ས་ཡོངས་སུ་བརྟག་པ།

[Full Size]

རི་ཕུག་དང་ནི་ཆུ་འགྲམ་དང༌། །དུར་ཁྲོད་སྐྱེ་བོས་དབེན་དང་ནགས། །འབབ་ཆུས་གང་བ་འབའ་ཞིག་ཏུ། །དངོས་གྲུབ་མྱུར་བར་གདོན་མི་ཟ། །གྲོང་ཁྱེར་ཁྱིམ་དང་ལྷས་དང་ནི། །གཙུག་ལག་ཁང་གི་ཁྱིམ་གནས་སུ། །ཡུན་རིངས་ཀྱིས་ནི་དངོས་གྲུབ་དག །འགྲུབ་ཅེས་དེ་ཉིད་རིག་པས་གསུངས། །གནས་ནི་རྣམ་པར་བསྟན་པའོ། །ཉི་མ་བཟང་ཞིང་སྐར་བཟང་ལ། །ཐོ་རངས་དུས་སུ་བློ་ལྡན་གྱིས། །ས་ཡི་མཚན་ཉིད་ཕ་རོལ་སོན། །ས་ནི་ཡང་དག་བརྟག་པར་བྱ། །ཙིན་ཙ་ཡུང་བ་བཏུ་བར་རམ། །ཀ་རཉྫ་དང་དོན་འགྲུབ་ཀོ་བི་ད་ར་དང༌། ཀརྞི་ཀས་ནི་མཉམ་བཀང་རིགས་ཀྱི་རི། །རུས་སྦལ་གླང་པོའི་རྒྱབ་འདྲའི་ས་ནི་སྤང་བར་བྱ། །ཤར་ཕྱོགས་པི་པི་ལིང་གི་ཤིང་དང་ནི། །ལྷོ་ཕྱོགས་བླག་ཤ་བ་ཡི་ཤིང་དང་ལྡན། །ནུབ་ཕྱོགས་ནྱ་གྲོ་དྷ་ཡི་ཤིང་དང་ལྡན། །བྱང་གི་ཕྱོགས་ན་བ་ཀུ་ལེ་དང་ལྡན། །མེ་ཡི་མཚམས་ནི་ཀ་ཀུ་བྷེ་དང་ལྡན། །པ་ལཱ་ཤ་ནི་བདེན་བྲལ་དག་དུ་བརྗོད། །རླུང་གི་ཕྱོགས་སུ་ཤལ་མ་ལི་ཤིང་སྟེ། །དབང་ལྡན་དུ་ནི་ཨུ་དུམྺཱ་རའོ། །མྱ་ངན་མེད་དང་ཀནད་སུ་ཁ་ནིམ་པ་གྲུབ་ཤིང༌། ཏ་མ་ལ་དང་མ་ཙོ་ཀུ་ཙ་ཨ་མྲ་བལ་པོ་སེའུ། ཆུ་དང་དབང་པོའི་ཕྱོགས་སུ་ཆུ་མིག་དང་ལྡན་ཤིས་པའི་ས། །གྲུ་བཞིའི་མཚན་ཉིད་ས་ནི་རྣམ་པར་བརྟག་པར་བྱ། །དེར་ནི་གདབ་གྲུ་བཞི་རྣམ་པར་བརྐོས་བྱས་ནས། །དེ་ལ་བརྐོས་པའི་ས་ཡིས་ཤིན་ཏུ་གང་བར་བྱ་བ་སྟེ། །གལ་ཏེ་དོང་སྟེ་ཁེངས་པར་མ་གྱུར་ཤིས་པ་མ་ཡིན་ཞིང༌། །ས་ལ་སོགས་པ་ལྷག་པར་གྱུར་ན་ཤིན་ཏུ་བསྔགས་པ་ཡིན་ནོ། །ས་ཡོངས་སུ་བརྟག་པའོ། །