མངོན་སྤྱོད་ཀྱི་སྦྱིན་སྲེག་གི་ཆོ་ག

[Full Size]

བསད་པ་དང་སྐམ་པ་དང་བསྐྲད་པ་དང་སྡང་བ་དང་རེངས་པ་དང་རྨོངས་པ་དང་ལུས་སྐེམས་པ་ལ་སོགས་པའི་ལས་བསྒྲུབ་པར་བྱ་བའི་ཕྱིར་མངོན་སྤྱོད་ཀྱི་སྦྱིན་སྲེག་བྱ་སྟེ། དེ་ལ་དཀྱིལ་འཁོར་གྱི་བྱང་ཕྱོགས་སུ་རྩུབ་ཅིང་སྐམ་པའི་ནམ་མཁའ་ལྟ་བུའི་ས་གཞི་ནག་པོ་ལ་སོར་ཉི་ཤུ་པ་ཟབས་སུ་སོར་བཅུ་པ་དབུས་སུ་ནི་རྩེ་གསུམ་པའི་རྩེ་མོར་སོར་བརྒྱད་པའི་རྡོ་རྗེས་བྱིན་གྱིས་བརླབས་པ། སྟེང་དུ་སོར་གསུམ་པོར་ལ་ཞེད་དང་དཔངས་སུ་ནི་སོར་གསུམ་པ་ཁ་ཁྱེར་གཞོལ་བས་བསྐོར་བའི་བི་དྷི་ཀའམ་མགོ་བྱང་དུ་བལྟས་པའི་ཟུར་གསུམ་ནག་པོའི་ཐབ་ཁུང་བྱས་ལ། ས་བདག་དང་དུར་ཁྲོད་ཀྱི་ཐལ་བ་དང་བོང་བུ་དང་རྔ་མོ་ལ་སོགས་པའི་ལྕི་བ་ཇི་སྙེད་པས་བྱུགས་ལ་དྲི་མི་ཞིམ་པ་དང༌། མེ་ཏོག་སྔོན་པོ་དང་དམར་པོ་དང་སོ་བའི་འབྲུ་ལ་སོགས་པས་དགྲམ་པར་བྱའོ། །དེ་ལ་སྔར་བརྗོད་པའི་སྣོད་དུ་དྲི་ངན་པའི་ཆུ་དང་ཀོ་ཏྲ་བ་དང༌། མི་དང་བ་ལང་དང་བོང་བུའི་ཆུ་མེ་ཏོག་དང་བཅས་པ་ལ་སྔགས་ཡི་གེ་ཕཊ་ཀྱི་མཐའ་ཡིས་སྔར་བཞིན་དུ་ཡོངས་སུ་བཟླས་ལ་གཡས་ཀྱི་ཆར་ཡོངས་སུ་གཞག་པར་བྱའོ། །ཡུངས་ཀར་སེར་པོ་དང་འབྲུ་མར་ཚན་དེ་དང་མེ་ཏོག་དང་ཚྭ་དང་སྐེ་ཚེ་དང༌། དུར་ཁྲོད་ཀྱི་ཐལ་བ་དང༌། རྐང་པའི་རྡུལ་དང་ནིམ་པའི་ལོ་མ་དང་བོང་བུ་དང་རྔ་མོ་ལ་སོགས་པའི་ལྕི་བ་དང་སྐྲ་དང་བརྡུངས་ལ། བྱ་རོག་ལ་སོགས་པ་རྣམས་ཀྱི་དང་བྱི་ལའི་གཅིན་རྟུག་དང༌། ཚེར་མ་དང༌། གསེག་མ་དང་རུས་པའི་ཕྱེ་མ་དང་ཁྲག་སོ་རུ་དང་ཤ་དང་དུག་དང་ཁྲག་དང་སྐེ་ཚེ་དང་སྨྱོ་བའི་འདབ་མའི་ཁུ་བས་སྦྱར་ལ། ལས་ཐམས་ཅད་པའི་སྔགས་ཀྱིས་བཟླས་པའི་ཆུ་དང༌། ཐལ་བ་དང་བསྣུན་པ་དང་སོལ་བ་དང་དུག་ལ་སོགས་པ་དང་བསྲེས་ལ་རྫས་འདི་རྣམས་ཀྱིས་དགྲའི་སྤྲུལ་པའི་གཟུགས་བརྙན་བྱས་ལ་བསྲེག་རྫས་བྱའོ། །མི་ཚིལ་གྱི་མར་མེ་ཡང་གཡོན་གྱི་

[Full Size]

