རོ་སྲེག་པའི་ཆོ་ག།
ཡེ་ཤེས་བཟང་པོས་མཛད།
― DTG010_Page_0267 ―
[མ་དཔེ་གཟིགས་ན་འདིར་གནོན།]
རྒྱ་གར་སྐད་དུ། ཤ་ཝ་སཾ་ག་བི་དྷིཿ། བོད་སྐད་དུ། རོ་སྲེག་པའི་ཆོ་ག །དཔལ་དགྱེས་པ་རྡོ་རྗེ་ལ་ཕྱག་འཚལ་ལོ། །རྫོགས་པའི་བྱང་ཆུབ་བདེ་ཆེན་པོ། །དྲི་མེད་ཡིད་ཀྱིས་བཏུད་བྱས་ཏེ། །རྡོ་རྗེ་གུར་གྱི་རྒྱུད་ལ་སོགས། །བརྟེན་ཏེ་དགྱེས་པ་རྡོ་རྗེ་ཡི། །སེམས་ཅན་ཀུན་ལ་ཕན་པའི་ཕྱིར། །རོ་སྲེག་ཆོ་ག་བཤད་པར་བྱ། །དུར་ཁྲོད་དང་ནི་ཆུ་བོའི་འགྲམ། །ནགས་ཚལ་འབབ་ཆུ་དགོན་པ་རུ། །རྡོ་རྗེ་སློབ་དཔོན་མཚན་ལྡན་ནི། །བརྟན་ཞིང་ཟབ་མོའི་ཆོས་དང་ལྡན། །རིག་པའི་གནས་རྣམས་ཀུན་ལ་མཁས། །རྩ་བའི་ལྟུང་བ་རབ་འཇོམས་པ། །དེ་ཡིས་ཉེ་བར་བསྟན་པའི་སྔགས། །སྒྲུབ་པ་པོ་ལ་འགྲུབ་པོ་ཀྱེ། །དེ་ལ་དང་པོར་བསྙེན་པ་ཡིས། །ཆོ་ག་བཞིན་དུ་ཤེས་བྱས་ཏེ། །
― DTG010_Page_0268 ―
[མ་དཔེ་གཟིགས་ན་འདིར་གནོན།]
ལྷ་དང་རོ་ཡི་དབྱེ་བ་ཡིས། །རྣམ་པ་གཉིས་སུ་སྦྱར་བར་བྱ། །དེ་ལ་ལྷ་ཡི་ཆོ་ག་ཡང༌། །བླ་མ་རྡོ་རྗེ་ཅན་མཆོད་ཅིང༌། །བདུན་པོ་རྣམ་པར་དག་པར་བྱ། །བྱང་ཆུབ་ཏུ་ནི་སེམས་བསྐྱེད་དེ། །ཆོས་ཀྱི་འབྱུང་གནས་རྣམ་པར་བསྒོམ། །དེ་ལ་སངས་རྒྱས་གནས་བསམས་ཏེ། །བྱང་ཆུབ་རྣམ་ལྔ་བསྒོམ་པར་བྱ། །དང་པོ་སྐྱེས་བུ་བསམས་དེ་ནས། །མཁའ་འགྲོ་མ་ཡི་འཁོར་ལོ་སྤྲོ། །དྲི་ཟ་རབ་ཏུ་ཞུགས་པ་ནི། །ལྷུང་སྟེ་ཞུ་བ་རྗེས་དྲན་པ། །མཚམས་ཀྱི་ལྷ་མོས་བསྐུལ་བར་བྱ། །བསྐུལ་ནས་འབྲས་བུ་བཞེངས་པ་ལ། །མིག་སོགས་གཏི་མུག་རྡོ་རྗེ་སོགས། །རྡོ་རྗེ་གསུམ་ནི་གནས་གསུམ་དགོད། །ཡེ་ཤེས་དངོས་པོ་རབ་བཅུག་ལ། །རིག་མ་བརྒྱད་ཀྱིས་དབང་བསྐུར་བྱ། །བདུད་རྩི་ཡང་ནི་མྱང་བྱ་ཞིང༌། །ལྷ་མོ་བརྒྱད་རྣམས་ཀྱིས་མཆོད་དང༌། །འཁོར་ལོའི་འདྲེན་པ་ལ་བསྟོད་བྱ། །དེ་ལྟར་ཡན་ལག་དྲུག་པོ་ནི། །སྔགས་དྲུག་གིས་ནི་ང་རྒྱལ་བྱ། །དེ་ནས་ཀྱང་ནི་ཡུད་ཙམ་བསམ། །དེ་ལ་མཚན་མ་མཚོན་པར་བྱ། །དེ་ནས་རོ་ཡི་ཆོ་ག་ཡང༌། །སློབ་དཔོན་འདས་པའི་དུས་ན་ནི། །རྨོངས་པ་རྣམས་ནི་ཤི་ཞེས་ཟེར། །ཤི་བ་ཞེས་པ་རྣམ་རྟོག་དེ། །དག་པའི་གནས་སུ་གཤེགས་པའོ། །ཡང་ན་བདེ་བ་ཅན་དུ་འམ། །དག་པའི་གནས་སུ་སྐྱེ་འགྱུར་བ། །རོ་སྲེག་འདི་ཡིས་རྣམ་པར་འབྱེད། །ལུས་མཐའ་ནས་ནི་ལུས་མཐར་སྐྱེལ། །དམན་པའི་སེམས་ཅན་ཐམས་ཅད་ཀྱང༌། །བདེ་འགྲོ་ནས་ནི་བདེ་འགྲོར་འགྲོ། །དེ་ལ་ཆོ་ག་དང་པོར་ནི། །ཆུ་གཙང་དྲི་ཞིམ་སྦྱར་བས་བཀྲུ། །སྣ་ཚོགས་དྲི་ཡིས་བྱུགས་པ་དང༌། །ཚུལ་བཞིན་རྒྱན་གྱིས་གནས་བྱས་ཏེ། །བགེགས་བསྐྲད་ལྷར་བསྐྱེད་ཆོ་ག་དང༌། །སྐྱེ་མཆེད་གནས་གསུམ་བྱིན་གྱིས་བརླབས། །རྣམ་ཤེས་ཨ་ཡི་གཟུགས་ཀྱིས་གཞུག །རྩ་བའི་སྔགས་སོགས་ཚུལ་བཞིན་དུ། །བཟླས་པས་སྡིག་སྒྲིབ་ཐམས་ཅད་བཅོམ། །བྱང་ཆུབ་སེམས་སུ་ཞུ་བྱས་ལ། །སླར་ཡང་བསྐྱེད་ཅིང་ཚུལ་བཞིན་ལྡང༌། །གཏོར་མ་མཆོད་པ་རྒྱ་ཆེན་བྱ། །སྨོན་ལམ་གདབ་ཅིང་བསྲུང་ལ་གནས། །ཡི་གེ་བརྒྱ་བ་ཅི་མང་དུ། །བཟླས་བརྗོད་བྱ་བ་བསྔགས་པ་ཡིན། །དེ་ལྟར་ཐུན་གསུམ་བར་དུ་ནི། །བཟླས་བརྗོད་འབུམ་གྱི་ཚད་དུ་བྱ། །དེ་ནི་སྔོན་
― DTG010_Page_0271 ―
[མ་དཔེ་གཟིགས་ན་འདིར་གནོན།]
གྱི་ཆོ་གའོ། །དེ་རྗེས་ས་ཡི་ཆོ་ག་སོགས། །དཀྱིལ་འཁོར་ཆོ་ག་ཚུལ་བཞིན་བྱ། །རྡོ་རྗེ་སློབ་དཔོན་དག་ལ་ནི། །རྡོ་རྗེ་དྲིལ་བུ་ལག་པར་སྦྱིན། །མགོ་བོར་དབུ་རྒྱན་བསྐོན་པར་བྱ། །རྡོ་རྗེ་སྡོམ་པ་རྣམས་བྱིན་ཏེ། །དཀྱིལ་འཁོར་དུ་འཇུག་ཚུལ་བཞིན་བྱ། །བུམ་པའི་དབང་བསྐུར་རྣམས་བྱིན་ལ། །རྡོ་རྗེ་ཐབ་ཁུང་རབ་སྦྱོར་གྱིས། །འདུ་བྱེད་རབ་ཏུ་བྱ་བར་བསྟན། །སྒྲུབ་པ་པོ་ཡང་དེ་ལྟར་བྱ། །སེམས་ཅན་ཕལ་པ་ཐམས་ཅད་ཀྱིས། །འཇུག་ཅིང་དབང་བསྐུར་སྤང་བར་བྱ། །སྦྱིན་སྲེག་ཆོ་ག་འབའ་ཞིག་གིས། །སྦྱང་བ་དག་ནི་རབ་ཏུ་བྱ། །དེ་ལ་སྦྱིན་སྲེག་གི་ཆོ་ག་ནི་དཀྱིལ་འཁོར་གྱི་ཕྱོགས་གཅིག་ཏུ་སྲེག་ཁང་བརྩིག་པར་བྱ་སྟེ། ཇི་ཙམ་ལྕོགས་པའི་མཎྜལ་བྱས་ལ། དེའི་དབུས་སུ་ཞི་བའི་ཐབ་ཁུང་ཟླུམ་པོ་ཁྲུ་གང་བར་བྱའོ། །ཁྲུ་ཕྱེད་ཐུར་དུ་བརྐོ། སོར་བཞི་ཕྱིར་བསྐྱེད། ཁ་ཁྱེར་སོར་བཞིས་བསྐོར། དེའི་ཕྱི་རིམ་གྱི་སོར་བཞི་བོར་ལ། པདྨའི་ཕྲེང་བ་བྲི། ཐབ་ཁུང་གི་ནང་དུ་གཙོ་བོའི་ཕྱག་མཚན་བཞག་པ་ནི་དབུས་སུ་རྡོ་རྗེ། ཤར་དུ་འཁོར་ལོ། ལྷོར་རིན་ཆེན། ནུབ་ཏུ་པདྨ། བྱང་དུ་རལ་གྲི། ཞིང་སོར་བརྒྱད་པར་བྱའོ། །ཁ་དོག་དཀར་པོས་བྱུགས་པ་དེར། ཤིང་གང་ཇི་ལྟར་རིགས་པར་བརྩིགས་ཏེ། རོ་དེ་དཀྱིལ་འཁོར་ལ་ཁ་མངོན་དུ་ཕྱོགས་པར་གཞུག་གོ །མཆོད་རྫས་དང་སྲེག་རྫས་གཞག་པའི་རིམ་པ་ནི། སྔགས་མཁན་གྱི་གཡོན་དུ་ཡོན་ཆབ་ཀྱི་སྣོད་གསེར་ལ་སོགས་པ་ཆབ་ཀྱིས་བཀང་པ་དང༌། ཞབས་བསིལ་གྱི་སྣོད་གཞག་གོ །གཡས་ཕྱོགས་སུ་ཟངས་གཞོང་ཅིག་གི་ནང་དུ་དྲིས་བཀང་ལ། ཀུ་ཤ་བཅུག་པ་པྲོཀྵ་ཎའི་སྣོད་གཞག །དེ་བཞིན་དུ་མེ་ཏོག་དང༌། བདུག་སྤོས་དང༌། དྲིའི་དུང་ལ་སོགས་པའི་སྣོད་དུ་གཞག་གོ །མདུན་གྱི་མཎྜལ་གསེར་ལ་སོགས་པ་ལས་བྱས་པའི་བཟེད་ཞལ་གཞག་པར་བྱ་སྟེ། དེ་ལྟར། མེ་ཏོག་བདུག་སྤོས་དེ་བཞིན་དྲི། །དྲི་ཡི་དུང་སོགས་གཡས་གནས་ཏེ། །གཡོན་དུ་སྔགས་ཀྱི་མཆོད་ཡོན་སྣོད། །མདུན་དུ་བཟེད་སྣོད་བཞག་བྱས་ལ། །ཞབས་བསིལ་སྔོན་དུ་འགྲོ་བས་དབུལ། །མེ་ཏོག་སྤོས་སོགས་གོ་རིམས་བཞིན། །སྒེག་སོགས་མཆོད་པས་མཆོད་བྱས་ན། །སྐལ་པ་ཆེན་པོར་གྱུར་པ་ཡིན། །ཞེས་གསུངས་སོ། །
