སྔོན་དུ་བསྒོམ་པའི་རིམ་པ།

མེ་ཐབ་ཀྱི་རིམ་པ།

[Full Size]

རྒྱ་གར་སྐད་དུ། ཤྲཱི་ཧེ་བཛྲ་ཧོ་མ་བི་དྷི། བོད་སྐད་དུ། དཔལ་ཀྱེ་རྡོ་རྗེ་ལས་སྦྱིན་སྲེག་གི་ཆོ་ག །ཀྱེ་རྡོ་རྗེ་ལ་ཕྱག་འཚལ་ལོ། །དཔལ་ལྡན་མཁའ་འགྲོ་འགྲོ་བའི་མགོན། །ལྷ་མོ་དང་བཅས་འཁོར་ལོ་ལ། །ཕྱག་འཚལ་ནས་ནི་སྦྱིན་སྲེག་གི །རིམ་པ་ཡང་དག་བཤད་པར་བྱ། །རྒྱལ་བས་བྱ་བའི་རྒྱུད་ལས་ནི། །ལས་ནི་རྣམ་པ་བཞིར་གསུངས་པ། ཞི་དང་རྒྱས་དང་དབང་མངོན་སྤྱོད། །དེ་ཡི་རིམ་པ་མ་ནོར་བར། །མདོར་བསྡུས་རིམ་པ་བཤད་པར་བྱ། །ཞལ་བསྲོ་ཆོ་ག་བྱ་བ་ལ། །རྒྱས་པའི་ལས་ནི་མཆོག་ཡིན་ཏེ། རྒྱས་ནས་བརྩམས་ཏེ་ལས་རྣམས་ཀྱི། །རིམ་པ་རབ་ཏུ་བཤད་པར་བྱ། །མེ་ཐབ་རིམ་པ་བཤད་བྱ་སྟེ། རྒྱས་པ་པ་ལ་ནི་གྲུ་བཞི་པ། །ཞི་བ་ལ་ནི་ཟླུམ་པོར་འདོད། །དབང་ལ་གཞུ་ཡི་དབྱིབས་ཅན་ཏེ། །གསོད་པ་ལ་ནི་གྲུ་གསུམ་ཤིས། །ཡང་ན་ལས་ཀུན་བྱེད་པའི་མཆོག །ཁྲུ་གང་དང་ནི་ཁྲུ་དོ་ཉིད། །རྒྱས་པའི་སྟེང་དང་འོག་ཏུ་འདོད། །ཁྲུ་གང་དང་ནི་དེ་ཡི་ཕྱེད། །ཞི་བའི་སྟེང་དང་འོག་ཏུ་འདོད། །གཞུ་ལ་བཞི་བཅུ་ཉི་ཤུ་ཁ། །ཟབས་སུ་སོར་བཅུ་དབང་གི་ཡིན། །ངོས་གསུམ་སོར་ནི་ཉི་ཤུ་ལ། །ཟབས་སུ་དེ་ཕྱེད་གསོད་ལ་འདོད། །རྒྱས་པ་ཁ་དོག་སེར་པོ་སྟེ། །ཞི་བ་དཀར་པོར་ཤེས་པར་བྱ། །དབང་ལ་དམར་པོར་རབ་ཏུ་གྲགས། །དེ་བཞིན་གསོད་ལ་ནག་པོར་འདོད།།

[Full Size]

