མཉེས་པའི་སྙིང་པོ།
དཔའ་བོ་རྡོ་རྗེ།
༄། །རྒྱ་གར་སྐད་དུ། ཧྲི་པ་ཏ་གརྦྷ་ནཱ་མ། བོད་སྐད་དུ། མཉེས་པའི་སྙིང་པོ་ཞེས་བྱ་བ། དཔལ་རྡོ་རྗེ་མཁའ་འགྲོ་མ་ལ་ཕྱག་འཚལ་ལོ། །ཨོཾ་དེ་ལ་དང་པོར་རེ་ཞིག་སློབ་མ་ཁྲུས་བྱས་ལ་གོས་གཙང་མ་བགོས་ཏེ། ལག་ན་མེ་ཏོག་ཐོགས་པའི་སློབ་མ་ལ། །ཡིད་གཞུངས་སྤྲོ་བ་ཆེ་བ་དང༌། །བྱས་པ་གཟོ་ཞིང་ང་རྒྱལ་མེད། །རིགས་མཐོ་ཡོན་ཏན་དང་ལྡན་ཞིང༌། །གཟུགས་དང་ཁ་དོག་ལང་ཚོར་ལྡན། །བདེ་བར་གཤེགས་པའི་གསང་བ་ནི། །སྒྲུབ་པ་དོན་གཉེར་མངོན་བརྩོན་ན། །སློབ་བཟང་པོའི་མཚན་ཉིད་དོ། །བདེ་གཤེགས་སྔགས་ཀྱི་སྒྲུབ་པ་ལ། །དོན་དུ་གཉེར་ཞིང་མངོན་བརྩོན་ན། །གཟུགས་མེད་ཡོན་ཏན་མེད་པའམ། །དམན་པའང་ལྷག་པར་གནས་པར་བྱ། །སློབ་མ་ངན་པའི་མཚན་ཉིད་དོ། །ད་ནི་ཆོས་ཉན་དུ་གཞུག་པར་བྱ་སྟེ། དཀྱིལ་འཁོར་གྱི་ནི་ཆོ་ག་ལ། །འཁོར་རྣམས་བཞི་ཡང་རྗེས་སུ་གནང༌། །རང་གི་བསླབ་དང་ཤིན་དུ་ལྡན། །ཐེག་ཆེན་ལ་དགའི་མཚན་ཉིད་ལྡན། །ལ་ལ་གསང་སྔགས་གྲུབ་དོན་གཉེར། །འདི་ནི་དཀྱིལ་འཁོར་འཇུག་པར་འཚལ། །བསོད་ནམས་འདོད་པ་དེ་ལས་གཞན། །གཞན་དག་འཇིག་རྟེན་གཞན་དོན་གཉེར། །འཇིག་རྟེན་ཕ་རོལ་དོན་གཉེར་བའི། །དད་པ་མང་དུ་བྱེད་པ་ཡིས། །བློ་ལྡན་དཀྱིལ་འཁོར་འཇུག་པ་ཡི། །ཚེ་འདིའི་འབྲས་བུ་འདོད་མི་བྱ། །ཚེ་འདིའི་འདོད་པར་གྱུར་པ་ལ། །འཇིག་རྟེན་ཕ་རོལ་དོན་མི་འབྱུང༌། །འཇིག་རྟེན་ཕ་རོལ་དོན་གཉེར་སྐྱེས། །འཇིག་རྟེན་འདི་ཡི་འབྲས་བུ་རྒྱས། །ཞེས་འབྱུང་ངོ༌། །དེ་ནས་སློབ་མ་ཡི་གེ་ཧཱུཾ་གིས་རང་གི་སྙིང་གར་བཅུག་ལ། གསང་བའི་རྡོ་རྗེའི་ལམ་ནས་ཕྱུང་ནས་གཞལ་ཡས་ཁང་གི་སྒོར་བཞག་ལ་འདི་སྐད་ཅེས་གསོལ་བ་འདེབས་སུ་གཞུག་གོ །དགའ་ཆེན་ཁྱོད་བདག་སྟོན་པ་བས། །སློབ་དཔོན་ཁྱོད་ནི་དགོངས་སུ་གསོལ། །བྱང་ཆུབ་ཆེན་པོའི་ཚུལ་བསྟན་པས། །མགོན་པོ་ཆེན་པོ་བདག་ཕྱག་འཚལ། །དམ་ཚིག་དེ་ཉིད་སྩལ་དུ་གསོལ། །བྱང་ཆུབ་སེམས་ནི་བདག་ལ་གསོལ། །སངས་རྒྱས་ཆོས་དང་དགེ་འདུན་ཏེ། །སྐྱབས་གསུམ་དག་ནི་བདག་ལ་གསོལ། །ཐར་པ་ཆེན་པོའི་གྲོང་མཆོག་ཏུ། །མགོན་པོ་བདག་ནི་འཇུག་པར་འཚལ། །ཞེས་ལན་
༄། །གསུམ་བརྗོད་དུ་གཞུག་གོ །དེ་ལ་སློབ་མའི་སྙིང་གར་མ་ལས་ཟླ་བའི་དཀྱིལ་འཁོར་དེའི་སྟེང་དུ་ཡི་གེ་ཧཱུཾ་ཡིད་ཀྱིས་བྲིས་ལ་ཡི་གེ་བརྒྱ་བས་བརྟན་པར་བྱ་སྟེ་འདི་སྐད་བསྒོའོ། །ཁྱོད་ནི་ཚུལ་ཆེན་སྣོད་ཡིན་ཏེ། །བུ་ཚུར་ཐེག་པ་ཆེན་པོ་ཡི། །གསང་སྔགས་སྤྱོད་ཡུལ་ཆོ་ག་ནི། །ཁྱོད་ལ་ཡང་དག་བསྟན་པར་བྱ། །རྫོགས་པའི་སངས་རྒྱས་གང་འདས་དང༌། །དེ་བཞིན་གང་དག་མ་བྱོན་དང༌། །ད་ལྟར་བྱུང་བའི་མགོན་པོ་རྣམས། །འགྲོ་ལ་ཕན་ཕྱིར་བཞུགས་པ་རྣམས། །དེ་དག་ཀུན་གྱིས་གསང་སྔགས་ཀྱི། །ཆོ་ག་བཟང་པོ་འདི་མཁྱེན་ནས། །དཔའ་བོས་བྱང་ཆུབ་ཤིང་དྲུང་དུ། ཐམས་ཅད་མཁྱེན་པ་མཚན་མེད་བརྙེས། །གསང་སྔགས་སྦྱོར་བ་མ་མཉམ་མེད་དེས། །སྐྱོབ་པ་དཔལ་ལྡན་ཧེ་རུ་ཀ །བདུད་སྡེ་ཤིན་ཏུ་མི་བཟད་པ། །དཔུང་ཆེན་དག་ཀྱང་འདི་ཡིས་བཅོམ། །དེ་བས་ཀུན་མཁྱེན་ཐོབ་བྱའི་ཕྱིར། །བུ་ཡིས་བློ་གྲོས་འདི་གྱིས་ཤིག །དེ་ནས་རྒྱུན་བཤགས་བྱ་སྟེ། དཀོན་མཆོག་གསུམ་ལ་ཕྱག་འཚལ་ལོ། །དཀོན་མཆོག་གསུམ་ལ་སྐྱབས་སུ་མཆི། །སྡིག་པ་ཐམས་ཅད་སོ་སོར་བཤགས། །བསོད་ནམས་ཀུན་ལ་རྗེས་ཡི་རང༌། །སངས་རྒྱས་བྱང་ཆུབ་ཡིད་ཀྱིས་གཟུང༌། །བྱང་ཆུབ་མཐར་ཐུག་སྐྱབས་སུ་མཆི། །བྱང་ཆུབ་མཆོག་གི་སེམས་ནི་བདག་གིས་བསྐྱེད། །སེམས་ཅན་ཐམས་ཅད་བདག་གིས་མགྲོན་དུ་གཉེར། །འདོད་ལ་སྤྱོད་པའང་བྱང་ཆུབ་སྤྱོད་མཆོག་འགྱུར། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །ཅེས་ལན་གསུམ་བརྗོད་ལ་དེ་ནས་ཕྱག་འཚལ་བར་བྱ་སྟེ། ཤར་ཕྱོགས་ཀྱི་སྒོར་འདུག་ལ་ཐལ་མོ་སྦྱར་ཏེ། ཨོཾ་ན་མ་སྟེ་ཧཱུཾ། ཨོཾ་ན་མ་མི་ཧཱུཾ། ཨོཾ་ན་མོ་ན་མ་ཧཱུཾ། ཞེས་སྐུ་གསུང་ཐུགས་ཀྱི་ཕྱག་བྱ་སྟེ། ཡང་ཕྱག་བཞི་བྱའོ། །ཐལ་མོ་སྤྱི་བོར་སྦྱར་བར་བྱས་ལ་སྙིང་ག་ས་ལ་གཏུགས་ནས་འདི་སྐད་དུ་གཞུག་པར་བྱའོ། །ཨོཾ་སརྦ་བཱི་ར་ཡོ་གི་ནཱི་ཨཱ་ཪྻ་པཱུ་ཛོ་པ་སྠ་ནཱ་ཡ་ཨཱཏྨ་ནཱཾ་ནི་ཪྻའ་ཏ་ཡཱ་མི། སརྦ་ཏ་ཐཱ་ག་ཏ་བཱི་ར་ཡོ་གི་ནི་ཨཱཏྨ་ནཾ་ཌཱ་ཀི་ནཱི་ཨ་དྷི་ཏིཥྛ་སྭཱ་མཱཾ་ཞེས་པ་དང༌། ཐལ་མོ་སྙིང་གར་སྦྱར་དཔྲལ་བས་ལ་གཏུགས་ནས་ཨོམ་སརྦ་བཱི་ར་ཡོ་གི་ནི་པཱུ་ཛ་ཨ་བྷི་ཥེ་ཀ་ཏ་ཨཱཏྨ་ནཱཾ་ནི་ཪྻཱ་ཏ་ཡཱ་མི་སརྦ་ཏ་ཐཱ་ག་ཏ་བཱི་ར་ཡོ་གི་ནཱི་ཨཱཏྨ་ལ་མེ་ཨ་བྷིཥིཉྩ་མཱཾ་ཞེས་པ་དང༌། ཐལ་མོ་དཔྲལ་བར་སྦྱར་
༄། །ལྐོག་མ་ས་ལ་རེག་པར་བྱ་སྟེ། ཨོཾ་སརྦ་བཱི་ར་ཡོ་གི་ནཱི་པཱུ་ཛ་པྲ་བརྟན་ཡ་ཨཱཏྨ་ནཱཾ་ནི་ཪྻཱ་ཏ་ཡཱ་མི། སརྦ་ཏ་ཐཱ་ག་ཏ་བཱི་ར་ཡོ་གི་ཨཱཏྨ་ནཾ་བཎྜ་རོ་ཧེ་དྷརྨཱ་པྲ་བརྟ་ཡམཱཾ་ཞེས་པ་དང༌། ཐལ་མོ་སྙིང་གར་སྦྱར་སྤྱིར་སྤྱི་གཙུག་ས་ལ་གཏུགས་ཏེ། ཨོཾ་སརྦ་བཱི་ར་ཡོ་གི་ནཱི་པཱུ་ཛ་ཀརྨ་ཀ་རཱ་ཡ་ཨཱཏྨ་ནཱཾ་ནི་ཪྻཱ་ཡཱ་མི། སརྦ་ཏ་ཐཱ་ག་ཏ་བཱི་ར་ཡོ་གི་ནཱི་ཨཱཏྨ་རཱུ་པི་ཎྀ་ཀརྨ་ཀུ་རུ་མཱཾ་ཞེས་པ་དང་ཕྱག་བཞི་བྱའོ། །དེ་ནས་ལག་ན་མེ་ཏོག་ཐོགས་པ་སློབ་མས་མཆོད་པ་ལ་སོགས་པ་བྱས་ཏེ། བཅོམ་ལྡན་འདས་དཔལ་ཧེ་རུ་ཀ་ཡབ་ཡུམ་རྡོ་རྗེ་ཕག་མོ་རིགས་ལྔ་བདེ་བར་གཤེགས་པ་རིགས་ཀྱི་ཡུམ་དང༌། སེམས་དཔའ་དང་སེམས་མ་དཔའ་བོ་དང་དཔའ་བོ་ཡེ་ཤེས་དང་ལས་ལས་གྲུབ་པ་ཐམས་ཅད་ལ་བདག་མིང་འདི་ཞེས་བྱ་བས་ལུས་དང་ངག་དང་ཡིད་དད་པའི་སྒོ་ནས་མཆོད་པར་བགྱིའོ། །བཅོམ་ལྡན་འདས་དཔལ་ཧེ་རུ་ཀ་ཡུམ་རྡོ་རྗེ་ཕག་མོ་རིགས་ལྔ་བདེ་བར་གཤེགས་པ་རིགས་ཀྱི་ཡུམ་དང་སེམས་དཔའ་དང་སེམས་མ་དཔའ་བོ་དང་དཔའ་མོ་ཡེ་ཤེས་དང་ལས་ལས་གྲུབ་པ་ཐམས་ཅད་ཀྱི་སྤྱན་སྔར་སྡིག་པ་ཐམས་ཅད་ནི་བླ་ན་མེད་པའི་སོ་སོར་བཤགས་པས་སོ་སོར་བཤགས་པར་བགྱིའོ། །བཅོམ་ལྡན་འདས་དཔལ་ཧེ་རུ་ཀ་ཡུམ་རྡོ་རྗེ་ཕག་མོ་རིགས་ལྔ་བདེ་བར་གཤེགས་པའི་རིགས་ཀྱི་ཡུམ་དང་སེམས་དཔའི་དང་སེམས་མ་དཔའ་བོ་དང་དཔའ་མོ་ཡེ་ཤེས་དང་ལས་ལས་གྲུབ་པ་ཐམས་ཅད་ཀྱི་སྤྱན་སྔར་བསོད་ནམས་ཐམས་ཅད་ལ་རྒྱ་ཆེར་རྗེས་སུ་ཡི་རང་བར་བགྱིའོ། །བཅོམ་ལྡན་འདས་དཔལ་ཧེ་རུ་ཀ་ཡུམ་རྡོ་རྗེ་ཕག་མོ་རིགས་ལྔ་བདེ་བར་གཤེགས་པའི་རིགས་ཀྱི་ཡུམ་དང་སེམས་དཔའ་དང་སེམས་དཔའ་བོ་དང་དཔའ་མོ་ཡི་ཤེས་དང་ལས་ལས་གྲུབ་པ་ཐམས་ཅད་ལ་ཆོས་ཀྱི་འཁོར་ལོ་བསྐོར་བའི་ཕྱིར་བསྐུལ་བར་བགྱིའོ། །བཅོམ་ལྡན་འདས་དཔལ་ཧེ་རུ་ཀ་ཡུམ་རྡོ་རྗེ་ཕག་མོ་རིགས་ལྔ་བདེ་བར་གཤེགས་པ་རིགས་ཀྱི་ཡུམ་དང་སེམས་དཔའ་དང་སེམས་མ་དཔའ་སེམས་མ་དཔའ་མོ་ཡེ་ཤེས་དང་ལས་ལས་གྲུབ་པ་ཐམས་ཅད་ཡོངས་སུ་མྱ་ངན་ལས་འདའ་བར་བཞེད་པ་གང་ཡིན་པ་དེ་དག་ཐམས་ཅད་ལ་མྱ་ངན་ལས་མི་འདའ་བར་གསོལ་བར་འཚལ་ལོ།།
