དཔལ་ཟབ་མོའི་དོན་གསལ་བ་རྨད་དུ་བྱུང་བ་ཆེན་པོ།
ཟབ་པའི་རྡོ་རྗེ།

ལེའུ་དང་པོའི་བཤད་པ།

---

^{[མ་དཔེ་གཟིགས་ན་འདིར་གནོན།]}

རྒྱ་གར་སྐད་དུ། ཤྲཱི་གུ་ཧྱཱ་རྠ་པྲ་ཀཱ་ས་མ་ཧཱ་ཨཱདྦྷཱུ་ཏ་ནཱ་མ། བོད་སྐད་དུ། དཔལ་ཟབ་མོའི་དོན་གསལ་བ་རྨད་དུ་བྱུང་བ་ཆེན་པོ་ཞེས་བྱ་བ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །ཕྱག་རྒྱ་ཆེན་པོའི་བདག་ཉིད་མགོན། །རང་རིག་པ་ཡི་མཚན་ཉིད་དངོས། །སྤྲོས་པ་མེད་པ་སྐུ་དང་བྲལ། །ཡེ་ཤེས་ནམ་མཁའ་རང་བཞིན་འདུད། །བྱ་བ་དང༌། སྤྱོད་པ་དང༌། རྣལ་འབྱོར་དང༌། རྣལ་འབྱོར་བླ་མ་དང༌། རྣལ་འབྱོར་བླ་ན་མེད་པའི་རྒྱུད་ཀྱི་མཆོག་གི་ནང་ནས། དེ་རང་ཕྱག་རྒྱ་ཆེན་པོའི་ཐིག་ལེ་རྒྱུད་ཀྱི་རྒྱལ་པོ་ལས། གང་ཞིག་དཔལ་བླ་མས་སློབ་མ་ལ་བཤད་པ་བདག་ལ་གནང་བ་དེ་རང་དོན། ཕྱི་ནས་རྣལ་འབྱོར་མའི་ལུང་ལས་འདུན་པ་དང༌། མཚན་ཉིད་མེད་པའི་ངག་གི་དབང་གིས་རྡོ་རྗེ་སྤུན་དང་ལྷན་ཅིག་འབྲེལ་གཏམ་བགྱིད་པའི་ཕྱིར་བདག་འདྲི་ཞེས་ཐོས་སོ། །དེ་ནི་ཇི་ལྟར་བླ་མས་གཏན་ལ་ཕབ་པའི་རིམ་པ་རྣམ་པར་དཔྱད་དེ། དང་པོ་རེ་ཞིག་བརྗོད་པ་ལ་སོགས་པ་ལྔ་བཤད་དེ། གང་གི་ཕྱིར་ཞེ་ན། དེས་ནི་རྒྱུད་ལ་མདོར་བསྟན་པ་དང༌། རྒྱས་པར་བསྟན་པ་དང༌། སོ་སོར་བསྟན་པ་དང༌། ཡེ་ཤེས་དང་ཡེ་ཤེས་ལས་བྱུང་བའི་དོན་ཀུན་ཤེས་སོ། །དེའི་ཕྱིར་བརྗོད་པ་ལ་སོགས་པ་ལྔ་འདྲི་བ་ལེགས། དེ་ལ་རིམ་པ་ནི་འདི་ཡིན་ཏེ། བརྗོད་པ་དང༌། བརྗོད་པར་བྱ་བ་དང༌། འབྲེལ་པ་དང༌། དགོས་པ་དང༌། དགོས་པའི་ཡང་དགོས་པའོ། །དེ་རུ་ཆ་དང་ཐིག་ལེ་ལ་སོགས་པའི་བདག་ཉིད་སྦྱོར་བ་དྲུག་གི་རྣམ་པར་ཤེས་པ་མན་ཆད་ལྔ་བཅུ་རྩ་བཞི་འབྲི་བ་གང་ཞིག་དཔལ་ཡེ་ཤེས་མཁའ་འགྲོའི་མཚན་ཞེས་བྱ་བའི་མཐར་ཡན་ཆད་བརྗོད་པའོ། །དེ་ནི་དཔལ་ཕྱག་རྒྱ་

---

^{[མ་དཔེ་གཟིགས་ན་འདིར་གནོན།]}

ཆེན་པོའི་ཐིག་ལེ་རྗེ་བཙུན་སྨྲ་བ་དེ་ནི་བརྗོད་པར་བྱའོ། །དེ་དག་རྗོད་པ་དང༌། བརྗོད་པར་བྱ་བ་གཉིས་གཉིས་སུ་མེད་པའི་ངོ་བོའི་ཕྱིར། ཤེས་རབ་དང་ཐབས་གཉིས་སུ་མེད་པའི་དེ་ཁོ་ན་ཉིད་ཀྱིས་འདུལ་བའི་དོན་གཟིགས་ནས་གང་ཞིག་གསང་བའི་དབང་བསྐུར་བ་ལ་སོགས་པ་སྦྱིན་པ་ཡང་བླང་བ་དེ་ནི་དགོས་པ། དབང་བསྐུར་བ་ལ་སོགས་པ་ཐོབ་པའི་ཕྱི་ནས་གང་ཞིག་འབྲས་བུ་རྙེད་པ་དེ་ནི་དགོས་པའི་དགོས་པའོ། །འབྲས་བུའི་སྒྲས་ནི་སངས་རྒྱས་ཉིད། །ཡང་ན་རྡོ་རྗེ་ནི་རྒྱུད་ཀྱི་དོན་རྒྱས་པར་བསྟན་པའོ། །གང་ཞིག་འབྲེལ་པ་དེ་ཅན་འདྲི། གང་ཞིག་བརྗོད་པར་བྱ་བ་དེ་ནི་རྒྱུད་ཀྱི་མདོར་བསྟན་པའོ། །གང་ཞིག་བརྗོད་པར་བྱ་བ་དེ་ནི་རྒྱུད་ཀྱི་དོན་རྒྱས་པར་བསྟན་པའོ། །གང་ཞིག་འབྲེལ་པ་དེ་ནི་གསང་བའི་དབང་ལ་སོགས་པ་སོ་སོར་བསྟན་པའོ། །གང་ཞིག་དགོས་པ་དེ་ནི་ཤེས་རབ་ཡེ་ཤེས་ཀྱི་དབང་བསྐུར་པའི་ཡེ་ཤེས་སོ། །གང་ཞིག་དགོས་པའི་དགོས་པ་དེ་ནི་བཞི་པའི་དོན་གྱི་མན་ངག་གི་ཡེ་ཤེས་ལས་བྱུང་བའོ། །ཡེ་ཤེས་ལས་བྱུང་བའི་སྒྲས་ནི་ཡེ་ཤེས་ཐམས་ཅད་ཁོང་དུ་ཆུད་པ་ཞེས་བྱ་བའི་དོན་ཏོ། །དེ་ནི་སློབ་དཔོན་གྱི་གཞུང་ངོ༌། །སྡུད་པ་པོའི་གཞུང་གིས་འདི་རུ་བརྗོད་པ་ནི་མདོར་བསྟན་པའི་རྒྱུད་དོ། །བརྗོད་པར་བྱ་བ་ནི་རྒྱས་པར་བསྟན་པའི་ཕྱག་དང་ཞལ་ལ་སོགས་པ་དང་ལྡན་པའོ། །འབྲེལ་པ་ནི་སོ་སོར་བསྟན་པའི་མཁའ་འགྲོ་མའི་འཁོར་རོ། །དགོས་པའི་ཡེ་ཤེས་ནི་འདོད་ཆགས་ཀྱིས་འདུལ་བ་རྣམས་ལ་ཤེས་རབ་དང་ཐབས་གཉིས་སུ་མེད་པས་ཐ་མལ་པའི་འདོད་ཆགས་འཇིག་པའོ། །དགོས་པའི་དགོས་པ་ཡེ་ཤེས་ལས་བྱུང་བ་ནི་གྲངས་མེད་པའི་འཇིག་རྟེན་གྱི་ཁམས་ན་ཡོད་པའི་བདེ་བ་དང་མི་བདེ་བ་ལ་སོགས་པའི་ནད་ཀྱིས་འཚོ་བ་ལ། བདེ་བ་ཆེན་པོའི་གནས་སུ་སླེབ་པའོ། །དེ་ནི་སློབ་དཔོན་གྱི་ཞལ་སྔ་ནས་སྡུད་པ་པོའི་གཞུང་བཤད་པའོ། །ཞུ་བ་པོ་ཡང་དེ་རུ་འདི་སྐད་སྨྲའོ། །རྒྱུད་ལ་འདི་སྐད་བདག་གིས་ཐོས་པ་མེད་པས་སྡུད་པ་པོའི་གཞུང་ཇི་ལྟར་ཡིན། རྡོ་རྗེ་སློབ་དཔོན་གྱིས་བཀའ་སྩལ་པ། འབུམ་ལྔའི་བདག་ཉིད། ཀྱེའི་རྡོ་རྗེ་རྩ་བའི་རྒྱུད་ལ་འདི་སྐད་བདག་གིས་ཐོས་པ་ལ་སོགས་པ་ཉེ་བར་བསྟན་པ་གསུངས་སོ། །དེའི་དུས་སུ་གཞན་མ་ཡིན་པའི་འཁོར་གྱི་དབུས་སུ་རྩ་བའི་དོན་

---

^{[མ་དཔེ་གཟིགས་ན་འདིར་གནོན།]}

གྱི་རྒྱུད་ཐམས་ཅད་རྣལ་འབྱོར་མའི་གཞུང་གི་གསང་བ་ཆེན་པོའི་དོན་དེ་མ་ཐག་ཏུ་རྒྱས་བཏབ་པའི་ཕྱིར། །ཕྱག་རྒྱ་ཆེན་པོའི་ཐིག་ལེ་ཕྱི་མའི་རྒྱུད་ཅེས་བྱ་བའི་གསང་བའི་རྒྱ་མཚོའི་རྒྱུད་ལས་གསུངས་སོ། །ཕྱི་མ་ཞེས་བྱ་བ་ནི་སྔར་ཕྱུང་བ་སྟེ། དཔལ་སངས་རྒྱས་མཉམ་སྦྱོར་དེ་ཁོ་ན་ཉིད་བསྟན་པ་ལས་དེ་སྐད་གསུངས་སོ། །དེའི་ཕྱིར་སྡུད་པ་པོས་འདི་སྐད་བདག་གིས་ཐོས་པ་ལ་སོགས་པ་མ་སྨོས་སོ། །འོན་ཀྱང་རྩ་བ་དང༌། བརྟག་པ་ལ་སོགས་པ་རྒྱུད་ཀུན་སྡུད་པ་པོའི་ཚིག་ཡིན་ནོ། །གང་གི་ཕྱིར་ཞ་ན། བཅོམ་ལྡན་འདས་རྡོ་རྗེ་སེམས་དཔའ་ནི་ལྷ་དང་མི་ལ་སོགས་པས་རྙེད་པར་དཀའ་བ་དེའི་ཕྱིར། བཅོམ་ལྡན་འདས་ཀྱི་ཞལ་ནས་སྡུད་པ་པོས་ཉན་ཏེ། ལྷ་དང་མི་ལ་སོགས་པ་ལ་གསལ་བར་བྱས་སོ། །དེ་བཞིན་དུ་སྡུད་པ་པོ་རང་གིས་སྨྲས་པ་ནི་མ་ཡིན་ནོ། །སྡུད་པ་པོ་ནི་འདིར་ཡང༌། རྡོ་རྗེ་འཛིན་པའི་སྤྲུལ་པ་ས་བཅུའི་དབང་ཕྱུག་བྱང་ཆུབ་སེམས་དཔའ་སེམས་དཔའ་ཆེན་པོའོ། །བཅོམ་ལྡན་ཡེ་ཤེས་མཁའ་འགྲོ་ལ། །ཞེས་བྱ་བ་ལ་བཅོམ་ལྡན་འདས་བདག་གིས་ཞུ་བ་གསོན་ཞེས། དེ་སྐད་བཅོམ་ལྡན་འདས་དཔལ་རྡོ་རྗེ་འཛིན་པ་ཆེན་པོ་ལ་འོག་ཏུ་འཆད་པའི་སྦྱོར་བ་དྲུག་གི་རྣམ་པར་ཤེས་པ་ལ་སོགས་པ་དོན་ཞུ་བའི་ཕྱིར་ཁོད་དུ་ཆུད་པར་མཛད་ཅེས་ལུང་ངོ༌། །སློབ་དཔོན་གཞན་གྱི་གཞུང་གིས་འདི་རུ་དོན་ནི་འདི་ཡིན་ཏེ། བྷ་ག་ཡོད་པའི་ཕྱིར་བཅོམ་ལྡན་འདས། བྷ་གའི་སྒྲ་ནི་ཡང་དག་པ་ཆོས་ཀྱི་དབྱིངས་ཀྱི་ཡེ་ཤེས་དེའི་ཡེ་ཤེས་ཀྱི་འོད་ཟེར་གང་ལ་ཡོད་པ་དེ་ནི་ཡེ་ཤེས་མཁའ་འགྲོ་ཉི་མའོ། །སློབ་དཔོན་གཞན་གྱི་གཞུང་གིས་དབང་ཕྱུག་ལ་སོགས་པའི་ཡོན་ཏན་དྲུག་དང་ལྡན་པའི་ཕྱིར་བཅོམ་ལྡན་འདས་སོ། །ནམ་མཁའ་ལ་འགྲོ་བའི་ཕྱིར་མཁའ་འགྲོ་ཞེས་བཤད་དོ། །ནམ་མཁའ་ལ་འགྲོ་བ་ཡང་དོན། དཔལ་ཨིནྡྲ་བྷཱུ་ཏིའི་ཞལ་སྔ་ནས་ཀྱི་གཞུང་གིས་འདི་སྐད་བཤད་དེ། གློ་བུར་བའི་བྱང་ཆུབ་ཀྱི་སེམས་ཀྱི་བདག་ཉིད་རྡོ་རྗེ་འཛིན་པ་རང་གིས་ངོ་བོའི་སྐུ་རྒྱལ་བའོ། །གསང་བའི་སྙིང་པད་རྒྱས་པར་བྱེད། །ཅེས་བྱ་བ་ལ། གསང་བ་ནི། ཨཱ་ལི་ཀཱ་ལི་མཉམ་པར་སྦྱོར་བ་ཞེས་ལུང་ལས་བཤད་པའོ། །སློབ་དཔོན་གཞན་མའི་གཞུང་གིས་གསང་བ་ནི་ཆོས་ཀྱི་

---

^{[མ་དཔེ་གཟིགས་ན་འདིར་གནོན།]}

འབྱུང་གནས་སོ། །རྡོ་རྗེ་སློབ་དཔོན་གྱི་གཞུང་གིས། འདབ་མ་གསུམ་པའི་རྣམ་པ་རེག་བྱའི་རྩའི་ཆུ་སྐྱེས་སོ། །སྙིང་པོ་ཞེས་བྱ་བ་ནི་བྱང་ཆུབ་ཀྱི་སེམས་སོ། །པདྨ་ཞེས་བྱ་བ་ནི་ཀུན་དུ་དམར་བའི་རང་བཞིན། རྒྱས་པར་བྱེད་པ་ཞེས་བྱ་བ་ནི་གསལ་བར་མཛད་པའོ། །ཡང་ན་འབྱུང་བར་མཛད་པའོ་ཞེས་བྱ་བའི་དོན་ཏོ། །གསང་བར་ལྟེ་བའི་ནང་ན་གནས། །ཞེས་བྱ་བ་ནི་སློབ་དཔོན་བཛྲ་བོ་དྷིས་གསུངས་པའི་ཨཱ་ལི་ཀཱ་ལི་གཉིས་སུ་མེད་པར་སྦྱོར་བ་མངོན་སུམ་དུ་རྡོ་རྗེ་འཛིན་པ་ཆེན་པོའི་དངོས་པོ་དེ། འདི་རུ་ཆོས་ཀྱི་འབྱུང་གནས་ཀྱི་གཞལ་ཡས་ཁང་གི་ནང་དུ་བཞུགས་སོ། །རྡོ་རྗེ་སློབ་དཔོན་གྱི་གཞུང་གིས། གསང་བ་ནི་མཆོག་གི་དགའ་བ། པདྨ་ནི་ཆད་པའི་དགའ་བ། ལྟེ་བ་ནི་རང་བཞིན་གྱི་དགའ་བ། དེ་ལྟ་བུའི་དགའ་བ་གསུམ་གྱི་བདག་ཉིད། དགའ་བ་གཉིས་ཀྱི་དབུས་སུ་གློ་བུར་བའི་རང་བཞིན་པདྨའི་འདབ་མར་ཆུ་བཞིན་དུ་བཞུགས་སོ། །འདི་ལྟར། འདི་རུ་གསང་བའི་རྒྱ་མཚོ་ལས། །མཆོག་དང་ཆད་པའི་དབུས་སུ་ནི། །དེ་ཉིད་གསུམ་དག་མི་ཟད་པ། །གསང་བའི་ཆུ་སྐྱེས་ལྟེ་ནང་བཞུགས། །གསང་བ་པདྨ་རང་བཞིན་བདག །ཅེས་གསུངས་སོ། །འབུམ་ལྔའི་བདག་ཉིད་ལ་སོགས་ཞེས་བྱ་བ་ལ། དེ་རུ་དོན་ནི་འདི་ལྟར་བཤད་དེ། འབུམ་ལྔའི་བདག་ཉིད་གང་ཞིག་ཀྱེའི་རྡོ་རྗེའི་རྒྱུད་དེ་ནི་བརྟག་པ་སུམ་ཅུ་རྩ་གཉིས་ཀྱི་མཚན་ཉིད་འདི་ལྟར་ཡིན་ཏེ། དང་པོ་རྡོ་རྗེ་སྙིང་པོ་མངོན་པར་བྱང་ཆུབ་པའི་བརྟག་པ། གཉིས་པ་ནི་སྒྱུ་འཕྲུལ་གྱི་བརྟག་པ། གསུམ་པ་ནི་རྡོ་རྗེ་གར་གྱི་བརྟག་པ། བཞི་པ་ནི་སྣ་ཚོགས་ཀྱི་བརྟག་པ། ལྔ་པ་ནི་རྡོ་རྗེའི་བརྟག་པ། དྲུག་པ་ནི་སྟོབས་པོ་ཆེའི་བརྟག་པ། བདུན་པ་ནི་མི་གཡོ་བའི་བརྟག་པ། བརྒྱད་པ་ནི་གཟུངས་མའི་བརྟག་པ། དགུ་པ་ནི་ཀུ་རུ་ཀུ་ལླེའི་བརྟག་པ། བཅུ་པ་ནི་དྲེགས་ཆེན་གྱི་བརྟག་པ། བཅུ་གཅིག་པ་ནི་རྣམ་པར་སྣང་མཛད་ཀྱི་བརྟག་པ། བཅུ་གཉིས་པ་ནི་དངོས་གྲུབ་ཀྱི་བརྟག་པ། བཅུ་གསུམ་པ་ནི་སྒྲོལ་མའི་བརྟག་པ། བཅུ་བཞི་པ་ནི་རྡོ་རྗེ་ཕག་མོའི་བརྟག་པ། བཅོ་ལྔ་པ་ནི་འོད་ཟེར་གྱི་བརྟག་པ། བཅུ་དྲུག་པ་ནི་བདག་མེད་མའི་བརྟག་པ། བཅུ་བདུན་པ་ནི་གཤིན་རྗེ་དགྲའི་བརྟག་པ། བཅོ་བརྒྱད་པ་ནི་རྡོ་རྗེ་ཧུཾ་མཛད་ཀྱི་བརྟག་པ། བཅུ་དགུ་པ་ནི་སོ་སོར་འབྲང་

---

^{[མ་དཔེ་གཟིགས་ན་འདིར་གནོན།]}

མའི་བརྟག་པ། ཉི་ཤུ་པ་ནི་སྦྱིན་སྲེག་གི་བརྟག་པ། ཉི་ཤུ་རྩ་གཅིག་པ་ནི་རབ་གནས་ཀྱི་བརྟག་པ། ཉི་ཤུ་གཉིས་པ་ནི་དཀྱིལ་འཁོར་ཆེན་པོའི་བརྟག་པ། ཉི་ཤུ་གསུམ་པ་ནི་གཏོར་མའི་བརྟག་པ། ཉི་ཤུ་བཞི་པ་ནི་སྟ་གོན་གྱི་བརྟག་པ། ཉི་ཤུ་ལྔ་པ་ནི་མངོན་པར་བྱང་ཆུབ་པའི་བརྟག་པ། ཉི་ཤུ་དྲུག་པ་ནི་རྒྱས་གདབ་པའི་བརྟག་པ། ཉི་ཤུ་བདུན་པ་ནི་སྦྱོར་ཐབས་ཀྱི་བརྟག་པ། ཉི་ཤུ་བརྒྱད་པ་ནི་རྡོ་རྗེ་གླུའི་བརྟག་པ། ཉི་ཤུ་དགུ་པ་ནི་པདྨ་གར་གྱི་དབང་ཕྱུག་གི་བརྟག་པ། སུམ་ཅུ་པ་ནི་ཕྱག་ན་རྡོ་རྗེའི་བརྟག་པ། སུམ་ཅུ་གཅིག་པ་ནི་མཁའ་འགྲོ་མའི་བརྟག་པ། སུམ་ཅུ་རྩ་གཉིས་པ་ནི་མཁའ་འགྲོ་མའི་བརྟག་པ། དེ་ཀུན་གྱི་ནང་ནས་མཁའ་འགྲོ་དང་མཁའ་འགྲོ་མའི་ཡུལ་དུ་མ་བཞུགས་པ་ཞེས་གཅིག་ནས་གཅིག་ཏུ་རིམ་པ་ལས་བྱུང་བའི་ཚིག་གོ །རྒྱུད་ཅེས་བྱ་བ་ནི་ཐབས་དང་ཤེས་རབ་གཉིས་མེད་ལྡན་པའི་བསྐྱེད་རིམ་རྫོགས་རིམ་ལྡན་པའོ། །ཀྱེའི་རྡོ་རྗེ་ཞེས་བྱ་བ་ནེ་ཤེས་རབ་དང་ཐབས་གཉིས་སུ་མེད་པ་ལས་རྫོགས་པའི་བདེ་བ་ཆེན་པོ་ཡེ་ཤེས་འཚོ་ཞེས་བྱ་བ་ནི་ཟབ་པ་དང༌། གཟུང་བར་དཀའོ། །གསུངས་ཞེས་བྱ་བ་ནི་དོན་ཇི་ལྟ་བ་བཞིན་བཤད་པའོ། །སྦྱོར་དྲུག་རྣལ་འབྱོར་མ་ཡི་གཞུང༌། །ཞེས་བྱ་བ་ནི་འདི་ལྟར་གསུངས། རྣལ་འབྱོར་མའི་གཞུང་གི་སྒྲས་ནི་རྣལ་འབྱོར་མ་ཐམས་ཅད་ཀྱི་བརྟག་པའི་རྒྱལ་པོ་དེ་རུ་ལེའུ་དང་པོ་ལ་གང་ཞིག་སྦྱོར་བ་དྲུག་དང་རྡོ་རྗེ་འཛིན་པ་ཆེན་པོས་བཤད་པ་དེ་ནི་རྣལ་འབྱོར་གྱི་རྒྱུད་ཀྱི་གོ་རིམས་ཀྱིས་སོ། །དེའི་ཕྱིར་སྦྱོར་བའི་སྒྲ་ལ་བསྟན་པ། སྦྱོར་བ་ནི་མཉམ་པར་འཁྱུད་པ། ཡང་ན་ཕུན་སུམ་ཚོགས་པ། དེའི་རིམ་བ་ནི་འདི་ཡིན་ཏེ། དང་པོ་ནི་བདག་པོའི་ཕུན་སུམ་ཚོགས་པ། གཉིས་པ་ནི་རྒྱུད་ཀྱི་ཕུན་སུམ་ཚོགས་པ། གསུམ་པ་ནི་སྡུད་པ་པོའི་ཕུན་སུམ་ཚོགས་པ། བཞི་པ་ནི་དུས་ཀྱི་ཕུན་སུམ་ཚོགས་པ། ལྔ་པ་ནི་འཁོར་གྱི་ཕུན་སུམ་ཚོགས་པ། དྲུག་པ་ནི་གནས་ཀྱི་ཕུན་སུམ་ཚོགས་པ། དེ་ལྟ་བུའི་སྦྱོར་བ་དྲུག་གིས་ཉམས་པར་སྦྱོར་བའི་དངོས་པོ་ཡང་དག་རྒྱ་ཆེ་བ་ཀུན་རྫོགས་ཀྱི་དཔག་ཏུ་མེད་བ་ཤེས་ནས། མདོར་བསྡུས་པ་འདོད་པ་ཆེན་གྱི་དོན་དུ། ཆ་དང་ཐིག་ལེ་ལ་སོགས་པའི་དོན་བསྟན་པར་བྱས་

---

^{[མ་དཔེ་གཟིགས་ན་འདིར་གནོན།]}

ནས། དོན་དམ་པའི་སྦྱོར་བ་དྲུག་གི་དོན། ལེགས་དགྱེས་ཆེན་པོའི་མཆོད་པ་ལ་སོགས་པ་དང༌། རྡོ་རྗེ་གླུའི་གུས་པས་བཅོམ་ལྡན་འདས་རབ་ཏུ་དགའ་བར་བྱས་ནས། གསང་བའི་སྒྲས་བཅོམ་ལྡན་འདས་མས་འདི་སྐད་ཞུས་སོ། །ཆ་དང་ཐིག་ལེ་ཚུལ་དག་དང༌། །ཚུལ་ཙམ་མཆོག་དང་མཆོག་ལས་གཞན། །སྦྱོར་བ་དྲུག་དབྱེ་རྣམ་པར་ཤེས། །གནས་ནི་གང་དུ་གནས་པ་ལགས། །སྲོག་ནི་གང་ནས་བྱུང་བ་དང༌། །རྡོ་རྗེ་འཛིན་པ་གང་དུ་ཐིམ། །རྡོ་རྗེ་ཉིན་གང་མཚན་མོ་གང༌། །མཚམས་དང་ཤར་བ་གང་ཞིག་ལགས། །གང་དུ་ནུབ་པའི་དུས་དང་རྩ། །མཆོག་གི་དབང་ཕྱུག་དུ་ཙམ་མཆིས། །དུས་ཀྱི་མཚན་ཉིད་གང་ལགས་གསུངས། །དེ་ཡི་དུས་ཀྱི་དགོས་པ་ཅི། །ཨཱ་ལི་ཀཱ་ལི་བྱ་བ་དང༌། །མངའ་བདག་གང་ནས་བྱུང་བ་ལགས། །རོ་ནི་བྱེ་བྲག་དུ་ཞིག་གནས། །དགའ་བ་ཡང་ནི་དེ་བཞིན་ནོ། །གང་གི་དུས་སུ་དགའ་བ་རྣམས། །རྡོ་རྗེ་དབང་ཕྱུག་སྐྱེ་བར་འགྱུར། །ཆོས་ཀྱི་དབྱིངས་ནི་ཇི་ལྟར་བཤད། །རྡོ་རྗེ་ཡང་ནི་ཇི་ལྟར་བུ། །རེ་ཞིག་བདག་གི་སྒྲ་ནི་གང༌། །གསང་བ་ཞེས་བྱ་ཇི་ལྟར་ལགས། །མཆོག་ཅེས་བྱ་བ་ཇི་ལྟར་ཏེ། །དགྱེས་པའི་དོན་ནི་གསལ་བར་བརྗོད། །རིགས་ཀྱི་བྱེ་བྲག་དུ་ཙམ་བསྟན། །ཕུང་པོ་ལ་སོགས་སྐྱེ་མཆེད་ཅིང༌། །ཚངས་པ་དབང་ཕྱུག་དྲག་པོ་དང༌། །ཁྱབ་འཇུག་རྟག་ཏུ་ཞི་བ་དང༌། །གང་ནས་སྐྱེ་ཞིང་གང་དུ་གནས། །ངོ་བོ་ཇི་ལྟར་ཆེན་པོའི་ཆེ། །ཕྱག་རྒྱའི་བྱེ་བྲག་དུ་ཞིག་བསྟན། །ཕྱག་རྒྱ་ཆེན་པོ་ཇི་ལྟར་ལགས། །མགོན་པོ་མཆོད་པའི་བྱེ་བྲག་ཅི། །དེ་རུ་མེ་ཏོག་ཇི་ལྟར་ལགས། །མགོན་པོ་ཆེན་བོ་སྲོག་གཅོད་ནི། །ཇི་ལྟ་བུ་ཞིག་འཚལ་བ་ལགས། །དཀྱིལ་འཁོར་མཆོག་གི་དམ་པ་ཅན། །བཅོམ་ལྡན་འདས་དེ་ཇི་ལྟར་ལགས། །དེ་རུ་ལྷ་མོ་ཇི་ལྟར་ལགས། །ལྷ་མོ་ཞེས་བྱ་གང་ལ་བཤད། །བཅོམ་ལྡན་དུར་ཁྲོད་དུ་ཞིག་མཆིས། །དེ་རུ་ཤིང་ནི་ཇི་ལྟར་ལགས། །དུར་ཁྲོད་དང་ནི་ཤིང་རྣམས་ལས། །རྒྱལ་བའི་དབང་ཕྱུག་གནས་བཀའ་སྩལ། །མགོན་པོ་ནང་གི་སྦྱིན་སྲེག་དང༌། །བདུད་རྩི་ལྔ་ཡི་རིམ་པ་དང༌། །རྣལ་འབྱོར་མ་ཡི་འདུས་པ་དང༌། །དེ་རུ་སྐད་ནི་ཇི་ལྟར་ལགས། །བདག་ཉིད་རང་གི་ངོ་བོ་ནི། །མགོན་པོ་ཆེན་པོས་བཀའ་སྩོལ་ཅིག །དེ་ལྟ་བུ་ཡི་

---

^{[མ་དཔེ་གཟིགས་ན་འདིར་གནོན།]}

རིམ་པ་ལ། །བཞི་ལྷག་ལྔ་བཅུ་དྲིས་པ་ལ། །གང་དུ་དེ་ཉིད་མཆོག་གི་དབང་ཕྱུག་གིས་རྒྱས་པར་བསྟན་པ། བདག་ཀྱང་དེ་རང་སློབ་དཔོན་གྱི་གཞུང་གིས་ངེས་པའི་དོན་དང༌། དྲང་བའི་དོན་བྱེ་བྲག་གིས་འདྲི་ཞེས་པ་ནི་རིགས་པའོ། །ཅིའི་ཕྱིར་ཞེ་ན། རྡོ་རྗེ་སློབ་དཔོན་གྱིས་ཀྱང་རྒྱུད་ཀྱི་རིམ་པ་བཀའ་སྩལ་ཏོ། །རྒྱུད་ལ་རིམ་པས་དབང་གི་ཡན་ལག་ནི་གོང་དུ་ཡོད་དོ། །དེའི་ཕྱིར་དབང་བསྐུར་བའི་དོན་རབ་ཏུ་གསལ་བར་བྱས་ནས། རྗེས་སུ་རྒྱུད་ཐམས་ཅད་ཀྱི་གླེང་གཞི་དཔྱད་པར་བྱའོ། །གང་གི་ཕྱིར་ཞེ་ན། ཡང་དག་པར་དབང་བསྐུར་བའི་སློབ་མ་ལུས་ལ་སོགས་པ་ཟབ་པའི་མན་ངག་གིས་དོན་ལ་སྣོད་ཡིན་པར་འགྱུར་རོ། །དེ་ལྟ་མ་ཡིན་པར་དབང་བསྐུར་བ་མེད་པར་རྒྱུད་དོན་གསལ་བར་བྱས་ན་སློབ་དཔོན་དང་སློབ་མ་རྩ་བ་ལ་ལྟུང་བའོ་ཞེས་གསུངས་སོ། །དཔལ་ཕྱག་རྒྱ་ཆེན་པོའི་ཐིག་ལེ་ལས། ལེའུ་དང་པོའི་བཤད་པའོ།། །།

ལེའུ་གཉིས་པའི་བཤད་པ།

---

^{[མ་དཔེ་གཟིགས་ན་འདིར་གནོན།]}

ད་ནི་ལེའུ་གཉིས་པ་ལ་ཟབ་པའི་ཚིག་རྣམས་བྲི། བཅོམ་ལྡན་འདས་ཀྱིས་བཀའ་སྩལ་པ་ལ་སོགས་པས་མཐའ་ཡན་ཆད་དོན་ཇི་ལྟ་བ་བཞིན་དུ་བཤད། རིམ་པ་ལ་སོགས་པ་ཞེས་བྱ་བ་ལ། རིམ་པའི་སྒྲ་ནི་ས་བོན་ལས་མྱུ་གུ་ལ་སོགས་པ་བཞིན་དུ་ཉེ་བར་དགོད། ཡང་ན་སྐྱོར་བ་བཞི་ཞེས་བྱ་བ་ནི་དོན་ཇི་ལྟ་བ་བཞིན་ནོ། །དབང་བསྐུར་བ་ནི་ཆགས་པ་ལ་སོགས་ཀྱི་དྲི་མ་དག་པར་བྱེད་པ། འབྲས་བུའི་དུས་སུ་གསུམ་དུ་དབྱེ་བ་ཞེས་བཤད་པ་ཞེས་བྱ་བ་ནི་རྒྱུ་འབྲས་ཀྱི་སྐབས་སུ་དཔྱད་པར་བྱའོ། །སློབ་དཔོན་ལ་སོགས་བྱ་བ་ལ། དོན་ནི་ཇི་ལྟར་བཤད་དེ་ཆུ་དང༌། དབུ་རྒྱན་ལ་སོགས་པས་དབང་བཅུ་གཅིག་གི་དབང་ཕྱུག་སངས་རྒྱས་རྡོ་རྗེ་འཛིན་པའི་སྐུ་ཞེས་བྱ་བའི་དོན་ཏོ། །གསང་བ་ཞེས་བྱ་བ་ནི་ལོངས་སྤྱོད་རྫོགས་པའི་སྐུ། ཤེས་རབ་ཡེ་ཤེས་ཞེས་བྱ་བ་ནི་ཆོས་ཀྱི་སྐུ། བཞི་པ་ནི་བདེ་བ་ཆེན་པོའི་སྐུ། །སློབ་དཔོན་བཅུ་གཅིག་ཏུ་དབྱེ་ཞེས་བྱ་བའི་རིམ་པ་འདི་ཡིན་ཏེ། ཆུ་དང༌། དབུ་རྒྱན་དང༌། རྡོ་རྗེ་དང༌། དྲིལ་བུ་དང༌། མིང་དང༌། དམ་ཚིག་གསུམ་དང༌། བརྟུལ་ཞུགས་དང༌། ལུང་བསྟན་པ་དང༌། སྐྱབས་སྦྱིན་པ་ཞེས་བྱའོ། །བཅུ་གཉིས་པ་གསང་བཞེས་བྱ་བ་ནི་ལོངས་སྤྱོད་རྫོགས་པའི་སྐུའི་མཚན་ཉིད་ཀྱིས་ཀུན་རྫོབ་དང་དོན་དམ་པ་གཉིས་སུ་མེད་པའི་བྱང་

---

^{[མ་དཔེ་གཟིགས་ན་འདིར་གནོན།]}

ཆུབ་ཀྱི་སེམས་མྱང་བ་ཉམས་སུ་མྱོང་བ་ཞེས་བྱ་བའི་དོན་ཏོ། །བཅུ་གསུམ་པ་ཤེས་རབ་ཡེ་ཤེས་ཞེས་བྱ་བ་ནི་ཤེས་རབ་སྟོབས་ཀྱི་ཕ་རོལ་ཏུ་ཕྱིན་པའི་ཡེ་ཤེས་ཤེས་ནས་སྤྲོས་པ་དང་བྲལ་བ་གཉིས་སུ་མེད་པ། དེ་ཉིད་ཡེ་ཤེས་ལ་འཇུག་པ། དེ་ལྟར་དེ་ཉིད་བཅུ་བཞི་ཞེས་བྱ་བ་ནི་དེ་ཉིད་ཡེ་ཤེས་ཀྱི་འཇུག་པ་ལས་གཞན་མ་ཡིན། ཡེ་ཤེས་ནི་ནམ་མཁའི་རང་བཞིན་བདེ་བ་ཆེན་པོའི་སྐུ་ཉིད་གསང་བའི་དབང་པོ་རྒྱུད་ཀྱི་རིམ་པ་ཞེས་བཤད་དོ། །གཞན་ནི་དོན་ཇི་ལྟ་བ་བཞིན་དུ་བཤད། ས་དང་འབྲས་བུ་གསུམ་དུ་དབྱེ་བ་ཞེས་བྱ་བ་ལ་དོན་ནི་འདི་ཡིན་ཏེ། གང་ཞིག་རྒྱུ་ཡིན་པ་དེ་རང་རྩ་བ། འདི་རུ་རྩ་བའི་སྒྲ་ནི་འོད་རབ་ཀྱི་རང་བཞིན། ཆོས་ཀྱི་སྐུ་གསུངས་སོ། །དེ་ཡང་སྐུ་དང་གསུངས་དང་ཐུགས་གསུམ་དུ་དབྱེ་བ། གང་ཞིག་བུམ་པའི་དབང་ལ་སོགས་པའི་དོན་དེ་ནི་སྐུ། གང་ཞིག་གསང་བའི་དབང་དེ་ནི་གསུང༌། གང་ཞིག་ཤེས་རབ་ཡེ་ཤེས་ཀྱི་དབང་དེ་ནི་ཐུགས་སོ། །དེ་རྣམས་ཀྱི་འབྲས་བུ་ཞེས་བྱ་བ་ནི་སེམས་ལས་བྱུང་བའི་གྲགས་པ་ཅན། བདེ་བ་ཆེན་པོ་རྒྱལ་ལོ། །ཡང་ན་འབྲས་བུ་གསུམ་དུ་དབྱེ་བའི་དོན་ལ་ནི་འདི་ལྟ་སྟེ། བཞི་པ་ནི་ཡེ་ཤེས་ནམ་མཁའི་རང་བཞིན་ཕྱིར་རྒྱུ་ལ། འབྲས་བུ་དེའི་ཕྱིར་དེ་ཉིད་གསུམ་གྱི་ངོ་བོ་ཉིད་དཔལ་རྡོ་རྗེ་འཛིན་པས་གསུངས་སོ། །དགའ་བའི་བྱེ་བྲག་གིས་ཤེས་པར་བྱ་ཞེས་བྱ་བ་ལ། དབང་རྣམས་ལ་ཕྱིའི་རིམ་པས་དྲི་མ་མེད་པའི་ས་ལ་སོགས་བའི་འབྲས་བུ་ཐོབ་པ། ནང་གི་རིམ་པས་དགའ་བ་ལ་སོགས་པའི་འབྲས་བུའོ། །འཁོར་ལོ་རྣམས་ལ་དོན་ནི་འདི་ལྟ་སྟེ། བུམ་པའི་དབང་བསྐུར་བའི་དུས་སུ། འཁྲིག་པ་དང་འོ་ལས་སྐུའི་འཁོར་ལོར་དགའ་བ། བདུད་རྩི་མྱོང་བའི་དུས་སུ། འཇིག་རྟེན་ལས་འདས་པའི་རེག་བྱ་ཚོར་བ་ལས་གསང་བའི་དབང་ལས་གསུང་གི་འཁོར་ལོར་མཆོག་གི་དགའ་བ། ཤེས་རབ་ཐབས་མཉམ་པར་སྦྱར་བའི་བདེ་བ་ཉམས་སུ་མྱོང་བ་ལས་ཐུགས་ཀྱི་འཁོར་ལོར་ཆད་པའི་དགའ་བ། རང་དང་གཞན་གྱི་བྱེ་བྲག་གི་དྲན་པ་མེད་ཅིང་གང་ཞིག་དགའ་བ་སྤྲོས་པ་ཡེ་ཤེས་ཀྱི་འཁོར་ལོ་རང་བཞིན་གྱི་དགའ་བ་ཞེས་ཨིནྡྲ་བྷཱུ་ཏིའི་ཞལ་སྔ་ནས་ཀྱི་གཞུང་གིས་གསུངས་སོ། །ཡར་ངོའི་ཚེས་གསུམ་ཞེས་བྱ་བ་ལ་སོགས་པ་ལ། བྲམ་ཟེ་འདྲ་བུའི་གཞུང་གིས་གསང་བའི་དབང་བསྐུར་

---

^{[མ་དཔེ་གཟིགས་ན་འདིར་གནོན།]}

བའི་དུས་སུ་བྱང་ཆུབ་ཀྱི་སེམས་ཐིག་ལེ་གསུམ་གཟུང་ངོ༌། །ཐབས་ཀྱི་ཞལ་ལ་སོགས་པ་སྒྲ་ཇི་བཞིན་དུ་བཤད་དོ། །ལོ་བཅུ་གཉིས་མ་གསུང་པའི་དབང་གི་དུས་སུའོ། །གང་གི་ཕྱིར་ཞེ་ན་པདྨ་ཅན་མ་ཡིན་པའི་ཕྱིར་གསང་བ་བྱང་ཆུབ་ཀྱི་སེམས་ལ་བསྲུང་ངོ༌། །ལོ་བཅུ་དྲུག་དང་ལྡན་པ་ཤེས་རབ་ཡེ་ཤེས་ཀྱི་དབང་གི་སྐབས་སུ། དགའ་བ་རབ་ཀྱི་ཡེ་ཤེས་པ་བསྲུང་བ་དང་བྱུང་བ་གཉིས་ཀྱི་དོན་དུའོ། །ལོ་ཉི་ཤུ་དང་ལྡན་པ། གསང་བ་དང་ཤེས་རབ་ཡེ་ཤེས་ཀྱི་དབང་གཉིས་ཀྱི་དོན་ནི་མི་རྙེད་པའི་ཕྱིར་སྤངས་བར་བྱའོ། །དེ་ལྟར་ཡང་ཉི་ཤུ་ལོན་པ་ཡན་ཆད་ནི་ཕྱག་རྒྱའི་དངོས་གྲུབ་རིང་དི་བགྱིད་པ་ཉིད་བཅོམ་ལྡན་འདས་རྡོ་རྗེ་འཛིན་པས་གསུངས་སོ། །རྡོ་རྗེ་སློབ་དཔོན་གྱི་གཞུང་གིས་ལོ་ཉིད་ཤུ་ལོན་པ་བྱང་ཆུབ་ཀྱི་སེམས་ལ་འཁྲུག་པར་བྱེད་འཁྲུག་པས་དགའ་བ་འབྱུང་བར་མི་འགྲུབ། རྣལ་འབྱོར་བླ་མའི་རྒྱུད་དུ་འདུས་པར་བྱས་སོ། །སྲིང་མོ་ལ་སོགས་པ་མཚན་མ་རྙེད་པ་ལ། དབང་བསྐུར་བ་གསུམ་གྱི་དུས་སུ་རིག་པར་གསུངས་སོ། །ཅིའི་ཕྱིར་ཞེ་ན། མཚན་མ་ནི་ཡེ་ཤེས་ལྔ་ལ་རྒྱུ་ཡིན་ནོ། །རྒྱུ་ཡོད་པས་ཐེ་ཚོམ་མེད་པའི་འབྲས་བུ་རྙེད་དོ། །ཡེ་ཤེས་ཀྱི་འབྲས་བུ་མངོན་དུ་གྱུར་པའི་རྣལ་འབྱོར་གྱི་དབང་ཕྱུག་ལ་སྲིང་མོ་ལ་སོགས་པས་ནི་སྡིག་པ་མེད་དོ། །དེ་ནི་རེ་ཞིག་ཀུན་རྫོབ་ཀྱི་བདེན་པའི་རིམ་པའོ། །དོན་དམ་པའི་བདེན་པའི་རིམ་པས་ནང་གི་བུམ་པའི་དབང་གི་དུས་སུ་སྐད་ཅིག་བྱེ་བྲག་གསལ་བར་བྱེད་པའི་ཕྱིར་སྲིང་མོ། །གསང་བའི་དབང་གི་དུས་སུ་དགའ་བ་འཇོ་བའི་ཕྱིར་བུ་མོ། ཤེས་རབ་ཡེ་ཤེས་ཀྱི་དབང་གི་དུས་སུ་རོ་ཐམས་ཅད་ལ་སྣང་བར་བྱེད་པའི་ཕྱིར་ཆུང་མ། ཆུང་མ་སློབ་དཔོན་ལ་དབུལ་བར་བྱ་ཞེས་བྱ་བ་ལ་སོགས་པ་ཀུན་རྫོབ་ཀྱི་སྐབས་སུ་དོན་ཇི་ལྟ་བ་བཞིན་གྱིས་རྩབ་གསུངས་སོ། །བླ་མའི་གཟུངས་ཀྱིས་བདག་ཉིད་ཅེས་བྱ་བ་ལ། རྡོ་རྗེ་སེམས་དཔའ་རྗེ་བཙུན་ཉིད་ཅེས་བྱ་བའི་དོན་ཏོ། །བདག་མཆོད་པ་ལས་དངོས་གྲུབ་རྙེད་པ་ཞེས་བྱ་བ་ལ། ཡེ་ཤེས་ཆེན་པོ་ཐོབ་ཅེས་དགོངས་པའོ། །དེ་མ་ཐག་ཏུ་ཕྱག་རྒྱ་ཆེན་པོ་ལ་སོགས་ཞེས་བྱ་བ་ལ། དོན་འདི་ལྟར་བཤད་དེ་བླ་མ་རྗེ་བཙུན་ལ་ཡོན་ཕུལ་བ་དང༌། མཆོད་པ་ལ་སོགས་པའི་ཕྱིས་ནས་ཕྱག་རྒྱ་ཆེན་པོའི་དངོས་གྲུབ་སྟེར་བ། ཤེས་རབ་མ་མེ་ཏོག་དང་སྤོས་ལ་སོགས་པའི་རྫས་ཀྱིས་ཡང་དག་

---

^{[མ་དཔེ་གཟིགས་ན་འདིར་གནོན།]}

པར་མཆོད་པར་བྱས་ནས་ལྷ་མོའི་གཟུགས་སུ་བསྒོམས་ཏེ། སློབ་མའི་ཡན་ལག་ཐམས་ཅད་དུ་རེག་པའི་དོན་དུ་བསྙེན་པར་བྱ་ཞིང་སྦྱིན་པར་བྱ་ཞེས་དགོངས་པའོ། །དེ་ནི་ནང་གི་བུམ་པའི་དབང་གི་ཕྱིར་ཡང་རྣམ་པར་རྒྱལ་བའི་བུམ་པ་ལག་ཏུ་གཟུང་བར་བྱ། །གསང་བའི་དབང་གི་དུས་སུ་སློབ་མ་ལ་ཡེ་ཤེས་གོམས་པའི་ཕྱིར། དང་པོ་སློབ་དཔོན་གྱིས་སྣ་ཚོགས་སྦྱོར་ཐབས་ཀྱིས་བསྙེན་པ་བྱའོ། །བསྙེན་པ་སྦྱོར་བས་བྱང་ཆུབ་ཀྱི་སེམས་འབྱུང་བ་དེ་ནི་སློབ་མའི་ཁ་རུ་དབབ་པར་བྱ་གཞུག་པར་བྱ་ཞེས་སྒྲ་ཇི་བཞིན་གྱི་རྒྱུད་ཀྱི་དོན་ནོ། །སྒྲ་ཇི་བཞིན་མ་ཡིན་པའི་དོན་གྱིས་སློབ་མ་གཞན་གྱི་དབང་གང་ཞིག་འབྱུང་བ་དེ་ནི་བདག་གི་གནས། སློབ་དཔོན་ནག་པོའི་གཞུང་གིས། བདག་ནི་གནས་རྡོ་རྗེ་རིན་པོ་ཆེའི་སྙིང་པོ་གཞན་གྱི་གནས་ནི་པདྨ་རིན་ཆེན་གྱི་སྙིང་པོ། །སློབ་དཔོན་ཀུ་ཀུ་རཱ་ཛའི་གཞུང་གིས། བདག་གི་གནས་ནི་མཆོག་གི་དགའ་བ། གཞན་གྱི་གནས་ནི་ཆད་པའི་དགའ་བ། དཔལ་ཨིནྡྲ་བྷཱུ་ཏིའི་གཞུང་གིས་བདག་གི་གནས་ནི་བསྐྱེད་རིམ། གཞན་གྱི་གནས་ནི་རྫོགས་པའི་རིམ་པ། སློབ་དཔོན་ཌོ་མྦི་པའི་ཞལ་སྔ་ནས་ཀྱིས། བདག་གི་གནས་ནི་ཐམས་ལས་བྱུང་བ། གཞན་གྱི་གནས་ནི་ཐམས་སོ། །སློབ་དཔོན་གཞན་པའི་ཡེས་ཤེས་དང༌། ཡེ་ཤེས་བྱུང་བ་ཞེས་དགོངས་པའོ། །སྲིན་ལག་མཐེ་བོང་ལ་སོགས་ཞེས་བྱ་བ་ལ། ཕྱིའི་དོན་གྱི་རྡོ་རྗེ་རིན་ཆེན་གྱི་སྙིང་པོའི་ནང་ནས་བྱང་ཆུབ་ཀྱི་སེམས་སློབ་མའི་མགྲིན་པའི་ནང་ནས་བླུགས་ཏེ་མགྲིན་པའི་རྩ་གཉིས་བ་ཙིར་བར་བྱའོ། །གང་གི་ཕྱིར་ཞེ་ན། དེས་ནི་ཕྱིས་ནས་ཇི་ལྟར་ཉམས་སུ་མྱོང་བ་བཞིན་ཤེས་ལ། རང་རིག་པའི་མཚན་ཉིད་ཅན་ཡང་དག་པར་འབྱུང་བ་ཞེས་སྒྲ་ཇི་བཞིན་གྱིས་རྒྱུད་ཀྱི་དོན་བཤད་དེ། དེ་རུ་དཔེ་ནི་འདི་ལྟ་སྟེ། གཞོན་ནུ་མ་ལ་སོགས་པ་ལ་ལེགས་དགྱེས་བཞིན་ནོ། །ཇི་ལྟར་ཤིན་ཏུ་ལང་ཚོ་ལ་བབ་པའི་རྒྱལ་པོའི་བུ་མོ་འདོད་པའི་བདེ་བ་ནམ་ཡང་མ་མྱོང་བས་དང་པོའི་སྐབས་སུ་ཤིན་ཏུ་མཁས་པ། འདོད་པའི་སྦྱོར་བས་གང་ཞིག་བྱེད་པའི་ལེགས་སྐྱེས་ཀྱི་བདེ་བ་དེ་ནི་དཔེ་མེད་བརྗོད་མེད་ཅེས་སློབ་དཔོན་གཞན་གྱི་གཞུང་ངོ༌། །རྡོ་རྗེ་སློབ་དཔོན་གྱི་གཞུང་གིས་ཇི་བཞིན། དང་པོའི་སྐབས་སུ་གཞོན་ནུ་མ་ལེགས་དགྱེས་ཀྱི་བདེ་བ། རྣམ་པ་སྣ་ཚོགས་ཀྱི་བྱེ་བྲག་

---

^{[མ་དཔེ་གཟིགས་ན་འདིར་གནོན།]}

ཅང་མི་ཚོར་ན། དེ་བཞིན་དུ་མགྲིན་པའི་རྩ་བཙིར་བ་ལས་ཕྱི་རོལ་གྱི་དངོས་པོ་ཅང་མི་ཚོར་རོ། །མཐེ་བོང་ཞེས་བྱ་བ་ནི་རྡོ་རྗེ་རིན་ཆེན། །སྲིན་ལག་ཅེས་བྱ་བ་ནི་རྟོག་མེད་མ། སྦྱོར་བ་ཞེས་བྱ་བ་ནི་མཉམ་པར་འཁྱུད་པའི་ལས་ཀྱིས་སོ། །སློབ་དཔོན་ཨུ་རྒྱན་གྱི་གཞུང་གིས་སྲིན་ལག་ནི་ཆོས་ཀྱི་འབྱུང་གནས། །མཐེ་བོང་ནི་རྡོ་རྗེ། སློབ་དཔོན་ཁ་ཆེ་བའི་གཞུང་གིས་སྲིན་ལག་ནི་ལྟེ་བ། མཐེ་བོང་ནི་ས་བོན། །སློབ་དཔོན་ཛའ་ལནྡྷ་རའི་གཞུང་གིས། སྲིན་ལག་ནི་གསང་བའི་སྣ། མཐེ་བོང་ནི་གསང་བའི་རྩ། ལོངས་སྤྱོད་ནི་ནང་དུ་འཇུག་པར་བྱ་ཞེས་བྱ་བ་ལ། སློབ་དཔོན་ཨ་ཝ་དྷཱུ་ཏཱིའི་ཞལ་སྔ་ནས་ཀྱི་གཞུང་གིས་ཕན་ཚུན་བྱང་ཆུབ་ཀྱི་སེམས་མེ་ཏོག་གི་སྦྲང་རྩི་ཡན་ལག་བཀབ་བས་སོ། །རྡོ་རྗེ་སློབ་དཔོན་གྱི་གཞུང་གིས། རྡོ་རྗེའི་ས་བོན་མཆོག་གི་དགའ་བའི་གནས་སུ་སྟ་གོན་བྱ། ཨུ་རྒྱན་གྱི་གཞུང་གིས་ཆད་པའི་དགའ་བའི་གནས་སུ་རབ་གནས་བྱ། ནི་གསང་བའི་དབང་གི་རིམ་པའོ། །ད་ནི་རྡོ་རྗེ་སློབ་དཔོན་གྱི་གཞུང་གིས་ཤེས་རབ་ཡེ་ཤེས་ཀྱི་དབང་བྲི། སྲོག་དང་གཏུབ་པ་མཉམ་པར་བྱ། །ཞེས་བྱ་བ་ལ། ཕྱིའི་དོན་གྱི་དོན་ཇི་ལྟ་བ་བཞིན་ནོ། །ནང་གི་དོན་གྱི་སྲོག་ནི་འགྲོ་བའི་དུས། །གཏུབ་པ་ནི་འོང་བའི་དུས་སུ། །དུས་ཀྱི་སྒྲས་ནི་འཇིག་རྟེན་ལས་འདས་པའི་བདེ་བ་ཉམས་སུ་མྱོང་བའི་སྐད་ཅིག་གོ །མཉམ་པར་བྱ་ཞེས་བྱ་བ་ནི་རོ་གཅིག་ཏུ་བྱས་ནས་བསྟན་པའི་རྡོ་རྗེ་གཞོན་ནུ་མ་ལ་ལེགས་དགྱེས་ཀྱིས་ཤིན་ཏུ་ཡང་མཆོད་པར་བྱའོ། །ལེགས་དགྱེས་ཞེས་བྱ་བ་ནི་འཁྲུག་པ་མེད་པའི་དོན་ཏོ། །ཤིན་ཏུ་ཞེས་བྱ་བ་ནི་དུས་རིང་པོའོ། །ཧཱུཾ་ཕཊ་ཀྱི་སྔགས་རིན་ཆེན་ཁ་རུ་དོན་འདི་ལྟ་སྟེ། པདྨ་དང་རྡོ་རྗེ་གཉིས་ཀྱི་ལྟེ་བའི་ཁ་རུ་ཧཱུཾ་ཕཊ་བཀོད་ནས། དེ་ལ་པདྨ་བསྐྱོད་པར་ཞེས་ཚོགས་ལ་བཤད་པའི་སྐབས་སུ་སློབ་མ་ལ་བཤད་པའི་དུས་སུ་དེ་ལ་ཞེས་བྱ་བ་ནི་བྱང་ཆུབ་ཀྱི་སེམས། །སློབ་དཔོན་ཨུ་རྒྱན་གྱི་གཞུང་གིས་ལྟེ་བ། སློབ་དཔོན་ཁ་ཆེའི་གཞུང་གིས་བྱ་གདོང་མ། སློབ་དཔོན་ཛའ་ལནྡྷ་རའི་གཞུང་གིས་རང་བྱུང༌། སློབ་དཔོན་ཀ་མ་རུ་པའི་གཞུང་གིས་ཤེས་རབ་དང་ཐབས་མཉམ་པར་འཁྱུད་པའོ། །དེའི་དུས་ལ་སོགས་པ་ནི་དོན་འདི་ལྟར་བཤད་དེ། ཤེས་རབ་ཡེ་ཤེས་དབང་བསྐུར་

