུངས་སོ། །རླུང་གི་དཀྱིལ་འཁོར་བཞི་བོ་དེ་རྩ་གསུམ་གྱི་རོ་རྐྱང་ནས་རྒྱུ་བ་ནི། རྒྱུད་རྡོར་ཕྲེང་ལས། སྐུ་དང་གསུང་གི་སྙིང་པོ་གཉིས། ལ་ལ་ནཱ་དང་ར་ས་ནཱ། ཞེས་སོ། །དེ་དག་དང་གཞན་ཡང་སྣ་བུག་ནས་རྒྱུ་ཚུལ་གྲངས་མཚུངས་པ། སྡོམ་འབྱུང་ལས། མེལ་ཚེ་ཐུན་དུ་བརྗོད་པར་བྱ། །ཐུན་བཞི་ཉིན་མོར་རིག་བྱ་སྟེ། །དེ་བཞིན་མཚན་མོའང་ཐུན་བཞིའམ། །འཕོ་བའི་ཡན་ལག་བཅུ་དྲུག་གི །རླུང་ནི་ཉིན་ཞག་གཅིག་གིས་འགྱུར། །སྣ་ཡི་བུ་ག་ལ་རྟག་ཏུ། །ཐུན་ནི་ཕྱེད་ཕྱེད་ཡང་དག་རྒྱུ། །ཞེས་དང་། རྩ་ནི་སུམ་ཅུ་གཉིས་ཞེས་བྱ། །ཐུན་གཅིག་གི་ནི་བཞི་ཆ་རྣམས། །རྩ་དང་ཆུ་ཚོད་ཅེས་ཀྱང་བརྗོད། །ཉིན་དང་མཚན་མོས་དབྱུ་གུའི་ཚད། །དྲུག་ཅུ་རྩ་བཞི་དག་ཏུ་འགྱུར། །རྩ་ཕྱེད་ཆུ་ཚོད་ཕྱེད་དབྱུ་གུ །ཐུན་ནི་བརྒྱད་ཆ་ཞེས་པར་གྲགས། །རླུང་ནི་སྣ་སྒོར་འབྱུང་འཇུག་ལ། །དབུགས་སུ་ཡོངས་སུ་གྲགས་པ་སྟེ། །ཞེས་དང་། །ཁྲོ་བོ་སྟོབས་ཀྱི་རྒྱུད་ལས་འདི་དག་ཕྱིར་རྒྱུ་བའི་རླུང་དུ་གསུང་པའང་ཡོད་དོ། །དུས་འཁོར་ལྟར་ན་སྤྱི་བོར་ཟླ་རྐང་མགྲིན་པར་རྒྱུ་སྐར་སྙིང་གར་གཟའ་རྐང་ལྟེར་བར་དབྱུ་གུ་དྲུག་ཅུའི་རླུང་རྒྱུ་བར་བཤད་པའོ། །ཡང་ཚིགས་ཆེན། ཚིགས་ཕྲན། ནད་བསྐྱེད་ཀྱི་རྩ་དང་། བདུན་ཁྲི་ཉིས་སྟོང་ལ་རྩའི་གྲངས་དང་མཉམ་པར་ནང་དུ་རྒྱུའོ། །ཀུན་གྱི་རྩ་བ་སྲོག་འཛིན་མི་བསྐྱོད་པ་དང་༔ ཆོས་དབྱིངས་ཡེ་ཤེས་ཆུའི་ཁམས་ཁ་དོག་དཀར་པོ། གྱེན་རྒྱུ་འོད་དཔག་མེད་དང་། སོར་རྟོགས་ཡེ་ཤེས་མེའི་ཁམས་ཁ་དོག་དམར་པོ་ཐུར་སེལ་རིན་འབྱུང་དང་མཉམ་ཉིད་ཡེ་ཤེས་ས་ཁམས་ཁ་དོག་སེར་པོ། །མེ་དང་མཉམ༔ པ་དོན་གྲུབ་དང་བྱ་གྲུབ་ཡེ་ཤེས་རླུང་ཁམས་ཁ་དོག་ལྗང་ནག །ཁྱབ་བྱེད་རྣམ་སྣང་དང་མེ་ལོང་ཡེ་ཤེས་ནམ་མཁའི་ཁམས་ཁ་དོག་སྔོན་པོ་རྣམས་སུ་བཤད་པ་སྟེ་རྣམ་པ་ལྔ༔ དེ་ཡང་གནས་ནི་གྱེན་རྒྱུ་མགྲིན་པ་ལ་གནས་པས་སྟོད་དང་ཐུར་སེལ་སྨད༔ དུ་གསང་གནས་དང་། མེ་མཉམ་ཕོ་བ་ཞེས་ལྟེ་བ་ན་གནས། ཁྱབ་བྱེད་ལུས་བྱིང་༔ དང་ཚིགས་ལ་གནས་སྲོག་ནི་སྙིང་ལ་སྟེ་སྲོག་གི་རྩ་ལ་རྒྱུ༔ དེ་དག་གི་གནས་བྱེད་ལས་དང་བཅས་པའང་། རྡོར་ཕྲེང་ལས། རླུང་རྣམས་ཀྱི་ནི་མཚན་ཉིད་མཆོག །སྲོག་གི་རླུང་ནི་སྙིང་གར་གནས། །མི་བསྐྱོད་བྱེ་བྲག་རིགས་ལས་སྐྱེས། །མདོམས་ན་གནས་པའི་ཐུར་སེལ་ནི། །རིན་ཆེན་འབྱུང་ལྡན་བྱེད་བྲག་སྐྱེས། །སྟོད་དུ་རྒྱུ་ལ་ལྐོག་མཐར་གནས། །འོད་དཔག་མེད་པའི་རང་བཞིན་ནོ། །མེ་དང་མཉམ་གནས་ལྟེ་བར་གནས། །དོན་ཡོད་གྲུབ་པའི་རང་བཞིན་ནོ། །ཁྱབ་བྱེད་ཡན་ལག་ཀུན་ལ་གནས། ། རྣམ་སྣང་མཛད་ཀྱིས་བྱིན་གྱིས་བརླབས། །དབང་པོའི་སྒོ་ཡི་རྒྱུན་ལས་ནི། །སྲོག་དང་རྩོལ་བ་རྒྱུད་འདི་དང་། །དུས་ཀུན་དུ་ནི་རྒྱུ་བ་ནི། །སྲོག་ཅེས་བྱ་བ་ཡིན་པར་བཤད། །སྲོག་རབ་རླུང་དང་ཕྱི་ས་དང་། །དེ་བཞིན་དུ་ནི་ཁུ་བ་སོགས། །འོག་འདྲེན་འདི་ནི་ཐུར་སེལ་རླུང་། །རྟག་ཏུ་རྣལ་འབྱོར་པས་ཤེས་བྱ། །དགོད་དང་ཟ་དང་ལྡག་པ་དང་། །ཀུན་ཏུ་འཐུང་དང་འཇིབ་པ་དང་། །གང་ཞིག་རྟག་ཏུ་མཉམ་གནས་པ། །མཉམ་དུ་གནས་པ་ཞེས་བྱར་བརྗོད། །གྱེན་དུ་འགྲོ་ཞིང་སྡུད་པ་དང་། །བཟའ་དང་མྱང་བ་ལ་སོགས་པ། །ཤེས་ནས་ལྷན་ཅིག་འབྱོར་བ་དག །གྱེན་རྒྱུའི་ལས་སུ་ཤེས་པར་བྱ། ཁྱབ་དང་འཛིན་པ་ཉིད་དང་ནི། །དེ་བཞིན་འགྲོ་དང་ལྡོག་པ་སོགས། །ཚིགས་ཀུན་དུ་ནི་ཁྱབ་པའི་ཕྱིར། །ཁྱབ་བྱེད་ཅེས་ནི་བཤད་པར་བཤད། །ཅེས་སོ། །སྤྱོད་བསྡུས་ལས། སྙིང་ཁ་དང་མདོམས་དང་ལྐོག་མ་དང་ལྟེ་བ་དང་ལུས་ཀྱི་ཚིགས་ཐམས་ཅད་ན་རིམ་པ་བཞིན་དུ་སྲོག་འཛིན་དང་། ཐུར་སེལ་དང་། གྱེན་རྒྱུ་དང་། མེ་མཉམ་དང་། ཁྱབ་བྱེད་ཀྱི་གནས་དང་མིག་སོགས་ལྔ་ནི་རྒྱུ་བ་སོགས་ཀྱི་རླུང་ལྔའི་གནས་ས་བཤད་དོ། །འདིར་ཁྱབ་བྱེད་རྣམ་སྣང་། རྡོར་མགོན་སྲོག་འཛིན་དུ་བཞག་པ་གསང་འདུས་ལྟར་དང་། རང་ལུགས་ལ་སྲོག་འཛིན་ནམ་མཁའི་མགོན་པོ་རྣམ་སྣང་སྔོན་པོ། །རྡོར་མགོན་ཁྱབ་བྱེད་དཀར་པོར་བཞག་གོ །དུས་འཁོར་གྱི་དགོངས་པ་གྱེན་རྒྱུ་སྙིང་ཁ་མེའི་འདབ་མའི་རྩ་གླང་ཆེན་ལྕེ་དང་། ཐུར་སེལ་དུ་དུང་ཅན་མ་ལས། མེ་མཉམ་སྙིང་ཀའི་ཤར་གྱི་འདབ་མའི་རྩ་སྣར་མ་ལས། ཁྱབ་བྱེད་ལྷོའི་འདབ་མ་སེར་སྐྱའི་རྩ་ལ་གནས་ཞེས་གསུངས། དྲི་མེད་འོད་ལས། སྲོག་སྟེང་དུ་རྒྱུ་སྟེ་ཐུར་སེལ་ལྟེ་བའི་འོག་ཏུ་རྒྱུའོ། །མེ་མཉམ་ཤར་གྱི་འདབ་མ་ལ་སྣར་མའི་རྩ་ལ་ལྷག་པའི་ལྷའོ། །གྱེན་རྒྱུ་མེའི་འདབ་མ་ལ་གླང་པོ་ཆེའི་ལྕེའི་རྩའོ། །ཁྱབ་བྱེད་ལྷོའི་འདབ་མ་ལ་སེར་སྐྱའི་རྩའོ། །ཞེས་སོ། །རྩ་བའི་རླུང་ལྔ་དེ་དག་གིས་ཕུང་པོ་ལྔའི་རྟེན་བྱེད་དོ། །ནང་དུ་འབྱུང་བ་ལྔ་ཡི་རླུང་༔ ས་རླུང་སེར་པོར་གྲུ་བཞི་དང་༔ ཆུ་རླུང་དཀར་པོ་ཟླུམ་པོ་དང་༔ མེ་རླུང་དམར་པོ་གྲུ་གསུམ་དང་༔ རླུང་གི་ལྗང་གུ་ཟླ་གམ་ཚུལ༔ ནམ་མཁའི་རླུང་ནི་འཁོར་ལོའི་དབྱིབས༔ ཁ་དོག་མཐིང་ཀའི་ཚུལ་ཉིད་དུ༔ སྙིང་ཀའི་འཁོར་ལོའི་རྩ་ལྔའམ༔ ཡི་གེ་ལྔ་ལ་བརྟེན་ནས་སུ༔ རང་བཞིན་འཁོར་ལོ་ལྔ་ལ་གནས༔ ནང་གི་ཕུང་པོ་ལྔ་དང་སྐྱེ་མཆེད་ཀུན་གྱི་རྟེན་བྱེད་ཅིང་ཡེ་རླུང་གི་ངོ་བོར་མ་དག་གི་བར་དུ་འཆི་སྲིད་སོགས་ཀྱི་གནས་སྐབས་སུ་རླུང་དེ་དག་ཐིམ་ནས་རེ་ཞིག་ཕུང་ཁམས་རགས་པ་མི་སྣང་ཡང་སླར་ཡང་མཆེད་པའི་གཞི་བྱེད་པ་སྟེ། གཞན་ཡང་འཁོར་ལོ་ལྔ་བོ་གསལ་ནས་ཐབས་ལམ་འོག་སྒོ་ཉམས་སུ་ལེན་པའི་མིའི༔ གསང་གནས་བདེ་སྐྱོང་འཁོར་ལོར་ན༔ གཏེར་མའི་ཕྱོགས་ལ་རྩ་འདབ་བརྒྱ་དང་རྩ་བརྒྱད་གསལ༔ དུས་འཁོར་ལས་སོ་གཉིས་རྙིང་རྒྱུད་དང་སྒྲུབ་སྡེ་དག་ལས་དོན་གསུམ་བཤད་པ་སོགས་དབྱེ་བསྡུ་མང་ངོ་། །དེ་དབུས་ཡྃ་ལྗང་ལ་བརྟེན་ཏེ༔ རྒྱུ་བའི་དུས་རླུང་གི་རླུང་ནི་རྣམ་པར་བསྒོམ༔ གཞན་ཡང་རྒྱུ་བ། རྣམ་རྒྱུ་ཡང་དག་རྒྱུ་རབ་རྒྱུ་ངེས་པར་རྒྱུ་རྣམས་རིམ་པར་མཁའ་རླུང་མེ་ཆུ་ས་དང་། གཟུགས་སྒྲ་དྲི་རོ་རེག་རྡོ་རྗེ་མ་ལྔ་ཁ་དོག་སྔོ་ནག་དམར་དཀར་སེར་བོའི་རང་བཞིན་ཅན་དང་། དུས་འཁོར་ལས། ཀླུ་ནི་ས་ཡིན་དེ་ནས་རུས་སྦལ་དང་ནི་རྩངས་པ་ཡི་ནི་རླུང་དང་ལྷས་སྦྱིན་དང་ནི་ནོར་ལས་རྒྱལ། བཞི་པོ་རྣམས་ནི་རླུང་དང་མེ་དང་ཆུ་དང་ས་རྣམས་ལས་ནི་རིམ་གྱིས་འབྱུང་བར་འགྱུར། ཞེས་སོ། །གཞན་ཡང་གཞི་དུས་ཀྱི་ཕུང་ལྔ་འབྱུང་ལྔའི་རླུང་དུ་ཡེ་རྡོར་རྒྱུད་ལས་གསུངས་པ་དང་། སྣང་མཆེད་ཐོབ་པ་ཉེར་ཐོབ་དང་མཐའི་ཡེ་ཤེས་དང་བཅས་པ་རླུང་གི་ཁམས་དྲུག་ཏུ་དུས་འཁོར་རྩ་རྒྱུད་ལས་གསུངས་པ་དག་དང་། གཞན་ཡང་དབྱེ་བསྡུས་གྲངས་བསམ་གྱིས་མི་ཁྱབ་པའི་དོན་ཡེ་ཤེས་ཀྱི་རླུང་རྣམ་པ་ཐམས་ཅད་པ་ལ་བདག་ཏུ་བཟུང་བའི་ལས་རླུང་དུ་གྱུར་བ་བསྒྲང་དུ་མེད་དོ། །དེ་ལྟར་ཕྱི་ནང་གི་རླུང་གཉིས་ལས་ཕྱིར་སྣ་བུག་ནས་རྒྱུ་ཚུལ་གྱིས༔ ཉམས་ལེན་གནད་ལ་སྣ་བུག་གཉིས༔ སུ་རོ་རྐྱང་གི་སྣ་ཁ་ཟུག་པས་གཡས་ནས་ཕོ་རླུང་གཡོན་མོ་རླུང་༔ རླུང་ནི་བཅོམ་ལྡན་ཧེ་རུ་ཀའི། །རང་བཞིན་ཉིད་དེ་གསུམ་དུ་འགྱུར། །གཡོན་པ་ཤེས་རབ་རང་བཞིན་ཏེ། །གཡས་པ་སྙིང་རྗེའི་བདག་ཉིད་དོ། །ཞེས་སོ། །མཉམ་ནས་མ་ནིང་རླུང་རྒྱུ་བས༔ རིམ་པས་གཡས་ཀྱི་རླུང་གི་ངོ་བོ་མེ་དཀྱིལ་ཁ་དོག་དམར་སེར་ལྷའམ་བདག་པོ་པདྨ་མགོན་པོ། གཡོན་ནས་རླུང་དཀྱིལ་ལྗང་གུ་ལས་ཀྱི་མགོན་པོ་ལྷག་པའི་ལྷའོ། །མཉམ་ནས་དྲག་རྒྱུ་ས་དཀྱིལ་གསེར་མདོག་རིན་ཆེན་མགོན་པོ་ལྷག་ལྷ་དང་། མཉམ་ནས་དལ་བར་རྒྱུ་བ་ཆུ་དཀྱིལ་ཤེལ་ལྟར་དྭངས་བ་ལ་ལྷ་རྡོ་རྗེ་མགོན་པོ་དང་། ནམ་མཁའི་མགོན་པོའི་རླུང་ནི་འཆི་བའི་མཐའ་ལས་མི་རྒྱུ་ཡང་། ནམ་མཁའི་རླུང་ཙམ་གྱི་ལམ་བྱེད་ནི་མཉམ་རྒྱུ་འདིས་ཚང་བར་འགྱུར་ཞིང་། འདི་གཉིས་ཀྱི་ངོ་བོ་ནམ་མཁའི་ཁ་དོག་མེད་པའི་ཁ་དོག་གམ་སྔོན་པོ། རིགས་བདག་རྣམ་སྣང་ངོ་། །རྡོར་ཕྲེང་ལས། སྟེང་གི་སྣ་ལས་ངེས་འབྱུང་བ། །གཡས་དང་གཡོན་དང་གཉིས་ཀ་ཡང་། །དལ་བར་རྒྱུ་དང་རྣམ་བཞི་འགྱུར། །ནང་གི་དུས་ནི་ཡིན་པར་བཤད། །ལྐོག་མ་སྙིང་ཀ་ལྟེ་བ་དང་། །གསང་བའི་པདྨར་འགྲོ་འོང་སྟོན། །ཐུན་ཕྱེད་ཀྱིས་ནི་དུས་དག་ཏུ། །གོ་རིམ་ཇི་བཞིན་གནས་པས་བསྟན། །གཡས་པ་ན་ནི་འབྱུང་བའི་ཁམས། །མེ་ཡི་དཀྱིལ་འཁོར་ཉིད་ཡིན་ཏེ། ཁ་དོག་དམར་ཞིང་གསལ་བ་ཉིད། །པདྨའི་མགོན་པོ་རྒྱུ་བའོ། །གཡོན་པ་ནས་ནི་འབྱུང་བའི་ཁམས། །རླུང་གི་དཀྱིལ་འཁོར་ཞེས་བྱ་བ། །ལྗང་སེར་དག་ཏུ་སྣང་བ་སྟེ། །ལས་ཀྱི་མགོན་པོ་རྒྱུ་བའོ། །གཉིས་ཀ་ལས་ནི་འབྱུང་བའི་ཁམས། །གསེར་གྱི་མདོག་ཏུ་སྣང་བ་སྟེ། །དབང་ཆེན་གྱི་ནི་དཀྱིལ་འཁོར་ཉིད། །རིན་ཆེན་མགོན་པོར་རྒྱུ་བའོ། །དལ་ཞིང་རྒྱུ་བ་མེད་པའི་ཁམས། །དག་པའི་ཤེལ་ལྟར་སྣང་བ་ནི། །ཆུ་ཡི་དཀྱིལ་འཁོར་ཉིད་ཡིན་ཏེ། །རྡོ་རྗེ་མགོན་པོ་རྒྱུ་བའོ། །ལུས་ཀུན་ལ་ནི་གནས་པའི་རླུང་། །བྱ་བ་ཀུན་ལ་འཇུག་པའོ། །འདི་ནི་རྣམ་སྣང་ངོ་བོ་སྟེ། །འཆི་བའི་ལུས་ལ་འབྱུང་བར་འགྱུར། །ཞེས་དང་། སྡོམ་འབྱུང་ལས། རྣལ་འབྱོར་བ་ཡི་སྲོག་རྩོལ་ནི། །སངས་རྒྱས་ལྔ་ཡི་ངོ་བོར་གནས། །གཡོན་དང་གཡས་ཀྱི་གནས་གང་ན། །རིམ་པ་ཇི་བཞིན་རྣམ་པར་རྒྱུ། །གཡས་ནས་རྣམ་པར་རྒྱུ་བའི་འོད། །མེ་ཡི་དཀྱིལ་འཁོར་ཉིད་ཡིན་ཏེ། །ནགས་ཀྱི་མེ་ཏོག་ལྟ་བུའི་མདོག །དེ་ནི་འོད་དཔག་མེད་པའི་ལྷ། །གཡོན་ནས་རྣམ་པར་རྒྱུ་བའི་འོད། །རྟག་ཏུ་རླུང་གི་དཀྱིལ་འཁོར་ཏེ། ཁ་དོག་ལྗང་གུ་ལྟར་སྣང་བ། །ལྷ་ནི་དོན་ཡོད་མཆོག་ཡིན་ནོ། །གཉིས་ཀ་ནས་ནི་རྒྱུ་བའི་འོད། །གསེར་གྱི་འོད་ལྟར་སྣང་བ་སྟེ། །དབང་ཆེན་དཀྱིལ་འཁོར་གྱི་ནི་རླུང་། །རྟག་ཏུ་རིན་ཆེན་འབྱུང་ལྡན་རྒྱུ། །འོག་ནས་དལ་བར་རབ་རྒྱུ་བ། །ཀུན་ད་ཟླ་བ་ལྟ་བུར་དཀར། །ཆུ་ཡི་དཀྱིལ་འཁོར་རྒྱུ་བ་སྟེ། །འོད་ཆེན་རྡོ་རྗེའི་མགོན་པོའམ། །ལུས་ཀུན་ལ་ནི་རྗེས་འགྲོའི་རླུང་། །སེམས་ཀུན་རབ་ཏུ་འཇུག་བྱེད་པ། །མགོན་པོ་རྣམ་པར་སྣང་མཛད་ནི། །འབྱུང་བར་རབ་ཏུ་གྲགས་པ་ཡིན། །ཞེས་སྣ་བུག་ནས་ཕྱིར་རྒྱུ་བའི་རླུང་མགོན་པོ་ལྔ་དང་ཁམས་ལྔ་ལ་སྦྱར་བའོ། །ཀླུ་སྒྲུབ་ཀྱིས་འཁོར་ལོ་བཞིར་རླུང་བཞི་ཡོད་པར་གསུངས། ཕོ་ཡིས་མོ་རླུང་བཟུང་བ་དང་༔ མོ་ཡིས་ཕོ་རླུང་གཉིས་ཀ་ཡིས༔ མ་ནིང་རླུང་བཟུང་ཡེ་ཤེས་མྱུར༔ སྒྲུབ་སྡེ་ལས། སྣ་བུག་གཡས་ནས་རླུང་རྒྱུ་ཚེ། །ཐབས་རླུང་ཉོན་མོངས་རླུང་ཡིན་ཕྱིར། །མི་བཟུང་བཟུང་ན་རླུང་ལོག་འོང་། །སྣ་བུག་གཡོན་ནས་རྒྱུ་བའི་ཚེ། །ཤེས་རབ་ཡེ་ཤེས་རླུང་ཡིན་ཕྱིར། །བཟུང་ན་སྐྱོན་མེད་ཉམས་རྟོགས་འཕེལ། །སྣ་བུག་གཉིས་ནས་མཉམ་རྒྱུའི་ཚེ། །ཐབས་ཤེས་གཉིས་སུ་མེད་པའི་རླུང་། །ཨ་ཝ་དྷུ་ཏཱིའི་སྒོར་ཚུད་པས། །འདི་དུས་འབད་ན་ཡེ་ཤེས་འཆར། །ཞེས་སོ། །འདི་ལའང་རྡོར་བཟླས་ལ་སྣ་བུག་གཡས་ནས་རྒྱུ་དུས་དང་། །རླུང་འཛིན་དུས་མཉམ་རྒྱུ་དགོས་པར་རྒྱུད་སྡེ་ཀུན་ཞལ་མཐུན། གཞན་ཡང་གནད་ཀྱི་ཉམས་ལེན་ལ༔ གྱེན་རྒྱུ་ལ་ནི་སྟེང་རླུང་མནན༔ ཐུར་དུ་སེལ་ལ་འོག་རླུང་བསྡམ༔ མཉམ་དུ་གནས་ལ་བར་རླུང་བསྐྱིལ༔ རྔུབ༵་དང་དག༵ང་དང་ག༵ཞིལ་དང་འཕ༵ང་༔ གསང་རྫོགས་ལས། འོག་རླུང་བསྡམས་ཏེ་སྟེང་རླུང་ནི། རྔུབ་ཅིང་མནན་ཏེ་བསྐྱིལ་བར་བྱ། །ཚད་དུ་སླེབས་ཚེ་མདའ་ལྟར་དུ། །སྣ་ནས་མདའ་གང་ཚད་དུ་འཕང་། །ཡང་རྔུབ་ཡང་བསྐྱིལ་ཡང་འཕངས་ཏེ། །གནས་པའི་རླུང་དེ་བསྐྱིལ་ཡུལ་བསྲིངས། །ཞེས་སོ། །དེ་ནི་རླུང་གི་མན་ངག་མདེའུ༔ རི་བོ་ལྟ་བུར་མནན་སོགས་དགུ༔ ཐམས་ཅད་འདི་ལ་ཡང་དག་འདུས༔ དེ་ཡང་རྔུབ་རླུང་ལ་གཞུ་ལྟར་དགུག་པ་༡ཞེས་དང་། སྟེང་རླུང་རི་ལྟར་མནན་པ་༢། འོག་རླུང་སྦུབས་ཆུ་ལྟར་དྲངས་ནས་༣། བར་རླུང་བུམ་ཅན་དུ་བསྐྱིལ་བ་༤། ཡན་ལག་གི་རླུང་གཅུན་པས་ཆུ་སྲིན་ཆིངས་སུ་བཅིངས་པ་༥། གཙུག་ཏོར་ན་རླུང་དང་དཔྱིད་ཐིག་ཡེ་ཤེས་ཀྱི་ཆ་རྩ་ལ་གདབས་པ་༦། རླུང་མི་ཐུབ་དུས་རང་གནས་སུ་གཞིལ་པ་༧། ཕྱིར་མདའ་ལྟར་འཕེན་པ་༨། རྗེས་ཤེས་ཀྱི་ངོ་བོ་རིག་སྟོང་ཀ་དག་ཏུ་ལ་བཟླ་བའོ་༩། སྦུབས་ཆུ་ལྟར་དྲངས་པ་འདི་དྲངས་པ་འདི་ལ་ལས་རླུང་སྒྲོགས་མདོ་ནས་དབུ་མར་དྲངས་ཏེ་སྲོག་མི་ཤིགས་པར་གཟུད་པའང་གསུངས། དེ་ཡང་ཀུན་གྱི་ཐོག་མ་རུ༔ སྔ་སོར་རང་ལ་འགྱུ་བའི་རླུང་༔ འབྱུང་འཇུག་གནས་ལ་བྱིན་རློབ་ཕྱིར༔ དེ་ཡང་རླུང་འཇུག་གནས་ལྡང་གསུམ་ལ་བགྲང་བ་དང་རྗེས་འགྲོ་འཇོག་པ་རྟོག་པ་བསྒྱུར་བ་ཡོངས་དག་གི་རྣལ་འབྱོར་དྲུག་ལ། འབྲུ་གསུམ་ངག་ཏུ་བཟླ་བ་བརྗོད་བཅས་རྡོར་བཟླས། དབྱིབས་དང་ཁ་དོག་བསྒོམ་པ་དམིགས་པ་རྡོར་བཟླས་ཏེ། ཀུན་རྫོབ་ཀྱི་བཟླས་པ་གཉིས་པ་འདིས་ཞི་གནས་བསྐྱེད་ལ་རླུང་ལྡང་འཇུག་གནས་གསུམ་གྱི་གདངས་སུ་རླུང་སྔགས་དབྱེར་མེད་དུ་ཤེས་ནས་བཟླ་བ་བརྡར་གྱུར་དང་། རླུང་འཇུག་ལྡང་གནས་གསུམ་སྟོང་ཉིད་ཕྱག་ཆེན་བརྗོད་བྲལ་དུ་རྟོགས་ཤིང་མཉམ་པར་བཞག་པ་ནི་དོན་དམ་རྡོར་བཟླས་ཏེ་འདི་གཉིས་ཀྱིས་ལྷག་མཐོང་གཙོ་བོར་བསྐྱེད་དོ། །རྡོར་ཕྲེང་ལས། བརྗོད་དང་དམིགས་པར་བཅས་པ་དང་། །བརྡར་གྱུར་དང་ནི་དོན་དམ་མོ། །ཞེས་པ་ལྟར་རོ། །དེས་ན་ལས་དང་པོ་བས། རྡོ་རྗེ་གསུམ་གྱི་བཟླས་པ་ནི༔ རྩ་སྔགས་ལ་སོགས་གང་རུང་ལ༔ གསང་རྫོགས་ལས། །བདེ་གཤེགས་རྣམས་ཀྱི་ཡང་སྙིང་མཆོག །རྔུབ་རླུང་ཨོཾ་ལ་བསྐྱིལ་གནས་ཨཱཿ། །འཕང་བ་ཧཱུྃ་ཡིན་རླུང་གསུམ་གྱི། །གནས་པ་ཨཱཿལ་ཟིན་ནན་བསྐྱེད། །ཅེས་སོ། །བསྒྲང་ཕྲེང་བཅད་དེ་དལ་གྱིས་བཟླ༔ དེ་ནི་རླུང་དང་ངག་བྱིན་རླབས་པའོ༔ དེ་ནས་མདུན་གྱི་ནམ་མཁའ་རུ༔ ཕྱོགས་བཅུ་དུས་གསུམ་རྒྱལ་བ་ཡི༔ བྱིན་རླབས་ངོ་བོ་ཡེ་ཤེས་རླུང་༔ བད་ཀན་ཅན་ལ་ལྗང་གུ་དང་༔ གྲང་བ་ཅན་ལ་དམར་པོ་དང་༔ མཁྲིས་པ་ཅན་ལ་དཀར་པོ་དང་༔ ལྡན་པ་ཅན་ལ་ལྗང་གུ་དང་༔ འདུས་པ་ཅན་ལ་སྔོན་པོ་དང་༔ རླུང་ནད་ཅན་ལ་སེར་པོ་དང་༔ ཚ་བ་ཅན་ལ་དཀར་པོ་ནི༔ ས་ཆུ་མེ་རླུང་ནམ་མཁའ་ཡི༔ དྭངས་མར་རྒྱུ་བའི་རང་བཞིན་ཅན༔ སྤྲིན་ཕུང་ལྟར་དུ་འཐིབ་པ་ལ༔ ཁམས་གསུམ་སྣོད་བཅུད་འོད་དུ་ཞུ༔ བག་ཆགས་ཐམས་ཅད་དྭངས་མར་སྦྱངས༔ བཅུད་དང་དྭངས་བྱིན་ལྷུན་གྲུབ་པ༔ རོ་རྐྱང་ཡར་སྣེ་སྣ་བུག་གཉིས༔ རྔུབ་པའི་རླུང་གིས་ནང་དུ་དྲངས༔ རོ་རྐྱང་མར་སྣ་ཆ་ཡིག་མཚན༔ རང་བྱུང་དབུ་མར་ཟུག་པ་ལས༔ ཞུགས་ཤིང་དབུ་མ་ལྟེམ་གྱིས་གང་༔ སླར་ཡང་རྣམ་རྟོག་རྩ་འདབ་ནས༔ དག་དང་མ་དག་རྩ་རླུང་བསྡུས༔ དྭངས་མའི་བཅུད་བླང་དྷུ་ཏཱི་ནས༔ གྲུབ་ཐོབ་ཨོ་རྒྱན་པས། ས་དང་མེ་དང་ཆུ་དང་རླུང་རྣམས་ཀྱང་། །དགྲ་དང་གྲོགས་སུ་རང་བཞིན་གནས་པ་ལས། །ཚ་གྲང་གཉེན་པོའི་རིམ་པས་སྦྱངས་བར་བྱ། །ཞེས་པ་ལྟར། བད་ཀན་ཅན་གྱིས་སྤྲུལ་འཁོར་དུ༔ ལཾ་གསལ་བ་ལ་བསྟིམས་པ་དང་༔ རླུང་ནད་ཅན་གྱིས་བདེ་སྐྱོང་དུ༔ ཡཾ་དང་སྲོག་རླུང་ཅན་སོགས་ཀྱིས༔ སྙིང་ཀའི་འཁོར་ལོར་བསྟིམས་པ་དང་༔ ཚ་ནད་ཅན་གྱིས་མགྲིན་པ་རུ༔ རཾ་གསལ་བ་དང་ཚད་ནད་ཅན༔ མཁྲིས་ནད་ཅན་གཉིས་ནད་སེལ་ལོ༔ གྲང་ནད་ཅན་གྱིས་སྤྱི་བོ་ཡི༔ བཾ་ལ་བསྟིབ་པས་འདིར་ལ་བཟླ་བས་ལྷན་ཅིག་སྐྱེས་སྦྱོར་དང་སོར་སྡུད་སོགས་ཀྱིས་མི་རྟོག་རྒྱ་ཡན་དུ་བཅིངས་པའི་རིམ་པའི་རླུང་སྦྱོར་ཚང་། ཁ་དོག་དང་དབྱིབས་ལ་སྦྱངས་བས་མངོན་ཤེས་དང་ཟད་པར་བསྒྲུབ་པའི་རླུང་སྦྱོར་ཚང་། བུམ་ཅན་ལ་སེང་གེ་རྣམ་གྲོལ་གྱི་ཕྱག་རྒྱའི་རླུང་སྦྱོར་ཚང་བ་སོགས་རྒྱུད་སྡེ་མཐའ་དག་གི་རྫོགས་རིམ་ཐམས་ཅད་ཀྱང་འདིས་ཚར་ཕྱིན་ཏོ༔ རང་རང་གཉེན་པོའི་རླུང་གི་མཆོག༔ ཕྱི་ནས་དྲངས་པའི་བྱིན་བཅུད་རླུང་༔ རྩ་ལ་འཕོས་པས་ཡེ་ཤེས་རླུང་༔ དབུ་མ་འཁོར་ལྔའི་ནང་དུ་བཙུད༔ གཞིལ་བས་རླུང་ལ་དྭངས་སྙིགས་ཕྱེས༔ དེ་ལས་དྲངས་པའི་སྙིགས་མའི་རླུང་༔ སྦུབས་ཆུ་ལྟ་བུར་ལྟེར་འོག་དྲངས༔ སྙིམས་མའི་དྭངས་མ་འབྱུང་བཅུད་རླུང་༔ གསང་གནས་བདེ་སྐྱོང་གཞི་ལ་བསྟིམས༔ སྙིགས་མའི་སྙིགས་མ་བག་ཆགས་རླུང་༔ ཕྱིར་ལ་མདའ་ལྟར་འཕང་བ་ཡིས༔ ཉོན་མོངས་ལྔ་དང་བག་ཆགས་ལྔའི༔ བསྐྱེད་པའི་ནད་གདོན་གདོས་བཅས་ཀྱི༔ འཁྲུལ་བའི་རྩ་རླུང་ཐམས་ཅད་ཀུན༔ འོད་ཟེར་དཀར་མོག་དམར་ནག་མོག༔ རྣམ་པར་དབྱིངས་སུ་ཡལ་བར་བསམ༔ སླར་ཡང་གོང་བཞིན་དམིགས་པ་དང་༔ བསྒྲགས་ནས་རླུང་གི་གྲངས་ལ་བསླབས༔ དལ་རྔུབ་དལ་བཟུང་དལ་དུ་གཞིལ༔ དལ་དུ་ལྷག་མ་ལྟེ་འོག་བཅག༔ དལ་དུ་ཕྱིར་དབྱུང་བ་སྟེ་བཞི༔ འདི་ནི་མེད་ཐབས་མེད་པའོ༔ སྔར་ལས་འགྱུ་བ་ཉུང་གྱུར་ནས༔ བཅུ་འགྱུར་ལ་སོགས་ཆད་ལ་བསླབས༔ སྲོག་རྩོལ་གསུམ་གྱི་རླུང་གི་ཐིག་ལེ་དབྱིབས་དང་ཁ་དོག་འགྲོ་འོང་ལ་བསླབས་པས་ངག་དབེན་སོགས་གསུང་རྡོ་རྗེའི་ལམ་བྱེད་དུ་རྒྱུད་གསུམ་ཀ་ཞལ་མཐུན་པའི་ཕྱིར། དེ་ཉམས་སུ་ལེན་པ་ལ་ཐོག་མར་སྙིང་གི་སྣ་རྩེར་བསྒོམ་པས་སྔགས་ཀྱི་ཐིག་ལེར་འགྱུར་ཚུལ། དེ་ནས་སྙིང་ཁར་འོད་ལྔའི་ཐིག་ལེ་དེ་བཞིན་གཤེགས་པ་ལྔའི་རང་བཞིན་ཅན་གསལ༔ བ་ལ་སེམས་བཟུང་ནས་རླུང་འབྱུང་གནས་འཇུག་གསུམ་དང་རྡོར་བཟླས་སོགས་ཀྱི་གཞིར་བྱ་བ་དང་རྫས་དང་འོད་ཀྱི་ཐིག་ལེའི་སྲོག་རྩོལ་དུ་འགྱུར་ཚུལ་ནི། དེ་ནས་ཡང་ཅིག་རྒྱལ་བ་རྣམས་ཀྱི་ཤངས་བུག་གཡོན་ནས་ཞུགས། ཐུགས་སྲོག་ལ་གཡས་སུ་འཁོར་ཏེ་ཐུགས་རྗེ་བྱིན་རླབས་བསྡུས། རང་གི་སྣ་བུག་གཡོན་ནས་ཞུགས་ཏེ་ནོར་རྩེར་སོན་ཏེ་སླར་སྙིང་ཁར་འཁོད་པ་དང་། སེམས་ཅན་རྣམས་ལའང་དེ་བཞིན་དུ་བསྒོམ་མོ། །དབུ་མའི་ལམ་ནས་རོ་རྐྱང་ཐིམ༔ པ་སྟེ་རོ་མ་ལ་ལམ་བྱས་ནས་ནོར་བུའི་རྩེ་མོར་སྒོམ་པ། དེ་ནས་རོ་མ་བརྒྱུད་དེ་སྣ་བུག་གཡས་ནས་ཐོན་ཅིང་སྣ་རྩེར་སྒོམ་པ་དང་སླར་དེ་ལ་ལམ་བྱས་རྒྱང་རིང་རླུང་སེམས་བསྒྲགས༔ ཕར་སོང་ཚུར་འོང་འགྲོ་འོང་བསླབ༔ ཐིག་ལེ་སྔར་ལྟར་དབུས་སུ་ནི༔ ཨེ་ཡཾ་བཾ་ལཾ་རཾ་རྣམས་གསལ༔ སེམས་དང་ཡི་གེ་ཐིག་ལེར་བཅས༔ ཕར་ལ་གང་མཚམས་འཁོར་ལོ་ལྔའི༔ རླུང་ཐིག་ཡི་གེའི་འཕྲོ་འདུ་བསམ་མི་ཁྱབ་བསམ་ལ༔ སྤྱིར་རླུང་ལ་མཉམ་བཞག་སྦྱོར་བ་བཞི་ལྡན་དང་རྗེས་ཐོབ་རྡོར་བཟླས་དང་འཁོར་ལོའི་སྤྲོ་བསྡུའི་དམིགས་སྐོར་ཤིན་ཏུ་མང་བ་ལ། མ་བླ་མེད་དང་ཕའི་རྒྱུད་ལྟོ་སྦྱོར་དུ་སྒོམ་པའི་ཁྱད་ཆོས་དང་། དང་པོའི་ཕྱོགས་ཀྱི་རྗེས་ཐོབ་འཇམ་རླུང་ཙམ་ལ་བཤད་པའང་ཡོད་འདིར་གཉིས་མེད་རྒྱུད་ཀྱི་མཐར་ཐུགས་རྫོགས་པ་ཆེན་པོའི་དབང་དུ་བྱས་པའི་ལམ་སྟེགས་སུ་སྒོམ་ཚུལ་ལོ། །དེ་ནས་རླུང་གི་བུམ་ཅན་ཆེ་འབྲིང་ཆུང་གསུམ་གྱི་གྲང༵ས་དང་རྗེས་ཐོབ་ཀྱི་རླུང་ཡང་བསྒྲག༵ས་བསླབ༵༔ ད་ནི་ཁ་དོག་དང་དབྱིབས་རང་བཞིན་གསུམ་ལ་བསླབ་པ་ནི་བདེ་ཆེན་འཁོར་ལོ་རུ༔ ཆུ་རླུང་དཀར་པོའི་རྣམ་པར་བཟུང་༔ མགྲིན་པར་མེ་རླུང་སྙིང་ཁར་ནི༔ ནམ་མཁའི་རླུང་གི་རྣམ་པར་བཟུང་༔ ལྟེ་བར་ས་རླུང་གསང་གནས་སུ༔ རླུང་གི་རླུང་ནི་རྣམ་པར་བཟུང་༔ ཕྱིར་དབྱུང་བ་དང་ནང་དུ་བསྟིམ་སྟེ་གནས་པ་སླར་དེ་ལས་ཡེ་རླུང་རྩ་ལ་དགྲམ་པ་ཐམས་ཅད་ཀྱི་འཁོར་ལོ་སོ་སོའི་རླུང་ཐིག་ཡི་གེ་ལས་བྱེད་པ་དོན་གྱི་གོ་བའི་འགང་ཡིན་མ་བྱང་བ་ཡིས་དམིགས་པ་བྱ༔ དམིགས་ནས་རྩ་གསུམ་འཁོར་ལྔ་སོགས་གསལ་བཏབ་ནས་དམིགས་པ་ལྟེ་གསང་གི་འཁོར་ལོ་ལ་རླུང་བཟུང་ནས་སྟེང་རླུང་མནན་པ་དང་༔ དེ་ནི་གསང་བའི་མན་ངག་གོ༔ འོག་རླུང་གནད་དུ་བསྣུན་པ་ལགས༔ སྟེང་འོག་རླུང་བསྡམས་ཕོ་བ་འདུར༔ བར་གྱི་རླུང་ལ་གནད་བསྣུན་པའོ༔ སྡོམ་འབྱུང་ལས། སྟེང་དང་འོག་ཏུ་རྒྱུ་བའི་རླུང་། ཁ་སྦྱོར་དུ་ནི་ཡིད་ཀྱིས་བྱ། །དེ་ཡིས་སྦྱོར་བ་གོམས་བྱེད་ན། །དེས་ནི་བརྟེན་པའི་གོ་འཕང་ཐོབ། །ཅེས་སོ། །དེས་ཚད་གྲངས་ཤུགས་ཡོན་ཏན་ཟིན་པ་རྣམས་འབྱུང་ངོ། །རླུང་གི་གཏུམ་མོའམ་དེ་ལ་བུམ་ཅན་ཞེས་ཀྱང་བྱ༔ འོག་རླུང་བསྡམས་ནས་ཕོ་བ་འདུར༔ སྟོད་ཀྱི་རླུང་ལ་འགྲོ་འོང་གིས༔ ཐིག་ལེས་རོ་རྐྱང་གང་བར་བསམ༔ སྟོད་ཀྱི་རླུང་ལ་གནད་དུའོ༔ འདི་དག་གི་དོན་ནི་བདེ་ ༼ འོག་ ༽གསལ་ ༼ སྟེང་ ༽ མི་རྟོག་ ༼ བུམ་ཅན་ ༽ གི་ཏིང་འཛིན་སྐྱེ་བ་དང་དེ་གསུམ་གྱིས་ལོག་པ་གསུམ་དང་ཆགས་པ་གསུམ་སྟེང་འོག་བར་གསུམ་གྱི་རླུང་ལོག་འབྱམས་འཁྲུགས་འགགས་རྡུགས་པའི་གེགས་རྣམས་སེལ་ཞིང་བོགས་འདོན་པའི་གནད་ཡོད་པས་སོ། །ཡང་ཅིག་རྦ་རླབས་ལམ་གཉིས་གཏེམ༔ བུམ་ཅན་དང་བསྒྲགས་ནས་རྦ་རླབས་གཏེམ་པ་དང་དྲག་ཏུ་གཏེམ་པ་གཉིས་འབེབས་ཆུང་ཆེན་དང་བསྒྲགས་པ་གཉིས་དང་བཞིའོ། །དེས་སྟོང་བཞིའི་འོད་གསལ་བསམ་གྱིས་མི་ཁྱབ་པའི་རིམ་པ་འཆར་བས་དྭངས་མའི་རླུང་ལ་ལམ་བྱས་པའོ༔ དེ་ལྟར་མཉམ་བཞག་རླུང་དང་ནི༔ ཡང་ན་རྗེས་ཐོབ་རླུང་འཇམ་རླུང་ཙམ་ལ་ནི༔ འོག་རླུང་བསྡམས་ཤིང་ཕོ་བ་འདུར༔ མི་ཡེངས་དྲན་པ་བསྟེན་པའོ༔ བོགས་འབྱིན་ཁམས་དབང་བསྟུན་པའི་གདམ་ངག་ཟབ་མོས་ཁ་བསྒྱུར་ན། ཞེ་སྡང་ཅན་གྱིས་དབྱར་དང་སྔ་དྲོ་ནི༔ ཆུ་རླུང་བསྒོམ་པས་གསལ་ཉམས་སྐྱེ༔ གཏི་མུག་ཅན་གྱིས་ཉིན་གུང་དང་དཔྱིད་ནི༔ རླུང་གི་རླུང་བསྒོམ་སྟོང་ཉམས་སྐྱེ༔ འདོད་ཆགས་ཅན་གྱིས་དགོངས་མོ་དང་དགུན་ནི༔ མེ་རླུང་བསྒོམ་པས་བདེ་ཉམས་སྐྱེ༔ ཕྲག་དོག་ཅན་གྱིས་སྟོན་དང་ས་རུབ་ལ༔ ས་རླུང་བསྒོམ་པས་ཞི་གནས་སྐྱེ༔ ང་རྒྱལ་ཅན་གྱིས་དུས་མཚམས་དང་གུང་ལ་ནི༔ ནམ་མཁའི་རླུང་བསྒོམ་ལྷག་མཐོང་རྒྱས༔ གསང་བའི་གསང་བ་ཆེན་པོའི་རླུང་༔ ཡེ་ཤེས་ལྔ་བོ་མངོན་དུ་འགྱུར༔ གསང་རྫོགས་ལས། དེ་ཚེ་རླུང་ཉིད་ལས་རུང་བས། །ཐ་མལ་ཤེས་པ་སྙིང་དབུས་སད། །ཆོས་རྣམས་ཀུན་གྱི་དེ་བཞིན་ཉིད། །མ་བཅོས་བྱང་ཆུབ་སེམས་རྟོགས་པས། །ཉོན་མོངས་རང་སངས་ཡེ་ཤེས་རྒྱས། །གསང་རླུང་ངོས་ཟིན་ངོ་མཚར་ཆེ། །ཞེས་སོ། །མཆོག་གོ་ཐུན་མོངས་ཟད་པར་གྲུབ༔ དུས་འཁོར་རྩ་རྒྱུད་ལས། སྣང་བ་ས་མཆེད་པ་མེ་ཐོབ་པ་ཆུ་ཉེར་ཐོབ་རླུང་མཐའི་འོད་གསལ་ནམ་མཁའི་ཁམས་སུ་གསུང་བ་དང་། ཡེ་ཤེས་རྡོ་རྗེ་ཀུན་ལས་བཏུས་པ་ལས། སེམས་ཉིད་ཡེ་ཤེས། རྣམ་ཤེས་ནམ་མཁའ། འདུ་བྱེད་རླུང་གི འདུ་ཤེས་ཆུས། གཟུགས་ས་ཡི་རླུང་དུ་གསུང་བ་དང་། རྣམ་ཤེས་ཀྱིས་ཞེ་སྡང་། ཉོན་ཡིད་ཀྱིས་ང་རྒྱལ། ཡིད་ཤེས་ཀྱིས་འདོད་ཆགས། སྒོ་ལྔས་ཕྲག་དོག ། ཀུན་གཞི་གཏི་མུག་བསྐྱེད་པའི་རླུང་ཡིན་ཏེ་དེས་ན་ངོ་བོ་སྐྱེད་བྱེད་དང་། བསྐྱེད་བྱ་རང་རྩལ་ཉོན་མོངས་འཁོར་བའི་སེམས་སེམས་བྱུང་ཐམས་ཅད་ཀྱི་རྟེན་གཞིའང་རླུང་ཡིན་པ་དང་། གཉེན་པོ་རླུང་གི་ཕྱེད་བཅིངས་ཀྱི་ཐབས། ཕྱི་ནང་གསང་བ་ཡང་གསང་གི་ཐབས་ཀྱི་གནད་ཀྱིས་རླུང་གི་དེ་ཉིད། ཡེ་ཤེས་ལྔ་དང་། རང་མདངས་སྐུ་ལྔར་གནས་པ་སྒྲིབ་བྲལ་མངོན་དུ་གྱུར་བས་གནས་སྐབས་བཞིའི་འཁྲུལ་སང༵ས་ནས་འབྲས་བུ་སྐུ་གསུམ་གྱི་ཡེ་ཤེས་སུམ་ ༼ གཞི་གནས་མཚན་འཛིན་ཡུལ་ཁྱབ མཆན་ ༽ བརྩེགས་སུ་རྒྱས༵་པའི་རྟེན་ནམ་རྟ་བྱེད་པས་ན། རྡོ་རྗེ་ཕྲེང་བའི་རྒྱུད་ལས། དེ་ལ་རླུང་གི་འོད་ཟེར་མཆོག །གསལ་བ་ཆེན་པོ་ཁ་དོག་ལྔ། །དེ་བཞིན་གཤེགས་པ་ལྔ་རང་བཞིན། །ཕུང་པོ་ལྔ་ཡི་རང་ངོ་བོ། །དེ་ནི་ཡེ་ཤེས་ལྔ་དག་པ། །རླུང་ལྔ་རུ་ནི་རྒྱུ་བར་བྱེད། །ཞེས་པས་རྣམ་ཤེས་དང་ཡེ་ཤེས་ཀྱི་འབྲེལ་དང་། སྣང་བ་མཉམ་ཉིད། མཆེད་པ་སོར་རྟོགས། ཐོབ་པ་མེ་ལོང་། ཉེར་ཐོབ་བྱ་གྲུབ། མཐའི་འོད་གསལ་ཆོས་དབྱིངས་ཏེ། གཞི་ལམ་འབྲས་བུའི་རྒྱུད་གསུམ་འབྲེལ་བའི་ངོ་བོ་བྱེད་བཅིང་གི་ཐབས་ཀྱི་རོ་གཅིག་ཏུ་འགྱུར་བའི་འཐད་པ་གྲུབ་སྟེ་དེས་ན་འཁོར་འདས་ཐམས་ཅད་ཀྱི་རྟེན་རླུང་གི་བྱེད་པས་མཆོག་ཐུན་གྱི་དངོས་གྲུབ་ལ་རང་དབང་བསྒྱུར་བའང་། རྡོར་ཕྲེང་ལས། རླུང་ཞེས་བྱ་བ་ལས་ཀུན་བྱེད། །འདི་ནི་རྣམ་ཤེས་བཞོན་པ་སྟེ། །སངས་རྒྱས་གོ་འཕང་འཐོབ་བྱེད་པ། །རྒྱུད་རྣམས་ཀུན་གྱི་གསང་པ་སྟེ། །བྱང་ཆུབ་རྒྱུ་ཡི་ཐབས་ཡིན་ནོ། །ཞེས་སོ། །ཐུན་མོང་གི་དངོས་གྲུབ་ཟད་པར་ཟིལ་གནོན་སོགས་འགྲུབ་ཅིང་མཐར་འགྱུར་གྱི་ཉམས་གཡས་རླུང་དབུ་མར་ཚུད་པས་དུ་བ། གཡོན་རླུང་གིས་སྨིག་རྒྱུ། ཆུ་རླུང་གིས་སྤྲིན་དང་ཟླ་འོད། མེས་འོད་འབར་བ། སས་གསེར་མདོག །ནམ་མཁས་མཐིང་ག་དང་འཇའ་འོད་ཐིག་ལེ་ལ་སོགས་པ་དང་། ལྷའི་སྐུ་སོགས་ཉོན་མཚན་གྱི་རྟགས་བཅུའི་སྟོང་གཟུགས། ཕྱག་རྒྱ་ཆེན་མོ་རྣམ་ཀུན་མཆོག་ལྡན་གྱི་སྙེམས་མ་དང་རོ་གཅིག་ཏུ་རོལ་བའི་ཐར་བ་སྟེར་བ་ནི་རླུང་གི་གཏུམ་མོ་དམ་ཚིག་གི་ཕྱག་རྒྱའི་གནས་སྐབས་ཀྱི་འབྲས་བུའོ། །དེ་དག་ཀྱང་སྒྱུ་འཕྲུལ་ཆེན་མོ་ལས། དེ་ལྟར་རྣལ་འབྱོར་སྐལ་ཆེན་པོ། །རླུང་ལྔའི་དྭངས་མ་སྟོབས་གྱུར་པས། །འོད་ལྔ་ནང་གི་ཡེ་ཤེས་ལྔ། །སྐུ་ལྔ་བསྒྲོད་པའི་ཞིང་ཁམས་ལྔ། །ཟད་པར་ལྔ་སོགས་ཐོབ་པར་འགྱུར། །ཞེས་བཤད་དོ། །དུ་བ་འཐུལ་དང་ས་རྡུལ་འཁྲིགས༔ མི་བཟུང་བ་ནི་གདམས་ངག་གོ༔ འདི་ཡིས་རླུང་བཅུ་དབུ་མར་འཇུག༔ གེགས་སེལ་རིམ་པ་རྗེས་འཕྲུལ་འཁོར་གྱི་དུས་སུ་འབྱུང་འགྱུར་བཞིན་ནོ༔ ཡང་ན་མ་ནིང་རླུང་གིས་བོགས་དབྱུང་བ༔འབྱུང་གནས་འཇུག་གསུམ་དལ་གྱིས་བསླབ་པའོ༔

བསྡུ་ན་རྩ་གསུམ་འཁོར་ལྔ་གསལ༔ གཡས་གཡོན་རླུང་བཅུད་དབུ་མར་བསྟིམས༔ སྙིགས་མའི་རླུང་བསྡུས་ཕྱི་རུ་འཕང་༔ དབུ་མའི་རླུང་བཅུད་རྩ་ཕྲན་གཞིལ༔ དགྲམ་ལ་འཁྲུལ་འཁོར་བྱས་པའི་མཐར༔ རོ་རྐྱང་རྩ་ཕྲན་དང་བཅས་པའི༔ མདུད་པ་རླུང་གིས་བཤིགས་པར་བསམ༔ དཔའ་བོ་ཡབ་ཡུམ་འཁྲིལ་སྦྱོར་རོལ༔ རླུང་གིས་ལུས་གནས་རྒྱལ་བའི་ཚོགས༔ མཆོད་པ་འབུལ་བས་ཚོགས་གཉིས་རྫོགས༔ ལུས་ཀྱི་བྱེད་བཅིང་ཆོས་བདུན་གཡོ་མེད་ལ༔ རླུང་གི་བྱེད་བཅིང་སྟེང་འོག་ཁ་སྦྱོར་བ༔ སེམས་ཀྱི་བྱེད་བཅིང་འོད་གསལ་བཟུད་པ་ཡིས༔ ཉམས་ཀྱི་གཏུམ་མོ་བདེ་གསལ་གྱི་རྟོག་པ་དང་། རྟགས་བཅུའི་སྟོང་གཟུགས་དང་མཆོག་གི་གཏུམ་མོ་སྟོང་བཞིས་དྲངས་པའི་འོད་གསལ་དཔེ་དོན་གྱི་ཡེ་ཤེས་ཡང་དག་འབྱུང་༔ འདི་ལས་གཞན་པའི་ཞི་ལྷག་ཟུང་འཇུག་གི་རྣལ་འབྱོར་སྒྲུབ་པའི་ཏིང་ངེ་འཛིན་གྱི་འཕྲུལ༔ གསང་རྨད་དུ་བྱུང་བ་དང་མྱུར་ལམ་ནི་འཇིག་རྟེན་ཀུན་ན་ཡོད་མ་ཡིན༔ སངས་རྒྱས་རྣམས་ཀྱི་ཉེ་ལམ་མཆོག༔ ཏིལ་བཙིར་ན་མར་འབྱིན་པ་ལྟར། ལས་རླུང་འཆིང་བས་དེའི་ངོ་བོའམ་སྙིང་པོ་རྒྱུ་རྒྱུད་གཉུག་མའི་རླུང་ལ་གནད་དུ་བསྟུན༔ པར་འགྲོ་བས་སོ། །ཅེས་རྣལ་འབྱོར་ཕའི་རྒྱུད་གཙོ་བོར་སྟོན་པའི་ ༼ འདི་རྒྱུད་སྡེ་ཀུན་གྱི་ཁོང་སྙིང་གཅིག་ཏུ་བསྡེབས་པ་ལགས་ཀྱང་། ཕ་རྒྱུད་ཀྱི་རྫོགས་རིམ་རླུང་ཡིན་པའི་ཕྱོགས་ལས་གསུང་ངམ་སྙམ། མཆན། ༽ དོན་བསྡུས་པ་ཨོ་རྒྱན་གྱི་སློབ་དཔོན་ཆེན་པོ་པདྨའི་ཞབས་ཀྱིས་རྗེས་སུ་གནང་བ་རྫོགས་སོ། །སླར་མཇུག་བྱང་ཁ་བཀང་བ་ནི། ཐབས་མཆོག་རྗེ་བཙུན་བདུད་འཇོམས་པས༔ འདི་ཨོ་རྒྱན་ཆེན་པོས་བདུད་འཇོམས་རྗེ་ལ་གསུངས་ནས་དེས་བདག་ལ་ཉམས་སྣང་དུ་གསུངས་བར་སྣང་བས། ཁོ་བོས་བཙས་སུ་བཞག་པ་སྙམ༔ ནམ་མཁའི་མཛོད་ལས་རང་གྲོལ་བརྡ༔ ལུ་གུ་རྒྱུད་ཀྱི་འགྲོ་འོང་ལ༔ བསླབ་པའི་སྟོབས་ཀྱིས་མིག་མདོང་ཕྱེས༔ དགེའོ༔ དགེའོ༔ དགེའོ༔ གསེར་མཆན་འདི་ནི་ཚེ་རབས་སྔོན་ནས་མཆེད་གྱུར་མཛོད་གསུམ་འཆང་བ་ཆེན་པོ་པདྨ་བཱིདྱའི་གསུང་གིས་བསྐུལ་ངོར། སྔགས་འཆང་ག་གཱ་ཨ་བྷྱེ་ནས་སྨྲས་པ་ཡི་གེའི་འདུ་བྱེད་ཀྱང་དེ་ཉིད་ཀྱིས་བགྱིས་པ་དགེའོ། །

བདེ་སྟོང་དཔྱིད་ཀྱི་ཐིག་ལེ་རྩ་བ།

བདེ་སྟོང་དཔྱིད་ཀྱི་ཐིག་ལེ་ལས༔ རང་བྱུང་ཡེ་ཤེས་བསྐྱེད་པའི་ཐབས༔ རྒྱུ་འབྲས་ས་བཅུ་ལྟོ་སྦྱོར་དུ༔ གོམས་པ་ཕྲ་མོའི་རྣལ་འབྱོར་བཞུགས༔

ན་མོ་གུ་རུ་པདྨ་ཀཱ་ར་ཡེ༔ རྣལ་འབྱོར་གང་ཞིག་སྲོག་ལ་ཡང་དག་གོམས༔ ལས་རུང་གང་དུ་བྱེད་པ་བཅིང་ཡང་ཟིན༔ དེ་ཡིས་རྩོལ་བའི་རྒྱུ་བ་གཅད་པར་བྱ༔ དེ་ལ་གནད་ཀྱི་མན་ངག་འདི་ཉིད་ཟབ༔ ས་མ་ཡཱ༔

དང་པོ་གཏུམ་མོ་མ་གོམས་ཉམས་ལེན་པ༔ སྤྱི་བརྟོལ་ཙམ་ལས་གནད་དུ་འབྱོར་མིན་པས༔ དམ་ཚིག་ཕྱག་རྒྱའི་ལམ་མཆོག་ཉམས་ལེན་པས༔ བཅིང་བ་གསུམ་གྱི་གནད་ལས་མ་འདས་དགོས༔ དེ་ལྡན་རྡོ་རྗེའི་ལུས་ལ་ཡེ་གནས་པ༔ སྦར་བྱ་མེ་ཡི་འཁོར་ལོ་ཨ་ཤད་གཟུགས༔ སྤྲུལ་པའི་འཁོར་ལོའི་འོག་ནས་སོར་གཉིས་མཚམས༔ སྤར་བྱེད་རླུང་གི་འཁོར་ལོ་སོར་གཉིས་མཚམས༔ སྤུ་ནག་གུ་ཡི་མཚམས་ནས་ཅུང་དཔག་པ༔ རོ་རྐྱང་རླུང་གིས་ཡཾ་ཡིག་ཆེར་བསྐྱོད་དེ༔ དེ་ལས་རླུང་གཡོས་དབུ་མའི་ནང་དུ་དེད༔ ཨ་ཤད་མེ་འབར་མཚན་ཉིད་བཞི་ལྡན་པ༔ རྣམ་པ་མེ་ལ་རེག་བྱ་ཚ་བ་དང་༔ རྩེ་མོ་རྣོ་ལ་ཁ་དོག་དམར་བའོ༔ ༼ གཞན་དུ་རྣམ་པ་གསལ་བ༔ རེག་བྱ་ཚ་བ༔ རྩེ་མོ་རྣོ་བ༔ ངོ་བོ་བདེ་བ༔ ཞེས་པ་ཡང་ཡོད་དོ། །༽ གོང་མ་གསུམ་དང་རྒྱལ་ཀུན་བྱིན་རླབས་མེ༔ རྣམ་པར་འཁྱུག་པ་འཁོར་ལོ་ལྔ་ལ་ཁྱབ༔ མ་དག་ལས་ཉོན་བག་ཆགས་ཐམས་ཅད་བསྲེགས༔ བདེ་དྲོད་ཉི་ཟླ་ལྟ་བུར་འབར་བསམ་ཞིང་༔ འདི་ནི་སྟེང་སྒོ་སྤྱི་དང་བསྟུན་པ་ལས༔ འོག་སྒོ་སྦྱོང་བས་གསང་གནས་ཡཾ་རླུང་དཀྱིལ༔ ལྟེ་འོག་སོར་གཉིས་མཚམས་སུ་ཨ་ཤད་གཉིས༔ སྦྲེབ་དང་སྦར་བ་འདི་ནི་ཁྱད་འགྱུར་རོ༔ དུས་དང་རྣམ་པ་ཀུན་ཏུ་ཉམས་བླངས་པས༔ ཐིག་ལེའི་གཞི་ནི་གཏུམ་མོའི་རྣལ་འབྱོར་ཡིན༔ གཏུམ་མོའི་སྤར་བྱེད་སྲོག་གི་རྣལ་འབྱོར་ཡིན༔ སྲོག་མ་སྨིན་ན་གཏུམ་མོ་སྦར་མི་ནུས༔ གཏུམ་མོ་མ་གོམས་ཐིག་ལེ་འཇུ་འདུལ་མིན༔ དེ་ཕྱིར་འབྲེལ་བ་ཅན་གྱིས་སྔོན་དུ་འགྲོས༔ གོས་མི་དགོས་ཤིང་བདེ་དྲོད་རབ་ཏུ་འབར༔ ཏིང་འཛིན་ཟད་པར་མེ་ལ་མངའ་དབང་བསྒྱུར༔ འདི་ཡང་ག་ག་ཨ་བྷྱེས་བསྡུས་ཁྲིགས་ཏེ༔ ཙི་ཏྲ་ཀ་དང་གཡེར་མའི་བསིལ་གསུམ་ཟས༔ སྨན་གྱི་རྣལ་འབྱོར་སྤང་བ་མན་ངག་གོ༔ ས་མ་ཡཱ༔

དེ་ནས་ཐིག་ལེའི་རྣལ་འབྱོར་ཉམས་ལེན་ལ༔ རགས་པའི་ཐིག་ལེ་དྭངས་མའི་ཐིག་ལེ་དང་༔ ཡེ་ཤེས་ཐིག་ལེ་རང་བཞིན་ཐིག་ལེ་དང་༔ འབྲས་བུའི་ཐིག་ལེ་ལ་སོགས་རྣམ་མང་ཡང་༔ རགས་པའི་ཐིག་ལེ་ཀུན་རྫོབ་རྒྱུ་ལ་བརྟེན༔ རྦ་རླབས་དྭངས་མའི་ཐིག་ལེའི་ལམ་བོགས་ཐོན༔ ཁྱད་པར་རླུང་གི་དྭངས་མའི་ཐིག་ལེའི་སྒྲ༔ སྦྱོང་བ་མ་དང་མཁའ་འགྲོའི་ཁྱད་ཆོས་ཅན༔ རྡོ་རྗེ་འཆང་གི་ཐུགས་ལ་གནས་ན་ཡང་༔ སྐལ་མེད་ལ་གབ་མངོན་དུ་མ་གྱུར་གཉིས༔ ཡང་ཅིག་དབྱུང་བའི་ཁྱད་ཀྱིས་སྣ་ཡི་ལམ༔ ཡེ་ཤེས་ཐིག་ལེ་ཉམས་ལེན་གནད་ཀྱི་དངོས༔ གཞན་ཡང་རླུང་བཟུང་མུན་པའི་རྣལ་འབྱོར་དུ༔ རླུང་བཅུ་དབུ་མར་ཚུད་པའི་བྱེད་ལས་ཀྱིས༔ ཤེས་ཉམས་རྟགས་བཅུའི་སྐར་མ་ལམ་མེ་བ༔ ཕྱི་ནང་གསང་བའི་དྲོད་རྟགས་བཅུ་བཅུ་འབྱུང་༔ དེ་ལ་ཐིག་ལེའི་ཤེས་བྱ་དྷུ་ཏིའི་རྩེར༔ ཕ་ལས་ཐོབ་པའི་ཐིག་ལེ་དཀར་པོ་དང་༔ མར་སྣང་མ་ལས་ཐིབ་པའི་རཀྟ་དམར༔ དེ་གཉིས་རོ་རྐྱང་ནང་ནས་བཅུད་བྱུང་སྟེ༔ དབུ་མ་ལ་ཐིམ་ཨ་ཧཾ་རྣམ་པར་བཞུགས༔ ཕྲ་མོ་གྲངས་ཀྱིས་མི་ཆོད་འཁོར་ལོའི་མཐའ༔ སྐར་མའི་གྲངས་ཀྱིས་ཐིག་ལེ་དཀར་དམར་བ༔ དཔའ་བོ་ཡབ་ཡུམ་ཁ་འཐོར་ཚུལ་དུ་བཞུགས༔ དེ་དག་གོམས་པར་བྱེད་པའི་རྣལ་འབྱོར་པས༔ སྐྱེ་མེད་ཞུགས་ཀྱིས་རི་བོང་ཅན་བཞུས་པས༔ འདོད་ཆགས་ཆེན་པོའི་དགྱེས་མཉམ་མཆོད་པའི་སྤྲིན༔ གྲོལ་ཐར་ཕྱག་རྒྱའི་ལམ་ལ་ཉེ་རྒྱུར་འགྱུར༔ དེ་ཡི་དམིགས་པ་སྤྱི་བོའི་འཁོར་ལོ་རུ༔ བཾ་ཡིག་ཡོངས་གྱུར་རྣམ༵་སྣང་འཁོར་ལོ་འཛིན༔ མགྲིན་པར་རྃ་ལས་སྣང་མཐའ་པདྨ་འཛིན༔ ཐུགས་ཀར་ཨེ་ལས་སེམས་དཔའ་རྡོ་རྗེ་འཛིན༔ ལྟེ་བར་ལྃ་ལས་རིན་ཆེན་ནོར་བུ་འཛིན༔ གསང་བར་ཡ་ལས་རྔ་སྒྲ་རྒྱ་གྲམ་འབར༔ རང་རང་རིགས་ཀྱི་ཡུམ་དང་བཅས་པ་དང་༔ འཁྲིལ་སྦྱོར་གཡོན་པས་དྲིལ་བུ་རིགས་ཀྱི་མཚན༔ རིགས་ཆུང་སེམས་དཔའི་འཁོར་གྱིས་ཡོངས་བསྐོར་གསལ༔ ཞི་བ་རྐྱང་བའི་ལམ་ནི་དེ་འདྲ་ལ༔ ཞི་ཁྲོ་རོལ་པའི་མཉམ་པར་སྦྱོར་བ་ནི༔ ཁྱད་པར་སྙིང་ཀའི་འཁོར་ལོའི་རྩ་འདབ་ཀྱི༔ དྭངས་མའི་རྩ་འདབ་ཀུན་ན་གཞི་ཡི་ལྷ༔ ཞི་བ་བཞི་བཅུ་རྩ་གཉིས་རྫོགས་པར་ལྡན༔ དེ་ལས་འོད་འཕྲོས་དུང་ཁང་དཀར་པོ་ནས༔ ཁྲག་འཐུང་རོལ་པའི་ལྷ་ཚོགས་ཚོམ་བུར་བཅས༔ ཡབ་ཡུམ་རྒྱན་དང་གཞལ་ཡས་ཁང་བཅས་རྫོགས༔ ཀུན་ཀྱང་རང་བཞིན་དག་པའི་འོད་རྩ་ན༔ མི་འགྱུར་མི་ཤིགས་ཡེ་ཤེས་ལྔ་ལྡན་པ༔ ཟེར་གྱི་སྐུ་ལ་བསམ་མི་ཁྱབ་པར་འཕྲོ༔ དེ་ནས་ཕྱི་ཡི་དབུ་མ་སྟོང་སངས་པ༔ མཚན་ཉིད་བཞི་ལྡན་མར་སྣེའི་རྟ་གདོང་ཅན༔ ཐབས་ཤེས་རྒྱུ་ལམ་རླུང་གིས་བསྐུལ་བ་ལས༔ མཚན་ཉིད་བཞི་ལྡན་རབ་ཏུ་ཕྲ་བ་ཞིག༔ འཁྱུགས་ཤིང་གོང་དུ་བསྙེགས་པས་ལྷ་ཚོགས་རྣམས༔ ཡེ་ཤེས་དྲོད་ཀྱིས་དགྱེས་པ་རབ་བསྐྱེད་ནས༔ ཡར་འཕར་ག་བུར་དབང་པོའི་རྡུལ་ལ་རེག༔ དེ་ལས་ཕྲ་བའི་ཐིག་ལེ་བབས་པ་དང་༔ མེ་དང་ཐིག་ལེ་བྲོས་དེད་ཚུལ་དུ་བྱུང་༔ ཨ་ཤད་ལ་ཕོག་དེ་ཡིས་མེ་གསོས་བྱས༔ ཆེར་འབར་ཐིག་ལེ་ཆུ་རྒྱུན་བཞིན་བབས་པར༔ དམིགས་པས་དུས་གསུམ་རྒྱལ་བའི་སྐུ་གསུང་ཐུགས༔ ཡོན་ཏན་ཕྲིན་ལས་ངོ་བོ་འོད་དཀར་དམར༔ མཐིང་གསུམ་རྣམ་པར་ཐིམ་པས་བདུད་རྩི་ནི༔ ཁ་དོག་རབ་དཀར་ཟླ་བ་འབུམ་བརྩེགས་ལྟའི༔ སྤྱི་བོའི་རྩ་འཁོར་མ་ལུས་ཁྱབ་པ་དང་༔ དེའི་སྟོབས་ལུས་ཀྱི་སྒོ་ནས་བསགས་སྡིག་སོགས༔ བ་སྤུ་ཀུན་ནས་ཆུ་རྒྱུན་བཞིན་དུ་བཏོན༔ ཟག་མེད་ཡེ་ཤེས་བདུད་རྩིའི་ལྟེམས་ཀྱིས་གང་༔ དེ་ན་བཞུགས་པའི་མགོན་པོ་སྲས་བཅས་མཆོད༔ རྩ་ཡི་ལམ་བྱང་དཔའ་བོ་ཡབ་ཡུམ་གྱིས༔ རྣལ་འབྱོར་པ་ཡི་མཆོད་པ་བླངས་ནས་སུ༔ དབྱེར་མེད་རྣམ་འདྲེས་སྐུ་ཡི་དངོས་གྲུབ་ཐོབ༔ དང་པོའི་དབང་ཐོབ་དཀའ་བའི་ཡེ་ཤེས་སྐྱེས༔ ཚོགས་ལམ་མཐའ་ཕྱིན་དེ་ནས་མར་བབས་ཏེ༔ མགྲིན་པའི་འཁོར་ལོ་གང་བས་གོང་བཞིན་དུ༔ དེ་ན་བཞུགས་པའི་མགོན་པོ་སྲས་བཅས་མཆོད༔ རྩ་ཡི་ལམ་བྱང་དཔའ་བོ་ཡབ་ཡུམ་གྱིས༔ རྣལ་འབྱོར་པ་ཡི་མཆོད་པ་བླངས་ནས་སུ༔ དབྱེར་མེད་རྣམ་འདྲེས་གསུང་གི་དངོས་གྲུབ་ཐོབ༔ གསང་བའི་དབང་ཐོབ་མཆོག་དགའི་ཡེ་ཤེས་སྐྱེས༔ སྦྱོར་ལམ་མཐར་ཕྱིན་དེ་ནས་མར་བབས་ཏེ༔ སྙིང་ཀའི་འཁོར་ལོ་གང་བས་གོང་བཞིན་དུ༔ དེ་ན་བཞུགས་པའི་མགོན་པོ་སྲས་བཅས་མཆོད༔ རྩ་ཡི་ལམ་བྱང་དཔའ་བོ་ཡབ་ཡུམ་གྱིས༔ རྣལ་འབྱོར་པ་ཡིས་མཆོད་པ་བླངས་ནས་སུ༔ དབྱེར་མེད་རྣམ་འདྲེས་ཐུགས་ཀྱི་དངོས་གྲུབ་ཐོབ༔ ཤེས་རབ་དབང་ཐོབ་ཁྱད་དགའི་ཡེ་ཤེས་སྐྱེས༔ མཐོང་ལམ་མཐར་ཕྱིན་དེ་ནས་མར་བབས་ཏེ༔ ལྟེ་བའི་འཁོར་ལོ་གང་བས་གོང་བཞིན་དུ༔ དེ་ན་བཞུགས་པའི་མགོན་པོ་སྲས་བཅས་མཆོད༔ རྩ་ཡི་ལམ་བྱང་དཔའ་བོ་ཡབ་ཡུམ་གྱིས༔ རྣལ་འབྱོར་པ་ཡིས་མཆོད་པ་བླངས་ནས་སུ༔ དབྱེར་མེད་རྣམ་འདྲེས་ཡོན་ཏན་དངོས་གྲུབ་ཐོབ༔ ཚིག་གི་དབང་ཐོབ་ལྷན་དགའི་ཡེ་ཤེས་སྐྱེས༔ སྒོམ་ལམ་མཐར་ཕྱིན་ས་དགུའི་རྟོགས་པ་འཆར༔ དེ་ནས་མར་བབས་གསང་བའི་འཁོར་ལོར་ཁྱབ༔ དེ་ན་བཞུགས་པའི་མགོན་པོ་སྲས་བཅས་མཆོད༔ རྩ་ཡི་ལམ་བྱང་དཔའ་བོ་ཡབ་ཡུམ་གྱིས༔ རྣལ་འབྱོར་པ་ཡི་མཆོད་པ་བླངས་ནས་སུ༔ དབྱེར་མེད་རྣམ་འདྲེས་ཕྲིན་ལས་དངོས་གྲུབ་ཐོབ༔ འོད་ཟེར་དབང་ཐོབ་དགའ་བྲལ་ཡེ་ཤེས་སྐྱེས༔ མི་སློབ་ལམ་མཐར་ཕྱིན་ཏེ་ཞི་ཁྲོ་ཡི༔ ལྷ་ཚོགས་ཡོངས་ཀྱི་དགྱེས་པ་བསྐྱེད་བྱས་ཏེ༔ སླར་ཡང་མས་བརྟན་རླུང་གི་སྟོབས་ཀྱིས་ལྡོག༔ སྔར་གྱི་ཉམས་ཞེན་འགྱུར་བདེའི་བག་ཆགས་བཅས༔ ཡོངས་སྦྱོངས་གཙུག་ཏོར་འཁོར་ལོ་ལ་སླེབས་ཏེ༔ དེ་ནས་རྩ་གནས་ཀུན་ཏུ་འཁྲུལ་འཁོར་དགྲམ༔ མ་དག་རྩ་རླུང་ཐིག་ལེའི་རྒྱུ་བ་ཀུན༔ བཅོམ་ནས་དག་དབྱིངས་དྭངས་མའི་དཔལ་ཆེན་པོ༔ མངོན་གྱུར་རྩ་མདུད་ཕྲ་བ་ཞིག་སྟོབས་ཀྱིས༔ རླུང་སེམས་འབྱོང་དང་ལས་རུང་མཐར་ཕྱིན་ཏེ༔ ཡི་གེ་འཁོར་ལོ་ཚོགས་ཆེན་མངོན་གྱུར་བསམ༔ དེ་ནས་སྤྱི་གཙུག་ཐིག་ལེ་རབ་ཕྲ་བ༔ སྟོང་པའི་སྒྲོན་མ་སྐུ་ལྔའི་ངོ་བོ་ཉིད༔ བལྟ་དཀའ་བསམ་གྱིས་མི་ཁྱབ་ཆོས་ཉིད་ཆེ༔ བརྗོད་བྲལ་ཀ་དག་ཆེན་པོར་ལ་ཡང་བཟླ༔ ཐིག་ལེའི་བཟུང་ལྡོག་དགྲམ་པ་རླུང་དང་གཞན༔ སྟག་མོའི་འགྱུར་སྟངས་སེང་གེ་རྩལ་སྤྲུག་དང་༔ གཞུ་འགེང་དར་པོ་ཆེ་བསྐྱོད་འགྱིང་ཚུག་བཟུང་༔ འཇག་མའི་ཕྱུར་སྟངས་རྣམ་པ་དྲུག་གི་ལྡོག༔ གཉིད་ཀྱི་རྣལ་འབྱོར་འོད་གསལ་སྦ་བའི་ཐབས༔ ཐིག་ལེའི་རྣལ་འབྱོར་དྭངས་མའི་རྩ་ལ་སྦ༔ རྣམ་རྟོགརང་བཞིན་འོད་གསལ་ཆོས་སྐུར་སྦ༔ བདེ་བ་ཡེ་ནས་ལྷུན་འབྱམས་ཆེན་པོར་སྦ༔ འོད་གསལ་འཛིན་མེད་གཞོན་ནུ་བུམ་སྐུར་སྦ༔ དེ་ཡང་རང་བབས་དགོངས་པའི་ངོ་བོར་སྦ༔ སྦ་བ་དྲུག་དང་ལྡན་པའི་ཁྱད་ཆོས་འདི༔ རྟོག་གེ་རྟོགས་འདོད་ཅན་གྱི་ཡུལ་མ་ཡིན༔ ཟོག་པོ་འདོད་ཆགས་ཅན་གྱི་ཡུལ་མ་ཡིན༔ རྫུན་མ་མགོ་བསྐོར་མཁན་གྱི་ཡུལ་མ་ཡིན༔ ཕྲག་དོག་རླུང་འཚུབ་སྔགས་པའི་ཡུལ་མ་ཡིན༔ ཆགས་བྲལ་སྡུག་སྲན་བྱེད་པའི་ཡུལ་མ་ཡིན༔ རང་མཐོང་གྲགས་འདོད་ཅན་གྱི་ཡུལ་མ་ཡིན༔ གནས་སྐབས་ཡོན་ཏན་གོང་གི་བརྒྱ་ཕྲག་ལ༔ མཐར་ཐུག་ཡོན་ཏན་ཁ་སྦྱོར་ཡན་ལག་བདུན༔ ཡང་གསང་ཡོན་ཏན་ཁྱད་ཆོས་དྲུག་དང་ལྡན༔ རྡོ་རྗེ་གཟི་བརྗིད་འཇིགས་བྲལ་གླིང་པ་དང་༔ བདུད་འཇོམས་རྡོ་རྗེའི་ཁྱད་ཆོས་བླ་ན་མེད༔ འདི་ཡིས་ཅིག་ཆར་ཐབས་ལམ་ཉེ་རྒྱུར་བྱེད༔ རླུང་གི་གེགས་སེལ་ཐིག་ལེའི་གེགས་སེལ་བཅས༔ སྲིད་པ་མཐར་བྱེད་ཅི་བཞིན་ཉམས་ཀློང་གྲོལ༔ ས་མ་ཡཱ༔ རྒྱ་རྒྱ་རྒྱ༔ སྐུའི་རྒྱ༔ གསུང་གི་རྒྱ༔ ཐུགས་ཀྱི་རྒྱ༔ གཏད་རྒྱ༔ ཟབ་རྒྱ༔ གསང་རྒྱ༔ བཀའ་འདི་གནོད་སྦྱིན་ཤན་པ་ཆེན་པོ་དང་༔ ཟླ་བའི་དབང་པོ་འཁོར་དང་བཅས་པ་དང་༔ ཁྱད་པར་ཊཱཀྐིའི་དབང་མོ་ཚེ་རིང་མ༔ མཆེད་ལྔ་འཁོར་དང་བཅས་ལ་གཏད་དོ་རྒྱ༔ སྒྲོ་སྐུར་བཀའ་རྐུན་དབང་ཟ་བྱེད་པ་ཡི༔ སྙིང་ཁྲག་ཧུབ་ཀྱིས་ཐོབས་ཤིག་དམ་ཚིག་ཅན༔ ཚུལ་བཞིན་བསྒྲུབ་པའི་སྐུ་ཚེ་མཛད་ཕྲིན་དང་༔ ཉམས་རྟོགས་ཡོན་ཏན་ཡར་ངོའི་ཟླ་བཞིན་སྤེལ༔ བཀྲ་ཤིས་དཔལ་གྱིས་ས་གསུམ་ཁྱབ་གྱུར་ཅིག༔ ཅེས་པ་འདི་ཡང་མི་ལོ་ཉེར་ལྔའི་གོང་ཐོག་ནས་རྒྱུད་ལ་ཐོབ་ཀྱང་སྤེལ་བའི་དུས་ལ་མ་བབས་པས་བཀའ་རྒྱས་བཏབ་ལ། སླར་རང་ལོ་སོ་བཞི་བ་ན་རྣལ་འབྱོར་བ་ཆེན་པོ་པདྨ་མ་ཏིས་བསྐུལ་ངོར་ག་གཱ་ཨ་བྷྱེས་ཡེ་ཤེས་སྒྱུ་འཕྲུལ་དྲྭ་བ་ལས་བསྒྱུར་ཞིང་གཏན་ལ་ཕབ་པའི་རྣམ་པར་རིག་པའི་འདུ་བྱེད་ཀྱི་རྫུ་འཕྲུལ་གནས་བརྟན་རྫོགས་ཆེན་དོན་གྱི་དབང་ཐོབ་འགྱུར་མེད་རྣམ་པར་རྒྱལ་བའི་སྡེའོ། །དགེའོ། །

བདེ་སྟོང་དཔྱིད་ཀྱི་ཐིག་ལེའི་འགྲེལ་བ།

བདེ་སྟོང་དཔྱིད་ཀྱི་ཐིག་ལེ་ལས༔ རང་བྱུང་ཡེ་ཤེས་བསྐྱེད་པའི་ཐབས༔ རྒྱུ་འབྲས་ས་བཅུ་ལྟོ་སྦྱོར་དུ༔ གོམས་པ་ཕྲ་མོའི་རྣལ་འབྱོར་བཞུགས༔

གཉིས་པ་མ་རྒྱུད་དབང་བཙན་དུ་བྱས་པའི་རྫོགས་རིམ་ཁྱད་པར་བ་ནི། ལར་སྲིད་རྩ་ཁམས་ཀྱི་འགྱུར་བ་ལས་བྱུང་བས། དེ་འཆིང་བྱེད་ཁམས་འཛག་མེད་དུ་བཅིང་བ་ལ་རག་ལས་པའི་ཕྱིར་དང་འཛག་བདེའི་འགྱུར་བ་འགྱུར་མེད་བདེ་སྟོང་གི་རང་བཞིན་དུ་གྲོལ་བའི་གནད་ནི་དཔྱིད་ཅེས་པ་བདེ་བ་འཇོ་བའི་ཕྱིར་དཀར་ཆའི་ཐིག་ལེ་དང་། ཐིག་ཅེས་པ་འཇུ་བྱེད་ཀྱི་རྐྱེན་དུ་གྱུར་བ་དམར་ཆའི་ཐིག་ལེ་དང་། གཉིས་ཀའང་ཀུན་ལ་ཁྱབ་ཅིང་བརྡལ་བས་ལེ་ཞེས་བྱ། དེ་གཉིས་ཟུང་དུ་འཇུག་པའི་ཙནྜ་ལི་གཉིས་ཀྱི་ཐབས་ལས་ཐབས་བྱུང་གི་ཚུལ་ལ་བཞག་ཀྱང་དོན་དུ་རང་གནས་ཀྱི་ཡེ་ཤེས་མངོན་དུ་གསལ་བའི་རྒྱུར་གྱུར་བ་ལས་བསྐྱེད་པའི་རྒྱུར་མ་དགོས་ཀྱང་བརྡ་དག་དེར་བྱས་ནས་འབར་འཛག་དབབ་ལྡོག་གི་ཟླ་ཉིའི་ཆ་༡༦་དང་ཁྱིམ་༡༢གྱི་སྐུ་༤གསུང་༤ཐུགས་༤ཡེ་ཤེས་༤ཀྱི་དགའ་བ་བཅུ་དྲུག་གིས་དྲང་བས་ཐབས་སྙིང་རྗེ་བཅུ་དྲུག་དང་། ཤེས་རབ་སྟོང་ཉིད་བཅུ་དྲུག་ཟུང་དུ་འཇུག་པའི་རྣལ་འབྱོར་གྱིས་རྒྱུ་འཇིག་རྟེན་པ་དང་འབྲས་བུ་འཇིག་རྟེན་ལས་འདས་པའི་ས་བཅུ་ལྟོ་སྦྱོར་དུ་གོམས་པ་ཐིག་ལེ་ཕྲ་མོའི་རྣལ་འབྱོར་ཞེས་བྱ་སྟེ། རྒྱུ་མཚན་ནི་དམིགས་རྟེན་ཕྲ་བའི་ཕྱིར་དང་། ནང་ལ་གཞོལ་བའི་རྣལ་འབྱོར་ཡིན་པའི་ཕྱིར་རམ་དེའི་སྤྲོས་བྲལ་རིག་པའི་ཐིག་ལེ་མངོན་དུ་འགྱུར་བའི་ཐ་ཚིག་གོ །

