སྦྱོར་བ་ཡན་ལག་དྲུག་པའི་འགྲེལ་པ།
ཉི་མའི་དཔལ་ཡེ་ཤེས་ཀྱིས་མཛད།
རྒྱ་གར་སྐད་དུ། ཥ་ཌངྒ་ཡོ་ག་ཊཱི་ཀཱ། བོད་སྐད་དུ། སྦྱོར་བ་ཡན་ལག་དྲུག་པའི་འགྲེལ་པ། དཔལ་དུས་ཀྱི་འཁོར་ལོ་ལ་ཕྱག་འཚལ་ལོ། །དུས་ཀྱི་འཁོར་ལོའི་དབང་ཕྱུག་དང༌། །ཡོན་ཏན་ཆེ་བའི་བླ་མ་ལ། །བཏུད་དེ་སྦྱོར་བ་དྲུག་པ་ཡི། །ཡོན་ཏན་རྫོགས་བྱེད་འགྲེལ་པ་བརྩམ། །འདིར་ཕྱི་ནང་གི་རིམ་པ་ལ་སྦྱངས་པའི་ཐུགས་དང་ལྡན་པའི་སློབ་དཔོན་དཔེ་མེད་འཚོ་དམིགས་པའི་དེ་ཁོ་ན་ཉིད་བསྒོམ་ཞིང༌། དཔལ་ཁར་ས་པ་ཎིའི་དྲུང་དུ་ལོ་བཅུ་གཉིས་བཞུགས་ཀྱང་རྟོགས་པའི་ཁྱད་པར་མ་ཐོབ་པས་ཡི་ཆད་ནས་གཉིད་དུ་སོང་བ་ལ་རྡོ་རྗེ་རྣལ་འབྱོར་མས་གསུང་བྱུང་སྟེ། བུ་བི་ཀྲམ་པཱུ་རར་སོང་ཤིག །དེར་ཁྱོད་ལ་རྟོགས་པའི་ཁྱད་པར་འབྱུང་བར་འགྱུར་ཞེས་སོ། །དེས་དེའི་བཀའ་སྤྱི་བོར་བཞག་ནས། སློབ་མ་ཚོད་དཔོན་གྱི་བུ་པཎྜི་ཏ་ཆེན་པོ་དཔལ་འཛིན་དང་བི་ཀྲ་མ་པཱུ་རར་གཤེགས་སོ། །དེར་དུས་བཟང་པོར་དགེ་སྦྱོར་ལ་བཞུགས་པ་ལ་ནམ་ཕྱེད་ལ་ཨ་བ་དྷཱུ་ཏཱིའི་ཚུལ་གྱི་རྡོ་རྗེ་འཆང་གིས་དངོས་སུ་གདམས། དེའི་གདམས་པ་ཐོབ་པ་ཙམ་གྱིས་ཏིང་ངེ་འཛིན་ལ་སྙོམས་པར་ཞུགས་སོ། །དེ་ནས་བཅོམ་ལྡན་འདས་དེ་ཉིད་དུ་མི་སྣང་བར་གྱུར། ནམ་ལངས་པ་དང་དེ་འང་ཏིང་ངེ་འཛིན་ལས་ལངས་ནས་བདག་ཉིད་ཆེན་བོ་བླ་མ་དེའི་གྲོགས་མཛད་པའི་དཔལ་འཛིན་པ་ལ་གདམས་པ་གནང་ངོ༌། །དེས་ཀྱང་ཐུགས་རྗེ་དང་སྐལ་པར་ལྡན་པར་པཎྜི་ཏ་ཆེན་པོ་འོད་བྱེད་ལྷ་ལ་གནང༌། དེས་ཀྱང་པཎྜི་ཏ་ཆེན་པོའི་བླ་མ་སྙིགས་མའི་དུས་ཀྱི་ཐམས་ཅད་མཁྱེན་པ་ཆོས་ཀྱི་འབྱུང་གནས་ཞི་བ་ལ་བཤད། དེས་ཀྱང་བརྗོད་དུ་
མེད་པའི་ཡོན་ཏན་གྱི་འབྱུང་གནས་ཀྱི་བླ་མ་མཉེས་པར་བྱེད་པ་ལ་བརྩོན་པ་ཉི་མ་དཔལ་བདག་གིས་དེ་ཁོ་ན་ཉིད་ཐོབ་བོ། །འདི་ནི་བླ་མའི་བརྒྱུད་པའོ། །དེ་ལྟར་སློབ་མས་གསོལ་བ་བཏབ་པའི་དབང་གིས་སློབ་དཔོན་དཔེ་མེད་འཚོ་དེས་རྡོ་རྗེ་འཛིན་པའི་ས་གོ་འཕང་ཐོབ་པའི་རྒྱུ་སྦྱོར་བ་ཡན་ལག་དྲུག་པ་བྱེད་པར་འདོད་པས་རང་གི་ཡི་དམ་ལ་བསྟོད་པ་བྱེད་པའི་སྒོ་ནས་ཡན་ལག་དྲུག་པ་བརྗོད་དེ། སྒྲིབ་པ་ལ་སོགས་པའོ། །དེ་ཁོ་ན་ཉིད་ལ་བསྒྲིབས་པས་སྒྲིབ་པ་ཉིད་ཁོ་ན་སྤྲིན་གྱི་ཚོགས་ཏེ་དེ་དང་བྲལ་བས་གྲངས་མ་ལུས་པ་རྟོགས་པ་དང༌། དབུགས་རླུང་འགགས་པས་མཐར་ཐུག་པའི་བར་སྣང་ལ་འཆར་བ་སྤྱན་རས་གཟིགས་ནི་སངས་རྒྱས་ཏེ། དེ་ཁོ་ན་གང་བའི་ཟླ་བ་ཡིན་པས་སྐྱེ་བོ་རྣམས་དགའ་བར་བྱེད་པས་མཛེས་པའོ། །ངེས་དོན་གྱི་གཟུང་འཛིན་གྱི་སྒྲོ་བཏགས་པ་དང་བྲལ་བ་སྟེ། འདིས་སོ་སོར་རྟོག་པ་དང་བསམ་གཏན་གྱི་ཡན་ལག་བཤད་དོ། །གྲངས་མ་ལུས་པའི་རྟོག་པ་ནི་ཆགས་པ་དང་བཅས་པའི་སེམས་ཀྱི་སྐད་ཅིག་སྟོང་ཕྲག་བརྒྱད་ཅུ་རྩ་བཞིའི་མཚན་ཉིད་ཅན་དང༌། འབྱུང་བ་དང༌། རྔུབ་པའི་རླུང་འགགས་པའི་བར་སྣང་དུ་རྣམ་པ་ཐམས་ཅད་དུ་མཐོང་བའི་སྣ་ཚོགས་གཟུགས་འདིས་སྲོག་རྩོལ་དང༌། འཛིན་པ་དང༌། རྗེས་སུ་དྲན་པ་བཤད་དེ། འཆར་བའི་གཏུམ་མོ་ལ་རེག་པས་བདེ་བ་ཆེན་པོའི་འཁོར་ལོ་ལས་སོ། །སངས་རྒྱས་ཐམས་ཅད་ཀྱི་སྤྱི་གཙུག་དང་རྡོ་རྗེའི་རྩེ་མོས་འཛིན་པས་འཇིག་རྟེན་དབང་ཕྱུག །དགའ་བ་བཅུ་དྲུག་གིས་གང་བའི་ཟླ་བ་དེ་ལྟ་བུར་མཛེས་པའོ། །འདིས་ཏིང་ངེ་འཛིན་གྱི་ཡན་ལག་བཤད་དོ། །ད་ནི་ཡན་ལག་དྲུག་པའི་བྱ་བ་འགལ་ཚབས་ཅན་དུ་བཤད་དོ། །སྲིད་ཞི་ལ་སོགས་པའོ། །སྲིད་པ་ནི་སྐྱེ་བ་དང༌། འཆི་བའི་རྒྱུན་ཀུན་རྫོབ་དང༌། ཞི་བ་ནི་དོན་དམ་པའི་བདེན་པ་སྟེ། དེ་གཉིས་ཀྱི་དམིགས་པ་དང་བྲལ་ཡང་དེ་གཉིས་ལས་ཐ་མི་དད་པས་ཟུང་དུ་འཇུག་པའོ། །ཁམས་གསུམ་ལ་ཁྱབ་པས་ཁྱབ་བྱེད། སྟོང་པ། ཤིན་ཏུ་སྟོང་པ། སྟོང་ཉིད་ཆེན་པོ། ཐམས་ཅད་སྟོང་པས་སྟོང་པའོ། །མེ་ལོང་གི་གཟུགས་བརྙན་ལྟ་བུའི་རྣམ་པ་ཐམས་ཅད་དང་ལྡན་པའོ། །རྟོག་པ་མེད་པའི་ཡེ་ཤེས་མཐར་ཐུག་གི་གནས་སྐབས་པ་སྟེ། དེའི་དབང་ཕྱུག་བཅུ་གཉིས་པའོ། །རབ་ཏུ་མི་གནས་ནི་དམིགས་པ་ལ་མི་ཆགས་པས་སོ། །གཡོ་མེད་ནི་མ་ཉམས་པས་སོ། །གཉིས་དང་བྲལ་བས་རྟོག་མེད། མཁས་པ་ནི་རྟོག་མེད་ཀྱི་ཡེ་ཤེས་
རྟོགས་པ་ལ་འདོད་པའི་ཡོན་ཏན་ལྔའི་བདེ་བ་མ་ཉམས་པ་སྟོན་པའོ། །སེམས་མིན་ནི་རྟོག་པ་འགག་པའི་སེམས་སོ། །དེ་ལས་འཆར་བས་འགྲོ་བས་བསྟེན་བར་བྱ་བས་མགོན་ཏེ། དེས་འགྲོ་བ་དག་གི་སེམས་བྱིན་གྱིས་རློབ་པར་སྨོན་པའོ། །ཡོད་པའི་ཡོན་ཏན་བརྗོད་པ་སྔོན་དུ་འགྲོ་བས་བླ་མ་ལ་ཕྱག་འཚལ་བ་བཤད་དེ་ཡོད་རྟོག་ལ་སོགས་པའོ། །ཅུང་ཟད་ཀྱང་ཡོད་པར་རྟོག་ན་རྟག་པའི་མཐར་འགྱུར་ཏེ། དེ་ཡང་མ་བརྟགས་པར་དོར་ན་ཆད་པའི་མཐའ་སྟེ་བསྐལ་པ་དུ་མར་མནར་མེད་དུ་སྡུག་བསྔལ་མྱོང་བའི་རྒྱུའོ། །དེ་ལྟར་དམ་པའི་ལམ་སུབས་པར་གྱུར་པ་ལས་དཔལ་ལྡན་བླ་མ་གང་གིས་སེམས་ལས་འདས་པ་སེམས་མ་ཡིན་པའི་སེམས་ཀྱི་རང་བཞིན་སྟོང་པར་སྡུག་བསྔལ་ལ་སོགས་པའི་རྣམ་པ་ཐམས་ཅད་དང་ལྡན་པ། ནམ་མཁའི་གཟུགས་བརྙན་ནི་སྣ་ཚོགས་པའི་གཟུགས་སློབ་མ་དམ་པ་ལ་སྟོན་བར་བྱེད་པའི་བླ་མ་དེ་ལ་རབ་ཏུ་དགའ་བར་བྱེད་པས་ལུས་ངག་ཡིད་ཀྱི་སྒོ་ནས་ཕྱག་འཚལ་ལོ། །འོ་ན་བླ་མའི་དྲིན་ཁོ་ནས་ལམ་དམ་པ་ཐོབ་ན་དེ་རང་ལ་བསྔགས་པས་མཆོག་གི་ཡན་ལག་དྲུག་པ་བརྗོད་པས་ཅི་བྱ་ཞེ་ན། སྨྲས་པ། དེ་ལྟ་ལ་སོགས་པའོ། །ཇི་ལྟ་བའི་ལམ་སྟོན་པ་པོའི་བླ་མའི་ཡོན་ཏན་བརྗོད་པ་ནི་རང་གི་རྟོག་པ་བརྗོད་པ་ཁོ་ན་སྟེ། གང་གི་ཕྱིར་འབར་བའི་མེ་མེད་ན་དུ་བ་འབྱུང་བ་གསལ་བར་མཐོང་བ་མི་སྲིད་པ་བཞིན་ནོ། །འོན་ང་རྒྱལ་ཞི་བའི་རྒྱུ་དེ་ཁོ་ན་ཉིད་ཀྱི་ལམ་རྟོགས་པ་ཉིད་ལ་བདག་དེ་ཁོ་ན་ཉིད་རིག་པའོ་ཞེས་ང་རྒྱལ་མི་རིགས་ཤེ་ན། སྨྲས་པ། རྟོགས་བརྗོད་ལ་སོགས་པའོ། །བདག་གི་རྟོག་པའི་ང་རྒྱལ་འདི་སྐྱོན་དུ་མི་འགྱུར་ཏེ། གང་གི་ཕྱི་ཐར་པ་འདོད་པ་རྣམས་འཇུག་པར་བྱེད་པས་གཞན་དོན་གྱི་རྒྱུ། རྙེད་པ་ལ་སོགས་པའི་ཕྱིར་ནི་མ་ཡིན་ནོ། །གང་གི་ཕྱིར་སྟོན་པ་པོས་མ་ངེས་པའི་དངོས་པོ་ལ་འདོད་པའི་དོན་བསྒྲུབ་པའི་ཕྱིར་སྐྱེ་བོ་རྣམས་མི་འཇུག་པའོ། །ད་ནི་རྒྱུད་ཀྱི་བྱུང་ཚུལ་བཤད་དེ། སོ་སོ་སྐྱེ་བོས་བྱས་པའི་འགྲེལ་པས་རྒྱུད་ཀུན་གྱི་དྲང་དོན་རྟོགས་པས་ཁེངས་པའི་སྔགས་པ་རྣམས་ཀུན་རྫོབ་དང་དོན་དམ་པའི་དབྱེ་བས་མི་ཤེས་པས་ལམ་ལ་འཁྲུལ་པ། གཟུགས་ཀྱི་ཕུང་པོ་ནི་རྣམ་པར་སྣང་མཛད་ཡིན་ཞེས་བ་ལ་སོགས་པས་འཇུག་པ་རྣམ་པར་སྣང་མཛད་ཀྱི་ཚིག་གིས་གཟུགས་ཀྱི་ཕུང་བོ་སྟོང་པར་བསྟན་པས་གཟུགས་བཀག་པར་མི་རྟོག་པ་དེ་ཁོ་ན་ཉིད་རྟོགས་པར་བྱ་བའི་ཕྱིར་དཔལ་རྡོ་རྗེ་འཆང་
གི་བཀས་བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་གྱི་སྦྲུལ་བ་ཤམྦྷལའི་རྒྱལ་པོས་བཀའ་བསྡུས་པའི་སྒོ་ནས་དུས་ཀྱི་འཁོར་ལོའི་རྒྱུད་ཕྱི་མ་གསུངས། འདིས་སྟོན་པ་བོ་དང༌། བཀའ་སྡུད་པ་བོ་དང༌། དོན་གྱི་ཞུ་བ་པོ་ཕྱག་ན་རྡོ་རྗེའི་སྤྲུལ་པ་རྒྱལ་པོ་ཟླ་བཟངས་ཡིན་པས། རྒྱུད་ཀྱི་ཆེ་བ་བརྗོད་དོ། །རྒྱུད་གང་ལ་འཇིག་རྟེན་དབང་ཕྱུག་གི་སྤྲུལ་པ་པདྨ་དཀར་པོས་དོན་ཐམས་ཅད་གསལ་བར་བྱེད་པའི་དྲི་མ་མེད་པའི་འོད་ཅེས་བྱ་བའི་འགྲེལ་པ་མཛད། དེས་གསལ་བར་བྱས་པ་སངས་རྒྱས་རིན་པོ་ཆེའི་ཐུགས་དམ་པའི་ལམ་གྱི་དམ་པ་བསོད་ནམས་བསགས་པ་རྣམས་ཀྱིས་བླ་མ་ལས་ཐོབ་ནས་དེས་དོན་བདུད་རྩི་སྟོན་པས་དགའ་བ་བཞིའི་བདུད་རྩིས་སྲིད་པའི་དུ་གསལ་ཞིང༌། མ་ཉམས་པའི་བདེ་བས་རོལ་པ་འདིས་བཤད་པ་པོའི་ཆེ་བ་བརྗོད་དོ། །སླར་ཡང་རྒྱུད་ཀྱི་རྒྱལ་པོའི་བསྔགས་པ་བརྗོད་དེ། གང་དུ་ལ་སོགས་པའོ། །ཤེས་བྱའི་ཚོགས་ཐམས་ཅད་ཕྱི་ནང་གི་རིག་པའི་གནས་ཀྱི་རྟེན་ལ། དང་པོའི་སངས་རྒྱས་ལས་མ་གསུངས་པ་གང་ཡིན་པ་དེ་ནི་མེད་དོ་ཞེས་གསུངས་པའི་ཕྱིར་རོ། །རྒྱུད་ཀྱི་རྒྱལ་པོ་གང་ལ་སངས་རྒྱས་བཅོམ་ལྡན་འདས་ལ་ཐམས་ཅད་མཁྱེན་པ་ཞེས་མཚན་དོན་དང་ལྡན་པར་བསྟན། །ཡང་དེ་ཁོ་ན་ཉིད་རིན་པོ་ཆེའི་འབྱུང་གནས་གང་ལ་དབང་ཕྱུག་ལ་སོགས་པའི་ཚིག་སྙིང་པོ་མེད་པས་རྩྭ་དང་འདྲའོ། །ཤེས་རབ་ཀྱི་ཕ་རོལ་ཏུ་ཕྱིན་པ་ཆོས་སྟོང་པ་རྟོགས་པས་ནམ་མཁའ་ལས་བྱུང་བ་ནི་སྣ་ཚོགས་གཟུགས་ལས་བྱུང་བའི་སངས་རྒྱས་ཀྱི་ཡུམ་གྱིས་སྐྱེ་བར་འགྱུར་བ་ནི་རྟོགས་པའི་ཚོགས་མ་ལུས་པ་སླར་མི་འབྱུང་བའི་ཚུལ་དུ་འཇོམས་པར་མཛད་དོ། །ད་ནི་དུ་བ་ལ་སོགས་པའི་མཚན་མ་སྟེ་བའི་རྒྱུ་ཡིན་ལ་གདུག་པའི་རྟེན་བླ་མའི་གདམས་པ་བཤད་དེ། །གང་དུ་ལ་སོགས་པའོ། །རྒྱུད་གང་ལ་དྲི་མ་སྟེ་སྤྲིན་ལ་སོགས་པ་མེད་པའི་ནམ་མཁའི་བར་སྣང་ལ། དམིགས་པས་མིག་ཕྱེད་བརྟན་པར་གཏད་པ་ན་སྙིང་རྗེས་བརླན་པ་རྟོག་པ་དང་བྲལ་བའི་སེམས་ལས་མུ་བཞི་དང་བྲལ་བ་དུ་བ་ལ་སོགས་པའི་རྟགས་འབྱུང་ངོ༌། །མུན་པ་གནག་པ་ལ་ཅི་ཡང་བསམ་པར་མི་བྱའོ་ཞེས་པ་ནི་གདམས་པའོ། །གཞན་དུ་ཡང༌། ཡིད་ཀྱི་རྩ་བ་ཕྱུང་བྱས་ཏེ། །སྟོང་པ་ཉིད་ལ་གོམས་བྱས་ན། །མ་རིག་རབ་རིབ་ཀྱིས་ལྡོངས་པའི། །མིག་སྨན་འདི་ལས་གཞན་ཅི་ཡོད། །ཅེས་སོ། །ས་ར་ཧ་བས་ཀྱང༌། ཆོས་ཀུན་མཁའ་དང་མཉམ་བྱས་ཤིང༌། །ནམ་མཁའ་
མཉམ་པར་སེམས་བཟུང་ནས། །སེམས་དེ་སེམས་མ་ཡིན་བྱས་ན། །དེས་ནི་བླ་མེད་བྱང་ཆུབ་འཐོབ། །ཅེས་གསུངས་སོ། །ད་ནི་རྫོགས་པའི་རིམ་པ་གསལ་བར་བྱེད་པ་ནི་ཀུན་རྫོབ་དང་དོན་དམ་རོ་གཅིག་པར་སོན་པའོ། །དུས་ཀྱི་འཁོར་ལོའི་ཡེ་ཤེས་ཀྱི་ལེའུ་ཚིགས་སུ་བཅད་པ་བརྒྱ་དང་ཉི་ཤུ་རྩ་དྲུག་གི་རྗེས་ལ་ཉམས་མེད་ལ་སོགས་པའོ། །ཉམས་པ་མེད་པའི་ལྷན་ཅིག་སྐྱེས་པའི་སྐུའི་ཨཱ་ལི་དང་ཀཱ་ལི་པདྨ་དང་ཟླ་བ་ཉི་མའི་གདན་ཧཱུཾ་ཡིག་ཡོངས་སུ་གྱུར་པ་ལས་ཕྱག་མཚན་ལས་བྱུང་བའི་གཟུགས་དང་དབྱིབས་དང་ཕྱག་དང་དབྱིབས་སུ་རྟོག་པའི་ཆོས་འགོག་པས་བཅོམ་ལྡན་འདས་མ་ཉམས་བའི་ཡེ་ཤེས་ཀྱི་བསྒྲུབ་པ་བརྗོད་དེ། ཨཱ་ལི་ནི་ཨཱ་ལ་སོགས་ཏེ་དབྱངས་ཀྱི་ཚོགས་ཟླ་བའོ། །ཀཱ་ལི་ནི་ཀ་ལ་སོགས་པ་གསལ་བྱེད་ཀྱི་ཚོགས་ཉི་མའོ། །དེ་གཉིས་གཅིག་ཏུ་གྱུར་པའི་གདན་དང༌། པཾ་ལས་པདྨ་དང༌། ཨ་ལས་ཟླ་བ། རཾ་ལས་ཉི་མ། མ་ཉམས་པའི་ཡེ་ཤེས་དང་ལྡན་པའི་རྡོ་རྗེ་འཆང་གི་གདན་མ་ཡིན་ནོ། །ཧཱུཾ་ལས་བྱུང་བའི་རྡོ་རྗེ་ཡོངས་སུ་གྱུར་པ་ལས་ལྷའི་སྐུ་རྟེན་པ་མི་འདོད་དོ། །མངོན་པར་ཞེན་པའི་མཚན་ཉིད་ཅན་ཡིན་པས་ཉམས་པའི་ཕྱིར་རོ། །མ་ཉམས་པའི་བདེ་བ་སྐྱེད་ཅིང་ཉམས་པ་འཇོམས་པས་ཐ་མལ་པས་བརྟགས་པའི་ཨ་ལ་སོགས་པའི་ཡི་གེར་དང་བྲལ་བ་ལྷའི་དབང་པོ་དང་ལྡན་པའོ། །དེ་བསན་ལ་སོགས་པ་གོ་སླའོ། །ཆོས་ཀྱི་དབྱིངས་ནི་མཁའ་ལ་སྣ་ཚོགས་གཟུགས་རྣམ་པ་ཐམས་ཅད་དང་ལྡན་པའི་སྟོང་པའི་མེ་ལོང་ལ་ཕྲ་ཕབ་པ་ནི་སྒྲུབ་པ་པོས་བསྡམས་པ་བཞིན་ནོ། །དེར་མེད་པའི་ཆོམ་རྐུན་ལ་སོགས་པ་གཞོན་ནུ་མས་མཐོང་བཞིན་དུ་རྟོག་པ་མེད་པར་མ་སྐྱེས་པའི་ཆོས་མཐོང་བའོ། །བྱིས་པས་བརྟགས་པས་ཕྱི་རོལ་གྱི་དངོས་པོ་མེད་པས་མིག་ཡོད་ན་རྨི་ལམ་ལྟ་བུར་སྣང་བས་སོ། །བེམས་པོ་མེད་པས་རྡུལ་ཕྲ་རབ་མེད་པའོ། །རྒྱང་པན་པའི་ལུགས་ལ་མ་ཞུགས་པས་ཆད་པའི་སྟོང་ཉིད་རིང་དུ་བྱས་པའོ། །ནང་གི་བདེ་བ་རང་ཉིད་ཀྱི་རིག་པ་ལ་ཆགས་པས་སོ། །ལས་ཀྱི་ཕྱག་རྒྱ་མི་བསྟེན་པས་ཕྱིའི་ལ་སོགས་པས་སོ། །མན་ངག་ནི་འཆད་པར་འགྱུར་བས་སོ། །རྒྱལ་བ་ལ་སོགས་པ་ནི་ལམ་མ་ཐོབ་པས་བསྡུ་ན་བཞི། ཕྱེ་ན་བཅུ་དྲུག་འཆད་པར་འགྱུར་བ་ནི་རྟོག་པའི་ལམ་གྱིས་མི་འཐོབ་བོ། །ཧཱུཾ་ཕཊ་ལ་སོགས་པ་ནི་སོགས་པའི་སྒྲས་ཕྱག་རྒྱ་ལ་སྒོས་པ་དང་བྲལ་བ་བསྐྱེད་
