དཔལ་རྡོ་རྗེ་སེམས་དཔའ་རྗེས་སུ་དྲན་པའི་ཆོ་ག་ཞེས་བྱ་བ།
ཐུ་བོ་རཱ་ཛ་ཧ་ཏི།
༄། །རྒྱ་གར་སྐད་དུ། ཤྲཱི་བཛྲ་སཏྭ་ཨ་ནུ་སྨྲྀ་ཏིནཱ་མ་བིདྷི། བོད་སྐད་དུ། དཔལ་རྡོ་རྗེ་སེམས་དཔའ་རྗེས་སུ་དྲན་པའི་ཆོ་ག་ཞེས་བྱ་བ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །རབ་གནས་ཡུལ་ཚོགས་ཉམས་དགའ་བར། །ཀུན་རྫོབ་འཕྲུལ་པའི་དཀྱིལ་འཁོར་ལ། །རྣམ་དག་གཉིས་མེད་ཡུལ་ཀུན་སྦྱོར། །བྱང་ཆུབ་སེམས་བྱུང་རྒྱལ་བའི་མཆོག །དེ་ལ་དེ་སྣང་རོལ་མོའི་ཆོས། །སྲིད་མཐའི་མ་དམིགས་དུས་གསུམ་འགོག །རྣམ་དཔྱད་བྱ་བའི་རྒྱུད་ལྡན་ཞིང༌། །རིགས་བདག་དཀྱིལ་འཁོར་བསྟོད་པའི་གནས། །ངེས་པའི་གསང་མཆོག་རྩ་བའི་རྒྱུད། །དེ་ཉིད་སྒྲུབ་པའི་ཐབས་ཆེན་པོ། །གཉིས་དང་གཉིས་མེད་ཐེག་པའི་མཆོག །རྗེས་སུ་དྲན་པ་སྐྱེད་བྱེད་པའི། །ཆོ་ག་བཟང་པོ་རྨད་དུ་བྱུང༌། །གསང་དོན་བརྒྱུད་པའི་རྡོ་རྗེའི་ཚིག །དུས་གསུམ་རྒྱུན་གྱི་མཚན་ལྡན་བཅིང༌། །རིགས་བདག་དཀྱིལ་འཁོར་བསྟོད་པའི་གནས། །འཁོར་བའི་བྱ་བ་ཀུན་གནས་འཇུག །དཔའ་བོ་གཅིག་པའི་དཀྱིལ་འཁོར་བཟང༌། །བསྙེན་སྒྲུབ་ཡན་ལག་དང་བཅས་བཤད། །སངས་རྒྱས་ཀུན་གྱི་དགོངས་པའི་ཡུལ། །བྱ་བའི་ཡན་ལག་ཀུན་རྫོགས་ཤིང༌། །ངེས་པའི་གསང་བ་སྟོན་མཛད་པའི། །འབྲས་བུའི་དཀྱིལ་འཁོར་བླ་ན་མེད། །ཐམས་ཅད་དུ་ས་ཞེས་བྱ་བ་ཡི། །ལྟ་བ་ལ་སོགས་འབྱུང་བའི་ཆོས། །ཉོན་མོངས་གནས་ཀུན་རྣམ་དག་ཅིང༌། །རང་བཞིན་མཉམ་པས་སྤྲོས་དང་བྲལ། །ཡང་དག་སངས་རྒྱས་བདེ་བ་ཆེ། །ཀུན་དུ་གོམས་པས་གསལ་བྱེད་པའི། །ཡན་ལག་ལམ་གཉིས་རྫོགས་པའི་གྲོགས། །རབ་སྦྱངས་བས་ནི་འཇུག་འགྱུར་ཞིང༌། །རིག་འཛིན་གནས་ཀུན་བགྲོད་བྱེད་ཅིང༌། །རྒྱུ་རྐྱེན་ཆ་ཤས་ཀུན་རྫོགས་ཤིང༌། །ཐུན་མོང་བྱེ་བྲག་རྐྱེན་གྱི་སྟོབས། །སྔ་མ་ལས་བྱུང་ཕྱི་མའི་རྒྱུན། །འབྲས་བུ་ཚོགས་པའི་བདག་ཉིད་དོ། །ས་དང་སར་གནས་རིག་འཛིན་ཀུན། །རང་རིག་སྦྱོར་བའི་ཚུལ་གྱིས་ནི། །གསང་སྔགས་ཕྱག་རྒྱའི་གནས་ཀུན་དང༌། །མི་མཐུན་གཉེན་པོ་བྱེ་བྲག་མཐུས། །དངོས་གྲུབ་མཐའ་ཡས་རྟག་ལྡན་ཞིང༌། །ཏིང་འཛིན་ཆོས་ཀུན་རྫོགས་པའི་མཐར། །སངས་རྒྱས་ཀུན་གྱི་གནས་མཐོང་ཞིང༌། །ངེས་པའི་ས་མཆོག་རྫོགས་པར་འགྱུར། །རིགས་ཀྱི་འཁོར་ལོ་ཀུན་བསྐོར་ཞང༌། །རིགས་ཀྱི་གནས་རྣམས་རྣམ་དག་པས། །རིགས་མཆོག་ཡོན་ཏན་བཟང་པོའི་ཚོགས། །
༄། །རིགས་ཀུན་རྒྱལ་བས་མཉམ་སྦྱོར་བའོ། །ཡང་དག་ངེས་པའི་ཐེག་པའི་མཆོག །དམ་བ་ལས་བྱུང་དམ་པའི་ཡུལ། །དེ་གནས་ཚུལ་གྱིས་ཕྲེང་བ་ཉིད། །ཡང་དག་བདེ་བས་རྒྱན་དུ་བྱས། །དཀྱིལ་འཁོར་ཆེན་པོ་དགའ་ཚལ་དང༌། །ཆོས་ཀྱི་རྒྱལ་པོའི་གྲོང་ཁྱེར་མཆོག །ཆོས་ཀྱི་འཁོར་ལོ་རིམ་འཇུག་པས། །ཆོས་ཀྱི་འབྲས་བུ་བཟང་པོ་ཉིད། །ཤིན་ཏུ་སྦྱོར་བས་ཡང་དག་སྐྱེས། །མེ་ཏོག་ཚལ་ལས་ཁ་དོག་དྲི། །འདོད་པའི་ཚོགས་རྣམས་ཚིམ་གྱུར་ལྟར། །རང་གནས་བྱང་ཆུབ་ཡན་ལག་ཕྲེང༌། །བསྙེན་དང་ཉེ་བར་བསྙེན་པ་དང༌། །སྒྲུབ་དང་སྒྲུབ་པ་ཆེན་པོ་ཡི། །ཡན་ལག་ཆ་ཤས་ཀུན་རྫོགས་པས། །ཞི་སོགས་བྱེ་བྲག་རྣམ་པར་བཀོད། །སངས་རྒྱས་ཐེག་པའི་ཡན་ལག་གིས། །ཉེ་བར་སྦྱར་བའི་རྣལ་འབྱོར་འགྲུབ། །ས་མཚམས་མཁས་པའི་སྤྱོད་ཡུལ་ཉིད། །རྐྱེན་བཅས་སྟོབས་ཀྱིས་རབ་ཏུ་རྫོགས། །དཀྱིལ་འཁོར་ཡན་ལག་སྟོབས་ལྡན་པའི། །བླ་མ་ལྷག་གནས་བརྟུལ་ཞུགས་ཅན། །ཡོན་ཏན་རིན་ཆེན་འབྲས་བུའི་བདག །བྱང་ཆུབ་མཆོག་སེམས་རྣམ་དག་པ། །ཡང་དག་མོས་པས་བསྟོད་བྱས་ཏེ། །སྒོ་གསུམ་དང་བས་གསོལ་བ་གདབ། །གདམས་པའི་ཡན་ལག་ཀུན་འཛིན་ཅིང༌། །ཉེ་བར་འཁོར་བའི་དགའ་སྟོན་མཆོག །དཀྱིལ་འཁོར་ཆེན་པོར་དགྱེས་བྱས་པས། །རབ་ཏུ་རྫོགས་པར་འཁོར་ལོ་དབང༌། །དེ་ཉིད་ཡན་ལག་དམ་ཚིག་བཅས། །ངེས་པར་འཇུག་པས་བསྟན་བྱས་པའོ། །གསང་བའི་རྒྱུད་དོན་སྣ་ཚོགས་དག །འདྲེན་པའི་ཡན་ལག་བླ་ན་མེད། །ངེས་པར་བསྟན་པའི་ཕྱག་རྒྱ་ཡི། །ཡན་ལག་རྫོགས་པས་ཐེག་པའི་མཆོག །དབེན་བ་ཡི་ནི་གནས་དག་གམ། །རང་གི་སྐྱེད་མོས་ཚལ་སོགས་པར། །ཀུན་དུ་སྣ་ཚོགས་སྐལ་བཟང་པོ། །ཀུན་དུ་སྣ་ཚོགས་བདེ་མཆོག་གིས། །ཀུན་དུ་སྣ་ཚོགས་དགོངས་པ་རྣམས། །ཅི་བདེ་བར་ནི་བསྒྲུབ་པར་བྱ། །གནས་ཀྱི་ཉེ་འཁོར་ཕྱག་དར་དང༌། །དྲི་ཞིམ་ཚུར་བཅས་དག་བྱས་ཏེ། །དཀྱིལ་འཁོར་ས་གཞི་བཟང་པོའི་མཆོག །བཀྲ་ཤིས་དག་བྱེད་རྫས་ཀྱིས་བྱུག །ཕྱོགས་བཅུར་བླ་རེ་རྒྱལ་མཚན་དང༌། །འཕན་གདུགས་ལྷ་བ་ལྷུབ་རྔ་ཡབ་དང༌། །རིན་ཆེན་མེ་ཏོག་ཕྲེང་བའི་ཚོགས། །བཟའ་བཏུང་འདོད་ཡོན་རྣམ་འཕྲུལ་པའི། །ཕྱག་རྒྱ་གོས་དང་རྒྱན་བཅས་པས། །མ་ལུས་ཀུན་དུ་ཉེ་བར་མཛེས། །ཐབས་དང་ཤེས་རབ་བརྟུལ་ཞུགས་མཆོག །བདེ་བའི་ཡེ་ཤེས་རོལ་མོའི་དབྱིངས། །རྣམ་པར་འཕྲུལ་པས་བསམ་བྱས་པས། །བྱ་བའི་འཁོར་ལོ་བརྟན་པར་འགྱུར། །ཇི་སྙེད་མཆོད་པའི་ཚོགས་རྣམས་དང༌། །གཏོར་མས་གནས་ཀུན་ཉེར་
༄། །བརྒྱན་དག །བསང་སྤྱད་བཀྲ་ཤིས་བྱིན་གྱིས་བརླབ། །རིམ་བཞིན་སྔགས་དང་ཕྱག་རྒྱ་གནས། །འགྲོ་གནས་ཀུན་གྱི་ཉོན་མོངས་ཚོགས། །མི་དགེ་སྟོབས་སོགས་སྡིག་པའི་མཐུས། །གནས་ཀུན་ཉམ་ཐག་གཟིར་བས་འཇོམས། །བདག་གཞན་ཀུན་རྒྱུད་རླག་པར་བྱེད། །དེ་དག་ཐུགས་རྗེ་ཆེན་པོའི་བློས། །མ་ལུས་ཡུལ་བཅས་སྒྲོལ་བའི་ཕྱིར། །དྲན་པ་གཅིག་པའི་ཡེ་ཤེས་སྐུ། །ཏིང་འཛིན་དག་པས་རྣམ་པར་གྲོལ། །ཕྱི་ནང་ཆོས་རྣམས་ཐམས་ཅད་ཀྱི། །རང་བཞིན་གཉིས་མེད་བྱང་ཆུབ་སེམས། །དེར་སྣང་ཡུལ་ལས་འདས་པ་ཉིད། །ལྷུན་གྱིས་གྲུབ་པའི་ཆོས་ཉིད་དོ། །ཚུལ་འདི་རྣམ་པར་སྤངས་པ་ཡི། །དེ་ནས་དེ་ལས་དེ་བཞིན་རྒྱུད། །ཀྱེ་མ་ཐུགས་རྗེ་ཆེན་པོའི་ཡུལ། །རིགས་ཀྱི་དཀྱིལ་འཁོར་རྫོགས་པ་ཉིད། །རྣམ་གསུམ་ལྷ་ཡི་ཏིང་འཛིན་གྱིས། །རྣམ་གསུམ་སྔགས་དང་ཕྱག་རྒྱར་སྦྱོར། །བྱིན་རླབས་ནུས་མཐུ་རྫོགས་བྱས་ནས། །བདག་གཞན་སྦྱངས་ཤིང་གསལ་བྱས་ཏེ། །རིགས་མཆོག་སྐུ་གསུང་ཐུགས་ཀྱི་བདག །ཡང་དག་འོད་ཟེར་རབ་སྦྱོར་བས། །གསལ་བའི་དཀྱིལ་འཁོར་རྒྱས་པ་ཉིད། །ཚུལ་གསུམ་ཕྱག་རྒྱའི་ཆ་ལུགས་ཀྱིས། །ཤིན་ཏུ་བཀོད་པ་ལེགས་འབྱུང་བའི། །ཚད་མེད་བཞི་ལི་གནས་རྫོགས་འགྱུར། །ཀུན་ནས་སྤྱན་དྲངས་བརྟན་བྱས་པ། །ཉེ་བར་སྦྱོར་བའི་ཕྱག་རྒྱ་ཉིད། །ཨོཾ་ཡང་དག་བརྟན་པས་སྟོབས་རྫོགས་པའི། །རང་བཞིན་དཀྱིལ་འཁོར་རྫོགས་པའི་ཚོགས། །ཐུགས་རྗེས་བདག་ཉིད་རྣམ་གྲོལ་བ། །དཀྱིལ་འཁོར་རྫོགས་པའི་ལས་ལ་དགྱེས། །མི་ཤེས་ཡུལ་རྣམས་བཅོམ་མཛད་ཅིང༌། །རིག་པའི་གནས་ཆེན་སྙོམས་འཇུག་པར། །ཕྱག་རྒྱ་བདེ་བའི་ཚུལ་སྦྱོར་བས། །གྲོང་ཁྱེར་བརྟན་པར་མཛད་དུ་གསོལ། །ཨོཾ་བཛྲ་ས་ཏྭ་ཧཱུཾ། ཛྙཱ་ན་སམ་ཡ་སྟྭཾ། ཛཿཧཱུཾ་བཾ་ཧོཿཔྲ་བེ་ཤ་ཡ་ཕཊ། བཛྲ་ཨཱ་བེ་ཤ་ཡ་ཨ་ཨཱ། ཇི་སྲིད་བརྟན་པའི་གནས་བཞུགས་ཤིང༌། །བྱང་ཆུབ་སེམས་མཆོག་སྤེལ་བའི་ཕྱིར། །བཀྲ་ཤིས་ལྷག་གནས་བརྒྱན་པ་ཡི། །ཞིང་ཁམས་ཕོ་བྲང་དག་པར་བརྗོད། ཨོཾ་བཛྲ་ཙཀྲ་མཎྜལ་པ་ནས་པ་རི་ཧཱུཾ། རབ་ཏུ་གུས་པའི་ཚུལ་གྱིས་ནི། མངོན་པར་དམིགས་བྱས་དག་པའི་མཆོག །ཐབས་དང་ཤེས་རབ་རྫོགས་བྱེད་པའི། །ཡུལ་ཀུན་རང་བཞིན་རྣམ་པར་དག །གང་འདིར་ཡོན་ཏན་བསྔགས་པའི་གནས། །རྒྱལ་བ་བདེ་གཤེགས་འདྲེན་པའི་གཙོ། །རིགས་མཆོག་རྡོ་རྗེ་སེམས་དཔའི་གནས། །ངོ་མཚར་ཡུལ་ཀུན་རྣམ་
