དཔལ་འཁོར་ལོ་སྡོམ་པའི་སྒྲུབ་ཐབས་རིན་པོ་ཆེའི་སྒྲོན་མ།
མཻ་ཏྲི་པ།
༄། །རྒྱ་གར་སྐད་དུ། ཤྲཱི་ཙ་ཀྲ་སཾ་བ་ར་སཱ་དྷ་ནཾ་རཏྣ་དཱི་པ། བོད་སྐད་དུ། དཔལ་འཁོར་ལོ་སྡོམ་པའི་སྒྲུབ་ཐབས་རིན་པོ་ཆེའི་སྒྲོན་མ། །དཔལ་ཧེ་རུ་ཀ་ལ་ཕྱག་འཚལ་ལོ། །གང་ཞིག་རྣམ་དག་ཀུན་དུ་རྟོག་ཡངས་མཁའ་འདྲའི་ཆོས་སྐུ་དང༌། །དཔེ་མེད་ཕུན་ཚོགས་བདེ་བས་རྣམ་མཛེས་ལོངས་སྤྱོད་རྫོགས་སྐུ་ཉིད། །ས་རྣམས་ཀུན་དུ་ཕན་མཛད་རབ་གསལ་སྤྲུལ་པའི་སྐུར་བརྗོད་གང༌། །བཅོམ་ལྡན་རྡོ་རྗེ་སེམས་དཔའ་དེ་ཡིས་ཁྱེད་ལ་བདེ་ལེགས་ཤོག །དང་པོར་རེ་ཞིག་རྣལ་འབྱོར་པ་དཔལ་འཁོར་ལོ་སྡོམ་པའི་དབང་བསྐུར་བ་དང་ཡང་དག་པར་ལྡན་པས་ཡིད་དང་རྗེས་སུ་མཐུན་ཞིང་དབེན་བར་བདེ་བའི་སྟན་ལ་འདུག་སྟེ། དམ་ཚིག་བརྟན་པར་བྱས་ནས་རང་གི་སྙིང་གར་ཉི་མའི་དཀྱིལ་འཁོར་ལ་ཧཱུཾ་ནག་པོ་བལྟས་ལ་བླ་མའི་མན་ངག་ཇི་བཞིན་པས་སྔགས་བསྐོང་པའི་ལག་པ་གཡོན་པས། དམ་ཚིག་གི་རྫས་སྦྱངས་ཤིང་བླངས་ཏེ། ཞལ་བཞི་པའི་སྔགས་ཀྱིས་ཕྱོགས་བཞི་དང་བདག་ཏུ་བྱས་པ་ལ་གཏོར་བ་དང་ཡན་ལག་ལ་ཡང་དགོད་པར་བྱ་ཞིང་བདག་དང་གནས་དང་རྣལ་འབྱོར་བསྲུང་བར་བྱའོ། །དེ་ནས་དྲི་ཞིམ་པོ་དང་བཅས་པའི་ཆུས་མདུན་དུ་མཎྜལ་བྱས་ཏེ། བདུད་རྩི་ལྔ་དང་དམ་ཚིག་ཅན་གྱིས་བྱུགས་ལ། དེའི་དབུས་སུ་གཡོན་པའི་མིང་མེད་ཀྱིས་མནན་ཏེ། པུ་ཛ་ལ་སོགས་པའི་ཡི་གེ་ཉི་ཤུ་རྩ་བཞིས་རྣམ་པར་དག་པ་དང༌། གནས་ལ་སོགས་པ་བཅུའི་མིང་ཅན་ས་བཅུར་མོས་པ་བརྗོད་པར་བྱའོ། །དེའི་རྗེས་ལ་དཀྱིལ་འཁོར་དེ་སྐད་ཅིག་ཙམ་གྱིས་འབྱུང་བ་ཆེན་པོ་བཞི་ལ་གནས་པའི་རི་རབ་ཀྱི་སྟེང་དུ། གཞལ་ཡས་ཁང་དུར་ཁྲོད་དང་བཅས་པ་བསྐྱེད་དེ། དེའི་ནང་དུ་སྣ་ཚོགས་པདྨའི་གེ་སར་ལ་ཉི་མའི་སྟེང་དུ་རང་གི་སྙིང་གའི་ས་བོན་གྱི་འོད་ལས་འཕྲོས་པའི་རྡོ་རྗེ་འཛིན་པ་བལྟས་ཏེ། དེ་ཡོངས་སུ་གྱུར་པ་ལས་བཅོམ་ལྡན་འདས་འཁོར་ལོ་ཡོངས་སུ་རྫོགས་པ་དང་བཅས་པའི་བདག་ཉིད་བཅོམ་ལྡན་འདས་མ་དང་སྙོམས་པར་འཇུག་པར་བ་ལྟ་བར་བྱའོ། །དེའི་འོག་ཏུ་སྙིང་གའི་ས་བོན་གྱི་འོད་ཟེར་གྱི་ཕྲེང་བ་རྣམས་ཀྱིས་འཁོར་ལོ་བསྐུལ་ཏེ། ནམ་མཁའི་ཕྱོགས་སུ་གནས་པ་ལ་མངོན་དུ་ཕྱོགས་ནས་མཆོད་པར་བྱས་ལ། སྔགས་དང་བཅས་པས་དམ་ཚིག་གི་འཁོར་ལོ་
༄། །བཅུག་ནས་རོ་མཉམ་པར་བྱ་བ་དང༌། མཆོད་པ་རྣམས་ཀྱིས་མཉེས་པར་བྱ་སྟེ། དེ་ཡང་རྣམ་པར་བྱང་བའི་ལག་པ་གཡེན་པས་ཡི་གེ་གསུམ་གྱི་སྔགས་དཀྱིལ་འཁོར་གྱི་དབུས་སུ། དང་པོ་བཅོམ་ལྡན་འདས་ཉིད་མེ་རྟོག་ལ་སོགས་པས་མཆོད་པར་བྱའོ། །འདི་ལྟ་སྟེ། བཅོམ་ལྡན་འདས་ཀྱི་སྙིང་པོ་དང་ཉེ་བའི་སྙིང་པོ་དང༌། བཅོམ་ལྡན་འདས་མའི་སྙིང་པོ་དང༌། ཉེ་བའི་སྙིང་པོ་ཉིད་ཀྱིས་བྱའོ། །དེ་བཞིན་དུ་མཁའ་འགྲོ་མ་ནས་གཤིན་རྗེ་འཇོམས་མ་ལ་སོགས་པའི་མཐར་ཐུག་དཔའ་བོའི་དབང་ཕྱུག་མ་བཅུ་གཉིས་མན་ངག་བཞིན་དུ་རང་རང་གི་སྔགས་ཀྱིས་ཕྱོགས་རྣམས་སུ་གཡོན་སྐོར་དུ་དགོད་ཅིང༌། མཚམས་རྣམས་སུ་ནི་གཡས་སུ་བསྐོར་བས་གནས་ཇི་ལྟ་བ་བཞིན་དེ་དག་ལ་མཆོད་པར་བྱའོ། །དེ་ནས་ཡིད་ལས་བྱུང་བའི་མཆོད་པའི་ལྷ་མོ་བཅུ་དྲུག་དང༌། བདུད་རྩི་དང༌། ཏེ་ཏེ་དགའ་བའི