དཔལ་རིན་པོ་ཆེ་སྙེ་མ་ཞེས་བྱ་བའི་རྒྱ་ཆེར་འགྲེལ་པ།
ཤྲཱི་གུཔྟས་མཛད།
རྒྱ་གར་སྐད་དུ། ཤྲཱི་རཏྣ་མཉྫ་རཱིནཱ་མ་ཊཱི་ཀ། བོད་སྐད་དུ། དཔལ་རིན་པོ་ཆེ་སྙེ་མ་ཞེས་བྱ་བའི་རྒྱ་ཆེར་འགྲེལ་པ། དཔལ་ཆོས་ཀྱི་དབྱིངས་ལ་ཕྱག་འཚལ་ལོ། །རྣལ་འབྱོར་རྣལ་འབྱོར་མ་བྱེ་བྲག །གང་ཞིག་འདི་སྐད་བདག་སོགས་དོན། །དཔལ་རིན་རྡོར་ཞབས་ལ་ཕྱག་འཚལ་ཏེ། །ཤེས་རབ་དཔལ་བདག་དེས་གསལ་བཤད། །འདི་ལྟར་གསང་བ་ཆེན་པོ་ནི། །གསལ་བར་བྱེད་པ་ལུགས་མིན་ཡང༌། །དེ་ལྟ་མོད་ཀྱི་བོད་ཡུལ་དུ། །སྐྱེས་པ་རང་གི་སློབ་མ་མཆོག །གུས་པས་ཞུས་པའི་ངོར་བྱས་སོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་དཔའ་བོ་ཆེན་པོ་དང་དཔའ་མོའི་དབང་ཕྱུག་མས་རྣམ་པར་བསྐོར་ནས་ཤེས་རབ་ཀྱི་བྷ་ག་ལ་བཞུགས་སོ་ཞེས་བྱ་བ་ནི་མདོའོ། །དེ་ལས་དང་པོ་བརྗོད་པ་བརྗོད་པར་བྱ་བ་དང་འབྲེལ་བ་དང༌། དགོས་པ་དང༌། དགོས་པའི་ཡང་དགོས་པའི་དོན་གྱི་ཡན་ལག་འཇུག་པའི་ཕུན་སུམ་ཚོགས་པ་ངེས་པར་བཤད་པའོ། །གང་གི་ཕྱིར་ཞེ་ན་འདིས་རྒྱུད་ཀྱི་དོན་གསལ་བར་ཤེས་པ་དེའི་ཕྱིར་རོ། །དང་པོ་ནི་བདག་པོ་ཕུན་སུམ་ཚོགས་པ། བདག་པོ་ནི་ཐམས་ཅད་སྐྱེ་བའི་རྒྱུའི་རང་བཞིན་གྱི་ཕྱིར་རོ། །ཇི་ལྟར་ས་བོན་ནོ། །གཉིས་པ་གནས་ཕུན་སུམ་ཚོགས་པ་ནི་ས་བོན་ལ་ཡང་བཞི་དགོས་པའི་ཕྱིར་རོ། །གསུམ་པ་འཁོར་ཕུན་སུམ་ཚོགས་པ་ནི་བཞི་ལ་ཡང་ཆུ་ལ་སོགས་པ་དགོས་པའི་ཕྱིར་རོ། །བཞི་པ་དུས་ཕུན་སུམ་ཚོགས་པ་ནི་ཆུ་ལ་སོགས་པ་ལ་ཡང་གནས་དགོས་པའི་ཕྱིར་རོ། །ལྔ་པ་སྡུད་པ་པོ་ཕུན་སུམ་ཚོགས་པ་གནས་སྐབས་ལ་ཡང་བྱེད་པ་པོ་དགོས་པའི་ཕྱིར་རོ། །དྲུག་པ་རྒྱུད་ཕུན་སུམ་ཚོགས་པ་འདིར་བྱེད་པ་པོ་ཡང་ཐམས་ཅད་རྫོགས་པ་ལ་འདུས་པ་ཕྱེད་པའི་ཕྱིར་རོ། །འདི་ལྟར་རིགས་པས་བསྐྱེད་པའི་རིམ་པའོ། །དེ་ལ་བརྗོད་པ་ལ་སོགས་པའི་དོན་གྱི་རིམ་པས་རྫོགས་པའོ། །དེའི་ཕྱིར་
བསྐྱེད་པ་དང་རྫོགས་པའི་ངོ་བོ་ཉིད་ཀྱི་རྒྱུད་དཔལ་ཡེ་ཤེས་ཐིག་ལེ་རྒྱུད་ཀྱི་རྒྱལ་པོ་ལས་ཉིད་མཆོག་གི་དབང་ཕྱུག་གིས་དེ་སྐད་གསུངས་སོ། །ད་ནི་བརྗོད་པ་ལ་སོགས་པའི་དོན་གྱིས་ཕུན་སུམ་ཚོགས་པ་དྲུག་བཤད་དེ། གང་རྒྱུད་ཕུན་སུམ་ཚོགས་པ་དེ་ནི་བརྗོད་པའོ། །གང་སྡུད་པ་པོ་དང་དུས་ཕུན་སུམ་ཚོགས་པ་གཉིས་ནི་བརྗོད་པར་བྱའོ། །གང་འཁོར་ཕུན་སུམ་ཚོགས་པ་ནི་འབྲེལ་པའོ། །གང་གནས་ཕུན་སུམ་ཚོགས་པ་ནི་དགོས་པའོ། །གང་བདག་པོ་ཕུན་སུམ་ཚོགས་པ་དེ་ནི་དགོས་པའི་དགོས་པའོ། །ད་ནི་འདི་ལ་ཇི་ལྟ་བར་སྒྲའི་རིམ་པ་གསལ་བར་བཤད་དེ། འདི་སྐད་ཅེས་བྱ་བ་ནི་རྒྱུད་དེ། བདག་གིས་ཐོས་པ་ཞེས་བྱ་བ་ནི་སྡུད་པ་པོའོ། །དུས་གཅིག་ན་ཞེས་བྱ་བ་ནི་དུས་སོ། །བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་ཞེས་བྱ་བ་ནི་བདག་པོ་རྡོ་རྗེ་འཛིན་པ་ཆེན་པོའོ། །དཔའ་བོ་ཆེན་པོ་དང་དཔའ་མོའི་དབང་ཕྱུག་མས་ཡོངས་སུ་བསྐོར་བ་ཞེས་བྱ་བ་ནི་འཁོར་རོ། །ཤེས་རབ་ཀྱི་བྷ་ག་ལ་བཞུགས་ཞེས་བྱ་བ་ནི་གནས་སོ། །ད་ནི་ཨེ་ཝཾ་མ་ཡཱ་ཡི་གེ་བཞི་ལ་དང་པོ་རེ་ཞིག་རྣལ་འབྱོར་རྒྱུད་ཀྱི་རིམ་པས་དོན་བཤད་དེ། རྣལ་འབྱོར