ཡེ་ཤེས་དབང་ཕྱུག་མའི་སྒྲུབ་ཐབས།
འཕགས་པ་ལྷ།
༄། །རྒྱ་གར་སྐད་དུ། ཛྙཱ་ན་ཤྭ་རི་སཱ་དྷ་ན་ནཱ་མ། བོད་སྐད་དུ། ཡེ་ཤེས་དབང་ཕྱུག་མའི་སྒྲུབ་ཐབས། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །ཐབས་དང་ཤེས་རབ་བདག་ཉིད་མཆོག །ཡེ་ཤེས་དབང་ཕྱུག་ཕྱག་འཚལ་ནས། །རྩ་བའི་རྒྱུད་ཀྱི་རྗེས་འབྲངས་ཏེ། །བདག་གིས་དེ་ཡི་སྒྲུབ་ཐབས་བཤད། །དེ་ལ་ཐོག་མར་གནང་བ་ཐོབ་པའི་རྣལ་འབྱོར་པས། གཡས་པའི་ལག་
༄། །མཐིལ་ལ་ཨ་རྣམ་པར་བསྒོམ་པར་བྱའོ། །སྡིགས་མཛུབ་ལ་སོགས་པའི་སོར་མོ་རྣམས་ལ། སུཾ་ཀྵུཾ་ཡུཾ་ཧཱུཾ་ཨ། རིམ་པ་ཇི་ལྟ་བ་བཞིན་དུ་བསྒོམ་པར་བྱས་ལ་རྡོ་རྗེ་རྩེ་ལྔ་པ་བསམ་པར་བྱའོ། །དེ་བཞིན་དུ་གཡོན་པའི་ལག་མཐིལ་དུ་སའི་རྣམ་པ་སྡིགས་མཛུབ་ལ་སོགས་པའི་སོར་མོ་ལ། སྨྲྱུཾ་ཧྨྲྱུཾ་ཡྨྲྱུཾ་ཀྵྨྲྱུཾ་སཾ། ཞེས་པ་རིམ་པ་ཇི་ལྟ་བ་བཞིན་དུ་བསྒོམས་ལ་པདྨ་བསམ་པར་བྱའོ། །འདི་ནི་ལག་པ་སྦྱང་བར་བྱ་བའོ། །དེ་ནས་མགྲིན་པར་ཧྲཱིཿལས་པདྨ་འདབ་མ་བརྒྱད་པ་བསྒོམས་ལ། ལྕེའི་འདབ་མར་ཧཱུཾ་ལས་རྡོ་རྗེ་དེའི་དབུས་སུ་ཨོཾ་ཨཱཿཛི་སྭ་སཾ་བརྟ་ནི་ཧཱུཾ་ཕཊ་ཅེས་པས་ལྕེ་དག་པར་བྱའོ། ཨོཾ་ཧཱུཾ་སྭཱ་ཧཱ། ཞེས་པས་ཨརྒྷ་དང་གཏོར་མའི་སྣོད་ལ་ཕྱག་རྒྱ་དང་བཅས་པས་ལན་བདུན་མངོན་པར་བསྔགས་ཏེ། གཡོན་ཕྱོགས་སུ་བཞག་ལ། དེའི་ཆུས་ཐམས་ཅད་ཀུན་ལ་བསང་གཏོར་བྱའོ། །ལག་པ་གཉིས་རྡོ་རྗེ་ཁུ་ཚུར་བཅངས་ཏེ་དབུས་མ་གཉིས་བརྐྱང་སྟེ། ཁབ་ལྟར་བྱས་ལ་ཨོཾ་ཧཱུཾ་ཕཊ། ཞེས་པས་གནས་བསྲུང་བར་བྱའོ། །ལག་པ་གཉིས་བརྐྱང་སྟེ་མཐེ་བོང་གཉིས་བཅིངས་ལ། གཤོག་པ་བཞིན་དུ་བྱས་ལ་བསྐོར་ནས་སྙིང་གར་བཟློག་སྟེ་བཀོད་པ་ནི་བདག་བསྲུང་བའོ། །ཨོཾ་ཧཱུཾ་སྭཱ་ཧཱ། ཞེས་པས་སོ། །རྡོ་རྗེ་བཅིངས་ནས་དབུ་མ་བརྐྱང་བ་ནི་ཁབ་ཀྱི་ཕྱག་རྒྱ་བཞིན་དུ་བཅས་ནས་བསྐོར་བ་བྱས་ལ་དྲ་བ་དང་ར་བ་ལ་སོགས་པར་བྱའོ། །ཨོཾ་ཌ་ཊུ་སྭཱ་ཧཱ། རྡོ་རྗེ་ཁུ་ཚུར་གཉིས་ཀྱི་སྡིགས་མཛུབ་གཉིས་བཟློག་སྟེ། སྙིང་ག་དང་རྒྱབ་དང་མགོ་པོ་རྣམས་ཀྱི་གོ་ཆ་སྟེ་ལན་གསུམ་བྱའོ། །ཨོཾ་བཛྲ་ཏུ་ཥྱ་ཧོ། །ཞེས་པས་མཉམ་པའི་ཐལ་མོ་གྱིས་པར་བྱས་ལ། །དེའི་མདུན་དུ་འོག་ནས་འབྱུང་བའི་དཀྱིལ་འཁོར་གྱི་འཁོར་ལོ་བསྒོམས་ཏེ་མཆོད་པར་བྱའོ། །ཨོཾ་ཤྲཱིཾ་སྭཱ་ཧཱ། ལག་པ་བརྐྱང་སྟེ་མཐེ་བོང་མཛུབ་མོ་སྦྱར་བར་བྱས་པ་ནི་མེ་ཏོག་གིའོ། །ཨོཾ་ཧཱུཾ་སྭཱ་ཧཱ། ལག་པ་བརྐྱང་བ་ནི་དྲིའོ། །ཨོཾ་ཀཾ་སྭཱ་ཧཱ། ལག་པ་བརྐྱང་སྟེ་དབུ་མ་བསྒྲེང་བ་བདུག་པའི་འོ། །ཨོཾ་ཀྵུཾ་སྭཱ་ཧཱ། ཁུ་ཚུར་བཅངས་ཏེ་མཐེ་བོང་བསྒྲེང་པ་ནི་མར་མེའོ། །ཨོཾ་གྷུཾ་སྭཱ་ཧཱ། ལག་པ་གཉིས་བརྐྱང་སྟེ། དབུས་སུ་མཐེ་བོང་རབ་ཏུ་བསྐྱོད་པ་ནི་གཏོར་མ་དབུལ་པའོ། །དེ་ནས་པདྨ་བསྒྱུར་བ་སྔོན་དུ་འགྲོ་བ་ཐལ་མོ་སྙིང་གར་
༄། །གཞག་སྟེ། ཨོཾ་ན་མཿ་ཏེ་ཧཱུཾ། ན་མ་མི་ཧཱུཾ། ན་མོ་ན་མཿཧཱུཾ་སྭཱ་ཧཱ། ཨོཾ་པཉྩ་ཌཱ་ཀི་ནཱི་པཱུ་ཛོ་པ་སྠ་ནཱ་ཡ་ཨཱཏྨ་ནཱཾ་ནིཪྻཱ་ཏ་ཡཱ་མི། །ཨོཾ་ཨཱ་ཙཪྻཱ་ཇོ་པ་སྠ་ནཱ་ཡ་ཨཱཏྨ་ནཱཾ་ནི་ཪྻཱ་ཏ་ཡཱ་མི། ཨོཾ་ས་ཀ་ལ་སཏྭ་པ་རི་ཏྲ་ཎཱ་ཡ་ཨཱཏྨ་ནཱཾ་ནིཪྻཱ་ཏ་ཡཱ་མི། ས་མ་ཡ་སྟྭཾ། ས་མ་ཡ་ཧོ་ཧོ་ཧོ་ཞེས་སོ། །སངས་རྒྱས་ཆོས་དང་དགེ་འདུན་ལ། །རྟག་པར་བདག་ནི་སྐྱབས་སུ་མཆི། །ཐམས་ཅད་ཐེག་པ་གསུམ་ལ་ཡང༌། །སྦྱོར་བ་གསང་བ་མཁའ་འགྲོ་དང༌། །དཔའ་བོ་དཔའ་མོ་དབང་ལྷ་མོ། །བྱང་ཆུབ་སེམས་དཔའ་བདག་ཆེན་དང༌། །ཁྱད་པར་དུ་ནི་སློབ་དཔོན་ལ། །རྟག་ཏུ་སྐྱབས་སུ་བདག་མཆིའོ།། བདག་ལ་དགོངས་ཤིག་ཐམས་ཅད་ཀྱིས། །རྣམ་སྣང་མི་བསྐྱོད་རིན་ཆེན་མཆོག །སྣང་མཐའ་ཡས་དང་དོན་ཡོད་ཀྱི། །སངས་རྒྱས་བྱང་ཆུབ་སེམས་དཔའ་ཀུན། །ཆེ་གེ་མོ་ཞེས་བྱ་བ་བདག །དུས་འདི་ཉེ་བར་བཟུང་ནས་སུ། །བྱང་ཆུབ་ཆེན་པོ་ཐོབ་པའི་བར། །བླ་ན་མེད་པའི་བྱང་ཆུབ་སེམས། །མཆོག་ཏུ་བདག་གིས་བསྐྱེད་པར་བགྱི། །ཇི་ལྟར་དུས་གསུམ་མགོན་པོ་ཡི། །བྱང་ཆུབ་ཉིད་དུ་ངེས་བྱས་བཞིན། །ཚུལ་ཁྲིམས་རྣམ་གསུམ་བསླབ་པ་དང༌། །དགེ་བའི་ཆོས་ནི་སྡུད་པ་དང༌། །སེམས་ཅན་དོན་བྱེད་ཚུལ་ཁྲིམས་གསུམ། །སོ་སོར་བདག་གིས་བརྟན་པོར་བཟུང༌། །སངས་རྒྱས་ཆོས་དང་དགེ་འདུན་དང༌། །བླ་མེད་དཀོན་མཆོག་གསུམ་གྱི་མཆོག །སྡོམ་པ་སངས་རྒྱས་རྣལ་འབྱོར་སྐྱེས། །དང་པོ་དེ་རིང་གཟུང་བར་བགྱི། །རྡོ་རྗེ་དྲིལ་བུའི་ཕྱག་རྒྱ་དག །སོ་སོར་དེ་བཞིན་ཉིད་དུ་གཟུང༌། །རྡོ་རྗེ་ཆེན་པོའི་རིགས་མཆོག་ལ། །སློབ་དཔོན་ཉིད་དུ་གཟུང་བར་བགྱི། །དམ་ཚིག་ཡིད་དུ་འོང་བ་ཡི། །རིན་ཆེན་འབྱུང་བའི་རིགས་མཆོག་ལ། །ཉིན་རེ་བཞིན་དུ་ལན་དྲུག་ཏུ། །སྦྱིན་པ་རྣམ་བཞི་སྦྱིན་པར་བགྱི། །བྱང་ཆུབ་ཆེན་པོ་ལས་བྱུང་བའི། །པདྨ་ཆེན་པོའི་རིགས་དག་ལ། །ཕྱི་ནང་གསང་བའི་ཐེག་པ་གསུམ། །དམ་ཆོས་སོ་སོར་གཟུང་བར་བགྱི། །སྡོམ་པ་ཐམས་ཅད་ལྡན་པ་ལ། །ཇི་ལྟར་ནུས་པ་མཆོད་པའི་ལས། །ལས་ཀྱི་རིགས་མཆོག་ཆེན་པོ་ལ། །དེ་བཞིན་ཉིད་དུ་སོ་སོར་གཟུང༌། །བླ་ན་མེད་པའི་བྱང་ཆུབ་སེམས། །མཆོག་ཏུ་བསྐྱེད་པ་བྱས་ནས་སུ། །སེམས་ཅན་ཐམས་ཅད་དོན་བྱེད་ཕྱིར། །སྡོམ་པ་མ་ལུས་གཟུང་བར་བགྱི། །མ་