---

^{[མ་དཔེ་གཟིགས་ན་འདིར་གནོན།]}

མཉམ་པར་སྦྱོར་བའི་དུས་སུ། ཇི་ལྟར་སྐད་ཅིག་དང་དགའ་བ་སློབ་དཔོན་ལ་སྐྱེ་བ་དེ་ལྟར་རོ། །བཅུ་དྲུག་མ་ལ་སྨྲ་བར་བྱའོ། །གང་གི་ཕྱིར་ཞེ་ན། དེས་ཡང་དག་པར་ཤེས་པས་སློབ་མ་ལ་དབང་བསྐུར་བའི་དུས་སུ། །ཤེས་རབ་མ་སྐད་ཅིག་ལ་སོགས་བརྡ་བགྱིད། ལེགས་པར་བརྡས་ཤེས་རབ་ཡེ་ཤེས་ལ་འཁྲུལ་པ་མེད་པའི་སེམས་གྲུབ་པ་ཞེས་དགོངས་པའོ། །ཕྱིས་ནས་སློབ་མའི་སྦྱིན་པར་བྱ། །ཞེས་བྱ་བ་ལ་སོགས་པའི་ཡེ་གེའི་དོན་གྱིས་བཤད་པའོ། །པདྨའི་སྙིང་པོའི་དབུས་སུ་གནས། །ཞེས་བྱ་བ་ལ་སོགས་པ་ལ། པདྨའི་སྙིང་པོ་ནི་སངས་རྒྱས་རིན་པོ་ཆེའི་སྣོད་དབུས་ན་གནས་ཞེས་བྱ་བ་ནི་རི་བོང་ཅན་འབབ་པའི་གནས་སུ་བཞུགས་སོ། །དེ་ཅིའི་ཕྱིར་ཞེ་ན། དེ་རང་དོན་བྲི་ན། རྡོ་རྗེ་དབྱིངས་ཀྱི་དབང་ཕྱུག་མའི་རྩ། རྡོ་རྗེ་གསང་པད་ཁ་འབྱེད། རིན་པོ་ཆེ་ལ་ཁམས་ས་བོན་བླུགས་པས་ཕྱུག་པར་བྱེད་པས་རྡོ་རྗེ་དབྱིངས་ཀྱི་དབང་ཕྱུག་མ་ཞེས་སློབ་དཔོན་གྱིས་བསྟན་པའོ། །སངས་རྒྱས་ཉིད་དུ་ཐབས་གཞན་པས་མ་ཡིན་ཞེས་གཞན་ཀུན་གྱི་མན་ངག་དང༌། བསྒོམ་པ་ལ་སོགས་པ་དགག་པའི་ཚིག་གོ །གང་གི་ཚེ་དེ་ནི་མི་རྙེད་ཅེས་པ། འདི་སྐད་ཅེས་བཤད་དེ། གང་གི་རྡོ་རྗེ་དབྱིངས་ཀྱི་དབང་ཕྱུག་མའི་རྩ་དེ་ནི་རྣམ་པ་དང་བྲལ་བ་དེའི་ཕྱིར། ཕྲ་བས་ཕྲ་བ་ཉིད་ཅེས་བཅོམ་ལྡན་འདས་ཀྱིས་གསུངས་སོ། །དེ་ནི་གང་ནས་རྙེད་ཅེས་རྟོག་པ་དང༌། མི་རྙེད་པས་རྒྱུད་ཀྱི་མན་ངག་ནི་ཇི་ལྟར་འགྱུར། དེའི་དོན་ལ་ཐབས་འདི་ལྟར་བཤད། རྡོ་རྗེ་དབྱིངས་ཀྱི་དབང་ཕྱུག་མ་དངོས་པོ་དང་བྲལ་བས་ཀྱང༌། དེ་ལྟ་མོད་ཀྱི་བླ་མའི་མན་ངག་ལས་དེ་ལ་རེག་བྱའི་སྣང་བ་ཙམ་ཚོར་ནས་རང་གི་ཉམས་སུ་མྱོང་བའི་སེམས་མི་བསྐྱོད་པར་འགྱུར་རོ། །དེ་རུ་དཔེ་ནི་འདི་ལྟར་གསུངས་སོ། །མེ་ཏོག་ཀེ་ཏ་ཀའི་སྐྱེད་མོས་ཚལ་ལ། གཟུགས་མེད་པའི་རླུང༌། དབང་པོ་གསལ་བའི་ཤེས་རབ་ཅན་གྱིས་གཏན་ལ་ཕབ་ནས། གང་གི་ཚེ་དེ་མ་ཐག་ཏུ་བསྣམས་པ་ཙམ་གྱིས་སྔར་མེད་པའི་དྲི་ཉམས་སུ་མྱོང༌། དེ་ལྟར་རིག་པས་རྡོ་རྗེ་དབྱིངས་ཀྱི་དབང་ཕྱུག་མ་རེག་བྱ་ཙམ་གྱིས་ཅི་ཞིག་དགའ་བ་ཆེན་པོ་ཉམས་སུ་མྱོང༌། །རིམ་པའི་གོམས་པའི་སྤྱོད་པས་སངས་རྒྱས་ཉིད་འཐོབ་པོ། །དཔལ་ཕྱག་རྒྱ་ཆེན་པོའི་ཐིག་ལེ་

---

^{[མ་དཔེ་གཟིགས་ན་འདིར་གནོན།]}

ལས་ལེའུ་གཉིས་པའི་བཤད་པའོ།། །།

ལེའུ་གསུམ་པའི་བཤད་པ།

---

^{[མ་དཔེ་གཟིགས་ན་འདིར་གནོན།]}

ད་ནི་ལེའུ་གསུམ་པའི་ཟབ་པའི་དོན་བྲི། དེ་ནས་ཞེས་བྱ་བ་རྒྱུད་ཐམས་ཅད་ཀྱི་གླེང་གཞི་དང༌། དབང་བསྐུར་བའི་ལེའུ་གཉིས་པའི་འོག་ཏུ་རྒྱུད་ཐམས་ཅད་ཀྱི་གླེང་གཞིའི་དོན། དཔལ་རྡོ་རྗེ་སེམས་དཔའ་རྗེ་བཙུན་ཉིད་རྒྱས་པར་བསྟན་པས་བཀའ་སྩལ་ཀྱང༌། དེ་ལྟ་མོད་ཀྱི་དང་པོའི་རེ་ཞིག་རྡོ་རྗེ་སློབ་དཔོན་གྱི་ཞལ་སྔ་ནས། དཔལ་ཨིནྡྲ་ཕཱུ་ཏཱིའི་ཞལ་སྔ་ནས་ཀྱི་གཞུང་གིས་ནི། དེ་ནས་ཞེས་བྱ་བ་ལ། དང་པོ་མ་སྐྱེས་པའི་རང་བཞིན་ཆ་ཡིན་ཡང༌། ཐམས་ཅད་འབྱུང་བར་མཛད་པ་ཞེས་གསུངས་སོ། །གསང་བ་ཞེས་བྱ་བ་ནི་ཉི་མའི་འོད་ཀྱི་རང་བཞིན་ཐིག་ལེ་བཤད་ཅེས་བྱ་བ་ནི་རྡོ་རྗེའི་ས་བོན་རྣམ་པ་ཅན་ཚུལ་གྱི་མེ། མཆོག་ཅེས་བྱ་བ་ནི་པདྨའི་ས་བོན་གྲགས་པ་མཆོག་གི་དགའ་བ། རང་གི་ངོ་བོའི་ཚུལ་ཅན་མཆོག་གཞན་ཞེས་བྱ་བ་ལ། མཆོག་གི་དགའ་བ་ལས་རབ་མཆོག་གི་མཆོག་གོ །མཐར་མཆོག་ཅེས་བྱ་བ་ལ། ནམ་མཁའ་ལྔ་རྣམ་པར་བརྒྱན་པ་ཅན། རང་བཞིན་དགའ་བ་བདེ་བ་ཆེན་པོའི་རྒྱལ་པོ། །དེ་ནི་སྦྱོར་དྲུག་རྣམ་པར་ཤེས་པ་ལས་རྒྱུའི་མདོར་བསྟན་པ་གསུངས་སོ། །ད་ནི་འབྲས་བུའི་རྒྱས་པར་བཤད་དེ། ཕུང་པོ་ལྔ་ཉིད་ལུས་པོ་ལ། །ལེགས་དགྱེས་དབང་པོ་འཁོར་ལོ་དྲུག །གང་དུ་བོད་བའི་ཚིག་གི་འཁོར་ལོ་བྱེ་བྲག་བརྡ་མཛད་དོ། །དེ་རང་དོན་རྡོ་རྗེ་སློབ་དཔོན་གྱིས་འདི་སྐད་བཤད་དེ། རླུང་གི་འཁོར་ལོ་ལྟེ་བའི་གནས། རྐང་པའི་མཐིལ་གྱི་གནས་ཡན་ཆད་ཚོགས་པ་ལ་བཤད་པའི་སྐབས་སོ། །སློབ་མ་ལ་བཤད་པའི་དུས་སུ་གསང་བའི་པདྨའི་ནང་དུའོ། །མེའི་འཁོར་ལོ་ནི་དེའི་དཀྱིལ་མ་ཡིན་པའི་གྲུ་གསུམ་གྱི་རྣམ་པ། ཨུ་རྒྱན་གྱི་གཞུང་གིས་ལྟེ་བའི་ཕྱི་རོལ་ལོ། །སྤྲུལ་པའི་འཁོར་ལོ་ནི་ལྟེ་བའི་གནས། ཆོས་ཀྱི་འཁོར་ལོ་ནི་སྙིང་གའི་གནས། །ལོངས་སྤྱོད་ཀྱི་འཁོར་ལོ་ནི་མགྲིན་པའི་གནས། བདེ་བ་ཆེན་པོའི་འཁོར་ལོ་ནི་སྤྱི་བོའི་གནས་སོ། །ཟླ་བ་ཕྱེད་བཞིན་ཆའི་དངོས། །རླུང་གི་འཁོར་ལོའི་རྣམ་བར་གསུམ། དང་བའི་དོན་དུ་བཅོམ་ལྡན་འདས་ཀྱིས་གསུངས་སོ། །རྡོ་རྗེ་སློབ་དཔོན་གྱི་གཞུང་གིས། བཅོམ་ལྡན་འདས་མ་བདག་མེད་མ། །ཞེས་ངེས་པའི་དོན་ཏོ། །ཕྱེད་མིན་

---

^{[མ་དཔེ་གཟིགས་ན་འདིར་གནོན།]}

རྒྱས་པ་ཡང་མིན་ཆུ་ཟླ་བཞིན་དུ་དཔེ་ཡིས་གཟུང་འཛིན་རྣམ་པར་སྤངས། རང་ཉིད་སྐྱེ་བ་མེད་པ་ཡིན་ཡང་ཐམས་ཅད་ལ་སྐྱེ་བར་མཛད་པའི་ཕྱིར་སྒྱུ་འཕྲུལ་ཆེན་མོ་སྤྲོས་པ་མེད་ཀྱང༌། ཁམས་གསུམ་མ་ལུས་པ་ལ་སྲོག་གི་ཆ་བཟུང་མ། ནམ་མཁའི་རང་བཞིན་གྱི་ཕྱིར་ཞི་བ། མཆོག་གི་དགའ་བ་སྦྱིན་པའི་ཕྱིར་མཆོག །རྨད་དུ་བྱུང་བའི་དགའ་བ་ཁོང་དུ་ཆུད་པའི་ཕྱིར་མཆོག་གཞན་མ། རང་བཞིན་དགའ་བའི་ངོ་བོ་ཉིད་ཀྱི་ཕྱིར་བསམ་དུ་མེད་པ། སྲིད་པ་དང་མྱ་ངན་ལས་འདས་པ་གཉིས་སུ་མེད་པའི་ཕྱིར་སྐྱེ་བ་མེད་པ། སྲོག་གི་འཁོར་ལོ་ལ་སྲོག་གི་གྲགས་པ་ཅན་ཞེས་འདི་ལྟར་གསུངས་ཏེ། ཕྱི་དང་ནང་གི་བདག་ཉིད་རླུང་གི་འཁོར་ལོ་སྐྱེད་བྱེད་མ་བདག །གང་ཕྱིར་ཞེ་ན། རང་བཞིན་གྱིས་རླུང་གི་ངོ་བོ་ཡིན་པའི་ཕྱིར་དགོངས་པའོ། །མེ་ཡི་འཁོར་ལོའི་ནང་དུ་ཐིམ། ཡི་གེ་མེད་པའི་འཁོར་ལོ་གཅིག །དྲང་བའི་དོན་གྱི་བཅོམ་ལྡན་འདས་ཀྱི་ལུང་ངོ༌། །རྡོ་རྗེ་སློབ་དཔོན་གྱི་གཞུང་གིས་བཅོམ་ལྡན་འདས་རྡོ་རྗེ་རིགས་སྐྱེ་བོ་རྡོ་རྗེར་གྲགས་པ་བདེ་བ་ཆེན་པོའི་རྒྱལ་པོའོ། །སློབ་དཔོན་ཀུ་ཀུ་རི་པའི་ཞལ་སྔ་ནས་ཀྱི་གཞུང་གིས་མེ་ལོང་ལྟ་བུའི་ཡེ་ཤེས་ངོ་བོ་མི་གཡོ་བའི་ཕྱིར་ཡི་གེ་མེད་པ། སྟོང་ཆེན་པོའི་རང་བཞིན་གྱི་ཕྱིར་རྣམ་པ་ཐམས་ཅད། རྣམ་པ་མེད་པའི་རྣམ་པར་ཤེས་པ་ཙམ་གྱི་ཕྱིར་ཀུན་ལ་གནས་པ། རྣམ་པ་དང་བཅས་པའི་རྣམ་པར་ཤེས་པའི་ངོ་བོའི་ཕྱིར་ཀུན་ལ་ཁྱབ་པ་དང༌། ཡང་ན་ནམ་མཁའ་རང་བཞིན་གྱི་ཕྱིར། ཤེས་རབ་དང་ཐབས་གཉིས་སུ་མེད་པའི་ངོ་བོའི་ཕྱིར་བདེ་བ་འབྱུང་བ། མཆོག་གི་དགའ་བའི་རང་བཞིན་གྱི་ཕྱིར་བདེ་བ་འཕེལ་བ། ཡིད་ཀྱི་རྣམ་པར་ཤེས་པའི་རང་བཞིན་གྱི་ཕྱིར་དབྱངས་དང་གསལ་བྱེད་ཀྱི་ཡི་གེ་དང་བྲལ་བ། བདེ་བ་ཆེན་པོའི་ངོ་བོ་ཉིད་ཀྱི་ཕྱིར། ཁམས་གསུམ་མ་ལུས་པ་རྒྱུ་བར་བྱེད་པ་པོ། །ཚུལ་ནི་གློ་བུར་བའི་གནས་ཞེས་བྱ་བ་ལ། དྲང་བའི་དོན་གྱི་བཅོམ་ལྡན་འདས་ཀྱི་ལུང་ངོ༌། །ངེས་པའི་དོན་གྱི་རྡོ་རྗེ་སློབ་དཔོན་གྱི་གཞུང་གིས་དཔལ་རྡོ་རྗེ་གྲགས་པ་ཆེན་པོའི་རྒྱལ་པོ་སྤྲོས་པ་དང་བྲལ་བ། ཤེས་རབ་དང་ཐབས་དང་འཁྱུད་པའི་དུས་སུ་ཚུལ་གྱིས་འདུ་ཤེས་ཅན། རྨད་དུ་བྱུང་བའི་དགའ་བ་སྤྲོ་བ། གང་གི་དགའ་བས་ཐོས་པ་དང༌།

---

^{[མ་དཔེ་གཟིགས་ན་འདིར་གནོན།]}

དྲན་པ་དང་ཉམས་སུ་མྱོང་བ་ཙམ་གྱིས་དེ་བཞིན་གཤེགས་པ་ཡང༌། བདེ་བ་ཆེན་པོའི་བདེ་བ་རྙེད་པས། ཕྱིའི་བུད་མེད་ཀྱི་བདེ་བ་བསྙེན་པས་དགའ་བ་དེ་ལྟར་ནི་མ་ཡིན་ནོ། །དེའི་ཕྱིར་ཕྱི་མ་ཡིན་པས་རྣམ་པ་ཐམས་ཅད་དང་བྲལ་བ་བདེ་མཆོག་དབང་ཕྱུག་གིས་ཞེས་གསུངས་སོ། །ཉན་ཐོས་དང་རང་སངས་རྒྱས་ལ་སོགས་པ་ལ་གཟུང་བར་དཀའ་བའི་ཕྱིར་ཤིན་ཏུ་འཇིགས་པར་བྱེད་པའི་ཀླུའི་ལྕེའི་རྣམ་པ། ཇི་ལྟར་དཔའ་བོ་ཡིན་ཀྱང་སྤྲུལ་ཆེན་པོའི་ལྕེ་མཐོང་ན་འཇིགས་སོ། །དེ་ལྟར་རྡོ་རྗེ་འཛིན་པ་ལ་དགའ་བ་འབྱུང་བ་སངས་རྒྱས་ཀྱིས་ཀྱང་མི་ཐེག །འོན་ཀྱང་གཞན་མ་ལྷ་དང་མི་ཅི་སྨོས། ནམ་མཁའ་ལ་སོགས་པ་ལ་བྱེད་པ་པོ་ཞེས་བྱ་བ་ལ་ཕྱིའི་དོན་གྱིས་འདི་ལྟར་བཤད་དེ། ནམ་ཁའི་སྒྲ་ནི་མཐོ་རིས། སོགས་པའི་སྒྲ་ནི་མི་ཡུལ་དང་ས་འོག །ནང་གི་དོན་གྱིས་མཆོག་གི་དགའ་བ་ལ་སོགས་པ། སློབ་དཔོན་ཌོ་མྦི་པའི་ཞལ་སྔ་ནས་ཀྱི་གཞུང་གིས་རྣམ་པ་སྣ་ཚོགས་པ་ལ་སོགས་པའི་སྐད་ཅིག །དཔལ་ཨིནྡྲ་བྷཱུ་ཏེའི་ཞལ་སྔའི་གཞུང་གིས། ཡེ་ཤེས་གཟུགས་དང་བྲལ་བའི་ཕྱིར་ཡི་གེ་མེད་པ། རེག་བྱ་དང་བྲལ་བའི་ཕྱིར་ཁམས་མེད་པ་ལ། རོ་དང་བྲལ་བའི་ཕྱིར་གུག་སྐྱེད་མེད་པ། སྒྲ་དང་ཐལ་བའི་ཕྱིར་ཐིག་ལེ་མེད་པ་དྲི་མ་མེད་པའི་ཕྱིར་དཔག་ཏུ་མེད་པ། རང་བྱུང་བའི་ཕྱིར་སྐྱེ་བ་མེད་པ། ནམ་མཁའི་རང་བཞིན་གྱི་ཕྱིར་མི་ཟད་པ། དོན་དམ་པའི་ལྟ་བ་ཞེས་དཔལ་ཨིནྡྲ་བྷཱུ་ཏིའི་གཞུང་ངོ༌། །ལྟེ་བའི་གནས་སུ་ལ་སོགས་བྱ་བ་ལ། གོང་དུ་བྲིས་སོ། །སློབ་དཔོན་ནག་པོ་པའི་གཞུང་གིས་ལྟེ་བ་ནི་གཞན་མ་ཡིན། སྤྲུལ་པའི་འཁོར་ལོ། སློབ་དཔོན་དཔའ་བོ་བཟང་པོའི་གཞུང་གིས། རྫོགས་པའི་རིམ་པའི་ཕྱོགས་སུ་སྤྲུལ་པའི་འཁོར་ལོ་ལྔ། དཔལ་སྡོམ་པའི་རྒྱ་མཚོ་དང༌། རིགས་ཆེན་པོ་དེ་ཁོ་ན་ཉིད་ཀྱི་རྒྱ་མཚོ་ཆེན་པོའི་རྒྱུད་ལ་སོགས་པ་དེ་དང་འདྲ། མདོར་ན་བསྡུས་པ་འདོད་པ་ལ་དོན་གྱི་ཕྱིར། བརྟག་པ་གཉིས་ཀྱི་རྒྱལ་པོའི་རྒྱུད་ལ་སོགས་པ་རྒྱས་པ་མ་ཡིན་བཀའ་སྩལ་པ། ཡང་ན་ཆོས་ལ་སྤྱོད་པ་ཤེས་རབ་ཆུང་བའི་ཕྱིར་ཞེས་དགོངས་པའོ། །ཚུལ་ཙམ་ཆོས་ཀྱི་འཁོར་ལོར་ནི། །སྦྲུལ་གྱི་མིག་བཞིན་དྲི་མ་མེད། །ཅེས་བྱ་བ་ལ། དྲང་བའི་དོན་གྱི་བཅོམ་ལྡན་འདས་ཀྱི་ལུང་ངོ༌། །

---

^{[མ་དཔེ་གཟིགས་ན་འདིར་གནོན།]}

ངེས་པའི་དོན་གྱི་རྡོ་རྗེ་སློབ་དཔོན་གྱི་གཞུང་གིས་འདི་ལྟ་སྟེ། བཅོམ་ལྡན་འདས་ལ་དང་པོའི་དགའ་བ་འབྱུང་བའི་ཚེ་རྡོ་རྗེ་འཛིན་པའི་ས་ལ་གནས་པ། དེ་བཞིན་གཤེགས་པ་ལ་དེའི་དགའ་བའི་འོད་ཟེར་སྣ་ཚོགས་ཀྱིས། ཡང་དག་པར་རྨད་དུ་བྱུང་བ་རོ་ཆེན་པོ་བརྒྱད་སྐྱེས་སོ། །དེ་གཟིགས་ནས་ཕྱིས་ནས་མཆོག་གི་དབང་ཕྱུག་གིས། གསང་བ་ཆེན་པོའི་མཆོག །ཚུལ་ཙམ་མཆོག་གི་དགའ་བ། ཡེ་ཤེས་ཆེན་པོ་རྣམ་པར་སྤྲོས་པ། ཆོས་ཀྱི་འཁོར་ལོར་ནི་ཙནྡན་གང་གིས་སོ་རིམས་ཀྱི་གནས་ཀྱིས་བསྟན་པའོ། །སྤྲུལ་གྱི་མིག་བཞིན་དྲི་མ་མེད། །ཅེས་བྱ་བ་ལ། ཉི་བར་བརྟགས་པ་ཙམ། །འོན་ཀྱང་དེས་ནི་ཤིན་ཏུ་དྲི་མ་མེད་པ་ཉིད་རབ་ཏུ་བསྟན་ཏོ། །ཡང་ན་ངེས་པའི་དོན་གྱིས་སྤྲུལ་གྱི་སྒྲ་ནི་ལོངས་སྤྱོད་རྫོགས་པའི་སྐུ། ཀྱེ་ལ་རིའི་ཞལ་སྔ་ནས་ཀྱི་གཞུང་གིས་སྣང་བ་མཆེད་པ། སློབ་དཔོན་བཛྲ་ནཾ་གྱི་ཞལ་སྔ་ནས་ཀྱི་གཞུང་གིས་རྡོ་རྗེ་ཉི་མ་ཤར་བ། ཀ་མ་ལ་བི་རཱི་ཞལ་སྔ་ནས་ཀྱི་གཞུང་གིས་ཐིག་ལེ་ཡེ་ཤེས་འབིགས་པ། རྒྱལ་མོ་ལག་སྨིའི་གཞུང་གིས་ས་ལ་སོགས་པ་འབྱུང་བ་ལྔ་དང་བྲལ་བ། དེའི་ཕྱིར་ཉིད་རྡོ་རྗེ་འཛིན་པས་ཡང་དག་དྲི་མ་མེད་པ་གསུངས་སོ། །ཆ་མེད་པའི་ཕྱིར་སྤྲོས་པ་མེད་པ་གཞན་མའི་གཞུང་ངོ༌། །དྲི་མ་མེད་པའི་ཕྱིར་ཞེས་བྱ་བ་དེའི་ཁྱད་པར་ཅན་གྱི་ཚིག །དྲི་མ་མེད་པ་བཅོས་མ་མེད་པ་རྣམ་པ་དང་བྲལ་བ། རྣམ་པ་མེད་པའི་ཕྱིར་གནས་མེད་པ། གནས་མེད་པའི་ཕྱིར་མི་གཡོ་བ་ཡེ་ཤེས་ཀྱི་ནམ་མཁའི་རང་བཞིན་ཞེས་བྱ་བའི་དོན་ཏོ། །ཡེ་ཤེས་ནམ་མཁའི་རང་བཞིན་གྱི་ཕྱིར་དཔེ་དང་བྲལ་བ། དབུས་དང་དབུས་མ་ཡིན་པ་མེད་པ་ཞེས་བྱ་བ་ནི་ཡོད་པ་དང་མེད་པ་ལས་འདས་པ། ཆུལ་ཙམ་མཆོག་གི་ཡེ་ཤེས་ནི། ལྷའི་དབང་ཕྱུག་གིས་མི་ཤེས་ཁྱབ་འཇུག་དང༌། ལྷ་ཆེན་དང༌། ཚངས་པ་དང༌། བརྒྱ་བྱིན་དང༌། ཉེ་བའི་དབང་པོ་ལ་སོགས་པས་ཀྱང་མི་ཤེས་པ་ཞེས་བྱ་བའི་དོན་ཏོ། །མཆོག་གི་ལོངས་སྤྱོད་འཁོར་ལོར་གནས། །མཆོག་གི་རྣམ་པའི་བདུད་རྩི་མཆོག །ཅེས་བྱ་བ་ལ། དྲང་བའི་དོན་གྱི་བཅོམ་ལྡན་འདས་ཀྱི་ལུང་ངོ༌། །རྡོ་རྗེ་སློབ་དཔོན་གྱི་གཞུང་གིས་ངེས་པའི་དོན་གྱི་དོན་འདི་ལྟ་སྟེ། བཅོམ་ལྡན་འདས་རྡོ་རྗེ་འཛིན་པ་ཆེན་པོ་ལ་མཆོག་

---

^{[མ་དཔེ་གཟིགས་ན་འདིར་གནོན།]}

གི་དགའ་བ་ཡེ་ཤེས་ཆེན་པོ་འབྱུང་བའི་ཚེ། གྲངས་མེད་པའི་འཇིག་རྟེན་གྱི་ཁམས་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་དང༌། འཆི་བ་མེད་པ་ལ་སྐུ་འབར་བ་དག་དང༌། སྐམ་པར་འགྱུར་བ་སེམས་ཀྱིས་ལ་བརྒྱལ་བ་དེ་ལྟར་མི་ཐུབ་གཟིགས་ནས་རྡོ་རྗེ་འཛིན་པ་ཆེན་པོས་རབ་གཏུམ་དགའ་བ་ལ་སྣང་བ་མེད་པར་མཛད་ནས། ཞི་བ་ཆེན་པོའི་མཚན་ཉིད་མཆོག་གི་གྲགས་པ་ཅན་གྱིས་མཐའི་དགའ་བ་ཞེས་རྣམ་པར་སྤྲོས་སོ། །ལོངས་སྤྱོད་རྫོགས་པའི་དོན་ནི་སྔར་བཤད་པས། མཆོག་གི་དགའ་བ་ཞེས་བྱ་བ་ལ་དགའ་བ་ཐམས་ཅད་དང་སྐད་ཅིག་དང་རོ་རྒྱས་པའི་ཕྱིར་རོ། །མཆོག་གི་བདུད་རྩི་ཞེས་བྱ་བ་ལ་ཐམས་ཅད་སྐྱེ་བའི་རྒྱུ་ཡིན་པའི་ཕྱིར་རོ། །དཔལ་ཨིནྡྲ་བྷཱུ་ཏིའི་ཞལ་སྔའི་གཞུང་གིས་མིག་མི་ཐུབ་པའི་སྐབས་སུ། དཔེ་མེད་པའི་བདེ་བ་མྱོང་བའི་ཕྱིར་མཆོག་གི་བདུད་རྩི། སློབ་དཔོན་ཀུ་ཀུ་རིའི་ཞལ་སྔའི་གཞུང་གིས་མི་བསྐྱོད་པའི་ཕྱིར་མཆོག་གི་བདུད་རྩི། མཆོག་གི་དང་པོ་ནི་སློབ་དཔོན་གྱི་ཞལ་སྔ་ནས་འདི་སྐད་ཅེས་བཤད་དེ། མཆོག་ལ་ཡོངས་སུ་རྫོགས་པའི་ངོ་བོའི་དགའ་བ་ལ། གང་ཞིག་འོད་ཟེར་གྱི་ཚོགས་དེ་ནི་མཆོག་གི་དང་པོའོ། །མཆོག་གི་མཐའ་ཞེས་བྱ་བ་ལ་ཆོ་ག་འདི་སྐད་གསུངས་ཏེ། ཡང་དག་དྲག་པོའི་མཆོག་ནི་དགའ་བ། གང་ཞིག་ཉེ་བར་ཞི་བ་དེ་ཉིད་དོ། །དེ་ནི་མཆོག་གོ་མཐའོ། །དེ་རུ་བཞུགས་ཞེས་བྱ་བ་ལ། །དེ་རུ་ཤར་བ་ཞེས་བྱ་བའི་དོན་ཏོ། །མཆོག་གྲགས་མཐའ་ནི་དགའ་བདེ་མ་ཐག་ཏུ་བྲི་བར་བྱའོ། །སློབ་དཔོན་གཞན་གྱི་གཞུང་གིས་མཆོག་ནི་དང་པོའི་དགའ་བ། མཆོག་གི་མཐའ་ནི་ཆད་པའི་དགའ་བ། དེ་རུ་བཞུགས་པ་ནི་རང་བཞིན་གྱི་དགའ་བ། དཔལ་ཨིནྡྲ་བྷཱུ་ཏིའི་ཞལ་སྔ་ནས་ཀྱི་གཞུང་གིས། མཆོག་གི་དང་པོ་ནི་གཙོ་བོ་ཉིད། མཐའ་ནི་དེའི་མཇུག །བཞུགས་པ་ཞེས་བྱ་བ་ནི་བསྐྱོད་པ་མེད་པས་སོ། །སློབ་དཔོན་ཀུ་ཀུ་རིའི་ཞལ་སྔ་ནས་གྱི་གཞུང་གིས་དེ་དང་འདྲའོ། །ཇི་ལྟར་ཆང་གི་རོ་ནི་བཅུད་ཅེས་བྱ་བ་ལ། རྡོ་རྗེ་སློབ་དཔོན་གྱིས་འདི་སྐད་ཅེས་གསུངས་ཏེ། ཕྱི་རོལ་གྱི་དཔེས་ནི་ཇི་ལྟར་ཤིན་ཏུ་སྨིན་པའི་རྒྱུན་འབྲུམ་གྱི་རོ་ལ་དགའ་བ་ཡོད་པ་དེའི་ཕྱིར། ཀུན་རྫོབ་དང་དོན་དམ་པ་གཉིས་

---

^{[མ་དཔེ་གཟིགས་ན་འདིར་གནོན།]}

སུ་མེད་པའི་བྱང་ཆུབ་ཀྱི་སེམས་ཀྱི་རོས་སྔར་མེད་པ་རྨད་དུ་བྱུང་བའི་ཞི་བའི་དགའ་བ་ཡོད་དོ། །མཆོག་གི་མཐའ་ཡིས་དགའ་བ་ལ། །གཟུགས་ལ་སོགས་པའི་རྣམ་པ་འགོག །དེའི་ཕྱིར། གཟུགས་དང་བྲལ་བའི་བདག་ཉིད་བཞུགས། །ཐམས་ཅད་བདག་ཉིད་དངོས་པོ་མེད། །ཅེས་པ་ཉིད་མཆོག་གི་དབང་ཕྱུག་གིས་གསུངས་སོ། །མཆོག་གཞན་བདེ་ཆེན་འཁོར་ལོར་ནི། །ཐམས་ཅད་མཐའ་ཡི་མཐའ་ན་བཞུགས། །བཅོམ་ལྡན་འདས་ཀྱིས་གསུངས་པ་སྒྲ་ཇི་བཞིན་གྱིས་སོ། །དངོས་གྲུབ་ཐོབ་པའི་སློབ་དཔོན་གྱི་གཞུང་གིས། །དོན་ནི་འདི་ལྟར་བཤད་དེ། དཔལ་རྡོ་རྗེ་འཛིན་པ་ཆེན་པོ་མཐའི་དགའ་བ། ཞི་བ་ཆེན་པོའི་རང་བཞིན་བཞུགས་པའི་སྐབས་སུ། དེ་བཞིན་གཤེགས་པ་ཐམས་ཅད་སྟོང་པ་ཉིད་འཇིགས་པའི་ཕྱིར་བརྒྱལ་བ། ས་ལ་འགྱེལ་བ་དེ་ལྟར་གཟིགས་ནས་བཅོམ་ལྡན་འདས་ཕྱིས་ནས་ཀྱང༌། མཆོག་སྦྱིན་གྱི་སྒྲས་པ་ཅན་རྨད་དུ་བྱུང་བ་ཆེན་པོའི་དགའ་བར་མཛད་ཅིང་སྣང་བའོ། །བདེ་བ་ཆེན་པོའི་འཁོར་ལོ་ཞེས་བྱ་བ། སློབ་དཔོན་ཀུ་ཀུ་རིའི་ཞལ་སྔ་ནས་ཀྱི་གཞུང་གིས། བདེ་བ་ཆེན་པོ་ཚོར་བའི་གནས་གསང་བའི་རིན་ཆེན་གྱི་སྙིང་པོའོ། །ཀུན་གྱི་མཐའ་ཡི་མཐའ་ན་བཞུགས། །ཞེས་བྱ་བ་ལ་འདི་སྐད་གསུངས་ཏེ། ཀུན་གྱི་མཐའི་སྒྲ་ནི་མཐའི་དགའ་བའོ། །དེའི་མཐའ་ནི་མ་ཡིན་པ་རྣམ་པར་འབྱེད་པ་དཔལ་ཨིནྡྲ་བྷཱུ་ཏིའི་སྲས་ཀྱི་གཞུང་གིས་ཀུན་གྱི་མཐའ་ནི་དགའ་བྲལ། མཐའ་ན་བཞུགས་པ་ཞེས་བྱ་བ་ལ་རང་བཞིན་གྱི་དགའ་བ། དེའི་ཕྱིར། བལྟ་བར་དགའ་བའི་མཚན་ཉིད་དགའ། །ཐམས་ཅད་མཚན་ཉིད་མིན་དང་བྲལ། །བརྗོད་མེད་མི་ཟད་ཞི་བ་སྟེ། །རང་དགའ་ཉམས་སུ་མྱོང་བའི་དངོས་ཉིད་རྡོ་རྗེ་སེམས་དཔའ་གསུངས་སོ། །བླ་མའི་ཞབས་ཀྱི་བཀའ་དྲིན་གྱིས། །ཞེས་བྱ་བ་ལ་སོགས་པ་ལ་སྒྲ་ཇི་བཞིན་གྱིས་བཤད་དོ། །སྟེང་འོག་མཉམ་པར་སྐྱོར་བ་ཡི། །ཁ་སྦྱར་གྱི་ནི་དབྱིངས་ཀྱི་གནས། །ཞེས་འཁོར་ལོ་རྣམས་ལ་དེ་ལྟར་མཚན་ཉིད་བཤད་དོ། །སློབ་དཔོན་ཌོ་མྦི་པའི་ཞལ་སྔ་ནས་ཀྱི་གཞུང་གིས་གསང་བའི་པདྨ་སྙིང་པོར་འོག་ན་རླུང་གི་འཁོར་ལོ། །སྟེང་ན་མེའི་འཁོར་ལོ། འོག་ན་ལྟེ་བའི་འཁོར་ལོ། སྟེང་ན་ཆོས་ཀྱི་འཁོར་

---

^{[མ་དཔེ་གཟིགས་ན་འདིར་གནོན།]}

ལོ། །འོག་ན་ལོངས་སྤྱོད་ཀྱི་འཁོར་ལོ། །སྟེང་ན་འོང་བ་བདེ་བ་ཆེན་པོའི་འཁོར་ལོ། །སློབ་དཔོན་བི་ལས་བཛྲའི་གཞུང་གིས། འདབ་མ་ནི་གང་རུང་གསལ་བ། ལྟེ་བ་རྣམས་ནི་འདུས་པ། སློབ་དཔོན་གཞན་མའི་གཞུང་གིས་ནང་གི་འདབ་མ་ནི་འདུས་པ། དེའི་ཕྱིར་ཁ་སྦྱོར་གྱི་རྣམ་པ་ཡོད་པས་ཞེས་བསྟན་ཏོ། །བཅུ་གཉིས་ཀྱི་ཕྱེད་ལ་སོགས་པ་ལ་འཁོར་ལོ་རྣམས་ཀྱི་འདབ་མའི་གྲངས་ཀྱི་ཚད། དེ་ལ་རིམ་པ་ནི་འདི་ཡིན་ཏེ། རླུང་གི་འཁོར་ལོའི་འདབ་མ་དྲུག །མེའི་འཁོར་ལོའི་འདབ་མ་གསུམ། །སྤྲུལ་བའི་འཁོར་ལོའི་འདབ་མ་དྲུག་ཅུ་རྩ་བཞི། ཆོས་ཀྱི་འཁོར་ལོའི་འདབ་མ་བརྒྱད། ལོངས་སྤྱོད་ཀྱི་འཁོར་ལོའི་འདབ་མ་བཅུ་དྲུག །བདེ་བ་ཆེན་པོའི་འཁོར་ལོ་ནི་འདབ་མ་སུམ་ཅུ་རྩ་གཉིས་སོ། །དཔལ་ཕྱག་རྒྱ་ཆེན་པོའི་ཐིག་ལེ་ལས་ལེའུ་གསུམ་པའི་བཤད་པའོ།། །།

ལེའུ་བཞི་པའི་བཤད་པ།

---

^{[མ་དཔེ་གཟིགས་ན་འདིར་གནོན།]}

སྟོང་ཕྲག་བདུན་ཅུ་རྩ་གཉིས་ཞེས་བྱ་བ་ལ་དོན་ནི་འདི་ལྟར་གསུངས་ཏེ། ཕུང་པོ་ལྔའི་བདག་ཉིད་སྤྱི་བོ་དང་སྤྱི་གཙུག་ཡན་ཆད། སྟོང་ཕྲག་བདུན་ཅུ་རྩ་གཉིས་ཀྱི་ནང་གི་རྩའི་དྲ་བས་ཁྱབ་པོ། །དེའི་ནང་ནས་རབ་ནི་གསུམ། །ཁ་ཅིག་ནི་གཉིས་ནི་ལེན་ཏེ། ཀུན་དགའ་ལ་དཔལ་རིགས་ཆེན་པོའི་རྒྱུད་ཀྱི་རྒྱལ་པོར་མིང་དང་མཚན་མ་གསུངས་སོ། །འདི་རུ་འཁོར་ལོ་དྲུག་གི་གྲངས་མདོར་བསྟན་པའོ། །ཅིའི་ཕྱིར་ཞེ་ན། གང་ཞིག་འདབ་མ་དེ་རང་རྩའོ། །གཞན་ཡང་ཇི་ལྟར་མཚན་བསྟན་པ་མཚན་ཉིད་ཀྱང་དེ་ལྟར་རོ། །ལྷ་མོ་རྩ་འབྱུང་མེད་པ་ཡིས། །ཕུང་པོ་ལ་སོགས་ཇི་ལྟར་འབྱུང༌། །ཞེས་བྱ་བ་ལ་འདི་ལྟར་བཤད་དེ། ཕུང་པོ་ལྔའི་སྐུ་བདག་ཉིད། །སྐུ་ནི་གཞི་དང་འདྲ། དེ་ཡང་གཞི་རྩ་དཀའ་བས་མི་འཇིག་པར་འགྱུར། མི་ཤིགས་པས་བསོད་ནམས་དང་ཡེ་ཤེས་ཀྱི་ཚོགས་གཉིས་འགྲུབ། དེ་ལས་སངས་རྒྱས་ཉིད་སློབ་དཔོན་གཞན་གྱི་གཞུང་གིས། རྩ་ལ་ཕུང་པོ་བརྟེན། སློབ་དཔོན་ཀུ་ཀུ་རིའི་གཞུང་གིས། །ཕན་ཚུན་མཉམ་པར་འབྲེལ་སློབ་དཔོན་ཌོ་མྦི་བའི་ཞལ་སྔའི་གཞུང་གིས་ཕྱིའི་རྩ་ཕུང་པོ་ལ་སོགས་པ་ལ་རྟེན་དུ་གྱུར་ཏོ། །སློབ་དཔོན་ཨིནྡྲ་བྷཱུ་ཏིའི་གཞུང་གིས་ཕྱི་དང་ནང་གི་བདག་ཉིས་གཉིས་སོ། །སློབ་དཔོན་བི་ལས་བཛྲའི་གཞུང་གིས་ཆུ་ལ་སོགས་པ་དང་ལྡན་པའི་བརྟེན་པའི་དོན་བྱེད་

---

^{[མ་དཔེ་གཟིགས་ན་འདིར་གནོན།]}

དོ། །དེ་ནས་རྩའི་མཚན་བསྟན་པ་རྒྱུད་ལས་གསལ་བའི་ཕྱིར་འདིར་མ་བྲིས་སོ། །ཕུང་པོ་མེད་པའི་ཡི་གེ་ཆེ། །རྣལ་འབྱོར་པས་ནི་ཇི་ལྟར་རྙེད། །ཅེས་ཇི་ལྟར་བཤད་དེ། རྩའི་ནི་རྟེན་ཡིན་པས་བྱང་ཆུབ་སེམས་འབྱུང༌། དེ་ནི་ཤེས་རབ་ཡེ་ཤེས་ཀྱི་དབང་གི་འབྲས་བུ་ཐོབ་པ། དེས་ནི་ཡེ་ཤེས་ཆེན་པོ་རྡོ་རྗེ་འཛིན་པ་ཉིད་ཅེས་བྱ་བའི་དོན་ཏོ། །དེ་ལྟར་མིན་ན་ཡེ་ཤེས་ཆེན་པོ་ཐོབ་པར་མི་འགྱུར་ཞེས་དགོངས་པའོ། །ཕུང་པོ་ལྔ་ཡི་བདག་ཉིད་སྐུ། །མཁའ་འགྲོ་ལྔར་ནི་རབ་ཏུ་གྲགས། །ཞེས་བྱ་བ་ལ་སློབ་དཔོན་ཤཱཀྱ་མཻ་ཏྲིའི་གཞུང་གིས་འདི་ལྟར་ཡང་བཤད་དེ། གཟུགས་ཀྱི་ཕུང་པོ་སངས་རྒྱས་མཁའ་འགྲོ། སངས་རྒྱས་ནི་རྣམ་པར་སྣང་མཛད། ཚོར་བའི་ཕུང་པོ་རིན་ཆེན་མཁའ་འགྲོ། །རིན་ཆེན་ནི་རིན་ཆེན་འབྱུང་ལྡན། འདུ་ཤེས་ཕུང་པོ་པདྨའི་མཁའ་འགྲོ། པདྨ་ནི་སྣང་བ་མཐའ་ཡས། འདུ་བྱེད་ཀྱི་ཕུང་པོ་ནི་ལས་ཀྱི་མཁའ་འགྲོ། །ལས་ནི་དོན་ཡོད་གྲུབ་པ། རྣམ་པར་ཤེས་པའི་ཕུང་པོ་ནི་དྲོ་རྗེ་མེ་མཁའ་འགྲོ། རྡོ་རྗེ་ནི་མི་བསྐྱོད་པ། ཕུང་པོ་ལྔ་ནི་མཁའ་འགྲོ་ཇི་ལྟར་འགྱུར། །ཞེས་རྟོག་ནས་སློབ་དཔོན་ལ་འདི་སྐད་བཤད་དེ། ཕུང་པོ་ལ་ནི་རང་བཞིན་མཁའ་འགྲོ་ལྔ་འོན་ཀྱང་མིའི་སྐབས་སུ་གློ་བུར་བའི་དྲི་མས་ཁྱབ། ཇི་ལྟར་ཟླ་བ་དང་ཉི་མ་སྤྲིན་དང་མུན་པ་དང་དུད་པ་ལ་སོགས་ཀྱིས་སོ། །སངས་རྒྱས་དཀྱིལ་འཁོར་དེ་ལྟར་མེད། །ཅེས་ཀླུ་སྒྲུབ་སྙིང་པོའི་ཞལ་སྔ་ནས་ཀྱི་གཞུང་ངོ༌། །འབྱུང་བའི་རང་བཞིན་ཡེ་ཤེས་ལྔའི་དོན་གྱིས་བཤད་དེ། དེ་ལ་རིམ་པ་ནི་འདི་ཡིན་ཏེ། མེ་ལོང་ལྟ་བུའི་ཡེ་ཤེས་དང༌། མཉམ་པ་ཉིད་ཀྱི་ཡེ་ཤེས་དང༌། སོ་སོར་ཀུན་དུ་རྟོག་པའི་ཡེ་ཤེས་དང༌། བྱ་བ་གྲུབ་པའི་ཡེ་ཤེས་དང་ཆོས་ཀྱི་དབྱིངས་ཀྱི་ཡེ་ཤེས་སོ། །དེ་ལྟར་ཡེ་ཤེས་ལ་སོགས་པའི་བདག་ཉིད། ཕུང་པོ་ལྔའི་གྲུབ་པའི་སྐུ། །རྩའི་འབྱུང་བ་མེ་དཔས་མི་འགྲུབ། །ཕུང་པོ་མེད་པས་རྣལ་འབྱོར་པས་དངོས་གྲུབ་མི་རྙེད་པས་ལུང་དོ། །གཞན་མ་ནི་སྒྲ་ཇི་བཞིན་གྱིས་བཤད་དོ། །ལྷ་མོའི་རྣམ་པའི་གཟུགས་ཀྱིས་ནི། །རྩའི་དངོས་པོའི་ལུས་པོར་ཞེས་ལུང་གི་གོ་རིམས་ཀྱིས། སློབ་དཔོན་ཡེ་ཤེས་བྱང་ཆུབ་ཀྱི་གཞུང་གིས་བཤད། གང་ཞིག་སྟོང་ཕྲག་བདུན་ཅུ་རྩ་གཉིས་ཀྱི་རྩའི་

---

^{[མ་དཔེ་གཟིགས་ན་འདིར་གནོན།]}

དྲ་བ་དེ་ནི། རིགས་ཆེན་པོའི་རྩའི་རྒྱུད་ཀྱིས་བཤད་པའི་སྐབས་སུ་ལྷ་མོའི་རྣམ་པར་དག་པས་འཁོར་གྱི་དཀྱིལ་འཁོར་རོ། །སློབ་དཔོན་ནག་པོ་པའི་གཞུང་གིས་འབུམ་ལྔའི་བདག་ཉིད་མཁའ་འགྲོའི་དཀྱིལ་འཁོར་དུ། སློབ་དཔོན་བི་ལས་བཛྲའི་གཞུང་གིས་མཁའ་འགྲོ་མའི་བརྟག་པའི་དཀྱིལ་འཁོར་དུ། དཔལ་ཨིནྡྲ་བྷཱུ་ཏིའི་གཞུང་གིས་རྩའི་གྲངས་ལ་མདོར་བསྟན་པ་དང༌། ངེས་པའི་དོན་གྱི་རྒྱུད་ལ་ཡང་ཡོད། ལྷ་མོའི་རྣམ་པར་དག་པ་ཡང་ཡོད། འོན་ཀྱང་དཀྱིལ་འཁོར་བའི་གོ་རིམས་ཀྱིས་བཅོམ་ལྡན་འདས་ཀྱིས་མ་གསུངས་སོ། །དེ་སྐད་ཨིནྡྲ་བྷཱུ་ཏིའི་ཞལ་སྔ་ནས་ཀྱི་དགོངས་པ་བཟུང་ནས་སློབ་དཔོན་ཀ་ར་བའི་རས་འདི་སྐད་ཅེས་བཤད་དོ། །རྩའི་འཁོར་ལོ་ལྷ་མོའི་གཟུགས་ཀུན་དུ་སྤྲུལ་པས་དམ་ཚིག་ཆེན་པོའི་དཀྱིལ་འཁོར་གཤེགས་པའི་དོན་དུ། སྐད་ཅིག་གཅིག་གིས་རྣལ་འབྱོར་མ་ཐམས་ཅད་ལ་ལེགས་དགྱེས་ཀྱི་བདེ་བ་མྱོངས་བའི་ཕྱིར། ཉིད་རྡོ་རྗེ་འཛིན་པ་ཆེན་པོ་མཉམ་པར་འཁྱུད་པར་བཞུགས་སོ། །སློབ་དཔོན་བོ་དྷིའི་གཞུང་གིས་འགྲོ་བ་དང་མི་འགྲོ་བ་ལ་སྐྱེ་བའི་རྒྱུའི་ཕྱིར་མཉམ་པར་འགྱུར་རོ། །རེག་བྱའི་ཁམས་ལ་སོགས་པ་ཞེས་བྱ་བའི་དོན་ནི་འདི་ལྟར་བཤད་དེ། རེག་བྱའི་ཁམས་ནི་ཆོས་ཀྱི་འབྱུང་གནས། གསང་བའི་པདྨ་ཞེས་བྱ་བའི་དོན་ཏོ། །རྒྱལ་མཚན་ནི་གསང་བའི་རྡོ་རྗེའོ། །སྦྱོར་བས་ནི་མཉམ་པར་འཁྱུད་པའོ། །མེའི་འཁོར་ལོའི་ནང་དུ་ཆུ་སྐྱེས་ཀྱི་དོན་ནི་འདི་ལྟ་སྟེ། མེའི་འཁོར་ལོ་ནི་གྲུ་གསུམ་གྱི་གནས། ཆུ་སྐྱེས་ནི་དེའི་ནང་དུ་སངས་རྒྱས་རིན་པོ་ཆེའི་སྣོད། སློབ་དཔོན་ཤ་བ་རིའི་གཞུང་གིས་མེའི་འཁོར་ལོའི་ནང་གི་ཆུ་སྐྱེས་ཀྱིས་གཉིས་ཀའི་བདེ་བ་མྱོང་བ་མཉམ་པར་རྒྱས་པ་ལས་རྡོ་རྗེ་བསྐྱེད་པར་བྱའོ། །སློབ་དཔོན་ཨ་ནཾ་བྷ་ག་བཛྲའཾ་གཞུང་གིས། གསང་བའི་པདྨ་ནི་རླུང་གི་རང་བཞིན་གསང་བའི་རྡོ་རྗེ། ཉི་མའི་རང་བཞིན་དེ་དག་གིས། །མེ་ཡི་འཁོར་ལོ་རྣམ་པར་རྒྱས། །གངས་ཚེ་རྡོ་རྗེ་བསྐྱོད་པ་ནི། །དེ་ཚེ་མེ་ནི་ཁོང་དུ་ཆུད། །ཅེས་རྒྱུད་ཀྱི་གོ་རིམས་ལས་རྡོ་རྗེ་སློབ་དཔོན་གྱིས་དེ་སྐད་ཅེས་བཀའ་སྩལ་པ། རྡོ་རྗེ་ནི་སྙིང་པོ་བྱང་ཆུབ་ཀྱི་སེམས། མེ་ནི་རང་ལས་

---

^{[མ་དཔེ་གཟིགས་ན་འདིར་གནོན།]}

བྱུང་བའི་མེ་ཏོག །སློབ་དཔོན་གཞན་གྱི་གཞུང་གིས་རྡོ་རྗེ་ནི་ཐབས་མེ་ནི་ཤེས་རབ་སློབ་དཔོན་ཤཱཀྱ་བཤེས་གཉེན་གྱི་གཞུང་གིས། རྡོ་རྗེ་ནི་ཨཱ་ལིའི་རང་བཞིན། མེ་ནི་ཀཱ་ལིའི་རང་བཞིན། དཔལ་ཨིནྡྲ་བྷཱུ་ཏིའི་གཞུང་གིས། མེའི་བདག་ཉིད་ཀྱི་ཀཱ་ལི། ཡེ་ཤེས་ལས་རྡོ་རྗེའི་བདག་ཉིད། ཨཱ་ལི་ཡེ་ཤེས་རབ་ཏུ་ཁོང་དུ་ཆུད་པར་འགྱུར་རོ། །སློབ་དཔོན་ཀུ་ཀུ་རིའི་གཞུང་གིས་ཨཱ་ལི་ཀཱ་ལི་གཉིས་ཀྱི་ཁ་སྦྱོར་བས་དུས་གཅིག་ཏུ་མེ་དང་རྡོ་རྗེ་དག་ལ་འཁོང་དུ་ཆུད་པའོ། །རྡོ་རྗེ་གསལ་གྱིས་རྣམ་པར་རྒྱལ་བ་ལ་སོགས་པ་ཞེས་འདི་ལྟར་བཤད་དེ། གང་གི་ཚེ་རྡོ་རྗེ་པདྨ་གཉིས་ཀྱི་ཁ་འབྱེད་པ་དེའི་ཚེ། ལྟེ་བ་ལ་སོགས་གནས་ལ་ཡོད་པའི་འཁོར་ལོའི་ཆུ་སྐྱེས་རྒྱས་རྣམ་པར་རྒྱས་པས། བྱང་ཆུབ་ཀྱི་སེམས་སྦྲང་རྩི་ལྟ་བུ་འཇོག་གོ །སློབ་དཔོན་ཌོ་མྦི་པའི་གཞུང་གིས། འཁོར་ལོ་དྲུག་པར་མ་རྒྱས་པའི་ཕྱིས་ནས་རྩའི་འཛག་པ། སློབ་དཔོན་ཨིནྡྲ་བྷཱུ་ཏིའི་གཞུང་གིས་འཁོར་ལོའི་པདྨ་དེ་རང་རྩའོ། །དེ་ནི་རིགས་པས་གཞུང་ངོ༌། །དེ་ལྟ་མིན་ན་དངོས་པོ་སོ་སོའི་དོན་མི་འགྲུབ་པོ། །དེ་ལྟར་ཡང༌། ཆགས་པའི་སྣོད་ལ་ཆུ་བཞིན་དུ། །ཞེས་དེ་ཉིད་རྡོ་རྗེ་འཛིན་པས་གཉིས་སུ་མེད་པའི་དོན་གྱི་གསུངས་སོ། །དེ་ནས་སྤྲུལ་པའི་འཁོར་ལོའི་གནས་ལ་སོགས་ཞེས་བྱ་བ་ལ་རྡོ་རྗེ་སློབ་དཔོན་གྱི་ཞལ་ནས་རྒྱས་པར་བཤད། བདག་ཉི་འདི་རུ་སློབ་དཔོན་འགའ་ཙམ་གྱི་གཞུང་བྲི། དོན་གྱིས་གཏན་ལ་ཕབ་པར་བྱེད། རྩའི་ཡེ་ཤེས་ཉམས་སུ་མ་མྱོང་བའི་བསྒོམ་པ་ཅན་བཅོམ་ལྡན་འདས་ཀྱི་དྲང་བའི་དོན་བཟུང་ནས། དེ་བཞིན་གཞན་མ་སྒོམ་པར་བྱེད། །དེ་རུ་ཡང་ཤེས་པ་ཙམ་གྱིས་ཡིད་ཤེས་པར་མི་བྱེད་དོ། །ཅིའི་ཕྱིར་ཞེ་ན། བཅོམ་ལྡན་འདས་ཉེ་བར་བརྟགས་པའི་ཕྱིར། དྲང་བའི་དོན་གྱིས་གཏན་ལ་ཕབ་པར་བྱེད། དེ་རང་དོན་སྐལ་པ་དང་ལྡན་པའི་སེམས་ཅན་གྱི་དོན་དུ་ངེས་པའི་དོན་གྱིས་དཔལ་ཨིནྡྲ་བྷཱུ་ཏིའི་ཞལ་སྔ་ནས་ལ་སོགས་པའི་དངོས་གྲུབ་ཐོབ་པའི་སློབ་དཔོན་གྱིས་གསལ་བར་བྱེད། དེ་བཞིན་དུ་བར་མ་ཆད་པའི་རིམ་བས་གང་ཞིག་གསལ་བར་བྱེད་པ་དེ་ན། རིགས་པས་ནི་གསུངས་སོ། །དེ་རུ་སློབ་དཔོན་ཀུ་ཀུ་རིའི་ཞལ་སྔ་ནས་ཀྱི་གཞུང་གིས་འབྱུང་བ་ལྔའི་རང་བཞིན་རྩ་ལྔ་སྤྲུལ་པའི་

