རྡོ་རྗེ་ཕག་མོའི་སྒྲུབ་ཐབས།
རྡོ་རྗེ་དྲིལ་བུ།
༄། །རྒྱ་གར་སྐད་དུ། བཛྲ་བཱ་རཱ་ཧཱི་སཱ་དྷ་ནཾ། བོད་སྐད་དུ། རྡོ་རྗེ་ཕག་མོའི་སྒྲུབ་ཐབས། དཔལ་རྡོ་རྗེ་རྣལ་འབྱོར་མ་ལ་ཕྱག་འཚལ་ལོ། །བདེ་བ་དམ་པ་རྒྱུན་གྱི་རྒྱུ། །རྡོ་རྗེ་ཕག་མོ་ལ་བཏུད་དེ། །དེ་ཡི་སྒྲུབ་ཐབས་དྲག་པོ་ནི། །མདོར་བསྡུས་པ་ནི་བརྩམ་པར་བྱ། །མཾ་ལས་ཉི་མ་ལ་གནས་པའི་ཧྲཱིཿ་དཀར་པོའི་འོད་ཟེར་ཐོན་ནས་རབ་ཏུ་གཏུམ་མོ་ལ་སོགས་པ་འཁོར་ལོ་གསུམ་གྱི་ལྷ་མོ་རྣམས་དང༌། དོ་རྗེ་ཕག་མོ་ལ་སོགས་པ་ཡང་དག་པར་མཆོད་དེ། ངོ་བོ་ཉིད་ཀྱི་ཡང་དག་པར་མོས་པས་སྟོང་པ་ཉིད་ལ་སོགས་པའི་སྔོན་དུ་འགྲོ་བས་པདྨ་དམར་པོའི་སྟེང་དུ་མཾ་ལས་བྱུང་བའི་ཉི་མ་ལ་ཧཱུཾ་དཀར་པོ་ལས་སྐྱེས་པའི་རྡོ་རྗེ་དཀར་པོ་རྩེ་
༄། །ལྔ་པ་ལས་སྐྱེས་པའི་རྡོ་རྗེ་ཕག་མོ་སྤྱན་གསུམ་དམར་བ། ཞལ་མཚེ་བ་གཙིགས་པ། སྐྲ་གྲོལ་བ། རྡོ་རྗེ་ཕྲེང་བ་གཉིས་ཀྱི་བར་དུ་ཐོང་བའི་ཕྲེང་བ་འཛིན་པ། ཕྱག་རྒྱ་ལྔས་རྒྱས་བཏབ་པ། ཕྱག་གཡས་པ་ན་རྡོ་རྗེ་བསྣམས་པ། གཡོན་ན་ཐོད་པ་དང་ཁ་ཊཱཾ་གང་སྣམས་པ། །གཡས་བརྐྱང་པས་བཞུགས་པ། གཅེར་བུ་ལྷ་དང་མི་དང་ལྷ་མ་ཡིན་རྣམས་འཇགས་པར་མཛད་པ། །འོད་ཟེར་མཐའ་ཡས་པ་འཕྲོ་བའི་ཧྲཱིཿ་ཉི་མ་ལ་གནས་པས་སྙིང་གར་བྱིན་གྱིས་བརླབས་པའི་རྡོ་རྗེ་ཕག་མོར་བདག་ཉིད་བསྒོམ་པར་བྱའོ། །རང་གི་སྔགས་ཀྱི་འོད་ཟེར་གྱིས་ཡེ་ཤེས་ཀྱི་འཁོར་ལོ་བཀུག་སྟེ་དེ་ཆོ་ག་བཞིན་དུ་བཅུག་སྟེ། ཨོཾ་ཡོ་ག་ཤུདྡྷཿ་སརྦ་དྷརྨཱ་ཡོ་ག་ཤུདྡྷོ྅ཧཾ། དེའི་འོད་ཟེར་གྱིས་དེ་བཞིན་གཤེགས་པ་ཐམས་ཅད་བཀུག་ནས་གནས་དབང་བསྐྱུར་བས་སྤྱི་བོར་མི་བསྐྱོད་པར་གྱུར་པར་བལྟའོ། །རབ་ཏུ་གཏུམ་མོ་ལ་སོགས་པས་བདག་ཉིད་ལ་མཆོད་ནས་བདུད་རྩི་མྱང་བར་བྱ་སྟེ། ལྟེ་བར་སྣ་ཚོགས་པདྨ་ལ་ཉི་མ་དམར་བ་ལ་ཧྲཱིཿ་དཀར་པོ་ཕྲེང་བའི་རྣམ་པ་ལྟ་བུར་སྔགས་ཀྱི་ཕྲེང་བ་དཀར་པོ་ཁ་ནས་འཐོན་ནས་སངས་རྒྱས་ཀྱི་ཡོན་ཏན་ལ་སོགས་པ་བླངས་ཏེ། ལྟེ་བའི་བུ་གར་ཞུགས་པ་ལས་བཟླས་པར་བྱའོ། །བསོད་ནམས་ཡོངས་སུ་བསྔོ་བ་ལ་སོགས་པ་བྱ་སྟེ། ལངས་ནས་དེའི་གཟུགས་ཀྱིས་རྒྱུན་དུ་བྱའོ། །ཐུན་མཚམས་གཞན་ཡང་དེ་བཞིན་བྱའོ། །ཨ་ལས་གྱུར་པའི་ལྕེ་པདྨའི་རྣམ་པ་ལ་ཡི་གེ་ཧཱུཾ་འཕྲོས་པས་ཇི་སྲིད་འདོད་ཀྱི་བར་དུ་ཐུན་བཞིར་སྔགས་ཟློས་པའི་རྣལ་འབྱོར་བསྒོམ་པར་བྱའོ། །དེ་ལྟར་བསྟན་བཅོས་ཐམས་ཅད་ལ་མཁས་ཤིང་རྩོད་པ་ཆེན་པོར་འགྱུར་རོ། །དུག་ལ་སོགས་བདུད་རྩིར་འགྱུར་རོ། །དབང་དུ་བྱས་པ་ལ་སོགས་པ་དེའི་ས་བོན་དམར་པོ་དང་ཁ་དོག་དམར་པོས་སྔོན་བཞིན་དུ་བྱའོ། །རྣལ་འབྱོར་མ་ཡི་འཁོར་ལོ་གཙོ། །རྡོ་རྗེ་ཕག་མོ་སྒྲུབ་པའི་ཐབས། །བྱས་ལས་དགེ་བ་གང་ཐོབ་པ། །དེས་ནི་བདག་དང་སེམས་ཅན་རྣམས། །དུས་ཡུན་རིང་ལ་མི་ལྟོས་པར། །བླ་མེད་བྱང་ཆུབ་རྒྱལ་གྱུར་ཅིག །རྡོ་རྗེ་ཕག་མོའི་སྒྲུབ་ཐབས། །སློབ་དཔོན་མཁས་པ་ཆེན་པོ་རྡོ་རྗེ་དྲིལ་བུ་པས་མཛད་པ་རྫོགས་སོ།། །།རྒྱ་གར་གྱི་མཁན་པོ་སུ་མ་ཏི་ཀཱིརྟི་དང༌། བོད་ཀྱི་ལོ་ཙཱ་བ་མཁས་པ་ཆེན་པོར་མར་པ་ཆོས་ཀྱི་དབང་ཕྱུག་གིས་བསྒྱུར་ཅིང་
༄། །ཞུས་ཏེ་གཏན་ལ་ཕབ་པའོ།།