རྨི་ལམ་སྒྲོལ་མའི་སྒྲུབ་ཐབས།
ཟླ་བའི་བཤེས་གཉེན།
༄། །རྒྱ་གར་སྐད་དུ། སྭཱཔྣ་ཏཱ་ར་ནོ་པིཀ །བོད་སྐད་དུ། རྨི་ལམ་སྒྲོལ་མའི་སྒྲུབ་ཐབས། འཕགས་མ་རྨི་ལམ་སྒྲོལ་མ་ལ་ཕྱག་འཚལ་ལོ། །པྲིན་བྲལ་མཁའ་དཀྱིལ་ཟླ་རྒྱས་གཟུགས། །རབ་དཀར་བསིལ་བའི་འོད་ལྡན་མ། །མ་ལུས་རྨི་ལམ་གསལ་མཛད་དེའི། །ཞབས་ལ་མགོས་བ་ཏུད་དེ་བསྒྲུབ་བཤད། །དགེ་བས་རབ་ཏུ་སྔར་ལངས་ཏེ། །གདོང་སོགས་དག་བྱས་དྲི་ཞིམ་བྱུགས། །རྗེ་བཙུན་དེ་རྟེན་མདུན་བདར་ལ། །ཡིད་འོང་མཆོད་བས་མཛེས་པར་བྱས། །སྐྱབས་གསུམ་ལྷ་མོར་བཅས་པ་ལ། །སྐྱབས་གསུམ་འགྲོལ་ཕན་ཡིད་ཀྱིས། །མི་དགེ་མེད་པའི་སེམས་ལྡན་པས། །ཐོག་མར་བསོད་ནམས་ཚོགས་བསགས་བྱ། །ཨོཾ་ཨམྲྀ་ཏ་ཀུཎྜ་ལི་ཧན་ཧ་ན་སརྦ་བིགྷྣཾ་ཏ་ཌ་ཧ་ཏི་ཌ་ཧ་སརྦ་བཱ་པཾ་ཧཱུཾ་ཕཊ་སྭཱ་ཧཱ། འཁྱིལ་པ་ཁྲོས་པའི་སྔགས་འདི་ཡིས། །རྨི་ལམ་བར་ཆད་བགེགས་བསལ་ལ། །དྲི་མེད་བཻ་ཌཱུཪྻ་འདྲ་ཡིས། །མཁའ་ལ་འཕགས་མ་བསྒོམ་པར་བྱ། །རབ་མཛེས་པཾ་ལས་ཆུ་སྐྱེས་སྣུམ་འཇམ་གསལ་ཞིང་གསར་བའི་འདབ་ཚོགས་རྒྱས། །དེ་སྟེང་དཀར་བསིལ་རི་བོང་འཛིན་འཁྱིལ་དེ་དབུས་ཁམས་གསུམ་རྒྱས་འགེངས་ཏཱཾ། །ཀུན་ནས་མུན་སེལ་སྐར་མའི་རྒྱལ་པོ་འོད་བཟང་མདོག་ཅན་རབ་འཕྲོས་ལས། །ཡོངས་གྱུར་འཕགས་མ་རྨི་ལམ་སྒྲོལ་མ་ཞི་མདོག་མ་མཛེས་མ་བལྟ། །རབ་དཀར་ལང་ཚོ་རྒྱས་པའི་གཟུགས། །ཞལ་གཅིག་ཕྱག་གཉིས་མཆོག་སྦྱིན་མཛད། །
