རིག་པ་བསྐྱེད་པ།
― DTG028_Page_0113 ―
[མ་དཔེ་གཟིགས་ན་འདིར་གནོན།]
༄། །རྒྱ་གར་སྐད་དུ། བི་དྱ་བརྡྷ་ནི། བོད་སྐད་དུ། རིག་པ་བསྐྱེད་པ། རིག་བྱེད་སྒྲོལ་མ་ལ་ཕྱག་འཚལ་ལོ། །གང་ཞིག་རྨོངས་པས་བློ་མདོངས་པ། །རིག་བྱེད་སྒྲོལ་མ་རིག་པའི་མཆོག །རྒྱལ་པོ་ཁྱིམ་བདག་མགུ་བྱེད་པ། །བླང་ཕྱིར་བདག་གིས་བྲི་བར་བྱ། །གཞན་ཡང་སྒྲོལ་མའི་རིག་པ་མཆོག་བླང་པའི་སླད་དུ་བསྙེན་བའི་གྲངས་ཚད་དུ་སོང་ཞིང་སྒྲུབ་ཐབས་ཆོ་ག་བློ་འདྲིས་པའི་རྟེན་གྱི་གང་ཟག་གིས་བྱམས་པ་དང་སྙིང་རྗེ་སྔོན་དུ་བསྐྱེད་ལ་སྐད་ཅིག་གིས་རིག་བྱེད་སྒྲོལ་མ་སྐུ་མདོག་ཚོས་ཆེན་པོ་ལྟ་བུ་ཞལ་གཅིག་ཕྱག་བཞི་པ། གཡས་ཀྱི་དང་པོ་མི་འཇིགས་པའི་ཕྱག་དང༌། གཉིས་པས་མདའ་དང༌། གཡོན་གྱིས་རིན་པོ་ཆེའི་གཞུ་དང༌། གཡོན་གཉིས་བས་ཨུཏྤལ་དམར་པོ་འཛིན་པ། རྒྱན་སྣ་ཚོགས་ཀྱིས་སྦྲས་པ། པདྨ་དང་ཟླ་བའི་གདན་ལ་སྐྱིལ་ཀྲུང་གིས་བཞུགས་པ། དེའི་ཐུགས་ཀར་པཾ་ལས་པདྨ། ཨ་ལས་ཟླ་བའི་སྟེང་དུ་ཏཱཾ་དམར་པོ་བྱི་རུའི་མདོག་ལྟ་བུ་ལས། ཕྱོགས་བཅུར་འོད་འཕྲོས་ཚུར་བསྡུས་ནས་བདག་གི་ཀུན་དུ་རྨོངས་པའི་ཚོགས་ཐམས་ཅད་ཞི་བར་བསམ་ཞིང་སེམས་གཏད་ལ་བསྒོམ་པར་བྱའོ། །དེ་ནས་སྐྱེ་བར་གྱུར་ན་གསང་སྔགས་རྒྱུན་མགལ་མེའི་འཁོར་ལོ་ལྟ་བུས་སེམས་སྦྱངས་ནས་ཡར་ངོའི་ཆོས་བརྒྱད་ཀྱི་ཉིན་པར་ནས་མཚལ་དང་གུར་གུམ་དང་གི་ཝཾ་རྣམས་སྦྱར་ལ་པདྨ་འདབ་མ་བཅུ་དྲུག་བ་གཉིས་བྲིས་ལ། ― DTG028_Page_0114 ―
[མ་དཔེ་གཟིགས་ན་འདིར་གནོན།]
༄། །ཨོཾ་ཏཱ་རེ་ཏུ་ཏྟཱ་རེ་ཨ་ནི་བྷི་པྲ་ཛྙཱ་སཱ་དྷ་ན། ཨ་བྷི་བྲ་ཛྙཱ་པྲ་སཱ་དྷ་སྭཱ་ཧཱ། ཞེས་བཟླ་ཞིང་བདག་དང་འཁོར་ལོ་ཕན་ཚུན་ཐིམ་ཞིང་སྙིང་པོ་དང་གཟུངས་དགོད། །འཁོར་ལོ་གཅིག་ལ་དབྱངས་དང་གསལ་བྱེད་བྲི་བར་བྱའོ། །དེ་ནས་བཅོ་ལྔའི་མཚན་ཕྱེད་ལ་ཟླ་བ་ལ་མངོན་དུ་ཕྱོགས་པས་མཆོད་པ་རྣམ་པ་ལྔ་དང་སྦྱིན་སྲེག་དང་གཏོར་མ་རྣམས་ཕུལ་ལ། མེ་ལོང་གཡཱ་ཡོངས་སུ་དག་པ་བུག་མེད་པ་ལ་སིནྡྷཱུ་ར་དམར་པོ་མཎྜལ་ལ་གསེར་རམ་ཟངས་ཀྱི་ཐུར་མས་འཁོར་ལོ་ཇི་ལྟ་བ་བཞིན་དུ་ཕྱི་ནང་དུ་གཉིས་བྲིས་ལ་སྙིང་པོ་དང་གཟུངས་དང༌། ཕྱི་མ་ལ་དབྱངས་དང་གསལ་བྱེད་བཀོད་དེ་ཅུང་ཞིག་བཟླས་པ་བྱ་ཞིང་མཆོད་པ་རྣམ་པ་ལྔས་ཡང་དག་པར་མཆོད་ལ་འཁོར་ལོ་གཉིས་དྲིལ་ཏེ་མགུལ་དུ་གདགས་པར་བྱ། སིནྡྷུ་ར་ལེགས་པར་བསྡུས་ཏེ་དུག་ལང་ཀ་ཝ་ཏིའི་སྦུ་གུར་བླུགས་ལ་མཆན་ཁུང་གཡོན་པར་བཏགས་ཏེ་ཐིག་ལེ་དམར་པོ་སྐྲ་མཚམས་སུ་བྱ་ཞིང༌། བསོད་སྙོམས་ཀྱི་ཕྱིར་གྲོང་ཁྱེར་དུ་ཞུགས་ན་རྒྱལ་པོ་དང་ཁྱིམ་བདག་དད་ཅིང་འདུན་པར་འགྱུར་རོ། །སྒྲ་དང་བསྟན་བཅོས་མང་པོ་དང༌། །རོལ་མོ་སྒྱུ་རྩལ་ཇི་སྙེད་དང༌། །ལྷ་དང་གནོད་སྦྱིན་བུ་མོ་སོགས། །རིག་བྱེད་མཐུ་ཡིས་འདུན་པར་བྱེད། །རིག་པ་བསྐྱེད་པ་རྫོགས་སོ།། |