---

^{[མ་དཔེ་གཟིགས་ན་འདིར་གནོན།]}

འཁོར་ལོར་འདུས་པ་ནི་ངེས་པའི་དོན་ཏོ། །དེའི་རིམ་པ་ནི་འདི་ཡིན་ཏེ། ཤུ་ཀྲ་བྷ་ཧ་དང༌། རཀྟ་བྷ་ཧ་དང༌། ར་ས་བྷ་ཧ་དང༌། མ་དྷ་བཏ་ཧ་དང༌། མུ་ཏྲ་བྷ་ཧའོ། །རྩ་གཉིས་ཀའི་རྩེ་མོ་ལས། །ཞེས་བྱ་བ་ལ་རྡོ་རྗེ་སློབ་དཔོན་གྱི་ཞལ་སྔ་ནས་ཀྱིས་འདི་ལྟར་བཤད་དེ། མེའི་འཁོར་ལོའི་ནང་དུ་གསང་བའི་པདྨའི་ལྟེ་བའི་གཡས་གཡོན། སྤྲུལ་མོ་ཆུང་བ་བཞིན་ཉི་མ་དང་ཟླ་བ་འཛག་གོ །ཟླ་བའི་སྒྲ་ནི་ཤུ་ཀྲ། ཉི་མའི་སྒྲ་ནི་རཀྟ། དཔལ་ཨིནྡྲ་བྷཱུ་ཏིའི་གཞུང་གིས་མ་ད་ཞེས་བྱ་བ། རང་བྱུང་གི་མེ་ཏོག་གི་ནང་ནས་འཛག་གོ །མངལ་གྱི་དབུས་སུ་རྩ་གཉིས་ནི། །ཐག་པའི་དངོས་པོ་བཞིན་སྦྲུལ་མོ་ཆུང་བ་དང་འདྲ་བ། དཔེས་དེ་མ་ཐག་ཏུ་བྲི་བར་བྱའོ། །དེ་ནི་རྒྱུ་ནི་གཅིག་ཉིད་ཤེས་པར་བྱ། །ཞེས་བྱ་བ་ལ་འདི་ལྟར་གསུངས་ཏེ། རྒྱུ་ཞེས་བྱ་བ་ནི་རྩ་བ། རྩ་བ་འདིར་ཨ་ཝ་དྷཱུ་ཏཱི། བདག་མེད་པའི་རང་བཞིན། དེ་རང་ཀུན་དངོས་ཀྱི་གཟུགས་ཀྱིས་གཉིས་སུ་དབྱེ་བ་དང༌། གསུམ་དུ་དབྱེ་བ་དང༌། བཞི་རུ་དབྱེ་བ་དང༌། ལྔ་རུ་དབྱེ་བ་དང༌། དྲུག་ཏུ་དབྱེ་བ་དང༌། བརྒྱད་དུ་དབྱེ་བ་དང༌། བརྒྱད་གཉིས་སུ་དབྱེ་བ་དང༌། བརྒྱད་བཞི་རུ་དབྱེ་བ་དང༌། བརྒྱད་བརྒྱད་དུ་དེ་བྱེ་བ་དང༌། སྟོང་ཕྲག་བདུན་ཅུ་རྩ་གཉིས་སུ་དབྱེ་བའོ། །དེས་ནི་རྒྱུའི་རྩ་བ་ལས་འབྲས་བུ་ཕུན་སུམ་ཚོགས་པ་བཤད། གཡོན་དུ་ཤུ་ཀྲ་འབྱུང་བ་ཞེས་བྱ་བ། ངེས་པའི་དོན་དང་དྲང་བའི་དོན་གྱི་བཅོམ་ལྡན་འདས་ཀྱི་ལུང་ངོ༌། །རྡོ་རྗེ་སློབ་དཔོན་གྱི་གཞུང་གིས་འདི་ལྟ་སྟེ། གཅིག་པུ་ནཾ་བྱང་ཆུབ་ཀྱི་སེམས་ཀྱིས་གཉིས་སུ་དབྱེ་བ་དང༌། གསུམ་དུ་དབྱེ་བ་དང་བཞི་རུ་དབྱེ་བ་དང༌། ལྔ་རུ་དབྱེ་བའོ། །དེ་ལ་དོན་ནི་རྣམ་པ་སྣ་ཚོགས་ཀྱི་སྐད་ཅིག་འབྱུང་བའི་ཚེ། བོ་ལ་དང་ཀཀྐོ་ལའི་རེག་བྱ་ཙམ་གྱིས་སྲ་བར་གྱུར་ཏོ། །དགའ་བ་སྐྱེས་པས་ཞུ་བར་གྱུར་ཏོ། །མཆོག་གི་དགའ་བ་སྐྱེས་པས་ཚ་བར་གྱུར་ཏོ། །ཆད་པའི་དགའ་བ་འབྱུང་བས་གཡོ་བར་གྱུར་ཏོ། །རང་བཞིན་དགའ་བ་བྱུང་བས་ནམ་མཁའི་རང་བཞིན་དུ་གྱུར་ཏོ། །དེ་ལྟ་བུའི་འབྱུང་བ་ཆེན་པོའི་ལྔའི་རང་བཞིན་གྱིས་གཅིག་པུའི་བདེ་བ་ཆེན་པོའི་བྱང་ཆུབ་ཀྱི་སེམས་བཤད་པའོ། །དེའི་ཕྱིར་ལ་ལར་གཡས་སུ་འབབ། ལ་ལར་གཡོན་དུ། ལ་ལར་དབུས་སུ། ལ་ལར་གྱེན་དུ།

---

^{[མ་དཔེ་གཟིགས་ན་འདིར་གནོན།]}

ལ་ལར་འོག་གི་ལམ་གྱིས། ལ་ལར་ཐམས་ཅད་དུའོ། །གང་གི་ཚེ་གཡས་སུ་ཉི་མ་ལ་སོགས་ཞེས་བྱ་བ་ལ་སློབ་དཔོན་ནག་པོ་པའི་གཞུང་གིས་ནི་འདི་ལྟ་སྟེ། ཉི་མའི་སྒྲ་ནི་སྲོག །སྲོག་གི་འབྱུང་བའི་ཚེ། ཤུ་ཀྲ་ཀུན་དུ་དམར་པོའི་ངོ་བོར་འགྱུར་རོ། །ཟླ་བའི་སྒྲ་ནི་ཉེ་བའི་སྲོག །ཉེ་བའི་སྲོག་གི་འབྱུང་བའི་ཚེ། ཤུ་ཀྲ་ནི་དཀར་པོའི་ངོ་བོར་འགྱུར་རོ། །མེའི་སྒྲས་ནི་བཅུད་ཤུ་ཀྲ་དང༌། རཀྟ་གཉིས་ཀྱི་ནང་དུ་ཐིམ། ཇི་ལྟར་སྒོ་ངའི་ནང་དུ་མི་ནང་བའི་སྲོག །སློབ་དཔོན་བིམ་ལ་བཛྲའི་གཞུང་གིས་རོལ་དོན་དེ་ལྟར་བཤད་དོ། །སློབ་དཔོན་ཨིནྡྲ་བྷཱུ་ཏིའི་གཞུང་གིས། མཆོག་གི་དགའ་བའི་བདག་ཉིད་བྱང་ཆུབ་ཀྱི་སེམས་ལ་དོན་འདི་ལྟར་བཤད་དོ། །སློབ་དཔོན་ཀུ་ཀུ་རིའི་ཞལ་སྔ་ནས་རང་བཞིན་དགའ་བའི་བདག་ཉིད་ལ་དེ་ལྟར་བཤད་དོ། །དེའི་བཤད་པའི་ཕྱིས་ནས་རྡོ་རྗེ་སློབ་དཔོན་གྱི་ཞལ་སྔ་ནས་བསྐྱེད་པའི་གཞུང་གིས་འབྱུང་བའི་སྦྱོར་བ་བཤད་དེ། སྔོན་གྱི་ལས་ཀྱི་རླུང་གིས་རྣམ་པར་ཤེས་པ་ལ་སོགས་པ་ཞེས་བྱ་བ་ལ་འཁོར་བར་གནས་པ་ལྷ་དང་མི་ལ་ཁྱད་པར་གྱིས་ཤིག་དགེ་བ་དང་མི་དགེ་བའི་རྒྱུ་སྔོན་གྱི་ལས་བཅོམ་ལྡན་འདས་རྡོ་རྗེ་འཛིན་པའི་སྐབས་སུ། སྔོན་གྱི་ལས་ནི་སེམས་ཅན་ཐམས་ཅད་ལ་ཕན་པའི་དོན་དུ་དེ་བཞིན་གཤེགས་པ་ཉིད་དུ་འབྱུང༌། སློབ་དཔོན་དོམ་བི་པའི་གཞུང་གིས། ལས་ནི་སྐད་ཅིག་བཞིས་བསྐོར་བའི་ཡེ་ཤེས། སློབ་དཔོན་བི་ལས་བཛྲའི་གཞུང་གིས། དགའ་བའི་སྦྱོར་བ། དཔལ་ཨིནྡྲ་བྷཱུ་ཏིའི་གཞུང་གིས། དེ་ཁོ་ན་ཉིད་རྒྱས་པ། སློབ་དཔོན་ཀུ་ཀུ་རིའི་ཞལ་སྔ་ནས་འོད་རབ་ཀྱི་སྣང་བ། དེ་རང་ཡིད་ཀྱི་རྣམ་པར་ཤེས་པའི་ངོ་བོའི་ཕྱིར་རང་བཞིན་གྱི་རླུང་ངོ༌། །འཁོར་བ་ཞེས་བྱ་བ་ལ་ཐ་མལ་བའི་སྐབས་སུ་སྲིད་པ་ཐ་མལ་ལོ། །རྡོ་རྗེ་འཛིན་པ་ཆེན་པོའི་སྐབས་སུ་རང་བཞིན་དགའ་བའི་འོད་ཟེར་སྤྲོ་ཞེས་རྡོ་རྗེ་སློབ་དཔོན་གྱི་མན་ངག་གོ །གང་གི་ཚེ་གང་གི་སྐབས་སུ་རང་བཞིན་དགའ་བ་སྲ་བར་འགྱུར། དེའི་ཚེ་དེའི་དུས་སུ་མ་ཆགས་པ་ཆེན་པོའི་ཡིད་ཕས་བསྒྱུར་ཞེས་ངེས་པའི་དོན་གྱི་བཅོམ་ལྡན་འདས་ཀྱི་ལུང་ངོ༌། །རྡོ་རྗེ་སློབ་དཔོན་གྱི་དོན་ནི་འདི་ལྟ་སྟེ། ཕའི་སྒྲས་ནི་རྡོ་རྗེ་འཛིན་པ་ཆེན་པོའོ། །འདོད་ཆགས་

---

^{[མ་དཔེ་གཟིགས་ན་འདིར་གནོན།]}

ཆེན་པོས་ཡིད་བསྒྱུར་ཞེས་བྱ་བ་ལ། རང་བཞིན་དགའ་བའི་རྒྱ་མཚོ་ཆེན་པོ་ལས་བཞེངས་ཏེ། ཆགས་པ་ཆེན་པོའི་གྲགས་པ་ཅན། མཆོག་གི་དགའ་བ་ལ་གནས་མཛད་ནས། གྲངས་མེད་པའི་འཇིག་རྟེན་གྱི་ཁམས་ལ་སྐྱེ་བའི་རྒྱུའི་དོན་གྱི་ཕྱིར། རེ་ཏོའི་རྒྱུད་དང་ལྡན་པའི་བྷ་ག་ཅན་ཤེས་རབ་རྣལ་འབྱོར་མ་བདག་མེད་མ་དང་ལྷན་ཅིག་མཉམ་པར་འཁྱུད་པར་མཛད་དོ། །རེ་ཏོའི་སྒྲས་ནི་འཇིག་རྟེན་ལས་འདས་པའི་དུས་ཀུན་དུ་བཤད་དོ། །སློབ་དཔོན་ཨུ་རྒྱན་གྱི་གཞུང་གིས་ཆང་བའི་དགའ་བའོ། །སློབ་དཔོན་ཁ་ཆེའི་གཞུང་གིས་འོད་ཟེར་ཆེན་པོའི་དགའ་བའི་མཆོག་གོ །སློབ་དཔོན་བཾ་ག་ལའི་གཞུང་གིས་དང་པོའི་དགའ་བའོ། །མེ་དང་ཉི་མ་གསལ་བར་འབྱུང་བའི་དོན་ནི་ཨཱ་ལི་དང་ཀཱ་ལི་འབྱུང་བས་སོ། །སློབ་དཔོན་ཤ་བ་རིའི་གཞུང་གིས་མཆོག་དང་ཆད་པ་འབྱུང་བས་སོ། །དེའི་ཚེ་ཆགས་པ་ཆེན་པོའི་ཡིད་ཅེས་བྱ་བའི་དོན་ནི། འདི་ལྟར་བཤད་དེ་བཅོམ་ལྡན་འདས་མ་བདག་མེད་མས་བདག་མེད་པའི་འཇིག་རྟེན་གཟིགས་ནས། སྒྱུ་ཕྲུལ་ཅན་ཤེས་རབ་ཅན་དང་སྐྱེ་བོ་རུ་སྦྱོར་བས། སྒྱུ་མའི་རྣམ་པ་ཅན་འདོད་ཆགས་ཆེན་པོའི་རང་བཞིན་ཁམས་གསུམ་དུ་སྐྱེ་བའི་དོན་དུ་མཁའ་འགྲོའི་འཁྱུད་པ་བསྟན་པ་མཛད་དེ། རེག་བྱ་འདོད་པ་ཞེས་བྱ་བ་ནི་ལྷ་དང་མིང་སྐྱེ་བའི་དོན་དུ་ཤེས་རབ་ཐབས་གཉིས་སུ་མེད་པའི་སྦྱོར་བ་ལ་ཐིམ། བོ་ལ་ཀཀྐོ་ལ་འཇུག་པར། །ཞེས་བྱ་བ་ལ་དོན་ནི་འདི་ལྟ་སྟེ། གསང་བའི་རྣམ་པ་ཅན་ཀཀྐོ་ལ་བོ་ལའི་གྲགས་པ་ཅན། རྡོ་རྗེ་རབ་ཏུ་ཞུགས་ནས། ཆུའི་ནང་དུ་ཆུ་བཞིན་དུ་ཀུན་རྫོབ་དང་དོན་དམ་པ་གཉིས་སུ་མེད་པའི་བྱང་ཆུབ་སེམས་སུ་གྱུར་ཏོ། །ཁ་ཅིག་པདྨ་དང་རྡོ་རྗེ་གཉིས་གླེང༌། ཨིནྡྲ་བྷཱུ་ཏིའི་ཞལ་སྔ་ནས་ཀྱི་གཞུང་གིས། ཆུ་ནི་རྡོ་རྗེ་ལས་བྱུང་བའི་ས་བོན་ཆུའི་ནང་དུ་ནི་པདྨ་ལས་བྱུང་བའི་ཀུན་དུ་དམར་བའི་རང་བཞིན་དེའི་ཕྱིར་དེ་ལས་ས་བོན་ལས་བྱུང་བའི་རྒྱུ་ཞེས་ཉིད་རྡོ་རྗེ་འཛིན་པས་གསུངས་སོ། །ས་བོན་ལས་གོང་བུར་སྐྱེས་ཞེས་བྱ་བ་ལ་དེ་བཞིན་གཤེགས་པ་འབྱུང་བར་འགྱུར་རོ། །གོང་བུའི་སྒྲས་ནི་སྐུ་ཡིན་པའི་ཕྱིར་རོ། །སློབ་དཔོན་གཞན་མའི་གཞུང་གིས་ནི་གོང་བུ་

---

^{[མ་དཔེ་གཟིགས་ན་འདིར་གནོན།]}

ནུར་ནུར་པོའི་རྣམ་པའོ། །དེ་ལས་དང་པོ་ནི་རྩ་སྐྱེའོ། །ཕྱིས་ནས་གོར་གོར་དང༌། རྐང་ལག་འགྱུར་བ་ལ་སོགས་པའི་སྦྱོར་བས་ཕུང་པོ་ལ་སོགས་པ་འབྱུང་ཞེས་གྱུར་ཏོ། །དཔལ་ཕྱག་རྒྱ་ཆེན་པོའི་ཐིག་ལེ་ལས། །ལེའུ་བཞི་པའི་བཤད་པའོ།། །།

ལེའུ་ལྔ་པའི་བཤད་པ།

---

^{[མ་དཔེ་གཟིགས་ན་འདིར་གནོན།]}

ད་ནི་ལྔ་པ་ལ་ཟད་པའི་དོན་བྲི་བར་བྱ། གསང་བའི་གཞང་ཁའི་ནང་ན་གནས། །ཞེས་བྱ་བ་ལ། སློབ་དཔོན་གྱི་ཞལ་སྔ་ནས་གསང་བའི་པདྨའི་རྒྱུད་ཀྱི་གཞུང་གིས་ནི། གཞན་གསང་བ་ནི་རིན་པོ་ཆེའི་སྙིང་པོ་བཤད་དོ། །སློབ་དཔོན་དཔའ་བོ་བཟང་པོའི་གཞུང་གིས་ནི་གཞན་མ་ཡིན་པའི་ཆོས་ཀྱི་འབྱང་གནས་སོ། །དཔལ་ཨིནྡྲ་བྷཱུ་ཏིའི་མན་ངག་གི་གཞུང་གིས་བལྟ་བར་དཀའ་བའི་རེག་བྱའི་གནས་དེ་ནི་གཞང་ཁའོ། །དེའི་ཕྱིར་ཉིད་རྡོ་རྗེ་འཛིན་པས་གསང་བའི་སྐུ་ཞེས་བསྟན་པའོ། །དེ་རུ་སྐྱེ་བ་མེད་པའི་ཆ་ཆེན་པོ་ཞེས་བྱ་བ་ལ། ཆ་ཆེན་པོའི་སྒྲས་ནི་རྣལ་འབྱོར་མ་བདག་མེད་མི། དྲོ་རྗེ་སློབ་དཔོན་གྱི་ཞལ་སྔ་ནས་ཀྱིས་གསུངས་སོ། །སློབ་དཔོན་བི་ལས་བཛྲའི་གཞུང་གིས་གསང་བའི་གནས་སུ་པདྨ་གཞོན་ནུའི་སྐུད་པ་བཞིན་ནོ། །དཔལ་ཨིནྡྲ་བྷཱུ་ཏིའི་གཞུང་གིས་དོན་དམ་པ་བྱང་ཆུབ་སེམས་ཀྱི་ཟླ་ཚེས་སོ། །དེའི་ཕྱིར་ཉིད་མཆོག་གི་དབང་གིས་སྐྱེ་བོའི་སྒྲས་གསུངས་སོ། །དེ་ཡང་རྣམ་པར་ཤེས་པ་དང་བྲལ་བ་ཞེས་བདག་མེད་མ་ཉིད་བཤད་དོ། །ཡེ་ཤེས་སྐུ་ཞེས་བྱ་བ་འདི་ལྟར་བཤད་དེ། གང་ཞིག་བདག་མེད་མ་ཉིད་དེ་རང་ཡེ་ཤེས་ཀྱི་སྐུ་ཉིད་དོ། །བདག་མེད་ཅེས་བྱ་བ་ནི་སྟོང་པ་ཉིད་ཀྱི་ངོ་བོར་ངེས་པར་བསྟན། སྟོང་པ་ཉིད་ཀྱི་སྒྲ་ལ་ཡང་རྡོ་རྗེ་སློབ་དཔོན་གྱི་ཞལ་སྔ་ནས་འདི་ལྟར་བཤད་དེ་ངེས་པར་བསྟན་པ་གསུངས་པ། སྟོང་པ་ཉིད་ཅེས་བྱ་བ་ལ་རྣམ་པར་མི་རྟོག་པ་ཉིད་ཅེས་བྱ་བའི་དོན་ཏོ། །འཕགས་པ་ཀླུ་སྒྲུབ་ཀྱི་ཞལ་སྔ་ནས་ནི། ཀུན་རྫོབ་སྟོང་པ་ཉིད་དུ་བསྟན། །སྟོང་པ་ཉིད་ནི་ཀུན་རྫོབ་བོ། །དེ་རུ་གནས་ནས་སྲོག་སྐྱེ་ཞེས་བྱ་བ་ལ། རྡོ་རྗེ་སློབ་དཔོན་གྱི་ཞལ་སྔ་ནས་འདི་སྐད་བཤད་དེ། རྟོག་པ་དང་བྲལ་བའི་བདག་མེད་པའི་གནས་ནས། ཀུན་རྫོབ་དང་དོན་དམ་བ་གཉིས་སུ་མེད་པའི་བྱང་ཆུབ་ཀྱི་སེམས་རྣམ་པར་ཤེས་པའི་སྲོག་གི་རླུང་འབྱུང་ངོ༌། །དེ་ཡང་སེམས་ཅན་ལ་མཆོག་གི་སྲོག་གི་ཚེ་ཞེས་བྱ་བའི་

---

^{[མ་དཔེ་གཟིགས་ན་འདིར་གནོན།]}

དོན་ཏོ། །རྟག་ཏུ་བདག་ཉིད་པའི་སྲོག་ཆེན་པོ་ཞེས་བྱ་བ་ལ་དོན་ནི་འདི་ལྟར་གསུངས། སྲིད་པ་བར་མ་དོ་ལ་རྟག་ཏུ་ཡོད་དོ། །གནས་ལྔའི་བཞུགས་ཞེས་བྱ་བ་ལ། འབྱུང་བ་ཆེན་པོ་ལྔའི་གནས་པ་ཞེས་དགོངས་པའོ། །ཁ་ཅིག་ནི་འཁོར་ལྔའི་ལེན་ཏེ། འབྱུང་བ་ལྔ་ཞེས་གྲགས་པ་ནི་རྡོ་རྗེ་སློབ་དཔོན་གྱི་ཞལ་སྔ་ནས་འདི་སྐད་གསུངས་སོ། །གང་ཞིག་འབྱུང་བ་ཆེན་པོ་ལྔ་དེ་རང་ནམ་མཁའ་དང་ལྔའོ། །དེས་བརྒྱན་པ་ཁྱབ་པ་ཞེས་བྱ་བའི་དོན་ཏོ། །ཅི་ཞིག་ཅེ་ན་སྲོག་གི་རླུང་ངོ༌། །ནམ་མཁའ་རྣམ་མཁར་ཐིམ་ཞེས་བྱ་བ་ལ་འདི་ལྟར་གསུངས་ཏེ། ནམ་མཁའ་ཞེས་བྱ་བ་ནི་བྱང་ཆུབ་ཀྱི་སེམས། ནམ་མཁའ་ནི་འབྱུང་བ་ཆེན་པོ་ལྔའིའོ། །ཐིམ་ཞེས་བྱ་བ་ནི་རེག་བྱ་ཆེན་པོ་སྐྱེ་བར་བྱེད་དོ། །སློབ་དཔོན་མཚོ་སྐྱེས་རྡོ་རྗེའི་གཞུང་གིས་ནམ་མཁའ་ནི་རྣམ་པར་ཤེས་པ། རྣམ་མཁའ་ཐིམ་པ་ནི་འབྱུང་བ་ཆེན་པོ་ལྔ་ལ་ཁྱབ་པར་གནས་པའོ། །དཔལ་ཨིནྡྲ་བྷཱུ་ཏིའི་ཞལ་སྔ་ནས་ནི་ནམ་མཁའ་ནི་སྲོག །ནམ་མཁའ་ཞེས་བྱ་བ་ནི་འབྱུང་བ་ཆེན་པོ་ལྔ་ལ་ཕན་ཚུན་བསྟེན་ཞིང་སྦྱོར་བའོ། །དེ་ཉིད་དཔལ་རྡོ་རྗེ་འཛིན་པས་འདི་སྐད་གསུངས་ཏེ། འབྱུང་བ་ཆེན་པོ་བཞི་པོ་ནི། །སྲོག་ལ་རྟེན་དུ་ཤེས་པར་བྱ། །ཡང་ན་དེ་ལ་སྲོག་ནི་བརྟེན། །ལེགས་དགྱེས་དབང་མོ་ཤེས་པར་བྱ། །དེ་རུ་ཉིད་མཆོག་གི་དབང་ཕྱུག་བསྐྱེད་པའི་རིམ་པར་འབྱུང་བ་ཆེན་པོའི་དོན་རབ་ཏུ་གསལ་བར་བྱེད་དོ། །རྣམ་པར་ཤེས་པ་ལས་རླུང་སྐྱེས། །དེ་ལས་མེ་ནི་འབྱུང་བར་འགྱུར། །དེ་ལས་ཆུ་ནི་སྐྱེ་བར་འགྱུར། ཆུ་ལས་ས་ནི་འབྱུང་བར་འགྱུར། །དེ་ལས་ཕུང་པོ་ཡང་དག་འབྱུང༌། །ཕུང་པོ་ལས་ནི་སྐྱེ་མཆེད་དོ། །དེ་ལས་ཡེ་ཤེས་རང་བཞིན་ནི། །བརྒྱ་རྩ་བརྒྱད་ཀྱི་རིམ་པས་སོ། །དེ་རུ་བླ་མའི་ཞལ་སྔ་ནས་གཉིས་གཉིས་པའི་རྒྱུད་ཀྱི་གོ་རིམས་ཀྱིས་རང་བཞིན་ཡེ་ཤེས་ལ་ཚད་བསྟན་ཏེ། །འབར་དང་འཁྲུག་དང་ཁྲོ་བ་དང༌། །ང་རྒྱལ་ཕྱོགས་ཀུན་ལྟ་བ་དང༌། །ལྡིན་པར་ངོ་ཚ་མེད་པ་དང༌། །འཛག་པ་རབ་ཏུ་རྒྱས་པ་དང༌། སྒེག་པ་དྲེགས་དང་རོལ་པ་དང༌། །བསམ་པ་ནོར་ལ་ཆགས་པ་དང༌། །བུད་མེད་ལ་དཔྱད་ནོར་བའི་རྩི། །སྐམ་པ་རྒྱལ་བ་གཉིད་སད་དང༌། །དབྱལ་དང་དགའ་བའི་མཆི་མ་འབབ། །སེམས་ནི་གཡོ་བ་དང་ནི་རྒྱུག །མི་

---

^{[མ་དཔེ་གཟིགས་ན་འདིར་གནོན།]}

རྟོག་ནད་དང་མི་སྣང་དང༌། །དགོད་པ་གླུ་དང་དགའ་བའི་ཡིད། །བཅུ་གཉིས་བདུན་གྱིས་ལྷག་པའོ། །ཐུན་ཚོད་གཉིས་ཀྱི་རེ་རེ་ནི། །ཡེ་ཤེས་ཡན་ལག་ལ་རིམ་འབྱུང༌། །དེ་རུ་འཕགས་པ་ཀླུ་སྒྲུབ་སྙིང་པོའི་གཞུང་གིས། རྡོ་རྗེ་སློབ་དཔོན་གྱི་ཞལ་སྔ་ནས་ཀྱི་དོན་ནི་འདི་ལྟར་བཤད་དེ། ཡེ་ཤེས་ནི་ཀུན་གཞི་རྣམ་པར་ཤེས་པ། དེའི་ཡན་ལག་ནི་བསྐོར་བ། དེ་རང་ཉིད་བདག་མེད་མའི་རང་བཞིན། བདག་མེད་མའི་རང་བཞིན་ཡིན་ཡང་ལུས་ལ་བརྟེན་ནས་འགྲོ་བ་ལ་སོགས་པའི་དོན་བྱེད་དོ། །ཇི་ལྟར་རྒྱ་མཚོ་ཆེན་པོ་ལ་རྟེན་བྱས་ནས། ཤིང་ཆེན་པོ་བསྐོར་བར་བགྱིད་དོ། །སློབ་དཔོན་ཨུཏྤལའི་གཞུང་གིས་རྣམ་པར་ཤེས་པ་ནི་རླུང་གི་རང་བཞིན་གྱི་ངོ་བོའོ། །དཔལ་བཛྲ་པུ་ཏིའི་ཞལ་སྔ་ནས་ཀྱི་རང་བཞིན་མན་ངག་གིས། ལས་ཀྱི་རླུང་གིས་བྱས། ཐུན་ཚོད་གཉིས་ཀྱི་བར་དུ། ཉི་ཤུ་རྩ་བདུན་གྱི་གནས་སུ་རང་པའི་དུས་སུ། ཆུ་ཚོད་ཕྱེད་ཕྱེད་ལས་ཀྱི་ལོངས་སྤྱོད་མྱོང་ནས། ཕྱིས་ནས་ཀྱང་འོག་གི་ལམ་ནས་དེའི་རིམ་པས་རབ་ཏུ་བསྐོར་རོ། །དེ་ལྟར་མཚན་མོ་དང་ཉིན་མོའི་བར་དུ། རང་བཞིན་བརྒྱ་རྩ་བརྒྱད་ལ་ལོངས་སྤྱོད་དང༌། ཐིམ་པ་དང་དབང་པོ་དེ་རུ་སློབ་དཔོན་ནག་པོ་པ་ལ་སོགས་པའི་མན་ངག་གི་རིམ་པ་ནི་འདི་ཡིན་ཏེ་ལས་ཀྱི་རླུང་ལ་ཞན་ནས་ཀུན་གཞི་རྣམ་པར་ཤེས་པ་གང་གི་ཚེ་སྤྱི་བོ་ན་གནས་བགྱིད་པའི་ཚེ། དབང་གྲགས་ལུས་པོ་ལ་འབར་བའི་རྟགས་སུ་གྱུར་ཏོ། །གང་གི་ཚེ་སྤྱི་གཙུག་ན་གནས་པ་དེའི་ཚེ། ལོངས་སྤྱོད་གང་ལ་འཁྲུལ་པའི་རྟགས་སུ་འགྱུར་རོ། །གང་གི་ཚེ་རྣ་བ་གཡས་པ་ལ་ཤར་ན། དེའི་ཚེ་མི་སྣང་བའི་རྟགས་སུ་འགྱུར་རོ། །གང་གི་ཚེ་རྒྱབ་ཀྱི་གླིང་བུ་ན་གནས་པར་གྱུར་ན་དེའི་ཚེ་དབང་གི་ངོ་བོའི་སེམས་ལ་ང་རྒྱལ་གྱི་རྟགས་འབྱུང་ངོ༌། །གང་གི་ཚེ་རྣ་བ་གཡོན་ན་གནས་པར་གྱུར་ན། དེའི་ཚེ་ལོངས་སྤྱོད་ཅན་ཕྱོགས་སུ་ལྟ་བའི་རྟགས་འབྱུང་ངོ༌། །གང་གི་ཚེ་སྨིན་མཚམས་སུ་གནས་པ་དེའི་ཚེ། མི་སྣང་བའི་རང་བཞིན་ལུས་པོ་ལ་གཅིན་གཏོང་བའི་རྟགས་འབྱུང་ངོ༌། །གང་གི་ཚེ་མིག་ཏུ་གནས་པ་དེའི་ཚེ། དབང་གི་རང་བཞིན་ངོ་ཚ་མེད་པའི་རྟགས་སུ་འབྱུང་ངོ༌། །གང་གི་ཚེ་ལག་ངར་གྱི་རྩ་བ་གཉིས་སུ་གནས་པར་གྱུར་པ་དེའི་ཚེ་ལོངས་སྤྱོད་ཀྱི་

---

^{[མ་དཔེ་གཟིགས་ན་འདིར་གནོན།]}

རང་བཞིན་ཤུ་ཀྲ་འཛག་པའི་རྟགས་འབྱུང་ངོ༌། །གང་གི་ཚེ་མཆན་ཁུང་གཉིས་ལ་གནས་པར་གྱུར་པ་དེའི་ཚེ། མི་སྣང་བའི་རང་བཞིན་སེམས་རྒྱས་པའི་རྟགས་འབྱུང་ངོ༌། །གང་གི་ཚེ་ནུ་མ་གཉིས་སུ་གནས་པར་གྱུར་པ་དེའི་ཚེ། དབང་གི་གྲགས་པ་ཅན་ང་རྒྱལ་གྱི་རྟགས་འབྱུང་ངོ། །གང་གི་ཚེ་ལྟེ་བར་གནས་པར་གྱུར་པ་དེའི་ཚེ། ལོངས་སྤྱོད་ཀྱི་རང་བཞིན་དྲེགས་པའི་རྟགས་འབྱུང་ངོ༌། །གང་གི་ཚེ་སྣའི་རྩེ་མོ་ལ་གནས་པར་གྱུར་པ་དེའི་ཚེ་ཐིམ་བའི་རང་བཞི་ལས་རོལ་པའི་རྟགས་འབྱུང་ངོ༌། །གང་གི་ཚེ་ཁ་རུ་གནས་པར་གྱུར་པ་དེའི་ཚེ། དབང་གྲགས་ཤེས་རབ་བསམ་པའི་རྟགས་འབྱུང་ངོ༌། །གང་གི་ཚེ་མགྲིན་པར་གནས་པར་གྱུར་བ་དེའི་ཚེ། །ནོར་ལ་ཆགས་པའི་རྟགས་འབྱུང་ངོ༌། །གང་གི་ཚེ་སྙིང་གར་གནས་པར་གྱུར་བ་དེའི་ཚེ་མི་སྣང་བའི་རང་བཞིན་སྐོམ་པའི་རྟགས་འབྱུང་ངོ༌། །གང་གི་ཚེ་མཚན་མའི་རྩ་བ་ལ་གནས་པར་གྱུར་ན། དེའི་ཚེ་དབང་གྲགས་ཅན་བརྒྱལ་བའི་རྟགས་འབྱུང་ངོ༌། །གང་གི་ཚེ་མཚན་མར་གནས་པ་དེའི་ཚེ། ལོངས་སྤྱོད་ཀྱི་རང་བཞིན་གཉིད་སད་པའི་རྟགས་འབྱུང་ངོ༌། །གང་གི་ཚེ་གཞང་ཁར་གནས་པར་གྱུར་པ་དེའི་ཚེ་མི་སྣང་བའི་རང་བཞིན་དབྱལ་གྱི་རྟགས་འབྱུང་ངོ༌། །གང་གི་ཚེ་བྲལ་རུ་གནས་པ་དེའི་ཚེ། དབང་གྲགས་ཅན་དགའ་བ་ལ་ཚིམ་པའི་རྟགས་འབྱུང་ངོ༌། །གང་གི་ཚེ་རྗེ་ངར་གཉིས་ལ་གནས་པར་གྱུར་པ་དེའི་ཚེ་ལོངས་སྤྱོད་ཀྱི་རང་བཞིན་སེམས་གཡོ་བའི་རྟགས་འབྱུང་ངོ༌། །གང་གི་ཚེ་སོར་མོར་གནས་པར་གྱུར་བ་དེའི་ཚེ་མི་སྣང་བའི་རང་བཞིན་རྒྱུག་པའི་རྟགས་འབྱུང་ངོ༌། །གང་གི་ཚེ་རྐང་མཐིལ་ལ་གནས་པར་གྱུར་པ་དེའི་ཚེ་དབང་གྲགས་ཅན་མི་རྟོགས་པའི་རྟགས་འབྱུང་ངོ༌། །གང་གི་ཚེ་མཐེ་བོང་ལ་གནས་པ་དེའི་ཚེ། ལོངས་སྤྱོད་ཀྱི་རང་བཞིན་ནད་ཀྱི་རྟགས་འབྱུང་ངོ༌། །གང་གི་ཚེ་པུས་མོ་གཉིས་ལ་གནས་པར་གྱུར་པ་དེའི་ཚེ་མི་སྣང་བའི་རང་བཞིན་སེམས་སྟོར་བའི་རྟགས་འབྱུང་ངོ༌། །གང་གི་ཚེ་ཕྱི་ནས་ཡང་གྱེན་གྱི་རིམ་པས་ཐུགས་ཀྱི་འཁོར་ལོ་ལ་གནས་པར་གྱུར་པ་དེའི་ཚེ་དབང་གྲགས་ཅན་རྒོད་པའི་རྟགས་འབྱུང་ངོ༌། །གང་གི་ཚེ་གསུང་གི་འཁོར་ལོ་ལ་གནས་པར་གྱུར་པ་དེའི་ཚེ། ལོངས་སྤྱོད་ཅན་ཀླུའི་རྟགས་འབྱུང་ངོ༌། །གང་གི་ཚེ་

---

^{[མ་དཔེ་གཟིགས་ན་འདིར་གནོན།]}

སྐུའི་འཁོར་ལ་ལ་གནས་པ་དེའི་ཚེ་མི་སྣང་བའི་རང་བཞིན་དགའ་བའི་རྟགས་འབྱུང་ངོ༌། །དེ་ལྟ་བུ་ཉིད་ཤུ་རྩ་བདུན་གྱི་གནས་ལ། ཀུན་གཞི་རྣམ་པར་ཤེས་པའི་སྟེང་དང༌། འོག་ཏུ་འགྲོ་བ་ལས་ཡེ་ཤེས་ཀྱི་རང་བཞིན་ལས་འབྱུང་བའི་དུས་སུ། །མི་སྣང་བ་དང༌། ལོངས་སྤྱོད་དང་དབང་ལ། དཔལ་ཀ་མ་ལ་ཤཱི་ལའི་ཞལ་སྔ་ནས་ཀྱི་མན་ངག་གི་གཞུང་གིས་རྡོ་རྗེ་སློབ་དཔོན་གྱི་གཞུང་གི་དོན་ནི་འདི་ལྟ་སྟེ། རང་གི་བདེ་བ་ཉམས་སུ་མྱོང་བ་ལ་གང་ཞིག་མི་གསལ་བ་ཉིད་དམ། ཡང་ན་རབ་ཏུ་འཇུག་པ་དེ་ནི་མི་སྣང་ངོ༌། །ཀུན་རྫོབ་དང་དོན་དམ་པ་གཉིས་སུ་མེད་པའི་བདེ་བ་ཆེན་པོ་ཉམས་སུ་མྱོང་བ་ནི་ལོངས་སྤྱོད་དོ། །དེ་དག་གི་ཡེ་ཤེས་ཀྱི་ལྟ་བས་གང་ཞིག་འཁྲུལ་པ་མེད་པ་ཉིད་དེ་ནི་དབང་ངོ༌། །རྡོ་རྗེ་ཕྲེང་བའི་རྒྱུད་ལ་སོགས་པར་བྱ་བ་ནི་སྒྲ་ཇི་བཞིན་གྱིས་གསུངས་སོ། །དེ་ནི་མཚན་མོའི་དོན་རྡོ་རྗེ་སློབ་དཔོན་གྱི་ཞལ་སྔ་ནས་ཀྱིས་ཇི་ལྟར་གསུངས་པ་དེ་ལྟར་དཔྱད་དེ། མཚན་མོ་ཤེས་རབ་ཅེས་སུ་གྲགས། །ཤེས་རབ་མཚན་མོ་དགུང་ཉིད་འགྱུར། །ཞེས་གཉིས་སུ་མེད་པའི་ངོ་བོས་ངེས་པའི་དོན་དང་དྲང་བའི་དོན་གྱིས་བཅོམ་ལྡན་འདས་ཀྱི་བཀའོ། །སློབ་དཔོན་ཤ་བ་རིའི་ཞལ་སྔ་ནས་ཀྱི་མན་ངག་གིས། གང་ཞིག་ཤིན་ཏུ་མཚན་དང་ལྡན་པ་ལ་ལོ་བཅུ་གཉིས་ལོན་པ། མི་གསལ་བའི་པདྨ་ཅན་དེ་ནི་མཚན་མོའི་འདུ་ཤེས་ཤེས་རབ་སློབ་དཔོན་ཨུ་རྒྱན་གྱི་གཞུང་གིས་མ་གྲགས་པའི་རང་བཞིན། །རང་གི་རིགས་ལས་སྐྱེས་པའོ། །སློབ་དཔོན་ཁ་ཆེའི་གཞུང་གིས་ཡུལ་གྱི་གཡོ་བས་འཁྱར་བའི་ཁ་ཆེའི་སེམས་སོ། །སློབ་དཔོན་ཀུ་མ་རཱུ་པའི་གཞུང་གིས་ནག་སྔོན་ཡན་ལག་ནས་ལོ་བཅུ་དྲུག་དང་ལྡན་པའོ། །སློབ་དཔོན་ཀུ་ཀུ་རིའི་ཞལ་སྔ་ནས་ཀྱི་གཞུང་གིས་བྱང་ཆུབ་ཀྱི་སེམས་ཟླ་བ་རྒྱས་པའོ། །ཤེས་རབ་མཚན་མོད་གུང་ཉིད་ཅེས་བྱ་བ་ལ། བླ་མའི་ཞལ་སྔ་ནས་དོན་ནི་འདི་ལྟར་བཤད་དེ། ཤེས་རབ་ཅེས་བྱ་བ་ལ་ང་ཚོལ་བབ་པ། མཚན་མོ་ཞེས་བྱ་བ་ནི་འདོད་ཆགས་ཆེན་པོས་ལོང་བ། དགུང་ཉིད་ཅེས་བྱ་བ་ནི་ནམ་མཁའི་ཆུང་ཟད་དབྱེ་བའོ། །མཚན་མོའི་རྣམ་པ་ཞེས་བྱ་བ་ལ་ནམ་མཁའི་ཆུ་སྐྱེས་ན་གནས་པའི་བྱང་ཆུབ་ཀྱི་སེམས་ཤིན་དུ་དཀར་བའི་ཕྱིར་དེ་དང་ཟླ་བ། མཆོག་པས་མཆོག་དགའ་བ་སྦྱིན་པ་མྱ་ངན་ལས་འདས་པའི་རང་བཞིན་ནོ་

---

^{[མ་དཔེ་གཟིགས་ན་འདིར་གནོན།]}

སློབ་དཔོན་ནག་པོའི་གཞུང་གིས་ནི་དགའ་བྲལ་སྦྱིན་པའི་ཕྱིར་མྱ་ངན་ལས་འདས་པའི་རང་བཞིན་ནོ། །ཤེས་རབ་འདི་རུ་གཉིས་དབྱེ་ཞེས། །ཀུན་རྫོབ་དང་དོན་དམ་པའི་དངོས་ཞེས་བྱ་བ་བཅོམ་ལྡན་འདས་ཀྱིས་རྡོ་རྗེ་སློབ་དཔོན་གྱིས་ཞལ་སྔ་ནས་སྒྲ་ཇི་བཞིན་དུ་གསུངས་སོ། །ཀུན་རྫོབ་རེག་བྱ་སྐྱེ་མེད་པ། །ཞེས་བྱ་བ་ལ་བསྐྱེད་པའི་རིམ་པའི་ཕྱོགས་སུ་ལྷའི་རྣམ་པར་བྱིན་གྱིས་བརླབས་ཏེ། རེག་བྱའི་པདྨ་ལ། བདུད་རྩི་མྱོངས་བའི་ཕྱིར་ལོ་བཅུ་དྲུག་དང་ལྡན་པའོ། །དཔལ་བཛྲ་པུ་ཏིའི་གཞུང་གིས། ནང་གི་བདག་ཉིད་ལས་ཀྱི་ཕྱག་རྒྱའོ། །སློབ་དཔོན་ཌོ་མྦི་པའི་ཞལ་སྔ་ནས་ནི་བྱ་གདོང་ངོ༌། །སློབ་དཔོན་ཀུ་ཀུ་རིའི་ཞལ་སྔ་ནས་ནི་སྲོག་གི་རྩ་བའོ། །དོན་དམ་པའི་རེག་བྱ་དང་བྲལ་བ་སྐྱེད་བྱེད་མ་ཞེས་བྱ་བ་ལ་དཔལ་ཨིནྡྲ་བྷཱུ་ཏིའི་གཞུང་གིས་བཅོམ་ལྡན་འདས་བདག་མེད་མའོ། །སློབ་དཔོན་ཀུ་ཀུ་རིའི་ཞལ་སྔ་ནས་ཀྱི་མན་ངག་གིས་རྩ་རྟོག་མེད་པ། རེག་བྱ་དང་བྲལ་བ་གང་ཞིག་བདེ་བ། བལྟ་བར་དཀའ་བའི་མཚན་ཉིད་དཀའ། །ཞེས་བྱ་བ་ལ་ནི་བརྗོད་དུ་མེད་པའི་ཕྱིར་སྒྲ་ཇི་བཞིན་པའི་དོན་བཀའ་སྩལ་ཏོ། །རང་བཞིན་མེད་པའི་རང་བཞིན་ཅན། །དེའི་མཚན་མོ་བདག་གིས་བཤད། །ཅེས་བྱ་བ་ལ་རྫོགས་པའི་རིམ་པའི་སྐབས་སུ་བརྡར་བྱས་སོ། །ཉིན་མོ་ཐབས་སུ་གྲགས་ཞེས་བྱ་བ་ལ་སློབ་དཔོན་གྱིས་ཞལ་སྔ་ནས་འདི་ལྟར་བཤད་དེ། ཉིན་མོའི་སྒྲས་ནི་རིན་པོ་ཆེ་ཉིད་མའི་འོད་ཟེར་ཅན་ཐར་པ་ཞེས་བྱ་བ་ནི་དེ་དང་འདྲ་བའི་གང་ཟག་ཡང་ན་གྲངས་མེད་པའི་འཇིག་རྟེན་གྱིས་ཁམས་ལ་རྡོ་རྗེ་འཛིན་པའི་ས་ཐོབ་པའི་དོན་དུ་ཐབས་ཙམ་བསམ་པའི་ཕྱིར་ཐབས་སོ། །ཐབས་ནི་ཉི་མ་ཡིན་པར་འགྱུར་རོ་ཞེས་བྱ་བ་ལ་དེ་ནི་ཐབས་དོན་གསལ་བར་བྱས་སོ། །སློབ་དཔོན་ནག་པོ་པའི་གཞུང་གིས་ནི་གསང་བའི་རྡོ་རྗེ་རིན་པོ་ཆེའི་ནང་དུ་འབྱུང་བ་མཆོག་གི་དགའ་བའི་ངོ་བོ་བྱང་ཆུབ་ཀྱི་སེམས་སོ། །བྷ་ག་ལས་བྱུང་ཉི་མར་འགྱུར། ཞེས་བྱ་བ་ལ་ངེས་པའི་དོན་དང་དྲང་པའི་དོན་གྱིས་བཅོམ་ལྡན་འདས་ཀྱི་བཀའོ། །དཔལ་ཨིནྦྲ་བྷཱུ་ཏིའི་གཞུང་གིས། བྷ་ག་ནི་ཤེས་རབ། ཉི་མ་ནི་ཐབས། འབྱུང་བ་ནི་བྱང་ཆུབ་ཀྱི་སེམས། ཉི་མ་བྷ་གའི་བདག་པོ་ཞེས་བྱ་བ་ལ། ཤེས་རབ་མ་ལ་ཐབས་མགོན་པོ་ཡིན་ནོ། །ཡང་ན་

---

^{[མ་དཔེ་གཟིགས་ན་འདིར་གནོན།]}

ཁོང་དུ་ཆུད་པར་བྱེད་དོ། །སློབ་དཔོན་ཤ་བ་རིའི་གཞུང་གིས། བྷ་ག་ནི་ཤེས་རབ་ཀྱི་མངལ་གྱིས་པདྨ་རྒྱས་པ། ཉི་མ་ཞེས་བྱ་བ་ནི་རང་བྱུང་གི་མེ་ཏོག །འབྱུང་བ་ཞེས་བྱ་བ་ནི་དེ་ལས་སྐྱེ་བའོ། །སློབ་དཔོན་བཛྲ་རཱ་གའི་གཞུང་གིས་བྷ་ག་ནི་ཆད་པའི་དགའ་བའི་རང་བཞིན། བྱང་ཆུབ་ཀྱི་སེམས་ཉི་མ་ནི་མཆོག་གི་དགའ་བའི་ངོ་བོ། །བདག་པོའི་སྒྲ་ནི་རང་བཞིན་གྱིས་དགའ་བ་ཉིད་དོ། །སྲིད་པའི་རྣམ་པ་ཉི་མར་འགྱུར། །ཞེས་བྱ་བ་ལ། རྡོ་རྗེ་སློབ་དཔོན་གྱི་ཞལ་སྔ་ནས། བརྟག་པ་གཉིས་པའི་རྒྱལ་པོའི་རིམ་པར་འདི་བཤད་དེ། ཤེས་རབ་ཡེ་ཤེས་ཀྱི་མན་ངག་བསྒོམ་ཞིང་རོ་ཆེན་པོ་ཉམས་སུ་མྱོང་བ་དང༌། དེ་བཞིན་གསང་བའི་རྡོ་རྗེའི་རིན་པོ་ཆེའི་འཁོར་ལོར་དགའ་བ་ཆེན་པོའི་གནས་སུ་རྒྱུན་མི་ཆད་པའི་རྣམ་པར་འབྱེད་པ་མ་ཡིན་པའི་ངོ་བོ་ཞིག་དགའ་བ་འབྱུང་བའོ། །དེ་རང་ཉིད་ཤིན་ཏུ་གསལ་བའི་ཕྱིར་ཉི་མའོ། །ཟླ་བ་མྱ་ངན་ལས་འདས་པའི་ངོ་བོ་ཞེས་བྱ་བ་ལ། ཤེས་རབ་ཡེ་ཤེས་ཀྱི་དགའ་བ་ལས་ཅི་ཞིག་དགའ་བ་ཆེན་པོའི་ཕྱོགས་སུ་འདུ་ཤེས་མེད་པ་ཉིད་དོ། །དཔལ་ཨིནྡྲ་བྷཱུ་ཏིའི་གཞུང་གིས་རྟོག་པ་མེད་པ་ཉིད་དོ། །སློབ་དཔོན་གཞན་མའི་གཞུང་གིས་ནི་ཆད་པའི་དགའ་བའོ། །སྲིད་པ་དེ་ནི་རིགས་སུ་བཤད། །ཅེས་བྱ་བ་ལ་སོགས་པ་ལ། དཔལ་པྲ་ཧ་སྟི་སྟ་བཛྲ་ཨུ་ཏའི་གཞུང་གིས་ནི་འདི་ལྟར་བཤད་དེ། སྲིད་པ་ཞེས་བྱ་བ་ནི་ཀུན་གཞི་རྣམ་པར་ཤེས་པ། རིགས་ཞེས་བྱ་བ་ནི་ཕུང་པོ་ལྔ་གྲུབ་པའི་སྐུ། ཟླ་བ་ལ་ཞེས་བྱ་བ་ནི་སྲིད་པ་བར་མ་དོ་ལ། རིགས་ཞེས་བྱ་བ་ལ་ནི་སྲིད་པ་ལེན་པ། ཉི་མ་ལས་ཞེས་བྱ་བ་ནི་སྔོན་གྱི་སྨོན་ལམ་གྱི་འདུས་པའི་དྲན་པས་སོ། །སློབ་དཔོན་ཌོ་མྦི་བའི་ཞལ་སྔ་ནས་སྲིད་པ་ནི་ཐབས། རིགས་ནི་ཤེས་རབ། སློབ་དཔོན་མཚོ་སྐྱེས་རྡོ་རྗེའི་གཞུང་གིས་སྲིད་པ་ནི་མཆོག་གི་དགའ་བའི་རང་བཞིན་ཤུ་ཀྲ། རིགས་ཞེས་བྱ་བ་ནི་རཀྟ། ཟླ་བ་བྱང་ཆུབ་ཀྱི་སེམས་ལ་རིགས་སྐྱེ་བ། ཉི་མ་ལ་རཀྟ་ཞེས་བྱ་བའི་དོན་ཏོ། །སློབ་དཔོན་གྱི་གཞུང་གིས་དེ་ནི་མྱ་ངན་ལས་འདས་པའི་རང་བཞིན་ཅན་བྱང་ཆུབ་ཀྱི་ས་བོན་ཤིན་ཏུ་རྣམ་པར་འགྲུབ་པའི་ཕྱིར་རཀྟའི་ངོ་བོར་གྱུར་ཏོ། །གང་གི་ཚེ་རང་གི་མཚན་ཉིད་དུ་གྱུར་པ་དེའི་ཚེ། རྡོ་རྗེ་རིན་པོ་ཆེ་འདྲ་བར་འགྱུར་རོ། །གང་གི་ཚེ་ཅུང་

---

^{[མ་དཔེ་གཟིགས་ན་འདིར་གནོན།]}

ཟད་སྟོབས་ཀྱིས་འཕོ་བར་འགྱུར་བ་དེའི་ཚེ་སྐྱེ་པའི་གཟུགས་ཅན་དུ་གྱུར་ཏོ། །དེ་ནི་བསྐྱེད་པའི་རིམ་པའི་ཕྱོགས་སོ། །རྫོགས་པའི་རིམ་པའི་ཕྱོགས་སུ་སྤྲོས་པ་མེད་པའི་ཕྱིར་ཉི་མ་གྲུབ་ཅེས་བྱ་བ་ནི་མཆོག་གི་དགའ་བའི་བྱང་ཆུབ་ཀྱི་སེམས་རྣམ་པར་རྟོག་པའི་རིགས་དང་བྲལ་ཞེས་བྱ་བའི་དོན་ཏོ། །གང་ཞིག་རྣམ་པར་རྟོག་པ་མེད་པ་དང་ཆ་མེད་པ་དེ་ནི་རབ་དང་མཆོག་གོ །རབ་མཆོག་གི་ཕྱིར་ཕྲ་མོ། ཕྲ་མོའི་ཕྱིར་གང་ཡང་མིན། གང་ཡང་མ་ཡིན་པའི་ཕྱིར་སྟོང་པ་ཉིད་ཀྱི་སྐུའོ། །སྟོང་པ་ཉིད་ཀྱི་སྐུའི་ཕྱིར་འོད་རབ་བོ། །འོད་རབ་ཀྱི་ཕྱིར་ཞི་བ་ཆེན་པོའོ། །ཞི་བ་ཆེན་པོའི་ཕྱིར་ཀུན་ལ་བཞུགས་སོ། །དཔལ་པདྨ་ཤཱི་ཀ་རའི་གཞུང་གིས་ཇི་ལྟར་ནམ་མཁའ་ཀུན་ལ་ཁྱབ་པ་དེ་ལྟར་འོད་རབ། གྲགས་པའི་རང་བཞིན་ཐམས་ཅད་ལ་བཞུགས་ཞེས་དགོངས་སོ། །དེ་ནི་ཉིན་མོ་ལ་སོགས་པ་ནི་སྒྲ་ཇི་བཞིན་ནོ། །མཚམས་གཉིས་འདུས་ཞེས་བྱ་བ་ལ་སོགས་པ་ནི། མཚམས་ཞེས་བྱ་བ་ནི་འཕོ་བ། གཉིས་བྱ་བ་ནི་ཤེས་རབ་དང་ཐབས། འདུས་ཞེས་བྱ་བ་ནི་ཁ་སྦྱོར་རོ། །རྡོ་རྗེ་དང༌། པདྨ་དང༌། ཉི་མ་དང༌། ཟླ་བ་ཞེས་བྱ་བ་ནི་ཤེས་རབ་ཐབས་གཉིས་སུ་འབྲེལ་པས། གང་ཞིག་ཁ་སྦྱོར་བྱེད་པ་དེ་ནི་རྡོ་རྗེ་དང་པདྨར་གྲགས་པའི་མཚན་མ་གཉིས་འདུས་པའོ། །ཡང་ན་དེ་དག་ལས་བྱུང་བ་ཟླ་བ་དང་ཉི་མའོ། །ཟླ་བའི་སྒྲས་ནི་ཤུ་ཀྲ། ཉི་མའི་སྒྲས་ནི་རཀྟའོ། །ལྟེ་བ་གཉིས་ཀྱི་ཕྲད་པ་ལ་སོགས་ཞེས་བྱ་བ་ནི་གཉིས་ཀའོ། །ཤེས་རབ་དང་ཐབས་ཀྱི་མཚན་མ་གཉིས་ཀ་ལ་གང་ཞིག་སྙིང་པོའི་གནས་དེ་ནི་ལྟེ་བ་གཉིས་སོ། །ཕྲད་པ་ཞེས་བྱ་བ་ནི་ཤེས་རབ་ཡེ་ཤེས་དབང་བསྐུར་ཉམས་སུ་མྱོང་བའི་སྐབས་སུ་བླ་མའི་མན་ངག་ལས་གསང་བའི་རིན་པོ་ཆེ་འདུས་པའོ། །ཕྲ་མོར་ལྟ་བའི་སྐད་ཅིག་གིས་མཚན་ཉིད་ཅེས་བྱ་བ་ནི་ནང་གི་ལྟ་བ་གྲུབ་ཅེས་བྱ་བའི་དོན་ཏོ། །དཔལ་ཨིནྡྲ་བྷཱུ་ཏིའི་གཞུང་གིས་ནི་གསང་བ་ཆེན་པོ་རིན་པོ་ཆེ་རྩེ་མོ་གཉིས་འདུས་པ་ལས། གང་ཞིག་ཤེས་རབ་ཡེ་ཤེས་ཀྱི་དབང་བསྐུར་གྱིས་འབྲས་བུ་ཉམས་སུ་མྱོང་བའི་བྱང་ཆུབ་ཀྱི་སེམས་ཐིགས་པའི་སྣང་བའི་ཐིགས་པ་དེ་ནི་དོགས་གཉིས་ཀྱི་དབུས་སུ་རེག་བྱའི་ལྟ་བས་གཟིགས་པ་ཉིད་དོ། །