དེ་ཡང་སྔོན་བྱུང་མ་ཧཱ་གུ་རུ་པདྨས་རྒྱུད་སྡེ་མཐའ་དག་གི་དོན་གྱི་སྙིང་པོ་གཅིག་ཏུ་བསྡུས་ཏེ་རྗེ་འབངས་འཁོར་བཅས་ལ་གསུངས་ཤིང་སྨིན་གྲོལ་གྱི་འབྲས་བུ་ལ་བཀོད་ཅིང་ཕྱི་རབས་པའི་དོན་དུ་བརྡ་ཡིག་ཤོག་སེར་ལ་དྲིལ་བས་འབྱུང་ཁུང་ཡང་དག་པའོ། །ན་མོ་གུ་རུ་པདྨ་ཀཱ་ར་ཡེ༔ རྣལ་འབྱོར་གང་ཞིག་སྲོག་རྩོལ་གསུམ་གྱི་མན་ངག་ལ་ཡང་དག་པར་གོམས༔ རྩ་དྲང་རླུང་བྱང་བའམ་རྩ་རླུང་འབྱོང་བས་ལས་སུ་རུང་ཞིང་འཁོར་ལོ་གང་དུ་བྱེད་པ་བཅིངས་ཀྱང་ཟིན༔ དེ་ཡིས་སེམས་ཀྱི་རྩོལ་བའི་རྒྱུ་བ་བཅད་པར་བྱ༔ དེ་ལ་གནད་ཀྱི་མན་ངག་དེའི་རྟེན་ཐིག་ལེ་འཇུ་འདུལ་འདི་ཉིད་ཟབ༔ ས་མ་ཡཱ༔ དང་པོ་རླུང་འཆིང་བའི་གནད་ཀྱིས་རྣམ་རྟོག་གཅོད་པའི་ཕྱིར་རླུང་གི་གཏུམ་མོ་དང་། མ་དག་པའི་ཐིག་ལེ་ཁམས་ཀྱི་འཕོ་བ་ཟ་བྱེད་ནང་གི་ཡེ་ཤེས་ཀྱི་མེའི་གཏུམ་མོ་ལས་འདིར་ཕྱི་མ་སྟེ། རྡོ་རྗེ་སྙིང་འགྲེལ་ལས། སྲེག་བྱེད་ཕྱིར་ན་གཏུམ་མོར་བཤད། །ཅེས་དང་། མཚོ་སྐྱེས་ཀྱི་ཀྱཻ་རྡོར་དཀའ་འགྲེལ་ལས། གཏུམ་མོ་ནི་སྲིད་པའི་ཉོན་མོངས་རྩད་ནས་མེད་པར་བྱེད་པ་ཉིད་དོ། །ཞེས་སོ། །ལར་གཏུམ་མོ་ལ་ནམ་མཁའ་དང་མཉམ་པའི་རྒྱུད་ལས། རང་རིག་ཡེ་ཤེས་གང་འདོད་པས། །ཙཎྜ་ལཱི་ཡི་བྱེ་བྲག་བརྟགས། །དང་པོ་རང་བཞིན་ཙཎྜ་ལཱི། །གཉིས་པ་གཏུམ་མོའི་ཙཎྜ་ལཱི། །གསུམ་པ་ཁ་སྦྱོར་ཙཎྜ་ལཱི། །ཞེས་དང་། དབྱེ་བ་བཅུ་གཉིས་མན་སྙེ་ལས། ལུས་དང་རྣལ་འབྱོར་ལྷན་སྐྱེས་ཀྱི་གཏུམ་མོ་གསུམ་དང་། གསང་བ་བདུད་རྩི་ལས། སྡུག་པོའི་ཙཎྜ་ལཱི་༡༢སོགས་ཀྱི་དབྱེ་བ་མཛད། གཞན་ཡང་ལུས་ཡེ་ཤེས་ཕལ་མཆོག་མཚན་བཅས་མཚན་མེད་ཀུན་རྫོབ་དོན་དམ་གཞི་ལམ་འབྲས་བུ་རྫས་སྔགས་ཡེ་ཤེས་རྩ་རླུང་ཐིག་ལེའི་གཏུམ་མོ་སོགས་ལས་འདིར་ཕྱི་མ་གསུམ་སྟེ་དེ་ཉིད་ལམ་བྱེད་ཀྱི་རྣལ་འབྱོར་ལ་གཏུམ་མོ་མ་གོམས་པར་སྟེང་སྒོ་བདེ་སྟོང་དཔྱིད་ཀྱི་འཇུ་འདུལ་ཉམས་སུ་ལེན་པ༔ ལ་ཐོད་རྒལ་དུ་འཇུག་པ་ནི། སྤྱི་བརྟོལ་ལམ་ཕོ་ཚོད་ཙམ་ལས་གནད་དུ་འབྱོར་མིན་ཏེ་འཇུ་བྱེད་ཐིག་ལེའམ་གཏུམ་མོའི་མེས་ཕྱག་རྒྱས་མ་བསྐུལ་ན༎ འཇུ་བྱ་དཔྱིད་ཀྱི་ནམ་མཁའི་བ་འཇོ་མི་ནུས་པས༔ སོ། །དེས་ན་སྒྲུབ་སྡེ་ལས། ཕྱི་རྫས་ཀྱི་དང་ནང་བསྐྱེད་རིམ་གྱི་དང་གསང་བ་རླུང་བཟུང་གི་གཏུམ་མོ་དང་གསུམ་ལས་ཕྱི་མ་དམ་ཚིག་ཕྱག་རྒྱའི་ལམ་མཆོག་ཉམས་ལེན་པས༔ བཅིངས་པ་ལུས་རླུང་སེམས་གསུམ་གྱི་གནད་ལས་མ་འདས་དགོས༔ གསང་བ་རླུང་བཟུང་གཏུམ་མོ་ནི། །འཁྲུལ་འཁོར་གསུམ་གྱིས་སྒོ་གསུམ་གཟིར། །བཅའ་བ་ལུས་ཀྱི་འཁྲུལ་འཁོར་ནི། །བདེ་བའི་གདན་ལ་ཙོག་པུར་འདུག །རྐང་གཡོན་བོལ་གོང་གཡས་མཐིལ་མནན། གྲུ་གུ་འབོལ་བས་འཕོངས་སྟེགས་བྱ། །གཡས་གཡོན་བསྣོལ་བའི་ལག་མགོ་ཡིས། །བར་ལྷུ་གཉིས་ཀྱིས་འཕར་རྩ་བསྡམ། །དེ་ཁོངས་པུས་མོ་གཉིས་པོ་བསྡམ། །བརླ་ཆེན་ནང་ཤ་ ༼ སྦོ་ཡང་ ༽ སྦྲེ་ཤ་དང་། །རྩ་བོ་ཆེ་བཞི་ཆ་བསྒྲིམས་ལ། །སེམས་ཀློད་མེ་ཡི་འཁོར་ལོ་བསྐོར། །རོ་སྟོད་གཡས་སུ་བསྐོར་ཅིང་བཞུ། །སེང་གིས་གཡེངས་བས་རྩ་མིག་དགྲམ། །དེ་འོག་ངག་བཅུད་འཁྲུལ་འཁོར་ནི། །ལྟེ་བའི་ལྐོག་ན་མེའི་ས་བོན། །རཾ་གནས་དེ་ལ་རཾ་བརྗོད་པས། །མེ་འབར་བདེ་དྲོད་འབར་བར་བསམ། །དེ་ནས་ཡིད་ཀྱི་འཁྲུལ་འཁོར་ནི། །ཡིད་གསལ་མ་ཡེངས་ངར་དང་བཅས། །སྟེང་རླུང་མནན་ཞིང་འོག་རླུང་འཐེན། ཁྱབ་བྱེད་བར་གྱི་རླུང་དཀྲུགས་ཏེ། །ཨ་ལོང་ཁ་ནི་ནེམ་ཙམ་བསྡམས། །རང་ལུས་རྡོ་རྗེར་གསལ་བ་ཡི། །ལྟེ་བ་བདེ་བས་གང་བ་ལ། །ལུས་བྱིང་མེ་རུ་འབར་བར་བསྒོམ། །ཞེས་སོ། །དེ་ལྡན་རྡོ་རྗེའི་ལུས་ལ་ཡེ་གནས་པ༔ རྩ་བ་སྤྲོས་བྲལ་གྱི་ཐིག་ལེ་ཞེས་རིག་པ་རང་བྱུང་གི་ཡེ་ཤེས་ངོ་བོ་སྟོང་པ་སྐྱེ་བ་མེད་པ་རང་བཞིན་གསལ་བ་འབྲས་ཆོས་མཐའ་དག་ལྷུན་གྱིས་གྲུབ་པ། ཐུགས་རྗེ་ཀུན་ཁྱབ་ཇི་ལྟ་ཇི་སྙེད་མཁྱེན་པའི་ངང་རྒྱས་པའོ། །འཁྲུལ་བ་མ་རིག་པའི་ཐིག་ལེ་ནི་གོང་གི་ལྷན་སྐྱེས་ཀྱི་ཆོས་གསུམ་རང་ངོ་མ་ཤེས་པའི་སེམས་དཀར་དམར་རླུང་གསུམ་གྱི་བག་ཆགས་དང་འགྲོགས་པའི་གཟུང་འཛིན་ཕྱི་ནང་གི་རྟེན་དུ་སྣང་བའོ། །དེ་ལས་ཕྱེ་བས་ཀུན་བཏགས་སྔགས་དང་གཞན་དབང་ཡིད་ཀྱི་ཐིག་ལེ་གཉིས་སོ། །ཁམས་ལྔ་རྫས་ཀྱི་ཐིག་ལེ་ལ་གཙོ་བོ་དཀར་དམར་གཉིས་ལས་འདིར་མ་ལས་ཐོབ་པའི་ཀུན་གྱི་མཆོག་ཏུ་གྱུར་བ་གཞི་དུས་ཀྱི་གཏུམ་མོ་འདི་ལ། བདེ་མཆོག་ལས་ཐིག་ལེ། རྡོར་ཕྲེང་ལས་མེ། ཕྱག་ཆེན་ཐིག་ལེ་ལས་རླུང་། རྡོ་རྗེ་སྙིང་འགྲེལ་ལས་རྩ་རུ་བཤད་པས་རྫ༵ས་དང་། དཔྱིད་ཐིག་ལས། ལྟེ་བར་ཨེ་ཡི་གཟུགས་སུ་སྟེ། །ཐུང་ངུ་རུ་ནི་ཡོངས་སུ་གྲགས། །ཞེས་ཨ་ཐུང་གི་རང་བཞིན་སྔགས༵་སུ་བཤད། ཨ་བྷི་དྷ་ན་ལས་ཡེ་ཤེས་ཀྱི་མེ་འདི་ལུས་ཀྱི་རླུང་གིས་བསྐྱོད་ནས་ཞེས་ཡེ༵་ཤེས༵་སུ་བཤད་ཀྱང་། འདིར་སྦར་བྱ་མེ་ཡི་འཁོར་ལོ་ཨ་ཤད་གཟུགས༔གནས་ཚུལ་ལ་གནམ་ཞལ་སྣ་ཚོགས་ཡུམ་ཕག་མོའི་རང་བཞིན་ཡི་གེ་ལཉྫའི་ཤད་ལྟ་བུ་རྡོ་རྗེ་གསུམ་གྱི་མཚོན་བྱེད་དོན་དམ་པར་ཤེས་རབ་ཀྱི་ཕར་ཕྱིན་སྤྲོས་བྲལ་བསམ་གྱིས་མི་ཁྱབ་པའི་ཡེ་ཤེས་མཚོན་པའི་ནཱ་དཱ་དབྱིངས་གསུམ་འདུ་འབྲལ་མེད་པའི་མཚོན་བྱེད་སུམ་འཁྱོགས་ཀྱི་བྲེང་ཆགས་པ་སྟེ་རང་བཞིན་ནང་གི་གཏུམ་མོ། །སྤྲུལ་པའི་འཁོར་ལོའི་ནས་སོར་གཉིས་ཀྱི་མཚམས༔ སུ་ཡེ་ནས་གྲུབ་པ་དང་། སྤར་བྱེད་རླུང་གི་འཁོར་ལོ་ཞེས་དེའི་འོག་སོར་གཉིས་གཞལ་བའི་མཚམས༔ སྤུ་ནག་གུ་ཡི་མཚམས་ནས་སམ་ཐད་ནས་ཅུང་དཔག་པ༔ ན་གཡོ་བའི་བ་དན་གྱི་རྣམ་པ་ཅན་དུ་ཡོད་པ་སྟེ་རྒྱུད་སྡེ་སྤྱིའི་དེ་གཉིས་ལ་རྐྱེན་གྱི་འཁོར་ལོ་གསུང་། ལམ་དུས་ཀྱི་གཏུམ་མོ་ནི། སྤྱིར་མཁའ་འགྲོ་རྒྱ་མཚོའི་རྒྱུད་ལས། རོ་རྐྱང་གི་རླུང་ཡི་གེའི་རང་བཞིན་ཅན་གྱིས་སྦར་བ་དང་། རྡོར་ཕྲེང་ལས་དབུ་མའི་རླུང་གཅིག་པུ་དང་། དུས་འཁོར་ལས་སྲོག་ཐུར་གོང་བུར་འདྲེས་པས་སྦར་བ་གསུམ་རླུང་གི་དང་ས་བོན་ཕྱག་མཚན་སྐུ་ཐིག་ལེ་ནཱ་དཱ་སོགས་དམིགས་པས་སྦར་བ་རང་གཞན་གྱི་ལུས་ཐབས་ལྡན་ལ་བརྟེན་པས་ཐབས་ཀྱིས་སྦར་བའོ། །འདིར་རོ་རྐྱང་འདི་དག་འཁོར་ལོ་གཉིས་དང་ཐབས་ལམ་སྟེང་འོག་གཉིས་ཀྱི་སྒོ་གཉིས་འབྱོངས་པའི་གཞིར་བསྒོམ་པའི་དབང་གིས་རོ་རྐྱང་གི་སྣ་ཁ་རྐང་མཐིལ་དང་ནོར་བུའི་རྩེ་ཡན་ཡོད་པའི་ལུགས་སུ་བྱས་ཏེ། ཕྱི་ནས་དྲངས་པའི་རླུང་གིས་གསང་གནས་ཀྱི་ཡཾ་ཡིག་ཆེར་བསྐྱོད་དེ༔ དེ་ལས་རླུང་གཡོས་པ་དང་འོག་རླུང་གྱེན་དུ་བསྐུམ་པའི་རྐྱེན་གཉིས་ཀྱི་ཕྱིའི་རླུང་དེ་གཉིས་དབུ་མའི་ནང་དུ་དེད༔ གསང་རྫོགས་ལས། སྟེང་འོག་གཉིས་ཀྱི་རླུང་ཡང་ནི། །ཧ་ཅང་བསྡམས་དྲག་མ་ཡིན་ཏེ། །སྐབས་སུ་གསེང་ཞིང་མཚམས་པར་མནན། །སྟེང་རླུང་ཐབས་ཀྱི་རང་བཞིན་ལས། །དཀར་པོ་འཁྱིལ་བ་སྤྲིན་དང་འདྲ། །འོག་རླུང་ཤེས་རབ་རང་བཞིན་ཉིད། །ཡར་ལ་དམར་པོ་འཁྱིལ་བ་ནི། །ལྟེ་བ་སྤྲུལ་པའི་འཁོར་ལོ་རུ། །སྦྲུལ་བཞིན་དཀར་དམར་འདྲེས་འཁྱིལ་བས། །ལྟེ་འོག་སོར་བཞི་ཆོས་འབྱུང་ནས། །དོན་དམ་གཏུམ་མོ་རྒྱ་ཁབ་ཙམ། །དམར་གསལ་གྱེན་དུ་འབར་བ་ཡིས། །རྩ་བར་རཾ་དམར་གཅིག་ཏུ་གནས། །རང་ཉིད་ལུས་ཀྱི་སྟོང་ར་ནི། །རྫ་བསྲེག་ཐུར་ལ་སྦུབ་པ་འདྲ། །གསང་གནས་ཡི་གེ་ཡཾ་དཀར་ལས། །རླུང་གི་འོད་ཟེར་གྱེན་དུ་འགྱུས། །དོན་དམ་ཙཎྚ་ལཱི་ལ་ཕོག །རཾ་ཉིད་མེ་འབར། ཞེས་སོ། །དེའི་རྐྱེན་གྱིས་ཨ་ཤད་ལས་མེ་འབར་བ་མཚན་ཉིད་བཞི་དང་ལྡན་པ༔ རྣམ་པ་མེ་ལ་རླུང་མེའི་དྲོད་ཅན་གྱི་ངོ་བོར་གྲུབ་པའི་རེག་བྱ་ཚ་བ་དང་༔ རྩེ་མོ་རྣོ་ལ་ཉི་མའི་ཆོས་ཉིད་རྣམ་པར་དག་པས་ཁ་དོག་དམར་བའོ༔ བྱང་སེམས་ཡེ་ཤེས་ཀྱི་བདུད་རྩི་དམ་པའི་ཕྱིར་ཉམས་མྱོང་བདེ་བ། ཆོས་དབྱིངས་ཤེར་ཕྱིན་གྱི་ངོ་བོ་ཉིད་པས་རང་བཞིན་སྟོང་བའོ། །ཞེས་དང་། གཞན་དུ་རྣམ་པ་གསལ་བ་རེག་བྱ་ཚ་བ་རྩེ་མོ་རྣོ་བ་ངོ་བོ་བདེ་བ་ཞེས་པ་ཡང་ཡོད་དོ། །གོང་མ་གསུམ་སྟེ་བརྒྱུད་པ་གསུམ་དང་རྒྱལ་ཀུན་འདི་ལ་ཨ་ཐུང་ལས་འོད་འཕྲོས་ཏེ་བརྒྱུད་པ་གསུམ་ལྡན་གྱི་བླ་མ་སོགས་རྩ་བ་མ་རྒྱུད་མཁའ་འགྲོའི་དཀྱིལ་འཁོར་ཐམས་ཅད་དང་རྒྱལ་བ་སྲས་བཅས་རྟེན་དང་བརྟེན་པར་བཅས་པ་འོད་ཀྱི་རྣམ་པར་བྱོན་ནས་ཨ་ཤད་ལ་ཐིམ་པར་བསྒོམ་པ་ཞལ་ཤེས་གནད་ཀྱི་མན་ངག་གོ །དེ་ཡང་གཏུམ་མོ་བྱིན་རླབས་ཀྱི་ལམ་ཡིན་གསུང་སྙམ། བྱིན་རླབས་མེ༔དེ་ཡང་ཐོག་མར་མེ་འབར་བ་རྒྱ་ཁབ་ཀྱི་རྩེ་མོ་ལྟ་བུའི་ཆེ་ཆུང་གི་ཚད་ཙམ་ལ་སེམས་བཟུང་ནས་མ་གོམས་བར་དུ་དམིགས་སྐོར་ཕྱི་མར་མི་འཇུག་ཅིང་དེ་ནས་མེ་དེ་ལྟེ་བའི་འཁོར་ལོའི་དབུས་ཙམ་དུ་སླེབས་པ་དང་། ཡང་སྙིང་གའི་འཁོར་ལོའི་དབུས་དང་མགྲིན་པ་དང་སྤྱི་བོ་དང་དེ་ལས་ཆེར་མཆེད་དེ་འཁོར་ལོ་ལྔ་སོ་སོ་དང་། འཁོར་མཐའི་ནད་བསྐྱེད་ཀྱི་རྩ་སོགས་སྟོང་ཕྲག་༧༢ཏུ་མཆེད་ཅིང་གང་ནས་བ་སྤུའི་རྩེ་མོ་ཐམས་ཅད་ནས་མེ་ལྕེ་ཤིན་ཏུ་ཕྲ་བའི་རེ་ཁ་ཙམ་དུ་བྱུང་བ་དང་། བདེ་དྲོད་བསྐྱེད་པའི་དོན་དུ་མེའི་གའུ་ཁ་སྦྱོར་གྱི་བར་ན་ཡོད་པར་བསྒོམ་པ་རྣམས་གོམས་ཤིང་མཐར་མེ་ལྕེ་ཆེར་མཆེད་ནས་རྣམ་པར་འཁྱུག་པ་འཁོར་ལོ་ལྔ་ལ་ཁྱབ༔ མ་དག་ལས་ཉོན་གནས་དོན་ལུས་གསུམ་གྱི་བག་ཆགས་དང་གནོད་བྱེད་གདོན་བགེགས་སྡིག་སྒྲིབ་བྱང་ཆུབ་སྒྲུབ་པའི་བར་ཆད་ཐམས་ཅད་བསྲེགས༔ བདེ་དྲོད་ཉི་ཟླ་ལྟ་བུར་འབར་བསམ་ཞིང་༔ རྒྱ་མཚོ་ལས། ཟག་མེད་བདེ་བས་མེ་སྤར་དེ། །བསྲེག་པ་སྟེང་གི་འཇོ་བར་བཤད། །ཅེས་གསུང་པ་འདི་ནི་སྟེང་སྒོ་སྤྱི་དང་བསྟུན་པ་ལས༔ འོག་སྒོ་སྦྱོང་བས་གསང་གནས་ཡཾ་རླུང་དཀྱིལ༔ ལྟེ་འོག་སོར་གཉིས་མཚམས་སུ་ཨ་ཤད་གཉིས༔ བྱིན་རླབས་ཡེ་ཤེས་ཀྱི་རླུང་གིས་སྦྲེབ་དང་བདེ་དྲོད་ཡེ་ཤེས་ཀྱི་མེ་སྤར་བ་འདི་ནི་གཞན་དུ་སྟེང་སྒོ་ཁོ་ན་ལམ་དུ་བྱེད་ཚུལ་གསུང་བ་ལས་འདིར་ནི་འོག་སྒོ་སྦྱོང་ཚུལ་ཡང་བསྟན་པས་ཁྱད་པར་དུ་འགྱུར་རོ༔ དུས་དང་རྣམ་པ་ཀུན་ཏུ་ཉམས་བླང་བས༔ ཐིག་ལེའི་གཞི་ནི་གཏུམ་མོའི་རྣལ་འབྱོར་ཡིན༔ གཏུམ་མོའི་སྦར་བྱེད་སྲོག་གི་རྣལ་འབྱོར་ཡིན༔ སྔ་མ་ལས། རླུང་ཉིད་ལས་རུང་དྲོད་སྦར་བས། །ཐིག་ལེ་ཞུ་ནས་བདེ་དྲོད་འབར། །དེ་ཡི་མན་ངག་འབར་འཛག་གནད། །སྟེང་འོག་གཉིས་ཀྱི་རླུང་ཡང་ནི། །ཧ་ཅང་བསྡམས་དྲག་མ་ཡིན་ཏེ། །སྐབས་སུ་གསེང་ཞིང་འཚམས་པར་མནན། །ཞེས་སོ། །བུམ་ཅན་བསྒོམ་པས་སྲོག་མ་སྨིན་ན་གཏུམ་མོ་སྦར་མི་ནུས༔ དེ་ཉིད་ལས། དེ་ཕྱིར་བྱང་སེམས་འཇུ་བའི་ལས། །གཏུམ་མོ་ཉིད་ཀྱི་དེ་ལ་ལྔ། །ཞེས་སོ། །དེ་ལ་དཔལ་ནམ་མཁའ་དང་མཉམ་པའི་རྒྱུད་ལས། རང་བཞིན་ཕྱིའི། ཨ་ཐུང་ནང་གི ཁ་སྦྱོར་གསང་བའི་གཏུམ་མོ་གསུམ་དུ་གསུང་པའི་ཉམས་ལེན་གསུམ་བསྒྲིབ་དུ་བྱེད་པ་འདི་ཡིན་ལ། དེ་ཡང་ཙཎྜ་ལིའི་སྒྲ་ལས་དྲག་ཅིང་གཏུམ་ལ་བསྲེགས་པར་བྱེད་པ་སྟེ། འདི་ལྟར་གནད་དུ་བསྣུན་ན་ལས་ཉོན་རྟོག་གནས་ཕུང་ཁམས་བག་ཆགས་དང་བཅས་པ་མྱུར་དུ་བསྲེགས་ཤིང་བདེ་སྟོང་དཔྱིད་ཀྱི་དུས་སྟོན་གཡུར་དུ་བཟའ་བ་ལས་གཞན་དུ་གཏུམ་མོ་མ་གོམས་ཐིག་ལེ་འཇུ་འདུར་མིན༔ དེ་ཕྱིར་སྔ་ཕྱིའི་འབྲེལ་བ་ཅན་གྱི་སྔོན་དུ་འགྲོས༔ རྡོར་ཕྲེང་ལས། ཤེས་བྱ་དབུས་སུ་རླུང་རྒྱུ་བ། །མེ་སད་བྱེད་པར་ཤེས་པར་བྱ། །ཞེས་དང་ཁ་སྦྱོར་ལས། །ལས་ཀྱི་རླུང་གིས་བསྐུལ་བ་ཡིས། །ལྟེ་བའི་དཀྱིལ་འཁོར་དུ་ནི་འབར། །དཔྱིད་ཐོབ་པ་ཡི་ཆོག་ཤེས་པས། །ཞེས་དང་། ཞལ་ལུང་ལས། །སྡོམ་བརྩོན་གཞུ་དབྱིབས་གཡོ་བ་ཡིས། །སུམ་མདོར་གྲུ་གསུམ་མེ་འབར་བས། ཁམས་བཞུས་ནས་ནི་བཅུ་དྲུག་ཆར། །ཞེས་གསུངས་པའི་ཕྱིར་རོ། །གནས་སྐབས་གོས་མི་དགོས་ཤིང་མཐར་ཐུག་བདེ་དྲོད་ཡེ་ཤེས་སུ་རབ་ཏུ་འབར༔ སམ་བྷུ་ཌི་ལས། ཐབ་ཁུང་ལྟེ་བའི་དཀྱིལ་འཁོར་དུ། ལས་ཀྱི་རླུང་གིས་བསྐྱོད་པ་ཡི། །ཚངས་པའི་མེ་ནི་སུམ་མདོར་འབར། །ཞེས་སོ། །སྔར་གྱི་ལུང་གི་འཕྲོས། དོན་དམ་ཙཎྜ་ལཱི་ལ་ཕོག །རཾ་ཉིད་མེ་འབར་ལྟེ་བ་ཡིས། །སྤྲུལ་པའི་འཁོར་ལོ་འོད་དུ་འབར། །དེ་རྟགས་ལུས་ནི་བེམ་བེམ་བྱེད། །སེམས་ཀྱང་བག་ཙམ་གནས་པ་འབྱུང་། །དེ་ནས་མེ་ཉིད་སྙིང་ཀར་སླེབ། །ཆོས་ཀྱི་འཁོར་ལོ་འོད་དུ་འབར། །ཕུང་པོ་ལྔ་ཡི་རྟོག་པ་དང་། །དུག་ལྔ་བསྲེག་པས་བདེ་དྲོད་འབར། །ལུས་འདར་འཕར་དང་སྤྲུག་པ་འོང་། །དེ་ནས་མེ་ལྕེ་མགྲིན་པར་སླེབ། །དེ་རྟགས་དགོད་དང་ཨ་ཨི་ཟེར། །དེ་ནས་མེ་ལྕེ་ཀླད་དཀྱིལ་དྲང་། །ཀླད་པ་བདེ་ཆེན་འཁོར་ལོ་དྲོས། །ལྟེ་བ་ཐིག་ལེ་ཞེས་པའི་བར་དང་། །དེ་ཉིད་ཉམས་ལེན་ལག་ཆེ་སྟེ། །ལུས་ལ་རྩ་གནས་རྩ་ནང་ན། །བྱང་སེམས་གནས་ཏེ་དེ་ཞུ་ནས། །བདེ་མཆོག་ཡེ་ཤེས་འཁོར་ལོ་འབར། །ཞེས་སོ། །ཐུན་མོང་གི་ཏིང་འཛིན་ཟད་པར་མེ་ལ་མངའ་དབང་བསྒྱུར༔ འབྲས་དུས་ཀྱི་གཏུམ་མོ་ནི། དུས་འཁོར་ལས། ཡེ་ཤེས་མེ་ལྕེ་རབ་ཏུ་རྒྱས་པ་དེས་ནི་བདུད་ཚོགས་ཡུལ་དང་བཅས་པ་མཐའ་དག་སྲེག་བྱེད་ཅིང་། །ཞེས་བདུད་དཔུང་འཇོམས་པ་སོགས་ཀྱི་བྱེད་ལས་ཅན་སོ་སོར་རྟོགས་པའི་ཡེ་ཤེས་ལ་བཤད་དོ། །འདི་ཡང་ག་ག་ཨ་བྷྱེའི་བསྡུས་ཁྲིགས་ཏེ༔ ཙི་ཏྲ་ཀ་དང་གཡེར་མའི་བསིལ་གསུམ་ཟས༔ ཚ་བའི་སྨན་གྱི་རྣལ་འབྱོར་སྤང་བ་མན་ངག་གོ༔ གཏུམ་མོའི་དམ་ཚིག་ཡིན་པས་ཤ་ཅན་གྱི་གོས་མ་གྱོན་ན་བཟང་། ས་མ་ཡཱ༔ དེ་ནས་དཔྱིད་དང་ཐིག་ལེའི་རྣལ་འབྱོར་ཟུང་འཇུག་ཏུ་ཉམས་ལེན་པ་ལ༔ རྒྱུད་སྡེ་སྤྱི་སྦས་ཀྱི་འཆད་ཚུལ་སྔར་བསྟན་ལྟར་ལ་འདིར་རྫས་ཐིག་བསྟན་པའི་གོ་ས་ནས་ཟུར་བྱུང་རྫོགས་ཆེན་གྱི་ཚིག་བརྗོད་ལྟར་ན་ཕྱི་ལྟར་རགས་པ་ཀུན་རྫོབ་རྒྱུའི་ཐིག་ལེ་དང་དྭངས་མ་རྦ་རླབས་གཏེམས་པའི་ཐིག་ལེ་དང་༔ རང་བྱུང་གི་རིག་པ་ཡེ་ཤེས་ལྔའི་འཁོར་གྱིས་བརྒྱན་པ་དང་བཅས་པའི་ཐིག་ལེ་སྙིང་ཀ་ན་གནས་པ་དང་། རང་བཞིན་དབྱིངས་ཀྱི་ཐིག་ལེ་དབྱིངས་རིག་ཟད་པའི་དགོངས་པའི་འཆར་གཞི་རྐྱང་མ་ན་གནས་པ་དང་༔ འབྲས་བུ་རང་སྨིན་པའི་ཐིག་ལེ་ཡེ་ཤེས་མཁའ་གསལ་གྱི་སྒྲོན་མ་དྲུག་གི་སྣང་བ་ལ་སོགས་རྣམས་མང་ཡང་༔ འདིར་རགས་པའི་ཐིག་ལེ་ཀུན་རྫོབ་རྒྱུ་ལ་བརྟེན༔པའི་བྱེད་བཅིངས་ཀྱི་ཐབས་ཤེས་ཁྱད་པར་ཅན་གྱི་རང་བཞིན་སྤྲོས་པ་དང་བྲལ་བའི་ཀ་དག་གི་ཆོས་ཉིད་དང་། ལྷུན་གྲུབ་ཡེ་ཤེས་ཀྱི་ཐིག་ལེ་དབྱེར་མེད་པའི་བདེ་ཆེན་མངོན་དུ་འཆར་ཞིང་དེས་དག་སྣང་ལྷ་སྐུའི་རྣམ་ཆ་དང་བཅས་པ་འབྱུང་བ་དང་། གལ་ཏེ་རྩལ་སྦྱོང་གི་གནད་དུ་རྦ་རླབས་དྭངས་མའི་ཐིག་ལེ་ལམ་བོགས་ཐོན༔ བརྟགས་གཉིས་ལས། ལོངས་སྤྱོད་ཀྱི་ནི་རླབས་གཉིས་ལ། །རང་གི་གཡས་དང་ལག་གཞན་གྱི། །མཐེ་བོང་དང་ནི་སྲིན་ལག་གིས། །དེ་ནི་རྣལ་འབྱོར་པ་ཡིས་བཙིར། །དེ་ལས་ཡེ་ཤེས་སྐྱེ་བར་འགྱུར། །ཞེས་སོ། །ཁྱད་པར་འབྱུང་བ་རླུང་གི་དྭངས་མའི་ཐིག་ལེའི་སྒྲ༔ སྒྲ་བཞིའི་རྣལ་འབྱོར་ལ་བསླབ་པ་དང་། འོད་གསལ་མུན་པའི་རྣལ་འབྱོར་སྦྱོང་བ་མ་དང་མཁའ་འགྲོའི་ཁྱད་ཆོས་ཅན༔ རྡོ་རྗེ་འཆང་གི་ཐུགས་ལ་གནས་ན་ཡང་༔ སྐལ་མེད་ལ་གབ་གསང་དོན་རྣ་བའི་མཁའ་འགྲོའི་སྒྲའི་འོད་གསལ་ཡེ་ཤེས་ཀྱི་རང་སྒྲ་གསང་སྔགས་ཀྱི་རོལ་མོར་ཉམས་སུ་ལེན་པའི་ཐབས། མངོན་དུ་མ་གྱུར་གཉིས༔ ལ་སོགས་པ་མང་དུ་མཆིས་པ་དང་། ཡང་ཅིག་དབྱུང་བའི་ཁྱད་ཀྱིས་སྣ་ཡི་སྦུ་གུའི་ལམ༔ གཉིས་ནའང་ཡེ་ཤེས་ཀྱི་འོད་རྩ་ཡེ་གནས་དེ་ལ་ཡེ་ཤེས་ཀྱི་འོད་དང་ཐིག་ལེའི་ཉམས་ལེན་གནད་ཀྱི་དངོས༔ སྒྲ་སྦྱངས་དང་དྲི་སྦྱང་འདི་གཉིས་རྫོགས་ཆེན་ཐོད་རྒལ་གྱི་དཔེ་དོན་རྟགས་ཀྱི་ངོ་སྤྲོད་ཀྱིས་འཕྲོ་བའི་ལམ་ཁྱེར་ཡིན་པས་རྣམ་གྲངས་ཙམ་དུ་བགྲང་པའོ། །གཞན་ཡང་ཐུན་མོང་གི་གསང་རྒྱུད་དག་ལས་རླུང་བཟུང་མུན་པའི་རྣལ་འབྱོར་དུ༔ རླུང་བཅུ་དབུ་མར་ཚུད་པའི་བྱེད་ལས་ཀྱིས༔ ཤེས་ཉམས་མཚན་ལྟས་དུ་བ་སྨིག་རྒྱུ་ནམ་མཁའ་མར་མེ་ལྟ་བུ་སྟེ་བཞི་ཉིན་ལྟས་འབར་བ་ཟླ་བ་ཉི་མ་རྡོ་རྗེ་ཆ་ལང་ཐིག་ལེ་ལྟ་བུ་སྟེ་དྲུག་འཆར་བས་རྟགས་བཅུའི་སྐར་མ་ལམ་མེ་བ༔ སྣང་བའི་རྟགས་བཅུ་པོ་དེ་དང་ནང་རང་ལུས་ལ་འབྱུང་བས་མི་གནོད་པའི་རྟགས་བཅུ་སོགས་ཀྱི་རྟགས་དང་། གསང་བ་བརྟག་གཉིས་ལས་གསུང་པ་ལྟར། འཇིགས་༡སྨྱོ་༢སྡུག་བསྔལ་༣མྱ་ངན་༤འཚེ་བ་ལྔ་༥། དུག་གསུམ་རྣམས་ཀྱིས་མི་གཡོ་བའི་དྲོད་རྟགས་ཆུང་འབྲིང་གཉིས་༦། སྤྱན་༧མངོན་ཤེས་༨རྫུ་འཕྲུལ་༩སྟོབས་ལྔ་༡༠སྟེ། ཕྱི་ནང་གསང་བའི་དྲོད་རྟགས་བཅུ་བཅུ་འབྱུང་༔ དེ་ལྟར་རྣམ་གྲངས་རྣམ་པར་བསྒྲངས་ནས་འདིར་ཁམས་ལྔ་རྫས་ཀྱི་ཐིག་ལེ་གཉིས་བཅིངས་པའི་ཐབས་ཀྱིས་ཕྱི་ནང་གསང་བའི་ཡང་གསང་གི་ཐིག་ལེ་ཐམས་ཅད་ཤུགས་ཀྱིས་འཆིང་བས་དེས་ན་དེའི་ལམ་ཉམས་སུ་ལེན་པ་ལ་ཐིག་ལེ་གཙོ་ཕལ་གྱི་རྣལ་འབྱོར་ཤེས་དགོས་པས་དེ་ལ་ཐིག་ལེའི་ཤེས་བྱ་ཁམས་སྟོང་ཕྲག་བདུན་ཅུ་རྩ་གཉིས་ཀྱི་གཙོ་བོའི་འབྱུང་གནས་ཀྱི་རྩ་བ་ནི་དྭངས་མའི་དྭངས་མ་དྷུ་ཏཱིའི་རྩེར༔ ཡབ་ཧེ་རུ་ཀའི་ངོ་བོ་ཕ་ལས་ཐོབ་པའི་ཐིག་ལེ་ཁ་དོག་དཀར་པོ་སྣུམ་ལ་འདྲིལ་བ་ཆེ་ཆུང་ཡུངས་དཀར་ཕྲ་མོའི་འབྲས་བུ་ཙམ་ཧཾ་ཡིག་གིས་མཚན་པ་ཤེལ་ལྟར་དྭངས་བ་མགོ་ཐུར་བསྟན་དང་༔ མར་སྣར་དམར་ཆ་ཨ་ཐུང་གི་གནས་རྩ་གསུམ་གྱི་འདུས་མདོར་མ་ལས་ཐོབ་པའི་རཀྟ་དམར༔ དཔལ་ཡང་དག་སྦྱོང་བའི་ཐིག་ལེའི་རྒྱུད་ལས། རུས་པ་རྐང་དང་ཁུ་བ་ཉིད། །ཕ་ལས་སྐྱེས་པ་གསུམ་དུ་གསུངས། །པགས་པ་དང་ནི་ཤ་དང་ཁྲག །མ་ལས་སྐྱེས་པ་གསུམ་ཞེས་བསྒྲགས། །ཞེས་སོ། །དཀར་དམར་གཉིས་པོ་འདི་ལ་རྒྱུ་ལམ་འབྲས་གསུམ་གྱི་བྱང་སེམས་ཡོད་པས། རྒྱུ་ནི་ཐོག་མཐའ་མེད་པའི་བྱང་ཆུབ་སེམས་སོ། །ལམ་ལ་སྤྱི་སྦས་གཉིས་ལས། དང་པོ་ནི། ཐུན་མོང་གི་བདེན་གཉིས་བྱང་སེམས་སོ། །སྦས་དོན་ནི་སྒྲིབ་མེད་དྭངས་མའི་བྱང་སེམས་དེ་མཆོག་ཏུ་གྱུར་བས་ན་དེ་ཉིད་ཞུ་བདེའི་རྟེན་འབྲེལ་གྱིས་སྔ་མ་ཤུགས་ལ་སྐྱེ་བ་དང་། སེམས་ཀྱི་བྱང་སེམས་དེ་ལུས་ཀྱི་བྱང་སེམས་ལ་ལྟོས་པའི་ཕྱིར་ཁམས་དཀར་དམར་ལ་བྱང་སེམས་ཀྱི་སྒྲས་གསུངས་པའོ། །འབྲས་བུ་ནི་རྡོ་རྗེ་འཆང་ཉིད་དོ། །དེ་གཉིས་ཀྱི་བར་དབུ་མར་ཀུན་གཞི་སྲོག་གི་རླུང་ཆེན་པོ་བརྟེན་པ་དཀར་དམར་གྱི་ཐིག་ལེ་གཉིས་པོ་དེ་རོ་མའི་ཡར་སྣ་དང་རྐྱང་མའི་མར་སྣའི་ནང་ནས་བཅུད་བྱུང་སྟེ༔ དབུ་མ་ལ་ཐིམ་ཨ་ཧཾ་རྣམ་པར་བཞུགས༔ དེ་ཡང་བཅུད༵་ཕྱུང༵་སྟེ༵་ཞེས་པའི་དོན་རོ་རྐྱང་དཀར་དམར་གྱི་ལམ་ཡིན་པས་གཉིས་ཀའི་བཅུད་ཀྱི་དྭངས་མ་སོ་སོའི་རྩ་རྩེ་ཨ་ཧཾ་གི་ཐད་དབུ་མར་ཟུག་མཚམས་ན་བཞུགས་པའི་དོན་ལ་དགོངས་ཏེ་དབུ་མ་ལ་ཐིམ་ཞེས་གསུངས་སྙམ། དྭངས་མ་དེ་གཉིས་ལས་བདེ་བའི་མཐར་དབྱུང་བ་སོགས་ཉི་ཟླའི་རྒྱུན་ཐམས་ཅད་གཅིག་ཏུ་འདྲིལ་ནས་རོ་རྐྱང་གི་ལམ་ནས་རྩ་ཕྲན་ཡང་ཕྲན་དང་བཅས་པར་ཕྲ་མོ་གྲངས་ཀྱིས་མི་ཆོད་འཁོར་ལོའི་མཐའ༔ ཐམས་ཅད་དུ་འབབ་པས་སྐར་མའི་གྲངས་ཀྱིས་ཐིག་ལེ་དཀར་དམར་པ༔ ཞེས་གྲངས་མེད་པར་ཡོད་ཀྱང་རགས་རིམ་ཙམ་དུ། གསང་རྫོགས་ལས། རྩ་གནས་ལུས་ལ་རབ་བརྟེན་པས། །བྱང་སེམས་སྟོང་ཕྲག་བྱེ་བ་དང་། །ཕྱེད་དང་བཞི་བརྒྱ་ཡོད་ན་ཡང་། །བསྡུ་ན་དྭངས་སྙིགས་སྲོག་འཛིན་གསུམ། །ཞེས་སོ། །དྭངས་མའི་དྭངས་མ་དཀར་དམར་གཉིས་དང་སྲོག་འཛིན་ཏེ། རླུང་སེམས་གཉིས་ཀྱི་དྭངས་མ་དང་གསུམ་ལས་སྔ་མ་གཉིས་ནི་གོང་ལྟར་ལ། ཕྱི་མ་ནི་དེ་ཉིད་ལས། སྲོག་འཛིན་པ་ཡི་བྱང་སེམས་ནི། །སྙིང་དབུས་ཁྲག་གི་དྭངས་མ་སྟེ། །བྱེའུ་ལེབ་མའི་སྒོང་ཚད་ཀྱི། །དཀྱིལ་ན་འོད་ཀྱི་གོང་བུ་ནི། །སྲན་མའི་གའུ་ཁ་སྦྱར་ཚད། །དེ་དབུས་དྲན་བྱེད་ཤེས་པ་གནས། །ཞེས་སོ། །དེ་དག་གི་སྙིགས་མ་ལའང་དྭངས་སྙིགས་གཉིས་ལས། དྭངས་མ་བཅུ་གཉིས་ཀྱི་ངོ་གྲངས་ནི། སྙིང་གར་རྩ་འདབ་བརྒྱད་དང་ཡར་མར་ཀྱི་ཆ་གཉིས་དང་བཅུ། དེའི་སྟེང་དུ་དབུ་མ་ལ་རླུང་དང་ཁམས་འབབ་པའི་རྩ་གཉིས་སུ་ཕྱེ་བའི་བཅུ་གཉིས་ཀྱི་ཁམས་སུ་གསུངས་སོ། །དེའི་སྙིགས་མ་ནི་སྤྱི་བོའི་མི་ཕྱེད་མ་ལས་སོ་དང་སེན་མོ། །སྤྱི་གཙུག་གི་ཕྲ་གཟུགས་མ་ལས་སྐྲ་དང་ཁ་སྤུ་འབབ། རྣ་བ་གཡས་སུ་རྩེ་བ་མ་ལས་ལྤགས་པ་དང་དྲི་མ་འབབ། མགོ་རྒྱབ་ཏུ་གཡོན་པ་མ་ལས་ཤ་འབབ། རྣ་བ་གཡོན་དུ་ཐུང་ངུ་མ་ལས་རྒྱུས་པ་འབབ། སྨིན་དབུས་སུ་རུས་སྦལ་སྐྱེས་ལས་རུས་པ་འབབ། མིག་གཉིས་སྒོམ་པ་མ་ལས་མཆིན་པ། དཔུང་པ་གཉིས་སུ་རྩ་དབང་བསྐུར་མ་ལས་སྙིང་། མཆན་ཁུང་སྐྱོན་མ་མ་ལས་མིག་འབྲས་ཏེ་ཤ ནུ་མ་གཉིས་སུ་འཇུག་མ་ལས་མཁྲིས་པ། ལྟེ་བར་མ་མོ་མ་ལས་གློ་བ། སྣ་རྩེ་མཚན་མོ་མ་ལས་རྒྱུ་མའི་ཕྲེང་བ། ཁར་ནི་བསིལ་སྦྱིན་མ་ལས་གཉེ་མ་དང་གྲོད་པ། མགྲིན་པར་ཚ་བ་མ་ལས་ལྟོ་བ། སྙིང་ཁར་རྩ་གཞོལ་མ་ལས་བཤང་བ། མདོམས་དང་མཚོག་མའི་བར་དུ་འབྲེལ་བའི་རྩ་རངས་མ་ལས་རྒྱུང་པ་འབབ། མཚན་མར་གཟུགས་ཅན་མ་ལས་བད་ཀན། བཤང་ལམ་དུ་ཐུན་མོང་མ་ལས་རྣག །བརླ་གཉིས་སུ་རྒྱུ་སྦྱིན་མ་ལས་ཁྲག །བྱིན་པ་གཉིས་སུ་སྦྱོར་བྲལ་མ་ལས་རྡུལ། རྐང་སོར་རྩ་སྡུག་གུ་མ་ལས་ཚིལ། རྐང་པའི་བོལ་གྲུབ་མ་ལས་མཆི་མ། མཐེ་བོང་འཚེད་མ་ལས་མཆིལ་མ་དང་ངར་སྣབས། པུས་མོར་ཡིད་བཟང་མ་ལས་སྣ་ཆུ་འབབ་པའོ། །དེ་ལྟར་དྭངས་མ་བཅུ་གཉིས་དང་། སྙིགས་མ་ཉེར་བཞི་སྟེ་ཁམས་སོ་དྲུག་ཏུ་བཤད་པ་ཞིག་དང་། ཉེར་བཞི་བོའི་སྟེང་དུ་སུམ་སྐོར་མ་སོགས་ལྔ་དང་། དབུ་རྐྱང་རོ་གསུམ་སྟེ་སོ་གཉིས་ཀྱི་སྟེང་དུ་སྦས་པའི་རྩ་ལྔ་བསྣན་པས་བྱང་སེམས་འབབ་པའི་རྩ་སོ་བདུན་གྲངས་ཀྱི་ཁམས་དང་། དེ་དག་གི་ནང་ནས་གནས་ཀྱི་རྩ་གཙོ་བོ་ཉེར་བཞི་ལ་ཐིམ་ལོངས་བདག་གསུམ་གྱིས་དབྱེ་བས་དོན་གཉིས། དེ་རེ་རེ་ལ་འཁོར་སྟོང་སྟོང་ཡོད་པས་དེ་ཉིད་ཀྱི་ཁམས་ཀྱང་ཡོད་པར་གསུངས་སོ། །ཁྱད་པར་ཟླ་བའི་དྭངས་མ་ཆ་བཅུ་དྲུག་ཁམས་བཞི་དང་ལྡན་པ་འཁོར་ལོ་སོ་སོ་ནས་གཏུམ་མོའི་མེ་ལ་བབས་པའམ་མེས་བཞུ་ནས་དགའ་བའི་མཐར་འབྱུང་བ་དང་། ཡང་ཟས་སྐོམ་ཞག་བདུན་དུ་དྭངས་སྙིགས་བཅུ་བཞིར་ཕྱེ་བས་ནང་གི་སྐྱེ་བ་བདུན་པ་ཞེས་དུས་འཁོར་ལས་གསུང་བ་ལུས་ཀྱི་ཟུངས་སུ་གྱུར་པ་རྫས་ཀྱི་ཐིག་ལེའི་ཚུལ་ཡིན་ལ། དེ་དག་ནི་ནང་གི་ཁམས་དང་། ཕྱི་སྣོད་ཀྱིས་བསྡུས་པ་ནི་ཕྱིའི་ཁམས་ཞེས་བྱ་སྟེ། ནང་གི་ཁམས་ཀྱི་རང་གདངས་སུ་ཤར་བ་ཡིན་པས་རྨི་ལམ་དང་བར་དོའི་དུས་ཀུན་འབྱུང་བཞིའི་སྣང་བ་འབྱུང་བའང་ཡེ་ཤེས་ཀྱི་རང་མདངས་ལ་གཞན་ལྷའི་དཀྱིལ་འཁོར་ལྷུན་གྲུབ་ཏུ་རྫོགས་པའི་ཀུན་རྫོབ་དག་པ་ཆེན་པོ་བདག་ཏུ་བཟུང་བ་ལས་ཡིན་པས་སོ། །གསང་བ་ཡེ་ཤེས་བྱང་ཆུབ་སེམས་ཀྱི་ཁམས་མཁའ་འགྲོའི་སྐུ་གསུང་ཐུགས་སུ་བཞུགས་ཚུལ་སྒྲོན་མ་གསལ་རྒྱན་ལས་བསྙད་པ་ལྟར་ཡིན་པའི་གནད་ཀྱིས་ཕྱི་ནང་གི་ཁམས་དེ་དག་གི་ངོ་བོ་ནི་དཔའ་བོ་ཡབ་ཡུམ་ཏུ་རྣམ་པར་དག་པས། རྩ་མཁའ་འགྲོའི་དཀྱིལ་འཁོར་ཁམས་དེའི་སྐུ་རང་བཞིན་དུ་གནས་པས་ན། དཔའ་བོ་ཡབ་ཡུམ་ཁ་འཐོར་ཚུལ་དུ་བཞུགས༔ མངོན་བརྗོད་ལས། སོ་སེན་ཐོད་པའི་དུམ་བུ་དང་རབ་གཏུམ་མ། སྐྲ་སྤུ་ཀེང་རུས་ཆེན་པོ་དང་གཏུམ་མིག་མ། པགས་དྲི་ཀེང་རུས་དང་འོད་ལྡན་མ། ཤ་མཆེ་བ་རྣམ་གཙིགས་དང་སྣ་ཆེན། རྩ་རྒྱུས་ལྷ་དགྲ་དང་དཔའ་བའི་བློ་གྲོས་མ། རུས་པ་འོད་དཔག་མེད་དང་མིའུ་ཐུང་མ། མཁལ་མ་རྡོ་རྗེ་འོད་དང་ལིངྐའི་དབང་ཕྱུག་མ། སྙིང་རྡོ་རྗེ་ལུས་སམ་སྐུ་རྡོ་རྗེ་དང་ཤིང་གྲིབ་མ། མིག་རྡོ་རྗེ་མྱུ་གུ་དང་ས་བསྲུང་མ། མཁྲིས་པ་རྡོ་རྗེ་རལ་པ་ཅན་དང་འཇིགས་བྱེད་ཆེན་མོ། །གློ་བ་དཔའ་བོ་ཆེན་པོ་དང་རླུང་གི་ཤུགས་ཅན་མ། རྒྱུ་མ་རྡོ་རྗེ་ཧཱུྃ་མཚན་དང་ཆང་འཐུང་མའོ། །གཉེ་མ་རབ་ཏུ་བཟང་པོ་དང་སྔོ་བསངས་ལྷ་མོ། །ལྟོ་བ་རྡོ་རྗེ་བཟང་པོ་དང་རབ་བཟང་ལྷ་མོ། །ལྒང་བ་འཇིགས་བྱེད་ཆེན་པོ་དང་རྟ་རྣ་མ། སྐྲ་མཚམས་མིག་མི་བཟང་དང་བྱ་གདོང་མ། བད་ཀན་སྟོབས་པོ་ཆེ་དང་འཁོར་ལོའི་ཤུགས་ཅན་མ། རྣག་རིན་ཆེན་རྡོ་རྗེ་དང་དུམ་སྐྱེས་མ། ཁྲག་རྟ་མགྲིན་དང་ཆང་འཚོངས་མ། རྔུལ་ནམ་མཁའི་སྙིང་པོ་དང་འཁོར་ལོའི་གོ་ཆ་མ། ཚིལ་དཔལ་ཧེ་རུ་ཀ་དང་ཤིན་ཏུ་དཔའ་མོའོ། །མཆི་མ་པདྨ་གར་གྱི་དབང་ཕྱུག་དང་སྟོབས་ཆེན་མོའོ། །མཆིལ་མ་རྣམ་པར་སྣང་མཛད་དང་འཁོར་ལོའི་སྒྱུར་མ། སྣབས་རྡོ་རྗེ་སེམས་དཔའ་དང་བརྩོན་འགྲུས་ཆེན་མོའོ། །ཞེས་སོ། །བཤད་མ་ཐག་པའི་དོན་དེ་དག་ལ་གོམས་པར་བྱེད་པའི་རྣལ་འབྱོར་བས༔ ཤེས་རབ་སྐྱེ་བ་མེད་པའི་ཞུགས་སམ་མེ་ཉིད་ཀྱིས་ཐབས་བདེ་བ་ཆེན་པོའི་ངོ་བོ་རི་བོང་ཅན་བཞུས་པས༔ འདོད་ཆགས་ཆེན་པོའི་དགྱེས་མཉམ་མཆོད་པའི་སྤྲིན༔ གྲོལ་ཐར་ཕྱག་རྒྱའི་ལམ་ལ་ཉེ་རྒྱུར་འགྱུར༔ ཞེས་ཞུ་བདེའི་ཙནྟྲ་ལི་འདིས་གཞན་ལུས་བདེ་སྟོང་གི་ཙནྟྲ་ལིའི་ཉེ་རྒྱུ་དང་། ལམ་རྟེན་གྱི་རྣམ་པའི་དབྱིངས་བསྟན་པའོ། །དེ་ཡི་དམིགས་པ་དེ་ཡང་བྱེད་བཅིངས་གསུམ་དང་རྩ་གསུམ་འཁོར་ལྔ་ལ་སོགས་སྔར་ལྟར་གསལ་གདབ་པ་གཞིར་བཞག་གི་འཁོར་དབུས་ཀྱི་ཡི་གེ་རྣམས་ལྷར་བསྐྱེད་པ་ཡིན་པའི་གོ་དོན་དུ་བཟུང་བར་བྱའོ། །བཤགས་རྒྱུད་ལས། ཨོཾ་བདག་ལུས་གཞལ་ཡས་ཁང་དུ་གནས་པའི་ནང་། །སྤྱི་མགྲིན་སྙིང་ཀ་ལྟེ་བ་གསང་གནད་སུ། །དུག་ལྔ་རྣམ་དག་རིགས་ལྔ་ཡབ་ཡུམ་སྐུ། །བསྐྱེད་རིམ་དབྱིབས་ཀྱི་ཞེས་པ་ལྟར་སྤྱི་བོའི་འཁོར་ལོ་རུ༔ བཾ་ཡིག་ཡོངས་གྱུར་རྣམ་སྣང་འཁོར་ལོ་དང་དྲིལ་བུ་འཛིན༔ མགྲིན་པར་རཾ་ལས་སྣང་མཐའ་པདྨ་འཛིན༔ ཐུགས་ཀར་ཨེ་ལས་སེམས་དཔའ་རྡོ་རྗེ་འཛིན༔ ལྟེ་བར་ལཾ་ལས་རིན་ཆེན་ནོར་བུ་འཛིན༔ གསང་བར་ཡཾ་ལས་རྔ་སྒྲ་རྒྱ་གྲམ་འབར༔ རང་རང་རིགས་ཀྱི་ཡུམ་དང་བཅས་པ་དང་༔ འཁྲིལ་སྦྱོར་གཡོན་པས་དྲིལ་བུ་རིགས་ཀྱི་མཚན༔ རིགས་ཆུང་སེམས་དཔའ་འཁོར་གྱིས་ཡོངས་བསྐོར་གསལ༔ ཞི་བ་རྐྱང་བ་ལས་མི་བསྒོམས་པའི་ལམ་བྱེད་ནི་དེ་འདྲ་བས་འཐུས་ལ༔ ཡང་ན་ཞི་ཁྲོ་རོལ་པའི་དཀྱིལ་འཁོར་མཉམ་པར་ཁ་སྦྱོར་བ་སྒོམ་པའི་ནང་གི་དཀྱིལ་འཁོར་རྒྱལ་མཆོག་གི་ཞིང་སྦྱོང་བ་དང་། ཚོགས་བསགས་པ་བདུད་རྩི་འབེབས་སྦྱོང་གི་བྱིན་བསྡུ་བ་དང་། རང་རྒྱུད་ཀྱི་སྒྲིབ་པ་སྦྱངས་ནས་གོ་འཕང་གི་ཆོས་སུ་སྨིན་པའི་ཐབས་ནི༔ སྔ་འགྱུར་རྫོགས་པ་ཆེན་པོའི་རང་ལུགས་སུ་བྱས་ན། ཁྱད་པར་སྙིང་ཀའི་འཁོར་ལོའི་རྩ་འདབ་ཀྱི༔ དྭངས་མའི་རྩ་འདབ་ཀུན་ན་གཞི་ཡི་ལྷ༔ ལྷ་འདི་དག་གསལ་བ་ལའང་རྫོགས་ཆེན་གྱི་རྒྱུད་རང་རྐང་ལྟར་གསེར་གྱི་རྩ་ཆེན་གྱི་དབུས་དང་། ཡང་ན་གསང་ཐིག་གི་ལྟར། རྒྱབ་ཡོན་ཏན་གྱི་རྩའི་སྣང་ཆའི་ཞིང་ཁམས་སུ། མདུན་ཆོས་ཉིད་ཀྱི་རྩའི་རང་གདངས་སྐུ་གསུམ་གྱི་ཆོས་ཉིད། གཡས་ཡེ་ཤེས་ཀྱི་རྩའི་བྱེད་པའི་ཐུགས་རྣམ་པ་ཐམས་ཅད་པ་དང་ལྡན་པའི་ཞི་བ་བཞི་བཅུ་རྩ་གཉིས་རྫོགས་པར་ལྡན༔ དེ་ལས་འོད་འཕྲོས་པའམ་དེའི་དབུ་རྒྱན་གྱི་ཚུལ་དུ་དུང་ཁང་དཀར་པོ་ནས༔ ཁྲག་འཐུང་རོལ་པའི་ལྷ་ཚོགས་ཚོམ་བུར་བཅས༔ ཡབ་ཡུམ་རྒྱན་དང་གཞལ་ཡས་ཁང་བཅས་རྫོགས༔ ཀུན་ཀྱང་རང་བཞིན་དག་པའི་འོད་རྩ་ན༔ མི་འགྱུར་མི་ཤིགས་ཡེ་ཤེས་ལྔ་ལྡན་པ༔ ཡང་སྤྲུལ་ཟེར་གྱི་སྐུ་ལ་གོང་བསྟན་དཔའ་བོ་ཡབ་ཡུམ་དག་གིས་མཚོན་རབ་འབྱམས་ལས་གསུང་བའི་བསམ་མི་ཁྱབ་པར་འཕྲོ༔ དེ་ནས་ཕྱི་ཡི་དབུ་མ་སྟོང་སངས་པ༔ དབུ་མ་མཚན་ཉིད་བཞི་ལྡན་མར་སྣེའི་རྟ་གདོང་ཅན༔ ཐབས་ཤེས་ཀྱི་རྒྱུ་ལམ་རོ་རྐྱང་ནས་རླུང་གིས་བསྐུལ་བ་ལས༔ ཨ་ཐུང་ལས་མཚན་ཉིད་བཞི་ལྡན་གྱི་གཏུམ་མོའི་མེ་རབ་ཏུ་ཕྲ་བ་ཞིག༔ འཁྱུགས་ཤིང་གོང་དུ་བསྙེགས་པས་མས་ནས་རིམ་པ་བཞིན་ལྷ་ཚོགས་རྣམས༔ ཡེ་ཤེས་དྲོད་ཀྱིས་དགྱེས་པ་རབ་བསྐྱེད་ནས༔ ཡར་འཕར་ག་བུར་དབང་པོའི་རྡུལ་ལ་རེག༔ དེ་ལས་ཕྲ་བའི་ཐིག་ལེ་བབས་པ་དང་༔ ཕ་ལས་ཐོབ་པའི་དཀར་ཆའི་དྭངས་མ་ཧཾ་ཡིག་ནི་ཟླ་བའི་ཁམས་ཀྱི་ཆ་ཡིན་པས་ཕྱིར་དཀར་བ། ཐབས་ཀྱི་རང་བཞིན་མུ་ཏིག་གི་རྡོག་ལྟར་འཚེར་བ། བྱང་ཆུབ་སེམས་ཀྱི་བདུད་རྩིའི་བཅུད་དང་ལྡན་པས་སྣུམ་པ། རྩ་གནས་གང་དུའང་སྤྱན་དྲོངས་བདེ་བས་ཟླུམ་ལ་འདྲིལ་བའི་མཚན་ཉིད་བཞི་ལྡན། མེ་དང་ཐིག་ལེ་བྲོས་དེད་ཚུལ་དུ་བྱུང་ཨ་ཤད་ལ་ཕོག་དེ་ཡིས་མེ་གསོས་བྱས༔ ཆེར་འབར་ཐིག་ལེ་ཆུ་རྒྱུན་བཞིན་བབས་པར༔ ཕྱག་ཆེན་ཐིག་ལེ་ལས། དེ་ཡིས་མེ་འབར་ཡང་དག་གིས། བདེ་ཆེན་འཁོར་ལོ་ཞུ་བར་འགྱུར། །བཞུས་པས་རྩ་ནི་ཐམས་ཅད་ལས། །མཆོག་གི་བདུད་རྩི་འཛག་པའོ། །ཞེས་སོ། །དམིགས་པས་དུས་གསུམ་རྒྱལ་བའི་སྐུ་གསུང་ཐུགས༔ ཡོན་ཏན་ཕྲིན་ལས་ངོ་བོ་འོད་དཀར་དམར༔ མཐིང་གསུམ་རྣམ་པར་ཐིམ་པས་ལར་འདི་ལ་ཨ་ཧཾ་ལས་འོད་འཕྲོས་ཏེ་རྩ་བ་གསུམ་གྱི་ལྷ་ཚོགས་སྤྱན་དྲངས་ཏེ་ཡབ་རྣམས་ཧཾ་ཡིག་དང་ཡུམ་རྣམས་ཨ་ཤད་ལ་བསྟིམས་པ་དང་། གཞན་ཡང་ལུས་གནས་ཀྱི་ལྷ་སེམས་དཔའ་སུམ་བརྩེགས་སོགས་གསལ་ཞིང་དབྱིངས་ནས་རྒྱལ་བའི་དཀྱིལ་འཁོར་སྤྱན་དྲངས་ཏེ་བསྟིམ་པ་སོགས་ཀྱང་བྱེད་དགོས་ལ། སྤྱིར་ཧཾ་ཡིག་དབུ་གྱེན་བསྟན་དུ་ཡོད་ཀྱང་བྱིན་དབབ་པའི་རྐྱེན་གྱིས་ཐུར་བསྟན་དུ་ལོག་པར་བཤད་པའང་རྟོག་དཔྱོད་ཆེ་བའི་རིགས་ལ་དགོངས་པ་ཙམ་དུ་མངོན་ཏེ་འདི་དག་ནི་ཞར་བྱུང་འཕྲོས་དོན་དུ་སྨོས་པའོ། །བདུད་རྩི་ནི༔ ཁ་དོག་རབ་དཀར་ཟླ་བ་འབུམ་བརྩེགས་ལྟའི༔ སྤྱི་བོའི་རྩ་འཁོར་མ་ལུས་ཁྱབ་པ་དང་༔ དེའི་སྟོབས་ལུས་ཀྱི་སྒོ་ནས་བསགས་སྡིག་སོགས༔ བ་སྤུ་ཀུན་ནས་ཆུ་རྒྱུན་བཞིན་དུ་བཏོན༔ ཟག་མེད་ཡེ་ཤེས་བདུད་རྩིའི་ལྟེམས་ཀྱིས་གང་༔ དེ་ན་བཞུགས་པའི་མགོན་པོ་སྲས་བཅས་མཆོད༔ རྩ་ཡི་ལམ་བྱང་དཔའ་བོ་ཡབ་ཡུམ་གྱིས༔ རྣལ་འབྱོར་པ་ཡི་མཆོད་པ་བླངས་ནས་སུ༔ དབྱེར་མེད་རྣམ་འདྲེས་སྐུ་ཡི་དངོས་གྲུབ་ཐོབ༔ འདི་དག་ནི་བསྒོམ་པའི་དགའ་བཞི་ཞེས་བྱ་སྟེ་དམིགས་པ་གལ་ཆེ་བ་དང་དེའི་སྟོབས་ཀྱིས་གནས་ཀྱི་ཡེ་ཤེས་བཅུ་དྲུག་ལ་སོགས་པའི་ཉམས་མྱོང་རིམ་གྱིས་འཆར་བའི་ངོ་བོ་ལ་ལྟ་གསུང་། དང་པོའི་དབང་ཐོབ་བསམ་གཏན་དང་པོའི་ཡན་ལག་ཡོངས་སུ་རྫོགས་པའི་ངོ་བོ་ཅན་གྱི་དགའ་བའི་ཡེ་ཤེས་དང་དྲན་ཉེར་བཞི་ཡང་དག་སྤོང་བཞི། རྫུ་འཕྲུལ་རྐང་བཞིའི་མངོན་རྟོགས་ཀྱི་རིམ་པ་རྣམས་རྒྱུད་ལ་སྐྱེས༔ འདི་ཡང་གནས་ཀྱི་དབང་གིས་སྐུའི་དགའ་བཞི་སྟེ་དགའ་བའི་དགའ་བ་མཆོག་དགའ་ཁྱད་དགའ་ལྷན་དགའ་བཞིར་ཉམས་སུ་མྱོང་བའི་ཚོགས་ལམ་འདུན་པ་སེམས་པའི་རྣལ་འབྱོར་མཐར་ཕྱིན་དེ་ནས་མར་བབས་ཏེ༔ མགྲིན་པའི་འཁོར་ལོ་གང་བས་གོང་བཞིན་དུ༔ དེ་ན་བཞུགས་པའི་མགོན་པོ་སྲས་བཅས་མཆོད༔ རྩ་ཡི་ལམ་བྱང་དཔའ་བོ་ཡབ་ཡུམ་གྱིས༔ རྣལ་འབྱོར་བ་ཡི་མཆོད་པ་བླངས་ནས་སུ༔ དབྱེར་མེད་རྣམ་འདྲེས་གསུང་གི་དངོས་གྲུབ་ཐོབ༔ གསང་བའི་དབང་ཐོབ་བསམ་གཏན་གཉིས་པའི་ངོ་བོའི་གསུང་མཆོག་དགའི་དགའ་བཞིའི་ཡེ་ཤེས་དང་དབང་པོ་ལྔ་དང་སྟོབས་ལྔའི་རིམ་པའི་མངོན་རྟོགས་རྒྱུད་ལ་སྐྱེས༔ སྦྱོར་ལམ་རིགས་ཆེན་འབྱེད་པའི་རྣལ་འབྱོར་མཐར་ཕྱིན་དེ་ནས་མར་བབས་ཏེ༔ སྙིང་ཀའི་འཁོར་ལོ་གང་བས་གོང་བཞིན་དུ༔ དེ་ན་བཞུགས་པའི་མགོན་པོ་སྲས་བཅས་མཆོད༔ རྩ་ཡི་ལམ་བྱང་དཔའ་བོ་ཡབ་ཡུམ་གྱིས༔ རྣལ་འབྱོར་པ་ཡི་མཆོད་པ་བླངས་ནས་སུ༔ དབྱེར་མེད་རྣམ་འདྲེས་ཐུགས་ཀྱི་དངོས་གྲུབ་ཐོབ༔ ཤེས་རབ་དབང་ཐོབ་བསམ་གཏན་གསུམ་པའི་ངོ་བོ་ཅན་ཐུགས་ཁྱད་དགའི་དགའ་བཞིའི་ཡེ་ཤེས་དང་བྱང་ལག་བདུན་གྱི་མངོན་རྟོགས་རྒྱུད་ལ་སྐྱེས༔ མཐོང་ལམ་དབུགས་ཆེན་འབྱིན་པའི་རྣལ་འབྱོར་མཐར་ཕྱིན་དེ་ནས་མར་བབས་ཏེ༔ ལྟེ་བའི་འཁོར་ལོར་གང་བས་གོང་བཞིན་དུ༔ དེ་ན་བཞུགས་པའི་མགོན་པོ་སྲས་བཅས་མཆོད༔ རྩ་ཡི་ལམ་བྱང་དཔའ་བོ་ཡབ་ཡུམ་གྱིས༔ རྣལ་འབྱོར་བ་ཡི་མཆོད་པ་བླངས་ནས་སུ༔ དབྱེར་མེད་རྣམ་འདྲེས་ཡོན་ཏན་དངོས་གྲུབ་ཐོབ༔ ཚིག་གི་དབང་བསམ་གཏན་བཞི་བའི་ངོ་བོ་ཅན་ཡེ་ཤེས་རྡོ་རྗེ་ཐོབ་ལྷན་དགའི་དགའ་བཞིའི་ཡེ་ཤེས་འཕགས་ལམ་བརྒྱད་ཀྱི་མངོན་རྟོགས་རྒྱུད་ལ་སྐྱེས༔ སྒོམ་ལམ་ལུང་ཆེན་ཐོབ་པའི་རྣལ་འབྱོར་མཐར་ཕྱིན་ས་དགུའི་རྟོགས་པ་འཆར༔ འོག་སྒོ་སྦྱོང་བའི་སྔོན་འགྲོ་བྱེད་ན། དེ་ནས་མར་བབས་གསང་བའི་འཁོར་ལོར་ཁྱབ༔ དེ་ན་བཞུགས་པའི་མགོན་པོ་སྲས་བཅས་མཆོད༔ རྩ་ཡི་ལམ་བྱང་དཔའ་བོ་ཡབ་ཡུམ་གྱིས༔ རྣལ་འབྱོར་བ་ཡི་མཆོད་པ་བླངས་ནས་སུ༔ དབྱེར་མེད་རྣམ་འདྲེས་ཕྲིན་ལས་དངོས་གྲུབ་ཐོབ༔ འོད་ཟེར་དབང་ཐོབ་གཟུགས་མེད་སྙོམས་འཇུག་བཞིའི་ངོ་བོ་ཅན་དགའ་བྲལ་ཡེ་ཤེས་དང་ཀུན་ཏུ་འོད་ཀྱི་སའི་སྤངས་རྟོགས་ཁྱད་པར་ཅན་རྒྱུད་ལ་སྐྱེས༔ ནས་དགའ་བྲལ་གྱི་དགའ་བཞི་ཉམས་སུ་མྱོང་ནས། མི་སློབ་པའི་ལམ་རྩལ་ཆེན་རྫོགས་པའི་རྣལ་འབྱོར་མཐར་ཕྱིན་ཏེ་ཞི་ཁྲོ་ཡི༔ ལྷ་ཚོགས་ཡོངས་ཀྱི་དགྱེས་པ་བསྐྱེད་བྱས་ཏེ༔ འབར་འཛག་འདི་དག་གི་དོན། ལར་དཀར་ཆ་ཆུ་ཁམས་ཐུར་ལ་འབབ་པ་ཡིན་པས་དགའ་བཞི་བས་བརྟན་དུ་སྐྱེ་དགོས་པ་འདྲ་ཡང་ཐིག་ལེས་མེ་གསོས་བྱས་ནས་མེ་ཆེར་འབར་བའི་ཤུགས་ཀྱིས་བཏེགས་ནས་རྩ་འཁོར་གྱི་དབུས་དང་ཡང་ཕྲན་དང་བཅས་པ་གང་ནས་ད་དུང་བདུད་རྩི་བབ་པའི་ཤུགས་ཀྱིས་མེ་ཐུར་མནན་ནས་འཁོར་ལོ་འོག་མ་ལ་རིམ་པར་ཁྱབ་པའི་དོན་ནོ་གསུང་། ༼ གོ་རིམ་ལ་ལྟོས་པའི་དགའ་བཞི་ནི་ཡས་བརྟན་དང་མས་བརྟན་གཉིས་ལས། མཆན། ༽ ཡས་བརྟན་གྱི་དགའ་བ་བཞི་སྐྱེ་ཚུལ་ནི། བཤད་རྒྱུད་རྡོ་རྗེའི་ཕྲེང་བ་ལས། དེ་རྗེས་ལུགས་འབྱུང་བཤད་བྱ་སྟེ། །བདེ་ཆེན་འཁོར་ལོ་སྤྱི་བོ་ལ། །དེ་ནི་དགའ་བར་བཤད་པ་ཡིན། །ལོངས་སྤྱོད་འཁོར་ལོར་མཆོག་དགའ་དང་། །བྲལ་དགའ་ཆོས་ཀྱི་འཁོར་ལོར་གནས། །སྤྲུལ་པའི་འཁོར་ལོ་ལྷན་ཅིག་སྐྱེས། །དགའ་བ་ཉམས་སུ་མྱོང་བར་བྱེད། །ཅེས་གསུངས་སོ། །སླར་ཡང་མས་བརྟན་རླུང་གི་སྟོབས་ཀྱིས་ལྡོག༔ དེ་ཡང་མས་བརྟན་གྱི་དགའ་བཞི་ནི། མངོན་བརྗོད་བླ་མ་ལས། ལྟེ་བ་སྙིང་པད་ནུ་མའི་དབུས། ལྕེ་ཡི་རྩ་དང་མགོ་སྟེང་དུ། །དགའ་བ་དང་ནི་མཆོག་དགའ་ཉིད། །དམ་པར་དགའ་དང་ལྷན་ཅིག་སྐྱེས། །ཞེས་དང་། མན་ངག་སྙེ་མར། མས་བརྟན་གྱི་དགའ་བ་བཞི་ཀ་ལྷུན་སྐྱེས་ལ་ཆུང་ངུ་དང་བར་མ་དང་ཆེན་པོ་དང་ཆེན་པོའི་ཆེན་པོར་ཕྱེ་བར་བཤད་རྒྱུད་ཀྱི་དོན་ཡིན་ཏེ། །བརྟགས་གཉིས་ལས། རྫོགས་པའི་རིམ་པའི་ཕྱོགས་ལ་ནི། །འདི་ལྟར་ལྷན་ཅིག་སྐྱེས་རྣམ་བཞི། །ཞེས་སོ། །ཡབ་ ༼ དགའ་མཆོག་མཆན། ༽ ཡུམ་ ༼ བྲལ་སྐྱེས། མཆན། ༽ གཉིས་ཀྱི་རྣམ་རྟོག་རགས་པ་དང་ཐམས་ཅད་འགགས་པས་སྤངས་བྱ་ལ་ལྟོས་པའི་དགའ་བཞི་དང་དེ་གཉིས་ཀྱི་ལུས་ཁོལ་བུ་དང་ཁྱབ་པར་བདེ་བ་སྐྱེས་པས་གནས་ལ་ལྟོས་པའི་དགའ་བཞི་ཞེས་ཀུན་མཁྱེན་པས་གསུངས་སོ། །༈དེ་ལྟ་བུའི་དགའ་བ་དེ་དག་ཀྱང་། །སྣང་བ་མཆེད་པ་ཐོབ་པ་འོད་གསལ་དང་བཞིས་ཡེ་ཤེས་དང་བསམ་གཏན་བཞི་སྟོང་བ་སྟོང་ཆེན་ཐམས་ཅད་སྟོང་བ་ཤིན་ཏུ་སྟོང་བ་བཞི་དང་། གཟུགས་མེད་བཞིའི་སྙོམས་འཇུག་གི་རོ་དང་ལྡན་པ་སྟེ། ཕྱག་ཆེན་ཐིག་ལེ་ལས། གང་ཕྱིར་དགའ་བ་དེ་སྣང་བ། སྣང་བ་མཆེད་པ་མཆོག་ཏུ་བཤད། ཁྱད་དགའ་ཉེ་བར་ཐོབ་པར་ཤེས། ལྷན་ཅིག་སྐྱེས་དེ་འོད་གསལ་སྦ། ཞེས་སོ། །འདི་ལ་ས་ལམ་གྱི་རྫོགས་ཚུལ་ནི། ༼ གསང་སྙིང་ལེའུ་བཅུ་གསུམ་པའི་འགྲེལ་བ་མུན་སེལ་ལས་གསལ། མཆན། ༽རྡོ་རྗེ་ལས་རིམ་ལས། གནས་ཀྱི་ཡེ་ཤེས་བཅུ་དྲུག་པོ། །ཚོགས་སྦྱོར་ས་སོགས་དང་པོ་ནས། །མཐར་ཕྱིན་སངས་རྒྱས་ས་ཉིད་དེ། །གནས་བཞི་དེ་བཞིན་དབྱེ་བ་ལས། །གཉིས་པའི་བར་ས་རབ་དགའ་སོགས། །ཕ་རོལ་ཕྱིན་དང་ས་མཚན་ཉིད། །མཚུངས་ཕྱིར་རྫོགས་པར་བཤད་པ་ཡིན། །ཞེས་སོ། །སྔར་གྱི་ཉམས་ཞེན་འགྱུར་བདེའི་བག་ཆགས་བཅས༔ ཡོངས་སྦྱངས་གཙུག་ཏོར་འཁོར་ལོ་ལ་སླེབས་ཏེ༔ དེ་ནས་རྩ་གནས་ཀུན་ཏུ་འཁྲུལ་འཁོར་དགྲམ༔མ་དག་རྩ་རླུང་ཐིག་ལེའི་རྒྱུ་བ་ཀུན༔ བཅོམ་ནས་དག་དབྱིངས་དྭངས་མའི་དཔལ་ཆེན་པོ༔ མངོན་གྱུར་རྩ་མདུད་ཕྲ་བ་ཞིག་སྟོབས་ཀྱིས༔ རླུང་སེམས་འབྱོར་དང་ལས་རུང་མཐར་ཕྱིན་ཏེ༔ ཡི་གེ་འཁོར་ལོ་ཚོགས་ཆེན་མངོན་གྱུར་བསམ༔ དེ་ནས་རྗེས་ཤེས་ཀྱི་ངོ་བོ་སྤྱི་གཙུག་ཐིག་ལེ་རབ་ཕྲ་བ༔ ཐིག་ལེ་སྟོང་པའི་སྒྲོན་མ་འོད་དང་འོད་ཟེར་རབ་ཏུ་འབར་བ་སྐུ་ལྔའི་ངོ་བོ་ཉིད༔ ཀྱི་ལྷ་སྐུའི་མཚན་དཔེའི་ངོ་བོར་གསལ་ཞིང་ཡེ་ཤེས་མིག་གིས་དེ་ལ་བལྟ་བ་དང་། དེའི་རང་བཞིན་བལྟ་དཀའ་བསམ་གྱིས་མི་ཁྱབ་ཆོས་ཉིད་རིགས་ཆེན་གཙུག་ཏོར་ཆེ༔ ན་པོ། བརྗོད་བྲལ་ཀ་དག་ཆེན་པོར་གཞོན་ནུུ་བུམ་པ་སྐུའི་ངང་དུ་ལ་ཡང་བཟླ༔ ཡང་ཀུན་མཁྱེན་ཆེན་པོས། ལུས་གནད་ཀྱིས་ལ་བཟླ་ཚུལ་དུ་གསུང་བའང་ཡོད་དོ། །འདི་ལའང་ཁམས་ཐིག་ལེའི་འཕོ་བ་དབང་མེད་དུ་མི་འཛག་པར་བཟུང་བ་དང་གྱེན་དུ་ལྡོག་པ་དང་རྩལ་དགྲམ་པ་རྣམས་རླུང་གི་སྟོབས་ཀྱིས་བྱེད་པ་དང་དེ་ལས་གཞན༔ ཡང་འཁྲུལ་འཁོར། སྟག་མོའི་འགྱུར་སྟངས་སེང་གེ་རྩལ་སྤྲུགས་དང་༔ གཞུ་འགེངས་དར་པོ་ཆེ་བསྐྱོད་འགྱིང་ཚུགས་བཟུང་༔ འཇག་མའི་ཕྱུར་སྟངས་རྣམ་པ་དྲུག་གིས་ལྡོག༔ འདི་རྣམས་ནི་ཐབས་ལམ་རིམ་གཅིག་ཆར་གཉིས་ཀ་ལ་ཟབ་པའི་ལུས་སྦྱོང་ངོ་། །ལམ་གྱི་གཞི་མ་སྒྱུ་ལུས་ལྟར་སྒོམ་ཞིང་། ལམ་གྱི་རྩ་བ་གཏུམ་མོ་ཉམས་སུ་བླངས་ནས། དྲོད་ཚད་རྨི་ལམ་གྱིས་འཛིན་པ་སྦྱོང་བསྒྱུར་བཅད་གསུམ་གྱི་ཐབས་དང་། ལམ་གྱི་སྙིང་པོ་འོད་གསལ་རྣམས་སྦྱོང་། སུན་མ་བར་དོའི་གདམས་ངག་དང་བཅས་པ་ཟུར་བ་ལྟར་ལ་འདིར་རྫོགས་ཆེན་གྱི་རྒྱུད་བུ་ལྟར་གཉིད་ཀྱི་རྣལ་འབྱོར་འོད་གསལ་སྦ་བའི་ཐབས༔ དང་བྱེ་བྲག་ཏུ་གཉིད་དུས་འབར་འཛག་གི་དཔྱིད་ཐིག་རྗེས་གཞིག་གིས་སྙིང་དབུས་དྭངས་མའི་རྩ་ལ་སྦ་བ་དང་། དེས་རྣམ་རྟོག་ཆོས་སྐུར་འཆར་ཞིང་། ཐིག་ལེའི་རྣལ་འབྱོར་དྭངས་མའི་རྩ་ལ་སྦ༔ རྣམ་རྟོག་རང་བཞིན་འོད་གསལ་ཆོས་སྐུར་སྦ༔ བདེ་བ་ཡེ་ནས་ལྷུན་འབྱམས་ཆེན་པོར་སྦ༔ འོག་གསལ་འཛིན་མེད་གཞོན་ནུ་བུམ་སྐུར་སྦ༔ དེ་ཡང་རང་བབས་དགོངས་པའི་ངོ་བོར་སྦ༔ གཉིད་འོད་གསལ་དུ་སྦ་བ་སྟེ། འབར་འཛག་ཀྱི་རྒྱུན་ལ་སེམས་བཟུང་ནས་འོད་གསལ་འཆར་བས་ལམ་དུ་ཁྱེར་བ་དང་། འཁོར་ལོ་ལྔའི་དབུས་ཀྱི་ཐིག༵་ལེ༵་དང་རྩ་རླུང་གི་བདེ་སྤྲིན་གྱི་རྒྱུན་ཐམས་ཅད་བསམ་གཏན་གཉིས་ཀྱི་བསྡུ་རིམ་གྱིས་སྙིང་ཀའི་མི་ཤིགས་པ་དང་ཨེ་ཡིག་ལ་སྦ་བ་དེས་དྲངས་བའི་དགའ་བཞིའི་བདེ་བའང་རྒྱུ་དུས་ཀྱི་དུག་ཅན་སེམས་ཀྱི་གཡའ་དང་བྲལ་བ་རིག་པ་བྱང་ཆུབ་ཀྱི་སེམས་ཕྱག་རྫོགས་དབྱེར་མེད་ཀྱི་དགོངས་པ་འབྲས་དུས་ཀྱི་དུག་མེད་དམ་འབྲས་བུའི་ངོ་བོ་དངོས་མངོན་སུམ་ལམ་བྱེད་འོད་གསལ་ཆོས་སྐུར་སྦ་བའམ་ལ་བཟླ་བ་དང་། འགྱུར་བའི་བདེ་བ་ལ་དཔྱད་སྟོང་གི་ལྷན་པ་འདེབས་པའི་སྟོང་ཉིད་རྒྱས་འདེབས་ལྟ་བུར་མ་ཤོར་བར་བདེ་བ་དེའི་ངོ་བོ་ལྷུན་འབྱམས་ཡངས་པ་ཆེན་པོར་རྣལ་དུ་འབྱོར་བའི་གསང་སྔགས་གྱི་དེ་ཁོ་ན་ཉིད་དུ་སྦ་བ་དང་། དེ་ལྟ་བུའི་འོད་གསལ་དེ་ལམ་དུས་ཀྱི་ཁྱད་ཆོས་དྲུག་གི་རྟོགས་པའི་གདེང་གིས་གཞོན་ནུ་བུམ་པའི་སྐུར་སྦ་བ་དང་༔ བདེ་སྟོང་གི་ཡུལ་༥དབང་༥ཤེས་༥གསུམ་རང་བཞིན་དང་དབང་པོ་ཡུལ་དུས་ཀྱི་སྦྱོར་སྒྲོལ་ལྔའི་དགོངས་ཀློང་རང་བཞིན་བབས་ཀྱིས་གནས་ལུགས་རྒྱ་ཆད་ཕྱོགས་ལྷུང་དང་བྲལ་བ་ཆོས་སྐུའི་ཡོ་ལང་ཆེན་པོར་དུག་ལྔ་དང་ཚོགས་དྲུག་སྒོ་ཡུལ་རང་གྲོལ་དུ་ཤར་བ་ནི་དཔེར་ན་རིམ་པ་དང་པོར་གང་སྣང་ལྷར་འཆར་བ་ཞིག་དགོས་པ་བཞིན་དུ་རིམ་པ་གཉིས་པར་གང་སྣང་བདེ་བར་འཆར་བ་ནི་ཨ་ནུ་ཡོ་གའི་ཉམས་ལེན་གྱི་མཐིལ་སོ་ཡང་དག་པ་སྟེ། དེ་ལྟ་བུའི་ངང་དུ་སྦ་བའམ་གདེང་ཆོས་པར་བྱའོ། །སྦ་བ་དྲུག་དང་ལྡན་པའི་ཁྱད་ཆོས་འདི༔ རྟོག་གེ་རྟོགས་འདོད་ཅན་གྱི་ཡུལ་མ་ཡིན༔ ཟོག་པོ་འདོད་ཆགས་ཅན་གྱི་ཡུལ་མ་ཡིན༔ རྫུན་མ་མགོ་བསྐོར་མཁན་གྱི་ཡུལ་མ་ཡིན༔ ཕྲག་དོག་རླུང་འཚུབ་སྔགས་པའི་ཡུལ་མ་ཡིན༔ ཆགས་བྲལ་སྡུག་སྲན་བྱེད་པའི་ཡུལ་མ་ཡིན༔ རང་མཐོང་གྲགས་འདོད་ཅན་གྱི་ཡུལ་མ་ཡིན༔ གནས་སྐབས་ཡོན་ཏན་གོང་གི་སྤྱན་དང་མངོན་ཤེས་རྫུ་འཕྲུལ་སོགས་ཐུན་མོང་ཀུན་རྫོབ་ཀྱི་ཡོན་ཏན་བརྒྱ་ཕྲག་བཅུ་གཉིས་ལ༔ མཐར་ཐུགས་ཡོན་ཏན་ཁ་སྦྱོར་ཡན་ལག་བདུན༔ མཚན་དཔེས་བརྒྱན་པའི་སྐུ་སོགས་ཕུན་ཚོགས་ངེས་པ་ལྔ་ལྡན་གྱི་ལོངས་སྤྱོད་རྫོགས་པ་དང་༡། འདོད་ཡོན་རྒྱན་དུ་ཤར་བ་དང་ཐབས་ཤེས་དབྱེར་མེད་ཆེན་པོའི་རང་སྣང་གི་ཕྱག་རྒྱ་དང་ཁ་སྦྱོར་དུ་བཞུགས་པ་དང་༢། ཐུགས་ཟག་མེད་ཀྱི་བདེ་བ་ཆེན་པོ་དང་ལྡན་པ་དང་༣། དེ་ཡང་རྣམ་ཀུན་མཆོག་ལྡན་གྱི་སྟོང་ཉིད་ལ་དགྱེས་པར་རོལ་བའི་རང་བཞིན་མེད་རྟོགས་ཀྱི་ཤེས་རབ་༤དང་། དམིགས་མེད་ཐུགས་རྗེ་ཀུན་ཁྱབ་སྙིང་རྗེས་ཡོངས་སུ་གང་བ་༥དང་། དེའི་འབྲེལ་ལས་སྲིད་པ་ཇི་སྲིད་དུ་འགྲོ་བ་འདུལ་བའི་གཟུགས་སྐུ་རྒྱུན་མི་ཆད་པ་འབྱུང་བ་དང་༦། ཞི་བ་ཕྱོགས་གཅིག་གི་ས་ལ་འགོག་པ་མེད་པར་གཞན་ཕན་གྱི་ཕྲིན་ལས་ལྷུན་གྲུབ་སྟེ་༧། ཡང་གསང་ཡོན་ཏན་གཞོན་ནུ་བུམ་སྐུའི་ཁྱད་ཆོས་དྲུག་དང་ལྡན༔ དེ་ལྟར་སྟེང་སྒོ་རྣམ་པར་གྲོལ་བའི་ལམ་ནི། རྒྱ་མཚོ་ལས། འཁོར་ལོ་གསུམ་གཉིས་སྲོག་ཤིང་གསུམ། །མེ་རླུང་འགྲོ་བའི་ནམ་མཁའི་བ༔ བཞོས་པས་སྟེང་དུ་རྣམ་པར་གྲགས། །ཞེས་པ་ལྟར་རོ། །རྡོ་རྗེ་གཟི་བརྗིད་འཇིགས་བྲལ་གླིང་བ་དང་༔ བདུད་འཇོམས་རྡོ་རྗེའི་ཁྱད་ཆོས་བླ་ན་མེད༔ འདི་ཡི་ཐབས་ཀྱི་ངེས་པའི་ལམ་གྱི་ཕྱོགས་གཅིག་འོག་སྒོ་བདེ་བ་ཆེན་པོ་ཅིག་ཆར་ཐབས་ལམ་ཉེ་རྒྱུར་བྱེད༔ རླུང་གི་གེགས་སེལ་ཐིག་ལེའི་གེགས་སེལ་བཅས༔ སྲིད་པ་མཐར་བྱེད་ཇི་བཞིན་ཉམས་ ༼ འོག་ཏུ་འབེམས་གྱི་མན་ངག་ལྔ་ཞེས་པ་དང་ཕྲ་མོ་ལས་འཆོས་གསང་དེམ་གྱི་ཡི་གེ་ལྔ་ཞེས་པ་རྣམས་ཀྱང་ལུས་སྦྱོང་འདིའི་ནང་ན་ཡོད་དེ་ད་སྔོན་ཕབ་མ་གྲུ། མཆན། ༽ ཀློང་གྲོལ༔ ས་མ་ཡཱ༔ རྒྱ་རྒྱ་རྒྱ༔ སྐུའི་རྒྱ༔ གསུང་གི་རྒྱ༔ ཐུགས་ཀྱི་རྒྱ༔ གཏད་རྒྱ༔ ཟབ་རྒྱ༔ གསང་རྒྱ༔ རྒྱ་འདི་དག་ཟངས་ཤོག་ཅན་ལས་འགྲེལ་བ་ཤེས་པར་བྱས་པས་འཐེར་རོ༔ བཀའ་འདི་གནོད་སྦྱིན་ཤན་པ་ཆེན་པོ་དང་༔ ཟླ་བའི་དབང་པོ་འཁོར་དང་བཅས་པ་དང་༔ ཁྱད་པར་ཌཀྐིའི་དབང་མོ་ཚེ་རིང་མ༔ མཆེད་ལྔ་འཁོར་དང་བཅས་ལ་གཏད་དོ་རྒྱ༔ སྒྲོ་སྐུར་བཀའ་རྐུན་དཔང་ཟ་བྱེད་པ་ཡི༔ སྙིང་ཁྲག་ཧུབ་ཀྱིས་ཐོབ་ཅིག་དམ་ཚིག་ཅན༔ ཚུལ་བཞིན་སྒྲུབ་པའི་སྐུ་ཚེ་མཛད་ཕྲིན་དང་༔ ཉམས་རྟོགས་ཡོན་ཏན་ཡར་ངོའི་ཟླ་བཞིན་སྤེལ༔ བཀྲ་ཤིས་དཔལ་གྱིས་ས་གསུམ་ཁྱབ་གྱུར་ཅིག༔ ཅེས་པ་འདི་ཡང་མི་ལོ་ཉེར་ལྔའི་གོང་ཐོག་ནས་རྒྱུད་ལ་ཐོབ་ཀྱང་སྤེལ་བའི་དུས་ལ་མ་བབས་པས་བཀའ་རྒྱས་བཏབ་ལ་སླར་རང་ལོ་སོ་བཞི་པ་ན་རྣལ་འབྱོར་བ་ཆེན་པོ་པདྨ་མ་ཏིས་བསྐུལ་ངོར་༧ག་ག་ཨ་བྷྱེས་ཡེ་ཤེས་སྒྱུ་འཕྲུལ་དྲྭ་བ་ལས་བསྒྱུར་ཞིང་གཏན་ལ་ཕབ་པའི་རྣམ་པར་རིག་པའི་འདུ་བྱེད་ཀྱི་རྫུ་འཕྲུལ་གནས་བརྟན་རྫོགས་ཆེན་དོན་གྱི་དབང་ཐོབ་འགྱུར་མེད་རྣམ་པར་རྒྱལ་པའི་སྡེའོ། །མཆན་འགྲེལ་འདི་ཡང་བསླབ་གསུམ་རྒྱན་གྱིས་མཛེས་འབར་པདྨ་བིདྱ་ནས་བསྐུལ་བའི་ངོར་ག་གཱས་སོ། །དགེའོ། །དགེའོ། །དགེའོ། །སརྦ་མངྒ་ལཾ། །

སྒྱུ་མ་གར་གྱི་ཆོ་འཕྲུལ་བརྟུལ་ཞུགས་སྤྱོད་པ་རྡོ་རྗེའི་བྲོ་བརྡུང་།

ཡང་ཟབ་སྒྱུ་འཕྲུལ་དྲྭ་བའི་ཡེ་ཤེས་ལས༔ སྒྱུ་མ་གར་གྱི་ཆོ་འཕྲུལ་བརྟུལ་ཞུགས་སྤྱོད་པ་རྡོ་རྗེའི་བྲོ་བརྡུང་བཞུགས༔

