བཅོམ་ལྡན་འདས་མ་སྒྲོལ་མ་ལ་བསྟོད་པ་ཉི་ཤུ་རྩ་གཅིག་པའི་སྒྲུབ་ཐབས།
ཉི་མ་སྦས་པ།
རྗེ་བཙུན་མ་འཕགས་མ་སྒྲོལ་མ་མྱུར་མ་དཔའ་མོ་ཞེས་བྱ་བའི་སྒྲུབ་ཐབས།
༄། །རྒྱ་གར་སྐད་དུ། བྷ་ག་བ་ཏི་ཏཱ་ར་དེ་བཱི་ཨེ་ཀ་བིཾ་ཤ་ཏི་སྟོ་ཏྲ་ནོ་པི་ཡ་ཀཾ །བོད་སྐད་དུ། བཅོམ་ལྡན་འདས་མ་སྒྲོལ་མ་ལ་བསྟོད་པ་ཉི་ཤུ་རྩ་གཅིག་པའི་སྒྲུབ་ཐབས། འཕགས་མ་སྒྲོལ་མའི་ཞབས་ལ་ཕྱག་འཚལ་ལོ། །དུས་གསུམ་རྒྱལ་བ་བསྐྱེད་མཛད་ཡུམ། །ཤེས་རབ་ཕ་རོལ་ཕྱིན་བདག་ཉིད། །སྣ་ཚོགས་སྤྲུལ་
༄། །པས་ཀུན་སྐྱོབ་མ། །ལྷ་མོ་མཆོག་དེའི་ཞབས་བཏུད་བཤད། །དེ་ཉིད་སྐྱབས་སོང་སེམས་བཟང་པོས། །སྲས་བཅས་རྒྱལ་བས་ཡོངས་བསྐོར་བའི། །འཕགས་མ་ཉིད་མདུན་མཁར་བཞུགས་མཆོད། །སྡིག་བསལ་བསོད་ནམས་ལོངས་རྫོགས་བྱ། །རྣམ་དག་སྔགས་ཀྱིས་དྲི་བསལ་ལ། །སྐུ་གསུངས་ཐུགས་དངོས་བསྐྱེད་དང་རྫོགས། །ཆོ་ག་ཇི་བཞིན་ཇི་སྙེད་པར། །མ་འཁྲུགས་འཁྲུལ་པ་མེད་པར་བསྒོམ། །འཕགས་མ་སྒྲོལ་མ་ཆེ་ཉིད་སྐུ། །ཡོངས་གྱུར་འདོད་སྦྱིན་སྣ་ཚོགས་གཟུགས། །སྣ་ཚོགས་ནོར་བུའི་ཚུལ་བཞིན་དུ། །གདུལ་བྱའི་དབང་ཅན་ཡོངས་གྱུར་བལྟ། །ཡེ་ཤེས་གཞུག་ཅིང་བྱིན་བརླབས་ལ། །དབང་བསྐུར་མཆོད་ཅིང་རྒྱས་གདབ་བྱ། །འོད་ཟེར་འབྱོར་པས་འགྲོ་སྐྱོབ་དང༌། །དངོས་གྲུབ་བླངས་ཏེ་བཟླས་པ་བྱ། །ཕྱག་འཚལ་སྒྲོལ་མ་མྱུར་མ་དཔའ་མོ། །སྤྱན་ནི་སྐད་ཅིག་གློག་དང་འདྲ་མ། །འཇིག་རྟེན་གསུམ་མགོན་ཆུ་སྐྱེས་ཞལ་གྱི། །གེ་སར་བྱེ་བ་ལས་ནི་བྱུང་མ། །སྤྱན་རས་གཟིགས་མགོན་ཐུགས་རྗེ་མ། །ཆུ་སྐྱེས་ཞལ་གྱི་གེ་སར་ལས། །ཆུ་འཛིན་ལས་སྐྱེས་གློག་འགྱུ་བཞིན། །བྱུང་བས་རབ་དགའི་སྒྲོལ་མ་བསྒོམ། །མཁའ་དཀྱིལ་གསེར་མདོག་ཆུ་སྐྱེས་གདན། །ཞལ་གཅིག་ཕྱག་བརྒྱད་ཆོས་སྒྲོགས་དང༌། །མདའ་གཞུ་འཁོར་ལོ་རལ་གྲི་དུང༌། །རྡོ་རྗེ་ཞགས་བཅས་མེ་ཏོག་བརྒྱན། །དེ་ཡི་ཕྲིན་ལས་གཞན་གྱི་མཐུ། །ཕྱིར་བཟློག་བསྟེན་ཕྱིར་ལྷ་མོ་བསྙེན། །བསྒྲུབ་བྱའི་རྗེས་ལ་དཀྱིལ་འཁོར་བྱ། །དེ་དབུས་ཧོཾ་ཁུང་དྲག་གཟུགས་དགོད། །སྙིང་གར་རྩིབས་བརྒྱད་སྤེལ་ཚིག་སྔགས། །མན་ངག་བཞིན་བཀོད་ཐི་གུས་དྲང༌། །སྦུ་གུ་སྙིང་གཏང་ལྷ་སྦྱོར་གྱིས། །སྤོད་བྱེད་རྟེན་བྲལ་ཡང་ཡང་གཞུག །ལྷ་མོ་ཁྲོས་པས་མཆོད་རྟེན་ནི། །ནག་པོ་ཁྲི་འཕང་བཞི་ལྡན་བརྩིག །རྒོད་གསུང་རྣ་བ་མགུལ་ངང་ཐོས། །སྣོམ་པའི་སྡུད་བྱེད་ཤེས་པར་བྱེད། །རྒྱུན་མི་འཆད་པའི་ལྷ་སྦྱོར་གྱིས། །དགུག་གཞུག་བསྟིམས་ནས་མནན་བྱ་སྟེ། །མཚན་མ་རྙེད་ནས་སྔར་གཟུགས་སྲེག །རང་གནས་སླར་ཡང་ཙི་ཏས་མནན། །ནུས་ལྡན་སྟོང་གིས་གཅིག་བྲང་ཀྱང༌། །མཚོན་ཆའི་སྦྱོར་བ་སླར་ཉེས་བཞིན། །བདག་ཉིད་བདག་གིས་ཕུང་
༄། །བར་བྱེད། །མཆོད་བསྟོད་སྙིང་རྗེས་མི་གཏོང་ཞེས། །ཨོཾ་ཏཱ་རེ་ཏུཏྟཱ་རེ་ཏུ་རེ་མ་མ་རཀྵ་རཀྵ་སྭཱ་ཧཱ། ཨོཾ་ཏཱ་རེ་ཏུཏྟཱ་རེ་ཏུ་རེ་ཆེ་གེ་མོ་གྲྀ་ཧྞ་གྲྀ་ཧྞ། བནྡྷ་བནྡྷ། ཧ་ན་ཧ་ན། ད་ཧ་ད་ཧ། བི་དྷྭནྶ་ཡ། བིདྷྭྣྶ་ཡ། ཨཱ་མུ་ཀཾ་མཱ་ར་ཡ་ཕཊ། མཱ་ར་ཡ་ཏུ་རེ་ཧཱུཾ་ཧཱུཾ་ཕཊ་སྭཱ་ཧཱ། ཨོཾ་ཏཱ་རེ་ཏུཏྟཱ་རེ་ཏུ་རེ་མ་ཧཱ་པཉྩ་ཡཀྵ་སྟཾ་བྷ་ཡ་ཧྲི་བཾ་ཧྲིལ་མ་ར་ཡ་ཕཊ་ཀུ་རུ་ཀུ་ལ་བྷྱོ། རྗེ་བཅུན་མ་འཕགས་མ་སྒྲོལ་མ་མྱུར་མ་དཔའ་མོ་ཞེས་བྱ་བའི་སྒྲུབ་ཐབས་རྫོགས་སོ།། །།
རྗེ་བཙུན་མ་སྒྲོལ་མ་སྟོན་ཟླ་ལྟ་བུ་ཞེས་བྱ་བའི་སྒྲུབ་ཐབས།
༄། །ཕྱག་འཚལ་སྟོན་ཀའི་ཟླ་བ་ཀུན་དུ། །གང་བ་བརྒྱ་ནི་བརྩེགས་པའི་ཞལ་མ། །སྐར་མ་སྟོང་ཕྲག་ཚོགས་པ་རྣམས་ཀྱིས། །རབ་ཏུ་ཕྱེ་བའི་འོད་རབ་འབར་མ། །སྟོན་ཟླ་བརྒྱ་ཡི་ཞལ་མདངས་མངའ། །སྟོང་ཕྲག་སྐར་མས་རབ་ཕྱེ་བའི། །བཀྲག་འབྱིན་གཟི་མདངས་ཡིད་འོང་མ། །མི་ཤེས་མུན་སེལ་བསྒོམ་པར་བྱ། །ཇི་བཞིན་ཆོ་གས་རབ་སྦྲུལ་ཡུམ། །ཞལ་གསུམ་དཀར་སྔོ་གསེར་མདོག་ཅན། །བཅུ་གཉིས་ཕྱག་མངའ་མཉམ་གཞག་དང༌། །ཁ་ཊྭཱཾ་འཁོར་ལོ་རིན་ཆེན་ཉིད། །རྡོ་རྗེ་མེ་ཏོག་ཕྲེང་འཛིན་གཡས། །རིལ་བ་ཨུཏྤལ་དྲིལ་བུ་དང༌། །བུམ་པ་དང་ནི་པོ་ཏི་གཡོན། །སྣ་ཚོགས་ལྷ་མོའི་རྒྱན་གྱིས་སྤྲས། །སྐུ་སྤྲོས་གསུང་བཟླས་ཕྱག་མཚན་ཐུགས། །རང་རང་རྗེས་མཐུན་ཕྲིན་ལས་སྒྲུབ།། ཐུན་མོང་ཐུན་མོང་མ་ཡིན་པས། །མཉམ་གཞག་རྗེས་འགྲོ་རྩེ་གཅིག་བྱ། །ཕྲིན་ལས་ཡམས་ནད་ཞི་བའི་ཕྱིར། །དཀར་ཕྱོགས་མཎྜལ་མཎྜལ་དགོང༌། །དབུས་སུ་ཡུམ་བཅས་འོད་དཔག་མེད། །ཕྱོགས་མཚམས་རིགས་བཞི་ཡུམ་བཞི་དགོད། །ཁོར་ཡུག་ཕྱོགས་སྐྱོང་བཅས་དཀྱིལ་འཁོར། །མ་ལུས་རྒྱན་གྱིས་མཛེས་པར་བྱ། །མཆོད་དང་གཏོར་མ་སྔོན་སོང་བས། །གསོ་སྦྱོང་ལྡན་པས་གསང་སྔགས་བཟླས། །ཁྲི་ཕྲག་མཆོད་གཏོར་ལྡན་པས་འབུམ། །བཟླས་ཏེ་ལྷ་ཡི་སྦྱོར་ལྡན་པས། །ནད་སོགས་ཞི་བྱ་གཙང་སྦྲས་སོ། །ཡམས་བདག་མང་པོ་ཚིམ་པར་བྱ། །ཨོཾ་ཏཱ་རེ་ཏུཏྟཱ་རེ་ཏུ་རེ་སརྦ་བྱཱ་དྷི་པྲ་ཤ་མ་ན་ཤཱནྟིཾ་ཀུ་རུ་སྭཱ་ཧཱ། རྗེ་བཙུན་མ་སྒྲོལ་མ་སྟོན་ཟླ་ལྟ་བུ་ཞེས་བྱ་བའི་སྒྲུབ་ཐབས་རྫོགས་སོ།། །།
རྗེ་བཙུན་མ་སྒྲོལ་མ་ཕ་རོལ་ཕྱིན་མ་ཞེས་བྱ་བའི་སྒྲུབ་ཐབས།
༄། །ཕྱག་འཚལ་གསེར་སྔོ་ཆུ་ནས་སྐྱེས་ཀྱིས། །པདྨས་ཕྱག་ནི་རྣམ་པར་བརྒྱན་མ། །སྦྱིན་པ་བརྩོན་འགྲུས་དཀའ་ཐུབ་ཞི་བ། །
