སྤྱན་དབྱེ་བའི་ཆོ་ག།
― DTG010_Page_0279 ―
[མ་དཔེ་གཟིགས་ན་འདིར་གནོན།]
རྒྱ་གར་སྐད་དུ། པྲ་ཏི་སྟ་བིདྷིཿ་བོད་སྐད་དུ། སྤྱན་དབྱེ་བའི་ཆོ་ག །རྣལ་འབྱོར་མ་རྣམས་ལ་ཕྱག་འཚལ་ལོ། །རྡོ་རྗེ་སློབ་དཔོན་གྱིས་རབ་ཏུ་གནས་པའི་ལས་བྱ་བའི་ཕྱིར། ཆོ་ག་གང་གིས་གང་ལ་རབ་ཏུ་གནས་པ་དེའི་མཚན་ཉིད་བཤད་པར་བྱའོ། །དེ་ཡང་ཐམས་ཅད་ལ་འཐད་ཅིང་དགོས་པ་མ་ཡིན་ཏེ། སྐྱེ་བ་མེད་པ་ལ་གང་ཞིག་རབ་ཏུ་གནས་པར་བྱ། ཀུན་རྫོབ་གཙོ་བོར་སྤྱོད་པས་ཀྱང༌། དེ་ཉིད་བྱིན་རླབས་ཡིན་ཤེས་ན། །རབ་གནས་ཆོ་ག་མི་འཐད་དོ། །སེམས་ཅན་དང་པོའི་ལས་ཅན་གྱིས། །རྒྱུད་རྣམས་ཡང་དག་སྨིན་ཕྱིར་བྱས། །དེ་ཡང་སློབ་དཔོན་མཐུ་ཐོབ་པ་དང༌། མ་ཐོབ་པའི་བྱེ་བྲག་གིས་ཆོ་ག་བསྡུས་པ་དང༌། རྒྱས་པའི་བྱེ་བྲག་གིས་ཅི་རིགས་པར་བླ་མའི་མན་ངག་ལ་བརྟེན་པ་རྣམས་ཀྱིས་ཤེས་པར་བྱའོ། །དེ་ལ་ཆོ་ག་རྒྱས་པ་ནི་དང་པོ་བསྙེན་པ་གཙོ་བོའི་འབུམ་མམ། འཁོར་གྱི་ཁྲིར། དེ་ལྟར་གྲངས་སམ། མཚན་མའི་བསྙེན་པ་བྱས་ལ། དཀྱིལ་འཁོར་བྲི་བའི་ཆོ་ག་དག་ཚུལ་བཞིན་དུ་བྱས་ལ། ཁྲུས་སའི་སྟེགས་བུ་བརྩིགས་ལ། བུམ་པ་རྣམས་བཀོད་ལ། བཟླས་བརྗོད་ཀྱི་ཆོ་ག་ནི་རང་གི་ཡི་དམ་གྱི་ལྷའི་སྦྱོར་བས། མཚན་ཉིད་ལྡན་པའི་བུམ་པ་ལས། །ཐམས་ཅད་ཆུ་ལས་ཁམ་ཕོར་དུ། །ཅུང་ཟད་བླུགས་ཏེ་རྣམ་རྒྱལ་གྱི། །བུམ་པ་པཾ་ལས་སྐྱེས་པ་ཡི། །རིན་པོ་ཆེ་ཡི་སྟེང་དུ་གཞག །དེར་ནི་དཀྱིལ་འཁོར་བསྐྱེད་བྱ་སྟེ། །དམ་ཚིག་བདག་ཉིད་རྫོགས་པ་དང༌། །ཡེ་ཤེས་དཀྱིལ་འཁོར་སྤྱན་དྲངས་ནས། །ཞལ་བསིལ་ལ་སོགས་རིམ་པར་དབུལ། །དམ་ཚིག་ལྷན་ཅིག་བཅུག་བྱས་ཏེ། །མཆོད་པ་རྣམས་ཀྱིས་ཚིམ་བྱས་ལ། །མེ་ཏོག་སྤོས་སོགས་རོལ་མོ་ཡིས། །འབད་པ་ཡིས་ཀྱང་མཆོད་པར་བྱ། །དྲིལ་བུ་དག་ནི་དཀྲོལ་བ་དང༌། །བསྟོད་པ་གཤེགས་ཀུན་ཁྲུས་གསོལ་བ། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་བཀྲུ་བྱའོ། །ཨོཾ་སརྦ་ཏ་ཐཱ་ག་ཏ་ཀཱ་ཡ་ས་བྷི་ཤེ་ཀ་ས་མ་ཡ་ཤྲི་ཡེ་ཧཱུཾ། འདི་ནི་ཁྲུས་སྔགས་སོ། །རས་སོགས་རང་རང་གསང་སྔགས་ཀྱིས། །མཉམ་པར་གཞག་པས་དབུལ་པར་བྱ། །ཡང་ན་རང་གི་སྔགས་ཀྱིས་དབུལ། །བཟླས་ཏེ་ཕྱག་འཚལ་གཙོ་བོ་ལ། །ཨོཾ་བཛྲ་བཱ་ས་སེ་སྭཱ་ཧཱ། ― DTG010_Page_0280 ―