---

^{[མ་དཔེ་གཟིགས་ན་འདིར་གནོན།]}

མཚམས་ནི་སྤྲོས་པ་ལས་འདས་ཞེས་བྱ་བ་ལ་སོགས་པ་ལ་གང་ཞིག་སྔར་བསྟན་པའི་མཚམས་དེ་ནི་སྤྲོས་པ་དང་བཅས་པའི་མཚན་ཉིད་ཅན་གང་ཞིག་འོག་ཏུ་བཤད་པ་དེ་ནི་སྤྲོས་པ་དང་བྲལ་བའོ། །དེའི་ཕྱིར་རྣམ་པ་དང་བྲལ་བ་དང་མཆོག་དང་མཆོག་ལས་མཆོག་ཉིད་བཅོམ་ལྡན་འདས་ཀྱིས་གསུངས་སོ། །ཕྲད་པ་གཉིས་ཀྱི་དབུས་གནས་ལ་སོགས་པ་ལ། པྲ་ཧ་སྟི་སྟ་བཛྲ་ཨུ་ད་ཡའི་གཞུང་གིས་ཀུན་རྫོབ་དང་གོན་དམ་པ་གཉོས་སུ་མེད་པའི་ཤེས་རབ། དཔལ་ཨིནྡྲ་བྷཱུ་ཏིའི་གཞུང་གིས་ནི་དངོས་པོ་དང་དངོས་པོ་མ་ཡིན་པའི་ཕྱོགས་གཉིས་སྤངས་ཏེ། རྣལ་འབྱོར་པ་ལ་དངོས་གྲུབ་སྒྲུབ་པའི་ཕྱིར་ཡེ་ཤེས་ཀྱི་སྒྲོན་མ་ཙམ་གང་ངོ༌། །བྱུག་དང་སྣུམ་པ་རྣམ་པར་གྲོལ། །ཞེས་བྱ་བ་ནི་བྱུག་ཅེས་བྱ་བ་ནི་འཁོར་བ་སྣུམ་པ། །ཞེས་བྱ་བ་ནི་མྱ་ངན་ལས་འདས་པ་དེ་དག་གིས་བྲལ་ལོ་ཞེས་བྱ་བའི་དོན་ཏོ། །དེ་ནི་མཚམས་ལ་སོགས་ཞེས་བྱ་བའི་སྒྲ་ཇི་བཞིན་ནོ། །ཤར་ལ་སོགས་ཞེས་བྱ་བ་ལ་སློབ་དཔོན་ཤ་བ་རིའི་གཞུང་གིས་ནི་ལྷ་དང་མི་ཉིད་སྐྱེ་བ་ཉིད་ཀྱི་ཕྱིར་བཅོམ་ལྡན་འདས་རྡོ་རྗེ་འཛིན་པ་ཆེན་པོས་སེམས་ཅན་དམིགས་པའི་ཐུགས་རྗེ་མངོན་དུ་གྱུར་པར་མཛད་པས། བསྒྲུབ་པ་དང་སྒྲུབ་ཐབས་ཆེན་པོའི་ཐབས་ཀྱི་ངན་འགྲོའི་སེམས་ཅན་ཡེ་ཤེས་ཀྱི་ལྕགས་ཀྱུས་ཞལ་དུ་ཞུགས་ཏེ་བདེ་བ་ཆེན་པོའི་གནས་སུ་ཟླ་བ་ཞུ་བའི་བདུད་རྩིའི་གཟུགས་ཀྱིས་བཞག་སྟེ། དེའི་སྐབས་སུ། གང་ཞིག་དགའ་བ་ཆེན་པོ་དེ་ནི་ཤར་བའི་དང་པོ། །གང་ཞིག་གཞན་མ་ཡིན་པའི་སྤྲོ་བ་དེའི་རྫོགས་པ་དེ་ནི་དགའ་བྲལ་ལོ། །མདུད་པའི་རྩེ་མོ་མཆོག་གི་གནས། །ཞེས་བྱ་བ་ལ། སྤྲོ་བའི་དུས་ནི་བབ་པའི་མཆོག་གི་དགའ་བ་ལ་རྡོ་རྗེ་རིན་ཆེན་འཁོར་ལོར་བཞུགས་པའི་གནས་ནི་བཞི་པའོ། །གནས་ཀྱི་སྒྲ་ནི་ཤར་བར་བཤད་དོ། །ཙ་ན་ཀ་ཡི་ཟུར་གཟུགས་ཅན། །ཞེས་བྱ་བ་ནི་ཡེ་ཤེས་ཞབས་ཀྱི་མན་ངག་གི་གཞུང་གིས། བསྐྱེད་པའི་རིམ་པའི་ཕྱོགས་སུ་བྱང་ཆུབ་སེམས་ཀྱི་ཐིག་ལེའོ། །སློབ་དཔོན་གཞན་མའི་གཞུང་གིས་དེ་ནི་རྫོགས་པར་གླེང༌། དེ་རང་ཁོ་ན་ཤེས་པར་བྱ། །ཞེས་པ་ལ་སློབ་དཔོན་ཌོ་མྦི་པའི་གཞུང་གིས་ནི། གང་གི་དགའ་བའི་ཐིག་ལེ་དེ་རང་ཆད་པའི་དགའ་བའི་ཐིག་ལེ་ཁ་འམ་སྒོའོ། །ཡང་ན་

---

^{[མ་དཔེ་གཟིགས་ན་འདིར་གནོན།]}

ལམ་ཞེས་བྱ་བའི་དོན་ཏོ། །ཁ་ནི་གཉིས་པ་ཡིན་ཞེས་བྱ་བ་ལ་ཆད་པའི་དགའ་བ་ལ་ཡང་ཁ་ཆད་པའི་སྤྲོ་བའི་ལམ་ཞེས་བྱ་བའི་དོན་ཏོ། །འཕགས་པ་ཀླུ་སྒྲུབ་སྙིང་པོའི་གཞུང་གིས་སྒོ་གཉིས་པ་རྟག་པ་དང་ཆད་པ་ངེས་པར་གསུངས་སོ། །དཔལ་ཨིནྡྲ་བྷཱུཏིའི་གཞུང་གིས་ནི་གང་ཞིག་ཙ་ན་ཀའི་རུས་པའི་རྣམ་པ་ཅན་བྱང་ཆུབ་སེམས་ཀྱི་ཐིག་ལེ་དེ་ནི་དཀྱིལ་འཁོར་འཁོར་ལོའི་མདུད་པའི་གནས་སོ། །ཁ་ཞེས་བྱ་བ་ནི་ནང་གི་ལྷ་མོའི་སྒོ། གཉིས་པ་ཞེས་བྱ་བ་ནི་ཕྱི་རོལ་གྱིས་སྒོ། དེ་ནི་བསྐྱེད་པའི་རིམ་པའི་ཕྱོགས། རྫོགས་པའི་རིམ་པ་ནི་གང་ཞིག་ཙ་ན་ཀའི་རུས་པའི་གཟུགས་ཅན་བྱང་ཆུབ་ཀྱི་སེམས་དེ་ནི་མཆོག་གི་དགའ་བ་འབྱུང་བ། དེ་རང་ཁ་ཞེས་བྱ་བ་ནི་རྡོ་རྗེ་རིན་པོ་ཆེའི་སྒོ། གཉིས་པ་ཞེས་བྱ་བ་ནི་གསང་བ་པདྨ་ལྟེ་བའི་སྒོ། པྲ་ཧ་སྟི་སྟ་བཛྲ་ཨུ་ད་ཡའི་གཞུང་གིས་ཤར་བ་ཞེས་བྱ་བ་ནི་ཀུན་རྫོབ་དང་དོན་དམ་པ་གཉིས་ཀྱི་བྱང་ཆུབ་ཀྱི་སེམས་ཀུན་སྣང༌། དཔལ་ཨིནྡྲ་བྷཱུ་ཏིའི་གཞུང་གིས་ཤར་བ་ནི་མཆོག་གི་དགའ་བ། ཨོཾ་དྷའི་སྒྲས་ནི་མཚན་མོའི་འདུ་ཤེས་ཀྱི་ངོ་བོ་ཅན་ཆད་པའི་དགའ་བ། བདག་པོའི་སྒྲས་ནི་ཟླ་བའི་འདུ་ཤེས་ཀྱི་ངོ་བོ་ཅན། མཚན་མོ་གྱེན་དུ་འགྲོ་བ་ནི་རང་བཞིན་དགའ་བ། མཚན་མོ་ཐིག་ལེ་མཉམ་པར་གྲགས། །ཞེས་བྱ་བ་ནི་དགའ་བ་བཞིའི་རང་བཞིན་ཅན་བྱང་ཆུབ་ཀྱི་སེམས་ཟླ་བའི་རྒྱལ་པོའོ། །ཐིག་ལེ་བཞི་རུ་དབྱེ་ཞེས་བྱ་བ་ནི་རིམ་པའི་ཕྱོགས་སུ་ཕྱི་སྣང་བ་དང༌། དབང་དང༌། ལོངས་སྤྱོད་དང༌། ཡེ་ཤེས་ཀྱི་བྱེ་བྲག་ཅེས་བྱ་བའི་དོན་ཏོ། །ཐོག་མ་ཐ་མ་དབུས་ཞེས་བྱ་བ་ལ་ཐོག་མའི་སྐབས་སུ་ལོངས་སྤྱོད། །དབུས་ཀྱི་སྐབས་སུ་དབང༌། ཐ་མའི་སྐབས་སུ་མི་སྣང་བ་དེ་ནི་བསྐྱེད་པའི་རིམ་པའི་ཕྱོགས་སོ། །རྫོགས་པའི་རིམ་པའི་ཕྱོགས་སུ་ཐོག་མ་མི་སྣང་བ། དབུས་སུ་ལོངས་སྤྱོད། །ཐ་མ་དབང༌། བཞི་པ་ཉེ་བར་རྙེད་མིན་ཞེས་བྱ་བ་ནི་གང་ཞིག་ཡེ་ཤེས་དེ་ནི་བསྐྱེད་པའི་རིམ་པ་དང༌། རྫོགས་པའི་རིམ་པ་དང་བྲལ་བ། །གང་ཕྱིར་རང་རིག་བདག་ཉིད་དོ། །དེ་ཕྱིར་བརྗོད་པར་ནུས་མ་ཡིན། །ཞེས་བཅོམ་ལྡན་འདས་ཉིད་རྡོ་རྗེ་འཛིན་པས་གསུངས་སོ། །དེ་ནི་དེ་ལྟར་བཤད་ཅེས་བྱ་བ་ལ་སོགས་པའི་སྒྲ་ནི་ཇི་བཞིན་ནོ། །

---

^{[མ་དཔེ་གཟིགས་ན་འདིར་གནོན།]}

ནུབ་བའི་དོན་ནི་རྡོ་རྗེ་སློབ་དཔོན་གྱི་བཤད་པ། གང་ཚེ་གང་གི་དུས་སུ་དགའ་བ་གསུམ་གྱིས་བདག་ཉིད་པའི་སེམས་ཤར་བའི་སྣང་བ་མཆེད་པའི་བདག་ཉིད་ཀྱི་བླང་བར་ཐིམ་པ་དེའི་ཚེ། ནུབ་པར་ཤེས་པར་བྱ་ཞེས་བྱ་བའི་དོན་ཏེ། དེ་ཡང་འོད་ཟེར་དལ་བས་ཞེས་དགོངས་སོ། །སློབ་དཔོན་ཌོ་མྦི་པའི་གཞུང་གིས་ནུས་པ་ནི་ཆད་པ། སློབ་དཔོན་ཤ་བ་རིའི་གཞུང་གིས། འགྲོ་མེད་པ་ལ་འགྲོ་བར་འགྱུར། །ཞེས་བྱ་བ་དང༌། ཞུ་བ་མེད་པའི་ངོ་བོ་ཅན་བྱང་ཆུབ་ཀྱི་སེམས་ལ་ཞུ་བ་ཉིད་དོ། །གང་གི་ཚེ་ཐོག་མ་ནས་ཐ་མར་འགྲོ་བ་འདི་ལྟ་སྟེ། གང་གི་ཚེའི་དུས་སུ་མཆོག་གི་དགའ་བར་གནས་ནས། ཆད་པའི་དགའ་བའི་གནས་སུ་དེའི་ཚེ་ནུབ་པོ། །བཱི་ར་བུ་ཏིའི་གཞུང་གིས་ནི་ཐོག་མའི་དགའ་བ་ལས་དགའ་བྲལ་གྱི་གནས་སུ་ནུབ་བར་མཛོད། ཐ་མར་ནུབ་པར་རབ་ཏུ་བསྟན། །ཞེས་བྱ་བ་ལ་སློབ་དཔོན་ཤ་བ་རིའི་གཞུང་གིས་ནི་ཐ་མ་ནི་ཆད་པའི་དགའ་བ། ནུབ་བ་ནི་ཆད་པ། དཔལ་ཨིནྡྲ་བྷཱུ་ཏིའི་གཞུང་གིས་ནི་ཆད་པའི་དགའ་བ་ཀུན་ལ་དགའ་མེད་སྐྱེ་བར་བྱེད་པའི་བཏང་སྙོམས་བྱེད་ཅེས་བྱ་བའི་དོན་ཏོ། །བརྟན་པའི་གནས་ལས་མི་བརྟན་པའི་གནས་ཞེས་བྱ་བ་ནི་འདི་སྐད་ནུབ་པའི་ངེས་པའི་དོན་ཉིད་ངེས་པའི་མཆོག་གི་དབང་ཕྱུག་གིས་རབ་ཏུ་གསལ་ལ་བརྟན་པ་ལ་སོགས་པའི་བདེ་བ་ནི་མི་བརྟན་པའི་བདེ་བ་ལས་སོ་ཞེས་སྒྲ་བཞིན་ནོ། །དཔལ་ཕྱག་རྒྱ་ཆེན་པོའི་ཐིག་ལེ་ལས་ལེའུ་ལྔ་པའི་བཤད་པའོ།། །།

ལེའུ་དྲུག་པའི་བཤད་པ།

---

^{[མ་དཔེ་གཟིགས་ན་འདིར་གནོན།]}

ད་ནི་དྲུག་པ་ལ་ཟབ་པའི་ཚིགས་སུ་བཤད་པ་བྲི། དུས་ནི་གནས་དབྱེ་ཞེས་སུ་བསྟན། །ཞེས་པ་ལ་སོགས་པ་ལ་སློབ་དཔོན་ནག་པོའི་གཞུང་གིས་ནི་རྩ་བའི་ཀུན་སྤྱོད་ལ་འཇུག་པ་དང་འདྲ་བའོ། །སློབ་དཔོན་ས་ར་ཧའི་གཞུང་གིས་ནི་དུས་ཞེས་བྱ་བ་བརྗོད་དུ་མེད་པའི་སྒྲུབ་ཐབས་ཀྱི་བརྩོན་པ། གནས་སྐབས་ཞེས་བྱ་བ་ནི་དུས་གཅིག་ཏུ་བྱང་ཆུབ་ཀྱི་སེམས་འབྱུང་བ། དུས་ནི་གཉིས་སུ་དབྱེ་བ་ཞེས་བྱ་བའི་གཞུང་གིས་བྲམ་ཟེ་མོ་བཛྲ་བ་ཏིའི་གཞུང་གིས་བསྐྱེད་པ་དང་རྫོགས་པའི་སྦྱོར་བའོ། །བསམ་དུ་མེད་པའི་དུས་ཞེས་བྱ་བ་ལ། ལྷ་ལྕམ་ལཀྵྨཱིའི་གཞུང་གིས། རྩེ་རོ་མ་ལས་བྱུང་བའི་རང་བཞིན་གྱི་རླུང་གི་ངོ་བོ་ཙམ་དགའ་བ་ཆེན་པོ་རྒྱལ་མོ་དཔལ་

---

^{[མ་དཔེ་གཟིགས་ན་འདིར་གནོན།]}

མོ་བཟང་མོའི་གཞུང་གིས་སྲོག་གི་རྩ་ལས་བྱུང་བའི་སྲོག་གི་རླུང་ལས་རང་བཞིན་ཆད་པའི་དགའ་བ། བཟང་པོའི་དུས་ནི་གནས་སྐབས་བརྗོད། །ཅེས་བྱ་བ་ལ། ལྷ་ལྕམ་ལཀྵྨཱིའི་གཞུང་གིས་ནི་རྡོ་རྗེ་དབྱིངས་ཀྱི་དབང་ཕྱུག་མ་ལས་བྱུང་བའི་ཉེ་བའི་སྲོག་གི་རང་བཞིན་རེག་བྱའི་དགའ་བ། བཟང་པོའི་དུས་ལྟ་ངན་དུས་ཞེས་བྱ་བ་ལ། རྒྱལ་པོ་དཔལ་མོ་བཟང་མོའི་གཞུང་གིས་མཆོག་དང་ཆད་པ་ཞེས་བཤད། ལྷ་ལྕམ་ལཀྵྨཱིའི་གཞུང་གིས་ནི་ཤིན་ཏུ་དགའ་བའི་ཕྱིར་ངན་དུས། ཤིན་ཏུ་བླ་མའི་ཕྱིར་བཟང་དུས་སོ། །སྣ་ཡི་འཕར་མ་གཉིས་བུག་ལས། །ཞེས་བྱ་བ་ནི་རྒྱལ་པ་བཛྲ་ཀརྐ་ཏི་རིའི་གཞུང་གིས་བདེ་བ་ཆེན་པོ་ཚོར་བའི་གནས་སུ་ཤུ་ཀྲ་དང་རཀྟ་འབབ་པའི་གང་ཞིག་སྒོའི་ལམ་དེ་ནི་སྣའི་འཕར་མ་ཞེས་བྱ་བའི་དོན་ཏོ། །དེའི་ལམ་གྱིས་གང་ཞིག་སྤྲོས་པ་དང་བྲལ་བའི་བདེ་བ་ཆེན་པོ་ཉམས་སུ་མྱོང་བ་དེ་ནི་དུས་ཞེས་དཔལ་ཨིནྡྲ་བྷཱུ་ཏི་ཉིད་ལ་སྐྱེ་བ་དང་པོ་སྔོན་དུ་དངོས་གྲུབ་ཐོབ་པ་རྣལ་འབྱོར་མ་ལག་སྨིའི་གཟུང་ངོ༌། །དེ་ཡང་ལྷ་ལྕམ་ལཀྵྨཱིའི་ཐབས་དང་མ་རེག་ཀྱང་ད་ལྟ་གསུངས་པའི་སློབ་དཔོན་ཤཱཀྱ་མི་ཏྲས་མཛད་པའི་བསྟན་བཅོས་ཀྱིས་བསྟན་པས་རྡོ་རྗེ་སློབ་དཔོན་གྱིས་ཞལ་སྔ་ནས་གསུངས་སོ། །དེ་ནི་རེ་ཞིག་རྣལ་འབྱོར་མ་དངོས་གྲུབ་ཐོབ་པའི་གཞུང་ངོ༌། །ད་ནི་རྣལ་འབྱོར་མ་དབང་ཕྱུག་པས་བསྟན་བཅོས་པའི་དོན་དཔྱད་དེ། འཇིགས་པ་དེ་ནི་དུས་ངན་བསྟན། །ཞེས་བྱ་བ་ནི་ཕྱིར་རོལ་གྱིས་སོན་གྱིས་སྐབས་སུ། སྣའི་འཕར་མ་གཉིས་ཀྱིས་གང་ཞིག་སྲོག་དང་ཉེ་བའི་སྲོག་གཉིས་ལ་འོང་བ་དང༌། འགྲོ་བ་དེ་ནི་ཇི་ལྟ་བཞིན་ནོ། །ནང་གི་བདག་ཉིད་ཀྱི་འཇུག་པ་དེ་ནི། ཤིན་ཏུ་དུས་ཞེས་བྱ་བ་ནི་བདེ་བ་ཆེན་པོའི་འཁོར་ལོ་མན་ཆད་ནས། བདེ་བ་ཆེན་པོ་ཚོར་བའི་གནས་ཡན་ཆད། སྲོག་གི་རླུང་ལ་ཞོན་ནས་བྱང་ཆུབ་ཀྱི་སེམས་འོང་བའོ། །འགྲོ་བ་ངན་དུས་བརྗོད་ཅེས་བྱ་བ་ནི་དེ་ལས་གནས་གཞན་སླེབ་བ་ཞེས་ཛྙཱ་ན་མཱུ་རྟིའི་གཞུང་ངོ༌། །ངན་དུས་དགའ་བྲལ་ཤེས་པར་བྱ། །བཟང་དུས་རབ་མཆོག་ལྡན་པ་ཞེས་བྱ་བ་ལ། བསྟན་པའི་དོན་ལ་རབ་ཏུ་གསལ་བ་ཉིད་མཆོག་གི་དབང་ཕྱུག་གསུངས་སོ། །གཉིས་ཀྱི་བྲལ་བའི་དེ་ཁོ་ཉིད། །ཅེས་བྱ་བ་ནི་འགྲོ་བ་དང་འོང་བ་དང་འབྱུང་བ་

---

^{[མ་དཔེ་གཟིགས་ན་འདིར་གནོན།]}

དང་དེ་ཟད་པ་དང་བྲལ་བའི་རང་བཞིན་དགའ་བ། པདྨ་ཤཁའི་གཞུང་ངོ༌། །དེའི་ཕྱིར་ནི། དེ་ལྟར་དུས་ནི་སྔོན་མེད་ཉིད། །ཅེས་དེ་ཉིད་བཅོམ་ལྡན་འདས་ཀྱིས་གསུངས་སོ། །བལྟ་བར་དགའ་བ་ལ་སོགས་ཞེས་བྱ་བ་ལ། རང་བཞིན་རླུང་གི་ངོ་བོ་ཕྱིར། །རྣམ་པ་ལ་སོགས་མཆན་ཉིད་ཀྱིས། །ཐར་པ་དཀའ་བའི་མཚན་ཉིད་ཀྱིས་བྲལ་བ། །ཞེས་བྱ་བ་ནི་བསྒོམ་པ་ལ་སོགས་ཀྱིས་མི་རྙེད་མཚན་ངན་ཐམས་ཅད་དང་བྲལ་བ་ནི་ཆད་པའི་སྐད་ཅིག་རང་གི་ཡན་ལག་གིས། རྣམ་པར་བྲལ་ཞེས་སློབ་དཔོན་བི་ལ་ས་བཛྲའི་གཞུང་ངོ༌། །དེ་ལྟར་དུས་ལ་སོགས་ཞེས་བྱ་བ་ནི་སྒྲ་ཇི་བཞིན་གྱིས་བཀའ་སྩལ་ཏོ། །དེ་དུས་ཡིད་ནི་གཞན་མར་མིན། །རྣལ་འབྱོར་ནི་བྱེད་ན་ཞེས་བྱ་བ་ལ། དཔལ་མཧཱ་སུ་ཁ་བཛྲའི་གཞུང་གིས། མཆོག་དང་ཆད་པ་འབྱུང་བའི་དུས་སུ་རྣལ་འབྱོར་བ་ཡིད་ཀྱི་རྣམ་པར་ཤེས་པ་དང་ལྡན་པའི་བྱང་ཆུབ་ཀྱི་སེམས་བདེ་བ་ཆེན་པོའི་གནས་ནས། གང་ཚེ་གཡོ་བར་བྱེད་པ་ན། །དེའི་ཚེ་ངེས་པར་བསྐྱོད་མི་ཟད། །རྡོ་རྗེ་འཛིན་དང་འདྲ་བར་འབྱུང༌། །ཞེས་དངོས་པོའོ། །དཔལ་ཨིནྡྲ་བྷཱུ་ཏིའི་གཞུང་གིས་ནི། མཆོག་དང་ཆད་པ་ལས་འབྱུང་བ་དང༌། འཇིག་པ་དང་གནས་པ་དང༌། འཇུག་པ་དང༌། འགྲོ་བ་དང༌། འོང་བ་ལ་སོགས་པའི་རྣམ་པར་རྟོག་པ་དང་བྲལ་བ་གང་གི་ཚེ་རྣལ་འབྱོར་པས་སེམས་ཚོར་བ་དེའི་ཚེ་ཉིད་རྡོ་རྗེ་འཛིན་པས་ཞེས་དགོངས་སོ། །ཨཱ་ལི་ཀཱ་ལི་འབྱུང་ལ་སོགས། །ཞེས་བྱ་བ་ལ་པྲ་ཧ་སྟི་སྟ་བཛྲོ་ད་ཡའི་གཞུང་གིས་ནི་འདི་ལྟར་གསུངས་སོ། །ཨཱ་ལི་སྒྲ་ནི་ཤེས་རབ། ཀཱ་ལི་སྒྲ་ནི་ཐབས་ཀྱི་འབྱུང་བ་ཞེས་བྱ་བ་ནི་བྱང་ཆུབ་ཀྱི་སེམས་གང་ལས་ཞེས་བྱ་བ་ནི་སྒྲུབ་པ་དང༌། བསྲུབ་ཐབས་ཆེན་པོའི་སྦྱོར་བས་སོ། །གཞན་ནི་སྒྲ་ཇི་བཞིན་ནོ། །དེ་ནི་རེ་ཞིག་གསང་བ་ཆེན་པོའི་དོན་གྱིས་རྫོགས་པའི་རིམ་པའོ། །བསྐྱེད་པའི་རིམ་པའི་ཕྱོགས་སུ་ནི། །འོད་རབ་གནས་ནས་སྐྱེ་བ་ཡི། །སྣང་བ་ཆེན་པོའི་རང་བཞིན་ཅན། །ཞེས་བྱ་བ་ནི། ཀཱ་ལི་ཡེ་ཤེས་ཉི་མ། དཔེ་བྱད་སུམ་ཅུ་རྩ་གསུམ་ཞེས་བྱ་བ་ནི། ཀའི་ཡིག་འབྲུ་ནས་ཧའི་ཡིག་འབྲུ་མན་ཆད་དོ། །སྣང་བ་ཆེན་པོའི་ཉི་མ་ལས་སྣང་བ་བྲལ་བ། ཨཱ་ལི་ཡེ་ཤེས་ཀྱི་ཟླ་བའི་སྐུའོ། །དབྱངས་ཡིག་བཅུ་དྲུག་ལྡན་

---

^{[མ་དཔེ་གཟིགས་ན་འདིར་གནོན།]}

པ་ཞེས་བ་བ་ནས་ཨ་ནས་ཨའི་ཡིག་འབྲུ་ཡན་ཆད་དོ། །སློབ་དཔོན་ཌོ་མྦི་པའི་གཞུང་གིས་ནི་རཀྟ་ཀཱ་ལི་ཡེ་ཤེས། ཤུ་ཀྲ་ཨཱ་ལི་ཡེ་ཤེས། སློབ་དཔོན་ཀུ་ཀུ་རིའི་གཞུང་གི་ཁྱད་པར་གྱིས། ཀཱ་ལི་ཡེ་ཤེས་ཀྱི་ངོ་བོ་ཉིད་དཔལ་རྡོ་རྗེ་སེམས་དཔའ་རྗེ་བཙུན་གྱི་སྤྲུལ་པའི་སྐུའོ། །ཨཱ་ལི་ཡེ་ཤེས་ཀྱི་ངོ་བོས་བཅོམ་ལྡན་འདས་བདག་མེད་མའི་སྐུའོ། །དེ་དག་ཉིད་མཉམ་པར་སྦྱོར་བ་ལ་སོགས་ཞེས་བྱ་བ་ལ་འཇིག་རྟེན་ལས་འདས་པའི་ཐབས་དང་ཤེས་རབ་མཉམ་པར་སྦྱོར་བའི་སྒྲུབ་པ་དང་བསྲུབ་ཐབས་ལས། ཀུན་རྫོབ་དང་དོན་དམ་པ་གཉིས་སུ་མེད་པའི་རང་བཞིན་བྱང་ཆུབ་ཀྱི་སེམས་དལ་བའི་རོ་ཆེན་པོ་འདུ་ཤེས་ཅན་སྐྱེ་བ་ཞེས་བྱ་བའི་དོན་ཏོ། །སློབ་དཔོན་གྱི་གཞུང་གིས་ནི་དལ་བ་སྟོང་པ་ཉིད་ཀྱི་རང་བཞིན་བྱང་ཆུབ་ཀྱི་སེམས། རོ་ཆེན་པོ་ཞེས་བྱ་བ་ནི་ཐུགས་རྗེའི་རང་བཞིན། །སློབ་དཔོན་ཨུ་རྒྱན་གྱི་གཞུང་གིས་དལ་བ་ཞེས་བྱ་བ་ནི་ཆད་པའི་དགའ་བ་གཉིས་སུ་མེད་པའི་རང་བཞིན་བྱང་ཆུབ་སེམས་དཔའི་རོ་ཆེན་པོ་འདུ་ཤེས་ཅན་སྐྱེ་བཞེས་པའི་དོན་ཏོ། །སློབ་དཔོན་གྱི་གཞུང་གིས་དལ་བ་ནི་སྟོང་པ་ཉིད་ཀྱི་རང་བཞིན་བྱང་ཆུབ་ཀྱི་སེམས། རོ་ཆེན་པོ་ཞེས་བྱ་བ་ནི་ཐུགས་རྗེའི་རང་བཞིན། སློབ་དཔོན་ཨུ་རྒྱན་གྱིས་གཞུང་གིས་དལ་བ་ཞེས་བྱ་བ་ནི་ཆད་པའི་དགའ་བ་གཉིས་སུ་མེད་པའི་རང་བཞིན་བྱང་ཆུབ་ཀྱི་སེམས། རོ་ཆེན་པོ་ཞེས་བྱ་བ་ནི་མཆོག་གི་དགའ་བའི་རང་བཞིན། སློབ་དཔོན་ཁ་ཆེའི་གཞུང་ནི། དལ་བ་ཞེས་བྱ་བ་ནི་ཀུན་རྫོབ་ཀྱི་ངོ་བོ་ཅན། རོ་ཆེན་པོ་ཞེས་བྱ་བ་ནི་དོན་དམ་པའི་རང་བཞིན། སློབ་དཔོན་བྷཾ་ག་ལའི་གཞུང་གིས་ནི། དལ་བ་ཞེས་བྱ་བ་ནི་བསྐྱེད་པའི་རིམ་པའི་ངོ་བོ། རོ་ཆེན་པོ་ཞེས་བྱ་བ་ནི་རྫོགས་པའི་རིམ་པ། དཔལ་ཨིནྡྲ་བྷའུ་ཏིའི་གཞུང་གིས་ནི་མཐར་ཐུག་པ། རོ་ཆེན་པོ་ཞེས་བྱ་བ་ནི་མཐར་ཐུག་པ་དང་བྲལ་བའོ། །སློབ་དཔོན་བྷི་ར་པུ་ཏྲའི་གཞུང་གིས་ནི། དལ་བ་ནི་མིང་སྣང་བའི་ངོ་བོ། རོ་ཆེན་པོ་ཞེས་བྱ་བ་ནི་ལོངས་སྤྱོད་ཀྱི་ངོ་བོ། དེའི་ཕྱིར་མཆོག་གི་བདུད་རྩི་རོའི་དངོས་རིག་མའི་སྣ་རྩེ་དག་ལས་བྱུང་ཞེས་ལྷ་ལྕ་ལཀྵྨཱིའི་གཞུང་གིས་ནི་རྡོ་རྗེ་དབྱིངས་ཀྱི་དབང་ཕྱུག་རྩའི་སྙིང་གའི་གནས་ནས་

---

^{[མ་དཔེ་གཟིགས་ན་འདིར་གནོན།]}

བྱུང༌། འཁོར་ལོ་དྲུག་པར་རབ་གསལ་བྱེད། །ཅེས་བྱ་བ་ནི་དེ་མ་ཐག་ཏུ་སྨྲས་པའི་རོ་ཆེན་པོ་སྐུ་རྟེན་སྲོག་གི་དབྱུག་པའི་ཆུ་སྐྱེས་ཁོང་དུ་ཆུད་པར་བྱེད་པ་ཞེས་སློབ་དཔོན་ཨཱཪྻ་དེ་བའི་གཞུང་ངོ༌། །དེ་ལ་རེག་བྱ་རྙེད་བྱེད་མ། །རོ་ཆེན་བརྒྱད་ནི་ཤེས་པར་བྱ། །ཞེས་བྱ་བ་ལ། དེ་ལ་ཞལ་ཞེས་བྱ་བ་ལ་རྡོ་རྗེ་དབྱིངས་ཀྱི་དབང་ཕྱུག་མའི་ཁ། རེ་ག་པའི་བདེ་བའི་ལས་སོ། རོ་ཆེན་པོ་བརྒྱད་ཅེས་བྱ་བ་ནི་ཡེ་ཤེས། ཆེ་བའི་འབྲས་བུ་ཐོབ་པའི་དུས་སུ་འདར་བ་ལ་སོགས་པའི་རྟགས་སོ། །རེག་བྱའི་རོ་ཞེས་བྱ་བ་ནི་དགའ་བ་ལ་སོགས་གསལ་བའི་བྱེད་པ། རོ་འབྱུང་བ་ལ་སོགས་པ་ལ། རོ་འབྱུང་བ་ཞེས་བྱ་བ་ནི་རྟགས་ཁོང་དུ་ཆུད་པའོ། །དེའི་དབང་དུ་བྱས་པ་ནི་དགའ་བ་རྣམས་འབྱུང་ངོ༌། །སློབ་དཔོན་བི་ལ་ས་བཛྲའི་གཞུང་གིས་ནི། འབྱུང་བ་ཞེས་བྱ་བ་ནི་གསལ་བའོ། །ཡང་དག་བཟང་བ་སྐྱེས་ཞེས་བྱ་བ་ནི་ཐ་མལ་བ་མ་ཡིན་པའི་རང་བཞིན་ནོ། །སློབ་དཔོན་བི་མ་ལ་མུ་དྲའི་གཞུང་གིས། ཕྱི་རོལ་གྱིས་དབེལ་སོགས་པ་དང་བྲལ་བའོ། །དེ་ལ་རིམ་པ་ནི་འདི་ཡིན་ཏེ། དགའ་བ་དང༌། ཀུན་དུ་དགའ་བ་དང༌། དགའ་བྲལ་དང༌། རང་བཞིན་གྱིས་དགའ་བའོ། །དགའ་བ་ཞེས་བྱ་སྣང་བ་ཡིན། །ཞེས་བྱ་བ་ལ། པྲ་ཧ་སྟི་སྟ་བཛྲོ་ད་ཡའི་གཞུང་གིས་རྡོ་རྗེ་འཛིན་པ་ཆེན་པོའི་སྲུབ་པ་དང་བསྲུབ་ཐབས་ཀྱི་སྐབས་སུ་དངོས་པོའི་རང་བཞིན་དགའ་བ་འབྱུང་བའི་ཚེ། ཟླ་བ་དང་ཉི་མ་དང་སྐར་མ་ལ་རབ་ཏུ་གསལ་བའི་རང་བཞིན་སྣང་བར་གྱུར་ཏོ། །དེ་ལས་འཇིག་རྟེན་ལས་སྣང་བ་དེ་ནི་དགའ་པའི་དོན་ཏོ། །ད་ནི་རབ་ཏུ་དགའ་བའི་དོན་བྲི་བར་བྱ་སྲུབ་པ་དང་བསྒྲུབ་ཐབས་ཀྱི་ཆེན་པོའི་དུས་སུ་རྟེན་གྱི་ངོ་བོ་ཅན་དགའ་བ་ཆེན་པོ་འབྱུང་བའི་ཚེ། མཐོ་རིས་ལ་གནས་པའི་འཆི་མེད་ལ། ཉི་མའི་བྱེ་བྲག་གི་འོད་ཟེར་གསལ་བ་དེ་ལས་གྲངས་མེད་པའི་འཇིག་རྟེན་གྱི་ཁམས་ལ་སྣང་བ་མཆེད་པ་དེ་ནི་རབ་ཏུ་དགའ་བའི་དོན་ཏོ། །ད་ནི་དགའ་བྲལ་གྱི་དོན་བྲི་བར་བྱ། ཆགས་པ་ཆེན་པོ་འབར་བའི་སྐབས་སུ། འོག་ན་གནས་པའི་ལྷ་མིན་ལ་མིའི་རང་བཞིན་ཕྱོགས་ཐམས་ཅད་དུ་གསལ་བ། དེ་ལ་ས་འོག་བདུན་ཡན་ཆད་སྣང་བ་ཐོབ་པ། དེ་ནི་དགའ་བྲལ་གྱི་དོན་ཏོ། །ད་ནི་རང་བཞིན་དགའ་བའི་དོན་འདྲི། གང་ཞིག་རང་བཞིན་དགའ་བ་དེ་

---

^{[མ་དཔེ་གཟིགས་ན་འདིར་གནོན།]}

ནི་འོད་རབ་ཀྱི་ངོ་བོ། དེ་ལ་སྣང་བ་དགའ་བ་ལ་སོགས་པ་འབྱུང་བ་གསལ་བ་དེ་ལ་བྱ་བའི་དོན་ཏོ། །སློབ་དཔོན་ཌོ་མྦི་པའི་གཞུང་གིས་ནི་དབང་བཞིའི་འབྲས་བུ་ཉམས་སུ་མྱོང་བའི་དུས་སུ། སྒོམ་པར་བྱེད་པ་ལ་གང་ཞིག་དགའ་བ་རྣམས་སྐྱེ་བ་དེ་ལ་སྣང་བ་ལ་སོགས་པ་ཡེ་ཤེས་ཀྱི་རྟགས་སོ། །སློབ་དཔོན་ཀུ་ཀུ་རིའི་མན་ངག་གི་གཞུང་གིས་གཅིག་པུའི་ཤེས་རབ་ཡེ་ཤེས་ཀྱི་མན་ངག་གི་རིམ་བ་བསྒོམ་པས་དགའ་བ་བཞིའོ། །དགའ་བ་རེ་རེ་ལ་སྣང་བ་ལ་སོགས་པའི་ཡེ་ཤེས་སྐྱེའོ། །སྡེ་དུས་སྐད་ཅིག་སྐྱེ་བར་འགྱུར། །རྣམ་པ་སྣ་ཚོགས་སོགས་མཚན་ཉིད། །ཅེས་བྱ་བ་ལ་འདི་ལྟར་བཤད་དེའི་སྒྲ་ནི་འོང༌། རབ་ཏུ་ཞེས་བྱ་བ་ནི་རྒྱུ། དེའི་གསལ་བའི་དོན་ནི་འདི་ཡིན་ཏེ། དང་པོར་རེ་ཞིག་འོད་རབ་ཀྱི་རྒྱུ་རྩ་བ་ལས་རྣམ་པ་སྣ་ཚོགས་དང༌། རྣམ་པར་སྨིན་པ་དང༌། རྣམ་པར་འཇོམས་པ་དང༌། རྣམ་པར་མཚན་ཉིད་དང་བྲལ་བ་ནི་དགའ་བ་རྣམས་ཀྱི་རྒྱུ་འབྱུང་བའོ། །ཕྱི་ནས་འབྲས་བུ་ཅན་དགའ་བ་ཉིད་དོ། །སྣང་བ་ལ་སོགས་ཞེས་བྱ་བ་ནི་གང་ཞིག་བསྟན་པ་དེ་ནི་གཅིག་པུ་འོད་རབ། རྒྱུ་འབྲས་ཀྱི་བདག་ཉིད་ཀྱི་ཕྱིར། གཞན་མ་ཀུན་ལ་བཀག་པའོ། །སློབ་དཔོན་བའི་ར་བུའི་མན་ནག་གི་གཞུང་གིས་ནི་འོད་རབ་ཀྱི་རྒྱུ་འབྲས་དང་བྲལ་བའོ། །ད་ནི་དགའ་བ་རྣམས་ཀྱི་འབྱུང་བའི་དུས་བཤད་དེ། གང་ཚེ་མདུད་པའི་ནང་དུ་སེམས། །དེ་ཚེ་དགའ་བ་མྱོང་བར་འགྱུར། །ཞེས་བཅོམ་ལྡན་འདས་ཀྱི་བཀའ་སྩལ་པའི་གོ་རིམས་ཀྱི་རྡོ་རྗེ་སློབ་དཔོན་གྱི་ཞལ་སྔ་ནས། རྡོ་རྗེ་རིན་པོ་ཆེ་འཁོར་ལོ་འདུད་པའི་གནས་སུ་བཤད་དོ། །སློབ་དཔོན་བི་ལས་བཛྲའི་གཞུང་གིས་ནི་ལྟེ་བའི་གནས་སོ། །སློབ་དཔོན་ཤ་བ་རིའི་གཞུང་གིས་ནི་རྡོ་རྗེ་རྩ་བའི་གནས་སོ། །དཔལ་ཨིནྡྲ་བྷཱུ་ཏིའི་གཞུང་གིས་ནི་བཅོམ་ལྡན་འདས་ཀྱི་བཀའ་ལུང་དང་འདྲའོ། །ཤེས་རབ་མའི་སྐབས་སུ་དེ་དང་འདྲ་བར་ཞེས་སློབ་དཔོན་ཛྙཱ་ན་ས་རིའི་གཞུང་ངོ༌། །སེམས་ཀྱི་སྒྲས་ནི་ནང་གི་བདག་ཉིད་བུམ་པའི་དབང་ལས་རེག་བྱ་ཉམས་སུ་མྱོང་བའི་དུས་སུ་ནང་གི་ས་བོན་འབྱུང་བའོ། །དེ་ཚེ་དི་དུས་ཞེས་བྱ་བ་ལ། ཕྱི་ཡི་དངོས་པོ་ཀུན་ལ་བཅོས་མ་ཡིན། །ཞེས་གང་མགུ་བདེ་ནི་དགའ་བ་ལས་བྱུང་བ་ཞེས་པ་པདྨ་ཤྲཱི་ཀའི་མན་ངག་གི་

---

^{[མ་དཔེ་གཟིགས་ན་འདིར་གནོན།]}

གཞུང་ངོ༌། །མདུད་པ་ལས་ནི་ནས་གསུམ་ཙམ། །ཞེས་བྱ་བའི་དོན་ནི་འདི་ལ་སྟེ། གང་ཚེ་གསང་བའི་དབང་བསྐུར་བ་ཉམས་སུ་མྱོང་བ་བྱང་ཆུབ་ཀྱི་སེམས་རྡོ་རྗེ་རིན་པོ་ཆེ་འཁོར་ལོའི་གནས་ནས་འབབ་པ་དེའི་ཚེ་ཕྱི་རོལ་སྒྱུ་འཕྲུལ་གྱི་རབ་བཞིན་གང་ཞིག་ཁོང་དུ་ཆུད་པ་དེ་ནི་མཆོག་གི་དགའ་བ། གསུམ་པའི་གནས་ནས་གསུམ་པར་འགྲོ། །ཞེས་བྱ་བ་འདི་ལྟར་བཤད་དེ། གསུམ་པའི་གནས་ཞེས་བྱ་བྱ་ནི་རིན་པོ་ཆེའི་འཁོར་ལོ་ལས་སོར་གཅིག་ཙམ་གསུམ་པར་ཞེས་བྱ་བ་ནི་སོར་གཅིག་ཙམ། སློབ་དཔོན་ཤ་བ་རིའི་གཞུང་གིས་ནི། རིན་པོ་ཆེའི་ཁའོ། །གང་གི་ཚེ་དེ་རུ་ཤེས་རབ་ཡེ་ཤེས་ཀྱི་དབང་བསྐུར་གྱི་དོན་ཉམས་སུ་མྱོང་བའི་བྱང་ཆུབ་ཀྱི་སེམས་བབས་པ་དེའི་ཚེ། རང་དང་གཞན་གྱི་བྱེ་བྲག་གི་དྲན་པ་མེད་པས་གང་ཞིག་ཅི་ཡང་མི་ཚོར་བ་ཉིད་དེ་ནི་ཆད་པའི་དགའ་བ། དགའ་བ་ལ་མི་སྣང་བ་འབྱུང་བ་མེད་བ་ཞེས་བྱ་བ་ནི་སློབ་དཔོན་སནྟ་ཀུ་རིའི་གཞུང་ངོ༌། །གསུམ་དང་བྲལ་བ་ཞེས་བྱ་བའི་དོན་ནི་འདི་ལྟར་ཤད་དེ། འབྲུ་ནས་སོར་གཉིས་ཙམ་སྤངས་ཏེ་རང་བཞིན་དགའ་བ་ལ་བྱུང་བའི་གནས་སོ། །དཔལ་ཨིནྡྲ་བྷཱུ་ཏིའི་གཞུང་གིས་གསུམ་པ་ཞེས་བྱ་བ་འོག་གི་ཆ་ལས། དེ་ཀུན་སྟེང་གི་ཆར་ཏེ། གང་ཞིག་དབུས་ཀྱི་ཆ་ལས་ཕྲ་མོའི་སྐྲའི་རྩེ་མོ་ཙམ་དེ་ནི་རང་བཞིན་གྱིས་དགའ་བའི་གནས་སོ། །དེ་ནི་རེ་ཞིག་རྟེན་དང་བཅས་པའི་ཕྱོགས་སོ། །བརྟེན་བའི་ཕྱོགས་སུ་རང་རིག་པའི་མཚན་ཉིད་ཅན་རེག་བྱ་ཆེན་པོའི་སྣང་བ་ཆེན་པོ་ཉམས་སུ་མྱོང་བ་ཙམ་གྱིས་རང་བཞིན་དགའ་བ་ཤར་རོ། །ད་ནི་གསང་བ་ཆེན་པོ་ལ་སོགས་ཞེས་བྱ་བ་སྒྲ་ཇི་བཞིན་གྱིས་གསུངས་སོ། །གཞན་ཡང་ཆོས་ཀྱི་དབྱིངས་གྲགས་པ་ལ་སོགས་ཞེས་བྱ་བ་ལ། འདུས་པ་ཆེན་པོའི་རྒྱུད་ཀྱི་གོ་རིམས་ཀྱིས་འདི་སྐད་བཤད་དེ། ཆོས་ནི་སྤྲོས་པ་མེད་པ། དབྱིངས་ནི་སྤྲོས་པ་ཡོད་པ། ཉོན་མོངས་པ་ཞེས་བྱ་བ་ནི་སྟོང་པ་ཉིད་ཀྱི་རང་བཞིན། དེའི་ཕྱིར་ནམ་མཁའ་ཉིད་ཆོས་ཀྱི་དབྱིངས་ཉིད་དཔལ་རྡོ་རྗེ་འཛིན་པས་གསུངས་སོ། །ཁམས་ནི་ས་བོན་ཞེས་སུ་དྲན། །ཞེས་བྱ་བ་ཀུན་རྫོབ་ཀྱི་ངོ་བོ་བྱང་ཆུབ་སེམས་སོ། །ཆོས་ཐམས་ཅད་ནི་ནང་ཡོད་ཅེས་བྱ་བ་ལ་འགྲོ་བའི་འཇིག་རྟེན་བཞུགས་པ་ཞེས་བཤད་དོ། །

---

^{[མ་དཔེ་གཟིགས་ན་འདིར་གནོན།]}

གཏན་ཚིགས་ཞེས་བྱ་བ་ནི་འཇིག་རྟེན་གྱི་ཁམས་མ་ལུས་པ་སྐྱེ་བའི་རྒྱུའོ། །མཆོག་གི་གནས་ཞེས་བྱ་བ་ནི་ཐུགས་ཀྱི་རྡོ་རྗེའི་རྣག་བཞིན། །ཇི་ལྟར་མར་ཁུ་ལ་སོགས་བྱ། །ཞེས་བྱ་བ་སྒྲ་ཇི་བཞིན་གྱི་གསུངས་ཏེ། །དེ་ནི་བསྐྱེད་པའི་རིམ་པའི་ཕྱོགས་སོ། །རྫོགས་པའི་རིམ་པའི་ཕྱོགས་སུ། །ཆོས་ཀྱི་དབྱིངས་ནི་བྷ་གར་གྲགས། །བྷ་གའི་སྒྲ་ནི། སྲིད་པ་མཆོག་གི་དགའ་བ་འབྱུང༌། །སྐྱེ་བྱེད་བྷ་ག་རིན་ཆེན་སྣོད། །ཅེས་བྱ་བ་ལ་དཔལ་ཨིནྡྲ་བྷཱུ་ཏིའི་གཞུང་གིས་རེག་བྱའི་རྩའི་བདག་ཉིད་པདྨའོ། །བའི་ར་བྷུ་ཏིའི་མན་ངག་གི་གཞུང་གིས་རིན་པོ་ཆེ་ཞེས་བྱ་བ་ནི་བྱང་ཆུབ་ཀྱི་སེམས་སྣོད་ཅས་བྱ་བ་ནི་རྩ་གསུམ་གྱི་བདག་ཉིད་ཀྱི་པདྨའོ། །སློབ་དཔོན་ཌོ་མྦི་པའི་གཞུང་གིས་ནི་རིན་པོ་ཆེན་ཞེས་བྱ་བ་ནི་རཀྟ། སྣོད་ཅེས་བྱ་བ་ནི་ག་བུར། སློབ་དཔོན་ཨ་ཝ་དྷཱུ་ཏཱིའི་གཞུང་གིས་ནི། བྷ་གའི་སྒྲས་ནི་བཅོམ་ལྡན་འདས། སྣད་ཀྱི་སྒྲས་ནི་རང་འོད་ཤེས་རབ་མ། དེའི་ཕྱིར་དབང་ཕྱུག་ལ་སོགས་པའི་ཡོན་ཏན་ལྡན་དང་ལྡན། དེ་ནི་བྷ་ག་རབ་ཏུ་གྲགས། །ཞེས་རྒྱུད་ལས་བསྟན་ཏོ། །ད་ནི་བསྐྱེད་རིམ་རྫོགས་རིམ་ལ་ངེས་པར་བསྟན་པའི་ཚེག་བྲི་བར་བྱ། ཆོས་ནི་བྷ་ག་ཞེས་སུ་བསྟན། །ཞེས་བྱ་བ་ལ་གསང་ཞིག་ཆོས་ཀྱིས་གྲགས་པ་ཅན། བྷ་ག་དེ་ནི་སྤྲུལ་པའི་འཁོར་ལོའོ། །གང་ཞིག་ཁམས་ཀྱིས་གྲགས་པ་ཅན། །སེམས་དེ་ནི་གསུང་གི་འཁོར་ལོའོ། །གང་གི་ཕྱིར་ཞེ་ན། གང་ལས་ཁམས་ཀུན་ལ་བྱེ་བྲག་སྐྱེས་ཞེས་སོ། །གང་ཞིག་གཅིག་ཏུ་གྱུར་པའི་གྲགས་པ་ཅན་ཐུགས་དེ་ནི་ཐུགས་ཀྱི་འཁོར་ལོའོ། །དེ་ཡང་ཐུགས་ཀྱི་འཁོར་ལོ་ནི་ཁམས་གསུམ་མ་ལུས་པ་བསྐྱེད་པའི་རྒྱུའོ། །ཀུན་རྫོབ་རྣམ་པའི་གཟུགས་ཀྱིས་ནི། །ཞེས་བྱ་བ་ལ་སྒྲ་ཇི་བཞིན་གྱིས་གསུངས་སོ། །དཔལ་ཕྱག་རྒྱ་ཆེན་པོའི་ཐིག་ལེ་ལས་ལེའུ་དྲུག་པའི་བཤད་པའོ།། །།

ལེའུ་བདུན་པའི་བཤད་པ།

---

^{[མ་དཔེ་གཟིགས་ན་འདིར་གནོན།]}

ད་ནི་བདུན་པ་ལ་ཟབ་པའི་ཚིགས་སུ་བཅད་པ་བྲི། གཞན་ཡང་ཞེས་བྱ་བ་ལ་སོགས་ཞེས་བྱ་བ་ལ་སྒྲ་ཇི་བཞིན་ནོ། །མི་ཤིགས་ཞེས་བྱ་བ་ནི་སློབ་དཔོན་བཛྲ་བྷཱུ་ཏིའི་གཞུང་གིས་ཆ་མེད་པ། སློབ་དཔོན་ཤ་བ་རིའི་གཞུང་གིས་སྐྱེ་བ་དང་བྲལ་བ། ཡེ་ཤེས་ལྔའི་བདག་ཉིད་ཅེས་བྱ་བ་ནི་མེ་ལོང་ལ་བུའི་ཡེ་ཤེས་ལ་སོགས་པའི་ངོ་བོ། །ནམ་མཁའི་

---

^{[མ་དཔེ་གཟིགས་ན་འདིར་གནོན།]}

ནང་དུ་ཐིམ་ཞེས་བྱ་བ་ནི་ཕུང་པོ་ལྔའི་ནང་དུའོ། །ནམ་མཁའི་བདག་ཉིད་ཅེས་བྱ་བ་ནི་དེ་བཞིན་གཤེགས་པ་ལྔའི་ངོ་བོ། དེ་ནི་རེ་ཞིག་དོན་དམ་པའི་ཕྱོགས་སུ་ནི་པདྨའི་སྙིང་པོའི་དབུས་ན་གནས། ཐིག་ལེ་གཅིག་པུ་ཡི་གེ་མེད། །ཅེས་བྱ་བ་ཀུན་རྫོབ་དང་དོན་དམ་པ་གཉིས་སུ་མེད་པའི་བྱང་ཆུབ་ཀྱི་སེམས་མཆོག་གི་དགའ་བའོ། །རྩ་གསུམ་གྱི་བདག་ཉིད་པདྨའི་ལྟེ་བའི་དབུས་སུ་རྟག་ཏུ་ཤར་ཞེས་ལྷ་ལྕམ་ལཀྵྨཱིའི་གཞུང་ངོ༌། །གྲངས་མེད་པ་སྐྱེ་བར་མཛད་པའི་ཕྱིར་རྣམ་པ་ཐམས་ཅད་ཀྱི་ངོ་བོ། །ནམ་མཁའི་རང་བཞིན་གྱིས་སྤྱིར་རྣམ་པ་ཐམས་ཅད་དང་བྲལ་བ་རྡོ་རྗེ་འཛིན་པའི་ཕྱིར་རྡོ་རྗེའོ། །ད་ནི་བདག་གིས་སྒྲ་བཤད་དེ། བདག་གིས་སྒྲ་ལ་སོགས་པ་འདི་ལྟར་གསུངས་ཏེ། ཨའི་ཡིག་འབྲུ་ནི་གསང་བའི་རྡོ་རྗེ་ཧཾ་གི་ཡིག་འབྲུ་ནི་གསང་བའི་ཤེས་རབ། དཔལ་པདྨ་ཤཱི་ཁ་རིའི་གཞུང་གིས་ནི། ཨ་ཡི་ཡིག་འབྲུ་བྱང་ཆུབ་ཀྱི་སེམས་ཧཾ་གི་ཡིག་འབྲུ་དགའ་བ། ཨིནྡྲ་བྷཱུ་ཏིའི་གཞུང་གིས་ཨའི་ཡིག་འབྲུ་སྲིད་པ། ཧཾ་གི་ཡིག་འབྲུ་མྱ་ངན་ལས་འདས་པ། སློབ་དཔོན་ཀུ་ཀུ་རིའི་གཞུང་གིས་ཨའི་ཡིག་འབྲུ་སེམས། ཧཾ་གི་ཡིག་འབྲུ་སེམས། ཧཾ་གི་ཡིག་འབྲུ་སེམས་ལས་བྱུང་བ། འཕགས་པ་ཀླུ་སྒྲུབ་སྙིང་པོའི་གཞུང་གིས་ཨའི་ཡིག་འབྲུ་ཀུན་གྱི་གཞི་རྣམ་པར་ཤེས་པ། ཧཾ་གི་ཡིག་འབྲུ་ཡིད་ཀྱི་རྣམ་པར་ཤེས་པ། དཔལ་དངོས་གྲུབ་ཀྱི་གཞུང་གིས་ཨའི་ཡིག་འབྲུ་དེ་བཞིན་གཤེགས་པས་དབུགས་དབྱུང་བ། སློབ་དཔོན་ནག་པོའི་གཞུང་གིས་ཨའི་ཡིག་འབྲུ་སྤྲོ་བ། ཧཾ་གི་ཡིག་འབྲུ་ལེན་པ། སློབ་དཔོན་བྷི་ར་པ་ཏྲའི་གཞུང་གིས་ཨའི་ཡིག་འབྲུ་སོག །ཧཾ་གི་ཡིག་འབྲུ་ཉེ་བའི་སྲོག །དེ་ལྟ་བུའི་སློབ་དཔོན་གཞན་མའི་གཟུང་ནི་མང་པོ་ཡོད་དོ། །ད་ནི་ཡི་གེ་གཉིས་ལས་སློབ་དཔོན་ཌོ་མྦི་པའི་གཞུང་གིས་ནི་གནས་ཀྱི་ཕུན་སུམ་ཚོགས་པ་བྲི་བར་བྱ། །ཨའི་ཡིག་འབྲུ་རིའི་རྩེ་མོ་ལ་སོགས་ཞེས་བྱ་བ་ལ། རི་རྩེ་ནི་རྡོ་རྗེ་ཉི་མ་འབྱུང་བའི་གནས་སུ་རྡོ་རྗེ་རིན་པོ་ཆེའི་འཁོར་ལོ། །རྩེ་མོ་ནི་གསང་བའི་རྡོ་རྗེ་སྙིང་པོའི་གནས་སུ། སློབ་དཔོན་ཤཱ་ཀྱ་མི་ཏྲའི་གཞུང་གིས་རྡོ་རྗེ་རིན་པོ་ཆེའི་གཙུག་ཏོར་རོ། །ཧཾ་གི་ཡིག་འབྲུ་སྤྱི་བོ་མཚམས་ཀྱི་མཐར་ཞེས་བྱ་བ་ལ། དོན་འདི་ཡིན་ཏེ། སྤྱི་བོ་ཞེས་བྱ་བ་ནི་བདེ་བ་

---

^{[མ་དཔེ་གཟིགས་ན་འདིར་གནོན།]}

ཆེན་པོ་ཚོར་བའི་གནས་པདྨའི་འཁོར་ལོའི་མཚམས་ཀྱི་གནས་ཞེས་བྱ་བ་ནི་གསང་བའི་སྣའི་མཐའ། སླད་མ་ནི་སྒྲ་ཇི་བཞིན་གྱིས་གསུངས་སོ། །དཔལ་ཕྱག་རྒྱ་ཆེན་པོའི་ཐིག་ལེ་ལས་ལེའུ་བདུན་པའི་བཤད་པའོ།། །།