པའི་རིམ་པ་ལམ་དུ་ཞུགས་པ་སྟེ། དེ་དེ་ལས་འདས་པ་རྫོགས་པའི་རིམ་པ་ནི་ནམ་མཁའ་ལ་བསྒོམས་པས་རྟོགས་པར་བྱ་བ་དེའི་རིམ་པ་ནི་དུ་བ་ལ་སོགས་པའི་སྦྱོར་བ་དེ་ཁོ་ན་ཉིད་རྒྱུ་ཡིན་གྱི་པདྨ་ལ་སོགས་པའི་རྟོགས་པ་གཞན་མ་ཡིན་ནོ། །བྱང་ཆུབ་ཀྱི་སེམས་མཐོང་བའི་ཐབས་བཤད་དེ། མེ་ནི་ལ་སོགས་པའོ། །རྟེན་མེད་པ་ལྟ་ཞོག་གི་ཤིང་ལ་གནས་པ་ཡང་སྟ་རེ་ལ་སོགས་པས་གཅོད་པ་དང་སོག་ལེགས་གཤགས་ཀྱང་མི་མཐོང་ལ་གཙུབ་ཤིང་ལ་སོགས་པའི་སྦྱོར་བས་མཐོང་བ་ལྟར་དེ་བཞིན་དུ་རྣམ་རྟོག་ཡང་དང་ཡང་དུ་གོམས་པས་སེམས་ཀྱི་སྣང་ཚུལ་མི་མཐོང་གི་འོན་ཀྱང་རོ་མ་དང་རྐྱང་མ་དབུ་མ་གཉིས་སུ་མེད་པའི་སྦྱོར་བས་རང་སེམས་དེ་ཉིད་དུ་སྣང་བར་འགྱུར། དོན་དམ་པ་བསྙེན་པ་ལས་དེ་བཤད་པ། ཤིང་ལས་མེ་བྱུང་ཆུ་ནི་ཆུ་ཤེལ་ལས། །ཞོ་ལས་མར་དང་རྡོ་ལས་གསེར་སོགས་ལྟར། །བུད་མེད་བསྟན་པས་མ་ཉམས་བདེ་བ་ནི། །དེ་ཐབས་སྦྱོར་བས་སྐལ་ལྡན་གྱིས་གཟུང་བྱ། །ཁྱོད་ཀྱི་སེམས་ལ་ཅུང་ཟད་བསགས་པ་མིན། །གཞག་བྱ་མེད་ལ་འཕེལ་ཞིང་འགྲིབ་པ་མེད། །རང་གི་སེམས་ལ་སེམས་ཉིད་སྣང་བ་ཙམ། །དཔེར་ན་ཁམས་གསུམ་ཆུ་ལ་ཉི་མ་བཞིན། །ཞེས་སོ། །སེམས་གཅིག་པུ་ཉིད་ཤེས་རབ་ཀྱི་གཟུགས་བརྙན་ལས་དུ་མར་འགྱུར་ཞེས་དགོངས་པའོ། །དེ་ཉིད་བཤད་དེ། དུ་བ་ལ་སོགས་པའོ། །དུ་བ་ཉིད་ཐོག་མར་གང་གི་ཡིན་པ་དེ་ནི་སྨིག་རྒྱུ་ལ་སོགས་པའོ། །རྟགས་ནི་ཡིད་ཆེས་པའོ། །སྲོག་རྩོལ་ནི་བུམ་པ་ཅན་དེ་གོང་དང་འོག་ཏུ་རྩ་གསུམ་འགོག་པའི་བང་གཉིད་ཅན་ནོ། །དབུ་མར་རྒྱུ་བ་ནི་སེམས་ཀྱི་རྩ་ལ་སྲོག་རླུང་ཞུགས་ནས་རྒྱུ་བའོ། །རིག་མའི་བརྟུལ་ཞུགས་ནི་རིག་མ་གཙོ་བོར་བྱས་པ་ཚངས་པར་སྤྱོད་པའོ། །མ་ཉམས་པ་ནི་འགྲེང་བའོ། །གྱེན་དུ་རྒྱུ་བ་ནི་ནོར་བུ་དང་པདྨ་ལ་སོགས་ཏེ་ལམ་འདིས་ནི་དུ་བ་ལ་སོགས་པ་ལ་ཡན་ལག་དྲུག་པའི་མཚན་ཉིད་ཅན་གྱིས་སོ། །སངས་རྒྱས་ཐམས་ཅད་ཀྱི་དབང་པོ་དང་བྲལ་བའི་བདེ་བ་ནི་མ་ཉམས་པའི་མཆོག་ཡིན་ནོ། །ཕོ་ཉ་ཀུན་ནི་རྩ་སྟོང་ཕྲག་བདུན་ཅུ་རྩ་གཉིས་འགོག་པའི་རང་བཞིན་མཁའ་འགྲོ་མ་རྣམས་ཀྱི་ལྷན་སྐྱེས་སོ། །གཟུགས་ལ་སོགས་པ་ནི་གཟུགས་ལ་སོགས་པ་ལ་གཟུགས་བསྒོམས་པ་ནི་ལས་ཀྱི་ཕྱག་རྒྱའོ། །སོགས་པའི་སྒྲས་ཡིད་ཀྱི་ཕྱག་རྒྱའོ། །དཀྱིལ་འཁོར་ནི་རྟེན་ཡིན་ལ།
འཁོར་ལོ་ནི་བརྟེན་པ་ལྷའི་ཚོགས་སོ། །སོགས་པའི་སྒྲས་སྔགས་དང་ཕྱག་རྒྱའོ། །དེ་དག་བསྒོམས་པས་འཇིག་རྟེན་ནི་ཁམས་གསུམ་སྟེ་དེའི་གྲུབ་པ་ནི་འོག་མིན་གྱི་བར་གྱི་དབང་ཕྱུག་གྲུབ་ཀྱི་ཕྱག་རྒྱ་ཆེན་པོ་གྲུབ་པ་འཇིག་རྟེན་ལས་འདས་པ་གང་ལ་གྲུབ། འོ་ན་ལམ་གྱི་གདམས་པ་འདི་ཐམས་ཅད་ལས་འབྱུང་ངམ་མ་ཡིན་ཏེ་འོན་ཀྱང་སེམས་ཅན་ལ་སོགས་པའོ། །ལམ་འདི་བླ་མ་དམ་པའི་དྲིན་གྱིས་དབང་ལ་སོགས་པས་ཐ་མལ་པའི་ང་རྒྱལ་གྱི་དྲི་མ་དག་པས་རྣམ་པར་དག་པའི་སློབ་མ་ལ་སྐྱེའོ། །ཕྱག་རྒྱ་ཆེན་པོའི་ཐིག་ལེ་ལས་གསུངས་པ། ཇི་ལྟར་དུག་ནི་སྔགས་སོགས་ཀྱིས། །སྦྱངས་པ་ཡིས་ནི་བཅུད་ལེན་འགྱུར། །དེ་ལྟར་དབང་ལ་སོགས་པ་ཡིས། །མ་དག་སློབ་མ་དག་པར་འགྱུར། །ཞེས་སོ། །གང་གི་སེམས་ཅན་སྙིང་རྗེ་གཞན་དོན་དང་རྟག་ཏུ་དགེ་བ་ལ་བརྩོན་པའོ། །ད་ནི་ལམ་ཐོབ་ནའང་བག་མེད་པས་མེ་དང་འབྲལ་བའི་རྒྱུ་བཤད་དེ། ལམ་མཆོག་ལ་སོགས་པའོ། །སངས་རྒྱས་ཉིད་དཀའ་ཚེགས་མེད་པར་གང་གིས་ཐོབ་པ་དེ་ནི་ལམ་སྟེ། དེ་ཉིད་དགའ་བ་འཕེལ་བར་བྱེད་པས་རིན་པོ་ཆེ། རྙེད་པར་དཀའ་བ་དང་འདོད་པའི་དོན་ཕུན་སུམ་ཚོགས་པ་སྟེར་བས་ཡིད་བཞིན་ནོར་བུ་ལྟ་བུའོ། །བག་མེད་ནི་ཕན་པ་དང་བདེ་བ་ལ་ལྟོས་པ་མེད་པ། འཁོར་བར་རིགས་དྲུག་ཏུ་འཁྱམས་པ། སྙིང་རྗེ་ལ་སོགས་པའི་ཡོན་ཏན་དང་བྲལ་བ། གཞན་ལ་ཕན་པ་དང་བདེ་བ་ལ་མི་བརྩོན་པ་ལ་བྱིན་ན་རང་གི་ཁྱིམ་ནི་ཆུང་མ་སྟེ་དེ་ཉིད་ནགས་ཡིན་ཏེ། མ་རུངས་པའི་སེམས་ཅན་གྱི་རྟེན་ཡིན་པས་སོ། །དེར་འདི་ལ་དབང་པོ་རྣམས་ཆགས་པས་ཡུལ་ཏེ། གཟུགས་ལ་སོགས་པ་ཕྱིའི་ཡུལ་ལོངས་སྤྱོད་དེ་ནི་དམན་པ་སྟེ། ལམ་གྱི་མི་མཐུན་ཕྱོགས་ཡིན་པ་དེ་རྨོངས་པས་བསྟེན་པའོ། །དེ་ཉིད་ཆོ་མ་རྐུན་ཏེ་དེ་དག་གིས་ཕྲོགས་པར་འགྱུར། འདི་དག་འབའ་ཞིག་གིས་མ་ཡིན་གྱི་འོན་ཀྱང་བླ་མ་དང་ལུང་དང་རང་ཉིད་ཡིད་ཆེས་པའི་ལམ་རིན་པོ་ཆེ་ལ་ཐེ་ཚོམ་དང་ལེ་ལོ་ནི་དགེ་བ་ལ་མ་སྤྲོ་བའོ། །གཉིད་ནི་ལུས་དང་ཡིད་ལས་སུ་མི་རུང་བའོ། །འགྱོད་པ་ནི་ལས་དམན་པ་བདག་གིས་བྱས་པས་ལམ་མངོན་སུམ་བདག་གིས་བྱ་བར་མི་
