རྗེ་བཙུན་དཔལ་ནག་པོ་ཆེན་པོ་ལ་བསྟོད་པ།
རྩ་མི་སངས་རྒྱས་གྲགས་པ།
― DTG028_Page_0540 ―
[མ་དཔེ་གཟིགས་ན་འདིར་གནོན།]
༄། །རྒྱ་གར་སྐད་དུ། ཤྲཱི་བྷཊྚ་རཱ་ཀ་མ་ཧཱ་ཀཱ་ལ་སྟོ་ཏྲ། བོད་སྐད་དུ། རྗེ་བཙུན་དཔལ་ནག་པོ་ཆེན་པོ་ལ་བསྟོད་པ། དཔལ་ནག་པོ་ཆེན་པོ་ལ་ཕྱག་འཚལ་ལོ། །བདུད་དང་བདུད་ཀྱི་ཕྱོགས་ཀྱི་སེམས་ཅན་མ་ལུས་མྱུར་དུ་ཚར་བཅད་བསད་ནས་ཁྲག་རྒྱུན་གསོལ་མཛད་ནག་པོ་ཆེན་པོ་ནི། །རབ་འཇིགས་མདོག་གནག་གཟུགས་ཐུང་གསུས་པ་འཕྱང་ཞིང་དབུ་སྐྲ་དམར་སེར་འཇིགས་པའི་མེ་དཔུང་ནང་བཞུགས་ཁྲོས་པའི་གང་མོས་ནི། །ཧ་ཧཱུཾ་ཕེཾ་གྱི་སྒྲ་ཡིས་ལྷ་དང་ལྷ་མིན་ཚོགས་ནི་འདར་ཞིང་འདུད་པའི་འཁོར་གྱིས་བསྐོར་ནས་མནན་པ་དྲག་པོའི་ཚུལ། །བདུད་དང་བདུད་ཀྱི་ཕྱོགས་ཀྱི་སེམས་ཅན་མ་ལུས་མྱུར་དུ་ཚར་བཅད་བསད་ནས་ཁྲག་རྒྱུན་གསོལ་མཛད་ནག་པོ་ཆེན་པོ་ནི། སྐྱེ་རགས་དྲིལ་བུ་གཡེར་ཀ་སིལ་སིལ་ཌ་མ་རུ་མི་ཊི་ཊི་ཧཱུཾ་ཧ་རྔ་སྒྲ་ཐོག་གི་ནང་གི་ཐོག་ལྟར་ནི། །སྒྲ་རྣམས་སྒྲོགས་ཤིང་མཉམ་དང་མི་མཉམ་གར་བྱེད་པ་ཡི་ལྷ་དང་ལྷ་མོའི་ཚོགས་ཀྱིས་བསྐོར་ནས་དུར་ཁྲོད་གནས་སུ་རོལ། །བདུད་དང་བདུད་ཀྱི་ཕྱོགས་ཀྱི་སེམས་ཅན་མ་ལུས་མྱུར་དུ་ཚར་བཅད་བསད་ནས་ཁྲག་རྒྱུན་གསོལ་མཛད་ནག་པོ་ཆེན་པོ་ནི། །ཐུང་ཞིང་སྦོམ་ལ་སྤྱན་གསུམ་མེ་ཏོག་བན་དུ་ཀ་ལྟར་དམར་བས་བགེགས་རྣམས་སྐྲག་ཅིང་སྡང་མཛད་ལྗགས་ནི་གློག་ལྟར་འཁྱུག །མཆེ་བ་རྣམ་པར་གཙིགས་པས་མ་རུངས་གདུག་པ་ཅན་གྱི་ཤ་དང་རུས་པ་ཀྲུཾ་ཀྲུཾ་འཆའ་ཞིང་ལྷ་བ་ཞག་འཇིབ་པ། །བདུད་དང་བདུད་ཀྱི་ཕྱོགས་ཀྱི་སེམས་ཅན་མ་ལུས་མྱུར་དུ་ཚར་བཅད་བསད་ནས་ཁྲག་རྒྱུན་གསོལ་མཛད་ནག་པོ་ཆེན་པོ་ནི། །ཕྱག་རྐྱ་ལྔ་དང་ཀླུ་བརྒྱད་ཀྱིས་བརྒྱན་སྟག་ལྤགས་སྐེ་རགས་དང་ནི་སྐུ་སྨད་དཀྲིས་ཤིང་མི་བསྐྱོད་པ་ནི་སྤྱི་བོར་བཞུགས། །དེ་བཞིན་གཤེགས་པའི་ཚོགས་རྣམས་སྐུ་ལས་སྤྲོ་ཞིང་མི་ཡི་རྒྱུ་མས་སྤྲེལ་བའི་མགོ་ཡི་ཕྲེང་བ་རབ་འཕྱང་དོ་ཤལ་བྱས། །བདུད་དང་བདུད་ཀྱི་ཕྱོགས་ཀྱི་སེམས་ཅན་མ་