ལེའུ་བརྒྱད་པའི་བཤད་པ།

---

^{[མ་དཔེ་གཟིགས་ན་འདིར་གནོན།]}

ད་ནི་བརྒྱད་པ་ལ་ཟབ་པའི་ཚིགས་སུ་བཅད་པ་རྣམས་བྲི། གསང་བ་ཆེན་པོའི་དོན་ནི་རབ་བཤད་བྱ། ཞིས་བྱ་བ་ལ། དཔལ་པྲ་ཧ་སྟི་སྟའི་གཞུང་གིས་ནི་གསང་བ་ཆེན་པོ་ནི་དངོས་པོ་ལ་སོགས་པ་དང་བྲལ་བ། གསང་བ་ཆེན་པོ་དགའ་བ་ཆེ། །ཞེས་བྱ་བ་ལ། གསང་བ་ཆེན་པོ་ནི་མན་ངག་ཉམས་སུ་མྱོང་བ་དུས་སུ། གང་ཞིག་གློ་བུར་བའི་ནང་གི་བདག་ཉིད་ཀྱི་སྣང་བ་ཆེན་པོ་དེ་ནི་གསང་ཆེན་དགའ་བའོ། །དེའི་དུས་སུ་གང་ཞིག་འཇིག་རྟེན་ལས་འདས་པའི་བདེ་བ་ཆེན་པོའི་བདག་ཉིད་རེག་བྱ་ཉམས་སུ་མྱོང་བ་དེ་ནི་མཆོག་གི་དགའ་མཆོག །དེའི་ཕྱི་ནས་གང་ཞིག་དཔེ་མེད་རེག་བྱའི་རོ་ཉམས་སུ་མྱོང་བ་དེ་ནི་གསང་ཆེན་བདག་ཉིད་དགའ་བྲལ། དེའི་སྐབས་གང་ཞིག་ངོ་བོ་མེད་པའི་ངོ་བོ་ཅན་ཡེ་ཤེས་ཀྱི་སྣང་བ་ཆེན་པོ་དེ་གསལ་བ་ནི་ཐམས་ཅད་བདག་ཉིད་རང་བཞིན་དགའ་བའོ། །རང་བཞིན་ཐུག་པ་མེད་པའི་སྐབས་སུ་གང་བརྗོད་དུ་མེད་པ་དེ་ཁོང་དུ་ཆུད་པར་བྱའོ། །དེ་ནི་གསང་བ་ཆེན་པོ་པས། །གསང་བ་ཆེན་པོ་བདེ་བ་ཆེན་པོ་ཉམས་སུ་མྱོང་བའོ། །དེ་ནི་རེ་ཞིག་དོན་དམ་པའི་ཕྱོགས་སུའོ། །ཀུན་རྫོབ་ཀྱི་ཕྱོགས་སུ་རཏྣ་གའུ་གཞུང་གིས་འདི་སྐད་གསུངས་སོ། །གསང་བ་ཆེན་པོའི་ཤུ་ཀྲ་ཞེས་བྱ་བ་ནི་ཀུན་གཞི་རྣམ་པར་ཤེས་པ། ཤུ་ཀྲ་སོགས་ཞེས་བྱ་བ་ནི་རྣམ་པར་ཤེས་པའི་རླུང༌། སློབ་དཔོན་ནག་པོ་པའི་གཞུང་གིས་ནི་འབྱུང་བ་ཆེན་པོ་བདག་ཉིད་རླུང་སློབ་དཔོན་ཌོ་མྦིའི་གཞུང་གིས་ནི་སྲོག་རྟེན་བྱ་བ། ཕུང་པོ་ལྔའི་བདག་ཉིད་སྐུ། །རྟེན་ནི་ས་ཉིད་ཤེས་པར་བྱ། །ཞེས་བྱ་བ་ལ་དཔལ་དམ་པ་ཤུ་ཀྲཱ་རིའི་གཞུང་གིས་ནི་སྐུའི་རྟེན་བྱང་ཆུབ་ཀྱི་སེམས་སོ། །དེའི་དང་པོའི་དགའ་བ། ཡང་དག་སྲ་བའི་མཚན་ཉིད་ཀྱི་ཕྱིར་ས། མཆོག་གི་དགའ་བ་ཕུན་སུམ་ཚོགས་པས་གཤེར་བའི་མཚན་ཉིད་ཀྱི་ཕྱིར་ཆུ། ཆུ་ནི་སྲོག་ལ་ཚ་ཞེས་བྱ་བ་ལ། དཔལ་ཨིནྡྲ་བྷཱུ་ཏིའི་གཞུང་གིས་བྱང་ཆུབ་ཀྱི་སེམས་བདུད་

---

^{[མ་དཔེ་གཟིགས་ན་འདིར་གནོན།]}

རྩེ་ཞུ་བ་ཉིད་སྙིང་པོའོ། །སློབ་དཔོན་ཀུ་ཀུ་རིའི་གཞུང་གིས་ནི་ཁྱབ་པ་ཉིད། དགའ་བྲལ་འོད་བརྟེན་ཞེས་བྱ་བ་ལ། ཆད་པའི་དགའ་བྲལ་ནང་གི་བདག་ཉིད། །ཆགས་པ་ཆེན་པོས་མེའི་ནུས་པ་ཀུན་དུ་འོད་ཟེར་ཅན། འོད་ནི་མཐར་ཞེས་བྱ་བ་ནི། དཔལ་བདེ་བ་ཆེན་པོའི་གཞུང་གིས་ནི་བདེ་ཆེན་གྲགས་པ་རང་ཞིན་དགའ་བའི་མཐའ་ན་སྐྱེ་བ་མེད་པའི་བརྟེན། །ཞེས་བྱ་བ་ལ་ཀླུ་སྒྲུབ་སྙིང་པོའི་དང་བྲལ་བའོ། །མཐར་ནི་འཕོ་བ་མི་བཤད་ཅེས་བྱ་བ་ལ་ཆད་པའི་མཚན་ཉིད་ནི་མ་ཡིན་ནོ། །འཕོ་བ་དང་དངོས་བོ་མ་ཡིན་བརྟེན། །ཞེས་བྱ་བ་ལ་ཀླུ་སྒྲུབ་སྙིང་པོའི་གཞུང་གིས་ནི་ཆད་པའོ། །དངོས་པོ་མ་ཡིན་མཐར་བརྗོད་ཅེས་བྱ་བ་ལ། དཔལ་པདྨ་ཤ་པ་རིའི་གཞུང་གིས་ནི་མཐར་ཐུག་པའི་རང་བཞིན་དགའ་བ་རྟག་ཏུ་ཤར་བ་ཞེས་བྱ་བའི་དོན་ཏོ། །དེའི་ཕྱིར་མཐའ་ནི་ཕྲ་མོ་བས་ཤིན་ཏུ་ཕྲ་ཞེས་པ་ཉིད་རྒྱུད་ལས་གསུངས་སོ། །རང་བཞིན་གྲགས་པ་བདེ་ཆེན་ཕྱིར། །ཡེ་ཤེས་རླུང་དུ་རབ་ཏུ་གྲགས། །དེ་དང་ནམ་མཁའ་ཞེས་སུ་བསྟན། །ཞེས་བྱ་བ་ལ་རྣམ་པ་ཐམས་ཅད་ཀྱི་སྟོང་པ་ཉིད་ཆེན་པོ། ཡེ་ཤེས་རང་བཞིན་གྱི་ཕྱིར་ཞེས་ལུང་ངོ༌། །གཞན་མ་ནི། ཐམས་ཅད་བདག་ཉིད་རྟག་ཏུ་བཞུགས། །ཞེས་སྒྲ་ཇི་བཞིན་གྱིས་བཤད་དོ། །ཡང་ན། ཐམས་ཅད་བདག་ཉིད་རྟག་ཏུ་བཞུགས། །ཞེས་བྱ་བ་ནི་སྣ་ཚོགས་པའི་སྤྱོད་པའི་སྦྱོར་བས། དངོས་པོ་ཀུན་ལ་ཁྱབ་པ་ཞེས་མཚན་མཆོག་གི་རྒྱུད་ལས་གསུངས་སོ། །དཔལ་ཨིནྡྲ་བྷཱུ་ཏིའི་གཞུང་དེ་དང་འདྲའོ། །ད་ནི་རིགས་ལྔའི་དོན་བཤད་དེ། རིགས་ནི་ཀ་པ་ལ་རུ་བརྗོད། །ཅེས་བྱ་བ་དྲང་བའི་དོན་ཏོ། །ངེས་པའི་དོན་གྱིས་ཀ་པ་ལ་ནི་རུས་ཀྱི་སྡོམ་པ་ཞེས་སློབ་དཔོན་ཨུ་ཏ་མ་ར་བཛྲའི་གཞུང་གིས་སོ། །དཔལ་སརྦ་བྷཱུ་ཏིའི་གཞུང་གིས་ནི་གསལ་བའི་དོན་འདི་ལྟ་སྟེ། དཔལ་རྡོ་རྗེ་སེམས་དཔས་འདུལ་བའི་གང་ཟག་རྗེས་སུ་ཆགས་པས་བདེ་བ་ཆེན་པོའི་སྡོམ་པའི་དུས་སུ། །རྡོ་རྗེ་ལྟེ་བ་ལས་རིགས་ཀྱི་འབྱུང་བའོ་།ཀ་པ་ལ་ནི་དང་པོ་ཀ་བརྗོད་ཅེས་བྱ་བ་ནི་འདུས་ནས་སྔོན་དུ་རྡོ་རྗེ་ཞེས་སྡོམ་པའི་རྒྱ་མཚོའི་རྒྱུད་ཀྱི་མན་ངག་གི་གཞུང་ངོ༌། །ཀ་ནི་དང་པོ་རྩ་བ་ཞེས་བྱ་བ་ལ་རིགས་ཐམས་ཅད་ཀྱི་ནང་ནས་རྡོ་རྗེའི་རིགས་ནི་ཡབ།

---

^{[མ་དཔེ་གཟིགས་ན་འདིར་གནོན།]}

ཡང་ན་རིགས་སུ་ཀུན་ལ་རྒྱུར་གྱུར་པ་དེ་སློབ་དཔོན་བི་ལ་ས་བཛྲའི་གཞུང་ངོ༌། །རྩ་བ་ལྔ་རུ་དབྱེ་ཞེས་བྱ་བ་ནི་དེ་བཞིན་གཤེགས་པ་ལྔའི་རང་བཞིན་ནོ། །དེ་ལས་གྲངས་མེད་པའི་རིགས་སོ། །དེ་བཞིན་གཤེགས་པ་ལྔའི་བདག་ཉིད་ཕུང་པོ་ལྔ་ཉིད་ལ་སོགས་ཞེས་བྱ་བ་ལ་སྟོང་པ་ཉིད་ཀྱི་རྡོ་རྗེའི་རང་བཞིན་ཉིད་ཀྱི་ཕྱིར། ཐ་མལ་པ་དེ་དང་དེ་བཞིན་གཤེགས་པའི་ངོ་བོ། དེ་ཅིའི་ཕྱིར་ཞེ་ན། ཀུན་ལ་འབྱུང་བ་ཆེན་པོ་ལྔ་ལ་དབང་མཛད་པའི་ཕྱིར་རོ། །གང་ཞིག་འབྱུང་བ་ཆེན་པོ་ལྔ་པོ་དེ་ཡང་ལྷའི་དངོས་པོ། ཇི་ལྟར་ཁྱབ་འཇུག་ནི་ས། དབང་ཕྱུག་ཆེན་པོ་ནི་ཆུ། དྲག་པོ་ཆེན་པོ་ནི་མེ། ཚངས་པ་ནི་རླུང༌། རྟག་ཏུ་ཞི་བ་ནི་ནམ་མཁའོ། །དེ་ལ་ལྔ་ལ་གཅིག་ཁྱབ་པ་སྟེ། བདག་ནི་དོན་དམ་པའི་རྩ་ཞེས་བྱ་བ་ལ། འོད་རབ་ཆེན་པོའི་རང་བཞིན། དཔལ་རྡོ་རྗེ་འཛིན་པ་ཆེན་པོའོ། །ཀུན་ལ་ཁྱབ་པ་ཞེས་བྱ་བ་ནི་འདི་ལྟར་གསུངས་ཏེ། འོད་རབ་ཏུ་ཆེན་པོའི་ཕྱིར་ཐམས་ཅད་ཁྱབ་པའོ། །འབྱུང་བ་ཆེན་པོ་ལ་ཀུན་ལ་ཁྱབ་ན་ཡང་དེ་ལྟ་མོད་ཀྱི་དེ་ལ་ཡང་འོད་རབ་ཆེན་པོ་གསལ་བར་བྱེད་པའོ། །དེའི་ཕྱིར་ཁྱད་པར་གྱིས་ཀུན་ལ་ཁྱབ་པའོ། །སློབ་དཔོན་ཙནྡྲ་ཀ་རིའི་གཞུང་གིས་ཐམས་ཅད་ཀྱི་སྒྲས་ནི་འབྱུང་བ་ཆེན་པོ་ལྔས། དེ་རྣམས་ཁྱབ་པ་སྣང་བ་སྐྱེ་བར་བྱེད་པ། འོད་རབ་ཆེན་པོ་ཞེས་བྱ་བའི་དོན་ཏེ། ཤིན་ཏུ་སྤྲོས་པ་དང་བྲལ་བའི་སྟོང་པ་ཉིད། སྐྱེ་བ་དང་འཇིག་པ་དང་བྲལ་བའི་ཕྱིར་འཕོ་བ་མེད་པ། ནམ་མཁའ་ལ་གཞན་གྱི་ཕྱིར་འོང་བ་མེད་པ། མི་གསལ་བའི་ཕྱིར་དང༌། དངོས་པོ་མེད་པའི་ཕྱིར་སྐྱེ་བ་མེད་པ། གཞན་མ་ཐུགས་རྗེ་བཏུབ་པ་ལ་སོགས་སྒྲ་ཇི་བཞིན་གྱིས་གསུངས་སོ། །དཔལ་ཕྱག་རྒྱ་ཆེན་པོའི་ཐིག་ལེ་ལས་ལེའུ་བརྒྱད་པའི་བཤད་པའོ།། །།

ལེའུ་དགུ་པའི་བཤད་པ།

---

^{[མ་དཔེ་གཟིགས་ན་འདིར་གནོན།]}

ད་ནི་དགུ་པ་ལ་ཟབ་པའི་ཚིགས་སུ་བཅད་པ་བྲི་བར་བྱ། ཕྱག་རྒྱ་སྒྲ་ནི་བདག་པོར་བྱེད་རྒྱུད་སརྦ་བྷཱུ་ཏིའི་དེ་ཁོ་ན་ཉིད་བསྟན་པ་ལས་གསུངས་སོ། །དཔལ་ཨིནྡྲ་བྷཱུ་ཏིའི་གཞུང་གིས་ནི་ཀུན་རྫོབ་ཀྱི་ཕྱོགས་སུ་བརྟུལ་ཞུགས་ཆེན་པོ། དོན་དམ་པའི་ཕྱོགས་སུ་ཡེ་ཤེས་ཀྱི་དོན་རྒྱས་བཏབ་པ། གསང་བའི་ཕྱོགས་སུ་ཐབས་དང་ཤེས་རབ་མཉམ་པར་སྦྱོར་བ། བརྡ་

---

^{[མ་དཔེ་གཟིགས་ན་འདིར་གནོན།]}

ཞེས་བྱ་བ་ནི་གསང་བའི་མན་ངག་ལས་དྲངས་པ། ཡང་ན་གསང་བའི་དམ་ཚིག་ལ་འདུས། སློབ་དཔོན་གཞན་མའི་གཞུང་གིས་ནི་ལག་པ་ལ་སོགས་པའི་སྦྱོར་ཐབས་ཀྱིས་ཕྱག་རྒྱ་གླེང་ངོ༌། །དཔལ་བཛྲཱ་བྷཱུ་ཏིའི་གཞུང་གི་ས་ནི་ཁམས་གསུམ་མ་ལུས་པ་ཕྱག་རྒྱ་བདག་ཉིད་དོ། །གཞན་མ་ནི་རྡོ་རྗེ་སློབ་དཔོན་གྱི་ཞལ་སྔ་ནས་སྒྲ་ཇི་བཞིན་དུ་གསུངས་སོ། །རིགས་ཀྱི་བྱེ་བྲག་གིས་གང་ཞིག་གཞོན་ནུ་མ་རིགས་ངན་རྡོ་རྗེ་འཛིན་པས་གསུངས་པ་དེ་ནི་རིགས་ཀུན་ལ་རང་བཞིན་གྱི་རིགས་མེད་པར་རབ་ཏུ་བསྟན་ཏོ། །གང་གི་ཕྱིར་ཞེ་ན། དེ་བཞིན་གཤེགས་པ་ལ་རིགས་དང་སྐྱེ་བ་མེད་དོ། །སློབ་དཔོན་བའི་ར་བྷཱུ་ཏིའི་གཞུང་གིས་ཀུན་དེ་བཞིན་གཤེགས་པའི་ཕྱིར་བཅོམ་ལྡན་འདས་ཀྱི་རིགས་ཀྱི་བྱེ་བྲག་དག་པ་སྐུ་གསུང་ཐུགས་ཀྱི་རྣམ་པར་དག་པས། གཞང་སྲིང་མོ་ལ་སོགས་ཀྱིས་བསྟན་པ་དེ་ནི་རྣམ་པར་རྟོག་པ་དང་བྲལ་བའི་ཡེ་ཤེས་འབྱུང་བའི་དོན་དུ་ཞེས་ལྷ་ལྕམ་ལཀྵྨཱིའི་གཞུང་ངོ༌། །ཕྱི་ནས་ཀྱང་རྩའི་དོན་གྱིས་གང་ཞིག་རྣམ་པར་དག་པ་དེ་ཡང་མི་མྱོང་བ་ཞེས་བྱ་བའི་དོན་ཏོ། །ས་ལ་སོགས་པའི་དོན་གྱིས་གང་ཞིག་རྣམ་པར་དག་པ་དེ་ནི་ཀུན་ལ་ཡོད་ཅེས་དགོངས་སོ། །དེ་བས་སྲིང་མོ་ལ་སོགས་ཀྱིས་བྱེ་བྲག་མི་ལ་སོགས་ཀྱི་བྱེ་བྲག་མི་བྱ་ཞེས་རྣལ་འབྱོར་མ་བཛྲ་བི་ཏིའི་ཞུང་ངོ༌། །རོ་དྲུག་ནི་དོན་གྱི་གང་ཞིག་སྲིང་མོ་ལ་སོགས་པ་བསྟན་པ་དེ་ནི་སློབ་དཔོན་བའི་ར་བྷཱུ་ཏིའི་གཞུང་གིས་ཁམས་གསུམ་གསོ་བའི་ཕྱིར་ཉེ་བར་མྱོང་བར་བྱ་ཞེས་གསུངས་སོ། །དེ་ཀུན་འབད་པས་མཆོད་པར་བྱ། །མྱུར་དུ་དངོས་གྲུབ་ཐོབ་པར་འགྱུར། །ཞེས་བྱ་བ་ལ། ཐབས་དང་ཤེས་རབ་གཉིས་སུ་མེད་པའི་སྦྱོར་བས་དགའ་བར་བྱས་ཞེས་དགོངས་སོ། །གང་གི་ཕྱིར་ཞེ་ན། མྱུར་དུ་དངོས་གྲུབ་སྟེར་ཞེས་དགོངས་པའི་དོན་ཏོ། །དཔལ་ཕྱག་རྒྱ་ཆེན་པོའི་ཐིག་ལེ་ལས་ལེའུ་དགུ་པའི་བཤད་པའོ།། །།

ལེའུ་བཅུ་པའི་བཤད་པ།

---

^{[མ་དཔེ་གཟིགས་ན་འདིར་གནོན།]}

ད་ནི་ལེའུ་བཅུ་བའི་ཟབ་མོའི་ཚིགས་སུ་བཅད་པ་བྲི། རྡོ་རྗེ་དང་ས་ལ་སོགས་པའི་མཆོད་རྟེན་ལ། དེ་ཁོ་ན་ཉིད་ཤེས་པ་ཅན་གྱིས་ཕྱག་རྒྱ་ལ་སོགས་པ་དགག་ཅེས་རྒྱུད་ཀྱི་གོ་རིམས་ཀྱིས་ལྟ་ལྕམ་ལཀྵྨཱིའི་གཞུང་གིས་སློབ་དཔོན་གྱི་ཞལ་སྔ་ནས་གསུངས་སོ། །དེ་ཅིའི་ཕྱིར་ཞེ་ན། དེ་ཁོ་ན། དེ་ཁོ་ན་ཉིད་ཤེས་

---

^{[མ་དཔེ་གཟིགས་ན་འདིར་གནོན།]}

པ་རྣམས་ཀྱི་སེམས་ཀྱིས་ངོ་བོ་ནི་ཤེས། དེའི་ཕྱིར་ས་ལ་སོགས་པ་ལྷའི་སྐུ་སྤངས་ཏེ། དེ་བཞིན་གཤེགས་པ་ལྔའི་བདག་ཉིད་ཀྱི་ལུས་པོ་འབྱུང་བའི་བདུད་རྩི་རྫས་ཀྱིས་ཉིད་ཐུགས་ཀྱི་རྡོ་རྗེ་ལ་བཞུགས་པའི་གནས་སྐུའི་རྒྱལ་པོ་མཆོད་པར་བྱ་ཞེས་དགོངས་སོ། །གཞན་མ་ནི་སྤྱི་བོ་དན་བཤད། རིགས་ལྔའི་མཉམ་པར་སྦྱོར་བ་ལ་སོག་རྡོ་རྗེ་སློབ་དཔོན་གྱི་ཞལ་སྔ་ནས་སྔར་བསྟན་པ། དེ་བཞིན་དུ་ཀུན་སངས་རྒྱས་ཡིན་པའི་དགོངས་པས་རིགས་ཀྱི་བྱེ་བྲག་དགག་གོ །བཏུང་བ་དང་མི་བཏུང་བ་ནི་སྤྱད་པར་བྱའོ་ཞེས་བྱ་བ་ལ། རྣམ་པར་རྟོག་པ་མེད་པ་ཉིད་ལ་བརྡའོ། །སོགས་པའི་སྒྲས་ནི་གཅེས་པ་དང་མི་གཅེས་པའོ། །དཔལ་བཱི་ར་བྷཱུ་ཏིའི་གཞུང་གིས་ཤེས་རབ་དང་ཡེ་ཤེས་ཀྱི་དབང་མི་གནས་པ་ནི་ཤེས་རབ་ཡེ་ཤེས་བཏུང་བ་ནི་མཆོག་གི་དགའ། མི་བཏུང་བ་ནི་ཆད་པའི་དགའ་བ། དེ་ཡང་མི་སྤྱོད་ཅེས་བྱ་བའི་དོན་ཏོ། །བུད་མེད་སྐལ་ལྡན་མིན་མི་སྨྲ། །ཞེས་བྱ་བ་ལ་འདི་སྐད་གསུངས་ཏེ། བུད་མེད་ལ་སྐུར་པ་འདེབས་པས་ཕྱག་རྒྱ་ཆེན་པོའི་དངོས་གྲུབ་མི་འཐོབ་ཅེས་དཔལ་ཛྙན་བྷཱུ་ཏིའི་གཞུང་ངོ༌། །གཞན་མ་ནི་སྒྲ་ཇི་བཞིན་གསུངས་སོ། །ད་ནི་གནས་ལ་སོགས་པ་རྣལ་འབྱོར་མའི་རྒྱུད་ལས་གསུངས་པའི་རིམ་པས་རྡོ་རྗེ་སློབ་དཔོན་གྱི་ཞལ་སྔ་ནས་ཀྱིས་རིམ་པ་འདི་ལྟར་གསུངས་ཏེ། ལེགས་དགྱེས་ཆེན་མོ་འབྱུང་བའི་དུས་སུ་གནས། གང་ཞིག་བྱང་ཆུབ་ཀྱི་སེམས་ལ་བརྟེན་པ་དེ་ནི་གནས། བདེ་བའི་བདུད་རྩི་ལ་གནག་ཞིག་འཕེལ་བ་དང་བརྟེན་པ་དེ་ནི་ཉེ་བའི་གནས། བདེ་བ་ལ་ཡང་དང་ཡང་དུ་གང་ཞིག་སྐྱེ་བ་དེ་ནི་ཞིང༌། བདེ་བ་ལ་རྣག་གི་གནས་སུ་གང་ཞིག་རྒྱས་པ་དེ་ནི་ཉེ་བའི་ཞིང༌། ཅི་འབྱུང་བ་བདེ་བའི་དངོས་པོ་ལ་བཟུང་བས་ཚནྡོ་ཧ། དེ་རིང་ཉེ་བའི་བྱེད་པས་ཉེ་བའི་ཚནྡོ་ཧ། བདེ་བའི་ཆོས་ལ་ཡང་དག་པར་སྦྱོར་བར་བྱེད་པས་འདུས་པ། དེར་ཉེ་བའི་ཕྱིར་ཉེ་བའི་འདུས་པ། ཉེ་བ་ཞེས་བྱ་བ་ནི་ཇི་ལྟར་ཤེལ་གྱི་དུམ་བུ་ལ་ཕྱིའི་རྩི་བཞིན་ནོ། །བདེ་བ་ཆེན་པོ་ལ་ཐོག་མ་དང་ཐ་མར་གང་ཞིག་དངོས་པོ་མེད་པ་དེ་ནི་དུར་ཁྲོད། དངོས་པོ་མེད་པའི་མཚན་ཉིད་ཀྱིས་གནག་ཞིག་བདེ་བ་ཉམས་སུ་མྱོང་བ་དེ་ནི་ཉེ་བའི་དུར་ཁྲོད། བདེ་བ་ཉམས་སུ་

---

^{[མ་དཔེ་གཟིགས་ན་འདིར་གནོན།]}

མྱོང་བ་དེ་ཡང་དག་པར་ཁྱབ་པར་འཕེལ་བའོ་།དེ་དང་དྲན་པས་ཉེ་བར་འཕེལ་བའོ། །དེ་ཀུན་བཅུ་གཉིས་ཀྱི་བདག་ཉིད། །བདེ་བ་ཉམས་སུ་མྱོང་བ་ལས། །གནས་བརྟན་པས་བདེ་བ་ཆེན་པོ་ཚོར་བའི་གནས་སོ། །ནང་གི་བདག་ཉིད་ཀྱི་གནས་ནི་སྤྱི་བོ་དང་སྤྱི་གཙུག་གི་གནས་སོ། །ཕྱིའི་གནས་ནི་ཨུ་རྒྱན་ལ་སོགས་པའོ། །སློབ་དཔོན་གཞན་མའི་གཞུང་གིས་གནས་ལ་སོགས་པ་དོན་གྱིས་ཨ་རྣམས་ལ་བསྟན་པར་བྱས་སོ། །མཆོད་པའི་དུས་སུ་མཆོད་པར་བྱ། །ཞེས་བྱ་བ་འདི་ལྟར་གསུངས་ཏེ། མཆོད་པའི་དུས་ཞེས་བྱ་བ་ནི་རྡོ་རྗེ་འཛིན་པའི་ང་རྒྱལ་གྱིས་བསྒྲུབ་པ་དང་སྒྲུབ་ཐབས་ཀྱི་སྦྱོར་བ། མཆོད་པ་ཞེས་བྱ་བ་ནི་གཉིས་སུ་མེད་པའི་ངོ་བོས་ལྷའི་རྣམ་པས་ཐབས་དང་ཤེས་རབ་བདག་ཉིད་ཀྱི་སྒྲ་དགའ་བར་བྱ། །རི་བོང་ཅན་འོད་མེ་ཏོག་གི །ཞེས་བྱ་བ་ལ། སློབ་དཔོན་བཱི་ར་བྷཱུ་ཏིའི་གཞུང་གིས། རི་བོང་ཅན་གྱི་སྒྲ་ནི་ཟླ་གཟལ་བའི་སྒྲ་ནི་བྱང་ཆུབ་ཀྱི་སེམས། འོད་ཟེར་སྒྲས་ནི་ཐིག་ལེ་རྣམས་ཀྱི་མེ་ཏོག་གིས་ཞེས་བྱ་བས་ནི་ཡིད་འཕྲོག་ཅན་གྱིས་སོ། །ཡང་ན་དཀར་བས་སོ། །མེ་ཏོག་ཉི་མ་དམར་བ་ཞེས་བྱ་བ་ལ་རང་ལས་བྱུང་བའི་མེ་ཏོག་གོ །སློབ་དཔོན་ཛྙཱ་ན་བྷཱུ་ཏིའི་གཞུང་གིས་ནི་འདི་ལྟར་བཤད་དེ། སྲོག་ནི་བདེ་བ་ཆེན་པོའི་འཁོར་ལོ་ལ་གནས་པའི་བྱང་ཆུབ་ཀྱི་སེམས་སོ། །སྤྱོད་པ་ཞེས་བྱ་བ་ནི་འཁོར་ལོ་གསུམ་གྱི་བྱུགས་པའི་ནང་གི་བདེ་བ་ཆེན་པོ་ཚོར་བའི་གནས་སུ་དབང་དྲུག །ལོངས་སྤྱོད་དང་མི་སྣང་བའོ། །ལྷ་བཤོས་ཀྱི་སྒྲས་ནི་ཚིམ་པར་བྱེད་པ། དབུལ་བའི་སྒྲས་ནི་ཉམས་སུ་ཞེས་བྱ་བ་ནི་དེ་མ་ཐག་ཏུ་སྨྲས་པའི་བདེ་བ་ཆེན་པོའི་འཁོར་ལོའི་གནས་སོ། །སློབ་དཔོན་ཌོ་མྦིའི་གཞུང་གིས་ནི་འདབ་མ་དྲུག་ཅུ་རྩ་བཞི་དང་ལྡན་པའི་སྤྲུལ་པའི་འཁོར་ལོ། །སློབ་དཔོན་བཱི་ར་བྷཱུ་ཏིའི་གཞུང་གིས་ནི། ཤེས་རབ་མའི་མངལ་གྱི་པདྨར། སྲོག་གཅོད་པར་བྱ་ཞེས་པ་རྒྱལ་མི་བཱི་ར་མ་ཏིའི་གཞུང་གིས་ཤེས་རབ་མའི་པདྨར་བྱང་ཆུབ་སེམས་ཀྱི་མེ་ཏོག་གིས་མཆོད་པར་བྱའོ། །མི་དགའ་མི་བྱ་ཞེས་པ་ལ་དཔལ་ནཱ་ག་བོ་དྷིའི་གཞུང་གིས། རང་ལ་ཐབས་ཀྱི་མཆོག་གི་དགའ་བ་ལས་གཞན་མི་གནས་རེག་པར་མི་བྱ། ཤེས་རབ་མ་ལ་མི་བརྩོན་པའི་སེམས་མི་བྱའོ་ཞེས་སོ། །དེ་ཅིའི་ཕྱིར་ཞེ་ན།

---

^{[མ་དཔེ་གཟིགས་ན་འདིར་གནོན།]}

མཆོད་པའི་སྐབས་སུ་སྦྱིན་པ་ལ་སོགས་ཀྱི་དོན་གལ་ཆེའོ། །དེའི་སྲོག་གཅོད་པ་ལས་ཡང་དག་པའི་རབ་མཆོག་གི་དགའ་བའི་ངོ་བོ་བསོད་ནམས་ཀྱི་འབྲས་བུ་རྙེད་ཅེས་ལུང་གི་གོ་རིམས་ཀྱིས་དཔལ་པདྨ་ཤྲཱི་ཀ་རིའི་གཞུང་ངོ༌། །ད་ནི་གསང་བའི་དཀྱིལ་འཁོར་བསྟན་པ། ཇི་ལྟར་རྡོ་རྗེ་སློབ་དཔོན་གྱི་ཞལ་ནས་བཤད་པ་དེ་ལ་འདི་རུ་གསལ་བར་བྲི་བར་བྱ། གྲུབ་གསུམ་ལ་སོགས་ཞེས་བྱ་བ་ལ། གྲུ་གསུམ་ཞེས་བྱ་བ་ནི་ལོངས་སྤྱོད་དང༌། མི་སྣང་བ་དང༌། དབང་ལ་མཉམས་སུ་མྱོང་བའི་གནས་སོ། །དམར་ཞེས་བྱ་བ་ནི་འོད་རབ་ཀྱི་རང་བཞིན། རན་པ་ཞེས་བྱ་བ་ནི་ཤིན་ཏུ་རན་པའི་ཆོས་ཀྱི་དབྱིངས་ཀྱི་ཡེ་ཤེས་ཀྱི་ངོ་བོ། །རིམ་པ་གཉིས་ཞེས་བྱ་བ་ནི་རྟེན་དང་བརྟེན་པའི་མཚན་ཉིད་ཅན། དཀྱིལ་འཁོར་ཞེས་བྱ་བ་ནི་སྙིང་པོའི་རང་བཞིན། ནང་གི་རིམ་པ་ལ་དཔལ་ལྡན་ཞེས་བྱ་བ་ནི་སློབ་དཔོན་ཤ་བ་རིའི་གཞུང་གིས་ནི། ནང་གི་རིམ་པ་ནི་བརྟེན་པའི་གནས། དཔལ་གྱི་སྒྲས་ནི་བཅོམ་ལྡན་འདས་བདག་མེད་མ། བཅོམ་ལྡན་འདས་བྱང་ཆུབ་སེམས་ཡིད་ཅེས་བྱ་བ་ནི་དོན་དམ་པའི་བྱང་ཆུབ་སེམས་ཀྱི་ཐིག་ལེར་གྲགས་པ་ཅན་མགོན་པོ་ཧེ་རུ་ཀ །ཕྱི་ནས་བརྟེན་པའི་གནས་སོ། །རིགས་གསུམ་ཅན་གྱི་རྣལ་འབྱོར་མ། །ཞེས་བྱ་བ་ནི་སྐུ་དང་གསུང་དང་ཐུགས་ཀྱི་ངོ་བོ་ཅན། རོ་མ་དང་འཛིན་མ་དང་རྟོག་མེད་མའོ། །སློབ་དཔོན་མཚོ་སྐྱེས་རྡོ་རྗེའི་གཞུང་གིས་ལུས་དང་ངག་དང་ཡིད་འབབ་པ་དེ་ནི་ནང་གི་དཀྱིལ་འཁོར་གྱི་རྣམ་པར་དག་པའོ། །ད་ནི་ལྷ་མོ་དག་འདྲི་བར་བྱ། ལྷ་མོའི་སྒྲས་ནི་བདག་པོ་དེ་སརྦ་བྷཱུ་ཏིའི་དེ་ཁོ་ན་ཉིད་ཀྱིས་བསྟན་པའི་གཞུང་ངོ༌། །དཔལ་ཨིནྡྲ་བྷཱུ་ཏིའི་གཞུང་གིས་ནི་ཡན་ལག་ཉེ་བར་གསུངས་སོ། །ལུས་པོ་གནས་ཞེས་བྱ་བ་ལ་ལུང་ལ་བརྟེན་པའི་གོ་རིམས་ཀྱི་རྩ་བའི་བསྟན་པའོ། །གང་གི་ཕྱིར་ཞེ་ན། སྒྲ་ནི་དཀྱིལ་འཁོར་རོ། །ཆོས་ཀྱི་དབྱིངས་ཀྱི་རང་བཞིན་གྱི་ཕྱིར་དེ་རང་བྷ་ག་བཤད་དོ། །བྷ་ག་ལས་བྱུང་བྱང་ཆུབ་སེམས་ཀྱི་རྗེ་བཙུན་ནོ། །འབྱུང་བའི་སྒྲ་ནི་ཤར་ཞེས་བྱ་བའི་དོན་ཏོ། །ཇི་ལྟར་ནམ་མཁའ་ལ་རྒྱལ་བའི་ཟླ་བའོ། །དུར་ཁྲོད་བརྒྱད་ཀྱི་དབུས་ན་བཞུགས། །ཞེས་བྱ་བ་ལ་འདི་སྐད་བཤད་དོ། །ལྷ་མོའི་ཡན་ལག་དང་ལྡན་པའི་

---

^{[མ་དཔེ་གཟིགས་ན་འདིར་གནོན།]}

གསང་བའི་དཀྱིལ་འཁོར་ཕྱི་དང་ནང་དང་གསང་བའི་དུར་ཁྲོད་ཀྱིས་བརྒྱན་པའོ། །ཕྱིའི་གཏུམ་དྲག་པ་ལ་སོགས་པ་མེའི་སྲེག་པའི་གནས། ནང་གི་སྒོ་དགུ་དང་ལྡན་པའི་སྐུ། གསང་ཟ་ནི་བདེ་བའི་བདག་ཉིད་བྱང་ཆུབ་སེམས་ཀྱི་དབུགས་འབྱུང་བའི་མི་སྣང་བའི་གནས་སོ། །དཔལ་བདེ་བ་ཆེན་པོའི་གཞུང་གིས་དུར་ཁྲོད་བརྒྱད་ལ་སློབ་དཔོན་གྱི་ཞལ་སྔ་ནས་འདི་སྐད་བཤད་དེ། གསང་བའི་ཆུ་སྐྱེས་ཀྱི་དབུས་སུ་རེག་བྱའི་རྩ་བརྒྱད་འདབ་མ་ཅན་པདྨ་དམར་པོ་དེའི་དབུས་སུ་བདེ་བ་ཆེན་པོའི་རྒྱལ་པོའི་བྱང་ཆུབ་ཀྱི་སེམས། ཤར་གྱི་འདབ་མར་ཀུན་རྫོབ་ཀྱི་གཟུགས་ཅན་བྱང་ཆུབ་ཀྱི་སེམས་མི་སྣང་བའི་ངོ་བོར་གྱུར་པས་ཚིག་པའི་མཚན་ཉིད་གཏུམ་དྲག །ལྷོ་རུ་ལོངས་སྤྱོད་ཉིད་གྱུར་པས་མི་འཚིག་པའི་མཚན་ཉིད་དབྱིབས་ཅན། ནུབ་ཏུ་ལོངས་སྤྱོད་ལས་འདས་པའི་མཚན་ཉིད་ཅན་ཚང་ཚིང༌། བྱང་དུ་དབང་ཐོབ་པས་དུམ་བུར་མ་གྱུར་བའི་མཚན་ཉིད་ཅན་འབར་བ། མིའི་མཚམས་སུ་ཆད་པའི་དགའ་བར་གྱུར་པས་འཇིགས་པའི་མཚན་ཉིད་དམྱལ་ཚོགས། ཆུའི་མཚམས་སུ་ཆད་པར་གྱུར་པ་མི་བཞད་པའི་མཚན་ཉིད་ཅན་འཇིགས་པར་བྱེད་པ། རླུང་གི་མཚམས་སུ་ཆད་པའི་གནས་ནས་སྲོག་གི་རླུང་དང་ཕྲད་པས། ཕྱི་ནས་ཀྱང་དགའ་བའི་གནས་སུ་སླེབ་པའི་ཕྱིར། མདུང་རྩེ་བསྐྱོད་པའི་མཚན་ཉིད་ཅན་ཧ་ཧད་གོད་པ། དབང་གི་མཚམས་སུ་ཅུང་ཟད་གྱེན་དུ་འགྲོ་བས་མཆོག་གི་དགའ་བས་འགེགས་པའི་མཚན་ཉིད་གཡེར་ཁ་ཅན་ནོ། །དེ་ལྟར་གསང་བ་ཆེན་པོའི་དུར་ཁྲོད་བརྒྱད་ཀྱི་རྩ་བའི་འདབ་མའི་གནས་ལས་ཅུང་ཟད་གཡོ་བ་ནི་ཆད་པ་ལ་སོགས་ཀྱི་གནས་བསྟན་ཏེ། དེ་རུ་རྩའི་འདབ་མ་ལ་རིམ་པ་འདི་ཡིན་ཏེ། མཐུ་དྲག་མ་དང༌། མཐུ་བྱེད་མ། རོ་མཆོག་མ་དང༌། མཐུ་སྒྲ་མ། ནམ་མཁའ་མ་དང༌། ཆུ་སྤྱིན་མ་དང༌། རུལ་པ་མ་དང༌། སེར་སྣ་མའོ། །རྩའི་ཡན་ལག་དང་ཉེ་བའི་ཡན་ལག་མང་པོ་ཡོད་པའི་ཕྱིར་རོ། །ཤིང་གི་སྒྲ་ཉིད་མཆོག་གི་དབང་ཕྱུག་གིས་གསུངས་ཞེས་སློབ་དཔོན་ཤ་བ་རིའི་གཞུང་ངོ༌། །རྩའི་ཤིང་མེ་ཏོག་ལ་སོགས་པ་རྒྱུད་ཀྱི་ཞེས་བྱང་ཆུབ་སེམས་འབྱུང་བའི་ཕྱིར་དོན་ཏོ། །སོགས་པའི་རང་ལས་བྱུང་བའི་མེ་ཏོག །མེ་ཏོག་གིས་མེད་

---

^{[མ་དཔེ་གཟིགས་ན་འདིར་གནོན།]}

པར་ཇི་ལྟར་མཆོད། དཀྱིལ་འཁོར་གྱི་སྟེང་དུ་འགྱུར་ཞེས་བྱ་བ་ལ་འདི་ལྟར་བཤད་དེ། བྱང་ཆུབ་ཀྱི་སེམས་རང་ལས་བྱུང་བའི་མེ་ཏོག་མེད་པར། ཤེས་རབ་མའི་ཕྱག་རྒྱའི་དཀྱིལ་འཁོར་ལ། མི་སྣང་བ་དང༌། ལོངས་སྤྱོད་དང་དབང་གི་གྲགས་པ་ཅན་མཆོད་པར་མེད་ཅེས་དགོངས་སོ། །སློབ་དཔོན་བི་ལ་བཛྲའི་གཞུང་གིས་ནི་གསང་བའི་མེ་ཏོག་ལ་སོགས་པ་མེད་པས། ཐབས་དང་ཤེས་རབ་ལ་རྫོགས་པ་མེད་པ་རྣལ་འབྱོར་མའི་གཞུང་གིས་ནི་ཕྱག་རྒྱ་དང༌། དངོས་གྲུབ་མི་འགྲུབ་པོ། དཔལ་ཕྱག་རྒྱ་ཆེན་པོའི་ཐིག་ལེ་ལས་ལེའུ་བཅུ་པའི་བཤད་པའོ།། །།

ལེའུ་བཅུ་གཅིག་པའི་བཤད་པ།

---

^{[མ་དཔེ་གཟིགས་ན་འདིར་གནོན།]}

ད་ནི་ལེའུ་བཅུ་གཅིག་པ་ལ་ཟབ་པའི་ཚིགས་སུ་བཅད་པ་བྲི། ཉོན་ཅིག་སྦྱིན་སྲེག་རབ་ཏུ་བཤད། །ཅེས་བྱ་བ་ལ་སོགས་པའི་སྒྲ་ཇི་བཞིན་གྱིས་གསུངས་སོ། །ལྟེ་བའི་གནས་སུ་ཚུལ་གྱིས་གནས། །ཞེས་བྱ་བ་ལ། དཔལ་གསང་ཆེན་རྡོ་རྗེའི་གཞུང་གིས་ནི། གསང་བའི་པདྨའི་སྙིང་པོ། སློབ་དཔོན་ཌོ་མྦི་པའི་གཞུང་གིས་ནི། འདབ་མ་དྲུག་ཅུ་རྩ་བཞིའི་ལྟེ་བའི་གནས་སོ། གསང་བའི་པདྨའི་ནི་སློབ་དཔོན་གྱི་ཞལ་སྔ་ནས་རེག་བྱའི་རྩའི་འདབ་མར་བཤད་པའོ། །དེའི་ལྟེ་བའི་གནས་སུ་ཚུལ་རིག་པར་བྱའོ། །དེའི་ཕྱིར་ཚུལ་གྱི་མཐའ་མར་གསང་བའི་པདྨ་ཞེས་རྒྱུད་ལས་བཤད་དོ། །ཚུལ་གྱི་སྒྲས་ནི་གློ་བུར་བའི་སྒྲའོ། །སློབ་དཔོན་བཱི་ར་བྷཱུ་ཏིའི་གཞུང་གིས་ནི་བྱང་ཆུབ་སེམས་ཀྱི་སྒྲའོ། །དེ་རུ་རང་དབང་གི་རླུང་ཞེས་བྱ་བ་ནི་སློབ་དཔོན་ཨུ་རྒྱན་གྱི་གཞུང་གིས་ནི་རེག་བྱའི་རྩ་བརྒྱད། འདབ་མའི་ལྟེ་བའི་དབུས་སུ་གློ་བུར་བའི་ཚུལ་ལ་གཉིས་སུ་མེད་པའི་རང་བཞིན་གྱིས་རླུང་རྟག་ཏུ་ཤར་རོ། །ཀུན་དུ་བསྐོར་ཏེ་མི་བསྐོར་ཞེས་བྱ་བ་ནི་རྡོ་རྗེ་སློབ་དཔོན་གྱི་ཞལ་སྔ་ནས་འདི་སྐད་ཅེས་བཤད་དོ། །ཀུན་དུ་བསྐོར་བ་ཞེས་བྱ་བ་ནི་ཐབས་དང་ཤེས་རབ་ཉེ་བར་སྦྱོར་བའི་དུས་སུ། རང་བཞིན་གྱི་རླུང་ཀུན་ལ་ཤར་ན་ཡང་ཁྱད་པར་གྱིས་གཡས་སྐོར་དུ་འབྱུང༌། མི་བསྐོར་ཞེས་བྱ་བ་ནི་གཡོན་ལ་བསྐོར་བའོ། །དཔལ་བཛྲ་བྷཱུ་ཏིའི་གཞུང་གིས་ཀུན་དུ་བསྐོར་ཞེས་བྱ་བ་ནི་སྐད་ཅིག་འབྱུང་བའོ། །མི་བསྐོར་ཞེས་བྱ་བ་ནི་ཐིམ་པར་གྱུར་པའོ། །དབང་པོ་གཉིས་ཀྱི་བུད་ཤིང་སྦྱོར་བ་ལས། །ཐབས་

---

^{[མ་དཔེ་གཟིགས་ན་འདིར་གནོན།]}

དང་ཤེས་རབ་མཉམ་པར་འཁྱུད་པའི་བསྒྲུབ་པ་དང༌། སྒྲུབ་ཐབས་ཆེན་པོའོ། །རླུང་ལ་མེ་འབར་བྱ་བ་ལ་དེ་མ་ཐག་ཏུ་སྨྲས་པའི་རང་བཞིན་གྱི་རླུང་གིས་བསྐུལ་པར་བྱ་བའི་གཏུམ་མོའི་ངོ་བོ་ཅན་བཅོམ་ལྡན་འདས་མ་རྡོ་རྗེ་དབྱིངས་ཀྱི་དབང་ཕྱག་མ་འབར་རོ། །སྟེང་གི་འཁོར་ལོ་ལ་གནས་པའི་མར་ཞེས་བྱ་བ་ལ། སྟེང་ནི་བདེ་བ་ཆེན་པོའི་འཁོར་ལོ། །མར་ནི་བྱང་ཆུབ་ཀྱི་སེམས་སོ། །དེས་ནི་ཅི་སྨྲས་ན་རང་བཞིན་གྱི་རླུང་གིས་ཁོང་དུ་ཆུད་པར་བྱས་པའི་གཏུམ་མོའི་འོད་ཟེར་གྱིས་བདེ་བ་ཆེན་པོ་ན་གནས་པའི་བྱང་ཆུབ་ཀྱི་སེམས་ཀྱི་མར་ཞུ་བར་འགྱུར་རོ། །དཔལ་མ་ཧཱ་སུ་ཁའི་གཞུང་གིས་ནི་སྟེང་གི་འཁོར་ལོ་ནི་སྤྲུལ་པའི་འཁོར་ལོ་ནས། ནང་དུ་གཞུག་པའི་འཁོར་ལོ་མཆོག །དེ་རང་སྣོད་ཅེས་བྱ་བ་ནི་སངས་རྒྱས་རིན་པོའི་སྣོད་གསུངས་སོ། །ཧ་ནི་རྣམ་པར་དགང་གཟར་བསྟན། །ཞེས་བྱ་བ་ལ་དཔལ་ཨིནྡྲ་བྷཱུ་ཏིའི་གཞུང་གིས་ནི་རྩ་གསུམ་གྱི་བདག་ཉིད་རེག་བྱའི་ས་བོན་ནོ། །སློབ་དཔོན་ཤ་བ་རིའི་གཞུང་གིས་ནི་ཤེས་རབ་མའི་གསང་བའི་པདྨའི་ལྟེ་བའོ། །བླུགས་གཟར་རྡོ་རྗེ་འདི་རུ་བསྟན། །ཞེས་བྱ་བ་ལ་རྡོ་རྗེ་རིན་པོ་ཆེ་དབྱུག་པ་ཧོ་མ་ཁུང་བྷ་ག་ཞེས་བྱ་བ་ནི་སྒྲ་ཇི་བཞིན་ནོ། །དབང་པོ་ལྔ་ལ་སྒྲ་ཇི་བཞིན་ནོ། །ཡང་ན་སྟོབས་ལྔའོ། །མར་ངོ་ལས་ནི་ཞེས་བྱ་བས་ཆད་པའི་དགའ་བ། དེ་ནི་སློབ་དཔོན་དཔལ་ལྡན་གྱི་གཞུང་ངོ༌། །ཉ་གང་བ་ལ་གཤེགས་སུ་གསོལ། །ཞེས་བྱ་བ་ནི་མཆོག་གི་དགའ་བའི་གནས་ཡན་ཆད། ཆད་པའི་དགའ་བའི་འཇུག་པའོ། །སློབ་དཔོན་ནག་པོ་པའི་གཞུང་གིས་མར་ངོ་ཤེས་རབ་མ། ཡར་ངོ་ནི་ཐབས། གཤེགས་སུ་གསོལ་ཞེས་བྱ་བ་ནི་ཤེས་རབ་ལ་དབང་བསྐུར་བར་བྱའོ། །ཧོམ་ཁུང་ཕྱི་རོལ་ཐིགས་ཕྱེད་ཙམ་ནི། བླུགས་གཟར་ནས། །ཐིགས་ཕྱེད་ཙམ་ནི་དོར་མི་བྱ། །ཞེས་བྱ་བ་ནི་ཧོམ་ཁུང་གི་ཕྱི་རོལ་ནི་གསང་བའི་པདྨའི་ཕྱི་རོལ་ལོ། །བླུགས་གཟར་ནས་ནི་གསང་བའི་རྡོ་རྗེའི་རིན་པོ་ཆེ་ནས། དེ་ལ་དོན་ནི་འདི་ཡིན་ཏེ། བྱང་ཆུབ་སེམས་ཀྱི་མར་དགང་བླུགས་དབུལ་བའི་དུས་སུ། ཡོ་ནི་ཕྱི་རོལ་དུ་གཉང་བར་མི་བྱའོ། །སློབ་དཔོན་ཌོ་མྦི་པའི་གཞུང་གིས་ནི། གང་ཞིག་ཧོམ་ཁུང་གི་ཕྱི་རོལ་དེ་ནི་རྡོ་རྗེའི་ཕྱི་རོལ། བླུགས་

---

^{[མ་དཔེ་གཟིགས་ན་འདིར་གནོན།]}

གཟར་གྱི་སྒྲས་ནི་གསང་བ་རིན་པོའི་གནས། དེ་ལས་ཕྱིའི་གནས་སུ་བྱང་ཆུབ་སེམས་གཏང་བར་མི་བྱའོ། །མི་བྱ་བའི་ཕྱིར་ན་དགང་བླུགས་ནི་མ་ཡིན་ནོ། །སངས་རྒྱས་ལ་སོགས་བྱ་བ་ནི་གསང་བའི་དོན་གྱིས་རྡོ་རྗེ་སློབ་དཔོན་གྱི་ཞལ་སྔ་ནས་འདི་སྐད་གསུངས་ཏེ། སངས་རྒྱས་ཞེས་བྱ་བ་ནི་སེམས་དང་སེམས་ལས་བྱུང་བ། བྱང་ཆུབ་སེམས་དཔའ་ཞེས་བྱ་བ་ནི་ཕུང་པོ་ལྔ། ལྷ་དང་ལྷ་མོ་ཡིན་ཞེས་བྱ་བ་ནི་ཁམས་ཀྱི་རང་བཞིན། །སྲིན་པོ་ཞེས་བྱ་བ་ནི་སྐྱེ་མཆེད། ཕྱོགས་སྐྱོང་བརྒྱད་ཅེས་བྱ་བ་ནི་རོ་བརྒྱད། བསྲེག་རྫས་ཀྱིས་ནི་ཚིམ་པར་བྱ། །ཞེས་བྱ་བ་ནི་ཐབས་དང་ཤེས་རབ་གཉིས་སུ་མེད་པའི་སྦྱོར་བས། ཕན་ཚུན་གྱི་བྱང་ཆུབ་སེམས་ཀྱི་བདུད་རྩིས་དགྱེས་པར་བྱའོ། །དེ་ཅིའི་ཕྱིར་ཞེ་ན། དེས་ནི་ཕུང་པོ་ལ་སོགས་བསྟན་པར་འགྱུར་རོ། །གང་ཞིག་རྡོ་རྗེ་སེམས་དཔའ་མཆོད་པ་ནི། དགང་བླུགས་ཀྱིས་ནི་སྦྱིན་པར་བྱ། །ཞེས་སློབ་དཔོན་ཛྙཱ་ན་བྷཱུ་ཏིའི་གཞུང་གིས་འདི་སྐད་གསུངས་ཏེ། རྡོ་རྗེ་སེམས་དཔའ་ཞེས་བྱ་བ་ནི་དཔལ་བདེ་བ་ཆེན་པོའི་རྒྱལ་པོའོ། །དགང་བླུགས་ཀྱིས་ཞེས་བྱ་བ་ནི་མི་སྤྲོ་བའི་བདུད་རྩི་གང་ཞིག་རང་བཞིན་དགའ་བ་དེས་མཆོད་པར་བྱ། ཉམས་སུ་མྱོང་བར་བྱ་ཞེས་བྱ་བའི་དོན་ཏོ། ཧཱུཾ་ཕཊ་སྔགས་ཀྱིས་ལ་སོགས་ཞེས་བྱ་བ་ནི་གསང་བའི་མཉམ་པར་སྦྱིན་པའི་སྦྱིན་སྲེ་ག་གི་དུས་སུ་རྡོ་རྗེའི་རིན་པོ་ཆེའི་སྙིང་པོར་ལྟ་བའི་རྣམ་པར་དགོད་པར་བྱའོ། །པདྨ་རིན་པོ་ཆེའི་སྙིང་པོར་ཕའི་རྣམ་པ། དེས་ནི་མཁའ་འགྲོ་ཀུན་དགྱེས་ལ། །ཞེས་བྱ་བ་ནི་མཁའ་འགྲོ་མའི་སྒྲས་ནི་རྩ་དགྱེས་ཞེས་བྱ་བ་ནི་མི་ཟད་གྱུར་པའོ། །གཞན་མ་ཡང་རྣལ་འབྱོར་མ་མོ་ཞེས་བྱ་བ་ནི་ཕྱི་རྩའོ། །དངོས་གྲུབ་ཡང་སྟེར་ཞེས་བྱ་བ་ནི། །རང་བཞིན་དགའ་བའི་གྲུབ་ཏུ་གྱུར། །ཞེས་སློབ་དཔོན་བསནྟ་ཏི་ལ་ཀའི་གཞུང་ངོ༌། །དེ་ལྟར་བཤད་པ་ལ་སོགས་ཞེས་བྱ་བ་ནི་སྒྲ་ཇི་བཞིན་ནོ། །འདོད་པ་ཐམས་ཅད་གྲུབ་པར་བྱེད། །ཅེས་བྱ་བ་ལ་སློབ་དཔོན་ཛྙཱ་ན་བྷཱུ་ཏིའི་གཞུང་གིས་ནི་རྩ་ལ་སོགས་པ་རྒྱས་པ་ཉིད་དོ། །དཔལ་ཕྱག་རྒྱ་ཆེན་པོའི་ཏིག་ལེ་ལས་ལེའུ་བཅུ་གཅིག་པའི་བཤད་པའོ།། །།

ལེའུ་བཅུ་གཉིས་པའི་བཤད་པ།

---

^{[མ་དཔེ་གཟིགས་ན་འདིར་གནོན།]}

ད་ནི་བཅུ་གཉིས་པ་ཚིགས་སུ་བཅད་པ་བྲི། བདུད་རྩི་ལྔ་ཡི་རིམ་པ་འདི་ལྟར་ལ་སོགས་ཞེས་བྱ་བ་ལ། བདུད་རྩི་ལྔ་