༄། །བཅོམ་ལྡན་འདས་དཔལ་ཧེ་རུ་ཀ་ཡུམ་རྡོ་རྗེ་ཕག་མོ་རིགས་ལྔ་བདེ་བར་གཤེགས་པ་རིགས་ཀྱི་ཡུམ་དང་སེམས་དཔའ་དང་སེམས་མ་དང་དཔའ་བོ་དང་དཔའ་མོ་ཡེ་ཤེས་དང་ལས་ལས་གྲུབ་པ་ཐམས་ཅད་ལ་དུས་ཐམས་ཅད་དང་རྣམ་པ་ཐམས་ཅད་དུ་བདག་འབུལ་གྱིས་སོ་སོར་བཞེས་ཤིག །བཅོམ་ལྡན་འདས་དཔལ་ཧེ་རུ་ཀ་ཡུམ་རྡོ་རྗེ་ཕག་མོ་རིགས་ལྔ་བདེ་བར་གཤེགས་པ་རིགས་ཀྱི་ཡུམ་སེམས་དཔའ་དང་སེམས་མ་དང་དཔའ་བོ་དང་དཔའ་མོ་ཡེ་ཤེས་དང་ལས་ལས་གྲུབ་པ་ཐམས་ཅད་ལ་བདག་མིང་འདི་ཞེས་བགྱི་བས་སྔོན་འཁོར་བ་ཐོག་མ་མེད་པ་ནས་ཐ་མ་ད་ལྟར་གྱི་བར་དུ་ཉན་ཐོས་ཀྱི་སྔོམ་པ་དང༌། བྱང་ཆུབ་སེམས་དཔའི་སྡོམ་པ་དང༌། གསང་སྔགས་ཀྱི་དམ་ཚིག་བསྲུངས་པ་ཇི་སྙེད་པ་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དཔལ་ཧེ་རུ་ཀའི་གོ་འཕང་དུ་བསྔོ་བར་བགྱིའོ། །བདག་གི་དགེ་བའི་ལས་རྣམས་འདི་དག་གིས། །འཇིག་རྟེན་དུ་ནི་མྱུར་དུ་སངས་རྒྱས་ཤོག །འགྲོ་ལ་ཕན་ཕྱིར་ཆོས་རྣམས་སྟོན་བགྱིད་ཅིང༌། །སེམས་ཅན་སྡུག་བསྔལ་མང་པོས་གཟིང་ལས་སྒྲོལ། །དེ་ནས་སློབ་མ་བྱིན་གྱིས་བརླབ་པ་ནི་ཧཱུཾ་མཛད་ཀྱི་སྔགས་ཀྱིས་བསྲུངས་ལ། སྤྱི་བོ་དང་ལྐོག་མ་དང་ལྟེ་བ་དང་རྐང་བར་ཨ་ལས་ཟླ་བའི་དཀྱིལ་འཁོར་ལྔ་བསྐྱེད་ལ་དེའི་སྟེང་དུ་ཨོཾ་དཀར་པོ་དང༌། ཨཱཿ་དམར་པོ་དང༌། སྭཱ་སེར་པོ་དང༌། ཧཱ་ལྗང་གུ་དེ་རྣམས་ཡོངས་སུ་གྱུར་པ་ལས་འཁོར་ལོ་དང་པདྨ་དང༌། རྡོ་རྗེ་དང་རིན་པོ་ཆེ་དང་རལ་གྲི་ལ་རང་རང་གི་ཡི་གེས་མཚན་པར་བསམས་ལ། ཨོཾ་ཨཱཿ་ཧཱུཾ། ཞེས་པས་བྱིང་ཡིས་བརླབ་པར་བྱའོ། །དེ་ནས་སློབ་མའི་སྤྱི་བོར་མེ་ཏོག །མདུན་དུ་སྤོས་དང་མར་མེ་སྙིང་གར་དྲི་སྦྱིན་པར་བྱའོ། །དེའི་རྗེས་ཨ་ཤྭདྠ་ལ་སོགས་པའི་སོ་ཤིང་སོར་བཅུ་གཉིས་པ་ཡོན་པོ་མ་ཡིན་པ་མ་གས་པ་སྲོག་ཆགས་མེད་པ་རྩེ་མོར་མེ་ཏོག་གི་ཕྲེང་བ་བཅིངས་ལ་བདུད་རྩི་ཐབ་སྦྱོར་གྱི་སྔགས་བཟླ་ལ་སློབ་མ་ལ་སྦྱིན་བར་བྱའོ། །སློབ་མས་ཀྱང་བྱང་ངམ་ཤར་དུ་བལྟས་ཏེ་བཅས་ལ་བ་ལང་གི་ཀོ་བ་ཙམ་གྱི་སའི་ཆ་ལྕི་བས་བྱུགས་པར་དོར་བར་བྱའོ། །སོ་ཤིང་གི་རྩེ་མོ་ཤར་ལ་སོགས་པར་བལྟས་ན་ཞིང་ལ་སོགས་
༄། །པའི་དངོས་གྲུབ་འབྱུང་བར་སྟོན་ཏོ། །དེ་ནས་ཁྱོར་བ་གསུམ་གྱི་འཐོར་འཐུང་བྱིན་ལ། ཨོཾ་ཧྲཱིཿ་བི་ཤུདྡྷ་སྶརྦ་དྷ་རྨཿ་སརྦ་པཱ་པཾ་ནི་སཾ་ཤོདྷ་ཡ་སརྦ་བི་ཀལྤ་ཨ་པ་ན་ཡ་ཧཱུཾ་ཞེས་བཟླས་པའི་ཆུས་ཁ་བཀྲུའོ། །དེ་ཡང་འདུག་པ་ལས་ཡི་གེ་བདུན་པ་བཟླས་པའི་ཀུ་ཤའི་སྔགས་དང། ཁྲོ་བོ་ཧཱུཾ་མཛད་པའི་ཀུ་ཤ་སྟན་གྱི་ཕྱིར་བྱིན་ལ། ཡི་གེ་གསུམ་དང་ཧཱུཾ་མཛད་བཟླས་པའི་སྲུང་སྐུ་དཔུང་པ་གཡོན་པར་བཅིངས་ལ། དཔྲལ་བར་ཡི་གེ་བདུན་པ་བཟླས་པའི་དྲིའི་ཐེག་ལེས་བསྲུངས་ལ། ཧཾ་ཁཾ་ལས་གོ་ཆ་བསྐྱེད་ལ་ཨོཾ་ཧཱུཾ་མཻ་བཛྲ་ཀ་བ་ཙ་རཀྵ་ཧཾ་ཞེས་བྱ་བས་གོ་ཆ་བསྐོན་ནས། ཨོཾ་བཛྲ་ཨུཥྞཱི་ཥ་ཧཱུཾ་ཞེས་བྱ་བའི་སྔགས་དང་རྡོ་རྗེ་བསྡམས་པ་ལས་གུང་མོ་མྱུ་གུ་ལྟར་བསྒྲེང་བའོ། །ཕྱག་རྒྱ་སྤྱི་བོར་བཞག་ལ་སྤྱི་བོའི་གཙུག་ཏོར་བསྐྱེད་པར་བྱའོ། །དེ་ནས་སྙིང་གར་ཡི་གེ་ཧཱུཾ་བསྒོམས་ལ་རྡོ་རྗེ་ཁུ་ཚུར་གྱིས་གཏུགས་ཏེ་ཡི་གེ་བརྒྱ་པས་བརྟན་པར་བྱའོ། །དེ་ནས་ཆོས་བཤད་པར་བྱ་སྟེ། སྒྱུ་འཕྲུལ་དྲ་བའི་རྒྱུད་ལས་ནི། །གཡས་སུ་སྲུང་སྐུད་བཅིང་བ་དང༌། །ཀུ་ཤའི་ལོ་མས་བརྟན་བྱས་ནས། །འཇིག་རྟེན་ནི་ཀུན་མཁྱེན་རྣམས། །ཨུ་དུ་མ་བཱ་རའི་མེ་ཏོག་བཞིན། །བརྒྱ་ལམ་ན་ནི་རེས་འགའ་ཞིག །འབྱུང་འགྱུར་ཡང་ནི་མི་འབྱུང་ངོ༌། །གསང་སྔགས་སྤྱོད་པའི་ཚུལ་འབྱུང་བ། །དེ་བས་ཀྱང་ནི་དཀོན་པ་སྟེ། །གང་ཞིག་མཉམ་མེད་སེམས་ཅན་དོན། །མྱ་ངན་མི་འདའ་བྱེད་པར་ནུས། །བསྐལ་པ་བྱེ་བ་དུ་མ་རུ། །སྡིག་པ་བགྱིས་པར་གྱུར་པ་དག །དེ་ཀུན་དཀྱིལ་འཁོར་འདི་འདྲ་བ། །མཐོང་བས་བྱང་བར་འགྱུར་འདྲ་ན། །གྲགས་པ་མཐའ་ཡས་སྔགས་སྤྱོད་པའི། །ཚུལ་ལ་གནས་པ་སྨོས་ཅི་དགོས། །སྐྱོབ་པ་གསང་སྔགས་བཟླས་ནས་ནི། །གོ་འཕང་བླ་ན་མེད་པར་འགྱུར། །གང་དག་སྤྱོད་པ་མཆོག་འདི་ལ། །བློ་གྲོས་ཤིན་ཏུ་མི་གཡོ་བ། །དེ་དག་གིས་ནི་ངན་འགྲོའི་རྒྱུན། །སྡུག་བསྔལ་ཀུན་འབྱུང་རབ་ཏུ་སྤྱོད། །བདག་ཉིད་ཆེན་པོ་ཁྱེད་རྣམས་ཀྱིས། །རྙེད་པ་མཉམ་མེད་དེ་རིང་སྙེད། །གང་ཕྱིར་རྒྱལ་བ་སྲས་བཅས་པ། །བདག་ཉིད་ཆེན་པོ་ཁྱེད་རྣམས་ནི། །བསྟན་པ་འདི་ལ་ཁྱེད་རྣམས་ཀུན། །ཡོངས་སུ་གཟུང་སྟེ་སྐྱེ་བཞིན་པ། །དེ་ཕྱིར་ཁྱེར་རྣམས་ཐེག་ཆེན་ལ། །སང་ནི་རབ་ཏུ་སྐྱེ་བར་འགྱུར། །
༄། །ཐེག་པ་ཆེན་པོ་འབྱུང་བ་ཡི། །ལམ་མཆོག་འདི་ནི་དཔལ་དང་ལྡན། །ཁྱེད་རྣམས་དེར་ནི་དོང་བ་ལགས། །རང་འབྱུང་སྐལ་བ་ཆེན་པོ་པ། །འཇིག་རྟེན་ཐམས་ཅད་མཁྱེན་པ་ཡི། །དེ་བཞིན་གཤེགས་པ་རྣམས་སུ་འགྱུར། །ཞེས་སྤྲོ་བ་བསྐྱེད་ལ། བཞིན་བཟངས་རྣམས་ལངས་ལ་དཀྱིལ་འཁོར་ལ་ཕྱག་གྱིས་ཤིག་ནང་པར་དཀྱིལ་འཁོར་ཆེན་པོ་མ་ཐོང་བར་འགྱུར་རོ། །དེ་ནས་རྨི་ལམ་དགེ་མི་དགེ་ང་ལ་སྨྲོས་ཤིག་ཅེས་བསྒོའོ། །རྨི་ལམ་ངན་ན་ཧཱུཾ་མཛད་བརྒྱ་རྩ་བརྒྱད་བཟླས་པར་བྱའོ། །སློབ་མ་ལྷག་པར་གནས་པའོ། །།དེ་ནས་སློབ་མ་གཞུག་པར་བྱ་སྟེ། དང་པོར་ཧཱུཾ་མཛད་བཟླས་པའི་སྟོད་གཡོགས་དང་སྨད་གཡོགས་བསྐོན་ལ་ཡི་གེ་བདུན་པ་བཟླས་པའི་དར་སེང་ཁས་གདོང་གཡོགས་བཅིངས་ལ་ཡོལ་བའི་རྒྱབ་ཏུ་བཞག་ལ་ཧཱུཾ་མཛད་ཀྱི་བུམ་པའི་ཆུས་བསངས་ནས་སྡུག་པ་ཁྱོད་སུ་ཡིན་ཞེས་དྲི་བར་བྱའོ། །སློབ་མས་ཀྱང་བདག་སྐལ་བ་བཟང་པོ་ཅན་ནོ་ཞེས་བརྗོད་པར་བྱའོ། །དེ་ནས་ཛཿ་ཧཱུཾ་བཾ་ཧོཿ་ས་ནང་དུ་གཞུག་པར་བྱའོ། །གཞུག་པའི་ཆོ་ག་བདུན་ཏེ། དེ་ལ་དང་པོ་རེ་རེ་ཞིག་གསོལ་བ་གདབ་ཅིང་རྒྱུན་བཤགས་བྱ་བ་ནི། སངས་རྒྱས་ཀུན་གྱི་རང་བཞིན་སྐུ། །སློབ་དཔོན་ལ་ནི་སྐྱབས་སུ་མཆི། །དཔའ་བོ་རྣམས་འབྱོར་མའི་འཁོར་ལོ། །རྣལ་འབྱོར་གནས་ལ་ཕྱག་འཚལ་ལོ། །དེ་བཞིན་གཤེགས་པ་ཀུན་གྱི་གནས། །ཧེ་རུ་ཀ་དཔལ་གྲོང་ཁྱེར་མཆོག །སྙིང་པོའི་དཀྱིལ་འཁོར་འདི་རུ་ནི། །མགོན་པོ་བདག་ནི་གཞུག་པར་མཛོད། །ཅེས་སྨྲས་གཞུག་གོ །དེ་ནས་མིག་ལམ་ན་ཅི་སྣང་ཞེས་དྲི་བར་བྱའོ། །ཁ་དོག་ལ་སོགས་པའི་བྱེ་བྲག་གིས་ཞི་བ་ལས་སོགས་པའི་ལས་འགྲུབ་བར་བསྟན་པར་བྱའོ། །དེ་ནས་སྔར་བསྟན་པ་བཞིན་དུ་ཕྱག་འཚལ་བ་དང་མཆོད་པ་དང་སྡིག་པ་བཤགས་པ་དང་རྗེ་སུ་ཡི་རང་བ་དང་བསྐུལ་བ་དང་གསོལ་བ་གདབ་པ་དང་ལུས་དབུལ་བ་དང་བསྔོ་བ་དང་སྔོམ་པ་གཟུང་བར་བྱ་བ་ནི། ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པའི། །བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་པར་བགྱི། །སངས་རྒྱས་རྣལ་འབྱོར་སྡོམ་པ་ལ། །ཚུལ་ཁྲིམས་ཀྱི་ནི་བསླབ་པ་དང༌། །དགེ་བའི་ཆོས་ནི་སྡུད་པ་དང༌། །སེམས་ཅན་དོན་བྱེད་ཚུལ་ཁྲིམས་གསུམ། །བདག་