ན་མོ་གུ་རུ་པདྨ་ཀཱ་ར་ཡེ༔ སྲོག་གི་རྣལ་འབྱོར་ཉམས་ལེན་པས༔ རྡོ་རྗེའི་བྲོ་འདི་མ་བརྡུང་ན༔ སྲོག་དང་ཐུར་སེལ་འདྲེས་པ་དང་༔ ཁྱབ་བྱེད་འབྱམས་དང་གྱེན་རྒྱུ་ལྡོག༔ རྣམ་པ་བཞི་བོ་འབྱུང་བར་འགྱུར༔ སྲོག་ཐུར་འདྲེས་པར་གྱུར་བ་ན༔ རྩ་ཆུ་དགག་ཅིང་སྟོང་སྦོས་དང་༔ བརྒྱལ་ཞིང་འབམ་གྱི་ནད་དུ་འགྱུར༔ ཁྱབ་བྱེད་འབྱམས་ན་དམུ་ཆུ་དང་༔ མཛེ་དང་ཤུ་བ་ལ་སོགས་འབྱུང་༔ གྱེན་དུ་རྒྱུ་བ་ལྡོག་གྱུར་ན༔ ནང་དུ་དབུགས་སྡུད་འཆི་ཉེན་ཡོད༔ སྲོག་དང་གྱེན་རྒྱུ་འདྲེས་གྱུར་ན༔ དབུགས་མི་བདེ་ཞིང་སྟོད་འཚང་མཐར༔ སྨྱོ་ཞིང་འབོགས་པ་དག་ཏུ་འགྱུར༔ གཞན་ཡང་རྩ་རླུང་ཤ་ཐིག་འཁྱུས༔ ཁོལ་ན་རྒྱུས་འཐེན་དབུགས་མི་བདེ༔ གསང་རྫོགས་ལས། བླ་མའི་མན་ངག་མ་ཐོབ་ན། །རླུང་རོ་ལུས་ནས་གེགས་སུ་གྱུར། །མདོར་ན་རྔུབ་དགང་འཕེན་ལ་སོགས། །བཏང་རན་བཟུང་ཚད་མ་ཤེས་ཤིང་། །འཁོར་ལོའི་གོ་རིམ་ལོག་ཅིང་གེགས། །འགྱུར་ཚུལ་སྲོག་རྩར་རླུང་འགྲིམས་ཏེ། །ཤོར་བ་སྲིད་ན་སྨྱོ་ནས་འགྲོ། །ཤ་མདངས་བར་དུ་རླུང་ཤོར་ན། །མཛེ་འབྲས་དུམ་ཆུ་ཤིག་ནད་འབྱུང་། །སྙིང་ལ་ཤོར་ན་སྙིང་རླུང་འབྱུང་། །ཐུར་རླུང་ལོག་ན་ཕྱི་ས་དང་། །བྱང་སེམས་དཀར་དམར་འཛགས་པ་ཡིན། །གྱེན་དུ་ལོག་ན་མགོ་འཁོར་ཞིང་། །འཁྲུགས་དང་སྟོད་གཟེར་སྣ་གཟེར་འོང་། །ཞེས་སོ། །དེ་ལ་ལོག་གནོན་རྣམ་པ་ལྔ༔ དེ་ནས་བཅོམ་ལྡན་རིགས་དྲུག་དང་༔ ཁྲོ་བོ་ཆེན་པོ་རིགས་ལྔ་ཡི༔ བརྟུལ་ཞུགས་གྲུབ་པའི་རྡོ་རྗེའི་བྲོ༔ འཁྲུལ་པའི་རྩ་རླུང་རྣམས་ལ་བརྡུང་༔ མཐར་ནི་འབེམས་ཀྱིས་རྣལ་དུ་དབབ༔ རྣམ་པ་གསུམ་གྱིས་ལས་ཀུན་སྦྱོངས༔ ས་མ་ཡཱ༔ དང་པོ་ལོག་གནོན་རྣམ་ལྔ་ནི༔ མེད་ཐབས་མེད་དེ་རྐྱེན་ཀུན་སེལ༔ ཁྱུང་ཆེན་ལྡིང་སྟབས་ཞིང་ངར་སྒྲ་སྒྲོགས༔ ནཱ་ག་ཟས་སུ་ཟ་བ་བཞིན༔ བརྟུལ་ཞུགས་ཀུན་གྱི་ཐོག་མ་རུ༔ ལང་སྟེ་ཁུ་ཚུར་ཟུར་བརྒྱང་ལན་གསུམ་མཐར༔ ཁུ་ཚུར་གཡས་སུ་ལན་གསུམ་རྒྱུད་དུ་འཕང་༔ ཡང་ཁུ་ཚུར་གཡོན་དུ་དེ་བཞིན་ལན་གསུམ་བྱས་པའི་མཐར༔ རྐང་ལག་ལྷན་དུ་འཕར་ཏེ་འདོམ་རྒྱང་གསུམ༔ དང་བསྒྲགས་ནས་རྐང་ལག་བཞི་བོའི་རྩོས་གཉིས་ལ་བརྡུང་༔ ནས་ས་ལ་བབས་དུས་འཕར་ནས་སྔར་བཞིན་འདོམ་རྒྱང་ཡང་བརྡུང་། དེ་ལྟ་ལན་གསུམ་གྱི་མཐར། ཁྱུང་གི་ལྟ་སྟངས་གྱེན་དང་བཅས་ཏེ༔ གཟུགས་བཞི་ས་ལ་བཙུགས་ནས་སྒུར་ཞིང་འོག་རླུང་རབ་ཏུ་བཙིར༔སྟེང་གི་རླུང་ནི་ལན་གསུམ་འཐེན༔ རྐེད་པ་ཉེད་བྱས་དེ་ཡི་མཐར༔ གཡས་ཀྱིས་ས་ལ་མགོ་བོ་བཞག༔ རྐང་གཡོན་ཟུར་ཤད་ལག་པ་གཡོན༔ གྱེན་དུ་ཤད་པས་ཤེད་ཀྱིས་རྐང་ལག་གྱེན་ཐུར་དུ་འཐེན༔ ལ་གསུམ་འཕེན༔ དེ་བཞིན་གཡས་གཡོན་གོ་བརྗེ་ཞིང་༔ དེ་མཐར་བསྒྲད་བའི་འབེབས་ཆེ་ཆུང་༔ ཁྲུ་དོ་གང་མཐོ་གང་རབ་འབྲིང་དགུ་ཡིས་མཐའ་རུ་ཕྱིན༔ དེ་ཡིས་སྲོག་ཐུར་འདྲེས་པ་སེལ༔ གཉིས་པ་རྡོ་རྗེའི་མཆུ་ཡི་བྲོ༔ འཆུན་བཙལ་བསྡད་དེ་ལུས་པོ་ཤེད་ཀྱིས་ལན་གསུམ་འཐེན༔ དེ་ནས་ལང་སྟེ་ཁུ་ཚུར་སྟ་ཟུར་ཤད༔ ལན་གསུམ༔ ཁྲོ་བོ་ཆེན་པོའི་སྔགས་རྣམས་བརྗོད༔ དེ་དང་བསྒྲགས་ཏེ་གཟུགས་བཞི་ཡིས༔ བྱོལ་སོང་འགྲོས་ཀྱིས་བྲོ་རབ་བརྡུང་༔ ལང་སྟེ་ཐལ་རྡེབ་ཀྱིས་ལག་པ་གཡས་ཀྱིས་བྲང་ཁ་ནས༔ གཡོན་ཕྱོགས་ཤེད་ཀྱིས་ཕྱི་རུ་གསུམ་འཕུར༔ དེ་བཞིན་གཡོན་གྱིས་གཡས་ལ་གསུམ་དང་༔ ཁྱད་པར་རྐང་པ་གཡས་གསུམ་པ་རུ༔ བྲང་ནས་གསུམ་སྟ་ཟུར་གཡས་གསུམ་རེ། སྔ་གསུམ་ཕྱི་གསུམ་འཕུར་ཀུན་ལ་ཐལ་རྡེབ་གཡོན་པ་རྐང་བ་སྟ་ཟུར་སོགས་ལའང་གོ་བརྗེའོ༔ དམིགས་པ་ལུས་ཀྱི་ཆུ་སེར་ཀུན༔ ཡན་ལག་བཞི་ནས་དོན་པར་བསམ༔ ལུས་ཀུན་བུ་ག་མེད་པ་དང་༔ ལག་གཉིས་རྐང་གཉིས་མཐིལ་བུག་བསམ༔ ཕྱིར་བུག་པ་ནས་ཆུ་སེར་ཐམས་ཅན་ལག་པས་ཕྱེ་དུས་དེད་བཏང་བར་བསམ། དེ་ནས་སྒུར་ཆུང་དགུ་འབེབས་གོམ་པ་གསུམ་རེ་སྔུན་དུ་རྒྱུག་ནས་བརྒྱབ༔ དེ་ཡིས་ཁྱབ་བྱེད་འབྱམས་པ་སེལ༔ ཨོ་རྒྱན་པས། ཐད་ཀའི་ཟུག་གཟེར་དྲོད་དང་བྲལ་བ་ཀུན། །རང་རང་གནས་སམ་བསྐྱེད་པའི་རྩ་སྒོ་ནས། །ཟུག་རྔུ་དེ་ནི་ཐད་ཀར་དབྱུང་བར་བྱ། །ཞེས་པ་ལྟར་རོ། །གསུམ་པ་ཡཀྴ་མེ་དབལ་གྱི༔ བརྟུལ་ཞུགས་རོལ་པའི་རྟ་བྲོ་ནི༔ བསྡམས་གཤིག་ཁ་སྦུབས་ཡན་ལག་ཀུན་འཕར་དང་བཅས་རྒྱང་སྟེ༔ ཡན་ལག་ཕྱོགས་བཞིར་རབ་ཏུ་ལན་གསུམ་འཕེན༔ དེ་ནས་འདྲིལ་དང་ཆབ་གཅིག་ཏུ༔ ཐལ་རྡེབ་ཤུགས་སྒྲ་སིད་སྒྲ་ལན་དགུ་འཕེན༔ འཕར་དང་བཅས་གཡས་ཀྱི་རྐང་ལག་གཉིས་གནམ་དུ་འཕེན་དེ་བཞིན་གཡོན་དུའང་གོ་བརྗེའོ། །ཁྱད་པར་ཁ་གནམ་དུ་འཁོར་ཡན་ལག་ཀུན་བརྒྱངས་ལ། ཡན་ལག་སྔར་བཞིན་ལ༔ ལག་པས་བྲང་བརྡུང་རྐང་བ་ཡིས༔ ཤད་བརྒྱངས་སིད་སྒྲ་ཡན་ལག་ཐམས་ཅད་ཀུན༔ མགོ་བོ་མང་བོར་གྱུར་བ་དང་༔ ལུས་ན་མིག་ནི་བརྒྱ་ཕྲག་ཙམ༔ ཀུན་ཀྱང་བུག་པ་འབྲས་མེད་པ༔ སིལ་སྒྲ་དང་བཅས་སྙིང་ཐད་སོགས༔ ཀུན་ནས་རླུང་ཀུན་ཕྱི་རུ་སོང་༔ བསམ་ཞིང་མཐར་ནི་སྒལ་འབེབས་དགུ༔ དེ་ཡིས་སྲོག་གྱེན་འདྲེས་པ་སེལ༔ གྱེན་དུ་རྒྱུ་བ་ལྡོག་གྱུར་ན༔ ཕག་མོ་ནག་མོའི་བརྟུལ་ཞུགས་བྲོ༔ རང་ཉིད་རྡོ་རྗེ་ཕག་མོར་བསྒོམ༔ བསྡམ་བཤིག་སྟོང་འདྲེན་གསུམ་མམ་དགུ་གང་རུང་ངམ། བརྒྱ་དང་རྩ་བརྒྱད་བྱེད༔ དེ་ཀུན་ཤེད་ཀྱིས་ཧ་ཡིས་བརྒྱངས༔ ནམ་མཁའི་ཁམས་ལ་ཁུ་ཚུར་གནམ་རྒྱང་གིས༔ ལན་གྲངས་དགུ་མཐར་ཧ་སྤྲུགས་ཧ་གཉིས་རེ་སྤྲུགས་དགུ༔ དེ་ནས་ཕག་སྐད་ཅི་མང་འདོན༔ དང་བསྒྲགས་འབེབས་ཆེན་ལན་གསུམ་དང་༔ རྐང་འབེབས་དང་བསྒྲགས་ཕག་སྐད་ལག་འབེབས་དང་བསྒྲགས་ཕག་སྐད་ལན་གསུམ་གསུམ༔ དེ་ཡིས་གྱེན་རྒྱུ་ལྡོག་པ་སེལ༔ གཞན་ཡང་སྤྱི་ཡི་ལོག་གནོན་ལ༔ ལུས་ལ་དྲོད་ལྡན་ཆུ་ལ་ཉལ༔ གྲང་ཤུམ་ཀུན་ལ་མཉེ་བ་གནད༔ ལོག་གནོན་བརྒྱ་དང་རྩ་བརྒྱད་འདུས༔ རྩ་ཡི་སྡུན་རྒྱབ་གང་འཁྱུས་ཀྱང་༔ འཐེན་པ་རྣམ་པ་བརྒྱད་ཀྱིས་སེལ༔ རྐང་གཉིས་སྐྱིལ་ཀྲུང་ལང་སྟབས་ཀྱི་དཀྱིལ་དུ་ལག་ངར་གཉིས་བསྣོལ་ཁུ་ཚུར་བཞག་སྟེ་རྒྱབ་ཤ་གཡས་གཡོན་འཐེན་པ་གཉིས། ཡང་སྐྱིལ་ཀྲུང་གི་སྒྱིད་ཁུང་ནས་ལག་གཉིས་ཕྱིར་འཁྱུད་དེ་སྐེ་དང་ནང་དུ་འཁྱུད་དེ་སྒལ་བ་འཐེན་པ་གཉིས། གཡས་གཡོན་གྱི་རྐང་ལག་གཉིས་རེ་ནམ་མཁར་འཕང་ནས་གཞོག་གཡས་གཡོན་འཐེན་པ་གཉིས། རྐང་གཉིས་གནམ་ལ་འཕང་ནས་ལག་གཉིས་སར་གཏད་པ་དང་ལག་གཉིས་འཕེན་པ་སྟེ་སྟོད་སྨད་འཐེན་པ་གཉིས་དང་བརྒྱད་དོ། །དེ་ནི་འཐེན་པ་བརྒྱད་དོ། །གཞན་ཡང་དེ་ཉིད་ལས། དེ་སོགས་རླུང་སྐྱོན་བསམ་ཡས་ཀྱང་། །མུན་ལ་ཉི་བཞིན་དུག་སེལ་ཐབས། །རླུང་བསྒོམ་ཐུན་མཚམས་ཐམས་ཅད་དུ། །ཧཱུྃ་རིང་ལན་གསུམ་བུས་རྗེས་སུ། །ཧ་དྲག་ཡང་ཡང་སྡུད་ཅིང་གདབ། །རོ་སྟོད་ཡང་སྙམས་སེམས་ན་བཞག །དེས་ནི་རླུང་སྐྱོན་འོང་མི་སྲིད། །ཆིག་ཆོད་ཐབས་ཀྱི་རྒྱལ་པོ་ཡིན། །ཞེས་པའི་དོན། ནང་རླུང་རྣམ་པ་གང་འཁྲུགས་ཀྱང་༔ རྔུབ་པ་བསྡུ་བ་འདྲེན་པས་བརྫངས༔ ཨོ་རྒྱན་པས། ལུས་ལ་གནས་པའི་རླུང་དང་ནད་གཞིའི་རྩིག །གྱེན་དུ་འཕངས་ཞིང་འོག་ཏུ་བཅིངས་པ་དང་། །ཐད་ཀར་བསང་ཞིང་རང་སར་གཞིལ་བར་བྱ། །ཡང་ན་དགང་ཞིང་ཟུག་རྔུའི་གནས་སུ་འཕངས། །ཞེས་སོ། །དེ་ནས་བདེ་གཤེགས་རིགས་ལྔ་ལ༔ རང་རང་རིགས་ཀྱི་སེམས་དཔའ་གཉིས༔ དེ་བཞིན་སེམས་མ་རྣམ་པ་གཉིས༔ བཅོམ་ལྡན་འདས་ཀྱི་སྐུ་ལ་རྫོགས༔ རིགས་གཅིག་འཁྲུལ་འཁོར་སྤྱི་མོས་བྱེད༔ བསམ་ཞིང་ལོངས་སྤྱོད་རྫོགས་སྐུ་དེའི༔ སྐྱིལ་ཀྲུང་བསྡམས་བཤིགས་ལྔ་རེའམ༔ ཐ་མ་ཡང་ནི་རེ་རེ་ལས༔ བརྩམས་ཏེ་རྣམ་པར་སྣང་མཛད་ལ༔ མིག་ནི་ཐད་དྲང་བལྟ་དབྱིངས་མངོན་བྱེད་འཆུན་བཙལ་ཁུ་ཚུར་གདོང་བརྒྱང་གསུམ་མཐར༔ ཐལ་རྡེབ་ལག་གཉིས་བདེ་ཆེན་འཁོར་ལོ་མཉེ༔ ཕྱག་གཡས་འཁོར་ལོའི་ཕྱག་རྒྱ་གུང་མོ་གསུམ༔ གཡོན་པས་དྲིལ་བུའི་འཁྱུད་སྟབས་གསུམ༔ བཤིགས་དང་སྐྱིལ་ཀྲུང་བཤིག་རེ་བསྒྲགས༔ པ་ལན་གསུམ། དེ་མཐར་འབེབས་ཆེན་གསུམ་གྱིས་ནི༔ གཙུག་ཏོར་འཁོར་ལོའི་རྩ་འདབ་ནས༔ རང་བྱུང་ཟག་མེད་བདུད་རྩིའི་རྒྱུན༔ བདེ་ཆེན་འཁོར་ལོར་གྱེས་པ་ཡི༔ ཡན་ལག་ཉིང་ལག་རྩ་ལ་དགྲམ༔ ཉོན་མོངས་གཟུགས་སུ་འཛིན་པ་བཅོམ༔ ཆོས་དབྱིངས་ཡེ་ཤེས་ལྔ་ཆོས་དབྱིངས་ཡེ་ཤེས། དབྱིངས་རྣམ་དག་གི་ཡེ་ཤེས། དབྱིངས་ཆེན་པོའི་ཡེ་ཤེས། དབྱིངས་ཐམས་ཅད་གཉིས་སུ་མེད་པའི་ཡེ་ཤེས། དབྱིངས་ཀྱི་ཡེ་ཤེས་དང་ལྔའོ། །ལྡན་པ༔ མངོན་དུ་གྱུར་བསམ་མཉམ་པར་འཇོག༔ དེ་ནས་སྣང་བ་མཐའ་ཡས་ལ༔ མིག་ནི་གཡས་བལྟ་དབྱིངས་མངོན་བྱེད༔ འཆུན་བཙལ་ཁུ་ཚུར་གདོང་བརྒྱང་གསུམ་གྱི་མཐར༔ ཐལ་རྡེབ་ལག་པས་ལོངས་སྤྱོད་ཁོར་ལོ་མཉེ༔ ཕྱག་གཡས་པདྨའི་ཕྱག་རྒྱ་རང་ལུགས་སྲིན་ལག་གཞན་ལུགས་མཐེ་བོང་གསུམ༔ གཡོན་པས་དྲིལ་བུའི་འཁྱུད་སྟབས་གསུམ༔ བཤིགས་དང་སྐྱིལ་ཀྲུང་བཤིགས་རེ་བསྒྲགས༔ པ་ལན་གསུམ། དེ་མཐར་འབེབས་ཆེན་གསུམ་གྱིས་ནི༔ བདེ་ཆེན་འཁོར་ལོའི་རྩ་འདབ་ནས༔ རང་བྱུང་ཟག་མེད་བདུད་རྩིའི་རྒྱན༔ ལོངས་སྤྱོད་འཁོར་ལོར་གྱེས་པ་ཡི༔ ཡན་ལག་ཉིང་ལག་རྩ་ལ་དགྲམ༔ ཉོན་མོངས་འདུ་ཤེས་འཛིན་པ་བཅོམ༔ སོར་རྟོགས་ཡེ་ཤེས་ལྔ་སོ་སོར་རྟོགས་པའི་ཡེ་ཤེས། དོན་རབ་འབྱེད་བའི་ཡེ་ཤེས། རྟོགས་པ་སྐྱེ་བའི་ཡེ་ཤེས། སྒྲ་རྣམ་པར་སེལ་བའི་ཡེ་ཤེས། སྒྲ་ཚིག་ལ་མི་གནས་པར་གོ་བའི་ཡེ་ཤེས་སོ། །ལྡན་པ༔ མངོན་དུ་གྱུར་བསམ་མཉམ་པར་འཇོག༔ དེ་ནས་རྡོ་རྗེ་སེམས་དཔའ་ལ༔ མིག་ནི་ཐུར་བལྟ་དབྱིངས་མངོན་བྱེད༔ འཆུན་བཙལ་ཁུ་ཚུར་གདོང་བརྒྱང་གསུམ་གྱི་མཐར༔ ཐལ་རྡེབ་ལག་གཉིས་ཆོས་ཀྱི་འཁོར་ལོ་མཉེ༔ ཕྱག་གཡས་རྡོ་རྗེའི་ཕྱག་རྒྱ་མཛུབ་མོ་གསུམ༔ གཡོན་པས་དྲིལ་བུའི་འཁྱུད་སྟབས་གསུམ༔ བཤིགས་དང་སྐྱིལ་ཀྲུང་བཤིགས་རེ་བསྒྲགས༔ པ་ལན་གསུམ། དེ་མཐར་འབེབས་ཆེན་གསུམ་གྱིས་ནི༔ ལོངས་སྤྱོད་འཁོར་ལོའི་རྩ་འདབ་ནས༔ རང་བྱུང་ཟག་མེད་བདུད་རྩིའི་རྒྱུན༔ ཆོས་ཀྱི་འཁོར་ལོར་གྱེས་པ་ཡི༔ ཡན་ལག་ཉིང་ལག་རྩ་ལ་དགྲམ༔ ཉོན་མོངས་རྣམ་ཤེས་འཛིན་པ་བཅོམ༔ མེ་ལོང་ཡེ་ཤེས་ལྔ་ལྡན་པ༔ མེ་ལོང་ལྟ་བུ་དང་། མེ་ལོང་ཆེན་པོའི་དང་། རྟོག་མེད་གསལ་བའི་དང་། རྟོག་མེད་དྭངས་བའི་དང་། གསལ་ལ་འཛིན་མེད་ཀྱི་ཡེ་ཤེས་དང་ལྔའོ། །མངོན་དུ་གྱུར་བསམ་མཉམ་པར་འཇོག༔ དེ་ནས་རིན་ཆེན་འབྱུང་ལྡན་ལ༔ མིག་ནི་གཡོན་བལྟ་དབྱིངས་མངོན་བྱེད༔ འཆུན་བཙལ་ཁུ་ཚུར་གདོང་བརྒྱང་གསུམ་མཐར༔ ཐལ་རྡེབ་ལག་པས་ལྟེ་བའི་འཁོར་ལོ་མཉེ༔ ཕྱག་གཡས་རིན་ཆེན་ཕྱག་རྒྱ་རང་ལུགས་མཐེ་བོང་གཞན་ལུགས་སྲིན་ལག་གསུམ༔ གཡོན་པས་དྲིལ་བུའི་འཁྱུད་སྟབས་གསུམ༔ བཤིགས་དང་སྐྱིལ་ཀྲུང་བཤིག་རེ་བསྒྲགས༔ པ་ལན་གསུམ་དེ་མཐར་འབེབས་ཆེན་གསུམ་གྱིས་ནི༔ ཆོས་ཀྱི་འཁོར་ལོའི་རྩ་འདབ་ནས༔ རང་བྱུང་ཟག་མེད་བདུད་རྩིའི་རྒྱུན༔ སྤྲུལ་པའི་འཁོར་ལོར་གྱེས་པ་ཡི༔ ཡན་ལག་ཉིང་ལག་རྩ་ལ་དགྲམ༔ ཉོན་མོངས་ཚོར་བར་འཛིན་པ་བཅོམ༔ མཉམ་ཉིད་ཡེ་ཤེས་ལྔ་མཉམ་ཉིད་ཡེ་ཤེས། མཉམ་ཉིད་མ་འགགས་པའི་དང་། མི་གཡོ་མཉམ་ཉིད་ཀྱི་དང་། མི་འགགས་པ་མཉམ་ཉིད་ཀྱི་དང་། མཉམ་ཉིད་ཅི་ལའང་མི་གནས་པའི་ཡེ་ཤེས་སོ། །ལྡན་པ༔ མངོན་དུ་གྱུར་བསམ་མཉམ་པར་འཇོག༔ དེ་ནས་དོན་ཡོད་གྲུབ་པ་ལ༔ མིག་ནི་ནམ་མཁའི་དབྱིངས་སུ་བསྐྱོད༔ འཆུན་བཙལ་ཁུ་ཚུར་གདོང་བརྒྱང་གསུམ་མཐར༔ ཐལ་རྡེབ་ལག་པས་གསང་བའི་འཁོར་ལོ་མཉེ༔ ཕྱག་གཡས་རྒྱ་གྲམ་ཕྱག་རྒྱ་མཐེ་ཆུང་གསུམ༔ གཡོན་པས་དྲིལ་བུའི་འཁྱུད་སྟབས་གསུམ༔ བཤིགས་དང་སྐྱིལ་ཀྲུང་བཤིག་རེ་བསྒྲགས༔ པ་ལན་གསུམ་དེ་མཐར་འབེབས་ཆེན་གསུམ་གྱིས་ནི༔ སྤྲུལ་པའི་འཁོར་ལོའི་རྩ་འདབ་ནས༔ རང་བྱུང་ཟག་མེད་བདུད་རྩིའི་རྒྱུན༔ བདེ་སྐྱོང་འཁོར་ལོར་གྱེས་པ་ཡི༔ ཡན་ལག་ཉིང་ལག་རྩ་ལ་དགྲམ༔ ཉོན་མོངས་འདུ་བྱེད་འཛིན་པ་བཅོམ༔ བྱ་གྲུབ་ཡེ་ཤེས་ལྔ་བྱ་གྲུབ་ཡེ་ཤེས་དང་། བྱ་བྱེད་ཡེ་ཤེས་དང་། བྱ་བྲལ་ཡེ་ཤེས་དང་། བྱ་བ་ལ་མི་གནས་པའི་ཡེ་ཤེས་དང་། སྒྲོ་འདོགས་ཆོད་པའི་ཡེ་ཤེས་སོ། །ལྡན་པ༔ མངོན་དུ་གྱུར་བསམ་མཉམ་པར་འཇོག༔ དེ་ལྟར་རྣམ་པ་ལྔ་བོ་ཡིས༔ ཡེ་ཤེས་དྲོད་ཀྱི་མེ་འབར་ཞིང་༔ ཐིག་ལེ་གནས་སུ་ལེགས་པར་འཆུན༔ གལ་ཏེ་ཐིག་ལེ་ལོག་འབྱམས་ཀྱིས༔ ཁོར་བུར་ན་ཞིང་ཤ་འགུལ་རྒྱུག༔ ཐ་མ་ནད་རིགས་སྣ་ཚོགས་འགྱུར༔ ཁྱད་པར་ཁམས་འཛག་ཁམས་སྡོམ་དང་༔ ཁྲག་བཤལ་ཁྲག་སྐྱུག་སྟོད་འཚང་བྱེད༔ འདི་ཡིས་སེལ་ཞིང་གཞན་དུའང་༔ འདས་པའི་སྐུ་ལྔའི་ཡི་བཞུགས་ཚུལ་ལ༔ བསླབ་དང་འབེབས་ཀྱིས་རྩ་མདུད་གྲོལ༔ ཡོན་ཏན་ཁྱད་པར་བསམ་ལས་འདས༔ རླུང་དང་དབུ་མ་ཁམས་ཀྱི་བཅུད༔ གཙུག་ཏོར་འཁོར་ལོར་བརྟན་པར་འགྱུར༔ ས་མ་ཡཱ༔ མཐར་ཐུག་རྒྱལ་བ་རིགས་ལྔ་ཐོབ༔ ཡེ་ཤེས་ལྔ་བོ་མངོན་དུ་འགྱུར༔ སྐུ་ལྔའི་ས་ལ་སྐལ་བཟང་ཐོབ༔ ཉོན་མོངས་ལྔ་བོ་གནས་སུ་དག༔ ཤེས་རབ་ལྔ་ཡི་དཔལ་ལ་སྤྱོད༔ དེ་དག་ཀུན་གྱི་རིགས་གཅིག་ཏུ༔ རང་ཉིད་ཀུན་ཏུ་བཟང་པོ་ཡི༔ ཡེ་ཤེས་སྒྱུ་འཕྲུལ་དྲྭ་བ་ཀུན༔ ཞི་ཁྲོ་དམ་པ་རིགས་བརྒྱར་ཤར༔ བསྐྱེད་དུ་མེད་དེ་ཡེ་ཡིན་ལྷའི༔ རྣམ་པར་གསལ་ལ་མཉམ་པར་བཞག༔ འཆུན་བཙལ་ཆོས་བདུན་གཡོ་མེད་དང་༔ དེ་ནས་ལག་པ་ཁུ་ཚུར་སྟ་ཟུར་ཤད༔ གསུམ་གྱི་མཐར་ནི་མཉམ་བཞག་བྱ༔ སླར་ཡང་སེ་གོལ་རེ་རེ་གཏོགས༔ ཆོས་བདུན་གཡོ་མེད་ནས་བཟུང་འདི་ཡན་ལན་གསུམ་དེ་ནས་ལྟ་ཟུར་ཤད་གཡོན་སྟེང་མཉམ་བཞག་གསུམ༔ སླར་ཡང་སེ་གོལ་རེ་རེ་གཏོགས༔ པ་ལན་གསུམ་སྟོང་ཉིད་རྒྱས་འདེབ་ཆེན་པོར་བསམ༔ མཐར་ནི་འབེབས་ཆེན་གསུམ་འབེབས་ཆུང་གསུམ་དང་༔ བར་འབེབས་གསུམ་གྱིས་བརྟན་པར་བྱ༔ དེ་ཡང་ནང་ནས་གཏུམ་མོ་མེ་དམིགས་དང་༔ སྲོག་རླུང་གི་དམིགས་པ་མ་ཡེངས་བྱ༔ ཕྱི་ནས་ཐིག་ལེ་དགྲམ་པ་དང་༔ རླུང་ཉིད་དགྲམ་ཕྱིར་འཁྲུལ་འཁོར་རྣམ་པར་བྱ༔ ལར་ནི་དྲག་རླུང་གཡས་བཟུང་བས༔ རྟོག་པ་འགགས་ཤིང་འཇམ་རླུང་ནི༔ གཡོན་ནས་བཟུང་བས་བདེ་བ་སྐྱེས༔ མ་ནིང་རླུང་ནི་མཉམ་བཟུང་བས༔ བདེ་གསལ་མི་རྟོག་ཏིང་འཛིན་སྐྱེ༔ དེ་ལ་སོགས་པ་བསམ་མི་ཁྱབ༔ དེ་ནས་ཉོན་མོངས་གནས་གྱུར་ནས༔ ཡེ་ཤེས་ཆེན་པོ་མངོན་གྱུར་སླད༔ ཁྲོ་བོ་རོལ་པའི་བརྟུལ་ཞུགས་ནི༔ རང་ཉིད་ཆེ་མཆོག་གསལ་བ་ཡིས༔ འཆུན་བཙལ་ཐོག་ནས་སྟ་ཟུར་ཤད༔ སྡིགས་མཛུབ་གདོང་བརྒྱང་མཐར་ནི་ཁྲོ་བོ་རྣམས༔ མཆན་ཚགས་རེ་མཐར་བསྡམས་བཤིགས་གཡས་པ་ཡི༔ སྡིགས་མཛུབ་མཁའ་ལ་ལན་གསུམ་འཕང་༔ བདག་འཛིན་རུ་ཏྲའི་གཟེས་པོ་ལ༔ རྡོ་རྗེ་འབར་བས་འཚོགས་བསམ་ཞིང་༔ འཕར་གཅིག་ལས་མེད་གཡས་པས་ས་ལ་ལན་གསུམ་བསྡིགས༔ གཡོན་པས་དུང་དམར་སྟོབས་ཚུལ་དང་༔ རྡོ་རྗེ་ཕྱར་སྟབས་ལན་གསུམ་བྱེད༔ དེ་མཐར་བསྒྲད་ཆེན་འབེབས་གསུམ་གྱིས༔ འཁྲུལ་རྟོག་རྟེན་གྱི་རླུང་ཐིག་ནི༔ འཐིས་པ་གཏོར་ཏེ་ཞིག་པ་ཉིད༔ སྟོང་འདྲེན་གསུམ་གྱིས་སྒྲོགས་མདོར་དྲངས༔ ཧ་ཧའི་གད་མོ་རྒོད་པ་གསུམ༔ དང་བསྒྲགས་རྩ་ལམ་ནས་དྲངས་ཏེ༔ ཁ་སྣའི་ལམ་ནས་ཐོན་པ་ཡིས༔ ལས་རླུང་དབྱིངས་སུ་དག་པར་བསམ༔ ཡེ་རླུང་དབུ་མར་ཚུད་པར་བྱས༔ མེད་ཐབས་མེད་པའི་གནད་གཅིག་པུ༔ ཉོན་མོངས་བརྒྱད་ཁྲི་མ་རིག་རྩ༔ ཕྲ་བའི་བག་ཆགས་བཅོམ་བསམ་ཞིང་ཕཊ་དང་བསྒྲགས་ནས་འབེབས་ཆེན་གསུམ༔ དེ་ནི་གཙོ་བོའི་འཕྲུལ་འཁོར་རོ༔ དེ་ནས་བཛྲ་ཧེ་རུ་ཀ༔ དཀར་པོར་གསལ་ཞིང་འཆུན་བཙལ་ནས༔ བསྡམ་གསུམ་རྒྱ་དང་མ་བྲལ་བཞིན༔ ཞེ་སྡང་བག་ཆགས་དང་བཅས་རླུང་༔ ཕྱིར་དོན་མེ་ལོང་ཡེ་ཤེས་ཀྱི༔ དྭངས་མའི་རླུང་དང་ཐིག་ལེ་ཀུན༔ དབུ་མ་ལ་བཙུད་གཙུག་ཏོར་དཀར༔ ཡིད་ནང་ཆུད་པར་བྱ་བའི་ཕྱིར༔ སྡིགས་མཛུབ་སྐོར་རྒྱང་ལན་གསུམ་མཐར༔ བསྡམས་བཤིགས་རྡོ་རྗེ་འབར་བ་གནམ་དུ་འཕེན༔ དེ་བཞིན་ཤར་ཕྱོགས་ལན་གསུམ་འཕེན༔ ཞེ་སྡང་འབར་བའི་རུ་ཏྲའི་འཁོར༔ དགྲ་སྟྭ་འབར་བས་གཏུབ་པར་བསམ༔ བྷནྡྷ་འབར་པའི་དུང་ཁྲག་གསོལ༔ རྐང་གཡས་ལག་པར་བཅས་པ་ནི༔ ཤར་གྱི་ཕྱོགས་སུ་གཟིར་སྟངས་དང་༔ བཅས་ཏེ་ར་ལ་ར་ལ་དང་༔ འཕར་གཉིས། ཕཊ་ཕཊ་ལན་གསུམ་དང་བསྒྲགས་ཏེ༔ དེ་མཐར་རྡོ་རྗེ་ཐོག་འབེབས་གསུམ༔ དེ་ཡིས་ཞེ་སྡང་བག་ཆགས་བཅས༔ གཏོར་བསམ་སླར་ཡང་མཉམ་པར་བཞག༔ དེ་ནས་རཏྣ་ཧེ་རུ་ཀ༔ གསལ་ལ་ང་རྒྱལ་རླུང་ཐིག་གཏོར༔ མཉམ་ཉིད་ཡེ་ཤེས་རླུང་ཟིན་བསམ༔ སྡིགས་མཛུབ་ཟུར་བརྒྱང་དང་བཅས་ཏེ༔ ལག་གཡས་ཏྲི་ཤུལ་གྱིས་གཟེས་བསམ༔ ལྷོ་ཡི་ཕྱོགས་སུ་འཕར་གཅིག་དང་བཅས་སྡིགས་མཛུབ་རྐྱང་བ་ལན་གསུམ་འཕང་༔ དེ་ནས་གཉིས་འཕར་དང་བཅས་བནྡྷ་འབར་པའི་དུང་ཁྲག་གསོལ༔སྟང་སྟབས་དང་བཅས་འཕར་བསྡུས་གསུམ༔ ལྟ་སྟངས་ལྷོ་རུ་གཟིར་བ་དང་༔ ཐལ་མོ་ལན་གསུམ་བརྡབས་པ་དང་༔ བཅས་ཏེ་གཡས་བསྐོར་གཅུས་འབེབས་གསུམ༔ བརྡབས་ཤིང་ང་རྒྱལ་འཁྲུལ་འཁོར་བཅོམ༔ བསམ་ཞིང་སླར་ཡང་མཉམ་པར་བཞག༔ དེ་ནས་པདྨ་ཧེ་རུ་ཀ༔ གསལ་ལ་འདོད་ཆགས་རླུང་ཐིག་གཏོར༔ སོར་རྟོགས་ཡེ་ཤེས་རླུང་ཟིན་བསམ༔ སྡིགས་མཛུབ་སྐོར་རྒྱང་དང་བཅས་ཏེ༔ ལག་གཡས་ཁ་ཊཱྃ་གྱིས་གཟེས་བསམ༔ ནུབ་ཀྱི་ཕྱོགས་སུ་ལན་གསུམ་འཕང་༔ འཕར་བསྡུས་དུང་ཁྲག་སོགས་རཏྣ་ཧེ་རུ་ཀ་དང་མཚུངས། བྷནྡྷ་འབར་བའི་དུང་ཁྲག་གསོལ༔ སྟངས་སྟངས་དང་བཅས་འཕར་བསྡུས་གསུམ༔ ལྟ་སྟངས་ནུབ་ཏུ་གཟིར་བ་དང་༔ ཐལ་མོ་ལན་གསུམ་བརྡབས་པ་དང་༔ བཅས་ཏེ་གཡོན་བསྐོར་གཅུས་འབེབས་གསུམ༔ བརྡབས་ཤིང་འདོད་ཆགས་འཁྲུལ་འཁོར་བཅོམ༔ བསམ་ཞིང་སླར་ཡང་མཉམ་པར་བཞག༔ དེ་ནས་ཀརྨ་ཧེ་རུ་ཀ༔ གསལ་ལ་ཕྲག་དོག་རླུང་ཐིག་གཏོར༔ བྱ་གྲུབ་ཡེ་ཤེས་རླུང་ཟིན་བསམ༔ སྡིགས་མཛུབ་སྐོར་རྒྱངས་དང་བཅས་ཏེ༔ ཤར་དུ་རྡོ་རྗེ་ལང་འདུག་གསུམ༔ དཔུང་བ་གཉིས་ཁྱུང་གཤོག་ལྟར་བརྒྱང་། ཁུ་ཚུར་གཉིས་མཁལ་མ་ལ་བཅར་ལང་འདུག་ཉལ། ལྷོ་རུ་རཏྣ་ལང་འདུག་གསུམ༔ ཡང་ཁུ་ཚུར་གཉིས་མཁལ་མ་ལ་བཅར་དཔུང་བ་གཉིས་སྔུན་དུ་བརྒྱང་རྐང་བ་གཉིས་རྩོས་ལ་གཏུགས་ཏེ་འདུག་ཉལ། ནུབ་ཏུ་པདྨ་ལག་གཉིས་སྔུན་དུ་བསྐྱང་རྐང་བ་གཉིས་སྔུན་དུ་འགྲེང་སྟབས་ཀྱིས་ལང་འདུག་གསུམ༔ བྱང་དུ་རལ་གྲིའི་འཁྲུལ་འཁོར་ནི༔ ཤར་ལྷོ་གཉིས་སུ་གཡས་བསྐོར་གྱིས་ལག་གཉིས་རལ་གྲིའི་རྒྱ་དང་བཅས་འབེབས་གསུམ་ནུབ་བྱང་གཉིས་སུ་གཡོན་བསྐོར་གྱིས་ལན་གསུམ་རལ་གྲི་འབར་བས་བསྐོར་གཡུག་བྱང་དུ་གསུམ༔ ལུས་ཀྱང་ལན་དྲུག་གཡས་གཡོན་གཅུ༔ ལན་གསུམ་སྟོད་འཐེན་དང་སྟོང་འདྲེན་གསུམ་དང་༔ འཕར་འདུག་སོར་མོ་བསྣོལ་སྒྱིད་ཁུང་ནས་འཁྱུད་དེ༔ འཕོང་འབེབས་ལན་མ་གསུམ་དུ་དང་༔ རྒྱུག་འབེབས་གོམ་པ་དགུ་དྲུག་གང་རུང་གསུམ་དང་ཧེ་ཕཊ་གསུམ༔ འབེབས་ཆེན་གསུམ་གྱིས་བརྡབ་པ་ཡིས༔ ཉོན་མོངས་ཕྲག་དོག་རྟོག་ཀུན་བཅོམ༔ ཕྲིན་ལས་མཐར་ཕྱིན་གྱུར་བསམ་ཞིང་༔ དེ་ནི་ལས་ཀྱི་རིགས་ཕྱིར་འབུངས༔ བཀྲ་ཤིས་སྐོར་འབེབས་ནི། དང་པོ་གསུམ་འབེབས་ཆེན། བར་བ་གསུམ་བསྒྲད་འབེབས། ཐ་མ་གསུམ་རབ་ཐོག་འབེབས། ཐ་མ་འབེབས་ཆེན། དེ་ལྟར་གར་གྱི་རྣམ་འགྱུར་གྱི༔ སྒྱུ་མ་མཆོག་གསང་རྨད་བྱུང་བ༔ ཀུན་གྱི་མཐའ་དང་རླུང་ཐིག་མཐར༔ འབེབས་ཞེས་པ་སྟབས་ཁ་ལ་གོ་ན་ཆོག །ཀྱིས་རྣལ་དབབས་རྣམ་པ་གསུམ༔ ཉན་ཐོས་བྱང་སེམས་ཁྲོ་བོའི་ལྟ་སྟངས་སོགས་ཀྱིས་རྣལ་དུ་དབབ་པའམ་སོར་གཞུག་པའོ། །ཐབས་དེ་དག་གིས་རྩ་རླུང་ལས་སུ་རུང་བས་བདེ་སྟོང་མི་རྟོག་གིས་དྲངས་བའི༔ སྟོང་བཞིའི་སྔོན་འགྲོའི་སྣང་བཞི་དངོས༔ ཀྱིས་སྦྱོར་དངོས་པོའམ་རང་བཞིན་གྱིས༔ འདི་དག་གི་སྣང་བཞིའི་འཆར་སྟོང་བཞིའི་གྲོལ་རིམ་རྣམས་ནི་དྲུག་ཁྲིད་ལྟར་ཤེས་པར་བྱས་ནས། ལྷན་ཅིག་སྐྱེས་པས་ཡེ་ཤེས་ཉིད༔ ངོས་བཟུང་ངང་དུ་ལ་བཟླ་༡བ༔ ར་བྱ་སྟེ་དེ་ལྟ་བུའི་གནད། མེད་པར་གང་ལྟར་བྱས་ཀྱང་འཆིང་༔ དེ་ཡོད་དེ་ལ་བོགས་འདོན་མཆོག༔ དེ་ལྟ་བུའི་ཉམས་ལེན་ལ་བདེ་ཆེན་ཆོས་ཉིད་ཀྱི། གཏུམ་མོ་ཡེ་ཤེས་ཀྱི། རྩལ་སྦྱོང་བོགས་འབྱིན་གྱི་འཁོར་ལོ་སྟེ་གསུམ་དང་སྔར་བཤད་ལྟར་མན་ངག་བཞི་ཉམས་སུ་ལེན་ཚུལ་སོགས་མང་དུ་མཆིས་ཀྱང་གཏུམ་མོ་ཀུན་གྱི་རྩེ་མོར་ཕྱིན༔ དེ་ལྟར་རླུང་གི་གནད་ཀྱིས་ཞི་གནས་རྒྱུད་ལ་སྐྱེ་བས་མི་རྟོག་ཏིང་འཛིན་བཟང་པོ་དང་༔ འགྲོགས་པའི་ཡེ་ཤེས་ལྷག་མཐོང་གི༔ ཐབས་སུ་རང་ལུས་ཞུ་བདེ་༢ཡི༔ སྟེང་སྒོ་རྣམ་པར་གྲོལ་བའི་ལམ༔ དབུ་མར་ཡེ་ཤེས་རླུང་འདུས་པས༔ མཐར་ཐུག་འབྲས་བུ་མངོན་གྱུར་རྩལ༔ སྤྱན་དཔག་ཚད་བརྒྱ་སྟོང་སོགས་མཐོང་བ་ཤའི་སྤྱན། སེམས་ཅན་གྱི་འཆི་འཕོ་དང་སྐྱེ་བ་ཤེས་པ་ལྷའི་སྤྱན། ཆོས་ཉིད་ཀྱི་དོན་མཐོང་བ་ཤེས་རབ་ཀྱི་སྤྱན། སྤང་རྟོགས་མཉམ་པའི་རྒྱུད་ཚོད་ཤེས་པ་ཆོས་ཀྱི་སྤྱན། ཆོས་ཀུན་མངོན་བྱང་ཆུབ་པར་མཐོང་བ་སངས་རྒྱས་ཀྱི་སྤྱན། དང་མངོན་ཤེས་ལྷའི་མིག་རྣ་བ་སོགས་རྫུ་འཕྲུལ་དང་༔ དྲོད་རྟགས་ཕུན་ཚོགས་རྨད་པོ་ཆེ༔ ཚོགས་སྦྱོར་མཐོང་སྒོམ་མངོན་རྟོགས་རིམ༔ འཁོར་ལོའི་མདུད་པ་གྲོལ་བ་དང་༔ སྦྱོང་བའི་སྟོབས་ཀྱིས་ལྷུན་གྱིས་གྲུབ༔ ལྟེ་བ་སྤྲུལ་པའི་འཁོར་ལོ་དང་། སྙིང་ཀ་ཆོས་ཀྱི་འཁོར་ལོ། །མགྲིན་པ་ལོངས་སྤྱོད་ཀྱི་འཁོར་ལོ། །སྤྱི་བོ་བདེ་ཆེན་གྱི་འཁོར་ལོ་རྣམས་ཀྱི་རླུང་སེམས་ལས་སུ་རུང་བས་ཚོ༵གས་སྦྱོར༵་སྒོམ༵་མཐོང་སྒོམ༵་བཞིའི་མངོ༵ན་རྟོགས༵་ཀྱི་རིམ༵་པ་དྲན་པ་ཉེར་བཞག་བཞི། ཡང་དག་སྤོང་བཞི། རྫུ་འཕྲུལ་རྐང་བཞི། དབང་པོ་ལྔ་དང་། སྟོབས་ལྔ། བྱང་ཆུབ་ཀྱི་ཡན་ལག་བདུན། འཕགས་ལམ་ཡན་ལག་བརྒྱད་ཀྱི་ཡོན་ཏན་རྣམས་རྫོགས་པར་གསུངས་ཏེ། ཀུན་མཁྱེན་ཆོས་རྗེས། སྤྲུལ་བའི་འཁོར་ལོའི་རླུང་སེམས་ལས་རུང་བས། །ཚོགས་ལམ་གསུམ་པོའི་དྲོད་རྟགས་འཆར་བ་སྟེ། །ཞེས་དང་། ཆོས་ཀྱི་འཁོར་ལོའི་རླུང་སེམས་ལས་རུང་བས། །སྦྱོར་བའི་ལམ་གྱི་ཡོན་ཏན་འཆར་བ་ནི། །ཞེས་དང་། ལོངས་སྤྱོད་འཁོར་ལོའི་རླུང་སེམས་ལས་རུང་བས། །རྣམ་པར་མི་རྟོག་བདེན་མཐོང་མཐོང་ལམ་གྱི། །ཡོན་ཏན་བརྒྱ་ཕྲག་བཅུ་གཉིས་དབང་བསྒྱུར་ཞིང་། །ལོངས་སྐུའི་ཞིང་བགྲོད་རིགས་ལྔའི་སངས་རྒྱས་མཐོང་། །ཞེས་དང་། བདེ་ཆེན་འཁོར་ལོའི་རླུང་སེམས་ལས་རུང་བས། །སྒོམ་ལམ་ས་དགུའི་ཡོན་ཏན་འཆར་བ་སྟེ། །ཞེས་པ་དག་གི་ལྟར་དང་། ས་བཅུ་བོ་དེ་དག་གི་སྤང་བྱ་སྒོམ་སྤངས་ཆེ་འབྲིང་ཆུང་གསུམ་ལ་གསུམ་རེ་དབྱེ་བས་དགུ གཉེན་པོ་ཆུང་འབྲིང་ཆེ་གསུམ་ལ་གསུམ་རེ་དབྱེ་བས་དགུས་སྤོང་ཞིང་རྟོགས་པ་ཐོབ་པའང་རིམ་བཞིན་རྣམ་པར་དག་པས་ཕར་ཕྱིན་བཅུ་ལྷག་པ་ནི། ཕལ་ཆེན་ལས། ས་བཅུ་ཕ་རོལ་ཕྱིན་བཅུ་ལྷག་པར་ཆེ་བ་ཡིན། ཞེས་དང། ཀུན་རྫོབ་ཀྱི་ཡོན་ཏན་༡༢༠༠ཐོབ་པའང་། ས་དང་པོ་ལ་ཏིང་ངེ་འཛིན་བརྒྱ་ཐོབ་པ། སངས་རྒྱས་བརྒྱ་མཐོང་བ། སངས་རྒྱས་བརྒྱས་བྱིན་གྱིས་བརླབས་པར་ཤེས་པ། འཇིག་རྟེན་གྱི་ཁམས་བརྒྱར་བསྐྱོད་པ། ཞིང་བརྒྱར་འགྲོ་བ། ཞིང་བརྒྱར་སྣང་བར་འོད་ཟེར་འགྱེད་པ། སེམས་ཅན་བརྒྱ་སྨིན་པ། བསྐལ་བ་བརྒྱར་གནས་པ། སྔོན་དང་ཕྱི་མའི་མཐའ་བརྒྱ་ལ་ཡེ་ཤེས་འཇུག་པ། ཆོས་གྱི་སྒོ་བརྒྱ་འབྱེད་པ། ལུས་བརྒྱར་སྟོན་པ། ལུས་རེ་རེ་ལ་འཁོར་ཕུན་སུམ་ཚོགས་པ་བརྒྱ་བརྒྱས་བསྐོར་བར་སྟོན་པའོ། །ས་གཉིས་པ་ལ་སྟོང་ཕྲག་བཅུ་གཉིས། གསུམ་པ་ལ་འབུམ་ཕྲག་བཅུ་གཉིས། བཞི་བ་ལ་ཁྲག་ཁྲིག་བརྒྱ། ལྔ་བ་ལ་སྟོང་། དྲུག་པ་ལ་ཁྲི། བདུན་པར་བྱེ་བ་ཁྲག་ཁྲིག་ཕྲག་འབུམ། བརྒྱད་པར་སྟོང་གསུམ་འབུམ་གྱི་རྡུལ་ཕྲན་གྱི་གྲངས་སྙེད། དགུ་བར་སངས་རྒྱས་ཀྱི་ཞིང་འབུམ་ཕྲག་བཅུའི་རྡུལ་ཕྲན་གྱི་གྲངས། བཅུ་བར་ཞིང་ཁམས་བརྗོད་དུ་མེད་པ་བྱེ་བ་ཁྲག་ཁྲིག་ཕྲག་བཅུའི་རྡུལ་ཕྲན་གྱི་གྲངས་དང་མཉམ་པའོ། །དེ་དང་བརྗོད་ཚུལ་ཅུང་མི་འདྲ་བས་རྒྱུད་སྡེའི་ལུགས་གཞན་ལྟར་ན། བདེ་སྐྱོང་འཁོར་ལོའི་རྩ་རླུང་ལས་སུ་རུང་བས་ཚོགས་ལམ་དང་། འབྱོངས་ཤིང་དེར་རླུང་ཚུད་པས་སྦྱོར་ལམ་མཐར་ཕྱིན། དེ་ནས་གསང་བའི་རོ་རྐྱང་གི་རྩ་མདུད་ཡང་ཡང་ཕྲན་དང་བཅས་པ་གྲོལ་བས་དུས་༡༨༠༠སྦྱོར་གཅིག་གི་ ༼ གཞུ་ཁྱིམ་ ༽ རླུང་དང་ཐིག་ལེ་སྐ་བ་གྲངས་དེ་སྙེད་ཅིག་གསང་བའི་འཁོར་ལོར་དག་པས་རྟེན་འབྲེལ་རྒ་ཤི་འགགས་པས་ནང་གི་གནས་བཞི་བསྒྲོད་ནས་ས་དང་པོ་ཐོབ་ནས་མཐོང་སྤང་མཐའ་དག་སྤངས་ཤིང་ཀུན་རྫོབ་ཡོན་ཏན་ཐོབ་པ་དང་ ༼ འདིར་གཡོན་དང་གཡས་ཀྱི་རྩ་རླུང་ཐིག་ལེ་ཐིམ་ཞེས་གསུངས་པའང་ཡོད་དེ་རྩ་མདུད་ཉེར་གཅིག་གི་དབང་དུ་བྱས་ན་མཆན། ༽ ལྟེ་གསང་གི་འཁོར་མཚམས་ཀྱི་མདུད་པ་གྲོལ་ཤིང་དུས་༡༨༠༠སྦྱོར་གཉིས་པའི་ ༼ སྡིག་ ༽རླུང་དང་སྐྱེ་བ་འགགས། ནང་གི་ཉེ་གནས་བཞི་བསྒྲོད་ས་གཉིས་པའི་སྤངས་རྟོགས་ཐོབ། ༼ བསྒོམ་སྤང་ཆེན་པོའི་ཆེན་པོ་གཉེན་པོ་ཆུང་ངུའི་ཆུང་ངུར་མཆན། ༽ སྤྲུལ་འཁོར་གྱི་རྩ་མདུད་ཡང་ཕྲན་བཅས་པ་གྲོལ་བས་དུས་༡༨༠༠སྦྱོར་གསུམ་པའི་ ༼ སྲང་ ༽ རླུང་དང་སྲིད་པ་འགགས། ནང་གི་ཞིང་གཉིས་བསྒྲོད་ས་གསུམ་པའི་སྤངས་རྟོགས་ཐོབ། ལྟེ་སྙིང་གི་འཁོར་མཚམས་ཀྱི་མདུད་ཕྲ་རགས་གྲོལ་བས་དུས་༡༨༠༠སྦྱོར་བཞི་བའི་ ༼ བུ་མོ་ ༽རླུང་ཐིམ་ཞིང་ལེན་པ་འགགས། ནང་གི་ཉེ་ཞིང་གཉིས་བསྒྲོད་ས་བཞི་བའི་སྤངས་རྟོགས་ཐོབ། ཆོས་འཁོར་གྱི་རྩ་ཕྲ་རགས་ཀྱི་མདུད་པ་གྲོལ་པས་དུས་༡༨༠༠སྦྱོར་ལྔའི་ ༼ སེང་གེ་ ༽ རླུང་ཐིམ་ཞིང་སྲེད་པ་འགགས། ཚནྡྷོ་ཧ་གཉིས་བསྒྲོད་ནས་ས་ལྔ་བའི་སྤངས་རྟོགས་ཐོབ། མགྲིན་སྙིང་གི་འཁོར་མཚམས་ཀྱི་རྩ་ཕྲན་གྱི་མདུད་པ་གྲོལ་པས་དུས་༡༨༠༠སྦྱོར་དྲུག་པའི་ ༼ ཀརྐྚ་ ༽རླུང་ཐིམ་ཚོར་བ་འགགས་ཉེ་བའི་ཚནྡྷོ་གཉིས་བགྲོད་ས་དྲུག་པའི་སྤངས་རྟོགས་ཐོབ། ལོངས་སྤྱོད་འཁོར་ལོའི་རྩ་ཕྲ་རགས་ཀྱི་མདུད་པ་གྲོལ་བས་དུས་༡༨༠༠སྦྱོར་བདུན་པའི་ ༼ འཁྲིག་ ༽རླུང་ཐིམ་རེག་པ་འགགས། འདུ་བ་གཉིས་བསྒྲོད་ས་བདུན་པའི་སྤངས་རྟོགས་ཐོབ། སྤྱི་མགྲིན་ཀྱི་འཁོར་མཚམས་གྲོལ་ནས་དུས་༡༨༠༠སྦྱོར་བརྒྱད་པ་ ༼ གླང་ ༽ དང་སྐྱེ་མཆེད་འགགས་ཉེ་འདུ་གཉིས་བསྒྲོད་ས་བརྒྱད་པའི་སྤངས་རྟོགས་ཐོབ། བདེ་ཆེན་འཁོར་གྲོལ་བས་དུས་༡༨༠༠སྦྱོར་དགུ་བ་ ༼ ལུག་ ༽དང་མིང་གཟུགས་འགགས། དུར་ཁྲོད་གཉིས་བསྒྲོད་ས་དགུ་བའི་སྤངས་རྟོགས་ཐོབ། སྤྱི་གཙུག་གི་འཁོར་མཚམས་གྲོལ་བས་དུས་༡༨༠༠སྦྱོར་བཅུ་བ་ ༼ ཉ ༽ དང་རྣམ་ཤེས་འགགས། ཉེ་བའི་དུར་ཁྲོད་གཉིས་བགྲོད་བཅུ་བའི་སྤངས་རྟོགས་ཐོབ། དེ་ནས་གཙུག་ཏོར་གྱི་མགྲིན་པའི་རྩ་མདུད་གྲོལ་ནས་དུས་༡༨༠༠སྦྱོར་བཅུ་གཅིག་ ༼ བུམ་པ་ ༽ པ་དང་འདུ་བྱེད་འགགས། ནང་གི་འཐུང་གཅོད་བགྲོད་ནས་ས་བཅུ་གཅིག་པའི་སྤངས་རྟོགས་ཐོབ། དེ་ནས་གཙུག་ཏོར་འཁོར་ལོའི་དབྱིངས་སུ་དཀར་དམར་ཁམས་ཀྱི་རྒྱུ་བ་མཐའ་དག་དུས་༡༨༠༠སྦྱོར་བཅུ་གཉིས་ ༼ ཆུ་སྲིན་ ༽པའི་རླུང་དང་ལྷན་ཅིག་ཐིམ་པས་རྟེན་འབྲེལ་མ་རིག་པ་འགགས། ནང་གི་གནས་འཐུང་གཅོད་ཆེན་པོ་བགྲོད་དེ་བཅུ་གཉིས་པ་མ་ཆགས་པདྨ་ཅན་གྱི་ས་བགྲོད་ནས་སངས་རྒྱས་ཐོབ་པར་འདོད་པ་ཨ་ནུ་རང་རྐང་གི་ལུགས་དང་། དེ་ཡང་གཙུག་ཏོར་གྱི་སྤྱི་མགྲིན་མི་འཇོག་པར་ས་དང་པོ་ནོར་བུའི་སྤྱི་མགྲིན་ནས་འཇོག་པའི་ལུགས་རྡོ་རྗེ་སྒོས་རྒྱུད་དང་བཀའ་བརྒྱད་པད་སྡོང་བརྩེགས་པ་སོགས་ཀྱི་ལུགས་སོ། །དེ་ལས་ཚུལ་གཞན་ཡང་རབ་དགའ་ལ་གཞུའི་ཁྱིམ་༡གྱི་རླུང་འགགས་པ་བཞིན་སྡིག་ཁྱིམ་༢ཆུ་སྲིན་༣་སེང་གེ་༤བུ་མོ་༥སྲང་༦འཁྲིག་པ་༧ཉ་༨བུམ་པ་༩གླང་༡༠ཀརྚ་༡༡ལུག་ཁྱིམ་༡༢རྣམས་ས་གཉིས་སོགས་རིམ་བཞིན་སྦྱར། ངེས་བརྗོད་རྩེ་མོ་ལས། རོ་མ་རྐྱང་མ་ཀུན་འདར་མ། །མདུད་པས་འཁོར་བའི་འཁྲུལ་སྣང་སྟེ། །གྲོལ་བས་ཡེ་ཤེས་མྱ་ངན་འདས། །ཞེས་སོ། །ཨ་ནུ་རང་རྐང་ལྟར་གྱིས་འགྱུར་བ་མ་ངེས་པའི་ས་དང་བརྟེན་པ་གཞིའི་ས་གཉིས་ཚོགས་ལམ་འདུན་པ་སེམས་པའི་རྣལ་འབྱོར་གྱིས། གལ་ཆེན་སྦྱོང་བ་བསླབ་པ་རྒྱུན་བསོད་ནམས་རྟེན་གྱི་ས་གསུམ་སྦྱོར་ལམ་རིགས་ཆེན་འབྱེད་པའི། བརྟེན་པ་ཁྱད་པར་དུ་འགྲོ་བའི་ས་ནི་མཐོང་ལམ་དབུགས་ཆེན་འབྱིན་པ། དམིགས་པ་འབྲས་བུ་སྐྱེ་བའི་ས་ནི་སྒོམ་ལམ་ལུང་ཆེན་ཐོབ་པ། གནས་པ་མི་འགྱུར་བ། གདལ་པ་ཆོས་ཉིད། རྫོགས་པ་སྤྱིར་ཆུབ་ཀྱི་ས་གསུམ་ནི་མཐར་ལམ་རྩལ་ཆེན་རྫོགས་པའི་རྣལ་འབྱོར་གྱིས་བསྡུས་ཏེ། རྐྱེན་འགྱུར་ལས་གྱི་བག་ཆག་ཕྲ་རགས་གཉིས་དང་། མངོན་དུ་རྒྱུའི་བག་ཆགས་རགས་ཕྲ་འབྲིང་ཙམ་དང་བརྟེན་དེར་ཚོགས་སྤྱོད་ཀྱི་ཉེ་རྒྱུ་ལ་བརྟེན་ནས་སྣང་གསུམ་གྱི་འགྱུར་བདེ་རགས་པ་བཅོམ་སྟེ། ཀུན་འགྲོའི་སྒྲིབ་པ་དག །སྒོམ་ལམ་དུ་ལྷན་ཅིག་གནས་པའི་སྒྲིབ་པ་དག །མཐར་ལམ་དུ་བག་ཉལ་རགས་འབྲིང་ཕྲ་གསུམ་གྱི་སྒྲིབ་པ་སྤོང་ཞིང་ས་བཅུའི་རིམ་པར་གཡོ་བའི་སེམས། སྨོན་པའི་སེམས། ལྡང་བའི་སེམས། སྦྱོར་བའི་སེམས། དོན་ལ་འཇུག་པའི་སེམས། མི་འགྱུར་ལྷག་པའི་སེམས། ཡེ་ཤེས་སུ་གསལ་པའི་སེམས། འབད་མེད་དུ་གནས་པའི་སེམས། བྱར་མེད་རྫོགས་པའི་སེམས་དང་བཅུ་མཐར་ཕྱིན་པའོ། །མཐར་ཐུག་འབྲས་བུ་གམ་དུ་ཉེ༔ ཡང་ན་ཉེ་ལམ་བོགས་བཏོན་ཕྱིར་༣༔ རྒྱ་མཚོ་ལས། བྱེ་བྲག་རླུང་ལས་གྱུར་བ་ཡི། །ཡེ་ཤེས་འབྱུང་བའི་སྟེང་འོག་སྒོ། །དབུགས་དང་དགུག་པའི་ཐབས་ཉིད་དེ། །ཞེས་དང་། བཀུག་པ་གསུམ་གྱིས་སེམས་ལྔའི་རིམ། །སྐྱེས་པས་བཅུ་དྲུག་ས་ཐོབ་པའི། །རང་བཞིན་ལྷན་ཅིག་སྐྱེས་པའི་ཕྱིར། །འཆིང་བ་ཉིད་ཀྱིས་ཐར་བའི་ལམ། །ཞེས་པ་ལྟར། ཁམས་གསུམ་རོལ་པའི་རང་བཞིན་ཅན༔ ཤེར་དབང་གི་ལམ་རྒྱས་བསྡུས་གཉིས་ལས་རྒྱས་པ་ལ། ཡབ་ཡུམ་གྱི་ལུས་༡འདོད་པ་༡བྱིན་རླབས་༡མཉམ་པ་གསུམ་དང་། རིག་མ་སྐྱེས་༡སྦྱངས་ཀྱི་༣དག་པ་མན་ངག་གི་གནད་ཟིན་པ་ལྔ་དང་ལྡན་དགོས་པའང་། བཤགས་རྒྱུད་ལས། ཡུམ་བདག་འདོད་པ་བྱིན་རླབས་མཉམ་པ་དང་། །སྦྱོར་བ་དངོས་གཞི་རྗེས་ཀྱི་རྒྱས་བསྡུས་རྣམས། །ཞེས་པ་ཁུང་དོན་དུ་རྫོགས་པས་ཡབ་ཡུམ་ལྷར་གསལ་སྐུ་ཕྱག་ཆེན། སྦྱོར་ཐབས་གསུང་ཆོས་ཀྱི་ཕྱག་རྒྱ། མཁའ་གསང་རྡོ་རྗེ་པདྨ་ཐུགས་དམ་རྒྱར་བལྟ་བ་སྟེ། འདུ་ཤེས་གསུམ་གྱིས་སད་བྱས་པས༔ ཉེ་རེག་མཆོག་གྱུར་པདྨ་ཅན་དུང་ཅན་ཧསྟི་ཀ་རི་དྭགས་ཅན་མ་རི་མོ་ཅན་ནམ་སྣ་ཚོགས་མ་སྟེ་ལྔའམ། སྔ་ཕྱི་གཉིས་གཅིག་ཏུ་བསྡོམ་པས་རིགས་བཞི་བརྟགས༔ པ་དང་འགུགས་དང་དབང་ཁྲིད་སོགས་ཀྱིས་རྒྱུད་སྦྱངས་པ་དང་བརྟེན་པའི་བསྙེན་བསྒྲུབ་སྦྱོར་དུས་ཀྱི་ཡན་ལག་བཞིས༔ སྨོན་པ་འཇུག་པ་གཡོ་ལྡང་འཇིག་འཇུག་མཐར་ཕྱིན་བྱང་ཆུབ་ཏུ་སེམས་བསྐྱེད་པའི་ཐབས་ལམ་གྱི་སེམས་ལྔའི་དངོས་པོ་ལྷན་སྐྱེས་ཀྱི་ཡེ་ཤེས་ཀྱིས་རང་བཞིན་བྱང་ཆུབ་མཆོག༔ ལྷན་ཅིག་སྐྱེས་འདྲེན་པའི་ཉེ་རྒྱུའི་སྤྱོད་པ་ལ༔ སྦུབ་ཆུ་བཞིན་འདྲེན་རུས་སྦལ་ལྟ་བུར་དབབ་རྨ་བྱ་ལྟ་བུ་བཟུང་གར་མཁན་ལྟ་བུ་ལྡོག་ཞིང་ཆུ་ལྟ་བུ་འགྲམ་བསྐྱིལ་བའི༔ ཐེམ་བུ་ལྟ་བུའི་དཔེའི་མཚོན་པའི་མན་ངག་དྲུག་གམ་ཡང་ན་ལུས་གནད་སྟག་མོ་ལ་སོགས་ཐབས་ཀྱིའང་རུང་༔ བདེ་སྟོང་དེ་ལ་བརྟན་པར་བྱེད༔ དེའི་དགོས་པ་ནི། རྒྱས་པ་ལས། ཕ་རོལ་ཕྱིན་བཅུ་རྒྱུ་འབྲས་རྫོགས། །ཞེས་པ་ལྟར་རོ། །ཟླ་གསང་ལས། འདོད་ཆགས་མེད་ལ་བྱང་ཆུབ་མེད། །ཅེས་དང་། སྒྲོན་གསལ་ལས། སྐྱེས་བུ་འདོད་ཆགས་ཅན་དོན་དུ། །དེ་ཡི་བྱེད་པོ་རྡོ་རྗེ་སེམས། །ཞེས་སོ། །འདིར་ནི་དེ་དག་སྤྲོ་བྱ་མིན༔ རླུང་གི་དུས་སུ་གནད་ཀྱིས་༡ཟབ༔ ཆུ་གྲི་ཐོད་པར་སེམས་བཟུང་སྤྲོ༔ གཏུམ་མོའི་དུས་སུ་གནད་ཀྱིས་༢ཟབ༔ མེ་དང་དབུ་མ་ཆེ་ཆུང་བསྐྱེད༔ ཐིག་ལེའི་དུས་སུ་གནད་ཀྱིས་༣ཟབ༔ འགྲོ་འོང་ཆེ་ཆུང་རིམ་པས་བསླབ༔ འཁྲུལ་འཁོར་དུས་སུ་གནད་ཀྱིས་༤ཟབ༔ རྟེན་འབྲེལ་བདེན་པར་ཡིད་ཆེས་མཆོག༔ ཀུན་གྱི་དུས་སུ་གནད་ཀྱིས་༥ཟབ༔ སྤྲོས་བྲལ་རིག་པའི་ངོ་བོ་བཟུང་༔ དབབ་ལྡོག་དུས་སུ་གནད་ཀྱིས་༦ཟབ༔ བསམ་གྱིས་མི་ཁྱབ་ཐིག་ལེར་བསྲེ༔ འཕྲོ་རྒོད་དུས་སུ་གནད་ཀྱིས་༧ཟབ༔ མུན་པའི་ཁང་བར་བསྒོམ་རླུང་བཟུང་༔ རྨུགས་འཐིབ་དུས་སུ་གནད་ཀྱིས་༨ཟབ༔ ཆུར་རྐྱལ་གཅེར་བུར་རྡོ་ཐོག་སྒོམ༔ ཉོན་མོངས་དུས་སུ་གནད་ཀྱིས་༩ཟབ༔ རང་སེམས་ཐིག་ལེར་ཁྲོ་སྐུར་བཞུགས༔ རང་སེམས་ཐིག་ལེ་ཁ་དོག་ལྔ་ལྡན་གསལ་ནས་དུང་ཁང་གི་ཁྲོ་བོའི་རྗེ་བཙུན་གྱི་ཐུགས་ཀར་བསྟིམ་ཞེས་པའི་དོན། འབར་འཛག་དུས་སུ་གནད་ཀྱིས་༡༠ཟབ༔ སྔར་བསྟན་པ་ལྟར་ཆུང་བཟླས་ཨེ་ལ་ཁ་སྦྱོར་ཞིང་༔ ཡ་འབྱམས་རྨད་བྱུང་ངོ་བོ་ཉིད༔ ཐིག་ལེ་སྟོང་བ་ཆོས་ཀྱི་དབྱིངས༔ ཟིན་དུས་རིམ་བཞིན་རྩ་མདུད་གྲོལ༔ དབུ་མ་སྤྱི་འབྱམས་གཤིས་ཤོར་དང་༔ རྣལ་འབྱོར་མཚན་བཅས་ལྷ་དང་དངོས་གྲུབ་འབྲས་བུ་ཡེ་ཤེས་སེམས་དཔའ་གཞན་ལས་དང་དུས་མ་འོངས་བར་ཕྱི་ལྟ་དང་༔ སྣང་སྲིད་དག་མཉམ་གྱི་ངེས་པ་ཙམ་ཐོབ་ཀྱང་འབྲས་བུ་དང་ཆ་འདྲ་བསྒོམ་པའི་ལམ་བྱེད་ཙམ་ལས། དཔེར་ན་ཏིལ་ལ་མར་ཡོད་པར་ཤེས་ཀྱང་དེ་བཏགས་བཙག་གི་བྱ་བ་བྱེད་མི་ཤེས་པར་མར་བསྒོམ་པ་དང་འདྲ་བས། མ་ཧཱ་ཐབས་མེད་འབྲས་རློམ་པའི༔ ལྟ་བ་འཁོར་འདས་བདེན་པ་དབྱེར་མེད་ཅེས་ཟེར་ཡང་༔ རྒྱུ་འབྲས་ལྟ་ལས་རང་ངོ་ཡི༔ དབྱིངས་དང་ཡེ་ཤེས་ཟུང་འཇུག་གི༔ རྣལ་མ་རྒྱུ་འབྲས་ལྷུན་གྲུབ་པའི༔ ལྟ་བ་མ་རྟོགས་སྙིང་རྗེའི་གནས༔ དེས་ན་མ་ཧཱའི་སྒོམ་སྤྱོད་དེ་དག་ཀྱང་གཉུག་མའི་སྒོ་གསུམ་ལ་གནད་དུ་བསྣུན་པར་རེ་ཡང་༔ ཇི་བཞིན་ཉམས་སུ་མི་ལོན་པ༔ འམ་མ་ལོང་བའི་རྒྱུ་མཚན་གྱིས་ན་ཨ་ནུའི་ལམ་འདི་ལས་ཡེ་ཇི་བཞིན་པ་དང་རང་བཞིན་ལྷུན་གྲུབ་ཀྱི་སྲས་བདེ་བ་ཆེན་པོའི་དཀྱིལ་འཁོར་གསུམ་དབྱེར་མེད་པའི་ལྟ་བ། ཀུན་ལས་ཁྱད་འཕགས་བྱང་ཆུབ་སེམས་ཀྱི་སྲས༔ བདེ་བ་ཆེན་པོ་ཉིད་ལས་གཞན་པ་སུ་ཞིག་ཡོད༔ དེ་མེད་དོ། །སྒོམ་པ་རྩ་བ་བྱང་ཆུབ་སེམས་ཀྱི་དཀྱིལ་འཁོར་དེ་ཉིད་མངོན་སུམ་བཅར་ཕོག་ཏུ་འབྱིན་པའམ་སྟོན་པར་བྱེད་པ་ཉེ་རྒྱུའི་ལམ་མཆོག་ཟབ་མོ་ཐབས་དང་ཤེས་རབ་ཀྱིས་ངེས་པ་གཉིས་ལས་ཁྱད་པར་བ། ནམ་མཁའི་བ་འཇོ་སྟེང་དུ་འགྲོ་བའི་ཐབས༔ སྟེང་སྒོ་དང་། དགའ་མ་ལ་རོལ་བདེ་ཆེན་མངོན་བྱེད་ཐབས༔ འོག་སྒོ་གཉིས་པོ་འདི་དག་གིས་སྲིད་རྩ་ཁམས་ཀྱི་རྒྱུ་བ་འཆིང་བ་ནི་དཔེར་ན་དངུལ་ཆུ་མེ་དང་འཕྲད་ན་འབྲོས་བར་འགྱུར་ཀྱང་རྫས་དང་སྦྱར་བས་འཆིང་ཞིང་བཟོ་དང་སྨན་སྦྱོར་ལ་འདོད་བཞིན་བཏུབ་པ་ལྟར་རྡོ་རྗེ་པདྨ་ལ་རེག་པས་ཁམས་ཀྱི་འཛག་པའི་ཆོས་ཉིད་ཀྱང་ཐབས་ཀྱི་མཆོག་གྱུར་འདི་དག་གིས་འཕོ་མེད་དུ་འཆིང་བ་སྟེ། དེ་ཡང་སྟེང་སྒོ་རང་ལུས་དང་། ཐབས་ལྡན་གྱི་མཆོག་གིས་ཕྱག་རྒྱ་གསུམ་གྱི་མེས་ཟག་མེད་ཀྱི་ཚུལ་ཁྲིམས་རྣམ་པར་དག་པའི་འཁོར་ལོ་སྡོམ་པའི་སྐད་ཅིག་བཞིས་མངོན་དུ་འདྲེན་པའི། ཡེ་ཤེས་སུ་ལ་བཟླ་བ་འབྲས་བུ་ལམ་བྱེད་ཐབས༔ ཤེས་རབ་ཀྱིས་གྲོལ་བའི་ལམ་གྱིས་ཕྱོགས་གཅིག་དོན་གྱི་རྗེས་སུ་འཇུག་པ་ཞེས་བདེ་ཆེན་བྱང་ཆུབ་སེམས་ཀྱི་དཀྱིལ་འཁོར་རང་ཤར་བ་ལ་གནས་པ་སྟེ། སྤྱི་མདོ་ལས། ཇི་བཞིན་པ་ཡི་ཆོས་ཉིད་ལ། །དེ་བཞིན་པ་ཡི་བློ་བཞག་ན། །བརྗོད་པ་མེད་པའི་ངང་ཉིད་ལས། །མ་ཡེངས་རྒྱུན་དུ་དྲན་པའོ། །ཞེས་པའོ། །མན་ངག་སྡེ་བ་ཀུན་གྱི་བླ་ན་མེད༔ མཚན་གྱི་མེ་ཏོག་ལ་དཔེ་བྱད་ཀྱི་འབྲས་བུར་ཆགས་པའི་ལང་ཚོ་ཕུན་སུམ་ཚོགས་པའི། རྒྱ་མཚོ་ལས། ཨཱ་ལི་ཀཱ་ལིའི་བདེ་བ་ཉིད། །ཕན་ཚུན་འདྲེས་ཤིང་གཅིག་པར་ཤེས། །༼ ཡབ་ཡུམ་ཀྱི་དགའ་བ་ ༽བཅུ་དྲུག་ངོས་གཉིས་མཚན་ ༼ བཟང་སོ་གཉིས་ ༽ དང་ལྡན། །ཕྱོགས་གཅིག་ ༼ ཡབ་ཀྱི་དགའ་བ་བཅུ་དྲུག་ལ་ ༽ ཡེ་ཤེས་ལྔ་ ༼ ལྔར་ ༽ལྡན་པ། ༼ དཔེ་བྱད་ ༽ བརྒྱད་ཅུ་བཟོད་སོགས་རྒྱུ་ལས་འཕགས། །ཐིག་ལེ་གཉིས་མེད་བདེ་ཆེན་ཉིད། །ཅེས་སོ། །རྡོ་རྗེའི་གཟི་བྱིན་དང་སྟོབས་བཅུ་བོ་ནས་ཆོས་སྐུའི་ཡོན་ཏན་སུམ་ཅུ་རྩ་གཉིས་ཟུང་དུ་འཇུག་པ་བདེ་ཆེན་རྡོ་རྗེའི་སྐུ་མྱུར་འགྲུབ་པ༔ གྲོགས་ཀྱི་སྤྱོད་པ་དང་པོའི་དགེ་སྦྱོང་ལ༔ ཆགས་བྲལ་སྟེང་སྒོ་ལྟ་བའི་ཐབས་དང་གཅིག༔ བར་དུ་བརྟུལ་ཞུགས་རོ་སྙོམས་སྤྱོད་པའི་ཐབས༔ ཐ་མ་ཡིད་རིག་ཆོས་ཀྱི་ཕྱག་རྒྱར་རོལ༔ རབ་ཀྱིས་ཀླུ་དང་ཡིད་ཀྱི་མཁའ་འགྲོ་སྤྱོད༔ རྩེ་མོས་དངོས་རིག་སྣང་སྟོང་སྒྱུ་མ་ལས༔ ཀུན་བཟང་བླ་ན་མེད་པའི་སྤྱོད་པ་ཡོད༔ བྱེ་བྲག་ཏུ་དབྱེ་ན། དབྱིངས་ཡེ་གཉིས་མེད་རྟོགས་པའི་བྱིན་རླབས་ཀྱི་སྤྱོད་པ། དུག་ལྔ་ཡེ་ཤེས་ལྔའི་རང་བཞིན་དུ་དབང་བསྒྱུར་བའི་སྤྱོད་པ། འཁོར་འདས་གཉིས་མེད་དུ་རྟོགས་པ་ཐབས་ཀྱི་སྤྱོད་པ་གསུམ་འབྱུང་སྟེ། དེ་ཡང་སྤྱི་མདོ་ལས། བྱིན་གྱིས་རློབ་ཀྱིས་སྤྱོད་པ་དང་། །དབང་བསྒྱུར་ཐབས་ཀྱི་སྤྱོད་པ་སྟེ། །ཞེས་སོ། །ཐོབ་བྱའི་འབྲས་བུའང་ཀུན་ཏུ་འོད་ལས་བརྒལ༔ ཡི་གེ་འཁོར་ལོ་ཚོགས་ཆེན་ལོངས་སྐུའི་ས༔ དེ་ལ་ངལ་གསོས་རྡོ་རྗེ་འཛིན་པ་མཆོག༔ འབྲས་ཆོས་ཉེར་ལྔ་གཞི་ལ་ཡོན་ཏན་ལྷུན་གྲུབ་ཏུ་བཞུགས་པ་མངོན་དུ་གྱུར་བ་ཙམ་སྟེ། དེ་ཡང་སྤྱི་མདོ་ལས། གཞན་ལས་མ་བྱུང་རང་བྱུང་བ། །ཞེས་པས། རང་ཐོག་རང་གྲོལ་སྒྲ་མཐུན་དོན་དཔག་པ༔ མཚན་ཉིད་སོགས་ཀྱི་ས་བཅུ་དང་སྒྲ་མཐུན་ཡང་དོན་གྱིས་དཔག་པའི་ཁྱད་པར་གྲུབ་པ་ལ། མྱུར་བའི་ཚད་ཀྱང་བགྲང་བྱ་དྲུག་ན་ནི༔ ཚེ་དབང་རིག་འཛིན་དང་པོའི་ས་ལ་གནས༔ ཚོགས་སྒྲུབ་གཞན་ནི་ལམ་གྱི་ཟག་བཅས་ལམ་གྱི་རྣམ་འབྱོར་བཞི་མཐར་ཕྱིན་ནས་ངེས་རྫོགས་སུ་འཇུག་པའི་རྣལ་འབྱོར་དང་༔ འདི་ནི་གཞི་ནས་འཇུག་པའི་ཁྱད་པར་རོ༔ དེ་ཡང་མི་འཐད་པ་མ་ཡིན་ཏེ། མར་ལུགས་ཀྱི་གདམས་པ་ལ་ཐུན་གྱི་མགོ་མཇུག་ཏུ་བསྐྱེད་རྫོགས་སྒོམ་པར་གསུང་བ་དང་མཐུན་ཤས་ཆེ་བར་བྱས་ཀྱང་ཆོག་ལ། མོས་སྒོམ་ནི་སྨ་འགྱུར་ལུགས་སུའང་གྲགས་པའི་ཕྱིར་རོ། །དེ་ལྟར་ལྟ་སྤྱོད་འབྲས་བུ་བསྒོམ་པ་དང་༔ ལམ་གྱི་མྱུར་ཁྱད་རྣམ་པ་བཞིས་འཕགས་པའི༔ ཨ་ནུའི་ཨ་ཏི་རང་བྱུང་གི་སངས་རྒྱས་དྲུག་པ་རྡོ་རྗེ་འཆང་གི་གོ་སར་བླན་པར་བྱེད་པ་འདི༔ གང་ན་མ་ཧཱ་གུ་རུ་པདྨས་སྦྱར། བརྟུལ་བཞུགས་སྤྱོད་པ་རྡོ་རྗེའི་བྲོ་བརྡུང་ཞེས་བྱ་བ་རྫོགས་སོ། །པད་འབྱུང་གི༔ ཕྲིན་ལས་མཆོག་གྱུར་བདུད་འཇོམས་རྡོ་རྗེ་ཆེའི༔ རིགས་ཀྱི་མྱུ་གུར་སྐྱེ་སྲིད་ཙམ་ཐོབ་པ༔ དུས་མཐའི་སྔགས་ལ་ཅུང་ཟད་སྦྱངས་སྟངས་ཅན༔ ཞབས་རྡོལ་བུམ་པ་བཅུད་ཀྱི་སྟོང་བ་ལྟའི༔ ཡེ་ཤེས་རང་བཞིན་ཤིན་ཏུ་ན་ཕྲ་བ༔ ཀུན་སྤྱོད་བླ་མར་ཕྱིན་པའི་ཐོ་ཅོ་མཁན༔ ག་ག་ཨ་བྷྱེའི་རྩལ་ལས་རབ་ཕྱེ་ཡང་༔ ཐོས་པའི་ཚིག་གི་འབྱོར་བས་ཀྱང་མ་བརྒྱན༔ བསླབ་གསུམ་ཡོན་ཏན་མེ་ཏོག་སད་ཀྱིས་ཁྱེར༔ གསོན་གཤིན་ཟང་ཟིང་དངོས་པོ་ལ་སྤྱོད་པས༔ ཐར་པའི་སྲོག་ཙམ་ཡོད་དམ་སྙམ་དུ་གནས༔ དེ་ཕྱིར་བློ་སྐྱོན་རིམ་པ་བསམ་མི་ཁྱབ༔ མཁས་དང་གྲུབ་པའི་དབང་ཕྱུག་བཟོད་པར་འཚལ༔ མཁའ་འགྲོ་ཆོས་སྐྱོང་སྲུང་མས་ཆད་པ་ཡང་༔ འཆལ་པོ་བདག་ལ་ཕྱི་མར་བཤོལ་འཚལ་ལོ༔ འོན་ཏིང་པདྨ་མ་ཏིའི་བཀའ་མཆིད་དང་༔ ལམ་ལ་རང་གིས་ཉམས་བླངས་རྒྱུས་ཐོབ་པས༔ དེ་ཕྱིར་དགོངས་པ་ཅུང་ཟད་བསྐང་སྟངས་བགྱིས༔ སྨྲ་གཞི་ཡང་དག་ཆོས་ལས་ཕྱེ་བའི་ཕྱིར༔ འདི་ལ་དགེ་བའི་རྩ་བའང་ཡོད་ཀྱང་སྲིད་༔ ཡོད་ན་མཁའ་ཁྱབ་འགྲོ་བའི་དོན་ཕྱིར་བསྔོ༔ ཀུན་ཀྱང་བླ་མེད་བྱང་ཆུབ་མྱུར་ཐོབ་ཤོག༔ མཁའ་འགྲོའི་བརྡ་རུ་ཤར་བའི་ཤོག་སེར་ལས་ཞལ་བཤུས་བའི་ཨཀྵ་ར་འམ་ཡི་གེ་ཡི་འཕྲུལ༔ བསླབ་གསུམ་པདྨོའི་ཟེའུ་འབྲུའི་མཛེས་འབར་བ༔ འགྱུར་མེད་རྣམ་པར་རྒྱལ་བའི་ལྕུག་ཕྲན་གྱི༔ ཡལ་འདབ་ལྔ་བའི་སྣང་མཐའ་རྡོ་རྗེའི་སེམས༔ རྩོལ་པས་རྐང་འཐུང་སྤྱི་བོའི་གར་བྱེད་ཀྱིས༔ ཁྲོ་བ་མ་མཆིས་ཆགས་བྲལ་ཚུལ་དུ་བསྒྲུབ༔ དགེ་དེས་འཁོར་ལོ་ཚོགས་ཆེན་མངོན་གྱུར་དུ༔ སྤྱི་མོས་མ་རྣམས་ཕན་བདེའི་གཞིར་ཡང་ཤོག༔ དགེའོ༔ དགེའོ༔ དགེའོ༔ སརྦ་མངྒ་ལཾ༔ ༼མཆན། འདི་ཡང་དམ་པ་འགྱུར་མེད་རྣམ་པར་རྒྱལ་བ་ནས་སྔ་སོར་ཡང་ཡང་བསྐུལ་བ་དང་ཉེ་ཆར་དུའང་བསླབ་གསུམ་ལྡན་པ་པདྨ་བརྩོན་འགྲུས་ཀྱི་བཞེད་སྐོང་དུ་ག་ག་ཨ་བྷྱེས་སྨྲས་པའི་ཡི་གེ་པ་ནི་དེ་ཉིད་དོ། །༽

རྡོར་བཟླས་ལ།

རྡོར་བཟླས་ལ། རླུང་དང་སྔགས་ཀྱི་དེ་ཉིད་ཤེས་པའི་སྒོ་ནས་རྟེན་ལྷར་གསལ་བའི་སྙིང་ཀའི་པདྨའི་དབུས་ཀྱི་དྷུ་ཏཱིའི་ནང་དུ་མི་ཤིགས་དྭངས་མ་གསུམ་ལྡན་གྱི་ངོ་བོ་ཧཱུྃ་ཡིག་དཀར་པོའམ། ཐིག་ལེ་རིན་ཆེན་ཆེན་པོ་ཁ་དོག་ལྔ་དེ་བཞིན་གཤེགས་པ་ལྔའི་རང་བཞིན་ཞེས། ཁ་དོག་ལྔ་ལྡན་གང་རུང་བསྒོམ་པ་ལས་རླུང་འཇུག་གནས་ལྡང་གསུམ་བྱེད་པ་སྟེ། གཞི་ནས་རླུང་དེ་གསུམ་སྐུ་གསུམ་དང་ཡེ་ཤེས་གསུམ་གྱི་རང་བཞིན་དུ་སངས་རྒྱས་པའི་གནད་ཀྱིས་ཡི་གེ་གསུམ་གྱི་འབྲུ་ཚོགས་དང་། སྒྲ་གདངས་རླུང་སྔགས་དབྱེར་མེད་དུ་རྫོགས་པ་ངོ་ཤེས་པའི་སྦྱོར་བས་མགོན་པོ་ལྔའི་རླུང་གང་རྒྱུ་བ་ལ་འོད་དང་ཁ་དོག་གི་འབྲུ་གསུམ་སོ་སོའི་རིན་ཆེན་དང་། ཡན་ལག་གི་རླུང་ལྔ་ལ་ཐོགས་མེད་ཀྱི་བཟླས་པ་བྱས་པས་སྙིང་གི་རྩ་མདུད་གྲོལ་ནས་ཐོག་མར་རླུང་དབུ་མ་ལ་ཞུགས་པ་དང་། རྗེས་སུ་མི་ཤིགས་པ་ལ་རྣམ་རྟོག་གི་རླུང་ཐིམ་པའི་མཐུས། ངག་དང་སེམས་ཀྱི་དབེན་པ་རིམ་པར་འདྲེན་ནོ། །དེ་ཡང་གྱེན་རྒྱུ་སྲོག་འཛིན་རང་གནས་ཀྱི་ཐིག་ལེ་གསུམ་གཅིག་ཏུ་བསྡུས་པ་ཨོཾ་ཡིག་གི་དོན། མགྲིན་པར་གྱེན་རྒྱུ་དང་སྲོག་ཐུར་གསུམ་གཅིག་ཏུ་བྱས་པའམ་བསྡུས་པ་ཨཱཿཡིག་གི་དོན། སྲོག་ཐུར་གཉིས་གྱེན་རྒྱུ་དང་གསུམ་སྙིང་ཀའི་པདྨའི་དབུས་སུ་གཅིག་ཏུ་གྱུར་བ་ནི་ཐུགས་རྡོ་རྗེ་ཧཱུྃ་ཡིག་གི་དོན། འཁོར་ལོ་གསུམ་གྱི་རྩ་མདུད་གྲོལ་བའི་ནང་དུ་རླུང་རྣམས་ཚུད་པ་ཡི་གེ་གསུམ་གྱི་དོན་གསུངས་ཤིང་། དེའི་ནང་ནས་ཀྱང་གཙོ་བོ་སྙིང་ཁའི་རྩ་མདུད་གྲོལ་དཀའ་བ་དང་། དེ་གྲོལ་ན་གཞན་གཉིས་ཤུགས་ཀྱིས་གྲོལ་བ་དང་། རྣམ་རྟོག་བསྐྱེད་པའི་རླུང་དང་བཅས་པ་གཅོད་པ་དང་། རླུང་གི་དེ་ཁོ་ན་ཉིད་ལ་བརྟེན་པའི་སྔགས་ཀྱི་དེ་ཁོ་ན་ཉིད་ཀྱིས་བསྐུལ་བའི་གཏུམ་མོ་སད་པར་བྱས། དེས་བྱང་སེམས་ཞུ་བའི་བདེ་སྟོང་དབྱེར་མེད་པའི་དགའ་བཞིའམ་སྟོང་བཞིའི་ས་བོན་བསྐྱེད་པར་ནུས་པའོ། །གཞན་ཡང་ལས་བསྒྲུབ་ན་སྙིང་ཀའི་མི་ཤིགས་པ་ལས། ཞི་བ་ལ་རྡོ་རྗེ་མགོན་པོའི་རླུང་ཁ་དོག་དཀར་བོ་ཆུའི་དཀྱིལ་འཁོར། ཀུན་རྫོབ་ཀྱི་སྣ་ཁ་ནས་བྱུང་བ་ལ་འབྲུ་གསུམ་གྱི་རྡོར་བཟླས་བྱས་ན་འགྲུབ་པོ། ཚིག་ཏུ་བཏོན་པའི་ཕྱི་རོལ་གྱི་སྒྲ་དང་། དབྱིབས་ལ་མ་ཡིན་པར་ནང་གི་ངག་ཏུ་སྤྱོད་བསྡུས་ལས་གསུངས་སོ། །མི་ཤིགས་པའི་ཐིག་ལེ་དེ་ལ། གསང་འདུས་ཀྱི་རྒྱུད་ཕྱི་མ་ལས། ཡེ་ཤེས་ལྔ་ཡི་རང་བཞིན་དབུགས། །འབྱུང་བ་ལྔ་ཡི་ངོ་བོ་ཉིད། །ཀོང་བུའི་གཟུགས་ཀྱིས་བྱུང་ནས་ནི། །ཞེས་སོ། །མི་ཤིགས་པ་ལས་བྱུང་བའི་ཡི་གེ་གསུམ་པོ་འདི་སྔགས་ཐམས་ཅད་ཀྱི་གཙོ་བོ་ཡིན་པ་དང་། འབྲུ་གསུམ་ནི་སྙིང་པོ་ལ་སོགས་པའི་སྔགས་ཐམས་ཅད་ཀྱི་དེ་ཉིད་དུ་གསུངས་ཤིང་། སྔགས་བཟླས་པའི་མཐར་ཐུག་ཀྱང་རླུང་གི་རང་གདངས་ཡི་གེ་གསུམ་དུ་ཤར་བ་བཟླས་པ་ཡིན་པ་དང་། བཟླས་པ་དེའི་སྔགས་ཐམས་ཅད་ཀྱི་གསལ་བའི་ཐུགས་རྒྱུད་བསྐུལ་བ་དང་། བྱིན་གྱིས་རློབས་པ་ལྷག་དང་བཅས་འགྲུབ་ལ། རོ་རྐྱང་གི་རླུང་དབུ་མར་བསྡུས་ཤིང་མི་ཤིགས་པ་ལ་ཐིམ་པའི་ལྷན་སྐྱེས་འཆར་བ་དང་། དེ་བཞིན་གཤེགས་པ་ཐམས་ཅད་ཀྱི་སྙིང་བོ་ཡིན་པ་དང་། དོན་ནི་རླུང་གསུམ། རྟོག་པ་ནི་ཡི་གེ་གསུམ། བཟླས་པ་ནི་དེ་གཉིས་དབྱེར་མེད་དུ་བཟླས་པའི་རྡོར་བཟླས་སུ་བཤད་དོ། །སངས་རྒྱས་ལྔའི་ངོ་བོ་རླུང་ལྔ་དང་། ཡི་གེ་གསུམ་དབྱེར་མི་ཕྱེད་པར་བརྟགས་པ་དང་། རླུང་སྔགས་ཐམས་ཅད་ངོ་བོ་ཉིད་མེད་པར་རྟོགས་པའི་བཟང་པོའི་བཟླས་པ་ཞེས་གསུངས་སོ། །ཡང་ལྷ་ཐམས་ཅད་རྡོ་རྗེ་གསུམ་དུ་འདུ་ལ། དེ་དག་གི་སྔགས་ཀྱང་སྙིང་པོ་གསུམ་དུ་འདུས་པ་དང་། རིགས་ལྔའི་ངོ་བོ་རླུང་འོད་ཟེར་ལྔ་བ་དབང་དུ་འདུས་ན་མཆོག་སྟེར་བ་དང་། རང་བྱུང་གི་ཡེ་ཤེས་བྱང་ཆུབ་ཀྱི་སེམས་རླུང་སེམས་ཕྲ་བའི་མི་ཤིགས་པ་ནི། ཨ་ཐུང་གི་དེ་ཉིད་དམ་ངེས་དོན་མི་ཤིགས་པ་ལས་བྱུང་བའི་རླུང་དགུ སྲོག་རླུང་རགས་པ་དང་བཅུ་ནི་མགོན་པོ་ལྷ་མོ་དང་བཅ་པར་སངས་རྒྱས་པ་རླུང་གི་ངེས་དོན་རླུང་གི་རང་གདངས་ཨ་ལི་ཀ་ལིར་རྫོགས་པའི་སྔགས་ཀྱི་ངེས་དོན་དེ། དེ་ལྟར་ན་ལྷ་སྔགས་ཆོས་ཉིད་དབྱེར་མེད་པར་ཤེས་བའི་སྔགས་བཏུ་བ་དང་། བརྡ་གཉིས་ཀྱིས་རྡོར་བཟླས་བྱེད་ཚུལ་བསྟན། དེ་བྱས་པའི་རྒྱུ་འོད་བདེན་གཉིས་དབྱེར་མེད་པའི་བྱང་སེམས་བསྐྱེད་པ་ནི་སྔགས་ཀྱི་དོན་དང་སྔགས་ཀྱི་དོན་དམ་པ་གཉིས་སོ། །མདོར་ན་རྡོར་བཟླས་ཀྱིས་རླུང་རྣམས་དྷཱུ་ཏཱིར་བཙུད་པ་དང་མི་ཤིགས་པ་ལ་ཐིམ་པའི་འོད་གསལ་རྫོགས་པར་འཆར་བ་ན་སྔགས་ཀྱི་དེ་ཁོ་ན་ཉིད་དོ། །ཞེས་ཀྱང་ག་གཱ་ཨ་བྷྱེས་ཟིན་ཐུན་དུ་བགྱིས་པའོ། །

དུས་ཀྱི་འཁོར་ལོའི་རྫོགས་རིམ་བསྡུས་དོན་ཉི་ཟླའི་ཟེར་ཐིག

དུས་ཀྱི་འཁོར་ལོའི་རྫོགས་རིམ་བསྡུས་དོན་ཉི་ཟླའི་ཟེར་ཐིག་བཞུགས་སོ། །

སྦྱོར་བ་ཡན་ལག་དྲུག་གི་མན་ངག་ཡིད་ཆེས་གསུམ་ལྡན་གྱི་ལམ་ལ། ཐུན་མོང་གི་སྔོན་འགྲོ། སྐྱབས་སེམས་སྡིག་བཤགས་མཎྜལ་བླ་མའི་རྣལ་འབྱོར་རྣམས་དང་། ཐུན་མིན་རྟེན་བསྐྱེད་དང་ཉེར་བསྡོགས་སྒོ་གསུམ་ལོངས་སྤྱོད་དང་བཅས་པ་ལ་སྤྲོས་མེད་བཞི་ལྡན་ནམ། ལུས་བྱ་བའི། ངག་སྨྲ་བརྗོད་ཀྱི། སེམས་རྣམ་རྟོག་གིས་དབེན་པའི་སྔོན་འགྲོ་ཐུན་མིན་གྱི་མུན་པའི་ཁང་བར་ལུས་གནད་ཆོས་བདུན་གྱིས་རླུང་རོ་གསུམ་སྣ་ནས་བསལ། མཐར་རླུང་རང་བབས་སུ་བཞག །སེམས་བཟོ་བཅོས་སྤྲོ་བསྡུ་མེད་པར་ལྷོད་དེ་འོག་འགྱུ་དང་རྒྱ་འབྱམས་སུ་མ་ཤོར་བར་རྩེ་གཅིག་ཏུ་བཞག་གོ །

དངོས་གཞི་ལ་ཐོག་མར་དགེ་བ་སྐུ་རྡོ་རྗེ་བསྙེན་པའི་ཡན་ལག་སོར་བསམ་གཉིས། བར་དུ་དགེ་བ་གསུང་རྡོ་རྗེ་ཉེར་བསྒྲུབ་ཀྱི་ཡན་ལག་སྲོག་འཛིན་གཉིས། ཐ་མར་དགེ་བ་ཐུགས་རྡོ་རྗེ་སྒྲུབ་པའི་ཡན་ལག་རྗེས་དྲན། ཡེ་ཤེས་རྡོ་རྗེ་སྒྲུབ་ཆེན་གྱི་ཡན་ལག་ཏིང་ངེ་འཛིན་གཉིས་ཏེ་དྲུག་ལས།

དང་པོ་ལ། གཟུགས་མ་གྲུབ་པ་སྒྲུབ་བྱེད་སོར་སྡུད་དང་། གྲུབ་ཟིན་བརྟན་བྱེད་བསམ་གཏན་གྱི་ཡན་ལག་གོ །དང་བོ་ལ་མཚན་དོན། ས་མཚམས། ཇི་ལྟར་བསྒོམ་པའི་མཚན་ཉིད། ཚད་མ། དག་དབྱེ། འབྲས་བུའོ། །དང་པོ་ནི། སཾ་སྐྲི་ཏའི་སྐད་དུ། པྲ་ཏི་ཨ་ཧ་ར་སོ་སོར་སྡུད་པ་སྟེ། དབང་ལྔ་ཐ་མལ་གྱི་ཡུལ་སོ་སོ་ལ་འཇུག་པ་བཀག་ནས་ཡེ་ཤེས་ཀྱི་སྣང་བ་ལ་འཇུག་པའོ། །

གཉིས་པ་ནི། སྣ་བུག་གཡོན་གྱི་རླུང་གཡས་སུ་འཕོ་མ་ཐག་པའི་དུས་སུའོ། །

གསུམ་པ་ལ། རྣལ་འབྱོར་སོ་སོས་བསྒོམ་ཚུལ་དང་། སྤོགས་ཆོག་གོ ། དང་པོ་ལ་གཉིས་ལས། མཚན་མོའི་རྣལ་འབྱོར་ལ། གནས་། ལུས་གནད། ལྟ་སྟངས། དབང་པོའི་ཕྱེད་བཅིངས། མྱོང་བ་སྐྱེ་ཚུལ། དམིགས་པ་གཏོད་ཡུལ་དང་དྲུག་ལས། དང་པོ་ནི་མུན་ཁང་ངོ་། །གཉིས་པ་ནི། སྐྱིལ་ཀྲུང་ཁུ་ཚུར་བརླ་སྟེང་དུ་བཞག་པའོ། །གསུམ་པ་ནི་གཙུག་ཏོར་འཁོར་ལོ་བསྒྱུར་བའི་ལྟ་སྟངས་སོ། །བཞི་བ་ནི་ལྟ་སྟངས་སྨིན་མའི་དབུས་ཀྱི་དྷཱུ་ཏཱིའི་ནང་དུ་བཞག་པས་རྩ་བ་དང་ཡན་ལག་གི་རླུང་གཉིས་དབུ་མར་ཚུད་ནས། དཔྲལ་བར་མ་དག་པའི་གནས་སྐབས་བསྐྱེད་པའི་ཐིག་ལེ་ཡོད་པ་སོར་སྡུད་ཀྱིས་སྦྱངས་ནས་ལུས་བསྐྱེད་པའི་སྐུ་རྡོ་རྗེའི་རྣལ་འབྱོར་དུ་རིགས་སོ། །ལྔ་བ་ནི། མཚན་རྟགས་བཞི་འཆར་བའོ། །དྲུག་པ་དམིགས་པ་གཏོད་ཡུལ་ནི། ཕྱེད་བཅིངས་སུ་འདུའོ། །

གཉིས་པ་ཉིན་མོའི་རྣལ་འབྱོར། གནས་ནི་བླ་གབ་མེད་པར་ཉི་མ་ལ་རྒྱབ་ཕྱོགས་སྔ་དྲོ་དང་ཕྱི་ཕྲེད་དུ་བསྒོམས་ལུས་གནད་སོགས་གཞན་སྔ་མ་ལྟར་ལ་བསྒོམ་པས་ཉིན་རྟགས་དྲུག་གི་མྱོང་བ་སྐྱེ་བར་འགྱུར་རོ། །དེའི་རླུང་དྷཱུ་ཏཱིར་ཚུད་ཙམ་གྱིས་མཚན་རྟགས་བཞི་བ་དང་ཞུགས་གནས་ཐིམ་པས་ཉིན་རྟགས་བཞི་འཆར་རོ། །

གཉིས་པ་སྤོགས་ཆོག་ནི་བཙན་ཐབས་ཀྱི་སྦྱོར་བའི་ནཱ་དཱ་བསྒོམ་པའོ། །བཞི་བ་ཚད་མ་ནི། ཡིད་ཀྱི་དབང་པོའི་མངོན་སུམ་རྟོག་བྲལ་ལོ། །གཙོ་ཆེར་དབང་མངོན་ཏེ་ཤའི་སྤྱན་གྱི་ཞེས་སོ། །ལྔ་བ་དག་དབྱེ་ནི། ཡེ་ཤེས་ཀྱི་ཁམས་དང་། ཕུང་པོ་དག་པའོ། །དྲུག་པ་འབྲས་བུ་ནི། གནས་སྐབས་སྔགས་ཚིག་འཛིན་པ་དང་། མཐར་ཐུག་ཡེ་ཤེས་ཀྱི་ཕུང་པོ་དྲུག་དྲི་བྲལ་དུ་གྱུར་ནས་རྡོ་རྗེ་སེམས་དཔའི་སྐུ་འགྲུབ་པའོ། །

གཉིས་པ་གཟུགས་གྲུབ་པ་བརྟན་པར་བྱེད་པའི་བསམ་གཏན་ལ། དངོས་དང་། སྤོགས་ཆོག་གོ །དང་པོ་ལ་མཚན་དོན་ནི། ལེགས་སྦྱར་བས་དྷྱཱ་ནི་བསམ་གཏན་ཏེ་དམིགས་པ་ལས་མི་གཡོ་བའོ། །དུས་མཚམས་ནི། རྟགས་བཅུ་རྫོགས་ནས་སོ། །གང་སྒོམ་པའི་ཡན་ལག་ནི། གཟུགས་གྲུབ་པ་བརྟན་པའི་ཕྱིར་དམིགས་པ་སྔ་མ་དེ་ཉིད་ཀྱིས་བསྒོམ་པས་སྟོང་གཟུགས་ཕྲ་རགས་མཐོང་བའི་རྟོག༵་དཔྱོད༵་གཉིས་དང་། སེམས་དང་ལུས་ལ་ཤིན་སྦྱངས་ཐོབ་པའི་དག༵འ་བདེ༵། སེམས་རྩེ་གཅིག་པའི་ཤེས༵་རབ་སྟེ༵་ཡན་ལག་ལྔ་ལྡན་གྱི་བསམ་གཏན་གྲུབ་པའོ། སྤོགས་ཆོག་ནི། སོར་སྡུད་ལྟར་རོ། །རྟགས་ཚད་ནི། རྟགས་བཅུས་མཐོང་བ་སོར་སྡུད་ལས་ཆེས་ཆེར་འཕགས་པ་གསལ་འཚེར་འོད་ཟེར་འཕྲོ་ཞིང་གཞིག་དགའ་བའོ། །དག་བྱ་ནི་རྣམ་ཤེས་ཕུང་པོའོ། །དབྱེ་བ་ཡན་ལག་ལྔ་བ་ཡུལ་ཡུལ་ཅན་གྱིས་ཕྱེ་བའི་བཅུར་འགྱུར་རོ། །འབྲས་བུ་གནས་སྐབས་སུ་མངོན་ཤེས་ལྔ་ཐོབ། སངས་རྒྱས་ལས་ཆོས་ཉན། མཐར་ཐུག་ནམ་མཁའི་ཁམས་དང་། རྣམ་ཤེས་ཀྱི་ཕུང་བོ་སོགས་དྲུག་ཚན་གཅིག་མི་བསྐྱོད་པ་སོགས་དྲུག་ཚན་གཅིག་ཏུ་འགྲུབ་པའོ། །

གཉིས་པ་བར་དུ་དགེ་བ་གསུང་རྡོ་རྗེ་ཉེར་བསྒྲུབ་ཀྱི་ཡན་ལག་ལ་གཉིས་ལས། དང་བོ་སྲོག་རྩོལ་གྱི་ཡན་ལག་ལ། མཚན་དོན་ནི། སཾ་སྐྲི་ཏའི་སྐད་དུ་པྲཱ་ཎ་ཨ་ཡ་ཏེ་སྲོག་འགོག་པ་ཞེས་སྲོག་རྩོལ་དུ་འཇུག་ལ། རོ་རྐྱང་དུ་རྒྱུ་བའི་དཀྱིལ་འཁོར་བཅུ། དབུ་མར་འཇུག་བྱེད་སྲོག་རྩོལ་ཞེས་བྱའོ། །དུས་མཚམས་ནི་བསམ་གཏན་གྱི་རྟགས་རྫོགས་པ་ནའོ། །ཡན་ལག་དངོས་ལ། དབྱེ་བ་རྡོར་བཟླས་དང་། བུམ་ཅན་གཉིས་སོ། །བསྒོམ་ཚུལ་ནི། ཐོག་མར་གཡས་གཡོན་གྱི་རྒྱུ་བ་དངོས་སུ་མ་བཀག་པར་རྡོར་བཟླས་བསྒོམ་པའི་གནས་དང་། ལུས་གནད་མཉམ་བཞག་བྱ་བའི་ཁྱད་པར་ཙམ་ལས་སྔ་མ་ལྟར་གྱིས་ཀྱང་ཆོག་ལ། དེ་ཡང་རླུང་ཨོཾ་གྱི་གདངས་ཀྱིས་སྟོང་གཟུགས་དང་ལྷན་གཅིག་ཏུ་རྔུབ་ནས། ལྟེ་བའི་དབུ་མའི་ནང་དུ་ཧཱུྃ་གདངས་སུ་གནས། ཕྱིར་ཨཱཿགདངས་ཀྱིས་ལྡང་བའི་རླུང་དྷཱུ་ཏཱིར་ཚུད་ཅིང་། དེ་ནས་སྟོང་གཟུགས་ཁྱད་པར་རགས་སུ་བཞེངས་བ་དང་། སྟེང་འོག་གི་རླུང་སེམས་དབུ་མར་བརྟན་པར་བྱེད་ཅིང་། ཉམས་སྣང་རྩ་འཁོར་དང་དེའི་ཁ་དོག །འཇིག་རྟེན་ཁམས་མང་གི་མཐོང་སྣང་ཡང་འཆར་རོ། །རོ་རྐྱང་གི་རླུང་རྒྱུ་བ་དངོས་སུ་བཀག་ནས་བུམ་ཅན་ལ་གནས་སོགས་གཞན་རྡོར་བཟླས་ལྟར་ལ། ཕྱེད་བཅིངས་སྔོན་ལ་སྟེང་རླུང་དང་དེ་ནས་འོག་རླུང་དང་བཅས་པ་དབུ་མ་རོ་རྐྱང་གིས་བཅིངས་པའི་རྩ་འཁོར་གྱི་དབུས་དྷཱུ་ཏཱིའི་ནང་དུ་ཁ་སྦྱོར་དུ་བྱས་ནས་དེ་ལ་སེམས་གཏད་དོ། །དེས་ཁམས་མི་བདེ་བ་སོགས་བྱུང་ན་དེ་ནས་འཛིན་པ་ལ་འབུང་ངོ་། །རྟགས་ཚད་ནི་དེས་རླུང་དབུ་མར་ཚུད་པའི་རྟགས་འཁྲུལ་མེད་ཀྱི་ཉམས་མྱོང་འབྱུང་ངོ་། །དེ་ནས་ཅིས་ཀྱང་རླུང་དབུ་མར་མ་ཚུད་ན་དུ་སོགས་རྟགས་ཙམ་གྱི་ལྷན་སྐྱེས་འདྲེན་མི་ནུས་པའི་སྤོགས་ཆོག་ནཱ་ད་བསྒོམ་པའི་བཙན་ཐབས་ཞེས། རླུང་སྣ་ནས་ཧཱུྃ་གི་སྒྲ་གདངས་སུ་མོས་པས་རྔུབ། ཐུར་སེལ་ལྟེ་གོང་དུ་འཐེན་ལ་དེ་ནས་ཇེ་མཐོར་འདྲེན་པ་དྲག་ལ་རྒྱུན་རིང་དུ་འཐེན་ནོ། །རླུང་བཅུ་འགགས་པའི་དབྱེ་བ་བཅུའོ། །ཚད་མ་ནི་ཡིད་ཀྱི་མངོན་སུམ་མོ། །དག་དབྱེ་དང་འབྲས་བུ་ནི་རླུང་ཁམས་དང་འདུ་བྱེད་ཀྱི་ཕུང་བོའི་དྲུག་ཚན་གཉིས་དག་ནས་དོན་འགྲུབ་ཀྱི་དྲུག་ཚན་གཅིག་ཐོབ་པོ། །

གཉིས་པ་འཛིན་པའི་ཡན་ལག་ལ་དངོས་དང་སྤོགས་ཆོག་གོ ། དང་པོ་ལ་མཚན་དོན་ནི། ལེགས་སྦྱར་སྐད་དུ་དྷཱ་ར་འཛིན་པ་སྟེ། སྲོག་རྩོལ་གྱི་རླུང་དབུ་མར་བཙུད་པ་གནས་པར་བྱེད་པའོ། །དུས་མཚམས་ནི་སྲོག་རྩོལ་དབུ་མར་ཚུད་པའི་རྟགས་ཤར་ནས་སོ། །བསྒོམ་ཚུལ་ནི་རིམ་པར་ལྟེ། སྙིང་། མགྲིན། སྤྱི་གཙུག །གསང་རྣམས་ཀྱི་དྷུ་ཏཱིའི་ནང་དུ་གནས་སྐབས་བཞི་དང་། ནམ་མཁའ་དང་ཡེ་ཤེས་ཀྱི་ཐིག་ལེ་དྲུག་ལ་བརྟེན་ནས་རླུང་སེམས་ཤིན་ཕྲ་དང་། སྲོག་ཐུར་བསྲེས་ཏེ་ས་ཆུ་མེ་རླུང་ནམ་མཁའ་ཡེ་ཤེས་རྣམས་རིམ་པར་ཐིམ་པའི་ཚུལ་བཞིན་ཏུ་འཁོར་ལོ་དྲུག་ལ་གནད་དུ་བསྣུན་པས་དེས་རླུང་སེམས་ཕྲ་བའང་སྡུད་ནུས་པའོ། །རྟགས་ཚད་ནི་རེ་ཁ་ནག་པོ་དང་། གཏུམ་མོའི་འབར་སྣང་གཞོམ་མེད་ཀྱི་སྒྲས་ལྷག་ཞིང་། ཚད་མ་ནི་སྲོག་རྩོལ་དང་འདྲའོ། །དག་བྱ་ཚོར་ཕུང་སོགས་མེ་ཁམས་པ་དྲུག་ཚན་གཅིག །དག་བྱེད་འཁོར་ལོ་དྲུག་དུ་རླུང་འཛིན་པའི་དྲུག་གོ །འབྲས་བུ་ནི་གནས་སྐབས་བདུད་བགེགས་གཞོམས་པ་དང་། མཐར་ཐུག་མེ་ཁམས་དང་ཚོར་བའི་དྲུག་ཚན་གཉིས་དག་ནས་རིན་འབྱུང་གི་དྲུག་ཚན་གཅིག་སྒྲིབ་བྲལ་གྱི་འབྲས་བུ་ཐོབ་པོ། །

གསུམ་པ་ཐ་མར་དགེ་བ་ལ་གཉིས་ལས། དང་པོ་ཐུགས་རྡོ་རྗེ་བསྒྲུབ་པའི་ཡན་ལག་རྗེས་དྲན་ལ། མཚན་དོན་ནི། ལེགས་སྦྱར་སྐད་དུ་ཨ་ནུ་སྨྲི་ཏི་སྟེ་སྟོང་གཟུགས་ཕྱག་ཆེན་རྗེས་སུ་དྲན་པའི་དོན་ནོ། །དུས་མཚམས་ནི། རྩ་རླུང་ཐིག་ལེ་ལ་དབང་བསྒྱུར། གཏུམ་མོའི་སྣང་བ་ལྷ་སྐུར་ཤར་བ་ནའོ། །བསྒོམ་ཚུལ་དངོས་ནི། དབང་པོ་དམན་འབྲིང་མཆོག་གསུམ་ཐིག་ལེ་སླ་བ་དང་། ཅུང་ཟད་སྐ་བ་དང་། ཤིན་ཏུ་སྐ་བའི་རིམ་པས་ལས་དང་ཡེ་ཤེས། རྗེས་མཐུན་པའི་སྟོང་གཟུགས་ཕྱག་རྒྱ་ཆེན་པོ་རྣམས་ལ་སྦྱར་ནས་ཞུ་བདེ་ཁྱད་པར་ཅན་འདྲེན་པ་གོམས་སྟོབས་ཀྱིས་མཐར་ནུས་མ་བཅུའི་གྲངས་སྙེད་ཀྱི་རྣལ་འབྱོར་མའི་ཕྱག་རྒྱ་ཆེན་པོ་དངོས་ལ་སྦྱར་བས་བདེ་སྟོང་རྫོགས་པར་འདྲེན་པའོ། །རྟགས་ཚད་ནི་དགའ་བཞི་རྫོགས་པར་དྲངས་པའི་གཏུམ་མོའི་འབར་སྣང་འཕྲོ། ཀུནྡྷར་ཤུགས་ཀྱིས་ལྡོག །རང་ལུས་སྟོང་གཟུགས་ཀྱི་དཀྱིལ་འཁོར་དུ་སྣང་བ་ལ་སོགས་པའོ། །ཚད་མ་ནི། རང་རིག་མངོན་སུམ་གཙོ་ཆེ། དག་བྱ་འདུ་ཤེས་སོགས་ཆུའི་ཁམས་དྲུག །དག་བྱེད་རྗེས་དྲན་གྱི་ཡན་ལག་གི་བདེ་བ་ཐོབ་པའོ། །འབྲས་བུ་ནི། གནས་སྐབས་སེམས་ལྷའི་སྐུ་དངོས་སུ་སྨིན་པ་སོགས་དང་མཐར་ཐུག་འོད་དཔག་ཏུ་མེད་པ་སོགས་ཆུ་ཁམས། དྲུག་ཚན་གཅིག་གི་དཀྱིལ་འཁོར་མངོན་དུ་འགྱུར་བ་ཡིན་ནོ། །

གཉིས་པ་ཡེ་ཤེས་རྡོ་རྗེ་སྒྲུབ་ཆེན་གྱི་ཡན་ལག་ཏིང་ངེ་འཛིན་ལ། མཚན་དོན་ནི། སཾ་སྐྲི་ཏའི་སྐད་དུ། ས་མ་དྷི་ཞེས་པ་ཏིང་ངེ་འཛིན་ཏེ། དུས་མཚམས་ནི་རྗེས་དྲན་མཐར་ཕྱིན་ནུས་པ་ཐོབ་པའོ། །བསྒོམ་པའི་ཚུལ་ནི། སྔ་ཕྱི་གནས་འགྱུར་གྱི་ཐིག་ལེ་དབབ་བཟློག་གི་ཞུ་བདེ་འཛག་མེད་གཉིས་ཚོགས་ཀྱི་ངང་ནས་སྟོང་གཟུགས་ལ་ཤིན་ཏུ་ཆགས་པས་འཛག་མེད་སྒྲུབ་པ་དང་། རྗེས་ཐོབ་སྤྲོས་བཅས་ཀྱི་སྤྱོད་པ་སྤོགས་ཆོག་དང་བཅས་པའི་སེམས་ཤེས་རབ་འགྱུར་མེད་ཀྱི་བདེ་བ་དང་ལུས་ཐབས་རྣམ་ཀུན་མཆོག་ལྡན་གྱི་ཡེ་ཤེས་ཀ་ལ་ཙཀྲ་ཡབ་ཡུམ་དུ་ཤར་བའི་སྐུ་གཉིས་ཐ་དད་དུ་མཐོང་བས་གཉིས་སྣང་མེད་པར་ཤེས་དང་ཤེས་བྱ་རོ་གཅིག་ཏུ་མྱོང་བའི་རྩ་རླུང་ཁམས་གསུམ་གྱི་ཆ་རེ་དབུ་མར་ཐིམ་པས་ཕྱིན་ཆད་འཛག་མེད་ཐོབ་པ་དང་ངོ་བོ་གཅིག་པའི་ཡེ་ཤེས་དེ་ནི་ཏིང་ངེ་འཛིན་ནོ། །རྟགས་ནི་འཇིག་རྟེན་ཁམས་གཅིག་ནས་སྟོང་དང་ཉེར་བཞིའི་དོན་མཐོང་། ཚད་མ་ནི། གཙོ་ཆེར་རྣལ་འབྱོར་མངོན་སུམ་མོ། །དག་བྱ་གཟུགས་ཕུང་སོགས་ས་ཁམས་པ་དྲུག་ཚན་གཅིག་དག་བྱེད་རླུང་བཅུ་འགགས་པའི་ཏིང་ངེ་འཛིན་བཅུའོ། །འབྲས་བུ་ནི་གནས་སྐབས་རྣམ་སྨིན་གྱི་ལུས་དབྱིངས་སུ་ཐིམ་ནས་མཐར་ཐུག་རྒྱལ་བ་རྣམས་སྣང་སོགས་ལྷ་ས་ཁམས་པ་དྲུག་ཚན་གཅིག་གི་དཀྱིལ་འཁོར་མངོན་དུ་གྲུབ་པོ། །

དེ་ལྟར་སོར་བསམ་སྔགས་ཀྱི་ཚོགས་ལམ་ཆེན་པོ་དང་། སྲོག་རྩོལ་གྱི་སྦྱོར་ལམ། དྲོད་རྩེ་རྗེས་དྲན་ཀྱི་བཟོད་ཆོས། གསང་འཁོར་གྱི་ཕྱེད་མི་འགྱུར་བའི་བྱང་སེམས་ཀྱིས་གང་བས་ས་དང་པོ་ཐོབ། ཕྱེད་ཕྱི་མ་གང་བས་ས་གཉིས་པ་སྟེ། དེའི་འགྲེས་ཀྱིས་མས་བརྟན་དུ་འཁོར་ལོ་དྲུག་དང་ལུས་ཐམས་ཅད་གང་བས་ས་བཅུ་གསུམ་ཐོབ། ཡན་ལག་གི་རླུང་སྟོང་བརྒྱད་བརྒྱ་ཁམས་སོ་གཉིས་རྩ་ཉི་ཁྲི་དགུ་འབུམ་ལ་སོགས་པ་དག་ནས་ནང་གི་གནས་ཡུལ་བགྲོད་དེ་མཐར་ཐུག་གི་འབྲས་བུ་རྣམས་མེད་རྣམ་པ་ཅན་གྱི་རང་གཟུགས་སྐུ་དྲུག་ཡོངས་སུ་རྫོགས་པ་ཁྱབ་བདག་དུས་ཀྱི་འཁོར་ལོའི་གོ་འཕང་བརྙེས་པར་འགྱུར་རོ། །

དང་བོའི་སངས་རྒྱས་དུས་ཀྱི་འཁོར་ལོ་ཡི། །རྫོགས་པའི་རིམ་པ་སྦྱོར་བ་ཡན་ལག་དྲུག །བསྡུས་པའི་སྙིང་པོ་ཤིན་ཏུ་འཁྱེར་བདེ་བ། །འདི་ཡང་ག་ག་ཨ་བྷྱེས་སྨྲས་པའོ། །དགེའོ། །

དགྱེས་པ་རྡོ་རྗེའི་རྫོགས་རིམ་བསྡུས་པ་བདེ་ལེགས་དཔལ་ཕྲེང་།

དགྱེས་པ་རྡོ་རྗེའི་རྫོགས་རིམ་བསྡུས་པ་བདེ་ལེགས་དཔལ་ཕྲེང་བཞུགས་སོ། །

དང་པོ་སྣང་གསུམ་གྱིས་རྒྱུད་སྦྱངས་ནས་དབང་ཐོབ་ཅིང་དམ་ཚིག་ལ་གནས་པས་རྒྱུད་གསུམ་གྱི་དོན་ལ་ངེས་པར་ཐོས་བསམ་གྱིས་སྒྲོ་འདོག་བཅད་དེ། བུམ་དབང་དང་འབྲེལ་བའི་ལམ་བསྐྱེད་རིམ་ལ་བརྟན་པ་ཇི་རིགས་ཐོབ་པའི་མཐར་བསྒོམ་ཁྲིགས་ཆག་གམ། ཐུན་གྱི་མགོ་མཇུག་ཏུ་བྱས་ཀྱང་རུང་སྟེ། དེ་ནས་གསང་དབང་དང་འབྲེལ་བའི་ལམ་བདག་བྱིན་གྱིས་བརླབས་པ་ནི། ཁྲིད་དང་ཐུན་གྱི་སྔོན་འགྲོ་སྔོན་དུ་སོང་བས། མགོ་མཇིང་བསྒྱུར་བ་ལག་གཉིས་རྐང་གཉིས་སོ་སོར་བཀྲུག་པའི་ཡན་ལག་ལྔ་སྦྱང་གིས་ལུས་དང་། བཟླས་པ་ཡོད་ན་ཤུབ་བུར་མ་ཆགས་ཙམ་ལས་ངག་གི་ལས་སྤངས་བ་དང་། ཡང་བསྐྱེད་རིམ་ཙམ་ལས་རྣམ་རྟོག་གཞན་སྤངས་བའི་སེམས་ཏེ་སྦྱངས་བ་གསུམ། ལུས་ཆོས་བདུན་གཡོ་མེད་དུ་བཞག་པ། ངག་རླུང་རོ་ལན་གསུམ་འབུད་ཅིང་སེམས་ཀློད་ནས་བཟོ་མེད་དུ་བཞག་པ་གསུམ་གྱི་གནད་ལ་དབབ་པ་གསུམ་མོ། །

བསྒོམ་པ་གསུམ་ནི། བྱང་ཆུབ་སེམས་བསྐྱེད། བླ་མ་བསྒོམ་ཞིང་གསོལ་བ་གདབས་པ། ཡི་དམ་བསྒོམ་པའོ། །དེ་དག་ལ་བསམ་གཏན་གྱི་ཡན་དགུ་ཞེས་བྱའོ། །

དངོས་གཞི་ཁྱབ་བྱེད་མན་ངག་གི་གནད་རླུང་དང་། ཁྱབ་བྱ་མན་ངག་ནི་གཏུམ་མོ་དང་དེ་དག་གི་ཡན་ལག་གོ །དང་བོ་སྲོག་རྩོལ་ལམ་རྡོར་བཟླས་ལམ་བྱེད་ལ། བསམ་གཏན་ཀྱི་ཡན་ལག་དང་ལྡན་པའི་ངང་ནས་རྡོར་བཟླས་བྱ། དེས་རྒྱུ་བ་གསལ་བ་དང་། རྣམ་པ་ངེས་པ་དག་འབྱུང་ངོ་། །དེ་ལ་བརྟེན་ཅིང་བོག་དབྱུང་བའི་ཕྱིར། ཕྱིར་བཏང་བའི་མན་ངག་གསུམ། ནང་དུ་དགང་པའི་མན་ངག་གཉིས། གནས་པ་ལམ་བྱེད་ཁ་སྦྱོར་གྱི་མན་ངག་དང་བདུན་ལས། དང་པོ་ལ་སྣ་བུག་གཡས་ཀྱི་རྩོལ་བ་གོང་མཛུབ་ཀྱིས་བཀག་སྟེ། གཡོན་གྱི་སྲོག་ནས་དང་གཉིས་ཀ་ནས་ཤུགས་བསྐྱེད་དེ་བཏང་བའི་ཁ་ནས་སྒྲ་མེད་དུ་བཏང་བ་དང་བཅས་པའི་མན་ངག་དང་གསུམ་མོ། །གཉིས་པ་ལ། སྲོག་ནས་དགང་བ་ནི། སྣ་བུག་གཡས་བཀག་ལ་གཡོན་ནས་དགང་བ། ཁ་ནས་སྒྲ་མེད་དུ་དགང་བའི་མན་ངག་གཉིས་སོ། །རྩ་བའི་གཉིས་པ་ཁྱབ་བྱ་མན་ངག་གི་གནད་ལ། འཁོར་ལོ་ལ་ཡང་བརྟེན་པ་ལྔ། མར་མེ་གསོ་བ། ཚངས་པའི་ཐོག ། རྩའི་རྣལ་འབྱོར། སྲིབ་ཤིང་གི་འཁོར་ལོ། །ཐིག་༼ སྙིང་ཁའི་ཉི་ཟླ་ཁ་སྦྱོར་ལྟེ་བའི་དབང་བོ་འབར་ཞིག་གསང་གནས་བདེ་བའི་ཐིག་ལེ་མཛོད་སྤུའི་སྐྲ་དཀར་ས་བོན་མཆན། ༽ ལེའི་རྣལ་འབྱོར་སྟེ་མན་ངག་གི་གནད་༼ ལམ་སྦྱང་བ་ལྟ་བ་བསྐྱང་བ་དྲོད་བྱུང་རྒྱལ་དུ་བསྐྱང་བ་ཐུན་གྲངས་མེད་པ་ཐུན་ཚད་མེད་པ་ཡིད་འཇུག་ཡུལ་བརྟགས་པ་ཁམས་ཚོད་བཟུང་བ། ཁ་ཟས་དང་སྤྱོད་ལམ་གྱི་ལྕག་གིས་བསྣུན་བའོ། །མཆན། ༽ བརྒྱད་བརྒྱད་དང་ལྡན་པའི་ཉམས་སུ་བླང་བའོ། །འཁོར་ལོ་ལ་བརྟེན་པའི་མན་ངག་ལ་ལྟེ་བའི་འཁོར་ལོ་གཅིག་པུ་ལ་བརྟེན་པའི་རྣོ་བ་དེའི་སྟེང་དུ་སྙིང་ཀ་དང་། གཉིས་ལ་བརྟེན་པ་མྱུར་བ། མགྲིན་སྤྱི་དང་བཅས་བཞི་ལ་བརྟེན་པ་བརྟན་པ་སྟེ། འཁོར་ལོ་ལ་བརྟེན་པའི་མན་ངག་གསུམ་དང་བཅས་བརྒྱད་ཀྱི་སྟེང་དུ་མན་ངག་གི་གནད་ལ་བརྟེན་པ་ཞེས། མེ་དམར་སྐྱ། མེ་འབར་བ། ཐིག་ལེའི་འཐབ་མོ། མེའི་འཁོར་ལོ། མེ་དྲག་འབར། ཆེར་འབར། ཐམས་ཅད་འབར་བ། བདུན་གཅིག་ཏུ་བསྡོམ་པས་དགུའོ། །

ཤེར་དབང་དང་འབྲེལ་བ་དཀྱིལ་འཁོར་འཁོར་ལོ་ཐབས་ཀྱི་ལམ་ལ་སྔོན་འགྲོ་གཉིས་དང་ཡན་ལག་དགུ་རྒྱས་བསྡུས་གང་རིགས་སྔར་ལྟར་ལ། དངོས་གཞི་ལམ་རྒྱས་བསྡུས་གཉིས་དང་པོ་ལ་ལྔ་སྟེ། རིགས་མ་དག་པ་ལུས་ངག་འདོད་པ་བྱིན་རླབས་མཉམ་པ་སྟེ་གསུམ། མན་ངག་གི་གནད་ཟིན་པ་དང་ལྔའོ། །བསྡུས་པ་ལ་སྦྱོར་བ་ཐུར་སེལ་དབང་དུ་བྱ་བ། ཁ་སྦྱོར་དངོས་གཞི་ཐིག་ལེ་དབབ་བཟུང་དུས་གཅིག་ཏུ་བྱེད་པ། རྗེས་བཅད་དེ་ཐིག་ལེ་མི་འཆོར་བར་བྱའོ། །དེ་ལས་ཡས་དབབ་ཀྱི་དགའ་བཞི་ནི། ལུས་སེམས་གཉིས་ཀྱི་སྟེང་དུ་ངོ་བོ་བདེ་བར་སྐྱེའོ། །དེ་ཡང་གཟུགས་ལ་བལྟས་འཁྱུད་བཙུམ་པའི་བར་དུ་ཉམས་ཅི་སྐྱེས་དགའ་བ། དབང་པོ་གཉིས་སྤྲད་པས་མཆོག་དགའ། སྲུབ་པས་དགའ་བྲལ། ཁ་སྦྱོར་བཞི་འཛོམ་དུས་ཅི་མྱོང་ལྷན་སྐྱེས་ཏེ་གོ་རིམ་ལ་ལྟོས་བའི་དགའ་བཞི། ཡང་ལུས་ཀྱི་གནས་ཁོལ་བུ་དགའ་བ། ཕལ་ཆེར་མཆོག་དགའ། ཐམས་ཅད་ལ་དགའ་བྲལ། སྣང་བའི་དངོས་པོ་ཀུན་ལ་ཁྱབ་པར་བདེ་བ་སྐྱེས་ན་ལྷན་སྐྱེས་ཏེ་ཕྱི་གནས་ལ་ལྟོས་པ་དང་། སྤྱི་མགྲིན་སྙིང་ཀ་ལྟེ་བ་གསང་གནས་ཀྱི་བར་ནང་གནས་ལ་ལྟོས་པའི་དགའ་བཞི། ཡུལ་རྟོག་རགས་རིམ་འགོགས་པ། བདག་རྟོག་རགས་རིམ། ཕྱག་རྒྱ་ལ་ཞེན་པའི་རྣམ་རྟོག་དགའ་བ་གསུམ་གྱི་རྣམ་རྟོག་སྟེ་སྤངས་བྱ་ལ་ལྟོས་པའི་དགའ་བཞི་བདེ་བའི་ཉམས་མྱོང་ཆུང་ངུ་དང་། ཆེར་འབར་བདེ་བ་མི་རྟོག་པ་དང་ལྡན་པ་བདེ་སྟོང་གཉིས་སུ་མེད་པ་རྣམས་ངོ་བོ་ལ་ལྟོས་པའི་དགའ་བཞིའི་དབྱེ་བའོ། །དབང་བཞི་བ་དང་འབྲེལ་བའི་ལམ་རྡོ་རྗེའི་རྦ་རླབས་ནི། སྔོན་འགྲོ་བསམ་གཏན་གྱི་ཡན་ལག་དགུའོ། །དངོས་གཞི་ལ་འོག་རླུང་བསྐྱོད་པ་ལུས་ཀྱི་རྦ་རླབས་ཞེས་རླུང་ཁ་སྦྱོར་འབད་རྩོལ་དྲག་པོས་བསྒོམ་པའོ། །ངག་འདྲེན་པ་ཞི་དྲག་གི་རྦ་རླབས་ནི། ཨཱི་ཞེས་རླུང་ཆུང་ངུར་དྲངས་བ་ཞི་བར་འདྲེན་པ་དང་། ཧཱུྃ་ཞེས་དྲག་པོར་འདྲེན་པ་གཉིས། ཏིང་ངེ་འཛིན་སེམས་ཀྱི་རྦ་རླབས་ནི་ཐབས་དང་ཤེས་རབ་དང་གཉིས་ཀའི་རྒྱུད་སོ་སོར་དག་པར་བྱེད་པའི། གཡས་བཟུང་བའི་རྦ་རླབས་རངས་པ། གཡོན་འཛིན་བའི་རྦ་རླབས་རངས་པ། དབུས་གཉིས་ཀའི་རྦ་རླབས་རངས་པ་གསུམ་གྱིས་རྩ་གསུམ་དབང་དུ་འདུས། རླུང་གསུམ་ལ་དབང་ ༼ ལྡང་འཇུག་གནས་གསུམ་མཆན། ༽ ཐོབ་རྣམ་ཐར་གསུམ་མངོན་དུ་བྱེད་པའོ། །དགྱེས་རྡོར་རྩ་རྒྱུད་ལས། རྦ་རླབས་མེད་པའི་བདེ་བ་ཐོབ། རློམ་སེམས་མེད་པའི་རང་བཞིན་ཅན། ཞེས་སོ། །

གསུམ་པ་དེ་དག་གི་ཡན་ལག་ལ། བོག་འདོན་བརྒྱད་དང་གདམས་ངག་དྲུག་གེགས་སེལ་བསྲུང་བ་སུམ་ཅུའོ། །ཅེས་བཤགས་པའི་རྒྱུད་དང་། མ་མོའི་རྒྱུད་ལུང་། དགྱེས་རྡོར། ཧེ་རུ་ཀ་ཀལྤོ་ལ་སོགས་པའི་རྫོགས་རིམ་གྱི་ཚུལ་ག་གཱ་ཨ་བྷྱེས་སྨྲས་པའོ། །

ཡང་དགོན་པ་དང་འབའ་ར་བའི་ཕྱག་ཆེན་ཆོས་དྲུག

ཡང་དགོན་པ་དང་འབའ་ར་བའི་ཕྱག་ཆེན་ཆོས་དྲུག་ལས། མེ་ཐབས་དྲུག་འཆིང་ནི། ལག་པ་ཞགས་པ་ལྟར་བསྡུམས་ཏེ། མཐེ་བོང་གཡོན་པ་གཡས་ཀྱི་གུང་མོའི་བསྣོལ་བའི་མཐེབ་སྙིང་གཉིས་སྦྱར་བ་གཡས་པའི་མཛུབ་མོ་བཞིས་བསྡམས། དེའི་ཕྱི་ནས་གཡོན་པའི་མཛུབ་མོ་བཞིས་དམ་དུ་བསྡམས་པ་དེ་ལྟ་བུའི་ཕྱག་རྒྱ་ལྟེ་འོག་སོར་བཞིའི་ཐད་དུ་བཅའ། ཡང་ན་རྐང་བའི་ལོང་བུ་གཉིས་བསྣོལ་ལ་པུས་མོ་སོ་སོར་བསྒྲངས། ལག་གཉིས་བསྣོལ་བའི་གྲུ་མོ་པུས་སྟེང་དུ་བཙུག །ལག་མཐིལ་དཔུང་བ་གཡས་གཡོན་གྱི་སྟེང་དུ་སྦྱར་ཏེ། པུས་འཁྱུད་ཀྱིས་བཅིངས་བས་རྐང་བ་ལ་ཐབས་འགལ་གྲུ་གསུམ་གཉིས་ལག་པ་ལ་བཞི་སྟེ་དྲུག །ནང་དང་གསང་བའི་ཡང་དེ་ལྟར་དྲུག་ཡོད་པས་ཐབས་འགལ་གྱི་ཕྱག་རྒྱ་བཅོ་བརྒྱད་བཅའ། འབྲི་གོང་ཆོས་དྲུག་ལྟར། སྟག་མོ་ནི་བཤང་ལམ་དྲག་ཏུ་བསྡམས། རྒྱུ་མ་ཕོ་ཁར་འཐེན། ལྕེ་རྩེ་ཐུར་དུ་ལྡོག་ནས་ལྕེ་ཆུང་ལ་རེག །སྨིན་མཚམས་སུ་ཐིག་ལེ་དཀར་དམར་ལ་སེམས་གཏད། ལས་རྒྱའི་སྒྱིད་ཁུང་རང་གི་གྲུ་ཁུག་དང་སྦྱར་ནས་ཧཱུྃ་བརྗོད་དོ། །ཐོས་གྲོལ་འོག་སྒོའི་འགྲེལ་བ་ལྟར། སེང་གེའི་འགྱིང་ནི། རྐང་བའི་མཐེ་བོང་སར་བཙུགས་ཏེ་ཕྱིར་ཕུལ་སྨད་བསྐུམ་ནས་རོ་སྟོད་གསེང་ལ་བོར། མིག་མི་འགུལ། རླུང་ནང་དུ་འཐེན་ནོ། །འཇག་མའི་ཕྱུར་སྟངས་ལུས་སྤྱི་འདར་ལ་བསྐུར། རླུང་སྤྱུར་ནས་མགོ་འདར། ལུས་ཀྱི་རྩ་བཞི་བསྐུམ་པའོ། །འདྲེན་པའི་འཁྲུལ་འཁོར་སྟག་མོའི་སྐྱུག་སྟངས་ནི་པུས་བཙུག་ལག་ངར་སར་ཕབ་ཅིང་ཁུ་ཚུར་དགྱེ་བ་ཧག་གི་སྒྲས་མགོ་བོ་གྱེན་ཕྱོགས་རླུང་ཕྱིར་དབྱུང་། རྩ་མིག་ཏུ་གདབ་པ་ལ་སེང་གེ་རྣམ་གྲོལ་ནི། རྡོར་དཀྱིལ་ལུས་བསྲང་རླུང་ཕྱིར་འཛིན་མཐར་ལྟག་གིས་ཁ། གུང་མོའི་སྣ། མཛུབ་མོས་མིག་དང་མཐེ་བོང་གིས་རྣ་བ་བཀག་ལ་གཡས་གཡོན་ཏུ་སྒུར་ཞིང་དགྱེ་བ་གསུམ་གསུམ་བྱའོ། །༈སྟག་མོའི་འགྱུར་སྟངས་ནི། སྲིན་ཞལ་དྲག་ཏུ་བསྡམས། སྦྲུལ་ཚང་ཕོ་བར་འཐེན་ནེ་ཚོ་གྱེན་དྲིལ་ལྕེ་ཆུང་ལ་རེག །སྨིན་མཚམས་སུ་ཐིག་ལེ་དཀར་དམར་ལ་སེམས་གཏད་མུ་དྲའི་སྒྱིད་ཁུང་དུ་རང་གིས་གྲུ་ཁུག་སྦྱར་ངག་གི་ཧཱུཾ་བརྗོད་ཅིང་འདྲེན་པའོ། །སེང་གེའི་འགྱིང་ཚུགས་ནི་རྐང་མཐེབ་ས་ལ་བཙུག་ནས་ཕྱིར་ཕུལ། སྨད་བསྐུམས། སྟོད་གསང་ལ་བོར། མིག་མི་འགུལ། རླུང་ནང་དུ་འཐེན། རླུང་གི་རྡོ་རྗེ་སྔོན་པོ་ནས་ཙམ་བསྒོམ་པའོ། །

གཏུམ་མོའི་ལག་ལེན།

གཏུམ་མོའི་ལག་ལེན་ནི། ཟླ་བ་གཅིག་གི་དབང་དུ་བྱས་ན། ཞག་བཅུ་ལ་སྔོན་འགྲོ་དང་། ཞག་ལྔ་ལ་དབུ་མ་ཆེ་བསྐྱེད་ཆུང་བསྐྱེད། ཞག་ལྔ་ལ་རླུང་དང་ལོག་གནོན་གྱི་འབེབས། ཞག་ལྔ་ལ་གཏུམ་མོའི་མེ་དམིགས་དང་ཞི་བའི་འབེབས། ཞག་ལྔ་ལ་དཔྱིད་ཐིག་དང་ཁྲོ་བོའི་འབེབས་སོ། །ཡིད་ཀྱི་རིག་མ་བསྒོམ་པས་ལམ་སྦྱང་ན་སྔོན་འགྲོ་ཞག་ལྔ་ལས་མི་བྱེད་དོ། །

དེ་དམིགས་པ་ནི། རང་ཉིད་ཀུན་བཟང་ཆེ་མཆོག་གང་རུང་དུ་གསལ་ལ་ཡེ་ཤེས་སྒྱུ་འཕྲུལ་རོལ་པའི་ཞི་ཁྲོ་དམ་པ་རིགས་བརྒྱའི་རང་རྩལ་ཉི་མ་ལ་འོད་བཞིན་རྫོགས་པར་བསམ་ལ། ལུས་དབུས་གཡས་སུ་རོ་མ་དཀར། གཡོན་རྐྱང་མ་དམར། དབུས་དབུ་མ་མཐིང་སྐྱ་གསལ། མདུན་དུ་ཕྱོགས་བཅུའི་རྒྱལ་བའི་བྱིན་རླབས་འདུས་པ་དང་། འབྱུང་བཞིའི་བཅུད་ཀྱི་རླུང་ཁ་དོག་ལྔ་ལྡན་སྤོས་རིང་གི་དུད་པ་ལྟར་སྣ་ནས་དྲངས་ཏེ་རོ་རྐྱང་བརྒྱུད་ནས་དྭངས་མ་དབུ་མར་བསྟིམ། གཞིལ་བས་དྭངས་སྙིགས་ཕྱེས། སྙིགས་མའི་དྭངས་བཅུད་ལྟེ་འོག་ཏུ་མནན། སྙིགས་མ་ཕྱིར་འཕངས་པ་སྟེ། སྟེང་རླུང་མནན། འོག་རླུང་བསྡམས། བར་རླུང་བསྐྱིལ་བ་མཉམ་བཞག་གི་རླུང་ངོ་། །རྒྱུན་དུ་འཇམ་རླུང་བཟུང་བ་རྗེས་ཐོབ་གྱི་རླུང་ངོ་། །དེ་ནས་དབུ་མའི་ཡར་མར་གྱི་སྣ་ལས་ཨ་ཤད་དམར་པོ་དང་ཧཾ་ཡིག་དཀར་པོ་གསལ་ལ་ལྟེ་འོག་ཏུ་ཡཾ་གསལ་སྣ་ནས་རླུང་དྲངས་འོག་རླུང་བསྐུམ་པས་ཡཾ་ལས་རླུང་གཡོས། ཨ་ལས་མེ་འབར་བས་སྤྱི་བོའི་ཧཾ་ཞུ་ནས་ཐིག་ལེ་ཕྲན་དུ་བབས་པས་མེ་གསོས་བྱས་ཏེ་ཆེར་འབར་འཛག་བྱས་པས་སྙིང་ཀའི་རྩ་འདབ་ན་ཞི་བ་བཞི་བཅུ་རྩ་ལྔ། སྤྱི་བོའི་རྩ་འདབ་ན་ཁྲག་འཐུང་ཁྲོ་བོ་རོལ་བ་ལ་མཆོད་པ་འབུལ་བས་ཐུགས་བདེ་སྟོང་གི་རོས་ཚིམ་ནས་བདག་གི་མ་དག་པའི་ལུས་ངག་ཡིད་གསུམ་གྱི་སྡིག་སྒྲིབ་བག་ཆགས་དང་བཅས་པ་ཐམས་ཅད་དག་ནས་འཁོར་ལོ་ལྔ་ལ་བབས་པས་དགའ་བ་མཆོག་དགའ་ཁྱད་དགའ་ལྷན་དགའ་དགའ་བྲལ་རྣམས་ཉམས་སུ་མྱོང་བས་དབང་ལྔ་ཐོབ། ཉོན་མོངས་ལྔ་གནས་སུ་དག །ཡེ་ཤེས་ལྔ་མངོན་དུ་གྱུར་པར་བསམ་པ་དང་། ཐིག་ལེ་ལྡོག་ནས་གཙུག་ཏོར་ནས་འཁོར་ལོ་ལྔ་ལ་དགྲམ་ནས་སྤྲོས་བྲལ་གྱི་ཡེ་ཤེས་ལ་མཉམ་པར་བཞག་གོ །

ལོ་བརྒྱའི་རླུང་ལ་དུང་བདུན་བྱེ་བ་བདུན་ས་ཡ་བདུན་འབུམ་ཐེར་དྲུག་ཡོད་པའི་གྲངས་དང་མཉམ་པའི་ཆོས་ཀྱི་རྣམ་གྲངས།

ལོ་བརྒྱའི་རླུང་ལ་དུང་བདུན་བྱེ་བ་བདུན་ས་ཡ་བདུན་འབུམ་ཐེར་དྲུག་ཡོད་པའི་གྲངས་དང་མཉམ་པའི་ཆོས་ཀྱི་རྣམ་གྲངས་བྱུང་། བརྒྱད་ཁྲི་བཞི་སྟོང་ཞེས་པ་ནི་རགས་རིམ་ཙམ་གྱི་གྲངས་ཡིན་ནོ། །དེ་ལས་ལོ་བརྒྱའི་ཡེ་རླུང་ལ་ས་ཡ་ཉེར་བཞི་དང་འབུམ་ཕྲག་གསུམ་ཡོད་པའི་གྲངས་སྙེད་ཀྱི་གླེགས་བམ་གྱི་རྒྱུད་བྱུང་ངོ་། །དེའི་ན་ལོ་གསུམ་ལ་ཞག་གྲངས་སྟོང་བརྒྱད་ཅུའི་ཡེ་རླུང་ལས་དུས་ཀྱི་འཁོར་ལོ་༡༨༠༠དང་འཁོར་ལོ་སྡོམ་ཆེན་ངེས་བརྗོད་འབུམ་༧༢པས། དེ་ཐབས་ཤེས་ཟུང་དུ་སྡོམ་པའི་སོ་བདུན་ནི་འཁོར་ལོ་སྡོམ་ཆུང་བསྡུས་རྒྱུད་ཀྱི་ལྷ་གྲངས་དང་། རྣལ་འབྱོར་མ་ཀུན་ཏུ་སྤྱོད་པའི་རྒྱུད་ཀྱི་ལྷ་གྲངས་སོ། །ཕྱོགས་གསུམ་གྱི་ཞག་ཞེ་ལྔ་འཕོ་བ་བཅུ་གཉིས་ཀྱིས་བསྒྱུར་བས། སྒྱུ་འཕྲུལ་དྲྭ་བས་དཀྱིལ་འཁོར་རིམ་གསུམ་གྱི་ལྷ་ཉིས་བརྒྱ་དང་དོན་བཞི་དང་། གསང་འདུས་ཀྱི་དཀྱིལ་འཁོར་རྣམ་གྲངས་དྲུག་གི་ལྷ་ཉིས་བརྒྱ་དང་དྲུག་ཅུ་རྩ་བཞི་བྱུང་ངོ་། །སྔ་ཕྱི་སྡོམ་ན་ལྔ་བརྒྱ་དང་སུམ་ཅུ་སོ་བརྒྱད་ཡིན་ནོ། །ག་གཱས་སོ། །

སྟོང་༡བརྒྱད་བརྒྱ། ཤར་ཕྱོགས་མདུན་དུ་བྱས་ནས་རླུང་། གཡས་མེ། རྒྱབ་ས། གཡོན་ཆུ། ལག་གཡས་རླུང་། གཡོན་མེ། རྐང་གཡས་ས། གཡོན་ཆུའོ། །གྱེན་རྒྱུ་མེ། ཐུར་སེལ་ས། སྲོག་རླུང་མཁའ། ཁྱབ་བྱེད་ཆུ་དང་ནམ་མཁར བཤད་པ་གཉིས། མེ་མཉམ་རླུང་། ཡི་གེའི་རྣམ་པ། ཨེ་སྲོག །༼ ནམ་མཁའ་ ༽ ལ་ཐུར་སེལ། རི་གྱེན་རྒྱུ། ཨི་མེ་མཉམ། ཨུ་ཁྱབ་བྱེད་དོ། །ཀླུ་བའམ་ནམ་མཁའ་ ༼ རྒྱུ་བ་ ༽ ཨཱ། རུས་སྦལ་རླུང་༼ རྣམ་རྒྱུ ༽ཨེ། རྩངས་བ་མེ་ ༼ ཡང་དག་རྒྱུ ༽ ཨཱར། ལྷ་སྦྱིན་ཆུ་ ༼ རབ་ཏུ་རྒྱུ ༽ ཨ་ཨཽ། ནོར་རྒྱལ་ལམ་གཞུ་རྒྱལ་ལས་ ༼ ངེས་པར་རྒྱུ་བ ༽ ཨ་ལོ། ༼ གཉེ་མ་སྦྲུལ་ལྟ་བུ། མཆིན་པ་རུ་སྦལ་ལྟ་བུ། གློ་བ་རྩངས་བ་ལྟ་བུ། སྙིང་ལྷ་སྦྱིན་བུ་མོའི་གོ་ཟུ་གྱོན་པ་ལྟ་བུ། མཁའ་ལམ་གཞུའི་དབྱིབས་འདྲ། ༽ ༈ གཡས་མེ་རླུང་པདྨ་མགོན་འབྱུང་བ་ཐིམ་རིམ་གྱིས་རྒྱུ་ཞིང་ཁ་དོག་དམར་པོ། གཡོན་ནས་རླུང་གི་ཁམས་ལས་ཀྱི་མགོན་པོ་ལྗང་སེར་འབྱུང་བ་ཆགས་རིམ་གྱི་རྒྱུ། གཉིས་ཀ་དྲག་ཏུ་རྒྱུ་བ་ཁ་དོག་སེར་པོ་རིན་ཆེན་མགོན་པོ་དབང་ཆེན་གྱི་དཀྱིལ་འཁོར། མཉམ་པར་དལ་བར་རྒྱུ་བ་རྡོ་རྗེ་མགོན་པོ་ཆུའི་རང་བཞིན་ཁ་དོག་ཤེལ་ལྟ་བུའོ། །དེ་སྲོག་རླུང་ཡིན། ཁྱབ་བྱེད་ནམ་མཁའི་ཁམས་མི་རྒྱུ་ཞེས་གསུངས་པའང་ཡོད་དོ། །༈སྣའི་ཀ་བ་གཉིས་བྱིངས་ཆུ། འོག་གཉིས་ས། སྟེང་གཉིས་མེ། གཤོག་པ་གཉིས་རླུང་ངོ་། །༈ ཕྱིར་རྒྱུ་བའི་ཚུལ་གྱི་གྲངས་ནི་གཡས་ནས་ཉི་མའི་རླུང་དང་། གཡོན་ནས་ཟླ་བའི་ཆུ་ཚོད་དམ་འཕོ་ཆུང་ངམ་དབྱུ་གུ་རེ་ལ་སུམ་བརྒྱ་དྲུག་ཅུ་རེ། དུས་སྦྱོར་རེ་རེ་འཕོ་བ་རེ་ལ་སྟོང་བརྒྱད་བརྒྱ་རྒྱུ་བས་སྤྱིར་བཏང་ཉིན་ཞག་གཅིག་ལ་ཡེ་རླུང་ལོགས་སུ་བཀར་བའི་ཉི་ཟླ་ལ་རེ་ཡོད། དུས་འཁོར་ནས་ནང་དུ་སྤྱི་བོ་ནས་ཟླ་རྐང་གི་༢༡༦༠༠རླུང་། བདེ་དགྱེས་ནས་ཡུད་ཙམ་སོ་གཉིས་ཀྱི་རླུང་རྒྱུ་༡༠༤༦༤བར་གསུངས་སོ། །མགྲིན་པ་ནས་༦༧༥རྒྱུ་སྐར་གྱི་ལོངས་སྤྱོད་མཐུན་པའི་རླུང་རྒྱུ་བར་དུས་འཁོར་ནས་བཤད། ཀྱེ་བདེ་གསང་གསུམ་རྩ་འདབ་གཉིས་རེ་ཐབས་ཤེས་གཅིག་ཏུ་བསྡོམ་ནས་འཕོ་བ་བཅུ་དྲུག་གི་རླུང་རྒྱུ་བར་བཤད་དོ། །ལྟེ་བར་དབྱུ་གུ་དྲུག་ཅུའི། སྙིང་ཀར་རྩ་འདབ་བརྒྱད་དུ་རྩ་བ་དང་ཡན་ལག་གི་རླུང་ཐུན་ཚོད་བརྒྱད་ཀྱིས་ཚུལ་དུ་རྒྱུ་བའོ། །ཡན་ལག་གི་ཚིགས་བཅུ་གཉིས་ལ་སུམ་བརྒྱ་དྲུག་ཅུ་རེ་ཉིང་ལག་གི་ཚིགས་དྲུག་ཅུ་ལ་དྲུག་རེ་སྟེ་སུམ་བརྒྱ་དྲུག་ཅུ་དུས་གཅིག་ཏུ་རྒྱུ་བའོ། །ག་གཱས་སོ། །༈ ཁྲི་༢སྟོང་༡དྲུག་བརྒྱ། ཁྲི་༡བཞི་བརྒྱ་རེ་ལྔ་དང་དབུགས་ཕྱེད་རེ་རྒྱུ། དྲུག་བརྒྱ་དོན་ལྔ།

བརྡ་ཆེན་དབྱིངས་ཀྱི་གབ་བྱང་འབྱེད་པ་འཕྲུལ་གྱི་ལྡེའུ་མིག

བརྡ་ཆེན་དབྱིངས་ཀྱི་གབ་བྱང་འབྱེད་པ་འཕྲུལ་གྱི་ལྡེའུ་མིག་བཞུགས་སོ། །

ན་མོ་གུ་རུ་ས་མནྟ་བྷ་དྲ་དྷརྨཱ་ཀིརྟི་ཡེ། ཐོག་མར་རྒྱུད་ཆེན་པོ་སེང་གེ་རྩལ་རྫོགས་ཀྱི་མཆན་འགྲེལ་ལྟར་ན། འགྲོ་བ་ཀུན་གྱི་ ༼ ཀུན་ཏུ་རྟོག་པའི་ ༽ སྲོག་བཅད་ན༔ ཆོས་ཉིད་དམ་ཚིག་ཆེན་པོ་ཡིན༔ སློབ་དཔོན་རྒྱ་མཚོ་ཆེན་པོར་བསྐྱིལ༔ རྡོ་རྗེའི་མཆེད་ལྕམ་དོང་དུ་གཞུག༔ ༼ རླུང་སེམས་ཡེ་ཤེས་ཀྱི་དོང་དུ་བཅུག་ན་ ༽ཕ་དང་མ་གཉིས་ཐང་ལ་བཏོན༔ ༼ དབྱིངས་རིག་ ༽ མཆོད་རྟེན་ཕྱགས་ནས་ཆུ་ལ་ཕོ༔ ༼ རང་སྣང་ནམ་མཁར་བྱུང་བའོ། །༽དཀོན་མཆོག་གསུམ་ལ་རྒྱབ་ཀྱིས་ ༼ དྲན་བསམ་རྒྱུན་བཅད་ ༽ ཕྱོགས༔ དུས་གསུམ་སངས་རྒྱས་ ༼ དུག་ལྔ་ ༽ བསྒྲལ་ནས་ ༼ ཡེ་ཤེས་ཀྱི་དོང་དུ་བཅུག་ན། ༽ ཀྱང་༔ ༼ གཟུང་འཛིན་ ༽ཆོས་རྣམས་ ༼ ཡེ་ཤེས་ ༽ མེར་བསྲེགས་ ༼ བདེ་ཆེན་གྱི་ ༽ཆུ་ལ་ཕོ༔ སེམས་ཅན་ཐམས་ཅད་ ༼ དྲན་རྟོག་འཆར་སྒོ་ ༽ དུས་གཅིག་བསྒྲལ༔ ༼ རིག་པ་རྟོག་མེད་ ༽ རང་ ༼ གཟུང་འཛིན་ ༽ སྲོག་རང་གིས་བཅད་པར་བྱ༔ དཀྱིལ་འཁོར་ལྷ་ཚོགས་ ༼ ཐིག་ལེ་འགུལ་འགྲིགས་མེད་པ་ ༽ བཙོན་དུ་བཟུང་༔ དེས་ནི་དངོས་གྲུབ་ཉེ་བར་གསུངས༔ ༼ དེ་དག་ནི་རྒྱུད་མཆན་དངོས་སོ། །ཞེས་དང་། ༽ དམ་ཚིག་བསྲུང་བས་དམྱལ་བར་ལྷུང་༔ དམ་ཚིག་རལ་བས་རྫོགས་སངས་རྒྱས༔ ཚུལ་ཁྲིམས་བསྲུང་བས་འཁོར་བར་ལྷུང་༔ ཚུལ་ཁྲིམས་འཆལ་བས་གྲུབ་པ་ཐོབ༔ ཞེས་སོ། །ད་ནི་རྩལ་བཤད་ཅུང་ཟད་བྱས་ན། རྐང་བ་དང་པོ་དང་གཉིས་པའི་དོན། འདི་འདྲའི་རིགས་ལ་སོམ་ཉིས་སྐུར་འདེབས་ནི་མི་འཚལ་དེ། འདི་ཡང་ཚིག་དོན་ལྟར་ན། ཚོམས་ལས། ཡུལ་འཁོར་སྐོར་བཅས་བཅོམ་པ་ན། །མི་དེ་དག་པ་ཉིད་དུ་འགྱུར། །ཞེས་ནང་གི་སྐྱེ་མཆེད་གཟུང་འཛིན་དང་བཅས་པའི་རྣམ་ཤེས་ཚོགས་བརྒྱད་ནི་ཡུལ་འཁོར་བསྐོར་དང་བཅས་པའོ། །བསྐྱེད་རྫོགས་སྤྱི་སྦས་ལྟར་རྡོ་རྗེའི་རིགས་ལ་སྲོག་གཅོད་བྱ་བར་གསུངས་བས། ཕྱི་ཞིང་བཅུ་ནང་རླུང་བཅུ་། ༼ ཟླ་ཉི་སྒྲ་གཅན་གྱི་དབྱིངས་སུ་ ༽ དང་གསང་བ་སྲོག་ཆེན་པོའི་མིང་གིས་བསྟན་པས་རྣམ་རྟོག་གསད་དགོས་པ་ལ་དགོངས་ནས། ཧེ་བཛྲ་ལས། ཁྱོད་ཀྱིས་སྲོག་ཆགས་གསད་བྱ་ཞིང་། །ཞེས་དང་། གསང་སྙིང་ལས། བློ་ངན་འཇིག་རྟེན་སྙིང་རེ་རྗེ། །གཉིས་སུ་མེད་པར་བསྒྲལ་བར་བྱ། །ཞེས་འདིར་ཁམས་གསུམ་གྱི་ཀུན་ཏུ་རྟོག་པའི་སྲོག་སྐྱེ་མེད་དུ་བཅད་པ་དང་། མཐར་ཐུག་གི་དོན་ལྟར་ན་འདིར་མན་ངག་སྡེ་ལས། སེམས་དང་ཡེ་ཤེས་དབྱེ་བའི་སྒོ་ནས་རྫོགས་ཆེན་བསྒོམ་ཡོད་པས་བློན་པོ་བཙོན་དུ་བཟུང་བ་སོགས་ཀྱི་ཐབས་དང་། བསྒོམ་མེད་པས་ངང་དྭངས་རང་བཞག་ཆེན་པོའི་གནད་བཞིའི་སྐྱེ་མེད་དུ་རང་གྲོལ་བར་བྱེད་པ་ནི་ཆོས་ཉིད་ཀྱི་དམ་ཚིག་ཡིན་ཞེས་པ་དང་། རྐང་བ་གསུམ་པ་། སློབ་དཔོན་ངན་པ་ནི་སེམས་ཡིན་ཏེ། དེ་ཐ་མལ་གྱི་ཡུལ་གཟུགས་སོགས་ལ་འཇུག་པ་སོ་སོར་སྡུད་པའི་གནད་རིག་པ་མིག་དང་། མིག་བར་སྣང་ལ་གཏད་པས་ནམ་མཁའ་སུམ་སྤྲུག་གི་དགོངས་པ་འཆར་བ་དང་། ཐོད་རྒལ་དང་འབྲེལ་ན་རྟེན་གསུམ་ལས་དབྱིངས་ཐིག་འཆར་པའི་དོན་ནོ། །རྐང་བ་བཞི་བའི་དོན། རྟག་ཏུ་འགྲོགས་པའི་མཆེད་ལྕམ་རླུང་སེམས་གཉིས་དང་། གཟུང་འཛིན་གཉིས་གནད་གསུམ་ཆོས་ཉིད་ཀྱི་འཁོར་ལོ་གཅུན་པས་གཅོང་རོང་གི་དོང་དུ་གཞུག་པ་ལྟར་རང་འགགས་ལ་སོང་ནས་རིག་པའི་ཡེ་ཤེས་ཀྱི་སྐུ་དང་མི་འབྲལ་ཞེས་པའོ། །ལྔ་བའི་དོན། སྤྱིར་ཕ་མ་གཉིས་ནི་དཀར་ཆའི་དབང་བྱས་པ་ལས་འཛིན་པ་སེམས། བདག་རྟོག་ཏུ་འཇུག་པ་ཉིད་ཀྱིས་སྲེད༵་ཅིང་། དམར་ཆའི་དབང་བྱས་པ་ལས་ཡུལ་གཟུང་བ་གཞན་དང་སྣང་བ་སྟེ་གཞན་རྟོག་འཇུག་པས་འདོད་ཡོན་དང་དུ་ལེན༵་པ་གཉིས་ཀྱིས་འཁོར་བར་འདུ་བྱེད་པས་ན་སྲེད་ལེན་དེ་ལེན་དེ་དག་བཅད་དགོས་པའི་དོན་ཏེ། ཚོམས་ལས། ཕ་དང་མ་ནི་བསད་པ་ཡིན། །ཞེས་དང་། ཁྱད་པར་བ་བཞུགས་སྟངས་དང་། གཟིགས་སྟངས་སོགས་ཀྱི་དབྱིངས་རིག་གི་མཐོང་བ་ཁོང་ནས་ཅུར་འབྱིན་དུ་བརྟོལ་བའོ། །དྲུག་པ་ནི། ཕྱི་ལྟར་ཀུན་གཞི་བག་ཆགས་སྣ་ཚོགས་ཀྱི་རྟེན་གཞིར་གྱུར་བས་རྒྱལ་པོ། བྲམ་ཟེ་འཇིག་ལྟ་དང་། དགེ་སློང་ཚུལ་ཁྲིམས་བརྟུལ་ཞུགས་མཆོག་འཛིན་གྱི་ལྟ་བ་སྟེ་གཙང་སྦྲ་ཅན་གཉིས་བཅོམ་པ་ལ་བཤད་དེ། ཆེད་དུ་བརྗོད་པའི་ཚོམས་ལས། རྒྱལ་པོ་གཙང་སྦྲ་ཅན་གཉིས་བཅོམ། །ཞེས་སོ། །ཡང་ཤིན་ཏུ་གཅེས་སྤྲས་ཀྱིས་བཀུར་སྟིའི་གནས་བདག་འཛིན་ནི་རྒྱལ་པོ་དང་གཙང་སྦྲ་ཅན་ཏེ། དེ་དག་ཡུལ་བྱུང་བ་དང་། གསང་བ་ལྟར་ན་རང་སྣང་དབྱིངས་རིག་སྐུ་དང་ཡེ་ཤེས་ཀྱི་མཐོང་བ་ནམ་མཁར་ཕྱིང་བ་སྟེ་རྒྱང་ཞགས་སུ་ཤར་བའི་དོན་ནོ། །བདུན་པའི་དོན་གསང་བའི་སྐྱབས་གནས་རང་བཞིན་བྱང་ཆུབ་ཀྱི་སེམས་སྒྲོན་མ་ནང་གསལ་རང་ལ་ཡོད་པས་ན། ཕྱི་རོལ་མཚན་མ་ཡུལ་ཞེན་གྱི་རྟོག་པས་བཏགས་པའི་དཀོན་མཆོག་གསུམ་ལ་མཆོད་པ་དང་། བསྒོམ་བསྒྲུབ་ཀྱི་རེ་ཡུལ་གཞན་ནས་མི་བཙལ་བར་རང་སྣང་ཡེ་ཤེས་ཀྱི་དཀྱིལ་འཁོར་དབྱིངས་རིག་གི་ངང་ལ་མཉམ་པར་བཞག་པས་ཞིང་ཁམས་ནང་ནས་མཐོང་བའོ། །བརྒྱད་པ་ནི། དུས་གསུམ་སངས་རྒྱས་ཞེས་པ་དུག་ལྔའམ་ཕུང་ལྔ་སོགས་ལ་བརྗོད་དེ། རྒྱུད་ལས། དེ་བཞིན་གཤེགས་པ་ལྔ་བསྲེགས་ནས། ཞེས་དང་། ཐུན་མིན་རང་ཤར་ལས། དེ་བཞིན་དུས་གསུམ་སངས་རྒྱས་ནི། །རང་གི་སྣང་བ་ཆེན་པོར་བཤད། །དེ་ཡང་ལུས་ངག་ཡིད་གསུམ་མོ། །ངག་ནི་འདས་པའི་སངས་རྒྱས་ཡིན། །ཡིད་ནི་མ་འོངས་སངས་རྒྱས་ཡིན། །ལུས་ནི་ད་ལྟའི་སངས་རྒྱས་ཡིན། །སངས་རྒྱས་རྣམ་གསུམ་དེ་ལྟར་རོ། །ཞེས་པ་སྟེ། ཕྱི་འཇིག་རྟེན། བར་སེམས་ཅན། ནང་རང་ལུས་ཀུན་ལུས་སུ་དགོངས་པའམ། བར་དབང་པོ་དྭངས་མས་ཡུལ་སེམས་མཚམས་སྦྱོར་བས་བརྡ་སྤྲོད་ལའང་ངག་ཞེས་དང་། ནང་ཚོགས་བརྒྱད་ཐམས་ཅད་ལ་སེམས་ཞེས་བྱ་བ་དང་། སྣང་། ཕྱེད་སྣང་། མི་སྣང་པའི་སྲིད་པ་ཐམས་ཅད་དུ་འཛིན་པ་བསྒྲལ་བས་རང་རིག་རྟོགས་པར་འགྱུར་ཞེས་དང་དགུ་བའི་དོན། འཁོར་ཆོས་ཉི་ཤུ་ཡེ་ཤེས་ཀྱི་མེས་བསྲེགས་ཤིང་བདེ་ཆེན་གྱི་ཆུ་ལ་ཕོ་བའོ། །བཅུ་བ་རང་གཞུང་ལྟར་དྲན་རྟོག་འཆར་སྒོའི་འཁྲུལ་སྣང་ལ་བཤད། བཅུ་གཅིག་པ་ནི། གཞུང་བཞིན། གཟུང་འཛིན་གྱི་སྟེ། གསང་སྙིང་ལས། ཐོག་མར་བདག་ཉིད་རྟོག་གམ་བསྒྲལ། །ཞེས་སོ། །བཅུ་གཉིས་པ་ནི་སྤྱིར་སེམས་འཛིན་གྱི་བསམ་གཏན། ཞི་ལྷག་གི་ཏིང་འཛིན་ཐམས་ཅད་དང་། བསྐྱེད་རིམ་པས་ཏིང་ངེ་འཛིན་ལྷའི་གཟེར། རྫོགས་རིམ་པས་མ་དག་པའི་རྩ་རླུང་ཐིག་ལེ་བཅིངས་པས་རྒྱུ་འོད་ལ་རང་དབང་དུ་བྱས་པ་དང་། ཁྱད་པར་ལྷན་ཅིག་སྐྱེས་སྦྱོར་བཞིའི་རྒྱུད་ཀྱི་སྣང་བ་དང་མུན་པའི་ལམ་བྱེད་རྡོ་རྗེའི་རྣལ་འབྱོར་ལ་བརྟེན་ནས་བསམ་གཏན་གྱི་རྟགས་བཅུའི་སྟོང་གཟུགས་ཕྱག་རྒྱ་ཆེན་པོ་ལ་སྙོམས་པར་འཇུག་པ་དང་། འདིར་དངོས་ཀྱི་དོན་དབྱིངས་ཐིག་གི་ར་བར་ལུ་གུ་རྒྱུད་གདངས་བཅས་པ་འཛིན་པ་ལའོ། །བཅུ་གསུམ་པ་ནི། རྩོལ་བཅས་མཚན་མར་འཛིན་པའི་གཡེང་བས་དམ་ཚིག་ལ་གནས་ཀྱང་འཁོར་བ་ལས་མི་འདའ་ཞིང་སྡུག་བསྔལ་གསུམ་གྱིས་མནར་བར་འགྱུར་བ་ལ་དམྱལ་བའི་མིང་གིས་བརྡ་སྦྱར་རོ། །རྩལ་རྫོགས་ལས། སྐྱེ་མེད་དོན་ལས་འདའ་མེད་ལ། དམ་ཚིག་བསྲུང་བས་སངས་མི་རྒྱ། །ཞེས་དང་། ཕྲེང་བ་ལས། འདའ་བར་འདོད་པའི་དམ་ཚིག་ལ། །བསྲུང་བར་འདོད་པ་འཆིངས་པ་ཉིད། །ཅེས་སོ། །བཅུ་བཞི། བསྲུང་ཉམས་ཀྱི་འདུ་ཤེས་དམ་པོའི་ཤེས་བྱའི་སྒྲིབ་པའི་འཆིངས་རྒྱ་ལས་གྲོལ་བའི་བསྲུང་དུ་མེད་པའི་དམ་ཚིག་ཆེན་པོ་བཞིའི་དོན་ཡང་དག་པ་ཉིད་དུ་ལ་བཟླས་པས་ཀློང་དུ་གྱུར་ནས་རྣམ་པར་གྲོལ་བའོ། །བཅོ་ལྔ། ཚུལ་ཁྲིམས་བརྟུལ་ཞུགས་མཆོག་འཛིན་གྱི་ཀུན་ཏུ་སྦྱོར་བས་འཁོར་བ་ལས་འདའ་མི་ནུས་པས། ཇི་སྐད་དུ་ཚུལ་ཁྲིམས་ནི་བདུད་ཀྱི་ལས་སོ། །ཞེས་པ་ལྟར་རོ། །བཅུ་དྲུག་པ། འཁོར་གསུམ་བདེན་ཞེན་གྱི་དྲི་མ་དང་བྲལ་བ་འཇིག་རྟེན་ལས་འདས་པའི་ཚུལ་ཁྲིམས་ཀྱིས་མཆོག་དང་ཐུན་མོང་གི་གྲུབ་པ་ཐོབ་པའོ། །ལར་འདི་དག་སུས་ཀྱང་བློ་ལ་ཤོང་དཀའ་བས་ཅ་ཅོ་སྣ་ཚོགས་སྒྲོགས་པ་ལ་དོགས་ནས་རང་སློབ་དམ་པ་པན་སྐྱབས་སོགས་ཀྱིས་བསྐུལ་ངོར་ག་གཱས་སོ། །

ཕྲ་མོ་རྣམ་པ་ལྔའམ་དྲུག་གི་ལམ་བྱེད་ལས་ཡི་གེ་ཕྲ་མོ་བསྒོམ་པ་རྩ་ཁམས་གནས་དག

ཡང་ཟབ་སྒྱུ་འཕྲུལ་དྲྭ་བའི་ཡེ་ཤེས་ལས༔ ཕྲ་མོ་རྣམ་པ་ལྔའམ་དྲུག་གི་ལམ་བྱེད་ལས་ཡི་གེ་ཕྲ་མོ་བསྒོམ་པ་རྩ་ཁམས་གནས་དག་བཞུགས་སོ༔

ན་མོ་གུ་རུ་པདྨ་ཀཱ་ར་ཡ༔ གང་ཞིག་གཏུམ་མོ་འབར་བའི་རྣལ་འབྱོར་ལ༔ གདེངས་སུ་བདེ་དྲོད་རྟགས་མཚན་ལ་སོགས་ཐོབ༔ དེ་ཡི་ཀུན་རྫོབ་ཐིག་ལེ་མས་འཛེགས་བསྒོམ༔ དེ་ལ་ཉེ་བར་གདེངས་བརྟན་གྱུར་དུས་ན༔ ༡བདེ་སྟོང་དཔྱིད་ཀྱི་མཆོད་པ་འབུལ་བ་ནི༔ ཚོགས་སྒྲུབ་དུས་ལ་བབས་པས་ལས་རུང་གི༔ བཅོས་པས་འདུན་མ་མིན་ཡིན་ལས་འདས་ཏེ༔ གནས་པས་ལྟ་བ་དག་མཉམ་ཐབས་ཤེས་སུ༔ ༢སུས་ཀྱང་མ་གོད་མིག་གདོང་གིས་བསྒྱུར་བ༔ བླ་མའི་མན་ངག་སྟོབས་ཀྱིས་ཡང་ཅིག་ན༔ རང་གི་བསྒོམ་སྟོབས་བཟོད་པའི་ཤེས་ཙམ་དུ༔ ཡིད་ཆེས་ངེས་ཡོད་འདི་འདྲ་རབ་ཏུ་བསྔགས༔ ༣སྐུ་གསུང་ཐུགས་ཀྱི་ཕྲ་མོ་ཡེ་ཤེས་དང་༔ རྟེན་གྱི་ཕྲ་མོ་རྣལ་འབྱོར་གང་ཞིག་གིས༔ རྫོགས་ནས་འཇུག་པ་ངེས་རྫོགས་ལུགས་ཀྱི་ངང་༔ མོས་སྤྱོད་དང་པོ་ཞུགས་ལ་ལམ་བཞག་ཚང་༔ ༤རྩ་དང་རླུང་ལ་ཅུང་ཟད་བརྟན་ཐོབ་པས༔ སླར་ཡང་རྩ་གསུམ་འཁོར་ལོ་ལྔ་ཡི་དབྱིབས༔ གོང་བཞིན་པ་ལས་ཁྱད་པར་རྒྱས་སུ་སྤྲོས༔ ཕྲ་མོའི་རྩ་ཁམས་སྟོང་ཕྲག་བདུན་ཅུ་གཉིས༔ ༥ཡང་ཕྲན་གྲངས་ཀྱི་མཐར་ཐུག་མེད་པ་རུ༔ སྤྱི་བོའི་འཁོར་ཕྲན་ཐམས་ཅད་བྃ་ཡིག་སྤྲིན༔ ཡང་ན་གཙོ་འཁོར་ཐམས་ཅད་ཨོཾ་དུ་བསྒྱུར༔ མགྲིན་པར་ཐམས་ཅད་རཾ་མམ་ཧྲཱིཿཡི་གེ༔ ༦སྙིང་ཀརཨེ་ཧཱུྃ་ལྟེ་བར་ལཾ་ཏྲཾ་དང་༔ གསང་བའི་གནས་སུ་ཡཾ་ཨཱཿགང་རུང་བསམ༔ དེ་ཉིད་རྫོགས་པར་མོས་བསྒོམ་གང་རུང་གིས༔ གསལ་ཞུགས་རླུང་ཐིག་འབར་འཛགས་སྦྲེབ་ཞུན་གྱི༔ ༧ཡི་གེ་འཁོར་ལོ་གཟི་མདངས་དྲི་མ་དག༔ མངོན་གྱུར་འོད་ཀྱི་ལུས་ཀུན་བྱིན་གྱིས་བརླབས༔ རྩ་ཡི་ཁམས་ཀུན་ཡི་གེར་དག་པ་དང་༔ རྩ་ཡི་འགྲོས་ཐིམ་སྤྲུལ་སྐུར་སྨིན་པར་བསམ༔ ༨དེ་ལྟར་ཡི་གེའི་ཛ་ལནྡྷ་ར་ནི༔ སྐུ་གསུང་ཐུགས་ཡོན་ཕྲིན་ལས་རང་བཞིན་གྱི༔ གནས་ལྔར་བསྒོམ་པས་སྣང་སྲིད་དཔེ་ཆར་འཆར༔ ཡོན་ཏན་ཁྱད་པར་བསམ་གྱིས་མི་ཁྱབ་པ༔ ༩བསྒྲངས་མཐའ་ཡས་པ་འདི་ནི་གཙོ་བོར་ཟུངས༔ རྗེས་སྣང་ཐམས་ཅད་ཡི་གེའི་རང་བཞིན་བལྟ༔ ཕྲ་བ་ཡིག་འབྲུ་བསླབ་པ་ཚོགས་ཀྱི་ལམ༔ ཚོགས་སྒྲུབ་སྦྱོར་ལམ་པ་ལ་དགོས་ཆོས་སུ༔ ༡༠འགྱུར་ཚུལ་ལྷ་སྐུ་དང་ནི་འོད་གསལ་གྱི༔ ཁྱད་པར་བཞིན་དུ་ཡང་དག་ངེས་པ་དང་༔ མོས་པ་དང་པོའི་འཇུག་སྒོ་ཡངས་པའི་སླད༔ འདི་འདྲའི་མན་ངག་སྐུར་བཏབ་ཉམས་ཉེས་འཕྲད༔ ༡༡གཞན་དུ་རྒྱས་སྤྲོས་ཡི་གེ་ལྔ་བཅུ་པོ༔ སྐུ་གསུང་ཐུགས་དང་ཡོན་ཏན་ཕྲིན་ལས་རིགས༔ ཡང་ཅིག་རྩ་གནས་འཁོར་ལོའི་ཡི་གེ་སོགས༔ ཡེ་ནས་རྡོ་རྗེ་ལུས་ལ་ལྷུན་གྲུབ་པ༔ ༡༢གང་ལའང་མཉམ་བཞག་གནད་ཀྱིས་མི་འགལ་ལོ༔ མདོ་རྒྱུ་སེམས་ཀྱི་སྤྱི་ཚུལ་ཇི་བཞིན་དང་༔ རྩ་གསུམ་ཉིད་ལས་འཁོར་ལོ་ལྔ་བོ་དང་༔ གྱེས་པའི་གཞལ་ཡས་གནས་ཡུལ་རྩ་མདུད་ཀུན༔ ༡༣ཡི་གེ་འཁོར་ལོ་སྤྲིན་གྱི་རྣམ་འཕྲུལ་བ༔ བསམ་ཡས་གོམས་པས་ཡི་གེ་འབའ་ཞིག་ཏུ༔ གང་དག་སྐད་ཅིག་གམ་ནི་སྦྱངས་སྟོབས་ཀྱི༔ ཚར་ཕྱིན་ཐབས་ཀྱི་ཏིང་འཛིན་དམ་པའི་ངང་༔ ༡༤ལྡན་དུས་ཕྲིན་ལས་འབྲས་བུའི་རྒྱུ་མཐུན་ནམ༔ ལམ་ལ་བོགས་འདོན་རྩལ་སྦྱངས་ཆེད་གར་དུ༔ རྫུ་འཕྲུལ་སྤྱོད་པ་ཡི་གེའི་འཕྲོ་འདུ་ཡི༔ བྱིན་བསྡུས་འགྲོ་བའི་ཕན་བདེ་མཐའ་ཡས་ཀྱང་༔ ༡༥ལམ་ནས་མཛད་མོད་སོ་སྐྱེ་ལོངས་སྐུ་དང་༔ སྐལ་མཉམ་གྲུབ་པ་བཞི་ལ་དབང་མཛད་པ༔ སྔགས་ཀྱི་ཁྱད་འཕགས་འདི་ཙམ་བླ་ན་མེད༔ མཚན་ཉིད་ཐེག་པས་བསྐལ་པས་ཚིག་ཆད་བཅད༔ ༡༦ཚོགས་རྫོགས་བྱང་ཆུབ་སེམས་ལ་སྦྱོར་བ་ཡི༔ དྲོད་དུ་གཙོར་སྤྱོད་ཕྲ་མོའི་སྨིན་བྱེད་དེ༔ སྔགས་རྒྱུད་ཀུན་ནས་མི་མཐུན་སྣ་ཚོགས་པ༔ འབྲས་བུ་ཉག་གཅིག་ཐོབ་ལ་མཐུན་པར་འདུམ༔ ༡༧ཆོད་ཆེ་བར་གྱི་རྣལ་འབྱོར་འདི་ཡང་ཟབ༔ སྐུ་ཡི་རང་བཞིན་ཡི་གེ་འཁོར་ལོའི་སྤྲིན༔ གསུང་གི་རང་བཞིན་རང་སྒྲ་འབྲུག་སྟོང་འདྲ༔ ཐུགས་ཀྱི་རང་བཞིན་སྣང་སྟོང་ཨ་དང་འོད༔ ༡༨ཐམས་ཅད་སྐུ་གསུང་ཐུགས་སུ་རྣམ་པར་དག༔ ཡི་གེ་སྐུ་གསུམ་དོན་གྱི་རྣལ་འབྱོར་བས༔ མཐར་ཐུག་སྐུ་གསུམ་ཕྱིར་མི་ལྡོག་པར་གྲུབ༔ གནས་སྐབས་རང་འབྲས་ཚེ་སོགས་བསམ་མི་ཁྱབ༔ ༡༩ག་ག་ཨ་བྷྱེས་བསྡུས་ཏེ་བསྒྲིགས་པ་ཡི༔ དག་སྣང་ཁྲིགས་ལས་ཅུང་ཟད་ཉམས་གྱུར་ཡང་༔ དོན་གྱི་འབྲས་བུ་མི་བསླུ་ཉམས་པ་མེད༔ ས་མ་ཡཱ༔

ཕྲ་མོ་གསུམ་གྱི་རྣལ་འབྱོར།

ཡེ་ཤེས་སྒྱུ་འཕྲུལ་དྲྭ་བ་ལས༔ ཕྲ་མོ་གསུམ་གྱི་རྣལ་འབྱོར་བ༔ རྩ་རླུང་ཐིག་ལེའི་ཡི་གེའི་ཁམས༔ གནས་དག་ཡེ་ཤེས་འཁོར་ལོ་བཞུགས༔

ན་མོ་གུ་རུ་པདྨ་ཀཱ་ར་ཡེ༔ གང་ཞིག་རྡོ་རྗེ་ཕུང་པོའི་གྲོང་༔ ཡེ་ནས་སྐུ་གསུང་ཐུགས་ཀྱི་ངང་༔ སྐུ་གསུམ་ཡེ་ཤེས་ལམ་བྱས་ནས༔ ༈སྒོ་གསུམ་འགྱུར་བདེ་དང་བཅས་པ༔ དུག་གསུམ་ལས་ཉོན་ལྷན་སྐྱེས་བརྟགས༔ དག་པར་བྱེད་པའི་ཐབས་ཆེན་པོ༔ ཐབས་ཤེས་ལྟོ་སྦྱོར་ངོ་མཚར་རྨད༔ ༈དང་པོ་ཡི་གེའི་ཕྲ་མོ་ལ༔ སྐུ་གསུང་ཐུགས་ཀྱི་རྣམ་པ་གསུམ༔ རྩ་གསུམ་འཁོར་ལོ་དྲུག་གི་དབྱིངས༔ སྤྱི་བོར་རྩ་འདབ་སུམ་བརྒྱ་དང་༔ ༈དྲུག་ཅུའི་མགྲིན་པའི་བཅུ་གསུམ་གཉིས་ ༼ སུམ་ཅུ་རྩ་གཉིས། ༽སྙིང་གར་དྲུག་ཅུ་སྐྱེད་བྱེད་ན༔ དྲུག་ཅུ་རྩ་བཞིར་གནས་པ་དང་༔ བདེ་བ་སྐྱོང་བར་བརྒྱ་རྩ་བརྒྱད༔ ༈ཕྲན་དུ་བསམ་གྱིས་མི་ཁྱབ་པར༔ ཡི་གེའི་འཁོར་ལོ་དཔག་ཏུ་མེད༔ ཐིག་ལེ་མཚན་མའི་གནས་ས་རུ༔ ཕྲ་རགས་ཐམས་ཅད་ཨོཾ་དུ་གསལ༔ ༈དོན་དམ་ཐིག་ལེའི་རྒྱུ་ལམ་ལས༔ གསུང་གི་སྙིང་པོ་ཏིལ་གང་བཞིན༔ ཟུང་འཇུག་ཡེ་ཤེས་སྟོང་ལམ་དུ༔ ཧཱུྃ་གི་ཕྲ་རབ་རྡུལ་དུ་བརྩེགས༔ ༈འོད་ཀྱི་རང་བཞིན་གཟི་བརྗིད་སྤྲིན༔ གཅིག་ལས་དུ་མའི་རྣོ་གཅོད་ཀྱིས༔ མ་དག་གནས་པ་ཐམས་ཅད་ཀུན༔ དུམ་བུར་བཅད་ནས་དངོས་པོར་གཞིག༔ ༈ཤ་དང་ཁྲག་དང་ཆུ་སེར་ཞག༔ གདོས་བཅས་དག་པ་ཡི་གེ་ནི༔ བརྩེགས་པ་སྐུ་ལས་ཞུན་ཐིག་གིས༔ ཟབ་གསལ་གཉིས་མེད་ཡི་གེ་དང་༔ ༈སྙོམས་འཇུག་སྒྲ་གཅན་སྒྱུ་འཕྲུལ་ལས༔ གསུང་གི་རྡོ་རྗེ་དངས་མའི་རླུང་༔ ཡེ་ཤེས་ལྔ་ཡི་རང་བཞིན་གྱི༔ སྐྱེ་མེད་བརྡ་ཚིག་གྲགས་སྟོང་རིག༔ ༈བསམ་གྱིས་མི་ཁྱབ་གསུང་ལ་བཞག༔ སྤྲོས་བྲལ་གཅིག་གོམས་ཀུན་ཏུ་བཟང་༔ འོན་ཀྱང་སྒྱུ་འཕྲུལ་རོལ་མོའི་གར༔ རྟོག་ཚོགས་འཁོར་ལོ་འདུལ་བྱེད་དམིགས༔ ༈ཞི་ཁྲོ་རོལ་པའི་ལམ་གཉིས་དང་༔ ཟུང་འཇུག་རིགས་ལྔའི་དབྱིངས་གསུམ་བཀྲོལ༔ སྐྱེ་གནས་མེད་པའི་ཡུམ་མཁའ་དང་༔ ཐུགས་ཀྱི་ཐུགས་ལ་སྙོམ་ཞུགས་པས༔ ༈གནས་ཀྱི་དབུས་སུ་དྲན་པ་ལ༔ སྙིང་པོའི་རྫོགས་པ་བྷྲཱུྃ་གཞལ་ཡས༔ ཨ་མ་པཾ་དང་རཏྣ་ལྷར༔ དེ་སྟེང་དབུས་ནས་མདུན་གཡས་བསྐོར༔ ༈ཋ་ཊ་ཌ་ཌྷ་ཎ་ཐ་ཏ༔ ད་དྷ་ན་ཟུང་བཞི་སྦྱོར་དུ༔ ཀ་ཁ་ག་གྷས་གཡོན་ནས་བལྟས༔ ཙ་ཚ་ཛ་ཛྙ་རྣམ་པར་རོལ༔ ༈པ་ཕ་བ་བྷ་ཡ་ཝ་ར༔ ལ་ནི་ཟུང་ཞིག་མཉམ་པར་གདལ༔ ང་ཉ་མ་ཨོ་ཤ་ཥ་ས༔ ཧ་རྣམས་ཟུང་སྦྱོར་ཕྱོགས་བཞིར་བཀོད༔ སྟེང་ཕྱོགས་འཁོར་ལོ་ཨི་ཡིས་གཏམས༔ ༈ཤར་ཕྱོགས་འཁོར་གནས་ཨི་ལྷོ་ནུབ༔ ཨུ་དང་ནུབ་བྱང་ཨཱུ་བྱང་ཤར༔ འཁོར་ཁྱམས་ཐམས་ཅད་ཨེ་ལས་སྦྱང་༔ ༈ཨཻ་ཡི་འོག་གི་ཕྲན་དུའོ༔ དེ་ལྟར་རྩ་ཁམས་ཡི་གེའི་སྤྲིན༔ ཞུ་ནས་དག་པའི་ཡེ་ཤེས་སུ༔ ཕྲ་མོར་གོམས་པ་རིགས་ཀྱི་ལྷ༔ ༈སྐུ་ཡི་ཐམས་ཅད་དཀར་པོ་དང་༔ གསུང་དམར་ཐུགས་མཐིང་ཡོན་ཏན་སེར༔ ཕྲིན་ལས་པ་ལ་ལྗང་གུ་དང་༔ རིགས་འདྲེས་ཐམས་ཅད་མ་རྨོངས་པར༔ ༈སྤྱི་བོར་འོད་ཟེར་དར་དཀར་ལས༔ རང་རང་རིག་ཀྱི་ཡི་གེ་དང་༔ བྷནྡྷ་འབར་བའི་གཞལ་ཡས་སུ༔ བྱོལ་སོང་ཏི་ར་དཀར་དམར་རྫོགས༔ ལྷ་ལ་ཡི་གེ་རྩ་འཁོར་དུ༔ དབུས་སུ་ཧཱུྃ་ཆེན་ཉི་ཤུ་དང་༔ སླར་ཡང་གྱེས་པར་ཧ་ཧེ་བརྒྱད༔ ཛཿཧཱུྃ་བཾ་ཧོ་བྷྱོ༔ ཉེར་གཅིག༔ སླར་ཡང་ཧཱུྃ་གི་སྙོམས་འཇུག་ཏུ༔ རྣམ་པ་བཅུར་ནི་ཡང་དག་འབར༔ འཁོར་མཐའ་ཧཱུྃ་གི་རྡུལ་དུ་བརྩེགས༔ དེ་ལ་རིགས་དང་ཁ་དོག་ལྡན༔ ༈འབར་འཛག་བསྣོལ་བའི་ཐབས་ཤེས་ཀྱིས༔ ཡི་གེ་འཁོར་ལོའི་ཐབས་ཤེས་ལ༔ རྒྱས་བཏབ་ཐབས་ཤེས་མཚམས་སྦྱོར་བས༔ བདེ་གསལ་ཐབས་ཤེས་ཟིལ་མངར་འཕྲོ༔ ༈ཞི་ལྷག་ཐབས་ཤེས་གསོས་ཀྱི་མཆོག༔ རྟོག་ཞེན་ཐབས་ཤེས་ཡི་གེར་སྦྱོར༔ དབྱིངས་ནས་ཐབས་ཤེས་བྱིན་བརྟན་ལོ༔ ཐབས་ཤེས་སྲོག་ལ་དོན་དུ་བཟློས༔ བསྐྱེད་རྫོགས་ཐབས་ཤེས་འདུ་འབྲལ་མེད༔ མཚན་བཅས་མཚན་མེད་ཟུང་དུ་ཞུགས༔ ཞུགས་བཞིན་དཀྲི་དྲངས་ཐབས་ཤེས་འཕྲུལ༔ སྐུ་གསུང་ཐུགས་དང་ཡེ་ཤེས་སོ༔ ༈སྐུ་ཡི་རྐྱང་པས་མཚམས་སྦྱོར་ལ༔ ཡི་གེ་ཕྲ་རྡལ་སྣ་བསྒོམ་མཐར༔ དེ་ཡང་དམིགས་མེད་མཉམ་པར་བཞག༔ གསུང་གི་རང་སྒྲ་འབྲུག་བཞིན་དང་༔ ༈བསྒྲགས་སོ་དབེན་པས་རྡོ་རྗེའི་བཟླས༔ ཡང་ན་ཞི་ཁྲོ་ཟུང་འཇུག་པ༔ སྤྱི་བོའི་འཁོར་ལོ་བཾ་དང་ཨ༔ མགྲིན་པར་རཾ་ཧྲཱིཿསྙིང་ཀ་ན༔ ༈ཨེ་ཧཱུྃ་ལྟེ་བར་ལཾ་ཏྲཾ་པ༔ གསང་བར་ཡཾ་ཨ་གང་རུང་རྣམས༔ འབར་འཛག་སྟོབས་ཀྱི་དགྱེས་ཚིམ་ལས༔ ཞུ་བས་རྡུལ་འཛག་འཁོར་མདུད་ཕྲན༔ ༈ཕྲ་མོའི་ཡི་གེ་དེ་ཡི་སྤྲིན༔ ཡེ་ཡོད་རྩ་ཡིག་མི་གསལ་ལ༔ ཞུགས་པས་གཟི་མདངས་དྲི་མ་དག༔ ཡེ་ཤེས་ལྔ་དང་མངོན་ཤེས་སྤྱན༔ ༈མངོན་བྱས་འོད་ཀྱི་རྡོས་ ༼ གདོང་དཔྱད། ༽བཅས་སྦྱངས༔ ཕྲ་མོ་ཛ་ལནྡྷ་ར་ཡི༔ རང་བཞིན་ཨ་ལས་གནས་སུ་འཁྱིལ༔ ཆོ་འཕྲུལ་སྤྲུལ་སྐུ་གྲངས་མེད་པས༔ ༈ཐམས་ཅད་དག་དབྱིངས་ཡི་གེ་བསྡུས༔ ཕན་བདེ་ལྷུན་གྲུབ་མཛད་པ་བསྐྱང་༔ དེ་འདྲའི་ཏིང་འཛིན་འཕྲུལ་ཆེན་གྱི༔ སངས་རྒྱས་སེམས་ཅན་མཉམ་པར་བསྒྲུབ༔ ༈མགྲིན་པར་དཔའ་བོའི་ཡི་གེ་དང་༔ ལྟེ་བར་མཁའ་འགྲོའི་གསང་གནས་སུ༔ ཐམས་ཅད་འདུས་པའི་མཁའ་དཀྱིལ་ཡིག༔ བསམ་གྱིས་མི་ཁྱབ་བརྡ་ཡི་ཀློང་༔ འཁོར་ལོ་ཉི་ཤུ་རྩ་བཞི་ནི༔ གནས་ཡུལ་སྦྱོར་བས་ས་བཅུ་གསུམ༔ ལྷུན་གྱིས་གྲུབ་པ་ཡི་གེ་ཡང་༔ འཁོར་ལོ་ལྔ་ལ་རྫོགས་པའི་དབྱིངས༔ བདུད་རྩི་སྨན་གྱི་གཏེམ་པ་མྱོས༔ འཆོས་གསང་དེམ་གྱི་ཡི་གེ་ལྔ༔ སྐྱེ་མེད་ཨ་ཡི་རང་བཞིན་ནི༔ རྒྱལ་བ་ཀུན་གྱི་ཐུགས་ལ་གནས༔ སེམས་ཅན་ཀུན་གྱི་ཡིད་ལ་ཞུགས༔ ཡི་གེ་ཐུགས་ཀྱི་རྡོ་རྗེ་ནི༔ ཏིང་འཛིན་ཉོན་མོངས་ཟད་མཐར་འབྱམས༔ ཀུན་ལ་ཡེ་གྲོལ་རྒྱས་གདབས་པ༔ དེ་ཡང་དབུ་མའི་ཕྲ་མོའི་ངང་༔ བཞག་པའི་རྣལ་འབྱོར་ནམ་མཁའ་འཆར༔ འགགས་མེད་འཕྲུལ་གྱི་སེམས་བྱུང་ཟེར༔ ཐམས་ཅད་འཕྲུལ་བསྒྱུར་ཡི་གེའི་གསུང་༔ ཏིང་འཛིན་ཉོན་མོངས་བརྟན་རྩར་གྱུར༔ དཔེ་ཡི་ཡེ་ཤེས་ཚད་བཟུང་བས༔ ཉི་མ་རབ་འབྱམས་འོད་ཟེར་ནི༔ ལོངས་སྤྱོད་རྫོགས་པ་དོན་དམ་ཉིད༔ མི་ནུབ་རྒྱལ་མཚན་རང་བཞིན་འཆར༔ ༈ཁྲོ་བོ་ཐམས་ཅད་ཧཱུྃ་གིས་བསྡུས༔ ཞི་བ་ཐམས་ཅད་ཨ་ཡིས་བསྡུས༔ མཁའ་འགྲོ་ཧ་རི་ས་བཾ་བསྡུས༔ དཔའ་བོ་ཐམས་ཅད་ཧོ་ཡིས་བསྡུས༔ ༈མཁའ་དབྱིངས་ཨ་ལི་ཀ་ལ༼ ལི་དཔྱད། ༽འི་སྟེ༔ ཨོཾ་ཨཱཿཧཱུྃ་དང་སྭཱ་ཧཱས་བསྡུས༔ དེ་དག་སྦས་གསང་བཀྲུན་པས་བསྡུས༔ ཀུན་ཀྱང་འཁོར་ལོ་གཉིས་ཀྱིས་བསྡུས༔ ༈སྐུ་ཡི་ཛ་ལནྡྷ་རས་བསྡུས༔ དེ་ཡང་འཇུ་འདུལ་ཐབས་ཀྱིས་བསྡུས༔ བྷ་ག་དཔའ་བོའི་ཁྱད་ཆོས་སུ༔ ཡི་གེ་སྐུ་གསུང་ཐུགས་ཀྱིས་བསྡུས༔ ༈ཨ་ལི་ཤེས་རབ་རྒྱས་སྤྲིན་ལས༔ འོག་སྒོ་འབྱོངས་ལ་ཡོན་ཏན་ཅན༔ ཀ་ལི་ཐབས་ཀྱི་སྟེང་ཕྱོགས་འགྲོ༔ ཟུང་དང་ཟད་པར་བསམ་མི་ཁྱབ༔ སྐུ་ལ་སྦྱངས་པས་སྤྲུལ་སྐུ་དང་༔ གསུང་གི་ལོངས་སྤྱོད་ཐུགས་ལྟར་གྱི༔ ཆོས་ཀྱི་སྐུ་ལས་འཕར་སྟོབས་སྟོངས༔ གྲུབ་པ་བཞི་ལྡན་ཡི་གེ་ཡི༔ ཡན་ལག་དྲུག་ཅུའི་གསུང་དབྱངས་འགྲུབ༔ སྐུ་གསུང་ཐུགས་གསུམ་དབྱེར་མེད་པ༔ སྐུ་གསུམ་དཀོན་མཆོག་གསུམ་ངོ་བོ༔ ཡི་གེའང་འཁོར་འདས་ཀུན་ཏུ་ཁྱབ༔ ནམ་ཞིག་དུས་སུ་གྲུབ་པ་ན༔ སེམས་ཅན་དོན་དུ་གླེགས་བམ་སྣང་༔ རང་གི་དོན་དུ་ཆོས་སྐུ་ཡིན༔ དེ་བར་ཕྲིན་ལས་སྣ་ཚོགས་པ༔ ཐམས་ཅད་ཡི་གེའི་རྣལ་འབྱོར་བས༔ མི་གྲུབ་པ་ནི་གཅིག་ཀྱང་མེད༔ ཨ་ཧོ་ངོ་མཚར་རྨད་ཀྱི་ཆོས༔ དམ་ཚིག་འདི་ལས་འདའ་མེད་རྒྱ༔ ༈ཚོགས་ཀྱི་ལམ་པས་སྒྲུབ་པ་ན༔ དེ་ཡང་མོས་པས་སྤྱི་བ་ལ༔ སྦྱོར་བའི་ལམ་དུ་བསྒྲུབ་ཀྱང་ནི༔ རླུང་སེམས་ལས་གྲུབ་ཡི་གེར་ཏེ༔ མཐོང་བའི་འོད་གསལ་ཡི་གེ་དང་༔ སྒོམ་པས་ཟུང་འཇུག་མི་སློབ་པར༔ གསུང་གི་རྡོ་རྗེ་ཟུང་འཇུག་ལས༔ དང་པོ་བས་ལྟ་ག་ལ་རིག༔ ༈མཐར་ཐུག་སངས་རྒྱས་སྐུ་གསུང་ཐུགས༔ ཡི་གེ་གཅིག་གིས་ཚར་ཕྱིན་ཏོ༔ འདི་འདྲ་ཆེས་ཆོད་བྱས་པ་ན༔ བརྒྱད་ཁྲི་བཞི་སྟོང་རྩ་བ་བས༔ ༈ཆོས་རྣམས་ཀུན་ལ་རྨ་འབྱིན་ནས༔ ལོག་སྤྱོད་གསོད་མི་རུང་བ་དེར༔ སངས་རྒྱས་ཐུགས་རྗེའི་གོ་སྐབས་དབེན༔ འདི་འདྲ་ཉམས་སུ་བླང་བ་ན༔ གཅིག་སྒྲུབ་ཀུན་འགྲུབ་ཨ་ལ་ལ༔ དང་པོ་རྩ་ཡི་འགྲོས་ཐིམ་པས༔ ལམ་དུ་ཆོས་ཀྱི་ཕུང་པོ་འཆར༔ དེ་ནས་ཡི་གེའི་འགྲོས་ཐིམ་པས༔ དཔྱད་ལས་འདས་པས་མངོན་སུམ་རིག༔ ཐ་མ་རླུང་ལ་བྱིན་རླབས་ཞུགས༔ རྡོ་རྗེ་གསུང་གི་རོལ་མོ་བརྡུང་༔ ཡང་མཐར་རྩེ་མོ་སྐུ་གཉིས་པ༔ ༈ལོངས་སྤྱོད་རྫོགས་སྐུར་ཡི་གེ་འཕྲོ༔ ཞེས་ཀྱང་དག་སྣང་རབ་འབྱམས་སུ༔ རྒྱས་པ་བསྡུས་པས་ཟུར་ཉམས་ཀྱང༔ དངོས་པོ་ཙམ་ཞིག་གནས་པར་བསྡུས༔ ས་མ་ཡཱ༔ ཕྲན་ཚེགས་ཕྲིན་ལས་ཡི་གེས་གྲུབ༔ མིག་དང་རྣ་བ་སྣ་དང་ལྕེ༔ པདྨའི་རཀྟ་གང་རྙེད་ལ༔ ཀ་ཁ་ག་གྷ་རབ་བཀོད་དེ༔ ཛ་ཧཱུྃ་བཾ་ཧོའི་འཕྲོ་འདུ་ལས༔ ཁམས་གསུམ་སེམས་ཅན་ཐམས་ཅད་དང་༔ དུས་གསུམ་རྒྱལ་བའི་མངོན་པར་ཤེས༔ བསྡུས་བསྟིམ་དབང་པོ་སོ་སོར་སྡུད༔ བཟའ་ཞིང་བྱུག་པས་ཁྱད་དང་བརྟེན༔ སྙིང་ཀར་ཡེ་ཤེས་སེམས་དཔའ་ལ༔ ཏིང་ངེ་འཛིན་གྱི་ཡི་གེ་མཱུཾ༔ བཀོད་ལ་འཕྲོ་འདུ་མ་དམན་པས༔ ཐོགས་པ་མེད་པའི་མཁྱེན་པའང་༔ ཡི་གེ་འཁོར་ལོ་འདི་ཡིས་བྱེད༔ ཡི་གེ་ང་ཉ་ན་ཨོ་ཡི༔ ཡེ་ཤེས་སེམས་དཔའ་ལ་བཀོད་དེ༔ འཕྲོ་འདུས་སངས་རྒྱས་རྫུ་འཕྲུལ་བསྡུས༔ འགྲོ་བའི་སྟོབས་ཀྱིས་སྒྲིབ་པ་སྦྱངས༔ བདག་གི་སྤྱོད་པ་ལྔ་ལ་བསྟིམ༔ ཐོས་ནའང་རྫུ་འཕྲུལ་དངོས་གྲུབ་ཀྱང་༔ ཡི་གེ་འཁོར་ལོ་འདི་ཡིས་བྱེད༔ ལོག་འདྲེན་ལུས་ལ་བཀོད་པ་དང་༔ ཐམས་ཅད་བྱང་ཆུབ་སེམས་ལྡན་བྱེད༔ བགེགས་བསྐྲད་བསྲུང་བའི་འཁོར་ལོ་ཡང་༔ ཧཱུྃ་ཆེན་ཁྲོཾ་བོར་བཅུ་ཡི་ཐུགས༔ ཡི་གེ་འཁོར་ལོ་འདི་ཡིས་བྱེད༔ བྱད་མའི་ལུས་ལ་ཡི་གེ་བཀོད༔ གྲུམ་ཆིངས་ནུས་པ་གཞོམ་པའང་༔ ཡ་ར་ལ་ཝ་བཞི་ཉིད་དེ༔ ཡི་གེ་འཁོར་ལོ་འདི་ཡིས་བྱེད༔ རྃ་ལས་འོད་ཟེར་ཉི་མ་འབུམ༔ བརྡལ་གྱིས་འགྲོ་དྲུག་མུན་པ་བསལ༔ ཆོས་ཀྱི་སྣང་བར་ཁྱབ་པ་ཡི༔ རྡོ་རྗེ་ཉི་མའི་དངོས་གྲུབ་ཀྱང་༔ ཡི་གེ་འཁོར་ལོ་འདི་ཡིས་བྱེད༔ འབྱུང་བ་བཞི་ལ་དྲྭ་བ་བཀོད༔ རང་དབང་ཐོབ་ནས་སྐུ་རུ་སྨིན༔ ཡུམ་ཆེན་ལྔ་ཡི་རོལ་པར་འཆར༔ ཡི་གེ་འཁོར་ལོ་འདི་ཡིས་བྱེད༔ ཕུང་པོ་ལྔ་ལ་སྒྱུ་འཕྲུལ་བཀོད༔ ཞིང་ཁམས་ལྔ་ལ་རླུང་གིས་བཏེགས༔ རྩལ་འབྱོངས་ཞིང་ཁམས་སྦྱོང་པ་ཡང་༔ དབྱིངས་ལ་རིང་ཐུང་གུགས་ཀྱེད་ཀྱི༔ ཡི་གེ་འཁོར་ལོ་འདི་ཡིས་བྱེད༔ ཟས་ལ་ཡི་གེ་ཧྲཱིཿབཀོད་པས༔ དུག་གི་གནོད་སེལ་སྤོ་བ་གྲུབ༔ ཡོ་བྱད་ཡི་གེ་ཊཾ་བཀོད་པས༔ གང་འདོད་ནམ་མཁའ་མཛོད་ལ་དབང་༔ སྣང་ཞེན་ཡི་གེ་ཨཱཿབཀོད་པས༔ ཐམས་ཅད་མཉམ་པར་གྲུབ་པ་ཐོབ༔ ཡུལ་ལ་ཡི་གེ་ཨོཾ་བཀོད་པས༔ འཚོ་བ་ཐམས་ཅད་དག་པར་གྲུབ༔ གང་གི་ཟས་གོས་དངོས་གྲུབ་ཀྱང་༔ ཡི་གེ་འཁོར་ལོ་འདི་ཡིས་བྱེད༔ སྲོག་རྩ་ཧཱུྃ་བཀོད་འཕྲོ་འདུ་ཡིས༔ ཚེ་བཅུད་བསྡུས་ནས་འཆི་བདུད་བཅོམ༔ རྡོ་རྗེ་ཚེ་ཡང་འདི་ཡིས་གྲུབ༔ དྲེགས་པའི་ལུས་ལ་ཧཱུྃ་ཆེན་གྱིས༔ ཐུན་མོང་དངོས་གྲུབ་ཐམས་ཅད་དང་༔ རྡོ་རྗེའི་རོ་ལ་བཀོད་པ་ཡི༔ མི་སྣང་ལ་སོགས་བསམ་ཡས་འགྲུབ༔ ཡི་གེ་འཁོར་ལོ་འདི་ཡིས་བྱེད༔ གཞན་ཡང་དེ་འདྲ་བསམ་མི་ཁྱབ༔ ཡི་གེ་འཁོར་ལོས་མི་བྱེད་མེད༔ ཡི་གེ་འདི་ལ་ཕུལ་དུ་ཕྱུང་༔ ཡི་གེ་བཞི་བཅུ་ཞེ་གཉིས་ལ༔ སྒྲུབ་ཐབས་རྣམ་པ་དེ་ཡི་གྲངས༔ ཡི་གེ་ཆེན་པོ་བདུན་ཅུ་དྲུག༔ སྒྲུབ་ཐབས་རྣམ་གྲངས་དེ་ཡི་མཐའ༔ ཟད་མི་ཤེས་པའི་གཏེར་ཁུང་རྡོལ༔ ས་མ་ཡཱ༔ ཡེ་ནས་ལུས་སེམས་ཡི་གེར་གནས༔ རང་གཞན་ཡི་གེ་གཞི་ཡི་རྒྱུད༔ རྣམ་པ་བཀོད་པར་འཇུ་འདུལ་ཡང་༔ ཏིང་འཛིན་འཕྲུལ་གྱི་གསུང་དཀྱིལ་འཁོར༔ དབྱིབས་སུ་དཔེར་ཤར་བརྡ་སྟོན་པ༔ གཟུགས་བརྙན་ཡང་སྤྲུལ་ཡི་གེའོ༔ སངས་རྒྱས་སྐུ་ཡི་ཡི་གེ་ནི༔ ཡེ་ཤེས་འབྲས་བུ་བླ་ན་མེད༔ སངས་རྒྱས་གནས་ཀྱི་ཡི་གེ་ནི༔ འབྲས་བུ་བྱ་བྱེད་ཡི་གེ་ལགས༔ རྒྱུད་གསུམ་འབྲེལ་བར་ཉམས་བླང་པས༔ ཤེས་ཐོབ་རྐྱེན་འདི་རྩེར་ཕྱིན་ནོ༔ ས་མ་ཡཱ༔ གཉིས་པ་རྡོ་རྗེའི་རིམ་པ་ཡི༔ ཛ་ལནྡྷ་ར་སྤྲོས་པ་མེད༔ ཡི་གེའི་རྩ་ནང་བཅུད་ཀྱི་སྨིན༔ རླུང་ནི་ཡེ་ཤེས་རྣམ་པ་ལྔར༔ གནས་ལུགས་སྣང་བའི་སྒྱུ་འཕྲུལ་དུ༔ སྤྱི་བོར་རྡོ་རྗེ་ཕྲ་མོའི་ཚོགས༔ དཀར་པོ་ཆུ་ཡི་རང་བཞིན་དང་༔ མགྲིན་པར་པདྨ་ཕྲ་མོའི་འཁྲིགས༔ དམར་པོ་མེ་ཡི་རང་བཞིན་ཅན༔ སྙིང་ཁར་ནམ་མཁའ་མཐིང་ཀ་རུ༔ ལྟེ་བར་རཏྣ་སེར་པོ་ས༔ གསང་བར་རྒྱ་གྲམ་ཨིནྜ་སྟེ༔ འཁོར་མཐའ་ཐམས་ཅད་དེ་འདྲེར་བསྒོམ༔ ཕྱག་མཚན་ཕྲ་མོའི་འཁོར་ལོ་བསྐོར༔ འཁོར་འདས་ཐམས་ཅད་ཕྱག་རྒྱར་གྱུར༔ ཕྱི་ནང་ཀུན་ཏུ་བཟང་པོ་ཡི༔ གཏམས་པས་ཕྱག་རྒྱའི་རྣམ་པ་ལས༔ མ་དག་ཡུལ་གྱི་དངོས་པོ་གཞིག༔ སེམས་ཀྱི་གཞི་མལ་འཁོར་ལོ་ལ༔ རྣམ་ཤེས་རྡོ་རྗེ་ཉིད་དུ་བསྒོམ༔ ཉོན་མོངས་རིན་ཆེའི་དགོས་འབྱུང་སྟེ༔ ཡིད་ནི་ཆགས་མེད་པདྨ་འབར༔ འཇུག་པ་རྒྱ་གྲམ་ཟུང་འཇུག་བསྣོལ༔ ཀུན་ཏུ་ཕྱག་མཚན་ཕྱག་མཚན་ལ༔ གསོར་བས་བསམ་པས་ང་རྒྱལ་བསད༔ ཀུན་ཏུ་པདྨ་པདྨ་ལ༔ མདངས་ཀྱི་ཕྱུང་བས་འདོད་ཆགས་བསད༔ ཀུན་ཏུ་རྡོ་རྗེ་རྡོ་རྗེར་བསྒོམ༔ མི་འགྱུར་ཏིང་འཛིན་ཞེ་སྡང་བསད༔ ཀུན་ཏུ་བླང་དོར་མཉམ་པ་ཡི༔ མ་རིག་ལྟོ་ཕྲལ་གཏི་མུག་བསད༔ ཀུན་ཀྱང་བྱང་ཆུབ་སེམས་ཀྱི་སྲས༔ དབྱིངས་ཡེ་ངོ་མཉམ་ལྟ་བས་བསད༔ སྤྲོས་པ་ཅན་ལ་བྱིན་གྱིས་བརླབས༔ རྡོ་རྗེ་འབར་བའི་དམྱལ་བ་བཤིགས༔ བསྒྲལ་འདྲེན་རྡོ་རྗེ་རྔམས་པར་སྤྱོད༔ བསྟིམ་ནས་སྐུ་ཡི་རྡོ་རྗེ་སྦྱོར༔ པདྨ་འབར་བའི་ཡི་དྭགས་བཤིགས༔ བསྒྲལ་འདྲེན་པདྨ་རྔམས་པར་སྤྱོད༔ འཁོར་ལོ་འབར་བས་བྱིང་པ་བསད༔ བསྒྲལ་འདྲེན་འཁོར་ལོ་རྔམས་པར་སྤྱོད༔ རྒྱ་གྲམ་འབར་བས་མི་བཟོད་བསིགས༔ བསྒྲལ་འདྲེན་རྒྱ་བསྣོལ་རྔམ་པར་སྤྱོད༔ ཀུན་ཀྱང་ཐུགས་ལྔའི་བྱང་ཆུབ་བཀོད༔ རྒྱལ་རྣམས་རྡོ་རྗེའི་དམ་ལ་འདུས༔ སྐུ་ཡི་དབྱིག་ཏུ་རྡོ་རྗེ་བདག༔ བདེ་ཆེན་བྱང་ཆུབ་སེམས་སུ་ཇེན༔ རྡོ་རྗེ་རིགས་ཀྱི་རྫོགས་པ་ཆེ༔ རྒྱལ་རྣམས་པདྨའི་དམ་ཚིག་རྒྱལ༔ གསུང་གི་དབྱིག་ཏུ་པདྨའི་བདག་༔ སྙིང་རྗེ་བྱང་ཆུབ་སེམས་སུ་ཇེན༔ པདྨ་རིགས་ཀྱི་རྫོགས་པ་ཆེ༔ རྒྱལ་རྣམས་འཁོར་ལོའི་དམ་ལ་རོལ༔ ཐུགས་ཀྱི་འབྱིག་ཏུ་འཁོར་ལོ་བདག༔ ཤེས་རབ་བྱང་ཆུབ་སེམས་སུ་ཇེན༔ འཁོར་ལོའི་རིགས་ཀྱི་ངོ་མཉམ་པའོ༔ རྒྱལ་རྣམས་རིན་ཆེན་དམ་ལ་བཏབ༔ ཡོན་ཏན་དབྱིག་ཏུ་རཏྣ་བདག༔ མི་གཤོང་བྱང་ཆུབ་བཏང་སྙོམས་ཇེན༔ རྒྱལ་རྣམས་རྒྱས་འདེབས་ཆེན་པོར་ཞུགས༔ བྱམས་ཆེན་བྱང་ཆུབ་སེམས་སུ་ཇེན༔ ཀརྨའི་རིགས་ཀྱི་རྫོགས་པར་སྨིན༔ མི་འཇིགས་ཆོས་ཀྱི་དབྱིངས་སུ་བཞུགས༔ རྣམ་པས་ཆོ་འཕྲུལ་གཟུགས་ལ་གཟིགས༔ མི་གོས་སོ་སོར་རྟོགས་པ་ཡི༔ རྟགས་ཀྱི་འདུ་ཤེས་སྙིང་ལ་ཟུགས༔ ཚར་རྣོན་རྣམ་ཤེས་སྙིང་པོར་ལྡང་༔ མི་སྡུག་རྡོ་རྗེའི་ཞལ་དུ་བསྟབས༔ མི་འགོང་ང་རྒྱལ་ངོ་བོ་ཡི༔ རྣམ་གསུམ་ཚོར་བ་དབྱིངས་ནས་མཉམ༔ འདུ་བྱེད་འཕྲོ་འདུས་རླབས་ཀྱིས་གཞོམ༔ དོན་གྱི་སྣ་ཚོགས་རྡོ་རྗེའོ༔ རྟགས་ཀྱི་རྣམ་པ་བསྒོམ་པ་དང་༔ གཟུགས་བརྙན་རྣམ་པ་མི་འབྲལ་བ༔ ཆོས་སྐུའི་ཆོས་སྐུ་ལ་སོགས་གྲུབ༔ ཁྱབ་བྱེད་འབྲས་ཆོས་རྡོ་རྗེའི་རིམ༔ ལྷ་ཚོགས་ངོ་བོ་ཡེ་ཤེས་ལྔ༔ ཟང་ཐལ་དབྱིངས་ཀྱི་གོ་རར་བསྡམས༔ སླད་ཀྱི་རྒྱས་འདེབས་དབྱིངས་སུ་བསད༔ སྣང་བ་གསལ་བརྟན་གདན་ལ་བསྒྲིངས༔ མོ་མོག་མོས་བསྒོམས་དབྱིངས་ནས་ཤི༔ གཡོ་ཐབས་གོམས་པའི་མཐར་ཕྱིན་གྱི༔ དབྱིངས་ལྔ་ཡེ་ཤེས་ཕྱག་རྒྱ་ཅན༔ འཁོར་འདས་མཁར་འདེགས་རྒྱལ་པོ་ནི༔ བཞེངས་ལས་ཕྱག་རྒྱ་ཁྲོ་བོ་འདི༔ རྣམ་དག་རང་བཞིན་ཇི་འདྲ་བ༔ བསྒོམ་པ་ཇི་འདྲ་མཚོན་པ་འདྲ༔ སྣང་སྲིད་ཕྲ་རབ་རྡོ་རྗེས་འབིགས༔ རྡོ་རྗེ་རྟགས་པའི་རྡོ་རྗེའོ༔ འགྱུ་འཕྲོའང་སྣ་ཚོགས་རྡོ་རྗེས་འབིགས༔ རྡོ་རྗེ་སྲ་མཁྲེགས་འགྱུར་མེད་དོ༔ ནད་རྣམས་པདྨའི་རྡོ་རྗེའི་སྟེ༔ བདེ་བ་ཆེན་པོའི་ལུགས་སུ་བླུགས༔ གདོན་རྣམས་རྒྱས་འདེབས་རྡོ་རྗེས་འབིགས༔ དག་རྫོགས་ལྷ་ཡི་མངལ་ནས་གདོན༔ དགོས་འདོད་རིན་ཆེན་རྡོ་རྗེ་ལས༔ དུ་མའི་སྤྲིན་ཆར་ཞུན་མར་བསྟིམས༔ ནང་གི་རླུང་སེམས་དཀར་དམར་ལ༔ དབང་ཐོབ་ཕྱི་ཡི་ཕྲིན་ལས་རྣམས༔ ཞལ་ལས་གྲུབ་པར་གདོན་མི་ཟའོ༔ འབྱུང་ལྔ་ཕུང་ལྔ་ཕྱག་རྒྱ་སྟེ༔ བྱ་བ་ཕྱི་ཡི་རྡོ་རྗེར་བརྟགས༔ སེམས་རྟོག་དཔྱོད་པའི་ཕྱག་མཚན་ཏེ༔ ཟིན་པ་རྡོ་རྗེ་ཕྱི་ནང་གི༔ དཀར་ནག་མ་འདྲེས་བྱེ་བྲག་ཆོས༔ ཐམས་ཅད་རྡོ་རྗེར་ཚར་ཕྱིན་ནོ༔ ལམ་དང་ཡེ་ཤེས་རྡོ་རྗེར་ཤར༔ བྱ་བ་བྱེད་པས་རྡོ་རྗེའོ༔ ཡེ་གྲུབ་རང་བཞིན་རྡོ་རྗེ་ལས༔ རང་བཞིན་བཅུ་ལ་ཡིད་མི་སྟོན༔ བྱར་མེད་རྫོགས་པས་རྡོ་རྗེའོ༔ ཀུན་ཀྱང་རྡོ་རྗེ་སྲས་ཀྱི་དམ༔ ས་མ་ཡཱ༔ འདིས་ཀྱང་ཐོགས་མེད་རྣམ་ལྔ་གྲུབ༔ རྡོ་རྗེ་སྲ་ལ་མི་སྡུག་པར༔ ཟང་ཐལ་པདྨའི་མེས་མི་ཚིགས༔ འཁོར་ལོ་མཁའ་ལ་མཐོ་དམན་གྲུབ༔ རཏྣ་ཛ་ཧུའི་གཏིང་དུ་སྤྱོད༔ སྣ་ཚོགས་གྲུབ་པ་ཐམས་ཅད་ཐོབ༔ རྡོ་རྗེས་དུས་ཀྱི་མཚོན་ཆ་གཏོར༔ པདྨའི་ཆུ་བོའི་གཡེང་བ་བྱེད༔ འཁོར་ལོའི་རྦོད་མས་མི་འཇིགས་པར༔ རཏྣའི་མེ་ལ་མི་བརྫི་སྟེར༔ དེ་ལ་སོགས་པ་ཐམས་ཅད་ཀུན༔ རིམ་པ་འདི་ལྟར་བཀོད་ནས་ནི༔ དུས་གསུམ་རྒྱལ་བའི་དབང་བྱིན་དབབ༔ རིག་འཛིན་སྟོང་ཆེན་སྒྱུ་ཡི་བརླབས༔ གང་ལའང་ནི་ཆགས་ཐོགས་མེད༔ འདའ་དཀའ་རྡོ་རྗེའི་ཕྱག་རྒྱ་ཡི༔ སྐྱེ་གནས་བཞི་བོ་ཟང་ཐལ་ནས༔ རིག་འཛིན་རྣམ་གཞིའི་ལམ་ལ་གནས༔ འདི་ཡང་ག་ག་ཨ་བྷྱེས་ཏེ༔ ནམ་མཁའ་མཛོད་ཀྱི་ཆོས་སྒོར་ཤར༔ ས་མ་ཡཱ༔ ཚར་གཅོད་ཡུལ་ལ་ཕབ་པ་ཡི༔ ཟད་པར་འཕྲུལ་གྱི་ལུང་ལ་སྦྱོར༔ དེ་ནས་བསྒྲལ་འདྲེན་ས་ལ་གནས༔ དེ་ནི་ཉི་ཚེའི་འབྲས་བུའོ༔ ལམ་མྱུར་འབྲས་བུ་ས་ཐོབ་ནས༔ རལ་གྲིའི་རིག་འཛིན་ལ་སོགས་པའོ༔ འབྲས་བུ་འདི་ནི་ཡེ་ཤེས་ཀྱི༔ ཕྱག་རྒྱ་ལམ་དུ་བྱེད་པའི་ཟབ༔ ལྷུན་གྱིས་གྲུབ་པའི་འབྲས་ཆོས་ལྔ༔ མཐར་ཐུག་རིམ་པ་ལྔའི་ཕྲིན་ལས༔ རྟོག་མེད་འབྱུང་བ་ངོ་མཚར་ཅན༔ དག་སྨིན་ཁོ་ལག་རྫོགས་པའོ༔ རྡོ་རྗེ་མི་འགྱུར་འདི་བསྒོམས་པས༔ ཐོས་པ་རྡོ་རྗེ་ལྟ་བུའི་ནོར༔ དད་པ་ཆུ་བོ་ལྟ་བུའི་ནོར༔ བསམ་གཏན་རྡོ་རྗེའི་དབྱིངས་སུ་ཟླུམ༔ པདྨ་མ་གོས་འདི་བསྒོམ་པས༔ ཚུལ་ཁྲིམས་མེ་ཏོག་ལྟ་བུ་ལ༔ དམ་ཚིག་ཤེལ་སྒོང་ལྟ་བུ་དང་༔ འདུ་བཞི་མོས་པར་བཅས་པའང་གྲུབ༔ འཁོར་ལོ་རྣོན་པོའི་དཔལ་ཆེན་པོའི༔ ཤེས་རབ་ཉི་མ་ལྟ་བུ་དང་༔ བརྩོན་འགྲུས་ངང་གི་འགྲོ་ཆོས་བཅུ༔ བཅས་ཏེ་སྡུད་ནས་ལྷུན་གྱིས་གྲུབ༔ རིན་ཆེན་བསྟར་ལེགས་འདི་བསྒོམས་པས༔ སྦྱིན་པ་ནོར་བུ་ལྟ་བུ་དང་༔ བཟོད་པས་ཐམས་ཅད་ཕྱོགས་ལ་ཞུགས༔ མཉམ་པ་ཉིད་དུ་ཐམས་ཅད་ཟླུམ༔ སྣ་ཚོགས་རིམ་པ་འདི་བསྒོམ་པས༔ ཐབས་ཆེན་སྨན་གྱི་སྡོང་པོ་དང་༔ སྟོབས་ཀྱི་སྲེད་མེད་གནོན་པ་དང་༔ ཡེ་ཤེས་ནམ་མཁའ་ལྟ་བུ་འགྲུབ༔ གཞན་དུ་རྒྱས་པར་སྤྲོས་པ་ན༔ རྒྱལ་པོའི་ཡི་གེའི་གོ་ས་རུ༔ ཕྱག་རྒྱ་དམ་ཚིག་ལྔ་ཡང་གསལ༔ གཞན་ལ་རང་རང་ཕྱག་རྒྱ་སོགས༔ རིག་པས་ཕུལ་དུ་བསྡུས་པས་ན༔ མ་རྨོངས་རིམ་གྱི་གོམས་པར་བྱ༔ ཡི་གེ་ཕྱག་མཚན་གྱུར་པ་དང་༔ ཡི་གེའི་རྡུལ་གྱི་རྩ་དབུས་སུ༔ གསལ་ལ་ཁྱད་པར་མེད་པས་ན༔ གང་ལྟར་མོས་པ་ལྟ་བུར་བསྒོམ༔ ས་མ་ཡཱ༔ འཇུ་འདུལ་རྡོ་རྗེའི་མཉམ་སྦྱོར་བས༔ འཁོར་འདས་ཐིག་ལེ་རྡོ་རྗེའི་སྤྲིན༔ ལ་བཟླ་དྭངས་མའི་ཐིག་ལེ་འཆར༔ རླུང་གི་བསླད་པས་མ་གོས་པ༔ ཡེ་ཤེས་སྙིང་པོ་ལ་མཉམ་བཞག༔ དང་པོ་རྩ་ཡི་འགྲོས་ལ་གདབས༔ རྒྱུ་བ་བཅད་པ་ལམ་སྤྲུལ་སྐུ༔ བར་དུ་ཡི་གེའི་འགྲོས་ལ་གདབས༔ རྒྱུ་བ་བཅད་དེ་ལོངས་སྤྱོད་རྫོགས༔ ཐ་མ་ཐིག་ལེ་རླུང་ལ་གདབས༔ རྒྱུ་བ་བཅད་པ་ཆོས་སྐུའི་ལམ༔ དེ་ལྟར་རྡོ་རྗེའི་འཁོར་ལོ་ཡི༔ འབྲས་བུ་སྐུ་གསུམ་ལྷུན་གྱིས་གྲུབ༔ ས་མ་ཡཱ༔ སྐུ་ཡི་ཛ་ལནྡྷ་ར་ནི༔ རྩ་ཁམས་ཡི་གེ་རྡུལ་སྙེད་དུ༔ རླུང་ཁམས་དྭངས་མའི་ཐིག་ལེ་ཕྲན༔ ཐིག་ལེ་སྣ་ཚོགས་རྡོ་རྗེའི་སྦུབས༔ གཉུག་མ་ཡེ་ཤེས་ངོ་བོའི་སྐུ༔ ཆ་ཕྲ་གྲངས་ཀྱིས་བསྒྲངས་ལས་འདས༔ རང་བཞིན་དཀྱིལ་འཁོར་ངང་ལ་རྫོགས༔ གཟུགས་བརྙན་ཏིང་འཛིན་མཉམ་པར་བསྡུས༔ འཁོར་ལོ་ལྔ་རུ་ཞི་བའམ༔ འཁོར་ལོ་གཉིས་སུ་ཞི་ཁྲོའི་ལྷ༔ གདན་དང་བཅས་པའི་རང་བཞིན་ལ༔ སྣང་འབྱེད་ཐོབ་པས་བསམ་ཡས་སྤྲོ༔ དབུས་སུ་བྱ་བྱེད་རྫོགས་པ་དང་༔ པདྨའི་སྐྱིལ་ཀྲུང་གིས་རོལ་པ༔ མཐིང་ནག་མདུན་ནས་རྣམ་པར་སྣང་༔ བཙོ་མ་རིན་ཆེན་གཡས་སུ་ནི༔ བཻཌཱུར་ཆགས་མཆོག་པདྨའི་སྐུ༔ ནུབ་ནས་བྱང་ཕྱོགས་གདོན་མི་ཟ༔ མརྒད་མདོག་འདྲ་རང་རང་ཡུམ༔ ཚོམ་བུའི་རིགས་ཆུང་དང་བཅས་སུ༔ མ་འདྲེས་ཏིལ་གྱི་གོང་བུ་འདྲ༔ ཡང་ཅིག་རྟོག་འདུལ་ཐུབ་ཆེན་དྲུག༔ ཕྱོགས་བཞི་སྟེང་འོག་གནས་སུ་སྟེ༔ སྒོ་བཞིར་དབང་ཆེན་འཇོམས་བྱེད་ཟུང་༔ཡ་བརྒྱད་ལ་སོགས་བསམ་མི་ཁྱབ༔ ཡང་ཅིག་སྤྱི་བོའི་འཁོར་ལོ་རུ༔ འབར་བ་ཧེ་རུ་བདུན་ཅུ་དྲུག༔ ཁྲོ་བོ་རོལ་པའི་འོད་ཟེར་ཅན༔ ཀུན་ཀྱང་སྣང་སྟོང་རོལ་བའི་ངང་༔ མཉམ་པ་ཆེན་པོ་བདེ་བ་ཆེ༔ ཡང་གཞན་འཁོར་མཐའ་ཏིལ་འབྲུ་འདྲའི༔ གཏམས་པར་འཇུ་འདུལ་བདེ་མཆོད་ཆེའི༔ དགྱེས་མཉམ་དྲོད་ཀྱི་ཞུ་ལུག་གིས༔ སྐུ་ཡི་རྡུལ་ཕྲན་གོལ་ཆེར་ཞུགས༔ གྲངས་མེད་བདེ་གཤེགས་ལུས་ལ་བཞུགས༔ ལུས་སུ་འཛིན་པ་འཇིག་པར་བྱེད༔ གཞན་ཡང་ལུས་ཁམས་སྐུ་མཆོག་ཏུ༔ གྲུབ་ནས་རྩ་ཁམས་དྭངས་མ་རུ༔ དྭངས་མར་དྭངས་མ་ཡེ་ཤེས་རླུང་༔ ཡི་གེ་འཁོར་ལོའི་གནས་སུ་འཁྱིལ༔ བྱར་མེད་ཆོས་ཟད་རྟོག་བྲལ་ལ༔ ཇི་སྙེད་པ་ཡི་རླུང་ཆེན་བསྐྱེད༔ ཡང་ན་རྩ་ཁམས་ཐམས་ཅད་དུ༔ དཔའ་བོ་གྲི་ཐོད་བསྣམས་པ་ནི༔ རླུང་ཁམས་དཔའ་མོའི་ཨེ་དབྱིངས་འཁྱིལ༔ དེ་ལའང་བདེ་རྒྱུ་སྔར་ལྟར་སྦྱོངས༔ འདི་ཡི་རིམ་པ་བསྐྱེད་ཆོག་ནི༔ གང་ཡིན་དེ་ཡི་རྗེས་སུ་བྱ༔ ཡང་ན་སྤྱི་བོ་ཁྲག་འཐུང་དང་༔ མགྲིན་པར་དཔའ་བོ་སྙིང་ཀ་རུ༔ ཞི་བ་ལྟེ་བར་མཁའ་འགྲོའི་ཚོགས༔ པད་ཊ་རྡོ་རྗེའི་སྦུག་མ་རུ༔ ཡོངས་འདུས་བཀོད་པའི་ཁྲོམ་སྤྲུགས་སུ༔ དགའ་བཞི་རྩོལ་མེད་འཆར་བ་ཉིད༔ ཡེ་ཤེས་རང་བཞིན་དབྱེར་མེད་གསལ༔ ཐོ་ཕྱི་ཀུན་ཏུ་རྡུལ་སྙེད་ཀྱི༔ ལྷ་མོའི་བརྡ་ཡི་འབྲས་བུ་རྫོགས༔ དགུགས་བརྟགས་རྡོ་རྗེའི་ཆིངས་སུ་བཅིང་༔ དེ་ལྟར་གསལ་ཀུན་སྣང་སྟོང་གི༔ འཇོག་བསྒོམ་མ་ཡིན་བྱིན་རླབས་ཞུགས༔ བརྟན་གཡོ་སྐུ་ཡི་གོར་རུ་བཙུད༔ སྐུ་ལ་འུབ་ཆུབ་ཁྱབ་བདག་བལྟ༔ སྐུ་ཡི་ཛ་ལནྡྷ་ར་ཡིས༔ མཆོག་ཏུ་སངས་རྒྱས་ཕྲིན་ལས་བསྒྲུབ༔ སྡུག་བསྔལ་ལྡན་ལ་ཆོས་ཀྱི་རྒྱལ༔ བཀྲེན་ལྡན་ཁ་འབར་བློ་རྟུལ་ལ༔ སེང་རབ་གཉིས་ལྡན་ཤཱཀྱ་ཐུབ༔ དགའ་ཆེན་བརྒྱ་བྱིན་རྩོད་ལྡན་དུ༔ ཐ་བཟང་རིས་ཀྱི་འོད་ཟེར་ཞུ༔ ལས་སྣང་བག་ཆགས་ཐམས་ཅད་ཀུན༔ བསྲེག་སྦྱངས་སྐུ་ཡི་གོ་རུ་བསྟིམ༔ སྒོས་བཙན་འཁོར་ལོ་བཞི་ལའང་ཞུགས༔ ཐམས་ཅད་ས་བོན་འཇུ་འདུལ་བརླབས༔ འདི་ཡི་སངས་རྒྱས་གྲུབ་པའི་མཐར༔ གཞན་དོན་མཛད་པའི་རྟེན་འབྲེལ་འགྲིགས༔ བསྐལ་བ་བླུགས་ནས་དྲི་མ་གཏོར༔ སངས་རྒྱས་ཀུན་དང་མཉམ་ཉིད་ཐོབ༔ སྐུ་ཡི་དོན་དམ་རིག་སྐུ་ནི༔ རང་བཞིན་ལྷུན་གྲུབ་མགོན་པོ་འགྲུབ༔ སྐུ་ཡི་རང་བཞིན་འགགས་མེད་པས༔ ཡེ་ཤེས་གསུང་རྣམས་ལོངས་སྤྱོད་རྫོགས༔ སྐུ་ཐུགས་སྤྲོས་བྲལ་ཉག་གཅིག་འདུམ༔ ངོ་བོ་ཀ་དག་ཆོས་སྐུ་ཐོབ༔ སྐུ་ཡི་ཤ་ཁམས་རྡུལ་ལ་ཐེབ༔ ཆོས་དབྱིངས་ཡེ་ཤེས་རྟགས་སུ་འབར༔ གཏི་མུག་གསང་ནས་གྲོལ་བ་ནི༔ མཁའ་ལ་སྤྲིན་དེངས་དཔེ་རུའོ༔ སྐུ་ཡི་ཁྲག་གི་གོ་བཀག་པས༔ རོལ་བས་དགྱེས་བསྐྱེད་ང་རྒྱལ་བསད༔ མཉམ་ཉིད་ཡེ་ཤེས་ཚོམ་བུར་ཤར༔ འདི་ཡི་སངས་རྒྱས་འགྲུབ་པའི་མཐར༔ འདོད་ཆགས་ཟད་པར་གྲུབ་པ་ཐོབ༔ སྐུ་ཡི་མེ་རྡུལ་ལ་བཏབ་པས༔ སོར་རྟོགས་ཡེ་ཤེས་རྟགས་སུ་འབར༔ འདི་ཡང་ལམ་གྱི་ཕྲིན་ལས་སོ༔ སྐུ་ཡི་རླུང་ལ་དེ་བཞིན་འབེབས༔ བྱ་གྲུབ་ཡེ་ཤེས་རྟགས་སུ་འབར༔ ཁོང་ ༼ ཕྲག་དཔྱད། ༽ དོག་བསད་ནས་གྲུབ་ཐོབ་སྟེ༔ འདི་ཡང་ལམ་གྱི་ཕྲིན་ལས་སོ༔ སྐུ་ཡི་མཁའ་ཁམས་སྟོང་ལ་ཐེབ༔ རྡོ་རྗེ་མི་འགྱུར་རང་དཀྱིལ་འཁོར༔ ཞེ་སྡང་བསད་ནས་གྲུབ་ཐོབ་སྟེ༔ མེ་ལོང་ཡེ་ཤེས་རྟགས་སུ་འབར༔ འདི་ཡང་ལམ་ཀྱི་ཕྲིན་ལས་སོ༔ ཤ་ཁམས་སྐུ་ཡི་རྡོ་རྗེ་འབར༔ ཁྲག་ཁམས་ཡོན་ཏན་རྡོ་རྗེ་འབར༔ མེ་ཁམས་པདྨ་རྡོ་རྗེ་འབར༔ རླུང་ཁམས་ལས་ཀྱི་རྡོ་རྗེ་འབར༔ རིག་སྟོང་ཐུགས་ཀྱི་རྡོ་རྗེ་འབར༔ དེ་ཡི་གཟི་བྱིན་མཐར་ཕྱིན་པ༔ ཅུང་ཟད་ཙམ་དུ་མ་གྱུར་ཡང་༔ མོས་དང་རླུང་སེམས་འོད་གསལ་སློབ༔ ལྷ་སྐུའི་རིམ་པའང་བར་སྐབས་སུ༔ སློབ་མིན་སངས་རྒྱས་གསང་བར་བཅས༔ སྒྱུ་མ་རྡོ་རྗེ་སྲ་མཁྲེགས་འབར༔ འབར་བ་གསོབ་གསོགས་རྟོག་བྲལ་སྐུ༔ སངས་རྒྱས་ཀུན་གྱི་སྐུའི་སྐུ་གསུང་༔ ཐུགས་ཡོན་ཕྲིན་ལས་ཡུལ་གོལ་ཕྲལ༔ ཏིལ་གྱི་གོང་བུ་བཞིན་པ་ཡི༔ དཀྱིལ་འཁོར་འཁོར་ལོ་བསམ་མཐར་ཡས༔ དེ་འདྲའི་འགྲོས་བཞི་བསྟིམ་ལས་སྣང་༔ བདུད་ལྷའི་རང་གཉེན་དེ་དང་འཕྲད༔ མཐར་ཐུག་སྐུ་གསུམ་འབྲས་བུ་ཐོབ༔ ས་མ་ཡཱ༔ རྡུལ་སྙེད་རིགས་དྲུག་ལ་བཀོད་པས༔ རྡུལ་སྙེད་རྡོ་རྗེས་སྐུ་དྲུག་འབྱིན༔ ཉོན་མོངས་གཏུམ་པོའི་ལུས་ལ་བཀོད༔ རྡོ་རྗེ་མཚོན་ཆས་ཚར་བར་བྱེད༔ སེམས་དང་ངག་ལ་དེ་བཞིན་ནོ༔ ཕྱི་ཡི་རྡོ་རྗེར་ཕྲ་འདི་བཀོད༔ ཐམས་ཅད་སྐུ་ཡི་གོ་རུ་འཕོ༔ འདོད་པས་རྡོ་རྗེར་ཕྲ་བཀོད་པས༔ ཁབ་ལེན་ཉིད་ལ་ལྕགས་འདུ་འདྲ༔ སྡུག་བསྔལ་རྡོ་རྗེར་ཕྲ་བཀོད་པས༔ ཞེན་པས་རྩི་བྲལ་བདེ་ཆེན་ཉེ༔ ཟིན་པས་རྡོ་རྗེར་འདི་ཉིད་པས༔ རང་བཞིན་དཀྱིལ་འཁོར་ཉི་མ་གཞོན༔ མུན་པས་ཕྱོགས་གསུམ་དྲུང་ནས་འབྱིན༔ མ་ཟིན་རྡོ་རྗེར་འདི་ལྟར་ན༔ བྷ་ག་ཡངས་པ་ལྔ་རུ་བསྐྱིལ༔ ཡང་ཅིག་དུག་ལ་པདྨ་སེམས༔ རྒྱས་པར་རཏྣ་རྡོ་རྗེ་ལ༔ རྣམ་ཞི་རྡོ་རྗེ་རྡོ་རྗེ་དང་༔ མ་ཞི་བ་ལ་གྲུབ་པར་བཀོད༔ སེམས་འཕྱོར་ཐམས་ཅད་རྡོ་རྗེ་རྟགས༔ ཀུན་ནས་ཕུང་ལ་རྟགས་པ་ལེགས༔ ཉི་མ་འདི་ནི་གྲང་བས་ནད༔ ག་བུར་ཚད་པ་སྤུར་བས་རྟགས༔ བརྟན་ལ་གཡོ་བས་ཡབ་ཞུགས་པས༔ ཟུང་འཇུག་སྟོབས་ཀྱི་བདེ་ཆེན་འཆར༔ ཐམས་ཅད་མཁའ་ཀློང་རྡོ་རྗེར་འབྱིན༔ དེའང་མ་མ་རྡོ་རྗེར་སིམ༔ སྐུ་ཡི་ཛ་ལནྡྷ་ར་ཡི༔ མ་དག་འཁྲུལ་བའི་བག་ཆགས་ཀུན༔ གཞི་ལ་དག་ནས་གྲོལ་བ་ཐོབ༔ ཕྲ་བཀོད་དགུ་སྟོང་གྲངས་ཡོད་དེ༔ དེ་དག་ཡི་གེ་འདི་ལ་ཞུགས༔ ཞེས་སོ༔ ཕྲ་མོ་རྣམ་གསུམ་དམ་ཚིག་ལ༔ ཡི་གེ་པོ་ཏིའི་གཟུགས་བརྙན་དམ༔ རང་ལ་བཞུགས་པའི་ཤེས་བྱའི་དམ༔ ཏིང་འཛིན་སྟོང་འདེབས་གསལ་བས་དམ༔ དེ་འདྲའི་གསུམ་པོ་བསྒྱུར་བས་དམ༔ དགུ་རུ་རྣམ་པར་བཤད་དོ་རྒྱ༔ དེ་འདྲའི་རྟགས་ལ་མི་བརྙེས་དང་༔ རྣལ་འབྱོར་བྱེད་དང་བཅས་པ་དང་༔ མཚན་དང་བཅས་ལ་བརྙེས་སྤངས་གུས༔ སྒྲུབ་པའི་རྣམ་པ་ཉེར་བདུན་ནོ༔ སྔ་ཕྱི་རྩ་བ་ཡན་ལག་གོ༔ དབང་ནི་རྣམ་པ་བཞི་ཡིན་ནོ༔ ས་མ་ཡཱ་བུདྡྷ༔ ཞེས་ཀྱང་ཕྲ་མོ་བརྒྱ་ལྷག་ཡོད་པ་ལས་གསུམ་ཙམ་བསྡུས་ཏེ་བསྟན་པས་དག་སྣང་གི་ཁྲིགས་ལས་ཟུར་ཆགས་པ་དུས་མཐའི་སྔགས་མིང་ག་གཱ་ཨ་བྷྱེ་ནས་རྩ་རླུང་གི་ཡན་ལག་ཏུ་སྤྲོས་སོ། །དགེའོ། །དགེའོ། །དགེའོ། །

གཞན་ལུས་ཐབས་ལྡན་བསྡུས་པ་ཡེ་ཤེས་སྙིང་པོ

གཞན་ལུས་ཐབས་ལྡན་བསྡུས་པ་ཡེ་ཤེས་སྙིང་པོ་བཞུགས་སོ༔

ན་མོ་གུ་པདྨ་ཀཱ་ར་ཡེ༔ འདི་ལ་གསུམ་སྟེ༔ ཐ་མལ་གྱི་ཉེས་པས་མི་གོས་ཤིང་འཆིང་བ་མཐའ་དག་ལས་གྲོལ་བར་བསྟན༔ བརྟེན་པ་ཉིད་བསྒྲུབ་པའི་སྙིང་པོའི་བཤད༔ བརྟེན་ཚུལ་གྱི་ཉམས་ལེན་བསྡུས་པ་དང་༔ དེའི་ཡོན་ཏན་གྱི་བསྔགས་པ་བརྗོད་པའོ༔ དང་པོ་ནི༔ མི་ཚངས་སྤྱོད་པའི་ཉེས་པ་བྱུང་བ་ལ༔ གཞི་བསམ་སྦྱོར་བ་མཐར་ཐུག་རྣམས་ཚང་དགོས་པ་ལས། དང་པོ་གཞི་མིའི་བུད་མེད་ལས་ལྡོག་ཏེ༔ ཡབ་ཡུམ་ལྷར་བསྒོམ་པའི་འདུ་ཤེས་ཀྱིས་དེའི་ཡན་ལག་མ་ཚང༔ བསམ་པ་འཁྲིགས་བདེ་ཉམས་སུ་མྱོང་འདོད་ལ༔ འདིར་སེམས་ཅན་ཐམས་ཅད་ཀྱི་དོན་དུ་ལྷན་སྐྱེས་ཀྱི་བདེ་བ་ཕྱག་རྒྱ་ཆེན་པོ་མཆོག་གི་དངོས་གྲུབ་མངོན་དུ་བྱེད་པའི་འདུ་ཤེས་དང་ལྡན་པས་བསམ་པའི་ཡན་ལག་མ་ཚང་༔ སྦྱོར་བ་ཐབས་ལ་མི་མཁས་པའི་དབང་པོ་གཉིས་སྦྱོར་ཐ་མལ་ལས་ལྡོག་ཏེ༔ མཁའ་གསང་རྡོ་རྗེ་དང་པདྨའི་འདུ་ཤེས་དང་༔ སྦྱོང་བའི་སྒྱུ་རྩལ་དྲུག་ཅུ་སོགས་ལ་མཁས་པ་དང་༔ མཐར་ཐུག་ཁམས་འཕོ་བ་དང་འགྱུར་བའི་སྡུག་བསྔལ་ལས་འཕགས་ནས་འཕོ་མེད་དུ་བཟུང་ལྡོག་དགྲམ་པས་ཐིག་ལེ་གོང་འཕེལ་དུ་སྤེལ་བའི་ཁྱད་པར་རྨད་བྱུང་གི་གནད་ཀྱིས་ཚངས་སྤྱོད་མཆོག་ཏུ་གྱུར་པ་ཡིན་ཏེ༔ འཁོར་ལོ་བཅུ་པའི་མདོ་ལས༔ ཁྱིམ་ན་གནས་ཤིང་ཁ་སྤུ་མ་བྲེགས༔ ཆོས་གོས་མ་གྱོན་ཀྱང་༔ ཚུལ་ཁྲིམས་ཀྱང་མ་མནོས་ཀྱང་༔ འཕགས་པའི་ཆོས་ཉིད་དང་ལྡན་པ་དེ་ཉིད་དོན་དམ་པའི་དགེ་སློང་ཞེས་བྱ་བའོ༔ ཞེས་གསུངས་སོ༔ དེས་ན་ས་ར་ཧས༔ ཚངས་པར་སྤྱོད་པའི་དགེ་སློང་སྟེ༔ ཧེ་རུ་ཀ་དཔལ་དགེ་སློང་མཆོག༔ ཞེས་དང༔ གསང་འདུས་ལས༔ ཕ་རོལ་བུད་མེད་བསྟེན་པར་བྱ༔ ཞེས་སོ༔ དེར་མ་ཟད་འདིའི་སྟོང་བཞིའི་རིམ་པར་ཁམས་གསུམ་གྱི་སེམས་སེམས་བྱུང་ཐམས་ཅད་བཙན་ཐབས་སུ་འགགས་ཤིང༔ དེ་ལ་བརྟེན་པའི་ལས་དང་བག་ཆགས་ཀྱི་འཆིངས་བ་མཐའ་དག་ལས་གྲོལ་བའང་༔བདེ་མཆོག་ལས༔ ཁྱད་པར་དུ་ནི་བསྒྲུབ་པ་པོའི་མ་དང་བུ་མོ་ལ་སོགས་པར༔ རྣམ་པ་འདི་ལྟའི་ཆོ་ག་ཡིས༔ འཆིང་བ་ལས་ནི་རབ་གྲོལ་ནས༔ ཞེས་སོ༔ གཉིས་པ་ནི༔ ཚངས་སྤྱོད་གཞན་གྱིས་ཁམས་བསྲུང་བར་བྱེད་ཀྱང་སྤེལ་བར་ནི་མ་ནུས་པ་ལ༔ འདིར་འདོད་པའི་རྒྱུ་རྩལ་གྱིས་ཁམས་རྒྱས་པར་བྱས་ནས་ཕྱག་རྒྱ་བརྟེན་ཏེ་འཛག་མེད་དུ་བཅིངས་ཤིང་དེར་མ་ཟད་རྒྱ་མཚོ་ལས༔ ཨཱ་ལི་ཀཱ་ལིའི་བདེ་བ་ཉིད༔ ཕན་ཚུན་མ་འདྲེས་གཅིག་པར་ཤེས༔ བཅུ་དྲུག་ངོས་མཉམ་མཚན་དང་ལྡན༔ ཕྱོགས་གཅིག་ཡེ་ཤེས་ལྔ་ལྡན་པ༔ བརྒྱད་བཅུ་བཟོད་སོགས་རྒྱུ་ལས་འཕགས༔ ཞེས་པ་ལྟར༔ མཚན་དང་དཔེ་བྱེད་ཀྱི་ངོ་བོ་སྤེལ་ནས༔ འཛག་བདེ་འགྱུར་བཅས་དེ་ཡང་ཐབས་ལམ་གྱི་སེམས་ལྔ་མཐར་ཆགས་སུ་སྐྱེས་ནས་མི་འགྱུར་བའི་བདེ་ཆེན་སྟོང་ཉིད་ཉི་ཤུའི་རང་བཞིན་ཅན་དང་༔ རྣམ་ཀུན་མཆོག་ལྡན་གྱི་སྟོང་ཉིད་འབྲས་ཆོས་མཐའ་དག་ལྷུན་གྲུབ་ཆེན་པོ་ལྷན་ཅིག་སྐྱེས་པའི་ཡེ་ཤེས་ལ་ཐུགས་ཀྱི་ཡེ་ཤེས་ལྔའི་བསྐོར་བར་བསྐྱེད་པ་ལ༔ ཐབས་ཀྱི་རྣམ་པའི་ཆ་ནས་བྱང་ཆུབ་ཕྱོགས་ཀྱི་ཆོས་སུམ་ཅུ་རྩ་བདུན་མ་འདྲེས་ཡོངས་སུ་རྫོགས་པ་དང་༔ རྒྱུ་མཚན་དེས་ན་གནས་སྐབས་ཀྱི་འབྲས་བུ་ས་བཅུ་ལམ་ལྔའི་སྤང་རྟོགས་ཀྱི་ཆོས་ཀྱང་བདེ་སྟོང་ལྷུན་གྱིས་གྲུབ་པའོ༔ དེ་ལྟ་བུའི་ཉེ་ལམ་རྨད་དུ་བྱུང་བ་འདི་ལ༔རིག་མ་འདུ་བྱ་བ་ལ་སོགས་པའི་བསྙེན་པ་དང་༔ དབང་བསྐུར་ཆོས་བཤད་བྱིན་གྱིས་བརླབས་ནས་མཁའ་གསང་མཉམ་པར་སྦྱོར་བས་ཉེ་བསྙེན༔ སྐད་ཅིག་བཞིའི་སྔ་མ་རྣམ་པར་དགའ་བ་བཞི་སྐྱེས་པ་ནི་བསྒྲུབ་པ༔ མཆོག་ཏུ་མི་འགྱུར་བ་དགའ་བྲལ་རྒྱུད་ལ་སྐྱེས་པ་ནི་བསྒྲུབས་པ་ཆེན་པོ་སྟེ༔ གསང་འདུས་ལས༔ བསྒྲུབ་བྱའི་བསྒྲུབ་པར་ཡང་དག་སྦྱོར༔ གང་ཡིན་དེ་ནི་བསྙེན་པར་བཤད༔ རྡོ་རྗེ་པདྨ་མཉམ་སྦྱོར་བ༔ ཉེ་བར་བསྙེན་པ་ཞེས་བྱ་བའོ༔ ཞེས་སོ༔ དེ་ཡང་ཡི་གེ་ཧཱུྃ་དང་ཕཊ་ལྡན་པས༔ བསྐྱེད་པ་བསྒྲུབ་པ་ཞེས་བྱའོ༔ ངོ་བོ་ཉིད་བདེ་ཞི་བདེ་བ༔ བསྒྲུབ་པ་ཆེན་པོ་ཞེས་བྱའོ༔ ཞེས་སོ༔ དེ་ཡང་ཡབ་ཡུམ་གྱི་ཕུང་ཁམས་སྐྱེ་མཆེད་ཡེ་ནས་ལྷར་གནས་པ་སྐུ་ཕྱག་རྒྱ༔ ངག་ཡེ་གེའི་འཁོར་ལོར་གནས་པ་གསུང་ཆོས་རྒྱ༔ སེམས་ཡེ་ཤེས་ལྔའི་ངོ་བོར་གྲོལ་བ་ཐུགས་དམ་རྒྱ༔ སྙོམས་པར་འཇུག་པའི་ལས་ཀྱི་སྐྱེ་བ་སྤྲུལ་སྐུ་བསྐྲུན་ནས་དེའི་ཀྱང་ཞི་རྒྱས་དང་དབང་དྲག་གི་ལས་བྱེད་པ་ཕྲིན་ལས་རྒྱ་སྟེ་ཕྱག་རྒྱ་བཞི་དང་༔ ཡང་སྟོང་པ་དང༔ རིག་པ༔ ཟུང་འཇུག༔ ལྷ་ཡབ༔ ཡུམ༔ ཟུང་འཇུག༔ ཤེས་རབ་༔ ཐབས༔ དབྱེར་མེད་རྣམས་ཀྱི་ངོ་བོ་གཟུངས་སྔགས་རིག་སྔགས༔ གསང་སྔགས་ཀྱི་དེ་ཁོ་ན་ཉིད༔ ཆོས་ཉིད༔ ཆོས་ཅན༔ ནུས་མཐུ༔ བྱིན་གྱིས་རླབས་ཀྱིས་གྲུབ་པ་བཞི་ལྡན་དུ་ཡོད་པས་ན༔ དྲན་ཉམས་༔ མ་རྟོགས་ལོག་རྟོགས་ཐ་མལ་གྱི་མཚན་འཛིན་ལས་ཡེ་ཤེས་བདེ་མྱུར་དུ་སྐྱོབས་ཤིང༔ འདིར་ཐབས་ཀྱི་རྣམ་པ་ཡབ་ཡུམ་ལྷར་གསལ་བའི་ཟུང་འཇུག་དང་༔ དེའི་སྙིང་པོ་བདེ་སྟོང་གཉིས་མེད་ཀྱི་ཡེ་ཤེས་དབྱེར་མེད་ལ་ཡར་ལྡན་དུ་རྫོགས་པས་ན༔ རྣམ་སྣང་མངོན་བྱང་ལས༔ སྤྲོས་པ་མེད་པའི་དོན་གསང་སྔགས་ཀྱི་དངོས་པོ་དེ་ཉིད་ཅེས་དང་༔ གཉིས་མེད་ཡེ་ཤེས་འདི་ཉིད་ནི༔ ཐུབ་པས་སྔགས་སུ་གསུངས་པ་ཡིན༔ ཞེས་པས༔ དེ་ལྟར་སྔགས་གསུམ་དང་ཕྱག་རྒྱ་བཞི་ལྡན་པའི་ཆོ་གའི་བསྙེན་བསྒྲུབ་ཡན་ལག་བཞིའི་སྒོ་ནས་བསྒྲུབ་པ་ཡིན་པས་ན༔ གསང་འདུས་རྒྱུད་ཕྱི་མ་ལས༔ སྒྲུབ་བྱའི་སྒྲུབ་པར་ཡང་དག་སྦྱོར༔ ཞེས་དང་༔ བདེ་མཆོག་ལས༔ ཕྱག་རྒྱ་ཆེན་པོའི་ཡན་ལག་བསྒོམ༔ འགྱུར་མེད་བདེ་ཆེན་བསྒྲུབ་ནས་ནི༔ ཚེ་འདི་ཉིད་ལ་སངས་རྒྱས་འགྱུར༔ ཞེས་སོ༔ དེས་ན་མདོ་སྔགས་གང་གིས་ཀྱང་བསྒྲུབ་བྱའི་སྙིང་པོ་ལྷན་ཅིག་སྐྱེས་པའི་ཡེ་ཤེས་དོན་དམ་བྱང་ཆུབ་ཀྱི་སེམས་ཡིན་པས་འདིར་དེ་ཉིད་ཐབས་ཀྱི་སྒོ་ནས་སྐད་ཅིག་བཞིའི་རིམ་པར་རྒྱུད་ལ་འདྲེན་པའི་ལམ་རྨད་དུ་བྱུང་བ་བསྒྲུབ་བྱ་དང་བསྒྲུབ་པའི་སྙིང་བོར་གྱུར་བའོ༔