---

^{[མ་དཔེ་གཟིགས་ན་འདིར་གནོན།]}

ཞེས་བྱ་བ་ནི་ནང་གི་དོན་གྱི་མཁའ་འགྲོ་མ་ལས་བྱུང་བའི་དཀྱིལ་འཁོར་ལྔ། དེ་རུ་སྐུའི་འཁོར་ལོ་ནི་རྣམ་པར་སྣང་མཛད། གསུང་གི་འཁོར་ལོ་ནི་སྣང་བ་མཐའ་ཡས། ཐུགས་ཀྱི་འཁོར་ལོ་ནི་མི་བསྐྱོད་པ། ཡོན་ཏན་གྱི་འཁོར་ལོ་ནི་རིན་ཆེན་འབྱུང་ལྡན། ལས་ཀྱི་འཁོར་ལོ་ནི་དོན་ཡོད་གྲུབ་པ། ཕྱིའི་དོན་གྱི་རྫས་ལྔའི་བདག་ཉིད་དོ། །གསང་བའི་དོན་གྱིས་ཐོག་མ་དང་ཐ་མ་དང་དབུས་དང་བྲལ་བའི་བདེ་བ་ཆེན་པོའི་རྒྱལ་པོའོ། །དཔལ་ཕྱག་རྒྱ་ཆེན་པོའི་ཐེག་ལེ་ལས་ལེའུ་བཅུ་གཉིས་པའི་བཤད་པའོ།། །།

ལེའུ་བཅུ་གསུམ་པའི་བཤད་པ།

---

^{[མ་དཔེ་གཟིགས་ན་འདིར་གནོན།]}

ད་ནི་བཅུ་གསུམ་པ་ལ་ཟབ་པ་བྲི། ཨུ་རྒྱན་ལ་སོགས་གནས་ཞེས་བྱ་བ་ལ། གནས་ལ་སོགས་པའི་དོན་ལྔར་བཤད་པར་བྱའོ། །རྣལ་འབྱོར་མའི་འདུས་པ་ཞེས་བྱ་བ་ནི་གསང་བའི་མཉམ་པར་སྦྱོར་པའི་དུས་སུ་རྩ་ཕྲད་པའི་འཕོ་བ། དེ་རུ་སྐད་ནི་སྨྲ་བར་བྱེད། །ཅེས་བྱ་བ་སློབ་དཔོན་ཤ་བ་རིའི་གཞུང་གིས་ཕན་ཚུན་བྱང་ཆུབ་སེམས་འདུས་པར་བྱེད་དོ། །དེའི་གསང་བའི་སྒྲ་དང་ལྡན་པ་ཉིད་རྒྱུད་ལས་གསུངས་སོ། །གསང་བའི་སྒྲ་ནི་ལེགས་དགྱེས་ཀྱི་དགའ་བའི་རོ་ཞེས་སློབ་དཔོན་པ་ལ་ས་བཛྲའི་གཞུང་ངོ༌། །སློབ་དཔོན་གཞན་མའི་གཞུང་གིས་གསང་བའི་སྒྲས་ནི་རང་རང་གི་རིགས་ལ་འདུས་པའོ། །སློབ་དཔོན་རཏྣ་བྷཱུ་ཏིའི་གཞུང་གིས་གསང་བའི་སྐད་ནི་འདོར་བའི་བརྡའི་གནས་སོ། །སློབ་དཔོན་ཌོ་མྦིའི་གཞུང་གིས་ནི་སྐལ་བ་དང་ལྡན་པ་མི་ལྡན་པ་བསྟན་པའི་རྒྱུའི་ཕྱིར། གསང་བའི་སྐད་སྨྲ་བའོ། །གཞན་མ་ནི་ཆང་ལ་སོགས་པ་སྒྲ་ཇི་བཞིན་གྱིས་གསུངས་སོ། །དཔལ་ཕྱག་རྒྱ་ཆེན་པོའི་ཐིག་ལེ་ལས་ལེའུ་བཅུ་གསུམ་པའི་བཤད་པའོ།། །།

ལེའུ་བཅུ་བཞི་པའི་བཤད་པ།

---

^{[མ་དཔེ་གཟིགས་ན་འདིར་གནོན།]}

ད་ནི་བཅུ་བཞི་པ་ལ་ཟབ་པའི་ཚིགས་སུ་བཅད་པ་བྲི། ཡན་ལག་ཕྱག་རྒྱ་ལ་སོགས་པའི་མཚན་ཉིད་ལ་སོགས་ཞེས་བྱ་བ་ལ། རྡོ་རྗེ་སློབ་དཔོན་གྱི་ཞལ་སྔ་ནས་འདི་སྐད་གསུངས་ཏེ། ཡན་ལག་གི་སྒྲས་ནི་ཐབས། ཕྱག་རྒྱའི་སྒྲས་ནི་ཤེས་རབ། མཚན་ཉིད་ཅེས་བྱ་བ་ནི་བདེ་བར་སྦྱོར་བ། སློབ་དཔོན་ཛྙཱ་ན་བྷཱུ་ཏིའི་གཞུང་གིས་ཡན་ལག་ནི་སྲིད་པ། ཕྱག་རྒྱ་ནི་མྱ་ངན་ལས་འདས་པ་དེ་དག་གཉིས་ཀྱིས་ཡོངས་སུ་ཤེས་པ་ལས་ཕྱག་རྒྱའི་དངོས་གྲུབ་པོ། །སློབ་དཔོན་ནག་པོ་པའི་གཞུང་གིས་ཡན་ལག་ནི་མཆོག་

---

^{[མ་དཔེ་གཟིགས་ན་འདིར་གནོན།]}

གི་དགའ་བ། ཕྱག་རྒྱ་ནི་ཆད་པའི་དགའ་བ། སློབ་དཔོན་མཚོ་སྐྱེས་རྡོ་རྗེའི་གཞུང་གིས་ཕྱག་རྒྱའི་དངོས་གྲུབ་མངོན་དུ་གྱུར་པའི་རྣལ་འབྱོར་པ་ལ་ཉེ་བར་བརྟགས་པའི་དོན་གྱི་ཕྱིར་རྣལ་འབྱོར་མ་འདུས་པའོ། །དཔལ་ཕྱག་རྒྱ་ཆེན་པོའི་ཐིག་ལེ་ལས་ལེའུ་བཅུ་བཞི་པའི་བཤད་པའོ།། །།

ལེའུ་བཅོ་ལྔ་པའི་བཤད་པ།

---

^{[མ་དཔེ་གཟིགས་ན་འདིར་གནོན།]}

ད་ནི་བཅོ་ལྔ་པ་ལ་ཟབ་པའི་ཚིགས་སུ་བཅད་པའི་དོན་བྲི། གཟུགས་དང་མཚན་ཉིད་ཅེས་བྱ་བ་ནི་སློབ་དཔོན་གྱི་ཞལ་སྔ་ནས་འདི་སྐད་ཅེས་གསུངས་ཏེ། གཟུགས་ནི་ཀུན་དུ་དམར་བའི་རང་བཞིན་བྱང་ཆུབ་ཀྱི་སེམས། མཚན་མ་ཞེས་བྱ་བ་ནི་ཕྱི་རོལ་དུ་འབྱུང་བའི་རྣམ་པའི་ངོ་བོ། སོགས་པའི་སྒྲས་ནི་གནས་སོ། །དེ་ལ་དོན་ནི་འདི་ཡིན་ཏེ། གང་ཞིག་རྣལ་འབྱོར་མ་རྟག་ཏུ་ཨཱ་ལི་ཀཱ་ལི་བདུད་རྩིའོ། །གསང་བའི་པདྨའི་གནས་ནས་འཛག་པ་དེ་ནི་ཐེ་ཚོམ་མེད་པར་དངོས་གྲུབ་ཆེན་པོ་སྟེར་བར་འོང༌། ཨཱ་ལི་ཀཱ་ལིའི་ཡེ་ཤེས་ལས་ཁམས་གསུམ་སྐྱེ་བའི་ཕྱིར་རོ། །གང་ཞིག་ཉིད་ལས་དེ་ལྟར་གྱུར་པའི་ཡེ་ཤེས་རྟག་ཏུ་འབྱུང་བ་དེ་ནི་མི་ལས་གཞན་པའི་ལྷའི་རིགས་སོ། །ལྷ་མོ་མ་ཡིན་པ་གཞན་མས་དངོས་གྲུབ་ཆེན་པོ་གྲུབ་པར་མི་ནུས་པ་མི་འོང་ཞེས་དགོངས་པའོ། །དཔལ་ཕྱག་རྒྱ་ཆེན་པོའི་ཐིག་ལེ་ལས་ལེའུ་བཅོ་ལྔ་པའི་བཤད་པའོ།། །།

ལེའུ་བཅུ་དྲུག་པའི་བཤད་པ།

---

^{[མ་དཔེ་གཟིགས་ན་འདིར་གནོན།]}

ད་ནི་བཅུ་དྲུག་པ་ལ་ཟབ་པའི་ཚིགས་སུ་བཅད་པ་བྲི། ཉོན་ཅིག་དཀྱིལ་འཁོར་རྒྱལ་དབང་པོ། །ཞེས་ཤེས་བྱ་བ་ནི་སློབ་དཔོན་གྱི་ཞལ་སྔ་ནས་མཁའ་འགྲོ་མ་རྡོ་རྗེ་གུར་གྱི་མན་ངག་གི་གཞུང་གིས་འདི་ལྟར་བཤད་དེ། དཀྱིལ་འཁོར་གྱི་སྒྲས་ནི་འཁོར་གྱི་སྙིང་པོ། སྙིག་པོ་སྟོང་པ་ཉིད་ཀྱི་ཡེ་ཤེས་ཀྱི་རང་བཞིན་དོན་དམ་པའི་བྱང་ཆུབ་ཀྱི་སེམས། འཁོར་ནི་བྱ་བའི་ཡེ་ཤེས་སོ། །དེར་ནི་མིན་བདག་བཞུགས་ཞེས་བྱ་བ་ནི་བཛྲ་བྷཱུ་ཏིའི་གཞུང་གིས་ནི་སྟོང་པ་ཉིད་ཀྱི་ཡེ་ཤེས་ཀྱི་ངོ་བོ། བདག་ཉིད་དོན་དམ་པའི་བྱང་ཆུབ་ཀྱི་སེམས་བདེ་བ་ཆེན་བོའི་བྱང་ཆུབ་བོ། །ཧཱུཾ་གི་དངོས་པོ་ལ་དངོས་པོ་ཞེས་འདིར་བཤད་དོ། །ཧཱུཾ་གི་དངོས་པོ་ཞེས་ཐུགས་ཀྱི་རྡོ་རྗེའི་མཐའ་འགྲོ་ལས་སོ། །དངོས་པོ་ཞེས་བྱ་བ་ནི་གསུང་གི་རང་བཞིན། ཀུན་རྫོབ་དང་དོན་དམ་པ་གཉིས་སུ་མེད་པའི་བྱང་ཆུབ་ཀྱི་སེམས་ཀྱི་ངོ་བོ། གསུམ་པའི་དངོས་པོ་ཞེས་བྱ་བ་ནི་

---

^{[མ་དཔེ་གཟིགས་ན་འདིར་གནོན།]}

མཚན་དང་དཔེ་བྱད་དང་ལྡན་པ་ལོངས་སྤྱོད་རྫོགས་པའི་སྐུའོ། །སློབ་དཔོན་གཞན་མའི་གཞུང་གིས་ནི་གདུལ་དཀའ་འདུལ་བྱེད་ཀྱི་ཕྱིར། དཔལ་རྡོ་རྗེ་འཛིན་པ་ཆེན་པོ་ལ་སྤྲུལ་པའི་ཀྱེའི་རྡོ་རྗེའོ། །དེ་རང་ལ་ཡེ་ཤེས་མཁའ་འགྲོ་ཞེས་བྱ་བའི་མཚན་ཉིད་དོ། །ཉི་མའི་དཀྱིལ་འཁོར་གྱི་སྟེང་དུ་བཞུགས་ཞེས་བྱ་བ་ལ་མཆོག་གི་དགའ་བའི་གནས་ན་བཞུགས། ཉི་མ་བྱེ་བའི་འོད་ཅེས་བྱ་བ་ལ་རང་བཞིན་དགའ་བའི་གྲགས་པ་ཅན་འོད་རབ་ཆེན་པོའི་ངོ་བོ། ཁྱེད་དང་ལྷན་ཅིག་མཉམ་པར་འཁྱུད། །ཅེས་བྱ་བ་ལ། ལེགས་དགྱེས་ཆེན་མོའི་མཉམ་པར་གཉིས་སུ་མེད་པའི་སྦྱོར་བས་བདག་མེད་མའི་ཁ་སྦྱར་གྱི་སྦྱོར་བའོ། །ཆུ་སྐྱེས་སྔོན་པོའི་གཟུགས་ཅན་ཞེས་བྱ་བ་ལ། ཡེ་ཤེས་ཆེན་པོ་ཡང་ནམ་མཁའི་རང་བཞིན་ནོ། །སློབ་དཔོན་བཱི་ར་བྷྭུ་ཏིའི་གཞུང་གིས་ནི་ཞལ་ལ་སྐད་ཅིག་རྣམ་པར་དག་པ་བཤད་དོ། །ཁ་ཅིག་དགའ་བའི་རྣམ་པར་དག་པ་ལེན། ཕྱག་ལ་སྣ་ཚོགས་ཐམས་གསལ་བའི་ཕྱིར། སློབ་དཔོན་གྱི་ཞལ་སྔ་ནས་སྣ་ཚོགས་རྣམ་པར་དག་པ་བཤད་དོ། །དེ་ནི་རེ་ཞིག་བདག་པོ་རྫོགས་པའི་གཞུང༌། འཁོར་རྫོགས་པའི་སྐབས་སུ་སློབ་དཔོན་ཛྙཱ་ན་མཱུརྟིའི་གཞུང་གིས་ནི། གང་ཞིག་བཅུ་གཉིས་པའི་བདག་ཉིད་དེ་ནི་ཐབས་ཀྱི་དཀྱིལ་འཁོར། གང་ཞིག་བཞི་བཅུ་རྩ་བཞི་པ་དེ་ནི་ཐབས་ལས་བྱུང་བའི་དཀྱིལ་འཁོར། སློབ་དཔོན་བཱི་ར་བྷཱུ་ཏིའི་གཞུང་གིས་ནི་གང་ཞིག་བསྒྲུབ་པ་དང་སྒྲུབ་ཐབས་ཀྱིས་རོའི་དགའ་བ་ལས་རྫོགས་པ་དེ་ནི་ཡེ་ཤེས་ཀྱི་དཀྱིལ་འཁོར། གང་ཞིག་སྐད་ཅིག་གི་རྣམ་པར་རྫོགས་པ་དེ་ནི་འབྱུང་བའི་དཀྱིལ་འཁོར། སློབ་དཔོན་ཤ་བ་རིའི་གཞུང་གིས་དང་པོ་འབྱུང་བ་དེ་ནི་རྟེན་གྱི་དཀྱིལ་འཁོར། གང་ཞིག་ཕྱི་ནས་འབྱུང་བ་དེ་ནི་བརྟེན་པའི་དཀྱིལ་འཁོར། གང་ཞིག་ཕྱག་ལ་ཉ་དང་ཆུ་སྲིན་ལ་སོགས་པ་དེ་ནི། མཁའ་འགྲོ་མ་རྡོ་རྗེ་གུར་གྱི་མན་ངག་གིས་ནད་ལ་སོགས་པ་འཇིག་པར་མཛད་པའོ། །སློབ་དཔོན་སླད་མ་ནི་སྒྲ་ཇི་བཞིན་ནོ། །གང་ཞིག་ཉི་ཤུ་རྩ་བཞིར་གནས། །དེ་ནི་ཚོགས་ལ་བཞུགས་པའི་ས། །ཞེས་བྱ་བ་ལ། འཁོར་ལོ་བཞི་གནས་པའི་ལྷ་མོ་སུམ་ཅུ་རྩ་གཉིས་ལ་གནས་དང༌། ཉེ་བའི་གནས་

---

^{[མ་དཔེ་གཟིགས་ན་འདིར་གནོན།]}

ལ་སོགས་པའི་བཞུགས་པའི་གནས་སོ། །གང་གི་ཕྱིར་ཞེས་ནང་གི་ལྷ་མོ་ལ་ནང་གི་གནས། ཕྱིའི་ལྷ་མོ་ལ་ཕྱི་རོལ་གྱི་སྒོ་ལ་སོགས་པ། དབུས་ནི་གནས་པ་ལ་རྟེན་མེད་པའི་ཕྱིར་གནས་ལ་སོགས་པ་བཞུགས་པའི་ས་ཞེས་སློབ་དོན་ཤ་བ་རིའི་གཞུང་ངོ༌། །འདི་རུ་ལྷ་མོ་སུམ་ཅུ་རྩ་གཉིས་ལ། གནས་ཉི་ཤུ་རྩ་བརྒྱད་ཇི་ལྟར་བཞུགས་པའི་ས་ཡིན་པར་གྱུར་པ་དེ་ལ་སློབ་དཔོན་གྱིས་འདི་ལྟར་བཤད་དེ། ལེའུ་ཉི་ཤུ་རྩ་བརྒྱད་པ་ལ་གང་ཞིག་སྦྱོར་བ་དང༌། ཉེ་བའི་སྦྱོར་བ་བཞི་པོར་གསལ། དེས་སུམ་ཅུ་རྩ་གཉིས་ཚང་བར་འགྱུར་རོ། །དེ་ནི་རེ་ཞིག་ལྷ་མོའི་གནས་ཀྱི་ཕུན་སུམ་ཚོགས་པ་བཤད། ད་ནི་རྣམ་པར་དག་པའི་བསྐྱེད་པའི་རིམ་པ་བྲི། དེ་ནས་བསྐྱེད་པའི་རིམ་པ་ཡིས། །རྩ་ཀུན་ལ་ནི་འབྱུང་བའི་ཚེ། །ཞེས་བྱ་བ་ལ་སློབ་དཔོན་མང་པོའི་གཞུང་གིས། རྡོ་རྗེ་སློབ་དཔོན་གྱིས་འདི་སྐད་བཤད་དེ། དང་པོ་རེ་ཞིག་བསྒྲུབ་དང་སྒྲུབ་ཐབས་ལས། ཕྱི་དང་ནང་གི་བདག་ཉིད་ཀྱི་གསང་བའི་རྩ་ལས་འབྱུང་བའི་ཚེ། དེ་ལས་ལྷ་མོའི་རྣམ་པ་འབྱུང་བར་འགྱུར་རོ། །དེ་ནི་བསྐྱེད་པའི་རིམ་པའི་ཕྱོགས་སོ། །རྫོགས་པའི་རིམ་པའི་ཕྱོགས་སུ་ནི་ཕྱི་དང་ནང་གི་བདག་ཉིད་ཅན་གྱི་དཀྱིལ་འཁོར་ལ་གནས་པའི་ལྷ་མོའི་ཚོགས་ལ་གཟུང་འཛིན་རྣམ་པར་སྤངས་པའི་ཕྱིར། གང་ནས་སྐྱེ་བ་དེར་རང་ཞུགས་ལ་རྩའི་རྣམ་པར་དག་པའོ། །འཛུམས་པ་དང་འབྱེད་པ་ལ་སོགས་ཞེས་བྱ་བ་ལ། རྩའི་ལྷ་མོའི་མཆོད་པ་སྤྲོ་བའི་བདག་ཉིད་ཅན། བདེ་བ་ཆེན་པོའི་དགའ་བ་འབྱུང་བ་ལ་ཡེ་ཤེས་ཀྱི་ཕྱག་རྒྱ་ཁོང་དུ་ཆུད་པའོ། །ཡེ་ཤེས་ཀྱི་ཕྱག་རྒྱ་ནི་ཞི་བ་ཆེན་པོའི་རང་བཞིན་སྤྲོས་པ་མེད་པ། བསྒྲུབ་དང་སྒྲུབ་ཐབས་ཆེན་པོ་ཁོང་དུ་ཆུད་པ་ལས། དེ་རང་གཏུམ་མོ། །སློབ་དཔོན་ཤ་བ་རིའི་གཟུང་གིས་ནི་ལས་དྲུག་པོ་མཛད་པའི་ཕྱིར་གཏུམ་མོ། །སློབ་དཔོན་བཱི་ར་བྷཱུ་ཏིའི་གཞུང་གིས། མཆོག་གི་དགའ་བ་རྒྱས་པར་བྱེད་པའི་ཕྱིར་གཏུམ་མོ། །སློབ་དཔོན་ཌོ་མྦི་པའི་གཞུང་གིས་ནི་འོད་ཟེར་རབ་ཏུ་ཆེ་བའི་ཕྱིར་གཏུམ་མོ། །སློབ་དཔོན་བདེ་བ་ཆེན་པོའི་གཞུང་གིས་ནི་རྡོ་རྗེ་ལ་འཛུམས་པ། པདྨོ་ལ་དབྱེ་བ། ལྷ་ལྕམ་ལཀྴྨཱིའི་གཞུང་གིས། འཛུམས་པ་ཞེས་བྱ་བ་ནི་གྱེན་ལ་འགུགས་པ། དབྱེ་བ་ནི་འོག་

---

^{[མ་དཔེ་གཟིགས་ན་འདིར་གནོན།]}

ཏུ་གཤེགས་སུ་གསོལ་བ། དཔལ་ཨིནྤྲ་བྷཱུ་ཏིའི་གཞུང་གིས། འཛུམས་པ་ནི་ཤུ་ཀྲ། དབྱེ་བ་ནི་རཀྟ། དེ་དག་མཉམ་པར་སྦྱོར་བ་ནི་འདུས་པས་རྡོ་རྗེ་ཆེ། རྡོ་རྗེ་མེ་ལས་ཞི་བ་ཆེན་པོའི་རང་བཞིན་སྤྲོས་པ་མེད་པ་མ་ཡིན་ཡང་མཆོག་གི་དགའ་བའི་འོད་ཟེར་གྱིས་ཁྱབ་པའི་ཕྱིར་འབར་བ་དང༌། སྲེག་པར་བྱེད་པ་དང༌། བྱང་ཆུབ་ཀྱི་སེམས་ཞུ་བར་བྱེད་པ་དང༌། རྩ་ལ་ཚིམ་པར་བྱེད་པ་དང༌། དཀྱིལ་འཁོར་ལ་བྱ་བའི་མཆོད་པ་མཛད་དོ། །དེ་ལྟར་རྩ་ཆེན་པོ་སྤྲོས་པ་མེད་པའི་ཡེ་ཤེས་ཀྱི་སྒྲོན་མ་རང་བཞིན་ཅན། རྩ་ཐམས་ཅད་རྟེན་བྱས་ནས། ཤེས་རབ་དང་གཟུགས་ཀྱིས་འཇིག་རྟེན་ལས་འདས་པའི་ཤེས་རབ་ཡེ་ཤེས་ཀྱི་དོན་གྲུབ་པར་མཛད་ཅེས་བཤད་དོ། །སྔར་བསྟན་པའི་གཞན་མ་ནི་སྒྲ་ཇི་བཞིན་པའོ། །དེ་རང་བདེ་བ་ཆེན་པོ་ཡེ་ཤེས་ནི། དཀྱིལ་འཁོར་ལ་ནི་རྣམ་པར་བཞུགས། །ཞེས་བྱ་བ་ནི་གང་ཞིག་རྫོགས་པའི་རིམ་པས་ཤེས་རབ་ཡེ་ཤེས་ཀྱི་དབང༌། དེ་རང་བདེ་བ་ཆེན་པོ། བསྐྱེད་པའི་རིམ་པའི་སྒྲ་ནི་སྒྲུབ་ཐབས་ཀྱི་དགོས་པས་བདེ་བ་ཆེན་པོ་ཐོབ་པ། བསྐྱེད་པའི་རིམ་པའི་ཕྱོགས་ལ་ནི་ཕྱིའི་ཤེས་རབ་བསྒྲུབ་པ་དང༌། སྒྲུབ་ཐམས་ཙམ་ལ་འདོད་ཅེས་སློབ་དཔོན་སནྟ་གུཔྟའི་གཞུང་ངོ༌། །གང་གི་ཕྱིར་ཞེ་ན་རྟག་ཏུ་མའི་ཤེས་རབ་བསྙེན་པས། བསམ་གཏན་ལ་འགྲིབ་པ་འོད་བས། དེ་ལྟར་རྒྱུད་ཉིད་ལས་སྔར་འདི་ལྟར་བསྟན། བལྟ་བ་ཙམ་ནི་དགོས་པ་སྟེ། །དེ་བཞིན་ཀུན་ལ་རྟག་ཏུ་མིན། །ཕྱེ་ནས་རྣམ་རྟོག་སྐྱེ་བར་བྱེད། །དེས་ནི་དངོས་གྲུབ་མི་ཐོབ་པ། །དཀྱིལ་འཁོར་དུ་ནི་རྣམ་པར་བཞུགས། །ཞེས་བྱ་བ་ནི་དཀྱིལ་འཁོར་གྱི་སྒྲས་ནི་བདག་པོ་དེ་ལ། བདེ་བ་ཆེན་པོ་རྟག་ཏུ་ཤར། །ཞེས་བྱ་བའི་དོན་ཏོ། །དཀྱིལ་འཁོར་ལ་ཡང་བདེ་བ་ཆེན་པོ་ལ། རྟེན་དང་བརྟེན་པ་ལ་དབྱེར་མེད་པ་དཔལ་ཨིནྡྲ་བྷཱུ་ཏིའི་གཞུང་ངོ༌། །ཀུན་རྫོབ་དང་ནི་དམ་པའི་དོན། །གཉིས་སུ་དབྱེ་བའི་བདེ་བ་ཆེན། །ཞེས་བྱ་བ་ནི་ཀུན་རྫོབ་ཀྱི་གཟུགས་ཅན་བདེ་བ་ཆེན་པོའི་ཤེས་རབ་ཡེ་ཤེས་ལས་འབྱུང་ངོ༌། །ཅིའི་ཕྱིར་ཞེ་ན་ཤེས་རབ་ཡེ་ཤེས་ལས། ཐ་མལ་པ་མ་ཡིན་པའི་དགའ་བ་རྣམས་ལ་ཤར་པའི་དུས། དགའ་པ་ལ་སོགས་པ་ལས་བདེ་བ་ཆེན་པོའི་རྣམ་པར་ཤེས་པའོ། །དོན་དམ་པར་ཞེས་བྱ་བ་ནི། རང་ལས་

---

^{[མ་དཔེ་གཟིགས་ན་འདིར་གནོན།]}

འགྱུར་བ་དེ་རྣམས་སོགས། །ཞེས་བྱ་བ་ལ་སྒྲ་ཇི་བཞིན་ནོ། །སྣང་བ་རེག་བྱ་འདུས་པ་དང༌། འགྲོ་བ་དེ་ནི་བཞི་པ་ཞེས་བྱ་བ་ནི་སྣང་བ་ཞེས་བྱ་བ་ཀུན་རྫོབ་ཀྱི་བདག་ཉིད། ཤེས་རབ་ཡེ་ཤེས་དབང་བསྐུར་བའི་དུས་སུ་བདག་མེད་མའི་རང་བཞིན་ཤེས་རབ་མ་ལ་སྤྱན་གཟིགས་པར་བྱེད་པའི་བྱིན་རླབས་ཞེས་བྱ་བའི་དོན་ཏོ། །སློབ་དཔོན་ཤ་བ་རིའི་གཞུང་གིས་ནི་དགའ་བ་བཞི་པ། སྣང་བ་ལ་སོགས་པ་བཞི་རྩ་བར་གྱུར་པ། རྒྱུར་གྱུར་པ་ཞེས་བྱ་བའི་དོན་ཏོ། །དཔལ་ཨིནྡྲ་བྷཱུ་ཏིའི་གཞུང་གིས་སྣང་བ་ནི་ལམ། རེག་བྱ་ནི་བྱེད་པ་པོ། འདུས་པ་ནི་བྱ་བ། འགྲོ་བ་ནི་འབྲས་བུ། གཞན་མ་སྲིད་པ་དང་བྲལ་བ་ཞེས་མཐའ་ཡན་ཆད་སྒྲ་ཇི་བཞིན་གྱིས་དེ་བསྐྱེད་པའི་རིམ་པ་དགའ་བ་བཞིའོ། །དེ་ནི་རེ་གཞིག་དགའ་བ་བཞི་ལ་བསྟན་པ་ཙམ། ད་ནི་དགའ་བ་བཅུ་དྲུག་གི་བྱེ་བྲག་གིས། གང་ཞིག་དགའ་བ་བཞི་ལ་སྦྱོར་བ་དེ་ལ་དང་པོའི་དགའ་བ་རྣམས་ལ་རྒྱུད་ཀྱི་གོ་རིམས་ཀྱིས། སློབ་དཔོན་ཛྙཱ་ན་མཱུ་རྟིའི་གཞུང་གིས་འདི་སྐད་བཤད་དེ། ཤེས་རབ་མ་ལ་སྤྱན་གཟིགས་པ་དང༌། འཁྱུད་པས་དང་པོའི་སྦྱོར་བའི་དང་པོ་འདོད་པའི་དགའ་བ། གཉིས་པ་འདར་བའི་དགའ་བ། གསུམ་པ་འགྲོ་བའི་དགའ་བ། བཞི་པ་དགའ་བ་ཉིད། དེ་ནི་རང་པོའི་དགའ་བའོ། །པདྨ་དང་རྡོ་རྗེ་གཉིས་ཀྱི་འདུས་པའི་འདོད་པ་རྒྱས་པ་ལས། སྦྱོར་བ་གཉིས་ཀྱི་དང་པོ་རྒྱས་བའི་དགའ་བ། གཉིས་པ་སྟོབས་ཀྱི་དགའ་བ། གསུམ་པ་འབྱུང་བའི་དགའ་བ། བཞི་པ་མཆོག་གི་དགའ་བ་ཉིད། དེ་ནི་སྦྱོར་བ་གཉིས་པའོ། །བྱང་ཆུབ་ཀྱི་སེམས་འགྲོ་བའི་སྐབས་སུ་གསུམ་པའི་སྦྱོར་བའི་དང་པོ་འབར་བའི་དགའ་བ། གཉིས་པ་ཐིག་ལེའི་དགའ་བ། གསུམ་པ་མྱོངས་པའི་དགའ་བ། བཞི་པ་ཆད་པའི་དགའ་བ་ཉིད་དོ། །སྦྱོར་བ་བཞི་པའི་དང་པོ། ཨུ་ཏའི་དགའ་བ། གཉིས་པ་ཚུལ་གྱི་དགའ་བ། གསུམ་པ་ཉིད་ལོག་པའི་དགའ་བ། བཞི་པ་རང་བཞིན་དགའ་བ་ཉིད། དེ་ལྟ་བུའི་སྦྱོར་བའི་དགའ་བ་བཅུ་དྲུག་གོ །སློབ་དཔོན་བཱི་ར་བྷཱུ་ཏིའི་གཞུང་གིས་རྩ་བས་ནི་དགའ་བ་བཞི། དེ་ལ་ཡང་ཤེས་རབ་མ་ལས་སྤྱན་གཟིགས་པའི་རྒྱུད་ལས་འབྱུང་ངོ༌། །གང་ཞིག་འདོད་པའི་དགའ་བ་ལ་སོགས་པ་དེ་ནི་དགའ་བ་རྣམས་ངེས་པར་བསྟན་པའི་མཚན་ཉིད། གང་ཞིག་གཙོ་རབ་ཀྱི་དོན་དེ་ནི་

---

^{[མ་དཔེ་གཟིགས་ན་འདིར་གནོན།]}

སོ་སོར་བསྟན་པའི་མཚན་ཉིད་དོ། །དེ་ནི་ཨུ་ཏའི་དགུག་པ་ལ་སོགས་ཞེས་བྱ་བ་ལ། དཔལ་ཨིནྡྲ་བྷཱུ་ཏིའི་གཞུང་གིས་ནི་ཨུ་ཏའི་དགུག་པ་ཞེས་བྱ་བ་ནི་རྫོགས་པའི་རིམ་པའི་སྦྱོར་བས་རྟེན་མེད་པའི་རང་བཞིན་བདེ་བ་གཉིས་སུ་མྱོང་བའོ། །སློབ་དཔོན་བཱི་ར་བྷཱུ་ཏིའི་གཞུང་གིས་ནི་ཤེས་རབ་ལས་སླར་བདེ་བ་དགུག་པར་བྱེད་པ། གང་ཞིག་ཅེས་བྱ་བའི་སྒྲ་ནི་ཞུ་བ་པོ་རྣམས་ལ་ཁོང་དུ་ཆུད་པར་བྱ་བའི་ཚིག་གོ །ཐིགས་པ་གསུམ་གྱི་མཐར་ཞེས་བྱ་བ་ལ། གསུམ་གྱི་སྒྲ་ནི་དགའ་བ་གསུམ། དེ་རྣམས་ཀྱི་མཐའ་ནི་བཞི་པའི་རང་བཞིན་གྱི་དགའ་བ། དེ་རུ་ཐིགས་པ་མཐར་ཞེས་བྱ་བ་ནི། ཆད་པ་ལ་རབ་ཏུ་འཇུག་པར་བྱའོ་ཞེས་དགོངས་པའོ། །རང་བཞིན་རིམ་པར་ཤེས་པར་བྱ་བ་ལ་སོགས་པ་ལ། དགའ་བའི་སྦྱོར་བ་བཞི་ལ་རིམ་པས་རང་བཞིན་དགའ་བ་ཀུན་ལ་ཤར་རོ། །གཞན་མ་དགའ་བ་ལ་སོགས་པ་ལ་ཉམས་སུ་མྱོང་བའི་གནས་ནི། བདེ་བ་ཆེན་པོའི་གཙུག་ཏོར་ནས་སྨིན་མཚམས་ཀྱི་འཁོར་ལོའི་དབུས་ཡན་ཆད་དྲང་བའི་དོན་གྱིས་བཅོམ་ལྡན་འདས་ཀྱི་བཀའོ། །དེས་དོན་གྱིས་བདེ་བ་ཆེན་པོའི་འཁོར་ལོ། གཙུག་ཏོར་ནི་བདེ་བ་ཆེན་པོའི་ཚོར་བའི་གནས་སོ། །སློབ་དཔོན་ཀུ་ཀུ་རིའི་གཞུང་གིས་ནི་གསང་བའི་རྡོ་རྗེའི་རིན་པོ་ཆེའི་སྨིན་མཚམས་ཀྱི་འཁོར་ལོ་ནི་གསང་བའི་རྡོ་རྗེའི་རིན་པོ་ཆེའི་གདུ་བུའི་གནས་སོ། །དེ་རུ་དགའ་བའི་ཐིགས་པ་ལ་ཉམས་སུ་མྱོང་བའི་གནས་སོ། །སློབ་དཔོན་ཤ་བ་རིའི་གཞུང་གིས་ཤར་བའི་དུས་སོ། །སྨིན་མཚམས་སུ་འཁོར་ལོ་ནས་མགྲིན་པའི་གནས་སུ་ནི་ཆུང་ཟད་འོག་གི་ལམ་དེ་རུ་མཆོག་གི་གནས། སྙིང་གའི་རྡོ་རྗེ་རིན་ཆེན་གྱི་གནས་དེ་རུ་ཆད་པའི་དགའ་བས་སོ། །དེ་ནི་བསྐྱེད་པའི་རིམ་པའི་ཕྱོགས་སོ། །རྫོགས་པའི་རིམ་པའི་ཕྱོགས་སུ་ནི་ལྟེ་བའི་འཁོར་ལོ་ལ་སོགས་ཞེས་བྱ་བ་ལ། ལྟེ་བའི་འཁོར་ལོ་ནི་དེ་མ་ཐག་ཏུ་སྨྲས་པའི་རྡོ་རྗེ་རིན་པོ་ཆེའི་དབུས་གནས་སོ། །མདོམས་ཀྱི་སྒྲས་ནི་དེའི་སྤྱི་བོའི་ས། དེ་རུ་དགའ་བ་རྣམས་ཀྱིས་ཉམས་སུ་མྱོང་བའི་གནས་སོ། །མདུད་པའི་རྩ་བར་ནི་རྡོ་རྗེ་རིན་པོ་ཆེའི་འཁོར་ལོ་ཉིད། དེ་རུ་མཆོག་གི་དགའ་བའི་གནས་སོ། །རིན་པོ་ཆེ་འཁོར་ལོ་ཉིད། དེ་རུ་མཆོག་གི་དགའ་བའི་གནས་སོ། །རིན་པོ་ཆེ་ཆད་པའི་དགའ་བའི་གནས་སོ། །རྡོ་རྗེ་རིན་པོ་

---

^{[མ་དཔེ་གཟིགས་ན་འདིར་གནོན།]}

ཆེའི་ནང་གི་གནས་ཞེས་བྱ་བ་ལ་བླ་མའི་ཞལ་སྔ་ནས་གཞུང་མང་པོ་བཀའ་སྩལ་ཏེ། རབ་ནི་དཔལ་ཨིནྡྲ་བྷཱུ་ཏིའི་མན་ངག་གི་གཞུང་གིས་མདུད་པའི་གནས། ལྷ་ལྕམ་ལཀྵྨཱིའི་གཞུང་གིས་གསང་བ་རིན་པོ་ཆེའི་སྣོད་ཀྱི་དབུས་ནས། སློབ་དཔོན་བཛྲ་བྷཱུ་ཏིའི་གཞུང་གིས་རྡོ་རྗེ་རིན་པོ་ཆེ་རངས་པའོ། །སློབ་དཔོན་བཱི་ར་བྷཱུ་ཏིའི་གཞུང་གིས་ནི་རིན་པོ་ཆེའི་ཁའི་ཉེ་བར་རོ། །དཔལ་ཕྱག་རྒྱ་ཆེན་པོའི་ཐིག་ལེ་ལས་ལེའུ་བཅུ་དྲུག་པའི་བཤད་པའོ།། །།

ལེའུ་བཅུ་བདུན་པའི་བཤད་པ།

---

^{[མ་དཔེ་གཟིགས་ན་འདིར་གནོན།]}

ད་ནི་བཅུ་བདུན་པའི་ཚིགས་སུ་བཅད་པ་བྲི། ཐིག་ལེ་ཚུལ་དང་ཆ་ལ་སོགས། །ཞེས་བྱ་བ་ལ། ཀ་མ་ལ་ཤཱི་ལའི་གཞུང་གིས། ཆའི་གནས་ནི་སྣང་བའི་ངོ་བོ་ཅན་དགའ་བ། ཐིག་ལེ་ཞེས་བྱ་བ་ནི་སྣང་བ་མཆེད་པའི་ངོ་བོ་མཆོག་གི་དགའ་བ། ཚུལ་གྱི་སྒྲ་ནི་སྣང་བ་ཐོབ་པའི་ངོ་བོ་ཅན་ཆད་པའི་དགའ་བ། དེ་རྣམས་ལ་ཡེ་ཤེས་ཀྱི་འོད་རབ་གྲགས་པའི་རང་བཞིན་གྱི་དགའ་བ། ཡེ་ཤེས་ཀྱི་སྒྲ་ནི་དགའ་བ་རྣམས་ལས་ནི་ཡོངས་སུ་གྲུབ་པའི་མཚན་ཉིད། སློབ་དཔོན་ཌོ་མྦིའི་གཞུང་གིས་ཡེ་ཤེས་ནི་དགའ་བ་རྣམས་ལས་རྙེད་པའི་གཞི། སློབ་དཔོན་ཤ་བ་རིའི་གཞུང་གིས་ནི་ཉམས་སུ་མྱོང་བའི་གནས་སོ། །རྣམ་རྟོག་ལས་ནི་རྟོག་མེད་ལ། །ཞེས་བྱ་བ་ལ་སོགས་པ་ལ་རྣམ་པར་རྟོག་པ་ཞེས་བྱ་བ་ནི་བསྐྱེད་པའི་རིམ་པ་རྟོག་པ་མེད་པ་ཞེས་བྱ་བ་ནི་རྫོགས་པའི་རིམ་པ། དཔལ་ཨིནྡྲ་བྷཱུ་ཏིའི་གཞུང་གིས། རྣམ་པར་རྟོག་པ་ནི་མེ་ཏོག་ཀུནད་དང་མཚུངས་སོ། །རྟོག་པ་མེད་པ་ཞེས་བྱ་བ་ནི་གཟུགས་དང་བྲལ་བའི་རང་བཞིན་བདེ་བ། ཀླུ་སྒྲུབ་སྙིང་པོའི་གཞུང་གིས་རྣམ་པར་རྟོག་པ་ནི་དངོས་པོ་ཅན། རྟོག་པ་མེད་པ་ནི་དངོས་དང་བྲལ་བ། སློབ་དཔོན་གཞན་མའི་གཞུང་གིས་རྣམ་པར་རྟོག་པ་ནི་སྲིད་པ། རྟོག་པ་མེད་པ་ནི་མྱ་ངན་ལས་འདས་པ། དཔལ་བདེ་བ་ཆེན་པོའི་གཞུང་གིས་རྣམ་པར་རྟོག་པ་ནི་མཆོག་གི་དགའ་བ། རྟོག་པ་མེད་པ་ནི་དགའ་བ་དང་བྲལ་བ། ལྟེ་བའི་གནས་ཞེས་བྱ་བ་ནི་དེ་དག་ལ་གཉིས་སུ་མེད་པའི་ངོ་བོས་རང་བཞིན་དགའ་བ། གང་ཚེ་བདུད་རྩིའི་གནས་འགྲོ་བ། །ཞེས་བྱ་བ་ལ་རྫོགས་པའི་ཕྱོགས་སུ་བདུད་རྩིའི་གནས་ནི་མྱ་ངན་ལས་འདས་པའི་གནས། མྱ་ངན་ལས་འདས་པའི་གནས་ནི་སློབ་མས་ཡེ་ཤེས་རྫོགས་པ། བསྐྱེད་པའི་རིམ་པའི་ཕྱོགས་སུ་ནི་བདེ་བའི་བདག་ཉིད་བྱང་ཆུབ་

---

^{[མ་དཔེ་གཟིགས་ན་འདིར་གནོན།]}

སེམས་ཉིད་བཅོམ་ལྡན་འདས་རྡོ་རྗེ་འཛིན་པས་གསུངས་སོ། །དེ་རྣམས་གནས་ནི་བཞི་རུ་སྟེ། །དགའ་བའི་བྱེ་བྲག་གིས་ནི་ཐལ། །ཞེས་བྱ་བ་ལ་སློབ་དཔོན་ནག་པོ་པའི་གཞུང་གིས་དེ་རྣམས་ཞེས་བྱ་བ་ནི་བྱང་ཆུབ་སེམས་ཀྱི་ཐིག་ལེ་བཞི་རུ་ཞེས་བྱ་བ་ནི་དཔྲལ་བ་དང༌། མགྲིན་པ་དང༌། སྙིང་ག་དང༌། ལྟེ་བའི་གནས་སོ། །ཐལ་བ་ཞེས་བྱ་བ་ནི་འདི་སླེབ་པའོ། །དེ་ལ་དོན་ནི་འདི་ཡིན་ཏེ། གསང་བའི་རྡོ་རྗེ་རིན་པོ་ཆེའི་དཔྲལ་བ་ལ་ཚོགས་པའི་གནས་སུ། བྱང་ཆུབ་ཀྱི་སེམས་ཐིག་ལེ་བཞི་པ་སླེབ་པས་དགའ་བའི་ངོ་བོ་ཞེས་དགོངས་པའོ། །ཕྱི་ནས་ཡང་རྡོ་རྗེ་སློབ་དཔོན་གྱིས་འདི་ལྟར་བཤད་དེ། གང་གི་ཚེ་བྱང་ཆུབ་ཀྱི་སེམས་ཐིག་ལེའི་དངོས་པོ་ཅན་དུ་གྱུར་པ་དེའི་ཚེ་རྣམ་པར་རྟོག་པ་ཉིད། གང་གི་ཚེ་དགའ་བ་ཉིད། དེའི་ཚེ་རྟོག་པ་མེད་པ་ཉིད། རྩ་ཡི་ཀུན་སྤྱོད་སྦྱོར་བ་ཡིས། །ཞེས་བྱ་བ་སྒྲ་ཇི་བཞིན་པའོ། །དཔྲལ་བའི་སྟེང་གི་པདྨའི་གནས་ལ་སོགས་ཞེས་བྱ་བ་ནི། དཔྲལ་བ་ཞེས་བྱ་བ་ནི་གསང་བའི་རྡོ་རྗེ་རིན་ཆེན་འཁོར་ལོའི་ཐོག་མའི་གནས། སྟེང་དུ་པདྨ་ཞེས་བྱ་བ་ནི་བདེ་བ་ཆེན་པོའི་འཁོར་ལོའི་གནས་པ་ཅན་བདེ་བ་ཆེན་པོའི་པདྨ་ཉིད་དོ། །དེའི་གཙུག་ཏོར་སྟེང་བཞིན་ཞེས་བྱ་བ་ནི་འཁོར་ལོའི་རྣམ་པ་ལས་ཕྱི་རོལ་གྱི་གནས་སུ། གང་ཞིག་འཛུམས་པའི་པདྨའི་དངོས་པོ་ཅན་རིན་པོ་ཆེ་དེ་ནི་གཙུག་ཏོར་རོ། །སློབ་དཔོན་ནག་པོ་པའི་གཞུང་གིས་ཇི་ལྟར་སངས་རྒྱས་ཀུན་གྱི་དབུ་ལ། གཙུག་ཏོར་སངས་རྒྱས་རིན་པོ་ཆེའི་སྣོད་ལ་ཡང་དེ་ལྟར་རོ། །དེས་ན། བདེ་བ་ཆེན་པོ་ཚོར་བའི་གནས། །ཞེས་བྱ་བའི་དོན་ཏོ། །དཔལ་ཀུ་ཀུ་རིའི་གཞུང་གིས་གསང་བའི་རྩའི་གནས་བསྟན་པའོ། །ལྟེ་བའི་འོག་མ་ལ་སོགས་ཞེས་བྱ་བ་ནི་བསྐྱེད་པའི་རིམ་པའི་ཕྱོགས་སུ་སྒྲ་ཇི་བཞིན། རྫོགས་པའི་རིམ་པའི་ཕྱོགས་སུ་སློབ་དཔོན་ཛྙཱ་ན་བྷཱུ་ཏིའི་གཞུང་གིས། ལྟེ་བའི་གནས་ནི་གསང་བའི་རྡོ་རྗེ་རིན་པོ་ཆེའི་དབུས། འོག་ཅེས་བྱ་བ་ནི། སྒོའི་ཕྱིར་རོལ་གྱི་གནས་སོ། །གྲུ་གསུམ་གྱི་རྣམ་པའི་ཕྱིར། དེ་རང་སུམ་མདོའི་གནས་སོ། །དེའི་སྟེང་ནི་འདི་ལྟར་བཤད་དེ། གྲུ་གསུམ་གྱི་སྟེང་ན། ལྟེ་བའི་སྒྲས་ནི་གསང་བ་རིན་པོ་ཆེའི་སྣོད། མདོམས་ཞེས་བྱ་བའི་གསང་བའི་སྣོད་ཀྱི་དབུས། སློབ་དཔོན་བཱི་ར་བྷཱུ་ཏིའི་གཞུང་གིས། དབུས་ཀྱི་གནས་ནི་རིན་པོ་ཆེའི་འཁོར་ལོ་བདེ་བ་ཆེན་པོའི་མཛོད་

---

^{[མ་དཔེ་གཟིགས་ན་འདིར་གནོན།]}

ཉིད་གྲུ་གསུམ་གྱི་འོག་ཏུ་ལྟེ་བའི་རྣམ་པ་ཅན་ཞེས་བྱ་བ་ལ། ཕྱི་ནས་ནི་དོན་གང་གིས་བཤད་ཅེས། སློབ་དཔོན་གྱིས་འདི་ལྟར་བཤད་དེ་བྱང་ཆུབ་ཀྱི་སེམས་འབབ་པའི་བདག་ཉིད་ལ་སོགས་རྣམས་ལ་གནས་ཀྱི་བདག་ཉིད་བསྟན་པའོ། །ལ་ལ་ནཱ་ལ་སོགས་གོ་སླ་བར་གསུངས་སོ། །རྡོ་རྗེ་རྩེ་མོ་ལ་སོགས་ཞེས་བྱ་བ་ལ། སློབ་དཔོན་ཤ་བ་རིའི་གཞུང་གིས། རྡོ་རྗེ་རྩེ་མོ་ལ་སོགས་ཞེས་བྱ་བ་ལ། རྡོ་རྗེ་རྩེ་མོ་ཞེས་བྱ་བ་ནི་སྣང་བའི་གནས། ཐུགས་ཀྱི་རྡོ་རྗེ་ཞེས་བྱ་བ་ནི་དེ་རུ་སྣང་བ་ཐོབ་པ། སུམ་མདོར་ཞེས་བྱ་བ་ནི་ལོངས་སྤྱོད་ཀྱི་གནས། གསུང་ཡིན་ཞེས་བྱ་བ་ནི་དེ་རུ་སྣང་བ་མཆེད་པ། ལྟེ་བ་ཞེས་བྱ་བ་ནི་དབང་གི་གནས། སྐུ་ཞེས་བྱ་བ་ནི་སྣང་བ། སྐུ་གསུམ་ལ་དེ་ལྟར་ངེས་པའི་ཞེས་བྱ་བ་ནི་སྣང་བ་ལ་སོགས་པའི་མཚན་ཉིད་ཀྱི་དགའ་བ། གསུམ་ལ་རིན་པོ་ཆེའི་ཁའི་མཐའ་ནས་འབྱུང་བའི་བཞི་བསྟན་པའོ། །ཕྱི་ནས་ཀྱང་དེ་རང་ལ་གྱེན་དུ་ལམ་གྱི་རིམ་པས་རྒྱས་པར་བསྟན་པའི་དོན་བཤད་དེ། སྙིང་ག་ཞེས་བྱ་བ་ནི་གསང་བའི་རྡོ་རྗེ་རིན་པོའི་གནས། ཐུགས་ཀྱི་རྡོ་རྗེ་ཞེས་བྱ་བ་ནི་དབང་གི་གྲགས་པ་ཅན་ཆོས་ཀྱི་སྐུ། མགྲིན་པ་ཞེས་བྱ་བ་ནི་རྡོ་རྗེ་རིན་པོ་ཆེའི་འཁོར་ལོ། །གསུང་གི་རྡོ་རྗེ་ཞེས་བྱ་བ་ནི། དེ་རུ་ལོངས་སྤྱོད་ཀྱི་རང་བཞིན་ལོངས་སྤྱོད་རྫོགས་སྐུ། དཔྲལ་བ་ཞེས་བྱ་བ་ནི་རྡོ་རྗེ་རིན་པོ་ཆེ་འཁོར་ལོའི་གདན། སྐུའི་རྡོ་རྗེའི་མཆོག་ཅེས་བྱ་བ་ནི་མི་སྣང་བའི་གྲགས་པ་ཅན། སྤྲུལ་པའི་སྐུ་མི་སྣང་བའི་སྒྲས་ནི་གནས་ནས་གནས་སུ་འཕོ་བ། སློབ་དཔོན་བཛྲ་བྷཱུ་ཏིའི་གཞུང་གིས་ནི་དང་པོའི་གནས་སུ་འགྲོ་བ། དཔལ་པདྨ་ཤ་བ་རིའི་གཞུང་གིས་ནི་སྐྱེ་མེད་དུ་འགྲོ་བ། དེའི་དབུས་ན་ཡོད་པའི་སྲོག་ལ་སོགས་ཞེས་བྱ་བ་ནི་དཔལ་བདེ་བ་ཆེན་པོའི་གཞུང་གིས། དེའི་སྒྲས་ནི་དེ་མ་ཐག་ཏུ་སྨྲ་བའི་གྲགས་པ་ཅན་དགའ་བ་གསུམ་སྲོག་ཅེས་བྱ་བ་ནི་བཞི་པ་རང་བཞིན་དགའ་བ། དེ་ཡང་ཀུན་རྫོབ་ཀྱི་བདེ་བ་ལ་བསྐྱེད་པའི་རིམ་པའི་ཕྱོགས་སུའོ། །ཉེ་བའི་སྲོག་ཅེས་བྱ་བ་ནི་དགའ་བྲལ། སྙིང་གའི་གྱེན་ལས་སྲོག་གི་རླུང་ཞེས་བྱ་བ་ནི་རྡོ་རྗེ་རིན་པོ་ཆེའི་དཀྱིལ་ནས་ཀུན་རྫོབ་ཀྱི་བདེ་བའི་བདག་ཉིད་རང་བཞིན་དགའ་བ་ཤར་བ། ཀུན་དུ་སྣང་བ་ཞེས་བྱ་བའི་དོན་ཏོ། །ལྟེ་བའི་འོག་ནས་རྡོ་རྗེ་རིན་ཆེན་ཁའི་གནས་

---

^{[མ་དཔེ་གཟིགས་ན་འདིར་གནོན།]}

ནས། ཚིམ་བྱེད་ཀྱི་རླུང་གི་སྒྲས་ནི་དགའ་བྲལ་ལ་ཤར་བའི་ཚེ། གང་གི་ཚེ་དགོངས་པས་དགའ་བྲལ་ནི་ཚིམ་བྱེད་རླུང་གི་མཚན་ཉིད་ཅན། དེ་རུ་སློབ་དཔོན་ནག་པོ་པའི་གཞུང་གིས། ཐ་མལ་པའི་ཆགས་པའི་དགའ་བ་རྣམས་ལ། མགུ་བ་སྐྱེ་བའི་དོན་གྱི་ཕྱིར། གང་གི་ཚེ་རྐང་མཐིལ་ནས་ཚིམ་བྱེད་ཀྱི་རླུང་འབྱུང་བར་འགྱུར་བ་དེའི་ཚེ་སྲོག་གི་རླུང་གྱེན་དུ་འགྲོ། རྐང་མཐིལ་ཞེས་བྱ་བ་ནི་རྡོ་རྗེ་རིན་པོ་ཆེའི་སྒོ། དེ་ལས་སྲོག་གི་རླུང་རང་བཞིན་གྱི་དགའ་བ། རང་གི་སྟོབས་ནུས་ཀྱིས། ཚིམ་བྱེད་པའི་རླུང་ཡང་གྱེན་དུ་འགུགས་པར་མཛད། ཚིམ་བྱེད་པའི་རླུང་ནི་ལྟེ་བའི་གནས་སུ་གཞི་བགྱིད་པར་ཞེས་སློབ་དཔོན་ཝ་སནྟ་ཏི་ལ་ཀའི་ཞལ་སྔ་ནས་ནི། རྡོ་རྗེ་རིན་པོ་ཆེའི་ལྟེ་བའི་གནས་སུ་བཞུགས་པའི་གསང་བའི་པདྨའི། དེ་རུ་ཚིམ་པར་བྱེད་པའི་རླུང་འགྲོ་བ་ཙམ་གྱིས་གསང་བ་ཆེན་པོའི་ངོ་བོར་འགྱུར། རང་བཞིན་དགའ་བ་ཉིད་རྫོགས་པ་ཞེས་བྱ་བའི་དགོངས་པའོ། །དེ་རྫོགས་པའི་རིམ་པའི་ཕྱོགས་སོ། །བསྐྱེད་པའི་རིམ་པའི་ཕྱོགས་སུ་ནི་འདི་ལྟར་བཤད་དེ། རྡོ་རྗེ་རིན་པོ་ཆེའི་འཁོར་ལོའི་གནས་ཀྱི་རྩ་བ་ནི་གཙུག་ཏོར་གྱི་གནས་ནས་གང་གི་ཚེ། མེ་ཏོག་ཀུནད་དང་འདྲ་བ་རང་བཞིན་གྱི་དགའ་བ་ཤར་བ་དེའི་ཚེ། དགའ་བྲལ་གྱི་ངོ་བོ་ཅན་བྱང་ཆུབ་ཀྱི་སེམས། རྡོ་རྗེ་རིན་ཆེན་གྱི་ཁ་སྒོའི་གནས་སུ་གཤེགས་སོ། །དེའི་ཚེ་དེ་ནི་སྲོག་གི་རླུང༌། ལྟེ་བའི་གནས་སུ་བརྟེན་པར་འགྱུར། །ཞེས་བྱ་བ་ལ། གང་གི་ཚེ་དགའ་བྲལ་འབྱུང་བ་དེའི་ཚེ། ཡང་དག་པ་ཤེས་རབ་ཡེ་ཤེས་ཀྱི་དབང་གི་དེ་ཁོ་ན་ཉིད་རྣལ་འབྱོར་པས་ཐོབ་ན། དེའི་ཚེ་སྲོག་གི་རླུང་ལ་རེག་པར་བྱེད་པར་ནུས། དེ་ལས་དེའི་སྐད་ཅིག་གིས་རང་བཞིན་གྱི་དགའ་བ་རྡོ་རྗེ་རིན་པོ་ཆེའི་ལྟེ་བའི་གནས་སུ་བསྟན་པར་འགྱུར་རོ། །དཔལ་ཕྱག་རྒྱ་ཆེན་པོའི་ཐིག་ལེ་ལས་ལེའུ་བཅུ་བདུན་པའི་བཤད་པའོ།། །།