ནུས་སོ་ཞེས་བྱ་བའི་རྣམ་པ་ཅན་ནོ། །ཆོམ་རྐུན་འདི་དག་གི་ཉེ་དུ་ནི་བུ་དང་ཆུང་མ་ལ་སོགས་པ་དེ་ཉིད་ནགས་ཏེ་དེར་ཞུགས་པའི་གྲོལ་ལམ་མཆོག་ནི་འཕྲོག་པར་འགྱུར་རོ། །ཏིང་ངེ་འཛིན་གྱི་སྒྲིབ་པ་འདི་དག་འབའ་ཞིག་པ་མ་ཡིན་གྱི། འོན་ཀྱང་སྲོག་གཅོད་པ་དང༌། མ་བྱིན་པར་ལེན་པ་དང༌། བརྫུན་དུ་སྨྲ་བ་དང༌། ཕྲ་མ་དང༌། ཚིག་རྩུབ་པོ་དང༌། འདོད་པས་ལོག་པར་གཡེམ་པ་དང༌། ངག་འཁྱལ་པ་དང༌། བརྣབ་སེམས་དང༌། གནོད་སེམས་དང༌། ལོག་ལྟ་སྟེ་འདི་དག་གིས་ཀྱང་ལམ་རིན་པོ་ཆེ་འཕྲོག་པར་འགྱུར་རོ། །དེ་དག་འབའ་ཞིག་གིས་མ་ཡིན་གྱི་འོན་ཀྱང་བཟའ་བཏུང་ཤིན་ཏུ་ཚད་མེད་པས་ཀྱང་འཕྲོག་སྟེ་དེ་ལ་བཟའ་བ་ནི་ཤ་ལ་སོགས་པའོ། །བཏུང་བ་ནི་ཆང་ལ་སོགས་པའོ། །ཤིན་ཏུ་ནི་རྒྱལ་བའི་ཆོས་ཀྱིས་སོ། །ལོངས་སྤྱོད་ནི་ཕྲེང་བ་ཙནྡན་ན་བུད་མེད་ལ་སོགས་པ་སྣ་ཚོགས་པའོ། །དེས་བརྩོན་འགྲུས་དང་ལྡན་པའི་ཡང་འཕྲོག་ན་བརྩོན་འགྲུས་མེད་པའི་ལྟ་ཅི་ཞིག་དོགས། བག་མེད་ནི་གྲོགས་ངང་པ་དང་འགྲོགས་པ་ལ་སོགས་ཏེ། དེས་བརྒྱལ་བ་བཞིན་ནོ། །ལམ་རིན་ཆེན་བརྟག་པ་བཤད་དེ། རིན་ཆེན་ལ་སོགས་པའོ། །རང་གིས་རིན་ཆེན་ཡིན་མིན་མི་ཤེས་པས་གཞན་སྡིག་ཅན་མི་མཁས་པ་ལ་རིན་ཆེན་ཡིན་ནམ་མ་ཡིན་ཞེས་སྟོན་ན། དེས་མ་ཡིན་ཞེས་སྨྲས། དེས་ཚིག་གིས་སྐལ་བ་མེད་པས་དེ་འདོར་བར་བྱེད་དོ། །དེས་སྡིག་པའི་གྲོགས་དང་འགྲོགས་པའི་སྐྱོན་བཤད་དོ། །འོ་ན་རང་གིས་བརྟག་པས་མི་ཤེས་པ་ལམ་རིན་ཆེན་ཇི་ལྟར་ཤེས་ཤེ་ན་སྨྲས་པ། རིན་ཆེན་ལ་སོགས་པའོ། །རིན་ཆེན་བརྟག་དཔྱད་མཁས་པ་ཁོ་ན་ལ་བརྟེན་པར་བྱ་སྟེ་དེའི་མི་སླུ་བའི་ཚིག་གིས་རིན་ཐང་མེད་པར་ཤེས་བར་བྱ། དེས་དགེ་བའི་བཤེས་གཉེན་བསྟེན་པ་བཤད་དོ། །ལམ་ལ་ཞུགས་པ་ལ་བདུད་བྱུང་ན་སྤང་བར་བཤད་དོ། །ཕ་ལ་སོགས་པའོ། །གང་གི་ཕྱིར་ལམ་འཕྲོག་པ་ཡོད་པ་དེ་བས་བདུད་སྡིག་ཅན་སངས་རྒྱས་ལ་སོགས་པའི་གཟུགས་ཀྱིས་བར་ཆད་བྱེད་དེ་འདིས་འཚང་རྒྱ་བའི་ལམ་ཡིན་ཞེས་བྱ་བ་ལ་སོགས་པ་བདུད་ཀྱི་ལེའུ་ལས་བཤད་པ་བཞིན་ནོ། །ཉེ་བར་བསྡུས་ཤིང་བཤད་དེ་ཆོམ་རྐུན་ལ་སོགས་པའོ། །གང་
གི་ཕྱིར་ལམ་འཕྲོག་པ་ཡོད་པ་དེ་བས་ཉེ་དུ་དང་ཐེ་ཚོམ་ལ་སོགས་པ་སྤངས་ནས་འབད་དེ་བླ་མས་གནང་བའི་ལམ་རིན་པོ་ཆེ་ཤིན་ཏུ་གསལ་བར་བྱ། ཐར་པ་ཐོབ་པའི་ལམ་གཞན་ཡང་ཡོང་ཅེ་ན། སྨྲས་པ། བདག་ལ་སོགས་པའོ། །བདག་བྱིན་གྱིས་བརླབ་པའི་རིམ་པ་ནི་ཞི་བའི་ལྷ་ལ་དམིགས་པའོ། །དཔའ་བོའི་རིམ་པ་ནི་དྲག་པོའི་ལྷ་ལ་དམིགས་པའོ། །དེ་ནི་ཐར་པའི་སླད་དུ་སངས་རྒྱས་ཀྱིས་བསྟན་པ་མ་ཡིན་གྱིས་འོན་ཀྱང་ཤིན་ཏུ་རྣམ་པར་དག་པའི་རིམ་པ་ཉིད་རྫོགས་པའི་རིམ་པ་འབའ་ཞིག་པའོ། །དེ་ཅིས་ཤེས་ཤེ་ན། སྨྲས་པ། གང་གིས་མ་ལ་སོགས་པའོ། །རྒྱུ་མཚན་གང་གིས་པ་དང༌། མ་དང༌། དགྲ་བཅོམ་པ་བསད་པ་དང༌། དགེ་འདུན་གྱི་དབྱེན་དང༌། དེ་བཞིན་གཤེགས་པ་ལ་ངན་སེམས་ཀྱིས་ཁྲག་འབྱིན་པ་སྟེ་མཚམས་མེད་པ་ལྔ་བྱས་པ་རྣམས་ཀྱང་བདེ་བས་འབད་རྩོལ་མེད་པར་རྣམ་དག་གི་རིམ་པ་དབང་གི་དོན་གྱིས་བསྡུས་པར་བྱས་པ་ལས་གཞན་དུ་ན་མཚམས་མེད་པ་བྱས་པ་རྣམས་དཔའ་བོའི་རིམ་པས་དྲག་པོའི་ལས་ལས་ལྡོག་པར་མི་འགྱུར་རོ། །བདག་བྱིན་གྱིས་བརླབས་པས་ཀྱང་འཁོར་བའི་བདེ་བ་ལས་ཐར་པ་མི་ཐོབ་བོ། །འོ་ན་རིམ་པ་གཉིས་པོ་འདི་ལམ་མ་ཡིན་ན་བཅོམ་ལྡན་འདས་ཀྱིས་ཅི་སྟེ་གསུངས་ཤེ་ན། སྨྲས་པ། དཔའ་བོ་ཞེས་བྱ་བ་ལ་སོགས་པའོ། །དཔའ་བོའི་རིམ་པ་ནི་ཕྱི་རོལ་དུ་མ་ཡིན་གྱི་གང་གི་ཕྱིར་ལུས་ལ་སྲོག་རླུང་ཟད་པར་བྱེད་པ་འདི་ཡིན་ནོ། །བདག་བྱིན་གྱིས་བརླབ་པ་ནི་རང་སེམས་ཀྱི་སྣང་བ་སྟེ། དེ་ཡང་ནམ་མཁའ་ལ་ཁམས་གསུམ་གྱི་སྣང་བའོ། །བདག་བྱིན་གྱིས་བརླབ་པ་ནི་རང་གི་སེམས་ཀྱི་སྣང་བ་སྟེ། ཁམས་གསུམ་གྱི་སྣང་བ་ཡིན་པས་བྱུང་ནས་དེ་མི་ལྡོག་པས་འཁོར་བ་མི་ལྡོག་པར་འགྱུར་རོ། །ཇི་ལྟར་སངས་རྒྱས་ཤེ་ན། སྨྲས་པ། འཁོར་བ་ལ་སོགས་པའོ། །ཁམས་གསུམ་སྙིང་པོ་མེད་པ་བརྫུན་པ་ཟད་པའི་རྗེས་སུ་སངས་རྒྱས་ཐམས་ཅད་མཁྱེན་པ་ལ་སོགས་པའི་ཡོན་ཏན་ཅན་འབྲས་བུ་འབྱུང་ངོ༌། །དཔེར་ན་ཆུ་ཤིང་སྙིང་པོ་མེད་པ་ལ་འབྲས་བུ་སྨིན་པ་ནི་དེ་ཟད་ནས་འབྱུང་བ་བཞིན་ནོ། །འོ་ན་སྒྱུ་མ་ལྟར་སྣང་བ་འདི་མ་རིག་པ་ཡིན་པས་དེ་ལས་བྱུང་བའི་བྱང་
ཆུབ་ཀྱི་སེམས་ཇི་ལྟར་འཚང་རྒྱ་བའི་རྒྱུ་ཡིན་ཞ་ན། སྨྲས་པ། རྟ་བླ་མོ་ལ་སོགས་པའོ། །རྟ་བླ་མོ་དང་སྡིག་སྲིན་ལ་སོགས་པ་རྣམས་ནི་མ་གང་ལས་སྐྱེས་པ་དེ་གསོད་པར་བྱེད། དེ་ལྟར་ཐབས་དང་ཤེས་རབ་རྣལ་འབྱོར་གྱི་སེམས་དེ་འང་བཞི་བ་ཀུན་རྫོབ་ཀྱིས་གང་ལས་བྱུང་བ་དེས་སྒྱུ་མ་དེ་གསོད་པར་བྱེད། རྣལ་འབྱོར་གྱི་སེམས་འདིའི་མ་ཉམས་ཚུལ་གྱིས་དབྱེ་བ་བཞི་དང་བཅུ་དྲུག་བཤད་དེ། གཉིས་མེད་ལ་སོགས་པའོ། །གཉིས་མེད་ནི་འཁོར་བ་དང་མྱ་ངན་ལས་འདས་པ་དེ་གང་ལ་མེད་པའོ། །ནོར་བུ་དང་པདྨ་ལས་མི་གཡོ་བས་མི་གཡོ་བའོ། །ཐབས་སམ་ཤེས་རབ་ཀྱི་རྒྱུ་མེད་པས་རྒྱུ་མེད་དོ། །བླ་ན་མེད་པའི་བདེ་བ་སྟིར་བས་ཡི་དམ་སྟེ་རྣལ་འབྱོར་བཞི་པའོ། །དབུགས་ཉི་ཁྲི་ཚིག་སྟོང་དྲུག་བརྒྱ་འགོག་པས་མ་ཉམས་སོ། །ཆགས་པ་དང་ཆགས་པ་དང་བྲལ་བའི་བར་དུ་གནས་པས་ཆགས་པ་ཆེན་པོའོ། །རྣམ་པ་དང་བཅས་པ་དང་རྣམ་པ་མེད་པའི་བར་ལས་གྲོལ་བས་དངོས་པོ་དང་དངོས་མིན་མ་ཡིན་པའོ། །ཤེས་བྱ་མ་ལུས་པ་མཐོང་བས་ཡེ་ཤེས་དེ་རྣལ་འབྱོར་གསུམ་པའོ། །འགྲོ་བ་དགའ་བར་བྱེད་པ་སྔོན་དུ་འགྲོ་བ་སེམས་ཅན་གྱི་དོན་ལ་ཞེ་ན་བས་སེམས