དཔལ་ཀྱེ་རྡོ་རྗེ་ལས་སྦྱིན་སྲེག་གི་ཆོ་ག
བོ་དྷི་གརྦྷས་མཛད།
སྔོན་དུ་བསྒོམ་པའི་རིམ་པ།
མེ་ཐབ་ཀྱི་རིམ་པ།
རྒྱ་གར་སྐད་དུ། ཤྲཱི་ཧེ་བཛྲ་ཧོ་མ་བི་དྷི། བོད་སྐད་དུ། དཔལ་ཀྱེ་རྡོ་རྗེ་ལས་སྦྱིན་སྲེག་གི་ཆོ་ག །ཀྱེ་རྡོ་རྗེ་ལ་ཕྱག་འཚལ་ལོ། །དཔལ་ལྡན་མཁའ་འགྲོ་འགྲོ་བའི་མགོན། །ལྷ་མོ་དང་བཅས་འཁོར་ལོ་ལ། །ཕྱག་འཚལ་ནས་ནི་སྦྱིན་སྲེག་གི །རིམ་པ་ཡང་དག་བཤད་པར་བྱ། །རྒྱལ་བས་བྱ་བའི་རྒྱུད་ལས་ནི། །ལས་ནི་རྣམ་པ་བཞིར་གསུངས་པ། ཞི་དང་རྒྱས་དང་དབང་མངོན་སྤྱོད། །དེ་ཡི་རིམ་པ་མ་ནོར་བར། །མདོར་བསྡུས་རིམ་པ་བཤད་པར་བྱ། །ཞལ་བསྲོ་ཆོ་ག་བྱ་བ་ལ། །རྒྱས་པའི་ལས་ནི་མཆོག་ཡིན་ཏེ། རྒྱས་ནས་བརྩམས་ཏེ་ལས་རྣམས་ཀྱི། །རིམ་པ་རབ་ཏུ་བཤད་པར་བྱ། །མེ་ཐབ་རིམ་པ་བཤད་བྱ་སྟེ། རྒྱས་པ་པ་ལ་ནི་གྲུ་བཞི་པ། །ཞི་བ་ལ་ནི་ཟླུམ་པོར་འདོད། །དབང་ལ་གཞུ་ཡི་དབྱིབས་ཅན་ཏེ། །གསོད་པ་ལ་ནི་གྲུ་གསུམ་ཤིས། །ཡང་ན་ལས་ཀུན་བྱེད་པའི་མཆོག །ཁྲུ་གང་དང་ནི་ཁྲུ་དོ་ཉིད། །རྒྱས་པའི་སྟེང་དང་འོག་ཏུ་འདོད། །ཁྲུ་གང་དང་ནི་དེ་ཡི་ཕྱེད། །ཞི་བའི་སྟེང་དང་འོག་ཏུ་འདོད། །གཞུ་ལ་བཞི་བཅུ་ཉི་ཤུ་ཁ། །ཟབས་སུ་སོར་བཅུ་དབང་གི་ཡིན། །ངོས་གསུམ་སོར་ནི་ཉི་ཤུ་ལ། །ཟབས་སུ་དེ་ཕྱེད་གསོད་ལ་འདོད། །རྒྱས་པ་ཁ་དོག་སེར་པོ་སྟེ། །ཞི་བ་དཀར་པོར་ཤེས་པར་བྱ། །དབང་ལ་དམར་པོར་རབ་ཏུ་གྲགས། །དེ་བཞིན་གསོད་ལ་ནག་པོར་འདོད།།