་གླུས་ཉེ་བར་མཆོད་པར་བྱའོ། །དེ་བཞིན་དུ་ལག་པ་གཡོན་པའི་མཐིལ་དུ་པདྨ་ལྔ་པ་ལྟེ་བ་དར་བཅས་པའི་གཞིར་དཔའ་མོ་དྲུག་རྣམས་ལ་གོ་རིམས་བཞིན་དུ་དམར་མོ་དང༌། སྔོན་མོ་དང༌། དཀར་མོ་དང༌། སེར་མོ་དང༌། ལྗང་གུ་དང༌། དུ་བའི་མདོག་ཅན་རྣམས་དགོད་ལ། འཁོར་ལོས་སྒྱུར་བ་དྲུག་ཀྱང་དཀར་པོ་དང༌། སྐྱ་བོ་དང༌། སེར་པོ་དང༌། ནག་པོ་དང། དམར་པོ་དང༌། ལྗང་གུ་རྣམས་སྔགས་ཀྱིས་གཟུགས་སུ་ཕྱོགས་ཇི་ལྟ་བ་བཞིན་དུ་རང་རང་གི་སྔགས་ཀྱིས་མེ་ཏོག་དགོད་པ་སྔོན་དུ་འགྲོ་བས་ཆོ་ག་བཞིན་དུ་མཆོད་པ་དབུལ་བར་བྱའོ། །འཁོར་ལོ་དེ་ཡང་ལག་པའི་རྒྱབ་ཏུ་མེ་ལོང་དང་བའི་ངོས་གཉིས་པའི་གཟུགས་བརྙན་བཞིན་དུ་གསལ་བར་སྣང་བར་བལྟའོ། །དེ་ནས་དེའི་དཀྱིལ་འཁོར་གྱི་སྔགས་རྣམས་ནི། ས་ལ་སོགས་པའི་ཁམས་རྣམས་ཀྱི་རང་བཞིན་ལྷུང་བྱེད་མ་དང༌། རྡོ་རྗེ་སེམས་དཔའ་ལ་སོགས་པའི་ལྷ་རྣམས་ཀྱི་ངོ་བོ་ཉིད་དུ་ལྷག་པར་མོས་པར་བྱ་སྟེ། ཁུ་བ་བྱིན་གྱིས་བརླབས་པས་བསང་གཏོར་བྱས་ལ་འཁོར་ལོ་དེ་ཉིད་དཔའ་བོ་དང་དཔའ་མོ་རྣམས་ཀྱིས་བྱིན་གྱིས་བརླབས་པའི་དཀྱིལ་འཁོར་ལ་འཁོར་ལོ་གསུམ་གྱི་རང་བཞིན་དུ་མོས་པར་བྱས་ཤིང་རྐང་པ་བརྒྱད་པའི་སྔགས་ཀྱིས་མེ་ཏོག་ལ་སོགས་པས་མཆོད་པར་བྱའོ། །དེ་ནས་མེ་ཏོག་ཕྲེང་བའི་སྔགས་བརྗོད་པའི་མཐར་དཀྱིལ་འཁོར་དུ་དོར་ཏེ། སྙིམ་པས་བླངས་
༄། །ནས་ཕྲེང་སྔགས་སྔོན་དུ་བརྗོད་པས་མགོ་བོར་དགོད་པར་བྱའོ། །ཡེ་ཤེས་ཀྱི་འཁོར་ལོ་དེ་ཡང་བདག་ཉིད་ལ་བཅུག་བར་བསམས་ནས་ཡི་གེ་བརྒྱ་པས་བརྟན་པར་བྱའོ། །དེ་ནས་སྡིག་པ་བཤགས་པ་ལ་སོགས་པ་ཆོ་ག་བཅུ་གསུམ་གྱིས་རྣམ་པར་དག་པར་ཡང་བྱའོ། །དེའི་འོག་ཏུ་བདག་པོ་རྣམས་ལ་བདུད་རྩི་མྱང་བ་ལྟ་བུའི་ཆོ་གས་གཏོར་མ་སྦྱིན་པའང་ཤེས་པར་བྱའོ། །གལ་ཏེ་འབྱོར་ན་རྣལ་འབྱོར་པ་རྣམས་འདུས་ཏེ་ཚོགས་ཀྱི་འཁོར་ལོ་བསྐོར་བར་བྱའོ། །དེ་ནས་རྡོ་རྗེ་དྲིལ་བུ་འཛིན་པས་མདུད་པ་བྱས་ཏེ། ཤྲཱི་ནི་གཉིས་མེད་ཡེ་ཤེས་ཏེ། །ཧེ་ནི་རྒྱུ་སོགས་སྟོང་པ་ཉིད། །རུ་ནི་ཚོགས་པ་དང་བྲལ་བ། །ཀ་ནི་གང་དུའང་མི་གནས་ཉིད། །ཧེ་རུ་ཀ་དཔལ་དཀྱིལ་འཁོར་གཙོ། །རྡོ་རྗེ་འཛིན་མཆོག་ཕྱག་འཚལ་བསྟོད། །དཔལ་ལྡན་རྡོ་རྗེ་མཁའ་འགྲོ་མ། །མཁའ་འགྲོ་མ་ཡི་འཁོར་ལོས་སྒྱུར། །ཡེ་ཤེས་ལྔ་དང་སྐུ་གསུམ་ཉིད། །འགྲོ་བ་སྐྱོབ་པ་ལ་ཕྱག་འཚལ་བསྟོད།། ཇི་སྙེད་རྡོ་རྗེ་མཁའ་འགྲོ་མ། །ཀུན་དུ་རྟོག་པ་འཆིང་གཅོད་ཅིང༌། །འཇིག་རྟེན་བྱ་བ་རབ་འཇུག་པ། །དེ་སྙེད་རྣམས་ལ་ཕྱག་འཚལ་བསྟོད། །ཅེས་བྱ་བས་བསྟོད་པར་བྱའོ། །ཆོ་གའི་བྱ་བ་མ་ཚང་བ། །རྫོགས་སངས་རྒྱས་དང་ལྷ་རྣམས་དང༌། །དེ་སྲས་རྣམས་དང་ཚངས་ལ་སོགས། །འཇིག་རྟེན་སྐྱོང་རྣམས་བཟོད་པར་གསོལ། །ཞེས་བྱ་བས་བཟོད་པར་གསོལ་ལོ། །དེ་ནས། ལྷ་མོ་ཚད་མ་དམ་ཚིག་ཚད་མ་དང༌། །དེས་གསུངས་ཚིག་ནི་མཆོག་ཏུ་ཚད་མ་སྟེ། །བདེན་པ་འདི་དག་གིས་ནི་ལྷ་མོ་རྣམས། །བདག་ལ་རྗེས་སུ་འཛིན་པའི་རྒྱུར་གྱུར་ཅིག །ཅེས་སྨོན་ལམ་གདབ་བར་བྱ་སྟེ།། འདི་ནི་ཕྱི་རོལ་གྱི་མཆོད་པའི་ཆོ་གའོ། །དེ་ནས་ནང་གི་རྣལ་འབྱོར་ལ་བརྩོན་པར་འདོད་པའི་སྔགས་པས། ཡང་སྙིང་གའི་ས་བོན་གྱི་འོང་ཟེར་ཕྲེང་བའི་ལྕགས་ཀྱུས་འཆང་བར་འགྱུར་བའི་མཚན་ཉིད་ཅན་གྱིས་བཅོམ་ལྡན་འདས་དཀྱིལ་འཁོར་དང་བཅས་པ་བསྐུལ་ཏེ། ནམ་མཁའ་ལ་བལྟས་ལ། ཕྱག་འཚལ་བ་དང་མཆོད་པ་སྔོན་དུ་འགྲོ་བས་དེའི་སྤྱན་སྔར་སྡིག་པ་བཤགས་པ་ལ་སོགས་པ་བྱ་བ་ནི། །ཐོག་མེད་ནས་བསགས་སྡིག་དར་བག་ཆགས་མཐུས། །རྣམ་སྨིན་སྡུག་བསྔལ་བསྐྱེད་ཅིང་བརྟས་གྱུར་པའི། །སྡིག་དང་ཉོན་མོངས་ཇི་སྙེད་མཆིས་གྱུར་པ། །བཅོམ་