― DTG028_Page_0541 ―
[མ་དཔེ་གཟིགས་ན་འདིར་གནོན།]
༄། །ལུས་མྱུར་དུ་ཚར་བཅད་བསད་ནས་ཁྲག་རྒྱུན་གསོལ་མཛད་ནག་པོ་ཆེན་པོ་ཆེན་པོ་ནི། །དྲག་པོ་དང་ནི་ཆུ་བདག་བཟློག་པར་དཀའ་བའི་ཚོགས་རྣམས་ཞལ་དུ་གསོལ་མཛད་ཕྱག་གཡོན་རྩེ་གསུམ་འཛིན་ཅིང་ཐོད་ཁྲག་འཐུང༌། །གཤིན་རྗེའི་ལྕེ་འདྲའི་གྲི་གུག་དང་ནི་རལ་གྲི་ཕྱག་གཡས་བསྣམས། །གདུག་པ་ཅན་རྣམས་རློག་མཛད་སྡིག་པ་རིང་དུ་སྤོང༌། །བདུད་དང་བདུད་ཀྱི་ཕྱོགས་ཀྱི་སེམས་ཅན་མ་ལུས་མྱུར་དུ་ཚར་བཅད་བསད་ནས་ཁྲག་རྒྱུན་གསོལ་མཛད་ནག་པོ་ཆེན་པོ་ནི། །རིག་བྱེད་ཅེས་པའི་ལྷ་མོ་བརྒྱད་དང་རོལ་བའི་རྗེ་བཙུན་རྡོ་རྗེ་ནག་པོ་ཆེན་པོ་སངས་རྒྱས་གྲགས་པས་བསྐུལ་པ་ནི། །གང་གིས་ཉིན་མཚན་རྟག་ཏུ་འདི་བཏོན་བསྒྲུབ་པའི་དོན་རྣམས་གྲུབ་དང་སེམས་ཅན་མ་ལུས་ཁྱད་པར་ས་ལ་གནས་པར་མཛོད།། །།དཔལ་རྡོ་རྗེ་ནག་པོ་ཆེན་པོ་ལ་ཕྱག་འཚལ་ལོ། །བོང་ཐུང་གསུས་འཕྱང་མདོག་གནག་རལ་པ་ཁམ་ནག་གྱེན་དུ་བརྗེས། །འབར་བའི་ཚོགས་ཀྱིས་ལྷ་མིན་དགྲ་བགེགས་མ་ལུས་སྲེག་པར་བྱེད། །དྲག་པོའི་ཞལ་གྱིས་བདུད་རྩི་གསོལ་མཛད་མགོ་བོ་གཅོད་མཛད་པ། །བཞད་པའི་ཚུལ་གྱིས་ཁྲོ་ཞིང་གདུག་པའི་དགྲ་རྣམས་སྐྲག་མཛད་པ། །རྐེད་པ་བྱིན་པ་དྲིལ་བུ་གཡེར་གའི་ཚོགས་ཀྱིས་སྒྲ་སྒྲོགས་ཤིང༌། །ཊི་ཊི་དང་ནི་ཧཱུཾ་ཧཊ་རུ་ཡི་སྒྲ་སྒྲོགས་པ། །ཞལ་ནས་ཏོར་ཀེ་ན་ནི་ཏོར་ར་ཀི་ཎི་ཀི་སྐྲ་ནི། །སྒྲོགས་ཤིང་ཞབས་ཀྱིས་མཉམ་དང་མི་མཉམ་ཚུལ་དུ་གར་མཛད་ཅིང༌། །མ་མོའི་ཚོགས་ཀྱིས་ཡོངས་སུ་བསྐོར་ཅིང་དུར་ཁྲོད་གནས་ན་རོལ། །ཧ་ཀ་ཧཱུཾ་ཀ་ཕེཾ་ཀའི་སྒྲས་ནི་ལྷ་དང་ལྷ་མིན་སྲེགས། །མ་ལུས་དགྲ་བགེགས་ཚོགས་ཀྱི་སྲོག་ལ་མྱུར་དུ་སོགས་བྱེད་ཅིང༌། །ནག་པོའི་ཕྱོགས་ཀྱི་དགྲ་བགེགས་ཁྲག་གི་རྒྱུན་ནི་ཞལ་དུ་གསོལ། །ནག་པོ་ཆེན་པོས་སྒྲུབ་པ་པོ་ཡི་བསམ་པ་མྱུར་དུ་སྒྲུབས། །སྤྱན་གསུམ་མེ་ཏོག་བྱི་རུའི་མདོག་ལྟར་དམར་ཞིང་སྨིན་མ་འཁྱོག །ལྗགས་ནི་གློག་ལྟར་འཁྱུག་པས་བགེགས་ཀྱི་ཚོགས་ནི་འཇིགས་ཤིང་སྐྲག །ཞལ་ནས་མཆེ་བ་རྣམ་པར་གཙིགས་པས་དགྲ་བགེགས་མ་ལུས་པའི། །ཤ་རུས་རྐང་དམར་ཀྲུཾ་ཀྲུཾ་གསོལ་ཞིང་ལྷ་བཞག་ནི་འཇིབ། །སྟག་གི་པགས་པའི་ཤམ་ཐབས་ཀྱིས་ནི་སྐུ་སྨད་ཡོངས་སུ་དཀྲིས། །ཕྱག་རྒྱ་ལྔ་དང་ཀླུ་བརྒྱད་ཀྱིས་བརྒྱན་
― DTG028_Page_0542 ―
[མ་དཔེ་གཟིགས་ན་འདིར་གནོན།]
༄། །སྤྱི་བོ་ནས། །མི་བསྐྱོད་ལ་སོགས་དེ་བཞིན་གཤེགས་པ་རྣམ་པར་འཕྲོ་བར་བྱེད། །རྒྱུ་མ་མི་མགོ་རློན་པའི་ཕྲེང་བས་སྐུ་ལ་དོ་ཤལ་བྱས། །ནག་པོ་དྲག་པོས་ཆུ་བདག་ལ་སོགས་ཞལ་དུ་གསོལ་བར་མཛད། །རྩེ་གསུམ་དང་ནི་གདུག་པའི་ཁྲག་བཀང་ཐོད་པ་གཡོན་ན་བསྣམས། །གནོད་སྦྱིན་ལྕེ་འདྲའི་གྲི་གུག་རལ་གྲི་གཡས་ཀྱི་ཕྱག་ན་འཛིན། །གདུག་པའི་དགྲ་རྣམས་རིང་དུ་སྦོང་ཞིང་རློག་པར་མཛད་པ་ཁྱོད། །ལྷ་མོ་བརྒྱད་ཀྱིས་བསྐོར་ཞིང་འདིར་ནི་གར་གྱི་ཚུལ་གྱིས་བཞུགས། །ཉིན་དང་མཚན་དུ་སྒྲུབ་པའི་དོན་རྣམས་མ་ལུས་མཛད་པ་ལ། །སངས་རྒྱས་གྲགས་པ་ཡིས་ནི་འཇིག་རྟེན་མགོན་པོ་ལ་ཞུས་པ། །མ་ལུས་སེམས་ཅན་འདི་དག་རྡོ་རྗེ་ས་ལ་རབ་འགོད་མཛད། །རྗེ་བཙུན་དཔལ་ནག་པོ་ཆེན་པོ་བྱ་རོག་མིང་ཅན་དང་གདོང་ཅན་ལ་བསྟོད་པ་མཁས་པ་ཆེན་པོ་རྩ་མི་སངས་རྒྱས་གྲགས་ཀྱིས་བསྟོད་པ་རྫོགས་སོ།། །།འདི་དག་པྲ་ཀྲི་ཏའི་སྐད་དུ་ཡོད་པ་ལས་སེ་ལོ་ཙཱ་བས་བོད་སྐད་དུ་བསྒྱུར་བའོ།།
| 