གསུམ་པ་ལ༔ སྦྱོར་བ་དངོས་གཞི་རྗེས་ཀྱི་རིམ་པ་ལས༔ དང་པོ་ནི༔ སེམས་ཅན་ཐམས་ཅད་ཀྱི་དོན་དུ་སངས་རྒྱས་ཐོབ་པར་བྱ༔ དེའི་ཆེད་དུ་བདེ་སྟོང་ལྷན་ཅིག་སྐྱེས་པའི་ཡེ་ཤེས་མངོན་དུ་བྱ་སྙམ་དུ་བྱང་ཆུབ་བླ་ན་མེད་པའི་སེམས་བསྐྱེད་དོ༔ གཉིས་པ་ལ༔ ཡབ་ཡུམ་ལྷར་བསྐྱེད་པ༔ མཁའ་གསང་བྱིན་གྱིས་བརླབས་པ༔ཐིག་ལེ་དབབ་པ༔ བསྐྱིལ་བ༔འདྲེན་པ༔ དགྲམ་པ༔ ཡེ་ཤེས་ཆེན་པོར་ལ་བཟླ་བའོ༔ དང་པོ་ནི༔ རང་ཉིད་སྐད་ཅིག་གིས་ཀུན་ཏུ་བཟང་པོ་སྐུ་མདོག་མཐིང་ཀ་གཅེར་བུ་མཉམ་བཞག་གི་ཕྱག་རྒྱ་ཅན༔ ཞབས་རྡོ་རྗེའི་སྐྱིལ་ཀྲུང་དུ་བཞུགས་པ་ལ༔ ཡུམ་ཀུན་ཏུ་བཟང་མོ་མཐིང་སྐྱ་པདྨའི་མཉམ་བཞག་དང་སྐྱིལ་ཀྲུང་གིས་མཁྱུད་པ༔ ཡབ་ཡུམ་གཉིས་ཀ་དགྱེས་ཆགས་ཞི་བདེའི་ཉམས་ཀྱིས་རོལ་བར་སྣང་སྟོང་ཆུ་ཟླར་ལྟར་བསྐྱེད་ལ༔ བཛྲ་ས་མ་ཡ་ཛ༔ ཡེ་ཤེས་པ་སྤྱན་དྲངས་ས་མ་ཡ་ཏིཥྛ་ལྷན་གྱིས་གཉིས་སུ་མེད་པར་བསྟིམ༔ སྤྱི་བོར་བླ་མ་ཡབ་ཡུམ་སྙོམས་པར་འཇུག་པར་བསྒོམ་མོ༔ གཉིས་པ་མཁའ་གསང་བསྐྱེད་པ་ནི༔དེ་ནས་ཡབ་ཀྱི་གསང་བ་རྡོ་རྗེ་སྔོན་པོ་རྩེ་ལྔ་བའི་ཁང་སེང་གི་བུམ་པ་ན་ཧཱུྃ་འོད་འབར་བས་བུག་པ་བཀགས་པར་བསམ༔ ཡུམ་མཁའ་པདྨ་དམར་པོ་འདབས་བཞིའི་དབུས་ནས་ཕཊ་སྔོན་པོའི་བུག་པ་བཀག་པར་བསམ་མོ༔ གསུམ་པ་ཐིག་ལེ་དབབ་པ་ནི༔ ཡབ་ཡུམ་ལྷ་སྐུ་སྙོམས་པར་ཞུགས་ལ༔ དལ་བུར་བསྐྱོད་ནས་སྤྱི་བོར་ཐིག་ལེ་ཞུ་བའི་བདེ་བ་འོག་གཡོ་བ་ལ་སེམས་ཅུང་ཟད་མཉམ་པར་བཞག༔ དེ་ནས་བསྐྱོད་པས་ཐིག་ལེ་མགྲིན་པར་སླེབས་པས་ཡུལ་རང་སར་རྟོག་པ་འགག་པ་ནི་དགའ་བའི་ཡེ་ཤེས་ཏེ་དེའི་ངང་ལ་བཞག་གོ༔ ཡང་སྙིང་ཀར་སླེབས་པར་བསྒོམ་ལ་ཞིབ་པར་དཔྱོད་པའང་འགག་པའི་མཆོག་ཏུ་དགའ་བ་ལའང་ཉམས་སུ་བླང་ངོ་༔ ཡང་ལྟེ་བར་ཡབ་ཡུམ་དུ་འཛིན་པའི་རྟོག་པ་རགས་པའང་འགག་ནས་བདེ་བའི་ངོ་བོར་ཞིབ་པར་དཔྱོད་པ་དང་༔ སྐྱེས་པ་ནི་ཁྱད་པར་གྱི་དགའ་བ་སྟེ༔ དེའི་ངང་ལ་མཉམ་པར་བཞག༔ དེ་ནས་གསང་བར་བབས་པས་བདེ་བའི་འཛིན་པ་ཙམ་ཡང་རྣམ་པར་དག་ཀྱང་༔སྣང་བ་མ་འགགས་ལ༔ རང་བཞིན་སྟོང་གསལ་སྤྲོས་པ་དང་བྲལ་བར་ཉམས་སུ་མྱོང་བ་ནི་ལྷན་ཅིག་སྐྱེས་པའི་དགའ་བ་ཞེས་བྱ་སྟེ༔ དེ་ཉིད་ཀྱི་རང་ཚུགས་མ་ཤོར་བར་ངོ་བོ་ཉིད་ལ་བལྟ་བཞིན་པའི་ངང་ནས་ཉམས་སྐྱོང་པ་ནི་སྙིང་པོ་བླ་ན་མེད་པ་སྟེ༔ དེ་ལྟར་དབབ་པའི་གནད་དུ་རྡོ་རྗེ་བདེ་བའི་རྩལ་གཏད་དེ༔ སྟེང་རླུང་མནན༔འོག་རླུང་འཐེན༔རྐང་ལག་སོར་མོ་བསྐུམ་ཏེ༔ དལ་བུར་བསྐྱོད་དོ༔ བཞི་པ་བསྐྱིལ་བ་ནི༔གོམ་པ་ཡང་རབ་ཀྱིས་ཡུམ་མཁར་དཀར་དམར་ཞལ་འདྲེས་པར་བསྐྱིལ་བ་དང་༔ རབ་ཀྱིས་རྡོ་རྗེའི་རྩེ་མོ༔ འབྲིང་གིས་བུམ་པར༔ ཐ་མས་རྩ་བར་སླེབས་པ་ན༔ སྟེང་རླུང་ཅུང་ཟད་མནན༔ རྒྱུ་མ་རྒལ་བ་ལ་བཅར༔ མིག་བར་སྣང་ལ་ཟློག༔ རྡོ་རྗེའི་རྩེ་མོའི་ཧཱུཾ་དང་༔ སྤྱི་བོའི་བླ་མ་ཡབ་ཡུམ་གྱི་བདེ་བ་ལ་སེམས་བཟུང་ངོ་༔ དེ་ཡང་མ་ཟིན་ན༔ གསང་རྩ་མནན༔ ཐུར་སེལ་གྱེན་འཐེན༔ རིག་པ་ཀ་དག་གི་ངང་ལ་མཉམ་པར་བཞག་པས་མི་ཟིན་མི་སྲིད་དོ༔ དེའི་ངང་ནས་ཡུན་བསྐྱང་དེ་ཉམས་སུ་བླང་ངོ་༔ ཡང་ཡང་བདེ་བ་ཡལ་ཡལ་འདྲ་ན་སྔར་ལྟར་ཅུང་བསྐྱོད་དེ་ཡང་བཟུང་ཞིང་ངོ་བོ་ལ་བལྟའོ༔ དེས་ལྷན་ཅིག་སྐྱེས་པའི་ཡེ་ཤེས་བདེ་སྟོང་གི་ཏིང་ངེ་འཛིན་མྱུར་དུ་འབྱོང་ཞིང་༔ བརྟན་པ་ཐོབ་ནས་དེ་ཉིད་ཀྱི་ངང་ལ་ཉིན་མཚན་ཁོར་ཡུག་ཏུ་འདའོ༔ལྔ་བ་ཐིག་ལེ་འདྲེན་པ་ནི༔ ཟིན་ཡང་མ་ལྡོག་ན་ཆུ་དང་བསྡོངས་ནས་འཆོར་བས་ན༔ ལུས་གནད་ཡན་ལག་བཞི་བསྡུ། རྒྱུ་མ་སྒལ་བ་ལ་བཅར༔ ལྕེ་ཡ་རྐན་ལ་སྦྱར༔མིག་སྤྱི་བོའི་སྒྲོན་མ་ལ་ཕྱོགས༔ འགོ་བོ་བསྐྱོད༔ འོག་གི་རླུང་འཐེན་ལ༔སེམས་ཀྱི་གནད་དུ་དབུ་མ་ནས་ཧཱུཾ་གི་རྒྱུན་ཚོགས་དཀར་ལ་འཚེར་བ་བལྟར་ལ་བརྒྱུས་པའི་ཚུལ་དུ་འཁོར་ལོ་བཞིར་རིམ་གྱིས་ལྡོག་པས་ལུགས་ལྡོག་གི་དགའ་བཞི་ཉམས་སུ་མྱོང་བར་བསམ་ཞིང་མཉམ་པར་བཞག་གོ༔ངག་གི་གནད་དུ་ཧཾ་གི་སྟོང་འདྲེན་མང་པོ་བྱའོ༔དེའི་འདྲེན་ཐུབ་པ་ཡིན་ནོ༔ དྲུག་པ་དགྲམ་པ་ནི༔ དེ་ལྟར་རླུང་སྟོབས༔ ལུས་གནད་ཀྱིས་ལྡོག་ནུས་ཀྱང་༔ མ་ཁྲེམ་ན་རྩ་གནས་གང་དུ་ཆགས་པ་ནས་ནད་དུ་འགྲོ་བས་ན་དགྲམ་པ་འདི་གལ་ཆེ་སྟེ༔ དེ་ལ་ལུས་གནད་ནི༔ རླུང་ཐུར་དུ་ལན་གསུམ་བརྫང་༔ གྱེན་དུ་ལན་གསུམ་འཕེན༔ ནང་དུ་ལན་གསུམ་དྲངས༔ ལུས་གནད་འགྲེ་ལྡོག་ལན་གསུམ༔ སྤྲུག་སྟངས་གསུམ༔ སུག་བཞི་ས་ལ་བཙུགས་ནས་ཡན་ལག་གང་རུང་རེ་འཕེན་སྡུད་གསུམ་གསུམ་བྱེད༔ སེམས་གནད་སྤྱི་བོའི་ཐིག་ལེའི་གཏམས་པ་ལུས་དང་འཁོར་ལོ་ལྔའི་རྩ་འདབས་ཐམས་ཅད་དུ་ཁྱབ་པར་མཉམ་པར་བཞག་གོ༔ བདུན་པ་ཡེ་ཤེས་ཆེན་པོར་ལ་བཟླ་བ་ནི༔ ལུས་དྲང་པོར་བསྲང་བའམ༔ གན་རྐྱལ་དུ་ཉལ་ལ་འགུལ་བསྐྱོད་མི་བྱེད༔ ངག་གིས་མི་བརྗོད༔ སེམས་མི་བསམ་པར་གློད་དེ༔ ཡིན་ལུགས་སྤྲོས་པ་དང་བྲལ༔ དགག་སྒྲུབ་སྤང་ལེན་མེད་པ༔ ངོ་བོ་ངོས་བཟུང་ལས་འདས་པའི་རང་བྱུང་གི་ཡེ་ཤེས་སྔར་བདེ་བའི་རང་བཞིན་མཐོང་བའི་ངང་དུ་ལ་བཟླ་ཞིང་འཇོག་པ་ནི་སྦྱོར་བའི་འབྲས་བུ་བླ་ན་མེད་པའོ༔ གསུམ་པ་རྗེས་ཀྱི་རིམ་པ་ནི༔ དམ་གྲིབ་ཉམས་ཆགས་ལ་འཛེམ༔ ཕ་རོལ་གྱི་གཟུང་མ་བསྟེན་པ་ལ་མི་སྨོད་ཅིང་༔ མ་ཟད་སེམས་ཅན་གྱི་འཁྲིགས་པ་སྤྱོད་པ་ཡན་ཆད་ལ་ཡི་དམ་གྱི་ལྷ་ཡབ་ཡུམ་ཏུ་མོས་ཤིང་༔ སྐྱེ་བ་སྤྲུལ་པའི་སྐུར་བཞེངས་པའི་ཐབས༔ ཡུམ་མཁར་ཉི་ཟླའི་གདན་ལ་ཡི་དམ་གང་ཡིན་གྱི་ས་བོན་གསལ་བཏབ་ནས༔ རིག་པ་བསྲེ་འཕོའི་ཧཱུཾ་ཕྱག་མཚན་དེ་ཉིད་སྐུ་ཡོངས་རྫོགས་དཔའ་བོ་གཅིག་པར་བསྐྱེད་པ་ལ་སོགས་པའི་དམིགས་པ་ཡང་བྱ་ཞིང་༔ དེ་ཙམ་མིན་ཡང་སྐྱབས་སུ་འགྲོ་ཞིང་དབང་ཞུ་བའི་འདུན་པ་ཙམ་བྱས་ཏེ་མིག་སེར་ལོག་ལྟ་སོགས་ཀྱི་བློ་ངན་འདི་མ་བོར་ན་སྲིད་པ་བར་དོ་ཆོད་ཐབས་ཤིག་གཏན་ནས་མེད་པས་ན༔ རང་ཉིད་ཉམས་ཉེས་ཀྱི་གཡང་ས་ལ་འཇུག་གི་དོགས་པས་བག་ཟོན་ཅུང་ཟད་རེ་མཛད་པ་དང་༔ ཐབས་ཆེན་གྱི་སྦྱོར་བ་ལ་དད་པ་དང་༔ བྱང་སེམས་ཉེས་པའི་སྤྱོད་པ་སྤང་བ་དང་༔ རྟག་ཏུ་ཡང་ལམ་ལ་སློབ་པ་དང་༔ དགའ་བ་བཞི་དང་༔ སྟོང་པ་བཞི་དང་༔ མཐར་གྱི་གནས་པའི་སྙོམས་པར་འཇུག་པ་དགུ༔ ཚད་མེད་བཞི༔ རྣམ་ཐར་སྒོ་གསུམ༔ སྡོམ་པ་གསུམ༔ ཕར་ཕྱིན་བཅུ༔ ས་བཅུ༔ ལམ་ལྔ༔ ཐེག་པ་དགུ༔ དབང་བཞི༔ རིགས་ལྔ༔ སྐུ་ལྔ༔ ཡུམ་ལྔ་ལ་སོགས་པའི་ཡེ་ཤེས་ཀྱི་བྱེ་བྲག་གི་ཡོན་ཏན་ཚད་མེད་པའི་ཉམས་མྱོང་འབྱུང་བའི་ཚུལ་རྒྱས་པར་ཁོ་བོའི་གཞན་དུ་སྨོས་པ་ལ་སོགས་པའི་ངེས་པ་བློ་ལ་བྱང་བ་རེ་མཛད་ནས་ངོས་བཟུང་བ་དང་། གེགས་འབྱུང་གིས་དོགས་པ་ན་རྡོ་རྗེའི་བྲོ་བརྡུང་གིས་བསལ་བར་བྱ་བ་རྣམས་བྱའོ༔ གསུམ་པ་དེའི་ཡོན་ཏན་དང་བསྔགས་པ་བརྗོད་པ་ནི། དེའི་གནས་སྐབས་སུ་སྣང་སྲིད་ཆོས་སྐུར་ཤར༔ སྡུག་བསྔལ་བདེ་ཆེན་དུ་གྲོལ༔ གྲུབ་པ་བརྒྱད་ལ་རང་དབང་བསྒྱུར༔ ཕྲིན་ལས་རབ་འབྱམས་འགྲུབ༔ འདུ་བ་གསུམ་འབྱུང་༔ རྫུ་འཕྲུལ་དང་མངོན་ཤེས་འགྲུབ་པ་དང་༔ མཐར་ཐུག་འཁོར་ལོ་ཚོགས་ཆེན་གྱི་ས་ཐོབ་ནས་སྐུ་གསུམ་ལྷུན་གྲུབ་པའི་འབྲས་བུ་མངོན་དུ་འགྱུར་པ་ཡིན་ནོ༔ ཟབ་མོའི་དབང་གིས་སྨིན་པ་རྒྱ་མཚོ་ལ༔ རྒྱལ་ཐབས་སྤྱི་བླུགས་ཆུ་འགོ་ལས་འཆེད་དེ༔ དབང་དང་གདམས་པའི་ཐབས་སུ་བབས་པའི་རྒྱུན༔ སྐལ་ལྡན་ལས་འཕྲོ་ཅན་གྱི་གསོས་སུ་ཤར༔ ཞེས་ཀྱང་བླ་མ་དམ་པ་ཚུལ་ཁྲིམས་བཟོ་སྐོམ་སྤྲུལ་བའི་སྐུ་མཆོག་ཐུབ་ལོ་སྔགས་ལ་མོས་པ་ཡེ་ཤེས་སོགས་ཀྱི་དོན་སླད་དུ་ག་གཱ་ཨ་བྷྱེས་མཁའ་འགྲོའི་གསང་མཛོད་ལས་བསྒྱུར་བའོ། །དགེའོ། །དགེའོ། །དགེའོ། །སརྦ་མངྒ་ལཾ། །

བཏགས་གྲོལ་གྱི་རྒྱབ་ཡིག་འདུ་བྱེད་རང་གྲོལ།

བཏགས་གྲོལ་གྱི་རྒྱབ་ཡིག་འདུ་བྱེད་རང་གྲོལ་བཞུགས་སོ། །

ན་མོ་གུ་རུ་མ་ར་སྱེ་ན་པྲ་མརྡྷ་ན་བཛྲ་ཡེ། ཁྱོན་སྤོམ་ཐིག་ལེ་ཉེར་བཞི་པོ་མཐིང་ཤོག་ལ་གསེར་གྱིས་བྲིས་ལ་རས་ཀྱི་ནང་དུ་གཡོག་ནས་ཁ་ཕྱེ་བདེ་བའམ། ཡང་ན་འདོན་རྒྱུའི་ཡི་གེ་ཞིག་ཟུར་དུ་བྲིས་ལ་སུས་ཀྱང་མཐོང་མི་ཉན། དེ་ནི་རླུང་བྱེར་ཟུག་འཁྲུགས་གནས་དང་སྦྱར་ཏེ་འདོན་ཞིང་ཚེ་ཐར་རེ་དང་མཆོད་པ་མར་མེ་རེ་དང་སྦྱིན་པ་ཁྱི་སྤྲང་ལ་ཟན་ཡན་ཆད་སྦྱིན། མདུན་ནས་ཀུན་བཟང་ཡབ་ཁ་ནང་བསྟན་དང་གཅིག །རྒྱབ་ནས་བཟང་མོ་ནང་བསྟན་དང་གཉིས་ཀྱི་བར་དུ་ཙཀྲ་རྣམས་ཡི་གེའི་གོ་རིམ་བཞིན་གཅིག་རྒྱབ་གཅིག་བཞག་བྱ། དེ་ཡང་མཆོད་བརྗོད་ཡན་ཆད་ཙཀྲ་གཅིག །ཚིག་བཞི་བཅུ་པོ་ཙཀྲ་བཅུ། ལྷག་མ་མཛད་བྱང་དང་བཅས་ཙཀྲ་བརྒྱད་ ༼ བཅུ་དཔྱད། ༽ ཀུན་བཟང་ཡབ་ཡུམ་ཙཀྲ་གཉིས་དང་། རིགས་བརྒྱའི་སྲོག་ཡིག་ཙཀྲ་གཅིག་དང་ཁྱོན་ཐིག་ལེ་ཉེར་གསུམ་ཡེ་དྷརྨ་སྟེ་བསྟན་པ་སྤྱིའི་སྙིང་པོ་ཙཀྲ་གཅིག་དང་ཉེར་བཞི་པོ་ལ། རྫས་ནི་རྒྱུད་གྱི་བུ་བརྒྱ་ཚར་གྱི་བྱིན་གྱིས་བརླབས་པའམ། ཡང་ན་བཏགས་གྲོལ་ཕུང་པོ་རང་གྲོལ་བརྒྱས་རབ་གནས་བསྔགས་པའི་བྱས་པའི་བདུད་རྩི་ཆོས་སྨན་སེལ་མེད་དང་། དམ་རྫས་རིལ་བུ་སོགས་སེལ་མེད་ཀྱིས་བྱུག །བཟང་དྲུག་གི་ཆུས་ཀྱང་བྱུག་ལ། རྟེན་འབྲེལ་སྙིང་པོ་ཚད་རབ་འབུམ། འབྲིང་ཁྲི་ཐ་ནའང་སྟོང་གིས་རབ་གནས་བྱས། དམིགས་པ་ནི་རྫོགས་ཆེན་སྟོན་པ་བཅུ་གཉིས་སོགས་དགོངས་བརྡ་སྙན་བརྒྱུད་ཀྱི་བླ་མ་རྣམས་བྱོན་ནས་ཐིམ་པ་ལས་འོད་ཟེར་བདག་གི་གནས་བཞིའམ་ལྔ་ལ་ཐིམ་པས་སྒོ་ལྔའི་སྒྲིབ་པ་བག་ཆགས་དང་བཅས་པ་དག་དབང་བཞི་འོད་ཟེར་ཆེན་པོ་དང་ལྔ་ཐོབ་སྐུ་ལྔ་མངོན་དུ་གྱུར་བར་བསམ་ལ་དབང་བཞི་བླང་དེ་སུས་ཀྱང་མཐོང་ཐོས་མེད་པར་བཅིང་ངོ་། །ཟླ་འཛིན་ཉི་འཛིན་ས་གཡོ། སྒྲ་གྲགས་པ་དུས་དབྱར་དགུན་སྟོན་དཔྱིད་ཀྱི་འབྲིང་བོའི་བཅོ་ལྔ་ལ་ཡིན་མཆན། བཞི་རྣམས་སུ་རླུང་བྱེར་ཟུག་དང་སྦྱར་མཆན། རང་ཀུན་བཟང་ཡབ་ཡུམ་རིགས་བརྒྱ་འདུས་པའི་ངོ་བོར་བསྒོམ་ལ་ལྕེ་རྡོ་རྗེ་རྭ་གདེངས་བར་བསྒོམ་པས་བཟླའོ། །གསེར་མ་འབྱོར་ན་མཚལ་ལམ་གསེར་འགྱུར་ལ་གསེར་བཏབ་བྲིའོ། །འདི་ལྟར་དྲོད་དང་མ་བྲལ་བ་གལ་ཆེའོ། །བསྲེགས་ཚེ་རོ་དང་མ་འབྲལ་བར་བྱ་བ་ཡང་། ལུས་བཟང་དྲུག་གི་ཆུས་བཀྲུས་ལ་ཕོའི་མཆན་གཡས། མོས་གཡོན་དུ་བཏགས་ཏེ་བསྲེགས་སོ། །གྲོལ་རྟགས་གདུང་རིང་བསྲེལ་འཇའ་འོད་དཀར་སེར་དམར་ལྗང་མེ་མདོག་དང་བཅས་པའི་རིགས་གང་གི་སྤྲུལ་བར་དབུགས་འབྱིན་ཤེས་སོ། །འདིའི་ཆ་ལག་འཕོ་བ་རབ་ཀྱི་སྐུ་གསུམ་གསང་ལམ། འབྲིང་གི་པདྨའི་ཕྲེང་བ། ཐ་མའི་བདེ་ཆེན་ལམ་བཟང་། ཡང་ན་སྔ་སོར་ཁོ་བོས་བྱས་པ་དེས་འཐེར་རོ། །ཅེས་ཀྱང་འོད་གསལ་རྫོགས་པ་ཆེན་པོའི་རྣལ་འབྱོར་བ་ག་ག་ཨ་བྷྱེས་རང་གཞན་ཀུན་ལ་ཕན་སླད་བྲིས་པ་དུས་གསུམ་ཀུན་ཏུ་དགེ་བར་གྱུར་ཅིག །སརྦ་མངྒ་ལཾ། རླུང་བྱེར་ཟུག་ནི་སྤྱི་དང་མཐུན་ཏེ། དེ་ཡང་ཉིན་དུས་ཀྱི་ནམ་ལངས་ནས་དྲོས་པོ་ཆེའི་བར་དུ་བྱེར་པའོ། །དེ་ནས་གུང་ལ་མ་སླེབ་བར་དུ་ཟུག་པའོ། །གུང་མཐིལ་པོ་ནི་སྙོམས་པའོ། །གྲིབ་བསིལ་ཕེབས་ནས་ཉི་མ་ནུབ་བའི་བར་ནི་འཁྲུགས་པའོ། །མཚན་དུས་ཀྱི་སྟོད་བྱེར་བ། སྟོད་ཡོལ་ཟུག་པ། ནམ་ཕྱེད་སྙོམས་པ། ཐོ་རངས་འཁྲུགས་པའོ། །ས་གཡོ་བ་༡ནད་༢་མུ་གེ་༣། ཉི་ཟླ་འཛིན་༤ཐོག་༥རྟགས་དེ་རྣམས་བྱེར་བ་ལ་བྱུང་ན་ཀློག །ཟུག་པ་ལ་བསྒོམ། སྙོམས་པ་ལ་སྦྱིན་ཡུལ་འབོད་པ་དང་། ཚེ་ཐར་སྲོག་བསླུ་སོགས་བྱ། འཁྲུགས་པ་ལ་ཚོགས་འཁོར་དང་མཆོད་པ་སོགས་བྱ་བ་སྤྱི་ལྟར་རོ། །

བཏགས་གྲོལ་གྱི་དོན་སྦྱར་ནོར་བུའི་ཕྲེང་བ།

བཏགས་གྲོལ་གྱི་དོན་སྦྱར་ནོར་བུའི་ཕྲེང་བ་བཞུག་སོ༔

ན་མོ་གུ་རུ་པདྨ་ཀཱ་ར་ཡེ༔ བཏགས་གྲོལ་འདིའི་གཞི་མཐིང་ཀ་ཁྱབ་པ་ཆེན་པོ་ལ་པད་འདབ་ལྔ་ལྡན་མཉམ་པ་ཆེན་པོ་སྟེ་དབྱིངས་རྣམ་དག་གི་སྒྲོན་མ༔ ཐིག་ཕྲན་ནི་སྟོང་སྒྲོན་ལུ་གུ་རྒྱུད་དང་༔ ཀུན་བཟང་ཚིག་དོན་རྣམས་རང་བྱུང་སྒྲོན་མ༔ འཇའ་ཟེར་རྩའི་སྒྲོན་མ༔ ཕྱིའི་འོད་ཟླུམ་རྒྱང་ཞག༔ ཡང་སྣང་བ་འདི་མངོན་སུམ༔ ཐིག་ཆེར་གོང་འཕེལ་མཐའི་སྨིན་པའི་ཐིག་ལེ༔ སྐུ་ཚད་ཕེབ༔ ཐུགས་སྲོག་ཆོས་ཟད་བློ་འདས་དཀྱིལ་འཁོར་དུ་བཀོད་པ་འདི་བུམ་སྐུའི་ཚུལ་དུ་བཞུགས༔ སྐུ་ལུག་རྒྱུད༔ གསུང་རྒྱང་ཞགས༔ ཐུགས་ནི་ཐུགས་སྲོག༔ གཞི་ཀུན་བཟང་༔ ལམ་སྒྲོན་བཞི༔ འབྲས་བུ་བུམ་སྐུར་བཀོད་པ་ཆེན་པོ་ལ་སོགས་པའི་ཚུལ་རྫོགས་པའི་ཤིན་ཏུ་ཟབ་པའི་ཏི་ལ་ཞིག་གོ །རྒྱས་པ་ནི་མ་བཤད་དོ༔ ཤིན་ཏུ་བསྡུས་པའི་དུམ་ཁྲིགས་འདི་ཡང་མ་མཁའ་འགྲོའི་ཁ་རླུང་ཐོ་ལེ་བ་ལགས་པས༔ སྒྲོ་སྐུར་ཅན་ལ་ཆད་པ་ཆོད་ཅིག༔ བཅུ་བདུན་རྒྱུད་ཀྱི་སྲུང་མ་རྣམས༔ ཞེས་ཀྱང་ལྷ་རྒྱལ་གྱི་ངོར་ག་གཱ་ཨ་བྷྱེས། སྦས་བའི་ཡོ་ག་ཆེན་པོ་རྒྱུད་བཞི་བའི་སོ། །

རང་གིས་རྒྱུན་དུ་བཏགས་གྲོལ་གྱི་ལམ་དབང་བླངས་བའི་ཁ་གསོ།

རང་གིས་རྒྱུན་དུ་བཏགས་གྲོལ་གྱི་ལམ་དབང་བླངས་བའི་ཁ་གསོ་བྱ་བ༔

རང་ཀུན་བཟང་དུ་གསལ༔ བགེགས་བསྐྲད་བསྲུང་འཁོར་བསྒོམ༔ བཏགས་གྲོལ་ཞི་ཁྲོའི་ལྷ་ཚོགས་སུ་དམིགས༔ བདག་མདུན་ལས་འོད་ཟེར་འཕྲོས་པས་ཡེ་ཤེས་པ་སྤྱན་དྲངས་ཤིང་བསྟིམ༔ ཡིད་ཀྱིས་མཆོད༔ ཚར་དུ་ཐོན་གྱི་རྗེས་སུ་རྟེན་སྙིང་གི་རབ་གནས་བྱས༔ མཐོང་ཐོས་དྲན་རེག་གི་སེམས་ཅན་ཐམས་ཅད་བྱང་ཆུབ་ལས་ཕྱིར་མི་ལྡོག་པར་མཛད་དུ་གསོལ༔ ཞེས་བརྗོད་ནས༔ བཀྲ་ཤིས་ཀྱིས་མཐའ་བརྒྱན་ཞིང་༔ དེ་ནས་རང་གི་རྩ་བའི་བླ་མ་དེས་བཏགས་གྲོལ་གྱི་དབང་བསྐུར་བར་མོས་ལ་ཕྱག་འཚལ་བར༔ ཚར་ཅི་འགྲུབ་ཀྱིས་བཏགས་གྲོལ་འདོན་ཞིང་བླ་མ་དང་དབྱེར་མེད་པར་བཏགས་གྲོལ་དེ་ལ་མཎྜལ་ཕུལ་ཞིང་རང་གི་སྤྱི་མགྲིན་སྙིང་ཀ་ལྟེ་བ་བཞིར་གཏུགས་ཤིང་༔ ཚར་རེའམ་ཚར་གཅིག་བཟླས་པས་བཏགས་གྲོལ་ལས་འོད་བྱུང་ནས་སྣང་སྲིད་ཁྱབ༔ སྒྲིབ་པ་ཐམས་ཅད་དག་ཅིང་དངོས་གྲུབ་ཡོངས་སུ་རྫོགས་པ་ཐོབ་པར་དམིགས་ལ༔ བསྟན་པ་བུ་གཅིག་གི་རྒྱུད་ལས་བྱུང་བའི༔ སངས་རྒྱས་ཐམས་ཅད་ཀྱི་སྲས་གཅིག་པོའི་བདག་མིང་འདི་ཞེས་བགྱི་བའི་ལུས་བྱིན་གྱིས་བརླབ་ཏུ་གསོལ༔ སྨིན་པར་མཛད་དུ་གསོལ༔ གྲོལ་བར་མཛད་དུ་གསོལ༔ གང་བར་མཛད་དུ་གསོལ༔ ཆེར་འཕེལ་བར་མཛད་དུ་གསོལ༔ རྒྱས་པར་མཛད་དུ་གསོལ༔ སངས་རྒྱས་ཐམས་ཅད་ཀྱི་སྐུ་དང་གཉིས་སུ་མེད་པར་བྱིན་གྱིས་བརླབ་པར་མཛད་དུ་གསོལ༔ གྷ་ཛ་ཀ་ཡཱ་ཨ་བྷི་ཥིཉྩ་ཨོཾ༔ མགྲིན་པར་བཞག་ལ༔ སངས་རྒྱས་ཐམས་ཅད་ཀྱི་སྲས་གཅིག་པོའི་བདག་ཞེས་བགྱི་བའི་ངག་བྱིན་གྱིས་བརླབ་ཏུ་གསོལ༔ སྨིན་པར་མཛད་དུ་གསོལ༔ གྲོལ་བར་མཛད་དུ་གསོལ༔ གང་བར་མཛད་དུ་གསོལ༔ ཆེར་འཕེལ་བར་མཛད་དུ་གསོལ༔ རྒྱས་པར་མཛད་དུ་གསོལ༔ སངས་རྒྱས་ཐམས་ཅད་ཀྱི་གསུང་དང་གཉིས་སུ་མེད་པར་བྱིན་གྱིས་བརླབ་པར་མཛད་དུ་གསོལ༔ གྷ་ཛ་ཝཀྐ་ཨ་བྷི་ཥིཉྩ་ཨོཾ༔ སྙིང་ཀར་བཞག་ལ༔ སངས་རྒྱས་ཐམས་ཅད་ཀྱི་སྲས་གཅིག་པོའི་བདག་ཞེས་བགྱི་བའི་ཡིད་བྱིན་གྱིས་བརླབ་ཏུ་གསོལ༔ སྨིན་པར་མཛད་དུ་གསོལ༔ གྲོལ་བར་མཛད་དུ་གསོལ༔ གང་བར་མཛད་དུ་གསོལ༔ ཆེར་འཕེལ་བར་མཛད་དུ་གསོལ༔ རྒྱས་པར་མཛད་དུ་གསོལ༔ སངས་རྒྱས་ཐམས་ཅད་ཀྱི་ཐུགས་དང་གཉིས་སུ་མེད་པར་བྱིན་གྱིས་བརླབ་པར་མཛད་དུ་གསོལ༔ གྷ་ཛ་དྷརྨ་ཙིཏྟ་ཨ་བྷི་ཥིཉྩ་ཨོཾ༔ ལྟེ་བར་བཞག་ལ༔ སངས་རྒྱས་ཐམས་ཅད་ཀྱི་སྲས་གཅིག་པོའི་བདག་ཞེས་བགྱི་བའི་ལུས་ངག་ཡིད་གསུམ་དང་བཅས་པ་བྱིན་གྱིས་བརླབ་ཏུ་གསོལ༔ སྨིན་པར་མཛད་དུ་གསོལ༔ གྲོལ་བར་མཛད་དུ་གསོལ༔ གང་བར་མཛད་དུ་གསོལ༔ ཆེར་འཕེལ་བར་མཛད་དུ་གསོལ༔ རྒྱས་པར་མཛད་དུ་གསོལ༔ སངས་རྒྱས་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་དང་བཅས་པའི་གཉིས་སུ་མེད་པར་བྱིན་གྱིས་བརླབ་པར་མཛད་དུ་གསོལ༔ གྷ་ཛ་ཀ་ཡ་ཝཀྐ་ཙིཏྟ་དྷརྨ་ཨ་བྷི་ཥིཉྩ་ཧཱུྃ་ཨཱ༔ ཨོཾ་ཧྲཱིཿ སྭཱ་ཧཱཿ བསྡུ་ན་ཕྱི་མ་འདི་ཁོ་ནས་ཆོག །མཐར་ནི། རྟེན་འདི་བཏགས་པའི་བྱིན་རླབས་ཀྱིས། །བདག་ནི་མཐོང་ཐོས་དྲན་རེག་ཀུན། །དེ་མ་ཐག་ཏུ་གྲོལ་གྱུར་ནས། །འབྲེལ་ཚད་དོན་དང་ལྡན་པར་ཤོག །དེ་ནས་ཤིས་བརྗོད་ལ་སོགས་བྱ། ཅེས་ཀྱང་ག་གཱ་ཨ་བྷྱེས་སྨྲས་པའི་ཡི་གེ་པ་ཀརྨའི་མིང་གིས་སོ། །ཨོཾ་ཨེ་དྷརྨ་ཤ་ཏ་ཐཱ་ག་ཏ་ཡོ་ནི་ཨེ་བམ་ཏིཥྛ་ལྷན་སི་ཏི་ཧཱུྃ་ཧཱུྃ༔ རྟེན་སྙིང་ངོ་། །

ཡེ་ཤེས་ཐིག་ལེ་བཞི་བ།

ཡེ་ཤེས་ཐིག་ལེ་བཞི་བ་བཞུགས་སོ༔

རྒྱ་གར་སྐད་དུ༔ ཛྙ་ན་ཏི་ལ་ཀ་ཙ་ཏུ་ར་ན་མཿ བོད་སྐད་དུ༔ ཡེ་ཤེས་ཐིག་ལེ་བཞི་བ་ཞེས་བྱ་བ༔ དཔལ་ཀུན་བཟང་ཡབ་ཡུམ་ལ་ཕྱག་འཚལ་ལོ༔ ཡེ་ཤེས་ཐིག་ལེ་ཞི་ཁྲོའི་རྒྱལ༔ ཆོས་ཉིད་བདེ་གཤེགས་སྙིང་པོ་ནི༔ རང་བཞིན་གསུམ་ལྡན་དབྱེར་མེད་པ༔ གནས་ལུགས་གཞི་ཡི་སྒྲོན་མ་ཡིན་༡༔ རིན་ཆེན་མཆོང་གི་གུར་ཁང་ནི༔ བསེ་ཡི་གའུ་ཁ་སྦྱོར་བ༔ གསང་འདུས་ཟུར་བརྒྱད་དྭངས་མ་ཆེ༔ ཙིཏྟ་ཤ་ཡི་སྒྲོན་མ་བཞུགས་༢༔ སྲོག་འདུས་ཟུར་བཞི་འོད་ཀྱི་སྒང་༔ དྭངས་མའི་རྩེ་ལས་ཟང་ཐལ་ནས༔ དྷཱུ་ཏིར་ཐིམ་པའི་དུང་ཁང་ལས༔ ཧར་སང་ཡན་པའི་རྩ་ཁུག་པ་༣༔ སྣལ་མའི་གདོང་ལས་ཆ་གཉིས་འཛིན༔ བྱེར་ཟུག་འཆིང་འཕེན་སྒོ་གཉིས་མཛོད༔ ཡེ་ཤེས་རླུང་གི་བསྐུལ་མ་འདེད༔ རྒྱང་ཞགས་མུན་པའི་འཁོར་སྒོ་བཅོམ་༤༔ ངོ་བོ་གཞི་ཡི་རང་ཡུལ་དེའི༔ གདངས་ཀྱི་གོ་འབྱེད་ཡུལ་དུ་བརྟེན༔ དབང་སྔོན་མཚོན་བཅས་ཁང་བས་སྐྱོབ༔ ཡིག་འབྲུ་འཛིན་མའི་ཀུན་ཏུ་བཟང་༥༔ ཟླ་མེད་ཟབ་པའི་ཏི་ལ་ཀ༔ རིམ་པས་འཁོར་བས་མཉྩ་རཾ༔ ཆགས་བྲལ་ཟང་ཐལ་གསལ་འཚེར་འབར༔ སྟོང་བ་ཉིད་ཀྱི་ལམ་དམིགས་པའོ་༦༔ འབྲེལ་བའི་དྲྭ་བ་རླུང་གིས་བསྐུལ༔ བུང་བ་པདྨའི་བཅུད་ལ་འཁོར༔ སྨིན་ནས་སྐུ་ཡི་གོ་རུ་བཞུགས༔ རང་བྱུང་ཆེན་པོའི་ཉི་མ་འོད་༧༔ བར་མ་དོ་ཡི་སྐུ་ཐིག་འོད༔ རང་གསལ་རང་ངོ་ཤེས་པ་ལས༔ གྲོལ་མཐོང་བཙན་ས་ཟིན་པའི་དབྱིངས༔ དུས་ཀྱི་སྒྲོན་མ་སྤྲུལ་བསྒྱུར་དགོད་༨༔ འབྱུང་བ་མ་ལ་ཞ་ནས་ཀྱང་༔ ཡེ་ཤེས་ཆེན་པོ་དབྱིངས་སུ་འཁྱིལ༔ ཤེས་རབ་མཁའ་བསྐྱོད་བུམ་སྐུ་ཟིན༔ མཐར་ཐུག་འབྲས་བུའི་སྒྲོན་མའོ་༩༔ ཏིང་འཛིན་རང་བཞག་སྒྱུ་འཕྲུལ་ལས༔ བཀོད་པའི་གཡོ་མེད་ཆུ་བོའི་རྒྱུན༔ བསམ་གཏན་རྣམ་དག་བདེ་ཀློང་འཁྱིལ༔ འོད་གསལ་ཡེ་ཤེས་སྒྲོན་མ་རྙེད་༡༠༔ སྣོད་ཀྱི་ཙིཏྟ་རྩ་ཆུ་ནས༔ གཞི་ཡི་སྒྲོན་མའི་དངོས་གདངས་བཅུད༔ སྨིན་པ་ལམ་གྱི་སྣང་སྟོང་རིག༔ ལས་འཁྲུངས་ཉམས་ཀྱི་ཏིང་འཛིན་བཟང་༔ སུན་མའི་ཤེས་རབ་སྐུར་སྨིན་ནས༔ འབྲས་རྒྱུད་རྒྱུ་ལ་བྲལ་དག་སྟེ༔ སྐུ་དང་ཡེ་ཤེས་མཛད་པའི་སྒོ༔ མཐར་ཕྱིན་བྱེད་པོ་བླ་ན་མེད༔ རྒྱུད་སྦྱངས་དབང་གི་སོ་བཏང་སྟེ༔ ལྟ་དགོངས་ནམ་མཁའ་ཉི་ཟླ་འབར༔ གནད་ཆེན་གཟེར་གྱིས་རབ་བསྡམས་ནས༔ ཆོས་ཉིད་འཁོར་ལོར་ལ་བཟླས་པས༔ དམ་ཚིག་ཆེན་པོ་ལས་མི་འགོངས༔ གྲོང་ཁྱེར་ཕྱི་ཕྱག་གིས་འཕུལ་ནས༔ གྲུབ་རྟགས་ནམ་མཁའ་ལྟ་བུ་ལགས༔ སངས་རྒྱས་ཀུན་གྱི་ཐུགས་ཀྱི་ཐིག༔ གཞི་ལམ་འབྲས་བུ་ཉམས་ཀྱི་ཚུལ༔ ཀུན་ཏུ་བཟང་པོ་རྣམ་པ་བཞི༔ སྣོད་ཀྱི་རང་བཞིན་གྱིས་བརྟེན་པ༔ བྲལ་བས་སུན་མས་དགྱེས་བཞིན་སླེབས༔ ཟང་ཐལ་ཐོགས་པ་མེད་པ་ཡི༔ སངས་རྒྱས་ཀུན་གྱི་རྡོ་རྗེའི་གདན༔ ད་ལྟ་ཉིད་དུ་ས་དྲུག་རྫོགས༔ འདི་ནི་མཐོང་བ་ཙམ་གྱིས་ཀྱང་༔ དེ་མ་ཐག་ཏུ་སྤྲུལ་སྐུ་འབྱིན༔ ཐོས་པ་ཙམ་གྱི་རང་བཞིན་གྱིས༔ བསམ་གཏན་ཤུགས་ཀྱིས་རྒྱུད་ལ་འཁོར༔ གང་གིས་ཐིག་ལེར་རབ་བཅིངས་ན༔ དེ་མ་ཐག་ཏུ་རིང་བསྲེལ་འབྱིན༔ བསྒོམ་བསམ་དྲན་པས་དེ་མ་ཐག༔ ཡེ་ཤེས་བླ་མའི་རྒྱལ་ས་ཐོབ༔ མཐོང་ཐོས་དྲན་རེག་གྲོལ་བ་ཡི༔ ཟབ་ལས་ཉིང་ཁུར་བཅུད་འཁྱིལ་བ༔ སྔགས་ཀྱི་བདག་མོ་ཆེན་མོས་བསྲུང་༔ ས་མ་ཡཱ༔ རྒྱ་རྒྱ་རྒྱ༔ ཞེས་ཀྱང་པདྨ་མཁའ་ཀློང་ཡངས་བས་སྨྲས་པའི་རྡོ་རྗེ་གྲགས་སྟོང་དབྱེར་མེད་ཀྱི་རང་གདངས༔ ཛྙཱ་ན་ཏི་ལ་ཀ་ཙ་ཏུ་ས་མ་པ་ཐ༔ དགེའོ༔ དགེའོ༔ དགེའོ༔ སརྦ་མངྒ་ལཾ༔ འདི་ལ་འོད་གསལ་རྫོགས་པ་ཆེན་པོའི་རྒྱུད་ཀྱི་ལྡང་ཚད་ཐམས་ཅད་ཚང་ངོ་༔ དེ་ཡང་གཞི་ལམ་འབྲས་གསུམ་འཇུག་པའི་སྒོ༔ དབང་དམ་ཚིག་གཉིས༔ ལམ་ལ་བཟླ་གཉིས༔ འབྲས་བུ་དང་ལྔའོ༔

ཡེ་ཤེས་སྒྱུ་འཕྲུལ་དྲྭ་བའི་ཆོས་སྡེའི་རྫོགས་རིམ་བར་དོ་དྲུག་གི་ཁྲིད་རིམ་གྱི་ཁ་བྱང་རྡོ་རྗེའི་ཕྲེང་བ།

ཡེ་ཤེས་སྒྱུ་འཕྲུལ་དྲྭ་བའི་ཆོས་སྡེའི་རྫོགས་རིམ་བར་དོ་དྲུག་གི་ཁྲིད་རིམ་གྱི་ཁ་བྱང་རྡོ་རྗེའི་ཕྲེང་བ་བཞུགས།

དེ་ལ་ཐོག་མར་ཁོག་དབུབ་ལས་ཉོན་ཆུ་བོ་རྒྱུན་གཅོད་ཀྱི་གཞི་ལམ་འབྲས་གསུམ་གྱི་དབྱིངས་སྤྱིར་ངེས་པར་བྱ་བ་དང་། ལམ་བྱེ་བྲག་ཏུ་བར་དོ་སོ་སོའི་ཉམས་ལེན་དང་སྦྱར་བའི་དབང་དུ་བྱས་ཏེ། སྐྱེ་གནས་བར་དོའི་ཉམས་ལེན་བསྐྱེད་རིམ་བསྒོམ་ཁོག་སྐུ་གསུམ་ལྷུན་གྲུབ་ཡིན་ལ། བསམ་གཏན་བར་དོའི་རླུང་དང་དཔྱིད་ཐིག །རྨི་ལམ་བར་དོའི་ཟབ་གནད་སོ་གཅིག །འཆི་ཁ་བར་དོའི་འཕོ་བ་དང་འོད་གསལ། ཆོས་ཉིད་སྣང་སྟོང་གི་བར་དོའི་ཁྲེགས་ཆོད་དང་ཐོད་རྒལ། སྲིད་པ་བར་དོའི་སྒྱུ་ལུས་དང་བདུད་གཅོད་ཟབ་མོའོ། །ཕྲ་མོ་ནི་རླུང་དང་དཔྱིད་ཐིག་གི་ཆ་ལག་དང་། རུ་ཤན་ཁྲེགས་ཐོད་ཀྱི་སྔོན་འགྲོ་དང་། འོད་གསལ་གཉིད་དང་བསྲེ་ཐབས་སྦ་བསྡུད་དག་སྦྱོར། དེ་དག་གི་དོན་བསྡུས་ཏེ་གནད་ཀྱི་ལག་ལེན་དུ་བསྡེབས་པ་བསྡུས་དོན་ནོར་བུའི་ཕྲེང་བ་སྟེ། ལར་གདམས་ངག་དྲུག་པོ་རེ་རེས་ཀྱང་བར་དོ་ཐམས་ཅད་ལ་ཕན་པའི་ཡན་ལག་ཏུ་འགྱུར་ནའང་བྱེ་བྲག་སོ་སོའི་གཞི་འབྲས་དང་རྗེས་མཐུན་ལ་བསམ་ནས་ཇི་སྐད་བཤད་པའི་དོན་དེ་ཡང་། རྒྱུད་དང་མན་ངག་གོང་མཐུན་པར་དོན་ལ་གནས་པའི་གླེང་འོས་སུ་གྲུབ་པ་འདིས་ཀྱང་སྨིན་གྲོལ་གྱི་ཆ་རྐྱེན་ཡོངས་སུ་ཚང་ཞིང་ཟབ་མྱུར་མཐར་ཐུག་པའོ། །ཞེས་པ་འདིའང་རྣལ་འབྱོར་ཆེན་པོ་པདྨ་བརྩོན་འགྲུས་ཀྱི་བཞེད་སྐོང་དུ་གསང་སྔགས་ཤིན་ཏུ་རྣལ་འབྱོར་གྱི་རིག་པ་འཛིན་པ་ག་གཱ་ཨ་བྷྱེའམ་པདྨ་མཁའ་ཀློང་ཡངས་པ་ཕྲིན་ལས་འདུས་པ་རྩལ་གྱིས་དགའ་སྐྱིད་ངོ་མཚར་གྱི་གད་མོ་ཆེར་དགོད་པའོ། །སརྦ་མངྒ་ལཾ། །འདི་ལ་མཁན་པོ་ཀུན་དཔལ་དང་། སྒྲ་ལོ་གཉིས་ཀྱི་ཞལ་རྒྱུན་ལ། ཕྱོགས་བཅུའི་སངས་རྒྱས་དང་། ཀུན་བཟང་རྡོར་འཆང་གི་ཆ་བྱད་དུ་གསུངས་སྙམ་སྟེ། སངས་རྒྱས་སྟོང་སྐུ་དང་འདྲ་བ། རིགས་ལྔ་ཤར་དང་ཤར་ལྷོ་ས་གནོན་མཉམ་གཞག །ལྷོ་དང་ལྷོ་ནུབ་མཆོད་སྦྱིན་མཉམ་གཞག །ནུབ་དང་ནུབ་བྱང་མཉམ་གཞག །བྱང་དང་བྱང་ཤར་སྐྱབས་སྦྱིན་དང་མཉམ་གཞག་རྣམས་འཁྲུལ་མེད་གསུང་སྣང་། དབུས་དང་དེ་ལ་རིགས་བདག་ཚུལ་དུ་རྡོར་འཆང་དང་ཀུན་བཟང་ ༼ གི་ཆ་བྱ་མཆན། ༽ གསུངས་སྣང་ཤར་ཡང་དབུས་ཀྱི་དེ་གཉིས་ཅུང་ཟད་བརྗེད། ཁོ་བོས་སྙམ་པ་ལ། ༡ཤར་སྣང་བ་དམ་པ་སྐུ་མདོག་སྔོན་པོ་རྣམ་སྣང་གི་ཆ་བྱད་ཅན། ༢འོད་མི་འཁྲུགས་པ་རྡོར་སེམས། ༣འཁོར་བ་འཇིགས་སྐྱོབས་རིན་འབྱུང་། ༤རོལ་བ་རྣམ་པར་བརྩེ་བ་སྣང་མཐའ། ༥རྡོ་རྗེ་འཆར་བ་དོན་འགྲུབ་༦དཔའ་བོ་སྟོབས་ལྡན་ལོངས་སྐུ་སྤྱན་གཟིགས་དཀར་པོ་ཕྱག་གཉིས། ཤེལ་ཕྲེང་པདྨ། ༧ཁྲོས་པའི་རྒྱལ་པོ། འཇམ་དཔལ་སེར་པོ་ལོངས་སྐུ། རལ་གྲི་དང་པུསྟི། ༨གསེར་འོད་དམ་པ་མི་འཁྲུགས་པ་སྔོན་པོ་ལོངས་སྐུ། མཉམ་བཞག་དང་རྡོ་རྗེ། ༩བྱང་ཤར་བརྩེ་བ་རོལ་བའི་བློ་གྲོས་ཕྱག་རྡོར་ཞི་བ་སྐུ་མདོག་སྔོན་པོ། ལོངས་སྐུ། ཕྱག་གཡས་རྡོ་རྗེ་དང་སྦྲུལ་ཞགས་བསྣམས་པའོ། །༡༠སྟེང་ཕྱོགས་ན་འོད་སྲུང་བསྒྲེས་པོ་གནས་བརྟན་བསྒྲེས་པོའི་ཆོས་གོས་རྣམ་གསུམ་མཁར་སིལ་ལྷུང་བཟེད་དཀར་བོ་ཆ་བྱད་ཅན། ༡༡འོག་ཕྱོགས་སུ་མངོན་རྫོགས་རྒྱལ་པོ་རིག་པ་འཛིན་པའི་ཆ་བྱད་སྐུ་མདོག་དཀར་བོ་སྟག་གདན་གཟན་དཀར་ཤམ་ཐབས་སྔོན་པོ་ལྕགས་རི་དམར་པོ་ཐོར་ཅོག །ཅན་གྲི་ཐོད་བསྣམས་པའོ། །༡༢བདག་ཅག་གི་སྟོན་པ་ཤཱཀྱ་ཐུབ་པའི་ཆ་ལུགས་སོ། །ཞེས་ཀྱང་ག་གཱ་ཨ་བྷྱེས་འཁྲུལ་སྣང་ཉམས་ཀྱིས་རིག་གོ །

བར་དོའི་གདམས་པའི་རྒྱབ་ཆོས་ལོག་རྟོག་ཆུ་བོ་རྒྱུན་གཅོད།

ཡེ་ཤེས་སྒྱུ་འཕྲུལ་དྲྭ་བ་ལས༔ བར་དོའི་གདམས་པའི་རྒྱབ་ཆོས་ལོག་རྟོག་ཆུ་བོ་རྒྱུན་གཅོད་ཅེས་བྱ་བ་བཞུགས་སོ༔

ན་མོ་གུ་རུ་པདྨ་ཀཱ་ར་ཡེ༔ འགྲོ་ཀུན་ལས་དང་ཉོན་མོངས་འཁོར་བའི་རྒྱུ༔ དེ་ཡི་འབྲས་བུ་སྡུག་བསྔལ་བར་མ་དོ༔ རྣམ་བྱང་འགོག་པའི་བདེན་པར་གསལ་བྱེད་ལམ༔ ཆུ་བོ་རྒྱུན་གཅོད་ཆེན་པོའི་ཚད་མའི་ལུང་༔ སྔ་ན་མེད་པའི་སར་པའང་མ་ཡིན་མོད༔ དོན་གྱི་ཁོང་སྙིང་སྡེབ་ལས་རྟོགས་སླ་ཞིང་༔ ཟབ་བརླིང་སྙིང་གི་ཐིག་ལེ་ངེས་པ་ཞིག༔ པདྨ་ཀཱ་ར་བདག་གིས་བཤད་ཀྱི་ཉོན༔ ཞེས་པས་མདུན་བསུས་ཁྱུང་རི་གནམ་རྫོང་གི་ཆོས་སྐོར་འདི་ལ་ས་གཏེར་གྱི་རྟེན་འབྲེལ་མ་འགྲིགས་ཀྱང་༔ ཇི་སྐད་དུ༔ དུས་གསུམ་རྒྱལ་བའི་དགོངས་གཏེར་འབྱུང་༔ རིག་འཛིན་བླ་མའི་ཐུགས་གཏེར་འབྱུང་༔ ཞེས་གསུངས་པ་ལྟ་བུའི་ཚུལ་དུ་བཀའ་བབས་པའི་འགྲོ་དོན་འགོག་པར་མ་གྱུར་ཏེ་བྱུང་བ་ལ༔ རྒྱུད་འབྱུང་པའི་ཁྱད་པར་ཅན་གྱི་གླེང་གཞི་དང་༔ དེ་ལས་བྱུང་བའི་དངོས་གཞི་གཉིས་ལས༔

དང་པོ་ནི༔ འདི་ནི་ཐུན་མོང་གི་གླེང་གཞི་བསླང་བདག་དང་མི་འདྲ་སྟེ༔ དེ་དག་སྟོན་འཁོར་རྒྱུད་གཞན་པའི་ཚུལ་གྱིས་བཤད་པའང་ཡོད༔ མི་གཞན་པའི་སྔོན་བྱུང་ལྟར་ཡང་དུས་ཕྱི་མར་གོ་ཕྱེ་བས་དོན་དུ་འཆད་པ་དང་དེ་ལས་ཀྱང་རིང་པོར་སོན་པར་སྣང་བའི་ཕྱིར་རོ༔ འདིར་ནི་ཚུལ་གཞན་གྱི་རྣམ་པར་བཞག་པ་སྟེ༔ དེ་ཡང་གནས་ཕུན་སུམ་ཚོགས་པ་ནས་༴ ད་ལྟ་བ་ཞིག་གོ༔ ཉི་ཟླ་ཁ་སྦྱོར་ལས་གསུངས་ཚུལ་སྒྲོན་མའི་རྒྱན་ནས་གསལ་བ་ནི་གཞི་སྣང་གི་ཕུན་ཚོགས༔ འདིར་ནི་གཞི་དང་སྣང་གི་གླེང་གཞིའི་འབྱུང་རྒྱུ་གཉིས་ཆར་ད་ལྟ་ནས་ཚང་བའི་ཡེ་ཐོག་ཞེས་དུས་སྔ་མོ་ལ་འདྲེན་མི་དགོས་ཤིང་༔ གཞི་སྣང་སྙིང་ཁར་སྐུ་གསུམ་གྱི་དཀྱིལ་འཁོར་ལྷུན་གྱིས་གྲུབ་པ་ལས་ད་ལྟ་མངོན་དུ་གྱུར་པ་ཙམ་ན་འོག་མིན་ན་རྟག་པ་རྒྱུན་གྱི་ཆོས་འཁོར་ཡོད་པས་ན༔ རིན་པོ་ཆེ་སྤུངས་པའི་རྒྱུད་ལས༔ མེད་པ་སྟོང་བའི་ཆོས་འབྱུང་ནས༔ ཡེ་ཐོག་དང་པོའི་སངས་རྒྱས་ཀྱི༔ རིག་པ་ཡེ་ཤེས་ཁྱད་པར་ལས༔ ཆོས་ཉིད་ཞི་བའི་རང་སྒྲར་ནི༔ ཡེ་ནས་ཆོས་ཀྱི་འཁོར་ལོ་བསྐོར༔ ཐོག་མ་བར་དང་ཐ་མེད་པར༔ ཞེས་དང་༔ ཐལ་འགྱུར་ལས༔ ས་ཆུ་མེ་རླུང་འབྱུང་བ་བཞི༔ འདུས་ཤིང་བསྐྱེད་པའི་གཞལ་ཡས་ན༔ རང་བྱུང་རིག་པ་བཅོས་པ་མེད༔ འཁྲུལ་པ་ཡོངས་སུ་དག་པ་ལ༔ བདེ་ཆེན་འདུས་པ་ཐབས་ཀྱི་འཁོར༔ སྐུ་དང་ཡེ་ཤེས་ཤེས་རབ་ཀློང་༔ མི་འབྱེད་སྣ་ཚོགས་དམིགས་པ་མེད༔ རྩ་རླུང་ཐབས་ཀྱི་བདེ་ཆེན་ཆོས༔ སོ་སོའི་ཉམས་དང་མཐུན་པར་བཤད༔ འདས་དང་མ་འོངས་ད་ལྟ་མེད༔ མ་ཕྱེ་འབྱེད་པ་ཡོངས་སུ་མེད༔ ཐམས་ཅད་རང་བྱུང་ཡེ་ཤེས་སོ༔ ཞེས་པས་ན་ཆོས་ཅན་ལ་ལྟོས་པའི་ད་ལྟར་དང་༔ ཆོས་ལ་ལྟོས་པའི་ཐོག་མ་དང་ཐ་མ་མེད་པའི་ཕྱིར༔ སྔར་བྱུང་གིས་བསླད་ནས་རྒྱུད་འབྱུང་བར་མི་འདོད་པ་ནི༔ རྟག་པ་རྒྱུན་གྱི་འཁོར་ལོ་དང་༔ བྱིན་གྱིས་བརླབ་པའི་བཀའ་དང་༔ འཁོར་འདས་རང་སྣང་དུ་ཤར་བ་ལ་གཉིས་འཛིན་གྱི་ཀུན་དུ་བརྟགས་པས་བདེན་པར་བཟུང་ནས༔ ཡོངས་སུ་གྲུབ་པའི་ཕྱོགས་ཙམ་ཡང་མ་རྟོགས་པར་ཟད་དོ༔ སངས་རྒྱས་རྣམས་ལས་གདམས་ངག་དང་༔ ཡེ་ཤེས་ཡངས་བ་ཐོབ་པར་འགྱུར་བ་ལ་བརྒྱུད་པ་མེད་དོ་ཞེས་ངན་སྨྲས་ཀྱི༔ ཀླན་ཀ་དེ་རང་ལ་འབབས་པ་རང་གིས་ཀྱང་མ་རིག་པའི་སྒྲིབ་པའང་ཡོད་དོ༔ མན་ངག་འདིའི་སྔ་ན་༴སོགས་། དེ་ཡང་དབང་བསྐུར་བའི་ཕན་ཡོན༔ མ་ཐོབ་བའི་ཉེས་པ༔ བསྐུར་བོ༔ བསྐུར་ཡུལ༔ བསྐུར་ཚུལ་ལ་སོགས་པ་དབང་ལས་འབྱུང་བ་ལྟར་རོ༔

གཉིས་པ་དེ་ལས་རྒྱུད་དོན་དངོས་གཞི་ལ༔ ཐོག་མར་སྦྱངས་གཞི་༴སོགས་ནས༔ དགོས་སོ༔ ཞེས་པའི་བར་དེ་གཞི་ལམ་འབྲས་བུའི་ཆོས་ཐམས་ཅད་འདི་རུ་མ་འདུས་པ་མེད་པས་ན༔ ཀློང་ཆེན་རབ་འབྱམས་རྒྱལ་པོའི་རྒྱུད་ལས༔ བར་དོ་ཞེས་བྱ་ཆོས་སྤྱིའི་སྐད༔ འདི་རུ་ཆོས་ཀུན་མ་འདུས་མེད༔ ཞེས་སོ༔

དང་པོ་ལ་སྣང་ཚུལ་༴ སོགས་ནས། འཛིན་ཏོ༔ འདིའི་དབང་ལུང་ནི་འོག་ནས་དག་པ་ཆོས་ཉིད་ཀྱི་བར་དོའི་སྐུ་གསུམ་ཡེ་ཤེས་དང་བཅས་པའི་སྣང་བ་ལས་མ་དག་འཁྲུལ་བའི་བར་དོར་འཁྲུལ་ཚུལ་རང་བཞིན་འབྲས་བུ་རྟགས་ཀྱི་ལྟ་བ་ལྷུན་གྲུབ་བསྒྲུབ་པ་དག་ལས་མང་དུ་འབྱུང་བས་འཐུས་སོ༔

གཉིས་པ་བར་དོའི་ངེས་ཚིག་ལ་༴ ཞེས་སོགས་ནས༔ དེ་དག་ནི་ངེས་ཚིག་གོ༔ ཡང་ངེས་དོན་ཆོས་ཉིད་ཀ་དག་གཞི་འབྲས་ཀྱི་དབུས་སུ་ཚུད་པ་ནི༔ བར་དོ་ཐམས་ཅད་ཀྱི་ངེས་ཕྱི་མོ་སྟེ༔ ཀུན་གསལ་ལས༔ ངེས་པའི་དོན་ལ་མི་གནས་པའི༔ རང་ས་མ་ཟིན་བར་དོའམ༔ ངེས་པའི་གཏན་ཚིག་ཞེས་བྱའོ༔ དཔེར་ན་འཇིག་རྟེན་དོན་གཉེར་བ༔ འགྲོ་སར་མ་ཕྱིན་བར་ཞག་བཞིན༔ ཞེས་སོ༔ ཡང་ལྟ་བ་ཡེ་ཤེས་ནམ་མཁའ་དང་མཉམ་པའི་རྒྱུད་ལས༔ འཁོར་འདས་གཉིས་ཀྱི་བར་དོ་རུ༔ ཐོག་མཐའ་གཅོད་ནི་མ་ཤེས་ན༔ སྐྱེ་རྒ་ན་འཆི་ལས་མི་ཐར༔ ས་མཁན་མེད་བའི་ཚོང་བ་འདྲ༔ ཞེས་ཆོས་ཉིད་རང་བྱུང་གི་གཞི་འཁོར་འདས་ཀྱི་ཕྱོགས་གང་དུའང་མ་ལྷུང་བར་བཞུགས་པ་ལ་ངེས་ཚིག་གནང་༔ སྐྱེ་བ་ལེན་དུས་སྲིད་པའི་མཐའ་དང་༔ ཤི་སྲིད་ཀྱི་བར་དོ་གཉིས་ཀྱི་དབུས་ན་ཡོད་པ་ལས་རང་བཞིན་གྱི་བར་དོར་བཏགས་ཏེ༔ སྐྱེ་ཤི་གཉིས་ཀྱི་བར་དོ་རུ༔ ཆོས་སྐུ་ངོ་སྤྲོད་མ་ཤེས་ན༔ མ་རིག་མུན་པ་སངས་དུས་མེད༔ སྒྲོན་མེ་མེད་པའི་མུན་ཁུང་འདྲ༔ ཞེས་དང་༔ རྗེས་ཐོབ་སྔ་ཕྱིའི་བར་གྱི་མཉམ་བཞག་ལ་ཏིང་འཛིན་བསམ་གཏན་གྱི་ངེས་ཚིག་གིས་གསལ་བར༔ མཉམ་བཞག་རྗེས་ཐོབ་བར་དོ་རུ༔ ཞེས་དང་༔ སྲིད་པ་དག་གི་བར་དོ་རུ༔ ཞེས་དང་༔ ཚིག་གསུམ་པའི་རྒྱུད་ལས༔ སྲིད་པ་བར་དོ་ནི་ལུང་བསྟན་ནས་རང་འོད་དུ་ངོ་ཤེས་ནས་སངས་མི་རྒྱ་མི་སྲིད་པའི་བར་དོ་ཡིན་ནོ༔ རང་གི་རིག་པའི་རང་འོད་ངོ་མ་ཤེས་ན་འགྲོ་དྲུག་ཏུ་མི་འཁོར་མི་སྲིད་པས་ཀྱང་སྲིད་པ་བར་དོ་ཡིན་ནོ༔ ཞེས་སོགས་ཀྱི་ཆོས་ཟླས་དྲངས་བར་གཞན་གྱི་ངེས་ཚིག་ཤུགས་ལ་བསྟན་ནོ༔ ས་མ་ཡཱ༔

གསུམ་པ་བར་དོའི་དབྱེ་བ་ནི་དྲུག་དུ་ཕྱེད་དེ་༴ ནས་བཞིར་ཡང་པོ་གསུངས་ཏེ་ཆོས་ཉིད་ཀྱི་བར་དོ་ནི་བླ་མ་འགའ་ཞིག་གིས་མེད་ཅེས་སུ་ཡང་གསུངས་ཀྱང་༔ དཔལ་ལྡན་མར་མེ་མཛད་ཀྱིས་འབྲོམ་སྟོན་པ་ལ་འཆི་ཁའི་བར་དོའི་སྐབས་སུ་ཆོས་ཉིད་སྐུ་གསུམ་གྱི་སྣང་བ་མཐོང་བར་བཤད་པ་དེ་ཆོས་ཉིད་བར་དོ་ཡིན་ཏེ༔ དེ་ཡང་བཀའ་གདམས་གླེགས་བམ་ལས༔ མདོར་ན་འབྲོམ་རྗེ་ང་ལ་ཉོན༔ ཞི་ཁྲོའི་ལྷ་ཚོགས་དཔག་མེད་མཐོང་༔ གོམས་པས་སྐྱེས་བུའི་ཤེས་གྱུར་ན༔ གྲོགས་དང་སྐྱབས་གནས་དགའ་བར་ཚོལ༔ ཞེས་གསུངས་སོ༔ གཞན་ཡང་ཡོད་དོ༔ ཐེག་པའི་རྒྱལ་པོ་ལས་༴ སོགས་ནས། བཞིར་བཤད་དེ༔ ཐལ་འགྱུར་ལས༔ བར་མ་དོ་ཡི་སྣང་བ་ནི༔ རང་བཞིན་གནས་པའི་ཕུང་པོ་དང་༔ ཁམས་དང་སྐྱེ་མཆེད་ཡུལ་དུ་སྣང་༔ འཆི་ཁའི་ན་བུན་ལམ་ལིང་དང་༔ ཤེས་པ་གཅིག་ཏུ་མི་གནས་པའོ༔ ཆོས་ཉིད་བར་དོའི་སྐུ་དང་ཡང་༔ ཡེ་ཤེས་འོད་དང་ཁ་དོག་གོ༔ ཐིག་ལེ་མཆེད་དང་འབྱུང་སྣང་དག༔ ཅིར་སྣང་ཆོས་ཉིད་གཞལ་ཡས་སོ༔ སྲིད་པའི་སྣང་བ་ཕྱད་ཕྱོད་དང་༔ ཞེས་སོགས་གསུངས་པ་དང་༔ བར་དོའི་ཆོས་ཉིད་འདི་ལྟ་བུ༔ རབ་ཏུ་གསང་བའི་ཆོས་ཉིད་བཤད༔ དབྱེ་ན་རྣམ་པ་བཞི་དག་ལས༔ འདིར་ནི་ཆོས་ཉིད་བར་དོ་བཤད༔ ཅེས་པའི་རྩ་བ་ནས་འཕྲོས་པ་ཉི་ཟླ་ཁ་སྦྱོར་གྱི་རྒྱུད་ལས་ཀྱང་བཞིར་སྤྲོས་སོ༔ རབ་འབྱམས་ལས༔ བར་དོ་རྣམ་པ་བཞི་ཡིན་ཏེ༔ དང་པོ་སྐྱེ་གནས་བར་དོ་དང་༔ འཆི་ཁ་སྡུག་བསྔལ་བར་དོ་དང་༔ ཆོས་ཉིད་ཞི་ཁྲོའི་བར་དོ་དང་༔ སྲིད་པར་འཁྱམས་པའི་བར་དོའོ༔ ཞེས་གསུངས་སོ༔ དེའི་སྟེང་དུ་རྨི་ལམ་བག་ཆགས་ཀྱིས་༴ བསྟན་པར་བྱའོ༔ བསྟན་པ་བུ་གཅིག་གི་རྒྱུད་ལས༔ ཆོས་ཉིད་ཀྱི་བར་དོ་དང་༔ སྲིད་པའི་བར་དོ་དང་༔ རྨི་ལམ་གྱི་བར་དོ་དང་གསུམ་མོ༔ ཞེས་དང་༔ མན་ངག་སྙིང་དགོངས་ལས༔ རང་བཞིན་གྱི་བར་དོ་དང་༔ ཏིང་ངེ་འཛིན་གྱི་བར་དོ་དང་༔ རྨི་ལམ་གྱི་བར་དོ་དང་༔ ཆོས་ཉིད་ཀྱི་བར་དོ་བཞི་ལ་ངོ་སྤྲད་དོ༔ ཞེས་དང་༔ ཀུན་གསལ་ནི༔ བར་དོ་རྣམ་པ་བཞི་བོ་ནི༔ རང་བཞིན་དག་གི་བར་དོ་དང་༔ ཏིང་འཛིན་གྱི་བར་དོ་དང་༔ ཆོས་ཉིད་འོད་གསལ་བར་དོ་དང་༔ སྲིད་པའི་བར་དོ་རྣམས་ཡིན་ནོ༔ ཞེས་སོ༔ གཞན་ཡང་རྣམ་གྲངས་བསྒྲང་ན་རྒྱུ་མ་རིག་གསུམ་རྐྱེན་དེར་རྟོགས་དེར་ཞེན་གྱི་གོལ་ས་༡བར་དོའི་ལུས་གསུམ་གསུམ་འདུས་པ་མ་རིག་འཁྲུལ་བའི་བར་དོ་སྡུག་བསྔལ་སྣ་ཚོགས་འདུ་བྱེད་པ་དང་༔ ངན་སོང་གི་སྡུག་བསྔལ་ལ་སྐྲག་ནས་དགེ་བ་བཅུ་སོགས་སྤྱད་པའི་འབྲས་བུ་ལྷ་མི་ཐོབ་པའི་བདེ་བར་ཀུན་བརྟགས་གྱེས་པའི་༢བར་དོ༔ བསྐྱེད་པའི་ཏིང་འཛིན་དང་རྫོགས་རིམ་གྱི་ལྷ་སྐུ་གཉིས་ནི་རྟོགས་པ་གནས་འགྱུར་གྱི་འབྲས་བུ་འདོད་པའི་གནས་འགྱུར་ལྷ་ཡི་༣བར་དོ་ཞེས༔ རྣམ་ཤེས་རླུང་ཞོན་སྲིད་པ་༤བར་དོ་དང་༔ རྟོག་པ་མངོན་གྱུར་གྱི་ཆོས་སྐུའི་ཕྲིན་ལས་༥གཟུགས་སྐུ་གཉིས་སུ་སྣང་བ་དེ་ལྔར་གསུངས་བ་སྲིད་པ་བར་དོ་ལས་ཕྱེ་བ་ཡིན་ཡང་འདིར་རིམ་པ་བཞིན༔ སེམས་ཅན་འཁྲུལ་ཚུལ༔ བར་དོའི་དགེ་སྡིག་གི་རང་གཟུགས་ཀྱི་ཉམས་དང་སྣང་བ་དང་༔ རང་བཞིན་དུ་རིགས་དྲུག་གི་བདེ་སྡུག་ཏུ་སྣང་ཚུལ་དང་༔ བསམ་གཏན་བར་དོའི་བསྐྱེད་རྫོགས་ཀྱི་ལྷ་སྐུར་བསྒོམ་པ་དང་༔ སྲིད་པ་བར་དོར་སྒྱུ་ལུས་ལྷ་སྐུར་ལྡང་པ༔ ཐ་མལ་བའི་རྣམ་ཤེས་ཚུགས་མེད་པར་འཁྱར་བ་དང་༔ རྣལ་འབྱོར་སྦྱངས་སྟོབས་ཕྲ་བས་འཕོ་བས་སྟོང་འདེབས་པ༔ གང་ཟག་རབ་འབྲིང་གི་གྲོལ་བ་ཐོབ་པས་གཞན་ངོར་སྤྲུལ་སྐུ་ཕྲིན་ལས་དང་བཅས་འབྱུང་བ་འབྲས་བུའི་གནས་སྐབས་སུ་བཤད་པ་རྣམས་ལ་ལྷག་ཆད་མེད་པར་འུབ་ཆུབ་པའོ༔ ཡེ་ཤེས་མཁའ་མཉམ་ལས༔ ད་ཡང་འདུས་པའི་སྙིང་པོ་ཉོན༔ སྲིད་པའི་བར་དོ་རྣམ་ལྔ་ལ༔ མ་རིག་འཁྲུལ་བའི་བར་དོ་དང་༔ གནས་འགྱུར་ལྷ་ཡི་བར་དོ་དང་༔ རྣམ་ཤེས་རླུང་གི་བར་དོ་དང་༔ ཀུན་བརྟགས་གྱེས་པའི་བར་དོ་དང་༔ རྟོགས་པ་མངོན་གྱུར་བར་དོ་ཡིན༔ ཞེས་སོ༔ ཡང་འཁོར་འདས་བར་དོའི་ལུས་ནི་གང་༔ སྐྱེ་ཤི་བར་དོའི་གདམས་ངག་གང་༔ ཡུལ་སེམས་བར་དོ་ཅིའི་མི་འགལ༔ ཏིང་འཛིན་བར་དོ་འབྲེལ་ལམ་གང་༔ སྲིད་པ་བར་དོ་ཅི་ལྟ་བུ༔ ཞེས་པས་འཁོར་འདས་བར་དོ་ནི་གནས་སྣང་ཀ་དག་གི་གཞི་ཆོས་ཉིད་དང་༔ ངོ་བོ་གཞི་སྣང་བཤད་པའོ༔ ཡུལ་སེམས་བར་དོ་ནི་ཡུལ་སེམས་གཉིས་ཀྱི་བར་དུ་ཤར་བའི་རིག་པ་ལ་ངོས་བཟུང་བ༔ རང་བཞིན་གྱི་བར་དོ་གདམས་པའི་ཐག་བཅད་པ་ལ་འུབ་ཆུབ་པོ༔ ཡང་ཡེ་ཤེས་གཏིང་རྫོགས་ལས༔ བདག་གཞན་རྩོད་པའི་བར་དོ་ནི༔ ༼ གལ་མདོ་ཚིག་གི་འཕྲང་མེད་ན༔ ཐེག་པ་གཞན་ལས་བོག་མི་ཐོན༔ གཡུལ་ངོར་ཕམ་པའི་བློན་པོ་འདྲ༔ ཞེས་པ་ནི༔ འདི་ལ་བརྒལ་ལན་སྐབས་བབས་རྣམས་དང་༔ ལྟ་བ་བརྒལ་རྟགས་ཀྱིས་གཏན་ལ་ཕབས་པའི་ཡོན་ཏན་ཡར་ལྡན་དུ་བྱུང་བའོ༔ བཞི་བ་ས་མཚམས་ནི༔ རིགས་དྲུག་གི་༴ ནས། ས་མཚམས་སུ་ངེས་སོ༔ ༽ དེ་ཡང་རབ་འབྱམས་རྒྱལ་པོའི་རྒྱུད་ལས༔ ས་མཚམས་སྐྱེ་གནས་བར་དོ་ནི༔ མ་ལ་སྐྱེས་ནས་འཆི་རྐྱེན་གྱི༔ ནད་ཀྱིས་བཏབ་པ་ཚུན་ཆད་དོ༔ འཆི་ཁའི་བར་དོ་ནད་ཐེབས་ནས༔ ནང་དབུགས་ཆད་པ་ཚུན་ཆད་དོ༔ ཆོས་ཉིད་བར་དོ་དབུགས་ཆད་ནས༔ ལྷུན་གྲུབ་སྣང་བ་ཤར་བའོ༔ སྲིད་པ་བར་དོའི་ས་མཚམས་ནི༔ ལྷན་གྲུབ་སྣང་བ་ཡོངས་ཐིམས་ནས༔ མངལ་དུ་ཚུད་པ་ཚུན་ཆད་དོ༔ ཞེས་སོ༔ ཞར་བྱུང་ནི་འགྲེ་དེས་གོ་སླའོ༔

ལྔ་བ་གྲངས་ངེས་ནི༔ དྲུག་པ་གོ་རིམ་ནི་༴ ནས། གཉིས་སུ་བཞག་གོ༔ དེས་ན་རྒྱུད་སྡེ་ཀུན་གྱི་གོ་རིམ་འབྲེལ་མར་གསུངས་སོ༔

བདུན་པ་བར་དོ་དྲུག་གི་སྣང་ཚུལ་ལམ་འཆར་ཚུལ་བསྟན་པ་དངོས་ལ༔ ནས། ཐ་དད་པ་ལྟ་བུའོ༔ སྣང་སྲིད་ཁ་སྦྱོར་ཆེན་པོའི་རྒྱུད་ལས༔ ཀྱེ་མ་ཀྱེ་མ་ཧོ༔ ཡང་དག་དོན་ལས་གོལ་བ་རྣམས༔ རྣམ་རྟོག་བདག་ཏུ་བཟུང་བ་ཡིས༔ ནན་གྱིས་ནམ་མཁར་མདུད་པ་བྱས༔ རང་གི་མགོ་བོ་རྐང་བས་མནན༔ རང་གི་སྐེ་ལག་རང་གིས་བཅིངས༔ རང་གི་རིན་ཆེན་རང་གིས་སྟོར༔ རང་གི་སྒྲོན་མེ་རང་གིས་བསད༔ རང་གི་ཉི་ཟླ་རང་གིས་བསྣུབ༔ སངས་རྒྱས་སེམས་ཅན་གཉིས་ཀྱི་གཞི༔ ངོ་བོ་སྤྱི་ས་མཉམ་པ་ལ༔ རང་ས་མ་ཟིནགསུམ་གྱི་ལན༔ ཞེས༔ འཆར་གཞིའམ་འཁྲུལ་གཞི་བཤད་པ་དང་༔ དེ་ལྟར་མེད་ལ་ཡོད་བཟུང་གིས༔ རིགས་དྲུག་སྐྱེ་དགུ་ལ་སོགས་བྱུང་༔ མི་བདེན་བདེན་བཟུང་རྟོག་ཚོགས་ཀྱིས༔ ཐམས་ཅད་འཁྲུལ་པའི་འབྲས་བུར་སྨིན༔ ཞེས་དང་༔ མུ་ཏིག་ཕྲེང་བ་ལས༔ དེ་མ་ཡིན་ལ་དེར་བཟུང་བའི༔ ཕྱི་ནང་སྣོད་བཅུད་གཉིས་སུ་འཁོར༔ ཞེས་དང་༔ བཅུད་ཐིག་ལས༔ མིན་ལས་ཆོས་ལ་ཡིན་བཟུང་བའི༔ དེ་ཡི་འཁྲུལ་བའི་འབྲས་བུར་སྨིན༔ ཞེས་དང་༔ སྣང་བ་ངེས་པ་མེད་པའང་༔ ཡེ་ཤེས་མཁའ་མཉམ་ལས༔ དཔེར་ན་འཁྲུལ་བའི་སྣང་བ་ནི༔ གཙང་དང་མི་གཙང་གཉིས་ཀའི་གཞི༔ ལུད་པ་ལ་སོགས་གང་རུང་ལ༔ བྱ་ཁྱི་རྣམས་ཀྱིས་ཟས་སུ་མཐོང་༔ མི་རྣམས་ཀྱིས་ནི་མི་གཙང་མཐོང་༔ དེ་བས་སྣང་བ་མ་ངེས་ཕྱིར༔ དོན་ལ་བླང་དོར་མེད་པ་ཡིན༔ ཞེས་དང་ལྟ་བའི་སྙིང་པོ་ལས༔ གཙང་དང་མི་གཙང་གཉིས་ཀ་བཞིན༔ ལུད་པ་ལ་སོགས་གང་རུང་ལ༔ བྱ་ཁྱི་ཡིས་ནི་ཟས་སུ་མཐོང་༔ དེ་ཕྱིར་བླང་དོར་མེད་པའོ༔ ཞེས་སོ༔ དབུ་མའི་རྒྱན་ལས༔ ཡང་དག་དུ་ན་གཅིག་པ་དང་༔ དུ་མ་ཡི་ནི་བྲལ་བའི་ཕྱིར༔ ཞེས་གསུངས་པས་སོ༔ ས་མ་ཡཱ༔

སྤྱི་ཚན་ལ་༴ ཡོད་དོ༔ བདེན་གཉིས་ལས༔ དངོས་གཅིག་ཡིད་ནི་ཐ་དད་པའི༔ དོན་མ་གྲུབ་པ་ཉིད་དུ་མཐོང་༔ ཞེས་དང་༔ ཀུན་གསལ་ལས༔ ཤེས་བྱའི་དཀྱིལ་འཁོར་མ་འགགས་པའི༔ སྣང་བའི་དངོས་པོ་འདི་ཉིད་ལ༔ དམྱལ་བས་ཚ་གྲང་གཉིས་སུ་མཐོང་༔ ཡི་དྭགས་གསུམ་ལ་སྣང་བ་གསུམ༔ ཕྱི་ནང་སྤྱི་མཐུན་སྣང་བའོ༔ ཕྱི་ཡི་ཟས་སྐོམ་རྣག་ཁྲག་དང་༔ གོས་ལ་ཚེར་མ་ལྟ་བུའོ༔ གཅིག་ལ་ཟས་སྣང་སྲུང་མས་བསྲུང་༔ གཅིག་ལ་བསྲུང་མེད་ཟོས་པས་དུག༔ དེ་བཞིན་ཡི་དྭགས་གསུམ་ལ་སྣང་༔ བྱོལ་སོང་གཉིས་ལ་སྣང་བ་གཉིས༔ བྱིངས་ན་གནས་ལ་མུན་པ་དང་༔ ཁ་འཐོར་གནས་ལ་གྱེན་ཐུར་སྣང་༔ མི་ལ་མཐུན་སྣང་འདི་ཉིད་དེ༔ རང་རང་ཡུལ་མི་ཁྱིམ་མཚེས་སོགས༔ ལྷ་མ་ཡིན་ལ་གོ་མཚོན་དང་༔ ལྷ་ལ་རིན་ཆེན་བདུད་རྩིར་སྣང་༔ བློ་སྣང་ཞེན་པའི་བག་ཆགས་ཡིན༔ ཞེས་པ་ཉིད་ལྟར་རོ༔ དེ་དག་ཀྱང་ཡོད་ནས་མི་སྣང་བར༔ ཀུན་གསལ་ལས༔ དེ་ལ་རང་བཞིན་བར་དོ་ནི༔ ད་ལྟའི་འཁྲུལ་སྣང་འདི་ཉིད་ཡིན༔ ཞེས་དང་༔ མེད་ནས་སྣང་བ་སྒྱུ་མའི་དཔེ་བཅུ་ལྟ་བུ་སྟེ༔ སྒྱུ་མའི་ཚོགས་སྤྲུལ་ཡོད་པ་མེད༔ སྒྲ་བརྙན་སྨིག་རྒྱུ་གཟུགས་བརྙན་དང་༔ མིག་ཡོར་ཆུ་ཟླ་སྤྲུལ་པ་རྣམས༔ ཡོད་ནས་མི་སྣང་མེད་ནས་སྣང་༔ ཞེས་སྐུ་གསུང་ཐུགས་རྩ་བའི་རྒྱུད་ནས་གསུངས་པས་མཚོན་བསམ་གྱིས་མི་ཁྱབ་པོ༔ ས་མ་ཡཱ༔

བར་དོ་དང་པོ་སྐྱེ་གནས་ཀྱི་བར་དོ་༴ ནས། སྤྱོད་པ་སྟེ༔ རང་གིས་རང་བཅིངས་སངས་རྒྱས་ཀྱི་ཆོས་ལྷུན་རྫོགས་བྱང་ཆུབ་སྙིང་པོ་རང་ལ་གསང་བ་སྟེ༔ སྒྱུ་འཕྲུལ་ལས༔ ཨེ་མ་ཧོ་བདེ་གཤེགས་སྙིང་པོ་ལས༔ ནས། བསྟན་ཕྱིར་སྤྲོ་བ་སྣ་ཚོགས་མཛད༔ ཅེས་དང་༔ རིན་ཆེན་སྤུང་པ་ལས༔ བདག་རྟོག་བཅིངས་བས་ཉོན་མོངས་ལྔ༔ ཡེ་ནས་རིག་པར་རང་ཤར་བའི༔ ཡེ་ཤེས་ཡིན་པ་ཞལ་མ་འཚོ༔ ཞེས་དང་༔ བདུད་རྩི་མངོན་འབྱུང་གི་རྒྱུད་ལས༔ གཟུགས་ཕུང་རྣམ་པར་སྣང་མཛད་དེ༔ ཚོར་བ་རིན་ཆེན་འབྱུང་ལྡན་ནོ༔ འདུ་ཤེས་སྣང་བ་མཐའ་ཡས་ཉིད༔ འདུ་བྱེད་དོན་ཡོད་གྲུབ་པ་སྟེ༔ རྣམ་པར་ཤེས་པ་མི་བསྐྱོད་པ༔ ཞེས་དང་༔ དེ་དག་ཀྱང་སྒྲིབ་གཞི་དང་སྒྲིབ་ཆོས་ཡིན་པས༔ ཡང་དག་དང་ལོག་པའི་ཀུན་རྫོབ་ཏུ་གནས་པའང་ཚུལ་འདིས་ཀུན་འགྲེལ་ནས༔ གསེར་ཕྲེང་ལས༔ མཐིང་ཀ་དཀར་པོ་སེར་ལེབ་རྒན༔ ལྗང་གུ་ལྔ་ལ་བདག་བཟུང་བས༔ ནམ་མཁའ་ཆུ་བོ་ས་དང་མེ༔ རླུང་ལྔའི་འབྱུང་བར་རང་ཤར་རོ༔ ཞེས་སོ༔ དེ་ཡང་རང་བཞིན་གྱི་བར་དོ་ལ་ཉོན་མོངས་འཁོར་བའི་རྒྱུ་འབའ་ཞིག་གི་གནས་ཚུལ་ཡིན་ཏེ༔ གཏན་ལ་ཕབ་ནས་ཤེས་པར་བྱས་པའི་སྣང་བ་ཐམས་ཅད་ལ་དབང་སྒྱུར་ཐོབ་པ་སྟེ༔ ཉི་ཟླ་ཁ་སྦྱོར་ལས༔ ཁམས་རྣམས་དང་ནི་ཕུང་པོ་དང་༔ སྐྱེ་མཆེད་རྣམས་དང་དབང་པོ་དང་༔ ཡུལ་དང་ཡུལ་ཅན་ཤེས་པ་རྣམས༔ ཇི་ལྟར་གནས་པ་གཏན་ལ་དབབ༔ འདི་དག་ཤེས་པའི་རྣལ་འབྱོར་བས༔ སྣང་བ་ཐམས་ཅད་དབང་བསྒྱུར་ཐོབ༔ ཅེས་དང་༔ ཁམས་དང་སྐྱེ་མཆེད་དེ་དག་ཀྱང་ཀློང་ཆེན་རབ་འབྱམས་ཀྱི་རྒྱུད་ལས༔

གཉིས་པ་རང་བཞིན་བར་དོ་ནི༔ རང་ལུས་འདོམ་གང་གྲུ་བཞི་འདི༔ ཁམས་རྣམས་དང་ནི་ཕུང་པོ་དང་༔ སྐྱེ་མཆེད་རྣམས་དང་དབང་པོ་དང་༔ ཡུལ་དང་ཡུལ་ཅན་ཉོན་མོངས་རྣམས༔ ཇི་ལྟར་གནས་པ་གཏན་ལ་ཕབ༔ འདི་དག་ཤེས་པའི་རྣལ་འབྱོར་བས༔ སྣང་བ་ཐམས་ཅད་དབང་བསྒྱུར་ནུས༔ ཁམས་ལ་རྣམ་པ་གཉིས་ཡིན་ཏེ༔ ཡུལ་གྱིས་བསྡུས་པ་ཕྱི་ཡི་ཁམས༔ སེམས་ཀྱིས་བསྡུས་པ་ནང་གི་ཁམས༔ ཁམས་ཀྱི་རྣམ་པ་དེ་དག་ཀྱང་༔ ཡུལ་ཀུན་འཛིན་པ་འཁྲུལ་བའོ༔ ཕུང་པོ་རྟོག་པ་དང་བཅས་པ༔ དངོས་པོ་ཐམས་ཅད་གཅིག་ཏུ་སྡུད༔ རྟོག་པ་མེད་པའི་ཕུང་པོ་འདི༔ བསམ་གཏན་གཅིག་འདུས་རང་བཞིན་ནི༔ སྐྱེ་མཆེད་གཟུང་འཛིན་གཉིས་ཡིན་ཏེ༔ གཟུང་བའི་སྐྱེ་མཆེད་བཅུ་གཉིས་དང་༔ འཛིན་པའི་སྐྱེ་མཆེད་བཅུ་གཉིས་སོ༔ དབང་པོ་གཟུགས་ཀྱི་ཆ་འཛིན་དང་༔ ཤེས་རབ་ཆ་འཛིན་དབང་པོའོ༔ ཡུལ་ལ་དངོས་པོའི་ཡུལ་དང་ནི༔ དངོས་པོ་མེད་པའི་ཡུལ་གཉིས་སོ༔ ཡུལ་ཅན་ཐམས་ཅད་རྣམ་པར་དག༔ དག་ཅེས་བྱ་བ་ཆོས་ཟད་དོ༔ ཉོན་མོངས་པ་ནི་དྲུག་ཡིན་ཏེ༔ མ་རིག་གཏི་མུག་ཞེ་སྡང་དང་༔ ང་རྒྱལ་འདོད་ཆགས་ཕྲག་དོག་གོ༔ ཞེས་དང་༔ ཉི་ཟླ་ཁ་སྦྱོར་ལས༔ དེ་ཉིད་གསལ་རྒྱས་རྫོགས་པར་བསྟན་ཏོ༔ དེ་ཀུན་འཁོར་བའི་རྒྱུ་འབའ་ཞིག་ལགས་པས་རང་བཞིན་གྱི་བར་མ་དོ་འདི་ལ༔ མྱ་ངན་ལས་འདས་པའི་རྒྱུ་གནས་པ་ལགས་སམ༔ འོན་ཏེ་གོང་དུ་གནས་པ་དེ་དག་དང་རྒྱུ་གཅིག་པ་ལགས་སམ༔ ཡང་ན་གཏན་མེད་པ་ལགས༔ འདི་ལ་ཐེ་ཚོམ་ཟ་བས་བསལ་དུ་གསོལ༔ ཞེས་ཞུས་པས༔ སྟོན་པས་བཀའ་སྩལ་པ༔ ཀྱེ་ཐུབ་པ་ཆེན་པོ་ཉོན་ཅིག༔ རང་བཞིན་གནས་པའི་བར་དོའི་སེམས་ཅན་ལུས་ཀྱིས་བསྡུས་པ་ཐམས་ཅད་ལ༔ མྱ་ངན་ལས་འདས་པའི་རྒྱུ་ནི་དུས་གསུམ་གྱི་སངས་རྒྱས་རྣམས་དང་༔ ཁྱད་མེད་པར་གནས་པ་ཡིན་ནོ༔ དེ་ཡང་སྐུ་རྣམས་ཀྱི་བདག་ཉིད་དང་༔ ཡེ་ཤེས་དང་༔ འོད་དང་༔ ཐིག་ལེ་དང་༔ རིག་པ་རང་གི་ངོར་གནས་པ་ཡིན་ནོ༔ ཞེས་གསུངས་པས་གནས་ཚུལ་གྱི་དབང་གིས་ཡེ་ཤེས་ཀྱི་༴ ནས། རྟོག་དཔྱོད་ཀྱི་རང་བཞིན་དུ་སྣང་ངོ་ཞེས་སོ༔ དེ་དག་གི་ཚུལ་རྒྱས་པར་རྒྱན་གཉིས་དང་རིན་ཆེན་སྒྲོམ་བུ་གོང་སྦྲེལ་བས་དབང་ལུང་ཚད་མ་ཚང་ངོ་༔

གཉིས་པ་བྱེ་བྲག་ཏུ་༴ ནས། ལུས་ཡོད་དོ༔ དེ་ཡང་ལྷ་མི་གླིང་བཞི་སོགས་ན་ལྟོས་པས་ཡིན་གྱི་རང་རང་ཚན་གཅིག་པ་ལ་གོ་བར་བྱ་བ་མ་ཡིན་ནོ༔ འཇིག་རྟེན་གདགས་པར༔ འཛམ་བུ་གླིང་གི་མི་ཁ་ཅིག་ནི་ཁྲུ་ཕྱེད་དང་བཞི་པའོ༔ ཁ་ཅིག་ནི་ཁྲུ་བཞི་པའོ༔ ཤར་ལུས་འཕགས་པོ་རྣམས་ནི་ཁྲུ་བརྒྱད་པའོ༔ ནུབ་གྱི་བ་ལང་སྤྱོད་པ་རྣམས་ནི་ཁྲུ་བཅུ་དྲུག་པའོ༔ བྱང་གི་སྒྲ་མི་སྙན་གྱི་མི་རྣམས་ནི་ཁྲུ་སུམ་ཅུ་རྩ་གཉིས་པའོ༔ རྒྱལ་ཆེན་བཞིའི་ལྷ་རྣམས་ནི་རྒྱང་གྲགས་ཀྱི་བཞི་ཆའོ༔ སུམ་ཅུ་རྩ་གསུམ་གྱི་ལྷ་རྣམས་ཀྱི་ནི་རྒྱང་གྲགས་ཀྱི་ཕྲེད་དོ༔ འཐབ་བྲལ་བ་རྣམས་ཀྱི་ནི་རྒྱང་གྲགས་ཀྱི་བཞི་ཆ་གསུམ་མོ༔ ཞེས་པ་ལ་སོགས་པས་མཚོན་པ་ཉིད་དོ༔ ཡང་རབ་འབྱམས་ལས༔ འོད་གཟུགས་ཤ་གཟུགས་ཡིད་གཟུགས་གསུམ༔ དེ་ཡི་འཁོར་འདས་གཉིས་སུ་གྱེས༔ ཞེས་སོ༔ དེས་མཚོན་ཏེ་མཚན་མའི་ལུས་ལྔའམ་བདུན་ལ་སོགས་པ་ཡང་ཡོད་དོ༔ ངག་ནི་འདོད་པ་ན་༴སོགས་། ཡོད་དོའི་བར་རོ༔ སེམས་ནི་འདོད་པ་ནས་ཇེ་སྲབ་པོ༔ དེ་ཡང་ཕྲི་ལུགས་གཟུགས་མེད་ན་ཞི་གནས་རྩེ་གཅིག་གི་སེམས་མིང་གཞིའི་ཕུང་པོ་ལ་བརྟེན་པ་དང་༔ གཟུགས་ཁམས་བསམ་གཏན་གྱི་སེམས་འོད་ལུས་ལ་བརྟེན༔ འདོད་ཁམས་རྟོག་བཅས་ཀྱི་སེམས་རྡོས་བཅས་ཀྱི་སེམས་ལ་བརྟེན་པ་དེ་ཁམས་གོང་མ་གཉིས་ན་རྩ་རླུང་ཐིག་ལེ་ཕྱི་གསལ་རགས་པ་མེད་པའི་རིག་གདངས་ནང་གསལ་ལས་རྟོག་པར་མི་འཕྲོ་ལ༔ དེ་ཡང་གཟུགས་མེད་ན་དམིགས་པའི་ཡུལ་ཡང་མེད༔ གཟུགས་ཁམས་དེ་བས་ཡུལ་ཤེས་རགས་ཤིང་༔ འདོད་ཁམས་ལྟར་མེད་པའང་ཡིན་ལ༔ ཁམས་གསུམ་པས་སེམས་གསུམ་ལ་བརྟེན་པས་ཁྱད་པར་ཡང་ཡོད་དོ༔ དེས་ན་ངག་ཀྱང་རགས་པ་མེད་པའི་རྒྱུ་མཚན་ཡིན་ནོ༔ གནས་ནི་འདོད་ཁམས་ཀྱིས་༴ སོགས་ནས། ཤས་ཆེའོ༔ ཞེས་པའི་བར་གྱིས་བསྟན་ཏེ༔ བསམ་གཏན་གྱི་ལྷ་ལ་འོད་གསལ་གྱི་ཡུལ༔ གཟུགས་མེད་ལ་ཡུལ་མེད་དེ་ཡོད་ན་མི་རྟོག་ཡིད་ཀྱི་ཡུལ་ཙམ་ལས་མེད་ཀྱང་འདོད་པའི་ཁྱད་པར་རྒྱས་པ་ནི༔ ཐུན་མོང་གི་སྔོན་འགྲོ་ལས་འབྱུང་བའི་ཕྱིར་འདིར་མ་སྨོས་སོ༔ འོན་ཀྱང་ཡུལ་ནི་ཆོས་ཀྱི་དབྱིངས་ཡིན་པའི་ཁྱད་པར་མེད་མོད་འཛིན་པའི་དབང་གིས་མི་འདྲ་བ་སྟེ༔ ཀློང་གསལ་ལས༔ ཡེ་ཤེས་ངོ་བོ་གཅིག་ཉིད་ལས༔ འཛིན་པ་ལོག་པའི་ཐ་དད་སྣང་ཞེས་དང་༔ ཡེ་ཤེས་གསང་འཁོར་ལས༔ ཡུལ་དུ་སྣང་བ་རྨི་ལམ་ཙམ༔ དོན་ལ་ཡེ་ཤེས་རྩལ་དུ་སྣང་༔ ལས་ཀྱི་སོགས་ཚུལ་ནི་༴ སོགས་ནས། བག་ཆགས་སོག་གོའི་བར༔ དེ་ཡང་འདོད་ཁམས་མ་གཏོགས་པ་ན་སྒོ་གསུམ་དང་འཛིན་པ་རགས་པར་མེད་པའི་ཕྱིར་རོ༔ ཁམ་ཟས་རགས་པ་༴ སོགས་ནས། རྒྱུའོ༔ ཞེས་པ་སྟེ༔ དེའི་ཚུལ་ནི༔ འདོད་ཁམས་ཡན་ཆད་ན་བཀྲེས་སྐོམས་ཀྱང་མེད་ལ༔ དེས་ན་ཁམས་ཟས་དང་དེ་ལས་བྱུང་བའི་བཤང་གཅི་ཡང་མེད་དེ༔ འདོད་པའི་ཁམ་ཟས་ཡང་༔ སྒྲ་མི་སྙན་གྱི་ས་ལུ༔ འདོད་ལྷ་རིགས་དྲུག་གིས་བདུད་རྩིའི་ཟས་ཟ་སྟེ༔ འཇིག་རྟེན་གཞག་པ་ལས༔ ཇི་ལྟར་འཛམ་གླིང་གི་མི་རྣམས་ལ་བཀྲེས་པ་དང་༔ སྐོམ་པ་ཡོད་བཞིན་དུ་ཤར་གྱི་ལུས་འཕགས་པོ་རྣམས་དང་༔ ནུབ་ཀྱི་བ་ལང་སྤྱོད་པ་རྣམས་དང་༔ བྱང་གི་སྒྲ་མི་སྙན་པ་རྣམས་དང་༔ རྒྱལ་ཆེན་བཞིའི་རིས་ཀྱི་ལྷ་རྣམས་དང་༔ སུམ་ཅུ་རྩ་གསུམ་པ་རྣམས་དང་༔ འཐབ་བྲལ་བ་རྣམས་དང་༔ དགའ་ལྡན་པ་རྣམས་དང་༔ འཕྲུལ་དགའ་བ་རྣམས་དང་༔ གཞན་འཕྲུལ་དབང་བྱེད་པ་རྣམས་ལ་ཡང་ཡོད་དོ༔ དེ་ཕན་ཆད་ལ་ནི་བཀྲེས་པ་དང་སྐོམ་པ་མེད་དོ༔ དེ་ལྟར་འཛམ་བུ་གླིང་གི་མི་རྣམས་ལ་ཁ་ཟས་འདི་ལྟ་སྟེ༔ འབྲས་ཆེན་དང་༔ ཟན་དང་༔ ཕྱེ་དང་༔ ཤ་དང་༔ ཁུར་བ་རྣམས་ཡོད་པ་བཞིན་དུ་ཤར་གྱི་ལུས་འཕགས་པོ་དང་༔ ནུབ་ཀྱི་བ་ལང་སྤྱོད་ལ་ཡང་ཡོད་དོ༔ བྱང་གི་སྒྲ་མི་སྙན་གྱི་རྣམས་ནི་མ་རྨོས་མ་བཏབ་པའི་འབྲས་ས་ལུའི་འབྲུ་ཟའོ༔ རྒྱལ་ཆེན་བཞིའི་རིས་ཀྱི་ལྷ་རྣམས་ནི་དྲི་ཟའི་ཟས་དང་བདུད་རྩིའི་ཟས་ཟའོ༔ རྒྱལ་ཆེན་བཞིའི་ལྷ་རྣམས་ཇི་ལྟ་བ་བཞིན་དུ་སུམ་ཅུ་རྩ་གསུམ་པ་རྣམས་དང་༔ འཐབ་བྲལ་བ་རྣམས་དང་༔ དགའ་ལྡན་པ་རྣམས་དང་༔ འཕྲུལ་དགའ་པ་རྣམས་དང་༔ གཞན་འཕྲུལ་དབང་བྱེད་ཀྱི་ལྷ་རྣམས་ཀྱང་དེ་བཞིན་ནོ༔ དེ་ཡན་ཆད་ལ་ནི་ཁམ་གྱི་ཟས་མེད་དོ༔ རྒྱལ་ཆེན་བཞིའི་ལྷ་རྣམས་ཀྱི་བདུད་རྩི་ནི་རྣམ་པ་བཞི་སྟེ༔ སྔོན་པོ་དང་༔ སེར་པོ་དང་༔ དམར་པོ་དང་༔ དཀར་པོ་རྣམས་སོ༔ རྒྱལ་ཆེན་བཞིའི་ལྷ་རྣམས༔ ཇི་ལྟ་བ་བཞིན་དུ་སུམ་ཅུ་རྩ་གསུམ་པ་རྣམས་དང་༔ འཐབ་བྲལ་བ་རྣམས་དང་༔ དགའ་ལྡན་པ་རྣམས་དང་༔ འཕྲུལ་དགའ་བ་རྣམས་དང་༔ གཞན་འཕྲུལ་དབང་བྱེད་པ་རྣམས་ཀྱང་དེ་བཞིན་ནོ༔ ཚངས་རིས་པ་རྣམས་ལ་ནི་མེད་དོ༔ དེ་ཡན་ཆད་པ་ལའང་མེད་དོ༔ ཞེས་སོ༔ ཏིང་ངེ་འཛིན་ནི་ཡིད་ཀྱི་ཟས་ཀྱི་ཆ་ཤས་ཡིན་པས༔ ཁམས་གོང་མ་ན་དེ་ཡོད་པའི་ཕྱིར་རོ༔ རང་བཞིན་བར་དོ་ཞེས་པ་གཙོ་ཆེ་བར་སྐྱེ་གནས་༴ སོགས་ནས། རྣམས་སོ་ཞེས་བའི་བར་གྱིས་ལར་ཡེ་ཤེས་ལྔ་ལས་འབྱུང་བ་བཞིར་འཁྲུལ་སྟོབས་ཀྱིས་སྐྱེ་གནས་བཞི་ལ་སོགས་པ་འབྱུང་བ་སྟེ༔ ཀློང་གསལ་ལས༔ འཁྲུལ་ལུགས་རྣམ་པ་མང་བཤད་ཀྱང་༔ ཡེ་ཤེས་ལྔ་ཡི་རྩལ་ཉིད་ཡིན༔ རྩལ་གྱི་ཡེ་ཤེས་ངོ་མ་ཤེས༔ དངོས་པོ་འཛིན་པ་ཅན་དུ་འཁྲུལ༔ ཡེ་ཤེས་ལྔ་ལས་འབྱུང་བ་ལྔ༔ འབྱུང་བ་ལྔ་ལས་སྐྱེ་གནས་བཞི༔ རིགས་དང་སེམས་ཅན་དཔག་མེད་འབྱུང་༔ ཁམས་གསུམ་འཁོར་བའི་ཁང་པ་རུ༔ རྒྱུད་དྲུག་སེམས་ཅན་རེས་མོས་འཁོར༔ ཞེས་སོ༔ སྐྱེ་གནས་དེ་དག་ལ་ཡང་༔ རང་དབང་ཅན་དང་༔ རང་དབང་མེད་པར་འཁོར་བ་གཉིས་སུ་ཡོད་དེ༔ རབ་འབྱམས་ལས༔ རང་དབང་ཅན་དུ་འཁོར་བ་དང་༔ རང་དབང་མེད་པར་འཁོར་ཚུལ་གཉིས༔ ཞེས་སོ༔ དེ་ཡང་སྐྱེ་གནས་བཞི་ནི༔ དེ་ཉིད་ལས༔ མངལ་སྐྱེས་སྒོང་སྐྱེས་དྲོད་གཤེར་སྐྱེས༔ བརྫུས་སྐྱེས་སྐྱེ་དང་བཞི་ཡིན་ནོ༔ ཞེས་སོ༔ དེ་ལ་འཁོར་ཚུལ་ནི༔ ཀློང་གསལ་ལས༔ དེ་བཞིན་སྐྱེ་བ་རྣམ་པ་བཞི༔ ཡར་དང་མར་གཉིས་ཤེས་པར་བྱ༔ ཡར་གྱི་སྒོང་སྐྱེས་རྡོ་རྗེ་སེམས༔ མར་གྱི་སྒོང་སྐྱེས་བྱ་དང་སྲིན༔ ཡར་གྱི་བརྫུས་སྐྱེས་སྤྲུལ་སྐུ་ལྔ༔ མར་གྱི་བརྫུས་སྐྱེས་ཡི་དྭགས་ཚོགས༔ ཡར་གྱི་དྲོད་སྐྱེས་མི་ལྷ་ཚོགས༔ མར་གྱི་དྲོད་སྐྱེས་འབུ་སྲིན་ཚོགས༔ ཡར་གྱི་རླན་སྐྱེས་ཆུ་ཡི་ལྷ༔ མར་གྱི་རླན་སྐྱེས་གྲང་དམྱལ་དང་༔ ཡར་གྱི་མངལ་སྐྱེས་སྤྲུལ་སྐུ་དྲུག༔ མར་གྱི་མངལ་སྐྱེས་ཉོན་མོངས་དྲུག༔ འདྲ་བ་འདྲ་སྟེ་ནོར་ལ་རེ༔ ཞེས་སོ༔ ཡང་ཁམས་གསུམ་ཐམས་ཅད་སྐྱེ་གནས་བཞིས་བསྡུས་པ་ཡིན་ཏེ༔ གོང་མ་གཉིས་བརྫུས་སྐྱེས་དང་༔ འདོད་པས་བཞི་ག་ཡོད་དེ༔ དེས་ན་གླིང་བཞི་ཡང་སྐྱེ་གནས་བཞིར་གཏོགས་པ་ལ་ཕོ་མོའི་དབང་པོ་དང་༔ བག་མ་གཏོང་ལེན་དང་༔ འཁྲིག་ཆོས་དང་༔ ཕ་མ་དང་༔ མངལ་སྦྲུལ་བཙའ་སོགས་ཀྱི་ཐ་སྙད་ཡོད་པའང་༔ བལྟས་རྒོད་དང་བཅང་འཁྱུད་ཀྱིས་ཁྱད་པར་ཙམ་མོ༔ དེ་སྐད་དུ་འཇིག་རྟེན་བཞག་པ་ལས་གསུངས་སོ༔ ཚེ་ཚད་ནི༔ གཟུགས་མེད་བསྐལ་ཆེན་བརྒྱད་ཁྲི་འགོག་པ་༴ སོགས་ནས། ཆོས་ནས་བསྟན་པ་ལྟར་རོ༔ ཞེས་པའི་བར་སྟེ༔ འཇིག་རྟེན་བཞག་པ་ལས༔ དམྱལ་བའི་སེམས་ཅན་གྱི་ཚེའི་ཚད་ཀྱི་མཐའ་ནི་བསྐལ་བ་གཅིག་སྟེ༔ བར་མ་དོར་འཆི་བ་ནི་ཡོད་དོ༔ དུད་འགྲོའི་སྐྱེ་གནས་སུ་སྐྱེས་པའི་སེམས་ཅན་རྣམས་ཀྱི་ཚེའི་ཚད་ནི༔ མཐའི་བསྐལ་བ་གཅིག་སྟེ༔ བར་མ་དོར་འཆི་བ་ནི་ཡོད་དོ༔ ཡི་དྭགས་རྣམས་ཀྱི་ཚེའི་ཚད་ཀྱི་མཐའ་ནི་ལོ་དེ་ལྟ་བུར་བརྩིས་པའི་ལོ་ལྔ་བརྒྱ་སྟེ༔ བར་མ་དོར་འཆི་བ་ནི་ཡོད་དོ༔ དེ་མིའི་ལྟར་བརྩིས་ན་ལོ་ཁྲི་ལྔ་སྟོང་ཡོད་དོ༔ ཤར་གྱི་ལུས་འཕགས་ཀྱི་མི་རྣམས་ཀྱི་ཚེའི་ཚད་ཀྱི་མཐའ་ནི་ལོ་ཉིས་བརྒྱ་ལྔ་བཅུ་སྟེ༔ བར་མ་དོར་འཆི་བ་ནི་ཡོད་དོ༔ ནུབ་ཀྱི་བ་ལང་སྤྱོད་ཀྱི་མི་རྣམས་ཀྱི་ཚེའི་ཚད་ཀྱི་མཐའ་ནི་ལོ་ལྔ་བརྒྱ་སྟེ༔ བར་མ་དོར་འཆི་བ་ནི་ཡོད་དོ༔ བྱང་གི་སྒྲ་མི་སྙན་གྱི་མི་རྣམས་ཀྱི་ཚེའི་ཚད་ཀྱི་མཐས་ནི་ལོ་སྟོང་སྟེ༔ བར་མ་དོར་འཆི་བ་ནི་མེད་དོ༔ ཅིའི་ཕྱིར་བྱང་གི་སྒྲ་མི་སྙན་གྱི་མི་རྣམས་ནི་བར་མ་དོར་འཆི་བ་མེད་ཅེ་ན༔ དེ་དག་ལ་བདག་གི་མེད་ཅིང་ཡོངས་སུ་འཛིན་པ་མེད་དེ༔ ཚེ་ངེས་ཤིང་ཁྱད་པར་དུ་འགྲོ་བ་ཡིན་པས་དེའི་ཕྱིར་བྱང་གི་སྒྲ་མི་སྙན་གྱི་མི་རྣམས་ལ་བར་མ་དོར་འཆི་བ་མེད་དོ༔ འཛམ་བུ་གླིང་མི་རྣམས་ལ་ནི་ཡར་སྐྱེ་བ་དང་༔ མར་འགྲོ་བ་ཡོད་དོ༔ འཛམ་བུ་གླིང་གི་མི་རྣམས་རེས་འགའ་ནི་ཚེ་དཔག་ཏུ་མེད་པར་འགྱུར་ལ༔ རེས་འགའ་ནི་ཚེ་ལོ་བཅུ་བར་འགྱུར་ལ༔ ཞེས་དང་༔ རྒྱལ་ཆེན་རིགས་བཞིའི་ལྷ་རྣམས་ཀྱི་ཚེའི་ཚད་ཀྱི་མཐའ་ནི་ལོ་དེ་ལྟ་བུར་བརྩིས་པའི་ལྷའི་ལོ་ལྔ་བརྒྱ་སྟེ༔ བར་མ་དོར་འཆི་བ་ནི་ཡོད་དོ༔ ཞེས་དང་༔ ཚངས་རིས་ཀྱི་ལྷ་རྣམས་ཀྱི་ཚེའི་ཚད་ཀྱི་མཐའ་ནི་བསྐལ་བ་ཕྱེད་དེ་བར་མ་དོར་འཆི་བ་ནི་ཡོད་དོ༔ ཞེས་དང་༔ འདུ་ཤེས་དང་འདུ་ཤེས་མེད་མིན་སྐྱེ་མཆེད་པའི་ལྷ་རྣམས་ཀྱི་ཚེའི་ཚད་ཀྱི་མཐའ་ནི་བསྐལ་པ་བརྒྱ་ཁྲི་སྟེ༔ བར་མ་དོར་འཆི་བ་ནི་ཡོད་དོ༔ ཞེས་སོ༔ འདིའི་གདམས་པ་ནི་༴ ནས། པདྨ་ང་ཡི་གསང་ཚིག་ངེས་པའོ༔ ཞེས་ཏེ༔ ཆེད་དུ་བརྗོད་པའི་ཚོམས་ལས༔ ཀྱཻ་མ༔ འདུས་བྱས་རྣམས་མི་རྟག༔ སྐྱེ་ཞིང་འཇིག་པའི་ཆོས་ཅན་ཡིན༔ སྐྱེས་ནས་འཇིག་པར་འགྱུར་པ་ནས༔ དེ་བས་མྱུར་དུ་ཞི་བ་མེད༔ ཅེས་དང་༔ དཔལ་མར་མེ་མཛད་ཀྱིས༔ བྱས་པ་ཐམས་ཅད་དོན་མེད་སྡུག་བསྔལ་རྒྱུ༔ ཞེས་དང་༔ བྱས་པ་མི་རྟག་རང་བཞིན་གཅིག་པའི་ཕྱིར་དང་༔ ཨཱརྱ་དཱེ་ཝས༔ འཆི་བའི་རྐྱེན་ནི་གྲངས་མང་ཞིང་༔ འཚོ་བའི་རྐྱེན་ནི་ཉུང་བ་དེ༔ དེ་ཡང་འཆི་བའི་རྐྱེན་དུ་འགྱུར༔ ཞེས་དང་༔ ས་འོག་ས་སྟེང་ས་བླ་ནི༔ ལ་ལ་སྐྱེས་ནས་མ་ཤི་བ༔ འགའ་ཞིག་ཁྱོད་ཀྱིས་མཐོང་བའམ༔ ཐོས་སམ་འོན་ཏེ་ཐེ་ཚོམ་ཟ༔ ཞེས་དང་༔ མདོ་ལས༔ བདག་ནི་གདོན་མི་ཟ་བར་འཆི་འགྱུར་ཏེ༔ ཤི་ནས་གཞན་གྱི་གཏམ་འདི་འགྱུར་ཏེ་འོང་༔ ཞེས་སོ༔ ཉི་ཟླ་ཁ་སྦྱོར་ལས༔ གང་ཞིག་ལུས་ཅན་སྐྱེས་བུ་རྣམས༔ ཚེ་ནི་མི་རྟག་རྨི་ལམ་འདྲ༔ རྨི་ལམ་གྱིས་ནི་གྲུབ་པ་མེད༔ ཚེ་ནི་མི་རྟག་ཆུ་དྲག་འདྲ༔ འབབ་ཆུ་གཅིག་ཏུ་བསྡད་པ་མེད༔ ཚེ་འདི་མི་ཟིན་རླུང་དང་འདྲ༔ རླུང་གིས་སྐྱེས་བུ་བཟུང་བ་མེ༔ ཚེ་འདི་ཡུན་ཐུང་སྤྲུལ་བ་འདྲ༔ སྤྲུལ་བ་རྟག་ཏུ་གནས་པ་མེད༔ ཚེ་འདི་བདེན་མེད་སྒྱུ་མ་འདྲ༔ སྒྱུ་མས་བདེན་པའི་ས་གཟུང་མེད༔ ཚེ་འདི་མི་སྡོད་མགྲོན་པོ་འདྲ༔ མགྲོན་པོ་རྟག་ཏུ་བསྡད་པ་མེད༔ ཚེ་འདི་མ་ངེས་ཆར་སྤྲིན་འདྲ༔ སྤྲིན་གྱི་དུས་ཚོད་བཟུང་བ་མེད༔ དེ་ལྟར་སྐྱེས་བུའི་ཚེ་ཡི་ཚད༔ འདི་ལྟར་གཅིག་ཏུ་མ་ངེས་ཏེ༔ གློ་བུར་བ་དང་ཐོག་བབས་སུ༔ དུས་ཚོད་འདི་འདྲ་བཟུང་བ་མེད༔ ཅེས་སོ༔ ས་མ་ཡཱ༔

གཉིས་པ་འཆི་བའི་རྟགས་དང་༴སོགས་ནས། སྤྱིའི་རྟགས་ཟེར་རོ༔ ཞེས་པའི་བར་ཏེ༔ བདེ་མཆོག་འབྱུང་བ་ལས༔ གང་ཞིག་གི་ནི་རྨི་ལམ་མཐར༔ བྱེ་མའམ་ཐལ་བའི་ཕུང་པོའམ༔ ལྷ་ཁང་ངམ་ནི་མཆོད་སྡོང་འཛེག༔ དེ་ནི་སྔོན་བཞིན་འཆི་བར་འགྱུར༔ གལ་ཏེ་བོང་བུའམ་སྤྲེལ་ཞོན་ནས༔ གྲོག་མཁར་ཕྱག་དར་ཕུང་པོ་ལ༔ མངོན་འཛེགས་ལྷོ་ཕྱོགས་འགྲོ་བར་ནི༔ གང་གིས་རྨི་ལམ་མཐར་མཐོང་ན༔ བུད་མེད་གང་ཞིག་གོས་གནག་ཅིང་༔ མདོག་གནག་མི་ནི་འདོད་སྤྱོད་པ༔ དེ་ནི་དུས་མཚོན་ཡིན་ཞེས་བྱ༔ གཤིན་རྗེའི་ལྟོ་བར་འགྲོ་བར་འགྱུར༔ བྱ་རྒོད་ཅེ་སྤྱང་ཁྱི་དང་ཁྲ༔ དྲེད་དང་ཡི་དྭགས་ཤ་ཟ་ཡིས༔ ཟ་བར་རྨི་ལམ་མཐོང་ན་ནི༔ ལོ་གཅིག་ན་ནི་ངེས་པར་འཆི༔ གོས་ནི་དམར་པོས་གཡོག་པ་དང་༔ ཕྲེང་བ་དམར་པོས་བརྒྱན་པ་དང་༔ ཏིལ་མར་གྱིས་བསྐུས་རྨི་ལམ་མཐོང་༔ ཟླ་བ་དྲུག་ན་གསོན་མི་འགྱུར༔ མན་ངག་ཇི་བཞིན་ལྡན་པ་ཡིས༔ ཞེས་དང་༔ ཡང་ནང་གི་རྟགས་ནི་༴ ནས། མ་བརྟགས་པར་གསལ་བ་ཞིག་ཡིན་ནོ༔ ཞེས་པའི་བར་ཏེ༔ དེ་ཡང་བཤད་ཚུལ་གཞན་དུ་མིག་གི་ཚིག་འཁྲུལ་པ་ནི་གྱེན་དུ་ལོག་ལོག་ལྟ་བའོ༔ སྣ་གཡས་གཡོན་དུ་ཡོ་ན་སྣ་ཡི་མ་སུ་ག་ཆད་པ་ཞེས་བྱའོ༔ དེ་ཡང་རྡོ་རྗེ་མཁའ་འགྲོའི་རྒྱུད་ལས་ནི༔ སེན་མོའི་ཁྲག་ནི་མེད་གྱུར་ན༔ ཉིན་ཞག་བཅུ་ན་ཡང་དག་ཉལ༔ ཞེས་དང་༔ མིག་གི་ཆུ་ནི་ཆད་གྱུར་ན༔ ཉི་མ་ལྔ་ན་འཆི་བར་འགྱུར༔ ཞེས་དང་༔ དོན་གསལ་ལས༔ དཔག་བསམ་ཡལ་འདབ་ཆག་གམ་མ་ཆག་བལྟ༔ སྐྲ་དང་བ་སྤུ་ལོག་ན་ལོ་འདབ་སྐམ༔ རྩ་ཕྲན་ནང་དུ་འཁུམས་པས་འཆི་བའི་རྟགས༔ ཞེས་གསུངས་པ་སྟེ༔ འདིར་རྣ་ལྟག་གི་རྩ་ལ་གྱེན་བསྒྲེངས་སུ་ནག་པོ༔ མིའི་གཟུགས་འདྲ་བ་བབས་པ་ལ་འགྲེལ་ཚུལ་ཡང་ཡོད་དོ༔ ཁ་སྦྱོར་ལས༔ རྐང་པའི་ལོང་བའི་ཕྱིར་ཐོན་ན༔ དེ་ནི་ཟླ་བ་གཅིག་ནའོ༔ ཞེས་དང་༔ གལ་ཏེ་གཞན་གྱི་ལུས་བརྟགས་ན༔ སྐྱེས་བུ་ནད་ཀྱིས་བཏབ་པའི་ཚེ༔ སོ་ཡི་རྩ་བར་དྲག་༼ དྲེག་དཔྱད། ༽པ་ཆགས༔ ཞག་དགུ་ན་ནི་དེ་ཡང་འཆི༔ ཞེས་དང་༔ མཁའ་འགྲོ་ལས་ནི༔ སྣ་ཡི་པར་ཤ་ཆད་གྱུར་ན༔ ཉིན་ཞག་བདུན་གྱིས་ཐེ་ཚོམ་མེད༔ ཅེས་དང་༔ ཁ་སྦྱོར་ལས༔ མིག་ནི་འབྲུ་ཚུག་བལྟ་བ་ན༔ ཞག་གསུམ་ནས་ནི་འཆི་བར་འགྱུར༔ ཞེས་དང་༔ མིག་གི་ཚིག་རྣམས་རབ་འཁྲུལ་ན༔ དེ་ནི་ཟླ་བ་ཕྱེད་ནའོ༔ ཞེས་དང་༔ མཁའ་འགྲོ་རྒྱ་མཚོ་ལས༔ རྣ་བ་གཡོན་དང་འགྲམ་པ་ཡི༔ ངོས་ཀྱི་མཚན་མ་དག་ལས་ནི༔ ཉིན་ཞག་གཅིག་ལས་མི་འཚོའོ༔ ཞེས་དང་༔ ཁ་སྦྱོར་ལས༔ སྣ་ཡི་མ་སུ་ག་ཆད་ན༔ ཞག་བདུན་ན་ནི་འགུམ་པར་འགྱུར༔ མིག་གི་པ་ར་ཎ་ཆད་ན༔ ཞག་ལྔ་དག་ན་དེ་ཡང་འགུམ༔ འགྲམ་པ་གཡོན་གྱི་ཤ་ཤོར་ན༔ ཞག་གཅིག་ན་ནི་དེ་ཡང་འགུམ༔ ཞེས་དང་༔ མཁའ་འགྲོ་ལས༔ ལྕེ་ཡི་སྐུད་པ་ནག་མཐོང་ན༔ ལུས་ཅན་དུས་ཀྱི་ཉིན་ཞག་འཆི༔ སྟེང་འོག་སོ་ནི་འཐོམ་གྱུར་ན༔ འབྱུང་བ་དག་ནི་མ་ལུས་འདྲེན༔ སྲོག་ནི་དུས་དང་ཉིན་ཞག་འགྲོ༔ ཞེས་དང་༔ ཁ་སྦྱོར་ལས༔ རྣ་བ་མགོ་ན་འབྱར་གྱུར་ན༔ དེ་ནི་དེ་ནུབ་ནམ་ཕྱེད་ནའོ༔ ཞེས་དང་༔ མཁའ་འགྲོ་ལས༔ བྲང་གི་དྲ་བ་གཞོམ་གྱུར་ན༔ ཟླ་བ་ཕྱེད་ན་གདོན་མི་ཟ༔ གཉིད་ལོ་རྩ་ནི་མེད་པ་ན༔ དེ་ཡང་ཟླ་བ་ཕྱེད་ནའོ༔ ཞེས་སོ༔ ཡང་རྒྱུ་མེད་པར་ཅེས་པ་ལ་༴སོགས་ནས། མ་བརྟགས་གསལ་བ་ཞེས་པའི་བར་དེ༔ མཁའ་འགྲོ་རྒྱ་མཚོ་ལས༔ གལ་ཏེ་ཁུ་བ་དཀར་དམར་འགྱུར༔ ཟླ་བ་དྲུག་ན་དེ་འཆི་སྟེ༔ ཞེས་དང་༔ བཤང་དང་གཅི་བའི་དུས་སུ་ནི༔ གལ་ཏེ་སྦྲིད་བ་བྱུང་བ་ན༔ དེ་ཡི་ད་ལྟར་དུས་ཚོད་ཀྱི༔ ལོ་ན་ངེས་པར་འཆི་བའོ༔ ཞེས་དང་༔ གཤེད་དམར་གྱི་རྒྱུད་ལས༔ སྣའི་རྩེ་མོ་མ་མཐོང་བ་ལས་ཟླ་བ་ཕྱེད་ཀྱིས་སོ༔ ཞེས་དང་༔ ལྷ་མོ་ལྕེ་རྩེ་མ་མཐོང་ན༔ དེ་ནི་ཞག་གསུམ་ན་ནི་འཆི༔ ཞེས་སོ༔ ནད་པའི་རྩ་ཆད་པ་ནི༔ གཉིད་ལོག་གི་རྩ་མེད་པས་བཤད་ལུགས་ཡིན་ནོ༔ སྤྲོས་བྲལ་དོན་གསལ་ལས༔ དུས་ཀྱི་ཆུ་ཀླུང་ཉལ་མ་ཉལ༔ བླ་རྩ་འཁྱམ་པོ་མེད་ན་འཆི༔ ཞེས་སོ༔ བརྟག་པའི་བརྟག་པ་༴སོགས་ནས། འདིར་དེ་ཙམ་མོ་ཞེས་པའི་བར་ནི༔ ཁ་སྦྱོར་ལས༔ གལ་ཏེ་རང་གི་དོན་བྱེད་ན༔ ནམ་མཁའི་ཁམས་ཀྱི་གཟུགས་བརྙན་ནི༔ མི་རྟག་གྱུར་ཏེ་ཡལ་བ་ན༔ ཟླ་གཟུགས་མེད་དེ་འཆི་བ་ཡིན༔ ཡན་ལག་བཞི་ཆད་ཟླ་བཞིའོ༔ དེ་སྟེང་མགོ་ཆད་ཟླ་གསུམ་ནའོ༔ སྟོད་སྨད་ཕྱེ་ན་ཟླ་གཉིས་ནའོ༔ ཐུམ་པོར་དྲིལ་ན་ཟླ་གཅིག་ནའོ༔ དེ་ཡི་དུས་ཚོད་ཤེས་པར་བྱ༔ ཞེས་དང་༔ གཟུགས་བརྙན་ཆོ་འཕྲུལ་ཡལ་མ་ཡལ༔ རང་གྲིབ་བར་སྣང་གཟུགས་ལ་བལྟ༔ གཟུགས་མེད་སྣང་བ་ལོག་ནས་འཆི༔ ཞེས་སོ༔ བདེ་མཆོག་འབྱུང་བ་ལས༔ དེར་ཡང་ཉིན་མོ་གྲིབ་མ་ནི༔ སྐྱེ་བོའི་གཟུགས་ཅན་བལྟ་བྱ་སྟེ༔ དེ་ཡི་མགོ་བོ་མ་མཐོང་ན༔ ལོ་གཅིག་གི་ནི་ནང་དུ་འཆི༔ ལག་པ་གཡོན་པ་མ་མཐོང་ན༔ བུ་དང་ཆུང་མ་ངེས་བརླག་འགྱུར༔ ལག་པ་གཡས་པ་མ་མཐོང་ན༔ ཕ་དང་བུ་སོགས་ཚེགས་ཆེན་འཆི༔ ཞེས་དང་༔ ཡང་ལྗོན་ལ་བརྟག་པ་༴ སོགས་ནས། མི་གནས་སོས་བར་དེ༔ ཀུན་གསལ་ལས༔ རྣམ་ཤེས་འབྲེལ་ཐག་ཆད་མ་ཆད༔ ལག་པ་མིག་སྔར་བྱ་བའི་རྟགས༔ ཆད་ན་ཨ་ཏོ་ལི་ག་ཉམས་ཏེ་འཆི༔ ཞེས་སོ༔ ཁ་སྦྱོར་ལས་ཀྱང་༔ གནམ་ས་གཉིས་ཀྱི་འབྲེལ་ཐག་ནི༔ གལ་ཏེ་ཆད་པར་གྱུར་པ་ན༔ ཞག་ནི་བཅུ་དགུ་ལས་མི་ཐུབ༔ ཅེས་སོ༔ གསུམ་པ་གསང་བ་རླུང་ལ་༴ ནས། བྱང་བ་གལ་ཆེའོ༔ ཞེས་པའི་བར་ནི༔ རྡོ་རྗེ་མཁའ་འགྲོ་ལས༔ དབུགས་ནི་རྣམ་པར་དགོད་གྱུར་ན༔ ལུས་ཅན་དྲུག་དང་གཉིས་ཀྱིས་འཆི༔ ཞེས་དང་༔ བདེ་མཆོག་འབྱུང་བའི་རྒྱུད་ལས༔ ཉི་མ་གཅིག་གཉིས་གསུམ་དང་བཞི༔ ལྔ་དང་དྲུག་ཏུ་གང་ཚེ་རླུང་༔ ཕྱིན་ཅི་ལོག་ཏུ་རྟག་རྒྱུ་ན༔ དེ་ཚེ་རྩོད་པ་ཆེན་པོར་འགྱུར༔ ཟླ་ཕྱེད་རྟག་ཏུ་ལོག་པར་རྒྱུ༔ ནད་ནི་ཆེན་པོ་ཡང་དག་འབྱུང༔ ཟླ་བ་གཅིག་ཏུ་ལོག་པར་རྒྱུ༔ སྙིང་སྡུག་གཉེན་ནི་བརླག་པར་འགྱུར༔ ཕྱེད་དང་གཉིས་ནི་ལོག་པར་རྒྱུ༔ ཟླ་བ་དྲུག་ན་འཆི་བར་འགྱུར༔ ཐུན་མོང་དུས་སུ་ཤེས་པར་བྱ༔ ཞེས་དང་༔ འགྲེས་བྱང་ཙམ་གྱི་དཔྱད་སྒོར་འདྲེན་ན༔ ཞེས་དང་༔ དེ་ཡང་ཇི་སྐད་དུ༔ ང་ཡི་སྤྲུལ་བས༔ ཞག་དྲུག་གོ་ལོག་འཐབ་རྩོད་དང་༔ སྡུག་བསྔལ་དྲག་པོ་འབྱུང་བར་འགྱུར༔ ཟླ་ཕྱེད་གོ་ལོག་ནད་གདོན་འབྱུང་༔ ཟླ་གཅིག་གོ་ལོག་ཉེ་འབྲེལ་དུ༔ ཟླ་བ་ཕྱེད་གཉིས་གོ་ལོག་ན༔ ཟླ་བ་དྲུག་ན་འཆི་བར་འགྱུར༔ དེ་རྣམས་ངེས་པའི་འཆི་ལྟས་ཏེ༔ ངེས་པའི་འཆི་ལྟས་གཞན་དག་ཀྱང་༔ རྒྱས་པའི་འཆི་ལྟས་ལ་སོགས་པ༔ ཡི་གེར་འཇིགས་ཕྱིར་འདིར་མ་བྲིས༔ ཞེས་སོ༔ རྡོ་རྗེ་མཁའ་འགྲོ་ལས༔ སྒོ་གཅིག་ནས་ནི་ཉིན་དྲུག་ཏུ༔ གང་ཚེ་དབུགས་ནི་རྒྱུ་གྱུར་བ༔ ཡོན་ཏན་གསུམ་གྱི་ལོ་དག་ན༔ ཞེས་དང་༔ གལ་ཏེ་ཉིན་བཅུ་རྒྱུར་གྱུར་ན༔ ལོ་གཉིས་ལུས་ནི་མི་འཚོའོ༔ གང་ཞིག་ཉི་མ་ལྔ་གསུམ་དུ༔ གཡས་ཀྱི་སྒོ་ནས་རླུང་རྒྱུ་ན༔ ལོ་གཅིག་ན་ནི་གདོན་མི་ཟ༔ གལ་ཏེ་ཉིན་ཞག་ཉི་ཤུ་ནི༔ རྒྱུ་བ་ཟླ་བ་དྲུག་ན་དང་༔ ཉིན་ཞག་ཉི་ཤུ་ལྔ་རྒྱུ་ན༔ ཟླ་བ་གསུམ་ལས་མི་འཚོའོ༔ ཞེས་དང་༔ གཤེད་དམར་རྒྱུད་དུ༔ ལུས་ལ་དྲི་ངན་པ་ལས་མཚན་མོ་བདུན་གྱིས་སོ༔ ཞེས་སོགས་གསུངས་པ་ལྟར་གྱི་འགྲེས་འོག་མ་ལའང་སྦྱོར་དུ་ཡོད་པ་ཡི་གེས་འཇིགས་སོ༔ ཡང་གསང་བ་སེམས་རིག་ལ་བརྟགས་༴སོགས་ནས། གཉིད་ཚུལ་གྱིས་སོ་ཞེས་པའི་བར་དང་༔ གཉིས་པ་རིག་པ་ལ་ནི་གཉིས་༴ ནས། ཞག་གཅིག་ནས་ཀྱང་འཆིའི་བར་ཏེ་རིམ་པ་བཞིན༔ སྤྲོས་བྲལ་དོན་གསལ་ལས༔ མཁའ་འགྲོའི་སྒྲ་སྒྲོག་ཆགས་གམ་མ་ཆག་བརྟགས༔ རྣ་བ་གཉིས་བཙིར་པས་ནི་མངོན་པ་སྟེ༔ སྒྲ་ཆག་གཞི་ལ་རྩལ་འདུས་འཆི་བའོ༔ ཞེས་དང་༔ གསལ་བ་ཤེལ་གྱི་མེ་ལོང་གིས༔ གདངས་དེ་ནུབ་བམ་མ་ནུབ་བལྟ༔ མེ་ལོང་བཙིར་བས་བལྟས་པ་དེར༔ མདངས་ཤོར་གཞི་ལུས་འཆི་བའི་རྟགས༔ ཞེས་དང་༔ ཁ་སྦྱོར་ལས༔ ས་ཡི་གྲོང་དག་ཏུ་ནི༔ དགེ་སྦྱོང་དུ་བ་ཆད་པ་ན༔ ཞག་ནི་དགུ་ནས་དེ་ཡང་འགུམ༔ ཞེས་དང་༔ མཁའ་འགྲོ་རྒྱ་མཚོ་ལས༔ གལ་ཏེ་ཁུ་བ་ནག་པོར་མཐོང་༔ དེ་ཚེ་ཟླ་བ་དྲུག་ན་འཆི༔ ཡང་ན་ཁ་སྦྱོར་ལས༔ རི་རབ་ཀྱི་ནི་ལོགས་དག་ནས༔ སེང་གེ་དཀར་མོ་མི་འབབ་ན༔ བཅུ་དྲུག་ཞག་གིས་གདོན་མི་ཟ༔ ཞེས་སོ༔ དགོངས་བཤད་ལྟར་༴ ནས། བསམ་གྱིས་མི་ཁྱབ་བོ་ཞེས་བར་ལ༔ མཁའ་འགྲོ་ལས༔ མེ་ལོང་ངམ་ནི་ཆུར་གང་ཞིག༔ རང་གི་གྲིབ་མ་མ་མཐོང་དང་༔ ཞེས་དང་༔ གཤེད་དམར་གྱི་རྒྱུད་ལས༔ ཧ་འདེབས་པས་གྲང་བར་ཚོར་ན་ཞག་བདུན་གྱིས་སོ༔ ཞེས་སོ༔ རྡོ་རྗེ་མཁའ་འགྲོ་ལས༔ སྣ་དང་མིག་གི་ཕྱོགས་དང་ནི༔ འགྲམ་པ་དང་ནི་རྣ་བའི་རྩར༔ ལྕེ་དང་མཆེ་བའི་མཚམས་དང་ནི༔ མགྲིན་པ་རྩིབ་ལོགས་དེ་བཞིན་དུ༔ སྙིང་གི་གུར་དང་ལྟེ་བ་དང་༔ བརླ་དང་བྱིན་པ་དེ་བཞིན་གཞན༔ མདོམས་དང་ལིང་ག་དག་དེ་བཞིན༔ མགོ་བོ་དང་ནི་སྤྱི་བོའི་ཕྱོགས༔ མཚམས་ནི་དེ་རྣམས་ཐམས་ཅད་དུ༔ དབུགས་ནི་ཆད་ཅིང་ཆད་པའོ༔ ལུས་ཀྱི་མཚན་མ་དགུ་རྣམས་ཏེ༔ འཆི་བའི་དུས་ནི་བསྟན་པ་ཡིན༔ ཞེས་སོ༔ ཆུའི་སྤྲིས་མ་སོགས་ལ་བརྟགས་ན༔ བི་མ་ལས༔ རྒྱ་མཚོའི་གཏིང་དུ་ཆུའི་སྤྲིས་མ་བརྟག་པ་ནི༔ མཚན་མོ་ཆང་མང་པོ་མ་འཐུང་༔ འཁྲིག་པ་མ་སྤྱད༔ གཏམ་མང་པོ་མ་སྨྲས་པའི་ནང་པར་ཉི་མ་རྩེ་ཤར་ལ་ཤར་དུ་བལྟས་ཏེ་འཁར་ཕོར་ལ་སོགས་པ་སྣོད་དཀར་ནག་རན་པར་རང་གི་ཆུ་ལ་བརྟག་པ་སྟེ་རླངས་པ་སྔོ་དམར་དུ་བྱུང་ན་ཟླ་བ་ཕྱེད་ན་འཆིའོ༔ ནག་པོ་ཧྲལ་ཧྲོལ་དུ་སོང་ན་ཞག་བཅུ་གཅིག་ནའོ༔ དམར་པོ་ཐིག་ལེ་ཅན་ནི་ཞག་དགུ་ནའོ༔ ཞེས་དང་༔ རྡོ་རྗེ་མཁའ་འགྲོ་ལས༔ གཅིན་ནི་རྒྱུན་ལྔར་འགྱུར་བ་དང་༔ གཡོན་ནས་འཁོར་ཞིང་དྲི་ང་དང་༔ སྐྱུར་བ་ལ་སོགས་གཅིན་བྱུང་ན༔ ཟླ་དྲུག་ནང་དུ་འཆི་བར་འགྱུར༔ ཞེས་སོ༔ དེ་ལྟར་ཕྱི་ནང་གསང་བ་༴ ནས། གཞན་གྱིས་ཤེས་སོ་ཞེས་པའི་བར་ལ༔ སྡོམ་འབྱུང་ལས༔ སྒྲ་མེད་བཟླས་པར་འབུམ་ཕྲག་ནི༔ ཡོངས་སུ་རྫོགས་པས་སྒྲུབ་པའོ༔ ཚེ་ཟད་པ་ཡང་ལོ་ལྔ་རུ༔ འཚོ་བར་འདི་ནི་ཐེ་ཚོམ་མེད༔ ཅེས་དང་༔ ཡང་ན་བུམ་པའི་རྣལ་འབྱོར་གྱིས༔ རྟག་ཏུ་འཆི་བདག་ལས་རྒྱལ་བྱ༔ ཞེས་དང་༔ བདེ་མཆོག་འབྱུང་བ་ལས༔ སྒྲུབ་པོས་སྒྲ་དང་བྲལ་བ་ནི༔ འབུམ་བཟླས་ཡོངས་སུ་རྫོགས་པ་ན༔ ཚེ་ཟད་པ་ཡང་ལོ་ལྔ་རུ༔ འཚོ་བར་འདིར་ནི་ཐེ་ཚོམ་མེད༔ རྟག་ཏུ་ནང་པར་ཡར་ལངས་རླུང་༔ སྟོང་ཕྲག་གཅིག་ཏུ་བགྲང་བྱ་སྟེ༔ དེ་བས་རླུང་གི་རྣལ་འབྱོར་ལ༔ རྟག་ཏུ་མཉམ་གཞག་གནས་པར་བྱ༔ ཡང་ན་བུམ་པའི་རྣལ་འབྱོར་གྱིས༔ རྟགཏུ་འཆི་བདག་ལས་རྒྱལ་བྱ༔ ཞེས་དང་༔ བུམ་པ་ཅན་ནི་ཤེས་བྱས་ནས༔ འགོག་ལ་བརྟན་པར་གནས་པ་ན༔ དེ་ལ་བསྐལ་པ་སྟོང་དུ་ཡང་༔ འཆི་བདག་ཉེ་བར་འོང་མི་འགྱུར༔ ཞེས་དང་༔ སྡོམ་འབྱུང་ལས༔ སྦྱོར་བས་ནམ་མཁའ་ཟས་སུ་ཟ༔ ནམ་མཁའ་བཞིན་དུ་འཆི་མེད་འགྱུར༔ ཞེས་སོ༔ གསུམ་པ་སྡུག་བསྔལ་དངོས་ནས་བློས་མི་འཁྱུད་པའི་སྡུག་བསྔལ་ཡོད་དོ༔ མན་ངག་སྙིང་གི་དགོངས་པ་རྒྱལ་བའི་བཀའ་ལས༔ ཀྱེ་གསང་བའི་བདག་པོ༔ མལ་གྱི་ཐ་མར་ནི་ཉལ༔ གོས་གྱི་ཐ་མར་ནི་བགོས༔ ཟས་གྱི་ཐ་མར་ནི་ཟ༔ སྐོམ་གྱི་ཐ་མར་ནི་འཐུང་༔ གཏམ་གྱི་ཐ་མ་ནི་སྨྲ་བའི་དུས་དེར༔ རང་ལ་འཆི་བའི་སྡུག་བསྔལ་དྲག་པོ་འོང་ངོ་༔ རང་གི་དབུགས་རང་ངར་ཕར་འགྲོ་ཚུར་འགྲོ་བྱེད་པའི་དུས་དེར༔ ཉེ་བ་དང་འབྲེལ་པ་ན་རེ་ཁྱོད་ནི་ན་དང་ངེད་ཙུག་ཅི་བྱེད་ཟེར་བའི་དུས་སུ༔ ཉེ་བ་དང་འབྲེལ་བས་གདུང་བའི་སྨྲེ་སྔགས་བཏོན་ནོ༔ དེ་ཙམ་ན་ད་རེས་ངས་མི་ཐར་བ་འདུག་པ་ཙུག་བྱེད་ན་སྙམ་པའི་སྡུག་བསྔལ་མི་བཟོད་པ་ཡོང་ངོ་༔ སྔ་མའི་ལུས་མི་འདྲ་བར་སོང་ནས༔ རང་གི་ལག་མགོ་དང་ཁ་ལྕེ་ཡང་མི་མྱུར་པར་སོང་བའི་དུས་སུ༔ ལུས་ཀྱི་ཉམས་སོ་བྲི་པའི་སྡུག་བསྔལ་ཡོང་ངོ་༔ ང་ཤི་ནས་ཅིར་སྐྱེ་ན་སྙམ་པའི་ཕུང་པོ་ཉིང་མཚམས་སྦྱར་བའི་སྡུག་བསྔལ་དྲག་པོ་མི་བཟོད་པ་ཡོང་ངོ་༔ ངས་སྡུག་བཙིར་བྱས་ནས་བསགས་པ་ལུས་སོ་སྙམ་ནས་ནོར་རྫས་དོར་བས་སྡུག་བསྔལ་མི་བཟོད་པ་ཡོང་ངོ་༔ ཀྱཻ་གསང་བའི་བདག་པོ་༔ སེམས་ཅན་ཐམས་ཅད་སྐྱེས་པ་དང་ཉིན་མཚན་མེད་པར་ཚེ་རྐུ་བས་མི་སྡོད་པར་འགྲོའོ༔ ད་རེས་ཤི་ནས་འདིར་མི་ཡོང་བར་མི་སྡོད་པར་འགྲོའོ༔ སང་ནང་པར་མི་ཤི་བའི་དཔེ་མེད་པས་མགྱོགས་པར་འགྲོའོ༔ ཆ་མེད་ཀྱི་ཡུལ་དུ་འགྲོ་བས་ལམ་རྒྱུས་མེད་པར་འགྲོའོ༔ ད་ང་ཙུག་བྱེད་ན་སྙམ་ནས་སྙིང་མི་དགའ་འོ༔ གཤིན་རྗེའི་རྐུངས་སར་འགྲོ་བས་འཇིགས་པ་ཆེའོ༔ སྐྱེལ་མ་མི་རྙེད་པར་མགོན་སྐྱབས་མེད་དོ༔ རང་དགེ་སྡིག་གཉིས་ལས་མི་ཤོངས་པ་འཕྲང་དོག་གོ༔ ལམ་དེ་ལ་ཐམས་ཅད་མི་འགྲོ་མི་སྲིད་པས་བཟུར་ས་མེད་དོ༔ ཞེས་དང་༔ སྤྱོད་འཇུག་ལས༔ ཡིད་བརྟན་མི་རུང་འཆི་བདག་འདི༔ བྱས་དང་མ་བྱས་མི་སྡོད་པས༔ ན་དང་མི་ན་ཀུན་གྱིས་ཀྱང་༔ གློ་བུར་ཚེ་ལ་ཡིད་མི་བརྟན༔ ཐམས་ཅད་བོར་ཏེ་ཆ་དགོས་པར༔ བདག་གིས་དེ་ལྟར་མ་ཤེས་པས༔ མཛའ་དང་མི་མཛའི་དོན་གྱི་ཕྱིར༔ སྡིག་པ་རྣམ་པ་སྣ་ཚོགས་བྱས༔ མི་མཛའ་རྣམས་ཀྱང་མེད་འགྱུར་ཞིང་༔ མཛའ་བ་རྣམས་ཀྱང་མེད་པར་འགྱུར༔ བདག་ཀྱང་མེད་པར་འགྱུར་བ་སྟེ༔ དེ་བཞིན་ཐམས་ཅད་མེད་པར་འགྱུར༔ རྨི་ལམ་ཉམས་སུ་མྱོང་བ་བཞིན༔ དངོས་པོ་གང་དང་གང་སྤྱད་པ༔ དེ་དེ་དྲན་པའི་ཡུལ་དུ་འགྱུར༔ འདས་པ་ཐམས་ཅད་མཐོང་མི་འགྱུར༔ རེ་ཞིག་གསོན་ཚེ་འདི་ཉིད་ལའང་༔ མཛའ་དང་མི་མཛའ་དུ་མ་འདས༔ དེ་དག་དོན་དུ་བྱས་པའི་སྡིག༔ མི་བཟད་གང་ཡིན་མདུན་ན་གནས༔ དེ་ལྟར་བདག་ནི་གློ་བུར་ཞེས༔ བདག་གིས་རྟོགས་པར་མ་གྱུར་པས༔ གཏི་མུག་ཆགས་དང་ཞེ་སྡང་གིས༔ སྡིག་པ་རྣམ་པ་དུ་མ་བྱས༔ ཉིན་མཚན་སྡོད་པ་ཡོང་མེད་པར༔ ཚེ་འདི་རྟག་ཏུ་གོད་འགྱུར་ཞིང་༔ སྣོན་པ་གུད་ནས་འོང་མེད་ན༔ བདག་ལྟ་འཆི་བར་ཅིས་མི་འགྱུར༔ བདག་ནི་མལ་ན་འདུག་བཞིན་དུ༔ གཉེན་བཤེས་ཀུན་གྱིས་མཐའ་བསྐོར་ཀྱང་༔ སྲོག་ཆད་པ་ཡི་ཚོར་བ་དག༔ བདག་ཉིད་གཅིག་པུས་མྱོང་བར་འགྱུར༔ གཤིན་རྗེའི་ཕོ་ཉས་ཟིན་པ་ལ༔ གཉེན་གྱིས་ཅི་ཕན་བཤེས་ཅི་ཕན༔ དེ་ཚེ་བསོད་ནམས་གཅིག་སྐྱབས་ན༔ དེ་ཡང་བདག་གིས་མ་བསྟེན་ནོ༔ ཞེས་དང་༔ ཡེ་ཤེས་གཏིང་རྫོགས་གྱི་རྒྱུད་ལས༔ དེ་ཚེ་ཆགས་སྡང་མི་མནོ་དགུ་གཅིག་བསམ༔ གནད་གཅོད་དྲགས་ནས་དྲན་པ་བརླག་པར་འགྱུར༔ འདི་ནི་སྣང་བ་ནུབ་ཁའི་དུས་ཡིན་ཏེ༔ ཞེས་དང་༔ རབ་འབྱམས་ལས༔ འཆི་ཁ་མ་ཡི་ཆོས་ཉིད་ནི༔ འཆི་རྐྱེན་ནད་ཀྱིས་འབྱུང་བ་འཁྲུགས༔ ལུས་ངག་ཡིད་གསུམ་སྡུག་བསྔལ་ཏེ༔ འཛིན་ཆགས་ཞེན་པའི་མཚོ་རྡོལ་ནས༔ ལུས་སེམས་བྲལ་གྱིས་དོགས་པ་ཡིས༔ སྡུག་བསྔལ་ཤིན་ཏུ་རགས་པ་སྟེ༔ བན་བུན་དང་ནི་ལང་ལོང་དང་༔ ཤེས་པ་གཅིག་ཏུ་མི་གནས་པའོ༔ ཞེས་སོ༔ ཕར་བལྟས་པས་གཤིན་རྗེ་༴སོགས་ནས། བརྒྱ་ཆར་ཡང་མི་ཕོད་དོ༔ ཞེས་པའི་བར་དེ༔ ས་མ་ཡཱ༔ དེ་སྐད་དུ་ཡང་སངས་རྒྱས་རང་ཆས་སྲིད་པ་བར་དོའི་རྒྱུད་ལས༔ སྡིག་པ་བྱེད་པ་འཆི་བའི་སྣང་བ་དེ༔ ཤ་ཟ་སྲིན་པོ་མང་མཐོང་བ་དང་༔ མི་སྡུག་གཟུགས་ཉིད་སྣ་ཚོགས་སྟོན་པར་བྱེད༔ ཚེ་སྲོག་དབུགས་ཀྱིས་བརྒྱལ་བ་མི་རྟོགས་ཏེ༔ ངུ་ཞིང་ཆོ་ངེ་མང་པོ་འདོན་པར་བྱེད༔ ཞགས་ཐོགས་མཚོན་ཐོགས་མང་པོ་གཤིན་རྗེ་ཡིས༔ ད་འདོང་ཟེར་ཞིང་རྒྱབ་ནས་ཕུལ་བར་བྱེད༔ ཞེས་དང་༔ སྤྱོད་འཇུག་ལས༔ མགོན་པོ་བག་མེད་བདག་གིས་ནི༔ འཇིགས་པ་འདི་འདྲ་མ་འཚལ་ནས༔ མི་རྟག་ཚེ་འདིའི་ཆེད་དག་དུ༔ སྡིག་པ་མང་པོ་ཉེ་བར་བསྒྲུབས༔ སྐྱེ་བོ་ཡན་ལག་གཅོད་པའི་སར༔ དེ་རིང་ཁྲིད་པའང་བྲེད་འགྱུར་ཏེ༔ ཁ་སྐམ་མིག་རྩ་ངན་ལ་སོགས༔ སྔ་ལས་གཞན་དུ་འགྱུར་སྣང་ན༔ གཤིན་རྗེའི་ཕོ་ཉ་འཇིགས་འཇིགས་ལྟའི༔ ཤ་ཚུགས་ཅན་གྱིས་བཟུང་གྱུར་ཞིང་༔ འཇིགས་ཆེན་ནད་ཀྱིས་ཐེབས་གྱུར་བ༔ རབ་ཏུ་ཉམ་ཐག་སྨོས་ཅི་དགོས༔ སུ་ཞིག་འཇིགས་ཆེན་འདི་ལས་བདག༔ ལེགས་པར་སྐྱོབས་པར་བྱེད་འགྱུར་ཞེས༔ བྲེད་ཤ་ཐོན་པའི་མིག་བསྒྲད་ནས༔ ཕྱོགས་བཞིར་སྐྱབས་དག་འཚོལ་བར་བྱེད༔ ཕྱོགས་བཞིར་སྐྱབས་མེད་མཐོང་ནས་ནི༔ དེ་ནས་ཀུན་ཏུ་ཡི་མུག་འགྱུར༔ གནས་དེར་སྐྱབས་ཡོད་མ་ཡིན་ན༔ དེ་ཚེ་བདག་གིས་ཇི་ལྟར་བྱ༔ ཞེས་སོ༔

གཉིས་པ་འབྱུང་བའི་ཐིམ་ཚུལ་༴ སོགས་ནས། ཆོས་ཉིད་དེ་ལྟོས་བརྟག་གོ༔ དེ་ལ་འབྱུང་བའི་ཐིམ་ཚུལ་དང༔ སྐྱེ་གནས་ཀྱི་རྟགས་གཉིས་ལས༔ དང་པོ་རང་ཤར་ལས༔ ཀྱེ་གྲོགས་པོ་དག༔ སེམས་ཅན་རྣམས་དབུགས་འཕོ་བའི་ཚེ༔ ཕྱི་ཡི་འབྱུང་བ་ལྔ་ནང་གི་འབྱུང་བ་ལྔ་ལ་ཐིམ༔ ནང་གི་འབྱུང་བ་ལྔ་གསང་བའི་འབྱུང་བ་ལྔ་ལ་ཐིམ༔ གསང་བའི་འབྱུང་བ་ལྔ་ཡོངས་སུ་རྫོགས་པའི་འབྱུང་བ་ལྔ་ལ་ཐིམ་ནས༔ ལམ་ཆེན་པོ་ལ་འཇུག་པའི་ཚེ༔ འདི་ལྟར་ཤེས་པར་བྱའོ༔ ཞེས་སོ༔ གཟུགས་ཐིམ་པས་༴ སོགས་ནས། ཇེ་ཆུང་ལ་འགྲོ་བ་ཡིན་ཏེ༔ ཡེ་ཤེས་མངོན་པར་འབྱུང་བའི་རྒྱུད་ཕྱི་མ་ལས༔ ལུས་ཅན་རྣམས་ནི་འཆི་བའི་ཚེ༔ གཟུགས་ནི་སྒྲ་ལ་ཐིམ་པར་འགྱུར༔ སྒྲ་དྲི་རོ་ནི་རེག་ལ་ཐིམ༔ རེག་ནི་ཆོས་ལ་ཐིམ་པར་འགྱུར༔ ཞེས་སོ༔ དེ་ཡང་ལུས་འདི་ཐོག་མར་འབྱུང་བ་ལྔ་ཟུག་སྨིན་གྱི་གཅིག་གྲོགས་གཅིག་གིས་བྱས་ཏེ་བསྐྱེད་པ་ལ༔ འཆི་བའི་དུས་བྱེར་འཁྲུག་གི་ནང་ཕན་ཚུན་དགྲར་ལྡང་སྟེ་གཅིག་ནུས་གཅིག་གིས་བཅོམ་སྟེ༔ འཇིག་པའི་རྒྱུར་བྱེད་པའང་ཡིན་ལ༔ ཕྱི་ལུས་ཀྱི་འབྱུང་ལྔ༔ ནང་སེམས་དང་༔ དེ་ཉིད་གསང་བ་ཡེ་ཤེས་དང་༔ དེའི་གདངས་ནང་དུ་ཐིམ་པ་ལ་ཕྱི་ནང་གསང་བ་ཡོངས་རྫོགས་ཀྱི་ཐ་སྙད་དུ་ཁོ་བོས་བཞག་པ་སྟེ༔ ཚུལ་གཞན་ཞིག་ཡིན་ནོ༔ དེ་ཡང་ཉི་ཟླ་ཁ་སྦྱོར་ལས༔ མི་རྟོག་ཐུབ་པ་ཡང་ཉོན་ཅིག༔ གལ་ཏེ་ཚེ་ཡི་དུས་ཟད་ན༔ སྐྱེས་བུ་ཤི་བ་ཞེས་བྱར་འགྱུར༔ གཟུགས་ཀྱི་ཕུང་པོ་རྡོས་པ་ཅན༔ ཐོག་མ་འབྱུང་བས་བསྐྱེད་པའི་ཕྱིར༔ ཐ་མ་ཡང་ནི་འབྱུང་བས་འཇིག༔ ལུས་ཀྱི་འབྱུང་བ་ལྔ་རྣམས་ནི༔ ནང་མི་མཐུན་པའི་རྐྱེན་གྱིས་ནི༔ ཚེ་ཡི་འདུ་བྱེད་གང་བྱས་པ༔ གློ་བུར་རྐྱེན་གྱིས་ཤི་བའོ༔ འབྱུང་བ་རང་ལ་རང་ཐིམ་ནས༔ སྐྱེས་བུ་ཚེ་ཡི་དུས་ཚོད་ཟད༔ འཆི་བའི་དུས་ལ་བབས་ཉེས་བྱ༔ ཞེས་སོ༔ དེ་དག་གི་སྟེང་དུ་འཇུག་ཤེས་དྲུག་རྣམ་ཤེས་ལ་བསྡུས་ནས་འབྱུང་མ་རགས་པའི་ཁམས་ལྔ་དང་༔ ཉོན་མོངས་དུག་ལྔ་ཕྱི་ཤར་རགས་པའི་སྣང་གསུམ་ཐིམ་པ་ལ་འཁོར་བའི་ཆོས་ཉི་ཤུའམ་རགས་པ་ཉི་ཤུར་བྱས་ཀྱང་རུང་སྟེ་ཇི་སྐད་དུ༔ འབྱུང་བ་ལྔ་དང་ཉོན་མོངས་ཕུང་པོ་ལྔ༔ དབང་པོ་རྣམ་ལྔའི་ཞེན་པ་དང་བྲལ་ནས༔ ཞེས་པ་ལྟར་རམ༔ ཡང་ན་ཕུང་ལྔ༔ དབང་ལྔ༔ འཇུག་ཤེས་ལྔ༔ འབྱུང་བ་ལྔ༔ བཤད་པ་འདི་ཡང་འཐད་པར་མངོན་ནོ༔ འབྱུང་ལྔའི་ཐིམ་ཚུལ་ལ་༴ ཞེས་པ་ནས། དབང་ལྔའི་ནུས་པ་ཞན་གྱི་བར་ཏེ༔ སྲིད་པ་བར་དོའི་རྒྱུད་ལས༔ སེམས་ཅན་ལུས་སུ་གྲུབ་པ་ཐམས་ཅད་ལ༔ རྒྱུ་དང་རྐྱེན་གྱིས་བསྐྱེད་པ་ཡིན་པས་ན༔ རྒྱུའི་ནུས་པ་ཟད་པས་འཆི་བར་སྣང་༔ ནུས་པ་ཟད་པའི་རྟགས་ནི་འདི་རྣམས་འབྱུང་༔ འབྱུང་བ་ལྔ་ཡིས་བསྐྱེད་པའི་ལུས་ཡིན་པས༔ ས་ཡི་ནུས་པ་ཟད་པས་སྐམ་པོར་སྣང་༔ ཆུ་ཡི་ནུས་པ་ཟད་པས་ལྕི་བར་སྣང་༔ མེ་ཡི་ནུས་པ་ཟད་པས་གྲང་བར་འོང་༔ རླུང་གི་ནུས་པ་ཟད་པས་ལྡང་བར་ནུབ༔ ནམ་མཁའི་ནུས་པ་ཟད་པས་བཀྲག་མདངས་ཉམས༔ ཞེས་དང་༔ ཁ་སྦྱོར་དང་རབ་འབྱམས་ཀྱི་རྒྱུད་མཐུན་པར༔ ས་ནི་ས་ལ་ཐིམ་པ་ན༔ ལུས་ནི་ལྕི་ཞིང་ཟས་མི་ལེན༔ ལང་འདུག་འགྲོ་བས་སྟོབས་ཀུན་ཟད༔ ཆུ་ནི་ཆུ་ལ་ཐིམ་པའི་ཚེ༔ ཁ་ཆུ་སྣ་ཆུ་འཛག་པར་བྱེད༔ དེ་བཞིན་མེ་ལ་མེ་ཐིམ་པས༔ ཁ་སྣ་དག་ནི་རབ་ཏུ་སྐམ༔ ལུས་ཀྱི་མཐའ་ཡི་དྲོད་རྣམས་འཆོར༔ དེ་བཞིན་རླུང་ལ་རླུང་ཐིམ་པས༔ དབུགས་ནི་ངར་ངར་རབ་ཏུ་གཡོབ༔ མིག་ཀྱང་གྱེན་ལ་ལྡོག་པའོ༔ རྟགས་འདི་སུ་ལ་བྱུང་བ་དེ༔ འདི་ལ་མི་གནས་ཕ་རོལ་ཏུ༔ ཞེས་སོ༔ ས་རླུང་རྩ་ཕྲན་༴ ནས། གསལ་བ་ཡང་འབྱུང་ལ་སྟེ༔ ཡེ་ཤེས་གཏིང་རྫོགས་ཀྱི་རྒྱུད་ལས༔ དེ་ཚེ་སྣང་བ་གཉིས་ནི་ཉམས་སུ་མྱོང་༔ དང་པོ་སྣང་བ་སྨིག་རྒྱུ་དུ་བ་ལྟར༔ བུན་ནེ་ལང་ལོང་འཇིག་རྟེན་ཞིག་པར་མཐོང་༔ དེ་ཚེ་འཕོས་མ་ཐག་ཏུ་སྣང་བ་མཆེད༔ སྲིན་འབུ་མེ་ཁྱེར་ལྟ་བུར་ཧྲབ་ཧྲིབ་ཙམ༔ སྣང་བ་ཐོབ་པ་མར་མེའི་རྩེ་མོ་ལྟར༔ ཤིན་ཏུ་བརྟག་དཀའ་རབ་རིབ་འབྱུང་བའི་ཚེ༔ ཡེ་ཤེས་ཉུག་གིས་བྱུང་སྟེ་མ་རིག་བསྒྲིབས༔ ཞེས་སོ༔ ནང་འབྱུང་ཕྲ་བུ་༴ ནས། མ་བཟློས་སོ་སྟེ༔ འདི་ཡན་ཆད་ཀྱི་གོ་དོན་ཐམས་ཅད་འདིས་སློང་ནུས་པས་ན༔རིག་པ་རང་ཤར་ལས༔ དེ་ནས་ནང་གི་འབྱུང་བ་ལྔ་ཕྱི་ལ་ཐིམ་པའི་རྟགས་སུ་འདི་ལྟར་ཤེས་པར་བྱའོ༔ ས་ས་ལ་ཐིམ༔ ཆུ་ཆུ་ལ་ཐིམ༔ མེ་མེ་ལ་ཐིམ༔ རླུང་རླུང་ལ་ཐིམ༔ ནམ་མཁའ་ནམ་མཁའ་ལ་ཐིམ་ནས༔ དེ་ཡང་ས་ལ་ས་ཐིམ་པ་ལ་གཉིས་ཏེ༔ ཕྱིའི་ས་ནང་གི་ས་ལ་ཐིམ༔ ནང་གི་ས་ཕྱིའི་ས་ལ་ཐིམ༔ ཕྱིའི་ས་ནང་གི་ས་ལ་ཐིམ་པའི་དུས་ནི༔ དང་པོའི་དུས་སོ༔ ནང་གི་ས་ཕྱིའི་ས་ལ་ཐིམ་པའི་རྟགས་སུ༔ ལུས་ཀྱི་སྟོབས་འཆོར་རོ༔ དེ་ཡང་འདི་ལྟ་སྟེ༔ ཀུན་ཏུ་སྣང་བའི་ས་ཐིམ་པའི་རྟགས་སུ༔ ཕྱིའི་ཤེས་པ་རྨུགས༔ མི་འགྱུར་བ་རྡོ་རྗེའི་ས་ཐིམ་པའི་རྟགས་སུ༔ ལུས་ཀྱི་སྟོབས་འཆོར་རོ༔ ཐམས་ཅད་འབྱུང་བ་རིན་པོ་ཆེའི་ས་ཐིམ་པའི་རྟགས་སུ་སྟོབས་ཉམས་ནས་ལྡང་མི་ནུས༔ སྣང་བ་སྟོན་པ་ཀུན་ཏུ་མཐའ་ཡས་པའི་ས་ཐིམ་པའི་རྟགས་སུ༔ ལོངས་སྤྱོད་རྫོགས་པའི་སྟོབས་འཆོར་ནས་དགོངས་པ་མི་གསལ་ལོ༔ སྒྲུབ་པ་མཐར་ཕྱིན་པའི་ས་ཐིམ་པའི་རྟགས་སུ༔ སྒྲོན་མའི་སྣང་བ་འགགས་སོ༔ ནང་གི་ཆུ་ཕྱིའི་ཆུ་ལ་ཐིམ་པའི་རྟགས་སུ༔ ཆུ་མི་ཐུབ་སྟེ༔ འགྱུར་བ་མེད་པའི་ཆུ་ཐིམ་པའི་རྟགས་སུ༔ ཁ་སྣ་སྐམ་པ་ཡིན༔ འཛིན་མེད་རྫོགས་པའི་ཆུ་ཐིམ་པའི་རྟགས་སུ་རྣ་བས་སྒྲ་མི་ཐོས་པ་ཡིན་ནོ༔ ནང་གི་མེ་ཕྱིའི་མེ་ལ་ཐིམ་པའི་རྟགས་སུ་ལུས་ཀྱི་དྲོད་འཆོར་བ་ཡིན་ནོ༔ དེ་ཡང་འདི་ལྟར་ཤེས་པར་བྱའོ༔ ཕྱི་ནང་ཀུན་ཁྱབ་ཀྱི་མེ་ཐིམ་པའི་རྟགས་སུ༔ ནང་གི་དྲོད་ཤོར་ཞིང་ཤེས་པ་མི་གསལ༔ ཕྱི་ནང་ཀུན་ཏུ་མཉམ་པའི་མེ་ཐིམ་པའི་རྟགས་སུ༔ གསང་བའི་དྲོད་འཆོར༔ ཕྱི་ནང་གི་བྱ་བ་རྫོགས་པའི་མེ་ཐིམ་པའི་རྟགས་སུ༔ ཡོངས་སུ་རྫོགས་པའི་དྲོད་འཆོར༔ ཕྱི་ནང་གི་བྱ་བ་གྲུབ་པའི་མེ་ཐིམ་པའི་རྟགས་སུ༔ སྟོང་པའི་སྒྲོན་མ་མི་མཐོང་ངོ་༔ ཕྱི་ནང་རྫོགས་པའི་མེ་ཐིམ་པའི་རྟགས་སུ༔ ཤེས་པ་རེས་གསལ་རེས་མི་གསལ་ལོ༔ ནང་རླུང་ཕྱི་རླུང་ལ་ཐིམ་པའི་རྟགས་སུ༔ ལུས་ཀྱི་རྩལ་ཤོར༔ དེ་ཡང་འདི་ལྟར་ཤེས་པར་བྱའོ༔ བཀྲག་མདངས་དང་གཟི་མདངས་བསྐྱེད་པའི་རླུང་ཐིམ་པའི་རྟགས་སུ༔ ལུས་ཀྱི་བཀྲག་འཆོར༔ མེ་དང་མཉམ་དུ་གནས་པའི་རླུང་ཐིམ་པའི་རྟགས་སུ༔ ལུས་ནས་ཆུ་འབྲུབ༔ སྲོག་འཛིན་པའི་རླུང་ཐིམ་པའི་རྟགས་སུ་དབུགས་མི་ཐུབ༔ ཀུན་ཏུ་ཁྱབ་བྱེད་ཀྱི་རླུང་ཐིམ་པའི་རྟགས་སུ༔ ལུས་ཀྱི་བཀྲག་དང་དྲན་པ་འཆོར༔ སྙིང་རྗེ་མེད་པ་བསྐལ་པ་ལས་ཀྱི་རླུང་ཐིམ་པའི་རྟགས་སུ༔ ཕྱི་དབུགས་ཆད་པ་ཡིན་ནོ༔ དེ་ནི་ཕྱིའི་འབྱུང་བ་ཞེས་བྱའོ༔ ནམ་མཁའ་ནམ་མཁའ་ལ་ཐིམ་པ་ནི༔ ཕྱི་ཀུན་ལ་ཁྱབ་པའི་ནམ་མཁའ་སྒྲོན་མ་རྣམ་པར་དག་པ་ལ་ཐིམ་མོ༔ ཡུལ་མེད་གསལ་དག་གི་ནམ་མཁའ་རིག་པ་ལ་ཐིམ་མོ༔ མ་འདྲེས་པ་དག་པའི་ནམ་མཁའ་དབྱིངས་ལ་ཐིམ་མོ༔ དོན་མཚོན་བྱེད་ཀྱི་ནམ་མཁའ་ཤེས་རབ་ལ་ཐིམ་མོ༔ དག་པའི་ཞིང་དུ་སྒྲོལ་བྱེད་ཀྱི་ནམ་མཁའ་ཉི་ཤུ་རྩ་གཅིག་དོན་ལ་ཐིམ་མོ༔ དེ་ནི་ནང་གི་འབྱུང་བ་ཞེས་བྱའོ༔ རྩ་བ་འཛིན་པའི་སྲོག་ཐིག་ལེ་ལ་ཐིམ་མོ༔ སྐྱོབ་བྱེད་ཀྱི་སྲོག་ནམ་མཁའ་ལ་འཁྱིལ་ལོ༔ རྣམ་པར་འཕྲོ་བའི་སྲོག་ལུས་ལ་འཁྱིལ་ལོ༔ མི་གཙང་བའི་སྲོག་ནམ་མཁའ་ལ་ཡལ་ལོ༔ རྣམ་པར་འདར་བྱེད་ཀྱི་སྲོག་དབྱིངས་སུ་ཐིམ་མོ༔ དེ་ནི་གསང་བའི་འབྱུང་བ་ཞེས་བྱའོ༔ དྭངས་སྙིགས་འབྱེད་པའི་རླུང་ཚོམ་བུ་ལ་ཐིམ་མོ༔ དྲོད་བསྐྱེད་བའི་རླུང་འོད་ལ་ཐིམ་མོ༔ གསལ་འགྱུར་གྱི་རླུང་སྐུ་ལ་ཐིམ་མོ༔ རྣམས་པར་སྡུད་པའི་རླུང་ཡེ་ཤེས་ལ་ཐིམ་མོ༔ རྣམ་པར་གཟེངས་བསྟོད་པའི་རླུང་ཐུགས་རྗེ་ལ་ཐིམ་མོ༔ རྣམ་པར་ཤེས་པ་བསྐྱེད་པའི་རླུང་སྟོང་པ་ལ་ཐིམ་མོ༔ རྣམ་པར་ཡིད་འབྱུང་བའི་རླུང་གཉིས་མེད་ལ་ཐིམ་མོ༔ རྣམ་པར་མདངས་དང་ལྡན་པའི་རླུང་མཐའ་གྲོལ་ལ་ཐིམ་མོ༔ རྣམ་པར་སྲེག་པའི་རླུང་བདེ་བ་ཆེན་པོ་ལ་ཐིམ་མོ༔ རྣམ་པར་དགོད་པའི་རླུང་གསལ་བ་ལ་ཐིམ་མོ༔ གཞི་ལ་ཁྱབ་བྱེད་ཀྱི་རླུང་མཁའ་གསལ་ལ་ཐིམ་མོ༔ འཕྲ་ལ་ཁྱབ་བྱེད་ཀྱི་རླུང་གཏིང་གསལ་ལ་ཐིམ་མོ༔ སྔངས་ཤིང་སྐྲག་པ་ཁྱབ་བྱེད་ཀྱི་རླུང་ཡུལ་ལ་ཐིམ་མོ༔ དྲན་པ་ཁྱབ་བྱེད་ཀྱི་རླུང་བར་དོ་ལ་ཐིམ་མོ༔ འཛིན་པས་ལུས་ཀུན་ཁྱབ་པའི་རླུང་རང་སྣང་ལ་ཐིམ་མོ༔ རྣམ་པར་སྐྱོད་བྱེད་ཀྱི་རླུང་གིས་རིག་པ་མཁའ་ལ་བསྐྱོད་དོ༔ རྣམ་པར་སྒྲོལ་བྱེད་ཀྱི་རླུང་གིས་ཕྱི་ནང་གི་ཆོས་དང་ཕྲལ་ལོ༔ རྣམ་པར་ལྡོག་བྱེད་ཀྱི་རླུང་གིས་རང་གི་རིག་པ་གཞི་ལ་ལྡོག་གོ༔ རྣམ་པར་མྱུར་བྱེད་ཀྱི་རླུང་གིས་རིག་པའི་ཡུལ་མཐོང་ངོ་༔ སྐད་ཅིག་མའི་རླུང་གི་སྐད་ཅིག་མ་གསུམ་ལ་ཀ་དག་གི་ས་ལ་ཕྱིན་པར་བྱེད་དོ༔ དེ་ནི་ཡོངས་སུ་རྫོགས་པའི་འབྱུང་པའོ༔ ཞེས་སོ༔ བརྒྱད་པ་ཡང་ཕྲ་༴ སོགས་ནས། རབ་རིབ་དུ་འབྱུང་ངོ་༔ བར་ལ་སྣང་སྟོང་གི་ཆ་གཉིས་ལས་སྣང་ཆ་ལྷ་སྐུའི་ཆ་ནི༔ གཉིས་མེད་རྣམ་རྒྱལ་ལས༔ དང་པོ་སྨིག་རྒྱུད་དེ་ཉིད་ཀྱང་༔ འོད་ཟེར་ལྔ་དང་ལྡན་པ་མཐོང་ཞེས་སོ༔ འོད་གསལ་སྣང་སྟོང་གི་ཆ་གཉིས་ནི༔ གཟུང་རྟོག་འགག་ཆའི་སྟོང་པའི་འོད་གསལ་སེམས་གསལ་ཆའི་སྣང་བའི་འོད་གསལ་ཡིན་ཏེ༔ དེ་ཉིད་ལས༔ སྣང་བ་ཞེས་བྱ་རྣམ་པར་མི་རྟོག་པ༔ གསལ་བའི་ཆ་དེ་གཟུང་རྟོག་སྤངས་བ་ལས༔ འབྱུང་བ་མི་འབྱུང་རླུང་དང་བཅས་པ་གང་༔ ལྷང་ངེར་གནས་པ་སྐད་ཅིག་དང་པོ་ཡིན༔ ཞེས་སོ༔ སྣང་སྟོང་གི་ཡེ་ཤེས་དེའི་ངོ་བོ་མེ་ལོང་ལྟ་བུ་ཡིན་པའི་ཕྱིར༔ ཞེ་སྡང་གི་རྟོག་པ་སོ་གསུམ་འགགས་པ་ནི༔ ཨཱརྱ་དེ་ཝའི་སྤྱོད་བསྡུས་ལས༔ རྣམ་རྟོག་སུམ་ཅུ་རྩ་གསུམ་པོའི་མིང་གང་ཞེ་ན༔ འདོད་ཆགས་དང་བྲལ་བ་དང་༔ འདོད་ཆགས་དང་བྲལ་བ་བར་མ་དང་༔ ཤིན་ཏུ་འདོད་ཆགས་དང་བྲལ་བ་དང་༔ ཡིད་ཀྱིས་འགྲོ་བ་དང་༔ སོང་བ་དང་༔ མྱ་ངན་དང་༔ མྱ་ངན་བར་མ་དང་༔ ཤིན་ཏུ་མྱ་ངན་དང་༔ ཞི་བ་དང་རྣམ་རྟོག་དང་༔ འཇིགས་པ་དང་༔ འཇིག་པ་བར་མ་དང་༔ ཤིན་ཏུ་འཇིགས་པ་དང་༔ སྲེད་པ་དང་༔ སྲེད་པ་བར་མ་དང་༔ ཤིན་ཏུ་སྲེད་པ་དང་༔ ཉེ་བར་ལེན་པ་དང་༔ མི་དགེ་བ་དང་༔ བཀྲེས་པ་དང་༔ སྐོམ་པ་དང་༔ ཚོར་བ་དང་༔ ཚོར་བ་བར་མ་དང་༔ ཤིན་ཏུ་ཚོར་བ་དང་༔ རིག་པ་པོ་དང་༔ རིག་གཞི་དང་༔ སོ་སོར་རྟོག་པ་དང་༔ ངོ་ཚ་ཤེས་པ་དང་༔ བརྩེ་བ་དང་༔ བརྩེ་བ་བར་མ་དང་༔ ཤིན་ཏུ་བརྩེ་བ་དང་༔ དོགས་པ་དང་བཅས་པ་དང་༔ བསགས་པ་ཉིད་དང་༔ ཕྲག་དོག་སྟེ་རང་བཞིན་གྱི་རྟོག་པ་སུམ་ཅུ་རྩ་གསུམ་མོ༔ ཞེས་སོ༔

གཉིས་པ་དེ་ནས་དབུ་མའི་ཡར་སྣང་༴ སོགས་ནས། ཆེན་པོ་སྟོང་པ་ཡང་ཟེར་རོའི་བར་གྱི༔ ལྷ་སྐུ་ལ་སྔ་མ་ལས༔ གཉིས་པ་ཟླ་བ་ལྟ་བུ་དང་༔ ཞེས་དང་༔ འོད་གསལ་སྣང་སྟོང་ལ༔ དེ་ཉིད་ལས༔ མཆེད་པ་རྣམ་པར་རབ་ཏུ་མི་རྟོག་སྟེ༔ ཚེ་གསལ་བ་ལ་འཛིན་རྟོག་མ་ཞུགས་པ༔ ཡེ་ཤེས་ཕྲ་བ་རླུང་དང་མི་རྟོག་པ༔ ལྷན་ནེར་གནས་པ་སྐད་ཅིག་གཉིས་པ་ཡིན༔ ཞེས་སོ༔ ཡེ་ཤེས་དེ་ནི་སོར་རྟོགས་ཀྱི་ངོ་བོའི་ཆ་ཡོད་པས༔ འདོད་ཆགས་གྱི་རྟོག་པ་བཞི་བཅུ་འགག་པ་ནི༔ སྤྱོད་བསྡུས་ལས༔ འདོད་ཆགས་ལས་བྱུང་བའི་རྟོག་པ་བཞི་བཅུ་གང་ཞེ་ན༔ ཆགས་པ་དང་༔ ཆགས་པ་བར་མ་དང་༔ ཀུན་ཏུ་ཆགས་པ་དང་༔ དགའ་པ་དང་༔ དགའ་བ་བར་མ་དང་༔ ཤིན་ཏུ་དགའ་བ་དང་༔ རངས་པ་དང་༔ རབ་ཏུ་མགུ་བ་དང་༔ ངོ་མཚར་བ་དང་༔ དགོད་པ་དང་༔ ཚིམ་པ་དང་༔ འཁྱུད་པ་དང་༔ འོ་བྱེད་པ་དང་༔ འཇིབ་པ་དང་༔ བརྟན་པ་དང་༔ བརྩོན་པ་དང་༔ ང་རྒྱལ་དང་༔ བྱ་བ་དང་༔ འགྲོགས་པ་དང་༔ སྟོབས་དང་༔ དབྲོག་པ་དང་༔ སྤྲོ་བ་དང་༔ ལྷན་ཅིག་བྱེད་པའི་དགའ་བ་ལ་སྦྱོར་བ་དང་༔ ཤིན་ཏུ་དགའ་བ་ལ་སྦྱོར་བ་དང་༔ སྒེགས་པ་དང་༔ རྣམ་པར་སྒེག་པ་དང་༔ ཞེ་འགྲས་པ་དང་༔ དགེ་བ་དང་༔ ཚིག་གསལ་བ་དང་༔ བདེན་པ་དང་༔ མི་བདེན་པ་དང་༔ ངེས་པ་དང་༔ ཉེ་བར་ལེན་པ་དང་༔ སྦྱིན་པ་པོ་དང་༔ གཞན་ལ་སྐུར་བ་དང་༔ དཔའ་བོ་དང་༔ ངོ་ཚ་བ་མེད་པ་དང་༔ གཡོ་སྒྱུ་དང་༔ སྡུག་པ་དང་༔ མི་སྲུན་པ་དང་༔ གྱ་གྱུ་ཆེ་བ་སྟེ་འདོད་ཆགས་ལས་གྱུར་པའ་རྟོག་པ་བཞི་བཅུའོ༔ ཞེས་སོ༔

གསུམ་པ་དེ་ནས་མཆེད་པ་ཐོབ་པ་ལ་༴ སོགས་ནས། ཐོབ་པའི་ཡེ་ཤེས་ཞེས་བྱའོ༔ དེའི་ལྷ་སྐུའི་ཆ་ལས༔ གཉིས་མེད་རྣམ་རྒྱལ་ལས༔ གསུམ་པ་ཉི་མ་ལྟ་བུ་དང་༔ ཞེས་དང་༔ འོད་གསལ་སྣང་སྟོང་ལས༔ ཐོབ་པའི་ཡེ་ཤེས་ཤིན་ཏུ་མི་རྟོག་པ༔ གསལ་བ་ཙམ་དུའང་མི་གནས་ཤིན་ཏུ་ཕྲ༔ རླུང་སེམས་མི་ཕྱེད་གསལ་བར་འཆར་བ་སྟེ༔ ལྷམ་མེར་གནས་པ་སྐད་ཅིག་གསུམ་པ་ཡིན༔ ཞེས་སོ༔ འདི་སོར་རྟོགས་ཡེ་ཤེས་ཡིན་ཡང་ཆོས་དབྱིངས་ཀྱིས་ཁྱབ་པའི་ཆས་གཏི་མུག་གི་རྟོག་པ་བདུན་བཅོམ་པས་ཤིན་ཏུ་སྟོང་བ་ཀ་དག་སྟེ༔ སྤྱོད་བསྡུས་ལས༔ གཏི་མུག་གི་ལས་གྱུར་པའི་རྟོག་པ་བདུན་གང་ཞེ་ན༔ མི་གསལ་བ་དང་༔ བརྗེད་ངེས་པ་དང་༔ འཁྲུལ་བ་དང་༔ མི་སྨྲ་བ་དང་༔ སྐྱོ་བ་དང་༔ ལེ་ལོ་དང་༔ ཐེ་ཚོམ་སྟེ༔ ཐམས་ཅད་གཏི་མུག་ལས་གྱུར་པའི་རྟོག་པ་བདུན་པོ་དེ་དག་འགག་གོ༔ ཞེས་སོ༔

བཞི་པ༔ དེ་ནས་དཀར་དམར་སྙིང་གར་འདྲེས་པ་༴ སོགས་ནས། སྐད་ཅིག་བཞི་པ་སྟེ༔ ཡང་དེའི་ལྷ་སྐུའི་ཆ་ལས༔ བཞི་པ་མུན་པ་ལྟ་བུ་དང་༔ ཞེས་རྣམ་རྒྱལ་ལས་གསུངས་པ་ལྟ་བུ་དང་༔ འོད་གསལ་སྣང་སྟོང་གི་ཆ་ནས༔ ཉེ་བར་ཐོབ་པ་དྲི་མ་མེད་པ་སྟེ༔ རང་བྱུང་རང་གསལ་བདེ་བ་དམིགས་སུ་མེད༔ ཕྲ་རགས་རང་བཞིན་ཏིང་འཛིན་མཆོག་མི་འགྱུར༔ སྐད་ཅིག་བཞི་པར་མི་འགྱུར་ཁྱབ་བྱེད་ཡིན༔ ཞེས་སོ༔ དེ་དག་ནི་རྣམ་ཤེས་སྣང་བ་ལ་ཐིམ་པ༔ སྣང་བ་མཆེད་པ་ལ་ཐིམ་པ༔ མཆེད་པ་ཐོབ་པ་ལ་ཐིམ་པ༔ ཐོབ་པ་ཉེར་ཐོབ་ལ་ཐིམ་པ་ཞེས་བྱ་བ་རྣམས་སོ༔ དེ་ནས་ཉེར་ཐོབ་འོད་གསལ་ལ་ཐིམ་པ་ཞེས་བྱ་བ་ནི༔ མ་དག་པའི་སྣང་སེམས་བཞི་༴ ནས། བར་གྱི་བཤད་ཟིན་སྟེ༔ སྟེང་སྣང་སྟོང་ཟུང་འཇུག་ལྷན་སྐྱེས་དོན་གྱི་ཡེ་ཤེས་དེ་ནི་ཀ་དག་གདོད་མའི་རྒྱལ་ས་ཡིན་པས་སྐྱོན་གྱིས་མ་གོས་པའི་ཆ་ནས༔ རྣམ་རྒྱལ་ལས༔ ལྔ་བ་སྤྲིན་མེད་ནམ་མཁའ་ལ༔ མི་རྟོག་མཐའ་དབུས་མེད་པ་འཆར༔ ཞེས་དང་༔ འོད་གསལ་བ་ནི་བསམ་གཏན་ཟག་པ་མེད༔ རྡུལ་མེད་ས་བོན་མེད་པ་མི་གཡོ་བ༔ ལྷན་ཅིག་གནས་པ་ཆོས་སྐུའི་སྙིང་བོ་ནི༔ ལྷུན་གྲུབ་བྱང་ཆུབ་སེམས་ཀྱི་ངོ་བོ་ཉིད༔ ཅེས་དང་༔ ཟུང་འཇུག་བདེ་བ་ཆེན་པོའི་མཚན་ཉིད་ཅན༔ ཆོས་དབྱིངས་ཆོས་ཉིད་དབྱེར་མེད་དག་པའི་སྐུ༔ ཐ་དད་རྣམ་བྲལ་མི་ཕྱེད་ཡེ་ཤེས་ཏེ༔ གསང་བ་ཆེན་པོའི་ལམ་ལས་འདིར་རྟོགས་བྱ༔ ཞེས་དང་༔ དེ་དག་ཀྱང་ཇི་སྐད་དུ༔ སྣང་བ་ཐིམ་དང་རྟོག་པ་ཐིམ༔ ཕྲ་བ་ཐིམ་དང་རགས་པ་ཐིམ༔ ཐིམ་པས་རྗེས་ལ་གོམ་པ་ཡིས༔རང་བཞིན་གྱིས་ནི་འོད་གསལ་འཆར༔ ཞེས་དང་༔ འཕགས་པ་ལྷས༔ དེ་བཞིན་སྟོང་པ་རྣམ་པ་བཞི༔ དངོས་པོ་བརྒྱད་དུ་ཤེས་པར་བྱ༔ ཞེས་དང་༔ ས་ཡིས་ཁམས་ནི་ཆུ་ལ་ཐིམ༔ ཆུ་ནི་མེ་ལ་ཐིམ་པའོ༔ མེ་ཡང་ཕྲ་བའི་ཁམས་ལའོ༔ རླུང་ནི་སེམས་ལ་རྣམ་པར་ཐིམ༔ སེམས་ནི་སེམས་ལས་བྱུང་ལ་ཐིམ༔ མ་རིག་པ་ལས་སེམས་བྱུང་ངོ་༔ དེ་ཡང་འོད་གསལ་བ་ལ་འགྲོ༔ འདི་ནི་སྲིད་གསུམ་འགོག་པའོ༔ ཞེས་སོ༔ འདིའི་ལྷ་སྐུ་རྣམས་དང་༔ སྔར་གྱི་ས་རླུང་སོགས་ཐིམ་པའི་རྟགས་གཉིས་ངོ་བོ་གཅིག་ལ་ཕྲ་རགས་ཕྱི་ནང་གི་ཁྱད་པར་ཅུང་ཟད་ཀྱང་ཡོད་ལ༔ འོད་གསལ་སྣང་སྟོང་བརྒྱད་པོ་ཁྲེགས་ཆོད་ཀྱི་ལྟ་བསྒོམ་གཉིས་ཀའི་གཞིའམ་རྫོགས་རིམ་སྣང་མེད་ཀྱི་སྙིང་རྡོ་ཡིན་པས་ཀ་དག་གི་བརྒྱད་དོ༔ ལྷ་སྐུ་ནི་ལྷུན་གྲུབ་ཀྱི་ཆ་ཙམ་ཡིན་ནའང་༔ འབྲས་ཆོས་མ་ལུས་པ་གསལ་རྫོགས་སུ་མེད་པ་དང་༔ ནང་ཐིམ་གྱི་འཆར་རིམ་ཡིན་པས་ལོངས་སྐུའི་བར་དོ་དང་༔ འོད་གསལ་དངོས་མ་རྟོགས་པས་སྟོང་བཞིའི་གཞན་རྣམས་ཀྱང་ཆོས་སྐུའི་བར་དོ་ཁྱད་པར་པ་མིན་ནོ༔ འོད་གསལ་དངོས་འདི་འཁོར་འདས་བར་དོའང་ཡིན་ནོ༔ འདི་དང་གཞུང་༔ འོད་གསལ་ཉམས་ལེན་རྣམས་ཀྱི་ཆ་བརྒྱད་པོ་བཏགས་ཚུལ་ཅུང་མི་འདྲ་ཡང་༔ སོ་སོ་ནས་རྒྱུད་ཀྱི་དགོངས་པ་རེ་ཡིན་ཞིང་༔ རྒྱུད་གཅིག་ལའང་མཐའ་དྲུག་ཚུལ་བཞིའི་དགོངས་པ་ལེན་ཚུལ་ཡོད་པས༔ གང་ལྟར་ཡང་འགལ་བ་མེད་དོ༔ ཡང་ཐིམ་རིམ་གྱི་ལྷ་སྐུ་འདི་ནང་གི་འབྱུང་བ་ལྔ་ཡོངས་རྫོགས་ཀྱི་འབྱུང་བ་ལ་ཐིམ་ཞེས་པས༔ ཡོངས་རྫོགས་ཀྱི་འབྱུང་བར་གོ་དོན་བླང་ནའང་ཤིན་ཏུ་ལེགས་སོ༔

གཉིས་པ་འཕྲོས་དོན་སྐྱེ་གནས་ཀྱི་རྟགས་ལ༔ རྟགས་དངོས་དང་༔ དེ་སྦྱངས་བ་གཉིས་ལས༔ དང་པོ་ལ༔ རྣམ་འགྱུར་དང་༔ དྲོད་ལ་དབུགས་དང་གསལ་བ་གསུམ་སྟེ༔ བར་དོའི་རྒྱུད་ལས༔ མཐོ་རིས་ངན་སོང་གར་འགྲོ་བ༔ དབུགས་དང་དྲོད་ཀྱི་ཆ་ཡི་ཤེས༔ ཞེས་ཕྱི་དང་ནང་གི་རྟགས་དེ་གཉིས་བཞག༔ ཉི་ཟླ་ཁ་སྦྱོར་ལས༔ ཕྱིའི་རྟགས་ནི་དེ་དག་དང་༔ ནང་གི་རྟགས་ནི་འདི་དག་སྦྱར༔ ཞེས་ཕྱིའི་རྟགས་སུ་རྣམ་འགྱུར་དང་༔ ནང་རྟགས་དྲོད་དང་དབུགས་ལ་གསུངས་པ་ལྟར༔ དང་པོ་ཕྱི་རྟགས་རྣམ་འགྱུར་ནི༔ ཉི་ཟླ་ཁ་སྦྱོར་ལས༔ ཕྱི་ཡི་སྣང་བ་འདི་ལྟ་བུ༔ གལ་ཏེ་དྲོད་ནི་གྱེན་ཡལ་ནས༔ དབུགས་ཆེན་འབྱིན་པར་བྱེད་པ་ཡིན༔ མིག་ནི་མི་གསལ་རབ་རིབ་ན༔ ངན་སོང་གནས་རྣམས་དག་ཏུ་སྐྱེ༔ ལག་པ་དག་ནི་གཡས་གཡོབ་ན༔ མི་དེ་ལྷ་ཡི་གནས་ནའོ༔ ཁ་ནས་ཚིག་ནི་འཆོལ་བ་ན༔ ལྷ་མིན་གནས་སུ་དེ་བཞིན་སྐྱེ༔ རྐང་པ་གཡོན་པ་ས་ལ་བརྡེག༔ དེ་ནི་དམྱལ་བའི་གནས་སུའོ༔ ལུས་ཀྱི་བཀྲག་ནི་སེར་བཀྲག་མེད༔ འདི་ནི་ཡི་དྭགས་གནས་སུའོ༔ ཁ་ནས་སེམས་ཅན་སྐད་བཞིན་འདོན༔ དེ་ནི་བྱོལ་སོང་གནས་སུའོ༔ ཡང་ན་ཁ་ལྐུག་སོ་འཐམ་ན༔ དེ་བཞིན་བྱོལ་སོང་སྐྱེ་ངེས་སོ༔ ཚིག་གསལ་དྲན་པ་མ་ཉམས་ན༔ དེ་ནི་མི་ཡི་གནས་སུའོ༔ ཕྱི་ཡི་རྟགས་ནི་དེ་དག་དང་༔ ཞེས་སོ༔

གཉིས་པ་ནང་དྲོད་དང་དབུགས་ཀྱི་རྟགས་ལ་གཉིས་ལས༔ དང་པོ་ལ་དྲོད་འདུ་ཚུལ་དང་ཡས་ཚུལ་གྱིས་བཤད་པ་གཉིས་ལས་དང་པོ་ནི༔ སྔ་མ་ལས༔ ནང་གི་རྟགས་ནི་འདི་དག་སྦྱར༔ སྤྱི་བོར་དྲོད་རྣམས་འདུས་པ་ན༔ དེ་ནི་ལྷ་ཡི་གནས་སུའོ༔ དེ་བཞིན་རྐང་མཐིལ་དྲོད་འདུས་ན༔ དེ་ནི་དམྱལ་བའི་གནས་སུའོ༔ མཆན་ཁུང་གཡས་སུ་དྲོད་འདུས་ན༔ དེ་ནི་ལྷ་མིན་གནས་སུའོ༔ དེ་བཞིན་ཁར་ནི་དྲོད་འདུས་ན༔ མི་དེ་ཡི་དྭགས་གནས་སུ་སྐྱེ༔ དེ་བཞིན་མཚན་མར་དྲོད་འདུས་ན༔ དེ་ནི་བྱོལ་སོང་སྐྱེ་གནས་སོ༔ མིག་ཏུ་དྲོད་རྣམས་འདུས་པ་ན༔ མི་ཡི་གནས་སུ་སྐྱེ་བ་ཡིན༔ དེ་ལྟར་རྟགས་དང་སུ་ལྡན་ན༔ འདི་ནི་ངེས་པ་ཁོ་ནའོ༔ ཞེས་སོ༔

གཉིས་པ་ནི༔ བར་དོའི་རྒྱུད་ལས༔ མཐོ་རིས་འགྲོ་བས་དྲོད་དེ་ནི༔ རྐང་མཐིལ་དག་ཏུ་དྲོད་ཡལ་ན༔ སྲིད་པ་ཆགས་པའི་ལྟེ་བ་རུ༔ ལུས་ཀྱི་དྲོད་ནི་དེར་འདུས་ན༔ ཁྱད་པར་ལྷ་ཡི་གནས་སུ་སྐྱེ༔ དེ་ནས་སྙིང་དྲོད་ཡར་བསྡུས་ཏེ༔ མགྲིན་པའི་ངག་གི་གནས་དེར་སྡུད༔ ལུས་ཀྱི་དྲོད་ནི་དེར་འདུས་ན༔ ཁྱད་པར་ལྷ་མིན་གནས་སུ་སྐྱེ༔ མགྲིན་པའི་དྲོད་དེ་ཡར་བསྡུས་ནས༔ སྤྱི་བོར་ཚངས་པའི་གནས་དེར་འདུས༔ བསྡུས་ཏེ་འཇའ་ཚོན་བཞིན་དུ་སོང་༔ ཕྱག་རྒྱ་ཆེན་པོའི་རྒྱུ་རུ་སྐྱེ༔ ཞེས་དང་༔ ངན་སོང་སྐྱེ་བའི་དྲོད་དེ་ནི༔ སྤྱི་བོའི་གཙུགས་ནས་དྲོད་ཡལ་ཏེ༔ ལྟེ་བའི་གནས་སུ་དྲོད་བསྡུས་ན༔ གླེན་ལྐུག་བྱོལ་སོང་གནས་སུ་སྐྱེ༔ ལྟེ་བ་ནས་བཟུང་དྲོད་ཡལ་ན༔ དམྱལ་བའི་གནས་སུ་ངེས་པར་སྐྱེ༔ ལུས་ཀྱི་ཕྱི་རུ་དྲོད་བྲོས་ནས༔ ཐད་ཀ་རང་རང་ཡལ་བ་ན༔ བཀྲེས་སྐོམ་ཡི་དྭགས་གནས་སུ་སྐྱེ༔ ཞེས་སོ༔ གཉིས་པ་དབུགས་ཀྱི་རྟགས་ནི༔ བར་དོའི་རྒྱུད་ལས༔ མཐོ་རིས་ཐོབ་པའི་དབུགས་རྟགས་ནི༔ ནང་དུ་སུམ་ཆ་རྔུབ་པས་ན༔ ལྷ་དང་ལྷ་མིན་ཁྱད་པར་ཐོབ༔ ཕྱི་རུ་སུམ་གཉིས་རྔུབ་པ་ན༔ རིག་པ་འཛིན་པའི་ས་རུ་སྐྱེ༔ ཞེས་དང་༔ ངན་སོང་འགྲོ་བའི་དབུགས་དེ་ནི༔ ནང་དུ་སུམ་ཉིས་རྔུབ་པ་དང་༔ ཕྱི་རུ་སུམ་ཆ་སྤྲོ་བ་ནི༔ ངན་སོང་གནས་སུ་སྐྱེ་བར་ངེས༔ ཞེས་སོ༔

གཉིས་པ་སྐྱེ་གནས་ངན་པའི་རྟགས་དང་ལྡན་ན༔ དེ་ཉིད་སྦྱངས་བའི་ཐབས་ལ༔ རང་གཞན་གཉིས་ལས༔ དང་པོ་རང་གིས་སྦྱངས་བ་ནི༔ འཕོ་བ་ཡིན་ཏེ༔ དེ་ལ་ཡེ་ཤེས་གསལ་སྟོན་གྱི་རྒྱུད་ལས༔ རབ་ནི་ཆོས་སྐུ་དག་ལ་འཕོ༔ འབྲིང་ནི་གཟུགས་སྐུ་དག་ལ་འཕོ༔ ཐ་མ་ཞིང་ཁམས་དག་དུ་འཕོ༔ ཞེས་གསུམ་དུ་གསུངས་བས་འདིར་ཡང་སྤྱིར་རྣམས་རབ་འབྲིང་ཐ་མ་གསུམ་དུ་ཡོད་པ་ལས༔ རབ་ནི༔ སྤྱིར་དབང་བཞི་རང་རང་གི་ལྟ་བའི་ངང་དུ་འཕོ་བ་ཡིན་ལ༔ འདིར་ནི་དབྱིངས་རིག་གཉིས་ལས་དབྱིངས་ལ་འཕོ་བ༔ འཆི་སྦྱང་གིས་དེ་ལྟར་ཁྲེགས་ཆོད་ཙམ་གྱི་ངོ་སྐལ་དུ་ཡིན་ཏེ༔ དེའི་ཚུལ་གཙོ་ཆེ་བ་ནི༔ བར་དོའི་རྒྱུད་ལས༔ ཆོས་ཉིད་མི་འགྱུར་ནམ་མཁའ་ལ༔ རང་བཞིན་མེད་པར་རྟོགས་པ་ན༔ སངས་རྒྱས་ཆོས་སྐུའི་སྙིང་པོ་ཐོབ༔ འཆི་བ་དབུགས་ཀྱི་བར་དོ་རུ༔ ཆོས་རྣམས་ཐམས་ཅད་དྲན་མི་བྱ༔ དྲན་རྟོགས་མེད་པའི་ནམ་མཁའ་ལ༔ དམིགས་པ་མེད་པར་སང་ངེ་བཞག༔ བག་ཆགས་མི་གཡོ་ཡེ་ཤེས་ཏེ༔ རང་བཞིན་མེད་པར་རྟོགས་གྱུར་ན༔ སངས་རྒྱས་ཀུན་གྱི་སྙིང་པོ་ཐོབ༔ ཆོས་རྣམས་ནམ་མཁའི་རང་བཞིན་ལ༔ མཚན་མའི་རྣམ་རྟོག་ཅི་ཤར་ཡང་༔ རྟོག་མེད་ནམ་མཁའི་ངང་དུ་བསྒོམ༔ ཆོས་རྣམས་ཐམས་ཅད་ལྟ་བས་གཅོད༔ ལུས་ངག་སྤྱོད་པ་ཆེན་པོ་དེ༔ ལུས་ཀྱི་སྡུག་བསྔལ་ཐམས་ཅད་བྱུང་ཡང་༔ རིག་པས་ཤེས་པ་དེ་དག་ཀུན༔ རིག་མེད་དབུགས་ཀྱི་རྟ་ཕོ་ལ༔ རྣམ་རྟོག་བཅས་ཏེ་མཁའ་ལ་བཞག༔ རྣམ་རྟོག་བསྐྱེད་མི་ཡིད་ཡིན་པས༔ ཡིད་ཀྱིས་ཡེ་ཤེས་མིང་མེད་བསྒོམ༔ ལོ་དང་བསྐལ་བ་མང་པོ་རུ༔ ཉོན་མོངས་བག་ཆགས་མང་ཡོད་ཀྱང་༔ བར་དོའི་ཡེ་ཤེས་སྐད་ཅིག་ལ༔ གསལ་བས་ཐམས་ཅད་དག་པར་བྱེད༔ འཆི་ཁའི་ཡེ་ཤེས་རྟོག་དྲག་ན༔ གོང་གི་རྣམ་རྟོག་ཉོན་མོངས་ཀུན༔ ཡེ་ཤེས་སྐད་ཅིག་གཅིག་གིས་སེལ༔ འཆི་ཁའི་ཡེ་ཤེས་སྟོབས་ཞན་ན༔ ལོ་དང་བསྐལ་པའི་བག་ཆགས་ཀུན༔ དུས་དེ་ཉིད་ལ་རྫོགས་པར་སྣང་༔ ཞེས་སོ༔ འོན་ཀྱང་ཐོད་རྒལ་གྱིས་དབྱིངས་རིག་ཟུང་འཇུག་ནི༔ ལྷ་སྐུའི་མཆོག་འོད་གསལ་བ་ཡིན་པས༔ དེ་ལས་ཕུལ་དུ་བྱུང་བ་མེད་དེ༔ དེའི་སྣང་སྟོང་གི་ཆ་སོ་སོ་ནས་བཟུང་ནའང་༔ རིག་སྟོང་ཤེས་རབ་རང་བྱུང་སྒྲོན་མ་ཁྲེགས་ཆོད་མཐར་ཐུག་ལ་འཕོ་བ་ནི་ཡེ་ཤེས་དང་༔ དེའི་གདངས་དབྱིངས་དང་ཐིག་ལེའི་སྣང་བ་ཐོད་རྒལ་གྱི་ཆ་ལས་ལྷ་སྐུར་ཉིད་ལ་འཕོ་བ་སྟེ༔ སྣང་སྟོང་གི་ལམ་གཉིས་ཟུང་འཇུག་དུ་བསྒོམ་ནའམ༔ ཡང་ན་ཐོད་རྒལ་རྐྱང་པའང་འདིའི་རང་ལམ་གྱི་ནི་བསྐྱེད་རྫོགས་ཀྱང་ཡིན་ནོ༔ དེ་ལྟར་འཕོ་བའི་ཚུལ་ཡང་༔ ཉི་ཟླ་ཁ་སྦྱོར་ལས༔ དེ་ཚེ་བླ་མའི་གདམ་ངག་རྣམས༔ རང་གི་རྒྱུད་ལ་འདྲེས་པར་བྱ༔ དོན་འདི་རྣམས་ཀྱིས་གསལ་ཡང་གདབ༔ དེ་ཚེ་སྐྱེས་བུ་སྐལ་ལྡན་དེ༔ སྣང་བ་ཉིད་ནི་རང་གསལ་ལ༔ མི་གནས་ཤེས་པ་རང་སོ་ཞེས༔ རླུང་བཞི་རིམ་གྱིས་ཞི་ནས་ཀྱང་༔ རླུང་ཆེན་དག་གིས་བསྐྱོད་པའི་ཚེ༔ ཡུལ་དང་གནས་ལ་འཇུག་པ་དང་༔ སྐུ་དང་ཡེ་ཤེས་འཇུག་ལུགས་བསྟན༔ ཞེས་རིག་པ་མིག་ལ་གཏད༔ མིག་དང་ཤེས་པ་བར་སྣང་ལ་གཏད༔ དབྱིངས་དང་རིག་གདངས་གང་རུང་ལ་འཕོ་བ་སྟེ༔ དེ་ཉིད་ལས༔ སྐུ་དང་ཡེ་ཤེས་འཇུག་ལུགས་ནི༔ རིག་པ་འདི་ལྟར་གཏད་པར་བྱ༔ ཕུང་པོ་སེང་གེ་ཉལ་ལུགས་ཀྱིས༔ རིག་པ་ཉིད་ནི་མིག་ལ་གཏད༔ ཡུད་ཙམ་བར་སྣང་ལམ་དུ་བྱ༔ དབྱིངས་དང་རིག་པ་མ་འགྱུར་ན༔ མི་དེ་བར་དོ་མེད་པར་ནི༔ སངས་རྒྱས་ས་ལ་ཐེ་ཚོམ་མེད༔ ཞེས་སོ༔ འཕོ་བའི་དེ་ནི་འདུན་པ་འཕོ་བ་དང་༔ འདི་ནི་དབྱིངས་རིག་མི་འགྱུར་བའི་ངང་ལ་མཉམ་པར་འཇོག་པ་རྒྱས་སྤྲོས་ཀྱི་ཁྱད་པར་ལས་བཟློས་སོ༔ འདི་ལ་དབྱིངས་རིག་རང་སོ་ལ་བཞག་པ་ཞེས་སུ་བྱའོ༔ གལ་ཏེ་དེ་ལ་དབྱིངས་རིག་མི་འགྱུར་བའི་རང་གདངས་མ་རྙེད་ན་ནི༔ ཆོས་ཉིད་བར་དོའི་སྒྲ་འོད་ཟེར་གསུམ་གྱིས་རིག་པའི་རང་སྣང་ལ་བཙན་ས་བཟུང་བའི་འདུན་པ་དང་བཅས་ཏེ༔ སངས་རྒྱས་སྐུ་གསུམ་གྱི་སུན་མ་འོང་བའི་འོད་དང་ཡེ་ཤེས་རྣམས་ཡིད་བྱེད་ཅིང་བསྒོམ་པས་གྲོལ་བ་ཐོབ་པའང་༔ ཁ་སྦྱོར་ལས༔ གལ་ཏེ་དབྱིངས་རིག་མི་གསལ་ན༔ ཆོས་ཉིད་བདེན་པའི་བར་མ་དོར༔ རིག་པའི་སྣང་བ་གཟུང་བའི་ཕྱིར༔ སྔར་བསྟན་འོད་རྣམས་ཡིད་ལ་བྱ༔ དེས་ནི་བདེན་པའི་སྣང་བ་ཐོབ༔ ཞེས་དང་༔ བར་དོའི་རྒྱུད་ལས༔ སྔར་རྣམ་རྟོག་བསྐྱེད་མི་ཡིད་ཡིན་པས༔ ཞེས་གསུངས་པའང་ཁྲེགས་ཆོད་པས་འདི་དང་མཐུན་པར་བསྒོམ་ཚུལ་གྱི་རང་ལམ་ཡིན་ནོ༔

གཉིས་པ་འབྲིང་གིས་ནི༔ སྟོང་དང་སྙིང་རྗེ༔ བསྐྱེད་དང་རྫོགས་པ༔ སྒྱུ་ལུས་དང་འོད་གསལ་གྱི་བསྒོམ་པ་ཡིད་ལ་བྱེད་བའི་བསྲེ་འཕོ་ནི༔ བསྐྱེད་རྫོགས་ཟུང་འཇུག་གི་འཕོ་བ་གཞན་གྱི་ཚུལ་ལོ༔ གསུམ་པ་ཐ་མས་ནི༔ སྤྲུལ་སྐུ་ཚད་མེད་ཐུགས་རྗེས་འཕོ་བ་ཞེས་དམིགས་འདུན་དང་བཅས་པ་སྟེ༔ དེ་ལ་ཐེག་པ་སོ་སོ་དང་རྒྱུད་ཐ་དད་ཀྱི་དགོངས་པ་མང་ནའང་༔ འདིར་ཁ་སྦྱོར་ལས༔ ཡུལ་གནས་དག་ལ་འཇུག་ལུགས་ནི༔ གྲོང་འཕོ་གྲོང་འཇུག་གདམས་པ་སྟེ༔ རྣམ་ཤེས་རླུང་ཞོན་རླུང་ལ་སྦྱང་༔ དེ་ཡང་གོང་དུ་འབྱོངས་པ་གཅེས༔ རིག་པ་སྡུད་དང་འཕང་བ་གཅེས༔ དེ་ཡང་ཧིག་གིས་འཕང་པའོ༔ དེ་ཉིད་བླ་མའི་ཞལ་ལ་ཐུག༔ ཅེས་སོ༔ དེ་ལ་རྒྱུད་ཀྱི་བབ་མཐུན་གཙོ་བས་གསང་ལམ་ལ་འཕོ་བ་ཞེས་བྱ་བར་གནད་ཀྱི་གདམས་ངག་སྐོར་གསུམ་ལས་བཤད་པ་ལྟར་རོ༔ འདི་ཡང་འཕོ་ཁྲིད་ཀྱི་ནང་ནས༔ ཆོས་ཉིད་བར་དོའི་ནང་ཚན་གྱིས༔ ལྟ་བའི་འཕོ་བར་བཤད་ཀྱང་༔ ལྟ་བ་ལ་རྒྱས་འདེབས་སམ༔ སྟོང་འདེབས་ཙམ་ལས་ལྟ་བ་དངོས་ཀྱི་ངང་ལ་བཙན་ས་ཉིན་པ་ནི་མ་ཡིན་པས་འདིར་སྤྲུལ་སྐུར་བཤད་ཀྱང་ཤིན་ཏུ་འབྲེལ་ཆགས་སོ༔