༄། །བསྒྲལ་བ་རྣམས་བདག་གིས་བསྒྲལ། །མ་གྲོལ་བ་རྣམས་བདག་གིས་དགྲོལ། །དབུགས་མ་ཕྱིན་པ་དབུགས་བྱུང་སྟེ། །སེམས་ཅན་མྱ་ངན་འདས་ལ་དགོད། །དེ་ནས་རང་གི་སྙིང་གར་ཀྵུཾ་གི་རྣམ་པའི་འོད་ཟེར་གྱི་ཕྲེང་བ་བསྒོམ་པས། །རང་གི་ལུས་ལ་སོགས་པ་འཇིག་རྟེན་སྟོང་པར་བསྒོམ་པར་བྱས་ལ། ཆོས་རྣམས་ཐམས་ཅད་རང་བཞིན་མེད་པར་བྱའོ། །ཨོཾ་སྭ་བྷཱ་བ་ཤུདྡྷཿསརྦ་དྷརྨཱཿསྭ་བྷཱ་བ་ཤུདྡྷོ྅ཧཾ་ཞེས་བརྗོད་དོ། །དེའི་རྗེས་ལ་རྡོ་རྗེ་མཁའ་འགྲོ་མ་ལ་སོགས་པའི་ལྷ་མོ་བཞིས་བསྐུལ་བའི་བདག་ཉིད་དུ་བལྟ་བར་བྱའོ། །ཛ་ཛ་ཛ་ཛ་རྡོ་རྗེ་སེམས་དཔའ་གཤེགས་པས་བདག་པོ་ལ་ཁྱོད་ཀྱིས་དངོས་གྲུབ་སྟེར་བ། ཧ་ཧ་ཧ་ཧ། ཧཱུཾ་ཡིག་མགོན་པོ་དམ་ཚིག་བདག་པོ་བདག་ཕྱག་འཚལ་ལོ། །བ་བ་བ་བ་རྡོ་རྗེ་གཤེགས་པའི་གསང་བ་ལས་ཕྱུང་སྐུ་འཛིན་པ། ཨ་ཨ་ཨ་ཨ་ཧོ་གུཧྱའི་རྡོ་རྗེ་ཨཱ་ལི་གཅིག་ཏུ་ཐིམ་པའི་ཧཱུཾ། དེ་ནས་ཟླ་བའི་དཀྱིལ་འཁོར་བསྒོམས་ཏེ། ཨོཾ་ཛྙཱ་ན་ཨ་ཧཾ་ཞེས་བརྗོད་པར་བྱ་སྟེ། དེའི་སྟེང་དུ་ཨ་ལ་སོགས་པའི་ཡི་གེ་ལས་བྱུང་པའི་ཟླ་བའི་དཀྱིལ་འཁོར་ཡང་མདུན་དུ་བལྟ་བར་བྱའོ། །དེའི་དབུས་སུ་ཧཱུཾ་ལས་བྱུང་བའི་རྡོ་རྗེའི་ལྟེ་བ་ལ་ས་བོན་དེ་ཉིད་གནས་པ་བསྒོམ་མོ། །ཨོཾ་བཛྲ་ཤུདྡྷཿ་སརྦ་དྷརྨཱ་བཛྲ་ཤུདྡྷོ྅ཧཾ། ཞེས་བརྗོད་པར་བྱའོ། །དེ་ནས་རྡོ་རྗེའི་འོད་ཟེར་ལས། དེ་བཞིན་གཤེགས་པ་ཐམས་ཅད་ཀྱི་སྐུ་དང་ལྡན་པར་བྱུང་སྟེ། སེམས་ཅན་ཐམས་ཅད་ཀྱི་དོན་བྱས་ཏེ་སླར་ཡང་བཞུགས་ཏེ་སྔགས་ཀྱི་ང་རྒྱལ་བྱའོ། །ཨོཾ་ཝརྟ་ན་མོ་ཨ་ཧོ་ཧོ། །ཞེས་པས་ཡེ་ཤེས་མཁའ་འགྲོ་མ་བསྒོམ་པར་བྱའོ། །རྒྱན་ཐམས་ཅད་དང་ལྡན་པ། ཞལ་གསུམ་པ་དང༌། ཕྱག་དྲུག་པ་དང༌། སྤྱན་གསུམ་པ། སེང་གེའི་གདན་གྱི་སྟེང་ན། སྣ་ཚོགས་པདྨ་དང་ཉི་མའི་དཀྱིལ་འཁོར་གྱི་སྟེང་ན། སེམས་དཔའི་སྐྱིལ་མོ་ཀྲུང་གིས་བཞུགས་པ། སྐུ་མདོག་སྔོན་པོ། །སྦྲུལ་གྱི་རྒྱན་གྱིས་བརྒྱན་པ། འཇིགས་པར་བྱེད་པ། སྐྲ་གྲོལ་བ། སྤྱི་བོར་ཐོད་པས་བརྒྱན་པ། དབུ་ལ་སངས་རྒྱས་ལྔ་ཡིས་བརྒྱན་པ། བཞད་པ་དང༌། ཁྲོ་བ་དང༌། སྒེག་པའི་ཞལ་ཅན། ན་བཟའ་དམར་པོ་བསྣམས་པ། གཙིགས་ཤིང་བཞད་པ། གཡས་པའི་ཕྱག་ན་ཁ་ཊྭཱཾ་ག་དང་དགྲ་སྟ་དང༌། རྡོ་རྗེ་འཛིན་པ། གཡོན་པ་ན་དྲིལ་བུ་དང༌། ལྟུང་བཟེད་དང༌། རལ་གྲི་འཛིན་པ། འོད་ཟེར་འབར་བའི་ཕྲེང་བ་ཅན། རང་བཞིན་གྱི་རྡོ་རྗེ་སེམས་དཔའ་ལ་འཁྱུད་པར་
༄། །བསྒོམ་མོ། །དེ་ནས་ཨོཾ་ཨུདྦྷ་བོ་ཨ་ཧཾ་ཨཱ་ཨཱ་ཨཱ་ཨོཾ་ཧཱུཾ་སྭཱ་ཧཱ། ཞེས་བརྗོད་དོ། །ཨོཾ་ཡོ་ག་ཤུདྡྷཿསརྦ་དྷརྨཱ་ཡོ་ག་ཤུདྡྷོ྅ཧཾ། རྡོ་རྗེ་གསོར་ལ། ཨོཾ་ཛྙཱ་ན་ཀ་ཡོ་ཨ་ཧཾ་ཞེས་ང་རྒྱལ་བྱའོ། །དེ་ནས་ལག་པ་གཡོན་པའི་མཐེའུ་ཆུང་དང༌། མཐེ་བོང་སྦྱར་ཏེ། ལྷག་མ་བརྐྱང་ལ་བ་དན་གསུམ་པའི་ཕྱག་རྒྱས། སུཾ་ཀྵུཾ་ཡུཾ་ཧཱུཾ། ལྕེ་དང༌། སྤྱི་བོ་དང༌། རྣ་བ་དང༌། སྣ་དང༌། མིག་ཏུའོ། །སྨྲྱུཾ་ཧྨྲྱུཾ་ཡྨྲྱུཾ་ཀྵྨྲྱུཾ་མགྲིན་པ་དང༌། དཔུང་པ་དང༌། སྙིང་ག་དང༌། ལྟེ་བ་རུ་ཡི་གེ་བརྗོད་ཅིང་བྱིན་གྱིས་བརླབ་པར་བྱའོ། །ཨོཾ་བཛྲ་ཀཱ་ཡ་ཧོ། ཨོཾ་བཛྲ་བཱ་ཀྱེ་ཨཱཿ། ཨོཾ་བཛྲ་ཙིཏྟ་ཧཱུཾ་ཞེས་པས་ལུས་ལ་སོགས་པ་བྱིན་གྱིས་བརླབ་པོ། །ཨོཾ་ས་མ་ཡོ྅ཧཾ། ཧཱུཾ་ཧཱུཾ། ས་མ་ཡ་སྟྭཾ། ཨ་དྷི་ཏིཥྛ་མཾ། ཞེས་པ་ལག་པ་གཉིས་པའི་མཐེ་བོང་དང༌། མཐེའུ་ཆུང་སྤྱར་ལ་ལྕགས་སྒྲོག་ལྟར་བྱས་ལ། ལྷག་མ་གསུམ་བརྐྱང་སྟེ་གུང་མོ་ཁབ་ལྟར་བྱས་ལ། སྙིང་ག་དང༌། མཛོད་སྤུ་དང༌། སྤྱི་བོ་དང༌། མགྲིན་པ་རུ་བྱིན་གྱིས་བརླབ་པོ། །ཨོཾ་ཧཱུཾ་ཨཱཿསྭཱ་ཧཱ། རྡོ་རྗེ་བཅིངས་ཏེ། མཛུབ་མོ་དང་གུང་མོ་གཉིས་ཀ་བརྐྱང་སྟེ། གུང་མོ་ཁབ་ལྟར་བྱས་ལ་མཛུབ་མོ་གཉིས་ཀྱིས་མནན་ཏེ། སྤྱི་བོ་ལ་སོགས་པའི་གནས་ལྔར་གཞག་པར་བྱའོ། །རྣམ་པར་སྣང་མཛད་དང༌། མི་བསྐྱོད་པ་དང༌། རིན་ཆེན་འབྱུང་ལྡན་དང༌། འོད་དཔག་མེད་དང། ལས་ཀྱི་མགོན་པོ་རྣམས། དཀར་པོ་དང༌། སྔོན་པོ་དང༌། སེར་པོ་དང༌། དམར་པོ་དང༌། ལྗང་གུའི་སྐུ་མདོག་གོ །བྱང་ཆུབ་མཆོག་དང༌། ས་གནོན་དང༌། མཆོག་སྦྱིན་དང༌། ཏིང་ངེ་འཛིན་དང༌། སྐྱབས་སྦྱིན་གྱི་ཚུལ་གྱིས་མངོན་དུ་བཞུགས་པ་རིམ་པ་ཇི་ལྟ་བ་བཞིན་དུ་བསྒོམ་པར་བྱས་ལ། ཨོཾ་ཧཱུཾ་སྭཱ་ཧཱ། ཞེས་པས་རྡོ་རྗེ་དང༌། ཨོཾ་ཧྲཱི་སྭཱ་ཧཱ། ཞེས་པས་དྲིལ་བུ་བཟུང་བས་ང་རྒྱལ་དང་བཅས་པས་དཀྲོལ་བར་བྱའོ། །ཚངས་པའི་གཙུག་གི་ནོར་བུའི་འོད་ཀྱིས་ཞབས་གཉིས་སྣང་བར་མཛད། །སྐུ་ལ་ཤིན་ཏུ་དམ་དུ་འཁྱུད་པའི་དྲིལ་བུ་ལས་བྱུང་སྐུ་འཛིན་པ། །གཡོ་ཞིང་འཕྲོས་པར་བསྐྱོད་པའི་གསང་བ་ལས་བྱུང་པདྨ་གཉིས། །དེ་འདི་རྡོ་རྗེ་སེམས་དཔའ་མཆོག་གི་དབང་ཕྱུག་དམ་པ་མཆོག་གི་གནས། །ཞེས་བརྗོད་ལ། མཆོད་པ་ཐམས་ཅད་ཀྱི་བདག་ཉིད་ཀྱིས་མངོན་པར་མཆོད་པར་བྱའོ། །དེའི་རྗེས་ལ། ཡུཾ་ཀྵུཾ་སུཾ་ཧཱུཾ་གི་ས་བོན་ལས་རླུང་དང༌། མེ་དང༌། ཆུ་དང༌། སའི་
༄། །དཀྱིལ་འཁོར་ཟླ་བ་ཕྱེད་པ་དང༌། གྲུ་གསུམ་པ་དང༌། ཟླུམ་པོ་དང༌། གྲུ་བཞིའི་རྣམ་པ་རིམ་བཞིན་དུ་བསྒོམ་པར་བྱའོ། །དེའི་སྟེང་དུ། ཧཱུཾ་སུཾ་ཧཱུཾ། ཞེས་པས་རི་རབ་བསམ་པར་བྱས་ལ། ཨོཾ་ཧཱུཾ་སྭཱ་ཧཱ། ཞེས་པས་རྡོ་རྗེ་ལག་པར་བརྐྱང་སྟེ། གནས་ལྔར་བརྡབས་པས་རིན་ཆེན་བདུན་གྱི་རང་བཞིན་གྱི་གཞལ་ཡས་ཁང་བསྒོམ་པར་བྱའོ། །དེའི་དབུས་སུ་ཟླ་བའི་དཀྱིལ་འཁོར་སེང་གེའི་གདན་ལྔས་ཉེ་བར་སྤྲས་པ། གདུགས་དཀར་པོ་དང་ཡང་དག་པར་ལྡན་པར་བལྟའོ། །དབུས་ཀྱི་སེང་གེའི་གདན་ལ་པདྨ་བྱིན་གྱིས་བརླབས་པ་ལ། ཉི་མའི་དཀྱིལ་འཁོར་ལ་ཧཱུཾ་གིས་མཚན་པ། དེ་ལས་རྡོ་རྗེ་དེ་ལ་ཡང་ཧཱུཾ་གི་རྣམ་པ། དེ་ལས་གོང་དུ་གསུངས་པའི་ཡེ་ཤེས་མཁའ་འགྲོ་མའི་གཟུགས་བསམ་པར་བྱའོ། །དེ་ནས་རང་གི་ཟླ་བའི་དཀྱིལ་འཁོར་ལ་འོག་ནས་འབྱུང་བའི་འཁོར་ལོ་རིམ་པར་བསམ་པར་བྱས་ལ། སོ་སོར་དབུགས་ལས་འབྱུང་བར་བསམ་མོ། །ཧཱུཾ་ཞེས་པས་ཡེ་ཤེས་མཁའ་འགྲོ་མ་ཕྱུང་སྟེ། སེམས་ཅན་ཐམས་ཅད་ཀྱི་དོན་བྱས་ནས་སླར་འོངས་ཏེ། དབུས་སུ་གནས་པ་བསམ་པར་བྱའོ། །སུཾ་གྱིས་རྡོ་རྗེ་མཁའ་འགྲོ་མ། །ཀྵུཾ་གིས་དྲག་མོ་མཁའ་འགྲོ་མ། །ཡུཾ་གྱིས་རོ་ལངས་མཁའ་འགྲོ་མ། །ཧཱུཾ་གིས་གཏུམ་མོའི་མཁའ་འགྲོ་མ། དེ་རྣམས་དབུགས་ལས་ཕྱུང་སྟེ། སེམས་ཅན་གྱི་དོན་བྱས་ནས། ཡེ་ཤེས་དབང་ཕྱུག་མའི་མདུན་དང༌། གཡོན་དང༌། རྒྱབ་དང༌། གཡས་ཕྱོགས་སུ་རིམ་པ་བཞིན་དུ་དགོད་པར་བྱའོ། །དཀར་པོ་དང༌། སེར་པོ་དང༌། དམར་པོ་དང༌། ནག་པོའི་སྐུ་མདོག་གོ །ཁ་ཊྭཱཾ་ག་ངང་རྣལ་འབྱོར་གྱི་སྣོད་འཛིན་པ། ཉི་མའི་དཀྱིལ་འཁོར་དང་པདྨའི་གདན་ལ་སེམས་དཔའི་སྐྱིལ་ཀྲུང་གིས་ཉེ་བར་བཞུགས་པའོ། །སྤྱན་གསུམ་པ། སྐྲ་གྲོལ་བ། ན་བཟའ་དམར་པོ་བསྣམས་པ། སྤྲུལ་གྱི་རྒྱན་གྱིས་བརྒྱན་པར་བྱའོ། །སྨྲཾ་གིས་སེང་གེ་མའོ། །ཧྨྲྱུཾ་གིས་སྟག་མོ་ལའོ། །ཡྨྲྱུཾ་གིས་ཅེ་སྦྱང་མའོ། །ཡྨྲྱུཾ་ཞེས་པས་འུག་པ་མའོ། །རིམ་པ་བཞིན་དུ་དབང་ལྡན་དང༌། མེ་དང༌། བདེན་བྲལ་དང༌། རླུང་དུ་གླང་པོ་ཆེའི་གདན་དང༌། མ་ཧེའི་གདན་དང༌། ཀླུའི་གདན་ལ་དཀར་ཞིང་སེར་བ་དང༌། དཀར་ཞིང་སྔོ་བ་དང༌། སྔོ་ཞིང་དམར་བ་དང༌། དམར་ཞིང་སེར་བའི་སྐུ་མདོག་དང་གཡོན་སྡིགས་མཛུབ་དང༌། ཞགས་པ་
༄། །གཡས་པའི་ཕྱག་ན་རྡོ་རྗེ་དང་ལྕགས་ཀྱུ། སེམས་དཔའི་སྐྱིལ་མོ་ཀྲུང་གིས་བཞུགས་པའོ། །མཁའ་འགྲོ་མ་ཕུཾ། འབར་བྱེད་མ་ཕེཾ། འཇིབ་བྱེད་མ་ཕྲོཾ། འཕྲོག་བྱེད་མ་ཕྲིཾ་ཞེས་པ་ཤར་དང༌། བྱང་དང༌། ནུབ་དང༌། ལྷོ་ཕྱོགས་ཀྱི་སྒོ་བཞིར་རོའི་གདན་ལ་བཞུགས་སོ། །ལག་པ་གཉིས་ཁར་བཅུག་ནས་རབ་ཏུ་དགོད་པ་དང༌། ཐལ་མོ་སྤྱི་བོར་འཛིན་པ་དང༌། སྐུད་པ་དམར་པོ་ལྟར་སྙིམ་པས་ཁྲག་འཐུང་བ་དང༌། སྙིང་གར་གནས་པའི་སྡིགས་མཛུབ་དང་གཏུན་ཤིང་འཛིན་པའོ། །ཐམས་ཅད་ཀྱང་སྤྱན་གསུམ་པ། འབར་བའི་ཕྲེང་བ་ཅན་དབུ་སྐྲ་གྲོལ་བ། དཀར་པོ་དང༌། སེར་པོ་དང༌། དམར་པོ་དང༌། ལྗང་གུའི་མདོག་ཏུ་འདུག་པའོ། །དེ་ལྟར་དཀྱིལ་འཁོར་གྱི་འཁོར་ལོ་རྣམས་བསྒོམས་ལ། རྡོ་རྗེ་ཁུ་ཚུར་གཉིས་བཅིངས་ཏེ། །གཡོན་པ་སྙིང་གར་བཞག་སྟེ། གཡས་པ་ལག་པ་གཡོན་པའི་མཆན་ཁུང་དུ་བཅུག་སྟེ། ཨོཾ་ཧཱུཾ་སྭཱ་ཧཱ། ཞེས་དམ་ཚིག་གི་ཕྱག་རྒྱ་བསྟན་པར་བྱའོ། །ཨོཾ་ཨ་སྭཱ་ཧཱ། ཨོཾ་ཨཱ་སྭཱ་ཧཱ། ཨོཾ་ཨཱཿསྭཱ་ཧཱ། ཨོཾ་ཨཾ་སྭཱ་ཧཱ། འདི་ནི་རྩ་བའི་སྔགས་སོ། །རྡོ་རྗེ་ཁུ་ཚུར་གཉིས་བཅིངས་ཏེ། དབུ་མ་བརྐྱང་ནས་རྩེ་སྤྲད་པར་བྱས་པ་ནི་ཡེ་ཤེས་ལྷ་མོའི་རྩ་བའི་ཕྱག་རྒྱའོ། །རྡོ་རྗེ་བཅིངས་ནས་མཐེ་བོང་དང་དབུ་མ་སྤྲད་པ་ནི་རྡོ་རྗེ་ལྷ་མོའི་ཕྱག་རྒྱའོ། །དེ་ཉིད་ལས་མཐེ་བོར་ཕྱི་རོལ་དུ་བརྐྱང་བར་བྱས་པ་ནི། དྲག་མོ་ལྷ་མོའི་རྩ་བའི་ཕྱག་རྒྱའོ། །དེ་ཉིད་ལས་མཐེ་ཆུང་གཉིས་བརྐྱང་བ་ནི་རོ་ལངས་མའི་རྩ་བའི་ཕྱག་རྒྱའོ། །དེ་ཉིད་ལས་དབུ་མ་བརྐྱང་བ་ནི་གཏུམ་མོའི་རྩ་བའི་ཕྱག་རྒྱའོ། །དེ་རྣམས་ཀྱི་སྔགས་ནི་རིམ་པ་ཇི་ལྟ་བ་བཞིན་དུ་ཤེས་པར་བྱའོ། །ཨོཾ་རི་སྭཱ་ཧཱ། ཨོཾ་རཱྀ་སྭཱ་ཧཱ། ཨོཾ་ལི་སྭཱ་ཧཱ། ཨོཾ་ལཱྀ་སྭཱ་ཧཱ། དབང་ལྡན་གྱི་སེང་གེ་མ་ལ་སོགས་པའི་རྩ་བའི་སྔགས་སོ། །རྡོ་རྗེ་ཁུ་ཚུར་གཉིས་བཅིངས་ཏེ། སྡིགས་མཛུབ་བརྐྱང་བ་རྩེ་མོ་སྤྲད་པར་བྱས་པ་ནི། མཚམས་ཀྱི་ལྷ་མོ་བཞིའི་ཕྱག་རྒྱའོ། །ཨོཾ་ཕུཾ་སྭཱ་ཧཱ། ཨོཾ་ཕེཾ་སྭཱ་ཧཱ། ཨོཾ་ཕྲིཾ་སྭཱ་ཧཱ། ཨོཾ་ཕྲིཾ་སྭཱ་ཧཱ། སྒོ་སྐྱོང་རྣམས་ཀྱི་རྩ་བའི་སྔགས་སོ། །རིམ་པ་དེ་བཞིན་དུ་རྩ་བའི་སྔགས་ཀྱི་ཕྱག་རྒྱ་ནི། ལག་པ་གཉིས་ཁར་བཅུག་ནས་ཧ་ཧ་ཞེས་བརྗོད་པ་དང༌། སྤྱི་བོར་ཐལ་མོ་སྦྱོར་བ་དང༌། ལག་པ་སྦྱར་ཏེ་ཁ་དབྱེ་བར་བྱས་པ་གསང་
༄། །བའི་གནས་སུ་བཞག་པ་སྟེ། ཧཱུཾ་ཧཱུཾ་ཞེས་བརྗོད་པ་དང༌། ལག་པ་བསྐོར་ཞིང་སོར་མོ་སྤྲད་ལ་གསང་བའི་གནས་སུ་བཞག་ལ། སྔོན་དུ་གསུངས་པའི་མཆོད་པ་རྣམ་པ་ལྔའི་སྔགས་དང༌། ཕྱག་རྒྱས་ཕྱི་རོལ་དུ་མཆོད་པ་རྒྱས་པས་མཆོད་པར་བྱས་ཏེ། གོང་ནས་གསུངས་པའི་སྔགས་དང༌། ཕྱག་རྒྱ་རྡོ་རྗེ་དྲིལ་བུ་བླངས་ལ། རྡོ་རྗེ་གསོར་ཞིང་ཚིགས་བཅད་འདི་བརྗོད་པར་བྱའོ། །རྡོ་རྗེ་གསོར་བའི་གཟི་བརྗིད་ཀྱིས། །སེམས་ཅན་ཐམས་ཅད་རྣམ་ཐར་བྱེད། །ཆོས་ཀྱི་བྱེ་བྲག་གྲོལ་བ་ཡིས། །རྡོ་རྗེ་སྙིང་པོ་བཟུང་བའོ། །ཞེས་པས་རྡོ་རྗེ་བླངས་ཏེ། མཐེའུ་ཆུང་ལྕགས་སྒྲོག་ཏུ་བྱས་ཏེ། རྒྱབ་དང་རྒྱབ་ཏུ་སྦྱར་ལ་སྡིགས་མཛུབ་གཉིས་བསྒྲེང་སྟེ། ཨོཾ་བཛྲ་གྷནྜེ་ར་ཎི་ཏ་པྲ་ར་ཎི་ཏ་སརྦ་བུདྡྷ་པྲ་ཙ་ལི་ཏེ་པྲ་ཛྙཱ་པཱ་ར་མི་ཏཱ་ན་ད་སྭ་བྷཱ་ཝེ་ན། སརྦ་བུདྡྷ་ཧྲྀ་ད་ཡཱ་ཨ་ཝ་ཏོ་ཥ་ནི་ཧཱུཾ་ཧཱུཾ་ཧཱུཾ་ཧོ་ཧོ་ཧོ་སྭཱ་ཧཱ། ཞེས་པས་དྲིལ་བུ་བླངས་ཏེ། དེ་ནས་དྲིལ་བུ་གསིལ་ལ། ཧཱུཾ་གི་གླུ་ཡི་རྣམ་པ་ཡི། །བདེ་བའི་ཐུགས་ལྡན་རྡོ་རྗེ་ཅན། །བདག་གི་མིག་གིས་དེ་མཐོང་ངོ༌། །ཡི་གེ་དངོས་པོའི་རང་བཞིན་ནི། །སྟོང་པས་རྒྱས་པ་དེ་ཡིན་ནོ། །དངོས་དང་དངོས་མེད་ལས་གྲོལ་བའི། །དབུས་ནི་རྣམ་པར་ཤེས་བྱས་ཏེ། །ཡི་གེ་ཐམས་ཅད་འཇོམས་བྱས་ནས། །འདིས་ནི་ཤིན་ཏུ་བསམ་པ་ནི། །ཕན་ཚུན་འཁྱུད་ནས་སྦྱོར་བ་ལས། །འགྱིང་བག་ཏུ་ནི་འདི་བྱའོ། །གཉིས་མེད་ཆོས་ནི་རྙེད་གྱུར་ན། །མྱ་ངན་ལས་འདས་འདི་ཐོབ་བོ། །འཁོར་བའི་བདེ་བ་རྨོངས་ན། །དེ་ནི་མྱ་ངན་ལས་འདས་པ། །རང་བཞིན་ཀུན་གྱི་རྣལ་འབྱོར་མ། །གར་བྱེད་སྨྱོ་བ་བཞིན་དུ་འདི། །རྣལ་འབྱོར་མ་ལྔ་སངས་རྒྱས་ཏེ། །དེ་ནི་དེ་བཞིན་ཉིད་དུ་བརྟག །སྣ་ཆོགས་མང་དུ་གཟུགས་སྤྲུལ་པ། །སེམས་ཅན་རྣམ་པར་སྨིན་བྱེད་དེས། །འཁོར་བ་བདེ་བའི་དོན་བྱེད་དེ། །ཆོས་ཉིད་འདི་ལ་མ་རྨོངས་ན། །རྣལ་འབྱོར་མ་ཡི་ཐར་པ་འདི། །ཆོས་ཀྱི་སྙིང་པོ་ཕྱག་འཚལ་ལོ། །སེམས་ཅན་གྲོལ་མཛད་རྣལ་འབྱོར་བདག་ལ་བསྟོད་ཕྱག་འཚལ། །ཀུན་ཏུ་བདག་ཉིད་ངོ་བོ་གཅིག་ལ་བསྟོད་ཕྱག་འཚལ། །འཁོར་བའི་རྒྱ་མཚོ་རྨོངས་པ་གཅོད་ལ་བསྟོད་ཕྱག་འཚལ། །བདག་གིས་རྟག་ཏུ་དེ་བཞིན་ཉིད་གཅིག་བསྟོད་ཕྱག་འཚལ། །དེའི་རྗེས་