༄། །པར་དག །ཨོཾ་ན་མོ་སྟུ་སྟི་བནྡྷ་ནཾ་ཀ་རོ་ཡ་མི། །མེ་ན་རཱ་ག་ཧོ། །ཀུན་འབྱུང་ཡོན་ཏན་རྫོགས་པ་ཡི། །མེ་ཏོག་འབྲས་བུ་བཟང་ལྡན་ཞིང༌། །ཀུན་དུ་བཟང་པོའི་རྒྱན་རྣམས་དང༌། །འདོད་པའི་ལྷ་མོ་རྐྱེན་ལྡན་ཞིང༌། །ཡུལ་ཀུན་ཆགས་པས་རྣམ་གྲོལ་བ། །ཕྱག་རྒྱའི་དཀྱིལ་འཁོར་བླ་མེད་པ། །ལྷ་དང་ལྷོ་མོ་བསམ་ཡས་པས། །ཕྱོགས་བཅུ་ཀུན་ནས་རྣམ་པར་འཁྲིགས། །བྱ་བའི་ཡུལ་ཀུན་མ་ལུས་དག །ཡང་དག་བསྔོ་བ་བླ་ན་མེད། །གཉིས་མེད་བྱང་ཆུབ་སེམས་ཀྱི་དངོས། །གཉིས་སུ་མེད་པའི་རོལ་པ་དག །མཉམ་ཉིད་རོལ་མོའི་དཀྱིལ་འཁོར་ཉིད། །མཉེས་པ་ཆེན་པོའི་བདག་ཉིད་དུ། །ཨོཾ་སརྦ་པཱུ་ཛ་མེ་གྷ་པྲ་ཏི་ཙྪ་ཧོ། །ཐོག་མེད་ཡུན་རིངས་འཁོར་བའི་གནས། །མ་ལུས་ཉེ་བར་བསགས་པའི་ཚོགས། །ཀུན་སྤྱོད་གནས་གསུམ་ལས་སྐྱེས་པ། །ཐམས་ཅད་ཡུལ་ལ་ཉེ་བར་བཤགས། །རབ་རྟོགས་ཉེ་བར་བསགས་པའི་ཆོས། །ཚུལ་ཁྲིམས་བརྟུལ་ཞུགས་སྡོམ་པ་དང༌། །ཉེར་མཛེས་བརྒྱན་པའི་ཡན་ལག་རྣམས། །རབ་བསྔགས་བསྟོད་པས་ཡི་རང་མཆོག །སངས་རྒྱས་ཀུན་གྱི་ལམ་སྟོན་ཅིང༌། །དོན་བཞིན་བསྟན་པས་འདུལ་མཛད་དེ། །སྦྱོར་བའི་སྟོབས་བཅས་ཤེས་རབ་ཚོགས། །ཐབས་ཀྱི་ཐེག་ཆེན་བཤད་དུ་གསོལ། །ཕྱོགས་བཅུའི་མགྲོན་གནས་ཇི་སྙེད་མཐའ། །མྱ་ངན་ཀུན་སྒྲོལ་མགོན་པོ་རྣམས། །སྐུ་གསུམ་བསྟན་པའི་ཚུལ་གྱིས་ནི། །དུས་གསུམ་འགྱུར་བ་མེད་པའི་དབྱིངས། །མ་ལུས་སྲིད་དངོས་འགྲོ་བའི་ཚོགས་འདོན་ཅིང༌། །ཡང་དག་གཉིས་མེད་བརྟན་པར་བྱེད་པའི་ཡིད། །བྱང་ཆུབ་སེམས་མཆོག་བླ་ན་མེད་པའི་དོན། །ཡང་དག་བརྟན་གནས་ཀུན་དུ་རྒྱས་པར་བྱ། །སྨིན་ཅིང་གྲོལ་བར་བྱེད་པའི་ཚོགས་རྣམས་ཀྱིས། །ཁྱད་པར་ལམ་ཀུན་ཡང་དག་རྫོགས་པར་འགྱུར། །བསྙེན་སྒྲུབ་ཕྱག་རྒྱའི་ཡན་ལག་སྣ་ཚོགས་པས། །བདག་གཞན་བཟུང་ཞིང་ཡན་ལག་རྫོགས་པར་སྤྱད། །ཐུགས་རྗེ་རྣམ་དག་དཀྱིལ་འཁོར་རྫོགས་པའི་ཆོགས། །རབ་ཏུ་གྲོལ་བས་གཉིས་མེད་མཉམ་ལྡན་པའི། །ཐམས་ཅད་མཐུན་པའི་ཚུལ་རྣམས་མཛད་བཅས་པས། །བདག་གི་ཆ་ཤས་རབ་ཏུ་དམིགས་པས་དབུལ། །ཐམས་ཅད་མི་གཉིས་ཡེ་ཤེས་ཆེན་པོ་བདག །བྱ་བྱེད་རྟོག་པའི་ཚོགས་རྣམས་རྣམ་དག་ཅིང༌། །སྒྱུ་མ་རྣམ་དག་བྱ་རྩལ་བདེ་བའི་མཆོག །མཁའ་འགྲོ་
༄། །སྒྱུ་མའི་དོན་རྫོགས་མཉམ་པ་ཉིད། །མགོན་པོ་དུས་གསུམ་སྒྲིབ་བྲལ་སངས་རྒྱས་ཀུན། །དངོས་གྲུབ་ཕྲིན་ལས་ཡུལ་རྣམས་ཉེ་བར་སྟོན། །རང་གནས་ཉམས་དགའ་མཉམ་ཉིད་མཆོག་གི་བདག །རྣམ་དག་བྱ་བའི་ཚུལ་གྱི་ཡུལ་ལས་འདས། །ཨོཾ་བཛྲ་སཏྭ་ས་མ་ཡ། མ་ནུ་པཱ་ལ་ཡ། བཛྲ་སཏྭ་ཏྭེ་ནོ་པ་ཏིཥྛ། དྲྀ་ཌྷོ་མེ་བྷ་བ། སུ་ཏོ་ཥྱོ་མེ་བྷ་བ། སུ་པོ་ཥྱོ་མེ་བྷ་བ། ཨ་ནུ་རཀྟོ་མེ་བྷ་བ། སརྦ་སིདྡྷིམྨེ་པྲ་ཡཙྪ། སརྦ་ཀརྨ་སུ་ཙ་མེ། ཙིཏྟཾ་ཤྲེ་ཡཿཀུ་རུ་ཧཱུཾ། ཧ་ཧ་ཧ་ཧ་ཧོཿབྷ་ག་ཝཱ་ན་སརྦ་ཏ་ཐཱ་ག་ཏ་བཛྲ་མཱ་མེ་མུཉྩ། བཛྲཱི་བྷ་ཝ་མ་ཧཱ་ས་མ་ཡ་སཏྭ་ཨཱཿ། བཛྲ་གཙྪ་མུཿ། རྩེ་གཅིག་དྲན་པའི་ཏིང་འཛིན་གྱིས། །མ་ལུས་ཡུལ་བཅས་རྣམ་པར་གྲོལ། །ཕྱག་རྒྱ་གསང་སྔགས་སྦྱོར་བའི་མཐུས། །ལྷ་མོའི་དཀྱིལ་འཁོར་སྣ་ཚོགས་ཉིད། །འགྲོ་གནས་སྡུག་བསྔལ་ལས་གྲོལ་ཞིང༌། །བདེ་བའི་མཆོག་ཀུན་མཐར་ཕྱིན་ཏེ། ཐར་པ་མྱ་ངན་ལས་འདས་པར། །བཏང་སྙོམས་ཀུན་དུ་མི་དམིགས་པའི། །དྲག་པོའི་ཆོགས་བཅས་མ་ལུས་ཀུན། །རབ་ཏུ་ཞེན་རྟོག་སྟོབས་ཀྱིས་འཇུག །དེ་དག་ཐུགས་རྗེ་ཆེན་པོ་ཡིས། །འདུལ་བྱེད་སྟོབས་ཆེན་ཧེ་རུ་ཀ །ཕྱག་རྒྱ་དབྱིངས་དང་མཉམ་པར་སྦྱོར། །རྣམ་པར་གྲོལ་བའི་ཏིང་འཛིན་གྱིས། །ཕྱོགས་བཅུའི་བགེགས་ཚོགས་འདུལ་བར་མཛད། །ཡང་དག་དཀྱིལ་འཁོར་བརྟན་བྱས་ཏེ། །མཚོན་ཆ་མེ་འོད་འབར་བ་ཡིས། །དཀྱིལ་འཁོར་ཀུན་ནས་བརྒྱན་པ་ལ། །བགེགས་ཀྱི་རྒྱལ་པོ་ཀུན་བསྡུས་ཏེ། །ཕྱག་རྒྱ་བཞི་ཡིས་དབང་བྱས་ནས། །མྱོས་ཤིང་གཟིར་གནོན་རྣམ་པར་དགོད། །ཐུགས་ཀྱི་ཡེ་ཤེས་རབ་འབར་བ། །ཡེ་ཤེས་ཕྱག་རྒྱའི་གནས་ཀྱིས་འཇུག །ཀུན་ནས་འཕྲོ་ཞིང་བསྡུ་བའི་མཐུས། །ཁྲོ་བོའི་དཀྱིལ་འཁོར་བརྟེན་འགྱུར་བའོ། །ཞལ་གསུམ་ཕྱག་དྲུག་འཇིགས་པར་བྱེད། །རྒྱན་ཆ་མཚོན་ཆའི་ཚོགས་རྣམས་དང༌། །ཆ་ལུགས་རྔམ་པའི་ཆ་བྱད་ལྡན། །རིགས་ཀྱི་སྤྲུལ་པའི་བསམ་ཡས་པའོ། །གསང་བའི་ཕྱག་རྒྱ་བཞི་སྟོན་ཅིང༌། །ངེས་པར་བརྗོད་པའི་སྔགས་རྣམས་ཀྱིས། །ཀུན་ནས་བརྟན་པའི་དཀྱིལ་འཁོར་རྣམས། །ཡང་དག་སྦྱོར་བཅས་རྫོགས་པར་འགྱུར། །ཨོཾ་བཛྲ་ཀྲོ་དྷ་མུས་ལ་ཙྪིནྡ་ཙིཚིནྡ་ཧཱུཾ། ཧུ་ལུ་ཧུ་ལུ། ཏིཥྛ་ཏིཥྛ། བནྡྷ་བནྡྷ། ཧ་ན་ཧ་ན། །ཤྲཱི་ཧེ་རུ་ཀ་ཀྲོ་དྷཱི་ཤྭ་རིཧཱུཾ་ཕཊ། ཐམས་ཅད་ཀུན་ནས་རྫོགས་པའི་ཆོས། །རྣམ་གསུམ་ཡུལ་ཀུན་རྣམ་དག་པའི། །བྱང་ཆུབ་སེམས་ཉིད་རང་བྱུང་
༄། །བའི། །ཐམས་ཅད་རྫོགས་པའི་གནས་ཉིད་དོ། །ཨོཾ་མ་ཧཱ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱ་ཏྨ་ཀོཉ་ཧཾ། །ཐུགས་རྗེ་ཆེན་པོའི་རྒྱུན་གྱིས་ནི། །ཐམས་ཅད་ཁྱབ་མཛད་རིན་ཆེན་ཚོགས། །དོན་ཀུན་སྣང་བའི་གནས་རྫོགས་ཏེ། །སངས་རྒྱས་མཛད་པ་རྣམ་པར་དག །ཨོཾ་དྷ་རྨ་དྷཱ་ཏུ་བཛྲ་སྭ་བྷཱ་བ་ཨཱཏྨ་ཀོཉ་ཧཾ། །རྣམ་པར་འཕྲུལ་པའི་ཏིང་འཛིན་མཆོག །འོག་མིན་གནས་མཆོག་ཉམ་དགའ་བར། །ཕྱག་རྒྱ་རྫོགས་པའི་ཆ་ལུགས་ཀྱིས། །པདྨའི་དཀྱིལ་འཁོར་ལ་གནས་པའོ། །ཐུགས་རྗེ་ཆགས་པའི་ཏིང་འཛིན་དང༌། །གསང་བ་སྔགས་ཀྱི་བྱིན་རླབས་ཀྱིས། །ཕོ་བྲང་རྣམ་པར་དག་པའི་ཚོགས། །རྣམ་པར་འཕྲུལ་བས་བསྐྱེད་པའི་ཚུལ། །ཐུགས་ཀྱི་གསང་སྔགས་ཀུན་འགྱུར་གནས། །རིམ་བཞིན་སྦྱོར་བའི་བྱིན་རླབས་ཀྱིས། །ས་བོན་གསང་སྔགས་སྤྲོ་བྱ་སྟེ། །རྟེན་གྱི་དཀྱིལ་འཁོར་རྫོགས་པར་མཛད། །ཨེ་ལས་ནམ་མཁའི་དཀྱིལ་འཁོར་ཉིད། །ཆོས་འབྱུང་གྲུ་གསུམ་གྱེན་བསྒྲེང་དཀར། །ཡཾ་ལས་རླུང་དཀྱིལ་གཞུ་ཡི་དབྱིབས། །དུད་ཁ་སྲ་མཁྲེགས་རྒྱལ་མཚན་ཅན། །བཾ་ལས་ཆུའི་དཀྱིལ་འཁོར་སྣ་ཚོགས་འབྱུང༌། །དཀར་ཟླུམ་ཀུན་འབྱུང་བུམ་པས་མཚན། །ལཾ་ལས་དབང་ཆེན་ས་གཞི་དབྱིབས། །གྲུ་བཞི་གསེར་མདོག་རྡོ་རྗེས་བརྒྱན། །ཁཾ་ལས་རིམ་བཞིན་བརྩེགས་པའི་མཆོག །ཁ་དོག་དབྱི་བས་རྒྱན་ཀུན་རྫོགས་པ། །སུཾ་ལས་རི་ཡི་རྒྱལ་པོ་སྟེ། །རིན་ཆེན་སྣ་ཚོགས་ལས་གྲུབ་པའོ། །རཾ་ལས་མེ་ཡི་དཀྱིལ་འཁོར་མཆོག །དམར་སེར་གྲུ་གསུམ་རཾ་ཡིག་མཚན། །དེ་དབུས་བྷྲཱུཾ་ལས་གཞལ་ཡས་ཁང༌། །གྲུ་བཞི་སྒོ་བཞི་སྒྲོ་ཁྱུད་བཅས། །ར་པ་རིམ་གསུམ་དུར་ཁྲོད་དང༌། ཀུན་འབྱུང་རིན་ཆེན་ཕྲེང་བས་མཛེས། །རིགས་ཀྱི་དཀྱིལ་འཁོར་མཚན་ལྡན་པའི། །རྒྱན་ཚོགས་རྣམ་པར་སྤྲས་པ་ལ། །འོད་གསལ་ཐུགས་རྗེ་བྱང་ཆུབ་སེམས། །རྣམ་དག་དཀྱིལ་འཁོར་མཛེས་པའི་མཆོག །ཕོ་བྲང་འཁོར་ལོའི་ལྟེ་དབུས་སུ། །རེའུ་ཆའི་ཕྲེང་བ་རྡོ་རྗེས་མཛེས། གདན་གྱི་དཀྱིལ་འཁོར་རྣམ་བཀོད་པའི། །མ་འདྲེས་པར་ནི་དག་པའི་དོན། །དབུས་ཀྱི་འཁོར་ལོ་ལ་གནས་པའི། །སངས་རྒྱས་རྡོ་རྗེ་འཛིན་པ་ཉིད། །རབ་ཏུ་འོད་འབར་ཕྱག་རྒྱའི་ཚོགས། །རིགས་དང་རིགས་བཅས་མཉམ་པར་སྦྱོར། །ཕྱོགས་བཅུའི་སངས་རྒྱས་ཐམས་ཅད་
༄། །གྱིས། །ཀླུ་དབྱངས་འོད་བཅས་བསྐུལ་བར་མཛད། །ཐམས་ཅད་རྫོགས་པའི་དཀྱིལ་འཁོར་གྱི། །དེ་གནས་མཐའ་རྣམས་བསྲུང་བའི་ཕྱིར། །ཕྱག་རྒྱའི་རོལ་པས་མཉེས་འགྱུར་ཞིང༌། །རྟོག་མེད་བྱང་ཆུབ་སེམས་ཀྱི་སྐུ། །ཤེས་རབ་འོད་གསལ་བཅུ་དྲུག་ཕྲེང། །འོད་ཟེར་འཕྲོ་དང་འདུ་བའི་མཐུས། །འགྲོ་རྣམས་བདེ་གཤེགས་ཡུལ་སྦྱོར་ཏེ། །རང་གནས་སུམ་ཅུ་རྩ་གཉིས་བརྒྱན། །ཐབས་མཆོག་ཐུགས་རྗེ་གསལ་བྱེད་ཕྲེང༌། །སྦྱོར་བ་རྣམས་གཉིས་མཛད་བཅས་རྫོགས། །སངས་རྒྱས་དཔེ་བྱད་བཟང་པོ་ཉིད། །གཡས་གཡོན་ཕྲེང་བ་འཁོར་ལོའི་ཚུལ། །ཐམས་ཅད་གཅིག་ཏུ་སྦྱོར་བའི་མཐུས། །རིན་ཆེན་ཁ་དོག་སྣ་ལྔ་པོ། །ཧཱུཾ་མཛེས་བྱེད་རྡོ་རྗེའི་ཕྱག་རྒྱ་རྫོགས། །དཀར་གསལ་འོད་མདངས་ལྔ་ཡིས་བརྒྱན། །རབ་ཏུ་སྦྱོར་བའི་ཏིང་འཛིན་གྱིས། །ཕྱག་རྒྱ་རྫོགས་པའི་ང་རྒྱལ་ཉིད། །འོད་ཟེར་རིགས་ཀྱི་དཀྱིལ་འཁོར་ཚོགས། །དྲུག་བཅས་བཅུ་དྲུག་གནས་རྣམས་དག །མ་འདྲེས་ཐེག་པ་བསམ་ཡས་ཀྱིས། །སྐུ་གསུང་ཐུགས་ཀྱི་དཀྱིལ་འཁོར་བསྡུས། །རབ་འབར་གསལ་བས་བརྗིད་པའི་སྐུ། །གསང་སྔགས་ཡི་གེའི་ཕྲེང་བས་མཛེས། །ཨོཾ་མ་ཧཱ་སུ་ཁཱ་བཛྲ་སཏྭ་ཨཱཿ། ཛཿཧུཾ་བཾ་ཧོཿ། སུ་ར་ཏ་སྟྭཾ། ཕྱག་རྒྱ་ཆེན་པོ་རྫོགས་པ་ཡི། །རྡོ་རྗེ་སེམས་གཙོ་བདེ་བའི་མཆོག །ཞལ་བཞི་ཕྱག་བཞི་ཞབས་གཉིས་མཛེས། །དབུས་དཀར་ཟླ་བའི་དཀྱིལ་འཁོར་བཞིན། །གཡས་སྔོ་གཡོན་དམར་རྒྱབ་སེར་བོ། །རིན་ཆེན་རྒྱན་གྱིས་རྣམ་པར་མཛེས། །ཐུགས་རྗེ་ཆགས་པའི་དོན་མདངས་ལྡན། །ཕྲིན་ལས་རྣམ་བཞི་ཆ་ལུགས་བཅས། །གཡས་ན་རྡོ་རྗེ་རྩེ་ལྔ་འབར། །གཡོན་ན་ཁ་ཊྭཱཾ་དྲིལ་བུ་འཁོར། །འོག་གཉིས་ཞི་གནས་ལྷག་མཐོང་རྒྱ། །འོད་མདངས་ལྔ་ཡི་ཕྲེང་བས་མཛེས། །རིན་ཆེན་རྒྱན་དང་ན་བཟའ་དང༌། །ཕྱག་རྒྱ་རྣམ་ལྔ་མཚན་དཔེ་རྫོགས། །འོད་ཀྱི་རིག་མ་དང་སྦྱོར་ཅིང༌། །བདེ་བའི་རོལ་པས་ཀུན་སྤྱོད་མཛད། །མཁའ་དབྱིངས་དབང་ཕྱུག་ཕྱག་རྒྱ་ཡིས། །གནས་ཀུན་བྱིན་གྱིས་བརླབ་པར་བྱ། །ལུས་དང་ངག་སེམས་རྡོ་རྗེ་ཡི། །མཚན་མའི་ཕྱག་རྒྱ་ལྡན་བྱས་ཏེ། །ཐམས་ཅད་འབྱུང་བའི་སྦྱོར་བ་ཡིས། །བདག་གི་ལྷར་ནི་བདག་ཉིད་བྱ། །ཐུགས་གསལ་ཉི་མ་ལ་གནས་པའི། །ཡེ་ཤེས་སེམས་དཔའ་ཧཱུཾ་དང་བཅས། །འོད་ཟེར་འཕྲོ་
༄། །འདུ་སྦྱོར་བ་ཡིས། །རང་བཞིན་དཀྱིལ་འཁོར་དགུག་བྱས་ཏེ། །གཉིས་མེད་སྦྱོར་བའི་བྱང་ཆུབ་སེམས། །བདུད་རྩིའི་བུམ་བཅས་ལྷ་མོའི་ཚོགས། །གནས་རྣམས་ཀུན་དུ་ཁྲུས་བྱས་པས། །རིགས་ཀྱི་བདག་པོས་ཉེ་བར་མཛེས། །མཐེ་བོང་སེམས་དཔའི་སྐྱིལ་མོ་ཀྲུང༌། །མཛུབ་མོ་གཉིས་ཀྱི་རྩེ་མོ་དགུག །གུང་མོ་གཉིས་ནི་མཉམ་པར་སྦྱོར། །ལྷག་མ་རྡོ་རྗེ་ཐལ་མོ་ཉིད། །སྤྱི་བོ་དང་ནི་དཔྲལ་བ་དང༌། །མགྲིན་པ་གཉིས་དང་ལྟག་པར་རོ། །ཨོཾ་ཨ་བི་ཥིཉྩ་མཾ། །ཐོད་སྐམ་ཕྱག་རྒྱས་བརྟན་བྱས་པས། །རིམ་བཞིན་གནས་ཀུན་བརྒྱན་པར་བྱ། །ཧཱུཾ་ཨ་བིཥིཉྩ་མཾ། རིན་ཆེན་མྱུ་གུའི་ཕྱག་རྒྱ་ཡིས། །རྒྱན་རྣམས་ཉེ་བར་གདགས་བྱས་ཏེ། །རིན་ཆེན་ཕྲེང་བ་དར་དཔྱངས་བཅིང༌། །རྡོ་རྗེ་རྒྱ་གྲམ་ཁྲོ་བོར་བཅས། །སྐ་ནན་རྒྱན་ཐག་བགོས་པ་དང༌། །མཉེས་པའི་ཐལ་མོས་བརྟན་པར་བྱ། །ཨོཾ་རཏྣ་མཱ་ལ་ཨ་བི་ཥིཉྩ་ཏྲཱཾ། ཨོཾ་པ་ཏྲ་ལཾ་བ་ཨ་བྷི་ཥིཉྩ་ཧཱུཾ། ཨོཾ་བཛྲ་ཏུ་ཤྱ་ཧོ། །རྗེས་སུ་ཆགས་པའི་རྣམ་མང་དགའ་བའི་པདྨ་རྣམས། །དག་པའི་མཆོད་པས་གསལ་བར་རྗེས་སུ་མཆོད་བྱས་བ། །མཆོག་ཏུ་རྟག་པའི་རྣལ་འབྱོར་བདེ་བས་གྲུབ་པར་མཛོད། །ཨེ་མ་ཧོ་མཆོག་ཏུ་བདེ་བའི་དམ་ཚིག་ངོ་བོ་ཉིད། །མཆོག་ཏུ་བདེ་བའི་རྣལ་འབྱོར་སྐལ་བཟང་མཆོག །རང་གི་དམ་ཚིག་རྟག་ལ་རོལ་ཅིག་རོལ་ཅིག་ཧོ། །མཁའ་གསང་དབྱངས་དང་ཡེ་ཤེས་རྒྱ། །ས་བོན་རྡོ་རྗེ་པདྨར་བཅས། །ལིངྒ་འགྲེང་བ་རང་འབྱུང་བ། །བརླ་ཡི་དབུས་སུ་གཞུག་བྱ་སྟེ། །ལིངྒ་རྡོ་རྗེར་བྱིན་བརླ་བས་པས། །རྡོ་རྗེ་སེམས་སོགས་སྐུར་བསྐྱེད་དོ། །འོད་འཕྲོ་ཀུན་དུ་ཁྱབ་པ་ཡིས། །སངས་རྒྱས་ཐམས་ཅད་མཉེས་མཛད་ཅིང༌། །འགྲོ་བའི་གནས་ཆེན་རྣམ་དག་པར། །མཁའ་གསང་རྫོགས་པའི་དཀྱིལ་འཁོར་ཉིད། །ཧཱུཾ་ལས་བསྐྱེད་པའི་རྡོར་སེམས་ནི། །གསང་གནས་དབུས་ཀྱི་གདན་ལ་གཞུག །ཨོཾ་ལས་གླིང་བུ་ཏྲཱཾ་པི་ཝཾ། །བཾ་ལས་རྔ་ཆེན་ཛཾ་རྫ་རྔ། །ཨ་ལས་མེ་ཏོག་ཨཱ་སྤོས་མེ། །ཨཾ་ལས་མར་མེ་ཨི་དྲི་ཆབ། །ཕྱོགས་དང་མཚམས་སུ་རིམ་པ་བཞིན། །མཆོད་པའི་ལྷ་མོ་བརྒྱད་རྣམས་སོ། །ཛཿ་ཧཱུཾ་བཾ་ཧོཿསྒོ་བཞི་རུ། །རྟ་མགྲིན་འཕང་མཐོ་ལ་སོགས་བསྐྱེད། །བྷ་གར་ལིངྒ་བཅུག་བྱས་ནས། །དེར་ནི་མཚན་མ་བསྒོམ་པར་བྱ། །རྡོར་ཇེ་སེམས་དཔའི་ཕྱག་རྒྱ་ཆེ། །སྐུ་གཉིས་ལྡན་པར་སྤྲོ་བྱའོ། །ཀུན་དུ་དོན་མཛད་འདུས་པ་དང༌། །ཐབས་དང་ཤེས་རབ་རྫོགས་པར་སྦྱོར། །གླིང་བུ་
