སྒྲོལ་མའི་གཟུངས།
༄། །།།ཨོཾ་ཏཱ་རེ་ཏུཏྟཱ་རེ་ཙ་ལ་པྲ་ཙ་ལ་ཤཱི་གྷྲཾ་གཱ་མི་ནི་དེ་བ་ཏཏྟ་ཨུཙྪ་ཏྲ་ཡ་ཧཱུཾ། འདི་བྱ་རོག་གི་སྒྲོས་ལན་སུམ་ཅུ་རྩ་གཅིག་བཟླས་ནས་བསྒྲུབ་བྱའི་སྒོ་ལ་སྦས་པས་ཞག་བདུན་གྱིས་སྐྲོད་པར་འགྱུར་རོ། །སྒྲོལ་མའི་གཟུངས་ཀྱིས་སྲི་ན་ལག་ལ་ལན་བདུན་བཟླས་ལ། བདག་གི་མིག་གཉིས་ཕྱིས་ཏེ། དེ་ནས་རྒྱལ་པོའི་དྲུང་དུ་ཕྱིན་ན་རྒྱལ་པོ་དེ་སློབ་མ་ལྟ་བུར་འགྱུར་བས་དད་པ་བྱེད་པ་དང༌། ངག་ཏུ་མི་སྨྲ། སྦྱིན་པ་སྟེར། ཁོལ་ལྟར་འགྱུར་རོ། །ཁྲོས་ཀྱང་དབང་དུ་འགྱུར་རོ། །འདི་ནི་ཡིད་ཆེས་པས་ངོ་མཚར་རོ། །བདག་ཉིད་སྒྲོལ་མར་བསྒོམས་ཏེ། ཚ་བའི་མར་ཁུས་ལུས་བྱུག་པ་བྱ། སྔགས་ཁྲི་བཟླས། བཟླས་པའི་རྗེས་སུ་འབྲས་མཁར་མ་ཅན་གྱི་མ་དག་པ་དྲི་མ་བཏོན། དེ་ལ་སྣུམ་ཁུར་བྱས་ལ་བསྒྲུབ་བྱ་ལ་བྱིན་ན་ངེས་པར་ཐེ་ཚོམ་མེད་པའོ། །གོས་ཀྱི་ཐུ་བ་ནས་བཟུང་སྟེ་གང་དུ་འགྲོ་བའི་ཕྱོགས་ཀྱི་གནོད་བྱེད་བཀུག་ལ་ཐུ་བར་གཏུམས་ཏེ་མདུད་པ་བྱས་ལ་སྔགས་འདི་ལན་བདུན་བསྔགས་ལ། འཇིགས་པའི་ས་གང་དུ་འགྲོ་ཡང་འཇིགས་པ་མི་འབྱུང་ངོ༌། །སྟག་དང༌། ཆོམ་རྐུན་དང༌། སྤྲུལ་དང༌། གླང་པོ་ཆེ་དང༌། མ་ཧེ་དང༌། དྲེད་ལ་སོགས་པས་ཀྱང་གནོད་པར་མི་འགྱུར་རོ། །དབང་གི་ཐབ་ཏུ་ཨུཏྤལ་དམར་པོའི་སྦྱིན་སྲེག་བརྒྱ་རྩ་བརྒྱད་བྱས་ན་གང་འདོད་པ་དེ་དབང་དུ་འགྱུར་རོ། །སྤྲ་ཚིལ་དང་སྐེ་ཚེའི་འབྲས་བུ་དང༌། པོ་སོ་ཆ་དང༌། ཨ་ཤོ་ཀའི་ལོ་མ་རྣམས་མར་དང་སྦྲང་རྩིའི་ལྡི་གུ་དང་བཅས་པས་སྟོང་ཕྲག་ལྔའི་སྦྱིན་སྲེག་གིས་ཉི་མ་བདུན་གྱིས་རང་འདོད་པའི་བུ་མོ་ཐོབ་བོ། །ཨོཾ་ཏཱ་རེ་ཏུཏཱ་རེ་ཏུ་རེ་ཨ་མུ་ཀ་བྷིདྷ་ན་ཀུ་མཱ་རི་མ་ཧཱ་མུརྦྷ་ཧེ་ན་ཏ་པྱ་པི་ཏཱ་པྲ་ཡཙྪ་དུ་མེ་སྭཱ་ཧཱ། རྒྱ་ཤུག་གི་ཚེར་མ་སྟོང་ཕྲག་ལྔ་རང་བྱུང་གི་མེ་ཏོག་དང་བཅས་པས་སྲེག་བླུགས་བྱས་ན། སྐྱེས་པས་སྦྱོང་བའི་བུ་མོ་ཡང་འགུགས་སོ། །སྔགས་ནི། ཨོཾ་ཏཱ་རེ་ཏུཏྟཱ་རེ་ཏུ་རེ་ཨ་མུ་ཀ་བྷཏྟཱ་ནཾ་སྭཱ་ཐ་ན་ཏ་པས་ཀ་རཱ་ཡ་མ་མ་ན་ཀེ་ཛ། ཟླ་མཚན་འཛག་པའི་རས་ལ་བཅོམ་ལྡན་འདས་མ་ཕྱག་གཉིས་ཞལ་གཅིག་མ་ལྕགས་ཀྱུ་དང་ཨུཏྤལ་ཞགས་པ་དང་བཅས་པ་རྣམས་བྲི། དེའི་མདུན་
༄། །དུ་མཆོད་པ་བྱས་ནས། ཕྱི་ནས་བསྒོམས་ལྡན་སྔགས་བཟླ་བར་བྱའོ། །ཨོཾ་ཏཱ་རེ་ཏུཏྟཱ་རེ་ཏུ་རེ་ཨ་མུ་ཀི་མ་མ་ཨི་པིས་ཏཾ་སྭཱ་བྣཾ་ཀ་ཐཱ་ཡ་ཧཱུཾ་ཕཊ། སྟོང་ཕྲག་ལྡས་འོང་བར་འགྱུར་རོ། །ཞགས་པས་ཨ་མུ་ཀའི་མགྲིན་པ་བཅིངས། ལྕགས་ཀྱུས་དྲངས་ནས་བསྒྲུབ་བྱ་རྐང་པའི་འོག་ཏུ་བསམས་ཏེ། ཁོལ་མོའི་ཚུལ་གྱིས་བཟའ་བར་བྱའོ། །ན་མོ་གུ་རུ་བྷྱཿམེ་སྦར་བསངས་ནས་ཐབ་བསྐྱེད། བྱིན་བརླབས་སྤྱན་དྲངས་པད་གདན་དབུལ། །ཆུ་བཞི་ཕུལ་ལ་ཕྱག་རྒྱ་བསྟན། །དགུག་གཞུག་དབང་བསྐུར་རྒྱས་གང་བ་བྱ། །ཀུ་ཤ་བྱོན་ཟན་མེ་ལྟས་བརྟག །སྲེག་རྫས་ཕུལ་ནས་མཆོད་བསྟོད་བྱ། །ནང་མཆོད་ཧཱུཾ་ཏྲ་ཛྭ་ཡིས་བསང༌། །འདས་པའི་དམ་ཚིག་བསྐྱེད་ཅིང་གཞུག །དབང་བསྐུར་མཆོད་བསྟོད་བྱོན་ཟན་དབུལ། །སྲེག་རྫས་མཆོད་བསྟོད་གསོལ་བ་གདབ། །བཟོད་གསོལ་གཤེགས་ཤིང་དམ་ཚིག་བསྡུ། །མེ་ལྷ་གསོལ་གདབ་སྲེག་རྫས་ཀྱི། །ལྷག་མ་ཕུལ་ལ་དགང་བླུགས་གསུམ། །ཡོན་བདག་ལག་པ་ནས་བཟུང་དབུལ། །གཏོར་མ་མཆོད་པ་བསྟོད་པ་དབུལ། །གསོལ་བ་གདབ་ཅིང་མེ་ལྷ་གཤེགས། །དམ་ཚིག་བསྡུ་ཞིང་ལྷག་ཆད་བསྐང༌།།