བཅུ་གསུམ་པ། ས་བོན་ལ་སོགས་པའི་ཕན་ཡོན་རྣམ་པར་བཞག་པའི་ཆོ་ག

[Full Size]

དེ་ནས་ཚོགས་བསགས་པའི་སྔགས་པས་ཕྱག་རྒྱ་ཆེན་པོའི་དངོས་

[Full Size]

གྲུབ་འདོད་པས་ཇི་སྐད་གསུངས་པའི་རྣལ་འབྱོར་གང་ཡང་རུང་བའི་སྦྱོར་བ་ལ་དམིགས་ཤིང་སེམས་བརྟན་པར་བྱ་སྟེ། བརྟན་པར་གྱུར་པ་དང་སེམས་ཀྱི་མཚན་མ་བརྟག་སྟེ་མཚན་མ་ཡང་ལྷུན་གྱིས་གྲུབ་པར་སྐྱེས་པའི་དགའ་བའི་ཤུགས་ཀྱིས་རྒྱུན་གང་གི་ཚེ་མངོན་སུམ་དུ་གསལ་བར་སྣང་བར་གྱུར་པ་དེ་ཡིན་ཏེ། རྔ་དང་རྔ་བོ་ཆེ་དང་རྔ་ཟླུམ་དང་ཟངས་དུང་ལ་སོགས་པའི་གསལ་བར་གྲག་པའི་སྒྲ་རྣམས་ཀྱིས་རིག་པ་མི་འབྱུང་བ་ཡང་ཡིན་ནོ། །ལྕག་དང་ཐལ་མོ་དང་ཁུ་ཚུར་ལ་སོགས་པས་ཚོར་བ་མི་འབྱུང་པའོ། །སྦྲང་བུ་དང་སྦྲང་མ་ལ་སོགས་པས་ཀྱང་གནོད་པ་མི་འབྱུང་བའོ། །དེའི་ཆེ་སེམས་བརྟན་པར་གྱུར་པར་ཤེས་པར་བྱའོ། །དེ་ནས་བརྟན་པར་གྱུར་པའི་རྣལ་འབྱོར་པས་རི་ཕུག་གམ་ཆུ་འགྲམ་མམ། རྒྱ་མཚོའི་འགྲམ་མམ་དུར་ཁྲོད་དམ་བཞི་མདོའམ་མ་མོའི་ཁྱིམ་མམ་ལྷ་ཁང་ངམ་ལྷ་གནས་རྙིང་པའམ་ལྡུ་མ་ར་དག་སྟེ། རྗེས་སུ་མཐུན་ཞིང་བདེན་པ་འཚེ་བ་མེད་པ་དྲི་མ་མེད་པའི་ཆུ་དང་ལྡན་པ་མེ་ཏོག་དང་འབྲས་བུའི་ཚོགས་ཀྱིས་བརྒྱན་པའི་ཤིང་གི་ཕྲེང་བས་བསྐོར་བའི་ནགས་ཚལ་གྱི་གནས་སུ་གནས་ཏེ་ཡི་དམ་གྱི་རྣལ་འབྱོར་ལ་དམིགས་ཤིང་དངོས་གྲུབ་ཐམས་ཅད་བསྒྲུབ་པར་བྱའོ། །གྲུབ་པ་དང་ས་ལ་སོགས་པ་འབྱུང་བ་ཆེན་པོ་རྣམས་རིམ་བཞིན་དུ་གཅིག་ལ་གཅིག་ཐིམ་སྟེ་དེས་ཀྱང་མཚན་མ་ཉེ་བར་མཚོན་ཏོ། །མཚན་མ་རྣམ་པར་ལྔ་ཡིན་ཏེ། དེ་བཞིན་དུ་ས་ཐིམ་པས་སྨིག་རྒྱུའི་རྣམ་པའི་མཚན་མ་སྐྱེ་བར་བྱེད་དོ། །ཆུ་ཐིམ་པས་ནི་དུ་བའི་རྣམ་པའོ། །མེ་ཐིམ་པས་ནི་སྲིན་བུ་མེ་ཁྱེར་གྱི་རྣམ་པའོ། །རླུང་གིས་ནི་མར་མེ་ལྟ་བུའོ། །དེ་ན་སྟོན་ཀའི་ནམ་མཁའི་དཀྱིལ་ལྟ་བུ་འོད་གསལ་བ་སྣང་བ་མེད་པ་གསལ་བ་ཙམ་དུ་གསལ་ལོ། །དེ་ཡང་གསུངས་པ། དང་པོ་སྨིག་རྒྱུ་ལྟ་བུ་སྟེ། །གཉིས་པ་དུ་བའི་རྣམ་པ་ཡིན། །གསུམ་པ་སྲིན་བུ་མེ་ཁྱེར་འདྲ། །བཞི་པ་མར་མེ་འབར་བའོ། །ལྔ་བ་ཡང་ནི་གསལ་བར་ལྡན། །སྤྲིན་མེད་ནམ་མཁའ་ལྟ་བུའོ། །དེ་ནི་ཐིམ་པའི་མཚན་མ་སྟེ། །འབྱུང་བ་རྣམས་ནི་ཡེ་ཤེས་སོ། །ཞེས་པའོ། །དེ་ལྟར་ཤེས་ཤིང་མཚན་མ་རྙེད་པ་མཉམ་པར་གཞག་པའི་སྔགས་པས་ས་བོན་གྱི་གཟུགས་སམ་ཐིག་ལེའི་གཟུགས་སམ་མཚན་མ་ཕྱ་མོའི་གཟུགས་

