དཔལ་ཧེ་རུ་ཀའི་སྒྲུབ་ཐབས།
ས་ཧ་ཛ་བི་ལ་སས་མཛད།
― DTG010_Page_0044 ―
[མ་དཔེ་གཟིགས་ན་འདིར་གནོན།]
རྒྱ་གར་སྐད་དུ། ཤྲཱི་ཧེ་རུ་ཀ་སཱ་དྷ་ནཾ། བོད་སྐད་དུ་ཧེ་རུ་ཀའི་སྒྲུབ་ཐབས། དཔལ་རྡོ་རྗེ་མཁའ་འགྲོ་ལ་ཕྱག་འཚལ་ལོ། །ཁྲག་འཐུང་འཇིག་རྟེན་གསུམ་ལས་བསྐྱོད། །དཔལ་ལྡན་བླ་མར་མགོས་བཏུད་ནས། །དེ་ཡི་སྒྲུབ་ཐབས་ཞི་བ་ནི། །གསུངས་པའི་ཆོ་ག་མདོར་བསྡུས་བྱ། །དཔའ་བོ་ཞལ་ཅིག་ཕྱག་གཉིས་པ། །བདག་མེད་མ་ཡིས་མགུལ་ནས་འཁྱུད། །འཁོར་ལོ་ལ་སོགས་རྒྱན་དང་ལྡན། །སྤྱན་གསུམ་སྟག་གི་ཤམ་ཐབས་ཅན། །རྒྱུད་འདིར་བསྒོམ་པ་ལ་དབང་བའི་རྣལ་འབྱོར་བས་ཐོ་རྔས་ལངས་ཏེ། སྟན་བདེ་བ་ལ་འདུག་ནས། རང་གི་སྙིང་གར་ཉི་མ་ལ་གནས་པའི་ཧཱུཾ་བལྟས་ཏེ། དེའི་འོད་ཟེར་གྱིས་དཔལ་ཧེ་རུ་ཀ་མངོན་དུ་བྱས་ལ། མེ་ཏོག་ལ་སོགས་པ་མཆོད་པ་ལྔས་ཡང་དག་པར་མཆོད་པར་བའོ། །དེའི་སྤྱན་སྡར་སྡིག་པ་བཤགས་པ་དང༌། བསོད་ནམས་ལ་རྗེས་སུ་ཡི་རང་བ་དང༌། གསུམ་ལ་སྐྱབས་སུ་འགྲོ་བ་བྱས་ཏེ། བྱང་ཆུ་བ་ཆེན་པོར་སེམས་བསྐྱེད་དོ། །སེམས་ཅན་ཐམས་ཅད་བདེ་བ་ལ་དགོད་པར་འདོད་པའི་བྱམས་པ་དང༌། སྡུག་བསྔལ་ཐམས་ཅད་ལས་བསྒྲལ་བར་འདོད་པའི་སྙིང་རྗེ་དང༌། བདེ་བ་ངེས་པར་རྒྱུན་མི་འཆད་པར་འདོད་པའི་དགའ་བ་དང༌། ཉོན་མོངས་པ་ཐམས་ཅད་དང༌། ཉེ་བའི་ཉོན་མོངས་པ་དང༌། གཟུང་བ་དང་འཛིན་པ་ལ། སོགས་པའི་རྟོག་པའི་དྲི་མས་མ་གོས་པའི་རང་བཞིན་སྟོན་ཀའི་དྲི་མ་མེད་པའི་ནམ་མཁའི་དཀྱིལ་ལྟར་གཉིས་སུ་མེད་པའི་ཡེ་ཤེས་ཚུལ་དང་གཅིག་པའི་སྟོང་པ་ཉིད་བསྒོམ་པར་བྱའོ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱ་ཏྨ་ཀོ྅ཧཾ། ཞེས་བྱ་བའི་སྔགས་ཀྱིས་བྱིན་གྱིས་བརླབ་པོ། །དེ་ནས་
― DTG010_Page_0045 ―
