བཅུ་དྲུག་པ། ཐབས་དང་ཤེས་རབ་ལས་བྱུང་བའི་ཡེ་ཤེས་ལ་སོགས་པ་བསྒོམ་པའི་ཆོ་ག

[Full Size]

དེ་ནས་རྗེས་སུ་མཐུན་པའི་བསམ་གཏན་གྱི་གནས་སུ་བདེ་བའི་སྟན་ལ་འདུག་སྟེ་རྗེས་སུ་མཐུན་པར་བྱེད་པས་གནས་པ་ཡིད་གཡེང་བ་མེད་པའི་སྔགས་པས། མགྲིན་པའི་ཕྱག་རྒྱའི་རྩའི་སྒོའི་མཚོ་སྐྱེས་ལ། དཔུང་པའི་ཐབས་ཀྱིས་ལག་པའི་མཐེ་བོའི་ཡལ་ག་རྡོ་རྗེ་རྩེ་མོས་མན་ངག་ཇི་ལྟ་བ་བཞིན་བརྟེན་པས་དོན་དམ་པ་ཡིད་ལ་བྱས་ཏེ་གནས་པར་བྱའོ། །དེ་ནས་རྣལ་འབྱོར་གྱི་སྟོབས་ལས་བྱུང་བ་བདེ་བ་ཆེན་པོའི་ངོ་བོ། །ཆོས་ཀྱི་སྐུའི་བདག་ཉིད་མཚན་མ་མེད་པ། གཞི་མེད་པ་སྤྲོས་པ་མེད་པ། གསལ་ཞིང་རོ་གཅིག་པ་མངོན་དུ་བྱས་ནས་ཕྱོགས་ཐམས་ཅད་དང་ནམ་མཁའི་ངོས་དང་དངོས་པོ་ཐམས་ཅད་དུ་སྤྲོ་སྟེ། དེའི་བདག་ཉིད་དུའོ། །ལྷག་མ་ནི་སྔ་མ་བཞིན་ནོ། །གལ་ཏེ་ཡང་གང་གི་ཚེ་རྣལ་འབྱོར་པ་དཀྱིལ་འཁོར་གྱི་འཁོར་ལོ་ལ་སོགས་པའམ། འཇིག་རྟེན་གྱི་ཁམས་ལ་སོགས་པ་མངོན་སུམ་བཞིན་དུ་བྱེད་པར་འདོད་པ་དེའི་ཚེ་དེ་ལ་དམིགས་ནས་ཡིད་མཉམ་པར་གཞག་པས་གནས་ན། འདིས་ངེས་པར་མངོན་སུམ་ལྟར་དེ་མཐོང་ངོ༌། ད་ལྟ་དེ་ལྟར་བྱས་ཏེ་གནས་ན་བཏུང་བར་འདོད་པས་བཏུང་བའོ། །བཟའ་བར་འདོད་པས་བཟའ་བའོ། །མང་དུ་སྨྲས་པས་ཅི་ཞིག་བྱ། །མངོན་སུམ་དུ་གང་འདོད་པ་དེ་བྱེད་དོ། །དེ་དག་ནི་དཔལ་ཧེ་རུ་ཀའི་མན་ངག་ལས། ཐབས་དང་ཤེས་རབ་ལས་བྱུང་བའི་ཡེ་ཤེས་ལ་སོགས་པ་བསྒོམ་པའི་ཆོ་ག་སྟེ་བཅུ་དྲུག་པའོ།། །།