༄། །བཟོད་པ་བསམ་གཏན་སྤྱོད་ཡུལ་ཉིད་མ། །ཤེས་རབ་བདག་ཉིད་ཕར་ཕྱིན་ལྔ། །ཡོངས་རྫོགས་འཕགས་མ་ཆོ་ག་བཞིན། །རིམ་གཉིས་བསྒོམ་ཞིང་བཟླས་བྱ་སྟེ། །རྒྱ་ཆེར་མཆོད་བསྟོད་བསྔགས་པར་བྱ། །པད་ཉིར་སྐྱིལ་ཀྲུང་གསེར་མདོག་ཞལ། །གཅིག་མདའ་ཕྲེང་བ་རལ་གྲི་མདའ། །རྡོ་རྗེ་དབྱི་གུ་དར་དཔྱངས་ཞགས། །པདྨ་དྲིལ་བུ་གཞུ་འཛིན་བཅུའོ། །རྗེས་མཐུན་ཆོག་སྔོན་སོང་བས། །ཚེ་བསྲིང་ཕྲིན་ལས་དོགས་མེད་བསྒྲུབ། །གཞན་སྲོག་ཚེ་ཡང་བསྲུངས་ནས་ནི། །ཚེ་དཔག་མེད་བཀུག་མཆོད་བསྟོད་གསོལ། །ཨོཾ་ཏཱ་རེ་ཏུཏྟཱ་རེ་ཏུ་རེ་ཨཱ་ཡུ་རྫྙཱ་ན་དྷ་ར་དྷ་ར་བི་དྷ་ར་བི་དྷ་ར་ཡ་མ་བྲ་ཧི་དཱ་ཡ་དེ་ཧི་སྭཱ་ཧཱ། རང་ལོའི་གྲངས་ཀྱི་བརྒྱ་རྩ་བརྒྱད། །སངས་རྒྱས་ཀུན་དངོས་ཚེ་ཡི་དཔལ། །གྲངས་ཏེ་ཉི་ཤུ་གཅིག་བསྟོད་བྱ། །ཞག་རེ་ཟླ་རེ་ལས་ཚེ་འཕེལ། །རྗེ་བཙུན་མ་སྒྲོལ་མ་ཕ་རོལ་ཕྱིན་མ་ཞེས་བྱ་བའི་སྒྲུབ་ཐབས་རྫོགས་སོ།། །།
རྗེ་བཙུན་མ་སྒྲོལ་མ་གཙུག་གཏོར་རྣམ་རྒྱལ་མ་ཞེས་བྱ་བའི་སྒྲུབ་ཐབས།
༄། །ཕྱག་འཚལ་དེ་བཞིན་གཤེགས་པའི་གཙུག་ཏོར། །མཐའ་ཡས་རྣམ་པར་རྒྱལ་མ་སྤྱོད་མ། །མ་ལུས་ཕ་རོལ་ཕྱིན་པ་ཐོབ་པའི། །རྒྱལ་བའི་སྲས་ཀྱིས་ཤིན་ཏུ་བསྟེན་མ། །གཙུག་ཏོར་ཡིད་བཞིན་ནོར་བུས་མཚན། །བདུད་དགྲ་འཚེ་བ་ཀུན་ལས་རྒྱལ། །ཕ་རོལ་ཕྱིན་ཀུན་ཡོངས་རྫོགས་པས། །བདག་ཉིད་ཆེ་རྣམས་ཀྱིས་མཆོད་བསྒོམ། །གསེར་མདོག་ཆུ་སྐྱེས་རི་མོ་ཅན། །ཟག་མེད་ཆགས་མེད་རྣམ་གནོན་ཞིང༌། །གསེར་རི་ལྟར་བརྗིད་ཕྱག་བཞི་མཛེས། །མཆོག་སྦྱིན་ཕྲེང་བ་རིལ་བ་དབྱུག །དེ་ལས་སྲོག་གཡོ་རྣམས་འཇིལ་བ། །ཁརྒ་ནེ་ཏྲ་ཨཀྵོ་བྷྱ། །གརྦ་སུ་ཁ་གཅིག་པུ་སྐྱེས། །མ་གྷི་བཻ་རོ་ཙ་ན་སྦྱར། །ལྷ་མོར་ཡིད་བརྟན་མང་བཟླས་ནས། །གནས་ལྔར་གདབ་ཅིང་ཁོང་དུ་སྦྱིན། །རྩེ་གཅིག་ཧ་ལས་འཚོ་སྒྲོས་བྱ་བ། །རང་བཞིན་བཅོས་སོགས་སེལ་དོན་མེད། །ཨོཾ་ཏཱ་རེ་ཏུཏྟཱ་རེ་ཏུ་རེ་ན་མ། ཤ་རེ་ཤ་རེ་བི་ཤ་རེ་སརྦ་བྲཧྨ་གྷ་ཊ་སྭཱ་ཧཱ། རྗེ་བཙུན་མ་སྒྲོལ་མ་གཙུག་ཏོར་རྒྱལ་མ་ཞེས་བྱ་བའི་སྒྲུབ་ཐབས་རྫོགས་སོ།། །།
རྗེ་བཙུན་མ་སྒྲོལ་མ་སྲིད་གསུམ་འགུགས་བའི་སྒྲུབ་ཐབས།
༄། །ཕྱག་འཚལ་ཏུཏྟཱ་ར་ཧཱུཾ་ཡི་གེས། །འདོད་དང་ཕྱོགས་དང་ནམ་མཁའ་གང་མ། །འཇིག་རྟེན་གསུམ་པོ་ཞབས་ཀྱིས་མནན་ཏེ། །ལུས་པ་མེད་པར་
༄། །འགུགས་པར་ནུས་མ། །མཐུ་ཆེན་སྔགས་ཀྱི་ཧཱུཾ་སྒྲ་ཡིས། །ཁམས་གསུམ་རྒྱས་འགེངས་སྲིད་གསུམ་གནོན། །ཀུན་བདག་བཀུག་ནས་དབང་སྡུད་མ། །དབང་བསྒྱུར་ཆེ་ཉིད་རྣམ་པར་བསྒོམ། །ཟླ་སྟེང་རྡོ་རྗེའི་ཞབས་གནོན་ཅིང༌། །སྐྱབས་སྦྱིན་གསེར་གྱི་པད་ལྕུག་འཛིན། །ཏིང་འཛིན་མཆོག་གཞུག་འགྲོ་སྐྱོབ་མ། །མ་ཆགས་གདུལ་བྱ་ཀུན་སྐྱོང་མཛད། །ཕྲིན་ལས་བསྒྲུབ་ཕྱིར་ལྷར་བསྙེན་མ། །རས་ལ་རྩིབས་བཞི་འཁོར་ལོ་བྲི། །བསྒྲུབ་བྱའི་གཟུགས་སོགས་མིག་དང་ལྡན། །ཝ་ཤཾ་ཀུ་རུ་ཁྲག་གིས་བྲི། །ཨོཾ་གསུམ་རིམ་པའི་རྒྱལ་མོའི་དབུས། །སྐྱེ་མཆེད་གསལ་རྫོགས་སྤྲ་ཚིལ་གཟུགས། །ལྷ་མོས་བསྡུས་ཏེ་སྙིང་གར་གཞུག །དུས་གསུམ་དུས་དྲུག་སེང་ལྡེང་བསྲེག །སྒོ་གཉིས་ཟངས་མའི་ཐུར་མས་བྲུ། །ས་བོན་འོད་དམར་ཤུགས་དྲག་གི །ལྕགས་ཀྱུས་བཀུག་སྟེ་ཞགས་པས་བཅིངས། །སྐྲ་ཡེངས་གཅེར་བུ་རྐང་འདུད་བསམ། །དུར་ཁྲོད་རྗེས་གསུམ་རྡོ་རྗེའི་ཆུས། །སྦྱར་ཏེ་སྔགས་བཅས་སྦྱིན་པར་བྱ། །དེ་རྗེས་སྐེ་ཚེ་མིང་དང་བཅས། །དབང་སྡུད་ཡིད་ཀྱིས་སྦྱིན་སྲེག་བྱ། །བདུན་ཕྲག་ཞག་ནི་གཅིག་དང་གཉིས། །དེ་བཞིན་བདུན་གྱི་མི་མོ་དང༌། །མི་ཕོ་ལྷ་མོ་སོགས་དབང་བསྐུར། །ཨོཾ་ཏཱ་རེ་ཏུཏྟཱ་རེ་ཏུ་རེལ་པྦྷ་ལམྦྷ་སོ་སཱ་ཏིཀྵ་སི་ཨུ་ཀྭོ་སི་བ་ཤཾ་ཀ་ར་ཡ་ཨ་མུ་ཀཾ་སྱ་དྷྱརྨ་གྷ་ཌ་ནི་ར་ཧ་ཏྲ་ཙ་མ་ན་བ་བྷྱཿ་སིད་ཧ་ད་ཧ་སྠི་དྷྱ་མ་མ་སྫ་ཀ་དྷ་ཧ་ལཾ་པ་ན་བི་རུ་ཏི་པ་ལ་ཎཱ་པ་ཙ་ཏི་རཏྣེ་ཏཾ་བ་ལན་དཪྻ་མ་ནེ་ཧི་ཀུ་ཏོ་ནི་ཀུ་ཀུ་ཏྲོ་རོ་ཏྲོ་ཏྲི་ཡ་ཏི་བ་ས་ནེ་ཧི་བ་ལན་བ་དྷ་ཕུ་ར་ས་ཀྲི་ཏཾ། ཨོཾ་ཙི་ཏྲི་ཙི་ཏྲི་བི་ལོ་ལི་ལ་བི་ལོ་ལ་སྭཱ་ཧཱ། ཨཱ་མུ་ཀཾ་སཱ་དྷ་ནཾ་པ་ར་པ་ཏཱམྨེ་ད་ས་མ་ན་ཡེ་སྭཱ་ཧཱ། ཨོཾ་ཀུ་རུ་ཀུལླེ་ཧྲཱིཿ་སྭཱ་ཧཱ། འབུམ་ཕྲག་རྣལ་འབྱོར་རྩེ་གཅིག་གིས། །མེ་ཏོག་བདུག་པ་བཟའ་བཏུང་དག །བྱིན་ན་བརྒྱ་བྱིན་ཡང་དབང་བྱེད། །མེ་ཏོག་དམར་པོའི་སྦྱིན་སྲེག་གཅེས། །ཡུངས་ཀར་སྐྱེས་བུ་མཆོག་ལ་བསྔགས། །འཁར་བའི་སྣོད་དུ་སྦྲང་རྩི་མར། །སྔགས་དང་བཅས་གུས་དུས་གསུམ་དུ། །མཆོད་པ་བཅས་པས་དོན་རྣམས་འགྲུབ། །ཁམ་ཕོར་རམ་ནི་དུང་ཕོར་དུ། །སྦྲང་རྩི་སོགས་ལ་བརྒྱ་རྩ་བརྒྱད། །བཟླས་སོ་མིག་བྱུགས་དགྲ་པོ་ཡང༌། །བུ་སྡུག་བཞིན་དུ་
༄། །སེམས་པར་འགྱུར། །དུར་ཁྲོད་གནས་སུ་སྣོད་ཆེན་ནི། །པདྨ་དཀར་དང་ཆེན་པོའི་སྣུམ། །བརྒྱ་དང་བཅུ་བཞི་བསྒྲུབ་བྱས་པའི། །མིག་སྨན་གྱིས་ནི་གཞན་དགའ་བྱེད། །རྗེ་བཙུན་མ་སྒྲོལ་མ་སྲིད་གསུམ་འགུགས་པའི་སྒྲུབ་ཐབས་རྫོགས་སོ།། །།
རྗེ་བཙུན་མ་སྒྲོལ་མ་སྡིག་པ་ལས་རྣམ་པར་རྒྱལ་མའི་སྒྲུབ་ཐབས།
༄། །ཕྱག་འཚལ་བརྒྱ་བྱིན་མེ་ལྷ་ཚངས་པ། །རླུང་ལྷ་སྣ་ཚོགས་དབང་ཕྱུག་མཆོད་མ། །འབྱུང་པོ་རོ་ལངས་དྲི་ཟ་རྣམས་དང༌། །གནོད་སྦྱིན་ཚོགས་ཀྱིས་མདུན་ནས་བསྟོད་མ། །འཇིག་རྟེན་ལས་འདས་འཇིག་རྟེན་གྱི། །ཆེ་རྣམས་དབང་ཕྱུག་དཔལ་ལྡན་མ། །འཇིགས་ཆེན་སྡིག་སྤྱོད་སྲིད་ཞ་ཡི། །དངོས་གྲུབ་སྟེར་མཛད་མཁས་པས་བསྒོམ། །པདྨ་ཉི་མ་ལ་གནས་དམར། །ཞལ་གཅིག་ཕྱག་བཞི་རྡོ་རྗེ་གྲི། །སྡིགས་མཛུབ་ཞགས་བསྣམས་རྗེས་མཐུན་བསྒྲུབ། །ལྷ་ཚོགས་ཀུན་ལ་སྐྱོན་སེལ་མའོ། །ལས་སྒྲུབ་འགྲོ་ལ་ཕན་ཡིད་ཀྱིས། །དབེན་པར་དཀྱིལ་འཁོར་བཟང་བྱས་ཏེ། །བགེགས་བསལ་ཕྲིན་ལས་གཏོར་མ་བྱིན། །ལྷ་མོ་སྤྱན་དྲངས་མཆོད་བསྟོད་གསོལ། །བརྒྱ་རྩ་བརྒྱད་བཟླས་བསྒོམ་པར་བཅས། །གནས་གསུམ་ལུས་ངག་ཡིད་སྡིག་སྐྱོན། །སྡིག་གཟུགས་བསམས་ལ་བྱབ་པར་བྱ། །དེ་རྗེས་བཀྲུ་དང་བསྲེག་པར་བྱ། །ལུས་བཀྲུས་འདམ་སྐྱེས་སྡུད་དང་སྐྱེས། །མཁའ་ལ་རྒྱུ་དང་རྩོད་ལས་རྒྱལ། །ངན་སྐྱུགས་རྒལ་སོགས་ལྟས་འཐོན་ནས། །སྡིག་ལྡན་གཞན་ཡང་སྦྱང་བར་བྱ། །ན་མོ་རཏྣ་ཏྲ་ཡཱ་ཡ། ན་མ་ཨཱཪྻ་བ་ལོ་ཀི་ཏེ་ཤྭརཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཨོཾ་ཏཱ་རེ་ཏུཏྟཱ་རེ་ཏུ་རེ་མ་མ་སརྦ་པཱ་པཾ། ཤོ་དྷ་ཡ། བི་ཤོ་དྷ་ཡ། བི་ཤོ་དྷ་ཡ། བི་ཤོ་དྷ་ཡ། སརྦ་བྷ་བ་ས་མུ་དྷིཙོཚ་ཤ་ར་ཡཾ་སྭཱ་ཧཱ། དངོས་སམ་གཟུགས་སམ་གཟུགས་བརྙན་ལ། །མི་དགེ་ཀུན་བསྡུས་སྟོབས་བཞིར་བཅས། །འཕགས་པའི་སྐུ་གསུང་ཐུགས་བདེན་པས། །བདག་དང་འགྲོ་ཀུན་སྡིག་བསལ་བྱ། །རྗེ་བཙུན་མ་སྒྲོལ་མ་སྡིག་པ་ལས་རྣམ་པར་རྒྱལ་མའི་སྒྲུབ་ཐབས་རྫོགས་སོ།། །།
རྗེ་བཙུན་མ་སྒྲོལ་མ་གཞན་འཇོམས་འཕོ་བ་ཞེས་བྱ་བའི་སྒྲུབ་ཐབས།
༄། །ཕྱག་འཚལ་ཏྲཊ་ཅེས་བྱ་དང་ཕཊ་ཀྱིས། །ཕ་རོལ་འཁྲུལ་འཁོར་རབ་ཏུ་འཇོམས་མ། །གཡས་བསྐུམ་གཡོན་བརྐྱང་ཞབས་ཀྱིས་མནན་ཏེ། །མེ་འབར་འཁྲུག་མ་ཤིན་ཏུ་
༄། །འབར་མ། །མ་ལུས་རྒོལ་འཇོམས་ལྷ་མོ་ཆེ། །ཏྲཊ་ཕཊ་སྒྲ་ཡིས་ཕ་རོལ་གནོན། །པདྨ་སེར་དང་ཉི་མ་ལ། །གཡས་བསྐུམ་གཡོན་བརྐྱང་སྟང་སྟབས་མཛེས། །ཚམ་རྔམ་གནག་ཅིང་ཁྲོས་པའི་བཞིན། །ན་བཟའ་སེར་བསྣམས་ལྟོ་འགྲོས་བརྒྱན། །ཕྱག་བཞི་འཁོར་ལོ་རལ་གྲི་དང༌། སྐྱེ་གནས་སྟེང་ཞགས་སྡིག་མཛུབ་མཛད། །རྗེས་མཐུན་ལས་ཀྱི་འཆི་བསླུས་ལ། །དེ་ལས་གོང་མར་འཕོ་བར་བྱ། །ཕྱི་ནང་གསང་བས་འགྲོ་བ་ལ། །སྲོག་སྦྱིན་ཚོགས་བསགས་མཆོད་རྟེན་བསྒྲུབ། །ལྷ་མོ་འདོད་སྦྱིན་ཡིད་ཀྱི་བལྟས། །སྒོ་གཉིས་འཇུག་ལྡོག་རླུང་སྦྱངས་ལ། །གཉུག་མར་གནས་པའི་ཡི་གེ་གསུམ། །གཅིག་ཏུ་བསྡུས་ཏེ་སྟེང་དུ་འཕང༌། །ཧི་ཀས་ལམ་ཕྱེ་ཏཱཾ་གིས་དྲངས། །འོག་མིན་ལོངས་སྤྱོད་རྫོགས་སྐུར་འགྱུར། །དྲི་མེད་ཆོས་སྐུ་ལས་མ་གཡོས། །སྣ་ཚོགས་གནས་སུ་སྤྲུལ་སྐུ་འཕྲོ། །རྗེ་བཙུན་མ་སྒྲོལ་མ་གཞན་འཇོམས་འཕོ་བ་ཞེས་བྱ་བའི་སྒྲུབ་ཐབས་རྫོགས་སོ།། །།
རྗེ་བཙུན་མ་སྒྲོལ་མ་མཆོག་སྩོལ་བ་ཞེས་བྱ་བའི་སྒྲུབ་ཐབས།
༄། །ཕྱག་འཚལ་དཀོན་མཆོག་གསུམ་མཚོན་ཕྱག་རྒྱ། །སོར་མོས་ཐུགས་ཀར་རྣམ་པར་བརྒྱན་མ། །མ་ལུས་ཕྱོགས་ཀྱི་འཁོར་ལོས་བརྒྱན་པའི། །རང་གི་འོད་ཀྱི་ཚོགས་རྣམས་འཁྲུག་མ། །སངས་རྒྱས་ཆོས་ལས་ལེགས་སྐྱེས་ཤིང༌། །དགེ་འདུན་ཀུན་སྐྱོང་བརྩེ་ཆེན་མ། །ཕྱོགས་དང་ཕྱོགས་བྲལ་འཁོར་ལོའི་བདག །རང་སྐྱེས་འོད་ཀྱིས་ཀུན་སྐྱེས་བསྒོམ། །པདྨ་དམར་དང་ཟླ་སྟེང་དུ། །བནྡུ་ལྟར་དམར་ཕྱག་བཞི་མ། །གཉིས་དང་གཉིས་ལས་རབ་དགའ་ཡི། །རང་བཞིན་མྱ་ངན་མེད་ཤིང་འཛིན། །རྗེས་མཐུན་ལས་ཀྱི་དོན་བསྒྲུབ་ཅིང༌། །དེ་ལ་མཆོད་ཚོགས་སྔོན་འགྲོ་བས། །བསྙེན་ཅིང་བསྒྲུབས་ནས་ཚོགས་བསགས་ཏེ། །དེ་ཉིད་གསུམ་གྱིས་བྱིན་གྱིས་བརླབས། །བྱིན་བརླབས་མ་བརླབས་ཡོན་ཏན་སྐྱོན། །ཤེས་གསལ་མི་གསལ་བསྲུང་བྱས་ཏེ། །ཡོངས་རྫོགས་མཎྜལ་གསུམ་པའི་ཚད། །མཎྜལ་སྟེགས་བཞུགས་དུས་བཟང་བརྟག །མཆོད་བསྟོད་གསོལ་བཏབ་གཏོར་མ་སྦྱིན། །ལྷ་ཡི་རྣལ་འབྱོར་རྫོགས་ལྡན་པས། །དཀྱིལ་འཁོར་བྲིས་ཏེ་བུམ་པར་ནི། །དབང་བསྐུར་ཕྱིར་ནི་ལྷ་རྣམས་བསྒྲུབ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥ་ཀ་ཏ་
༄། །ས་མ་ཡ་ཤྲི་ཡེ་ཧཱུཾ། བུམ་པ་ལ་བཟླས་པ་བྱའོ། །བྷྲཱུཾ་ཨཱཾ་ཛྲཱྀཾ་ཁཾ་ཧཱུཾ་བསྐྱེད་ལ། །སླར་ཡང་ཕྱག་མཚན་ལྷ་སྦྱོར་ལས། །རིགས་ལྔ་བསྒོམས་ཏེ་དབང་མཆོག་བསྐུར། །ཁྲུས་བྱས་དྲིས་བྱུག་ཀུན་རྫོགས་སྦྱར། །ཨོཾ་སརྦ་ཏ་ཐཱ་གདྟ་ཀཱ་ཡ་བི་ཤོདྷ་ནེ་ཧཱུཾ་སྭཱ་ཧཱ། སྐུ་ཕྱི་པའི་སྔགས་སོ། །ཨོཾ་ཨཱཿ་ཧཱུཾ་ཛཿ་ཧཱུཾ་བཾ་ཧོཿ། སྐུ་གསུང་ཐུགས་བྱིན་གྱིས་བརླབ་པ་དང༌། ཡེ་ཤེས་པ་སྤྱན་དྲང་བའི་སྔགས་སོ། །དེ་ནས་མན་ངག་ལྡན་པ་ཡིས། །མཆོད་ནས་སྔགས་བཟླས་སྤྱན་ཕྱེ་ལ། །སླར་ཡང་རབ་ཏུ་རྒྱས་པའི་ལས། །མཆོད་ཅིང་སྦྱིན་སྲེག་བཅས་མངའ་གསོལ། །ཨོཾ་ཨཱཿ་ཏཱ་རེ་པུཥྤ་དྷཱུ་པཾ་དཱི་པ་གནྡྷེ་ནཻ་བི་ཏྱ་བཛྲ་ཧཱུཾ་མཆོད་པའི་སྔགས་སོ། །ཨོཾ་ཙཀྵུ་ཙཀྵུ་ས་མནྟ་ཙཀྵུ་བི་ཤོ་དྷ་ཡ་སྭཱ་ཧཱ། ཐུར་མས་སྤྱན་དབྱེ་བའི་སྔགས་སོ། །ཨོཾ་སུ་པྲ་ཏིཥྛ་བཛྲེ་སྭཱ་ཧཱ། མེ་ཏོག་ལ་བཟླས་པ་དང་གཏོར་མའི་སྔགས་སོ། །ཨོཾ་ཧཱུཾ་བྷྲཱུཾ་ཁཾ་བཛྲཱི་བྷ་བ་དྲྀ་ཌྷོ་ཏིཥྛ་བྷྲཱུཾ་ཁཾ། བཞུགས་ནས་མཎྜལ་དབུལ་བའི་སྔགས་སོ། །ཞི་བའི་སྦྱིན་སྲེག་ལས་ཀུན་བྱེད། །བསྟན་སྐྱོང་མཆོད་པས་སྲུང་བར་བྱེད། །སྲུང་འཁོར་ལྡན་བྱས་གནོད་མེད་བྱེད། །གཏོར་མ་རྒྱས་བྱིན་རྒྱས་པར་བྱེད། །མཆོག་གི་མངའ་གསོལ་རབ་གནས་ཀྱིས། །བྱིན་བརླབས་འབར་དང་རྒྱུན་རིང་གནས། །གང་འདོད་དཔལ་སྟེར་མཐུ་སྟོབས་འཕེལ། །གང་བསྒྲུབས་དེ་འདྲར་སངས་རྒྱས་འགྱུར། །རྗེ་བཙུན་མ་སྒྲོལ་མ་མཆོག་སྩོལ་བ་ཞེས་བྱ་བའི་སྒྲུབ་ཐབས་རྫོགས་སོ།། །།