དེ་ལྟ་ན་གསེབ་ལམ་ནས་འཕོ་བ་ནི༔ སྟོང་ལམ་ ༼ ཁྲེགས་ཆོད། ༽གྱི་དང་༔ གསང་ལམ་ ༼ ཐོད་རྒལ། ༽ ན་ནས་འཕོ་བ་ནི་སྣང་ལམ་གྱི་སྐལ་བར་ཐེམ་ཐང་དུ་འགྲོའོ༔ འདིར་གྲོལ་བའི་གདམས་པ་ནི༔ འཕོ་བ་ཡེ་ཤེས་གསང་ལམ་ནས་བར་དོ་ཟང་ཐལ་རྒྱབ་ཆོས་འདོན་ཆོག་དང་བཅས་པ་ལྟར་རོ༔ གཉིས་པ་གཞན་གྱིས་སྦྱངས་པ་ནི༔ འཆི་ཁ་དང་༔ རོ་དང་༔ དེ་མེད་པའི་རྗེས་སུ་སྦྱངས་པ་དང་གསུམ་ལས༔ དང་པོ་ནི༔ བླ་མའམ་མཆེད་གྲོགས་ཀྱིས་སྦྱངས་པ་སྟེ༔ བར་དོའི་རྒྱུད་ལས༔ རང་ཉིད་རྨུགས་པར་གྱུར་བ་ལ༔ ཁྱད་པར་ཅན་གྱི་བླ་མས་སྦྱངས༔ ལྟ་བ་བསྒོམ་པ་སྤྱོད་པ་ཡིས༔ སྦྱངས་ཏེ་ལམ་ལ་འཇུག་པར་བྱ༔ ཞེས་སོ༔ དེ་ཡང་མ་དག་འཁོར་བའི་སྒོ་དགུ་པོ་ཡི་གེ་ཨ་ཡིས་དགག་པ་སྟེ༔ པདྨ་འཁྱིལ་བའི་རྒྱུད་ལས༔ སྐྱེ་བའི་སྒོ་ཨས་ཁ་ཁོག་ཅིག༔ ཅེས་གསུང་པ་འདི་ནི་རང་གཞན་གཉིས་ཀའི་སྦྱངས་པ་ལ་འཇུག་སྟེ༔ གཞན་གྱིས་སྦྱངས་པའི་ཚེ་ན༔ ཉི་ཟླ་ཁ་སྦྱོར་ལས༔ དེ་དག་རྗེས་སུ་བཟུང་བའི་ཕྱིར༔ གནས་ནི་རིམ་པར་དྲངས་བའི་ཕྱིར༔ ཡི་གེ་ཨ་ཡི་སྦྱོར་བ་ཡིས༔ དབུགས་དང་དེ་ཡི་གྲངས་དང་སྦྱར༔ གལ་ཏེ་དེ་བར་མ་ཤི་ན༔ སྤྱི་བོར་ཁ་གཏད་དབུགས་ཀྱིས་ནི༔ ཤེས་པ་ལུས་ཀྱི་དཀྱིལ་དུ་ཡང་༔ ཨ་ནི་དམིགས་ཏེ་བསྡུ་བར་བྱ༔ ཞེས་ཕ་རོལ་པོ་དང་གཞན་དོན་བྱེད་པའི་གང་ཟག་གཉིས་ཀའི་མི་དེའི་རྣམ་ཤེས་ཨ་དཀར་པོར་དམིགས་ཏེ༔ བཟླས་ནས་དབུགས་འགྲོ་དུས་སྤྱི་བོར་ཁ་གཏད་ནས་ཨ་ཉེར་གཅིག་བརྗོད་པས་མཐོ་རིས་སུ་འདྲོང་པར་གསུངས་པ་དང་༔ གནད་གཅིག་པར་རང་ངམ་ ༼ གཤིན་པོ། ༽ གྲོགས་ཀྱི་མཛུབ་མོ་གཡོན་པའི་པྲེ་ག་ལ་ཡི་གེ་ཨཱ་གཅིག་བསམ་ནས༔ གཤིན་པོར་ཆས་པ་དེའི་སྣ་བུག་གཡོན་དགག་པར་བྱའོ༔ དེའི་དུས་སུ་གསལ་གདབ་པ་ནི༔ མ་དག་འཁོར་བའི་སྒོ་དགུ་ཡི་གེ་ཨས་དགག་པར་བསྒོམ་དུ་གཞུག་པ་དང་༔ ཡི་གེ་དེ་བྲིས་ལ་སྒོ་དགུར་གདགས་པ་དང་ ༼ གཞན་དོན་བྱེད་པོ་གང་ཟག་གིས། མཆན། ༽ བསམ་པར་ཡང་བྱ་སྟེ༔ དེའི་སྤྱི་བོར་ཚངས་པའི་ཐད་ནས་སྐྲ་ཚོམ་གཅིག་ལ་གཟུངས་ཐག་གདགས་པའམ་ཡང་ན་སྣ་བུག་གཡས་འབྱུང་བའི་ལམ་ཡིན་པས་དེའི་ཐད་དུ་བཟུང་ནས་༔ ༼ འདྲེན་པ་པོ། ༽བདག་གསང་ཆེན་རིགས་གཅིག་གི་ལྷ་རྡོར་སེམས་སོགས་གང་རུང་དུ་བསྐྱེད་པས་སྲིན་ལག་ལ་གཟུངས་ཐག་དཀར་དམར་མཐིང་ཀ་སུམ་བསྒྲིལ་གྱི་སྣེ་བཏགས་ཏེ༔ དེ་ནས་ལྷའི་སྔགས་ཀྱི་སྙིང་པོའམ་ཨཱ་དེ་སྟོང་བཟླས་པའི་སྒྲ་ཡིས་བོས་པ་དང་མཉམ་དུ་ཁོའི་རྣམ་ཤེས་ཧཱུྃ་དུ་གྱུར་པ་སྤྱི་གཙུག་ནས་གཟུངས་ཐག་ལ་བརྒྱུད་དེ༔ བདག་ལྷར་གསལ་བའི་ཐུགས་ཀར་ཐིམ་པར་གཉིས་ཀས་བསམ་ནས་ཀྱང་༔ སངས་རྒྱས་ཐམས་ཅད་ཀྱི་ཐུགས་ཡེ་ཤེས་ལྔ་ལྡན་གྱི་རང་བཞིན་སྐྱེ་མེད་སྤྲོས་པ་དང་བྲལ་པ་ཨ་དོན་རང་བྱུང་གི་ཡེ་ཤེས་ལ་མཉམ་པར་བཞག་པས༔ གྲོལ་བ་ཐོབ་པའང་༔ པདྨ་འཁྱིལ་བའི་རྒྱུད་གསང་བ་ལས༔ རང་ངམ་གྲོགས་ཀྱི་མཛུབ་མོ་གཡོན་པའི་བྲེ་ག་ལ་ཡི་གེ་ཨཱ་གཅིག་བསམ་ནས་གཡོན་དགག་པར་བྱའོ༔ དེའི་དུས་སུ་ཕྱིར་མི་ལྡོག་པའི་གདམས་ངག་དྲན་པར་བྱའོ༔ བྱང་ཆུབ་སེམས་དཔའ་ཁྱོད་ལམ་དུ་འཇུག་པའི་ཚེ༔ གསང་བ་སྒོ་དགུའི་ནང་དགུ་ལ༔ ཡི་གེ་མ་བུའི་སྦྱོར་བས་དགག༔ གསང་བའི་སྒོ་དགུའི་གནད་དགུ་ནི༔ སྙིང་ག་ལྐོག་མའི་ཁ་ཕྱོགས་དང་༔ མིག་གཉིས་དང་ནི་རྣ་བ་དང་༔ ནོར་བུ་སྣ་ཡི་རྩེ་མོ་རུ༔ སྔགས་བྲིས་པས་ནི་དགག་པར་བྱ༔ བསམ་པར་བྱ་བ་དོན་ལ་གསུངས༔ ད་ནི་གསང་བའི་སྒོ་གསུམ་དབྱེ༔ འཇུག་པ་དེ་ཡི་འཐོར་ཏོ་ནས༔ ཚངས་པའི་སྐུད་པ་སུམ་བསྒྲིལ་ལ༔ བདག་ཉིད་ལྷ་ཡི་སྲིན་ལག་ལ༔ བཏགས་ཏེ་སྔགས་འདི་སྟོང་བཟླས་ནས༔ བཅུ་གཉིས་བཅུ་གཉིས་ཕྱི་སྒོ་ནས༔ བདག་ཉིད་ཡེ་ཤེས་སེམས་དཔའ་ཉིད༔ མེ་ལོང་ལྟ་བུའི་གཟུགས་བརྙན་ནི༔ ཨོཾ་བཛྲ་ས་ཏྭ་ཧཱུྃ༔ གསུང་གི་སྒྲ་ཡིས་བོས་པའི་ཚེ༔ བདག་དང་གཉིས་མེད་ཐུགས་ཀར་ཐིམ༔ སྐྱེ་བ་མེད་པའི་ལམ་བསྟན་པའོ༔ མཇུག་གི་ཧཱུྃ་ནི་ཨཱ་རུ་ཐིམ༔ ཨ་ནི་སྐྱེ་མེད་ཆོས་ཀྱི་སྐུ༔ ཆོས་ཉིད་རྣམ་དག་ངང་དུ་བསྟིམ༔ དེ་ལ་གཉེན་པོས་བཤིག་ཏུ་མེད༔ དེ་ནི་ཡང་དག་རྫོགས་པའོ༔ འཆི་ཀ་མ་ལས་ཀྱི་རིན་པོ་ཆེ་རིག་པ་ལུ་གུ་རྒྱུད་དུ་དྲངས་པའོ༔ ཞེས་སོ༔ དེ་དག་ནི་ཆོས་འདིའི་སྒོ་མ་མཐོང་བ་དང་༔ མཐོང་ཡང་བརྟན་པ་མ་ཐོབ་པ་གཉིས་ཀའི་ཐུན་མོང་ཡིན་ལ༔ ཁྱད་པར་དུ་ལམ་འདིར་ཞུགས་ནས་གོམས་ཆ་རེ་ཡོད་པ་ལ་ནི༔ སུན་མ་གསུམ་གྱི་དུས་སུ་སྐྱེལ་མ་གསུམ་གྱི་ཕན་གདགས་པའི་ཕྱིར༔ བླ་མའམ་གྲོགས་ཀྱི་མགྲོན་པོ་ལ་བརྒལ་ལ་ཚངས་སྤྲུག་སུ་གདབ་པ་ནི༔ ཉི་ཟླ་ཁ་སྦྱོར་ལས༔ གལ་ཏེ་དེ་དག་མི་གསལ་ན༔ རང་གི་བླ་མ་གནས་པ་ན༔ གོང་གི་མན་ངག་གསལ་ཡང་གདབ༔ བླ་མ་མེད་ན་རྡོ་རྗེ་སྤུན༔ ཤེས་པའི་གསལ་ཡང་གདབ་པར་བྱ༔ ཞེས་པ་ལྟར་བྱ་བ་ལ༔ སུན་མ་གསུམ་ནི༔ སྤྱིར་བར་དོ་སྐུ་གསུམ་གྱི་སྣང་བའང་ཡིན་ལ༔ ཁྱད་པར་འདིའི་སྐབས་སུ་སུན་མ་གསུམ་ནི་སྐུའི་སུན་མ་སྣང་སྲིད་ཐམས་ཅད་འོད་ཁ་དོག་ལྔ་རུ་འཆར་རོ༔ གསུང་གི་སུན་མ་སྒྲ་རུ་འཆར་རོ༔ ཐུགས་ཀྱི་སུན་མ་ཟེར་དུ་འཆར་རོ༔ དེ་རྣམས་སྐུ་གསུང་ཐུགས་སུ་ངོ་ཤེས་པར་བྱས་པས༔ རིག་པ་རང་འོད་གཉིས་སུ་མེད་པར་ཐིམ་པ༔ དཔེར་ན་ཆུ་དང་འོ་མ་འདྲེས་ཙ་ན་ཆུ་ཡང་འོ་མའི་རང་བཞིན་འགྱུར་བས༔ དེ་ལྟར་རིག་པ་འོད་གསལ་དུ་ཐིམ་ནས་སངས་རྒྱའོ༔ སྐྱེལ་མ་གསུམ་ནི༔ སྔར་ཉམས་སུ་བླངས་པའི་སྐྱེལ་མ༔ ཉམས་གདངས་སུ་ཚུད་པའི་སྐྱེལ་མ༔ འཆི་ཁར་གྲོགས་སམ་རང་གི་གསལ་ཐེབས་པའི་སྐྱེལ་མ་སྟེ༔ འདི་ནི་འཕོ་བའི་དུས་ཐམས་ཅད་ལ་དགོས་པ་ཡིན་ཏེ༔ བསྟན་བུ་ལས༔ འཕོ་བའི་དུས་དེ་རྣམས་སུ་སྐྱེལ་མ་གསུམ་དང་ལྡན་པར་བྱས་ཏེ༔ སུན་མ་གསུམ་གྱི་སྟེང་དུ་འཕོའོ༔ དེ་ནི་རང་གི་རིག་པའི་འོད་གསལ་གཉིས་སུ་མེད་པར་ཐིམ་ནས༔ སྐྱེ་མེད་ཆོས་ཀྱི་སྐུར་སངས་རྒྱའོ༔ ཞེས་སོ༔ གདབ་ཚུལ་ནི༔ ཕ་རོལ་པོ་དབུགས་དང་བྲལ་ལ་ཁད་པ་དེའི་སྒོ་ཁ་སྣ་གསུམ་དང་༔ གདབ་མཁན་གྱི་སྒོ་གསུམ་སྤྲད་ཏེ༔ འཇམ་རླུང་ཨོཾ་ཨཱཿགཉིས་དང་༔ དམིགས་མེད་ཀྱི་ངང་དུ་འཕང་བ་གསུམ་པོ་དེའི་དབུགས་བསུས་ནས་ཚུར་རྔུབ་དུས་གསུམ་ག་ལ་ཁོའི་ཤེས་པ་ཧཱུྃ་མཐིང་ཀ་གསུམ་དུ་བསམ་སྟེ༔ ཚུར་དྲངས་ནས་རང་གི་རིག་པ་དང་དབྱེར་མེད་དུ་བསྲེས་ནས་སྟོང་ཉིད་ཀྱི་དོན་ལ་མཉམ་པར་བཞག་པས༔ རྣལ་འབྱོར་རྟོགས་པ་མཆོག་ལྡན་ཡིན་ན༔ གཞི་རང་བཞིན་དང་རྟོགས་པ་མངོན་གྱུར་བའི་བདེན་པ་ནང་འཕྲད་དེ་གྲོལ་བའམ༔ པདྨ་འཁྱིལ་བའི་རྒྱུད་ལས༔ རིག་པ་ལུ་གུ་རྒྱུད་དུ་དྲངས་བ་ནི༔ གང་ཞིག་གནས་ནས་ཐོན་པའི་ཚེ༔ སྒོ་གསུམ་སྒོ་གསུམ་སྒོ་སྤྲད་དེ༔ དབུགས་ཏེ་ཧཱུྃ་རེས་རྔུབ་པར་བྱ༔ མཇུག་ཏུ་ཧཱུྃ་ནི་ཨཱ་ལ་ཐིམ༔ ཨཱ་ནི་སྐྱེ་མེད་ཆོས་ཀྱི་སྐུ༔ ཆོས་ཉིད་རྣམ་དག་ངང་དུ་བསྟིམ༔ ཞེས་སོ༔ ཁ་སྦྱོར་ལས༔ དེ་ཉིད་ཐུགས་རྗེས་བཟུང་བའི་ཕྱིར༔ སྒོ་གསུམ་སྒོ་གསུམ་སྒོ་སྤྲད་དེ༔ དབུགས་ནི་རྔུབ་དང་བསྡུད་དང་འཕང་༔ ཡི་གེ་འབྲུ་གསུམ་གཞུག་པས་ནི༔ ལུས་ངག་ཡིད་གསུམ་སྟོབས་བསྐྱེད་ཕྱིར༔ དབུགས་དང་བཅས་ཏེ་མཁས་པས་བྱ༔ ཞེས་སོ༔ མིན་ཡང་ཤི་བ་སླར་ལོག་ནས་གདམས་ངག་ལ་ཉན་པར་དབང་བའི་རྟགས་སུ༔ མིག་དང་ཤེས་པ་གྲུང་བའི་ཧར་ལང་ནུས་པ་སོགས་བྱུང་ན་འདི་ལྟར་གདབ་པར་བྱ་སྟེ༔ སྨྱུག་སྦུབས་ལས༔ ཀྱེ་རིགས་ཀྱི་བུ་མ་ཡེངས་བར་ཉོན་ཅིག༔ ཆོས་ཉིད་ཀྱི་བར་དོ་ལ༔ འོད་དང་༔ ཟེར་དང་༔ སྒྲའི་སྣང་བ་གསུམ་འབྱུང་སྟེ༔ འོད་ནི༔ དབུགས་ཆད་པའི་དུས་སུ༔ སྣང་སྲིད་ཐམས་ཅད་ཁ་དོག་ལྔ་རུ་འཆར་ཏེ༔ བསམ་གཏན་གྱི་ཞག་གསུམ་གནས་སོ༔ འོད་ཀྱི་ཟེར་ནི་གདམས་ངག་མ་བསྟན་པ་ལ་ཟེར༔ མཚོན་ཆ་བཏབ་པ་ལྟ་བུར་སྣང་ངོ་༔ དེ་ལ་མ་འཇིགས་ཤིག༔ དེ་རང་འོད་དུ་ངོ་ཤེས་པས་ཆོག་གོ༔ བཏབ་པ་ལ་རྡོ་རྗེའི་བུ་ག་ཁོང་སེང་དུ་འོང་ངོ་༔ སྒྲ་ནི་ཕལ་བ་ལ་འཇིགས་པའི་སྒྲ་ཐོས༔ རྣལ་འབྱོལ་བ་ལ་ཆོས་ཉིད་ཀྱི་སྒྲ་ཐོས༔ དེ་ལ་མ་འཇིགས་ཤིག་དེ་ཆོས་ཉིད་ཀྱི་རང་སྒྲར་ངོ་ཤེས་པའི་ངང་དུ་བཙན་ས་ཟུངས་ཤིག༔ འོད་ཀྱི་སྙིང་པོ་ནི་སྐུ་དང་ཞིང་ཁམས་སུ་སྨིན་པར་འགྱུར་གྱིས༔ ཀྱཻ་རིགས་ཀྱི་བུ་གང་ཞིག་ཕུང་པོ་ལྷག་མ་མེད་པར་སངས་རྒྱ་བར་འདོད་པས་འདི་ལྟར་ཤེས་པར་བྱའོ༔ རང་གི་སྙིང་ནང་ན་འོད་ཁ་དོག་ལྔའི་དཀྱིལ་ན་སངས་རྒྱས་རྒྱལ་བ་རིགས་ལྔའི་སྐུ་ཚོམ་བུའི་དཀྱིལ་འཁོར་བཅས་པ་སྐུ་ཉུང་འབྲུ་ལ་སྤྱན་ཕུལ་ཐག་ཙམ་སྣ་ཚོགས་གཅེར་བུར་བཞུགས་སོ༔ སྐུ་དེ་ཡང་ངོ་བོ་གསལ་བ་ཟང་ཐལ་བ་འཛིན་རྟོག་དང་བྲལ་བའི་ཡེ་ཤེས་སུ་བཞུགས་སོ༔ དེ་ལྟར་རང་གི་སྙིང་གི་ནང་ནས་སངས་རྒྱས་ཀྱི་སྐུ་ཡུངས་འབྲུ་ཙམ་བཞུགས་ཤིང་འཁྲུལ་སྣང་འགགས་པའི་དུས་སུ་སྐུ་ཆེན་པོ་ནམ་མཁའི་མཐའ་དང་མཉམ་པ༔ འབྲིང་པོ་རི་རབ་ཙམ་གྱིས་ཁེངས་ནས་རང་འཆར་རོ༔ དེ་ལ་མ་འཇིགས་ཤིག༔ དེ་ངོ་ཤེས་པས་ཆོག་གོ༔ རང་གི་རིག་པ་འོད་ལྔ་དང་འདུ་འབྲལ་མེད་པར་འགྲོགས་པ་ཡིན་ནོ༔ རིགས་ཀྱི་བུ་སངས་རྒྱས་ཀྱི་སྐུ་རང་ལ་ཡོད་པས་གཞན་དུ་མ་ཚོལ་ཞིག༔ སངས་རྒྱས་འོད་ལྔའི་ལུས་སུ་བཞུགས་ནས་གསལ་འགྲིབ་དང་བྲལ་ལོ༔ སངས་རྒྱས་གྱི་སྐུ་ལ་འགྱུར་བ་མེད་པས་སྐྱེ་འཆི་དང་བྲལ་ལོ༔ ལུས་གནས་ལ་སངས་རྒྱས་བཞུགས་པ་རྟེན་དང་བྲལ་བས་ཁྱོད་ལ་མངོན་སུམ་དུུ་སྣང་བ་ཡིན་ཏེ༔ མ་འཇིགས་ཤིག༔ མ་སྔངས་ཤིག༔ མ་སྐྲག་པར༔ སངས་རྒྱས་ཐམས་ཅད་རང་ངོ་ཤེས་པས་སངས་རྒྱས་པས་དཀའ་ཐུབ་དང་བྲལ་ལོ༔ དེས་ན་ཁྱོད་ཀྱང་མི་འགྱུར་པ་གསེར་གྱི་ཐུར་མས་ཐབས་མཆོག་ཏུ་དྲན་པར་གྱིས་ལ༔ རང་གདེངས་ཆོས་ཤིག༔ རང་ས་ཟུངས་ཤིག༔ ཀ་དག་ཏུ་སྐྱོལ་ཅིག༔ ཕྱིར་མི་ལྡོག་པར་བག་སྐྱོངས་ཤིག༔ ཅེས་བརྗོད་པའམ༔ ཡང་ན་པདྨ་འཁྱིལ་བའི་རྒྱུད་ལས༔ རིགས་ཀྱི་བུ་ནམ་འཆི་ཀ་མའི་དུས་ཀྱི་ཚེ༔ སངས་རྒྱས་ཉག་ཅིག་རྗེས་སུ་དྲན་པར་གྱིས་ཤིག༔ སྐྱེ་བའི་སྒོ་ཨས་ཁ་ཁོག༔ གཟུང་འཛིན་ཞིང་ཁམས་ལ་སྦྱོར་ཞིག༔ ཡི་གེ་གསུམ་གྱི་དོན་ཁོང་དུ་ཚུད་ཅིག༔ ལམ་འབྱུང་བའི་ཚེ་རི་དྭགས་ལྟ་བུར་ཤེས་པར་བྱའོ༔ རིགས་ཀྱི་བུ་བར་མ་དོའི་ཤེས་པ་ལ་བདུད་ཀྱི་བསླུ་བ་བཅོ་བརྒྱད་འབྱུང་ངོ་༔ སྒྱུ་ལུས་ཀྱི་ཕུང་བོ་ཨ་ལ་ཟློག་ཅིག༔ རྣམ་པར་རྟོག་པ་ཧཱུྃ་ལ་ཟློག་ཅིག༔ སྣང་བའི་སྤྱོད་ཡུལ་ཐམས་ཅད་རང་བྱུང་གི་ཡེ་ཤེས་ལ་ཟློག་ཅིག༔ རིག་པ་ཤེས་རབ་ཆེན་པོ་ལ་ཟློག་ཅིག༔ ཤེས་རབ་ཀྱི་མདངས་བག་ཆགས་ཀྱི་གཉིད་སད་པར་བྱའོ༔ འོད་སྣང་བའི་དུས་སུ་ཕྱིར་མི་ལྡོག་བའི་གདམས་ངག་སྨྲས་པ༔ རིགས་ཀྱི་བུ་ཡེ་ཤེས་ཀྱི་བདེན་པ་མཐོང་བའི་དུས་སུ༔ ཤེས་རབ་མཁའ་ལས་གསལ་བའི་དུས་ན༔ འུབ་ཆུབ་ཏིང་ངེ་འཛིན་གྱི་རྒྱས་ཐོབ་ཅིག༔ ཡེ་ཤེས་ལྔའི་འོད་སྣང་བའི་དུས་སུ༔ རིན་པོ་ཆེ་ཨའི་རྒྱས་ཐོབ་ཅིག༔ སངས་རྒྱས་ཀྱི་ཞིང་ཁམས་སྣང་བའི་དུས་སུ༔ རྡོ་རྗེ་ལྟ་བུའི་ཏིང་ངེ་འཛིན་གྱི་རྒྱས་ཐོབ་ཅིག༔ ཅེས་གསུངས་པ་ལྟར་བརྗོད་པར་བྱའོ༔ དེ་ལྟར་དགོངས་པའི་ངང་ལ་བཞག་པ་དང་༔ རང་དང་གཞན་གྱི་བསྲེ་འཕོ་དང་སྦྱངས་བ་རྣམས་ཀྱི་ཚུལ་ཡང་༔ ཀློང་ཆེན་རབ་འབྱམས་ཀྱི་རྒྱུད་ལས༔ གལ་ཏེ་དེ་དག་མི་གསལ་ན༔ རང་གི་བླ་མ་བཞུགས་ན་རབ༔ བླ་མ་མེད་ན་རྡོ་རྗེའི་སྤུན༔ ལྟ་སྤྱོད་མཐུན་ཞིང་དམ་གཙང་པས༔ ཤེས་པ་གསལ་ཡང་གདབ་པར་བྱ༔ གལ་ཏེ་ཕྱི་དབུགས་ཆད་ན་ནི༔ རླུང་སྦྱངས་འཕོ་བའི་གནད་བྱས་ཏེ༔ གདམས་པ་བཏབ་པས་ངེས་པར་ཐེབས༔ གདམས་པའི་གནད་ནི་འདི་ལྟར་གདབ༔ ཕུང་པོ་སེང་གེའི་ཉལ་ལུགས་བཅོས༔ རིག་པ་ཉིད་ནི་མིག་ལ་གཏད༔ ཡིད་དང་ཤེས་པ་བར་སྣང་ལ༔ དབྱིངས་དང་རིག་པ་མི་འགྱུར་གཏད༔ ས་ལེ་ཧྲིག་གེ་སང་ངེ་བཞག༔ སྒྲ་རྣམས་ཐམས་ཅད་རང་གི་སྒྲ༔ འོད་ཟེར་ཐམས་ཅད་རང་གི་འོད༔ སྣང་བ་ཐམས་ཅད་རང་སྣང་ངོ་༔ གསལ་སྟོང་འཛིན་པ་མེད་པའོ༔ དབྱིངས་དང་རིག་པ་མ་འགྱུར་ན༔ མི་དེ་བར་དོ་མེད་པར་འགྱུར༔ གལ་ཏེ་དབྱིངས་ཉིད་མ་གསལ་ན༔ བླ་མས་བར་དོའི་འོད་སྣང་རྣམས༔ ཡང་ཡང་སྤྱི་བོར་ཁ་གཏད་བཤད༔ བཏགས་གྲོལ་རྒྱུད་དང་གདམས་པ་རྣམས༔ རྣ་བར་སྦུ་གུ་བཅུག་ལ་བཤད༔ དེས་ནི་བརྟན་པ་ཐོབ་པར་འགྱུར༔ ཞེས་སོ༔

གཉིས་པ་རོ་ལ་སྦྱངས་པ་ནི༔ གཞན་ན་ཐུགས་རྗེས་ཟླ་བའི་སྟོད་ཆ་བཏགས་པ་དེའི་ཁྲུས་ལུང་གིས་ཐེར་ཞིང་༔ གསུམ་པ་རྗེས་ལ་སྦྱངས་པ་ནི༔ དེ་དང་བཅས་པས་རིགས་དྲུག་གི་མཎྜལ་བཀོད་དེ༔ ཚེ་ཁྲུས་གནས་གསུམ་གྱི་ལུང་མཐར་ཕྱིན་པས༔ དབང་བསྐུར༔ ཟད་གཏད༔ ལམ་བསྟན༔ གནས་སྤར་གྱི་ཆོ་ག་ལ་སོགས་པ༔ རབ་བདུན་ཚན་བདུན་དུ་བགོས་ཏེ༔ བར་དོའི་ཚེ་ཚད་འབྲིང་ཡིན་པ་དང་༔ བདུན་མཚམས་ནས་འཆི་ཆུང་ཡོད་པའི་ཕྱིར་འཇིགས་པ་དེ་ལས་སྐྱོབས་པའི་དགོས་པའང་ཡོད་དོ༔ དགེ་སྟོབས་འདེགས་པས་དེ་ཚུན་ཐུང་པ་དང་༔ མི་དགེ་བའི་ལས་འགའ་ཞིག་གིས་རིང་བའང་སྲིད་པས༔ འབྲིང་མཐའ་གཉིས་ཀས་ཀྱང་བདུན་ཚན་གཉིས་གསུམ་ཚུན་ངེས་པར་གལ་ཆེ༔ ཡང་རབ་ཀྱིས་ནི་ལོ་ཟླ་མང་བོའི་བར་ཚད་བཟུང་དུ་མེད་པས་དགེ་རྩས་ཀྱང་ཕན་པ་རྒྱ་ཆེའོ༔ ཡང་ན་ས་བཅད་དེ་གཉིས་ཀ་ཆིངས་གཅིག་གིས་འོང་བའང་༔ འདི་ལྟར་ཡང་ན་རང་ཉིད་ཀུན་ཏུ་བཟང་པོར་གསལ་བའི་ཐུགས་ཀའི་ཧཱུྃ་གི་འོད་ཟེར་ཞིག་འཕྲོས་པས་ཚེ་འདས་ཀྱི་རྣམ་ཤེས་ནྲཿཡིག་གི་རྣམ་པ་དེ་ལ་ཕོག་པས་ཨཱ༔ དཀར་པོ་གཅིག་ཏུ་གྱུར་ནས༔ མདུན་དུ་བཀུག་སྟེ་རོའམ་རུས་པ་མིང་བྱང་དྲི་གོས་ཀྱི་རྟེན་དག་ལ་བསྟིམས་པས༔ དེ་ཉིད་ཚེ་འདས་དངོས་སུ་གསལ་བའི་སྙིང་ཀ་ལ༔ སླར་ཡང་ཐུགས་ཀའི་ཕཊ༔ ཡིག་འོད་ཟེར་དང་བཅས་པ་ཐིམ་པས་སེམས་ཀྱི་སྒོ་ཕྱེས༔ མ་རིག་ཉོན་ཤེས་དང་གནས་རིས་ཀྱི་སྒྲིབ་པ་གཤེད་ལྕགས་ལོག་འདྲེན་དང་བཅས་པ་གཏོར་ཞིང་འགས་བའི་ལས་རྣམས་བྱས་ནས་ཆོས་ཉན་པའི་རང་དབང་ཐོབ་པར་བསམ་ཞིང་༔ སླར་ཡང་ཨཱཿཡི་ཁྲུས་ལུང་ཧཱུྃ་གིས་དབང་བསྐུར༔ ཕཊ་ཀྱིས་གནས་སྤར་དང་བཅས་པས་རྣམ་ཤེས་སྐྱེ་མེད་ཆོས་ཀྱི་སྐུའི་རང་བཞིན་ལ་རྒྱས་གདབ་པའི་མན་ངག་གི་ཆོ་ག་ཟུར་པ་ལ་ཡང་མདོར་འདུས་པ་སྟེ༔ སྲིད་པ་བར་དོའི་རྒྱུད་ལས༔ སྟོན་པས་སྟོན་པ་ཀུན་བཟང་གིས༔ ཚེ་འདས་རིགས་ཀྱི་བུ་དེ་ཡང་༔ དྲི་མ་རུས་པའི་རྟེན་དག་ལ༔ རིན་ཆེན་དར་དང་ཚོན་སྐུད་ཀྱིས༔ ལེགས་པར་རིགས་དྲུག་སྙིང་པོ་དགོད༔ ཡི་གེ་ཨཱཿཧཱུྃ་ཕཊ་དག་གི༔ རྒྱ་ཡིས་གདབ་སྟེ་གུར་ཆེན་དབུས༔ ཉོན་མོངས་སྦྱངས་ཕྱིར་བཀུག་ལ་བསྟིམ༔ ཡེ་ཤེས་ཕྱག་རྒྱ་ཀུན་བཟང་གིས༔ ཐུགས་ཀྱི་ཡི་གེ་ཧཱུྃ་བཏོན་ནས༔ ཨཱཿཡིས་བསྟིམ་སྟེ་ཕཊ་ཀྱིས་སྤར༔ ཕཊ་ཀྱི་འོད་ཟེར་ནག་པོ་ཡིས༔ ཉོན་མོངས་སྦྱངས་པས་ཡི་གེ་གསལ༔ ཡེ་ཤེས་དེ་ཡི་བྱིན་རླབས་ལས༔ བྱང་ཆུབ་སེམས་དེ་ཡི་གེ་ཨཱ༔ དམིགས་པ་མེད་པའི་ཆོས་ཉིད་བསྒོམ༔ དེ་ཡི་ཁྱད་པར་ཡོན་ཏན་ལ༔ ཉོན་མོངས་སྦྱངས་ཏེ་ཡེ་ཤེས་གསལ༔ རང་བཞིན་མེད་པས་ཆོས་སྐུ་ཐོབ༔ ཞེས་སོ༔

གསུམ་པ་ཆོས་ཉིད་སྐུ་གསུམ་གྱི་བར་དོ་༴ སོགས་ནས། འགལ་བའང་མེད་དོ༔ རབ་འབྱམས་ལས༔ ཆོས་ཉིད་བར་དོ་ཞེས་བྱ་བ༔ དེ་དུས་རླུང་གི་རྣམ་ཤེས་ལ༔ ཐིམ་པས་ནང་དབུགས་ཆད་པར་འགྱུར༔ རྣམ་ཤེས་ནམ་མཁའ་ལ་ཐིམ་པས༔ ལུས་དང་སེམས་ཀྱི་འབྲེལ་བ་ཆད༔ དབུགས་ནི་བར་སྣང་ཁམས་སུ་ཡལ༔ ལུས་པོ་བེམ་པོར་ལང་གིས་འགྲོ༔ རིག་པ་མེ་སྟག་ཡལ་བ་ལྟར༔ འོད་གསལ་ཆོས་ཉིད་ས་རུ་སླེབ༔ ཞེས་སོ༔ གཉིས་པ་གཞི་སྣང་༴ སོགས་ནས། དེའི་འོད་གསལ་གྱི་བར་དོ་བཤད་དོའི་བར་ཁ་སྦྱོར་ལས༔ དེ་ནས་བཅོམ་ལྡན་འདས་ཀྱིས་མི་སྣང་བ་རབ་ཏུ་འབྱེད་པའི་ཏིང་ངེ་འཛིན་ལས་བཞེངས་ནས་བཀའ་སྩལ་པ༔ ཀྱེ་མ་མི་རྟོག་ཐུབ་པ་ཆེན་པོ་ཉོན་ཅིག༔ དེ་ལྟར་ཚེ་ཡི་འདུ་བྱེད་བྱས་པ་ཐམས་ཅད་ལ་ཆོས་ཉིད་ཀྱི་བར་མ་དོ་ཞེས་བྱ་བ༔ འདི་ལྟར་སྣང་བ་འདི་ནུབ་སྟེ༔ ཕུང་པོ་མེད་ཅིང་ཟག་བཅས་བྲལ༔ སྣང་བ་ཐམས་ཅད་བདེ་བའི་ཞིང་༔ རང་སྣང་དག་པའི་སྐུར་སྣང་སྟེ༔ ཆོས་ཉིད་ཞིང་ཁམས་སྣང་བ་ལ༔ རང་སྣང་དག་པའི་སྐུར་སྣང་སྟེ༔ འདི་ལ་ཐེ་ཚོམ་སུས་ཟ་བ༔ རྒྱལ་བ་རྣམས་ཀྱི་སྐུ་ལ་བསྒྲིབ༔ ཅེས་གསུངས་སོ༔ ཡང་གསོལ་བ༔ ཀྱེ་བཅོམ་ལྡན་འདས་དེ་ལྟ་བུའི་སྣང་བ་དེ་རང་ཅི་ལྟ་བུ་བདག་ལ་གསུངས་དང་༔ ཡང་བཀའ་སྩལ་པ༔ ཀྱེ་མི་རྟོག་ཐུབ་པ་ཆེན་པོ་ཁྱོད་ཉོན་ཅིག༔ རང་བཞིན་དག་པའི་སྣང་བ་འདི་ལྟ་སྟེ༔ སྐྱེས་བུ་རྣམས་ཀྱི་རྣམ་པར་ཤེས་པ་འོད་གསལ་ལ་ཐིམ་པ་ཞེས་བྱ་སྟེ༔ དབུགས་ཕྱི་ནང་གི་འགྲུལ་ཐག་ཆད་མ་ཐག་ཏུ༔ རང་གི་རྣམ་གྱི་ཆ་ལས་དངོས་པོར་སྣང་བ་མེད་དེ༔ ཡོད་སྙམ་པའི་ཤེས་པ་ནི་འབྱུང་ངོ་༔ རྡོས་བཅས་ཀྱི་ལུས་ནི་མི་སྣང་སྟེ༔ འོད་ཀྱི་ལུས་སུ་སྣང་བའོ༔ དེའི་ཚེ་དབང་པོའི་སྤྱོད་ཡུལ་དུ་གྱུར་ཚད་ཙམ་འོད་ཟེར་ལྔའི་དཀྱིལ་འཁོར་དུ་སྣང་བའོ༔ དེ་ཡང་སྣང་བ་དེ་དག་ནི་ཕྱི་ནས་བལྟས་ན་ནང་གསལ་བ༔ ནང་ནས་བལྟས་ན་ཕྱི་གསལ་བ་༔ ཕྱི་ནང་མེད་པ་ཀུན་ཏུ་ཟང་ཐལ་བ༔ ལྟེམ་བཞིན་པ༔ མེར་བཞིན་པ༔ མནན་ན་ནེམ་སྙམ་པ༔ བཏེགས་ན་འཕར་བ་སྙམ་པ༔ ཤིན་ཏུ་ཡིད་འཕྲོག་པ༔ ཁ་དོག་གསལ་བ་ལ༔ སོ་སོར་མ་འདྲེས་པར་རང་གསལ་པ༔ ཆ་མཉམ་པ་ལ་གསལ་བའི་ཆ་མ་འགགས་པ༔ ཡང་དག་པར་བལྟས་ན་ཤིན་ཏུ་ཕྲ་བ་དང་༔ འགྱུ་བ་དང་༔ འགུལ་བ་ལྟ་བུ་དང་༔ འཕྲིག་པ་ལྟ་བུ་དང་༔ རབ་ཏུ་འཚེར་བ་ལས་ལྷུན་བརྗིད་པའོ༔ ཤིན་ཏུ་རྒྱ་ཆེ་ལ་དཔག་པའམ་དམིགས་སུ་མ་ཚུད་པ༔ དཔང་མཐོ་ལ་རྩེ་མོ་ཡངས་པ་ཞེས་བྱ་སྟེ༔ དཀྱིལ་འཁོར་ཐམས་ཅད་ཀྱི་འབྱུང་གནས་སུ་བཞུགས་པའོ༔ དེ་ཡང་ཁ་དོག་ནི་ལྔ་སྟེ༔ དཀར་པོ་རང་ས་ནི་གསལ་བ་ལ་ཟེར་འཕྲོ་བ་དང་༔ དེ་བཞིན་དུ་སེར་བོ་རང་ས་ན་གསལ་བ་ལ་ཟེར་འཕྲོ་བ་དང་༔ དམར་པོ་རང་ས་ན་གསལ་བ་ལ་ཟེར་འཕྲོ་བ་དང་༔ ལྗང་གུ་ཉིད་རང་ས་ན་གསལ་བ་ལ་ཟེར་འཕྲོ་བ་དང་༔ གདན་ནི་དེ་བཞིན་དུ་མཐིང་ག་ཉིད་རང་ས་ན་གསལ་བ་ལ་ཟེར་འཕྲོ་བ་སྟེ༔ དེ་དག་རེག་ལ་མ་འབྱར་བར་སོ་སོར་ཁ་དོག་རང་གསལ་བ་དང་༔ ཤིན་ཏུ་ལྷུན་སྡུག་པར་གནས་སོ༔ ཞེས་དང་༔ རབ་འབྱམས་ལས༔ ནམ་མཁའ་འོད་གསལ་ལ་ཐིམ་པས༔ ཕྱི་ཡི་ས་རྡོ་རི་བྲག་འགག༔ ནང་དུ་འོད་གསལ་ཆོས་ཉིད་འཆར༔ སྔར་གྱི་ལུས་ཀྱི་བག་ཆགས་ཀྱིས༔ རྡོས་བཅས་ལུས་འདི་མི་སྣང་ཡང་༔ ཡོད་དོ་སྙམ་པའི་ཤེས་པས་འབྱུང་༔ སྟེང་འོག་ཕྱོགས་མཚམས་མ་ལུས་ཀུན༔ བར་མཚམས་མེད་པ་འོད་ལྔའི་ཞིང་༔ ཕྱི་ནས་བལྟས་པས་ནང་ཡང་གསལ༔ ནང་ནས་བལྟས་པས་ཕྱི་ཡང་གསལ༔ ལྟེམ་ལྟེམ་བཞིན་ནམ་མེར་མེར་བཞིན༔ མནན་ན་ནེམ་ནེམ་བྱེད་པ་སྙམ༔ བཏེགས་ན་འཕར་བར་སྙམ་པ་དང་༔ ཤིན་ཏུ་ཡིད་དུ་འོང་བ་དང་༔ ཁ་དོག་ལྔ་རུ་གསལ་བ་དང་༔ འཕྲ་བ་འགུལ་བ་འཕྲིག་པ་དང་༔ གསལ་འཚེར་ལྷུན་སྡུག་གཟི་བརྗིད་འཕྲོ༔ རྒྱ་ཆེ་ཁོག་ཡངས་དཔང་མཐོ་བ༔ རྩེ་མོ་ཡངས་བ་ཞེས་བྱ་སྟེ༔ བྱས་པ་མེད་པར་རང་བྱུང་བཞུགས༔ ཞེས་སོ༔

ད་ནི་ཟུང་འཇུག་གི་བར་དོ་༴ ནས། མཉམ་པར་སྣང་ངོའི་བར་དེ༔ མན་ངག་སྙིང་དགོངས་ལས༔ རྒྱལ་བ་འོད་ཀྱི་ཕུང་པོ་ཆེན་པོ་དཀྱིལ་འཁོར་ཆེན་པོ༔ འདབ་མ་བཞི་བ་ལྟེ་བ་དང་ལྔའི་ཚུལ༔ མེ་མར་སྟོང་པ་བཏེགས་པ་ལྟ་བུ༔ ཉི་མ་འབུམ་པས་ ༼ ལས་དཔྱད། ༽ ལྷག་པའི་པདྨའི་དབུས་ལྟེ་བ་ལ༔ རིག་པ་ངོ་བོ་སྟོང་པའི་ངོས་ནས་ཆོས་ཀྱི་དབྱིངས་ཀྱི་ཡེ་ཤེས༔ ཡེ་ཤེས་དེའི་རང་གདངས་འོད་ཁ་དོག་མཐིང་གར་གསལ་ལོ༔ དེའི་འབྲས་བུ་གཟུགས་བརྙན་ཤར་བའི་སྐུ༔ བཅོམ་ལྡན་འདས་དཔལ་རྣམ་པར་སྣང་མཛད༔ ཆོས་ཉིད་མི་འགྱུར་བའི་རྟགས་སུ༔ སྐུ་མདོག་མཐིང་ག༔ དོན་གྱི་དགོངས་པ་ཆོས་ཉིད་སྐྱེ་བ་མེད་པའི་ཀློང་དུ་འདུས་པའི་རྟགས་སུ༔ བྱང་ཆུབ་མཆོག་གི་ཕྱག་རྒྱ་ཅན༔ ཐུགས་རིག་པའི་ཡེ་ཤེས་མ་རིག་པ་གཅོད་བའི་བརྡ་རུ༔ ཕྱག་མཚན་འཁོར་ལོ་བསྣམས་པ༔ ཡོན་ཏན་རིན་པོ་ཆེ་དུ་མས་སྤྲས་པའི་བརྡ་རུ༔ རིན་པོ་ཆེ་མཛེས་པའི་རྒྱན་གྱིས་སྤྲས་པ༔ སྐུ་ལ་རྩལ་གསུམ་རྫོགས་པའི་རྟགས་སུ་སེང་གེའི་གདན་ནོ༔ སྐུ་ལ་ཉོན་མོངས་པའི་སྐྱོན་གྱིས་མ་གོས་པའི་རྟགས་སུ་པདྨའི་གདན༔ དེའི་སྟེང་དུ་ཐབས་ཤེས་རབ་འདུ་འབྲལ་མེད་པའི་བརྡ་རུ༔ ཉི་མ་དང་ཟླ་བའི་གདན་ལ་བཞུགས་སོ༔ འཁོར་ནི་ཚད་མེད་པ་བཞི་དང་ལྡན་པའི་བརྡ་རུ༔ རིགས་བཞིའི་སངས་རྒྱས་ཀྱིས་བསྐོར་ཏེ༔ སྐུ་མཆོག་དགོངས་པ་བརྡ་ཡིས་མཚོན་པ༔ ཚོམ་བུའི་དཀྱིལ་འཁོར་དུ་གསལ་ལོ༔ ཞེས་སོ༔

གཉིས་པ་སྐུ་ཞི་བའི་དཀྱིལ་འཁོར་ནས་སྣང་ངོའི་བར་རོ༔ སྙིང་དགོངས་ལས༔ ཤར་གྱི་པདྨའི་འདབ་མ་ལ༔ རིག་པ་རང་བཞིན་གསལ་བ་ལ་མེ་ལོང་ལྟ་བུའི་ཡེ་ཤེས༔ ཡེ་ཤེས་དེའི་རང་གདངས་འོད་ཁ་དོག་དཀར་པོ་གསལ་ལོ༔ དེའི་འབྲས་བུ་གཟུགས་བརྙན་ཤར་བའི་སྐུ༔ བཅོམ་ལྡན་འདས་དཔལ་རྡོ་རྗེ་སེམས་དཔའ༔ ཆོས་ཀྱི་སྐུ་དྲི་མ་མེད་པའི་བརྡ་རུ༔ སྐུ་མདོག་དཀར་པོ༔ ས་ཡོངས་སུ་རྫོགས་ཤིང་ནོན་པའི་བརྡ་རུ་ས་གནོན་གྱི་ཕྱག་རྒྱ༔ ཐུགས་རིག་པའི་ཡེ་ཤེས་ལས་འགྱུར་བ་མེད་ཅིང་༔ སྐུ་ལྔ་ཡེ་ཤེས་ལྔ་དང་ལྡན་བའི་བརྡ་རུ༔ ཕྱག་མཚན་རྡོ་རྗེ་རྩེ་ལྔ་པ་བསྣམས་པའོ༔ ཐབས་ཤེས་རབ་འདུ་འབྲལ་མེད་པའི་བརྡ་རུ༔ ཡུམ་སངས་རྒྱས་སྤྱན་དང་གཉིས་སུ་མེད་པ༔ སྐུ་རྡོ་རྗེའི་སྐྱིལ་མོ་ཀྲུང་དུ་བཞུགས་ཤིང་༔ མཚན་དང་དཔེ་བྱད་ཀྱིས་བརྒྱན་པའོ༔ གདན་ནི་ཆོས་ཉིད་མི་འགྱུར་བའི་རྟགས་སུ་གླང་པོ་ཆེའི་གདན་ནོ༔ དེའི་སྟེང་དུ་ཉོན་མོངས་སྐྱོན་གྱིས་མ་གོས་པའི་བརྡ་རུ༔ པདྨའི་གདན་དང་ཉི་ཟླའི་གདན་ལ་བཞུགས་སོ༔ དེ་ཡང་རྡོ་རྗེ་སེམས་དཔའ་ཡབ་ཀྱི་ཐབས་འགག་པ་མེད་པའི་ཡེ་ཤེས་ཀྱི་ཆ་འཛིན་པའི་གཉིས་སུ་ཤར༔ དེ་ཡང་ས་ཡི་སྙིང་པོ་གཡས་ན་བཞུགས་བྱམས་པ་མེ་ཏྲི་གཡོན་ན་བཞུགས་སོ༔ ཡུམ་སངས་རྒྱས་སྤྱན་གྱི་ཤེས་རབ་འགྱུར་བ་མེད་པའི་ཆོས་ཉིད་ཀྱི་མཚན་ཉིད་འཛིན་པ་སེམས་མ་གཉིས་སུ་ཤར་ཏེ༔ ལཱ་སྱ་སྒེག་མོ་མདུན་བཞུགས་སོ༔ པུཥྤེ་མ་རྒྱབ་ན་བཞུགས་སོ༔ ཚོམ་བུའི་དཀྱིལ་འཁོར་དུ་རང་གསལ་ལོ༔ ཞེས་སོ༔

གསུམ་པ་ལ་ཡོན་ཏན་ཞི་བའི་དཀྱིལ་འཁོར་༴ ནས། སྣང་ངོ་བར༔ སྔ་མ་ལས༔ ལྷོའི་པདྨའི་འདབ་མ་ལ༔ རང་རིག་པ་གསལ་སྟོང་གཉིས་སུ་མེད་པ་ལ༔ མཉམ་པ་ཉིད་ཀྱི་ཡེ་ཤེས༔ ཡེ་ཤེས་དེའི་རང་གདངས༔ འོད་ཁ་དོག་སེར་བོ་རུ་གསལ་ལོ༔ དེའི་འབྲས་བུ་གཟུགས་བརྙན་གྱི་སྐུ་རུ་གསལ་བ༔ བཅོམ་ལྡན་འདས་དཔལ་རིན་ཆེན་འབྱུང་ལྡན་དུ་གསལ་ཏེ༔ དེ་ཡང་རིན་པོ་ཆེ་དུ་མས་རྒྱས་པའི་རྟགས་སུ༔ སྐུ་མདོག་སེར་པོ༔ འགྲོ་བ་སེམས་ཅན་ལ་ཐུགས་རྗེ་འབྱུང་བའི་རྟགས་སུ༔ མཆོག་སྦྱིན་གྱི་ཕྱག་རྒྱ་ཅན༔ རིག་པ་རང་བྱུང་གི་ཡེ་ཤེས་ལ༔ ཡོན་ཏན་ཕྱོགས་མེད་དུ་འབྱུང་བའི་བརྡ་རུ༔ ཕྱག་མཚན་ནོར་བུ་རིན་པོ་ཆེ་བསྣམས་པའོ༔ ཐབས་ཤེས་རབ་འདུ་འབྲལ་མེད་པ་མཚོན་པའི་བརྡ་རུ༔ ཡུམ་མཱ་མ་ཀཱི་དང་གཉིས་སུ་མེད་པར་བཞུགས་པའོ༔ གདན་ནི་འཁོར་བའི་ཆོས་ཉིད་ཀློང་དུ་གྲོལ་བའམ༔ བསྐྱོད་པའི་བརྡ་རུ༔ རྟ་མཆོག་བསྣོལ་བའི་གདན་ནོ༔ སྐྱོན་གྱིས་མ་གོས་པའི་རྟགས༔ པདྨའི་གདན་ནོ༔ དེ་ཡང་ཡབ་ཀྱི་འགག་པ་མེད་པའི་ཡེ་ཤེས་ཀྱི་ཆ་འཛིན་པ༔ སེམས་དཔའ་གཉིས་སུ་ཤར་ཏེ༔ སེམས་དཔའ་ཀུན་དུ་བཟང་པོ་གཡས་ནའོ༔ ནམ་མཁའི་སྙིང་གཡོན་ནའོ༔ ཡུམ་གྱི་ཤེས་རབ་འགྱུར་བ་མེད་པའི་ཆ་འཛིན་པ་མཱ་ལེ་མེ་ཏོག་གི་ཕྲེང་བ་ཅན་མདུན་ན༔ དྷུཔྤེ་མ་རྒྱབ་ནའོ༔ ཚོམ་བུའི་དཀྱིལ་འཁོར་རང་གསལ་ལོ༔ ཞེས་སོ༔ བཞི་བ༔ གསུང་ཞི་བའི་དཀྱིལ་འཁོར་༴ནས། སྣང་ངོ་བར༔ སྙིང་དགོངས་ལས༔ ནུབ་ཀྱི་པདྨ་རིག་པའི་ཤེས་རབ་འགག་པ་མེད་པའི་སོ་སོར་རྟོགས་པའི་ཡེ་ཤེས༔ ཡེ་ཤེས་དེའི་རང་གདངས༔ འོད་ཁ་དོག་དམར་པོ་གསལ་ལོ༔ དེའི་འབྲས་བུ་གཟུགས་བརྙན་དུ་ཤར་བའི་སྐུ༔ བཅོམ་ལྡན་འདས་དཔལ་སྣང་བ་མཐའ་ཡས་སུ་གསལ་ཏེ༔ ཐུགས་རྗེ་འགྲོ་བའི་དོན་ལ་ཆགས་པའི་བརྡ་རུ༔ སྐུ་མདོག་བྱེ་རུའི་མདོག་ལྟར་དམར་པོ་གསལ་ལོ༔ དོན་གྱི་དགོངས་པ་ཆོས་ཉིད་ངང་ལ་གནས་པའི་བརྡ་རུ༔ མཉམ་བཞག་གི་ཕྱག་རྒྱ་ཅན༔ ཐུགས་རིག་པའི་ཡེ་ཤེས་ལ་རྟོག་པ་ཉོན་མོངས་པའི་སྐྱོན་གྱིས་མ་གོས་བའི་བརྡ་རུ༔ ཕྱག་མཚན་པདྨ་བསྣམས་པའོ༔ ཐབས་ཤེས་རབ་འདུ་འབྲལ་མེད་པའི་བརྡུ་རུ༔ ཡུམ་གོས་དཀར་མོ་དང་གཉིས་སུ་མེད་པའོ༔ གདན་ནི་འགྲོ་བའི་དོན་མཛད་པ་ལ་མཛེས་པའི་བརྡ་རུ༔ རྨ་བྱ་བསྣོལ་བའི་གདན་ནོ༔ དེའི་སྟེང་དུ་འཁོར་བའི་ཉོན་མོངས་པའི་སྐྱོན་ཀྱིས་མ་གོས་པའི་བརྡ་རུ་པདྨའི་གདན་ནོ༔ ཐབས་ཤེས་རབ་གཉིས་སུ་མེད་པའི་བརྡ་རུ༔ ཉི་ཟླའི་གདན་ནོ༔ དེ་ཡང་སྐུ་སྐྱིལ་ཀྲུང་༔ མཚན་དང་དཔེ་བྱད་ཀྱིས་བརྒྱན་པ༔ ཡབ་ཀྱི་ཐབས་འགག་པ་མེད་པའི་བརྡར༔ སེམས་དཔའ་གཉིས་སུ་ཤར་ཏེ༔ འཇམ་དཔལ་གཡས་ནའོ༔ སྤྱན་རས་གཟིགས་གཡོན་ནའོ༔ ཡུམ་གྱི་ཤེས་རབ་འགྱུར་བ་མེད་པའི་ཆ་འཛིན་པ་གཉིས་སུ་ཤར་ཏེ༔ ཨཱ་ལོ་ཀེ་སྣང་གསལ་འབུལ་བ་མདུན་ནའོ༔ གཱིརྟི་སྒྲའི་མཆོད་པ་འབུལ་བ་རྒྱབ་ནའོ༔ ཚོམ་བུའི་དཀྱིལ་འཁོར་དུ་རང་གསལ་ལོ༔ ཞེས་སོ༔

ལྔ་པ་ཕྲིན་ལས་ཞི་བའི་དཀྱིལ་འཁོར་༴ ནས། སྣང་ངོ་བར་དེ༔ ཡང་སྔ་མ་ལས༔ བྱང་གི་པདྨའི་འདབ་མ་ལ༔ ཤེས་བྱའི་ཐོགས་པ་མེད་པའི་བྱ་བ་གྲུབ་བའི་ཡེ་ཤེས༔ ཡེ་ཤེས་དེའི་རང་གདངས༔ འོད་ཁ་དོག་ལྗང་གུ་རུ་གསལ་ལོ༔ དེའི་འབྲས་བུ་གཟུགས་བརྙན་གྱི་སྐུར་ཤར་བ༔ བཅོམ་ལྡན་འདས་དཔལ་དོན་ཡོད་གྲུབ་པ༔ སྐུ་མདོག་ལྗང་གུར་གསལ་ལོ༔ ཐུགས་རྗེས་སེམས་ཅན་གྱི་དོན་ལ་སྐྱོབ་པའི་བརྡ་རུ༔ རིན་པོ་ཆེའི་རྒྱན་དུ་མས་བརྒྱན་པའོ༔ མཚན་སུམ་ཅུ་རྩ་གཉིས་དང་༔ དཔེ་བྱད་བཟང་པོ་བརྒྱད་ཅུས་བརྒྱན་པ༔ གདན་ནི་སྐྱོན་གྱིས་མ་གོས་པ་པདྨའི་གདན་དང་༔ ཐབས་ཤེས་རབ་འདུ་འབྲལ་མེད་པ་ཉི་ཟླའི་གདན་ནོ༔ འགྲོ་བའི་དོན་ཐོགས་པ་མེད་པ་མཛད་པའི་བརྡ་རུ༔ ཤང་ཤང་བསྣོལ་བའི་གདན་ནོ༔ དེ་ཡང་ཡབ་དོན་ཡོད་གྲུབ་པ་འགག་པ་མེད་པའི་བརྡ༔ སེམས་དཔའ་གཉིས་སུ་ཤར་ཏེ༔ ཕྱག་ན་རྡོ་རྗེ་གཡས་ན་དང་༔ སྒྲིབ་པ་རྣམ་སེལ་གཡོན་ནའོ༔ ཡུམ་ཤེས་རབ་འགག་པ་མེད་པའི་ཆ་འཛིན་པ༔ སེམས་མ་གཉིས་སུ་ཤར་ཏེ༔ དེ་ཡང་ནིརྟི་མ་སྒྲའི་མཆོད་པ་འབུམ་བ་མདུན་ན༔ གནྡྷེ་མ་དྲིའི་མཆོད་པ་འབུལ་བ་རྒྱབ་ནའོ༔ ཚོམ་བུའི་དཀྱིལ་འཁོར་དུ་རང་གསལ་ལོ༔ ཞེས་སོ༔ རིགས་ལྔ་རེ་རེའི་མཐའ་༴ ནས། ཞག་སྟེ་འཆར་རོའི་བར༔ དེ་ཉིད་ལས༔ ཀྱེ་གསང་བའི་བདག་པོ༔ ཚད་མེད་པ་བཞིའི་རང་བཞིན་ལས༔ སྒོ་བ་བཞིར་ཡང་སྣང་སྟེ༔ རྣམ་རྒྱལ་ཤར་ན༔ གཤིན་རྗེ་གཤེད་པོ་ལྷོ་ན༔ རྟ་མགྲིན་ནུབ་ན༔ བདུད་རྩི་འཁྱིལ་པ་བྱང་ནའོ༔ དེའི་ཡུལ་བཞི་ལ་སྒོ་མ་བཞིར་ཡང་སྣང་སྟེ༔ ལྕགས་ཀྱུ་མ་ཤར་ན༔ ཞགས་པ་མ་ལྷོ་ན༔ ལྕགས་སྒྲོགས་མ་ནུབ་ན༔ དྲིལ་བུ་མ་བྱང་ནའོ༔ དེ་མཐར་ཕྱིན་པའི་བརྡ་རུ༔ ཕ་རོལ་ཏུ་ཕྱིན་པ་དྲུག་དང་ཡང་ལྡན་ཏེ༔ ཐུབ་པ་དྲུག་ཏུ་གསལ་ལོ༔ དེའི་ཐབས་ཤེས་རབ་མ་འགགས་པས༔ ཡབ་ཀུན་ཏུ་བཟང་པོ༔ ཡུམ་ཀུན་ཏུ་བཟང་མོ་གསལ་ལོ༔ ཆོས་སྐུར་སྟོང་ཆ་ལ་ཞི་བའི་ལྷ་ཚོགས་སུ་གསལ་ལོ༔ ཞེས་སོ༔ དེ་དག་ཀྱང་ཐིག་ལེ་གསང་བའི་རྒྱུད་ལས༔ འོད་གསལ་ཡེ་ཤེས་སྒྱུ་མའི་སྦུབས༔ དབུགས་ཆད་ཡེ་ཤེས་འཆར་དུས་ན༔ ལྔ་ལྡན་བདེ་གཤེགས་སྣང་བ་འཆར༔ རྡོ་རྗེ་དབྱིངས་ཀྱི་དཀྱིལ་འཁོར་གྱི༔ རིགས་ལྔའི་འོད་གསལ་ཚོམ་བུ་ལྔ༔ རྣམ་སྣང་ཡབ་ཡུམ་དབུས་གནས་པས༔ རིགས་བཞི་ཡབ་ཡུམ་ཕྱོགས་བཞིར་བྱུང་༔ ཚོམ་བུའི་དཀྱིལ་འཁོར་དང་པོ་ལ༔ རྡོ་རྗེ་སེམས་དཔའ་སངས་རྒྱས་སྤྱན༔ ས་སྙིང་སྒེག་མོ་བྱམས་པ་དང་༔ མེ་ཏོག་བཞིས་བསྐོར་ཚོམ་བུ་གཉིས༔ མཱ་མ་ཀཱི་དང་རིན་འབྱུང་ལ༔ ནམ་སྙིང་ཕྲེང་བ་ཀུན་བཟང་དང་༔ སྤོས་མ་བཞིས་བསྐོར་ཚོམ་བུ་གསུམ༔ སྣང་བ་མཐའ་ཡས་གོས་དཀར་མོ༔ སྤྱན་རས་གླུ་མ་འཇམ་དཔལ་དང་༔ མར་མེ་བཞིས་བསྐོར་ཚོམ་བུ་བཞི༔ དོན་ཡོད་དམ་ཚིག་སྒྲོལ་མ་ལ༔ ཕྱག་རྡོར་གར་མ་སྒྲིབ་སེལ་དང་༔ དྲི་ཆབ་བཞིས་བསྐོར་ཚོམ་བུ་བཞི༔ འགྲོ་དྲུག་འདུལ་བའི་ཐུབ་པ་དྲུག༔ ཚད་མེད་བཞིས་འདུལ་སྒོ་བ་བཞི༔ མཐའ་བཞི་ལས་གྲོལ་སྒོ་མ་བཞི༔ དབྱིངས་དང་ཡེ་ཤེས་མི་འབྲལ་བ༔ ཀུན་བཟང་ཡབ་དང་ཡུམ་དུ་གནས༔ དཀར་དང་དམར་དང་སེར་དང་ལྗང་༔ འཁོར་ལོ་རྡོ་རྗེ་རིན་ཆེན་པད༔ རྒྱ་གྲམ་ཐུགས་ཀྱི་དགོངས་ནས་གསལ༔ མཚན་དཔེ་ཚུལ་དགུའི་བཞུགས་གདན་བཅས༔ སྣང་མེད་མཁའ་ལ་འཇའ་ཚོན་དགུ༔ བརྗོད་མེད་སྤྲོས་བྲལ་ཀློང་དུ་ཤར༔ ཞེས་དང་༔ གཉིས་པ་ལོངས་སྐུ་ཁྲོ་བོའི་༴ སོགས་ནས། ཞག་གཅིག་ལ་སྣང་ངོའི་བར༔ ཡང་དེ་ཉིད་ལས༔ ཀྱེ་གསང་བའི་བདག་པོ༔ རང་གི་སེམས་གློ་བ་ནས་འཐོན་ནས༔ དབུགས་སྣ་སྒོར་ཆད་པའི་ཚེ༔ ཆོས་ཉིད་དག་པའི་སྣང་བ་ཕྲ་ལ་དྭངས་པ༔ གསལ་ལ་འཚེར་བ༔ རང་བཞིན་བཀྲག་པ༔ མཛེས་པའི་འོད་ཟེར་ཕྱོགས་བཅུར་འཕྲོ་བ༔ ཉམ་ང་བ་སོས་ཁའི་ཐང་ལ༔ སྨིག་རྒྱུ་རྒྱུ་བ་བཞིན་དུ་མེ་རེ་རེ༔ རང་སྣང་ལོངས་སྐུ་རུ་འཆར་རོ༔ དེ་ལ་མ་འཇིགས་ཤིག༔ འོད་ཀྱི་ནང་ཐམས་ཅད་ནས་ཆོས་ཉིད་ཀྱི་རང་སྒྲ་འབྲུག་སྟོང་ལྡིར་བ་ཙམ༔ སྒྲ་གྲགས་ལ་ལྡིར་ཆེ་བ༔ དི་རི་རི་བ་ཡོང་ངོ་༔ དེ་ལ་མ་དངངས་ཤིག༔ འོད་ལས་ཟེར་མཚོན་ཆའི་ཆར་བ་འབབ་པ་འདྲ་བ༔ མཚོན་ཆ་སྣ་ཚོགས་སུ་ཟིང་ཟིང་བ་ཡོད་དོ༔ དེ་ལ་མ་སྐྲག་ཅིག༔ ཀྱེ་གསང་བའི་བདག་པོ༔ ད་ལྟ་ངོ་མ་སྤྲད་ན༔ སྒོམ་སྒྲུབ་ཇི་ལྟར་བྱས་ཀྱང་༔ གདམས་པ་དང་མི་འཕྲད་པས༔ འོད་ཀྱིས་འཇིགས་སོ༔ སྒྲས་དངངས་སོ༔ ཟེར་གྱིས་སྐྲག་གོ༔ གདམས་པའི་གནད་མ་ཤེས་ན༔ སྒྲ་འོད་ཟེར་གསུམ་མ་ཤེས་ན་འཁོར་བར་འཁྱམ་མོ༔ ཀྱེ་གསང་བའི་བདག་པོ༔ བཅོམ་ལྡན་འདས་དཔལ་ཆེན་པོ་ཤྲཱི་བུདྡྷ་ཧེ་རུ་ཀ༔ སྐུ་མདོག་སྨུག་ནག་དབུ་གསུམ་པ༔ ཕྱག་དྲུག་པ༔ ཞབས་བཞི་པ༔ ཞལ་གཡས་དཀར་བ༔ ཞལ་གཡོན་དམར་བ༔ དབུས་མཐིང་ནག༔ ལོངས་སྐུ་འོད་ཀྱི་ཕུང་པོར་འབར་བ༔ སྤྱན་དགུ་སྡང་མིག་ཏུ་གཟིགས་པ༔ སྨིན་མ་གློག་བཞིན་དུ་འགྱུར་བ༔ མཆེ་བ་ཟངས་ཡག་འབར་བ༔ ཨ་ཨ་ཧ་ཧའི་རྟ་སྐད་ཅན༔ སྤྱུག་པའི་སྒྲ་ཆེན་པོ་སྒྲོགས་པ༔ དབུ་སྐྲ་དམར་སེར་གྱེན་ཞིང་འཕྲོ་བ༔ ཉི་ཟླ་དང་ཐོད་སྐམ་གྱིས་བརྒྱན་པ༔ གླང་ཆེན་གྱི་ཐོད་རློན་དང་༔ ཞིང་ཆེན་གྱི་གཡང་གཞི་དང་༔ སྟག་གི་ཤམ་ཐབས་གསོལ་བ༔ ཐལ་ཆེན་གྱི་ཚོམ་བུ་དང་༔ རཀྟའི་ཐིག་ལེ་དང་༔ བ་སུ་ཏའི་རྒྱུ་ཞགས་དང་༔ སྦྲུལ་ནག་དང་ཐོད་པ་སྐམ་རློན་གྱིས་བརྒྱན་པ༔ ཕྱག་གཡས་ཀྱི་དང་པོ་ན་རྡོ་རྗེ་འཛིན་པ༔ བར་ན་རལ་གྲི༔ ཐ་མ་ན་དགྲ་སྟྭ༔ གཡོན་གྱི་དང་པོ་ན་དྲིལ་བུ༔ བར་ན་བྷནྡྷ་དམར་གྱིས་བཀང་བ༔ ཐ་མ་ན་ཐོང་གཤོལ་བསྣམས་པ༔ རྐན་སྒྲ་དང་ཐུག་ཆོས་དང་༔ འུར་སྒྲ་འབྲུག་སྟོང་ལྡིར་བ༔ རྡོ་རྗེ་འབར་བའི་སྤུ་གསེབ་ནས་ཡེ་ཤེས་ཀྱི་མེ་འབར་བ༔ ཁྱུང་གིས་འདེགས་པའི་གདན་ལ༔ བརྐྱང་བསྐུམ་དུ་བཞུགས་པ་ཡབ་ཡུམ་ཞལ་སྦྱོར་ནས་རང་གི་ཀླད་པ་དུང་ཁང་གི་གཞལ་ཡས་ཁང་ནས་འཐོན་ནས་རང་ལ་འཆར་རོ༔ དེ་ལ་མ་འཇིགས་ཤིག༔ མ་དངངས་ཤིག༔ མ་སྐྲག་ཅིག༔ རང་གི་སངས་རྒྱས་རང་ལས་ཤར་བར་གྱིས་ཤིག༔ ཅེས་སོ༔ ཞག་གཉིས་པ་ལ་སྐུ་བཛྲ་༴ ནས། ཡོད་དོའི་བར༔ དེ་ཉིད་ལས༔ བཅོམ་ལྡན་འདས་དཔལ་བཛྲ་ཧེ་རུ་ཀ་སྐུ་མདོག་མཐིང་ནག་ཞལ་གསུམ་པ༔ ཕྱག་དྲུག་པ༔ གཡས་དཀར་བ༔ གཡོན་དམར་བ༔ དབུས་སྔོ་ནག༔ ཡུམ་བཛྲ་ཀྲོ་དྷཱི་ཤྭ་རི་མ་དང་ཞལ་སྦྱོར་ནས༔ རང་གི་ཀླད་པ་དུང་ཁང་ནས་འཐོན་ནས་རང་ལ་འཆར་རོ༔ དེ་ངོ་ཤེས་པར་གྱིས་ལ་མ་འཇིགས༔ ཞེས་སོ༔ ཞག་གསུམ་པ༴ ནས། ཡོད་དོའི་བར༔ སྙིང་དགོངས་ལས༔ ཁྲག་འཐུང་རིན་ཆེན་ཡབ་ཡུམ་སྐུ་མདོག་སེར་ནག༔ ཞལ་གསུམ་ཕྱག་དྲུག་པ༔ གཡས་དཀར༔ གཡོན་དམར༔ དབུས་སེར་ནག༔ ཡབ་ཡུམ་རང་གི་དུང་ཁང་གི་ལྷོ་ནས་འཐོན་ནས་རང་ལ་འཆར་རོ༔ དེ་ལ་མ་འཇིགས་པར་རང་གི་སངས་རྒྱས་རང་ལ་ཤར་བས་ཤེས་པར་གྱིས་ཤིག༔ ཅེས་སོ༔ དེ་ནས་ཞག་བཞི་པ་ལ ༴ ནས། ཡོད་དོ་བར༔ ཡང་སྙིང་དགོངས་ལས༔ ཁྲག་འཐུང་པདྨ་ཡབ་ཡུམ་རང་གི་དུང་ཁང་གི་ནུབ་ནས་འཆར་རོ༔ དེ་ལ་མ་འཇིགས་ཤིག༔ ཅེས་སོ༔ དེ་ནས་ཞག་ལྔ་པ༴ ནས། ཡོད་དོ་བར༔ སྔ་མ་ལས་ཁྲག་འཐུང་ལས་ཀྱི་ཡབ་ཡུམ་སྐུ་མདོག་ལྗང་ནག་དབུ་གསུམ་པ༔ ཕྱག་དྲུག་པ༔ ཞལ་གཡས་དཀར་བ༔ གཡོན་སྨུག་པ༔ རང་གི་ཀླད་པ་དུང་ཁང་གི་བྱང་ནས་འཐོན་ནས་འཆར་རོ༔ དེ་ལ་མ་འཇིགས་པར་བྲོད་པ་སྐྱེད་ཅིག༔ ཅེས་སོ༔ དེ་དག་གི་རྗེས་སུ་༴ནས་། ས་མ་ཡཱཿའི་བར༔ ཡང་སྔ་མ་དེ་ཉིད་ལས༔ རང་གི་ཀླད་པ་དུང་ཁང་ནས་ཀོའུ་རཱི་དཀར་མོ༔ གཡས་ཞིང་དབྱུག་ཐོགས་པ་གཡོན་བྷནྡྷ་དམར་གྱིས་བཀང་བསྣམས་པ༔ དུང་ཁང་གི་ལྷོ་ན་ཙོའུ་རཱི་མ་སེར་མོ་མདའ་གཞུ་འགེངས་པ་འཆར་རོ༔ དུང་ཁང་གི་ནུབ་ན་པྲ་མོ་དམར་མོ༔ གཡས་པ་ཆུ་སྲིན་གྱི་རྒྱལ་མཚན་འཛིན་པ༔ གཡོན་པ་བྷནྡྷ་དམར་གྱིས་བཀང་བ་འཆར་རོ༔ དུང་ཁང་གི་བྱང་ན་བེ་ཏཱ་ལི་ནག་མོ༔ གཡས་པ་སྡིགས་མཛུབ་ཀྱི་རྩེ་ལ་རྡོ་རྗེ་རྩེ་ལྔ་པ་འཕྱར་ཞིང་གདེང་པ༔ གཡོན་པ་བྷནྡྷ་དམར་གྱི་བཀང་བ་འཛིན་པ་འཆར་རོ༔ དུང་ཁང་གི་ཤར་ལྷོ་མཚམས་ན་པུསྐ་དམར་སེར༔ ཕྱག་གཡས་གཡོན་གཉིས་ཀྱིས་རྒྱུ་ཞགས་འདྲེན་པ་འཆར་རོ༔ དུང་ཁང་གི་ལྷོ་ནུབ་ནས་གྷསྨ་རཱི་སྐུ་མདོག་ལྗང་ནག་དུང་དམར་ཕྱག་གཉིས་ཀྱིས་བཟུང་ནས་འཐུང་བ་འཆར་རོ༔ དུང་ཁང་གི་ནུབ་བྱང་མཚམས་ནས་ཙཎྜ་ལཱི་སེར་སྐྱ་ཕྱག་གཡས་པས་ཙིཏྟ་བསྣམས་པ༔ གཡོན་པ་ཞིང་ཆུང་བཟུང་བ་འཆར་རོ༔ དུང་ཁང་གི་བྱང་ཤར་མཚམས་ན༔ སྨ་ཤ་ནི་མཐིང་ནག་ཞིང་མགོ་ལུས་ཕྲལ་ནས་སྟོབས་པ་དང་༔ གནས་ཀྱི་ཀོའུ་རི་མ་བརྒྱད་པོ་དེ༔ རང་གི་ཀླད་པ་དུང་ཁང་གི་ནང་ནས་རང་ལ་འཆར་རོ༔ དེ་ལ་མ་འཇིགས་ཤིག༔ དེའི་ཕྱི་རིམ་ཀླད་པ་དུང་ཁང་གི་ཤར་ནས༔ སེང་ཧ་སེར་མོ་སེང་གེའི་མགོ་ཅན་ཕྱག་གཡས་གཡོན་ཐུགས་ཀར་བསྣོལ་བ་འཆར་རོ༔ ལྷོ་ནས་བྱཱ་གྷྲི་མུ་ཁ་དམར་མོ་སྟག་གི་མགོ་ཅན༔ རྡོ་རྗེ་ཁུ་ཚུར་དཔུང་ཁར་བསྣོལ་བ༔ ནུབ་ནས་སྲི་ལ་མུ་ཁ་ཝའི་མགོ་ཅན༔ ཞིང་ཁོག་པ་དྲལ་ནས་རཀྟ་ལྡག་པ༔ བྱང་ན་ཤྭ་ན་མུ་ཁ་མཐིང་ནག་སྤྱང་མོའི་མགོ་ཅན༔ ཕྱག་གཡོན་གྱིས་ ༼ ཞིང་དཔྱད། ༽ བཟུང་ནས༔ གཡས་ཀྱིས་སྒྲོལ་བ༔ ཤར་ལྷོ་མཚམས་ན་ཀྲི་ཏ་མ་དཀར་སེར་བྱ་རྒོད་ཀྱི་མགོ་ཅན༔ ཞིང་ཕྲག་ལ་བཀལ་ནས་གཡོན་པ་བྷནྡྷ་རཀྟས་བཀང་ནས་འཐུང་བ༔ ལྷོ་ནུབ་་མཚམས་ནས་ཀཾ་ཀ་མུ་ཁ་དམར་ནག་ཀཾ་ཀའི་མགོ་ཅན༔ ཞིང་ཕྲག་ལ་ཁུར་བ༔ ནུབ་བྱང་མཚམས་ནས་ཁ་ཁ་མུ་ཁ་ནག་མོ་བྱ་མགོ་ཅན༔ རྒྱུ་ཞགས་འདྲེན་པ༔ བྱང་ཤར་མཚམས་ནས་ཧུ་ལུ་མུ་ཁ་དཀར་ཁྲ་འུག་པའི་མགོ་ཅན༔ ཕྱག་གཡས་ལྕགས་ཀྱུ༔ གཡོན་པ་བྷནྡྷ་དམར་གྱིས་བཀང་བ་ཐོགས་ནས༔ ཁྲག་ཚིལ་ལྡག་ཅིང་ཟ་བ་དང་༔ རང་གི་ཀླད་པ་དུང་ཁང་གི་ནང་ན་ཡོད་པའི་ཕྲ་མེན་བརྒྱད་རང་ལ་འཆར་རོ༔ དེ་ལ་མ་འཇིགས་ཤིག༔ དུང་ཁང་གི་ཤར་ནས་རྟ་གདོང་དཀར་མོ་ལྕགས་ཀྱུ༔ གཡོན་བྷནྡྷ་དམར་གྱིས་བཀང་བ༔ ལྷོ་ནས་ཕག་གདོང་ཞགས་པ་མ་སེར་མོ་གཡས་ཞགས་པ༔ གཡོན་བྱ་རྒོད་ཀྱི་མཆེ་བ༔ ནུབ་ནས་ལྕགས་སྒྲོགས་མ་དམར་མོ༔ ཕྱག་གཉིས་རྡོ་རྗེ་ལྕགས་སྒྲོགས་བཟུང་བ༔ བྱང་ནས་དྲིལ་བུ་མ་ནག་མོ༔ གཡས་དྲིལ་བུ་གཡོན་བྷནྡྷ་དམར་གྱིས་བཀང་བ༔ སྒོ་མ་བཞི་རང་གི་ཀླད་པ་དུང་ཁང་གི་ནང་ནས་འཐོན་ནས་རང་ལ་འཆར་རོ༔ དེ་ངོ་ཤེས་པར་གྱིས་ཤིག༔ དེའི་ཕྱི་རིམ་དབང་མོ་ཉི་ཤུ་རྩ་བརྒྱད་ཧེ་རུ་ཀ་དྲག་པོའི་ལྷ་རང་བྱུང་གི་སུམ་ཅུའི་ཕྱི་རོལ་ན༔ ཀླད་རྒྱ་དང་གཉིས་ཀྱི་མཚམས་ནས་རང་ལ་འཆར་ཏེ༔ སྲིན་མོ་སྨུག་ནག་གཡག་གི་མགོ་རྡོ་རྗེ་ཐོད་ཁྲག་བསྣམས་པ་དང་༔ ཚངས་པ་སེར་མོ་པདྨ་ཐོགས་པ་དང་༔ ལྷ་ཆེན་དཀར་ལྗང་རྡོ་རྗེ་ཐོགས་པ་དང་༔ གཏོགས་འདོད་སྔོན་པོ་འཁོར་ལོ་འཛིན་པ་དང་༔ དགའ་བ་སེར་མོ་སྤུ་གྲི་འཛིན་པ་དང་༔ གཞོན་ནུ་དམར་མོ་མདུང་ཐུང་འཕེན་པ་དང་༔ རྡོ་རྗེ་ནག་མོ་ལྕགས་ཀྱུ་ཅན༔ ཤར་གྱི་མ་བདུན་འཆར་རོ༔ བརྒྱ་བྱིན་དཀར་མོ་རྒྱུ་ཞགས་ཐོགས་པ་དང་༔ ཞི་མ་དམར་མོ་བུམ་པ་འཛིན་པ་དང་༔ བདུད་རྩི་དམར་མོ་པདྨ་འཛིན་པ༔ ཟླ་བ་དཀར་མོ་རྡོ་རྗེ༔ བེ་ཅོན་ལྗང་ནག་དབྱུག་ཏོ༔ སྲིན་མོ་དམར་མོ་ཐོད་ཁྲག་འཐུང་བ༔ རྡོ་རྗེ་སེར་མོ་ཞགས་པ་ཐོགས་པ༔ ལྷོ་ནས་མ་བདུན་འཆར་རོ༔ ཟ་བ་ལྗང་ནག་བེ་ཅོན་ཐོགས་པ༔ དགའ་བ་དམར་མོ་ཁོག་ཆེན་འཛིན་པ༔ སྟོབས་ཆེན་དཀར་མོ་དབྱུག་ཏོ་འཕྱར་བ༔ སྲིན་མོ་རྡོ་རྗེ་སྤུ་གྲི་འཛིན་པ༔ འདོད་པ་དམར་མོ་མདའ་གཞུ་འགེངས་པ༔ ནོར་སྲུང་ལྗང་མོ་བུམ་པ་འཛིན་པ༔ རྡོ་རྗེ་དམར་མོ་ལྕགས་ཀྱུ་ཐོགས་པ༔ ནུབ་ཀྱི་མ་བདུན་འཆར་རོ༔ རླུང་ལྷ་སྔོན་མོ་བ་དན་འཕྱར་བ༔ མི་མོ་དམར་སེར་གསལ་ཤིང་ཐོགས་པ༔ ཕག་མོ་ནག་མོ་མཆེ་ཞགས་སྡོམ་པ༔ རྡོ་རྗེ་དམར་མོ་ཞིང་ཆུང་འཛིན་པ༔ སྣ་ཆེན་ལྗང་ནག་ཐོད་ཁྲག་འཐུང་བ་དང་༔ རྡོ་རྗེ་ལྗང་ནག་དྲིལ་བུ་འཛིན་པ༔ ༼ ཆུ་ལྷ་སྔོན་མོ་སྦྲུལ་ཞགས་བརྡ་ཆད་ཡིན་སྙམ་དཔྱད། ༽ མ་བདུན་བྱང་ནས་འཐོན་ནས་ཧེ་རུ་ཀ་དྲག་པོའི་སྐུའི་རྩལ་ལ༔ རང་གི་ཀླད་པ་དུང་ཁང་གི་ནང་ནས་ཁྲག་འཐུང་ལྔ་བཅུ་རྩ་བརྒྱད་འཐོན་ནས༔ རང་ལ་འཆར་བའི་དུས་སུ༔ རང་གི་རིག་པའི་རང་གདངས་རང་ལ་ཤར་བར་ངོ་ཤེས་པས༔ ཁྲག་འཐུང་གི་སྐུ་ལ་གཉིས་སུ་མེད་པར་ཐིམ་ནས་སངས་རྒྱས་སོ༔ ད་ལྟར་ངོ་མ་སྤྲད་ན་ཁྲག་འཐུང་གི་ལྷ་ཐམས་ཅད་གཤིན་རྗེ་རུ་མཐོང་ནས་ཁྲག་འཐུང་གི་ལྷས་འཇིགས་སོ༔ དངངས་སོ༔ སྐྲག་གོ༔ བརྒྱལ་ལོ༔ རང་སྣང་བདུད་དུ་སོང་ནས་འཁོར་བར་འཁྱམ་མོ༔ ཞེས་གསུངས་སོ༔ དེ་དག་ཀྱང་ཐལ་འགྱུར་ལས༔ འཇུག་ཅིང་སྨིན་པའི་རླུང་ལས་ཀྱང་༔ ཕྱོགས་བཞི་མཚམས་དང་བླ་འོག་འགྲུབ༔ དེ་ལ་ཕྱོགས་ཀྱི་འོད་འདུས་པས༔ རིགས་ལྔ་སྐུ་ཡང་མངོན་པར་སྣང་༔ མཐིང་ག་དཀར་སེར་དམར་ལྗང་ནི༔ སོ་སོའི་ཡུམ་དང་བཅས་པར་སྣང་༔ འདི་ལ་མཆེད་དང་འཛིན་ཤེས་ན༔ སངས་རྒྱས་རྣམས་ཀྱི་ཡོན་ཏན་རྫོགས༔ ཁམས་གསུམ་འཇུག་པ་མ་ཡིན་ནོ༔ དེ་ཡི་མཚན་ཉིད་འདི་ལྟ་བུ༔ རགས་པའི་འབྱུང་བ་ལྟོས་བྲལ་བས༔ འོད་ལས་ཐིག་ལེ་ཟུང་དུ་འབར༔ ཐིག་ལེ་ལྔར་འབྲེལ་སྐུས་བཀང་སྟེ༔ ཕྱེད་སྐུ་ལས་ནི་གཟུགས་རྫོགས་པའོ༔ གཟུགས་ཕྱེད་སྐུ་ལས་ལྔ་ལྔའི་ཟུང་༔ སོ་སོའི་ཚོམ་བུར་རྫོགས་པ་ལ༔ ལྔ་ལྡན་བཅུ་ལྡན་བརྒྱ་ལྡན་དང་༔ ཚོམ་བུ་སྟོང་དང་འབུམ་ཕྲག་ནི༔ བསམ་ངོར་རང་བཞིན་དག་པར་སྣང་༔ བརྗོད་ཀྱིས་མི་ལང་གྲངས་མེད་པ༔ འདི་ལ་རང་དང་གཞན་ཤེས་ན༔ སྐུ་གསུམ་གཅིག་ཏུ་དྲིལ་བ་ཐོབ༔ ཐོབ་པ་འདི་ལས་སླར་ལྡོག་མེད༔ གསལ་བཏབ་པ་ལས་བྱུང་བའོ༔ ཞེས་དང་༔ ཉི་ཟླ་ཁ་སྦྱོར་ལས༔ ད་ཡང་སྐྱེས་བུའི་འོད་གསལ་ལས་དེ་ཟུང་འཇུག་ལ་ཐིམ་པ་ཞེས་བྱ་སྟེ༔ ཡང་སྣང་བ་དེ་དག་སྐུའི་རྣམ་པར་རང་ཤར་ཏེ༔ སྐུ་དེ་དག་ཀྱང་༔ མི་ཆེ་བ༔ མི་ཆུང་བ༔ ཆ་མཉམ་པ༔ རྒྱན་དང་༔ ཁ་དོག་དང་༔ བཞུགས་ཚུལ་དང་༔ གདན་ཁྲི་དང་༔ ཕྱག་རྒྱ་དང་བཅས་ཏེ༔ སྐུ་དེ་དག་ཀྱང་ལྔ་ལྔའི་ཟུང་གིས་ཁྱབ་པ༔ ལྔ་ཚན་རེ་རེ་ལ་འོད་ཀྱི་མུ་ཁྱུད་དང་བཅས་པ༔ ཡབ་ཀྱི་ཆ་འཛིན་པའི་རིགས་དང་༔ ཡུམ་གྱི་ཆ་འཛིན་པའི་རིགས་དང་༔ སེམས་དཔའ་དང་༔ སེམས་མ་དང་༔ དཀྱིལ་འཁོར་ཐམས་ཅད་གཅིག་ལ་རྫོགས་པར་གནས་སོ༔ དེའི་ཚེ་རང་གི་སྙིང་ག་ནས་འོད་ཤིན་ཏུ་ཕྲ་བ་ཞིག་འཆར་ཏེ༔ དེ་སྐུ་ཐམས་ཅད་ཀྱི་ཐུགས་ཀར་འབྲེལ་ཏེ་འཆར་རོ༔ དེ་ལ་རང་གིས་ཤེས་པ་ཟིན་ཏེ༔ མི་རྟོག་པའི་བསམ་གཏན་ལ་རང་བཞིན་གྱིས་གནས་སོ༔ དེ་ནི་རིག་པ་འོད་ལ་འཇུག་པ་ཞེས་བྱ་སྟེ༔ སྣང་བ་དེ་ཀུན་ཀྱང་རབ་ཏུ་འཕྲིག་པར་མངོན་པར་འགྱུར་ཏེ༔ སྙིང་གའི་ཟེར་ཐག་དེ་ལ་ཡང་༔ ཐིག་ལེ་ཕྲ་མོ་གྲངས་མེད་པར་འཆར་རོ༔ དེ་ནས་ཡང་རང་གི་སྙིང་ག་ནས་འོད་ཀྱི་ཟེར་ཐག་ཚོན་སྐུད་བསྒྲིལ་བ་ཙམ་ཞིག་འཆར་ཏེ༔ དེ་ནས་སྐུ་དེ་ཐམས་ཅད་རང་གི་ལུས་ལ་ཐིམ་པ་སྙམ་བྱེད་པའི་སྣང་བ་ཤར་ཏེ༔ དེ་ནི་འོད་རིག་པ་ལ་ཚུར་འཇུག་པ་ཞེས་བྱའོ༔ དེའི་ཚེ་སྐྱེས་བུ་རྣམས་ཀྱིས་ཡིད་ཆེས་པ་མ་པང་བུ་འཇུག་པ་ལྟ་བུའི་ཐབས་མཆོག་ཏུ་དྲན་པར་བྱའོ༔ ཞེས་དང་༔ རབ་འབྱམས་ལས༔ ཇི་ལྟར་མཐོང་བའི་ཡུལ་སྣང་ཀུན༔ ཞི་བ་དང་ནི་ཁྲོ་བོའི་སྐུ༔ ཆེ་བ་ནམ་མཁའི་མཐའ་དང་མཉམ༔ ཆུང་བ་ཉུང་དཀར་འབྲུ་དགུ་ཙམ༔ འབྲིང་བ་རྣམས་ནི་རི་རབ་ཙམ༔ རང་གི་སྙིང་དང་ཀླད་པ་ནས༔ ཐོན་ནས་དེ་ལྟར་འཆར་བར་འགྱུར༔ མང་ཉུང་དཔག་ཏུ་མེད་པ་སྟེ༔ མགོ་བརྙན་མཚོན་ཆ་སྣ་ཚོགས་ཐོགས༔ འོད་ནི་ཉི་མ་འབུམ་ཤར་ཙམ༔ སྒྲ་ནི་འབྲུག་སྟོང་ལྡིར་བ་ཙམ༔ ཟེར་ནི་མཚོན་ཆ་གཟེངས་བ་ཙམ༔ སྐུ་ཡིས་སྐྲག་ཅིང་སྒྲ་ཡིས་སྔངས༔ ཟེར་གྱིས་སྣང་བ་ཡལ་བར་བྱེད༔ རང་གི་ཕྱོགས་སུ་རུབ་པ་སྙམ༔ དེ་ལ་འཇིགས་པར་མ་བྱེད་བར༔ རང་སྣང་ཡིན་པར་ཐག་ཆོད་ཅིག༔ རང་རིག་ཡིན་པར་ཐག་ཆོད་ཅིག༔ མ་བུ་གཉིས་པོ་མ་འཛོལ་ཞིག༔ ཅེས་སོ༔

འདི་ལྟར་འཆར་བ་བརྒྱུད་གཞན་ནའང་ཡོད་དེ༔ དཔལ་བརྟག་གཉིས་ལས༔ སེམས་ཅན་རྣམས་ནི་སངས་རྒྱས་ཉིད་དེ་མཚན་སུམ་ཅུ་རྩ་གཉིས་དང་ལྡན་པ་ཡང་སེམས་ཅན་ཐམས་ཅད་ཀྱི་ནང་ནས་འཆར་རོ༔ ཞེས་སོ༔ མཁས་གྲུབ་གཞན་གྱི་གསུངས་ལས་ཀྱང་བྱུང་བ་ནི༔ བཀའ་གདམ་གླེགས་བམ་ལས༔ གཞན་ཡང་འབྲོམ་རྗེ་ང་ལ་ཉོན༔ དེའི་ཚེ་ཤར་ནས་བཅོམ་ལྡན་འདས༔ རྡོ་རྗེ་སེམས་དཔའ་རི་བོ་ཙམ༔ རང་གི་ཁ་དོག་ཉིད་བྱས་ཏེ༔ རྒྱན་གྱིས་བརྒྱན་པའི་སྣང་བར་འོང་༔ དེའི་ཚེ་ལྷོ་ནས་བཅོམ་ལྡན་འདས༔ རིན་ཆེན་འབྱུང་གནས་གོང་བཞིན་འབྱུང་༔ དེའི་ཚེ་ནུབ་ནས་བཅོམ་ལྡན་འདས༔ སྣང་བ་མཐའ་ཡས་གོང་བཞིན་འབྱུང་༔ དེའི་ཚེ་བྱང་ནས་བཅོམ་ལྡན་འདས༔ དོན་ཡོད་གྲུབ་པ་གོང་བཞིན་འབྱུང་༔ གཞན་ཡང་རྣམ་སྣང་ལ་སོགས་པ༔ ལྷ་ཡི་ཚོགས་རབ་དུ་མ་མཐོང་༔ མདོར་ན་འབྲོམ་རྗེ་ང་ལ་ཉོན༔ ཁྲོ་བོའི་ལྷ་ཚོགས་དཔག་མེད་མཐོང་༔ གོམས་པའི་སྐྱེས་བུས་ཤེས་གྱུར་ནས༔ གྲོགས་དང་སྐྱབས་གནས་དགའ་བར་ཚོལ༔ ཀུན་ལ་སྐྱབས་འགྲོ་གསོལ་བ་འདེབས༔ དེ་དག་ཀུན་གྱི་རྗེས་སུ་འབྲངས༔ དེ་དག་ཀུན་གྱི་གནས་ལུགས་སྟོན༔ བླ་མ་དག་ཀྱང་དེར་བྱོན་ནོ༔ དེ་ཚེ་ཤེས་པར་བྱས་གྱུར་ཏེ༔ རྣམ་ཤེས་རིག་པ་ཐོགས་མེད་པས༔ རབ་ནི་ཆོས་ཀྱི་དབྱིངས་ལ་འཕོ༔ འབྲིང་ནི་བླ་མའི་ཐུགས་ཀར་འཕོ༔ ཐ་མ་ཡི་དམ་ཐུགས་ཀར་འཕོ༔ གཏན་གྱི་བཙན་ས་བཟུང་ཞིང་ཞུ༔ དེ་ཚེ་འདི་དུས་གང་གོམས་པའི༔ བག་ཆགས་དངོས་སུ་སད་པར་འགྱུར༔ ཞེས་དང་༔ དུས་འཁོར་ལས༔ འཆི་བ་འོད་གསལ་གྱི་སྐབས་སུ་སྟོང་གཟུགས་ཀྱི་སྣང་བ་ཚད་མེད་དུ་འཆར་བར་གསུངས་པའང་འདི་དག་ཡིན་ནོ༔ རབ་འབྱམས་ལས༔ ཆོས་ཉིད་བར་དོའི་ཆོས་ཉིད་ནི༔ ཕུང་བོ་མེད་ཅིང་ཟག་བཅས་བྲལ༔ ཞི་བའི་སྐུ་དང་ཁྲོ་བོའི་སྐུ༔ ཡེ་ཤེས་འོད་དང་ཁ་དོག་དང་༔ ཐིག་ལེ་མཆེད་དང་འབྱུང་སྣང་དག༔ སྣང་བ་ཐམས་ཅད་བདེ་ཆེན་ཞིང་༔ རང་སྣང་དག་པར་ཀུན་སྣང་སྟེ༔ ཅིར་སྣང་ཆོས་ཉིད་གཞལ་ཡས་སོ༔ ཞེས་གསུངས་སོ༔ དེ་ལ་ཁ་ཅིག་ན་རེ་༴ ནས། ཟུམ་པ་འོའི་བར་ཏེ༔ རང་ཤར་ལས༔ ཐ་མའི་འབྲིང་ནི༔ ཞག་བཅུ་དགུ་ཐོགས་ཏེ༔ ཡང་ཚོམ་བུ་ལ་ཞག་བཅུ་གཉིས་ཐོགས་སོ༔ ཡེ་ཤེས་པ་བཞི་གནས་སོ༔ སེམས་ཅན་གྱི་དབང་པོ་དེ་རྣམས་ཀུན་སངས་རྒྱས་ཀྱི་ས་ནོན་པའོ༔ ཞེས་སོ༔ ཟུང་འཇུག་ལས་ཡེ་ཤེས་བཞི་སྦྱོར་༴སོགས་ནས། འཕེན་པར་འགྱུར་རོའི་བར་ནི༔ ཉི་ཟླ་ཁ་སྦྱོར་ལས༔ ཡང་རང་གི་སྙིང་ག་ནས་འོད་ཀྱི་ཐག་པ་ཤིན་ཏུ་ཕྲ་བ་ཞིག་འཆར་ཏེ༔ དེའི་སྟེང་གི་ནམ་མཁའ་ལ་གྱེན་དུ་ཟུག་པར་སྣང་ངོ་༔ དེ་ལ་རང་གི་མིག་གིས་མ་ཡེངས་པར་བལྟས་པས༔ སྣང་བ་དེ་དག་མ་འདྲེས་པར༔ ཤིན་ཏུ་རྒྱ་ཆེ་བར་འཆར་ཏེ༔ དེ་ཡང་དང་པོ་མཐིང་གའི་སྣམ་བུའི་སྟེང་དུ་ཐིག་ལེ་དང་ལྡན་པ་མེ་ལོང་ཁ་སྦུབ་པ་ཙམ་ཤིན་ཏུ་གསལ་ལ་འཚེར་བ༔ དེ་ལ་རང་བཞིན་གྱི་ཐིག་ལེ་ལྔ་ལྔས་བརྒྱན་པའོ༔ ཞེས་དང་༔ ཚིག་གསུམ་པའི་རྒྱུད་ལས༔ ལྷ་མ་ཡིན་གྱི་འོད་སྔོན་པོ་བཀྲག་མེད༔ བྱོལ་སོང་ལྗང་གུ་ཞེས་ཅུང་ཟད་སྤྲུག་པར་བཤད་དོ༔ དེའི་སྟེང་དུ་རྡོ་རྗེ་སེམས་དཔའི་༴ ནས། སྐྱེ་བ་འཕེན་པར་འགྱུར་རོ༔ བར། ཡང་དེའི་སྟེང་དུ་དཀར་པོའི་སྣམ་བུའི་སྟེང་དུ་ཐིག་ལེ་ཤིན་ཏུ་གསལ་བ་གོང་དང་འདྲ་བ་འཆར་རོ༔ ཞེས་དང་༔ ཚིག་གསུམ་པ་ལས༔ ལྷའི་འོད་དཀར་པོ་བཀྲག་མེད་པར་འཆར་རོ༔ ཞེས་སོ༔ དེའི་སྟེང་དུ་རིན་ཆེན་འབྱུང་ལྡན༴ ནས། འཕེན་པར་འགྱུར་རོ་སྟེ༔ ཁ་སྦྱོར་ལས༔ སེར་པོའི་སྣམ་བུའི་སྟེང་དུ༔ ཡང་ཐིག་ལེ་གོང་དང་འདྲ་བར་འཆར་རོ༔ ཞེས་སོ༔ དེའི་སྟེང་དུ་སྣང་བ་༴ནས། འཕེན་ནོ༔ དེ་ཡང་ཁ་སྦྱོར་ལས༔ དེའི་སྟེང་དུ་ཡང་དམར་པོའི་སྣམ་བུའི་སྟེང་དུ༔ ཐིག་ལེ་གོང་མ་ལྟར་རོ༔ ཞེས་སོ༔ དེའི་སྟེང་དུ་དོན་ཡོད་༴ནས། འཕེན་པར་འགྱུར་རོ་སྟེ༔ འདིར་བྱ་བ་གྲུབ་པའི་ཡེ་ཤེས་ཀྱི་རྩལ་མ་རྫོགས་པས་མི་སྣང་ངོ་ཞེས་གསུངས་པ་ནི༔ འབྲས་བུའི་གཟུགས་སྐུ་ཕྲིན་ལས་དང་བཅས་པ་ལ་དགོངས་ཀྱི༔ གཞན་དུ་འོད་དང་ཐིག་ལེ་ཙམ་འགོག་པའི་ཤས་ཆེར་ལས་གསུངས་པ་ནི་མིན་པར༔ གཞི་དུས་ཀྱི་འབྱུང་བ་རླུང་དང་དབུགས༔ ལམ་དུས་ཀྱི་འོད་དང་ལྗང་གུ་བར་དོའི་འོད་གསལ་དང་ཟུང་འཇུག་གི་དོན་གྲུབ་པ་འོད་ཐིག་དང་བཅས་པ་ཡིན་ཞིང་༔ ཡང་ཚད་ཕེབ་ལའང་བྱ་གྲུབ་ཀྱི་རྩལ་ཇི་བཞིན་པར་མ་རྫོགས་ཀྱང་༔ སྨིན་པའི་འོད་དང་ཐིག་ལེ་ཡོད་པར་བཤད་པ་དག་གིས་ཤེས་སོ༔ དེའི་རྗེས་སུ་ལོངས་སྐུ་ཐམས་ཅད་ཀྱི་ནས་འཕེན་པར་འགྱུར་རོ༔ བར་ཏེ༔ སྙིང་དགོངས་ལས༔ ཡབ་ཀུན་ཏུ་བཟང་པོ༔ ཤེས་རབ་མ་འགགས་པས༔ ཡུམ་ཀུན་ཏུ་བཟང་མོར་གསལ་ལོ༔ ཆོས་སྐུར་སྟོང་ཆ་ལ་ཞི་བའི་ལྷ་ཚོགས་སུ་གསལ་ལོ༔ ཞེས་དང་༔ བསྟན་བུ་ལས༔ ཐབས་ཤེས་རབ་འདུ་འབྲལ་མེད་པ་ལས༔ ཀུན་བཟང་ཡབ་ཡུམ་དུ་འཆར་རོ༔ ལོངས་སྐུ་བཞི་བཅུ་རྩ་གཉིས༔ རང་གི་ལུས་ལས་འཆར་རོ༔ ཞེས་སོ༔

གཞན་ཡང་བྱང་ཆུབ་༴ ནས། དེ་བཞིན་ནོ༔ དེ་ཡང་གཞི་ལ་གནས་ཚུལ་དང་༔ ལམ་དང་བར་དོ་ལ་སྣང་ཚུལ་ལས༔ དང་པོའི་དབང་དུ་བྱས་ནས༔ ཡེ་ཤེས་མར་མེའི་རྒྱུད་ལས༔ ཀྱེ་གསང་བདག་ཉོན་ཅིག༔ རང་གི་སྤྱི་བོའི་བདེ་བ་ཆེན་པོའི་རྩའི་དཀྱིལ་ན་རང་བྱུང་གི་དབང་པོ་བརྒྱ་བྱིན་སྐུ་མདོག་དཀར་བོ་བཞུགས་སོ༔ རང་གི་ལྟག་པའི་རྩ་བ་མེན་གྱི་རྭ་ལྟ་བུ་དེའི་ནང་ན་རང་བྱུང་གི་ཐག་བཟང་རིས་སྐུ་མདོག་ལྗང་གུར་བཞུགས་སོ༔ རང་གི་སྙིང་ག་ན་རང་བྱུང་ནི་ཤཱཀ་ཐུབ་སྐུ་མདོག་སེར་པོར་བཞུགས་སོ༔ རང་གི་རྒྱབ་ཀྱི་ཕྱོགས་རྩ་དམར་པོའི་ནང་ན་རང་བྱུང་གི་རབ་བརྟན་མཐིང་གར་བཞུགས་སོ༔ ལྟེ་བ་སྤྲུལ་པའི་རྩ་བ་ན་རང་བྱུང་གི་ཁ་འབར་མ་དམར་པོ་བཞུགས་སོ༔ རང་གི་རྐང་བའི་མཐིལ་གྱི་རྩ་དཀྱིལ་ན་རང་བྱུང་ཆོས་རྒྱལ་ནག་པོ་བཞུགས་སོ༔ གསང་བདག་རང་གི་སྤྱི་བོ་ནས་རྐང་མཐིལ་ཡན་ཆད་སངས་རྒྱས་ཀྱི་གྲོང་ཁྱེར་དུ་ཤེས་པར་གྱིས་ཤིག༔ ཅེས་སོ༔ འདི་ལ་དུས་བདེ་གསང་གསུམ་ལ་སོགས་པ་དཀྱིལ་འཁོར་མ་ཚང་བ་མེད་པར་རྫོགས་པའི་མང་ཚིག་ལས༔ ཉི་ཁྲི་ཆིག་སྟོང་གི་བརྟག་མཐའ་བཟུང་ཡང་དེ་ཙམ་གྱིས་ཀྱང་མ་ཟད་པར༔ རབ་འབྱམས་ལས༔ རང་གི་ཙིཏྟའི་དཀྱིལ་ཉིད་ན༔ སངས་རྒྱས་བྱེ་བ་འབུམ་ཁྲི་དང་༔ ཞེས་ཞི་བའི་གྲངས་དང་༔ སངས་རྒྱས་བྱེ་བ་ཁྲག་ཁྲིག་འབུམ་ཞེས་ཁྲོ་བོ་དང་༔ ཡེ་ཤེས་མཁའ་འགྲོ་བྱེ་བ་འབུམ༔ ས་ཡ་གྲངས་དེའི་བརྗོད་མི་ལང་༔ ཞེས་མཁའ་འགྲོའི་གྲངས་སུ་གསུངས་པ་ལྟར་རང་གི་ལུས་ལ་བསམ་གྱིས་མི་ཁྱབ་པར་གནས་པ་ཉིད༔ གཉིས་པའི་དབང་དུ༔ སྙིང་དགོངས་ལས༔ ཕར་ཕྱིན་དྲུག་ལས་ཐུབ་པ་དྲུག་དུ་འཆར་རོ༔ སྤྱི་གཙུག་ནས་བརྒྱ་བྱིན༔ ལྟག་པ་ནས་ཐག་བཟང་རིས༔ སྲོག་རྩ་ནས་ཤཱཀྱ་ཐུབ༔ ལྟེ་བ་སེང་གེ་རབ་བརྟན༔ གསང་བ་ནས་ཁ་འབར་མ༔ རྐང་མཐིལ་ནས་གླང་མགོ་ཅན་འཆར་རོ༔ ཞེས་བར་དོའི་དུས་སུ་ཤར་བ་ཡིན་ནོ༔ དེ་དག་གི་ཐུགས་ཀའི་འོད་ཐག་ཀྱང་༔ ཚིག་གསུམ་པ་ལས༔ ཀྱེ་གསང་བའི་བདག་པོ་རང་གི་རིག་པའི་རང་འོད་ལ་རྟག་ཏུ་བལྟའོ༔ ཨེ་མ་ཧོ་ལས་ཀྱི་བར་དོ་ནི་སངས་རྒྱས་ཀྱི་རང་འོད་ངོ་མ་ཤེས་པས་འཁོར་བ་རུ་བཟློག་པར་རིགས་དྲུག་གི་སྣང་བ་འཆར་རོ༔ དུག་ལྔའི་ལམ་ལ་ཞག་དྲུག་འགྲིམ་མོ༔ ལྷའི་འོད་དཀར་པོ་བཀྲག་མེད་པར་འཆར་རོ༔ དེ་ལ་ཤེས་པ་ཞུགས་ན་ལྷར་སྐྱེའོ༔ དེ་བཞིན་དུ་ལྷ་མ་ཡིན་གྱི་འོད་སྔོན་པོ་བཀྲག་མེད༔ མིའི་དམར་པོ༔ བྱོལ་སོང་ལྗང་གུ༔ ཡི་དྭགས་སེར་པོ༔ དམྱལ་བའི་ནག་པོར་འཆར་རོ༔ ཨེ་མ་ཧོ་འགྲོ་བ་རིགས་དྲུག་གི་འོད་ལ་ཤེས་པ་ཞུགས་པས་སྐད་ཅིག་མ་གཉིས་པ་ལ་རྫོགས་ལྡན་མུན་པ་ནག་པོའི་ཁམས་ཉིན་མོ་ཉི་མའི་སྣང་བ་མེད༔ ནུབ་མོ་ཟླ་བའི་སྣང་བ་མེད༔ སྣང་ནུབ་མེའི་སྣང་བ་མེད༔ ཆར་དང་རླུང་དང་མུན་ནག་གི་ནང་ན་ཤིན་ཏུ་སྡུག་བསྔལ་ལོ༔ ཞེས་སོ༔