[མ་དཔེ་གཟིགས་ན་འདིར་གནོན།]
ལངས་ཏེ་ནམ་མཁའི་ཕྱོགས་སུ་ཉི་མའི་དཀྱིལ་འཁོར་ལ་གནས་པའི་ཧཱུཾ་བལྟས་ཏེ། དེ་ཡོངས་སུ་གྱུར་པ་ལས་རྡོ་རྗེའི་ལྟེ་བ་ལ་གནས་པའི་ཉི་མ་ལ་ཧཱུཾ་བསམ་པར་བྱའོ། །དེའི་འོད་ཁ་ནས་འཐོན་ཏེ། དཔལ་ཧེ་རུ་ཀའི་གཟུགས་ཀྱིས་འགྲོ་བ་མ་ལུས་པའི་དོན་བྱས་ནས་དེ་ཉིད་དུ་ཞུགས་པ་དང༌། དེ་ཡོངས་སུ་གྱུར་པ་ལས་དཔལ་ཧེ་རུ་ཀ་པདྨ་སྣ་ཚོགས་འདབ་མ་ཅན་ལ་རོའི་སྟེང་ཉི་མའི་དཀྱིལ་འཁོར་ལ་བཞུགས་པ། ཞལ་གཅིག་པ་ཕྱག་གཉིས་པ་སྤྱན་གསུམ་པ། ཕྱག་གཡས་ན་རྡོ་རྗེ། གཡོན་ན་རྡོ་རྗེས་མཚན་པའི་ཐོད་པ་བསྣམས་པ། གར་གྱི་སྟངས་དང་ལྡན་པ་སྟག་གི་ཤམ་ཐམས་ཅན་སྤྱི་བོར་མི་བསྐྱོད་པའི་བདག་ཉིད་མིའི་མགོ་བོ་ལས་བྱས་པའི་འཁོར་ལོ་འཛིན་པ་དང༌། རྣམ་པར་འོད་དཔག་མེད་ཀྱི་བདག་ཉིད་མིའི་རུས་པའི་རྣ་ཆ་དང༌། མགུལ་བར་རིན་ཆེན་འབྱུང་ལྡན་གྱི་རང་བཞིན་མགུལ་རྒྱན་དང་ལྡན་པ། ལག་པ་ལ་རྣམ་པར་སྣང་མཛད་ཀྱི་རང་བཞིན་གདུ་བུ་དང་ལྡན་པ། རྐེད་པར་དོན་ཡོད་གྲུབ་པའི་བདག་ཉིད་སྐེ་རགས་ཀྱིས་བརྒྱན་པ། སྐྲའི་མཆོད་ཕྱིར་ཐོགས་དང༌། དཔུང་རྒྱན་དང༌། རྐང་གདུབ་ཀྱིས་བརྒྱན་པ། དབུ་སྐྲ་སེར་པོ་གྱེན་དུ་བརྗེ་ས་པ། བདག་མེད་མ་ཞལ་གཅིག་ཕྱག་གཉིས་པ། གྲི་གུག་དང་ཐོང་པ་བསྣམས་པའི་མགུལ་ནས་འཁྱུད་པའོ། །དེ་ལྟ་བུར་གྱུར་པར་བདག་ཉིད་བསམས་ལ། རྣ་བར་བདག་མེད་མའོ། །མིག་ནི་རྡོ་རྗེ་མའོ། །སྣ་ལ་གསང་བའི་གཽ་རཱི་མ། ལྕེ་ལ་ཆུའི་རྣལ་འབྱོར་མ། །ལུས་ལ་རྡོ་རྗེ་མཁའ་འགྲོ་མ། །ཡིད་ལ་བདག་མེད་མས་བྱིན་གྱིས་བརླབས་པར་བསམ་པར་བྱའོ། །དེ་ནས་སྤྱི་བོར་པདྨ་འདབ་མ་སུམ་ཅུ་རྩ་གཉིས་པའི་ལྟེ་བ་ལ། ཧཾ་ཁ་ཐུར་དུ་བལྟས་པའོ། །མགྲིན་པར་པདྨ་འདབ་མ་བཅུ་དྲུག་པ་ལ་ཨཾ་