 གསུང་འབུམ་པོད་བཅུ་གཅིག་པ།སྔ་འགྱུར་རྒྱལ་བ་ཕུག་ཁང་པའི་དཔེ་ཚོགས།དཔལ་སྤྲུལ་ནམ་མཁའ་འཇིགས་མེད།Nitartha internationalམཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། ། རིག་འཛིན་ཚོམ་བུ་འདུས་པའི་ལུས་དཀྱིལ་ཕྲ་བཀོད་ཡོངས་ཀྱི་སྤྱི་ཕུད།༄༅༔ རྡོ་རྗེ་སེམས་དཔའི་དགོངས་ཉམས་ལས༔ རིག་འཛིན་ཚོམ་བུ་འདུས་པའི་ལུས་དཀྱིལ་ཕྲ་བཀོད་ཡོངས་ཀྱི་སྤྱི་ཕུད་ཅེས་བྱ་བ་བཞུགས་སོ༔ ན་མོ་གུ་རུ་པདྨ་ཀ་རཱ་ཡེ༔ ཡེ་ཤེས་ལྷ་ནི་བྱིན་རླབས་དངོས་གྲུབ་མྱུར༔ འོན་ཀྱང་དེང་སང་མངོན་དུ་མ་གྱུར་པས༔ འདྲེན་སྟོབས་མྱུར་ཞལ་རིག་འཛིན་ཚོམ་བུའི་ཚུལ༔ སྙིགས་མའི་འགྲོ་ལ་ཕན་ཕྱིར་འདིར་གསལ་བྱ༔ ས་མ་ཡཱ༔ དེ་ལ་དང་པོ་ཏིང་འཛིན་རྣམ་གསུམ་ནི༔ ཧཱུྃཿ དངོས་ཀུན་མི་དམིགས་འཁོར་འདས་རྒྱུ་གཅིག་ལས༔ སྟོང་པའི་སྣང་བ་ཀློང་འཁྱིལ་བར་དོའི་དངོས༔ ཤར་སྟོང་ཁྱབ་བརྡལ་ཡེ་ཤེས་ཁ་མིག་ཅན༔ སྐད་ཅིག་དྲན་རྫོགས་རྣམ་ཤེས་ཡུལ་བརྒྱད་པོ༔ དུར་ཁྲོད་རྣམ་དག་ཡུམ་བརྒྱད་ངོ་བོ་ཉིད༔ རྟེན་དང་བརྟེན་པའི་འབྱུང་ལྔ་གཞལ་ཡས་ཚུལ༔ དབྱིངས་ཀྱི་བཅུད་དུ་ཡེ་ཤེས་འཁྱིལ་བ་ཡི༔ སྟེང་འོག་ཟུར་རྒྱན་( ཅེས་པ་ཡང་ན་ཁྲི་ཡོད་བྲིས་ན་ཁྲི་རྐང་སྟེང་དུ་པད་ཟླ་ཉི་མ་བམ་གདན་ནམ་ཡང་ན་འབོལ་གྱིས་ཀྱང་ཆོག་གོ )ལོག་གི་བཀོད་པ་སྟེ༔ ཡུམ་གྱི་ཡེ་ཤེས་གདན་དུ་ཤར་བ་ལ༔ ཚོགས་བརྒྱད་རྣམ་པར་དག་པའི་ངོ་བོ་ཉིད༔ ཨོ་རྒྱན་པདྨ་བདུད་འཇོམས་ཁྲོ་བོ་ལོད༔ (དམར་པོ།)ཞལ་གཅིག་ཕྱག་གཉིས་རྡོ་རྗེ་ལྕགས་ཕུར་གདེང་༔ ཚུལ་དགུ་དུར་ཁྲོད་ཆས་བཅུའི་བརྗིད་པ་ནི༔གཡས་གཡོན་ལྷ་ལྕམ་(ཨ་ཉ་བྱང་སྒྲོན།)ཡེ་ཤེས་མཚོ་རྒྱལ་(མཁྱེན་བརྩེའི་མ་ཡུམ།)འདུད༔ བལ་མོ་ཡུམ་(སྐལ་བཟང་སྒྲོལ་མ།) དང་འཁྲིལ་སྦྱོར་རྔམ་པར་རོལ༔ དཔལ་ཆེན་ཀློང་རྫོགས་ཀུན་བཟང་ངོ་བོར་གསལ༔ གཡས་སུ་(དྲི་མེད།)ཡེ་ཤེས་ཉི་མ་སྐུ་མདོག་དཀར༔ ཕྱག་གཉིས་ཌཱ་དྲིལ་འཁྲོལ་ཞིང་རྣལ་འབྱོར་ཆས༔ ཆེ་མཆོག་ཡང་དག་བློ་ལྡན་མཆོག་སྲིད་ངང་༔ གདུལ་བྱ་ལམ་གྱིས་འགྲོ་འདུལ་སྤྲུལ་བར་གསལ༔ གཡོན་དུ་(ནམ་མཁའ།)ཤེས་རབ་ཟླ་བའི་དབང་པོ་དམར༔ (སེར།)ཞལ་གཅིག་ཕྱག་གཉིས་རྣལ་འབྱོར་རྒྱན་ཆས་ཅན༔ གཡས་གཡོན་ཕྱག་ན་ཉི་ཟླའི་(སྟེང་འོག་ཏུ།)གའུ་བསྣམས༔ (དེ་གཉིས་རིག་ཀྱང་མི་སྐྱོན།)ཐིག་ལེ་(སྐུ་ལ།)སྟོང་པའི་སྒྲོན་མེ་འོད་ཟེར་འབར༔ པདྨ་དབང་ཆེན་དཀྱིལ་འཁོར་ཡོངས་རྫོགས་པ༔ ཉི་མ་འོད་ཟེར་སྤྲུལ་པའི་སྐུ་རུ་བསྒོམ༔ རྒྱབ་དུ་(གྲུབ་ཆེན།)བསྟན་པའི་ཉི་མ་སྐུ་མདོག་སེར༔ གཡས་གཡོན་ཕྱག་ན་མཁར་སིལ་ལྷུང་བཟེད་བསྣམས༔ (བཞེང་བཞུགས་འདྲ།)བདེ་གཤེགས་ཡོངས་རྫོགས་ཤཱཀྱ་སེང་གེ་ནི༔ འཇམ་དཔལ་སྐུ་ཡི་ངོ་བོར་ལྷུན་གྱིས་གྲུབ༔ མདུན་དུ་(རྡོར་ལོ།)གསང་བདག་མི་འགྱུར་རྡོ་རྗེ་མཐིང་༔ གཡས་གཡོན་ཕྱག་ན་ཁ་ཊྭཱཾ་ཕུར་བ་འཛིན༔ (ཁྲོ་ཉམས།)སེངྒེ་སྒྲ་སྒྲོག་ཕྲིན་ལས་ཕུར་བའི་སྐུ༔ གྲྭལ་གྱི་འགོ་དང་རྒྱབ་དངོས་ལོགས་མཚམས་སུ༔ (མཁྱེན་བརྩེ།)འཛམ་གླིང་བརྟུལ་ཞུགས་མཆོག་གྲུབ་སྐུ་མདོག་ནག༔ ཡབ་ཡུམ་ཟུང་འཇུག་རྡོ་རྗེ་བྷན་དམར་འཛིན༔ བླ་མ་རིག་འཛིན་མཚོ་སྐྱེས་རྡོ་རྗེ་དངོས༔ གཡོན་རྒྱབ་ལོགས་སུ་(རིག་འཛིན་ནོར་བུ།)མཐུ་སྟོབས་དབང་ཕྱུག་རྩལ༔ ཞལ་གཅིག་ཕྱག་གཉིས་ཕུར་བ་ཧོམ་(གྲུ་གསུམ་དམར།)ཁུང་བསྣམས༔ (མཐིང་ནག)དམོད་པ་དྲེགས་སྔགས་པདྨ་རྒྱལ་པོའི་ངང་༔ གཡོན་མདུན་མཚམས་སུ་(པདྨ་རྡོ་རྗེ།)པདྨ་གར་དབང་པོ༔ ལྗང་ནག་གཡས་གཡོན་ཟོར་དང་རྡོ་རྗེ་ཐོགས༔ འཇིག་རྟེན་མཆོད་བསྟོད་པདྨ་སཾ་བྷར་(ཞི་བ།)གསལ༔ མདུན་གཡས་མཚམས་སུ་(ལྷ་ཆེན།)སྟོབས་ཀྱི་རྒྱལ་པོ་ནི༔ ཕྱག་གཡས་(གསང་མཚན།)ལིང་ཀ་གཡོན་པས་བྷནྡྷ་འཛིན༔ (དཀར་དམར་ཕྱེད་ཞལ།)པདྨ་འབྱུང་གནས་མ་མོའི་ངོ་བོར་བསྐྱེད༔ མཐའ་བསྐོར་འཇའ་ལུས་གྲུབ་པ་ལྔ་བརྒྱ་རུ༔ མཆོག་གི་རིག་འཛིན་བཅུ་གཉིས་འཇའ་ཟེར་སྐུ༔ (ནང་མ་བཞི་ཕྱོགས་མདོག་དེའི་ཕྱི་རིམ་རྣམས་དཀར་སེར་དམར་ལྗང་མཐིང་ཀ་ཕྱོགས་མཚམས་ཡིན་ཀྱང་ཆོག)ཕྱག་ན་ལུག་རྒྱུད་སྒྲོན་མེ་འབར་བ་བསྣམས༔ ཡང་མཐར་ཀུན་ཀྱང་རྣལ་འབྱོར་དབང་ཕྱུག་ཚུལ༔ ནམ་མཁའི་ལུས་ལ་ཉི་ཟླའི་སྤྱན་མངའ་བ༔ གཡས་གཡོན་ཕྱག་ན་ཅང་ཏེའུ་དུང་ཆེན་འཛིན༔ བྱིན་རླབས་ལྷ་ཚོགས་སངས་རྒྱས་སྟོང་རྩ་གཉིས༔ རྡོ་རྗེའི་ལུས་ལ་དམ་པ་རིགས་བརྒྱ་རྫོགས༔ རང་རང་དབང་རྟགས་རིགས་ཆུང་ལྔ་བཅུའི་རྒྱས༔ གནས་གསུམ་འོད་འཕྲོས་དབྱིངས་ནས་ཡེ་ཤེས་པ༔ སྤྱན་དྲངས་གཉིས་མེད་དུ་མ་རོ་གཅིག་གྱུར༔ དེ་ནས་བསྙེན་པ་ནི༔ ཐུགས་ཀར་ཐུགས་ཀྱི་ཡེ་ཤེས་བྱིན་རླབས་ལྷ༔ གཙོ་བོ་རྣམས་ལ་སྒྲུབ་ཆེན་བཀའ་བརྒྱད་དང་༔ མཆོག་རིག་འཛིན་ལ་སྟོན་པ་བཅུ་གཉིས་ཏེ༔ ལྷག་མའི་འཁོར་ལ་དཔའ་བོ་མཁའ་འགྲོ་སྟོང་༔ ཀུན་མཆོག་རྡོ་རྗེར་ཀུན་ཏུ་བཟང་པོ་ཡི༔ ཐུགས་དཀྱིལ་ཉི་གདན་ཨཱ་ལི་ཀཱ་ལི་ནི༔ གཡས་གཡོན་འཛིངས་མར་འཁོར་བའི་ཐུགས་སྲོག་ཧཱུྃ༔ འོད་འཕྲོས་འཁོར་བའི་རྟོག་འཛིན་དབྱིངས་སུ་སྦྱངས༔ དག་པ་རབ་འབྱམས་ཐུགས་ལ་དབང་བསྒྱུར་བས༔ བྱིན་རླབས་འོད་ཟེར་ལྕགས་ཀྱུས་བདག་སྨིན་ནས༔ སྒོ་གསུམ་རྡོ་རྗེ་གསུམ་དུ་རོ་གཅིག་གྱུར༔ ཧཱུྃཿ ཨ་ཨཱཿ ཨི་ཨཱིཿ ཨུ་ཨཱུ༔ རྀ་རཱྀ༔ ལྀ་ལཱྀ༔ ཨེ་ཨེ༔ ཨོ་ཨཽ༔ ཨཾ་ཨ༔ ཀ་ཁ་ག་གྷ་ང་༔ ཙ་ཚ་ཛ་ཛྷ་ཉ༔ ཊ་ཋ་ཌ་དྷ་ཎ༔ ཏ་ཐ་ད་དྷ་ན༔ པ་ཕ་བ་བྷ་མ༔ ཡ་ར་ལ་ཝ༔ ཤ་ཥ་ས་ཧ་ཀྵ༔《ཨོཾ་བཛྲ་གུ་རུ་ཀྲོ་དྷ་ཧཱུྃ་ཨཱཿ བདུད་འཇོམས་གསུངས་ལས་སོ།》དེ་ལྟར་གྲངས་ལྡན་བསྐྱལ་བ་ཡིས༔ དུས་གསུམ་སངས་རྒྱས་ལྷན་ཅིག་འགྲུབ༔ གསང་སྔགས་ཀུན་ལ་རང་དབང་ཐོབ༔ ཡེ་ཤེས་རྩལ་གྱིས་འགྲོ་ཀུན་འདྲེན༔ གཡོ་མེད་གསལ་གསུམ་དང་ལྡན་པས༔ ཟླ་བ་དྲུག་གིས་རིག་འཛིན་བརྙེས༔ སངས་རྒྱས་ཀུན་དང་སྐལ་བ་མཉམ༔ འདི་འདྲའི་གདམས་པ་ས་སྟེང་མེད༔ སྙིང་དང་མིག་ལས་གཅེས་པའི་ཕྱིར༔ རྡོ་རྗེ་ཆོས་སྐྱོང་ཚོགས་རྣམས་ཀྱིས༔ བསྲུང་སྐྱོབས་ཕྲིན་ལས་མ་གཡེལ་ཅིག༔ བཀའ་དང་དམ་ཚིག་གཉན་པོའི་རྒྱ༔ སྐུའི་རྒྱ༔ གསུང་གི་རྒྱ༔ ཐུགས་ཀྱི་རྒྱ༔ བརྡ་ཐིམ༔ ཨྠིྀ༔ ཅེས་པ་འདི་ཡང་ཛ་ཡའི་མིང་གིས་བསྐུལ་ངོར་པདྨ་མཁའ་ཀློང་ཡངས་པས་སྨྲས་པའི་ཡི་གེའི་འདུ་བྱེད་ནི་སྣ་ཆེན་པོ་གཉིས་པ་ནས་སོ། །༈ དཔལ་དགུ་ལས་བླ་མ་རིག་འཛིན་དང་སྲིད་པ་མ་མོ་ཆགས་བྲལ་གྱི་ཚུལ་ཤེས་ཆེ་བ་དང༌། གུ་རུ་མཚན་བརྒྱད་ལས་ཤཱཀྱ་སེང་གེ་དང་པདྨ་སཾ་བྷ་ཝ་ཆགས་བྲལ་གྱིས་འདུལ་བ་ལ་དགོངས་པ་དང༌། འདིར་ཡང་པདྨ་རྡོ་རྗེ་དང་བསྟན་པའི་ཉི་མ་ཆགས་བྲལ་དུ་ཡོད་པ་བརྟེན་འབྲེལ་ཚུལ་འདྲ་ཞིང༌། འོན་ཀྱང་མཚན་བརྒྱད་སྒྲུབ་སྡེ་ལ་དངོས་གྲུབ་བརྙེས་ཚུལ་དང་མི་འདྲ་བ་དང༌། གཞུང་གི་པདྨ་བསྟན་པ་གཉིས་སྦྱོར་ཚུལ་དང་འདིར་འཕྲོས་བཤད་མི་འདྲ་བ་ནི་སངས་རྒྱས་རྣམས་ཀྱི་རྣམ་བར་འཕྲུལ་བ་ཚད་བཟུང་མེད་པ་དང༌། འདི་ལུས་དཀྱིལ་རང་བཞིན་ཡེ་ཤེས་ནི་གང་ལའང་དབང་བསྒྱུར་བ་དང༌། རྩ་བའི་རིགས་འཕོས་ཀྱི་ལུགས་ཡིན་པས་སྐྱོན་གྱི་དྲི་མ་རྣམ་པར་དག་ཅིང༌། མཚན་བརྒྱད་ཀྱང་ཕྱོགས་རེ་ནས་བཟུང་པས་མི་འགལ་ལོ། །ག་གཱས་སོ། །༈ གཡས་སུ་ལྷ་ལྕམ་སྐུ་མདོག་དཀར་མོ་ཞི་བ་ཞལ་གཅིག་ཕྱག་གཉིས་གཡས་ཞལ་ཟས་གཡོན་བདུད་རྩིའི་ཀ་པཱ་ལ་འཛིན་པ་རྒྱ་གར་མའི་ཆ་བྱད་ཅན་ཞབས་གཉིས་མཉམ་པར་བཞེངས་བ་རྒྱན་ན་བཟའ་ཡོངས་རྫོགས་མཆོད་ལྷ་ལྟ་བུའོ། །གཡོན་དུ་ཡེ་ཤེས་མཚོ་རྒྱལ་དམར་མོ་ཁྲོ་འཛུམ་གྲི་ཐོད་ཅན་ཞབས་གཉིས་གར་སྟབས་བསྒྱུར་བ་རུས་རྒྱན་སོགས་རྣལ་འབྱོར་མའི་ཆ་བྱད་ཡོངས་སུ་རྫོགས་པ་དང༌། སྐུ་ལ་བལ་མོ་ཤཀྱ་དཱེ་ཝ་མཐིང་ནག་གཡས་འཁོར་ལོ་དང་གཡོན་དུང་དམར་སྟོབས་པ་གར་སྟབས་ཅན་གྱིས་ཞབས་གཡོན་ཡབ་ཀྱི་སྐེད་ལ་འཁྲིལ་བ་ཁྲོ་མོའི་ཆ་བྱད་ཡོངས་སུ་རྫོགས་པའོ། ། ༈ ཨོཾ་ཨཱཿཧཱུྃ༔ རྡོ་རྗེའི་བླ་མའི་ཡེ་ཤེས་སྒྱུ་འཕྲུལ་ནི༔ སྐུ་ཡིས་འདུལ་ལ་དགུ་ལྡན་བླ་མའི་ཚུལ༔ གསུང་གིས་འདུལ་བས་ཐེག་དགུའི་རང་སྒྲ་བཀོད༔ ཐུགས་ཀྱིས་འདུལ་ལ་ཡེ་ཤེས་ཆེན་པོ་དགུ༔ ཞི་བས་འདུལ་ལ་ཚུལ་དགུའི་སྒེག་པ་དང་༔ ཁྲོ་བོའི་འདུལ་ལ་གར་དགུའི་རོལ་རྩེད་བསྒྱུར༔ ལུང་གིས་འདུལ་ལ་ཁྲག་འཐུང་ཆེན་པོ་དགུ༔ སྒྲུབ་པའི་དཀྱིལ་འཁོར་ཆེ་མཆོག་ཚོགས་འདུས་དགུ༔ དོན་མཐུན་ཚུལ་བསྟན་མཆོག་གི་རིག་འཛིན་དགུ༔ སྤྲུལ་པས་འདུལ་ལ་གུ་རུ་མཚན་དགུ་དང་༔ སྒྲུབ་འཇུག་སྤྲོ་བསྟན་བོད་ཀྱི་རིག་འཛིན་དགུ༔ ས་དགུའི་འགྲོ་འདུལ་ཡང་སྤྲུལ་ཡབ་སྲས་དགུ༔ གཞན་ཡང་རིགས་དྲུག་འདུལ་བའི་སྒྲོན་མ་སྟོང་༔ མདོར་ན་འཁོར་འདས་སྤྱི་དཔལ་ཧེ་རུ་ཀ༔ ཀུན་ནས་ཀུན་བཟང་ཁྱོད་ལས་དོན་གྱི་ལྷ༔ ཅུང་ཟད་ཚོལ་བའི་འདུ་ཤེས་ཡོངས་སྤངས་ནས༔ དྲིལ་སྒྲུབ་ཟབ་མོའི་ཐམས་ཅད་ཕྱམ་གཅིག་བསྡུ༔ འབད་མེད་ཡོངས་གྲུབ་བདེ་གཤེགས་སྙིང་པོ་ཡིས༔ བྱིན་རླབས་མ་དག་གཞན་དབང་ཀུན་བཏགས་ཆོས༔ དག་པ་ལྷ་ཡི་ངོ་བོར་སད་གྱུར་ཅིང་༔ ཕྱིན་ཅི་མ་ལོག་ཁྱོད་དངོས་མངོན་གྱུར་ཤོག༔ ཅེས་ཀྱང་རྡོ་རྗེའི་གྲོགས་ཀྱི་དངས་མ་ཐེ༵ག་པ་མཆོ༵ག་གི་དོན་ལ་རྣལ་འབྱོར་མཐར་ཕྱིན་པ་གང་གིས་གསུངས་བཞིན་པདྨ་ཀློང་ཡངས་ནས་སོ། ། ༈ བསྡུ་ན༔ ན་མོ༔ ཕྱོགས་དུས་ཕྱི་ནང་གསང་བའི་སྐྱབས་ཡུལ་ཀུན༔ ཁྱོད་ཀྱི་ཡེ་ཤེས་བདག་རྐྱེན་ལས་བྱུང་བས༔ ཡིད་བཞིན་ནོར་བུ་བདུད་འཇོམས་ཧེ་རུ་ཀ༔ སྲས་འཁོར་སྤྲུལ་བར་བཅས་ལ་གསོལ་བ་འདེབས༔ མཉམ་ཉིད་ཆོས་དབྱིངས་དགོངས་པར་འདྲེས་གྱུར་ཅིག༔ ལྷུན་གྲུབ་རིག་འཛིན་ཚེ་འདིར་ཐོབ་པར་ཤོག༔ ཅེས་པའང་འོད་གསལ་རྫོགས་པ་ཆེན་པོའི་ཚིག་གི་རྣལ་འབྱོར་བས་སོ། ། ༈ རང་གི་སྙིང་ཀ་ནས་འོད་ཟེར་འཕྲོས་པས་རང་བཞིན་ལྷུན་གྱིས་གྲུབ་པའི་ཞིང་ཁམས་རྡུལ་སྙེད་ནས་རྒྱལ་བ་སྲས་དང་བཅས་པ་བླ་མ་རིག་འཛིན་ཡོངས་འདུས་ཀྱི་རྣམ་པར་བཞེངས་ཏེ་སྐྱབས་སེམས་ཚོགས་ཞིང་གི་ཡུལ་དུ་མདུན་གྱི་ནམ་མཁར་བཛྲ་ས་མ་ཡ་ཛ་ཛ༔ རཏྣ་སུརྱ་ཙནྡྲ་ཀ་མ་ལ་ཡ་སྟྭོམ༔ ༈ སྐྱབས་འགྲོ་སོགས་ནི༔ ཧོ༔ འདི་བཟུང་བྱང་ཆུབ་སྙིང་པོ་མ་ཐོབ་པར༔ སྐྱབས་གནས་མཆོག་གྱུར་རྣམས་ལ་སྐྱབས་སུ་མཆི༔ རང་བྱས་ལས་ཀྱིས་མནར་བའི་ཕ་མ་རྣམས༔ འཁོར་བ་དོང་ནས་སྤྲུགས་པར་སེམས་བསྐྱེད་དོ༔ ཧོ༔ རིག་འཛིན་འདུས་པའི་དཀྱིལ་འཁོར་ལ༔ སྒོ་གསུམ་གུས་པས་ཕྱག་འཚལ་ལོ༔ ཕྱི་ནང་གསང་བའི་མཆོད་པ་འབུལ༔ དུས་གསུམ་བྱས་བསགས་སྡིག་ལྟུང་བཤགས༔ བདག་གཞན་དགེ་ལ་རྗེས་ཡི་རང་༔ བླ་མེད་ཆོས་འཁོར་བསྐོར་བར་བསྐུལ༔ ཇི་སྲིད་འཁོར་བ་མ་སྟོང་པར༔ མྱ་ངན་མི་འདའ་རྟག་བཞུགས་གསོལ༔ རྣམ་དཀར་བྱང་ཆུབ་རྒྱུ་རུ་བསྔོ༔ འགྲོ་ཀུན་སངས་རྒྱས་ཐོབ་པར་ཤོག༔ ཛཿཧཱུྃ་བྃ་ཧོ༔ ཚོགས་ཞིང་རྣམས་རང་ལ་ཐིམ་པས་སྐུ་གསུང་ཐུགས་ཡེ་ཤེས་རྡོ་རྗེ་བཞིའི་དབང་བྱིན་དངོས་གྲུབ་ཐམས་ཅད་ཐོབ་པར་བསམ་ལ༔ ཧཱུྃ༔ བདག་ལྟ་གཉིས་འཛིན་འཁྲུལ་བའི་འདྲེ༔ བདག་མེད་ཆོས་ཉིད་ངང་དུ་བསྐྲད༔ ཕྱག་རྒྱ་ལས་དང་རྒྱལ་པོ་ཡི༔ བྱང་ཆུབ་ཆེན་པོས་མཚམས་བཅད་དོ༔ ཧཱུྃ་ཧྲཱི༔ བདེ་གཤེགས་འདུས་པའི་བདག་ཉིད་ཆེ༔ ཚོགས་རྗེ་ཚོགས་བདག་ཧེ་རུ་ཀ༔ འཆོལ་བ་བདུད་འཇོམས་ཁྲོ་བོ་ལོད༔ བྱིན་ཆེན་ཕོབ་ཅིག་བཅོམ་ལྡན་འདས༔ རྟགས་དང་མཚན་མ་མྱུར་དུ་སྟོན༔ གནས་དང་སྒྲུབ་ཁང་སྒྲུབ་མཆོག་རྫས༔ ཞིང་དང་གཞལ་ཡས་ཡེ་ཤེས་ལྷའི༔ རོལ་བ་ཆེན་པོར་དབང་བསྐུར་ཅིག༔ ཨོཾ་བཛྲ་མ་ཧཱ་གུ་རུ་མ་ར་སྱེ་ན་པྲ་མར་དྷ་ན་བཛྲ་ཡེ་ཨ་ཝེ་ཤ་ཡ་ཕེཾ་ཕེཾ༔ ཨོཾ་སརྦ་དྷརྨཱ་སྭ་བྷ་ཝ་ཛྙཱ་ན་བྷོ་དྷི་ཙིཏྟ་ཤུདྡྷེ་བི་ཤུདྡྷེ་ཨཱཿཧཱུྃ༔ ཨཱཿ ནམ་མཁའ་རྣམ་པར་དག་པའི་དབྱིངས༔ སྟོང་པ་ཉིད་ཀྱི་ཡེ་ཤེས་ལས༔ རྒྱན་སྣང་ཀུན་བཟང་མཆོད་པའི་སྤྲིན༔ འཛད་མེད་ནམ་མཁའ་མཛོད་དུ་སྤྲོ༔ ཨོཾ་མ་ཧཱ་པཱུ་ཙ་སུ་ཁ་བཛྲ་ཕཊ༔ ཅེས་བརྗོད་ནས་གཞུང་ལ་འཇུག་གོ༔ ཅེས་པ་འདི་ཡང་རྡོ་རྗེའི་གྲོགས་མཆོག་གི་གསུང་གི་པུཥྤེ་སྤྱི་བོར་སོན་པ་ལས་ག་གཱས་སོ། ། ༈ སྤྱན་འདྲེན་སོགས་ནི༔ ཧཱུྃ༔ རང་སྣང་དོན་གྱི་འོག་མིན་ནས༔ ཆོས་སྐུའི་བླ་མ་གཤེགས་སུ་གསོལ༔ ལྷུན་གྲུབ་འོད་གསལ་ཕོ་བྲང་ནས༔ ལོངས་སྐུའི་བླ་མ་གཤེགས་སུ་གསོལ༔ ཐུགས་རྗེ་ཕྱོགས་མེད་གཞལ་ཡས་ནས༔ སྤྲུལ་སྐུའི་བླ་མ་གཤེགས་སུ་གསོལ༔ ཁྱད་པར་ལི་ཡུལ་ཆུ་ཤོར་ནས༔ པདྨ་བདེ་ལྡན་གཤེགས་སུ་གསོལ༔ གང་འདུལ་སྒྱུ་འཕྲུལ་དྲྭ་བའི་དངོས༔ ཡུམ་སྲས་འཁོར་བཅས་གཤེགས་སུ་གསོལ༔ གནས་མཆོག་འདི་རུ༴ སྒྲུབ་མཆོག༴ བགེགས་དང་༴ མཆོག་དང་༴ བཛྲ་ས་མ་ཡ་ཛ་ཛ༔ ཧཱུྃ༔ རིན་ཆེན་ཉི་ཟླ་པདྨ་དང་༔ སྨོན་ལམ་གུས་པའི་ཁྲི་སྟེང་དུ༔ དེ་བཞིན་གཤེགས་པ་གདན་འཛོམ་པར༔ གཉིས་མེད་ངང་དུ་བརྟན་པར་བཞུགས༔ བཛྲ་ས་མ་ཡ་ཏིཥྛ་ལྷན༔ ཧོ༔ རང་གནས་སྐུ་འོད་ཐིག་ལེ་ཡི༔ རོལ་བ་རྨད་དུ་བྱུང་བ་ལས༔ འགྲོ་བ་འདུལ་བའི་གཟུགས་བརྙན་ཀྱང་༔ དབྱེར་མེད་ལྟ་བ་མཇལ་ཕྱག་འཚལ༔ ན་མོ་ན་མ་ཧོ༔ ཨོཾ༔ མཆོད་པའི་བྱེ་བྲག་ཇི་སྙེད་པ༔ སེམས་ཀྱི་ཡིད་བཞིན་རྒྱན་དུ་ཤར༔ ངོ་བོ་རྣམ་དག་ལོངས་སྤྱོད་ཆེ༔ རིག་འཛིན་དཀྱིལ་འཁོར་ལྷ་ལ་འབུལ༔ བཞེས་ནས་བདག་ལ་བྱིན་གྱིས་རློབས༔ ཨོཾ་བཛྲ་ར་ཏི་པཱུ་ཛ་སརྦ་ཛྙཱ་ན་ཨ་ལཾ་ཀ་ར་ཁཱ་ཧི༔ ཧཱུྃ༔ ཐིག་ལེ་ཆེན་པོ་གྲྭ་ཟུར་མེད༔ སྣ་ཚོགས་འོད་གསལ་འདུས་མ་བྱས༔ རྩོལ་མེད་རང་གྲོལ་རང་ལུས་ལྡན༔ རྡོ་རྗེའི་བླ་མའི་སྐུ་ལ་བསྟོད༔ ཕྱོགས་མེད་གདུལ་བྱའི་རྣམ་རིག་ལ༔ ཅི་མི་གསུང་བཞིན་རྟོག་འདུལ་གོ༔ གྲགས་སྟོང་ན་དཱའི་ངང་ལ་གྲོལ༔ རྡོ་རྗེའི་བླ་མའི་གསུང་ལ་བསྟོད༔ གཉིས་སྣང་གཉིས་སུ་འཛིན་མེད་ཀྱང་༔ ཡོད་དང་མེད་པའི་བདེན་གཉིས་ཆོས༔ མ་འདྲེས་རིག་སྟོང་ཀུན་ཏུ་མཁྱེན༔ ཐམས་ཅད་མཁྱེན་པའི་ཐུགས་ལ་བསྟོད༔ ཚེ་རབས་གྲངས་མེད་སྡིག་ལྟུང་མུན༔ ཁྱེད་ཐུགས་གཏད་པས་མིང་མཐར་བྱེད༔ ཡས་འབེབས་བདེན་པ་མངོན་གསལ་བའི༔ ནུས་པའི་ཕྲིན་ལས་མངའ་ལ་བསྟོད༔ ༈ དེ་ནས་ཚོགས་ཀྱི་མཆོད་པ་ནི༔ ཤ་ཆང་ལ་སོགས་དམ་ཚིག་རྫས༔ ཡོ་བྱད་ཆ་མ་ཆོ་དགུ་བཤམས༔ ཧཱུྃ༔ བདག་ཉིད་ལྷ་གསལ་ཐུགས་ཀ་ནས༔ སྦྱངས་སྤེལ་བསྒྱུར་བའི་ཡི་གེའི་ཕྲེང་༔ འཕྲོས་པས་ཚོགས་ཀྱི་ཉེས་སྐྱོན་སྦྱངས༔ ཟག་མེད་བདེ་ཆེན་བདུད་རྩིར་བསྒྱུར༔ རྃ་ཡྃ་ཁྃ༔ ཨོཾ་ཨཱཿཧཱུྃ་ཧ་ཧོ་ཧྲཱི༔ ཧཱུྃ༔ ཚོགས་རྗེ་ཚོགས་བདག་དབང་དང་ལྡན༔ མཐུ་ཆེན་རྡོ་རྗེ་བདུད་འཇོམས་རྩལ༔ ཡབ་ཡུམ་སྲས་འཁོར་སྤྲུལ་བར་བཅས༔ ཡེ་ཤེས་ཚོགས་ལ་གཤེགས་སུ་གསོལ༔ ཨོཾ་གྷ་ན་ཙཀྲ་ས་མ་ཡ་ཛ་ཛ༔ ཧཱུྃ༔ བླ་མ་རིག་འཛིན་དཀྱིལ་འཁོར་ལ༔ འདོད་ཡོན་ལོངས་སྤྱོད་ཚོགས་མཆོད་འབུལ༔ ཚོགས་རྫོགས་སྒྲིབ་པ་ཀུན་དག་ནས༔ མཆོག་དང་ཐུན་མོང་དངོས་གྲུབ་སྩོལ༔ གྷ་ན་ཙཀྲ་ཁཱ་ཧི༔ ཧོ༔ དུས་རིང་ཐོག་མ་མེད་པ་ནས༔ ཉོན་མོངས་དབང་གྱུར་སྒོ་གསུམ་གྱིས༔ དམ་ཚིག་ཉམས་ཆགས་ཐམས་ཅད་ཀུན༔ བསོད་ནམས་ཚོགས་ཀྱི་མཆོད་པས་བཤགས༔ གྷ་ན་ཙཀྲ་སོགས་ཡི་གེ་བརྒྱ་བས་ནོངས་པ་བཤགས༔ ཧཱུྃ༔ གནས་ལུགས་དོན་གྱི་ཧེ་རུ་ཀའི༔ སྙིང་རྗེ་ཁྲོས་པའི་ཡེ་ཤེས་མཚོན༔ ཉོན་མོངས་རུ་ཏྲའི་སྲོག་ལ་གདབས༔ འཁྲུལ་པའི་མ་རིག་རྩད་ནས་བཅད༔ འཁྲུལ་མེད་རྒྱལ་བའི་སྲས་སུ་བཀྲུན༔ འཚེངས་བ་གསུམ་ལྡན་ཨེ་མ་ཧོ༔ མ་ཏྲཾ་རུ་ཏྲ་མ་ར་ཡ་ཕཊ༔ ཧཱུྃ༔ ཡེ་ཤེས་ཀློང་ཡངས་ཞལ་ཧོམ་དུ༔ ཟག་བཅས་ལྔ་ཕུང་ཚོགས་སུ་འབུལ༔ ཟད་དང་མི་སྐྱེ་ཤེས་པ་ཡི༔ ཡེ་ཤེས་མངོན་གྱུར་དངོས་གྲུབ་སྩོལ༔ མ་ཏྲཾ་རུ་ཏྲ་ཧ་ལ་པཉྩ་ཁཱ་ཧི༔ དེ་ནས་ཐུགས་དམ་བསྐང་པ་ནི༔ ཧཱུྃ༔ དཔེ་མེད་ཕྱག་རྒྱ་ཆེར་རྫོགས་པའི༔ བདུད་འཇོམས་དཔའ་བོའི་ཐུགས་དམ་བསྐངས༔ དཔེ་ལྡན་ཐབས་ཀྱིས་མཚོན་པའི་ཕྱིར༔ ཡུམ་ཆེན་རིགས་ལྔའི་ཐུགས་དམ་བསྐངས༔ ཀུན་ཏུ་འོད་ཀྱི་སར་བརྟན་པའི༔ ཡེ་ཤེས་ཉི་མའི་ཐུགས་དམ་བསྐངས༔ པདྨ་འོད་ལ་མངོན་བྱང་ཆུབ༔ ཤེས་རབ་ཟླ་བའི་ཐུགས་དམ་བསྐངས༔ ཤེས་རབ་འོད་ལ་དེ་བཞིན་གཤེགས༔ བསྟན་པའི་ཉི་མའི་ཐུགས་དམ་བསྐངས༔ ལས་ཀྱི་འོད་ཟེར་རབ་འགྱེད་པའི༔ མི་འགྱུར་རྡོ་རྗེའི་ཐུགས་དམ་བསྐངས༔ རྡོ་རྗེ་འོད་ཀྱིས་སྒྲིབ་གཉིས་བཅོམ༔ བརྟུལ་ཞུགས་མཆོག་གྲུབ་ཐུགས་དམ་བསྐངས༔ རིན་ཆེན་འོད་ཀྱིས་རེ་བ་སྐོངས༔ མཐུ་སྟོབས་དབང་ཕྱུག་ཐུགས་དམ་བསྐངས༔ རབ་ཏུ་འོད་གསལ་མངོན་གྱུར་པའི༔ པདྨ་གར་དབང་ཐུགས་དམ་བསྐངས༔ བདུད་རྩི་འོད་ལ་བརྟན་པ་ཐོབ༔ སྟོབས་ཀྱི་རྒྱལ་པོའི་ཐུགས་དམ་བསྐངས༔ དག་པ་རྣམ་པ་བཅུ་གཉིས་འཆང་༔ མཆོག་རིག་འཛིན་པའི་ཐུགས་དམ་བསྐངས༔ པཎ་གྲུབ་སྟོང་གི་རྣམ་རོལ་འཆང་༔ འཇའ་ལུས་གྲུབ་པའི་ཐུགས་དམ་བསྐངས༔ ཐུགས་དམ་བསྐང་བའི་ཡོན་ཏན་གྱིས༔ ཡོངས་གྲུབ་དཀྱིལ་འཁོར་མངོན་གྱུར་ནས༔ མ་དག་སྣང་བ་དབྱིངས་སུ་ནུབ༔ རྒྱུ་འབྲས་བློ་ཡི་སྣང་བ་སྦྱོངས༔ རྟོགས་ལྡན་ཉམས་ཀྱི་སྣང་བ་གྲུབ༔ དབྱེར་མེད་ཀུན་བཟང་སྣང་མཐར་ཐུག༔ འགྱུར་མེད་བཙན་ས་ཟིན་པར་ཤོག༔ དེ་ནས་གནམ་ཕུད་གཏོང་བ་ནི༔ ཧོ༔ མ་རྟོགས་སེམས་ཉིད་དོན་དུ་སྣང་༔ རྡོ་རྗེ་ཕག་མོ་གན་རྐྱལ་གྱི༔ ཆོས་འབྱུང་ཡངས་ལ་རྫོགས་ལྡན་པའི༔ ལྗོངས་ལྔ་གླིང་དྲུག་ལུང་ཆེན་བཞི༔ སྦས་ཡུལ་བཅུ་གཉིས་འབྲོས་ཡུལ་བདུན༔ ནང་ལྟར་རྡོ་རྗེ་ཕུང་པོའི་གྲོང་༔ གསང་བ་བྱང་ཆུབ་སེམས་ཀྱི་ངང་༔ འབྱུང་དང་འབྱུང་གྱུར་ཚུལ་ཤར་བའི༔ ས་འོག་ས་སྟེང་ས་བླའི་བཀོད༔ དེ་དང་དེར་བཞུགས་དཔའ་བོ་དང་༔ ཊཱཀྐི་ཆོས་དང་གནས་ཡུལ་སྐྱོངས༔ མ་ལུས་ལུས་པ་མེད་པ་ལ༔ དམ་རྫས་བདུད་རྩིའི་མཆོད་པ་འབུལ༔ བདེ་བ་ཆེན་པོའི་དེ་ཁོ་ནའི༔ རྩལ་འཆང་གྲུབ་པ་མཐར་ཕྱིན་ཤོག༔ དེ་ནས་ཁོ་བོ་ལ་སྐབས་འདིར་ཚོགས་ལ་རོལ་བ་མེད་པས་ཅི་དགྱེས་སུ་མཛོད་ཅིག༔ ཧཱུྃ༔ སྔོན་ཚེ་སྤྱི་དཔལ་སྤྱན་སྔ་རུ༔ ཁས་བླངས་དམ་བཅས་བྲོ་བོར་བའི༔ མ་མདུན་སྲིང་བཞི་འབར་མ་བརྒྱད༔ གིང་དང་ལིང་ཀ་དབང་ཕྱུག་མ༔ ཕམ་ཕབ་བཟང་པོ་འདི་བཞེས་ལ༔ སྒྲུབ་པའི་བར་ཆད་དབྱིངས་སུ་སོལ༔ ཐ་ཚིག་བཞིན་དུ་ཕྲིན་ལས་མཛོད༔ ཨུཥྩི་ཊ་བྷ་ལིངྟ་ཁཱ་ཧི༔ ཧཱུྃ༔ སྔོན་ཚེ་བདུད་འཇོམས་ཧེ་རུ་ཀས༔ རང་སྣང་བདུད་བཞི་བཅོམ་པའི་ཚེ༔ འཁྲུལ་བ་གཞི་ལ་དག་པ་ཡི༔ རང་བྱུང་ཚིག་ལྔའི་རང་དན་བཅས༔ བར་དུ་རིག་འཛིན་ཧཱུྃ་ཀ་ར༔ ཚོགས་རྗེ་ཚོགས་བདག་ཆེན་པོར་བཞེངས༔ ཆོས་ཉིད་རུ་ལུའི་རང་སྒྲ་བསྒྲགས༔ གདུལ་བྱ་རྗེས་སུ་བཟུང་བ་དང་༔ ཐ་མ་སྐལ་བཟང་དགེར་སད་ངོར༔ ཆེ་མཆོག་རྡོ་རྗེ་ཁྲོ་ལོད་ཀྱིས༔ མངོན་སྤྱོད་རྔམ་པའི་རྟ་བྲོ་ཡིས༔ དྲེགས་ཚོགས་དབང་བསྡུད་ཟིལ་གྱིས་མནན༔ སྡེ་དཔོན་སྲུང་མར་མངའ་ཡང་གསོལ༔ ད་ལྟ་གདུལ་བྱའི་དཔལ་མཚོ་རུ༔ བླ་མ་རིག་འཛིན་ཚོམ་བུ་ཡིས༔ རྫོགས་ཆེན་བསྟན་པ་ཉིན་མོར་བྱས༔ དཀའ་ཡི་སྲུང་མར་མངའ་ཡང་གསོལ༔ ཆད་དོན་གཏོར་མ་འདི་བཞེས་ལ༔ དམ་བཅས་བཞིན་དུ་ཕྲིན་ལས་མཛོད༔ བུདྡྷ་ཤ་ས་ན་པཱ་ལ་སརྦ་བྷ་ལིངྟ་ཁཱ་ཧི༔ མ་བྷྱོ༔ བསྟན་མ་ཡ་མ་སྐྱོང་མའི་ཚོགས༔ རྡོ་རྗེ་བདུད་རྩི་འདི་བཞེས་ལ༔ བདེན་དོན་རྣམ་པ་བཅུ་གཉིས་ཀྱི༔ བསྟན་པའི་མངའ་ཐང་དར་རྒྱས་མཛོད༔ མ་མ་ཧྲཱིཾ་ཧྲཱིཾ་ཨེ་དམ་བྷ་ལིངྟ་ཁཱ་ཧི༔ དེ་ནས་རྟ་བྲོ་ནི༔ ཧཱུྃ༔ དབྱིབས་བཞི་རྫོགས་པའི་བྲོ་ར་ལ༔ རིག་འཛིན་དཔའ་བོ་དཔའ་མོ་ཡིས༔ ཐབས་ཀྱི་བྲོ་བརྡུང་གཡས་སུ་བསྐོར༔ ཞེ་སྡང་དགྲ་གདོན་འདུལ་ཕྱིར་བརྡུང་༔ རྐང་པ་གཡོན་པས་སྟབས་སྤྱོད་དེ༔ ཤེས་རབ་བྲོ་བརྡུང་གཡོན་དུ་བརྡུང་༔ འདོད་ཆགས་མོ་གདོན་འདྲེ་མོ་སོགས༔ གནོད་བྱེད་དགྲ་གདོན་མགོ་ལ་ཡ༔ ཟུང་འཇུག་བྲོ་བརྡུང་བསྣོལ་མར་འཁྲབ༔ གཏི་མུག་ཀླུ་གདོན་འདུལ་བའི་བྲོ༔ དམ་སྲི་ཡ་མ་འཇོམས་པའི་བྲོ༔ གཞིག་མེད་ལས་ཀྱི་རྡོ་རྗེའི་བྲོ༔ སྐྱེ་མེད་ཡེ་ཤེས་སྤོར་བའི་བྲོ༔ གླུ་བྲོ་གར་དང་བཅས་ཏེ་བརྡུང་༔ བྱང་ཆུབ་སེམས་གཉིས་མ་སྐྱེས་བར༔ ནམ་ཡང་ལྡང་མེད་སྟཾ་བྷ་ཡ༔ ཨོཾ་ལཾ༔ ཨཱཾ་ལཾ༔ ཧཱུྃ་ལཾ་མ་ར་ཡ་ནན༔ ཅེས་དང་༔ ཧཱུྃ༔ རིག་འཛིན་ཡོངས་རྫོགས་དཀྱིལ་འཁོར་དུ༔ བསྙེན་སྒྲུབ་ལས་སྦྱོར་མཐའ་རུ་ཕྱིན༔ རྡོ་རྗེ་དཔའ་བོའི་ནམ་ཡང་ལངས༔ དངོས་གྲུབ་སྩོལ་བའི་དུས་ལ་བབས༔ འགྱུར་མེད་སྐུ་ཡི་དངོས་གྲུབ་སྩོལ༔ ན་དཱ་གསུང་གི་དངོས་གྲུབ་སྩོལ་༔ མི་རྟོག་ཡེ་ཤེས༴ ཡིད་བཞིན་ཡོན་ཏན༴ ཕྲིན་ལས་ལྷུན་གྲུབ་དངོས་གྲུབ་སྩོལ༔ ཨོཾ་བཛྲ་གུ་རུ་སརྦ་མ་ཧཱ་བིཏྱ་དྷཱ་ར་སིདྡྷི་ཕ་ལ་ཧཱུྃ༔ དེ་ནས་ནོངས་པ་བཤགས་པ་ནི༔ ཧཱུྃ༔ གཤིས་ལ་ཉམས་པའི་དྲི་བྲལ་ཡང་༔ རྩལ་གྱི་འཁྲུལ་བ་ལོག་བཟུང་གིས༔ ལྟ་བསྒོམ་སྤྱོད་པ་བསྙེན་སྒྲུབ་ལས༔ ཚུལ་བཞིན་རྔོ་མ་ཐོགས་པ་ཀུན༔ གནོང་འགྱོད་དྲག་པོའི་མཐོལ་ལོ་བཤགས༔ ཚངས་པ་མཆོག་གི་དངོས་གྲུབ་སྩོལ༔ ཡི་གེ་བརྒྱ་པས་ནོངས་པ་བཤགས་སོ༔ བསྡུ་ལྡང་ནི༔ ཧཱུྃ༔ ཡེ་ཤེས་ལྷ་ཚོགས་རྟེན་བརྟེན་པ༔ བདག་ཉིད་དམ་ཚིག་སེམས་ལ་ཐིམ༔ ལྷ་སྐུའི་ཕྱག་རྒྱའི་ཀུན་རྫོབ་ཀྱང་༔ སྤྲོས་བྲལ་འོད་གསལ་རྡོ་རྗེར་ལྷུག༔ སླར་ཡང་ཟུང་འཇུག་ཡེ་ཤེས་ཀྱི༔ ཕྱག་རྒྱ་གཅིག་པའི་འབྲས་བུར་ཤར༔ ཨ་ཨཱཿ ཨོཾ་ཧཱུྃ༔ དེ་ནས་བཀྲ་ཤིས་ནི༔ ཧཱུྃ༔ ཀུན་ཁྱབ་གཉིས་མེད་དོན་གྱི་རྡོ་རྗེ་སེམས༔ རྩ་བའི་བླ་མ་ཚོམ་བུའི་འཁོར་ལོར་ཤར༔ བཀྲ་ཤིས་མཐར་ཐུག་ཁྱོད་ཀྱིས་གང་བརྙེས་པ༔ དེས་ནི་དེང་བདག་དབུགས་དབྱུང་བསྩལ་ཏུ་གསོལ༔ ལྟ་བ་གྲོང་ཁྱེར་རྒྱུན་གཅོད་རྟོགས་པ་དང་༔ བསྒོམ་པ་ཉིན་མཚན་ཁ་སྦྱོར་འདྲེས་ནས་སུ༔ སྤྱོད་པ་སྣང་བ་དབང་བསྒྱུར་གྲུབ་པ་ཡིས༔ གྲུབ་མཐའ་རྣམ་དག་སྙོགས་པའི་བཀྲ་ཤིས་ཤོག༔ སྒྱུ་ལུས་རྡོས་པ་སྐུ་ལྔའི་ཕྱག་རྒྱ་ཆེ༔ བརྡ་སྤྲོད་རྩོལ་བྱུང་གསུང་ལྔའི་གསང་བ་སྔགས༔ འཁྲུལ་སེམས་རྟོགས་བྲལ་ཐུགས་ལྔའི་སྙིང་པོར་གྲོལ༔ ཀུན་མཆོག་གསང་གསུམ་མངོན་གྱུར་བཀྲ་ཤིས་ཤོག༔ ཁྲེགས་ཆོད་གཞི་ཡི་འོད་གསལ་གདེངས་སུ་གྱུར༔ ཐོད་རྒལ་ལམ་གྱི་འོད་གསལ་རང་རྩལ་རྫོགས༔ ཟུང་འཇུག་སྣང་བཞིའི་ཉམས་མཐར་ཐུག་ནས་སུ༔ གཞོན་ནུ་བུམ་པ་ཁྱོད་ཀློང་གྲོལ་གྱུར་ཅིག༔ ཅེས་པ་འདི་ཡང་རྡོ་རྗེ་ཡི། །མཆེད་ཀྱིས་ཐུགས་གཡེལ་གསུང་བསྡམས་ན། །བདག་ཀྱང་དངངས་སྐྲག་སུན་པའི་བློས། །དྲན་པའི་ཚེ་ན་བྲིས་པ་སྟེ། །འབེན་མ་མཐོང་བའི་མདའ་བཞིན་དང༌། །མུན་ནག་ནང་གི་ལག་ནོམ་དུ། །སོང་ངམ་སྙམ་ཀྱང་དྲི་མ་ཕོད། །དབྱེན་མཁན་འགའ་ཡིས་སྤྱོས་སམ་སྙམ། །ཅི་ཟེར་ཆ་མ་ཆོད་པ་དང༌། །ག་གཱ་རྒད་པོས་འཕྱོས་གཏམ་དུ། །མ་སོང་བ་ན་ཡི་རང་སྐྱེ། །སོང་ཀྱང་རང་ཐོག་ཡོག་མེད་ལགས། ཅེས་ཁ་མཚར་གཅེས་འཁང་དང་བཅས་ཐེག་མཆོག་གི་བཞེད་སྐོངས་སུ་ཕུལ་ལོ། ། སྔོན་འགྲོའི་ངག་འདོན་བསྡུས་པ་བྱང་ཆུབ་ལམ་སྒྲོན།༄༅། །ཡེ་ཤེས་སྒྱུ་འཕྲུལ་དྲྭ་བ་ལས༔ སྔོན་འགྲོའི་ངག་འདོན་བསྡུས་པ་བྱང་ཆུབ་ལམ་སྒྲོན་བཞུགས་སོ༔ སྔོན་དུ་འགྲོ་བའི་ཆོས་བཅུ་ལས༔ ཀྱཻ༔ སྐྱབས་གནས་ཀུན་འདུས་བླ་མ་རིན་པོ་ཆེ༔ ཐུགས་རྗེའི་བརྩེར་དགོངས་བདག་བརྒྱུད་བྱིན་གྱི་རློབས༔ རྙེད་དཀའི་དལ་འབྱོར་རིན་ཆེན་ཐོབ་དུས་འདིར༔ མི་རྟག་འཆི་བ་བརྒྱུད་ལ་སྐྱེ་བ་དང་༔ འཁོར་བའི་གནས་ལ་བདེ་བ་མེད་ཤེས་ཏེ༔ བདེ་སྡུག་རྒྱུ་ལ་སྤང་བླང་མ་འཛོལ་བར༔ ཀུན་ཀྱང་ཐར་བ་ཆ་མཐུན་དོན་དུ་གཞོལ༔ ཡང་དག་སངས་རྒྱས་གོ་འཕང་ཐོབ་པར་ཤོག༔ ཀྱཻ༔ བླ་མ་དཀོན་མཆོག་རང་སེམས་འབྲས་བུ་ཡི༔ ངོ་བོ་སེམས་ཅན་ཀུན་གྱིས་མངོན་གྱུར་བྱ༔ སྐྱབས་མཆོག་རང་ལ་ཡོད་པའི་བདེན་སྟོབས་ཀྱི༔ ད་ལྟ་ཉིད་ནས་སེམས་བསྐྱེད་མཐར་ཐུག་ཤོག༔ ཨེ་མ༔ དྲི་མེད་དེ་བཞིན་ཉིད་ནི་གཟུགས་ཀྱི་སྐུ༔ རྡོ་རྗེ་སེམས་དཔའ་སྤྱི་བོའི་གཙུག་ཏུ་བསྒོམ༔ སྡིག་ལྟུང་མི་དགེ་འགྱོད་སྡོམ་དྲག་པོའི་ངང་༔ རང་བཞིན་མེད་པ་སྒྱུ་མ་ལྟ་བུར་བཤགས༔ སྐུ་ལས་བདུད་རྩིའི་རྒྱུན་དཀར་བབས་པ་ཡི༔ འཁོར་འདས་རྡོ་རྗེ་སེམས་དཔའི་གོ་རུ་བཀོད༔ ཨོཾ་བཛྲ་ས་ཏྭ་ཧཱུྃ༔ སེམས་དཔའ་འོད་ཞུ་རྩ་བའི་བླ་མར་གྱུར༔ བྱིན་རླབས་དབང་བསྒྱུར་རྗེ་བཙུན་ཐུགས་རྗེའི་གཏེར༔ ཕྱི་ནང་གསང་བ་ཡང་གསང་མཎྜལ་དང་༔ རྣམ་དག་བདུན་གྱི་བདག་དོན་ཚོགས་ཞིང་མཛོད༔ ཁྱོད་ནི་དུས་གསུམ་སངས་རྒྱས་བླ་མའི་གར༔ སྐད་ཅིག་ལས་ལ་མ་ལྟོས་འདྲེན་སྟོན་མཛོད༔ སིདྡྷི་ཅི་མང་གིས་ཐུགས་དམ་བསྐུལ༔ གནས་གསུམ་འོད་ཟེར་འབྲུ་གསུམ་རྣམ་ཅན་གྱི༔ སྒོ་གསུམ་ལ་ཐིམ་སླར་ནི་དབྱེར་མེད་གྱུར༔ དབང་བཞི་དགོས་འབྲས་དང་བཅས་ཡོངས་སུ་རྫོགས༔ སྒོ་གསུམ་རྡོ་རྗེ་གསུམ་དུ་གོ་འཕོས་སོ༔ ཨཱ༔ ཧིཀ་གིས་རང་སེམས་རྡོ་རྗེ་ཁྲོས་མ་རུ༔ སྟེང་ཕྱོགས་འཆི་མེད་ལམ་བཟང་ཡངས་པར་འཕོས༔ ཕཊ་དྲལ་གྲི་ཁུག་ཕྱག་གིས་ཕྱོགས་བཅུར་བརྡལ༔ ཤ་རི་ཁྲག་མཚོ་རུས་གྲམ་བདུད་རྩིར་བརླབས༔ ཡར་མར་མགྲོན་ཐབས་འོད་ཟེར་ཕོ་ཉ་ཡིས༔ སྤྱན་དྲངས་མཆོད་སྦྱིན་མཉེས་ཚིམ་དངོས་གྲུབ་ཐོབ༔ ལན་ཆགས་བུ་ལོན་ཀུན་བྱང་ཕྱམ་གཅིག་ཏུ༔ ཀུན་བཟང་དགོངས་ཀློང་ཁྱབ་བརྡལ་ཡངས་པར་ལྷུག༔ ཨ་ཨ་ཕཊ༔ ཅེས་ཀྱང་ག་ག་ཨ་བྷྱེ་ཡིས༔ རིགས་ལྡན་ཛི་ནའི་བསྐུལ་བའི་ངོར༔ སློབ་འབངས་ཡོངས་ལ་ཕན་པའི་བློའི༔ རིན་ཆེན་ཤོག་སྐྱའི་ངོགས་སུ་བཀོད༔ ཅེས་ཀྱང་ག་གཱས་སོ། །མངྒ་ལཾ། ། བླ་མའི་གསོལ་འདེབས་ཡོན་ཏན་རྗེས་དྲན།༄༅༔ བླ་མའི་གསོལ་འདེབས་ཡོན་ཏན་རྗེས་དྲན་ཞེས་བྱ་བ་བཞུགས་སོ༔ ༄༅༔ ཨེ་མ་ཧོ༔ དུས་གསུམ་སྲས་བཅས་མགོན་གྱུར་ཀུན་དབང་ཕྱུག༔ བརྟུལ་ཞུགས་གྲུབ་པ་རྡོ་རྗེའི་རིག་པ་འཛིན༔ ཨོ་རྒྱན་པདྨས་རྗེས་བཟུང་འགྲོ་བའི་མགོན༔ ནམ་མཁའ་འཇིགས་མེད་ཞབས་ལ་གསོལ་བ་འདེབས༔ འཇིག་རྟེན་ཆོས་བརྒྱད་སྤྱོད་པ་རོ་སྙོམས་སུ༔ མཛད་ལས་གཞན་ངོར་མཛེས་པའི་སྤྱོད་པ་སྤངས༔ ཕྱི་ཚུལ་འདི་འདྲ་ཚད་དང་གཏིང་མི་དཔོག༔ ནམ་མཁའ་འཇིགས་མེད་ཞབས་ལ་གསོལ་བ་འདེབས༔ ཁྱད་པར་ཅན་གྱི་བསླབ་པ་རིན་པོ་ཆེ༔ མཆོག་འཛིན་ཀུན་ཏུ་སྦྱོར་བས་མ་སྨད་པར༔ རྨ་བྱའི་འཚོ་བ་ལྟ་བུའི་ཕྱག་རྒྱ་ལས༔ དངོས་གྲུབ་ལེགས་པར་བརྙེས་ལ་གསོལ་བ་འདེབས༔ རང་གྲོལ་མངོན་སུམ་སྟོན་པའི་བསྟན་པ་དངོས༔ དེ་ཡི་གཟུགས་བརྙན་ཐེག་པའི་རིམ་པ་བརྒྱད༔ ཤེས་རབ་གསུམ་གྱིས་དོན་བཅུད་གཅིག་ཏུ་བསྡུས༔ མན་ངག་ཁྲིགས་སུ་སྡེབས་ལ་གསོལ་བ་འདེབས༔ སོ་སོར་ཡང་དག་རིག་པའི་དོན་བརྙེས་ཤིང་༔ ལྟ་བ་སེང་ཆེན་རྩལ་གསུམ་རབ་རྫོགས་ཀྱང་༔ རྒྱུ་མཐུན་དོན་ཚོལ་བླ་མ་མང་དུ་བརྟེན༔ མཁས་པའི་དབང་པོ་མཆོག་ལ་གསོལ་བ་འདེབས༔ མཁའ་འགྲོའི་ལུང་བསྟན་ཡི་དམ་དངོས་གྲུབ་ཐོབ༔ བཀའ་དྲིན་ཅན་གྱི་བླ་མའི་རྗེས་གནང་བས༔ འཆད་དང་རྩོམ་པའི་བར་ཆད་དབྱིངས་སུ་ཞི༔ ཕྲིན་ལས་རང་དབང་ཐོབ་ལ་གསོལ་བ་འདེབས༔ རང་ཞལ་ཚུལ་བཞིན་མཐོང་བའི་མངོན་སུམ་གྱི༔ ཟག་མེད་ཡེ་ཤེས་ངང་ལས་ཡིད་མི་ཕྱེད༔ འོན་ཀྱང་སྣང་དུ་མི་རུང་དཔོག་པའི་རྒྱུའི༔ གདམས་པའི་གསང་མཛོད་འདོམས་ལ་གསོལ་བ་འདེབས༔ རང་བྱུང་ཡེ་ཤེས་ལྔ་ཡི་སྐུ་གསུང་གི༔ ཕྲིན་ལས་ཞི་རྒྱས་ཐབས་ཀྱིས་བྲལ་སྤངས་དང་༔ དབང་དྲག་ཤེས་རབ་ཐབས་བྱུང་སྨིན་པའི་རྒྱན༔ ཆ་ལུགས་སྟོན་པར་མཛད་ལ་གསོལ་བ་འདེབས༔ དུ་མའི་ཡོན་ཏན་མཛད་པའི་རྣམ་རོལ་ཀྱང་༔ གཅིག་གིས་དེ་ཉིད་བརྗོད་ལ་མངོན་ཕྱོགས་ལྟའི༔ ཀུན་གསལ་དོག་པོར་བགྱིད་པའི་ཡིད་ཅན་རེར༔ དཔག་ཡས་འདུལ་བྱེད་སྟོན་ལ་གསོལ་བ་འདེབས༔ ཕྱོགས་བཅུའི་རྒྱལ་བའི་ཐུགས་རྗེས་བརྒྱུད་བསྐུལ་ཏེ༔ ཤེས་བཞིན་འཇུག་གནས་འབྱུང་ལ་དཔའ་བོ་དང་༔ མཁའ་འགྲོའི་གླུ་གར་རོལ་མོའི་སྐྱེལ་མ་ཡིས༔ བསྙེན་བཀུར་མངོན་སུམ་མཛད་ལ་གསོལ་བ་འདེབས༔ ཡུམ་མཁར་རྗེས་དྲན་མངོན་བྱང་ལྔ་ལྡན་པའི༔ ལྷ་སྔགས་ཆོས་ཉིད་དབྱེར་མེད་དམ་པའི་དོན༔ ཡི་གེ་དྲུག་གི་རྡོ་རྗེའི་གསུང་མཐོན་གྱིས༔ རིགས་ཆེན་གསལ་བར་མཛད་ལ་གསོལ་བ་འདེབས༔ བལྟམས་ཚེ་ཉེ་འཁོར་རླུང་གི་རྒྱལ་མཚན་དང་༔ རྫི་ཕྱོགས་དཔག་ཚད་བསུང་ཞིམ་གདུགས་ཀྱིས་འགེབས༔ ཟླ་བ་གཅིག་ནས་འཕགས་པས་རྗེས་སུ་བཟུང་༔ མངལ་གྱི་དྲི་མ་མེད་ལ་གསོལ་བ་འདེབས༔ ལོ་གསུམ་དུས་ནས་ཐབས་ཤེས་ཆོས་གཏེར་སྒྲོམ༔ ཨ་ལི་ཀཱ་ལི་མ་བསླབས་རང་ཤེས་ནས༔ སྐྱེ་བོ་ཀུན་གྱི་བླ་དྭགས་དེར་ཆགས་པའི༔ མཁྱེན་གཟིགས་སྦས་གསང་བརྟོལ་ལ་གསོལ་བ་འདེབས༔ བརྟུལ་ཞུགས་མཆོག་ཏུ་གྲུབ་པའི་དབང་འབྱོར་ལས༔ གྲོགས་ཀྱི་དམ་པ་ངག་དབང་ཕྲིན་ལས་མདུན༔ བྱིའུ་བསད་དེ་སླར་ཡང་ཞག་གི་མཐར༔ བསླང་བས་ངོ་མཚར་འབར་ལ་གསོལ་བ་འདེབས༔ ཕ་ཅིག་དམ་པ་བདུད་འཇོམས་རྡོ་རྗེ་ཡིས༔ སྐལ་བཟང་སྟོང་ལ་ཆོས་འཁོར་བསྐོར་བའི་དབུས༔ ཐོག་བཅས་མཁར་གྱི་རྩེ་ནས་འཕུར་རྩལ་ཕྱིན༔ ཡང་དག་ལྟ་བ་བསྐྱེད་ལ་གསོལ་བ་འདེབས༔ རོ་སྙོམས་སྤྱོད་པ་ལྷུར་ལེན་ཐོག་མ་ན༔ གཞན་དག་ཡིད་ཆེས་དབུགས་དབྱུང་སྦྱིན་པའི་སླད༔ སྲ་མཁྲེགས་ལྕགས་དང་སྤོས་ཀྱི་རིང་བུར་ནི༔ རྡོ་རྗེའི་མདུད་པའི་བོར་ལ་གསོལ་བ་འདེབས༔ ཕ་རོལ་འཆི་འཕོ་སྦྲོན་པའི་འ་འོལ་ལས༔ སྙན་སྨྲས་དུས་ཀྱི་སྟོན་མོར་འགྱུར་དགོངས་ནས༔ གསུང་གིས་ཤིས་བརྗོད་མེ་ཏོག་གིས་མཆོད་དེ༔ སྟོབས་བཅུའི་མངོན་རྟགས་ངོམ་ལ་གསོལ་བ་འདེབས༔ ཐེམ་སྐས་མེད་པའི་མཁར་གྱི་བཀད་སའི་སྟེང་༔ རྫུ་འཕྲུལ་ཤིན་ཏིང་དེ་ཝའི་བརྟུལ་ཞུགས་ཀྱིས༔ སྐྱེ་བོ་མང་ལ་མངོན་སུམ་སྣང་བྱས་བཞིན༔ རང་བྱོན་སྔོན་རྗེས་མཛད་ལ་གསོལ་བ་འདེབས༔ ཁྱད་པར་དུ་ཡང་དམན་པའི་སྤྱོད་པ་ཡིས༔ སྐྱེ་བོའི་ཚུལ་བསྟུན་ཚུལ་འཆོས་མིག་རྒྱན་དུ༔ མ་སྤྲས་གང་དེའི་སྙིང་རྗེའི་གཞན་བཟུང་པའི༔ ཐབས་མཁས་འོད་ཟེར་ཅན་ལ་གསོལ་བ་འདེབས༔ ཤིན་ཏུ་མཐོ་འཇམ་རྡོ་རྗེའི་བྲག་གི་ངོས༔ གཞན་བརྟེན་ཟླ་བོར་བཅས་ཏེ་བདེ་མྱུར་འཛེགས༔ ས་གཏེར་བསོད་ནམས་དུས་སུ་སྨིན་པ་ཡིས༔ པདྨའི་བརྒྱུད་འཛིན་ཆེ་ལ་གསོལ་བ་འདེབས༔ ཁྱད་པར་ཤེས་པས་བཏང་བའི་བེམ་པོ་ནི༔ ངན་སེམས་འབྱུང་བོའི་སྦྲན་ནས་ཡུལ་ཁམས་འགའ༔ ཕུང་ལ་ཉེ་བར་སྦྱོར་དུས་ཏིང་འཛིན་གྱིས༔ མཐུ་སྟོབས་ནུས་པས་བཏུལ་ལ་གསོལ་བ་འདེབས༔ རྨ་གཡང་ནོར་གྱི་བདག་པོའི་ཉེ་འདབས་སུ༔ གཏིང་ཟབ་ཆུ་ཞེངས་ཡངས་པའི་རྒྱ་མཚོ་ལས༔ གྲོགས་བཅས་གཞན་བརྟེན་རྫུ་འཕྲུལ་སྟོབས་ཆེན་པོའི༔ མ་བྱིང་བདེ་བར་བཞུད་ལ་གསོལ་བ་འདེབས༔ ཀློག་སློབ་མཁན་པོ་རིག་འཛིན་རྡོ་རྗེ་ཡིས༔ བྱིས་པའི་ངང་ཚུལ་འགོགས་ཕྱིར་ཕོ་བྲང་གི༔ སྒོ་དང་སེང་སྐར་གཏན་པར་བཅད་གྱུར་ཀྱང་༔ ཟང་ཐལ་རང་བྱོན་མཛད་ལ་གསོལ་བ་འདེབས༔ མ་ཧཱ་ཙི་ནའི་དམག་གི་དཔུང་ཆེན་ཀྱང་༔ དུས་གསུམ་སྒྲིབ་མེད་འཆད་པའི་མངོན་ཤེས་ལ༔ ཡིད་ཆེས་ཐོབ་པས་སྤྱི་བོའི་རྒྱན་དུ་བསྟོད༔ མཁྱེན་གཟིགས་འགྲན་ཟླ་མེད་ལ་གསོལ་བ་འདེབས༔ ཟབ་མོའི་ཆོས་ཀྱི་འཁོར་ལོའི་ཐོག་མ་རུ༔ མཁའ་འགྲོ་འབར་བའི་ལུང་བསྟན་དབུགས་དབྱུང་གིས༔ རྗེས་བརྗོད་མེ་ཏོག་ཆར་(བྱ་རྒོད་ཀྱི་ཐུལ་ཕྲན་)བ་ཐོ་ཕྱིར་འཁྲོལ༔ བཀའ་བབས་གྲུབ་ཐོབ་ཆེན་པོར༴ གྲི་གུས་བྲང་གཤགས་ལྷ་ཚོགས་མཐོངས་སྟོན་དུ༔ ཡུམ་གྱིས་མ་བཟོད་ཁྱིམ་ཐབ་རྩོད་པར་བསམ༔ སླར་ནི་ཅི་ཡང་མ་ཉེས་བདེར་གཟིགས་པའི༔ རྣམ་ཐར་གཞལ་མེད་མཆོག་ལ་གསོལ་བ་འདེབས༔ རེ་ཞིག་དངོས་ཀྱི་མཛད་པ་མཐར་ཕྱིན་ནས༔ ངོ་མཚར་གཟུགས་སྐུ་དབྱིངས་བསྡུས་ཚུལ་བསྟན་ཀྱང་༔ སྲིད་ཁམས་སྟོངས་པར་གང་འདུལ་ཐབས་མཁས་ཀྱིས༔ ཕྲིན་ལས་རྒྱུན་མི་འཆད་ལ༴ དེ་ལྟར་གསོལ་བ་བཏབ་པའི་བྱིན་རླབས་ཀྱིས༔ ཐུགས་ཡིད་གཅིག་ཏུ་འདྲེས་པར་གྱུར་ནས་སུ༔ མཐར་ཐུག་གྱུར་པའི་ཡོན་ཏན་ལྷུན་གྲུབ་པས༔ བླ་མ་མཆོག་གི་གོ་འཕང་ཐོབ་པར་ཤོག༔ ཅེས་ཀྱང་འགྱུར་ཆོས་གང་ཐར་ངོར་ག་གཱས་སོ། ། ཟབ་མོ་གཏེར་བརྒྱུད་ཀྱི་བླ་མའི་དགོངས་གསོལ་ཐུགས་རྗེའི་བསྐུལ་འདེབས།༄༅༔ ཟབ་མོ་གཏེར་བརྒྱུད་ཀྱི་བླ་མའི་དགོངས་གསོལ་ཐུགས་རྗེའི་བསྐུལ་འདེབས་ཞེས་བྱ་བ་བཞུགས༔ ན་མོ་གུ་རུ་པདྨ་ཀཱ་ར་ཡེ༔ མོས་གུས་མཆི་མ་འཁྲུགས་པ་ནི༔ ཟོལ་ཟོག་བརྫུས་མར་མ་སོང་པས༔ ཐོལ་སྐྱེས་རིག་པ་བླ་མའི་སྐུ༔ རིག་རྩལ་སྲས་དང་སྤྲུལ་པ་ལ༔ ཡེ་ཤེས་ངོ་སྟོང་མཉམ་པ་ཉིད༔ ཡུམ་ལྔའི་རྣམ་པར་ཤེས་པའི་བློས༔ གསོལ་བ་བཏབ་ཅིང་རང་ལུས་སེམས༔ བླ་མའི་ང་རྒྱལ་རྣམ་པར་གསལ༔ ཨེ་མ་ཧོ༔ གཉུག་མའི་སེམས་ཉིད་ཁྱབ་པ་གཉིས་ལྡན་ནི༔ ནང་གསལ་དབྱིངས་བཞུགས་བླ་མའི་དོན་དམ་སྐུ༔ སངས་རྒྱས་རྒྱ་མཚོའི་བྱུང་དང་འབྱུང་འགྱུར་གྱི༔ རྩ་བའི་དཀྱིལ་འཁོར་མཆོག་ལ་གསོལ་བ་འདེབས༔ ཚོགས་ཀྱིས་མ་རྒྱན་རང་བྱུང་སྐུ་གཉིས་སུ༔ སྒྲོན་མ་མཁའ་ཁྱབ་རྩོལ་བས་རྟོག་བྲལ་བཞིན༔ གདུལ་བྱའི་ཆུ་སྣོད་དང་འཚམས་བཀོད་པ་ཡིས༔ རྣམ་པས་འཕྲུལ་བསྒྱུར་མཛད་ལ་གསོལ་བ་འདེབས༔ ནམ་མཁའི་སྙིང་པོ་ལ་སོགས་གནུབས་རིགས་ཀྱི༔ གྲུབ་ཐོབ་བརྒྱུད་པ་བར་མ་ཆད་པ་ནི༔ དྲུག་ཕྲག་གསུམ་གྱི་ཚུག་གི་སྔར་རབས་ཀྱིས༔ ཡེ་ཤེས་ལྡན་པ་རྣམས་ལ་གསོལ་བ་འདེབས༔ ཕྱི་རབས་བཅོ་བརྒྱད་འབྱུང་བའི་ཆུ་མགོ་ནི༔ རོལ་པའི་རྩལ་གྱི་དེ་མ་ཐག་པ་རུ༔ པད་མའི་ཞལ་སྐྱིན་བདུད་འཇོམས་དཔའ་བོ་མཆོག༔ ཡོན་ཏན་ཀུན་ལྡན་ཞབས་ལ་གསོལ་བ་འདེབས༔ ཤེས་རབ་དབྱིངས་ཁམས་ཟུང་འཇུག་དབྱེར་མེད་ཀྱི༔ བདེ་བ་ཆེ་ལ་མི་ཕྱེད་རྟགས་ཀྱི་རྒྱ༔ རང་བྱུང་ཡེ་ཤེས་ལྔ་ཡི་གྲངས་བཟུང་བའི༔ གཟུངས་ཀྱི་སྙེམ་མ་རྣམས་ལ་གསོལ་བ་འདེབས༔ ཕ་རོལ་དོན་ཕྱིར་བྱང་ཆུབ་རྣམ་པ་ལྔའི༔ ཚུལ་ལས་བཞེངས་པའི་བཟོ་རིག་མཁས་པས་འཕྲུལ༔ རིགས་ལྔ་མི་གནས་རང་བྱུང་རང་རིག་པའི༔ འདའ་ཀའི་ཡེ་ཤེས་མངའ་ལ་གསོལ་བ་འདེབས༔ སྔོན་བྱུང་དུས་ན་སྒྲུབ་སྡེ་དགུ་ཡི་ཚོགས༔ དེ་ལས་བཀའ་བབས་སློབ་དཔོན་རིག་འཛིན་དགུ༔ གང་ལ་རྣམ་པ་གུ་རུ་མཚན་དགུ་དང་༔ བོད་ཀྱི་རིག་འཛིན་བཅས་ལ་གསོལ་བ་འདེབས༔ སླད་ནས་གླིང་པ་དགུ་དང་ད་ལྟའི་དུས༔ ཡབ་སྲས་དགུ་ཡིས་གཏེར་རིགས་བཅོ་བརྒྱད་དང་༔ སྤྱི་ཏི་ཡོ་གའི་དབུ་བཟུང་བསྟན་གཉིས་ཀྱིས༔ སྒྲོན་མེ་འདེགས་པར་བཟོད་ལ་གསོལ་བ་འདེབས༔ ཐུགས་གསང་ཆོས་སྐུའི་གཟུགས་བརྙན་ཐེག་པ་དགུ༔ ཁམས་གསུམ་ས་དགུར་མི་གནས་གོམ་སྟབས་ཀྱིས༔ སངས་རྒྱས་ས་དགུར་མྱུར་བར་སྦྱོར་མཛད་པ༔ དམ་པའི་ཆོས་མཛོད་འཛིན་ལ་གསོལ་བ་འདེབས༔ གང་ཐུགས་ཟག་མེད་ཡེ་ཤེས་ཆེན་པོ་ཉིད༔ རྟོགས་པ་མངོན་གྱུར་ཐོབ་ལ་མ་ཉམས་པར༔ གཉན་པོ་མཆོག་གི་འདུ་འབྲལ་མེད་ལྡན་པས༔ ཆོས་སྤྲིན་འཕྲོ་བ་དེ་ལ་གསོལ་བ་འདེབས༔ གཞན་ཡང་བཀའ་བརྒྱུད་འདི་ལས་གྲུབ་ཐོབ་པའི༔ འཕོ་བ་ཆེན་པོའི་སྐུ་བརྙེས་བཅུ་གསུམ་དང་༔ ཟག་ཕུང་མཁའ་ལ་དེངས་པ་ཉི་ཤུ་ལྔ༔ ལྟོས་པས་དམན་པ་ལྔ་བརྒྱ་ལ་སོགས་པ༔ རྡོ་རྗེའི་མཆེད་གྱུར་རྣམས་ལ་གསོལ་བ་འདེབས༔ དེ་ལྟར་བརྒྱུད་བསྐུལ་གསོལ་བ་བཏབ་པའི་མཐུས༔ དབང་བཞིའི་ལྟ་བ་རྟོགས་པའི་སྒོམས་ཉམས་ཀྱི༔ རང་བཞིན་བར་དོར་གྲོལ་བར་བྱིན་གྱིས་རློབས༔ གལ་ཏེ་རང་དབང་བརྟན་པོ་མ་ཐོབ་ན༔ འདའ་ཀ་ཐུགས་རྗེའི་འོད་ཀྱི་ཐག་པ་སྐྱོངས༔ སྐད་ཅིག་ཉིད་ལ་བར་དོ་ཟང་ཐལ་ནས༔ སྦུབས་ལ་མི་གནས་ཡེ་ཤེས་མཐར་ཕྱིན་ཤོག༔ རྣལ་འབྱོར་གཅིག་གི་སྐྱེ་འཇུག་དབང་ལྟོས་ནས༔ བདག་ཉིད་ལས་འཕྲོ་དབང་བཙན་སྙོམ་ལས་ལ༔ བླ་མ་གྲོགས་དང་བཅས་པས་རྗེས་འཛིན་གྱི༔ དཔུང་སྦྲེལ་བདེན་པ་ནང་འཕྲོད་རང་གྲོལ་དུ༔ ཁམས་གསུམ་ཆོས་ཀྱི་རྒྱལ་པོར་དབུགས་དབྱུང་ནས༔ དོན་གཉིས་ལྷུན་གྲུབ་སྐུ་གཉིས་མངོན་གྱུར་ཤོག༔ ཞེས་བརྗོད་གཉིས་སུ་མེད་བློ་ཡིས༔ མཉམ་པར་བཞག་པ་རྣལ་འབྱོར་ལམ༔ སུ་ཞིག་འདི་ལ་བཟོད་ཐོབ་པས༔ སངས་རྒྱས་སྟོང་དང་འདུ་འབྲལ་མེད༔ དཀྱིལ་འཁོར་ལྷ་དང་བཅས་པ་ཡང་༔ མ་སྒྲུབ་རང་བྱུང་རྒྱ་མཚོ་ལ༔ ཆུ་བོ་ཕྲན་ཀུན་གྱེས་འདུ་བཞིན༔ འཕེལ་འགྲིབ་མེད་པའི་དེ་བཞིན་གཤེགས༔ ཐབས་མཆོག་ཀུན་གྱི་བླ་མ་འདི༔ མོས་གུས་བརྟན་པོའི་དག་སྣང་ལ༔ རང་དབང་ཐོབ་པའི་རྣལ་འབྱོར་བ༔ ཙནྟྲ་ཀིརྟིས་བསྐུལ་བའི་ངོར༔ ཕྲན་གཏེར་འགའ་ལས་མེད་པ་ཡི༔ ག་ག་ཨ་བྷྱེ་རྫུན་མཐོང་ཡང་༔ རང་སེམས་དབང་དུ་བཞག་པ་མཁན༔ སུ་མ་མགུ་ལ་འཁུ་འཁྲིག་མེད༔ ས་མ་ཡཱ༔ རྒྱ་རྒྱ་རྒྱ༔ ཅེས་ཀྱང་སྔ་སོར་ལོ་གྲངས་མང་ཞིག་གི་ཡིག་རྙིང་མ་དག་པ་མི་མཐོང་བ་ལས་བཤུས་སོ། །དགེའོ། །དགེའོ། །དགེའོ། །སརྦ་མངྒ་ལམ། །བྷ་ཝནྟུ། ། བླ་མའི་རྒྱང་འབོད་ཐུགས་རྗེའི་སྣང་བ།༄༅༔ བླ་མའི་རྒྱང་འབོད་ཐུགས་རྗེའི་སྣང་བ་བཞུགས་སོ༔ ༄༅༔ ཨེ་མ་ཧོ༔ ཉི་ཟླ་ལྟ་བུར་ཀུན་ཏུ་སྣང་༔ མཐུན་པས་མཐུན་པ་འདུལ་བར་བྱེད༔ བླ་མའི་སྐུ་ལ་གསོལ་བ་འདེབས༔ ལུས་ཀྱི་བཅིངས་པ་གྲོལ་བར་བྱིན་གྱིས་རློབས༔ སྒྲ་སྙན་ལྟ་བུར་ཡིད་ལ་འཇུག༔ ཆོས་ཀྱི་སྦྱིན་པ་ཕྱོགས་མེད་གཏོང་༔ བླ་མའི་གསུང་ལ་གསོལ་བ་འདེབས༔ ངག་གི་བཅིངས་པ་གྲོལ་བར་བྱིན་གྱིས་རློབས༔ ནམ་མཁའ་ལྟ་བུར་སྤྲོས་པ་དབེན༔ ཤེས་བྱའི་གོ་སྐབས་ཡངས་པ་འབྱེད༔ བླ་མའི་ཐུགས་ལ་གསོལ་བ་འདེབས༔ ཡིད་ཀྱི་འཆིང་བ་གྲོལ་བར་བྱིན་གྱིས་རློབས༔ སངས་རྒྱས་ཐམས་ཅད་ཡོན་ཏན་ཆེ༔ རྩ་བའི་བླ་མ་བཀའ་དྲིན་ཆེ༔ བདག་ཉིད་ངོས་ནས་བླ་མ་གཉན༔ རྩ་བའི་བླ་མར་གསོལ་བ་འདེབས༔ མཁས་པས་ཚིག་གི་སྤུན་པ་བསྡུད༔ གྲུབ་པས་དོན་གྱི་ཉམས་མྱོང་འདོམས༔ སྲིད་པའི་འཆིང་རྒྱ་དེ་ཡིས་ཆོད༔ རྩ་བའི་བླ་མར་གསོལ་བ་འདེབས༔ སྟོན་ཆེན་མངའ་ཐང་གཡེར་བོས་འགྱིངས༔ ཐབས་མཁས་བརྟུལ་ཞུགས་མཆོག་དམན་མཉམ༔ དངོས་ངན་ཞིང་སར་ལྷག་པར་སྨན༔ རྩ་བའི་བླ་མར་གསོལ་བ་འདེབས༔ ཆོས་བརྒྱད་ཅན་གྱིས་མིག་རྒྱན་གཙིགས༔ སྙིང་རྗེ་ཅན་གྱིས་དམན་འགྲོ་བསྲེལ༔ ཉོན་མོངས་ཚ་གདུང་སྐྱོབས་པའི་གདུགས༔ རྩ་བའི་བླ་མར་གསོལ་བ་འདེབས༔ བརྡ་དོན་ཚིག་འགྲོལ་ཐ་མལ་ཟོལ༔ དོན་ལ་འདུལ་དབང་བཙན་པོའི་བཀོད༔ གསོལ་བ་བཏབས་ཀྱང་དངོས་གྲུབ་ཐོབ༔ རྩ་བའི་བླ་མར་གསོལ་བ་འདེབས༔ གང་སྐུ་མཐོང་ན་སྣང་ཤེས་འགོག༔ གསུང་གསང་ཐོས་པས་ཏིང་འཛིན་འདྲེན༔ དྲན་པ་ཙམ་གྱིས་ངེས་འབྱུང་སྐྱེ༔ རྩ་བའི་བླ་མར་གསོལ་བ་འདེབས༔ ཡོན་ཏན་རྒྱ་མཚོ་ཆེན་པོའི་འཇིངས༔ ཚུར་མཐོང་རྐྱལ་གྱིས་བསྐོར་དུ་རྡུགས༔ ཀློང་ཆེན་ཡངས་ལྡན་འཛིན་མའི་ཁྱོན༔ རྩ་བའི་བླ་མར་གསོལ་བ་འདེབས༔ ཨེ་མ་ཧོ༔ འཁོར་འདས་ཐམས་ཅད་བླ་མའི་དཀྱིལ་འཁོར་ཆེ༔ སེམས་ཉིད་གཞི་ཡི་བླ་མ་དང་༔ སྣང་ཚུལ་ཟེར་གྱི་བླ་མ་སྟེ༔ རྩ་བའི་བླ་མར་གསོལ་བ་འདེབས༔ ཡེ་ཐོག་གཞི་ཡི་བླ་མ་ཡིས༔ དམིགས་དང་བྲལ་བའི་ཆོས་རྣམས་སྟོན༔ རྩ་བའི་བླ་མར་གསོལ་བའདེབས༔ འཁྲུལ་མེད་རྟོགས་པར་བྱིན་གྱིས་རློབས༔ ཡེ་ཀློང་ཀུན་ཁྱབ་བླ་མ་ཡིས༔ ཆོས་ཉིད་ཡུལ་དུ་རང་ཤར་སྟོན༔ རྩ་བའི་བླ་མར་གསོལ་བ་འདེབས༔ སྙིང་པོ་རྟོགས་པར་བྱིན་གྱིས་རློབས༔ ཐེག་ཁྱབ་གཉིས་མེད་བླ་མ་དེས༔ མ་ཕྱེད་མ་གོལ་ཆོས་རྣམས་བསྟན༔ རྩ་བའི་བླ་མར་གསོལ་བ་འདེབས༔ གདར་ཤ་ཆོད་པར་བྱིན་གྱིས་རློབ༔ ཐོག་མ་གཞི་ཡི་བླ་མ་ཡིས༔ སྙིང་པོ་འགྱུར་མེད་ཆོས་རྣམས་བསྟན༔ རྩ་བའི་བླ་མར་གསོལ་བ་འདེབས༔ རང་ས་ཟིན་པར་བྱིན་གྱིས་རློབས༔ མ་འགགས་རྩལ་སྣང་བླ་མ་ཡིས༔ སྐྱེ་འགགས་མེད་པའི་ཆོས་རྣམས་བསྟན༔ རྩ་བའི་བླ་མར་གསོལ་བ་འདེབས༔ སྤྲོས་བྲལ་རྟོགས་པར་བྱིན་གྱིས་རློབས༔ ཤེས་རྩལ་གཉིས་མེད་བླ་མ་ཡིས༔ རྩིས་གདབས་མེད་པའི་ཆོས་རྣམས་བསྟན༔ རྩ་བའི་བླ་མར་གསོལ་བ་འདེབས༔ སྤངས་བླང་ཞིག་པར་བྱིན་གྱིས་རློབས༔ ཀུན་གཞི་སྤྱི་ཁྱབ་བླ་མ་ཡིས༔ ཀུན་འབྱུང་ཡིད་བཞིན་ནོར་བུར་བསྟན༔ རྩ་བའི་བླ་མར་གསོལ་བ་འདེབས༔ མཛོད་དོན་རྟོགས་པར་བྱིན་གྱིས་རློབས༔ ཟེར་རིག་མ་འགགས་བླ་མ་དེས༔ རྒྱ་ཆད་ཕྱོགས་ལྷུང་མེད་པར་བསྟན༔ རྩ་བའི་བླ་མར་གསོལ་བ་འདེབས༔ ཕྱོགས་འཛིན་ཞིག་པར་བྱིན་གྱིས་རློབས༔ ཀུན་རིག་གཉིས་མེད་བླ་མ་དེས༔ གཞི་རྩལ་དབྱེར་མེད་རང་ཐིམ་བསྟན༔ རྩ་བའི་བླ་མར་གསོལ་བ་འདེབས༔ འབྲས་བུ་སྨིན་པར་བྱིན་གྱིས་རློབས༔ རྩལ་སྣང་ཡིད་རིག་འགྱུར་མེད་ཀྱིས༔ སྐྱེ་མེད་ཆོས་སྐུའི་ངོ་བོ་བསྟན༔ རྩ་བའི་བླ་མར་གསོལ་བ་འདེབས༔ ནམ་མཁའ་རྟོགས་པར་བྱིན་གྱིས་རློབས༔ མ་བཅོས་སེམས་ཀྱི་བླ་མ་དེ༔ ལོངས་སྤྱོད་རྫོགས་པའི་སྐུ་རུ་བསྟན༔ རྩ་བའི་བླ་མར་གསོལ་བ་འདེབས༔ འོད་གསལ་རྟོགས་པར་བྱིན་གྱིས་རློབས༔ གཉིས་མེད་སློབ་དཔོན་གཉིས་སྣང་གིས༔ མ་བསྐོར་རང་གྲགས་ཆོས་འཁོར་བསྐོར༔ རྩ་བའི་བླ་མར་གསོལ་བ་འདེབས༔ གཉིས་འཛིན་ཞིག་པར་བྱིན་གྱིས་རློབས༔ རང་གྲོལ་སློབ་དཔོན་འཁོར་བ་སྟེ༔ ཡང་དག་ཀུན་རྫོབ་རྣམས་ཀྱི་སྐས༔ རྩ་བའི་བླ་མར་གསོལ་བ་འདེབས༔ བདེན་པ་མཐོང་བར་བྱིན་གྱིས་རློབ༔ ཤེས་པས་སློབ་དཔོན་མ་རིག་པ༔ རང་སངས་ལྟ་གཞིའི་ཆོས་འཁོར་བསྐོར༔ རྩ་བའི་བླ་མར་གསོལ་བ་འདེབས༔ ཀུན་གྲོལ་རྟོགས་པར་བྱིན་གྱིས་རློབས༔ ཨེ་མ་ཧོ༔ ཕུང་ཁམས་སྐྱེ་མཆེད་ཞི་ཁྲོའི་སྐུ༔ དབུ་སྐྲ་མཁའ་འགྲོ་བྱེ་བ་གནས༔ བ་སྤུ་ཐམས་ཅད་དགྲ་བཅོམ་པ༔ གསུང་ནི་མཁའ་འགྲོ་དྲུག་ཅུ་གཉིས༔ ཐུགས་ཀྱང་ཆོས་མིན་དཀྱིལ་འཁོར་ཆེ༔ རྩ་བའི་བླ་མར་གསོལ་བ་འདེབས༔ རྟག་འཛིན་བློ་སྣ་ཐོངས་བ་རུ༔ བླ་མས་བྱིན་གྱིས་བརླབ་ཏུ་གསོལ༔ ངེས་འབྱུང་སྐྱོ་ཤེས་སྐྱེ་བ་རུ༔ བླ་མས་བྱིན་གྱིས་བརླབ་ཏུ་གསོལ༔ བདེན་དོན་རྒྱུད་ལ་འཁྲུངས་པ་རུ༔ བླ་མའིི་བྱིན་གྱིས་ བརླབ་ཏུ་གསོལ༔ བྱང་ཆུབ་སེམས་གཉིས་འབྱོངས་པ་རུ༔ བླ་མས༴ བྱིན་ཀྱིས༴ འཁྲུལ་པའི་རྫུན་ཕུག་རྡིབ་པ་རུ༔ བླ་མས་བྱིན་གྱིས་ བརླབ་ཏུ་གསོལ༔ ཡང་དག་ལྟ་བ་རྟོགས་པ་རུ༔ བླ་མས་བྱིན་གྱིས་བརླབ་ཏུ་གསོལ༔ སྒོམས་པའི་གོལ་ས་གྲོལ་བ་རུ༔ བླ་མས་བྱིན་གྱིས་བརླབ་ཏུ་གསོལ༔ སྤྱོད་པའི་ལྟུང་སྒོ་ནུབ་པ་རུ༔ བླ་མས་བྱིན་གྱིས་བརླབ་ཏུ་གསོལ༔ (༈ རྫོགས་ཆེན་གྱི་རྒྱུད་སྒྲོན་མ་བརྩེགས་པ་ལས༔ ད་ལྟའི་སྣང་བ་འདི་ཉིད་ལ༔ སྤངས་བླང་ཅན་དུ་བལྟས་པ་ན༔ ཉན་ཐོས་ཞི་བ་ཕྱོགས་གཅིག་ལྟུང་༔ ཞེས་སོགས་ཕྱི་ནང་གི་གྲུབ་མཐའ་ཐམས་ཅད་ཀྱི་ཕྱོགས་སུ་ལྷུང་བ་རེ་བཤད་ཡོད་པའི་སྒོ་བཅུ་དྲུག་པོ་དེ་དག་རྣལ་འབྱོར་པའི་ངོར་མི་སྣང་བར་ཤོག་ཅེས་པའི་དོན་ཏོ)འཁོར་བའི་འཁོར་ལོ་ལྡོག་པ་རུ༔ བླ་མས་བྱིན་གྱིས་བརླབ་ཏུ་གསོལ༔ ས་ལམ་མཐའ་རུ་ཕྱིན་པ་རུ༔ བླ་མས་བྱིན་གྱིས་བརླབ་ཏུ་གསོལ༔ སྒྱུ་ལུས་འོད་སྐུར་དག་པ་རུ༔ བླ་མས་བྱིན་གྱིས་བརླབ་ཏུ་གསོལ༔ རང་དོན་ཆོས་སྐུ་ཐོབ་པ་རུ༔ བླ་མས་བྱིན་གྱིས་བརླབ་ཏུ་གསོལ༔ གཞན་དོན་གཟུགས་སྐུ་ཐོབ་པ་རུ༔ བླ་མས་བྱིན་གྱིས་བརླབ་ཏུ་གསོལ༔ དགོངས་པ་རོ་གཅིག་སད་པ་རུ༔ བླ་མས་བྱིན་གྱིས་བརླབ་ཏུ་གསོལ༔ སྐྱེ་བ་འདི་ལ་ཐོབ་པ་རུ༔ བླ་མས་བྱིན་གྱིས་བརླབ་ཏུ་གསོལ༔ བགེགས་དང་བར་ཆད་མེད་པ་རུ༔ བླ་མས་བྱིན་གྱིས་བརླབ་ཏུ་གསོལ༔ རྐྱེན་དང་སྒྱིད་སྙོམས་མེད་པ་རུ༔ བླ་མས་བྱིན་གྱིས་བརླབ་ཏུ་གསོལ༔ ཞེས་བརྗོད་དོ༔ འདི་ལྟར་གསོལ་བ་གདབས་པ་ལ༔ ཁོ་ལ་ཡོན་ཏན་མེད་ནའང་༔ ཁྱོད་རང་བསམ་པ་རྣམ་དག་གི༔ རེ་སྨོན་ཅི་བཞིན་བསྒྲུབ་པའོ༔ ཕྱོགས་དུས་བླ་མ་གང་ལའང་༔ རྒྱང་འབོད་འདི་ཡིས་མི་ཁེབས་མེད༔ འོན་ཀྱང་རང་དྲིན་གང་ཆེ་བའི༔ ལུས་ལ་རྒྱལ་ཀུན་འཇུག་ཅེས་གསུངས༔ མཐོ་བརྙབ་མཁན་པོས་བླ་མ་སྤངས༔ མཁས་བཙུན་ལྡན་ཀྱང་ལོག་པར་གོལ༔ དམ་པར་བཟུང་ནས་ཞུས་ཕན་ཆད༔ དམ་པར་ངེས་དང་མ་ངེས་ཀྱང་༔ བཀའ་བཅག་ལུང་བོར་ག་ལ་སྲིད༔ གལ་ཏེ་དེ་ཡི་རྒྱ་ཉམས་ན༔ མནར་མེད་སྡུག་བསྔལ་མྱོང་བ་དང་༔ སློབ་དཔོན་དམ་ཚིག་སྲོག་ལྟར་གསུངས༔ དེ་ཕྱིར་ཁྱོད་ལ་སྨན་ཀྱང་སྲིད༔ སུས་ཀྱང་རང་རང་བླ་མར་སྦྱར༔ མདོ་ལས་སྔགས་ཀྱི་བླ་མ་གཙོ༔ རྒྱུད་ལས་མན་ངག་བླ་མ་དང་༔ དེ་ལའང་རྫོགས་པ་ཆེན་པོ་ཡི༔ སེམས་ངོ་བསྟན་པ་གཙོ་གསུངས་པས༔ རྒྱུད་ལ་སུས་ཀྱང་འགོག་དུ་མེད༔ ཅེས་ཀྱང་ཉི་སར་བློ་གྲོས་ཞེས༔ ཁྱིམ་གནས་ཡང་དག་ལྟ་ལ་དད༔ དཀོན་མཆོག་གསུམ་ལ་བླ་མར་བྱེད༔ གང་གིས་ནན་ཆེར་བསྐུར་བ་བཞིན༔ ག་ག་ཨ་བྷྱེ་ཞེས་བྱ་བ༔ གཟིག་གོས་བོང་བུར་བསྐོན་པ་དེས༔ དྲེད་ལྤགས་ངོ་ལ་བཀབ་ནས་བྲིས༔ ད་ཕན་སྔུ ན་ནས་མི་བལྟར་ཞུ། མངྒ་ལཾ༔ ༈ རྡོ་རྗེ་ཀུན་ཏུ་བཟང་པོའི་སྤྲུལ་བའི་གརཿ གྲུབ་ཐོབ་ནམ་མཁའ་འཇིགས་མེད་ལ་གསོལ་བ་འདེབསཿ སྒྱུ་ལུས་འོད་སྐུར་གྲོལ་བར་བྱིན་གྱིས་རློབསཿ བདག་གཞན་དོན་གཉིས་མཐར་ཕྱིན་དངོས་གྲུབ་སྩོལཿ ཅེས་ཀྱང་ཤྲི་བས་སོ། ། ༈ ཆོས་ཉིད་གཅིག་ལ་མཛད་པ་ཐ་དད་དུཿ མ་འགགས་མིག་འཕྲུལ་ལྟ་བུར་ཅིར་ཡང་བཀྲཿ བདུད་འཇོམས་སྲས་འཁོར་བཅས་ལ་གསོལ་བ་འདེབསཿ ཐུགས་ཡིད་གཅིག་འདྲེས་འཕོ་ཆེན་ལྷུན་ཤོགཿ རིག་མཚོའི་བསྐུལ་ངོར་ག་གཱས་སོ། ། ༈ ཨེ་མ་ཧོ༔ ཨོ་རྒྱན་ལུང་བསྟན་བདུད་འཇོམས་རྡོ་རྗེ་ཡི༔ སྐུ་གསུང་ཐུགས་ཀྱི་སྲས་མཆོག་ཟབ་གཏེར་བདག༔ གནས་ལུགས་དོན་གྱི་དགོངས་པའི་བཙན་ས་ཟིན༔ ནམ་མཁའ་འཇིགས་མེད་ཞབས་ལ་གསོལ་བ་འདེབས༔ ཚེ་འདིར་ཚེ་རིང་ནད་མེད་བསམ་དོན་འགྲུབ༔ ཕྱི་མ་ཡང་དག་སངས་རྒྱས་ཐོབ་པར་ཤོག༔ ཅེས་ཀྱང་གནམ་བསྐོས་འཁོར་ལོའི་བསྒྱུར་བས་མངའ་གསོལ་ཞིང་མཚན་གྱི་མེ་ཏོག་གིས་རབ་ཏུ་བརྒྱན་པ་གང་གི་བཀའ་ཕེབས་བཞིན་ངོ་ཚ་མེད་པའི་ག་ག་ཨ་བྷྱེ་ནས་སོ། ། ཐོད་རྒལ་བྱིན་འབེབས་ཡེ་ཤེས་སྣང་བ།༈ རྡོ་རྗེ་སེམས་དཔའི་དགོངས་ཉམས་ལས༔ ཐོད་རྒལ་བྱིན་འབེབས་ཡེ་ཤེས་སྣང་བ་བཞུགས་སོ༔ ན་མོ་གུ་རུ་པདྨ་ཀ་ར་ཡེ༔ རང་ཉིད་ཀུན་ཏུ་བཟང་པོར་བསྒོམ༔ ལུས་ཀྱིས་བཞུགས་སྟངས་གཙོ་བོར་བཅའ༔ ཡིད་ཀྱིས་མངོན་སུམ་བཞིན་དམིགས་ལ༔ ཡང་ནས་ཡང་དུ་འདི་ལྟར་བྱ༔ ན་མོ་གུ་རུ༔ ཕྱོགས་བཅུ་དུས་གསུམ་རྒྱལ་བ་སྲས་དང་བཅས༔ ཆོས་སྐུ་ཀུན་བཟང་རྡོ་རྗེ་འཆང་ཆེན་པོ༔ རིགས་ལྔ་གངས་ཆེན་ལོངས་སྤྱོད་རྫོགས་པའི་སྐུ༔ ཡོངས་རྫོགས་རྡོ་རྗེའི་བླ་མ་རིན་པོ་ཆེ༔ ཡེ་ཤེས་སྤྱི་ཕུད་ཐིག་ལེ་ཉག་གཅིག་ལས༔ གཞན་དུ་མ་གྲུབ་ཐུགས་རྗེ་ཡེ་འབྲེལ་གྱི༔ རང་བཞིན་གཅིག་གྱུར་ཆོས་ཉིད་བདེན་སྟོབས་དབྱིངས༔ ལྷར་སྣང་ཆེན་པོར་བཞེངས་ནས་བརྟན་བཞུགས་ཟོལ༔ སྐལ་ལྡན་ལས་ཅན་དམ་པའི་རིགས་མཆོག་གིས༔ མི་གཅོག་མེད་པར་ཟབ་མོ་ལ་བཟོད་ན༔ ཐུགས་རྗེ་ཆེ་རྣམས་དུས་ལས་མི་ཡོལ་བར༔ བྱིན་རླབས་མངོན་རྟགས་ད་ལྟ་བསྟན་དུ་གསོལ༔ རྫོགས་ཆེན་གསལ་བའི་སྟོན་པ་བཅུ་གཉིས་དང་༔ དགའ་རབ་ཤྲཱི་སེང་འཇམ་བཤེས་བི་མ་ལ༔ ཛྙཱ་ན་སུ་ཏྲ་ཨོ་རྒྱན་པདྨ་འབྱུང་༔ རིག་འཛིན་བརྡ་བརྒྱུད་འཇའ་ལུས་གྲུབ་པའི་ཚོགས༔ ཐུགས་རྗེའི་ཤུགས་ཀྱིས་བདག་རྒྱུད་བཟུང་ནས་ཀྱང་༔ མ་དག་སྙིགས་མའི་རྣམ་སྨིན་སྐྱེས་ཀྱི་ལུས༔ འཇའ་ལུས་རྡོ་རྗེ་གྲུབ་པར་མཛད་དུ་གསོལ༔ གྲུབ་ནས་གཞོན་ནུ་བུམ་སྐུར་བྱིན་གྱིས་རློབས༔ ཏིང་འཛིན་བཟང་པོ་ལྷུན་རྒྱལ་སེང་གེ་དབང་༔ ཞང་སྟོན་ཡབ་སྲས་གུ་རུ་ཇོ་འབེར་ཞབས༔ འཁྲུལ་བ་དབྱིངས་གྲོལ་སེང་གེ་རྒྱབ་པ་སོགས༔ འཇའ་ལུས་རྡོ་རྗེའི་སྐུ་མཆོག་བརྙེས་པ་རྣམས༔ ཐུགས་རྗེའི་ཤུགས་ཀྱིས་བདག་རྒྱུད་བཟུང་ནས་ཀྱང་༔ མ་དག་སྙིགས་མའི་རྣམ་སྨིན་སྐྱེས་ཀྱི་ལུས༔ འཇའ་ལུས་རྡོ་རྗེ་གྲུབ་པར་མཛད་དུ་གསོལ༔ གྲུབ་ནས་གཞོན་ནུ་བུམ་སྐུར་བྱིན་གྱིས་རློབས༔ མེ་ལོང་རྡོ་རྗེ་ཀུ་མ་ར་ཛ་དང་༔ ཀློང་ཆེན་རབ་འབྱམས་པདྨ་བདུད་འཇོམས་གླིང་༔ ཀ་བཞི་གདུང་བརྒྱད་སྐུ་གསུང་ཐུགས་ཀྱི་སྲས༔ ག་ག་ཨ་བྷྱེ་རྣམས་ལ་གསོལ་བ་འདེབས༔ ཐུགས་རྗེའི་ཤུགས་ཀྱིས་བདག་བརྒྱུད་བཟུང་ནས་ཀྱང་༔ མ་དག་སྙིགས་མའི་རྣམ་སྨིན་སྐྱེས་ཀྱི་ལུས༔ འཇའ་ལུས་རྡོ་རྗེ་གྲུབ་པར་མཛད་དུ་གསོལ༔ གྲུབ་ནས་གཞོན་ནུ་བུམ་སྐུར་བྱིན་གྱིས་རློབས༔ ཡི་དམ་ཞི་ཁྲོ་བཀའ་བརྒྱད་ལྷ་ཚོགས་དང་༔ མཁའ་འགྲོ་སྐུ་གསུམ་ཁྲོས་མ་མཚོ་རྒྱལ་ཡུམ༔ ཟག་ཕུང་འོད་སྐུར་དེངས་བ་མནྡ་ར༔ རྡོ་རྗེའི་ལང་ཚོ་མངོན་གྱུར་རིག་འཛིན་ཚོགས༔ ཐུགས་རྗེའི་ཤུགས་ཀྱིས་བདག་རྒྱུད་བཟུང་ནས་ཀྱང་༔ མ་དག་སྙིགས་མའི་རྣམ་སྨིན་སྐྱེས་ཀྱི་ལུས༔ འཇའ་ལུས་རྡོ་རྗེ་གྲུབ་པར་མཛད་དུ་གསོལ༔ གྲུབ་ནས་གཞོན་ནུ་བུམ་སྐུར་བྱིན་གྱིས་རློབས༔ ཨོཾ་ཨཱཿཧཱུྃ༔ འོད་ཕུང་འཇའ་སྤྲིན་ལྟ་བུའི་རྣམ་པ་རུ༔ སྐུ་གསུང་ཐུགས་ཡོན་ཕྲིན་ལས་དབང་བྱིན་རླབས༔ བྱོན་དེ་དར་དཀར་ཕྲ་ལ་འཁྲིལ་ནས་ཞུགས༔ རྩ་རླུང་ཐིག་ལེ་ཡི་གེའི་འགྲོས་ཐིམ་ནས༔ སྐུ་བཞིའི་དབྱིངས་སུ་སྐད་ཅིག་གོ་འཕོས་ཏེ༔ མ་དག་བསྐལ་བ་དབྱིངས་ཆེན་ལོངས་སྤྱོད་རྫོགས༔ རང་སྣང་ལྷུན་སྡུག་བཀོད་པར་ཞིག་ནས་ཀྱང་༔ སྤྲུལ་པའི་རྣམ་པ་ཐམས་ཅད་པ་ཡིས་སུ༔ རྩོལ་མེད་འགྲོ་ལ་ཕན་པ་འབྱུང་བ་རུ༔ ད་ལྟ་ཉིད་དུ་བྱིན་གྱིས་བརླབ་ཏུ་གསོལ༔ མྱུར་བ་ཉིད་དུ་བྱིན་གྱིས་བརླབ་ཏུ་གསོལ༔ འདུག་ས་འདི་རུ་བྱིན་གྱིས་བརླབ་ཏུ་གསོལ༔ གདན་ཐོག་འདི་རུ་བྱིན་གྱིས་བརླབ་ཏུ་གསོལ༔ སྐད་ཅིག་ཉིད་ལ་བྱིན་གྱིས་བརླབ་ཏུ་གསོལ༔ ཨོཾ་ཨཱཿཧཱུྃ༔ མ་ཧཱ་གུ་རུ་དྷརྨ་ཀཱ་ཡ་དེ་ཝ་ཊཱཀྐི་ནི་སརྦ་ཨ་ཝེ་ཤ་ཡ་ཕེཾ་ཕེཾ༔ སིདྡྷི་ཕ་ལ་ཨོཾ་ཧཱུྃ་ཧོ༔ ཞེས་མཐར༔ ཨཱ༔ སྐྱེ་མེད་ཆོས་སྐུ་བྱང་ཆུབ་སེམས༔ མཚན་དཔེ་འདུ་འབྲལ་མེད་པ་ཡི༔ ཐུགས་རྗེའི་མཁྱེན་ཆ་སྤྲུལ་པའི་སྐུ༔ མངོན་པར་བྱང་ཆུབ་བདེ་ཀློང་འཁྱིལ༔ འདི་ན་དུས་གསུམ་སངས་རྒྱས་བཞུགས༔ རྣམ་པར་རྟོག་པ་ཀུན་བྲལ་བ༔ ཡེ་ནས་རང་ཤར་ཆེན་པོ་ཉིད༔ མ་སྤྲོས་མ་བསྡུས་ཏིང་འཛིན་བཟང་༔ གསང་སྔགས་མགོན་པོ་མཐར་ཕྱིན་ཏེ༔ སངས་རྒྱས་ཀུན་དང་མངོན་སུམ་གཅིག༔ མཚན་མ་མེད་ལ་ཆད་པ་མིན༔ དག་མཉམ་དབྱིངས་ལ་བདག་འདུད་དོ༔ ཅེས་བརྗོད་པས་སྙིང་ཀའི་གཞི་དཀྱིལ་ལ་ཐིམ་པས་རབ་ཏུ་རྒྱས་པའི་འོད་ཟེར་ལམ་དང་འབྲས་བུའི་དཀྱིལ་འཁོར་སྨིན་པ་མཐར་ཐུག་པར་མོས་ལ་གཉིས་སུ་མེད་པའི་ཡེ་ཤེས་གསང་སྔགས་ཀྱི་དེ་ཁོ་ན་ཉིད་ལ་མཉམ་པར་བཞག་གོ༔ ཅེས་ཀྱང་རང་སློབ་ན་ཐ་ནས་བསྐུལ་ངོར་ག་གཱ་པས་སོ། །དགེའོ། ། ཐོད་རྒལ་གསོལ་འདེབས་བྱིན་རླབས་གཟེར་བུ།༈ ཐོད་རྒལ་གསོལ་འདེབས་བྱིན་རླབས་གཟེར་བུ་བཞུགས་སོ༔ ཨེ་མ་ཧོ༔ ཆོས་སྐུ་ཀུན་བཟང་ཡབ་ཡུམ་ལ་གསོལ་བ་འདེབས༔ འོད་གསལ་འཕོ་ཆེན་འགྲུབ་པར་བྱིན་གྱིས་རློབས༔ ལོངས་སྐུ་རྡོ་རྗེ་སེམས་དཔའ་ལ་གསོལ་བ་འདེབས༔ འོད་གསལ་འཕོ་ཆེན་འགྲུབ་པར་བྱིན་གྱིས་རློབས༔ སྤྲུལ་སྐུ་རྡོ་རྗེ་འཆང་ཆེན་ལ་གསོལ་བ་འདེབས༔ འོད་གསལ་འཕོ་ཆེན་འགྲུབ་པར༴ དགའ་རབ་དཔའ་བོ་ཆེན་པོ་ལ་གསོལ་བ་འདེབས༔ འོད་གསལ་འཕོ་ཆེན་འགྲུབ་པར་བྱིན་གྱིས་རློབས༔ པཎ་ཆེན་མཉྫུ་མི་ཏྲ་ལ་གསོལ་བ་འདེབས༔ འོད་གསལ་འཕོ་ཆེན་འགྲུབ་པར་བྱིན་གྱིས་རློབས༔ རིག་འཛིན་ཤྲི་སེངྷ་ལ་གསོལ་བ་འདེབས༔ འོད་གསལ་འཕོ་ཆེན་འགྲུབ་པར་བྱིན་གྱིས་རློབས༔ ཨོ་རྒྱན་པདྨ་འབྱུང་གནས་ལ་གསོལ་བ་འདེབས༔ འོད་གསལ་འཕོ་ཆེན་འགྲུབ་པར་བྱིན་གྱིས་རློབས༔ གྲུབ་ཐོབ་ཆེན་པོ་བརྒྱད་རྩ་ལ་གསོལ་བ་འདེབས༔ འོད་གསལ་འཕོ་ཆེན་འགྲུབ་པར་བྱིན་གྱིས་རློབས༔ རྗེ་འབངས་ཉི་ཤུ་རྩ་ལྔ་ལ་གསོལ་བ་འདེབས༔ འོད་གསལ་འཕོ་ཆེན་འགྲུབ་པར་བྱིན་གྱིས་རློབས༔ གཏེར་སྟོན་ཆེན་པོ་བརྒྱ་རྩ་ལ་གསོལ་བ་འདེབས༔ འོད་གསལ་འཕོ་ཆེན་འགྲུབ་པར་བྱིན་གྱིས་རློབས༔ འཇའ་ལུས་གྲུབ་པའི་བརྒྱུད་པ་ལ་གསོལ་བ་འདེབས༔ འོད་གསལ་འཕོ་ཆེན་འགྲུབ་པར་བྱིན་གྱིས་རློབས༔ བསྐལ་བཟང་སངས་རྒྱས་སྟོང་རྩ་ལ་གསོལ་བ་འདེབས༔ འོད་གསལ་འཕོ་ཆེན་འགྲུབ་པར་བྱིན་གྱིས་རློབས༔ རིག་འཛིན་བདུད་འཇོམས་རྡོ་རྗེ་ལ་གསོལ་བ་འདེབས༔ འོད་གསལ་འཕོ་ཆེན་འགྲུབ་པར་བྱིན་གྱིས་རློབས༔ འཇའ་ལུས་དབང་ཕྱུག་ལྔ་བརྒྱ་ལ་གསོལ་བ་འདེབས༔ འོད་གསལ་འཕོ་ཆེན་འགྲུབ་པར་བྱིན་གྱིས་རློབས༔ བརྒྱུད་ལྡན་རྡོ་རྗེའི་གསང་འཛིན་ལ་གསོལ་བ་འདེབས༔ འོད་གསལ་འཕོ་ཆེན་འགྲུབ་པར་བྱིན་གྱིས་རློབས༔ ཡི་དམ་ཞི་ཁྲོ་རྒྱ་མཚོ་ལ་གསོལ་བ་འདེབས༔ འོད་གསལ་འཕོ་ཆེན་འགྲུབ་པར་བྱིན་གྱིས་རློབས༔ ལུང་རྟོགས་དམ་ཆོས་བརྒྱད་ཁྲི་ལ་གསོལ་བ་འདེབས༔ འོད་གསལ་འཕོ་ཆེན་འགྲུབ་པར་བྱིན་གྱིས་རློབས༔ བསྟན་པ་བཙས་ཀྱི་བུ་གསུམ་ལ་གསོལ་བ་འདེབས༔ འོད་གསལ་འཕོ་ཆེན་འགྲུབ་པར་བྱིན་གྱིས་རློབས༔ དཔའ་བོ་མཁའ་འགྲོའི་གྲོང་ཁྱེར་ལ་གསོལ་བ་འདེབས༔ འོད་གསལ་འཕོ་ཆེན་འགྲུབ་པར་བྱིན་གྱིས་རློབས༔ དམ་གཙང་རྡོ་རྗེའི་མཆེད་ལྕམ་ལ་གསོལ་བ་འདེབས༔ འོད་གསལ་འཕོ་ཆེན་འགྲུབ་པར་བྱིན་གྱིས་རློབས༔ སྒྱུ་ལུས་སྒྱུ་མའི་སྐུ་ལ་ཐིམ་ནས་ཀྱང་༔ འོད་གསལ་འཕོ་ཆེན་འགྲུབ་པར་བྱིན་གྱིས་རློབས༔ སྣང་བ་ཡེ་ཤེས་མདངས་སུ་གསལ་བ་ཡི༔ འོད་གསལ་འཕོ་ཆེན་འགྲུབ་པར་བྱིན་གྱིས་རློབས༔ དྲན་རིག་ཤེས་རབ་གདངས་ཀྱི་བརྟན་གྲོལ་ཏེ༔ འོད་གསལ་འཕོ་ཆེན་འགྲུབ་པར་བྱིན་གྱིས་རློབས༔ རྟག་ཏུ་ཡུལ་གསལ་ཐུགས་རྗེའི་ཟེར་ཐག་གི༔ འོད་གསལ་འཕོ་ཆེན་འགྲུབ་པར་བྱིན་གྱིས་རློབས༔ གཞན་ཡང་འགྲོ་བ་མ་ལུས་ཐམས་ཅད་ཀུན༔ འོད་གསལ་འཕོ་ཆེན་འགྲུབ་པར་བྱིན་གྱིས་རློབས༔ བདག་གཅིག་མཐུ་ཡིས་འཁོར་བ་དོང་སྤྲུགས་ནས༔ འོད་གསལ་འཕོ་ཆེན་འགྲུབ་པར་བྱིན་གྱིས་རློབས༔ ཀུན་ཏུ་བཟང་པོའི་རྗེས་སུ་སློབ་གྱུར་ཏེ༔ འོད་གསལ་འཕོ་ཆེན་འགྲུབ་པར་བྱིན་གྱིས་རློབས༔ རྡོ་རྗེ་འཆང་ཆེན་གོ་འཕང་ཐོབ་ནས་ཀྱང་༔ འོད་གསལ་འཕོ་ཆེན་འགྲུབ་པར་བྱིན་གྱིས་རློབས༔ མི་རིང་མྱུར་དུ་འགྲུབ་པར་བྱིན་གྱིས་རློབས༔ ད་ལྟ་གདན་ཐོག་འདི་རུ་བྱིན་གྱིས་རློབས༔ སྐད་ཅིག་ཉིད་ལ་ཐུགས་རྗེས་བྱིན་གྱིས་རློབས༔ རགས་ལུས་འཕྱང་རྒྱ་འོད་གསལ་སྦུབས་ཞུགས་ཏེ༔ རིན་ཆེན་སྦུབས་ལ་བརྟན་པར་བྱིན་གྱིས་རློབས༔ གཞི་ཡི་ཀུན་བཟང་བདག་ཉིད་རྡོ་རྗེར་ལྡན༔ ལམ་གྱི་ཀུན་བཟང་འཁོར་ལོ་ལྷུན་གྲུབ་ནས༔ འབྲས་བུའི་ཀུན་བཟང་འཕོ་ཆེན་ཡེ་ཤེས་གཟིས༔ མ་རིག་མུན་ཁམས་ཡེ་ཤེས་མཁར་གསལ་ཤོག༔ ལྟ་བའི་འོད་གསལ་རྫོགས༵་པའི་སྐུ་འབར་ནས༔ བསྒོམ་པའི་འོད་གསལ་སྨིན༵་པའི་རྩལ་སྟོབས་རྒྱས༔ དག༵་པ་དོན་གྱི་འོད་གསལ་ཆེན་པོ་རུ༔ ཧེ་རུ་ཀ་དཔལ་ངང་དུ་འབྱམས་ཀླས་ཤོག༔ ཅེས་བརྗོད་བྱིན་རླབས་ཡེ་ཤེས་འཕོ༔ ཅེས་ཀྱང་འོད་གསལ་རྡོ་རྗེའི་ངོར་ག་གཱས་སོ། །བཀྲ་ཤིས་ཤོག ། ཐོད་རྒལ་བྱིན་འབེབས་དངོས་གྲུབ་ཆར་འབེབས།