ཆར་བཞག་གོ །བུད་ཤིང་ནི་ཚ་བ་དང་ཚེར་མ་ཅན་དང༌། ཁ་བ་དང༌། དྲིང་བ་དང་ཤིང་ལས་སྐྱེས་པའམ། ཡང་ན་དུར་གྱི་ཤིང་ངམ་བོང་བུ་དང་རྔ་མོའི་ལྕི་བ་སྐམ་པོའོ། །ནིམ་པ་དང་སེང་ལྡེང་དང་ཀོ་བྷི་དྷ་དང་བྷ་ལ་ཏ་ཀ་དང་མ་ད་ནའི་ཤིང་ལས་སྐྱེས་པའམ། ཚ་བ་དང་ཚེར་མ་དང་བཅས་པའམ། ཁ་བའི་ཤིང་ལས་སྐྱེས་པའམ་དུར་ཁྲོད་ཀྱི་ཤིང་ལས་སྐྱེས་པ་རྩ་བའི་ཆ་ནས་བཅད་ལ་ཡམ་ཤིང་བྱ་སྟེ། སོར་བཅུ་པ་ལ་མེ་ཏོག་དང་བཅས་པ་རྩེ་མོ་རྣོ་བ་འབྲུ་མར་ཚན་དེ་ལ་རྩེ་མོ་གཉིས་བསྙུག་གོ །དུར་ཁྲོད་ཀྱི་མི་རུས་ལས་སྐྱེས་པའམ། །དུར་ཁྲོད་ཀྱི་ཤིང་ལས་སྐྱེས་པའམ། རྡོ་ལས་བྱུང་བའམ། གདོལ་བའི་ཁྱིམ་ནས་བྱུང་བའི་མེ་ཡིས་སོ། །ཁ་དོག་ནག་པོ་སྐྲ་གྱེན་དུ་འབར་བ། མིག་དམར་བ་མཆེ་བ་གཙིགས་པ་གདོང་ཁྲོ་གཉེར་དང་བཅས་པ། ཁྲོ་ལ་འཇིགས་སུ་རུང་བ། གསུས་པ་འཕྱང་བ། བོང་ཐུང་བ་གོས་ནག་པོ་གྱོན་པ། མཆོད་ཕྱིར་ཐོགས་པ་དང་ལྡན་པ། འབར་ཞིང་ཁ་གདངས་པའི་མེ་ལྷའོ། །ཁྲོ་ཞིང་གོས་སྔོན་པོ་བགོས་པའི་ཐོར་ཚུགས་མེ་ཏོག་དང་ལྡན་པ། གོས་དང་ཁྲག་དང་ཆུས་བརླན་པར་བྱས་ཤིང་ཁེངས་པའི་མིག་ཅན། ཁྲོ་གཉེར་གྱི་གདོང་དང་ལྡན་པ་རྐང་པ་གཡོན་པས་གཡས་པ་མནན་པ། སོ་ཡིས་སོ་ལ་མནན་ཅིང་སྟན་དང་བྲལ་ཏེ་བསྒྲུབ་བྱའི་གཟུགས་བརྙན་གྱི་ལྟོ་བ་ལ་ཙོག་བུར་འདུག་པའམ། ཁྲོ་བོའི་སྐྱིལ་ཀྲུང་བཅིངས་ལ་ཁ་ལྷོ་རུ་བལྟ་ཞིང་སྙིང་རྗེའི་ཁྲོས་པས་དཀོན་མཆོག་གསུམ་ལ་གནོད་པའི་དགྲ་བཟློག་པར་བྱ་བའི་ཕྱིར་མར་ངོ་གང་ཡང་རུང་བ་ནས་བརྩམས་ཏེ། ཉིན་ཕྱེད་དམ་མཚན་ཕྱེད་ན་ཁྲོ་བ་ཉིད་ཀྱིས་ཚད་མར་བྱས་ཏེ། པུས་མོ་གཉིས་ལས་ཕྱི་རོལ་ཏུ་ལག་པ་བྱས་ལ་ལག་པ་གཡོས་པས་མཚོན་རྣོན་པོ་བླངས་ཏེ། བསྲེག་བྱ་ལ་བཅད་ཅིང་བཅད་ཅིང་ལག་པ་གཡོན་གྱིས་སྡིགས་མཛུབ་བྱས་ཏེ། ཕཊ་ཨ་མུ་ཀ་སྱ་ཨ་བྷི་ཙ་རཾ་ཀུ་རུ་ཕཊ་ཅེས་པའི་སྔགས་བརྗོད་ལ་བསྲེག་པར་བྱ་སྟེ། མངོན་སྤྱོད་ཀྱི་སྦྱིན་སྲེག་བྱ་སྟེ། སྡང་བ་ལ་ནི་ཁྱད་པར་དུ་བསྐུལ་བའི་མཚམས་སུ། ཨོཾ་ཛྲཱིཾ་སྭཱ་ཧཱ། ཧཱུྃ་ཨ་མུ་ཀཾ་བི་དེ་ཤ་ཡ། བསྐྲད་པ་ལ་ནི་ཨོཾ་ཁཾ་སྭཱ་ཧཱ། ཧཱུྃ་ཨ་མུ་ཀ་ཨུ་ཙྪ་ཏྲ་ན་ཡ་ཧཱུ༵། རེངས་པ་དང་རྨོངས་པ་དག་ལ་ནི་ཨོཾ་ཧཱུྃ་ཧཱུྃ་སྭཱ་ཧཱ།

[Full Size]

བཽ་ཥ་ཊ་ཨ་མུ་ཀཾ་སྟྭཾ་མྦྷ་ཡ་མོ་ཧ་ཡ་བཽ་ཥ་ཊ། བསད་པ་ལ་ནི་ཨོཾ་གྷུ་སྭཱ་ཧཱ། ཕཊ་ཨ་མུ་ཀཾ་མཱ་ར་ཡ་ཕཊ། དེ་ལྟར་གཞན་ལ་ཡང་ངོ༌། །སྦྱིན་སྲེག་གི་ལྷ་དགྱེས་ཏེ་རང་གི་སྙིང་གའི་ས་བོན་ལས་ཁྲོ་བོ་སྤྲོས་ཏེ་རྡོ་རྗེ་ཞགས་པ་དང་མེ་མདག་གི་ཆར་གྱིས་བསྒྲུབ་བྱ་ལ་བཀང་ཞིང་མཚོན་ཆ་དུ་མས་བཏབ་ཅིང་སྲོག་དང་བྲལ་ཏེ་བདེ་བར་གཤེགས་པ་ཉིད་ལ་སྦྱར་ནས་སྤྲོས་པ་རྣམས་བདག་ཉིད་ལ་བསྡུས་པར་བལྟའོ། །འདི་ནི་མངོན་སྤྱོད་ཀྱི་སྦྱིན་སྲེག་གི་ཆོ་གའོ། །