བདུན་པ། ཐབས་དང་ཤེས་རབ་གཉིས་སུ་མེད་པ་ལ་སེམས་འཛིན་པ་བསྒོམ་པའི་ཆོ་ག― DTG008_Page_0666 ―
[མ་དཔེ་གཟིགས་ན་འདིར་གནོན།]
དེ་ནས་སྔ་མ་བཞིན་བསམ་གཏན་གྱི་གནས་སུ་བདེ་བའི་སྟན་ལ་འདུག་སྟེ། བྱ་བ་བྱས་པའི་རྣལ་འབྱོར་པ་བདག་ཉིད་དཔལ་ཧེ་རུ་ཀར་མོས་པར་བྱའོ། །སྤྲུལ་པའི་འཁོར་ལོའི་དབུས་སུ་གནས་པའི་ཟླ་བའི་དཀྱིལ་འཁོར་ལ་ཡི་གེ་མཆོག་ལས་བྱུང་བ་བ་ཐག་ཕྲ་མོ་ལྟར་ཕྲ་བ། ལྷན་ཅིག་སྐྱེས་པ་ཤེས་རབ་ཀྱི་ངོ་བོ་འོད་ཟེར་གྱི་རི་མོ་འབར་བ་བཞིན་དུ་བསྒོམ་པར་བྱའོ། །དེ་ནས་དེ་རིན་པོ་ཆེ་པདྨ་རཱ་གའི་འོད་ཟེར་གྱི་རི་མོ་བཞིན་ཆགས་པ་དང་བཅས་པས། འདོད་ཅན་མ་བཞིན་ཆགས་པ་དང་བཅས་པ་འདོད་པ་ཅན་གྱི་ལུས་ལ་སྐྱེས་པ་ཆགས་པའི་རླུང་བཏང་བས་མཐོང་བ་རྗེས་སུ་ཆགས་པ་བལྟ་བར་བྱའོ། །དེ་ནས་བདེ་བའི་གནས་ན་གནས་པ་ཡང་ཐབས་ཆེན་པོའི་ངོ་བོ་སྙིང་པོ་ཆེན་པོའི་བདག་ཉིད་འདོད་པ་ཅན་དང་འདོད་པ་ཅན་མ་ཉེ་བར་གནས་པ་ལས་རྗེས་སུ་ཆགས་ཤིང་འདོད་པར་བལྟ་བར་བྱའོ། །ཆགས་མ་ཐག་ཏུ་ཉེ་བར་འགྲོ་བས་དེ་དང་རྗེས་སུ་མཐུན་པའི་ཡན་ལག་ཐམས་ཅད་དང༌། དེའི་ཡན་ལག་ཐམས་ཅད་འཁྱུད་པ་བཞིན་འདོད་པ་ཅན་དང་འདོད་པ་ཅན་མ་བལྟ་བར་བྱའོ། །དེའི་རྗེས་ལ་སྦུ་གུའི་འཁྲུལ་འཁོར་ཕྲ་མོ་ནས་འོ་མའི་རྒྱུན་བཞིན་དུ་རྒྱུ་བ་དང༌། རླུང་མེད་ཅིང་གཡོ་བ་མེད་པའི་སྤོས་ཀྱི་རེང་བུའི་དུ་བའི་རི་མོ་བཞིན་སྟེང་འོག་ཏུ་གནས་པ་དང༌། སྐར་མའི་བདག་པོའི་འོད་ཟེར་བཞིན་མུན་པའི་ཚོགས་མཐའ་ ― DTG009_Page_0667 ―
[མ་དཔེ་གཟིགས་ན་འདིར་གནོན།]
དག་འཇོམས་པར་བྱེད་པ། གདུང་པ་མ་ལུས་པ་རབ་ཏུ་ཞི་བར་བྱེད་ཅིང་ཚིམ་པར་བྱེད་པ། བདེ་བ་ཆེན་པོའི་ངོ་བོ་བདུད་རྩིའི་འོད་ཟེར་ཕྲེང་བ་སྤྲོས་པའི་བདག་ཉིད་དུ་བྱས་ཏེ། འཇིག་རྟེན་མཐའ་དག་སྣང་བའི་ངོ་བོ་མཛེས་པའི་དགའ་བའི་ཚོགས་ཅན། བླ་ན་མེད་པའི་མྱ་ངན་ལས་འདས་པའི་གྲོང་ཁྱེར་དུ་འཇུག་པའི་སྒོ་གླེགས་བྱེད་པ་གསལ་ཞིང་ཁྱད་པར་དུ་གྱུར་པའི་ལྡེ་ཀྱོག་གི་རྩེ་མོ་བཞིན་ཐབས་ཆེན་པོ་ཐམས་ཅད་ཀྱི་མཆོག་ལ་སྔགས་པས་ཡིད་གཏད་པས། ཇི་སྲིད་སེམས་བརྟན་པ་ཡིན་པ་དེ་སྲིད་བསྒོམ་པར་བྱའོ། །དེ་ལ་སེམས་བརྟན་པར་གྱུར་པས། སྣང་བ་ལ་སོགས་པ་མཐོང་བ་སྐྱེ་བར་འགྱུར་རོ། །དེ་མཐོང་ནས་ཏིང་ངེ་འཛིན་ཐམས་ཅད་དང༌། དངོས་གྲུབ་ཐམས་ཅད་དང༌། ཡོན་ཏན་ཐམས་ཅད་མངོན་དུ་བྱེད་པར་འགྱུར་རོ། །དེ་དག་ནི་དཔལ་ཧེ་རུ་ཀའི་མན་ངག་ལས་ཐབས་དང་ཤེས་རབ་གཉིས་སུ་མེད་པ་ལ་སེམས་འཛིན་པ་བསྒོམ་པའི་ཆོ་ག་སྟེ་བདུན་པའོ།། །། |