༄། །གིས་བརྟན་པོར་གཟུང་བར་བགྱི། །སངས་རྒྱས་ཆོས་དང་དགེ་འདུན་ཏེ། །བླ་ན་མེད་པའི་དཀོན་མཆོག་གསུམ། །དེང་ནས་བརྩམས་ཏེ་གཟུང་བར་བགྱི། །ནམ་དུ་ཡང་ནི་མེ་སྤོང་ངོ༌། །རྡོ་རྗེ་རིགས་མཆོག་ཆེན་པོ་ལ། །རྡོ་རྗེ་དྲིལ་བུ་ཕྱག་རྒྱ་ཡང༌། །ཡང་དག་ཉིད་དུ་གཟུང་བར་བགྱི། །སློབ་དཔོན་དག་ཀྱང་གཟུང་བར་བགྱི། །རིན་ཆེན་རིགས་མཆོག་ཆེན་པོ་ལ། །དམ་ཚིག་ཡིད་དུ་འོང་བ་ལ། །ཉིན་རེ་ཞིང་ནི་དུས་དྲུག་ཏུ། །སྦྱིན་པ་རྣམ་ཞི་རྟག་ཏུ་སྦྱིན། །བྱང་ཆུབ་ཆེན་པོ་ལས་བྱུང་བའོ། །པདྨའི་རིགས་མཆོག་དག་པ་ལ། །ཕྱི་ནང་གསང་བའི་ཐེག་པ་གསུམ། །དམ་པའི་ཆོས་ཀྱང་གཟུང་བར་བགྱི། །ལས་ཀྱི་རིགས་མཆོག་ཆེན་པོ་ལ། །སྡོམ་པ་ཐམས་ཅད་ལྡན་པར་ནི། །ཡང་དག་ཉིད་དུ་གཟུང་བར་བགྱི། །མཆོད་པའི་ལས་ཀྱང་ཅི་ནུས་བགྱི། །བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་བགྱིས་ནས། །སེམས་ཅན་ཀུན་གྱི་དོན་གྱི་ཕྱིར། །བདག་གིས་སྡོམ་པ་མ་ལུས་གཟུང༌། །མ་གྲོལ་བ་ནི་དགྲོལ་བར་བགྱི། །མ་བསྐལ་བ་ནི་བསྒྲལ་བར་བགྱི། །དབུགས་མ་ཕྱིན་པ་དབུགས་ཕྱུང་ཞིང༌། །སེམས་ཅན་མྱ་ངན་འདས་ལ་དགོད། །ཅེས་བརྗོད་དོ། །ཡང་འདི་སྐད་ཅེས་བརྗོད་པར་བྱའོ།། གོང་ནས་གོང་གི་སྡོམ་པ་འདི། །བུ་ཁྱོད་ཀྱི་ནི་བསྲུང་བྱ་སྟེ། །གྲོལ་བའི་རྒྱུ་ནི་དེ་ལས་གཞན། །ཐབས་ནི་ཅི་ཡང་ཡོད་མ་ཡིན། །གཉིས་མེད་མེད་རྣལ་འབྱོར་བདག །བྱང་ཆུབ་ཡན་ལག་མེ་ཏོག་སྦྲུལ། །བདུད་རྩི་ལྔ་ཡི་དམ་ཚིག་ནི། །སྡིག་པ་འབྱིན་བྱེད་བུས་སྲུངས་ཤིག །ཅེས་བརྗོད་དོ། །གཉིས་པ་བྱང་ཆུབ་ཏུ་སེམས་བསྐྱེད་པ་ནི་གནས་གསུམ་དུ་ནི་ཡི་གེ་བདུན་པ་དྲིའི་ཐིག་ལེ་བྱས་ལ་བྱང་ཆུབ་ཏུ་སེམས་བསྐྱེད་པར་བྱ་སྟེ། སྙིང་གར་ཟླ་བའི་དཀྱིལ་འཁོར་ལ་ཡི་གེ་ཧཱུཾ་ལས་རྡོ་རྗེ་ལྔ་པ་དཀར་པོ་བསྐྱེད་ལ་སྦོས་ཆུས་བརླན་པའི་ལག་པས་རྡོ་རྗེ་བཟུང་ལ་སློབ་མའི་སྙིང་གར་བཞག་ནས། ཨོཾ་སརྦ་ཡོ་ག་ཙིཏྟ་ཨུཏྤཱ་ད་ཡཱ་མི་སུ་ར་ཏ་ས་མ་ཡ་སྟྭཾ། ཧོ་བཛྲ་སིདྡྷི་ཡ་ཐཱ་སུ་ཁཾ་ཞེས་བརྗོད་ལ་ཡི་གེ་བརྒྱ་བས་བརྟན་པར་བྱའོ། །དེ་ནས་གསུམ་པ་ལྷ་དང་སློབ་དཔོན་གྱི་དམ་ཚིག་བསྒྲག་པར་བྱ་སྟེ། དེར་ཁྱོད་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་ཀྱིས་དེ་
༄། །བཞིན་གཤེགས་པ་ཐམས་ཅད་ཀྱི་མཆོག་ཏུ་གསང་བ་འདི། ཁྱོད་ཀྱིས་དཀྱིལ་འཁོར་མ་མཐོང་བ་རྣམས་ལ་སྨྲ་བར་མ་བྱེད་ཅིག །དད་པ་དང་མི་ལྡན་པ་རྣམས་ལ་ཡང་མ་ཡིན་ནོ་ཞེས་བརྗོད་དོ། །དེ་ནས་ཡང་ཛཿ་ཧཱུཾ་བཾ་ཧོཿ་ས་དཀྱིལ་འཁོར་རུ་གཞུག་པར་བསམས་ལ། ཨཱཿ་ཁཾ་བཱི་ར་ཧཱུཾ་ཞེས་པའི་སྔགས་དང་དཔའ་བོ་ནམ་མཁའ་དང་མཉམ་པའི་དཀྱིལ་འཁོར་དུ་བཞུགས་སོ་ཞེས་བརྗོད་པར་བྱའོ། །དེང་ཁྱོད་དཔའ་བོ་དང་རྣལ་འབྱོར་མ་ཐམས་ཅད་ཀྱི་རིགས་སུ་ཞུགས་ཀྱིས་ངས་ཁྱོད་ལ་ཡེ་ཤེས་གང་གིས་དཔལ་ཧེ་རུ་ཀ་དང་དེ་བཞིན་གཤེགས་པ་ཐམས་ཅད་དང་དཔའ་བོ་དང་རྣལ་འབྱོར་མ་ཐམས་ཅད་ཀྱི་དངོས་གྲུབ་ཐོབ་པར་འགྱུར་ན། དངོས་གྲུབ་གཞན་ལྟ་ཅི་སྨོས་ཏེ་དེ་ལྟ་བུའི་ཡེ་ཤེས་བསྐྱེད་པར་བྱའོ། །ཁྱོད་ཀྱིས་དཀྱིལ་འཁོར་ཆེན་པོ་མཐོང་བ་རྣམས་ལ་སྨྲ་བར་མ་བྱེད་ཅིག་དམ་ཚིག་ཉམས་པར་གྱུར་ཏ་རེ་ཞེས་བརྗོད་དོ། །སློབ་མའི་སྙིང་གར་རྡོ་རྗེ་བཞག་ལ། ཨོཾ་ཧེ་རུ་ཀ་དཔལ་དེང་ཁྱོད་ཀྱི། །སྙིང་ལ་དག་ཞུགས་བར་འགྱུར། །གལ་ཏེ་ཚུལ་འདི་སྨྲས་ན་ནི། །དེ་མ་ཐག་ཏུ་དྲལ་ཏེ་གཤེགས། །ཞེས་བརྗོད་ནས་ཐོད་པའི་ནང་དུ་བདུད་རྩི་ལྔ་སྦྱར་ལ་ཡི་གེ་གསུམ་བཟླས་ལ་འཐུང་དུ་བཅུག་ལ་འདི་སྐད་བརྗོད་པར་བྱའོ། །འདི་ནི་མི་ཐོང་ཆུ་ཡིན་ཏེ། །དམ་ཚིག་འདས་ན་སྲེག་པར་བྱེད། །དམ་ཚིག་བསྲུངས་ན་དངོས་གྲུབ་ནི། །རྡོ་རྗེ་བདུད་རྩིའི་ཆུ་འཐུང་ཤིག །ཨོཾ་པཉྩ་ཨ་མྲྀ་ཏ་ཨུ་ད་ཀ་ཋཿ་ཞེས་བརྗོད་དོ། །དེ་ནས་སློབ་དཔོན་གྱི་དམ་ཚིག་བསྒྲག་པར་བྱ་སྟེ། དེང་ཕྱིན་ཆད་ཁྱོད་ཀྱི་ཧེ་རུ་ཀ་ང་ཡིན་གྱིས་ངས་འདི་བྱོས་ཤིག་ཅེས་བསྒོ་བ་དེ་བྱ་དགོས་སོ། །ཁྱོད་ཀྱིས་ང་ལ་བརྙས་པ་མ་བྱེད་ཅིག །མི་བདེ་བ་མ་སྤངས་པས་ཁྱོད་དུས་བྱས་ནས་དམྱལ་བར་གྱུར་ཏ་རེ་ཞེས་བརྗོད་དོ། །དེ་ནས་བཞི་པ་ཡེ་ཤེས་དབབ་པར་བྱ་སྟེ། དཔའ་བོ་དང་རྣལ་འབྱོར་མ་ཐམས་ཅད་ཀྱིས་བྱིན་གྱིས་རློབས་ལ། དཔལ་ཧེ་རུ་ཀའི་ཡེ་ཤེས་བདག་ལ་འབབ་པར་གྱུར་ཅིག་ཅེས་སྨྲར་བཅུག་ལ། དེའི་ཐུགས་ཀར་ལཾ་ལས་བྱུང་བའི་དབང་ཆེན་གྱི་དཀྱིལ་འཁོར་ཁ་དོག་སེར་པོ་དབུས་སུ་རྡོ་རྗེས་མཚན་པ། ལྐོག་མར་བཾ་ལས་བྱུང་བའི་ཆུའི་དཀྱིལ་འཁོར་དཀར་པོ་བུ་མ་པས་མཚན་པ་ལ་དབུས་ན་ཡི་གེ་ཨ་གནས་པར་བསམ་མོ། །སློབ་མའི་སྤྱི་བོར་ཡི་གེ་
༄། །ཡཾ་ལས་བྱུང་བ་རླུང་གི་དཀྱིལ་འཁོར་གཞུའི་དབྱིབས་ལྟ་བུ་ཁ་དོག་སྔོན་པོ་བ་དན་ན་གྱིས་མཚན་པ་ལ་དབུས་སུ་ཡི་གེ་ཧཱུཾ་གནས་པར་བསམ་མོ། །སློབ་མའི་རྐང་པའི་འོག་ཏུ་ཛྷཻཾ་འོད་ཐེར་འབར་བ་དང་བཅས་པ་བསམས་ལ་དེའི་འོག་ཏུ་ཡང་རླུང་གི་དཀྱིལ་འཁོར་གྱི་སྟེང་དུ་རཾ་ལས་བྱུང་བའི་མེའི་དཀྱིལ་འཁོར་གྲུ་གསུམ་པ་ཁ་དོག་དམར་པོ་བསྒོམས་ལ། དྲིལ་བུ་དཀྲོལ་ཞིང༌། ཨཱ་བེ་ཤ་ཡ་ཨཱ་བེ་ཤ་ཡ། སྟྭཾ་བྷ་ཡ་སྟྭཾ་བྷ་ཡ། ར་ར་ར་ར། ཙ་ལ་ཡ་ཙ་ལ་ཡ། ཧཱུཾ་ཧ་ཨ་ཛྷཻཾ། ཞེས་བརྗོད་ཅིང་ཐང་ཆུ་ལྔ་སྦྱར་ལ་བསྐུས་པའི་གོས་ལེགས་པར་བརྡུངས་པ་དང༌། བྱི་ལའི་དང་གུ་གུལ་ལྷན་ཅིག་སྦྱར་བའི་ཐོང་པའི་ནང་དུ་དུར་ཁྲོད་ཀྱི་སོལ་བའི་མེ་ལ་ཡབ་ཡུམ་གྱི་སྔགས་དང༌། དཔའ་བོ་དང་དཔའ་མོའི་སྔགས་དང༌། ཨོཾ་ཏིཥྛ་མ་ཧཱ་ཀྲོ་དྷ་ཨཱ་བེ་ཤ་ཡ་ཧཱུཾ། ཨོཾ་ཤྲའི་ཧེ་རུ་ཀ་ཡ་བིད་མ་ཧེ་སྭ་ཧ་ཞེས་བྱབས་དབབ་པར་བྱའོ། །དེ་ནས་བབས་ཀྱང་རུང་སྟེ་ལྕེ་ལ་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་ཨཱཿ་དམར་པོ་གསུང་གི་རྡོ་རྗེའི་རང་བཞིན་དུ་བསམས་ལ། བྲུཾ་ཧི་བཛྲ་དགེ་བའམ་མི་དགེ་པ་སྨྲོས་ཤིག་ཅེས་བརྗོད་ལ། བབ་པར་གྱུར་ན་ཏིཥྛ་བཛྲ་ཞེས་པ་དང༌། ཡི་གེ་བརྒྱ་པས་བརྟན་པར་བྱའོ། །དེ་ནས་ལྔ་བ་མེ་ཏོག་དོར་བར་བྱ་སྟེ་རིན་པོ་ཆེ་འམ་མེ་ཏོག་གི་ཕྲེང་བ་དོར་ལ་ལྷ་དང་ཉེ་བ་དང་མི་ཉེ་བའི་གནས་བརྟགས་ལ། པྲ་ཏི་གྲྀཧྞ་སྭ་མི་མཱཾ་སྟྭ་མ་ཧཱ་བ་ལ་ཞེས་པས་བླངས་ལ་སློབ་མའི་མགོ་ལ་བཅིང་བར་བྱའོ། །དེ་ནས་དྲུག་པ་གདོང་གཡོགས་དགྲོལ་བར་བྱ་སྟེ། དེའི་མིག་གཉིས་སུ་ཡི་གེ་འོད་ཟེར་དང་བཅས་པ་བསམས་ལ་རྡོ་རྗེ་རྩེ་མོས་ཕྱི་ཞིང༌། ཨོཾ་བཛྲ་ན་ཏྲ་ཨ་པ་ཧར་བ་ཊ་ལཾ་ཧྲའིཿ་ཞེས་པ་དང༌། ཧེ་རུ་ཀ་དཔལ་དེང་ཁྱོད་ཀྱི། །མིག་འབྱེད་པར་ནི་བརྩོན་པར་མཛད། རྡོ་རྗེ་མིག་ནི་བླ་མེད་པ། །དེ་ཉིད་དུ་ནི་འབྱེད་པར་ཤོག །ཅེས་བརྗོད་ལ་གདོང་གཡོགས་དགྲོལ་བར་བྱའོ། །དེ་ནས་བདུན་པ་དཀྱིལ་འཁོར་བསྟན་པ་ནི། །དཀྱིལ་འཁོར་བཟང་པོ་འདི་ལ་ལྟོས། །ད་ནི་དད་པ་རབ་ཏུ་བསྐྱེད། །ཁྱོད་ནི་རྣལ་འབྱོར་རིགས་སུ་སྐྱེས། །གསང་སྔགས་ཕྱག་རྒྱ་བྱིན་གྱིས་བརླབས། །འགྲོ་བའི་ཕུན་སུམ་ཚོགས་ཀུན་དང༌། །དངོས་གྲུབ་ཀུན་ཁྱོད་མངོན་དུ་གྱུར། །ཞེས་པ་དང༌། གང་དུ་མེ་ཏོག་བབས་པའི་ལྷ་དང་དཀྱིལ་འཁོར་གྱི་དེ་ཉིད་བརྟན་པར་བྱའོ། །སྣ་ཚོགས་པདྨའི་