རྗེ་བཙུན་མ་སྒྲོལ་མ་བདུད་འཇོམས་དབང་སྟེར་མ་ཞེས་བྱ་བའི་སྒྲུབ་ཐབས།
༄། །ཕྱག་འཚལ་ཏུ་རེ་འཇིགས་པ་ཆེན་མོ། །བདུད་ཀྱི་དཔའ་བོ་རྣམ་པར་འཇོམས་མ། །ཆུ་སྐྱེས་ཞལ་ནི་ཁྲོ་གཉེར་ལྡན་མཛད། །དགྲ་བོ་ཐམས་ཅད་རབ་ཏུ་གསོད་མ། །འཇིགས་ཆེན་ལས་སྐྱོབ་འཇིགས་ཆེན་མོ། །དཔའ་བོ་ལས་ཀྱང་དཔའ་མོ་ཆེ། །ཁྲོས་པས་དགྲ་གསོད་དགྲ་ཆེན་དགྲ། །དབང་བསྐུར་ཀུན་སྦྱིན་དབང་བདག་བསྒོམ། །པདྨར་ཟླ་གདན་ཆུ་སྲིན་གདན། །གསེར་མདོག་སྐྱིལ་ཀླུང་ཕྱེད་ཞལ་གཅིག །ཨ་ཤྭ་ཀ་དང་རིན་ཆེན་མཆོག །པདྨ་བུམ་ལས་དབང་མཆོག་སྟེར། །རྗེས་མཐུན་ལས་བྱེད་ཉོན་མོངས་ཀྱིས། །ཉོན་མོངས་ཀུན་སེལ་དབང་བསྒྲུབ་བྱ། །རིགས་གསུམ་ལས་སྐྱེས་སྨིན་བྱས་ཏེ།།
༄། །ཆོ་གས་སྦུ་གུར་སྙིང་པོ་དྲང༌། །ཉི་ཟླ་ནམ་མཁའ་སྦྲང་རྩིའི་བཅུད། །ལྷན་ཅིག་སྐྱེས་ཞེས་མི་འབྲལ་བསྒོམ། །ཟག་དང་བཅས་ལས་ཟག་པ་མེད། །ཞི་ལ་འོད་གསལ་དམིགས་བྲལ་དག །མཁས་པས་ལུས་དང་ལུས་མེད་ལས། །མེ་ཏོག་རྩིའམ་ཏིལ་མར་ལྟར། །ཐབས་ལྡན་ཐབས་བྲལ་ལེགས་བླངས་བསྟན། །མཐར་ནི་ཡང་དག་མཁའ་མཉམ་ཉིད། །རྗེ་བཅུན་མ་སྒྲོལ་མ་བདུད་འཇོམས་དབང་སྟེར་མ་ཞེས་བྱ་བའི་སྒྲུབ་ཐབས་རྫོགས་སོ།། །།
རྗེ་བཙུན་མ་སྒྲོལ་མ་མྱ་ངན་སེལ་བྱེད་ཀྱི་དཀྱིལ་འཁོར་དུ་འཇུག་པའི་ཡན་ལག་ཅེས་བྱ་བ།
༄། །ཕྱག་འཚལ་རབ་ཏུ་དགའ་བ་བརྗིད་པའི། །དབུ་རྒྱན་འོད་ཀྱི་ཕྲེང་བས་སྤེལ་མ། །བཞད་པ་རབ་བཞད་ཏུ་ཏཏྟཱ་ར་ཡིས། །བདུད་དང་འཇིག་རྟེན་དབང་དུ་མཛད་མ། །ཏིང་འཛིན་དམ་པས་ཐུགས་བལྟམས་ཏེ། །དགྱེས་ཤིང་དགྱེས་པས་རོལ་པའི་སྟངས། །དབུ་རྒྱན་ལྔ་ཡི་ལྷ་འོད་ཀྱིས། །བཞད་ཅིང་རབ་བཞད་བསྒོམ་པར་བྱ། །པདྨར་ཟླ་སྟེང་བྱི་རུའི་མདོག །ཞལ་གཅིག་ཕྱག་བཞི་དང་པོ་གཉིས། །སྤྱི་བོར་བཅིངས་དང་རལ་གྲི་འཕྱར། །ཨ་ཤྭ་ཀ་ཡི་ཡལ་ག་འཛིན། །རྗེས་མཐུན་ལས་རྣམས་བསྒྲུབ་མཛད་མ། །མཉེས་བྱས་དུ་མས་གསོལ་བཏབ་པས། །བགེགས་བསལ་གཏོར་མ་སྔོན་བྱིན་ལ། །ས་བླང་སྟེགས་བུ་བཟང་པོ་བྱ། །རི་རབ་སྟེང་གནས་གཞལ་ཡས་ཁང༌། །བུམ་པ་ལྔ་ལྡན་མཆོད་བསྟོད་གསོལ། །དམ་ཚིག་བསྐྱེད་ལ་རྫོགས་པར་བསྒྲུབ། །འབུམ་ཕྲག་གསུམ་དུ་བཟླས་པ་བྱ། །མིག་གཉིས་ཉི་མ་ཟླ་བ་ཡིས། །ཕྱོགས་ཀུན་བསྲེགས་ནས་ལྷ་མོ་ཡི། །དཀྱིལ་འཁོར་དམ་པ་མཁའ་ལ་བལྟ། །བཛྲ་ཨུཙྪ་ཊ་ཧཱུཾ་བརྗོད། །འཁྱིལ་པའི་སྔགས་བརྗོད་གོམ་པ་བརྒྱར། །རྔམ་པར་བྱ་སྟེ་དྲ་གུར་བྱ། །འབྱུང་ཆེན་ལྷ་མོ་དཔང་བཞག་ནས། །དཀྱིལ་འཁོར་མཆོག་ནི་རྒྱས་པར་བྲི། །ཕྱོགས་བཞི་ནས་གུས་ཚིག་བཞི་ཡིས། །གསོལ་བཏབ་དམ་ཚིག་ཡེ་ཤེས་ཀྱི། །དཀྱིལ་འཁོར་བསྐྱེད་དང་གཞུག་སོགས་བྱ། །བུ་དང་བླ་མའི་དྲིས་ལན་བརྗོད། །མཎྜལ་སྔོན་སོང་སོ་ཤིང་སྦྱིན། །སྔགས་བཅས་ཉལ་བས་རྨི་བརྟགས་ལ། །ལྷ་ཡིད་ཀུན་ལྡན་རྡུལ་ཚོན་དགོད། །མཆོད་བསྟོད་བསྒོམ་ཞིང་བཟླས་སོགས་བྱ། །ཨོཾ་དྷ་རོད་བཛྲ་ས་མ་ཡ་སྭཱ་ཧཱ།
༄། །གསང་བར་བསྡམས་ཏེ་མནའ་དོར་ལ། །བྱིན་བརླབས་ཆུ་སྦྱིན་གདོང་གཡོགས་ནས། །མེ་ཏོག་དོར་ཏེ་དཀྱིལ་འཁོར་གཞུག །རྟགས་ལྡན་བརྟན་པ་ཕྱག་རྒྱས་གདབ། །ཨོཾ་ཏཱ་རེ་ཏུཏྟཱ་རེ་ཏུ་རེ་ཙིཏྟ་མཎྜལ་བཛྲ་ས་མ་ཡ་སྟྭཾ། དཀྱིལ་འཁོར་བསྟན་ཅིང་གསོལ་བཏབ་ལ། །སངས་རྒྱས་ཀུན་བཞུ་ལྷ་མོ་ཡི། །རྣལ་འབྱོར་ཀུན་ལྡན་ཡེ་ཤེས་ལྔའི། །དབང་བསྐུར་སློབ་མ་མཆོག་ལ་སྦྱིན། །ཨོཾ་ཨཱ་བཛྲ་དཪྴ་ཛྙཱ་ན་ཨ་བྷི་ཥིཉྩ་མཱཾ། ཨོཾ་བཛྲ་ས་མ་ཏ་ཛྙཱ་ན་རཏྣ་ཨ་བྷིཥིཉྩ་མཱཾ། ཨོཾ་བཛྲ་པྲ་ཏྱ་བེཀྵ་ཎ་ཛྙཱ་ན་ཨ་བྷི་ཥཾ་ཉྩ་མཱཾ། ཨོཾ་ཀྲྀ་ཏྱ་ཨ་ནུཥྛ་ན་ཛྙཱ་ན་བཛྲ་ཨ་བྷི་ཥིཉྩ་མཱཾ། ཨོཾ་ཙཀྲ་ཨ་མོ་གྷ་ཛྙཱ་ན་ཨ་བྷི་ཥིཉྩ་མཱཾ། དེ་ནས་རྡོ་རྗེ་སྦྱིན་ཏེ། ཨོཾ་བཛྲ་ས་མ་ཡ་སྟྲྭཾ་ཨ་བྷི་ཥིཉྩ་མཱཾ། དེ་ནས་རྒྱན་དང་སྲུང་བ་སྦྱིན་ལ། ཨོཾ་བཛྲ་རཀྵ་རཀྵ་ཧཱུཾ་ཨ་བྷི་ཥིཉྩ་མཱཾ། ལུང་བསྟན་ཅིང་དབུགས་ཕྱངས་ལ། ཨོཾ་ཏཱ་རེ་ཏུཏྟཱ་རེ་ཏུ་རེ་སིདྡྷ་ས་མ་ཡ་སྟྭཾ་སྭཱ་བྷཱ་བ་ཡ་བྷི་ཥཉྩ་མཱཾ། རྡོ་རྗེ་སློབ་དཔོན་ཉིད་དུ་དབང་བསྐུར་ལ། ཨོཾ་ཏཱ་རེ་ཏཏཱ་རེ་ཏུ་རེ་ཧེ་ཧེ་ཨབྷི་ཥིཉྩ་མཱཾ། ཕྱིར་མི་ལྡོག་པར་དབང་བསྐུར་ལ། ཨོཾ་བཛྲ་བེ་ཝ་རྟི་ཨ་བྷི་ཥིཉྩ་མཱཾ། ཆོས་ཀྱི་རྒྱལ་པོར་དབང་བསྐུར་ལ། ཨོཾ་དྷརྨཱ་རཱ་ཛའ་པྲ་ཏི་སྭཱ་ཧཱ། རྗེས་སུ་ནད་བའི་དབང་བསྐུར་ལ། ཨོཾ་བཛྲ་ཨ་ནུཉྩ་ཨ་བྷི་ཥིཉྩ་མཱཾ། འདི་དག་སློབ་མའི་དབང་བཅུ་སྟེ། །ཕལ་ཆེར་བུམ་པ་ལ་གནས་ཕྱིར། །བུམ་པའི་དབང་དུ་བརྗོད་པ་ཡིན། །དང་པོ་ཡང་ནི་ཐོབ་པར་བྱེད། །དེ་བཞིན་གསང་བ་ཤེས་རབ་ཀྱི། །དབང་བསྐུར་བཅུ་ཡི་ཡེ་ཤེས་དང༌། །སྐུ་གསུམ་ཐོབ་བྱེད་བླ་མའི་ཞལ། །བདུད་རྩི་བཞི་པས་རྡོ་རྗེ་འཛིན། །རྗེ་བཙུན་མ་སྒྲོལ་མ་མྱ་ངན་སེལ་བྱེད་ཀྱི་དཀྱིལ་འཁོར་དུ་འཇུག་པའི་ཡན་ལག་ཅེས་བྱ་བ་རྫོགས་སོ།། །།
རྗེ་བཙུན་མ་སྒྲོལ་མ་འགྲོ་བ་འགུགས་ཤིང་ཕོངས་པ་སེལ་མ་ཞེས་བྱ་བའི་སྒྲུབ་ཐབས།
༄། །ཕྱག་འཚལ་ས་གཞི་སྐྱོང་བའི་ཚོགས་རྣམས། །ཐམས་ཅད་འགུགས་པར་ནུས་པ་ཉིད་མ། །ཁྲོ་གཉེར་གཡོ་བ་ཡི་གེ་ཧཱུཾ་གིས།། ཕོངས་པ་ཐམས་ཅད་རབ་ཏུ་སྒྲོལ་མ། །དཔལ་ལྡན་ས་སྐྱོང་ཕྱོགས་རྣམས་དང༌། །ཕྱོགས་བྲལ་མ་ལུས་འགུགས་བྱེད་མ། །དེ་ཉིད་སྙིང་པོ་རབ་གཡོ་བས། །ཕོངས་པ་མཐའ་དག་སེལ་མཛད་བསྒོམ། །རྗེས་མཐུན་ཆོ་གས་ལས་བསྒྲུབས་ནས། །པད་ཉི་ལ་བཞུགས་གཡས་