་ནི་བསྐྱེད་པའི་རིམ་པའི་མཚན་ཉིད་ཀྱི་ཕྱིར་རོ། །རྣལ་འབྱོར་མ་ནི་རྫོགས་པའི་རང་བཞིན་ནོ། །དེ་བས་ན་རྣལ་འབྱོར་ནི་དང་པོར་བཤད་པར་རིགས་སོ། །ཨེའི་རྣམ་པ་ཞེས་བྱ་བ་ནི་སའོ། །སངས་རྒྱས་རིན་པོ་ཆེའི་སྣོད་ཀྱི་རྟེན་གྱི་གཟུགས་སོ། །རྩུབ་པའི་མཚན་ཉིད་ཀྱི་ཕྱིར་སྲ་བའོ། །ཝཾ་གྱི་རྣམ་པ་ནི་ཆུའོ། །གཞན་མིན་ནི་སངས་རྒྱས་རིན་པོ་ཆེའི་སྣོད་དོ། །གཤེར་བའི་མཚན་ཉིད་ཀྱི་ཕྱིར་འཇམ་པའོ། །མ་ཞེས་བྱ་བ་ནི་མེའོ། །ཉིད་བྱང་ཆུབ་ཀྱི་སེམས་རིན་པོ་ཆེའོ། །ཚ་བའི་མཚན་ཉིད་ཀྱི་ཕྱིར་ཤིན་ཏུ་འོད་གསལ་བའོ། །ཡའི་རྣམ་པ་ནི་རླུང་ངོ༌། །ཡང་དག་པ་བྱང་ཆུབ་ཀྱི་སེམས་ཟླ་བའི་གཟུགས་སོ། །གཡོ་བའི་མཚན་ཉིད་ཀྱི་ཕྱིར་སྤྲིན་དང་འདྲ་ཞེས་བྱ་བའི་དོན་ཏོ། །ད་ནི་འབྱུང་བ་ཆེན་པོའི་བདག་ཉིད་ཀྱི་ཡི་གེ་བཞི་ལ་རྣམ་པ་དང་བཅས་པའི་ལྷ་མོའི་དབང་བཤད་དེ། ཨེའི་རྣམ་པ་ནི་ལས་ཀྱི་ཕྱག་རྒྱའི་རང་བཞིན་སངས་རྒྱས་སྤྱན་ནོ། །ཐམས་ཅད་བདེ་བ་འབྱུང་བའི་རྒྱུ་སྦྱོར་ཐབས་བྱེད་པའོ། །ཝཾ་གྱི་
རྣམ་པ་ནི་ཆོས་ཀྱི་ཕྱག་རྒྱའི་རང་བཞིན་མཱ་མ་ཀཱིའོ། །སྦྱོར་ཐབས་ལས་བྱུང་བའི་བདེ་བ་ཕྱིའི་འདོད་ཆགས་ཀྱི་མེའི་ཚ་བ་ལས་བསིལ་བར་བྱེད་པའོ། །ཡང་ན་ཉེ་བར་ཞི་བར་བྱེད་པའོ། །མེའི་རྣམ་པ་ནི་དམ་ཚིག་གི་ཕྱག་རྒྱའི་རང་བཞིན་གོས་དཀར་མོའོ། །དགའ་བ་དང་སྐད་ཅིག་ཐམས་ཅད་ཀུན་མྱོང་བའི་ཕྱིར་རོ། །ཡཱའི་རྣམ་པ་ནི་ཕྱག་རྒྱ་ཆེན་པོའི་རང་བཞིན་སྒྲོལ་མའོ། །སྤྲོས་པ་ཐམས་ཅད་དང་བྲལ་བའི་རྨད་དུ་བྱུང་བའི་བདེ་བ་ཆེན་པོ་གསལ་བར་བྱེད་པའི་ཕྱིར་རོ། །ཡང་ན་ཁྱབ་པར་བྱེད་པའི་ཕྱིར་ཞེས་དགོངས་པའོ། །ད་ནི་དེ་རྣམས་ལ་ཚངས་པའི་གནས་དང་བཅས་པའི་གནས་ཀྱི་རིམ་པ་བཤད་དེ། བྱམས་པ་དང་སྙིང་རྗེ་དང་དགའ་བ་དང་བཏང་སྙོམས་ཞེས་བྱ་བ་ནི་ཚངས་པའི་གནས་བཞིའོ། །ཡང་ན་ཚངས་པའི་སྒྲ་ནི་བྱང་ཆུབ་ཀྱི་སེམས་སོ། །སྤྱོད་པའི་ཕྱིར་ན་གནས་སོ། །དེས་ན་ཚངས་པའི་གནས་སོ། །དེ་ལ་གནས་ནི་སྤྲུལ་པ་དང་ཆོས་དང་ལོངས་སྤྱོད་དང་བདེ་བ་ཆེན་པོའི་འཁོར་ལོ་བཞིའོ། །དེ་ལ་འདི་ནི་དགོངས་པའོ། །གང་ཞིག་ཨེ་ཝཾ་མ་ཡཱ་ཡི་གེ་བཞི་པོ་དེ་ནི་བྱང་ཆུབ་ཀྱི་སེམས་ཀྱི་རང་བཞིན་ལྷ་མོའི་རྣམ་པའི་གཟུགས་ཀྱིས་སྤྲུལ་པ་ལ་སོགས་པའི་གནས་ན་བཞུགས་སོ། །དེ་ཡང་ལྷའི་རྣམ་པའི་གཟུགས་ཤེས་རབ་དང་ཐབས་གཉིས་སུ་མེད་པའི་རང་བཞིན་ཏེ། སྟེང་འོག་སྦྱོར་བས་ཞེས་དགོངས་པའོ། །འོག་གི་གནས་ན་ཡོད་པ་ཨེའི་རྣམ་པའི་གཟུགས་ཤེས་རབ་བོ། སྟེང་གི་གནས་ན་ཡོད་པའི་ཝཾ་གྱི་རྣམ་པའི་གཟུགས་ཐབས་སོ། །དགོངས་པ་གང་གིས་སྟེང་དང་འོག་གི་སྦྱོར་བ་དེ་བཤད་དེ། རྟེན་དང་བརྟེན་པའི་རང་བཞིན་གྱི་ཕྱིར་ཞེས་དགོས་པའོ། །གང་གི་ཚེ་ཨེའི་རྣམ་པའི་གཟུགས་ཤེས་རབ་རྟེན་ཡོད་པ་དེའི་ཚེ་ཐབས་ལ་ངལ་སོའི་གནས་ཡོད་དོ། །ཐབས་ངལ་སོ་བས་ཐབས་བསྐྱེད་པ་དང་གནས་པར་འགྱུར་རོ། །བསྐྱེད་པ་ལ་ནི་རྫོགས་པ་ཡང་དག་པར་ཤེས་སོ། །དེ་ལྟ་མ་ཡིན་ན་གཞན་གང་ནས་འོང༌། གང་གི་ཕྱིར་ཞེ་ན། རྫོགས་པའི་རང་བཞིན་ནམ་མཁའ་བཞིན་དུ་ཆོས་ཀྱི་སྐུའི་རང་གི་ངོ་བོའོ། །དེ་ནི་སྐྱེད་པའི་རྟེན་མེད་པས་མི་ཤེས་སོ། །ཇི་ལྟར་མུན་ནག་ནང་དུ་མར་མེ་མེད་པར་མུ་ཏིག་ལ་སོགས་པ་མི་རྙེད་ཅེས་འབྲེལ་པའོ། །ད་ནི་
མའི་སྒྲའི་དོན་བཤད་དེ། མ་ཡཱ་ཞེས་བྱ་བ་ནི་ལོངས་སྤྱོད་རྫོགས་པའི་སྐུའོ། །མའི་རྣམ་པའི་བདེ་བ་ཆེན་པོའི་གྲུབ་པ་འོད་ཀྱི་བདག་ཉིད་བྱང་ཆུབ་ཀྱི་སེམས་སོ། །ཡཱའི་རྣམ་པ་ནི་རང་བཞིན་གྱི་རླུང་གི་མཚན་ཉིད་དེས་མནན་པ་གཡོ་བ་མེད་པར་བྱས་པ་ཞེས་བྱ་བའི་དོན་ཏོ། །གཡོ་བ་མེད་པས་ཐམས་ཅད་དགའ་བ་སྐད་ཅིག་རོས་ཡོངས་སུ་རྒྱས་པ་དེའི་ཕྱིར་ལོངས་སྤྱོད་རྫོགས་པའི་སྐུའོ། །ཡང་ན་དངོས་པོ་ཐམས་ཅད་ཀྱི་རོ་གཅིག་པའི་རང་བཞིན་གྱི་ཕྱིར་ལོངས་སྤྱོད་རྫོགས་པའི་སྐུ་ཞེས་བྱ་བའི་དོན་ཏོ། །ཡང་ན་མའི་རྣམ་པ་ནི་སྲོག །ཡཱའི་རྣམ་པ་ནི་ཉེ་བའི་སྲོག །དེ་དག་སྦྱོར་བས་མཉམ་པའོ། །གང་ཞིག་མཉམ་པ་དེ་ནི་འགྲོ་བ་དང་འོང་བ་དང་བྲལ་བའོ། །གང་ཞིག་སྲོག་དེ་ནི་སུམ་ཅུ་རྩ་གཉིས་ཕྱི་ནང་ཆུ་ཚོད་སུམ་ཅུ་རྩ་གཉིས་དབྱུ་གུ་དྲུག་ཅུ་རྩ་བཞི་ཐུན་ཚོད་བརྒྱད་ཀྱི་ཕྱེད་ཀྱི་བར་དུ་བརྒྱད་བརྒྱས་ལྷག་པའི་སྟོང་ཕྲག་བཅུ་སྣང་བ་མཆེད་པའི་གཟུགས་ཀྱིས་བདེ་བ་ཆེན་པོའི་ལོངས་སྤྱོད་མྱོང་བའི་དོན་དུ་སྙིང་ག་ནས་འོངས་ནས་ཁྱད་པར་འབྱུང་ངོ༌། །ཕྱེད་ཀྱི་སྣང་བ་ཐོབ་པའི་གཟུགས་ཀྱིས་ལྟེ་བའི་དབུས་ནས་འོངས་ནས་གྱེན་དུ་འབྱུང་ངོ༌། །དེ་དག་འབྱུང་བས་གང་ཞིག་སྐད་ཅིག་གིས་བདེ་བ་ཆེན་པོ་ཆུ་སྐྱེས་ཀྱི་སྙིང་པོར་འོད་རབ་ཆེན་པོའི་སྣང་བ་དེ་ནི་མ་ཡཱ་ཞེས་བྱ་བའི་དོན་ཏོ། །ད་ནི་ཐོས་པའི་སྒྲའི་དོན་བཤད་དེ། ཐོས་པ་ཞེས་བྱ་བ་ནི་རྫོགས་པའོ། །ཅི་ཞིག་སྤྲུལ་པའི་སྐུའོ། །གང་ལས་རྫོགས་པ་དེ་ཉིད་དོན་བཤད་དེ། བདེ་བ་ཆེན་པོ་གྲུབ་པའི་འོད་ཀྱི་བདག་ཉིད་གང་གི་ཚེ་གྲུབ་པ་ཟླ་བའི་རྣམ་པས་ཡོངས་སུ་སྨིན་པ་དེའི་ཚེ་ཡོངས་སུ་སྨིན་པའི་དུས་སུ་རླུང་དང་མེའི་ཁོང་དུ་ཆུད་པས་མཚན་དང་དཔེ་བྱད་ལྡན་པའི་སྐུ་ཆུ་ལས་ཉ་བཞིན་བཞེངས་པར་རྫོགས་པ་ཞེས་བྱ་བའི་དོན་ཏོ། །ཡང་ན་ཐོས་པ་དེ་ནི་གཞན་མིན་རྫོགས་པའོ། །ཅི་ཞིག་དེ་རང་དོན་བཤད་དེ། དངོས་པོ་ཐམས་ཅད་ལ་སྣང་བ་ཐོབ་པའོ། །སྣང་བ་ཞེས་བྱ་བ་ནི་ཐ་མར་གྲོལ་བའི་ལྟ་བའོ། །ཐོབ་པ་ནི་དེ་རང་ལེན་པ། ཡང་ན་གཟུང་བ་ཞེས་བྱ་བའི་དོན་ཏོ། །ད་ནི་འདི་སྐད་བདག་གིས་ཐོས་པ་ཞེས་བྱ་བའི་ཚིགས་བཅད་ལ་སྦྱོར་བ་དྲུག་གི་དོན་གྱིས་ཇི་ལྟར་རང་བཞིན་བཤད་དེ། ཨེའི་རྣམ་པ་དངོས་པོའི་རྣམ་པར་ཤེས་པ་དངོས་པོ་ཐམས་ཅད་ཀྱི་རྟེན་གྱི་ཕྱིར་རོ། །ཡང་ན་
ལམ་མོ། །ཝཾ་གྱི་རྣམ་པ་རྟེན་གྱི་རྣམ་པར་ཤེས་པའོ། །ཐོབ་པ་དང་མ་ཐོབ་པ་རྣམས་ལ་ངལ་སོ་བའི་སའོ། །ཡང་ན་རྒྱུར་གྱུར་པའོ། །རྒྱུ་འདིར་རྙེད་པ་ལ་འབྱུང་བ་མ་ཡིན་པ་ཞེས་བྱ་བའི་དོན་ཏོ། །མའི་རྣམ་པ་ནི་ཡེ་ཤེས་ཀྱི་རྣམ་པར་ཤེས་པའོ། །ཐོབ་པའི་བདེ་བ་ལ་སོགས་པ་སྐྱབས་སྦྱིན་ནོ། །ཡང་ན་འདུས་པར་བྱེད་དོ། །ཡའི་རྣམ་པ་ནི་རྣམ་པར་འབྱེད་པའི་རྣམ་པར་ཤེས་པའོ། །སྦས་པ་ལ་བྱེ་བྲག་བྱེད་དོ། །ཡང་ན་འགྲོ་བར་འདོད་པ་ནི་མི་སྟེར་བའོ། །ཤྲོའི་རྣམ་པ་ནི་མཐའི་རྣམ་པར་ཤེས་པའོ། །གྲངས་མེད་པའི་འཇིག་རྟེན་ལ་ཡོད་པའི་