༄། །ལ་གཏོར་མའི་སྣོད་བཟའ་བ་མཐའ་དག་གིས་ལྡན་པར་བྱས་ཏེ། ཉ་ཤ་རློན་པ་དང༌། ཤ་ཡང་དག་པར་ལྡན་པའི་བདུད་རྩི་ལྔ་དང་ལྕགས་ཀྱུ་ལྔ་ལྷན་ཅིག་པ་མདུན་དུ་བཞག་སྟེ། རྡོ་རྗེ་ལག་པས་རེག་ལ། ལྷ་མོ་ཀུན་གྱི་རྩ་བའི་སྔགས་ཀྱིས་སོ་སོར་ཞི་བའི་ལས་ལ་སོགས་པ་ལ་བརྒྱ་ཕྲག་གཅིག་ལྷག་པའི་གྲངས་ཀྱིས་བྱིན་གྱིས་བརླབ་པར་བྱའོ། །དེ་ནས་ཇི་ལྟར་འབྱོར་པའི་མཆོད་པས་མཆོད་པར་བྱ་སྟེ། ཨོཾ་གྷུ་སྭཱ་ཧཱ། ཞེས་པས་རྩ་བའི་སྔགས་དང་ལྡན་པས་གཏོར་མའི་ཕྱག་རྒྱས་གཏོར་མ་དབུལ་བར་བྱའོ། །དེ་ནས་ཨཱ་ལི་དབུལ་བར་བྱ་སྟེ། དེ་ལ་རིམ་པ་ནི་འདིའོ། །པདྨའི་ལག་སྐོར་སྔོན་དུ་འགྲོ་བས་གཡས་པར་པདྨ་ལ་གནས་པའི་སྣོད་བསམ་པར་བྱའོ། །གཡོན་པ་རྡོ་རྗེ་འཕྱར་བ་སྟེང་དུ་བཟུང་ལ། ཨོཾ་ཧ་ཧོཿ་ཧྲཱིཿ་སྭཱ་ཧཱ། ཞེས་པ་སྔོན་དུ་ཕྱག་རྒྱ་ཆེན་པོ་བསྟན་པར་བྱའོ། །གཡས་པར་རྣལ་འབྱོར་གྱི་སྣོད་ཨཱ་ལིས་བཀང་བ་བཟུང་ལ། གཡོན་པའི་ལག་མཐིལ་ལ་སཾ་གི་རྣམ་པ་དཀར་པོ་ལ། ཨཱ་ལིའི་རྣམ་པ་བཅུ་དྲུག་གིས་ཡོངས་སུ་བསྐོར་བར་བསམས་ལ། སྣོད་ལ་དགབ་པར་བྱས་ལ་བདུད་རྩིའི་རང་བཞིན་དུ། ཨཱ་ལི་བལྟ་བར་བྱའོ། །ཧཱུཾ་གི་རྣམ་པས་མཐེ་བོང་ས་གཞིར་བྱས་པ་སྲིན་ལག་ལ་སུཾ་གི་རྣམ་པར་ལྡན་པས་རི་རབ་ཏུ་བསམས་ལ་བསྲུང་བར་བྱའོ། །མགྲིན་པར་མཆོད་རྟེན་རྣམ་པར་བསྒོམས་ལ། ཐིགས་གཏོར་གསུམ་དབུལ་ལོ། །སྐུ་དང་གསུང་དང་ཐུགས་ལ་གསུམ་གསུམ་དབུལ་ལོ། །རྣལ་འབྱོར་མ་རྣམས་ཐམས་ཅད་ལ། ཐིགས་གཏོར་གསུམ་དབུལ་ལོ། །པི་ཙི་ཨ་སོ་ཧི་ཨ། དྷ་མ་མུ་ན་སྟི་སཾ་བྷ་བ་ན་མེ་ལུ། བྲཧྨ་ན་ཀུཀྐུ་ར་ཙཎྜ་ལུ་ཨེཀྐུ་སཧཱ་བེཧྑ་དྪུ་ཞེས་བརྗོད་ནས། ཨོཾ་ཧ་ཧོཿཧྲཱིཿཞེས་བརྗོད་པས་དབུལ་བར་བྱའོ། །ཨོཾ་བྷཀྵ་བྷཀྵ་སརྦ་ཡོ་གཱི་ཤྭ་ར་ཧཱུཾ་ཧཱུཾ་ཧཱུཾ་ཛུཾ་སྭཱ་ཧཱ། རྡོ་རྗེ་ཁུ་ཚུར་གཉིས་བྱས་ལ། རྒྱབ་དང་རྒྱབ་ཏུ་སྦྱར་བར་བྱ། །སྲིན་ལག་གཉིས་དང་ཁྲོ་བོ་གཉིས། །ལྕགས་སྒྲོག་དག་གི་རྣམ་པར་བྱ། །གཏོར་མ་དང༌། ཨཱ་ལིའི་མཆོད་པ་གཟུང་བར་བྱའོ། །ཇི་ལྟར་བདེ་བ་ཞེས་བརྗོད་པར་བྱའོ། །མཆོད་པ་རབ་འབྱམ་ཐམས་ཅད་ཀྱིས་མཆོད་ལ་བསྟོད་པ་ཡང་བྱ་སྟེ། ཨོཾ་སྲབྷཱ་བ་ཤུདྡྷཿ་སརྦ་དྷརྨཱཿ་སྭབྷཱ་པ་ཤུདྡྷོ྅ཧཾ། བཛྲ་ཤུདྡྷཿ་
༄། །སརྦ་དྷརྨཱ་བཛྲ་ཤུདྡྷོ྅ཧཾ། ཡོ་ག་ཤུདྡྷཿ་སརྦ་དྷརྨཱ་ཡོ་ག་ཤུདྡྷོ྅ཧཾ། ཞེས་རྡོ་རྗེ་ཐལ་མོ་སྙིང་གར་བཞག་སྟེ་བཟླས་པར་བྱའོ། །དེ་ནས་དཀྱིལ་འཁོར་གྱི་ཕྱི་རོལ་དུ་གྲུ་གསུམ་དཀྱིལ་འཁོར་དམར་པོའི་མཐར། ལྔ་པ་ལྔའི་ཕྱི་རོལ་གྱི་ལྷ་ཉིད་ཕྱོགས་བརྒྱད་དུ་བསྒོམ་པར་བྱའོ།། རོའི་གདན་ལ་གནས་པ་མཁའ་འགྲོ་དང༌། གཏུམ་མོ་ལྔ་རྩེ་གསུམ་དང༌། ཐོད་པ་འཛིན་པ་ནག་པོ་དྲག་པོ་དྲག་ཆེན་པོ་ལ་སོགས་པ་དང༌། ཙ་མུཎྜི་ལ་སོགས་པ་ཡང་གཡས་ཀྱི་ཕྱག་ན་ཐོད་པ་བསྒོམ་པར་བྱའོ། །རྡོ་རྗེ་ཁུ་ཚུར་གཉིས་བཅིངས་ཏེ། རྒྱབ་དང་རྒྱབ་ཏུ་སྦྱར་བར་བྱ། མཐེ་ཆུང་གཉིས་ཀྱིས་དཀྲི་བར་བྱ། །སྡིགས་མཛུབ་གཉིས་ནི་བསྒྲེང་བར་བྱ། །སྡིགས་མཛུབ་གཡས་པར་སྤྱན་དྲང་ངོ༌། །ཨོཾ་ཀུ་རུ་ཀུ་རུ་ས་མ་ཡ་ཨ་དྷི་པ་ཏི་ཧཱུཾ་ཛཿསྭཱ་ཧཱ། ཞེས་པ་འདིས་དམར་པོ་ཉེ་བར་སྤྱོད་པས། མཆོད་པར་བྱ་ཞིང་མཆོད་པ་ཉི་ཤུ་པས་མཆོད་དོ། །ཧཱུཾ་གི་གླུའི་རྣམ་པ་བྱ་ཞིང་པདྨའི་ལག་བསྐོར་བྱ་ཞིང༌། སྒེག་མོ་ལ་སོགས་པ་དང༌། པི་ཝང་དང༌། གླིང་བུ་དང༌། སིལ་སྙན་དང༌། དུང་འབུད་པའི་ཚུལ་དང༌། པ་ཊ་ཧའི་ཚུལ་དང༌། རྫ་རྔའི་ཚུལ་དང༌། སྦྲང་ཡབ་ཀྱི་ཚུལ་དང༌། གར་གྱི་ཚུལ་དང༌། རྒྱལ་མཚན་གྱི་ཚུལ་དང༌། བླ་རེའི་ཚུལ་དང༌། བ་དན་གྱི་ཚུལ་དང༌། གདུགས་ཀྱི་ཚུལ་དང༌། ཁྲོ་བ་དང༌། སྒེག་པ་དང༌། འགྱུར་བ་དང༌། འཁྱུད་པ་དང༌། ཕྱག་འཚལ་བ་དང༌། དེ་རྣམས་ཀྱི་རྣམ་པའི་ཚུལ་གྱིས་མཆོད་པར་བྱའོ། །རྡོ་རྗེ་དྲིལ་བུ་བླངས་ལ་བསྟོད་པ་ཡང་བྱའོ། །རྣལ་འབྱོར་མ་ཐམས་ཅད་མཚན་མ་ཅི་རིགས་པར་ཀུན་ལ་བསྟན་པར་བྱའོ། །གཡོན་གྱི་གློར་གཏོར་མའི་སྣོད་བཞག་སྟེ། གཡས་པས་སྡིགས་མཛུབ་བསྒྲེང་ལ། གཡོན་པ་བ་དང་གསུམ་པའི་ཕྱག་རྒྱས་གཏོར་མའི་ཚིགས་བཅད་ལན་གསུམ་བརྗོད་ལ་བརྟན་པར་བསྔོ་བར་བྱའོ། །ཨོཾ་ཤིང་གཅིག་དང་ནི་དུར་ཁྲོད་དང༌། །རི་དང་བྲག་དང་ཕུག་གི་ས། །ཡུལ་གྱི་འདབ་དང་ལམ་དང་ཞིང༌། །ཁྱད་པར་དུ་ནི་ཁྱིམ་སྟོང་ལ། །སྣོད་དང་ཐང་དང་ས་སྟོང་ལ། །ཁྱད་པར་གདོལ་བའི་ཁྱིམ་གནས་པ། །ནག་པོ་དྲག་པོ་དྲག་ཆེན་པོ། །ལྷ་སྦྱིན་མཉམ་དུ་བསྟེན་པ་དང༌། །ནག་པོ་གཙིགས་བྱེད་འཇིགས་བྱེད་པ། །རྒ་ལས་འདས་པ་བགེགས་རྒྱལ་པོ། །རྒན་བྱེད་མ་དང་