༄། །བརྐྱང་རོལ། །མུན་མདོག་ཞལ་གཅིག་ཕྱག་གཉིས་གཡས། །ལྕགས་ཀྱུ་གཟའ་འགུགས་ཞགས་བསྣམས་འཆིང༌། །དཔའ་མོ་བསྙེན་པས་འགྲོ་ཕན་ཡིད། །བརྒྱ་རྩ་བརྒྱད་ནི་གུས་བསྒོམས་ལ། །པདྨའམ་བིལ་འབྲས་དེ་བཞིན་དུ། །ཀ་རྦིའ་རའི་མེས་མཆོད་བྱ། །བུམ་བཟང་སྣོད་དུ་ལྔ་ཕྲག་ལྔ། །རིན་ཆེན་གཟུགས་སྤྲས་སྙིང་པོ་གཞུག །གང་འདོད་བཞིར་ནི་བགེགས་བསལ་ལ། །ལྷ་མོ་ནོར་གྱི་དབང་ཕྱུག་བརྟེན། །ཨོཾ་ཏཱ་རེ་ཏུཏྟཱ་རེ་ཛཾ་བྷེ་མོ་ཧེ་སྭཱ་ཧཱ། རྗེ་བཙུན་མ་སྒྲོལ་མ་འགྲོ་བ་འགུགས་ཤིང་ཕོངས་པ་སེལ་མ་ཞེས་བྱ་བའི་སྒྲུབ་ཐབས་རྫོགས་སོ།། །།
རྗེ་བཙུན་མ་སྒྲོལ་མ་བཀྲ་ཤིས་ཐམས་ཅད་སྦྱིན་མའི་སྦྱིན་སྲེག་བྱ་བའི་སྒྲུབ་ཐབས།
༄། །ཕྱག་འཚལ་ཟླ་བའི་དུམ་བུས་དབུ་བརྒྱན། །བརྒྱན་པ་ཐམས་ཅད་ཤིན་ཏུ་འབར་མ། །རལ་པའི་ཁུར་ནས་འོད་དཔག་མེད་ལས། །རྟག་པར་ཤིན་ཏུ་འོད་རབ་འཛག་མ། །གང་གིས་གསོལ་བཏབ་བཀྲ་ཤིས་དང༌། །དགེ་ལེགས་རྒྱས་མཛད་ཟླ་ཚེས་བརྒྱན། །འོད་དཔག་མེད་ལས་འོད་འཛགས་པས། །བསོད་ནམས་འོད་དཔུང་འབར་མཛད་བསྒོམ། །མཚན་མས་རྗེས་མཐུན་ལས་བསྒྲུབས་ནས། །སླར་ཡང་ཆུ་སྐྱེས་རི་བོང་ཅན། །རྡོ་རྗེའི་སྐྱིལ་ཀྲུང་གིས་གནོན་དཔལ། །གསེར་མདོག་ཞལ་གཅིག་ཕྱག་བརྒྱད་བལྟ། །རྩེ་གསུམ་ལྕགས་ཀྱུ་རྡོ་རྗེ་གྲི། །རིན་ཆེན་ལྕགས་ཀྱུ་དབྱུ་གུ་རིལ། །ཐུགས་རྗེས་ཚར་གཅོད་རྗེས་འཛིན་མ། །རྒྱུན་མི་འཆད་པར་འདོད་སྟེར་མའོ། །ཤིས་པའི་ཕྱོགས་སུ་ཐབ་བརྩིགས་ཏེ། །དབུས་སུ་ཏཱཾ་ལྡན་ཨུཏྤལ་བསྐོར། །སྲེག་རྫས་གཡས་དང་མཆོད་རྫས་གཡོན། །འོ་མ་ཅན་ཤིང་སྦྲང་རྩི་མར།། བསངས་ཏེ་སོ་སོར་བྱིན་གྱིས་བརླབས། །རིན་ཆེན་ལས་བྱས་ཚད་ལྡན་གྱིས། །དགང་གཟར་བླུགས་གཟར་རྡོ་རྗེ་དྲིལ། །བསངས་ཏེ་ཀུ་ཤས་གཅལ་བཀྲམ་བྱ། །རྒྱུན་བཞག་བྲམ་ཟེའི་མེས་སྦར་ལ། །བསང་ཞིང་རླུང་ཡབ་ཀྱིས་བསྐྱོད་བྱ། །འབར་བའི་ཆེད་དུ་ལན་གསུམ་གསུམ། །བདག་མེད་བྱིན་ཟ་མཆོད་ནས་བསྟིམ། །པདྨའི་འདུག་སྟངས་ལན་གཉིས་ཏེ། །གསུམ་གསུམ་གྱིས་ནི་ལན་བདུན་དུ། །མར་གྱི་དགང་བླུགས་གུས་པས་སྦྱིན། །རྣལ་འབྱོར་ལྡན་པས་རྩེ་གཅིག་གོ །ཨོཾ་ཨགྣ་ཡེ་ཨ་དི་བྱ་ཨ་བི་ས་མ་ཡ་རཱ་ཤྲི་ཡེ་ཧ་བྱ་ཀ་བྱ་མ་ཧཱ་ཀ་ན་སྭཱ་ཧཱ། །མེ་བལྟས་ངན་ན་
༄། །བགེགས་དགྲ་བཟློག །བཟང་ན་གསོལ་བཏབ་དངོས་གྲུབ་བླང༌། །སྡིག་ལྡན་སྦངས་ནས་གསོ་སྦྱོང་ཅན། །གུས་ཤིང་སྙིང་རྗེ་ལྡན་པར་མཆོད། །ཨོ་ཨ་བྷི་བྷ་ཀྵ་ཨགྣ་ཡེ་མ་མ་ཤཱནྟིཾ་ཀུ་རུ་སྭཱ་ཧཱ། དེ་རྗེས་དགང་བླུགས་ཞབས་བསིལ་བྱ། །མཆོད་བསྟོད་འདོད་དོན་གསོལ་བ་གདབ། །དེ་རྗེས་ལྷ་བསྐྱེད་སོགས་མཆོད་ནས། །དགང་བླུགས་ཕུལ་ལ་རྫས་རྣམས་མཆོད། །ན་མོ་རཏྣ་ཏྲ་ཡཱ་ཡ། ན་མ་ཨཱཪྻཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་ས་ཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཨོཾ་ཏཱ་རེ་ཏུཏྟཱ་རེ་ཏུ་རེ་མ་མ་ཤཱནྟིཾ་ཀུ་རུ་སྭཱ་ཧཱ། དགང་བླུགས་དབུལ་ཞིང་མཆོད་བསྟོད་ལ། །སླར་ཡང་མེ་ལྷ་བསྐྱེད་རྫས་དབུལ། །མཆོད་བསྟོད་བཤགས་ཤིང་བྱང་ཆུབ་བསྔོ། །ཀུན་དོན་ཕྲིན་ལས་ཐམས་ཅད་གྲུབ། །རྗེ་བཙུན་མ་སྒྲོལ་མ་བཀྲ་ཤིས་ཐམས་ཅད་སྦྱིན་མའི་སྦྱིན་སྲེག་བྱ་བའི་སྒྲུབ་ཐབས་རྫོགས་སོ།། །།
རྗེ་བཙུན་མ་སྒྲོལ་མ་ཡོངས་སུ་སྨིན་པས་དགྲ་བགེགས་གཞོམ་པའི་སྒྲུབ་ཐབས།
༄། །ཕྱག་འཚལ་བསྐལ་པ་ཐ་མའི་མེ་ལྟར། །འབར་བའི་ཕྲེང་བའི་དབུས་ན་གནས་མ། །གཡས་བརྐྱང་གཡོན་བསྐུམ་ཀུན་འཁོར་དགའ་བའི། །དགྲ་ཡི་དཔུང་ནི་རྣམ་པར་འཇོམས་མ། །སྨིན་བྱེད་རླག་བྱེད་དཔའ་མོ་ནི། །མི་བཟད་མེ་དཔུང་དབུས་ན་བརྗིད། །རྟེན་བྱེད་སྡང་བྱེད་དགའ་མཛད་ཅིང༌། །འཇོམས་བྱེད་དགྲ་གཟུགས་ཅན་དེ་བསྒོམ། །པདྨ་དམར་དང་ཉི་མ་ལ། །བཞེངས་པའི་དོར་སྟབས་བརྐྱང་བསྐུམ་མ། །མི་བཟད་རཱ་ག་ལྟར་དམར་མདོག །ཀུན་དུ་འཕྲོ་ཞིང་ཀུན་བསྲེག་མཛད། །ཞལ་གཅིག་ཕྱག་བཞི་མཆུ་སྨིན་གཡོ། །རལ་གྲི་མདའ་དང་འཁོར་ལོ་གཞུ། །གཅོད་འབིགས་གཤག་ཅིང་བསྣུན་བྱེད་ལས། །བགེགས་དགྲ་ཕྲ་རབ་རྡུལ་མི་གནས། །གསེར་མདོག་ནོར་བུ་ཨིནྡྲ་དང༌། །སྦུར་ལོང་འཕགས་པའི་གདུང་ཐལ་དང༌། །བྲི་ཧ་ཏི་དང་གུ་གུལ་དང༌། །བདུད་རྩི་ལྔ་སོགས་སྦྱར་བའི་སྤོས། །རྣལ་འབྱོར་ལྡན་པས་བདུག་བྱས་ན། །སྟོང་ཕྲག་བརྒྱད་ཅུའི་མ་ལུས་བགེགས། །ནགས་མེས་ཤིང་སྐམ་ཇི་བཞིན་འཇོམས། །རིམས་སོགས་དུག་སོགས་དེ་བཞིན་ནོ། །བསྒྲུབ་བྱའི་གཟུགས་ལ་ལྷ་མོ་ཡིས། །ང་རྒྱལ་གྱིས་བཀུག་རྩུབ་མོའི་ཤིང༌། །རྟེན་ཕྲལ་ལིང་ག་གཏུབས་ནས་བསྲེགས། །བསྙེན་བསྒྲུབ་ལས་ལ་གོ་རིམས་བཞིན། །འབུམ་ཕྲག་སྟོང་ཕྲག་བརྒྱ་རྩ་བརྒྱད།།
༄། །བཟླས་ཏེ་ཁྲོ་མོའི་ཧོཾ་ཁུང་ཞལ། །ཕུལ་ནས་གསུམ་བདུན་ཉི་ཤུ་གཅིག །ཞག་གིས་ཚངས་པར་གྱུར་ཀྱང་གསོད། །ཨོཾ་ཏཱ་རེ་ཏུཏྟཱ་རེ་ཏུ་རེ་དྷ་མ་དྷ་རེ་ས་ཧཱུཾ། སྥོ་ཊ་བྷ་སྨི་ཀུ་རུ་ཧཱུཾ་ཧཱུཾ་ཧཱུཾ་ཕཊ་ཕཊ་ཕཊ་སྭཱ་ཧཱ། རྗེ་བཙུན་མ་སྒྲོལ་མ་ཡོངས་སུ་སྨིན་པས་དགྲ་བགེགས་གཞོམ་པའི་སྒྲུབ་ཐབས་རྫོགས་སོ།། །།