དགུག་པའི་ལས་ནི་དབང་དུ་བྱ། །མངོན་སྤྱོད་དུ་ནི་ཞེ་སྡང་སོགས། །རྒྱས་པ་དབུས་སུ་རིན་ཆེན་ཏེ། །ཤར་དུ་རྡོ་རྗེ་ལྷོར་འཁོར་ལོ། །ནུབ་ཏུ་པདྨ་རལ་གྲི་བྱང༌། །སོར་བཞི་འགྱེད་པར་བྱས་པའི་ཕྱིར། །ཁ་ཁྱེར་སོར་བཞི་རྡོ་རྗེས་བསྐོར། །ཕྱི་རོལ་སོར་བཞི་པོར་ལ་ཡང༌། །པདྨའི་ཕྲེང་བ་གཏང་བར་བྱ། །ཞི་བའི་ཕྱག་མཚན་རིམ་པ་ཡང༌། །དབུས་སུ་འཁོར་ལོ་ཤར་རྡོ་རྗེ། །ལྷོ་རུ་རིན་ཆེན་ནུབ་པདྨ། །བྱང་དུ་རལ་གྲི་ཤེས་པར་བྱ། །ཙནྡན་དཀར་པོས་བྱུགས་པའོ། །དབང་གི་ཕྱག་མཚན་རིམ་བཤད་བྱ། །ཁ་ཁྱེར་སྤྱི་དང་མཐུན་པ་སྟེ། །དབུས་ལ་རྡོ་རྗེ་རབ་དང༌། དབུས་སུ་པདྨ་འདབ་བརྒྱད་བྱ། །ཕྱི་མ་སྤྱིར་མཐུན་དམར་པོས་བྱུག །མངོན་སྤྱོད་མཚན་ཉིད་བཤད་བྱ་སྟེ། །ཁ་ཁྱེར་སོར་གསུམ་རྡོ་རྗེས་བསྐོར། །དབུས་སུ་རལ་གྲི་ཕྱི་མ་ནི། །བླ་མའི་ཞལ་ཤེས་ནག་པོས་བྱུག །རྒྱས་པ་ཤར་དུ་བལྟས་ལ་བྱ། ཞི་བ་ལ་ནི་བྱང་དུ་འདོད། དབང་དང་བསྐྲད་པ་ནུབ་ཏུ་འདོད། །དྲག་པོའི་ལས་ལ་ལྷོ་རུའོ། །རྒྱས་པ་ལ་ནི་ནང་པར་བྱ། །ཞི་བ་ཉི་མ་ཕྱེད་ནའོ། །དབང་ནི་ཉི་ནུབ་ནམ་ཕྱེད་དྲག །ཅེས་གང་གསུངས་པ་ནི་མེ་ཐབ་ཀྱི་རིམ་པའོ། །

མཆོད་རྫས་སྲེག་རྫས་ཀྱི་རིམ་པ།

[Full Size]

མཆོད་རྫས་སྲེག་རྫས་རིམ་ཞེས་བྱ། །སྔགས་མཁན་གཡོན་དུ་དྲི་མེ་ཏོག །དུང་ཕོར་བཀང་བ་གཞག་པར་བྱ། །ཡོན་ཆབ་སྣོད་ནི་གསེར་ལ་སོགས། །ཆུ་དང་མེ་ཏོག་གིས་བཀད་གཞག །མེད་ན་ས་ལས་བྱས་པའང་རུང༌། །ཤིང་ནི་མི་ཤེས་སྤང་བར་བྱ། །དགང་གཟར་བླུགས་གཟར་མར་མདུན་དུ། །གཡས་སུ་དྲིས་བཀང་སྣོད་དུ་ནི། །ཀུ་ཤ་བཅུག་ལ་གཞག་པར་བྱ། །ལས་ཀུན་བྱེད་པའི་བུམ་པ་ཡང༌། །ཚུལ་བཞིན་དུ་ནི་གཞག་པར་བྱ། །འབྱུང་པོའི་གཏོར་མ་མཆོག་ཀྱང་གཞག །ཏིལ་སོགས་སྲེག་རྫས་རིམ་བཞིན་གཞག །རྒྱས་ལ་ཞོ་དང་ཞི་ལ་ཏིལ། །དབང་དང་དགུག་ལ་ཨུཏྤལ་དམར། །དྲག་པོ་ལ་སོགས་ཚེར་ཅན་ཤིང༌། །ཕྱི་མ་འོག་ནས་བཤད་པ་བཞིན། །ཐོག་མར་མར་དང་ཐ་མར་མར། །མཆོད་རྫས་དང་སྲེག་རྫས་ཀྱི་རིམ་པའོ། །

རྫས་བྱིན་གྱིས་བརླབས་པའི་རིམ་པ།

[Full Size]

དེ་རྣམས་བྱིན་གྱིས་བརླབ་པ་ནི། །རྡོ་རྗེས་རག་པ་དེ་ཉིད་ནི། །བརྗོད་པས་དྲི་མ་དག་ནས་ནི། །ཉི་མའི་ཤེལ་ལྟར་དག་པར་བསམ། །རྫས་བྱིན་གྱིས་བརླབ་པའི་རིམ་པའོ། །

ཡམ་ཤིང་གི་རིམ་པ།

[Full Size]