༄། །ལྡན་འཁོར་ལོའི་གཙོ་ལ་སོ་སོར་བཤགས། །འདས་དང་མ་བྱོན་དེ་བཞིན་ད་ལྟའི་དུས། །ཉན་ཐོས་རང་རྒྱལ་བྱང་ཆུབ་སེམས་དཔའ་དང༌། །འབྲས་བུ་གསང་སྔགས་སྒྲུབ་པ་ལྷུར་བྱེད་པའི། །དགེ་བ་མཛད་པ་ཀུན་ལ་རྗེས་ཡི་རང༌། །ཁྱེད་འདིར་མི་འགྱུར་མཁའ་ལྟར་རྟག་བཞུགས་ལ། །དོགས་པའི་ས་ལས་སེམས་ཅན་བསྒྲལ་པའི་ཕྱིར། །སྲིད་པ་ཇི་སྲིད་གཟུགས་སྐུ་རྣམ་གཉིས་སུ། །མྱ་ངན་མི་འདའ་བརྩེ་བས་བཞུགས་སུ་གསོལ། །འཁོར་བ་ཇི་སྲིད་བར་དུ་བཞུགས་ནས་ཀྱང༌། །སེམས་ཅན་དམན་དང་མཆོག་དང་བར་མ་ལ། །གསང་སྔགས་རྡོ་རྗེ་ཐེག་པ་བླ་མེད་པའི། །བདེ་བ་མཆོག་གི་འཁོར་ལོ་བཤད་དུ་གསོལ། །ལྷ་མོ་རྐྱང་གཉིས་གཙོ་བོ་ཐམས་ཅད་མཁྱེན། །དུས་གསུམ་གཤེགས་པ་སངས་རྒྱས་ངོ་བོ་ཉིད། །དུས་གསུམ་དབྱེར་མེད་ཡེ་ཤེས་དཔའ་བོའི་ཐུགས། །སངས་རྒྱས་གཙོ་ལ་གུས་པས་སྐྱབས་སུ་མཆི། །ངན་འགྲོ་སྲིད་པའི་ཉོན་མོངས་དྲི་སེལ་བ། །རྣམ་དག་དུས་གསུམ་དམ་ཆོ་ས་ངོ་བོ་ཉིད། །ཨཱ་ལི་ཀཱི་ལི་རོ་གཅིག་དཔའ་མོ་གསུངས། །སྐྱོབ་བའི་ཆོས་ལ་དང་བས་སྐྱབས་སུ་མཆི། །སྡིག་གྲོགས་ལོག་པར་ཁྲིད་ལ་ཐར་མཛད་པ། །དུས་གསུམ་ཚོགས་ཀྱི་དམ་པའི་རང་བཞིན་དཔལ། །ཚོགས་གཉིས་རྣལ་འབྱོར་བདེ་ཆེན་ལྷ་ཡི་ལྷ་ཡི་སྐུ། །དགེ་འདུན་ཆེ་ལ་ཡང་དག་སྐྱབས་སུ་མཆི་།སྲིད་པའི་བརྩོན་རར་བསྡམས་པའི་ཉམ་ཐག་རྣམས། །བདེ་བ་མཆོག་གི་ས་ལ་དགོད་པའི་ཕྱིར། །བགྲོད་པ་ཀུན་ཀྱང་འཁོར་ལོ་སྡོམ་པ་ཡི། །ལམ་ཆེན་འདི་ལ་དགའ་བས་བདག་གནས་སོ། །བླ་ན་མེད་པའི་བྱང་ཆུབ་སེམས། །དམ་པ་བདག་གིས་བསྐྱེད་བགྱིས་ཏེ། །སེམས་ཅན་རྣམས་ཀྱི་དོན་གྱི་ཕྱིར། །རྡོ་རྗེ་འཁོར་ལོ་རིན་ཆེན་དང༌། །པདྨ་དང་ནི་ལས་ཀྱི་རིགས། །ཇི་བཞིན་སྙེད་དམ་ཚིག་སྡོམ། །བདག་གིས་བརྟན་པོར་ཡང་དག་བཟུང༌། །ནམ་ཡང་བརྩོན་པ་མི་དོང་རོ། །དེ་ལྟ་བས་ན་མྱུར་དུ་བདག །མ་སྨིན་པ་རྣམས་སྨིན་པ་དང༌། །མ་གྲོལ་བ་རྣམས་དགྲོལ་བར་བགྱི། །མ་རྒལ་བ་རྣམས་བརྒལ་བ་དང༌། །དབུགས་མ་བྱུར་རྣམས་དབུགས་དབྱུར་ཞིང༌། །སེམས་ཅན་མྱ་ངན་འདས་ལ་དགོད། །གནས་དང་ཉེ་ཞིང་ལ་སོགས་བཅུ་གཉིས་སུ། །དམ་ཚིག་
༄། །བརྡ་དང་བདེ་སྤྱོད་རོལ་བའི་ལམ། །དེ་རིང་ནས་བཟུང་རྟག་ཏུ་ལོངས་སྤྱོད་ཅིང༌། །བདེ་ཆེན་ཡེ་ཤེས་རོལ་བས་ལེགས་གནས་ཤོག །ཐབས་དང་ཤེས་རབ་སྙོམས་འཇུག་རྣམ་མི་རྟོག །ལུས་ངག་ཡིད་འདིར་གསང་སྔགས་དགེ་སྤྱད་པ། །འགྲོ་བ་སྡུག་བསྔལ་མེ་ཚོགས་གཞིལ་སླད་དུ། །མ་ལུས་བདག་གིས་དངོས་གྲུབ་མཆོག་ཏུ་བསྔོ། །ཞེས་བྱ་བ་འདི་དག་གིས་སོ། །དེའི་རྗེས་ལ་བྱམས་པ་དང༌། སྙིང་རྗེ་དང༌། དགའ་བ་དང༌། བཏང་སྙོམས་ཚད་མེད་པ་ཚང་བའི་གནས་བཞི་པོ་དག་བསྒོམས་ནས་བདག་ཉིད་མི་གནས་པའི་མྱ་ངན་ལས་འདས་པ་སྟོང་པ་ཉིད་ཀྱི་ཏིང་ངེ་འཛིན་ལ་སྐད་ཅིག་གིས་གནས་པར་བྱའོ། །ཨོཾ་སྭ་བྷའ་ཝ་ཤྡྡྷཿསརྦ་དྷརྨཱཿསྭཱ་བྷཱ་ཝ་ཤུདྡྷོ྅ཧཾ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་བྷའ་ཝ་ཨཱཏྨ་ཀོ྅ཧཾ། དེ་ནས་ཏིང་ངེ་འཛིན་དེ་ལ་ལངས་ནས་འགྲོ་བ་སྒྱུར་མ་ལྟ་བུར་བལྟས་ལ། ས་བོན་གྱི་ཡེ་གེ་ཡཾ་རཾ་བཾ་ལཾ་སུཾ་ཡོངས་སུ་གྱུར་པ་ལ། གཞུ་དང་གྲུ་གསུམ་ཟླུམ་པོ་དང༌། །གྲུ་བཞི་དང་ནི་ལྷུན་པོ་སྟེ། །སྔོ་དང་དམར་དང་དཀར་དང་སེར། །འབྱུང་ཆེན་བཞི་ཡི་དཀྱིལ་འཁོར་བསྒོམ། །དེ་སྟེང་རིན་ཆེན་བཞིའི་རང་བཞིན། །རི་བོ་ལ་གནས་འཁོར་ལོ་སྦྲུལ། ཨོཾ་མེ་དི་ནཱི་བཛྲཱི་བྷ་བ་བཛྲ་བནྡྷ་ཧཱུཾ་ལཾ་ཧཱུཾ། ཨོཾ་བཛྲ་པྲཱ་ཀར་ཧཱུཾ་བཾ་ཧཱུཾ། ཨོཾ་བཛྲ་པཉྫ་ར་ཧཱུཾ་བཾ་ཧཱུཾ། ཨོཾ་བཛྲ་བི་ཏཱ་ན་ཧཱུཾ་ཁཾ་ཧཱུཾ། ཨོཾ་བཛྲ་ས་ར་ཛཱ་ལ་ཏྲཾ་སཾ་ཏྲཾ། ཨོཾ་བཛྲ་ཛྭ་ལ་ཨ་ན་ལཱ་རྐ་ཧཱུཾ་ཧཱུཾ་ཧཱུཾ་ཞེས་བྱ་བ་ལ་སོགས་པ་འདིས་རྡོ་རྗེའི་ས་ལ་སོགས་པ་དྲུག་སྦྲུལ་པར་བྱའོ། །དེའི་ནང་དུ་ནི་སྣ་ཚོགས་པདྨ་གེ་སར་གྱི་སྟེང་དུ་ཨཱ་ལི་ཡོངས་སུ་གྱུར་པ་ལས་བྱུང་བའི་ཟླ་བ་དང་ཉི་མ་ཁ་སྦྱོར་གྱི་དབུས་སུ་ཧཱུཾ་རྡོ་རྗེ་སེམས་དཔའི་བདག་ཉིད་འོད་ཟེར་འཕྲོ་བ་དང་འདུ་བའི་བདག་ཉིད་ཅན་བསྒོམས་ལ། དེ་དག་ཡོངས་སུ་གྱུར་པ་ལས་བཅོམ་ལྡན་འདས་ཧེ་རུ་ཀ་གཞལ་ཡས་ཁང་དང་བཅས་པར་བདག་ཉིད་ཡང་དག་པར་བསམ་མོ། །དེ་ལ་བཅོམ་ལྡན་འདས་ནི་ཉི་མའི་དཀྱིལ་འཁོར་གྱི་སྟེན་དུ་འཇིགས་བྱེད་དང་དུས་མཚན་གྱི་དཔྲལ་བ་དང་ནུ་མར་གཡོན་བསྐུམ་ཞིང་གཡས་བས་བཞུགས་པ། ནམ་མཁའི་མདོག་ཅན་སྔོན་པོ་དང་ལྗང་གུ་དང༌། དམར་པོ་དང་སེར་པོའི་ཞལ་བཞི་མངའ་བ་རེ་རེ་ཡང་སྤྱན་གསུམ་ཅུར་ཐད་ཁྲོ་བའི་ངང་ཚུལ་ཅན། ཐོད་པ་ལྔས་བརྒྱན་པ། སྐུ་ལ་མགོ་བོ་རློན་པའི་ཕྲེང་བ་བརྒྱའི་
༄། །ཕྱེད་ཀྱིས་བརྒྱན་ཞིང༌། སྣ་ཚོགས་རྡོ་རྗེ་དང་ཟླ་བ་ཕྱེད་པས་མཚན་པ། རལ་པའི་ཐོར་ཚུགས་ཅན། སྐུ་ལ་ཕྱག་རྒྱ་དྲུག་གིས་བརྒྱན་པ། ཞལ་མཆེ་བ་གཙིགས་པས་འཇིགས་པར་བྱེད་པ་སྟག་གི་པགས་པའི་ཤམ་ཐབས་ཅན། སྒེག་པ་ལ་སོགས་པའི་ཉམས་དང་ལྡན་པ། རྡོ་རྗེ་ཡན་ལག་མས་ཉེ་བར་འཁྱུད་པ་དང༌། ཕྱག་བཅུ་གཉིས་ཀྱིས་སྤྲས་པ་སྟེ། རྩ་བའི་གཉིས་ཀྱིས་རྡོ་རྗེ་དང༌། །དྲིལ་འཛིན་བདེ་ཆེན་མ་ཉིད་འཁྱུད། །གཉིས་ཀྱིས་གླང་ཆེན་བགས་པ་འཛིན། །གཡས་ཕྱག་གསུམ་པ་བཞི་པ་དང༌། །ལྔ་པ་དྲུག་པ་གོ་རིམས་བཞིན། །ཅང་ཏེའུ་དགྲ་སྟ་གྲི་གུག་དང༌། །རྩེ་གསུམ་རྡོ་རྗེའི་མདུང་བསྣམས་པའོ། །དེ་བཞིན་གཡོན་ཕྱག་གསུམ་པ་ཡི། །བཞི་པ་ལྔ་པ་དྲུག་རིམ་ལྟར། །ཁ་ཊྭཱཾ་ཐོད་པ་རྡོ་རྗེ་ཞགས། །ཚངས་པའི་མགོ་བོ་མཛེས་འཛིན་པ། །རྟེན་ཅིང་འབྲེལ་འབྱུང་རྣམ་དག་བདག །དེའི་མདུན་དུ་བཅོམ་ལྡན་འདས་མ་བསྒྲོམ་པར་བྱ་བ་ནི་སྐུ་མདོག་དམར་མོ་སྤྱན་གསུམ་པ། ཞལ་གཅིག་པ་དུམ་བུའི་སྐེ་རགས་ཀྱིས་བརྒྱན་ཞིང༌། ཁ་ཊྭཱཾ་གས་བརྒྱན་པའི་ཐོད་པ་འཛིན་པའི་ཕྱག་གཡོན་པས་མགུལ་པ་ནས་འཁྱུད་པ་དང༌། རྡོ་རྗེ་ཚངས་པའི་གྲི་གུག་རབ་ཏུ་འབར་བ་ཐོགས་པས་སྟེང་དུ་སྡིགས་མཛུབ་ཆེར་བསྒྲེང་བ། བྱིན་པ་གཉིས་ཀྱིས་བཅོམ་ལྡན་འདས་ཀྱི་བརླ་གཉིས་ལ་དཀྲིས་ཤིང་གཤིབས་ནས་ཕན་ཚུན་བཅུག་པས་འཁྱུད་དེ་བཞུགས་པའི་མཚན་ཉིད་རབ་ཏུ་གསལ་བར་བསྒོམ་པར་བྱའོ། །དེ་ནས་ཤར་གྱི་འདབ་མ་ལ་མཁའ་འགྲོ་མ་མདོག་ནག་མོ་དང༌། གཡོན་གྱི་འདབ་མ་ལ་ལཱ་མ་ལྗང་གུ་དང༌། ནུབ་ཀྱི་འདབ་མ་ལ་དུམ་སྐྱེས་མ་དམར་མོ་དང༌། གཡས་ཀྱི་འདབ་མ་ལ་གཟུགས་ཅན་མ་སེར་མོ་དང༌། དེ་བཞིན་དུ་མཚམས་རྣམས་སུ་ནི་བྱང་ཆུབ་ཀྱི་སེམས་ཀྱི་སྣོད་བཟང་པོ་དག་ཉེ་བའི་འདབ་མ་ཤར་ལ་སོགས་པ་བཞིར་ནི། ཁྭ་གདོང་མ་ལ་སོགས་པའི་ལྷ་མོ་རྣམས་མཁའ་འགྲོ་མ་བཞི་པོ་དག་དང་འདྲའོ། །མཚམས་བཞིར་ནི་གཤིན་རྗེ་བརྟན་མ་ལ་སོགས་པ་བཞི་ནི་ཕྱེད་ཀྱི་མདོག་ཅན་དུ་ཤེས་པར་བྱའོ། །རྣལ་འབྱོར་མ་དེ་དག་ཐམས་ཅད་ཀྱང་ཞལ་གཅིག་ཕྱག་བཞི་མ་གཡས་བསྐུམ་ནས་གཡོན་བརྐྱང་བའི་ཞབས་ཀྱིས་རོའི་གདན་ལ་
༄། །བཞུགས་པ། གོས་དང་བྲལ་བ་ཕྱག་རྒྱ་ལྔའི་རྒྱན་ཆ་ཅན་ཐོད་པ་རྡོ་རྗེ་ཕྲེང་བས་སྤྲས་པའི་དབུ་རབ་ཏུ་མཛེས་པ་ཉིད་དང༌། མགོ་བོའི་ཕྲེང་བས་བརྒྱན་ཅིང་ཐོད་པ་དང༌། ཁ་ཊྭཱཾ་ག་དང་གྲྀ་གུག་དང་ཅང་ཏེའུ་བསྣམས་པ་ཅུང་ཟད་དྲག་པོའི་མཚན་ཉིད་ཅན་དུ་བསམ་པར་བྱའོ། །དེའི་འོག་ཏུ་དེ་དག་ཐམས་ཅད་ཀྱི་ལུས་དང་ངག་དང་ཡིད་ཀྱི་ལས་རྣམས་ལ་འཁོར་ལོ་དང་པདྨ་དང་རྡོ་རྗེ་ལྟེ་བ་ལ་གནས་པའི་ས་བོན་ཨོཾ་ཨཱཿཧཱུཾ་ཞེས་པ་འདི་དགོད་དེ། ཇི་བཞིན་སྤྲོ་བ་དང་བསྡུ་བའི་འོད་ཀྱིས་སྦྱོར་བ་ཡོངས་སུ་སྦྱང་བར་བྱའོ། །དེ་ནས་རྡོ་རྗེ་གོ་ཆའི་སྔགས་ཀྱིས་བཅོམ་ལྡན་འདས་ལ་གོ་བསྒོ་བར་བྱ་སྟེ། ཨོཾ་ཧ། ན་མ་ཧི། སྭཱ་ཧཱ་ཧུ། བཽ་ཥྚ་ཧེ། ཧཱུཾ་ཧཱུཾ། ཕཊ་ཧཾ། ཞེས་བྱ་བའི་འཁོར་ལོས་སྒྱུར་བ་དྲུག་གི་ངོ་བོ་འདི་དག་གིས་སྙིང་ག་དང༌། སྤྱི་བོ་དང༌། མགོ་བོ་དང༌། ཕྲག་པ་གཉིས་དང༌། སྤྱན་གསུམ་དང༌། ཡན་ལག་ཐམས་ཅད་ལ་བསྲུང་བར་བྱའོ། །ཨོཾ་བཾ། ཧཾ་ཡོཾ། ཧྲིཾ་མོཾ། །ཧྲེཾ་ཧྲིཾ། ཧཱུཾ་ཧཱུཾ། ཕཊ་ཕཊ། ཅེས་བྱ་བས་དཔའ་མོ་དྲུག་གི་ངོ་བོ་འདི་དག་ནི། བཅོམ་ལྡན་འདས་མ་ལ་གོ་ཆ་བགོ་བར་བྱའོ། །ལྟེ་བ་དང༌། སྙིང་ག་དང༌། ཁ་དང༌། དཔྲལ་བ་དང༌། སྤྱི་བོ་དང་ཡན་ལག་ཐམས་ཅད་ལའོ། །དེ་ནས་སྙིང་གའི་ས་བོན་གྱི་འོད་རི་མོའི་ལྕགས་ཀྱུས་ཡེ་ཤེས་ཀྱི་འཁོར་ལོ་བཀུག་སྟེ། དམ་ཚིག་པ་ལ་སྔགས་སྔོན་དུ་འགྲོ་བས་གཞག་པར་བྱའོ། །བཅོམ་ལྡན་འདས་ལ་དབང་བསྐུར་བའི་དོན་དུ་གསོལ་བ་གདབ་པར་བྱའོ། །དེ་ལས་སྤྲོས་པའི་བདུད་རྩི་ལྔས་གང་བའི་རིན་པོ་ཆེའི་བུམ་པ་འཛིན་པའི་ཡུམ་བཞི་པོ་དག་གིས། ཇི་ལྟར་བལྟམས་པ་ཙམ་ཉིད་ལ། །དེ་བཞིན་གཤེགས་ཀུན་ཁྲུས་གསོལ་བ། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་སྐུ་ཁྲུས་གསོལ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ས་མ་ཡ་ཤྲི་ཡེ་ཧཱུཾ། ཞེས་སྔགས་བརྗོད་པས་དབང་བསྐུར་བར་བསམ་མོ། །ཆུ་དེ་ལས་བྱུང་བའི་རང་གི་རིགས་ཀྱི་ལྷས་ཅོད་པན་ཇི་ལྟར་རིགས་པ་ཉེ་བར་བརྒྱན་པར་བྱའོ། །དེའི་རྗེས་ལ་སྙིང་གའི་ས་བོན་གྱི་འོད་ཟེར་གྱིས་གཟུགས་ལ་སོགས་པའི་ཡུལ་རྣམས་དང༌། བཅོམ་ལྡན་འདས་མའི་ཐུགས་ཀའམ། པདྨའི་གེ་སར་ལ་བསྡུས་ནས་དེ་ལས་སྤྲོས་པའི་འོད་ཟེར་ལྷ་མོ་རྣམས་ཀྱིས་དམ་ཚིག་ལ་སོགས་པའི་རྫས་དཀྱིལ་འཁོར་དང་བཅས་པའི་བདག་པོ་ལ་ཉེ་བར་