རྗེ་བཙུན་མ་སྒྲོལ་མ་འགུགས་བྱེད་མས་བསྲུང་བའི་འཁོར་ལོ་བྱ་བའི་སྒྲུབ་ཐབས།
༄། །ཕྱག་འཚལ་ས་གཞིའི་ངོས་ལ་ཕྱག་གིས། །མཐིལ་གྱིས་བསྣུན་ཅིང་ཞབས་ཀྱིས་བརྡུངས་མ། །ཁྲོ་གཉེར་གཡོ་བའི་ཡི་གེ་ཧཱུཾ་གིས། །རིམ་པ་བདུན་པོ་རྣམས་ནི་འགེམས་མ། །འགུགས་བྱེད་སྣུན་བྱེད་རྡུང་བྱེད་མ། །ཡིག་མཆོག་འཛིན་རིམ་གཉིས་བདུན་འགེམས། ལྷ་མོ་ཉིད་བསྙེན་གུས་པ་ཡིས། །ཞེ་སྡང་དང་བྲལ་ཁྲོ་བས་བསྒྲུབ། །སྟོང་ཟིལ་གནག་མདོག་ཞལ་གསུམ་མ། །གཡས་དཀར་གཡོན་དམར་ཁྲོས་པའི་ཞལ། །ཐོད་པའི་དོ་ཤལ་རྒྱུ་མ་གསོལ། །སྦྲུལ་བརྒྱད་ཀྱིས་བརྒྱན་སྟག་ལྤགས་གསོལ། །ཕྱག་དྲུག་རལ་གྲི་ལྕགས་ཀྱུ་དང༌།། དབྱུ་གུ་དེ་བཞིན་ཐོད་ཁྲག་བཀང༌། །ཞགས་པ་ཚངས་པའི་མགོ་འཛིན་མ། །ཁམས་གསུམ་རིམ་བདུན་ཅིག་ཅར་འགེམས། །རྗེས་མཐུན་ལས་རྣམས་སྔོན་སོང་བས། །དར་དཀར་དྲིལ་བྱག་ལྷ་སྦྱོར་གྱིས། །ཆུ་སྐྱེས་གེ་སར་ཨོཾ་དང་ཨའི། །མཐའ་རྟེན་མདའ་བརྒྱད་འབྲུ་བརྒྱད་བྲི། །བདེན་བཞིའི་རྟེན་འབྲེལ་མཐའ་སྐོར་དང༌། །རིགས་ལྔའི་སྙིང་པོས་བརྒྱན་པ་ཡི། །སྣ་ཚོགས་རྡོ་རྗེ་མཛེས་པ་དང༌། །ཨཱ་ལི་ཀཱ་ལི་མུ་ཁྱུད་བསྐོར། །མཐར་བྱེད་སྔགས་དང་རལ་གྲི་ཡི། །རབ་ཕྱི་རོལ་རིམ་གཉིས་དགོད། །དེ་ནས་འབར་བའི་ར་བ་སྟེ། །ཤིས་པའི་སྣག་ཚ་ས་མཉམ་གཞག་བྲི། །མཆོད་ཅིང་ཡེ་ཤེས་འཁོར་ལོ་གཞུག །ང་རྒྱལ་ལྡན་པས་རྒྱས་བཏབ་ལ། །བདུག་པས་བདུག་ཅིང་མགུལ་དུ་གདགས། །འདི་ཡིས་མི་སྲུང་གང་ཡང་མེད། །རྗེ་བཙུན་མ་སྒྲོལ་མ་འགུགས་བྱེད་མས་བསྲུང་བའི་འཁོར་ལོ་བྱ་བའི་སྒྲུབ་ཐབས་རྫོགས་སོ།། །།
རྗེ་བཙུན་མ་སྒྲོལ་མ་ཞི་བ་ཆེན་མོ་ཕྱི་ཁྲུས་ཀྱི་ཆོ་གའི་སྒྲུབ་ཐབས།
༄། །ཕྱག་འཚལ་བདེ་མ་དགེ་མ་ཞིམ། མྱ་ངན་འདས་ཞི་སྤྱོད་ཡུལ་ཉིད་མ། །སྭཱ་ཧཱ་ཨོཾ་དང་ཡང་དག་ལྡན་མ། །སྡིག་པ་ཆེན་པོ་འཇོམས་པ་ཉིད་མ། །ལྷ་མོ་བདེ་མས་མཐོ་རིས་སྦྱིན། །དགེ་མས་ཐར་པ་སྦྱིན་པ་སྟེ། །དེ་བཞིན་ཞི་མས་རྫོགས་སངས་རྒྱས། །སྦྱིན་མཛད་སྡིག་འཇོམས་བསྒོམ་པར་བྱ། །པདྨ་དཀར་དང་ཟླ་བ་ལ། །རྡོ་རྗེའི་སྐྱིལ་
༄། །ཀྲུང་ཀུནདའི་མདོག །ཕྲེང་བ་མཆོག་སྦྱིན་དབྱུ་གུ་དང༌། །པདྨ་སྤྱི་བླུགས་པོ་ཏི་འཛིན། །རྩ་བའི་བསྙེན་ལྡན་ཁྲུས་བྱས་ཏེ། །བགེགས་བསལ་བསོད་ནམས་སྤེལ་ཕྱིར་རོ། །ལྷ་སྦྱོར་ལྡན་དང་རྫས་ཚང་དང༌། །དད་དང་སྙིང་རྗེ་བཙོན་པས་ཡིད། །ཉམས་དགའི་ཕྱོགས་སུ་སྟེགས་བུ་བཅས། །སྣ་ཚོགས་པདྨ་འདབ་བཞི་ལྡན། །རྡོ་རྗེ་མེ་ཕྲེང་མཛེས་བསྐོར་ཞིང༌། །ཕྱོགས་སྐྱོང་བཀྲ་ཤིས་རྟགས་ལྡན་བྲི། །རལ་གྲི་མེ་ཏོག་མདའ་དང་དར། །རྨ་བྱ་ཚོན་སྐུད་དུང་དཀར་སོགས། །བ་དན་བླ་རེ་རྒྱལ་མཚན་གདུགས། །མེ་ཏོག་ཕྲེང་སོགས་མཆོད་གཏོར་བཤམ། །ལྷ་མོའི་ཏིང་འཛིན་ལས་སྦྲུལ་པ། །རིན་ཆེན་ཁང་བརྩེགས་རྒྱ་ཆེན་ནང༌། །དངོས་གྲུབ་མཚོ་སྐྱེས་བཅོམ་ལྡན་མ། །ཆོ་ག་གསུམ་གྱིས་བསྐྱེད་གཞུག་མཆོད། །ན་མོ་རཏྣ་ཏྲ་ཡཱ་ཡ། ན་མོ་ཨཱཪྻཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཨོཾ་ཏཱ་རེ་ཏུཏྟཱ་རེ་ཏུ་རེ་སརྦ་གྲ་ཧེ། སརྦ་བྱ་དྷི། སརྦ་ཙོ་ར། །སརྦ་བ་ཏྱི། སརྦ་དུར་སྭཱ་པ་ནི་བྷྱཿ་སརྦ་པཱ་པཾ་ཤ་མ་ནཱ་ཡ་སྭཱ་ཧཱ། རིག་པའི་རྒྱལ་མོའི་མཐའ་སྐོར་དུ། །གཟུགས་མཛེས་ཀྱིས་ནི་བརྒྱ་སྟོང་གྲངས། །བསྐོར་ཞིང་འཕྲོ་འདུའི་འོད་འབར་བས། །བཞུ་སྟེ་བདུད་རྩིའི་རྫིང་བུར་བྱས། །དུག་སེལ་སྒྲོས་བྱབ་སྡིག་གདོན་སོགས། །མི་སྡུག་གཟུགས་སུ་ཕྱུང་བྱས་ཁྲུས། །རིག་སྔགས་བཀྲ་ཤིས་བཅས་ཏེ་གདོན། །རྗེས་ལ་མཆོད་བསྟོད་བཟོད་པར་གསོལ། །ལན་ཅིག་ལན་གསུམ་ལྔ་དང་བདུན། །ཁྲུས་བྱས་ནད་སེལ་གདོན་ཞི་བྱེད། །སྡིག་འཇོམས་དོན་ཀུན་འགྲུབ་འགྱུར་ཏེ། །རྟག་ཏུ་བྱས་ན་དངོས་གྲུབ་ཐོབ། །རྗེ་བཙུན་མ་སྒྲོལ་མ་ཞི་བ་ཆེན་མོ་ཕྱི་ཁྲུས་ཀྱི་ཆོ་གའི་སྒྲུབ་ཐབས་རྫོགས་སོ།། །།
རྗེ་བཙུན་མ་སྒྲོལ་མ་དགྲ་འཇོམས་མས་བློ་འཕེལ་བ་ཞེས་བྱ་བའི་སྒྲུབ་ཐབས།
༄། །ཕྱག་འཚལ་ཀུན་ནས་བསྐོར་རབ་དགའ་བའི། །དགྲ་ཡི་དཔུང་ནི་རབ་ཏུ་འགེམས་མ། །ཡི་གེ་བཅུ་པའི་སྔགས་ནི་བཀོད་པས། །རིག་པ་ཧཱུཾ་ལས་སྒྲོལ་བ་ཉིད་མ། །ཡིད་གཞུངས་དྲན་སོགས་ཀུན་ནས་བསྐོར། །མི་ཤེས་དགྲ་དཔུང་རབ་འཇོམས་མ། །བློ་གྲོས་ཡི་གེ་བཅུ་བཀོད་པས། །ཧཱུཾ་ལས་སྲིད་ཞིའི་མུན་སྒྲོལ་བསྒོམ། །པདྨའི་གེ་སར་
༄། །ཉི་མ་ལ། །སེམས་དཔའི་སྐྱིལ་ཀྲུང་བྱ་རུའི་མདོག །དགྲ་འཇོམས་རྩེ་གསུམ་ཐུགས་ཀར་འཛིན། །འབྲས་བཅས་ཤིང་བསྣམས་སྡིགས་མཛུབ་འཕྱར། །ཐུགས་ཀྱི་སྙིང་པོ་རེག་པ་མཆོག །ཡི་གེ་བཅུས་བསྐོར་འདོད་པ་ཡི། །དངོས་གྲུབ་ཀུན་སྟེར་བློ་གྲོས་སྤེལ། །ཐམས་ཅད་སྙིང་གི་དབུས་གནས་མའོ། །ཐུགས་རྗེའི་རང་བཞིན་ཤེས་རབ་མཆོག །གཅིག་ཏུ་ཕན་མཛད་དངོས་གྲུབ་སྦྱིན། །ཇི་ལྟར་གཞན་བློ་སྤེལ་དེ་ལྟར། །བདག་གི་བློ་མཆོག་རྒྱས་པར་མཛད། །དག་གི་དབང་ཕྱུག་ཞི་ཕྲ་དམར། །བདག་གྱུར་གཡོན་མདུན་རྒྱབ་ཏུ། །ཡིད་གཞུངས་དྲན་དང་ཤེས་རབ་དང༌། །བློ་འཕེལ་ལྷ་མོ་བཞི་བསྒོམ་བྱ། །སྲིད་པའི་འཁོར་ལོ་ཟླ་བའི་དབུས། །རྣམ་སྣང་སྒྲོལ་མ་ལས་བྱུང་དངོས། །རྩ་རིག་འོད་ཀྱིས་མུན་སེལ་བསྐྱེད། །མི་སྨྲའི་སྦྱོར་བས་གསང་སྔགས་བཟླས། །ཨོཾ་ཏཱ་རེ་ཏུཏྟཱ་རེ་ཏུ་རེ་ཧྲཱིཿ། མཧཱ་མ་ཡཱཾ་ག་པྲཛྙཱ་པྲི་དྷཱ་མ་ཧཱ་ས་ར་ས་ཏྱཻ་ན་མ་པྲ་ཀྲྀ་ཏ་པ་རི་ཤུདྡྷ་སརྦ་དྷརྨཱ་པྲ་ཀྲྀ་ཏ་པ་རི་ཤུདྡྷོཉཧཾ། སརྦ་མ་ཧཱ་བྷ་ཡན་ཏཱ་ར་སྭཱ་ཧཱ། སྨན་རྣམས་སྦྱར་བས་བཟླས་ནས་ནི། །ཟླ་བ་དྲུག་དང་གསུམ་མམ་གཅིག །ཟོས་ནས་ཐོས་མང་འཛིན་པ་དང༌། །ཚེ་ལྡན་ཚངས་པའི་ང་རོ་ཐོབ། །དེ་བཞིན་གསེར་མདོག་དྲི་ལྡན་སྔགས། །ཟླ་གཅིག་ཟླ་གསུམ་ཟླ་བ་དྲུག །བསྙེན་པས་ཡིད་གཞུངས་དྲན་ལྡན་ཞིང༌། །བློ་འཕེལ་ངག་གི་དབང་ཕྱུག་འགྱུར། །རྗེ་བཙུན་མ་སྒྲོལ་མ་དགྲ་འཇོམས་མས་བློ་འཕེལ་བ་ཞེས་བྱ་བའི་སྒྲུབ་ཐབས་རྫོགས་སོ།། །།
