བརྒྱད་པ། གཏུམ་ཞིང་རབ་ཏུ་གཏུམ་པའི་ཆོ་ག― DTG010_Page_0468 ―
[མ་དཔེ་གཟིགས་ན་འདིར་གནོན།]
དེ་ནས་མཚན་ཉིད་ཇི་ལྟ་བ་བརྗོད་པའི་སྔགས་པས་སྔར་གསུངས་པའི་བྱ་བ་ཐམས་ཅད་བྱ་སྟེ། བདག་ཉིད་བདག་མེད་མར་མོས་ཤིང་སྤྲུལ་པའི་འཁོར་ལོ་ལ་མཆོག་གི་ཐབས་དང་ཤེས་རབ་ཀྱི་བདག་ཉིད་ཟླ་བ་ཉི་མའི་སྦྱོར་བ་ལས་ཡང་དག་པར་བྱུང་བ་རླུང་མེད་པའི་མར་མེ་མི་གཡོ་བ་ལྟར་གྱེན་དུ་འབར་བས་མུན་པའི་ཚོགས་མ་ལུས་པ་ཞི་ཞིང་ཡུལ་དང་དབང་པོའི་གྲོང་ཁྱེར་བསྲེགས་ཏེ། གཞན་གྱི་རྣལ་འབྱོར་མ་རབ་ཏུ་འཇུག་པ་ཡང་འགོག་ཅིང་རྣམ་པར་རྟོག་པ་ཉུང་བ་མ་ཡིན་པ་ཟད་པར་བྱེད་དེ། ཤིང་སྐམ་པོའི་ཡལ་གའི་ཚོགས་ལ་ཕུལ་དུ་གྱུར་པའི་ཤེས་རབ་མེའི་ཚོགས་སུ་འབར་བས་ཡང་བདག་མེད་མའི་རང་བཞིན་གཏུམ་མོ་ལྟར་མི་རེག་པ་གཏུམ་ཞིང་རབ་ཏུ་གཏུམ་པ་བལྟའོ། །དེ་ཡང་ཡིད་ཆགས་པར་གྱུར་པ་དང་བདེ་བའི་འཁོར་ལོ་ནམ་མཁར་གནས་པའི་ངང་པ་ཕྱེ་མ་ལེ་བ་ལྟར་ལེགས་པར་སྣུམ་ཞིང་མར་ཁུའི་མེར་སྣང་བའི་སྲེད་པས་བལྟ་བ་དང་ཆགས་པས་ཞུ་སྟེ་དེར་ཐིམ་པར་རྣམ་པར་བྱའོ། །དེ་ནས་དེའི་མེ་ལ་མར་བཅུག་པ་ལྟར་རབ་ཏུ་འབར་ཞིང་སྡིག་པ་དང་ཉོན་མོངས་པས་གདུངས་པ་མ་ལུས་པ་བསལ་ཏེ་རྣམ་པར་སྤྲོས་པས་བདེ་བ་ཆེན་པོ་རྒྱས་པར་སྤྲོ་བ་གཟེར་ལྟར་དམིགས་པ་ཐམས་ཅད་ཞི་སྟེ། ― DTG010_Page_0469 ―
[མ་དཔེ་གཟིགས་ན་འདིར་གནོན།]
མི་དམིགས་པ་དང་བསམ་དུ་མེད་པ་དང་བརྗོད་དུ་མེད་པར་གྱུར་ཏེ་དེར་ཅི་ནུས་ཙམ་གྱི་བར་དུ་བསྒོམ་མོ། །དེ་དག་ནི་བདག་མེད་མའི་མན་ངག་ལས་གཏུམ་ཞིང་རབ་ཏུ་གཏུམ་པའི་ཆོག་སྟེ་བརྒྱད་པའོ།། །། |