༄། །མཆོད་པར་བྱའོ། །དེ་ནས་མ་ལུས་པ་ལྷ་མོ་དང་བཅས་པས་བསྟོད་པའི་དབྱངས་བརྗོད་པ་ནི། ཁྱོད་ནི་ཡེ་ཤེས་རང་བཞིན་བདེ་བ་ཆེ། །ཁྱོད་ནི་ཕན་མཛད་ཤིན་ཏུ་རོལ་པའི་སྐུ། །ཁྱོད་ནི་ས་རྣམས་མ་ལུས་ཉེར་འཚོ་སྟེ། །རྣལ་འབྱོར་མ་ཡི་ཚོགས་བདག་བདེ་ལེགས་ཤོག །བདེ་ཆེན་དེར་ནི་བརྟན་གཡོའི་འཇིག་རྟེན་སྟོན། །ཐུགས་རྗེ་སྤྲུལ་པས་སེམས་ཅན་སད་མཛད་ཅིང༌། །སྒྱུ་མའི་རྣམ་ཐར་སྤྲུལ་པ་དོན་ཀུན་སྒྲུབ། །མགོན་པོ་བདེ་ཆེན་དཔལ་ལྡན་དགྱེས་པས་བཞེངས། །ཞེས་བྱ་བས་སོ། །དེའི་རྗེས་ལ་མདུན་དུ་རླུང་དང་མེའི་དཀྱིལ་འཁོར་གྱི་སྟེང་དུ། མགོ་བོ་གསུམ་ལ་གནས་པའི་ཨ་ལས་བྱུང་བའི་ཐོད་པའི་སྟེང་དུ། ས་བོན་ཇི་ལྟ་བ་བཞིན་ལས་སྐྱེས་པའི་བདུད་རྩི་ལྔ་སྟེ། སྟེང་དུ་ཨོཾ་བལྟའོ། །ཨ་ལས་བྱུང་བའི་ཟླ་བའི་དཀྱིལ་འཁོར་གྱིས་ཁ་བཅད་དོ། །འོག་ཏུ་ནི་ཧཱུཾ་ལས་སྐྱེས་པའི་རྡོ་རྗེ་ལས། ཐམས་ཅད་འབར་བ་ལ་སོགས་པའི་རིམ་གྱིས་བདུད་རྩིར་བསྒྱུར་ཏེ། ཡེ་ཤེས་ཀྱི་བདུད་རྩི་དྲང་བ་དང༌། རོ་མྱང་བའི་ངོ་བོ་ཉིད་དུ་ཡི་གེ་གསུམ་གྱིས་བྱིན་གྱིས་བརླབས་ཏེ། ཧཱུཾ་ལས་བྱུང་བའི་རྡོ་རྗེའི་ལྕེས་མཚན་པས་མྱང་བར་བྱ་ཞིང་འཕྲོ་བའི་སྦྱོར་པས་ལྷ་མོའི་ཚོགས་ཀྱང་ཚིམ་པར་བྱའོ། །དེ་ནས་རྡོ་རྗེ་པདྨ་རྣམ་པར་སྦྱངས་པའི་བརྡེབས་པ་ལས་དགའ་བའི་སྒྲས་དགའ་བ་ཆེན་པོས་དེ་བཞིན་གཤེགས་པའི་རིགས་ནང་དུ་ཞལ་ནས་བཅུག་སྟེ། ཞུ་བར་གྱུར་པ་ནོར་བུའི་ཟེའུ་འབྲུའི་དབུས་ཀྱི་ཐིག་ལེ་གཉིས་ཀྱི་བདག་ཉིད་རྡོ་རྗེ་སེམས་དཔའི་ངོ་བོ་ཉིད་དུ་གནས་པར་བྱས་ལ། ལྷན་ཅིག་སྐྱེས་པའི་དོན་ལ་མངོན་དུ་ཕྱོགས་པས་ཏིང་ངེ་འཛིན་དུ་བྱའོ། །ཁ་སྦྱོར་དབུས་ན་ས་བོན་གནས། །ཐིག་ལེ་གཉིས་པོ་མི་འགྱུར་བར། །རྡོ་རྗེ་སེམས་དཔའི་ངོ་བོ་ཉིད། །རྣལ་འབྱོར་པས་ནི་རྟག་ཏུ་བསྒོམ། །ཞེས་ཇི་སྐད་གསུངས་པ་བཞིན་ནོ། །ཨཱ་ལི་ཀཱ་ལི་མདུན་བསམས་ནས། །རྣལ་འབྱོར་ཆེན་པོ་དལ་བསོ་སྟེ། །ཟླ་བའི་དཀྱིལ་འཁོར་ཡོངས་རྫོགས་ལ། །ལྟེ་དབུས་གནས་སུ་རྣམ་པར་བསྒོམ། །ཡི་གེ་གོ་འཕང་མཆོག་གྱུར་པ། །དེ་ཡི་དབུས་སུ་བསམ་པར་བྱ། །དེ་ནི་སྐུ་གསུང་ཐུགས་རྡོ་རྗེའི། །ལྷ་ཡི་ངོ་བོ་ཉིད་བསྒོམ་བྱ། །དེ་འདིར་ལུས་ལས་འདས་གྱུར་ཀྱང༌། །སེམས་ཉིད་ཀྱང་ནི་མ་ཡིན་ནོ། །བསམ་མེད་བསམ་པར་བྱ་བའང་མེད། །བསམ་པ་དེ་ཡང་མི་ཤེས་སོ། །སེམས་དཔའ་ཡང་ནི་
༄། །བསམ་མི་ཁྱབ། །དེ་ནས་གཟུངས་ནི་ཐོབ་པར་འགྱུར། །ཞེས་གསུངས་པའོ། །དེའི་རྗེས་ལ་སྙིང་གའི་ས་བོན་གྱི་ཐིག་ལེ་ཉི་མའི་གཟུགས་ཀྱི་སྟེང་དུ་སྔགས་ཀྱི་ཕྲེང་བ་ཤིན་ཏུ་ཕྲ་མོ་མངོན་པར་བལྟས་ལ། བརྟན་པའི་སེམས་ཀྱིས་འཕྲོ་བ་དང༌། འདུ་བའི་རིམ་པས་མན་ངག་ཇི་ལྟ་བ་བཞིན་དུ་བཟླས་པར་བྱའོ། །དེ་ལ་ཨོཾ་ཤྲཱི་ཧེ་ཧེ་རུ་རུ་ཀཾ་ཧཱུཾ་ཧཱུཾ་ཕཊ། བཛྲ་ཌཱ་ཀི་ནཱི་ཛཱ་ལ་སཾ་བ་ར་སྭཱ་ཧཱ། ཨོཾ་ཧྲཱིཿཧ་ཧ་ཧཱུཾ་ཧཱུཾ་ཕཊ། རྗེ་བཙུན་གྱི་སྙིང་པོ་དང་ཉེ་བའི་སྙིང་པོའོ། །ཨོཾ་སརྦྦ་བུདྡྷ་ཌཱ་ཀི་ནཱི་ཡེ་བཛྲ་བརྞ་ནཱི་ཡེ་ཧཱུཾ་ཕཊ་སྭཱ་ཧཱ། ཨོཾ་བཛྲ་རོ་ཙ་ནཱི་ཡེ་ཧཱུཾ་ཕཊ་སྭཱ་ཧཱ། ལྷ་མོའི་སྙིང་པོ་དང་ཉེ་བའི་སྙིང་པོའོ། །ཨོཾ་ཌཱ་ཀི་ནཱི་ཡེ་ཧཱུཾ་ཧཱུཾ་ཕཊ། ཨོཾ་ལཱ་མཱ་ཡཻ་ཧཱུཾ་ཧཱུཾ་ཕཊ། ཨོཾ་ཁཎྡ་རོ་ཧཱ་ཡཻ་ཧཱུཾ་ཧཱུཾ་ཕཊ། ཨོཾ་རཱུ་པི་ཎཱི་ཡེ་ཧཱུཾ་ཧཱུཾ་ཕཊ། ཨོཾ་ཀཱ་ཀཱ་སྱེ་ཧཱུཾ་ཧཱུཾ་ཕཊ། ཨོཾ་ཨུ་ལུ་ཀཱ་སྱེ་ཧཱུཾ་ཧཱུཾ་ཕཊ། ཨོཾ་ཤྭ་ནཱ་སྱེ་ཧཱུཾ་ཧཱུཾ་ཕཊ། ཨོཾ་སཱུ་ཀ་རཱ་སྱེ་ཧཱུཾ་ཧཱུཾ་ཕཊ། ཨོཾ་ཡ་མ་དཱ་དྷཱི་ཧཱུཾ་ཧཱུཾ་ཕཊ། ཨོཾ་ཡ་མེ་དཱུ་ཏཱི་ཡེ་ཧཱུཾ་ཧཱུཾ་ཕཊ། ཨོཾ་ཡ་མ་དཾཥྚི་ཎཱི་ཡེ་ཧཱུཾ་ཧཱུཾ་ཕཊ། ཨོཾ་ཡེ་མ་མ་ཐ་ནཱི་ཡེ་ཧཱུཾ་ཧཱུཾ་ཕཊ་སྭཱ་ཧཱ། དཔའ་མོ་རྣམས་ཀྱི་སྔགས་སོ། །ཨོཾ་ན་མོ་བྷ་ག་བ་ཏི་ཝཱི་རེ་ཤཱ་ཡ། མ་ཧཱ་ཀལྤཱ་གནི་སཾ་ནི་བྷཱ་ཡ། ཛཱ་ཊ་མ་ཀུ་ཊོ་ཊྐ་ཊཱ་ཡ། དཾཥྚྲ་ཀ་རཱ་ལོ་གྲ་བྷཱི་ཥ་ཎ་མུ་ཁཱ་ཡ། ས་ཧ་སྲ་བྷུ་ཛ་བྷཱ་སུ་རཱ་ཡི། བ་ར་ཤུ་པཱ་ཤོ་དྱ་ཏ་ཤཱུ་ལ་ཁ་ཊྭཱཾ་ག་དྷ་རི་ཎི། བྱཱ་གྷྲ་ཛི་ནཱ་མྦ་ར་དྷ་རཱ་ཡ། མ་ཧཱ་དྷུ་མྦྲཱ་ནྡྷ་ཀ་ར་ཝ་པུཥཱ་ཡ། རྩ་བའི་སྔགས་སོ། །ཨོཾ་ཀ་ར་ཀ་ར། ཀུ་རུ་ཀུ་རུ། བནྡྷ་བནྡྷ། ཏྲ་ས་ཡ་ཏྲཱ་ས་ཡ། ཀྵོ་བྷ་ཡ་ཀྵོ་བྷ་ཡ། ཧྲཽཾ་ཧྲཽཾ་ཧྲཿཧྲཿཕེཾ་ཕེཾ། ཕཊ་ཕཊ། ད་ཧ་ད་ཧ། པ་ཙ་པ་ཙ། བྷཀྵ་བྷཀྵ། བེ་ས་རུ་དྷི་ར་ཨནྟྲ་མཱ་ལཱ་བ་ལམྦི་ནི། གྲྀཧྞ་གྲྀཧྞ། སཔྟ་པཱ་ཏེ་ལེ་ག་ཏུ་བྷུ་ཛཾ་གཾ་སརྦཾ་བཱ། ཏརྫ་ཡ་ཏ་རྫ་ཡ། ཨཱ་ཀཌྷྱ་ཨཱ་ཀཌྷྱ། ཧྲིཾ་ཧྲིཾ། ཛྞཽཾ་ཛྞཽཾ། ཀྵྨཱཾ་ཀྵྨཱཾ། ཧཾ་ཧཾ། ཧིཾ་ཧིཾ། ཧཱུཾ་ཧཱུཾ། ཀི་ལི་ཀི་ལི། སི་ལི་སི་ལི། ཙི་ལི་ཙི་ལི། དྷི་ལི་དྷི་ལི། ཧཱུཾ་ཧཱུཾ་ཕཊ་སྭཱ་ཧཱ། ཕྲེང་སྔགས་སོ། །དེ་ནས་རྣལ་འབྱོར་པ་ཁ་ལྷོ་ཕྱོགས་སུ་མངོན་པར་ཕྱོགས་པས་ཇི་བཞིན་སྦྱངས་པའི་གཏོར་མ་སྦྱིན་པ་ནི། མཚན་མོ་སྐྲ་གྲོལ་གཅེར་བུ་ཡིས། །མཐོན་པོའི་གནས་སུ་མཆོད་བརྩོན་པས། །བདག་ཉིད་ལྷ་ཡི་ང་རྒྱལ་གྱིས། །རྐང་པ་མནན་ཅིང་གནས་སུ་བལྟ། །གསང་བསྟོད་ཕེཾ་གྱི་སྒྲ་སྒྲོགས་ཤིང༌། །ཕྱོགས་བཅུ་འཇིག་རྟེན་ཁམས་བཞུགས་པའི། །དཔའ་བོ་རྣལ་འབྱོར་མ་རྣམས་འགུགས། །རྣམ་
༄། །མཁའི་ངོས་ལ་ལེགས་བཞུགས་བྱ། །རྡོ་རྗེ་ཐལ་མོ་གྱེན་ཕྱེ་ལ། །དཔའ་བོ་རྣལ་འབྱོར་སྙན་གསན་དབབ། །སྔགས་ཀྱིས་བསྐུལ་བར་བྱས་ན་ནི། །དེ་ཡི་མདོ་ལ་བྱོན་པར་འགྱུར། །མཛུབ་མོ་མདུད་བྱས་གུང་མོ་དེས་པར་སྦྱར། །མཐེ་བོང་རྡོ་རྗེ་བརྟན་པོ་རབ་ཏུ་སྦྱར། །རྒྱ་འདི་དཔྲལ་བའི་དབུས་སུ་ཉེར་བཞག་ནས། །བསྐོར་ཞིང་བསྐོར་བས་ཕན་ཚུན་ཀུན་དུ་བསྐོར། །གཡས་བརྐྱང་བ་ཡི་སྦྱོར་བ་ཡིས། །འབར་བའི་ཕྱག་ནི་བཅིང་བར་བྱ། །དམ་ཚིག་གིས་ནི་ཁ་བསྐང་ལ། །སྔགས་ནི་འདི་ལྟར་རྗེས་དྲན་བྱ། །ཨོཾ་ཨ་རལླི་ཧོ། ཛཿ་ཧཱུཾ་བཾ་ཧོཿ། བཛྲ་ཌཱ་ཀི་ནཱི་ས་མ་ཡ་སྟྭཾ་དྲྀ་ཤྱ་ཧོཿ། ཞེས་ལན་གསུམ་བརྗོད་པར་བྱའོ། །ཨོཾ་ཁ་ཁ་ཁཱ་ཧི་ཁཱ་ཧི། སརྦ་ཡཀྵ་རཀྵ་སརྦ་བྷཱུ་ཏ་པྲེ་ཏ་པི་ཤཱ་ཙ་ཨུནྨཱ་ད་ཨ་པ་སྨ་ར་ཌཱ་ཀི་ནྱ་ད་ཡ་ཨི་མཾ་བ་ལིཾ་གྲྀཧྞ་ནྟུ་ས་མ་ཡ་རཀྵ་ནྟུ་སརྦ་སིདྡྷི་མྨེ་པྲ་ཡཙྪ་ནྟུ། ཡ་ཐཻ་བཾ་ཡ་ཐེཥྚཾ་བྷུཉྫ་ཐ། པི་ཝ་ཐ། མཱ་ཏི་ཀྲ་མ་ཐ། མ་མ་སརྦ་ཀཱ་རྟ་ཡ། སཚུ་ཁཾ་བི་བྲྀདྡྷ་ཡེ་ས་ཧཱ་ཡི་ཀཾ་བྷ་བ་ནྟུ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། ཉེ་བར་སྦྱིན་པའི་སྔགས་སོ། །གང་ཞིག་རྣལ་འབྱོར་རྣལ་འབྱོར་