་དཔའོ། །ཐོག་མཐའ་བར་དུ་དགེ་བས་ཀུན་དུ་བཟང་པོའོ། །བདུད་དང་ཉོན་མོངས་པ་ལ་རྟོག་པ་སྤངས་པས་ཕྱི་ནང་དུ་བརྗོད་པའི་སྒྲ་མེད་པས་སྒྲ་མེད་དོ། །རང་སྒྲའི་རང་བཞིན་མེད་པས་སྒྲ་ཆེན་དེ་རྣལ་འབྱོར་གཉིས་པའོ། །མངལ་ལས་སྐྱེ་བ་སྤངས་པས་ལྷན་སྐྱེས་སོ། །སྐུ་བཞིའི་སྒྲིབ་པ་ཟད་པས་བྱང་ཆུབ་སེམས་ཀྱི་ཐིག་ལེ་འཛིན་ནོ། །སྟོང་ཉིད་དང་སྙིང་རྗེ་ཐ་མི་དད་པས་དཔལ་དུས་ཀྱི་འཁོར་ལོའི་རྡོ་རྗེ། ཚུལ་ཁྲིམས་ཀྱི་ཚོགས་རྫོགས་པས་ཐབས་དང་ཤེས་རབ་དང་ལྡན་པའི་རྣལ་འབྱོར་ཏེ་རྣལ་འབྱོར་དང་པོའོ། །བསྟན་པའི་ཕྱིར་བླ་མའི་མཚན་ཉིད་བཤད་དེ། དེ་ལྟར་ལ་སོགས་པའོ། །རྡོ་རྗེའི་ཐེག་པ་ལ་འཇུག་པ་མ་ཉམས་པའི་ཡེ་ཤེས་བསྒོམས་པས་དེ་ཁོ་ན་ཉིད་བསྒོམ་ལ། བྱང་སེམས་བསྲུང་བས་དམ་ཚིག་དང་ལྡན་པ། འདོད་ཆགས་ལ་སོགས་མེད་པས་རྙོག་མ་མེད་པ། བུ་དང་ཆུང་མ་དང་རང་ལུས་ལ་སོགས་པ་ལྟོས་པ་མེད་པས་འདོད་པ་མེད་པ། བཟོད་པ་དང་ལྡན་པའི་སངས་རྒྱས་པའི་ལམ་ལ་
གནས་པའི་བླ་མ་མཉེས་པར་བྱས་པ། དམྱལ་བའི་འཇིགས་པ་ལས་སྐྱོ་པ་བའི་ལམ་སྟོན་པ། མ་ཉམས་པའི་བདེ་བ་ཐོབ་པས་དེ་ཉིད་དུ་ཚངས་པར་སྤྱོད་པ། བདུད་བཞི་འཇོམས་པར་བྱེད་པའི་བླ་མ་དེ་ནི་རྡོ་རྗེ་འཛིན་པས་བྱིན་གྱིས་བརླབས་པས་དེའི་སྤྲལ་པ་ཡིན་པས་རྡོ་རྗེ་སེམས་དཔའ་ཡིན་ནོ། །ད་ནི་འཇིག་རྟེན་དང་འཇིག་རྟེན་ལས་འདས་པ་བསྒྲུབ་པའི་ཕྱར་ལྷའི་དམིགས་པ་བཤད་དེ། ལྷའི་ལ་སོགས་པའོ། །དེ་ཉིད་ཀྱི་སྦྱོར་བ་ནི་སྣ་ཚོགས་གཟུགས་སྒོམ་པའི་སྦྱོར་བས་སོ། །སྐར་མའི་འཁོར་ལོ་བཞིན་ནི་ནོར་བུ་སྔོན་པོ་ཟླ་བའི་དཀྱིལ་འཁོར་གྱི་རྣམ་པ་ཅན་ཐིག་ལེའི་ནང་དུ་མཐའ་ཡས་པའི་སངས་རྒྱས་ཀྱི་ལོངས་སྤྱོད་རྫོགས་པའི་སྐུ་མཐོང་བ་སྔོན་དུ་འགྲོ་བ་དཔག་ཚད་བརྒྱར་རིང་བའི་དངོས་པོ་མཐོང་བའི་ཤའི་མིག་གིས་ཁམས་གསུམ་གྱི་བུམ་པ་ལ་སོགས་པ་མཐོང་བ་དང༌། སངས་རྒྱས་ཀྱི་སྤྱན་དང༌། གཞན་སེམས་རིག་པ་དང༌། ཆོས་ཐམས་ཅད་མི་རྟོག་པའི་མཚན་ཉིད་ཅན་ཤེས་རབ་ཀྱི་སྤྱན་དང་ཡེ་ཤེས་ཀྱི་སྤྱན་གྱིས་དངོས་པོ་ཐམས་ཅད་རྣམ་པ་ཐམས་ཅད་དུ་མཐོང་བའོ། །ཐ་མལ་པ་གཞན་གྱི་ས་ལ་སོགས་པ་ལ་བྱས་པ་དང༌། ར་གན་ལ་སོགས་པ་བླུགས་པ། སྤྲོ་བ་ལ་སོགས་པ་མེད་པས་ཤི་བའི་རོ་ལྟར་མཐོང་ངོ༌། །བདུད་རྩི་ལྔ་ནི་བཤད་བ་དང༌། གཅི་བ་དང༌། རྐང་མར་དང༌། ཁྲག་དང༌། ས་བོན་ནོ། །སོགས་པའི་སྒྲས་སྒྲོན་མ་ལྔ་སྟེ་བ་ལང་དང༌། ཁྱི་དང༌། གླང་པོ་ཆེ་དང༌། རྟ་དང༌། མིའི་ཤའོ། །ནང་གི་བདུད་རྩི་ལྔ་ནི་ཕུང་སྟེ། སྒྲོན་མ་ལྔ་ནི་དབང་པོ་ལྔའོ། དེ་ལ་ལྟོས་པ་མེད་པའོ། །ཟས་ནི་མངོན་པར་ཕྱོགས་པ་སྟེ། ཐ་མལ་པའི་གཟུགས་ལ་སོགས་པ་མངོན་དུ་ཕྱོགས་པ་ལས་ལོག་པ་ནི་སོ་སོར་རྟོག་པའོ། །གཟུགས་ལ་སོགས་གཞན་ནི་རྡུལ་ཕྲན་མ་ཡིན་པས་འཇིག་རྟེན་ལས་འདས་པའི་གཟུགས་ལ་སོགས་པའོ། །རྡོ་རྗེའི་པདྨ་ནི་སྤྱི་གཙུག་གི་པདྨ་སྟེ་དེར་འཆར་བ་སྟེ། བདུད་རྩིས་ནི་མ་ཉམས་པའི་བྱང་ཆུབ་ཀྱི་སེམས་སོ། །ཟླ་བ་བདུན་གྱིས་ནི་ཉེ་བར་མཚོན་པས་ཟླ་བ་དགུའོ། །ཕུང་པོ་དྲུག་གིས་ནི་གཟུགས་དང༌། ཚོར་བ་དང༌། འདུ་ཤེས་དང༌། འདུ་བྱེད་དང་རྣམ་པར་ཤེས་པ་དང༌། ཡེ་ཤེས་ཀྱི་ཕུང་པོས་སོ། །ཆུང་ངུ་
ལ་སོགས་པའི་དབྱེ་བས་ས་ཐོབ་པ་ནི་ཆུང་དུ་ལ་སོགས་པ་བཞི་པ་གསུམ་ལ་སྦྱར་བས་སོ། །རབ་ཏུ་དགའ་བ་ནས་ཡེ་ཤེས་སྤྱན་གྱི་བར་ས་བཅུ་གཉིས་སོ། །བདེན་པ་རྣམ་པ་བཅུ་གཉིས་ཀྱི་དོན་ནི་ལུག་དང་གླང་ལ་སོགས་པའི་ཁྱིམ་བཅུ་གཉིས་ཀྱི་དག་པ་སྣ་བུག་ཏུ་འཕོ་བ་བཅུ་གཉིས་འགོག་པའོ། །དེ་ཉིད་རྣམ་པ་བཅུ་དྲུག་རིག་ནི་འཁོར་བའི་ཆ་བཅུ་དྲུག་ཟླ་བའི་ཆ་ཟད་པས་མ་ཉམས་པའོ། །རྣམ་པ་ཉི་ཤུས་བྱང་ཆུབ་པ་ནི་སྦྱོར་དྲུག་བསྒོམས་པས་དག་པའི་དབུ་མས་སྦྱངས་པ་ཕུང་པོ་ལྔ་དང༌། ཁམས་ལྔ་དང༌། དབང་པོ་ལྔ་དང༌། སྐྱེ་མཆེད་ལྔ་དག་པའི་རྣམ་པར་རྟོག་པས་སོ། རྣམ་པར་སངས་རྒྱས་ནི་མ་རིག་པ་འགོག་པས་སོ། །ཀུན་རིག་ནི་དངོས་པོ་ཐམས་ཅད་སངས་རྒྱས་ཀྱི་རང་བཞིན་དུ་རྟོགས་པས་སོ། །དེ་ཉིད་ཀྱི་ཕྱིར་མཆོག་ཡིན་ནོ། །ཞག་འགའ་ཞིག་གིས་ནི་ལོག་སུམ་དང༌། ཟླ་བ་ཕྱེད་དང་གཉིས་དུས་ཀྱི་འཁོར་ལོའི་ཞག་གིས་ཕྱག་རྒྱ་ཆེན་པོའི་གྲུབ་པ་ཐོབ་པར་འགྱུར་རོ། །ད་ནི་ཚིགས་བཅད་རྡོ་རྗེ་སེམས་ལ་སོགས་པས་སྦྱོར་བ་དྲུག་བཤད་དོ། སོ་སོར་རྟོག་ནི་དུ་བ་ལ་སོགས་པ་མཚན་མའི་དབྱེ་བས་རྣམ་པ་བཅུའོ། །བསམ་གཏན་ནི་སྣ་ཚོགས་གཟུགས་ལ་ཡུལ་དང་ཡུལ་ཅན་བཅུ་གཅིག་ཏུ་འགྱུར་པས་སོ། །སྲོག་རྩོལ་ནི་གཡོན་དང་གཡས་ཀྱི་དཀྱིལ་འཁོར་བཅུ་གཅིག་ཏུ་གྱུར་པས་སོ། །འཛིན་པ་ནི་ལྟེ་བ་སྙིང་ག་མགུལ་བ་དཔྲལ་བ་སྤྱི་གཙུག་ཏུ་སྲོག་རླུང་འགྲོ་བ་དང་འོང་བ་མེད་པས་རྣམ་པ་བཅུའོ། །རྗེས་སུ་དྲན་པ་ལ་འདོད་པའི་གནས་སྐབས་བཅུའི་དབྱེ་བས་ནི། སེམས་པ་འདོད་དང་ལུས་ཚད་འབྱུང༌། །ཁ་སྐམས་པ་དང་ཟ་མི་འདོད། །འདར་དང་མྱོས་པ་ལུས་འཁོར་དང༌། །སེམས་འཁྲུལ་བ་དང་ཤིན་ཏུ་བརྒྱལ། །སེམས་ཅན་ལུས་ལ་གནས་སྐབས་འདི། །རྡོ་རྗེ་འཆང་གི་གནས་སྐབས་ཡིན། །ཏིང་འཛིན་རླུང་བཅུ་འགོག་པ་ནི། །སྲོག་དང་ཐུར་སེལ་མཉམ་པ་ཉིད། །གྱེན་དུ་རྒྱུ་དང་ཁྱབ་བྱེད་དང༌། །ཀླུ་དང་རུས་སྦལ་ཀྲི་ཀ་ར། །ལྷ་སྦྱིན་ནོར་ལས་རྒྱལ་བའོ། །ཆགས་པ་དང་ཆགས་པ་དང་བྲལ་བས་རབ་ཏུ་མི་གནས་པའི་མྱ་ངན་ལས་འདས་སོ། །མིག་ལ་སོགས་པ་ལྔ་གཞན་གྱིས་ནི་ཤའི་མིག་ལ་སོགས་པ་སྣ་ཚོགས་གཟུགས་མཐོང་བའོ། །ངེས་
པ་ནི་སྟོང་པ་ཉིད་དུ་ངེས་པའོ། །སྣ་ཚོགས་གཟུགས་ལ་ཞེན་པ་ནི་ཡུལ་ལ་སོགས་པའི་ཡིད་ཙམ་གྱིས་བླ་ན་མེད་པ་ཤེས་རབ་དང་ཐབས་རོ་གཅིག་ཏུ་གྱུར་པའི་དེ་ཁོ་ན་ཉིད་ལ་འཇུག་པས་ཡིད་བདེ་བ་གང་ཡིན་པ་དེ་ནི་དགའ་བའོ། །བདེ་བ་མི་གཡོ་བ་ནི་ལུས་སྦྱངས་པ་ལ་སོགས་པའི་བདེ་བས་སོ། །ལམ་གཉིས་དབུ་མར་འཇུག་པ་ནི་སྣ་བུག་གཡོན་པར་ནམ་མཁའ་ལ་སོགས་ལྔ་དང༌། གཡས་སུ་ས་ལ་སོགས་པ་ལྔ་མི་རྒྱུ་བས་རོམ་རྐྱང་མ་འགགས་ནས་དབུ་མའི་ལམ་ཁོ་ན་ལ་འཇུག་པ་དང་གནས་པ་དང་འབྱུང་བའི་མཚན་ཉིད་ཅན་ཕྲ་བ་ནི་སྲོག་རྩོལ་ཡིན་ནོ། །རྒྱུ་བ་གཉིས་བྲལ་ནི་ལྟེ་བ་སྙིང་དང་མགུལ་བ་སྤྱི་གཙུག་ལ་འགྲོ་བ་དང་འོང་བ་མེད་པས་སོ། །རྣམ་པ་བཅུར་སྔར་བཤད་པ་ནི་སེམས་འཛིན་པ་ལ་གནས་པས་ན་རང་གི་དང་གིས་དུ་བ་ལ་སོགས་པའི་མཚན་མ་རྣམ་པ་བཅུའི་སྣང་བ་སྔོན་དུ་འགྲོ་བས་རྫོགས་པའི་དཀྱིལ་འཁོར་གྱི་ལྷའི་སྣང་བ་གཟུགས་བརྙན་ལྟ་བུ་རྟོག་པ་མེད་པ། དེ་ནས་འོད་དུམ་འཕྲོ་བ། དེ་ནས་ཁམས་གསུམ་དུ་ལྷའི་དཀྱིལ་འཁོར་སྤྲོ་བ་ལ་སོགས་པ་སྔོན་དུ་འགྲོ་བ་སེམས་པ་ལ་སོགས་པ་འདོད་པའི་གནས་སྐབས་བཅུའི་མཚན་ཉིད་ཅན་རྗེས་སུ་དྲན་པའོ། །སྲོག་རླུང་ལ་སོགས་པ་རྒྱུ་བ་མེད་པས་ནི་གཏུམ་མོ་འབར་བས་རྡོ་རྗེའི་ནོར་བུའི་རྩེ་མོར་གནས་པ་མ་ཉམས་པའི་བྱང་སེམས་ཡིན་པས་རིམ་གྱིས་འཁོར་ལོ་དྲུག་ལ་ཉི་ཁྲི་ཆིག་སྟོང་དྲུག་བརྒྱའི་དབུགས་རླུང་འགོག་པས་རྟོག་མེད་མ་ཉམས་པའི་བདེ་བའི་རང་བཞིན་ཟུར་དུ་འཇུག་པའི་ཡེ་ཤེས་ཀྱི་རྡོ་རྗེ་འཆང་གི་རང་བཞིན་ཏིང་ངེ་འཛིན་ཡིན་ནོ། །བྱང་ཆུབ་སེམས་དཔར་འགྱུར་རོ་ཞེས་པ་ནི་མྱ་ངན་ལས་འདས་པའི་སེམས་སྐྱེ་བ་དང་བྱང་ཆུབ་པ་དང་ཆོས་ཀྱི་འཁོར་ལོ་བསྐོར་བ་ལ་སོགས་པ་མི་མཛད་པ་སྟེ། དེ་མཛད་པ་ན་སངས་རྒྱས་ཀྱི་ཞིང་ཁམས་སུ་རྫོགས་པའི་སངས་རྒྱས་ཁོ་ནར་གྲགས་པར་འགྱུར་རོ་ཞེས་དགོངས་པའོ། །དབང་བཅུ་ནི་ཚེ་དང༌། ལས་དང༌། མོས་པ་དང༌། ཡོ་བྱད་དང༌། སྨོན་ལམ་དང༌། རྫུ་འཕྲུལ་དང༌། ཆོས་དང༌། སེམས་དང༌། སྐྱེ་བ་དང༌། ཡེ་ཤེས་ལ་དབང་བ་ལ་སོགས་པའོ། །ནཱ་ད་ལ་གོམས་པས་ནི་ལྷན་ཅིག་སྐྱེས་པའི་ཡེ་ཤེས་ཀྱི་དགའ་བ་ལ་གོམས་པས་སོ། །ཇི་ལྟར་བཤད་པའི་གཞོན་ནུ་
མའི་པདྨར་རྡོ་རྗེ་བཅུག་ཅིང་གཡོ་བ་མེད་པར་ངལ་སོལ་དེའི་པདྨར་རྡོ་རྗེའི་ནོར་བུས་མནན་ལ་དགའ་བ་དང་མཆོག་ཏུ་དགའ་བས་ཡུད་ཙམ་མི་གཡོ་ཞིང་གཉིས་ཀ་ལ་ཉམས་པའི་དགའ་བ་འཆར་བ་ན་ཧཱུཾ་ཞེས་བརྗོད་པ་སྔོན་དུ་འགྲོ་བས་བླ་མ་དམ་པའི་དྲིན་ལ་མངོན་དུ་ཕྱོགས་ཤིང༌། ལྷན་ཅིག་སྐྱེས་པའི་དགའ་བ་བཞི་པ་མྱོང་བས་བྱང་ཆུབ་ཀྱི་སེམས་བཀག་སྟེ་མ་ཉམས་པའི་སྐད་ཅིག་ཐོབ་པའོ། །དམིགས་པ་མེད་པའི་གནས་སུ་འགྲོ། །བཅུ་གཉིས་ཀྱི་མཐར་ནི་སྣ་བུག་གཡོན་པ་ན་ནམ་མཁའ་ནས་སའི་དཀྱིལ་འཁོར་གྱི་བར་དུ་སོར་བཅུ་དྲུག་ནས་བཅུ་གཉིས་ཀྱི་མཐར་རོ། །བཅུ་དྲུག་མཐར་ནི་སྣ་བུག་གཡས་པ་ནས་སའི་དཀྱིལ་འཁོར་ནས་ནམ་མཁའི་བར་དུ་སོར་བཅུ་གཉིས་ནས་བཅུ་དྲུག་གི་མཐར་རོ། །ཧཱུཾ་གི་སྒྲས་བརྗོད་པས་སྲོག་དང་ཐུར་སེལ་གཉིས་སྦྱར་བས་ལྟེ་བར་ཐིམ་པར་བྱས་ནས་དབུ་མར་བཅུག་སྟེ་གློག་གི་མེ་དང་མཚུངས་པ་གྱེན་དུ་བསྐུལ་བས་ཁ་བ་ལྟ་བུའོ། །གྲོང་འཇུག་མི་ནུས་ན་འཕོ་བ་བྱས་ཏེ་རྡོ་རྗེ་ལངས་པ་ནི་བདེ་བའི་ཡེ་ཤེས་ཀྱི་མཆོག་བསྐྱེད་ནས་སོ། །མཁའ་ལ་སྤྱོད་པ་ནི་འོག་མིན་གྱི་བར་དུ་དབང་བྱེད་པའོ། །མངོན་ཤེས་ལྔ་ནི་རྫུ་འཕྲུལ་དང༌། ལྷའི་མིག་དང༌། ལྷའི་རྣ་བ་དང༌། གཞན་གྱི་སེམས་ཤེས་པ་དང༌། སྔོན་གྱི་གནས་རྗེས་སུ་དྲན་པ་སྟེ་མངོན་ཤེས་ལྔའི་རང་བཞིན་དུ་སྣ་ཚོགས་ཡུམ་གྱུར་ཏེ་ཕྱག་རྒྱ་ཆེན་པོ་ལ་ཆགས་པས་རྟོག་མེད་གཏུམ་མོ་འབར་བས་སོ། །མ་ཉམས་གསུམ་ནི་སེམས་ཀྱི་ཐིག་ལེ་ནི་གསང་གནས་སུ་འགོག་པ་དང༌། །ངང་གི་ཐིག་ལེ་ལྟེ་བར་འགོག་པ་དང༌། ལུས་ཀྱི་ཐིག་ལེ་སྙིང་གར་འགོག་པའོ། །མ་ཉམས་པའི་བདེ་བས་ནི་རྡོ་རྗེའི་རྩེ་མོར་ཐིག་ལེའི་ཚོགས་མ་ཉམས་པས་ཡེ་ཤེས་ཀྱི་ཐིག་ལེ་འགོག་པའོ། །རླུང་གཉིས་འགོག་པ་ཞེས་བྱ་བའི་བར་གྱིས་མཁའ་སྤྱོད་ཀྱི་བསྒྲུབ་པ་དང༌། སྣ་ཚོགས་ཡུམ་ཞེས་བྱ་བའི་བར་གྱིས་ཕྱག་རྒྱ་ཆེན་པོའི་སྒྲུབ་པ་བསྟན་ཏོ། །ཕྱག་རྒྱ་ཆེན་པོ་སྒྱུ་མ་ལྟ་བུ་ནི་མེ་ལོང་དངས་པའི་གཟུགས་བརྙན་ལྟ་བུའོ། །ནམ་མཁར་སེམས་སུ་མེད་པ་ནི་སེམས་མ་ཡིན་པའི་སེམས་ལའོ། །ཤེས་རབ་དང་ཡེ་ཤེས་ཀྱི་གོ་རིམས་བཞིན་དུ་ནི་ཆོས་ཐམས་ཅད་སྟོང་བར་རྟོགས་པ་ནི་ཤེས་རབ་བོ། །ཡེ་ཤེས་ནི་འཛིན་པའི་སེམས་སོ། །