སྲོག་གི་གྲགས་པའོ། །ཡང་ན་ཁྱབ་པར་བྱེད་པའོ། །དེའི་རྣམ་པ་ནི་སྣང་བའི་རྣམ་པར་ཤེས་པའོ། །མི་གསལ་བའི་བདེ་བའི་ཡེ་ཤེས་ཀུན་ལ་གསལ་བར་བྱེད་དོ། །ཡང་ན་སྤོང་བར་བྱེད་པ་ཞེས་བྱ་བའི་དོན་ཏོ། །ད་ནི་དུས་གཅིག་ན་ཞེས་པའི་དོན་བཤད་དེ། དུས་ཀྱི་སྒྲ་ནི་གནས་སྐབས་སོ། །ཡང་ན་ཡོངས་སུ་སྨིན་པའི་དུས་སོ། །དེ་ཡང་འདིར་གཉིས་སུ་དབྱེ་ན་ནི་ཤིན་ཏུ་དུས་དང༌། ངན་དུས་སོ། །ཤིན་ཏུ་དུས་ནི་སྣའི་འཕར་བ་གཉིས་ཀྱི་འོང་བ། ངན་དུས་ནི་དེ་བཞིན་དུ་འགྲོ་བ་ཤིན་ཏུ་དུས་ཀྱིས་ཇི་ལྟར་འདོད་པའི་འབྲས་བུ་རྙེད་དོ། །ངན་པའི་དུས་ཀྱིས་མི་རྙེད་དོ། །ཡང་ན་དུས་ནི་དགའ་བ་གཉིས་མཉམ་པར་འབྱུང་ངོ༌། །ཡང་ན་གཉིས་ཀྱི་རིན་པོ་ཆེ་ཁ་སྤྲད་པའོ། །ཡང་ན་བླ་མའི་མན་ངག་གིས་རིན་པོ་ཆེའི་སྐེའི་ནང་གི་ལྟེ་བའི་རྩ་བར་བཟུང་བའོ། །དེ་ཉིད་གཟུང་བ་ཙམ་གྱིས་ནི་གང་ཞིག་ཟླ་བ་ཉི་མའི་སྟན་འཛུམས་པ་དེ་ནི་གཅིག་ཅེས་བྱ་བའི་དོན་ཏོ། །ཡང་ན་གང་ཞིག་འགྲོ་བ་དང་འོང་བ་དང་བྲལ་བ་དེ་ནི་གཅིག་གོ །ཡང་ན་གང་ཞིག་གྲགས་པ་དང་བྲལ་བ་དེ་ནི་གཅིག་གོ །ཡང་ན་གང་ཞིག་ཆགས་པ་དང་བྲལ་བ་དེ་དག་གཅིག་ཏུ་གྱུར་པ་མར་གྱི་ནང་དུ་མར་བཞིན་དུ་དེ་ནི་དུས་གཅིག་བརྗོད་ཅེས་བྱ་བའི་དོན་ཏོ། །དེའི་སྐད་ཅིག་ལ་ཕྱིས་བཤད་པའི་ཤེས་རབ་ཀྱི་བྷ་ག་ལ་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེར་བཞུགས་སོ། །ཆགས་པ་ལ་སོགས་པའི་ཉོན་མོངས་པའི་དྲ་བ་བཅོམ་པའི་ཕྱིར་བཅོམ་ལྡན་འདས། ཡང་ན་དབང་ཕྱུག་ལ་སོགས་པའི་ཡོན་ཏན་དང་ལྡན་པའི་ཕྱིར་བཅོམ་ལྡན་འདས། ཡང་ན་སྲིད་པའི་མུན་ནག་བཅོམ་པའི་ཕྱིར་བཅོམ་ལྡན་འདས། ཡང་ན་སྲིད་པའི་རྒྱ་མཚོ་
གཏིང་རིང་བའི་ཟབ་པ་ཆགས་པ་ལ་སོགས་པའི་ཉོན་མོངས་པའི་ཆུ་སྲིན་གྱིས་ཁྱབ་པ་སྒྲོལ་བར་བྱེད་པའི་ཕྱིར་བཅོམ་ལྡན་འདས། ཡང་ན་སྟོང་པ་ཉིད་ཀྱི་བྷ་ག་ལ་བཞུགས་པའི་ཕྱིར་བཅོམ་ལྡན་འདས་སོ། །བཞུགས་བཞིན་དུ་གང་གི་ཕྱིར་འགྲོ་བ་དང་མི་འགྲོ་བ་དབྱེར་མེད་པས་གཟིགས་པ་དེའི་ཕྱིར་ཐམས་ཅད་དོ། །ཇི་ལྟར་སུས་ཀྱང་མ་གཤེགས་པ་དེ་ལྟར་གཤེགས་པས་དེ་བཞིན་གཤེགས་པ་ཞེས་བྱ་བའོ། །ཡང་ན་དེ་བཞིན་གཤེགས་པའི་སྒྲས་རྣམ་པར་སྣང་མཛད་ལ་སོགས་པ་དེ་རྣམས་ཀྱི་གང་ཞིག་སྐུ་གསུང་ཐུགས་དེ་ནི་རྡོ་རྗེའོ། །རྡོ་རྗེ་ནི་རང་བཞིན་བདེ་བའི་མཚན་ཉིད་དོ། །བདེ་བའི་མཚན་ཉིད་ཀྱི་ཕྱིར་མི་ཤིགས་པའོ། །ཡང་ན་ཐམས་ཅད་ཀྱི་སྒྲས་འབྱུང་བ་ཆེན་པོ་ལས་སྐྱེས་པ་ཕུང་པོ་ལ་སོགས་དེ་ནི་ཇི་ལྟར་སྔོན་འོངས་པ་དེ་བཞིན་དུ་འགྲོ་བ་དེ་ནི་དེ་བཞིན་གཤེགས་པ་ཞེས་བྱ་བའི་དོན་ཏོ། །དེ་རྣམས་ལ་གང་ཞིག་སྐུ་དེ་ནི་སྐུའི་མཚན་ཉིད་ཀྱིས་འདས་སོ། །ཉོན་མོངས་པའི་སྒྲིབ་པས་སྐྱོན་མི་བགྱིད་པའི་ཕྱིར་ལུས་པོ་ལ་རྒས་པ་ལ་སོགས་པ་ཡོད་པའོ། །དེ་མེད་པས་ལུས་པོ་ཡོད་པ་ནི་ཡང་མེད་དེ། ཇི་ལྟར་ཆུའི་ཟླ་བ་བཞིན་དུ་ཆུ་ཟླའི་མཚན་ཉིད་ཀྱི་ཕྱིར་དེ་ཉིད་རྡོ་རྗེའོ། །དེ་ཡང་ཆོས་ཀྱི་དབྱིངས་ཀྱི་རང་བཞིན་ནོ། །ཆོས་རྣམས་ཀྱི་དབྱིངས་ཆོས་ཀྱི་དབྱིངས་བྱ་བ་ཆོས་ཀྱི་སྒྲ་ནི་སྐུ་གསུང་ཐུགས། དབྱིངས་ཀྱི་སྒྲ་ནི་ས་བོན་སེམས་ལས་བྱུང་བ། ཡང་ན་ནམ་མཁའ། དེ་ཉིད་ཤེས་རབ་ཀྱི་ཕ་རོལ་ཕྱིན་མ། དེའི་བྷ་ག་ནི་སྟོང་པ་ཉིད་དོ། །དེ་ཡང་ཤིན་ཏུ་གཏིང་རིང་བ་ཟབ་པ་ཚད་མེད་བསམ་དུ་མེད་དོ། །ཡང་ན་མྱ་ངན་ལས་འདས་པའི་འཛིན་པའི་གཞི་བཅོམ་པའི་ཕྱིར་བྷ་གའོ། །དེ་ལ་བཞུགས་པ་སུ་ཞིག་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་འཛིན་པ་ཆེན་པོ་ཞེས་བྱའོ། །ད་ནི་འདི་སྐད་བདག་གིས་ཐོས་པ་ལ་སོགས་པ་ནས་བཞུགས་པ་ཡན་ཆད་གནས་དང་ཉེ་བའི་གནས་ལ་སོགས་པའི་དོན་གྱིས་ཇི་ལྟ་བའི་རང་བཞིན་བཤད་དེ་གང་གི་ཕྱིར་ཞེ་ན། བཅོམ་ལྡན་འདས་རྡོ་རྗེ་འཛིན་པ་ཆེན་པོ་ལ་ཨེ་ཝཾ་གྱི་རྣམ་པ་གནས་པ་དེའི་ཕྱིར་གནས་དང་ཉེ་བའི་གནས་ལ་སོགས་པའི་དོན་གྱིས་ངེས་པར་སྨྲ་བར་བྱའོ། །ཟླ་བ་གྲགས་པའི་ཞལ་སྔ་ལ་སོགས་པ་ནས་སེམས་ཅན་གྱི་ཕྱོགས་ལ་སྙིང་རྗེ་མེད།
ཡོད་ན་འདི་སྐད་བདག་གིས་ལ་སོགས་པ་ཅིའི་དོན་གྱི་ཕྱིར་ཡང་དག་པར་མ་བཤད། གང་ཞིག་བཤད་པ་དེ་ནི་རྒྱུད་རང་གི་རིམ་པ་བོར་ནས་གལ་ཏེ་འདུས་པ་ལ་གནས་ལ་སོགས་པའི་དོན་མ་བཤད་ཅེས་དགོངས་ནས་དེ་ལ་སྨྲའོ། །གང་འདུས་པ་མ་བཤད་ན་དེ་ནི་འདུས་པ་ཆེན་པོ་ལ་བཅོམ་ལྡན་འདས་ཀྱིས་མ་བཤད་དམ་ཅི། གལ་ཏེ་རྒྱུད་མཐོང་བ་ཡིན་ན་དེ་ལྟ་ཡིན་ན་ཐོས་པ་ཆེ་བའི་མཚན་ཉིད་གང༌། ཐོས་པ་ཆུང་བ་དེས་འགྲེལ་པ་ལ་སོགས་པ་མི་བྱ། མང་པོ་སྨྲ་བས་ཅི་བཅོམ་ལྡན་འདས་ཀྱིས་བཤད་པའི་གོ་རིམས་ཀྱིས་བདག་གི་དེར་དོན་བཤད་དེ། འདི་སྐད་ཅེས་བྱ་བའི་གནས་དངོས་པོ་ཐམས་ཅད་ཀྱི་རྟེན་གྱི་ཕྱིར། ཡང་ན་འོངས་པ་རྣམས་ལ་གནས་བགྱིད་པའི་ཕྱིར་རོ། །བདག་གིས་ཞེས་བྱ་བ་ནི་ཉེ་བའི་གནས། གནས་པ་ལ་འཕེལ་བར་བྱེད་པའི་ཕྱིར་ཡང་ན་ཡོངས་སུ་སྨིན་པར་བྱེད་པས་སོ། །ཐོས་ཞེས་བྱ་བ་ནི་ཞིང་ཐམས་ཅད་སྐྱེ་བའི་རྒྱུའི་ཕྱིར་ཡང་ན་རྫོགས་པར་བྱེད་པས་སོ། །དུས་གཅིག་ཅེས་པ་ནི་ཉེ་བའི་ཞིང་ཐམས་ཅད་ལ་ཐམས་ཅད་ཡན་ལག་གིས་ཐམས་ཅད་རྒྱས་པར་བྱེད་པའི་ཕྱིར། ཡང་ན་ཁྱབ་པའི་ཕྱིར་རོ། །དེ་བཞིན་གཤེགས་པ་ཐམས་ཅད་ཅེས་པ་ནི་འདུན་པ། རྟེན་དང་འཕེལ་བ་དང་འབྱུང་བ་དང་ཡན་ལག་རྒྱས་པ་ལ་གཟུང་བའི་ཕྱིར། ཡང་ན་ལྟ་བའི་ཕྱིར་རོ། །སྐུ་ནི་ཉེ་བའི་འདུན་པ། བཟུང་བའི་དངོས་པོ་ལ་འདུ་བྱེད་བགྱིད་པའི་ཕྱིར་ཡང་ན་དག་པར་བྱེད་པའི་ཕྱིར་རོ། །གསུང་ནི་འདུས་པ། ཆོས་ཐམས་ཅད་ལ་སྦྱོར་བར་བྱེད་པའི་ཕྱིར་ཡང་ན་བྱེ་བྲག་གསལ་བར་བྱེད་པའི་ཕྱིར་རོ། །སེམས་ནི་ཉེ་བའི་འདུས་པ། དངོས་པོ་ཐམས་ཅད་ལ་ཉེ་བ་མ་ཡིན་པའི་ཕྱིར། ཇི་ལྟར་པདྨའི་འདབ་མ་ནི་ནང་ན་ཆུ། ཡང་ན་ཐམས་ཅད་ཀྱི་ནང་ན་ཡོད་པའི་ཕྱིར། ཇི་ལྟར་ཤིང་ལ་སོགས་པའི་ནང་ན་མེའོ། །རྡོ་རྗེ་ཞེས་བྱ་བ་ནི་དུར་ཁྲོད། དངོས་པོ་ཐམས་ཅད་ལ་དངོས་པོ་མེད་པར་བྱེད་པའི་ཕྱིར། ཡང་ན་རླག་པར་བྱེད་པའི་ཕྱིར་རོ། །དཔའ་བོ་ཆེན་པོ་ཞེས་པ་ནི་ཉེ་བའི་དུར་ཁྲོད། བརླག་པ་འགྲུབ་པ་ལ་སྔོན་གྱི་བག་ཆགས་ཀྱི་སྟོབས་ཀྱིས་གཞན་མའི་དངོས་པོས་མྱུ་གུ་འབྱུང་བར་བྱེད་པའི་ཕྱིར། ཡང་ན་རང་གི་མཚན་ཉིད་གསལ་བར་བྱེད་པའི་ཕྱིར་རོ། །དཔའ་མོའི་དབང་ཕྱུག་མ་ནི་རིང་བ་ཆོས་ཐམས་ཅད་ལ་ཡེ་ཤེས་ཀྱི་ལྟ་བས་ཁྱབ་པར་བྱེད་པའི་ཕྱིར། ཡང་ན་ཁོང་དུ་ཆུད་པར་བྱེད་པའི་ཕྱིར་རོ། །