དགུག་པའི་ལས་ནི་དབང་དུ་བྱ། །མངོན་སྤྱོད་དུ་ནི་ཞེ་སྡང་སོགས། །རྒྱས་པ་དབུས་སུ་རིན་ཆེན་ཏེ། །ཤར་དུ་རྡོ་རྗེ་ལྷོར་འཁོར་ལོ། །ནུབ་ཏུ་པདྨ་རལ་གྲི་བྱང༌། །སོར་བཞི་འགྱེད་པར་བྱས་པའི་ཕྱིར། །ཁ་ཁྱེར་སོར་བཞི་རྡོ་རྗེས་བསྐོར། །ཕྱི་རོལ་སོར་བཞི་པོར་ལ་ཡང༌། །པདྨའི་ཕྲེང་བ་གཏང་བར་བྱ། །ཞི་བའི་ཕྱག་མཚན་རིམ་པ་ཡང༌། །དབུས་སུ་འཁོར་ལོ་ཤར་རྡོ་རྗེ། །ལྷོ་རུ་རིན་ཆེན་ནུབ་པདྨ། །བྱང་དུ་རལ་གྲི་ཤེས་པར་བྱ། །ཙནྡན་དཀར་པོས་བྱུགས་པའོ། །དབང་གི་ཕྱག་མཚན་རིམ་བཤད་བྱ། །ཁ་ཁྱེར་སྤྱི་དང་མཐུན་པ་སྟེ། །དབུས་ལ་རྡོ་རྗེ་རབ་དང༌། དབུས་སུ་པདྨ་འདབ་བརྒྱད་བྱ། །ཕྱི་མ་སྤྱིར་མཐུན་དམར་པོས་བྱུག །མངོན་སྤྱོད་མཚན་ཉིད་བཤད་བྱ་སྟེ། །ཁ་ཁྱེར་སོར་གསུམ་རྡོ་རྗེས་བསྐོར། །དབུས་སུ་རལ་གྲི་ཕྱི་མ་ནི། །བླ་མའི་ཞལ་ཤེས་ནག་པོས་བྱུག །རྒྱས་པ་ཤར་དུ་བལྟས་ལ་བྱ། ཞི་བ་ལ་ནི་བྱང་དུ་འདོད། དབང་དང་བསྐྲད་པ་ནུབ་ཏུ་འདོད། །དྲག་པོའི་ལས་ལ་ལྷོ་རུའོ། །རྒྱས་པ་ལ་ནི་ནང་པར་བྱ། །ཞི་བ་ཉི་མ་ཕྱེད་ནའོ། །དབང་ནི་ཉི་ནུབ་ནམ་ཕྱེད་དྲག །ཅེས་གང་གསུངས་པ་ནི་མེ་ཐབ་ཀྱི་རིམ་པའོ། །
མཆོད་རྫས་སྲེག་རྫས་ཀྱི་རིམ་པ།
མཆོད་རྫས་སྲེག་རྫས་རིམ་ཞེས་བྱ། །སྔགས་མཁན་གཡོན་དུ་དྲི་མེ་ཏོག །དུང་ཕོར་བཀང་བ་གཞག་པར་བྱ། །ཡོན་ཆབ་སྣོད་ནི་གསེར་ལ་སོགས། །ཆུ་དང་མེ་ཏོག་གིས་བཀད་གཞག །མེད་ན་ས་ལས་བྱས་པའང་རུང༌། །ཤིང་ནི་མི་ཤེས་སྤང་བར་བྱ། །དགང་གཟར་བླུགས་གཟར་མར་མདུན་དུ། །གཡས་སུ་དྲིས་བཀང་སྣོད་དུ་ནི། །ཀུ་ཤ་བཅུག་ལ་གཞག་པར་བྱ། །ལས་ཀུན་བྱེད་པའི་བུམ་པ་ཡང༌། །ཚུལ་བཞིན་དུ་ནི་གཞག་པར་བྱ། །འབྱུང་པོའི་གཏོར་མ་མཆོག་ཀྱང་གཞག །ཏིལ་སོགས་སྲེག་རྫས་རིམ་བཞིན་གཞག །རྒྱས་ལ་ཞོ་དང་ཞི་ལ་ཏིལ། །དབང་དང་དགུག་ལ་ཨུཏྤལ་དམར། །དྲག་པོ་ལ་སོགས་ཚེར་ཅན་ཤིང༌། །ཕྱི་མ་འོག་ནས་བཤད་པ་བཞིན། །ཐོག་མར་མར་དང་ཐ་མར་མར། །མཆོད་རྫས་དང་སྲེག་རྫས་ཀྱི་རིམ་པའོ། །