― DTG010_Page_0272 ―
[མ་དཔེ་གཟིགས་ན་འདིར་གནོན།]
ཡང་སྲེག་རྫས་གཞག་པའི་རིམ་པ་ཡང༌། མདུན་དུ་དགང་གཟར་དང་བླུགས་གཟར་དང༌། ཁྱད་པར་གྱི་རྫས་ཏིལ་དང༌། ཐུན་མོང་གི་རྫས་ཀྱི་གཙོ་བོ་མར་གཞག་པར་བྱའོ། །རྫས་གཞན་གཡས་ཕྱོགས་སུ་མཎྜལ་ཇི་ལྟར་འབྱོར་པར་གཞག་པར་བྱའོ། །དེ་ལྟར་ཡང༌། དགང་གཟར་བླུགས་གཟར་ཁྱད་པར་རྫས། ཐུན་མོང་རྫས་ཀྱི་གཙོ་བོ་རྣམས། །སྔགས་མཁན་མདུན་དུ་བཞག་བྱས་ལ། །རྫས་གཞན་གཡས་སུ་ཅི་འབྱོར་པ། །གོ་རིམས་བཞིན་དུ་གཞག་པར་བྱ། །ཞེས་གསུངས་སོ། །དེ་ནས་བདག་ཉིད་ཁྲུས་བྱས་ལ་རྒྱན་གྱིས་བརྒྱན་ཏེ། མཆོད་པ་ལ་སོགས་པ་ཀུན་ཧཱུཾ་གིས་བསངས་ལ། ལག་པ་གཡས་པས་རྡོ་རྗེ་བཟུང་ལ། སྣོད་ཀུན་གྱི་སྟེང་དུ་གཏུག་ཅིང༌། ཨོཾ་ཨཱཿ་ཧཱུཾ། ཞེས་སྔགས་པས་འཇིག་རྟེན་པའི་རྟོག་པ་ཀུན་བསལ་ནས། རྫས་དེ་ཉིད་བཟང་ཞིང་དྲི་མ་མེད་པར་བསམ་མོ། །ཡམ་ཤིང་དང་བུད་ཤིང་ཡང་ཞི་བ་ལ་ཇི་ལྟར་བསྔགས་པ་ལྟར་གཟུང་ངོ༌། །དེ་ནས་སློབ་དཔོན་གྱིས་ཡན་ལག་དྲུག་དང་ལྡན་པའི་བསྐྱེད་པའི་རིམ་པ་རྫོགས་པར་བྱ། སྔར་གྱིས་གསལ་ན་མ་བྱས་ཀྱང་རུང༌། དེ་ནས་གཙུབས་པ་ལ་སོགས་པའི་མེ་བླངས་ཏེ། རླུང་གཡབ་ཀྱིས་མེ་སྤར་རོ། །ཨོཾ་ཛྭ་ལ་ཛྭ་ལ་ཧཱུཾ་ཕཊ། མེ་སྦར་བའི་སྔགས་སོ། །ཨོཾ་བཛྲ་སཏྭ་ཨཱ་ཡུ་ཥེ་སྭཱ་ཧཱ། ཀུ་ཤ་དགྲམ་པའི་སྔགས་སོ། །ཨོཾ་ཨཱཿ་ཧཱུཾ། བསང་གཏོར་གྱི་སྔགས་སོ། །དེ་ནས་ཐབ་ཏུ་སྣ་ཚོགས་པདྨ་འདབ་མ་བརྒྱད་པ་ཅིག་བསྒོམས་ལ། དེར་ཧེ་རུ་ཀ་ཡབ་ཡུམ་བྱང་ཆུབ་པ་ལྔས་བསྐྱེད་ལ། དེ་ཉིད་འདོད་ཆགས་ཆེན་པོ་དངུལ་ཆུ་བཞིན་དུ་ཞུ་ནས་གནས་པ་ལས། ཡི་གེ་རཾ་སྤྲེལ་མར་གྱུར་ནས། ཡི་གེ་གཉིས་གྱུར་པ་ལས་མེ་ལྷ་ཡབ་ཡུམ་ཞལ་གསུམ་ཕྱག་དྲུག་པ། གསུས་ཁྱིམ་ཆེ་བ། རལ་པའི་དབུ་རྒྱན་ཅན། མཆོད་ཕྱིར་ཐོགས་འཆང་བ། ཕྱག་དང་པོ་གཉིས་ཀྱིས་རང་དང་འདྲ་བའི་ཤེས་རབ་མ་ལ་འཁྱུད་པའོ། །གཡས་ན་གུནྡྷེ་དང་མཆོད་ཕྱིར་ཐོགས། གཡོན་ན་བུམ་པ་དང་བགྲང་ཕྲེང་ཐོགས་པ་སྐུ་མདོག་དཀར་པོར་བསམས་ལ། ཐུགས་ཀར་སྣ་ཚོགས་པདྨའི་སྟེང་དུ་མེ་གྲུ་གསུམ། ལྕེ་ལ་རཾ་དམར་པོ་བསམ་མོ། །དེ་ལྟར་རཾ་ཞུ་བ་ལས་དམ་ཚིག་སེམས་དཔའི་
― DTG010_Page_0273 ―
[མ་དཔེ་གཟིགས་ན་འདིར་གནོན།]
མེ་ལྷར་བསྒོམ་པ་སྟེ། དེ་ཡང་རང་གི་ལྷག་པའི་ལྷར་དམིགས་ཏེ། བཟང་པོའི་རྒྱན་གྱིས་རྣམ་པར་བརྒྱན་པའི་མེ་ལྷ་ཕུན་སུམ་ཚོགས་པ་ཀུན་དམིགས་ལ། ལྟོ་བའི་གནས་སུ་སྲེག་བླུགས་བྱ། །ཞེས་གསུངས་སོ། །དེ་ནས་རང་གི་སྙིང་གའི་ས་བོན་གྱིས་ཡེ་ཤེས་སེམས་དཔའ་སྤྱན་དྲངས་ཏེ། མདུན་གྱི་ནམ་མཁར་བཞུགས་པ་ལ་བསང་གཏོར་དང༌། ཡོན་ཆབ་དང༌། ཕྱག་བྱས་ལ། ཨོཾ་ཨགྣ་ཡེ་མ་ཧཱ་ཏེ་ཛཱ་སརྦ་ཀརྨ་སཱ་དྷ་ཀ །ཀཱ་རུ་ཎྱ་ཀྲྀ་ཏྭ་སཏྭཱ་རྠ་ཨསྨིནྶནྣི་ཧི་ཏྭ་བྷ་བ། ཞེས་བྱ་བའི་སྔགས་ཀྱིས་སྤྱན་དྲངས་ལ། གཉིས་སུ་མེད་པར་བསྟིམས། དེ་ནས་པྲོ་ཀྵ་ཎཾ་ལ་སོགས་པ་བྱའོ། །གཟར་བུ་ལ་རང་གི་ལྷའི་ས་བོན་བསམས་ལ། གྲུ་མོ་གཉིས་སྤྲད་ལ་གཟར་བུ་བདུན་དབུལ། སྔགས་ནི། ཨོཾ་ཨགྣ་ཡེ་ཧཱུཾ། ཨོཾ་སརྦ་པཱ་པཾ་ད་ཧ་ན་བཛྲཱ་ཡ་བཛྲ་སཏྭ་སྱ་སརྦ་པཱ་པཾ་ད་ཧ་ན་སྭཱ་ཧཱ། ཨོཾ་བཛྲ་པུཥྚ་ཡེ་སྭཱ་ཧཱ། ཨོཾ་སརྦ་སི་པ་དེ་སྭཱ་ཧཱ། ཨོཾ་བཛྲ་བིཛཱ་ཡ་སྭཱ་ཧཱ། ཨོཾ་མ་ཧཱ་བེ་གཱ་ཡ་སྭཱ་ཧཱ། ཨོཾ་མ་ཧཱ་བ་ལཱ་ཡ་སྭཱ་ཧཱ། ཨོཾ་བཛྲ་གྷསྨ་རི་ཡེ་སྭཱ་ཧཱ། ཨོཾ་བཛྲ་ཨཱ་ཡུ་ཤེ་སྭཱ་ཧཱ། ཨོཾ་བཛྲ་ཨ་པྲ་ཏི་ཏ་ཏ་བཛྲཱ་ཉྫཱ་ཡ་སྭཱ་ཧཱ། ཨོཾ་བཛྲ་བོ་དྷི་བྲྀ་ཀཥཱ་ཡ་སྭཱ་ཧཱ། ཨོཾ་པ་ཏ་ལཱ་ཡ་སྭཱ་ཧཱ། ཨོཾ་ཀུ་བེ་རཱ་ཡ་སྭཱ་ཧཱ། ཨོཾ་སརྦ་ཀ་རཱ་ཡ་སྭཱ་ཧཱ། ཨོཾ་སརྦ་པཱ་པཾ་ད་ཧ་ན་བཛྲཱ་ཡ་སརྦ་པཱ་པཾ་ད་ཧ་ནཱ་ཡ་སྭཱ་ཧཱ། ཞེས་བྱ་བའི་སྔགས་ཀྱིས་སྲེག་རྫས་རྣམས་གོ་རིམས་བཞིན་དབུལ་ལོ། །དེ་ནས་མར་གྱི་དགང་བླུགས་བརྒྱའམ་སྟོང་དབུལ་བར་བྱའོ། །ཡང་བསང་གཏོར་བྱས་ནས། ཨོཾ་ཛཿ་ཧཱུཾ་བཾ་ཧོཿ་ཁམ་རཾ་ཞེས་པས་ཨརྒྷཾ་དབུལ་ལོ། །ཨོཾ་ནི་རི་ཏི་ཧཱུཾ་ཞེས་ཞལ་བསིལ་དབུལ་ལོ། །དེ་ནས་མེ་ཏོག་ལ་སོགས་པ་དང༌། སྒེག་མོ་ལ་སོགས་པའི་མཆོད་པས་མཆོད་ལ། ཨོཾ་བཛྲ་གྷ་ཎྚེ་ཨཱཿ། ཞེས་པས་དྲིལ་བུ་གཟུང་ངོ༌། །ཨོཾ་མ་ཧཱ་བཛྲ་ཧཱུཾ་ཞེས་བྱ་བས་རྡོ་རྗེ་གཟུང་བར་བྱའོ། །དེ་ནས་མེ་ལྷ་ལ་བསྟོད་པ་བྱ་བ་དང༌། དོན་ཆེན་པོའི་གསོལ་བ་གདབ་པ་ལ་སོགས་པ་བྱའོ། །དེ་ནས་ཐབ་ཁུང་ལན་གསུམ་དུ་བསངས་ལ། མེ་ལྷའི་ཐུགས་ཀར་སོ་སོའི་སྙིང་པོ་ལས་དཀྱིལ་འཁོར་བསམས་ལ། དེ་ནས་ཡེ་ཤེས་སེམས་དཔའ་ཅི་རིགས་པར་སྤྱན་དྲངས་ལ་བཞུགས་སུ་གསོལ་ལོ། །ཡང་བསང་གཏོར་ལ་སོགས་པ་བྱས་ལ། གནས་ཁང་དུ་
― DTG010_Page_0274 ―
[མ་དཔེ་གཟིགས་ན་འདིར་གནོན།]
བའི་ལྕི་བས་བྱུགས་ལ་མཎྜལ་གྲུ་བཞི་པའི་སྟེགས་བུ་བརྩིགས་ཏེ། རེ་ཁཱ་དཀར་པོས་གྲུ་ཉིས་རིམ་དུ་བྱས་ལ། དབུས་སུ་གཏོར་མ་ཆ་གཅིག་བཞག །མཆོད་པ་ལྔ་ཡང་བཤམས། ཚོགས་ཀྱི་ཁ་ཟས་སྣོད་ཆེན་པོ་གཅིག་ཏུ་སྤྱི་དཔུངས་སུ་གཞག །ཆང་ཡང་སྣོད་ཆེན་པོ་གཅིག་བཀང༌། དེ་མི་འདེགས་པར་བཞག་ནས། དེ་ནས་མར་གཟར་བུ་ཉི་ཤུ་རྩ་གཅིག་ཏུ་དབུལ་བར་བྱའོ། །དེ་ནས་རྫས་ལྷག་མ་རྣམས་རང་གི་སྔགས་སམ། ལྷའི་སྔགས་ཀྱིས་རིམ་བཞིན་དུ་ཕུལ་ལ། ཐ་མར་ཡང་མར་གྱི་སྦྱིན་སྲེག་