གཏུམ་ཆེན་དྲག་པོའི་མངོན་པར་རྟོགས་པ།
བདེ་བ་ཆེན་པོའི་རྡོ་རྗེ།
༄། །རྒྱ་གར་སྐད་དུ། ཙཎྜ་མ་ཧཱ་རོ་ཥ་ཎཱ་བྷི་ས་མ་ཡ། བོད་སྐད་དུ། གཏུམ་ཆེན་དྲག་པོའི་མངོན་པར་རྟོགས་པ། བླ་མ་དང་དཔལ་གཏུམ་པོ་ཆེན་པོ་ལ་ཕྱག་འཚལ་ལོ། །དཔལ་གཏུམ་ཆེན་དྲག་པོ་བསྒྲུབ་པར་འདོད་པའི་རྣལ་འབྱོར་པས། དང་པོར་རེ་ཞིག་ཡིད་དང་རྗེས་སུ་མཐུན་པའི་དབེན་པའི་གནས་འགའ་ཞིག་ཏུ་ཐོག་མར་བདེ་བའི་སྟན་ལ་ཉེ་བར་འདུག་ནས་རལ་གྲིའི་ཕྱག་རྒྱ་བཅིངས་ཏེ། སྙིང་ག་དང་མཛོད་སྤུ་དང་མགྲིན་པ་དང་སྤྱི་བོ་རྣམས་སུ་ལན་གསུམ་བཞག་ལ། ན་མཿ་སརྦཱ་ཤཱ་པ་རི་པཱུ་ར་གེ་བྷྱཿ་སརྦ་ཐཱ་ག་ཏེ་བྷྱཿ་སརྦ་ཐཱ་ཧ་ར་ཧ་ར། མཱ་ར་ཡ་མཱ་ར་ཡ། སརྦ་བིགྷྣཱཾ་ཛྙཱ་ན་ཁཊྒ་ཧཱུཾ་ཕཊ་ཅེས་བརྗོད་དོ། །
༄། །དེ་ལ་རལ་གྲིའི་ཕྱག་རྒྱ་ནི་འདི་ཡིན་ཏེ། མཛུབ་མོ་དང་གུང་མོ་དྲང་པོར་བྱས་ལ་མིང་མེད་དང་མཐེའུ་ཆུང་མཐེ་བོང་གིས་མནན་པའོ། །དེས་ཕྱོགས་བཅུར་འཁྱམ་པའི་བགེགས་རྣམས་དྲུངས་ཕྱུང་བར་བལྟའོ། །དེ་ནས་སྤྱི་བོར་བཟུང་ནས་མུཿ་ཡིག་གིས་གཤེགས་སུ་གསོལ་ནས། ཨོཾ་ཨཱཿཧཱུཾ་ཞེས་བྱ་བ་དག་སྤྱི་བོ་དང་མགྲིན་པ་དང་སྙིང་གར་བསམས་ལ་ལག་པ་གཡོན་གྱིས་རེག་ནས་ལན་གསུམ་བརྗོད་དོ། །དེ་བཞིན་དུ་སྤྱི་བོར་ཨོཾ་མ་ཎི་དྷ་རི་བཛྲི་ཎི་མ་ཧཱ་པྲ་ཏི་ས་ར་རཀྵ་རཀྵ་མཱཾ་ཧཱུཾ་ཧཱུཾ་ཕཊ་ཕཊ་སྭཱ་ཧཱ་ཞེས་བརྗོད་དོ། །ཨོཾ་ཨཱཿབཛྲ་ས་ནེ་ཧཱུཾ་ཞེས་པས་སྟན་བྱིན་གྱིས་བརླབས་ཏེ། དེ་དག་གིས་བསྲུང་བ་བྱས་ནས། རང་གི་སྙིང་གར་ཟླ་བའི་དཀྱིལ་འཁོར་གྱི་སྟེང་དུ་ཉི་མ་རྣམ་པར་བསྒོམས་ནས། དེའི་སྟེང་དུ་འོད་ཟེར་དང་བཅས་པའི་ཧཱུཾ་ཡིག་བསྒོམ་པར་བྱའོ། །དེ་ནས་འོད་ཟེར་དེས་ལུས་རྣམ་པར་སྦྱངས་ནས། འོག་མིན་གྱི་མཐར་ཐུག་པའི་ས་གསུམ་པོ་ཁྱབ་པར་བྱས་ལ། དེ་དག་ན་བཞུགས་པའི་དཔལ་གཏུམ་ཆེན་དྲག་པོ་སྤྱན་དྲངས་ནས་མདུན་གྱི་ནམ་མཁར་བལྟས་ཏེ། འོད་ཟེར་མེ་ཏོག་ལ་སོགས་པའི་གཟུགས་སུ་བསྒོམས་ནས་མཆོད་ཡོན་དང་ཞབས་བསིལ་སྔོན་དུ་འགྲོ་བའི་མཆོད་པ་བྱའོ། །བླ་ན་མེད་པའི་མཆོད་པ་ནི་རྣམ་པ་བདུན་ཡིན་ཏེ། འདི་ལྟར་བདག་གིས་སྡིག་པ་ཐམས་ཅད་བཤགས་པར་བགྱིའོ། །སྐྱེ་བོ་གཞན་དག་གིས་དགེ་བ་ལ་མཆོག་ཏུ་དགའ་བས་རྗེས་སུ་ཡི་རང་ངོ༌། །བཅོམ་ལྡན་འདས་ཞུགས་པའི་དོན་གྱི་ཕྱིར་དང༌། དམ་པའི་ཆོས་དཀོན་མཆོག་གནས་པར་བྱ་བའི་སླད་དུ། དཀོན་མཆོག་གསུམ་ལ་སྐྱབས་སུ་མཆིའོ། །བྱང་ཆུབ་ཀྱི་རྒྱ་མཚོ་ཡིད་ལ་བྱས་ནས། དེའི་ལམ་ལ་གནས་ཤིང༌། དགེ་བའི་ཆོ་གས་བྱང་ཆུབ་ཀྱི་ཆེད་དུ་འཇུག་པར་བགྱིའོ་ཞེས་བྱ་བ་འདིས་སོ། །དེ་ལས་བཅོམ་ལྡན་འདས་ཐུགས་དགྱེས་པས་ལེགས་སོ་ཞེས་བྱ་བ་གནང་ནས་སྒྲུབ་པོ་དབུགས་འབྱིན་པར་མཛད་དོ། །དེ་ནས་བཅོམ་ལྡན་འདས་ལ་ཕྱག་བྱས་ནས་བཟོད་པར་གསོལ་ཏེ་རང་གི་གནས་སུ་གཤེགས་པར་བལྟའོ། །དེ་ནས་ཨོཾ་སྭཱ་བྷཱ་ཝ་ཤུདྡྷཿ་སརྦ་དྷརྨཱཿ་སྭཱ་བྷཱ་ཝ་ཤུདྡྷོཉཧཾ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭཱ་བྷཱ་ཝ་ཨཱཏྨ་ཀོཉཧཾ། ཞེས་བྱ་བ་འདི་དག་གིས་དོན་