མའི། །ཆོ་ག་ཁྱད་པར་འདོད་པ་དང༌། །འདི་སྐད་བཤད་པ་ཐམས་ཅད་དུ་ཀུན། །རྣལ་འབྱོར་མ་ཡིས་བརྡར་འགྱུར་ཏེ། །དཔལ་ལྡན་རྡོ་རྗེ་མཁའ་འགྲོ་ཉིད། །གཙོར་བྱས་དཀྱིལ་འཁོར་ཐམས་ཅད་བྱ། །ཟླ་བ་ཕྱེད་དོའི་ཚེས་བཅུ་ནི། །གཉིས་ཀར་ལྷ་མོ་མཆོད་པར་བྱ། །གཞོན་ནུ་མ་དང་རྣལ་འབྱོར་མ། །རྟག་ཏུ་ཆོ་ག་བཞིན་ཚིམ་བྱ། །དེ་ནས་སྔགས་པ་ལྡང་བར་འདོད་ན་མཆོད་པ་དང་བསྟོད་པ་སྔོན་དུ་འགྲོ་བས། དཀྱིལ་འཁོར་གྱི་མན་ངག་ཇི་ལྟ་བ་ཤེས་པས་ཡི་གེ་བརྒྱ་པའི་སྔགས་བཟླས་པས་བསྡུ་བར་བྱའོ། །དེ་ནས་བཟོད་པར་གསོལ་ནས་གཤེགས་སུ་གསོལ་བ་ནི། རྫོགས་སངས་རྒྱས་དང་ལྷ་རྣམས་དང༌། །དེ་སྲས་རྣམས་དང་ཚངས་ལ་སོགས། །འཇིག་རྟེན་སྐྱོང་རྣམས་ཆོ་ག་འདི། །མཚང་པ་རྣམས་བཟོད་པར་གསོལ། །ཞི་དང་བཀྲ་ཤིས་བདེ་ལེགས་མཛོད། །གཙོ་བོ་ནུས་པ་མ་མཆིས་ཤིང༌། །མ་ཚང་བ་དང་ལྷག་གྱུར་པ། །རྣལ་འབྱོར་གཙོ་བོ་རྗེས་གནང་སྟེ། །ནོངས་གྱུར་གང་དེ་བཟོད་པར་གསོལ། །གསང་སྔགས་ཉམས་དང་བྱ་བ་ཉམས། །ཆོ་ག་ཉམས་
༄། །པར་གྱུར་པ་གང༌། །མངའ་བདག་མ་ཡིས་བཀས་གནང་སྟེ། །འདི་ནི་ལྷ་མོ་བཟོད་པར་གསོལ། །ལྷ་མོ་ཚད་མ་དམ་ཚིག་ཚད་མ་དང༌། །དེས་གསུངས་མཆོག་ཏུ་ཚང་མ་གང་ཡིན་པ། །བདེན་པ་དེ་དག་གིས་ནི་ལྷ་རྣམས་འདིར། །བདག་ལ་རྗེས་སུ་འཛིན་པའི་རྒྱུར་གྱུར་ཅིག །ཅེས་བྱ་བས་བཟོད་པར་གསོལ་ལོ། །ཁྱེད་ཀྱིས་སེམས་ཅན་དོན་ཀུན་མཛད། །སྒྲུབ་ལ་རྗེས་མཐུན་དངོས་གྲུབ་སྩོལ། །སངས་རྒྱས་སྤྱོད་ཡུལ་གཤེགས་གསོལ་ཏེ། །སླར་ཡང་འབྱོན་པར་མཛད་དུ་གསོལ། །ཚུལ་ཁྲིམས་ཙན་དན་ཡན་ལག་བྱུགས། །བསམ་གཏན་སྟོད་གཡོགས་ཀྱིས་དཀྲིས་ཤིང༌། །བྱང་ཆུབ་ཡན་ལག་མེ་ཏོག་བཀྲམ། །ཇི་ལྟར་བདེ་བ་སྤྱད་པར་བྱ། །ཨོཾ་བཛྲ་མཎྜལ་མུཿཞེས་བྱ་བས་དཀྱིལ་འཁོར་བསྡུ་བར་བྱའོ། །གང་ཞིག་རྟག་ཏུ་གུས་པས་ནི། །རྣལ་འབྱོར་བརྩོན་ལ་མན་ངག་སྦྱིན། །གོམས་པ་བསྐྱེད་པ་དེ་ལ་ནི། །ཕྱག་རྒྱ་ཆེན་པོ་འགྲུབ་པར་འགྱུར། །མཆོད་སྦྱིན་དབང་བསྐུར་སྦྱིན་སྲེག་དང༌། །ཚོགས་ཀྱི་འཁོར་ལོ་རབ་གནས་སོགས། །ཞི་ལ་སོགས་པའི་ལས་དངོས་གྲུབ། །མ་ལུས་དཀྱིལ་འཁོར་འདིས་གྲུབ་བྱེད། །དཔལ་ལྡན་འཁོར་ལོ་སྡོམ་འབྱུང་མན་ངག་གི །ཇི་བཞིན་གྲུབ་པའི་ཡན་ལག་མདོར་བསྡུས་པ། །མཆོག་གྱུར་སྔགས་འཆང་བློ་གྲོས་སྒྲོན་རྣམས་ལ། །གསལ་བྱེད་རིན་ཆེན་སྒྲོན་མ་འབར་འདི་ཡིན། །དགེ་བ་གང་ཞིག་བདག་གིས་བསགས་ཐོབ་པ། །དེ་མེད་སྟོན་ཟླ་ལྟ་བུར་དཀར་གསལ་དང༌། །དེས་ནི་འཇིག་རྟེན་སྤྲིན་ཚོགས་མུན་བསལ་ཏེ། །སྣང་བ་ངོ་མཚར་ཅིག་ཅར་འོད་བྱེད་གྱུར། །དཔལ་ལྡན་འཁོར་ལོ་བདེ་མཆོག་གི་སྒྲུབ་ཐབས། རིན་ཆེན་སྒྲོན་མ་ཞེས་བྱ་བ་སློབ་དཔོན་མཁས་པ་མཻ་ཏྲི་པས་མཛད་བ་རྫོགས་སོ།། །།རྒྱ་གར་སྐད་གྱི་མཁན་པོ་བཛྲ་པཱ་ཎིའི་ཞལ་སྔ་ནས་དང༌། བོད་ཀྱི་ལོ་ཙཱ་བ་བ་རེག་ཐོས་པ་དགས་བསྒྱུར་ཅིང་ཞུས་ཏེ་གཏན་ལ་ཕབ་བའོ། །སླད་ཀྱི་དགེ་བའི་བཤེས་གཉེན་དམ་པ་མཁས་པ་བ་རི་ལོ་ཙཱ་བས་བཅོས་ཤིང་གཏན་ལ་ཕབ་པ་ལས། དུས་ཕྱིས་ཁ་ཆེའི་པཎྜི་ཏ་ཆེན་པོ་བུདྡྷ་ཤྲཱི་ཛྙཱ་ནའི་བཀའ་དྲིན་ལ་བརྟེན་ནས་གནུབས་ལོ་ཙཱ་བས་སྒྲ་དོན་ཇི་ལྟ་བ་བཞིན་དུ་གཏན་ལ་ཕབ་པའོ།། །།