༄། །ཨུཏྤལ་སྔོ་འཛིན་འགྱིང་ཚུལ་སྒེག །མཚུངས་མེད་གཅིག་པོས་ཀུན་ཁྱབ་མའོ། །དྲི་ཞིམ་དབུ་སྐྲ་བཟང་འཁྱིལ་ལི། །ལྷ་རྫས་རིན་ཆེན་དུ་མས་བརྒྱན། །མཐིང་གའི་དར་གྱིས་སྟོད་གཡོགས་ཤིང༌། །སྣ་ཚོགས་ཁ་དོག་ཤམ་ཐབས་མནབས། །མུ་ཏིག་ཕྲེང་བའི་དྲ་བ་ཡིས་མཉམ་པར་མཛེས་པའི་སྐ་རགས་དང༌། །ག་ཤ་སེ་རལ་ཁར་བཅིངས་ཤིང༌། །ཅོད་པན་དོན་ཡོད་གྲུབ་པས་བརྒྱན། །གཡས་བསྐུམ་གཡོན་བརྐྱང་སྐྱིལ་ཀྲུང་གིས། །སྲིད་དང་ཞི་ལ་མི་གནས་ཤིང༌། །སངས་རྒྱས་བྱང་ཆུབ་སེམས་དཔའི་ཚོགས། །སྤུ་སྒོ་ཀུན་ནས་རབ་འཕྲོ་བའོ། །ཅི་འདྲའི་ཡེ་ཤེས་ལྷ་མོ་འདི། །བཀུག་ལ་མཆོད་པས་མཉེས་བྱས་བསྟིམ། །སྐུ་གསུང་ཐུགས་ཀྱི་རྡོ་རྗེ་ཡིས། །བྱིན་རླབས་ཕྱོགས་བཅུའི་རྒྱལ་བས་བསྔགས། །དེ་རྣམས་མཎྜལ་མཆོད་བཅས་པས། །གུས་པར་ཕུལ་ལ་གསོལ་བ་གདབ། །ཞལ་ཟས་བཏུང་བ་བཟང་ལྡན་པ། །དཀར་གསུམ་མངར་གསུམ་མེ་ཏོག་དབུལ། །རིན་ཆེན་ཕྲེང་བ་དཀར་ཐོགས་ཏེ། །མ་ཡེངས་བློ་ཡིས་འཕགས་མ་ལ། །རྩེ་གཅིག་ཡིད་གཏད་གསང་སྔགས་མཆོག །འབུམ་ཕྲག་ཉི་ཤུ་རྩ་བཞིར་བཟླས། །ཨོཾ་སྭཱབྣ་ཏཱ་རེ་སྭཱཧཱ། དེ་ནས་ཟང་ཟིང་མེད་པར་ནི། །རང་གཞན་དོན་དུ་རྨི་ལྟས་བརྟག །གྲོང་བའི་ཆོས་ཀྱིས་མ་སྦགས་པའི། །བུ་མོ་དུས་བཟང་དག་ལ་མཆོད། །དྲི་ཞིམ་ཁྲུས་བྱས་གོས་རྒྱན་མཛེས། །རོལ་མོའི་གྲངས་སམ་བརྒྱད་དམ་བདུན། །ཨརྒྷ་ལ་སོགས་མཆོད་སྔོན་འགྲོས། །ཟས་དཀར་ཞོ་དང་འོ་མ་སྦྱིན། །འགྲོན་བུ་དར་སོགས་ཡོན་བྱིན་ལ། །དུང་ཆོས་ཆུས་གཏོར་ཅི་བདེར་དེངས། །དེ་རྗེས་བྱི་དོར་དྲིལ་ལྡན་པའི། །ཁང་པར་ཚངས་སྤྱོད་བརྟུལ་ཞུགས་གནས། །སྔགས་སུ་མེ་ཏོག་དྲི་ཞིམ་གྱིས། །བྱུགས་པའི་མཎྜལ་བཟང་བྱས་ལ། །མཆོད་པ་ལྔ་དང་ཁྱད་པར་དུ། །གུ་གུལ་མར་མེ་དབུལ་བར་བྱ། །འཇིམ་རིལ་སྲན་མའི་ཚད་བཅོས་ཏེ། །ཀུཎྜ་ལི་ཡི་སྔགས་བདུན་གྱིས། །བཏབ་ལ་ཉི་ཤུ་རྩ་གཅིག་ནི། །ཕྱོགས་བཅུར་གཏོར་བས་བར་ཆད་ཟློག །གསུམ་བདུན་གཅིག་ནི་རིན་པོ་ཆེར། །བསྒོམས་པས་མཎྜལ་སྟེང་དུ་དབུལ། །སྟན་ལ་དགྲམ་དང་གཟུང་བར་བྱ། །