ཡང་ན་༴ ནས། འགོག་བསམ་པར་བྱའོ༔ བར༔ སྔར་བཞི་སྦྱོར་གྱི་རྩལ་རྫོགས་མ་རྫོགས་བཤད་མ་ཐག་པ་ལྟར་རོ༔ ཡེ་ཤེས་བཞི་སྦྱོར་གྱི་སྣང་བ༔ དེ་དག་ཀྱང་རབ་འབྱམས་ལས༔ འདི་དུས་ཡེ་ཤེས་བཞི་སྦྱོར་གྱི༔ སྣང་བ་རང་གི་སྙིང་ལས་འཆར༔ དཀར་སེར་དམར་དང་མཐིང་གའི་འོད༔ སྣམ་བུ་བརྐྱང་བ་ལྟ་བུའི་ཁར༔ ཐིག་ལེ་ཟེར་དང་ལྡན་པ་ནི༔ མེ་ལོང་ཁ་སྦུབ་བྱས་པ་ལྟར༔ ཤིན་ཏུ་གསལ་ལ་འཚེར་བ་ལ༔ རང་བཞིན་ཐིག་ལེ་ལྔ་ལྔ་ཡིས༔ འོད་སྣང་བཞི་ཀའི་སྟེང་དུ་བརྒྱན༔ དེ་ནི་ཡེ་ཤེས་བཞི་སྦྱོར་ཏེ༔ རྡོ་རྗེ་སེམས་དཔའ་ཁོང་སེང་ལམ༔ རིག་པའི་སྣ་ཐག་ཅེས་བྱའོ༔ ཞེས་དང་ཁ་སྦྱོར་ལས༔ དེ་ནི་ཡེ་ཤེས་བཞི་སྦྱོར་གྱི་སྣང་བ་ཞེས་བྱ་བ་སྟེ༔ རྡོ་རྗེ་སེམས་དཔའ་ཁོང་སེང་གི་ལམ་ཞེས་བྱའོ༔ ཞེས་སོ༔

དོན་གསུམ་པ་ཡེ་ཤེས་ཀྱི་རྗེས་སུ་༴ ནས། ནས་སྔར་ལྟར་ཏེ༔ ཁ་སྦྱོར་ལས༔ དེ་ནས་རང་གི་ཤེས་པ་སྟེང་གི་འོད་ལ་ཐིམ་པས་ཤར་ལུགས་བརྒྱད་ཉམས་སུ་མྱོང་བའོ༔ དེའི་ཚེ་གོང་གི་ལོངས་སྐུ་ཁྲོ་བོའི་སྣང་བ་རྣམས་ཀྱང་མཐོང་བར་འགྱུར་རོ༔ ཤར་ལུགས་བརྒྱད་གང་ཞེ་ན༔ རྒྱུད་འདི་དང་དོན་གཅིག་པར༔ ཀློང་ཆེན་རབ་འབྱམས་ལས༔ དེའི་ཚེ་འཆར་ལུགས་བརྒྱད་འཆར་ཏེ༔ དེ་ཡང་རིག་པ་ཡེ་ཤེས་འདི༔ ཐུགས་རྗེ་ལྟར་དུ་ཤར་བས་ན༔ འཁོར་འདས་གཉིས་པོ་རྒྱ་མ་ཆད༔ རང་རིག་འོད་དུ་ཤར་བས་ན༔ སྣང་བ་ཐམས་ཅད་ནང་དུ་གསལ༔ རང་རིག་སྐུ་ལྟར་ཤར་བས་ན༔ ཤེས་པའི་ཁ་ནི་ཕྱིར་མ་ཤོར༔ རང་རིག་ཡེ་ཤེས་ལྟར་ཤར་བས༔ སྣང་བ་ཐམས་ཅད་ཟང་ཐལ་ཉིད༔ རང་རིག་གཉིས་མེད་ལྟར་ཤར་བས༔ རང་གི་ཤེས་པ་རྩེ་གཅིག་གནས༔ རང་རིག་མཐའ་གྲོལ་ལྟར་ཤར་བས༔ མཐའ་ནི་གང་ལ་ཡང་མི་གནས༔ མ་དག་འཁོར་བའི་སྒོ་ལྟར་འཆར༔ སྲིད་པའི་འབྱུང་ཁུངས་མ་འགགས་སོ༔ དག་པ་ཡེ་ཤེས་སྒོ་ལྟར་འཆར༔ ཆོས་ཉིད་མ་དང་བུ་འབྲེལ་ལོ༔ ཞེས་སོ༔

གསུམ་པ་སྤྲུལ་སྐུའི་བར་དོ་༴ ནས། བརྒྱད་ཀྱང་འཆར་རོ༔ བར་ཏེ༔ ཀློང་གསལ་ལས༔ འདི་ལས་ཤར་ཕྱོགས་འཇིག་རྟེན་ཁམས༔ ཞིང་ཁམས་མིང་ནི་མངོན་པར་དགའ༔ སྤྲུལ་སྐུའི་ཞིང་ཁམས་ཡངས་པ་དེར༔ གཞལ་ཡས་ཁང་ནི་འདི་ལྟ་སྟེ༔ ཤར་རི་དཀར་པོ་ཤེལ་ལས་གྲུབ༔ གྲུབ་བཞི་སྒོ་བཞི་རྟ་བབས་ལྡན༔ ས་གཞི་ཐམས་ཅད་རིན་པོ་ཆེ༔ ཡིད་དུ་འོང་ཞིང་ལྟ་ན་སྡུག༔ རིན་པོ་ཆེ་ཡི་ཐེམ་སྐས་དང་༔ ཕྱོགས་བཞི་གསེང་སྐར་ཆེན་པོ་བཞི༔ གསེང་ཀའི་ནང་དུ་ཉི་མ་ཤར༔ རིན་ཆེན་ཤེལ་གྱི་ཁྱིམ་དང་འཐབ༔ ནང་དུ་ཡེ་ཤེས་འོད་ལྔར་ལྡན༔ གཞལ་ཡས་དེ་ཡི་ཕྱི་རིམ་དུ༔ ཡན་ལག་བརྒྱད་ལྡན་ཆུ་བོ་དང་༔ དྲི་ཞིམ་ཁྲུས་ཀྱི་རྫིང་བུ་དང་༔ འཚོ་བྱེད་སྨན་གྱི་ལྡུམ་ར་ཡོད༔ དེ་ལ་ནད་ཀྱིས་ཉེན་པ་རྣམས༔ འཐུང་བཀྲུས་ཟོས་པས་ནད་རྣམས་བྱང་༔ དེ་ཡི་ཕྱི་རིམ་ལྕགས་རི་ལ༔ མཚོ་ལུ་ཆེན་པོ་བརྒྱད་ཡོད་དེ༔ དེ་ཡི་ནང་ན་བྱ་ཡི་རིགས༔ རྣམ་པ་སྣ་ཚོགས་ཉིད་དུ་སྟེ༔ བྱ་ཡི་རྒྱལ་པོ་ངང་པ་དང་༔ མཐིང་རིལ་དག་དང་ཀ་ཏི་དང་༔ རྨ་བྱ་ནེ་ཙོ་ཤང་ཤང་དང་༔ ཁུ་བྱུག་རི་སྐེགས་ལ་སོགས་པ༔ བྱ་རིགས་སྟོང་ཕྲག་བརྒྱད་ཅུ་དང་༔ ཡིད་འོང་བྱ་ནི་འདི་ལྟ་སྟེ༔ ཀང་ཀ་རི་དང་ཟེར་མོ་དང་༔ ཝབ་དང་བྱ་སྐད་དྲིལ་བུ་སྐད༔ ཀི་ཏིང་གསེར་གྱི་རྡོ་རྗེའི་གཟུགས༔ དེ་ལ་སོགས་པ་བྱ་ཡི་རིགས༔ གཡུ་ལྟར་སྔོ་ལ་དུང་ལྟར་དཀར༔ བྱི་རུ་ལྟར་དང་ཨིནྡྲ་དང་༔ རིགས་ལྡན་བྱ་ལ་ཡིད་དུ་འོང་༔ གསུང་སྙན་རྣམ་པ་སྣ་ཚོགས་སྒྲོག༔ དེ་དག་རྣམས་ཀྱི་ཕྱི་རིམ་དུ༔ རིན་ཆེན་བདུན་གྱི་ལྕགས་རི་ཡོད༔ དེ་དག་རྣམས་ཀྱི་དབུས་སུ་ནི༔ རིན་ཆེན་བདུན་གྱི་ཁྲི་རྐང་ཡོད༔ ཆོས་འཆད་པ་ཡི་བསྟན་པ་ཡོད༔ ཕོ་བྲང་དེ་ཡི་གཙོ་བོ་ནི༔ སྤྲུལ་སྐུ་རྡོ་རྗེ་སེམས་དཔའ་ཞེས༔ མཚན་དང་དཔེ་བྱད་ལྡན་པ་ལ༔ རྡོ་རྗེ་རིགས་ཀྱི་འཁོར་གྱིས་བསྐོར༔ སྲོད་ལ་རྒྱུ་ཡི་ཆོས་རྣམས་གསུང་༔ ཉིན་ཕྱེད་འབྲས་བུའི་ཆོས་རྣམས་གསུངས༔ དེ་ལྟར་དུས་བཞིར་ཐུན་བཞིའོ༔ དེ་རུ་གནས་པའི་བྱང་སེམས་རྣམས༔ སྐྱེ་བ་གཅིག་གིས་ཐོགས་པའོ༔ ལོ་ཡང་ལྔ་བརྒྱ་ལྔ་བཅུ་ཐུབ༔ ཞིང་ཁམས་དེ་ནི་ཁྱད་པར་འཕགས༔ སྐོམ་རྣམས་བདུད་རྩིའི་ཆུ་འཐུང་བས༔ སྐོམ་པའི་ཚད་པ་མེད་པའོ༔ ཏིང་འཛིན་གཙང་མའི་ཟས་ཟ་བས༔ ཟས་ཞེས་བྱ་བའི་མིང་ཡང་མེད༔ འདོད་ཡོན་ལྔ་ལ་ལོངས་སྤྱོད་པས༔ ལྟོག་འཕྱུགས་བྱ་བའི་མིང་ཡང་མེད༔ གཞལ་ཡས་དེ་ཡི་ཟུར་བཞི་ལ༔ མུ་ཏིག་ཆེན་པོ་རྣམ་བཞི་ཡོད༔ བར་སྣང་ཐམས་ཅད་གཡེར་ཁས་སྦྲེལ༔ སྦྲེལ་ཐག་རླུང་གིས་བསྐྱོད་ཙམ་ལས༔ ཡིད་འོང་སྣ་ཚོགས་སྒྲ་དང་ལྡན༔ ཕྱོགས་བཞིར་རབ་བརྟན་སྣ་ཚོགས་བཞི༔ རླུང་གིས་བསྐྱོད་པའི་དྲི་ཞིམ་འཐིབ༔ ཞིང་ཁམས་དེ་ཡི་ཡོན་ཏན་ནི༔ དཔག་མེད་བསམ་ལས་འདས་པའོ༔ ཞིང་ཁམས་གནས་དང་བཅས་པ་དེ༔ འདི་ནས་ཤར་གྱི་ཕྱོགས་རོལ་དུ༔ དཔག་ཚད་ལྔ་བརྒྱ་འདས་པའི་སྟེ་༔ རིག་པ་རང་སྣང་ཡུལ་ན་བཞུགས༔ དེ་རུ་སྐྱེས་པའི་བྱང་སེམས་རྣམས༔ སུམ་ཅུ་རྩ་གསུམ་དག་དང་ནི༔ ལོངས་སྤྱོད་ཐམས་ཅད་མཉམ་པའོ༔ དེ་ནི་ས་ལ་གནས་པ་ཡིས༔ ཤར་ཕྱོགས་མངོན་དགའི་ཞིང་འཁོད་དོ༔ ཡང་གཅིག་རིགས་བཞིའི་བདག་མོ་དང་༔ འབྱུང་ལྔའི་བདག་མོ་ཐམས་ཅད་ཉོན༔ འདི་ནས་ལྷོ་ཡི་ཕྱོགས་རོལ་དུ༔ དཔལ་དང་ལྡན་པའི་ཞིང་ཁམས་ནི༔ རིན་ཆེན་གསེར་ལས་གྲུབ་པ་ལས༔ ཡོན་ཏན་ཐམས་ཅད་ཤར་དང་གཅིག༔ རིགས་ཀྱི་སྤྲུལ་སྐུ་རིན་ཆེན་འབྱུང་༔ འཁོར་དུ་རིན་ཆེན་མཁའ་འགྲོས་བསྐོར༔ ཁ་དོག་གཙོ་བོ་མ་གཏོགས་པ༔ གོང་དང་འདྲ་བས་རིགས་པས་བྱ༔ ཡང་གཅིག་འབྱུང་ལྔའི་བདག་མོས་ཉོན༔ འདི་ནས་ནུབ་ཀྱི་ཕྱོགས་རོལ་ན༔ པདྨ་བརྩེགས་པའི་ཞིང་ཁམས་ན༔ པདྨ་རཱ་ག་དག་ལས་གྲུབ༔ སྟོན་པ་སྣང་བ་མཐའ་ཡས་སོ༔ འཁོར་ནི་པདྨའི་རིགས་མཆོག་གོ༔ ཡོན་ཏན་གྲུབ་ཚུལ་ཐམས་ཅད་ཀུན༔ ཤར་དང་འདྲ་བར་རྫོགས་པའོ༔ ཡང་གཅིག་འབྱུང་ལྔའི་བདག་མོས་ཉོན༔ འདི་ནས་བྱང་གི་ཕྱོགས་རོལ་ན༔ ལས་རབ་བརྩེགས་པའི་ཞིང་ཁམས་ཡོད༔ ཨིནྡྲ་ནཱི་ལའི་གཞལ་ཡས་ཁང་༔ སྤྲུལ་སྐུ་དོན་ཡོད་གྲུབ་པ་ལ༔ ལས་ཀྱི་རིགས་ཀྱི་འཁོར་གྱིས་བསྐོར༔ གནས་ཀྱི་ཡོན་ཏན་བརྗོད་ཚུལ་རྣམས༔ མངོན་དགའ་དག་དང་མཚུངས་པའོ༔ བརྒྱད་ཀྱང་འཆར་རོ་ཞེས་པའི་དོན་ནི༔ རྫོགས་པ་རང་བྱུང་ལས༔ བྱང་ཤར་མཚམས་ན་སྟོབས་རྣམ་པར་བཀོད་པ་ཞེས་བྱ་བའི་ཞིང་ཁམས་ཤིན་ཏུ་ཡངས་པ་ཞེས་བྱ་བ་ཡོད་ཀྱི༔ ཞིང་ཁམས་དེ་ན་བཅོམ་ལྡན་འདས་ཕྱག་ན་རྡོ་རྗེ་བྱ་བ་ཡོད་ཀྱི༔ ཞེས་དང་༔ ཤར་ལྷོ་མཚམས་ཀྱི་འཇིག་རྟེན་གྱི་ཁམས་ན༔ ཞིང་ཁམས་ཐུགས་རྗེས་བརྒྱན་པ་ཞེས་བྱ་བ་དེ་ན༔ བཅོམ་ལྡན་འདས་ཐུགས་རྗེ་ཐམས་ཅད་ཀྱི་བདག་པོ༔ སྤྱན་རས་གཟིགས་དབང་ཕྱུག་ཞེས་བྱ་བ་ཡོད༔ ཞེས་དང་༔ ལྷོ་ནུབ་ཀྱི་འཇིག་རྟེན་གྱི་ཁམས་ན༔ ཞིང་ཁམས་འཇམ་པའི་མགོན་ཅེས་བྱ་བ་ཡོད་དེ༔ དེ་ན་བཅོམ་ལྡན་འདས་འཇམ་དཔལ་གཞོན་ནུར་གྱུར་བ་ཞེས་བྱ་བ་ཡོད་དེ༔ ཞེས་དང་༔ ནུབ་བྱང་གི་འཇིག་རྟེན་གྱི་ཁམས་ན༔ ཞིང་ཁམས་ཡིད་འཁྲུགས་པ་ཐམས་ཅད་ཞི་བར་བྱེད་པ་ཞེས་བྱ་བ་ཡོད་དེ༔ དེ་ན་བཅོམ་ལྡན་འདས་མི་འཁྲུགས་པ་ཞེས་བྱ་བ་ཡོད་ཀྱིས༔ ཞེས་གསུངས་པ་རྣམས་དང་༔ སྟེང་གི་ཕྱོགས་ན་ནམ་མཁའ་རྣམ་པར་དག་པ་ཞེས་བྱ་བའི་འཇིག་རྟེན་དང་༔ འོག་གི་ཕྱོགས་ན་ཞིང་ཁམས་མ་གཡོས་པ་ཞེས་བྱ་བ་དང་༔ དབུས་ཕྱོགས་ན་སྟུག་པོ་བཀོད་པའི་ཞིང་ཁམས་དང་བཅུ་གཅིག་ཀྱང་འཆར་བའོ༔

འགྲོ་འདུལ་སྤྲུལ་པའི་བར་དོ་ནི་༴ སོགས་ནས། ཟས་སྣང་བའོ༔ འི་བར་གྱི་ལྷུན་གྲབ་སྒོ་བརྒྱད་ལས་མ་དག་པ་ལྟར་ཤར་བའི་རིགས་དྲུག་གི་ཡུལ་སྣང་བ་ལ་འདུལ་བྱེད་ཞི་བའི་ཐུབ་པ་དྲུག་ཏུ་ཤར་བ་ནི་སྔར་བཤད་གྲུབ་བོ༔ ཁྲོ་བོ་ལ་ཡང་༔ གདུལ་བྱ་གཞན་སྣང་དུ་འདུལ་བྱེད་སྤྲུལ་སྐུ་ཁྲོ་བོའི་དཀྱིལ་འཁོར་བསྟན་པར་བཤད་པ་བཞིན་དུ༔ ཕྱེད་ལོངས་སྐུ་དང་༔ འགྲོ་བ་འདུལ་བའི་སྣང་བ་རབ་འབྱམས་སུ་མ་འགགས་པར༔ བར་དོ་ལ་འཆར་བ་ཡང་༔ ཀློང་གསལ་ལས༔ ཉོན་གཅིག་རིག་མདངས་མཁའ་འགྲོ་ལྔ༔ ཞི་བའི་ཞིང་ཁམས་ལྔ་པོ་ཡིས༔ རང་རང་མདུན་གྱི་བར་སྣང་དུ༔ སྤྲུལ་སྐུ་ཁྲོ་བོའི་ཞིང་ཁམས་ཡོད༔ མིང་ནི་དུར་ཁྲོད་མེ་རི་འབར༔ དེ་རུ་གཞལ་ཡས་ཁང་ཆེན་པོ༔ ཐོད་པའི་ཁང་པ་གྲུ་བཞི་པ༔ ཐོད་སྐམ་ཀུན་གྱིས་འགྲམ་གཞི་བྱས༔ རྙིང་བ་ཀུན་གྱིས་བར་རྩིགས་བྱས༔ ལྕང་ལོ་ཅན་གྱིས་ཁ་པད་བྱས༔ རྒྱ་དང་འཕང་དུ་དཔག་ཏུ་མེད༔ གནམ་ལྕགས་གཟེར་བཏབ་རཀྟས་བྱུག༔ ཉི་ཟླའི་ཀ་གདན་འོད་དང་བཅས༔ ཆུ་སྲིན་ཀ་ཞུ་ལྷ་བརྒྱད་གདུང་༔ གཟའ་བརྒྱད་ཀ་བ་རྒྱུ་སྐར་ཕྱམ༔ མཆོག་གི་དྲལ་མ་ཞིང་ཆེན་གཡོགས༔ ཉིན་བཞིན་རླུང་འཚུབས་མཚན་མེ་འབར༔ གཞལ་ཡས་དེ་ཡི་ཟུར་བཞི་རུ༔ ཞིང་ཆེན་གདུགས་དང་ཐོད་པས་གཡོག༔ ལྷ་མོ་ལྷ་ནི་གར་སྟབས་སྒྱུར༔ ས་གཞི་ཐམས་ཅད་རཀྟའི་མཚོ༔ ཞིང་ཆེན་ཞིང་ཆུང་བརྡལ་བའི་ཀློང་༔ གཞལ་ཡས་དེ་ཡི་ནང་ཉིད་དུ༔ གཞོན་ནུ་དཔའ་བོ་སྟོབས་དང་ལྡན༔ ཐུགས་རྗེ་ཞི་བར་མ་གཡོས་ཀྱང་༔ སྐུ་ནི་ཁྲོ་བོའི་ཆ་ལུགས་བསྟན༔ མཁའ་འགྲོ་ཁྲོ་བོའི་ཆོགས་ཀྱིས་བསྐོར༔ མཁའ་འགྲོ་པཱུརྣ་ཉེར་བཞི་དང་༔ ཚངས་པ་ཉིད་ནི་དུང་མགྲིན་ཅན༔ དྲང་སྲོང་ཟླ་འོད་གཞོན་ནུ་དང་༔ ཨེ་ཀ་ཙ་ཏི་སྤུན་དྲུག་དང་༔ དེ་ཡི་བྲན་མོ་བཅུ་བཞི་དང་༔ གཡོག་མོ་ལྔ་བཅུ་རྩ་བརྒྱད་དང་༔ ཡང་གཡོག་འབུམ་ཁྲི་འབུམ་སྟོང་དང་༔ མཁའ་འགྲོ་མ་ཡི་འདུ་ཚོགས་ནི༔ བསྐལ་པ་ཞིང་གི་རྡུལ་སྙེད་དུ༔ བྱེ་བ་དུ་ཕྱུར་གྲངས་མེད་བསྐོར༔ ཁྲོ་བོ་དེ་ཡི་ཐུགས་སྤྲུལ་ནི༔ ཕྱག་ན་རྡོ་རྗེ་ལ་སོགས་ཏེ༔ ཁྲོ་བོ་དཔག་ཏུ་མེད་པས་བསྐོར༔ འཁོར་གྱི་སྡེ་ཚོགས་དག་ལ་ཡང་༔ ཡང་གསང་བླ་ན་མེད་པའི་ཆོས༔ ཀློང་གསལ་ཉི་མ་འདི་ཉིད་ཀྱིས༔ ཞི་བ་སྤྲུལ་པའི་སྐུ་རྣམས་ནི༔ གྲོལ་བའི་བྱེད་པ་ཐམས་ཅད་ཀྱང་༔ ཁྲོ་བོ་རྣམས་ཀྱི་གཉེར་མ་ནི༔ ཡེ་ཤེས་ལྡན་པ་ཤ་སྟག་གོ༔ དབང་པོ་ཐ་མ་ཐམས་ཅད་ནི འདི་ལ་བྲེད་ཅིང་དངངས་པས་ན༔ ཞིང་ཁམས་རིགས་ལྔའི་ཞིང་ཁམས་སུ༔ སྐྱེ་བ་ལེན་པ་ཤ་སྟག་གོ༔ དེ་ནི་དབྱིངས་དང་ཡེ་ཤེས་དང་༔ ཐུགས་རྗེའི་དགོངས་སྤྱོད་བསྟན་པའོ༔ ཞེས་སོ༔ དེ་ལྟར་ཆོས་ཉིད་ཀྱི་བར་དོའི་སྣང་བ་ཐམས་ཅད་ཀྱི་འཆར་གཞི་ལྷུན་གྲུབ་སྒོ་བརྒྱད་ཡིན་པ་དང་༔ དེ་ཡང་བསྡུས་པས་སྒྲ་འོད་ཟེར་གསུམ་གྱི་སྣང་བ་ལ་འདུ་ཞིང་༔ དེས་ན་སྐུ་གསུམ་གྱི་བར་དོའང་ངོ་བོ་གཅིག་ལ་གཉིས་སྣང་གི་བག་ཆགས་རྩིང་ཞིབ་བམ་ཀུན་ནས་ལྡང་པའི་དྲི་མ་དང་མངོན་གྱུར་བས་བར་ཆོད་རིམ་ལས་ཐ་དད་དུ་སྣང་བ་ཙམ་གྱིས༔ འདིར་སྤྲུལ་སྐུའི་བར་དོ་ལྷུན་གྲུབ་དང་ས་བཅད་འཛིང་བར་བསྟན་པའང་དོན་དང་བཅས་པ་ལས༔ སྐྱོན་གྱི་ཚི་པ་ནི་མེད་དོ༔ དེས་ནི་ཚིག་གསུམ་པའི་རྒྱད་ལས༔ ཨེ་མ་ཧོ་རིགས་ཀྱི་བུ་དབུགས་ཆད་པ་དང་ཞག་ལྔར་དག་པའི་སྣང་བ་འཆར་རོ༔ དེའི་དུས་སུ་སུན་མ་གསུམ་འོང་ངོ་༔ འོད་དང་༔ སྒྲ་དང་༔ ཟེར་དང་གསུམ་འོང་ངོ་༔ འོད་ནི་བདེ་བར་གཤེགས་པའི་རང་འོད་ཕྲ་ལ་དྭངས་པ༔ གསལ་ལ་འཚེར་བ༔ རང་བཞིན་གྱི་བཀྲག་ལ་ཉམ་ང་བ༔ སོས་ཀའི་ཐང་ལ་སྨིག་རྒྱུ་འགྱུ་བ་བཞིན་དུ་འཇིག་རྟེན་གྱི་ཁམས་ཐམས་ཅད་ཁེངས་ནས་མེར་རེ་རེ་འོང་ངོ་༔ དེ་ལ་མ་འཇིགས་ཤིག༔ སྒྲ་ནི་འོད་ཀྱི་ནང་ཐམས་ཅད་ནས་ཆོས་ཉིད་ཀྱི་རང་སྒྲ་འབྲུག་སྟོང་ལྡིར་བ་ཙམ་དྲག་ལ་སྒྲ་ཆེ་བ་དི་རི་རི་འོང་ངོ་༔ དེ་ལ་མ་སྔངས་ཤིག༔ འོད་ལས་ཟེར་མཚོན་ཆའི་ཆར་འབབ་པ་ཙམ་འབྱུང་སྟེ༔ དེ་ཡང་ཆར་པ་འབབ་པ་འདྲ་བ་མཚོན་ཆའི་རྣམ་པ་སྣ་ཚོགས་པ་ཟིང་ཟིང་པ་འོང་ངོ་༔ དེ་ལ་མ་སྐྲག་ཅིག༔ དེ་གསུམ་ལ་མི་འཇིགས༔ མི་སྔངས༔ མི་སྐྲག་པ་ནི་ད་ལྟའི་ཉམས་ལེན་གསུམ་ཉམས་སུ་བླངས་པས་མི་འཇིགས་སོ༔ མི་སྔངས་སོ༔ མི་སྐྲག་གོ༔ དེའི་ཕྱིར་ན་དག་པའི་སྣང་བ་ལ་འདྲིས་པར་བྱའོ༔ ཞེས་དང་༔ བསྟན་བུ་ལས༔ རང་འཆི་བའི་དུས་སུ་འོད་ལྔ་གསལ་ལ་འཚེར་བ༔ རང་བཞིན་གྱིས་བཀྲག་ལ་ཉམ་ང་བ༔ སོས་ཀའི་བྱང་ཐང་ཆེན་པོ་ལ༔ སྨིག་རྒྱུ་རྒྱུ་བ་བཞིན་མེར་མེར་འོང་ངོ་༔ དེ་ལ་མ་འཇིགས་ཤིག༔ འོད་ཟེར་མཚོན་ཆའི་ཆར་པ་འབབ་མ་དང་འདྲ་བ་འོང་ངོ་༔ དེ་ལ་མ་སྐྲག་ཅིག༔ འོད་ཀྱི་ནང་ཐམས་ཅད་ནས་ཆོས་ཉིད་རང་སྒྲ་འབྲུག་སྟོང་ལྡིར་བ་ལྟར་དྲག་ལ་ཆེ་བའོ༔ དེ་ལ་མ་དངངས་ཤིག༔ དེ་གསུམ་ལ་མི་འཇིགས་མི་དངང་མི་བྲེད་པ་དེ་ནི་སངས་རྒྱས་ཡིན་ནོ༔ ཞེས་སོ༔

འདི་དག་གི་དུས་སུ་གྲོལ་བའི་གདམས་པ་ནི༔ འོད་གསལ་དང་༔ ཟུང་འཇུག་གི་སྣང་བ་ལ་མ་པང་དུ་བུ་འཇུག་པ་ལྟ་བུ་དང་༔ བཞི་སྦྱོར་དུ་མི་འགྱུར་བ་གསེར་གྱི་ཐུར་མ་ལྟ་བུ་དང་༔ ལྷུན་གྲུབ་ཏུ་ཕྱིར་མི་ལྡོག་པ་དཔག་ཆེན་གྱི་མདའ་འཕངས་བ་ལྟ་བུའི་ཐབས་རྣམས་དང་༔ འཇུག་པ་ཤེས་པའི་གནད༔ གྲོལ་བ་དུས་ཀྱི་གནད༔ མཐར་ཕྱིན་འབྲས་བུའི་གནད་རྣམས་ནི༔ ཆོས་ཉིད་ཀྱི་བར་དོར་གྲོལ་བའི་གདམས་པ་འོད་གསལ་ཐོད་རྒལ་ཆེན་པོ་ལ་འདུ་བ་ཡིན་ཏེ༔ དེ་དག་གི་དོན་ཅུང་ཟད་བཤད་ན༔ ད་ལྟར་གྱི་གནད་ལས༔ བར་དོར་རང་མལ་ཆོས་པ་སྟེ༔ ཁྲེགས་ཆོད་ཀྱིས་ཚིག་གསུམ་གནད་དུ་བརྡེག་པའི་དང་༔ ཁྱད་པར་ཐོད་རྒལ་གྱི་གཞི་ཡེ་ཤེས་ཀྱི་དཀྱིལ་འཁོར་ཁོང་གསལ་ཆེན་པོ་ལས༔ ལམ་སྒྲོན་མ་མཁའ་གསལ་དུ་རང་ལས་མི་གཞན་པར༔ རང་ལ་འབྲེལ་བར་སྣང་བའི་དབྱིངས་ཀྱི་ཟེར་ཐག་གི་རྩེ་མོ་དང་དབུས་སུ་རིགས་ལྔའི་སྐུ་གཞལ་ཡས་ཐིག་ལེ་སྟོང་བའི་སྒྲོན་མའི་དཀྱིལ་དུ་སྐུར་སྨིན་པ་དང་༔ སྐུའི་ངོ་བོ་ལུ་གུ་རྒྱུད་དང་བཅས་པ་ཤར་བ་ཤེས་རབ་ཀྱི་རང་རྩལ་ཆེན་པོས་ཡུལ་གོལ་གཟུང་འཛིན་གྱི་འཆིང་རྒྱ་ཐད་གར་དུ་ཆོད་དེ༔ ཕྱིར་སྣམ་བུ་དང་འདྲ་བའི་འོད་དེ་རྣམས་རང་རིག་མའི་ངོ་བོ་གཟུང་འཛིན་རང་སར་དག་པར་བཀྲོལ་བའི་དབྱེར་མེད་གཞི་ཐིམ་དུ་གདེངས་ཆོས་པ་ནི༔ མ༵་པང༵་བུ༵་འཇུག༵་ལྟ་བུར་གྲོལ་བས་སྟོང་འདེབས་སུ་འགྲོ་བ་དང་༔ རིག༵་པ༵་འོད༵་ལ༵་འཇུག༵་པ༵་སྟེ༔ གཞི་དཀྱིལ་ལས་སྒྲོན་མ་ཕར་སྣང་བ་ལ་གཉིས་འཛིན་དང་རྣམ་རྟོག་ཞི་ནས༔ རང་སྣང་ཡིན་པར་ཤེས་ཏེ་རང་བཞིན་བར་མེད་ཀྱི་བསམ་གཏན་ལ་རིག་པ་ཟིན་པས་འོད༵་ལ༵་རིག༵་པ༵་འཇུག༵་པ༵་ཞེས་རང་ངོ་ཆོས་ཉིད་དུ་གཉིས་སྣང་གྲོལ་བར་མངོན་དུ་གྱུར་རིམ་ལས༔ ཟག་བཅས་ཀྱི་སྦུབས་དང་ཉོན་མོངས་ཕྱི་ནང་གི་ཆོས་ལས་གྲོལ་བའི་ལོངས་སྤྱོད་རྫོགས་པའི་སྐུ་དང་ཡེ་ཤེས་ཡོན་ཏན་མངོན་ཏུ་གྱུར་ཏེ་སངས་རྒྱས་ནས་སླར་མི་ལྡོག་པའི་གདེངས་ཐོབ་པར་འགྱུར་བའི་མཐ༵ར་ཕྱིན༵་འབྲས༵་བུ་གནད༵་དང་བཅས་པ་ཚང་ཞིང་༔ སྣང་བའི་སྒྲོན་མ་རང་སྣང་དུ་ཤེས་ཐོག་ལས་མི་འགྱུར་བར་བཞག་པས༔ མི་འགྱུར་བ་གསེར་གྱི་ཐུར་མས་ཐབས་ཀྱི་སྔོན་རོལ་བ་ཡང་ཡིན་ལ༔ དེས་ནང་དབྱིངས་ཀ་དག་ལས་ཕྱིར་མི་ལྡོག་པར་སྐད་ཅིག་གི་ཟང་ཐལ་དུ་རྟོག་པ་རང་དབང་སྟེར་བས་ན༔ ཕྱིར༵་མི༵་ལྡོག༵་པས༵་གདམས་པ་ཡོངས་སུ་རྫོགས་པའི་ཡོན་ཏན་ཡར་ལྡན་འདིས༔ བར་དོའི་དུས་སུ་དབང་པོ་རྣོ་རྟུལ་གོམས་ཆ་ཆེ་ཆུང་གིས་རང་ས་ཟིན་ནས་གྲོལ་བར་འགྱུར་བའོ༔ དེའི་ཚུལ་ནི་ཁ་སྦྱོར་ལས༔ ཐབས་ནི་གཉིས་ཏེ༔ སྔོན་རོལ་གྱི་གདམས་པའི་གནད་དང་༔ འདི་དུས་གྱི་རིག་པ་རྣོ་རྟུལ་གྱི་ཁྱད་དོ༔ ཞེས་དང་༔ ཀློང་ཆེན་རབ་འབྱམས་ལས༔ དེ་ཚེ་དུས་གནད་གསུམ་ཡིན་ཏེ༔ འཇུག་པ་ཤེས་པའི་གནད་དང་ནི༔ གྲོལ་བ་ལུས་ཀྱི་གནད་དག་དང་༔ མཐར་ཕྱིར་རང་ངོ་ཤེས་པའི་གནད༔ འཇུག་པ་ལ་ཡང་དུས་གཉིས་ཏེ༔ རིག་པ་འོད་ལ་འཇུག་པ་དང་༔ འོད་ནི་རིག་པར་འཇུག་པའོ༔ རིག་པ་འོད་ལ་ཕར་འཇུག་པ༔ གང་གི་འོད་སྣང་དེ་དག་ནི༔ སྐུ་ཡི་སྣང་བར་འཆར་བ་སྟེ༔ དཔག་མེད་གྲངས་ལས་འདས་པ་ལ༔ སེམས་དཔའ་དང་ནི་སེམས་མར་བཅས༔ ཡབ་དང་ཡུམ་གྱི་ཆ་འཛིན་ཞིང་༔ མུ་ཁྱུད་འོད་ལྔའི་རྭ་བས་བསྐོར༔ སྣང་བ་ཐམས་ཅད་སྐུ་རུ་འཆར༔ དེ་ཚེ་རང་གི་སྙིང་ཀ་ནས༔ འོད་ཟེར་ཤིན་ཏུ་ཕྲ་བ་གཅིག༔ ལྷ་སྐུ་ཀུན་དང་འབྲེལ་བར་སྣང་༔ དེ་ལ་རང་གི་ཤེས་པས་ཟིན༔ རང་སྣང་ཡིན་པར་ཤེས་གྱུར་ན༔ རང་བཞིན་དུ་ནི་མི་རྟོག་པའི༔ བསམ་གཏན་དག་ལ་གནས་པ་དང་༔ འོད་ཉིད་རིག་པར་ཚུར་འཇུག་པ༔ ཡང་ནི་རང་གི་སྙིང་ནང་ནས༔ འོད་ཟེར་ཚོན་སྐུད་བསྒྲིལ་བ་གཅིག༔ ཚོམ་བུའི་ལྷ་ཚོགས་ཐུགས་ཀར་འབྲེལ༔ དེ་དུས་ཚོམ་བུའི་ལྷ་ཚོགས་རྣམས༔ རང་ལ་ཐིམ་བའི་སྣང་བ་འཆར༔ དེ་ནི་འོད་ཟེར་རིག་པ་ལ༔ ཚུར་ལ་འཇུག་པ་ཞེས་བྱའོ༔ དེ་ནས་གྲོལ་བ་ལུས་ཀྱི་གནད༔ འདི་ཡི་དུས་ན་ཕུང་པོ་ལྔ༔ བདག་ཏུ་འཛིན་པ་རང་དེངས་པས༔ ལུས་ནི་ལོངས་སྤྱོད་རྫོགས་སྐུར་གྲོལ༔ འབྱུང་བའི་རྡོས་བཅས་རང་དེངས་པས༔ འོད་གསལ་བདེ་ཆེན་ཀློང་དུ་གྲོལ༔ ཉོན་མོངས་ཕྲ་རགས་རང་གྲོལ་བས༔ འོད་གསལ་རིག་པ་ཆོས་སྐུར་ཤར༔ རིག་པ་མ་ལ་བུ་ཐིམ་གྲོལ༔ ཞེས་དང་༔ རང་ཆས་ལས༔ དེ་ནས་ཡང་རྣམ་པར་གྲོལ་བའི་སངས་རྒྱས་འོད་ཀྱི་ཕུང་བོས་བཀའ་སྩལ་པ༔ ཀྱེ་གསང་བའི་བདག་པོ་རང་གི་ཡེ་ཤེས་རང་ངོ་ཤེས་པ་དེ་སངས་རྒྱ་བ་ལ་གསུམ་མོ༔ འཇུག་པ་དང་གྲོལ་བ་དང་མཐར་ཕྱིན་པའོ༔ འཇུག་པ་ལ་གཉིས་ཡིན་ནོ༔ དག་སྣང་རང་ལ་ཚུར་འཇུག་པ་ནི༔ རང་འཆི་བའི་ཚེ་རང་གི་སངས་རྒྱས་རང་ལ་འཆར་བ་དེ་ཡིན་ནོ༔ རང་ལ་ཕར་འཇུག་པ་ནི༔ རང་གི་སངས་རྒྱས་འཆར་བའི་ཚེ་རང་ངོ་ཤེས་པས་སངས་རྒྱ་བའོ༔ རང་གི་རང་བཞིན་གྱིས་འོད་གསལ་ལ་དུས་རྟག་ཏུ་བལྟ་བའོ༔ གྲོལ་བ་ལ་གསུམ་ཡིན་ནོ༔ རིག་པ་སྦུབ་ནས་འཐོན་པས་ཕྱི་ནང་གི་ཆོས་ཐམས་ཅད་གྲོལ་ལོ༔ རིག་པ་སེམས་དང་བྲལ་བས་གཟུང་འཛིན་གྱི་རྣམ་པར་རྟོག་པ་ལས་གྲོལ་ལོ༔ རིག་པ་རང་ལུས་ཐོབ་ནས༔ རང་གི་ཡེ་ཤེས་རང་ས་འཛིན་ནས༔ མ་རིག་པ་རིག་པའི་ཡེ་ཤེས་སུ་གྲོལ་ལོ༔ མཐར་ཕྱིན་པ་སངས་རྒྱས་ནས་སེམས་ཅན་དུ་མི་ལྡོག་པའོ༔ ཞེས་སོ༔ དེ་ཡང་ད་ལྟ་མ་གོམས་ན༔ བར་དོ་ལ་མི་གྲོལ་ཞིང་༔འོད་གསལ་གྱི་ལམ་ལ་གོམས་པ་ཡོད་ན་དེ་གཅིག་པོས་ཆོག་གི༔ འོན་ཀྱང་མནལ་ཁ་འདུན་པས་འོད་གསལ་ངོས་འཛིན་པ་དང་༔ འོད་གསལ་ལ་འཕོ་བའི་གདམས་པ་བློས་སྦྱངས་བ་དང་༔ འཆི་ཁའང་དེ་ལ་ཞོ་ཤས་བསྐྱངས་སུ་གཞན་རྐྱེན་གྱི་ངོ་སྤྲོད་རྣམས་བྱས་ཀྱང་ཕུན་སུམ་ཚོགས་པའི་ཡན་ལག་ཏུ་འགྱུར་ན༔ ལམ་སྦྱངས་དམན་པ་རྣམས་ལ་དེ་དག་དགོས་པ་སྨོས་ཅི་དགོས་ཏེ༔ མེད་ཐབས་མེད་པ་ཡིན་ནོ༔ ཆོས་འདིའི་སྒོ་མ་མཐོང་བ་དང་༔ མཐོང་ཡང་ངེས་པ་མེད་པ་རྣམས་ནི༔ འདི་ནས་ཞི་ཁྲོའི་སྣང་བ་ལ་ཆགས་པའམ་འཇིགས་སྐྲག་གིས་གོལ་ཏེ་ལམ་གཞན་དུ་ལྡོག་པར་འགྱུར་བ་ཡིན་ལ༔ གདམས་ངག་ཅུང་ཟད་དམ་རྒྱས་པར་གོམས་པ་ཡོད་ན༔ འདིའི་དུས་སུ་ལམ་གྱི་དམར་ཐག་གཅོད་སའམ་ལམ་གྱི་སུན་མ་བར་དོ་ཞེས་བྱ་བ་ཡིན་པས་དངོས་གྲུབ་ལེན་པའི་དུས་དེར༔ བར་དོའི་དག་སྣང་དེ་དག་ཆོས༵་ཉིད༵་མའི༵་སྣང༵་བ༵་ཞེས་ཀྱང་བྱ༔ རྣལ་འབྱོར་པས་ལམ་དུས་ཀྱི་རྟོགས་པའི་མཚམས་སྦྱར་གྱི་ཡེ༵་ཤེས༵་རང༵་ས༵་ཟི༵ན་ཏེ༔ སྐད་ཅིག་ལ་ཕྱིར་མི་ལྡོག་པར་གྲོལ་བ་ཐོབ་པའི་དགའ་བའི་དུས་སྟོན་ཡོད་པས་ན༔ རྣལ་འབྱོར་དབང་ཕྱུག་གིས༔ འཆི་བ་འཆི་བ་མ་ཡིན་ཏེ༔ རྣལ་འབྱོར་སངས་ཆུང་རྒྱ་བ་ཡིན༔ ཞེས་གསུངས་པས་གནད་གཉིས་པོ་འདི་ལ་གོང་མ་ཐམས་ཅད་འུབ་ཆུབ་པ་ཡང་༔ སངས་རྒྱས་རང་ཆས་པའི་རྒྱུད་ལས༔ ཀྱེ་གསང་བའི་བདག་པོ༔ སངས་རྒྱ་བ་ལ་གཉིས་ཡིན་ནོ༔ ཆོས་ཉིད་མ་དང་འཕྲད་པ་དང་༔ ཡེ་ཤེས་རང་ས་ཟིན་པའོ༔ ཆོས་ཉིད་མ་དང་འཕྲད་པ་ནི༔ འཁྲུལ་སྣང་འགག་ནས་དག་སྣང་འཆར་བ་ཡིན་ནོ༔ ཡེ་ཤེས་རང་ས་ཟིན་པ་ནི༔ འོད་ལྔ་ངོ་ཤེས་པས་རང་གི་སྣང་བ་ལ་ཐིམ་ནས་སངས་རྒྱ་བས༔ བདག་སངས་རྒྱ་བའི་དུས་ཀྱིས་དམར་ཐག་ཆོས་ཉིད་མ་དང་འཕྲད་པའི་དུས་སུ་བཅད་དོ༔ ཞེས་དང་༔ ཀྱེ་སངས་རྒྱས་འོད་ཀྱི་ཕུང་པོ༔ ཆོས་ཀྱི་ཕུང་པོ་བརྒྱད་ཁྲི་བཞི་སྟོང་གསུངས་ཀྱང་༔ ཆོས་ཐམས་ཅད་ཀྱི་རྩ་བ་གདམས་ངག་ལ་འདུས༔ གདམས་ངག་ཐམས་ཅད་ཀྱི་དམར་ཐག་གར་བཅད་ཅེས་ཞུས་སོ༔ དེ་ནས་ཡང་སངས་རྒྱས་འོད་ཀྱི་ཕུང་པོས་བཀའ་སྩལ་བ༔ རང་འཆི་བའི་ཚེ༔ དྲོད་རྐང་བའི་མཐིལ་ནས་ཡར༔ སྤྱི་བོ་ཚངས་པའི་བུ་ག་ནས་ཡར་འཐོན༔ སེམས་གློ་བའི་ནང་ནས་འཐོན་ནས་དབུགས་སྣ་སྒོར་ཆད༔ སངས་རྒྱས་སྙིང་གི་ནང་ནས་བྱོན་ནས་མིག་ནས་ཕར་ལ་དོན་པའི་དུས་སུ༔ སྣང་བ་ཐམས་ཅད་འོད་དུ་འཆར་ཏེ༔ ཤར་བ་དེ་རང་གིས་སངས་རྒྱས་སུ་ངོ་ཤེས་པས་རང་འོད་དང་སྐུ་ལ་ཐིམ་ནས་སངས་རྒྱས་པས༔ གདམས་ངག་ཐམས་ཅད་ཀྱི་དམར་ཐག་སྣང་སྲིད་ཐམས་ཅད་སྐུ་དང་འོད་དུ་འཆར་བའི་དུས་བཅད་དོ༔ ཞེས་སོ༔ དེ་ལྟར་བཅད་ནུས་པའི་རྣལ་འབྱོར་རིགས་ཀྱི་བུ་དེ་ལ་རྗེས་དྲན་དྲུག་དང་མངོན་ཤེས་ལྔ་ཡང་ཤར་ནས་ཡང་དག་པ་སངས་རྒྱས་ཀྱི་འབྲས་བུ་རྙེད་པར་འགྱུར་བ་སྟེ༔ དེའི་ཚུལ་ནི་སྔར་གོམས་པའི་དབང་གིས་བླ་མ་ལ་མོས་གུས་ཡོད་པ་རྣམས་ཀྱིས་དེ་རྗེས་སུ་དྲན་མ་ཐག་པར་མདུན་དུ་མངོན་སུམ་བྱོན་ནས༔ ལམ་དང་གདམས་པའི་ངོ་སྤྲོད་བསྟན་ནས་མི་གྲོལ་མི་སྲིད་ལ༔ དབང་ཡང་དག་པར་ཐོབ་པ་རྣམས་ལ་ནི༔ ཡི་དམ་གྱི་ལུང་བསྟན་ཐོབ་པ་དང་༔ དམ་ཚིག་གཙང་བ་རྣམས་ལ་ནི་མཁའ་འགྲོའི་ལུང་བསྟན་པ་འབྱུང་བས་སངས་རྒྱའོ༔ ལུང་བསྟན་དང་གདམས་པ་ཇི་ལྟར་འདོམ་ན༔ འོད་ལ་མ་འཇིགས༔ སྒྲ་ལ་མ་དངངས༔ ཟེར་ལ་མ་སྐྲག༔ འདི་དག་རིག་པའི་རང་སྣང་སྔར་བླ་མས་ངོ་སྤྲོད་པ་སྟེ༔ ད་ལྟ་བར་དོར་ཁྱོད་ལ་ཤར་བ་ཡིན་ནོ༔ ཞེས་གསུངས་པར་འགྱུར་རོ༔ དེས་ན་ད་ལྟ་དབང་མ་ཐོབ་དམ་ཚིག་མ་དག༔ མོས་གུས་མེད་པ་རྣམས་ནི་འཇིགས་སར་སྐྱེལ་མས་བསླུས་པ་བཞིན་དུ༔ ཕྱིན་ལོག་བདུད་ཀྱི་ལུང་བསྟན་འབྱུང་བ་ལས༔ རྗེས་དྲན་དང་ལུང་བསྟན་འདི་དག་མི་འབྱུང་བས་ད་ལྟ་ནས་ཚག་བྱེད་གལ་ཆེ་བའི་རྒྱུ་མཚན་དེ་ཡིན་ནོ༔ བླ་མ་དཀྱིལ་འཁོར་གྱི་ཁྱབ་བདག་ཡིན་པ་དང་༔ ལྷ་དང་མཁའ་འགྲོ་སྒྱུ་མ་ནི་ངོ་བོ་གཅིག་པས་སོ༔ ཆུད་པར་རོལ་པའི་རྒྱུད་ལས༔ བླ་མ་རྡོ་རྗེ་འཛིན་པ་ཆེ༔ ལྷ་ཡི་ལྷ་ཁྱོད་དགོངས་སུ་གསོལ༔ ཞེས་པས་སོ༔ དེ་གསུམ་ནི་༡ལྷ་རྗེས་སུ་དྲན་པ་དང་༔ བསྐྱེད་རིམ་པས་ལྷག་ལྷའི་ཞལ་མཐོང་བ་དང་མཉམ་དུ་བར་དོ་འཁྲུལ་སྣང་གི་ལུས་མི་སྣང་བར་སྒྱུ་ལུས་ལྷ་སྐུར་ལྡང་བའང་ལྷ་རྗེས་དྲན་ཡིན་ནོ༔ དེ་དག་གི་བསྟན་པའི་༢ལམ་རྗེས་སུ་དྲན་པ་དང་༔ རྫོགས་རིམ་ལ་གོམས་པས་༣ལྟ་བ་རྗེས་སུ་དྲན་པ་དང་༔ སྐྱེ་གནས་༤རྗེས་སུ་དྲན་ཏེ་སྨོན་ལམ་དང་རང་བཞིན་སྤྲུལ་སྐུའི་ལམ་ཁྱེར་གྱིས་དེར་དབུགས་དབྱུང་༔ བསམ་གཏན་རྗེས་དྲན་གྱི་ཞག་ལྔར་རང་བཞིན་གྱི་བསམ་གཏན་ལ་ཤུགས་ཀྱི་གནས༔ གདམས་ངག་༥རྗེས་དྲན་གྱིས་རང་སྣང་རང་ངོ་ཤེས་ནས་ཆོས་ཉིད་ལ་གཉིས་སུ་མེད་པར་སྤྱོད་པའོ༔ དེ་དག་ཀྱང་ཚིག་གསུམ་པའི་རྒྱུད་ལས༔ ཀྱེ་ཀྱེ་རྡོ་རྗེ་འཛིན་པ་ཆེན་པོ་བར་དུ་བླ་མ་དང་ཡི་དམ་མཁའ་འགྲོའི་སྣང་བ་འཆར་རོ༔ རིགས་ཀྱི་བུ་འོད་དེ་ལ་མ་འཇིགས་སྒྲ་དེ་ལ་མ་སྔངས༔ ཟེར་དེ་ལ་མ་སྐྲག་པས་རྒྱུན་དུ་རང་གི་རིག་པའི་གདངས་ཡིན་ནོ་ཞེས་ཟེར་ནས་ལུང་སྟོན་ན༔ དེ་ལ་བླ་མའི་ལུང་བསྟན་ནི་བླ་མ་ལ་མོས་གུས་ཆེ་བས་འོང་ངོ་༔ ཡི་དམ་གྱི་ལུང་བསྟན་ནི་ཕྱི་ནང་གསང་བའི་དབང་རྫོགས་པ་ལས་འོང་ངོ་༔ མཁའ་འགྲོའི་ལུང་བསྟན་ནི་གསང་སྔགས་ཀྱི་དམ་ཚིག་མ་ཉམས་ལས་འོང་ངོ་༔ ཞེས་དང་༔ ཁ་སྦྱོར་ལས༔ དེའི་ཚེ་རྗེས་སུ་དྲན་པ་དྲུག་ཀྱང་འཆར་ཏེ༔ ཞེས་རྫོགས་པར་གསུངས་བ་དང་༔ རབ་འབྱམས་ལས༔ སྐད་ཅིག་མ་ནི་དང་པོ་ལ༔ རྗེས་སུ་དྲན་པ་དྲུག་འཆར་ཏེ༔ ལྷ་དང་བླ་མ་སྐྱེ་གནས་དང་༔ གདམས་ངག་ལྟ་བ་རྗེས་སུ་དྲན༔ ཞེས་གསུངས་སོ༔ མངོན་ཤེས་དྲུག་ནི༔ ཉི་ཟླ་ཁ་སྦྱོར་ལས༔ དེ་ལྟར་ཤར་པའི་ཚེ་རིགས་ཀྱི་བུ་དེ་ལ་མངོན་ཤེས་འཆར་ཏེ༔ སྔོན་གྱི་སྐྱེ་གནས་ཤེས་པ་དང་༔ འཆི་འཕོ་བ་དང་༔ སྐྱེ་བ་ཤེས་པ་དང་༔ ཕ་རོལ་ཀྱི་སེམས་ཤེས་པ་དང་༔ སྣང་བ་ལྐོག་ཏུ་བྱུང་པ་ཐམས་ཅད་ཤེས་པ་དང་༔ རིགས་དྲུག་གི་གནས་མཐོང་ཞིང་ཤེས་པ་དང་༔ དབང་པོ་རྣམ་པར་དག་པའི་མངོན་པར་ཤེས་པ་དྲུག་འཆར་རོ༔ ཞེས་སོ༔ དེ་དྲུག་ལ་ཆ་ཤས་གསལ་བར་དབྱེ་ན༔ སུམ་ཅུ་རྩ་དྲུག་ཏུ༔ ཀློང་ཆེན་རབ་འབྱམས་ཀྱི་རྒྱུད་ལས༔ མངོན་པར་ཤེས་པ་དྲུག་ཕྲག་དྲུག༔ ཤིན་ཏུ་གསལ་བར་འཆར་བའོ༔ ཞེས་སོ༔ དེ་ལས་ཀྱང་རྒྱས་པར་བརྒྱ་སུམ་ཅུ་རྩ་བཞི་རྣམས་ཀྱང་འཆར་པའོ༔ གཞན་ཡང་མི་བརྗེད་བའི་གཟུངས་དང་རྒྱུན་གྱི་ཏིང་ངེ་འཛིན་རྣམས་ཀྱང་རྒྱུད་ལ་རང་བཞིན་གྱི་འཆར་པའང་༔ ཁ་སྦྱོར་ལས༔ དེའི་ཚེ་མི་བརྗེད་པའི་གཟུངས་རྣམས་ཀྱང་རང་གི་རྒྱུད་ལ་སྐྱེ་སྟེ༔ སྔོན་གྱི་ཆོས་རྣམ་ཐམས་ཅད་རྒྱུད་ལ་དུས་གཅིག་ཏུ་འཆར་རོ༔ དེ་བཞིན་དུ་སྔར་མ་མཐོང་བའི་ཆོས་རྣམས་ཀྱང་འཆར་བས་ན་ཆོས་ཉིད་ཀྱི་བར་དོ་ཞེས་བྱའོ༔ རྒྱུན་གྱི་ཏིང་ངེ་འཛིན་རྒྱུད་ལ་རང་བཞིན་གྱིས་འཆར་བས་རྣམ་པར་རྟོག་པ་ངན་པ་ཅི་ཡང་མི་སྐྱེའོ༔ ཞེས་དང་༔ རབ་འབྱམས་ལས༔ འདི་དུས་མི་བརྗེད་གཟུངས་རྣམས་ཀྱང་༔ རང་གི་རྒྱུད་ལ་སྐྱེ་བར་འགྱུར༔ ཞེས་སོ༔ སྐྱེས་བུ་དེ་ལ་གྲོལ་བའི་ཐིམ་ལུགས་བརྒྱད་ཀྱང་འབྱུང་བ་ནི༔ རབ་འབྱམས་ལས༔ སྐད་ཅིག་མ་ནི་གསུམ་པ་ལ༔ གྲོལ་བའི་ཐིམ་ལུགས་བརྒྱད་འབྱུང་སྟེ༔ ཐུགས་རྗེ་ཐུགས་རྗེ་ལ་ཐིམ་སྟེ༔ ཉི་མ་ནུབ་པའི་ཟེར་ཐག་ལྟར༔ གཟིགས་སྣང་ཀུན་ལས་འདས་པའོ༔ ཡེ་ཤེས་ཡེ་ཤེས་ལ་ཐིམ་པས༔ མ་པང་བུ་ཆུང་ལྟ་བུ་སྟེ༔ ཆོས་ཉིད་མ་དང་རིག་པ་བུ༔ ལྷུན་གྲུབ་སྦུབས་སུ་འཛོམ་པའོ༔ འོད་ནི་འོད་ལ་ཐིམ་པ་སྟེ༔ འཇའ་ཚོན་ནམ་མཁར་ཡལ་བ་ལྟར༔ འོད་སྣང་ལྔ་ཡང་ནམ་མཁའ་འདུས༔ སྐུ་ནི་སྐུར་ཐིམ་བུམ་སྐུ་འདྲ༔ ཤེས་བྱ་ནང་དུ་གསལ་བས་ན༔ མཚན་མ་ཞལ་ཕྱག་ཅན་དུ་མེད༔ རང་ངོ་རྣམ་པར་དག་པའོ༔ གཉིས་མེད་གཉིས་མེད་ལ་ཐིམ་སྟེ༔ ཆུ་ལ་ཆུ་བོ་ཐིམ་པ་ལྟར གཏད་པའི་ཡུལ་མེད་རང་སངས་ཉིད༔ མཐའ་གྲོལ་མཐའ་གྲོལ་ལ་ཐིམ་པ༔ ནམ་མཁའ་ནམ་མཁའ་ཐིམ་པ་ལྟར༔ གཏད་པའི་ཡུལ་མེད་ཀ་ནས་དག༔ མ་དག་དག་པར་ཐིམ་པས་ཏེ༔ སྦྲ་ཡི་ཆོན་ཐག་བསྡུས་པ་ལྟར༔ ཐིག་ལེ་ཉག་གཅིག་ངང་དུ་རྫོགས༔ དག་པ་ཡེ་ཤེས་ཆེན་པོ་ནི༔ ངོ་བོའི་སྐུ་ལ་ཐིམ་པས་ཏེ༔ སེངྒེ་གངས་ལ་ཟིན་པ་ལྟར༔ ཡ་ངའི་རྟོག་པ་ཀུན་དང་བྲལ༔ ལྷུན་གྲུབ་ཀ་དག་རང་གྲོལ་ལོ༔ ཞེས་སོ༔ གྲོལ་བའི་འབྲས་བུའི་ཁྱད་པར་དང་༔ དུས་ཀྱི་མྱུར་བུལ་སོགས་ཀྱང་ཡོད་དེ༔ རབ་འབྱམས་ལས༔ དབང་པོ་དག་གི་བྱེ་བྲག་གིས༔ རབ་ནི་སྐད་ཅིག་གསུམ་ལ་གྲོལ༔ འབྲིང་ནི་སྐད་ཅིག་ཉེར་གཅིག་གམ༔ ཞག་པོ་ལྔ་ལ་གྲོལ་བར་འགྱུར༔ ཐ་མ་སྤྲུལ་སྐུའི་ཞིང་ཁམས་སུ༔ བར་དོ་མེད་པར་སངས་རྒྱའོ༔ ཆོས་ཉིད་བར་དོའི་འཆར་ཚུལ་ནི༔ ཞེས་སོ༔ ཆོས་འདིའི་སྒོ་མ་མཐོང་པ་དང་༔ ལས་མ་དག་པའི་གང་ཟག་དང་༔ ངོ་སྤྲོད་ཀྱི་སྣང་བ་འདི་དག་ལ་ཞལ་འདྲེས་མེད་པ་དག་གིས་ནི༔ མངོན་ཤེས་དང་རྗེས་དྲན་གྲོལ་པའི་ཐིམ་ལུགས་རྣམས་ཀྱང་ཆ་ཙམ་ལས་ལོང་ཡོད་དང་ཕན་བྱེད་དུ་མི་འཆར་ལ༔ རང་སྣང་ངོ་མ་ཤེས་པར་མཐོང་མ་མྱོང་པའི་ཡུལ་ཞི་ཁྲོ་རིགས་ལྔའི་སུན་མ་རྣམས་ལ་འཇིགས་ཤིང་སྐྲག་ནས༔ མ་དག་ཞི་བའི་སྐུ་མགོན་པོ་ནག་པོ་དང་༔ ཁྲོ་བོ་རྣམས་གཤིན་རྗེ་ཆོས་ཀྱི་རྒྱལ་པོར་གོལ་ཏེ༔ ཡེ་ཤེས་ཀྱི་འོད་ཟེར་ལའང་དངངས་ཤིང་སྐྲག་ནས་འགྲོ་བ་རིགས་དྲུག་གི་འོད་ལམ་དྲུག་པོའི་གང་རུང་དུ་ཤེས་པ་གཞུག་མ་ཐག་ཏུ་རྫོགས་ལྡན་མུན་པ་ནག་པོའི་རྒྱལ་ཁམས་སུ་འཁྱམས་ནས་སྡུག་བསྔལ་བ་ལས་འདུས་བྱས་ཀྱི་ཆོས་སྒྲུབ་ཚད་ཀྱིས་དེ་ཕན་ཆད་ཀྱི་སྲིད་བདེ་བསྐྱེད་པ་ལས་སངས་རྒྱས་ཀྱི་འབྲས་བུ་ལ་ཅི་ཡང་མི་ཕན་བར༔ སྙིང་དགོངས་ལས༔ ཞི་བའི་སྐུ་དང་ཁྲོ་བོའི་སྐུ་ཆེ་བ་ནམ་མཁའི་མཉམ་པ༔ འབྲིང་པོ་རི་རབ་ཙམ་ནས༔ ཐ་མ་ཉུང་འབྲུ་ཙམ་གྱིས་ཁེངས་ནས་འཆར་རོ༔ ཞག་ལྔ་པར་སྣང་སྲིད་གསུམ་ཐམས་ཅད་འོད་དང་སྐུ་རུ་འཆར་རོ༔ སྣང་བ་ཐམས་ཅད་འོད་དང་སྐུར་ཤར་བ་དེ༔ རང་གི་རིག་པའི་གདངས་སུ་ངོ་ཤེས་པས༔ རང་འོད་ལ་གཉིས་སུ་མེད་པར་སངས་རྒྱའོ༔ རིགས་ཀྱི་བུ་ད་ལྟར་ངོ་མ་སྤྲད་ན༔ ཞི་བའི་སྐུ་མགོན་པོ་ནག་པོར་འཆར་རོ༔ ཁྲོ་བོའི་ལྷ་གཤིན་རྗེ་ཆོས་ཀྱི་རྒྱལ་པོར་ཤར་ནས༔ རང་སྣང་བདུད་དུ་སོང་ནས་འཁོར་བར་འཁྱམ་མོ༔ ཀྱེ་གསང་བའི་བདག་པོ༔ རང་སྣང་ངོ་མ་ཤེས་ན་བསྐལ་བར་ཆོས་བྱས་ཀྱང་སངས་མི་རྒྱའོ༔ རང་སྣང་ངོ་མ་ཤེས་ན་ཤི་མ་ཐག་ཏུ་ཆོས་ཉིད་བར་དོར༔ གཤིན་རྗེ་ཆོས་ཀྱི་རྒྱལ་པོའི་སྐུར་འཆར་རོ༔ ཞེས་དང་༔ ཁ་སྦྱོར་ལས༔ དེར་རང་གི་ཤེས་པ་མ་ཚུད་ཅིང་༔ སྔར་བླ་མའི་ལུང་མེད་པ་རྣམས་ནི༔ སྣང་བ་དེ་ལ་བྲེད་པ་དང་༔ སྔངས་པ་དང་༔ སྡུག་པ་དང་༔ འཇིགས་པ་དང་༔ འདུ་ཤེས་ཤོར་བ་ལ་སོགས་ཏེ༔ ཡང་འཁོར་བའི་ཉེ་བར་ལེན་པའི་ཁ་ལེན་ཏེ༔ ཡང་དབང་པོ་ཉི་ཤུ་རྩ་གཅིག་གིས་བྱེ་བྲག་ཏུ་འཁྲུལ་པའང་ཡོད་དོ༔ ཞེས་དང་༔ ལྷུན་གྲུབ་འཁྲུལ་སྟོབས་ཀྱི་ཐིམ་པའང་༔ བསྟན་བུ་ལས༔ སྒྲ་འོད་ཟེར་གྱི་སྣང་བ་དེ་གསུམ་ལ་བྲེད་འཇིགས་སྐྲག་པ་དེ་ནི་རྫོགས་ལྡན་མུན་པ་ནག་པོའི་རྒྱལ་ཁམས་ཞེས་བྱ་བ༔ ཉིན་མོ་ཉི་མའི་སྣང་བ་མེད༔ ནུབ་མོ་ཟླ་བའི་སྣང་བ་མེད༔ ནང་ནུབ་མེའི་སྣང་བ་མེད་པ༔ རླུང་དང་ཆར་དང་མུན་པ་ནག་པོའི་གསེབ་ན༔ ཤིན་ཏུ་སྡུག་བསྔལ་ལ༔ འཁོར་བ་སྲིན་གྱི་ཁ་ཆུ་དང་འདྲ་བས་འཁོར་ཞིང་མོ༔ ཞེས་དང་༔ རབ་འབྱམས་ལས༔ ཆོས་སྒོ་འདི་ཉིད་མ་མཐོང་བའི༔ གང་ཞིག་འགྲོ་བ་ཕལ་པ་རྣམས༔ གོང་གི་ཆོས་ཉིད་བར་དོ་ལ༔ གདམས་པའི་གནད་མེད་ངོ་མ་ཤེས༔ འོད་ལ་འཇིགས་ཤིང་ཟེར་ལ་དངངས༔ ཀུན་ལ་རྟོག་པ་ཟོས་པ་ཡིས༔ དབང་པོ་མར་ལ་ཁ་འཁྱལ་ནས༔ སྲིད་པའི་བར་དོ་ཉིད་དུ་ཚུད༔ ཞེས་སོ༔

དེ་ལྟ་བུའི་ཆོས་ཉིད་༴་ནས། རྒྱུ་མཚན་དེ་ཡིན་ནོ༔ བར་ཏེ༔ ལར་ཆོས་སྐུའི་བར་དོ་གཏན་ལ་འབེབས་བྱེད་དང་༔ རྗེས་མཐུན་གྱི་ལྟ་སྒོམ་སྤྱོད་གསུམ༔ དབུ་མའི་དངོས་སྦས་ཀྱི་དོན་དང་༔ གསང་སྔགས་བས་སྟོང་ཕྱོགས་ཀྱི་རྫོགས་རིམ་ཐམས་ཅད་ཡིན༔ ལོངས་སྐུའི་བར་དོ་གཏན་ལ་འབེབས་བྱེད་བཀའ་ཐ་མའི་མདོ་དང་བསྟན་བཅོས༔ གསང་སྔགས་བས་བསྐྱེད་རིམ་སྣང་ཕྱོགས་ཐམས་ཅད་ཡིན༔ ཁྱད་པར་དུ་ཟུང་འཇུག་གི་རྒྱུད་སྡེའི་དེ་གཉིས་ཆ་ཆེ་ཆུང་མེད་པར་ཤེས་འཇུག་མངོན་གྱུར་གྱི་ཆ་རྐྱེན་དུ་བྱེད་ནའང་༔ དེ་དག་ཀྱང་མཐར་ཐུག་གི་དོན་སྟོན་པའི་མན་ངག་མ་ཡིན་པའི་ཕྱིར་ཆོས་ཉིད་རྣམ་དག་གི་སྣང་བ་སྒྲ་ཇི་བཞིན་པ་འདི་གབ་པས་ན༔ བར་དོ་དྲུག་གི་གདམས་ངག་དང་༔ དེ་ལ་ཕན་བྱེད་ཀྱི་ཉམས་ལེན་ཁྱད་པར་བ་འོད་གསལ་རྫོགས་པ་ཆེན་པོའི་དོན་འདི་མ་མཐོང་ན་ཕན་པ་རྒྱ་ཆུང་བའང་༔ བསྟན་བུ་ལས༔ དེས་ན་གདམས་པ་འདི་གནད་ཆེའོ༔ འདི་མ་ཤེས་ན་ཕན་མེད་དོ༔ ཞེས་དང་༔ ཆོས་ཀྱི་སྐུ་གདམས་ངག་ལ་ཐུག་གོ་ཞེས་གསུངས་པའང་འདི་ཉིད་ལ་དགོངས་པ་གོར་མ་ཆག་གོ༔

གསུམ་པ་ལྷུན་གྲུབ་ཐིམ་ཚུལ་༴ ནས། བཤད་ཟིན་ཏོ༔ ཞེས༔ རིན་ཆེན་སྤུངས་བ་ལྟར་དེ་ཉིད་དང་༔ རབ་འབྱམས་དང་༔ ཀློང་གསལ༔ ཁ་སྦྱོར་དག་གིས་ལྟར་སྒྲོན་མའི་རྒྱན་དང་༔འདིར་ཡང་གོང་དུ་བཤད་ཟིན་པ་དང་༔ འཁྲུལ་སྟོབས་ཀྱི་ཐིམ་པ་མི་གསལ་བས་དགོས་ཆེད་ཆུང་ཕྱིར་རྒྱས་པར་མ་བཤད་དོ༔ དེ་ལྟར་སྐུ་གསུམ་རང་ལ་ཡོད་པ་བར་དོར་ཤར་བའང་༔ སྒྲོན་མ་རྣམ་བཀོད་ལས༔ བར་དོ་རྣམ་པ་གསུམ་ཉིད་དུ༔ སྐུ་གསུམ་པོ་ནི་རིམ་བཞིན་འཆར༔ ཞེས་སོ༔ དོན་བཞི་བ་༴ ནས། བཤད་ཀྱང་སྟེ༔ རབ་འབྱམས་ལས༔ དེ་ལ་ཁྱད་པར་ཉི་ཤུ་སྟེ༔ གཟུགས་དང་༔ སྐྱེ་མཆེད་དང་༔ འོད་དང་༔ སྐྱེ་གནས༔ མགོ་དང་༔ ཚེ་ཚད༔ མངོན་ཤེས༔ སྣང་བ༔ སྤྱོད་ལམ༔ མིང་དང་༔ རྫུ་འཕྲུལ༔ ལས༔ ཁ་དོག༔ འཁོར་ཚུལ༔ ངེས་ཚིག་དང་༔ དགེ་སྡིག༔ གར་གཏོགས༔ ཕྱི་མའི་ལས༔ ཉོན་མོངས་བ༔ དཔེ་དང་ཉི་ཤུའོ༔ ཞེས་གསུངས་པ་རྣམས་གཞུང་གི་དོན་འདིའི་རྣམ་བཅད་ཀྱི་དམིགས་སུ་འབྲུ་མ་གཉེར་ཡང་དོན་ཀྱི་དབྱིངས་གཅིག་པས་ན༔ འདིར་ནི་༴ ནས། བྲེ་བ་སྟེ༔ ཁ་སྦྱོར་ལས༔ ཀྱེ་མ་མི་རྟོག་ཐུབ་པ་ཉོན༔ ངས་བསྟན་ཁྱོད་ཀྱིས་ལེགས་པར་ཟུངས༔ འདི་ཉིད་ལུང་དང་མི་ལྡན་པའི༔ སེམས་ཅན་ཀུན་གྱི་འཇུག་པའི་ས༔ སྲིད་པའི་བར་དོ་ཞེས་བྱ་བ༔ འཁོར་བའི་གནས་ཀྱི་ལམ་སྒོ་ནི༔ དཔེར་ན་ཟོ་ཆུན་བཞིན་དུ་འཁོར༔ ཤ་ཁྲག་རང་གའི་ལུས་བྲལ་ནས༔ སྒྱུ་མ་ཡིད་ཀྱི་གཟུགས་ཅན་ནོ༔ རྡོས་དང་བྲལ་བས་མིང་གཉིས་སོ༔ ཞེས་དང་༔ རབ་འབྱམས་ལས༔ སྲིད་པ་བར་དོའི་ཆོས་ཉིད་ནི༔ ཤ་ཁྲག་རང་གི་གཟུགས་བྲལ་ནས༔ སྒྱུ་མ་ཡིད་ཀྱི་གཟུགས་ཅན་དེས༔ ཆོས་ཉིད་བདེན་པའི་དོན་མ་མཐོང་༔ འོད་སྣང་ཀུན་ལ་བྲད་སྔངས་ནས༔ སྟོང་གསུམ་ཀུན་ཏུ་ཡིད་ཀྱིས་རྒྱུ༔ བྱ་སྒྲོ་རླུང་གིས་ཁྱེར་བ་བཞིན༔ ཕྱད་ཕྱོད་ཡད་ཡུད་སྙོམས་ཤིང་འཇུག༔ བན་བུན་ལང་ལོང་རྨི་ལམ་འདྲ༔ ས་གཅིག་མི་ཚུག་ཚིག་པ་ཟ༔ གར་སླེབ་ལ་སོགས་རིགས་དྲུག་འོང་༔ སོ་སོའི་དམིགས་པ་སྣང་བའོ༔ ཞེས་སོ༔ ཡུལ་དྲུག་དགྲར་ལངས་ཀྱི་༴ནས། མྱོང་བ་དང་༔ གི་བར་ཏེ༔ སྔར་ཡེ་ཤེས་ཀྱི་སྣང་བ་དཀར་དམར་ནག་ལམ་གསུམ་ངོ་མ་ཤེས་པ་ལས་འཁྲུལ་ནས༔ རབ་འབྱམས་ལས༔ ཆོས་ཉིད་མ་རིག་མ་མཐོང་ཞིང་༔ རང་སྣང་དགྲ་རུ་ལངས་པ་རྣམས༔ ཞེས་དང་༔ འོད་ལ་འཇིགས་ཤིང་ཟེར་ལ་དངངས༔ ཀུན་ལ་རྟོག་པ་ཟོས་པ་ཡིས༔ དབང་པོ་མར་ལ་ཁ་འཁྱལ་ནས༔ སྲིད་པའི་བར་དོ་ཉིད་དུ་ཚུད༔ ཅེས་ཆོས་དབྱིངས་ཡེ་ཤེས་འོད་སྣང་དང་བཅས་པ་བདག་ཏུ་བཟུང་ནས་གཏི་མུག་གི་གཞིར་སོང་བའི་རང་མདངས་འཇིགས་པའི་མུན་ནག་གི་ཀློང་རྫོགས་ལྡན་མུན་པའི་རྒྱལ་ཁམས་སུ་འཁྱམས་པ་ནི༔ བར་དོའི་རྒྱུད་ལས༔ རང་གི་དུས་ནས་ཕ་བོས་མ་བོས་ཀྱང་༔ རང་ཉིད་གཅིག་པུ་མུན་ནག་ཆེན་པོར་འཁྱམས༔ ཞེས་སོ༔ དེ་ལྟ་བུའི་མུན་པ་དེ་ཅུང་ཟད་སངས་པ་དང་མཉམ་དུ༔ ལྷན་ཅིག་སྐྱེས་པའི་ལྷ་འདྲེ་གཉིས་ཀྱིས་ཁྲིད་དེ༔ གཤིན་རྗེའི་གམ་དུ་ཕྱིན་པའང་ཡོད་ལ༔ ཁྱད་པར་སྡིག་པ་ཤས་ཆེ་བ་ཡིན་ནའང་༔ རྒྱལ་བའི་བཀའ་ལས༔ གཤིན་རྗེ་ཆོས་ཀྱི་རྒྱལ་པོ་སྐུ་ཆེ་བ་ནམ་མཁའ་དང་མཉམ་པ༔ འབྲིང་པོ་རི་རབ་ཙམ་པ༔ ཐ་མ་ཉུང་འབྲུ་ཙམ་པས༔ ཡ་སོས་མ་མཆུ་མནན་པ༔ མིག་ཤེལ་མིག་ཏུ་བཟློག་པ༔ སྐྲ་སྤྱི་བོར་བཅིངས་པ༔ གསུས་པ་ཆེ་ལ་སྐེ་རྩ་ཕྲ་བ༔ ལག་ན་ཁྲམ་ཤིང་ཐོགས་པས་ཁ་ནས་རྒྱོབ་སོད་ཀྱི་སྒྲ་སྒྲོག་པ༔ ཀླད་པ་ལྡག་པ༔ ཁྲག་འཐུང་བ༔ ཆུ་སེར་འཇིབ་པ༔ རུས་པ་མུར་པ༔ མགོ་ལུས་འབྲལ་བ༔ སྙིང་འདོན་པ་དང་༔ དེ་ལྟ་བུའི་འཇིག་རྟེན་གྱི་ཁམས་ཁེངས་ཡོང་ངོ་༔ ཞེས་དང་༔ བར་དོའི་རྒྱུད་ལས༔ ཤིན་ཏུ་འཇིགས་པའི་གཤིན་རྗེ་ཡིས༔ སྡིག་བྱེད་ལུས་ལ་གནོད་པར་བྱེད༔ ཅེས་སོ༔ དེ་ནས་དགེ་སྡིག་གི་རྩིས་བསྒྲངས་བྱེད་དེ༔ ཚིག་གསུམ་པ་ལས༔ ཨེ་མ་ཧོ་འགྲོ་བ་རིགས་དྲུག་གི་འོད་ལ་ཤེས་པ་ཞུགས་པས་སྐད་ཅིག་མ་གཉིས་པ་ལ་རྫོགས་ལྡན་མུན་པ་ནག་པོའི་ཁམས་ཉིན་མོ་ཉི་མའི་སྣང་བ་མེད༔ ནུབ་མོ་ཟླ་བའི་སྣང་བ་མེད༔ ནང་ནུབ་མེའི་སྣང་བ་མེད༔ ཆར་དང་རླུང་དང་མུན་ནག་གི་ནང་ན་ཤིན་ཏུ་སྡུག་བསྔལ་ལོ༔ དེ་ཡང་དཔེར་ན་ཉི་མ་ནུབ་པས་མུན་པ་སྲོས་པ་དང་འདྲའོ༔ དེ་ནས་ཞག་བདུན་མུན་པ་སངས་ནས༔ ལྷན་ཅིག་སྐྱེས་པའི་ལྷ་དང་༔ ལྷན་གཅིག་སྐྱེས་པའི་འདྲེ་གཉིས་ཀྱིས་གཤིན་རྗེའི་གམ་དུ་ཁྲིད་དེ་ལས་ཀྱི་མེ་ལོང་བལྟར་བཅུག་ནས་ལས་དགེ་སྡིག་གི་རྡེའུ་གང་མང་བསྒྲངས་པའི་བར་དེར་དགེ་སྡིག་གཉིས་སྟོབས་གང་ཆེ་བའི་འབྲས་བུ་ལེན་པས་ལས་ཀྱི་བར་དོ་འདིར་ལས་དགེ་སྡིག་གིས་མ་བསྒྲིབས་པ་ཤིན་ཏུ་གལ་ཆེའོ༔ ཞེས་གསུངས་པ་དང་༔ སྙིང་དགོངས་ལས༔ དེའི་ཚེ་ལྷན་ཅིག་སྐྱེས་པའི་འདྲེས་སྡིག་པ་བྱས་ཚད་བསགས་ནས་རྡེའུ་ནག་པོ་བགྲང་དུ་ཡོང་ངོ་༔ ལྷན་གཅིག་སྐྱེས་པའི་ལྷས་དགེ་བ་བྱས་ཚད་བསགས་ནས་རྡེའུ་དཀར་བོ་བགྲང་ངོ་༔ དེའི་དུས་སུ་རང་ཤིན་ཏུ་བྲེད་པ༔ དངངས་པ༔ སྐྲག་པ༔ འདར་བ་བྱས་ནས༔ ངས་སྡིག་པའི་རྣམ་སྨིན་ལར་མ་བྱས་ཟེར་ནས་རྫུན་ཟེར་དུ་འོང་ངོ་༔ དེར་གཤིན་རྗེ་ཆོས་ཀྱི་རྒྱལ་པོ་ན་རེ༔ ངས་ལས་ཀྱི་མེ་ལོང་ལ་དྲི་ཡིས་ཟེར་ནས༔ ལས་ཀྱི་མེ་ལོང་བསྟན་པས༔ དགེ་སྡིག་ཐམས་ཅད་མེ་ལོང་ནང་ནས་བཀྲ་ལམ་མེ་གསལ་བར་བྱུང་བས༔ ཞེས་སོ༔ དེའི་དུས་སུ་ད་ལྟ་ཟག་བཅས་ཀྱི་དགེ་བ་དང་༔ བསྐྱེད་བསྒོམ་དམིགས་པ་ལ་ཅུང་ཟད་གོམས་པས་ཀྱང་ཕན་པ་རྒྱ་ཆེ་བ་དང་༔ སྡིག་པ་ལ་གོམས་པའི་གནོད་ཚབ་ཆེ་བས་ན་རང་དྲིན་རང་ལ་ཆེ་བར་བྱེད་པ་གལ་ཆེ་བའི་རྒྱུ་མཚན་ཡང་དེ་ལྟར་རོ༔ དེ་ནས་སྡིག་པ་ཅན་ལ་གཤིན་རྗེའི་ཕོ་ཉ་མང་པོས་སྐེ་ལ་ཐག་པས་བཏགས་ཏེ༔ སྔོན་ནས་འཐེན་ཞིང་ལན་ཆགས་ཤ་འདྲེད་ཀྱི་བདག་པོ་མང་པོས་ཕྱི་ནས་དེད་ཏེ༔ བརྡུང་རྡེག་ལ་སོགས་པའི་སྡུག་བསྔལ་བསམ་གྱིས་མི་ཁྱབ་པ་མྱོང་བར་བྱེད་བཞིན་དུ༔ ངན་སོང་གི་གནས་སུ་འཁྲིད་པའང་༔ སྙིང་དགོངས་ལས༔ གཤིན་རྗེས་སྐེ་ལ་ཐག་པ་བཏགས་ནས་དྲུད་དོ༔ སྐེ་བྲེག་སྙིང་འདོན༔ རྒྱུ་མ་གཟེང་༔ ཀླད་པ་ལྡག༔ ཤ་ཟ༔ ཁྲག་འཐུང་༔ རུས་པ་མུར་ཡང་༔ ཞག་འགར་འཆི་མི་འདོད་དོ༔ ལུས་དུམ་བུར་གཏུབས་ཀྱང་སོས་སོ༔ ཡང་གཏུབས་པས་ཤིན་ཏུ་སྡུག་བསྔལ་ཆེ་བ་ཞག་ལྔ་ཡོང་ངོ་༔ ཞེས་དང་༔ བར་དོའི་རྒྱུད་ལས༔ སྡིག་པ་བྱེད་པ་འཆི་བའི་སྣང་བ་དེ༔ ཤ་ཟ་སྲིན་པོ་མང་པོ་མཐོང་བ་དང་༔ མི་སྡུག་གཟུགས་ཉིད་སྣ་ཚོགས་སྟོན་པར་བྱེད༔ ཚེ་སྲོག་དབུགས་ཀྱིས་བརྒྱལ་བ་མི་རྟོགས་ཏེ༔ ངུ་ཞིང་ཆོ་ངེ་མང་པོ་འདོན་པར་བྱེད༔ ཞགས་ཐོགས་མཚོན་ཐོགས་མང་པོའི་གཤིན་རྗེ་ཡི༔ ད་འདོང་ཟེར་ཞིང་རྒྱབ་ནས་ཕུལ་བར་བྱེད༔ ཚ་གྲང་དམྱལ་བའི་སྡུག་བསྔལ་མང་པོ་མྱོང་བར་སྟོན༔ ཞེས་སོ༔ སྔོན་མོའུ་འགལ་གྱི་བུས་མ་གར་སྐྱེ་མི་ཤེས་པའི་རྒྱུ་བཞིའི་དབང་གིས་མ་མཁྱེན་པར་གཤིན་རྗེའི་ཡུལ་དུ་དྲིར་བྱོན་པའི་གཟིགས་སྣང་ལྟ་བུ་དང་༔ དེ་དུས་ཆོས་ཀྱི་རྒྱལ་པོས༔ ཡར་མར་ཟང་ཐལ་དུ་འགྲོ་བ་མ་གཏོགས་ང་ཡི་དྲུང་དུ་འོང་བར་གསུངས༔ གསུངས་པ་དག་གི་འདིའི་ཚད་མར་འགྱུར་རོ༔ གལ་ཏེ་དེ་ལས་ཡར་མར་འགྲོ་སྐལ་ཀྱི་དགེ་སྡིག་གི་ལས་གཅིག་ཤོས་མ་ཆེ་ན་ནི་གདོད་སྲིད་པ་བར་དོར་འཁྱམས་ཏེ༔ ཉེ་བ་གང་དང་གོམས་པ་གང་༔ སྔར་བྱས་གང་ཡིན་དེ་ཀུན་ལས༔ སྔ་མ་སྔ་མ་རྣམ་སྨིན་འགྱུར༔ ཞེས་པ་ལྟར༔ བག་ཆགས་གོམས་སྟོབས་གང་ཆེ་ལས་སྲེད་པས་སྐྱེ་བ་འཕེན་པའོ༔ ཡང་ངོ་བོ་ཐོབ་པའི་དམར་ལམ་དེར་འཁྲུལ་པ་ལས་བྱུང་བ་༴ ནས། མྱོང་བ་དང་གི་བར་དང་༔ དེའི་དཔང་ལུང་ནི་སྔར་བསྟན་པས་འཐུས་སོ༔ ཡང་གཉིས་པ་འཇིགས་པའི་སྒྲ་བཞི་༴ ཞེས་པ་ནས། ཐོབ་པོའི་བར་དང་༔ སྒྲ་བཞི་ལས་འབྱུང་བའི་སྣང་བ་དང་༔དེས་ནོན་པའི་སྡུག་བསྔལ་ཡང་འཆར་ཏེ༔ མན་ངག་སྙིང་དགོངས་ལས༔ དེ་ནས་འཁྲུལ་པའི་བར་དོ་ལ༔ ལུས་འབྱུང་བ་ལྔ་ལ་གཡར་བ༔ ནམ་མཁའི་སྣང་བ་འཆར་རོ༔ ནམ་མཁའི་སྣང་བ་ལུས་གཡང་སར་བསྒྱུར་བ་ལྟ་བུའི་སྡུག་བསྔལ་ཞག་ལྔའོ༔ དེ་ནས་སའི་སྣང་བ་འཆར་ཏེ་ལུས་ས་འོག་དུ་ཆུད་པ་སྙམ༔ རིའི་འོག་ཏུ་ནོན་བ་ལྟ་བུའི་ཤིན་ཏུ་སྡུག་བསྔལ་བ་ཞག་ལྔ་སྡོད་དོ༔ དེ་ནས་ཆུའི་སྣང་བ་འཆར་རོ༔ ཆུ་ཆེན་པོའི་ནང་དུ་ཞག་ལྔ་འཁྱགས་པ་ལ་སྡོད་དོ༔ དེ་ནས་མེའི་སྣང་བ་འཆར་རོ༔ མེ་ཆེན་པོའི་ནང་དུ་མེས་ཞག་ལྔ་སྲེག་གོ༔ དེ་ནས་རླུང་གིས་ཐམས་ཅད་དུ་གྲང་ཞིང་གཡེང་བ་ལ་ཞག་ལྔ་ཡོང་ངོ་༔ ལར་འཁྲུལ་བའི་བར་དོ་ལ་ཞག་ཉི་ཤུ་རྩ་ལྔ་ཡོད་དོ༔ ཞེས་སོ༔ འདི་ནི་རབ་འབྱམས་ལས་བར་དོའི་ཞེས་ས་བཅད་དུ་མཛད་པ་ཉིད་རྒྱུད་ཀྱིས་འགྲེལ་བའོ༔ དེ་ནས་མ་ངེས་པས་༴ ནས། སྣང་ཤུགས་དང་ཞེས་པའི་བར་དེ༔ བར་དོའི་རྒྱུད་ལས༔ རང་ཉིད་གཅིག་པུར་མུན་ནག་ཆེན་པོར་འཁྱམས༔ རྫུ་འཕྲུལ་གྱི་ཁྱད་པར་ནི༔ ཉི་ཟླ་ཁ་སྦྱོར་ལས༔ དབང་པོའི་ཡན་ལག་ཡོངས་རྫོགས་པས༔ དངོས་པོ་ཀུན་ལ་ཐོགས་མེད་ཅིང་༔ རི་བྲག་རྣམས་ལ་ཐོགས་མེད་འཇུག༔ ཞེས་དང་༔ བར་དོའི་རྒྱུད་ལས༔ ལུས་ཀྱི་སྣང་ཚུལ་འདི་ལྟར་སྣང་བ་སྟེ༔ དབང་པོ་ཀུན་ཚངས་ཐོགས་མེད་ལུས༔ སྔོན་འབྱུང་སྲིད་པའི་ཤ་གཟུགས་ཅན༔ ཞེས་དང་༔ རབ་འབྱམས་ལས༔ སྲིད་པ་བར་དོའི་ཆོས་ཉིད་ནི༔ ཤ་ཁྲག་རང་གི་གཟུགས་བྲ་ནས༔ སྒྱུ་མ་ཡིད་ཀྱི་གཟུགས་ཅན་དེས༔ ཆོས་ཉིད་བདེན་པའི་དོན་མ་མཐོང་༔ འོད་སྣང་ཀུན་ལ་བྲེད་སྔངས་ནས༔ སྟོང་གསུམ་ཀུན་ཏུ་ཡིད་ཀྱིས་རྒྱུ༔ བྱ་སྒྲོ་རླུང་གིས་ཁྱེར་བ་བཞིན༔ ཕྱད་ཕྱོད་ཡད་ཡུད་སྙོམས་ཤིང་འཇུག༔ བན་བུན་ལང་ལོང་རྨི་ལམ་འདྲ༔ ས་གཅིག་མི་ཚུགས་ཚིག་པ་ཟ༔ གར་སླེབ་ལ་སོགས་རིགས་དྲུག་འོད༔ སོ་སོའི་དམིགས་པ་སྣང་བའོ༔ ཞེས་དང་༔ བར་དོའི་རྒྱུད་ལས༔ ཐོགས་མེད་ལུས་དེ་ཐམས་ཅད་འཁྱམས༔ དབུགས་ཀྱི་རྟ་ལ་རབ་ཞོན་ཏེ༔ འདས་དང་མ་འོངས་ཐམས་ཅད་ཀྱང་༔ རང་གི་ལུས་ཆགས་ཐམས་ཅད་གསལ༔ ཞེས་སོ༔ ཡང་སྐབས་ཤིག་ཏུ་ལུས་ཀྱང་༴ ནས། ལ་སོགས་པ་བྱེད་དོའི་བར་གྱི་ལུས་ཀྱི་རྣམ་པ་དང་༔ མགོའི་ལྟ་ཕྱོགས༔ ཚད༔ ཁ་དོག་འོད༔ རྣམས་ཀྱི་ཚུལ་བཤད་པ་སྟེ༔ དེ་ཡང་རིམ་པ་བཞིན་དུ༔ ཡེ་ཤེས་གཏིང་རྫོགས་ཀྱི་རྒྱུད་ལས༔ ད་ཡང་འདུས་པའི་རྡོ་རྗེ་སེམས་དཔའ་ཉོན༔ དེ་ཚེ་བར་དོའི་འབྲེལ་བྱུང་བག་ཆགས་ཀྱིས༔ སྔ་མའི་ལུས་དང་བཅས་ཡོད་སྙམ་པ་འབྱུང་༔ བར་དོར་སྣང་བ་འགྱུར་བ་ཡིད་ཀྱི་ལུས༔ འཁོར་ལོས་བསྒྱུར་རྒྱལ་ཆ་ལུགས་རང་ཡིད་ཀྱིས༔ དབང་པོ་ཀུན་ཚང་ཐོགས་མེད་ཀུན་ཏུ་འགྲོ༔ དེ་ནས་ཤེས་པའི་སྣང་བ་ཡང་འགྱུར་ཏེ༔ ཕྱི་མ་གང་ལེན་ལུས་སུ་ཡོད་སྙམ་ནས༔ ཞེས་དང་༔ ཁ་སྦྱོར་ལས༔ ཕྱིས་ནི་གང་སྐྱེས་ཆ་བྱད་འཛིན༔ ཕྱིས་འབྱུང་ཆ་བྱད་ཡོངས་བཟུང་ནས༔ རིགས་དྲུག་སོ་སོའི་སྣང་ཆར་འགྱུར༔ ཞེས་ཆ་བྱད་དང་༔ མགོའི་བལྟ་ཕྱོགས་ནི༔ དེ་ཉིད་ལས༔ དེ་ཚེ་ཁ་ནི་འདི་ལྟ་སྟེ༔ ལྷ་དང་མི་ནི་གྱེན་ལ་བལྟ༔ ལྷ་མིན་བྱོལ་སོང་དེ་བཞིན་འཕྲེད༔ ཡི་དྭགས་དམྱལ་བ་ཐུར་དུ་བལྟ༔ འདི་དག་ད་གཟོད་སྐྱེ་བའི་དབང་༔ ཞེས་སོ༔ ཚད་ནི༔ དེ་ཉིད་ལས༔ དེ་ལྟར་བར་མའི་ལུས་ཀྱི་ཚད༔ བྱིས་པ་ལོ་བརྒྱད་ལོན་པའམ༔ ལོ་བཅུ་ལོན་པའི་ལུས་ཚད་དུ༔ རྨི་ལམ་ལྟ་བུའི་གཟུགས་སུ་གནས༔ ཞེས་སོ༔ ཁ་དོག་ནི༔ དེ་ཉིད་ལས༔ ལྷ་དང་མི་ནི་ཁ་དོག་དཀར༔ ལྷ་མ་ཡིན་དང་བྱོལ་སོང་སེར༔ ཡི་དྭགས་འོད་ནི་དུ་བ་འདྲ༔ དམྱལ་བ་སྡོང་དུམ་ལྟ་བུ་འམ༔ ཡང་ན་བལ་ནག་གཡེངས་བ་འདྲ༔ བྱོལ་སོང་ཡང་ན་ཁྲག་བཙོས་འདྲ༔ ལྷ་མིན་ཁ་ཆར་འབབ་པ་བཞིན༔ ཞེས་སོ༔ འོད་ཀྱི་ཚད་ནི༔ དེ་ཉིད་ལས༔ དེ་ཉིད་འོད་ཀྱི་ཚད་རྣམས་ནི༔ སྔར་ཞེན་བག་ཆགས་བག་ཆུང་བ༔ འདི་ཡི་འོད་ནི་དཔག་ཚད་ཕྱེད༔ ཁ་དོག་དཀར་པོ་ལྷང་ལྷང་པོ༔ འདི་ནི་ལྷ་མིའི་སྐྱེ་གནས་སོ༔ བག་ཆགས་ཅན་ལ་གསལ་མི་སྣང་༔ ཞེས་སོ༔

གནས་ཀྱི་ཁྱད་པར་ཡང་གྲོགས་སྟོང་༴ སོགས་ནས། རྒྱུ་མཚན་ཡང་དེ་ཡིན་ནོའི་བར༔ འདི་ནི་དབང་པོ་སོགས་ཀྱི་མངོན་ཤེས་ཡོད་པའི་ཕྱོགས་སོ་སོ་ནས་འཆད་པར་ཡང་སོང་སྟེ༔ དེ་ཡང་ཁ་སྦྱོར་ལས༔ འདོད་པ་ཁམས་ཀྱི་ཕྱི་སྣོད་དང་༔བཅུད་ནི་རང་གིས་རིག་ཅིང་གསལ༔ རང་གར་སྐྱེ་བའི་སྣོད་བཅུད་ཀྱང་༔ དེ་ཉིད་དུས་ན་གསལ་བའོ༔ འདོད་ལྡན་སྣོད་བཅུད་གསལ་བར་སྣང་༔ ཞེས་དང་༔ མན་ངག་སྙིང་དགོངས་ལས༔ དེ་ནས་སྲིད་པའི་བར་དོ་ལ་དབང་པོ་ཚང་བ༔ ཤེས་པ་ད་ལྟ་བས་བདུན་འགྱུར་གྱིས་གསལ་བ༔ ཕར་ཐམས་ཅད་གསལ་བ༔ ཚུར་རང་གི་རིགས་མིན་པས་མི་མཐོང་བ༔ རིག་པ་རྟེན་མེད་པ༔ བྱ་སྒྲོ་རླུང་གིས་ཁྱེར་བ་ལྟ་བུ༔ དབུགས་ཀྱི་རྟ་ལ་ཞོན་ནས་རིག་པ་ཕྱོ་ལང་ལང་ཡོད༔ ཐམས་ཅད་དུ་ལུས་འཚོལ་དུ་འགྲོ་བ་ཡོང་ངོ་༔ ཉེ་དྲུང་དང་བཟའ་ཚང་གདུང་བས་ངུས་པས༔ ང་ཤི་ནས་འདུག་པ་ཇི་ལྟར་བྱ་ན་སྙམ་པའི་སྡུག་བསྔལ་དྲག་པོ་ཉ་བྱེ་ཚན་ལ་འདྲེ་བ་འདྲ་བའི་སྡུག་བསྔལ་མི་བཟོད་པ་ཡོང་ངོ་༔ རིག་པ་རྟེན་དང་བྲལ་བས༔ རི་དང་ཁང་ཁྱིམ་དང་ས་རྡོ་རི་བྲག་ཐམས་ཅད་ལ་ཐོགས་པ་མེད་པར་འགྲོའོ༔ གདུང་བ་ཀུན་ལ་ང་འདི་ན་ཡོད་མ་ངུ་ཟེར་རོ༔ དེར་མ་ཐོས་པས་ཡང་ཤི་ནས་འདུག་པ་སྙམ་ནས་སྡུག་བསྔལ་ཤིན་ཏུ་ཆེའོ༔ ངས་ལུས་ཤིག་ཐོབ་ན་ཅི་མ་རུང་སྙམ་ནས༔ ཐམས་ཅད་དུ་ལུས་ཚོལ་དུ་འགྲོའོ༔ སྔར་གྱི་ལུས་དེ་ཡོད་པ་སྙམ་དུ་འོང་ངོ་༔ རི་བྲག་ས་རྡོ་ཐམས་ཅད་ཀྱི་ནང་དུ་འཚང་ངོ་༔ སྲིད་པའི་བར་དོ་ཤིན་ཏུ་སྡུག་བསྔལ་བར་ཞག་ཉི་ཤུ་རྩ་གཅིག་ཡོང་༔ ཞེས་དང་༔ ཐིག་ལེ་གསང་བ་ལས༔ དགེ་སྡིག་ཅི་བྱས་གསལ་བར་སྣང་༔ སྔོན་དུ་འདྲེས་པ་ཐམས་ཅད་ཀུན༔ གདུང་བའི་སེམས་ཀྱིས་གསལ་བར་སྣང་༔ འདྲེས་པའི་ཡུལ་གྱིས་བོས་པའི་ཚེ༔ ལམ་དེ་བཞག་ནས་མལ་དུ་འཁོད༔ སྔོན་དུ་ཅི་བྱས་རྣམ་པར་དག༔ འདྲེས་པའི་དངོས་པོ་བརྗེད་མི་བྱ༔ རྣམ་རྟོག་དབུགས་ཀྱི་རྟ་ལ་ཞོན༔ ཀུན་ཏུ་འཁྱམས་ཏེ་ཀུན་ཏུ་འཁོར༔ ཞེས་དང་༔ ཀུན་གསལ་ལས༔ འོད་ལ་གནས་པའི་བར་དོ་ཡིན༔ སྲིད་པའི་བར་དོ་ཞེས་བྱ་བ༔ ཆོས་ཉིད་འོད་གསལ་སྣང་བ་ཡང་༔ རྟོག་པའི་ཤེས་རབ་མ་སྐྱེས་པས༔ སྔ་ནས་ཡེ་ཤེས་བག་ལ་ཞ༔ སྔར་གྱི་བག་ཆགས་སྣང་བ་འཆར༔ དབང་པོ་ཀུན་ཚང་ཐོགས་མེད་ལྡན༔ སྲིད་པའི་ཤ་གཟུགས་སྔོན་དུ་ཤར༔ རང་དང་རིགས་མཐུན་ལྷ་མིག་མཐོང་༔ ལུས་དང་འདུག་ས་འཚོལ་བར་བྱེད༔ ཞེས་སོ༔

གཞན་དག་ན་རེ༴ ནས། སྤྲོས་པས་ཆོག་གོ་བར༔ འདི་ནི་རིགས་པས་སྒྲུབ་པ་ཡིན་གྱི་རང་གཞན་གྱི་རྒྱུད་སྡེ་ཕྱི་མོའི་ཀླན་ཀ་འདི་ལ་ལུང་གི་དགོས་པ་མི་ཆེ་བར་ཤེས་ནས་མ་སྤྲོས་སོ༔ སྲིད་པ་བར་དོའི་༴ ནས། ཚད་དོ་ཞེས་པའི་བར༔ དེ་ཡང་བར་དོའི་ཚེ་ཚད་རིང་མཐའ་ཞེ་དགུ་དང་ཐུང་ཚད་ཞག་བདུན་ཚུན་ཆད་ཡིན་པར༔ ཁ་སྦྱོར་ལས༔ གཞན་ལ་ཚེ་ནི་ཞག་བདུན་འགྱུར༔ ཞག་ནི་བདུན་ཕྲག་བདུན་གྱིས་ནི༔ དེ་ནི་ཚེ་ཡི་ཚད་ཡིན་ནོ༔ ཞེས་དང་༔ བར་དོའི་རྒྱུད་ལས༔ སྲིད་པའི་འཁོར་ལོ་ཉིན་མཚན་བདུན་བདུན་བསྐོར༔ རང་གིས་སྡུག་བསྔལ་མང་པོ་མྱོང་བར་བྱེད༔ བསྐལ་བར་བསགས་པའི་སྡུག་བསྔལ་སྟོན་པར་བྱེད༔ རིགས་དྲུག་སྣང་བ་ཐམས་ཅད་སྟོན་པར་འོང་༔ བར་དོ་ཕར་ཆེར་ཞག་ནི་བདུན་ལ་འབྱུང་༔ བདུན་ཚོ་བདུན་ལ་བར་དོ་ཐེངས་རེ་འབྱུང་༔ ཞེས་སོ༔ སྐྱེ་གནས་བཞི་ལས་གར་གཏོགས་ཤེ་ན་བརྫུས་སྐྱེས་ཡིན་པར་གཞུང་རྩ་ཚིག་ལས༔ སྐྱེ་བ་ཐམས་ཅད་བརྫུས་ཏེ་སྐྱེ་བ་དང་ཞེས་པའི་དོན་ནི༔ ཁ་སྦྱོར་ལས༔ སྐྱེ་གནས་ཉིད་ནི་རྣམ་བཞི་ལས༔ བརྫུས་ནས་སྐྱེ་བ་ཉིད་དུ་སྟེ༔ ལྷ་དང་དམྱལ་བ་བར་མ་དོ༔ འདི་ཀུན་བརྫུས་པ་ལས་སྐྱེའོ༔ ལུས་ཀྱི་སོག་ཚུལ་སོགས་༴ ནས། གོམ་མོ་བར༔ ཁ་སྦྱོར་ལས༔ སྲིད་པའི་བར་དོའི་ལས་རྣམས་ནི༔ སོག་དང་མི་སོག་ལྟས་འདིའོ༔ རྣམ་པར་སྨིན་པའི་བག་ཆགས་མེད༔ བར་མའི་དབང་གིས་རྒྱུ་མཐུན་པའི༔ བག་ཆགས་རྣམས་ནི་འདིར་སོག་གོ༔ ཞེས་སོ༔

དེ་བཞིན་དུ་༴ ནས། དེར་མངོན་ལ་བར༔ སྔ་མ་ལས༔ གང་གི་ལས་ནི་བཟང་ངན་གྱིས༔ བཟང་བ་དགེ་དང་ཡིད་འོང་འཕྲད༔ ངན་པ་སེམས་ཅན་བག་ཆགས་ཅན༔ ཡིད་དུ་མི་འོང་མངལ་དུ་འཇུག༔ ཞེས་ལས་འབྲེལ་བཟང་ངན་ལས་སྐྱེ་སྲིད་ཀྱང་དེ་ལྟར་ལེན་པ་དང་༔ འདི་ཕྱི་མའི་སྐྱེ་བའི་ལས་བཟང་ངན་སོགས་ལ་བཤད་པ་མིན་པར་ནི་སྔར་ཡང་རྟགས་ཀྱང་༔ བར་དོའི་རྒྱུད་ལས༔ དགེ་སྡིག་བྱས་པའི་འབྲས་བུ་སྣང་བ་གང་༔ ཞིང་ཁམས་མ་ལུས་གསལ་ཞིང་ཡི་དམ་གསལ༔ བདེ་གཤེགས་སངས་རྒྱས་རྣམས་ཀྱིས་སྲས་ཀྱི་དམ་པར་བྱེད༔ ལྷ་དང་མཁའ་འགྲོས་སྤུན་དང་གྲོགས་པོར་བྱེད༔ གཤིན་རྗེ་ཤ་ཟ་མང་པོས་ཁུར་ཞིང་རྗེ་བོར་མཐོང་༔ ལྷ་སྲིན་སྡེ་བརྒྱད་བྲན་དང་གཡོག་པོར་སྣང་༔ དབུགས་ཀྱི་དྲོད་དང་རྐང་མཐིལ་ནས་ཡལ་ནས༔ སྤྱི་གཙུག་ཚངས་པའི་གནས་སུ་སྡུད་པར་བྱེད༔ ཕྱི་ཡི་དབུགས་དེ་རིང་བར་རྒྱུ་བ་ལས༔ རྟོག་མེད་ནམ་མཁའི་ངང་ལ་སང་རྩེར་ཐོང་༔ སྡིག་པ་བྱེད་པ་འཆི་བའི་སྣང་བ་དེ༔ ཞེས་སོགས་བཤད་པ་ལྟར་རོ༔ ཁམས་གསུམ་གང་དུ་གཏོགས་ན་གཟུགས་མེད་ཀྱི་ཆར་གཏོགས་པས་ན་གཞུང་ལས༔ གཟུགས་ལས་གཞན་པའི་༴ ནས། ཆར་གཏོགས་ལ་ཞེས་པའི་བར་དེ༔ ཁ་སྦྱོར་ལས༔ ཁམས་ནི་རྣམ་པ་གསུམ་དག་ནས༔ མིང་བཞིའི་ཕུང་པོ་མ་འགགས་ཏེ༔ ཕྱི་མ་མ་བླངས་བར་མ་སྲིད༔ མིང་བཞི་འདུས་པའི་ཕུང་པོ་ལུས༔ ཤ་ཁྲག་གཟུགས་ནི་མི་སྣང་བས༔ གཟུགས་ནི་མེད་པའི་ཁམས་སུའོ༔ ཞེས་སོ༔ དེ་ནས་སྲིད་པ་བར་དོ་༴ ནས། ཐེབ་ཡོད་དོ་ཞེས་པའི་བར༔ ལུས་ཀྱི་རྟགས་སྔར་སྨོས་གྲུབ་ལ༔ ཉམས་ཀྱི་རྟགས་སམ་ལས་འབྲེལ་དང་ཀློང་ཆེན་རབ་འབྱམས་ལས་ཉོན་མོངས་ཞེས་པའི་ས་བཅད་ཀྱི་མཛད་པ་ནི༔ དེ་ཉིད་ལས༔ ཕྱི་མའི་ལུས་དང་འབྲེལ་བར་ནི༔ རང་ཤུགས་ཞེ་སྡང་སྐྱེ་བའི་རྒྱུ༔ དེ་བཞིན་འདོད་ཆགས་རྐྱེན་གྱིས་ནི༔ ཕྱི་མ་ལ་ནི་སྣང་བའི་ཚུལ༔ ཞེས་དང་༔ བར་དོའི་རྒྱུད་ལས༔ ཕ་ལ་ཞེ་སྡང་སྐྱེ་ཞིང་མ་ལ་འདོད་ཆགས་སྐྱེ༔ རིག་པ་ཕོ་ཡི་ལུས་སུ་གྲུབ་པའི་རྟགས༔ མ་ལ་ཞེ་སྡང་སྐྱེ་ཞིང་ཕ་ལ་འདོད་ཆགས་སྐྱེ༔ རིག་པ་མོ་ཡི་ལུས་སུ་གྲུབ་པའི་རྟགས༔ ཞེས་དང་༔ སེམས་ལ་དུས་རྟགས་མེད་པ་རུ༔ རང་གི་སྣང་བ་གཅིག་པུར་མཐོང་༔ ཞེས་སོ༔ འདི་མན་མི་སྣང་། མཆན།