གྱེན་དུ་བལྟས་པའོ། །སྙིང་གར་པདྨ་འདབ་མ་བརྒྱད་པའི་ལྟེ་བ་ལ་ཧཱུཾ་ཁ་ཐུར་དུ་བལྟས་པའོ། །ལྟེ་བར་པདྨ་འདབ་མ་དྲུག་ཅུ་རྩ་བཞི་པའི་སྟེང་དུ་ཨཾ་ཁ་གྱེན་དུ་བསམ་པར་བྱའོ། །དེ་ནས་དམ་ཚིག་སེམས་དཔའ་ལྟ་བུའི་ཡེ་ཤེས་སེམས་དཔའ་བཀུག་སྟེ། ཛཿ་ཧཱུཾ་བཾ་ཧོཿ་ཞེས་པའི་སྔགས་ཀྱིས་དགུག་པ་དང་གཞུག་པ་དང༌། བཅིང་བ་དང་དབང་དུ་བྱའོ། །ཆུ་དང་འོ་མ་བསྲེས་པ་ལྟ་བུ་
― DTG010_Page_0046 ―
[མ་དཔེ་གཟིགས་ན་འདིར་གནོན།]
རོ་མཉམ་པར་བྱའོ། །དེའི་རྗེས་ལ་རང་གི་སྙིང་གར་ཉི་མ་ལ་རྡོ་རྗེ། དེའི་ལྟེ་བར་ཧཱུཾ་གི་འོད་ཀྱིས་དེ་བཞིན་གཤེགས་པ་ཐམས་ཅད་ཀྱི་བདག་ཉིད་དཔལ་ཧེ་རུ་ཀ་བཀུག་ལ་མཆོད་པ་བྱ་སྟེ། དེ་བཞིན་གཤེགས་པ་ཐམས་ཅད་ཀྱིས་བདག་ལ་དབང་བསྐུར་ཅིག་ཅེས་གསོལ་བ་གདབ་པོ། །དེ་དག་གིས་བདུད་རྩི་ལྔས་གང་བའི་རིན་པོ་ཆེའི་བུམ་པས་དབང་བསྐུར་བས་བདག་ལ་མི་བསྐྱོད་པ་མགོན་པོའི་དབུ་རྒྱན་དང་བཅས་པ་བསམ་པར་བྱའོ། །དེ་ནས་རྣལ་འབྱོར་མའི་ཚོགས་ཐམས་ཅད་ཀྱིས་རང་རང་གི་བྱང་ཆུབ་སེམས་ཀྱི་རྫས་ཀྱིས་མཆོད་པར་བསམ་མོ། །དེ་ནས། མཆོག་གཙིགས་ཤིང་འཇིགས་པ་ཆེ། །སྔགས་ཀྱི་མེ་ཏོག་ཕྲེང་བས་བརྒྱན། །ཤ་ཆེན་རབ་ཏུ་གསོལ་མཛད་པ། །ཧེ་རུ་ཀ་ལ་ཕྱག་འཚལ་བསྟོད། །ཅེས་བྱ་བས་བསྟོད་པར་བྱའོ། །དེ་ནས་སྙིང་གར་ཧཱུཾ་ཡོངས་སུ་གྱུར་པ་ལས་རྡོ་རྗེ། དེའི་འོག་ཏུ་ཨོཾ་ཡོངས་སུ་གྱུར་པ་ལས་པདྨའི་སྣོད་བསྐྱེད་དེ། དེའི་དབུས་སུ་ཨོཾ་གྱིས་མཚན་པའི། གོ་ཀུ་ད་ཧ་ན་མ་ར་མུ་སུ་བི་ལ་སོགས་པ་དམ་ཚིག་གི་རྫས་བསམ་པར་བྱའོ། །དེ་ནས་རྡོ་རྗེ་དང༌། པདྨའི་སྦྱོར་བས། མེ་འབར་བ་དེས་རྫས་རྣམས་བསྲེགས་ཏེ་བསྐོལ་ནས་ཞུ་བར་གྱུར་པ། དེ་བཞིན་གཤེགས་པ་ཐམས་ཅད་ཀྱི་རང་བཞིན་དུ་བལྟས་ཏེ། ཡེ་ཤེས་ཀྱི་ཉི་མ་འབར་བ། ཡེ་ཤེས་ཀྱི་ས་བོན་དེའི་འོད་ཀྱིས་དེ་བཞིན་གཤེགས་པ་ཐམས་ཅད་ཀྱི་བདུད་རྩི་བཀུག་ནས། དངོས་པོ་དེ་དག་དང་ལྷན་ཅིག་པར་བྱ་སྟེ། ཨོཾ་ཨཱཿ་ཧཱུཾ་ཞེས་བྱ་བའི་ཡི་གེས་བྱིན་གྱིས་བརླབ་པར་བྱ་སྟེ། དེ་ནས་ཧཱུཾ་དཀར་པོའི་རང་བཞིན་གྱིས་ལྕེ་སྦྱངས་ལ། བདག་ཉིད་དེ་ཡིས་ཚིམ་པར་བྱའོ། །དེ་ནས་སྙིང་གར་ཉི་མ་ལ་གནས་པའི་ཧཱུཾ་ལ་བསྐོར་ནས་གནས་པའི། ཨོཾ་ཏྲཻ་ལོ་ཀྱཱ་ཀེཥ་པ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། ཞེས་བྱ་བའི་ཡི་གེ་བཅུ་གཉིས་ཀྱི་སྔགས་ཀྱི་ཕྲེད་བ་མར་མེའི་ཕྲེང་བ་ལྟར་འབར་ཞིང་གསལ་བ་ཡིད་ཀྱིས་བྲིས་ཏེ། ཀློག་པའི་རིམ་པ་བཞིན་དུ། མི་འགྱུར་བར་བཟླས་པར་བྱའོ། །གུང་དང་དགོངས་ཀྱི་དུས་སུ་ཡང་བདག་ཉིད་ཧེ་རུ་ཀའི་རང་བཞིན་དུ་སྐད་ཅིག་གིས་བསྐྱེད་དེ། དེ་ནས་མིག་ལ་སོགས་པའི་རྣམ་པར་དག་པ་དང༌། འཁོར་ལོའི་བསྒོམ་པ་དང༌། མཆོད་པ་དང༌། བསྟོད་པ་དང༌། བདུད་རྩི་མྱང་བ་དང༌།
― DTG010_Page_0047 ―
[མ་དཔེ་གཟིགས་ན་འདིར་གནོན།]
བཟླས་པ་ལ་སོགས་པ་བྱས་ཏེ། ཇི་བཞིན་པར་གནས་ནས་གཤེགས་སུ་གསོལ་བར་བྱ་སྟེ། གཏོར་མ་གཏང་པ་ལ་སོགས་པ་བྱའོ། །དེ་ནས་དཀྱིལ་འཁོར་བསྡུས་ཏེ། སྐད་ཅིག་མས་ལྷར་སྤྲུལ་པ་ཅི་བདེར་གནས་པར་བྱའོ། །དཔའ་བོ་འཇིག་རྟེན་གསུམ་བསྐྱོད་པའི། །སྒྲུབ་ཐབས་བླ་མེད་བྱས་པ་ལས། །བསོད་ནམས་གང་ཞིག་བསགས་པ་དེས། །འཇིག་རྟེན་རྡོ་རྗེ་འཛིན་པར་ཤོག །དགྱེས་པ་རྡོ་རྗེ་ཞལ་གཅིག་ཕྱག་གཉིས་པའི་སྒྲུབ་ཐབས་རྫོགས་སོ།། །།སློབ་དཔོན་ཆེན་པོ་ས་ཧ་ཛ་བི་ལ་སའི་ཞལ་སྔ་ནས་མཛད་པ། རྒྱ་གར་གྱི་མཁན་པོ་བ་ལེནྡྲ་རུ་ཙིའི་ཞལ་སྔ་ནས་དང༌། བོད་ཀྱི་ལོ་ཙཱ་བ་རྨ་བན་ཆོས་འབར་གྱིས་བསྒྱུར་བའོ།།
| 
