སྒྱུ་འཕྲུལ་ཆེན་མོའི་རྒྱུད་ཀྱི་རྗེས་སུ་འབྲང་བའི་ཧེ་རུ་ཀའི་སྒྲུབ་པའི་ཐབས།
ཀུ་ཀུ་རི་པ།
― DTG025_Page_0456 ―
[མ་དཔེ་གཟིགས་ན་འདིར་གནོན།]
༄། །རྒྱ་གར་སྐད་དུ། མ་ཧཱ་མཱ་ཡཱ་ཏནྟྲ་ཨ་ནུ་ཧེ་རུ་ཀ་སཱ་དྷ་ན་ནོ་བི་ཀ །བོད་སྐད་དུ། སྒྱུ་འཕྲུལ་ཆེན་མོའི་རྒྱུད་ཀྱི་རྗེས་སུ་འབྲང་བའི་ཧེ་རུ་ཀའི་སྒྲུབ་པའི་ཐབས། བཅོམ་ལྡན་འདས་དཔལ་རྡོ་རྗེ་མཁའ་འགྲོ་མ་ལ་ཕྱག་འཚལ་ལོ། །སྒྱུ་འཕྲུལ་ཆེན་མོའི་བདག་ཉིད་རྒྱལ། རྡོ་རྗེ་མཁའ་འགྲོ་ཕྱག་བྱས་ཏེ། །དེ་ཡི་གཞུང་ལུགས་བསྡུས་པ་ཡི། །སྒྲུབ་ཐབས་རིམ་པ་བཤད་པར་བྱ། །དད་བྱམས་སྙིང་རྗེར་ལྡན་པ་ཡིས། །ཡང་དག་བྱང་ཆུབ་ཡིད་བྱས་ཏེ། སྦྱིན་དང་ཚུལ་ཁྲིམས་ལ་སོགས་ལྡན། །འཇིག་རྟེན་ཆོས་བརྒྱད་མཉམ་སེམས་ཤིང༌། །སྔགས་རྒྱུད་དངོས་གྲུབ་སྩོལ་རིག་པས། །རྣལ་འབྱོར་སྤྱོད་དང་མཐུན་ལ་རོལ། །བདེ་བའི་གནས་སུ་ཉེར་འདུག་སྟེ། །སྙིང་གར་ཉི་མ་ཧཱུཾ་བཞག་ནས། །འོད་ཟེར་ལས་བྱུང་མཆོད་པ་ཡིས། །མདུད་ན་དུ་བདག་པོ་ཡོངས་མཆོད་ནས། །སྡིག་པ་བཤགས་པ་ལ་སོགས་བྱས། །དེ་ནས་སྟོང་ཉིད་བསྒོམ་བྱ་སྟེ། ཨོཾ་ཤཱུ་ཉ་ཏཱ་ཛྙཱ་ན་ཛྲ་སྭཱ་ཝ་ཨཱ་ཏྨ་ཀོ྅ཧཾ། ཞེས་པ་ཡིད་ཀྱིས་བརྗོད་པར་བྱ། །མཁའ་ལ་དམར་པོ་འདབ་བཞི་པའི། །པདྨ་ལ་གནས་ཉིད་ཀྱིལ་ལ། །ཐིག་ལེ་དཀར་པོ་ལྔ་བསམས་ཏེ། །དང་པོ་སྤྲོ་དང་བསྡུ་བྱས་ནས། །སྔོན་དུ་གོམས་པའི་བྱམས་ཆེན་དང༌། །སྙིང་རྗེ་ལ་སོགས་རང་བཞིན་ཅན། །ཕྱོགས་བཞིར་ཐིག་ལེ་ལས་བྱུང་བའི། །གར་གྱི་ཚུལ་གྱིས་འཁྱུད་དགའ་བའི། །རྟག་ཏུ་མཁའ་འགྲོ་མ་བཞི་ཡིས། །བསྐུལ་བར་རྣམ་པར་བསམ་པར་བྱ། །ཧ་ལེས་ཧི་བི་ཡ་སི་ཨ། །ཀ་མ་ལུ་པྲ་བ་ཡུ་བཛྲེ། ཨ་ལ་ལ་ལ་ལ་ཧོ། །མ་ཧཱ་སུ་ཏེ་ན། ཨ་ར་ཧ་ནི་ཏེ་ན། ར་ཝི་ཀི་ར་ཎ། པྲ་ཕུ་ལི་ཡུ་ལ། ཀ་མ་ལུ་མ་ཧཱ་སུ་ཏེ་ན། དེ་ནས་འཁོར་བའི་སྡུག་བསྔལ་ལས། །སེམས་ཅན་བསྒྲལ་བའི་བསམ་པ་ཡིས། །འགྲོ་བ་དེ་ཉིད་སྒྱུ་མ་བཞིན། །ཇི་ལྟར་འབྱུང་ལས་རྣམ་གཟིགས་ཏེ། །དབུས་མའི་ཐིག་ལེ་ལས་བྱུང་སྔོ། །ས་བོན་ཧཱུཾ་ལས་སྙིང་རྗེའི་དངོས། །ཡེ་ཤེས་ལྔ་དང་སྐུ་གསུམ་བདག །མཆོག་ཏུ་དགའ་ཞིང་མཛེས་པ་ཡི། །ཞལ་བཞི་པ་དང་ཕྱག་བཞི་པ། །ཡན་ལག་རྣམས་ནི་ཐལ་བས་བྱུགས། །རྩ་ཞལ་ལུས་བཞིན་ཁ་དོག་སྔོ། །གཡས་པའི་ཞལ་ནི་སེར་བ་དང༌། །རྒྱབ་མ་དཀར་ཞིང་དམར་བར་སྣང༌། །གཡོན་པ་མ་རྒད་བཞིན་དུ་འབར། །སྤྱན་གསུམ་ན་རའི་པགས་
― DTG025_Page_0457 ―
[མ་དཔེ་གཟིགས་ན་འདིར་གནོན།]
༄། །ལ་སོགས། །ཕྱག་རྒྱ་རྣམ་པ་ལྔ་ཡིས་བརྒྱན། །མགོ་སྐྱེས་ཁམ་པ་གྱེན་བསྒྲེང་པ། །མི་བསྐྱོད་ཐོད་པའི་དབུ་རྒྱན་མཐོ། །གཡས་ན་ཀ་པཱ་ལ་དང་མདའ། །ཁ་ཊྭཱཾ་ག་དང་གཞུ་ནི་གཡོན། །འོད་ཟེར་བྱེ་བ་འཕྲོ་བའི་ཚོགས། །འགྲོ་ལ་ཕན་ཕྱིར་སངས་རྒྱས་མཛད། །རང་སྣང་སངས་རྒྱས་མཁའ་འགྲོ་མ། །འདོད་ལ་དགའ་བས་རྟག་འཁྱུད་མ། །ཞལ་ནི་ལྷ་མོ་བཞིར་གཟིགས་པའི། །གར་ལྟ་ཧེ་རུ་ཀ་བསམ་བྱ། །མཁའ་འགྲོ་མ་རྣམས་ཀྱི་མཆན་ལ་སོགས་པ་བཤད་པར་བྱ་སྟེ། དེ་ལ་ཤར་ཕྱོགས་ཀྱི་འདབ་མ་ལ་ནི་རྡོ་རྗེ་མཁའ་འགྲོ་མ་ཁ་དོག་སྔོན་པོ་སྟེ་སྔོན་པོ་དང༌། སེར་པོ་དང༌། དཀར་ཞིང་དམར་བ་དང༌། ལྗང་གུའི་ཞལ་བཞི་སྟེ། ས་དང་མེ་ལོང་ལྟ་བུའི་ཡེ་ཤེས་ལ་སོགས་པ་རྣམ་པར་དག་པ། གཡས་པ་ན་རྡོ་རྗེ་དང་ཀ་པཱ་ལ་འཛིན་པ། གཡོན་པ་ན་དྲིལ་བུ་དང་ཁ་ཊྭཱཾ་ག་འཛིན་པའོ། །ལྷོ་ཕྱོགས་ཀྱི་འདབ་མ་ལ་ནི་མཉམ་བ་ཉིད་ཀྱི་ཡེ་ཤེས་དང༌། ཆུའི་ཁམས་ལ་སོགས་པའི་རང་བཞིན་ཅན། དཔལ་རིན་ཆེན་མཁའ་འགྲོ་མ་ཕྱག་ན་རིན་པོ་ཆེའི་རྒྱལ་མཚན་དང་ཏྲི་ཤཱུ་ལ་བསྣམས་པ། གཡོན་པ་ན་བྷནྡྷ་དང་ཅེ་སྦྱང་གི་མགྲིན་པ་དམ་དུ་འཛིན་པ་སྟེ། སེར་པོ་དང༌། སྔོན་པོ་དང༌། དཀར་ཞིང་དམར་པ་དང༌། ལྗང་གུའི་ཞལ་བཞིའོ། །ནུབ་ཀྱི་འདབ་མ་ལ་ནི་པདྨ་མཁའ་འགྲོ་མ་དཀར་ཞིང་དམར་བ་སྟེ། མེ་དང་སོ་སོར་ཀུན