༈ རྡོ་རྗེ་སེམས་དཔའི་དགོངས་ཉམས་ལས༔ ཐོད་རྒལ་བྱིན་འབེབས་དངོས་གྲུབ་ཆར་འབེབས་བཞུགས་སོ༔ ཐོག་མར་བླ་མའི་རྣལ་འབྱོར་དང་༔ དབང་བཞི་བླང་བ་བཅས་གྲུབ་ནས༔ རང་ལུས་མཁའ་འགྲོའི་སྐུར་གསལ་ལ༔ བྱིན་ཆེན་འབེབས་པ་འདི་ལྟར་བྱ༔ ཨོཾ་ཨཱཿཧཱུྃ༔ ཐོག་མའི་མགོན་པོ་ཆོས་སྐུ་ཀུན་ཏུ་བཟང་༔ རིགས་ལྔ་རིགས་བརྒྱ་གསང་ཆེན་རིགས་གཅིག་དང་༔ རྒྱུད་དང་སྒྲུབ་སྡེ་ཕྱི་ནང་གསང་བའི་ལྷ༔ དེང་འདིར་རྣལ་འབྱོར་བདག་ལ་བྱིན་ཆེན་ཕོབས༔ སྐུ་གསུམ་མཁའ་འགྲོ་མ་རྒྱུད་གསང་བའི་དབྱིངས༔ ཁྱད་པར་འོད་གསལ་རྫོགས་ཆེན་བརྒྱུད་པ་ཡི༔ རྩ་བརྒྱུད་བླ་མ་རིག་འཛིན་རྒྱ་མཚོའི་ཚོགས༔ དེང་འདིར་རྣལ་འབྱོར་བདག་ལ་བྱིན་ཆེན་ཕོབས༔ ཡང་གསང་ཐིག་ལེ་ཉག་གཅིག་གདམ་པའི་མཛོད༔ ཀུན་བཟང་རྡོར་སེམས་དགའ་རབ་འཇམ་བཤེས་དང་༔ ཤྲཱི་སེང་ཡེ་ཤེས་མདོ་དང་བི་མ་ལས༔ དེང་འདིར་རྣལ་འབྱོར་བདག་ལ་བྱིན་ཆེན་ཕོབ༔ པདྨ་འབྱུང་གནས་ཏིང་འཛིན་བཟང་པོ་དང་༔ ལྡང་མ་ལྷུན་རྒྱལ་སེང་གེ་དབང་ཕྱུག་ཞབས༔ རྒྱལ་བ་ཞིང་སྟོན་མཁས་པ་ཉི་འབུམ་གྱིས༔ དེང་འདིར་རྣལ་འབྱོར་བདག་ལ་བྱིན་ཆེན་ཕོབས༔ གུ་རུ་ཇོ་འབེར་སེང་གེ་རྒྱབ་པ་དང་༔ མེ་ལོང་རྡོ་རྗེ་ཀུ་མ་ར་ཛ་ཆེ༔ ཀུན་མཁྱེན་ཆོས་རྗེ་མངོན་རྫོགས་སངས་རྒྱས་དཔལ༔ དེང་འདིར་རྣལ་འབྱོར་བདག་ལ་བྱིན་ཆེན་ཕོབ༔ ཁ་བསྐང༌། འཇིགས་མེད་གླིང་བ་ཕྲིན་ལས་འོད་ཟེར་དཔལ༔ རྒྱལ་བའི་མྱུ་གུ་ཆོས་ཀྱི་དབང་པོ་དང་༔ བདེ་ཆེན་རྡོ་རྗེ་ཀུན་བཟང་ཆོས་ཀྱི་གྲགས༔ དེང་འདིར་རྣལ་འབྱོར་བདག་ལ་བྱིན་ཆེན་ཕོབ༔ འཇིགས་མེད་སྒྲ་དབྱངས་ནམ་མཁའ་འཇིགས་མེད་པ༔ གཏེར་སྟོན་བརྒྱ་རྩ་གྲུབ་ཆེན་བརྒྱད་ཅུ་གཉིས༔ གཞན་ཡང་ཕྱོགས་བཅུའི་སངས་རྒྱས་སྲས་འཁོར་བཅས༔ དེང་འདིར་རྣལ་འབྱོར་བདག་ལ་བྱིན་ཆེན་ཕོབ༔ ཁྱད་པར་ཨོ་རྒྱན་བླ་མ་དངོས་བརྟེན་པ༔ ཉེ་བརྒྱུད་བྱིན་རླབས་མཛོད་ལྡན་བདུད་འཇོམས་གླིང་༔ ཀ་བཞི་གདུང་བརྒྱད་འཇའ་ལུས་ལྔ་བརྒྱ་ཡིས༔ དེང་འདིར་རྣལ་འབྱོར་བདག་ལ་བྱིན་ཆེན་ཕོབ༔ ལུས་ལ་རྡོ་རྗེ་སྐུ་ཡི་དབང་བྱིན་ཕོབས༔ ངག་ལ་རྡོ་རྗེ་གསུང་གི་དབང་བྱིན་ཕོབ༔ ཡིད་ལ་རྡོ་རྗེ་ཐུགས་ཀྱི་དབང་བྱིན་ཕོབ༔ མ་དག་སྣང་བ་དག་པ་རབ་འབྱམས་ཀྱི༔ དཀྱིལ་འཁོར་ཆེན་པོར་བྱིན་ཆེན་དབབ་ཏུ་གསོལ༔ ཆོས་ཉིད་མངོན་སུམ་མཐོང་བར་བྱིན་གྱིས་རློབསཿ ཉམས་སྣང་གོང་དུ་འཕེལ་བར་བྱིན་གྱིས་རློབས༔ རིག་པ་ཚད་ལ་ཕེབ་པར་བྱིན་གྱིས་རློབས༔ ཆོས་ཉིད་ཟད་སར་འཁྱོལ་བར་བྱིན་གྱིས་རློབས༔ མཐར་ཐུག་འབྲས་བུ་སྐུ་བཞི་ཡེ་ཤེས་ལྔ༔ མཛད་པ་ཕྲིན་ལས་དང་བཅས་མངོན་གྱུར་ནས༔ རང་གཞན་དོན་གཉིས་ལྷུན་གྱིས་གྲུབ་པ་རུ༔ ད་ལྟ་ཉིད་དུ་བྱིན་གྱིས་བརླབ་ཏུ་གསོལ༔ མྱུར་བ་ཉིད་དུ་བྱིན་གྱིས་བརླབ་ཏུ་གསོལ༔ འདུག་ས་འདི་རུ་བྱིན་གྱིས་བརླབ་ཏུ་གསོལ༔ གདན་ཐོག་འདི་རུ་བྱིན་གྱིས་བརླབ་ཏུ་གསོལ༔ འཇའ་ལུས་འཕོ་བ་ཆེན་པོའི་སྐུ་འགྲུབ་ནས༔ གཞོན་ནུ་བུམ་སྐུར་ཡང་དག་སངས་རྒྱས་ཤོག༔ ཞེས་གསོལ་བ་ཕུར་ཚུགས་སུ་གདབ་པས་རྒྱལ་བ་སྲས་བཅས་ཆོས་ཀྱི་དབྱིངས་ནས་གཟུགས་ཀྱི་སྐུར་བཞེངས་ཏེ་མདུན་གྱི་ནམ་མཁར་བྱོན་པར་བསམ༔ བླ་མ་རྒྱལ་བ་སྲས་དང་བཅས༔ འོད་ཕུང་ལྔ་ཡི་རོལ་བར་ཞུ༔ རྒྱང་ཞགས་སྒོ་ནས་རབ་ཞུགས་ཅིང་༔ འོད་རྩ་ཀ་ཏིའི་ལམ་ནས་བྱོན༔ སྙིང་དབུས་གཞི་ཡི་སྒྲོན་མ་ལ༔ ཆུ་ལ་ཆུ་བཞག་བཞིན་ཏུ་ཐིམ༔ བདག་རྒྱུད་རང་བཞིན་སངས་རྒྱས་ཏེ༔ རྟོགས་པ་མངོན་གྱུར་ཆོས་སྐུ་རུ༔ སངས་ནས་ཆོས་གཟུགས་ཡོན་ཏན་ཀུན༔ མངོན་གྱུར་སྐལ་བ་རྒྱུད་ལ་བཞག༔ གནས་ལུགས་དོན་དམ་སྒྲུབ་པ་ཡིས༔ ཤེས་ཐོབ་གྲོལ་མཐོང་གདེངས་ལྡན་པའི༔ ལ་ཟླའི་ཆོས་ཉིད་ཆེན་པོར་རོལ༔ ཞེས་བཟླས་པའི་དོན་པོར་འོད་གསལ་ཐིག་ལེའི་སྒྲུབ་པ་ལ་འབད་དོ༔ དེས་ནི་སྒོ་གསུམ་རྡོ་རྗེ་ཡི༔ གྲོང་འཕོ་མྱུར་ལམ་མཐའ་རུ་ཕྱིན༔ གོལ་ཤོར་བདུད་ཀྱི་གཡུལ་ལས་རྒྱལ༔ ཚེ་འདིར་ཡེ་ཤེས་བླ་མ་ཐོབ༔ ཅེས་པ་འདི་ཡང་ཀུན་བཟང་བསྟན་འཛིན་ལ་སོགས་སློབ་བུ་འགའ་ཡི་བསྐུལ་བ་དོན་ཡོད་པའི་ཕྱིར་དུ་ག་ག་ཨ་བྷྱེས་སྤེལ་བ་བཀྲ་ཤིས་པར་གྱུར་ཅིག །དགེའོ། །སརྦ་མངྒ་ལཾ། ། འོད་གསལ་སྙིང་པོའི་སྒྲུབ་པ།འོད་གསལ་སྙིང་པོའི་སྒྲུབ་པ་བཞུགས་སོ༔ འོད་གསལ་བསྒོམ་པའི་རྣལ་འབྱོར་གྱི༔ སྙིང་བོའི་སྲོག་བསྒྲུབ་འདི་ལ་འབུང་༔ ན་མོ་གུ་རུ་པདྨ་ཀཱ་ར་ཡེ༔ ཧོ༔ སངས་རྒྱས་རང་ལ་རང་ཆས་སུ༔ བདེ་གཤེགས་སྙིང་པོར་ལྷུན་གྱིས་གྲུབ༔ འཁོར་འདས་ཀུན་ཁྱབ་བླ་མ་ལ༔ ངང་མཐོང་ལྟ་བས་སྐྱབས་སུ་མཆི༔ ཧོ༔ ཐིག་ལེ་ཉག་གཅིག་བདེ་བ་ཆེ༔ མ་རྟོགས་སྡུག་བསྔལ་འཁོར་བར་འཕྱན༔ རྟོགས་པ་ཙམ་ཀྱིས་རང་གྲོལ་བའི༔ ལ་བཟླ་ཆེན་པོར་སེམས་བསྐྱེད་དོ༔ ཐོད་རྒལ་ཡན་ལག་བདུན་པ་སོགས་བྱ༔ ཧཱུྃ༔ སྟོང་ཉིད་སྙིང་རྗེའི་ཕུར་བུ་ཡིས༔ རྟོག་གཉིས་རུ་ཏྲ་དབྱིངས་སུ་བསྐྲད༔ ཡང་དག་དོན་ལ་བགེགས་མེད་ཕྱིར༔ ཕན་གནོད་རེ་དོགས་མཚང་ལ་རྒོལ༔ ཕེཾཿ མ་རིག་རྨོངས་པའི་མུན་ཁམས་སུ༔ མ་ཧཱ་གུ་རུ་རྣམ་པ་དགུའི༔ ཡེ་ཤེས་སྣང་བའི་བྱིན་ཆེན་ཕོབ༔ འདོད་ཡོན་རྒྱན་གྱི་འཁོར་ལོར་རློབས༔ ཨོཾ༔ འཁོར་འདས་སྣང་སྟོང་ཚོགས་ཡུལ་ཆོས༔ ཀུན་ཏུ་བཟང་པོར་རྫོགས་སངས་རྒྱས༔ མ་བཅོས་རང་ཤར་དཀྱིལ་འཁོར་ལྷར༔ མཐོང་དག་སྒྲོན་མེའི་ལྟ་བས་འཚལ༔ ཤེལ་གྱི་སྦུ་གུའི་ཞིང་ཁམས་སུ༔ རྣམ་དག་དབྱིངས་ཀྱི་གཞལ་ཡས་དབུས༔ ཐིག་ལེ་སྟོང་པའི་གདན་ཁྲི་ལ༔ ཤེས་རབ་རང་བྱུང་བླ་མ་མཆོག༔ ལུ་གུ་རྒྱུད་ཀྱི་སྐུ་རུ་ལྡང་༔ ངོ་བོ་གདངས་རྩལ་རྣམ་པའི་སྐུ༔ ཟེར་གྱི་སྐུ་དང་ཆ་ཤས་སྐུ༔ བསམ་གྱིས་མི་ཁྱབ་སྟོན་འཁོར་ཚུལ༔ སྐུ་གསུམ་དགུ་སྤྲུགས་ལྷ་ཚོགས་ནི༔ ཡེ་ཤེས་སྒྱུ་མ་ཡུལ་ལ་རོལ༔ ཧཱུྃ༔ གཉིས་མེད་རོལ་བའི་ཡེ་ཤེས་ལྷ༔ རྒྱང་ཞགས་ཕྱག་རྒྱས་ལྷ་མོ་བཞིའི༔ ཆོས་ཉིད་མངོན་སུམ་དཀྱིལ་འཁོར་དུ༔ སྤྱན་འདྲེན་གནས་འདིར་གཤེགས་སུ་གསོལ༔ ཏྲཾཿ རིན་ཆེན་ཟུར་བརྒྱད་ལ་སོགས་པའི༔ གཞལ་ཡས་ཆེན་པོ་དེ་བཞི་རུ༔ གདན་འཛོམ་སངས་རྒྱས་བཅོམ་ལྡན་འདས༔ ཉམས་སྣང་གོང་འཕེལ་ངང་དུ་བཞུགས༔ ཧྲཱིཿ གནད་གསུམ་ཆོས་ཉིད་འཁོར་ལོ་ཡིས༔ དེ་བཞིན་གཤེགས་པའི་གསང་མཛོད་བརྡོལ༔ ནན་ཏན་འདུན་པའི་འདྲེས་ཕྱག་གིས༔ ལོངས་སྐུའི་ཡོན་ཏན་ཚད་ལ་ཕེབ༔ ཨཱཿ ཆོས་ཅན་སྣང་བ་ཐམས་ཅད་ཀུན༔ ཆོས་ཟད་བློ་འདས་ངང་ལ་མཆོད༔ བློ་དབང་ཡུལ་རྟོག་འཁྲུལ་བ་ཟད༔ སྐྱེ་འཇུག་དབང་ཐོབ་དངོས་གྲུབ་སྩོལ༔ ཧོཿ སྣང་གསུམ་འཕོ་བའི་བག་ཆགས་ཀྱི༔ ཤེས་སྒྲིབ་ཕྲ་བ་རང་དག་པས༔ ཁྱད་ཆོས་དྲུག་དང་ལྡན་པ་ཡིས༔ གཞོན་ནུ་བུམ་སྐུའི་ཀློང་ལ་བསྟོད༔ རང་དོན་ཆོས་སྐུ་མངོན་གྱུར་ནས༔ གཞན་དོན་གཟུགས་སྐུ་རྣམ་གཉིས་ཀྱི༔ གང་ལ་གང་འདུལ་ཕྲིན་ལས་བཞིའི༔ འགྲོ་ཁམས་རྒྱ་མཚོ་དོང་སྤྲུགས་ཤོག༔ ཅེས་བརྗོད་ནས་འོད་གསལ་ཐོད་རྒལ་ཆེན་པོའི་བཟླས་པ་ལ་འཇུག་པར་བྱའོ༔ སློབ་བུ་དབང་གྲགས་གིས་བསྐུལ་ངོར་ག་གཱས་སོ། ། ༄༅༔ འོད་གསལ་ཐོད་རྒལ་བསྒོམ་པའི་རྣལ་འབྱོར་བསཿ སྐྱབས་འགྲོ་སེམས་བསྐྱེད་རིམ་པ་འདི་ལྟར་བྱཿ ཨེ་མ་ཧོཿ སངས་རྒྱས་ཀུན་ཀྱི་སྐུ་གསུང་ཐུགསཿ འོད་གསལ་ཟང་ཐལ་ངོ་བོ་ཉིདཿ རང་རིག་མཐའ་དབུས་མེད་པ་ལཿ ལྟ་བ་མཇལ་བས་སྐྱབས་སུ་མཆིཿ རང་སེམས་སྐུ་གསུམ་གསང་སྔགས་ཀྱིསཿ ངོ་བོ་མངོན་གྱུར་རྟོགས་པ་ཐོབཿ དུས་གསུམ་བླ་མ་རིག་འཛིན་དངཿ སངས་རྒྱས་སྲས་བཅས་སྐྱབས་སུ་བཟུངཿ རྒྱུ་འབྲས་སྐྱབས་གནས་ཐམས་ཅད་ཀུནཿ བདག་ཉིད་གཅིག་པར་མངོན་སངས་རྒྱསཿ དེང་ནས་རང་གནས་སྐུ་གསུམ་གྱིསཿ དགོངས་པས་བདག་ལ་སྐྱབས་སུ་གསོལཿ གཉིས་པ་སེམས་བསྐྱེད་པ་ནིཿ ཀྱཻཿ སངས་རྒྱས་རང་ལ་རང་ཆས་ཀྱངཿ མ་རྟོགས་རྐྱེན་གྱི་གོལ་བའི་འགྲོཿ འཁོར་བ་དོང་ནས་སྤྲུགས་པའི་ཕྱིརཿ བྱང་ཆུབ་ཆེན་པོར་སེམས་བསྐྱེད་དོཿ ཀུན་རྫོབ་དོན་དམ་བྱང་ཆུབ་སེམསཿ རྩོལ་མེད་རང་བཞག་དགོངས་པའི་ངངཿ འབྲས་བུ་ཕྱི་དུས་མི་རེ་བརཿ ད་ལྟ་ཉིད་དུ་བསྐྱོལ་བར་བྱཿ འོད་གསལ་སྐུ་དང་ཐིག་ལེའི་སྐུཿ རྣམ་འབྱེད་ཡེ་ཤེས་མིག་གཅིག་གིསཿ རང་བྱུང་ཐུགས་ཀྱི་སྒྲོན་མ་ལཿ ཉི་ཟླ་ཁད་མཉམ་དགོངས་པའི་འཇུགཿ ཕ་རོལ་ཕྱིན་པའི་རང་བཞིན་ཅནཿ ཏིང་འཛིན་འབུམ་ཀྱི་སྒོ་ཕྱེད་པཿ ཅོག་བཞག་རང་བབས་ཆེན་པོ་ཡིསཿ ཡེ་ཤེས་བླ་མ་འགྲུབ་པར་ཤོགཿ ཅེས་ཀྱང་བསྟན་འཛིན་ངོར་ག་གཱས་སོ། །༈ རྗེས་ལ་བསྔོ་བ་སྨོན་ལམ་ནིཿ ཧོཿ དོན་དམ་བྱང་ཆུབ་སེམས་མཆོག་གིསཿ མཐར་ཐུག་རྒྱུ་འོད་ཟུང་འཇུག་ལཿ མཉམ་པར་བཞག་པའི་དགེ་རྩ་འདིཿ མི་སློབ་ཡང་དག་རྒྱུ་རུ་བསྔོཿ འཁོར་གསུམ་དམིགས་པ་ཉེར་ཞི་བསཿ ཤེས་རབ་ཕྲིན་ལས་འགྲུབ་པ་དངཿ མཐའ་ཡས་ཕ་མ་མཁའ་ཁྱབ་འགྲོཿ ཕྱམ་གཅིག་སངས་རྒྱས་ཐོབ་པར་ཤོག༔ བཀྲ་ཤིས་ནི། ཧཱུྃ༔ གཞི་ཡི་བཀྲ་ཤིས་རང་ཆས་ལྡན༔ ལམ་གྱི་བཀྲ་ཤིས་རྩོལ་མེད་གྲུབ༔ འབྲས་བུའི་བཀྲ་ཤིས་མངོན་སངས་རྒྱས༔ འོད་གསལ་ལྷུན་གྲུབ་བཀྲ་ཤིས་ཤོག༔ ལྟ་བ་ཟང་ཐལ་འོད་གསལ་རྟོགས༔ བསྒོམ་པ་ཉིན་མཚན་འཁོར་ཡུག་འདྲེས༔ སྤྱོད་པ་རང་གྲོལ་གཉུག་མར་འབྱམསཿ སངས་རྒྱས་དགོངས་པའི་རྩལ་ཐོབ་ཤོགཿ སྒྱུ་ལུས་ཁ་སྦྱོར་རྡོ་རྗེར་དགཿ སྲོག་རྩོལ་འབྱུང་ཆེན་ངོ་བོར་རྫོགསཿ རིག་བྱེད་ཡེ་ཤེས་ཆོས་སྐུར་སྨིནཿ འཕོ་ཆེན་གྲུབ་པའི་བཀྲ་ཤིས་ཤོགཿ ཅེས་ཀྱང་བསྟན་འཛིན་ངོར་ག་ག་ཨ་བྷྱེས་སོ། །༈ དེ་ནས་ཚོགས་མཆོད་དགོས་གལ་ནཿ བྱིན་རླབས་ནིཿ ༀ༔ ངོ་བོ་སྟོང་བ་ཆོས་ཀྱི་སྐུ༔ ཨཱཿ རང་བཞིན་གསལ་བ་ལོངས་སྤྱོད་རྫོགས༔ ཧཱུྃ༔ ཐུགས་རྗེ་ཀུན་ཁྱབ་རྒྱན་འཁོར་ལོ༔ ཧྲཱིཿ འདོད་ཡོན་ལྷ་མོར་མངོན་སངས་རྒྱས༔ སྤྱན་འདྲེན་ནི༔ ཧཱུྃ༔ རང་བྱུང་སྒྲོན་མའི་རང་མདངས་གསལ༔ འཁོར་འདས་ཀུན་བཟང་འཁོར་ལོ་ཅན༔ བླ་མ་སངས་རྒྱས་བླ་མེད་མགོན༔ ཚོགས་གཉིས་ཞིང་དུ་ཚོགས་ལ་དགོངས༔ གུ་རུ་ཛྙཱ་ན་མ་ཧཱ་མ་ཡ་ཙཀྲ་ས་མ་ཡ་ཛ་ཛ་༔ ཚོགས་མཆོད་ནི༔ ཧཱུྃ༔ འདོད་ཡོན་ཆོས་ཉིད་རོལ་བའི་གདངས༔ སེམས་དཔའི་ཁྱེའུ་ལྔའི་བླང་ནས༔ རིག་བྱེད་གཉིས་མེད་ངང་དུ་ཐིམ༔ རང་ཤར་རང་གྲོལ་ཚུལ་དུ་མཆོད༔ ག་ཎ་ཙཀྲ་པཱུ་ཙ་ཁཱ་ཧི༔ བཤགས་པ་ནི༔ ཧཱུྃ༔ རང་སྣང་ཡེ་ཤེས་རང་བཞིན་སྦུབས༔ གཟུགས་བརྙན་འོད་དུ་ཀུན་རྨོངས་པས༔ རྐྱེན་གྱུར་ལས་དང་བག་ཆགས་ཀུན༔ བྱ་གྲུབ་ཡེ་ཤེས་ཀློང་དུ་བཤགས༔ ག་ཎ་ཙཀྲ་ས་ཏྭ༴ ཚོགས་བསྒྲལ་ནི༔ ཧཱུྃ༔ བདག་མེད་ཆོས་སྐུའི་ཧེ་རུ་ཀས༔ ཤེས་རབ་ཡེ་ཤེས་ཕུར་བུ་ཡི༔ རྟོག་གཉིས་རུ་དྲའི་སྙིང་ལ་གདབས༔ ཐལ་འབྱིན་རྣམ་བཞིའི་དགོངས་ཀློང་སྤྱོད༔ མ་ཊཾ་རུ་ཏྲ་མ་ར་ཡ་ཕཊ་ཕཊ༔ བསྟབས་པ་ནི༔ ཧཱུྃ༔ ཕུང་པོ་ཁམས་དང་སྐྱེ་མཆེད་ཆོས༔ གདན་གསུམ་དཀྱིལ་འཁོར་ཀློང་དུ་བསྟབས༔ ཤེས་བྱ་ལྟ་བའི་དག་ཚིག་འདིས༔ འཚང་བ་གསུམ་ལྡན་ཨེ་མ་ཧོ༔ ཁ་རཾ་ཁཱ་ཧི༔ ལྷག་མ་ནི༔ ཕཻམ༔ རྟོག་ཚོགས་ལྷག་མས་ཤེས་སྒྲིབ་ཀྱི༔ རྩལ་སྣང་ཡེ་ཤེས་ངང་དུ་སྡུད༔ སྣང་སྲིད་ཀ་དག་ཆོས་ཀྱི་སྐུཿ རྣམ་དག་ཕྲིན་ལས་གཞི་ལ་རྫོགས༔ ཨུཥྩི་ཊ་བྷ་ལིདྷ་ཁཱ་ཧི༔ བསྐུལ་བ་ནི༔ ཛ༔ གསང་འདུས་མཛོད་བཞིའི་དཀྱིལ་འཁོར་ལྷ༔ མཉམ་བཞག་དགོངས་པས་གནད་བསྐུལ་ཀྱིས༔ བཞེངས་ཤིག་སྡུག་ཀུན་ཡོ་ལང་ཆོམས༔ འབྲས་རྒྱུད་བྲལ་དག་ཕྲིན་ལས་མཛོད༔ ཆད་བརྟན་ནི༔ ཧཱུྃ༔ ལུགས་འབྱུང་འཕོ་བའི་རྟེན་འབྲེལ་ཆོས༔ འཕོ་མེད་དམ་ཚིག་ལྷ་མོར་བརྟན༔ བདེན་དོན་རྣམ་པ་བཅུ་གཉིས་ཀྱི༔ བསྟན་པ་མཐར་རྒྱས་ཕྲིན་ལས་མཛོད༔ དྷརྨ་པཱ་ལ་ས་མ་ཡ་པཱུ་ཛ་བྷ་ལིདྷ་ཁཱ་ཧི༔ རྟ་བྲོ་ནི༔ ཧཱུྃ༔ སྣང་ཞེན་ཡུལ་གྱི་འཁྲུལ་བ་ཀུན༔ ལུ་གུ་རྒྱུད་ཀྱི་དལ་སྦྲེལ་ཆས༔ སྒྲོན་མ་དྲུག་གི་འོག་ཏུ་མནན༔ སྐུ་གསུམ་ལྷུན་གྲུབ་བྲོ་རྒྱས་གདབས༔ གཞོན་ནུ་བུམ་སྐུའི་གད་རྒྱང་རྔམཿ སྐྱེ་བས་མ་རིག་མ་ལྡང་ཞིག༔ སྟྭམ་བྷ་ཡ་ནན༔ དངོས་གྲུབ་ནི༔ ཧཱུྃ༔ ངོ་བོ་སྐུ་ལ་རང་བཞིན་འོད༔ ཐུགས་རྗེ་ཡེ་ཤེས་ཏི་ལ་ཀའིཿ ཀ་དག་སངས་རྒྱས་ད་ལྟ་ཉིད༔ དངོས་གྲུབ་རང་གནས་རང་དབང་སྤྱོད༔ ལྷ་བསྐང་ནི༔ ཧཱུྃ༔ ལྷ་ནི་ཆོས་ཉིད་ཆོས་ཀྱི་སྐུ༔ མེད་པའི་རང་བཞིན་རྣམ་པ་བཅུ༔ ཕྱལ་བ་སྤྲོས་བྲལ་སྟོང་བ་ཉིད༔ ཡེ་གྲོལ་རྟོགས་པའི་ལྟ་བས་བསྐངས༔ ལྷ་ནི་ཆོས་ཉིད་གཟུགས་ཀྱི་སྐུ༔ རང་རིག་བྱང་ཆུབ་སེམས་སུ་གཅིག༔ མཚན་མ་མེད་ལ་མཚན་མར་སྣང་༔ རང་གྲོལ་ཀློང་འབྱམས་བསྒོམ་པས་བསྐངས༔ ལྷ་ནི་ཟུང་འཇུག་དོན་དམ་པ༔ མཉམ་རྫོགས་བྱར་མེད་རྣལ་འབྱོར་རྩེ༔ ཆོས་བོར་ཆོས་ཟད་འདུས་མ་བྱས༔ ཅེར་གྲོལ་ཆེན་པོའི་སྤྱོད་པས་བསྐངས༔ ལྷ་ནི་སྨོན་པ་མེད་པའི་མཐའ༔ ཡེ་ནས་སེམས་ཅན་སངས་རྒྱས་ཡིན༔ སངས་རྒྱས་གཞན་དུ་རྙེད་མི་འགྱུར༔ འབྲས་བུ་ལྷུན་གྲུབ་གདེངས་ཀྱིས་བསྐངས༔ བསྐང་དང་བསྐང་བྱེད་བསྐང་བའི་ཡུལ༔ གཞི་མེད་རྩ་བྲལ་རྫོགས་སངས་རྒྱས༔ རྟོགས་པས་སྒྲོ་བཏགས་ཐམས་ཅད་ཀུན༔ མཉམ་པ་ཉིད་དུ་ཕྱམ་གདལ་ཡན༔ ཅེས་ཀྱང་ག་གཱས་སོ། །འདི་ལ་ཐོག་མར་གསོལ་འདེབས་སྐྱབས་སེམས་སོགས་འདོན་ཞིང་ཏིང་ངེ་འཛིན་གསུམ་གྱི་གོ་སར་ཐོག་མར་ཁྲེགས་ཆོད་དང་ནམ་མཁའི་རྣལ་འབྱོར་དུ་བྱ༔ དེ་ནས་དོན་དམ་པའི་སྒྲུབ་པ་ཐོད་རྒལ་ལ་འཇུག་ཅིང་དེ་གཅིག་པུས་སྤྲོས་པ་མ་ཞི་ན་རྩ་སྒྲུབ་འདོན་ཞིང་མཇུག་ཏུ་ཚོགས་འཁོར་འདི་སྤྲད་ཅིང་རྗེས་ཆོག་ལོགས་སུ་སྤྲོས་པ་ལྟར་བྱས་ཀྱང་ཆོག་ལ་ལར་ཚོགས་འདི་འགྲོན་ཐབས་ཀྱི་ལྷར་རུང་བ་དང་། ཐོད་རྒལ་འདི་རང་བཞིན་གཞིར་རྫོགས་ཀྱི་ལྷ་ཡིན་པས་ལྷ་བསྐྱེད་ལོགས་སུ་མ་བཏགས་ཀྱང་མི་འགལ་ལོ༔ ག་གཱས་སོ། །༈ ཨེ་མ་ཧོཿ གསལ་སྟོང་རིག་གསུམ་དབྱེར་མེད་རང་བྱུང་སྒྲོནཿ འོད་གསལ་ཁྲེགས་ཆོད་ཆོས་སྐུ་བྱང་ཆུབ་ཐུགསཿ དབྱིངས་ཐིག་ལུ་གུ་རྒྱུད་ཀྱི་མཚན་དཔེའི་སྐུརཿ ཟུང་འཇུག་རྡོ་རྗེའི་གྲུབ་མཐའ་སྙོགས་པར་འཚལཿ དོན་ཁོས་གསུང་ངོར་ག་གཱས་སོ། ། བླ་མ་ཡོངས་འདུས་ཀྱི་ལུས་དཀྱིལ།༈ བླ་མ་ཡོངས་འདུས་ཀྱི་ལུས་དཀྱིལ་བཞུགས་སོ༔ རང་ཉིད་སྐད་ཅིག་དྲན་རྫོགས་སུ༔ ཕྱི་སྣོད་པདྨ་འོད་ཀྱི་ཞིང་༔ རྒྱན་བཀོད་ཕུན་ཚོགས་གཞལ་ཡས་སུ༔ པདྨ་ཉི་ཟླའི་གདན་སྟེང་དུ༔ གུ་རུ་པདྨ་འབྱུང་གནས་ནི༔ ཞལ་གཅིག་ཕྱག་གཉིས་གསེར་རྡོར་དང་༔ ཐོད་བུམ་འཆི་མེད་བདུད་རྩིའི་བཀང་༔ གཉིས་མེད་བདེ་ཆེན་གསང་བའི་ཡུམ༔ ཛྙཱ་ན་ས་ར་འཁྲིལ་སྦྱོར་རོལ༔ རྒྱལ་པོ་རོལ་པའི་སྟབས་སུ་འགྱིང་༔ རིན་ཆེན་རུས་པ་ཐོད་ཕྲེང་བརྒྱན༔ སྣ་ཚོགས་དར་གྱི་ཆས་གོས་གསོལ༔ ཡབ་ཡུམ་སྐུ་མདོག་དཀར་དམར་མདངས༔ དབུ་ལ་པདྨའི་སྙེན་ཞུ་དང་༔ མནྡ་ར་བས་ཐོད་བཅིངས་ཏེ༔ སྒེག་མཛེས་དགྱེས་པའི་ཚུལ་དུ་བསྒོམ༔ གནས་གསུམ་འོད་ཟེར་རབ་འཕྲོས་པས༔ ཡེ་ཤེས་ལྷ་ཚོགས་སྤྱན་དྲངས་བསྟིམ༔ རྣམ་ཐར་མཆོག་ལ་དད་ཕྱག་འཚལ༔ སྦྱོར་སྒྲོལ་དམ་རྫས་མཆོད་པ་འབུལ༔ ཡེ་ཤེས་གླུ་ཡི་ཚིག་གིས་བསྟོད༔ ཐུགས་ཀར་ཧཱུྃ་མཐར་སྔགས་ཀྱིས་བསྐོར༔ བཟླས་པས་འཁོར་འདས་སྲོག་ཐོབ་བསམ༔ ཨོཾ་ཨཱཿཧཱུྃ༔ བཛྲ་གུ་རུ་པདྨ་སིདྡྷི་ཧཱུྃ༔ སྣང་སྲིད་མཆོད་པའི་སྤྲིན་དུ་འབུལ༔ འཁོར་འདས་འུབ་ཆུབ་རོལ་པའི་ལྷ༔ གཉིས་མེད་རོལ་བས་ཕྱག་འཚལ་བསྟོད༔ ཅེས་ཀྱང་སྨན་ལྷའི་ངོར་ག་ག་ཨ་བྷྱེས་སོ། ། ༈ ཧཱུྃ༔ རང་ཉིད་ལྷར་གསལ་ཐུགས་ཀ་ནས༔ འོད་འཕྲོས་ཚོགས་རྫས་སྦྱངས་སྤེལ་བསྒྱུར༔ སྐུ་གསུམ་ཡེ་ཤེས་བདུད་རྩིར་རླབས༔ རིག་འཛིན་བླ་མའི་ལྷ་ཚོགས་ལ༔ ཐིམ་པའི་ཚུལ་གྱིས་མཆོད་འབུལ་བས༔ ཕྱི་ནང་གསང་བའི་དམ་ཉམས་པ༔ བཤགས་ནས་ཐུགས་དམ་གཉན་པོ་བསྐངས༔ འགལ་རྐྱེན་དགྲ་བགེགས་ལོག་འདྲེན་སྒྲོལ༔ གཉིས་མེད་ཆོས་ཀྱི་དབྱིངས་སུ་སྟོབས༔ ལྷག་སྐྱོང་ཕོ་མོ་ལྷག་ལ་རོལ༔ སེམས་ཅན་དོན་ཕྱིར་རྒྱུད་བསྐུལ་ལོ༔ དམ་ཅན་བསྲུང་མར་ཆད་ཐོ་བསྒྲགས༔ མཆོད་བཞེས་བསྟན་པ་སྐྱོང་བ་དང་༔ འགབ་འདྲེ་དམ་སྲི་སྟྭཾ་བྷ་ནན༔ མཆོག་དང་ཐུན་མོང་དངོས་གྲུབ་སྩོལ༔ སྡོམ་དང་བསླབ་པ་དམ་ཉམས་བཤགས༔ ལྷར་སྣང་སྟོང་ཉིད་ཆེན་པོར་བསྡུ༔ སྟོང་པའི་རང་རྩལ་ཕྱག་རྒྱ་ཆེ༔ དགེ་དེས་སེམས་ཅན་སངས་རྒྱས་ནས༔ དུས་ཀུན་བཀྲ་ཤིས་དཔལ་འབར་སྩོལ༔ ཞེས་ཀྱང་ག་གཱས་སོ། ། ༈ བླ་མའི་རྣལ་འབྱོར་བསྡུས་པ་དབང་གི་ཆུ་རྒྱུན་བཞུགས༔ དུས་གསུམ་སངས་རྒྱས་བསྙེན་པ་ལས༔ བླ་མ་བསྙེན་པ་ལྷག་གསུངས་པས༔ དེ་ཕྱིར་དེ་ཡི་ཟོལ་མ་རུ༔ རྗེས་བརྗོད་བྲག་ཆ་དོན་མེད་འགོད༔ ས་མ་ཡཱ༔ རང་ཉིད་ཐ་མལ་གནས་པ་ཡི༔ སྨིན་མཚམས་ཐད་ཀྱི་ནམ་མཁའ་ལ༔ ཆུ་སྐྱེས་རྟ་ལྗང་ཟུང་གི་སྤོར༔ རྡོ་རྗེ་བླ་མའི་རྣམ་པ་ནི༔ ཐ་མལ་སྐྱེ་བ་སྤྲུལ་པའི་སྐུ༔ རང་ངོར་ཇི་ལྟར་སྣང་བ་བཞིན༔ ཕྱག་གཡས་འཁོར་ལོ་གཡོན་དྲིལ་བུ༔ ཞབས་གཉིས་རྡོ་རྗེའི་སྐྱིལ་ཀྲུང་བཞུགས༔ སྣང་སྟོང་གཉིས་མེད་རང་བཞིན་ལས༔ ལས་ཀྱི་ཕྱག་རྒྱ་དབྱེར་མེད་རོལ༔ ཐིག་ལེ་སྟོང་པའི་དཀྱིལ་འཁོར་དུ༔ རྣམ་དག་དབྱིངས་ཀྱི་དྲྭ་བ་ན༔ ཤེས་རབ་རང་བྱུང་སྒྲོན་མའི་དངོས༔ རང་བཞིན་སྣང་པའི་གདེངས་སུ་བཞུགས༔ གནས་གསུམ་འབྲུ་གསུམ་འོད་ཟེར་གྱིས༔ ཕྱོགས་བཅུའི་རྒྱལ་བའི་དཀྱིལ་འཁོར་ནས༔ ནུས་ལྡན་རྡོ་རྗེའི་སྐུ་གསུང་ཐུགས༔ ཡོན་ཏན་ཕྲིན་ལས་རང་རྩལ་ཀུན༔ མཚོ་ལ་ཁ་ཆར་བབས་པ་བཞིན༔ སྤྱན་དྲངས་གཉིས་སུ་མེད་པར་བསྟིམ༔ ཧཱུྃ༔ ཨོ་རྒྱན་ཡུལ་གྱི་སོགས༴ ཆོས་ཟད་བློ་འདས་དཀྱིལ་འཁོར་ནས༔ ཚད་ཕེབས་དོན་གྱི་ཡོན་ཏན་དཔལ༔ སྣང་བའི་ཉམས་སུ་ལྷུན་གྱིས་གྲུབ༔ མངོན་སུམ་འགྲོ་བའི་མགོན་པོ་ལ༔ ཕྱག་འཚལ་མཆོད་འབུལ་ཉེས་ལྟུང་བཤགས༔ དགེ་ལ་ཡི་རང་ཆོས་འཁོར་བསྐུལ༔ མི་འདའ་བཞུགས་གསོལ་སྐྱབས་སུ་མཆི༔ བྱང་ཆུབ་སེམས་ཀྱི་བསླབས་སྡོམ་གཟུང་༔ རིག་འཛིན་སྔགས་ཀྱི་དམ་ཚིག་ཀུན༔ རྡོ་རྗེའི་གདུང་ཀྱང་བདག་གིས་གསོབ༔ འགྲོ་ཀུན་བྱང་ཆུབ་གནས་བཀོད་པའི༔ ཕྲིན་ལས་བྱེད་པོར་བདག་བྱིན་རློབས༔ དགེ་བས་འགྲོ་ཀུན་སངས་རྒྱས་ཤོག༔ དབང་བཞི་བསྐུར་ཤིང་སྒྲིབ་བཞི་དག༔ སྐུ་བཞི་ཐོབ་པའི་དགའ་བཞིའི་ལམ༔ རྣལ་འབྱོར་བཞི་ཡི་སྨིན་བྱེད་དུ༔ རིགས་སད་ལས་ཀྱི་ཉེ་རྒྱུ་རུ༔ རྟེན་འབྲེལ་བདེན་པའི་སྤྱི་བླུགས་སྩོལ༔ བཛྲ་གུ་རུ་ག་ག་ཨ་བྷྱེ་སརྦ་སིདྡྷི་ཕ་ལ་ཧཱུྃ༔ ཨ་བྷི་ཥིཉྩ་ཧཱུྃ༔ ཅེས་ཅི་ནུས་མཐར༔ ཨཱ༔ གྲངས་མང་བསྐྱལ་ལོ༔ དེ་ནས་དབང་གི་རིམ་པ་ནི༔ ཨཱ༔ བླ་མའི་གནས་གསུམ་འབྲུ་གསུམ་ལས༔ འོད་ཟེར་དཀར་དམར་མཐིང་ཀ་གསུམ༔ ཡི་གེ་སྤྲིན་གྱི་རྣམ་པར་འཕྲོས༔ སྒོ་གསུམ་སྒྲིབ་དག་དགའ་གསུམ་སྐྱེ༔ སྐུ་གསུམ་གོ་འཕང་རྒྱུད་ལ་བཞག༔ ལམ་གསུམ་དབང་ཐོབ་སླར་ཡང་ནི༔ ཧཱུྃ་ལས་འོད་ཟེར་མཐིང་ནག་འབར༔ སྤྱི་བོར་ཚངས་བུག་ནས་ཞུགས་ཏེ༔ ཆེར་སྐྱེད་འཁོར་ལོར་ལྔ་བོ་ཡི༔ ཡན་ལག་ཕྲ་བ་ཀུན་ཞུགས་པས༔ ཚིག་གི་དབང་ཐོབ་ལྷན་དགའ་སྐྱེས༔ རྫོགས་ཆེན་བསྒོམ་པའི་སྣོད་དུ་གྱུར༔ རྒྱུ་འབྲས་ས་བཅུ་མངོན་དུ་བྱས༔ དེ་ནས་འོད་ཞུ་བདག་ལ་ཐིམ༔ ཉོན་ཤེས་སྒྲིབ་པ་མཐའ་དག་བྱང་༔ འོད་ཟེར་ཆེན་པོའི་དབང་ཐོབ་སྟེ༔ ཀུན་གཞིའི་ལས་དག་རྡོ་རྗེ་ཡི༔ ཏིང་འཛིན་དབང་ཐོབ་གདོས་བཅས་ཀུན༔ དག་པའི་འོད་སྐུ་བླ་མའི་ངང་༔ གྲགས་སྟོང་གསུང་གི་རྡོ་རྗེར་རོལ༔ དྭངས་མའི་རྩ་དང་ཡེ་ཤེས་ཀྱི༔ ངོ་བོ་རང་བཞིན་ཐུགས་རྗེ་ཡི༔ སྐུ་དང་ཐིག་ལེ་རིག་པར་སྨིན༔ མི་སློབ་ལམ་བརྒལ་ལྷུན་གྱིས་གྲུབ༔ གཞི་ལ་མཐར་ཕྱིན་བྱ་བྱེད་ཀྱིས༔ སྤྲུལ་པ་གཉིས་འབྱིན་ལ་དབང་བསྒྱུར༔ བློ་འདས་ཡེ་གྲོལ་ཨེ་མ་ཧོ༔ ཨ་ཨཱཿཕཊ༔ ཅེས་ཀྱང་པྲཛྙཱ་མ་ཏིའི་ངོར། །ག་གཱ་ཨ་བྷྱེས་ཁྲེལ་མེད་གཏམ། །རྣམ་པར་རིག་པའི་འཕྲུལ་བསྒྱུར་མཁན། །འགྱུར་མེད་རྣམ་པར་རྒྱལ་བའི་དཔལ། །དགེའོ། དགེའོ། དགེའོ། དགེའོ། སརྦ་མངྒལཾ། ། ༈ བླ་མའི་རྣལ་འབྱོར་ནིཿ རང་ཉིད་ཐ་མལ་སྤྱི་བོ་རུཿ རྡོ་རྗེའི་བླ་མ་རིན་པོ་ཆེཿ ཀུན་ཏུ་བཟང་པོའི་རྣམ་པ་ནིཿ ཞལ་གཅིག་ཕྱག་གཉིས་མཉམ་བཞག་མཛདཿ ཞབས་གཉིས་རྡོ་རྗེའི་སྐྱིལ་ཀྲུང་བཞུགསཿ ཆོས་ཉིད་བཟང་མོ་ཡུམ་དང་འཁྲིལཿ ཡབ་ཡུམ་གཉིས་མེད་སྐུ་མདོག་མཐིངཿ ཐིག་ལེ་འོད་ལྔའི་མུ་ཁྱུད་དབུསཿ སྣང་སྟོང་ཆུ་ཟླ་བཞིན་དུ་གསལཿ ཨོཾ་ཨཱཿབཛྲ་གུ་རུ་ས་མནྟ་བྷ་དྲ་ག་ག་ཨ་བྷྱེ་སརྦ་སིདྡྷི་ཕ་ལ་ཨ་བྷི་ཥིཉྩ་ཧཱུྃཿ མཐར་ནི་བླ་མའི་གནས་གསུམ་ལསཿ དཀར་དམར་མཐིང་ཀའི་འོད་ཟེར་སྤྲིནཿ མིག་དང་ཚངས་པའི་བུ་ག་ནསཿ རོ་རྐྱང་དབུ་མའི་ལམ་དུ་ཞུགསཿ དུག་གསུམ་སྒོ་གསུམ་སྡིག་སྒྲིབ་དགཿ རྡོ་རྗེ་གསུམ་གྱི་དབང་ཐོབ་བསམཿ མཐར་ནི་འོད་ཞུ་རང་ལ་ཐིམཿ རང་ལུས་བླ་མའི་སྐུ་རུ་སྨིནཿ ཀ་དག་ཚིག་གི་དབང་ཐོབ་ནསཿ ལམ་བཞི་བསྒོམ་པའི་སྣོད་རུང་ཞིངཿ སྐུ་བཞིའི་ས་བོན་རྒྱུད་ལ་ཐེབསཿ དམིགས་མེད་ངང་ལ་མཉམ་པར་བཞགཿ ཨ་ཨ་ཨཱཿ ཅེས་པ་འདི་ཡང་འཇིགས་མེད་པའི་ངོར་ག་གཱ་བས་སོ། ། ཆོས་གེགས་སེལ་བའི་གསོལ་འདེབས།༈ ཆོས་གེགས་སེལ་བའི་གསོལ་འདེབས་བཞུགས་སོ༔ ཀྱཻ༔ རྒྱལ་དབང་ཤཱཀྱ་ཐུབ་པ་དང་༔ མཆོག་ཟུང་ལྔ་སྡེ་བཟང་པོ་སོགས༔ འདུལ་བ་བརྒྱུད་པའི་བླ་མ་ལ༔ གསོལ་བ་འདེབས་སོ་བྱིན་གྱིས་རློབས༔ ལས་ཉོན་བདུད་དབང་མ་བཏང་བར༔ ཆོས་གེགས་བར་ཆད་ཞི་བ་དང་༔ ལྟ་སྒོམ་སྤྱོད་པ་མཐར་ཕྱིན་ཏེ༔ ས་ལམ་མི་མཐུན་ཕྱོགས་ལས་རྒྱལ༔ སྤང་རྟོགས་ལྷུན་གྲུབ་དངོས་གྲུབ་སྩོལ༔ རྡོ་རྗེ་འཆང་དང་རྡོ་རྗེ་ཆོས༔ པདྨ་འབྱུང་གནས་ལ་སོགས་པའི༔ གསང་སྔགས་བརྒྱུད་པའི་བླ་མ་ལ༔ གསོལ་བ་འདེབས་སོ་བྱིན་གྱིས་རློབས༔ ལས་ཉོན་བདུད་དབང་མ་བཏང་བར༔ ཆོས་གེགས་བར་ཆད་ཞི་བ་དང་༔ ལྟ་སྒོམ་སྤྱོད་པ་མཐར་ཕྱིན་ཏེ༔ ས་ལམ་མི་མཐུན་ཕྱོགས་ལས་རྒྱལ༔ སྤང་རྟོགས་ལྷུན་གྲུབ་དངོས་གྲུབ་སྩོལ༔ ཞི་བ་རྡོ་རྗེ་དབྱིངས་དང་ནི༔ རྒྱུད་དང་སྒྲུབ་སྡེ་ཁྲག་འཐུང་སོགས༔ ཡི་དམ་རྒྱལ་བའི་དཀྱིལ་འཁོར་ལ༔ གསོལ་བ་འདེབས་སོ་བྱིན་གྱིས་རློབས༔ ལས་ཉོན་བདུད་དབང་མ་བཏང་བར༔ ཆོས་གེགས་བར་ཆད་ཞི་བ་དང་༔ ལྟ་སྒོམ་སྤྱོད་པ་མཐར་ཕྱིན་ཏེ༔ ས་ལམ་མི་མཐུན་ཕྱོགས་ལས་རྒྱལ༔ སྤང་རྟོགས་ལྷུན་གྲུབ་དངོས་གྲུབ་སྩོལ༔ སྣ་ཚོགས་ཡུམ་དང་ཡུམ་ཆེན་མོ༔ རྡོ་རྗེ་ཕག་མོ་ལ་སོགས་པའི༔ མ་རྒྱུད་མཁའ་འགྲོའི་དཀྱིལ་འཁོར་ལ༔ གསོལ་བ་འདེབས་སོ་བྱིན་གྱིས་རློབས༔ ལས་ཉོན་བདུད་དབང་མ་བཏང་བར༔ ཆོས་གེགས་བར་ཆད་ཞི་བ་དང་༔ ལྟ་སྒོམ་སྤྱོད་པ་མཐར་ཕྱིན་ཏེ༔ ས་ལམ་མི་མཐུན་ཕྱོགས་ལས་རྒྱལ༔ སྤང་རྟོགས་ལྷུན་གྲུབ་དངོས་གྲུབ་སྩོལ༔ ལྷ་ཆེན་གནོད་སྦྱིན་དམར་ནག་དང་༔ མ་གཟའ་དམ་གསུམ་ལ་སོགས་པའི༔ ཆོས་སྐྱོང་དམ་ཅན་རྒྱ་མཚོ་ལ༔ གསོལ་བ་འདེབས་སོ་བྱིན་གྱིས་རློབས༔ ལས་ཉོན་བདུད་དབང་མ་བཏང་བར༔ ཆོས་གེགས་བར་ཆད་ཞི་བ་དང་༔ ལྟ་སྒོམ་སྤྱོད་པ་མཐར་ཕྱིན་ཏེ༔ ས་ལམ་མི་མཐུན་ཕྱོགས་ལས་རྒྱལ༔ སྤང་རྟོགས་ལྷུན་གྲུབ་དངོས་གྲུབ་སྩོལ༔ ཅེས་ཀྱང་ག་གཱས་སོ། ། ༈ ན་མོ་གུ་རུ་ཛ་ཡ་ས་ར་ཡེ༔ བརྒྱུད་གསུམ་བླ་མ་རིག་འཛིན་རྒྱ་མཚོ་དང་༔ རྒྱུད་སྡེ་བཞི་དྲུག་ཡི་དམ་དཀྱིལ་འཁོར་ལྷ༔ ཕྱི་ནང་གནས་ཡུལ་དཔའ་བོ་མཁའ་འགྲོའི་ཚོགས༔ ཁྱད་པར་བསྐལ་བཟང་སྒྲོན་མ་སྟོང་རྩ་གཉིས༔ ཐེག་གསུམ་དམ་ཆོས་སྐྱེ་འཕགས་དགེ་མདུན་སྡེ༔ སྐུ་གསུམ་དབྱིངས་བཞུགས་རྒྱལ་བ་རྒྱ་མཚོ་རྣམས༔ ཐུགས་རྗེ་བརྩེ་བས་བདག་ལ་དགོངས་ནས་ཀྱང་༔ གསོལ་བཏབས་འབྲས་བུ་དུས་སུ་སྨིན་པར་མཛོད༔ དེང་དུས་སྙིགས་མ་ལྔ་ཡི་གཞན་དབང་གིས༔ ནད་མཚོན་མུ་གེའི་བསྐལ་བ་ངན་པ་ཡིས༔ ཡིད་ཅན་མཐའ་དག་སྡུག་བསྔལ་རྒྱུ་འབྲས་ལ༔ སྤྱོད་དང་ཕྱི་མའི་འདུ་བྱེད་མྱོང་འགྱུར་ཀུན༔ ཁྱེད་རྣམས་མཐུ་སྟོབས་ནུས་པ་དབང་འབྱོར་གྱིས༔ བཟློག་ཅིང་བསྒྱུར་བའི་ཕྲིན་ལས་མངོན་གྱུར་སྟོན༔ སྣོད་བཅུད་སྲིད་ཞིའི་དགེ་མཚན་ཕུན་ཚོགས་ཀྱི༔ འབྲས་བཟང་གཡུར་དུ་ཟ་བར་བྱིན་གྱིས་རློབས༔ ཅེས་སུ་ལའང་མི་བསྟན་པའི་དམ་ཚིག་དང་དུ་བླང་ནས་ཉིན་ལན་གསུམ་མཚན་ལན་གསུམ་བརྗོད་ན་ཕྱི་ནང་གི་རྒུད་པ་མཐའ་དག་དབྱིངས་སུ་ཞི་ནས་ལེགས་ཚོགས་ཀྱི་ཡོན་ཏན་ཐམས་ཅད་ཡར་ངོའི་ཟླ་བ་ལྟར་དུ་འཕེལ་ཞིང་མཐུན་རྐྱེན་བསམ་དོན་མ་ལུས་ཡིད་ཀྱིས་སྨོན་པ་བཞིན་འགྲུབ་པར་འགྱུར་རོ༔ འདི་བྱིན་རླབས་ཤིན་ཏུ་ཆེའོ༔ བསོད་ནམས་སྙན་གྲགས་ཀྱིས་བསྐུལ་ངོར་ག་གཱས་སོ། ། ༈ བསམ་པ་མྱུར་འགྲུབ་བཞུགས་སོ༔ ཕྱོགས་བཅུའི་དུས་བཞིའི་བདེ་གཤེགས་སྲས་བཅས་དང་༔ གྲུབ་ཆེན་རིག་འཛིན་རྗེ་འབངས་བརྒྱུད་པར་བཅས༔ ཐུགས་རྗེ་གཅིག་བསྡུས་ནམ་མཁའ་འཇིགས་མེད་ཀྱི༔ བྱིན་རླབས་ནུས་མཐུ་བདེན་པའི་སྟོབས་ཤུགས་ཀྱིས༔ གང་ལ་རེ་སྨོན་བསམ་དོན་མ་ལུས་པ༔ འབད་མེད་ལྷུན་གྱིས་འགྲུབ་པའི་བཀྲ་ཤིས་ཤོག༔ ཅེས་ཀྱང་འབྲོག་འཇིགས་བསྐུལ་ངོར་ག་གཱས་སོ། ། འཆི་མེད་མགོན་པོའི་གསོལ་འདེབས་སྔགས་ཚིག་སྤེལ་མ།༈ འཆི་མེད་མགོན་པོའི་གསོལ་འདེབས་སྔགས་ཚིག་སྤེལ་མ་ནི༔ ཨེ་མ་ཧོ༔ སངས་རྒྱས་ཀུན་གྱི་གསུང་གི་སྤྱི་གཟུགས་མཆོག༔ འགགས་པ་མེད་པ་རྡོ་རྗེའི་ན་དཱ་ཉིད༔ སོར་རྟོགས་ཡེ་ཤེས་པདྨ་ཚེ་དཔག་མེད༔ གཟུགས་སྐུར་བཞེངས་ལས་དགོས་འབྲས་མངོན་སུམ་སྟོན༔ སེམས་ཅན་འདི་ལ་འཆི་མེད་ཚེ་དབང་བསྐུརཿ ཚེ་འཕྲང་བར་ཆད་གཡུལ་ལས་རྒྱལ་བར་མཛོད༔ འགྲོ་འདུལ་སྤྲུལ་སྐུ་པདྨ་འབྱུང་གནས་དང་༔ འཇའ་ལུས་མཆོག་བརྙེས་བི་མ་ལ་མི་ཏྲ༔ བྷོ་དྷི་ས་ཏྭ་དམ་པ་སངས་རྒྱས་ཞབས༔ གྲུབ་པའི་དབང་པོ་ཐང་སྟོང་རྒྱལ་པོ་ཡིས༔ འཆི་མེད་རྡོ་རྗེ་གྲུབ་པའི་བྱིན་རླབས་དང་༔ རང་བཞིན་འགྱུར་བ་མེད་པའི་བདེན་དོན་གྱིས༔ སེམས་ཅན་འདི་ལ་འཆི་མེད་ཚེ་དབང་བསྐུར༔ ཚེ་འཕྲང་བར་ཆད་གཡུལ་ལས་རྒྱལ་བར་མཛོད༔ ཁྱེད་རྣམས་སྔོན་ནས་མངོན་པར་བྱང་ཆུབ་དུ༔ སྣང་མེད་ཆོས་ཀྱི་སྐུ་ལ་མཉམ་ཉིད་ཀྱང་༔ ཐུགས་རྗེའི་གདུལ་ཐབས་རྒྱུན་ཆད་མ་གྱུར་བ༔ རྣལ་འབྱོར་གདུང་ཤུགས་གུས་པས་དགོངས་རྒྱུད་བསྐུལ༔ ཐུགས་བསྐྱེད་བར་མ་དོ་རུ་རག་མ་ལུས༔ དུས་ལས་མི་འདའ་བདག་ལ་ཉེར་དགོངས་ནས༔ སེམས་ཅན་འདི་ལ་འཆི་མེད་ཚེ་དབང་བསྐུར༔ ཚེ་འཕྲང་བར་ཆད་གཡུལ་ལས་རྒྱལ་ནས་ཀྱང་༔ གནས་སྐབས་ལོ་བརྒྱ་ཐུབ་པའི་ཚེ་དཔལ་བརྙེས༔ མཐར་ཐུག་འཆི་མེད་གཉུག་མ་ལྷན་ཅིག་སྐྱེས༔ ཡེ་ཤེས་ཆོས་སྐུ་མགོན་པོ་ཁྱེད་རྣམས་ཀྱིས༔ གོ་འཕང་མཆོག་ཐོབ་མཐའ་ཡས་འགྲོ་བ་ཀུན༔ སྡུག་བསྔལ་བདེན་པའི་གནས་ལས་དབུགས་འབྱུང་བའི༔ ཐུགས་བསྐྱེད་ནུས་སྟོབས་ལྷུན་གྱིས་གྲུབ་གྱུར་ཅིག༔ ཨོཾ་གུ་རུ་ཛྙཱ་ན་ཨཱ་ཡུར་པ་རཱི་མི་ཏ་པདྨ་ཀ་རཱ་སརྦ་མ་ཧཱ་ཀཱ་རི་ཎི་ཀ་ཨ་ཡུར་སརྦ་སིདྡྷི་ཕ་ལ་བྷྲཱུཾ་བྷྲཱུཾ་ཧཱུྃ་ནྲྀ་ཛ༔སྭཱ་ཧཱ༔ ཅེས་བརྗོད་རྟག་ཏུ་གསོལ་འདེབས་བཟླས༔ གང་ཞིག་ཚེ་ཟད་འཆི་བ་ལ༔ ཞག་གཅིག་པ་ལ་བསླེབས་པ་ཡང་༔ ལོ་བརྒྱ་ཐུབ་པར་གདོད་མི་ཟ༔ ས་མ་ཡཱ༔ རྒྱ་རྒྱ་རྒྱ༔ ཅེས་པ་འདི་ཡང་མཆོད་དཔོན་ཚེ་ལིའི་བསྐུལ་ངོར་ག་གཱ་ཨ་བྷྱེ་ནས་སོ། །དགེའོ། །དགེའོ། །དགེའོ། །སརྦ་མངྒ་ལཾ། ། ༈ བླ་འགུགས་བསྡུ་ནཿ ཧཱུྃཿ རྣལ་འབྱོར་བླ་གནས་འཕོ་ཡུལ་སུམ་ཅུ་ལཿ བརྟེན་པའི་བླ་ནི་རྣམ་ཤེས་འཁོར་བའི་གནསཿ ཆད་ཉམས་ཡར་ཟད་བརྐུས་དང་འཕྲོག་པ་ཀུནཿ ཡེ་ཤེས་ལྷ་ཡི་ཐུགས་རྗེས་འདིར་ཁུག་ཅིགཿ འཇིག་རྟེན་སྲུང་མའི་སྟོབས་ཀྱིས་འདིར་ཁུག་ཅིགཿ གསང་སྔགས་རིག་སྔགས་བདེན་པས་འདིར་ཁུག་ཅིགཿ རྟེན་འབྲེལ་བསླུ་མེད་བདེན་པས་འདིར་ཁུག་ཅིགཿ ཁམས་ལྔ་རྫས་ཀྱི་རྟེན་ལ་དབྱེར་མེད་བསྟིམཿ འཕོ་མེད་རྡོ་རྗེའི་ཕྱག་རྒྱས་ཆིངས་སུ་བཅིངཿ འཆི་མེད་ཚེ་ཡི་དབང་མཆོག་ཐོབ་ནས་ཀྱངཿ མི་བསྐྱོད་ཡེ་ཤེས་འགྲུབ་པའི་བཀྲ་ཤིས་ཤོགཿ ཅེས་ཀྱང་བྲེལ་ཚུབ་གཅིག་གི་ངང་ནས། གཉོམ་གཏམ་ཞིག་ལ་སྐྲག་ནས། སྡིགས་འདོད་ཞིག་ཏུ་མཐོང་སྟེ། སྦ་གསང་མེད་པར་ཐོལ་བྱུང༌། སྙན་ངག་མེད་པའི་དྭོ་ཧ། ངོ་ཚ་མེད་པའི་ག་གཱས། ངལ་བ་མེད་པས་བྲིས་སོ། ། ༈ ན་མོ༔ ཕྱོགས་བཅུ་དུས་བཞིར་གཤེགས་བཞུགས་འབྱོན་འགྱུར་གྱི༔ མཆོག་གསུམ་རྩ་གསུམ་སྐུ་གསུམ་དཀྱིལ་འཁོར་དང་༔ ཁྱད་པར་བཀའ་དྲིན་གསུམ་ལྡན་བླ་མ་ལ༔ སྒོ་གསུམ་གུས་པ་ཆེན་པོས་ཕྱག་འཚལ་ལོ༔ ཀ་ཡ་ཝཀྐ་ཙིཏྟ་ན་མོ་ན་མ་ཧོ༔ ཅེས་དམིགས་གསལ་མ་ཡེངས་པའི་ངང་ནས་ཕྱག་ལན་གཅིག་འཚལ་ན་ཁྲག་ཁྲིག་ཏུ་འགྱུར་རོ༔ རིན་ལྷའི་ངོར་ག་གཱས་སོ། ། ༈ བརྒྱུད་འདེབས་བསྡུས་པ་ནི༔ ཨོཾ་ཨཱཿཧཱུྃ༔ མངའ་དབང་རྫོགས་པའི་སྟོན་པ་ཀུན་ཏུ་བཟངཿ སྒྱུ་འཕྲུལ་གངས་ཆེན་རིགས་ལྔ་སྟངས་དཔྱལ་བཅསཿ རིགས་ཆུང་སེམས་དཔའ་ཡབ་ཡུམ་ཐུབ་པ་དྲུགཿ སྒོ་སྐྱོངས་རིགས་བཞིར་བཅས་ལ་གསོལ་བ་འདེབསཿ ཆེ་མཆོག་རིགས་ལྔ་ཁྲོ་མོ་ཉི་ཤུ་དངཿ དབང་ཕྱུག་ཆེན་མོ་ཁྲོ་བཅུ་སྤོར་མ་བརྒྱདཿ གྲངས་མེད་དཔའ་བོ་དཔའ་མོའི་སྤྲིན་ཚོགས་དངཿ གྲགས་ཆེན་སྟོན་པར་བཅས་ལ༴ ཁྱབ་བདག་མ་ཧཱ་གུ་རུ་མཚན་མཆོག་བརྒྱདཿ རྩ་བའི་བླ་མ་བཀའ་གཏེར་དག་སྣང་གིཿ བརྒྱུད་ལྡན་རིག་འཛིན་མགོན་པོ་ཡོན་ཏན་མཛོདཿ དགོངས་གཏེར་དམ་ཆོས་བཅས་ལ༴ དེ་ལྟར་གསོལ་བ་བཏབ་བའི་མཐུ་བྱིན་གྱིསཿ ཉེ་བརྒྱུད་དགོངས་པའི་དོན་ལ་དབང་ཐོབ་སྟེཿ རང་གཞན་འཁོར་བའི་སེམས་ཅན་ཐམས་ཅད་ཀུནཿ གཞོན་ནུ་བུམ་སྐུར་མངོན་པར་སངས་རྒྱས་ཤོགཿ ཅེས་ཀྱང་ཐེག་མཆོག་ངོར། ག་གཱ་ནས་སོ། ། ཡེ་ཤེས་སྒྱུ་འཕྲུལ་རོལ་བ་ལསཿ ཞི་ཁྲོའི་རྩ་བའི་རྒྱུན་ཁྱེར་སྐུ་གསུམ་ལྷུན་གྲུབ།ཡེ་ཤེས་སྒྱུ་འཕྲུལ་རོལ་བ་ལསཿ ཞི་ཁྲོའི་རྩ་བའི་རྒྱུན་ཁྱེར་སྐུ་གསུམ་ལྷུན་གྲུབ་ཅེས་བྱ་བ་བཞུགས་སོཿ ན་མོ་གུ་རུ་པདྨ་ཀཱ་ར་ཡེཿ འདི་ལ་སྦྱོར་དངོས་རྗེས་གསུམ་ལསཿ དང་པོ་རྣམ་པ་བདུན་དུ་བཤད༔ ན་མོཿ རང་གནས་ཞི་ཁྲོའི་དཀྱིལ་འཁོར་ལཿ སྒོ་གསུམ་གུས་པས་སྐྱབས་སུ་མཆིཿ ༈ འགྲོ་ཀུན་དེ་ལས་མི་འདའ་བའིཿ ངོ་བོ་སད་ཕྱིར་བྱང་སེམས་བསྐྱེདཿ ༈ ཧཱུྃ༔ རང་བྱུང་ཡེ་ཤེས་རང་རྩལ་ལསཿ བགེགས་ཀྱི་མཚན་མ་ཀ་ནས་དགཿ ༈ ལྟ་བ་ཤེས་མཐོང་གདེངས་ལྡན་པསཿ ཕྱིན་ཆད་འཁྲུལ་མེད་མཚམས་ཀྱི་རྒྱལཿ ༈ ཧཱུྃ༔ རྡོ་རྗེ་དབྱིངས་ཀྱི་སྐུ་གསུང་ཐུགསཿ ཡེ་ཡིན་སད་ཕྱིར་བྱིན་ཆེན་ཕོབཿ ༈ ཡེ་ཤེས་རྒྱན་གྱི་སྣང་བ་ལསཿ འདོད་ཡོན་ལྷ་མོར་རྫོགས་སངས་རྒྱསཿ ཨ་ཝེ་ཤ་ཡ་ཕེཾ་ཕེཾཿ ཛྙཱ་ན་པཱུ་ཛ་ཨཱཿཧཱུྃ༔ གཉིས་པ་དངོས་གཞི་རྣམ་པ་བདུནཿ ཨཱཿ ངོ་བོ་ཀ་དག་དེ་བཞིན་ཉིདཿ རང་བཞིན་ཀུན་སྣང་སྙིང་རྗེ་ཆེཿ ཐུགས་རྗེ་ཤར་གྲོལ་ཡི་གེ་ཨོཾཿ རྩ་བ་སྐུ་རིགས་ཡེ་ཤེས་འོདཿ རྩ་བཞི་དག་པའི་གཞལ་ཡས་སུཿ ཐིག་ལེ་ཉི་མ་ཟླ་བའི་གདནཿ མདངས་ཀྱི་སྐུ་ནི་རྣམ་པ་ལྔཿ རྣམ་སྣང་རྡོར་སེམས་རིན་ཆེན་འབྱུངཿ མཐའ་ཡས་དོན་ཡོད་གྲུབ་པར་ཤརཿ ཐུགས་ཀར་རིགས་ཆུང་ཚོམ་བུ་བཞིཿ དབུས་སུ་ཀུན་བཟང་རང་རང་མདོགཿ གཙུག་ཏོར་ཆེ་མཆོག་ཡབ་ཡུམ་བཞུགསཿ གཡས་གཡོན་སེམས་དཔའ་སེམས་མ་འཁྲིལཿ མཐའ་བསྐོར་ཐུབ་པ་དྲུག་ཕྲག་དྲུགཿ ཕྱོགས་བཞིར་འཇོམས་པ་བཞི་རེར་ལྡནཿ དུང་ཁང་གཡས་འཁྱིལ་རྩ་ཁུག་དབུསཿ གདངས་ཀྱི་ཁྲོ་བོ་ཆེན་པོ་ལྔཿ ཡབ་ཡུམ་ཟུང་སྦྱོར་མཐའ་བསྐོར་དུཿ ཁྲོ་མོ་བརྒྱད་དང་ཕྲ་མེན་འཁོརཿ སྲས་མོ་བཞི་དང་ཕྱི་མོར་བཅསཿ མ་འདྲེས་ཡོངས་རྫོགས་ཆེན་པོར་གསལཿ གནས་གསུམ་ཡི་གེ་འབྲུ་གསུམ་ལསཿ འོད་འཕྲོས་ཡེ་ཤེས་སྤྱན་དྲངས་གྱུར༔ དེ་ནསཿ ཧཱུྃ༔ བཟང་ངན་ཕྱོགས་ལྷུང་ཞེན་པའི་ངོརཿ རང་སྣང་སྟོན་པར་མངོན་འདུ་གསོལཿ ཡེ་གདན་ལྷུན་གྲུབ་ཆེན་པོ་ལཿ གཉིས་མེད་བརྟན་པར་བཞུགས་སུ་གསོལཿ ཛྙཱ་ན་དེ་ཝ་མཎྜ་ལ་ཛ་ཛཿ ས་མ་ཡཱ་ཏིཥྛ་ལྷནཿ ཧོཿ དོན་ལ་རང་བཞིན་མཉམ་པ་ཉིདཿ གཉིས་མེད་ལྟ་བ་མཇལ་ཕྱག་འཚལཿ རྩལ་སྣང་རང་གྲོལ་མཆོད་པའི་སྤྲིནཿ འཁོར་གསུམ་དམིགས་པ་མེད་པར་འབུལཿ པཱུ་ཙ་ཁཱ་ཧིཿ ཧཱུྃཿ ཐིག་ལེ་ཉག་གཅིག་བདེ་ཀློང་འཁྱིལཿ མི་གཡོ་རང་རིག་བྱང་ཆུབ་སེམསཿ ཐབས་ཤེས་སྐུ་ལྔའི་སྒྱུ་འཕྲུལ་གརཿ ཡེ་ཤེས་ལྔ་ཡི་མདངས་ཤར་བཿ ཕྲིན་ལས་ཚད་མེད་ཞི་ཁྲོའི་ངངཿ ཡོངས་རྫོགས་ཆེན་པོར་ཕྱག་འཚལ་བསྟོདཿ ༈ ཧཱུྃ༔ སེམས་དཔའ་སུམ་བརྩེགས་སྙིང་པོ་ལསཿ འོད་འཕྲོས་དོན་གཉིས་ཡོངས་སུ་གྲུབཿ སླར་འདུས་རང་ཐིམ་སྣང་སྲིད་ལྷའིཿ རོལ་པ་ཆེན་པོར་བྱིན་རླབས་བསམཿ ས་མ་ཡཿ ཞི་ཁྲོ་སྤྱི་དྲིལ་སྔགས་བཟླས་སམཿ ཡང་ན་ཡེ་ཤེས་སུམ་བརྩེགས་ནིཿ ངང་ལས་མི་འདའ་ཐུགས་དམ་བསྐྱངཿ དུས་གསུམ་རྒྱལ་བའི་སྟོང་སྲོག་ཐོབཿ ས་མ་ཡཱཿ སླར་ཡང་གསུམ་པ་རྗེས་ཆོག་རྣམ་པ་དྲུགཿ ཧཱུྃ༔ ཉོན་མོངས་རྒྱུ་འབྲས་བྱ་བར་བཅསཿ བདག་ཉིད་ཆེན་པོར་མངོན་སངས་རྒྱསཿ ༈ དངོས་གྲུབ་རང་གནས་རང་དབང་ཐོབཿ ༈ གཞན་དོན་ཕྲིན་ལས་ཡོངས་གྲུབ་ཤོགཿ ༈ ཧཱུྃ༔ སྣང་སྟོང་ཟུང་འཇུག་ཕྱག་རྒྱ་ཆེཿ སྒྱུ་མ་མཉམ་ཉིད་ང་རྒྱལ་གསལཿ ༈ གཞི་ལམ་འབྲས་བུའི་ཡོན་ཏན་ཀུནཿ མཐར་ཕྱིན་ཆེན་པོའི་བཀྲ་ཤིས་ཤོགཿ ས་མ་ཡཱཿ དེ་ལྟར་རྒྱུན་ཁྱེར་ཟབ་མོ་འདིཿ དྷརྨཱ་མུ་ནེ་དམ་པ་ཡིཿ རྡོ་རྗེའི་གསུང་ལ་གདོང་བཟློག་ཏུཿ མ་ཕོད་ག་ག་ཨ་བྷྱེས་སྨྲསཿ རྣམ་རིག་སྣ་ཚོགས་གཟུགས་དོན་ཅནཿ ངག་གི་དབང་ཕྱུག་དེ་ཡིས་སོཿ དགེའོ། ། ཡེ་ཤེས་སྒྱུ་འཕྲུལ་དྲྭ་བ་ལསཿ ཞི་ཁྲོའི་ཚོགས་བསྡུས་ཉམས་ཆགས་རྟོག་སྒྲིབ་སྦྱང་བ་དག་བྱེད་རྒྱུན་བཟང་།༈ ཡེ་ཤེས་སྒྱུ་འཕྲུལ་དྲྭ་བ་ལསཿ ཞི་ཁྲོའི་ཚོགས་བསྡུས་ཉམས་ཆགས་རྟོག་སྒྲིབ་སྦྱང་བ་དག་བྱེད་རྒྱུན་བཟང་ཞེས་བྱ་བ་བཞུགས་སོཿ འདི་ལ་སྦྱོར་བའི་ཆོ་ག་དངཿ དངོས་གཞི་རྗེས་ཀྱི་རིམ་པ་གསུམཿ དང་པོ་གྲུབ་ནས་ལྷག་མ་གཉིསཿ ཐོག་མར་བྱིན་བརླབས་ལ་སོགས་པཿ ཧཱུྃ༔ བདག་དང་ལས་ལྷའི་ཐུགས་ཀ་ནསཿ འོད་འཕྲོས་ཚོགས་ཀྱི་ཉེས་སྐྱོན་སྦྱངསཿ རང་བཞིན་ཡེ་ཤེས་བདུད་རྩི་ལཿ རྣམ་པ་འདོད་ཡོན་ལྷ་མོར་བཞེངསཿ རྃ་ཡྃ་ཁྃཿ ཨོཾ་ཨཱཿཧཱུྃ༔ སླར་ཡང་འོད་འཕྲོས་རང་བཞིན་གྱིསཿ ཡེ་ཤེས་ལྷ་ཚོགས་སྤྱན་དྲངས་ནསཿ མདུན་མཁར་དགྱེས་བཞིན་བཞུགས་པ་ལཿ བདེ་ཆེན་ཚོགས་ཀྱི་མཆོད་པ་འབུལཿ ཉམས་ཆགས་རྟོག་སྒྲིབ་ཀུན་དག་ནསཿ སྐུ་གསུང་ཐུགས་ཀྱི་དགྱེས་པ་སྐོངསཿ མཆོག་ཐུན་དངོས་གྲུབ་མ་ལུས་པཿ མི་སྒྲིབ་ཚེ་འདིར་བསྩལ་ཏུ་གསོལཿ ཨོཾ་གྷ་ཎ་ཙཀྲ་པཱུ་ཛ་ཁཱ་ཧིཿ ས་མ་ཡ་ཤུདྡྷེ་སིདྡྷི་ཕ་ལ་ཧོཿ ཧཱུྃ༔ བདག་གཉིས་བདག་མེད་དབྱིངས་སུ་བསྒྲལཿ ཆོས་དབྱིངས་མཁའ་ཀློང་ཡངས་བར་བསྟབསཿ ཕྱི་ནང་གསང་བའི་སྲུང་མར་བཅསཿ བདེ་སྟོང་རོ་ཡི་ཚིམ་གྱུར་ཅིགཿ ཧཱུྃ༔ རྣལ་འབྱོར་ཞལ་དུ་མེ་ལྷའི་ལྕེཿ འབར་འཛག་འཇུ་འདུལ་ལག་པ་ཡིཿ དགང་བླུགས་ནང་བཞུགས་ཞི་ཁྲོའི་སྐུཿ ཚིམ་པ་མཆོག་གི་ལོངས་སྤྱོད་དོཿ ཨ་ལ་ལ་ཧོཿ ཨ་ཀ་རོ་ཡིས་བརླབས་ལཿ ཧོཿ ཡར་མར་གནས་རིས་ཐམས་ཅད་མཆོདཿ དམ་ཚིག་བཀའ་ཡི་བསྟན་པ་སྐྱོངཿ ཟག་མེད་ཚོགས་མཆོད་དམ་པ་ཡིཿ དགེ་བས་འགྲོ་ཀུན་སངས་རྒྱས་ཤོགཿ ཀྱཻཿ ཞི་ཁྲོ་རིགས་བརྒྱ་དབྱིངས་ནས་བཞེངསཿ དུས་ལས་མི་འདའ་ཕྲིན་ལས་མཛོདཿ འཁོར་བ་གཞི་རུ་གཞིག་པ་ཡིཿ ཐུགས་དམ་གཉན་པོ་མ་གཡེལ་ཞིགཿ ཀ་དག་ཆེན་པོའི་དངོས་གྲུབ་སྩོལཿ དེ་ནསཿ ཧཱུྃ༔ ཆོས་སྐྱོང་སྲུང་མ་ཆད་ལ་བཙནཿ དཔལ་མགོན་དྲེགས་ཅན་བསྟན་པར་བཅསཿ ཤ་ཁྲག་བདུད་རྩིའི་གཏོར་མ་བཞེསཿ བཅོལ་བའི་ཕྲིན་ལས་འགྲུབ་པར་མཛོདཿ ཧཱུྃ༔ བདག་འཛིན་རྣམ་རྟོག་ལྷ་འདྲེ་ཀུནཿ དབྱིངས་ཡེ་ཟུང་འཇུག་ཧོམ་དུ་བྲུབཿ བདག་མེད་བརྟུལ་ཞུགས་རོལ་པའི་བྲོཿ ལྡོག་མེད་རྡོ་རྗེའི་རྒྱས་གདབ་པོཿ སྟམ་བྷ་ཡ་ནནཿ དེ་ནས་གསང་གསུམ་རྡོ་རྗེའི་དངོས་གྲུབ་བླང་བ་སོགས་གཞུང་ལྟར་རོཿ ཅེས་ཀྱང་རྡོ་རྗེའི་མཆེད་ཀྱི་དྭངས་མ་ཐེག་མཆོག་གི་བཀའ་བཞིན་ག་གཱ་ནས་སོ། །བཀྲ་ཤིས་ཤོག ། དྲན་རྗོགས་དཀྱིལ་འཁོར་ཆེན་པོ།༈ ཡེ་ཤེས་སྒྱུ་འཕྲུལ་དྲྭ་བ་ཡིསཿ དྲན་རྗོགས་དཀྱིལ་འཁོར་ཆེན་པོ་བཞུགསཿ ཨོཾ་ཨཱཿཧཱུྃཿ སྟོང་པ་ཡུམ་ཆེན་ལྔ་ཡི་བདེ་ཀློང་དུཿ སྣང་བ་ཀུན་བཟང་རྒྱལ་བའི་དཀྱིལ་འཁོར་ལྷརཿ རྟོག་ཚོགས་གཞིར་བཞེངས་རང་གྲོལ་རང་ཤར་གྱིཿ ངོ་བོ་མངོན་གྱུར་ངང་ནས་གསང་སྔགས་བཟླཿ རྩ་སྔགས་བཟླའོཿ པདྨ་མ་རིའི་ངོར་ཤཱི་བས་སོ། མདྒ་ལམཿ ༈ ཡེ་ཤེས་སྒྱུ་འཕྲུལ་དྲྭ་བ་ལསཿ ཞི་ཁྲོའི་སྔགས་བྱང་བསྡུས་པ་བཞུགས་སོཿ ཨོྃ་ཨཱཿཧཱུྃཿ ཨཱོཾ་ཧཱུྃཿསྭཱཿཨཱྂཿཧཱྂཿ མཱུྃཿལྃཿམྂཿ པྃཿཏཱྃཿ ཀྵི་མེ་ཧཱུྃ་ཏྲཱྃ་ཧྲཱི་མུྃ་ཐླྷཾ་ཛྷིཾཿ ཧཱུྃ་ཧཱུྃ་ཏྲྃ་ཛ་ཧྲཱི་བྃ་ཧོ་ཨཱཿ ཀྲེཾ་པྲེཾ་ཏྲུྂ་ཀྵྃ་སྲུྃ་ཡེཿ ཧཱུྃ་ཧཱུྃ་ཧཱུྃཿ ཛཿཧཱུྃ་བྃ་ཧོཿ ཧཱུྃ་ཧ་ཧེ་ཕཊ་བྷྱོ་ཧཱུྃ་ཧཱུྃ་ཧཱུྃ་སརྦ་ཀཱ་ཡ་ཝཱཀྐ་ཙིཏྟ་སརྦ་སིདྡྷི་ཕ་ལ་ཧཱུྃ་སྭཱ་ཧཱཿ ཞེས་བརྗོད་བདག་མདུན་བུམ་གསུམ་གྱིཿ གྲངས་དང་མཉམ་པའི་སྲོག་བཀོད་པསཿ ཐུགས་རྒྱུད་བསྐུལ་ཞིང་བྱིན་རླབས་བསྡུཿ རབ་འབྱམས་ཕྲིན་ལས་གང་ལའངཿ དོན་སྟོང་སེམས་ཀྱི་ལས་ལ་སྦྱོརཿ ཞེས་ཀྱང་ག་ག་ཨ་བྷྱེས་སོ།། ༈ ཧཱུྃ༔ བཅོམ་ལྡན་རྒྱལ་བ་ཞི་ཁྲོ་ལཿ ལྷ་རྫས་མཆོག་གི་ཕྱི་མཆོད་འབུལཿ རང་བྱུང་ལུས་ཀྱི་ནང་མཆོད་འབུལཿ རྣམ་དག་ལྷ་མོའི་གསང་མཆོད་འབུལཿ བདུད་རྩི་སྨན་གྱི་མཆོད་པ་འབུལཿ རཀྟ་དམར་གྱི་མཆོད་པ་འབུལཿ བརྗིད་ལྡན་དམ་རྫས་གཏོར་མཆོད་འབུལཿ སྣང་གསལ་ཉི་ཟླའི་སྒྲོན་མེ་འབུལཿ ཕྱག་རྒྱ་གར་གྱིས་བསྐོར་མཆོད་འབུལཿ སྦྱོར་ཡུམ་བདེ་རྒྱུའི་འདོད་ཡོན་འབུལཿ དགྲ་བགེགས་བསྒྲལ་བའི་མཆོད་པ་འབུལཿ བདེ་སྟོང་ཡེ་ཤེས་མཆོད་པ་འབུལཿ བསྟོད་པ་གླུ་ཡི་མཆོད་པ་འབུལཿ ལྷ་ཚོགས་ཐུགས་དམ་བསྐང་གྱུར་ཅིགཿ བདག་ཅག་ཚོགས་རྫོགས་སྒྲིབ་པ་དགཿ ཉམས་ཆགས་བྱང་ཞིང་རྟོག་སྒྲིབ་དགཿ དབང་དང་དངོས་གྲུབ་བསྩལ་ཏུ་གསོལཿ ཞེས་པ་འདི་ཡང་ག་གཱས་སོ། །༈ ཧཱུྃ༔ གཞན་དོན་ཐུགས་རྗེས་འགྲོ་བ་འཛིནཿ ཞི་བའི་ལྷ་ཚོགས་ཐུགས་དམ་བསྐངཿ རང་དོན་རྟོགས་པའི་བདུད་བཞི་བཅོམཿ ཁྲོ་བོ་རོལ་པའི་ཐུགས་དམ་བསྐངཿ ཉམས་ཆགས་རྟོག་སྒྲིབ་ཀུན་དག་ནསཿ དབང་དང་དངོས་གྲུབ་སྩོལ་བ་དངཿ འཁོར་བའི་རྒྱ་མཚོ་དོང་སྤྲུགས་ནསཿ སྐུ་གསུམ་ཀློང་དུ་བྱང་ཆུབ་ཤོགཿ དགེའོ། ། ལོངས་སྤྱོད་ག་ཎ་ཙཀྲ་བསྡུས་པ་ཚོགས་གཉིས་མྱུར་རྫོགས།༈ ཡེ་ཤེས་སྒྱུ་འཕྲུལ་དྲྭ་བ་ལས༔ ལོངས་སྤྱོད་ག་ཎ་ཙཀྲ་བསྡུས་པ་ཚོགས་གཉིས་མྱུར་རྫོགས་བཞུགས༔ ན་མོ་གུ་རུ་བྷྱ༔ བཟའ་བཏུང་ཚོགས་འཁོར་རྒྱུན་བརྟེན་པས༔ ཐབས་མཆོག་བདེ་མྱུར་ཟབ་མོ་ནི༔ ཨོཾ་ཨཿཧཱུྃ༔ རཾ་ཡཾ་ཁཾ༔ ཡེ་ཤེས་རྒྱན་གྱི་འཁོར་ལོ་ལ༔ དག་དང་མ་དག་མཚན་མ་མེད༔ རང་ཉིད་ཡེ་ནས་དཀྱིལ་འཁོར་ཏེ༔ བྱ་བྱེད་ལས་ཀྱི་དགང་བླུགས་ཀྱི༔ ཨ་ཧཾ་ལྷ་ཚོགས་ཞལ་གྱི་མཆོད༔ གཙང་རྨེ་གཉིས་འཛིན་རྟོག་པ་བསྒྲལ༔ ཚོགས་ཀྱི་དཀྱིལ་འཁོར་དབྱིངས་སུ་བསྟིམ༔ མཚན་འཛིན་རྟོག་སྒྲིབ་མཐོལ་ལོ་བཤགས༔ རང་བཞིན་དཀྱིལ་འཁོར་དགྱེས་པ་བསྐངས༔ བདེ་སྟོང་ཡེ་ཤེས་རོ་ལ་རོལ༔ འཁོར་འདབ་ཉེར་བཞི་གནས་ཡུལ་གྱི༔ དཔའ་བོ་མཁའ་འགྲོ་ལྷག་སྐྱོང་ལ༔ ཡེ་ཤེས་བདུད་རྩིའི་ཕམ་ཕབ་འགྱེད༔ རྩལ་སྣང་དབང་བསྡུད་ཕྲིན་ལས་མཛོད༔ ཅེས་ཀྱང་ག་གཱསཱ་སོ། །སྔགས་ཚིག་སྤེལ་བ་འདི་ལྟ་སྟེ༔ བིདྱཱ་དྷ་ར་མནྚ་ལ་ག་ཎ་ཙཀྲ་ཁཱ་ཧི༔ ཐབས་ལ་མཁས་པའི་རྣལ་འབྱོར་ལ༔ བསོད་ནམས་མི་འགྱུར་གང་ཡང་མེད༔ འདི་ཡང་རྡོ་རྗེ་ཐེག་པ་ཡི༔ ཐབས་ཆེན་བཅོ་ལྔའི་ཁྱད་པར་ཡིན༔ ས་མ་ཡཱ༔ གལ་ཏེ་ཚོགས་ཀྱི་འཁོར་ལོ་ནི༔ ཡེ་ཤེས་དཀྱིལ་འཁོར་མགྲོན་ཐབས་དང་༔ ཡང་ན་གཟུགས་བརྙན་ཏིང་འཛིན་དུ༔ རང་བཞིན་དཀྱིལ་འཁོར་གང་ཡང་རུང་༔ འདོན་པ་བསྒྱུར་བ་འདི་ལྟ་ལྟེ༔ རང་བཞིན་དཀྱིལ་འཁོར་གྱི་གོ་སར༔ དཀྱིལ་འཁོར་རྣམ་བཞིའི་དགྱེས་པ་བསྐངས༔ བྱས་པས་ཉམས་ལེན་རབ་ཏུ་བདེ༔ འདི་ཡང་པདྨ་མ་ཏི་ལ༔ ག་ག་ཨ་བྷྱེའི་རང་གྲོལ་བརྡའོ། ས་མ་ཡཱ། རྒྱ་རྒྱ་རྒྱ། སརྦ་མངྒ་ལཾ། ། བཟའ་བཏུང་ལམ་ཁྱེར།༈ བཟའ་བཏུང་ལམ་ཁྱེར་བཞུགས་སོཿ ཨོཾ་ཨཱཿཧཱུྃཿ རང་གི་ལུས་ངག་ཡིད་གསུམ་ནིཿ གདོད་ནས་མ་བཅོས་མངོན་སངས་རྒྱསཿ འདོད་པའི་ཡོན་ཏན་ཐམས་ཅད་ཀུནཿ ཕྱི་ནང་སྒེག་མོར་རྣམ་པར་དགཿ ཤ་ལྔ་བདུད་རྩི་རྣམ་པ་ལྔཿ རིགས་ལྔ་དམ་ཚིག་ལྔ་ཡི་དངོསཿ ཚིམ་པ་དྲུག་ལྡན་རོལ་བ་རུཿ དགྱེས་མཉམ་བྱང་ཆུབ་སེམས་ཀྱིས་མཆོདཿ དང་དུ་བླང་བའི་དམ་ཚིག་མཐུསཿ ཉམས་ཆགས་སྡིག་སྒྲིབ་ཀུན་བྱང་ནསཿ ཚོགས་གཉིས་ཡོངས་སུ་རྫོགས་གྱུར་ཅིགཿ མཆོག་ཐུན་དངོས་གྲུབ་ཡོངས་ཐོབ་ཅིངཿ མཐར་ཐུག་འབྲས་བུ་མངོན་གྱུར་ཤོགཿ ཅེས་སམ་ཡང་བསྡུ་ནཿ ཨེ་མ་ཧོཿ འཁོར་འདས་ལུས་དང་སེམས་ལ་རྫོགསཿ འདོད་ཡོན་ལྔ་ལྡན་སྦྱིན་སྲེག་གིསཿ ཚོགས་རྫོགས་སྒྲིབ་དག་སངས་རྒྱས་ཤོགཿ བཛྲ་མ་ཧཱ་སིངྔྷི་ཧོཿ ཞེས་ཀྱང་ཤྲཱི་བས་སོ། ། གཤིན་རྗེ་གཤེད་ཀྱི་ལས་བྱང་བསྡུས་པ་དུས་དགྲའི་དཔུང་འཇོམས།ཡེ་ཤེས་སྒྱུ་འཕྲུལ་དྲྭ་བ་ལསཿ གཤིན་རྗེ་གཤེད་ཀྱི་ལས་བྱང་བསྡུས་པ་དུས་དགྲའི་དཔུང་འཇོམས་བཞུགས་སོཿ ན་མོ་དཀོན་མཆོག་གསུམ་ལ་སྐྱབས་སུ་མཆིཿ བྱང་ཆུབ་སེམས་སྐྱེད་བསླབ་བྱ་བསྒྲུབཿ ཧཱུྃཿ འཁོར་འདས་སྟོང་ཉིད་ཆེན་པོར་ཞིགཿ སྤྲོས་བྲལ་དོན་གྱི་ཧེ་རུ་ཀའིཿ སྙིང་རྗེ་རྔམ་པའི་བརྟུལ་ཞུགས་གཟུགསཿ དུར་ཁྲོད་འབར་བའི་ཕོ་བྲང་དབུསཿ ཆུ་གླང་གཤིན་རྗེ་བརྗིས་པའི་སྟེངཿ བདག་ཉིད་སྐད་ཅིག་དྲན་རྫོགས་སུཿ རྡོ་རྗེ་ཤུགས་ཅན་འཇིགས་བྱེད་པཿ མཐིང་ནག་དུག་ཆེན་ཧ་ལའི་མདོགཿ ཞལ་གསུམ་ཕྱག་དྲུག་ཞབས་བཞི་བགྲདཿ གཡས་དཀར་ཞི་ཞིང་གཡོན་དམར་རྔམཿ དབུས་མཐིང་ཤིན་ཏུ་ཁྲོས་པའི་ཉམསཿ བེ་ཅོན་རལ་གྲི་དགྲ་སྟྭ་གཡསཿ སྡིགས་མཛུབ་མདུང་རིང་ཐོད་ཁྲག་གཡོནཿ སྐུ་ལ་དུར་ཁྲོད་ཆས་ཀྱིས་བརྒྱནཿ བཱེ་ཏ་ཟ་བྱེད་ནག་མོ་ཡུམཿ ཕྱག་གཡས་དགྲ་སྟྭ་གཡོན་བྷན་ཁྲགཿ ཡབ་ཀྱི་ཞལ་དུ་སྟོབས་པར་བྱེདཿ སྒྲོལ་ཡུམ་ཨེ་ཀ་ཛ་ཊི་གཡོནཿ སྐུ་གསུང་ཐུགས་ཡོན་ཕྲིན་ལས་ཀྱིཿ སྲས་མཆོག་ཡ་མ་ར་ཛ་དངཿ མྱོས་བྱེད་འབར་བ་མ་རུ་ཙེཿ རལ་པ་ཚལ་དགུ་གཤེད་བཅུ་གཉིསཿ སྒོ་མ་བཞི་དང་ཡང་སྤྲུལ་འཁོརཿ ཀིང་བཞི་གསོད་པའི་ཕོ་ཉ་བཞིཿ བདུད་ཤན་མོན་པ་རྩིས་འདེབས་སོགསཿ བདུན་བརྒྱ་ཉི་ཤུའི་འཁོར་བཅས་གསལཿ གཙོ་ཆེན་འབར་བ་ཆེན་པོ་ཡིཿ གནས་གསུམ་རྡོ་རྗེ་སྙིང་པོ་ལསཿ འོད་ཟེར་དཀར་དམར་མཐིང་གསུམ་འཕྲོསཿ འཁོར་འདས་རང་བཞིན་ཨེ་ཀློང་ནསཿ སྤྱན་འདྲེན་གནས་འདིར་གཤེགས་སུ་གསོལཿ གདན་གསུམ་དཀྱིལ་འཁོར་ཆེན་པོར་བཞུགསཿ སྒོ་གསུམ་གུས་པས་ཕྱག་འཚལ་ལོཿ ཕྱི་ནང་མཆོད་པ་རྒྱ་མཚོའི་མཆོདཿ མཐོང་བས་ངོ་མཚར་འཇིགས་པའི་གཟུགསཿ ཐོས་པས་རྣམ་གྲོལ་ཚངས་དབྱངས་དངཿ ཐུགས་རྗེ་ཐབས་ཚུལ་མཁྱེན་པའི་དབྱིངསཿ ཡབ་ཡུམ་འཁོར་དང་བཅས་ལ་བསྟོདཿ གཤེད་པོ་ཁྲོ་བོའི་ཐུགས་ཀ་རུཿ ཡེ་ཤེས་སེམས་དཔའ་ཞི་འཛུམ་མཛེསཿ ཐུགས་ཀར་ཉི་དཀྱིལ་འཁོར་ལོའི་དབུསཿ ཐུགས་སྲོག་ཧཱུྃཿ མཐར་སྔགས་ཀྱིས་བསྐོརཿ ཨཱོཾ་ཀ་ལ་རཱུ་པ་ཡ་ཧཱུྃ་ཕཊཿ ཡ་མནྟ་ཀ་ཨ་ཧཱུྃ་ཕཊཿ ཧྲིཥྚྲི་ཝི་ཀྲི་ཏ་ན་ན་ཧཱུྃ་ཕཊཿ ཡང་ན་སྤྱི་དྲིལ་སྔགས་ཀྱིས་ཆོགཿ ས་མ་ཡཱཿ ཡང་ཅིག་ཚོགས་མཆོད་བསྡུས་པ་ནིཿ རཾ་ཡཾ་ཁཾཿ ཨོཾ་ཨཱཿཧཱུྃཿ སྣང་སྲིད་གཞིར་བཞེངས་ཀུན་བཟང་ཚོགས་མཆོད་ལཿ སྐུ་གསུམ་རྩ་གསུམ་རིག་འཛིན་ལྷ་ཚོགས་དངཿ འཇམ་དཔལ་ཞི་དྲག་དཀྱིལ་འཁོར་སྤྱན་འདྲེན་གཤེགསཿ ཟག་མེད་བདེ་ཆེན་དམ་རྫས་མཉེས་མཆོད་འབུལཿ སྡིག་ལྟུང་དམ་ཚིག་ཉམས་ཆགས་མཐོལ་ལོ་བཤགསཿ འཁོར་འདས་དཔལ་ཡོན་རྒྱ་མཚོའི་ཐུགས་དམ་བསྐངཿ དགྲ་བགེགས་གནོད་བྱེད་བར་ཆད་དབྱིངས་སུ་སྒྲོལཿ རྣམ་སྨིན་ཕུང་ཁམས་ཡེ་ཤེས་ཀློང་དུ་སྟོབསཿ ལྷག་སྐྱོང་ཕོ་མོའི་ལྷག་རོལ་ཕྲིན་ལས་སྒྲུབསཿ ཚངས་པ་མཆོག་ཐུན་དངོས་གྲུབ་བསྩལ་ཏུ་གསོལཿ ཨོཾ་བཛྲ་གྷཱ་ཎ་ཙཀྲ་ས་མ་ཡཱ་ཁཱ་ཧིཿ དཔལ་མགོན་དྲེགས་ཆེན་བསྟན་མ་བཅུ་གཉིས་ཀྱིཿ ཆད་དོན་བཀའ་ཡི་གཏོར་མའི་བཤལ་ཆུ་བཞེསཿ བཅོལ་པའི་ཕྲིན་ལས་སྒྲུབ་མཛོད་ས་མ་ཡཱཿ ལོག་འདྲེན་དམ་སྲི་རྒབ་འདྲེ་བསྒྲལ་འདྲེན་ནོནཿ བིག་ནན་མ་ར་ཡ་ནན་ནནཿ ཧཱུྃ༔ དངོས་གྲུབ་ཀུན་བདག་བླ་མ་གཤིན་རྗེ་གཤེདཿ སྐུ་གསུང་ཐུགས་ཀྱི་སིདྡྷི་བསྩལ་ཏུ་གསོལཿ བསྲུང་ཉམས་བཤགས་པའི་འཁོར་གསུམ་ཉོན་ཤེས་སྒྲིབཿ ཡང་དག་དོན་མཐོང་སྐད་ཅིག་རྫོགས་སངས་རྒྱསཿ ཡིག་བརྒྱ་མཆོད་བསྟོད་མཐརཿ འདིའི་མཚོན་དགེ་ཚོགས་མ་གྱུར་སེམས་ཅན་ཀུནཿ འཇམ་དཔལ་གཞོན་ནུའི་གོ་འཕང་ཐོབ་ཕྱིར་བསྔོཿ སྤྲོས་བྲལ་རང་མདངས་ཕྱག་རྒྱ་ཆེན་པོ་ནིཿ གདོད་ནས་བསྐྱེད་རྫོགས་དབྱེར་མེད་ངང་དུ་འབྱམསཿ དྷཱིཿ རྒྱལ་ཀུན་ཡེ་ཤེས་སེམས་དཔའ་འཇམ་དཔལ་དབྱངསཿ མ་རིག་རྨོངས་པའི་མུན་སེལ་ཧེ་རུ་ཀཿ འཆི་བདག་བདུད་འཇོམས་མགོན་པོ་ཚེ་ཡི་བདགཿ བཀྲ་ཤིས་དེས་ཀྱང་གོ་འཕང་མཆོག་སྦྱིན་མཛོདཿ ཅེས་ཀྱང་ག་གཱས་སོ། ། ཧྲཱིཿ རང་ཉིད་འཕགས་པ་སྤྱན་རས་གཟིགས་དབང་སྐུཿ དཀར་གསལ་ཕྱག་བཞི་ཐལ་སྦྱར་པད་ཕྲེང་འཛིནཿ སྐྱིལ་ཀྲུང་གིས་བཞུགས་ཐུགས་ཀར་ཧྲཱིཿ ཡིག་མཐརཿ རྩ་སྔགས་འོད་ཀྱིས་དོན་གཉིས་ལྷུན་གྲུབ་བསམཿ ཨོཾ་མ་ཎི་པདྨེ་ཧཱུྃ་ཧྲཱིཿ ག་གཱས་སྣ་ཆེན་ལ་སྤྲེང་བའོ། ། ༈ ཧཱུྃ༔ཧཱུྃ༔ཧཱུྃ༔ ཁམས་གསུམ་ས་དགུ་དག་པའི་ཞིང་ཁམས་སུཿ ཚོགས་དགུ་གནས་དག་ཡེ་གྲོལ་ཧེ་རུ་ཀཿ དཔལ་དགུ་རྔམ་པའི་དཀྱིལ་འཁོར་ལྷུན་རྫོགས་ཤརཿ ཡེ་ཤེས་ཀློང་དགུའི་གད་རྒྱང་མི་ཤིགས་གཤེཿ ཨོཾ་བཛྲ་ཧེ་རུ་ཀ་ཀྲོ་ཏི་ཤྭ་རི་སརྦ་ཙིཏྟ་གརྦྷ་ཧཱུྃ༔ ཅེས་ཀྱང་ལུས་ཆེན་པོའི་བསྐུལ་བཞིན་ག་གཱས་སོ། ། ༈ ཧཱུྃ་ཨཱཿཨོཾཿ སྣང་བ་ལྷ་དང་ཞིང་ཁམས་ལཿ སྒྲ་གྲགས་ཐམས་ཅད་སྔགས་ཀྱི་ངངཿ འགྱུ་དྲན་ཆོས་ཉིད་འཁོར་ལོ་རུཿ ཡེ་རྫོགས་ཆེན་པོའི་གདེང་གིས་བཟླཿ ཞེས་ལྷ་གང་ཡིན་གྱི་བསྙེན་པ་བཟླའོཿ ཅེས་ཀྱང་ལུང་རྟོགས་ཀུན་འཕེལ་ཟུང་གི་ངོར་ག་གཱས་སོ། ། ༈ ཧཱུྃ༔ རང་ཉིད་སྐད་ཅིག་དྲན་རྫོགས་སུཿ ཆེ་མཆོག་རྡོ་རྗེ་ཁྲོ་བོ་ལོདཿ དམར་ནག་ཞལ་གཅིག་ཕྱག་གཉིས་པཿ ཕྱག་གཡས་གསེར་གྱི་རྡོ་རྗེ་ཡིཿ རྩེ་ལ་སྤྲུལ་བའི་ཁྱུང་ཁྲ་འཕྲོཿ སྟེང་གདོན་གཟའ་དང་རྒྱུ་སྐར་སྡེཿ འོག་གདོན་ཀླུ་དང་ས་བདག་ཚོགསཿ མ་ལུས་ཐལ་བའི་རྡུལ་དུ་རློགཿ ཕྱག་གཡོན་གནམ་ལྕགས་ཕུར་བ་གཟིརཿ ལྕགས་སྡིག་ནག་པོའི་ཟི་ར་འཕྲོཿ རྒྱལ་འགོང་སྡེ་བརྒྱད་སྤྱི་ནས་ཟཿ ཞབས་གཉིས་གྱད་ཀྱི་འདོར་སྟབས་སུཿ སྟག་མོ་གྲུས་མའི་སྟེང་ན་འགྱིངསཿ དུར་ཁྲོད་དཔལ་གྱི་ཆས་རྣམས་རྫོགསཿ ཞལ་ནས་དྲག་པོའི་གད་རྒྱངས་སྒྲོགསཿ འབར་བའི་གར་གྱི་བརྗིད་པ་ཡིཿ སྐུ་ལས་མེ་དཔུང་མཚོན་ཐུན་དངཿ ཁྲོ་ཆུང་ཕོ་ཉའི་འཕྲོ་འདུ་ཡིཿ གནོད་བྱེད་འབྱུང་པོ་ཐམས་ཅད་ཀུནཿ ཚར་གཅོད་རྡུལ་དུ་བརླག་པ་དངཿ ཤ་ཁྲག་ཧབ་ཧབ་ཟོས་པར་བསམཿ དམ་ཚིག་ཏིང་འཛིན་དཀྱིལ་འཁོར་ལཿ དབྱིངས་བཞུགས་རྒྱལ་བ་ཞི་ཁྲོའི་ཚོགསཿ སྤྱན་དྲངས་གཉིས་སུ་མེད་པར་བསྟིམཿ དབྱེར་མེད་ལྟ་བ་མཇལ་ཕྱག་འཚལཿ ཁམས་གསུམ་དུག་གསུམ་ཤ་ཁྲག་རུསཿ དབྱིངས་གྲོལ་ཆེན་པོའི་མཆོད་པ་འབུལཿ མཚན་མ་རྣམ་དག་ཤུགས་ཁྲོའི་ངངཿ སྒོ་གསུམ་གུས་པས་ཕྱག་འཚལ་བསྟོདཿ ཨོཾ་ཨཱཿཧཱུྃ༔ བཛྲ་གུ་རུ་ཁྲོ་བོ་ལོད་ནིརྨ་ཀ་ཡ་ཁྲོཾ་ཏི་པ་ཙ་སརྦ་བིགྣན་ན་ག་ར་ཛ་མ་ར་ཡ་ཕཊཿ ཅེས་ཅི་མང་བཟླའོཿ མཐར་ནི་མཆོད་བསྟོད་བསྡུ་རིམ་ལཿ ཧཱུྃ༔ སྣང་སྲིད་གཞིར་བཞེངས་མཆོད་པ་འབུལཿ ཡོན་ཏན་མངོན་ཤེས་ལྟ་བས་བསྟོངསཿ དག་པའི་རྟེན་འབྲེལ་སྒྱུ་འཕྲུལ་ཀུནཿ མི་དམིགས་ཆོས་ཀྱི་དབྱིངས་སུ་ཨཱཿ ཅེས་བརྗོད་དེ་ཡི་ནད་ལས་གྲོལཿ རིག་འཛིན་མཆོག་གི་ངོས་སྐལ་དུ། ཁྲག་མཐུང་ག་ག་ཨ་བྷྱེས་སོ། ། དཔལ་ཆེན་རྡོ་རྗེ་གཞོན་ནུ་ལུས་དཀྱིལ་ནོར་བུ་མིག་གཅིག༈ ཡེ་ཤེས་སྒྱུ་འཕྲུལ་དྲྭ་བ་ལས༔ དཔལ་ཆེན་རྡོ་རྗེ་གཞོན་ནུ་ལུས་དཀྱིལ་ནོར་བུ་མིག་གཅིག་བཞུགས་སོ༔ ཧཱུྃ༔ སྣང་སྲིད་ཐམས་ཅད་རྡོ་རྗེ་ཕུར་པའི་དལ༔ ཡེ་རྫོགས་ལྷུན་གྱིས་གྲུབ་པའི་རང་བཞིན་ཏེ༔ མཚན་ཉིད་ཡོངས་རྫོགས་དྲག་པོའི་གཞལ་ཡས་ཁང་༔ དེ་དབུས་བྱོལ་སོང་བརྒྱད་ཀྱིས་བཏེགས་པའི་ཁྲིར༔ པད་ཟླ་ཉི་སྟེང་བདུད་བཞི་བསྣོལ་བའི་སྟེང་༔ རང་ཉིད་དཔལ་ཆེན་རྡོ་རྗེ་གཞོན་ནུ་ནི༔ སྐུ་མདོག་མཐིང་ནག་ཞལ་གསུམ་ཕྱག་དྲུག་པ༔ གཡས་དཀར་དགོད་ཅིང་གཡོན་དམར་གཤེ་བའི་ཉམས༔ རྩ་ཞལ་མི་སྡུག་རབ་ཏུ་ཁྲོས་པའི་གདོང་༔ ཕྱག་གཡས་རྡོ་རྗེ་རྩེ་དགུ་རྩེ་ལྔ་དང་༔ གཡོན་གཉིས་མེ་དཔུང་དང་ནི་ཁ་ཊྭཱྃ་ཀ༔ ཐ་མ་གཉིས་ཀྱི་རི་རབ་ཕུར་བུ་འདྲིལ༔ དབུ་སྐྲ་དམར་སེར་གྱེན་བརྫེས་མེ་དཔུང་འབར༔ ཚར་གསུམ་ཐོད་རྒྱན་སྦྲུལ་རིགས་ལྔའི་ཆུན་པོ༔ ཞིང་གླང་སྟག་གི་ལྤགས་པའི་ནབ་བཟའ་གསོལ༔ ཐལ་ཆེན་རཀྟ་ཞག་གི་སོར་རིས་གདབ༔ རྡོ་རྗེ་རིན་ཆེན་གཤོག་པ་མེ་དཔུང་དང་༔ གསལ་བའི་རྒྱན་གཉིས་མཐིང་དམར་ཅོད་པཎ་འཕུར༔ སྤྱི་གཙུག་རྡོ་རྗེ་བསེ་ཁྲབ་རྒྱ་གྲམ་ལྕགས༔ ཟ་བྱེད་རྔམ་པའི་མཆེ་བ་མན་དུ་གཙིགས༔ སྦྱོར་བའི་ཡུམ་མཆོག་འཁོར་ལོ་རྒྱས་འདེབས་མ༔ མཐིང་སྐྱ་ཨུཏྤལ་དུང་ཁྲག་སྟོབས་ཅིང་འཁྲིལ༔ གཟིག་ཤམ་གཡང་གཞི་མནབ་ཞིང་རུས་རྒྱན་མཛེས༔ གཡོན་དུ་སྒྲོལ་ཡུམ་ཨེ་ཀ་ཙ་ཏི་མ༔ རལ་གཅིག་སྤྱན་གཅིག་ཚེམ་གཅིག་ནུ་གཅིག་འཕྱང་༔ ཕྱག་གཡས་དགྲ་སྙིང་གཡོན་པས་གཡུ་སྤྱང་འགྱེད༔ གྲུ་མོར་ཁ་ཊྭཱྃ་ཞབས་གཉིས་གར་སྟབས་འགྱིང་༔ གནས་ལྔར་སྐུ་གསུང་ཐུགས་ཡོན་སྤྲུལ་པའི་སྲས༔ ཀཱི་ལ་རིགས་ལྔ་རྐང་ལག་ཚིགས་ཆེན་བརྒྱད༔ སྤྱི་བོ་རྐང་མཐིལ་ཁྲོ་བཅུ་ཟ་གསོད་དང་༔ ཚིགས་ཕྲན་དྲུག་ཅུར་ཕུར་བསྲུང་བཅུ་གཉིས་དང་༔ རྡོ་རྗེ་ཕོ་ཉ་མཁྲིག་མ་བཞི་ལ་ནི༔ སྒོ་མ་བཞི་སོགས་མ་འདྲེས་ཡོངས་སུ་རྫོགས༔ གཙོ་བོའི་སྤྱི་བོར་བྱ་ཁྱུང་རྭ་བར་དུ༔ དོན་ཡོད་གྲུབ་པ་ལོངས་སྐུའི་ཆ་བྱད་ཅན༔ གནས་གསུམ་འོད་འཕྲོས་ཡེ་ཤེས་སྤྱན་དྲངས་གྱུར༔ ཧཱུྃ༔ ཆོས་ཀྱི་དབྱིངས་ནས་རིག་སྟོང་ཀུ་མ་རའི༔ གཞོམ་མེད་ན་དཱ་ཀཱི་ལའི་སྒྲ་སྒྲོགས་ཤིང་༔ ཕུར་བ་རྣམ་པ་བཞི་ཡི་ཕྱག་རྒྱ་ཡིས༔ ཐལ་འབྱིན་ཕྲིན་ལས་མཛད་ཕྱིར་གཤེགས་སུ་གསོལ༔ ཕུང་ཁམས་སྐྱེ་མཆེད་ཡེ་རྫོགས་གདན་ལ་བཞུགས༔ གཉིས་མེད་རང་བཞིན་རིག་པས་ཕྱག་འཚལ་ལོ༔ བདག་རྟོག་རུ་ཏྲ་བསྒྲལ་བའི་ཤ་ཁྲག་རུས༔ ཚིལ་ཞག་བཀྲག་མཛེས་ལང་ཚོའི་མེ་ཏོག་དང་༔ དྲོད་དང་དབང་ཤེས་གསལ་བའི་སྒྲོན་མེ་རྣམས༔ ཟན་ཆང་སྦྲང་ལས་ཞིམ་མངར་ཕུན་སུམ་ཚོགས༔ རྡོ་རྗེ་སྲིན་པོའི་ལྷ་ལ་མཆོད་པ་འབུལ༔ ཡོན་ཏན་ལྷུན་གྱིས་གྲུབ་པའི་ཆེ་རྔོམས་ལ༔ ཚིག་ཏུ་མ་ཡིན་ཆོས་ཉིད་རང་སྒྲ་ཡིས༔ ཡེ་ཤེས་སྙན་པའི་གླུ་ཡིས་བསྟོད་པའི་ངང་༔ ཤེས་མཐོང་རྣལ་འབྱོར་ཆེན་པོའི་མཉམ་བཞག་བརྟན༔ ཧཱུྃ༔ ཐུགས་ཀར་པདྨ་ཉི་ཟླའི་སྟེང་༔ རང་འདྲ་ཞལ་གཅིག་ཕྱག་གཉིས་པ༔ རྒྱ་གྲམ་དྲིལ་བུ་བསྣོལ་ཐབས་འཛིན༔ དེ་ཡི་ཐུགས་ཀར་ཕུར་པའི་སྦུབས༔ ཉི་སྟེང་ཧཱུྃ་མཐར་སྔགས་ཀྱི་བསྐོར༔ བཟླས་པས་འཁོར་འདས་ཕུར་བས་བསྒྲལ༔ ཤ་ཁྲག་ཕུར་བའི་ཞལ་དུ་རོལ༔ རྣམ་ཤེས་ཕུར་བའི་ཀློང་དུ་བསྟིམ༔ ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིགྣན་བཾ་ཧཱུྃ་ཕཊ༔ བསྙེན་སྒྲུབ་ལས་སྦྱོར་དམིགས་པའི་དབྱེ༔ འདི་ཡིས་གནས་སྐབས་བར་ཆད་སེལ༔ མཐར་ཐུག་ཤེས་དང་ཤེས་བྱ་སྟེ༔ འཁོར་འདས་ཉོན་ཤེས་དགྲ་བགེགས་ཀུན༔ ཆོས་ཉིད་རྡོ་རྗེ་ཕུར་བའི་ཀློང་༔ མངོན་སངས་རྒྱས་བའི་ཁྱད་ཆོས་ཡོད༔ ས་མ་ཡཱ༔ རྒྱ་རྒྱ་རྒྱ༔ དཔལ་ཆེན་ཐུགས་ལས་སྤྲུལ་སྲས་ཀྱི། །བསྐུལ་བཞིན་ག་གཱ་ཨ་བྷྱེས་སོ། །བརྩོན་འགྲུས་ཆེན་པོའི་གུས་སྦྱོར་མཁན། །བཛྲ་དྷྭ་ཛ་ཡ་ཡིས་སོ། །དགེའོ། །དགེའོ། །དགེའོ། །སརྦ་མངྒ་ལཾ། ། ༈ རང་ཉིད་ཨོཾ་ལས་བཅོམ་ལྡན་གདུགས་དཀར་ནི༔ དཀར་གསལ་དབུ་སྟོང་རིགས་ལྔའི་ཁ་དོག་ཅན༔ ཕྱག་སྟོང་ཕྱག་མཚན་ལྔ་ཡིས་དགྲ་བགེགས་ཀུན༔ བཟློག་བསྒྱུར་སྤྱན་སྟོང་དུས་གསུམ་ས་ལེར་གཟིགས༔ དྲེགས་པ་ཆེ་དགུ་བསྣོལ་བའི་གདན་ལ་བཞེངས༔ རྒྱལ་ཀུན་མཐུ་སྟོབས་དབང་ཕྱུག་གཅིག་བསྡུས་པའི༔ ཐུགས་ལས་འོད་འཕྲོས་དབྱིངས་ནས་ཡེ་ཤེས་པ༔ སྤྱན་དྲངས་དམ་ཡེ་གཉིས་སུ་མེད་པར་བཞུགས༔ གུས་པས་ཕྱག་འཚལ་ཕྱི་ནང་མཆོད་པ་འབུལ༔ བདུད་འཇོམས་དཔའ་བོ་ཆེ་ལ་ཕྱག་འཚལ་བསྟོད༔ ཐུགས་ཀར་ཨོཾ་མཐར་སྔགས་ཀྱི་ཕྲེང་བས་བསྐོར༔ འོད་འཕྲོས་རྒྱལ་ཀུན་དབང་ཕྱིན་དངོས་གྲུབ་བསྡུས༔ དྲེགས་པ་ཚར་བཅད་དགྲ་བགེགས་བྱད་ཕུར་དང་༔ ཀེག་རིགས་སྲི་གདོན་ཐམས་ཅད་ཕྱིར་ལ་བཟློག༔ འགྲོ་ཀུན་མི་མཐུན་ཕྱོགས་ལས་རྣམ་རྒྱལ་བསམ༔ ཨོཾ་ཧཱུྃ་མ་མ་ཧཱུྃ་ནི་སྭཱ་ཧཱ༔ སརྦ་ཤ་ཏྲུཾ་མ་ར་ཡ་ཕཊ་བྷྱོ་བཟློག༔ གདུགས་དཀར་ལུས་དཀྱིལ་འདི་འདྲ་ཞིག་དགོས་ཞེས་བསྟན་འཛིན་པས་བསྐུལ་ངོར་ག་གཱས་སོ། ། ༈ ཁྲོས་མའི་རྒྱུན་ཁྱེར་ནིཿ ཨཱཿ དྲན་རྫོགས་མཁའ་སྤྱོད་ཡོན་ཏན་ལྔ་ལྡན་པརཿ རང་ཉིད་རྡོ་རྗེ་ཁྲོས་མ་ནག་མོ་ནིཿ མཐིང་ནག་ཞལ་གཅིག་ཕྱག་གཉིས་གྲི་ཐོད་བསྣམསཿ ཞབས་གཉིས་གར་སྟབས་དུར་ཁྲོད་ཆས་གོས་བརྒྱནཿ ཡེ་ཤེས་སེམས་དཔའ་བཛྲ་ཝ་ར་ཧའིཿ ཐུགས་ཀར་ཉི་སྟེང་བཾ་མཐར་སྔགས་ཕྲེང་འཁོརཿ འཕྲོ་འདུས་འོད་ཀྱིས་སྒྲིབ་དག་དབང་བྱིན་བསྡུསཿ མཆོག་ཐུན་དངོས་གྲུབ་མ་ལུས་ཐོབ(དངོས་གྲུབ། མཆན།) བསམ་ཞིངཿ ཨོཾ་བཛྲ་ཝཱ་ར་ཧི་ཀྲོ་ཏི་ཀ་ལི་བཾ་ཧ་རི་ནི་ས་ཧཱུྃ་ཕཊཿ ཧཱུྃཿ སྣང་ཆ་ཐབས་ཀྱི་མཆོད་པ་འབུལཿ སྟོང་ཉིད་དབྱིངས་ལ་ཕྱག་འཚལ་བསྟོདཿ ཟུང་འཇུག་རྣམ་ཀུན་(བསྡུ་ལྡང་མཆན།)མཆོག་ལྡན་གྱིསཿ བཀྲ་ཤིས་ཀུན་ཏུ་ལྷུན་འགྲུབ་ཤོགཿ ཅེས་ཀྱང་ཕུན་ལྷའི་ངོར་ག་གཱས་སོ། ། འཕགས་པ་འཇམ་དཔལ་གྱི་མཚན་བརྗོད་པ་མཁྱེན་རབ་ཉི་ཟླ་ཟུང་འབྲེལ།༈ ཡེ་ཤེས་སྒྱུ་འཕྲུལ་དྲྭ་བ་ལས༔ འཕགས་པ་འཇམ་དཔལ་གྱི་མཚན་བརྗོད་པ་མཁྱེན་རབ་ཉི་ཟླ་ཟུང་འབྲེལ་ཞེས་བྱ་བ་བཞུགས་སོ༔ རྒྱ་གར་སྐད་དུ༔ མཉྫུ་ཤྲཱི་ཛྙཱ་ན་ས་ཏྭ་ན་མཿ བོད་སྐད་དུ༔ འཇམ་དཔལ་ཡེ་ཤེས་སེམས་དཔའི་མཚན་བརྗོད་པ༔ བཅོམ་ལྡན་འདས་ངག་གི་དབང་ཕྱུག་ལ་ཕྱག་འཚལ་ལོ༔ འདི་སྐད་བཤད་པའི་དུས་ན༔ རྣམ་པར་རིས་སུ་ཆད་དང་བྲལ་བའི་སྐབས་མེད་པའི་སྐབས༔ གནས་རང་སྣང་བསམ་ངོ་ལས་འདས་པ་ན༔ སྟོན་པ་ཀུན་ཏུ་བཟང་པོ་འཇམ་དཔལ་གཞོན་ནུ་བུམ་པའི་སྐུ་ཞེས་བྱ་བ་ལ༔ འཁོར་སྒྱུ་འཕྲུལ་དྲྭ་བའི་བཀོད་པ་དུས་གསུམ་བདེ་བར་གཤེགས་པས་བསྐོར་བའི་དགོངས་པ་སྒྲར་ཤར་བའི་གླེང་བཅོམ་ལྡན་འདས་འཇམ་དཔལ་དཔའ་བོའི་ཡེ་ཤེས་ལ་བསླངས་བ་ན༔ རང་གྲགས་སྟོང་ནམ་མཁའི་རོལ་མོ་བཀའ་སྡོད་ཀྱི་སྐྱེས་བུ་ལ་ཤར་གྲོལ༔ སྲིད་གསུམ་ཡེ་གདལ་ནམ་མཁའ་ལ༔ སྣང་ལྡན་དམིགས་ཁྱབ་བྱང་ཆུབ་སེམས༔ ཡེ་ཤེས་པདྨ་དྲི་མེད་འོད༔ ཐོག་མ་ཐ་མ་མངོན་སངས་རྒྱས༔ མཚན་རྫོགས་ཐབས་ཤེས་འདུ་འགོད་མེད༔ གང་བརྗོད་དངོས་དང་དེའི་བརྙན་དེ༔ སངས་རྒྱས་ཀུན་གྱི་བསྟན་པ་གཅིག༔ རྡོ་རྗེ་རིན་ཆེན་དབང་བསྐུར་དཔལ༔ ཉེས་སྤངས་སྐྱོན་གྱིས་དཀར་དག་པའི༔ ཤིན་ཏུ་སད་པའི་རྟོགས་པ་རྒྱས༔ ཁམས་གསུམ་སེམས་ལས་རྣམ་པར་འདས༔ དུས་གསུམ་སངས་རྒྱས་རྒྱལ་བར་བརྟན༔ ཨཱོཾ་ཨཱྃ་ཧཱུྃ་སྭཱྃ་ཧཱྃ༔ ཨརྱ་པྲཛྙཱ་དྷྲིཀ༔ སརྦ་སིདྡྷི་ཕ་ལ་སྭཱ་ཧཱ༔ དེ་སྐད་ཅེས་བཀའ་སྩལ་བས་དེ་བཞིན་གཤེགས་པ་རབ་བདུན་དང་སངས་རྒྱས་ཐམས་ཅད་རྗེས་སུ་ཡི་རང་ནས་བཅོམ་ལྡན་འདས་ཀྱི་ཐུགས་ལ་ཞུགས་སོ༔ སྤྱན་གྱི་འབྲས་བུ་ལས་ཉི་མའི་འོད་ཀྱིས་གླིང་བཞི་གསལ་ལོ༔ འཇམ་དཔལ་སྤྱི་ཏིའི་ཡང་ཏི་འབྲུ་མེད་བྱ་བ་རྫོགས་སོ༔ ཅེས་ཀྱང་ཤེས་རབ་ཟླ་བའི་དབང་པོས་སྤེལ་བའོ༔ ག་གཱས་སོ། །འདི་ཚར་གཅིག་བརྗོད་ན་འཇམ་དཔལ་སྒྱུ་འཕྲུལ་དྲྭ་བ་བརྒྱ་གླེང་བ་དང་འདྲའོ། །སརྦ་མངྒ་ལཾ། ། ༈ ཨོཾཿ མཚན་མ་མེད་པའི་འཇམ་པ་ལཿ ཡོན་ཏན་ལྷུན་གྲུབ་དཔལ་དང་ལྡནཿ ཁྱབ་བརྡལ་གཞོན་ནུ་བུམ་པའི་སྐུཿ སངས་རྒྱས་ཡེ་ཤེས་མཆོག་གྲུབ་ཤོགཿ མཉྫུ་ཤྲཱི་ཧཱུྃ་ཨཱ་སརྦ་སིདྡྷི་ཕ་ལ་ཧོཿ མཚན་བརྗོད་ཤིན་དུ་བསྡུས་པའོ། །ཐེག་མཆོག་ལ་ཕུལ་ལོ། །ག་གཱས་སོ། ། ༈ ཨོཾ༔ དཀོན་མཆོག་རྩ་གསུམ་སྐུ་གསུམ་བཀྲ་ཤིས་མཛོད༔ བདེ་གཤེགས་ཉེ་སྲས་བཀྲ་ཤིས་ལྷ་མོ་དང་༔ འཇིག་རྟེན་སྐྱོང་བ་བརྒྱད་ལའང་ཕྱག་འཚལ་ལོ༔ བྱས་པ་དོན་ལྡན་བཀྲ་ཤིས་དཔལ་སྩོལ་ཅིག༔ ག་གཱས་སོ། །བཀྲ་ཤིས་པར་གྱུར་ཅིག ། ༈ རྗེ་བཙུན་འཕགས་མ་སྒྲོལ་མའི་ཐུགས་དམ་གནད་བསྐུལ་གནོད་པ་ཐམས་ཅད་ཞི་བར་བྱེད་པའི་གཟུངས་བཞུགས་སོ༔ ན་མོ་གུ་རུ་པདྨ་ཀཱ་ར་ཡེ༔ རྒྱ་གར་སྐད་དུ༔ ཨརྱ་ཏཱ་རེ་སརྦ་བིགྣཾ་ཤིནྟཾ་ན་མ་དྷ་ར་ཎི༔ བོད་སྐད་དུ༔ འཕགས་མ་སྒྲོལ་མ་གནོད་པ་ཐམས་ཅད་ཞི་བ་ཞེས་བྱ་བའི་གཟུངས༔ ཡུལ་མེད་ཟང་ཐལ་སྒྲོལ་མ་ལ༔ བདག་མེད་རིག་པས་མཉམ་པར་སྦྱར༔ གནས་མེད་སེམས་ཀྱི་འཁྲུལ་ལྡོག་འཁོར༔ སྤྲོས་མེད་རང་གྲོལ་བདེན་གང་ཁྲོ༔ ཨོཾ་ཨཱརྱ་ཏཱ་རེ་སརྦ་བིགྣཾ་ཤིནྟཾ་ཀུ་རུ་ཡེ་ཨ་ཨ་ཨཱ༔ སྭཱ་ཧཱ༔ ཨ་ཏཱཾ་གྷྲི་སྱེ་གི་ཧུ་ཡ་ཏུ་ཏན་ཀེ་བྷ་ཨ་ཏི་གྷྲི་ཧོ༔ ཡང་ན་ཉེ་བསྙེན་བསྡུས་པའི་ཚུལ༔ ཨོཾ་ཏཱཾ་སརྦ་ཤིནྟཾ་ཨ་སྭཱ་ཧཱ༔ ཞེས་བརྗོད་འཇིག་རྟེན་ཐམས་ཅད་ནས༔ ནད་གདོན་དགྲ་ཇག་ཆོམ་ཀུན་སྲི༔ གྱོད་འདྲེ་བསམ་པའི་བར་ཆད་ཀུན༔ ཞི་བར་སངས་རྒྱས་ཀུན་གྱིས་བཤད༔ འཕགས་མ་གནོད་ཞི་མའི་གཟུངས་རྫོགས་སོ༔ དུས་གསུམ་ཀུན་བྱང་གི་གནས་ལ་རྟོགས་པས་ཡི་རང་ནས་མངོན་པར་བསྟོད་དོ༔ རང་སྣང་རྡོ་རྗེ་འཆང་གི་བཀོད་པའི་ཡེ་ཤེས་སྒྲར་སྣང་བའི་འཁོར་ལོ་བརྒྱད་པའོ༔ ཅེས་ཀྱང་པདྨའི་མཚན་གྱིས་བསྐུལ་ངོར་ག་གཱས་སོ། །དགེའོ། ། ཡེ་ཤེས་ཐིག་ལེ་བཞི་བ།ཡེ་ཤེས་ཐིག་ལེ་བཞི་བ་བཞུགས་སོཿ རྒྱ་གར་སྐད་དུཿ ཛྙ་ན་ཏི་ལ་ཀ་ཙ་ཏུ་ར་ན་མཿ བོད་སྐད་དུཿ ཡེ་ཤེས་ཐིག་ལེ་བཞི་བ་ཞེས་བྱ་བཿ དཔལ་ཀུན་བཟང་ཡབ་ཡུམ་ལ་ཕྱག་འཚལ་ལོཿ ཡེ་ཤེས་ཐིག་ལེ་ཞི་ཁྲོའི་རྒྱལཿ ཆོས་ཉིད་བདེ་གཤེགས་སྙིང་པོ་ནིཿ རང་བཞིན་གསུམ་ལྡན་དབྱེར་མེད་པཿ གནས་ལུགས་གཞི་ཡི་སྒྲོན་མ་ཡིནཿ ༡ རིན་ཆེན་མཆོང་གི་གུར་ཁང་ནིཿ བསེ་ཡི་གའུ་ཁ་སྦྱོར་བཿ གསང་འདུས་ཟུར་བརྒྱད་དྭངས་མ་ཆེཿ ཙིཏྟ་ཤ་ཡི་སྒྲོན་མ་བཞུགསཿ ༢སྲོག་འདུས་ཟུར་བཞི་འོད་ཀྱི་སྒངཿ དྭངས་མའི་རྩེ་ལས་ཟང་ཐལ་ནསཿ དྷཱུ་ཏཱིར་ཐིམ་པའི་དུང་ཁང་ལསཿ ཧར་སང་ཡན་པའི་ཙ་ཁུག་པཿ ༣ སྣལ་མའི་གདོང་ལས་ཆ་གཉིས་འཛིནཿ བྱེར་ཟུགས་འཆིང་འཕེན་སྒོ་གཉིས་མཛོདཿ ཡེ་ཤེས་རླུང་གི་བསྐུལ་མ་འདེདཿ རྒྱང་ཞགས་མུན་པའི་འཁོར་སྒོ་བཅོམཿ ༤ ངོ་བོ་གཞི་ཡི་རང་ཡུལ་དེའིཿ གདངས་ཀྱི་གོ་འབྱེད་ཡུལ་དུ་བརྟེནཿ དབང་སྔོན་མཚོན་བཅས་ཁང་བས་སྐྱོབསཿ ཡིག་འབྲུ་འཛིན་མའི་ཀུན་ཏུ་བཟངཿ ༥ ཟླ་མེད་ཟབ་པའི་ཏི་ལ་ཀཿ རིམ་པས་འཁོར་བས་པཉྩ་རཾཿ ཆགས་བྲལ་ཟང་ཐལ་གསལ་འཚེར་འབརཿ སྟོང་བ་ཉིད་ཀྱི་ལམ་དམིགས་པའོཿ ༦ འབྲེལ་བའི་དྲྭ་བ་རླུང་གི་བསྐུལཿ བུང་བ་པདྨའི་བཅུད་ལ་འཁོརཿ སྨིན་ནས་སྐུ་ཡི་གོ་རུ་བཞུགསཿ རང་བྱུང་ཆེན་པོའི་ཉི་མ་འོདཿ ༧ བར་མ་དོ་ཡི་སྐུ་ཐིག་འོདཿ རང་གསལ་རང་ངོ་ཤེས་པ་ལསཿ གྲོལ་མཐོང་བཙན་ས་ཟིན་པའི་དབྱིངསཿ དུས་ཀྱི་སྒྲོན་མ་སྤྲུལ་བསྒྱུར་དགོདཿ ༨ འབྱུང་བ་མ་ལ་ཞ་ནས་ཀྱངཿ ཡེ་ཤེས་ཆེན་པོ་དབྱིངས་སུ་འཁྱིལཿ ཤེས་རབ་མཁའ་བསྐྱོད་བུམ་སྐུ་ཟིནཿ མཐར་ཐུག་འབྲས་བུའི་སྒྲོན་མའོཿ ༩ ཏིང་འཛིན་རང་བཞག་སྒྱུ་འཕྲུལ་ལསཿ བཀོད་པའི་གཡོ་མེད་ཆུ་བོའི་རྒྱུནཿ བསམ་གཏན་རྣམ་དག་བདེ་ཀློང་འཁྱིལཿ འོད་གསལ་ཡེ་ཤེས་སྒྲོན་མ་རྙེདཿ ༡༠ སྣོད་ཀྱི་ཙིཏྟ་རྩ་ཆུ་ནསཿ གཞི་ཡི་སྒྲོན་མའི་དངོས་གདངས་བཅུདཿ སྨིན་པ་ལམ་གྱི་སྣང་སྟོང་རིགཿ ལས་འཁྲུངས་ཉམས་ཀྱི་ཏིང་འཛིན་བཟངཿ སུན་མའི་ཤེས་རབ་སྐུར་སྨིན་ནསཿ འབྲས་རྒྱུད་རྒྱུ་ལ་བྲལ་དག་སྟེཿ སྐུ་དང་ཡེ་ཤེས་མཛད་པའི་སྒོཿ མཐར་ཕྱིན་བྱེད་པོ་བླ་ན་མེདཿ ༈ རྒྱུད་སྦྱངས་དབང་གི་སོ་བཏང་སྟེཿ ལྟ་དགོངས་ནམ་མཁའ་ཉི་ཟླ་འབརཿ གནད་ཆེན་གཟེར་གྱིས་རབ་བསྡམས་ནསཿ ཆོས་ཉིད་འཁོར་ལོར་ལ་བཟླས་པསཿ དམ་ཚིག་ཆེན་པོ་ལས་མི་འགོངསཿ གྲོང་ཁྱེར་ཕྱི་ཕྱག་གིས་འཕུལ་ནསཿ གྲུབ་རྟགས་ནམ་མཁའ་ལྟ་བུ་ལགསཿ སངས་རྒྱས་ཀུན་གྱི་ཐུགས་ཀྱི་ཐིགཿ གཞི་ལམ་འབྲས་བུ་ཉམས་ཀྱི་ཚུལཿ ཀུན་ཏུ་བཟང་པོ་རྣམ་པ་བཞིཿ སྣོད་ཀྱི་རང་བཞིན་གྱིས་བརྟེན་པཿ བྲལ་བས་སུན་མས་དགྱེས་བཞིན་སླེབསཿ ཟང་ཐལ་ཐོགས་པ་མེད་པ་ཡིཿ སངས་རྒྱས་ཀུན་གྱི་རྡོ་རྗེའི་གདནཿ ད་ལྟ་ཉིད་དུ་ས་དྲུག་རྫོགསཿ འདི་ནི་མཐོང་བ་ཙམ་གྱིས་ཀྱངཿ དེ་མ་ཐག་ཏུ་སྤྲུལ་སྐུ་འབྱིནཿ ཐོས་པ་ཙམ་གྱི་རང་བཞིན་གྱིཿ བསམ་གཏན་ཤུགས་ཀྱིས་རྒྱུད་ལ་འཁོརཿ གང་གིས་ཐིག་ལེར་རབ་བཅིངས་ནཿ དེ་མ་ཐག་ཏུ་རིང་བསྲེལ་འབྱིནཿ བསྒོམ་བསམ་དྲན་པས་དེ་མ་ཐགཿ ཡེ་ཤེས་བླ་མའི་རྒྱལ་ས་ཐོབཿ མཐོང་ཐོས་དྲན་རེག་གྲོལ་བ་ཡིཿ ཟབ་ལས་ཉིང་ཁུར་བཅུད་འཁྱིལ་བཿ སྔགས་ཀྱི་བདག་མོ་ཆེན་མོའི་བསྲུངཿ ས་མ་ཡཱཿ རྒྱ་རྒྱ་རྒྱཿ ཅེས་ཀྱང་པདྨ་མཁའ་ཀློང་ཡངས་པས་སྨྲས་བའི་རྡོ་རྗེ་གྲགས་སྟོང་དབྱེར་མེད་ཀྱི་རང་གདངསཿ ཛྙཱ་ན་ཏི་ལ་ཀ་ཙ་ཏུ་ས་མ་པ་ཐཿ དགེའོཿ དགེའོཿ དགེའོཿ སརྦ་མངྒ་ལཾཿ འདི་ལ་འོད་གསལ་རྫོགས་པ་ཆེན་པོའི་རྒྱུད་ཀྱི་ལྡང་ཚད་ཐམས་ཅད་ཚང་སོཿ དེ་ཡང་གཞི་ལམ་འབྲས་གསུམ་འཇུག་བའི་སྒོཿ དབང་དམ་ཚིག་གཉིསཿ ལམ་ལ་བཟླ་གཉིསཿ འབྲས་བུ་དང་ལྔའོཿ བཤགས་པའི་རྒྱུད་ཀྱི་སྙིང་པོ་ཉི་མའི་འོད་ཟེར།ཡེ་ཤེས་སྒྱུ་འཕྲུལ་དྲྭ་བ་ལས༔ བཤགས་པའི་རྒྱུད་ཀྱི་སྙིང་པོ་ཉི་མའི་འོད་ཟེར་ཞེས་བྱ་བ་བཞུགས་སོ༔ རྒྱ་གར་སྐད་དུ༔ དེ་ཤ་ན་ཏནྟྲ་ཙིཏྟ་སུརྱ་རསྨི་ན་མ༔ བོད་སྐད་དུ༔ བཤགས་པའི་རྒྱུད་ཀྱི་སྙིང་པོ་ཉི་མའི་འོད་ཟེར་ཞེས་བྱ་བ༔ དཔལ་ཀུན་ཏུ་བཟང་པོ་ལ་ཕྱག་འཚལ་ལོ༔ འདི་སྐད་བཤད་པའི་དུས་ན་ཕྱི་ནང་མེད་པའི་ཆོས་དབྱིངས་ཀྱི་ཕོ་བྲང་ན༔ བཅོམ་ལྡན་འདས་རང་ཤེས་རིག་པའི་རྒྱལ་པོ་མི་གཡོ་བ་ཆེན་པོ་ལ༔ འཁོར་ཡེ་ཤེས་རྒྱ་མཚོའི་ཚོགས་ཀྱིས་བསྐོར་བའི་ནང་ནས་བཀའ་སྡོད་ཀྱི་སྐྱེས་བུ་མདུན་ན་འཁོད་པ་མེ་ལོང་ཡེ་ཤེས་ཆེན་པོའི་འདི་སྐད་ཅེས་ཞུས་སོ༔ ཀྱཻ་བཅོམ་ལྡན་འདས་རྣལ་འབྱོར་པ་རྣམས་ཀྱི་ཉམས་ཆགས་བཤགས་པའི་ཐབས་མདོར་བསྡུ་ན་ཅི་སྐད་བགྱི་ཞེས་ཞུས་སོ༔ དེ་ནས་བཅོམ་ལྡན་འདས་ཀྱིས་བཀའ་སྩལ་པ༔ ངའི་གསང་སྔགས་འདི་རིན་ཆེན་གསེར་སྣོད་ཞོམ་པ་དང་འདྲ་བས་ཐབས་ཡངས་པ་རྡོ་རྗེའི་ཐེག་པ་འདི་ཟུངས་ཤིག༔ ཅེས་གསུངས་ནས་དགོངས་པ་ནམ་མཁའ་ལྟ་བུའི་གསང་འདི་དག་རང་ཤར་རོ༔ ཨེ་མ་ཧོ༔ སྣང་སྲིད་འཁོར་འདས་ཐམས་ཅད་ཀུན༔ ཆོས་ཉིད་མི་གཡོ་མགོན་པོ་ཡི༔ གཞི་ལམ་འབྲས་བུའི་དཀྱིལ་འཁོར་ལྷར༔ ཉམས་ཆགས་བཤགས་པའི་དཔང་བོར་རོལ༔ ཨ་ལ་ལ་ཧོ༔ ཀྱེ་མ་རྡོ་རྗེའི་གདུང་འཚོབ་རྣལ་འབྱོར་བདག༔ ཐེག་པ་རིམ་དགུའི་ལམ་ཞུགས་ཏེ༔ སོ་སོའི་བསླབ་སྡོམ་དམ་ཚིག་རིགས༔ འགལ་ཞིང་ཉམས་པ་མཐོལ་ལོ་བཤགས༔ ཧོ༔ རྟོགས་པའི་ཡན་ལག་ཐམས་ཅད་ཀུན༔ གནས་ ཚུལ་དོན་དམ་ལྷུན་གྲུབ་དཔལ༔ ཞི་ཁྲོ་རྒྱལ་བ་རྒྱ་མཚོ་ལ༔ སྒོ་གསུམ་གུས་པས་ཕྱག་འཚལ་ལོ༔ ཨ་ལ་ལ་ཧོ༔ ཧཱུྃ༔ ཁམས་གསུམ་འཁོར་བའི་ཆོས་རྣམས་ཀུན༔ སྐུ་གསུམ་སྐུ་གསུང་ཐུགས་ཀྱི་ངང་༔ གདོད་ནས་མངོན་སངས་རྒྱས་པ་ཡི༔ དགོངས་ཀློང་མ་རྟོགས་མཐོལ་ལོ་བཤགས༔ ཧཱུྃ༔ ཐོག་མེད་དུས་ནས་ད་ལྟའི་བར༔ སྒོ་གསུམ་ཁམས་གསུམ་རུ་ཏྲ་ཡིས༔ ཉོན་མོངས་དབང་གིས་སྡིག་བགྱིས་པ༔ གནོང་འགྱོད་དྲག་པོའི་མཐོལ་ལོ་བཤགས༔ ཧཱུྃ༔ རྡོ་རྗེ་རྒྱལ་པོའི་ཐེག་པ་ཡིས༔ གལ་མདོ་དབང་བཞིའི་དམ་ཚིག་དང་༔ སློབ་དཔོན་སྐུ་གསུང་ཐུགས་མཆོག་གི༔ དམ་ཚིག་ཉམས་ཆགས་མཐོལ་ལོ་བཤགས༔ ཤེས་བྱ་ལྟ་བའི་དམ་ཚིག་དང་༔ སྒྲུབ་སྲུང་བསྒོམ་དངོས་སྤྱོད་པ་ཡི༔ ལམ་བཞི་ངེས་པའི་རང་སྐལ་གྱི༔ དམ་ཚིག་དང་དུ་མ་ལོན་དང་༔ མ་རིག་ཉོན་མོངས་བག་མེད་པས༔ ཚོད་དང་ལོངས་ཡོད་ཕྱི་བཤོལ་བས༔ སྤང་བྱ་མི་དགེ་ཉམས་ཆགས་ཀུན༔ སྤོང་བར་མ་ནུས་མཐོལ་ལོ་བཤགས༔ སྐུ་གསུང་ཐུགས་སུ་བསྒྲུབ་ཞེས་སུ༔ ཁས་བླང་དམ་བཅའ་བགྱིས་ནའང་༔ ཚུལ་བཞིན་རྔོ་མ་ཐོགས་པ་ཀུན༔ མཐོལ་ལོ་བཤགས་སོ་ཚངས་པར་སྩོལ༔ གསང་སྔགས་ཡི་གེ་བརྒྱ་བ་འདི༔ དུས་གསུམ་རྒྱལ་བའི་གསང་སྔགས་ཡིན༔ ཞི་ཁྲོ་རིགས་བརྒྱའི་ཡང་སྙིང་ཡིན༔ ཉམས་ཆགས་བཤགས་པའི་གཟུངས་སྔགས་ཡིན༔ སྡུག་བསྔལ་འཇོམས་པའི་རིག་སྔགས་ཡིན༔ བཟླས་པས་འགྲོ་དྲུག་སྐྱེ་རྒྱུན་ཆོད༔ ནན་ཏན་སྙིང་པོར་ཉེ་བར་ལོངས༔ ཨོཾ་བཛྲ་ས་ཏྭ་ས་མ་ཡ༔ མ་ནུ་པཱ་ལ་ཡ༔ བཛྲ་ས་ཏྭ་ཏྭེ་ནོ་པ་ཏིཥྛ༔ དྲིཌྷོ་མེ་བྷ་ཝ༔ སུཏྟོ་ཥྱོ་མེ་བྷ་ཝ༔ སུ་པོ་ཥྱོ་མེ་བྷ་ཝ༔ ཨ་ནུ་རཀྟོ་མེ་བྷ་ཝ༔ སརྦ་སིདྡྷི་མྨེ་པྲ་ཡ་ཙྪ༔ སརྦ་ཀརྨ་སུ་ཙ་མེ༔ ཙིཏྟཾ་ཤྲི་ཡ༔ ཀུ་རུ་ཧཱུྃ༔ ཧ་ཧ་ཧ་ཧ་ཧོ༔ བྷ་ག་ཝཱན༔ སརྦ་ཏ་ཐཱ་ག་ཏ༔ བཛྲ་མཱ་མེ་མུཉྩ༔ བཛྲཱ་བྷ་ཝ༔ མ་ཧཱ་ས་མ་ཡ་ས་ཏྭ་ཨཱ༔ ད་ནས་མི་འཆབ་མི་བགྱིད་དོ༔ ཞི་ཁྲོ་རོལ་བའི་ཕྲིན་ལས་ཀྱི༔ དག་ཚངས་སོར་ཆུད་དབུགས་དབྱུང་སྟེ༔ མཆོག་ཐུན་དངོས་གྲུབ་ཚེ་འདིར་སྩོལ༔ ཨ་ལ་ལ་ཧོ༔ ཨེ་མ་ཧོ༔ འཁོར་འདས་སྣང་སྲིད་ཆོས་རྣམས་ཀུན༔ དོན་ལ་མཉམ་ཉིད་ཐིག་ལེ་ཆེར༔ མ་རྟོགས་བཟང་ངན་ཕྱོགས་འཛིན་སྒྲིབ༔ ཡེ་གྲོལ་ཆེན་པོའི་ངང་དུ་བཤགས༔ ཨ་ལ་ལ་ཧོ༔ ཨེ་མ་ཧོ༔ ཨེ་མ་དམ་ཚིག་ཕྱག་རྒྱ་བཞི་ལྡན་པའི༔ བྱ་བ་དོན་ཡོད་གྲུབ་པའི་ངང་༔ མ་བཅོས་ལྷུན་གྲུབ་རྡོ་རྗེ་ཆེ༔ འདི་ལྟར་རྟོགས་ན་བསྐང་བཤགས་མཆོག༔ མ་སྐྱེས་མ་འགགས་གནས་དམིགས་མེད༔ མཚན་མཚོན་གཞི་བྲལ་ཡངས་པ་ཡི༔ རང་བཞིན་ཆོས་སྐུར་བབས་ཀྱིས་གྲུབ༔ འཁོར་གསུམ་དམིགས་པ་ཀ་ནས་དག༔ ཨ་ཨ་ཨཱ༔ ཨ་ལ་ལ་ཧོ༔ དེ་ལྟར་རྟོགས་པའི་རྩལ་ལྡན་པའི༔ ངང་ལ་ཡང་དག་མཉམ་བཞག་ནས༔ ཆད་པའི་མཐའ་ལས་གཟུང་བའི་ཕྱིར༔ སྡིག་ལྟུང་ཕྱག་རྒྱའི་འཁོར་ལོར་ཆེ༔ ཨ་ལ་ལ་ཧོ༔ རྣལ་འབྱོར་གང་ཞིག་སྐལ་ལྡན་པས༔ འདི་ལྟར་བཤགས་སྦྱངས་མངོན་བརྩོན་ནས༔ དགེ་སྡིག་ལས་ཀྱིས་མི་བསྒྲིབ་པར༔ ཚེ་འདིར་མཆོག་ཐུན་དངོས་གྲུབ་ཐོབ༔ གཞི་ནས་བསྐྱོད་པ་མེད་པ་དང་༔ སྡིག་ལྟུང་འདུས་བྱས་ཡིན་པའི་ཕྱིར༔ གང་ཡང་རང་གྲོལ་དམ་ཚིག་གི༔ སོར་ཆུད་མི་གཡོའི་གཏན་ཚིག་གོ༔ ཞེས་ཆོས་ཕུན་སུམ་ཚོགས་པ་འདི་གསུངས་པས༔ མེ་ལོང་ཡེ་ཤེས་ལ་སོགས་པའི་འཁོར་ཕུན་སུམ་ཚོགས་པ་རྣམས་རྗེས་སུ་ཡི་རང་སྟེ་དུས་བཞི་ཆོས་ཉིད་ཀྱི་ངོ་བོ་ལ་དགོངས་པ་དབྱེར་མེད་ཆེན་པོར་འབྱམས་ཀླས་སོ༔ སྒྲའི་བྱིང་དོན་བསྒྱུར་བཀོད་ཀྱི་རྩོལ་བ་ལ་མ་ལྟོས་པར༔ བཀའ་སྡོད་དགོངས་པ་གཅིག་པའི་པད་འབྱུང་གིས༔ དོན་གྱི་རྣམ་བཅད་ལས་ཐད་སོར་བཤད་པ་རྫོགས་སོ༔ འདི་ཡང་ནུ་འཇམ་དང་རི་ཁྲོད་པ་རྣམས་ཀྱི་ཡང་ཡང་བསྐུལ་ངོར་ག་གཱ་བས་སོ། ། སྡིག་སྒྲིབ་དག་པར་བྱེད་པའི་གཟུངས།༈ རྒྱ་གར་སྐད་དུ༔ སརྦ་པ་པཾ་ཤུདྡྷེ་ཨཱ་ན་མ་དྷ་ར་ནི༔ བོད་སྐད་དུ༔ སྡིག་སྒྲིབ་དག་པར་བྱེད་པའི་གཟུངས་ཞེས་བྱ་བ༔ བཅོམ་ལྡན་འདས་དཔལ་དྲི་མེད་མགོན་པོ་ལ་ཕྱག་འཚལ་ལོ༔ ཨོཾ་ན་མོ་བྷ་ག་ཝཱ་ཏེ་སརྦ་པ་པཾ་ཤུདྡྷེ་ཨཱ༔ བི་མ་ལེ་ནཱ་ཐ་རཱ་ཛ་སྭཱ་ཡཾ་ཀུ་རུ་ཡེ་སྭཱ་ཧཱ༔ བདག་སོགས་སེམས་ཅན་ཐམས་ཅད་ཀྱི་སྡིག་སྒྲིབ་བག་ཆགས་ཐམས་ཅད་ཤཱིནྟཾ་ཀུ་རུ་ཡེ་སྭཱ་ཧཱ༔ འདི་ལན་གསུམ་བརྗོད་པས་ཉི་མ་རེ་བཞིན་མ་ཆགས་པར་བྱས་ན་ཚེ་རབས་འབུམ་གྱི་འཁོར་བ་ཕྱིར་བསྙིལ་ལོ༔ ཅེས་ཀྱང་བླ་མ་ཐེག་མཆོག་རིན་པོ་ཆེའི་བསྐུལ་ངོར་གཱ་ག་ཨ་བྷྱེ་ནས་སྨྲས་པ་དགེ་བར་གྱུར་ཅིག ། ༈ རྡོ་རྗེ་སེམས་དཔའི་དགོངས་ཉམས་ལས༔ བཤགས་པ་དྲི་མེད་འོད་ཟེར་བཞུགས་སོ༔ ན་མོ་གུ་རུ་པདྨ་ཀ་ར་ཡེ༔ སྔར་བྱས་ལས་ལ་འགྱོད་སེམས་དང་༔ ཕྱིན་ཆད་ལྡོག་པའི་སྟོབས་བཅས་སུ༔ ཨེ་མ་ཧོ༔ སྐུ་གསུམ་རྒྱལ་བའི་དཀྱིལ་འཁོར་ལྷ༔ ཐེག་རིམ་དགུ་དང་འབྲེལ་བ་ཡི༔ ཕྱི་ནང་གསང་བའི་དཀོན་མཆོག་གསུམ༔ རྒྱུད་སྡེ་བཞི་དྲུག་ཡི་དམ་ལྷ༔ ཡོངས་འདུས་ཡིད་བཞིན་རིན་པོ་ཆེ༔ ཀུན་ནས་ཀུན་ཏུ་བཟང་པོའི་དཔལ༔ རྡོ་རྗེའི་བླ་མ་བཀའ་དྲིན་ཅན༔ མདུན་མཁར་དགྱེས་བཞིན་བཞུགས་པར་མོས༔ ཀྱེ་མ༔ བདག་གིས་མ་རིག་བག་མེད་པས༔ མི་དགེ་བཅུ་དང་མཚམས་མེད་ལྔ༔ ལྕི་བ་བཞི་དང་ལོག་པ་བརྒྱད༔ གཞན་ཡང་ཉེ་བ་ལྔ་ལ་སོགས༔ ཚེ་རབས་འཁོར་བ་ཐོག་མེད་ནས༔ ཉོན་མོངས་དབང་གིས་སྤྱོད་པའི་ལས༔ གནོང་ཞིང་འགྱོད་སེམས་དྲག་པོ་ཡིས༔ མི་འཆབ་མི་སྦེད་མཐོལ་ལོ་བཤགས༔ ཁྱད་པར་བརྟུལ་ཞུགས་བཟང་མནོས་ཏེ༔ སོ་སོར་ཐར་བའི་སྡོམ་པ་དང་༔ བྱང་ཆུབ་སེམས་དཔའི་བསླབ་པ་དང་༔ རིག་འཛིན་སྔགས་ཀྱི་དམ་ཚིག་ལ༔ འགལ་ཉམས་རལ་འདས་ཐམས་ཅད་ཀུན༔ བཤགས་སོ་བྱང་ཞིང་དག་གྱུར་ནས༔ མཆོག་ཐུན་དངོས་གྲུབ་ཐམས་ཅད་ཀུན༔ མི་བསྒྲིབ་ཚེ་འདིར་སྩལ་དུ་གསོལ༔ མཁས་བླངས་དམ་བཅས་ཉམས་པ་དང་༔ གཞན་གྱི་སྡིག་རྐྱེན་ཡི་རང་བྱས༔ བསྟན་ལ་གནོད་པའི་གཞུང་བསྲེང་སོགས༔ མཐོང་དང་མ་མཐོང་ཐམས་ཅད་ཀུན༔ རྟེན་མཆོག་དམ་པའི་སྟོབས་ཤུགས་དང་༔ གཉེན་པོ་བྱང་ཆུབ་སེམས་ཀྱི་མཐུས༔ བཤགས་སོ་བྱང་ཞིང་དག་གྱུར་ཅིག༔ ཕྱིན་ཆད་སྲོག་ལ་བབས་ཀྱང་སྡོམ༔ བླ་མའི་ཐུགས་ཀའི་འོད་ཟེར་ནི༔ དཀར་དམར་མཐིང་གསུམ་འབར་བ་ཡིས༔ སྒོ་གསུམ་སྡིག་སྒྲིབ་བག་ཆགས་དང་༔ ཁམས་གསུམ་གནས་དོན་སྣང་ཞེན་ཀུན༔ སྦུར་མ་མེ་ལ་བསྲེག་པ་ལྟར༔ ཆོས་དབྱིངས་དེ་བཞིན་ཉིད་དུ་སྦྱངས༔ འཁོར་གསུམ་དམིགས་མེད་ངང་དུ་ཨ༔ ཡི་གེ་བརྒྱ་པའི་མཐར༔ སརྦ་པ་པཾ་ཛྭ་ལ་རཾ་ཤུདྡྷེ་ཤུདྡྷེ་ཨཱ༔ ཧཱུྃ་ཕཊ་སྭཱ་ཧཱ༔ ཅི་འགྲུབ་བཟླས་ནས་དོན་དམ་པའི་བྱང་ཆུབ་ཀྱི་སེམས་ལ་མཉམ་པར་བཞག་གོཿ འདི་ཡང་འཇིགས་མེད་ཚུལ་ཁྲིམས་དང་རྒྱ་ཁོ་གཉིས་ཀྱིས་བསྐུལ་ངོར་ག་ག་ཨ་བྷྱེས་སྨྲས་པའི་ཡི་གེ་པ་ནི་ཁུ་ཅི་ཁུ་ལོའོ། ། དམ་ཚིག་ཉམས་ཆགས་བཤགས་པ་རྣལ་འབྱོར་སྤྱི་ཁྲུས།༈ ཡེ་ཤེས་སྒྱུ་འཕྲུལ་དྲྭ་བ་ལས༔ དམ་ཚིག་ཉམས་ཆགས་བཤགས་པ་རྣལ་འབྱོར་སྤྱི་ཁྲུས་ཞེས་བྱ་བ་བཞུགས་སོ༔ ཨེ་མ་ཧོ༔ སྐྱེ་མེད་ཐིག་ལེ་འབྲུ་གཅིག་ལ༔ ཉམས་པའི་གྲྭ་ཟུར་མ་བྱུང་ཡང་༔ རྣལ་འབྱོར་ལྟ་སྤྱོད་འཕང་དམའ་བས༔ འགལ་འཁྲུལ་འདས་རལ་མཐོལ་ལོ་བཤགས༔ བླ་མ་དམ་པའི་བདག་རྐྱེན་ལས༔ སྨིན་གྲོལ་ལམ་གྱི་དྲིན་ཐོབ་ཀྱང་༔ མ་ཤེས་མ་གུས་བརྗེད་ངེས་དང་༔ བག་མེད་བཤེས་བྲལ་བདུད་གྲོགས་ཟིན༔ ཉོན་མོངས་སྟོབས་ཆེ་གཉེན་པོ་ཕྲ༔ ཆོས་བརྒྱད་དབང་དུ་གྱུར་བ་སྟེ༔ དམ་ཚིག་ཉམས་པའི་རྒྱུ་རྐྱེན་དགུའི༔ ཀུན་ནས་བསླང་བ་མཐོལ་ལོ་བཤགས༔ རྒྱུད་སྡེ་སོ་སོས་རྩ་བ་དང་༔ ཡན་ལག་སྦོམ་ཕྲའི་བཀས་བཅད་དང་༔ སློབ་དཔོན་ཁྱེད་ཀྱི་སྐུ་གསུང་ཐུགས༔ བརྙས་བཅག་སུན་ཕྱུང་མཐོལ་ལོ་བཤགས༔ མི་དགེ་བཅུ་ལ་སྤྱད་པ་དང་༔ དགེ་བཅུ་ཁྱད་པར་རྒྱབ་ཕྱོགས་དང་༔ གདམས་པ་འདོར་དང་གསང་བ་འཆལ༔ སྤ་ལོ་གཟུ་ལུམ་རིས་ཆོད་བཤགས༔ སྔགས་ཀྱི་རྩ་བ་དག་སྣང་མེད༔ ལོག་ལྟ་གཏིང་ནས་སྐུར་བ་བཏབ༔ བཤེས་ངོར་དམ་སྤངས་བསྒོམ་བསྒྲུབ་གཡེལ༔ ལྟ་སྤྱོད་རུ་ཏྲར་བྱས་པ་བཤགས༔ ལྟ་བ་འཁྱེར་སོའི་གདེང་ཉམས་དང་༔ བསྒོམ་པ་བྱང་སེམས་བསྐྱེད་རྫོགས་གཡེངས༔ སྤྱོད་པ་མཐའ་བཅུའི་བསླབས་པ་རལ༔ ཤེས་བསྒྲུབ་སྤྱད་ལེན་སྤངས་ཉམས་བཤགས༔ མེད་ཕྱལ་གཅིག་པུ་ལྷུན་གྲུབ་སོགས༔ བསྲུང་དུ་ཡོད་དང་མེད་པ་ཡི༔ ས་མ་ཡཱ་ནི་འབུམ་སྡེ་ལ༔ དངོས་ཟླས་ཞར་ཉམས་འགལ་འདས་ཀུན༔ བཅོམ་ལྡན་ཞི་ཁྲོའི་སྤྱན་སྔ་རུ༔ གནོང་ཞིང་འགྱོད་སེམས་དྲག་པོ་ཡིས༔ ལུས་ངག་ཡིད་སྤྱོད་བདོག་པ་དང་༔ ཚོགས་གཏོར་འགྱོད་སྡོམ་བརྟན་པོས་བཤགས༔ དག་ཚངས་མཆོག་ཐུན་དངོས་གྲུབ་ཀུན༔ མི་བསྒྲིབ་ཚེ་འདིར་སྩལ་དུ་གསོལ༔ ཉིན་རེ་ཚར་རེ་མ་ཆགས་ན༔ དམ་ཚིག་སོར་ཆུད་དངོས་གྲུབ་ཐོབ༔ བསོད་ལྷས་བསྐུལ་བཞིན་ག་གཱས་སོ། ། ༈ གསང་སྔགས་རྡོ་རྗེ་ཐེག་པའི་དམ་ཚིག་ནི་དངོས་གྲུབ་ཐམས་ཅད་ཀྱི་ས་བོན་མ་རུལ་བ་ལ་སྨིན་པའི་ཆུ་ལུད་དྲོད་གཤེར་ལྟ་བུ་ལགས་པས་ཉམས་སླ་བ་བཤགས་དགོས་མ་བཤགས་ན་ཡོན་ཏན་ཅུང་ཟད་ཀྱང་མི་ཐོབ་པར་མ་ཚད་མར་གྱི་ཟང་ཐལ་དུ་གདོན་མི་ཟ་བའི་བཤགས་སྦྱངས་འབུང་བས་ཐབས་ཀྱི་ཆེ་བས་དག་སླ་གསེར་སྣོད་ཞོམ་པ་ལྟ་བུ་སྙད་མི་འཇུག་མཆོག་ཐུན་འབད་མེད་དུ་འགྲུབ་པའི་དྲི་མེད་བཤགས་རྒྱུད་སོགས་ན་ཧ་ཅིང་རྒྱས་པས་རྒྱུན་ཁྱེར་དུ་མི་ནུས་ན། ཡེ་ཤེས་སྐུ་མཆོག་བསྡུས་དོན་གྱི་དབང་དུ་ཆེ་བས་དེའི་ཆོག ཡང་ན། ངོ་བོ་ཉིད་དབྱིངས་སྤྲོས་མཚན་ཞི། །རང་བཞིན་སྙིང་རྗེའི་ཡེ་མདངས་ལས། །མཁྱེན་བརྩེ་ནུས་པའི་སྟོབས་ཤུགས་འབར། །རྟེན་གྱི་སྟོབས་སུ་རྣམ་པར་རོལ། །གཞི་དབྱིངས་དོན་གྱི་གནས་ལུགས་ལ། །བདག་གཞན་རྟོགས་པའི་དྲྭ་བ་མེད། །མེད་བཞིན་མ་རིག་བག་ཆགས་ཀྱིས། །ནོངས་པ་གཞི་བྲལ་ཀློང་དུ་བཤགས། །རང་སྣང་རྡོ་རྗེ་འཆང་ཆེན་གྱིས། །བཀོད་པའི་དམ་ཚིག་ས་ཡ་འབུམ། །སྤྱི་དང་བྱེ་བྲག་ཁྱད་པར་ལས། །མ་ཤེས་བག་མེད་མཐོལ་ལོ་བཤགས། །རྩ་བའི་ལྟུང་བ་བཅུ་བཞི་དང་། །སྦོམ་པོ་བརྒྱད་དང་རྩ་བ་ལྔའི། །བསྲུང་མཚམས་ཤེས་བཞིན་མི་ལྡན་པས། །ཁྱད་བསད་ཉམས་ཆགས་མཐོལ་ལོ་བཤགས། །མ་ཧཱ་ཡོ་གའི་གསང་ཆེན་གྱིས། །ཤེས་བྱ་ལྔ་དང་སྒྲུབ་བྱ་ལྔ། །མི་སྤངས་ལྔ་དང་དང་ལེན་ལྔ། །སྤྱད་བྱ་ལྔ་དང་གསང་བཅུའི་ཚུལ། །ཨ་ནུ་ཡོ་གའི་མྱུར་ལམ་གྱི། །ཉོན་མོངས་བརྒྱད་ཁྲི་བཞི་སྟོང་དང་། །ཚོགས་བརྒྱད་ཉེ་བའི་ཉོན་མོངས་བཅས། །སེམས་བྱུང་ལྔ་བཅུ་ལ་སོགས་པའི་། །རྟོག་ཚོགས་གནད་དུ་མ་སྦྱོངས་ཞིང་། ཁྱད་པར་ཨ་ཏི་བླ་མེད་ཀྱི། །རིམ་འཇུག་རྩོོལ་བ་བྲལ་བའི་གསང་། །རྩོལ་སྒྲུབ་དྲྭ་བའི་གཟེབ་བཙུད་པའི། །ཉམས་ཆགས་རྟོག་སྒྲིབ་ཐམས་ཅད་བཤགས། །སྟོང་ཉིད་ངོ་བོ་ཉིད་ཀྱི་གཤིས། །མ་སྐྱེས་མ་བྱུང་ཐིག་ལེ་ཆེར། །མེད་པའི་རང་བཞིན་བཅུ་ཡི་ཚུལ། །མ་རྟོགས་ཉམས་པ་མཐོལ་ལོ་བཤགས། །ཆོས་ཉིད་ཕྱལ་བ་ཆེན་པོ་ལ། །ཐ་སྙད་སྒྲོ་སྐུར་སླད་ཀྱིས་བསླད། །རྟོག་བརྟགས་ཚིག་ལ་འཆེལ་བའི་སྐྱོན། །ཀློང་མཉམ་ཆེན་པོའི་ངང་དུ་བཤགས། །གཅིག་པུ་ཆོས་རྣམས་ཐམས་ཅད་ཀུན། །ཁྱབ་བརྡལ་དོན་གྱི་རྡོ་རྗེར་མཉམ། །མཉམ་ཉིད་རང་བཞིན་དམིགས་མེད་གཤིས། །དམིགས་པའི་སྒྲོག་ཏུ་བཅུག་པ་བཤགས། །ལྷུན་གྲུབ་རང་བཞིན་ཡོན་ཏན་རྫོགས། །རྫོགས་པའི་བྱང་ཆུབ་བླ་མའི་ཐུགས། །རང་རིག་སྐུ་དང་ཡེ་ཤེས་གཤིས། །མ་རྟོགས་ཉམས་པ་མཐོལ་ལོ་བཤགས། །བལྟར་མེད་ངོ་བོ་མ་མཐོང་ཞིང་། །མ་རྟོགས་ལོག་རྟོག་ཕྱོགས་རྟོགས་གིས། །བླ་མའི་བཀའ་ལ་གཡོན་དུ་བལྟས། །ཕྱོགས་ལྷུང་མེད་པའི་ཀློང་དུ་བཤགས། །རང་བཞག་རྣལ་མའི་ཡེ་བབ་ལ། །ཡེ་ནས་འབྱམས་སུ་ཀླས་པ་ལས། །སེམས་སུ་བསླད་ནས་ཉིང་འཁྲུལ་བ། །ཕྱམ་བརྡལ་ཆེན་པོའི་ངང་དུ་བཤགས། །རིག་པ་རང་གྲོལ་ལུ་གུ་བརྒྱུད། །གདངས་སུ་བཞུགས་པ་མ་ཤེས་ཏེ། །ཕྱི་རུ་བཅད་ནས་བཟུང་འཛིན་ཞེན། །གནས་ལུགས་དོན་གྱི་རྡོ་རྗེར་བཤགས། །ལྟ་བའི་གནས་ཚུལ་དམན་པ་དང་། །སྤྱོད་པ་བླ་མར་ཕྱིན་པ་ཡི། །འཛིང་ཞིང་འཁྲུགས་པའི་སྐྱོན་ཆེན་པོ། །དག་མཉམ་ཆེན་པོའི་ཀློང་དུ་བཤགས། ཁྱད་པར་བླ་མའི་སྐུ་གསུང་ཐུགས། །ཡོན་ཏན་ཕྲིན་ལས་ཡོངས་རྫོགས་ཀྱི། །ཕྲ་རགས་དམ་ལས་ཉམས་པ་ཀུན། །བསྲུང་དུ་མེད་པའི་ངང་དུ་བཤགས། །རྡོ་རྗེ་མཆེད་ལ་ལོག་པར་བལྟས། །སེམས་ཅན་རྣམས་ལ་བྱམས་པ་སྤངས། ཁས་འཆེ་བ་ཡི་གནས་ལས་ཉམས། །ཐམས་ཅད་མ་ལུས་མཐོལ་ལོ་བཤགས། །ཉམས་ཆགས་སྡིག་སྒྲིབ་ཐམས་ཅད་ཀུན། །མ་སྐྱེས་མ་བྱུང་མཁན་པོའི་སྟོང་། །རང་རིག་གསལ་སྟོང་གཞི་ལ་སངས། །མཁའ་ཀློང་ཡངས་བའི་ངང་དུ་ཧར། །དེ་ལྟར་བཤགས་པའི་མཐུ་བྱིན་གྱིས། །རྣལ་འབྱོར་བདག་ལ་འདིར་རྐྱེན་དང་། །ཡུན་གྱི་སྒྲིབ་པར་མི་འགྱུར་ཞིང་། །དག་ཚངས་ཆེན་པོར་དབུགས་འབྱིན་མཛོད། །ཚངས་པ་ཆེན་པོའི་སྟོབས་ཤུགས་ཀྱིས། །ལམ་ལྔ་ས་བཅུ་མཐར་ཕྱིན་ཅིང་། །བཅུ་གསུམ་རྡོ་རྗེ་འཛིན་པ་རུ། །དབང་འབྱོར་དོན་ཀུན་ལྷུན་གྲུབ་ཤོག །ཁྱད་པར་ཨ་ཏིའི་གསང་ཆེན་གྱི། །སྣང་བཞི་མཐའ་རུ་འཁྱོལ་ནས་ཀྱང་། །ཡེ་ཤེས་བླ་ན་མ་མཆིས་པའི། །གཞོན་ནུ་བུམ་པའི་སྐུ་འགྲུབ་ཤོག །ཆོས་ཀྱི་སྐུ་ཡི་ཕྲིན་ལས་ཀྱིས། །སངས་རྒྱས་མཛད་པ་མཐར་ཕྱིན་ནས། །གང་འདུལ་འགྲོ་ལ་ཕན་པ་ཡི། །མཐའ་ཡས་ལྷུན་གྱི་གྲུབ་གྱུར་ཅིག །ཅེས་བྱས་ལ་ཁྱད་པར་སུན་འབྱིན་སླར་ལྡོག་གི་སེམས་དྲག་པོ་དང་བཅས་པའི་སྒོ་ནས་ཀུན་ཏུ་སྤྱོད་པའི་ལྟ་བ་ཟབ་མོ་དང་རྗེས་སུ་འབྲེལ་བའི་བཤགས་པ་འདི་བརྗོད་པར་བྱས་ན་ཉམས་ཆགས་རྟོག་སྒྲིབ་ཐམས་ཅད་དག་ནས་བྱ་རྩོལ་བྲལ་བ་གདོད་མའི་སར་ཕྱིན་པར་གདོན་མི་ཟའོ། །གལ་ཏེ་ཉེས་པ་ལ་ཉེས་པར་མ་མཐོང་བ་ནི་རྨོངས་ཞེན་གྱི་ཅལ་སྒྲོགས་གི་བཏོན་པ་མ་གཏོགས་སོ། །ཞེས་སྦས་པའི་རྣལ་འབྱོར་ཀོང་སྨྱོན་སྐྱེ་མཐའ་བློ་ལྡན་ཤེས་རབ་ཀྱི་བསྐུལ་བ་ལ་གཞི་བྱས་ནས་རིག་འཛིན་ཆེན་པོ་བདུད་འཇོམས་དཔལ་གྱི་རྡོ་རྗེའི་རིགས་ཀྱི་མྱུ་གུར་སྐྱེ་མིང་ཐོབ་པ་ག་གཱ་ཨ་བྷྱེས་ཆོས་ཉིད་བསམ་གྱིས་མི་ཁྱབ་པའི་གནས་ལ་དད་པ་བརྟན་པའི་མོས་གུས་གསར་བ་དང་བཅས་པའི་རང་གཞན་ལ་ཕན་པའི་བསམ་རྒྱ་ཆེ་བ་བསྐྱེད་ནས་ཁ་ཐང་མཐོ་མཐོ་བྱས་ཀྱང་མཁས་པས་བཞད་གད་བྱེད་པའི་གནས་སུ་ཟད་བསམ་ཡིད་མུག་དང་། ཀུན་བཟང་ཐུགས་ཀྱི་དགོངས་པའི་ཕྱོགས་ལ་སྐལ་བཟང་འཇོག་པ་ལ་ནི་སྤྲོ་བས་བཞེད་པ་དེའི་རྗེས་སུའོ། བཀྲ་ཤིས་དཔལ་གྱི་ས་གསུམ་ཡོངས་ཁྱབ་ཤོག ། ཉམས་ཆགས་བཤགས་པ་དག་བྱེད་བདུད་རྩིའི་རྒྱུན་བཟང་།ཉམས་ཆགས་བཤགས་པ་དག་བྱེད་བདུད་རྩིའི་རྒྱུན་བཟང་བཞུགས་སོ༔ རིགས་བརྒྱའི་ཁྱབ་བདག་བླ་མ་རིན་པོ་ཆེ༔ ཉམས་ཆགས་སྐོང་བའི་དཔང་པོར་བཞུགས་སུ་གསོལ༔ བདག་ནི་བླ་མེད་ཐེག་པའི་སྒོར་ཞུགས་ཀྱང་༔ སྡོམ་གསུམ་དམ་ཚིག་ཉམས་པ་མཐོལ་ལོ་བཤགས༔ སྨོན་འཇུག་ཚུལ་ཁྲིམས་༡གསུམ་ལ་སློབ་པ་དང་༔ རྡོར་དྲིལ་ཕྱག་མཚན་བླ་མ་༢འཛིན་པ་དང་༔ སྦྱིན་པ་རྣམ་བཞི་གཏོང་༣དང་ཐེག་གསུམ་༤དང་༔ ལས་རིམ་འཛིན་སྤངས་༥ཐུན་མོང་དམ་ཉམས་བཤགས༔ སྲོག་གཅོད་མ་བྱིན་ལེན་དང་བུད་མེད་དང་༔ རྫུན་དང་ཤ་ཆང་བརྟེན་པར་གསུང་བ་རྣམས༔ ཇི་བཞིན་ཡིན་མིན་དང་བླང་ཚུལ་མ་འཁྱོངས༔ ཁྱད་པར་རིགས་ལྔའི་དམ་ཚིག་ཉམས་པ་བཤགས༔ བླ་མ་སྨོད་༡དང་བདེ་གཤེགས་བཀའ་༢ལས་འདས༔ མཆེད་ལ་༣མཁུ་ཞིང་བྱམས་༤སྤངས་སྨོན་སེམས་༥བཏང་༔ གྲུབ་མཐའ་༦སྨོད་དང་གསང་༧སྒྲོག་ཕུང་པོ་༨བརྙས༔ དག་ལ་༩ཐེ་ཚོམ་ཞིང་བཅུ་མ་༡༠བསྒྲལ་བཤགས༔ དོན་དམ་བློའི་༡༡འཇལ་དད་ལྡན་སེམས་སུན་༡༢འབྱིན༔ སྐབས་བབས་རྫས་༡༣་སྤངས་བུད་མེད་༡༤ལ་སྨོད་པ༔ རྩ་ལྟུང་བཅུ་བཞི་སྤྱི་དང་བྱེ་བྲག་པ༔ བརྟུལ་ཞུགས་ཉེར་ལྔ་སོགས་ལས་འགལ་བ་བཤགས༔ མ་སྨིན་ཡུམ་༡བརྟེན་ཚོགས་ཀྱི་དུས་སུ་༢རྩོད༔ སྐལ་མེད་བདུད་རྩི་ལེན་༣དང་སྣོད་ལྡན་ལ༔ གསང་སྔགས་མི་༤སྟོན་དད་ལྡན་ཆོས་གཞན་༥སྟོན༔ ཞག་བདུན་ཉན་ཐོས་ནང་བསྡད་༦མཐོལ་ལོ་བཤགས༔ རྫུན་གྱི་རྣལ་འབྱོར་ང་རྒྱལ་༧བྱེད་པ་དང་༔ དད་མེད་ཆོས་འཆད་༨ཕྲ་མོ་བཅོ་ལྔ་སོགས༔ བླ་མེད་ཕྱི་གསང་སྦོམ་པོའི་ལྟུང་བ་རྣམས༔ མི་འཆབ་འགྱོད་སྡོམ་དག་ཚངས་དངོས་གྲུབ་སྩོལ༔ ཨ་ནུའི་(དམ་ཚིག་རྣམ་གྲངས་དགུ་ལས།)ལུས་ངག་ཡིད་སྤྱོད་དག་པ་སྟེ༔ བདེ་གཤེགས་སེམས་ཅན་ཐུགས་ཡིད་མ་ཁྲེལ་བའི༔ གལ་མདོ་ངེས་པའི་དམ་ཚིག་རྣམ་པ་བཞིའི༔ བསྲུང་མཚམས་ཚུལ་བཞིན་རྔོ་མ་ཐོགས་པ་བཤགས༔ ཐུན་མོང་ཉེར་བརྒྱད་(སྐུ་གསུང་ཐུགས་དང་ཡན་ལག་ཉེར་ལྔ་སྟེ།)ལྷག་པའི་དམ་ཚིག་བཞི༔ (མེད་ཕྱལ་གཅིག་པུ་ལྷུན་གྲུབ།)བརྟུལ་ཞུགས་ཉེར་གསུམ་སྒྲུབ་པའི་(ལྷག་པའི་དམ་ཚིག།)ཉི་ཤུ་དང་༔ (སྤྱོད་པ་རྒྱུན་གྱི་དམ་ཚིག་བཞི་ནི་)གཉིད་དང་མྱོས་འགྱུར་སྤངས་དང་བརྡའ་སྐད་སྨྲ༔ ལེ་ལོའི་གཞོམ་དང་བདུད་སྤང་(རྣམ་རྟོག་ལེ་ལོ་འདུ་འཛི་ཚིག་རྩུབ་ཁྲོ་གཏུམ་ལྔའི།)དགྲ་བཞི་བཅོམ༔ (ལྟ་སྒོམ་སྤྱོད་པ་རང་གར་ཤོར་བའི་དགྲ་ལྟ་དམན་སྤྱོད་རྩིང་གི་དགྲ ཉམས་པ་ལྟུང་བའི་དགྲ ཚོད་ཡོད་འབྲས་འཕྲོག་གི་དགྲ) ལྷ་དང་ཞིང་ཁམས་མཆོད་པའི་ཡོ་བྱད་དང་༔ ཉོན་མོངས་ཡེ་ཤེས་ཆེན་པོར་རྟོགས་པ་སྟེ༔ (ལྟ་བའི་དམ་ཚིག་བཞིའོ།།)ཨ་ནུའི་སྤངས་བླང་དམ་ཚིག་འགལ་ཉམས་བཤགས༔ ཨ་ཏིའི་བསྲུང་དུ་ཡོད་པའི་དམ་ཚིག་ནི༔ རྩ་བའི་བླ་མའི་སྐུ་གསུང་ཐུགས་གསུམ་གྱི༔ གཅིག་ལའང་ཕྱི་ནང་གསང་བ་གསུམ་གསུམ་དགུར༔ རྣམ་པར་ཕྱེ་བའི་ཉི་ཤུ་རྩ་བདུན་ཏེ༔ (སྐུ་ཡི་ཕྱི་ཡི་ཕྱི་ནང་གསང་བ་གསུམ།)མ་བྱིན་ལེན་༡དང་མི་ཚངས་སྤྱོད་༢སྲོག་༣གཅོད༔(སྐུ་ཡི་ནང་གི་ཕྱི་ནང་གསང་གསུམ་དུ།) ཕ་མ་སྤུན་སྲིང་༡ཆོས་དང་གང་ཟག་༢སྨོད༔ རང་ལུས་བརྡེགས་བཙོག་༣བརྙས་དང་གདུང་བྱས་ཤིང་༔(སྐུ་ཡི་གསང་བའི་ཕྱི་ནང་གསང་གསུམ་ནི།)རྡོ་རྗེའི་སྤུན་སྲིང་༡བརྡེག་གམ་བརྡེག་གཟས་ཤིང་༔ རྒྱན་ལ་སྨོད་དང་༢བླ་མའི་ཡུམ་ལ་གཙེས༔ བླ་མའི་གྲིབ་འགོང་༣སྤྱན་སྔར་ལུས་ངག་གིས༔ སྤྱོད་པ་བག་མེད་བགྱིས་པ་མཐོལ་ལོ་བཤགས༔(གསུང་གི་ཕྱི་ཡི་ཕྱི་ནང་གསང་བ་གསུམ།)རྫུན་དང་༡ཕྲ་མ་༢ཚིག་རྩུབ་༣སྨྲས་པ་དང་༔(གསུང་གི་ནང་གི་ཕྱི་ནང་གསང་བ་ལ།)ཆོས་སྨྲ་༡དོན་སེམས་༢སྒོམ་ལ་སྐུར་བཏབ་༣དང་༔(གསུང་གི་གསང་བའི་ཕྱི་ནང་གསང་གསུམ་དུ།)རྡོ་རྗེ་སྤུན་སྲིང་༡བླ་མའི་ཕྱག་རྒྱ་༢ འཁོར༔ བླ་མའི་གསུང་༣རྣམས་བརྙས་ཤིང་གཅོག་པ་བཤགས༔(ཐུགས་ཀྱི་ཕྱི་ཡི་ཕྱི་ནང་གསང་བ་གསུམ།)གནོད་སེམས་༡བརྣབ་སེམས་༢ལོག་པར་ལྟ་༣བ་ཤོར༔(ཐུགས་ཀྱི་ནང་གི་ཕྱི་ནང་གསང་བ་ལ།) སྤྱོད་ལོག་༡ཐོ་ཅོ་བསྒོམ་ལོག་༢གོལ་སྒྲིབ་འཁྲུལ༔ ལྟ་ལོག་༣རྟག་ཆད་མཐའ་རུ་འཛིན་བྱས་ཤིང་༔(ཐུགས་ཀྱི་གསང་བའི་ཕྱི་ནང་གསང་བ་ལ།)ཉིན་བཞིན་ལྟ་བསྒོམ་སྤྱོད་༡གསུམ་ཡི་དམ་ལྷ༔ བླ་མའི་རྣལ་འབྱོར་༢རྡོ་རྗེའི་མཆེད་ལྕམ་༣ལ༔ བརྩེ་གདུང་ཡིད་ལ་མ་བྱས་མཐོལ་ལོ་བཤགས༔ གནས་ལུགས་འདུག་ཚུལ་མེད་པའི་རང་བཞིན་བཅུ༔ སྤྲོས་བྲལ་རྣམ་ཐར་གསུམ་ལྡན་ཕྱལ་བ་དང་༔ འབྲས་ཆོས་ཉེར་(སྐུ་ལྔ། གསུང་ལྔ། ཐུགས་ལྔ། ཡོན་ཏན་ལྔ། ཕྲིན་ལས་ལྔ།)ལྔ་དབྱེར་མེད་ལྷུན་གྲུབ་པའི༔ རིག་པ་གཅིག་པུའི་ངང་ལ་འཁྱོངས་པ་བཤགས༔ ཏན་༡གན༢་མ་བྱིན་༣ལེན་རྫུན་༤ངག་འཁྱལ་སྤྱད༔ དུག་ལྔ་༥མི་སྤངས་ཕུང་པོ་༡འབྱུང་༢ཡུལ་༣དབང་༤༔ ཁ་དོག་༥ ལྷ་རུ་ཤེས་བྱ་རིགས་༥ལྔ་སྒྲུབ༔ བདུད་རྩི་དང་ལེན་དགག་སྒྲུབ་ཚུལ་ཉམས་བཤགས༔ དེ་ལྟར་གསང་སྔགས་རྩ་བ་ཡན་ལག་གི༔ དམ་ཚིག་ཉམས་ཆགས་ཉེས་ལྟུང་ཐམས་ཅད་ཀུན༔ རང་གནོང་འགྱོད་པས་མཐོལ་བཤགས་སླན་ཆད་སྡོམ༔ དག་ཚངས་མཆོག་ཐུན་དངོས་གྲུབ་བསྩལ་ཏུ་གསོལ༔ ཅེས་པ་འདི་ཡང་རང་དང་སྐལ་བ་མཉམ་པ་འགའ་ཞིག་ལ་ཕན་འདོད་ཀྱི་ལྷག་བསམ་དང་བཅས་ཏེ་ཆོ་འཕྲུལ་ཟླ་བའི་དམར་ཕྱོགས་ཀྱི་མཁའ་འགྲོ་འདུ་བའི་ཚེས་ལ་རྨོངས་པ་རྡོལ་སྤྱོད་མཁན་ག་ག་ཨ་བྷྱེས་མདོར་བསྡུས་ལ་ཁ་གསལ་བ་བསྔོ་བསྒྲངས་བྱེད་རྒྱུར་སྡེབ་སྦྱོར་གྱི་སྤྲོས་པ་བསྐྱུང་ནས་དོན་ལ་རྟོན་པ་སྔ་འགྱུར་གྱི་ཁྱད་ཆོས་བླ་ན་མེད་པའི་རྗེས་སུ་སྨྲས་པ་དགེའོ། །དགེའོ། །དགེའོ། །སརྦ་མངྒ་ལཾ། ། ཉམས་ཆགས་བཤགས་པའི་ལུང་བྱང་བསྡུས་པ་རྣམ་གྲོལ་སྙིང་ནོར།ཉམས་ཆགས་བཤགས་པའི་ལུང་བྱང་བསྡུས་པ་རྣམ་གྲོལ་སྙིང་ནོར་བཞུགས་སོ༔ ཧོ༔ དཀྱིལ་འཁོར་རྒྱ་མཚོའི་ཁྱབ་བདག་འཁོར་བཅས་དགོངས༔ སྐུ་ལ་ཕྱི་ནང་གསང་བ་རྣམ་གསུམ་ལས༔ ཕྱི་ལའང་ནི་ཕྱི་ནང་གསང་བ་སྟེ༔ བརྐུ་དང་མི་ཚངས་སྲོག་གཅོད་མཐོལ་ལོ་བཤགས༔ སྐུ་ཡི་ནང་གི་ཕྱི་ནང་གསང་བ་གསུམ༔ སྤུན་སྲིང་རང་ལུས་སྨོད་དང་ཆོས་དང་ནི༔ གང་ཟག་སྨོད་པ་རང་ལུས་དཀའ་ཐུབ་བརྙས༔ བརྡེག་གམ་བཙོག་པ་ཐམས་ཅད་མཐོལ་ལོ་བཤགས༔ སྐུ་ཡི་གསང་བའི་ཕྱི་ནང་གསང་བ་རུ༔ སྤུན་སྲིང་བརྡེག་གཟས་རྒྱན་ལ་སྨོད་པ་དང་༔ མཆེད་བརྡེག་བླ་མ་མཆེད་ཀྱི་ཡུམ་ལ་སྤྱོད༔ བླ་མའི་གྲིབ་འགོམ་སྒོ་གསུམ་མ་བསྡམ་བཤགས༔ གསུང་ལ་ཕྱི་ནང་གསང་བ་རྣམ་པ་གསུམ༔ ཕྱི་ལ་ཡང་ནི་ཕྱི་ནང་གསང་གསུམ་སྟེ༔ རྫུན་དང་ཕྲ་མ་ཚིག་རྩུབ་རྣམ་པ་གསུམ༔ སྨྲས་པ་ཐམས་ཅད་དུས་འདིར་མཐོལ་ལོ་བཤགས༔ གསུང་གི་ནང་གི་ཕྱི་ནང་གསང་བ་གསུམ༔ ཆོས་ཀྱི་ཚིག་སྨྲ་ཆོས་ཀྱི་དོན་ལ་བསམ༔ གནས་ལུགས་སྒོམ་ལ་གཤེ་སྐུར་མི་འདེབས་པའི༔ དམ་ཚིག་དེ་དག་འགལ་འཁྲུལ་མཐོལ་ལོ་བཤགས༔ གསུང་གི་གསང་བའི་ཕྱི་ནང་གསང་བ་རུ༔ རྡོ་རྗེའི་སྤུན་སྲིང་དེ་བཞིན་བླ་མའི་ཡུམ༔ ཉེ་འཁོར་བཅས་པའི་ཚིག་དང་བླ་མ་ཡིས༔ གསུང་ལ་བརྙས་པ་ཐམས་ཅད་མཐོལ་ལོ་བཤགས༔ ཐུགས་ལ་ཕྱི་ནང་གསང་བ་རྣམ་པ་གསུམ༔ ཐུགས་ཀྱི་ཕྱི་ལའང་ཕྱི་ནང་གསང་བ་ལས༔ གཞན་ཡང་བླ་མའི་ནོར་ལ་བརྣབ་སེམས་བྱས༔ སྤྱི་ལ་གནོད་སེམས་ལྟ་བསྒོམ་ལོག་ལྟ་བཤགས༔ ཐུགས་ཀྱི་ནང་ལ་ཕྱི་ནང་གསང་བ་སྟེ༔ སྤྱོད་པ་བག་མེད་བསྒོམ་པ་བྱིང་རྒོད་གྱུར༔ ལྟ་བ་ཡོད་མེད་མཐའ་རུ་ཞེན་པ་ཀུན༔ ཐམས་ཅད་མ་ལུས་དུས་འདིར་མཐོལ་ལོ་བཤགས༔ ཐུགས་ཀྱི་གསང་བའི་ཕྱི་ནང་གསང་གསུམ་རུ༔ ཉིན་མཚན་གཅིག་ལ་ལྟ་བསྒོམ་ཡིད་མི་བྱེད༔ ཡི་དམ་མི་བསྒོམ་བླ་མའི་རྣལ་འབྱོར་དང་༔ མཆེད་ལྕམ་བརྩེ་གདུང་སྤང་བ་མཐོལ་ལོ་བཤགས༔ གཞན་ཡང་བསྲུང་མེད་ཡན་ལག་དང་བཅས་པ༔ རྫོགས་ཆེན་དམ་ཚིག་ཉམས་ཆགས་ཐམས་ཅད་ཀུན༔ མི་འཆབ་གནོང་འགྱོད་མཐོལ་བཤགས་སླན་ཆད་སྡོམ༔ དག་ཚངས་མཆོག་གི་དངོས་གྲུབ་བསྩལ་ཏུ་གསོལ༔ ཞེས་ཀྱང་རང་སློབ་རྣམས་ཀྱི་ངོར་བསྔོ་བསྒྲང་བྱེད་རྒྱུར་གོ་སླ་བ་ག་གཱས་སོ། ། ༈ དཀྱིལ་འཁོར་གསུམ་དང་མི་འབྲལ་བ༔ འདི་ནི་རྩ་བའི་དམ་ཚིག་གོ༔ དཀོན་མཆོག་རྟག་ཏུ་མཆོད་བཀུར་བྱ༔ སློབ་དཔོན་མི་སྨོད་མཆེད་མི་འཁྲོ༔ སེམས་ཅན་འཚེ་སྤངས་བྱམས་པ་བསྒོམ༔ མི་དགེ་བཅུ་སྤངས་དགེ་བཅུ་སྤྱོད༔ ཕ་མ་བཀུར་དང་གསང་མི་འཆོལ༔(ཆེན་པོ་བརྒྱད།)དམ་ཚིག་བསྲུང་དུ་ཡོད་པའོ༔ མེད་དང་ཕྱལ་བ་ཁྲེགས་ཆོད་དང་༔ གཅིག་པུ་ལྷུན་གྲུབ་ཐོད་རྒལ་གྱི༔ བསྲུང་མེད་དམ་ཚིག་རྣམ་པ་ལ༔ འགལ་ཉམས་རལ་བ་མཐོལ་ལོ་བཤགས༔ དག་ཚངས་མཆོག་གི་དངོས་གྲུབ་སྩོལ༔ ཡིག་བརྒྱ་ཅི་ནུས་འདོན༔ རྫོགས་ཆེན་དམ་ཚིག་ཉམས་ཆགས་ཀུན༔ བཤགས་ཐབས་ག་ག་ཨ་བྷྱེའི་བྲིས༔ དྷརྨའི་མཚན་གྱི་བཞེད་སྐོང་ངོ་༔ ༈ ཀྱཻ༔ དཀྱིལ་འཁོར་དབང་ཕྱུག་བླ་མ་རྗེ༔ བདག་ནི་མ་རིག་ཉོན་མོངས་ཀྱི༔ སྐུ་གསུང་ཐུགས་ཀྱི་དམ་ཚིག་ལ༔ འགལ་འཁྲུལ་ནོངས་བ་མཐོལ་ལོ་བཤགས༔ དབང་བཞི་ཕྱི་ཡི་དམ་ཚིག་དང་༔ གསང་བ་ནང་གི་ཁྱད་པར་བ༔ ཨ་ཏི་བླ་མེད་དམ་ཚིག་ཀུན༔ མ་གུས་བག་མེད་ཉམས་ཆགས་བཤགས༔ སྤྱི་ཏི་ཀ་དག་རྣལ་འབྱོར་དང་༔ ཡང་ཏི་ཐིག་ལེ་མཐོང་བརྟོལ་ཆེ༔ བཀའ་དྲིན་ཁྱད་བསད་བསླབ་ལ་འགོང་༔ བསྲུང་མེད་རྒྱ་ལས་འདས་པ་བཤགས༔ རང་བྱུང་བདེ་བ་ཆེན་པོ་ལ༔ སྡུག་བསྔལ་འཁོར་བར་བལྟས་པ་བཤགས༔ རང་གྲོལ་རྡོ་རྗེ་སྙིང་པོ་ལ༔ ཀུན་ཉོན་དྲི་མར་གོལ་བ་བཤགས༔ ཁྱབ་བརྡལ་ཡེ་ཡོད་ཀུན་ཏུ་བཟང་༔ རང་ངོ་མ་ཤེས་ནོངས་པ་བཤགས༔ རྣལ་འབྱོར་འགྱོད་ཚངས་ཡང་དག་གིསཿ ཁམས་གསུམ་འཁོར་བ་སྟོང་གྱུར་ཅིག༔ ཅེས་མཐར་པདྨའི་ཡིག་བརྒྱ་བཟླ༔ ཅེས་ཀྱང་ཤྲཱི་ངན་ནས་སོ། ། རྩ་ལྟུང་བཅུ་བཞི་བཤགས་པ་ཉི་མའི་འོད་ཟེར།༈ རྩ་ལྟུང་བཅུ་བཞི་བཤགས་པ་ཉི་མའི་འོད་ཟེར་བཞུགས༔ འགྱོད་པ་དྲག་པོའི་སྤྱི་བོ་རུ༔ བླ་མ་རྡོ་རྗེ་སེམས་དཔའ་བསྒོམ༔ སྟོབས་བཞི་ལྡན་པས་འདི་སྐད་དོ༔ ཀྱཻ་མ༔ བླ་མ་སྨོད་དང་བདེ་གཤེགས་བཀའ་ལས་འདས༔ མཆེད་ལ་འཚེ་ཞིང་བྱང་སེམས་བཏང་པ་དང་༔ བསམ་བཞིན་ཁུ་བ་འབྱིན་ཅིང་གྲུབ་མཐའ་སྨོད༔ མ་སྨིན་གསང་བ་སྒྲོག་པ་མཐོལ་ལོ་བཤགས༔ ཕུང་པོ་ཡེ་སངས་རྒྱས་ལ་ཐེ་ཚོམ་བརྙས༔ ཞིང་བཅུ་མི་སྒྲོལ་ཆོས་ཉིད་བློས་གཞལ་དང་༔ སྣོད་ལྡན་སློབ་མ་དུས་བབས་དམ་རྫས་སྤངས༔ ཤེས་རབ་བུད་མེད་སྨོད་པ་མཐོལ་ལོ་བཤགས༔ འཁོར་འདས་མཉམ་ཉིད་སྐྱེ་མེད་ཀ་དག་ལ༔ རྨི་ལམ་ལྟ་བུར་ཉམས་དང་བསྲུང་བའི་ཚུལཿ འགལ་འདས་རལ་དང་ཚུལ་ཁྲིམས་མཆོག་འཛིན་ཀུན༔ ཡེ་གྲོལ་ཕྱག་རྒྱ་ཆེན་པོ་འདའ་དཀའོ༔ ས་མ་ཡཱ༔ ཨ་ཀཾ་ཀ་ཤུདྡྷེ་སྭཱ་ཧཱ༔ ཅེས་ཀྱང་རང་གཞན་ཀུན་ལ་བསྔོ་བསྒྲང་རྒྱུར༔ ལེ་ལོའི་དབང་བྱས་ག་གཱའི་མིང་གིས་བསྡུས༔ དགེ་བས་འགྲོ་ཀུན་རྡོ་རྗེ་འཆང་ཐོབ་ནསཿ འཁོར་བ་དོང་སྤྲུགས་རྣལ་འབྱོར་ཆེན་པོ་ཤོག༔ ༈ ཡང་ན་བཤགས་པ་བྱ་བ་ནི༔ ཧཱུྃ༔ བཅོམ་ལྡན་སྐུ་གསུམ་ངོ་བོར་བྱང་ཆུབ་པའི༔ སྡེ་སྣོད་བཞི་ལས་གནང་བཀག་ཡང་དག་མཐའ༔ སྤྱི་དང་ཁྱད་པར་ལྷག་པས་བསྡུས་སོ་འཚལ༔ བསླབ་སྡོམ་དམ་ཚིག་ཉམས་པ་མཐོལ་ལོ་བཤགས༔(འདུས་པའི།)རིགས་ལྔ་དང་ནི་དགོངས་ཏེ་གསུང་བ་བཞི༔ ཐུན་མིན་བརྒྱད་དང་(བདེ་མཆོག)གཡོན་གྱི་ཀུན་སྤྱོད་བརྒྱདཿ བསྒྲུབ༥་བྱ་བཅུ་(གུར་ལས།)བཞི་སྤྱོད་པ་རྣམ་པ་(མངོན་རྫོགས་བླ་མ།)དགུ༔ དུས་ཀྱི་འཁོར་ལོའི་བསྲུང་བྱ༥་བྱ་༥མིན་དང་༔ གསོད་༥དང་འཁུ་༥དང་ཞེན་༥པ་ལྔ་ལྔ་སྟེ༔(སམྦུ་ཊིའི།)དྲོད་ཐོབ་བརྟུལ་ཞུགས་དྲུག་དང་ལུང་(ཨ་ནུ།)ཆེན་གྱི༔ བརྟུལ་ཞུགས་ཆེན་པོ་ཉི་ཤུ་རྩ་གསུམ་སྟེ༔ དགུ་བཅུ་རྩ་དྲུག་ཉམས་པ་མཐོལ་ལོ་བཤགས༔ སྡོམ་པ་ཐུན་མོང་རིགས་དྲུག་ཐུན་མིན་དྲུག༔ དམ་ཚིག་རྩ་ལྟུང་བཅུ་བཞི་སྦོམ་པོ་དགུའི༔ ཚངས་སྤྱོད་ཉེར་(བདེ་མཆོག་ལས།)གསུམ་ཕྲིན་ལས་བཅོ་ལྔ་དང་༔ དེ་ཡི་ཡན་ལག་བདུན་དང་ཉེས་པ་དྲུག༔ ཡན་ལག་ལྟུང་བ་བཞིར་བཅས་ཉི་ཤུ་དྲུག༔ དབང་བཞིའི་མཉམ་༤བཞག་རྗེས་༤སྤྱོད་བཟའ་༤དང་བསྲུང་༤༔ མི་འབྲལ་༤དམ་ཚིག་ཉམས་པ་མཐོལ་ལོ་བཤགས༔ མདོ་༩སྒྱུ་༥སེམས་༡༧ཀྱི་དམ་ཚིག་རྩ་བ་དང་༔ ཡན་ལག་ཉེར་ལྔ་མེད་དང་ཕྱལ་བ་དང་༔ གཅིག་པུ་དང་ནི་ལྷུན་གྱིས་གྲུབ་པ་ཡི༔ བསྲུང་དུ་ཡོད་དང་མེད་པ་ཐམས་ཅད་དང་༔ ལྷག་པའི་དམ་ཚིག་ཉི་ཤུ་རྩ་གཉིས་སོགས༔ བསྲུང་སྡོམ་སྤང་བྱའི་བསྡུས་པ་ཐམས་ཅད་གང་༔ འགལ་ཉམས་རལ་འདས་གྱུར་བ་ཇི་སྙེད་པ༔ མི་འཆབ་མི་སྦེད་སྙིང་ནས་མཐོལ་ཞིང་བཤགས༔ མི་སྒྲིབ་ཚངས་པ་མཆོག་གི་དངོས་གྲུབ་སྩོལ༔ ཡི་གེ་བརྒྱ་པ་ཅི་ནུས་བཟླ༔ དམ་ཚིག་བཤགས་པའི་ལུང་བྱང་འདི། །སློབ་བུ་ཐུབ་བསྟན་སྨོན་ལམ་གྱིས། །ཡང་དང་ཡང་དུ་བསྐུལ་བ་ལས། །ག་ག་ཨ་བྷྱེས་སྨྲས་པའོ། །མངྒ་ལཾ། ། ༈ འཁོར་འདས་ཕྱི་ནང་ཐམས་ཅད་ཀུན༔ དཀར་དམར་རླུང་གི་སྒྱུ་འཕྲུལ་ཏེ༔ རྩ་བ་སྐུ་གསུང་ཐུགས་སུ་མཉམ༔ སྨན་གཏོར་རཀྟ་རྨད་དུ་བྱུང་༔ མ་རིག་པ་ཉིད་ཡེ་ཤེས་གསལ༔ སྒྲོན་མ་རང་མདངས་གཟི་བརྗིད་ཆེ༔ ཁྱབ་ཆེན་སྟོང་པའི་མཐར་འཛིན་གཅོད༔ ལྟ་བ་སྤྱི་བཅིང་མཆོད་པས་བསྐངས༔ འཁོར་བ་ཡུལ་མེད་ཟང་ཐལ་གྱི༔ དགོངས་ཀློང་མངོན་གྱུར་དངོས་གྲུབ་སྩོལ༔ ག་གཱས་སོ། །དགེའོ། ། བསམ་བཞིན་ཁུ་འབྱིན་གྱིས་ཉེས་ལྟུང་སོར་ཆུད་པར་བྱེད་པ་སྒྲོན་མ་སོར་བཞུགས།༈ ཡེ་ཤེས་སྒྱུ་འཕྲུལ་དྲྭ་བ་ལས༔ བསམ་བཞིན་ཁུ་འབྱིན་གྱིས་ཉེས་ལྟུང་སོར་ཆུད་པར་བྱེད་པ་སྒྲོན་མ་སོར་བཞུགས་ཞེས་བྱ་བ་བཞུགས་སོ༔ འདི་བཞིན་བཟླས་པའི་སྔགས་ཀྱིས་རབ་བླ་མའི་བྱང་སེམས་མིན་ཀྱང་བདུད་རྩི་ཆོས་སྨན་ལ་སྔགས་ནས་བཟའ་བར་བྱ་སྟེ༔ ཡང་ན་ཐོད་རྒལ་གྱི་ཁམས་གསོ་ཐབས་ཀྱི་རྫས་རྣམས་ཀྱང་རུང་ངོ་༔ ཨོཾ་བཛྲ་གུ་རུ་སརྦ་ཏི་ལ་ཀ་ས་མ་ཡ་ཤུདྡྷེ་བི་ཤུདྡྷེ་ཨཿཧཱུྃ༔ སརྦ་སིདྡྷི་ཕ་ལ་ཧཱུྃ༔ ཅེས་འབུམ་ཐེར་གཅིག་དང་༔ ཨོཾ་བཛྲ་ས་ཏྭ་ཨ་ཧཱུྃ༔ ཅེས་པ་འབུམ་ཐེར་གཅིག་བཅས་ཏེ་ཉ་༥སྟོང་༤དགུ་ནང་དུ་ལོན་པར་བྱས་ཏེ་བཟླས་ན་སོར་བྱང་སྔགས་གསུམ་གྱི་དམ་སྡོམ་བསླབ་གསུམ་ལས་དངོས་སུ་ཉམས་པའི་ཉེས་ལྟུང་དག་ནས་སྡོམ་པ་སོར་ཆུད་པར་འགྱུར་རོ༔ ཅེས་ཀྱང་ག་གཱས་སོ། ། ༈ བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སེང་གེའི་གདོང་ལ་ཕྱག་འཚལ་ལོ༔ མཆོད་དོ་སྐྱབས་སུ་མཆིའོ༔ ན་མོ་རཏྣ་ཏྲ་ཡཱ་ཡ༔ ན་མོ་བྷ་ག་ཝཱ་ཏེ་སངྷེ་ཤྭ་ར་རཱ་ཛཱ་ཡ༔ ཏ་ཐཱ་ག་ཏ་ཡ༔ ཨོཾ་ས་ཏྭ་སརྦ་མཾ་ས་དུརྒ་ཏེ་ཚིནྡྷ་ཚིནྡྷ་ས་ཙ་རཏྣ་མོ་དྲན་ན༔ པ་ཙ་པ་ཙ་ཨེ་དུན་དཱ་ཀ་ཡ་སྭ་ཧཱ༔ ཅེས་དང་ཉི་ཤུ་རྩ་གཅིག་བཟླས་པས་ཤ་ཟོས་པའི་སྡིག་སྒྲིབ་མི་འབྱུང་ཞིང་སེམས་ཅན་དེ་ལ་ཡང་སྨན་པར་འགྱུར་རོ༔ དེ་སྐད་དུ་ཡང་ཕྱུག་དྷིས་ཀྱིས་ངོར་ག་གཱས་སོ༑ ༑དགེའོ། ། ཉམས་ཆགས་རྟོག་སྒྲིབ་རང་ངོ་སྤྲོད་པ་ཀུན་བཟང་དགོངས་རྒྱན།༈ ཉམས་ཆགས་རྟོག་སྒྲིབ་རང་ངོ་སྤྲོད་པ་ཀུན་བཟང་དགོངས་རྒྱན་བཞུགས་སོ། ། གསང་སྔགས་ཀྱི་དམ་ཚིག་གི་རྩ་བ་དང་ཡན་ལག་གང་རུང་རང་དང་ཟླས་ཞར་གྱིས་ཉམས༵་པ་དང༌། སྔགས་གསུམ་ཕྱག་རྒྱ་བཞི་ལྡན་གྱི་ཆོ་ག་རྒྱུན་མི་བཅད་པར་གསུངས་པ་དང༌། ཚོགས་དང་གཏོར་མ་པྲ་ཏི་ཧ་ན་དུས་ཀྱི་མཆོད་པ་ཆ༵གས་པ་དང༌། ཆོས་ཉིད་སྤྲོས་པ་དང་བྲལ་བའི་གནས་ལུགས་དང༌། ཆོས་ཅན་རྣམ་དག་གི་དཀྱིལ་འཁོར་ཆེན་པོ་གཙང་བདེ་བདག་རྟག་གི་རང་བཞིན་ཅན་ལ། མ་རིག་གཉིས་འཛིན་གྱི་རྟོག༵་པ་ཕྱིན་ཅི་ལོག་གི་དབང་གིས། མ་དག་པའི་ཕུང་ཁམས་སྐྱེ་མཆེད་དུ་འཁྲུལ་བའི་སེམས་ཅན་གྱི་རྣམ་པར་སྨིན་པའི་ཆོས་ལ་གཙང་བདེ་བདག་རྟག་ཏུ་འཛིན་པས་སྒྲིབ༵་པ་དང༌། ཡང་གྲུབ་མཐའ་ངན་པས་བློ་བཅོས་ནས། དོན་དམ་པའི་སྐུ་དང་ཡེ་ཤེས་དག་པ་ཆེན་པོའི་དཀྱིལ་འཁོར་ལ་མི་གཙང་བ་དང༌། མི་རྟག་པ་དང༌། ཡེ་ཤེས་ཡོད་ན་བདག་ཏུ་འགྱུར་སྙམ་ནས་བདག་མེད་པ། ཟག་བཅས་སྡུག་བསྔལ་དུ་ལྟ་བའི་རྟོག༵་སྒྲིབ༵་ཀྱིས་བསྒྲིབ་ནས་སྔགས་གི་ལྟ་བ་ལ་སྒྲོ་སྐུར་གྱིས་གཡེངས་བ་དང༌། རྣལ་འབྱོར་ཅན་འཁྱེར་སོའི་གདེངས་དང་བྲལ་ནས་ཐ་མལ་དུ་གཡེངས་པའི་རྟོག༵་སྒྲིབ༵་ཀྱིས་དམ་ཚིག་ཉམས་པའོ། །ཡང་ཁམས་གསུམ་གྱི་སེམས་དང་སེམས་བྱུང་གི་རྟོག༵་པས་སྐུ་དང་ཡེ་ཤེས་ལ་སྒྲིབ༵་པའང་ཡིན་ནོ། །ལས་ངན་ནི། སེམས་པ་ཡིད་དང་བསམ་པ་ལུས་ངག་གི་སྒོ་ནས། དགེ་མི་དགེ་མི་གཡོ་བའི་ལ༵ས་གསུམ་སོགས་པ་ནི་ལས་ང༵ན་པ་ཡིན་ཏེ། འཁོར་བར་འཆིང་བྱེད་ཀྱི་རྒྱུར་གྱུར་པའི་སྡུག་བསྔལ་གསུམ་གྱི་དམ་ལ་མ་བཏགས་པའི་འཁོར་བ་མེད་པས་སོ། །སྡི༵ག་པ་ནི་མི་དགེ་བ་བཅུ་ལ་སོགས་པ་དང༌། སྒྲིབ༵་པ་ནི་ཉོན་མོངས་ཤེས་བྱ་སྙོམ་འཇུག་གི་སྒྲིབ་པ་དང༌། སད་རྨི་གཉིད་འཐུག་སྙོམས་འཇུག་དང༌། བག་ཆགས་ནི་ཀུན་གཞི་ལ་དགེ་སྡིག་དང་མི་གཡོ་བའི་ལས་དང༌། གཞན་ཡང་གནས་དོན་ལུས་གསུམ་གྱི་བག་ཆགས་བསྒོས་པས། ཕྱི་ནས་རྣམ་པར་སྨིན་པའི་ས་བོན་དུ་གྱུར་བ་ཡིན་ནོ་སྙམ་མོ། ད་ངོ་སྤྲད་ན་ཉམས་ཆགས་སྡིག་སྒྲིབ་ལས་ངན་རྣམས་ནི་གཞི་ནས་མ་སྐྱེས་པ་དང༌། སངས་རྒྱས་ཀྱི་ཕྲིན་ལས་བྱ་བ་གྲུབ་པའི་ཡེ་ཤེས་ལ་བདག་ཏུ་བཟུང་ནས་འཁྲུལ་བ་ཡིན་པས་ངོ་བོ་དེ་ཡིན་པ་དང༌། ཚོགས་བརྒྱད་ཡེ་ཤེས་ལྔར་རང་གྲོལ་བའི་ཚུལ་ཤེས་ནས། དཀྱིལ་འཁོར་གསུམ་གྱི་འཁྱེར་སོ་དང་མི་འབྲལ་བའི་ཉམས་ལེན་གྱིས་འཁོར་བའི་ཆོས་ཁམས་རྣམ་པར་དག་པའི་འབྲས་བུས་མཆོག་མངོན་དུ་གྱུར་བ་ནི་འབྲས་བུ་གཞི་ལ་གྲུབ་པའི་གནད་ཀྱིས་སོ། ཞེས་ཀྱང་ག་གཱ་ནས་ངག་འཁྱལ་འབྲེལ་མེད་འོལ་ཚོད་ཀྱི་གཏམ་མ་རང་བ་འགའ་ལ་ཉམས་ལྟས་ཀྱི་ཚུལ་དུ་སྨྲས་པའོ། །དགེའོ། །དགེའོ། །དགེའོ། །ཞེས་སོ། །སརྦ་མངྒཱ་ལཾ། ། ༈ རྩ་བའི་དམ་ཚིག་གསུམ་དང༌། ཡན་ལག་ཆེན་པོ་བརྒྱད་དང༌། ཕྲ་མོ་བཅོ་ལྔའི་བསྲུང་མཚམས་ཀྱི་མདོ་བཞུགས་སོ༑ ༑ཁྱེར་སོའམ་དཀྱིལ་འཁོར་གསུམ་དང་མི་འབྲལ་བ་ནི་རྩ་བའི་དམ་ཚིག་མདོར་བསྡུས་པ་ཡིན་ལ། དཀོན་མཆོག་གསུམ་ལ་མཆོད་བཀུར་རྒྱུན་མི་བཅད། སློབ་དཔོན་མི་སྨད། མཆེད་ལ་མི་འཁྲོ། སེམས་ཅན་ལ་མི་འཚེ་ཞིང་བྱམས་པ་བསྒོམ། མི་དགེ་བཅུ་སྤང༌། དགེ་བཅུ་བསྒྲུབ། ཕ་མ་བཀུར། གསང་བ་མི་འཆལ་ལོ། ཕྲ་མོ་བཅོ་ལྔ་ནི། དཀོན་མཆོག་གསུམ་དང༌། རྩ་གསུམ་ལ་མཆོད་པ་སྟེ་དྲུག བུ་མེད་ལ་མི་སྨོད། མཆེད་ལ་མི་འཁྲོ། ཕུང་བོ་མི་སྨད། ཡི་དམ་གྱི་ལྷ་དང༌། སྔགས་དང༌། ཕྱག་རྒྱ་བརྟེན་པ་དང༌། དད་ཅན་གྱི་ཚོགས་མི་བཅག དགེ་ལྡན་གྱི་སེམས་མི་སྐྲུག སྡོམ་དང་དམ་ཚིག་ལ་གནས་པ་སྟེ་བཅོ་ལྔའོ། །དེ་ཆེན་པོ་བརྒྱད་ལ་བསྡུ་ཚུལ་ཀྱང༌། དཀོན་མཆོག་ཕྱི་ནང་ངོ་བོ་དབྱེར་མེད་ལ། གྲོགས་མཆེད་ནི་དགེ་འདུན། ཕུང་པོ་དང་སྔགས་ནི་ལྷ་ཡིན་ལ། བུ་མེད་དང་ཕྱག་རྒྱ་ནི་མཁའ་འགྲོར་འདུ། ཚོགས་ནི་དགེ་བཅུ། སེམས་མི་སྐྲུག་པ་ནི་མི་དགེ་སྤང་བ་ལ་འདུའོ། །འདི་བསྲུང་བས་དམ་ཚིག་ཐམས་ཅད་རྣམ་པར་དག་གོ །འདི་ཡང་ག་གཱས་སོ། ། ༈ ཕྲ་མོ་བཅོ་ལྔ་ནི། དཀོན་མཆོག་གསུམ་དང་རྩ་བ་གསུམ་ལ་ཚོགས་མཆོད་རྒྱུན་མི་བཅད་པ་རྣམ་པ་དྲུག་དང༌། བུད་མེད་མི་སྨད་ཅིང་ཁྲོ་བར་མི་བྱ་ཕུང་པོ་མི་སྨད་དཀྱིལ་འཁོར་དང་ཡི་དམ་སྔགས་བཟླ་ཕྱག་རྒྱ་བཞི་ལྡན་བརྟེན་པ་དང༌། དད་པ་ཅན་གྱི་ཚོགས་གཉིས་མི་བཅག དགེ་ལྡན་གྱི་སེམས་མི་དཀྲུག་སོ། །བྱང་སོགས་སྡོམ་པ་དང༌། གསང་སྔགས་ཀྱི་དམ་ཚིག་ལ་གནས་པར་བྱའོ། །དེ་ཆེན་པོ་བརྒྱད་ལ་འདུས་ཚུལ་ནི། དཀོན་མཆོག་གསུམ་དང་བླ་མ་དང་མཆེད་རྣམས་ནི་ངོ་བོར་བསྟན་ལ། ཡི་དམ་དཀྱིལ་འཁོར་ཕུང་པོ་མཁའ་འགྲོ་རྣམས་དཀོན་མཆོག་གསུམ་ལ་འདུས། ཕྱག་རྒྱ་ཡང་དེར་འདུས། ཚོགས་མི་བཅག་པ་ནི་དགེ་བཅུར་འདུས་ལ༑ སེམས་མི་དཀྲུག་པ་མི་དགེ་བཅུ་སྤོང་ལ་འདུས་པ་ཡིན་ནོ། །ཞེས་ཀུན་མཁྱེན་གྱི་གསུང་གི་གནད་བསྡུ་ན་དེ་ལྟར་ལ། ཁོ་བོ་ནི། སྡོམ་དང་དམ་ཚིག་ནི་མི་དགེ་བཅུ་དང་དགེ་བཅུ་གཉིས་སྤང་བླངས་ལ་འདུས་སོ་སྙམ། དེ་ཡང་རྩ་གསུམ་ནི་ནང་གི་དཀོན་མཆོག་ཡིན་པའི་ཕྱིར་དང༌། ཕུང་ལྔ་དག་མཉམ་གྱི་སྐུ་གསུམ་གཞིའི་དཀྱིལ་འཁོར་དེ་གསང་བའི་དཀོན་མཆོག་དང༌། མཆེད་ལྕམ་ནི་དགེ་འདུན་དུ་འདུ་ལ། དེས་ན་ཕྲ་མོ་བཅོ་ལྔ་བོ་ཆེན་པོ་བརྒྱད་ཀྱི་བྱེ་བྲག་ཕྲ་ཞིབ་དུ་བཀྲལ་བར་ཟད་པས་དེ་བསྲུང་བའི་ཁོང་དུ་ལྡན་པར་རིགས་སོ། ། ༈ བརྟུལ་ཞུགས་ཉེར་གསུམ་ནི། སྲོག་ལ་བབས་ཀྱང་བླ་མ་དང་མཆེད་ལ་དམ་ཚིག་བསྲུང་(ཝ་ལྟ་བུའི་བརྟུལ་ཞུགས་)ཐོགས་པ་མེད་པའི་ཤེས་རབ་ཀྱི་ཤེས་བྱ་ཀུན་ལ་ཞུགས་ཤིང་བསྲུང་མཚམས་ཤེས་ནས་མཐར་ཕྱིན་པའི་གང་ཡང་སྐད་ཅིག་གི་འགྲུབ་པར་བྱ་བ་དང༌།(ཅང་ཤེས་) ལུས་ཀྱི་རྩལ་གྱིས་གར་དང་ཕྱག་རྒྱ་འཁྲུལ་འཁོར་བརྩོན་པ་(གྱི་ལང་)གདུག་པ་དང་གདུལ་བྱ་འདུལ་ཞིང་ཚར་བཅད་པ་(གླང་ཆེན་)ལྟ་སྤྱོད་ཏིང་འཛིན་གྱིས་སྟོབས་དང་ལྡན་པས་ཞིང་བཅུ་བསྒྲལ་ནས་གནས་སྤར་པ་(སྟག་)ལྟ་བས་དབྱིངས་ཡེ་དབྱེར་མེད་དུ་རྟོགས་པའི་གནམ་འཕང་ཆོད་པ་རྣལ་འབྱོར་མཆོག་གི་སྤྱོད་པ་ཕྱོགས་ལྷུང་མེད་པ་(ཁྱུང་)མངོན་སྤྱོད་ཀྱི་ལས་ལ་སྦྱོར་བས་ཕ་རོལ་ཚར་གཅོད་པ་དང་(དོམ་)ཉམས་ལེན་ལས་བློ་སླར་མི་ལྡོག་བར་བརྟན་པ་(གསེར་)འཁོར་འདས་སོགས་གང་ལའང་རིས་སུ་མི་འབྱེད་པ་དང༌།(ལྐུགས་)ཏིང་འཛིན་རྒོད་བྱིང་ཀྱི་དབང་དུ་མི་འགྱུར་བའི་བརྟུལ་ཞུགས་དང་(རི་རབ་)གང་ལའང་སྤང་ལེན་རྣམ་རྟོག་མེད་པའི་སྤྱོད་པ་(ནམ་མཁའ་)ཁྲོ་བོའི་བཟླས་པས་དགྲ་བགེགས་འཇོམས་པ་(ཐོག་ཆེན་)བར་དུ་གཅོད་པ་འཇོམས་པ་(ལག་ན་རྡོ་རྗེ་)དམ་ཚིག་གི་སྤང་བླང་ལ་བག་ཟོན་བྱ་བ་(བྱ་རོག་)ཡིན་པའི་དོན་ལ་ངེས་པའི་སྲན་ཚུགས་པ་ཅི་ལའང་མི་ལྟ་བ་དང་(གླང་ཆེན་ཆུར་འཇུག་ལྟར་)གྲོགས་སྤོང་གཅིག་པུར་དོན་ཆེན་བསྒྲུབ་པ་དང་(སེང་གེ་གྲོགས་མེད་ལྟར་)བླ་མ་མཆེད་དང་དབྱེན་གྱིས་མི་ཚུགས་པར་བརྩེ་གདུང་གི་འགྲོགས་བདེ་བ་(ངང་བ་ཕོ་མོ་ལྟར་)ཕྱག་རྒྱ་སྒྱུ་མའི་དཀྱིལ་འཁོར་སྒོམ་ནས་དེ་ལའང་མི་གནས་པར་ཐབས་མཁས་པའི་དོན་བྱེད་པ་(སྒྱུ་མ་མཁན་གྱི་བྱས་པའི་གཟུགས་ལྟར་)ཁ་ཟས་བླང་དོར་མེད་པས་(ཕག་ལྟར་) ཞིང་བཅུ་སྒྲོལ་ཞིང་ཞལ་དུ་གསོལ་བ་(ལྕེ་སྤྱང་)ལྟར་ཐུགས་རྗེ་ཆེན་པོའི་ཡུད་ལ་དོན་མཛད་པ་(གློག་)བླ་མ་དང་མཆེད་ཀྱི་དཀོར་ལ་འཛེམས་ཤིང་གདུལ་བྱར་གྱུར་བའི་རྫས་མ་བྱིན་པ་བླང་བ་(བྱ་རྒོད་)དགོངས་པ་མཉམ་པའི་གཞི་ལས་མ་གཡོས་པར་གདུལ་བྱ་ཐབས་ཀྱི་འདྲེན་པ་(རྒྱལ་བོ་ལྟར་)གཞན་ཡང་མེད་པ་ཕྱལ་བ་ལྷུན་གྲུབ་གཅིག་པུ་ཏེ་ལྷག་པའི་དམ་ཚིག་བཞི། རྩ་བ་སྐུ་གསུང་ཐུགས་གསུམ་དང༌། ཡན་ལག་དམ་ཚིག་ཉེར་ལྔ་སྟེ། རྣལ་འབྱོར་ཆེན་པོ་དང་མཐུན་པས་ཐུན་མོང་གི་ཉེར་བརྒྱད། གཉིད་དང་མྱོས་འགྱུར་སྤངས་པ་གཉིས། གསང་སྔགས་བརྡ་སྐད་ཀྱི་སྨྲ་བ། ལེ་ལོའི་བདུད་གཞོམ་པ་སྟེ་སྤྱོད་ལམ་རྒྱུན་གྱི་དམ་ཚིག་བཞི་དང༌། ལྟ་བསྒོམ་སྤྱོད་གསུམ་བཅོས་མ་རང་གར་ཤོར་བའི་དགྲ ལྟ་དམན་སྤྱོད་རྩང་འཆལ་བའི་དགྲ རྩ་བ་ཡན་ལག་གི་དམ་ཚིག་ཉམས་པ་ལྟུང་བའི་དགྲ ཚོད་ཡོད་ལེ་ལོས་འབྲས་བུ་འཕྲོགས་པའི་དགྲ་སྟེ། དགྲ་བཞི་གཞོམ་པ་དང༌། རྣམ་རྟོག་འདུ་འཛི་ལེ་ལོ་ཚིག་རྩུབ་ཁྲོ་གཏུམ་སྟེ་བདུད་ལྔ་སྤངས་བ། སྣོད་རྣམ་དག་འོག་མིན། འདོད་ཡོན་མཆོད་པའི་ཡོ་བྱད། བཅུད་ལྷའི་དཀྱིལ་འཁོར། ཉོན་མོངས་ཡེ་ཤེས་ཆེན་པོར་རྟོགས་པ་སྟེ་དམ་ཚིག་བཞིའོ། ག་གཱས་སོ། ། ཐར་མདོ་བསྡུས་པ་འགྱོད་ཚངས་ཀྱིས་སྡིག་སྦྱང་།༄༅༔ ཐར་མདོ་བསྡུས་པ་འགྱོད་ཚངས་ཀྱིས་སྡིག་སྦྱང་བཞུགས་སོ༔ སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ༔ འདི་སྐད་བདག་གི་ཐོས་པའི་དུས་གཅིག་ན༔ བཅོམ་ལྡན་འདས་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ན༔ དགེ་སློང་གི་དགེ་འདུན་བརྒྱད་ཁྲི་བཞི་སྟོང་དང་༔ བྱང་ཆུབ་སེམས་དཔའ་དྲུག་ཁྲི་སུམ་སྟོང་དང་ཐབས་གཅིག་དུ་བཞུགས་སོ༔ དེའི་ཚེ་ན་འཁོར་འདུས་པའི་ནང་ནས་དབང་པོ་བརྒྱ་བྱིན་ལ་སོགས་པའི་ལྷ་བརྒྱད་ཁྲི་ཆེན་པོ་དྲུག་དང་ལྡན་པས༔ མདོ་སྡེ་དང་འཛིན་འཆང་ཀློག་པར་བྱེད་པའི་གང་ཟག་གནས་པའི་ས་ཕྱོགས་དང་བཅས་པ་བསྲུང་སྐྱོབས་སྤྱི་བོས་མཆོད་པར་ཁས་བླང་བ་དང་༔ བྱང་ཆུབ་སེམས་དཔའ་མཚན་ཉིད་དད་སྟན་ལས་ལངས་ཏེ་བཅོམ་ལྡན་འདས་ལ་གུས་པས་འདི་སྐད་ཅེས་གསོལ་བ༔ སེམས་ཅན་འཆི་ཁ་མའི་རྣ་ལམ་དུ་སངས་རྒྱས་རིན་ཆེན་གཙུག་ཏོར་ཅན་གྱི་མཚན་བསྒྲགས་པས་ངན་སོང་གི་སྐྱེ་སྒོ་ཆོད་དེ་ལྷའི་གནས་སུ་སྐྱེ་བ་ཐོབ་པར་ཐོས་ན༔ ཕྱོགས་བཅུའི་སངས་རྒྱས་དང་དཀོན་མཆོག་གསུམ་གྱི་མཚན་བྱིན་རླབས་ཅན་རྣམས་མདོར་བསྡུས་ཏེ་སེམས་ཅན་ལ་ཕན་པའི་སླད་དུ་བཅོམ་ལྡན་འདས་ཀྱིས་བསྟན་དུ་གསོལ༔ ཞེས་གསོལ་བ་དང་༔ བཅོམ་ལྡན་འདས་ཀྱིས་བཀའ་སྩལ་པ༔ རིགས་ཀྱི་བུ་ལེགས་སོ་ལེགས་སོ༔ ངས་ཁྱོད་ལ་བསྟན་པར་བྱ་ཡི༔ ལེགས་པར་རབ་ཏུ་ཉོན་ལ་ཡིད་ལ་ཟུངས་ཤིག༔ མདོ་སྡེ་ཐར་བ་ཆེན་པོ་ན་བཞུགས་པའི་ཕྱོགས་བཅུ་དུས་གསུམ་གྱི་སངས་རྒྱས་དང་༔ མདོ་སྡེ་བཅུ་གཉིས་དང་༔ བྱང་ཆུབ་སེམས་དཔའི་དགེ་འདུན་ཆེན་པོའི་མཚན་དང་ལྡན་པ་རྣམས་ལ་ཕྱག་འཚལ་ལོ༔ ན་མོ་བུདྡྷ༴ སོགས་ཞེས་བསྡུས་ཀྱང་རུང་ངོ༌། བསྐལ་བ་མངོན་པར་དགའ་བ་ལ་བྱོན་པའི་སངས་རྒྱས་སུམ་ཁྲི་སུམ་སྟོང་ལ་ཕྱག་འཚལ་ལོ༔ རྫོགས་ལྡན་ཆེན་པོ་སངས་རྒྱས་བྱེ་བ་ཕྲག་བརྒྱ་ལ་ཕྱག་འཚལ་ལོ༔ མཐོང་བར་དགའ་བའི་སངས་རྒྱས་བྱེ་བ་ཕྲག་བརྒྱ་ལ་ཕྱག་འཚལ་ལོ༔ དགའ་དང་ལྡན་པའི་སྟོང་ཕྲག་དྲུག་ཅུའི་སངས་རྒྱས་ལ་ཕྱག་འཚལ་ལོ༔ འདས་པའི་སངས་རྒྱས་ཁྲག་ཁྲིག་གྲངས་མེད་པ་གངྒའི་ཀླུང་གི་བྱེ་མ་སྙེད་ཀྱི་གྲངས་དང་མཉམ་པ་རྣམས་ལ་ཕྱག་འཚལ་ལོ༔ ད་ལྟར་བཞུགས་པའི་སངས་རྒྱས་རྫོགས་ཆེན་སྟོན་པ་བཅུ་གཉིས་ལ་ཕྱག་འཚལ་ལོ༔ སྨན་བླ་བདེ་བར་གཤེགས་མཆེད་བརྒྱད་ལ་ཕྱག་འཚལ་ལོ༔ བར་གྱི་སངས་རྒྱས་རབ་བདུན་ལ་ཕྱག་འཚལ་ལོ༔ ཐར་བ་ཆེན་པོའི་འོད་ལ་ཕྱག་འཚལ་ལོ༔ ཤཱཀྱ་ཐུབ་པ་བྱེ་བ་ཕྲག་བརྒྱ་ལ་ཕྱག་འཚལ་ལོ༔ བསྐལ་བཟང་སངས་རྒྱས་སྟོང་རྩ་ལ་ཕྱག་འཚལ་ལོ༔ ད་ལྟར་བཞུགས་པའི་སངས་རྒྱས་གྲངས་མེད་གངྒའི་ཀླུང་གི་བྱེ་མ་སྙེད་ཁྲག་ཁྲིག་གི་གྲངས་དང་མཉམ་པ་རྣམས་ལ་ཕྱག་འཚལ་ལོ༔ མཆོད་དོ་སྐྱབས་སུ་མཆིའོ༔ མ་འོངས་པ་ན་འབྱོན་པའི་སངས་རྒྱས་འཇམ་དཔལ་འོད་ལ་ཕྱག་འཚལ་ལོ༔ སངས་རྒྱས་འོད་ཀྱི་མཚན་མས་རྒྱན་པ་ཉི་ཁྲི་ལ་ཕྱག་འཚལ་ལོ༔ མཚན་མཐུན་པ་ཀུན་ཏུ་དཔལ་སུམ་ཁྲི་ལ་ཕྱག་འཚལ་ལོ༔ འོད་མི་འགྱུར་བ་བཞི་ཁྲི་བརྒྱད་སྟོང་ལ་ཕྱག་འཚལ་ལོ༔ འོད་ཟེར་རྣམ་པར་བཀོད་པ་འབུམ་ཕྲག་བརྒྱད་ཅུ་ལ་ཕྱག་འཚལ་ལོ༔ པདྨའི་འོད་ལྔ་བརྒྱ་ལ་ཕྱག་འཚལ་ལོ༔ མ་བྱོན་པའི་སངས་རྒྱས་གངྒ་གྲངས་མེད་ཀྱི་ཕྱེ་མ་སྙེད་ཀྱི་གྲངས་དང་ངེས་པར་མཉམ་པ་ལ་ཕྱག་འཚལ་ལོ༔ མཆོད་དོ་སྐྱབས་སུ་མཆིའོ༔ ཆོས་ཆེན་པོ་གསུང་རབ་ཡན་ལག་བཅུ་གཉིས་ལ་ཕྱག་འཚལ་ལོ༔ བྱང་ཆུབ་སེམས་དཔའ་ཉེ་བའི་སྲས་བརྒྱད་ལ་ཕྱག་འཚལ་ལོ༔ བསྐལ་བཟང་གི་སེམས་དཔའ་བཅུ་དྲུག་ལ་ཕྱག་འཚལ་ལོ༔ ས་བཅུ་ལམ་ལྔ་ན་བཞུགས་པ་ཐམས་ཅད་ལ་ཕྱག་འཚལ་ལོཿ ཕྱོགས་བཅུ་དུས་བཞི་ན་བཞུགས་པ་ཐམས་ཅད་ལ་ཕྱག་འཚལ་ལོ༔ བྱང་ཆུབ་སེམས་དཔའ་གངྒ་བྱེ་བ་ཁྲག་ཁྲིག་བརྒྱད་སྟོང་གྲངས་མེད་པའི་ཕྱེ་མ་སྙེད་ཀྱིས་གྲངས་སྙེད་ཁྲག་ཁྲིག་ལ་ཕྱག་འཚལ་ལོ༔ མཆོད་དོ་སྐྱབས་སུ་མཆིའོ༔ དཀོན་མཆོག་གསུམ་པོ་དེ་རྣམས་ལ་ཕྱག་འཚལ་ན༔ བསྐལ་པ་ཁྲག་ཁྲིག་འབུམ་གྱི་སྡིག་པ་ཐམས་ཅད་དག་ནས་གྲངས་དེ་སྙེད་དུ་དམྱལ་བར་མི་སྐྱེའོ༔ སྲིད་པ་གསུམ་གྱི་ཁམས་སུ་མི་གཏོགས་པར་རྣམ་པར་གྲོལ་བའི་ཁམས་སུ་གཏོགས་པར་འགྱུར་རོ༔ སྡོམ་པའི་ཁྲིམས་དང་ལྡན་པར་འགྱུར་རོ༔ ཐེག་ཆེན་གྱི་སྐྱོད་ལམ་མཛེས་པ་དང་༔ སངས་རྒྱས་ཀྱི་བདག་ཉིད་མཐོང་བར་འགྱུར་རོ༔ དེ་བས་ན་གུས་པས་ཕྱག་འཚལ་ལོ༔ དཀོན་མཆོག་གི་མཚན་དེ་དག་བཤད་པའི་ཚེ༔ བྱང་ཆུབ་སེམས་དཔའ་དུང་ཕྱུར་འབུམ་གྱིས་མི་སྐྱེ་བའི་ཆོས་ལ་བཟོད་པ་ཐོབ༔ གཟུངས་ཀྱི་སྒོ་མཐའ་ཡས་ལ་ཆུད༔ ཕྱིར་མི་ལྡོག་པའི་སར་གནས༔ ལྷ་དང་མི་གྲངས་མེད་པ་འབྲས་བུ་ཐོབ་པོ༔ དོན་དམ་པར་དཀོན་མཆོག་གཅིག་ལ་དཀྲི་བའི་དབང་གིས་གསུམ་དུ་བཤད་པ་ལས༔ དེའི་མཚན་ཐོས་ནས་སེམས་ཐག་པ་ནས་དྲན་པ་བྱས་ཏེ༔ འཆི་ཁར་དགེ་བའི་བཤེས་གཉེན་གྱིས༔ ན་མོ་བུདྡྷ་ཡ༔ ན་མོ་དྷརྨ་ཡ༔ ན་མོ་སངྒྷ་ཡ༔ ཞེས་ལན་གསུམ་དུ་བརྗོད་དུ་བཅུག་ན༔ མི་དེ་ངན་སོང་གསུམ་དུ་མི་འགྲོ༔ ཕྱོགས་བཅུའི་ཞིང་གང་དུ་དད་པར་སྐྱེ༔ སངས་རྒྱས་དང་བྱང་ཆུབ་སེམས་དཔའ་ཐམས་ཅད་མཐོང་ཞིང་རིམ་གྲོ་བྱས་པར་འགྱུར་རོ༔ སྣང་ནས་སྣང་བར་དཀོན་མཆོག་གསུམ་དང་མི་འབྲལ་བར་མཐར་ཐུག་ངོ་བོ་གཅིག་ལ་འདུས་མ་བྱས་པའི་དཀོན་མཆོག་གི་གོ་འཕང་འགྲུབ་པར་འགྱུར་རོ༔ དེ་ཅིའི་ཕྱིར་ཞེ་ན༔ སེམས་ཅན་ཐམས་ཅད་ལ་སངས་རྒྱས་ཀྱི་བདག་ཉིད་ཡོད་པའོ༔ ཞེས་བཀའ་སྩལ་པ་དང་༔ བྱང་ཆུབ་སེམས་དཔའ་ནམ་མཁའི་སྙིང་པོས་འདི་སྐད་ཅེས་ཞུས་སོ༔ བྱང་ཆུབ་སེམས་དཔའ་རྣམས་ཀྱི་བྱང་ཆུབ་ཀྱི་རྒྱུ་དང་རྐྱེན་ཞིག་ཞུ་ན་སྐབས་དབྱེ་བར་མཛད་དུ་གསོལ༔ ཞེས་གསོལ་བ་དང་༔ ཆོས་བཞི་ཚན་ཉེར་གཅིག་གིས་རྒྱུ་རྐྱེན་གྱི་གྲུབ་པའོ་ཞེས་བཀའ་སྩལ་ལོ༔ ནམ་མཁའི་སྙིང་པོས་ཆོས་ཆེན་པོ་རྨད་དུ་བྱུང་བ་འདི་ལྟ་བུ་ནི་སྔོན་ཆད་ནམ་ཡང་ཐོས་མ་མྱོང་པས༔ ད་ཐོས་པ་འདི་བདག་ཅག་རྣམས་ཀྱིས་འཛིན་འཆང་ཀུན་ཏུ་ཆུབ་པར་བྱའོ༔ ཡོངས་སུ་སྤེལ་བར་བྱའོ༔ མི་གཏོང་བར་བགྱིའོ༔ འདིར་ནི་བསོད་ནམས་ཅི་ཙམ་ཞིག་ཐོབ་པར་འགྱུར༔ བཅོམ་ལྡན་འདས་ཀྱིས་བཀའ་སྩལ་པ༔ གང་ལ་ལ་ཞིག་གིས་སྟོང་གསུམ་འབུམ་ཕྲག་བརྒྱད་ཅུ་རིན་པོ་ཆེ་སྣ་བདུན་གྱིས་བཀང་ཏེ་མཆོད་སྦྱིན་བྱེད་པ་ལས་བསོད་ནམས་དཔག་ཏུ་མེད་པར་ཆེའོ༔ ཟག་པ་ཐམས་ཅད་ཟད་པར་འགྱུར་རོ༔ ཡོན་མཐའ་ཡས་པའང་འཇུ་ནུས་སོ༔ ལུས་སོ་སྐྱེས་ཀྱང་བློ་འཕགས་པའི་ཡེ་ཤེས་དང་འདྲའོ༔ ལས་ཉོན་ཐམས་ཅད་མོད་ལ་བྱང་ནས་མྱ་ངན་ལས་འདས་སོ༔ སངས་རྒྱས་ཀྱི་མཛད་སྤྱོད་བསྒྲུབ་པ་དང་༔ ཕྱོགས་བཅུའི་སངས་རྒྱས་མཐོང་བའང་ཡིན་ནོ་མདོ་སྡེ་འདི་ནི་འཕགས་བཞིའི་བསྐྱེད་ཡུམ་ཆེན་མོའོ༔ ངས་ཀྱང་བསྐལ་བ་དུང་ཕྱུར་མང་པོར་སངས་རྒྱས་གྲངས་མེད་ལ་བསྙེན་བཀུར་བྱས་པས་མཚན་སུམ་ཅུ་རྩ་གཉིས་ཀྱང་ཐོབ་པོ༔ དེ་ནས་བྱང་ཆུབ་སེམས་དཔའ་ནམ་མཁའི་སྙིང་པོས༔ བཅོམ་ལྡན་འདས༔ ཆོས་ཐམས་ཅད་ལ་བདག་གིས་བརྟགས་ན༔ ཡང་དག་པར་དངོས་པོ་དང་མཚན་མ་གང་ཡང་མ་མཆིས་ལ༔ དཀོན་མཆོག་གསུམ་དང་༔ བདེན་པ་བཞི་དང་༔ ཕུང་ཁམས་སྐྱེ་མཆེད༔ རྟེན་འབྲེལ་ཕ་རོལ་ཏུ་ཕྱིན་པའི་ཆོས་ཐམས་ཅད་རྒྱུ་འབྲས་ངོ་བོ་ཉིད་ཀྱི་རྣམ་ཐར་གསུམ་ལྡན༔ སྟོང་པ་ཉིད་ཉི་ཤུའི་རང་བཞིན་ཅན༔ བྱེད་པའི་སྐྱེས་བུ་བཅུ་གཉིས་མ་ལགས༔ སྤྲོས་པའི་མཐའ་གང་ཡང་མ་ལགས༔ ཁམས་བཅོ་བརྒྱད་མ་ལགས་ན༔ བཅོམ་ལྡན་འདས་ཀྱིས་གང་གི་སླད་དུ་སྤྱོད་ལམ་རྒྱ་ཆེར་བསྒྲུབས་པོ་གསུངས༔ ཞེས་གསོལ་བ་དང་༔ བཅོམ་ལྡན་འདས་ཀྱིས་བཀའ་སྩལ་བ༔ ནམ་མཁའི་སྙིང་པོ་ལེགས་སོ་ལེགས་སོ༔ ཁྱོད་ལྟ་བུ་ནི་འཁོར་བ་ན་སེམས་ཅན་གྱི་དོན་དུ་གནས་ཀྱང་༔ སྐྱོན་གྱིས་མ་གོས་པས་དོན་འདི་ལྟ་བུ་འདྲི་བར་ནུས་པའོ༔ དོན་དམ་པར་ནི༔ ཆོས་མེད༔ ཡི་གེ་མེད༔ བླ་ན་མེད་པའི་བྱང་ཆུབ་ཀྱང་མིང་ལས་གུད་ན་མེད་དོ༔ སྤྱོད་པ་སྤྱད་པའང་མེད་དོ༔ ཞེས་གསུངས་སོ༔ ནམ་མཁའི་སྙིང་པོས༔ ཡང་དག་པར་ན་ཆོས་ཐམས་ཅད་སྟོང་པ་ཉིད་དོ༔ དེ་བཞིན་གཤེགས་པ་ལ་འབྱུང་བ་དང་ནུབ་པ་མེད་དོ༔ སེམས་ཅན་འདུལ་བའི་སླད་དུ་ཐབས་སྣ་ཚོགས་བསྟན་ཀྱང་༔ སྤྲོས་པ་མེད་པའི་སྤྱོད་ཡུལ་དུ་གནས་ཏེ༔ ཁམས་གསུམ་ན་ཆོས་ཀྱི་སྐུ་རྣམ་པ་ལྔ་འབྱུང་ཏེ༔ སྐུ་ཡང་དག་པའི་ངོ་བོ་ཉིད་དང་༔ སྐུ་ཡོན་ཏན་ཅན་དང་༔ སྐུ་ངོ་བོ་ཉིད་ལས་སྐྱེས་པ་དང་༔ སྐུ་སྤྲུལ་ཅིང་འབྱུང་བ་དང་༔ སྐུ་ནམ་མཁའ་ལྟ་བུ་སྟེ་སེམས་ཅན་ཡོངས་སུ་མྱ་ངན་ལས་འདས་པའི་སླད་དུ་སྟོན་པའོ༔ ཞེས་གསོལ་བ་དང་༔ བཅོམ་ལྡན་འདས་ཀྱིས་ནམ་མཁའི་སྙིང་པོ་མ་འོངས་པ་ན་སངས་རྒྱས་རྒྱན་རྣམ་པར་དག་པ་ཞེས་བྱ་བར་ལུང་བསྟན་ཐོབ་པོ༔ དེ་ནས་བྱང་ཆུབ་སེམས་དཔའ་སེངྒེས་སྒྲས་བཅོམ་ལྡན་འདས་ཀྱི་སྤྱན་སྔར་གཟུངས་སྔགས་འདི་སྨྲས་སོ༔ ན་མོ་བུད་དྷ་ཡ༔ ན་མོ་དྷརྨཱ་ཡ༔ ན་མ་སངྒྷཱ་ཡ༔ ཨ་དན་ཏི་དྷཱ་ར་ཎཱི༔ ཏདྱ་ཐཱ༔ ཨཱ་ཀཱ་ཤ་ནི་བ་བཱི་ནི༔ སརྦ་དྷརྨཱ་ནི་༔ ཨི་ཤ་མ་ད༔ པི་བ་ཤ་ན༔ བི་མ་ལ༔ སུ་པ་རི༔ དྷརྨཱ་ནི་ཁ་ན༔ བ་ར་རུ་ནི་ཙ་ཡ་ཏ་མ་ལེ༔ ཙ་ལེ༔ ཧུ་ལུ་ཧུ་ལུ༔ ཤི་བི་ཏེ༔ མནྟྲ་མནྟྲཿམནྟྲཿསྭཱ་ཧཱ༔ སྔགས་འདི་དུས་གཅིག་ལ་ལན་བརྒྱ་རྩ་བརྒྱད་བཟླས་ཤིང་མཆོད་རྟེན་ལ་བསྐོར་བ་བགྱི༔ དེ་ལྟར་གདུགས་བདུན་དུ་ཉིན་བཞིན་དུས་གསུམ་དུ་སེམས་མི་གཡེངས་བར༔ ཤ་དང་ཆང་མི་འཚལ་ཞིང་བསམ་གཏན་ལ་གནས་པས་བཟློས་ན༔ གང་ཟག་དེ་དཔག་ཏུ་མ་མཆིས་པའི་སྒྲིབ་པ་གསུམ་གྱིས་སྡིག་ལྕི་བ་ཀུན་འབྱངས་པར་འགྱུར་རོ༔ ཡི་དམ་དུ་བྱས་ན་བྱང་ཆུབ་ཀྱི་བར་དུ་ངན་སོང་གསུམ་དུ་མི་ལྷུང་ངོ་༔ ཞེས་གསོལ་བ་དང་༔ རིགས་ཀྱི་བུ་ལེགས་སོ་ལེགས་སོ༔ གཟུངས་སྔགས་རྒྱ་ཆེར་བཤད་པ་ཤིན་ཏུ་ལེགས་སོ༔ ཞེས་གསུངས་སོ༔ དེ་ནས་རྒྱལ་བུ་དགེ་མཐོང་འཁོར་མི་སུམ་སྟོང་དང་བཅས་ཀྱིས་བཅོམ་ལྡན་འདས་ཀྱི་སྤྱན་སྔར་འགྱོད་ཚངས་ཀྱིས་བཤགས་པ་འདི་ལྟར་བགྱིས་སོ༔ ཕྱོགས་བཅུའི་དཀོན་མཆོག་རིན་པོ་ཆེ་རྣམས་ལ་སྐྱབས་སུ་མཆིའོ༔ བཅོམ་ལྡན་འདས་རྒྱལ་བ་རིགས་ལྔ་ལ་ཕྱག་འཚལ་ལོ༔ སངས་རྒྱས་འོད་མི་འགྱུར་ལ་ཕྱག་འཚལ་ལོ༔ མ་བྱོན་པའི་སངས་རྒྱས་ཐམས་ཅད་ལ་ཕྱག་འཚལ་ལོ༔ ད་ལྟར་ཕྱོགས་བཅུར་བཞུགས་པ་རྣམས་ལ་ཕྱག་འཚལ་ཞིང་སྐྱབས་སུ་གསོལ་ལོ༔ དཔང་དུ་བརྟེན་ནོ༔ ཐོག་མ་མེད་པ་ནས་བདག་དང་སེམས་ཅན་ཐམས་ཅད་ཀྱིས༔ མི་དགེ་བ་བཅུ་དང་༔ མཚམས་མེད་པ་ལྔ༔ ལྕི་བ་བཞི༔ ལོག་པ་བརྒྱད་དང་༔ རང་བཞིན་གྱིས་ཁ་ན་མ་ཐོ་བའི་སྡིག་པ་དང་༔ བཅས་པའི་ཁྲིམས་ཕྱི་ནང་གསང་གསུམ་དང་འགལ་བ་དང་༔ དཀོན་མཆོག་གི་དཀོར་ལ་སྤྱོད་པའི་རབ་ཏུ་བྱུང་བ་དང་༔ ཕ་དང་མ་དང་༔ བླ་མ་དང་སློབ་དཔོན་སངས་རྒྱས་ཐེག་པ་ཆེ་ཆུང་གི་ཆོས་དང་དགེ་འདུན་ལ་སྐུར་བ་བཏབ་པ་དང་༔ བྱང་ཆུབ་ཀྱི་དགེ་རྩར་ལྡན་པའི་སེམས་ཅན་ལ་མི་རིགས་མི་ཚུལ་བའི་ལས་བགྱིས་པ་དང་༔ མི་རྟག་པ་ལ་རྟག་པར་འཛིན་པ་སོགས་བདེན་བཞིའི་དོན་ལས་ལོག་པ༔ ཆོས་དང་ཆོས་མིན་གོ་ལྡོག་དུ་འཛིན་ཅིང་སྨྲས་པ་དང་༔ ལོག་པའི་སྤྱོད་པ་སྤྱད་པ༔ དམ་པའི་ཆོས་སྤངས་པ་དང་༔ དཀོན་མཆོག་གི་དཀོར་ལ་རྔམས་པ་དང་བསྙེན་བཀུར་མ་བགྱིས་པ་དང༌། ཉོན་མོངས་པའི་དབང་གིས་མི་དགེ་བའི་དངོས་པོ་གང་བྱས་པ་ཐམས་ཅད་ངོ་ཚ་འཇིགས་སྐྲག་དཔག་ཏུ་མ་མཆིས་པའི་ངང་ནས་དཀོན་མཆོག་གསུམ་གྱི་སྤྱན་སྔར་མཐོལ་ཞིང་འཆགས་ན༔ སངས་རྒྱས་བཅོམ་ལྡན་འདས་རྣམས་ནི་བྱམས་དང་ཐུགས་རྗེའི་མངའ་བདག༔ ཕྱོགས་སུ་སྙོམས་པའི་ཡབ་ཡུམ་ལགས༔ བྱང་ཆུབ་སེམས་དཔའ་རྣམས་ནི་དགེ་བའི་བཤེས་གཉེན་ལགས་ན༔ ཡོངས་སུ་བྱང་ཞིང་དག་པའི་སྐབས་དབྱེ་བར་གསོལ་ཞིང་༔ སླན་ཆད་ཀྱང་མི་བགྱིད་པར་སྨོན་ནོ༔ སེམས་ཅན་ཐམས་ཅད་ས་བཅུ་ལ་འཁོད་དེ་མངོན་པར་རྫོགས་པར་སངས་རྒྱས་པར་གྱུར་ཅིག༔ དེ་ནས་བཅོམ་ལྡན་འདས་ཀྱིས་ལེགས་སོ༔ ཁྱོད་ནི་སྐྱེས་བུ་དམ་པ་ཡང་དག་པའོ༔ ཞེས་བརྗོད་དོ༔ དེ་ནས་ཕྱོགས་བཅུའི་སངས་རྒྱས་ཐམས་ཅད་མངོན་པར་སྣང་ནས༔ རིགས་ཀྱི་བུ་ཁྱེད་རྣམས་ཀྱི་སྡིག་གི་རང་བཞིན་ཕྱི་ནང་བར་གསུམ་གང་དུའང་མི་གནས་སོ༔ རྣམ་པར་གྲོལ་ལོ༔ སྟོང་བ་ཉིད་དོ༔ འདས་པའི་སངས་རྒྱས་ཐམས་ཅད་མཐོང་བར་འགྱུར་རོ༔ ངེད་རྣམས་མཐོང་བའི་སྟེང་དུ་ཕྱོགས་བཅུའི་སངས་རྒྱས་སྤྲུལ་པའི་སྐུ་ཐམས་ཅད་ཀྱང་མཐོང་བར་འགྱུར་རོ༔ མཆོད་པ་བྱས་པར་འགྱུར་རོ༔ ཐེག་པ་ཆེན་པོའི་མདོ་སྡེ་འདིའི་རྗེས་སུ་བྱང་ཆུབ་ཏུ་ཆུད་པར་འགྱུར་རོ༔ དེ་ནས་བཅོམ་ལྡན་འདས་ཀྱིས་བཀའ་སྩལ་བ༔ སྡིག་ཅན་རྣམས་ཀྱིས་སྡིག་པ་བཤགས་པར་འདོད་ན་རྒྱལ་བུ་དགེ་མཐོང་བཞིན་དུ༔ ཕྱོགས་བཅུའི་སངས་རྒྱས་རྣམས་མངོན་སུམ་བཞིན་དུ་རེ་རེ་ནས་དམིགས་ཏེ་བཤགས་ན་བསོད་ནམས་དཔག་མེད་ཐོབ་ཅིང་༔ སྡིག་པ་ཀུན་ལས་གྲོལ་ལོ༔ སངས་རྒྱས་ཐོབ་པར་གདོད་མི་ཟའོ༔ ང་མྱ་ངན་ལས་འདས་པའི་འོག་ཏུ༔ དཀོན་མཆོག་གསུམ་ལ་སེམས་ཐག་པ་ནས་ཕྱག་འཚལ་ནུས་པས་དཀོན་མཆོག་གསུམ་གྱི་དྲིན་ལན་ལོན་པ་ཞེས་བྱ་སྟེ༔ དེ་མ་ཐག་དུ་སྡིག་ཀུན་བྱང་བར་འགྱུར༔ ཐེག་གསུམ་རང་རང་གི་འབྲས་བུ་ཐོབ་པར་འོས་པ་སྦྱིན་ནོ༔ ཀུན་རྫོབ་དང་དོན་དམ་པའི་འཇིག་རྟེན་དང་འཇིག་རྟེན་ལས་འདས་པའི་ཏིང་ངེ་འཛིན་དང་ཡོན་ཏན་མཐའ་དག་ཐོབ་པའང་དཀོན་མཆོག་གསུམ་ལ་ཕྱག་འཚལ་བའི་ཡོན་ནོ༔ དེ་ནས་བྱང་ཆུབ་སེམས་དཔའ་འཇམ་དཔལ་གྱིས་སྡིག་འབྱང་བར་འདོད་པས་ཇི་ལྟར་བགྱི་ཞེས་ཞུས་པས༔ བཀའ་སྩལ་བ་གོས་གཙང་མར་བསྒོས་ཏེ༔ ཁྲུས་གསུམ་གྱིས་དག་པར་བྱས་ལ༔ མཆོད་པའི་ཡོ་བྱད་བཀྲམ་སྟེ༔ གཤེགས་སུ་གསོལ་བ་མང་ཡང་རུང་ཉུང་ཡང་རུང་སྟེ༔ སེང་གེའི་ཁྲི་ལ་འདུག་ནས༔ ཆོས་ཀྱི་རྣམ་གྲངས་འདི་ཡུན་རིང་དུ་བསྒོམ༔ ལྟ་བ་ཐམས་ཅད་སྤངས་ཏེ༔ ཁྲོ་བ་མེད་པའི་སེམས་ཀྱིས་ཁ་བཏོན་དུ་བྱས་ཤིང་༔ ཏིང་ངེ་འཛིན་བསམ་གྱིས་མི་ཁྱབ་པའི་མཚན་དྲན་ཞིང་མཉམ་པར་བཞག་པས༔ སེམས་ཐག་པ་ནས་རྗེས་དྲན་དྲུག་དང་ལྡན་པས་མཐོལ་འཆགས་བྱས་པས༔ མཚན་མ་མངོན་པར་འབྱུང་ཞིང་སྡིག་པ་མི་འབྱངས་མི་སྲིད་དོ༔ སེམས་ཐག་པ་ནས་མ་བྱས་པ་ནི་མ་གཏོགས་སོ༔ བསྐལ་བ་བྱེ་བ་ཁྲག་ཁྲིག་འབུམ་ཕྲག་དགུ་བཅུའི་གངྒའི་ཕྱེ་མ་སྙེད་ཀྱི་འཁོར་བའི་སྡིག་པ་ཕྱིར་བསྙིལ་བར་འགྱུར་རོ༔ དེ་ནས་བྱང་ཆུབ་སེམས་དཔའ་གཟུངས་འཛིན་གྱིས་གུས་ཕྱག་དགུ་སྤྲུགས་ཀྱིས་བཏུད་དེ༔ བཅོམ་ལྡན་འདས་ཆོས་ཀྱི་རྣམ་གྲངས་འདིའི་མིང་ཅི་ལགས༔ ཇི་ལྟར་བཟུང་ཞིང་བསྒོམས་པར་བགྱི་ཞེས་གསོལ་བ་དང་༔ བཅོམ་ལྡན་འདས་ཀྱིས་སྡོམ་པ་ལྕི་བ་ཀུན་ལ་ཕན་གདགས་པ་ཞེས་བྱ་བར་ཟུངས་ཤིག༔ སྡེ་སྣོད་ཀྱི་སྒོ་དཔག་ཏུ་མེད་པ་༔ རྡོ་རྗེ་རིན་པོ་ཆེའི་སྙིང་པོ༔ ཐམས་ཅད་ཀུན་བསྡུས་པ༔ རྒྱན་ཆེན་པོ་དཔེ་ཟླ་མེད་པ༔ མི་སུམ་སྟོང་གྲོལ་བ་ཐར་བ་ཆེན་པོས་ཕྱོགས་སུ་རྒྱས་པ་ཞེས་བྱ་བར་ཟུངས་ཤིག༔ བྱང་ཆུབ་སེམས་དཔའ་གཟུངས་འཛིན་གྱིས༔ དེ་ལྟ་བུའི་བསམ་གྱིས་མི་ཁྱབ་པའི་དོན་དང་ལྡན་པ་བདག་གིས་གཟུངས་སུ་གཟུང་བར་བགྱིའོ༔ ཡོངས་སུ་སྤེལ་བར་བགྱིའོ༔ ཡུན་དུ་གནས་པར་བགྱིའོ༔ བཅོམ་ལྡན་འདས་ཀྱིས་བཀའ་སྩལ་བ༔ ལེགས་སོ་ལེགས་སོ་༔ ཁྱོད་ནི་སྐྱེས་བུ་དམ་པ་ཡང་དག་པའོ༔ སྡེ་སྣོད་དཔག་ཏུ་མེད་པ་ཐམས་ཅད་གཟུངས་སུ་འཛིན་པའོ༔ ཞེས་གསུང་པས་བྱང་ཆུབ་སེམས་དཔའི་ཚོགས་ཐམས་ཅད་དང་༔ ལྷ་དང་མི་དང་༔ ལྷ་མ་ཡིན་དང་༔ དྲི་ཟར་བཅས་པའི་འཇིག་རྟེན་ཡི་རང་ཏེ་བཅོམ་ལྡན་འདས་ཀྱི་གསུངས་པ་ལ་མངོན་པར་བསྟོད་དོ༔ འགྱོད་ཚངས་ཀྱིས་སྡིག་སྦྱངས་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ༔ ཅེས་པ་འདི་ཡང་སྦས་པའི་རྣལ་འབྱོར་ཆེན་པོ་ཀུན་བཟང་མཐར་ཕྱིན་ནས་གསུང་བསྐུལ་དོན་ཡོད་པར་བྱ་བའི་ཕྱིར་དུ་དུས་མཐའི་སྔགས་མིང་ག་ག་ཨ་བྷྱེ་ནས་སྨྲས་པའི་ཡི་གེའི་རིས་བྱེད་ཤེས་རབ་བློ་འཕེལ་བས་སོ། སྣ་དགེ །སྣ་དགེ །སྣ་དགེ །སརྦ་མངྒ་ལཾ། དཔལ་ཨོ་རྒྱན་གྱིས་མཁན་པོ་ཤཱཀྱ་སེང་གེ་ནས་རྨི་ལམ་འོད་གསལ་གྱི་ངོགས་སུ་ལེགས་སོའི་དབུགས་དབྱུང་དང་བཅས་བཀའི་གནང་བ་དགེ་བར་ཐོབ་པའི་རྟེན་འབྲེལ་ཤིན་ཏུ་བཟང་པོའང་འགྲིགས་སོ། ། ༈ ན་མོ་རཏྣ་ཏྲ་ཡཱ་ཡཿ ཨུཏྟ་ར་ངྷེ་ཝ་ཊཱཀྐི་ནིཿ བ་སུ་ངྷེ་ཝི་བུངྔྷ་ཀརྨ་ས་པཱ་རི་ཝ་ར་ས་མ་ཡ་ཛ་ཛཿ པུཎྱེ་ཤྲཱི་ཨ་ཡུར་པུཎྱེ་སརྦ་ཝ་ཤཾ་སུ་སིངྔྷི་ཀུ་རུ་ཧོཿ ཞེས་ཀྱང་སྒྲ་བརྒྱའི་དབང་བོའི་ཎིརྨ་ཀ་ཞེས་མི་སྲིད་སྲིད་པ་དེ་ཡིས་བསྐུལ། མི་བདེན་བདེན་པས་བྱིན་གྱིས་རླབས། རིགས་སྔགས་སོ། ནོར་བརྒྱ་སྟོང་ཁྲི་འབུམ་བྱེ་བར་འགྱུར་བའི་གདམས་ངག་ག་གཱས་སོ། ། ༈ བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དཔལ་གསང་བའི་བདག་པོ་ཕྱག་ན་རྡོ་རྗེ་ལ་ཕྱག་འཚལ་ལོ། མཆོད་དོ་སྐྱབས་སུ་མཆིའོ། བྱང་ཆུབ་སེམས་དཔའ་སེམས་དཔའ་ཆེན་པོ་དྲང་སྲོང་གཟའ་མཆོག་ཆེན་པོ་ལ་ཕྱག་འཚལ་ལོ། མཆོད་དོ་སྐྱབས་སུ་མཆིའོ། །ཞེས་བརྒྱ་རྩ་རེ་མ་ཆགས་པར་བྱས་པས། གཟའ་གདོན་ཐམས་ཅད་ལས་གྲོལ་ལོ་ཤྲི་བས་སོ། ། གསོལ་བསྡུས།༈ གསོལ་བསྡུས་ནི༔ རཾ་ཡཾ་ཁཾ༔ ཨོཾ་ཨཱཿ་ཧཱུྃ༔ གཙང་སྦྱར་གཏོར་མ་སྐྱེམས་ཕུད་དང་༔ བརྟེན་སྒྲུབ་མཆོད་བསྐང་མཐུན་པའི་རྫས༔ ལེགས་ལྡན་ཚོགས་བདག་ཕྱག་ཞལ་བཞི༔ མ་ནིང་སྔགས་སྲུང་རེ་མ་ཏི༔ ལྷ་ཆེན་དབང་ཕྱུག་གཟའ་རྣམ་སྲས༔ དུར་ཁྲོད་མ་མོ་ཞིང་སྐྱོངས་རྒྱལ༔ ཕུར་སྲུང་སྡེ་དཔོན་བསྟན་མ་སྐྱོང་༔ སྨན་བཙུན་ཚེ་རིང་རྒྱལ་པོ་དང་༔ རྡོར་ལེགས་བྲག་བཙན་ཙིའུ་དམར༔ ཐང་ལྷ་བདུད་བཙན་ཀླུ་གསུམ་དང་༔ སྲོག་བདག་བཞི་དང་གནོད་སྦྱིན་དམར༔ ཡ་བ་སྐྱ་གཅིག་གཡུ་སྒྲོན་མ༔ གངས་བཙན་གོང་བཙན་ཟངས་རི་དམར༔ དམག་ཟོར་བག་ཙེ་སྨྱོ་ཁ་དང་༔ རྡོ་རྗེ་གཤོགས་རྒོད་སྲོག་སྒྲུབ་མ༔ ཤ་ཟ་ཧོར་མོ་དབང་གི་རྒྱལ༔ གཞི་བདག་གནས་བདག་འགོ་བའི་ལྷ༔ སྐྱེས་ལྷ་སྤར་སྨེ་ཚེས་གྲངས་དང་༔ སྲོག་ལུས་དབང་ཐང་བརྟགས་ཆགས་ལྷ༔ མ་ལུས་འཁོར་དང་བཅས་པ་མཆོད༔ མི་མཐུན་རྐྱེན་ངན་བར་ཆད་སོལ༔ མཐུན་རྐྱེན་འདི་ཕྱིའི་བདེ་ལེགས་སྩོལ༔ འཁུ་ལྡོག་གདུག་རྩུབ་མ་མཛད་ཅིག༔ དམ་ལ་མ་འདའ་ས་མ་ཡཱ༔ ཨོཾ་དྷརྨཱ་པ་ལ་ཀྵེ་ཊ་པ་ལ་ལོ་ཀ་པ་ལ༔ ཡོ་ག་ཀ་ཡ་དེ་ཝ་མཎྜ་དཱེ་ཝ་བྷ་ལིང་ཏ་པཱུ་ཛ་ཁཱ་ཧི༔ ཞེས་ཤེས་རབ་བློ་འཕེལ་གྱིས་བསྐུལ་ངོར་ག་གཱས་སོ། ། ༈ ཧཱུྃ༔ཛ༔ གཟའ་ཀླུ་གཤིན་རྗེ་བཙན་མ་མོ༔ གནོད་སྦྱིན་དམར་ནག་དབང་ཕྱུག་ཆེ༔ ཤ་ཟ་ཧོར་མོ་དབང་གི་རྒྱལ༔ གསོལ་ལོ་མཆོད་དོ་ཕྲིན་ལས་མཛོད༔ ཅེས་ཀྱང་ག་གཱས་སོ། ། སྙིང་ཐིག་གསོལ་བསྡུས།༈ སྙིང་ཐིག་གསོལ་བསྡུས་ནི༔ བྷྱོཿ མ་མགོན་ལྕམ་དྲྭལ་ངའི་ནུས་མ༔ རྡོ་རྗེ་ལེགས་པ་གཟའ་བདུད་རྒྱལ༔ ཕུར་བསྲུང་བཅུ་གཉིས་གཡུ་ཡི་སྒྲོན༔ ཚེ་རིང་མཆེད་ལྔ་ཙིའུ་དམར༔ འཁོར་དང་བཅས་པ་ཐམས་ཅད་ལ༔ བདུད་རྩི་སྐྱེམས་གཏོར་མཐུན་རྫས་འབུལ༔ མི་མཐུན་རྐྱེན་སོལ་རྣལ་འབྱོར་གྱིས༔ གང་བཅོལ་ཕྲིན་ལས་ལྷུན་གྲུབ་མཛོད༔ ཅེས་ཀྱང་ག་གཱས་སོ། ། ༄༅༔ སྔགས་བསྲུང་ཨེ་ཀ་ཙ་ཊིའི་མཆོད་ཕྲིན་བསྡུས་པ་བཞུགས་སོ༔ བཅའ་ཐབས་དབུས་སུ་གཏོར་མ་གཅིག༔ ཕྱོགས་བཞིར་རང་འདྲ་བཞི་བའོ༔ གྲི་གུག་མཚན་པའི་མཆོད་སྒྲུབ་གཏོར༔ ཉེར་སྤྱོད་ཆ་མ་ཆོ་དགུའི་གཏམ༔ ས་མ་ཡཱ༔ བྷྱོཿ མདུན་དུ་དྲག་པོའི་གཞལ་ཡས་ཁང་༔ ནང་ན་པདྨ་ཉི་ཟླ་དང་༔ དྲིའུ་ནག་མོ་མགོ་དགུའི་སྟེང་༔ རིན་ཆེན་མུ་ཏིག་སྒ་ཆ་བསྟད༔ དེ་སྟེང་བྷྱོ་ལས་སྐད་ཅིག་གིས༔ དབྱིངས་ཀྱི་རྗེ་མོ་ཨེ་ཀ་ཛ༔ ཞལ་གཅིག་ཕྱག་གཉིས་སྐུ་མདོག་མཐིང་༔ རལ་བ་གཅིག་དང་མིག་གཅིག་པ༔ ནུ་གཅིག་མཆེ་བ་གཅིག་ཏུ་གཙིག༔ སྐུ་ལ་ན་བཟའ་མཐིང་ནག་གསོལ༔ ཕྱག་གཡས་དགྲ་སྙིང་དམར་པོ་ཟ༔ གཡོན་པས་གཡུ་སྤྱང་ཁྲ་ཐབས་འགྱེད༔ མདུན་དུ་སྲིན་མོ་མི་ཟན་མ༔ འབྲུག་ཞོན་སྤྲིན་གྱི་གོ་ཟུ་ཅན༔ གཡས་སུ་བལ་མོ་ཁྲག་མིག་མ༔ རོ་ལངས་ཞོན་ནས་མཁའ་ལ་འགྲོ༔ རྒྱབ་ཏུ་མ་མོ་རུས་འཆའ་མ༔ སོ་བྱ་ཞོན་ནས་མཚོ་ལ་བརྒལ༔ གཡོན་དུ་མོན་མོ་ཧུལླེ་མ༔ སྦྲུལ་ནག་མགོ་བརྒྱ་ཞོན་ནས་འཁྱུགས༔ ཀུན་ཀྱང་སྐུ་མདོག་མཐིང་ནག་ལ༔ ཕྱག་གཡས་བམ་གྱི་མགོ་ཁར་འཛུད༔ གཡོན་རྣམས་བྷནྡྷ་ཁྲག་བཀང་བསྣམས༔ འཁོར་དུ་ཤ་ཟ་སྨུག་ནག་འབུམ༔ ཡང་སྤྲུལ་ཕོ་ཉ་བསམ་མི་ཁྱབཿ འོད་འཕྲོས་འོག་མིན་ཆོས་དབྱིངས་ནས༔ ཡེ་ཤེས་རང་བཞིན་སྤྱན་དྲངས་བསྟིམ༔ ཧཱུྃ༔ དད་པ་དང་ནི་དམ་ཚིག་གིས༔ འབོད་དོ་གཤེགས་སོ་བསྟན་སྲུང་རྒྱལ༔ ཀུན་ཏུ་བཟང་མོའི་སྤྲུལ་བ་མཆོག༔ ཨེ་ཀ་ཛ་ཊི་གཤེགས་སུ་གསོལ༔ སྐུ་གསུང་ཐུགས་སྤྲུལ་གཤེགས་སུ་གསོལ༔ མོན་མོ་ཤ་ཟ་མ་མོའི་སྡེ༔ མ་ལུས་འཁོར་བཅས་གཤེགས་སུ་གསོལ༔ མ་འགྱིང་མྱུར་དུ་གཤེགས་སུ་གསོལ༔ ཨོཾ་མ་མ་ཨེ་ཀ་ཙ་ཊི་ས་མ་ཡ་ཛ་ཛ༔ ཧཱུྃ༔ བསྟན་དགྲ་བསྒྲལ་བའི་བམ་ཆེན་ལ༔ སྡོན་གྱི་དམ་ཚིག་དབང་གིས་ནི༔ མ་མོ་ཆེན་མོ་འཁོར་དང་བཅས༔ གཉིས་མེད་བརྟན་པར་བཞུགས་སོ་འཚལ༔ ཨོཾ་རོ་རུ་ཨེ་ཀ་ཙ་ཊི་ས་མ་ཡ་ཏིཥྛ་ལྷན༔ ཧཱུྃ༔ བསྟན་པ་གཉན་པོ་བསྲུང་བའི་ཕྱིར༔ རྣལ་འབྱོར་གུས་པས་ཕྱག་འཚལ་ལོ༔ མཆོད་གཏོར་སྐྱེམས་གཙང་གསེར་གཡུའི་ཚོགས༔ བཞེས་ནས་བདག་གི་ཕྲིན་ལས་མཛད་དུ་གསོལ༔ བཛྲ་ཨེ་ཀ་ཙ་ཊི་ན་མོ་པཱུ་ཛ༔ ཧཱུྃ༔ རལ་གཅིག་སྲིད་པ་གཞི་ལ་བཟློག༔ ཚེམས་གཅིག་བསྟན་དགྲ་ཟས་སུ་ཟ༔ སྤྱན་གཅིག་འཁོར་འདས་དུས་མཉམ་གཟིགས༔ ནུ་གཅིག་བརྒྱུད་འཛིན་རྗེས་སུ་སྐྱོངས༔ ཙིཏྟས་རུ་ཏྲའི་དུག་གསུམ་གཅོད༔ གཡུ་སྤྱང་ཉམས་ལ་ཁྲ་ཐབས་གཏོང་༔ དྲེལ་རྟ་མྱུར་མགྱོགས་ཁྱབ་འཇུག་སྟོན་༔ སྤྲུལ་བས་བཏང་སྙོམས་ནམ་མཁའ་མཚོན༔ ཡང་སྤྲུལ་ཐབས་མང་ཆོ་འགྲེལ་བས༔ གང་ནས་བོས་ཀྱང་ཁྱོད་ཀྱི་མིང་༔ དེ་གཅིག་ཐིག་ལེ་གཅིག་གཅིག་མཚོན༔ མ་མོ་ཁྲོས་མ་ནག་མོ་ཆེ༔ དབྱིངས་ཕྱུག་ཡུམ་ཆེན་ཁྱེད་ལ་བསྟོད༔ ཅེས་བརྗོད་དོ༔ དེ་ནས༔ བདག་གི་ཐུགས་ཀའི་འོད་ཀྱིས་བསྐུལ་བས་མ་མོའི་ཐུགས་དམ་རྗེས་སུ་དྲན་ཏེ༔ འཁོར་འདས་ཀྱི་སྲོག་སྙིང་འོད་ཀྱི་ཙིཏྟའི་ཚུལ་དུ་བདག་གི་ཕྱག་ཏུ་གཏོད་པར་བསམ་ལ༔ ཨོཾ་ཨེ་ཨ་ར་ལྀ་ཙ་ཌི་མ་མ་ཛ་ཛ༔ རྦད་ན༔ དགྲ་ལ་རྦད་རྦད༔ བསད་ན༔ དགྲ་བོ་ཧུར་ཐུཾ་སོད༔ ཅེས་སོ༔ དེ་ནས་མཆོད་ན༔ བྷྱོཿ དཔལ་ལྡན་ནག་མོ་ཀུན་གྱི་གཙོ༔ རི་རབ་ལྷོ་ཡི་མངའ་བདག་ལ༔ མཐུན་པའི་རྫས་ཀྱིས་བསྐང་བ་ནི༔ འབྲུག་དང་སོ་བྱ་དྲེའུ་རྟ༔ ཁྱེད་ཀྱི་མཐུན་པའི་རྫས་སུ་འབུལ༔ སྐུ་གླུད་མདོས་དང་བཟའ་བཅའ་བཏུང་༔ ཁྱེད་ཀྱིས་བཞེད་པའི་དཀོར་དུ་འབུལ༔ ཕྱི་ནང་གསང་བའི་མཆོད་པ་ཀུན༔ ཁྱེད་ཀྱིས་བཞེས་པའི་རྟེན་དུ་འབུལ༔ ཡོ་བྱད་རྣམ་པ་སྣ་ཚོགས་ཀྱང་༔ ཁྱེད་ཀྱི་ཐུགས་དགོས་བསྐང་ཕྱིར་འབུལ༔ སྲིད་པའི་མ་མོ་མ་འཁྲུགས་ཤིག༔ རྣལ་འབྱོར་བདག་ལ་འགོ་བ་དང་༔ སྡོང་གྲོགས་ཕྲིན་ལས་ཅི་བཅོལ་མཛོད༔ རང་དམ་གཉན་པོ་དེ་དྲན་ནམ༔ བཛྲ་ཨེ་ཀ་ར་མ་བྷྱོ༔ ཨེ་དམ་བྷ་ལིདྟ་ཁཱ་ཧི༔ ཅེས་ཀྱང་དགེ་ལེགས་ངོར་ག་གཱས་སོ། ། ༈ རཾ་ཡཾ་ཁཾ༔ ཨོཾ་ཨཿཧཱུྃ༔ འཇམ་དཔལ་ནག་པོའི་དངོས་སྤྲུལ་གེ་སར་རྒྱལ༔ སྤྲུལ་བ་གྲུབ་ཆེན་ཕུ་ནུ་སུམ་ཅུ་དང་༔ དགྱེས་སྡེ་མ་སྲུ་བཅུ་གསུམ་སྐུ་འཁོར་འབངས༔ དགྲ་བླ་ཝེར་མ་ལྷ་ཀླུ་གཉན་གསུམ་སོགས༔ མ་ལུས་ལུས་པ་མེད་པ་ཐམས་ཅད་ལ༔ ཟག་མེད་དམ་རྫས་རྒྱན་གྱི་མཆོད་པ་འབུལ༔ རྟག་ཏུ་བསྲུང་སྐྱོབས་ཁ་མགོན་སྡོང་གྲོགས་མཛོད༔ དྷརྨཱ་རཱ་ཛ་ས་པཱ་རི་ཝ་ར་ཨེ་དཾ་བྷ་ལིདྟ་ཁཱ་ཧི༔ ཤེས་རབ་ངོར་ག་གཱས་སོ། ། གེ་སར་གསོལ་བསྡུས།༈ གེ་སར་གསོལ་བསྡུས་ནིཿ ཧོཿ དགྲ་ལྷའི་རྒྱལ་པོ་འཛམ་གླིང་སེང་ཆེན་རྒྱལཿ ཡུམ་སྲས་སྤྲུལ་དང་ཡང་འཁོར་ཐམས་ཅད་ལཿ མཐུན་རྫས་འདོད་དགུའི་མཆོད་པ་འདི་འབུལ་བསཿ བསམ་པའི་དོན་ཀུན་ཆོས་བཞིན་འགྲུབ་པར་མཛོདཿ ག་གཱས་སོ། ། ༈ གསོལ་མཆོད་འདོད་ན༔ ཛཿ གཟའ་བདུད་ནག་པོ་འཁོར་བཅས་ལ༔ མཐུན་པའི་དམ་རྫས་སྣ་ཚོགས་དང་༔ དགྲ་ཤ་ཁྲག་གི་རི་མཚོ་ཐང་༔ ཕྱི་ནང་གསང་བའི་མཆོད་སྤྲིན་ནི༔ ཀུན་བཟང་རྣམ་པར་ཐར་བ་ཡིས༔ གུས་པ་ཆེན་པོའི་བསྟི་སྟངས་བགྱིད༔ བཅོལ་བའི་ཕྲིན་ལས་འགྲུབ་པར་མཛོད༔ ཤྲི་བས་སོ། ། ༈ ཀྵཿ གནོད་སྦྱིན་ཤན་པ་འཁོར་བཅས་ལཿ ཕྱི་ནང་གསང་བའི་གཏོར་མཆོད་འབུལཿ ཕྲིན་ལས་རབ་འབྱམས་ཡོངས་གྲུབ་མཛོདཿ མ་འདའ་བཛྲ་ས་མ་ཡཱཿ ཅེས་ཀྱང་མཉྫུ་མ་ཏིའི་ངོར་ཤྲཱི་བས་སོ། ། ༈ རྃ་ཡྃ་ཁྃཿ ཨོཾ་ཨཱཿཧཱུྃཿ ཀྱཻཿ གནོད་སྦྱིན་ཤན་པ་འཁོར་དང་བཅསཿ མ་ཐོགས་གནས་འདིར་གཤེགས་སུ་གསོལཿ ཤ་ཁྲག་དམར་གཏོར་མཆོད་འབུལ་བཞེསཿ རྐྱེན་སོལ་བསམ་དོན་ལྷུན་གྲུབ་མཛོདཿ ག་གཱས་སོ། ། ༈ ཀྱེཿ ལྷ་ཡི་བླ་མ་ལྷ་ཡི་ལྷ་ཆེན་པོཿ དབང་ཕྱུག་ཡོན་ཏན་བརྒྱད་དང་ལྡན་པས་མཐུའིཿ འཁོར་འདས་ཁམས་ཀྱི་དཔལ་གཡང་དགེ་མཚན་ཀུནཿ སེམས་ཅན་ཡོངས་ཀྱི་ལོངས་སྤྱོད་སྐལ་བར་སྩོལཿ འཛད་མེད་ནམ་མཁའ་མཛོད་ཀྱི་གཏེར་སྒོ་ཕྱེསཿ ཨོཾ་མ་ཧ་དཱེ་བ་ཛཿ སརྦ་བ་སུ་སིདྷི་ཕ་ལ་ཧོཿ དཱེ་བ་རཱ་ཛའི་བསྐུལ་ངོར་ག་གཱས་སོ། ། ༈ ཧཱུྃ་ཛ༔ དྲང་སྲོང་གཟའ་མཆོག་གནོད་སྦྱིན་མེ་རུ་ཙེ༔ ཡིད་བཞིན་དབང་རྒྱལ་དབང་གི་འཁོར་ལོའི་བསྒྱུར༔ དམ་ཚིག་དབང་གིས་འདིར་གཤེགས་མཆོད་འབུལ་བཞེས༔ ཐུགས་དམ་གཉན་བསྐང་བཅོལ་པའི་ཕྲིན་ལས་མཛོད༔ ཅེས་ཀྱང་བྷིག་ཐོའི་བསྐུལ་ངོར་ག་གཱས་སོ། ། ༈ ཧཱུྃ༔ རྒྱལ་ཀུན་ཡེ་ཤེས་ལྔ་ཡི་རང་གཟུགས་ནི༔ ཞིང་སྐྱོང་མཁའ་འགྲོའི་དབང་མོ་ཚེ་རིང་མ༔ མཆེད་ལྔ་འཁོར་དང་བཅས་པཐམས་ཅད་ལ༔ དམ་རྫས་འདོད་ཡོན་རྒྱན་གྱི་མཆོད་གཏོར་འབུལ༔ ཕྱི་ནང་རྐྱེན་སོལ་མཆོག་ཐུན་དངོས་གྲུབ་སྩོལ༔ ཅེས་ཀྱང་བླ་མ་དམ་པ་སརྦ་ཛྙཱ་དཱེ་ཝའི་ངོར་ག་གཱས་སོ། ། སྔགས་བསྲུང་ཤ་ཟ་ཧོར་མོའི་དོན་གསོལ་མ་མོའི་གད་རྒྱངས།སྔགས་བསྲུང་ཤ་ཟ་ཧོར་མོའི་དོན་གསོལ་མ་མོའི་གད་རྒྱངས་ཞེས་བྱ་བཞུགས་སོཿ བྷྱོཿ སྲིད་པའི་ཤ་ཟ་ཆེན་མོ་ཁྱོདཿ མ༵་ནི་སྙིང་པོའི་གནས་ལུགས་ཡིནཿ མོ་ནི་འཁོར་འདས་གནས་ལུགས་ཡིནཿ མ༵་ནི་མ་བཅོས་ཀུན་གྱི་གཞིཿ མོ༵་ནི་གཞི་ལ་ཅིར་ཡང་སྲིདཿ མ༵་ནི་རྒྱ་ཆད་ཕྱོགས་ལྷུང་མེདཿ མོ༵་ནི་ཀུན་འབྱུང་བྱང་ཆུབ་སེམསཿ ཆོས་ཉིད་ཀུན་ཁྱབ་མ་མོ་ཆེ་ཧོཿ མ༵་ནི་སེམས་མེད་ཆོས་ཀྱི་དབྱིངསཿ མོ༵་ནི་སྲོག་མེད་སྤྱན་ལྔའི་བཀྲཿ ཆེ་ཞེ་རྐང་མེད་མཁའ་ལ་འགྲོཿ རྟོགས་པ་ཡེ་ཤེས་མ་མོ་ཆེའོཿ འབྱུང་ལྔ་གཞི་ཡི་མ༵་ཞེས་བྱཿ བསྐྱེད་བྱེད་བརྟན་གཡོ་མོ༵འི་རྒྱུད་འཁྲུངསཿ ཡེ་ནས་མ་ཤེས་ཡེ་ཤེས་ཡིནཿ འབྱུང་བཞི་སྤྱི་ཡིས་ཆེན་མོ་ཧོཿ དངོས་པོ་ནང་གི་མ༵་ཞེས་བྱཿ ཤ་ཁྲག་དྲོད་དབུགས་མོ༵་ཞེས་ཡུམཿ ཤེས་པས་སྲིད་འབྱུང་མཁའ་འགྲོ་ཡིནཿ རྒྱུ་ལུས་ནང་གི་མ་ཆེན་མོ་ཧོཿ མི་སྲིད་སྲིད་པར་བརྫུ་ཐབས་སུཿ ཀུན་འཕྲུལ་སྒྱུ་མ་ཁ་མིག་མེདཿ མདུན་དུ་མི་འགྲོ་རྒྱབ་དུ་འཁྱོལཿ སེམས་ནི་ཀུན་སྲིད་མ་མོ་ཆེ་ཧོཿ ཡུལ་གྱིས་སེམས་ལ་བདེ་སྡུག་འདུདཿ དེ་ཡིས་ལུས་ལ་ཕན་གནོད་རྐྱེནཿ གཡས་སུ་མི་དགའ་གཡོན་ལ་འདརཿ ཕན་གནོད་ཡུལ་གྱི་མ་མོ་ཆེའོཿ ཡིད་ཟས་དང་བླངས་མཐུ་བརྟས་ནསཿ ཉོན་མོངས་དུག་ལྔའི་ལས་བསགས་ཀྱངཿ ལམ་འགོགས་སྲོག་ནི་ལྕགས་ལ་བླཿ ཕན་གནོད་ནང་གི་མ་མོ་ཆེའོཿ རྩ་བ་མ་ཆོད་ཡལ་གར་རྩེསཿ མཆོད་རྟེན་མ་བཀུར་ལྡོག་པས་བརྫིསཿ དེ་ལས་ཁ་བྲག་ལམ་དུ་འཁྱརཿ ཕན་གནོད་གསང་བའི་མ་མོ་ཆེའོཿ རྩ་ལ་ཞོན་ནས་ཁྲག་ལ་རྒྱུཿ དོན་སྙིང་ཡན་ལག་དབང་པོར་བདགཿ འབྱུང་འཇུག་དྭངས་སྙིགས་ལས་བྱེད་པསཿ འཇུག་ཤེས་བར་གྱི་མ་མོ་ཆེའོཿ དྭངས་སྙིགས་ལུས་སེམས་ཟུངས་བྱེད་དེཿ བཅོ་བརྒྱད་ཁམས་ཀྱི་སྐད་མེད་མའིཿ སླར་ཡང་ལ་ཝའི་ཆོས་སྐད་མཐོཿ གསང་བ་ཁམས་ཀྱི་མ་མོ་ཆེའོཿ ཁྱད་པར་འཇིག་རྟེན་ལས་གཟུགས་ཀྱིཿ བལྟ་ཞིང་དགོད་ལ་རེག་པས་འཁྱུདཿ བདེ་དགའི་དུས་སྟོན་ཕྱག་རྩེར་གཏོདཿ ཕྱག་རྒྱ་རཱ་ཏིའི་མ་མོ་ཆེའོཿ རི་རབ་རྩེ་སོགས་གནས་གསུམ་ནསཿ ཕྲ་མེན་གར་གྱིས་རྐེད་མེད་ཁྲོཿ རབ་འབྱམས་ལས་ལ་རང་བྱན་ཚུདཿ ཕྲིན་ལས་མྱུར་མཛད་མ་མོ་ཆེའོཿ མདོར་ན་འཁོར་འདས་གཡོ་འགྱུར་ཀུནཿ ཡེ་ཤེས་མ་མོའི་གར་སྟབས་ཡིནཿ ཡུལ་གྱི་བརྡ་སྒྲ་ཚངས་དབྱངས་ཀུནཿ ཆོས་ཉིད་མ་མོའི་གད་རྒྱངས་ཡིནཿ རྟོགས་རིག་ཉམས་དང་བློ་སྣང་ཀུནཿ བདེ་ཆེན་མ་མོའི་སྦྱོར་སྒྲོལ་ཡིནཿ བྱ་བྱེད་འབྱུང་དུས་འཁོར་ལོ་གངཿ ཅིར་ཡང་མ་མོའི་མི་མཛད་མཛདཿ སྲིད་ཞིའི་སྒོ་ཚུལ་བརྗིད་བག་བསྐྱངཿ དབང་ལྡན་མ་མོའི་མཚར་སྡུག་བཞདཿ ནད་རིམས་ཁྲག་དང་ཁྲམ་ཚོན་གྲུཿ དམ་ཚིག་མ་མོའི་ཆོ་འཕྲུལ་གཟེཿ ལྟས་ངན་བྱོལ་སོ་གོད་འབྱུང་འཁྲུགསཿ འཇིག་རྟེན་མ་མོའི་མཐུ་སྟོབས་ཡིནཿ དུས་འཁྲུགས་མཚོན་བསྐལ་མུ་གེ་སོགསཿ བྱས་ཉེས་མ་མོའི་གདུག་རྩུབ་ཡིནཿ ཆོས་སྲིད་དབང་ཐང་དགོས་འདོད་དགུཿ བསྟན་སྲུང་མ་མོའི་དངོས་གྲུབ་ཡིནཿ དེ་ཕྱིར་དོན་མཐོང་དབུ་འཕང་བསྟོདཿ མཆོད་བརྟེན་གུས་པའི་བྱིན་རླབས་ཀྱིསཿ ཆོ་འཕྲུལ་ནད་དལ་རང་ལ་བསྡུསཿ ཡེ་ཤེས་པ་ཁྱོད་རང་སར་བཞུགསཿ སངས་རྒྱས་བསྟན་དང་བསྟན་འཛིན་སྐྱོངསཿ ཀླ་ཀློ་གདུག་པའི་བསྟན་པ་བསྣུབསཿ རྣལ་འབྱོར་བདག་གི་ཕན་སྐྱོབས་མཛོདཿ དམ་ལ་མ་འདའ་ས་མ་ཡཱཿ བཅོལ་བའི་ཕྲིན་ལས་འགྲུབ་པར་མཛོདཿ འདི་ཚར་རེ་བཏོན་ན་དུས་ངན་གྱི་ནད་རིམས་ཐམས་ཅད་ཆད་དོཿ ཤ་ཟ་ཧོར་མོ་དངོས་ཀྱིས་རྨི་ལམ་དུ་ག་ག་ཨ་བྷྱེ་ལ་གནང་ངོཿ མངྒ་ལཾ། ། ཞིང་སྐྱོང་ལྷ་མོའི་གསོལ་མཆོད།ཞིང་སྐྱོང་ལྷ་མོའི་གསོལ་མཆོད་ནི༔ དམར་གཏོར་དགུའི་མཐར་བྷ་ལིང་བསྐོར༔ བརྟེན་བའི་རྫས་ནི་ཤ་ལྔ་དང་༔ ཁྱད་པར་བྱང་ཆུབ་དཀར་དམར་ཡིན༔ མཆོད་པ་བདུད་རྩི་ལྷག་མ་བཞི༔ བསྐང་རྫས་ལ་ནི་མདོས་མདངས་མཆོད༔ མཐུན་པ་ནལ་བུའི་བྱང་ཆུབ་སེམས༔ ས་མ་ཡཱ༔བྷྱོཿ མདུན་དུ་གཏུམ་འབར་དུར་ཁྲོད་དཀྱིལ༔ ཐོད་མཁར་འབར་བ་གྲུ་གསུམ་དབུས༔ པདྨ་ཉི་མ་བམ་གྱི་སྟེང་༔ སྔགས་བདག་ལྷ་མོ་ངན་ནེ་མ༔ དམར་མོ་དུར་ཁྲོད་ཆས་དང་ལྡན༔ ཕྱག་གཡས་སྙིང་དང་གཡོན་མེ་ལོང་༔ ཞབས་གཉིས་འདོར་སྟབས་སྡང་མིག་གཡོ༔ ཕྱོགས་བཞིར་སྤྲུལ་པ་རང་འདྲ་བཞི༔ མཚམས་ཕྱོགས་བརྒྱད་དུ་ལྕམ་དྲྭལ་དང་༔ ཡང་འཁོར་བྱེ་བ་ས་ཡ་གསལ༔ འོད་འཕྲོས་གནས་ནས་སྤྱན་དྲངས་ཏེ༔ གདན་ལ་བཞུགས་གསོལ་གུས་ཕྱག་འཚལ༔ མཐུན་རྫས་ཕྱི་ནང་གསང་མཆོད་འབུལ༔ གདུང་དབྱངས་རྣམ་ཐར་དྲན་པས་བསྟོད༔ མི་འབྲལ་སྙིང་ཉེ་འགྲོགས་བདེར་འཁོར༔ མ་མ་བཛྲ་ས་མ་ཡཱཿ དེ་ནས་བསྙེན་ན༔ ཧཱུྃ༔ མ་མོའི་ཐུགས་ཀར་ཉི་གདན་ལ༔ བྷྱོ་ཡིག་མཐའ་མར་སྡགས་ཀྱིས་བསྐོར༔ བཟླས་པས་བཀའ་ཉན་གསུང་སྡོད་དེ༔ ཕྲིན་ལས་རབ་འབྱམས་བསྒྲུབ་པར་བསམ༔ བྷྱོ་ཤ་མ་ཤ་ན་དེ་ཝ་ས་མ་ཡ་ཛ༔ ཅེས་ཀྱང་ཏིང་འཛིན་མ་གཡེལ་བར༔ འབྲུ་འབུམ་ཞིག་གིས་ལྷ་མོ་འཁོར༔ དེ་ནས་གསོལ་མཆོད་བསྡུས་པ་ནི༔ རཾ་ཡཾ་ཁཾ༔ ཨོཾ་ཨཱཿཧཱུྃ༔ གཏོར་མ་སྐྱེམས་ཕུད་མཆོད་པའི་སྤྲིན༔ ཡེ་ཤེས་བདུད་རྩིར་བྱིན་རླབས་ཏེ༔ དུར་ཁྲོད་ལྷ་མོ་འཁོར་བཅས་མཆོད༔ རྣལ་འབྱོར་བསམ་དོན་ཆོས་བཞིན་བསྒྲུབ༔ ཨེ་དམ་བྷ་ལིདྟ་ཁཱ་ཧི༔ ཀརྨ་སརྦ་སིདྡྷི་ཧོ༔ ཅེས་ཀྱང་མགོན་པོའི་བསྐུལ་ངོར་ག་གཱས་སོ། །ཨོཾ་བཛྲ་རཱ་ཏི་ཁུག་ཛ༔ ཞེས་པས་རིག་མ་དབང་དུ་འདུས༔ ཨོཾ་བཛྲ་ཤ་མ་ཤ་ན་ནྲྀ་ཏྲི་རྦད་རྦད༔ ཅེས་དགྲ་ལ་རྦད་དོ༔ ཡང་ཐན་འགྱེད་སྔགས༔ ཨོཾ་མུ་ཁཱ་བི་ཤྭ་རཱུ་པ་སྟོན་ཡཿརྦད་ཡ༔ ཞེས་དང་བསད་སྔགས་ནི༔ ཨོཾ་བཛྲ་སྟི་ར་དཱི་པ་པ་ཏི༔ སརྦ་བིགྷྣན་མ་ར་ཡ་ཕཊཿ སོད་སོད༔ ཅེས་ཀྱང་བསྟན་འཛིན་གསུང་ངོར་ག་གཱས་སོ། ། གནོད་སྦྱིན་ཙིའུ་དམར་པོའི་གསོལ་བསྡུས་ཁམས་གསུམ་དབང་བསྒྱུར།༈ གནོད་སྦྱིན་ཙིའུ་དམར་པོའི་གསོལ་བསྡུས་ཁམས་གསུམ་དབང་བསྒྱུར་བཞུགས་སོཿ མཆོད་གཏོར་ལ་སོགས་ཚོགས་བྱས་ནསཿ གྲངས་ལྡན་ཏིང་འཛིན་དག་པས་བསྐྱལཿ ཕྲིན་ལས་རབ་འབྱམས་ཐམས་ཅད་ཀུནཿ འདི་ཡིས་བསྒྲུབ་པོ་སྐལ་ལྡན་བུཿ ཙཿ འདི་ནས་ནུབ་ཕྱོགས་བཙན་ཡུལ་ཟངས་ཐང་ནཿ གནོད་སྦྱིན་ཆེན་པོ་རོལ་བ་མཆེད་སྡེ་བདུནཿ གཏམ་ཁྲིག་ཕ་མཐར་བརྡོ་བའི་རྟེན་བརྟེན་པརཿ ཡིད་ཀྱི་གཟུགས་ཆགས་དབང་བསྒྱུར་སྤྲུལ་འཁོར་བཅསཿ ཤ་ཁྲག་དམར་གཏོར་བཟའ་བཏུང་ཡོ་བྱད་འབུལཿ ཐུགས་ཀྱི་བཞེད་པ་མཐའ་དག་འདིའི་སྐོང་ནསཿ དགྱེས་རབ་རྩེར་ཕྱིན་རབ་འབྱམས་ཕྲིན་ལས་བསྒྲུབཿ འགལ་རྐྱེན་མཐའ་དག་ཆོས་ཀྱི་དབྱིངས་སུ་སོལཿ མཐུན་རྐྱེན་བསམ་པའི་དོན་ཀུན་ཡོངས་གྲུབ་མཛོདཿ བཀའ་དང་དམ་ལ་མ་འདའ་ས་མ་ཡཱཿ ཅེས་བརྗོད་ཕྲག་དོག་གདུག་རྩུབ་ཞིཿ བཀྲ་ཤིས་བདེ་ལེགས་དཔལ་བསྐྱེད་དོཿ བསྐུལ་བོས་ངོ་སོ་མ་ལྡོག་པར། ཁྲག་འཐུང་ག་གཱ་རྒྱལ་པོས་སོ། ། དཀོར་སྲུང་ཆེན་པོའི་གསོལ་མཆོད་བསྡུས་པ་བདེ་ལེགས་མྱུ་གུ།༈ རྡོར་སེམས་དགོངས་པ་འདུས་པ་ལས༔ དཀོར་སྲུང་ཆེན་པོའི་གསོལ་མཆོད་བསྡུས་པ་བདེ་ལེགས་མྱུ་གུ་བཞུགས་སོ༔ ན་མོ་གུ་རུ་པདྨ་ཀཱ་ར་ཡེ༔ ཡོ་བྱད་འབྱོར་ཚོགས་སྣ་ཚོགས་པ༔ ནམ་མཁའ་མཛོད་ཀྱི་སྔགས་ཀྱིས་བརླབས༔ ཀྱཻ༔ ཡིད་བཞིན་དབང་གི་རྒྱལ་པོ་ཁྱོད༔ མ་གཡེལ་བདག་ལ་དགོངས་སུ་གསོལ༔ ཕུད་དང་སྐྱེམས་གཏོར་འདི་བཞེས་ལ༔ བདག་གི་བཅོལ་བའི་ལས་རྣམས་ཀུན༔ མྱུར་དུ་འགྲུབ་པའི་གྲོགས་དན་མཛོད༔ བརྩེ་བའི་ཞལ་ཀྱང་བསྟན་དུ་གསོལ༔ ཁམས་གསུམ་དབང་དུ་སྡུད་པ་དང་༔ སྐྱེ་འགྲོའི་བློ་ཡིད་དབང་བསྒྱུར་ལ༔ བདག་གི་བྲན་དུ་ཁོལ་བར་མཛོད༔ བསོད་ནམས་དབང་ཐང་རླུང་རྟ་དང་༔ བླ་གཟའ་མཐུ་དང་སྙན་གྲགས་སྟོབས༔ ཡར་ངོས་ཟླ་བ་ལྟར་རྒྱས་མཛོད༔ དམ་ལ་མ་འདའ་ས་མ་ཡཱ༔ བཅོལ་བའི་ཕྲིན་ལས་གྲུབ་པར་མཛོད༔ འདི་ཡིས་བསམ་པའི་དོན་རྣམས་ཀུན༔ འབད་མེད་ཡོངས་སུ་གྲུབ་པར་གྱུར༔ ཅེས་རང་ལོ་བཅོ་བརྒྱད་པ་ལ་ཕུན་ཚོགས་ནོར་བུའི་གླིང་དུ་སླེབས་པའི་མཚན་མོའི་ཐུན་དང་པོ་ལ་སྣང་གསལ་གྱི་ངོག་སུ་ག་ག་ཨ་བྷྱེས་གང་དྲན་སུག་རིས་སུ་བགྱིས་པའོ། །སརྦ་མངྒ་ལཾ། ། ༈ ཀྱཻཿ ཟླ་བའི་དབང་བོ་འཁོར་བཅས་ལཿ ཕྱི་ནང་གསང་བའི་མཆོད་པ་འབུལཿ བྱམས་དང་བརྩེ་བས་བུ་བཞིན་སྐྱོངསཿ རབ་འབྱམས་ཕྲིན་ལས་ལྷུན་གྲུབ་མཛོདཿ ཅེས་ཀྱང་ག་གཱས་སོ། ། ༈ བསྡུ་ན༔ ཀྱཻ༔ རྡོ་རྗེ་འབར་བའི་རྒྱལ་པོ་ལ༔ འདོད་ཡོན་ལྔ་ལྡན་དམ་རྫས་འབུལ༔ ཐུགས་དམ་བསྐང་ལ་འཁོན་འཁྲུགས་བྱང་༔ བཅོལ་པའི་ཕྲིན་ལས་འགྲུབ་པར་མཛོད༔ དེ་ལྟར་གྲངས་ལྡན་བསྐྱལ་བ་ན༔ གཉན་ནད་བཅོ་བརྒྱད་ལ་སོགས་པ༔ མི་མཐུན་བར་ཆད་ཐམས་ཅད་ཞི༔ ཞི་རྒྱས་དབང་དྲག་ཕྲིན་ལས་འགྲུབ༔ ས་མ་ཡཱ༔ ༈ ཉོན་མོངས་ཤེས་བྱའི་སྒྲིབ་པས་དྲི་མའི་བག༔ ཀུན་བརྟགས་གཟུང་དང་འཛིན་པའི་རྣམ་རྟོག་ཀུན༔ རང་བྱུང་ཡེ་ཤེས་ཆེན་པོའི་ཀློང་དུ་དག༔ བསང་དང་བསང་བྱ་དབྱེར་མེད་ངང་དུ་གྲོལ༔ ཨ་ལ་ལ་ཧོ༔ བཛྲ་ཤུདྡྷེཨཱ༔ ཀིས་ཧིས་ཧིས༔ ག་གཱས་སོ། ། ཡོངས་སུ་རྣལ་འབྱོར་ཆེན་པོའི་གསོལ་འདེབས་སྨོན་ལམ་རྡོ་རྗེའི་རྒྱ་ཅན།༄༅༔ ཡོངས་སུ་རྣལ་འབྱོར་ཆེན་པོའི་གསོལ་འདེབས་སྨོན་ལམ་རྡོ་རྗེའི་རྒྱ་ཅན་བཞུགསཿ ཨེ་མ་ཧོ༔ རྣལ་འབྱོར་མ་ཧཱ་ཡོ་གའི་བུམ་དབང་ཐོབ༔ ཕྱག་རྒྱ་སྟོང་ཆེན་སྒྱུ་མ་གཅིག་སྤྲོས་སུ༔ གཡོ་ཐོབ་གོམས་བརྟན་མཐར་ཕྱིན་དམ་རྒྱའི་ཟིན༔ གསང་དབང་ཚོགས་ཆེན་ལམ་ལ་འཇུག་ནུས་ཤོག༔ ཡེ་གནས་རྡོ་རྗེའི་ལུས་ཀྱི་དཀྱིལ་འཁོར་དུ༔ སྤྲུལ་སྐུ་ལམ་དུ་སྣང་བ་རྩའི་གཞལ་ཡས༔ ལོངས་སྐུ་ལམ་དུ་སྣང་བ་དྭངས་མའི་རླུང་༔ ཆོས་སྐུ་ལམ་དུ་སྣང་བ་ཐིག་ལེའི་སྤྲིན༔ གཞི་ལ་རྫོགས་པའི་ཕྱག་རྒྱ་(རྩ་ཐིག་རླུང་གསུམ་གྱི་རང་བཞིན་སངས་རྒྱས་སྐུ་གསུམ་དུ་སངས་རྒྱས་པ་ནི་ལྷ་སྐུ་ཕྱག་རྒྱ་ཆེན་པོ༔ ཆོས་ཉིད་ཀྱི་དགོངས་དོན་རང་ལ་རང་བརྡ་སྤྲོད་པ་གསུང་ཆོས་རྒྱ། ཆོས་ཀུན་ཡེ་ཤེས་ལྔ་ལས་འདའ་ཉམས་མེད་པ་ཐུགས་དམ་རྒྱ། གཞི་ཉིད་འགགས་མེད་སྣ་ཚོགས་སུ་སྣང་བའི་ཕྲིན་ལས་ལས་རྒྱའོ།)རྣམ་པ་བཞིར༔ ལམ་དུ་རྣལ་འབྱོར་ཕྱག་རྒྱ་(ཀུན་ཏུ་བཟང་པོ་བསྒོམ་པ་དང་རྩ་ཁམས་རིགས་ལྔ་བསྒོམ་པ་སྐུ་ཕྱག་ཆེན། ཡི་གེ་བསྒོམ་པ་དང་རྡོར་བཟླས་བྱེད་པ་གསུང་ཆོས་རྒྱ། སྣ་ཚོགས་རྡོ་རྗེའི་རིམ་པ་བསྒོམ་པ་ཐུགས་དམ་རྒྱ། ཨ་ཧཾ་འབར་འཛག་ལས་འོད་ཟེར་སྤྲོ་བསྡུས་དོན་གཉིས་མཛད་པ་དང༌། རྩ་ཁམས་རྒྱལ་བ་མཆོད་པར་བསམ་པ་ལས་རྒྱ་དང་འཁྲུལ་འཁོར་བྱེད་པ་བཅའ་བ་ལས་རྒྱའོ།)རྣམ་པ་བཞི༔ འབྲས་བུ་བྲལ་ཐོབ་ཕྱག་རྒྱ་ (འབྲས་ཆོས་སྐུ་ལྔ་མངོན་དུ་གྱུར་པ་རྒྱལ་བ་ཞི་ཁྲོ་སྟོན་འཁོར་ཡོངས་རྫོགས་སྐུ་ཕྱག་རྒྱ། སྐུ་ལྔའི་འཁོར་ལ་གསུང་ལྔའི་ཆོས་བསྟན་པ་གསུང་ཆོས་རྒྱ། སྟོན་འཁོར་གྱི་དགོངས་པ་ཡེ་ཤེས་ལྔ་མངོན་དུ་མཛད་པ་ཐུགས་དམ་རྒྱ། ཆོས་སྐུའི་ངང་ལས་ལོངས་སྤྲུལ་གྱི་འོད་ཟེར་འཕྲོས་ནས་གདུལ་བྱའི་དོན་བྱེད་པ་འཕྲོ་འདུ་ཕྲིན་ལས་ཀྱི་ཕྱག་རྒྱའོ།)རྣམ་པ་བཞི༔ མཚམས་སྦྱོར་ཚོགས་ཆེན་པོ་རུ་ལྷུན་གྲུབ་ཤོག༔ སྲོག་གིས་རྩ་ལམ་བྱང་ནས་སྐྱོན་མདུད་གྲོལ༔ གསལ་བའི་ལྷན་ཅིག་སྐྱེས་པ་དྲུང་དུ་ཁུག༔ རྩོལ་པའི་སྟེང་འགྲོའི་དབབས་ལྡོག་དགྲམ་ལ་བཟླས༔ བདེ་སྟོང་དཔེ་ཡི་ཡེ་ཤེས་མངོན་གྱུར་ཤོག( ཡབ་ཡུམ་ལྷར་མཁའ་གསང་རྡོ་རྗེ་པདྨ་སྦྱོར་ཐབས་ཆོས་སུ།)ཁྱད་པར་འདུ་ཤེས་གསུམ་གྱིས་སད་བྱས་པས༔ ཤེས་རབ་དབང་མཆོག་བདེ་ཆེན་ཙནྜ་ལི༔ ཉེ་རེག་དགའ་མའི་སྟོང་བཞིའི་ལེགས་དྲངས་པའི༔ རང་བཞིན་ལྷན་ཅིག་སྐྱེས་པ་མངོན་གྱུར་ཤོག༔ རིམ་ལྔའི་(ཛ་ལནྡ་ར་སྣ་ཚོགས་རྡོ་རྗེ་ནོར་བུ་དགང་བ་བྱིན་གྱི་བརླབ་པ། བསམ་གྱིས་མི་ཁྱབ་པའི་རིམ་པ་སྟེ།)ལམ་གྱི་རིགས་ལྔའི་(འཁོར་ལོ་རྡོ་རྗེ་རིན་ཆེན་པདྨ་རལ་གྲིའི།)ལམ་འབྲས་བུ༔ གོ་ཕྱེས་གོམས་(སྤྱིར་རིག་པ་སྤྱི་བླུགས་མཐོང་བ་རྗེས་འཇོག་གཉིས་ལས་དང་པོ།)རྗེས་མཐོང་བ་རྗེས་འཇོག་པ༔(བརྟན་ཐོབ་རིག་པ་སྤྱི་བླུགས་སུ་བཞག་གོ །འདིར་ནི་མཐོང་ལམ་གྱི་མཐོང་ཟིན་ཡང་ཡང་གོམ་པའོ། །)བཞི་པའི་རང་ལམ་ཉི་ཟླ་མིག་འཁྲུལ་འགྲོའི༔ ཡན་ལག་བརྒྱད་(འཕགས་ལམ།)ལྡན་མཐའ་རུ་ཕྱིན་པར་ཤོག༔ རྩ་ཡི་དྭངས་མའི་ལྷན་སྐྱེས་ཕྱེད་བཅིང་གིསཿ ཟིན་པའི་མན་ངག་མི་སྲིད་སྲིད་པ་ཅན༔ ཅིག་ཆར་ཐོད་རྒལ་འཆིང་གནས་གཅུད་བཟུང་བས༔ ལམ་བསྟན་རྡོ་རྗེའི་རྦ་རླབས་ཚར་ཕྱིན་ཤོག༔ ལྷ་ཡི་དཔག་བསམ་འབྲས་ཆོས་ཡལ་གའི་དུད༔ གཅུད་པའི་དེམ་གྱིས་བུམ་སྐུ་རྗེན་ལ་ཕྱུང་༔ མཉན་པའི་སྒྲ་ཡི་མངོན་ཤེས་ཚངས་དབྱངས་འདྲེན༔ སྣོམ་པའི་ཐུགས་ཀྱི་གསང་ལ་དྲུང་འཇུག་ཤོག༔(ཁུང་སེང་ལམ་གཉིས་གབ་ནས་ཡོད།)འཁོར་འདས་དབྱིངས་གཅིག་ཀུན་ཏུ་བཟང་མོ་ལ༔ ཡེ་ཤེས་འགགས་མེད་བདེ་ཆེན་ཀུན་ཏུ་བཟང་༔ མཉམ་སྦྱོར་རྣལ་མ་འབྲས་བུ་དཀྱིལ་འཁོར་གསུམ༔ ཤེས་རབ་དབང་པོའི་མཐོང་བ་མཐར་ཕྱིན་ཤོག༔ སོ་སོ་རང་རིག་ཡེ་ཤེས་སྤྱོད་ཡུལ་དུ༔ སངས་རྒྱས་རྣམས་ཀྱི་ཐམས་ཅད་མཁྱེན་པ་མཆོག༔ ཇི་བཞིན་པ་ལ་དེ་བཞིན་ལྷུན་གྲུབ་ནས༔ ལམ་གྱི་བསྟི་གནས་གཡང་ལ་མི་ཐོགས་ཤོག༔ འབྲས་བུ་ཟུང་འཇུག་ཡི་གེའི་འཁོར་ལོ་རུ༔ བརྟན་པ་མཐར་ཕྱིན་ངེས་པ་ལྔ་ལྡན་གྱིས༔ མངའ་དབང་རྫོགས་པའི་ཀུན་ཏུ་བཟང་པོ་ཉིད༔ བར་དོ་ལོངས་སྤྱོད་རྫོགས་པར་སངས་རྒྱས་ཤོག༔ མཚམས་སྦྱར་དུས་དང་བསྟུན་པའི་གྲོགས་མཆོག་ལ༔ འཛོལ་བ་མེད་པས་བརྟུལ་ཞུགས་ཆེན་པོ་ཡི༔ བོགས་འབྱིན་མཐར་དབྱུང་འཕངས་ཀྱང་མི་དམའ་བའི༔ (སྟོང་ཉིད་ཉི་ཤུ་དང་འཁྲུལ་འཁོར་རྩ་བ་ཉི་ཤུའོ། །) ཐབས་ཤེས་རྣམ་པ་ཉི་ཤུའི་བྱང་ཆུབ་ཤོག༔ འདའ་ཀ་གསུམ་གྱི་ཐབས་ལ་མཁས་པ་ཡི༔ རྟོག་པའི་ཕྲ་ལ་སྟོང་ཆེན་བཏབས་བྱས་ཏེ༔ ཐ་མར་མི་གནས་དབུགས་ཆེན་འབྱིན་པ་ནི༔ ཡོངས་སུ་རྣལ་འབྱོར་ཆེན་པོ་མཐུའི་གྲུབ་ཤོག༔ མདོར་ན་མ་དག་རྩལ་འཕྲོས་རྩ་ཐིག་རླུང་༔ དག་པ་དོན་གྱི་དྷཱུ་ཏཱིར་སྡུད་པ་ཡི༔ འདུན་སེམས་རིགས་འབྱེད་དབུགས་འབྱིན་ལུང་ཐོབ་པ༔ རྩལ་ཆེན་རྫོགས་པས་འགྱུར་བདེའང་མཐར་བྱེད་ཤོག༔ གལ་མདོ་ངེས་པ་ལྷག་དང་བརྟུལ་ཞུགས་ཀྱི༔ སྒྲུབ་པའི་དམ་ཚིག་མ་ཉམས་ཚུལ་བཞིན་པས༔ གསང་སྔགས་འབྲས་བུ་དོན་ཡོད་གྲུབ་ནས་ནི༔ ཡོངས་སུ་རྣལ་འབྱོར་ཆེན་པོ་མཐར་ཕྱིན་ཤོག༔ ཆོས་སྐུ་རྡོ་རྗེ་འཆང་ཆེན་ལ་གསོལ་བ་འདེབསཿ མ་ཧཱ་ཨ་ནུ་ཡོ་ག་སིདྡྷི་ཧཱུྃ༔ ལོངས་སྐུ་རྒྱལ་བ་ཞི་ཁྲོ་ལ་གསོལ་བ་འདེབསཿ མ་ཧཱ་ཨ་ནུ་ཡོ་ག་སིདྡྷི་ཧཱུྃ༔ སྤྲུལ་སྐུ་པདྨ་ཐོད་ཕྲེང་ལ་གསོལ་བ་འདེབསཿ མ་ཧཱ་ཨ་ནུ་ཡོ་ག་སིདྡྷི་ཧཱུྃ༔ རྡོ་རྗེ་བདུད་འཇོམས་གླིང་པ་ལ་གསོལ་བ་འདེབསཿ མ་ཧཱ་ཨ་ནུ་ཡོ་ག་སིདྡྷི་ཧཱུྃ༔ དཀྱིལ་འཁོར་དབང་ཕྱུག་བཟང་མོ་ལ་གསོལ་བ་འདེབསཿ མ་ཧཱ་ཨ་ནུ་ཡོ་ག་སིདྡྷི་ཧཱུྃ༔ རྡོ་རྗེ་རྣལ་འབྱོར་རིགས་ལྔ་ལ་གསོལ་བ་འདེབསཿ མ་ཧཱ་ཨ་ནུ་ཡོ་ག་སིདྡྷི་ཧཱུྃ༔ ཡུམ་ཆེན་དབང་ཕྱུག་རིགས་ལྔ་ལ་གསོལ་བ་འདེབསཿ མ་ཧཱ་ཨ་ནུ་ཡོ་ག་སིདྡྷི་ཧཱུྃ༔ དབྱིངས་ཀྱི་ཡུམ་ཆེན་སྡེ་ལྔ་ལ་གསོལ་བ་འདེབསཿ མ་ཧཱ་ཨ་ནུ་ཡོ་ག་སིདྡྷི་ཧཱུྃ༔ ཤེས་རབ་ཐབས་རྒྱས་ཁྲོ་ཚོགས་ལ་གསོལ་བ་འདེབསཿ མ་ཧཱ་ཨ་ནུ་ཡོ་ག་སིདྡྷི་ཧཱུྃ༔ དཀྱིལ་འཁོར་གསུམ་གྱི་ལྷ་ཚོགས་ལ་གསོལ་བ་འདེབསཿ མ་ཧཱ་ཨ་ནུ་ཡོ་ག་སིདྡྷི་ཧཱུྃཿ དཔལ་ལྡན་རྩ་བའི་བླ་མ་ལ་གསོལ་བ་འདེབསཿ མ་ཧཱ་ཨ་ནུ་ཡོ་ག་སིདྡྷི་ཧཱུྃ༔ འཁོར་འདས་རྒྱལ་བའི་དཀྱིལ་འཁོར་ལ་གསོལ་བ་འདེབསཿ མ་ཧཱ་ཨ་ནུ་ཡོ་ག་སིདྡྷི་ཧཱུྃ༔ རྩ་དང་ཡི་གེ་ཐིག་ལེ་རླུང་བཞི་ཡི༔ འགྲོའི་ཐིམ་སྐུ་གསུང་ཐུགས་དང་ཡེ་ཤེས་ལྔ༔ སྐུ་ལྔ་ལྷུན་གྲུབ་རྡོ་རྗེ་འཆང་ཆེན་པོ༔ ད་ལྟ་ཉིད་དུ་ཐོབ་པར་བྱིན་གྱིས་རློབས༔ སྨོན་ལམ་བཏབས་པ་ཐམས་ཅད་འགྲུབ་པར་ཤོག༔ (ལྷག་པའི་དོན་དམ་)རང་བཞིན་རྣམ་དག་སངས་རྒྱས་བདེན་སྟོབས་དང་༔ རྟེན་འབྲེལ་(ལྷག་པའི་ཀུན་རྫོབ་)བསླུ་མེད་སངས་རྒྱས་རྫུ་འཕྲུལ་དང་༔ སྐྱབས་གནས་བསླུ་མེད་བདེན་པས་འགྲུབ་འགྱུར་ཅིག༔ ཅེས་ཀྱང་རྨི་ལམ་དུ་བདུད་འཇོམས་རྡོ་རྗེའི་གནང་བས་ཚིག་རྐང་འགའ་བརྗེད་འགའ་ཞིག་གོང་འོག་བསྣོལ་སོང་ཡང་བཏང་སྙོམས་སུ་གང་དྲན་བྲིས་པ་ཐོ་རངས་ཀྱི་ཐུན་ལ་ངལ་བ་བགྱིས་སོ། འདི་ཚར་གཅིག་བཏོན་ན་ལུང་ཆེན་ནང་གི་མདོ་བདུན་གྱི་ཚིག་ལ་རྣལ་འབྱོར་དུ་བྱས་པའོ། །དགེའོ། །
༈ ཨོཾ༔ ཕྱོགས་བཅུ་དུས་གསུམ་རྒྱལ་བ་ཐམས་ཅད་ཀྱི༔ སྤྱི་གཟུགས་རྡོ་རྗེའི་བླ་མ་རིན་པོ་ཆེ༔ ཐུགས་རྗེ་བརྩེ་བས་བདག་ལ་དགོངས་སུ་གསོལ༔ བདག་གི་སྨོན་ལམ་འགྲུབ་པའི་དཔང་པོར་རོལ༔ སྣང་སྲིད་འཁོར་འདས་ཐམས་ཅད་རང་གི་སེམས༔ སེམས་ཀྱི་ངོ་བོ་ཉིད་ལ་བལྟས་པའི་ཚེ༔ རྒྱུ་མཚན་ཅི་ཡང་མ་མཐོང་སྟོང་བ་ཉིད༔ སྐྱེ་མེད་ཆོས་སྐུའི་དགོངས་པ་རྟོགས་པར་ཤོག༔ སྟོང་ཉིད་ཕྱོགས་གཅིག་མ་ཆད་ཝ་ལེ་བ༔ དྲན་པ་འགགས་མེད་གསལ་མདངས་མ་འགགས་པར༔ རྒྱུ་རྐྱེན་རྩོལ་བས་མ་བསྒྲུབ་འོད་དུ་གསལ༔ རང་བཞིན་ལོངས་སྐུའི་དགོངས་པ་རྟོགས་པར་ཤོག༔ ཤར་གྲོལ་དུས་མཉམ་ཅེར་མཐོང་རང་བབས་ངང་༔ གཟུང་འཛིན་དྲི་མས་མ་གོས་ཐུགས་རྗེའི་རྩལ༔ ཇི་ལྟ་ཇི་སྙེད་མཁྱེན་པའི་འོད་ཟེར་ཅན༔ གཞན་སྣང་སྤྲུལ་སྐུའི་ཐུགས་དགོངས་རྟོགས་པར་ཤོག༔ སྐྱེ་འགགས་གནས་དམིགས་བྲལ་བ་སྐུ་གསུམ་དོན༔ ཕྱོགས་སུ་མ་ལྷུང་ཟུང་འཇུག་ཡེ་ཤེས་ཆེ༔ རང་གི་སེམས་ཀྱི་རྡོ་རྗེ་གཉུག་མའི་གཤིས༔ མངོན་གྱུར་ལྟ་བ་རྟོགས་པར་བྱིན་གྱིས་རློབས༔ བསྒོམ་ཞིང་སེམས་ཀྱིས་བསམ་པས་མི་རྟོགས་ཏེ༔ བལྟས་ཀྱང་ཡང་དག་དོན་ལ་མཐོང་བྱ་མེད༔ སྤྱོད་པས་བྱ་བྲལ་དོན་དང་འགལ་བའི་ཕྱིར༔ རང་བཞག་རྣལ་མའི་དོན་ལ་གནས་པར་ཤོག༔ རྟོགས་པ་མངོན་གྱུར་ཆེན་པོའི་ངང་ཆེན་དུ༔ གདེངས་ཐོབ་བཙན་ས་ཟིན་པའི་ངེས་རྙེད་དེ༔ ཁྱད་ཆོས་དྲུག་ལྡན་གཞོན་ནུ་བུམ་པའི་སྐུར༔ ཡེ་ཤེས་བླ་མའི་ས་མཆོག་ནོན་པར་ཤོག༔ དཀོན་མཆོག་རྩ་གསུམ་ཞི་ཁྲོའི་ཐུགས་རྗེ་དང་༔ མགོན་གཅིག་རྡོ་རྗེའི་བླ་མའི་བྱིན་རླབས་དང་༔ ཆོས་ཅན་ཆོས་ཉིད་དག་མཉམ་བདེན་སྟོབས་ཀྱིས༔ གེགས་མེད་སྨོན་པ་ཡིད་བཞིན་འགྲུབ་གྱུར་ཅིག༔ དགེ་གྲགས་ངོར་ཤྲཱི་ངན་ནས་སོ། ། #div1 འོད་གསལ་ཐོད་རྒལ་ཆེན་པོའི་སྨོན་ལམ་ཟང་ཐལ་རང་གྲོལ། ༈ འོད་གསལ་ཐོད་རྒལ་ཆེན་པོའི་སྨོན་ལམ་ཟང་ཐལ་རང་གྲོལ་བཞུགས་སོ༔ ཨེ་མ་ཧོ༔ ཐོག་མ་མེད་ནས་བཤེས་ཆེན་མ་འདྲེས་མགོན༔ པདྨའི་སྦྲང་རྩི་ཟང་ཐལ་རང་གྲོལ་བ༔ འཁོར་འདས་མཁར་སྦྲུམ་ཐིག་ལེ་ཉག་གཅིག་ཞལ༔ གསལ་ཁྱབ་རང་བཞིན་གཞི་རྒྱུད་མངོན་གྱུར་ཤོག༔ ལྷུན་གྱིས་གྲུབ་པ་རང་རྫོགས་འབྲས་བུ་ནི༔ དཔེ་དོན་རྟགས་ཀྱི་ངེས་པས་རང་མཚོན་ནས༔ ཅི་བཞིན་སྤྱི་བླུགས་ཚངས་པ་དོན་དམ་པ༔ རབ་ཏུ་སྤྲོས་མེད་དབང་མཆོག་ཐོབ་པར་ཤོག༔ ངོ་བོ་སྟོང་ཉིད་མི་འགྱུར་བདེ་བ་ཆེ༔ རྣམ་ཀུན་མཆོག་ལྡན་སྦས་མས་མཁའ་ལ་རོལ༔ ཞལ་ཕྱག་མཚན་བྲལ་ཁྱབ་བརྡལ་ཡེ་ཡོད་པ༔ རང་བཞིན་གཞི་རྒྱུད་ངོ་བོ་མངོན་གྱུར་ཤོག༔ གསང་བ་སྲོག་བཅས་འདུས་པའི་གཞལ་ཡས་དང་༔ དོན་མཁར་བྷནྡྟ་འབར་བའི་ཕོ་བྲང་དུ༔ ངོ་བོ་གདངས་དང་ཟེར་གྱི་གྲངས་མང་བའི༔ འབྲས་ཆོས་གཞིར་གནས་བཅུད་ཀྱི་དོན་རྟོགས་ཤོག༔ གཞི་ལ་ངེས་པ་ཐོབ་པའི་ལྟ་བའི་གནད༔ རང་བཞག་འཕོ་འགྱུར་མེད་པའི་འཆིང་བ་བཅུ༔ གནད་ཆེན་དྲུག་གི་ཁྱད་པར་ཟིན་པ་ཡི༔ ཅོག་བཞག་རྣལ་འབྱོར་ཆེན་པོ་འབྱོང་བར་ཤོག༔ གཉུག་མའི་སྒོ་གསུམ་སྐུ་གསུམ་གནད་དུ་གཅུན༔ བདེ་ཆེན་ཡེ་ཤེས་གསུམ་ལ་འབྱམས་སུ་ཀླས༔ གཟུང་འཛིན་རང་འགགས་ཡེ་ཤེས་རྗེན་ཆེར་གྱི༔ ཤེས་རབ་མ་ཡིན་དབང་པོའི་མཐོང་བར་ཤོག༔ ཆུ་བུར་རྡོ་རྗེར་བརྒལ་བས་ཁྱད་པར་ཆོས༔ སྣང་བའི་ཡེ་ཤེས་ལམ་གྱི་མུ་ཚོད་དང་༔ བསྐལ་མཉམ་ཡོན་ཏན་ཁྱད་པར་གྱིས་དཔག་པས༔ འདུས་མ་བྱས་པའི་གསང་མཛོད་བརྟོལ་ནུས་ཤོག༔ ཕྱི་རུ་སྣང་བས་འོད་གསལ་སྐུར་སྨིན་རྫོགས༔ ནང་དུ་ཉེར་ཐོབ་མཆེད་པས་སྐར་མདའ་ཅན༔ ཟད་པ་གཉིས་ཀྱི་ཚུལ་གྱི་མཐར་ཐུག་ནས༔ འོད་གསལ་ལྷུན་གྲུབ་རིག་འཛིན་ཉེར་ཐོབ་ཤོག༔ དེ་ཡི་ཤེས་སྒྲིབ་ཕྲ་བའང་ལྷག་མེད་དུ༔ རྡོ་རྗེའི་ཏིང་འཛིན་འབྲས་དབང་མཚམས་སྦྱོར་ནས༔ ཐུན་མོང་མ་ཡིན་གཞོན་ནུ་བུམ་སྐུར་བཟླུམ༔ ཡེ་ཤེས་ཆོས་སྐུར་ཡང་དག་སངས་རྒྱས་ཤོག༔ ངོ་བོ་ཉིད་ཀྱི་དབྱིངས་གྲོལ་སྐུ་གསུམ་ལས༔ འདོད་འཇོའི་རྩོལ་བ་མེད་པའི་རང་བསྲེལ་(སྤྲུལ་སྐུ་ལོངས་སྐུ།)གཉིས༔ ཐུན་མོང་ཐུན་མིན་མཛད་པས་སྒོ་ཕྱེས་ནས༔ འཁོར་བ་དོང་སྤྲུགས་དཔལ་དུ་འབར་གྱུར་ཅིག༔ དབྱིངས་ཀྱི་ཡེ་ཤེས་ཕྱོགས་སུ་རིས་མེད་པས༔ ཐུགས་ལྔའི་ཇི་ལྟ་ཇི་སྙེད་བྱེ་བྲག་ཅན༔ རྣམ་པ་ཀུན་ཏུ་ལྷུན་གྱིས་གྲུབ་པ་ཡི༔ སངས་རྒྱས་བཅོམ་ལྡན་བསམ་མི་ཁྱབ་ཐོབ་ཤོག༔ གལ་ཏེ་རྣལ་འབྱོར་རྩལ་ཆེན་མ་རྫོགས་ན༔ སྐུ་དང་ཡེ་ཤེས་འཇུག་པའི་འོད་ཐག་གི༔ ཐུགས་རྗེའི་ལྕགས་ཀྱུའི་མ་བསྒོམ་སངས་རྒྱས་ལམ༔ ལྷག་པས་འདའ་ཀའི་ཤེས་རབ་མཐར་རྒྱས་ཤོག༔ རྣམ་ཀུན་གྲོགས་ཀྱི་སྤྱོད་པ་ཉི་ཤུ་དང་༔ སྐུ་གསུང་ཐུགས་དང་ཆེན་བརྒྱད་ཕྲ་མོར་བཅས༔ ཉམས་པ་མེད་པའི་ཡང་དག་མངོན་རྫོགས་པས༔ འཇའ་ལུས་འཕོ་བ་ཆེན་པོ་འགྲུབ་པར་ཤོག༔ རྩ་བརྒྱུད་བླ་མ་རྣམས་ཀྱི་ཐུགས་རྗེ་དང་༔ སྐྱབས་གནས་དོན་གྱི་རིག་སྐུའི་བྱིན་བརླབས་དང་༔ རྒྱུ་འབྲས་དཀོན་མཆོག་སྐུ་གསུམ་ཆོས་ཉིད་དང་༔ ཆོས་ཅན་བསླུ་མེད་མཐུ་ཡི་འགྲུབ་གྱུར་ཅིག༔ གྲུབ་ནས་མཁྱེན་བརྩེ་རྡོ་རྗེ་ལྟ་བུ་ལུས༔ འགྲོ་བའི་དབུལ་བ་མཐའ་དག་མྱུར་བསལ་ཏེ༔ ནང་དབྱིངས་གདོད་མའི་རྒྱལ་པོར་དབུགས་འབྱིན་པ༔ བྱང་ཆུབ་སེམས་ཀྱི་བདེན་པས་འགྲུབ་གྱུར་ཅིག༔ དེང་སང་རྫོགས་ཆེན་བསྟན་པའི་ཉི་མ་ཤར༔ ཁོ་བོ་ཕྲན་ཡང་སྐལ་པ་བཟང་གྱུར་པས༔ དམ་ལྡན་གཞན་ལ་ཕན་པའི་བློ་གྲོས་ཀྱིས༔ ཀུན་བཟང་རྩལ་ལས་རྣམ་འཕྲུལ་ཤེས་རབ་དང་༔ རྡོ་རྗེ་བླ་མའི་མིག་ལྡོང་ཕྱེས་པ་ཡི༔ ཐོད་རྒལ་སྨོན་ལམ་ཟང་ཐལ་རང་གྲོལ་བ༔ བྱས་པའི་དགེ་བས་ནམ་མཁའི་མཐའ་ཡས་པའིཿ འགྲོ་རྣམས་ཀུན་ཏུ་བཟང་པོའི་གནས་ཐོབ་ཤོག༔ ཅེས་ཀྱང་འཇིགས་མེད་ནམ་མཁའི་རྡོ་རྗེ་ནས་བྲིས་པའོ། །མངྒ་ལཾ། ། འོད་གསལ་གནད་བཞི་སྦྱངས་པའི་སྨོན་ལམ།༈ འོད་གསལ་གནད་བཞི་སྦྱངས་པའི་སྨོན་ལམ་བཞུགས་སོ༔ དུས་གསུམ་རྒྱལ་བའི་སྤྱི་གཟུགས་བླ་མ་རྗེར༔ གསོལ་བ་འདེབས་སོ་བདག་རྒྱུད་བྱིན་གྱིས་རློབས༔ གཞི་ལ་གནས་པའི་གཉིད་དང་རྨི་ལམ་བཅས༔ སྙོམས་འཇུག་ཐ་མལ་མ་དག་སྐུ་བཞིའོ༔ གཉིད་དུས་འོད་གསལ་མེ་ལོང་ཡེ་ཤེས་ཏེ༔ དེ་ཕྱིར་གསལ་ལ་མི་རྟོག་ཉིན་མཚན་གྱི༔ སྟོང་ཉིད་རྣམ་ཀུན་མཆོག་ལྡན་ཕྱག་རྒྱ་ཆེའི༔ འོད་གསལ་ཆོས་སྐུའི་ངོ་བོ་མངོན་གྱུར་ཤོག༔ རྨི་ལམ་སོར་རྟོགས་མཉམ་ཉིད་ཡེ་ཤེས་སྐུ༔ སྣང་བ་ཞིང་ཁམས་ལྷ་སྐུ་སྒྱུ་མ་དང་༔ གྲགས་པ་སྔགས་ཀྱི་ཐིག་ལེར་གཞིར་བྱས་ནས༔ ཀུན་ཏུ་རྟོག་ཡུལ་ཡེ་ཤེས་ཕྱག་རྒྱར་བཅིངས༔ ཟུང་འཇུག་ལོངས་སྐུའི་ངོ་བོ་མངོན་གྱུར་ཤོག༔ སྙོམས་འཇུག་གནས་བཞིར་དགའ་བཞི་འབྱུང་ལྡོག་མཐའི༔ ལྷན་གཅིག་སྐྱེས་པའི་ཡེ་ཤེས་དེ་ཁོ་ན༔ ལས་ཀྱི་ཕྱག་རྒྱའི་རྣམ་པར་བཅིངས་པའི་མཐུས༔ ཡེ་ཤེས་སྐུ་ཡི་ངོ་བོ་མངོན་གྱུར་ཤོག༔ ཐ་མལ་ཚོགས་དྲུག་སྣང་ཞེན་ལས་ཉོན་བག༔ ཡེ་ཤེས་ལྔ་ཡི་རང་བཞིན་སྒྲིབ་པའི་ནོངས༔ ཆོས་ཀྱི་ཕྱག་རྒྱའི་བཅིངས་པའི་སྟོབས་ཤུགས་ཀྱིས༔ སྤྲུལ་པའི་སྐུ་ཡི་ངོ་བོ་མངོན་གྱུར་ཤོག༔ དེ་དག་མངོན་དུ་བྱེད་པའི་ཡན་ལག་ནི༔ གཏུམ་མོ་ལྔ་ཡི་ཉམས་ལེན་ཀློང་དུ་གྱུར༔ རྒྱུ་ལུས་ལྔ་དང་ཟུང་འཇུག་ལམ་དུ་ལོངས༔ རྨི་ལམ་ཟིན་པའི་བར་དོའི་གྲོལ་ཚད་རྟོགས༔ འོད་གསལ་ལྔ་ཡི་རྟོགས་པ་ཡང་དག་ཐོབ༔ འཕོ་བ་ཆེན་པོའི་ལམ་གྱི་སྟོང་ཐེབ་ནས༔ བར་དོ་མེད་པར་རྫོགས་པའི་སངས་རྒྱས་ཤོག༔ བཀྲ་ཤིས་དེའི་ཀྱང་འགྲོ་ཀུན་བརྒྱན་གྱུར་ཅིག༔ ཅེས་ཀྱང་ཐུབ་པའི་ངོར་ག་གཱས་སོ། མངྒལཾ། ། ༈ ན་མོ་དཀོན་མཆོག་སྐུ་གསུམ་རྩ་གསུམ་ཆོས་ཉིད་དང་༔ ཆོས་ཅན་བསླུ་མེད་བདེན་པའི་སྟོབས་ཤུགས་མཐུ༔ ཁྱད་པར་གུ་རུ་པདྨའི་ཐུགས་བསྐྱེད་ཀྱི༔ བདག་སོགས་ཚེ་འདིའི་སྣང་བ་ནུབ་མ་ཐག༔ དཔལ་རི་པདྨ་འོད་ཀྱི་ཞིང་ཁམས་སུ༔ རིག་འཛིན་རྒྱ་མཚོའི་གྲྭལ་དུ་འཁོད་པར་ཤོག༔ དེ་ཡང་རྡོ་རྗེ་ཐེག་པའི་འཕྲོ་མཐུད་དེ༔ སྦུབ་ལ་མི་གནས་ཡེ་ཤེས་མཐར་ཕྱིན་ཅིང་༔ ཡེ་ཤེས་བླ་མའི་ས་ལ་བྱང་ཆུབ་ནས༔ རང་གཞན་དོན་གྲུབ་སྐུ་གཉིས་མངོན་གྱུར་ཤོག༔ ཅེས་པ་ཡང་ག་གཱས་སོ། ། ༈ ན་མོ༔ བླ་མ་ཡི་དམ་མཁའ་འགྲོ་ཐུགས་རྗེ་ཅན༔ དཔལ་ལྡན་དུས་འཁོར་དམ་པ་མཛོད་ཀྱི་གསང་༔ ཀུན་གྱི་སྤྱི་གཟུགས་རིགས་ལྡན་བརྒྱུད་པར་བཅས༔ ས་སྤྱོད་ཞིང་ཁམས་བྱང་ཤར་ཤམ་བྷ་ལ༔ གསང་ཆེན་རྡོ་རྗེའི་ཐེག་པའི་གན་མཛོད་ཆེ༔ མུ་སྟེགས་ཀླ་ཀློ་རྒྱུ་བའི་གོ་སྐབས་མེད༔ སྐྱེ་བ་གཅིག་གི་མངོན་པར་བྱང་ཆུབ་པ༔ ཡོན་ཏན་དཔག་ཏུ་མེད་པའི་ཁྱད་པར་ཅན༔ འདི་ནས་ཚེ་ཡི་དུས་བྱའི་གྱུར་མ་ཐག༔ བདག་ནི་ཞིང་ཁམས་དམ་པ་ཡོངས་བཟུང་ཞིང་༔ རིགས་ལྡན་རྒྱལ་པོའི་ཞབས་དྲུང་སྐྱེ་བར་ཤོག༔ ཕྱོགས་བཅུ་དུས་བཞི་རྒྱལ་བ་སྲས་བཅས་ཀྱི༔ སྨོན་ལམ་འགྲུབ་པའི་བདེན་དཔང་མཐུན་འགྱུར་མཛོད༔ ཨོཾ་བཛྲ་པདྨ་གུ་རུ་བིདྱཱ་ར་ཛ་པྲ་ནི་དྷ་ནི་བྷནྡྷ་རེ་སྭཱ་ཧཱ༔ ཅེས་ཀྱང་གསེར་སྐོམ་པས་ངོར་ག་ག་ཨ་བྷྱེས་སོ། ། ༈ རང་གི་རྒྱུན་དུ་བཏགས་གྲོལ་གྱི་ལམ་དབང་བླངས་བའི་ཁ་གསོ་བྱ་བཿ རང་ཀུན་བཟང་དུ་གསལཿ བགེགས་བསྐྲད་བསྲུང་འཁོར་བསྒོམཿ བཏགས་གྲོལ་ཞི་ཁྲོའི་ལྷ་ཚོགས་སུ་དམིགས་ལཿ བདག་མདུན་ལས་འོད་ཟེར་འཕྲོས་པས་ཡེ་ཤེས་པ་སྤྱན་དྲངས་ཤིང་བསྟིམཿ ཡིད་ཀྱིས་མཆོདཿ ཚར་དུ་ཐོན་གྱི་རྗེས་སུ་རྟེན་སྙིང་གི་རབ་གནས་བྱསཿ མཐོང་ཐོས་དྲན་རེག་གི་སེམས་ཅན་ཐམས་ཅད་བྱང་ཆུབ་ལས་ཕྱིར་མི་ལྡོག་པར་མཛད་དུ་གསོལཿ ཞེས་བརྗོད་ནསཿ བཀྲ་ཤིས་ཀྱི་མཐའ་རྒྱན་ཞིངཿ དེ་ནས་རང་གི་རྩ་བའི་བླ་མ་དེས་བཏགས་གྲོལ་གྱི་དབང་བསྐུར་བར་མོས་ལ་ཕྱག་འཚལཿ ཚར་ཅི་འགྲུབ་ཀྱི་བཏགས་གྲོལ་འདོན་ཞིང་བླ་མ་དང་དབྱེར་མེད་པར་བཏགས་གྲོལ་དེ་ལ་མཎྜལ་ཕུལ་ཞིང་རང་གི་སྤྱི་མགྲིན་སྙིང་ཀ་ལྟེ་བ་བཞིར་གཏུགས་ཤིངཿ ཚར་རེའམ་ཚར་གཅིག་བཟླས་པས་བཏགས་གྲོལ་ལས་འོད་བྱུང་ནས་སྣང་སྲིད་ཁྱབཿ སྒྲིབ་པ་ཐམས་ཅད་དག་ཅིང་དངོས་གྲུབ་ཡོངས་སུ་རྫོགས་པ་ཐོབ་པར་དམིགས་ལཿ བསྟན་པ་བུ་གཅིག་གི་རྒྱུད་ལས་བྱུང་བའིཿ སངས་རྒྱས་ཐམས་ཅད་ཀྱི་སྲས་གཅིག་པོའི་བདག་མིང་འདི་ཞེས་བགྱི་བའི་ལུས་བྱིན་གྱི་བརླབ་ཏུ་གསོལཿ སྨིན་པར་མཛད་དུ་གསོལཿ གྲོལ་བར་མཛད་དུ་གསོལཿ གང་བར་མཛད་དུ་གསོལཿ ཆེར་འཕེལ་བར་མཛད་དུ་གསོལཿ རྒྱས་པར་མཛད་དུ་གསོལཿ སངས་རྒྱས་ཐམས་ཅད་ཀྱི་སྐུ་དང་གཉིས་སུ་མེད་པར་བྱིན་གྱིས་བརླབ་པར་མཛད་དུ་གསོལཿ གྷ་ཛ་ཀ་ཡཱ་ཨ་བྷི་ཥིཉྩ་ཨོཾཿ མགྲིན་པར་བཞག་ལཿ སངས་རྒྱས་ཐམས་ཅད་ཀྱི་སྲས་གཅིག་པོའི་བདག་ཞེས་བགྱི་བའི་ངག་བྱིན་གྱི་བརླབ་ཏུ་གསོལཿ སྨིན་པར་མཛད་དུ་གསོལཿ གྲོལ་བར་མཛད་དུ་གསོལཿ གང་བར་མཛད་དུ་གསོལཿ ཆེར་འཕེལ་བར་མཛད་དུ་གསོལཿ རྒྱས་པར་མཛད་དུ་གསོལཿ སངས་རྒྱས་ཐམས་ཅད་ཀྱི་གསུང་དང་གཉིས་སུ་མེད་པར་བྱིན་གྱིས་རླབས་པར་མཛད་དུ་གསོལཿ གྷ་ཛ་ཝཀྐ་ཨ་བྷི་ཥིཉྩ་ཨཿ སྙིང་ཀར་བཞག་ལཿ སངས་རྒྱས་ཐམས་ཅད་ཀྱི་སྲས་གཅིག་པོའི་བདག་ཞེས་བགྱི་བའི་ཡིད་བྱིན་གྱི་བརླབ་ཏུ་གསོལཿ སྨིན་པར་མཛད་དུ་གསོལཿ གྲོལ་བར་མཛད་དུ་གསོལཿ གང་བར་མཛད་དུ་གསོལཿ ཆེར་འཕེལ་བར་མཛད་དུ་གསོལཿ རྒྱས་པར་མཛད་དུ་གསོལཿ སངས་རྒྱས་ཐམས་ཅད་ཀྱི་ཐུགས་དང་གཉིས་སུ་མེད་པར་བྱིན་གྱིས་བརླབ་པར་མཛད་དུ་གསོལཿ གྷ་ཛ་ངྷརྨཱ་ཙིཏྟ་ཨ་བྷི་ཥིཉྩ་ཧཱུྃཿ ལྟེ་བར་བཞག་ལ། སངས་རྒྱས་ཐམས་ཅད་ཀྱི་སྲས་གཅིག་པོའི་བདག་ཞེས་བགྱི་བའི་ལུས་ངག་ཡིད་གསུམ་དང་བཅས་པ་བྱིན་གྱི་བརླབ་ཏུ་གསོལཿ སྨིན་པར་མཛད་དུ་གསོལཿ གྲོལ་བར་མཛད་དུ་གསོལཿ གང་བར་མཛད་དུ་གསོལཿ ཆེར་འཕེལ་བར་མཛད་དུ་གསོལཿ རྒྱས་པར་མཛད་དུ་གསོལཿ སངས་རྒྱས་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་དང་བཅས་པས་གཉིས་སུ་མེད་པར་བྱིན་གྱིས་རླབས་པར་མཛད་དུ་གསོལཿ གྷ་ཛ་ཀ་ཡ་ཝཀྐ་ཙིཏྟ་ངྷརྨཱ་ཀརྨ་ཨ་བྷི་ཥིཉྩ་ཧཱུྃ་ཨཱཿཨོཾ་ཧྲཱིཿསྭཱ་ཧཱཿ བསྡུ་ན་ཕྱི་མ་འདི་ཁོ་ནས་ཆོག་མཐར་ནིཿ རྟེན་འདི་བཏགས་པའི་བྱིན་རླབས་ཀྱིས། །བདག་ནི་མཐོང་ཐོས་དྲན་རེག་ཀུན། །དེ་མ་ཐག་ཏུ་གྲོལ་གྱུར་ནས། །འབྲེལ་ཚད་དོན་དང་ལྡན་པར་ཤོག །དེ་ནས་ཤིས་བརྗོད་ལ་སོགས་བྱ། ཅེས་ཀྱང་ག་ག་ཨ་བྷྱེས་སྨྲས་པའི་ཡི་གེ་པ་ནི་ཀརྨའི་མིང་གིས་སོ། །ཨོཾ་ཨེ་ངྷརྨཱ་ཤ་ཏ་ཐཱ་ག་ཏ་ཡོ་ནི་ཨེ་བམ་ཏིཥྛ་ལྷན་སི་ཏི་ཧཱུྃ་ཧཱུྃཿ རྟེན་སྙིངའོ། ། ༈ རླུང་བྱེར་ཟུག་ནི་སྤྱི་དང་མཐུན་ཏེ། དེ་ཡང་ཉིན་དུས་ཀྱི་ནམ་ལངས་ནས་དྲོས་པོ་ཆེའི་བར་དུ་བྱེར་པའོ། །དེ་ནས་གུང་ལ་མ་སླེབ་བར་དུ་ཟུག་པའོ། །གུང་མཐིལ་པོ་ནི་སྙོམ་པའོ། །གྲིབ་བསིལ་ཕེབས་ནས་ཉི་མ་ནུབ་པའི་བར་ནི་འཁྲུགས་པའོ། །མཚན་དུས་ཀྱི་སྲོད་བྱེར་བ། སྲོད་ཡོལ་ཟུག་པ། ནམ་ཕྱེད་སྙོམས་པ། ཐོ་རངས་འཁྲུགས་པའོ། །ས་༡གཡོ་བ་ནད་༢མུ་༣གེ ། ཉི་ཟླ་༤གཟའ་འཛིན་ཐོག་༥རྟགས་དེ་རྣམས་བྱེར་བ་ལ་བྱུང་ན་ཀློག ཟུག་པ་ལ་བསྒོམ། སྙོམས་པ་ལ་སྦྱིན་ཡུལ་འབོད་པ་དང༌། ཚེ་ཐར་སྲོག་བསླུ་སོགས་བྱ། འཁྲུགས་པ་ལ་ཚོགས་འཁོར་དང་མཆོད་པ་སོགས་བྱ་བ་སྤྱི་ལྟར་རོ། ། གཏེར་གསར་རྙིང་གི་གཅོད་དོན་བསྡུས་པ་བདག་འཛིན་གཅོད་པའི་རལ་གྲི།༈ རྡོར་སེམས་དགོངས་པ་འདུས་པ་ལསཿ གཏེར་གསར་རྙིང་གི་གཅོད་དོན་བསྡུས་པ་བདག་འཛིན་གཅོད་པའི་རལ་གྲི་ནིཿ ཕཊ་ཕཊ་ཕཊཿ བཾཿ རིགས་ལྔའི་མཁའ་འགྲོ་སྡེ་ལྔ་ནིཿ སྐུ་གསུམ་རྒྱལ་བའི་ཡེ་ཤེས་ལྔའིཿ དུག་ལྔའི་བསྐྱེད་བའི་ལྷ་འདྲེ་རྣམསཿ དབྱིངས་ལྔའི་ཀློང་བསྡུད་ཟིལ་གྱིས་གནོནཿ ཕཊ་ཕཊ་ཕཊཿ སྐྱབས་གནས་ཀུན་འདུས་མཁའ་འགྲོ་ལྷརཿ སྒོ་གསུམ་གུས་པས་སྐྱབས་སུ་མཆིཿ མཐའ་ཡས་ཕ་མ་སེམས་ཅན་ཀུནཿ ཡུམ་ཆེན་ས་ལ་བཀོད་པར་བྱཿ ཕཊ་ཕཊ་ཕཊཿ རང་སེམས་ཚངས་པའི་ལམ་བརྒྱུད་དེཿ སྐད་ཅིག་སྟེང་གི་ནམ་མཁར་འཕངཿ《འཕགས།》རྡོ་རྗེ་མཁའ་འགྲོ་ཁྲོས་མར་བཞེངསཿ ཕཊ་ཕཊ་ཕཊཿ ཕུང་པོ་ཐང་ལ་འགྱེལ་བ་དེཿ གྲི་གུག་གདབས་པས་ཐལ་གྱིས་བཤིགསཿ ཐུགས་ཀའི་འོད་གྱིས་མཆོད་རྫས་ནིཿ མ་ཚང་མེད་པའི་སྤྲིན་དུ་གྱུརཿ གནས་གསུམ་མཁའ་འགྲོའི་ཕོ་ཉ་ཡིསཿ མཆོད་སྦྱིན་མགྲོན་ཀུན་སྤྱན་དྲངས་གྱུརཿ ཕཊ་ཕཊ་ཕཊཿ མཆོད་རྫས་དཀར་མངར་ལྷ་མོ་ནིཿ དཀོན་མཆོག་སྲི་ཞུའི་མགྲོན་ལ་བསྟིམཿ ཤ་ལྔ་བདུད་རྩིའི་བསྐང་རྫས་སུཿ མགོན་པོ་ཡོན་ཏན་མགྲོན་ལ་འབུལཿ ཕཊ་ཕཊ་ཕཊཿ ཤ་ཁྲག་དྲི་གསུར་ཁུ་རླང་གིསཿ ལན་ཆགས་བགེགས་རིགས་འཁོར་བཅས་བརྔནཿ གང་འདོད་འཇོ་བའི་འདོད་ཡོན་དུཿ རིགས་དྲུག་སྙིང་རྗེའི་མགྲོན་ལ་བསྔོཿ ཕཊ་ཕཊ་ཕཊཿ བདག་སོགས་མཐའ་ཡས་སེམས་ཅན་ཐམས་ཅད་ཀྱིཿ ཚོགས་རྫོགས་ཉོན་ཤེས་སྒྲིབ་པ་ཀུན་དག་ནསཿ མཆོག་དང་ཐུན་མོང་དངོས་གྲུབ་ཐོབ་པ་དངཿ བྱང་ཆུབ་སེམས་ཀྱི་འགྲོ་ཀུན་རྒྱུད་ཚིམ་ཤོགཿ ཕཊ་ཕཊ་ཕཊཿ མཐར་ནི་འཁོར་གསུམ་དམིགས་པ་མེད་པ་ཡིཿ ཡུམ་ཆེན་དགོངས་པར་ཕྱམ་གཅིག་རྫོགས་སངས་རྒྱསཿ ཨ་ཨ་ཨཱཿ ཅེས་ཀྱང་ག་གཱས་སོ། ། ༈ ཡེ་ཤེས་སྒྱུ་འཕྲུལ་དྲྭ་བ་ལས༔ གླུད་བསྔོ་འཆི་བདག་ཞགས་འགྲོལ་ཞེས་བྱ་བ་བཞུགས༔ འཆི་ལྟས་རྣམ་པ་བརྒྱད་ཅུ་ལ༔ བཟློག་ཐབས་མདོས་དང་འཁོར་ལོ་བསྐོར༔ རྟེན་འབྲེལ་ཐབས་ཀྱི་བཅོས་པ་རྣམས༔ སོ་སོར་རང་རང་དགོས་ཆོས་བཞིན༔ རྫོགས་ཆེན་རྒྱུད་ཀྱི་དྭངས་མ་ནི༔ ཉི་ཟླ་ཁ་སྦྱོར་ཆེན་པོར་གསུངས༔ དེ་ལྟར་ཉམས་སུ་མ་ལོན་ཀྱང་༔ སྤྱི་བཅོས་འདིའི་ཀྱང་ངེས་པར་བཟློག༔ གླུད་དང་མདོས་སྒོ་རང་རང་ལྟར༔ དེ་ནས་བསྔོ་བ་འདི་ལྟ་སྟེ༔ ཀྱཻཿ འཆི་བདག་སྡེ་རུ་གཏོགས་པ་ཡི༔ བགེགས་རིགས་སྟོང་ཕྲག་བརྒྱད་ཅུ་དང་༔ གློ་བུར་དགུ་བཅུ་རྩ་གཅིག་སོགས༔ ཚེ་ལ་རྐུ་ཞིང་སྲོག་ལ་འགམ༔ བླ་ལ་འཇབ་ཅིང་ཡིད་ལ་བརྣག༔ མདངས་དང་དབང་པོ་འཕྲོག་བྱེད་པ༔ ཁྱད་པར་བདུད་པོ་ཁྲམ་བདག་ཆེ༔ ཤྭ་རྡེལ་འགྲིམ་ཞིང་ཞགས་པ་གཡུག༔ ལས་ཀྱི་མེ་རླུང་སོ་སོར་བཟའ༔ དེ་དང་དེ་དག་ཐམས་ཅད་ལ༔ མི་ལས་དགའ་བའི་གླུད་འདི་ཉིད༔ དབང་པོ་ཡན་ལག་ཡོན་ཏན་ནི༔ བརྒྱ་ཕྲག་བཅུ་གཉིས་ཆ་འདྲར་རྫོགས༔ འདོད་པའི་ཡོན་ཏན་ཐམས་ཅད་ཚང་༔ ལྷ་ཡི་བུ་བས་གཟི་བརྗིད་ལྡན༔ དབང་པོའི་གཞུ་ལས་ཁ་དོག་འཚེར༔ ཉི་ཟླ་གཉིས་ལས་འོད་རེ་གསལ༔ ལྗོན་ཤིང་ལས་ཀྱང་ཡན་ལག་རྒྱས༔ ནོར་བུ་བས་ཀྱང་རེ་བ་སྐོང་༔ དྲི་ཟའི་གླུ་ལས་གདེང་རེ་སྙན༔ བདུག་པའི་སྤྲིན་ལས་བསུང་རེ་ཞིམ༔ འཇམ་མཉེན་པཉྩའི་བགོ་བར་ལྡན༔ གང་འདོད་དེར་འགྱུར་འཕྲུལ་སྤྱོད་ཡངས༔ རྣམ་རིག་ཡོན་ཏན་མངོན་ཤེས་ལྡན༔ གཡོས་ལེགས་བདའ་དགུའི་སྦྱིན་ལག་ཡངས༔ དེ་མ་ཐག་དུ་མོད་ལ་འབྱུང་༔ དེ་འདྲའི་ཏིང་འཛིན་སྒྱུ་མའི་འཕྲུལ༔ དེ་བཞིན་གཤེགས་པའི་སྨོན་ལམ་མཐུ༔ རྣལ་འབྱོར་ཡེ་ཤེས་རང་གཟུགས་ཡིན༔ བྱང་ཆུབ་སེམས་ཀྱི་བྱིན་རླབས་ལྡན༔ འབྲེལ་ཚད་དགེ་བའི་འཁྲི་ཤིང་ཡིན༔ བསྔོས་ཚད་ཀུན་གྱིས་བར་ཆད་སེལ༔ ཐོབ་ཚད་ཐམས་ཅད་གཏན་དུ་འཚེངས༔ མྱོང་ཚད་ཟག་མེད་བདེ་བས་ཚིམ༔ འདི་ཉིད་ཁྱེད་ལ་གཏེར་དུ་འབུལ༔ མི་གཙང་ལུས་བརྒྱའི་བསྐྱོད་དུ་མེད༔ མི་དགེའི་སྲོག་ནི་འགམ་པ་ལ༔ འཁོར་མེད་ལན་ཆགས་དེས་ཅི་བྱ༔ ཤེས་ཏེ་ཁྱོད་ཀྱིས་བཀོལ་མི་བཏུབ༔ འཚེང་བར་རློམ་པས་ཕུང་དྲལ་ཏེ༔ བསད་ན་ཚེ་ཐུང་སྲོག་ལན་ཆགས༔ ཁྱོད་རང་ལས་ཀྱིས་ཉེན་སྡུག་བསྔལ༔ སེལ་ལས་ཕྱིར་ཞིང་ནོངས་པའི་རྒྱུ༔ འདམ་ཀའི་ངེས་པ་མ་ནོར་བར༔ བདེན་པའི་ཚིག་འདི་ཉན་པར་གྱིས༔ སྔགས་འཆང་བདག་གི་བཀའ་མ་བཅག༔ ཁྱེར་ཅིག་ཁྱེར་ཅིག་སྟོབས་ལྡན་རྣམས༔ སྲེད་དང་ཆགས་དང་ཞེན་པ་དང་༔ དྲན་དང་བཟུང་དང་བསམ་དང་རེག༔ ཀློད་དང་ཞི་དང་གྲོལ་བར་མཛོད༔ ཆོས་སྦྱིན་སོགས་བྱ༔ གླུད་གཏོར་ལོ་དགྲའི་ཕྱོགས་སུ་འདོར༔ ཕྱི་མིག་མི་བལྟ་རང་གནས་སླེབས༔ བགེགས་བསྐྲད་བསྲུང་བའི་འཁོར་ལོ་བསྒོམ༔ དེས་ནི་འཆི་བ་ངེས་པར་བསླུ༔ དེ་སྐད་རྙིང་སྔགས་རྒན་པོ་ཡི། །རིགས་ཀྱི་མྱུ་གུར་སྐྱེ་སྲིད་འཛིན། །ག་ག་ཨ་བྷྱེའི་མིང་གིས་ནི༑ ༑དབང་ཕྱུག་རྡོ་རྗེའི་བསྐུལ་ངོར་སྨྲས། །སརྦ་མངྒ་ལམ། ། ༈ གསུར་ཆུ་སྦྱིན་གང་ལའང་འདིས་བསྔོའོཿ ཨོཾ་ཨཱཿཧཱུྃ༔ རང་ཉིད་སྤྱན་རས་གཟིགས་དབང་གིཿ(ཡང་ན་གསུར་བྱེད་ན། ཐུགས་ཀའི་འོད་ཀྱི་རེག་པ་ཡིཿ གསུར་མཆོད་འདོད་ཡོན་རྒྱ་མཚོའི་རྡུལཿ དཀར་དམར་མངར་གསུམ་སོགས།) སྐྱབས་སྦྱིན་ཕྱག་རྒྱའི་མཛུབ་རྩེ་ལསཿ བདུད་རྩི་འོ་མའི་རྒྱུན་བབས་པསཿ སྦུ་རླངས་ཟིལ་མ་མཆོད་པའི་སྤྲིནཿ དཀར་དམར་མངར་གསུམ་རོ་དྲུག་ཟསཿ འདོད་ཡོན་ལྷ་མོའི་རྣམ་པ་ལཿ ཟག་མེད་ཡེ་ཤེས་བདུད་རྩི་དངོསཿ ཡི་གེ་གསུམ་གྱི་འོད་དུ་ཐིམཿ རྩིག་མ་དག་བྱེད་རྒྱུན་བཟང་པོཿ ནམ་མཁའ་མཛོད་ཀྱི་གཏེར་དུ་གྱུརཿ ཐུགས་ཀའི་འོད་ཀྱིས་མགྲོན་བཞིའི་ཚོགསཿ སྐད་ཅིག་ཉིད་ལ་སྤྱན་དྲངས་གྱུརཿ རྩ་བའི་བླ་མ་ལ་སོགས་པའིཿ དཀོན་མཆོག་མཆོད་པས་མཉེས་གྱུར་ཅིགཿ ཛཾ་བྷ་ལ་ཡི་དབུར་བཞུགས་ཀྱིཿ དམ་ཚིག་ཅན་གྱི་ཐུགས་དམ་བསྐངཿ དཀོར་དང་སྲོག་དང་ཞོ་ཤས་བསྐྱངཿ ལན་ཆགས་བགེགས་རིགས་ཐམས་ཅད་དངཿ ཡི་དྭགས་རྣམས་ཀྱི་གཙོ་བྱས་པའིཿ རིགས་དྲུག་འདོད་པ་ཚིམ་གྱུར་ཅིགཿ མི་དབང་མི་སླེབ་སྒྲིབ་པ་ཅནཿ ལྷག་མའི་མགྲོན་གྱི་ཐུགས་དམ་བསྐངཿ སོ་སོའི་དགྱེས་པ་ཀུན་ལྡན་གྱིསཿ ཚོགས་རྫོགས་སྒྲིབ་པ་ཡོངས་དག་ནསཿ བདག་དང་སེམས་ཅན་ཐམས་ཅད་ཀུནཿ རྣམ་མཁྱེན་སངས་རྒྱས་ཐོབ་པ་དངཿ ལན་ཆགས་ཤ་མཁོན་བུ་ལོན་སོདཿ སྡུག་བསྔལ་ཀུན་བྲལ་བདེ་ལྡན་ཤོགཿ སཾ་བྷ་ར་དང་ཆུ་སྦྱིན་སྔགས་གང་འོས་ཀྱིས་བསྔོཿ མཐར་ནི་འཁོར་གསུམ་དངོས་པོའི་ཆོསཿ མི་དམིགས་མཉམ་པ་ཉིད་ཕྱམ་གདལཿ ཞེས་པ་འདི་ཡང་ཀློང་ཆེན་ཡངས་བས་བསྐུལ་ངོར་ག་གཱས་སོ། ། མེ་མཆོད་བསྡུས་པ་དཔལ་གྱི་བུམ་བཟང་།༈ མེ་མཆོད་བསྡུས་པ་དཔལ་གྱི་བུམ་བཟང་ཞེས་བྱ་བ་བཞུགས་སོ༔ ན་མོ་གུ་རུ་པདྨ་ཀ་ར་ཡེ༔ དཀྱིལ་འཁོར་ལས་གཞུང་བསྲང་བྱས་ཏེ༔ བསྙེན་པའི་འཕྲོ་ལ་མཆོད་བསྟོད་མཐར༔ དྲག་ལས་ཡིན་ན་འགུགས་གཞུགས་ལ༔ གནོད་བྱེད་དགྲ་བགེགས་ཐམས་ཅད་མཚན་མ་རྫས་ཀྱི་རྟེན་འདི་ལ་ཁུག་ཅིག༔ ཅེས་དང་༔ སྭ་བྷ་ཝས་སྟོང་བར་སྦྱངས༔ སྟོང་པའི་ངང་ལས་མཆོད་སྲེག་གི་རྫས་རྣམས་ངོ་བོ་དགྲ་བགེགས་ཀྱི་ཤ་ཁྲག་རུས་གསུམ་ཡིན་པ་ལ་རྣམ་པ་བདེ་སྟོང་ཟག་མེད༴ ཅེས་བཏགས༔ གཞན་ལ༔ སྟོང་པའི་ངང་ལས་ཏྲཱཾཿལས་རིན་པོ་ཆེའི་སྣོད་དུ་མཆོད་སྲེག་གི་རྫས་རྣམས་བདེ་སྟོང་ཟག་མེད་ཀྱི་བདུད་རྩི་འདོད་པའི་ཡོན་ཏན་ཐམས་ཅད་འབྱུང་བའི་རང་བཞིན་ཅན་དུ་གྱུར༔ ཨོཾ་ཨཱཿཧཱུྃ་ཧ་ཧོ་ཧྲཱི་ལན་གསུམ་གྱིས་བརླབས་ལ༔ རཾ་ཞེས་མེ་སྦར་ནས༔ ཡཾ་ཞེས་མེ་དར་གཡབ༔ ཁཾ་ཞེས་དག་གཙང་གི་སྐྱེམས་ཀྱིས་མེ་གསོས་ལ༔ བྷྲཱུྃཿ མེ་ཐབ་གཞལ་ཡས་ལྷུན་གྲུབ་དབུས༔ མེ་ལྷ་བསྒྲང་ཕྲེང་གུནྡྷེ་འཛིན༔ སྣ་ཚོགས་མདོག་ཅན་འོད་འཕྲོ་འབར༔ རྭ་སྐྱེས་སྟེང་ན་འགྱིང་བག་ཅན༔ སྐུ་ཡི་ལྟོ་(སྤྲོས་ན་)བ་ཡངས་པ་རུ༔ པདྨ་ཉི་ཟླའི་གདན་སྟེང་དུ༔(དེ་ནས་ཡི་དམ་ལྟ་བུ་ལ་མཚོན་ན༔ རང་ཉིད་རྡོ་རྗེ་གཞོན་ནུ་ནིའམ༔ ཆོས་སྐྱོང་ལ༔ དབུས་སུ་ཀུན་གྱི་ཁྱབ་བདག་མཆོག༔ ཅེས་དང་༔ མ་མོ་ཤ་ཟ་ཧོར་མོ་ནི༔ ཞེས་དང་༔ གཟའ་ལ༔ རཿལས་དྲང་སྲོང་རཱ་ཧུ་ལ༔ ཞེས་དང་༔ ལྷ་ཆེན་ལ༔ ཧྲཱིཿ ལས་དྲང་སྲོང་ལྷའི་བླ་མ༔ སོགས་ནས་རང་གཞུང་སོ་སོ་ལ་འཇུག་གོ༔ མཆན༔) བར་རྩ་གསུམ་དང་༔ ཆོས་སྐྱོང་སྲུང་མ་འཁོར་དང་བཅས༔ མ་འདྲེས་ཡོངས་སུ་རྫོགས་པར་གསལ༔ འོད་འཕྲོས་གནས་ནས་སྤྱན་དྲངས་གྱུར༔ སྤྲོས་ན་རང་རང་གི་སྤྱན་འདྲེན༔ བཞུགས་གསོལ་བཅས་ཀྱིས་གྲུབ་པར་བགྱིད་དམ༔ ཡང་ན༔ ཨོཾ་གུ་རུ་དཱེ་ཝ་ཊཱཀྐི་ནི་ན་མོ་རཏྣ་ཏྲ་ཡཱ་ཡ༔ དྷརྨཱ་པཱ་ལ་བཛྲ་ས་མ་ཡ་ཛ་ཛ༔ ཛཿཧཱུྃ་བཾ་ཧོ༔ པདྨ་ཙནྡྲ་སུརྱ་མཎྜ་ལ་ཏིཥྛ་ལྷན༔ དེ་ནས༔ ཨོཾ་བཛྲ་ཨ་མྲྀ་ཏ་ཁཱ་ཧིཿ ཞེས་བྱོན་སྐྱེམས་མཐར༔ ཕྱག་འཚལ་མཆོད་བསྟོད་གཞུང་བཞིན་ནམ༔ ན་མོ་སརྦ་པཱུ་ཛ་སསྟི་སྟུ་ར༔ ཞེས་ཀྱང་ཆོག་གོ༔ རྩ་སྔགས་མཐར༔ སརྦ་པཱུ་ཛ་ཁཱ་ཧི༔ ཞེས་དང་༔ བདུན་མཚམས་སོགས་སུ༔ ཨོཾ་ཤིནྟཾ་པུཥྚཾ་ཝ་ཤཾ་མ་ར་ཡ་སརྦ་སིདྡྷི་ཕ་ལ་ཧོ༔ རྫས་སྐོར་སྤུང་བ་ཅི་འགྲུབ་མཐར༔ སོ་རྩི་ལ༔ ཨོཾ་བཛྲ་ཏཾ་བུ་ལ་ཡེ་སྭཱ་ཧཱ༔ གོས་ཟུང་ལ༔ ཨོཾ་བཛྲ་ཝཥྚ་ཡེ་སྭཱ་ཧཱ༔ ཚོགས་སམ་ཆོས་སྐྱོང་ཡིན་ན་གསོལ་མཆོད་ཀྱི་རྗེས་སུ༔ གཏང་རག་གིས་མཆོད་བསྟོད༔ བཟོད་གསོལ་གྱི་མཐར༔ ཨོཾ་བཛྲ་ཨ་མྲྀ་ཏ་ཁཱ་ཧི༔ གཤེགས་སྐྱེམས་ལན་གསུམ་མཐར༔ ཧཱུྃ༔ ཡེ་ཤེས་འཇིག་རྟེན་མེ་ལྷའི་ཚོགས༔ བསྒྲུབ་བརྟེན་རྫས་ལ་བརྟན་བཞུགས་ཤིང་༔ རྣལ་འབྱོར་བདག་ཅག་འཁོར་བཅས་ཀྱི༔ ཕྲིན་ལས་རབ་འབྱམས་ཁྱོད་ཀྱིས་སྒྲུབས༔ ཞེས་བྱས་ནས་གཏོར་སྒམ་གྱི་དམ་ཚིག་གི་རྫས་རྣམས་ལ་ཐིམ་པར་བསམ༔ ཡང་ཚོགས་གཏོན་ན༔ ཚོགས་ཀྱི་རྟག་ཆད་མཐའ་བསལ་གྱི་འགོར་གཤེགས་སྐྱེམས་ཕུལ་ནས༔ དེ་མན་ཆད་བསྐྱང་བས་ཆོག་གོ༔ དེ་སྐད་རྒྱས་བསྡུས་གང་ཡང་རུང་བ་འདི༔ དཀའ་བ་མེད་པ་སྔགས་ཀྱི་ཁྱད་ཆོས་ཡིན༔ ཚོགས་རྫོགས་བསྙེན་བསྒྲུབ་ཁ་སྐོང་ཕྲིན་ལས་མྱུར༔ འདི་འདྲའི་ཐབས་ལམ་འཇིག་རྟེན་ཀུན་ན་དཀོན༔ ས་མ་ཡཱ༔ སྐུ་གསུང་ཐུགས་ལ་ཁྲོས་པའི་ཉམས་ཆགས་པས། །སུས་ཀྱང་བལྟ་བར་མི་བཟོད་ཧེ་རུ་ཀ །ཤེས་རབ་བློ་འཕེལ་ཐུགས་དམ་བསྐང་གྱུར་ཅིག །ག་ག་ཨ་བྷྱེས་རྩལ་ཤུགས་ཕྱུང་དེ་ཕུལ། དགེའོ། ། རྡོ་རྗེ་སེམས་དཔའི་དགོངས་ཉམས་ལསཿ འཕོ་བའི་གདམས་པ་སྐུ་གསུམ་གསང་ལམ།རྡོ་རྗེ་སེམས་དཔའི་དགོངས་ཉམས་ལསཿ འཕོ་བའི་གདམས་པ་སྐུ་གསུམ་གསང་ལམ་ཞེས་བྱ་བ་བཞུགས་སོཿ ཨེ་མ་ཧོཿ གཞི་རྒྱུད་བདེན་པ་དབྱེར་མེད་དབུ་མ་ཆེཿ ཐབས་རྒྱུད་རྒྱུ་འོད་ཟུང་འཇུག་ཕྱག་རྒྱ་ཆེཿ འབྲས་རྒྱུད་མ་བཅོས་ལྷུན་གྲུབ་རྫོགས་པ་ཆེཿ རང་རིག་བྱང་ཆུབ་སེམས་ལ་མཉམ་པར་བཞགཿ བལྟས་པས་མ་མཐོང་བརྗོད་མེད་ངང་ལ་ཡནཿ གཉིས་འཛིན་བྲལ་བའི་ཡེ་ཤེས་རྗེན་པ་ནིཿ ཀུན་བཟང་གདོད་མའི་མགོན་པོའི་དགོངས་པ་རུཿ ངོ་ཤེས་ངང་རྟོགས་འགྱུར་མེད་བཙན་ས་བཟུངཿ ཕཊཿ ཕཊཿ ཕཊཿ ཨེ་མཿ སྣང་སྟོང་ཟུང་འཇུག་སྐུ་དང་ཡེ་ཤེས་མཛོདཿ འོད་གསལ་སྣང་བ་ལྔ་ལྡན་དཀྱིལ་འཁོར་དུཿ རང་ཤར་གཞི་སྣང་རང་ལ་གནས་པ་ཉིདཿ ངོ་ཤེས་ལོངས་སྐུའི་དགོངས་པའི་བཙན་ས་བཟུངཿ ཕཊ་ཕཊ་ཕཊཿ ཨེ་མཿ དཔག་ཚད་ལྔ་བརྒྱ་འདས་པའི་སྟེང་རོལ་དུཿ བཅོམ་ལྡན་མགོན་པོ་རྒྱལ་བ་རིགས་ལྔ་བཞུགསཿ རྣམ་ཤེས་རྡོ་རྗེ་ཧཱུྃ་གིས་མཚན་པ་ཅནཿ དཔག་ཆེན་མདའ་འཕང་བཞིན་དུ་རྒྱངས་ཀྱིས་ཐོནཿ ཕྱོགས་བཅུའི་སངས་རྒྱས་ཐུགས་དང་དབྱེར་མེད་གྱུརཿ ཕཊ་ཕཊ་ཕཊཿ ཅེས་ཀྱང་ཤྲཱི་བས་སོཿ ཕཊ་ཀྱི་མཚམས་རྣམས་སུ་འོག་གི་གསོལ་འདེབས་སྦྱོརཿ ཨེ་མ་ཧོཿ སྐུ་གསུམ་དབྱིངས་བཞུགས་རྒྱལ་བ་སྲས་དང་བཅསཿ རྫོགས་ཆེན་སྟོན་པ་བཅུ་གཉིས་སངས་རྒྱས་སྟོངཿ འཇའ་ལུས་དབང་ཕྱུག་བརྒྱུད་གསུམ་བླ་མ་དངཿ ཡི་དམ་མཁའ་འགྲོ་ཆོས་སྐྱོང་མ་ལུས་པཿ ཁྱད་པར་ཐུགས་བསྐྱེད་དབང་བཙན་འོད་དཔག་མེདཿ ཐུགས་དམ་གནད་བསྐུལ་དད་གུས་གསོལ་འདེབས་ཀྱིཿ ལས་རྐྱེན་ངན་བའི་དབང་དུ་མ་བཏང་བརཿ བདག་སོགས་རྒྱུ་ལུས་གཡར་ཁང་ཞིག་མ་ཐགཿ སྲིད་པ་སྡུག་བསྔལ་བར་དོ་མི་འགྲིམ་པརཿ འདྲེན་པའི་དེད་དཔོན་མཛོད་ཅིག་ཐུགས་རྗེ་ཅནཿ སྐུ་གསུམ་གདོད་མའི་ཀློང་དུ་བཙན་ས་ཟིནཿ འཕོ་ཆེན་འཇའ་ལུས་འགྲུབ་པར་བྱིན་གྱིས་རློབསཿ ཅེས་ཀྱང་ག་གཱ་ཨ་བྷྱེ་ནས་སྨྲས་པ་དགེ་བར་གྱུར་ཅིག ། དུས་མཐར་གདབས་པའི་འཕོ་བ་བར་དོ་མེད་པར་སངས་རྒྱ་བའི་གདམ་པ་ཟབ་མོ་བཞུགས་སོཿ རང་ལུས་ཐ་ལམ་དབུས་སུ་དབུ་མའི་སྦུབསཿ སྙིང་ཐད་རང་སེམས་རྡོ་རྗེ་ཧཱུྃ༔མཚན་ཅནཿ སྤྱི་བོར་བླ་མ་སངས་རྒྱས་ཀུན་འདུས་དཔལཿ བྱིན་རླབས་ཐུགས་རྗེ་མོས་གུས་རྒྱུད་སྦྲེལ་ནསཿ སྐད་ཅིག་ཉིད་ལ་གྲོལ་བ་མངོན་གྱུར་ཤོགཿ ཨེ་མ་ཧོཿ རྫོགས་ཆེན་གསལ་བའི་སྟོན་པ་བཅུ་གཉིས་དངཿ འཇའ་ལུས་གྲུབ་བའི་བླ་མ་བརྒྱུད་པར་བཅསཿ ཡོངས་འདུས་དྲིན་ཆེན་འགྲོ་མགོན་མཆོག་གི་ངངཿ བཟོད་མེད་གདུང་ཤུགས་དྲག་པོའི་གསོལ་བ་འདེབསཿ ལུས་གསུམ་བག་ཆགས་སྦུབས་རྒྱ་ལས་གྲོལ་ནསཿ འོད་གསལ་སྒྱུ་མ་གྲོང་འཕོ་གྲོང་འཇུག་གིསཿ འཇའ་ལུས་མཁའ་སྤྱོད་འགྲུབ་པར་བྱིན་གྱིས་རློབསཿ ཧིཀཿ ཅི་མང་བརྗོད་པས་གྲོལ་བར་ཐོབ་པར་གདོད་མི་ཟའོཿ ག་གཱས་སོ། ། རྒྱལ་ཐོ་བསྡུས་པ།༈ རྒྱལ་ཐོ་བསྡུས་པ་ནིཿ གཏོར་མ་བཞི་བོ་ཨ་ཀ་རོ་དང་མཛོད་སྔགས་ཀྱིས་བརླབ་ལཿ ཨོཾ་སྭཱ་བྷཱ་ཝས་སྟོང་བར་སྦྱང་ལཿ སྟོང་པའི་ངང་ལས་ཐོ་བཞིའི་གཞལ་ཡས་སུཿ སངས་རྒྱས་བསྟན་སྲུང་རྒྱལ་པོ་ཆེན་པོ་བཞིཿ འཁོར་ཚོགས་འབུམ་བཅས་སྐད་ཅིག་རྫོགས་པར་གསལཿ གནས་གསུམ་འོད་འཕྲོས་རི་རབ་ཕྱོགས་བཞི་ནསཿ དམ་ཚིག་ཕྱག་རྒྱས་སྤྱན་དྲངས་གཉིས་མེད་གྱུརཿ ཨོཾ་མ་ཧཱ་ར་ཛ་ཙ་ཏུ་བཻ་ས་པཱ་རི་ཝ་ར་ས་མ་ཡ་ཛ་ཛཿ པདྨ་ཀ་མ་ལ་ཡ་སྟྭམཿ ཨོཾ་བཻ་རུ་རཀྵ་པཱུ་ཛ་ཨེ་དཾ་བྷ་ལིདྟ་ཁཱ་ཧིཿ ཨོཾ་བཻ་རུ་པཀྵ་པཱུ༴ ཨོཾ་བཻ་རུ་དྷ་ཀ་པཱུ༴ ཨོཾ་བཻ་ཤྲ་མ་ཎ་པཱུ་ཛ༴ ཅེས་མཆོད་ལཿ ཨོཾཿ སྔོན་གྱི་ཐུགས་དམ་དབང་ལྡན་རྒྱལ་ཆེན་བཞིཿ རྣལ་འབྱོར་མཆོག་གི་དངོས་གྲུབ་བསྒྲུབ་པ་ཡིཿ བར་ཆད་ཀུན་སེལ་བསམ་དོན་ལྷུན་གྲུབ་མཛོདཿ མཐུ་སྟོབས་མཆོག་ཁྱོད་མཆོད་བསྟོད་ཕྱག་ཀྱང་འཚལཿ ཨོཾ་སུ་པྲ་ཏིཥྛ་བཛྲ་ཡེ་སྭཱ་ཧཱཿ ཞེས་བརྗོད་རྟེན་བཞུགས་བྱའོཿ ག་གས་སོ། ། ༈ ཀྱཻཿ སངས་རྒྱས་སྤྲུལ་བ་རྒྱལ་ཆེན་བཞིཿ དམ་ཚིག་ཐུགས་དམ་ཇི་བཞིན་དུཿ བསྒྲུབ་པའི་གེགས་ལས་རྒྱལ་ཟིན་གྱིཿ ད་ནི་མཆོད་ཡོན་བསྣམས་ནས་སུཿ རེ་ཞིག་རང་གཞན་གནས་སུ་གཤེགསཿ སླད་ནས་སྤྱན་འདྲེན་ཕྲིན་བཅོལ་དུསཿ ཕྱིར་ཞིང་འབྱོན་པར་མཛད་དུ་གསོལཿ ཨོཾ་མ་ཧཱ་ར་ཛ་ཙ་ཏུ་ས་པ་རི་ཝ་ར་བཛྲ་མུཾཿ ཅེས་བརྗོད་དོ། །འདི་ཡང་ག་གཱས་སོ། ། ཞལ་གདམས་སྐྱོན་ཐོག་མདའ་མོ།༈ ཞལ་གདམས་སྐྱོན་ཐོག་མདའ་མོ་ཞེས་བྱ་བ་བཞུགས་སོ། །ཨཻ། ཁྱེད་ལ་ཞལ་གདམས་དགོས་པའི་བཀའ་ནན་དེ། །བསམ་ཞིང་བསམ་ན་རང་གིས་རང་ལ་ལྟོས། །ཁ་ན་སོ་མེད་མགོ་ཡི་སྐྲ་དཀར་ཞིང༌། །སྐྱི་མོའི་གཉེར་མ་རྒྱལ་མཚན་འཕུར་མ་འདྲ། །མིག་ནི་སེར་པོ་གོས་ཀྱི་སྔ་སོ་རིང༌། །འགུལ་ལྕི་སེམས་ཀྱི་ཕོ་ཚོད་གདེང་ཉམས་ཏེ། །ཉམ་ཆུང་དབང་མེད་མི་འདུག་ཁ་མེད་ལས། །འགྲོ་ས་ཡོད་ན་རན་ལས་ཕྱི་ཐལ་ཁུར། །དེ་ཚོས་ཁྱེད་ལ་ཞལ་གདམས་བཤད་ཀྱིན་འོངས། །ལྕི་ན་མི་ཐེག་སྲབ་ན་ཁྱོད་མི་སྐྱོབ། །སྲ་ན་མི་ཆོད་སྙི་ན་ཕོ་བ་ཁོལ། །དེས་ཀྱང་ཁྱོད་ལ་གསལ་འདེབས་མ་གོའམ། །ཁྱད་པར་ངས་ཡིན་འདོད་པའི་ཁྱི་རྒན་དེ། །ཤི་ན་རོ་བདག་ཙམ་ཡང་མི་བྱེད་པར། །མཚེར་ཤུལ་ཚོ་ན་ཡོད་པ་གཟིགས་ལགས་སམ། །གསོན་པོའི་ཁྲེལ་བཀྲུ་ཙམ་གྱིས་ཅིང་མི་ཕན། །ཅུང་ཟད་ཕན་ཀྱང་དེ་ཡང་བྱེད་མཁན་ཉུང༌། །ངས་ཡིན་ཁོས་ཡིན་མཆོད་འགོ་ཤིན་ཏུ་མང༌། །མི་རྒྱུ་གཉིས་ཀ་ལྷན་དུ་ཤི་བ་འདྲ། །ཁ་མཁས་ཁ་ནས་འགྲམ་ཆུ་འཐག་པའི་དུས། །ལག་འཁུམ་ལག་ནས་གང་སོབ་གླུད་རྫོང་བྱེད། །དམར་པོའི་རྒྱུ་རྫས་རྫ་ལ་འགྲོ་བའང་དཀོན། །མ་ཟད་རིག་རྒྱུ་ཡོད་དེ་རྩི་རྒྱུ་མེད། །བསམ་ཞིང་བསམ་ན་ལྷ་འདྲེའི་ཆོ་འཕྲུལ་འདྲ། །ཚེ་སྟོད་ཆོས་སྐད་སྐྱུགས་ཏེ་ཁ་བོ་ཆེ། །ཚེ་སྨད་སེམས་ཚེགས་ཆེ་ཞིང་མི་ཉན་མང་། །འཆི་ཁ་སྡར་སྐད་ཤོར་ནས་མིག་རྩ་བརླན། །དེ་འདྲའི་མདོ་ཤོར་མ་མཛད་སྐུ་ཚེ་རིང༌། །ཚེ་ཕྱེད་སྒོམ་སྒྲུབ་དགོས་ཞེས་ཁ་ས་འཐེན། །དོན་ལ་ཟླ་བ་གཅིག་གིས་བཟླས་བརྗོད་དང༌། །ཉིན་རེ་ཐུན་ཐུང་གཅིག་གི་མཉམ་བཞག་མེད། །ད་སྔ་ཕན་ཆད་འཆི་ཆོས་ཅི་ཡོད་སོམ། །དེ་ཡང་སྡིག་གིས་གོས་སམ་མ་གོས་ལྟོས། ཞལ་གདམས་དེ་ཚོས་མཚངས་ལ་ཨེ་ཕོག་གམ། །ཆོས་ལུགས་ཀུན་གྱི་སྤྱི་དགྲ་ཆོས་རྒྱུས་ཅན། །བླ་སེར་ཀུན་གྱི་ལྟག་བདུད་མཉམ་འགྲོགས་ཅན། །གཞན་གྱི་བྱ་སྤྱོད་རྟོག་པའི་བློ་སྤྱང་པོ། །དེ་ཚོ་ཡང་དག་དོན་གྱི་གླེན་པ་ཡིན། །གལ་ཏེ་རང་འགའ་གཅིག་པུར་འཁྱམས་དུས་སུ། །ཐབས་ཆགས་ཤུལ་མིའི་འཁོར་བ་སྟོངས་སོ་ཞེས། །ངེས་དོན་མིག་གི་མཐོང་རྒྱུ་མ་ཡོད་ན། །འདིང་ལོག་སྣེ་ན་མདུད་ལོག་ཤིན་ཏུ་མང༌། །རང་ལུས་དགྱེ་རྒུ་རང་ལག་མེད་མི་སྲིད། །གཞན་ཁག་བཞག་ཀྱང་ཆོས་རྒྱལ་རྒྱུས་ཡོད་མིན། །དེ་དུས་འགྱོད་དང་ཐེབ་རིགས་སུམ་བརྒྱ་བརྒལ། །བསམ་བློ་ཐོང་ལ་རང་མདོ་མ་ཤོར་ཅིག །རང་ལ་ཡོད་ཚད་སྐྱོན་དེ་གཞན་ལ་མེད། །རང་ལ་མེད་ཀྱང་ཡོན་ཏན་གཞན་ཡོད་སྲིད། །གང་མཐོང་མི་བདེན་སྨིག་རྒྱུ་མིག་ཡོར་བཞིན། །དེ་ཚོ་ཤེས་པར་མཛོད་ཅིག་རིགས་ཀྱི་བུ། །ལྟ་བ་རང་སེམས་སྤྲོས་བྲལ་འདི་ལ་ཟེར། །དེ་ལས་གཞན་ན་མེད་དོ་ཁོ་ཐག་ཆོད། །བསྒོམ་པ་དེ་ཤེས་མ་ཡེངས་ཙམ་ཞིག་ཡིན། །དེ་ལས་གཞན་ན་མེད་དོ་ཁོ་ཐག་ཆོད། །སྤྱོད་པ་བརྩོན་འགྲུས་ཐང་ལྷོད་མེད་པ་ཡིན། །དེ་ལས་གཞན་ན་མེད་དོ་ཁོ་ཐག་ཆོད། །འབྲས་བུ་རང་ངོ་མངོན་དུ་གྱུར་བ་ཡིན། །དེ་ལས་གཞན་ན་མེད་དོ་ཁོ་ཐག་ཆོད། །རང་མདོ་ཨེ་ཤོར་རང་གི་བྱ་བ་ཡིན། །དེ་ལས་གཞན་ན་མེད་དོ་ཁོ་ཐག་ཆོད། །ཞལ་གདམས་ཤི་མཚངས་ཁོང་ནས་འབྲུ་བ་ཡིན། །དེ་ལ་གསང་བརྐུང་མེད་དོ་ཁོ་ཐག་ཆོད། །དེ་སྐད་སྙིང་གི་ལེགས་བཤད་ངེས་པ་ལ། །ཐུགས་ཁྲོ་མ་མཛད་ག་གཱས་མཐེ་བོང་སློང༌། ། ༈ ཀྱཻཿ གསོན་དང་གྲོགས་ཁྱེད་དལ་མཆོག་ཐོབ་དུས་འདིརཿ གསེར་གཞོང་ནོར་བུའི་སྤྲས་པའི་བདག་ཉིད་ཀྱིཿ ངན་སྐྱུགས་འཕྱགས་བཞིན་སྡིག་པར་མི་བརྩོན་ཏེཿ ཤིན་ཏུ་ཐ་ཆད་མཁས་པས་སྨད་ཅེས་གསུངཿ ཁྱད་པར་རང་རེའི་ཚེ་ལ་ངེས་པ་མེདཿ འཆི་བདག་བདུད་ནི་ནམ་འོང་ཆ་མ་མཆིསཿ དོ་ནུབ་ཙམ་ཡང་མི་འཆིའི་གདེངས་མེད་པསཿ དེ་ཕྱིར་བརྩོན་པས་གོས་བཙན་བགོ་འཚལ་ལོཿ འཁོར་བ་མེ་འོབ་ལྟ་བུར་མནར་ཞིང་གདུངཿ ལན་གཅིག་ཙམ་ཡང་བདེ་བར་བསྟིར་མེད་པསཿ སྡུག་བསྔལ་བརྣག་དཀའ་བདེ་བར་འཁྲུལ་བ་འདིཿ ཀྱཻ་མ་ཤེས་པ་རྣལ་མར་གནས་ཡིན་ནམཿ དཀར་ནག་ལས་ནི་ལུས་དང་གྲིབ་བཞིན་འགྲོགསཿ དགེ་སྡིག་དབང་གིས་བདེ་སྡུག་རྒྱུན་མི་ཆདཿ གང་ཡང་སྲིད་པར་འཛིན་པའི་གཏོད་ཕུར་བསཿ རྨི་ལམ་ཙམ་གྱི་རྒྱུ་འབྲས་འདམས་ཀ་ཚོལཿ ཁྱད་པར་འབྲས་བུ་བླ་མེད་ནོར་ཐོབ་པཿ ཨུ་དུམ་ཝ་ར་འཇིག་རྟེན་འབྱུང་སྲིད་ཀྱིཿ བརྒྱ་སྟོང་ཁྲག་ཁྲིག་ཟླ་བོར་ལ་མི་བསྙེགསཿ གྱི་ནར་མ་འདོར་དོན་གྱི་སྙིང་པོར་ཟུངསཿ ག་ག་ཨ་བྷྱེ་ནས་སོ། ། ༈ ཨེ་མ་ཧོཿ རང་སེམས་ཕུག་དེད་རྒྱལ་བའི་ཡེ་ཤེས་དངོསཿ འདི་ལ་སྡེ་སྣོད་རྒྱུད་སྡེའི་གསང་བ་རྫོགསཿ རྩལ་ལས་རོལ་བ་རང་ཤར་རང་གྲོལ་དུཿ ཡེ་ནས་སངས་རྒྱས་གདེངས་གིས་འབྲས་བུ་བརྙེསཿ ཅེས་ཀྱང་ག་གཱས་སོ། ། ཞལ་གདམས་ངེས་འབྱུང་ཤིང་རྟ།༈ ཞལ་གདམས་ངེས་འབྱུང་ཤིང་རྟ་བཞུགས་སོཿ ཀྱཻ་ཉོན་ཅིག་སྐལ་ལྡན་རིགས་་ཀྱི་བུཿ ཞལ་མཐུན་པ་མདོ་རྒྱུད་ཐམས་ཅད་ནསཿ འཁོར་བ་ལ་ངེས་འབྱུང་བསྐྱེད་པའི་ཕྱིརཿ བློ་ལྡོག་པའི་ཐབས་ལ་རྣམ་བཞི་གསུངསཿ མདོ་རང་གི་ལུས་ངག་སེམས་ལ་བལྟཿ ཆོས་གདམས་ངག་ཐོབ་པའི་སྐལ་བཟང་པོཿ འདི་རྙེད་པ་དལ་འབྱོར་མི་ལུས་ཟེརཿ དེ་སྟོང་ལོག་བྱས་ན་བསམ་བརླག་ཡིནཿ ཚེ་གཅིག་གི་འདུན་མ་མཁས་པ་ལཿ མི་སྤྱང་གྲུང་ཅན་ཞེས་ཀུན་གྱིས་བསྟོདཿ དེ་ངན་གཡོ་ཅན་གྱི་གང་ཟག་ཞིགཿ མཁས་ཟེར་ན་གཏན་འདུན་གྲུབ་པ་ཡིནཿ ལས་སྐལ་བ་རང་ལ་འབྱོར་ནའངཿ དོན་ཆོས་ཀྱིས་མ་ཆོད་མི་བོ་དེཿ གདོན་འཆི་བདག་ནད་ཀྱིས་ཐེབ་པའི་དུསཿ འགྱོད་ལྷག་གི་འགྲོ་ཡང་འཕྱིས་པ་ཡིནཿ དུས་དེ་ཙམ་ཞིག་ན་དགའ་བཞིན་དུཿ འཚེར་མེད་པར་བློ་བདེ་ངེས་རྙེད་པཿ མི་མདོ་ཅན་ཟེར་བ་ངག་དོན་ཅནཿ ཁྱོད་རང་དྲིན་རང་ལ་ཆེ་བ་ལགསཿ ཕྱི་འབྱུང་བཞིའི་འགྱུར་བ་མ་ངེས་ཤིངཿ ནང་སྒྱུ་ལུས་རྒུད་པས་གཉེར་མ་ཆགསཿ སེམས་སྐད་ཅིག་འགྱུར་ལྡོག་མི་རྟག་པཿ འདི་ཤེས་བཞིན་མཐོང་ཀྱང་ཁྱད་དུ་བསདཿ རང་མཆི་བར་ངེས་ཀྱང་སྡོད་གྲབ་ཤོམཿ མི་མཆི་བ་མཐོང་ཀྱང་འཇིགས་པ་མེདཿ མི་ཁྱོད་ལ་དཔའ་གདེངས་ཅི་ཡོད་ནཿ སང་ཙམ་ཞིག་གནས་པའི་ངེས་སོ་བྲལཿ གནས་ཁང་ཁྱིམ་ཁྱོད་ཀྱི་མལ་འཆའ་སྙམཿ རྒྱུ་ལོངས་སྤྱོད་ཁྱོད་ཀྱི་སྤྱོད་དོ་བཿ གྲོགས་དགའ་མཛའ་ཁྱོད་དང་འགྲོགས་ཀོ་ལོཿ དེ་ཐམས་ཅད་དོན་མེད་ཁྱི་རྒན་སེམསཿ ཆོས་ཐོས་པ་མང་ཡང་བསྒྲུབ་པ་དཀོནཿ མགོན་བརྟེན་པ་མང་ཡང་དད་པས་ཕོངསཿ དབང་ཐོབ་པ་མོད་ཀྱང་དམ་སྡོམ་བྲལཿ དེ་མི་ནག་ཕལ་ལས་ཁྱད་པར་གངཿ གཟུགས་ཆོས་པར་བཅོས་ཀྱང་སེམས་རྒྱུད་མཁྲེགསཿ རྟགས་དམར་སེར་བསྒྱུར་ཀྱང་བསླབ་བྱའི་དབུལཿ ཚིག་ཁ་ཏོན་ཙམ་ལ་ཆས་ཆོད་བྱསཿ འཆི་རན་དུས་སྒྲེན་མོ་ལག་སྟོང་ཡིནཿ ཕྱི་དམར་སེར་རྟགས་དེ་མ་མཛེས་ཀྱངཿ དམ་ཁྲིམས་ལྡན་སྙེམས་དེ་མ་ཡོད་ཀྱངཿ ཚིག་སྡེ་སྣོད་བཤད་ཡམ་མ་སྙན་ཀྱངཿ མཆོག་གྲུབ་ཐབས་སྒོམ་ཆེན་དག་ལ་ཡོདཿ སེམས་བཏགས་ན་གར་མཁན་སྤྲེའུ་འདྲཿ གྲོགས་གང་གིས་བསྒྱུར་ཀྱང་དེ་སྟངས་བྱེདཿ གར་ཐིག་དང་དབྱངས་རོལ་མཛེས་ཆོས་ཀྱིཿ དགྲ་འཆི་བདག་ལ་གོ་ངོམ་བསམ་གྱིན་འདྲཿ ད་བསམ་ཞིང་འཆི་བས་གཏུག་དེ་ཡོདཿ ཡོད་ངེས་ཀྱང་རང་སེམས་མ་ཤེས་པསཿ ཕྱི་འདོད་ཡོན་བུ་མོའི་བྱད་མདངས་ལཿ ཆགས་དྲག་ན་ཤི་འདྲེ་ཡི་དྭགས་ཡིནཿ ཆོས་བྱེད་བློའི་སྟངས་ཀ་མ་སྔ་དགོསཿ བྱས་ཚར་ན་མགོ་མཇུག་མ་འཚམས་ནཿ མི་གཞན་གྱིས་ཁྲེལ་ཞིང་རང་སྡུག་བསྔལཿ དོན་དེ་ཕྱིར་རང་ལ་བསྐུལ་མ་དགོསཿ ལར་ཆགས་སྡང་འདི་ལ་མ་ཕྲི་ཞིངཿ ཆོས་བྱས་ཀྱང་ཞེན་ལོག་མེད་པ་ཚོཿ ངས་གྲུབ་སྙམ་གྲངས་ཀྱི་གློ་བ་དགའཿ དེ་ལེགས་སྨོན་ཙམ་ལས་ཡོད་རེ་ཀནཿ དོན་བྱང་ཆུབ་སེམས་ཉིད་མ་སྦྱོངས་བཿ སྒོམ་ཡིན་ནོ་ཙམ་པས་རྒྱགས་པ་ཡངཿ དེ་ཐར་བའི་ལམ་དུ་འགྲོ་སྲིད་ཀྱངཿ སངས་རྒྱས་པའི་ལམ་བཟང་ཡིན་རེ་ཀནཿ དག་སྣང་དང་མོས་གུས་མ་ལྡན་ནཿ ངག་འདོན་པ་རྡོ་རྗེ་ཐེག་པ་མིནཿ སྣང་སྲིད་འདི་ལོག་ལྟར་ཤར་བ་ཡིཿ མཐར་སངས་རྒྱས་སྟོང་གི་སྐྱོབས་རེ་ཀནཿ སེམས་གནས་ལུགས་བབས་སུ་མ་བཞག་པརཿ རྒྱས་འདེབས་དང་ཕྱི་འབྱམས་སྟོང་ཉིད་ཀྱིཿ ཡིད་དཔྱོད་པ་ཡིན་སྙམས་མཆོག་འཛིན་གྱིཿ ཚི་ཆད་ལས་སྒོམ་གོ་ཆོད་རེ་ཀནཿ དེ་སྐད་དུ་སྨྲ་བའི་ཟོབ་རྫུན་འདིཿ ཁྱེད་སློབ་མས་ནན་བསྐུལ་མ་བཟོད་ནསཿ རྔ་དབྱུག་གུའི་བརྡུང་བའི་དཔེ་བཞིན་དུཿ སྔགས་རྒན་པོ་ག་ག་ཨ་བྷྱེས་བྲིསཿ ས་མ་ཡཱཿ རྒྱ་རྒྱ་རྒྱཿ ༈ རྐྱེན་ངན་རྩ་བ་ངར་འཛིན་འདི་ལ་ཐུག །འདྲེ་གདོན་རྩ་བ་རྣམ་རྟོག་ཡིན་ནོ་ལོ། །རྩུབས་ན་རྩུབས་ན་འཁོར་བའི་སྡུག་བསྔལ་རྩུབས། །གདོན་ན་གདོན་ན་ཉོན་མོངས་དུག་ལྔས་གདོན། །ཞེས་ཟེར་རོ། ། ཡིན་པ་བཅུ་གཉིས་ཀྱི་གླུ།༈ ཡིན་པ་བཅུ་གཉིས་ཀྱི་གླུ། བླ་མ་ཆོས་ཀྱི་འདྲེན་སྟོན་ཡིན། ༡ །ངེས་འབྱུང་ཆོས་ཀྱི་མགོ་བོ་ཡིན། ༢ །མ་རིག་ཆོས་ཀྱི་བསྐུལ་མ་ཡིན། ༣ །སྐྱབས་འགྲོ་ཆོས་ཀྱི་ས་བོན་ཡིན། ༤ །ཚུལ་ཁྲིམས་ཆོས་ཀྱི་ལུས་པོ་ཡིན། ༥ །བྱང་སེམས་ཆོས་ཀྱི་སྲོག་རྩ་ཡིན། ༦ །ཐོས་བསམ་ཆོས་ཀྱི་མིག་བུ་ཡིན། ༧ །ལྟ་བ་ཆོས་ཀྱི་ཁོང་སྙིང་ཡིན། ༨ །བསྒོམ་པ་ཆོས་ཀྱི་རྐང་བ་ཡིན། ༩ །སྤྱོད་པ་ཆོས་ཀྱི་ལག་པ་ཡིན། ༡༠ །བརྩོན་འགྲུས་ཆོས་ཀྱི་རང་མདོ་ཡིན། ༡༡ །འབྲས་བུ་ཆོས་ཀྱི་དོན་པོ་ཡིན། ༡༢ །ཡིན་པ་རྣམ་པ་བཅུ་གཉིས་འདི། །ཚུལ་བཞིན་ཉམས་སུ་བླང་མཛོད་དང༌། །ཀུན་ཏུ་འོད་ལ་བྱང་ཆུབ་པོ། ག་གཱས་སོ། ། མིན་པ་བཅུ་གཉིས་ཀྱི་གླུ།༈ མིན་པ་བཅུ་གཉིས་ཀྱི་གླུ། དད་མེད་བླ་མ་བརྟེན་པ་མིན། ༡ །ལེགས་སྨོན་ཡོད་ན་ངེས་འབྱུང་མིན། ༢ །སྐྱོ་ཤེས་མེད་ན་བསྐུལ་མ་མིན། ༣ །ཡིད་ཆེས་མེད་ན་སྐྱབས་འགྲོ་མིན། ༤ ། ངོས་ལྐོག་ཡོད་ན་ཚུལ་ཁྲིམས་མིན། ༥ །དགྲ་གཉེན་ཡོད་ན་བྱང་སེམས་མིན། ༦ །ཆེ་འདོད་ཡོད་ན་ཐོས་བསམ་མིན། ༧ །མཐར་འཛིན་ཡོད་ན་ལྟ་བ་མིན། ༨ །དམིགས་གཏད་ཡོད་ན་བསྒོམ་པ་མིན། ༩ །དུས་ཚོད་མ་འབྲེལ་སྤྱོད་པ་མིན། ༡༠ །བརྩོན་འགྲུས་མེད་ན་ཆོས་པ་མིན ། ༡༡ །སྤངས་རྟོགས་མ་རྫོགས་འབྲས་བུ་མིན། ༡༢ །འོན་ཀྱང་ཐེག་གསུམ་སོ་སོའི་པོ། །མིན་པ་བཅུ་གཉིས་རྡོ་རྗེའི་གླུའི། །གོལ་ས་སྒྲིབ་པ་ཀུན་དག་ནས། །མ་ཆགས་པདྨའི་ས་ནོན་ཤོག ། ཤྲཱི་བས་སོ། ། ཆོག་པ་རྣམ་པ་བཅོ་བརྒྱད་ཀྱི་གླུ།༈ ཆོག་པ་རྣམ་པ་བཅོ་བརྒྱད་ཀྱི་གླུ། འདི་སྣང་བློ་ཡིས་ཐོང་ན་ཆོག ༡ །གང་བྱས་ཆོས་སུ་འགྲོའོ་སྐལ་ལྡན་བུ། །མི་རྟག་བློ་སྣ་རྒྱུད་ལ་སྐྱེ་ན་ཆོག ༢ །ལེ་ལོ་ཕྱི་བཤོལ་མི་འཆོར་སྐལ་ལྡན་བུ། །དཀོན་མཆོག་ཡིད་ཆེས་སྐྱབས་འགྲོ་བྱས་ཀྱང་ཆོག ༣ །ཆོས་ཀུན་ཅིག་དྲིལ་ཡིན་ནོ་སྐལ་ལྡན་བུ༑ ༑བྱང་ཆུབ་སེམས་འདི་རྒྱུད་ལ་བསྟེན་ཀྱང་ཆོག ༤ །ཐེག་ཆེན་རྣལ་འབྱོར་ཡིན་ནོ་སྐལ་ལྡན་བུ། །སྟོང་ཉིད་དོན་ལ་གཅིག་དུ་གཞོལ་ཀྱང་ཆོག ༥ །ལྟ་བའི་སྤྱི་ཆིངས་ཡིན་ནོ་སྐལ་ལྡན་བུ༑ ༑བདག་མེད་ཙམ་ཞིག་ཁོལ་བུར་རྟོགས་ཀྱང་ཆོག ༦ །སྲིད་རྩ་དེས་ཀྱང་ཆོད་དོ་སྐལ་ལྡན་བུ༑ ༑ཚུལ་ཁྲིམས་མིག་འབྲས་ལྟ་བུར་བསྲུང་ཀྱང་ཆོག ༧ །ཡོན་ཏན་གཞི་རྟེན་ཡིན་ནོ་སྐལ་ལྡན་བུ། །བསམ་གཏན་ཙམ་དེར་གནས་ན་དེའི་ཀྱང་ཆོག ༨ །ཉོན་མོངས་ཉེས་པས་མི་གོས་སྐལ་ལྡན་བུ། །འབྲལ་མེད་བླ་མ་བསྟེན་ན་དེས་ཀྱང་ཆོག ༩ །བྱིན་རླབས་དགོངས་བརྒྱུད་འཕོའོ་སྐལ་ལྡན་བུ། །དབང་བསྐུར་ཙམ་ཞིག་ཐོབ་ན་ལོས་ཀྱང་ཆོག ༡༠ །སྐྱེ་བདུན་ཕན་ལས་མི་ལེན་སྐལ་ལྡན་བུ། །རྣམ་དག་དམ་ཚིག་བསྲུང་ན་དེས་ཀྱང་ཆོག ༡༡ །རིགས་ཡོད་གསོས་སུ་བྱེད་དོ་སྐལ་ལྡན་བུ། །དག་སྣང་མོས་གུས་བྱས་ན་དེས་ཀྱང་ཆོག ༡༢ །བར་དོ་ལྷ་རུ་འཆར་རོ་སྐལ་ལྡན་བུ། །ཀུན་རྫོབ་ལྷ་རུ་བསྒོམ་ན་དེས་ཀྱང་ཆོག ༡༣ །སྣང་བ་དག་པར་འགྱུར་རོ་སྐལ་ལྡན་བུ། །འོད་གསལ་རྫོགས་རིམ་བསྒོམ་ན་དེས་ཀྱང་ཆོག ༡༤ །ཕྱག་རྒྱ་ཆེན་པོ་ཐོབ་པོ་སྐལ་ལྡན་བུ། །ཟུང་འཇུག་རྫོགས་ཆེན་བསྒོམ་ན་དེས་ནི་མཆོག ༡༥ །འབྲས་བུ་སྐུ་གཉིས་འགྲུབ་པོ་སྐལ་ལྡན་བུ། །མ་ཎི་ཁ་ཏོན་བྱས་ན་དེས་ཀྱང་ཆོག ༡༦ །རི་བོ་ཏ་ལར་སྐྱེའོ་སྐལ་ལྡན་བུ། །བདེ་སྨོན་ཡི་དམ་བྱས་ན་དེ་ཡིས་ཆོག ༡༧ །བདེ་བ་ཅན་དུ་སྐྱེའོ་སྐལ་ལྡན་བུ། །གཞན་ཡང་དམན་པའི་དགེ་སྦྱོར་གཅིག་ཀྱང་མེད། །གང་དང་གང་ཞིག་གྲུབ་ན་དེ་ཡིས་ཆོག ༡༨ །དགེ་བ་སྒྲུབ་འདོད་དོན་གཉེར་མེད་པ་ལས། །ཆོས་ཀྱི་བརྡུགས་པ་མིན་ནོ་སྐལ་ལྡན་བུ། །འདི་ལས་གང་ཞིག་མོས་པ་ཆོས་སྐལ་དེའི། ཁྱོད་རང་གཏན་གྱི་འདུན་མ་འགྲུབ་པར་ཤོག །ག་གཱས་སོ། ། སྙིང་གཏམ་ཚིག་གསུམ་པ།༈ སྙིང་གཏམ་ཚིག་གསུམ་པ་ཞེས་བྱ་བ་བཞུགས་སོཿ ཀྱཻཿ ལེགས་པར་གསོན་ཅིག་སྐལ་ལྡན་རིགས་ཀྱི་བུཿ སྔོན་ལས་འཕྲལ་རྐྱེན་བཟང་པོའི་རྒྱུ་འབྲས་ཀྱིཿ དལ་འབྱོར་མི་ལུས་རིན་ཆེན་ཐོབ་པ་འདིཿ སྟོང་ལོག་ཨི་བྱེད་གང་ཟག་ཁྱོད་ལ་རགཿ ༡ ཡར་འགྲོ་མར་འགྲོས་ས་མཚམས་ད་རིས་ཡིནཿ འདུན་མ་གཏན་ལེགས་གཏན་ཉེས་སོ་མཚམས་ཏེཿ ད་རིས་འདི་ལ་ཆོས་ཞིག་མ་བྱས་ནཿ རིན་ཆེན་གླིང་ནས་སྟོང་ལོག་བྱེད་པ་འདྲཿ ༢ གཏན་བདེ་རྫོགས་པའི་སངས་རྒྱས་གོ་འཕང་ཞིགཿ འགྲུབ་ན་དེ་ལས་མདོ་ཆེན་གང་ཟག་མེདཿ མ་འགྲུབ་རང་གར་འདུག་ན་མདོ་ཤོར་ཡིནཿ ཐར་མེད་ལས་ངན་སོགས་ན་ཕུང་རྒན་ཟེརཿ ༣ དེ་ཡང་ཆོས་ལ་ཕྱི་བཤོལ་མི་འཚལ་ཏེཿ འཆི་བདག་བདུད་པོ་ནམ་འོང་ཆ་མེད་ཡིནཿ འཆི་ཁར་འགྱོད་པ་སྐྱེས་པ་ཕྱི་བ་ཡིནཿ ལག་ཅིག་རྩོད་ཐེབས་ཡོད་པ་ད་རེས་ཡིནཿ ༤ བསླབ་པ་གསུམ་གྱི་གཞི་མ་ཚུལ་ཁྲིམས་ཡིནཿ ཡུལ་དང་གྲོགས་ངན་མ་སྤངས་བསྲུང་ཐབས་དཀའཿ འཁོར་བའི་སྡུག་བསྔལ་མཐོང་ནས་ཡིད་དབྱུང་སྟེཿ ཐར་འདོད་ངེས་འབྱུང་མེད་ན་ལེགས་སྨོན་ཙམཿ ༥ གཞན་གྱི་གཡེམ་ལ་རྒྱུག་པའི་བྲོད་ཆུང་དེཿ དང་པོ་ཞུ་སྔ་ཐ་མ་ཉམས་སླ་བསཿ རང་དམ་རྡོ་ལ་རི་མོ་བྲིས་པ་ལྟརཿ སུ་ཡི་ཁ་ལ་མི་ཉན་དབེན་པ་བརྟེནཿ ༦ དེ་ལྟར་བྱས་ན་བསམ་གཏན་རང་འཁོར་ཡིནཿ སྟོང་ཉིད་སྙིང་རྗེ་ཟུང་འཇུག་བྱང་ཆུབ་སེམསཿ དཀའ་ཚེགས་མེད་པར་རྒྱུད་ལ་ངེས་པར་འཁྲུངསཿ ས་ལམ་ཡོན་ཏན་ཡར་ངོས་ཟླ་བཞིན་འཕེལཿ ༧ དབེན་པར་མི་ཚུགས་གཞན་དོན་སྒྲུབ་པོ་ལོསཿ ཐ་མ་རང་དོན་འཆོར་བའི་རྒྱུ་རུ་འགྱུརཿ གྲོང་ཡུལ་ཀུན་ཏུ་ཁྱི་བཞིན་ཉུལ་བ་དེའིཿ དམ་ཆོས་རྣམ་དག་འགྲུབ་པ་ཉིན་སྐར་ཙམཿ ༨ མི་ཁོམ་མི་འགྲུབ་སྙམ་པའི་ངང་རིང་བོཿ འཆི་བདག་བློ་བུར་བྱུང་ན་ཅི་ཞིག་བྱཿ རང་གིས་རང་ལ་རང་དྲིན་ཆེ་བར་མཛོདཿ རྒྱུ་རྫས་ལོངས་སྤྱོད་རྩ་ཁའི་ཟིལ་བ་འདྲཿ ༩ བསོགས་བཀྲུན་སྤེལ་བའི་ཤ་ཐང་《ཆང་དཔྱད།》ཉོ་བ་འདིཿ འདི་ཕྱི་གཉིས་བརླག་ལན་ཆགས་ཁུར་བོས་ནོནཿ དེ་ལ་བསམ་ནས་ཡུལ་ངན་མགོ་མ་འཁོརཿ འདི་སྣང་བྱ་བ་རི་མོའི་མར་མེ་འདྲཿ ༡༠ ལོངས་སྤྱོད་ཉམས་ལ་ཕན་པ་ཀྱང་སྲིད་དམཿ ཟིན་དུས་མེད་པའི་ཚུལ་ལ་ལེགས་བསམ་ནསཿ ཕྱི་བཤོལ་འཁྲུལ་བ་མ་སྤེལ་རིགས་ཀྱི་བུཿ ཕ་མ་ཉེ་འབྲེལ་རྨི་ལམ་སྐྱེ་བུ་འདྲཿ ༡༡ ཉེ་རིང་ཆགས་སྡང་མ་བྱེད་རིགས་ཀྱི་བུཿ བསྟོད་བསྐུར་སྙན་གྲགས་སྒྲ་ཡི་བརྙན་དང་འདྲཿ དགའ་སྡུག་རེ་དོགས་མ་བྱེད་རིགས་ཀྱི་བུཿ རང་གི་ལུས་འདི་ལ་ཁའི་ཐོ་ཡོར་འདྲཿ ༡༢ རྟག་འཛིན་གཅེས་སྤྲས་མ་ཆེ་རིགས་ཀྱི་བུཿ འདོད་ཡོན་ཐམས་ཅད་ནམ་མཁའི་འཇའ་ཚོན་འདྲཿ སྡུག་སེམས་རྗེས་དེད་མ་བྱེད་རིགས་ཀྱི་བུཿ རྣམ་རྟོག་སེམས་འདི་ཤིང་མགོའི་བྱ་དང་འདྲཿ ༡༣ ནམ་འཕུར་ཆ་མེད་ཡིན་ནོ་རིགས་ཀྱི་བུཿ བརྟགས་ཤིང་དཔྱད་ན་ཕྲེང་བའི་མུ་དང་འདྲཿ གཅིག་ཏུ་གྲུབ་པ་མེད་དོ་རིགས་ཀྱི་བུཿ དུ་མའི་ངོ་བོ་འདི་ཞེས་ངོས་གཟུང་མེདཿ ༡༤ དངོས་པོར་ཞེན་པ་ཡིན་ནོ་རིགས་ཀྱི་བུཿ ཉོན་མོངས་དུག་ལྔ་སྐྱེ་བའི་གཞི་མེད་ཀྱིཿ ངོ་བོ་དེ་ལ་ལྟོས་ཤིག་རིགས་ཀྱི་བུཿ འཛིན་པས་འཁོར་བར་རྟག་ཏུ་བཅིངས་ན་ཡངཿ ༡༥ དོན་ལ་འཆིང་ཞེན་མེད་དོ་རིགས་ཀྱི་བུཿ ལྟ་བ་ནམ་མཁའ་ལྟ་བུར་རྒྱ་ཆེ་ལཿ དམིགས་བསམ་བརྗོད་པ་མེད་དོ་རིགས་ཀྱི་བུཿ བསྒོམ་པ་ཉི་ཟླ་ལྟ་བུར་འོད་གསལ་ཞིངཿ ༡༦ འཆར་ནུབ་གསལ་སྒྲིབ་མེད་དོ་རིགས་ཀྱི་བུཿ སྤྱོད་པ་ཕ་རོལ་མི་དང་བསྟུན་པ་ཡིསཿ བླང་དོར་ཚུལ་བཞིན་གྱིས་ཤིག་རིགས་ཀྱི་བུཿ འོན་ཀྱང་རང་བཞིན་གཤིས་ཀྱི་བབ་བསྟུན་ནཿ ༡༧ སྤྱོད་དང་མི་སྤྱོད་མེད་དོ་རིགས་ཀྱི་བུཿ འབྲས་བུར་སྟོན་ཐོག་བཟང་པོ་སྨིན་པ་བཞིནཿ རང་བཞིན་དབུལ་བ་སེལ་ལོ་རིགས་ཀྱི་བུཿ དེ་ལྟར་ཁ་གཡང་བོས་པའི་བྱིན་རླབས་ཀྱིསཿ ༡༨ བཀའ་བཞིན་ཁྱོད་ལ་ཕན་པའི་རྒྱུ་གྱུར་ནསཿ བློ་ངན་དུག་སྡོང་རྩ་བ་དྲུངས་ཕྱུང་སྟེཿ རྟག་ཏུ་ཆོས་ལ་གཞོལ་བའི་བཀྲ་ཤིས་ཤོགཿ ཅེས་པ་འདི་ཡང་རང་ལ་མེད་པའི་ཁ་བཤད་ཆུ་ཡི་སྦུ་བ་དོ་གལ་ཆེན་པོའི་རླུང་གིས་དཀྲུག་པ་ལས་ཆགས་ཤིངཿ རྒྱན་དང་སྡེབ་སྦྱོར་སྙན་ཚིག་མེད་པའི་གསོགས་ཤིང་གསོབ་པཿ ཚིག་བཅད་བཅོ་བརྒྱད་དང་རྐང་བའི་དམན་པའི་བཅུ་དགུའི་རྟེན་འབྲེལ་ལ་བཟང་སྙམ་སྟེཿ བསོད་ནམས་ཆོས་གྲགས་ཞེས་ལེགས་སྦྱར་གྱི་སྐད་དུ་པུནྱེ་དྷརྨ་ཀིརྟི་འདི་རྗེས་འཇུག་ལ་ཤིན་ཏུ་ཞལ་དྲོ་བའི་བླ་དག་ཙམ་མིན་པའི་དོན་ཐོབ་མཐུན་པའི་ལྷག་བསམ་གྱིས་ག་ག་ཨ་བྷྱེས་བསྐུལ་མ་འདེབས་པའི་ཡི་གེའི་འདུ་བྱེད་དགེ་སློང་རྡོ་རྗེ་འཛིན་པ་ཆེན་པོ་ཝ་གི་ཤྭ་རི་ནས་བགྱིས་པས་རང་བཞན་གྱི་དོན་གཉིས་ལྷུན་གྱིས་གྲུབ་པའི་རྒྱུ་གྱུར་ཅིག །སརྦ་མངྒ་ལཾ། ། ༈ འོ་ཁྱོད་ལ་ཞལ་གདམས་ཤིག་དགོས་ན། རང་གི་ཚེ་ལ་ངས་པ་མེད་པར་འཆི་བ་ལས་མ་འདས་པའི་ངང་ཚུལ་ལ་བསམ་ཏེ་མི་རྟག་པ་བསྒོམ་ཞིང་ངེས་པར་རྒྱུད་ལ་སྐྱེས་པ་ཞིག་མཛོད། དེ་ལྟར་འཆི་བའི་འོག་ཏུ་འཁོར་བ་མཐོ་དམན་གང་དུ་སྐྱེས་ཀྱང་སྡུག་བསྔལ་གྱི་རང་བཞིན་ལས་མ་འདས་པས། འཁོར་བའི་སྡུག་བསྔལ་སྤྱི་དང་རིགས་དྲུག་སོ་སོའི་སྡུག་བསྔལ་ཡོད་ཚུལ་རྣམས་གོ་ལོ་ཐོས་ལོ་ཙམ་དུ་མ་སོང་བར་ཐར་འདོད་ཀྱི་བློའམ་ངེས་འབྱུང་ཡང་དག་པ་རྒྱུད་ལ་མ་སྐྱེས་བར་དུ་བསྒོམ། དེའི་རྒྱུ་སྡིག་པ་ཡིན་པའི་ཕྱིར་ན་སྤོང་ཅི་ནུས་སུ་བྱེད། གཏན་བདེ་འགྱུར་བ་མེད་པ་སངས་རྒྱས་ཀྱི་གོ་འཕང་ཡིན་ལ། དེ་ཐོབ་བྱེད་ཟག་བཅས་དང་ཟག་མེདཀྱི་དགེ་རྩ་ཅི་འགྲུབ་ལེ་ལོ་དང་སྙོམས་ལས་མེད་པར་བྱེད། ཁྱད་པར་དུ་ཚུལ་ཁྲིམས་ཀྱི་བསླབ་པས་གཞི་བཟུང༌། ཏེང་ངེ་འཛིན་གྱི་བསླབ་པས་ངང་བསྐྱང༌། དེ་དང་ལྡན་པའི་ངང་ནས་བསྒོམ་ལ་འཇུག་པར་བྱ་སྟེ། ལྟ་བས་ང་བདག་དང་ཡུལ་སེམས་དུ་སྣང་བ་ཐམས་ཅདསྟོང་ཉིད་དུ་གཏན་ལ་ཕབ། བསྒོམ་པས་དེས་སྟོང་ཉིད་ཡིན་པའི་ངེས་ཤེས་ཀྱི་ངང་དང་མ་བྲལ་བར་རྒྱུན་བསྲིང་ནས་སྐྱོང༌། སྤྱོད་པས་སྟོང་ཉིད་རྟོགས་པའི་ཆ་རྐྱེན་དུ་འགྱུར་བའི་ཕྱིར་ན། རྟག་ཏུ་ཆོས་སྤྱོད་ལ་དུས་འདའ་བར་བྱས་ཏེ་བརྩོན་འགྲུས་བརྩམས། ཐམས་ཅད་ལའང་སྦྱོར་བ་སེམས་བསྐྱེད། དངོས་གཞི་དམིགསམེད། མཇུག་བསྔོ་བ་དམ་པས་ཟིན་པར་བྱའོ། །ཁྱད་པར་དུ་རང་གི་དབང་དང་ཆོས་དྲིན་ཆེན་པོ་དང་ཟབ་མོ་གང་ལ་ཆོད་པའི་བླ་མ་དེ་ཉིད་བཟང་ངན་ཇི་ལྟར་སྣང་ཡང༌། དུས་གསུམ་སངས་རྒྱས་ཐམས་ཅད་ཀྱི་ཐུགས་རྗེ་དང་བྱིན་རླབས་དེའི་རྒྱུད་ལས་འབྱུང་བའི་ཕྱིར་ན། ཆོས་དྲིན་མ་ཆོད་པའི་བླ་མ་བཟང་འདམ་བྱས་ཀྱང་འབྲེལ་བ་མེད་པས་དེ་ལ་བརྟེན་ནས་བྱིན་བརླབས་འཇུག་མི་སྲིད་དེ། དེས་ཕྱིར་ན་དྲིན་ཆེན་བླ་མ་གང་ཡིན་དེ་སྤྱི་བོའི་གཙུག་ཏུ་བསྒོམ་ལ་དབང་བཞི་བླང་ཞིང་ཐུགས་ཡིད་བསྲེ་བ་ནི། ལྟ་སྒོམ་ཐམས་ཅད་ལམ་དུ་འགྲོ་བ་དང༌། ཆོས་ལ་བར་ཆད་མེད་པ། བདུད་ཀྱིས་གླགས་མི་རྙེད་པ། ནད་གདོན་དང་རྐྱེན་ངན་སེལ་བ། བྱིན་རླབས་དངོས་གྲུབ་འབྱུང་བ། དབང་བཞི་ཡོངས་སུ་རྫོགས་ཤིང་དམ་ཚིག་ཉམས་ཆགས་སྦྱོང་བར་བྱེད་པ། གོལ་ཤོར་ནོར་གསུམ་གྱི་འཕྲང་དང་བྲལ་བ་ཡིན་པས་ན་ཐུགས་ཡིད་བསྲེས་ལ་ཅི་གནས་སུ་ཞོག་དང༌། འཆི་ཁར་ཡང་བླ་མའི་སྣང་བ་ཤར་ནས་ཐུགས་ཡིད་བསྲེས་པས་བསྲེ་འཕོ་ཟུང་འཇུག་ཏུ་སངས་རྒྱས་པའི་གནད་ཟབ་མོ་བསྐྱེད་རིམ་དང་རྫོགས་ཆེན་ཀུན་གྱི་གནད་གཅིག་ཏུ་དྲིལ་བ་འབྲས་བུ་སངས་རྒྱས་སྐུ་གསུམ་གྱི་གོ་འཕང་མྱུར་དུ་ཐོབ་པའི་གདམས་པ་ཟབ་མོ་ཡིན་ནོ། །སྟོང་སྤྲུལ་ཕྱག་རྒྱའི་ངོ་སྐལ་དུ་ག་གཱས་སོ། ། ཟབ་དོན་གཅོད་ཀྱི་གནད་བསྡུས་བརྒྱུད་དྲུག་གཅིག་འདུས།༈ ཡེ་ཤེས་སྒྱུ་འཕྲུལ་དྲྭ་བ་ལསཿ ཟབ་དོན་གཅོད་ཀྱི་གནད་བསྡུས་བརྒྱུད་དྲུག་གཅིག་འདུས་བཞུགས་སོཿ ན་མོ་གུ་རུ་པདྨ་ཀཱ་རཱ་ཡེཿ བདུད་གཅོད་ཟབ་མོ་ཉམས་ལེན་པསཿ རྒྱུན་གྱི་རྣལ་འབྱོར་སྤྲོས་པ་མེདཿ བརྒྱུད་ཚུལ་ཀུན་གྱི་ལྡེའུ་མིག་དུཿ མན་ངག་སྒོ་བརྒྱ་འབྱེད་འདི་ལོངསཿ ས་མ་ཡཱཿ དེ་ལ་ཐོག་མར་བདག་དང་ཡུལ་གྱི་འཆིང་བ་ཐད་ཀར་དུ་གཅོད་པའི་ཕྱིར་བྱུང་གནས་འགྲོ་གསུམ་གཟུགས་དབྱིབས་ཁ་དོག་སོགས་ཀྱིས་གང་ཟག་གི་བདག་གམ་སེམས་ལ་དཔྱད་པསཿ བདག་སྟོང་ཉིད་དུ་གོཿ གཅིག་དང་དུ་མ་དངཿ སྒྱུ་མའི་དཔེ་བཅུ་སོགས་ཀྱིས་དཔྱད་པསཿ ཡུལ་སྟོང་ཉིད་དུ་གོ་ཡངཿ སྟོང་པ་ཕན་མེད་གནོད་མེད་དུ་གྱུར་ནསཿ སྙེམས་ཐག་མ་ཆོད་པའི་གང་ཟག་གིཿ གཉན་སར་སོང་ནས་རྐྱེན་དང་བསྲེས་པས་བདུད་བཞི་གཅིག་ཆར་དུ་གཅོད་པའི་ཐབས་མཁས་ཡིན་པསཿ དེ་ལ་སྔ་ནོནཿ བར་ནོནཿ ཕྱི་ནོན་གསུམ་གསུམ་གྱིས་བསྡུས་པའི་ཐོག་མར་སྔ་ནོན་ནིཿ རིམ་པ་གསུམ་དངཿ ཡང་ན་ཐམས་ཅད་ལ་ཁྱབ་པའི་གཅིག་གིས་ཀྱང་ཆོགཿ དང་པོ་རང་གི་གནས་ཁང་ནས་སྔ་ནོན་འཕེན་པ་ནིཿ རང་ཉིད་ཁྲོས་མ་ནག་མོ་ཕྱག་གཡས་གྲི་གུག་གཡོན་ཐོད་ཁྲག་འཛིན་པ་ཞབས་གཉིས་གར་སྟབས་ཀྱིས་པད་ཉི་རོའི་གདན་གྱི་སྟེང་དུ་བརྫིས་པཿ རྣ་ལྟག་གཡས་སུ་ཕག་ཞལ་ངུར་བཿ ཞལ་གཅིག་ཕྱག་གཉིས་པར་གསལ་བའི་ཐུགས་ཀ་ནས་མཁའ་འགྲོ་སྡེ་ལྔ་དཀར་སེར་དམར་ལྗང་མཐིང་ནག་གཡས་པས་མི་ལྤགས་ཀྱི་གཡང་གཞི་སྡེབ་པས་ཁམས་གསུམ་དབང་དུ་སྡུད་པཿ གཡོན་མི་རྐང་གི་གླང་བུ་འབུད་པས་སྲིད་གསུམ་ཟིལ་གྱིས་གནོན་པཿ ཤར་ལྷོ་ནུབ་བྱང་ཕྱོགས་མཚམས་སྟེང་འོག་ཏུ་འཕྲོས་པསཿ ཉོན་མོངས་ལྔའི་བསྐྱེད་པའི་ལྷ་འདྲེ་ཐམས་ཅད་དབང་དུ་བསྡུས་ཤིང་བཀུག་ནས་གཉན་ས་དེར་མི་ནག་པོ་གཅིག་ཏུ་བསྒྱུར་ནས་སྲུང་བའི་འཁོར་ལོ་རིམ་པ་དྲུག་གི་ནང་དུ་ཚུད་པར་བསམཿ གཉན་མིག་རིག་ས་དེ་ནས་ཡང་དེ་ལྟར་ཟིལ་ནོན་འཕེན་པ་ནི་སྔ་ནོན་བར་བཿ གཉན་སར་སླེབ་ནས་ཡང་དེ་ལྟར་ཟིལ་ནོན་འཕེན་པ་ནི་སྔ་ནོན་ཕྱི་མའོཿ ཡང་ན་སྔ་ནོན་གསུམ་པོ་ལ་རང་ཁྲོས་མའི་ཐུགས་ཀ་ནས་འོད་ཟེར་སྣང་སྲིད་ཐམས་ཅད་ཁྱབ་པར་འཕྲོས་པསཿ འོད་ཇེ་ཆུང་དུ་འདུས་པའི་ནང་དུ་ལྷ་འདྲེ་ཐམས་ཅད་བསྡུས་ནས་གཉན་ས་དེར་གནས་པའི་མཐར་སྲུང་འཁོར་བསྒོམ་པ་སྤྱིའི་ཟིལ་ནོན་གྱིས་འཐུསཿ བར་ནོན་དང་པོ་ནིཿ བྲོ་ར་ཕུར་ཁྱེར་དམིགས་པ་འདོན་ཆ་བཞིནཿ བར་ནོན་བར་བ་ནིཿ བདག་ཟིལ་གྱིས་ནོན་ཕྱིར་བདག་འཛིན་གྱི་སྙེམས་ཐག་བཅད་དེཿ བདག་མེད་དང་ཁྲོས་མར་བསྒོམཿ གནས་ཟིལ་གྱིས་ནོན་ཕྱིར་ལུས་པོ་ལུང་པ་གང་བར་བསམ་པའི་འོག་ཏུ་གནས་དེའི་ལྷ་འདྲེ་མི་ནག་ཏུ་གསལ་བ་དེ་མནན་ནས་སྐད་ངན་ཙི་རི་རི་འདོན་པར་བསམཿ ལྷ་འདྲེ་ཟིལ་གྱིས་ནོན་ཕྱིར་སྣང་སྲིད་ཀྱི་ལྷ་འདྲེ་ཐམས་ཅད་འོད་ཟེར་སྔར་ལྟར་སྤྲོས་ནས་གདན་འོག་གི་མི་ནག་ལ་ཡང་ཡང་ཐིམ་པར་བསམཿ བར་ནོན་ཐ་མ་ནིཿ བར་བར་དུ་ལུས་སྦྱིན་བྱས་ནས་མགྲོན་གྱི་ལྷ་འདྲེ་ཐམས་ཅད་སྔར་ལྟར་བསྟིམས་པ་དངཿ ཅི་ནས་ཀྱང་སློང་མ་ཐུབ་ན་རི་བོ་ཁམ་ཆོད་ལ་སོགས་པ་མཐར་གཏད་ཀྱི་དམིགས་པ་བྱ་བའོཿ ཕྱི་ནོན་དང་པོ་ནིཿ ཤ་ཁྲག་མགྲོན་དུ་འགྱེད་ནས་གནས་དེའི་ལྷ་འདྲེ་དྲེགས་ཤོས་རྣམས་ལ་ངའི་གནས་འདིར་སྔར་མེད་ཀྱི་ལྷ་འདྲེ་ནང་དུ་མ་བཏངཿ འདིར་གནས་ཀྱི་ལྷ་འདྲེ་ཕྱིར་མ་བཏངཿ ཁྱེད་རྣམས་ཀྱིས་ཕྱག་མཆོད་ཀྱི་རྟེན་འདིའི་གྱིས་ཤིགཿ ཅེས་ཨོཾ་ཨཱཿཧཱུྃ་བྲིས་ལ་རབ་གནས་བྱས་ཏེ་བཞག་པའོཿ ཕྱི་ནོན་བར་བ་ནིཿ ཁྲོཾ་གཅིག་བྲིས་པ་བྱ་ཁྱུང་མེ་འབར་བར་བསྒོམ་ལ་ཤ་ཁྲག་གི་ཕོག་གཏད་ནས་ངའི་རྗེས་སུ་ལྷ་འདྲེ་མ་མངག་ཞེས་ཕྲིན་ལས་བཅོལ་ལ་ཕྱི་བལྟས་མི་བྱེད་པར་འགྲོའོཿ ཕྱི་ནོན་ཐ་མ་ནིཿ རང་གི་རྣམ་ཤེས་ཕཊ་ཀྱིས་དབྱིངས་ཀུན་ཏུ་བཟང་མོའི་མཁའ་ཀློང་དུ་བསྲེས་ཏེ་དབྱིངས་ལས་འོད་ཟེར་ཁ་དོག་ལྔ་ལྡན་ཤིན་ཏུ་ཕྲ་བའི་ནང་དུ་རིག་པ་འོད་ཀྱི་ཐིག་ལེ་འདྲིལ་ནས་རང་ཁྱིམ་དུ་སོང་བར་བསམ་པའམཿ གཉན་ས་གཞན་དུ་འགྲོ་ན་དེ་ནས་སྔ་ནོན་འཕེནཿ ལར་གཉན་སར་འགྲོ་དུས་སྦྲུལ་ནག་འཁྱིལ་འགྲོས་ཀྱིས་ལྷ་འདྲེ་ཐམས་ཅད་དེད་དེ་འགྲོ་བར་བསམ་པ་དངཿ མཁའ་འགྲོའི་གར་འགྲོས་གྱིས་ལྷ་འདྲེ་རང་ལུས་ལ་བསྟིམས་ཏེ་འགྲོ་བར་བསམ་པ་དངཿ ལྟ་བའི་གདེང་འགྲོས་ཀྱིས་འཁོར་འདས་རང་སྣང་དུ་ཤེས་པའི་ངང་ནས་འགྲོ་བར་བསམ་པ་སོགས་འགྲོ་ལུགས་ལྔ་སོགས་གང་རུང་གིས་འགྲོཿ དེའི་སློང་ཚད་ལ་དགའ་སྡུག་རེ་དོགས་སྐྲག་དངངས་སོགས་འབྱུངཿ ཚར་ཚད་ལ་དབང་དུ་འདུས་པཿ ཟིལ་གྱིས་གནོན་པཿ བྲན་དུ་ཁོལ་བའི་རྟགས་སོགས་ཡོད་ཀྱང་ཀུན་ལ་དགའ་སྡུག་རེ་དོགས་མི་བྱ་བརཿ ལྟ་བ་སྟོང་ཉིད་ཀྱི་ངང་མདངས་དང་མ་བྲལ་བར་བྱའོཿ ཐུན་བཞིར་ཞི་གཅོད་དཀར་འགྱེད་དང་ཁྲ་འགྱེདཿ དྲག་གཅོད་དམར་འགྱེད་དང་ནག་འགྱེད་སོགས་བྱའོཿ ས་མ་ཡཱཿ རྒྱ་རྒྱ་རྒྱཿ ཅེས་པ་འདི་ཡང་གནད་དོན་གོ་སླ་བར་དྲིལ་དེ་ག་གཱ་བས་སོ། ། རྩ་རླུང་གནད་བསྡུས།༈ རྩ་རླུང་གནད་བསྡུས་ནིཿ བསྡུ་ན་རྩ་གསུམ་འཁོར་ལྔ་གསལཿ གཡས་གཡོན་རླུང་བཅུད་དབུ་མར་བསྟིམསཿ སྙིགས་མའི་རླུང་བསྡུས་ཕྱི་རུ་འཕངཿ དབུ་མའི་རླུང་བཅུད་རྩ་ཕྲན་གཞིལཿ དགྲམ་ལ་འཁྲུལ་འཁོར་བྱས་པའི་མཐརཿ རོ་རྐྱང་རྩ་ཕྲན་དང་བཅས་པའིཿ མདུད་པ་རླུང་གིས་བཤིགས་པར་བསམཿ དཔའ་བོ་ཡབ་ཡུམ་འཁྲིལ་སྦྱོར་རོལཿ རླུང་གིས་ལུས་གནས་རྒྱལ་བའི་ཚོགསཿ མཆོད་པ་འབུལ་བས་ཚོགས་གཉིས་རྫོགསཿ ལུས་ཀྱི་བྱེད་བཅིང་ཆོས་བདུན་གཡོ་མེད་ལཿ རླུང་གི་བྱེད་བཅིང་སྟེང་འོག་ཁ་སྦྱོར་བཿ སེམས་ཀྱི་བྱེད་བཅིང་འོད་གསལ་བཟུད་པ་ཡིས༵ཿ ཉམས༵་དང་མཆོག༵་གི༵་ཡང་དག་འབྱུངཿ འདི་ལས་གཞན་པའི་ཏིང༵་འཛིན༵་འཕྲུལ༵ཿ འཇིག་རྟེན་ཀུན་ན་ཡོད་མ་ཡིནཿ སངས་རྒྱས་རྣམས་ཀྱི་ཉེ་ལམ་མཆོགཿ གཉུག་མའི་རླུང་ལ་གནད་དུ་བསྟུནཿ ཡེ་ཤེས་གསང་ལམ་ལས་ཁོལ་བྱུང་ངོ༌། ། གཏུམ་མོའི་ལག་ལེན།༈ གཏུམ་མོའི་ལག་ལེན་ནི། ཟླ་བ་གཅིག་གི་དབང་དུ་བྱས་ན། ཞག་བཅུ་ལ་སྔོན་འགྲོ་དང་ཞག་ལྔ་ལ་དབུ་མ་ཆེ་བསྐྱེད་ཆུང་བསྐྱེད། ཞག་ལྔ་ལ་རླུང་དང་ལོག་གནོན་གྱི་འབེབས། ཞག་ལྔ་ལ་གཏུམ་མོའི་མེ་དམིགས་དང་ཞི་བའི་འབེབས། ཞག་ལྔ་ལ་དཔྱིད་ཐིག་དང་ཁྲོ་བོའི་འབེབས་སོ། །ཡིད་ཀྱི་རིག་མ་བསྒོམ་པས་ལམ་སྦྱང་ན་སྔོན་འགྲོ་ཞག་ལྔ་ལས་མི་བྱེད་དོ། ། ༈ དེའི་དམིགས་པ་ནི། རང་ཉིད་ཀུན་བཟང་ཆེ་མཆོག་གང་རུང་དུ་གསལ་ལ་ཡེ་ཤེས་སྒྱུ་འཕྲུལ་རོལ་པའི་ཞི་ཁྲོ་དམ་པ་རིགས་བརྒྱའི་རང་རྩལ་ཉི་མ་ལ་འོད་བཞིན་རྫོགས་པར་བསམ་ལ། ལུས་དབུས་གཡས་སུ་རོ་མ་དཀར། གཡོན་རྐྱང་མ་དམར། དབུས་དབུ་མ་མཐིང་སྐྱ་གསལ། མདུན་དུ་ཕྱོགས་བཅུའི་རྒྱལ་བའི་བྱིན་རླབས་འདུས་པ་དང༌། འབྱུང་བཞིའི་བཅུད་ཀྱི་རླུང་ཁ་དོག་ལྔ་ལྡན་སྤོས་རིང་གི་དུད་པ་ལྟར་སྣ་ནས་དྲངས་ཏེ་རོ་རྐྱང་བརྒྱུད་ནས་དྭངས་མ་དབུ་མར་བསྟིམ། གཞིལ་བས་དྭངས་སྙིགས་ཕྱེས། སྙིགས་མའི་དྭངས་བཅུད་ལྟེ་འོག་ཏུ་མནན། སྙིགས་མ་ཕྱིར་འཕང་བ་སྟེ། སྟེང་རླུང་མནན། འོག་རླུང་བསྡམས། བར་རླུང་བསྐྱིལ་བ་མཉམ་བཞག་གི་རླུང་ངོ། །རྒྱུན་དུ་འཇམ་རླུང་བཟུང་བ་རྗེས་ཐོབ་ཀྱི་རླུང་ངོ། །དེ་ནས་དབུ་མའི་ཡར་མར་གྱི་སྣ་ལས་ཨ་ཤད་དམར་པོ་དང་ཧཾ་དཀར་པོ་གསལ་ལ། ལྟེ་འོག་ཏུ་ཡཾ་གསལ། སྣ་ནས་རླུང་དྲངས་འོག་རླུང་བསྐུམ་པས་ཡཾ་ལས་རླུང་གཡོས། ཨ་ལས་མེ་འབར་བས་སྤྱི་བོའི་ཧཾ་ཞུ་ནས་ཐིག་ལེ་《ཐིག་དཔྱད།》ཕྲན་དུ་བབས་པས་མེ་གསོས་བྱས་ཏེ་ཆེར་འབར་འཛག་བྱས་པས་སྙིང་ཀའི་རྩ་འདབ་ན་ཞི་བ་བཞི་བཅུ་རྩ་ལྔ།《གཉིས་དཔྱད།》སྤྱི་བོའི་རྩ་འདབ་ན་ཁྲག་འཐུང་ཁྲོ་བོ་རོལ་བ་ལ་མཆོད་པ་འབུལ་བས་ཐུགས་བདེ་སྟོང་གི་རོས་ཚིམ་ནས་བདག་གི་མ་དག་པའི་ལུས་ངག་ཡིད་གསུམ་གྱི་སྡིག་སྒྲིབ་བག་ཆགས་དང་བཅས་པ་ཐམས་ཅད་དག་ནས་འཁོར་ལོ་ལྔ་ལ་བབས་པས། དགའ་བ། མཆོག་དགའ། ཁྱད་དགའ། ལྷན་དགའ། དགའ་བྲལ་རྣམས་ཉམས་སུ་མྱོང་བས། དབང་ལྔ་ཐོབ། ཉོན་མོངས་ལྔ་གནས་སུ་དག ཡེ་ཤེས་ལྔ་མངོན་དུ་གྱུར་བར་བསམ་པ་དང༌། ཐིག་ལེ་ལྡོག་ནས་གཙུག་ཏོར་ནས་འཁོར་ལོ་ལྔ་ལ་དགྲམ་ནས་སྤྲོས་བྲལ་གྱི་ཡེ་ཤེས་ལ་མཉམ་པར་བཞག་གོ ། ཐིག་ལེའི་དངོས་གཞི་བསྡུས་པ་བདེ་བའི་འཁོར་ལོ།༈ ཐིག་ལེའི་དངོས་གཞི་བསྡུས་པ་བདེ་བའི་འཁོར་ལོ་བཞུགས༔ སྔོན་འགྲོ་མཐའ་དག་རྫོགས་པའི་རྗེས༔ དངོས་གཞི་བསྡུ་ན་དབབ་སྐྱིལ་བཟུང་༔ ཐིག་ལེ་དྲངས་དགྲམ་ལ་བཟླ་ལྔ༔ དང་པོ་ནི༔ རྡོ་རྗེ་བདེ་བའི་རྩ་ལ་གཏད་དེ་བསྐྱོད་ཅིང་༔ སོར་མོ་བསྐུམ༔ སྟེང་རླུང་མནན༔ འོག་གི་རླུང་བསྡོམ༔ རིག་པ་ཁམས་དཀར་ལས་ཐིག་ལེ་གནས་ལྔར་བབས་པར་བསམ༔ ངག་གི་ཨཱཿབརྗོད་དོ༔ གཉིས་པ༔ དཀྱིལ་ན་ཡུམ་གྱི་དྭངས་མ་དང་འདྲེས་ནས་བདེ་སྟོང་ཤར་དུས་རིག་པ་གྱེན་དུ་གཏད་དེ་ཐིག་ལེའི་གཞི་མ་དྲན་པར་བྱས་ནས༔ མི་སྲུབ་པར་འོག་གི་རླུང་བསྡོམས་ཤིང་སོར་མོ་བསྐུམ་ལ་བཟུང་༔ གསུམ་པ་ནི༔ དེ་ནས་ཐིག་ལེ་བ་ཐག་འཛིང་བའི་རྒྱུན་ལྟ་བུ་དེ་མེ་དང་རླུང་གིས་ཡར་དྲངས་ནས་སྤྱི་བོས་སྒྲོན་མ་ལ་ཐིམ་པར་བསམ་ནས་རླུང་གྱེན་དུ་ལན་གསུམ་བརྫང་བའི་དུས་རྒྱུ་མ་རྒལ་བ་ལ་བཅར༔ གླིང་བཞི་འུབ་བསྡུས༔ ལྕེ་ཡ་རྐན་ལ་སྦྱོར༔ ཉི་ཟླ་དང་སེམས་སྤྱི་བོར་གཏད་དེ་སྟོང་འདྲེན་ཅི་མང་བྱའོ༔ བཞི་བ་ནི་དེ་ཉིད་དགྲམ་པ་ནི་ལུས་པོ་ལྕིད་ཕབས་ཏེ་སྐྱིལ་ཀྲུང་ལག་གཉིས་སོར་མོ་ས་ལ་གཏད་དེ་སྤྱི་བོ་ནས་འཁོར་ལོ་ཐམས་ཅད་དུ་ཁྱབ་པའི་མོས་པས་བདེ་ཆེན་གྱི་ཡེ་ཤེས་ལ་མཉམ་པར་བཞག༔ ཡང་ན་འཁྲུལ་འཁོར་གྱིས་ཁྲེམ་མོ༔ ལྔ་བ་ནི༔ དེའི་ངང་གི་ཉམས་སྐྱེས་དེ་ངོས་བཟུང་བས་བདེ་བའི་ངོ་བོ་དགའ་བཞིའི་ཉམས་ཞེན་དང་༔ འགྱུར་《འགྱུ་》བའི་དྲི་མས་མ་གོས་པ་ཞིག་གནས་པ་ནི་ནམ་ཡང་ཡོད་ཀྱང་༔ ངོ་མ་ཤེས་པས་ཀ་དག་གི་ཡེ་ཤེས་སུ་ཐག་བཅད་དེ༔ དེ་ཕྱིན་དེའི་ཉམས་རྗེས་སུ་སྐྱོང་ཞིང་ཉམས་སུ་བླང་ངོ་༔ ཡང་ཕབ་ཐབས་སོགས་མི་དགོས་ཀྱང་༔ ཕབ་ཟིན་དུ་མི་འཁྱོལ་ཕྱིར་རླུང་གི་ངང་༔ ལུས་གནས་《གནད་》བཤང་པ་རྐང་སོར་གྱིས་མནན་པས་ངེས་པར་ཟིན༔ བདེ་པའི་ངོ་བོ་ལ་བལྟས་ན་བདེ་སྟོང་དཔེའི་ཡེ་ཤེས་ཡིན་པས་དེས་རྒྱུས་བླང་ནས་རྒྱུན་དུ་ཉམས་སུ་བླང་ངོ་༔ དེ་ལྟར་མན་ངག་ཟབ་མོའི་གནད་དོན་ཀྱང་༔ རྩ་རླུང་རང་ལུས་ཐབས་ལྡན་མ་གོམས་ན༔ ཕན་མི་འགྱོད་ཡོད་འདི་ལ་གཟེགས་བས་བསྐུར༔ ཚུལ་ཁྲིམས་ཉམས་པ་བདུད་ཀྱིས་བཟུང་བར་འགྱུར༔ ཅེས་ཀྱང་ག་གཱ་བས་ཚུལ་ཁྲིམས་ངོར་སྨྲས་སོ། ། སེམས་འཛིན་ཉེར་གཅིག་གི་སེམས་གནས་ཐབས་བདུན།༈ སེམས་འཛིན་ཉེར་གཅིག་གི་སེམས་གནས་ཐབས་བདུན་ནི། ཚ་གྲང་གི་ནད་ལ་གཉེན་པོ་ཡི་གེ་ཨ་དཀར་པོ་གཅིག་སྣ་རྩེར་བསྒོམ་ལ་རླུང་དང་བསྦྲགས་ནས་ཕར་འགྲོ་ཚུར་འོང་བྱེད་པར་བསམ་པ་དང་གཅིག རླུང་སྔར་དང་འདྲ་བ་ལས། ཕཊ་ཞིག་བརྗོད་དེ་ཤེས་པ་རྟོག་མེད་དུ་གནས་པ་ལ་སེམས་བཟུང༌། ཡང་རྣམ་རྟོག་སྐྱེས་དུས་ཡང་བརྗོད་པ་དང་གཉིས། ཧ་དྲག་པོའི་རྣམ་རྟོག་གཏོར་ལ་སེམས་སུ་བཟུང་བ་དང་གསུམ། ལུས་ཙོག་པུས་རི་རྩེ་སོགས་སུ་མགོ་བསྒྲིལ་བ་དང་བཞི། འདི་དུས་རླུང་ཆོས་བྱེད། ཧཱུྃ་རིང་པོ་དང་ཐུང་ངུ་ཡང་བརྗོད་ནས་སེམས་ཧཱུྃ་ལ་གཏད་པ་དང་ལྔ། ལུས་གནད་སྔར་ལྟར་ལ་ལྟེ་བར་རཾ་གསལ་བས་སེམས་བཟུང་བ་དང་དྲུག སྣ་རྩེ་དང་བ་སྤུ་ཐམས་ཅད་ལ་སྐུ་ཕྲ་མོ་མང་པོ་ཕར་འཕྲོ་ཚུར་འདུས་པར་བསྒོམ་པ་དང་བདུན་ནོ། །ལུས་གནད་སྔར་ལྟར་ལ་སྨིན་མཚམས་སུ་ཐིག་ལེ་དཀར་དམར་ལ་སེམས་བཟུང་བ་དང་གཅིག རྩ་གསུམ་གསལ་ནས་རླུང་བཟུང་བ་དང་གཉིས། སྣ་རྩེ་རླུང་དཀར་པོ་མདའ་གང་པ་ཞིག་ཕར་འགྲོ་ཚུར་འོང་ལ་སེམས་བཟུང་བ་དང་གསུམ། ལུས་འོད་ཕུང་སྣ་ལྔར་གྱུར་བ་ལ་སེམས་བཟུང་བ་དང་བཞི། སེམས་རླུང་གཉིས་ནམ་མཁའ་ལ་འཕང་ནས། ཡི་གེ་འོད་གོང་གང་རུང་ཇེ་མཐོར་ཉི་ཟླ་ལ་ཐུག་པར་བསམ་པ་དང་ལྔ། སེམས་རྣ་བ་ལ་གཏད་དེ་གནས་པ་དང་དྲུག སྙིང་ནང་དུ་ལྷ་སྐུ་ཕྲ་མོ་གསལ་བ་ལ་སེམས་བཟུང་བ་དང་བདུན་ནོ། །དེས་ལུས་སེམས་ཀྱི་ཞེན་པ་བྲལ་ལོ། །གསུམ་པ་ཆོས་ཉིད་མཐོང་བ་བསྟན་པའི་བདུན་ཚན་ནི། མིང་གི་གདགས་གཞི་བཙལ་ནས། །འཁོར་འདས་ཀྱི་ཆོས་ཐམས་ཅད་སྟོང་ཉིད་དུ་བསྒོམ་པ་དང་གཅིག སྣང་ཚད་ལ་བལྟས་ནས་སྟོང་བར་བསྒོམ་པ་དང་གཉིས། གང་སྣང་བདེན་མེད་མི་རྟག་པར་བསྒོམ་པ་དང་གསུམ། འབྱུང་ལྔ་གང་སྣང་གི་སྟེང་དུ་མ་ཡེངས་བར་བཞག་པ་དང་བཞི། སྣང་ཤེས་གང་ཤར་ཐམས་ཅད་སྐད་ཅིག་མའི་ཕྲེང་བར་ཤེས་ནས་རྟོག་བྲལ་དུ་ཡེ་ནས་གནས་པ་ངོས་བཟུང་བ་དང་ལྔ། གཉིས་སྣང་གཉིས་འཛིན་དུ་ཤར་དུས་ཤར་བ་དེ་ལ་བལྟ་བ་དང་དྲུག རིག་པ་ནམ་མཁའ་ལ་ཐིམ། སྣང་སེམས་ཐམས་ཅད་ནམ་མཁའི་ངང་ན་ལང་ངེར་འདུག་བར་བསྒོམ་ལ། ནམ་མཁའ་དང་ཆོས་ཐམས་ཅད་སྟོང་པ་ཉིད་དུ་མཉམ་པའོ་སྙམ་དུ་སེམས་བཟུང་བ་དང་བདུན་ནོ། །དེ་དག་གིས་ཆོས་ཉིད་ལ་ངང་གིས་གནས་པ་ཐེག་མཆོག་མཛོད་ཀྱི་ཉི་ཟླ་ཁ་སྦྱོར་གྱི་དགོངས་པ་བླང་ནས་གསུང་བ་མདོར་བསྡུས་པའོ། །ཅེས་པ་འདི་ཡང་སློབ་བུ་འགའ་ལ་ཕན་པའི་ཕྱིར་དུ་ག་ག་ཨ་བྷྱེ་ནས་བྲེལ་འཚུབ་ཀྱི་ངང་ནས་སྨྲས་པའོ། །དགེའོ། །དགེའོ། ༈ སེམས་དོན་མདོར་བསྡུས་བདུད་རྩིའི་བཅུད་ཐིག་བཞུགས་སོ། །འོ་ཁྱོད་ཀྱི་ད་ལྟའི་སེམས་ལ་སྣང་བའི་ཆོས་ཐམས་ཅད་རྨི་ལམ་ལྟ་བུར་གཞན་དུ་གྲུབ་པ་མེད་པར་སེམས་ཀྱི་འཁྲུལ་སྣང་ཡིན་པར་བློ་ཐག་མ་ཆོད་ཀྱི་བར་དུ་དཔྱད། དེའི་སེམས་ཙམ་མན་ཆད་ཀྱི་གྲུབ་མཐའ་རྫོགས་པ་ཡིན་ནོ། །དེ་ནས་སེམས་དེ་ཡང་ཇི་འདྲ་ཡོད་ལྟོས་དང་ཅི་ཡང་མ་མཐོང་བ་ནི་ངོ་བོ་སྟོང་པའི་ཡེ་ཤེས་ཞེས་བྱ། དེས་དབུ་མ་མན་ཆད་ཀྱི་གྲུབ་མཐའི་དོན་རྟོགས་པའོ། །ངོ་བོ་སྟོང་བཞིན་པའི་སེམས་ཉིད་གསལ་སེང་ངེ་བ་འདི་རང་བཞིན་འོད་གསལ་བ་ཞེས་བྱའོ། །གསལ་སྟོང་དབྱེར་མེད་པའི་ཡེ་ཤེས་ཀུན་མཁྱེན་ཀུན་གཟིགས་ཤེས་རབ་ཀྱི་ཆ་ནས་ཐུགས་རྗེ་ཀུན་ཁྱབ་ཞེས་བྱའོ། །གསལ་རིག་སྟོང་གསུམ་འདུ་འབྲལ་མེད་པ་དེ་ནི་གཞི་རྒྱུད་སྐུ་གསུམ་ལྷུན་གྲུབ་ཞེས་བྱ་བ་ཡིན། དེའི་ངང་མངོན་དུ་བྱ་བའི་རྒྱུན་བསྐྱངས་ཏེ་འཁྲུལ་རྟོག་གཟུང་འཛིན་ཐ་མལ་གྱི་མ་རྙོགས་པར་ཆེད་དུ་འཛུར་བས་མ་བཅིངས་བར་བཞག་པ་ནི་མཉམ་བཞག་དམིགས་གཏད་དང་བྲལ་བའི་བསྒོམ་པ་ཡིན་ནོ། གལ་ཏེ་རྟོག་པ་སྐད་ཅིག་ཆ་མེད་བྱུང་ཞིག་དུ་ཤར་ཀྱང་དགག་བསྒྲུབ་སྤང་བླང་དང་བྲལ་བའི་ཆོས་ཉིད་དུ་ཤེས་པའི་ངང་ནས་རྗེས་མཐུད་མེད་པར་གནས་ལུགས་བསྐྱངས་བས་རང་རྒྱུད་འཛིན་ཞེན་གྱིས་མི་འཆིངས་བ་ནི་རང་གྲོལ་ཞེས་བྱ་སྟེ། རྗེས་ཐོབ་རྩལ་སྦྱོངས་ཀྱི་དགོངས་པའོ། །དེ་ནས་སྤྱོད་དུ་མེད་པ་མཉམ་བཞག་གི་སྤྱོད་པ་དང༌། སྤྱོད་དུ་ཡོད་པ་རྗེས་ཐོབ་ཀྱི་སྤྱོད་པ་གཉིས་སུ་དུས་ཚོད་དང་བསྟུན་དེ་སྤྱད་དོ། འབྲས་བུ་ནི་རང་ངོའི་སྐུ་གསུམ་ཡེ་ཤེས་དང་བཅས་པ་སྒྲིབ་བྱེད་ཀྱི་དྲི་མ་མཐའ་དག་དང་བྲལ་དེ་མངོན་དུ་གྱུར་ནས་མཛད་པའི་ཕྲིན་ལས་ཕྱོགས་མེད་དུ་རྒྱས་པའོ། །ཅེས་ཀྱང་ཐུབ་བསྟན་ངོར་ག་གཱས་སོ། །དགེའོ། ། སེམས་དོན་གནད་ཀྱི་མེ་ལོང་།༈ སེམས་དོན་གནད་ཀྱི་མེ་ལོང་བཞུགས་སོ༔ འོ་ཁྱེད་ཀྱི་ཕྱིའི་ཆོས་ཐམས་ཅད་སེམས་སྣང་རྨི་ཡུལ་ལྟ་བུར་ཐག་ཆོད་ཅིག༔ དེ་ནས་སེམས་ཁོ་རང་གི་ངོ་ལ་ལྟོས་ཤིག༔ བལྟས་པས་མ་མཐོང་བ་ནི་ཆོས་སྐུ་ངོ་བོ་སྟོང་པ་ཉིད་ཡིན་ནོ༔ སྟོང་བཞིན་དུ་མ་འགགས་པ་ནི་ལོངས་སྐུ་རང་བཞིན་གསལ་བ་ཡིན་ནོ༔ སྟོང་གསལ་གཉིས་སུ་མེད་པའི་ཡེ་ཤེས་ཀུན་ཤེས་ཀུན་རིག་གི་བདག་ཉིད་དེ་སྤྲུལ་སྐུ་ཐུགས་རྗེ་ཀུན་ཁྱབ་ཡིན་ནོ༔ རང་ལ་སྐུ་གསུམ་ལྷུན་གྲུབ་ཏུ་དེ་ལྟར་ཡོད་པ་ནི་གཞི་ཡིན་ནོ༔ དེ་ལྟ་བུའི་གཞི་ཡོད་མེད་ཀྱི་མཐའ་བྲལ་ཆེན་པོ་མ་ཤེས་པའི་གཟུང་འཛིན་ཕྱིར་བལྟས་སུ་གཡེངས་བས་ནི་སེམས་ཅན་ཐམས་ཅད་འཁྲུལ་བ་ཡིན་ནོ༔ ཤེས་ནས་ཀུན་ཏུ་བཟང་པོ་གྲོལ་བ་ཡིན་ནོ༔ ད་ལྟ་ལྟ་བས་ཤེས༔ བསྒོམ་པས་ངང་དུ་གནས་ནས་སྣང་བ་ལ་ཞེན་ཆགས་གཟུང་འཛིན་དུ་མ་ཤོར་བ་ནི་ལམ་ཡིན་ནོ༔ དེ་མངོན་དུ་གྱུར་ཏེ་སྐུ་དང་ཡེ་ཤེས་ཕྲིན་ལས་མཐར་ཕྱིན་པ་ཐོབ་པ་ནི་འབྲས་བུ་ཡིན་ནོ༔ འདི་ལས་གཞན་མེད་དོ༔ ཅེས་ཀྱང་དཔལ་བཟང་ངོར་ག་གཱས་སོ། ། ༈ ཡུལ་དུ་སྣང་བ་ཕྱི་ཡི་ནམ་མཁའ་ཡིན། །རྩ་སྦུབས་སྟོང་པ་ནང་གི་ནམ་མཁའ་སྟེ། །སེམས་ཉིད་སྟོང་ཆ་གསང་བའི་ནམ་མཁའ་འོ། །ཁྲེགས་ཆོད་ལུགས་ཀྱིས་གཅིག་ལ་གཅིག་འབྲེལ་འཆར། །ཕྱིར་སྣང་སྒྲོན་མ་སྤྲུལ་སྐུའི་ནམ་མཁའ་ལ། །རྩ་བཞིར་ལམ་དབྱིངས་ལོངས་སྤྱོད་རྫོགས་པའི་སྐུ། །ཙིཏྟ་གཞི་དཀྱིལ་ཆོས་སྐུའི་ནམ་མཁའ་སྟེ། །ངོ་བོ་རང་གསལ་བདག་གཅིག་བཞག་པས་འཆར། །དེ་སྐད་ཉི་སར་བློ་གྲོས་གསུང་བསྐུལ་བཞིན། །གསེར་ཤོད་སྨྱོན་པ་ག་གཱ་ཞེས་བྱའི་སྨྲས། ། ༈ ཨཻ། སེམས་ཉིད་སྦུབས་གསུམ་རྒྱ་ཡིས་བཅིངས་པ་ལས། །གྲོལ་ནས་ཆོས་ཉིད་དོན་གྱི་ནམ་མཁར་བསྲེ། །ནམ་མཁའི་ངང་ནས་ནམ་མཁའི་ཆོ་འཕྲུལ་དུ། །ནམ་མཁའི་ཕྱག་རྒྱ་ཁྲོས་མ་ནག་མོར་ལྡང༌། །བདག་བཟུང་གཞི་གསུམ་ནམ་མཁའི་ངང་དུ་འདོར། །བརྟུལ་ཞུགས་ནམ་མཁའི་ཆུ་སྲིན་ཕྱག་གིས་གདབས། །སྙིང་རྗེ་ནམ་མཁའ་ནམ་མཁའི་མགྲོན་ལ་འགྱེད། །འདི་ནི་ནམ་མཁའ་སྒོ་འབྱེད་ཡངས་པ་ཧོ། །དེ་ལས་ཅི་ཡང་མེད་དོ་སྐུ་ཚེ་རིང༌། །ག་གཱས་སོ། ། ༈ ཉིད་ཀྱིས་རང་གི་སྙིང་ཀར་རྩ་བའི་བླ་མ་རིག་འཛིན་བདུད་འཇོམས་རྡོ་རྗེ་སྐུ་མདོག་སྔོན་པོ་ལོངས་སྐུའི་རྒྱན་ཆས་ཅན་ཕྱག་གཡས་འཁོར་ལོ་དང་གཡོན་རྡོ་རྗེ་རྒྱ་གྲམ་རྣམ་པས་ཁ་ཆོད་ཅན་གྱི་བྷནྡྷ་བདུད་རྩིའི་བཀང་བ་བསྣམས་པ་ཞབས་རྡོ་རྗེའི་སྐྱིལ་ཀྲུང་དུ་བཞུགས་པ་གསལ་བའི་སྐུ་ལས་འོད་ཟེར་འཕྲོས་པས་ཕྱོགས་བཅུ་དུས་བཞིའི་རྒྱལ་བའི་དཀྱིལ་འཁོར་རྟེན་དང་རྟེན་པར་བཅས་པ་འོད་ཟེར་ཁ་དོག་ལྔ་ལྡན་གྱི་རྣམ་པར་བྱོན་ནས་སིབ་སིབ་ཐིམ་པར་མོས་ལ། ཨོཾ་བཛྲ་གུ་རུ་ཧེ་རུ་ཀ་ས་མ་ཡ་ཛ་ཛཿ ཞེས་ཅི་མང་བརྗོད་ལ་དེ་ལས་མ་ཡེངས། སྐབས་སུ་རང་གི་སེམས་ཀྱི་ངོ་བོ་ལ་ཡང་ནས་ཡང་དུ་ལྟོས་ལ་རྩ་གདར་ཆོད་དང༌། ཅི་ཡང་མཐོང་དུ་མེད་པ་ནི་གནས་ལུགས་རང་བབས་ཀྱི་གཤིས་བླ་མའི་ཐུགས་རྣམ་པར་མི་རྟོག་པའི་ཡེ་ཤེས་རང་སེམས་དང་གཉིས་སུ་མེད་པའི་དེ་ཁོ་ན་ཉིད་ཀྱི་དོན་མངོན་སུམ་མཐོང་བ་ཡིན་པས། བཟའ་གཏད་དང་དམིགས་འཛིན་བཅས་བཅོས་དགག་བསྒྲུབ་སྤང་བླང་མེད་པར་དེའི་ངང་ལ་ཞོག་དང༌། བདེ་སྡུག་དང་མཚན་མ་བྲལ་བའི་ཆོས་སྐུ་ལྷུན་གྲུབ་ཆེན་པོའི་ངང་དུ་འཁོར་འདས་རང་གྲོལ་བའི་གདམས་པ་ཟབ་གནད་ཅན་ཡིན་ནོ། ཞེས་ཀྱང་འོད་གསལ་དྲྭ་བ་སྡོམ་པའི་འཁྲིལ་བར་ནས་སྣང་ཆ་ལ་མཁའ་འགྲོ་རིག་བྱེད་མས་གསུངས་བའོ། །འབར་གྲགས་གི་ཉམས་སྣང་རང་གྲོལ་བའི་ཆེད་དུ་སྔགས་མིང་ག་གཱ་བས་སོ། ། ཁྲེགས་ཆོད་ཀྱི་གཟེར་ཡིག་གནད་གྱི་མེ་བཙའ།༈ ཁྲེགས་ཆོད་ཀྱི་གཟེར་ཡིག་གནད་གྱི་མེ་བཙའ་བཞུགས་སོ། །ཁྲེགས་ཆོད་ཀྱི་གནད་དུ་ཐོག་མར། ཕྱི་ནང་སྣོད་བཅུད་ཐམས་ཅད་སེམས་ཀྱིས་བཟོས་པའི་འཁྲུལ་སྣང༌། མེད་པ་སྟོང་གཟུགས། རབ་རིབ་དང་སྐྲ་ཤད། སྒྱུ་མའི་དཔེ་བཅུ་ལ་སོགས་པ་ལྟར་སྣང་སྟོང་ཟུང་འཇུག་ཕྱི་ནང་བདེན་གྲུབ་ཀྱི་དངོས་པོ་མེད་པར་ཐག་ནང་ནས་ཆོད་དགོས། དེ་ལྟར་བཟོ་བྱེད་ཀྱི་མཁན་པོ་སེམས་ཉིད་ཀྱང༌། བྱུང་གནས་འགྲོ་གསུམ་གྱི་ཡུལ་དང་མཁན་པོས་སྟོང་བས། གཟུགས་དབྱིབས་ཁ་དོག་སོགས་མཚན་མ་ཐམས་ཅད་དང་བྲལ་བར་བརྟགས་དཔྱད་གོམས་འདྲེས་མི་དམན་པར་ཐག་ནང་ནས་ཆོད་པ་ཞིག་དགོས། འོན་ཀྱང་སྟོང་ཉིད་ཆད་མཐའ་རུ་མ་ལྷུང་བར་རང་མདངས་འགགས་མེད་ལ། ངོ་བོ་སྟོང་པ་དང་ཡེ་ནས་ཟུང་དུ་འཇུག་པའི་སྣང་སྟོང་རིས་མེད་མཉམ་པ་ཆེན་པོ། ངོས་བཟུང་གི་མཚན་མ་ཐམས་ཅད་ལས་འདས་པ། གཡོ་བྱེད་རྣམ་རྟོག་གི་རླུང་རང་སར་དང༵ས་པ༵། དམིགས་གཏད་གཟུང་འཛིན་ཆེད་དུ་བློས་བྱས་ཐམས་ཅད་དང་བྲལ་ཞིང༌། རྟོག་བྲལ་རང་གསལ་ཟང་ཐལ་རྗེན་པའི་ཡེ་ཤེས་སུ་ཤར་བ་ཉིད་ནི། ཐོག་མའི་སངས་རྒྱས་ཀུན་ཏུ་བཟང་པོའི་དགོངས་པ་མ་འཁྲུལ་བ་རང་ལ་གནས་པའི་དེ་བཞིན་ཉིད་ཅེས་བྱའོ། །དེ་ངོ་ཤེས་ནས་དེའི་ངང་ལས་བློ་དང་ཡིད་དཔྱོད་ཀྱིས་མ༵་བཅོས། ཚོགས་དྲུག་གི་ཡུལ་ལ་ཕྱིར་མ༵་ཡེང༵ས། འགྱུར་《འགྱུ་》བྱེད་གཟུང་འཛིན་གྱི་རྣམ་པར་རྟོག་པས་མ༵་བསླད༵། ནང་སེམས་གནས་ཀྱི་ངོ་བོ་ལ་འདི་དང་འདིའོ་སྙམ་ནས་ཆེད་དུ་མ༵་བཟུ༵ང༌། རྣམ་རྟོག་སྐྱོན་དུ་བལྟས་ནས་དགག་པར་རྩོམ་པའི་རྩོལ་བ་སྤངས་བས་མ༵་དག༵ག སྣང་སྟོང་ཞི་ལྷག་ཕྱོགས་རེ་ནས་བཞག་པས་བསྒོམ་པའི་འོད་གསལ་བ་མ༵་བསྒྲུ༵བ་པའི་གནད་ཀྱི་གཟེར་བུ་ཆེན་པོ་དྲུག་གིས་མངོན་སུམ་རང་ཐོག་ལས་མི་འཁྱུག་པར་གདམས་པའི་མ་བཟློག་འམ་ཐག་གཅིག་ཐོག་ཏུ་བཅད་པ་སྒོམ་པའི་གནད་ཟིན། རྗེས་ཐོབ་ཀྱི་དུས་སུ་རྣམ་རྟོག་གང་ཤར་ཐམས་ཅད་ངོ་བོ་ཡེ་སྟོང་འཆིང་བྱེད་མེད་པར་ཡེ་ནས་གྲོལ་བར་ཤེས་པའི་གདེངས་དང་ལྡན་པའམ། སྣང་ཆ་ཅེར་གྲོལ་ཚུགས་ཐུབ་ཏུ་གྲུབ་པ་མེད་པར་ཤེས་པའི་གདེངས་དང༌། གྲོལ་བྱེད་ཀྱི་གཉེན་པོ་གཞན་མ་དགོས་པར་བཞག་པས་རང་གྲོལ་དུ་འགྲོ་བ་ཤེས་པའི་གདེངས་དང༌། འོད་གསལ་རིག་སྟོང་ཐིག་ལེ་ཉག་གཅིག་གི་ངང་ལ་བཞག་པས་ཀུན་གྲོལ་བར་ཤེས་པའི་གདེངས་གང་རུང་གིས་སྤྱོད་པས། མཉམ་རྗེས་ཀྱི་དགོངས་པ་དབྱེར་མེད་དུ་འདྲེས་ནས་གདེངས་གྲོལ་ཐོག་ཏུ་འཆོས་པར་འགྱུར་རོ། །དེ་ལྟ་བུའི་ལྟ་བསྒོམ་སྤྱོད་པའི་གནད་ཀྱིས་གཞི་ཇི་བཞིན་པ་མངོན་དུ་གྱུར་ནས། རང་ཐོག་རང་ས་ཟིན་ཅིང༌། རང་ལ་རང་གདེངས་ཐོབ་པས་གཞི་ཉིད་འབྲས་བུར་སྨིན་པའི་སངས་རྒྱས་སྐུ་གསུམ་ཕྱིར་མི་ལྡོག་པའི་ཚད་དང་ལྡན་པར་འགྱུར་རོ། ཁྲེགས་ཆོད་ཀྱི་གཟེར་ཡིག་འཇིགས་དགའི་ངོར་ག་ག་ཨ་བྷྱེས་སོ། ། ཀ་དག་ཁྲེགས་ཆོད་ཀྱི་གཟེར་ཡིག་སྙིང་པོའི་དོན་བསྡུས།༈ ཀ་དག་ཁྲེགས་ཆོད་ཀྱི་གཟེར་ཡིག་སྙིང་པོའི་དོན་བསྡུས་བཞུགས་སོ། ། རང་བྱུང་རིག་པའི་ཡེ་ཤེས་ནི། །སྤྲོས་བྲལ་དོན་གྱི་ཀུན་ཏུ་བཟང༌། །དེ་ལ་གུས་པས་ཕྱག་འཚལ་ནས། །སྙིང་པོའི་དོན་བསྡུས་འདི་བསྟན་ནོ། །ཞེས་སྨྲས་ནས། ད་སེམས་རིག་གི་ཤན་འབྱེད་པ་ནི། ལར་རང་སེམས་མ་བཅོས་པར་བཞག་པས། གཤིས་ཀྱི་གནས་ལུགས་ངང་དངས་རང་གསལ་བ་དེ་ཉིད། རིག་པ་སྤྲོས་བྲལ་ཀུན་ཁྱབ་བརྡལ་བའི་ཆོས་ཉིད་ཆེན་པོ་ཡིན་ཏེ༑ སེམས་ལ་གཟུང་འཛིན་ཡོད། རིག་པ་ལ་གཟུང་འཛིན་མེད། སེམས་ཀྱིས་ཡུལ་ལ་སེམས། རིག་པས་ཡུལ་ལ་མི་སེམས། སེམས་ལ་སྐྱེ་འགགས་ཡོད། རིག་པ་ལ་མེད། སེམས་ལ་རྒྱ་ཆད་ཕྱོགས་ལྷུང་ཡོད། རིག་པ་ལ་མེད། སེམས་ལ་བྱིང་རྒོད་འཐིབ་གསུམ་ཡོད། རིག་པ་ལ་མེད། སེམས་མ་རིག་པའི་རྩ་བ་ཅན། རིག་པ་ཡེ་ཤེས་ཆོས་སྐུ་སྤྲོས་བྲལ་གྱི་རྩ་བ་ཅན། སེམས་ཁ་ཕྱིར་བལྟས། རིག་པ་ནང་གསལ་ཆེན་པོ། སེམས་འཕྲལ་ཤེས། རིག་པ་རང་གསལ་ཡེ་ཤེས་ཆེན་པོའི་ཁྱད་ཡོད་དོ། །འོ་ན་ཀུན་གཞི་དང་ཆོས་སྐུ་ལ་ཁྱད་ཅི་ཡོད་ཞེ་ན། ཆོས་སྐུ་སྟོང་གསལ་སྤྲོས་པ་ཐམས་ཅད་དང་བྲལ་བ་ཞིག་གོ །ཀུན་གཞི་མ་རིག་པས་བསླད་པ་ཅན་སེམས་ཀྱི་རྩ་བའོ། །དེ་ཡང་ལུང་མ་བསྟན་པ་གནས་དོན་ལུས་གསུམ་དུ་བག་ཆགས་པའོ། །སྣོད་བཅུད་རྒྱ་ཆེན་པོ་ལ་དམིགས་པའོ། །ཁ་ཕྱིར་བལྟས་ཞིག་གོ །གཏི་མུག་གིས་ས་བ་ཞིག་གོ ༑འཛིན་པ་མེད་ཟེར་ཀྱང་དམིགས་པ་དེ་མཐར་གཏུག་ན་འཛིན་པ་ལས་མ་འདས་སོ། །ཆོས་སྐུ་ནི་ཟང་ཐལ་སྒྲིབ་པ་བྲལ་བ། ཡེ་ཤེས་ཀྱིས་རང་རྩལ་མ་འགགས་པ་ཞིག་གོ །ཤེས་རབ་ཀྱི་རོལ་བ་འཕྱོ་བ། བག་ཆགས་བསྲེག་པའི་མེ་ལྟ་བུ་དང༌། རིག་གེ་རྗེན་ནེ་པ་ཞིག་དུ་གནས་སོ། །ཡང་ཐ་མལ་དུ་ཡོད་དུས་སེམས་གསལ་སེང་ངེ་བ་ཞིག་ལ། རྟོག་པ་མ་འགྱུའི་བ་ཞིག་ཡོད་པ་དེ་ཀུན་གཞིའི་རྣམ་ཤེས་ཞེས་བྱའོ། །མུ་སྟེགས་པ་བདག་ཤེས་རིག་གི་སྐྱེས་བུ་དེ་དེ་ཡིན། དེ་བས་ན་སེམས་གསལ་ལ་རྟོག་བྲལ་ངས་ཤེས་ཟེར་མཁན་དེ་དེ་དང་འདྲའོ། །ཡང་གང་ལྟར་ཡང་རིག་ཆ་དེ་ངོ་མ་ཤེས་ན་སྒོམ་མིན། རིག་པའི་གསལ་ཆ་བཏོན་པས་གཟུང་འཛིན་དུ་སྟིས་ཕུར་བཏོན་པས་ལྐོགས་འགྱུ་དེ་མ་གོའོ། །ཡང་རིག་པ་སྟོང་པ་སྤྲོས་བྲལ་ལོ་ཞེས་ཀྱང༌། ཡིད་ཀྱིས་མྱོང་ན་སྤྲོས་པ་མ་བྲལ་ལོ། །མ་མྱོང་ན་ནི་ཅི་ཡང་མི་ཤེས་པ་དེས་ཀྱང་ལུང་མ་བསྟན་དུ་འབྱམས་པ་ཡིན་ནོ། །དེ་བས་ན་ཡེ་ནས་དབྱིངས་རིག་གི་ངོ་དང་མ་བྲལ་བ་ཞིག་ཡིན་ལ། ཡང་ཡིད་རྟོག་བཅས་ཀྱི་དཔྱད་པས་ཟིན་པ་དེ་ལ་རྣལ་འབྱོར་མངོན་སུམ་མི་བྱའོ། །བློའི་བསམ་བརྗོད་མེད་པར་གནས་པ་ལ་རོ་མྱོང་མཚུངས་ལྡན་གྱི་ཚོར་བ་གཟུགས་ཁམས་སྨད་པ་ལ་ཡོད་པ་རྣམས་ནི་དེང་སང་གི་སྒོམ་ཆེན་པའི་ཁྱད་ཆོས་དེ་འདྲ་མིན་པར། རིག་པའི་ངོ་བོ་སྟོང་བ་ཆོས་སྐུ། རང་བཞིན་གསལ་བ་ལོངས་སྐུ། ཐུགས་རྗེ་རིག་གེ་རྗེན་ནེ་བ་དེ་སྤྲུལ་སྐུ་ཕྱོགས་ལྷུང་དང་བྲལ་བའི་དགོངས་པའོ། །དེ་ལ་མ་ཡེངས་པར་བལྟ་བས་ལྟ་བ། བསྒོམ་བློའི་རྩོལ་ཞེན་གྱིས་མ་བསླད་པས་བསྒོམ་པ། རྣམ་རྟོག་གིས་མ་བསྐྱོད་པར་བཞག་པས་དུས་གསུམ་ཡིད་ཀྱིས་འབྲེལ་ཐག་ཆོད་པ་ལ་ཕོག་པས། དེ་ཉིད་ལས་མ་ཡེངས་པར་བཞག་པས་བྱར་མེད་རང་གྲོལ་གྱི་དགོངས་པ་མངོན་དུ་འགྱུར་བ་ཡིན་ནོ། །དེ་བས་ན་ད་ལྟར་གྱི་ཤེས་པ་ཟེར་བ། རྣམ་པ་གསལ་བ་ཞེས་པ་ཐམས་ཅད་ཀྱང་གནས་ལུགས་ཡང་དག་གི་དོན་ག་ལ་ཡིན། ཁྱེད་ཀྱིས་འོད་གསལ་ལ་ཉིན་མཚན་མེད་པར་སྐྱོང་དང་སངས་རྒྱས་ཀྱི་གོ་འཕང་མ་ཐོབ་ན་རྡོ་རྗེ་འཆང་གིས་བསླུ་བར་མི་འགྱུར་བའི་གཏན་ཚིག་གོ །ཡང་ཡེངས་བརྗེད་འཁྲུལ་འབྱམས་སུ་ཤོར་ན་རྣམ་རྟོག་འཁྲུལ་འབྱམས། འབྱམས་ཡུལ་ཅི་ཡང་མེད་དོ། །ཆོས་ཉིད་དུ་མ་གྲོལ་བ་ཞིག་མེད་པས་སོ། །དེ་ལྟར་ཉམས་སུ་ལོངས་དང་འདི་ལས་ཟབ་པ་མེད་དོ༑ ༑རྣམ་རྟོག་ཤར་དུས། ངོ་ལ་མི་ལྟ་བ། ངང་ལ་མི་བསྒོམ། སྔོན་བསུ་རྗེས་དཔྱོད་སོགས་ཅི་ཡང་མི་བྱེད་པར་སྔར་གྱི་རིག་པ་དེའི་ངང་དུ་བཞག་པས་རྐྱེན་སྣང་དང་རྣམ་རྟོག་ཐམས་ཅད་རང་ཡལ་རྗེས་མེད་དུ་དག་པ་སྟེ། རང་གྲོལ་མཉམ་པ་ཆེན་པོའི་དགོངས་པ་ཡིན་པས་དེ་རུ་ལ་བཟླ་བ་དང༌། རྣམ་རྟོག་དེའི་རང་བཞིན་ཕྱིར་སྣང་ཚུལ་གྱིས་སྐྱོན་ལྟར་སྣང་ཡང༌། གནས་ཚུལ་ལ་ཐད་ཀ་ན་རིག་པ་ལས་ཅི་ཡང་མེད་པས་སྐྱོན་དུ་བལྟ་མི་དགོས་ཏེ། ངོ་བོ་ཡེ་གྲོལ་དུ་ཡོད་པས་སོ། །དེ་སྐད་དུ་ཡང་ཆོས་ལིའི་བསྐུལ་ངོར་ག་གཱས་སོ། ། འོད་གསལ་ཐོད་རྒལ་གྱི་བསྡུས་དོན་རིན་ཆེན་གཟེར་ཡིག༈ འོད་གསལ་ཐོད་རྒལ་གྱི་བསྡུས་དོན་རིན་ཆེན་གཟེར་ཡིག་བཞུགས་སོ། ། ན་མོ་གུ་རུ་པདྨ་ཀཱ་ར་ཡེ། དེ་ལ་དང་པོ་རུ་ཤན་བྱེད་པ་ལ། །བྱང་ཆུབ་སེམས་བསྐྱེད་གཞི་བདག་མགྲོན་རིགས་དང༌། །བགེགས་མགྲོན་བརྔན་ནས་བསྲུང་འཁོར་བསྒོམ་པ་དང༌། །དེ་ནས་འགྲོ་དྲུག་ལུས་ངག་ཡིད་སྤྱོད་དང༌། །སངས་རྒྱས་ཉིད་ཀྱི་སྐུ་གསུང་ཐུགས་སྤྱོད་བྱ། །རྐང་མཐིལ་དམྱལ་བའི་ས་བོན་དུ་ནག་པོ། །གསང་གནས་ཡི་དྭགས་ས་བོན་པྲེ་ཐལ་སྐྱ། །ལྟེ་བར་དུད་འགྲོའི་ས་བོན་ཏྲི་དམར་ནག །སྙིང་ཁར་མི་ཡི་ས་བོན་ཎྀ་《ནྲི་དཔྱད།》ལྗང་ཁུ། །མགྲིན་པར་ལྷ་མིན་ས་བོན་སུ་སེར་པོ། །སྤྱི་བོར་ལྷ་ཡི་ས་བོན་ཨ་དཀར་པོ། །རང་མདོག་ཐིག་ལེའི་དཀྱིལ་ན་བསྒོམ་པ་ལ། །རིགས་དྲུག་ལས་ཉོན་སྡིག་སྒྲིབ་འདུས་པར་བསམ། །སྤྱི་བོར་ཨོཾ་དཀར་མགྲིན་པར་ཨཱཿདམར་པོ། །སྙིང་ཁར་ཧཱུྃ་མཐིང་རྣམས་ལས་འོད་དཀར་དམར། །མཐིང་གསུམ་འཕྲོས་པས་ས་བོན་བག་ཆགས་བསྲེགས། །དེ་ནི་ཕྱི་ཡི་རུ་ཤན་དབྱེ་བའོ། །འབྲུ་གསུམ་རྡོ་རྗེའི་བཟླས་པ་འབུམ་བདུན་བཟླ། །ནང་གི་རུ་ཤན་ལུས་ཉིད་རྡོ་རྗེ་ནི། །ཡར་རྩེ་སྐུ་གསུམ་མར་རྩེ་ངོ་བོ་དང༌། །རང་བཞིན་ཐུགས་རྗེ་གསུམ་གྱི་བདག་ཉིད་ཅན། །སྐེད་པ་ཐབས་ཤེས་ཟུང་འཇུག་མཚོན་པ་ལས། །མེ་སྟག་འཕྲོས་པས་གདོན་བགེགས་ཚར་བཅད་དེ། །རྡོ་རྗེ་ལང་འདུག་སྐོར་གསུམ་ཉམས་སུ་བླང༌། །ངག་གིས་ཧཱུྃ་བརྗོད་སྙིང་ཁའི་ཧཱུྃ་འཕྲོས་པས། ཁམས་གསུམ་སྣོད་བཅུད་ཧཱུྃ་དུ་ཞུ་བར་བསམ། །ཚུར་འདུས་བུ་ག་དགུ་ནས་ཞུགས་པ་ཡིས། །ལུས་ནང་ཐམས་ཅད་ཧཱུྃ་གིས་གང་བར་བསམ། །དེ་ནས་ཧཱུྃ་འཕྲོས་རི་བྲག་ཐམས་ཅད་འབིགས། །ཚུར་འདུས་རང་ལུས་གོལ་རྩེ་མེད་པར་འབིགས། །མདུན་དུ་ཤིང་བཙུག་སྙིང་ཀའི་ཧཱུྃ་ལས་ནི༑ ༑ཧཱུྃ་གི་ཐག་པ་ཤིང་ལ་དཀྲིས་པར་བསམ། །ཤིང་རྩེར་ཧཱུྃ་ཞིག་ལང་ལ་སེམས་ལ་གཏོད། །མཐར་ནི་གཅིག་ཐིམ་གཉིས་ཐིམ་སྙིང་ཀར་བསྡུ། །དེ་ནས་ཧཱུྃ་ཞིག་རིགས་དྲུག་གནས་སུ་སོང༌། །རིགས་དྲུག་སྡུག་བསྔལ་སྦྱང་ནས་ཞིང་ལྔར་བཀོད། །རྒྱལ་བ་རིགས་ལྔར་དབང་ཞུས་ལུང་བསྟན་ཐོབ། །ཉན་ཐོས་བྱང་སེམས་ཁྲོ་བོའི་ལྟ་སྟང་གིས། །བལྟས་ནས་རུ་ལུ་སོགས་བརྗོད་བྱ་བ་ཀུན། །དགུ་སྤྲུགས་བཏང་བའི་རིམ་པ་དང་བཅས་པ། །དེ་དག་སྔོན་འགྲོ་དེ་ནས་དངོས་གཞི་ནི། །སེམས་ཀྱི་བྱུང་གནས་བཙལ་ནས་སྟོང་བར་ཤེས། །དེ་ནས་ལུས་ཀྱིས་ཙོག་པུར་བྱས་ནས་སུ། །ལག་པའི་སོར་བསྣོལ་པུས་མོར་འཁྱུད་པ་དང༌། །དེ་ལས་ལག་གཉིས་མཆན་ཁུང་རེག་པ་དང༌། །ལག་རྒྱབ་ཁུ་ཚུར་ལྐོག་མར་བཏེགས་པ་གསུམ། །དེ་གསུམ་དུས་སུ་ལྟ་སྟངས་སྣ་རྩེར་ཕབ། །དེ་དག་སྤྲུལ་སྐུའི་བཞུགས་སྟངས་གཟིགས་སྟངས་སོ། །ཁ་སྦུབས་ལག་མཐིལ་འགྲམ་པ་སྐྱོར་བ་དང༌། །མིག་གཉིས་ཐད་བལྟ་ལོངས་སྤྱོད་རྫོགས་པའོ། །རྐང་བ་མདུན་སྤྲད་དབུས་སུ་ཁུ་ཚུར་བཙུག །སྒལ་ཚིགས་དྲང་བསྲེང་མིག་ནི་གྱེན་ལ་བལྟ། །ཆོས་ཀྱི་སྐུ་ཡི་བཞུགས་སྟངས་གཟིགས་སྟངས་སོ། །ཀུན་ལ་རླུང་གནད་མཆུ་སོ་མ་རེག་པར། །རླུང་ནི་དལ་བས་ཕྱི་རུ་རིང་བ་ཞིག །ཁ་ནས་གཏོང་ཞིང་མིག་གིས་ཕྱེད་བཙུམ་བལྟ། །ཡུལ་ནི་ཉི་ཟླ་མར་མེ་སྐུ་གསུམ་རྟེན། །དེ་ལ་བརྟེན་པ་ཙིཏྟ་ཤ་ཡི་སྒྲོན། །ཡེ་ཤེས་བཞུགས་གནས་སྙིང་གི་རྩེ་མོ་ནས། །སོར་བཞིའི་མཚམས་ནས་རྩ་བ་གཅིག་པ་ལས། །རྩེ་མོ་གཉིས་ཅན་སྒལ་ཚིགས་རྒྱུད་པ་སྟེ། །དཀར་འཇམ་རྩ་ཡི་སྒྲོན་མ་དེའི་རྩ་སྣ། །མིག་གི་དཀྱིལ་ཟུག་རྒྱང་ཞགས་ཆུ་ཡི་སྒྲོན། །དེ་ནི་སྣོད་ཀྱི་སྒྲོན་མ་རྣམ་གསུམ་མོ། །དེ་ནས་བཅུད་ཀྱི་སྒྲོན་མ་རྣམ་གསུམ་ནི། །ནམ་མཁར་བལྟས་ན་སྔོ་ནག་ཉི་ཟླ་ལ། །བལྟས་ན་ཁ་དོག་ལྔ་ལྡན་རབ་རིབ་འཆར། །དེ་ནི་རྣམ་དག་དབྱིངས་ཀྱི་སྒྲོན་མའོ། །དེ་ནང་ཐིག་ལེ་ཁ་དོག་ལྔ་ལྡན་པ། །ཀོར་མོའི་གཟུགས་ཏེ་ཐིག་ལེ་སྟོང་སྒྲོན་ནོ། །བར་མཚམས་ལུག་རྒྱུད་ཐིག་ལེ་འབྲེལ་ཞིང་འཁྱོག །ཤེས་རབ་རང་བྱུང་གདངས་ཡིན་སེམས་ཀྱི་དངོས། །སྟོང་གསལ་རིག་པ་ཤེས་རབ་རང་བྱུང་གི །ངོ་བོ་ཡིན་ནོ་ཡུལ་ཀུན་ཤེས་བྱེད་པ། །ཤེས་རབ་རང་བྱུང་སྒྲོན་མའི་རྩལ་ཡིན་ནོ། །མ་ཡེངས་རྣམ་རྟོག་མི་འགྱུ་དེ་ལ་བལྟ། །དེ་ལྟར་བལྟས་ན་སྣང་བཞི་རིམ་གྱིས་རྫོགས། །མཚན་མོའི་ཉམས་ལེན་སྦ་བསྡུ་དག་སྦྱོར་ནི། །ལུས་ནང་དབུ་མའི་ཡར་སྣེ་ཧཾ་ཡིག་དང༌། །མར་སྣེ་ཨ་ཐུང་གསལ་བཏབས་ཨ་ལས་མེ། །འབར་བས་སྤྱི་བོའི་ཧཾ་ལ་རེག་པ་ན། །ཧཾ་ལས་བདུད་རྩི་བབས་པས་མེ་གསོས་བྱས། །མེ་ཉིད་ཆེར་མཆེད་ལས་ཉོན་བག་ཆགས་བསྲེགས། །འོད་ལུས་དབུས་སུ་དབུ་མ་གསལ་བཏབ་བྱ། །མེ་འོད་ཀྱིས་ཁྱབ་བསམ་ཞིང་འོད་ལ་ནི། །སེམས་གཏད་པ་ཉིད་འོད་གསལ་སྦ་བའོ། །དེ་ལ་སེང་གེའི་ཉལ་སྟབས་བཞུགས་སྟངས་དགོས། །ཡང་ན་སྣ་རྩེར་ཐིག་ལེ་ཞིག་གསལ་ལ། །ལུས་ཉིད་འོད་ཞུ་དེ་ལ་ཐིམ་པར་བསམ། །སླར་ཡང་ལུས་དབུས་དབུ་མའི་ནང་ཉིད་ཀྱི། །སྙིང་ཀ་སྤྱི་བོ་གཉིས་སུ་ཨ་གཉིས་གསལ། །དེ་གཉིས་བར་དུ་ཨ་དཀར་བཅུ་དགུ་ནི། །འོད་ཟེར་ཉི་མ་འབུམ་དང་འདྲ་བར་སྒོམ། །སྤྱི་བོ་ནས་བཟུང་ཨ་རྣམས་མས་ཐིམ་དུ། །སྙིང་ཀའི་ཨར་བསྡུ་དེ་ལ་ཐམས་ཅད་ཀྱི། །འོད་དང་ཟེར་འབར་བསམ་པས་གཟི་བརྗིད་ཀྱིས། དབུ་མའི་ནང་ཀུན་རབ་ཏུ་གང་བར་བསམ། །འོད་དེར་ཤེས་པ་གཏད་དེ་གཉིད་པར་བྱ། །དེ་ཡི་འདུག་སྟངས་གླང་ཆེན་ཉལ་སྟབས་སོ། །དེ་ནི་ཤེས་བྱ་བུམ་པར་བསྡུ་བའོ། །ཐོ་རངས་ལང་ནས་རླུང་རོ་གསུམ་བསལ་ཏེ། །དམར་ནག་དཀར་ནག་ཁམ་ནག་རྣམ་པ་རུ། །དུག་གསུམ་ལས་བྱུང་སྡིག་སྒྲིབ་དག་པར་བསམ། །དེ་ནས་སྙིང་ཀའི་ཨ་ལས་སྨིན་མཚམས་སུ། །ཨ་མཐིང་ཞིག་གསལ་དེ་ལས་འོད་འཕྲོས་པས། །སྣོད་བཅུད་འོད་ཞུ་འོད་མཐིང་རྣམ་པར་གང༌། །དེ་ནི་ནམ་མཁའི་འབྱུང་བ་དག་སྦྱོར་རོ། །ཡང་ཅིག་ཨ་དཀར་ཆུ་ཡི་རང་བཞིན་ལ། །འོད་འཕྲོས་སྣོད་བཅུད་འོད་དཀར་རྣམ་པར་ཞུ། །གསུམ་པ་ཨ་སེར་འོད་ཀྱིས་སྣོད་བཅུད་སྦྱངས། །བཞི་པ་ཨ་དམར་འོད་ཀྱིས་སྣོད་བཅུད་སྦྱངས། །ལྔ་བ་ཨ་ལྗང་འོད་ཀྱིས་སྣོད་བཅུད་ཞུ། །འོད་ཟེར་དཀར་སེར་དམར་ལྗང་མཐིང་ནག་གི །འོད་ཀྱིས་འཁོར་འདས་ཁྱབ་ནས་བརྡལ་བསམ་ལ། །དེ་ཡི་བཞུགས་སྟངས་དྲང་སྲོང་ཙོག་པུར་གནས། །བར་སྐབས་འཆི་སྦྱངས་དབེན་པའི་གནས་ཉིད་དུ། །སེང་གེ་ཉལ་སྟབས་བྱས་ནས་འཆི་བའི་དུས། །གཉེན་བཤེས་ཀུན་གྱིས་མཐར་བསྐོར་འོ་དོད་འབོད། །བསམ་ཞིང་ང་ནི་ཅི་ལ་ཡང་མི་ཆགས། །ནམ་མཁའ་རྣམ་པར་དག་པའི་དབྱིངས་ཉིད་དུ། །ང་ནི་མྱ་ངན་འདའ་བསམ་མིག་གིས་ནི། །བར་སྣང་ལམ་བྱེད་དབྱིངས་རིག་བསྲེ་བའོ། །ཡང་ན་གླང་ཆེན་ཉལ་སྟབས་བྱས་ནས་སུ། །མངོན་དགའ་དཔལ་ལྡན་སྟུག་པོ་བཀོད་པ་དང༌། །བདེ་བ་ཅན་དང་ལས་རབ་རྫོགས་པ་རུ། །རྡོ་རྗེ་སེམས་དཔའ་རིན་འབྱུང་སྣང་མཐའ་ཡས། །དོན་གྲུབ་རྣམ་སྣང་བཞུགས་པའི་ཞབས་དྲུང་དུ། །ང་ནི་འདའ་སྙམ་དབྱིངས་ཐིག་མངོན་དུ་བྱ། །སླར་ཡང་རང་བཞིན་སྤྲུལ་པའི་ཞིང་ལྔ་གསལ། །ད་ནི་འཆི་བས་ཅི་ལ་མི་ཆགས་པར། །རང་བཞིན་སྤྲུལ་པའི་ཞིང་ལ་འགྲོ་སྙམ་ནས། །དབྱིངས་ཐིག་མངོན་བྱེད་དྲང་སྲོང་ཙོག་པུར་འདུག །དེ་ལྟར་གནད་བསྣུན་ཉིན་མཚན་ཁ་སྦྱོར་ནས། །ཟླ་བ་དྲུག་ན་ཆོས་ཉིད་མངོན་སུམ་མཐོང༌། །རིག་པ་གཅེར་ལྡང་ལུས་ནི་རུས་སྦལ་བཞིན། །ངག་ནི་ལྐུགས་པ་སེམས་ནི་གར་གཏད་སྡོད། །ཉམས་སྣང་གོང་འཕེལ་དབྱིངས་ཐིག་སྐུ་རུ་སྨིན། །ཤེས་ཉམས་སྣང་ཉམས་རྟགས་གསུམ་སྒོ་གསུམ་འཆར། །རིག་པ་ཚད་ཕེབ་ཚོམ་བུ་གཅིག་ཏུ་འཆར། །སྒོ་གསུམ་རྟགས་ཐོབ་འོད་ཟེར་ཚེ་དབང་ཐོབ། །སླར་ཡང་ཆོས་ཟད་བློ་ཟད་དབང་ཡུལ་ཟད། །སྒོ་གསུམ་རྟགས་ཐོན་གདེངས་བཞི་ཐོབ་ནས་ཀྱང༌། །སྐྱེ་འཇུག་ལ་དབང་སེམས་ཅན་སུམ་སྟོང་འདྲེན། །སླར་ཡང་ཤེས་སྒྲིབ་ཕྲ་བའི་ཕྲ་བ་ཉིད། །རྡོ་རྗེ་ལྟ་བུའི་ཏིང་འཛིན་གྱིས་བཅོམ་ནས། །གཞོན་ནུ་བུམ་སྐུ་ནང་གསལ་ཆེན་པོ་རུ། །སྐུ་ལྔ་ལྷུན་གྲུབ་ཡེ་ཤེས་གསུམ་དང་ལྡན། །མཛད་པ་གཞན་ངོར་སྐུ་གསུམ་ལུགས་འབྱུང་བ། །ལོ་ནི་གསུམ་བདུན་བཅུ་གཉིས་དབང་ཁྱད་ཀྱིས། །མངོན་རྫོགས་སངས་རྒྱས་འཇའ་ལུས་འོད་སྐུར་འགྲུབ། །རྟེན་ལ་ཁྱད་མེད་རྡོ་རྗེའི་ཚིག་ཆེན་ཡོད། །ཡལ་བར་མ་དོར་སྐལ་བཟང་རིགས་ལྡན་མ། །ཅེས་ཀྱང་ག་གཱས་སོ། ། ཐོད་རྒལ་བསྡུས་དོན།༈ ཐོད་རྒལ་བསྡུས་དོན་ནི། གཞི་རང་ལ་སྒྲོན་མ་དྲུག་གནས་པ་སྟེ། དེ་ཡང་སྙིང་ནི་ཙིཏྟ་ཤ་ཡི་སྒྲོན་མ། དེའི་རྩེ་ནས་མིག་ཏུ་འབྲེལ་བའི་རྩ་ནི་དཀར་འཇམ་རྩའི་སྒྲོན་མ། མིག་ནི་རྒྱང་ཞགས་ཆུའི་སྒྲོན་མ། ཐད་ཀའི་བལྟས་ན་འདི་འཛིང་བསྣོལ་དུ་ཡོད་པ་དྲྭ་བ་དྲྭ་ཕྱེད་ཀྱི་རྣམ་པ་དབྱིངས་རྣམ་པར་དག་པའི་སྒྲོན་མ། དེའི་དཀྱིལ་གྱི་ཐིག་ལེ་ཟླུམ་པོ་ནི་སྟོང་བའི་སྒྲོན་མ༌། དེ་ན་དྲྭ་ཕྱེད་ཀྱི་རྣམ་པ་མུ་ཏིག་བལྟར་ལ་བརྒྱུས་པ་འདྲ་བ་དེ་རྡོ་རྗེ་ལུ་གུ་རྒྱུད་དམ་ཤེས་རབ་རང་བྱུང་གི་སྒྲོན་མ་ཡིན། དེ་དག་ལ་མིག་ཕྱེད་བཙུམ་གྱིས། རྟེན་ཉི་ཟླ་ལ། རླུང་ཁ་ནས་བཏང༌། འདུག་སྟངས་དྲང་སྲོང་གིས་བཞག་པ་ནི་གནད་དོ། །ཁྱད་པར་དུ་ཡང་ནུབ་དུས་སུ་ཐིག་ལེ་སྟོང་སྒྲོན་ཞིག་སྙིང་ནང་དུ་དམིགས་ནས་འཕོ་ལུང་གི་དཔག་ཚད་ལྔ་བརྒྱའི་སྟེང་གི་ཕྱོགས་བཅུར་སྤྲུལ་པའི་སྐུའི་ཞིང་ན་བཞུགས་པའི་གཙོ་བོའི་ཐུགས་ཀར་བསྟིམས། སླར་ཡང་གཙོ་བོ་འོད་ཞུ་ཐིག་ལེར་གྱུར་བ་མར་བྱུང་སྟེ་བདག་གི་སྙིང་ཀར་བརྟེན་《ཐིམ་དཔྱད།》པས་རྡོ་རྗེ་ལྟ་བུའི་ཚེ་ལ་དབང་བར་བསམ་པས་འོད་ཟེར་གྱིས་ལུས་ནང་ཐམས་ཅད་གང་བར་བསམ་མོ༑ ༑བར་སྐབས་འཆི་སྦྱངས་སུ་ང་ནི་འཆི་བའི་དུས་ལ་བབས་པས་ཅིས་ཀྱང་མི་ཕན་ཅི་ལའང་མི་ཆགས་བསམ་ནས་རྣམ་ཤེས་བསྲེ་འཕོ་བྱ་ཞིང་དབྱིངས་ཐིག་གི་ངང་དུ་བདག་འཕོའོ་སྙམ་དུ་འདུན་པ་གཏད་པ་དང་ཆབ་གཅིག་མཉམ་པར་ཡང་ཡང་བཞག་གོ །དེས་བར་དོ་གཉིས་པ་ལ་གྲོལ་བ་ཐོབ་པར་འགྱུར་རོ། །ཞེས་ཀྱང་འདི་འདྲ་དགོས་ཞེས་བསྐུལ་བས་འཕྲིན་ཆོས་ཀྱི་ངོར་ག་གཱས་སོ། ། ཐོད་རྒལ་གྱི་གནད་དྲུག༈ ཐོད་རྒལ་གྱི་གནད་དྲུག་ནི། ལུས་གནད་སྐུ་གསུམ་གྱི་བཞུགས་སྟངས་ལ་གནས་པར་བྱ་བ་དང༌། ངག་《གནད་དཔྱད།》བརྗོད་མེད་ཀྱི་འཁོར་ལོ་ལ་གནས་པར་བྱ་བ་དང༌། སེམས་གནད་གཟུང་འཛིན་གྱི་རྣམ་རྟོག་དང་བྲལ་བའི་ ངང་ནས་དབྱིངས་ཐིག་ལ་གཏད་པ་དང་གསུམ་མོ༑ ༑ཡང་སྒོ་གནད་གཟིགས་སྟངས་གསུམ་ལས་མི་གཡོ་བས། ཡུལ་གནད་ཉི་ཟླ་མར་མེ་མན་ཤེལ་ནམ་མཁའ་ལ་གཏད་པ་དང༌། རླུང་གནད་མཆུ་སོ་ཅུང་ཟད་མ་རེག་པའི་བར་ནས་འབྱུང་འཇུག་བྱེད་པ་དང་དྲུག་གོ དེ་ལྟར་གནད་དྲུག་ལས་མ་འདས་པར་ཉམས་སུ་བླངས་བྱའི་རྩ་བ་སྒྲོན་མ་དྲུག་སྟེ། སྙིང་ཙིཏྟ་རིན་པོ་ཆེ་ཤའི་སྒྲོན་མ་ཡེ་ཤེས་གནས་པ་རྩ་བའི་གནས་སོ། །དེའི་ནང་ན་གསེར་གྱི་རྩ་ཆེན་ཡོད་པ་དང༌། །དེའི་ཡར་སྣ་དབུས་སྟོང་པ་རང་གྲོལ། གཡས་དར་དཀར་སྣལ་མ། གཡོན་ཕྲ་ལ་འཁྲིལ། གསེར་གྱི་རྩ་ཆེན་མར་དུ་《སྣ་དཔྱད།》སྲོག་རྩ་ལ་ཟུག་པ་རྣམས་ནི་ཡེ་ཤེས་ཀྱི་རང་མདངས་སྐུ་འོད་ཡེ་ཤེས་རྒྱུ་བའི་ལམ་ཡིན་པས་དཀར་འཇམ་རྩའི་སྒྲོན་མ། དར་དཀར་དང་ཕྲ་ལ་འཁྲིལ་གཉིས་ཀྱི་རྩ་སྣ་ཡེ་ཤེས་འཆར་བའི་སྒོ་རྒྱང་ཞགས་ཆུ་ཡི་སྒྲོན་མ་སྟེ་སྣོད་ཀྱི་སྒྲོན་མ་གསུམ། དབྱིངས་རྣམ་དག་གི་སྒྲོན་མ་འཇའ་ཚོན་སྣ་ལྔའི་རང་བཞིན་གྱེན་བསྒྲེངས་དང་རྩིབ་ཤར་དུ་སྣང་བ་དང༌། ཐིག་ལེ་སྟོང་པའི་སྒྲོན་མ་ཆུ་རིས་འོད་ལྔའི་མུ་ཁྱུད་དང༌། ཤེས་རབ་རང་བྱུང་ངམ་རྡོ་རྗེ་ལུ་གུ་རྒྱུད་ཤེལ་ཕྲེང་ངམ་ལྕགས་ཐག་བསྐྱངས་བ་ལྟ་བུ་གསུམ་ནི་བཅུད་ཀྱི་སྒྲོན་མ་གསུམ་ཞེས་བྱའོ། །དེ་ལྟ་བུའི་བཅུད་ཀྱི་སྒྲོན་མ་ཡུལ་དུ་སྣང་བ་ལ་མ་ཡེངས་ཞིང་རྣམ་རྟོག་མེད་པའི་ངང་ནས་བལྟས་པས་སངས་རྒྱས་ཐམས་ཅད་ཀྱི་སྐུ་གསུང་ཐུགས་དུས་གཅིག་ཏུ་མཐོང་བ་ཡིན་པས། འདིའི་མྱུར་དུ་སངས་རྒྱས་ཀྱི་གོ་འཕང་ཐོབ་པར་འགྱུར་ཞིང༌། འདི་ལས་ལྷག་པའི་གདམས་ངག་ནི་སངས་རྒྱས་སྟོང་གིས་བཙལ་ཀྱང་རྙེད་གནས་མེད་དོ། །ཐོད་རྒལ་གནད་བསྡུས་ཀུན་བཟང་བསྟན་འཛིན་ངོར་ག་གཱས་སོ། ། དུས་མཐར་གདབས་པ་དང་རྒྱུན་དུ་སྦྱངས་པ་རང་བཞིན་སྤྲུལ་སྐུའི་ཞིང་ཁམས་སུ་འཕོ་བའི་ཐབས་བློ་ལ་བཟུང་བདེ་བ་གནད་ལས་གནད་བསྡུས་པ།དུས་མཐར་གདབས་པ་དངཿ རྒྱུན་དུ་སྦྱངས་པཿ རང་བཞིན་སྤྲུལ་སྐུའི་ཞིང་ཁམས་སུ་འཕོ་བའི་ཐབས་བློ་ལ་བཟུང་བདེ་བ་གནད་ལས་གནད་བསྡུས་པ་ནིཿ ལྟ་བ་རྒྱས་འདེབས་ཀྱི་དབང་དུ་བྱས་ནཿ ཁྱེད་ཀྱི་ད་ལྟའི་སེམས་ཀྱི་གནས་ལུགས་སྤྲོས་པ་ཐམས་ཅད་དང་བྲལ་བ་འདི་གཞི་ཡི་འོད་གསལ་དངོས་ཡིན་པསཿ དེའི་ངང་ལས་མ་ཡེངས་པར་ཡང་ནས་ཡང་དུ་མཉམ་པར་ཞོག་ལཿ ཡང་སྐབས་སུཿ ད་ཅི་ང་ཤི་བའི་དུས་སུ་བར་དོ་དང་པོའི་འོད་གསལ་ཡང་འདི་དང་འདྲ་ལཿ ད་དུང་འདི་བས་བརྒྱ་སྟོང་གྲངས་མེད་ཡིད་ཀྱི་གསལ་བ་དངཿ བརྟན་པ་དངཿ དག་པ་སྟེཿ སེམས་ཀྱི་སྒྲིབ་གཡོག་ཐམས་ཅད་བྲལ་བ་ཞིག་འཆར་ཡོང་ངེས་པ་ཡིན་པསཿ དེ་ཆོས་སྐུ་ཀུན་ཏུ་བཟང་པོའི་ཐུགས་རྣམ་པར་མི་རྟོག་པའི་ཡེ་ཤེསཿ སངས་རྒྱས་ཐམས་ཅད་ཀྱི་རྒྱལ་ས་ཡིན་པས་ངོ་ཤེས་པར་བྱས་ལཿ དེའི་ངང་དུ་འཕོའོ་སྙམ་པའི་འདུན་པ་དུང་དུང་རེ་གྱིས་ལཿ སེམས་ཀྱི་ངོ་བོའི་ཐོག་ཏུ་མཉམ་པར་ཡང་ཡང་ཞོག་ཅིགཿ གལ་ཏེ་རྣམ་རྟོག་རྒོད་ནས་ཡེ་མི་གནས་པར་འདྲ་ནཿ ཁྱོད་རང་གི་རྩ་བའི་བླ་མ་མཆོག་གང་ཡིན་དེ་སྤྱི་བོར་བསྒོམ་ལཿ ལུས་ཐ་མལ་གྱི་དབུས་སུ་རྩ་དབུ་མ་མཐིང་ཀ་གསལ་བའི་དབུསཿ སྙིང་ཀའི་ཐད་དུཿ རིག་པ་རྡོ་རྗེ་ཚོན་གང་བ་ལྟེ་བ་ན་ཧཱུྃ་ཡོད་པ་ཞིག་དུ་སོམ་ལཿ ཧིག་བརྩེགས་པ་ཅི་ནུས་ཀྱིས་བླ་མའི་ཐུགས་ཀར་འཕོས་ཏེཿ ཐུགས་རྣམ་མཁྱེན་གྱི་ཡེ་ཤེས་དང་དབྱེར་མེད་པར་འདྲེས་པར་མོས་ལ་ཡང་སེམས་ངོ་ལ་ལྟོསཿ ཡང་ཐོད་རྒལ་གྱི་དབྱིངས་ཐིག་མར་མེ་ཞིག་སྡུན་དུ་བཞག་ལ་བསྒོམ་ནསཿ འདི་རང་སྣང་ལོངས་སྐུའི་སྣང་བ་དངོས་ཡིན་པསཿ བདག་འདིར་འཕོ་སྙམ་པའི་དབྱིངས་ཐིག་གི་ངང་དུ་རིག་པ་རྡོ་རྗེ་ཧཱུྃ་མཚན་ཅན་འཕོ་བ་དངཿ ཡང་ན་དཔག་ཚད་ལྔ་བརྒྱའི་སྟེང་དུ་འོག་མིན་སྟུག་པོ་བཀོད་པའི་ཞིང་ཁམས་སུ་བླ་མ་བཞུགས་པའི་ཐུགས་ཀརཿ ང་སྲིད་པ་བར་དོ་ལ་འཁྱམས་འདུག་པས་འཕོ་དགོས་སྙམ་ནས་འཕེན་པ་གང་ལ་ཡང་བླ་མའི་གསོལ་འདེབས་དྲན་པའི་ཧིཀ་གིས་སྦྱང་བ་ལས་ལོགས་སུ་འཕོ་བ་གཅིག་ཀྱང་མི་དགོས་པར་ཐམས་ཅད་དེར་འདུས་སོཿ དེ་ལྟར་གྲངས་མང་བསྐྱལ་བས་བར་དོ་མེད་པར་ཡར་གྱི་ཟང་ཐལ་དུ་འགྲོ་བར་གདོན་མི་ཟའོཿ འདི་ཀུན་ལ་ཤིན་ཏུ་མཁོཿ གལ་ཆེ་ཆེཿ འདི་ཁོ་ནའོཿ འདི་ཁོ་ནའོཿ འདི་ཁོ་ནའོཿ ག་གཱས་སོ། ། ཞལ་གདམས་སྨོན་ལམ་འབྲེལ་ཚད་དོན་ལྡན།༈ ཞལ་གདམས་སྨོན་ལམ་འབྲེལ་ཚད་དོན་ལྡན་ཞེས་བྱ་བ་བཞུགས་སོ༔ ཨེ་མ་ཧོ། ཕྱོགས་བཅུ་དུས་བཞིའི་རྒྱལ་བ་སྲས་བཅས་ཀྱི། །མཁྱེན་བརྩེ་ནུས་པའི་ཡོན་ཏན་གཅིག་བསྡུས་པ། །དཀའ་དྲིན་མཉམ་མེད་རང་སྣང་སྟོན་པར་ཤར། །དྲིན་ཆེན་བླ་མའི་ཞབས་ལ་གསོལ་བ་འདེབས། །བདག་ནི་མ་རིག་ཉོན་ཤེས་སྒྲིབ་དབང་གིས། །བདག་མེད་བདག་དང་ཡུལ་མེད་ཡུལ་དུ་བཟུང་། །འཁྲུལ་བ་རྨི་ལམ་ལྟ་བུའི་བསླུས་བསླུས་ནས། །ད་ནི་རང་སྣང་རང་ངོ་ཤེས་པར་ཤོག །འགྲོ་དྲུག་ནང་ནས་དལ་འབྱོར་རྙེད་པར་དཀའ། །རྙེད་ན་དོན་ཆེ་ཡིད་བཞིན་ནོར་བུ་འདྲ། །ཡར་འགྲོ་མར་འགྲོའི་ས་མཚམས་ད་རེས་ཡིན། །གཏན་འདུན་ཡང་དག་སྒྲུབ་པ་མཐར་ཕྱིན་ཤོག །ཐེག་གསུམ་ངེས་པར་འབྱུང་བའི་ལམ་བཟང་ལ། །མཐར་ཐུག་དགོངས་པ་ཀློང་དུ་གྱུར་ནས་སུ། །ལྟ་བསྒོམ་སྤྱོད་པ་འབྲས་བུའི་ཡོན་ཏན་ཀུན། །ཡར་ངོས་ཟླ་ལྟར་གོང་ནས་གོང་འཕེལ་ཤོག ཁྱད་པར་གསང་ཆེན་རྡོ་རྗེ་སྙིང་པོ་ཡི། །དགོངས་དོན་ཟབ་མོ་ཚུལ་བཞིན་ཉམས་སུ་ལོན། །སྣང་བཞིའི་སྦུབས་ནས་ས་ལམ་ཅིག་ཆར་བགྲོད། །བདག་གཞན་དོན་གཉིས་ལྷུན་གྱིས་འགྲུབ་པར་ཤོག །སེམས་ཅན་གང་ཞིག་བདག་མཐོང་ལེགས་བཤད་ཐོས། །དྲན་དང་ཡིད་བྱེད་མིང་ཙམ་ཐོས་པའང་། །སྐྱེ་བའི་རྒྱ་མཚོ་ཆེན་པོའི་ཕ་རོལ་ཕྱིན། །མགོན་པོ་འོད་དཔག་མེད་པའི་གནས་ཐོབ་ཤོག ཁྱདཔར་སྐྱེ་འཇུག་དབང་ཐོབ་གཟི་བྱིན་གྱིས། །ལས་ངན་ངེས་དང་མ་ངེས་གང་བྱས་འགྲོ། །སུམ་སྟོང་ཕྱམ་གཅིག་སྒྲོལ་ནུས་བདེན་སྟོབས་ཏེ། །སྐྱེ་མཐའ་འདི་ནས་མངོན་དུ་འགྱུར་བར་ཤོག །དཀོན་མཆོག་རྩ་གསུམ་རྒྱ་མཚོའི་བྱིན་རླབས་དང་། །གཞི་རྒྱུད་བདེ་གཤེགས་སྙིང་པོའི་བདེན་སྟོབས་མཐུ། །དབང་ཕྱུག་བླ་མ་དམ་པའི་ཐུགས་རྗེ་ཡི། །བདག་གི་གང་སྨོན་གྲུབ་པ་མཐར་ཕྱིན་ཤོག །ཅེས་ཀྱང་ཚེས་ལིའི་ངོར་ག་གཱས་སོ།། ཤམ་བྷ་ལའི་སྨོན་ལམ་ས་སྤྱོད་བགྲོད་པའི་ཤིང་རྟ་རྣམ་དག༄༅༔ ཤམ་བྷ་ལའི་སྨོན་ལམ་ས་སྤྱོད་བགྲོད་པའི་ཤིང་རྟ་རྣམ་དག་བཞུགས་སོ༔ ཨེ་མ་ཧོ༔ སྔོན་ཚེ་སྟོན་པས་བྱིན་རླབས་རྒྱུད་གསུངས་ནས༔ རྒྱས་བསྡུས་རིམ་པ་གཉིས་སུ་མེད་པ་གང་༔ དར་ནུབ་ཚུལ་གྱིས་མ་ཡིན་དུས་རྟག་པར༔ སྨིན་གྲོལ་ཟམ་མ་ཆད་པའི་ས་སྤྱོད་མཆོག༔ ༡ རིགས་ལྡན་འཕགས་པས་བརྟེན་པའི་གནས་ཆེན་པོ༔ ཕྱི་ལྟར་རྒྱ་གར་བྱང་ཤར་ཤམ་བྷ་ལ༔ ནང་ལྟར་སྙིང་ཀ་མཆོད་པའི་རྩ་བཞི་བ༔ ཁམས་ཀྱི་རྣམ་དག་དཔའ་བོ་མཁའ་འགྲོའི་ཚུལ༔ ༢ བདེ་སྟོང་གཉིས་མེད་རང་སྒྲའི་རྒྱུན་ལྡན་འབྱོར༔ གསང་ཆེན་བྱང་ཤར་སྟོབས་རྣམས་བཀོད་པ་སྟེ༔ མུ་སྟེགས་ཀླ་ཀློའི་རྒྱུ་བར་མི་ནུས་ཀྱིས༔ ཞིང་དེར་བདག་ནི་རིག་འཛིན་གྲལ་འཁོད་ཤོག༔ ༣ དཔལ་ལྡན་རྒྱུ་སྐར་དཀྱིལ་འཁོར་ཡངས་པ་རུ༔ གྲུབ་གཉིས་ལང་ཚོ་བརྡོ་བའི་གཟི་འོད་ཀྱིས༔ སངས་རྒྱས་བསྟན་པའི་བགེགས་བྱེད་དཔུང་བཅོམ་པའི༔ གཙོ་བོ་དམ་པར་བདག་ཀྱང་འགྱུར་བར་ཤོག༔ ༤ རྡོ་རྗེ་ཐེག་པའི་བསྟན་པ་ཉི་འོད་བཞིན༔ ཕྱོགས་དུས་ཀུན་ཏུ་སྤེལ་བའི་དགེ་མཚན་གྱིས༔ བཀྲ་ཤིས་སྣང་བའི་འབྲས་བུ་གཡུར་དུ་ཟ༔ རྡོ་རྗེ་རྣོན་པོའི་ཐུགས་ལ་བྱང་ཆུབ་ཤོག༔ ༥ དཀོན་མཆོག་བསླུ་བ་མེད་པའི་བྱིན་རླབས་དང་༔ དང་པོའི་སངས་རྒྱས་རིགས་ལྡན་ཐུགས་བསྐྱེད་དང་༔ གདུང་ཤུགས་སྨོན་ལམ་བཟང་པོའི་རྒྱུད་སྦྲེལ་ཏེ༔ གང་བསམ་ལྷུན་གྲུབ་འགྲོ་དོན་མཐའ་རྒྱས་ཤོག༔ ༦ ཅེས་ཀྱང་ཉི་སར་བློ་གྲོས་བཀའ་གནང་བཙན། །གྱི་ནར་འདོར་བར་མ་ཕོད་ག་གཱས་སོ། །བདག་ཀྱང་བླ་མའི་ཐུགས་ཀྱིས་དབུགས་དབྱུང་ལས། །ཚོམ་བུ་གཅིག་ཏུ་འཚོགས་པའི་དགའ་ཞིང་འགོད། །དགེའོ།། །། ཡེ་ཤེས་བླ་མའི་མུ་བཞི།༈ ཡེ་ཤེས་བླ་མའི་མུ་བཞི་ནི། ཡོན་ཏན་རྒྱ་མཚོའི་ཞལ་རྒྱུན། བླ་མ་དམ་པ་འཇིགས་མེད་སྒྲ་དབྱངས་ལ། གཞི༵་ལྷུན་གྲུབ་ཀྱི་ཕྱོགས་མ་རྟོགས་པ་དང་། དངོ༵ས་ཀ་དག་གི་ཕྱོགས་མ་རྟོགས་པས་དེ་གཉིས་དབྱེར་མེད་པའི་ཟུང་འཇུག་གི་ལམ་ལས་གཞན་དུ་རྣམ་པར་འཁྱམས་པ་དང་མཚན་ཉིད་པས་རྗེས་དཔག་རྣམ་གྲངས་བའི་དོན་དམ་པ་དག་གོ་གསུངས། དེ་ལ་ཁོ་བོས་འཐད་པར་རིགས་ཏེ། རྒྱུ་མཚན་དངོས་གཞིའི་སྒྲ་བཤད་འདི་ལ་ཐེག་མཆོག་མཛོད་ལས། ཚིག་གི་མཐའ་བཅད་པ་དང་། དེའི་དོན་གྱི་ཐོག་ཏུ་དབབས་པ་གཉིས་སུ་གསུངས་པའི་འགངས་བསྒྲིགས་ན་གསལ་ཏེ། དེ་ཡང་གཞི་ལྷུན་གྲུབ་དུ་འདོད་པ་རྣམས་ཀྱིས་ཆོས་སྐུ་རིག་སྟོང་སྤྲོས་བྲལ་ཀ་དག་གི་དོན་རྟོགས་པ་དང་ཟུང་དུ་མ་འབྲེལ་བའི་ཕྱིར་དང་། ཡང་རྫོགས་ཆེན་ཐོད་རྒལ་མཁན་པོ་འགའ་ཞིག་གིས། གནད་གསུམ་ཆོས་ཉིད་ཀྱི་འཁོར་ལོའི་ཐབས་ཀྱིས་གཅུན་པས་གཞི་ལྷུན་གྲུབ་ཀྱི་རང་གདངས་སྐུ་གསུམ་དག་པའི་ཕྱག་རྒྱ་ལམ་དུ་སྣང་བ་དབྱིངས་ཐིག་ལུ་གུ་རྒྱུད་དུ་མཐོང་བ་ལ་དག་གྲོལ་ངེས་འབྱིན་དུ་བལྟ་བ་ཙམ་ལས་རྩལ་དུ་འདོན་མ་ནུས་པས། ཐིག་ལེའི་ངོ་བོ་ཀ་དག་གི་དང་། དབྱིངས་ཀྱི་ངོ་བོ་ལྷུན་གྲུབ་ཀྱི། ལུག་རྒྱུད་ཀྱི་ངོ་བོ་ཐུགས་རྗེ་ཀུན་ཁྱབ་ཀྱི་ཡེ་ཤེས་གསུམ་དབྱེར་མེད་པའི་ཐུགས་ཤེས་རབ་རང་བྱུང་གི་སྒྲོན་མ་རིག་སྟོང་དོན་གྱི་ཡེ་ཤེས་དངོ༵ས་ཆོས་སྐུ་འོད་གསལ་བའི་དགོངས་པ་དང་། དེའི་གཞི༵འམ་རྟེན་ཤིན་ཏུ་རྣམ་པར་དག་པའི་གཟུགས་ཀྱི་སྐུའི་མཐོང་བ་ཡེ་ཤེས་འོད་གསུམ་ལྡན་པའི་སྒྱུ་ལུས་གཉིས་ཟུང་འཇུག་དབྱེར་མེད་ཆེན་པོར་ལྟ་བས་མ་རྟོགས་ཤིང་བསྒོམ་པས་ཉམས་སུ་མ་ལོན་པ་ནི་མུ་དང་པོ་སྟེ། ཀུན་མཁྱེན་ཆེན་པོའི་རེས་ཤེས་པ་ལ་ཤེས་རབ་རང་བྱུང་གི་སྒྲོན་མ་བཏགས། རེས་ནང་གདངས་ལ་བཏགས། རེས་ལུ་གུ་རྒྱུད་ལ་བཏགས་པས་མགོ་རྨོངས་པར་ཟད་དོ། །ཅེས་དང་། རྒྱུད་ལས་ཀྱང་། སོ་སོའི་ངོ་བོ་དང་གདངས་སྣང་ཚུལ་རྒྱུ་འོད་ཀྱི་ཆ་གཉིས་གཉིས་གཉིས་སུ་གསུངས་པའི་ཕྱིར་རོ། །ཡང་དེ་དང་ཚིག་རིས་ཅུང་མི་མཐུན་ཀྱང་དོན་གྱིས་གཅིག་པར་སྔགས་རྒྱུད་ཀུན་ལས་སྐུ་གཉིས་སྒྲུབ་གཞི་དང་གྲུབ་འབྲས་བདག་གཅིག་གི་ཤེས་ཐོབ་ཀྱི་རྒྱུ་རྐྱེན་ཟུང་དུ་འབྲེལ་བའི་ལྟ་བས་ལྷ་སྔགས་ཆོས་ཉིད་དབྱེར་མེད་པའི་དོན་ལ་ངེས་པ་ཙམ་ཞིག་རྙེད་ཀྱང་དམིགས་བཅས་སེམས་ཀྱི་བསྒོམ་པའི་ཏིང་ངེ་འཛིན་བསྐྱེད་རིམ་བཅོས་མའི་སྒྲུབ་བློ་དང་། རྫོགས་རིམ་བཅོས་མའི་དགག་བློ་རྟོག་བཅས་བཅད་ལྡོག་གཉིས་དུས་སྐད་ཅིག་གཅིག་ལ་ཅིག་ཆར་དུ་འཆར་མི་སྲིད་དེ། འགྲོ་ལ་ཤེས་རྒྱུད་གཉིས་མི་མངའ། ཞེས་པས་བསྐྱེད་རྫོགས་རིས་འཇོག་གི་རྒྱས་འདེབས་སུ་ཤུགས་ཀྱིས་གྲུབ་པས་དེ་ལ་དགོངས་ནས་འཇིགས་གླིང་གིས་ཟབ་གསལ་དང་། སྣང་སྟོང་ལ་སོགས་པ་གཅིག་ལ་གཅིག་འབྲེལ་ནས། མ་ཡིན་ཞེས་པའི་བར་གྱིས་བསྟན་ནོ། །འདི་ཡང་སྨིན་བྱེད་བསྐྱེད་རིམ་གྱི་གཞི་འདིང་ནས། རྫོགས་པའི་རིམ་པའི་འོད་གསལ་དངོ༵ས་བསྐྱེད་པར་འདོད་པ་དང་བཅས་པ་ལ་གསུངས་སོ་སྙམ། ཡང་གཞི་ཀ་དག་ཏུ་འདོད་པ་དག་གིས་དང་། མ་ཟད་ཁྲེགས་ཆོད་རྐྱང་བའི་ལམ་སོགས་ཀྱིས་ཀྱང་མཐའ་བརྒྱད་སྤྲོས་བྲལ་གྱི་རིག་པ་ངོ་སྤྲད་ཅིང་རྟོག་དཔྱོད་ཙམ་གྱི་གོ་བས་ཐོག་མར་གནད་ཐོག་ཏུ་ཕེབ་པ་འདྲ་ཡང་། སྤྲོས་བྲལ་དུ་འཇོག་བྱེད་ཀྱི་གཞི་རྟེན་གདངས་གསུམ་འདུ་འབྲལ་མེད་པར་འགགས་མེད་ལྷུན་གྱིས་གྲུབ་པ་ཉིད་དུ་དེ་ཁོ་ན་ཉིད་དབྱིངས་རིག་གི་ལྟ་བས་མྱོང་ཐོག་ཏུ་མ་ཆགས་པའི་ཚིག་གི་མཐའ་མ་ཆོད་པའི་མཐའ་མ་དེའི་ཐོག་ཏུ་མི་གནས་པའི་པྲ་ཡས་པ་ལྟ་བུ་སྟེ༑ དེ་ཡང་རིག་སྟོང་ཤེས་རབ་རང་བྱུང་གི་སྒྲོན་མ་འོད་གསལ་གྱི་ངོ་བོ་ཙམ་ལས། རིག་གདངས་རྡོ་རྗེ་ལུ་གུ་རྒྱུད་སོགས་ལྷ་སྐུའི་ཕྱག་རྒྱ་དང་ཟུང་དུ་འཇུག་པའི་རིག་པ་རང་སྣང་གི་ལམ་སྒྲོན་མ་མཐོང་བརྟོལ་གྱི་དགོངས་པས་མངོན་དུ་འབྱིན་མ་ནུས་པས་དམིགས་པ་ཡུལ་གྱི་བློ་ཅན་རྣམས་ཀྱིས་ཀྱང་འཁྲུལ་སྣང་དང་འཁྲུལ་ཤེས་སུ་འདྲེས་པ་ལས་མ་འཁྲུལ་བའི་འབྲས་བུ་འཚོལ་ཀྱང་ཉམས་སུ་མྱོང་བ་མེད་པའི་མུ་གཉིས་པའོ། །མུ་གསུམ་པ་ནི་གཞུང་ཞལ་གསལ་བས་དེ་ཉིད་དུ་ཟད་དོ། །དགའ་རབ་རྡོ་རྗེའི། ཡིད་དཔྱོད་འཛིན་པའི་ལྟ་བ་ཉོན་རེ་མོངས། །དེ་ལ་བརྟེན་པའི་སྒོམ་པ་ཡི་རེ་མུག །དེ་ལས་བྱུང་བའི་སྤྱོད་པ་ཐང་རེ་ཆད། །དེ་ལ་འབྲས་བུ་རེ་བ་ཡོང་རེ་འཁྲུལ། །ཞེས་སོགས་དོན་གྱི་ཐོག་ཏུ་དབབ་པ་ལས་ཀུན་མཁྱེན་ཉིད་ཀྱིས་རྒྱས་སྤྲོས་སུ་ངོས་འཛིན་གནང་བའོ། །མུ་བཞི་བ་ནི། ཐེག་མཆོག་མཛོད་ལས། མངོན་སུམ་སྙིང་ཏིག་གི་གནད་རིག་པ་དངོས་སུ་མཐོང་བས། ལྟ་སྒོམ་ཡིན་སྙམ་ལ་རག་མ་ལུས། གཞི་མཐོང་བས་ལྡོག་པའི་ས་མེད་པར་འཁོར་འདས་དུས་གཅིག་ལ་ཆོད་པའི་རྣལ་འབྱོར་བ་ཞེས་བྱའོ། །ཞེས་དངོས་རིག་སྟོང་ཀ་དག་གི་ཡེ་ཤེས་ཁྲེགས་ཆོད་ཀྱི་ལྟ་བ་དང་། གཞི་རིག་གདངས་ལྷུན་གྲུབ་ཀྱི་རང་སྣང་ཐོད་རྒལ་གྱི་ལྟ་བ་དབྱིངས་ཐིག་ཟུང་དུ་འཇུག་པ་ལ་གསུངས་པར་མངོན་ཏེ། གོང་དུ་རིག་པ་དངོས་སུ་མཐོང་བས་ཞེས་དངོས་ཀྱི་ངོས་འཛིན་དང་། དེའི་དོན་གྱི་ཐོག་ཏུ་དབབ་པར། འདི་རིག་པ་ལུ་གུ་རྒྱུད་མཐོང་བ་ན་རིག་པའི་རང་བཞིན་ལ་བཟང་ངན་དང་འཕོ་འགྱུར་མེད་པར་ཐམས་ཅད་དེའི་ངང་ལས་འགྲོ་ས་གཞན་མེད་པས་གཞི་ཞེས་བྱ་སྟེ་གཞན་ཏུ་འཆོར་མི་སྲིད་དོ། །དེ་ཡང་རིག་པ་དེ་རླུང་གནད་གཅུན་པས་གྲོལ་བའི་རྟགས་སུ་འགྲོ་འོང་དུ་ཡོད་ལ། ཐིག་ལེ་ལ་བརྟེན་ནས་གྲོལ་བའི་རྟགས་སུ་ཐིག་ལེ་ཕྲ་མོའི་སྦྲེལ་དུ་ཡོད་ལ། རིག་པ་དེ་རྩའི་གནད་ལ་བརྟེན་ནས་གྲོལ་བའི་རྟགས་སུ་ལུ་གུ་རྒྱུད་ཕྲ་ཞིང་འཁྱོགས་པའི་འབྲེལ་ཡོད་པའོ། །དེ་གསུམ་ནི་རིག་པ་དངོས་མ་ཡིན་ཡང་། དེ་ལ་བརྟེན་པའི་ཡོན་ཏན་གྱིས་བཙན་ཐབས་ཀྱི་གནད་ཀྱིས་གྲོལ་བའོ། །རིག་པ་དེ་མཐོང་བས་མི་ཆོག་གོམས་དགོས་པའི་རྟགས་སུ་ལུ་གུ་རྒྱུད་གཅིག་ལ་གཅིག་འབྲེལ་དུ་ཡོད་པའོ། །ཞེས་སོགས་ཀྱི་གཞིའི་ངོས་འཛིན་གནང་བའོ། །༈ ད་ནི་འདི་དག་གི་གོ་དོན་ཅུང་ཟད་ཅིག་དཔོག་ན། ཀུན་མཁྱེན་གཉིས་པས་སངས་རྒྱས་པའི་ལམ་ཐམས་ཅད་ཀྱི་དངོས་གཞིར་གསུངས་པ་ནི། སྒྲུབ་གཞིའི་ངོས་ནས་སྣང་སྟོང་ཁྱབ་པ་གཉིས་ལྡན་གྱི་རིག་ཁམས། སྒྲུབ་བྱེད་ཀྱི་དངོས་གཞི་ལམ་ཚོགས་གཉིས་བསྐྱེད་རྫོགས་ཐབས་ཤེས། སྒྲུབ་འབྲས་ཀྱི་དངོས་གཞི་སྐུ་གསུམ་གྱི་འབྲས་ཆོས་མཐའ་དག་མངོན་དུ་གྱུར་པ་ཉིད་ཡིན་ཏེ། དང་པོའི་སྒྲུབ་ན་འགྲུབ་པར་ཤེས་པ་ཏིལ་ལ་མར་ཡོད་པར་ངེས་པ་ལྟ་བུའོ། །གཉིས་པས་ལམ་སྒྲུབ་དགོས་པར་ཤེས་ཏེ་བཏག་བཙག་གི་རྩོལ་བ་མ་བྱས་ན་མར་མངོན་ཏུ་མི་འབྱིན་པ་ལྟ་བུར་རོ། །གསུམ་པས་དེ་གཉིས་ཀྱི་གྲུབ་དོན་མཐར་འབྲས་བདེ་བླག་ཏུ་ཐོབ་པས་མར་ཐོན་པ་ལྟ་བུར་རོ། །རྒྱུ་མཚན་དེས་ན་སྙིང་ཐིག་གི་དགོངས་པའི་བརྟེན་ས་དོན་དམ་དངོས་ཆོས་སྐུ་མི་འགྱུར་བའི་བདེ་བ་ཆེན་པོ་འོད་གསལ་བའི་ཡེ་ཤེས་དང་། དེའི་རྟེན་གཞི་ཀུན་རྫོབ་རྣམ་དག་རྣམ་ཀུན་མཆོག་ལྡན་གྱི་ཕྱག་རྒྱ་གཟུགས་ཀྱི་སྐུ་དབྱེར་མེད་པའི་གཞི་ཨེ་ཝཾ་ཟུང་འཇུག་གི་དོན་ཤེས༵་པར་བྱས་ནས། ཐབས་ཤེས་བསྐྱེད་རྫོགས་ཀུན་གྱི་མཐར་ཐུག་པའི་ལྷན་སྐྱེས་ངེས་དོན་གྱི་ལྷ་དང་འོད་གསལ་བའི་རྫོགས་རིམ་ཆེན་པོ་ཁྲེགས་ཆོད་དང་ཐོད་རྒལ་ལམ་གྱི་ཨེ་ཝཾ་ཟུང་འཇུག་གི་ཉམས་ལེན་གྱིས་འཇུག་པས་འབྲས་བུ་སྐུ་ལྔ་ལྷུན་གྲུབ་ཨེ་ཝཾ་ཟུང་འཇུག་རྡོ་རྗེ་འཆང་གི་གོ་འཕང་མངོ༵ན་ཏུ༵་འགྱུ༵ར་བ༵་ཡིན་པའི་ཕྱིར་གཞི་ལམ་འབྲས་རྒྱུད་གསུམ་འབྲེལ་བའི་དངོས་གཞི་ཡང་དག་པའོ། །ཡང་མུ་བཞི་དང་པོའི་སྒྲ་བཤད་ནི། ལྷུན་གྲུབ་ཀྱི་སྣང་ཆ་གཞིར་འཇོག་པའི་རྒྱུ་མཚན་ལ། གཞི་ལམ་འབྲས་གསུམ་གྱི་ཟླས་ཕྱེ་བས་གཞི་ལ་བཤད་ན་བཀྲ་ཤིས་མཛེས་ལྡན་ལས་གསུངས་པ་ལྟར། ལྷུན་གྲུབ་ངེས་མེད་ཀྱི་གཞི་སྣང་ལ་ཐུགས་རྗེ་ངེས་མེད་ཀྱིས་རང་ས་ཟིན་མ་ཟིན་ལས་འཁོར་འདས་གྲོལ་འཁྲུལ་གྱིས་གཞིར་སོང་བ་དཔེར་ན་དུང་ཉིད་དཀར་པོ་དང་། སེར་པོར་སྣང་ཡང་དུང་གི་ཁ་དོག་དཀར་པོ་ལས་འགྱུར་མ་མྱོང་པ་ལྟ་བུར་གཞི་སྣང་ལྷུན་གྲུབ་རིན་པོ་ཆེའི་སྦུབས་རང་སྣང་ལོངས་སྐུའི་བཀོད་པ་འདི་གྲོལ་གཞི་ཡིན་པས། ཚིག་དོན་མཛོད་ལས། གཞི་སྣང་འདི་གྲོལ་གཞི་ཡིན་ལ། ཀ་དག་ནི་གྲོལ་ས་ཡིན་པས། འདི་གཉིས་བྱེ་བྲག་ཕྱེད་པའང་ཤིན་ཏུ་གལ་ཆེ་སྟེ་ལེགས་པར་ཕྱེད་པ་ཤིན་ཏུ་ཉུང་ངོ་། །ཞེས་གསུངས་པ་དང་། འོན་ཀྱང་མ་རིག་པའི་དབང་གིས་དཔེར་ན་དུང་སེར་སྣང་གི་བརྒྱུད་རྒྱུར་སོང་བ་ལྟར་ལྷུན་གྲུབ་གྱི་སྣང་བ་ཉིད་འཁོར་བའི་ཆོས་སུ་འཁྲུལ་བའི་ཕྱིར་འཁོར་འདས་གཉིས་ཀའི་གཞིར་གྱུར་བའང་ཡིན་ནོ། །དེའི་ན་མུ་ཏིག་ཕྲེང་བ་ལས། འཁྲུལ་གཞི་རྣམ་པ་མང་བཤད་ཀྱང་། །ལྷུན་གྲུབ་དང་ནི་ཐུགས་རྗེའོ། །ཞེས་སོ། །དེ་ཡང་གསང་འབྱུང་ཤེས་རབ་རང་བྱུང་གི་སྒྲོན་མ་རིག་པའི་ཡེ་ཤེས་ངོ་བོ་རང་བཞིན་ཐུགས་རྗེ་གསུམ་བརྩེགས་ཀྱི་རང་རྩལ་ཡེ་ཤེས་ལྔར་རྫོགས་པའི་རང་གདངས་འོད་ལྔ་ལོངས་སྤྱོད་རྫོགས་པའི་མཚན་དཔེ་སྐུ་ལྔ་སྤྲུལ་པའི་སྐུ་དང་བཅས་པ་ལས་འཁྲུལ་ནས་གཟུགས་བརྙན་ནམ་བག་ཆགས་ཀྱི་སྦུབས་སུ་འཐུམ་པའི་ཕྱིར་རོ། །ཡེ་ཤེས་མར་མེའི་རྒྱུད་ལས། འདི་ལས་གཞན་ཞིག་ཡོད་དམ། ཀྱེ་གསང་བའི་བདག་པོ་ཡེ་ཤེས་ལྔ་པོ་འདི་གཞི་ལ་གནས་པའི་ཡེ་ཤེས་ཞེས་བྱའོ། །འོད་ལྔ་ནི་མཚན་ཉིད་འཛིན་པའི་འོད་ཅེས་བྱའོ། །སྐུ་ལྔ་ནི་ཐུགས་རྗེ་སྤྲུལ་པའི་སྐུ་འོད་ཀྱི་ཁ་མིག་ཅན་ཞེས་བྱའོ། །ཞེས་དང་། རབ་འབྱམས་ལས། གཞི་དག་མེ་ལོང་ཡེ་ཤེས་ལ། །རྟོག་དཔྱོད་བཏང་བས་ཆུ་རུ་འཁྲུལ། ཞེས་སོགས་ལྟར་རོ། །ལྷུན་གྱི་གྲུབ་པའི་གཞི་སྣང་འདི་ནི་ཐུགས་རིག་པ་ཆོས་སྐུའི་ཡེ་ཤེས་ཤེས་རབ་རང་བྱུང་སྒྲོན་མའི་སྐུ་ཕྱག་རྒྱ་ཆེན་པོ་སྟེ་རྟེན་དུ་གནས་པ་རང་སྣང་ལོངས་སྐུའི་སྣང་བ་དངོས་ཡིན་པས་རིག་ན་གྲོལ་གཞིར་སོང་བའོ། །རྒྱུ་མཚན་དེའི་ན། ལམ་མམ་ལུས་ཐབས་རྒྱུད་ཀྱི་ངེས་པ་ལས་བཤད་ན་ནི། ལུས་རྟེན་གཞི༵་དང་། སེམས་བརྟེན་པ། ཀུན་རྫོབ་དང་དོན་དམ་(སྟོང་གཞི་ཆོས་ཅན་) སྣང་བ་དང་སྟོང་བ།(ཐབས་དང་ཐབས་བྱུང་)ཐབས་དང་ཤེས་རབ(སྨིན་བྱེད་ཀྱི་གཞི་དང་དངོས་འབྲས་ལས་མཆན།)བསྐྱེད་རིམ་དང་རྫོགས་རིམ། སྒྱུ་ལུས་དང་འོད་གསལ། ལྷུན་གྲུབ་དང་ཀ་དག གཟུགས་སྐུ་དང་ཆོས་སྐུ། རྟེན་སྐུ་དང་བརྟེན་པ་ཡེ་ཤེས་ཀྱི་ངེས་པ་ལས་ད་ལྟ་ལམ་གྱི་དུས་སུ་རྟོགས་བྱེད་ཐབས་ཀྱི་གཞི༵་ཤིན་ཏུ་རྣམ་པར་དག་པའི་སྒྱུ་ལུས་དང་འོད་གསལ་ལམ། གཟུགས་སྐུ་དང་ཆོས་སྐུ་དག་མཉམ་འབྱེར་མེད་ཆེན་པོ་ཉིད། བག་ཆགས་ཀྱི་ཕུང་པོ་ལ་བཞུགས་པ་ངོ་རང་ཐོག་ཏུ་སྤྲད་པ་འདི་འོད་གསལ་སྙིང་ཐིག་གི་མཐོང་དག་སྒྲོན་མའི་ལྟ་བ་བླ་ན་མེད་པ་ཡིན་པའི་གནད་ཀྱིས་རྩལ་རྫོགས་ལས། སྤྱོད་པ་ཐབས་ཀྱི་ལྟ་བ་ན། སྒྲོན་མ་ཉིད་ཀྱི་ལྟ་སྟངས་སོ༑ ༑ཞེས་དང་། སྒྲ་ཐལ་འགྱུར་རྩ་བའི་རྒྱུད་ལས། ཕྱི་དང་ནང་དང་གསང་བ་དང་། ཁོ་ན་ཉིད་དང་དབྱིངས་རིག་གོ །ཞེས་དང་། སངས་རྒྱས་རང་ཆས་ཀྱི་རྒྱུད་ལས། ཞེན་པ་མེད་པའི་ཐིག་ལེའི་མཐོང་བ་བརྟོལ་བ་ནི་ཡེ་ཤེས་ལ་ལྟ་བས་ལྟ་བའོ། །ཞེས་པ་དག་གི་ལྟར་གཞི༵་སྣང་ལྷ་སྐུའི་ཕྱག་རྒྱའམ། སྒྱུ་ལུས་གཟུགས་ཀྱི་སྐུ། བརྟེན་པ་ཡེ་ཤེས་ཀྱི་གཞི་རྟེན་དབྱིངས་དང་ཐིག་ལེ་ལུག་རྒྱུད་དེ་གདངས་གསུམ་ལུས་ལ་བཞུགས་པར་ངོ་སྤྲད་དང་ཉམས་སུ་ལེན་ཚུལ་ཁྱད་པར་རྫོགས་ཆེན་གསང་སྐོར་མན་ཆད་ལ་མེད་པས་རྒྱུད་ལས། གཟུགས་སྐུ་ལུས་ཀྱིས་བསྒྲིབ་པའི་ཕྱིར། །དེ་ཡི་ངོ་སྤྲོད་ཡོད་མ་ཡིན། ཞེས་སོ། །དེའི་ན་སྒྲོན་མའི་ལྟ་བ་འདི་སྙིང་ཐིག་རྡོ་རྗེ་སྙིང་པོའི་ཁྱད་ཆོས་བླ་ན་མེད་པ་ཞིག་ཏུ་ངེས་ཀྱང་། ཀ་དག་ཁྲེགས་ཆོད་ཀྱི་ཡེ་ཤེས་དང་སླད་ནས་ཟུང་དུ་འཇུག་རྒྱུ་མེད་པའི་སྣང་སྟོང་རྒྱུ་འོད་མཉམ་རྫོགས་ཆེན་པོར་བཞུགས་པའི་དངོས་དོན་མ་རྟོགས་པའི་སྐྱོན་ལ་དགོངས་པའོ། །མུ་དང་པོ་གཉིས་པོ་འདི་ལ་མཁྱེན་བརྩེའི་ལྷའི་གསུང་གི་ཚིག་གདོང་གཏད་ལ་མཚོན་ན་སྔ་མ་འདི་སྣང་སྟོང་ངམ་ལྷ་དང་ཆོས་ཉིད་དབྱེར་མེད་ཟུང་འཇུག་ཏུ་མ་རྟོགས་པ་དང་། ཕྱི་མ་རྟོག་དཔྱོད་རྗེས་དཔག་ཙམ་ལས་ལྟ་བས་མངོན་གསུམ་དུ་མ་རྟོགས་པས་མྱོང་ཐོག་ཏུ་མ་ཆགས་པས་ཞེས། གཞི་རྟོགས་བྱ་དང་། གང་ཟག་གི་རྟོགས་ཚུལ་གྱིས་བཞག་པ་ཞིག་དང་འདྲ་ཡང་། འདིའི་གཞི་རྩ་འཆའ་བའི་ཕུག ཐེག་མཆོག་མཛོད་ལས། འདིར་རྫོགས་པ་ཆེན་པོ་ཁ་ཅིག་གི་ཞེས་དང་མན་ངག་ཁ་ཅིག་ཞེས་གསུངས་པས། རྫོགས་པ་ཆེན་པོ་པ་སོགས་གང་ཟག་ལ་སྦྱར་བའི་ཚིག་ཅི་ཡང་མི་གསལ་བས། ( དམིགས་པ་ཡུལ་དང་རིག་པ་རང་སྣང་གི་མཆན། )འདི་བློ་རིམ་རྣམ་གཉིས་ལ་དགོངས་པའི་ཆོས་ལ་ཡིན་པར་གོ་ནས་སྙམ་དུ་བསམ་པ་ལས་འགྲེལ་ཚུལ་འདི་དག་ཁོ་བོའི་བློ་གཟོས་ཙམ་ནི་མ་ཡིན་ནོ། །ཅེས་པ་འདི་དེང་གི་དུས་སུ་སུས་ཀྱང་ཅི་ཟེར་ཆ་མི་ཆོད་པས་འགྲེལ་ཚུལ་སྣ་ཚོགས་སུངས་པ་ལ་རྨོངས་བརྟུལ་ག་ག་ཨ་བྷྱེས་ཐེག་མཆོག་མཛོད་ཀྱི་དོན་གྱི་དབྱིངས་ལ་འཇལ་ཞིང་བླ་མ་དམ་པའི་ཞལ་ལུང་དང་མཐུན་པར་སྦྱར་བའོ། །༈ གཞི་ཡིན་ལ་དངོས་མིན་པ་ནི། གསལ་བ་ལྷ་སྐུའི་སྣང་ཆ་ལ། ཟབ་པ་སྟོང་པ་ཉིད་ཀྱི་ངེས་ཤེས་ཀྱི་བསྡུ་གཤེགས་དང་རྒྱས་འདབས་སུ་བྱ་བ་དང་། དེར་མ་ཟད་སེམས་གསལ་སྟོང་ཟུང་འཇུག་དུ་དམིགས་པའང་བློའི་དམིགས་པ་ལ་རིམ་ཅན་དུ་འབྱུང་བ་ལས། དུས་སྐད་ཅིག་གཅིག་ལ་ཅིག་ཆར་དུ་སྣང་སྟོང་དམིགས་པ་གཉིས་མི་སྲིད་པས་རེས་འཇོག་ཏུ་ཤུགས་ཀྱིས་གྲུབ་པའི། སེམས་ཐོག་ནས་མྱོང་བ་ཙམ་གྱི་གཞི་ཡིན་ལ། རིག་སྟོང་ཟུང་འཇུག་སྤྲོས་བྲལ་དུ་རང་རིག་པས་མངོན་སུམ་དུ་མ་མཐོང་བའི་ཕྱིར་དངོས་མིན་ནོ་སྙམ་མོ། །ཡང་གནས་ལུགས་དངོས་ཀྱི་བཞུགས་ཚུལ་ཤེས་བྱ་སྤྱི་ལ་ཁྱབ་པའི་མཐའ་བརྒྱད་སྤྲོས་བྲལ་དུ་རྟོག་དཔྱོད་ཀྱི་ཤེས་པ་རྟོག་བཅས་ཀྱིས་ཕར་སྡོམ་འཇོག་ཙམ་དུ་མོས་སྤྱིའི་གོ་བ་ཙམ་ཡིན་ཡང་གཞི་སེམས་ཐོག་ནས་དོན་སྤྱི་ཙམ་ཡང་ཉམས་སུ་མྱོང་བ་མ་ཡིན་པའི་རྣམ་གཅོད་ཡིན་སྙམ་གྱི་ངེས་ཤེས་མོས་སྤྱི་ལ་ལྟོས་འཆའ་བས་གཞི་མ་ཡིན་ཞེའམ། ཡང་གཞི་སེམས་ཐོག་ནས་ཉམས་སུ་མྱོང་བ་མེད་པར་ཆོས་ཐམས་ཅད་དོན་དུ་རང་བཞིན་མེད་དོ་ཞེས་རྣམ་གྲངས་ཀྱི་དོན་དམ་དེའི་ལྷུན་གྲུབ་ཀྱི་ཕྱོགས་ནས་བསྐུར་བ་བཏབ། ཀ་དག་གི་གནས་ལུགས་ཀྱང་རང་བཞིན་མེད་པ་ཙམ་ཞིག་མིན་པར་མཐའ་བརྒྱད་སྤྲོས་བྲལ་དུ་བཞུགས་པ་མ་གོ་པས་ཆོས་ཉིད་དངོས་ཀྱི་ཕྱོགས་ལ་གོ་བ་ཙམ་ཡང་མ་ཆགས་པས་གཉིས་ཀའང་མིན། དེར་མ་ཟད་རང་བཞིན་སྟོང་ཕྱོགས་ཀྱང་བཅར་ཕོག་ཏུ་མངོན་སུམ་མཐོང་བས་སླེབས་པ་མ་ཡིན་པར་སྤྱི་འབྱམས་དཔྱད་རྟོག་གི་གོ་ཡུལ་ཙམ་དུ་འཕྱན་པ་ནི་གཞི་དང་དངོས་གཉིས་ཀ་མིན་པའོ་སྙམ། ཡང་འདིར་ནི། སྣང་སྲིད་ཀྱི་ཆོས་ཐམས་ཅད་སེམས་ཀྱི་འཁྲུལ་སྣང་དུ་གཏན་ལ་ཕབ་ནས་རང་རྒྱུད་པ་མེད་པར་ཐག་གཏིང་ནས་ཆོད་ཅིང་། གཞི་རྩ་སེམས་ཀྱི་གནས་ལུགས་སྣང་སྟོང་གཅིག་ལ་གཅིག་འབྲེལ་ཙམ་དང་། སྣང་སྟོང་བདེན་གཉིས་ཐ་དད་ཟུང་འཇུག་ཏུ་བཅོས་པ་དང་། མཐའ་བརྒྱད་སྤྲོས་བྲལ་དུ་དཔྱད་བཞག་གི་ངང་དུ་གཟུང་འཛིན་སེམས་ཀྱི་དམིགས་གཏད་ཀྱིས་གོ་མྱོང་ཙམ་ལ་གདེངས་འཆའ་བ་མ་ཡིན་པར་གདོད་ནས་རིག་སྟོང་མཉམ་རྫོགས་དབྱེར་མེད་སྤྲོས་བྲལ་རང་གྲོལ་ཆེན་པོ་སེམས་ལས་འདས་པའི་སོ་སོར་རང་རིག་པའི་ཡེ་ཤེས་མངོན་སུམ་དུ་སྟོན་པའི་ཕྱིར་གཞི་དང་དངོས་གཉིས་ཀ་ཡིན་པའོ་སྙམ་དུ་སེམས། འདི་རྩལ་འགྲེལ་ཡིན་གྱི་བླ་མའི་ཞལ་རྒྱུན་སོགས་མིན་པས་ཡིད་བརྟན་མི་འོས་ཀྱང་ག་ག་ཨ་བྷྱེས་སོ། ། རྟོགས་པའི་དོན་གྱི་འདྲ་འབག་རྡོ་རྗེའི་དྭ་ཧའི་རྩེ་མོ།༈ རྟོགས་པའི་དོན་གྱི་འདྲ་འབག་རྡོ་རྗེའི་དྭ་ཧའི་རྩེ་མོ་ཞེས་བྱ་བ་བཞུགས་སོ། ། ཐོག་མའི་སངས་རྒྱས་ཀུན་ཏུ་བཟང་པོ་ནི། །ངོ་བོ་རང་བཞིན་ཐུགས་རྗེ་མ་བཅོས་པར། །ལྷུན་གྲུབ་སྐུ་གསུམ་རྒྱལ་བའི་ཕྱི་མོ་ལ། །རྣམ་པ་ཀུན་ཏུ་འབྲལ་མེད་རིག་པས་འདུད། ཁྱེད་གསུང་མ་ལྡོག་ཙམ་དུ་ཅུང་ཟད་ཅིག །བྲི་རྒྱུ་མ་རྙེད་དལ་ཞིག་དཀའ་བསམ་ན། །རང་སེམས་ཆོས་ཉིད་དག་པའི་འོད་གསལ་དུ། །བདུད་འཇོམས་དཔའ་བོ་ཆེ་ལ་གསོལ་བཏབ་བྲིས། །ཨེ་མ་ཧོ། །དངོས་ཀྱི་དག་པ་ཆོས་ཉིད་དེ་བཞིན་པ། །སོ་སོ་རང་རིག་ཡེ་ཤེས་སྤྱོད་ཡུལ་ནི། །སེམས་ཅན་རྣམས་ཀྱིས་སྐད་ཅིག་གཞལ་མི་ནུས། །འདུས་མ་བྱས་པ་བློ་ལས་ཟང་ཐལ་ལོ། །ཡང་དག་གཉུག་མ་ཁྱབ་བརྡལ་ཆེན་པོ་ནི། །ཡེ་ནས་སེམས་ཅན་ཀུན་ལ་འབྲལ་འདུ་མེད། །དེ་ཉིད་བྱང་ཆུབ་རིག་སྟོང་སྐུ་ཡིན་ཏེ། །སྐུ་ནི་མི་མངོན་མ་སྐྱེས་སྒྱུ་མའི་གར། །མེད་སྣང་ཉག་གཅིག་བདེ་བ་ཆེན་པོ་སྟེ། །ལྷུན་གྱིས་གྲུབ་པ་རང་བཞིན་མ་འགགས་པས། །རོལ་པའི་རྩལ་དུ་འཁོར་འདས་ཨ་ཕྱིར་བཞེངས། །སྣང་བ་ཐམས་ཅད་བྱང་ཆུབ་སྐུ་ལའོ། །སྐུ་ལས་སྣ་ཚོགས་བཟང་ངན་ལྟར་སྣང་བ། །དག་པའི་ཞལ་དང་ཕྱག་དང་དེ་བཞིན་ཡུལ། །ཡབ་ཡུམ་རྒྱན་སྣང་རྩལ་གྱི་འཁོར་ལོ་ཆེ། །གཞིར་བཞེངས་མཉམ་པ་ཉིད་ལ་བབས་ཀྱིས་གྲུབ། །དེ་ལ་ཕྱོགས་ཆད་མི་དམིགས་སྒྱུ་འཕྲུལ་རྩེན། །དཔག་པའི་གྲངས་མེད་ཐམས་ཅད་སྐུར་ཤར་བ། །བཟོ་དང་སྐྱེ་བ་ལ་སོགས་མཐའ་མི་མངོན། །གང་འདུལ་རྩོལ་བྲལ་འདུས་མ་བྱས་སུ་ཞུགས། །མང་པོར་སྐུར་གསལ་དབུགས་འབྱིན་ཞིང་ལྔ་རུ། །རིགས་བརྒྱ་རིགས་ལྔ་ལ་སོགས་རྩོལ་མེད་ལས། །འཛད་མེད་ཡེ་ཤེས་འཕྲུལ་གྱི་སྒོ་རུའོ། །ངོ་བོ་དབྱིངས་བཞུགས་རིག་པའི་རང་བཞིན་གདངས། །སྐྱེ་འགགས་འགྱུར་མེད་བཅོས་མེད་བབས་ཀྱི་ཀློང་། །ཞལ་ཕྱག་མཚན་བྲལ་ཆོས་ཀྱི་དེ་བཞིན་མཆོག །སྟོང་ལ་སྣང་ལ་ཡོད་མཉམ་མེད་མཉམ་པར། །རང་དག་ཟུང་འཇུག་ལང་ཚོས་མཛེས་འཛུམ་ཟེར། །ཕ་རོལ་མཐར་ཕྱིན་སྲིད་ཞིར་མཁར་སྦྲུམ་ཡུམ། །དེ་ཙམ་ཆར་མིན་གང་གི་གཞིར་བཞུགས་ཡབ། །སྣང་སྟོང་མ་བྲལ་བྱང་ཆུབ་ཆོས་ཀྱི་སྐུ། །ཐམས་ཅད་སྐུ་ལ་འདུ་འབྲལ་མ་མྱོང་བ། །མི་གནས་དག་པ་རྒྱལ་ཀུན་བླ་མར་བཞུགས། །ངོ་བོ་ཉིད་དབྱིངས་རིག་པའི་དོན་གྱི་སྐུ། །ཐམས་ཅད་ཐམས་ཅད་རྡོ་རྗེའི་སྐུ་ལ་རྫོགས། །མི་ཤིགས་ཆོས་ཆེན་བདུན་གྱི་བདག་ཉིད་ནི། །ནམ་མཁའ་ལྟ་བུར་སྤྲོས་པའི་དྲྭ་བ་དབེན། །ཡེ་ནས་རང་ལ་འབྲལ་འདུ་ཡོད་མ་མྱོང་། །མི་འགྱུར་རྡོ་རྗེ་ལྟ་བུ་སྐུ་ཡི་དབྱིངས། །ཨེ་མ་ཧོ། གསུང་མེད་གསུང་ནི་ཆེད་བརྩལ་འཆིང་བ་དག །དབང་པོ་རབ་འབྲིང་ཐ་མའི་སྒོར་ཤར་ཏེ། །གང་ཟག་བདག་མེད་ཙམ་དང་ཆོས་ཕྱེད་རྟོགས། །སོ་སོར་རྟོག་དངོས་ཀུན་འབྱུང་འདྲེན་པ་གསུམ། །ཐམས་ཅད་གསུངས་ལ་བདག་གཉིས་རྟོགས་པར་རྫོགས། །དེ་ཀུན་མ་སྐྱེས་མ་འགགས་མི་གནས་གསུམ། །རྡོ་རྗེ་རྡུལ་བྲལ་དག་པའི་གསུངས་མཆོག་ཏུ། །འཁུ་ཞིང་གཤོང་བ་མ་དམིགས་ཆུ་བོ་ཕྲན། །བདག་ལྟ་ལྟ་སྤྱོད་གོང་འོག་འཛིང་མཉམ་སྤྱོད། །དངོས་གྲུབ་རྗེ་འབངས་གྲོགས་ཀྱི་གཉིས་མེད་ཀྱི། །གང་ལྟར་བསྐལ་བའི་གཉེར་བྱ་རྣམ་པ་གསུམ། །ལྡན་ཆོས་དཀའ་ཐུབ་རིག་བྱེད་ཐེག་བསྟན་པ། །གསུང་གསང་རྡོ་རྗེ་བཀོད་པ་ལྷུན་གྲུབ་ཏུ། །ཐམས་ཅད་ཐམས་ཅད་རྣམ་དག་ལྷ་ཡི་ལྷ། །དངོས་གྲུབ་ཐམས་ཅད་མ་བཙལ་རང་ལ་རྫོགས། །དེ་ཡང་མཆོག་གསང་རབ་འདིའི་ཆུ་བོ་ཕྲན། །སྣང་སྲིད་ལྷར་བཀོད་དབྱིངས་ཡེ་རྒྱུ་འབྲས་སུ། །རློམ་ནས་ཁྱེར་སོ་གསུམ་དང་ཞི་བདེ་ཡི། །དག་སྦྱོངས་རིག་རྟོག་དགའ་བཞིའི་ལྷན་སྐྱེས་ཀྱི། །ཡེ་ཤེས་དངོས་གྲུབ་སྒྲུབ་པར་ངེས་དབང་བསྒྱུར། །སྣོད་བཅུད་སྣང་སྲིད་བྱང་ཆུབ་སྐུ་གསུང་ཐུགས། །རིགས་ལྔ་སྐུ་ལྔ་ཡེ་ཤེས་རིག་པའི་དབྱིངས། །རང་བཞིན་བྱང་ཆུབ་གསུང་ཆེན་ཨ་ཏི་ལ། །ཀུན་རྫོགས་དེ་དག་ཆུ་བོ་ཕྲན་རྣམས་ཀྱང་། །གསུངས་ཆེན་གཅིག་པུར་དྲངས་པའི་ལུང་བསྟན་ཆེ༑ ༑མ་ཟད་དེ་དག་སྒྲིབ་པ་བརྒྱད་དུ་ངེས། །ངང་ལ་གཅིག་རྫོགས་གཉིས་རྫོགས་ཐམས་ཅད་རྫོགས། །རྒྱ་མཚོ་ཆེ་ཀློང་ཐེག་ཕྲན་སྟེགས་ཀུན་འབབས། །གཞན་གང་སྤྲོས་པ་ཚིག་གི་བཟང་ངན་ངག །ཀུན་བཟང་བདེ་གཤེགས་སྙིང་པོའི་གསུང་ཉིད་དེ། །སྒྲ་སྐད་གསུང་ཆེན་མི་ཟད་རྒྱན་དུ་ཤར། །དེ་དག་བསལ་བཞག་མེད་པའི་གསང་སྔགས་མཆོག །ཨེ་མ་ཧོ། རྣམ་པ་ཐམས་ཅད་ཐམས་ཅད་མཆོག་ལྡན་ཐུགས། །དབྱིངས་མེད་དབྱིངས་ཉིད་སྤྲོས་མཚན་ཀུན་དང་བྲལ། །ཟབ་ཞི་གཞོན་ནུ་བུམ་པ་སྐུ་ཡི་གདངས། །བྱང་ཆུབ་རང་བཞིན་འཛིན་མེད་རང་སར་ཞི། །འབྲལ་མེད་སྐྱོངས་མེད་བཙལ་ལས་གྲུབ་པ་མེད། །འབྲེལ་འབྱུང་སྒྱུ་མའི་ཆོས་སུ་ཚར་མ་ཕྱིན། །གཞི་མེད་རྩ་བྲལ་ཁྱབ་བརྡལ་མུ་མཐའ་མེད། །སྣང་མིན་སྟོང་མིན་གཉིས་གཉིས་མཐར་མ་བརྒལ། །བརྒལ་དང་མ་བརྒལ་ཆེད་དུ་འཛིན་པ་ཞིག །གང་ལྟར་བརྟགས་པ་དེ་བཞིན་མ་ཡིན་ལ། །འགལ་མིན་རང་གི་རིག་བྱ་སོ་སོ་བ། །རྟོག་པ་ཟད་པ་གཏད་མེད་རྒྱ་ཡན་ནི། །མ་བཅོས་ལྷུག་པ་ཕྱལ་བ་ཟང་ཀ་མ། །ཁྲལ་ཁྲོལ་འདིར་དམིགས་དག་པའི་དགོངས་ཤར་བ། །རེ་དོགས་གཉིས་མེད་མཉམ་གྲོལ་ཡེ་ཤེས་སུ། །མ་སྤངས་རང་གྲོལ་ཉོན་མོངས་རྒྱན་དུ་ཤར། །མེ་ལོང་ཆོས་དབྱིངས་མཉམ་ཉིད་སོར་རྟོགས་དང་། །བྱ་གྲོལ་ཆེན་པོའི་ལས་བཞི་ལྷུན་གྲུབ་པོ། །ཤིན་ཏུ་རྣལ་འབྱོར་ལྟ་བསྒོམ་སྤྱོད་པ་ཡི། །ཐ་སྙད་བཏགས་པ་ནམ་མཁའི་གོ་རིམ་བཞིན། །བྱར་མེད་གཤིས་ལ་འཚལ་བ་མ་ཡིན་ཏེ། །བཅིང་བ་མེད་པ་གྲོལ་བར་ག་ལ་སྲིད། །བསྡམ་པ་མེད་པར་གློད་པ་ཡོད་དམ་ཅི། །གོས་པ་མེད་པ་དག་པར་གནམ་པོའི་ཡུལ། །དམིགས་སུ་མེད་པ་དམིགས་པའི་དུག་གིས་བསླད། །འཁྲུལ་བ་མེད་ལ་གྲོལ་བ་ལྟོས་གཞི་ཟད། །དཔེ་ཡིས་མཚོན་པར་མི་ནུས་རང་བཞིན་བབས། །ཚིག་གིས་བརྗོད་བྱར་མི་འོས་གདོད་མ་ཉིད། །དོན་གྱི་སྟོན་བྱའི་དངོས་མེད་རྩ་བྲལ་དོན། །ཡིད་དཔྱོད་སྒྲོགས་སུ་མ་ཚུད་རིག་པའི་གདངས། །ཡུལ་འཛིན་རེ་དོགས་བྲལ་བ་རང་གི་ཞལ། །མི་རྟོག་མི་གཉིས་གཟུང་འཛིན་འཇུག་པ་གྲོལ། །སེམས་སུ་མ་འཁྲུལ་ངོ་བོ་ཉིད་ཀྱི་ངང་། །བག་ཆགས་མངལ་རྒྱར་མ་ཚུད་རྗེན་པའི་ཞལ། །ཐུགས་ཕྲད་ཡུལ་ལ་མི་འཕྲོ་ཡུལ་མ་འགགས། །ཆེད་འཛིན་ཞིག་པས་མངོན་པའི་ང་རྒྱལ་མེད། །གཉེན་པོ་བཟང་ངན་གང་གིས་བསྒྱུར་དུ་མེད། །གཞི་རྫོགས་ལམ་རྫོགས་འབྲས་བུ་ལྷུན་གྲུབ་རྫོགས། །ཡེ་རྫོགས་ཕྱལ་བ་སྐྱོན་ཡོན་སླད་མ་ཞུགས། །མ་ཉམས་མ་སྨད་རྒྱ་ཆེ་དཔང་ཀྱང་མཐོ། །མ་ཆགས་དག་པ་འཁོར་འདས་གཉིས་ཆར་ཡང་། །དག་དང་མ་དག་རིག་དང་མ་རིག་ལས། །ཐམས་ཅད་ཀུན་བཟང་མི་བཟང་མེད་པར་ནི། །ཕྱམ་གཅིག་མ་སྐྱེས་དང་པོའི་གཞི་ལ་ཕྱལ། །སངས་རྒྱས་ཀུན་ལས་སྔར་རྒྱས་ཡེ་ཕྲལ་མིན། །སེམས་ཅན་ཀུན་ལ་བསྐལ་བ་དོར་མེད་བ། །སྟོང་ཉིད་མཚན་མ་སྨོན་པ་མེད་པས་བསྡུས། །དེ་ཡང་གཏིང་གསལ་ཆེན་པོར་རང་བཞིན་ལྷག །གློ་བུར་བྱིས་པའི་མ་རིག་ཁམས་ཆེན་པོའི། །ཀུན་གཞིར་མ་བསྒྱུར་ངང་ལ་སྐྱོན་མ་ཞུགས། །རྨི་ལམ་བཞིན་དུ་འཁྲུལ་པའི་ལྷན་སྐྱེས་ཀྱི། །ཀུན་ཏུ་བཏགས་གང་རླུང་ལྔའི་དེ་མ་ཐག །ཡེ་ནས་གཞི་ལ་མ་ནོངས་ཨ་ལ་ལ། །རྩལ་གྱིས་ངོ་བོ་སྒྲིབ་པ་ཡུལ་མེད་དུ། །རྟོགས་པ་ཙམ་ཞིག་ལམ་གྱི་མདོ་རུ་བཤད། །སངས་རྒྱས་རྣམས་ཀྱི་ཐུགས་ལ་གཤིས་གཞིག་ཀྱང་། །ཡེ་ཤེས་རྒྱ་མཚོ་ཆེ་འདིར་ཆུ་བོ་གཅིག །དུ་བྲལ་རང་བཞིན་བྱས་བའི་ཆོས་མ་ཡིན། །དབང་གིས་བརྡ་ཤོག་དགོད་དུ་མ་དགོས་ལ། །དགོངས་བརྒྱུད་བྱིན་རླབས་སྟོབས་ཀྱིས་སྤྱི་བླུགས་རྫོགས། །གང་མ་ལྡན་ཀྱང་དེས་ནི་བཤོལ་དུ་མེད། །རྣམ་རྟོག་འཕྲོ་འདུས་བསྐྱེད་པའི་ཡུལ་ལས་འདས། །བཟླས་བརྗོད་རྫོགས་རིམ་ཟད་པའི་སྤྲོས་མེད་ནི། །དམ་ཚིག་བསྲུང་མེ༵ད་ཕྱ༵ལ་ཡས་གཅི༵ག་ཏུ་གྲུབ༵། །རང་བཞིན་བཅུ་ཡིས་དེ་ལ་ཅི་ཞིག་བྱས། །སྒྲིབ་པའི་སྤྲིན་ལ་དཀར་ནག་ཡོད་དམ་ཅི། །མཚོན་དུ་མེད་ལ་དཔེ་ཡི་གཞོལ་འགྱུར་རམ། །གནས་ལུགས་ཅི་བཞིན་རྒྱུ་འབྲས་གཉིས་ལས་མིན། །ལྟོས་ནས་བརྟགས་པའི་ཡུལ་ཀུན་མེད་པ་ན། །ལྟོས་གཞི་ཡོད་སྙམ་ལོག་པའི་བློ་བྲེལ་ལོ། །འདུས་བྱས་བསྒྲུབ་པས་འདུས་མ་བྱས་མི་འགྲུབ། །མཁའ་ལ་ཐེམ་སྐས་བཙུག་འདོད་མི་བླུན་ནམ། །ཐོས་བསམ་གཉིས་ཀྱི་དེ་ལ་དབང་མ་བསྐལ། །མཉམ་པར་བཞག་པའི་བདེན་དོན་ཇི་བཞིན་པ། །རང་བཞིན་བབས་ཀྱིས་ཉམས་མྱོང་ཁུང་ནས་རྡོལ། །ཆོས་ཉིད་མཁའ་ལ་མཁྱེན་གཉིས་ཉི་མ་འཆར། །མ་བཞག་གཉེར་བའི་རྙོགས་མ་དཀྲུག་པ་ལས། །ཆུ་བོའི་དྭངས་གསལ་གསལ་བར་ག་ལ་མངོན། །ཐོག་མཐའ་མེད་པ་ཤེས་རབ་ཡེ་ཤེས་ཆེ། །གཞལ་བྱ་བློ་ཡིས་འཇལ་བར་ཅི་སྟེ་ནུས། །རིག་པ་ཡེ་ནས་གཞན་དུ་མ་སོང་བས། །ནམ་ཡང་འདུ་འབྲལ་ཡོད་པ་མ་ཡིན་ནོ། །ང་དང་ང་ཡིར་འཛིན་པ་གཉིས་མེད་ཀྱང་། །མོས་པ་ཚིག་གི་མཚོན་ཆར་དེ་སྐད་དུ། །སེམས་དང་སེམས་བྱུང་ཉོན་མོངས་ཉེ་བར་བཅས། །ཐམས་ཅད་མ་ལུས་བྱང་ཆུབ་རོལ་བར་ཤར། །ངོ་བོ་མི་གཡོས་མི་འགྱུར་རྡོ་རྗེར་ཆེ། །རྒྱ་མཚོ་ཆེ་ལས་རླངས་པ་ཅི་བཞིན་ནོ། །ཡེ་ནས་གཡོ་མེད་རི་བོ་ལྟར་བརྟན་ཡང་། །ཕྱོགས་མེད་ཐུགས་རྗེ་དག་པའི་རྟོགས་མེད་པ། །ཡིད་བཞིན་ལྗོན་པ་འདོད་འཇོའི་བུམ་བཟང་བཞིན། །བཅུ་གཉིས་མཛད་པ་གཞན་ངོར་རྒྱུན་མི་ཆད། །ངང་ཉིད་སྤྲོས་མེད་མཁའ་བཞིན་དག་པ་ལ། །གློ་བུར་སྤྲིན་བཞིན་མ་དག་འཁྲུལ་པའི་སྒོར། །སེམས་ཅན་རྣམས་ཀྱི་རྣམ་པར་རྟོག་པའི་གདུང་། །འོན་ཀྱང་རྣམ་དག་དབྱིངས་ཀྱི་བཏང་བའང་མེད། །ངང་མདངས་ངེས་པ་དོན་གྱི་དབྱིངས་འཁྱིལ་བར། །གདུལ་བྱའི་དབང་གི་གང་འདུལ་སྣ་ཚོགས་གསུངས། །ངེས་དོན་མཐར་ཐུག་འདི་ཡི་ཉག་ཕྲན་རེ། །ཁམས་དབང་བསམ་པར་མཐུན་ཏེ་མི་གསུང་གསུངས། །བསྟན་མེད་གཟུགས་མེད་དམིགས་མེད་མཚོན་མེད་ལ༑ ༑རྟོག་མེད་བརྗོད་མེད་སྐྱེ་མེད་འགགས་པ་མེད། །གནས་མེད་འགྲོ་འོང་མེད་པ་དོར་ལེན་མེད། །ཐ་དད་གཅིག་ཏུ་མ་ངེས་གྲུབ་མཐའ་ནི། །ལྟར་མེད་བསྒོམ་མེད་རང་བཞིན་དག་པ་དེ༑ ༑སྤྱོད་མེད་སྒྲུབ་མེད་སྤྲོས་མེད་ཕྱལ་བ་ཆེ། །མེད་པ་ཕྱང་ཆད་བེམ་སྟོང་ཕྱོགས་གཅིག་མིན། །ལུང་མ་བསྟན་མིན་ལུང་དུ་སྟོན་པའང་མེད། །འདི་ཡིན་འདི་མིན་མིང་དངོས་མཐར་ཞེན་ཞིག །རྟག་མིན་ཆད་མིན་བདག་མིན་སྲོག་སོགས་མིན། །གང་ལྟར་བརྗོད་ཀྱང་ཐམས་ཅད་བྱང་ཆུབ་མིང་། །གང་ཡང་འགལ་མེད་ཡིན་མིན་སྤྲོས་པ་ཞི། །སྔར་དང་མུ་དང་གྲུབ་པ་གཞན་ཀུན་མཉམ། །ཕྱི་ནང་བར་མེད་ཡངས་པ་གོ་སྐབས་འབྱེད། །སྟེང་འོག་ཕྱོགས་མེད་སངས་རྒྱས་སེམས་ཅན་མཉམ། །ལྷ་མེད་འདྲེ་མེད་ཕན་གནོད་གཞི་རྩ་མེད། །སྣང་ངོ་སྟོང་ངོ་ཡིན་ནོ་མིན་པ་མེད། །ཐམས་ཅད་ཀུན་གྱི་སྤྱི་ཆིངས་ཡིན་པས་ན། །དངོས་རྣམས་སྟོང་ཉིད་ངང་དུ་ལ་བཟློས་ཤིག །སྟོང་རྣམས་རང་གསལ་ངང་དུ་ལ་བཟློས་ཤིག །སྐྱེ་རྣམས་སྐྱེ་མེད་ངང་དུ་ལ་བཟློས་ཤིག །སྐྱེ་མེད་ཉག་གཅིག་ངང་དུ་ལ་བཟློས་ཤིག །ཉག་གཅིག་སྤྲོས་མེད་ངང་དུ་ལ་བཟློས་ཤིག །སྤྲོས་མེད་ཡེ་གྲོལ་ངང་དུ་ལ་བཟློས་ཤིག །ཡོངས་གྲོལ་ཕྱོགས་མེད་ངང་དུ་ལ་བཟློས་ཤིག །ཕྱོགས་མེད་ཁྱབ་བརྡལ་ངང་དུ་ལ་བཟློས་ཤིག ཁྱབ་བརྡལ་བུམ་པའི་སྐུ་རུ་ལ་བཟློས་ཤིག །ཐམས་ཅད་ཕྱམ་གཅིག་ཡེ་སངས་ལ་བཟློས་ཤིག །ཆོས་ཅན་ཆོས་ཉིད་ཆེན་པོར་འགགས་སུ་བསྡོམ། །ཆོས་ཉིད་རིག་པ་ཆེན་པོར་འགགས་སུ་བསྡོམ། །རིག་པ་ཡེ་གྲོལ་ཆེན་པོའི་འགགས་སུ་བསྡོམ། །ཡེ་གྲོལ་གཉིས་སུ་མེད་པར་འགགས་སུ་བསྡོམ། །མིང་ལ་ངལ་བ་ཐེག་པ་རིམ་པ་བརྒྱད། །ཤིན་ཏུ་རྣལ་འབྱོར་སེམས་ཀློང་མན་ངག་གནད། །འབུམ་ཕྲག་དགོངས་པ་འདུས་ལ་སུ་ཞིག་སྨྱོན། །དེ་ཕྱིར་རང་རིག་སྟོང་གསལ་གང་གི་ཀློང་། །འཁོར་འདས་དབང་ཐོབ་རྣལ་མའི་ངང་ཉིད་ལས། །གར་ཡང་མ་ཕྱིན་གདོད་མའི་རྒྱལ་ས་ན། །མི་གཡོ་བྱང་ཆུབ་སྙིང་པོ་རང་ལ་འབྱོར། །རྩལ་དང་རོལ་པའི་ཡུལ་ལ་རང་ཆེར་དབང་། །ངང་ལས་ཀུན་འབྱུང་སྣང་བ་མཐའ་ཡས་པས། །ཡོན་ཏན་ལྷུན་སྡུག་བཀོད་པའི་མཁྱེན་གཉིས་ཆར། །དག་གྲོལ་གཉིས་ལྡན་ཐིག་ལེ་བདེ་ཀློང་ཆེ། །མེད་གཅིག་ལྷུན་གྲུབ་ཕྱལ་བའི་གནས་ཀུན་འདུས། ༈ ཨེ་མ་ཧོ། ངང་ལ་བལྟ་བར་བྱ་བ་མེད་པ་ལ། །ལྟ་བ་ཞེས་སུ་སྒྲོ་བཏགས་མིང་ལ་ངལ། །བལྟར་མེད་ངང་ལ་མཐོང་བ་ཆེན་པོ་ནི། །ཀུན་ཁྱབ་སྟོང་བ་བྱང་ཆུབ་ལྟ་བའོ། །བལྟས་ཤིང་ཡང་དག་དོན་ལ་མཐོང་བ་མེད། །མ་བལྟས་ཅི་ཡང་མ་མཐོང་ངང་མཐོང་ལ། །ངང་མཐོང་སངས་རྒྱས་ཀུན་གྱི་དེ་ཉིད་མཐོང་། །དེ་ཉིད་མཉམ་ཉིད་བྱང་ཆུབ་ཁྱོད་ལ་བརྡོག །རབ་ཏུ་མི་གནས་བྱང་ཆུབ་ཆེན་པོའི་དོན། །བརྡལ་ཁྱབ་རྡོ་རྗེ་ཡེ་ཡོད་རིག་པའི་སྐུ། །མཐོང་བར་འདོད་པས་རྩོལ་སྒྲུབ་ལོག་ལྟ་བའི། །རང་ལ་བཞག་ནས་གཞན་དུ་བཙལ་བས་ཅི། །མཁན་པོ་རང་སྟོང་བལྟ་བྱའི་ཡུལ་བཅས་པ། །མཉམ་གྲོལ་དབྱེར་མེད་བཞག་པས་རབ་མཐོང་བ། །མིག་དང་དབང་པོའི་ཡུལ་ལས་བསྐལ་ནའང་། །དེ་ནི་མི་ལྟ་ལྟ་བ་ལྟ་བའི་ཟབ། ཨེ་མ་ཧོ། བསྒོམ་མེད་བྱང་ཆུབ་སྙིང་པོ་བླ་ན་མེད། །ངང་བཞག་རྒྱ་ཡན་ལྷུན་འབྱམས་ལྷུག་པའི་ངང་། །སྙེམ་མེད་ཕྱམ་གཅིག་ཀློང་རྫོགས་བསལ་བཞག་མེད། །མ་བཟུང་མ་བཏང་འཇུར་བུའི་སྒྲོགས་ལས་གྲོལ། །མ་བཅོས་འོད་གསལ་གཉུག་མ་རང་གི་རིག །སྟོང་པའི་བདེ་ཀློང་ཡངས་བ་ཕྱམ་བྲལ་བ། །བཞི་ཆ་གསུམ་མིན་དུ་མ་གཅིག་འདས་པས། །དེ་ལ་སྐྱོངས་བསྡུད་མེད་དོ་ཨེ་མ་ཧོ༑ ༑བསྒོམ་གྱིན་རྣལ་མ་བྱང་ཆུབ་ཞལ་ལ་སྒྲིབ། །ཡིད་དཔྱོད་ལམ་ན་བློ་ལས་འདས་པ་མེད། །སོ་སོ་རང་རིག་ཡེ་ཤེས་སྤྱོད་ཡུལ་བ། །དེ་ལ་བློས་བཅོས་བསྒོམ་པས་ཅི་ཞིག་བྱས། །རང་བཞིན་ཐ་མལ་འཁྲུལ་བའང་མ་ཡིན་ཏེ། །མ་འཁྲུལ་རྩེ་གཅིག་སྐུ་བཞི་ལྷུན་གྲུབ་པ། །ལམ་གྱི་རིག་པར་ཧར་སངས་ཡན་པ་ནི། །གུ་ཡང་བློ་བདེ་བྱར་མེད་ཆེན་པོ་སྟེ། །རྟོག་ཚོགས་ཕྲ་རགས་གང་ཅི་ཕྱམ་གཅིག་པར། །རང་གྲོལ་གཉེན་པོ་མེད་པས་རང་རྒྱས་ཆོད། །ཅེར་གྲོལ་ལྟོས་པ་མེད་པའི་དམ་རྒྱས་ཟིན། །ཡེ་གྲོལ་བསྐྱར་གཞི་མེད་པའི་ཡོངས་ཡེ་ཐེབ། །དེ་ཕྱིར་ངང་ལ་བསྒོམ་དང་མི་བསྒོམ་མེད། །ཡེངས་དང་མ་ཡེངས་དྲན་པས་ཟིན་མ་ཟིན། །གང་ཡང་ཐུག་ཕྲད་གཟུང་འཛིན་དག་པའི་ངོར། །ཡོངས་གྲོལ་ཀ་དག་ཆེན་པོའི་སྤྱི་རྒྱས་ཆོད། ཨེ་མ་ཧོ། ངང་ལ་སྤྱོད་དང་སྤྱད་བྱ་གཉིས་མེད་དེ། །སྤྱད་པའི་བྱ་བྲལ་དོན་ལ་ཕྱིར་ཞིང་ནོངས། །དགེ་སྡིག་རྒྱུ་འབྲས་འདས་པའི་བྱང་ཆུབ་ལ། །ཅོག་བཞག་རང་གི་གནས་ན་གནད་དུ་ཕེབས། །དགེ་བ་སྒྲུབ་པས་སྲིད་ན་མངོན་མཐོ་ལ། །སྡིག་པ་སྤྱད་པས་སྲིད་པའི་དམན་ཙམ་དུ། །གཉིས་ཀྱང་སྡུག་བསྔལ་གསུམ་གྱི་དམ་རྒྱས་ཟིན། །དོན་ལ་མེད་མཉམ་དག་མཉམ་གཞི་ལ་མཉམ། །ཚེ་གང་སྡིག་ལ་སྤྱོད་པའི་གང་ཟག་གིས། །ཐ་ཆད་ལས་ལ་དུས་གང་འདའ་བ་དང་། །ཚེ་གཅིག་དགེ་ལ་སྤྱོད་པའི་གང་ཟག་གཉིས། །མཉམ་ཉིད་རྟོགས་ལ་གྲོལ་དང་མི་གྲོལ་མེད། །སྐད་ཅིག་དུས་ལ་ནོངས་བ་མེད་པར་ནི། །ལྷན་ཅིག་རྟོགས་པས་ལས་ལ་མ་རེག་པར་། །གྲོལ་ལ་སྔ་ཕྱི་མེད་པའི་གཏན་ཚིག་གི །རྒྱུ་འབྲས་ཅན་ལ་ལོག་པར་ཞུགས་པ་འདྲ། །དགེ་སྡིག་སྤངས་ལེན་འཛོལ་བའི་གང་ཟག་གི །ལོག་རྟོག་ནོར་བ་ཆེན་པོའི་འཕྲང་ལ་ཐོགས། །དེ་ཕྱིར་བཟང་ངན་བར་གསུམ་ཆམ་བཞག་སྟེ། །དགུ་སྤྲུགས་བྱ་བ་བཏང་བ་སྤྱོད་མེད་གནད། ཨེ་མ་ཧོ། ངང་ལ་ཐོབ་དང་མ་ཐོབ་གཉིས་མེད་པས། །ལེན་པར་བྱ་བའི་འབྲས་བུ་རྡུལ་ཙམ་མེད། །རང་གི་ངང་ལས་གཞན་ལ་བགྲོད་དུ་མེད། །ཕྱིན་པར་བྱ་བའི་ལམ་གྱིས་ཅི་ཞིག་བྱ། །ཐམས་ཅད་མ་ལུས་འབྲས་ལས་དབྱིངས་མ་གཡོས། །གཉེར་བྱ་སངས་རྒྱས་ཡོན་ཏན་ཡིད་སྨོན་མེད། །འཁོར་བ་འཁྲུལ་བའི་ཡུལ་ལ་དོག་པ་མེད། །ཡུལ་མེད་དག་མཉམ་རང་གི་གཞི་ལ་སངས། །གར་ཡང་མ་འཁྲུལ་གང་དུ་གྲོལ་བ་མེད། །གྲོལ་བ་མེད་པས་འཁྲུལ་བ་ག་ལ་སྲིད། །ཡེ་ནས་གྲོལ་ལ་ཡང་གྲོལ་འཐད་མ་ཡིན། །སངས་རྒྱས་ཉིད་ཀྱི་རང་སྣང་དག་པ་ཙམ། །རང་ཞལ་རིག་དང་མ་རིག་ཁྱད་པར་ལས། །གཞན་དུ་བཅིང་བ་མེད་ཅིང་བགྲོལ་བ་མེད། །རྒྱུ་དང་རྐྱེན་གྱི་སྒྲུབ་བྱ་མེད་པས་ཕྱིར། །མཐར་ཐུག་དོན་གྱི་ངེས་པའི་སྙིང་པོ་ཆེ། །རང་བྱུང་ཡེ་ཤེས་ཉི་མ་ཁུང་ནས་ཤར། །མ་རིག་མུན་པ་གདོད་མའི་གཞི་ལ་སང༵ས། །སྐུ་དང་ཡོན་ཏན་རང་གི་ངང་ལ་རྒྱ༵ས། །གྲོལ་བ་མང་ཙམ་བཏགས་པ་དེ་ཙམ་མོ། །རྒྱུ་ལས་མ་བྱུང་རང་བྱུང་ཆེན་པོ་ནི། །སྣང་བཞི་ཚད་ཕྱིན་བློ་ཟད་ཆོས་ཟད་དུ། །གཟུང་འཛིན་ཡུལ་མེད་དག་པ་ཆོས་སྐུའི་ཀློང་། །ཕྲ་བ་སྣང་ཤེས་ཟད་པའི་གཉེན་པོ་ནི། །རྡོ་རྗེ་ལྟ་བུའི་ཏིང་འཛིན་དེར་ལྷག་ནས། །སྤྲོས་མཚན་ཉེར་ཞི་གཞི་ལས་རབ་འཕགས་པའི། །ཁྱད་པར་དྲུག་ལྡན་བདེ་བ་ཆེན་པོ་རུ༑ ༑ལྷུན་གྲུབ་རང་བཞེངས་ཆོས་ཉིད་གཏན་སྲིད་ཟིན། །ཐི་བྱ་ཚང་འཇུག་ལྟ་བུར་གྲོལ་བ་དང་། །མ་པང་བུ་འཇུག་ལྟ་བུར་གྲོལ་བ་དང་། །དེ་ལས་དབང་པོ་ས་བླར་མ་ཕྱིན་ཀྱང་། །སྔར་འདྲེས་མིར་འཕྲད་ལྟ་བུར་ཡང་དག་ཐོབ། །མངལ་གྱི་སྒོ་བཀག་གདམས་པའི་འཕྲོ་མཐུད་ཀྱི༑ ༑ཉེས་ཅན་བཙོན་ཐར་འདྲེན་ཆུར་ཝ་འཇུག་གིས། །འཁོར་བའི་རྒྱ་མཚོ་ཕ་རོལ་ཕྱིན་པར་བྱེད། །དེ་དག་རབ་འབྲིང་ཐ་མའི་གདེངས་ཐོབ་མཐུ། །སྐད་ཅིག་གསུམ་ལྔ་བདུན་ནམ་ཉེར་གཅིག་གི །སྤྲུལ་པའི་རང་བཞིན་འབྱིན་ནམ་མི་འབྱིན་པར། །ཉོན་མོངས་མ་སྤངས་རང་བྱུང་ཡེ་ཤེས་གྲོལ། །ཆོས་ཅན་མ་སྤངས་ཆོས་ཉིད་རོལ་བར་འཕོས། །བདག་ལྟ་མ་སྤངས་ལྷུན་གྲུབ་ཆེན་པོར་ཞི། །འཁོར་བ་མ་སྤངས་གདོད་མའི་གཞི་ལ་སངས། །འདས་པ་མི་ལེན་རང་གི་རང་བཞིན་གསལ། །སྤྲོས་པ་མ་སྤངས་ཀ་ནས་དག་པར་རོལ། །སྤྲོས་མེད་མ་གྲུབ་ལྟོས་གཞི་མེད་པར་ལྷུག །མི་འཇིགས་གདེངས་ཐོབ་རེ་དོགས་མེད་པར་འཕྱོ། །རྩོལ་མེད་གཏིང་གསལ་ཡེ་ནས་འཕོས་འཕགས་བྲལ། །དབྱིངས་ལ་དབྱིངས་ཞུགས་གདངས་ལ་གདངས་སུ་འཕོས། །མཁའ་ལ་མཁའ་ཐིམ་ལྟ་བུར་དག་མཉམ་བརྡལ། །ཕྱི་རྟགས་སྣ་ཚོགས་མི་འཇིགས་རྟེན་གྱི་རིགས། །འབྱུང་བ་འཇའ་ལུས་ཆེན་པོ་འོད་དུ་དག །ཆུང་ངུ་རྡུལ་ཕྲན་ཉིད་དུ་དེངས་པ་ཡི། །ནང་གི་རིག་པ་རང་གྲོལ་ཡེ་ཤེས་སུ། །གཟུང་འཛིན་འཇུག་ཞི་གནམ་སྟོང་ཟླ་བ་ལྟར། །སྐད་ཅིག་བག་ཆགས་སྣང་བར་བཅས་པ་དང་། །འོད་གསལ་དབྱིངས་སྣང་རང་བྱུང་རང་དག་ནས། །ཐིམ་ལ་མ་རྨུགས་ཡེ་ཤེས་ཆེན་པོ་ནི། །ལྷུན་གྲུབ་ཡོན་ཏན་འགགས་མེད་ཁ་སྦྱོར་གྱི། །བདེ་བ་ཆེ་ལ་དམིགས་མེད་ལྷུན་གྱིས་འབྱམས། །སྐུ་ལྔ་ཞིང་ལྔ་རིགས་ལྔའི་བཀོད་པ་ཡི། །སྒྱུ་འཕྲུལ་དྲྭ་བའི་རོལ་མོ་ཅིར་ཡང་རྩེན། །རྣམ་དག་དབུགས་འབྱིན་ཞིང་ལྔར་སྟོན་པ་ཡི། །ཅི་བཞིན་ཤུགས་ཀྱི་ཡེ་ཤེས་ལས་འཁྲུངས་པས། །རིགས་ལྔའི་མཁའ་འགྲོ་ས་བཅུའི་བརྟན་པ་ལ༑ ༑གང་འདུལ་རྟག་ཁྱབ་ངེས་པར་བསམ་མི་ཁྱབ། །མཆོག་གི་མཛད་པ་ཉེ་བར་སྟོན་པ་ཡི༑ ༑ཐུབ་པ་མཚན་དཔེའི་རང་བཞིན་སྤྲུལ་བའང་། །རྒྱ་ཆད་མེད་ཅིང་ཕྱོགས་ལྷུང་བྲལ་བར་གྱུར། །དེ་ཕྱིར་བྱང་ཆུབ་དགོས་འདོད་བུམ་པ་བཟང་། །ལས་སྨོན་དག་པའི་རྩོལ་དང་རྟོགས་བྲལ་བར། །སྐུ་གསུང་ཐུགས་ཀྱི་ཕུན་ཚོགས་བསམ་བྱར་མིན། །མཐའ་ཡས་རབ་འབྱམས་ཞིང་ལ་ལྷུན་གྱིས་གྲུབ། །གཉིས་འཛིན་མེད་པའི་ངང་ལ་འུབ་ཆུབ་པོ། །ཨེ་མ་ཧོ། ཆོས་ཉིད་བྱང་ཆུབ་རང་བྱུང་རིག་པ་ལ། །བསྒོམ་དང་ལྟ་དང་འབྲས་བུའི་ཐ་སྙད་གྲོལ། །འོན་ཏེ་རིམ་གྱི་དང་པོའི་ལས་ཅན་ལ། །རང་སྣང་སྟོན་པས་རང་ལ་ཤར་ནས་སྣང་། །རྡོ་རྗེའི་གནས་སུ་རྣམ་པར་བཀོད་པ་གང་། །ཡིད་དཔྱོད་ཚིག་གི་ལམ་དུ་མཚོན་ཚུལ་ཙམ། །དེར་ནི་གོལ་ཤོར་ནོར་བའི་འཕྲང་བསྟན་པའི། །ཤན་འབྱེད་འཕྱོང་ལ་རྣམ་མང་བཀྲོལ་བའང་། །འདིར་ནི་ཐམས་ཅད་གཞི་རུ་གཞི་སྣང་རྩལ། །གང་ཡང་ཡིན་ཏེ་མིན་པའི་མཐའ་ལས་འདས། །གང་ཡང་མིན་དེ་ཡིན་པའི་མཐའ་ཡས་པའི། །རྟག་མིན་ཆད་མིན་དངོས་མཚན་ཐེར་ཟུག་མིན། །བདེན་མིན་རྫུན་མིན་བག་ཆགས་རྟེན་གཞི་མེད། །མི་མངོན་མི་འགྱུར་ཟག་མེད་འདུས་མ་བྱས། །ལྷུན་གྱིས་གྲུབ་པ་རྒྱ་ཆད་ཕྱོགས་ལྷུང་གི །དམིགས་མེད་རང་བྱུང་རིག་པར་འབྱམས་སུ་ཀླས། །འཁོར་འདས་ཐམས་ཅད་རིག་པའི་ཀློང་མ་གཡོས། །སེམས་དང་སེམས་བྱུང་རོལ་བ་རང་གི་འཕྲུལ། །རང་སར་དག་མཉམ་རིག་པ་དེར་མི་གཅིག །གཞན་མིན་ནམ་མཁར་སྤྲིན་གྱི་རྒྱུ་རྩལ་བཞིན། །ཕན་མེད་གནོད་མེད་བཟང་དང་ངན་པར་མཉམ། །བདེ་གསལ་མི་རྟོག་ཉམས་ཀྱི་སྣང་བའང་། །གང་ལྟར་ཤར་ཀྱང་རྟོག་པ་ཙམ་ཞིག་གི །འཕོང་རྐྱེན་ཐར་བར་ཉེ་བ་ཁྱད་ཆོས་སོ། །ཅི་ཕྱིར་ཞེ་ན་དེ་དག་རིམ་པ་ནི། །མ་ཞེན་མི་ངལ་ལམ་གྱི་མ་རྨུགས་སུ༑ ༑བྱིང་རྒོད་ཁ་ཡན་ཆོས་ཉིད་ཆུ་བོའི་རྒྱུན། །མི་གོལ་བྱང་ཆུབ་མི་སྣང་རང་རྒྱས་ཆོད། ༈ བྱང་ཆུབ་རྒྱན་སྣང་ཀུན་གྱི་གཞི་ལ་དེངས། །ཤེས་རབ་རང་བྱན་རྣམ་པར་ཤེས་ལ་མེད། །ཡེ་ཤེས་མཁྱེན་ཆ་ཡིད་ལ་དངས་གསལ་མེད། །ཆོས་ཉིད་བདེ་ཀློང་ཞེན་པའི་རེ་བ་མེད། །སྤྱན་དང་མངོན་ཤེས་ཟག་པ་དོན་ལ་མེད། །བྱང་ཆུབ་ངང་འཁྱིལ་སེམས་མེད་གནས་ལྔ་ལྟར། །མི་རྟོག་ཙམ་མིན་རིག་པར་གཟུང་འཛིན་མེད། །དམ་པའི་དོན་ལ་དམིགས་མེད་ཤེས་རབ་འབར། །ཡེ་ཤེས་ཉག་གཅིག་མངོན་པའི་ང་རྒྱལ་མེད། །ཀློང་གསལ་ལྷུན་འབྱམས་མཐར་ཞེན་སྤྲོས་མེད་པ། །གཟུང་འཛིན་ཡུལ་མེད་ཟང་ཐལ་ཡོངས་གྲོལ་དུ། །རྟོགས་ནས་གོལ་ཤོར་ནོར་བའི་འཕྲང་ལས་གྲོལ། ཨེ་མ་ཧོ། དེ་ལྟར་ལྟ་བསྒོམ་སྤྱོད་འབྲས་ཤན་འབྱེད་འཕྱོངས། །གནད་རྣམས་ཐམས་ཅད་གང་ཤར་རྐང་བཅད་དུ། །དུམ་ཆོད་དུམ་ཆོད་བྱས་ནས་སྨྲས་པ་ནི། །ཐོས་པ་ཆུང་བས་འགལ་འདུ་ཡོད་ན་བཤགས། །ཚིག་དོན་གོང་འོག་འཛིང་འཁྲུགས་ཟློས་པའི་སྐྱོན། །མཐའ་དག་རང་སྐྱོན་བརྡོལ་བའི་སྤྱི་མཚན་པ། །ཡང་དག་ངེས་པ་ནང་ནས་མ་རྙེད་རིག །དེ་ལ་ཐུགས་རྗེའི་གཟིགས་ནས་བདག་ལ་ཞུ། འོན་ཀྱང་བླ་མ་མཆོག་གི་ཐུགས་རྗེ་དང་། །སྔོན་སྨོན་བཟང་པོའི་ཀུན་བཟང་བསྟན་པར་འཕྲད། །བག་ཆགས་དཀར་པོའི་གསོས་སུ་འགྱུར་སྙམ་སྟེ། །གླུ་འདི་ཡིད་ལ་གང་བབས་སྨྲས་པའོ། །འགལ་དང་མི་འགལ་ཆོས་ཉིད་གཤིས་ལ་མེད། །ནང་དོན་རྟོགས་པ་སངས་རྒྱས་ཐམས་ཅད་ཀྱི། །ཡེ་ཤེས་སེམས་ཅན་རྣམས་ལ་གཞིར་བཞུགས་པས། །སྙིང་པོ་བྱང་ཆུབ་སྐལ་བ་ལོས་ཀྱང་ཡོད། །དེ་སླད་ཐེ་ཚོམ་སྲིད་པ་ཟད་པའི་ཆོས། །རྡོ་རྗེ་མཆོག་ཏུ་གསང་བར་སྐལ་བ་བཞག །རྒྱུད་ཚོད་དེ་ལས་མི་འདུག་རྟོགས་འབུལ་ཞུ། །དགོངས་བརྒྱུད་བསྟན་པ་རིན་ཆེན་རྗེས་སུ་བསྙེད། །ཕུན་ཚོགས་འབྲས་ལ་སྨོན་ལམ་བཟང་བཏབ་པས། །བདག་འདྲ་མ་རིག་སྐལ་དམན་སེམས་ཅན་རྣམས། །ཕྱམ་གཅིག་གདོད་མའི་གཞི་ལ་ཡེ་རྒྱས་ནས། །དོན་གཉིས་མཐར་ཐུག་རྡོ་རྗེ་འཆང་ཐོབ་ཤོག ། ཞེས་ཁྱེད་ཞལ་མ་ལྡོག་ཙམ་དུ་སྨྲས་པ་པོ་ག་ག་ཨ་བྷྱེའི་བཅས་བཅོས་སུ་མེད་པར་རོ། ། ཏནྡྲ་ཀུན་གྱི་བསྡུས་དོན།༈ ཏནྡྲ་ཀུན་གྱི་བསྡུས་དོན་བཞུགས་སོ། །གཞི་དང་འཁྲུལ་ཚུལ་ཁྱབ་ཚུལ་དང་། །གནས་དང་ཡུལ་དང་སྒོ་དང་ལམ། །ཉམས་ལེན་ཚད་དང་བར་མ་དོ། །གྲོལ་ས་ཉིད་དང་བཅུ་གཅིག་གིས། །འོད་ཀྱི་ཡང་ཞུན་བཅུ་བདུན་སོགས། །རྫོགས་ཆེན་རྒྱུད་ཀྱི་ཁོང་སྙིང་བསྡུས། །ཅེས་ཀྱང་ག་གཱས་སོ། །དགེའོ། ། ༄༅། །དེ་ཡང་སེམས་ཅན་གྱི་རྒྱུ༵་ལ༵ས་མ༵་བྱུང་། བཅོས་མའི་ལམ་རྐྱེན་ལ་མ་ལྟོས་པས༵་མཐར་ཐུག་གི་གཞི་དང་འབྲ༵ས་བུ༵་དབྱེར་མེད། འདུས་མ་བྱས། མ་བཅོས་ཡེ་སངས་རྒྱས་པ་རང་བཞིན་(གཞི་རྒྱུད་རང་བཞིན་ལྷུན་གྱི་གྲུབ་པའི་དཀྱིལ་འཁོར། མཆན།)གྱི་རྒྱུད། འགྲོ་བ་ཀུན་ལ་རྩ༵་བའི༵་དཀྱིལ་འཁོར་གསུམ་གྱི་བདག་ཉིད་དུ་ཡེ་རྫོགས་ལྷུན་གྲུབ་རང་ཆས་སྤྱི་བླུགས་སྒྲུབ་གསལ་འགྲོ་འོང་དང་བྲལ་བར་བཞུགས་པའི་བྱུང༵་(གཞི་རྒྱུད་སེམས་ཅན་དུ་འདོད་པ་ལས་འཕགས་པར། སངས་རྒྱས་རང་ཆས་སུ་ཡོད་པར་བསྟན་པའི་གཞིའི་རྒྱལ་པོ། མཆན་།) རྒྱལ༵་ཞེས་བྱའོ། །རྒྱུ་མཚན་དེས་ན་སངས་རྒྱས་རང་ལ་ཡོད་པའི་གཞན་ནས་བཙལ་མི་དགོས་པའི་(གཞི་རྫོགས་པ་ཆེན་པོའི། མཆན་)ཁྱད་ཆོས་སུ་བསྟན་པ་སྟེ། ནམ་མཁའ་འབར་བའི་རྒྱུད་ལས། རང་བཞིན་སྟོང་པ་ལྷུན་གྲུབ་ཡིན། རང་བཞིན་རྒྱུ་རྐྱེན་མེད་པ་ཡིན། ཞེས་དང་། ངེས་དོན་འདུས་པ་ལས། སེམས་ཅན་རྒྱུ་ལས་མ་བྱུང་བའི། །འབྲས་བུ་ཆོས་སྐུར་ངེས་པར་ཡོད། །གཟུགས་སྐུ་ཚོགས་གཉིས་ལས་མ་བྱུང་། །དེ་ཕྱིར་ཆོས་སྐུ་རྟོགས་གྱུར་ན། །ཚོགས་མ་བསགས་པར་འབྲས་བུ་རྫོགས། །དེ་ཕྱིར་རྒྱུ་མེད་འབྲས་བུ་ཡོད། ཞེས་དང་། བང་མཛོད་འཕྲུལ་ལྡེེ་ལས། རྒྱུ་ལས་མ་བྱུང་རྐྱེན་གྱི་མ་བསྐྱེད་པས། །རང་བྱུང་ཡེ་ཤེས་ཡིན་པར་ཡིད་ཀྱང་ཆེས། ཞེས་དང་། རང་ཤར་ལས། རྩ་བའི་དཀྱིལ་འཁོར་ཆེན་པོ་ནི། རང་རང་ཙིཏྟའི་དཀྱིལ་ན་གནས། །དེ་ཡང་དཀྱིལ་འཁོར་འདི་ལྟ་སྟེ། །རང་བྱུང་རིག་པ་དཀྱིལ་ཡིན་ཏེ། །འོད་ལྔའི་སྣང་བ་འཁོར་དུ་འདོད། །རྩ་བའི་དཀྱིལ་འཁོར་ཆེན་པོ་གཅིག །རང་རང་དུང་ཁང་དཀར་པོ་ན། །རྣམ་དག་ཐིག་ལེ་དཀྱིལ་ཡིན་ཏེ། ཐིག་ཕྲན་ཟེར་ལྡན་འཁོར་དུ་འདོད། །རྩ་བའི་དཀྱིལ་འཁོར་ཆེན་པོ་གཉིས། །ཆོས་ཉིད་སྟོང་པའི་ཀློང་དཀྱིལ་དུ༑ ༑ལུ་གུ་བརྒྱུད་ནི་དཀྱིལ་ཡིན་ཏེ། །དབྱིངས་ཀྱི་སྒྲོན་མ་འཁོར་དུ་འདོད། །རྩ་བའི་དཀྱིལ་འཁོར་ཆེན་པོ་གསུམ། །ཞེས་སོ། །དེ་ལྟ་བས་(སྦྱངས་གཞི་ཆོས་ཉིད་ཀྱི་མདངས་འོད། སྦྱངས་བྱའི་དྲི་མ་འཁོར་བའི་ཆོས་དང་འཛོམས་པ་ལས། སྦྱོངས་བྱེད་ལམ་གྱི་རྣམ་པར་ཤར་བས་རྩེ༵་མོ༵་ཞེས་པའམ། མཆན།)དོན་མཚོན་བྱེད་ཐབས་ཀྱི་རྒྱུད་ཐེག་ཆོས་གྲུབ་མཐའི་ལྟ་སྒོམ་སྤྱོད་འབྲས་ཀུན་གྱི་རྩེ༵་མོ༵ར་གྱུར་བ་འདི་ཉིད་ཀྱིས་གདམས་ངག་ཐོབ་ནས་སམ། རང་སེམས་ཆོས་ཀྱི་སྐུ་མངོན་སུམ་བཅར་ཕོག་ཏུ་ངོ་འཕྲོད་པ་ལ། །བསྔགས་བརྗོད་དུ་རི་བོ་སྤྱི་ཆིངས་ཀྱི་ལྟ་བ་ཐོབ་པ་ཞེས་ཐོ༵ས་པ་སྒོམ་དུ་ཤར་ནས་སོ་སོ་རང་གི་རིག་པས་མ་བཅོས་རྣལ་བཞག་ཆེན་པོར་ལ་བཟླ་བ་ནི། ཡིད་དཔྱོད་སེམས་ཀྱི་བསྒོམ་པ་རྣམ་རྟོག་གཟུང་འཛིན་ཤེས་སྒྲིབ་ཀྱི་འཆིང་བ་ཀུན་དང་འགྲན་ཟླ་བྲལ་བའི་སྒོམ་དུ་མེད་པའི་བསྒོམ་པའི་རྒྱལ༵་པོ་ཞེས་བྱའོ། །རྡོ་རྗེ་སེམས་དཔའ་སྙིང་གི་མེ་ལོང་ལས། ཡེ་ཤེས་སྒྲོན་མ་ལྟ་བ་ཀུན་གྱི་རྩེ་མོར་གྱུར་བས་ཆེ། །གསལ་ལ་མ་ཡེངས་སྒོམ་པ་ཀུན་གྱི་རྩེ་མོར་གྱུར་བས་ཆེ། །རང་བྱུང་མ་བཅོས་སྤྱོད་པ་ཀུན་གྱི་རྩེ་མོར་གྱུར་བས་ཆེ། །འཛིན་མེད་རང་གསལ་འབྲས་བུ་ཀུན་གྱི་རྩེ་མོར་གྱུར་བས་ཆེ། ཞེས་དང་། རང་ཤར་ལས། མ་བཅོས་ཆགས་མེད་སྤྱོད་པ་ཀུན་གྱི་རྩེ། །འཛིན་མེད་རང་གྲོལ་བསྒོམ་པ་ཀུན་གྱི་རྩེ། །ཟང་མ་ཐལ་བྱུང་ལྟ་བ་ཀུན་གྱི་རྩེ། །ཞེས་དང་། གཅིག་ཆོད་ཀུན་གྲོལ་ཆེན་པོའི་རྒྱུད་ལས། རྒྱུ་བ་ལྡང་མའི་ཤེས་པས་རྒན་པོ་ཡང་། །དགོས་པ་གཏམ་ཏམ་ཐོས་པས་གོ་བ་བཞིན། །འདི་ཉིད་ཐོས་པ་ཙམ་གྱིས་གྲོལ་བར་འགྱུར། །འདི་ཉིད་མ་རྟོགས་ན་སོ་དར་གྱུར་ཀྱང་། །བྱིས་པ་ཡིན་ཏེ་སངས་རྒྱས་དོན་མ་རྟོགས། །འདི་ཉིད་ཐོབ་ནས་བྱང་ཆུབ་མངོན་དུ་བྱེད། །དེ་ཕྱིར་འདི་ཉིད་ཁྱད་པར་འཕགས་པ་སྟེ། །བསྒོམ་མི་དགོས་ཏེ་ཐོས་པ་བསྒོམ་དུ་འཆར། །མ་བསྒོམ་བཞག་ཀྱང་མི་གསལ་དགག་དུ་མེད། །ཐོས་པ་ཙམ་གྱི་ཡེ་བསྒོམ་ཆེན་པོ་ཡིན། །ཞེས་དང་། ཀུན་གསལ་ལས། །མ་བསྒོམ་རྒྱུན་ཆད་མེད་པའི་དཔེ། །ཆུ་བོ་ལྟ་བུར་བསྟན་པ་ཡིན། །མ་བསྒོམ་དོན་དང་མི་འབྲལ་བར། །སྦྱོར་རྩིར་སྦྲང་འདབ་འཕྱར་བ་བཞིན། །མ་བསྒོམ་ངང་གིས་གསལ་བ་ནི། །གསལ་དངས་ཉི་མའི་སྙིང་པོ་འདྲ། ཞེས་སོ། འཕགས་པའི་(ལམ་རྫོགས་པ་ཆེན་པོ་ཆོས་ཉིད་མངོན་སུམ་གྱི་བསྔགས་པ་བརྗོད་པའོ། །མཆན་)ལམ་གྱིས་རྗེས་སུ་འགྲོ་བའི་ངེས་གསང་བླ་ན་མེད་པའི་ལྟ་བསྒོམ་མཐར་ཕྱིར་པའི་འབྲས་བུ་ནི། ཡོ༵་ག༵་ཞེས་པས་སྒྲ་ལས་དྲངས་ན་རྣལ་འབྱོར་ལ་འཇུག་སྟེ། རང་ཤར་ལས། བསམ་གྱིས་མི་ཁྱབ་རྣལ་འབྱོར་ཀྱང་། །རྣམ་པ་ལྔ་ཡི་ཁོག་ཏུ་འདུས། །དེ་ཡང་བསྟན་པ་འདི་ལྟ་སྟེ། །རྩལ་ཆེན་རྫོགས་དང་ལུང་ཆེན་ཐོབ། །དབུགས་ཆེན་འབྱིན་དང་ལུས་སེམས་ཕྱེད། །བཀའ་སྡོད་ལས་ཀྱི་རྣལ་འབྱོར་རོ། །ཞེས་གསུངས་པའི་ནང་ནས། །བྱ་བ་རྫོགས་པའི་རྣལ་འབྱོར་ནི། །ཀ་དག་སངས་རྒྱས་ཆེན་པོ་ཡིན། །དེ་ལས་གཤེགས་སུ་མེད་པར་གསུངས། །ཞེས་དང་། ཀ་དག་འགྱུར་མེད་ཆེན་པོ་ལ། །བྱ་རྩོལ་ཐམས་ཅད་བྲལ་བ་སྟེ། །རྩལ་ཆེན་རྫོགས་པའི་རྣལ་འབྱོར་ཡིན། །ཞེས་བྱ་བ་རྫོགས་པའམ་རྩལ་ཆེན་རྫོགས་པའི་རྣལ་འབྱོར་བས། སངས་རྒྱས་ཀྱི་ས་དྲུག་མངོན་དུ་མཛད་དེ་བཅུ་དྲུག་ཡེ་ཤེས་བླ་མའི་ཀུན་བཟང་དབྱེ་བ་མེད་པའི་ས་ལ་གནས་པ་ནི་ཐེག་པའི་རིམ་པ་གཞན་དག་གི་བརྒྱུད་འབྲས་དང་འདིས་དངོས་ཀྱི་འབྲས་བུ་ཡིན་པས། ཁྱད་པར་འཕགས་པའི་དབང་གི་རྒྱལ་པོར་གྱུར་པའོ། །འདི་དག་ཀྱང་ཐུགས་རྗེ་ཆེན་པོ་བདེ་གཤེགས་ཀུན་འདུས་ཀྱི་ཚོགས་འཁོར་གྱི་སྐབས་སུ། གཞི་ནི་ལྷུན་གྱི་གྲུབ་པ་ལ། ལམ་ནི་མངོན་གསུམ་སྣང་བ་ཤར། འབྲས་བུ་གཞི་ལ་རྫོགས་པར་མཛོད། ཅེས་དང་ཚུལ་མཚུངས་པའོ། །ཡང་འགྲེལ་ཚུལ་གཞན་དུ། འབྲས་བུ་ངོ་བོ་གཞི་རང་བཞིན་གྱི་སངས་རྒྱས་མ་བཅོས་ལྷུན་གྲུབ་ཏུ་ཡོད་པའི་ཕྱིར་དང་། དེ་ཉིད་ཇི་ལྟ་བས་མཐོང་བ་མཐར་ཐུག་གི་འབྲས་བུ་དེ་ལས་བོག་དབྱུང་དུ་མེད་པའི་ཡང་རྩེ༵་མོ༵ར་ཕྱིན་པའི་ཐོ༵བ་རྒྱལ༵་ཞེས་བྱ་སྟེ། ཀུན་གསལ་ལས། འབྲས་བུའི་ངོ་བོ་ནི་སོ་སོའི་ལྟ་བ་ཡོངས་སུ་རྫོགས་པའོ། །ཞེས་དང་། ངས་བསྟན་རྒྱུད་ལུང་ཐམས་ཅད་དུ། །འབྲས་བུས་མཚོན་པའི་ཚིག་ཚོགས་ནི། །མཐར་ཕྱིན་པ་དང་རྫོགས་པ་དང་། ཞེས་པ་ལྟར་རོ། །འབྲ༵ས་བུ༵་ཡོ༵ག་རྒྱལ་ཞེས་པ་ལམ་ལ་འགྲེལ་ན། སྤྱིར་ཐེག་པ་ལ་གདུལ་བྱ་ལམ་གྱི་རྟེན་དང་། ལམ་གྱི་སྟེགས་དང་། ལམ་གྱི་མཐར་ཐུག་གི་འབྲས་བུ་ལ་འགོད་པའི་ཐེག་པ་ཡོད་ཀྱང་། ཡོ་ག་ཞེས་པ་རྣལ་འབྱོར་ཏེ། མ་ཧཱ་ཨ་ནུ་ཨ་ཏི་ཡོ་ག་ཞེས་དང་། ཐུན་མོང་གི་རྒྱུད་རྣམས་ལས། བསྐྱེད་རྫོགས་ཀྱི་ཏིང་ངེ་འཛིན་གྱི་བྱེ་བྲག་ལ་གསུངས་པ་ལྟར་བྱས་ཏེ། འདིར་གསང་སྔགས་ལའང་གཞི་སྦྱོང་བ་དང་། བསྒྱུར་བ་དང་། གཞི་དངོས་པོ་ལམ་བྱེད་གསུམ་ལས་ཕྱི་མ། འབྲས་བུ་དངོས་ལམ་བྱེད་ཡིན་པ་དང་། ཡོ་ག་ཀུན་གྱི་མཐར་ཐུག་གི་སྐྱེལ་སོ་བླ་ན་མེད་པ་ཡིན་པས་ཞེས་ཀྱང་རུང་ངོ་། །སློབ་འབངས་རེ་བའི་དབྱུག་གུ་ཡིས། །ནམ་མཁའི་རྔ་སྒོག་བརྡུང་བ་ན། །དོན་སྟོང་ལོག་པའི་སྒྲ་འབྱིན་འདི། །སྨྲ་འདོད་མེད་ཀྱང་ཀྱལ་ཀ་ཙམ། །རྫོགས་པ་ཆེན་པོའི་ཁྱད་ཆོས་འདི། །རྙིང་མ་རྣམས་ལ་ཆ་མེད་ན། །ཁོ་བོ་གྲོང་སྔགས་ཐོས་ཆུང་གིས། །སྨོས་ཅི་དགོས་ཏེ་དོགས་པ་མེད། ག་གཱས་སོ། །དཔེ་ཤིན་ཏུ་མི་དག་པས་དཔྱད་འཚལ། སྣང་སྟོང་གི་ལམ་བསྒོམ་པ་ཉིན་མཚན་ཁ་སྦྱོར་དུ་བྱེད་པའི་གདམས་ངག་འོད་གསལ་འཁོར་ལོ།སྣང་སྟོང་གི་ལམ་བསྒོམ་པ་ཉིན་མཚན་ཁ་སྦྱོར་དུ་བྱེད་པའི་གདམས་ངག་འོད་གསལ་འཁོར་ལོ་ཞེས་བྱ་བ་བཞུགས་སོཿ དེ་ལ་འདིར་ཉིན་མོ་འོད་གསལ་གྱི་གདངས་གཉིས་ཀྱིས་སྣང་བ་ལ་མཉམ་པར་བཞག་ཀྱངཿ མཚན་སྣང་དང་བསྲེ་མ་ཤེས་ན་དུས་སུ་མི་སྟོངས་པའི་ཕྱིརཿ དེའི་ཐབས་ལ་རྒྱས་པར་ནི་རྨི་ལམ་གྱི་རྣལ་འབྱོར་དང་འོད་གསལ་གྱི་རྣལ་འབྱོར་གཉིས་ཡིན་ཀྱང་འདིར་ཐོད་རྒལ་སྤྱི་ལ་བསྟུན་ནས་འཁྱེར་བདེ་བར་ལམ་དུ་བྱེད་ནཿ དང་པོ་གཉིད་འོད་གསལ་དུ་སྦ་བ་ནིཿ ཕྱི་ནང་གསང་གསུམ་སྟེཿ ཕྱི་ལྟར་ན་འདུན་པའི་སྒོ་ནས་འོད་གསལ་འཆར་པ་ངོས་ཟིན་པར་བྱའོ་སྙམ་དུཿ ཐོག་མར་གཡུ་འབྲུག་ཐུར་དབབ་ཀྱིས་ནམ་མཁའི་རྣལ་འབྱོར་སྒོམ་པ་ཞེས་བྱ་སྟེཿ རླུང་སྦྱོར་བསྒོམ་ནས་གསལ་སྟོང་མི་རྟོག་པའི་ཡེ་ཤེས་ལ་མཉམ་པར་བཞག་གོཿ དེའི་ངང་ལས་གཉིད་པའམཿ ཡང་ན་ནང་ལྟར་དུ་གཏུམ་མོའི་མེ་སྦར་བ་ལ་སྟེཿ ལུས་དབུས་སུ་རྩ་གསུམ་འཁོར་ལྔ་གསལ་ཞིངཿ ལྟེ་བའི་འོག་གི་སོར་བཞིའི་ཐད་དུ་ཨ་ཤད་དམ་ཐིག་ལེ་དམར་པོ་གསལ་བ་ལས་མེ་འབར་བས་སྤྱི་བོའི་ཧཾ་ལ་རེག་པས་ཧཾ་ལས་བདུད་རྩིའི་ཐིག་པ་བབས་པ་དང་བསྣོལ་མའི་རྒྱུད་ལ་སེམས་བཟུང་བ་ནི་སེང་ཕྲུག་རྩལ་སྦྱོང་གི་གནད་ཅེས་བྱའོཿ དེའི་བདེ་སྟོང་གི་འོད་གསལ་འཆར་བར་འགྱུར་བས་དེ་ལས་མ་ཡེངས་པར་གཉིད་དུ་ཕྱོགས་པ་དངཿ གསང་བ་ཉི་ཟླ་ཁ་སྦྱོར་གྱི་དགོངས་པས་སྦྱང་བ་ནིཿ དེ་ནས་མེ་དང་ཐིག་ལེ་ཆེར་མཆེད་དེཿ ལུས་ཡུལ་གྱི་དངོས་འཛིན་ཐམས་ཅད་བསྲེགས་ཤིང་འོད་ལུས་ཀྱི་ནང་དུ་སྙིང་ཀའི་འཁོར་ལོར་དཀར་དམར་རམ་མེ་ཆུ་ཁ་སྦྱོར་དུ་ཡོད་པའི་དབུས་སུ་སེམས་ཀྱི་ངོ་བོ་ཕྱི་གསལ་ནང་གསལ་གྱི་ཐིག་ལེ་ཤེལ་སྒོང་ལྟ་བུ་གཅིག་བསྒོམ་པ་ལས་མ་ཡེངས་པར་སེམས་བཟུང་བས་འོད་གསལ་སྣང་སྟོང་རིག་གསུམ་དབྱེར་མེད་པའི་བདག་ཉིད་འཆར་བའི་འཕྲུལ་གསང་བླ་ན་མེད་པའོཿ གཉིས་པ་ཤེས་བྱ་བུམ་བར་བསྡུ་བ་ནིཿ ཕྱི་ནང་གསང་གསུམ་ལསཿ ཕྱི་དབྱིངས་སྣང་འོད་ཟེར་གྱི་དྲྭ་བར་གཟུད་པའི་མན་ངག་ནིཿ ནམ་ཕྱེད་གྱེན་དུ་ལངས་ཏེཿ དྲང་སྲོང་གི་འདུག་སྟངས་སུ་བྱས་ལ་ལུས་པོ་ཉེད་ཉེད་པོར་གཅུན་ཏེཿ སྟེང་རླུང་མནན་པས་བདེ་ཆེན་དང་ལོངས་སྤྱོད་འཁོར་ལོའི་རྩ་འདབས་སུ་ཡེ་རླུང་འཕྲོས་པ་དབུ་མར་བསྡུཿ འོག་རླུང་བསྐུམ་སྟེཿ སྙིང་གར་རླུང་བཟུང་བས་བདེ་སྐྱོང་དང་སྤྲུལ་འཁོར་གྱི་རྩ་འདབ་ཀྱི་ཡེ་རླུང་དབྱིངས་རྣམ་དག་གི་སྒྲོན་མའི་ཆ་ཐམས་ཅད་དབུ་མར་བསྡུས་ལཿ སྙིང་གསེར་གྱི་རྩ་ཆེན་གྱི་དྲྭ་ཕྱེད་མིག་མང་རིས་སུ་བྲིས་པའི་དབྱིངས་ཀྱིས་གང་བར་མོས་ཤིངཿ གཉིད་དུ་ཕྱོགས་པས་རླུང་ལྔ་དབྱིངས་སུ་འཆིང་ནས་རང་བཞིན་གསལ་བའི་འོད་གསལ་ཟིན་པར་འགྱུར་རོཿ གཉིས་པ་ཐིག་ལེ་རང་མལ་དུ་བསྐྱལ་བའི་མན་ངག་མགྲོན་པོའི་རང་ཡུལ་སྙོགས་པ་ལྟ་བུ་ནིཿ རྩ་ཁམས་ཀྱི་ཐིག་ལེ་རྣམས་འཁོར་དབུས་ཀྱི་ཨེ་ཡཾ་བཾ་ལཾ་རཾ་རྣམས་ལ་འདུསཿ དེ་དག་གི་འོད་ཀྱིས་ལུས་ཐམས་ཅད་ཁྱབ་པར་དམིགས་ལཿ ཀུན་ཀྱང་ཡས་མན་སྡུད་རིམ་གྱིས་སྙིང་ཀའི་ཨེ་ལ་ཁ་སྦྱོར་ཞིང་ཐིག་ལེ་སྟོང་པའི་སྒྲོན་མ་རྨ་བྱའི་སྒོ་ང་ལྟ་བུ་ནང་སྟོང་པཿ ཕྱིའི་འོད་ཟེར་གྱིས་ལུས་ཐམས་ཅད་ཁྱབ་པ་ཞིག་དབྱིངས་རང་མལ་གྱི་དྲྭ་བའི་ཁྱིམ་དུ་གནས་པར་བསྒོམ་ལཿ དེ་ལས་མ་ཡེངས་པར་བྱས་པས་ཐུགས་རྗེ་ཀུན་ཁྱབ་ཀྱི་ཡེ་ཤེས་ཟིན་པར་འགྱུར་རོཿ གསུམ་པ་སྐུ་རྡོ་རྗེ་བུམ་པ་རིན་པོ་ཆེའི་དགོངས་པའམ་བརྫུས་སྐྱེས་པདྨོའི་མངལ་གནས་ཀྱི་དགོངས་པས་འོད་གསལ་མ་བུ་སྤྲོད་པ་ཞེས་བྱ་སྟེཿ ཐིག་ལེའི་ཁང་བའི་དཀྱིལ་དུ་བླ་མ་ཀུན་བཟང་ཡབ་ཡུམ་ཆོས་སྐུའི་ཆ་ལུགས་ཅན་གཅིག་བསྒོམ་པའི་ཐུགས་ཀར་ཨཿམཐིང་ཀ་འོད་དང་འོད་ཟེར་འབར་བ་གཅིག་གསལ་ལཿ ལུས་ཀྱིས་དབྱིངས་མི་བསྒྲིབཿ དབྱིངས་ཀྱིས་ཏི་ལ་ཀ་མི་བསྒྲིབཿ ཐིག་ལེས་སྐུ་མི་བསྒྲིབཿ སྐུས་ཡི་གེ་མི་བསྒྲིབ་པས་མི་བསྒྲིབ་རྣམ་བཞིའི་འོད་ཟེར་གྱི་གོང་བུརཿ ལུག་རྒྱུད་ཀྱི་རྣམ་པར་ཕྲ་ཞིང་འཁྱོགས་པ་མར་མེ་བཞིན་པར་སེམས་བཟུང་ལ་གཉིད་པས་ཟུང་འཇུག་ངོ་བོ་ཉིད་སྟོང་པ་ཆེན་པོའི་འོད་གསལ་ཟིན་པར་འགྱུར་རོཿ འདི་ལ་ཅིའི་ཕྱིར་ཤེས་བྱ་བུམ་པར་བསྡུ་བ་ཞེ་ནཿ ཕྱིའི་སྣང་བའི་ཁམས་གསུམ་སྒོ་གསུམ་ལས་མེད་པར་ཐག་ཆོད་ཅིངཿ གཉིད་ཀྱི་ཅུང་ཟད་ནོན་པ་ནཿ ཕྱི་ཡུལ་གྱི་རྟོག་པ་ནང་དུ་བསྡུས་པའི་ཕྱིར་དངཿ ཡེ་ཤེས་རླུང་ལུས་ལ་བྱེར་བ་ཐམས་ཅད་རྩ་བའི་རླུང་འོད་ཟེར་ལྔ་བ་ལ་བསྡུ་བའི་ཕྱིར་དངཿ ཐིག་ལེ་མ་ལ་བསྡུ་བའི་ཕྱིར་དངཿ སྐུ་ནང་གསལ་གཞོན་ནུ་བུམ་པ་ཡེ་ཤེས་གཞིར་གནས་ཨ་ཡིག་གི་བསྡུས་པ་ལ་ཤེས་བྱའི་བློ་ཡིད་དམིགས་པ་བསྡུ་བའི་ཕྱིར་རོཿ གསུམ་པ་ཐོ་རངས་འབྱུང་ཁམས་དག་སྦྱོར་ནིཿ མལ་ནས་ལངས་ཏེ་རླུང་རོ་ལན་གསུམ་སྤྲུགས་པའི་རྗེས་སུ་ཆོས་སྐུའི་བཞུགས་སྟངས་ཀྱིས་གནས་པའི་སྙིང་ཀའི་བུམ་སྐུ་ལས་ཨ་མཐིང་གཅིག་སྨིན་མཚམས་ཐད་ཀྱི་ནམ་མཁའ་ལ་སྤྲོས་པ་ཀུན་ཏུ་བཟང་མོ་གཅེར་བུ་མཉམ་བཞག་གི་ཕྱག་རྒྱ་ཅན་ཞིག་དུ་བསྒོམ་པའི་ཐུགས་ཀའི་འོད་ཀྱིས་འབྱུང་བ་ནམ་མཁའི་ཁམས་ཐམས་ཅད་འོད་མཐིང་གི་རྣམ་པར་ཁྱབ་སྟེཿ འོད་དེ་ཇེ་ཆུང་ལ་འུབ་འདུས་ནས་བཟང་མོའི་ཐུགས་ཀར་ཐིམ་པས་ནམ་མཁར་འཛིན་པའི་རྟོག་སྒྲིབ་ཐམས་ཅད་ཡུམ་ཆེན་མོའི་རང་བཞིན་དུ་སངས་རྒྱས་པར་མོས་ཤིངཿ སྐུ་ལ་ཅི་གནས་སུ་སེམས་བཟུང་བའི་བྱིན་རླབས་ཀྱིས་ཟླ་བ་གཅིག་ན་ཆོས་ཀྱི་དབྱིངས་ཀྱི་ཡེ་ཤེས་འཆར་རོཿ ཡང་དེ་གྲུབ་པ་ནཿ སངས་རྒྱས་སྤྱན་དངཿ མ་ཀིཿ གོས་དཀརཿ དམ་ཚིག་སྒྲོལ་མ་རྣམས་ཀྱི་ཐུགས་ཀ་ནས་རང་མདོག་གི་འོད་ཟེར་འཕྲོས་པས་འབྱུང་བ་ལྷག་མ་འོད་དུ་སྡུད་དེཿ ཡུམ་བཞི་ལ་ཐིམ་ཞིངཿ དེའི་རང་བཞིན་དུ་སངས་རྒྱས་པར་བསྒོམ་པས་ཞག་བཅོ་ལྔ་རེ་ནས་སོ་སོའི་རྟོག་སྒྲིབ་དབྱིངས་སུ་དག་སྟེཿ ཡུམ་ལྔའི་གོ་ལ་སྦྱོར་བས་འབྱུང་བ་རང་ཟད་ཀྱི་དགོངས་པ་འུབ་ཆུབ་ཆེན་པོ་ཞེས་བྱ་སྟེ་གནད་ཤིན་ཏུ་ཟབ་མོའོཿ བར་སྐབས་དང་ཐུན་མཐའ་ཐམས་ཅད་དུ་མི་དམིགས་པར་འཇོག་པ་ཀུན་ལ་དགོས་པ་དངཿ དེ་དག་གི་ཆོས་དབྱིངས་ཡེ་ཤེས་བཞི་ལྡན་གྱི་འོད་གསལ་མངོན་དུ་གྱུར་པ་ཡིན་ནོཿ ས་མ་ཡཱཿ བར་སྐབས་སུ་འཆི་བ་སྦྱངས་པའི་མན་ངག་ནིཿ འཕོ་བའི་གདམས་པ་ལྟར་སྲོད་ཐུན་ལ་ནམ་རེས་བྱེད་དགོས་པས་ཟུར་བ་མེད་དོཿ དེ་དག་གི་གནད་བསྡུས་ནཿ ནུབ་མོ་ཉལ་ཁ་གཅིག་པོ་ལཿ རང་སེམས་ཀྱི་ངོ་བོ་འོད་ཀྱི་ཐིག་ལེ་ཤིན་ཏུ་འཚེར་བའི་དཀྱིལ་ན་ཨཱཿས་མཚན་པ་ཡོད་པ་གཅིག་བསྒོམ་ལཿ ཧིག་གིས་རང་བཞིན་སྤྲུལ་སྐུའི་ཞིང་ལྔའམ་སྤྱི་བོར་བླ་མ་གསལ་བའི་ཐུགས་ཀར་བརྒྱང་བ་དངཿ བཅོམ་ལྡན་རིགས་ལྔའི་ཡེ་ཤེས་དང་བླ་མའི་ཐུགས་རྣམ་པར་མི་རྟོག་པའི་ངོ་བོཿ རང་སེམས་འོད་ཀྱི་ཐིག་ལེ་ཕྱིར་འོང་ནས་ཚངས་བུག་ནས་ཞུགས་ཏེ་སྙིང་ཀར་གནས་པའི་འོད་ཀྱིས་ལུས་ཕྱི་ནང་ཐམས་ཅད་གསལ་བ་མར་མེ་ལྟ་བུའི་སྙིང་པོ་སྙིང་ཀའི་ཐིག་ལེ་ལ་སེམས་བཟུང་བསཿ འཕོ་བའི་འཆི་སྦྱང་དངཿ གཉིད་འོད་གསལ་དུ་སྦ་བ་དངཿ ཤེས་བྱ་བུམ་སྡུད་གསུམ་གྱི་གནད་འདུས་ལཿ ཐོ་རངས་དེ་ལས་ཐིག་ལེ་གཉིས་པ་ཞིག་སྨིན་མཚམས་སུ་ཆད་དེཿ དེའི་འོད་ཟེར་གྱིས་ཁམས་གསུམ་སྣོད་བཅུད་འབྱུང་བཞི་དང་བཅས་པ་འུབ་ཀྱི་བསྡུས་ནས་ཐིག་ལེ་ལ་གཞུགས་པ་དངཿ དེ་རྩ་བའི་ཐིག་ལེ་ལ་ཐིམཿ དེ་ཡི་གེ་མེད་པ་ཆོས་ཀྱི་དབྱིངས་ཀྱི་རང་བཞིན་དུ་མི་དམིགས་པར་མཉམ་པར་བཞག་པས་ཆོས་དབྱིངས་ཀུན་ནས་བཟླུམ་པའི་ཐིག་ལེ་ཆེན་པོ་སྤྲོས་པའི་གྲྭ་ཟུར་དང་བྲལ་བ་མངོན་དུ་གྱུར་བའི་གནད་དོཿ དེ་སྐད་དུ་ཨོ་རྒྱན་གྱི་སློབ་དཔོན་ཆེན་པོ་པདྨ་འབྱུང་གནས་ཀྱིས་གསང་ཆེན་ངེས་པའི་རྒྱུད་བཅུ་བདུན་གྱི་བུ་ཡིག་བརྒྱ་རྩ་སོགས་ནས་ཟུར་སོ་སོར་བྱུང་བ་ཁོང་སྙིང་བསྡེབ་ནས་ཕྱོགས་གཅིག་ཏུ་བཀོད་པའོཿ དེ་ལྟར་འཁྲུལ་བ་བཙན་ཐབས་སྦྱོངས་བ་དངཿ སྣང་སྟོང་འོད་གསལ་འཁོར་ཡུག་འདྲེས་པའི་ལམཿ བསྒོམ་པའི་རྒྱལ་པོ་ཉིན་མཚན་ཁ་སྦྱོར་འདིསཿ མ་ལུས་འཆིང་གྲོལ་མེད་པའི་བྱང་ཆུབ་ཤོགཿ ས་མ་ཡཱཿ ཅེས་ཀྱང་དུས་མཐའི་སྔགས་མིང་ག་གཱ་ཨ་བྷྱེ་ནས་དག་པར་ཕབ་པའི་ཡི་གེ་པ་ནི་ཝ་ཀི་ཤྭ་རིའོ། །དགེའོ། །དགེའོ། །དགེའོ། །། བར་དོ་དྲུག་ཁྲིད་ཀྱི་བསྡུས་དོན་ནོར་བུའི་ཕྲེང་བ།ཡེ་ཤེས་སྒྱུ་འཕྲུལ་དྲྭ་བ་ལསཿ བར་དོ་དྲུག་ཁྲིད་ཀྱི་བསྡུས་དོན་ནོར་བུའི་ཕྲེང་བ་ཞེས་བྱ་བ་བཞུགས་སོཿ ན་མོ་གུ་རུ་པདྨ་ཀཱ་ར་ཡེཿ འདིར་གནད་ལས་གནད་དུ་བསྡུས་པ་ནིཿ ཐོག་མར་བར་དོ་དང་པོ་སྐྱེ་གནས་བར་དོ་སྦྱོང་བའི་སྒྱུ་ལུས་དང་བསྐྱེད་རིམ་གཉིས་ལསཿ སྒྱུ་ལུས་ལཿ ལུས་སྒྱུ་མ་ལྟར་སྦྱངས་བཿ ངག་བྲག་ཆ་ལྟརཿ སེམས་ན་བུན་ལྟར་སྦྱང་བ་གསུམ་ལསཿ དང་པོ་ནིཿ མེ་ལོང་དྭངས་བ་ཞིག་མདུན་དུ་བཤམས་ནསཿ གཟུགས་གཞན་མི་མཐོང་བར་དེ་ལ་བལྟ་ནསཿ ཅི་ཞིག་ན་ཕྱི་ནང་ཐམས་ཅད་དུ་བཙལཿ རང་གི་ལུས་ལ་ཡང་དེ་དང་འདྲ་བར་བློ་སྦྱངསཿ ཡང་བྲག་ཆ་དེ་བྲག་གི་ཕྱི་ནང་ཐམས་ཅད་ལ་བཙལཿ རང་གི་ངག་ཀྱང་དེ་ལྟ་བུར་བཙལ་ནས་འདྲེས་པར་སྦྱངསཿ ཡང་ནམ་མཁའི་སྤྲིན་གྱི་བྱུང་གནས་འགྲོ་གསུམ་དང་སེམས་ཀྱི་བྱུང་གནས་འགྲོ་གསུམ་མཉམ་པར་བཙལ་ཏེ་མཉམ་པར་སྦྱངསཿ དེ་དག་ལ་མཉམ་རྗེས་བསྲེ་ཕྱིརཿ རྗེས་ཐོབ་ཐམས་ཅད་སྒྱུ་མའི་དོན་དེ་གསུམ་གྱི་འདུན་པ་རྒྱུན་བསྲིང་ངོཿ གཉིས་པ་ནིཿ ང་ལྷ་ཡིན་བསམ་ནས་ཡི་དམ་གྱི་འདུན་པ་བྱཿ ཀུན་བཟང་ཡབ་ཡུམ་ཟུང་འཇུག་རྒྱན་མེད་གཅེར་བུའམཿ སྤྲོ་ཞིང་ནུས་ན་ཞི་ཁྲོ་ཡོངས་རྫོགས་ཀྱི་སྐུ་བསྒོམ་མོཿ དེ་ཡང་སྣང་སྟོང་སྒྱུ་མ་ལྟ་བུའི་དྲན་པ་བྱ་བས་རྣམ་དག་དྲནཿ ཆ་ལུགས་འདི་ལྟ་བུའོ་བསམ་པ་ལས་མ་ཡེངས་པས་རྣམ་པ་གསལ་བཿ ཕྱི་ནང་གི་ཆོས་ཐམས་ཅད་ལྷ་དང་ཞིང་ཁམས་སུ་ཤེས་པསཿ གང་ཟག་དང་ཆོས་ཀྱི་བདག་གཉིས་ཀྱི་འཛིན་པ་སྦྱོངས་ངོཿ ༈ གཉིས་པ་རྨི་ལམ་བར་དོ་སྦྱོངས་བ་ནིཿ ཆོས་ཐམས་ཅད་རྨི་ལམ་ལྟ་བུར་ཤེས་པ་ལྟ་བས་ཐག་བཅད་དེཿ འདུན་པས་རྨི་ལམ་བཟུང་ཕྱིར་ཉིན་མོ་དུས་ཀུན་ཏུ་རྨི་ལམ་ངོ་ཤེས་པར་བྱ་བསམ་པའི་བློ་བརྟན་ནསཿ རྨི་ལམ་དུ་ཡང་དེ་འདྲ་འབྱོངས་ལཿ བར་ཞིག་ན་ཉིན་སྣང་ལ་བདེན་འཛིན་དགག་སྒྲུབ་མ་ཤོར་ན་རྨི་ལམ་དང་བར་དོ་དེ་འདྲ་ལཿ བར་ཞིག་ན་རྨི་ལམ་གྱི་དུས་ན་ཐོག་བརྫིས་བྱ་ནུས་པ་ན་བར་དོ་ཆོད་པར་འགྱུར་རོཿ ཁྱད་པར་དུ་ཉལ་ཁ་སྒོམ་བསྐྱེད་རིམ་འོད་གསལ་ལ་སོགས་གནས་པའི་འདུན་པ་རྨི་ལམ་དང་ཡང་འདྲའོཿ ཡང་ན་སྙིང་ཁར་བླ་མའི་ཐུགས་ཀར་ཨཱཿཡིག་དཀར་པོ་ལ་སེམས་བཟུང་བས་རྨི་ལམ་འོད་གསལ་དུ་འཆར་ཞིང་ཟིན་པར་གསོལ་བ་བཏབསཿ གཉིད་ཁར་ཡང་ཡང་འདུན་པ་བསྒྱུར་རོཿ དེའི་སྲབ་མའི་འོད་གསལ་གྱི་སྣང་བ་མཐོང་བ་དངཿ བདེ་གསལ་མི་རྟོག་པ་འཆར་ལཿ འཐུག་པོའི་འོད་གསལ་རང་བཞིན་བརྒྱད་ཅུ་འགག་ནསཿ གཉིད་འཐུག་གཏི་མུག་གི་སྐྱོན་དང་བྲལ་བའི་རང་བཞིན་དོན་གྱི་འོད་གསལ་འཆར་བ་ཟིན་པར་འགྱུར་རོཿ ཁྱད་པར་ཁྲེགས་ཐོད་ཀྱི་འོད་གསལ་གྱི་ངང་མ་ཤོར་པས་ཟིན་པ་ཐབས་ལམ་རྨད་བྱུང་ངོཿ ༈ གསུམ་པ་བསམ་གཏན་བར་དོ་ཟིན་ཕྱིརཿ རྟེན་ཤིང་བུ་རྡེའུ་ལ་སོགས་པ་ལ་གཏད་པ་དངཿ སྐུ་གསུང་ཐུགས་རྟེན་དངོས་ལ་གཏད་པ་དངཿ སྐུ་གསུང་ཐུགས་རྟེན་བསྒོམ་ལཿ ལུས་སྣང་མཛད་ཀྱི་ཆོས་བདུན་དང་ལྡན་པས་གནས་ནས་མིག་མི་འགུལ་བར་བརྟན་པོསཿ སེམས་གནས་ཆའི་བསམ་གཏནཿ གསལ་ཆའི་ལྷག་མཐོང་ངམ་རང་བཞིན་མེད་པར་ཤེས་པའི་ངང་ལས་མ་ཡེངས་པས་ཞི་ལྷག་ཟུང་འཇུག་གོཿ དེ་ལྟ་བུའི་སྐྱོན་བསལ་བའི་ཕྱིརཿ བྱིང་ན་ལྟ་སྟངས་སྟོད་ནས་འཁྱག་སར་བསྒོམཿ རྒོད་ན་ཕབ་ལ་དྲོ་སར་བསྒོམ་མོཿ ཁྱད་པར་དུ་ལུས་དབུས་སུ་རྩ་གསུམ་འཁོར་ལྔ་གསལ་བས་སྣ་བུག་གཡསཿ གཡོནཿ མཉམ་པར་རླུང་དུག་གསུམ་བསལ་ལཿ རང་ལྷར་གསལཿ འབྲུ་གསུམ་རྡོ་རྗེའི་བཟླས་པས་ངག་བྱིན་གྱིས་བརླབསཿ དེ་ནས་མདུན་དུ་རྒྱལ་བ་སྲས་བཅས་ཀྱི་བྱིན་རླབསཿ ཁམས་གསུམ་སྣོད་བཅུད་ཀྱི་བཅུད་དང་དྭངས་བྱིན་ནམ་མཁའི་རླུང་གི་རྣམ་པར་སྣ་བུག་ནས་དྲངས་ནས་དབུ་མ་ལ་བཙུད་པས་ལས་རླུང་དབུ་མར་ཚུད་པར་བསམཿ ཕྱིར་རླུང་དུག་གི་རྣམ་པར་འཕང་བ་སྒྲོག་མདོའི་ཨ་ཤད་ལས་མེ་འབར་བ་གཏུམ་མོཿ ཐིག་ལེ་སྤྱི་བོ་ནས་བབས་པ་འཁོར་ལོ་ལྔར་ཁྱབ་པསཿ གནས་ལྔར་རིགས་ལྔ་མཆོདཿ དབང་ལྔ་ཐོབཿ དགའ་བཞི་དང་སྟོང་བཞི་ལ་སོགས་པ་མངོན་དུ་གྱུརཿ སྒྲིབ་བཞི་དགཿ ཡེ་ཤེས་ལྔ་མངོན་དུ་གྱུར་བར་བསམ་པ་ཐིག་ལེའི་རྣལ་འབྱོར་རོཿ དེ་ཡིས་བདེ་གསལ་རྣམ་པར་མི་རྟོག་པའི་ཏིང་འཛིན་བསམ་གཏན་ཐོབ་པོཿ ༈ བཞི་པ་འཆི་ཁ་བར་དོ་སྦྱོང་བ་ལཿ ད་ལྟ་དཀར་དམར་ནག་པོ་དངཿ ཉིན་མཚན་བར་གསུམ་དང་ཉི་ཟླ་མུན་པ་སོགས་ལ་བར་དོའི་འདུ་ཤེས་བཞག་ལ་ངོ་ཤེས་པར་བྱཿ དཀར་དམར་ལ་སོགས་པའོ་བསམ་ནས་འཕོ་བ་སྦྱངས་དེ་ཡང་བསྐྱེད་རིམ་ལ་གོམས་པས་ལྷ་སྐུ་ལཿ རྫོགས་རིམ་པས་འོད་གསལ་ལཿ རྫོགས་ཆེན་པས་ཀ་དག་ལའམཿ རིག་པ་རྡོ་རྗེ་ཧཱུྃ་མཚན་ཅན་སྤྱི་བོ་ནས་རང་བཞིན་སྤྲུལ་སྐུའི་ཞིང་ལྔའམ་སྤྱི་བོ་བླ་མ་ལཿ ཐོད་རྒལ་བས་དབྱིངས་ཐིག་ལ་མིག་ནསཿ སྒྱུ་ལུས་བས་རླུང་སེམས་ཀྱི་ཐིག་ལེ་འདུ་ཤེས་བཞི་ལྡན་གྱིས་འཕོའོཿ གསལ་འདེབས་པ་ནི་སོ་སོ་ལྟར་རོཿ ༈ ལྔ་པ་ཆོས་ཉིད་བར་དོ་སྦྱོངས་བ་ནིཿ ཞི་ཁྲོ་དབྱིངས་ཐིག་སོགས་ཀྱི་བཟོ་སྤྲུལ་སྐུ་ལ་ཤེལ་མིག་སྦྱར་བས་བལྟས་ཏེ་རང་སྣང་སྐུ་གསུམ་གྱི་བར་དོ་དངོས་ཡིནཿ ངོ་ཤེས་པར་བྱ་སྙམ་པའི་འདུན་པ་དྲག་པོའི་སྦྱངས་བ་དངཿ ཡང་ནཿ གདམས་ངག་གི་སྦྱངས་བ་ནིཿ ཁྲེགས་ཆོད་དང་ཐོད་རྒལ་ཏེཿ དང་པོ་ནིཿ ད་ལྟའི་རང་གི་སེམས་འདི་ཉིད་སྣ་ཚོགས་སུ་སྣང་ཡང་ཡོད་པ་ལྟར་བཟུང་ནས་དགག་སྒྲུབ་སྤང་ལེན་སྣ་ཚོགས་སུ་བྱས་ཀྱངཿ ངོ་བོ་ལ་བལྟས་ན་བྱུང་གནས་འགྲོ་གསུམཿ གཟུགས་དབྱིབས་ཁ་དོགཿ ཕྱི་ནང་བར་གསུམཿ ངོས་བཟུང་གི་ཆོས་སུ་གྲུབ་པ་ཅུང་ཟད་ཀྱང་མེད་ལཿ སྟོང་བ་བྱིང་ཆད་དུ་མ་སོང་བས་རང་བཞིན་རང་གསལཿ གསལ་སྟོང་དབྱེར་མེད་རང་བྱུང་གི་ཡེ་ཤེས་བདེན་པ་དབྱེར་མེད་ཆེན་པོཿ སེམས་ཀྱི་གནས་ལུགས་རང་བཞིན་གྱི་བབས་ནི་གཞི་ཡིན་ལཿ བློས་དགག་སྒྲུབ་སྤང་བླང་འཛིན་སྟངས་ཐམས་ཅད་བོར་བའི་བྱར་མེད་དུ་བཞག་དུསཿ དེའི་གཤིས་ཐོག་ཏུ་སླེབས་པ་ཡིན་པས་བསྒོམ་པ་ངང་བཞག་རྒྱ་ཡན་ཆེན་པོ་སྟེཿ བཞག་ཐབས་ནིཿ ཕྱི་སྣང་བ་ལ་མི་འཛིན་མི་དགག་པས་སྣང་བ་ཅེར་བཞག ནང་ཤེས་པ་བྱིང་རྨུག་འཐིབ་གསུམ་གྱི་སྐྱོན་དང་བྲལ་བའི་ངང་དྭངས་རང་སངས་རྒྱ་མཚོ་ཅོག་བཞགཿ རྣམ་རྟོག་གི་རླུང་གིས་མི་བསྒུལ་བས་རི་བོ་ཅོག་བཞགཿ ངོ་བོ་ངོས་བཟུང་དགག་སྒྲུབ་སྤང་བླང་མེད་པའི་ཆོས་ཉིད་ཀྱི་རྗེས་སུ་འཇོག་པའི་ཅོག་བཞག་བཞིའིཿ རྣམ་རྟོག་གི་ངོ་བོ་སྤྲོས་པའི་མཐ༵འ་(གྲོལ་)ཐམས་ཅད་ལས་གྲོལ་བར་ཡེ༵་(གྲོལ་)ནས་སངས་རྒྱས་པ་དངཿ སྐྱེས་པ་ལ་གཉེན་པོ་མི་དགོས་པར་(རང་གྲོལ་)མཐོང་ཡལ་(ཅེར་གྲོལ་)ཆེན་པོར་རང་གྲོལ་བའི་གནདཿ ཡུལ་སེམས་ཀྱི་བར་དུ་རིག་པ་གཅིག་གི་ངང་དུ་(གཅིག་གྲོལ་)ཅོག་གེར་བཞག་པས་ཐམས་ཅད་དུས་གཅིག་(ཡོངས་གྲོལ་)ལ་ཟིན་པའོཿ ཡང་ལུས་ཀྱི་འདུག་སྟངས་དངཿ མིག་གི་ལྟ་སྟང་གིས་སྣང་སེམས་ཀྱི་འཛིན་པ་དབྱིངས་སུ་རང་ཡུལ་ཆེན་པོར་རྒྱས་ཐེབ་ཅིངཿ གལ་ཏེ་ཡུལ་སེམས་ལ་བཟུང་འཛིན་སྐྱེས་ན་ཡང་དགག་སྒྲུབ་མི་བྱེད་པར་རིག་པ་ཐོག་བབས་སུ་ཡུལ་ལ་དབབ་ནསཿ རང་གནས་ཡེ་ཤེས་ཀྱི་ངང་ལས་མི་འདའ་བའི་ཏིང་འཛིན་གསུམ་གྱི་གནད་ཚང་ལཿ སྣང་སེམས་རིག་གསུམ་སྤྲོས་བྲལ་དུ་ཤེས་པའི་གདང་གིས་ཟིལ་གནོན་གསུམ་གྱི་གནད་ཚང་བའོཿ ༈ གཉིས་པ་ཐོད་རྒལ་ནིཿ གཞི་དབྱིངས་རིག་རང་གི་སྙིང་ནང་ན་ཡེ་ཤེས་སུམ་བརྩེགས་ཀྱི་ཚུལ་དུ་ཡོད་པ་དངཿ ལམ་རྩ་ནང་དུ་ཤར་བའིཿ འབྲས་བུ་ཉི་ཟླ་མར་མེ་མན་ཤེལ་ནམ་མཁའ་ལྔའི་ཡུལ་ལ་ཆོས་ལོངས་སྤྲུལ་གསུམ་གྱི་ལྟ་སྟངས་གྱེན་དང་ཟླུམ་པོ་སྣ་རྩེར་ཕབས་པ་གསུམཿ མངོན་བྱང་གཡསཿ རྡོ་རྗེ་གཡོན་དུ་མནན་པའི་ཕྱེད་བཙུམ་གྱིསཿ བཞུགས་སྟངས་སེངྒེཿ གླང་ཆེནཿ དྲང་སྲོང་གིས་སྒོ་གསུམ་མི་འགུལ་བར་སྡོད་ཅིངཿ རླུང་གནད་མཆུ་སོ་མ་རེག་པའི་བར་ནས་ཡུད་ཙམ་ཕྱིར་རིང་པའིཿ རིག་གནད་དབྱིངས་ཀྱི་དབུས་སུ་སེམས་མི་རྟོག་པར་ལུག་རྒྱུད་བཙོན་དུ་བཟུངཿ དབྱིངས་གནད་ཕྱོགས་བཞི་དབུས་ལྔ་གང་ལ་འཆར་བདེ་བ་དེར་ཁྲིད་ཅིང་བལྟས་པསཿ དབྱིངས་མཐིང་ཀ་དངཿ ཁ་དོག་སྣ་ཚོགས་པའི་འཇའ་ཚོན་དུཿ ཐིག་ལེ་ཕྱི་ནང་རིམ་པ་ལྔར་འཁོར་བའི་སྟོང་སྒྲོན་རྨ་བྱའི་སྒྲོ་ཐིག་ལྟ་བུ་དངཿ རིག་གདངས་རྡོ་རྗེ་ལུ་གུ་རྒྱུད་ཆུན་འཕྱང་གི་ཚུལ་དུ་ཡོད་པ་རྣམས་ནང་གི་དབྱིངས་ཐིག་འོད་གདངསཿ སྒོ་འོད་ཀྱི་རྩ་སྣ་རྒྱང་ཞགས་ཆུའི་སྒྲོན་མ་ལས་ཐོན་ཏེ་འཆར་བ་ལཿ མིག་རྒྱ་མཚོ་ཅོག་བཞག་ལྟ་སྟངས་ལས་མི་གཡོ་བརཿ ལུས་རི་བོ་ཅོག་བཞག་བཞུགས་སྟངས་དངཿ སེམས་སྣང་བ་ཅེར་བཞག་འོད་སྣང་ལ་སྤུ་རིས་མི་འབྱེད་པར་རང་སར་བཞག་པསཿ ངོ་བོ་སྤྲོས་པ་གང་དུ་ཡང་མ་གྲུབ་པའི་རིག་པ་ཅོག་བཞག་རྡོ་རྗེ་ལུ་གུ་རྒྱུད་ཀྱི་ངོ་བོ་འཆར་བ་ཡུལ་དང་བཅས་པ་ལཿ དངོས་པོར་མི་འཛིན་པའི་ལྟ་བཿ ངང་ལས་མི་འདའ་པའི་བསྒོམ་པཿ རང་སར་བཞག་པའི་སྤྱོད་པཿ འབྲས་བུ་སངས་རྒྱས་ཀྱི་སྐུ་དང་ཡེ་ཤེས་སུ་ཤེས་པའི་ངེས་ཤེས་རྒྱུན་དུ་བྱེད་པའི་རྣལ་འབྱོར་བཞིའི་ཉམས་སུ་བླང་བར་བྱའོཿ ༈ དྲུག་པ་སྲིད་པ་བར་དོའི་ཉམས་ལེན་ནིཿ ཉིན་མཚན་ཉི་ཟླ་སོགས་གཡང་ས་གསུམ་དུ་འདུན་པས་སྦྱངས་པ་དངཿ གྲགས་པ་ཐམས་ཅད་སྒྲ་བཞིར་འདུན་པས་སྦྱངས་བ་དངཿ དྲན་བསམ་ཐམས་ཅད་སྲིད་པ་བར་དོའི་སྣང་བར་འདུན་པས་སྦྱངས་ཤིངཿ འཇིགས་སྐྲག་དགའ་དངོས་ཀྱི་གཟུགས་ཐམས་ཅད་ལ་ཆགས་ཞེན་མཁན་པོ་བདག་ཡུལ་དང་བཅས་པ་སྙེམས་བྱེད་དང་ཕུང་པོའི་བདུད་དུ་ཤེས་ཤིང་འཁྲི་བ་བཙན་ཐབས་སུ་བཅདཿ སྤངས་ལེན་འདོད་སྡང་གི་རྣམ་རྟོག་ཐམས་ཅད་ཉོན་མོངས་པའི་བདུད་དང་ལྷ་བདུད་ཀྱི་གཡབ་མོར་ཤེས་པས་འཁྲི་བ་བཙན་ཐབས་སུ་གཅོད་པ་དངཿ བརྟུལ་ཞུགས་ཐུག་ཕྲད་ཐོག་བབས་རང་གྲོལ་དུ་རྩལ་སྦྱངས་བའམཿ ཡང་ན་ང་ཤི་འདུག་པས་རང་བཞིན་སྤྲུལ་སྐུའི་ཞིང་དུ་འགྲོའོ་སྙམ་པའི་འདུན་པ་དུང་དུང་ངེ་བའི་ངང་ནས་འཕོ་བའི་སྦྱོར་བ་དྲག་པོ་སྦྱར་བས་གྲོལ་བ་ཐོབ་པར་གདོན་མི་ཟའོཿ ཡང་ཉམས་ལེན་ཉིན་མཚན་ཁ་སྦྱོར་དུ་འདོད་པསཿ རང་གི་སྙིང་ནང་དུ་རྣམ་ཤེས་ཐིག་ལེ་སྟོང་སྒྲོན་དུ་གསལ་བཿ ཧིཀ་གིས་རང་བཞིན་སྤྲུལ་སྐུའི་ཞིང་ལྔར་བླ་མ་རྒྱལ་བ་རིགས་ལྔའི་ཐུགས་ཀར་བསྟིམས་པ་དངཿ ཐུགས་ཡེ་ཤེས་ལྔའི་རང་བཞིན་འོད་ཀྱི་ཐིག་ལེ་སླར་བྱུང་ནས་རང་གི་སྙིང་ཀར་གནས་པའི་འོད་ཀྱིསཿ ལུས་དང་སྣང་བ་ཐམས་ཅད་ཁྱབ་པ་ལ་འདུན་པ་བཟུང་ནས་གཉིད་འོད་གསལ་དུ་སྦ་ཞིང་ཤེས་བྱ་བུམ་པར་བསྡུ་བར་འགྱུརཿ ནང་མོ་སད་དུས་དེ་ལས་ཐིག་ལེ་གཉིས་པ་ཞིག་སྣ་རྩེར་ཆད་ནསཿ ཕྱི་རོལ་གྱི་འབྱུང་ལྔ་འོད་དུ་ཞུ་བ་སྣ་རྩེའི་ཐིག་ལེ་ལ་ཐིམ་པར་མོས་པས་དེ་ལ་སེམས་བཟུངཿ འབྱུང་ཁམས་དག་སྦྱོར་དུ་ཡང་འགྱུར་རོཿ དེ་ལྟར་མན་ངག་ཀུན་གྱི་གནད་འདུས་པཿ ཚིག་ཉུང་གོ་སླ་ཤིན་ཏུ་ཁྱེར་བདེ་འདིཿ གང་ན་པདྨའི་ཐུགས་རྗེའི་ཉེར་འཚོ་བཿ ག་ག་ཨ་བྷྱེའི་དུས་བབས་ཕྲིན་ལས་ཏེཿ མ་གྱུར་འགྲོ་བའི་ཉེར་འཚོར་འགྱུར་བར་ཤོགཿ འདི་འདྲ་འབྲི་དགོས་བླ་མའི་བཀའ་ཕེབས་ནསཿ བཟོ་རིགས་འདུ་བྱེད་ཀརྨའི་མིང་གིས་སོཿ ཅེས་རང་གི་ཚེ་རབས་སྔོན་ནས་བླ་མར་གྱུར་པ་སྟུག་རྒྱ་སྤྲུལ་སྐུའི་བཀའ་མ་ལྡོག་བར་ག་གཱས་སོ། །དགེའོ། །དགེའོ། །དགེའོ། །སརྦ་མངྒ་ལཾ། ། ཉམས་ལེན་གནད་ཀྱི་དམར་བྱང་ཚོགས་བརྒྱད་རང་གྲོལ།༈ ཉམས་ལེན་གནད་ཀྱི་དམར་བྱང་ཚོགས་བརྒྱད་རང་གྲོལ་བཞུགས་སོ། །དེ་ལ་ཐུན་བཞིར་སྤྱོད་པའི་རྣལ་འབྱོར་བས། །འོད་གསལ་ཆེན་པོའི་ལམ་གྱི་ཉམས་ལེན་ཚོགས། །ཁྲིགས་སུ་བསྡེབ་ནས་ལེགས་པར་བཤད་པ་ལ། །ཆོས་བདག་དཔའ་བོ་མཁའ་འགྲོས་གནང་བ་སྩོལ། །དེ་ཡང་དང་པོ་མལ་ནས་ལངས་ཏེ་ཧ་ཞེས་རླུང་རོ་དགུ་སྤྲུགས་མཐར་རང་ཉིད་སངས་རྒྱས་མཁའ་འགྲོར་གསལ་ལ་འབྱུང་ཁམས་དག་སྦྱོར་བྱས་ལ་ཅུང་ཞིག་བསྒོམ་ནས་སྔོན་འགྲོ་དང་མཐར་དཀར་འགྱེད་བྱས་ལ་ནང་ཇ་གསོལ་ལོ། །དེ་ནས་ཐོད་རྒལ་བྱིན་འབེབས་མཐར་(དམིགས་པ་ནི་ནུབ་ཕྱོགས་པདྨ་འོད་ཀྱི་ཞིང་ཁམས་སོགས་ནས་དུས་གསུམ་གྱི་སངས་རྒྱས་དང་བརྒྱུད་པ་དགུ་ལྡན་གྱི་བླ་མ་ཐམས་ཅད་འོད་ཕུང་འཇའ་སྤྲིན་ལྟ་བུའི་རྣམ་པར་བྱོན་ནས་མིག་གི་ཨ་འབྲས་ནས་སྙིང་ཀའི་དབྱིངས་ཐིག་ལ་ཐིམ་པར་བསྒོམ། མཆན།)རང་རྡོ་རྗེ་མཁའ་འགྲོར་གསལ་ལ་ཐོད་རྒལ་བསྒོམ། ཐུན་མཐར་ཁྲ་འགྱེད་དང་དགེ་བསྔོ་བྱའོ། །དེ་ནས་དྲོས་ཇ་གསོལ། ཡང་རང་ཉིད་རིན་ཆེན་མཁའ་འགྲོར་གསལ་ལ་བྱིན་འབེབས་དམིགས་པའམ་གསོལ་འདེབས་བསྡུས་པ་གང་རུང་གི་མཐར་ཐོད་རྒལ་བསྒོམ། ཐུན་མཐར་དམར་འགྱེད་དང་དགེ་བསྔོ་བསྒྲགས། །དགོང་ཇ་དང་དེའི་མཐར་ཡང་གསོལ་མཆོད་བསྡུས་པའི་མཐར་རང་པདྨ་མཁའ་འགྲོ་མར་གསལ་ལ་བྱིན་འབེབས་མཐར་ཐོད་རྒལ་བསྒོམ་མོ། །ཐུན་མཐར་བརྐྱང་ཕྱག་བརྒྱ་བརྡབ་སྟེ་བཙལ་ལོ། །དེ་ནས་ནུབ་ཇ་གསོལ་ལ་བྱིན་འབེབས་རང་ཉིད་ཀརྨ་མཁའ་འགྲོར་གསལ་ལ་ཐོད་རྒལ་བསྒོམ་མོ། །ཐུན་མཐར་འཆི་སྦྱངས། འཕོ་ལུང༌། ནག་འགྱེད་རྣམས་བྱས་ལ་ཚེ་བསྙེན་ཅུང་ཟད་བཟླའོ། །དེ་ནས་རང་ཉིད་ཁྲོས་མར་བསྒོམ་ནས་གཉིད་འོད་གསལ་དུ་སྦ་བ། ཤེས་བྱ་བུམ་པར་བསྡུ་བ་རྣམས་བྱའོ། །ཟླ་བ་དྲུག་གི་དབང་དུ་བྱས་ན། །ཟླ་བ་དང་པོ་ལ་ཁྲོས་མ། གཉིས་པར་སངས་རྒྱས། གསུམ་པར་རྡོ་རྗེ་མཁའ་འགྲོ། བཞི་བར་རིན་ཆེན། ལྔ་བར་པདྨ། དྲུག་པ་ལ་ཀརྨ་མཁའ་འགྲོ་བྱས་ན་ལེགས། ཟླ་བ་གཅིག་གམ། ཞག་བདུན་སོགས་ལ་སྔ་མ་ལྟར་རོ། །ནུབ་ཐུན་ལ་ཐིག་ལེ་ལྟེམས་ཀྱང་ཆོག་གོ །ཐོད་རྒལ་གཞན་ལ་འབྱུང་ཁམས་དག་སྦྱོར་མཐར་སྔོན་འགྲོའི་རྗེས་སུ་ཁྲེགས་ཆོད་བསྒོམ། དེ་ནས་ནང་ཇའི་རྗེས་སུ་ཐོད་རྒལ་བྱིན་འབེབས་སམ་བླ་མའི་རྣལ་འབྱོར་མཐར་ཐོད་རྒལ་བསྒོམ། ཉིན་གུང་བླ་མའི་རྣལ་འབྱོར་མཐར་ཐོད་རྒལ་བསྒོམ། དགོང་མོའང་དེ་འདྲ་ལ། བད་ཀན་ཅན་གྱིས་ཐུན་སོ་སོའི་མཐར་ཕྱག་འཚལ་ཅི་མོས། ནུབ་མོའང་དེ་འདྲ་འམ་ཁྲེགས་ཆོད་《ཐོད》གང་རུང་བསྒོམ། དེ་ནས་ཐུན་མཐར་འཆི་སྦྱང༌། འཕོ་ལུང༌། ལུས་སྦྱིན། གཉིད་འོད་གསལ་དུ་སྦ་བ་རྣམས་དང་བཅས་སྔ་མ་དང་འདྲའོ། །ཐོད་རྒལ་བྱིན་འབེབས་ནི། གཏེར་གསར་ལས། འདུག་ས་འདི་རུ་བྱིན་གྱིས་རློབསཿ ཞེས་པ་སྨད་ན་ཡོད་པ་དེ་ཡིན། ཀུན་ལ་ཐུན་མཐར་བསྔོ་སྨོན་ཐུན་མགོར་སེམས་བསྐྱེད་རེ་དགོས་པ་འདྲའོ། །དེ་ལྟར་ཉམས་ལེན་བསྲང་དུ་གཟུད་བའི་ཐབས། གངས་རིའི་ཁྲོད་ཀྱི་སྨྱོན་པ་ག་གཱ་པས། །རང་གཞན་ཀུན་ལ་ཕན་པའི་བསམ་པ་ཡི། །བྲིས་པའི་དགེ་བས་འགྲོ་ཀུན་སངས་རྒྱས་ཤོག ། ༈ ལྟ་སྒོམ་སྤྱོད་འབྲས་ལ་རྒྱུན་དུ་བྱེད་པའི་རྣལ་འབྱོར་བཞི་ལ་གོལ་ས་དགུ་ཡོད། ལྟ་བ་ཆད་ལྟ་ཅང་མེད་དུ་བལྟས་ན་གཟུགས་མེད་དུ་གོལ། སྣང་བའི་འོད་ལ་གསལ་བ་རིས་ཆད་དུ་བལྟས་ན་གཟུགས་ཁམས་སུ་གོལ། སྟོང་གཟུགས་ལ་དག་གྲོལ་དུ་འཛིན་ན་འདོད་ཁམས་སུ་གོལ། སྒོམ་པ་ལ་མི་རྟོག་རྩེ་གཅིག་ཏུ་བསྒོམ་པས་ཞི་གནས་སུ་གོལ་བའི་གཉེན་པོ་རིག་པའི་གསལ་ངར་འདོན་པ་གཅེས་སོ། །རྣམ་པ་གསལ་བ་རེས་ཅན་གུད་བཅད་དུ་བསྒོམ་ན་ཀུན་གཞིའི་རྣམ་ཤེས་སུ་གོལ་བས་གཉེན་པོ་སྤྲོས་བྲལ་ལ་གསལ་སྣང་བཏོན། བྱུང་ཚོར་བཀག་པའི་སྟོང་པ་བསྒོམ་ན་མུ་མེད་དུ་གོལ་བས་རང་ཁར་བཀག་པ་མེད་པར་བཞག སྤྱོད་པ་ལ་ཞེན་མེད་དུ་མ་གྱུར་པར་གང་བྱུང་ཐ་མལ་དུ་སྤྱོད་ན་སྨྱོན་པ་ལྟ་བུར་ལྷ་《ལྟ་དཔྱད༌།》མིན་དུ་གོལ། ཚིག་ལ་ཞེན་ན་འཇིག་ལྟར་འགྱུར་བས་གྲུབ་མཐའི་ཞེན་པ་སྤང༌། སྣང་བ་མ་བཟུང་ཧད་པོ་ཡིན་ཀྱང་རིག་ངོ་མ་ཟིན་ན་གཏི་མུག་ལུང་མ་བསྟན་དུ་གོལ་བས་རིག་ངོ་ཟིན་པ་གཅེས་སོ༑ ༑ད་ནི་འབྲས་བུ་ལུ་གུ་རྒྱུད་བསྒོམ་པའི་རྣལ་འབྱོར་བ་ལ་ནི་རྣམ་རྟོག་གི་དཔྱད་པ་ཞུགས་པ་ཙམ་ལས་གོལ་ས་ཅི་ཡང་མེད་དེ། ཀློང་དྲུག་ལས། ལུ་གུ་རྒྱུད་ལ་གོལ་ས་མེད། །ཅེས་སོ། །འཆི་ལུགས་ནི་རྣམ་པ་མང་ཡང༌། མཁའ་འགྲོ་ལྟར་འཆི་དུས་སྐད་ཅིག་གིས་ལུས་དབྱིངས་སུ་ཡལ་བ་དང༌། ནམ་མཁའ་ལྟར་རང་བབས་སྤྲོ་བསྡུ་བྲལ་བའི་དབྱིངས་སུ་ལུས་ཀྱི་ཆ་ཤས་དང་ཕྱེད་སོགས་ནས་མི་སྣང་བ་ཡལ་བ་དང༌། དང་པོ་ལུས་རྡུལ་ཕྲན་དུ་འཐོར། །དེ་ནས་དབྱིངས་སུ་ཡལ་བའི་འཆི་ལུགས་གསུམ་ཁྲེགས་ཆོད་ཀྱིས་སོ། །ལུས་འོད་ལུས་སུ་བཞེངས་པ་རིག་འཛིན་ལྟ་བུའི་འཆི་ལུགས་ཞེས་པདྨ་འབྱུང་གནས་ལྟ་བུ་འོད་ལུས་ཀྱིས་འགྲོ་དོན་བྱེད་པ། ལུས་འོད་ཕུང་དུ་དབྱིངས་སུ་ཡལ་བ་ནི། མེ་དཔུང་ལྟ་བུའི་འཆི་ལུགས། ལུས་འཇའ་འོད་ཀྱིས་བཏུམ་ནས་ཇེ་ཆུང་ལ་སྐྲ་སེན་ཙམ་ལྷག་པ་འཇའ་ལུས་ཆུང་ངུ་སྟེ། དེ་རྣམས་ཐོད་རྒལ་གྱི་འཆི་ལུགས། ཡང་བུ་ཆུང་ལྟར་ནམ་འཆི་འདིར་འཆིའི་རྩིས་གདབ་མེད་པར་འཆི་བ་བུ་ཆུང་ལྟ་བུའི་འཆི་ལུགས་དང༌། རི་དྭགས་ལྟར་དབེན་པ་ནས་འཆི་བ། སྤྲང་པོ་ལྟར་སྲང་མདོར་འཆི་བ་རྣམས་ཁྲེགས་ཐོད་ཐུན་མོང་གི་འཆི་ལུགས་སོ། །ག་ག་ཨ་བྷྱེས་སོ། ། ༈ ཆོས་སྐུའི་བླ་མས། དེ་ལྟར་ཡུལ་སྣང་མེད་པའི་རང་བཞིན་ལྟར། །ཡུལ་ཅན་བྱང་ཆུབ་སེམས་ཀྱི་རང་བཞིན་ཡང༌། །མེད་པའི་ངོ་བོ་ནམ་མཁའ་ལྟ་བུ་སྟེ། །སྨྲ་བསམ་བརྗོད་ལས་འདས་པ་ཤེས་པར་བྱ། །ཞེས་གསུངས་པས། རིག་པ་ཟང་ཐལ་བ་མཐོང་དུ་མེད་པའི་མཐོང་བ་ཆེན་པོ་དམིགས་མེད་རྟོག་བྲལ་རྗེན་པའི་ཡེ་ཤེས་ནི་ཀ་དག་ཕྱལ་བ་རང་གསལ་བའི་ཁྱད་ཆོས་དུ་མ་ཡོད་པས་སེམས་དང་ནོར་ས་མེད་ལ། དེ་ཉིད་ངོ་ཟིན་པའི་ངང་དེར་སྣང་སེམས་ཀྱི་སྤྲོས་པ་ཐམས་ཅད་རྒྱ་མཚོ་དྭངས་བ་ལ་གཟའ་སྐར་ཤར་བ་རྒྱ་མཚོ་ལས་མ་འདས་པ་ལྟར་ཆོས་ཉིད་རང་བྱུང་གི་ཡེ་ཤེས་ཀྱི་ངང་དུ་བཞག་པ་རྒྱ༵་མཚོ༵་ཅོ༵ག་བཞ༵ག་གི་དགོངས་པ། སྣང་བ་ཐམས་ཅད་རིག་པ་གཅིག་གི་ཀློང་དུ་བཞག་ནས་གཟུང་ཡུལ་ལ་འཛིན་པ་མ་འགྱུས་བཞག་པ་དེ་ཡང་ལུང་མ་བསྟན་མིན་པར་རིག་གེ་རྗེན་ནེ་བའི་ཆོས་སྐུ་ངོས་ཟིན་པའི་ངང་དུ་བཞག་པ་རི༵ག་པ༵་ཅོ༵ག་བཞ༵ག རིག་པ་དྭངས་པ་ལ་ཡུལ་ཤར་བ་ཐུགས་རྗེའི་རྩལ་མ་འགགས་པས་རྟོག་མེད་ཡིན་ཀྱང༌། རིག་ཅིང་གསལ་བས་རྟོག་པར་འདྲ་བར་སྣང་ལ། སྤྲོ་བསྡུ་མེད་པར་རང་བབས་སུ་བཞག་དུས་ཆོས་ཉིད་ཀྱི་ངང་ལས་མི་འདའ་བ་ནི་སྣང༵་བ༵་ཅེ༵ར་《ཅོག༵་》བཞ༵ག དགོངས་པ་ཆོས་ཉིད་རིག་པ་ལས་མི་གཡོ་བས་རྐྱེན་སྣང་ཆོས་ཉིད་ཀྱི་གསལ་འདེབས་སུ་དག་པའི་གདེངས་རྙེད་པ་རི༵་བོ༵་ཅོ༵ག་བཞ༵ག་གི་དགོངས་པའོ། །༈ ཡང་སྣང་སེམས་གང་ཤར་ཤར་དུས་ནས་རིག་པའི་ཡེ་ཤེས་ཀྱི་ཕྱག་རྒྱས་ཐེབ་པ་རྒྱས་འདེབས་ཏིང་འཛིན་གྱི་དགོངས་པ། རྐྱེན་ཁར་ཤོར་བའི་གང་ཟག་གིས་སླར་རིག་པ་ཡུལ་ལ་བཙན་ཐབས་སུ་འབེབས་པ་ཐོག་བབ་ཏིང་འཛིན་གྱི་དགོངས་པ། རང་གནས་ཀྱི་རིག་པ་འོད་གསལ་བའི་གཤིས་ལྟ་བསྒོམ་སྤྱོད་འབྲས་ལས་འདས་པས། མི་ལྟ་བས་ལྟ་བ། མི་སྒོམ་པས་བསྒོམ་པ། མི་སྤྱོད་པར་བྱ་བྲལ། མི་སྒྲུབ་པས་འབྲས་བུ་སྟེ། རིག་པ་གཅིག་གི་ཆོས་ཉིད་ཀྱི་ངང་དུ་འབྱམས་སུ་ཀླས་པ་ནི་རང་གནས་ཀྱི་ཏིང་འཛིན་ཡེ་ནས་གནས་པའི་དགོངས་པ་ཤེས་པ་སྟེ། དེ་ལ་གདེངས་གྲོལ་ཐོག་ཏུ་བཅའ་བ་དང་འདི་གཉིས་ཀྱང་འབབ་སོ་གཅིག་སྟེ། རྣམ་རྟོག་རང་གི་རང་གྲོལ་བ་སྦྲུལ་གྱི་མདུད་པ་ལྟ་བུ་དབང་པོ་འབྲིང་གི་གྲོལ་བ་དང་རང་གནས་ཀྱི་ཏིང་འཛིན་དགོངས་པ་གཅིག་སྟེ། གང་ཡང་ཆོས་ཉིད་གཅིག་གི་རང་བཞིན་རྩལ་དང་རོལ་བའི་ཡོ་ལང་དང་ཆོ་འཕྲུལ་དུ་གནས་པ་དང་རྣམ་རྟོག་ཐམས་ཅད་ཀྱང་རང་བཞིན་གཞིའི་འོད་གསལ་ཡིན་པས་ངོ་བོ་བརྗོད་དུ་མེད་པར་མཉམ་པ་དང༌། རང་བཞིན་འགགས་མེད་དུ་མཉམ་པའི་རང་གྲོལ་བར་ཤར་བའང་མཉམ་པའི་དང༌། རྒྱས་འདེབས་དང་ཕན་མེད་གནོད་མེད་དུ་གྲོལ་བ་མཉམ་སྟེ། གང་ཤར་ཐམས་ཅད་ལ་རིག་པ་ཉིད་བཞེངས་བཞུགས་ཀྱི་ཁྱད་པར་ལས་དོན་དུ་ཆུ་དང་རླབས་སུ་ཤར་བ་ལ་བཟང་ངན་མེད་པའི་ཟག་མེད་ཡེ་ཤེས་འདུས་མ་བྱས་པའི་སྤྱི་རྒྱས་བཏབ་པའི་བསལ་བཞག་དང་ཐོབ་ཤོར་མེད་པའི་ཁང་སྟོང་དུ་རྐུན་པོ་ཞུགས་པའི་གྲོལ་ཚུལ་དབང་པོ་རབ་ཀྱི་དང༌། དབང་པོ་ཐ་མ་འོད་གསལ་ངོ་ཤེས་པས་གྲོལ་བ་སྔར་འདྲེས་ཀྱི་མི་དང་འཕྲད་པ་ལྟ་བུ་དང་། ཐོག་བབ་ཀྱི་ཏིང་འཛིན་ཀྱང་གཅིག་ཏུ་འབབས་ཏེ་དེ་དུས་ཀྱི་འོད་གསལ་ལམ་རིག་པ་གཤིས་རང་བབ་ན་གནས་པ་ངོ་ཤེས་པའི་ངང་དུ་ཀློང་འབྱམས་པ་སྟེ། དེ་ལྟ་བུའི་རྣམ་རྟོག་ཐམས་ཅད་ཀྱི་ངོ་བོ་ཡེ༵་གྲོལ༵། །རང་བཞིན་རང་གིས་ར༵ང་གྲོལ༵་བ། །ཅེར༵་གྱི་མཐོང་སར་དུས་གཉིས་པར་མི་སྡོད་པར་གྲོལ༵་བའི་མ་གྲོལ་བ་དང་གྲོལ་བའི་བསལ་བཞག་མེད་པར་མཐ༵འ་ནས་ཡོ༵ངས་སུ་གྲལ༵་བས་གྲོལ༵་བ་དེ་དག་རིག་པ་གཅི༵ག་ཏུ་གྲོལ༵་བ་ཉིད་དུ་གདེངས་འཆང་བ་ལས་གཞན་དུ་བློའི་མང་པོ་བཞག་པའི་རྗེས་སུ་བསྙེགས་ན་རྟོག་པས་སྔར་ཡང་འཁྲུལ། ད་ཡང་བཅིང་པར་འགྱུར་བའི་ཚུལ་ཤེས་པར་བྱས་ནས་རང་བབས་ཀྱི་བསམ་གཏན་ཆུ་བོའི་རྒྱུན་གྱི་ཏིང་འཛིན་གྱི་སྐྱོངས་ཤེས་དགོས་པ་དེ་ལྟ་བུའི་གན༵ད་ཀྱི་གྲོལ༵་བའང་ཡེ་ཤེས་རང་རིག་པའི་ཚུལ་དུ་མཉམ་པར་བཞག་པའོ། །རྗེས་ཐོབ་ཀྱི་དུས་སུའང་དང་པོའི་ལས་ཅན་བྱ་བ་གང་བྱས་རིག་ཐོག་ཏུ་གནས་བཞིན་ཞེན་མེད་རྨི་ལམ་ལྟ་བུར་བལྟས་ནས་སྐྱོང༌། གདེངས་ཐོབ་པ་ན་རི་བོ་ཅོག་བཞག་གི་ངང་ལས་འདའ་མི་སྲིད་པའི་ཁྱད་པར་ཤེས་པར་བྱའོ། །༈ དེ་ལྟར་སྐྱོང་ལུགས་དང་གྲོལ་ལུགས་བཤད་པ་དེ་ཐམས་ཅད་རིག་པ་གཅིག་ཏུ་འགགས་བསྡམ་པའང་མུ་ཏིག་ཕྲེང་བ་ལས། །འདི་ནི་རྫོགས་པའི་སངས་རྒྱས་ཏེ། །ངོ་བོ་ཉིད་ལས་མ་གཡོས་པའོ། །ཞེས་རྟོག་བྲལ་ཟང་ཐལ་འོད་གསལ་བའི་རིག་ཆ་ཡེ་ཤེས་དེ་ངོས་ཟིན་ནས་ངང་ལས་མི་གཡོ་བ་ལ་གྲོལ་བ་ལྔ་དང་བཞག་ཐབས་བཞི་ཏིང་འཛིན་གསུམ་དང་བཅས་པ་ཡོངས་སུ་རྫོགས་པའོ། །ག་གཱས་སོ། ། འོད་གསལ་ཆེན་པོའི་ཐེམ་བཅུ་གཅིག་པ་ཉི་མའི་འཁོར་ལོ།༈ འོད་གསལ་ཆེན་པོའི་ཐེམ་བཅུ་གཅིག་པ་ཉི་མའི་འཁོར་ལོ་ཞེས་བྱ་བ་བཞུགས་སོཿ ན་མོ་གུ་རུ་པདྨ་ཀཱ་ར་ཡེཿ འདི་ལ་གཞིའི་ཐེམ་བུ་ཁོངས་སྤུང་དངཿ བཅུད་སྤུང་དངཿ བརྡ་སྤུང་གསུམ་ལསཿ དང་པོ་ནི། སེམས་ཅན་ཐམས་ཅད་ལ་གནས་ལུགས་གཞིའི་སྒྲོན་མ་དྲུགཿ ཁོང་ན་རང་བྱུང་ལ་མྱ་ངན་འདས་པའི་ཆོས་ཁམས་རྒྱ་མཚོ་བསགས་ནས་སྤུང་བ་ལྟ་བུར་འདུས་པ་ལ་བྱའོཿ གཉིས་པ་ནི། དེ་ལ་མ་སེམས་ཅན་དང་གདུལ་བྱའི་སྣང་བ་གཉིས་ཀྱི་དུས་སུ་འོ་མའི་བཅུད་དུ་མར་འདྲིལ་བ་ལྟརཿ ལུས་གནས་རྩའི་ཐིག་ལེ་ལ་བརྟེན་ནསཿ འབྱུང་བ་དྭངས་མའི་ཚུལ་དུ་ཡོད་པའི་འོད་ཟེར་ལས་ཕྱིར་སྣང་ཟད་པར་རྫོགས་པའི་ཁ་དོག་སྣ་ཚོགས་དབྱིངས་དང་ཐིག་ལེ་ལུ་གུ་རྒྱུད་དུ་སྣང་བའང་སྤྲིན་བྲལ་ནམ་མཁའ་དངཿ ནང་གི་སྒྲོན་མ་དེ་ཉིད་ཀྱི་ཐིག་ལེར་སྨིན་རིམ་ལས་བཅུད་ཀྱི་སྒྲོན་མ་ཡིན་ནོཿ བརྡ་སྤུང་ནི། དབྱིངས་ཀྱི་ནམ་མཁའཿ འོད་ཀྱི་མན་ཤེལཿ སྐུའི་འདྲ་འབག་སྟེ་གསུམ་མོཿ དེ་ལྟར་ངོ་སྤྲད་ནས་གཞི་ལམ་གྱི་སྒྲོན་མ་རང་ངོ་ཤེས་པ་ནི་བརྡ་དོན་ལ་འབྱོར་བའི་ཐེམ་བུ་ཞེས་ཀྱང་བྱའོཿ ཡང་བསྒྲོད་པའི་ཐེམ་བུ་ནི་གནད་གསུམ་འོད་གསལ་གྱི་འཁོར་ལོ་ལ་ལོངས་སྤྱོད་པ་སྤྱི་དང༌། བྱེ་བྲག་ཏུ་ཐིག་ལེ་འགག་ལ་བཙིར་བའི་ཐེམ་བུཿ རླུང་འདར་མེད་དུ་བཅིངས་བའོཿ སྐུ་ཨར་ལ་གཏད་པའི་ཐེམ་བུ་ནིཿ སེམས་བཙོན་དུ་འཛིན་པའི་མན་ངག་གོཿ དབྱིངས་ཟླུམ་ལ་འཁྱིལ་བའི་ཐེམ་བུ་ནིཿ འདོད་པའི་སྒོ་གཉིས་བཅད་པའོཿ རྟོག་པའི་སྒོ་འགག་པ་ནི་གདངས་རང་གར་བརྟན་པའི་ཐེམ་བུཿ ཡེ་ཤེས་ངོ་གང་དུ་བྱེད་པའི་ཐེམ་བུ་ནིཿ རྒྱལ་མཚན་དབྱིངས་ལ་གཟིགས་པའི་མན་ངག་གོཿ དེ་དག་ཀྱང་རིམ་པ་བཞིན་དུ་ལུས་བཞུགས་སྟངས་ལས་མ་གཡོས་ཐོགཿ མིག་ཟུར་འགྲམ་གྱི་རྩ་ཅུང་ཟད་བཙིར་བ་དངཿ སེམས་བཤང་ལམ་དུ་གཏད་པ་དངཿ སྟེང་འོག་གི་རླུང་གཉིས་ཁ་སྦྱོར་དུ་ཡིད་ཙམ་བཅིངས་པ་དངཿ རྩེ་ཆུང་གི་རྩ་གཉིས་བག་ཙམ་སྟེ་ནས་འབྲུ་གསུམ་རེའི་ལྕིད་ཙམ་མནན་བཞིན་དུ་བསྒོམ་པ་དངཿ རེས་འགའ་དབྱིངས་དང་སྒྲོན་མའི་མེ་ཏོག་ལ་སེམས་གཅུད་པ་རྣམས་སོཿ གོང་དུ་འཕེལ་བའི་ཐེམ་བུ་ནིཿ ཕྱི་ལྟར་ཚོགས་བསགས་སྒྲིབ་སྦྱངསཿ ལྷ་བསྒོམས་སྔགས་བཟླསཿ བླ་མའི་རྣལ་འབྱོར་དག་ཡིན་ལཿ ནང་ལྟར་ཡང་དང་ཡང་གི་རུ་ཤན་དང་རྫས་ཀྱི་འཁྲུལ་འཁོར་རོཿ གསང་བ་ལྟར་ན་སྔར་བཤད་པའི་གནད་བདུན་ནོཿ ཐོབ་པ་བཟློག་པའི་ཐེམ་བུ་ནིཿ ལམ་བཞི་རིམ་གྱིས་བསྒྲོད་དུས་ཀྱི་རང་གནད་ངེས་པ་རྣམས་ཀྱིས་མཐར་འབྲས་མངོན་དུ་གྱུར་པའོཿ དེ་ལྟར་ཐེམ་གྱི་མན་ངག་བཅུ་པ་འདིཿ རྡོ་རྗེ་འཆང་གི་རྒྱུད་ལྔ་གདན་བཞག་ལསཿ གསུང་བའི་དོན་ཀུན་བསྡུས་ཏེ་ཁྲིགས་སུ་བཀོདཿ འདི་ཡང་ག་ག་ཨ་བྷྱེས་ཉམས་མྱོང་གཏམཿ སྒྲོན་མ་རང་གསལ།༈ སྒྲོན་མ་རང་གསལ་ཞེས་བྱ་བ་བཞུགས་སོཿ དེ་ཡང་ཐོད་རྒལ་གྱི་གཞི་ནི་ཡེ་ཤེས་ཀྱི་སྒྲོན་མ་རང་ལ་ཡེ་ནས་གནས་པ་དེ་ཉིད་སྙིང་ཀ་ན་ཡེ་ཤེས་འོད་འབར་བའི་གཞལ་ཡས་ཁང་ཞེས་བྱ་ལཿ དེ་ལ་སྒྲོན་མ་མཐོང་དག་གི་ལྟ་བ་ནི་མིག་གི་ལྟ་སྟངས་ལས་ཕྱི་ན་སྒྲོན་མ་བཞི་མཐོང་བའོཿ སྒྲོན་མ་ཡུལ་གསལ་གྱི་ཆ་དེ་དག་བདག་ཏུ་མི་འཛིན་པ་ནི་སྒྲོན་མ་གྲོལ་ཡན་གྱི་ལྟ་བ་ཞེས་བྱཿ སྒྲོན་མ་དེ་དག་ཀྱང་གཞན་ན་མི་དམིགས་པ་ནི་སྒྲོན་མ་གཉིས་མེད་ཀྱི་ལྟ་བ་སྟེཿ སྒྲོན་མའི་ལྟ་བ་གསུམ་གྱི་སྐབས་དང་པོའོཿ ཡང་སྒྲོན་མ་སྒོམ་པ་ནིཿ བྱིང་རྒོད་རྣམ་རྟོག་ཡོད་མེད་གང་དུ་མི་རྟོག་ཅིང་མ་ཞེན་པ་ནི་སྒྲོན་མ་གོལ་མེད་ཀྱི་དགོངས་པ་ཞེས་བྱཿ དེ་དུས་ཀྱི་ཡུལ་སྣང་ཕྱི་ན་རང་སྐྱ་ཐུབ་པར་ཡོད་དོ་སྙམ་པའི་ཞེན་པ་མེད་པར་ཐམས་ཅད་སྒྲོན་མའི་ངོ་བོར་ཕྱམ་གཅིག་རྫོགས་སྐུའི་གནས་སུ་འཕོས་པའི་ངེས་ཤེས་སྒྲོགས་མེད་སྣང་སྲིད་གཞིར་བཞེངས་ཀྱི་བསྒོམས་པ་ཞེས་བྱཿ ཅུང་ཟད་རྟོགས་ཀྱང་སྣང་བ་ཅེར་འཛིན་ཀྱི་ཤེས་རབ་ཡིན་པས་ངང་ཚུལ་ཤེས་ཏེ་སྤོང་ལེན་རང་ཞིར་བྱེད་པ་སྒྲོན་མ་བརྩོལ་མེད་ཀྱི་དགོངས་པ་ཞེས་བྱ་བ་སྟེ་བསྒོམས་པ་གསུམ་གྱི་སྐབས་ཏེ་གཉིས་འོཿ དེ་ལྟར་ཉམས་སུ་ལེན་དུས་ཀྱང་ནང་གི་འཛིན་པ་རང་ཞིར་བཏང་བ་ནི་འཛིན་མེད་རང་གྲོལ་གྱི་སྤྱོད་པ་ཞེས་བྱཿ དབྱིངས་ཐིག་གི་ངང་དུ་ལྟ་བའི་ངལ་བ་དང་ལུས་སོགས་གནད་གསུམ་གྱི་དམ་རྒྱ་མི་ལྷོད་པ་ནི་ཆུ་སྲིན་ཕྱག་རྒྱའི་སྤྱོད་པ་ཞེས་བྱཿ ནམ་ཡང་ཡུལ་ངན་དུ་མགོ་མི་འཁོར་བ་ནི་ཐེ་ཚོམ་དྲས་གཅོད་ཀྱི་སྤྱོད་པ་ཞེས་བྱ་སྟེ་སྤྱོད་པ་གསུམ་གྱི་སྐབས་སོཿ བཞི་བ་ནི་ད་ལྟའི་དབྱིངས་ཐིག་འདི་གཞི་སྣང་གི་བར་དོ་སྐུ་གསུམ་དངོས་ཡིན་པས་ཕྱིའི་རྐྱེན་སོགས་ལས་བྱུང་ངོ་བསམ་དུ་མི་བརྙེས་པ་ནི་འབྲས་བུ་ཐག་ཆོད་ཀྱི་གདེངསཿ གལ་ཏེ་མ་འཕེལ་ཡང་དམ་ཚིག་མ་དག་པ་དང་རང་རྒྱུད་མ་དག་པ་ལས་ཡིན་གྱི་ལམ་ལ་ལོག་ལྟ་གཅོད་པ་ནི་འབྲས་བུ་རྐྱེན་ཐུབ་ཀྱི་གདེངསཿ ཡང་འབྲས་བུ་ལ་རེ་བ་ཆེ་བ་ནི་ཡུལ་ཞེན་གཟུགས་ཁམས་ཀྱི་རྒྱུ་ཡིན་པས་དེ་འདྲའི་ངོ་བོ་འདུ་འབྲལ་མེད་པར་རིམ་པས་རྒྱན་ཡོད་རྒྱན་མེད་དུ་རུང་བས་གདང་གི་ཟིན་པར་བྱའོཿ ཅེས་ཀྱང་ག་ག་ཨ་བྷྱེ་ནས་དཔལ་གྲགས་ཀྱིས་བསྐུལ་ངོར་སྨྲས་པའོ། ། ༈ ཡང་སྒྲོན་མ་ལ་རྣལ་འབྱོར་དུ་བྱེད་པ་ལས་མི་ལྷོད་པ་ནི་བརྩོན་འགྲུས་གོ་ཆའི་གཟེརཿ རྒྱུན་སྤྱོད་དུ་སྡིག་ལྟ་མི་གཙིགས་པ་སྒྲོན་མ་ལམ་འགྲོའི་གཟེརཿ བལྟ་དུས་སུ་གཞན་གྱིས་མི་མཐོང་བ་ནི་དམ་ཚིག་གི་ལམ་ཁྱེར་གྱི་གཟེར་ཏེ་གཟེར་གསུམ་མོཿ ༈ ལྟ་བ་ལ་བོགས་མེད་ན་སྣང་སྲིད་སྟོང་ཉིད་དུ་ངེས་ཤེས་བསྐྱེད་པས་ལྷག་མཐོང་གི་ཤེས་རབ་བརྟན་པའི་གནདཿ བསྒོམ་པ་ལ་བོགས་མེད་ན་བླ་མའི་རྣལ་འབྱོར་བླང་བས་སྒྲོན་མ་ལམ་གྲོལ་གྱི་གནདཿ སྤྱོད་པ་ལ་བོགས་མེད་ན་རུ་ཤན་ཡང་ཡང་བྱས་པས་ཆོས་ཉིད་རང་བྱུན་ཚུད་པའི་གནད་དང་གསུམ་མོཿ ༈ དེ་དུས་སྣང་བའི་འོད་ཀྱི་ཉམས་ཀྱིས་གཞན་རྒྱུད་ཤེས་སོ་སྙམ་པ་སོགས་ལ་བདེན་ཞེན་མེད་པ་ནི་སྒྲོན་མ་ཟིལ་གནོནཿ ལྷ་དང་མཁའ་འགྲོའི་ལུང་བསྟན་སྐད་དེ་སྣང་སྲིད་སྒྲས་གང་བ་ལ་རྟོག་གོམས་མེད་པ་ནི་གྲགས་པ་ཟིལ་གནོན་གྱི་གནདཿ ཡང་སློང་ཚད་སྣ་ཚོགས་པས་འདུག་སྙིང་མི་འདོད་དུ་ལྡང་བ་ལ་གཡོ་རྩོལ་ཟིལ་གྱིས་གནོན་པའི་གདེངས་དང་གསུམ་མོཿ དེ་ལྟར་ཤེས་པས་ངེས་པར་གྲོལ་ཐོབ་ཏེཿ ལམ་དུ་ལུང་ན་སངས་རྒྱས་ཀུན་རྗེས་ཟིནཿ སྲིད་པ་ཐ་མའི་ཆོས་ཀྱི་སྙིང་ཁུ་ནིཿ གསུམ་ཚན་བདུན་དུ་བྲེལ་བའི་ངང་ཚུལ་ལསཿ ཡི་གེ་ནོར་ནོག་བྱུང་ཡང་མ་བསྐྱུང་སྨྲསཿ དཔལ་ལྡན་གྲགས་པའི་ཐུགས་དམ་བསྐང་གྱུར་ཅིགཿ རྟོག་སྒྲིབ་བྱང་ཞིང་ལས་ཉོན་སྡིག་སྒྲིབ་དགཿ ཁམས་གསུམ་སྟོང་ནས་སྐུ་གསུམ་ཐོབ་དབང་བསྐུརཿ ཐོས་གྲོལ་བས་སོ། །ག་གཱས་སོ། ། ༈ གནད་གཅིག་ཆོས་ཉིད་འཁོར་ལོ་བཞུགསཿ འདིར་ནམ་ཡང་རང་ལུས་རྒྱལ་བ་ཞི་ཁྲོའི་གྲོང་ཁྱེར་བྱེ་བ་ས་ཡ་སྐུ་འོད་ཡེ་ཤེས་སུམ་བརྩེགས་སུ་གསལ་བར་བཞུགས་པ་ལཿ བ་སྤུའི་མཐར་ཁྱབ་པའི་མིག་ཆེ་ཆུང་གྲངས་མེད་པའི་ཞལ་ནང་དུ་གྱུ་ནས་བལྟ་བ་དངཿ མིག་ནས་འོད་དང་ཐིག་ལེ་ཕར་འགྲོ་ཚུར་འགྲོ་དངཿ རེས་མིག་ཀྱང་ཡར་མར་བརྗེ་རེས་བྱ་བ་སྤྲོས་བཅས་དངཿ ཐིག་ལེ་ལྟེམས་པ་སྤྲོས་མེད་གཅིག་ཆོག་གོཿ ཅེས་ཀྱང་བསྟན་འཛིན་ངོར། ག་གཱའི་སོ། །ལེགས། ། ཡེ་ཤེས་སྣང་བྱེད་ལམ་མཆོག༈ ཡེ་ཤེས་སྒྱུ་འཕྲུལ་རོལ་བ་ལསཿ ཡེ་ཤེས་སྣང་བྱེད་ལམ་མཆོག་བཞུགས་སོ༔ དུས་གསུམ་སངས་རྒྱས་ཐམས་ཅད་ཀུནཿ འདུས་པའི་བདག་ཉིད་པདྨ་འབྱུངཿ མགོ་བོ་རལ་བའི་ཅོད་པཎ་དུཿ བརྟེན་ཏེ་མན་ངག་གནད་བསྡུས་པཿ རྣམ་པ་བཅུ་ཡི་རང་བཞིན་གསུམཿ སྐལ་ལྡན་སློབ་མ་ཐམས་ཅད་ལཿ ཕན་སླད་བསམ་པ་བཟང་པོ་ཡིཿ འབད་དེ་བྲི་ཞིང་ལྡོག་མི་བགྱིདཿ སངས་རྒྱས་ཀུན་གྱི་བདེ་གསང་ཉིདཿ གཞི་རྒྱུད་བཅིང་གྲོལ་མེད་པ་ནིཿ སྤྲོས་བྲལ་རིག་པའི་ཐིག་ལེ་འདིསཿ སྟོང་སྣང་གཉིས་ཀྱི་ལྡོག་ཆ་ཡིཿ དབྱེ་བས་ཚོད་འཛིན་ལམ་ལ་ཐོབཿ རེ་རེའང་གནད་རྣམས་བཅུ་རེའོཿ ཞེས་པས་མདུན་བསུས་ནས་ཐོག་མར་ཁྲེགས་ཆོད་ཀྱི་གཞི་ངོ་སྤྲད་པ་ལས། ༈ སྣང་བ་ལས་ངོ་སྤྲད་ན་སྣང་ལ་འཛིན་ཞེན་མེད་པའི་ནོར་ས་བྲལ་བ་དང་གཅིགཿ སྟོང་བ་ལས་ངོ་སྤྲད་ན་སྟོང་ལ་ཆད་པར་གྱུར་བ་མེད་པས་རང་མདངས་ཤར་གྲོལ་དང་གཉིསཿ ཟུང་འཇུག་ལས་ངོ་སྤྲད་ན་འདི་ཡིན་གྱི་ཡིན་སྙམ་ཡིད་དཔྱོད་ཀྱི་སྒྲོ་ལ་རེག་མ་ལུས་པར་ཟང་ཐལ་རང་རིག་ཆེན་པོའི་བདེ་ཀློང་འཁྱིལ་བ་དང་གསུམཿ ༈ ཡང་བདེ་བ་ལས་ངོ་སྤྲད་པས་བདེ་འཛིན་ཉམས་སམ་རྣམ་རྟོག་སྤངས་བས་ཕ་རོལ་དུ་སོང་བས་རང་རིག་རང་གསལ་ཆེན་པོ་གཉིས་སྣང་མཐའ་དག་བྲལ་བའི་ཡེ་ནས་ཤེས་པ་དང་གཅིགཿ གསལ་བ་ལས་ངོ་སྤྲད་པས་སལ་སལ་ཀུན་གཞིའི་རྣམ་ཤེས་ལས་འདས་པའི་འཛིན་པ་སྤྱི་ལ་དམིགས་པ་ཡང་མེདཿ མི་རྟོག་པ་ལས་ཕྱེ་བས་ཧད་ཧད་པོ་ལས་འདས་པ་རིག་སྟོང་སྒྲོ་འདོག་ཆོད་པས་དམིགས་རྣམ་རྟེན་ཆོས་ཡུལ་དང་བཅས་པའི་སྟོང་བས་མིང་མེད་ཆེན་པོ་དང་གསུམཿ ༈ ཡང་ཤེས་པ་འཕྲོ་དུས་ཡུལ་ཀྱི་སྤྱི་འཛིན་པས་ཀུན་གཞིའི་རྣམ་ཤེས་དངཿ བྱེད་བྲག་འཛིན་པས་ཡིད་ཀྱི་རྣམ་རྟོག་ལས་ཝལ་ལེར་འཕྱོ་ཞིང་འཐོར་རླུང་ལྟར་ཡལ་བ་ལས་འདས་ནས། འཕྲོ་གཞིའི་ཡེ་ཤེས་རང་གསལ་མལ་ལས་མ་གཡོས་པ་དང་གཅིགཿ གནས་པའི་ཉམས་ཀྱི་དཔྱིས་ན་གནས་མི་གནས་ལས་འདས་པས་རིག་པ་རྩལ་ཕྱོགས་མེད་དུ་ཤར་ལ་ངོ་བོ་འགྱུར་བ་མེད་པ་མདངས་བདེ་ཆེན་གྱི་རྒྱས་པ་ཆེན་པོ་སྟེཿ གནས་པ་ཉམས་ལ་རིག་ཆ་ཆོས་སྐུ་ལགས་སོཿ ཡང་སེམས་ཀྱི་ཆོས་རྣམ་པར་རྟོག་པ་ཡལ་བ་ནཿ ཡལ་བ་དང་ཡལ་གཞི་ཐ་དད་པས་འཆིང་བར་བཅས་པའི་སེམས་ཀྱི་ཆ་འགག་པ་ལས་ཡེ་ཤེས་སྐྱེ་ནས་འགག་པ་གསར་དུ་བྱུང་བ་མ་ཡིན་པས་ཡེ་གྲོལ་རང་ལ་ཡོད་པ་ངོ་བཟུང་ནའང་བཟུང་རྒྱུ་ཡོད་པ་འདྲ་ཡང་མཐར་གཏུགས་ན་ཅི་ཡང་བཟུང་མི་བཟུང་ལས་འདས་པ་ཡི་རྗེན་ཁྲེས་སེ་བ་དེ་ནི་གྲོལ་མི་གྲོལ་ལས་འདས་པས་ཆོས་སྐུཿ ༈ ཡང་གང་གི་དུས་སུ་ཡང་ཡུལ་ལ་མ་འབྲེལ་བས་གཏིང་གསལ་རང་རིག་བློ་ལས་འདས་པ་ཡེངས་མེད་འཛིན་མེད་རྟོག་མེད་གཉིས་སྣང་མེད་བཞིན་དུ་ཡེ་མཁྱེན་ནི་ཁྱད་ཆོས་ཀུན་ལས་ཁྱད་པར་འཕགས་པ་ཞིག་དང་བཅུའོཿ ༈ ཡང་གདམས་ངག་གི་གནད་བཅུ་ཚན་གཉིས་པ་ནིཿ ད་ནི་ལམ་ཉམས་སུ་ལེན་པའི་དུས་སུ་སེམས་རིག་དྭངས་སྙིགས་ཕྱེད་པའི་བཞག་ཐབས་ནིཿ ནམ་མཁའི་རྣལ་༡འབྱོརཿ རྒྱ་མཚོའི་རྣལ་༢འབྱོརཿ ཉི་ཟླའི་རྣལ་༣འབྱོརཿ ཆུ་བོའི་རྣལ་༤འབྱོརཿ འཇའ་ཚོན་གྱི་རྣལ་༥འབྱོར་སྟེ་ལམ་གྱི་སྒོའི་རྣལ་འབྱོར་ལྔཿ གཡོ་བའི་རྣལ་འབྱོར་ལ་རྩལ་སྦྱོང་བཿ རང་བཞིན་རྣལ་འབྱོར་ལ་རྩལ་སྦྱོང་པཿ ནང་འཕྲད་ཀྱི་རྣལ་འབྱོར་ལ་སྦྱང་བཿ རྐྱེན་ངན་གྱི་རྣལ་འབྱོར་ལ་རྩལ་སྦྱངས་བ་སྟེ་རྩལ་སྦྱོང་ཐབས་ཀྱི་རྣལ་འབྱོར་བཞིཿ བརྟན་པས་གཡོ་བ་མེད་པས་རི་བོ་མཐར་ཕྱིན་གྱི་རྣལ་འབྱོར་ཏེ་བཅུའོཿ དང་པོ་ནིཿ ནམ་མཁའི་མཐོངས་སུ་རིག་པ་འཕངས་པས་སྤྲོས་བྲལ་རྩེ་གཅིག་ཏུ་ཉམས་སུ་མྱོང་ངོཿ གཉིས་པ་ནི་སེམས་གྱི་གསལ་ཆ་ལ་སྦྱངས་བས་ངང་ལས་རྣམ་རྟོག་གི་རླབས་ཀྱིས་མ་བསྐྱོདཿ བསྐྱོད་ཀྱང་རང་ཞིར་བཏང་བའོཿ གསུམ་པ་ནིཿ ཉི་མ་སྟེ་རྣམ་རྟོག་འཆར་བ་དངཿ ཟླ་བ་སྟེ་འཆར་གཞིའི་ཆ་གཉིས་ཀྱི་འབྲེལ་མཚམས་ལ་དཔྱད་བ་དང་ཆད་ནས་ཞི་ལྷག་ཟུང་འཇུག་གི་ངང་ལ་བཞག་པཿ བཞི་བ་ནིཿ ཆུ་བོའི་གཞུང་ལ་རིག་པ་འཕངས་པའི་སྒོ་ནས་བྱིང་བ་བསང་ནས་རིག་པས་ཡུལ་མཐོང་ལ་འཛིན་པ་མ་ཞུགས་པ་དེ་ངོས་རང་ཟིན་ལ་ཡོད་པ་ལས་མི་གཡོ་བ་ལགས་སོཿ ལྔ་བ་ནིཿ འོད་གསལ་གྱི་མཐོང་པ་ལ་མ་ཡེངས་པའོཿ དྲུག་པ་ནིཿ གཡོ་བ་ལ་ཁ་ནང་དུ་འཁོར་ནས་བལྟས་པས་མ་གཡོས་གཡོ་གཞི་མེད་པར་ཤེས་པའི་གཡོ་བ་ཡས་མ་ཡལ་གྱི་བར་གྱི་དངས་བཙལཿ བདུན་པ་ནིཿ རང་བཞག་པས་གནས་ཆ་དེ་ཉམས་ལཿ རིག་ཆ་ཅིར་ཡང་མ་བཟུང་བ་གང་དུ་ཡང་མ་གྲུབ་ཤར་བ་ལས་མ་ཡེངས་བའོཿ བརྒྱད་པ་ནིཿ སེམས་ངལ་ཆད་དུས་སེམས་རིག་པ་ལ་འཕྲད་དེ་དབྱིངས་སུ་འཁྱིལ་བ་དངཿ ཕྱིར་འཕྲོས་དུས་ཀྱང་རང་རིག་པ་དེ་རིག་པ་སེམས་ལ་འཕྲད་པས་ངང་དངས་བཟུང་ནས་འབྱམས་ཀླས་པར་བྱའོཿ དགུ་བ་ནིཿ རྐྱེན་ངན་སེམས་ལ་ཤར་དུས་རིག་པ་ལ་གྲུབ་པ་དང་གོས་མ་མྱོང་བས་བདེ་བ་ཆེན་པོར་རང་ཤར་བ་ངོས་བཟུང་ལ་དེ་ལས་མ་ཡེངས་བར་བྱས་པས་གཞི་གྲོལ་མཉམ་ཉིད་དུ་འཆར་རོཿ བཅུ་བ་ནིཿ མཐར་མི་རྟོག་པ་རི་བོ་ལྟ་བུར་ཤར་ན་ངང་དངས་འབྱིན་ལཿ བདེ་ཆགས་གསལ་ཆག་གི་ངང་རི་བོ་ཙམ་ལ་བསྒོམ་བཤིགས་ཞེན་པ་ཕཊ་ཀྱིས་གཏོརཿ སྤྲོས་བྲལ་དུ་འཛིན་པའང་མེད་པའི་རང་བབས་རི་བོ་ལྟར་ཤར་ན་ངོ་ཏི་དེ་ལས་མ་ཡེངས་པར་བཞག་གོཿ ༈ ད་ནི་འོད་གསལ་ཐོད་རྒལ་ཆེན་པོ་ལ་བཞག་པའི་དུས་དུ་མ་ཡེངས་བས་སེམས་ཀྱི་ངོ་བོ་ནི་རིག་གེ་རྗེན་ནེ་ཟང་ཐལ་བ་ཞིག་ཡོད་པ་དེ་རིག་པ་ཡེ་ཤེས་༡ཡིནཿ དེ་ཡང་འོད་སྣང་ལ་ཤེས་བྱེད་ཀྱི་ཡེ་ཤེས་འགག་པ་མེད་པ་དེ་སྣང་བ་ཅེར་འཛིན་གྱི་ཡེ་ཤེས་༢ཡིནཿ དེ་ཡང་འོད་གསལ་ལ་རྩེ་གཅིག་ཏུ་གཏད་དུས་གནས་ཆ་བསམ་གཏན་ཡིན་ལཿ སྐབས་སྐབས་སུ་སྣང་བ་འགགས་པའི་གཤིས་ན་ཡེ་ཤེས་པ་རང་གསལ་ཡུལ་ལ་མ་འཕྲོས་པ་ཞིག་ཡོད་པ་༣དེ་གོཿ ཡང་ཁ་སྣའི་རླུང་བསྡམས་དུས་སེམས་གང་དུ་ཡང་མི་འཕྲོ་བར་གནས་དུས་ཀྱི་གནས་པ་དེ་བསམ་གཏན་ལཿ ངོ་རང་ཤེས་ཙམ་དེ་རིག་༤པའོ་གསུངསཿ ཡང་འོད་རྩ་ལྟེམས་པས་དྲན་བ་འགགས་ལ་ཤེས་པ་གསལ་སྟོང་དུ་ཤར་བ་དེ་ལ་གནས་༥སོཿ ཡང་མཐོ་ས་ནས་ཕར་ལྟ་ཚུར་ལྟ་བྱས་པ་ན་བུ་ཆུང་གི་གཟུགས་མཐོང་བ་ལྟ་བུ་མིང་བརྗོད་མི་ཤེས་པ་ལྟ་བུ་དེ་ནི་རིག་༦པའོཿ ཡང་གཅིག་ལ་འཁོར་ལོ་ལྟར་བསྐོར་ནས་རྟོག་མེད་དུ་གནས་སྐབས་ཀྱི་ཤེས་ངོ་གསལ་སང་ངེ་བ་དེ་རིག་༧པཿ ཡང་འཕྲལ་དུ་སྦྲིད་པ་བྱེད་ཐབས་ཀྱིས་ཡེ་ཤེས་ཀྱི་གཟུགས་ལ་སྦྱངས་བ་༨དངཿ དབུགས་བཟུང་བས་ཁོག་པར་ཙིར་སྒྲ་གྲགས་པ་ཡེ་ཤེས་ཀྱི་སྒྲ་ལ་སྦྱངས་བ་༩དངཿ དེ་ནས་ཡེ་ཤེས་ཀྱི་ངོ་བོ་ལ་བཙན་ཐབས་སུ་བལྟའ་བ་ནིཿ མུན་པའི་རྣལ་འབྱོར་དྲུག་སྟེ་ཐོད་རྒལ་༡༠ལ་རྣམ་པ་བཅུ་ལསཿ གང་ལ་ཡང་སེམས་ངོ་ཟིན་ཕན་ཆད་མ་ཡེངས་མ་བརྗེད་མི་འཛིན་པར་གནས་པ་ནི་ཆིང་རྨད་དུ་བྱུང་བའོཿ དེ་ལྟར་ཡེ་ཤེས་རང་བཞིན་རྗེས་བྱེད་པཿ ཟབ་ཅིང་རྟོགས་སླ་ཁྱད་པར་འབྱོར་བ་འདིཿ གང་ན་ཐོས་མེད་གོམས་སྟོབས་འབའ་ཞིག་ཅནཿ ག་ག་ཨ་བྷྱེས་ང་རྒྱལ་ལན་དགུར་གྲགསཿ ཅེས་ཀྱང་བླ་མ་དམ་པ་ཚུལ་ཁྲིམས་ཀྱི་ངོར་པདྨ་མཁའ་ཀློང་ཡངས་བས་སོ། །དགེའོ། །དགེའོ། །དགེའོ། ། ཚིག་གསུམ་གནད་བརྡེགས་ཀྱི་བསྡུས་དོན་པུཎྜ་རི་ཀའི་ཕྲེང་བ།༈ ཚིག་གསུམ་གནད་བརྡེགས་ཀྱི་བསྡུས་དོན་པུཎྜ་རི་ཀའི་ཕྲེང་བ་བཞུགས་སོ། ། དེ་ཡང་བདུད་རྩི་བཅུད་ཐིག་ལས། ང་ཡི་དགུ་རྩེ་སྤྱི་ཏི་འདིར། །སྤྲོས་པ་རང་གི་ཐོག་ཏུ་བཅད། །རང་ངོ་རང་གི་ངང་ལ་སྤྲད། །རང་གདེངས་རང་གྲོལ་ཐོག་ཏུ་བཅའ། །ཞེས་པས་ན་རང་གི་སེམས་རང་བབས་སུ་རྟོག་གཉིས་གཟུང་འཛིན་བཏང་སྙོམས་དཔྱད་རྒྱའི་མ་བསླད་པར་བཞག་པས། རང་གསལ་འཛིན་མེད་སྟོང་བ་ཉམས་སུ་མྱོང་བའི་རིག་གེ་སེང་ངེ་བ་དེ་ཆོས་སྐུ་གཞི་ལྡན་གྱི་དགོངས་པ་རང་ལ་ཡོད་པ་ཉིད་ཡིན་པས་དེ་ལས་གཞན་དུ་ཚོལ་མི་དགོས་པས་ངོ་རང་ཐོག་ཏུ་སྤྲད་པ་ཟེར་རོ། །ཡང་དེའི་ངོ་བོ་ལ་ཡོད་མེད་མཐའི་དངོས་པོ་གང་གིས་ཀྱང་མ་རེག་པའི་དབུ་སེམས་སྔགས་ཀྱི་དབང་བཞི་བའི་ཡེ་ཤེས་ཚོགས་གཉིས་མཉམ་རྫོགས་ཀྱི་ཕྱག་རྒྱ་ཆེན་པོར་ཤེས་པས་བློས་སྤྲོས་པའི་གཟུང་འཛིན་མཐའ་དག་རང་བཞག་ན་ཡེ་ཤེས་ཆེན་པོ་གཅིག་གི་ཐོག་ཏུ་ཐག་ཆོད་གདེངས་ལྡན་དུ་བཞག་གོ །ཡང་རིག་པའི་རང་གདེངས་རྣམ་རྟོག་སྣང་ཞེན་གྱི་ཚོགས་ཐམས་ཅད་བཅས་བཅོས་སྤང་བླངས་བསྒྱུར་བཀོད་སྦྱོངས་གཞིག་རང་ལུགས་གང་དུའང་མི་བྱེད་པར་འགྱུ་བ་གསལ་དག་ཏུ་རང་གྲོལ་བར་སྔ་ཕྱི་བསུ་གཅོད་བག་ཆགས་ཀྱི་མཐའི་འཕྲང་ལ་མི་བཤར་བར་གཏོང་ངོ། །དེའི་གཞི་འབྲས་དབྱེར་མེད་རང་གནས་ཆེན་པོ་མངོན་དུ་འགྱུར་བའོ། །དེའི་དུས་སུ་འཛིན་པས་ཕྱོགས་དང་འཁྲུལ་པ་རྩིས་གདབ་ཕྲན་གྱི་ཟུག་རྡུ་ཡང་གོལ་སྒྲིབ་འཁྲུལ་པར་འཕྱན་པས། དགོངས་པ་དམིགས་མེད་ཀྱི་ངང་ལ་སླར་བརླན་པས་སྤྲོས་སྐྱོན་ཐམས་ཅད་དུས་གཅིག་ཏུ་ཆོད་དོ། །དེ་སྐད་རིམ་པར་གསལ་ཕྱེས་མགོ་རྨོངས་ལ། །གནད་བསྡུས་ཙམ་གྱིས་ཤེས་རབ་སྒྲོག་ཡིན་ཀྱང༌། །སྨོན་བཞིན་ག་ག་རྒྱལ་པོས་རེ་བ་བསྐང༌། །འདིས་ཀྱང་ཕན་པ་རྒྱ་ཆེར་འགྲུབ་གྱུར་ཅིག །ཕྱུག་རྡིས་ལ་ཕུལ། ༈ སྣང་མཆེད་ཐོབ་གསུམ་ཡིན་ལགས། སྔོན་ནམ་མཁའ་སྟོང་པ་རྟེན་མེད་དུ་སྣང་ཟེར་བ་དེ་དོན་ལ་ཀུན་གཞི་མཚན་ཉིད་ཅི་ཡང་མི་སེམས་པས་སྟོང་ཧད་དེ་ལ་ཟེར། ནམ་མཁའ་རྟེན་མེད་ཀྱི་ཁམས་གསུམ་རླུང་རི་ནག་པོ་རྡོ་རྗེ་རྒྱ་གྲམ་གྱི་དབྱིབས་ལྟར་ཆགས་ཟེར་བ་དེ་ནི་ལས་རླུང་གཡོ་བ་ཉིད་ཡིན། དེའི་སྟེང་དུ་ཞི་བ་གསལ་དག་གི་རྒྱ་མཚོ་ནི་ཀུན་གཞིའི་རྣམ་ཤེས་ཡིན། དེ་སྟེང་དུ་དབང་ཆེན་གསེར་གྱི་ས་གཞི་ནི་ཉོན་ཡིད་ཡིན་ནོ། །ཀུན་རྫོབ་ལ་མེ་ཡོད་ཟེར་བ་ཡིད་དྭངས་གསལ་ཀྱི་ཆ་ཡིན་ནོ། །དེ་ནི་དོན་གྱི་སྐལ་བ་ཆགས་ཚུལ་དང་འཁོར་བ་ལུགས་སུ་འབྱུང་ཚུལ་ཡིན་ནོ། །ལུགས་སུ་ལྡོག་ཚུལ་ནི། ཀུན་རྫོབ་ལ་སྔོན་མེའི་ཞེ་དགུ་ཆུའི་ལན་བདུན་རླུང་གི་ལན་གཅིག་སོགས་གཏོར་ཟེར་བ་སྲིད་ཀྱང་དོན་ལ་རྣམ་ཤེས་སྣང་བ་ལ་ཐིམ་ཚེ་དམར་ལམ་འཆར་བ་ལ་མེའི་ཞེ་དགུ་དང༌། སྣང་བ་མཆེད་པ་ལ་ཐིམ་ཚེ་དཀར་ལམ་སྣང་བ་ལ་ཆུའི་ལན་བདུན་དང༌། མཆེད་པ་ཉེར་ཐོབ་ལ་ཐིམ་ཚེ་ནག་ལམ་འཆར་བ་ལ་རླུང་གི་ལན་ཅིག་གཏོར་བ་ཞེས་བརྗོད་པ་ཡིན་ནོ། དེ་ལྟར་ལུགས་སུ་ལྡོག་ནས་སྲིད་རྩེ་རུ་འཕེན་པ་ལྟ་བ་ཡིན་ནོ། །བྲི་བ་རྒན་པོ་སྦ་ཁའི་བྲིས། །མཁོ་བ་འཕྲིན་ཆོས་ཁྱོད་ལ་མཁོ། །སྒོམ་པ་འཆི་ཁའི་གདམས་ངག་ཡིན། །གྲོལ་གྱུར་བ་ལ་ཐེ་ཚོམ་མེད། །དགེའོ། ། རྫོགས་པ་ཆེན་པོའི་རྒྱུད་ཉི་མའི་སྙིང་པོ།༈ རྫོགས་པ་ཆེན་པོའི་རྒྱུད་ཉི་མའི་སྙིང་པོ་བཞུགས་སོཿ རྒྱ་གར་སྐད་དུཿ མ་ཧཱ་ཨ་ཏི་ཡོ་ག་སུརྱ་གརྦྷ་ཏནྟྲཿ བོད་སྐད་དུཿ རྫོགས་པ་ཆེན་པོ་ཉི་མའི་སྙིང་པོའི་རྒྱུདཿ མཁའ་ཀློང་ཡངས་པར་ཕྱག་འཚལ་ལོཿ རྟོགས་པའི་ཡོན་ཏན་ཁྱད་པར་འཕགསཿ སངས་རྒྱས་རྣམས་ཀྱི་རྣམ་པར་དགཿ མི་རྟོག་ཡེ་ཤེས་ཟག་པ་མེདཿ ༡ ཁྱབ་བརྡལ་ལྷུན་གྲུབ་འདུས་མ་བྱསཿ མཚན་མ་ཚིག་གི་སྤྱོད་ཡུལ་འདསཿ འདས་དང་མ་འདས་མི་གནས་ལཿ ཐམས་ཅད་ཐམས་ཅད་མཁའ་རུ་སྦྲུམཿ ༢ སྐུ་གསུང་ཐུགས་ཀྱི་འཁོར་ལོ་རུཿ རྣམ་ཀུན་ཡེ་ནས་འུབས་སུ་ཆུབཿ བྱང་ཆུབ་མཉམ་རོལ་ཐིག་ལེ་ཆེཿ ཆེད་དུ་སྒྲུབ་ཀྱང་རྩོལ་བའི་མཐའཿ ༣ ངང་ལ་སྦྱངས་རྒྱུར་གང་ཡང་མཉམཿ གཤིས་ལ་ཐོབ་དང་མ་ཐོབ་མེདཿ སྔར་ལས་འཕྲལ་སངས་རྒྱས་པ་མེདཿ ཉག་གཅིག་ཕྱམ་ཕྱལ་ཡངས་པོ་ཆེཿ ༤ མཐའ་དང་ཕྱོགས་ལས་རྣམ་པར་རྒྱལཿ རྣམ་ཀུན་མཆོག་ལྡན་འགྱུར་བ་མེདཿ རིག་དབྱིངས་གདངས་ཀྱི་ཤེས་རབ་མཆོགཿ མ་ཉམས་མ་སྨད་ཉོན་མི་མོངསཿ ༥ བྱ་རྩོལ་འབད་པའི་འཕྱང་རྒྱ་གྲོལཿ གྲོལ་འཁྲུལ་མཉམ་དག་སྐྱེ་མ་མྱོངཿ གཅིག་དང་དུ་མའི་མཚན་བཅས་ཞིགཿ སྲིད་དང་ཞི་ལ་རྣམ་མི་གནསཿ ༦ འཆིང་དང་གྲོལ་བ་སླད་མི་འཚལཿ ཡེ་ནས་རང་བཞིན་བརྗོད་དུ་མེདཿ མེད་མཉམ་དག་མཉམ་བབ་ཀྱི་ངངཿ དཔེ་དང་མཚོན་པ་གནམ་པོར་འགྱུརཿ ༧ ཐེག་པའི་བྱེ་བྲག་གང་གིས་ཀྱངཿ ཡིད་ཀྱི་དཔྱོད་པས་དབྱེར་མི་བྱེདཿ རྨོངས་གཉིས་དྲི་མ་ཐམས་ཅད་ཀུནཿ ངོ་བོ་ཉིད་དུ་གཞི་རྩ་བྲལཿ ༨ ངོ་བོ་ཉིད་ལ་བསྟན་དུ་མེདཿ ངོ་བོ་ཉིད་ལ་གཟུང་དུ་མེདཿ ངོ་བོ་ཉིད་ལ་དམིགས་སུ་མེདཿ ངོ་བོ་ཉིད་ལ་མེད་མཐའ་ཟདཿ ༩ ངོ་བོ་ཉིད་ལ་སྤྲོས་པ་དགཿ ངོ་བོ་ཉིད་ལ་སྤྲོས་མེད་ཧརཿ ངོ་བོ་ཉིད་ཅེས་གཞན་དུ་མེདཿ ངོ་བོ་ཉིད་ཀྱང་སྐྱེ་བ་མེདཿ ༡༠ ངོ་བོ་ཉིད་ལ་གནས་འགགས་མེདཿ ངོ་བོ་ཉིད་ནི་བྱང་ཆུབ་སེམསཿ ཉི་མ་སྙིང་པོ་ཅི་ལྟ་སྟེཿ ངོ་བོ་ཉིད་ལས་མ་གཡོས་བཞིནཿ ༡༡ ངོ་བོ་ཉིད་ཀྱི་སྐུ་རུ་ཤརཿ བྱང་ཆུབ་སེམས་ཀྱི་གསུང་དུ་བསྒྲུནཿ རང་བྱུང་ཡེ་ཤེས་ཐུགས་སུ་བརྡལཿ དེས་ན་གཉིས་སུ་མ་རྟོགས་བཞིནཿ ༡༢ ཉི་མ་འོད་ཟེར་ཀུན་ཏུ་དགྲམཿ དེ་བཞིན་གཡོ་བའི་སེམས་མེད་པའིཿ ཕྱོགས་མེད་རྒྱན་གྱི་འཁོར་ལོ་སྤེལཿ སྤེལ་བཞིན་པའང་རང་བཞིན་དགཿ ༡༣ ཡང་ཅིག་ཉི་མས་རྩོལ་མེད་དུཿ ཕྱོགས་མཐའི་མུན་པ་དཔྱིས་ནས་འབྱིནཿ དེ་བཞིན་བྱང་ཆུབ་ཐིག་ལེ་ཆེའིཿ མཐའ་ཡས་ཁམས་ལྡན་མོས་ངོར་བརྩེཿ ༡༤ བརྩེ་བའི་སྤྲུལ་བ་རང་བྱུང་བཿ ཐུགས་རྗེ་དམ་པའི་དཔལ་ཆེན་པོཿ ནམ་མཁའ་བཞིན་དུ་ཕྱོགས་རིས་མེདཿ སྟོང་ལ་སྙིང་རྗེ་ཐབས་སུ་རྒྱསཿ ༡༥ རྫོགས་པ་ཆེན་པོ་ཉི་མའི་སྙིང་པོ་ལསཿ གཞི་ཁྱབ་བརྡལ་ཆེན་པོའི་རིག་པའི་སྐབས་ཏེ་དང་པོའོཿ དེ་ལྟར་གཤིས་ལུགས་ཐབས་ཤེས་མཉམ་བརྡལ་བཿ མ་རྟོགས་གུད་དུ་བཅད་པའི་ཞེན་འཐས་སྒྲིབཿ རང་ཞལ་སྐྱེ་མེད་ངང་དུ་གཞིལ་བའི་ཕྱིརཿ བསྒོམ་པ་ཉམས་སུ་ལེན་པའི་རིམ་པ་ལཿ ༡ ལར་ནི་དཀར་ནག་ལས་གང་མཉམ་བརྡལ་དུཿ རིག་པའི་སྒྲིབ་པར་གཞི་ལ་མཉམ་ནའངཿ རྩོལ་མེད་རྟོགས་བའི་ཡེ་ཤེས་མ་ཤར་བརཿ རྒྱུ་འབྲས་ཀུན་རྫོབ་བདེན་བའི་དོན་ཤེས་མཛོདཿ ༢ ཁྱད་པར་ཟད་མེད་ཤེས་རབ་རིག་པའི་མཚོནཿ སྲིད་རྩ་ང་རུ་འཛིན་པའི་དགྲ་ལ་ཕོབཿ སོར་རྟོགས་ཡེ་ཤེས་རྡོ་རྗེའི་འདུ་འཕྲོ་ཡིསཿ ཉོན་མོངས་དམར་སྙིང་འབྱིན་ལ་གདོད་མི་ཟཿ ༣ ཞི་གནས་ཉོན་མོངས་རྙོགས་པ་བྲལ་བའི་མཚོརཿ ལྷག་མཐོང་ཤེས་རབ་ཟླ་བ་གཉིས་པར་འཕོཿ ལམ་གྱི་རིག་པ་རྣལ་དུ་འབྱོར་བའི་ཕྱིརཿ བྱུང་གནས་འགྲོ་གསུམ་གཞི་རྩ་སེམས་ལ་གཞལཿ ༤ གནས་ཚུལ་ཡང་དག་མཐོང་རྒྱུ་འདི་ལ་ཡོདཿ ངོ་བོ་མངོན་དུ་བྱས་ན་སྟོང་སང་ངེཿ རང་བཞིན་བབ་ཀྱི་གནས་ན་རང་མདངས་གསལཿ རྩལ་ལས་འཁོར་འདས་སྣང་སྲིད་རྒྱན་སྣང་དགྲམཿ ༥ བསྐྱང་ཞིང་བསྐྱང་ན་དམིགས་མེད་རང་སར་ཧརཿ རྩལ་སྣང་སེམས་བྱུང་རྒྱུ་བ་རྣམ་ཞི་ནསཿ ཤར་སྟོང་ངོ་བོ་མཐོང་ན་གཅིག་དུ་གྱུརཿ དྲན་བའི་རང་ཚུགས་ཐུབ་ནས་གཟུ་བོར་བསྟིཿ ༦ དྲན་སྟོང་མལ་དུ་དུབ་ན་སྲིད་རྩེར་སྦྲོནཿ བདེ་གསལ་ཉམས་ཀྱི་བསླུས་ན་འདོད་གཟུགས་འདུཿ སྟོང་གསལ་ངང་ན་རང་གསལ་རྗེན་པར་ཤརཿ འདི་དུས་རིག་པའི་དབྱིངས་སུ་འཁྱོལ་བ་ལགསཿ ༧ རྫོགས་པ་ཆེན་པོའི་རྒྱུད་ཉི་མའི་སྙིང་པོ་ལསཿ སེམས་ལ་ལམ་བྱས་ནས་རིག་པའི་དབྱིངས་སུ་སྐྱོལ་བའི་སྐབས་ཏེ་གཉིས་པའོཿ རྣམ་པ་ཐམས་ཅད་མཁྱེན་པའི་ཡེ་ཤེས་ནིཿ སེམས་ཅན་ཀུན་ལ་རང་ཆོས་《ཆས་དཔྱད་》གནས་ནའངཿ མ་རྟོགས་ལོག་པའི་སྡུག་བསྔལ་བསམ་མི་ཁྱབཿ རྟོགས་ན་ད་ལྟ་ཉིད་ནས་གདོད་མར་ཕྱིནཿ ༡ དྲི་མེད་ཡེ་ཤེས་རྣམ་པར་དག་པ་སྟེཿ རང་གི་རིག་པ་ཁྱབ་བརྡལ་གཅིག་དུ་གནསཿ འདི་ཉིད་མ་མཐོང་ནམ་ཡང་གྲོལ་མི་སྲིདཿ མཐོང་ན་མི་གནས་སར་བསྒྲོད་གཏ༵ན་ཚིག༵་གཅི༵གཿ ༢ ཐོས་བསམ་བསྒོམ་པའི་མིག་བུ་དག་པ་དངཿ ཚོགས་སྨོན་བསོད་ནམས་བཟང་པོའི་བྱེ་བྲག་དངཿ ཁྱད་པར་རང་སྣང་སྟོན་པའི་ཕྲིན་ལས་ཀྱིསཿ འདི་ན་རིག་པའི་རྩལ་དབང་ཟབ་མོ་ཡིཿ ༣ དབང་དོན་བཞི་བའི་ཡེ་ཤེས་སྐྱེ་འགྱུར་གྱིཿ ཐབས་ཀྱིས་ཕོངས་བའི་འོལ་ཚོད་བསམ་སྤྱོད་ཅནཿ ཁ་ལྟ་སྟོང་སྐད་ཆེ་ཡང་ཆུ་འབབ་སྒྲཿ དེ་ལ་ཞེ་གཅོད་ལ་སོགས་དོན་རྡོའི་སྟོངཿ ༤ སྐུ་གསུམ་འདུ་འབྲལ་མེད་པའི་རིག་པ་ནིཿ དུས་གསུམ་སྐྱེ་འགགས་བྲལ་བའི་ཤེས་རབ་ཆེཿ རྒྱལ་བ་ཐམས་ཅད་དཀྱིལ་འཁོར་འདི་ལ་རྫོགསཿ དེ་ཡི་རྒྱུ་རྐྱེན་དད་དང་མོས་གུས་ཡིནཿ ༥ དེ་ཉིད་བླ་མའི་ཐུགས་རྗེའི་ངོ་འཕྲོད་ནསཿ ཡུལ་ལ་མི་འདྲེས་སེམས་སུ་མ་འཁྲུལ་པའིཿ ལམ་རིག་ཆ་རྫོགས་མངོན་དུ་གྱུར་ནས་ཀྱངཿ ངང་ལ་ཅེར་གྱི་གནས་པའི་ལྷག་མཐོང་ནིཿ ༦ ལྟ་དང་གཏད་སོ་མེད་པར་ཧར་སང་ངེཿ དམིགས་དང་རྩོལ་བློ་མེད་པར་ཕྱམ་བརྡལ་ལེཿ ཉོན་མོངས་རྙོགས་པ་མེད་པར་རྗེན་ཁྲེས་སེཿ རྣམ་རྟོག་དམིགས་པ་མེད་པར་རང་གསལ་ལེཿ ༧ སྒོམ་དང་ཡིད་བྱེད་མེད་པར་ཟང་ཐལ་ལེཿ གཉིས་འཛིན་སྤངས་བླངས་མེད་པར་ཅོག་གི་གནསཿ མཚན་མའི་སྤྲོས་པ་མེད་པར་བབ་ཀྱི་གནསཿ མ་བྱེད་མ་བྱེད་དགག་སྒྲུབ་བློ་མ་བྱེདཿ ༨ ཐམས་ཅད་ཆོས་ཉིད་དག་པའི་རང་རྩལ་ལཿ རིམ་པར་དགག་ན་སྨྱོ་འབོགས་བརྒྱལ་བའི་རྒྱུཿ མ་འཛིན་མ་འཛིན་འཁོར་གསུམ་བློ་མ་འཛིནཿ བཟུང་ཤིང་བཟུང་ན་དོན་ལ་གཟུང་མཁན་སྟོངཿ ༩ སྟོང་ལ་སྣང་བའི་རྒྱས་འདེབས་ག་ལ་འཐདཿ དག་པའི་རིག་པ་ཆོས་ཉིད་གདོད་མའི་རྒྱལཿ འཕོ་འགྱུར་སྐྱེ་འཇིག་མེད་པའི་རྒྱལ་ས་ནསཿ གཡོས་ན་དེ་ལ་ཐར་ལམ་ཅི་ཞིག་ཡོདཿ ༡༠ འཁོར་འདས་སྣང་སྲིད་གཉིས་སུ་ཤར་བ་དངཿ ལུས་དང་དབང་བོ་ཡུལ་དང་ཡིད་དྲུག་བཅསཿ ཐམས་ཅད་མ་ལུས་འདི་ཡི་སྤྱི་རྒྱས་བཅིངསཿ སྟོང་ཉིད་གཅིག་པུ་རིག་པར་རྟོགས་པ་ནཿ ༡༡ དེ་ཡི་གཞན་དུ་ལྟ་བ་ཞེས་བྱ་བཿ འགའ་ལ་ཡོད་ན་ཡིད་དཔྱོད་ལོག་རྟོག་ཞིགཿ བསྐལ་པར་གཉེར་ཀྱང་ཚི་ཆད་འཁོར་བ་རུཿ འདའ་བར་སྤྲོ་བས་བསྒྲོན་པའི་བྱེད་པོ་ཡིནཿ ༡༢ རིག་པ་དེ་ཡང་འདི་ཞེས་འཛིན་ཡོད་ནསཿ སེམས་ཀྱི་སེམས་ལ་ལྷག་པའི་སྣོན་མ་ཞིགཿ འཛིན་མེད་སྟོང་གསལ་ཉིད་དུ་ཉེ་བ་ལསཿ དགོན་པར་བྲོས་པ་ངེས་པའི་གཏ༵ན་ཚིག༵་གཉིསཿ ༡༣ བ༵ཞི་ཆ༵་གསུ༵མ་བྲ༵ལ་ཟང་ཐལ་གཅེར་ཡན་པཿ སྒྲ་དང་ཚིག་གི་གཞལ་ནས་སྨྲ་བའངཿ ནམ་མཁའ་སྟོང་བ་ཁ་དོག་སྤྲོས་མེད་ལཿ སྐྱེ་བོ་རྣམས་ཀྱིས་སྔོན་པོ་གྲགས་པ་བཞིནཿ ༡༤ ཇི་ལྟར་ནམ་མཁའ་ཉི་མ་ཟླ་བ་དངཿ སྤྲིན་དང་ཁུག་སྣས་བཅོས་བསྒྱུར་མེད་པ་བཞིནཿ དགེ་སྡིག་བཟང་ངན་རྟོག་པ་ཐམས་ཅད་ཀུནཿ ཐུ༵གས་ཕྲ༵ད་རང་དག་རྗེས་མེད་ཨ་ལ་ལཿ བསལ་བཞག་མེད་པ་ཐམས་ཅད་ཡེ་ཤེས་རྒྱནཿ ༡༥ འཁྲུལ་བ་རྒྱ་འབྱམས་དམིགས་པ་བྱུང་རྒྱལ་མིནཿ ཕྱི་གདངས་རང་གསལ་ནམ་མཁའ་དག་པ་དངཿ བར་དུ་འོད་ལྔ་ནང་མདངས་དག་པ་ནཿ གསང་བ་ཆོས་ཉིད་དག་པའི་ནམ་མཁའ་མཐོངཿ ༡༦ འདི་ཉིད་ངོ་བོ་རང་བཞིན་བདག་ཉིད་ཅནཿ མཐོང་བས་གཤིས་ཐོག་སོན་པའི་ཀུན་བཟང་ནིཿ དགེ་སྡིག་རྒྱུ་འབྲས་གང་གི་གཞན་དབང་དུཿ མ་གྱུར་རང་ཞལ་མཇལ་བའི་ཁྱད་ཆོས་ཡིནཿ ༡༧ རྫོགས་པ་ཆེན་པོའི་རྒྱུད་ཉི་མའི་སྙིང་པོ་ལསཿ ལམ་བསྒོམ་པ་རང་བཞག་ཆེན་པོའི་སྐབས་ཏེ་གསུམ་པའོཿ ལམ་གྱི་རིག་པ་མངོན་གྱུར་ཆ་རྫོགས་ནསཿ མཐར་ཕྱིན་འབྲས་བུ་སྐུ་དང་ཡེ་ཤེས་ཡིནཿ དེ་ཡི་རྒྱུ་རྐྱེན་ལྟ་སྤྱོད་གཉིས་ཆ་སྟེཿ ཅོག་བཞག་རང་བབ་ངང་ལ་ཆམ་བརྡལ་ལེཿ ༡ བཟང་ངན་གང་ཡང་སྒྲོག་ཏུ་བཙུད་པ་འདྲཿ དེ་ཕྱིར་ཐམས་ཅད་མཉམ་པར་ཁྲིགས་ཆོད་དེཿ སྣ་ཚོགས་སྤྲོས་པ་བསྐྱུང་བའི་རྗེས་ཐོབ་ཏུཿ རྒྱུ་འབྲས་རྟེན་འབྲེལ་རྩི་བསྒྲངས་ཞིབ་པ་དགོསཿ ༢ འགའ་ཞིག་ངས་ནི་སྟོང་ཉིད་རྟོགས་ཞེས་ནསཿ སྲོག་གཅོད་ལ་སོགས་སྡིག་པ་ཁྱད་དུ་གསོདཿ དེ་ནི་མ་རྟོགས་མཚུངས་བ་གསལ་བྱེད་དུཿ མེད་བཞིན་འཁྲུལ་ལ་སྙིང་རྗེ་ཟད་པ་ཡིནཿ ༣ མེ་ལ་དྲོད་བཞིན་སྟོང་ཉིད་ཕྱི་མཚན་ནིཿ སྙིང་རྗེའི་བདོ་དར་ལང་ཚོ་བཞད་བཞིན་དུཿ སྲིད་པའི་འདམ་དུ་ཉེར་དཀྱུས་དྲོད་གཤེར་སྐྱེསཿ ཆུས་མི་ཆགས་བཞིན་རྣམ་པར་རྟོག་པ་ཟདཿ ༤ རྫོགས་པ་ཆེན་པོ་ཉི་མའི་སྙིང་པོ་ལསཿ གྲོགས་སྤྱོད་པ་བསྟན་པ་སྟེ་གནས་བཞི་བའོཿ དེ་ལྟར་སྒོམ་དོན་ཚོལ་བའི་རྣལ་འབྱོར་གྱིཿ ཤན་འབྱེད་འཕྱོང་ལ་མཁས་པ་གནད་ཡིན་ཏེཿ སེམས་དང་རིག་པ་གཉིས་ཀྱི་ཤན་འབྱེད་མོདཿ སེམས་ནི་སྣ་ཚོགས་ཡུལ་གྱི་རྗེས་སུ་འགྲོཿ ༡ རིག་པ་ཡུལ་མེད་ཟང་ཐལ་གསལ་སྟོང་ཁྱདཿ རྣམ་ཤེས་གང་གི་ཉེ་བར་འདྲེན་བསྒྱུར་བྱེདཿ ཡེ་ཤེས་ཐམས་ཅད་རང་དག་མཉམ་པའི་ཁྱདཿ ཡིད་ནི་ཚོགས་དྲུག་འཁྲུལ་བཞད་བརྩེན་པའི་བདགཿ ༢ ཤེས་རབ་རང་གསལ་སོ་སོར་འབྱེད་པ་ལཿ ཉོན་མོངས་མི་དམིགས་སྣང་གསུམ་ཀ་ནས་དགཿ ཀུན་གཞི་གདངས་གསུམ་སྙིགས་མར་འཕོ་བ་ཡིནཿ ཆོས་སྐུ་གདངས་མདངས་རྩལ་གསུམ་ཡོན་ཏན་རྫོགསཿ ༣ རྫོགས་པའི་བྱང་ཆུབ་སྐུ་ལྔ་ལྷུན་གྱིས་གྲུབཿ ཡེ་ནས་ཕྱལ་བ་སྐྱོན་ཀུན་དམིགས་པ་དགཿ འུབ་ཆུབ་གཅིག་གི་ཐམས་ཅད་ཆོ་འཕྲུལ་ངོམཿ རིག་པའི་དབྱིངས་སུ་ཆོས་ཅན་རྟོག་པ་གྲོལཿ རྫོགས་པ་ཆེན་པོ་ཉི་མའི་སྙིང་པོ་ལསཿ ཐམས་ཅད་ཀྱི་གོལ་ས་ཤན་འབྱེད་ཀྱི་སྐབས་སྟེ་ལྔ་བའོཿ མཐར་ཐུག་འབྲས་བུ་ཡང་སངས་རྒྱས་པ་ནིཿ ཡེ་སངས་རྒྱས་ལ་འབྱུང་བའི་གནམ་གཟེར་གསུམཿ གདངས་ལ་གདངས་ཞུགས་ལྷུན་གྲུབ་ནང་དབྱིངས་སུཿ དབང་པོ་དྭངས་མ་ཁྱད་པར་ཆོས་ཕུན་ཚོགསཿ མདངས་ལ་མདངས་ཞུགས་སྐུ་དང་ཡེ་ཤེས་སུཿ འཛིན་མེད་རང་གྲོལ་འབྲིང་གི་ལ་བཟླས་དོནཿ རྩལ་ཉིད་རོལ་བར་ཤར་བའི་གྲོལ་བཞི་རུཿ གདེངས་རྙེད་ཙམ་ན་རང་བཞིན་སྤྲུལ་བར་རོཿ གཤིས་ལ་གཤིས་སོན་མཁའ་ལ་མཁའ་ཐིམ་བཞིནཿ ངང་ལ་ངང་རོལ་ཤེལ་སྒོང་འཇའ་འོད་བཞིནཿ རྩལ་ལས་རོལ་བ་ཆུ་ནང་ཉ་འཕར་བཞིནཿ མ་བང་བུ་འཇུག་ཐི་བྱ་ཚང་ཞུགས་བཞིནཿ དཔེ་དྲུག་གནད་ཀྱི་གྲོལ་བ་དྲུག་དང་ལྡནཿ ཇི་ལྟར་སྒོང་ངའི་ནང་ནས་འདབ་རྒྱས་བྱཿ སྒོང་རྒྱ་རལ་བཞིན་ལུས་རྒྱ་གྲོལ་མ་ཐགཿ འོད་གསལ་ལྷུན་གྲུབ་རང་བཞིན་མཁའ་ལ་འཕྱོཿ རྫོགས་པ་ཆེན་པོ་ཉི་མའི་སྙིང་པོ་ལསཿ ཡེ་སངས་རྒྱས་པ་ལ་ཡང་སངས་རྒྱས་པའི་འབྱུང་བའི་ཚུལ་བསྟན་པ་སྟེ་དྲུག་པའི་བདག་ཉིད་ཅན་གྱིས་རྫོགས་པའོཿ རྡོ་རྗེའི་མཆེད་ཀྱི་བཀའི་བསྐུལ་བ་མ་ལྡོག་ཙམ་དུ་རྨོངས་པ་ག་ག་ཨ་བྷྱེའི་ཁ་ལ་གང་བབ་ཤར་མར་བྲིས་པ་ཉེས་འགལ་མཆིས་ན་མཐོལ་ལོ་བཤགས། ། ༄༅། །དེ་ཡང་སེམས་ཅན་ཐམས་ཅད་མར་ཤེས་པ་དང་། དྲིན་དྲན་པ་གཞིར་བཞག་གིས་འཁོར་བ་སྤྱི་དང་རང་དགོས་ཀྱི་སྡུག་བསྔལ་ལ་སྤྱོད་པ་དམིགས་ཡུལ་དུ་བྱས་ནས། དེ་ལྟར་ན་སེམས་ཅན་ཐམས་ཅད་ཕ་མ་ཡིན་པས་ཉེ་རང་ཆགས་སྡང་མེད་པའི་བཏང་སྙོམ་ཀྱིས་བྱམས་སྙིང་རྗེའི་ཡུལ་དུ་རིག་པས་འཁོར་བའི་སྡུག་བསྔལ་དང་བྲལ་འདོད་ཀྱི་སྙིང་རྗེ་དང་། གནས་སྐབས་མཐར་ཐུག་གི་བདེ་བ་དང་ལྡན་འདོད་ཀྱི་བྱམས་པ་དང་། སྡུག་བྲལ་བདེར་གནས་ལ་དགའ་བ་དག་སྐྱེ་སྟེ། དེ་དག་གིས་དྲངས་བས་དེ་ལྟ་ན་གང་ཆེད་དུ་བྱ་བའི་དམིགས་ཡུལ་ནི་སེམས་ཅན་ཡིན་པས་སྙིང་རྗེའི་གཞན་དོན་དུ་དམིགས་པ་དང་། སྡུག་བསྔལ་རྒྱུ་འབྲས་གཉིས་དང་བྲལ་བ་དང་། མི་འགྱུར་ཞིང་ཡོན་ཏན་དང་བདེར་གནས་ཀྱི་མཐར་ཐུག་ནི་སངས་རྒྱས་ཀྱི་གོ་འཕང་ལས་གཞན་དུ་མ་དམིགས་པར་ཤེས་ནས་ཤེས་རབ་ཀྱིས་རྫོགས་བྱང་དེ་ཐོབ་པ་ལ་སྨོན་པ་དང་བདག་ཉིད་ཀྱིས་བསྒྲུབ་འདོད་འབྱུང་། དེ་ཡང་བདག་ཉིད་ཀྱིས་སེམས་ཅན་སངས་རྒྱས་ཀྱི་གོ་འཕང་ལ་འགོད་པར་བྱ་སྙམས་ཏེ་ཐག་བཅད་ནས་དམ་བཅའ་བཟུང་བ་ནི་འབྲས་བུ་ལ་དམ་བཅའ་བ་སྨོན་སེམས་ཡིན། དེའི་ཆེད་དུ་འབྲས་བུའི་རྒྱུ་ལམ་བསྒྲུབ་པར་བྱ་སྙམ་དུ་དམ་བཅའ་བ་ནི་འཇུག་སེམས་བསྐྱེད་པ་ཡིན། འཇུག་པ་དངོས་སམ་བསླབ་བྱ་ནི་ཕར་ཕྱིན་དྲུག་དང་འབྲེལ་བའི་ཐོས་བསམ་བསྒོམ་བསྒྲུབ་ཆེ་ཕྲ་ཆུང་གསུམ་ཐམས་ཅད་ལ་དངོས་སུ་འཇུག་ནས་བསྒྲུབ་པ་ཡིན། དེ་དག་ནི་ཀུན་རྫོབ་སེམས་བསྐྱེད་ཡིན། སེམས་བསྐྱེད་དང་ཕྱིན་དྲུག་གི་སྤྱོད་པ་དེ་དག་འཁོར་གསུམ་རྣམ་དག་གིས་རྒྱས་ཐེབས་པ་ནི་དོན་དམ་སེམས་བསྐྱེད་ཀྱི་ཉམས་ལེན་ཙམ་པོ་པ་དང་། དེ་གཉིས་སྨིན་བྱེད་དུ་གྱུར་ནས་ས་དང་པོ་ཐོབ་དུས་བདག་མེད་མངོན་སུམ་དུ་རྒྱུད་ལ་སྐྱེས་པ་ནི་དོན་དམ་སེམས་བསྐྱེད་དོ་སྙམ། བྲེལ་ཚུབ་ཀྱི་ངང་ནས་ག་གཱས་སྨྲས་པ་འདིའི་ཆོ་མིན་རིགས་མིན་གྱི་ཐུགས་དམ་བསྐང་བར་གྱུར་ཅིག ། ༈ བླ་མ་ཨོ་མུག་ལ་སྤྲིང་བ་ནི། སངས་རྒྱས་ཀུན་དང་འདུ་འབྲལ་མེད། །ཡེ་བབས་རིག་སྟོང་དོན་གྱི་ལྷ། །ཆོས་སྐུའི་མཁྱེན་བརྩེའི་རང་གཟུགས་པ། །བདུད་འཇོམས་རྡོ་རྗེར་ཕྱག་འཚལ་ལོ༑ ༑གང་གི་རྡོ་རྗེའི་གསུང་གསང་ལས། །ཟབ་དང་རྒྱ་ཆེ་ཐབས་ཤེས་རབ། །སྣ་ཚོགས་གཅིག་དུ་འདུས་པའི་ཆོས། །གཉིས་མེད་བསྩལ་བའི་དམ་ཚིག་གཅིག །ཁྱེད་ཀྱིས་བདག་ལ་དྲིས་པའི་ལན། །ཟག་མེད་མངོན་ཤེས་མི་ལྡན་ཕྱིར། །གསལ་ཉམས་ཤར་ཆ་ཙམ་པོ་བ། །ཕོ་རོག་དགོངས་པ་དེ་བསྟན་ན། །སྲིད་པ་ཁམས་གསུམ་འཁོར་བ་འདི། །རྨི་ལམ་ཙམ་ཞིག་ལུང་བསྟན་པ། །དེ་ལ་ངེས་པ་འཚལ་བ་ན། །ཤི་ཞེས་རྣམ་རྟོག་ནོར་བ་ཙམ། །ཤི་བའི་མཁན་པོ་ཞིག་མཆིས་ན། །དེ་ལ་འཆི་བ་ཡོད་གྲངས་ན། །མཁན་པོ་མེད་པའི་སྐྱེ་ཤི་འདོད། །དེ་ནི་མོ་གཤམ་བུ་ལའོ། །སྐྱེ་བ་ཞེས་ཀྱང་ལོག་རྟོག་པ། །ཡོད་པ་སྐྱེ་བར་མི་འགྱུར་ཏེ། །མ་སྐྱེས་གོང་ནས་ཡོད་པའི་ཕྱིར། །མེད་པ་སྐྱེ་བར་མི་འགྱུར་ཏེ། །རི་བོང་རྭ་ལ་སྐྱེ་ཡོད་དམ། །ཡོད་དང་མེད་པ་གཉིས་ཡིན་དང་། །གཉིས་མིན་ཞེས་བྱ་མི་སྲིད་དེ། །ཡོད་པ་ཡིན་ན་མེད་པ་མིན། །མེད་པ་ཡིན་ན་ཡོད་པ་མིན། །ཡོད་པ་མིན་ན་མེད་པ་ཡིན། །མེད་པ་མིན་ན་ཡོད་པ་ཡིན། །དེ་ཕྱིར་སྐྱེ་བ་ཡོད་མིན་པས། །འཆི་བར་འགྱུར་བ་གང་ཞིག་ཡིན། །དེ་ལ་འཆི་བ་ཞིག་ཡོད་ན༑ ༑ནམ་མཁའི་མེ་ཏོག་རྒས་པར་ཐལ། །གལ་ཏེ་ད་དུང་མི་གོ་ན། །ཤི་ཞེས་བྱ་བ་ཅི་ལ་ཟེར། །འགགས་པར་འགྱུར་བ་ལྟ་ཞིག་ན། །ནམ་མཁའི་ཡིད་ཅན་ཐལ་བས་ཕྱུག །འགགས་པ་མ་ཡིན་སྐྱེ་ཡོད་ཕྱིར། །རྟེན་ཅན་འབྲེལ་པའི་ཡུལ་མེད་ན། །ཤི་ཞེས་བྱ་བ་ཅི་ལ་ཟེར། །གལ་ཏེ་ཤི་རྒྱུ་ཞིག་ཡོད་ན། །གཟུང་འཛིན་འཁྲུལ་བ་འདྲ་མིན་པས། །དེ་ལས་སུ་ཡང་ཡོད་མི་འགྱུར། །ཆོས་རྣམས་མ་ལུས་ཐམས་ཅད་ནི། །ཡེ་གནས་སྤྲོས་བྲལ་ཆེན་པོ་སྟེ། །དེ་ཡི་ནང་ནས་ཆ་ཤས་ཀྱི། །འཆི་མཁན་རང་སྐྱ་ཐུབ་པ་ཞིག །ངས་ནི་ཀུན་ཏུ་མ་རྙེད་ཀྱང་། །ཁྱེད་ཀྱིས་རྙེད་ན་ང་ལ་སྟོན། །ཆོས་སྐུ་ཁྱབ་བདག་རིག་པའི་དབྱིངས། །སྐྱེ་འགགས་གནས་གསུམ་བྲལ་པའི་གཤིས། །རང་བཞིན་འོད་གསལ་ཆེན་པོ་ཉིད། །ཟང་ཐལ་རྟོག་བྲལ་ངང་གསལ་བ། །གསལ་ལ་སྟོང་པའི་ཁྱད་ཆོས་ཅན། །ཡེ་ཤེས་དྲི་མེད་རྗེན་པ་ནི། །ཉིད་ལ་ཆོས་སྐུའི་སྟོན་པ་དེའི། །དགོངས་བརྡ་སྙན་བརྒྱུད་གཅིག་རྫོགས་སུ། །རང་སྣང་ཚུལ་དུ་ཤར་བར་བྱས། །འདི་ན་སངས་རྒྱས་ཉག་གཅིག་གི །རང་ཞལ་སྒྲིབ་པ་བྲལ་བའི་དངོས། །མཐོང་བཞིན་རང་གིས་རང་བསླུ་ན། །དེ་ལས་འཁྲུལ་བ་རྙེད་མི་འགྱུར། །དེ་ཕྱིར་གཟེབ་བཅུར་མ་ལྟུང་བས། །རང་གནས་རིག་པ་རླུང་སེམས་དང་། །བསམ་གཏན་ཉམས་ཀྱི་ཤུན་ཕྲོལ་ལ། །རང་རིག་ཚུལ་དུ་འབྱམས་ཀླས་ན། །རྣལ་འབྱོར་དབང་པོ་དེ་ལ་ཟེར། །མདོར་ན་སེམས་འདི་ཆོས་རྣམས་ཀུན། །བྱེད་པའི་རྒྱལ་པོ་ཡིན་པའི་ཕྱིར། །མདང་གི་རྨི་ལམ་འཁྲུལ་བ་ཀུན། །དེ་རིང་དབྱིངས་སུ་ཞིག་ནས་མེད། །དེ་རིང་འཁྲུལ་བའང་དེ་དང་འདྲ། །དེ་ཕྱིིར་འཁྲུལ་བ་སེམས་ཀྱི་ཆོས། །ལྷུན་གྲུབ་རིག་པའི་རྩལ་ཉིད་ལས། །རོལ་བ་འགགས་མེད་ཆ་ཡིན་པས། །གཞི་མེད་རྩ་བ་བྲལ་བ་ནི། །བད་ཀན་ཅན་གྱི་སྐྲ་ཤད་དང་། །མཁྲིས་ནད་ཅན་ཀྱི་དུང་བཞིན་ནོ། །གང་ལྟར་ཤར་བའི་རྣམ་པར་རྟོག །ཤར་སྟོང་མཚན་མ་བྲལ་བ་ནི། །ཀུན་བཟང་རིག་པའི་ཁྱད་ཆོས་ཆེ༑ ༑གང་ལྟར་ཚོར་བའི་དྲི་རྣམས་ཀུན། །ཚོར་སྟོང་མཚན་མ་བྲལ་བ་ནི། །ཀུན་བཟང་རིག་པའི་ཁྱད་ཆོས་ཆེ། །གང་ལྟར་མཐོང་པའི་གཟུགས་རྣམས་ཀུན། །མཐོང་སྟོང་མཚན་མ་བྲལ་བ་ནི། །ཀུན་བཟང་རིག་པའི་ཁྱད་ཆོས་ཆེ། །གང་ལྟར་ཐོས་པའི་སྒྲ་རྣམས་ཀུན། །ཐོས་སྟོང་ཆེན་པོའི་བདག་ཉིད་ནི། །ཀུན་བཟང་རིག་པའི་ཁྱད་ཆོས་ཆེ། །གང་ལྟར་མྱོང་དང་རེག་པ་ཀུན། །མྱོང་རེག་མཚན་མ་བྲལ་བ་ནི། །ཀུན་བཟང་རིག་པའི་ཁྱད་ཆོས་ཡིན། །གང་དུ་ཉོན་མོངས་དུག་ལྔ་ཀུན། །སྣང་སྟོང་གསལ་སྟོང་བདེ་སྟོང་དང་། །ཚོར་སྟོང་འགགས་མེད་བདག་ཉིད་དེ། །ཀུན་བཟང་རིག་པའི་ཡེ་ཤེས་ལྔ། །དེ་ཕྱིར་ཐུག་འཕྲད་རང་(ཡུལ་ཤེས་རིག་པ་) གྲོལ་གསུམ། །བཞག་(རྒྱ་མཚོར་སྣང་བ་ཅོག་བཞག་རིག་པ་ཅེར་བཞག་རི་བོ་)ཐབས་བཞི་དང་(ཐོག་བབ། རྒྱས་འདེབས། རང་གནས།)ཏིང་འཛིན་གསུམ། །གྲོལ་ལུགས་བཞི་དག་ལྡན་པ་དེ། །ལྷག་པའི་ལྟ་དགོངས་སྐྱོངས་ཤེས་ན། །འཆི་མེད་གཉུག་མ་ཆོས་སྐུའི་ཞལ། །བྱང་ཆུབ་སེམས་མཆོག་རིག་པ་ལས། །ཕྱོགས་བཅུ་དུས་བཞི་གང་ནས་ཀྱང་། །རྫོགས་པའི་སངས་རྒྱས་རྙེད་མི་འགྱུར། །སེམས་ཉིད་རྫོགས་པའི་སངས་རྒྱས་ཏེ། །སངས་རྒྱས་གཞན་ནས་མ་ཚོལ་ཞིག །བཙལ་ཀྱང་དབྱིངས་ནས་མི་རྙེད་གསུངས། །དེ་ཚུལ་ཤེས་མཛོད་རྡོ་རྗེའི་གྲོགས། །དེ་ལྟར་བསྒོམ་པའི་སྐལ་ལྡན་ལ༑ ༑འཁྲུལ་འཁོར་རྩ་བ་ཆོད་པའི་རྟགས། །ཕྱི་སློང་ནང་སློང་གསང་བའི་སློང་། །ལྷ་འདྲེའི་ཆོ་འཕྲུལ་ཐན་ལྟས་ངན། །སེམས་ཀྱི་དགའ་སྡུག་འབྱུང་གསུངས་བ། ཁྱེད་ཀྱི་ཐུགས་ལ་མངའ་བཞིན་པ། ཁྱད་པར་མོ་རྩིས་སྨན་དཔྱད་འཁྲུགས། །མ་དག་བསྐལ་བ་ཞིག་ནས་ཀྱང་། །དག་དབྱིངས་དྭངས་མར་འཕོ་བའི་ལྟས། །དེ་དག་ཉམས་སུ་ཤེས་པ་ན། །ཉམས་ཀུན་རྨི་ལམ་བཞིན་ཡལ་ལོ། །ཤེས་ཉམས་བཅུ་དང་སྣང་ཉམས་ཚོགས། །ཐམས་ཅད་ཆོད་ན་རྣལ་འབྱོར་བ། །གཅོད་པ་ཞེས་བྱ་དེ་ལ་ཟེར། །ལྷག་མ་རོ་བཤའ་ཡིན་པའོ། །དེ་ཚུལ་དགོངས་ལ་རྣམ་རྟོག་དོར། །རྣམ་རྟོག་མ་རིག་ཆེན་པོ་སྟེ། །འཁོར་བར་ལྟུང་བྱེད་ཡིན་ཞེས་གསུངས། །དེ་ཕྱིར་རྣམ་རྟོག་སྤངས་བ་གང་། །འཁོར་པའི་གྲོང་ལས་དགོན་པར་ཕྱིན། །ཁྱད་པར་བླ་མེད་ཐིག་ལེ་ཆེ། །དབྱིངས་དང་རིག་པ་མངོན་གྱུར་ལམ། །བརྟེན་ན་འཆི་བདུད་བཅོམ་ནུས་པས། །སྣང་པའི་འཆི་བ་ཉི་ཚེ་བ། །འཇོམས་པ་འདི་ལ་ཐེ་ཚོམ་མེད། །མཐར་ཐུག་ཡེ་ཤེས་གསུམ་གྱི་དངོས། །མངོན་གྱུར་སྐལ་བ་ཁྱེད་ལ་མཛའ། །ང་ཡང་དེ་དུས་སླེབས་ནས་སུ། །ལྕང་ལོའི་ཟར་བུ་དཔྱང་བཞིན་དུ། །རིག་འཛིན་བླ་མའི་མཆོད་གྲྭལ་འཛིན། །ཨ་ཧོ་ཡེ། ཀ་དག་གི་རང་ཞལ་རྗེན་པ་ཡི་ཆོས་སྐུ། །མངོན་གྱུར་གྱི་ངང་ལ་ཆམ་བརྡལ་དུ་ཞོག་དང་། །བྱ་བྱེད་རང་མི་དགོས་ལྷུན་གྲུབ་དུ་གསལ་བ། །དེང་དུས་ཀྱང་མ་ཉམས་མ་སྨད་པར་ཉེ་འདུག ། བྱས་ཆོས་ཀྱིས་རྙོགས་པའི་སྐལ་དམན་པའི་ལམ་གྱིས། །དྭངས་གསལ་གྱི་ཆུ་བོ་མཐོང་དུས་ཞིག་རློམ་པ། །ཐལ་རྩེད་དང་འདྲ་བའི་དོན་མེད་དེ་བོར་ལ། །རང་བབས་སུ་ལྷུག་དང་མཐོང་མེད་དེ་མཐོང་ཡོད། །དཀར་ནག་གི་སྤྲིན་གྱིས་ཉིན་བྱེད་མཆོག་འོད་ཟེར། །གཡུར་བག་ལ་ཤོར་དོགས་རྣལ་འབྱོར་བས་དགོས་སྐད། །དཀའ་ཐུབ་ཀྱི་སྤྱོད་པས་ཕྱག་བསྐོར་མང་བྱས་ཀྱང་། །དཀྱིལ་འཁོར་ལ་བརྙེས་ཐབས་ཡང་དག་ཞིག་རེད་ཀོ །འབག་འབུག་གི་བཟླས་བརྗོད་གྲངས་ཀ་རེ་གཉེར་ཀྱང་། །འཇིགས་སྐྱོབས་ཀྱི་ཞེ་འདོད་རྣལ་མ་རུ་འདུག་གོ །ལྷ་བསྒོམ་གྱི་ང་རྒྱལ་བརྟན་པོ་སྟེ་བཟུང་བཟུང་། །ངར་འཛིན་གྱི་ཕུང་བའི་རྟོག་བཅས་ལས་མ་འདས། །སྐྱབས་ཡུལ་གཞན་བཙལ་སྙམ་འགྲོ་འདུག་གི་སེམས་པ། །འདུ་འཛི་དང་རྣམ་གཡེང་ལྟད་མོ་རུ་ངོ་མཚར། །བྱར་མེད་དུ་གནས་ལ་སྙེམས་བྱེད་བདུད་ལྡང་ངོ་། །ཞེན་མེད་ཀྱི་ངང་ནས་གཟུ་བོ་ཡི་རྣལ་འབྱོར། །ཆོས་མེད་རང་མ་ཡིན་བློ་བདེ་ཞིག་དགོས་སོ། །རྣམ་རྟོག་གིས་བསླུས་བསླུས་ནང་བདུད་ཀྱི་མཚངས་མང་། །སེམས་ཉིད་ཀྱི་རང་བཞིན་ནམ་མཁའི་ཁམས་སྤྲོས་བྲལ། །མ་རིག་གིས་བཅིངས་ཤིང་བདག་ཡོད་ལ་ཞེན་པ། །མ་ཆོད་ན་རྣལ་འབྱོར་ཟེར་བ་དེ་ཧོ་ཧོ། །གཞན་ཁྲེལ་དང་རང་ཉིད་ཡི་མུག་གི་སྣོན་མ། །གདམས་ངག་གི་ཆར་རྒྱུན་རྡོ་ཐོག་ཏུ་བབས་བབས། །ལོ་འབྲས་སུ་སྨིན་པའི་ཉེར་སྤྱད་ལ་རུང་འདོད། །གཞན་དག་གི་གནམ་པོར་འགྱུར་བ་ཞིག་དེ་ཀོ །རོ་སྙོམ་གྱི་གཅོད་ཡུལ་རེ་དོགས་ལ་འབེབས་ནུས། །རྒྱ་ཡན་གྱིས་སྤྱོད་པ་རང་བབས་སུ་རྣལ་བཞག །སྤྲོས་བཅས་དང་དམིགས་པ་ཀ་དག་སུ་ལྷུན་འབྱམས། །ཤར་སྟོང་གི་རོལ་བའི་ལྟས་མོ་ལ་མ་ཞེན། །ཆུ་ཟླ་ལ་རྒན་པོའི་བློ་གྲོས་བཞིན་གཟུར་གནས། །ཆ་ལུགས་ཀྱི་འཆོས་ཚུལ་མཛེས་མཛེས་ཞིག་མེད་ཀྱང་། །སངས་རྒྱས་དེ་ལག་མཐིལ་རི་མོ་བཞིན་ལྡན་འདུག །ཁ་ཕོ་རང་ཆེ་བ་བརྒྱུད་པ་ཡི་ལན་རེད། །དོན་རྩ་ན་མེད་པ་ང་རང་གི་མཚངས་ཡིན། །བཤད་བཤད་ནི་སྙན་པ་བླ་རྒན་གྱི་དྲིན་ཡིན། །ཐུགས་ཁྲེལ་དེ་ཡོད་པ་བླུན་པོ་ཡི་ཚིག་ཞིག །ཁྱད་པར་དུ་གཞན་གྱིས་གོ་བདེ་ཡི་གྲོང་ཚིག །གོང་འོག་ནི་མི་འགལ་ཚིག་ཀ་ལ་རྟོན་མིན། །དོན་བཟང་ལ་རྟོན་དང་བློ་ལྡན་ཞིག་དེ་ལགས། ཞེས་རིག་འཛིན་ཆེན་པོ་བདུད་འཇོམས་རྡོ་རྗེའི་རིགས་ཀྱི་མྱུ་གུར་སྐྱེ་སྲིད་འཛིན་པ་ཀུན་བཟང་བདེ་ཆེན་རྡོ་རྗེ་དང་འཇིགས་མེད་སྒྲ་དབྱངས་རྒྱ་མཚོ་འཇམ་དཔལ་དགྱེས་པའི་རྡོ་རྗེ་སོགས་ཀྱི་བཀའ་འབངས་ཡོངས་ཀྱི་ཐ་ཤལ་བ་བསྟན་པའི་བླ་བཙོང་དུག་ལྔ་དབྱར་གྱི་ཆུ་རྒྱུན་ལྟར་འཕེལ་བ་ག་ག་ཨ་བྷྱེས་རྡོ་རྗེའི་མཆེད་ལ་ཐུགས་གསལ་ཡིན། དགེའོ། མངྒ་ལཾ།། །། ཞལ་གདམས་སྐྱོན་མཚངས་འབྲུ་བ་སྙིང་གི་ཐུར་མ།༈ ཞལ་གདམས་སྐྱོན་མཚངས་འབྲུ་བ་སྙིང་གི་ཐུར་མ་བཞུགས། ། ཨ་ཡེ། གང་ཞིག་ཕྱོགས་བཅུའི་རྒྱལ་བ་སྲས་བཅས་ཀྱི། །མཁྱེན་བརྩེ་ནུས་གསུམ་གཅིག་དུ་བསྡུས་པ་ཡི། །སྤྱི་གཟུགས་སྐལ་བ་དགེ་བའི་ངོར་གཏད་ནས། །དྲིན་ཆེན་བླ་མར་ཤར་ལ་ཕྱག་འཚལ་ལོ། །ཞལ་གདམས་སྨྲ་བ་དམ་པའི་མཛོད་ལྡན་ལས། །དམན་པ་བདག་ལྟའི་ཡུལ་དུ་མ་གྱུར་ཀྱང་། །བསྐུལ་བའི་ངག་ལ་གདོང་བཟློག་ཡང་འབྲས་ཀྱིས། །ཅུང་ཟད་བརྗོད་འདིར་ཐུགས་དམ་མཐིལ་སོ་མཛོད། །ལར་ནི་དེང་སང་སྙིགས་མའི་གཞན་དབང་གིས། །མི་ཐུབ་ལྔ་བྱུང་གང་དུ་བལྟས་ནའང་། །དམ་པའི་ཚུལ་དང་མཐུན་པ་ཉིན་སྐར་ཙམ། །ལགས་ཀྱང་ཐམས་ཅད་མཚངས་ནས་མི་འབྲུ་སྟེ། །ང་དང་ཁྱོད་གཉིས་ངང་ཚུལ་མཚུངས་འདྲར་མཆིས། །རང་སྐྱོན་འཆད་ཀྱི་ཉིད་ལ་དེ་ཡོད་ན། །ཞལ་གདམས་མཚངས་ཐོག་ཁེལ་བ་ཞེས་བྱ་སྟེ། །དེ་ལ་གཉེན་པོ་འཚམས་པར་བརྟེན་ན་ལེགས། །ཀྱེ་ལགས། བནྡྷེ་ཁྲིམས་ཉམས་བླ་མ་མཉམ་གྲོགས་ཀྱིས། །དད་པ་དག་སྣང་སྤུ་ཙམ་མེད་པ་དང་། །གཡོ་རྒྱུའི་ལྟག་བདུད་བྱེད་པའི་འདུན་ཕུག་གིས། །དངོས་སམ་ཟུར་གཏམ་སྨྲ་བའི་སྐྱོན་དང་གཅིག །ཆུང་ནས་དགེ་འདུན་མཉམ་འགྲོགས་བདུད་ཀྱིས་གཡེངས། །ཅི་མི་སྙམ་པའི་བརྙས་ཐབས་སྣ་ཚོགས་དང་། །ཕྲག་དོག་གཞི་ཡོད་མེད་པའི་ཚུལ་མིན་གྱིས། །སྒྲོ་བསྐུར་མ་གུས་བན་དྲེད་རྣམས་ཀྱི་སྐྱོན། །ཆོས་ལ་མཉམ་འགྲོགས་ཐོབ་གྲངས་མང་ངོ་སྐད། །ཁས་ལེན་སླ་སྟེ་ཉམས་ལེན་དཀའ་བར་འདུག །ནེ་ཙོའི་ཁ་ནས་ཆོས་བཤད་མིན་ནམ་ཟེར། །ཞེ་ཁྲེལ་ཆོས་སྤངས་བན་དྲེད་རྣམས་ཀྱི་སྐྱོན། །ཚུལ་ལྡན་མཐོང་ན་བཟང་བརྫུ་མཁན་དུ་སེམས། །མཁས་པ་མཐོང་ན་ང་རྒྱལ་ཅན་དུ་རློམ། །རྟོགས་ལྡན་མཐོང་ན་མི་ཆོས་བླ་མར་དྲན། །དེ་ཡང་བན་དྲེད་བདག་གི་སྐྱོན་དུ་མཆི། །གྲུབ་ཐོབ་མཐོང་ན་བསླུ་བྲིད་མཁན་དུ་བལྟ། །བཟོད་ལྡན་མཐོང་ན་ཁས་ཞན་སྙོམ་ཆུང་དང་། །ཆོག་ཤེས་ཅན་མཐོང་འཁོས་མེད་མདོ་ཤོར་སྙམ། །འདི་ཡང་བན་དྲེད་བདག་གི་སྐྱོན་དུ་མཆི། །དགེ་སྒྲུབ་མཐོང་ན་དགོས་སྣང་ཤར་རམ་ཟེར། །སྡིག་སྤང་མཐོང་ན་ཆས་ཆོད་དམོད་པར་བྱེད། །ཁྲེལ་མེད་མཐོང་ན་དེ་ཡི་རྗེས་སུ་སློབ། །འདི་ཡང་བན་དྲེད་བདག་གི་སྐྱོན་དུ་མཆི། །དམེ་བོ་མཐོང་ན་ཚུལ་བརྗོད་བསྟོད་ར་བྱེད། །ཚོང་ཁེ་མ་བྱིན་ལེན་མཐོང་ཕོ་རྒོད་ཟེར། །རྟག་ཏུ་ངན་སྤྱོད་བྱེད་ཀྱང་ཕོ་བཟོ་མཐོ། །འདི་ཡང་བན་དྲེད་བདག་གི་སྐྱོན་དུ་མཆི། །དམ་ཆོས་མཐོང་ན་ཕྱིར་ཞིང་ཞེན་ཁ་ལོག །ནག་ཆང་མཐོང་ན་སྲེད་པ་མེ་ལྟར་འབར། །དཀོར་ཟས་མཐོང་ན་ཧབ་ཐོབ་རྔམས་ཟས་བྱེད། །འདི་ཡང་བན་དྲེད་བདག་གི་སྐྱོན་དུ་མཆི། །མཐོན་པོ་མཐོང་ན་ཁ་གསག་སུ་ལས་ཆེ། །སྤྲང་པོ་མཐོང་ན་ཞེ་སྡང་སུ་ལས་ཆེ༑ ༑སེམས་ཅན་མཐོང་ན་སྙིང་རྗེ་སུ་ལས་ཆུང་། །འདི་ཡང་བན་དྲེད་བདག་གི་སྐྱོན་དུ་མཆི། །དང་པོ་ཚུལ་ཁྲིམས་ཡོད་སྙམ་ང་རྒྱལ་སྤོས། །བར་དུ་སྡོམ་པ་ཤོར་སྙམ་ངོ་སོ་དམའ། །ཐ་མ་དྲེད་པོ་ངེས་འབྱུང་རྩ་བ་ཆད། །འདི་ཡང་བན་དྲེད་བདག་གི་སྐྱོན་དུ་མཆི། །སྐྱོན་ཞིག་ཡོད་ན་ངན་རྒྱབ་སྔགས་ཀྱི་འཚོ། །ཆོས་ཁྲིམས་བསྡམས་ན་གཅིག་རྒྱབ་གཅིག་གིས་བསྲུང་། །རྟག་ཏུ་ཁྱིམ་གྱི་ཁ་འཛིན་གཡེངས་བས་བྲེལ། །འདི་ཡང་བན་དྲེད་བདག་གི་སྐྱོན་དུ་མཆི། །ཕྱི་ཚུལ་ངན་པའི་འདོད་ཆགས་མི་སོད་དེ། །ཁྱིམ་པ་སུན་འབྱིན་འདི་ལ་དགོས་འབྲས་མེད། །མ་འཁྱུད་ཚིམ་པ་མེད་པའི་དུས་ཡིན་པས། །འཁྲིགས་ཚིག་ཁྲོམ་བཤད་འདི་ཡང་བན་དྲེད་སྐྱོན། །བསོད་ནམས་མེད་ན་ལོངས་སྤྱོད་མི་འབྱུང་བས། །སྡིག་པའི་ཉོ་ཚོང་འདི་ལ་དགོས་པ་མེད། །སྡོམ་པ་གསུམ་ཀ་བརྒྱ་ལ་མ་བསྲུང་ཀྱང་། །སྐྱབས་འགྲོ་མེད་པ་འདི་ཡང་བན་དྲེད་སྐྱོན། །རྩིག་རྨང་མེད་པའི་ཁང་བ་ངོ་མཚར་ཆེ། །གཞི་རྟེན་མེད་པའི་སྡོམ་པ་ངོ་མཚར་ཆེ། །སྐྱོན་འདི་ཁྱིམ་པ་ངེད་ཚོར་སྨོས་ཅི་དགོས། །དགེ་སྦྱོང་ཆོས་བཞི་ལྡན་པའི་མེད་དོ་ལོ། །ཨེ་མ་འདི་འདྲ་མཐའ་མི་མངོན་པ་ཡི། །མང་པོ་བརྗོད་ན་རང་གིས་རང་ལ་ཁྲེལ། །གཞན་གྱི་སྔོན་ནས་དེ་ལས་སྨ་མི་ཕབས། །ད་ནི་ཁ་གཡང་འབོད་པའི་དུས་ལ་བབས། །ད་རིས་དལ་འབྱོར་རིན་ཆེན་ལག་ཏུ་ཐོབ། །དོན་མེད་རྡོ་བཞིན་ཨེ་བོར་ཁྱེད་ཅིག་མཁྱེན། །འཆི་བདག་བདུད་ནི་སྐད་ཅིག་གཅིག་མི་སྡོད། །མ་ཚོར་ཐ་མར་ལུས་སམ་ཁྱེད་ཅིག་མཁྱེན། །འཁོར་བ་མེ་ཡི་འོབ་ལ་བསིལ་བ་མེད། །སྡུག་བསྔལ་བདེ་བར་ཨེ་རྩི་ཁྱེད་ཅིག་མཁྱེན། །དཀར་ནག་ལས་འདི་ཀུན་བྱེད་མཁན་པོར་གྲུབ། །སྤོངས་ལེན་ཕྱིན་ལོག་མ་བྱེད་ཁྱེད་ཅིག་མཁྱེན། །བསླུ་མེད་དཀོན་མཆོག་རིན་ཆེན་རྣམ་གསུམ་གྱི། །རྗེས་སུ་ཟིན་པར་མཛོད་ཅིག་ཁྱེད་ཅིག་མཁྱེན། །བྱང་ཆུབ་སེམས་བསྐྱེད་སངས་རྒྱས་རྒྱུ་རུ་ངེས། །འདི་ལ་གལ་ཆུང་མ་བྱེད་ཁྱེད་ཅིག་མཁྱེན། །དཀྱིལ་འཁོར་དབང་ཕྱུག་དྲིན་ཆེན་བླ་མ་ལ། །དད་གུས་དག་སྣང་མ་ཆུང་ཁྱེད་ཅིག་མཁྱེན། །གསང་སྔགས་ཐམས་ཅད་དབང་ལ་བརྟེན་ནས་འགྲུབ། །ཆུ་བོ་རྒྱུན་མི་བཅད་པ་ཁྱེད་ཅིག་མཁྱེན། །དབང་སྲོག་རྒྱུད་ལ་འཛིན་པ་དམ་ཚིག་ཡིན། །གལ་ཆུང་ཞོལ་ལུས་མ་བྱེད་ཁྱེད་ཅིག་མཁྱེན། །མ་ཐོབ་བར་དུ་ཤེས་པར་མི་འགྱུར་བས། །སྒྲོ་འདོག་ཕྱི་ལྟར་ཆོད་ཅིག་ཁྱེད་ཅིག་མཁྱེན། །མགོ་གནོན་གཉེན་པོ་བསྒོམ་བྱུང་རྒྱུ་ཡིན་པས། །བསམ་པའི་ཤེས་རབ་བསྐྱེད་ཅིག་ཁྱེད་ཅིག་མཁྱེན། །རྩ་བ་དྲུངས་ནས་བྱུང་བའི་གཉེན་པོ་བ། །བསྒོམ་བྱུང་ཤེས་རབ་བསྐྱེད་པར་ཁྱེད་ཅིག་མཁྱེན། །ཐ་སྙད་མཁས་ཀྱང་ཁ་རྒྱལ་རྩོད་རྒྱུ་མེད། །དགོས་མེད་ལིང་གིས་བསྐྱུར་ཅིག་ཁྱེད་ཅིག་མཁྱེན། །རྒྱུ་རྫས་ཡོད་ཀྱང་ཕྱི་མ་ཁྱེར་ས་མེད། །ཆོས་རྒྱགས་གྱིས་ལ་བསྒོམ་ཞིག་ཁྱེད་ཅིག་མཁྱེན། །རྩི་སྒོ་ཡོད་ཀྱང་ཕྱི་མ་ཕན་ཐོགས་མེད། །སྟོང་རྒྱུག་བཤད་དགའ་མ་ཆེ་ཁྱེད་ཅིག་མཁྱེན། །མཁྱེན་ནོ་མཁྱེན་ནོ་ཁྱེད་གཅིག་མཁྱེན་ལ་ཐོངས། །ངས་ནི་ཁྱེད་ལ་གསང་རྐུང་ཅུང་ཟད་མེད། །ལེགས་བཤད་བྱིས་པའི་ཁ་ནས་བྱིན་ཟིན་གྱི། །ད་ནི་མ་འགྱང་བསྒོམ་སྒྲུབ་དང་དུ་ལོང་། །བློ་ལྷག་ངེས་པར་ཡོང་ངོ་ཁྱེད་ཅིག་མཁྱེན། །ཕྱི་ཚུལ་ང་ལ་མེད་དེ་རྫ་བུམ་འདྲ། །ནང་བཅུད་མ་དཱ་ན་ཡིས་མི་མཚུངས་བའི། །རིག་འཛིན་བརྒྱུད་པའི་ཞལ་ཆབ་དངར་བོ་ཡོད། །ཐེ་ཚོམ་ཅུང་ཟད་མི་དགོས་ཁྱེད་ཅིག་མཁྱེན། །ས་དགེ་ཀར་འབྲུག་ཕྱག་ཆེན་ཉམས་ལེན་དེའི། །མདོ་སོ་འདི་ལ་འདུས་སོ་ཁྱེད་ཅིག་མཁྱེན། །བསྐྱེད་རྫོགས་སྒྱུ་འོད་དགོངས་མིན་མཐར་ཐུག་གི །ངེས་དོན་འདི་ལས་མེད་དོ་ཁྱེད་ཅིག་མཁྱེན་། །གང་ཟག་ཕོ་མོའི་བརྟེན་ལ་ཁྱད་མེད་པས། །སྒྲུབ་གཞི་འདི་ལ་རུང་ངོ་ཁྱེད་ཅིག་མཁྱེན། །རྡོ་རྗེ་ཐེག་པའི་རྒྱུད་སྡེ་ཐམས་ཅད་ཀྱི། །མཐར་ཐུག་སྐྱེལ་སོ་ཡིན་ནོ་ཁྱེད་ཅིག་མཁྱེན། །བུམ་གསང་ཤེས་རབ་བཞི་བའི་དབང་རྣམས་ཀྱི། །ལམ་གྱི་གནད་ཀྱང་ཚང་ངོ་ཁྱེད་ཅིག་མཁྱེན། །རིམ་ལྔ་སྦྱོར་དྲུག་ལ་སོགས་ཟབ་ཟབ་ཀྱང་། །བཞི་པའི་ཡེ་ཤེས་ཡོངས་གཅོད་མཐོང་མིན་པས། །ད་ནས་རྒྱན་མེད་དགྲ་བཅོམ་ཅི་བཞིན་དུ། །མངོན་རྟོགས་རིམ་པའི་ཡོན་ཏན་གསལ་རྫོགས་ཀྱིས། །མ་ཁྱབ་པ་ལས་ཐལ་བས་བཀབ་པའི་མེས། །མི་བསྲེགས་ཞེས་སུ་སྦས་པའི་རྣལ་འབྱོར་སྨོད། ཁྱོད་མ་མཐོང་བའི་རྒྱུ་མཚན་མ་ངེས་པའི། །ལྟར་སྣང་རྗེས་དཔག་སྤྱོད་ཡུལ་གྱུར་པ་ཡི། །འཕགས་པའི་མཉམ་བཞག་དེ་ལ་རེ་སྨོན་མེད། །ཇི་ལྟར་ཉི་མས་ཕྱེ་བའི་པདྨ་འཛུམ་པ་ལས། །སྦྲང་རྩིའི་དགའ་སྟོན་བུང་བའི་ལུས་ཁམས་གསོས་སུ་སྨིན། །དེ་བཞིན་རྟོགས་པའི་སྣང་བའི་རྣམ་པར་རྗེས་ཐོབ་པའི། །བདུད་རྩིའི་བགོ་བྱ་འགྱེད་འདི་གཞན་དགའི་སྟོན་ཆེན་ཡིན། །ཅེས་ཀྱང་སྨྲ་བའི་སྦོབས་མེད་ཀྱང་། །ཁ་གཡང་བོས་པ་ཡིན་ནོ་ལགས། །འདི་ཡི་སྨྲ་གཞི་ཆོས་ཡིན་པས། །ཕན་པའི་སེམས་ཀྱིས་བསླང་བ་ཡིས། །དགེ་བའི་རྩ་བ་ཡོད་ཀྱང་སྲིད། །ཡོད་ན་མཁའ་ཁྱབ་སེམས་ཅན་ཀུན། །ཡོན་ཏན་ཀུན་ལྡན་སངས་རྒྱས་ཀྱི། །གོ་འཕང་ཐོབ་པའི་རྒྱུ་རུ་བསྔོ། །མ་བརྟགས་བྲེལ་དང་མི་དབོག་རྒྱུ། །གང་ཟག་རྒྱུད་ཚོད་མ་ཤེས་དང་། །རྨོངས་ཕྱིར་སྦྱངས་བརྩོན་མེད་ཕྱིར་གྱི། །འགལ་འཁྲུལ་ཡོད་ན་མཁས་ལ་བཤགས། །ཚིག་བཅད་རྐང་བས་དམན་པ་དང་། །གྲོང་ཚིག་གསལ་དང་བསྐྱར་བཟློས་སོགས། །ཁྱབ་དང་དབང་ཕྱུག་གྲུབ་མཐའ་ལས། །ཡང་དག་རྟོན་འདིར་སྐྱོན་མ་ཡིན། །ཅེས་ཀྱང་ག་གཱ་ཞེས་སྔགས་མིང་དུས་མཐར་སྐྱེས་པ་དེའི་བྲེལ་ཚུབས་ཀྱི་ངང་ནས་འབྲོག་རི་བ་འཇིགས་དགའ་ལ་སྨྲས་སོ། ། སྐུ་གསུམ་ཡེ་ཤེས་དང་བཅས་པའི་རྣམ་པར་ངེས་པ་ཤིན་ཏུ་རྣལ་འབྱོར་གྱི་སྙིང་པོ།༈ སྐུ་གསུམ་ཡེ་ཤེས་དང་བཅས་པའི་རྣམ་པར་ངེས་པ་ཤིན་ཏུ་རྣལ་འབྱོར་གྱི་སྙིང་པོ་ཞེས་བྱ་བ་བཞུགས་སོ། ། འདི་ལ་གཞི་ལམ་འབྲས་གསུམ་གྱི་གནས་ལུགས་ཡོད་པས། སྤྱི་ཁྱབ་གོ་བའི་དབྱིངས་འཇལ་བ་དང༌། བྱེ་བྲག་གི་རྣམ་གྲངས་རྣམ་པར་འབྱེད་པ། དེ་དག་གི་དོན་བསྡུ་བ་དང་གསུམ་ལས། དང་པོ་ནི། ཆོས་སྐུ་ཡེ་ཤེས་ཀྱི་ཐུགས་ནང་གསལ་གྱི་ཆ་ནས་བཤད་པ་ཡིན་ལ། གཟུགས་སྐུ་གཉིས་དེའི་ཕྲིན་ལས་ཕྱི་གསལ་གྱི་ངོས་ནས་བཤད་པ་ཡིན་བྱས་ན་གོ་བ་བློ་ལ་བཟུང་བདེ་ཡང༌། རང་སྣང་ལོངས་སྐུ་ནི་ཆོས་སྐུ་དང་ཐ་དད་མེད་པས་ཤིན་ཏུ་རྣམ་དག་གི་སྣང་བ་ཡིན་པས་ཅུང་ཟད་མི་འཇུག་གོ །དེ་ལྟར་ན་ཆོས་སྐུ་ཞེས་བྱ་བ་གཞིའི་ངོས་ནས་སེམས་ཀྱི་ངོ་བོ་རང་བཞིན་ཐུགས་རྗེ་གསུམ་ལ་ཆོས་སྐུའི་ཆོས་སྐུ། ཆོས་སྐུའི་ལོངས་སྐུ། ཆོས་སྐུའི་སྤྲུལ་སྐུ་སྟེ། མི་འགྱུར་རྡོ་རྗེའི་སྐུ་དང༌། མངོན་པར་བྱང་ཆུབ་ཡེ་ཤེས་ཆོས་སྐུ་གསུམ་དུ་བཤད་དོ༑ ༑ལོངས་སྐུའི་ཆོས་སྐུ་ནི་ཡེ་ཤེས་ལྔ་ཡིན་ནོ། །ལོངས་སྐུའི་ལོངས་སྐུ་ནི་འོད་ལྔའོ། །ལོངས་སྐུའི་སྤྲུལ་སྐུ་ནི་སྐུ་ལྔའོ། །ཞེས་གསུངས་ཀྱང༌། དེ་ལའང་སོ་སོར་ཕྱེ་ན། ཆོས་དབྱིངས་ཡེ་ཤེས་ནི་ལོངས་སྐུའི་ཆོས་སྐུའི་ཡེ་ཤེས་དེའི་རང་གདངས་ནི་འོད་མཐིང་ཀ་དེའི་འབྲས་བུ་གཟུགས་བརྙན་དུ་ཤར་བའི་སྐུ་ནི་རྣམ་པར་སྣང་མཛད་དོ། །དེ་བཞིན་དུ་མེ་ལོང་དང་མཉམ་ཉིད་ནི་ལོངས་སྐུའི་ལོངས་སྐུའི་ཡེ་ཤེས་དེའི་རང་གདངས་འོད་དཀར་བོ་དང་སེར་པོ་འབྲས་བུ་སྐུ་ནི་རྡོར་སེམས་དང་རིན་འབྱུང་ངོ༌། །སོར་རྟོགས་དང་བྱ་གྲུབ་ནི་ལོངས་སྐུའི་སྤྲུལ་སྐུའི་ཡེ་ཤེས་དེའི་རང་གདངས་འོད་དམར་པོ་དང་ལྗང་གུ འབྲས་བུ་སྐུ་ནི་སྣང་མཐའ་དང་དོན་གྲུབ་པོ། སྤྲུལ་སྐུའི་ཆོས་སྐུའི་ཡེ་ཤེས་ནི་ཇི་ལྟ་བ་མཁྱེན་པའི་ཡེ་ཤེས་ཡིན་ལ་སྤྲུལ་སྐུའི་ལོངས་སྤྲུལ་གཉིས་ཀྱི་ཡེ་ཤེས་ནི་ཇི་སྙེད་པ་མཁྱེན་པའི་ཡེ་ཤེས་ཏེ། དེ་ཡང་སངས་རྒྱས་རང་སྣང་རྣམ་པར་དག་པ་མཐོང་བའི་ཆ་ནས་ལོངས་སྐུ་ཡིན་ལ། སེམས་ཅན་གྱི་ཁམས་དབང་བསམ་པ་མཁྱེན་པའི་ཆ་ནས་སྤྲུལ་སྐུའི་ཡིན་ནོ། །འོད་ནི་འདོམ་གང་ལ་སོགས་པའོ། །སྐུ་ནི་རང་བཞིན་སྤྲུལ་སྐུ། འགྲོ་འདུལ་བེམ་པོ་སྐྱེ་བ་བཟོ་སྤྲུལ་སྐུ་དང་བཅས་པའོ། །དེ་ལྟར་སྐུ་གསུམ་ཡེ་ཤེས་དང་བཅས་བའི་འཆར་ཚུལ་ཀྱང་ཆོས་སྐུ་ལས་ལོངས་སྐུ་དེའི་གཟུག་བརྙན་ལས་སྤྲུལ་སྐུ་འཆར་བ་ཡིན་པས་སྐུ་གསུམ་གྱི་ངོ་བོ་དབྱིངས་ནང་གསལ་གྱི་སྐུ་གསུམ་ཡིན་ལ། རོལ་བ་ནི་ཡེ་ཤེས་རྒྱ་མཚོ་དང་རིགས་ལྔ་ཡེ་ཤེས་ལྔ་དང་གང་ལ་གང་འདུལ་རྣམས་ཡིན་པར་བཤད་དོ། །གཞི་དུས་ན་སྐུ་གསུམ་པོ་ས་བོན་ནམ་རྒྱུའི་ཚུལ་དུ་ལུས་ལ་ཡོད། ལམ་དུས་སུ་མངོན་སུམ་གོང་འཕེལ་གཉིས་སུ་སྤྲུལ་སྐུ་མངོན་དུ་གྱུར། ཚད་ཕེབས་ལོངས་སྐུ། ཆོས་ཟད་ལ་ཆོས་སྐུ། དེ་ནས་ཤེས་སྒྲིབ་ཕྲ་བ་ཡང་དག་ནས་མངོན་བྱང་དང་མི་འགྱུར་རྡོ་རྗེའི་ས་ལ་གནས་པ་ནི། རང་དོན་སྐུ་ལྔ་ལྷུན་འགྲུབ་ལུགས་ལྡོག་ཏུ་འཆར་ཚུལ་ཡིན་ནོ། །གཞན་དོན་དུ་ཆོས་སྐུ་ལས་གཟུགས་སྐུ་འབྱུང་བ་སྔ་མ་ལྟར་རོ། །གཉིས་པ་ལ། གཞི་ལ་གནས་ཚུལ། ལམ་དུ་སྣང་ཚུལ། འབྲས་བུ་མངོན་དུ་གྱུར་ཚུལ་ལོ། །དང་པོ་ལ། ཆོས་སྐུ་ལོངས་སྐུ་སྤྲུལ་སྐུ་གཞི་ལ་གནས་ཚུལ་གསུམ་ལས། དང་པོ་ནི། ད་ལྟ་གཞི་སེམས་ཅན་གྱི་དུས་ན་ཆོས་སྐུ་ནི་ཡེ་ཤེས་གསུམ་ལྡན་དུ་སྙིང་ནང་དུ་ཡེ་ཤེས་སེམས་དཔའི་ཚུལ་དུ་ཡོད་དོ། །གཉིས་པ་ལོངས་སྐུ་ནི་གསེར་གྱི་རྩ་ཆེན་གྱི་དབུས་སུ་དྭངས་མ་ལྔ་ལྡན་འོད་ལྔའི་ཐིག་ལེའི་དབུས་སུ་རྣམ་སྣང་ལ་སོགས་པའི་ཞི་བ་བཞི་བཅུ་རྩ་གཉིས་ཀྱི་སྐུ་ཆ་ཕྲ་ལ་བལྟ་དཀའ་བའི་ཚུལ་དུ་ཡོད་ལ། དེ་ནས་སྟོང་བ་རང་གྲོལ་གྱི་ཡར་རྩེ་རུ་འོད་ཟེར་རམ་རིགས་བདག་གི་ཚུལ་དུ་ཡང་ཁྲོ་བོའི་སྐུ་འོད་ཡེ་ཤེས་སུམ་བརྩེགས་སུ་ཡོད་དོ། །གཞན་ཡང་འཁོར་ལོ་ལྔ་རུ་མཁའ་འགྲོའི་དཀྱིལ་འཁོར་ཡོད་དོ། །དེ་དག་ནི་ལོངས་སྐུའི་གཞི་གནས་ཚུལ་ལོ། །སྤྲུལ་སྐུའི་ཁྱབ་ཚུལ་ཁྱད་པར་ཆེན་པོའི་རྩ་བཞིའི་ཡལ་འདབ་ཕྲ་བ་སྡོང་པོ་དང་བཅས་པ་རྣམས་སུ་སྐུའི་རང་གདངས་ལུ་གུ་རྒྱུད་དང༌། ཐུབ་དྲུག་གི་སྐུ་དང༌། རང་བཞིན་སྤྲུལ་སྐུ་གྲངས་མེད་པ། གསུང་གི་རང་གདངས་འོད་ལྔ། ཐུགས་ཀྱི་རང་གདངས་ཐིག་ལེ་གསུམ་འདུ་འབྲལ་མེད་པར་སུམ་བརྩེགས་སུམ་བརྩེགས་སུ་ཡོད་པའོ། །དེ་དག་གི་ཡེ་ཤེས་ཆོས་སྐུའི་ཡེ་ཤེས་ཀྱི་རང་རྩལ་དུ་ལོངས་སྐུའི་ཡེ་ཤེས་རང་བཞིན་ཤུགས་ཀྱིས་རྫོགས། རྩལ་ལས་རོལ་བར་ཤར་བས་སྤྲུལ་སྐུའི་ཡེ་ཤེས་ཀྱི་སྤྲིན་འཕྲོ་བའོ། །རྩ་ནང་ཀུན་དང་ཤེས་བྱ་ཐམས་ཅད་ལའང་འཇུག་པར་བཤད། ཆོས་སྐུའི་ཡེ་ཤེས་འཆར་གཞིའི་ཚུལ། ལོངས་སྐུ་འཆར་བ་འོད་ཀྱི་ཚུལ། སྤྲུལ་སྐུ་འོད་ལས་ཟེར་གྱི་ཚུལ་དུ་འཕྲོ་བའོ། །སྙིང་དང་དུང་ཁང་ནང་དུ་གནས་པ་ནི་གཞིའི་དབྱིངས་རིག་ཐིག་ལེ་སུམ་བརྩེགས་རྩ་བཞི་དང་ཡང་ཕྲན་དང་བཅས་པ་ནས་གནས་པ་ནི་ལམ་གྱི། དེ་གཉིས་ཀའི་འབྲས་བུ་ཡུལ་ལ་སྣང་བའི་དབྱིངས་རིག་ཐིག་ལེ་རྣམས་ནི་ནམ་མཁའ་ལ་དབྱིངས་ཐིག་ལུ་གུ་རྒྱུད་དུ་སྣང་བའོ། །ཡང་ངོ་བོ་གང་དུའང་མ་གྲུབ་པས་ཆོས་དབྱིངས་ཡེ་ཤེས་སམ་སྟོང་བ་ཉིད་ཀྱི་ཡེ་ཤེས། གསལ་ལ་རྟོག་པ་མེད་པ་མེ་ལོང་ཡེ་ཤེས། སྣང་སྟོང་མཉམ་པར་བརྡལ་བས་མཉམ་ཉིད་ཡེ་ཤེས། མ་འདྲེས་སོ་སོར་མཁྱེན་པས་སོར་རྟོགས། བདག་གཞན་གྱི་དོན་གཉིས་ལྷུན་གྱིས་གྲུབ་པའི་དངོས་མཁྱེན་པས་བྱ་གྲུབ་ཡེ་ཤེས་ཏེ་ཡེ་ཤེས་ལྔའོ། །གཞུང་ལུགས་སྤྱིའི་ཆོས་སྐད་དུ་ཡེ་ཤེས་ལྔ་ལས་མེད་པས་དེ་སྐུ་ལྔ་ལ་སྦྱར་དུས། ཆོས་དབྱིངས་རྡོ་རྗེའི། མེ་ལོང་ཆོས་སྐུའི། མཉམ་ཉིད་ལོངས་སྐུའི། སོར་རྟོགས་མངོན་བྱང་གི བྱ་གྲུབ་སྤྲུལ་སྐུའི་ཡེ་ཤེས་སོ། །ཞེས་བཤད་དོ། །ཡང་ཡེ་ཤེས་དེ་དག་གི་རྩལ་གཞིར་གནས་ཀྱི་ཤེས་རབ་ཆོས་དབྱིངས་ཀྱི། བསྐྱོད་བྱེད་མེ་ལོང་གི སྡུད་བྱེད་མཉམ་ཉིད་ཀྱི། འབྱེད་བྱེད་སོར་རྟོགས་ཀྱི། སྒྲོལ་བྱེད་བྱ་གྲུབ་ཀྱི་རྩལ་ཡིན་ལ། ཤེས་རབ་ལྔའི་རྟ་དྭངས་མ་ཡེ་ཤེས་ཀྱི་རླུང་ལྔ་ནི། སྲོག་རླུང་གཞིར་གནས། གྱེན་རྒྱུ་བསྐྱོད་བྱེད། མཉམ་གནས་སྡུད་བྱེད། ཐུར་སེལ་འབྱེད་བྱེད། ཁྱབ་བྱེད་སྒྲོལ་བྱེད་ཀྱི་རྟ་ཡིན་ནོ། །ཆོས་ཉིད་སྤྲོས་པ་དང་བྲལ་དེ་བཞིན་རིགས། མི་འགྱུར་བ་རྡོ་རྗེའི་རིགས། ཡོན་ཏན་འབྱུང་བ་རིན་པོ་ཆེའི་རིགས། སྐྱོན་གྱིས་མ་གོས་པ་པདྨའི་རིགས། རང་གཞན་གྱི་དོན་གཉིས་སྒྲུབ་པ་ལས་ཀྱི་རིགས་ཏེ་རིགས་ཀྱི་ཆོས་ལྔ། སྐུ་ལྔ་ཡེ་ཤེས་ལྔའི་ངང་སྟོང་བར་གནས་པས་ངོ་བོ་ལྔ། རང་བཞིན་མ་འགགས་པར་གསལ་བས་རང་བཞིན་ལྔ། བདག་ཉིད་ཐུགས་རྗེ་ཆེན་པོའི་རོལ་བ་མ་འགགས་པས་ཐུགས་རྗེ་ལྔ་ཞེས་སམ་རྟག་པ་རྒྱུན་གྱི་ཐུགས་རྗེ། རང་བཞིན་ཤུགས་ཀྱི། རྐྱེན་དང་འཕྲད་པའི། བསྐུལ་ཞིང་གསོལ་བ་བཏབས་པའི་ཐུགས་རྗེ་བཞི། ཇི་ལྟ་ཇི་སྙེད་ནང་ལྟར་མཁྱེན་ནས་རང་རྒྱུད་གྲོལ་བའི་ཐུགས་རྗེ་དབྱིངས་ཡེ་སྣང་སྟོང་དབྱེར་མེད་པ་རྡོ་རྗེའི་སྐུ། སྤང་རྟོགས་མཐར་ཕྱིན་པ་དང་སྐུ་གསུམ་སྣང་ཆ་མ་འདྲེས་ནང་གསལ་མངོན་བྱང་གི་སྐུ། དབྱིངས་ལ་ཡེ་ཤེས་ཤར་བ་ཆོས་སྐུ། མཚན་དཔེའི་ཡོན་ཏན་རྫོགས་པ་ལོངས་སྐུ། སྤྲུལ་བ་གང་འདུལ་དུ་བྱུང་བས་སྤྲུལ་སྐུ་ཞེས་བྱའོ། །ཆོས་སྐུའི་གསུང་བརྗོད་དུ་མེད་པ་སྐྱེ་མེད་མཚོན་པ་ནམ་མཁའ་ལྟ་བུའི་གསུང༌། ལོངས་སྐུའི་གསུང་འགག་མེད་རང་གསལ་ལམ་དགོངས་བརྡའི་གསུང་གི་བྱིན་གྱིས་རླབས་ཀྱིས་བཤད། སྤྲུལ་སྐུ་བརྗོད་པ་ཚིག་གི་གསུང་སྡེབས་སྦྱོར་ལེགས་པས་བཤད། མངོན་བྱང་རིག་པ་བྱང་ཆུབ་ཀྱི་བྱིན་གྱི་རླབས་ཀྱིས་བཤད་དོ། །རྡོ་རྗེ་གྲགས་སྟོང་དབྱེར་མེད་པའི་གསུང་གིས་རང་བཞིན་སྤྲོས་བྲལ་དུ་སྟོན་ནོ། །ཐུགས་ནི་ཡེ་ཤེས་ལྔའོ། །རྡོ་རྗེའི་རིགས་ཀྱིས་ཕྲིན་ལས་ཞི་བ། རིན་ཆེན་གྱིས་རྒྱས་པ། པདྨའི་དབང་དང༌། ལས་རིགས་ཀྱི་དྲག་པོ། བུདྡྷའི་ལྷུན་གྲུབ་ཀྱི་ཕྲིན་ལས། ཡོན་ཏན་ལྔ་ནི་རིགས་ཀུན་ལ་ཡོད་པས། རྣམ་པར་དག་པའི་ཞིང་ཁམས། རྒྱ་ཚད་དང་བྲལ་བའི་གཞལ་ཡས། གསལ་ཞིང་དག་བའི་འོད་ཟེར། ཁྱད་པར་འཕགས་པའི་གདན་ཁྲི། དགྱེས་དགུར་རོལ་བའི་འདོད་ཡོན་ནོ། །གསུམ་པ་ནི༑ དེ་དག་ཀུན་ཀྱང་བྲལ་གཞི་ད་ལྟ་རིག་པའི་ཡེ་ཤེས་གཅིག་ལའང་རྫོགས་པས་ན་སོ་སོའི་བྲལ་རྒྱུུ་ལ་གོམས་པ་མཐར་ཕྱིན་པས། བྲལ་འབྲས་སངས་རྒྱས་ཀྱི་དུས་སུ་ཡེ་ཤེས་གཅིག་གི་ཆོས་ཉིད་དང༌། ཡོན་ཏན་དང༌། ཕྲིན་ལས་ལ་ལྷུན་གྱིས་གྲུབ་པར་འབྱུང་ཞིང་རང་གཞན་གྱི་དོན་གཉིས་འབྱུང་བའོ། །དེ་ལྟར་རྒྱུད་ལུང་མན་ངག་སྙིང་པོའི་དོན། །ཚིག་ཉུང་དོན་འདུས་ངོ་བོར་དྲིལ་བ་འདི། །ཆོས་ཉིད་བདེན་པ་མཐོང་བའི་ལག་རྗེས་སུ། །ག་ག་ཨ་བྷྱེ་སྨྱོན་པས་སྨྲས་ནས་སོ། །དམ་བའི་རིགས་ཅན་རཏྣའི་མཚན་ཅན་སོགས། །ཆོས་ཚུལ་འདི་ལ་ཡང་དག་རིག་པ་བཞིའི། །རྡུལ་བྲལ་དྲི་མ་མེད་པའི་མིག་ཐོབ་ནས། །མཐར་ཐུག་གོ་ས་སྙོགས་པའི་རྒྱུར་གྱུར་ཅིག །ཅེས་པ་འདི་ཡང་གནམ་བསྐོས་གོང་མ་ཆེན་པོའི་ཁབ་ཀྱི་རྒྱལ་ཕྲན་རཏྣ་ཨཱ་ཡུཿརཱ་ཛའི་བཀའ་ཕེབས་སྤྱི་བོར་བླངས་ཏེ་སྔགས་བཙུན་ནམ་མཁའ་འཇིགས་མེད་པས་སྨྲས་པ་དགེའོ། །མངྒ་ལམ། ། ༈ ཕྱོགས་བཅུའི་རྒྱལ་བ་སྲས་དང་བཅས་པ་རྣམས་དང༌། བརྒྱུད་པ་དགུ་ལྡན་གྱི་བླ་མ་ཐམས་ཅད་ཀྱིས། ཐུགས་རྗེ་བརྩེ་བ་ཆེན་པོས་མི་འདི་ལ་བཀའ་ལུང་དབང་ཁྲིད་རྗེས་གནང་དང་བཅས་པ་ཐམས་ཅད་ཡོངས་སུ་ཐོབ་པར་སྩལ་དུ་གསོལ། རྗེས་སུ་བཟུང་དུ་གསོལ། སྨིན་ཅིང་གྲོལ་བར་མཛད་དུ་གསོལ། ཞེས་ཀྱང་ག་གཱས་སོ། ། ༈ བསྟན་པ་རྒྱས་བྱེད་སྨོན་ལམ་བཞུགས། པདྨའི་རང་ལུགས་སྔ་འགྱུར་རྫོགས་པ་ཆེ། །ངེས་དོན་སྙིང་པོའི་ཤིང་རྟ་བདུད་འཇོམས་གླིང༌། །གང་གི་ཟབ་གཏེར་བསྟན་པ་སྲིད་མཐའི་བར། །མི་ནུབ་བཤད་དང་བསྒྲུབ་པས་འཛིན་གྱུར་ཅིག །ཅེས་པའང་གང་གི་སློབ་འབང་པྲཛྙཱའི་མིང་འཛིན་གྱི་བསྐུལ་ངོར་སྤྲུལ་མཁྱེན་བརྩེ་མྱུ་གུའི་བྲིས་པ་དགེ་པར་གྱུར་ཅིག ། ༈ བསྟན་པ་རྒྱས་བྱེད་ཉིན་མོའི་མགོན་པོ་ཞེས་བྱ་བ་བཞུགས་སོ༔ རིག་འཛིན་སྡེ་སྣོད་ཡོངས་ཀྱི་སྤྱི་ཕུད་མཆོག༔ འོད་གསལ་ཐིག་ལེ་ཉག་གཅིག་དམ་པའི་དོན༔ གསལ་མཛད་གྲུབ་ཆེན་ནམ་མཁའ་འཇིགས་མེད་ཀྱི༔ བསྟན་པ་དར་རྒྱས་ཡུན་རིང་གནས་གྱུར་ཅིག༔ ཅེས་ཀྱང་ཤྲཱི་བས་སོ། ། ༈ ཆེ་བ་རྟ་དང་གླང་པོ་མན་ཆད་ནསཿ ཆུང་བ་ཁབ་དང་སྐུད་པ་ཡན་ཆོད་ཀྱིཿ ཟང་ཟིང་ནོར་ཀྱི་འབྲེལ་ཐོགས་གང་ཡོད་པཿ ནུབ་ཕྱོགས་བདེ་བ་ཅན་དུ་སྐྱེས་ནས་ཀྱངཿ ཕྱིར་མི་ལྡོག་པའི་ས་ཆེན་ཐོབ་པར་ཤོགཿ བདུད་འཇོམས་པས་ཞལ་འདོན་སྐབས་སུ་གསུང་གནང་མཛད་སྐད། ༈ སྣང་ལ་རང་བཞིན་མེད་པའི་དགེ་རྩ་འདི། །སྣང་ལ་རང་བཞིན་མེད་པའི་སེམས་ཅན་ལ། །སྣང་ལ་རང་བཞིན་མེད་བའི་རྣལ་འབྱོར་ངས། །སྣང་ལ་རང་བཞིན་མེད་པའི་ངང་ནས་བསྔོ། །སྣང་ལ་རང་བཞིན་མེད་པའི་སྐུ་གཉིས་ཀྱི། །སྣང་ལ་རང་བཞིན་མེད་པའི་འབྲས་ཐོབ་ཤོག །ཅེས་ཀྱང་ག་གཱས་སོ། །དགེའོ། །དགེའོ། །དགེའོ། |