༄། །དྲག་མོ་དང༌། །འཇིགས་བྱེད་མ་དང་ཨུ་མས་བསྟོད། །རྒྱལ་མོ་རྣམ་པར་རྒྱལ་མོ་དང༌། །ཐུབ་ཆེན་གཞན་གྱིས་མི་ཐུབ་མ། །ནག་མོ་བཟང་མོ་ནག་ཆེན་མོ། །ནག་སྤོམ་མ་དང་རྣལ་འབྱོར་མ། །དབང་མོ་དང་ནི་ཟླ་བ་མོ། །ནག་མོ་སྡང་བ་ལམྦ་ཀི །འཕྲོག་བྱེད་མ་དང་མར་མེ་མ། །འཇིགས་བྱེད་ཡུལ་གནས་རྣལ་འབྱོར་མ། །དྲག་མོའི་གཟུགས་དང་གཟུགས་ཆེན་མ། །མཆེ་བ་གཙིགས་མ་ཐོད་ཅན་མ། །ཐོད་ཕྲེང་ཕྲེང་བ་ཁ་ཊྭཱཾ་མ། །སྦྲུལ་ཆེན་རལ་གྲི་དགྲ་སྟ་ཅན། །རྡོ་རྗེ་དེ་བཞིན་གཞུ་ལག་དང༌། །ལྷ་ཡི་དབང་ཕྱུག་མ་རྣམས་ནི། །མཁའ་འགྲོ་ལྔ་ཡི་དེ་ཉིད་དང༌། །ལས་ཀུན་རྗེས་སུ་སྒྲུབ་བྱེད་པའི། །སྦྱོར་བའི་དཀྱིལ་འཁོར་རྒྱལ་ཆེན་མོ། །དེ་བཞིན་རྡོ་རྗེ་དབང་ཕྱུག་གཙོ། །དེ་བཞིན་གཤེགས་པའི་སྐུ་ཆེན་མོ། །གོས་མེད་སྦྱོར་བ་སྐྱེད་བྱེད་མ། །རྡོ་རྗེ་དབང་ཕྱུག་མ་བཀའ་ཡིས། །ཐམས་ཅད་ཐམས་ཅད་འདིར་སྤྱོན་ཅིག །ཨོཾ་ཀཀྐ་ཌྷ་ན། བབྦནྡྷ་ན། ཁ་ཁྑཱ་ད་ན། སརྦ་དུཥྚཱ་ན་ཧ་ན་ཧ་ན་གྷཱ་ཏ་ཡ་གྷཱ་ཏ་ཡ། ཨ་མུ་ཀ་སྱཱ། ཨི་དཾ་ཀ་ར་ཡ། སཱ་དྷ་ཡ། ཧཱུཾ་ཧཱུཾ་ཧཱུཾ་ཕཊ་ཕཊ་ཕཊ་ཛཿསྭཱ་ཧཱ། ཞེས་བརྗོད་པས་ཇི་ལྟང་ལས་ཀྱི་རྗེས་སུ་འབྲངས་ན་བསྐུལ་བར་བྱའོ། །དེའི་རྗེས་ལ་བདུད་རྩིས་ཁ་བཀང་སྟེ། འབར་བའི་ཕྱག་རྒྱ་བཅིངས་ལ་མངོན་པར་འདོད་པའི་དངོས་པོ་ཡིད་ལ་བྱ་སྟེ། ཁྱེད་ཀྱིས་ངེས་པར་སྔོན་དུ་དགོས་པར་གྱིས་ཤིག་ཅེས་སྦྱར་བར་བྱའོ། །ཁ་ཕྲུའི་རྣམ་པས་རྣལ་འབྱོར་མ་དེ་རྣམས་ཀྱིས་ཁ་བཀང་བར་བསྒོམ་པར་བྱའོ། །གོང་དུ་གསུངས་པའི་སྔགས་དང་ཕྱག་རྒྱས་གཟུང་བར་བྱ་སྟེ། ཨོཾ་སྭ་བྷཱ་བ་ཞེས་པ་ལ་སོགས་པ་བརྗོད་དོ། །མགོན་པོ་སངས་རྒྱས་ཐམས་ཅད་རྗེས་སུ་ཆགས་པའི་ཨཱ་ལི་ཀཱ་ལིའི་སྦྱོར་བ་བྱས་ཏེ། །བདེ་བ་ཆེན་པོ་གནས་སྐབས་སུ་གྱུར་པའི་བདུད་རྩི་ལྔས་བདག་ཉིད་མཆོད་པར་བྱའོ། །ཕན་ཚུན་འཁྱུད་པའི་སྦྱོར་ལྡན་པའི། །རྫུ་འཕྲུལ་གྱིས་ནི་བརྒྱན་པ་འདི། །མགོན་པོའི་ལུས་ལ་མཛེས་པའི་སྐུ། །དངོས་ལས་གྲོལ་ལ་བདག་ཕྱག་འཚལ། །ཧཱུཾ་ཧཱུཾ་ཧཱུཾ་དེ་ནི་དབྱངས་སོ། །དེ་ནས་རྡོ་རྗེ་དྲིལ་བུ་བླངས་ཏེ་གསིལ་ལ་བསྟོད་པ་བྱའོ། །དཔལ་ལྡན་སྐལ་བཟང་ཀུན་དུ་བཟང་པོ་ཆེན་པོ་དང༌། །མཉམ་མེད་ཡེ་ཤེས་ཀྱིས་གནས་དེ་བཞིན་གཤེགས་པ་མགོན་པོ་ཡིས། །ཕྱག་མཚན་
༄། །དྲུག་གིས་བརྒྱན་པའི་ཕྱག་ན་དྲི་མེད་སེམས་ཅན་དག །དཔལ་ལྡན་རྡོ་རྗེ་སེམས་དཔའ་ཁྱོད་ཀྱི་ཞབས་ཀྱི་པདྨར་འདུད། །དེ་ཡི་ཡན་ལག་དང་འབྲེལ་བདེ་བ་ཆེན་པོ་བྱང་ཆུབ་བརྙེས། །སྒེག་དང་ཁྲོ་དང་བཞད་པའི་དེ་ཁོ་ན་ཉིད་སྐུ། །ཨིནྡྲ་ནཱི་ལ་དང་མཚུངས་འབར་བའི་མཛེས་པའི་སྐུ། །དཔལ་ལྡན་ཡེ་ཤེས་མཁའ་འགྲོ་ཁྱོད་ཀྱི་ཞབས་ཀྱི་པདྨར་འདུད། །སངས་རྒྱས་ཀུན་གྱི་རིགས་ཉིད་ཆུ་ལས་བྱུང་བ་དག་པའི་སྐུ། །སྤྱན་དཀྱུས་རི་རབ་གསལ་ཞིང་སྙིང་རྗེ་རྒྱན་གྱིས་བརྒྱན། །ཁ་ཊྭཱཾ་ག་དང་བདུད་རྩིས་བཀང་བའི་ཐོད་པ་བསྣམས། །དཔལ་ལྡན་རྡོ་རྗེ་མཁའ་འགྲོ་མ་ཁྱོད་ཞབས་ཀྱི་པདྨར་འདུད། །འོད་ཀྱི་རང་བཞིན་ས་བོན་ནོར་བུའི་རིགས་ལས་བྱུང་བའི་དྲི་མེད་ལུས། །ཕྱག་གིས་ཁུ་ཚུར་དྲིས་ནི་ཁ་ཊྭཱཾ་ག་དང་པདྨའི་སྣོད། །དྲག་པོའི་ཆར་གྱི་རྒྱུན་དང་བྲལ་བས་ས་སྟེང་ཚིམ་མཛད་པའི། །དཔལ་ལྡན་དྲག་མོའི་མཁའ་འགྲོ་མ་ཁྱོད་ཞབས་ཀྱི་པདྨར་འདུད། །ཆུ་ལས་སྐྱེས་པ་བཞིན་དུ་དེ་ནི་དབུགས་ཀྱི་ཐིག་ལེའི་ངོ་བོ་ཉིད། །ཕྱག་མཚན་ཁ་ཊྭཱཾ་གིས་མཚན་པདྨའི་འདབ་མ་འཛིན་མཛོད་ཅིང༌། །སྐྱེ་བོ་རྨོངས་པའི་ཐེ་ཚོམ་ངེས་པར་སེལ་མཛད་པའི། །རོ་ལངས་མཁའ་འགྲོ་མ་ཁྱོད་ཞབས་ཀྱི་པདྨར་འདུད། །ལས་ཀྱི་རྗེས་སུ་བྱེད་པའི་མེ་ཡི་རང་བཞིན་རྣམ་པར་དག་པའི་ལུས། །ཁ་ཊྭཱཾ་གས་མཚན་པད་སྣོད་ཕྱག་གཉིས་མཚན། །ཤ་ཟ་གཏུམ་པོའི་ཚོགས་ཀུན་ཕྱེ་མར་རབ་ཏུ་རློག །གཏུམ་མོའི་མཁའ་འགྲོ་མ་ཁྱོད་ཞབས་ཀྱི་པདྨར་འདུད། །དཔལ་ཆེན་སེང་གེ་འུག་པ་མོ་ནི་མང་པོས་ཧཱུཾ་སྒྲོགས་ང་རོ་ཅན། །དཔལ་ལྡན་སྟག་མོ་ཅེ་སྤྱང་མོ་ཡང་སྐྱེ་བའི་རིམ་ནི་གདུག་པ་འཇོམས། །ཞགས་པ་ལྕགས་ཀྱུ་སྡིགས་མཛུབ་བསྣམས་པའི་ཕྱག །ཁྱེད་ཀྱི་པདྨའི་ཞབས་ལ་བདག་ནི་སྐྱབས་སུ་མཆི། །དཔལ་ལྡན་མཁའ་འགྲོ་རབ་མཆོག་འབར་བྱེད་འཇིབ་བྱེད་མ། །འཕྲོག་བྱེད་མ་ནི་རྟག་ཏུ་མཉམ་མེད་དངོས་གྲུབ་མི་ལ་སྟེར། །གདུལ་དཀའ་འདུལ་བར་མཛད་པའི་སེམས་ཀྱི་བདག་ཉིད་རྒྱལ། །ཁྱོད་ཀྱི་པདྨའི་ཞབས་ལ་ཕྱག་འཚལ་སྐྱབས་སུ་མཆི། །ཞེས་སོ། །དེའི་རྗེས་ལ་སྙིང་གར་ཐལ་མོ་བཞག་སྟེ། སྨོན་ལམ་གདབ་པར་བྱ་སྟེ། སེམས་ཅན་ཐམས་ཅད་སྐྱོན་
༄། །མེད་ཅིང༌། །སེམས་ཅན་ཐམས་ཅད་བདེ་གྱུར་ཅིག །གང་གིས་ལམ་ལ་འགྲོ་བ་ཡིས། །སངས་རྒྱས་ཉིད་དུ་འགྲུབ་གྱུར་ཅིག །མ་བསྒྲལ་བ་རྣམས་བསྒྲལ་བ་དང༌། །མ་གྲོལ་བ་རྣམས་བདག་གིས་དགྲོལ། །དེ་ལྟར་རྗེས་སུ་བརྩེ་བའི་ཕྱིར། །རྣལ་འབྱོར་གཙུག་ལ་བདག་གིས་བགྱི། །ཨོཾ་ཞེས་བརྗོད་ལ་།ཨོཾ་ཇི་ལྟ་སངས་རྒྱས་བཅོམ་ལྡན་འདས། །སེམས་ཅན་ཕན་པར་མཛད་པ་ལྟར། །སངས་རྒྱས་ཡུལ་དུ་གཤེགས་ནས་ཀྱང༌། །སླར་ཡང་ཡུལ་དུ་གཤེགས་སུ་གསོལ། །ཞེས་བརྗོད་ཅིང་གཡོན་པའི་རྡོ་རྗེ་ཁུ་ཚུར་བཅིངས་ཏེ། སྙིང་གར་བཞག་ལ་གཡས་པའི་ལག་པ་བརྐྱང་ལས་ལ་བཞག་སྟེ། ཨོཾ་ཨཱཏྨ་ཏིཥྛ་སྭཱ་ཧཱ། ཞེས་པས་གཤེགས་སུ་གསོལ་ལོ། །རང་གི་དབུགས་ཀྱིས་རང་གི་ལུས་ལ་ཐིམ་པར་བྱའོ། །ཡེ་ཤེས་མཁའ་འགྲོ་མ་ལ་སོགས་པའི་ལྷ་མོ་ནི། སྙིང་ག་དང༌། ལྕེ་དང༌། སྤྱི་བོ་དང༌། རྣ་བ་དང༌། མིག་ཏུ་རིམ་པ་ཇི་ལྟ་བ་བཞིན་དུ་ཞུགས་པར་བྱའོ། །སེང་གེ་མ་ལ་སོགས་པ་ནི་མགྲིན་པ་དང༌། དཔུང་པ་དང༌། སྙིང་ག་དང་ལྟེ་བར་རོ། །སྒོ་སྲུང་བཞིན་ནི་གཡས་དང༌། གཡོན་གྱི་བརླ་དང་རྗེ་དར་གཉིས་སུ་རིམ་པ་བཞིན་དུ། ཡི་གེའི་གཟུགས་སུ་བ་དན་གསུམ་པའི་ཕྱག་རྒྱ་དགོད་པར་བྱའོ། །ཨོཾ་སརྦ་དུཥྚ་གྲྀ་ཧྞ་གྲྀཧྞ་གྩྪ་ཧཱུཾ་ཕཊ། ཅེས་པས་སེ་གོལ་གསུམ་གྱིས་ཕྱིའི་ལྷ་གཤེགས་སུ་གསོལ། དེ་ནས་ཕྱི་དང་ནང་གི་མཆོད་པའི་བདག་ཉིད་མཆོད་པ་རྒྱས་པས་བདག་ཉིད་མཆོད་པར་བྱ་སྟེ། ལྷག་མའི་གཏོར་མ་ཉིད་དབུལ་བར་བྱའོ། །ཨོཾ་ཀུ་རུ་ཀུ་རུ་བཏྟཱ་ལི། མཧཱ་བཏྟཱ་ལི། དུར་ཁྲོད་བདག་མོ་དངོས་གྲུབ་ཞལ། །གཏུམ་མོ་གཙིགས་བྱེད་ཡི་དགས་ཁ། །དམ་ཚིག་བསྲུང་བ་ཁྲག་དགའ་མོ། །ཀཱ་ལིའི་སྒྲ་སྒྲོགས་སྦྱོར་ཟིན་མ། །དུར་ཁྲོད་རོ་ཡི་ཆལ་དབུས་ན། །ཚོགས་དང་ཕོ་ཉར་བཅས་པ་རུ། །གཙིགས་བྱེད་གཏུམ་མོ་དུང་སོལ་མ། །གསོལ་ཅིག་བཞེས་ཤིག་དམ་ཚིག་ལྷ། །གནས་ནས་གནས་སུ་མཛད་དུ་གསོལ། །བདག་གི་སེམས་ལ་ཅི་འདོད་པ། །དེ་ནི་ཁྱོད་ཀྱིས་གྲུབ་པར་གྱིས། །ཧཱུཾ་གྲྀ་ཧྞ་གྲྀ་ཧྞ་སརྦ་དུཥྚ་ནཱཾ་བྷཀྵ་བྷཀྵ་ཕྲོཾ་ཕྲོཾ་ཕྲིཾ་ཕཊ་སྭཱ་ཧཱ། ཞེས་པས་རྡོ་རྗེ་ཁུ་ཚུར་གཉིས་མཛུབ་མོ་གཉིས་མཆེ་བའི་ཚུལ་གྱིས་ཁའི་གྲྭར་བཞག་ལ་གཤེགས་སུ་
༄། །གསོལ་ལོ། །སྲང་ཀའི་དབུས་སུ་ཁས་བླུགས་པར་བྱའོ། །རྩ་བའི་གཏོར་མ་ལྷོ་ཕྱོགས་སུ་བཞི་མདོར་བླུགས་པར་བྱའོ། །ལྷའི་ང་རྒྱལ་གྱི་གཟུགས་ཀྱིས་གནས་པར་བྱའོ། །གཏོར་མའི་ཆོ་གའོ། །གོང་དུ་གསུངས་པའི་རིམ་པས་བདག་ཉིད་སྦྱོར་བ་ཐམས་ཅད་རྫོགས་པར་བྱ་སྟེ། །བདག་ཉིད་མཆོད་པར་བྱས་ལ། དང་པོ་བུམ་པའི་སྟ་གོན་དུ་གནས་པའི་རིམ་པ་བཞིན་དུ་བྱའོ། །གསེར་ལ་སོགས་པའི་བུམ་པར་རིན་པོ་ཆེ་ལྔ་དང་སྨན་དང་འོ་མ་དང་ལྷ་རྟེན་གྱི་ཆུས་བཀང་བ་ལ། པ་ལ་ཤས་ལྡན་པར་བྱའོ། །ལས་ཀྱི་རྗེས་སུ་འབྲངས་ཏེ་གཅིག་གམ་གསུམ་མམ་ལྔའམ། དགུའི་རིམ་པས་གྲངས་བཞིན་དུ་ཀུ་ཤའི་ཆུན་པོ་ལ་འཁོར་བཞིན་དུ་བྱས་པའི་སྟེང་མདུན་དུ་གཞག་པར་བྱའོ། །ཡེ་ཤེས་ཀྱི་ལྷ་མོ་ལ་སོགས་པའི་མིང་ལ་སོགས་པ་བསྒོམ་པར་བྱའོ། །ཇི་ལྟར་རང་གི་ཕྱག་རྒྱ་དང་སྔགས་ཀྱི་མཆོད་པ་ལྔས་ཉེ་བར་མཆོད་དེ། ཕྱག་བྱས་ལ་ཨོཾ་ཧཱུཾ་སྭཱ་ཧཱ། ཞེས་པ་ལ་སོགས་པས་བྱིན་གྱིས་བརླབ་པར་བྱའོ། །ཇི་ལྟར་གནས་པར་མདུན་དུ་གཞག་པར་བྱའོ། །དེ་ནས་ཨོཾ་ཧི་ལི་ཧི་ལི་ཀི་ལ་བེཏྟཱ་ལཱི་ཧཱུཾ་ཕཊ། ཞེས་པའི་ཆུས་ཀུན་ནས་བསང་གཏོར་བྱའོ། །ཨོཾ་ཤྲཱིཾ་སྭཱ་ཧཱ་མར་སྦྱང་བར་བྱའོ། །ཨོཾ་ཨོཾ་སྭཱ་ཧཱ། སྣོད་ལ་སོགས་པ་སྦྱང་བར་བྱའོ། །ཨོཾ་ཇིཾ་སྭཱ་ཧཱ་འབྲུ་སྦྱང་བར་བྱའོ། །ཨོཾ་ཀུ་རུ་ཀུ་རུ་སྭཱ་ཧཱ་འབྲུ་ལ་སོགས་པ་སྦྱངས་པའོ། །ཨོཾ་ཨ་སྭཱ་ཧཱ་ཡམ་ཤིང་སྦྱང་པའོ། །སོ་སོར་བརྒྱད་བརྒྱར་བཟླས་པར་བྱའོ། །རྡོ་རྗེ་ཁུ་ཚུར་བཅིངས་ཏེ། དབུ་མ་ཁབ་ལྟར་བྱས་པའི་ཕྱག་རྒྱས། ཨོཾ་ཧཱུཾ་སྭཱ་ཧཱ། ཞེས་པས་མེ་ཏོག་བླངས་ཏེ་དབུལ་བར་བྱའོ། །དེ་ནས་སྣོད་རྣམས་སུ་རྫས་བླུགས་ཏེ། གཡས་ཕྱོགས་སུ་སྲེག་རྫས། གཡོན་དུ་རྡོ་རྗེ་དང་དྲིལ་བུ་སྟོན་བཞིན་དུ་བསགས་ཏེ། གཏོར་མའི་སྣོད་དང་ཨརྒྷའི་སྣོད་གཞག་པར་བྱའོ། །ཀུ་ཤའི་མདུད་པ་དང་ལྷན་ཅིག་པས། བགེགས་ཉེ་བར་ཞི་བར་བྱེད་པའི་ཆུས། ཨོཾ་བཛྲ་ཡཀྵ་ཧཱུཾ་ཕཊ་སྭཱ་ཧཱ། ཞེས་པ་བཟླས་ལ་གཞག་པར་བྱའོ། །དེ་ནས་མདུན་དུ་ཉི་མའི་དཀྱིལ་འཁོར་དང༌། །སྣ་ཚོགས་པདྨ་ལ་གདུགས་དཀར་པོས་བརྒྱན་པ་དེར་ཧཱུཾ་ལས་རྡོ་རྗེ་རྩེ་ལྔ་པ་འབར་བའི་ཧཱུཾ་དེ་ཉིད་བལྟའོ། །དེ་ལས་དཔལ་ཡེ་ཤེས་མཁའ་འགྲོ་མ་བསྒོམ་པར་བྱའོ། །སེང་གེའི་གདན་
༄། །ལ་པདྨའི་སྟེང་ན་ཉི་མའི་དཀྱིལ་འཁོར་ལ། སེམས་དཔའི་སྐྱིལ་མོ་ཀྲུང་གིས་བཞུགས་པ། ཕྱག་གཉིས་པ་ལས་དང་རྗེས་སུ་མཐུན་པར་ཁ་དོག་རྒྱན་གྱིས་བརྒྱན་པ་གཡས་པ་རྡོ་རྗེ་གཡོན་པར་དྲིལ་བུ་བལྟ་བར་བྱའོ། །རང་གི་སྙིང་གར་ཧཱུཾ་བསམས་ལ་རང་གི་དབུགས་ལས་ཛྙཱ་ན་ཌཱ་ཀཱི་ཧཱུཾ་ཞེས་པས་ཕྱུང་སྟེ་གཅིག་ཏུ་གྱུར་ནས། ཨོཾ་ཧཱུཾ་སྭཱ་ཧཱ་ཞེས་པས་གཡས་ན་དབྱུག་པ་གཡོན་ན་ཐོད་པ་བསྣམས་པ། རྩ་བའི་ཕྱག་རྒྱ་བསྟན་པར་བྱའོ། །ཨོཾ་བཛྲ་པྲཱ་ཀ་ར་ཧཱུཾ་ཕཊ་ཅེས་པས་ལག་པ་གཡོན་པ་ཁ་ཕྱིར་བསྟན། གཡས་པ་ཁ་ནང་དུ་བསྟན་ཏེ་བརྐྱང་ལ་དབང་ལྡན་ནས་བསྐོར་བ་བྱ་བ་ནི་ར་བའི་སྔགས་དང་ཕྱག་རྒྱའོ། །ཨོཾ་ཛུཾ་སྭཱ་ཧཱ། ལག་པ་གཉིས་བརྐྱང་སྟེ། ཕན་ཚུན་བསྣོལ་བ་ནི་དྲ་བའི་སྔགས་དང་ཕྱག་རྒྱའོ། །ཨོཾ་བྲུཾ་སྭཱ་ཧཱ། ཞེས་གཡོན་པ་ཁུ་ཚུར་བཅངས་ཏེ་མཐེ་བོང་བརྐྱང་ནས་ས་ལ་བཙུགས་པ་ནི་ཕུར་བུའི་སྔགས་དང་ཕྱག་རྒྱའོ། །དེ་ནས་རིམ་པ་འདིས་མཆོད་པར་བྱ་སྟེ། ཨོཾ་བཛྲ་གནྡྷེ་སྭཱ་ཧཱ། དྲིའོ། །ཨོཾ་པུཥྤེ་མཱ་ལེ་ཧཱུཾ་སྭཱ་ཧཱ། མེ་ཏོག་གིའོ། །ཨོཾ་ཏཱི་ཀྵྞ་དཱི་པེ་ཧཱུཾ་སྭཱ་ཧཱ། མར་མེའིའོ། །ཨོཾ་དྷཱུ་པེ་ཤྭ་རི་ཧཱུཾ་སྭཱ་ཧཱ། བདུག་པ་དབུལ་བར་བྱའོ། །ཕྱག་རྒྱ་ནི་ལག་པ་གཡས་པ་ཕྱེད་བརྐྱང་བ་ནི་དྲིའི་ཕྱག་རྒྱའོ། །མཐེ་བོང་དང་མཛུབ་མོ་སྦྱར་བ་ནི་མེ་ཏོག་གི་ཕྱག་རྒྱའོ། །ཁུ་ཚུར་བཅངས་ལ་མཐེ་བོང་བསྒྲེང་བ་ནི་མར་མེའིའོ། །དེ་ཉིད་ལ་གུང་མོ་བསྒྲེང་བ་ནི་བདུག་པའིའོ། །དེ་ནས་བགེགས་བསྒྲང་པར་བྱའོ། །རྒྱས་པའི་གཏོར་མའི་མདུན་དུ་འབར་བའི་སྣོད་ཀྱི་མེ་བཞག་ལ། བདུད་རྩི་ཐབ་སྦྱོར་གྱི་སྔགས་ཁྲོ་བོ་དང་བཅས་པས་བཟླས་པར་བྱའོ།། གཡས་པས་སྡིགས་མཛུབ་བྱས་ལ་གཡོན་པས་ཚ་བའི་མར་ཁུ་བྱུག་པའི་ཡུངས་ཀར་ལྔས་ལག་པ་གཡས་པ་སྡིགས་མཛུབ་བཅས་གཡོན་པས་སྦྱིན་སྲེག་བྱའོ། །ཨོཾ་གྱིས་དབྱུང་ཞིང་བསྐྲད་པར་བྱའོ། །དེ་ནས་རྡོ་རྗེ་གནོད་སྦྱིན་བཟླས་པས་བགེགས་ཉེ་བར་ཞི་བར་བྱེད་པའི་ཆུས་བསང་གཏོར་བྱའོ། །སྔོན་བཞིན་དུ་རྡོ་རྗེ་ར་བ་ལ་སོགས་བ་ཡང་བྱས་ལ། དེའི་རྗེས་ལ་ཁྲུས་བརྩམས་པ་ནི་ལྷའི་ལུས་ལ་དྲི་ཞིམ་པའི་བྱེ་བྲག་གིས་ཁྲུས་ཀྱི་ཆོ་ག་བཞིན་དུ་དྲི་ཞིམ་པོ་དབུལ་བར་བྱའོ། །ཨོཾ་ཧཱུཾ་སུཾ་ཀྵུཾ་ཡུཾ་ཧཱུཾ་ཕཊ་སྭཱ་ཧཱ། ཞེས་པས་ལན་བདུན་དུ་བ་དན་གསུམ་པའི་ཕྱག་རྒྱས་རེག་
༄། །པར་བྱའོ། །དུང་དང་རྔའི་སྒྲ་དང་བཀྲ་ཤིས་ཀྱི་གླུ་སྣ་ཚོགས་པའི་དབྱངས་བླངས་ཤིང་དྲིལ་བུ་གསིལ་བར་བྱའོ། །བཀྲ་ཤིས་ཀྱི་ཚེགས་བཅད་བརྗོད་ཅིང་ཆུའི་རྒྱུན་སྦྲེང་བར་བྱའོ། །དྲི་ཞིམ་པོའི་མར་ཁུ་དང་དྲི་མ་མེད་པའི་ཆུ་དྲི་ཞིམ་པོ་དང༌། སྦྲང་རྩེ་དང༌། འོ་མ་དང༌། མེ་ཏོག་གི་ཆུས་རིམ་པས་ཁྲུས་བྱའོ། །ཁྲུས་བྱས་ནས་ཁྲུས་རས་བསལ་ལ་ལས་དང་རྗེས་སུ་མཐུན་པའི་རས་ཟུང་གཅིག་དབུལ་བར་བྱའོ། །རྡོ་རྗེ་ཁུ་ཚུར་གཉིས་བཅིངས་ཏེ་བཟུང་བ་ནི་ཆོས་གོས་ཀྱི་རྒྱའོ། །སྔགས་ནི་ཨོཾ་ཧཱུཾ་སྭཱ་ཧཱ། གོས་ཉེ་བར་དབུལ་བ་དང༌། རྒྱན་ལ་སོགས་བ་དང༌། མཆོད་པའི་ཚོགས་དང་སྒྲ་ཡང་རྣམ་པར་དབུལ་ལོ། །དེ་ནས་ཨོཾ་ཧ་ན་ཧ་ན་ཀྲོ་དྷ་ཧཱུཾ་ཕཊ། ལག་པ་གཡས་པ་བརྐྱང་སྟེ་ས་ལ་རེག་ནས་བརྡབས་པས་ས་སྦྱང་བར་བྱའོ། །ཐབ་ཁུང་གི་བྱང་དང་ཤར་དུ་རྩེ་མོ་བསྟན་ཏེ། བུད་ཤིང་བརྩིག་པར་བྱའོ། །ཨོཾ་བཛྲ་སཏྭ་ཨ། ཞེས་པས་ལན་བདུན་བདུན་དུ་ཀུ་ཤའི་ཆུན་པོ་ལ་བཟླས་ལ་ཐབ་ཁུང་ནས་རྩེ་མོ་ལ་རྩ་བ་སྦྱར་ཏེ་ཀུ་ཤ་དགྲམ་པར་བྱའོ། །དེ་ནས་གཙུབ་ཤིང་ལ་སོགས་པའི་མེ་སྦར་ལ་ཀུ་ཤའི་ཆུས་ལན་གསུམ་བསང་གཏོར་དང༌། མཆོད་པ་བྱས་ཏེ་ཐབ་ཁུང་དུ་གཞུག་པར་བྱའོ། །ཨོཾ་བཛྲ་ཡཀྵ་ཧཱུཾ་ཞེས་པས་ལན་བདུན་བཟླས་པའི་མར་གྱིས་སྦར་བར་བྱའོ། །ལྷག་མ་ཀུ་ཤའི་ཆུན་པོས་གདབ་པར་བྱའོ། །དེ་ནས་ཧཱུཾ་གིས་ཐབ་ཁུང་བསྐྱེད་ལ། ཨོཾ་གྱིས་པདྨ་དེའི་སྟེང་དུ་རཾ་གྱི་རྣམ་པ་ལས་མེའི་ལྷ་བསྒོམ་པ་ནི་པདྨ་ལ་གནས་པ། མདོག་སེར་སྐྱ། རལ་པ་དང་བཅས་པ་ཕྱག་གཉིས་ན་བགྲང་ཕྲེང་དང་གུནྡྷེ་བསྣམས་པ་འབར་བའི་ཕྲེང་བ་ཅན་རྒྱན་ཐམས་ཅད་ཀྱིས་བརྒྱན་པའོ། །དེ་ནས་མེའི་མཚམས་ནས་དེ་བཞིན་དུ་ཡེ་ཤེས་སེམས་དཔའ་རྣམ་པར་བསྒོམ་པར་བྱའོ། །ཨོཾ་ཨཱ་གཙྪ་ཨཱ་གཙྪ་ཨགྣེ་ཛཿ་ཧཱུཾ་སྭཱ་ཧཱ། ཞེས་པས་སོ། །ལག་པ་གཡས་པ་ཁུ་ཚུར་བཅངས་ཏེ་མཛུབ་མོ་དང་དབུ་མ་བསྒྲེང་ལ་དབུ་མའི་ཚིགས་སུ་སྡིགས་མཛུབ་གཉིས་ཀྱི་སོར་མོས་སྤྱན་དྲང་བར་བྱའོ། །དམ་ཚིག་སེམས་དཔའ་ལ་ཡེ་ཤེས་སེམས་དཔའ་གཞུག་པར་བྱའོ། །ཨོཾ་ཛུ་ཧུ་ཛུ་ཧུ་སྭཱ་ཧཱ། ཞེས་པས་དབུ་མིའི་རྩེ་མོ་འབྲེལ་བར་བྱས། པདྨའི་ཕྱག་རྒྱ་ནི་དམ་ཚིག་གི་ཕྱག་རྒྱའོ། །
༄། །ཨོཾ་པྲ་ཝ་ར་སཏྐཱ་ར་སྭཱ་ཧཱ། ཨོཾ་ཞེས་པས་ཞབས་བསིལ་དང་ཞལ་བསིལ་ཕུལ་བས། འདོད་པའི་དངོས་པོ་མཐའ་དག་གི་སཱ་ལི་ལ་སོགས་པས་ཡང་དག་པར་མཆོད་དེ། དྲིལ་བུ་དཀྲོལ་ཞིང་བསྟོད་པར་བྱའོ། །དེ་ནས་ཨོཾ་ཨིནྡྲཱ་ཡེ་སྭཱ་ཧཱ། ཨོཾ་ཡ་མཱ་ཡེ་སྭཱ་ཧཱ། ཨོཾ་བ་རུ་ཎཱ་ཡེ་སྭཱ་ཧཱ། ཨོཾ་བེ་ཤྲ་བ་ཎཱ་ཡེ་སྭཱ་ཧཱ། ཨོཾ་ཨ་གན་ཡེ་སྭཱ་ཧཱ། ཨོཾ་ནཻ་རྲྀ་ཏེ་ཡ་སྭཱ་ཧཱ། ཨོཾ་བ་ཡ་བེ་སྭཱ་ཧཱ། ཨོཾ་ཨཱི་ཤ་ནཱ་ཡ་སྭཱ་ཧཱ། ཨོཾ་ཙནྡྲ་ཨཱ་དི་ཏཱ་བྷྱཿསྭཱ་ཧཱ། ཨོཾ་སུཾ་བྷ་ནི་སུཾ་བྷ་བྷྱཾ་སྭཱ་ཧཱ། ཞེས་པས་ལྷ་བཤོས་ལ་སོགས་པའི་མཆོད་པ་རབ་འབྱམ་གྱིས་འཇིག་རྟེན་སྐྱོང་བ་མཆོད་པར་བྱའོ། །མེ་ལ་ཞལ་བསིལ་ཕུལ་ལ་མེ་ལྷའི་ལྕེ་དང༌། དགང་གཟར་གྱི་ཁར་ཧཱུཾ་གི་རྣམ་པར་བསམས་ལ། རང་གི་རྡོ་རྗེ་དང་དྲིལ་བུ་བླངས་ཏེ་ཇི་ལྟར་འདོད་པ་བཞིན་དུ་ཆུ་བྱིན་ལ་ཨོཾ་ཛུ་ཧུ་ཛུ་ཧུ་ས་སྭཱ་ཧཱ། ཞེས་པའི་རིམ་པ་འདིས་བསྲེག་པར་བྱས་ཏེ། ཡམ་ཤིང་གིས་ནི་རྒྱ་བརྟེན་གྱི་ཚུལ་དུའོ། །མར་ནི་ཞལ་དུའོ། །འབྲུ་ནི་ཕྱག་ཏུའོ། །འབྲས་ནི་ཞལ་དུའོ། །ཞོ་ཡང་ཞལ་དུའོ། །དཱུར་བ་དང༌། མེ་ཏོག་གི་སྤྱི་བོར་རོ། །ཞབས་བསིལ་ཕུལ་ཏེ་མཆོད་པ་ལ་སོགས་པ་ཕར་བར་དུ་བྱས་ཏེ་ལན་གསུམ་གསུམ་དུ་བསྲེག་པར་བྱའོ། །དགང་བླུགས་ཀྱང་དབུལ་ལོ། །དེ་ནས་ཀུ་ཤའི་ཆུས་ལན་གསུམ་བསང་གཏོར་བྱ་སྟེ། འབར་བར་ཐིམ་པར་བྱའོ། །ཨོཾ་ཧཱུཾ་ཊ་ཊི་ཊ་ཏ་ཞེས་བགེགས་ཉེ་བར་ཞི་བར་བྱེད་པའི་ཆུས་རྡོ་རྗེའི་ལག་པ་དང་བཅས་པས་མེའི་ཐབ་ཁུང་ཀུན་ནས་བསང་བར་བྱའོ། །དེ་ནས་གོང་དུ་གསུངས་པའི་མདུན་དུ་བསྒོམས་ལ། ཡེ་ཤེས་མཁའ་འགྲོ་མ་མེའི་དབུས་སུ་བསྒོམ་པར་བྱའོ། །སྟོན་མོ་བྱ་སྟེ། སྒེག་མོ་ལ་སོགས་པས་ཀྱང་མངོན་པར་མཆོད་དེ། ཞལ་བསིལ་བ་དང༌། ཞབས་བསིལ་ཕུལ་ཏེ། ཨོཾ་ཧཱུཾ་སྭཱ་ཧཱ། ཞེས་པ་གོང་དུ་གསུངས་པའི་རིམ་པས་སྦྱིན་སྲེག་བྱའོ། །གོང་དུ་གསུངས་པའི་རིམ་པས་སྦྱིན་སྲེག་དང༌། འབྲས་བུ་ལ་སོགས་པས་སྦྱིན་སྲེག་ཏུ་དབུལ་ལོ། །དགང་གཟར་མར་གྱིས་བཀང་སྟེ་རྩ་བའི་སྔགས་ཀྱིས་ལན་བརྒྱ་རྩ་བརྒྱད་དུ་མངོན་པར་བསྔགས་ཤིང་རྡོ་རྗེ་དྲིལ་བུའི་ལག་པར་བླུགས་གཟར་ལ་ཧཱུཾ་བསམས་ལ། མངོན་པར་འདོད་པའི་དོན་སེམས་ལ་བྱ་སྟེ། དགོང་བླུགས་དབུལ་བར་བྱའོ། །སྔོན་དུ་ཞལ་བསིལ་ཕུལ་ནས། ཀུ་ཤའི་ཆུས་མེ་ལ་བསང་གཏོར་