༄། །ལྟེ་བར་བཞུགས། །གཉིས་མེད་གཉིས་མེད་ནང་ན་གནས། །བརྟན་གཡོ་ཀུན་གྱི་བདག་ཉིད་ཅན། །སྤྱོད་དང་གྲོལ་བའི་རབ་བརྩོན་བྱ། །ཀུན་མཁྱེན་ཀུན་མཁྱེན་གཙོ་བོ་སྟེ། །དཔའ་བོ་ཆེ་ལ་བུ་ཁྱོད་ལྟོས། །རྣལ་འབྱོར་མ་ལ་སོགས་པའི་ཚོགས། །གྲུབ་པའི་རྣལ་འབྱོར་མ་ལྔའོ། །ཐོད་པའི་དུམ་བུ་ལ་སོགས་ཀུན། །འཁོར་ལོ་མཁའ་ལ་སྤྱོད་པས་བསྐོར། །རབ་ལ་སོགས་པས་ཡང་དག་འཁྱུད། །གཉིས་པོ་ཐུགས་ཀྱི་སྤྲུལ་པ་ཡིན། །མྱུ་གུ་ཅན་ལ་སོགས་པ་ཀུན། །རྣལ་འབྱོར་མ་བརྒྱད་གཉིས་སུ་མེད། །གསུམ་ནི་རྣམ་དག་ངོ་བོ་ཡིས། །མི་ཡི་འཇིག་རྟེན་དག་ཏུ་ཁྱབ། །སྟོབས་པོ་ཆེ་ལ་སོགས་གནས་པ། །གྲུབ་པ་ས་འོག་པ་རྣམས་ཡིན། །སྐུ་ཡི་སྤྲུལ་པར་བཤད་པ་ཡི། །ཆགས་པ་ཀུན་གྱི་རྗེས་སུ་ཆགས། །ཧེ་རུ་ཀ་ལ་སོགས་འཁོར་ལོ། །གཡོན་ནས་འཁྱུད་ཅིང་ནུ་མ་འཛིན། །སྐུ་གསུམ་ཞེས་བྱའི་སྤྲུལ་པ་སྟེ། །འབྲིང་དང་མཆོག་དང་ཐམ་དང༌། །ཁྭ་ལ་སོགས་པ་བརྒྱད་པོ་ཡི། །གཟུགས་ནི་རྒྱུ་ཡིས་ཡང་དག་བསྟན། །ཁྲོ་བོ་རྣམ་རྒྱལ་ལ་སོགས་བརྒྱད། །བྱང་ཆུབ་སུམ་ཅུ་རྩ་བདུན་སྤྲུལ། །མཁའ་ལ་སྤྱོད་དང་ས་ལ་སྤྱོད། །ས་འོག་དག་ནི་སྤྱོད་པ་སྟེ། །བརྒྱད་གཉིས་མཆོད་པའི་ལྷ་མོ་སྟེ། །ལྷ་རྣམས་དེ་ཉིད་བསྟན་པ་ཡིན། །དཀྱིལ་འཁོར་གྱི་ནི་དེ་ཉིད་དང༌། །སློབ་མ་གཞུག་པའི་ཆོ་གའོ།། །།དེ་ནས་དབང་བསྐུར་བ་བཞི་བཤད་པར་བྱ། དེ་ལ་རེ་ཞིག་རིག་པའི་དབང་བསྐུར་བ་དང་པོར་བྱ་སྟེ། པདྨ་འདབ་མ་བརྒྱད་པ་བྲིས་ཏེ་དེའི་སྟང་དུ་སློབ་མ་སྐྱིལ་ཀྲུང་དུ་བཞག་ལ། ཧཱུཾ་མཛད་ཀྱི་ཆུས་བསངས་ནས། །ཡོན་གྱི་མཆོག་བླངས་ནས་གསོལ་བ་གདབ་པ་ནི། མི་ལྡོག་འཁོར་ལོའི་དབང་བསྐུར་བ། །མགོན་པོ་ཆེན་པོ་བདག་ལ་སྩོལ། །དཀྱིལ་འཁོར་ལྷ་ཡི་དེ་ཉིད་དང༌། །སློབ་དཔོན་གྱི་ནི་ལས་རྣམས་དང༌། །ཧེ་རུ་ཀ་དཔལ་དམ་ཚིག་དང༌། །སྡོམ་པ་གསང་བ་བླ་ན་མེད། །སེམས་ཅན་གྱི་ནི་དོན་གྱི་ཕྱིར། །དཔའ་བོ་སློབ་དཔོན་བདག་གྲུབ་མཛོད། །དེ་ལྟར་གསོལ་བ་བཏབ་ནས་སྔར་བཤད་པའི་སྡོམ་པ་བྱིན་ལ་སྙིང་གར་ཧཱུཾ་བསམས་ལ། ཨོཾ་སྭ་བྷཱ་བ་ཤུདྡྷཿ་སརྦྦ་དྷརྨཱཿ་སྭ་ཤུདྡྷོ྅ཧཾ་ཞེས་བྱ་བའི་སྔགས་ཀྱིས་སློབ་མ་སྟོན་པ་ཉིད་དུང་སྒོམས་ལ། དེ་ནས་ཨཱ་ལི་ཀའ་ལི་ལས་ཉི་ཟླ་ཁ་སྦྱོར། དེའི་དབུས་སུ་ཧཱུཾ་བཾ་གཉིས་ཏེ་དེ་ཡོངས་སུ་གྱུར་བ་ལས་རྡོ་རྗེ་དང་གྲི་གུག་
༄། །དེའི་སྤྲོ་བསྡུ་ལས་བཅོམ་ལྡན་འདས་དཔལ་ཧེ་རུ་ཀ་སྐུ་མདོག་སྔོན་པོ་ཞལ་བཞི་པ་ཕྱག་བཅུ་གཉིས་པ། ཡུམ་སྐུ་མདོག་དམར་མོ་ཞལ་གཅིག་ཕྱག་གཉིས་པ་བསྒོམ་དུ་བཅུག་ལ། དེ་ལ་གོ་ཆ་བསྐོན་ནས་ཡེ་ཤེས་སེམས་དཔའ་བཅུག་ལ་དབང་བསྐུར་པར་བྱ་སྟེ། ཇི་ལྟར་བལྟམས་བ་ཙམ་གྱིས་ནི། །དེ་བཞིན་གཤེགས་ཀུན་ཁྲུས་གསོལ་པ། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་ཁྲུས་བགྱིའོ། །བུམ་པ་ཐམས་ཅད་ཀྱི་ཆུ་བླངས་ལ། ཨོཾ་སརྦ་ཏ་ཐཱ་ག་ཏ་བཛྲ་ཨ་བྷི་ཥིཉྩ་ཧཱུཾ་ཞེས་བརྗོད་ལ་མེ་ཏོག་སྤྱི་བོར་དོར་ལ། དཔལ་ལྡན་རྡོ་རྗེ་ཐུགས་འཆང་བ། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་ཐུགས་སུ་མཛད་དུ་གསོལ། །ཕྱོགས་བཅུར་བཞུགས་པའི་སངས་རྒྱས་རྣམས། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་ཐུགས་སུ་མཛད་དུ་གསོལ། །ཨོཾ་སརྦ་ཏ་ཐཱ་ག་ཏ་ཙིདྟ་ནི་ཪྻཱ་ཏ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། རྣམ་ཤེས་ཕུང་པོ་རྣམ་དག་པས། །མེ་ལོང་ལྟ་བུ་ཡེ་ཤེས་ཀྱི། །ཞེ་སྡང་རྣམ་དག་མི་བསྐྱོད་པའི་། །དཔལ་ལྡན་ཆུ་ཡི་དབང་བསྐུར་བའོ། །དེ་ནས་གསེར་ལ་སོགས་པ་ལས་བྱས་པ་འབུར་དུ་བཏོད་པའམ་རས་ལ་སོགས་པ་ལ་བྲིས་པ་ལ་གོས་པའི་ཅོད་པན་ལ། ཧཱུཾ་མཛད་ལ་སོགས་པའི་སྔགས་ཀྱིས་བསངས་ནས་ཡི་གེ་ཧཱཾ་ལས་རིན་པོ་ཆེ་དེ་ཡོངས་སུ་གྱུར་པ་ལས་རིན་ཆེན་འབྱུང་ལྡན། དེ་ཡོངས་སུ་གྱུར་བ་ལས་རིགས་ལྔའི་དབུ་རྒྱན་དུ་བསམས་ལ་དྲིའི་ཐིག་ལེ་བྱས་ཏེ། མེ་ཏོག་ལ་སོགས་པས་ཡང་དག་པར་མཆོད་ནས་སློབ་མའི་མགོ་ལ་བཞག་སྟེ། འདི་སྐད་ཅེས་བརྗོད་དོ། །ཕལ་པའི་མདངས་ནི་གཞོམ་པའི་ཕྱིར། །ང་རྒྱལ་རིན་ཆེན་འབྱུང་ལྡན་གྱི། །ཡོན་ཏན་གཟི་བརྗོད་བསྐྱེད་པའི་ཕྱིར། །ཅོད་པན་གྱིས་ནི་དབང་བསྐུར་རོ། །ཨོཾ་སརྦ་ཏ་ཐཱ་ག་ཏ་མུ་ཀུ་ཊ་ཨ་བྷི་ཥིཉྩ་ཧཱུཾ་ཞེས་བརྗོད་པ་དང༌། རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་རིན་ཆེན་མཛད་དུ་གསོལ། །ཕྱོགས་བཅུ་ཡི་ནི་སངས་རྒྱས་རྣམས། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་རིན་ཆེན་མཛད་དུ་གསོལ། །ཨོཾ་སརྦ་ཏ་ཐཱ་ག་ཏ་བཛྲ་རཏྣ་སྭ་བྷཱ་བ་ཨཱཏྨ་ཀོ྅ཧཾ། ཚོར་བའི་ཕུང་པོ་རྣམ་དག་པའི། །མཉམ་པ་
༄། །ཉིད་ཀྱི་ཡེ་ཤེས་ཀྱི། །ང་རྒྱལ་རིན་ཆེན་འབྱུང་ལྡན་གྱི། །ཅོད་པན་གྱིས་ནི་དབང་བསྐུར་རོ། །ཅོད་པན་གྱི་དབང་སྟེ་གཉིས་པའོ། །དེ་ནས་རྡོ་རྗེའི་དབང་བསྐུར་བ་ནི། གསེར་རམ་རིན་པོ་ཆེ་ལས་བྱས་པའི་རྡོ་རྗེ་ཧཱུཾ་མཛད་ཀྱིས་བསངས་ཏེ་ཧྲཱིཿལས་པདྨ་དེ་ཡོངས་སུ་གྱུར་པ་ལས་སྣང་བ་མཐའ་ཡས་དེ་ཡོངས་སུ་གྱུར་པ་ལས་རྡོ་རྗེ་བསམས་ལ། དྲིའི་ཐིག་ལེ་བྱས་ལ་མེ་ཏོག་ལ་སོགས་པས་ཡང་དག་པར་མཆོད་ལ། སངས་རྒྱས་ཀུན་གྱི་རྡོ་རྗེའི་དབང༌། །དེ་རིང་ཁྱོད་ལ་བསྐུར་བར་བྱ། །ཧེ་རུ་ཀ་དཔལ་རབ་བསྒྲུབ་ཕྱིར། །རྡོ་རྗེའི་འདི་ནི་ཁྱོད་ཀྱིས་ལོང༌། །ཐོག་མཐའ་མེད་པའི་སེམས་དཔའ་ནི། །རྡོ་རྗེ་སེམས་དཔའ་དགའ་བ་ཆེ། །ཀུན་དུ་བཟང་པོ་ཀུན་བདག་ཉིད། །རྡོ་རྗེ་སྙེམས་ཚུལ་བདག་པོའི་བདག །ཨོཾ་སརྦ་ཏ་ཐཱ་ག་ཏ་ཧྲཱིཿ་ཤྲཱི་ཧེ་རུ་ཀ་བཛྲ་ཨ་བྷི་ཥིཉྩཱ་མི། ཏིཥྛ་བཛྲ་བཛྲ་ས་མ་ཡ་སྟྭཾ་ཞེས་པས་ལག་པར་རྡོ་རྗེ་གཏད་ལ། ཆོས་ཀྱི་གསུང་ལམ་དཔལ་དང་ལྡན། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་གསུང་དུ་བདག་གིས་བསྒོམ། །ཕྱོགས་བཅུར་བཞུགས་པའི་སངས་རྒྱས་རྣམས། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་གསུང་དུ་མཛད་དུ་གསོལ། །ཨོཾ་སརྦ་ཏ་ཐཱ་ག་ཏ་བཱ་ཀ་བཛྲ་སྭ་བྷཱ་བ་ཨཱཏྨ་ཀོ྅ཧཾ། འདུ་ཤེས་ཕུང་པོ་གནས་འགྱུར་པས། །སོ་སོར་རྟོག་པའི་ཡེ་ཤེས་ཀྱི། །འདོད་ཆགས་སྣང་བ་མཐའ་ཡས་ཀྱི། །རྡོ་རྗེ་ཡིས་ནི་དབང་བསྐུར་རོ། རྡོ་རྗེ་ཡིས་ནི་དབང་བསྐུར་རོ། རྡོ་རྗེའི་དབང་སྟེ་གསུམ་པའོ། །དེ་ནས་དྲིལ་བུའི་དབང་བསྐུར་བ་ནི་གསེར་ལ་སོགས་པའི་དྲིལ་བུ་ཡང་ཧཱུཾ་མཛད་ཀྱིས་བསངས་ལས། ཁཾ་ལས་རལ་གྲི་དེ་ལས་དོན་ཡོད་གྲུབ་པ་དེ་ཡོངས་སུ་གྱུར་པ་ལས་དྲིལ་བུར་བསམས་ལ། དྲིའི་ཐིག་ལེ་བྱས་ལ་མེ་ཏོག་ལ་སོགས་པས་མཆོད་ནས། །འདི་ནི་སངས་རྒྱས་ཐམས་ཅད་ཀྱི། །ཤེས་རབ་དབྱངས་ཀྱི་རྗེས་འགྲོར་བཤད། །ཁྱོད་ཀྱིས་ཀྱང་ནི་རྟག་ཏུ་བཅང༌། །རྒྱལ་བས་བྱང་ཆུབ་མཆོག་ཏུ་བཞེད། །སྲིད་པ་ངོ་བོ་ཉིད་ཀྱིས་བདག །ངོ་བོ་ཉིད་ཀྱིས་སྲིད་བྲལ་བྱས། །རང་བཞིན་དག་པའི་སེམས་དཔའ་མཆོག །སྲིད་པའི་མཆོག་ཏུ་གྲུབ་པར་བྱེད། །ཨོཾ་ཤྲཱི་ཧེ་རུ་ཀ་ཨ་དྷི་པ་ཏི་སྟྭཾ། ཨ་བྷི་ཥིཉྩཱ་མི་ཏིཥྛ་མི་ཏི་ཥྛ་བཛྲ་ས་མ་ཡ་སྟྭཾ་ཞེས་བྱ་བས་བྱིན་ལ། དཔལ་ལྡན་རྡོ་རྗེ་དོན་ཡོད་འཆང༌། །རྡོ་རྗེ་མི་ཕྱེད་