ཡོངས་སུ་བསྐོར་བ་ཞེས་བྱ་བ་ནི་ཉེ་བའི་རིང་བ། ཡེ་ཤེས་ཀྱི་ལྟ་བས་ཁྱབ་པའི་དངོས་པོ་ལ་ཡང་དག་པར་དྲན་པར་བྱེད་པའི་ཕྱིར་རོ། །ཡང་ན་ཉམས་སུ་མྱོང་བའི་ཕྱིར་རོ། །ཤེས་རབ་ཅེས་བྱ་བ་ནི་སྦྱོར་བ། ཡེ་ཤེས་ཐམས་ཅད་ལས་གཞན་མ་ཡིན་པ་སྤྱོད་པའི་ཕྱིར། ཡང་ན་རྣམ་པར་དཔྱོད་པའི་ཕྱིར་རོ། །བྷ་ག་ཞེས་བྱ་བ་ནི་ཉེ་བའི་སྦྱོར་བ། རྣམ་པར་དཔྱོད་པའི་ཡེ་ཤེས་ལ་ཡང་དག་པར་མཚན་ཉིད་མི་དམིགས་པར་བྱེད་པའི་ཕྱིར། ཡང་ན་བཏང་སྙོམས་བྱེད་པའི་ཕྱིར་རོ། །བཞུགས་སོ་ཞེས་བྱ་བ་ནི་ལམ། ཆོས་ཐམས་ཅད་ལ་འགོག་པ་གྲོལ་བའི་ཕྱིར། ཡང་ན་དག་པར་བྱེད་པའི་ཕྱིར་རོ། །བཅོམ་ལྡན་འདས་ཞེས་བྱ་བ་ནི་ཉེ་བའི་ལམ། སྐད་ཅིག་གཅིག་གིས་བཅུ་བཞི་དབང་བྱེད་པའི་ཕྱིར། ཡང་ན་རྙེད་པའི་ཕྱིར་ཞེས་པའི་དོན་ཏོ། །ད་ནི་རྣལ་འབྱོར་མའི་རྒྱུད་ཀྱི་གོ་རིམས་ཀྱི་དོན་བཤད་དེ། རྣལ་འབྱོར་དང་རྣལ་འབྱོར་མ་གཉིས་སུ་མེད་པའི་ཕྱིར་རོ། །རྣལ་འབྱོར་ནི་ཐབས། རྣལ་འབྱོར་མ་ནི་ཤེས་རབ། ཤེས་རབ་དང་ཐབས་གཉིས་སུ་མེད་པའི་སྦྱོར་བས་ཡེ་ཤེས་ཆེན་པོ་ཐོབ་བོ། །ཨེའི་རྣམ་པ་ཞེས་བྱ་བ་ནི་ཆར་ཡང་ཐམས་ཅད་བདེ་བ་བསྐྱེད་པའི་ཕྱིར། གླེང་གཞིའི་རང་བཞིན་ཡེ་ཤེས་ཀྱི་གཟུགས་སོ། །ཝཾ་གྱི་རྣམ་པ་ཞེས་བྱ་བ་ནི་ཐིག་ལེ་བདེ་བ་ལ་ཚིམ་པར་བྱེད་པའི་ཕྱིར། འབྱུང་བའི་རང་བཞིན་ཡེ་ཤེས་ཀྱི་གཟུགས་སོ། །མའི་རྣམ་པ་ཞེས་བྱ་བ་ཚུལ། བདེ་བ་ལ་ཡངས་པར་བྱེད་པའི་ཕྱིར་གནས་ཀྱི་རང་བཞིན་གྱི་ཡེ་ཤེས་ཀྱི་ངོ་བོའོ། །ཡཱའི་རྣམ་པ་ཞེས་བྱ་བ་ནི་ཚུལ་ཙམ་བདེ་བ་ལ་ནང་གི་རེག་བྱ་བྱེད་པའི་ཕྱིར་སྟོང་པ་ཉིད་ཡེ་ཤེས་ཀྱི་མཚན་ཉིད་དོ། །དེ་ལྟར་རང་བཞིན་ཡེ་ཤེས་གཞིའི་བྱེ་བྲག་ཏུ་འདི་སྐད་བདག་གི་དོན་དཔལ་དེ་ཁོ་ན་ཉིད་ཀྱི་སྒྲོན་མའི་རྒྱུད་ཀྱི་འདི་རུ་ཞེས་བསྟན་ཏོ། །ད་ནི་ཡེ་ཤེས་བཞི་ལ་རྩའི་དོན་གྱིས་རང་གི་ངོ་བོར་བཤད་དེ། འདས་པ་དང་མ་འོངས་པ་དང༌། ད་ལྟར་ཡོད་པ་དགའ་བ་རྣམས་ལ་གནས་སྦྱིན་པའི་ཕྱིར། ཡང་ན་རྩ་ནི་ཐམས་ཅད་ལ་རྩ་བའི་རྟེན་ལ་གནས། རྩ་བའི་རྟེན་གནས་ལས་བདེ་བ་ཐམས་ཅད་ལ་སོགས་པ་རྙེད་དོ། །ཨེའི་རྣམ་པ་ཞེས་བྱ་བ་ནི་ལུས་ཀྱི་མཚན་ཉིད་སྲོག་མ། ལུས་གསལ་བའི་གཟུགས་ཀྱི་ཕྱིར་ངག་ལ་སོགས་པ་བཞིའོ། །ཝཾ་གྱི་རྣམ་པ་ཞེས་བྱ་བ་ནི་ངག་གི་མཚན་ཉིད་རོ་མ། ངག་ནི་རོ་ཐམས་ཅད་ཀྱི་དབང་
བྱེད་པ་མི་གསལ་ན་ཡང་གསལ་བའི་སྣང་བ་བྱེད་དོ། །མའི་རྣམ་པ་ཞེས་བྱ་བ་ནི་སེམས་ཀྱི་རང་བཞིན་འཛིན་མ། བདེ་བ་ཐམས་ཅད་དང་རོ་ལས་འབྱུང་བའི་ངོ་བོ་འཛིན་པའི་ཕྱིར། ཡང་ན་ཚོར་བའི་ཕྱིར་རོ། །ཡཱའི་རྣམ་པ་ཞེས་བྱ་བ་ནི་སེམས་ལས་བྱུང་བའི་ངོ་བོ་ཉིད་རྟོག་མེད་མ་གསལ་བ་རྟེན་ལ་སོགས་པ་ནི་ཁྱད་པར་བྱེ་བྲག་ངོ་བོ་ཞེས་པས། ཡང་ན་སྤྲོས་པ་དང་བྲལ་བར་བྱེད་པའི་ཕྱིར་ཞེས་པའི་དོན་ཏོ། །ད་ནི་རྩའི་མཚན་ཉིད་ཅན་ཡི་གེ་བཞི་ལ་གནས་བཤད་དེ། ཨེའི་རྣམ་པ་ཞེས་བྱ་བ་ནི་འདབ་མ་བརྒྱད་པའི་ནང་དུ་རྣམ་པ་སྣ་ཚོགས་ཀྱི་མཚན་ཉིད་ཅན་འདབ་མ་གསུམ་པའི་འདབ་སྐྱེས་སོ། །ཝཾ་གྱི་རྣམ་པ་ཞེས་བྱ་བ་ནི་དེའི་ནང་ན་ཡོད་པ་རྣམ་པར་སྨིན་པའི་མཚན་ཉིད་ཅན་ལྟེ་བ། མའི་རྣམ་པ་ཞེས་བྱ་བ་ནི་ལྟེ་བའི་ནང་ན་ཡོད་པ་རྣམ་པར་འཇོམས་པའི་མཚན་ཉིད་ཅན་སྒུར་མོའི་རྣམ་པའི་བྱ་གདོང་མ་གཏུམ་མོའོ། །ཡཱའི་རྣམ་པ་ཞེས་བྱ་བ་ནི་རྣམ་པའི་མཚན་ཉིད་ཅན་ཡོན་པོའི་གདུབ་བུའི་རྣམ་པ་ཨཉྫ་ཀའོ། །དེ་ལ་འདི་ལྟར་དགོངས་པའོ། །གནས་གསུམ་གྱི་དབུས་སུ་གང་ཞིག་ཡོན་པོའི་གདུབ་བུའི་རྣམ་པ་ཨཉྫ་ཀ་དེ་ནི་ཀུན་རྫོབ་དང༌། དོན་དམ་པ་གཉིས་སུ་མེད་པའི་རང་བཞིན་བྱང་ཆུབ་ཀྱི་སེམས་ཞེས་བྱ་བའི་དོན་ཏོ། །ད་ནི་དགའ་བ་བཅུ་དྲུག་གི་བྱེ་བྲག་ཏུ་ཐོས་པ་ལ་སོགས་པའི་དོན་གསལ་བར་བཤད་དེ། གང་གི་ཕྱིར་ཨེ་ཝཾ་ཞེས་བྱ་བ་ནི་བདེ་བའི་ཞིང་དེ་བདག་གིས་ཐོས་ཞེས་བྱ་བ་ནི་འབྲེལ་པ། དེའི་ཕྱིར་ཇི་ལྟར་ཐོས་པ་ལ་སོགས་པའི་དོན་དགའ་བ་ལ་སོགས་པའི་དོན་གྱིས་གསལ་བར་བྱེད་པ་དེ་ནི་རྒྱུ་འབྲས་མཐུན་པར་འགྱུར་རོ། །ཐོས་པ་ཞེས་བྱ་བ་ནི་འདོད་པའི་མཚན་ཉིད་ཟླ་བའི་བདེ་བ། བདེ་བ་ལ་སྦྱོར་བར་བྱེད་པའི་ཕྱིར་རོ། །གཅིག་ཅེས་བྱ་བ་ནི་འདར་བའི་གྲགས་པ་མཆོག་སྦྱོར་བ་ཙམ་གྱིས་ནི་སྟེང་གནས་ན་ཡོད་པའི་བྱང་ཆུབ་ཀྱི་སེམས་འོག་ནས་འགྲོ་བའི་རབ་གཡོ་བའི་ཕྱིར་རོ། །དུས་ཞེས་བྱ་བ་ནི་འགྲོ་བའི་རང་གི་ངོ་བོ་ཕྱག་རྒྱ་ཆེན་པོ་རང་གི་གནས་རེག་བྱ་ཉམས་སུ་མྱོང་བའི་དུས་ཤེས་ནས་ཕྱི་ནས་གྱེན་དུ་འགྲོ་བའི་ཕྱིར་རོ། །ཕྱག་རྒྱ་ཆེན་པོའི་སྒྲ་ནི་རྟོག་མེད་མ་བདག་གིས་དགོངས་པའོ། །ཐམས་ཅད་ཅེས་བྱ་བ་ནི་དགའ་བའི་མཚན་ཉིད་ཡེ་ཤེས་གསུམ་གཅིག་པུ་ཡིན་ན་ཡང་རླག་པ་ལོངས་སྤྱོད་དབང་བྱེད་པའི་ཕྱིར་རོ། །དེ་བཞིན་
གཤེགས་པ་ཞེས་བྱ་བ་ནི་རྒྱས་པའི་ངོ་བོ་ཉིད་རྣམ་པར་འབྱེད་པ་དབང་ལ་སོགས་པ་བྱེད་པས་སྐད་ཅིག་དང༌། རོ་ལ་སོགས་པ་ཁེངས་པ་ལས་ཆད་པ་ལ་རྣམ་པར་འབྱེད་པ་བྱེད་པའི་ཕྱིར་རོ། །སྐུ་ཞེས་བྱ་བ་ནི་མདུང་གི་ངོ་བོ་ཉིད་དགའ་བ་ལས་ཀྱི་ཕྱག་རྒྱ་ལས་འབྱུང༌། བདེ་བར་རང་གིས་དཔྱོད་པའི་སྟོབས་ཀྱིས་ཡོངས་སུ་པོར་བས་མཚན་ཉིད་མེད་པར་བྱེད་པའི་ཕྱིར་ཞེས་བྱ་བའི་དོན་ཏོ། །གསུང་ཞེས་བྱ་བ་ནི་འབྱུང་བའི་གྲགས་པ་མཆོག་གི་དགའ་བ་དམ་ཚིག་ཕྱག་རྒྱ་ལས་འབྱུང་བའི་བདེ་བ་མྱོང་ནས་བཅོས་མ་ཞེས་ཡོངས་སུ་བསྒོམས་ཏེ། དཔེ་མེད་གསར་དུ་འབྱུང་བའི་བདེ་བ་བྱེད་པས་སོ། །སེམས་ཞེས་བྱ་བ་ནི་མཆོག་གི་དགའ་བའི་ངོ་བོ་ཉིད་ཆད་པའི་ངོ་བོ་དེ་རུ་སྨྲ་བ་མང་པོ་ཡོད། མན་ངག་གི་ཕྱིར་སྨྲ་བ་ལུགས་མ་ཡིན་ན་ཡང་དེ་ལྟ་མོད་ཀྱི་སྐལ་ལྡན་སེམས་ཅན་གྱི་ངོར་མཛད་པས་བསྟན་བཅོས་ཀྱི་གཞི་ལ་བདག་གིས་བྲི་ཞེས་འབྲེལ་པའོ། །མཆོག་གི་དགའ་བ་འདི་མེད་ན་དེ་ལ་ཇི་ལྟར་ཆད་པའི་དགའ་བ་ལས་རང་བཞིན་དགའ་བ་རྙེད་དེ། ཆད་པའི་དགའ་བ་ཞེས་བྱ་བ་ནི་དགའ་བའི་དངོས་པོ་ལས་རླག་པ་སྲོག་དང་བྲལ་བའི་དངོས་པོ་འཐོབ་བོ། །ཇི་ལྟར་སྣུམ་ཟད་པའི་མར་མེའི་སྡོང་བུ་དེ་ནི་འདོད་པའི་དངོས་པོ་རྙེད་པ་ཡུན་རིང་པོ་ཡོད་དམ་ཅི། ཆད་པའི་དགའ་བ་ཡང་དེ་བཞིན་ནོ། །མེད་པས་ན་གཅིག་པུ་ཆད་པའི་མུན་ནག་གོ །མུན་ནག་ལ་ཤིན་ཏུ་ཕྲ་མོའི་དངོས་པོ་སུས་རྙེད་པར་ནུས། དེ་བས་ན་མཆོག་གི་དགའ་བའི་མར་མེ་དགོས་སོ། །གང་གི་ཕྲ་མོའི་དངོས་པོ་རང་བཞིན་དགའ་བ་རྙེད་པ་ཞེས་བདག་གིས་དགོས་པའོ། །ཇི་ལྟར་རྙེད་པའི་མན་ངག་གི་དོན་བདག་གིས་བཤད་དེ། དང་པོ་སྲུབ་དང་བསྲུབ་ཐབས་ཀྱི་གཏུམ་མོའི་སྦྱོར་བ་ལས་རྡོ་རྗེ་རྩ་བར་དགའ་བ་ཚོར་བར་བྱའོ། །རྩ་བ་ལས་རྐེ་རུ་མཆོག་གི་དགའ་བ་རྐེ་ལས་སྙིང་གར་ཆད་པའི་དགའ་བ་དེ་ནི་བསྐྱེད་པའི་རིམ་པའི་ཕྱོགས་སོ། །རྫོགས་པའི་ཕྱོགས་སུ་སྙིང་གའི་གནས་སུ་བདེ་བ་ཆེན་པོ་སླེབ་པ་ཙམ་གྱིས་བླ་མའི་མན་ངག་ལས་དེ་རུ་གང་ཞིག་གཟུང་བ་དེ་ནི་མཆོག་ཏུ་དགའ་བའོ། །ཅུང་ཟད་ཙམ་གྱེན་དུ་འགྲོ་བར་བྱེད་པ་རང་བཞིན་དགའ་བའོ། །དེ་ལྟར་མིན་ན་རང་བཞིན་དགའ་བ་ཐོབ་པར་མི་འགྱུར་ཞེས་བདག་གིས་དགོངས་སོ། །རྡོ་རྗེ་ཞེས་
བྱ་བ་རྡོ་རྗེ་འབར་བའི་ངོ་བོ་ཉིད་ཀྱི་རང་བཞིན་སྤྲོས་པ་ཐམས་ཅད་ལྷན་ཅིག་སྐྱེས་པའི་ཕྱག་དང་མདོག་ལ་སོགས་པ་བྲལ་བའི་འོད་ཀྱི་ངོ་བོའི་ཕྱིར་རོ། །དཔའ་བོ་ཆེན་པོ་ཞེས་བྱ་བ་ནི་དཔའ་བོ་ཆེན་པོ་བྱང་ཆུབ་ཀྱི་སེམས་ཐིག་ལེའི་ངོ་བོ་ཉིད་དུ་ཞུ་བ་དང་ཆད་པ་དང་བྲལ་བའི་ཕྱིར་ཐིག་ལེའི་སྒྲས་བཤད་པའོ། །དཔའ་བོ་ཆེན་པོའི་དབང་ཕྱུག་མ་ནི་མྱོས་པའི་རང་བཞིན་གཙོ། །བདེ་བ་ཐམས་ཅད་ལ་སོགས་པ་ཁོང་དུ་ཆུད་པའི་ཕྱིར་རོ། །ཡོངས་སུ་བསྐོར་བ་ཞེས་པ་ནི་ཆད་པའི་དགའ་བའི་མཚན་ཉིད་ཀྱི་ཡན་ལག་ཐམས་ཅད་ཆད་པ་དང་བྲལ་བའི་ཕྱིར་རོ། །དེ་ལ་འདི་ནི་དགོངས་པའོ། །ཆད་པའི་མཚན་མའི་མཚན་ཉིད་དགའ་བ་ནི་ཉིན་མོའི་མཚན་ཉིད་མཚན་མོ་འདས་པས་ཉིན་མོར་འགྱུར་རོ། །ཉིན་མོའི་ཡན་ལག་ཐམས་ཅད་འོད་དང་ལྡན་པ་མཆོག་གི་དགའ་བ་མཐོང་བ་མཛེས་པ་ཞེས་བྱ་བའི་དོན་ཏོ། །ས་ཞེས་བྱ་བ་ནི་ཤེས་རབ་ཨོཾ་དྷའི་རང་བཞིན་སངས་རྒྱས་རིན་པོ་ཆེའི་སྣོད་རོ་ཐམས་ཅད་དང༌། རེག་བྱ་ལ་སོགས་པ་ལ་གཞིའི་ཕྱིར་རོ། །ཡང་ན་ངལ་སོ་བ་ཞེས་བྱ་བར་དགོངས་པའོ། །བྷ་ག་ཞེས་བྱ་བ་ནི་ཚུལ་གྱི་ངོ་བོ་ཉིད་ལོངས་སྤྱོད་ཐ་མའི་དངོས་པོ་བཅོམ་པའི་ཕྱིར། ཡང་ན་འཇིག་རྟེན་ལས་འདས་པའི་རོ་མྱོང་བའི་ཕྱིར་རོ། །བཞུགས་ཞེས་བྱ་བ་ནི་ཉིད་ཀྱི་མཚན་ཉིད་ཀྱིས་བཞུགས་སོ། །ཕྱིའི་ཆགས་པ་ལ་སོགས་པ་མ་ཚོར་བའི་ཕྱིར་རོ། །ཇི་ལྟར་སྐྱེས་བུ་གཉིད་དུ་འགྲོ་བ་ཅི་ཡང་མི་ཚོར་རོ། །བཅོམ་ལྡན་འདས་ཞེས་བྱ་བ་ནི་རང་བཞིན་དགའ་བའོ། །ནམ་མཁའི་ངོ་བོ་ཉིད་ཀྱི་ཕྱིར་རོ། །ཡང་ན་ཐམས་ཅད་ལ་ཁྱབ་པའི་ཕྱིར་ཞེས་དགོངས་པའོ། །དེ་ནི་མཆོག་གི་གསང་ཆེན་པོ། །ཐམས་ཅད་རྒྱུད་ཀྱི་དོན་སྙིང་པོ། །མཆོག་གི་བླ་མ་མངོན་པར་གཅེས། །ཡེ་ཤེས་བདུད་རྩི་རྒྱ་མཚོའོ། །དྲི་མེད་བདག་གིས་བཤད་པ་ཡིས། །གང་ཞིག་འབྲས་མཆོག་དགེ་བ་རྙེད། །སྲིད་པའི་སྒྲོག་གིས་བཅིངས་པ་ལ། །དེ་ཡིས་གྲོལ་བར་འགྲོ་བར་ཤོག །བདག་ཉིད་དྲན་པའི་དོན་ཕྱིར་དང༌། །མཁས་པ་ཡ་མཚན་འགྱུར་བ་དང༌། །སློབ་མ་དགའ་བའི་དོན་གྱི་ཕྱིར། །བདག་གིས་རིན་ཆེན་སྙེ་མ་བྱས། །རྒྱ་གར་གྱི་སློབ་དཔོན་ཆེན་པོ་ཤྲཱི་གུཔྟའི་ཞལ་སྔ་ནས་མཛད་པ། དཔལ་རིན་པོ་ཆེའི་སྙེ་མ་ཞེས་བྱ་བའི་རྒྱ་ཆེར་འགྲེལ་པ་ཞེས་བྱ་བ་རྫོགས་སོ།། །།ཉིད་ཀྱི་ཞལ་སྔ་ནས་མཛད་ཅིང་གཏན་ལ་ཕབ་པའོ།། །།