བདག་མེད་མའི་སྒྲུབ་པའི་ཐབས།
ཀྲྀཥྞ་པཎྜི་ཏས་མཛད།
― DTG010_Page_0455 ―
[མ་དཔེ་གཟིགས་ན་འདིར་གནོན།]
རྒྱ་གར་སྐད་དུ། ནཻརཱཏྨ་སཱ་དྷ་ནཾ། བོད་སྐད་དུ། བདག་མེད་མའི་སྒྲུབ་པའི་ཐབས། རྡོ་རྗེ་སེམས་དཔའ་ལ་ཕྱག་འཚལ་ལོ། །འཁོར་མིན་མྱ་ངན་འདས་མིན་གང༌། །གཟུགས་ཅན་མ་ཡིན་གཟུགས་མེད་མིན། །དེ་ཡི་རང་དངོས་ཀུན་རྫོབ་ཏུ། །བྱིས་པ་རྣམས་ཕྱིར་ད་ལྟར་བྲི། །བསྒོམ་པ་འདི་ལ་དབང་བར་གྱུར་པའི་རྣལ་འབྱོར་པ་ཐོ་རངས་ཀྱི་ཆ་ལ་མལ་ནས་ལངས་ནས་སྙིང་གར་ཟླ་བ་ལ་བདག་མེད་མའི་ས་བོན་བལྟས་ལ། ཨོཾ་རཀྵ་རཀྵ་ཧཱུཾ་ཧཱུཾ་ཕཊ་སྭཱ་ཧཱ་ཞེས་ལན་གསུམ་བརྗོད་ནས་གནས་དང་བདག་ཉིད་དང་རྣལ་འབྱོར་བསྲུང་བར་བྱའོ། །ཧཱུཾ་གིས་ལྕི་བ་མངོན་པར་བསྔགས་ལ། ཨོཾ་ཨཱཿ་ཧཱུཾ་སརྦ་ཏ་ཐཱ་ག་ཏ་བི་ཤོ་དྷ་ན་བཛྲེ་སྭཱ་ཧཱ། ཞེས་བྱ་བས་ཆུ་ལ་བསྔགས་ལ་བཟླས་པའི་དཀྱིལ་འཁོར་བྱས་ནས། ཨོཾ་མེ་དི་ནཱི་བཛྲ་བནྡྷ་ཧཱུཾ་ཞེས་བྱ་བས་ས་གཞི་རྡོ་རྗེའི་རང་བཞིན་དུ་བལྟས་ལ་མེ་ཏོག་དོར་བར་བྱའོ། །དཀྱིལ་འཁོར་གཞལ་ཡས་ཁང་དུ་ཡིད་ཀྱིས་དམིགས་ལ། ཨོཾ་བཛྲ་པུཥྤེ་ཨཱཿ་ཧཱུཾ་ཞེས་བྱ་བ་མེ་ཏོག་ལ་བསྔགས་ལ། དབུས་ན་གནས་པའི་པདྨ་འདབ་མ་བཞི་པའི་དབུས་ཀྱི་ལྟེ་བ་ལ། ཨོཾ་ནཻ་རཱ་ཏཻམ་བཛྲ་པུཥྤེ་ཨཱཿ་ཧཱུཾ་སྭཱ་ཧཱ། ཞེས་བྱ་བས་སོ། །ཤར་གྱི་འདབ་མ་ལ་ཨ་བཛྲི་ཞེས་བྱ་བས་སོ། །ལྷོའི་འདབ་མ་ལ་ཨི་གཽ་རཱི་ཞེས་བྱ་བས་སོ། །ནུབ་ཀྱི་འདབ་མ་ལ་ཨཱི་བ་རི་ཡོ་གི་ནཱི་ཞེས་བྱ་བས་སོ། །བྱང་གི་འདབ་མ་ལ་ནི་ཨུ་བཛྲ་ཊཱ་ཀི་ཞེས་བྱ་བས་སོ། །དབང་ལྡན་མཚམས་སུ་ཨཱུ་པུཀྐ་སཱི་ཞེས་བྱ་བས་སོ། །མེའི་མཚམས་སུ་རྀ་ཤ་བ་རཱི་ཞེས་
― DTG010_Page_0456 ―
[མ་དཔེ་གཟིགས་ན་འདིར་གནོན།]