༄། །གསུམ་བསྒོམས་པས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་ལས་སུ་མཛད་དུ་གསོལ། །ཨོཾ་སརྦ་ཏ་ཐཱ་ག་ཏ་ཨ་མོ་གྷ་བཛྲ་སྭ་བྷཱ་བ་ཨཱཏྨ་ཀོ྅ཧཾ། འདུ་བྱེད་ཕུང་པོ་རྣམ་དག་པའི། །བྱ་བ་ནན་ཏན་ཡེ་ཤེས་ཀྱི། །ཕྲག་དོག་དོན་ཡོང་གྲུབ་པ་ཡི། །དྲིལ་བུ་ཡིས་ནི་དབང་བསྐུར་རོ། །དེ་ནས་མེ་ཏོག་གི་ཕྲེང་བ་བཟུང་ལ་མིང་གི་དབང་བསྐུར་བར་བྱ་སྟེ། ལུགས་མའི་སྐུ་སྤྱི་བོར་བཞག་ལ་ཨོཾ་ལས་འཁོར་ལོ། དེ་ལས་རྣམ་པར་སྣང་མཛད་དེ་ཡོངས་སུ་གྱུར་པ་ལས་དབུའི་གཙུག་ཏོར་དུ་བསམས་ལ། ཕྲེང་བ་སྤྱི་བོར་བཅིངས་ཏེ། སྲིད་པའི་བདེ་བ་ཤིན་ཏུ་ཆུང༌། །སྡུག་བསྔལ་ཆེན་པོ་དག་བྱའི་ཕྱིར། །ཤིན་ཏུ་བདེ་བ་དམ་པའི་ཐབས། །ཧེ་རུ་ཀ་དཔལ་དག་ཏུ་བསྐྱེད། །ཨོཾ་ཤྲཱི་ཧེ་རུ་ཀ་ཨ་བྷི་ཥིཉྩཱ་མི། ཤྲཱི་ཧེ་རུ་ཀ་ཆེ་གེ་མོ་ནཱ་མ་ཨ་བྷི་ཥེ་ཀ་ཏ། དཔལ་ལྡན་རྡོ་རྗེ་སྐུ་འཆང་བ། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་སྐུར་ནི་མཛད་དུ་གསོལ། །ཨོཾ་སརྦ་ཏ་ཐཱ་ག་ཏ་ཀཱ་ཡ་བཛྲ་སྭ་བྷཱ་བ་ཨཱཏྨ་ཀོ྅ཧཾ། །གཟུགས་ཀྱི་ཕུང་པོ་རྣམ་དག་པས། །ཆོས་དབྱིངས་ཡེ་ཤེས་རྣམ་དག་པའི། །གཏི་མུག་རྣམ་པར་སྣང་མཛད་ཀྱི། །དཔལ་ལྡན་མིང་གི་དབང་བསྐུར་རོ། །དེ་ནས་མི་ཏོག་གཏོར་བྱས་ནས། །ཕུང་པོ་ལྔ་ནི་རྣམ་དག་ཅིང༌། །ཉོན་མོངས་ལྔ་ནི་སྤངས་པས་ན། །མ་རིག་པ་ནི་རྣམ་དག་པས། །རིག་པ་ཡི་ནི་དབང་ཞེས་བཤད། །རིག་པའི་དབང་བསྐུར་རོ། །དེ་ནས་བརྟུལ་ཞུགས་མང་པོ་སྦྱིན་པར་བྱ་སྟེ་རྡོ་རྗེ་དྲིལ་བུ་བྱིན་ལ། པདྨ་ལྟར་སྐོར་བའི་ཕྱག་རྒྱས་ལན་གསུམ་བསྐོར་ལ། རྡོ་རྗེ་གསོར་ཞིང་དྲིལ་བུ་དཀྲོལ་དུ་བཅུག་ལ། འདི་ནི་སངས་རྒྱས་ཐམས་ཅད་ཀྱི། །ཧེ་རུ་ཀ་དཔལ་ཕྱག་ན་བསྣམས། །ཁྱོད་ཀྱིས་ཀྱང་ནི་རྟག་ཏུ་བཅང༌། །ཧེ་རུ་ཀ་དཔལ་བརྟུལ་ཞུགས་བརྟན། །ཨོཾ་སརྦ་ཏ་ཐཱ་ག་ཏ་སིདྡྷི་བཛྲ་ས་མ་ཡ་ཏིཥྛ་ཨེ་ཥ་སྟྭཾ་དྷ་ར་ཡཱ་མི། ཧཱུཾ་ཧ་ཧ་ཧ་ཧ་ཧོ་ཞེས་བྱ་བས་རྡོ་རྗེ་བརྟུལ་ཞུགས་སོ། །དེ་ནས་ཕྱག་མཚན་བཅུ་གཉིས་ལུགས་མ་འམ་འབུར་དུ་བརྐོས་པའམ་རི་མོར་བྲིས་བ་ཧཱུཾ་མཛད་ཀྱི་སྔགས་ཀྱི་བསངས་ནས་སློབ་མ་ལ་སྦྱིན་པར་བྱ་སྟེ། རྡོ་རྗེ་དྲིལ་བུ་བཅངས་པ་ཡི། །ཤེས་རབ་ཕ་རོལ་ཕྱིན་པ་དང༌། །བཟོད་པ་གླང་པོའི་པགས་པ་དང༌། །སྨོན་ལམ་ཅང་ཏེའུ་བསྣམས་པ་དང༌། །ཡེ་ཤེས་གྲི་གུག་ཉོན་
༄། །མོངས་གཅོད། །དགྲ་སྟ་ཚུལ་ཁྲིམས་རྣམ་དག་དང༌། །རྩེ་གསུམ་སྦྱིན་པའི་ཕ་རོལ་ཕྱིན། །ཐོད་པ་ཐབས་ལ་མཁས་པ་དང༌། །བརྩོན་འགྲུས་རྡོ་རྗེ་ཞགས་པ་དང༌། །ཁ་ཊྭཱཾ་བསམ་གཏན་རྣམ་དག་སྟེ། །ཚངས་པའི་མགོ་བོ་སྟོབས་སུ་བཤད། །ཕ་རོལ་ཕྱིན་པ་རྣམ་དག་པས། །བུ་ཁྱོད་ཀྱིས་ནི་བཅང་བར་བྱ། །ཨོཾ་ཧྲཱིཿ་ཧ་ཧ་ཧཱུཾ་ཧཱུཾ་ཕཊ་རེ་རེ་ཞིང་བཟླས་པར་བྱའོ། །དེ་ནས་མེ་ཏོག་གཏོར་ནས། དཔའ་བོ་ཆེན་པོའི་བརྟུལ་ཞུགས་བཟང༌། །རྟེན་འབྲེལ་བཅུ་གཉིས་རྣམ་དག་པ། །ཕ་རོལ་ཕྱིན་པ་བཅུ་རྣམས་ཀྱི། །ཕྱག་རྒྱ་ཡིས་ནི་དབང་བསྐུར་རོ། །དབང་བདུན་པའོ།། །། སངས་རྒྱས་ཀུན་གྱི་མིག་འབྱེད་པའི། །གསང་སྔགས་བླ་ན་མེད་པ་ཡི། །སྙིང་པོ་ཡིད་བཞིན་ནོར་བུ་འདི། །སྐྱོབ་པའི་སངས་རྒྱས་དབང་བསྐུར་རོ། །དེ་ནས་མེ་ཏོག་གཏོར་ལ་སྔགས་བཟླ་པའི་ཕྱིར་བཟླས་པའི་ཕྲེང་བ་སྦྱིན་པར་བྱའོ། །དེང་ནས་བརྩམས་ཏེ་རྫོགས་སངས་རྒྱས། །རྣལ་འབྱོར་མ་དང་རྫོགས་སངས་རྒྱས། །ཤེས་རབ་ཐབས་ཀྱི་བསྙེམས་ཆེན་གྱིས། །གར་མཆོག་བདེ་བ་དགའ་སྟོན་གྱིས། །སྒེག་དང་བཅས་པའི་མེ་ཏོག་ཕྲེང༌། །སངས་རྒྱས་ཀུན་སོགས་རྣལ་འབྱོར་མ། །དེས་ནི་བྲལ་བར་མི་འགྱུར་ཏེ། །མེ་ཏོག་ཕྲེང་བས་བརྒྱན་གྱུར་ཅིག །ཕྲེང་བའོ། །ལུས་ཅན་ཀུན་གྱི་དམ་ཆོས་ཀྱི། །ཁྱོད་ཀྱིས་གླུ་ནི་བླངས་བྱས་ཏེ། །དེས་ན་རྣལ་འབྱོར་མ་དེ་དང༌། །མྱུར་དུ་བདེ་བ་མྱོང་བར་འགྱུར། །གླུའོ། །ཁྱོད་ཀྱིས་རྒྱལ་ལ་དྲི་ཕུལ་བས། །ཚུལ་ཁྲིམས་ཏིང་འཛིན་ཤེས་རབ་དང༌། །རྣམ་གྲོལ་ཡེ་ཤེས་མཐོང་བ་ཡི། །ལུས་ཅན་བྱང་ཆུབ་ཐོབ་གྱུར་ཅིག །དྲིའོ།། རྫོགས་སངས་རྒྱས་ལ་སྦོས་ཕུལ་བས། །བརྟུལ་ཞུགས་བཟང་པོས་ལེགས་ཚིམ་ཞིང༌། །ལུས་ཅན་བདེ་གཤེགས་ཆ་ལུགས་སུ། །ཡེ་ཤེས་ཀྱིས་ནི་ཚིམ་གྱུར་ཅིག །སྤོས་སོ། །ཆོས་ཀྱི་མར་མེ་ལེགས་སྦར་བས། །པདྨ་གར་དབང་བདག་ཉིད་དེ། །སེམས་ཅན་མ་རིག་མདོངས་བྱས་ལ། །ཡེ་ཤེས་སྒྲོན་མ་སྣང་གྱུར་ཅིག །མར་མེའོ། །བརྟུལ་ཞུགས་མང་པོའོ། །དེ་ནས་ཕྱིར་མི་ལྡོག་པའི་དབང་བསྐུར་བའི་ཕྱིར་གསོལ་བ་གདབ་པར་བྱ་སྟེ། བྱང་ཆུབ་རྡོ་རྗེས་སངས་རྒྱས་ལ། །ཇི་ལྟར་མཆོད་སྦྱིན་གསོལ་བ་གདབ་།བདག་ཀྱང་བསྲུང་བའི་དོན་གྱི་ཕྱིར།།
༄། །ནམ་མཁའི་རྡོ་རྗེ་བདག་ལ་གསོལ། །ཧེ་རུ་ཀ་དཔལ་དབང་བསྐུར་བ། །འགྲོ་བ་སྐྱོབ་པའི་གཟི་བརྗིད་ཅན། །ཇི་ལྟར་ཡོན་ཏན་འབྱུང་གནས་སྩོལ། །དེ་བཞིན་བདག་ལ་དེང་བདག་སྩོལ། །དབའ་བོ་ཆེན་པོ་མི་ལྡོག་པའི། །དབང་བསྐུར་བ་ནི་བདག་ལ་སྩོལ། །སེམས་ཅན་ཀུན་གྱི་དོན་གྱི་ཕྱིར། །བདག་ནི་རྟག་ཏུ་སློབ་དཔོན་གྱུར། །དེ་ལྟར་གསོལ་བ་བཏབ་པའི་རྗེས་ལ་སྡོམ་པ་སྦྱིན་པར་བྱ་སྟེ། ཇི་བཞིན་དོན་ལྡན་བཅུ་བཞི་ནི། །ཕས་ཕམ་པར་ནི་རབ་ཏུ་གྲགས། །སྦོང་ཞིང་དོར་བར་མི་བྱ་སྟེ། །རྩ་བའི་ལྷུང་བར་ཤེས་པར་བྱ། །སློབ་དཔོན་ལ་ནི་བརྙས་པ་དང༌། །བདེ་གཤེགས་བཀའ་ནི་གཅོག་པ་དང༌། །སྡང་བས་སྤུན་ལ་བསྔགས་མི་བྱ། །བྱམས་པ་ཆེན་པོ་སྤོང་བར་བྱེད། །བྱང་ཆུབ་སེམས་ནི་འདོར་བར་བྱེད། །ཤེས་པ་གསུམ་ལ་སྨོད་པ་དང༌། །སྐལ་མིན་གསང་བསྒྲོགས་པ་དང༌། །རྒྱལ་བའི་བདག་ཉིད་ཕུང་པོ་སྨོད། །དག་པའི་ཆོས་ལ་ཡིད་གཉིས་དང༌། །གདུག་ལ་བྱམས་དང་ཆགས་བྲལ་དང༌། །ཆོས་ལ་གཉིས་སུ་འབྱེད་པ་དང༌། །དད་པའི་སེམས་ནི་རབ་ཏུ་སྨོད། །དམ་ཚིག་བསྟེན་ཚེ་ཇི་སྙེད་ཚེ། །རྟག་པའི་བུད་མེད་སྨོད་པ་སྟེ། །རྩ་བའི་ལྟུང་བར་འགྱུར་བ་ཡིན། །ཉིན་དང་མཚན་མོ་ལན་གསུམ་དུ། །ཉིན་རེ་ཞིང་ནི་བཟླ་བར་བྱ། །སྔགས་པས་འདི་དག་བྱེད་པ་ནི། །ཁ་ན་མཐོ་སྦོམ་པོར་འགྱུར། །ཡན་ལག་དམ་ཚིག་ཤེས་པར་བྱ། །དམ་ཚིག་མི་ལྡན་སྣོད་མིན་པའི། །རིག་མ་བསྟེན་པར་བྱ་བ་དང༌། །ཚོགས་ཀྱི་འཁོར་ལོར་རྩོད་པ་དང༌། །གསང་བའི་ཆོས་ནི་སྟོན་པ་དང༌། །སེམས་ཅན་དང་དང་ལྡན་པ་ལ། །དམ་ཆོས་གཞན་དུ་སྟོན་པ་དང༌།། ཉན་ཐོས་དག་ཏུ་སློབ་བྱེད་པའི། །ནང་དུ་ཞག་བདུན་གནས་པ་དང༌། །སྦྱོར་བ་ངེས་པར་མ་བྱས་པའི། །སྣོད་མིན་གསང་བ་སྟོན་པ་ཡི། །ཁ་ན་མ་ཐོ་སྦོམ་འགྱུར་ཏེ། །སྔགས་པ་དམ་ཚིག་ཟད་པར་འགྱུར། །ཟད་པས་དངོས་གྲུབ་མི་འགྱུར་ཞིང༌། །བདུད་དང་སྡུག་བསྔལ་རབ་ཏུ་འཕེལ། །དེ་བས་དམ་ཚིག་བུས་སྲུངས་ཤིག །ཅེས་བརྗོད་པར་བྱའོ། །སློབ་མས་ཀྱང་དེ་བཞིན་དུ་བགྱིད་དོ་ཞེས་བརྗོད་དོ། །དེ་ནས་སེང་གེའི་ཁྲི་ལ་དར་གྱིས་གཡོགས་ཏེ་དེའི་སྟེང་དུ་བཞག་ལ། །ཡི་གེ་མངོན་པར་བཟླས་པའི་གདུགས་དང་རྒྱལ་མཚན་དང་བ་དན་བསྒྲེང་ལ་སློབ་མ་ལྷར་བསྐྱེད་ལ། པུ་ཛཱ་ཨུ་ཨ་གོ་ར་དེ་