༄། །མངོན་དུ་བྱས་ལ་སྟོང་པ་ཉིད་བསྒོམ་པར་བྱའོ། །དང་པོར་བྱམས་པ་དང་སྙིང་རྗེ་དང་དགའ་བ་དང་བཏང་སྙོམས་བསྒོམ་པར་བྱ་ཞིང༌། འགྲོ་ལ་ཕན་ཕྱིར་སངས་རྒྱས་འགྱུར་བར་ཤོག །ཅེས་བྱ་བའི་སྨོན་ལམ་ཡང་བཏབ་ནས་སོ། །དེ་ནས་སྟོང་པ་ཉིད་སྒོམ་པའི་རིམ་པ་ནི་འདི་ཡིན་ཏེ། བརྟན་པ་དང་གཡོ་བ་རྣམས་ས་བོན་ལ་གཞུག་ལ། བདག་ཉིད་ཀྱང་ཟླ་བ་དང་ཉི་མ་ལ། ཟླ་བ་དང་ཉི་མ་དག་ཀྱང་ཧཱུཾ་ལ། ཨཱུ་ཡང་ཧ་ལ། ཧ་ཡང་མགོ་བོ་ལ། མགོ་བོ་ཡང་ཟླ་ཚེས་ལ། ཟླ་ཚེས་ཀྱང་ཐིག་ལེ་ལ། ཐིག་ལེ་ཡང་ནཱ་ད་ལ། ནཱ་ད་ནི་ནམ་མཁའ་ལ་ཐིམ་སྟེ། དེ་ནས་ཅུང་ཟད་ཀྱང་རྟོག་པར་མི་བྱའོ། །དེ་ལ་འདིས་སྐད་ཅིག་དང་པོར་གནས་ནས། སྨོན་ལམ་དྲན་པ་སྔོན་དུ་འགྲོ་བས་རྩ་དམར་བའི་ཆོས་ཀྱི་འབྱུང་གནས། དེའི་དབུས་སུ་ཨ་ཡིག་དང་རེ་ཕ་ལས་སྐྱེས་པའི་ཟླ་བ་དང་ཉི་མའི་དཀྱིལ་འཁོར་གྱི་སྟེང་དུ་ཧཱུཾ་སྔོན་པོ་རྩ་དམར་བའི་འོད་ཟེར་ཅན་བསམས་ནས། ཟླ་བ་ལ་སོགས་པ་འདྲེས་ཤིང་དངུལ་ཆུའི་རྣམ་པ་དེ་ཡོངས་སུ་གྱུར་བའི་དཔལ་གཏུམ་ཆེན་དྲག་པོ་སྔོན་པོ་རྩ་དམར་བའི་འོད་ཟེར་ཅན། ཡོན་པོར་ལྟ་བ། མཆེ་བས་མ་མཆུ་འཚིར་ཞིང༌། གཡོན་པ་དང་གཡས་པའི་ཕྱག་དག་གིས་ཞགས་པ་དང་བཅས་པའི་སྡིགས་མཛུབ་དང༌། རལ་གྲི་འཛིན་པ། །སྟག་གི་པགས་པའི་ཤམ་ཐབས་ཅན། རུས་སྦལ་གྱི་སྟབས་ཀྱིས་བཞུགས་པ། ཞལ་གཅིག་པ་ཕྱག་གཉིས་པ། ཟུར་ཕུད་ལྔ་པ། གཞོན་ནུ་སྣ་ཚོགས་པའི་རྒྱན་གྱིས་བརྒྱན་པ། ཤིན་ཏུ་མཁྲང་པའི་སྐུ་སྙིང་རྗེ་ཆེན་པོ་དང་ལྡན་པའི་སྤྱན་གཉིས་རྩ་དམར་བ། རིན་པོ་ཆེའི་ཅོད་པན་ཅན་བསྒོམ་པར་བྱའོ། །ཤར་ལ་སོགས་པའི་རིམ་པས། སྤྱན་མ་དཀར་མོ་པདྨ་དཀར་པོ་འཛིན་པ། མཱ་མ་ཀཱི་སྔོན་མོ་རྡོ་རྗེ་འཛིན་པ། དཀར་མོ་དམར་མོ་པདྨ་དམར་པོ་འཛིན་པ། སྒྲོལ་མ་ལྗང་གུ་ཨུཏྤལ་སྔོན་པོ་འཛིན་པ་རྣམས་སོ། །འདི་དག་ནི་རྡོ་རྗེ་སྐྱིལ་ཀྲུང་གིས་བཞུགས་པ། སྣ་ཚོགས་པའི་གོས་དང་རྒྱན་གྱིས་བརྒྱན་པ། ལོ་བཅུ་དྲུག་ལོན་པའི་ཉམས་ཅན། གཡས་པ་དག་མཆོག་སྦྱིན་པར་མཛད་པ་སྟེ། ཆོས་འབྱུང་བའི་དབུས་སུ་བཅོམ་ལྡན་འདས་ལྟ་བུར་ཟླ་བ་དང་ཉི་མའི་གདན་ལ་བཞུགས་པར་བསམ་མོ། །དེ་ནས་རང་གི་ལུས་ལས་འོད་ཟེར་དམར་པོ་
༄། །རྣམས་ཀྱིས་སངས་རྒྱས་དང་བྱང་ཆུབ་སེམས་དཔའ་དང་རྣལ་འབྱོར་མའི་འཁོར་ལོ་སྤྱན་དྲངས་ལ། དབང་བསྐུར་བར་གསོལ་བ་གདབ་པར་བྱ་སྟེ། ཨ་བྷི་ཥིཉྩནྟུ་མཱཾ་སརྦ་ཏ་ཐཱ་ག་ཏ་ཞེས་པས་སོ། །དེ་རྣམས་ཀྱིས་བདུད་རྩི་ལྔས་གང་བའི་བུམ་པ་རྣམས་ཀྱིས་དབང་བསྐུར་བར་བྱ་སྟེ། ཨོཾ་སརྦ་ཏ་ཐཱ་ག་ཏཱ་བྷི་ཥེ་ཀ་ས་མ་ཡ་ཤྲི་ཡེ་ཧཱུཾ་ཞེས་བྱ་བ་འདིས་སོ། །དེ་ནས་དབང་བསྐུར་བའི་ཆུས་ཁྲུ་བ་ན་ཤེས་རབ་ཀྱི་ཕ་རོལ་ཏུ་ཕྱིན་མ་ཡང་དག་པར་འཕགས་ཏེ་བཅོམ་ལྡན་འདས་ལ་འཁྱུད་ནས་དམ་དུ་འཚིར་ཞིང༌། སྐུ་མདོག་དང་གཟུགས་ཤིན་ཏུ་དམར་བ་དང་ལྡན་པ། ལོ་བཅུ་དྲུག་གི་ཕྱེད་ཀྱི་ན་ཚོད་གཅེར་བུ་སྣ་ཚོགས་པའི་རྒྱན་གྱིས་བརྒྱན་པ། གཡོན་པས་པདྨ་དཀར་པོ་འཛིན་པའོ། །དེ་ནས་དེ་དང་དེ་རྩེ་བར་བྱ་སྟེ། དེ་ལས་ནམ་མཁའ་ལ་རྡ་པོ་ཆེའི་སྒྲ་གྲག་གོ །གུར་ཀུམ་ལ་སོགས་པའི་ཆར་འབབ་པོ། །དེ་ནས་དེ་ནི་བཅོམ་ལྡན་འདས་དཔལ་གཏུམ་བྱེད་དྲག་པོ་རྣལ་འབྱོར་མ་ལྔའི་འདྲེན་པའོ་ཞེས་བྱ་བ་འདིས་ཇི་སྲིད་སྐྱོ་བར་མ་གྱུར་པ་ཇི་སྲིང་དུ་ང་རྒྱལ་བར་བྱའོ། །སྐྱོ་ན་དེའི་ང་རྒྱལ་གྱིས་སྔགས་བགྲང་བར་བྱ་སྟེ། སྔགས་ནི་ཨོཾ་ཙཎྜ་མ་ཧཱ་རོ་ཥ་ཎ་ཧཱུཾ་ཕཊ། ཇི་ཙམ་འདོད་པའི་ངེས་པ་མཐར་སོན་པ་ན། ཨོཾ་བཛྲ་སཏྭ་ས་མ་ཡ་མ་ནུ་པཱ་ལ་ཡ། བཛྲ་སཏྭ་ཏྭེ་ནོ་པ་ཏིཥྛ་དྲྀ་ཌྷོ་མེ་བྷ་བ། སུཏོ་ཥྱོ་མེ་བྷ་བ། སུ་པོཥྱོ་མེ་བྷ་བ། ཨ་ནུ་རཀྟོ་མེ་བྷ་བ། སརྦ་སིདྡྷིམྨེ་པྲ་ཡཙྪ། སརྦ་ཀརྨ་སུ་ཙ་མེ་ཙིཏྟཾ་ཤྲེ་ཡཿ་ཀུ་རུ་ཧཱུཾ་ཧ་ཧ་ཧ་ཧ་ཧོཿ་བྷ་ག་ཝཱན་སརྦ་ཏ་ཐཱ་ག་ཏ་བཛྲ་མཱ་མེ་མུཉྩ། བཛྲཱི་བྷ་བ། མ་ཧཱ་ས་མ་ཡ་སཏྭ་ཨཱཿ་ཞེས་བརྗོད་ནས། ལྷའི་ང་རྒྱལ་གྱིས་ཇི་ཙམ་འདོད་པར་གནས་པར་བྱའོ། །འདིས་ཐུན་གསུམ་མ་མཐུན་བཞིར་བསྒོམ་པར་བྱ་སྟེ། བསྒོམ་པ་དང་བཟླས་པའི་ཆོ་གའོ། །རྣམ་པར་དག་པ་ཕྱི་རོལ་དུ་སྲུང་བ་ནི་བགེགས་ཉམས་པའི་ཆེད་དུའོ། །མཆོད་པ་ནི་བསོད་ནམས་ཀྱི་ཚོགས་སོ། །སྟོང་པ་ཉིད་ནི་ཡེ་ཤེས་ཀྱི་ཚོགས་སོ། །ལྷའི་གཟུགས་ནི་སངས་རྒྱས་ཉིད་དོ། །ལྷ་མོ་བཞི་ནི་ཚངས་པའི་གནས་བཞིའོ། །ཤེས་རབ་མ་ནི་རང་བཞིན་ཡིན་ནོ། །ནང་དུ་འོད་གསལ་བ་ནི་འཆི་བའོ། །ཆོས་འབྱུང་ནི་བྷ་ག་དང་ཟླ་བ་དང་ཉི་མ་ནི་ཁུ་བ་དང༌། ཁྲག་དང་སྔགས་ནི་བར་སྲིད་ཀྱི་སེམས་དང་དངུལ་ཆུའི་རྣམ་པ་ནི་ནུར་ནུར་པོ་
༄། །དང་མེར་མེར་པོ་དང་མཁྲང་འགྱུར་དང་ནར་ནར་པོ་རྣམས་ཀྱི་རང་བཞིན་དུ་ཡོངས་སུ་གྱུར་བའོ། །རྒྱན་དང་བཅས་པར་འགྱུར་བ་ནི་རྐང་ལག་འགྱུས་པའོ། །ལྷ་མོ་བཞི་ནི་ས་དང་ཆུ་དང་མེ་དང་རླུང་ངོ༌། །ཐམས་ཅད་ཀྱི་བསམ་དུ་མེད་པའི་གཟུགས་ནི་ཤེས་རབ་ཀྱི་ཕ་རོལ་ཏུ་ཕྱིན་མའོ། །དེ་ལ་འདི་དག་ནི་ཐམས་ཅད་ཀྱི་སངས་རྒྱས་ཉིད་དུ་གྱུར་པ་ཁོ་ནའོ་ཞེས་བྱ་བ་ཡིན་ཏེ། འོན་ཀྱང་མ་རིག་པ་དང་ཉོན་མོངས་པས་དབང་བྱས་པ་ཡིན་ནོ། །སེམས་ཅན་སྒྲོལ་བའི་ཕྱིར་ཟུང་དུ་འཇུག་པ་ཉིད་ནི་སྡིགས་མཛུབ་ཡིན་ལ། རལ་གྲིས་ནི་མ་རིག་པ་འཇོམས་ལ་ཞགས་པས་ནི་ཉོན་མོངས་པ་འཇོམས་པ་ཡིན་ནོ། །ཟླ་བ་དང་ཉི་མ་ནི་དངོས་པོ་དང་དངོས་པོ་མེད་པ་ལས་འདས་ནས་ཆོས་འབྱུང་གི་ཞིང་དུ་བྱམས་པ་ཆེན་པོའི་ཁྲོ་བོར་བཞུགས་སོ། །རྣམ་པར་དག་པའོ། །དེ་ནས་སྔོན་དུ་བསྙེན་པའི་དོན་དུ་འབུམ་བཟླ་བར་བྱ་སྟེ། ནག་པོའི་ཚེས་གཅིག་ནས་བརྩམས་ཏེ། ཟླ་བ་ཉའི་བར་དུ་བསྒོམ་ཞིང་སུམ་འགྱུར་དུ་བཟླ་བར་བྱ་སྟེ། ཉི་མ་སོ་སོར་སྟོང་ཕྲག་བཅུ་རྣམས་སོ། །ཉའི་ཉིན་མོ་ཡོངས་སུ་གྱུར་པའི་མཐར་ཇི་ལྟར་ནུས་པས་མཆོད་པ་བྱས་ནས་གཏོར་མ་ཕུལ་ཏེ། དབེན་པར་མཚན་ཐོག་ཐག་ཇི་སྲིད་ཉི་མ་འཆར་བའི་བར་དུ་བཟླ་བར་བྱའོ་ཞེས་པ་ནི་སྔོན་དུ་བསྙེན་པའི་ཆོ་གའོ། །གཏོར་མའི་སྣོད་ཨ་ཡིག་གིས་པདྨའི་སྣོད་དུ་བསམས་ནས། དེར་གནས་པ་ལྷའི་བདུད་རྩིར་བལྟས་ཤིང༌། ཨོཾ་ཙཎྜ་མ་ཧཱ་རོ་ཥ་ཎ་ཨི་དཾ་བ་ལིཾ་གྲྀཧྞ་གྲྀཧྞ་མ་མ་སརྦ་སིདྡྷཾ་ཀུ་རུ་ཧཱུཾ་ཕཊ་ཀྱིས་ལན་བདུན་དུ་མངོན་པར་བསྔགས་ནས་བཅོམ་ལྡན་འདས་པ་ལ་གཏོར་མ་དབུལ་ལོ་ཞེས་པ་ནི་གཏོར་མའི་ཆོ་གའོ། །དེ་ནས་སྔོན་དུ་བསྙེན་པའི་མཐར་རྒྱལ་ལ། ལྕགས་ལས་བྱས་པའམ། གྲུབ་པའི་ཤིང་ལས་བྱས་པ་ཡང་རུང་སྟེ། རལ་གྲིའི་རྣམ་པ་མཐེ་བོའི་སོར་གྱི་ཚད་ལ་མེ་ཏོག་ཕྲེང་བས་ཉེ་བར་མཛེས་པའི་རྣམ་ལྔ་དང་དྲི་ཐམས་ཅད་ཀྱིས་བཀྲུས་ལ། རས་བྲིས་ཡང་དག་པར་བརྩམས་པའི་སྐུ་གཟུགས་ཀྱི་མདུན་དུ་ཤེས་རབ་ཀྱི་ཕ་རོལ་ཏུ་ཕྱིན་པའི་གླེགས་བམ་བཀླག་ཅིང༌། གཏོར་མ་དང་མཆོད་པ་རྒྱ་ཆེན་པོ་ཕུལ་ནས་ཉའི་ཉིན་ལ་ལག་པ་གཉིས་ཀས་བཟུང་ནས་བཟླ་བ་གཅིག་ཏུ་བཟླས་པར་བྱའོ། །དེ་ནས་ཉའི་ཉིན་མོ་རྫོགས་ནས་མཚན་ཐོག་ཐག་བཟླའོ། །དེ་ནས་འབར་བའམ་གསལ་བར་གྱུར་ན་
༄། །དེ་ནས་ཉི་མ་འཆར་པ་ན་དེ་གྲུབ་པར་ཏེ། ཤའི་བཟའ་བཏུང་སྤངས་ནས་སོ། །འགའ་ཞིག་སྐྲ་འཁྲིལ་བ་ལོ་བཅུ་དྲུག་གི་རྣམ་པ་ཅན་ནམ་མཁའ་ལ་འགྲོ་ཞིང་ལོ་སྟོང་ཕྲག་བཅུ་རྣམས་སུ་འཚོ་བར་འགྱུར་རོ་ཞེས་པ་ནི་རལ་གྲིའི་དངོས་གྲུབ་ཀྱི་ཆོ་གའོ། །དེ་ནས་དགྲ་བོ་རིམས་ཀྱིས་འདེབས་པར་འདོད་ན། ཨོཾ་ད་ཧ་ད་ཧ། པ་ཙབ་ཙ། མ་ཐ་མ་ཐ། ཛྭ་ར་ཛྭ་ར་ལ་ཡ་ཛྭ་ལ་ཡ། ཤོཥ་ཡ་ཤོ་ཥ་ཡ་གྲྀཧྞ་གྲྀཧྞ་ཛྭ་ལ་ཛྭ་ལ་ཨོཾ་ཙཎྜ་མཧཱ་རོ་ཥ་ཎ་ཧཱུཾ་ཕཊ་སྭཱ་ཧཱ་ཞེས་པ་སྟེ། དུར་ཁྲོད་ཀྱི་རས་ལ་དུག་དང་སྐྱེ་ཚེས་བསྒྲུབ་བྱ་སོར་བརྒྱད་པའི་ཚད་དུ་བྲིས་ནས་ཕྲེང་བའི་སྔགས་ཀྱིས་བསྐོར་ཏེ། ཕྱི་ནས་སྤྲ་ཚིལ་གྱི་ནང་དུ་གཟུགས་བརྙན་བཅུག་ལ་ཡང་བསེ་ཤིང་གི་ནང་དུ་གཞུག་པར་བྱའོ། །ཨོཾ་ཙཎྜ་མ་ཧཱ་རོ་ཥ་ཎ་ཆེ་གེ་མོ་ལ་ཛྭ་རི་ཎ་གྲྀཧྞ་པ་ཡ་ཧཱུཾ་ཕཊ། སྔགས་འདི་དག་ཡོངས་སུ་བཟླ་ཞིང་དུར་ཁྲོད་ཀྱི་མེ་ལ་གདུངས་ན་རིམས་ཀྱིས་འདེབས་པར་འགྱུར་བ་འདི་ལ་ཐེ་ཚོམ་མེད་དོ། །ཨོཾ་བི་ཀྲི་ཏཱ་ན་ན་པ་ར་བ་ལ་བྷཉྫ་ནེ་བྷཉྫ་ཡ། སྟཾ་བྷ་ཡ་སྟཾ་བྷ་ཡ་བཛྲ་པཱ་ཤེ་ན་བནྡྷ་བནྡྷ་ཧཱུཾ་ཕཊ་ག །ཁཿ་ཁཿ་ཁཿ་ཧ་ཧཱ་ཧི་ཧཱི་ཕེཾ་ཨོཾ་ཙཎྜ་མ་ཧཱ་རོ་ཥ་ཎ་ཧཱུཾ་ཕཊ། སྔགས་འདི་དག་གྲོ་ག་ལ་བ་བླ་དང་ཡུང་བས་བྲིས་ནས་སྤྲ་ཚིལ་གྱིས་བཏུམས་ནས་ལིངྒཱི་ནང་དུ་བཅུག་ལ་ཡང་ལག་བརྒྱད་ལ་ཕུར་བུས་བཏབ་སྟེ། གཟུགས་བརྙན་ཁ་འོག་ཏུ་བསྟན་ནས་དོང་དུ་གཞུག་གོ །འདི་དག་གིས་ནི་དམག་ལྷགས་པ་ལ་ཕུར་བུས་བཏབ་པར་འགྱུར་རོ། །ཨོཾ་ཛ་ཡ་ཛ་ཡ་པ་རཱ་ཛ་ཡ་ནི་རྗ་ཏ་ཡནྟྲེ་ཧཱི་ཧཱི་ཧཱ་ཧཱ་སྥོཊ་ཡ་སྥོ་ཊ་ཡ་ཨུཚཱ་ད་ཡ་ཨུཚཱ་ད་ཡ་ཤཱི་གྷྲཾ་མརྨཾ་ཀུ་རུ་ཀུ་རུ་ཨོཾ་ཙཎྜ་མ་ཧཱ་རོ་ཥ་ཎ་ཧཱུཾ་ཕཊ། སྔགས་འདི་དག་དུར་ཁྲོད་ཀྱི་རས་ལ་བྲིས་ནས་སྲད་བུ་སྔོན་པོས་དཀྲིས་ཏེ་དཔུད་པར་བཅིངས་ནས་ཕ་རོལ་གྱི་འཁྲུལ་འཁོར་འཇོམས་པར་བྱེད་དོ། །ཨོཾ་ཨེ་ཙ་ལེ་སཉྩ་ལ་ཀྲི་ལ་ཡ་ཧཱུཾ་ཕཊ། སྤྲ་ཚིལ་གྱི་ལིངྒ་སོར་བཞིའི་ཚད་བྱས་ལ། གྲོ་ག་ལ་བསྒྲུབ་བྱའི་མིང་དང་བཅས་པ་བ་བླས་བྲིས་ནས་དེའི་ཁར་བཅུག་ལ། དེ་ནས་ཕུར་བུས་བཏབ་སྟེ་ལམ་བཞི་མདོར་དོང་དུ་བཅུག་ན་ཕས་ཀྱི་རྒོལ་བའི་ཁ་ལ་ཕུར་བུས་བཏབ་པར་འགྱུར་རོ། །ཨོཾ་སརྦ་མཱ་ར་བྷཉྫ་ནི་ཧཱུཾ་ཕཊ། སྔར་བཤད་པའི་ཆོ་གས་བསྒྲུབ་བྱའི་མིང་དང་སྤེལ་བ་བྱས་ནས། རྐང་པ་དག་ལ་ཕུར་བུས་བཏབ་ན་འགྲོ་བ་དང་འོང་བ་རེངས་པར་བྱེད་དོ། །ཨོཾ་སནྟ་ས་ནེ་མོ་ཧཱ་ན་ཡ་
༄། །ཧཱུཾ་ཕཊ་སྔགས་འདི་སྤྱི་བོར་བཅིངས་ནས་སྲུང་བར་འགྱུར་རོ། །ཨོཾ་ཡ་མ་མརད་ནེ་མརད་ཡ་མརད་ཡ་ཨོཾ་ཙཎྜ་མ་ཧཱ་རོ་ཥ་ཎ་ཧཱུཾ་ཕཊ། ཅེས་པ་ནི་སྡིག་པའི་ནད་སེལ་པའི་སྔགས་སོ། །ཨོཾ་ཀྲོ་དྷ་ནེ་ཀྲོ་ཥ་ཎེ་བྷེ་ད་ནཱ་ཡ་ཧཱུཾ་ཕཊ་ཅེས་པ་ནི་ཟུག་རྡུ་སེལ་བའི་སྔགས་སོ། །ཨོཾ་ཡ་མཱནྟ་ཀ་ཧྲིཿ་ཥྚྲྀ་ཧཱུཾ་ཧཱུཾ་ཕཊ། ཨོཾ་ཏྲཱ་ས་ཡ་ཏྲཱ་ས་ཡ་ཙཎྜ་པྲ་ཙཎྜ་ཧཱུཾ་ཕཊ། ཅེས་བརྗོད་ན་མ་ཧེ་འབྲོས་སོ། །ཨོཾ་ཧི་ལི་ཕུཿ་ཕུཿ་ཞེས་བརྗོད་ན་སྦྲུལ་འབྲོས་སོ། །མམྨ་མམཱ་གྲི་དྷི་ཎི་ཁཱ་ཧི་བིཥ་ཙ་རུ་གྭི་ནི་ཁ་ཁ་ཁ་ཧ་ཧ་སཿ་སཿ་ཙཎྜ་མ་ཧཱ་སེ་ནཱ་ཛྙཱ་པ་ཡ་ཏེ་སྭཱ་ཧཱ། ཨོཾ་སཾ་ཀཱ་རི་ཎི་དྷྭཾ་ཧཱི་ཧཱུཾ་ཧཿ་ཞེས་པ་ནི་མཁའ་ལྡིང་གི་སྔགས་ཏེ། སྟོང་ཕྲག་བཅུས་གྲུབ་པར་འགྱུར་རོ། །ཨོཾ་སྦེཏྐཱ་ར་ཕེཾ་ཕེཾ་ཧ་ཧ་ཧ་ཧཱ་ཧཱ་ཕཊ་ཅེས་པ་ནི་དུར་ཁྲོད་དུ་རྩེ་བར་བྱེད་པའི་སྔགས་སོ། །ཨོཾ་སརྦ་བི་དྱཱ་དྷི་པ་ཏ་ཡེ་པ་ར་ཡནྟྲ་ནཱ་ཤ་ན་སརྦ་ཌཱ་ཀི་ནཱི་ནཱཾ་ཏྲཱ་ས་ཡ་བནྡྷ་བནྡྷ་མུ་ཁཾ་ཀཱི་ལ་ཡ་ཀཱི་ལ་ཡ་ཧཱུཾ་ཧཱུཾ་ཕཊ། ཅེས་པ་ནི་གྲོང་ཁྱེར་དང་ཞིང་དུ་འཇུག་པའི་སྔགས་སོ། །ཡང་བྱ་རོག་ཁྲག་བླངས་ནས་ཟངས་མའི་གླེགས་བུ་ལ་སྔགས་བྲི་ཞིང༌། གང་གི་མིང་ཡིན་པ་དེ་ཉིད་ཀྱི་བཤད་བར་བཏུམས་ཏེ་བྱ་རོག་གིས་ཟོས་ན་བློ་དམན་ཡང་མི་གཡོ་བའི་སྔགས་ཀྱི་སྦྱོར་བ་ལས་ཏེ། ཨོཾ་ཀཱ་ཀ་ཀུ་ཏ་ནི་ཀྲ་བ་ནི་སྭཱ་ཧཱ། ཆེ་གེ་མོ་ཀཱ་ཀེ་ན་བན་ཀྵཱ་པ་ལ་ཙཎྜ་མ་ཧཱ་སེ་ནཱ་ཛྙཱ་པ་ཡ་ཏི་ཧཱུཾ་ཕཊ། ཅེས་པའི་སྔགས་བྱ་རོག་གི་མིག་གིས་བྲིས་ནས། དུར་ཁྲོད་ཀྱི་གོས་སྔོན་པོར་བཙོས་པས་གཟུགས་བརྙན་སོར་བཅུ་དྲུག་པ་དྲིལ་ཏེ། དུར་ཁྲོད་དུ་དབྱུག་པ་ལ་བཅིངས་ཤིང༌། ཅོག་པུའི་འདུག་སྟངས་ཀྱིས་དུར་ཁྲོད་དུ་མཚན་ཐོག་ཐག་བཟླའོ། །དེ་མཐོང་ན་ཕ་རོལ་གྱི་སྡེ་རེངས་པར་འགྱུར་ལ། ཕྱུང་ན་གྲོལ་བར་འགྱུར་རོ། །འདིའི་ཕྱེ་མས་ལུས་དང་རྐང་པ་ལ་བྱུགས་ན་རྒྱུག་པར་མི་ནུས་ཤིང་བརྒྱལ་བར་འགྱུར་རོ། །དེ་ལ་འདིའི་སྔགས་ནི། ཨོཾ་ཨཱ་ཀཌྜྷྱ་ཨཱ་ཀཌྜྷྱ་མོ་ཧ་ཡ་ཆེ་གེ་མོ་བ་ཤི་ཀུ་རུ་སྭཱ་ཧཱ། ལྟོ་བའི་སྲིན་བུ་བླངས་ནས་ཕྱེ་མས་ཞིབ་བར་བྱས་ཏེ། འོད་དཔག་མེད་དང་མིང་མེད་ཀྱི་ཁྲག་དང་ལྷན་ཅིག་རིལ་བུ་བྱས་ནས་སྔར་བཤད་པའི་སྔགས་ཀྱིས་མངོན་པར་བསྔགས་ཏེ། བཟའ་བ་དང་བཏུང་བར་བྱིན་ན། གལ་ཏེ་ན་ང་རྒྱལ་དང་དྲེགས་པས་བསྙེམས་པའི་མི་མོ་དབང་དུ་འགྱུར་བ་ལ་ཐེ་ཚོམ་མེད་དེ། མ་ཤིའི་བར་དུ་རྗེས་སུ་འབྲང་བར་འགྱུར་རོ། །འདི་དག་ཐམས་ཅད་ནི་བསྒོམས་པའི་བདག་ཉིད་
༄། །ཅན་ཁོ་ནས་གྲུབ་པར་འགྱུར་ཏེ། ཕྱུང་ན་ནི་གྲོལ་ལོ། །དེ་ནས་དབང་དུ་བྱ་བ་བཤད་པར་བྱ་སྟེ། འཕུར་བཞིན་པའི་སྤྲང་མའི་གཤོག་པ་གཉིས་དང༌། སོ་དབུས་མ་གཉིས་དང༌། རོའི་མེ་ཏོག་ཕྲེང་བས་ཏེ། དབང་དུ་བྱ་བ་ལ་སྔར་རེངས་པ་ལ་བཤད་པའི་སྐུ་མདོག་སེར་པོར་བསྒོམ་མོ། །བསྐྲད་པ་ལ་དུ་བའི་མདོག་དང་བསད་པ་ལ་མདོག་ནག་པོའོ། །ལས་གཞན་དང་གཞན་ལ་ཉེ་བར་གནས་པ་དང་དགྲོལ་བ་སྔོན་པོར་བསྒོམ་པར་བྱའོ། །ལས་ཐམས་ཅད་མི་གཡོ་བ་ལ་རིམ་པས་གུས་ཤིང་བསྒོམས་པའི་བདག་ཉིད་ཅན་གྱིས་རྒྱལ་པོ་ལྟ་བུར་སྤྱོད་དོ། །ཨོཾ་ཛྭཱ་ལཱ་ཀ་རཱ་ལ་བ་ད་ནེ་ཧ་ས་ཧ་ས་ཧ་ལ་ཧ་ལ། བཛྲེ་སུ་བཛྲེ་སྥ་ར་སྥ་ར་སྥ་ར་ཡ་སྥ་ར་ཡ་སརྦ་མེ་གྷ་ཏ་བྷི་ཏ་བྷིཥྚཾ་སྟྭམྦྷ་ཡ་སྟྭམྦྷ་ཡ་སྥོ་ཊ་ཡ་སྥོ་ཊ་ཡ་ཡཿ་ཡཿ་སརྦ་པཱ་ཎཱི་ཡཾ་ཤོ་ཥ་ཡ་ཧཱུཾ་ཕཊ། སྔགས་འདི་བཟླས་ནས་ཀུན་དུ་བལྟས་ན་རླུང་དང་སྤྲིན་འཐོར་བར་འགྱུར་རོ། །དེ་ནས་འདིར་བཅོམ་ལྡན་འདས་དགྱེས་པའི་སླད་དུ་མཆོད་པའི་མཎྜལ་བཤད་པར་བྱ་སྟེ། དེ་ལ་དང་པོར་ཁ་ལ་སོགས་པ་དག་པར་བྱས་ནས། ཨོཾ་མ་ཎི་དྷ་རི་བཛྲི་ཎི་མ་ཧཱ་པྲ་ཏི་ས་རེ་རཀྵ་རཀྵ་མཱཾ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། ཞེས་པ་ནི་སྲུང་བའི་སྔགས་སོ། །ཨོཾ་ཧྲིཿ་སྭཱ་ཧཱ་ཞེས་པ་འདི་ལག་པ་དང་རྐང་པ་བཀྲུ་བ་དང༌། འཐོར་འཐུང་གི་སྔགས་སོ། །ཨོཾ་སརྦ་ཏ་ཐཱ་ག་ཏཱ་བྷི་ཥེ་ཀ་ས་མ་ཡ་ཤྲི་ཡེ་ཧཱུཾ་ཞེས་པ་ནི་ཁྲུས་ཀྱི་སྔགས་སོ། །དེ་བཞིན་དུ་འདིས་གཙང་མར་གྱུར་བའི་མེ་ཏོག་བྱིན་གྱིས་རློབ་པའི་སྔགས་ཀྱིས་མེ་ཏོག་བྱིན་གྱིས་བརླབ་པའི་ཆེད་དུ་མེ་ཏོག་གཅིག་བཟུང་ནས་དྲི་བཟངས་སམ། བ་བྱུང་གི་ཆུས་ཟླ་བ་ལྟ་བུར་མཎྜལ་བྱའོ། །ཨོཾ་སརྦ་བིགྷྣཱན་ཨུཚཱ་ར་ཧཱུཾ་སྭཱ་ཧཱ། ཞེས་པའམ། ཨོཾ་བཛྲ་རེ་ཁེ་ཧཱུཾ་ཞེས་པ་འདིས་ཀྱང་ངོ༌། །དེ་ནས་ཨཱ་རེ་ཁ་སརྦ་ཏ་ཐཱ་ག་ཏཱ་ཏིཥྛནྟུ་སྭཱ་ཧཱ། ཞེས་པ་འདིས་མེ་ཏོག་ཕུལ་ཏེ། ལག་པ་བཀྲུས་ནས། དེ་ནས་དབུས་སུ་རི་རབ་དང༌། ཤར་དུ་ལུས་འཕགས་ལ་སོགས་པ་བསམ་ཞིང༌། འདི་སྟེང་དུ་ཧཱུཾ་ཡིག་ཡོངས་སུ་གྱུར་པའི་དཔལ་གཏུམ་ཆེན་དྲག་པོ། ལཾ་མཱཾ་པཾ་ཏཱཾ། རྣམས་ཡོངས་སུ་གྱུར་པས་ལྷ་མོ་ལྔས་ཡོངས་སུ་བསྐོར་བའི་ཕྲེང་བ་རྣམ་པར་བསམས་ལ། ཐོག་མ་མེད་པ་ནས་གྲུབ་པ་རྣམས་སྤྱན་དྲངས་ནས་དེ་ལ་བཅུག་སྟེ། བཅིངས་ཤིང་དགྱེས་པར་བྱ་བ་ནི་ཛཿ་ཧཱུཾ་བཾ་ཧོཿ་ཞེས་བྱ་བ་འདི་དག་གིས་སོ། །མེ་ཏོག་ལ་
༄། །སོགས་པས་མཆོད་པར་བྱ་སྟེ། ཨོཾ་ཙཎྜ་མ་ཧཱ་རོ་ཥ་ཎ་པུཥྤཾ་པྲ་ཏཱིཙྪ་ཧཱུཾ་ཕཊ། ཨོཾ་ལོ་ཙ་ནི་པུཥྤེ་པྲ་ཏཱིཙྪཾ་ལཾ་སྭཱ་ཧཱ། མཱ་མ་ཀཱི་ལ་སོགས་པ་རྣམས་ལ་ཡང་དེ་བཞིན་དུ་རྟོགས་པར་བྱའོ། །པུཥྤཾ་བཞིན་དུ་དྷཱུ་པཾ། གནྡྷཾ། མཱ་ལྱཾ་བི་ལེ་པཾ། ན་པུ་གཾ། ནཻ་བེ་དྱཾ། ཛ་ལ་ལ་སོགས་པ་རྣམས་ལ་རིག་པར་བྱའོ། །དེ་ནས་རལ་གྲིའི་ཕྱག་རྒྱས་དགྱེས་པར་བྱ་ཞིང་བསྟོད་ནས་ཕྱག་བྱས་ཏེ། ཡིད་ཀྱི་རང་བཞིན་གྱིས་མཆོད་པ་བྱ་ཞིང༌། རྣམ་པ་བདུན་དང་བཟླ་ན་མེད་པའི་མཆོད་པ་ཡང་བྱས་ཏེ། སླར་ཡང་ཕྱག་བྱས་ནས་བཟོད་པར་གསོལ་ཏེ། ཚུལ་ཁྲིམས་ཙནྡན་གྱིས་བྱུགས་ལུས། །བསམ་གཏན་གྱི་ནི་གོས་བགོས་ཤིང༌། །བྱང་ཆུབ་ཡན་ལག་མེ་ཏོག་བཀྲམ། །ཇི་ལྟར་བདེ་བར་དགྱེས་པར་མཛོད། །སླར་ཡང་བདག་ལ་བརྩེ་བ་ཡིས། །བཞབས་དག་ཇི་བཞིན་འབྱོན་པར་འཚལ། །ཨོཾ་མུཿམུཿ་སྭཱ་ཧཱ་ཞེས་ཆུ་གཙང་མེ་ཏོག་དང་བཅས་པ་ཞབས་ལ་དབུལ་ལོ། །དེ་ནས་མཆོད་པ་བསྡུས་ནས་གཤེགས་སོ་སྙམ་དུ་བསྒོམ་ཞིང༌། དེ་ནས་དྲི་མ་མེད་ཅིང་དབེན་པར་དོར་བར་བྱའོ། །དེ་ནས་གཙང་མར་གྱུར་ནས་ཅི་བདེར་བྱའོ། །ཨོཾ་ཧྲཱཾ་ཧྲཱིཾ་ཧྲོཾ་ཙཎྜ་རཱུ་པེ་ཙ་ཊ་ཙ་ཊ་པྲ་ཙ་ཊ་ཀ་ཧ་ཀ་ཧ་པྲ་སྥ་ར། པྲ་སྥ་ར་ཡ་ཧ་ན་ཧ་ན་གྲ་ས་གྲ་ས་བནྡྷ་བནྡྷ། ཛམྦྷ་ཡ་ཛམྦྷ་ཡ་སྟམྦྷ་ཡ་སཏམྦྷ་ཡ་མོ་ཧ་ཡ་སརྦ་ཤ་ཏྲཱུཾ་མུ་ཁཾ་བནྡྷ་ནཾ་ཀུ་རུ་ཀུ་རུ་སརྦ་ཌཱ་ཀི་ནཱི་ནཱཾ་གྲ་ཧ་བྷཱུ་ཏ་པི་ཤཱ་ཙ་བྱཱ་དྷི་ཡཀྵ་