རྫས་བྱིན་གྱིས་བརླབས་པའི་རིམ་པ།
དེ་རྣམས་བྱིན་གྱིས་བརླབ་པ་ནི། །རྡོ་རྗེས་རག་པ་དེ་ཉིད་ནི། །བརྗོད་པས་དྲི་མ་དག་ནས་ནི། །ཉི་མའི་ཤེལ་ལྟར་དག་པར་བསམ། །རྫས་བྱིན་གྱིས་བརླབ་པའི་རིམ་པའོ། །
ཡམ་ཤིང་གི་རིམ་པ།
རློན་ཤིང་འདབ་བཅས་རྩེ་ལས་བྱུང༌། །སྲིད་དུ་མཛུབ་གང་སྦོམ་ཆག་གང༌། །སྦྲང་རྩི་དང་ནི་མར་གྱིས་བྱུག །ཙནྡན་དཀར་པོའི་ཆུ་ལ་སྤངས། །རྩེ་གཅིག་ཞི་བའི་ལས་ལ་དབུལ། །སྲིད་དུ་ཁྲུ་གང་སྦོམས་སུ་ནི། །ཆག་གང་པ་ནི་རབ་ཏུ་བཟང༌། ཡལ་ག་དབུས་ཀྱི་ཆ་ལས་བྱུང༌། །ཞོ་དང་མར་དང་སེར་པོའི་དྲིས། །སྤངས་པ་རྩེ་གཅིག་རྒྱས་པ་ལའོ། །སོར་ལྔ་འདབ་བཅས་སྦོམ་ཆག་གང༌། །ཡུངས་མར་བདུད་རྩི་ལྔ་ལ་སོགས། །སྤངས་པ་དབང་གི་ལས་ལ་ཤིས། །སྲིད་དུ་སོར་བཞི་ཚེར་མ་ཅན། །མི་རུས་དུར་ཁྲོད་ཐལ་ཆེན་དང༌། །དུག་ལ་སོགས་པའི་ཆུས་སྤངས་པའོ། །མངོན་སྤྱོད་དག་ལ་དབུལ་བར་རིགས། །ཡམ་ཤིང་གི་རིམ་པའོ། །
བུད་ཤིང་གི་རིམ་པ།
དེ་ནས་བུད་ཤིང་རིམ་པ་བཤད། །པཱ་ལ་ཤ་དང་ནྱ་གྲོ་སོགས། །ལས་ཀྱི་རྗེས་སུ་མཐུན་པར་བྱ། །ཡང་ན་འོ་མ་ཅན་ཤིང་མཆོག །དེ་ཡང་ལས་དང་རྗེས་མཐུན་བྱ། །བུད་ཤིང་རིམ་པ་མདོར་བསྟན་པའོ། །
བདག་གཟི་བྱིན་བསྐྱེད་པའི་རིམ་པ།