རྗེ་བཙུན་མ་སྒྲོལ་མ་བདེ་ལྡན་མས་ཆོམ་རྐུན་བཅིང་བ་ཞེས་བྱ་བའི་སྒྲུབ་ཐབས།
༄། །ཕྱག་འཚལ་ཏུ་རེ་ཞབས་ཀྱིས་བརྡབས་པས། །ཧཱུཾ་གི་རྣམ་པའི་ས་བོན་ཉིད་མ། །རི་རབ་མནད་ར་དང་འབིགས་བྱེད། །འཇིག་རྟེན་གསུམ་རྣམས་གཡོ་བ་ཉིད་མ། །བདེ་ལྡན་ལྷ་མོས་ཞབས་བརྡབས་པས། །འཇིག་རྟེན་གསུམ་གཡོ་འཇིགས་པར་བྱེད། །ཧཱུཾ་ཡིག་ས་བོན་ལས་སྐྱེས་མགོན། །རི་རབ་ཀུན་བསྐྱོད་དབང་སྡུད་བསྒོམ། །རབ་དཀར་པད་དབུས་ཉི་མ་ལ། །ཧཱུཾ་ཡིག་ལས་སྐྱེས་ཀུན་བདེ་སྟེར། །སེམས་དཔའི་སྐྱིལ་ཀྲུང་དམར་སེར་མཛེས། །ཕྱག་གཉིས་རི་བོང་འཛིན་བསྣམས་པའོ། །དེ་བསྙེན་དབེན་པར་གཙང་ཁང་བཤམ། །ཞི་མཛད་ལྷ་ལ་མེ་
༄། །ཏོག་གི །མཎྜལ་མཆོད་བཅས་གཏོར་མར་བཅས། །དེ་བཞིན་གཏུམ་མོ་མེ་མཆོད་བཅས། །ཆོམ་རྐུན་ལ་སོགས་སྙིང་བརྩེ་བས། །ལྷ་མོ་གཏོར་མ་འདོད་བྱིན་ལ། །ཡན་ལག་དགུ་ལྡན་མཆོད་བྱས་ནས། །ཞི་དྲག་གཉིས་ཀར་གསོལ་བ་གདབ་སྙིང་གའི་འོད་ཀྱིས་སེམས་ཅན་ཁམས། །ཀུན་ཁྱབ་སླར་ཡང་ཐུགས་རྗེ་ཡི། །ཨ་ལས་བསིལ་ཟེར་དེ་སྟེང་ཏཱཾ། །ཡོངས་གྱུར་སྔར་གཟུགས་ལྷ་མོ་ཡི། །གཡས་གཡོན་མི་འཇིགས་ཨུཏྤལ་ཅན། །སྣ་ཚོགས་རྒྱན་མཛེས་ལྷ་རྫས་ཀྱི། །མཆོད་སྤྲིན་དབུས་བཞུགས་ཆེ་དགུས་མཆོད། །མགུལ་རྒྱན་གདུ་བུ་དོ་ཤལ་འཛིན། །འབྲུ་གསུམ་གྱིས་བརྒྱན་ནམ་མཁའ་ཡི། །ཚོན་གཟུགས་དང་བལྟས་གསལ་བར་བྱ། །ཕྱག་གི་བདུད་རྩིས་བདག་སྐྱོང་བར། །བསམས་ལ་གསང་སྔགས་ལོ་གྲངས་གདོན། །ན་མོ་ཨཱཪྻཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུཎི་ཀཱ་ཡ། ཏདྱ་ཐཱ། ཨོཾ་ཏཱ་རེ་ཏུཏྟཱ་རེ་ཏུ་རེ་སརྦ་དུ་ཥྚཱཾ་པྲ་དུཥྚཱཾ་མ་མ་ཀྲྀ་ཏྭཱན། ཛཾ་བྷ་ཡ། སྟཾ་བྷ་ཡ། མོ་ཧ་ཡ། བནྡྷ་བནྡྷ་ཡ། ཧཱུཾ་ཧཱུཾ་ཧཱུཾ་ཕཊ་ཕཊ་ཕཊ་སརྦ་སྟཾ་བྷ་ནི་ཏཱ་རེ་སྭཱ་ཧཱ། ཕྱི་ཡི་ཕྱག་རྒྱ་ཞབས་འོག་མནན། །ནང་གི་དབུགས་ཀྱིས་དྲངས་ཏེ་བསྲེག །བསྒྲུབ་བྱའི་འཁོར་ལོ་བཅིངས་ཏེ་དྲིལ། །དེ་སྐྱོང་ལྷ་ནི་གཏོར་མས་བསྐྲད། །གང་འགྲོའི་ཕྱོགས་སུ་དཔལ་ཆེན་མོ། །ཞལ་བཟང་བདག་ལ་གཟིགས་པར་བསམ། །དེ་ལ་བསྟོད་དང་བཟླས་གསོལ་བྱ། །དེས་ནི་འཇིགས་པ་ཀུན་སྐྱོབ་འགྱུར། །རྗེ་བཙུན་མ་འཕགས་མ་སྒྲོལ་མ་བདེ་ལྡན་མས་ཆོམ་རྐུན་བཅིང་བ་ཞེས་བྱ་བའི་སྒྲུབ་ཐབས་རྫོགས་སོ།། །།
རྗེ་བཙུན་མ་སྒྲོལ་མ་རྣམ་པར་རྒྱལ་མས་ཀླུ་ནད་གསོ་བའི་སྒྲུབ་ཐབས།
༄། །ཕྱག་འཚལ་ལྷ་ཡི་མཚོ་ཡི་རྣམ་པའི། །རི་དྭགས་རྟགས་ཅན་ཕྱག་ན་བསྣམས་མ། །ཏཱ་ར་གཉིས་བརྗོད་ཕཊ་ཀྱི་ཡི་གེས། །དུག་རྣམས་མ་ལུས་པར་ནི་སེལ་མ། །འཕགས་མ་ལྷ་ཡི་ངང་པ་འཛིན། །ཟག་མེད་བདེ་རྒྱས་དུ་སེལ་མ། །མཉེས་བྱས་རྫས་དང་སྔགས་སྦྱོར་བས། །དུག་རྣམས་ལས་རྒྱལ་བསྒོམ་པར་བྱ། །པདྨ་དཀར་སྟེང་ཟླ་དབུས་སུ། །འདབ་བཟང་ཁྲི་སྟེང་སྐྱིལ་ཀྲུང་བཞུགས། །གཉིས་ཀྱི་སྤྱི་བོར་ལྕགས་ཀྱུ་འཛིན། །
༄། །གཞན་གཉིས་མཆོག་སྦྱིན་པོ་ཏི་བསྣམས། །ལྷ་མཉེས་རྣལ་འབྱོར་ལྡན་པ་ཡིས། །གདོན་རིགས་ལྔ་ཡིས་དུག་བརྟགས་ལ། །རྫས་རིགས་ལྔ་ལ་གསང་སྔགས་ལྔ། །འབུམ་ཕྲག་གསུམ་བཟླས་གནས་ལྔར་བྱུགས། །ཨོཾ་ཏཱ་རེ་ཏུཏྟཱ་རེ་ཏུ་རེ་ཀུ་རུ་ཀུལླེ་ཧྲཱིཾཿ། སརྦ་ཤ་ཏྲཱུཾ་བྷ་ཀྵ་ཡ་ཧཱུཾ་ཧཱུཾ་ནཱ་ག་སྟཾ་བྷ་ཡ་མོ་ཧཱ་ཡ་བནྡྷ་ཡ་རཾ་ཡཾ་ཁཾ་སུཾ་ནེ་ར་པ་ནེ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། དམ་ཚིག་རྫས་ནི་དང་པོ་ལ། །གུ་གུལ་གླ་རྩི་ཤུ་དག་དང༌། །རུ་རྟ་བཙན་དུག་ཤིང་ཀུན་ཉིད། །གླ་རྩི་མི་བསྐྱོད་བཅས་སྦྱོར་བའོ། །གཉིས་པ་གཉིས་འགྱུར་ཤུ་དག་བླ། །རུ་རྟ་གུ་གུལ་མུ་ཟི་ཉིད། །རོ་རས་རྒྱ་ཚིལ་གཤིན་དྲི་ཆེན། །ཕག་བཅུད་སྒོག་སྐྱ་མ་དྷུ་ར། །མི་ཡི་བཅུད་དང་རུས་པའི་ཕྱེ། །མི་ཡི་བཅུད་བསྡུས་རིལ་བུའོ། །སྔ་མའི་གཉིས་འགྱུར་བསྙེན་པ་ཡིས། །རིག་པ་ཉིད་དང་ལྷ་སྦྱོར་ཉིད། །གསུམ་པ་ལ་ནི་གསུམ་འགྱུར་ཉིད། །གཞན་ཡང་ཀླུ་དུག་བདུད་རྩི་བསྟེན། །བཞི་པ་ཡང་ན་བཞི་འགྱུར་ཉིད། །ཀླུ་དུག་རྣམ་རྒྱལ་བསྟེན་པར་བྱ། །ལྔ་པ་ལྔ་འགྱུར་ཨ་རུ་ར། །མི་བསྐྱོད་གླ་རྩི་ཁྱད་པར་བསྟེན། །ཉི་འོད་མུན་པ་མི་ཡི་རྡུལ། །ཇི་བཞིན་དུག་རྣམས་འཇོམས་པར་བྱེད། །རྗེ་བཙུན་མ་སྒྲོལ་མ་རྣམ་པར་རྒྱལ་མས་ཀླུ་ནད་གསོ་བའི་སྒྲུབ་ཐབས་རྫོགས་སོ།། །།
རྗེ་བཙུན་མ་སྒྲོལ་མ་སྡུག་བསྔལ་བསྲེགས་པས་ཁྲི་མོན་ལས་ཐར་འི་སྒྲུབ་ཐབས།