ལེའུ་བཅོ་བརྒྱད་པའི་བཤད་པ།

---

^{[མ་དཔེ་གཟིགས་ན་འདིར་གནོན།]}

ད་ནི་བཅོ་བརྒྱད་པ་ལ་ཟབ་པའི་ཚིགས་སུ་བཅད་པ་བྲི། ཁ་སྦྱོར་རྣམ་པའི་སྦྱོར་བ་ཡིས། །ཞེས་བྱ་བ་ལ་སོགས་པ་ལ་སྡོམ་པའི་རྒྱ་མཚོའི་གཞུང་གིས། རྡོ་རྗེ་སློབ་དཔོན་གྱིས་འདི་ལྟར་བཤད་དེ། ཁ་སྦྱོར་གྱི་སྒྲས་ནི་སྲོག་གི་དབྱུག་པ་ལ། སྤྲོས་མེད་མ་ལ། ཙནྡན་གོ་ཤིཪྵའི་ཤིང་གི་ནང་དུ་སྦྲུལ་མོ་བཞིན་དུ་མཉམ་པར་འཁྱུད་པ། སློབ་དཔོན་ཌོ་མྦིའི་གཞུང་གིས་ནི་བདུད་རྩི་མ་དང༌། དེ་བཞིན་

---

^{[མ་དཔེ་གཟིགས་ན་འདིར་གནོན།]}

བདུད་རྩི་འབབ་པ་མའི། །སེམས་ལ་གང་གི་རིམ་པས་ནི། །འོང་བ་དང་ནི་འགྲོ་བར་འགྱུར། །ཞེས་འདི་ལྟར་བཤད་དེ། རྣམ་པར་ཤེས་པའི་རླུང་གི་བདག་ཉིད་ཀྱི་བྱང་ཆུབ་ཀྱི་སེམས། སྲོག་གི་རླུང་ལ་ཞོན་ནས་ལེགས་དགྱེས་ཆགས་པ་ཆེན་པོ་འབྱུང་དུས་སུ། རྡོ་རྗེ་དབྱིངས་ཀྱི་དབང་ཕྱུག་མའི་སྙིང་གའི་ལམ་གྱིས་མི་སྣང་བ་དང་ལོངས་སྤྱོད་དང༌། དབང་ལ་ཤར་བར་བྱེད་ཅེས་ལུང་ངོ༌། །ལེགས་དགྱེས་ཀྱི་ཆགས་པ་ཆེན་པོའི་སྒྲ་ནི་མཆོག་གི་དགའ་བའོ། །ལྟེ་བའི་རྩ་བར་སྲོག་གི་རླུང༌། །ཞེས་བྱ་བ་ནི་གང་ཞིག་ལྟེ་བ་དེ་ནི་མཆོག་དང༌། ཆད་པ་གཉིས་སུ་མེད་པའི་གནས་སོ། །སློབ་དཔོན་ཌོ་མྦཱིའི་གཞུང་གིས་ནི་ཀུན་རྫོབ་ཀྱི་རང་བཞིན་དགའ་བའི་གནས་སོ། །སྲོག་གི་རླུང་ནི་སྣང་བ་ཐོབ་པའི་རང་གི་ངོ་བོ་ཅན། བདེ་བ་ཆེན་པོའི་རིན་པོ་ཆེ་དེ་ནི་སྐད་ཅིག་ཙམ་ལ་གཏོར་བས། ཉམས་སུ་མྱོས་པས་རེག་བྱའི་རྩའི་རང་བཞིན་ཅན། པདྨ་རྣམས་ལ་གྱེན་དུ་འགྲོ་བ་དང༌། རྒྱས་པར་བྱེད་པ་ཞེས་བྱ་བའི་དོན་ཏོ། །དེ་ནི་ལྟེ་བའི་དབུས་སུ་གནས། །ཞེས་བྱ་བ་ལ་རྒྱས་པའི་རྣམ་པ་ཅན། རེག་བྱའི་པདྨ་ལ་ལྟེ་བའི་གནས་སུ། ལེགས་དགྱེས་ཆེན་པོའི་སྣང་བ་ཆེན་པོ་ཅན། བདེ་བའི་རིན་ཆེན་རྟག་ཏུ་ཤར། །ཞེས་བྱ་བའི་དོན་ཏོ། །དཔལ་ཕྱག་རྒྱ་ཆེན་པོའི་ཐིག་ལེ་ལས་ལེའུ་བཅོ་བརྒྱད་པའི་བཤད་པའོ།། །།

ལེའུ་བཅུ་དགུ་པའི་བཤད་པ།

---

^{[མ་དཔེ་གཟིགས་ན་འདིར་གནོན།]}

ད་ནི་བཅུ་དགུ་པ་ལ་ཟབ་པའི་ཚིགས་སུ་བཅད་པ་བྲི། བཅུ་དྲུག་ལོན་པ་དང་ལྷན་ཅིག་གང་ཞིག་ཁ་སྦྱོར་བ་དེ་ནི་སློབ་དཔོན་བདེ་བ་ཆེན་པོའི་གཞུང་གིས་ནི་གསང་བའི་རིན་ཆེན་གྱི་ལྟེ་བ་གཉིས་ལས་འབྱུང་བའི་ཤཱུ་ཀྲ་འབབ་པ་ལ་སོགས་པ་འདུས་པ་ཕྲད་པ་ཞེས་བྱ་བའི་དོན་ཏོ། །བྱང་ཆུབ་སེམས་ལས་འབྱུང་བ་པདྨའི་ནང་དུ་དབབ་པར་བྱ་ཞེས་བྱ་བ་ལ་འདི་ལྟར་བཤད་དེ། པདྨ་ནི་གཞོན་ནུ་མའི་ཀཱ་ལིའི་སྙིང་པོའི་བུམ་པ། དེ་རུ་བྱང་ཆུབ་ཀྱི་སེམས་དབབ་པར་བྱའོ། །གང་གི་ཕྱིར་ཞེ་ན། དེ་ལྟ་བུའི་བུམ་པའི་དབང་བསྐུར་བས་སློབ་དཔོན་ཉིད་དུ་ཐོབ། སློབ་དཔོན་བི་ལ་ས་བཛྲའི་གཞུང་གིས་སློབ་དཔོན་ཉིད་དུ་ནི་ཆད་པའི་དགའ་བ་ལ་དབང༌། དབང་ལས་ཕྱི་ནས་གསང་བ་ལ་སོགས་པའི་འབྲས་བུ་རྙེད། དེའི་ཕྱིར་སློབ་དཔོན་གྱི་དབང་མཆོག་ཅེས་ཉིད་མཆོག་གི་དབང་ཕྱུག་གིས་གསུངས་སོ། །དེ་

---

^{[མ་དཔེ་གཟིགས་ན་འདིར་གནོན།]}

ལྟར་མིན་ན་པདྨའི་ཕྱི་རོལ་དུ་བབས་པས་གཅིག་པུའི་ཆད་པའོ། །དེས་ཇི་ལྟར་དབང་ཉིད་དུ་འགྱུར་རོ། །ད་ནི་གསང་བའི་དབང་བསྐུར་བ་ལ་དོན་བྲི། གང་ཚེ་གསང་བའི་གནས་སུ་སེམས། །ཞེས་བྱ་བ་ནི་གང་ཞིག་རྟེན་མེད་པའི་བདག་ཉིད་པའི་བདེ་བ་ཉམས་སུ་མྱོང་བ་དེ་ནི། ཡང་དག་གསང་བ་དེ་ནི་རེ་ཞིག་དོན་དམ་པའི་ཕྱོགས་སུ། ཀུན་རྫོབ་ཀྱི་ཕྱོགས་སུ་དཔལ་བདེ་བ་ཆེན་པོ་གཞུང་གིས་ནི་ཐབས་དང་ཤེས་རབ་གཉིས་ཀྱིས་གསང་བ་རིན་པོ་ཆེའི་ནང་དུ་བྱང་ཆུབ་ཀྱི་སེམས་གཟུང་བ། སློབ་དཔོན་བཱི་ར་བྷཱུ་ཏིའི་གཞུང་གིས། གང་ཞིག་ཕྱི་རོལ་མ་ཡིན་སྤྲོས་པ་དེ་ནི་གསང་བ། དེའི་ཕྱིར། སེམས་ནི་པདྨའི་ནམ་མཁའ་མིན། །ཞེས་རྒྱུད་ལས་གསུངས་སོ། །ནམ་མཁའ་པདྨའི་སྒྲ་ནི་དོ་རྗེ་སློབ་དཔོན་གྱིས་བར་མ་བཤད་དོ། །ད་ནི་ཤེས་རབ་ཡེ་ཤེས་ཀྱི་དབང་བསྐུར་བྲི། ཤེས་རབ་ནི་བྱང་ཆུབ་གྱི་སེམས་ཟླ་བ་རྒྱས་པའི་ཞལ། རྡོ་རྗེ་དབྱིངས་ཀྱི་དབང་ཕྱུག་མ། ཡེ་ཤེས་ནི་མེ་ཏོག་ལ་དྲི་བཞིན་དངོས་པོ་དང་བྲལ་བའི་བདེ་བ། དབང་བསྐུར་ནི་ཉམས་སུ་མྱོང་བ། དེ་ནི་རྫོགས་པའི་རིམ་པ། བསྐྱེད་པའི་རིམ་པའི་ཕྱོགས་སུ་ནི། ཤེས་རབ་ནི་གསང་བའི་པདྨ་ལས་བབས་པའི་བྱང་ཆུབ་ཀྱི་སེམས་ཡེ་ཤེས་ནི་རྡོ་རྗེ་ལས་བྱུང་བ། དབང་བསྐུར་ནི་ཕན་ཚུན་འདུས་པ། རྒྱུད་ཀྱི་མན་ངག་གི་གོ་རིམས་ཀྱི་མན་ངག་སློབ་དཔོན་མཚོ་སྐྱེས་རྡོ་རྗེའི་གཞུང་འདི་ལྟ་སྟེ། དབང་བསྐུར་ནི་རྡོ་རྗེ་བུམ་པ་རིན་ཆེན་རྒྱུད་ལས་འབེབས་པ། དེ་ཡང་ཤེས་རབ་པདྨའི་ཡན་ལག་རབ་ལ། ཡེ་ཤེས་ཀྱི་ཆད་པའི་ཕྱག་རྒྱ་དེའི་ཕྱིར། ཡེ་ཤེས་ཀྱི་སྐབས་ལས་དེ་མ་ཡིན་པ་ཉིད། དཔལ་རྡོ་རྗེ་འཛིན་པ་ཆེན་པོས་དབང་བསྐུར་བའི་དོན་གསུངས་སོ། །སློབ་དཔོན་བཱི་ར་བྷཱུ་ཏིའི་གཞུང་གིས་ཤེས་རབ་མ་ལས། ཐབས་ལ་གང་ཞིག་ཡེ་ཤེས་ཀྱི་དབང་བསྐུར་བ་དེ་ནི་ཤེས་རབ་ཡེ་ཤེས་ཀྱི་དབང༌། ཤེས་རབ་ཀྱི་དབང་གི་སྒྲས་ནི་བཅོས་པ་མེད་པའི་བདེ་བའི་དབང༌། སླད་མ་སྔར་བསྟན་པ་དེ་ནི་སྒྲ་ཇི་བཞིན་ནོ། །དེའི་འགོག་པ་བཞི་པར་གྲགས་ཞེས་བྱ་བ་ནི། གང་ཞིག་དགའ་བྲལ་གྱི་ཐིག་ལེ་འགོག་པ་དེ་ནི་རང་བཞིན་དགའ་བའི་མཚན་ཉིད་ཅན་བཞི་པའོ། །སློབ་དཔོན་གཞན་མའི་གཞུང་ནི་དགའ་བྲལ་གྱི་ཐིག་ལེ་གང་ཞིག་ངོ་བོ་ཉིད་མེད་པ་དེ་ནི་བཞི་པའོ། །ཐིག་ལེའི་སྒྲ་ནི་ཡེ་ཤེས་

---

^{[མ་དཔེ་གཟིགས་ན་འདིར་གནོན།]}

ཞབས་ཀྱི་གཞུང་གིས་ནི། ཕྲ་མོའི་རྣལ་འབྱོར་གྱི་རྟེན་བཤད་དོ། །སློབ་དཔོན་ཤ་རིའི་གཞུང་གིས་ནི་སྣང་བ་དང༌། ལོངས་སྤྱོད་དང་དབང་དང༌། ཡེ་ཤེས་ཀྱི་རིམ་པས་དབང་བསྐུར་ཏེ། རེ་རེ་ལ་བྱང་ཆུབ་སེམས་ཀྱི་ཐིག་ལེ་བཞི། དབང་བསྐུར་བཞི་ལ་བཅུ་དྲུག་གི་གྲངས་སོ། །དེ་ཡང་ན་གི་བདག་ཉིད་ཀྱི་ཨཱ་ལི་ཀཱ་ལིའི་ངོ་བོ་ཅན། དེ་ནི་བསྐྱེད་པའི་རྨ་པའི་ཕྱོགས་སོ། །དེ་ནི་རྫོགས་པའི་རིམ་པའི་ཕྱོགས་སུ་བཞི་པའི་རང་བཞིན་ཡེ་ཤེས་ཀྱི་མཚན་ཉིད་ཀྱི་ཕྱིར་ཐིགས་པ་དང་བྲལ་བ། དེ་རུ་དབང་བསྐུར་བ་གསུམ་གྱི་གྲངས་ཀྱིས། ཐིག་ལེ་བཅུ་གཉིས་དེ་ཡང༌། ནང་གི་བདག་ཉིད་ཨཱ་ལིའི་རང་བཞིན། དེ་ལ་རིམ་པ་ནི་འདི་ཡིན་ཏེ། འོད་དང༌། སྟོབས་དང༌། སྤྲིན་དང༌། ཚུལ་དང༌། དབུགས་དང༌། ཨུཏྤལ་དང༌། མགུ་དང༌། ཡིད་དང༌། སྙིང་དང༌། ཟླ་བ་དང༌། ཉི་མ་དང༌། དྲག་པོ་དེ་ནི་རང་བཞིན་དགའ་བའི་ཐིག་ལེ་བཞི་མེད་པའི་བཅུ་གཉིས། མཆོག་གི་དགའ་བའི་ཀཱ་ལི་ཐིག་ལེའོ། །ཆད་པའི་དགའ་བ་ཤར་བའི་དུས་སུ་བྱང་ཆུབ་ཀྱི་འོད་དུ་ཞུ་བའི་ཕྱིར་གཞི་འཕེལ་བ། འཕེལ་བས་ཟླ་བའི་ཕྱིར། དེ་དང་ཨཱ་ལིའི་ཐིག་ལེ་ཞེས་མཚན་དུ་གྱུར་ཏོ། །སློབ་དཔོན་བཱི་ར་བྷཱུ་ཏིའི་གཞུང་གིས་ནི། ཨཱ་ལི་ཡེ་ཤེས་ལས་ནི་སྐྱེ་བའི་ཕྱིར། ཨཱ་ལིའི་ཡེ་ཤེས་འབྲས་བུ་འཕེལ་བའོ། །སློབ་དཔོན་མཚོ་སྐྱེས་རྡོ་རྗེའི་གཞུང་གིས། བྱང་ཆུབ་ཀྱི་སེམས་རྩ་བའི་ཕྱིར་རྒྱུའི་མཚན་ཉིད་ཅན་ཨཱ་ལིའི་ཡེ་ཤེས་དེ་རང་རྣམ་པར་སྨིན་པས་འབྲས་བུ་ཀཱ་ལིའི་ཡེ་ཤེས་དཔལ་ཨིནྡྲ་བྷཱུ་ཏིའི་གཞུང་གིས། ཨཱ་ལི་ཀཱ་ལིའི་སྦྱོར་བའི་གཉིས་སུ་མེད་པའི་རྣག་བཞིན་ཚངས་པའི་སྒོ་ནས་མགྲིན་གནས་ལ་སོགས་ཞེས་བྱ་བ་ལ། བསྐྱེད་པའི་རིམ་པའི་ཕྱོགས་ལ་ནི་ཚངས་པའི་སྒྲ་ནི་བདེ་བ་ཆེན་པོའི་ཡན་ལག་རབ། དེ་ནས་ནི་དེའི་གནས་ནས་གསང་བའི་ལྟེ་བ་ཡན་ལག་ཡན་ཆད་ཚངས་པའི་དབྱུག་པའི་དབུས་ཀྱི་ལམ་གྱིས་ཨཱ་ལི་ཀཱ་ལིའི་དགའ་བའི་ཐིག་ལེ་རྣམས་ལས། མི་སྣང་བ་དང༌། ལོངས་སྤྱོད་དང༌། དབང་དང༌། ཡེ་ཤེས་སོ། །ཡེ་ཤེས་ཐུབ་པ་མེད་པའི་རེ་རེའི་སྐབས་སུ་རེག་བྱའི་རོའི་ཉམས་གཉིས་གཉིས་འབྱུང་བར་འགྱུར་རོ། །འཁོར་ལོ་བཞིའི་རིམ་པ་ཞེས་བྱ་བ་ལ། འོག་ཏུ་བཤད་

---

^{[མ་དཔེ་གཟིགས་ན་འདིར་གནོན།]}

པའི་དབང་བསྐུར་བ་བཞི། ཕྱིའི་ཤེས་རབ་མ་དགོས་པ་མེད་པས་ནང་གི་བདག་ཉིད་ཀྱི་ཡེ་ཤེས་ཀྱི་ཕྱག་རྒྱ་དང་ལྷན་ཅིག་དབང་བསྐུར་བའི་རིམ་པར་བྱ་ཞེས་སློབ་དཔོན་ཨ་ཀྲ་པུ་ཏིའི་མན་ངག་གོ །དེ་ལ་རིམ་པ་ནི་འདི་ཡིན་ཏེ། བདེ་བ་ཆེན་པོའི་འཁོར་ལོར་དགའ་བའི་ཐིག་ལེ་བཞི་སྤྲོས་པས་བུམ་པའི་དབང༌། ལོངས་སྤྱོད་འཁོར་ལོར་མཆོག་གི་དགའ་བ་ནི་ཐིག་ལེ་བཞི་སྤྲོས་པས་གསང་བའི་དབང༌། ཆོས་ཀྱི་འཁོར་ལོར་དགའ་བྲལ་ཐིག་ལེ་བཞི་སྤྲོས་པས་ཤེས་རབ་ཡེ་ཤེས་ཀྱི་དབང༌། སྤྲུལ་པའི་འཁོར་ལོ་བདེ་བ་ཆེན་པོའི་ཚོར་བའི་གནས་སུ། རང་བཞིན་དགའ་བའི་ཐིག་ལེ་བཞི་སྤྲོས་པས། དེ་ལྟར་དེ་བཞིན་བཞི་པའོ། །དེ་ནི་བསྐྱེད་པའི་རིམ་པའི་ཕྱོགས་སོ། །རྫོགས་པའི་རིམ་པའི་ཕྱོགས་སུ་ནི་དབང་བསྐུར་གསུམ་ལ། དོ་རྗེ་རིན་པོ་ཆེ། དེའི་རིམ་པ་ནི་འདི་ཡིན་ཏེ། བུམ་པའི་དབང་ནི་རྡོ་རྗེ་རིན་པོ་ཆེའི་ཁ་རུ། གསང་བའི་དབང་ནི་རིན་པོ་ཆེའི་ལྟེ་བའི་དབུས་སུ། དེ་ཡེ་ཤེས་ཀྱི་དབང་ནི་རྡོ་རྗེ་རིན་པོ་ཆེ་འཁོར་ལོའི་དབུས་སུ། བཞི་པ་ནི་དེ་ལྟར་དེ་བཞིན་བཤད་པར་ཤེས་རབ་ཡེ་ཤེས་ཀྱི་དབང་ལ་འབྲས་བུའོ། །ཚང་བའི་ཞལ་དང་བྲལ་ཞེས་བྱ་བ་ནི་གང་ཞིག་ལྷའི་བུ་ཚང་པ་དེ་ལ། ཞལ་བཞི། དེས་རྣམ་པ་དང་བྲལ་པའི་རོ་ཆེན་པོ་དང་ལྡན་པའི་བཅོམ་ལྡན་འདས་ཀྱི་ཞལ་རྣམས་སོ། །དེ་ནི་ཨཱ་ལིའི་ཐིག་ལེ་བཅུ་གཉིས་ཀྱི་གྲངས་ལ་བསྟན་པའོ། །དཔལ་པྲ་ཧ་རིའི་གཞུང་གིས་ནི་རོ་ཆེན་པོ་བརྒྱད་ཀྱི་རང་བཞིན་ཧེ་རུ་ཀའི་ཞལ་ལོ། །དཔལ་ཨིནྡྲ་བྷཱུ་ཏིའི་གཞུང་གིས། ཚངས་པའི་གཞལ་ནི་བྱང་ཆུབ་ཀྱི་སེམས་མཆོག་གི་ཐིག་ལེའོ། །ལྷ་ལྕམ་ལཀྵྨཱིའི་གཞུང་གིས་ནི་རོ་ཆེན་པོ་ཞེས་བྱ་བ་ནི་ཚངས་པའི་ཡེ་ཤེས་ཀྱི་ངོ་བོ་ཅན། བྱང་ཆུབ་ཀྱི་སེམས་ཐིག་ལེ་དང་བྲལ་བ། གང་གི་ཕྱིར་ཞེ་ན་རང་བཞིན་དགའ་བ་འབྱུང་བའི་ཚད་མའི་ཕྱིར་རོ། །བཅུ་གཉིས་ཕྱེད་ལ་སོགས་ཞེས་བྱ་བ་ནི་དཔལ་བདེ་བ་ཆེན་པོའི་གཞུང་གིས་ནི་ཐིག་ལེ་བཅུ་གཉིས་ཀྱི་ནང་ནས། དབང་བསྐུར་དགའ་བ་རེ་རེ་ལ་གསུམ་གསུམ་དུ་ཤེས་པར་བྱའོ། །བཞི་པའི་རང་བཞིན་གྱི་ཕྱིར་ཐིག་ལེ་དང༌། དགའ་བ་དང་བྲལ་ཞེས་སྔར་གདམས་སོ། །གཞན་མ་ནི་གོང་མ་དང་འོག་མའི་དོན་སྒྲ་ཇི་བཞིན་གསུངས་སོ། །དཔལ་ཕྱག་རྒྱ་ཆེན་པོའི་ཐིག་

---

^{[མ་དཔེ་གཟིགས་ན་འདིར་གནོན།]}

ལེ་ལས་ལེའུ་བཅུ་དགུ་པའི་བཤད་པའོ།། །།

ལེའུ་ཉི་ཤུ་པའི་བཤད་པ།

---

^{[མ་དཔེ་གཟིགས་ན་འདིར་གནོན།]}

ད་ནི་ཉི་ཤུ་པ་ལ་ཟབ་པའི་དོན་བྲི། རྣལ་འབྱོར་པ་ལ་སྤྱོད་པ་ཞེས་བྱ་བ་ནི་འདི་ལྟར་བཤད་དེ། རྣལ་འབྱོར་ཞེས་བྱ་བ་ནི་རྣམ་པ་ཐམས་ཅད་མཁྱེན་པ་དབང་ཕྱུག་ཅེས་བྱ་བ་ནི་ཕྱོགས་གཅིག་པའི་བཏང་སྙོམས། སྤྱོད་པ་ནི་བྱེ་བྲག་གསུམ་པའི་ཐུགས་རྗེའི་རྟེན་བྱེད་པ། སློབ་དཔོན་བཱི་ར་བྷཱུ་ཏིའི་གཞུང་གིས། ཡང་དག་པའི་ཤེས་རབ་ཡེ་ཤེས་ཀྱི་དབང་བསྐུར་བའི་འབྲས་བུ་ཉམས་སུ་མྱོང་ཟིན་པ་གང་ཞིག །རིན་པོ་ཆེའི་གང་ཟག་དེ་ནི། རྣལ་འབྱོར་གྱི་དབང་ཕྱུག་གི་སྤྱོད་པ་ནི་རང་གིས་སྤྱོད། དཔལ་ཨིནྡྲ་བྷཱུ་ཏིའི་གཞུང་གིས་ནི་ཐམས་ཅད་བདག་ཉིད་རྟག་ཏུ་བཞུགས་པའི་རྣལ་འབྱོར་དབང་ཕྱུག་ངེས་པར་བསྟན་ཏོ། །སློབ་དཔོན་གཞན་མའི་གཞུང་གིས་ནི་ཕྱག་རྒྱ་ཆེན་པོའི་དངོས་གྲུབ་ཐོབ་པ་ལ་རྣལ་འབྱོར་དབང་ཕྱུག་ཉིད་དུ་བསྟན་ཏོ། །གཞན་མ་ནི་སྒྲ་ཇི་བཞིན་ནོ། །དཔལ་ཕྱག་རྒྱ་ཆེན་པོའི་ཐིག་ལེ་ལས་ལེའུ་ཉི་ཤུ་པའི་བཤད་པའོ།། །།

ལེའུ་ཉེར་གཅིག་པའི་བཤད་པ།

---

^{[མ་དཔེ་གཟིགས་ན་འདིར་གནོན།]}

ད་ནི་ཉི་ཤུ་རྩ་གཅིག་པ་ལ་ཟབ་པའི་ཚིགས་སུ་བཅད་པ་བྲི། སྔར་བསྟན་པའི་དྲུག་ལ་སོགས་པ་སྒྲ་ཇི་བཞིན་གསུངས་སོ། །གཞན་མ་ནི་ཕྱིའི་དོན་གྱིས་སྔགས་ཀྱི་དོན་གྱི་ས་བོན་ཡི་གེ་བཏུ་བའི་དུས་སུ། ལེགས་པར་མཉམ་པའི་ས་ཆ་རུ། །ཆང་ལ་སོགས་པས་མཆོད་པར་བྱ། ཞེས་སྒྲ་ཇི་བཞིན་ནོ། །གསང་བའི་དོན་གྱིས་ནི་མཆོག་གི་དགའ་བའི་ངོ་བོ་ཅན་ཡིད། སའི་ཆ་ཞེས་བྱ་བ་ནི་ཆོས་ཀྱི་འབྱུང་གནས། ལེགས་པར་མཉམ་པའི་སྒྲ་ནི་ཐབས་དང་ཤེས་རབ་གཉིས་སུ་མེད་པ་ཉིད། མཆོད་པའི་སྒྲ་ནི་བསྒྲུབ་དང་སྒྲུབ་ཐབས་མཛད་པ། དེའི་ཕྱིར། མཆོག་གི་དགའ་བའི་སྦྱོར་བ་ཡི། །རྩེ་གཅིག་པས་ནི་མཉེས་པར་བྱ། །ཞེས་བྱ་བ་ལ་ཉིད་རྒྱུད་ལས་བསྟན་ཏོ། །བསྙེན་པས་གང་ཞིག་བྱུང་བའི་མེ་ཏོག་ལས་བསྟན་པའོ། །གསང་བར་ཞེས་བྱ་བ་ནི་ཕྱི་དང་ནང་གི་བདག་ཉིད་ཀྱི་མཆོད་པའི་ངེས་པར་བསྟན་པའོ། །གཞན་མ་ནི་སྒྲ་ཇི་བཞིན་ནོ། །ཨཱ་ལི་ཀཱ་ལི་མཉམ་བྱས་ནས། །ཞེས་བྱ་བ་ལ། ཕྱིའི་དོན་གྱིས་མི་མཉམ་པ་མ་ཡིན་པ་དང༌། ཉུང་བ་མིན་པ་བྲི་བར་བྱ་བའི་དོན་ཏོ། །གསང་བའི་དོན་གྱིས་ནི་མཆོག་དང་ཆད་པ། དེ་དག་མཉམ་པར་བྱ་ཞེས་སློབ་དཔོན་ཨིནྡྲ་བྷཱུ་ཏིའི་གཞུང་ངོ༌། །སློབ་དཔོན་ཤ་

---

^{[མ་དཔེ་གཟིགས་ན་འདིར་གནོན།]}

བ་རིའི་གཞུང་གིས་ནི་དམར་པོ་འབྱུང་བའི་ནང་དུ་དཀར་པོའི་རོ་མཉམ་པར་ཞེས་བྱ་བའི་དོན་ཏོ། །ཐུབ་པ་བདུན་ནི་དྲང་བར་བྱ། །ཞེས་བྱ་བ་ལ། འདབ་མ་བདུན་སྡེ་ཚན་དང་པོ་བྲི་བར་བྱས་ནས། ཕྱི་ནས་ཧའི་ཡིག་འབྲུ་ཡན་ཆད། ཉི་ཤུ་རྩ་དྲུག་གསལ་བར་བྱེད་པ་བྲི་བར་བྱའོ། །དང་པོར་རྣམ་པར་སྣང་མཛད་བྲི། ཞེས་བྱ་བ་ནི། ཨོཾ་གྱི་ཡིག་འབྲུ་ལྔ་པའི་ལྔ་པ་ཞེས་བྱ་བ་ནི་ཡིག་འབྲུ་མ། ཨུཥྨ་ཎ་ཡི་བཞི་པ་ཞེས་བྱ་བ་ནི་ཡིག་འབྲུ་ཧ། བཅུ་དྲུག་པ་ཡི་གཉིས་པར་ལྡན། །ཞེས་བྱ་བ་ནི་ཨཱ་རིང་པོ་སྦྱར་རོ། །དང་པོའི་དང་པོ་ཞེས་བྱ་བ་ནི་ཡིག་འབྲུ་ཀའོ། །མེས་ལྡན་པ་ཞེས་བྱ་བ་ནི་འོག་ཏུ་ཡི་གེ་ར་སྦྱར་བའོ། །དབྱངས་ཡིག་བཅུ་གསུམ་པ་ནི་སྦྱར། །ཞེས་བྱ་བ་ནི་ཨོའི་ཡིག་འབྲུ་མགོ་བོར་བརྒྱན་པའོ། །བཞི་པའི་བཞི་པ་ཞེས་བྱ་བ་ནི་ཡིག་འབྲུ་དྷའོ། །དབྱངས་ཡིག་བཅུ་གཅིག་པ་དང་ལྡན། །ཞེས་བྱ་བ་ནི་ཨེའི་ཡིག་འབྲུས་བརྒྱན་པའོ། །ཨུཥྨ་ཎ་ཡི་དང་པོ་ཞེས་བྱ་བ་ནི་ཡིག་འབྲུ་ཤའོ། །ཨནྟསྠ་ཡི་བཞི་པ་ཞེས་བྱ་བ་ནི་ཡིག་འབྲུ་ཝའོ། །མེ་ཡི་ས་བོན་ཞེས་བྱ་བ་ནི་ཡིག་འབྲུ་རའོ། །གཉིས་པའི་གསུམ་པ་ཞེས་བྱ་བ་ནི་ཛའོ། །ཨནྟསྠའི་དང་པོ་ནི་ཡའོ། །ཨནྟསྠའི་བཞི་པ་ནི་ཝའོ། །དབྱངས་ཡིག་གསུམ་པ་དང་ལྡན་ཞེས་བྱ་བ་ནི་ཨིའི་ཡིག་འབྲུ་སྦྱར་བའོ། །གཉིས་པའི་གསུམ་པ་ཞེས་བྱ་བ་ནི་ཛའོ། །བརྒྱད་པའི་དང་པོ་ཞེས་བྱ་བ་ནི་ཡའོ། །དབྱངས་ཡིག་གཉིས་པ་དང་ལྡན་ཞེས་བྱ་བ་ནི་ཨཱ་རིང་བ་དང་སྦྱར་བའོ། །གསུམ་པའི་དང་པོ་ཞེས་བྱ་བ་ནི་ཏ་ལོག་གོ །ལོག་ཡང་དེ་རང་སྦྱོར་ཞེས་བྱ་བ་ནི་ཏ་ལོག་པས་སོ། །ཕྱི་ནས་ཡང་ནི་དེ་རང་སྦྱིན། །ཞེས་བྱ་བ་ནི་ཏ་ལོག་གཉིས་པར་བྲི་བར་བྱའོ། །ཨུཥྨ་ཎ་ཡི་བཞི་པ་ཞེས་བྱ་བ་ནི་ཧའོ། །དབྱངས་ཡིག་གཉིས་པ་དང་ལྡན་ཞེས་བྱ་བ་ནི་ཨཱ་རིང་པོ་དང་སྦྱར་བའོ། །ཨུཥྨ་ཎ་ཡི་གསུམ་པ་ཞེས་བྱ་བ་ནི་སའོ། །ལྔ་པའི་ལྔ་པ་ནི་མའོ། །ཨུཥྨ་ཎ་ཡི་བཞི་པ་ནི་ཧའོ། །དབྱངས་ཡིག་གཉིས་པ་ནི་ཨཱ་རིང་བ་དང་སྦྱར་བའོ། །དང་པོའི་དང་པོ་ཞེས་བྱ་བ་ནི་ཀའོ། །ཨནྟསྠའི་གསུམ་པ་ཞེས་བྱ་བ་ནི་ལའོ། །ལྔ་པའི་དང་པོ་ཞེས་བྱ་བ་ནི་པའོ། །དབྱངས་ཡིག་གཉིས་པ་དང་ལྡན་པ། །ཞེས་བྱ་བ་ནི་ཨཱ་རིང་བའོ། །དང་པོའི་གསུམ་པ་ནི་གའོ། །ཉི་ཤུ་པ་སྦྱར་ཞེས་བྱ་བ་ནི་ནའོ། །དབྱངས་

---

^{[མ་དཔེ་གཟིགས་ན་འདིར་གནོན།]}

ཡིག་གསུམ་པ་དང་སྦྱར་ཞེས་བྱ་བ་ནི་ཨི་དང་སྦྱར་བའོ། །ཁྲོ་བོའི་གཟུགས་ནི་ཆེ་བས་ཆེ། །ཞེས་བྱ་བ་ནི་དེ་རང་ལ་མཐུ་རབ་ཏུ་བསྟན་ཏོ། །ཨུཥྨ་ཎ་ཡི་གསུམ་པ་ཞེས་བྱ་བ་ནི་སའོ། །བཞི་པའི་ལྔ་པ་ཞེས་བྱ་བ་ནི་ནའོ། །འོག་ཏུ་དེ་དང་སྦྱར་ཞེས་བྱ་བ་ནི་ན་དང་ལྡན་པའོ། །ལྔ་པའི་བཞི་པ་ནི་བྷའོ། །དབྱངས་ཡིག་གཉིས་པ་དང་ལྡན་ཞེས་བྱ་བ་ནི་ཨཱ་རིང་པོ་དང་སྦྱར་བའོ། །བརྒྱད་པའི་དང་པོ་ནི་ཡའོ། །ཨུཥྨ་ཎ་ཡི་བཞི་པ་ནི་ཧའོ། །དབྱངས་ཡིག་དྲུག་པ་དང་ལྡན་ཞེས་བྱ་བ་ནི་ཨཱུ་དང་སྦྱར་ཞེས་སོ། །ཆ་དང་ཐིག་ལེར་ལྡན་ཞེས་བྱ་བ་ནི་ཟླ་ཚེས་དང་ལྡན་པའི་ཐིག་ལེ་མགོ་བོར་བྲི་བར་བྱའོ། །ཕྱི་ནས་དེ་རང་སྦྱིན་པར་བྱ། །ཞེས་བྱ་བ་ནི་ཧཱུཾ་གི་ཡིག་འབྲུ་གཉིས་པ་བྲི་བར་བྱའོ། །ལྔ་པའི་གཉིས་པ་ཞེས་བྱ་བ་ནི་ཕའོ། །གསུམ་པའི་དང་པོ་ཞེས་བྱ་བ་ནི་ཏ་ལོག་གོ །ཨུཥྨ་ཎ་ཡི་གསུམ་པ་ནི་སའོ། །ཨནྟསྠའི་བཞི་པ་དང་ལྡན། །ཞེས་བྱ་བ་ནི་འོག་ཏུ་ཝ་དང་སྦྱར་བའོ། །དབྱངས་ཡིག་གཉིས་པ་དང་བཅས་ཞེས་བྱ་བ་ནི་ཨཱ་རིང་བ་དང་སྦྱར་བའོ། །ཡའི་སྡེ་ཚན་བརྒྱད་པ་ནི་ཧའོ། །དབྱངས་ཡིག་གཉིས་པ་དང་ལྡན་པ། །ཞེས་བྱ་བ་ནི་ཨཱ་རིང་བ་དང་སྦྱར་བའི་དོན་ཏོ། །དོན་ཐམས་ཅད་གྲུབ་པར་བྱེད་པ། །ཞེས་བྱ་བ་ནི་སྔགས་ཀྱི་དངོས་གྲུབ་སྟེར་ཞེས་བྱ་བའི་དོན་ཏོ། །གཞན་མའི་གཞུང་གིས་ནི་ཞི་བ་ལ་སོགས་པའི་ལས་འགྲུབ་པར་བྱེད་དོ། །བདག་གིས་ཞེས་བྱ་བ་ནི་བཅོམ་ལྡན་འདས་ཀྱི་སྔགས་བསྟན་པའོ། །དང་པོ་གཟུགས་ཀྱི་བདག་པོ་ཞེས་བྱ་བ་ནི་ཨོཾ་གྱི་རྣམ་པའོ། །ཨནྟསྠ་ཡི་བཞི་པ་ཞེས་བྱ་བ་ནི་ཝའོ། །གཉིས་པའི་གསུམ་པ་ནི་ཛའོ། །མེའི་ས་བོན་གྱིས་བརྒྱན་ཞེས་བྱ་བ་ནི་འོག་ཏུ་རའི་ཡིག་འབྲུ་དང་ལྡན་པའོ། །བཞི་པའི་དང་པོ་ཞེས་བྱ་བ་ནི་ཏའོ། །དབྱངས་ཡིག་བཅུ་གཅིག་པ་དང་ལྡན་ཞེས་བྱ་བ་ནི་ཨེ་དང་སྦྱར་བའོ། །གཉིས་པའི་གསུམ་པ་ཞེས་བྱ་བ་ནི་ཛའོ། །དབྱངས་ཡིག་བཅུ་གསུམ་པ་དང་ལྡན་ཞེས་བྱ་བ་ནི་ཨོཾ་དང་ལྡན་པའོ། །དང་པོའི་གསུམ་པ་ནི་གའོ། །མེའི་ས་བོན་གྱིས་འོག་དང་ལྡན་ཞེས་བྱ་བ་ནི་ར་དང་སྦྱར་བའོ། །ཨུཥྨ་ཎ་ཡི་བཞི་པ་ཞེས་བྱ་བ་ནི་ཧའོ། །ཉི་མས་སྦྱར་ཞེས་བྱ་བ་ནི་འོག་མའི་ཆའི་ཡིག་འབྲུ་ར་དང་ལྡན་པའོ། །དབྱངས་ཡིག་བཞི་པ་དང་ལྡན་ཞེས་བྱ་བ་ནི་ཧཱུཾ་

---

^{[མ་དཔེ་གཟིགས་ན་འདིར་གནོན།]}

གི་རྣམ་པའོ། །ལྔ་པའི་གཉིས་པ་ཕའོ། །གསུམ་པའི་དང་པོ་ཞེས་བྱ་བ་ནི་ཏ་ལོག་གོ །ཉེ་བའི་སྙིང་པོ་ཞེས་བྱ་བ་ནི་རྩ་བའི་སྔགས་ཡན་ལག་གོ །དང་པོ་རྣམ་པར་སྣང་མཛད་ཅེས་བྱ་བ་ནི་ཨོཾ་གྱི་རྣམ་པའོ། །ཨུཥྨ་ཎ་ཡི་གསུམ་པ་ཞེས་བྱ་བ་ནི་སའོ། །དབྱངས་ཡིག་ལྔ་པ་ཞེས་བྱ་བ་ནི་ཨུ་དང་ལྡན་པའོ། །མེའི་ས་བོན་ཞེས་བྱ་བ་ནི་རའོ། །བཞི་པའི་དང་པོ་ཞེས་བྱ་བ་ནི་ཏའོ། །ཨུཥྨ་ཎ་ཡི་གསུམ་པ་ཞེས་བྱ་བ་ནི་སའོ། །ཉི་ཤུ་རྩ་ལྔ་ཞེས་བྱ་བ་ནི་མའོ། །རླུང་གི་ས་བོན་ཞེས་བྱ་བ་ནི་ཡའོ། །དབྱངས་ཡིག་བཅུ་གཅིག་པ་དང་སྦྱར། །ཞེས་བྱ་བ་ནི་ཨེ་དང་ལྡན་ཞེས་བྱ་བའི་དོན་ཏོ། །ཨུཥྨ་ཎ་ཡི་དང་པོ་ཞེས་བྱ་བ་ནི་ཤའོ། །ཨནྟསྠའི་བཞི་པས་ལྡན་པ་ནི་ཝའོ། །ཉི་མའི་ས་བོན་ཞེས་བྱ་བ་ནི་རའོ། །དབྱངས་ཡིག་གསུམ་པ་ཞེས་བྱ་བ་ནི་ཨི་དང་ལྡན་པའོ། །ཨུཥྨ་ཎ་ཡི་བཞི་པ་ཞེས་བྱ་བ་ནི་ཧའོ། །དབྱངས་ཡིག་དྲུག་པ་ཞེས་བྱ་བ་ནི་ཨུ་དང་ལྡན་པའོ། །ཆ་དང་ཐིག་ལེས་བརྒྱན་པ་ཞེས་བྱ་བ་ནི་ཟླ་ཚེས་དང་ལྡན་པའི་ཐིག་ལེས་བརྒྱན་པའོ། །ཕྱི་ནས་དེ་རང་བཞིན་ཞེས་བྱ་བ་ནི་ཧཱུཾ་གི་རྣམ་པ་གཉིས་བྲི་བར་བྱའོ། །གཞན་མ་ནི་སྔགས་འབིགས་པར་བྱེད་པ་ཞེས་བྱ་བ་ནི་དེ་རང་ལ་ནུས་པའི་མཐུ་བསྟན་ཏོ། །ལྔ་པའི་གཉིས་པ་ཞེས་བྱ་བ་ནི་ཕའོ། །གསུམ་པའི་དང་པོ་ཞེས་བྱ་བ་ནི་ཏ་ལོག་གོ ། ཨུཥྨ་ཎ་ཡི་གསུམ་པ་ཞེས་བྱ་བ་ནི་སའོ། །ཨནྟསྠའི་བཞི་པ་ཞེས་བྱ་བ་ནི་ཝའོ། །དབྱངས་ཡིག་གཉིས་པ་དང་ལྡན་ཞེས་བྱ་བ་ནི་ཨཱ་རིང་བའོ། །ཡའི་སྡེ་མཚན་བརྒྱད་པ་ཞེས་བྱ་བ་ནི་ཧའོ། །དབྱངས་ཡིག་གཉིས་པ་དང་ལྡན་ཞེས་བྱ་བ་ནི་ཨཱ་རིང་བའོ། །ཁྱེད་ཀྱི་ཞེས་བྱ་བ་ནི་བཅོམ་ལྡན་འདས་མའི་སྙིང་པོ་བསྟན་པའོ། །དང་པོ་ལྷའི་བདག་པོ་ཞེས་བྱ་བ་ནི་ཨོཾ་གྱི་རྣམ་པའོ། །དང་པོའི་དང་པོ་ཞེས་བྱ་བ་ནི་ཀའོ། །ས་ཡི་ས་བོན་དང་ལྡན་པ། །ཞེས་བྱ་བ་ནི་ལའོ། །དབྱངས་ཡིག་བཞི་པ་དང་ལྡན་ཞེས་བྱ་བ་ནི་ཨཱིའོ། །ཆ་དང་ཐིག་ལེས་བརྒྱན་ཅེས་བྱ་བ་ནི་སྔར་བསྟན་པའོ། །ཨནྟསྠའི་བཞི་པ་ཞེས་བྱ་བ་ནི་ཝའོ། །ས་ཡི་ས་བོན་འོག་ཏུ་ལྡན། །ཞེས་བྱ་བ་ནི་ལ་ཡིས་སོ། །དབྱངས་ཡིག་བཞི་པ་དང་ལྡན་པ། །ཞེས་བྱ་བ་ནི་ཨཱི་ཡིས་སོ། །ཆ་དང་ཐིག་ལེས་རྣམ་པར་བརྒྱན། །ཞེས་བྱ་བ་ནི་སྔ་མ་བཞིན་ནོ། །གཉིས་པའི་གསུམ་པ་ཞེས་བྱ་བ་ནི་

---

^{[མ་དཔེ་གཟིགས་ན་འདིར་གནོན།]}

ཛའོ། །སའི་ས་བོན་འོག་ཏུ་ལྡན་ཞེས་བྱ་བ་ནི་ལའོ། །དབྱངས་ཡིག་བཞི་པ་དང་ལྡན་པ། །ཞེས་བྱ་བ་ནི་ཨཱི་ཡིས་སོ། །ཟླ་ཚེས་ཐིག་ལེས་བརྒྱན་པ་ཞེས་བྱ་བ་ནི་དོན་ཇི་ལྟ་བ་བཞིན་ནོ། །ལྔ་པའི་གཉིས་པ་ཞེས་བྱ་བ་ནི་ཕའོ། །གསུམ་པའི་དང་པོ་ཞེས་བྱ་བ་ནི་ཏ་ལོག་གོ །སྭཱ་ཧཱ་མཐར་ཞེས་བྱ་བ་ནི་དོན་ཇི་ལྟ་བ་བཞིན་ནོ། །ཉེ་བའི་སྙིང་པོ་ཞེས་བྱ་བ་ནི་བཅོམ་ལྡན་འདས་མའི་རྩ་བའི་སྔགས་ཡན་ལག་ཅེས་བྱ་བའི་དོན་ཏོ། །གཞན་མ་ནི་སྒྲ་ཇི་བཞིན་ནོ། །ཧྲི་དྷིཾ་ཁཾ་ཞེས་བྱ་བ་ནི་སྐུ་གསུང་ཐུགས་ཀྱི་ས་བོན་གྱི་སྔགས་ཀྱིས་བདུད་རྩི་ལྔ་བྲིམས་པར་བྱའོ། །བྱིན་གྱིས་རློབ་པའི་དོན་ཏོ། །ཡ་ར་ལ་ཝ་ཡི་གེ་ས་བོན་གྱིས་གསོལ་བར་བྱ་བ་དགོངས་པའོ། །དཔལ་ཕྱག་རྒྱ་ཆེན་པོའི་ཐིག་ལེ་ལས། ལེའུ་ཉི་ཤུ་རྩ་གཅིག་པའི་བཤད་པའོ།། །།

ལེའུ་ཉེར་གཉིས་པའི་བཤད་པ།

---

^{[མ་དཔེ་གཟིགས་ན་འདིར་གནོན།]}

ད་ནི་ཉི་ཤུ་རྩ་གཉིས་པ་ལ་ཟབ་པའི་ཚིགས་སུ་བཅད་པ་བྲི། སེམས་ཅན་ལ་བསྲུང་བ་ལ་སོགས་ཞེས་བྱ་བ་ལ། སློབ་དཔོན་ཤ་བ་རིའི་གཞུང་གིས་གསང་བའི་དོན་ལ་བཤད། སེམས་ཅན་གྱི་དོན་ནི་ཐ་མལ་པ་མ་ཡིན་པའི་བསྒྲུབ་པ་དང་སྒྲུབ་ཐབས་ལས་བྱུང་བའི་བྱང་ཆུབ་ཀྱི་སེམས་སྲུང་བ་ཞེས་བྱ་བ་ནི་རྡོ་རྗེ་རིན་པོ་ཆེའི་འཁོར་ལོར་ཡང་དག་པར་འཛིན་པ། གཏོར་མ་ཞེས་བྱ་བ་ནི་མཆོག་གི་དགའ་བ་ཉིད་ཀྱིས་དེ་ལ་ཉམས་སུ་མྱོང་བ། དོན་དུ་ཞེས་བྱ་བ་ནི་འཇིག་རྟེན་ལས་འདས་པ་ཤེས་པའི་ཕྱིར་རོ། །དུར་ཁྲོད་ལ་སོགས་ཞེས་པ་ནི་འདོད་ཆགས་ཀྱི་རྣམ་པར་རྟོག་པ་བསྲེག་པའི་གནས་སུ། །ཆུ་ངོགས་ཞེས་བྱ་བ་ལ་བྱང་ཆུབ་ཀྱི་སེམས་འཕོ་བའི་གནས་སུ། སློབ་དཔོན་གཞན་མའི་གཞུང་གིས་ནི་སྲོག་གི་རྩ་བའི་གནས་སུ། །ཡུལ་གྱི་མཐའ་ཞེས་བྱ་བ་ནི་མཆོག་གི་དགའ་བ་ལས་གནས་གཞན་དུ། ཅིའི་ཕྱིར་ཞེ་ན་ཡུལ་ན་གནས་པ་རྟག་ཏུ་མི་ཆེ་བས་དགའ་བ་མེད། འཚེ་བར་བྱེད་པ་དེའི་ཕྱིར། དགའ་བྲལ་མེད་པའི་གནས་སུ་གསང་བའི་གཏོར་མ་གཏང་བར་བྱ་ཞེས་བྱ་བའི་དོན་ཏོ། །ཡང་ན་རི་ལ་ཞེས་བྱ་བ་ནི་སངས་རྒྱས་རིན་པོ་ཆེ་མཐོ་བའི་གནས་སུ་ཞེས་སློབ་དཔོན་ཨ་ཀྲ་བྷཱུ་ཏིའི་གཞུང་གིས་སོ། །ཤིང་གཅིག་གནས་སུ་ཞེས་བྱ་བ་ནི་སྤྲོས་པ་མེད་པ་རྟེན་གྱི་དབྱུག་པ་རུ། ཁང་སྟོང་ཞེས་བྱ་བ་ནི་ཉོན་མོངས་པ་ཐམས་ཅད་དང་བྲལ་བའི་གནས་རང་

---

^{[མ་དཔེ་གཟིགས་ན་འདིར་གནོན།]}

བཞིན་དགའ་བའོ། །གཞན་མ་མོ་ལ་སོགས་ཞེས་བྱ་བ་ནི་ཕྱིའི་དོན་གྱིས་ཀུན་སྒྲ་ཇི་བཞིན་ནོ། །དཔལ་ཕྱག་རྒྱ་ཆེན་པོའི་ཐིག་ལེ་ལས་ལེའུ་ཉི་ཤུ་རྩ་གཉིས་པའི་བཤད་པའོ།། །།

ལེའུ་ཉེར་གསུམ་པའི་བཤད་པ།

---

^{[མ་དཔེ་གཟིགས་ན་འདིར་གནོན།]}

ད་ནི་ལེའུ་ཉི་ཤུ་རྩ་གསུམ་པ་ལ་ཟབ་པའི་ཚིགས་སུ་བཅད་པ་བྲི། གསང་བ་མཆོག་དང་དགྱེས་གནས་སུ། །དེ་རུ་འཁོར་ལོ་རབ་ཏུ་བསྐོར། །ཞེས་པ་ལ། དཔལ་བདེ་བ་ཆེན་པོའི་གཞུང་གིས་ནི་གསང་བ་ཞེས་བྱ་བ་ནི་འདོད་ཆགས་འགེགས་པའི་གནས་སུ། མཆོག་ཅེས་བྱ་བ་ནི་སྲོག་གཅོད་པའི་གནས་སུ། དགྱེས་པ་ཞེས་བྱ་བ་ནི་རྒྱལ་པོ་འགུགས་པའི་གནས་སུ། དེ་རུ་འཁོར་ལོ་རབ་ཏུ་བསྐོར། །ཞེས་བྱ་བ་ནི་ཚོགས་ཀྱི་འཁོར་ལོ་བྱ་ཞེས་མདོར་བསྟན་པའོ། །ཕྱི་ནས་ཀྱང་དེ་ལྟར་སྨྲ་བ་ལ་རྒྱས་པར་བཤད་པའི་དོན་བཤད་དེ། འདོད་ཆགས་འགེགས་པའི་གནས་སུ་ནི་གནང་བའི་དབང་བསྐུར་བའི་དུས་སུ། སྲོག་གཅོད་པའི་གནས་སུ་ནི་ཤེས་རབ་ཡེ་ཤེས་ཀྱི་དབང་བསྐུར་བའི་དུས་སུ། རྒྱལ་པོ་དབང་བསྐུར་བའི་གནས་སུ་ནི་ཤེས་རབ་ཡེ་ཤེས་འགོག་པའི་དུས་སུ། ཚོགས་ཞེས་བྱ་བ་ནི་རེག་བྱའི་རྩ་འདུས་པ། འཁོར་ལོ་ཞེས་བྱ་བ་ནི་དེའི་རྟེན་གྱི་གནས་སངས་རྒྱས་རིན་པོ་ཆེའི་སྣོད། རབ་ཏུ་བསྐོར་ཞེས་བྱ་བ་ནི་ཀུན་སྤྱོད། སློབ་དཔོན་བཱི་ར་བྷཱུ་ཏིའི་གཞུང་གིས་ནི་ཚིམ་བྱེད་པའོ། །དཔལ་ཨིནྡྲ་བྷཱུ་ཏིའི་གཞུང་གིས་གསང་བ་ཞེས་བྱ་བ། གསང་བ་པདྨ་ཨཱ་ལིའི་དགའ་བ་མི་སྣང་བའི་གནས་སུ། མཆོག་ཅེས་བྱ་བ་པདྨའི་ལྟེ་བའི་དགའ་བ། ཀཱ་ལི་ལོངས་སྤྱོད་ཀྱི་གནས་སུ། དགྱེས་པའི་ཞེས་བྱ་བ་ནི་ལྟེ་བའི་དབུས་སུ་དགའ་བ་རབ་ཀྱི་རབ། ཨཱ་ལི་ཀཱ་ལི་གཉིས་སུ་མེད་པའི་དབང་གི་གནས་སུ། ཚོགས་ཀྱི་འཁོར་ལོ་ཞེས་བྱ་བ་ནི་དགའ་བ་དང་རྩ་ཐམས་ཅད་རྒྱས་པ་ཉིད་མངོན་སུམ་དུ་ཉམས་སུ་མྱོང་བའོ། །དེ་ནི་བདག་ཉིད་ཀྱི་ཕྱོགས་སུ། ཕྱིའི་ཕྱོགས་སུ་ནི་ཕྱག་རྒྱའི་དངོས་གྲུབ་སྒྲུབ་པའི་དོན་གྱི་ཕྱིར། ཐབས་དང་ཤེས་རབ་མི་མཉམ་པ་མ་ཡིན་པའི་རྡོ་རྗེ་ཧེ་རུ་ཀའི་རྣམ་པས། རྡོ་རྗེ་སློབ་དཔོན་ཚོགས་ཀྱི་གཙོ་བོ་ཉིད་དུ་མེ་ཏོག་ལ་སོགས་པའི་དཀྱིལ་འཁོར་གྱི་དབུས་སུ། སྣ་ཚོགས་གདན་གྱི་སྟེང་དུ་བཞུགས་སུ་གསོལ་བར་བྱས་ནས། མཆོད་པའི་མཆོད་སྦྱིན་ལ་སོགས་ཀྱིས་མཆོད་པར་བྱ་སྟེ། ཚོགས་དང་ལྷན་ཅིག་རྣམ་པར་རྟོག་པ་སྤང་བའི་དོན་དུ་གསང་བ་