དེ་ནས་སློབ་དཔོན་ཕྱག་རྒྱ་ལྔ་དང་ལྡན་པས། བླ་མ་མཆོད་པ་ནས་བརྩམས་ཏེ། ཏིང་ངེ་འཛིན་རྫོགས་པ་དང༌། བདག་ཉིད་ཀྱི་དཀྱིལ་འཁོར་ལ། ཀུ་ཤས་བསང་གཏོར་བྱ། ཞལ་བཤལ་དང༌། ཨརྒྷཾ་དང༌། ཞབས་བསིལ་དང༌། མཆོད་པ་རྣམ་པ་ལྔས་མཆོད། ཕྱག་རྒྱའི་མཆོད་པ་དང༌། ཕྱག་བཙལ་བར་བྱའོ། །བདག་གཟི་བྱིན་བསྐྱེད་པའི་རིམ་པའོ། །
མེ་སྦར་བའི་རིམ་པ།
དེ་ནས་རྫས་རྣམས་ཐམས་ཅད་ལ། བསང་གཏོར་ལན་གསུམ་བྱས་ནས་སུ། །ལས་དང་རྗེས་མཐུན་མེ་བླངས་ནས། །རླུང་ཡབ་ཀྱིས་ནི་སྦར་བར་བྱ། །སྤར་བའི་སྔགས་ནི་འདི་ཡིན་ཏེ། །ཨོཾ་ཛྭཱ་ལ་ཛྭཱ་ལ་ཧཱུཾ་ཕཊ། མང་བརྗོད་ལེགས་པར་སྦར་ནས་ནི། །ཐབ་ཁུང་བུད་ཤིང་བརྫངས་པ་ལ། །གཞུང་བཞིན་དུ་ནི་མེ་གཞུག་གོ །མར་གྱིས་གཟི་བྱིན་བསྐྱེད་བྱས་ལ། །དགེ་དང་མི་དགེའི་མཚན་བརྟག་གོ །མེ་སྤར་བའི་རིམ་པའོ། །
ཀུ་ཤ་དགྲམ་པའི་རིམ་པ།
ཨོཾ་བཛྲ་ཨཱ་ཡུ་ཥེ་སྭཱ་ཧཱ། །འདིས་ནི་ཀུ་ཤ་བྱིན་བརླབས་ནས། །ཤར་དུ་རྩེ་བསྟན་དང་པོ་ཡིན། །ལྷོ་དང་ནུབ་བྱང་དེ་བཞིན་རྩེ། །བསྟན་ཏེ་བཀྲམ་པའི་རིམ་པའོ། །ཀུ་ཤ་དགྲམ་པའི་རིམ་པ་མདོར་བསྟན་པའོ། །སྔོན་དུ་བསྒོམ་པའི་རིམ་པའོ། །
དངོས་གཞིའི་རིམ་པ།
དམ་ཚིག་སེམས་དཔའི་མེ་ལྷའི་རིམ་པ།
ནམ་མཁའི་ཁམས་སུ་བྷ་ག་བསམ། །དབུས་སུ་ཧཱུཾ་བསྐྱེད་མཆོད་རྟེན་བསམ། །ལས་དང་རྗེས་སུ་མཐུན་པ་ཡི། །དེ་ཡི་དབུས་སུ་ཐབ་ཁུང་བསམ། །དབུས་སུ་བཾ་བསྐྱེད་པདྨ་ལ། །དེ་དབུས་ཉི་མའི་དཀྱིལ་འཁོར་བསམ། །དེ་སྟེང་མངོན་པར་བྱང་ཆུབ་པས། །རྡོ་རྗེ་སེམས་དཔའ་ཡབ་ཡུམ་བསྒོམ། །འདོད་ཆགས་སྟོབས་ཀྱིས་འོད་དུ་ཞུ། །འོད་ལས་ཧཱུཾ་དང་རཾ་དུ་གྱུར། །དེ་གྱུར་མ་ལྷ་ཡབ་ཡུམ་བསམ། །ལས་དང་རྗེས་སུ་མཐུན་པའི་མདོག །ཞལ་གསུམ་པ་ལ་ཕྱག་དྲུག་པ། །རང་དང་འདྲ་བའི་ཤེས་རབ་འཁྱུད། །གཡས་ན་གུནྡྷེ་མཆོག་སྦྱིན་བསྣམས། །གཡོན་ན་སེའུ་འབྲུ་བགྲང་ཕྲེང་མཐའ། །གསུས་འདིར་རལ་པའི་དབུ་རྒྱན་ཅན། །རིགས་བདག་ཅོད་པན་མཆོད་ཕྱིར་ཐོགས། །དེ་ཡི་ཐུགས་ཀར་བསམ་པ་ནི། །སྣ་ཚོགས་པད་སྟེང་གྲུ་གསུམ་མེ། །དེ་ཡི་སྟེང་དུ་ཧཱུཾ་དང་ཛཿ། །ལྕེ་ལ་ཡི་གེ་རཾ་བསམ་མོ། །བསང་གཏོར་ནས་བརྩམས་ཕྱག་འཚལ་སོགས། །དེ་ལ་མཆོད་པ་དབུལ་བར་བྱའོ། །དམ་ཚིག་སེམས་དཔའི་མེ་ལྷའི་རིམ་པའོ། །
དམ་ཚིག་གི་མེ་ལྷ་ལ་ཡེ་ཤེས་ཀྱི་མེ་ལྷ་གཞུག་པའི་རིམ་པ།
ཨོཾ་ཨགྣ་ཡེ་མ་ཧཱ་ཏེ་ཛ། སརྦ་ཀརྨཱ་བྲ་སཱ་དྷ་ཀ །ཀ་རུ་ཎི་ཀྲྀ་ཏ་སརྦ། ཨཱསྨིན་སནྣི་ཧི་ཏྭཱ་བྷ་བ་ཡེ་ཤེས་སེམས་དཔའ་དགུག་པའོ། །རང་གི་མདུན་དུ་བལྟས་ནས་ནི། བསང་གཏོར་ནས་བརྩམས་ཕྱག་འཚལ་མཐའ། །ཕྱག་ནས་རབ་ཏུ་བསྟིམ་པར་བྱ། །སྔགས་འདིས་དགྱེས་པར་བཞུགས་སུ་གསོལ། །སརྦཱ་ནྱཻ་པར་ཐན་ཙ་སི་ཏི་ཧཾ་ག་ཙ་ཧ་བྱ་བ་ཀ །ཨ་ཀ་མུ་ཡེ་ཐ་ཀ་ལེ། སརྦ་སིདྡྷི་ཀུ་རུ་ཤ་མེ་མེ་ཛཿཧཱུཾ་བཾ་ཧོཿ། །བཀའ་ལུང་གིས་གར་དང་ལྡན་པར་བསྐུལ་བར་བྱ། གཽ་རཱི་ལྕགས་ཀྱུས་བཀུག་ནས་ནི། ཙཽ་རཱི་མ་ཡིས་ཞགས་པས་གཞུག །ལྕགས་སྒྲོག་གིས་བསྡམས་བེ་ཏཱ་ལཱི། །དྲིལ་བུས་མཉེས་བྱེད་གྷསྨ་རཱི། །གཉིས་སུ་མེད་པར་བསྟིམས་ནས་ནི། །བསང་གཏོར་ནས་བརྩམས་མཆོད་པ་དབུལ། །དམ་ཚིག་གི་མེ་ལྷ་ལ་ཡེ་ཤེས་ཀྱི་མེ་ལྷ་གཞུག་པའི་རིམ་པའོ། །
མེ་ལྷ་མཆོད་པའི་རིམ་པ།