་དུ་རྟོག་པ་ལ་སོགས་པའི་ཡེ་ཤེས་ཀྱི་རང་བཞིན་ཅན་གཞོན་ཞིང་མཛེས་པ་སྟེ། ཞལ་དཀར་ཞིང་དམར་བ་དང༌། གསེར་བཞུས་པ་ལྟ་བུ་དང༌། སྔོན་པོ་དང༌། ལྗང་གུའི་ཞལ་ཅན་ནོ། །ཕྱག་གཡས་པ་ན་སྣ་ཚོགས་པདྨ་དང་མདའོ། །གཡོན་ན་ནི་ཀ་པཱ་ལ་དང་གཞུའོ། །བྱང་ཕྱོགས་ཀྱི་འདབ་མ་ལ་ནི་སྣ་ཚོགས་མཁའ་འགྲོ་མ་ལྗང་གུ་སྟེ་ལྗང་གུ་དང༌། སེར་པོ་དང༌། དཀར་པོ་དང༌། སྔོན་པོའི་ཞལ་ཅན་བྱ་བ་གྲུབ་པ་དང༌། རླུང་ལ་སོགས་པའི་རྣམ་པར་དག་པའི་སྣ་ཚོགས་མཁའ་འགྲོ་མ་སྟེ། གཡས་པ་ན་རལ་གྲི་དང་ཌཱ་མ་རུ། གཡོན་པ་ན་ཞགས་པ་དང་ཀ་པཱ་ལའོ། །ལྷ་མོ་ཐམས་ཅད་ཀྱང་སྤྱན་གསུམ་པ་ཞལ་བཞི་དང༌། ཕྱག་བཞི་པ་སྟེ། སྒེག་པ་ལ་སོགས་པའི་ཉམས་དང་ལྡན་པ་མཚན་དང་དཔེ་བྱད་འབར་ཞིང་ཉི་མའི་གདན་ལ་
― DTG025_Page_0458 ―
[མ་དཔེ་གཟིགས་ན་འདིར་གནོན།]
༄། །གནས་པ། མགོན་པོའི་གར་གྱི་ཚུལ་ལྟ་བུ། །ཕྱག་རྒྱ་ལྔ་དང་ལྡན་པ་ལ་སོགས་པའོ། །ཡན་ལག་དྲུག་ཏུ་དགོད་བྱས་ནས། །མགོན་པོ་དགུག་པ་ལ་སོགས་པས། །དབང་བསྐུར་རྒྱལ་བ་མཆོད་པ་དང༌། །བསྟོད་དང་རྗེས་ཆགས་ལ་སོགས་པའོ། །དབྲལ་བ་མགྲིན་པ་མིག་གཉིས་དང༌། རྣ་བ་སྣ་དང་སྙིང་གར་དགོད། །ཨོཾ་ཨ་ཨཱ་ཁེ་ཙི་ར་ཞེས་པའོ། །རེ་ཕའི་སྟེང་དུ་ཧཱུཾ་བྱས་ཏེ། །རྡོ་རྗེ་མྱུར་དུ་མཉམ་སྦྱོར་བས། །ཡེ་ཤེས་དཀྱིལ་འཁོར་རྣམ་པར་དགུག །མཆོད་ཡོན་སྦྱིན་སོགས་སྔོན་བྱས་ཏེ། །རང་དང་གཅིག་ཏུ་གཞུག་པར་བྱ། །འཁོར་ལོ་གཅིག་ཏུ་མཉམ་བྱས་པས། །ཁྱད་པར་འབྲས་བུའི་དངོས་གྲུབ་འགྱུར། །ཟངས་སོགས་ཁུ་བས་བྱུག་པ་ཡིས། །གསེར་གྱི་དངོས་པོ་འགྲུབ་པ་ལྟར། །སྙིང་ནས་སྙིང་པོའི་འོད་ཟེར་གྱིས། །ཕྱོགས་བཞུགས་མགོན་པོ་བསྐུལ་བྱས་ཏེ། །འོད་ཟེར་ལས་བྱུང་རིག་མ་རྣམས། །བདུད་རྩིའི་ཆུས་གང་བུམ་པ་ཡིས། །རང་གི་སྤྱི་བོར་དབང་བསྐུར་བས། །མི་བསྐྱོད་གཙོ་བོའི་ཅོད་པན་དུའོ། །བཙུན་མོ་བཟང་མོ་རྣམས་ལ་ཡང