རྡོ་རྗེ་ཕག་མོ་སྒྲོལ་མ་ལ་བསྟོད་པ།
ཟླ་བ་གྲགས་པ།
― DTG028_Page_0181 ―
[མ་དཔེ་གཟིགས་ན་འདིར་གནོན།]
༄། །རྒྱ་གར་སྐད་དུ། བཛྲ་བཱ་རཱ་ཧཱི་ཏཱ་ར་སྟོ་ཏྲཾ། བོད་སྐད་དུ། རྡོ་རྗེ་ཕག་མོ་སྒྲོལ་མ་ལ་བསྟོད་པ། རྗེ་བཙུན་མ་སྒྲོལ་མ་ལ་ཕྱག་འཚལ་ལོ། །སྟོང་ཉིད་སྙིང་རྗེ་ཕག་མོ་ཆེ། །སྒྲོལ་མའི་སྐུ་ལ་ཕྱག་འཚལ་ལོ། །སྨྲ་བསམ་བརྗོད་མེད་ཕ་རོལ་ཕྱིན། །སྒྲོལ་མའི་གསུང་ལ་ཕྱག་འཚལ་ལོ། །དྲི་མེད་ཡེ་ཤེས་ཟླ་བའི་ཐུགས། །སྒྲོལ་མའི་ཐུགས་ལ་ཕྱག་འཚལ་ལོ། །ཟླ་འོད་སྲིད་པའི་མུན་སེལ་བ། །འཇོམས་བྱེད་ཉི་མའི་དཀྱིལ་དང་མཚུངས། །ཐབས་དང་ཤེས་རབ་ཡོན་ཏན་ལྡན། །སྒྲོལ་མ་ལ་ནི་རྟག་ཏུ་འདུད། །འགྲོ་ལ་བུ་བཞིན་རྟག་ཏུ་གདུང༌། །སྲིད་གསུམ་རྣམ་ཐར་གསུམ་ལ་འགོད། །སེང་ལྡེང་ནགས་ལ་རབ་གནས་ཤིང༌། །འཇིགས་པ་བརྒྱད་ལས་ཤིན་ཏུ་སྐྱོབ། །སྒྲོལ་མ་ལ་ནི་ཕྱག་འཚལ་བསྟོད། །མངོན་པར་དགའ་བའི་ཞིང་ཁམས་སུ། །རྡོ་རྗེ་མཁའ་འགྲོར་སྐུར་སྟོན་ཅིང༌། །འགྲོ་བའི་སྒྲིབ་གཉིས་སྦྱོང་མཛད་པ། །སྒྲོལ་མ་ལ་ནི་ཕྱག་འཚལ་བསྟོད། །དཔལ་དང་ལྡན་པའི་ཞིང་ཁམས་སུ། །རིན་ཆེན་མཁའ་འགྲོར་སྐུར་སྟོན་ཅིང༌། །འགྲོ་བའི་སྡུག་བསྔལ་ནད་སེལ་མཛད། །སྒྲོལ་མ་ལ་ནི་ཕྱག་འཚལ་བསྟོད། །བདེ་བ་ཅན་གྱི་ཞིང་ཁམས་སུ། །པདྨ་མཁའ་འགྲོར་སྐུར་སྟོན་ཅིང༌། །བདེ་བ་ཆེན་པོའི་དང་ལ་གནས། །སྒྲོལ་མ་ལ་ནི་ཕྱག་འཚལ་བསྟོད། །རྣམ་པར་དག་པའི་ཞིང་ཁམས་སུ། །ལས་ཀྱི་མཁའ་འགྲོར་སྐུར་སྟོན་ཅིང༌། །ཕྲིན་ལས་རྣམ་བཞིས་འགྲོ་དོན་མཛད། །སྒྲོལ་མ་ལ་ནི་ཕྱག་འཚལ་བསྟོད། །མཐའ་དབུས་མེད་པའི་ཞིང་ཁམས་སུ། །ཕ་རོལ་ཕྱིན་མའི་སྐུར་སྟོན་ཅིང༌། །ཕྱོགས་བཅུའི་སངས་རྒྱས་ཚོགས་དང་བཅས། །སྒྲོལ་མ་ལ་ནི་ཕྱག་འཚལ་བསྟོད། །དུར་ཁྲོད་
― DTG028_Page_0182 ―
[མ་དཔེ་གཟིགས་ན་འདིར་གནོན།]
༄། །བརྒྱད་ཀྱི་ཞིང་ཁམས་སུ། །རྡོ་རྗེ་ཕག་མོར་སྐུར་སྟོན་ཅིང༌། །མེ་དཔུང་འབར་བའི་དབུས་ན་བཞུགས། །སྒྲོལ་མ་ལ་ནི་ཕྱག་འཚལ་བསྟོད། །པཎྜི་ཏ་ཟླ་བ་གྲགས་པས་བསྟོད་པ་མཛད་པ་རྫོགས་སོ།།
| 