ཎཱཾ་ཏྲཱ་ས་ཡ་ཏྲཱ་ས་ཡ་མ་ར་མ་ར་མཱ་ར་ཡ་མཱ་ར་ཡ་རུ་རུ་ཙཎྜ་ཀུ་ཀ་རཀྵ་རཀྵ་ཙཎྜ་མ་ཧཱ་སེ་ནཱ་སརྦ་མཱ་ཛྙཱ་པ་ཡ་ཏི། ཨོཾ་ཙཎྜ་མ་ཧཱ་རོ་ཥ་ཎ་ཧཱུཾ་ཕཊ། སྔགས་འདི་དག་གྲོ་གའི་འདབ་མ་ལ་པདྨ་འདབ་མ་བཅུ་དྲུག་པའི་དབུས་སུ་གུར་ཀུམ་དང་གི་ཝང་དང་རྒྱ་སྐྱེགས་ཀྱིས་བྲིས་ཏེ་སྲད་བུ་ནག་པོས་དྲིལ་ནས་དཔུང་པའམ། མགྲིན་པར་བཅིང་བར་བྱའོ་ཞེས་པ་སྲུང་བའི་ཆོ་གའོ། །ཡང་ཁ་ལྷོར་བལྟས་ནས་ཡུངས་ཀར་ལ་བརྒྱ་རྩ་བརྒྱད་མངོན་པར་བསྔགས་ནས་མཁའ་འགྲོ་མ་ལ་སོགས་པས་ཟིན་པ་ལ་བརྡེག་པར་བྱས་ནས་གཏོང་བར་འགྱུར་རོ། །ཡང་ན་སོ་རྩིའི་འདབ་མ་ལ་གྲུ་གསུམ་པ་གཉིས་ཁ་སྦྱར་བའི་དབུས་སུ་ཚེར་མས་བྲིས་ནས་ཕོ་བ་རིས་ལྔ་དང་ལྷན་ཅིག་སྦྱར་ནས་ཟོས་ན་ཉིན་གཅིག་པ་ལ་སོགས་པའི་རིམས་ཐམས་ཅད་འཇོམས་པར་བྱའོ། །ཨོཾ་ཙཎྜ་མ་ཧཱ་སེ་ནཱ་གྲ་ས་གྲ་ས་ཁ་ཁ་ཁཱ་ཧི་ཁཱ་ཧི་ཤོཥ་ཡ་ཤོཥ་ཡ་མཱར་ཡ་མཱ་ར་ཡ་ཧཱུཾ་ཕཊ། མྱོས་བྱེད་ཀྱི་སོར་
༄། །བཞི་པའི་ཚད་ཀྱི་གཟུགས་བརྙན་བྱས་ནས་དེའི་སྙིང་གར་སྔགས་འདི་དག་དུར་ཁྲོད་ཀྱི་རས་ལ་དུག་དང་སྐྱེ་ཚེས་བྲིས་པ་བཅུག་སྟེ། སོར་གཅིག་པའི་ཚད་ཀྱི་རུས་པའི་ཕུར་བུས་གདབ་བར་བྱའོ། །དུར་ཁྲོད་དུ་ཁུང་བུ་བརྐོས་ནས་ཁ་སྦུབ་ཏུ་བཞག་ན་ཉི་མ་བདུན་གྱིས་འཆི་བ་བསྒྱུར་བར་ཐེ་ཚོམ་མེད་དོ། །ནིམ་བ་དང་བྱ་རོག་གི་ཚང་བླངས་ནས་ཡི་དགས་ཀྱི་མེ་ལ་བསྲེགས་བའི་ཐལ་བ་ལ། ཨོཾ་ཙཎྜ་མ་ཧཱ་རོ་ཥ་ཎ་ཆེ་གེ་མོ་ཨུཙྪ་ཊ་ཡ་ཧཱུཾ་ཡ་ཧཱུཾ་ཕཊ་བརྒྱད་དུ་རྩ་བརྒྱད་དུ་བསྔགས་ནས་སྒོ་ལ་གཏོར་ན་ཁྱིམ་ནས་སྐྲོད་པ་ལ་ཐེ་ཚོམ་མེད་དོ། །ཁྱི་འཐབ་པའི་ས་དེ་དག་གི་རྐུབ་ནས་བླངས་ལ། ཕན་ཚུན་སྡང་བའི་གཟུགས་བརྙན་ལ་འཐོར་ན་འབྱེད་པར་བྱེད་པ་ལ་རྣམ་པར་བརྟག་མི་དགོས་སོ། །སྔགས་ནི། ཨོཾ་དྭེ་ཥ་ཎེ་དྭེ་ཥ་བཛྲེ་ཆེ་གེ་མོ་པི་དྭེ་ཥ་ཡ་ཨོཾ་ཙཎྜ་མ་ཧཱ་རོ་ཥ་ཎ་ཧཱུཾ་ཕཊ། ཅེས་པ་དབྱེ་བའོ། །གྲོ་ག་ལ་བ་བླས་སོར་དྲུག་པའི་རུས་སྦལ་བྲིས་ནས་རྐང་པ་བཞི་ལ་ཧཱུཾ་ཁར་པླིཾ་དབུས་ཀྱི་ལྟོ་བར་ཏཾ་གཉིས་བྲིས་ལ། སྒྲུབ་པ་པོས་རྒྱབ་ཏུ་ཕྲེང་བའི་སྔགས་ཀྱིས་ཕྱི་རོལ་དུ་བསྐོར་བ་ལ། མཆོད་པ་དང་བསྟོད་པ་ཡང་དག་པར་བརྩམ་ཞིང༌། སོ་ཕག་གི་སྟེང་དུ་བསྐོར་རུས་སྦལ་གྱི་ཁོག་པས་བཀབ་སྟེ། སྲད་བུ་དམར་པོས་དཀྲིས་ནས་རྐང་པ་ཕྱིས་པའི་གོས་ཀྱིས་བཏུམས་ཏེ་རྐང་པ་གཡོན་པས་བརྡེག་པར་བྱ་ཞིང༌། ཆེ་གེ་མོ་བ་ཤཾ་བྷ་བནྟུ་ཞེས་པ་ལན་བདུན་གྱི་མཐར་ཐུག་པས་དགྲ་བོ་ཐམས་ཅད་ཀྱི་ཁ་བཅིང་བར་འགྱུར་རོ། །དེ་ལ་ཕྲེང་བའི་སྔགས་ནི་འདི་ཡིན་ཏེ། ཨོཾ་ཙཎྜ་མ་ཧཱ་རོ་ཥ་ཎ་ཧཱུཾ་ཧྲཱི་ཧྲོཾ་ཧྲི་གོ་ར་རཱུ་པེ་ཙ་ཊ་ཙ་ཊ་ཙ་པྲ་ཙ་ཊ་གྷ་ཏཱ་གྷཱ་ཏཱ་ཡ་ཀ་ཧ་ཀ་ཧ་པྲ་སྥར་པྲ་སྤར་ཡ་པྲ་སྥ་ར་ཡ་ཀཱི་ལ་ཡ་ཀཱི་ལ་ཡ་ཛམྦྷ་ཛམྦྷ་ཡ་སྟམྦྷ་སྟམྦྷ་ཡ་མོ་ཧ་ཡ་མོ་ཧ་ཡ་ཧཱུཾ་ཕཊ། ཅེས་པའོ། །ཨོཾ་ཙི་ལི་མི་ལི་ལ་ཏེ་ཧཱུཾ་ཕཊ། ཅེས་པ་མིག་ནད་ཞི་བར་བྱེད་པའི་སྔགས་སོ། །ཨོཾ་ཙྡཱ་ཙྡཱཾ་ཙྡྲུཾ་ཤོ་ཥ་ཡ་དྷཱ་རཾ་བནྡྷ་བནྡྷ་ཨོཾ་ཙཎྜ་མ་ཧཱ་རོ་ཥ་ཎ་ཧཱུཾ་ཕཊ། ཅེས་པ་བའི་རུས་པའི་ཕུར་བུ་སོར་བདུན་པའི་ཚད་ལ་བརྒྱ་རྩ་བརྒྱད་མངོན་བར་བསྔགས་ནས་བ་ལང་ལྷས་སུ་བརྐོ་སར་བཅུག་ན་འོམ་འཆད་པར་ངེས་སོ། །ཕྱུང་ན་གྲོལ་ལོ། །ཨོཾ་བཛྲི་ཎི་བཛྲ་པཱ་ཏ་ཡ་སུ་ར་པ་ཏི་རཱ་ཛྙཱ་པ་ཡ་ཏི་ཛྭ་ལ་ཡ་ཏི་ཛྭཱ་ལ་ཡ་ཛྭཱ་ལ་ཡ་ཛྭཱ་ལ་ཡ་ཨོཾ་ཙཎྜ་མ་ཧཱ་རོ་ཥ་ཎ་ཧཱུཾ་ཕཊ། མཁས་པས་གྲོག་མཁར་གྱི་འཇིམ་བ་བླངས་ནས་རྡོ་རྗེར་བྱས་ལ་འདི་ཉིད་བརྒྱ་རྩ་བརྒྱད་བཟླ་ཞིང་བསྔགས་ནས་