༄། །དེ་རྗེས་གང་འདོད་གསོལ་བཏབ་ཉལ། །ཨོཾ་སྭཱཔྣ་ཏཱ་ར་སྭཱཔྣ་ཨ་བ་ལོ་ཀི་ནི། ཏྲཻ་ལོ་ཀྱ་ནི་རྡཪྴ་ནི། ཏྲཻ་ལོ་ཀྱ་བཛྲི་ར་ནི། བྷུ་ཏཾ་བྷ་བཾ་བྷ་བ་སི་ཤམ། ཤུ་བྷ་ཤུ་ཏཾ་མི་སད་ཏྱེ་ཀ་ཐ་ཡ་སྭཱ་ཧཱ། བརྒྱ་རྩ་བརྒྱད་དམ་ཉི་ཤུ་གཅིག །ཡང་ན་ལན་བདུན་བཟླས་པར་བྱ། །གསོལ་བཏབ་སྔགས་འདིས་ཡིད་ཆེས་པས། །ལན་ཅིག་བཟླས་ཀྱང་མི་འགྲུབ་མེད། །དེ་ཚེ་འཕགས་མ་བདུན་གྱི་མཐའ་ལས་ཕྱོགས་བཅུར་འོད་མཛད་ཐུགས་ཀ་ལས་བྱུང་བསིལ་ཟེར་གྱིས། །བདག་སྙིང་གདུང་བསལ་ཐབ་ཐིབ་དྲ་བ་མ་ལུས་སྤངས་ཏེ་སྤྲིན་མེད་མཁའ་ལྟར་དག་བྱས་ནས། །གླང་ཆེན་སྣ་འདྲའི་ཕྱག་མཛེས་རིང་བརྐྱང་བདུད་རྩི་ཅན་ལས་བདུད་རྩིའི་རྒྱུན་ཕབ་སྙིང་སོགས་བཀང༌། །དེ་མཐུས་ལུས་ཀུན་ཀུན་ནས་དྲི་མེད་ཤེལ་བུམ་མཆོག་ལྟར་གཙང་ཞིང་རབ་དག་ཡིད་འོང་འགྱུར། །དེ་འོག་རྩ་བའི་རིག་པ་བརྒྱད། །ལྷ་མོ་མཆོག་ལ་རྩ་གཅིག་ཏུ། །མ་ཡེངས་སེམས་ཀྱི་དལ་བུས་ནི། །ཇི་སྲིད་གཉིས་ལོག་པར་དུ་བཟླས། །སེང་གེའི་ཉལ་སྟབས་དགེ་བས་ཉལ། །བག་ཡོད་དྲན་དང་མ་བྲལ་བ། །དངོས་སམ་བརྡའམ་ཚིག་དག་གིས། །དགེ་དང་མི་དགེ་མཐོང་བར་འགྱུར། །ཐུབ་པས་སྣ་ཚོགས་ལས་གྲུབ་ཀྱིས།། རྒྱུད་དུ་གང་གསུངས་ལྷ་མོ་ཆེའི། །བརྟག་པ་དོན་ཀུན་སྒྲུབ་བྱེད་འདི། །རྨི་ལམ་སྤྲོ་ལམ་ཡང་དག་བཤད། །རྨི་ལམ་སྒྲོལ་མའི་སྒྲུབ་ཐབས་སློབ་དཔོན་ཟླ་བའི་བཤེས་གཉེན་གྱིས་མཛད་པ་རྫོགས་སོ།། །།རྒྱ་གར་གྱི་པཎྜི་ཏ་སུ་ག་ཏ་ཤྲཱི་དང༌། ལོ་ཙཱ་བ་བྱམས་པའི་དཔལ་གྱིས་བསྒྱུར་བའོ།།