དེ་ནས་ལས་དང་རྗེས་སུ་མཐུན་པའི་སྒྲུབ་པ་པོས་རྒྱུད་རྣམས་བསྒོམས་ནས་ནི། གཟར་བུ་གཉིས་ཀྱི་ནང་དུ་ནི། ཡི་དམ་ལྷ་ཡི་ས་བོན་བསམ། །གྲུ་མོ་གཉིས་སྤྲད་གཟར་བུ་བདུན། །སོ་སོའི་ལས་དང་མཐུན་པར་དབུལ། །རྒྱས་དང་ཞི་བ་པུཥྚིཾ་དང༌། །ཤཱནྟིཾ་ཀུ་རུ་ཞེས་པས་དབུལ། །དབང་དྲག་གཉིས་པ་
བ་ཤཾ་དང༌། །ཤ་ཏྲཱུཾ་མ་རས་དབུལ་བར་བྱ། །དེ་ནི་དབུལ་བའི་རིམ་པ་བཤད་པར་བྱ་སྟེ། །ཨོཾ་ན་མཿ་ས་མནྟ་བུདྡྷཱ་ནཱཾ། ཨགྣ་ཡེ་སྭཱ་ཧཱ། པུ་ཎ་ཧི་མ་ནྟ། ཨགྣ་ཡེ་པུཥྚིཾ་ཀུ་རུ་སྭཱ་ཧཱ། ཞེས་པས་སོ། །གཞན་ནི་བླུགས་གཟར་གྱིས་དབུལ་བར་བྱའོ། །ཨོཾ་སརྦ་སཾ་བ་དེ་སྭཱ་ཧཱ། ཞོ་ཟན་གྱིའོ། །ཨོཾ་སརྦ་པཱ་པིཾ་ད་ཧ་ན་བཛྲ་ཡ་ཨ་མུ་ཀཾ་བྱ་སརྦ་པཱ་བཾ་ད་ཧ་ན་སྭཱ་ཧཱ། ཏིལ་གྱིའོ། །ཨོཾ་བཛྲ་ཨཱ་ཡུ་ཥེ་སྭཱ་ཧཱ། མེ་གྲུགས་པའི་དཱུར་བའི་འོ། །ཨོཾ་བཛྲཱ་ཡུ་ཥེ་སྭཱ་ཧཱ། འབྲས་མ་ཆག་པའི་འོ། །ཨོཾ་བཛྲཱ་པྲ་ཏི་ཧ་ཏ་བཛྲ་ཡེ་སྭཱ་ཧཱ། ཀུ་ཤའིའོ། ཨོཾ་བཛྲ་བ་ཛི་ཡེ་སྭཱ་ཧཱ། ལག་པན་གྱིའོ། །ཨོཾ་བཛྲ་མ་ཧཱ་བེ་ག་ཡེ་སྭཱ་ཧཱ། ནས་ཀྱིའོ། །ཨོཾ་མ་ཧཱ་བ་ལཱ་ཡ་སྭཱ་ཧཱ། སྲན་ཆེན་གྱིའོ། །ཨོཾ་བཛྲ་གྷསྨ་རི་སྭཱ་ཧཱ། གྲོའིའོ། །ཡམ་ཤིང་དབུལ་བའི་རིམ་པ་ནི། ཨོཾ་ཡ་ཛྙཱ་ཡ་སྭཱ་ཧཱ། ཨུ་དུམྺཱ་རའི་འོ། །ཨོཾ་བོ་དྷི་བྲྀ་ཀྵཱ་ཡ་སྭཱ་ཧཱ། བྱང་ཆུབ་ཀྱི་ཤིང་གིའོ། །ཨོཾ་བཛྲ་ན་ད་ཐཱ་ཡ་སྭཱ་ཧཱ། ནྱ་གྲོ་དྷའི་འོ། །ཨོཾ་བཛྲ་ཧ་ས་ཀ་རཱ་ཡ་སྭཱ་ཧཱ། ཨ་མྲའི་འོ། །དེ་ནས་ཨགྣ་ཡེ་པུཥྚིཾ་ཀུ་རུ་ཞེས་པས་མར་དགང་གཟར་ཁེངས་པ་སྟོང་ཡན་ཆད་དབུལ་བར་བྱའོ། །དེ་ནས་བསང་གཏོར་ནས་བརྩམས་ཏེ། མཆོད་ནས་མེ་ལྷ་ལ་བསྟོད་པ་བྱ། རྡོ་རྗེ་དྲིལ་འཛིན་དཔའ་བོ་ཡིས། །སྲིད་པའི་རང་བཞིན་ཚིགས་བཅད་བརྗོད། དེ་ཡན་ཆད་ནི་མེ་ལྷ་མཆོད་པའི་རིམ་པའོ། །