དུ་བ་ལ་སོགས་པའི་སྣང་བ་ནི་དེའི་གཟུང་བྱ་ཡིན་ནོ། །ཇི་ལྟར་མེ་ལོང་གི་གཟུགས་བརྙན་མིག་རང་གི་མིག་གིས་མཐོང་བ་དེ་བཞིན་དུ་སྟོང་བ་ཉིད་ཀྱི་རང་བཞིན་རང་སེམས་ཀྱིས་སྟོང་བ་ཉིད་ཀྱི་རང་བཞིན་རྣམ་པ་ཐམས་ཅད་དང་ལྡན་པའི་རང་སེམས་མཐོང་ངོ༌། །གཟུད་བྱའི་སེམས་དུ་བ་དང་ལྡན་པའི་མཚན་ཉིད་འདི་ལ་རྣལ་འབྱོར་པས་དབུ་མ་ལ་སྲོག་རླུང་གཞུག་དགོས། དེས་མཚན་མ་མཐོང་བའོ། །འདི་ནི་བླ་མའི་ཞལ་དང་བོ་སྐུའི་རྡོ་རྗེའོ། །དེ་བས་ཉི་མ་དང་ཟླ་བར་འགྲོ་བའི་སྲོག་རླུང་བསྡམས་པས་གཉིས་པ་སྲོག་རྩོལ་གསུང་གི་རྡོ་རྗེའོ། །བྱང་སེམས་ནི་བྱང་སེམས་སྣ་ཚོགས་གཟུགས་བརྙན་ལ་ཆགས་པ་གསུམ་པ་ཐུགས་ཀྱི་རྡོ་རྗེའོ། །བདེ་བའི་མཆོག་གིས་རྡོ་རྗེ་བསླང༌། །སྣ་ཚོགས་གཟུགས་ཀྱི་སྒོ་ནས་དགའ་བ་མ་སྐྱེས་ན་དེའི་ཚེ་བུལ་བར་རྡོ་རྗེའི་སྒྲ་བྱའོ། གལ་ཏེ་ཤེས་རབ་མ་མ་རྙེད་ན་དེའི་ཚེ་རང་གི་ལག་གིས་རྡོ་རྗེ་གསོར་བ་བདེ་བ་འཕེལ་བའི་ཕྱིར་ཏེ་ལྟུང་བའི་ཕྱིར་མ་ཡིན་ནོ། །དེ་ལྟར་བྱང་སེམས་མི་འདོར་ཞིང་བདེ་བ་དང་ལྡན་པ་འཆི་བའི་འཇིགས་པ་ལས་སྐྱོབ་པ་བཞི་པ་ཡེ་ཤེས་རྡོ་རྗེ་འདིའོ། །འདི་ནི་རྣལ་འབྱོར་པས་བསྒོམ་པའི་དེས་པའོ། །དང་པོ་སངས་རྒྱས་ནི་དབང་མདོར་བསྡུས་པའི་སྐབས་སུ་སྟེ། འདི་ཁོ་ནལ་སོགས་པའོ། །ཉོན་མོངས་པ་དང་ཤེས་བྱའི་སྒྲིབ་པའི་བུད་ཤིང་ཅན། ཐམས་ཅད་མཁྱེན་པའི་ཡེ་ཤེས་ཀྱི་མེ་དུ་བ་ལ་སོགས་པས་འདི་ཁོ་ན་རྣལ་འབྱོར་བས་བསྒྲུབ་པར་བྱ་སྟེ། ཇི་ལྟ་བུས་ཤེ་ན། རྩ་བའི་རྒྱུད་དང༌། རྒྱུད་ཕྱི་མ་དང༌། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སོགས་པ་ངེས་དོན་གྱི་མདོ་ལས་གྲགས་པ། སྟོང་པ་ཉིད་ལ་སྣང་བ་རྟོག་པ་ཐམས་ཅད་དང་བྲལ་བས་བསམ་དུ་མེད་པ་དེ་ཁོ་ན་ཉིད་ཀྱི་འབྲས་བུ་མངོན་དུ་འབྱུང་བས་མཚན་མ་སོགས་གཟུང་འཛིན་དང་བྲལ་བས་རང་བཞིན་གྱིས་སྟོང་བའི་ཤེས་རབ་ཀྱི་གཟུགས་བརྙན། ཕྱི་ནང་གི་སྒྲིབ་བས་མ་གཡོགས་པས་ནམ་མཁའ་དང་མཉམ་པ། ཡོད་མེད་ལ་སོགས་པའི་རྟོག་པ་མེད་པས། ཡོད་མེད་ལས་འདས་པ། རང་རིག་ཡིན་པས་རང་སེམས་ཀྱིས་མྱོང་བའི་དོན་མ་བྱས་པས་ངོ་མཚར་བ། རང་བཞིན་མེད་པས་རྡུལ་ཕྲ་རབ་ཀྱི་ཚོགས་པས་སྟོང་པ། མོ་གཤམ་གྱི་བུ་
མོ་དང་ཕྲད་པས་བདེ་བ་རྨི་ལམ་དུ་འབྱུང་བ་ལྟར། ནམ་མཁའ་ལས་བྱུང་གཟུགས་བརྙན་ལ། །བརྟེན་བས་རང་ལ་དེ་བཞིན་ནོ། །ས་ཡི་རྣམ་པ་ལ་སོགས་པ་ནི་གཟུགས་བརྙན་གྱི་མཚན་ཉིད་དོ། །འདིར་སྟོང་པ་ཉིད་ཀྱི་སྣང་བ་དངོས་པོ་མ་ཡིན་པ་ལ་སོགས་པར་སྣང་བ་སྲ་བ་མིན། ཁུ་བའི་རྣམ་པ་ཅན་སྨིག་རྒྱུའི་ཆུ་བཞིན་དུ་ཆུ་མ་ཡིན་ཏེ། དངོས་པོ་མ་ཡིན་པས་སོ། །མེའི་རྣམ་པ་ཅན་མེ་མ་ཡིན་ཏེ། མི་སྲེག་པས་སོ། །གཡོ་བ་རླུང་ལྟར་སྣང༌། རླུང་མིན་དངོས་པོ་མིན་པས་སོ། །ནམ་མཁའ་ལྟ་བུ་དེ་མི་མཐོང་བའི་ཕྱིར་རོ། །སྒྱུ་མའི་གྲོང་ཁྱེར་ལྟར་དཀར་པོ་ལ་སོགས་པའི་ཁ་དོག་དང་ལྡན་ཀྱང་དངོས་པོ་མ་ཡིན་པས་མདོག་མ་ཡིན་ནོ། །རྣམ་པ་ཐམས་ཅད་དང་ལྡན་ཡང་བྱིས་པ་རྣམས་ཀྱིས་མཐོང་བྱ་མ་ཡིན་ཏེ། ཉོན་མོངས་པ་དང་བདུད་ཀྱི་མཐུ་སྟེ། གཡོན་དང་གཡས་སུ་སྲོག་རླུང་རྒྱུ་བས་སོ། །ད་ནི་དཀྱིལ་འཁོར་ལྔ་ཐིམ་ཚུལ་བཤད་དེ། ས་རླུང་ལ་སོགས་པའོ། །གང་གི་ཚེ་རྣལ་འབྱོར་བ་མིག་བརྟན་ཅིང་ཁྲོ་བོའི་སྟངས་ཀྱིས་སྟོང་པ་ལ་སེམས་གཏད་པ་དེའི་ཚེ་སྣ་བུག་གཡོན་ནམ་གཡས་ལ་ནམ་མཁའ་ལ་སོགས་པའམ། ས་ལ་སོགས་པ་རྒྱུ་བས་སའི་རླུང་ཆུ་རླུང་ལ་ཐིམ། དེ་ལྟར་གཡོན་ནས་ནམ་མཁའ་ལ་སོགས་པ་རྣམ་ཤེས་ཀྱི་དཀྱིལ་འཁོར་གྱི་བར་རོ། །དེ་ལྟར་སྟོང་པ་ཉིད་དུ་བ་ལ་སོགས་པ་རྟགས་བཅུར་འགྱུར། རྟགས་ཀྱང་རྣམ་པ་ཐམས་ཅད་དང་ལྡན་པའི་གཟུགས་བརྙན་དུ་འགྲོ། གཟུགས་བརྙན་དེ་མ་ཉམས་པའི་བདེ་བར་འགྲོ། དེ་ཉིད་ཤེས་རབ་ཀྱི་ཕ་རོལ་ཏུ་ཕྱིན་པའི་ཡེ་ཤེས་ཡིན། ཡེ་ཤེས་ལས་ནམ་མཁའ་ལ་འགྲོ་བ་ལ་སོགས་པའི་རྫུ་འཕྲུལ་དང་ཁམས་གསུམ་གྱི་དབང་ཕྱུག་གི་སྒྲུབ་པ་སྐྱེ་བ་འདི་ཉིད་དུག་གྲུབ་པར་འགྱུར་རོ། །རྣལ་འབྱོར་ཉི་བར་བསྡུས་ཤིང་བཤད་དེ་དབུ་མ་ལ་སོགས་པའོ། །འདིར་དང་པོ་འཛིན་པའི་སེམས་སྟོང་བར་ཐིམ་པ་ནི་རོ་གཅིག་ཏུ་གྱུར་བའོ། །བྱིས་པ་དང་དར་ལ་བབ་པ་དང་འཛག་པ་ནི་ཐབས་ཀྱི་ཉམས་པའི་བདེ་བ་གཉིས་འགྱུར་བ་དང་བུལ་བའོ། །ཤེས་རབ་མི་འཛག་པ་སྟེ་མྱུར་དུ་མ་ཉམས་པས་སོ། །དེ་དག་གི་མཆོག་འཇིག་རྟེན་ལས་འདས་པ་གང་གི་མི་འཛག་པ་དེ་བཞིན་པ་ཕྱག་རྒྱ་ཆེན་པོ་ལས་བྱུང་
བའོ། །ད་ནི་རང་གི་སེམས་སྣང་བ་མེ་ལོང་གི་གཟུགས་བརྙན་ལྟ་བུ་ལ་འཇུག་པར་བཤད་དེ། ནམ་མཁའ་ལ་སོགས་པའོ། །མཚན་མོ་ནི་མུན་པ་ཉེ་བར་མཚོན་པའོ། །ཆགས་པ་ནི་ནམ་མཁའ་ལ་སེམས་ཐིམ་པའོ། །གཟུགས་ཀྱི་སྣང་བ་ནི་མེ་ལོང་གི་གཟུགས་བརྙན་ལྟ་བུ་དེ་རྙོག་པ་དང་བྲལ་བ་ཐོགས་པ་མེད་པར་སྣང་བས་སོ། །སྒྲའི་སྣང་བ་ནི་མགུལ་པ་དང་རྐན་ལ་སོགས་པའི་རྩོལ་བ་ལས་བྱུང་བ་མ་ཡིན། བདེ་བ་ཆེན་པོའི་སྟོབས་ཀྱིས་རང་སྒྲ་ཙམ་མྱོང་བས་སོ། །ཚིགས་བཅད་འདིས་སྐུ་གཉིས་བཤད་དོ། །གཞན་གྱི་སེམས་ཤེས་པ་མེད་པ་ནི་རང་གི་སེམས་ལས་ཐ་དད་པ་གཞན་གྱི་སེམས་ཤེས་པར་བྱར་མེད་པས་སོ། །གསུངས་པ། མ་སྐྱེས་པ་དང་མ་འགགས་པ། །འདིར་ནི་ཤེས་བྱ་གང་མཐོང་བ། །དེ་ནི་རང་སེམས་གཞན་མ་ཡིན། །ཕྱི་ཡི་ཤེས་བྱ་ལས་གཞན་ཕྱིར། །དེ་བས་རང་གིས་རང་ཉིད་ལ། །རྒྱས་འདེབས་པ་ནི་གར་ཡང་མེད། །རལ་གྲི་ཆེན་པོས་རང་ཉིད་ཀྱི། །རང་སོགས་གཅོད་པར་མི་ནུས་བཞིན། །ཚིགས་བཅད་འདིས་ཆོས་ཀྱི་སྐུ་སྒྲུབ་པར་བཤད་དོ། །ཕྱི་ནང་ཁྱབ་པའི་དུ་བའི་རྣམ་པ་སྤྲིན་གྱི་སྣང་བའི་རྗེས་སུ་འབྱུང་ངོ༌། །དེ་གསུངས་པ། དང་པོ་ཉིད་དུ་སྤྲིན་བཞིན་སྣང༌། །དུ་བར་སྣང་བ་གཉིས་བའོ། །ཞེས་སོ། །སྨིག་རྒྱུ་ནི་གཡོ་བཱ་ཆུ་བཞིན་ནོ། །སྲིན་བུ་མེ་ཁྱེར་དང་མར་མེའི་རྣམ་པ་གྲགས་བ་བཞིན་ནོ། །མཚན་མ་བཞི་པོ་འདི་དག་ནི་བུག་མེད་པའི་ཁྱིམ་དུ་མུན་པ་ལས་འབྱུང་བས། མཚན་མོའི་སྦྱོར་བ་དང་ནམ་མཁའི་སྦྱོར་བའོ། །གསང་བ་འདུས་པ་ལས་དང་པོ་དང་གཉིས་པ་བཟློག་པར་གསུངས་པ། སེམས་འགོག་རྡོ་རྗེར་གྱུར་པ་ན། །མཚན་མ་དག་ནི་འབྱུང་བར་འགྱུར། །མཚན་མ་དེ་ཡང་རྣམ་པ་ལྔ། །བྱང་ཆུབ་རྡོ་རྗེས་གསུངས་པ་ཡིན། །ཐོག་མར་སྨིག་རྒྱུའི་རྣམ་པ་ཅན། །དུ་བ་ལྟ་བུ་གཉིས་པའོ། །སྲིན་བུ་མེ་ཁྱེར་གསུམ་པ་སྟེ། །མར་མེ་ལྟ་བུ་བཞི་པ་ཡིན། །སྤྲིན་མེད་ནམ་མཁའ་ལྟ་བུ་ནི། །རྟག་ཏུ་སྣང་བ་ལྔ་པའོ། །ཞེས་སོ། །སྤྲིན་མེད་ནམ་མཁའ་སྣང་བ་སྔོན་དུ་འགྲོ་བ་མེའི་རྣམ་པ་ཅན་འབར་བ་དང་ཟླ་བ་དང་ཉི་མའི་སྣང་བ་གྲགས་པ་བཞིན། སྒྲ་གཅན་ནི་རིན་ཆེན་ནག་པོ་ལྟར་སྣང༌། གློག་