༄། །ཚོང་ཁང་དུ་གཞུག་སྟེ། དེས་སྐད་ཅིག་ལ་རྡོ་རྗེའི་ཟོང་ཉམས་པར་འགྱུར་རོ། །ཨོཾ་རཀྵ་རཀྵ་སཾ་ཀོ་ཙ་ལ་ནེ་པྲ་ཙ་ལ་ནེ་པྲ་ཙ་ལ་པྲ་ཙ་ལ་མ་ཧཱ་ཀྲོ་དྷ་རཱུ་པེ་པ་ཙ་པ་ཙ་ཙཱ་ལ་ཡ་ཨོཾ་ཙཎྜ་མ་ཧཱ་རོ་ཥ་ཎ་ཧཱུཾ་ཕཊ་ཅེས་པ་ནག་བོའི་བརྒྱད་དམ་བཅུ་བཞི་ལ་དུར་ཁྲོད་ཀྱི་ཐལ་བ་ལ་བརྒྱ་རྩ་བརྒྱད་མངོན་པར་བསྔགས་ནས་དགྲའི་ཁྱིམ་དུ་གཏོར་རོ། །ཡང་སྒོར་བརྐོས་ནས་གཟུགས་བརྙན་གཞུག་སྟེ། ཉི་མ་བདུན་གྱིས་སྐྲོད་པར་བྱེད་དོ། །དེ་ནས་གྲོང་ཁྱེར་བསྐྱོད་པ་བཤད་པར་བྱ་སྟེ། གྲོ་གའི་འདབ་མ་ལ་གུར་གུམ་གྱི་མདོག་ལྟ་བུ་ཕྱག་གཉིས་པ། ཞགས་པ་དང་ལྕགས་ཀྱུའི་ཕྱག་ཆགས་པ་དང་གཙིགས་ཤིང་འཇིགས་སུ་རུང་བ་བྲི་སྟེ། གླང་པོ་ཆེའི་ཆང་དང་རྒྱ་སྐྱེགས་དང་བུད་མེད་ཀྱི་རྡུལ་དང༌། སྭཱ་ལཱནྟ་དང་གུར་ཀུམ་རྣམས་ཀྱི་སྤེལ་ཚིག་དང་བཅས་པ་སྟེ། སྔགས་ཀྱི་ཡི་གེས་ལྟེ་བ་དང༌། སྙིང་ག་དང་མགོ་བོ་རྣམས་ལའོ། །ཨོཾ་ཡིག་མགོ་བོར་སྦྱིན་བྱ་སྟེ། ཧྲཱིཾ་ཡིག་དེ་བཞིན་སྙིང་ག་ལ། དེ་ལྟར་ལྟེ་བར་ཀྲིཾ་ཡིག་གོ །མིག་ལ་ཏྲཾ་ཡིག་དེ་བཞིན་ནོ། །ཕྲེང་བའི་སྔགས་ཀྱིས་བསྐོར་ནས་སྲད་བུ་དམར་པོས་དཀྲིའོ། །སྔགས་ནི་ཨོཾ་ཧྲཱིཾ་ཀྲཱཾ་ཏྲཾ་ཡ་མ་ཐ་ནེ་ཨཱ་ཀ་ད་ཀྵོ་བྷ་ཡ་ཀྵོ་བྷ་ཡ་སརྦ་ཀཱ་མ་པྲ་སཱ་དྷ་ནེ། ཧྲཾ་ཧྲེཾ་ཧྲིཾ་ཀ་ཊ་ཀ་ཊ་སྭཱ་ཧཱ། ཐོད་པ་ཁ་སྦྱོར་དུ་བཅུག་ནས་མར་དང་སྦྲང་རྩིས་བཀང་སྟེ། སྲད་བུ་དམར་པོས་དཀྲིས་ནས་ཡང་དག་པར་མཆོད་དེ། རོའི་གནས་སུ་བརྐོས་པར་བཅུག་ལ། རྐང་པ་གཡོན་པས་མནན་ནས་སྔགས་བཟླས་ཤིང༌། ཡང་མི་རུས་དམར་པོ་ལ་ཕྲེང་བ་བྱ་ཞིང་བསྒོམ་སྟེ། སྔགས་པ་མཉམ་པར་གཞག་པས་སྟོང་ཕྲག་ཉི་ཤུ་རྩ་ལྔས་འགྱུར་བ་ལ་ཐེ་ཚོམ་མེད་དོ་ཞེས་པ་གྲོང་ཁྱེར་བསྐྱོད་པའི་ཆོ་གའོ། །ཕག་གི་ཚིལ་བུའི་རྩེ་མོ་ལ་མར་མེ་སྦར་ནས་དགའ་བ་སྤྱད་ན་ཟླ་བོ་འཆིང་དོ། །ཨོཾ་ཥ་ཎིའི་རྩ་བ་དང༌། ཀཱ་མཱ་ཙཱིའི་རྩ་བ་དང༌། གསེར་ཤིང་གི་ས་བོན་དངས་བྱར་ནས། ག་པུར་དང་ལྷན་ཅིག་མཉེས་ནས་ཡན་ལག་མཆོག་ལ་བྱུགས་ཏེ་དགའ་བ་སྤྱད་ན་ཁམས་འཆིང་ངོ༌། །བཱ་ཀའི་འདབ་མ་དང༌། སྡོང་བུ་དང༌། སྦྲང་རྩི་དང༌། རྒྱ་སྐྱེགས་ཀྱི་ཤིང་དང༌། པི་པི་ལིང་རྣམས་ཆ་མཉམ་པར་མ་ཀྵ་ཀི་དང་སྦྲང་སྦྱར་ནས་ཟོས་ན་ཁམས་འཕེལ་ལོ། །ཏ་ག་རའི་རྩ་བ་སུ་དར་ཤ་ན་དང་མཉེས་ནས་མར་དང་ལྷན་ཅིག་འཐུངས་ཤིང་བྱུགས་ན་ཉམས་པར་བྱེད་དོ། །པུ་ཏྲ་ཛཱ་རཱི་དང་ཙཎྜ་ལི་
༄། །དང༌། མིང་མེད་ཀྱི་ཁྲག་དང་ཁུ་བ་དང༌། ལྟོ་བའི་སྲིན་བུ་ཕྱེ་མར་བྱས་ནས་བཟའ་བ་དང་བཏུང་བར་བྱིན་ན་བསྒྲུབ་བྱ་དབང་དུ་འགྱུར་རོ། །གཏུམ་ཆེན་དྲག་པོའི་མངོན་པར་རྟོགས་པ་རྫོགས་སོ།། །།པཎྜི་ཏ་བདེ་བ་ཆེན་པོའི་རྡོ་རྗེས་བསྒྲིགས་པའོ། །ཤཱཀྱའི་དགེ་སློང་གཞོན་ནུ་དཔལ་གྱིས་བསྒྱུར།།