༄། །བྱའོ། །ཡེ་ཤེས་ཀྱི་ལྷ་མོ་བྲིས་སྐུ་ལ་སོགས་པ་ལ་ཞུགས་པས་བྱ་སྟེ། སླར་ཡང་མེའི་ལྷ་གོང་དུ་གསུངས་པའི་རིམ་པས་བསམས་ལ། མཆོད་པ་སྣ་ཚོགས་པས་མངོན་པར་མཆོད་ནས། མངོན་པར་འདོད་པའི་དངོས་གྲུབ་རྣམ་པར་རིམ་པར་བྱས་ལ། ཨོཾ་ཁྱེད་ཀྱིས་སེམས་ཅན་དོན་ཀུན་མཛད། ཅི་ལྟའི་རྗེས་སུ་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་པར་མཛོད། །སླར་ཡང་འབྱོན་པར་མཛད་དུ་གསོལ། །ཨོཾ་གཙྪ་གཙྪ་ཨགྣེ་སྭཱ་ཧཱ། ཞེས་སྤྱན་དྲང་བའི་ཕྱག་རྒྱ་ལས་མཛུབ་མོ་རྒྱབ་ཏུ་སྦྱར་བ་ནི་གཤེགས་སུ་གསོལ་བའོ། །དེ་ནས་སྔོན་དུ་གསུངས་པའི་གཏོར་མའི་དཀྱིལ་འཁོར་གྱི་འཁོར་ལོ་བྱ་སྟེ། ཇི་སྐད་གསུངས་པའི་སྔགས་དང་ཕྱག་རྒྱ་མཐའ་དག་གིས་གཏོར་མ་དབུལ་བར་བྱའོ། །ཨོཾ་ཀུ་རུ་ཀུ་རུ་མ་ཧཱ་བཏྟཱ་ལི་ཧཱུཾ་སྭཱ་ཧཱ། ཞེས་པས་ལག་པ་གཉིས་བརྐྱང་སྟེ་སོར་མོ་དབུ་མ་གཉིས་སྦྱར་བ་ནི་སྦྱིན་སྲེག་གི་དུས་སུ་གཏོར་མའི་སྔགས་དང་ཕྱག་རྒྱའོ། །མེའི་བདག་ཉིད་སྦྱིན་སྲེག་གི་དུས་སུ་མེ་བརྟགས་ལ་གལ་ཏེ་མཚན་མ་ངན་པ་མཐོང་ན་དེ་ནས་ཨོཾ་བཛྲ་ཡཀྵ་ཧཱུཾ་སྭཱ་ཧཱ། ཞེས་པ་གོང་དུ་མཚན་མ་ངན་པ་མཐོང་བའི་ཕྱོགས་དེར་མར་བརྒྱ་རྩ་བརྒྱད་དུ་ནི་སྦྱིན་སྲེག་དབུལ་ལོ། །བགེགས་ཉེ་བར་ཞི་བར་བྱེད་པའི་ཆུས་ལན་གསུམ་དུ་བསང་གཏོར་བྱས་ལ། སྔོན་བཞིན་དུ་སྦྱིན་སྲེག་བྱའོ། །རྩ་བའི་སྦྱིན་སྲེག་གིས་མཆོད་ནས། གོང་དུ་གསུངས་པའི་རྣམ་པས་རང་གི་དབུགས་ཀྱིས་བཀུག་སྟེ། རང་གི་ལུས་ལ་གཞག་པར་བྱའོ། །ཕྱིའི་ལྷ་གཤེགས་སུ་གསོལ་ལ་ལངས་པར་བྱའོ། །སྦྱིན་སྲེག་གི་ཆོ་གའོ། །དེ་ནས་མཆོད་སྦྱིན་གྱི་ཆོ་ག་བརྗོད་པར་བྱའོ། །བླ་རེ་བྲེ་བ་དང༌། ན་བཟའ་སྣ་ཚོགས་འཕྱང་བ་དང༌། དྲི་དཀར་ལ་ཞིམ་པས་དཀྱིལ་འཁོར་གྲུ་བཞི་པར་བྱས་ལ། དཀར་པོས་བུམ་པ་དང་དབུས་ཀྱི་སྣོད་བྱུག་པར་བྱའོ། །འོ་མ་དང༌། དྲི་བཟང་པོའི་ཆུས་དགང་བར་བྱས་ལ་ཤིང་ལོ་ལ་སོགས་པས་བརྒྱན་པར་བྱའོ། །གོས་དཀར་པོས་དཀྲིས་པ་ལ་འདབ་མ་མིག་གེ་གཟུགས། སེན་རྩི་དང་ཀུ་ཤ་ལ་སོགས་པ་དབུལ་བར་བྱའོ། །སུཾ་ཀྵུཾ་ཡུཾ་ཧཱུཾ། སྨྲྱུཾ་ཧྨྲྱུཾ་ཡྨྲྱུཾ་ཀྵྨྲྱུཾ། ཞེས་པས་དང་པོར་ཨོཾ་དང་མཐར་སྭཱ་ཧཱ། རེ་རེ་ལ་ཡང་བརྒྱ་རྩ་བརྒྱད་མངོན་པར་བསྔགས་ཏེ། གནས་ཇི་ལྟ་བར་བུམ་པ་བརྒྱད་གཞག་པར་བྱའོ། །དབུས་སུ་ཡང་སྣོད་ཆེན་པོ་གཞག་པར་བྱའོ། །གོང་དུ་གསུངས་པའི་རིམ་པས་བདག་ཉིད་རྣལ་འབྱོར་མཐའ་དག་རྫོགས་པར་བྱ་སྟེ། བདག་
༄། །ཉིད་མཆོད་ལ། དེ་ནས་སྦྱིན་སྲེག་བརྩམ་པར་བྱའོ། །ཨོཾ་ཀ་མ་ལ་གརྦྷེ་སྭཱ་ཧཱ། ཞེས་པས་པདྨའི་རྣམ་པ་ལ་ལག་པའི་ཐལ་མོ་དབྱེ་བར་བྱས་ལ་དེ་ནས་སྣོད་ཀྱི་དབུས་སུ་པདྨ་དགོད་པར་བྱའོ། །དེ་ནས་ཟླ་བའི་དཀྱིལ་འཁོར་ལ་གདུགས་དཀར་པོས་གཡོགས་ལ། དེ་ནས་ཧཱུཾ་ལས་རྡོ་རྗེ་ཧཱུཾ་གིས་བྱིན་གྱིས་བརླབ་པའོ། །དེ་ནས་ཡེ་ཤེས་མཁའ་འགྲོ་མ་བསྒོམ་པར་བྱའོ། །སྐུ་མདོག་དཀར་པོ་ཕྱག་གཉིས་པ། སེམས་དཔའི་སྐྱིལ་ཀྲུང་གིས་བཞུགས་པ། རྡོ་རྗེ་དང་དབྱིག་པ་དེ་གཡོན་པ་དང་གཡས་པར་བསམ་པར་བྱའོ། །དེའི་ཤར་དུ་རྡོ་རྗེ་མ། བྱང་དུ་དྲག་མོ། །ནུབ་ཏུ་རོ་ལངས་མ། ལྷོར་གཏུམ་མོ། །དབང་ལྡན་དུ་སེང་གེ་མ། མེར་སྟག་མོ། །བདེན་བྲལ་དུ་ཅེ་སྦྱང་མ། རླུང་དུ་འུག་བ་མ། །གོང་དུ་གསུངས་པའི་མཚན་མ་དང་རྒྱན་དང་ལྡན་པའི་སྐུ་མདོག་དཀར་མོ་བསམ་པར་བྱའོ། །ཇི་ལྟར་རང་རང་གི་སྔགས་དང་ཕྱག་རྒྱས་དམ་ཚིག་དབུལ་བར་བྱའོ། །ཨོཾ་ས་མ་ཡ་ཏིཥྛ་ཧཱུཾ་ཕཊ། རྡོ་རྗེ་བཅིང་བ་བྱས་ནས་མཛུབ་མོ་གཉིས་བརྐྱང་སྟེ། རྩེ་མོ་བཀུག་པར་བྱས་ལ་དམ་ཚིག་གི་ཕྱག་རྒྱ་བསྟན་པར་བྱའོ། །སྔོན་ལྟར་མཆོད་ལ་ཧཱུཾ་སྭཱ་ཧཱ། རྡོ་རྗེ་ཁུ་ཚུར་གཉིས་བྱས་ནས་གཡོན་པས་སྙིང་གར་བཞག་གཡས་སྤྱི་བོར་བཞག་བ་ནི་རྩ་བའི་སྔགས་དང་ཕྱག་རྒྱའོ། །རྩ་བའི་སྔགས་ཀྱིས་ཇི་ལྟར་འདོད་པར་ཆུ་དབུལ་བར་བྱས་ནས། དཱུར་བའམ་ཀུ་ཤ་དང་སྦྱར་ཞིང་ཀུན་ད་ལ་སོགས་པའི་མེ་ཏོག་དང༌། བསྒོམ་པ་དང་ལྡན་པས་སྔགས་ལན་རེ་རེ་བཟླས་པས་རྡོ་རྗེ་ལྷ་མོའི་ཅོད་པན་དུ་དབུལ་བར་བྱའོ། །ཁྲི་ཕྲག་གཅིག་ཏུ་སྤྱི་བོར་དབུལ་བར་བྱས་ལ་ཡིད་ལ་ཇི་ལྟར་འདོད་པའི་དངོས་གྲུབ་འཕེལ་ཞིང་ནད་མེད་པར་འགྱུར་རོ། །སྦྱིན་སྲེག་གི་སྔགས་གོང་དུ་ཇི་ལྟར་གསུངས་པའི་རྗེས་སུ་འབྲངས་ནས། གཏོར་མ་དབུལ་བར་བྱའོ། །ཞི་བར་བྱ་བ་ལ་ནི་དཀར་པོའི་མཆོད་པ་དང༌། ཁ་ཤར་ཕྱོགས་སུ་མངོན་པར་བལྟས་པས་མཆོད་པར་བྱའོ། །ཚིགས་བཅད་ཀྱི་བར་དུ་མིང་སྦྱར་ཞིང་བསྐུལ་བར་བྱའོ། །ཕྲེང་བའི་གྲངས་བརྒྱ་ཕྲག་གཅིག་གི་མཛུབ་མོས་བགྲང་ཞིང་ཞི་བའི་ཡིད་ཀྱིས་ཞི་བར་བྱའོ། །རྒྱས་པ་ལ་ཡང་མཆོད་རྫས་ཐམས་ཅད་སེར་པོ་དང་ཁ་བྱང་དུ་བལྟ་བར་བྱའོ། །ཕུན་སུམ་ཚོགས་པ་ཐམས་ཅད་དགུག་པའོ། །བརྒྱ་རྩ་བརྒྱད་ཀྱིས་ལྷག་པའི་ཕྲེང་བ་དབུས་ནས་བགྲང་ཞིང་དགའ་བའི་ང་རྒྱལ་
༄། །གྱིས་རྒྱས་པའོ། །དབང་ལ་ནི་མཆོད་རྫས་ཐམས་ཅད་དམར་པོ་དང་ནུབ་ཏུ་བལྟས་པས་བྱའོ། །དབང་གིས་ཡིད་ཕྱོགས་ནས་འགུགས་པ་ལ་སོགས་པས་བསྐུལ་བར་བྱའོ། །བགྲང་ཕྲེང་ཉི་ཤུ་རྩ་ལྔ་པས། སྲིན་ལག་ལ་གནས་པར་བྱས་ལ་དབང་གི་ཡིད་ཀྱིས་དབང་དུ་བྱའོ། །མངོན་སྤྱོད་ལ་མཆོད་རྫས་ཐམས་ཅད་ནག་པོའི་རྫས་ཁ་ལྷོར་བལྟས་པས་བགྲོད་ཅིག་ཅེས་བསྐུལ་ཞིང་བགྲང་ཕྲེང་དྲུག་ཅུའི་གྲངས་ཀྱིས་མཐེའུ་ཆུང་ལ་གནས་པའི་ཁྲོ་བོའི་ཆ་བྱད་ཀྱིས་པདྨའི་གདན་ལ་བཞུགས་པའི་མངོན་པར་སྤྱོད་པ་བྱའོ། །གཏོར་མ་དང་སྦྱིན་སྲེག་དང་མཆོད་སྦྱིན་མདོར་བསྡུས་པའི་ཆོ་གའོ། །དཔལ་རྡོ་རྗེ་གདན་བཞི་པའི་མན་ངག་མདོར་བསྡུས་པ། དཔལ་ཡེ་ཤེས་དབང་ཕྱུག་མའི་སྒྲུབ་པའི་ཐབས་འཕགས་པ་ལྷས་མཛད་པ་རྫོགས་སོ།། །།པཎྜི་ཏ་སྨྲི་ཏི་ཛྙཱ་ན་ཀཱི་རྟིས་བསྒྱུར་བའོ། །ཕྱིས་པཎྜི་ཏ་ས་མ་ཡ་ཤྲཱི་ཛྙཱ་ན་ས་རྒྱ་དཔེ་ལ་ཞུ་ཏིག་བྱས་སོ། །