༌། །རྟག་པ་དང་ནི་རིན་ཆེན་དབང༌། །དཔག་མེད་དོན་ཡོད་གྲུབ་པ་རྣམས། །དམ་པའི་མཆོད་པས་ལག་བྲེལ་བའི། །མཆོག་གི་ལྷ་མོ་མཉམ་ཕྱུང་སྟེ། །རྣལ་འབྱོར་མ་དང་བཅས་མཆོད་ཅིང༌། །བདག་ཉིད་ཧེ་རུ་ཀ་བསྟོད་བྱ། །མཆེ་བ་གཙིགས་ཤིང་འཇིགས་པ་ཆེ། །སྔགས་ཀྱི་མེ་ཏོག་ཕྲེང་བས་བརྒྱན། །ཤ་ཆེན་རབ་ཏུ་གསོལ་མཛད་པ། །ཧེ་རུ་ཀ་དཔལ་བདག་ཕྱག་འཚལ། །དེ་དག་ནི་བསྟོད་པའི་གླུའོ། །མགོ་བོ་ལྟེ་བ་གསང་གནས་དང༌། །བརླ་གཉིས་ལ་སོགས་རིམ་བཞིན་དུ། །ཨོཾ་ཧཱུཾ་སྭཱ་ཨཱཿཧཱར་བཅས་པའི། །རིགས་ལྔའི་བདག་ཉིད་ས་བོན་བསམ། །ཧྲཱིཿཡིག་དམར་པོ་ཆུ་སྐྱེས་ཏེ། །བྲུཾ་ལས་བྱུང་བའི་གེ་སར་སེར། །སངས་རྒྱས་མཁའ་འགྲོ་དཔལ་དང་འདྲ། །ཆགས་པས་གཟིགས་ཏེ་དགའ་མོས་པའི། །ལྷ་མོ་བཞི་ལ་སོགས་པ་རྣམས། །གླུ་ཡི་དབྱངས་ཀྱིས་བསྐུལ་བར་བསམ། །ཨོཾ་བྱུང་ནོར་བུ་ཧཱུཾ་རྡོ་རྗེ། །རྣམ་པ་སྣ་ཚོགས་མཛད་སོགས་པས། །རྒྱལ་བ་རྗེས་སུ་ཆགས་མཛད་པའི། །དགའ་བ་འདི་ནི་བརྩམ་པར་བྱ། །རྡོ་རྗེ་བད་བསྐྱོད་ཕཊ་ཀྱི་སྒྲས། །བཀུག་
― DTG025_Page_0459 ―
[མ་དཔེ་གཟིགས་ན་འདིར་གནོན།]
༄། །ནས་ཀྱང་ནི་གཞུག་པར་བྱ། །རྒྱལ་བའི་ཚོགས་རྣམས་བདེ་བར་ནི། །ཞུ་བ་ལས་ནི་རྡོ་རྗེར་བྱུང༌། །དེ་ནས་ལྕེ་ཡི་ཆོ་ག་བཞིན། །པདྨ་ལས་རང་སེམས་མྱོང་བྱ། །སྙིང་གར་འབྱུང་བ་བཞི་དངོས་ཀྱི། །པདྨ་མར་པོ་འདབ་བཞི་པ། །ཉི་མ་ཟླ་གནས་ཐིག་ལེ་ལ། །ཁ་སྦྱར་ཤིན་ཏུ་བསྐོར་བ་ནི། །པད་རྩའི་སྐུད་འདྲའི་རི་མོ་ནི། །ཕྱེད་བཅས་མདུན་གྱི་ཁྱབ་ཡིག་ཚར། །སྒྲ་དང་བཅས་ཏེ་སྟེང་བྱུང་ནས། །དེ་ནས་ཟླ་བའི་བུ་གར་ཞུགས། །རྗེས་སུ་འགྲོ་དང་འོང་འགྱུར་པ། །བརྗོད་ནས་སྤྲོ་བར་བྱ་བ་ནི། །སྲོག་དང་རྩོལ་བ་བསྡམས་ནས་སུ། །སྔགས་ནི་དེ་བཞིན་སླར་བསྡུ་བའོ། །ཡི་གེ་གསུམ་གྱི་སྒྲ་ཡིས་ནི། །གཞུག་པ་དང་ནི་དབྱུང་བ་དང༌། །སྟེང་དུ་འགྲོ་བའི་རླུང་གིས་ནི། །ཡེ་གེ་ཨོཾ་གྱི་སྒྲས་དབྱུང་ཞིང༌། །གཞུག་པ་ལ་ནི་བཅུག་ནས་སུ། །གནས་བྱ་ལ་གནས་རླུང་ཕྲ་མོ། །ཐིག་ལེ་དཀར་པོའི་དབུས་སུ་གནས། །ལྟེ་བར་དབྱངས་དང་གསལ་བྱེད་རྒྱུས། །རི་མོ་ཕྱེད་བཅས་བདུན་ཡོན་ཏན། །གཞུག་དང་གནས་དང་ཕྱིར་དབྱུང་བ། །དལ་ཞིང་དལ་བས་གཞན་མི་འགྲོ། །རབ་ཏུ་སྤྱོད་པའི་སེམས་ཀྱིས་བསྒོམ། །ཨོཾ་ཨཱཿཧཱུཾ། འདི་ནི་ཡི་གེ་གསུམ་བཟླས་པའི་སྔགས་སོ། །འདོད་པའི་མཆོད་སོགས་བྱས་ནས་ལྡང༌། །དེ་ཉིད་མཐོང་ཞིང་རྣམ་གྲོལ་བས། །འགྲོ་བའི་སྡུག་བསྔལ་ལ་བལྟས་ཏེ། །བདེ་བ་ཡོངས་སུ་བསྔོ་བར་བྱ། །བདག་གིས་གང་ཞིག་བྱས་བསོད་ཀྱིས། །རྡོ་རྗེ་མཁའ་འགྲོ་བསྒོམ་གྱུར་ཅིང༌། །དེ་ཡིས་རྡོ་རྗེ་མཁའ་འགྲོའི་བདག །འགྲོ་མགོན་ཕུན་ཚོགས་ཐོབ་གྱུར་ཅིག །ལངས་ནས་བསོད་སྙོམས་ལ་སོགས་དང༌། །ཉན་དང་བཤད་པ་ལ་སོགས་བྱ། །རང་གཞན་ཧེ་རུ་ཀར་བྱས་ཏེ། །སྒྱུ་མའི་རྣམ་པ་བཞིན་དུ་སྤྱད། །ཧཱུཾ་གིས་ཁ་ཟས་བྱིན་བརླབས་ཏེ། །ཨ་ལས་བྱུང་བའི་ཀ་པཱ་ལར། །འོག་ཏུ་རླུང་ལས་མེའི་འཁོར་ལོ། །འབར་བ་དྲི་མ་མེད་བྱས་ཏེ། །སྟེང་དུ་ཨོཾ་ནི་བསམ་བྱས་ཏེ། །བདུད་རྩིའི་གཟུགས་ནི་མངོན་བསྔགས་ལ། །ལྕེ་རྩེར་རྡོ་རྗེ་བསམ་བྱས་ཏེ། །བཀུག་སྟེ་དེ་ཡིས་ཚིམ་པར་བྱ། །ཨོཾ་ཨཱཿཧཱུཾ་གུཧྱ་བྷཀྵ་བྷཀྵ་ཧཾ། འདི་ནི་བདུད་རྩི་མྱང་བའི་སྔགས་སོ། །ཁྲུས་ཀྱི་དུས་སུ་སྔོན་བཞིན་དུ། །དབང་བསྐུར་ཆོ་ག་སྔོན་བཞིན་
― DTG025_Page_0460 ―
[མ་དཔེ་གཟིགས་ན་འདིར་གནོན།]
༄། །བསྒོམ། །ཐུན་བཞི་པོ་ནི་ཐམས་ཅད་དུ། །དེ་ལྟར་བསྒོམ་ཞིང་མཉམ་པར་གཞག །བདག་གིས་རྡོ་རྗེ་མཁའ་འགྲོ་ཡི། །སྒྲུབ་ཐབས་བྱས་བའི་དགེ་བ་གང༌། །ཐོབ་པ་དེས་ནི་འགྲོ་བདག་ཉིད། །དེ་བཞིན་བྱེད་པས་མཛེས་གྱུར་ཅིག །སྒྱུ་འཕྲུལ་ཆེན་མོའི་རྒྱུད་ཀྱི་རྗེས་སུ་འབྲང་བའི་ཧེ་རུ་ཀའི་སྒྲུབ་ཐབས་སློབ་དཔོན་ཀུ་ཀུ་རི་བསམ་མཛད་པ་རྫོགས་སོ།།
| 