[Full Size]

ཏེ། ལུས་དང་ཡན་ལག་ལ་སེམས་བརྟན་པར་གྱུར་པས་བཞག་ན་འགྲུབ་པའོ། །དེ་ལ་སེམས་ལྷ་མོའི་མཁར་དུ་བཀོད་དེ་ཁམས་གསུམ་དུ་སོང་བས་ཁ་དོག་ལེགས་པའམ་མི་ལེགས་པའི་གཟུགས་མངོན་སུམ་དུ་མཐོང་བར་འགྱུར་རོ། །ཨོ་དྱ་ན་ནམ་གོ་དཱ་བ་རཱིར་འཇིག་རྟེན་གསུམ་དུ་གནས་པའི་ཟིན་པ་དང༌། མ་ཟིན་པ་དང༌། གཉི་གའི་དབྱེ་བས་ཕྱེ་བའི་སྒྲ་ཐམས་ཅད་ཐོས་ཤིང་སྒྲ་མ་ལུས་པ་གང་གི་ཡིན་པ་ཤེས་པར་འགྱུར་རོ། །ཀོ་ས་ལ་རུ་ཞིམ་པོ་ལ་སོགས་པའི་དབྱེ་བས་ཕྱེ་བའི་དྲི་ལྷན་ཅིག་པ་དང་སྦྱར་བ་ཅན་སྣོམ་པར་འགྱུར་རོ། །ཀ་ལིངྒ་ར་མངར་བ་ལ་སོགས་པའི་དབྱེ་བས་ཕྱེ་བའི་རོམ་ལུས་པ་མྱོང་བར་བྱེད་དོ། །བྱང་ཆུབ་ཀྱི་ཡན་ལག་ལ་རྩུབ་པ་ལ་སོགས་པའི་དབྱེ་བས་ཕྱེ་བའི་རེག་བྱ་མ་ལུས་པ་ལ་རེག་པར་འགྱུར་རོ། །དེ་བཞིན་ཏྲི་ཤ་ཀུ་ནེར་ལྷའི་བཙུན་མོ་དགུག་པ་སྤྲུལ་པ་ལོངས་སྤྱོད་དོ། །ཀཱཉྩི་རུ་སྔོན་གྱི་གནས་དང་ཕ་རོལ་གྱི་སེམས་ཤེས་པའོ། །ལམྦཱ་ཀ་རུ་བསྟན་བཅོས་ཐམས་ཅད་རིག་པ་དང་ལྷའི་སྐད་དང་སྔགས་ཀྱི་ཡང་སྐད་རྣམས་སོ། །རཱ་མེ་དབང་ཕྱུག་ཏུ་ཉི་མ་རེངས་པ་དང་འཆར་བ་ཡང་ནུབ་པར་བྱེད་དོ། །དེའི་སྟེང་དུ་ཟླ་བའོ། །དེའི་སྟེང་དུ་སྐར་མའི་འཁོར་ལོ་རྣམས་སོ། །པོ་ལ་གི་རི་རུ་ལྷ་ཐམས་ཅད་མཐོང་ཞིང་བདག་གི་བཀའ་བསྒོ་བ་ཡང་འགྲུབ་པར་བྱེད་དོ། །ཛཱ་ལནྡྷ་ར་རུ་དུས་གསུམ་དུ་མཐོང་བར་འགྱུར་རོ། །དེ་བཞིན་དུ་སྤྲུལ་པའི་འཁོར་ལོར་སྤྲུལ་པའི་སྐུ་ལ་ཐོབ་ཅིང་ཆོས་ཀྱི་འཁོར་ལོར་ནི་ཆོས་ཀྱི་སྐུའོ། །ལོངས་སྤྱོད་ཀྱི་འཁོར་ལོར་ནི་ལོངས་སྤྱོད་རྫོགས་པའི་སྐུའོ། །བདེ་བ་ཆེན་པོའི་འཁོར་ལོར་ནི་བདེ་བ་ཆེན་པོའི་སྐུ་འཐོབ་པར་བྱེད་དོ། །དེ་ལྟར་སྐུ་བཞི་རྙེད་པས་སངས་རྒྱས་རྡོ་རྗེ་འཛིན་པ་དང༌། བདག་མེད་མའི་གོ་འཕང་ཐོབ་པར་འགྱུར་ཏེ། ཡང་དག་པའི་བྱང་ཆུབ་ཐོབ་པས་སྒྲིབ་པ་ཐམས་ཅད་རབ་ཏུ་ཞི་ཞིང་གཟུངས་ཐམས་ཅད་དང་ས་དང་ཕ་རོལ་ཏུ་ཕྱིན་པ་དང༌། འཇིག་རྟེན་དང༌། འཇིག་རྟེན་ལས་འདས་པའི་དངོས་གྲུབ་མངོན་སུམ་དུ་བྱེད་པར་འགྱུར་ལ་དངོས་གྲུབ་མངོན་དུ་གྱུར་པས་གཞན་གྱི་དོན་མཐར་ཕྱིན་པར་འགྱུར་རོ། །དེ་དག་ནི་བདག་མེད་མའི་མན་ངག་ལས་ས་བོན་ལ་སོགས་པའི་ཕན་ཡོན་རྣམ་པར་གཞག་པའི་ཆོ་ག་སྟེ་བཅུ་གསུམ་པའོ།། །།