དང་ཐིག་ལེ་ཆེན་པོ་ནི་བརྟན་པ་དང་གཡོ་བ་གསལ་བར་བྱེད་པ་མདོག་སྔོན་པོ་ཟླ་བའི་དཀྱིལ་འཁོར་གྱི་རྣམ་པ་ལྟར་སྣང༌། མཚན་མ་དྲུག་པོ་འདི་དག་ནི་སྤྲིན་མེད་པའི་ནམ་མཁའི་སྣང་བ་ལས་བྱུང་བ་ཉིན་མོའི་རྣ་འབྱོར་དང་བླགས་བ་མེད་པའི་རྣལ་འབྱོར་རོ། །དེ་ནས་དེའི་དབུས་སུ་ལོངས་སྤྱོད་རྫོགས་པའི་སྐུའི་བདག་ཉིད་སངས་རྒྱས་ཀྱི་གཟུགས་བརྙན་མཐོང་བ་སྔོན་དུ་འགྲོ་བ་སྐད་ཅིག་གཅིག་ལ་ལག་མཐིལ་ན་ཡོད་པའི་ཆུ་བཞིན་དུ་དང་བ་རྣམ་པ་ཐམས་ཅད་དང་ལྡན་པའི་བུམ་པ་དང་རས་ལ་སོགས་པའི་སྣ་ཚོགས་གཟུགས་འོད་གསལ་བ་མཐོང་བའོ། །བཙུམས་པ་ལ་སོགས་པ་ནི་བར་སྣང་ལ་ཕྱེད་ཕྱེ་བའི་མིག་གཉིས་ཀྱིས་སྟོང་བ་ནི་གཟུང་འཛིན་དང་བྲལ་བ་ལས་ཏེ། མ་བརྟགས་པའི་རྣལ་འབྱོར་གྱི་མངོན་སུམ་དུ་གཟུགས་བརྙན་དུ་བ་ལ་སོགས་པ་རྟག་ཏུ་བསྒོམ་པར་བྱའོ། །རྣལ་འབྱོར་གཉི་ག་ནམ་མཁའ་ལ་ཆགས་པ་ལ་སོགས་པས་དུས་ཀྱི་འཁོར་ལོར་གསུངས་སོ། །ཤེས་རབ་ཀྱི་ཕ་རོལ་ཏུ་ཕྱིན་པ་ལས་ཀྱང་གསུངས་པ། རིན་པོ་ཆེ་སྣང་བ་ཞེས་བྱ་བའི་ཏིང་ངེ་འཛིན་དང༌། རིན་པོ་ཆེ་སྒྲོན་མ་ཞེས་བྱ་བ་དང༌། ཟླ་བའི་སྣང་བ་ཞེས་བྱ་བ་དང༌། །ཉི་མའི་སྒྲོན་མ་ཞེས་བྱ་བ་དང༌། རྣམ་པ་ཐམས་ཅད་མཐོང་བ་ཞེས་བྱ་བ་ལ་སོགས་པའོ། །དེ་བས་ཐེ་ཚོམ་མེད་པར་དུ་བ་ལ་སོགས་པའི་ལམ་འཚང་རྒྱ་བར་འདོད་པས་བསྒོམ་པར་བྱའོ། །འོ་ན་རྟོག་པ་དང་བྲལ་བ་ཕྱག་རྒྱ་ཆེན་པོ་ཡིན་ལ། སྒོམ་པ་ནི་སྒྲོ་བཏགས་པ་སྟེ་ཇི་ལྟར་བསྒོམ་པར་བྱ་ཞེས་བཤད་ཅེ་ན། སྨྲས་པ། སྒོམ་པ་ལ་སོགས་པའོ། །གདམས་པ་ཇི་ལྟ་བ་བཞིན་དུ་ཕྱི་ནང་མེད་པ་ལ་སྒོམ་པའི་གཟུགས་བརྙན་དེ་ཉིད་ལ། རྣལ་འབྱོར་བའི་བསྒོམ་པ་གང་ཡིན་པ་དེ་དངོས་པོ་མ་ཡིན་པའི་ཕྱིར་བསྒོམ་པ་མ་ཡིན་ནོ། །འོ་ན་དངོས་པོའི་ཡིན་རུང་དངོས་པོ་མ་ཡིན་པའི་ཡིན་རུང་རྟོག་པ་ལ་ཁྱད་མེད་པས་ཇི་ལྟར་དངོས་མིན་སྒོམ་ཞེ་ན་སྨྲས་པ། སེམས་ལ་སོགས་པའོ། །གང་གི་ཕྱིར་སྟོང་ཉིད་ཀྱི་གཟུགས་བརྙན་ལ་རྣལ་འབྱོར་པའི་དངོས་དང་དངོས་མིན་གྱི་རྟོག་པ་མེད་དེ། སྟོང་ཉིད་ཀྱི་གཟུགས་བརྙན་མ་བརྟགས་པའི་དུ་བ་ལ་སོགས་པ་ལ་མངོན་སུམ་དུ་མཐོང་བའི་ཕྱིར་རོ། །དགོངས་པ་འདི་ལྟ་
སྟེ་གལ་ཏེ་བརྟག་པ་ཡིན་ན་དངོས་པོར་འགྱུར་ཏེ་ལུགས་མ་ལ་སོགས་པ་བཞིན་ནོ། །མཐོང་བ་མེད་ན་དངོས་པོ་མ་ཡིན་པར་འགྱུར་ཏེ་མོ་གཤམ་གྱི་བུ་ལ་སོགས་པ་བཞིན་ནོ། །འདིར་ནི་མ་བརྟགས་པར་མངོན་སུམ་དུ་མཐོང་བས་ཐམས་ཅད་ལེགས་པར་གནས་སོ། །མཐོང་བའི་དཔེ་བཤད་དེ་པྲ་ཕབ་པ་ལ་སོགས་པའོ། །པྲ་ཕབ་པ་ནི་སྒྲུབ་པ་པོས་བྱེད་པ་སྟེ། མེ་ལོང་དང་རལ་གྲི་དང་མཐེ་བོང་དང་མར་མེ་དང་ཟླ་བ་དང་ཉི་མ་དང་ཆུ་ལ་མིག་གི་སྤྱོད་ཡུལ་དངོས་པོ་ལས་མ་བྱུང་བ། ཆོམ་རྐུན་ལ་སོགས་པ་བེམས་པོའི་ཆོས་ལས་མ་བྱུང་བ། མ་བརྟགས་པར་མཐོང་བ་འདི་ལ་དངོས་པོ་དང་དངོས་མིན་མེད་དོ། །དངོས་པོ་མེད་པར་དོན་བྱེད་ནུས་པ་ཙམ་དམིགས་པས་སོ། །འཇིག་རྟེན་ཁོ་ན་ལ་དངོས་པོ་མེད་པར་དངོས་པོར་མཐོང་སྟེ། དཔེར་ན་སྒྱུ་མ་དང་རྨི་ལམ་ལ་སོགས་པའོ། །ཆོས་ཅན་ལ་སོགས་པ་ནི་རྟོག་པ་མེད་པའི་ཡེ་ཤེས་འབྱུང་བ་དེ་ནི་རྣམ་པ་ཐམས་ཅད་དུ་འགྲོ་བའི་དོན་སྒྲུབ་པར་བྱེད་པས་ཡིད་བཞིན་ནོར་བུ་ལྟ་བུའོ། །དཔེ་བཤད་དེ་སྔར་ལ་སོགས་པའོ། །སྔར་མ་མཐོང་བའི་ཆོམ་རྐུན་ལ་སོགས་པ་སྔགས་ཀྱིས་བྱིན་གྱིས་བརླབས་པའི་མིག་གིས་གཞོན་ནུ་མས་པྲ་ཕབ་ན་མཐོང༌། །སྒྲུབ་པ་པོས་ནི་གཞོན་ནུ་མས་བཤད་པ་དེར་སོང་ལ་ཉི་ཚེ་བའི་མིག་གིས་མཐོང་ངོ༌། །བསམ་པ་འདི་ལྟ་སྟེ་སྒྲུབ་པའི་མན་ངག་སྔགས་ཀྱིས་བྱིན་གྱིས་བརླབས་པའི་བློའི་སྤྱན་གྱིས་རྣལ་འབྱོར་པ་གཞོན་ནུ་མ་བཞིན་བྱང་སེམས་མ་ཉམས་པས་མ་བསྟན་པ། ཐ་མལ་པའི་བགྲོད་བྱ་མ་ཡིན་པ་ནམ་མཁའ་ལ་འཇིག་རྟེན་ལས་འདས་པའི་དེ་ཁོ་ན་ཉིད་མཐོང་ངོ༌། །དེའང་སྤྲོས་པ་མཐའ་དག་དང་བྲལ་བར་བཤད་དེ་གཞན་གྱིས་ལ་སོགས་པའོ། །གཞན་གྱི་མིག་གིས་མི་མཐོང་སྟེ་དུ་བ་གཞན་དུ་མི་མཐོང་བའི་ཕྱིར་རོ། །རང་གི་མིག་གིས་མི་མཐོང་སྟེ་མིག་རས་ཀྱིས་བཀབ་པའི་ཕྱིར་རོ། །པྲ་ཕབ་པའི་དཔེ་འདིས་རྣལ་འབྱོར་གྱི་མངོན་སུམ་རང་བཞིན་ཀུན་མེད་པས་མ་སྐྱེས་ཏེ། རྨི་ལམ་དུ་གཞོན་ནུ་མས་བུ་དམིགས་པ་བཞིན་ཐམས་ཅད་མཁྱེན་པའི་ཡེ་ཤེས་གྲུབ་བོ། །སྦྱོར་བ་ཡན་ལག་དྲུག་གི་ནི། །བདག་གིས་བཤད་པའི་དགེ་བ་གང༌། །དེས་ནི་འཇིག་རྟེན་མ་ལུས་
པ། མ་ཉམས་བདེ་བ་ཐོབ་པར་ཤོག །སྦྱོར་བ་ཡན་ལག་དྲུག་པའི་འགྲེལ་པ་པཎྜི་ཏ་ཆེན་པོ་ཉི་མ་དཔལ་ཡེ་ཤེས་ཀྱིས་མཛད་པ་རྫོགས་སོ།། །།རྒྱ་གར་ཤར་ཕྱོགས་ཀྱི་པཎྜི་ཏ་ཆེན་པོ་ཤྲཱི་བི་བྷཱུ་ཏི་ཙནྡྲས་རུ་ལག་གི་སྙིང་པོ་འབྲིང་མཚམས་ཀྱི་སའི་ཅ་དཔལ་རྒྱ་རྟགས་ཀྱི་གཙུག་ལག་ཁང་དུ་བསྒྱུར་ཅིང་ཞུས་ཏེ་གཏན་ལ་ཕབ་པའོ། །