༄། །མ་ལ་སོགས་པའི་ཡི་གེ་ཉེ་ཤུ་རྩ་བཞི་ལུས་ལ་བཀོད་ལ། ཧཱུཾ་རིང་པོ་བརྒྱད་ལས་སྒོ་མཚམས་མ་བསྐྱེད་ལ་སྙིང་གའི་རྩ་བཞི་ལ་ཡུམ་བཞི་དང༌། བདུད་རྩིའི་སྣོད་བཞི་བསྐྱེད་ལ་དཔའ་བོ་དཔའ་མོའི་གོ་ཆ་བསྐོན་ནས། ཕཻ་ཕཻཾ་གི་ཕྱག་རྒྱས་ཡེ་ཤེས་སེམས་དཔའ་སྤྱན་དྲངས་ལ་བཅུག་སྟེ། གནས་གསུམ་དུ་ཡི་གེ་གསུམ་གྱི་བྱིན་གྱིས་བརླབ་པར་བྱའོ། །དེ་ནས་སློབ་དཔོན་གྱིས་ལྷ་ཐམས་ཅད་ཀྱི་རང་བཞིན་རྣམ་པར་རྒྱལ་བའི་བུམ་པ་བླངས་ནས་བཀྲ་ཤིས་ཚིག་སུ་བཅད་པ་བརྗོད་ཅིང་དབང་བསྐུར་བར་བྱ་སྟེ། ལྷ་རྣམས་ཞུ་བ་ལས་ཡེ་ཤེས་ཀྱི་བདུད་རྩིར་བྱིན་གྱིས་བརླབས་ཏེ་སྤྱི་བོར་བླུགས་ནས་འདི་སྐད་བརྗོད་དོ། །ཁམས་གསུམ་ཀུན་གྱིས་ཕྱག་བྱས་པ། གསང་བ་གསུམ་ནི་གནས་ལས་བྱུང༌། །དབང་བསྐུར་བ་ནི་རྡོ་རྗེ་ཆེ། །སངས་རྒྱས་ཀུན་གྱི་དབང་བསྐུར་རོ། །ཨོཾ་སརྦ་ཏ་ཐཱ་ག་ཏ་ཨ་བྷི་བརྟི་ཀ་ས་མ་ཡ་ཤྲི་ཡེ་ཧཱུཾ་ཞེས་བརྗོད་དོ། །དེ་ནས་ཅོད་པན་དང༌། རྡོ་རྗེ་དྲིལ་བུ་དང༌། མེ་ཏོག་གི་ཕྲེང་བ་སྤྱི་བོར་བཅིངས་ལ་འདི་སྐད་བརྗོད་དོ། །ཁམས་གསུམ་ཀུན་གྱིས་ཕྱག་བྱས་པ། །ཕྱག་རྒྱ་ཆེན་པོའི་བྱིན་བརླབས་ལ། །གཟུགས་དོར་བ་ཡི་དམ་ཚིག་གིས། །གསང་སྔགས་མ་ཚང་མེད་པར་བཟླ། །རང་རང་རིག་པའི་ངོ་བོ་དེ། །ཕྱོགས་བཅུ་དུས་གསུམ་བཞུགས་པའོ།། རང་གི་ལྷ་ཡི་སྦྱོར་བ་ཡིས། །བདག་དང་གཞན་ལ་མཆོད་པར་བྱ། །དཀའ་ཐུབ་སྡོམ་པ་མི་ཟད་པ། །བསྲུངས་ན་མི་སྣང་མངོན་ཤེས་དང༌། །མཁའ་ལ་རྒྱུ་དང་ལུས་ངག་ཡིད། །ལས་འབྱུང་འདོད་གྲུབ་འགྲུབ་མི་འགྱུར། །དེ་བས་སངས་རྒྱས་སེམས་དཔའ་མཆོག །འདོད་པ་ཐམས་ཅད་བསྟེན་པ་ཡིས། ཆོས་ཀྱི་ཡེ་ཤེས་མཆོག་བསྙེས་པའོ། །བ་དེ་དང་སྡུག་བསྔལ་དེ་དག་མིན། །འདོད་པའི་ཡོན་ཏན་ལྔ་རྣམས་བསྟེན། །ཡེ་ཤེས་དོན་གཉེར་འདོད་ཆགས་ཅན། །སྦྱོར་བས་བསྒྲུབས་ན་མྱུར་དུ་འགྲུབ། །སྐུ་གསུང་ཐུགས་ཀྱི་ཡང་དག་འགྲུབ། །གང་གཞན་དམན་པ་བཤད་པ་ཡིན། །སྔགས་ཀྱི་བཟླས་པ་འགྲུབ་འགྱུར་བ། །སྐུ་གསུང་ཐུགས་ནི་བསྒོམས་པས་སོ། །དེ་ཉིད་ཀྱིས་ནི་རྡོ་རྗེ་གསུང༌། །ཆོས་ཀྱི་དྲིལ་བུ་དཀྲོལ་བར་བྱ། །དམ་ཚིག་གིས་ནི་ཕྱག་རྒྱ་ཆེར། །བྱིན་གྱིས་བརླབས་ནས་སྙིང་པོ་བཟླ། །དེ་ནས་མིག་གཉིས་སུ་ཧཱུཾ་ལས་རྡོ་རྗེ་ནས་འབྲས་ཙམ་དཀར་པོར་བསམས་
༄། །ལ། གསེར་རམ་རིན་པོ་ཆེ་ལས་བྱས་པའི་མིག་ཐུར་དང་པྲ་ཞེས་བྱ་བས་མིག་དབྱེ་བར་བྱ་སྟེ། ཇི་ལྟར་མིག་མཁན་རྒྱལ་པོ་ཡིས། །འཇིག་རྟེན་ལིང་ཏོག་བསལ་བ་ལྟར། །བུ་ཁྱོད་ཀྱི་ནི་མི་ཤེས་པའི། །རབ་རིབ་རྒྱལ་བ་རྣམས་ཀྱིས་བསལ། །ཨོཾ་བཛྲ་ནི་ཏྲ་ཨ་པ་ཧ་ར་བ་ཊ་ལཾ་ཧྲཱིཿ་ཞེས་བརྗོད་པས་ནི་ཉོན་མོངས་པ་སྤངས་པའི་དབང་ངོ༌། །དེ་ནས་མེ་ལོང་བསྟན་ལ། ཆོས་རྣམས་གཟུགས་བརྙན་ལྟ་བུ་སྟེ། །དག་ཅིང་གསལ་ལ་རྙོག་པ་མེད། །གཟུང་དུ་མེད་ཅིང་བརྗོད་དུ་མེད། །རྒྱུ་དང་ལས་ལས་ཀུན་དུ་བྱུང༌། །ངོ་བོ་ཉིད་མེད་གནས་མེད་པར། །དེ་ལྟར་ཆོས་འདི་ཤེས་གྱིས་ལ། །སེམས་ཅན་དོན་ནི་མཉམ་མེད་བྱོས། །འོན་ཀྱང་སངས་རྒྱས་སྲས་སུ་སྐྱེ། །ཡེ་ཤེས་ཀྱི་དབང་ངོ༌། །དེ་ནས་སྐུ་གསུང་ཐུགས་ཀྱི་དབང་སྦྱིན་པར་བྱ་སྟེ། ཨ་ལས་བསྐྱེད་པའི་དྲིལ་བུ་བླངས་ཏེ། ཆོས་རྣམས་ནམ་མཁའི་མཚན་ཉིད་དེ། །ནམ་མཁའ་ལ་ཡང་མཚན་ཉིད་མེད། །ནམ་མཁའ་དང་མཉམ་སྦྱོར་བ་ཡིས། །སྐུ་མཆོག་མཉམ་པ་ཉིད་དུ་གསལ། །གསུང་གི་དབང་ངོ༌། །དེ་ནས་ཆོས་བསྐྱེད་པའི་མདའ་གཞུ་སྦྱིན་ལ་ཕྱོགས་བཞི་དང་སྟེང་འོག་ཏུ་ཧོ་ཞེས་པས་མདའ་འཕེན་དུ་གཞུག་གོ །སྐུའི་དབང་ངོ༌། །དེ་ནས་ཧཱུཾ་ལས་མེ་ལོང་བསྐྱེད་པ་བྱིན་ལ། རྡོ་རྗེ་སེམས་དཔའ་མེ་ལོང་བཞིན། །དག་ཅིང་གསལ་ལ་མེ་ལོང་བཞིན། །བུ་ཁྱོད་ཀྱི་ནི་སྙིང་ལ་ཞུགས། །གང་འདི་དེ་བཞིན་གཤེགས་པ་ཐམས་ཅད་ཀྱི་བདག་པོ་རྡོ་རྗེ་བྱང་ཆུབ་ཀྱི་སེམས་ནི་འདི་ཡིན་པར་ཤེས་པར་གྱིས་ཤིག །ཅེས་བརྗོད་པར་བྱ་སྟེ། ཐུགས་ཀྱི་དབང་ངོ༌། །དེ་ནས་རྐང་པ་གཉིས་ཀྱི་བར་དུ་ཆོས་ཀྱི་འཁོར་ལོ་བཞག་ལ། ལག་པ་གཡས་པར་དུང་བྱིན་ཏེ་གཡོན་པར་པོ་ཏི་བྱིན་ལ་འདི་སྐད་ཅེས་བརྗོད་དོ། །དེང་ནས་བརྩམས་ཏེ་སེམས་བསྐྱེད་པ་ཙམ་གྱིས་ཆོས་ཀྱི་འཁོར་ལོ་སྐོར་ཅིག །དེ་རིང་ཕན་ཆད་འཇིག་རྟེན་ལ། །སྐྱོབ་པའི་ཆོས་ཀྱི་འཁོར་ལོ་བསྐོར། །ཆོས་ཀྱི་དུང་ནི་བླ་མེད་པ། །མ་ལུས་ཀུན་དུ་གང་བར་གྱིས། །སོམ་ཉི་ཡིད་གཉིས་མི་བྱ་ཞིང༌། །དོགས་པ་མེད་པའི་སེམས་ཀྱིས་སུ། །གསང་སྔགས་སྤྱོད་པའི་ཚུལ་གྱི་མཆོག །འཇིག་རྟེན་འབྲལ་འདི་ལ་རབ་ཏུ་སྒྲོགས། །དེ་ལྟར་བྱས་ནས་སངས་རྒྱས་ལ། །ཕན་འདོགས་དྲིན་དུ་གཟོ་ཞེས་བྱ། །རྡོ་རྗེ་འཛིན་པ་དེ་ཀུན་ཡང༌། །ཀུན་དུ་སྲུང་བ་
༄། །ཁྱོད་ལ་མཛད། །ཅེས་བྱ་བས་སྦྱིན་པར་བྱའོ། །དེ་ནས་རྗེས་སུ་གནང་པའི་དབང་ལྔ་སྦྱིན་པར་བྱ་སྟེ། འཇིག་རྟེན་ཀུན་ལས་ཐམས་ཅད་དུ། །སེམས་ཅན་ཀུན་ལ་ཕན་པའི་ཕྱིར། །ཇི་ལྟར་སྣ་ཚོགས་འདུལ་འགྱུར་བ། །ཆོས་ཀྱི་འཁོར་ལོ་རབ་ཏུ་བསྐོར། །དེ་བཞིན་དུ་རྡོ་རྗེ་དང་ཁྲོ་བོ་དང་པདྨ་དང་ནོར་བུའི་འཁོར་ལོ་རབ་ཏུ་བསྐོར་ཞེས་བྱ་བའི་ཚིགས་སུ་བཅད་པ་ལྔས་རྗེས་སུ་གནང་བ་ལྔ་དབང་བསྐུར་བ་ལྔ་སྦྱིན་པར་བྱའོ། །དེ་ནས་སློབ་མ་ལ་མཆོད་པ་ལྔས་མཆོད་པར་བྱའོ། །མགོ་བོ་ལ་མེ་ཏོག་སྣ་ལ་བདུག་པ་མིག་ལ་མར་མེ་སྙིང་གར་བྱུག་པ། ཡང་ན་གནས་གསུམ་དུ་དྲིའི་ཐིག་ལེ་བྱས་ལ། བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་ལྷའི་དེ་ཉིད་དང༌། གནས་ཉི་ཤུ་རྩ་བཞི་ལ་སོགས་པ་དཀྱིལ་འཁོར་གྱི་དེ་ཉིད་དང༌། རྩ་དང༌། ཁམས་དང་རང་བཞིན་དུ་ལུས་ཀྱི་དཀྱིལ་འཁོར་གྱི་དེ་ཉིད་དང༌། བསྙེན་པ་དང་སྟ་གོན་དང༌། དཀྱིལ་འཁོར་དང་སྦྱིན་སྲེག་དང་བུམ་པ་དང་གཏོར་མ་དང་བདུད་རྩི་ལྔ་སྦྱང་བ་དང༌། བསྒོམ་པ་དང་བཟླས་པ་དང་བཅས་པའི་ཕྲིན་ལས་བཞི་སློབ་དཔོན་གྱི་ལས་རྣམས་བསླབ་པར་བྱའོ། །དེ་ནས་ཡོན་དབུལ་བར་བྱ་སྟེ། གླང་པོ་རྟ་དང་ཤིང་རྟ་ནོར། །ནོར་བུ་བྱུ་རུ་ལ་སོགས་པ། །ཡོན་གྱི་མཆོག་ནི་བླངས་པ་རྣམས། །ཕྱག་བྱས་ནས་ནི་དབུལ་བར་བྱ། །དེང་ནས་བརྩམས་ཏེ་བདག་བྲན་དུ། །ཁྱོད་ལ་བདག་ནི་འབུལ་ལགས་ཀྱིས། །མ་འོངས་མངོན་པར་འཚར་རྒྱ་བར། །ལུང་བསྟན་བྱ་དང་དབུགས་དབྱུང་མཛོད། །ཅེས་བརྗོད་དོ། །དེ་ནས་བདག་ཉིད་དེ་བཞིན་གཤེགས་པར་བསམས་ལ་གཟེངས་བསྟོད་པ་འདི་དང་ལུང་བསྟན་པར་བྱ་སྟེ། གཡོན་བ་སྙིང་གར་ཁུ་ཚུར་བཅངས་པ་དང་ཆོས་གོས་འཛིན་པའི་ཚུལ་དུ་བྱས་ལ། ཨོཾ་ང་ཡིས་འདི་ལྟར་ལུང་བསྟན་ཏེ། །རྡོ་རྗེ་སེམས་དཔའི་དེ་བཞིན་གཤེགས། །སྲིད་པའི་མཆོག་ནི་གྲུབ་པ་ཡིན། །སྲིད་པའི་ངན་འགྲོ་རྣམས་ལས་བཏོན། །ཀྱེ་དེ་བཞིན་གཤེགས་པ་རྡོ་རྗེ་ཆེ་གེ་མོ་ཞེས་བྱ་བ་དང༌། བྷུར་བྷུ་བསཿ། འདི་ཡི་དབང་བསྐུར་གྱུར་པ་ཡིས། །སྔགས་པས་འགྲོ་བ་ཀུན་དང་བདག །བླ་ན་མེད་པའི་བྱང་ཆུབ་ཏུ། །བདེ་བར་གཤེགས་ཀྱིས་ལུང་བསྟན་མཛོད། །ངོ་བོ་ཉིད་ཀྱིས་སེམས་ཅན་རྣམས། །ཇི་ལྟ་ཇི་ལྟར་འདུལ་འགྱུར་བ། །དེ་ལྟ་དེ་ལྟར་ཆགས་