བརྒྱ་རྩ་བརྒྱད་དུ་དབུལ། ཡང་བསང་བ་དང་མཆོད་པ་པ་སོགས་པ་རྫོགས་པར་བྱས་ལ། དེ་ཡང་སྦྱང་བར་འོས་པའི་གནས་སྐབས་དང་སྦྱར་བ་ནི། རྡོ་རྗེ་སྒྲུབ་པ་ཐ་མ་སློབ་དཔོན་ལ། །ཡི་གེ་རཾ་ལྷའི་སྡིག་སྒྲིབ་ཀུན། །བརྒྱ་པའི་གསང་སྔགས་བསྲེག་པ་རྣམས། །བརྒྱའམ་སྟོང་དུ་བཟླས་པར་བྱ། །རྡོ་རྗེ་རང་ལྷའི་སྡིག་པ་ནི། །གཟུགས་ཀྱི་གཟུགས་ནི་ཡོངས་བསྒོམས་ལ། །སྦྱང་བའི་ཆོ་གའི་མན་ངག་སྟེ། །བརྒྱུད་པའི་ཐབས་ཀྱིས་ཤེས་པར་བྱ། །དེ་ནས་གར་གྱིས་དཀྱིལ་འཁོར་གྱི་ལྷ་ལ་ཕྱག་བྱས་ལ། །ཨོཾ་ཨཱཿ་ཧཱུཾ་མུཿ་ས་གཤེགས་སུ་གསོལ་ཞིང་སྨོན་ལམ་གདབ་པོ། །ཡི་གེ་བརྒྱ་པ་ལན་གསུམ་བཟླས་ནས་རྫས་ཀྱི་ལྷག་མ་ཅི་འབྱོར་པས་མེ་ལྷ་མཆོད་པར་བྱའོ། །དེ་ནས་བསངས་ལ། མཆོད་པ་དང༌། བསྟོད་པ་ལ་སོགས་པ་བྱའོ། །དེ་ནས་ཡང་མེ་བསངས་ལ་གཤེགས་སུ་གསོལ་བ་ནི། བདག་གི་དོན་དང་གཞན་གྱི་དོན། །བསྒྲུབས་ཀྱིས་བྱིན་ཟ་ཁྱེད་གཤེགས་ཤིག། དེ་ལྟར་དུས་བཞིན་སླར་གཤེགས་ནས། །བདག་གི་དངོས་གྲུབ་ཐམས་ཅད་མཛོད། །ཅེས་གཤེགས་སུ་གསོལ་ལོ། །དམ་ཚིག་པ་མི་དམིགས་པར་བསམ་མོ། །དེ་ནས་རུས་བུ་བསྡུས་ལ། ཤི་བ་ལ་ཕན་བཏགས་པའི་ཕྱིར་མཆོད་རྟེན་བྱའོ། །དེ་ལྟར་ཉི་མ་གསུམ་ནི་ལོན་པ་དང༌། །རུས་པའི་ཕྲེང་བ་བསྡུས་བྱས་ལ། །དྲི་དང་འོ་མས་བྲན་ནས་ནི། །དེ་ཡིས་མཆོད་རྟེན་དག་ཏུ་བྱའོ། །ཞེས་གསུངས་སོ། །ཡོན་ཏན་བརྗོད་ཀྱིས་མི་ལང་བའི། །སྦྱིན་སྲེག་ཆོ་ག་འདི་བྱས་པས། །བདག་གི་བསོད་ནམས་ཕུང་པོ་འདིས། །ཉམ་ཐག་རྣམས་ནི་རྒྱལ་གྱུར་
― DTG010_Page_0275 ―
[མ་དཔེ་གཟིགས་ན་འདིར་གནོན།]
ཤོག །སློབ་དཔོན་མཁས་པ་ཆེན་པོ་ཡེ་ཤེས་སྙིང་པོའི་ཞལ་སྔ་ནས་མཛད་པ། རོ་སྲེག་པའི་དབང་དུ་བྱ་བ་རྫོགས་སོ།།
| 
