གཏོར་མའི་ཆོ་ག་ཉུང་ངུ།

[Full Size]

༄། །རྒྱ་གར་སྐད་དུ། བ་ལིཾ་ཨལྤ་བི་དྷིཿ། བོད་སྐད་དུ། གཏོར་མའི་ཆོ་ག་ཉུང་དུ། གནས་ཆེན་གྱི་དབང་ཕྱུག་མ་ལ་ཕྱག་འཚལ་ལོ། །བདག་ཉིད་ལྷ་ཡི་རྣལ་འབྱོར་དང་ལྡན་པས། ཅི་འབྱོར་པའི་རྫས་སྔོན་དུ་བཤམས་ལ། ཨོཾ་སྭཱ་བྷཱ་ཝ་ཤུདྡྷཿསརྦ་དྷརྨཱཿསྭཱ་བྷཱ་བ་ཤུདྡྷོཉཧཾ། ཞེས་བརྗོད་པས་སྟོང་པའི་ངང་ལས་ཡཾ་ཡོངས་སུ་གྱུར་པ་ལས་རླུང་གི་དཀྱིལ་འཁོར། དེར་གནས་པའི་རཾ་ལས་མེའི་དཀྱིལ་འཁོར། དེའི་སྟེང་དུ་ཨ་ལས་ཐོད་པ་ཆེ་བ་ཅིག་བསམ་མོ། །དེའི་ནང་དུ་མ་ར་བི་ཤུ་མུ་ལས། དབུས་སུ་མ་ལས་ཤ་ཆེན། ཤར་དུ་ར་ལས་ཁྲག །བི་ལས་ལྷོ་རུ་དྲི་ཆེན། ནུབ་ཏུ་ཤུ་ལས་བྱང་ཆུབ་ཀྱི་སེམས། བྱང་དུ་མུ་ལས་དྲི་ཆུ། དེ་དག་ཞུ་བ་ལས་ཧཱུཾ་ཨོཾ་ཏྲཱཾ་ཨཱཿཁཾ་ལྔར་གྱུར་པར་བསམ་མོ། །དེ་དག་ཞུ་བ་ལས་དེ་བཞིན་གཤེགས་པ་ལྔའི་རང་བཞིན་གྱི་གཟུགས་སུ་དམིགས་ལ། དེ་རྣམས་ཞུ་བས་བདུད་རྩི་དཀར་པོའི་རྣམ་པར་བསམས་ཏེ། སྟེང་དུ་རིམ་པར་ཧཱུཾ་ཨཱཿ་ཨོཾ་རྣམ་པར་བསམས་ཏེ་སྦྱར་བ་དང་སྦར་བ་དང་རྟོགས་པར་བྱའོ། །དེ་ནས་སྙིང་གའི་ས་བོན་ལས་འོད་ཟེར་འཕྲོས་པས་རྣལ་འབྱོར་མེའི་འཁོར་ལོ་བལྟས་ཏེ། ཨོཾ་ཨཱ་རལླི་ཧོཿཛཿཧཱུཾ་བཾ་ཧོཿསརྦ་ཙཀྵ་ཡོ་གི་ནཱི་ཡེ། བཛྲ་བཻ་རོ་ཙ་ནཱཾ་ཡེ་ཨི་མཾ་བ་ལིཾ་པྲ་ཏིཙྪ་ས་མ་ཡ་མ་ནུ་སྨ་ར་མ་མ་སརྦ་སཱ་དྷ་ནཱ་ནཉྩ་ཤཱནྟིཾ་པུཥྚིཾ་སརྦ་ཏྲ་ར་ཀྵཱ་བཱ་ར་ན་གུབྟིཾ་ཀུ་རུ་ཧཱུཾ། ཞེས་པ་ལན་གསུམ་བརྗོད་ལ་དབུལ་ལོ། །དེ་ནས་སྙིང་གའི་ཏཱཾ་གི་འོད་ཟེར་ལས། མཆོད་ཡོན། མེ་ཏོག །བདུག་སྤོས། སྣང་གསལ། དྲི་ཆབ། ཙནྡན། གུར་གུམ་ལ་སོགས་པ་དང༌། ཞལ་ཟས། བླ་རེ། གདུགས། རྒྱལ་མཚན། བ་དན། ན་བཟའ་ལ་སོགས་པས་མཆོད་དོ། །དེ་ནས་དེ་མ་ཐག་ཏུ་དངོས་གྲུབ་གང་འདོད་པ་ལ་གསོལ་བ་བཏབ་ལ་གཤེགས་སུ་གསོལ་ལོ། །རང་གི་སྙིང་ལ་རྗེས་སུ་ཞུགས་པར་བསམ་མོ། །གཏོར་མའི་ཆོག་ཉུང་ངུ་ཞེས་བྱ་བ་རྫོགས་སོ།། །།