༄། །ལ་སོགས། །གསང་བས་སེམས་ཅན་དོན་བྱའོ། །ཉིན་རེ་ཞིང་ནི་ཐུན་སྣ་རུ། །ཏིང་འཛིན་གསུམ་གྱི་སྦྱོར་ལྡན་པར། །གྱུར་ནས་ཐུན་མོང་གིས་ཤེས་ཀྱིས། །དངོས་གྲུབ་ཐོབ་པར་འགྱུར་བར་བྱ། །མི་སྣང་བ་ནི་སྟོང་ཡིན་ཏེ། །མངོན་ཤེས་སྣང་བ་ཉིས་སྟོང་ཡིན། །རིག་པ་འཛིན་པ་སུམ་སྟོང་ཡིན། །རྡོ་རྗེ་ཅན་ནི་འགྲོ་ཀུན་བདག །ཞི་དང་རྒྱས་སོགས་ལས་གང་དང༌། །དེ་ལས་གཞན་པ་ཅི་འདོད་པ། །འཁོར་ལོ་རྗེས་གཉིས་སྦྱོར་བ་ཡིས། །བསྒྲུབས་ན་མྱུར་དུ་འགྲུབ་པར་འགྱུར། །ཀུན་གྱི་གནང་བ་སྦྱིན་པའོ། །དེ་ནས་དབུགས་དབྱུང་བ་བཤད་པར་བྱ་སྟེ། །མཆོག་གསང་དཀྱིལ་འཁོར་དམ་པ་འདིར། །མཐོང་བ་དང་ནི་ཞུགས་གྱུར་པས། །སྡིག་པ་ཀུན་ལས་ངེས་གྲོལ་བར། །ཁྱེད་རྣམས་དེ་ཉིད་ལེགས་པར་གནས། །བདེ་ཆེན་ཐེག་པ་འདི་ལས་ནི། །སླར་ཁྱོད་འཆི་བ་ཡོད་མིན་ཏེ། །མི་ཚུགས་པ་དང་མི་སོད་པས། །ཅེས་ཀྱང་མི་འཇིགས་དགའ་བར་གྱིས། །སྲིད་པ་ཤིན་ཏུ་དག་པའི་ཕྱིར། །སྲིད་པའི་སྡུག་བསྔལ་ལས་ཁྱོད་འདས། །སྲིད་པ་ཤིན་ཏུ་གྲུབ་པའི་ཕྱིར། །སྟོན་པའི་མཆོག་ཏུ་གྱུར་པ་ཡིན། །རྟག་ཏུ་ཁྱོད་ཀྱིས་བསྲུང་བར་བྱ། །སངས་རྒྱས་ཀུན་གྱིས་མཐུན་པར་གསུངས། །དམ་པ་རྟག་པའི་བཀའ་ཡིན་ནོ། །གང་ཞིག་བསྐྱེད་པ་ཙམ་གྱིས་ནི། །སངས་རྒྱས་ཉིད་དུ་དོགས་མེད་པའི། །བྱང་ཆུབ་སེམས་ནི་གཏང་མི་བྱ། །ཕྱག་ན་རྡོ་རྗེ་གང་ཡིན་པ། །དམ་པའི་ཆོས་ནི་མི་སྤང་ཞིང༌། །ནམ་ཡང་དོར་བར་མི་བྱའོ། །མི་ཤེས་པའམ་རྨོངས་པ་ཡིས། །ཚུལ་ཆེན་བསྟན་པར་མི་བྱའོ། །བདག་ཉིད་ཡོངས་སུ་སྤངས་ནས་སུ། །དཀའ་ཐུབ་ཀྱིས་ནི་མ་བསྲུངས་ཤིང༌།། ཅི་བདེ་བར་ནི་བདེ་བར་བསམ། །འདི་ནི་མ་བྱོན་རྫོགས་སངས་རྒྱས། །རྡོ་རྗེ་དྲིལ་བུ་ཕྱག་རྒྱ་རྣམས། །ནམ་ཡང་ཡོངས་སུ་མི་དོར་ཞིང༌། །སློབ་དཔོན་སྨད་པར་མི་བྱ་སྟེ། །འདི་ནི་སངས་རྒྱས་ཀུན་དང་འདྲ། །སངས་རྒྱས་ཀུན་དང་མཚུངས་སླའོ། །སློབ་དཔོན་ལ་ནི་གང་སྨོད་པ། །དེ་ཡིས་སངས་རྒྱས་ཀུན་སྨད་པས། །རྟག་ཏུ་སྡུག་བསྔལ་ཐོབ་འགྱུར་ཏེ། །རིམས་དང་དུག་དང་དབྱིག་དུག་དང༌། །མཁའ་འགྲོ་རྣམས་ཀྱིས་གཙེ་བ་དང༌། །གདོན་དང་ལོག་འདྲེན་གཏུམ་པོ་ཡིས། །བསད་ནས་སེམས་ཅན་དམྱལ་ལྟུང་སྟེ། །དེ་བས་ནན་ཏན་ཐམས་ཅད་ཀྱིས། །རྡོ་རྗེ་སློབ་དཔོན་
༄། །བློ་གྲོས་ཆེ། །དགེ་བ་རབ་ཏུ་མི་སྤྱོམ་བས། །ནམ་ཡང་སྨད་པར་མི་བྱའོ། །བླ་མ་ལ་ནི་གུས་བཅས་ཡོན། །རྗེས་མཐུན་ཁྱོད་ཀྱིས་སྦྱིན་པར་བྱ། །དེས་ནི་རིམས་སོགས་གནོད་པ་རྣམས། །ཕྱིར་ཞིང་འབྱུང་བར་མི་འགྱུར་རོ། །རྟག་ཏུ་རང་གི་དམ་ཚིག་བསྲུང༌། །རྟག་ཏུ་དེ་བཞིན་གཤེགས་པ་མཆོད། །རྟག་ཏུ་བླ་མ་ལ་ཡང་དབུལ། །འདི་ནི་སངས་རྒྱས་ཀུན་དང་འདྲ། །དེ་ཕྱིར་སངས་རྒྱས་ཐམས་ཅད་ལ། །རྟག་ཏུ་སྦྱིན་པ་ཉིད་དུ་འགྱུར། །དེ་བྱིན་བསོད་ནམས་ཚོགས་ཡིན་ཏེ། །ཚོགས་ལས་དངོས་གྲུབ་མཆོག་ཏུ་འགྱུར། །གང་ཕྱིར་འདི་ནི་ལེགས་གནས་པས། །དེང་ཁྱོད་སྐྱེ་བ་འབྲས་བུར་བཅས། །དམ་ཚིག་ལྷ་རྣམས་ཀུན་མཉམ་པས། །དེང་ཁྱོད་གྱུར་པ་ཐེ་ཚོམ་མེད། །སངས་རྒྱས་རྡོ་རྗེ་འཛིན་བཅས་པས། །ཀུན་གྱིས་དེང་ཁྱོད་དབང་བསྐུར་བས། །ཁམས་གསུམ་ཀུན་གྱི་རྒྱལ་པོ་ཆེ། །རྒྱལ་བའི་དབང་བོ་བསྟེན་པ་ཡིན། །དེ་ནི་བདུད་ལས་རྣམ་རྒྱལ་ཏེ། །གྲོང་ཁྱེར་མཆོག་ཏུ་རབ་ཏུ་ཞུགས། །ཁྱེད་རྣམས་ཀྱིས་ནི་སངས་རྒྱས་ཉིད། །དེ་ཉིད་ཐོབ་པར་ཐེ་ཚོམ་མེད། །དབུགས་དབྱུང་བའོ། །ཕྱིར་མི་ལྡོག་པའི་དབང་བསྐུར་བ་ཡན་ལག་དང་བཅས་པའོ། །དེ་ནས་གསང་བའི་དབང་བསྐུར་བའི་ཕྱིར་གསོལ་བ་གདབ་པར་བྱ་སྟེ། །སྐྱབས་མེད་པ་ཡི་སྐྱབས་གྱུར་པ། །མགོན་མེད་པ་ཡི་མགོན་གྱུར་པ། །སྙིང་རྗེ་མེད་པའི་སྙིང་རྗེ་ཅན། །བཅོམ་ལྡན་བདེ་མཆོག་གཉིས་མེད་བདག །སྲིད་པའི་གདུང་བས་བསྒོམས་པ་ལས། །སྙིང་རྗེ་གསོལ་བའི་དབང་བསྐུར་གསོལ། །དེ་ནས་སློབ་མ་ལ་གནས་གསུམ་དུ་བདུད་རྩི་ལྔའི་ཐིག་ལེ་བྱས་ལ། །སྔོམ་པ་སྦྱིན་པར་བྱ་སྟེ། ཁྱོད་ཀྱིས་སྲོག་ཆགས་བསྒྲལ་བར་བྱ། །མཆོག་གི་རྫས་རྣམས་བླང་བར་བྱ། །གཞན་གྱི་དཔལ་ལ་ལ་ལོངས་སྤྱོད་ཅིང༌། །བརྫུན་པ་ལྟ་བུའི་ཚིག་རྣམས་སྨོས། །བླ་མེད་དམ་ཚིག་འདི་རྣམས་ནི། །བུ་ཁྱོད་ཀྱིས་ནི་བསྲུང་བར་བྱ། །དེ་ནས་བདག་ཉིད་དཔལ་ཧེ་རུ་ཀའི་ང་རྒྱལ་གྱིས་གནས་པས་ལས་ཀྱི་ཕྱག་རྒྱའམ་ཆོས་ཀྱི་ཕྱག་རྒྱལ་ནས་ཉི་ཤུ་རྩ་བཞི་ལ་ཡི་གེར་བཀོད་ནས། དཔའ་བོ་དང་དཔའ་མོ་བྱིན་གྱིས་བརླབས་ཏེ་བསྐྱེད་ལ། སྒོ་བརྒྱད་དུ་མཁའ་འགྲོ་མ་བརྒྱད་བཀོད་ནས། སྙིང་གའི་རྩ་བཞི་ལ་ཡུམ་བཞིར་བྱིན་གྱིས་བརླབས་ནས། ཧྲཱིཿ་ལས་པདྨར་བསྐྱེད་ལ་གནས་གསུམ་དུ་བྱིན་གྱིས་བརླབས་གནས། ཧཱུཾ་
༄། །ལས་ལིང་ག་རྡོ་རྗེར་བསྐྱེད་ལ། ནོར་བུའི་མཚམས་ཨཱཿ་ལས་བྱང་ཆུབ་སེམས་ཕབ་ནས་འཁོར་ལོ་བཞིའི་རང་བཞིན་དུ་བསྒོམས་ལ་དགའ་བ་བཞི་བཞིར་བསྐྱེད་ནས། ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ཎ་བཛྲ་སྭཱ་བྷ་བ་ཨཱཏྨ་ཀོ྅ཧཾ་ཞེས་བརྗོད་ལ་ཐིག་ལེ་གསུམ་པ་པདྨའི་ནང་དུ་ཕབ་ལ་ཐོད་པའི་ནང་དུ་བཞག་སྟེ། །སོཾ་སརྦ་ཏ་ཐཱ་ག་ཏ་པཱུ་ཛ་བཛྲ་སྭ་བྷཱ་བ་ཨཱཏྨ་ཀོ྅ཧཾ་ཞེས་བརྗོད་ལ་ཡེ་ཤེས་ལྔའི་འོད་ཟེར་སློབ་མའི་ལྕེ་ལ་གཞག་པར་བྱའོ། །དེ་ནས་སློབ་མའི་ལྐོག་མར་ཧྲཱིཿ་ལས་པདྨ་འདབ་མ་བརྒྱད་པ་བསམས་ལ་ལྕེའི་པདྨའི་ཆ་བ་ཧཱུཾ་ལས་རྡོ་རྗེ་བསྐྱེད་ལ་རྩེ་མོའི་དབུས་ཀྱི་སྦུ་གུས་འཐུང་བར་བསམ་མོ། །དེ་ནས། འཁོར་ལོ་ཀུན་དང་རྣལ་འབྱོར་མ། །སངས་རྒྱས་ཞུ་བའི་རང་བཞིན་ཅན། །ཁམས་ལྔ་དག་དང་ཡང་དག་འདྲེས། །གསང་བ་ཡི་ནི་དབང་བསྐུར་རོ། །དེ་ནས་ཤེས་རབ་ཡེ་ཤེས་ཀྱི་དབང་བསྐུར་བར་བྱ་སྟེ་གསོལ་བ་གདབ་པ་ནི། འཁོར་ལོ་བཞི་ཡི་རང་བཞིན་ཅན།། ཡེ་ཤེས་བཞི་ཡི་རང་བཞིན་སྐུ། །དགའ་བ་བཞི་ཡི་རང་བཞིན་མཆོག །བདེ་བ་ཆེན་བོའི་དབང་བསྐུར་གསོལ། །དེ་ནས་འདི་སྐད་ཅེས་བརྗོད་བར་བྱ་སྟེ། །བྲམ་ཟེ་རྒྱལ་རིགས་རྗེའུ་རིགས་དང༌། །དམངས་རིགས་མཐར་གནས་ཤེས་རབ་ཀུན། །གུས་དང་བཅས་པས་མཆོད་པ་དང༌། །གཉིས་མེད་ཚུལ་དང་འོ་བྱེད་པར། །དཔའ་བོ་ཆེན་པོ་སྤྲོ་གྱུར་ཏམ། །སྨོས་ཤིག་དཔའ་བོ་བདེ་བ་ཆེ། །ཅི་གསུང་དམ་ཚིག་བསྟེན་པར་གྱིས། །ལྷ་མོ་བདག་གིས་བྱེད་པར་ནུས། །པདྨ་ཁ་བྱེ་བྱས་ནས་ནི། །སྐྲ་གྲོལ་གཅེར་བུར་གནས་པ་ཡིས། །རྡོ་རྗེ་བཞད་པ་གར་བྱེད་པ། །མེ་ཏོག་ཆུ་ལྡན་དཔའ་བོ་ཡིས། །རྣལ་འབྱོར་མ་ལ་རྡོ་རྗེ་ཡིས། །དེང་ནས་བརྩམས་ཏེ་བུ་ཁྱོད་ཀྱིས། །བརྟུལ་ཞུགས་བཟང་པོས་འགྲོ་དོན་གྱིས། ཞེས་བརྗོད་དོ། །དེ་ནས་འདི་སྐད་ཅེས་སྔོམ་པ་དབོག་པར་བྱ་སྟེ། གཉིས་མེད་ཡེ་ཤེས་སེམས་ལྡན་ལ། །མི་བྱ་བ་ནི་ཅི་ཡང་མེད། །ཚངས་པར་སྤྱོད་པ་བརྟན་མནོས་ལ། །འདོད་པ་ལྔ་ནི་སྤྱད་པར་གྱིས། །གཉིས་མེད་ལ་གནས་ཟས་ལ་ནི། །རྡོ་རྗེ་སེམས་དཔའ་ལ་སོགས་བརྡ། །ལྷ་མོ་གཞན་དང་ཀུན་སྦྱོར་བ། །འདོད་པ་ཆགས་པར་གྱུར་པ་དང༌། །གཉིས་སུ་མེད་ཐོགས་མེད་པའོ། །དམ་ཚིག་སྤྱོད་དང་སྤྱད་པ་དང༌། །བུད་མེད་དབང་ཕྱུག་ཤིན་ཏུ་ཚོར། །