རློན་ཤིང་འདབ་བཅས་རྩེ་ལས་བྱུང༌། །སྲིད་དུ་མཛུབ་གང་སྦོམ་ཆག་གང༌། །སྦྲང་རྩི་དང་ནི་མར་གྱིས་བྱུག །ཙནྡན་དཀར་པོའི་ཆུ་ལ་སྤངས། །རྩེ་གཅིག་ཞི་བའི་ལས་ལ་དབུལ། །སྲིད་དུ་ཁྲུ་གང་སྦོམས་སུ་ནི། །ཆག་གང་པ་ནི་རབ་ཏུ་བཟང༌། ཡལ་ག་དབུས་ཀྱི་ཆ་ལས་བྱུང༌། །ཞོ་དང་མར་དང་སེར་པོའི་དྲིས། །སྤངས་པ་རྩེ་གཅིག་རྒྱས་པ་ལའོ། །སོར་ལྔ་འདབ་བཅས་སྦོམ་ཆག་གང༌། །ཡུངས་མར་བདུད་རྩི་ལྔ་ལ་སོགས། །སྤངས་པ་དབང་གི་ལས་ལ་ཤིས། །སྲིད་དུ་སོར་བཞི་ཚེར་མ་ཅན། །མི་རུས་དུར་ཁྲོད་ཐལ་ཆེན་དང༌། །དུག་ལ་སོགས་པའི་ཆུས་སྤངས་པའོ། །མངོན་སྤྱོད་དག་ལ་དབུལ་བར་རིགས། །ཡམ་ཤིང་གི་རིམ་པའོ། །

བུད་ཤིང་གི་རིམ་པ།

[Full Size]

དེ་ནས་བུད་ཤིང་རིམ་པ་བཤད། །པཱ་ལ་ཤ་དང་ནྱ་གྲོ་སོགས། །ལས་ཀྱི་རྗེས་སུ་མཐུན་པར་བྱ། །ཡང་ན་འོ་མ་ཅན་ཤིང་མཆོག །དེ་ཡང་ལས་དང་རྗེས་མཐུན་བྱ། །བུད་ཤིང་རིམ་པ་མདོར་བསྟན་པའོ། །

བདག་གཟི་བྱིན་བསྐྱེད་པའི་རིམ་པ།

[Full Size]

དེ་ནས་སློབ་དཔོན་ཕྱག་རྒྱ་ལྔ་དང་ལྡན་པས། བླ་མ་མཆོད་པ་ནས་བརྩམས་ཏེ། ཏིང་ངེ་འཛིན་རྫོགས་པ་དང༌། བདག་ཉིད་ཀྱི་དཀྱིལ་འཁོར་ལ། ཀུ་ཤས་བསང་གཏོར་བྱ། ཞལ་བཤལ་དང༌། ཨརྒྷཾ་དང༌། ཞབས་བསིལ་དང༌། མཆོད་པ་རྣམ་པ་ལྔས་མཆོད། ཕྱག་རྒྱའི་མཆོད་པ་དང༌། ཕྱག་བཙལ་བར་བྱའོ། །བདག་གཟི་བྱིན་བསྐྱེད་པའི་རིམ་པའོ། །

མེ་སྦར་བའི་རིམ་པ།

[Full Size]

དེ་ནས་རྫས་རྣམས་ཐམས་ཅད་ལ། བསང་གཏོར་ལན་གསུམ་བྱས་ནས་སུ། །ལས་དང་རྗེས་མཐུན་མེ་བླངས་ནས། །རླུང་ཡབ་ཀྱིས་ནི་སྦར་བར་བྱ། །སྤར་བའི་སྔགས་ནི་འདི་ཡིན་ཏེ། །ཨོཾ་ཛྭཱ་ལ་ཛྭཱ་ལ་ཧཱུཾ་ཕཊ། མང་བརྗོད་ལེགས་པར་སྦར་ནས་ནི། །ཐབ་ཁུང་བུད་ཤིང་བརྫངས་པ་ལ། །གཞུང་བཞིན་དུ་ནི་མེ་གཞུག་གོ །མར་གྱིས་གཟི་བྱིན་བསྐྱེད་བྱས་ལ། །དགེ་དང་མི་དགེའི་མཚན་བརྟག་གོ །མེ་སྤར་བའི་རིམ་པའོ། །

ཀུ་ཤ་དགྲམ་པའི་རིམ་པ།

[Full Size]

ཨོཾ་བཛྲ་ཨཱ་ཡུ་ཥེ་སྭཱ་ཧཱ། །འདིས་ནི་ཀུ་ཤ་བྱིན་བརླབས་ནས། །ཤར་དུ་རྩེ་བསྟན་དང་པོ་ཡིན། །ལྷོ་དང་ནུབ་བྱང་དེ་བཞིན་རྩེ། །བསྟན་ཏེ་བཀྲམ་པའི་རིམ་པའོ། །ཀུ་ཤ་དགྲམ་པའི་རིམ་པ་མདོར་བསྟན་པའོ། །སྔོན་དུ་བསྒོམ་པའི་རིམ་པའོ། །