---

^{[མ་དཔེ་གཟིགས་ན་འདིར་གནོན།]}

ཚོགས་གསོལ་ནས། ཡེ་ཤེས་གྲུབ་པའི་དོན་དུ་ནི། རྡོ་རྗེ་གླུ་ཡིས་རྡོ་རྗེའི་གར་བྱའོ། །མྱུར་དུ་དངོས་གྲུབ་སྒྲུབ་པའི་དོན་དུ་བརྩོན་པར་བྱེད་པའི་ཕྱིར། སློབ་དཔོན་ལ་མཆོད་པའི་དུས་སུ་ཆོས་ཐམས་ཅད་བདག་མེད་མའི་རང་བཞིན་གྱི་ཕྱིར། མདུང་རྩེའི་མཚོན་ཆས་བསྐུམ་པའི་རོ་གདན་དུ་དབུལ་བར་བྱའོ། །གཞན་མ་ནི་སྒྲ་ཇི་བཞིན་ནོ། །ལྟེ་བ་ལ་སོགས་ཞེས་བྱ་བ་ལ་ལྟེ་བའི་སྒྲ་ནི་རི་དགས་ཀྱི་བཅུད། རྡོ་རྗེ་ཆུ་ཞེས་བྱ་བའི་དོན་ཏོ། །རི་བོང་ཅན་ཞེས་བྱ་བ་ནི་ཟླ་བ་བྱང་ཆུབ་ཀྱི་སེམས་ཞེས་བྱ་བའི་དོན་ཏོ། །དགའ་བ་ཞེས་བྱ་བ་ནི་འོད་དང་ལྡན་པ་རང་ལས་འབྱུང་བའོ། །མཆོག་ཅེས་བྱ་བ་ནི་རྣམ་པར་སྣང་མཛད་དྲི་ཆེན་ཞེས་བྱ་བའི་དོན་ཏོ། །རྟ་ཞེས་བྱ་བ་ནི་དོན་ཡོད་གྲུབ་པའི་རང་བཞིན་ས་ལུ་ཞེས་བྱ་བའི་དོན་ཏོ། །ས་བོན་གྱི་བཀོད་པ་ནི་སྒྲ་ཇི་བཞིན་ནོ། །ནང་གི་རོ་མ་ལ་སོགས་ཞེས་བྱ་བ་ལ། སློབ་དཔོན་བཱི་ར་བྷཱུ་ཏིའི་གཞུང་གིས་ནི་ནང་གི་སྒྲས་ནི་ནང་གི་བདག་ཉིད་ཀྱི་པདྨ་ནང་གི་བདག་ཉིད་ཀྱང་གསང་བ་ཡིན་ཞེས་བཤད་དོ། །རོ་མ་ཞེས་བྱ་བ་ནི་བྱ་གདོང་གི་རྣམ་པ་ཅན། །རྡོ་རྗེ་དབྱིངས་ཀྱི་དབང་ཕྱུག་མ་ཆེན་མོའི་རྩའོ། །པདྨའི་འདབ་མར་བཀོད་པ་ཞེས་བྱ་བ་ནི་ཡོ་ནི་པདྨའི་ནང་དུ་བསྒོམ་པར་བྱའོ། །ཕྱི་དང་ནང་གི་བདག་ཉིད་ལ་སོགས་ཞེས་བྱ་བ་ལ་དེ་མ་ཐག་ཏུ་སྨྲ་བའི་པདྨ་གཉིས་རོ་མཉམ་པར་རབ་ཏུ་ཚིམ་པར་བྱ། བྱང་ཆུབ་སེམས་ཀྱིས་རྒྱས་པར་བྱ། །ཞེས་བྱ་བའི་དོན་ཏོ། །འཁོར་ལོ་བཞིའི་བྱེ་བྲག་ཅེས་བྱ་བ་ནི་ཀུན་དུ་རྩ་བ་ལས་ཁ་སྦྱོར་བས་བྱ་ཞེས་དགོངས་པའོ། །དང་པོ་དཔའ་བོའི་རོ་ཚོར་མ་ལ་སོགས་པ། སློབ་དཔོན་ཛྙཱན་མཱུརྟིའི་གཞུང་གིས་ནི། དཔའ་བོ་ཞེས་བྱ་བ་ནི་རང་བཞིན་གྱི་དགའ་བ། བདུད་རྩིའི་བུམ་པས་དབང་བསྐུར་བའི་དུས་སུ། རོ་ཚོར་མའི་སྐབས་སུ་གསང་བའི་སྣའི་སྒོ་རུ་འཇུག་པར་བྱའོ། །དཔའ་བོའི་དཔའ་བོ་དབུས་དང་ཞེས་བྱ་བ་ནི། དཔའ་བོ་ཞེས་བྱ་བ་ནི་རང་བཞིན་གྱི་དགའ་བ། དཔའ་བོ་ཞེས་མཆོག་གི་དགའ་བའི་བདུད་རྩིའི་གསང་བའི་དབང་བསྐུར་བའི་དུས་སུ། གསང་བའི་སྣའི་དབུས་སུ་ཉམས་སུ་མྱང་བར་བྱའོ། །དཔའ་བོའི་དབང་པོ་ཁ་ལ་ཞེས་བྱ་བ་ནི་རང་བཞིན་གྱི་དགའ་བ། དགའ་བ་དང་དཔའ་བོ་ཞེས་བྱ་བ་ནི་ཆད་པའི་དགའ་བའི་རོ་ཤེས་རབ་ཡེ་ཤེས་ཀྱི་དབང་གི་དུས་སུ་

---

^{[མ་དཔེ་གཟིགས་ན་འདིར་གནོན།]}

གསང་བའི་སྣ་བཅོམ་ལྡན་འདས་མ་རྡོ་རྗེ་དབྱིངས་ཀྱི་དབང་ཕྱུག་མའི་རིན་པོ་ཆེའི་ཁ་རུ། དེ་མ་ཐག་ཏུ་སྨྲ་བའི་ཆད་པས་དགའ་བའི་རོ་བདུད་རྩི་མེ་ཏོག་གིས་མཆོད་པར་བྱའོ། །རིམ་གྲོར་བྱ་ཞེས་བྱ་བའི་དོན་ཏོ། །གང་གི་ཕྱིར་ཞེ་ན་ཚོགས་ཀྱི་འཁོར་ལོ་ལ་ཡང་དག་པར་དབང་བསྐུར་ལྡན་པ་ལ་འགྲོ་བའི་དབང༌། ཡང་ན་དེའི་དུས་སུ་དབང་བསྐུར་མེད་པ་རྣམས་ལ་དབང་བསྐུར་སྦྱིན་པར་བྱ་ཞེས་སློབ་དཔོན་ཨ་ཀྲ་པུ་ཏིའི་གཞུང་ངོ༌། །ལྟེ་བ་གཉིས་དབུས་གནས་ཞེས་བྱ་བ་ནི་དཔའ་བོ་དགའ་བ་རྣམས་ལ། རྡོ་རྗེ་དང་པདྨ་གཉིས་ཀྱི་རིན་ཆེན་ལྟེ་བའི་གནས་སུ། བླ་མའི་མན་ངག་གིས་དབང་བསྐུར་བའི་དོན་ཤེས་ནས་ཉམས་སུ་མྱོང་བར་བྱའོ་ཞེས་གཞན་མ་ནི་སྒྲ་ཇི་བཞིན་ནོ། །མ་དང་སྲིང་མོ་ཞེས་བྱ་བ་ནི་གཟུང་འཛིན་གྱི་རྣམ་པར་རྟོག་པ་སྤང་བའི་དོན་དུ་ཐབས་དང་ཤེས་རབ་ཀྱི་ཚོགས་མཆོད་པར་བྱ་ཞེས་ལྷ་ལྕམ་ལཀྵྨཱིའི་གཞུང་ངོ༌། །གཞན་མ་ནི་སྒྲ་ཇི་བཞིན་གྱིས་བཤད་དོ། །དཔལ་ཕྱག་རྒྱ་ཆེན་པོའི་ཐིག་ལེ་ལས་ལེའུ་ཉི་ཤུ་རྩ་གསུམ་པའི་བཤད་པའོ།། །།

ལེའུ་ཉེར་བཞི་པའི་བཤད་པ།

---

^{[མ་དཔེ་གཟིགས་ན་འདིར་གནོན།]}

ད་ནི་ཉི་ཤུ་རྩ་བཞི་པ་ལ་ཟབ་པའི་ཚིགས་སུ་བཅད་པ་བྲི། དེ་ནས་གཞན་ཡང་བཤད་བྱ་བ། །ཞེས་བྱ་བ་ལ། དེ་ནས་སྒྲ་ནི་ཕྱི་ནས་བཤད་པ། གསང་བའི་བདག་ཉིད་ཚོགས་ཀྱི་འཁོར་ལོའི་ཕྱི་ནས་ལས་མཆོག་བསྒྲུབ་པར་བྱ། ལས་མཆོག་གི་སྒྲས་ནི་ཐབས་དང་ཤེས་རབ་གཉིས་སུ་མེད་པའི་རོ་མཉམ་པའི་སྐབས་སུ། ཚོགས་ཀྱི་འཁོར་ལོ་ཐམས་ཅད་གསང་བར་བྱ། ངོ་བོ་ཉིད་མེད་པ་ཉིད་དུ་བྱ་ཞེས་པའི་དོན་དཔལ་ཨིནྡྲ་བྷཱུ་ཏིའི་གཞུང་གིས་ནི། སྣང་བ་མེད་པ་ཉིད་དུ་བྱ། སྐྱེ་བ་བདུན་ལ་སོགས་ཞེས་བྱ་བ་ནི་རྟེན་བདུན་གྱི་ངོ་བོ། །གསང་བའི་ཚོགས་ཀྱི་འཁོར་ལོས་ཐམས་ཅད་ཚིམ་པར་བྱ་ཞེས་སོ། །དེ་ལ་རིམ་པ་ནི་འདི་ཡིན་ཏེ། སྦྱོར་བའི་རྟེན་དང༌། དམ་ཚིག་གི་རྟེན་དང༌། ཚུལ་གྱི་རྟེན་དང༌། བསྐྱོད་པའི་རྟེན་དང༌། དུས་ཀྱི་རྟེན་དང༌། རྣམ་པར་སྨིན་པའི་རྟེན་ནོ། །སྐྱེ་བ་གསུམ་པ་ལ་ཚོགས་ཞེས་བྱ་བ་ནི། ལམ་གསུམ་པ་འབྱུང་བའི་གང་ཞིག་སྣང་བ་གསུམ་གྱི་བྱང་ཆུབ་ཀྱི་སེམས། དེས་གསང་བའི་བདག་ཉིད་ཚོགས་ཀྱི་འཁོར་ལོར་ཚིམ་པར་བྱེད་པས་ལས་མཆོག་གོ །གཞན་མ་ནི་གོ་སླ་བའི་ཕྱིར་སྒྲ་ཇི་བཞིན་ནོ། །དཔལ་ཕྱག་རྒྱ་ཆེན་པོའི་ཐིག་ལེ་ལས་ལེའུ་ཉི་ཤུ་རྩ་བཞི་པའི་བཤད་པའོ།། །།

ལེའུ་ཉེར་ལྔ་པའི་བཤད་པ།

---

^{[མ་དཔེ་གཟིགས་ན་འདིར་གནོན།]}

ད་ནི་ཉི་ཤུ་རྩ་ལྔ་པ་ལ་ཟབ་པའི་ཚིགས་སུ་བཅད་པ་བྲི། སྲོག་དང་བརྔུབ་པའི་མཉམ་སྦྱོར་བས། །ཞེས་བྱ་བ་ལ་སོགས་པ་ལ། སློབ་དཔོན་ཤ་བ་རིའི་གཞུང་གིས་དགའ་བའི་གནས་ནས། གཞན་མའི་གནས་སུ་སློབ་མའི་ཡིད་ཀྱི་རྣམ་པར་ཤེས་པ་རང་གི་ངོ་བོའི་བྱང་ཆུབ་ཀྱི་སེམས། བརྔུབ་པ་ཞེས་བྱ་བ་གཞན་མའི་ཞེས་བྱ་བ་ལ། རང་བཞིན་དགའ་བའི་གནས་སུ་གནས་པ་བྱས་ནས་ཞེས་བྱ་བ་ནི་བླ་མའི་མན་ངག་ལས་ཉེ་བར་བརྟགས་ཏེ། མཆོག་དང་ཆད་པའི་དགའ་བ་ཉིད། །སྲོག་དང་བརྔུབ་པ་བཟའ་བར་བྱ། །ཉམས་སུ་མྱོང་བར་བྱ་ཞེས་པའོ། །དེ་ནི་བསྐྱེད་པའི་རིམ་པའི་ཕྱོགས། །རྫོགས་པའི་རིམ་པའི་ཕྱོགས་སུ་ནི། །མཆོག་དང་ཆད་པའི་བདག་ཉིད་པའི་རྣམ་པ་དང་བྲལ་བའི་བདེ་བ་འགོག་སྟེ། སྣང་བ་མེད་པར་བྱས་ཏེ། སྲོག་དང་བརྔུབ་པ་མཉམ་པར་བལྟ། །སྟོང་པ་ཆེན་པོ་ཉིད་ཡེ་ཤེས་ཀྱིས་གཟིགས་པར་བྱ་ཞེས་པའི་དོན་ཏོ། །དེ་ནང་གི་བདག་ཉིད་ཀྱིས་རིམ་པ་གཉིས་ཀྱིས་བཤད་པའོ། །ཕྱིའི་དོན་གྱིས་པདྨའི་ཁ་སྦྱོར་བའི་ཐབས་དང་ཤེས་རབ་ཡང་དག་པར་སྤྱོད་པར་བྱའོ། །གསང་བའི་དོན་གྱིས་སྙིང་གའི་སྙིང་པོའི་ནམ་མཁའ་རུ། དྲི་མེད་ཤེལ་གྱི་ཡི་གེ་བཞིན་དུ། བྱང་ཆུབ་སེམས་ཀྱི་ཕྲེང་བ་སྤྲུལ་པའི་འཁོར་ལོ་ནས་བཟློག་པར་བྱས་ནས། སྟེང་གི་འཁོར་ལོ་མན་ཆད་འདྲེན་པར་བྱ་ཞེས་བྱ་བའི་དོན་ཏོ། །གསང་བའི་དོན་གྱི་ནི་ཧའི་ཡིག་འབྲུ་བཏོན་ནས། བཟླས་པའི་རིམ་པ་བཤད་པ་དེ་ནི་དཔལ་ཨ་ཝ་དྷཱུ་ཏཱིའི་གཞུང་ངོ༌། །འཇམ་པ་ཞེས་བྱ་བ་ནི་མཆོག་གི་དགའ་བ་འབྱུང་བའི་དུས་སུ་ཤིན་ཏུ་ཕྲ་མོ་རེག་བྱའི་ཚུལ་དུ་འདོན་པར་བྱའོ། །འདོན་པ་ཞེས་བྱ་བ་ནི་བཟླས་པ་ཀུན་སྤྱོད་ཀྱི་དོན་དུའོ། །མགྲིན་པ་ཡ་རྐན་འགུལ་མེད་ཅེས་བྱ་བ་ནི་ལོངས་སྤྱོད་རྫོགས་པའི་གནས་པ་རྩ་མི་འགུལ་བས་སོ། །སྙིང་ག་རུ་ནི་ཞེས་བྱ་བ་ནི་བདེ་བ་ཆེན་པོ་ཚོར་བའི་གནས་ནས། གཞན་མར་ནང་གི་རེག་བྱ་འཇམ་པ་ཉམས་སུ་མྱོང་བའི་ཐབས་ཀྱིས། གསང་བའི་བཟླས་པ་མི་བྱ་ཞེས་སློབ་དཔོན་ཨ་ཀྲ་པུ་ཏིའི་མན་ངག་གོ །གང་གི་ཕྱིར་ཞེ་ན། ཀུན་རྫོབ་ཀྱི་བདེ་བའི་བདག་ཉིད་ལ་དོན་དམ་པས་འགོག་པའི་ཕྱིར་ཞེས་དགོངས་པའོ། །ཡེ་ཤེས་ཀྱི་དོན་གྱིས་ཤེས་རབ་ནི་གཏུམ་མོའི་ངོ་བོ། །ཐབས་ནི་གཏན་མེད་པའི་བདེ་བ་དེ་ནི་སློབ་

---

^{[མ་དཔེ་གཟིགས་ན་འདིར་གནོན།]}

དཔོན་དྲི་མེད་བཤེས་གཉེན་གྱི་གཞུང་ངོ༌། །རྡོ་རྗེ་སྐྱིལ་ཀྲུང་བྱས་ནས་སེམས་ལ་སོགས་ཞེས་བྱ་བ་ནི་རྡོ་རྗེ་བཞིན་དུ་མི་ཤིགས་པའི་ཡེ་ཤེས་ཀྱི་ཐུག་པ་མེད་པས་སྐྱེ་བ་བྱང་ཆུབ་ཀྱི་སེམས་ཞེས་བྱའོ། །སློབ་དཔོན་གཞན་མའི་གཞུང་གིས་ནི་ཐབས་དང་ཤེས་རབ་གཉིས་ལས་བྱུང་བ། གང་ཞིག་ཀུན་རྫོབ་དང་དོན་དམ་པ་གཉིས་སུ་མེད་པའི་རང་བཞིན། བྱང་ཆུབ་ཀྱི་སེམས་དེ་ནི་འགོག་པའི་གཏན་ལས་གཡོ་བ་མེད་པར་བྱའོ། །ཡེ་ཤེས་འབྱུང་བའི་དོན་གྱིས་དཔལ་བདེ་བ་ཆེན་པོའི་གཞུང་གིས། གསང་བའི་བཟླས་པ་ནི་ཆ་དང་ཐིག་ལེ་དང་ཚུལ་དང་མེད་ཅེས་བྱ་བ་ལ། སྣང་བ་ལ་སོགས་དང་བྲལ་བའི་བདེ་བའི་རྒྱལ་པོ། །བདེ་བ་ཆེན་པོ་ཚོར་བའི་གནས་སུ་མྱོང་བར་བྱའོ། །དེ་ནི་ཡེ་ཤེས་ལས་བྱུང་བའི་སོ་སོར་བསྟན་པའོ། །དཔལ་ཨིནྡྲ་བྷཱུ་ཏིའི་གཞུང་གིས་ནི་ཐིག་ལེ་དང༌། ཚུལ་དང༌། ཆ་དང་བྲལ་བའི་སྣང་བ་གསུམ་གང་ཞིག་ཡེ་ཤེས་དེ་ནི་གཞན་མ་ཡིན་པའི་རང་བཞིན་དགའ་བའོ། །དེ་ནི་ནང་གི་བདག་ཉིད་ཀྱི་ཕྱོགས་སུ། ཐིག་ལེ་དང་ཚུལ་དང་ཆའི་བདག་ཉིད་པའི་གང་ཞིག་ལོངས་སྤྱོད་དང༌། མི་སྣང་བ་དང༌། དབང་གི་གྲགས་པ་ཅན་ཡེ་ཤེས་དེ་ཡང་རྣམ་པ་ཐམས་ཅད་ཀྱི་བདག་ཉིད་རང་བཞིན་དགའ་བའོ། །དེ་ནི་ཕྱོགས་ཕྱོགས་སུའོ། །གསུམ་པ་ནི་ཐིག་ལེ་དང༌། ཚུལ་དང་ཆའི་ནང་ན་གནས་པའི་གང་ཞིག་དགའ་བ་གསུམ་གྱི་བདག་ཉིད། ཡེ་ཤེས་ཆེན་པོ་དེ་ཡང་དག་པའི་རང་བཞིན་དགའ་བའོ། །དེ་ནི་གསང་བའི་ཕྱོགས་སུའོ། །དེ་ནི་རྫོགས་པའི་འབྲས་བུའི་དོན་གྱིས། བཟླས་པའི་རིམ་པའི་བརྡ་བཤད་པར་བྱ་སྟེ། ཆའི་ནང་ན་སེམས་ལ་སོགས། །ཞེས་བྱ་བ་ནི། ཆའི་སྒྲ་ནི་ཤིན་ཏུ་ཡང་ཟབ་པའི་ཕྱིར་ཆད་པའི་དགའ་བ། སེམས་ཞེས་བྱ་བ་ནི་བྱང་ཆུབ་ཀྱི་སེམས་ནང་དུ་ཞེས་བྱ་བ་ནི་དེའི་ཡན་ལག་ལ་སླེབས་པ། སེམས་ཚུལ་གྱི་ནང་དུ་འདི་ལྟར་བཤད་དེ། ཐིག་ལེ་ནི་མཆོག་གི་དགའ་བ། སྟོང་པ་ཉིད་ནི་རང་བཞིན་གྱི་དགའ་བ། རང་བཞིན་དགའ་བ་ལ་མཆོག་གི་དགའ་བའི་གྲགས་པ་ཅན། ཡེ་ཤེས་རབ་ཏུ་འཇུག་པར་བྱ། །རྣམ་པ་ཐམས་ཅད་ཀྱིས་རང་བཞིན་དགའ་བ་གཅིག་པུ་ཉམས་སུ་མྱོང་བར་བྱ་ཞེས་པའི་དོན་ཏོ། །དགའ་བ་གསུམ་དང་བྲལ་བའི་ཕྱིར་སྟོང་པ་ཉིད་ཀྱི་རང་བཞིན་ཞེས་བསྟན་པ་དེ་ནི་ངེས་པའི་དོན་གྱིས་བཅོམ་ལྡན་

---

^{[མ་དཔེ་གཟིགས་ན་འདིར་གནོན།]}

འདས་ཀྱི་བཀའོ། །དཔལ་ཕྱག་རྒྱ་ཆེན་པོའི་ཐིག་ལེ་ལས་ལེའུ་ཉི་ཤུ་རྩ་ལྔ་པའི་བཤད་པའོ།། །།

ལེའུ་ཉེར་དྲུག་པའི་བཤད་པ།

---

^{[མ་དཔེ་གཟིགས་ན་འདིར་གནོན།]}

ད་ནི་ཉི་ཤུ་རྩ་དྲུག་པ་ལ་ཟབ་པའི་ཚིགས་སུ་བཅད་པ་བྲི། དུས་ནི་ཆ་ཞེས་རབ་ཏུ་བསྟན། །དེ་དག་སྦྱོར་བའི་དགོངས་པ་ཞེས་བྱ་བ་ལ། དཔལ་བདེ་བ་ཆེན་པོའི་ཞལ་སྔ་ནས་ཀྱི་མན་ངག་གི་གཞུང་གིས་འདི་ལྟར་བཤད་དེ། དུས་ཞེས་བྱ་བ་ནི་འཇིག་རྟེན་ལས་འདས་པའི་དགའ་བ་ཉམས་སུ་མྱོང་བ། ཆ་ཞེས་བྱ་བ་ནི་ཕྱག་རྒྱ་ཆེན་པོ་ཉིད། སློབ་དཔོན་ཌོ་མྦི་པའི་ཞལ་སྔ་ནས་ཀྱི་མན་ངག་གི་གཞུང་གི །ཆ་ནི་སྤྲོས་མེད་མ། དུས་ནི་བྱང་ཆུབ་ཀྱི་སེམས་སོ། །སློབ་དཔོན་ནག་པོའི་གཞུང་གིས་ཆ་ནི་ཤེས་རྦ། དུས་ནི་ཐམས། ལྷ་ལྕམ་ལཀྵྨཱིའི་གཞུང་གིས། ཆ་དང་དུས་ཞེས་བྱ་བ་ནི་བདེ་བ་ལ་ཤར་པ་དང་ནུབ་པ་དཔལ་ཨིནྡྲ་བྷཱུ་ཏིའི་ཞལ་སྔ་ནས་ཀྱི་མན་ངག་གི་གཞུང་གིས་ནི་ཇི་ལྟར་བརྒྱུད་ལ་རྒྱུད་པས་གསུངས་སོ། །དེ་ལ་དོ་ན་ནི་འདི་ཡིན་ཏེ། བཅོ་ལྔའི་བདག་ཉིད་ཀྱི་གང་ཞིག་ཟླ་བ་རྒྱས་པ་དེ་ནི་རྟེན་གྱི་ཆ། གང་ཞིག་དགའ་བ་བཅུ་དྲུག་པའི་བདག་ཉིད་ཀྱི་ཉི་མ་དེ་ནི་བརྟེན་པའི་དུས་དེ་དག་སྦྱོར་བ་ནི་དགོངས་པ་གཅིག་ཏུ་གྱུར་པ་ཉིད། བཞི་དང་བཞི་རུ་དབྱེ་བ་ཞེས་བྱ་བ་ནི་འདི་ལྟར་བཤད་དེ། བཅུ་དྲུག་པའི་བདག་ཉིད་གང་ཞིག་སྲོག་གི་དབྱུག་པའི་རྟེན་གྱི་སྦྱོར་བ་བཞི། དེ་ཡང་བཞི་རུ་དབྱེ་བ་དེ་ལྟར། གྲངས་ཀྱི་རིམ་པ་བཅུ་དྲུག་པའི་བདག་ཉིད་པ་ཞེས་བྱ་བའི་དོན་ཏོ། །ཡན་ལག་གཅིག་གི་རྣམ་པ་དང་བྲལ་བར་ཞེས་བྱ་བ་ནི་འདི་ལྟར་བཤད་དེ། བཅུ་དྲུག་པའི་བདག་ཉིད་གང་ཞིག་སྦྱོར་བ་དེ་ནི་ཐམས་ཅད་རྒྱས་པའི་ཕྱིར་སྐྱེ་བ་མེད་པའི་ཕྱིར་མི་རྟོག་ཅེས་ལུང་ངོ༌། །དེ་ཡང་བཅོ་ལྔའི་བདག་ཉིད་པ་ལ་འདི་ཉིད་ཉམས་སུ་མྱོང་བའི་དགོངས་པའོ། །སྦྱིན་པ་རྣམས་ཁོང་དུ་ཆུད་པའི་དོན་གྱི་ཕྱིར། ཕྱིའི་གྲངས་ཀྱི་སྦྱོར་བ་བཅུ་དྲུག་པ་ལ་སྐྱོན་དང་ཡོན་ཏན་མེད་དོ། །ད་ནི་བཅུ་དྲུག་པའི་ཡེ་ཤེས་ལ། གནས་ཀྱི་ཕུན་སུམ་ཚོགས་པ་བྲི། སྲོག་ནི་བྱང་ཆུབ་ཀྱི་སེམས། དབྱུག་པ་ནི་བདེ་བ་ཆེན་པོའི་འཁོར་ལོ་ནས། སྤྲུལ་པའི་འཁོར་ལོ་ནས། སྤྲུལ་པའི་འཁོར་ལོ་ཡན་ཆད། བཀའི་དངོས་པོས་ཁྱབ་པའོ། །དེའི་ཕྱིར་རྟེན་གྱིས་བསྟན་པའོ། །སློབ་དཔོན་ཌོ་མྦི་པའི་གཞུང་གིས་ནི། སྲོག་གི་དབྱུག་པ་ནི་བྱང་ཆུབ་ཀྱི་སེམས། རྟེན་ནི་རྣམ་པར་ཤེས་

---

^{[མ་དཔེ་གཟིགས་ན་འདིར་གནོན།]}

པའི་རླུང༌། སློབ་དཔོན་ཤ་བ་རེའི་གཞུང་གིས་ནི་སྲོག་གི་དབྱུག་པ་ནི་སྤྲོས་མེད་དངོས་པོ། །རྟེན་ནི་བྱང་ཆུབ་ཀྱི་སེམས། སློབ་དཔོན་ནག་པོ་པའི་གཞུང་གིས་ནི་སྲོག་གི་དབྱུག་པ་ནི་སྲོག་གི་རྩའི་དངོས་པོ། །རྟེན་ནི་སྤྲོས་མེད་མ། སློབ་དཔོན་ཨིནྡྲ་བྷཱུ་ཏིའི་གཞུང་གིས་ནི། དབྱུག་པ་ནི་ཨའི་རྣམ་པ་དེ་རང་ཐམས་ཅད་གྲུབ་པར་བྱེད་པའི་ཕྱིར་དེ་རུ་སྦྱོར་བའི་དོན་སྔར་བསྟན་པར་བྱས་པས། སྲོག་གི་དབྱུག་པ་དབུས་སུ་ཞེས་བྱ་བ་ནི་བྱང་ཆུབ་ཀྱེ་སེམས་བདུད་རྩི་མཆོག་གི་ལས་ནི་གསུམ་དུ་དབྱེ་བ། ཕྱི་དང་ནང་དང་གསང་བའི་བདག་ཉིད་དོ། །ནང་གི་བདག་ཉིད་ནི་དབུས་ཀྱི་གནས། གསང་བ་ནི་དེ་ཡི་ནང་དུ་ཕིའི་འདོད་པའི་གནས། འདོད་པའི་གནས་སུ་ཕྱིའི་རྩ་ལ་སོགས་པའི་མཉམ་པར་སྦྱོར་བ། དབུས་ཀྱི་གནས་སུ་རེག་བྱའི་རྩ་ལ་སོགས་པའི་སྦྱོར་བ། གསང་བའི་གནས་སུ་གསང་བའི་རྩ་ལ་སོགས་པའི་སྦྱོར་བ་ཞེས་སློབ་དཔོན་ཨིནྡྲ་བྷཱུ་ཏིའི་གཞུང་ངོ༌། །དཔལ་ཨིནྡྲ་བྷཱུ་ཏིའི་གཞུང་གིས་ནི་གསང་བ་དང་དབུ་མའི་གནས་གཉིས་ལ་མདུད་པའི་སྦྱོར་བ་མེད། འོན་ཀྱང་དགའ་བ་ལ་སོགས་པ་ལ་ཡོད་པ་དེའི་ཕྱིར་རོ་མ་ནི་མདུད་པ་སུམ་ཅུ་རྩ་གཉིས་དང་ལྡན། ནང་དུ་མིན་ཞེས་ཉིད་བཅོམ་ལྡན་འདས་རྡོ་རྗེ་འཛིན་པས་གསུངས་སོ། །མདུད་པའི་སྒྲས་ནི་ཕྱི་དང་ནང་གི་བདག་ཉིད་པ། རྩ་རྣམས་ལ་ཕན་ཚུན་ཡན་ལག་བསྒྲིལ་ཞེས་སློབ་དཔོན་ཨོ་ཀྲ་པུ་ཏིའི་གཞུང་ངོ༌། །མདུད་པའི་ནང་དུ་སྦྱོར་བ་ཡིན། །ཞེས་བྱ་བ་ལ། ལྷ་ལྕམ་ལཀྵྨཱིའི་གཞུང་གིས་ནི་ཕྱི་དན་ནང་གི་བདག་ཉིད་ཀྱི་རྩ་རྣམས་ལ། མདུད་མའི་སྤྱན་གྱིས་དབུས་སུ། བྱང་ཆུབ་སེམས་དང་དགའ་བ་དེ་དག་ལ་གཉིས་སུ་མེད་པ་ཉིད་དེ་ནི་ཆ་རྣམས་དགོས་པ་ཞེས་བྱ་བ་ནི་རྩ་རྣམས་ཀྱི་ཕྲད་པའོ། །ཆའི་སྦྱོར་བ་ནང་དུ་མིན། །ཞེས་བྱ་བ་ནི་གསང་བའི་གནས་སུ་ཕྲད་པ་དགག་པའོ། །དེ་བས་སྤྲོས་པ་མེད་པའི་རང་བཞིན་གྱི་ཕྱིར། སྤྲོས་མེད་མ་ཞེས་ཉིད་མཆོག་གི་དབང་ཕྱུག་གིས་གསུངས་སོ། །གཡས་གཡོན་མདུད་པའི་ནང་དུ་ནི་ལ་ལ་ནཱ་དང༌། ར་ས་ནཱ་བཞུགས་ཞེས་བྱ་བ་ནི་སྲོག་གི་དབྱུག་པ་ལ་གནག་ཞག་དབུས་ཀྱི་གནས། དེ་རུ་གཡས་གཡོན་ལ་ལ་ནཱ་དང་ར་ས་ནཱ་གཉིས། བཅོམ་ལྡན་འདས་བདག་མེད་མ་ཨ་ཝ་དྷཱུ་ཏཱི་ལ། གསུང་དང་ཐུགས་ཀྱི་ངོ་བོ། །སྲོག་གི་

---

^{[མ་དཔེ་གཟིགས་ན་འདིར་གནོན།]}

རྩ་ནི་སྐུ་བཅོམ་ལྡན་འདས་མ་བདག་མེད་མ་ཨ་ཝ་དྷཱུ་ཏིའི་ཉིད་སྐུ་གསུང་ཐུགས་དང་བྲལ་བ་དེ་ནི་དང་པོའི་རྒྱུད་ཀྱི་མན་ངག་གི་གཞུང་ངོ༌། །མདུད་པ་གཉིས་དབུས་རེ་རེ་ནི། །སུམ་ཅུ་རྩ་གཉིས་བཅུ་དྲུག་དྲན། །ཞེས་བྱ་བ་ནི་ཕྱི་རོལ་ནས་སུམ་ཅུ་རྩ་གཉིས། མདུད་པའི་བདག་ཉིད། གང་ཞིག་སྲོག་གི་དབྱུག་པ་དེ་ལ་མདུད་པ་གཉིས་གཉིས་ཀྱི་དབུས་སུ། རྩ་རེ་རེ་དང་དགའ་བ་རེ་རེ་འདུས་པས་མདུད་པ་སུམ་ཅུ་རྩ་གཉིས་ཀྱི་དབུས་སུ་བཅུ་དྲུག་གི་རྣམ་པ་ཅན་ཆའོ། །དེ་བཞིན་དགའ་བ་བཅུ་དྲུག་པ་དེ་རོ་གཅིག་ཏུ་གྱུར་པས། སྤྱོར་བ་ཞེས་བྱ་བའི་དོན་ཏོ། །མདུད་པ་སུམ་ཅུ་རྩ་གཉིས་ཀྱི་དངོས་པོ་ལ་དཔལ་ཡེ་ཤེས་ཐིག་ལེའི་གཞུང་གི་གྲངས་ནི། དང་པོ་ནི་ཟུར་གསུམ་གྱི་དངོས་པོ་ཅན། གཉིས་པ་ནི་པུཎྜ་རཱི་ཀའི་སྤྱན་ཅན། གསུམ་པ་ནི་དྲག་པའི་སྤྱན་ཅན། བཞི་པ་ནི་ཛཱ་ཏིའི་མེ་ཏོག་བཞིན། ལྔ་པ་ནི་ཚངས་པའི་མིག་བཞིན། དྲུག་པ་ནི་དུང་མིག་བཞིན། བདུན་པ་ནི་རྣ་མིག་བཞིན། བརྒྱད་པ་ནི་པ་མིག་བཞིན། དགུ་པ་ནི་དུང་གི་ལྟེ་བ་བཞིན། བཅུ་པ་ནི་གླང་པོ་ཆེའི་ལྟེ་བ་བཞི། བཅུ་གཅིག་པ་ནི་ཨུཏྤལའི་ལྟེ་བ་བཞི། བཅུ་གཉིས་པ་ནི་པདྨའི་ལྟེ་བ་བཞིན། བཅུ་གསུམ་པ་ནི་བུང་བའི་ཁ་བཞིན། བཅུ་བཞི་པ་ནི་རྨ་བྱའི་ཁ་བཞིན། བཅོ་ལྔ་པ་ནི་རྡོ་རྗེའི་ཁ་བཞིན། བཅུ་དྲུག་པ་ནི་རྒྱས་པའི་ཏིལ་གྱི་མེ་ཏོག་འདྲ་བར་བྱའོ། །གཞན་མ་ནི་མདུད་པ་བཅུ་དྲུག་དེའི་ནང་ན་གནས། དེ་ཡང་མི་གསལ་བའི་ཕྱིར་རེག་བྱའི་རྩའི་རྣམ་པ་ལ་རྟེན་ཞེས་སློབ་དཔོན་བི་ལ་ས་བཛྲའི་གཞུང་ངོ༌། །སོར་བཅུ་གཉིས་པའི་སྐུད་པའི་མདུད་པ་མེད་པ་གཅིག་པུ་ཞེས་བྱ་བ་ལ་བདེ་བ་ཆེན་པོའི་འཁོར་ལོའི་མཐའ་ནས། མགྲིན་པའི་སྟེང་ཡན་ཆད་དེ་ཙམ་ནི་ཕྱི་དང་ནང་གི་བདག་ཉིད་ཀྱི་རྩ་རྣམས་ལ་སྦྱོར་བ་མེད་དོ། །གང་གི་ཕྱིར་ཞེ་ན་ཤིན་ཏུ་ཕྲ་བར་སྦྱོར་བར་ཡང་མི་འགྱུར་ཞེས་སློབ་དཔོན་ཨོ་ཀྲ་པུ་ཏིའི་གཞུང་པོ། །དེ་ལས་གཞན་མ་མདུད་པ་དང་ལྡན་ཞེས་བྱ་བ་ནི་སྒྲ་ཇི་བཞིན་ནོ། །རླུང་གི་འཁོར་ལོ་ཡན་ཆད་ཅེས་བྱ་བ་ལ། གསང་བའི་པདྨའི་ལྟེ་བའི་ནང་ཞེས་བྱ་བའི་དོན་ཏོ། །མགྲིན་པའི་ལྟེ་བ་ནས་རིན་ཆེན་རྐེ་ཡན་ཆད་དུ། དེ་ཙམ་སྦྱོར་བ་བཅུ་དྲུག་གི་གནས་བསྟན་ཏོ། །ད་ནི་རྒྱུད་ལས་བསྟན་པའི་གོ་རིམས་ཀྱིས་སྦྱོར་བ་

---

^{[མ་དཔེ་གཟིགས་ན་འདིར་གནོན།]}

བཅུ་དྲུག་བྲི། འདོད་པའི་དགའ་བ་དང༌། དེ་བཞིན་ཤུལ་མའི་ཆའི་རྩ་ལས། རོ་གཅིག་ཏུ་གྱུར་པས་སྦྱོར་བ་དང་པོའོ། །གཉིས་པ་ནི་འདས་པའི་དགའ་བ་དང༌། སྟོབས་མ་ལ། གསུམ་པ་ནི་འགྲོ་བའི་དགའ་བ་དང༌། བདུད་རྩི་མ་ལ། བཞི་པ་ནི་དགའ་བ་དང༌། དེ་བཞིན་དཔལ་མོ་ལ་ལྔ་པ་ནི་རྒྱས་པ་དང༌། དེ་བཞིན་རྡུལ་མ་ལ། དྲུག་པ་ནི་སའི་དགའ་བ་དང༌། དེ་བཞིན་མྱོས་པ་མོ་ལ། བདུན་པ་ནི་འབྱུང་བའི་དགའ་བ་དང༌། དེ་བཞིན་མཚན་མོ་ལ། བརྒྱད་པ་ནི་མཆོག་གི་དགའ་བ་དང༌། དེ་བཞིན་རོ་མ་ལ། དགུ་པ་ནི་འབར་བའི་དགའ་བ་དང༌། དེ་བཞིན་ཞི་བ་མ་ལ། བཅུ་པ་ནི་ཐིག་ལེའི་དགའ་བ་དང༌། དེ་བཞིན་ནག་མོ་ལ། བཅུ་གཅིག་པ་ནི་མྱོས་པའི་དགའ་བ་དང༌། དེ་བཞིན་ཟད་པ་མ་ལ། བཅུ་གཉིས་པ་ནི་ཆད་པའི་དགའ་བ་དང༌། དེ་བཞིན་སྣུར་མ་ལ། བཅུ་གསུམ་པ་ནི་ཨུ་ཏིའི་དགའ་བ་དང༌། དེ་བཞིན་གཡོ་མ་ལ། བཅུ་བཞི་པ་ནི་ཚུལ་གྱི་དགའ་བ་དང༌། དེ་བཞིན་རླུང་མ་ལ། བཅོ་ལྔ་པ་ནི་གཉིད་ལོག་དགའ་བ་དང༌། དེ་བཞིན་མེ་ལྕེ་མ་ལ། བཅུ་དྲུག་པ་ནི་རང་བཞིན་དགའ་བ་དང༌། དེ་བཞིན་བསྐྱེད་མ་ལ། རིན་ཆེན་མགྲིན་པར་སླེབ་བཙམ། །རྒྱས་པའི་ཟླ་བ་ཞེས་སུ་དྲན། །ཞེས་སྔར་བསྟན་པའོ། །དེ་རང་ཤར་བ་ཞེས་བྱ་བ་ལ་སོགས་པ་ནི་ཡོངས་སུ་རྫོགས་པ་ཉིད། རབ་ཏུ་གསལ་བཞེས་སློབ་དཔོན་ཨོ་ཀྲ་པུ་ཏིའི་མན་ངག་གོ །བཅུ་དང་ལྔ་ནི་སྐྱེ་བའི་རྒྱུ། །བཅུ་དྲུག་པ་ལ་རྟོག་མེད་ཅེས་སྔར་བསྟན་པས་སོ། །ཤར་བ་དང་ནུབ་པ་མེད་པའི་ཕྱིར་དེ་ལ་སྦྱོར་བ་མེད་པ་ཞེས་ལུང་ལས་སྒྲ་ཇི་བཞིན་ནོ། །ད་ནི་རྩའི་མཚན་ཉིད་ཅན་རྩ་རྣམས་ལ་བསྐྱེད་པའི་སྦྱོར་བ་བྲི། བཅུ་དྲུག་པ་དང༌། དེ་བཞིན་ཉིད་མ་ཞེས་བྱ་བ་ལ། རྒྱལ་པོ་ཆེན་པོ་ཨིནྡྲ་བྷཱུ་ཏིའི་ཞལ་སྔ་ནས་ཀྱི། ཉིད་ལས་སྐྱེ་བའི་དཔལ་པདྨ་ཤཱི་ཀ་རིའི་གཞུང་གིས་འདི་ལྟར་བཤད་དེ། བཅུ་དྲུག་པ་ཞེས་བྱ་བ་ནི་ཀུན་རྫོབ་དང་དོན་དམ་པ་གཉིས་སུ་མེད་པའི་ངོ་བོ་ཅན་བྱང་ཆུབ་སེམས་ཀྱི་དངོས་པོ། །ཉི་མ་ཞེས་བྱ་བ་ནི་དེ་དང་འདྲ་བ་སྟེ། འོན་ཀྱང་འོད་ཆེ་བའི་ཕྱིར་རའི་དངོས་པོ། །གང་དུ་གཉིས་ཀའི་སྦྱོར་བར་འགྱུར་ཞེས་བྱ་བ་ནི་གཉིས་ཀ་ཞེས་བྱ་བ་ནི་ཏའི་རྣམ་པ་དང༌། རའི་རྣམ་པའོ། །གང་དུ་སྦྱོར་བ་ཞེས་བྱ་བ་ནི་བཅོམ་ལྡན་འདས་བདག་མེད་མ་ཉིད་ཨ་ཝ་དྷཱུ་ཏིའི་གྲགས་པ་ཅན་སྐྱེ་བ་མེད་

---

^{[མ་དཔེ་གཟིགས་ན་འདིར་གནོན།]}

མའོ། །རང་བཞིན་དེ་ནི་མཚན་ཉིད་ཅེས་བྱ་བ་ལ། བཅོམ་ལྡན་འདས་བདག་མེད་མ་ལ། དབྱེར་མེད་པའི་ངོ་བོ་རང་བཞིན་དགའ་བའི་རྗེ་བཙུན། དཔལ་ཕྱག་རྒྱ་ཆེན་པོའི་ཐིག་ལེའི་རྒྱལ་པོའོ། །བཅུ་དྲུག་པ་དང་དེ་བཞིན་ཉིད། །ཆ་རྣམས་ཀྱི་ནི་སྐྱེ་བའི་རྒྱུ། །ཞེས་བྱ་བ་ལ་སོགས་པ་ནི་གོ་སླ་བའི་ཕྱིར་སྒྲ་ཇི་བཞིན་གྱིས་བཤད་དོ། །དཔལ་ཕྱག་རྒྱ་ཆེན་པོའི་ཐིག་ལེ་ལས་ལེའུ་ཉི་ཤུ་རྩ་དྲུག་པའི་བཤད་པའོ།། །།

ལེའུ་ཉེར་བདུན་པའི་བཤད་པ།

---

^{[མ་དཔེ་གཟིགས་ན་འདིར་གནོན།]}

ད་ནི་ལེའུ་ཉི་ཤུ་རྩ་བདུན་པ་ལ་ཚིགས་སུ་བཅད་པ་བྲི། །སྦས་པའི་སྔགས་ལ་གསལ་བ་ཞེས་བྱ་བ་ནི་མི་དགེ་བ་བཅུ་བྱེད་པའི་གང་ཟག་ལ་གསང་པའི་སྔགས་སྦས་པ། ཡི་གེ་གྲགས་པ་ཅན་ཡང་དེ་བཞིན་ནོ། །དགེ་བ་བྱེད་པའི་གང་ཞག་དང༌། །དེ་བཞིན་གསང་བའི་ཚིག་བསྲུང་བ་ལ། ཐམས་ཅད་རབ་ཏུ་གསལ་བར་བྱ། དེའི་ཕྱིར་དད་པ་ཅན་དང༌། དད་པ་མེད་པ་ཉིད་དཔལ་རྡོ་རྗེ་འཛིན་པས་གསུངས་སོ། །དཔལ་ཕྱག་རྒྱ་ཆེན་པའོ་ཐིག་ལེ་ལས་ལེའུ་ཉི་ཤུ་རྩ་བདུན་པའི་བཤད་པའོ།། །།

ལེའུ་ཉེར་བརྒྱད་པའི་བཤད་པ།

---

^{[མ་དཔེ་གཟིགས་ན་འདིར་གནོན།]}

ད་ནི་ཉི་ཤུ་རྩ་བརྒྱད་པ་ལས་ཟབ་པའི་ཚིགས་སུ་བཅད་པ་བྲི། ཉོན་ཅིག་ལྷ་མོ་ཕྱག་རྒྱ་ཆེན། །མཆོག་གི་རྣམ་པ་བདེ་བའི་རབ། །ཅེས་བྱ་བ་ལ། སློབ་དཔོན་ཤ་བ་རིའི་གཞུང་གིས་ནོ། བདེ་བའི་རབ་ཀྱི་དོན་གྱིས་ནི་ཤིན་ཏུ་བདེ་བ་ཆེན་པོ་སྣང་བ་ཆེན་པོ་ཉིད་ངེས་པར་བསྟན་ཏོ། །རྣལ་འབྱོར་མ་ལ་དེ་ཀ་མིན། །ཞེས་བྱ་བ་ལ་ནི། སློབ་དཔོན་བཱི་ར་པུ་ཏིའི་གཞུང་གིས་ནི་རྣལ་འབྱོར་མ་ཞེས་བྱ་བ་ནི་ཐམས་ཀྱིས་དབང་བསྐུར་རྙེད་པའི་ཤེས་བ་མ་ལ་བདེ་བ་སྐྱེ་བའི་རང་བཞིན་ནང་ན་ཡོད་པའི་ཕྱིར། །ཆུད་ཟད་ཕྱག་རྒྱ་ཆེན་པོ་ལས་མྱུར་དུ་དངོས་གྲུབ་བྱེད་པ་ཞེས་བྱ་བའི་དོ་ཏོ། །རྣལ་འབྱོར་པ་ལ་ཅུང་ཟད་དཀའ། །ཞེས་བྱ་བ་ནི་ཐམས་ནི་ཤེས་རབ་ཀྱི་དབང་བསྐུར་རྙེད་ན་ཡང༌། དེ་ལྟ་མོད་ཀྱི་བདེ་བ་འབྱུང་བའི་གནས། ཕྱི་རོལ་དུ་གྱུར་པས་ན་ཞེས་བྱ་བའི་དོན་ཏོ། །སློབ་པའི་ཐམས་ཀྱིས་རྙེད་ཅེས་བྱ་བ་ལ་སོགས་པ་ནི་གང་ཞིག་སྤྲོས་པ་དང་བྲལ་བའི་རང་བཞིན་ཕྱག་རྒྱ་ཆེན་པོའི་དོན་དེ་ནི་རྟེན་དང་བཅས་པའི་ཐམས་ཀྱིས་ནམ་ཡང་མི་རྙེད་ཅེས་བྱ་བའི་དོན་ཏོ། །ཐམས་མ་ཡིན་པས་ཀྱང་མི་རྙེད་དོ། །གང་གི་ཕྱིར་ཞེ་ན་ཉམ་སུ་མྱོང་བའི་དུས་སུ་རེག་བྱའི་བདེ་བ་ཁོང་དུ་ཆུད་པའི་

---

^{[མ་དཔེ་གཟིགས་ན་འདིར་གནོན།]}

ཐབས། གང་གི་ཚེ་མེད་པ་དེའི་ཚེ་ཐམས་ཅད་མཁྱེན་པས་ཀྱང་མི་རྙེད་དེ། འོན་ཀྱང་གྲུབ་པར་བྱེད་པའི་རྣལ་འབྱོར་པས་གང་ལས་སོ། །དེ་ལྟར་ཡང་འདི་རུ་བཅོམ་ལྡན་འདས་རྡོ་རྗེ་འཛིན་པས་ཐམས་འདི་གསུངས་ཏེ། རླུང་གི་འཁོར་ལོའི་ཆའི་གནས་སུ་ཞེས་བྱ་བ་ནི་རང་བཞིན་གྱི་རླུང་འབྱུང་བའི་གནས་སུའོ། །རླུང་མ་གཉིད་པ་མ་ཞེས་བྱ་བ་ནི་ཟླ་བ་དང་ཉི་མ་འབབ་པའོ། །གཡས་དང་གཡོན་གྱི་ཕྱོགས་ཀྱིས་ནི་།ཆ་ནི་ཤིན་ཏུ་བསྐོར་བ་བྱ། །ཞེས་བྱ་བ་ནི། ཆའི་སྒྲས་ནི་བཅོམ་ལྡན་འདས་བདག་མེད་མ། ཨ་ཝ་དྷཱུ་ཏཱི། དེའི་གཡོན་ཕྱོགས་སུ་ཁུ་བ་འབབ་མ། གཡས་ཕྱོགས་སུ་ཁྲག་འབབ་མ། དེ་དག་རབ་ཏུ་བསྐུལ་བས་གང་ཞིག་བདེ་བ་སྐྱེ་བ་དེ་ནི་ཐམས་ཀྱིས་བླ་མའི་མན་ངག་ལས་ཕྱག་རྒྱ་ཆེན་པོ་རྙེད་ཅེས་ཉིད་མཆོག་གི་དབང་ཕྱག་གིས་གསུངས་སོ། །ཆ་ཡི་དབུས་ནི་རྩ་བར་བཞུགས། །ཞེས་བྱ་བ་ནི་འདི་ལྟར་བཤད་དེ་ཨ་ཝ་དྷཱུ་ཏཱི་གྲགས་པ་ཅན་ནོ། །པདྨའི་གྲགས་ཅན་དབུས་གནས་སུ། སྐྲའི་རྩེ་མོ་བརྒྱ་སྟོང་གི་ཆའི་ཚད་བཅོམ་ལྡན་འདས་མ་ཕྱག་རྒྱ་ཆེན་པོའོ།།རྩའི་གནས་ཞེས་བྱ་བ་ནི་སྤྲུལ་པའི་འཁོར་ལོ་ལས། རྩའི་གནས་ཞེས་བྱ་བ་ནི་བདེ་བ་ཆེན་པོའི་འཁོར་ལོ་དེ་ཙམ་ཁྱབ་པར་བཞུགས་ཞེས་སློབ་དཔོན་ཚངས་པའི་ཞལ་ལྔ་ནས་ཀྱི་མན་ངག་གི་གཞུང་ངོ༌། །དེ་ལ་ཡང་སོགས་ཞེས་བྱ་བ་ནི་སྒྲ་ཇི་བཞིན་ནོ། །ཕྱི་དང་ནང་གི་བདག་ཉིད་རྣམ་པར་བཞུགས་ཞེས་བྱ་བ་ནི་ཕྱི་རོལ་པའི་ཕྱག་དང་ཞབས་ལ་སོགས་པ་དང་མཉམ་པར་ལྡན་པའི་འཁྱུད་པའི་སྦྱོར་བས་སོ། །ནང་གི་བདག་ཉིད་ནི་གཟུགས་ལ་སོགས་པ་དང་བྲལ་བའོ། །ཚངས་པའི་ཞལ་སྔ་ནས་ཀྱི་མན་ངག་གི་ཞུང་གིས་ནི་ཕྱི་རོལ་གྱི་རེག་བྱ་མཆོག་གི་གྲགས་པ་ཅན་ཨ་ཝ་དྷཱུ་ཏཱི། ནང་གི་བདག་ཉིད་ཀྱི་ངོ་བོ་ཅན་ནི་རེག་བྱ་དགའ་བ། ཡེ་ཤེས་སྣང་བའི་སྐད་ཅིག །ཐིག་ལེ་ཚུལ་མེ་ཆུ། རླུང་ནམ་མཁའ་ལ་སོགས་པ་དང་བྲལ་བའོ། །གང་ཞིག་མི་ཤེས་པ་ལ་སོགས་ཞེས་བྱ་བ་ནི་དཔལ་ཨིནྡྲ་བྷཱུ་ཏཱིའི་ཞལ་སྣ་ནས་ནི་དེ་ལྟར་གྱུར་པའི་ཕྱག་རྒྱ་ཆེན་པོ་གང་ཞིག་མི་ཤེས་པ་ནི་བཅོམ་ལྡན་འདས་སངས་རྒྱས་ཡིན་ཀྱང་རྣལ་འབྱོར་ཆེན་པོ་མ་ཡིན། དཔལ་རྡོ་རྗེ་སེམས་དཔའ་ཆེན་རང་ངོ་བོ་མི་མཁྱེན་

---

^{[མ་དཔེ་གཟིགས་ན་འདིར་གནོན།]}

ཅེས་བྱ་བའི་དོན་ཏོ། །དཔལ་ཕྱག་རྒྱ་ཆེན་པོའི་ཐིག་ལེ་ཞེས་བྱ་བ་ནི་གོ་སླ་བའི་ཕྱིར་སྒྲ་ཇི་བཞིན་གྱིས་གསུངས་སོ། །དེ་སྐད་ཐོས་ནས་ལ་སོགས་པ་ནི་འདི་སྐད་གསུངས་ཞེས་བྱ་བ་ཡན་ཆད་སྡུད་པ་པོས་བསྟན་པ་གོ་སླ་བའི་ཕྱིར་སྒྲ་ཇི་བཞིན་ནོ། །རྩ་བའི་རྒྱུད་དུ་ཞེས་བྱ་བ་ནི་ཚངས་པའི་ཞལ་སྔ་ནས་ཀྱི་མན་ངག་གི་གཞུང་གིས། རིགས་ཆེན་པོའི་རྒྱུད། སློབ་དཔོན་ནག་པོའི་གཞུང་གིས་ནི་འབུམ་ལྔའི་བདག་གཉིད་ཀྱི་རྒྱུད། དེ་རུ་གཞུན་གྱི་གནས་དང་བདག་གི་གནས་ཀྱི་མདོར་བསྟན་པ་ཙམ། བཅོམ་ལྡན་འདས་བདག་ལ་གསུངས་ཞེས་བཅོམ་ལྡན་མོའི་ཞུ་བའི་ཚིག་གོ །བཅོམ་ལྡན་འདས་ཀྱིས་བཀའ་སྩལ་པ། ཞན་མའི་གནས་ནི་བྷ་གར་བསྟན། ནང་གི་གནས་ནི་ལྟེ་བའོ། །དེ་རུ་དཔལ་ལྷ་མོ་ཡན་ལག་རབ་ཀྱི་མན་ངག་གི་གཞུང་གི །བྱང་ཆུབ་སྤྲོ་བ་ཁྱབ་པའི་ཕྱིར། །གཞན་མའི་གནས་རྡོ་རྗེ་དབྱིངས་ཀྱི་དབང་ཕྱུག་མ། ལྟེ་བའི་ནང་ན་བཞུགས་པའི་ཕྱིར་བདག་ཉིད་ཀྱི་གནས་སོ། །གཞན་མས་སྒོའི་ཕྱི་རོལ་ཞེས་བྱ་བ་ནི་རྡོ་རྗེ་དང་པདྨ་ཐམས་ཀྱི་རིན་པོ་ཆེ་དང་འཁོར་ལོའི་གནས་ཞེས་རྣལ་འབྱོར་མ་བུང་བའི་མངལ་གྱི་མན་ངག་གོ །གཞན་མའི་གནས་ནི་སྦྱོར་བ་འམ། །ཞེས་བྱ་བ་ལ་འདུས་པ་ལ་སོགས་པའི་རྒྱུད་ལས་བསྟན་ཏོ། །ནང་གི་བདག་ཉིད་ཀྱི་གནས་རྣལ་འབྱོར་མ་ཞེས་ཕྱག་རྒྱ་ཆེན་པོའི་ཐིག་ལེའི་རྒྱུད་ལ་སོགས་པ་ལས་བསྟན་ཏོ། །ཡང་ནི་སྦྱོར་བ་དང༌། ཉེ་བའི་སྦྱོར་བ་བཞི་སྔར་ཉི་ཤུ་རྩ་བརྒྱད་པའི་གནས་སོ། །རྫོགས་པའི་དོན་དུ་མཐོ་རིས་དང་མི་ཡུལ་དང༌། ས་འོག་དང་རི་རབ་ཀྱི་རྩེ་མོ་དེ་ནི་ནང་གི་བདག་ཉིད་དང་ཕྱི་རོལ་གྱིའོ། །ནང་གི་བདག་ཉིད་ཅེས་བྱ་བ་ནི་ཆོས་ཀྱི་འཁོར་ལོའི་སྙིང་ག་དང༌། ལྟེ་བའི་སྙིང་ག་དང༌། སྤྲུལ་པའི་འཁོར་ལོའི་སྙིང་ག་དང༌། གསང་བའི་སྣའི་སྙིང་གའོ། །སྤྲུལ་པའི་འཁོར་ལོའི་སྙིང་ག་ཞེས་བྱ་བ་ནི་སངས་རྒྱས་རིན་པོ་ཆེའི་སྣོད་ཅེས་ཀི་ལ་རིའི་ཞལ་སྔ་ནས་ཀྱི་མན་ངག་གི་གཞུང་ངོ༌། །ལྷག་མ་ནི་གོ་སླ་བའི་ཕྱིར་དོན་ཇི་ལྟ་བ་བཞིན་གྱིས་བཤད་དོ། །དཔལ་ཕྱག་རྒྱ་ཆེན་པོའི་ཐིག་ལེ་ལས་ལེའུ་ཉི་ཤུ་རྩ་བརྒྱད་པའི་བཤད་པའོ།། །།འདི་ནི་དཔལ་ཕྱག་རྒྱ་ཆེན་པོའི་ཐིག་ལེ་ལས་ཟབ་པའི་དོན་གསལ་བ་རྨད་

---

^{[མ་དཔེ་གཟིགས་ན་འདིར་གནོན།]}

དུ་བྱུང་བ་ཞེས་བྱ་བ། ནང་དང་གསང་བ་རྒྱ་ཆེར་བཤད་པ། ཨུ་རྒྱན་གྱི་སློབ་དཔོན་ཕྱག་རྒྱ་ཆེན་པོའི་དངོས་གྲུབ་བརྙེས་པ། སློབ་དཔོན་ཟབ་པའི་རྡོ་རྗེས་མཛད་པ་རྫོགས་སོ།། །།པཎྜི་ཏ་ཤེས་རབ་གསང་བ་དང༌། ལོ་ཙཱ་བ་གཡུང་དྲུང་སྙིང་པོས་བསྒྱུར་བའོ།། །།