༄། །ཕྱག་འཚལ་ལྷ་ཡི་ཚོགས་རྣམས་རྒྱལ་པོ། །ལྷ་དང་མི་འམ་ཅི་ཡིས་བསྟེན་མ། །ཀུན་ནས་གོ་ཆ་དགའ་བའི་བརྗིད་ཀྱིས། །རྩོད་དང་རྨི་ལམ་ངན་པ་སེལ་མ། །ས་གསུམ་དབང་པོས་རབ་མཆོད་ཅིང༌། །ཀུན་ནས་དགའ་བསྐྱེད་འབར་བ་ཡི། །གཟི་ཡིས་ལྟས་ངན་སྡུག་བསྔལ་སེལ། །བརྩོན་བས་དུས་དྲུག་བསྒོམ་པར་བྱ། །པདྨ་དཀར་དང་ཉི་སྟེང་དུ། །གཡས་བརྐྱང་སྐྱིལ་ཀྲུང་ཀུནདའི་མདོག །སྣ་ཚོགས་འོད་ཕྲེང་སྐུ་བརྒྱན་ནས། །མེ་ཐབ་བསྣམས་ཤིང་སྡུག་བསྔལ་བསྲེག །ལྟས་མཐོང་བསྙེན་པས་འཕགས་མ་ཉིད། །སྐྱབས་སོང་སྦྱོར་གཞན་སྤངས་ནས་ནི། །བ་ལང་ལྕིས་བྱུགས་དཀྱིལ་འཁོར་བྱ། །དབུས་སུ་གསུང་ཐུགས་སྐུ་བསྐྱེད་བྱ། །དེ་ཉིད་སྤྱན་དྲངས་མཆོད་སྔོན་འགྲོ་།གསོལ་བཏབ་སྙིང་བརྩེས་བསྙེན་པས་སོ། །ཁྲི་བརྩོན་ལོ་གྲངས་བརྒྱ་རྩ་བརྒྱད། །མཆོད་བསྟོད་གསོལ་བ་མ་ཡེངས་བྱ།
༄། །ན་མོ་རཏྣ་ཏྲ་ཡཱ་ཡ། ན་མོ་ཨཱཪྻཱ་བ་ལོ་ཀི་ཏེ་ཤྭ་རཱ་ཡ། བོ་དྷི་ས་ཏྭཱ་ཡ། མ་ཏཱ་ས་ཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། རི་ཛུ་གྷ་དྷརྨཱི། ནིར་ཡ་ཏེ། ཏ་རེ་ཏ་ར་ཡ། བྷ་ག་བ་ཏི་ཏུཏྟཱ་རེ་བྷ་ཡ་མོ་ཙི་ཏུ་རེ་སྭཱ་ཧཱ། རྗེ་བཙུན་མ་སྒྲོལ་མ་སྡུག་བསྔལ་བསྲེགས་པས་ཁྲི་མོན་ལས་ཐར་པའི་སྒྲུབ་ཐབས་རྫོགས་སོ།། །།
རྗེ་བཙུན་མ་སྒྲོལ་མ་དངོས་སྒྲུབ་འབྱུང་བས་མི་སྣང་བ་བྱེད་པའི་སྒྲུབ་ཐབས།
༄། །ཕྱག་འཚལ་ཉི་མ་ཟླ་བ་རྒྱས་པའི། །སྤྱན་གཉིས་པོ་ལ་འོད་རབ་གསལ་མ། །ཏཱ་ར་གཉིས་བརྗོད་ཏུཏྟཱ་ར་ཡིས། །ཤིན་ཏུ་དྲག་པོའི་རིམས་ནི་སེལ་མ། །ཡེ་ཤེས་ལྷ་མོ་ཡེ་ཤེས་སྤྱན། །རབ་གསལ་བསྒྲིབས་དང་མི་བསྒྲིབས་གཟིགས། །ངན་འགྲོ་དང་ནི་སྲིད་པའི་ནད། །ཉོན་མོངས་བཅས་འཇོམས་བསྒོམ་པར་བྱ། །འདབ་སྐྱེས་དམར་སྟེང་ཟླ་བ་ལ། །སེམས་དཔའི་སྐྱིལ་ཀྲུང་གསེར་ཟངས་མདོག །ཕྱག་གཉིས་ཐུགས་ཀར་གསེར་བུམ་འཛིན། །ནད་འཇོམས་དངོས་གྲུབ་ཀུན་སྟེར་མཛད། །འདབ་པ་ཟངས་མིག་ལྕེ་མ་ཁྲིས་པ་བསྣམས། །རི་རབ་ཀྱིས་བཅས་ག་འུར་གཞུག །ལྷ་མོ་ཉིད་སྐུ་གསུང་དང་ཐུགས། །ཡི་གེ་གསུམ་བསྐྱེད་བསྲུང་བའི་མཆོག །རིག་པའི་རྒྱལ་མོ་ཏཱཾ་ཡི་གེ། །མིག་སྨན་བསྡུས་ནས་ཀུན་མཐོང་ཞིང༌། །གཞན་མཐོང་མི་མཐོང་སྦྱིན་པར་བྱེད། །སྤེད་བྱེད་གཟུངས་ནི་འབུམ་ཕྲག་བཟླས། །ན་མོ་རཏྣ་ཏྲ་ཡཱ་ཡ། ན་མོ་ཨཱཪྻཱ་བ་ལོ་ཀི་ཏེ་སྭཱ་རཱ་ཡ། བོ་དྷི་ས་ཏྭཱ་ཡ། མ་ཧཱ་ས་ཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ཨོཾ་ཏཱ་རེ་ཏུཏྟཱ་རེ་ཏུ་རེ་ཡ་ཏུ་ཛ་ཡེ་ཛ་ཡེ་ཏུཏྟཱ་རེ་ཛ་ཡ་བོ་དྷི་ཏུ་རེ་སྭཱ་ཧཱ། རྗེ་བཙུན་མ་སྒྲོལ་མ་དངོས་གྲུབ་འབྱུང་བས་མི་སྣང་བར་བྱེད་པའི་སྒྲུབ་ཐབས་རྫོགས་སོ།། །།
རྗེ་བཙུན་མ་སྒྲོལ་མ་ཡོངས་སུ་རྫོགས་བྱེད་མས་མཁའ་སྤྱོད་ཀྱི་སྒྲུབ་ཐབས།
༄། །ཕྱག་འཚལ་དེ་ཉིད་གསུམ་རྣམས་བཀོད་པས། །ཞི་བའི་མཐུ་དང་ཡང་དག་ལྡན་མ། །གདོན་དང་རོ་ལངས་གནོད་སྦྱིན་ཚོགས་རྣམས། །འཇོམས་པ་ཏུ་རེ་རབ་མཆོག་ཉིད་མ། །ལྷ་དང་སྔགས་དང་ཏིང་འཛིན་གྱིས། །དེ་ཉིད་གསུམ་བཀོད་མཐུ་ཆེན་མོ། །གནས་གསུམ་གནོད་པའི་ཚོགས་འཛོམས་མ། །ཡི་གེ་གཉིས་ལྡན་བསྒོམ་པར་བྱ། །ཆོ་ག་ཀུན་ལྡན་རྗེས་མཐུན་པའི། །ལྷ་བསྙེན་མཆོད་བཟླས་གོམས་པ་ཡིས། །དེ་ཉིད་གསུམ་ནི་རྟག་ཏུ་དྲན། །ཡོངས་རྫོགས་
༄། །མཁའ་སྤྱོད་འགྲུབ་པར་འགྱུར། །ཧ་སྐྱེས་ཁྱུ་མཆོག་པད་ཟླ་ལ། །སྐྱིལ་ཀྲུང་ཕྱེད་བཞུགས་སྟག་ཤམ་ཅན། །ཞལ་གཅིག་རྣམ་ཐར་སྤྱན་གསུམ་ཕྱག །མུ་ཏིག་ཕྲེང་དང་མདུང་རྩེ་གསུམ། །སྐར་མདོག་རབ་དཀར་མུན་སེལ་བྱེད། །གསང་སྔགས་སྒྲ་ཡིས་སྲིད་གསུམ་འགེངས། །དུག་གསུམ་མདུང་རྩེ་གསུམ་གྱིས་བསྣུན། །སྒྲུབ་ལ་དངོས་གྲུབ་ཀུན་རྫོགས་མཛད། །དེ་ཡིས་མཁའ་སྤྱོད་མཐོང་སྟེར་མ། །ལྷ་བསྙེན་ཡིད་ཀྱི་ཤུགས་གོམས་པས། །ཟངས་ལྕགས་གསེར་ལས་རལ་གྲི་བྱ། །ཚད་ལྡན་ཨཱ་ཀཱ་བཅུ་ཕྲེང་བརྒྱན། །སྔགས་བཟླས་རབ་འབྲིང་ཐ་མའི་རྟགས། །མེ་ཏོག་འོད་ཟེར་འཕྲོ་བ་དག །མཐོང་ནས་ཆགས་མེད་ཡིད་ཀྱིས་བསྐྱོད། །དེ་བཟུང་འདབ་གཤོག་བྱ་བཞིན་འགྲོ། །ཨོཾ་ཏཱ་རེ་ཏུཏྟཱ་རེ་ཏུ་རེ་ཨ་མོ་གྷ་སིདྡྷི་ཁཌྒེ་པ་ལོ་ཀ་ཨཱ་ལོ་ཀ་ཏིཥྛ་རཏྣ་ཙ་ལ་ཙ་ལ་ཧཱུཾ་ཧཱུཾ་ཧཱུཾ་བཾ་བཾ་སྠཱཾ་སྭཱ་ཧཱ། རྗེ་བཙུན་སྒྲོལ་མ་ཡོངས་སུ་རྫོགས་བྱེད་མས་མཁའ་སྤྱོད་ཀྱི་སྒྲུབ་ཐབས་རྫོགས་སོ།། །།འཕགས་མཆོག་ལྷ་མོ་ཡིད་བཞིན་དབང་གི་རྒྱལ་པོ་འདི། །ཉི་ཤུ་གཅིག་བཅས་བསྟོད་པའི་རྒྱལ་པོའི་རྗེས་སྒྲུབ་ཐབས། །སྒྲོལ་མ་མངོན་འབྱུང་ལེའུ་ལྔ་བརྒྱ་བདུན་ཅུ་པར། །གང་གསུངས་གསལ་བྱས་དེ་དགེས་འགྲོ་ཡིད་མུན་སེལ་ཤོག །བཅོམ་ལྡན་འདས་ཤཱཀྱ་ཐུབ་པས་རྗེ་བཙུན་འཕགས་མ་སྒྲོལ་མ་ལ་བསྟོད་པ་ཉི་ཤུ་རྩ་གཅིག་པའི་སྒྲུབ་ཐབས། རྗེ་བཙུན་ལྷ་མོ་མཆོག་ཉིད་ཀྱི་སྐུས་རྗེས་སུ་བཟུང་བའི་སློབ་དཔོན་ཆེན་པོ་ཉི་མ་སྦས་པའི་ཞབས་ཀྱིས་མཛད་པ་རྫོགས་སོ།། །།དཔལ་ཆོས་ཀྱི་རྗེ་མ་བྱོན་པའི་སངས་རྒྱས་གསུམ་བར་གྲགས་པའི་པཎྜི་ཏ་ཆེན་པོ་བསོད་སྙོམས་པ་ཁ་ཆེ་ཤཱཀྱ་ཤྲཱི་བྷ་དྲ་དང༌། ལོ་ཙཱ་བ་བྱམས་པའི་དཔལ་གྱིས། བོད་ཡུལ་དབུས་ཀྱི་གཙུག་ལག་ཁང་ཆེན་པོ་སོལ་ནག་ཐང་པོ་ཆེ་དང༌། ཕོ་བྲང་དམ་པ་ཁྲ་འབྲུག་གི་གཙུག་ལག་ཁང་དུ་བསྒྱུར་བའོ།། །།རྗེ་བཙུན་སྒྲོལ་མ། ཚེ་དང་ལྡན་པ་ཀུན་དགའ་བོ། དགྲ་བཅོམ་པ་ཉི་མ་གུང་པ། དགྲ་བཅོམ་པ་ཤ་ནའི་གོས་ཅན། དགྲ་བཅོམ་པ་ཀྲྀཥྞའི་གོས་ཅན། ཁ་ཆེ་ཉི་མ་སྦས་པ། རཱ་ཧུ་ལ་ཤྲཱི། བི་ན་ད་ཤྲཱི། པཎ་ཆེན་ཤཱཀྱ་ཤྲཱི། ལོ་ཙཱ་བ་བྱམས་པའི་དཔལ། བླ་མ་བསོད་ནམས་རྒྱལ་མཚན། རིན་པོ་
༄། །ཆེ་བ་ཚད་མའི་སྐྱེས་བུ། དེས་བུ་སྟོན་ལའོ།།