ཆོམ་རྐུན་བཅིང་བ།
― DTG028_Page_0112 ―
[མ་དཔེ་གཟིགས་ན་འདིར་གནོན།]
༄། །རྒྱ་གར་སྐད་དུ། ཙཽ་ར་བནྡྷ་ན། བོད་སྐད་དུ། ཆོམ་རྐུན་བཅིང་བ། མྱ་ངན་མེད་པའི་སྒྲོལ་མ་ལ་ཕྱག་འཚལ་ལོ། །གླང་ཆེན་སྟག་དང་མི་རྒོད་དང༌། །ཆོམ་རྐུན་འཇིགས་པ་བསྲུང་བའི་ཕྱིར། །རླུང་གི་བུམ་པས་ལུས་སྦྱོང་བ། །མྱ་ངན་མེད་པའི་སྒྲོལ་མ་མཆོད། །དེ་ཡང་སྒྲུབ་པའི་ཐབས་ནས་ཇི་ལྟར་བཤད་པའི་ཆོ་གས་འཕགས་མའི་ཚོགས་ཡོངས་སུ་མཉེས་པར་བྱས་ལ། ནགས་ཚལ་ལམ་རི་ཁྲོད་ལ་སོགས་པ་གནས་ཁྱད་པར་ཅན་དུ་རི་དགས་ཀྱི་པགས་པའམ། འགན་འཇི་སྔོན་པོ་ལེགས་པར་བཏགས་པ་ལ་འདུག་ལ། བྱམས་པ་དང་སྙིང་རྗེ་ཆེན་པོ་སྔོན་དུ་སོང་བས་བདག་གི་སྙིང་གར་པཾ་ལས་པདྨ་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་ཏཱཾ་སེར་པོ་དེ་ལས་ཕྱོགས་བཅུར་འོད་འཕྲོས་འཕགས་མ་དགྱེས་པ་དང་སེམས་ཅན་གྱི་དོན་བྱས་ལ། སླར་བསྡུས་པས་ཏཱཾ་ལ་ཐིམ་པ་དང་བདག་ཉིད་མྱ་ངན་མེད་པའི་སྒྲོལ་མ་སྐུ་མདོག་གསེར་བཙོ་མའི་མདོག་འདྲ་བ་རིན་པོ་ཆེ་སྣ་ཚོགས་ཀྱི་དབུ་རྒྱན་ཅོད་པན་དང་ལྡན་པ། ཞལ་གསུམ་ཕྱག་དྲུག་གཡས་སྔོ་གཡོན་དམར་བ། གཡས་བས་རལ་གྲི་དང་དགྲ་སྟ་དང་མདའ། གཡོན་པས་ཞགས་པ་དང་གཞུ་དང་དུང་འཛིན་པར་བསྒོམས་ལ། ཨོཾ་ཏཱ་རེ་ཏུཏྟཱ་རེ་ཏུ་རེ་བྷ་ཡ་ཧ་ར་ཎེ་རཀྵ་བ་ར་ནཾ་གུ་པྟིཾ་བིདྱཱཿ་ཤྱཱ་མ་ཧེ་སྭཱ་ཧཱ། ཞེས་པའི་སྔགས་བཟླ་ཞིང་སྟག་པའི་ཤུན་ལྤགས་ལ་གུར་གུམ་དང་གི་ཝཾ་གིས་འཁོར་ལོ་རྩིབས་བདུན་བ་བྲིས་པ་ལ་སྙིང་པོ་གཟུངས་དང་བཅས་པ་ལྟེ་བ་ལ་སོགས་པ་ལ་ཅི་རིགས་པ་བྲིས་ལ། སྦྱིན་སྲེག་དང་གཏོར་མའི་ཆོ་གས་མཆོད་ལ། སྔགས་དང་འོད་ཟེར་གྱི་རང་བཞིན་གྱི་འཁོར་ལོ་དྲིལ་ལ་མགྲིན་པའམ། དཔུང་པ་ལ་བཅིང་བར་བྱའོ། །དེ་ནས་འབྲོག་དགོན་པ་ལ་སོགས་པ་ཉམ་ང་བའི་གནས་སུ་སྒྲོལ་མ་གསལ་བར་བསྐྱེད་ལ་སྔོན་དུ་གོམས་པར་བྱས་པའི་རླུང་བསྲེ་ཞིང་སྙིང་པོ་དང་གཟུངས་སྔགས་བཟླ་ཞིང་བདག་གི་གྲི་བ་མ་བཞིན་དུ་གཡས་སུ་འོད་ཟེར་ཅན་མྱ་ངན་ ― DTG028_Page_0113 ―
[མ་དཔེ་གཟིགས་ན་འདིར་གནོན།]
༄། །མེད་པའི་ཆ་ལུགས། །ཕག་བདུན་གྱིས་དྲངས་པའི་ཤིང་རྟ་ལ་བསྐྱོན་ནས་མི་འཇིགས་ཀྱི་སྒྲས་བརྒྱན་པ་དང༌། གཡོན་ལོགས་ན་སྡིགས་མཛུབ་སྒྲོལ་མ་དམར་མོ་ཞལ་གཅིག་ཕྱག་གཉིས་མ་གཡས་པས་སྡིགས་མཛུབ། གཡོན་ཌ་མ་རུའི་སྒྲ་འབྱིན་པ། ལུས་གོས་དང་བྲལ་བས་མི་འཇིགས་པའི་དབྱངས་སྒྲོགས་ཤིང་གཤེགས་པར་བསམ་མོ། །དེ་ནས་བག་ཚ་བའི་ཕྱོགས་སུ་ཐར་པ་དང་མེ་ཏོག་ཕྲེང་འཛིན་ལ་སོགས་པའི་བསྟོད་པ་བྱའོ། །གཅན་གཞན་ཁྲོ་བོ་མང་པོས་གང་བ་ཡིས། །ཚང་ཚིང་ནགས་ས་མཆོམ་རྐུན་འདུ་བའི་གནས། །ལམ་མེད་ཉམ་ངའི་གནས་སུ་བདག་ལུས་པ། །ཆོ་ག་འདི་ཉིད་ཀྱིས་ནི་ཡོངས་སུ་སྒྲོལ། །ཆོམ་རྐུན་བཅིང་བ་རྫོགས་སོ།། |