༄། །ཚངས་སྤྱོད་དེ་བཞིན་རྣམ་བཞི་ཡི། །ཁྲོ་མེད་རྒྱུན་གྱི་ཀུན་སྤྱོད་པ། །སྒྲུབ་པ་པོ་ཡིས་ཡོངས་སུ་བསྲུངས། །རྟག་ཏུ་སྒྲུབ་པ་ལ་གནས་ནས། །ཡུལ་ཀུན་ལ་ནི་རྣམ་གྲོལ་ཞིང༌། །གཉིས་མེད་གྲུབ་པའི་རྣལ་འབྱོར་མ། །མི་བསྟེན་སྲིད་པ་དེང་ཁྱོད་ཀྱི། །བུ་ཁྱོད་ཀྱིས་ནི་བསྒྲུབ་པར་བྱ། །དེ་ལྟར་སྡོམ་པ་བྱིན་ནས་ཕྱག་རྒྱ་རྣམ་པ་བཞིའི་བྱེ་བྲག་གིས་དབང་བསྐུར་བ་རྣམ་པ་བཞིར་འགྱུར་ཏེ། ཆགས་པའི་ལམ་ལ་དགེ་བསྙེན་གྱི་སྔོམ་པ་དང་ལྡན་པའི་ཁྱིམ་པའི་བྱང་ཆུབ་སེམས་དཔའ་ཉོན་མོངས་པའི་སེམས་དང་མ་བྲལ་བས། ལས་ཀྱི་ཕྱག་རྒྱ་རིགས་ཅན་མ་བཞི་དང༌། ལོ་ཚིགས་མ་བཞི་དང༌། ལས་དང་ལྡན་པ་བཞི་སྟེ་བཅུ་གཉིས་ལ། གཟུགས་བཟང་ཡན་ལག་མ་ཉམས་དང༌། །རྒྱན་ནི་ཀུན་གྱིས་བརྒྱན་པ་དང༌། །ཞེས་བྱ་བ་ལ་སོགས་པ་གསུངས་པའི་ཡོན་ཏན་དང་ལྡན་པ་ལ་བསྐྱེད་པའི་རིམ་པ་ལ་བསྙེན་སྒྲུབ་བཞིའི་རིམ་པ་དང་ལྡན་པའི་ལྷ་མོར་བསྐྱེད་ལ། རྫོགས་པའི་རིམ་པའི་འཁོར་ལོ་བཞིའི་རིམ་པ་རྒྱུད་ཀྱི་རིམ་པ་དང༌། ཙཎྜ་ལཱི་སྔགས་ཀྱི་རིམ་པ་དང༌། བྱང་ཆུབ་ཀྱི་སེམས་ཕབ་པའི་ཡེ་ཤེས་ཀྱི་རིམ་པས་དགའ་བ་བཞི་བསྐྱེད་ལ། རྡོ་རྗེ་འཛིན་པའི་མཐར། རྐ་ན་ལ་ལྕེ་སྦྱར་རྒྱུན་བཟློག་པས། །ལྷ་དང་ལྷ་མིན་བསྡིགས་ནས་ནི། །གཉིས་མེད་ལྷན་ཅིག་སྐྱེས་དགའ་བསྒོམ། །ཞེས་པ་དང༌། ཡང་ན་གྲོལ་པའི་ལམ་ལ་དགེ་སློང་དང་དགེ་ཚུལ་ལམ། རབ་ཏུ་བྱུང་བའི་བྱང་ཆུབ་སེམས་དཔའ་ཆོས་ཀྱི་ཕྱག་རྒྱའི་འདོད་པའི་ཡོན་ཏན་ལྔའི་ལྷ་མོའམ། བྱག་མཚན་ལས་བསྐྱེད་པའམ། དམ་ཚིག་གི་ཕྱག་རྒྱར་རྩའི་འཁོར་ལོའམ། རླུང་དབུས་མ་ལས་གཏུམ་མོ་དྲོད་ཀྱི་རིམ་པ་ལས་བདེ་བ་བྱང་ཆུབ་ཀྱི་སེམས་བསྐྱེད་ནས་རླུང་གི་འཁྲུལ་འཁོར་དང༌། ཡེ་གེའི་འཁྲུལ་འཁོར་གྱི་དགའ་བྲལ་གྱིས་གནས་ནས་བཟློག །དེ་ནས་བསྒོམ་དུ་གཞུག་སྟེ་གཏུམ་མོ་སྲུབ་ཤིང་གི་འཁོར་ལོ་ལས། ལྷན་ཅིག་སྐྱེས་དགའི་མན་ངག་ནི། །རི་བོང་འཛིན་དང་བཟློག་པའི་མཐར། །དུ་བ་སྨིག་རྒྱུའི་རྟགས་ལྡན་པས། །དེ་ལས་གཟུངས་ནི་ཐོབ་པར་འགྱུར། །ཞེས་བྱ་བའི་ཚིག་དབང་རིན་པོ་ཆེ་ཉིད་སློབ་མ་ལ་སྦྱིན་པར་བྱའོ། །དེ་ནས། །འདོད་ཆགས་བྲལ་བལྟ་བུའི་སྡིག །ཁམས་གསུམ་ན་ནི་གཞན་མེད་དེ། །དེ་བས་འདོད་ལ་ཆགས་བྲལ་བར། །ཁྱོད་ནི་ནམ་ཡང་མ་བྱེད་ཅིག །ཅེས་
༄། །བརྗོད་ལ་དམ་ཚིག་བསྒྲག་པར་བྱའོ། །ཡང་ན་བདག་བྱིན་གྱིས་བརླབ་བའི་ལམ་པས་ནི་ཕྱག་རྒྱ་ཆེན་པོ་སྟོང་པ་ཉིད་ལ་རིལ་པོར་འཛིན་པ་དང་རྗེས་སུ་གཞུག་པའི་མན་ངག་གིས་བསྒོམ་སྟེ། བསམ་གྱིས་མི་ཁྱབ་པའི་རང་བཞིན་བདེ་བ་ཆེན་པོའི་ངང་ལ་འབད་རྩོལ་བྲལ་བའི་བློས་ལྷུན་གྱིས་གྲུབ་པའི་དབྱིངས་ལ་གནས་པས་རྒྱུད་དང་སྔགས་དང་ཡེ་ཤེས་ཀྱི་རིམ་པ་སྤངས་པ་གསང་བའི་རིམ་པ་འབའ་ཞིག་ལ་བརྟེན་ནས། རླུང་དབུ་མ་དང༌། ཐིག་ལེ་ཕྲ་མོ་དང༌། རྩ་ཨ་བ་དྷཱུ་ཏཱི་དང༌། གཏུམ་མོ་དྲོད་དང༌། ལྷན་ཅིག་སྐྱེས་པའི་དགའ་བ་སྟེ་དེ་རྣམས་ནི་མཚོན་བྱེད་བྱང་ཆུབ་ཀྱི་སེམས་སོ། །མཚོན་བྱ་དོན་གྱི་བྱང་ཆུབ་ཀྱི་སེམས་ནི་ཟུང་འཇུག་བསམ་གྱིས་མི་ཁྱབ་པ་དང༌། ཐབས་བདེ་བ་ཆེན་པོ་ཟུང་འཇུག་རྟོག་པ་དང་བྲལ་བས་འབྲས་བུ་གཉིས་སུ་མེད་པ་ཟུང་འཇུག་བདེ་བ་ཆེན་པོ་ལྷུན་གྱིས་གྲུབ་པ་འབྱུང་བར་འགྱུར་རོ། །བཅོས་མའི་ལམ་མཚན་མ་དང་བཅས་པ་རྣམ་པར་སྤངས་ནས། མ་བཅོས་པ་མཚན་མ་མེད་པ་བདག་བྱིན་གྱིས་བརླབ་པའི་སློབ་མ་ལ་བརྟན་པ་ཤེས་རབ་ཡེ་ཤེས་ཀྱི་དབང་བསྐུར་བ་ནི། ཚིག་དབང་རིན་པོ་ཆེ་གཉིས་པའོ། །དེ་སྐད་དུ་ཡང༌། དཔེར་ན་ཕ་རོལ་དོན་གཉེར་འགའ། །གཟིངས་ལ་བརྟེན་ནས་འགྲོ་བྱེད་པ། །ཕ་རོལ་ཕྱིན་ནས་དོར་བར་བྱེད། །བཅོས་མའི་ལམ་ཡང་དེ་བཞིན་ནོ། །ཞེས་གསུངས་སོ། །དེ་ནས་རིག་པའི་དམ་ཚིག་སྦྱིན་པར་བྱ་སྟེ། དོན་དམ་པར་ཆོས་ཀྱི་དབྱིངས་བདེ་བ་ཆེན་པོའི་རང་བཞིན་དམིགས་ལ། ཤིན་ཏུ་རྣམ་པར་དག་པའི་ལྷའི་དེ་ཁོན་ཉིད་བསྒོམ་པར་བྱ་སྟེ། འགྲོ་བ་འདི་ཀུན་སངས་རྒྱས་ལྔ་བདག་ཉིད། །གར་མཁན་དང་ནི་སངས་རྒྱས་བཟང་ལྟར་སྣང༌། །གང་དུ་བདེ་ཆེན་ཞེས་བྱ་གཅིག་པུ་ཉིད། །གཅིག་པུ་ཉམས་ཀྱིས་དུ་མའི་གར་ཡང་མཛད། །ཉིན་མོ་བཅོམ་ལྡན་རྡོ་རྗེ་ཅན། །རྣལ་འབྱོར་མ་ནི་མཚན་མོར་བཤད། །སྤྲུལ་པ་ལས་བྱུང་དཔའ་བོ་རྣམས། །ཡན་ལག་དྲུག་ཅུ་སེམས་ཀྱིས་སྤྲུལ། །དག་པའི་ཆོས་ཀྱི་སྤྲུལ་པ་ནི། །པདྨའི་གཟུགས་སུ་སྤྲུལ་པ་ཡིན། །ཤྲཱི་ནི་གཉིས་མེད་ཡེ་ཤེས་ཏེ། །ཧེ་ནི་རྒྱུ་ལ་སོགས་པ་ཉིད། །རུ་ནི་བཀོད་པ་དང་བྲལ་བ། །ཀ་ནི་གང་དུའང་མི་གནས་པའོ། །སེམས་ལ་རྣམ་གནས་རྣལ་འབྱོར་པ། །མྱ་ངན་འདས་ལ་མི་བསྟན་ཏོ། །ཞེས་བརྗོད་ལ། །ཧཱུཾ་ལས་ཆོ་ག་
༄། །བསྐྱེད་ནས་མཚམས་ཀྱི་སྔགས་ཀྱིས་བསྲུང་བར་བྱའོ། །དེ་ནས་མེ་ཏོག་གཏོར་ལ་རྐང་པ་བརྒྱད་པས་བསྟོད་ནས་སློབ་མ་ལྡང་བར་བྱའོ། །ཆུ་དང་དབུ་རྒྱན་ཅོད་པན་དང༌། །རྡོ་རྗེ་དྲིལ་བུ་མིང་ལྔ་ནི། །རིག་པའི་དབང་སྟེ་དང་པོ་ཡིན། །རྡོ་རྗེ་བརྟུལ་ཞུགས་ཕྱག་མཚན་སྔགས། །གར་དང་ཕྲེང་བ་གླུ་དང་ནི།། དྲི་དང་སྤོས་དང་མར་མེ་སྟེ། །བརྟུལ་ཞུགས་དགུ་པོ་འདི་དག་ནི། །རིག་པ་འཛིན་པའི་ཡན་ལག་ཡིན། །བརྟུལ་ཞུགས་མང་པོ་གཉིས་པའོ། །མདོར་ན་རིག་འཛིན་བཅུ་བཞིའོ། །མི་ལྡོག་དབང་བསྐུར་གསུམ་པའོ། །སྤང་པ་དང་ནི་ཡེ་ཤེས་དང༌། །སྐུ་དང་གསུང་དང་ཐུགས་དང་ནི། །རྗེས་སུ་གནང་བ་རྣམ་པ་གཉིས། །དཀྱིལ་འཁོར་ལྷ་ཡི་དེ་ཉིད་དང༌། །སློབ་དཔོན་གྱི་ནི་ལས་རྣམས་དང༌། །ལུང་བསྟན་གཟེངས་བསྟོད་དབུགས་དབྱུང་དང༌། །མི་ལྡོག་ཡན་ལག་བཅུ་པོ་ནི། །དབང་བསྐུར་བ་ནི་བཞི་པ་ཉིད། །གསང་བའི་དབང་བསྐུར་གསུམ་པའོ། །ཤེས་རབ་ཡེ་ཤེས་དྲུག་པའོ། །མདོར་ན་དབང་བསྐུར་རྣམ་བཞི་སྟེ། །དབྱེ་བ་ཉི་ཤུ་རྩ་བདུན་ནོ། །དཔལ་མཆོག་དང་པོའི་དབང་བསྐུར་བའི་རྒྱུད་དང་ཆོ་ག་སྣ་ཚོགས་ལས་བཏུས་པ་མཉེས་པའི་སྙིང་པོ་ཞེས་བྱ་བ་སློབ་དཔོན་དཔའ་བོ་རྡོ་རྗེས་མཛད་པ་རྫོགས་སོ།།