བཅུ་གཉིས་པ། ལྷན་ཅིག་སྐྱེས་པ་གཉིས་བསྒོམ་པའི་ཆོ་ག― DTG010_Page_0471 ―
[མ་དཔེ་གཟིགས་ན་འདིར་གནོན།]
དེ་ནས་སྔགས་པས་དབང་དུ་གྱུར་པ་བསམ་གཏན་གྱི་གནས་སུ་རབ་ཏུ་ཞུགས་ནས་གནས་དང་བདག་དང་རྣལ་འབྱོར་བསྲུང་བའི་ཆོ་ག་བྱ་ཞིང་དཀྱིལ་འཁོར་མཆོད་པའི་ཆོ་ག་ཡང་བྱ་སྟེ། ཆོས་ཐམས་ཅད་རང་བཞིན་གྱིས་རྣམ་པར་དག་བ་ཨོཾ་པྲ་ཀྲྀ་ཏི་པ་རི་ཤུདྡྷོ྅ཧཾ་ཞེས་བརྗོད་དེ་བདག་མེད་པར་བལྟའོ། །དེ་ནས་བདག་མེད་མ་དེ་ནུ་མ་དེ་ནུ་མ་ནང་དུ་ཐིམ་པར་གྱུར་ཅིང་རང་གི་པདྨའི་ཟེ་འབྲུ་ལས་སྐྱེས་པ་རྡོ་རྗེ་འགྲམ་གཉིས་ནི་དྲིལ་བུ་སྟེ་ཆགས་པ་དང་བཅས་ཤིང་ཆགས་པའི་ལྟ་བས་བལྟས་པས་གང་ཡང་རུང་བ་སྟེ་ཌོམྦི་ནཱིར་བལྟའོ། །དེ་ཡང་སྦྱོར་བ་དང་མཐོང་བ་དང་བསྒོམ་པ་དང་ཁྱད་པར་དང་མཐར་ཕྱིན་པའི་ལམ་གྱི་ངོ་བོ་སྟེ། རྣམ་པ་སྣ་ཚོགས་ལ་སོགས་པའི་སྐད་ཅིག་མའི་ཁྱད་པར་ལས་སོ། །ཟླ་བ་གང་བ་ལྟ་བུ་ལོངས་སྤྱོད་རྫོགས་པའི་སྐུའི་རང་བཞིན་ཅན་ལྷན་ཅིག་སྐྱེས་པ་ཐམས་ཅད་ཀྱི་རང་བཞིན་དཔལ་ཧེ་རུ་ཀ་ལ་འཁྱུད་པ་ནི་ན་མ་མཁའ་ལྟ་བུའི་ཆོས་ཀྱི་སྐུའི་རང་བཞིན་ལྷན་ཅིག་སྐྱེས་པ་ཤེས་རབ་ཀྱི་ངོ་བོར་བདག་མེད་མ་མངོན་སུམ་དུ་བྱའོ། །མངོན་དུ་བྱས་པ་དང༌། །ཡན་ལག་དང༌། ཉིན་ལག་ཐམས་ཅད་ལའོ། །དེ་ལས་ཕྱོགས་བཅུའི་དངོས་པོ་ཐམས་ཅད་དུ་སྤྲོས་ཏེ། རྣམ་པར་སྤྲོས་པ་ཐམས་ཅད་བདག་གི་རང་བཞིན་དུ་བྱའོ། །དེས་བདག་ཏུ་བྱས་པ་དང༌། སེམས་ཙམ་གྱི་བདག་ཉིད་དུ་རྣམ་པར་བསམ་མོ། །དེ་བསམས་པ་དང་རྟོག་པ་མེད་པར་བྱའོ། །དེ་ལྟར་ཡང་བསྒོམ་པ་ཐམས་ཅད་ལ་ཆོ་ག་འདིས་བསྒོམ་མོ། །དེ་དག་ནི་བདག་མེད་མའི་མན་ངག་ལས་ལྷན་ཅིག་སྐྱེས་པ་གཉིས་བསྒོམ་པའི་ཆོག་སྟེ་བཅུ་གཉིས་པའོ།། །། |