བྱ་བས་སོ། །བདེན་བྲལ་མཚམས་སུ་རཱྀ་ཙཎྜལཱི་ཞེས་བྱ་བས་སོ། །རླུང་གི་མཚམས་སུ་ལྀ་ཌོམྦི་ནཱི་ཞེས་བྱ་བས་སོ། །ཤར་གྱི་སྒོར་ནི་ལཱྀ་གཽ་རཱི་ཞེས་བྱ་བས་སོ། །ལྷོའི་སྒོར་ནི་ཨེ་ཙཽ་རཱི་ཞེས་བྱ་བས་སོ། །ནུབ་ཀྱི་སྒོར་ནི་ཨཻ་བེ་ཏཱ་ལཱི་ཞེས་བྱ་བས་སོ། །བྱང་གི་སྒོར་ནི་ཨོ་གྷསྨ་རཱི་ཞེས་བྱ་བས་སོ། །འོག་ཏུ་ནི་ཨཽ་བཧཱུ་ཙཪྻཱི་ཞེས་བྱ་བས་སོ། །སྟེང་དུ་ནི་ཨཱ་ཁེ་ཙཪྻཱི་ཞེས་བྱ་བས་བཞག་ལ་ཡང་དག་པར་མཆོད་པ་བྱ་སྟེ། ཨོཾ་བཛྲ་དྷཱུ་པེ་ཨཱཿ་ཧཱུཾ་ཞེས་བྱ་བས་མཆོད་པ་ཉེ་བར་བཀོད་པས་མཆོད་པ་བྱས་ལ། དཀོན་མཆོག་གསུམ་ལ་བདག་སྐྱབས་མཆི། །སྡིག་པ་ཐམས་ཅད་སོ་སོར་བཤགས། །འགྲོ་བའི་དགེ་ལ་རྗེས་ཡི་རང༌། །སངས་རྒྱས་བྱང་ཆུབ་ཡིད་ཀྱིས་གཟུང༌། །ཞེས་བྱ་བ་ལན་གསུམ་བརྗོད་པས་ཕྱག་བྱས་ནས། དཀྱིལ་འཁོར་ལ་ལག་པས་བཞག་ལ། །འགྲོ་བ་ཞེ་སྡང་མནན་མཐོང་ནས། འགྲོ་བ་ཞེ་སྡང་ཞི་བྱའི་ཕྱིར། །མགོན་པོ་བདག་མེད་མ་གཟུགས་ལྡན། །དེ་ཕྱིར་བདག་མེད་མ་ཕྱག་འཚལ། །ཞེས་པས་བསྟོད་ལ། ཨོཾ་བཛྲ་མུཿ་ཞེས་བྱ་བས་གཤེགས་སུ་གསོལ་ལོ། །དེའི་རྗེས་ལ་སེམས་ཅན་ཐམས་ཅད་ལ་ལྷའི་བདེ་བ་སྦྱར་བར་འདོད་པའི་བྱམས་པ་དང༌། སྡུག་བསྔལ་ཐམས་ཅད་བསལ་བར་འདོད་པའི་སྙིང་རྗེ་དང༌། ལྷའི་བདེ་བ་རྒྱུན་མི་འཆད་པར་འདོད་པའི་དགའ་བ་དང༌། བླ་ན་མེད་པའི་ལམ་ཉེ་བར་བསྡུ་བར་འདོད་པའི་བཏང་སྙོམས་བསྒོམ་པར་བྱའོ། །དེའི་རྗེས་ལ་ཡིད་ཀྱིས་ཆོས་ཐམས་ཅད་ལ་དམིགས་ལ་འདི་དག་སེམས་ཉིད་དེ་ཕྱི་རོལ་གྱི་བདེན་པ་མ་ཡིན་ན་ཡང༌། དོན་གྱི་རྣམ་པ་ལྟར་འཁྲུལ་པ་མ་ཡིན་ཏེ། དཔེར་ན་རྨི་ལམ་ལྟ་བུའོ་ཞེས་ངེས་པར་བྱས་ནས་འཁྲུལ་པས་སྒྲོ་བཏགས་པའི་ཆོས་ཐམས་ཅད་ཀྱི་རྣམ་པ་སྤངས་ལ། སྟོན་ཀའི་ཉི་མ་གུང་གི་དྲི་མ་མེད་པའི་ནམ་མཁའི་དཀྱིལ་ལྟ་བུའི་འོད་གསལ་བ་མངོན་སུམ་དུ་བྱས་ནས་སྔགས་འདིས་བྱིན་གྱིས་བརླབ་པར་བྱའོ། །ཨོཾ་ཤཱུནྱ་ཏཱ་ཛྙ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཡུད་ཙམ་སྟོང་པའི་ཡེ་ཤེས་ལ་ངལ་བསོས་ལ། དབྱངས་ཡིག་བཅོ་ལྔའི་ཕྲེང་བ་ཡོངས་སུ་གྱུར་པ་ལས་ཟླ་བའི་དཀྱིལ་འཁོར་གསལ་པོར་བསྒོམས་ལ། ས་བོན་ཨའི་འོད་ཀྱིས་དཔག་ཏུ་མེད་ཅིང་མཐའ་མེད་པའི་འཇིག་རྟེན་གྱི་ཁམས་གསལ་བར་བྱས་ནས་འགྲོ་བ་ཀུན་སངས་རྒྱས་ཀྱི་རང་བཞིན་དུ་
― DTG010_Page_0457 ―
[མ་དཔེ་གཟིགས་ན་འདིར་གནོན།]
བྱས་ནས་བཀུག་ལ་ས་བོན་གྱི་ཡི་གེར་ཞུགས་པར་བལྟས་ནས། བདག་མེད་མ་རྫོགས་པར་ཡུད་ཙམ་གྱིས་བསྒོམ་པར་བྱའོ། །ཆོས་དབྱིངས་རོ་ཡི་སྟེང་ན་གནས། །མགོ་སྐྱེས་སེར་པོ་གྱེན་དུ་བརྫེས། །ལྷ་མོ་ཕྱག་རྒྱ་ལྔ་འཛིན་མ། །མགོ་བོའི་ཕྲེང་བའི་རྒྱན་གྱིས་བརྒྱན། །སྐྱིལ་ཀྲུང་ཕྱེད་པའི་གར་གྱིས་གནས། །སྟག་གི་པགས་པའི་ན་བཟའ་མན་བས། །ཞལ་ནི་མཚེ་བ་གཙིགས་པ་ཅན། །དྲག་པོའི་གཟུགས་ཅན་སྤྱན་གསུམ་པ། །གཡོན་ན་ཐོད་པ་ཁ་ཊྭཱཾ་ག །གཡས་པ་ན་ནི་གྲི་གུག་གོ །མི་ཡི་རུས་པའི་རྒྱན་གྱིས་བརྒྱན། །རི་བོང་ཅན་འོད་ཟླ་བའི་གདན། །དེའི་རྗེས་ལ་བཅོམ་ལྡན་འདས་མའི་ཐུགས་ཀའི་ཟླ་བ་ལ་གྲི་གུག་དེ་ལ་ཡང་ཡི་གེ་ཨའོ། །མགོ་བོ་ལ་པདྨ་འདབ་མ་སུམ་ཅུ་རྩ་གཉིས་པའི་ལྟེ་བ་ལ་ཧཾ་ངོ༌། །མགྲིན་པར་འདབ་མ་བཅུ་དྲུག་པ་ལ་ཨོཾ་མོ། །སྙིང་གར་པདྨ་འདབ་མ་བརྒྱད་པ་ལ་ཧཱུཾ་ངོ༌། །ལྟེ་བར་འདབ་མ་དྲུག་ཅུ་རྩ་བཞི་པ་ལ་ཨེཾ་བསྒོམ་པར་བྱའོ། །དེའི་རྗེས་ལ་སྙིང་གའི་ས་བོན་གྱི་འོད་ཀྱིས་བཀུག་པའི་སངས་རྒྱས་ཐམས་ཅད་ནམ་མཁའི་དཀྱིལ་དུ་བལྟས་ལ། དེ་བཞིན་གཤེགས་པ་ཐམས་ཅད་ཀྱིས་བདག་ལ་དབང་བསྐུར་དུ་གསོལ་བ་གདབ་པར་བྱའོ། །དེ་ནས་དེ་དག་གིས་དེ་བཞིན་གཤེགས་པ་ལྔའི་རང་བཞིན་གྱི་བུམ་པས་དབང་བསྐུར་བར་བྱའོ། །མེ་ཏོག་གི་ཆར་དང་རྔ་སྒྲ་དང་གུར་ཀུམ་གྱི་ཆར་ཡང་འབབ་པར་འགྱུར་རོ། །སྤྱི་བོར་ནི་མི་བསྐྱོད་པ་འབྱུང་བར་འགྱུར་རོ། །དེའི་རྗེས་ལ་མིག་ལ་རྡོ་རྗེ་མའོ། །རྣ་བ་ལ་ནི་བདག་མེད་མའོ། །སྣ་ལ་ནི་གསང་བའི་གཽ་རཱི་མའོ། །ལྕེ་ལ་ནི་ཆུའི་རྣལ་འབྱོར་མའོ། །ལུས་ལ་ནི་རྡོ་རྗེ་མཁའ་འགྲོ་མའོ། །ཡིད་ལ་འང་བདག་མེད་མ་སྟེ་དེའི་བདག་ཉིད་དུ་བསམ་པར་བྱའོ། །ཡང་ཨོཾ་མགོ་བོ་ལའོ། །མགྲིན་པར་ཨཱཿ་འོ། །སྙིང་གར་ཧཱུཾ་བསམ་པར་བྱའོ། །གལ་ཏེ་བསྒོམས་པས་སྐྱོ་བར་གྱུར་ན་སྔགས་བཟླ་བར་བྱའོ། །དེའི་རིམ་པ་ནི་འདི་ཡིན་ཏེ། སྙིང་གའི་ཟླ་བ་ལ་ས་བོན་གྱི་ཡི་གེ་བཅོ་ལྔ་མར་མེའི་ཕྲེང་བ་བཞིན་དུ་འབར་བ་ཡིད་ཀྱིས་བྲིས་ལ་རིམ་གྱིས་ཀློག་པ་ལྟར་བསྔགས་ནས་བཟླས་པར་བྱའོ། །ལྡང་བར་འདོད་ན་སྨོན་ལམ་གདབ་པར་བྱ་སྟེ། སངས་རྒྱས་ཀུན་གྱིས་ཐམས་ཅད་ཀྱི། །རྡོ་རྗེ་འཆང་བ་ཆེན་
― DTG010_Page_0458 ―
[མ་དཔེ་གཟིགས་ན་འདིར་གནོན།]
པོའི་གནས། །དགེ་བ་འདིས་ནི་ཐོབ་གྱུར་ནས། །འགྲོ་རྣམས་ཀྱིས་ཀྱང་ཐོབ་པར་ཤོག །བྱང་ཆུབ་དག་ཏུ་གང་སྤྱོད་དང༌། །གང་ཡང་རྫོགས་པའི་བྱང་ཆུབ་སྤྱོད། །བྱང་ཆུབ་རྡོ་རྗེས་གང་བསྔགས་པ། །གཉིས་མེད་སྤྱོད་དེ་བདག་འགྲུབ་ཤོག །ཅེས་བྱ་བས་སོ། །དེ་བཞིན་དུ་ཐུན་གཞན་ལ་ཡང་ལྷའི་གཟུགས་ཀྱིས་གནས་པར་བྱའོ། །ཉལ་བའི་དུས་སུ་ཡང་ལྷན་ཅིག་སྐྱེས་པའི་དགའ་བ་མངོན་སུམ་དུ་བྱས་ལ་ཉལ་བར་བྱའོ། །དེ་ལྟར་ཉིན་ཏེ་ཞིང་ཇི་སྲིད་འགྲུབ་པའི་མཚན་མ་མཐོང་གི་བར་དུ་བྱའོ། །དེ་ནས་རྒྱུད་ནས་ཇི་སྐད་བསྟན་པ་བཞིན་བསྒྲུབ་པར་བྱའོ། །བུད་མེད་སོགས་ཀྱིས་རྒྱས་པ་དག །ཕལ་ཆེར་གཟུང་བར་དཀའ་བསམས་ནས། །ཞི་བའི་ཞབས་སོགས་ཀྱིས་བསྟན་པའི། །རྣལ་འབྱོར་བསྡུས་པ་བདག་གིས་བྱས། །བདག་མེད་མའི་སྒྲུབ་པའི་ཐབས་མདོར་བསྡུས་པ་སློབ་དཔོན་ཀྲྀཥྞ་པཎྚི་ཏས་མཛད་པ་རྫོགས་སོ།། །།
| 
