དགུ་པ། ཡེ་ཤེས་དང་བཅས་པའི་རྩའི་འཁོར་ལོ་མངོན་པར་བྱང་ཆུབ་པ་བསྒོམ་པའི་ཆོ་ག― DTG008_Page_0668 ―
[མ་དཔེ་གཟིགས་ན་འདིར་གནོན།]
དེ་ནས་ཆོ་ག་བཞིན་དུ་སྔགས་པས་ཇི་སྐད་གསུངས་པའི་བསམ་གཏན་གྱི་གནས་སུ་སྟན་ལ་འདུག་སྟེ་ཚོགས་བསགས་པས་བདག་ཉིད་རྟེན་དང་བརྟེན་པའི་དཀྱིལ་འཁོར་དུ་མོས་པར་བྱའོ། །དེ་ལ་གང་བདག་གི་ལུས་འདི་ཉིད་དེའི་རྟེན་གྱི་དཀྱིལ་འཁོར་འབྱུང་བ་ཆེན་པོ་བཞིའི་ངོ་བོ་ཐར་པ་ཆེན་པོའི་གནས་ཀྱི་རང་བཞིན་གཞལ་ཡས་ཁང་ངོ༌། །གང་ཡེ་ཤེས་དང་བཅས་པའི་རྩའི་འཁོར་ལོ་དེ་བརྟེན་པའི་དཀྱིལ་འཁོར་དང་བཅས་པའི་དཀྱིལ་འཁོར་གྱི་བདག་པོ་སྟེ། དེ་ལ་གང་བདག་གི་ལུས་ལ་གནས་པ་རྟོག་པ་ཐམས་ཅད་སྤངས་པ། རྩ་བའི་འཁོར་ལོ་མཐའ་དག་ལ་ཁྱབ་པར་བྱེད་པ། ལྷན་ཅིག་སྐྱེས་པ་གཉིས་ཀྱི་བདག་ཉིད་བདེ་བ་ཆེན་པོའི་ངོ་བོ་ཡེ་ཤེས་ཆེན་པོ་སྟེ། བཅོམ་ལྡན་འདས་དཔལ་ཧེ་རུ་ཀའི་ཆོས་ཀྱི་སྐུའོ། །གང་ཡང་བདག་ལ་བྱང་ཆུབ་སེམས་འབབ་པ་འདི་རྡོ་རྗེ་མ་ལ་སོགས་པ་རྣལ་འབྱོར་མ་བཅོ་ལྔའི་རང་བཞིན། སྤྱི་གཙུག་བོ་ལླ་གོ་རི་ལ་སོགས་པ་གནས་ལ་རྩ་སུམ་ཅུ་རྩ་གཉིས་པོ་དེ་ནི་ལོངས་སྤྱོད་རྫོགས་པའི་སྐུའོ། །གང་འདི་སེན་མོ་དང་སོ་ནས་ཁམས་དང་ལྟེ་བའི་ཁམས་འབབ་པ་དེ་སྤྲུལ་པའི་སྐུའོ། །གང་ཇི་སྐད་གསུངས་པ་དེ་རྣམས་ཀྱི་རྟེན་དང་བརྟེན་པའི་དཀྱིལ་འཁོར་གྱི་ཆོས་ཉིད་དེ་བཞིན་ཉིད་གཉིས་ཀྱིས་སྟོང་པ་ཉིད་དོན་དམ་པ་དེ་བདེ་བ་ཆེན་པོའི་སྐུ་ཞེས་བྱ་བར་མོས་པར་བྱའོ། །སེམས་བརྟན་པར་བྱེད་ཅིང་སེམས་བརྟན་པར་གྱུར་པས་ཡང་དག་པ་ཇི་ལྟ་བ་བཞིན་རབ་ཏུ་ཤེས་པར་འགྱུར་རོ། །ཡང་དག་པ་ཇི་ལྟ་བ་བཞིན་ཡོངས་སུ་ཤེས་པས་ ― DTG009_Page_0669 ―
[མ་དཔེ་གཟིགས་ན་འདིར་གནོན།]
སྐུ་བཞི་མྱུར་དུ་ཐོབ་པས་དཔལ་ཧེ་རུ་ཀ་འབྱུང་བར་འགྱུར་རོ། །དེ་དག་ནི་དཔལ་ཧེ་རུ་ཀའི་མན་ངག་ལས། ཡེ་ཤེས་དང་བཅས་པའི་རྩའི་འཁོར་ལོ་མངོན་པར་བྱང་ཆུབ་པ་བསྒོམ་པའི་ཆོ་ག་སྟེ་དགུ་པའོ།། །། |