ལྷ་ཡི་སྦྱིན་སྲེག་གི་རིམ་པ།
དེ་ནས་ལས་ཀུན་བྱེད་པའི་ཆུས། །མེ་ལྷ་བསང་གཏོར་ཐུགས་ཀ་རུ། །དཀྱིལ་འཁོར་འཁོར་ལོ་བསང་བར་བྱ། །ལས་དང་རྗེས་མཐུན་མེ་ཞལ་ཐབ། །བསངས་ནས་དེ་རུ་དབུལ་བར་བྱ། །ཛཿཧཱུཾ་བཾ་ཧོཿའི་བཀའ་ལུང་འདིས། །དཀྱིལ་འཁོར་ལྷ་ནི་དཀྱིལ་འཁོར་བསྟིམ། །བསང་གཏོར་ནས་བརྩམས་མཆོད་པ་དབུལ། །མཆོད་བསྟོད་བདུད་རྩི་མཐར་ཐུག་བྱ། །དེ་ནས་མར་གཟར་ཉི་ཤུ་རྩ་གཅིག་ཡན་ཆད་དབུལ་བར་བྱའོ། །དེ་ནས་ཞོ་ལ་སོགས་པའི་རྫས་རྣམས་ཕུལ་ལ། མར་གྱི་སྦྱིན་སྲེག་བརྒྱའམ་སྟོང་ལ་བརྒྱད་ཀྱིས་བཏགས་པ་དབུལ་བར་བྱའོ། །བསང་གཏོར་ནས་བརྩམས་མར་གྱིས་མཆོད། །བསྟོད་དེ་ཕྱག་འཚལ་གཤེགས་སུ་གསོལ། །རྡོ་རྗེ་དྲིལ་འཛིན་དཔའ་བོ་ཡིས། །རང་བཞིན་དག་གི་ཚིག་བཅད་བརྗོད། །
ཡི་གེ་བརྒྱ་བས་བཟོད་པར་གསོལ། །མཐའ་རུ་མུཿ་བཏགས་སྙིང་གར་བསྡུ། །ལྷ་ཡི་སྦྱིན་སྲེག་གི་རིམ་པའོ། །
མེ་ལྷའི་མཆོད་པའི་རིམ་པ།
དེ་ནས་བླུགས་གཟར་འབའ་ཞིག་གིས། །ལྷག་ནས་མེ་ལྷའི་མཆོད་པར་བྱ། །ཨོཾ་ཨགྣ་ཡེ་སྭཱ་ཧཱ། །ཞེས་པས་སོ། །དེ་ནས་རྫས་ཀུན་ཕུལ་བ་དང༌། དགང་གཟར་མར་གྱིས་བཀང་ནས་ནི། །དེ་ནས་སློབ་མས་མེ་ཏོག་བོར། །ལས་དང་མཐུན་པའི་ལེགས་པར་བརྗོད། །ཨོཾ་ཨགྣ་ཡེ་སྭཱ་ཧཱ། ཞེས་པས་དབུལ། །ཤནྟིཾ་ཀུ་རུ་ཞི་བ་ལ། རྒྱས་པ་པུཥྚིཾ་པ་ཤཾ་དབང༌། །ཞི་བའི་སྦྱིན་སྲེག་བྱེད་པའི་དུས་སུ་རྣལ་འབྱོར་པས་བྱ་བའི་རིམ་པ་ནི་འདི་དག་ཡིན་ཏེ། དང་པོར་ཐབ་ཁུང་གི་བྱེ་བྲག་བྱ་བ་དང༌། ཚད་དང་ཁ་དོག་དང༌། མཚན་མ་བྲི་བ་དང་དུས་དང་ཕྱོགས་དང༌། རྫས་ཀྱི་མཚན་ཉིད་དང༌། རྫས་བྱིན་གྱིས་བརླབ་པ་དང༌། རྣལ་འབྱོར་བསྐྱེད་པ་དང༌། ཡམ་ཤིང་གི་མཚན་ཉིད་དང༌། བུད་ཤིང་གི་མཚན་ཉིད་དང༌། མེ་སྤར་བའི་མཚན་ཉིད་དང༌། ཀུ་ཤ་དགྲམ་པ་དང༌། ཐབ་ཁུང་བྱིན་གྱིས་བརླབ་པ་དང༌། དེར་དམ་ཚིག་གི་མེ་ལྷ་བསྐྱེད་པ་དང༌། དེ་ལ་ཡེ་ཤེས་ཀྱི་མེ་ལྷ་སྤྱན་དྲང་བ་དང༌། བསང་གཏོར་དང༌། ཡང་དེར་བདག་ཉིད་ཀྱི་ལྷའི་འཁོར་ལོ་བསྐྱེད་པ་དང༌། དེ་ལ་ཡེ་ཤེས་ཀྱི་འཁོར་ལོ་དགུག་གཞུག་བྱ་བ་དང༌། དེར་དགང་བླུགས་ལ་སོགས་པ་དབུལ་བ་དང༌། མཆོད་པ་ལ་སོགས་པ་ཕུལ་ལ། ཡེ་ཤེས་ཀྱི་ལྷ་གཤེགས་སུ་གསོལ་ཏེ། དམ་ཚིག་གི་འཁོར་ལོ་བསྡུ་བ་དང༌། ཡང་མེ་ལྷ་ལ་མཆོད་པ་ལ་སོགས་པ་བྱ་སྟེ། ཡེ་ཤེས་ཀྱི་ལྷ་བསྐུལ་བ་དང༌། དམ་ཚིག་གི་མེ་ལྷ་བསྡུས་ལ། རྫས་ལྷག་མས་སྦྱིན་སྲེག་བྱ་སྟེ། བདག་ཉིད་ཅི་བདེར་གནས་པར་བྱའོ། །མངོན་སྤྱོད་ལ་ནི་མཱ་ར་ཡ། །མར་གྱི་སྦྱིན་སྲེག་བརྒྱ་རྩ་བརྒྱད། །མེ་ལྷའི་མཆོད་པ་བྱས་ནས་ནི། །མཆོད་པའི་ཞལ་བསིལ་གོང་མ་བཞིན། །སོ་རྩི་ན་བཟའ་ལ་སོགས་པས། །མེ་ལྷ་མཉེས་པར་བྱས་ནས་ནི། །རང་བཞིན་དག་པའི་ཚིགས་བཅད་བརྗོད། །མེ་ལྷ་ནམ་མཁར་གཤེགས་སུ་གསོལ། །མེ་ལྷའི་མཆོད་པའི་རིམ་པའོ། །ཟབ་མོའི་དོན་ནི་མན་ངག་ཡིན་པས་འདིར་མ་བསྟན། །ཀྱེ་ཡི་རྡོ་རྗེ་ཞེས་བྱ་བའི། །སྦྱིན་སྲེག་རིམ་པ་གསལ་བྱེད་པས། །དགེ་བ་ཐོབ་པ་གང་ཡིན་དེས། །མྱུར་བར་སེམས་ཅན་གྲོལ་གྱུར་
ཅིག །སྦྱིན་སྲེག་གི་ཆོ་ག་མདོར་བསྡུས་པ། །སློབ་དཔོན་པོ་དྷི་གརྦྷས་མཛད་པ་རྫོགས་སོ།། །།རྒྱ་གར་གྱི་མཁན་པོ་ཀ་མཱ་ལ་ཤྲཱི་དང༌། དགེ་སློང་ཤེས་རབ་སྐྱབས་ཀྱིས་བསྒྱུར། །