༄། །སྔོན་མོ་རྡོ་རྗེས་མཚན། །རྡོ་རྗེ་ལྕགས་སྒྲོག་ཤར་གྱི་ཕྱོགས། །པི་ཝང་སེར་མོ་རྡོ་རྗེས་མཚན། །གླུ་དབྱངས་དྲུག་ལྡན་ལྷོ་ཡི་ཕྱོགས། །རྔ་ཆེན་དམར་མོ་རྡོ་རྗེའི་རྔ། །བརྡུང་མཛད་ནུབ་ཀྱི་ཕྱོགས་ན་གནས། །རྫ་རྔ་ལྗང་གུ་རྫ་རྔལ་། །རྡོ་རྗེས་མཚན་བརྡུང་བྱང་གི་ཕྱོགས། །མེ་ཏོག་དམར་སེར་རྡོ་རྗེས་མཚན། །གཞོང་ཐོགས་མེ་ཡི་མཚམས་སུ་གནས། །སྤོས་མེ་དཀར་སྔོན་རྡོ་རྗེས་མཚན། །པོག་ཐོགས་བདེན་བྲལ་མཚམས་སུ་གནས། །མར་མེ་དམར་མོ་རྡོ་རྗེས་མཚན། །གསལ་འཛིན་རླུང་གི་ཕྱོགས་སུ་གནས། །དྲི་ཆབ་ལྗང་ཁུ་རྡོ་རྗེས་མཚན། །དག་འཐོར་དབང་ལྡན་མཚམས་སུ་གནས། །རྟ་མགྲིན་འཕང་མཐོ་དཀར་མདངས་ཅན། །ལྕགས་ཀྱུ་རྟ་མགོ་ལྗང་གུ་ཤར། །ཕག་གདོང་ནག་མོ་ཞགས་པ་གཡོན། །གཡས་པ་མཆེ་བ་ལྷོ་ཡི་སྒོར། །སྣང་བ་དམར་མོ་ཕྱག་གཉིས་ཀྱིས། །ཉི་ཟླ་ལྕགས་སྒྲོག་ནུབ་ཀྱི་ཕྱོགས། །ཐལ་བྱེད་ལྗང་གུ་གཡས་དྲིལ་བུ། །གཡོན་པ་བྷནྡྷ་དཀུར་བཅས་བྱང༌། །ཨོཾ་ཧེ་ར་ཏི་བཛྲ་བི་ལ། སི་ན་ཏྲ་ཐ། ཧེ་ར་ཏི་བཛྲ་གཱི་ཏེ་ཏེ་ཏཾ། ཧེ་ར་ཏི་བཛྲ་ཧཱ་སྱ་ཧ་ཏ་བཾ། ཧེ་ར་ཏི་བཛྲ་ནྲྀ་ཏེ་པེ་བ་ལེ་བ་ཛཾ། ཨོཾ་བཛྲཥྤེ། ཨོཾ་བཛྲ་དྷཱུ་པེ། ཨོཾ་བཛྲ་ཨཱ་ལོ་ཀེ། ཨོཾ་བཛྲ་གནྡྷེ། ཨོཾ་བཛྲ་ཨཾ་ཀུ་ཤ་ཛཿ། ཨོཾ་བཛྲ་པཱ་ཤ་ཧཱུཾ། ཨོཾ་བཛྲ་ཤྲིཾ་ཁ་ལི་བཾ། ཨོཾ་བཛྲ་གཎྜེ་ཧོཿ། །འདོད་པའི་ཡོན་ཏན་ཚོགས་རྣམས་ཀྱིས། །རྣམ་མཛེས་ཕྲེང་བའི་རྒྱན་ཐོགས་ཤིང༌། །གླུ་དབྱངས་རོལ་མོའི་གར་དུ་བཅས། །ལྷ་མོ་བཅུ་གཉིས་རང་སྣང་རྫོགས། །དབང་པོ་དྲུག་ལ་སངས་རྒྱས་ཀྱི། །གསང་སྔགས་ཕྱག་རྒྱ་སྦྱོར་བའི་མཐུས། །རིགས་ཀྱི་བདག་པོ་ཡུམ་དང་བཅས། །རྣམ་དག་མངོན་ཤེས་ཡེ་ཤེས་རྫོགས། །ལག་གཉིས་རོལ་པའི་བརྟུལ་ཞུགས་ཀྱིས། །གནས་གསུམ་རྡོ་རྗེ་འཆིང་སྦྱོར་ཅིང༌། །རྡོ་རྗེ་སེ་གོལ་བརྡབ་བྱ་སྟེ། །སངས་རྒྱས་ཐམས་ཅད་བསྡུ་བར་བྱ། །ཨོཾ་སྟོང་པ་ཤིན་ཏུ་ཡོད་མེད་རྣལ་འབྱོར་མཐུས། །ནམ་མཁའ་ཉིད་དུ་དམ་ཚིག་ཉེ་བར་གནས། །བདེ་གཤེགས་བདེ་བར་གཤེགས་པ་བཞེངས་སུ་གསོལ། །རྡོ་རྗེ་སེམས་དཔའ་སྐལ་བཟང་དཔལ་ཁྱོད་བདག །ཛཿཧཱུཾ་བཾ་ཧོཿ། ཨེ་ཨཱ་རལླི་བྷ་ག་ཝཱན། མ་ཧཱ་ཀ་རུ་ཎི་ཀ་དྲྀ་ཤྱ་ཧོཿ། །ས་མ་ཡ་ཧོཿ། །ས་མ་ཡ་སྟྭཾ། ཛཿཧཱུཾ་བཾ་ཧོཿ། ཏིཥྛ་བཛྲ་ཧོཿ། །སྒྱུ་འཕྲུལ་དགའ་བའི་རྡོ་རྗེ་རོལ་པའི་ཚོགས། །གཞན་ལ་སྣང་བའི་
༄། །དཀྱིལ་འཁོར་རྣམ་པར་མཛེས། །ཚངས་པའི་ཚོགས་རྣམས་ཟིལ་གྱིས་གནོན་མཛད་པའི། །རྟོག་པ་དུ་མའི་སྒྲོ་འདོགས་གཅོད་པར་མཛད། །གཉིས་མེད་ཡེ་ཤེས་གཉིས་ཅན་རྣམ་མཐའ་ཡས། །སྣང་སྟོང་བདེ་ཆེན་མཉམ་ཉིད་དབྱིངས་ལ་རོལ། །ཀུན་འབྱུང་ཡོན་ཏན་རྩོལ་མེད་ལྷུན་གྲུབ་སྣང༌། །རྒྱན་གྱི་དཀྱིལ་འཁོར་རྣམ་བཀོད་རང་ལས་བྱུང༌། །མཛད་པ་རྒྱ་ཆེན་འགོག་མེད་ལྷུན་གྲུབ་པས། །ཚོགས་བཅས་རོལ་པས་བྱ་བ་ཀུན་རྫོགས་གནས། །སྐུ་གསུང་ཐུགས་མཆོག་ཡོན་ཏན་ཕྲིན་ལས་རྒྱན། །དཀྱིལ་འཁོར་མཛེས་པའི་ལྷ་ལ་ཕྱག་འཚལ་ལོ། །ཨོཾ་ཨཱཿཧཱུཾ། ཨ་ཏི་པུ་ཧོ། །སརྦ་ཏ་ཐཱ་ག་ཏ་བནྡྷ་ནཾ་ཀ་རོ་མི། ཨ་ལ་ལ་ཧོ། །དཔལ་ལྡན་གཡོན་པ་འགྱིང་བའི་ཐབས། །གཡས་པ་བ་དན་གསུམ་པར་བྱ། །སྲི་ཞུ་བྱས་ཤིང་བཏེག་པའི་མཆོག །བདག་ཉིད་རྡོ་རྗེ་སེམས་དཔའ་དཔལ། །འཛུམ་དང་བཅས་པའི་མིག་གིས་བལྟ། །བསམ་པ་གཡོས་པས་ཕྱག་འཚལ་ལོ། །ཨོཾ་བདེ་བར་གཤེགས་སོ་བཅོམ་ལྡན་འདས། །རྒྱལ་བ་རྒྱ་མཚོ་ཡེ་ཤེས་ཀྱིས། །སྲིད་པའི་རྒྱ་མཚོ་མཐའ་ཡས་ཀུན། །ཀུན་བཟང་མཆོད་སྤྲིན་མཆོག་ཏུ་རོལ། །ཨོཾ་ན་མཿསརྦ་ཏ་ཐཱ་ག་ཏེ་བྷྱོ། །བི་ཤྭ་མུ་ཁེ་བྷྱ། སརྦ་ཏདྑཾ་ཨུངྒ་ཏེ་སྤ་ར་ཎ་ཧི་མཾ་གག་ན་ཁཾ་སྭཱ་ཧཱ། ཚད་མེད་བཞི་ཡི་ཕྱག་རྒྱ་ཡིས། །མདུན་གྱི་དཀྱིལ་འཁོར་མཉེས་པ་དག །དམ་ཚིག་དཀྱིལ་འཁོར་ལ་གཞུག་ཅིང༌། །མཉེས་ནས་དགེས་ཤིང་བརྟན་པར་མཛོད། །རྡོ་རྗེ་སེམས་དཔའི་ཏིང་འཛིན་མཆོག །ཕྱག་རྒྱ་ཆེན་པོའི་ཆ་ལུགས་ལྡན། །ཁམས་གསུམ་ཀུན་དུ་རྒྱས་བཏབ་ཅིང༌། །རིགས་ཀྱི་དཀྱིལ་འཁོར་གསང་བའི་བདག །ཨོཾ་བཛྲ་སཏྭ་ཧཱུཾ། མ་ཧཱ་མུ་དྲ་སྟྭཾ། རྡོ་རྗེ་སེམས་དཔའ་སྐལ་བཟང་དཔལ་ཁྱོད་བདག །བདག་ཅག་སྒྲུབ་ལ་རྟོགས་པར་མཛད་དུ་གསོལ། །རིགས་མཆོག་སངས་རྒྱས་ཐམས་ཅད་འདུས་པ་ཡི། །བྱིན་རླབས་དབང་བསྐུར་ཆོ་འཕྲུལ་བླ་ན་མེད། །ཨ་ལ་ལ་ལ་ཧོ། །ལྗགས་ཀྱི་པདྨོ་མཚན་བཅས་དཀྱིལ། །འོད་ཟེར་སྦྱོར་བའི་སྔགས་དང་བཅས། །ཨོཾ་ན་མཿསརྦྦ་སྟུ་ཏ་སརྦྦ་བུདྡྷེ་བྷྱཿཧཱུཾ་ཕཊ། དཔལ་གྲུབ་སྤྱན་གྱི་ཕྱག་རྒྱ་ཉིད། །དམ་ཚིག་གནས་སུ་གཞག་པར་བྱ། །ཨོཾ་བཛྲ་སཏྭ་ས་མ་ཡ་ཧཱུཾ། སྲིན་ལག་མཐེའུ་ཆུང་ཡན་ལག་
༄། །དབུས། །མཐེ་བོང་ལེགས་གཞུག་དམ་པར་བཅིངས། །རྡོ་རྗེ་ཁུ་ཚུར་སོ་སོ་ཡི། །མཛུབ་མོ་ལྕགས་ཀྱུ་ལྟ་བུར་བྱ། །ཨོཾ་བཛྲ་ས་ཏྭ་ཀརྨ་མུ་དྲ་ཧཱུཾ། ཨོཾ་པ་ན་པེ་ན་པེ་ནུ་སུ་ར་ཏ་ཏི་པུ་པ་ར་མུ་ས་མ་ཡོ་ག་སི་ཏ་ཨཱཿཧཱུཾ། ཨོཾ་ཨཱཿཧཱུཾ། རབ་ཏུ་དགའ་བའི་བདག་ལ་ཕྱག་འཚལ་ལོ། །དེ་བཞིན་གཤེགས་པའི་དམ་ཚིག་དམ་པ་གྲུབ་པར་མཛོད། །དམ་ཚིག་དམ་པ་གྲུབ་པར་མཛད་དུ་གསོལ། །མཆོད་པ་ཆེན་པོ་ཐམས་ཅད་གྲུབ་པར་མཛོད། །མཉམ་པ་ཆེན་པོའི་གནས་ལ་རོལ་དུ་གསོལ། །གྱེན་དུ་འཐོར་དང་ཐུར་དུ་འབེབས། །མར་མེ་འདེགས་སོགས་སོ་སོའི་རྒྱ། །གླིང་བུ་དང་ནི་པི་ཝང་དང༌། །རྒྱུད་མངས་རྒྱུད་དྲུག་སིལ་སྙན་དག །དངོས་འབྱོར་སྤྲུལ་པ་གང་ཡང་རུང༌། །རིམ་བཞིན་སྔགས་དང་སྦྱར་ཏེ་དབུལ། །ཨོཾ་འབྱུང་བ་ལྔ་ལས་ཐམས་ཅད་འབྱུང༌། །རང་ལས་མ་བྱུང་གང་ཡང་མེད། །གཙང་སྨེའི་དྲི་རྟོག་ཀུན་བྲལ་བའི། །བདུད་རྩི་བྱང་ཆུབ་སེམས་ཆེན་པོས། །བདག་སོགས་གཉིས་སུ་མེད་པའི་ཕྱིར། །མཉམ་པ་ཆེན་པོའི་གནས་ལ་རོལ། །ཨོཾ་ན་མ་སརྦ་པཉྩ་ཨ་མྲི་ཏ་ཨཱཿཧཱུཾ་སྭཱ་ཧཱ། །ཨོཾ་ཤིན་ཏུ་བརྒྱན་པའི་རིགས་དང་མཚན་ལྡན་མཆོག །བཀྲ་ཤིས་གླུ་དབྱངས་གར་གྱིས་བསྐྱོད་བྱས་པའི། །ལྷ་མོ་རྡུལ་སྙེད་ཕྱོགས་བཅུར་སྤྲོ་བྱས་ནས། །བྱང་སེམས་བདེ་བའི་མཆོད་པས་རྣམ་པར་རོལ། །ཨོཾ་མ་ཧཱ་སུ་ཁ་བོ་དྷི་ཙིཏྟ་ཨ་ལ་ལ་ཧོ། །ཨོཾ་མཉམ་ཉིད་མི་གཡོ་མཉམ་ཉིད་མཆོག་གི་ཆོས་ཉིད་ཅན། །ཐུགས་རྗེའི་བདག་ཉིད་འགྲོ་བའི་སྡུག་བསྔལ་སེལ་བར་མཛད། །ཡོན་ཏན་མཐའ་ཡས་དངོས་གྲུབ་ཐམས་ཅད་སྦྱིན་མཛད་པ། །དྲི་མེད་མི་གཡོ་མཉམ་མེད་པ་ཡི་ཆོས་མཆོག་ཅན། །ཨོཾ་ཡོན་ཏན་ཤིན་ཏུ་ཕྲ་བའི་ཆ་ལའང་ཚད་མེད་དེ། དཔེ་ནི་ནམ་མཁའ་དང་ཡང་བསྐྲུན་དུ་ཡོད་མ་ཡིན། །དངོས་གྲུབ་མཐའ་ཡས་མཉམ་མེད་དཔེ་དང་བྲལ་བ་རྣམས། །སེམས་ཅན་ཁམས་ལ་དངོས་གྲུབ་མཆོག་རྣམས་ངེས་པར་སྩོལ། །ཨོཾ་རྟག་ཏུ་དྲི་མ་མེད་པའི་ཐུགས་རྗེ་ཤུགས་ལས་བྱུང༌། །སྨོན་ལམ་གྲུབ་པ་འགག་པ་མེད་པའི་ཆོས་ཉིད་ཅན། །འགྲོ་བའི་དོན་བསྒྲུབ་རལ་ཏུ་བརྩོན་པ་མཐའ་ཡས་ལྷུར་མཛད་པ། །ཐུགས་རྗེ་ཆེན་པོའི་བདག་ཉིད་རྟག་ཏུ་རྣམ་པར་གནས། །ཨོཾ་ཚད་མེད་ཚད་དང་བྲལ་བ་ཤིན་ཏུ་རྫོགས་པ་ཡི། །བདེ་བར་
༄། །གཤེགས་པའི་གོ་འཕང་དམ་པ་བརྙེས་གྱུར་ཀྱང༌། །ཁམས་གསུམ་རྣམས་ལ་དངོས་གྲུབ་མཆོག་སྩོལ་མཛད་པ་ཡི། །ཐུགས་རྗེའི་སྤྱོད་པ་མི་གཡོ་འགག་པར་ཡོད་མི་འགྱུར། །ཨོཾ་ཤིན་ཏུ་བཟང་པོའི་ཆོས་ཉིད་མཆོག་དང་ལྡན། །མཆོག་སྦྱིན་རྣམས་ཀྱི་ནང་ན་གོ་འཕང་མཆོག་བརྙེས་པ། །མགོན་པོ་དུས་གསུམ་སྒྲིབ་པ་མེད་པར་རབ་མཁྱེན་ཅིང༌། །དམ་ཚིག་མཆོག་གསུམ་དངོས་གྲུབ་དམ་པ་བདག་ལ་སྩོལ། །དམ་ཚིག་ལ་གནས་བརྟུལ་ཞུགས་མཆོག །གསང་སྔགས་ཐེགས་པའི་སྤྱོད་པ་ཉིད། །རབ་རྫོགས་བྱང་ཆུབ་ཀུན་དོན་བཞིན། །འཁོར་ལོ་བླ་མེད་རྫོགས་གྱུར་ཅིག །ཐུགས་རྗེ་ཆེ་མངའ་ཐབས་ལྡན་པེས། །རིགས་ཀྱི་དངོས་པོ་བརྟན་པར་མཛོད། །བྱ་བའི་ཡེ་ཤེས་མཐའ་ཡས་མཆོག །ཕྲིན་ལས་གནས་ཆེན་རྫོགས་གྱུར་ཅིག །རིགས་ཀྱི་སེམས་དཔའ་གསུམ་ལྡན་པ། །ཕྱག་རྒྱའི་མཚན་མ་ཡི་གེར་བཅས། །འོད་འཕྲོ་གསལ་བ་རྣམ་གཉིས་ཀྱིས། །ཐབས་དང་ཤེས་རབ་རྣམ་གཉིས་རྒྱུན། །རིན་ཆེན་ཐིག་ལེ་སྣ་ཚོགས་འོད། །རིགས་ཀྱི་འཁོར་ལོ་རྫོགས་བྱེད་པའོ། །ཨོཾ་མ་ཧཱ་སུ་ཁ་བཛྲ་སཏྭ་ཨཱཿཛཿཧཱུཾ་བཾ་ཧོཿསུ་ར་ཏ་སྟྭཾ། ཡེ་ཤེས་དཀྱིལ་འཁོར་བརྟན་བྱེད་པའི། །ཡན་ལག་ཆོ་གས་ཀུན་བསྡུས་ཏེ། །རིན་ཆེན་འབར་བའི་གོང་བུ་ལ། །མཚན་མ་རྣམ་གསུམ་རིམ་བཞིན་རྫོགས། །ཕྱག་རྒྱའི་དཀྱིལ་འཁོར་སྤྲོ་བསྡུ་ཀུན། །མཚན་མ་རྣམ་པ་ལྔ་ཡི་མཐར། །ཇི་སྲིད་ཡུལ་ཀུན་བརྟན་གནས་པ། །དེ་ནས་དམིགས་པ་མེད་པའི་མཆོག །ཕྱག་རྒྱའི་གསང་གནས་དཀྱིལ་འཁོར་དུ། །ཡི་གེ་མཚན་མ་ཕྲ་མོ་སྐུ། །རིམ་བཞིན་རྫོགས་པར་ལས་མཛད་ཅིང༌། །ཕྱག་རྒྱ་བརྟན་པའི་ཏིང་ངེ་འཛིན། །ཁམས་གསུམ་ཡུལ་བཅས་རྣམ་དག་པའི། །བྱང་ཆུབ་སེམས་མཆོག་བདེ་བའི་རྒྱུན། །འཁོར་ལོ་བཞི་གནས་རིམ་པ་བཞིན། །དགའ་བ་བཞིས་བསྐྱོད་ཉི་ཟླའི་རྒྱ། །གོང་གི་ཕྱག་རྒྱའི་ཚོགས་དང་བཅས། །རབ་ཏུ་ཆགས་པ་རྣམ་གྲོལ་སེམས། །སྐུ་གསུང་ཐུགས་ཀྱི་སྦྱོར་བ་ཡིས། །གནས་གསུམ་བདེ་བ་མེ་མར་བཞིན། །རྣམ་པར་སྤྲོ་ཞིང་བསྡུ་བྱ་སྟེ། །འདོད་པའི་ཡན་ལག་རྫོགས་པ་ཡི། །ཐིག་ལེ་མཉམ་དང་མཉམ་སྦྱོར་བས། །དགའ་བཅས་བྱང་ཆུབ་སེམས་གཞི་བདག །འབྱོར་ཚོགས་ཡང་དག་སྦྱོར་བའི་མཐུས། །སྐྱེ་འགག་ཆོས་ཀུན་རྣམ་པར་སྤངས། །རྡོ་རྗེ་སེམས་དཔའ་
༄། །དཔལ་སྦྱོར་བ། །ཇི་ལྟའི་གཟུགས་དང་དབྱིབས་སུ་ལྡན། །བདེ་བ་ཉིད་ཀྱི་ཀུན་གྱི་བདག །ཀུན་གྱི་བདག་ལ་གཞུག་པར་བྱ། །ཆགས་པ་མེད་ཅིང་མ་ཆགས་མེད། །དབུ་མར་ཡང་ནི་དམིགས་སུ་མེད། །བུད་མེད་ཀུན་གྱི་སྒྱུ་སྦྱོར་འདི། །གཉིས་སུ་མེད་པའི་ཐེག་པ་མཆོག །ཐུན་མཚམས་སྦྱོར་བའི་ཕྱག་རྒྱ་ཡིས། །རིགས་ཀྱི་དམ་ཚིག་སྔགས་གསལ་ཞིང༌། །བཟླས་བརྗོད་ལ་སོགས་གྲངས་ཀྱིས་འཇུག །ཡེ་ཤེས་རྫོགས་པའི་འཁོར་ལོ་ཉིད། །དམ་ཚིག་ཡུལ་ཀུན་མཉམ་སྦྱོར་ཞིང༌། །རིམ་དང་ཅིག་ཅར་ཡན་ལག་གིས། །མཚན་བཅས་མཚན་མ་མེད་གནས་དག །རབ་ཏུ་བརྟན་པས་གཉིས་མེད་རྫོགས། །མང་དུ་བསགས་པའི་རྫས་རྣམས་ཀུན། །དག་པའི་སྣོད་རྣམས་བཀང་བྱས་ཏེ། །ཉེ་བར་བསྒྱུར་བའི་བྱིན་རླབས་ཀྱིས། །གཉིས་མེད་བདུད་རྩི་ཆེན་པོར་བསྒྲུབ། །བསྙེན་པ་རབ་གསལ་རྫོགས་པ་ལས། །ཉེ་བར་བསྙེན་པའི་བྱིན་རླབས་རྒྱས། །བསྒྲུབ་པ་བདག་གཞན་འབྲས་བུ་ཉིད། ཡང་དག་བརྟན་འགྱུར་དགའ་ཆེན་པོ། །འཇིག་རྟེན་མགྲོན་ཚོགས་མ་ལུས་པ། །རང་གི་སྔགས་དང་ཕྱག་རྒྱས་དགུག །གཏོར་མའི་རྫས་རྣམས་བསགས་པ་དང༌། །དུས་གཅིག་ཐུགས་ཀྱི་མེས་བསྲེགས་ཤིང༌། །གསུང་གི་བདུད་རྩི་དག་པར་མཛད། །སྐུ་ཡི་བྱིན་རླབས་ཡེ་ཤེས་ལྔ། །ཉེ་བར་བཀོད་པའི་སྦྱིན་རྣམས་ཀྱིས། །ཐམས་ཅད་དཀྱིལ་འཁོར་བརྟན་པའི་ཚོགས། །ཐབས་ཀྱི་དཀྱིལ་འཁོར་མཉམ་སྦྱོར་ཞིང༌། །ཤེས་རབ་ཡུམ་བཅས་རོལ་པ་ཉིད། །དེ་དག་སྔགས་དང་ཕྱག་རྒྱ་ཡིས། །དབང་བསྐུར་བྱིན་རླབས་རྫོགས་པར་མཆོད། །སྤྱོད་ལམ་ཀུན་དུ་མ་ཉམས་བློས། །ཕྱག་རྒྱའི་དཀྱིལ་འཁོར་བརྟན་བྱས་ཏེ། །ཐབས་དང་ཤེས་རབ་གར་སོགས་ཀྱིས། །རོལ་པའི་འཕྲོ་འདུ་རྒྱུན་བཞིན་གནས། །ངེས་པའི་གསང་མཆོག་ཕྱག་རྒྱའི་ཚོགས། །ཉེར་གསལ་བཤད་པའི་ཚུལ་དག་གིས། །དོན་ཀུན་སྐུ་གསུང་ཐུགས་ཀྱི་ཚུལ། །རབ་སྦྱངས་བརྟན་པས་རྫོགས་པ་ཉིད། །མི་ཤེས་དྲི་མ་ཀུན་སེལ་ཅིང༌། །ཡང་དག་ཡེ་ཤེས་གནས་གསལ་བྱེད། །རིགས་མཆོག་འཁོར་ལོ་རྫོགས་པ་ཡི། །སྒྲུབ་པའི་ཐབས་འདི་རྒྱས་པར་ཤོག ། །དཔལ་རྡོ་རྗེ་སེམས་དཔའ་རྗེས་སུ་དྲན་པའི་ཆོ་ག་ཞེས་བྱ་བ། །སློབ་དཔོན་ཆེན་པོ་ཐུ་པོ་རཱ་ཛ་ཧ་ཏི་ས་མཛད་པ་རྫོགས་སོ།། །།