འཕགས་མ་སྒྲོལ་མའི་སྒྲུབ་ཐབས།
ཤཱཀྱཤྲཱིབྷདྲ།
― DTG028_Page_0180 ―
[མ་དཔེ་གཟིགས་ན་འདིར་གནོན།]
༄། །རྒྱ་གར་སྐད་དུ། ཨཪྻ་ཏཱ་ར་སཱ་དྷ་ནཱཾ། བོད་སྐད་དུ། འཕགས་མ་སྒྲོལ་མའི་སྒྲུབ་ཐབས། འཕགས་མ་སྒྲོལ་མ་ལ་ཕྱག་འཚལ་ལོ། །ཐོག་མར་ཕྱག་འཚལ་བ་ལ་སོགས་པའི་ཡན་ལག་རྣམས་བྱས་ལ། བྱམས་པ་དང༌། སྙིང་རྗེ་དང༌། དགའ་བ་དང༌། བཏང་སྙོམས་ཏེ་ཚངས་པའི་གནས་བཞི་བསྒོམ་པར་བྱའོ། །དེ་ནས། ཨོཾ་སྭཱ་བྷཱ་ཝ་ཤུདྡྷཿསརྦ་དྷརྨཱཿསྭཱ་བྷཱ་ཝ་ཤུདྡྷོཉཧཾ། ཞེས་བརྗོད་པས་ཆོས་ཐམས་ཅད་སྟོང་པ་ཉིད་དུ་མོས་པར་བྱས་ཏེ། དེའི་ངང་ལས་པཾ་ལས་པདྨ་དང༌། ཨ་ལས་ཟླ་བའི་སྟེང་དུ་ཡི་གེ་ཏཱཾ་ལྗང་གུ་ཡོངས་སུ་གྱུར་པ་དང༌། ཨུཏྤལ་ཏཱཾ་གིས་མཚན་པ་ལས་འཕགས་མ་སྒྲོལ་མ་སྐུ་མདོག་ལྗང་གུ་ཞལ་གཅིག །ཕྱག་གཉིས་མ། གཡས་པ་མཆོག་སྤྱིན་དང༌། གཡོན་པ་ཨུཏྤལའི་སྡོང་བུ་འཛིན་པ། ཞབས་སྐྱིལ་ཀྲུང་གིས་གནས་པ་རྒྱན་སྣ་ཚོགས་ཀྱིས་ཉེ་བར་མཛེས་པ། མེ་ལོང་དངས་པའི་གཟུགས་བརྙན་ལྟ་བུར་བསྒོམ་པར་བྱའོ། །དེའི་ཐུགས་ཀར་ཟླ་བའི་སྟེང་དུ་མཚོན་གང་གི་སྐུ་ཚད་དང་ལྡན་པའི་སྒྲོལ་མ། དེའི་ཐུགས་ཀར་ཨུཏྤལའི་སྟེང་ན་ས་བོན་གྱི་ཡི་གེས་མཚན་པ་བསམ་པར་བྱའོ། །དེའི་འོད་ཀྱིས་འོག་མིན་ནས་ཡེ་ཤེས་སེམས་དཔའ་བཀུག་ལ་མཆོད་པ་བྱ་ཞིང༌། ཛཿཧཱུཾ་བཾ་ཧོཿ་ས་དགུག་པ་དང༌། གཞུག་པ་དང༌། བཅིང་བ་དང༌། མཉེས་པར་བྱའོ། །དེ་ནས་སྤྱི་བོ་དང༌། མགྲིན་པ་དང༌། སྙིང་ག་རྣམས་སུ་ཨོཾ་ཨཱཿཧཱུཾ་ཞེས་པའི་ཡིག་གེ་གསུམ་པོ་དཀར་པོ་དང་དམར་པོ་དང་མཐིང་ནག་གི་ཁ་དོག་ཅན་གྱི་སྐུ་གསུང་ཐུགས་བྱིན་གྱིས་བརླབ་པར་བྱའོ། །དེ་ནས་ཡི་གེ་ཏཱཾ་གི་འོད་ཟེར་གྱིས་དེ་བཞིན་གཤེགས་པ་ལྔ་ལ་སོགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་སྤྱན་དྲངས་པ་ལ་མཆོད་པ་དབུལ་བ་དང༌། དབང་བསྐུར་བ་བྱ་སྟེ། ཨོཾ་ཨཱཿསརྦ་ཏ་ཐཱ་ག་ཏ་ཨ་བྷི་ཥེ་ཀ་ས་མ་ཡ་ཤྲི་ཡེ་ཧཱུཾ། ཞེས་བརྗོད་པས་དེ་དག་གིས་ཡེ་ཤེས་ཀྱི་བདུད་རྩིའི་ཆུ་རྒྱུན་ཕབ་པ་དང༌། བདག་ཉིད་ཀྱི་སྐུ་གསུང་ཐུགས་ཡོངས་སུ་ཚིམ་པར་འགྱུར་ཏེ། བདུད་རྩི་དེའི་རྒྱུན་ཕྱི་མ་ལས་གྲུབ་པའི་དེ་བཞིན་གཤེགས་པ་དོན་ཡོད་གྲུབ་པ་སྤྱི་བོའི་སྟེང་དུ་
― DTG028_Page_0181 ―
[མ་དཔེ་གཟིགས་ན་འདིར་གནོན།]
༄། །བསམ་པར་བྱའོ། །ཡང་ཏཱཾ་དེ་ལས་འོད་ཟེར་ཕྱོགས་བཅུར་འཕྲོས་ཏེ། སེམས་ཅན་ཐམས་ཅད་ལ་ཕོག་པས་སྒྲོལ་མའི་སྐུར་གྱུར་ནས་སླར་དེ་ཉིད་ལ་འདུས་པར་བསམ་མོ། །དེ་ལྟར་ཡང་དང་ཡང་སྤྲོ་བསྡུ་བྱས་ཏེ། དེ་ལ་སྐྱོ་བར་གྱུར་ན་ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱཧཱ། ཞེས་བྱ་བས་སྔགས་བཟླས་པར་བྱའོ། །འཕགས་མ་སྒྲོལ་མའི་སྒྲུབ་ཐབས། ཁ་ཆེའི་པཎྜི་ཏ་ཆེན་པོ་ཤཱཀྱ་ཤྲཱི་བྷ་དྲའི་ཞལ་སྔ་ནས་བྱུང་བ་རྫོགས་སོ།།
| 