[མ་དཔེ་གཟིགས་ན་འདིར་གནོན།]
མེ་ཏོག་ལ་སོགས་པའི་སྔགས་སུ་ཡང་འགྱུར་རོ། །གསེར་ལ་སོགས་པས་སྣོད་བྱས་ཏེ། །སྦྲང་རྩི་མར་སར་བྱུགས་པ་ཡི། །གསེར་གྱི་ཐུར་མ་ཡིས་ནི་མིག །དབྱེ་བའམ་ཡང་ན་བསམ་གཏན་གྱིས། །ཨོཾ་ཙཀྵུ་ས་མནྟ་ཙཀྵུ་བི་ཤོ་དྷ་ནི་སྭཱ་ཧཱ། ཇི་ལྟར་རྫོགས་པའི་སྔགས་རྒྱས་ཀུན། །དགའ་ལྡན་ཡང་དག་རབ་བཞུགས་ནས། །ཇི་ལྟར་ལྷ་མོ་སྒྱུ་འཕྲུལ་ལྷུ་མས། །དེ་བཞིན་འདིར་གནས་བཞུགས་བྱས་ལ། །འདིར་ནི་རྒྱུན་དུ་ཞུགས་གྱུར་ནས། །མགོན་པོ་མེ་ཏོག་ལ་སོགས་འདི། །བྱང་ཆུབ་སེམས་ཀྱིས་བསྡུས་པའི་ཕྱིར། །ཆེ་གེ་མོ་ཡི་དོན་དུ་བཞེས། །ལྷ་རྣམས་བརྟན་པར་འདོད་པ་ཡིས། །མགོ་པོ་སྙིང་ག་གསང་གནས་སུ། །རྡོ་རྗེ་ཡིས་ནི་བསྐོར་བྱས་ནས། །ལན་གསུམ་བསྐོར་ཏེ་རབ་གནས་བྱ། །ཆད་པའམ་ནི་ལྷག་པས་ཀྱང༌། །བདག་གིས་བརྗོད་ནས་གང་བགྱིས་པ། །གང་ཕྱིར་ལུས་ཅན་སྐྱབས་མཛད་པ། །མགོན་པོ་ཁྱོད་ཀྱིས་བཟོད་པར་མཛོད། །མ་རྙེད་པ་དང་མ་ཤེས་པ། །མ་ལུས་པར་ཡང་བཟོད་པར་མཛོད། །ཉུངས་པའམ་གཞན་དུ་བགྱིས་པ་གང༌། །དེ་དག་བཟོད་པར་མཛད་པར་རིགས། །ཞེས་པས་བཟོད་པར་གསོལ་ལ་སྨོན་ལམ་གདབ་པོ། །མཆོད་རྟེན་གླེགས་བམ་ལ་སོགས་ལ། །ཀྱེ་ཡི་རྡོ་རྗེ་འཁོར་བཅས་པས། །རབ་ཏུ་གནས་པར་བྱ་བ་དང༌། །རྣམ་པ་དག་ནི་ཅི་རིགས་པར། །དེ་ནས་སློབ་མ་རྩ་བའི་དཀྱིལ་འཁོར་དུ་བཅུག་ལ། །ཅི་བདེ་བར་ནི་མཆོད་པར་བགྱིས། །ཞེས་བསྒོའོ། །དེ་ནས་གཏོར་མ་དང་སྦྱིན་སྲེག་གི་ལས་བྱ་སྟེ། དེ་རྣམས་ཀྱི་ཆོ་ག་ནི་གཞན་དུ་ཤེས་པར་བྱའོ། །མཆོད་པ་དང་བསྟོད་པ་སྔོན་དུ་འགྲོ་བས། ཡེ་ཤེས་ཀྱི་ལྷ་གཤེགས་སུ་གསོལ་བ་ལ་སོགས་པ་བྱའོ། །དེ་ནི་ཆོ་ག་རྒྱས་པའོ། །རྡོ་རྗེ་སློབ་དཔོན་ནུས་དང་ལྡན་པས་ནི། །ཉིན་གཅིག་གི་རབ་ཏུ་གནས་པའི་ཆོ་ག་རྫོགས་པར་བྱ་སྟེ། རང་གི་ལྷ་བསྐྱེད་པའི་རིམ་པ་བྱས་ལ། རང་གི་ལྷའི་སྔགས་བརྒྱའམ། སྟོང་དུ་བཟླས་བརྗོད་བྱས་ཏེ། རབ་ཏུ་གནས་པའི་རྟེན་སྦྱང་བ་དང༌། བརྟེན་པའི་ཡེ་ཤེས་སེམས་དཔའ་གཞུག་པ་བྱས་ལ། ཡིད་ཀྱིས་མཆོད་པས་མཆོད་པ་བཟླས་བརྗོད་ཅི་རིགས་པ་བྱའོ། རྫོགས་སོ།། |
