ཡེ་ཤེས་རྡོ་རྗེ་ཀུན་ལས་བཏུས་པའི་རྒྱུད་ལས་འབྱུང་བའི་རྒྱན་བདུན་རྣམ་པར་དགྲོལ་བ།
ཤྲདྡྷཱ་ཀ་ར་ཝརྨས་མཛད།
ཡེ་ཤེས་རྡོ་རྗེ་ཀུན་ལས་བཏུས་པའི་རྒྱུད་ལས་འབྱུང་བའི་རྒྱན་བདུན་རྣམ་པར་དགྲོལ་བ་བཞུགས། ༄༅༅།། །།བཅོམ་ལྡན་འདས་དཔལ་ཀུན་དུ་བཟང་པོ་ལ་ཕྱག་འཚལ་ལོ། །དངོས་ཀུན་རང་བཞིན་སྟོང་བདག་ཉིད། །དངོས་པོ་ཀུན་གྱི་ངོ་བོ་ཉིད། །ཐམས་ཅད་བདག་ཉིད་རྡོ་རྗེ་འཛིན། །གཉིས་མེད་དེ་ལ་རབ་ཏུ་འདུད། །ཡེ་ཤེས་ཀུན་བཏུས་རྒྱུད་ལས་ནི། །རྣལ་འབྱོར་བླ་མའི་རྒྱུད་དགྲོལ་ལུགས། །རྒྱན་ནི་བདུན་པོ་གང་ཡིན་པ། །མཁས་པ་དགའ་བསྐྱེད་
ཕྱིར་བཤད། །རྣལ་འབྱོར་རྒྱུད་ཚུལ་གང་ལ་ཡང༌། །རྒྱུད་ཚུལ་རྣམ་པ་གསུམ་དུ་སྣང༌། །རྒྱུ་ཡི་རྒྱུད་དང་ཐབས་ཀྱི་རྒྱུད། །འབྲས་བུའི་རྒྱུད་ཅེས་མཁས་པས་བཤད། །རྒྱུད་ལ་གང་ཟག་མཐའ་ཡས་ཀྱང༌། །ཅུང་ཟད་དབྱེ་ན་རྣམ་པ་ལྔ། །རིན་ཆེན་ཙནྡན་པདྨ་དང༌། །པད་དཀར་ཨུཏྤལ་ཞེས་གསུངས། །དེ་ལ་བསྡུས་པ་རྣམ་གཉིས་ཏེ། །ཚོགས་དང་སློབ་མའི་གང་ཟག་གོ །དེ་དག་རེ་རེ་དག་ལ་ཡང༌། །བློ་ནི་རབ་འབྲིང་ཐ་མ་གསུམ། །ཆོས་སྨྲ་བ་དང་སྒྲུབ་བྱེད་པའོ། །རྒྱན་ནི་ལྔ་པ་དྲུག་པར་བཤད། །ཐབས་ཀྱི་རྒྱུད་ལས་རྣམ་པ་གཉིས། །བརྡ་དང་དོན་དུ་མཁས་བས་བཤད། །དེ་འཛིན་བྱེད་པ་སྨྲ་བྱེད་དང༌། །སྒྲུབ་པར་བྱེད་པ་ཁོ་ན་ཡིན། །གླེང་བསླང་ལྔ་དང་མཐའ་དྲུག་རྒྱན། །བརྡ་ཡི་རྒྱུད་ལ་འཇུག་པ་ཡིན། །རིགས་པ་རྣམ་བཞི་བཤད་པ་བཞི། །བདེན་གཉིས་ངེས་པའི་རྒྱན་དག་ནི། །དོན་ལ་འཇུག་པའི་རྒྱན་ཞེས་བྱའོ། །གླེང་བསླད་དབྱེ་ན་རྣམ་པ་ལྔ། །ཅུང་ཟད་རིམ་པར་དབྱེ་བར་བྱ། །བརྡ་ཡི་རྒྱུད་དུ་གསུངས་པ་ཡི། །མིང་དང་ཆེད་དང་བྱེད་པ་པོ། །ཚད་དག་དང་ནི་དགོས་པའོ། །མིང་ནི་ཁྲི་སུམ་སྟོང་ཕྲག་བཞི། །རྣལ་འབྱོར་ཆེན་པོའི་རྒྱུད་དུ་གྲངས། །ཀ་ནས་ཡ་ཡི་བར་དུ་ནི། །ཉི་ཤུ་རྩ་དྲུག་མིང་གི་མཐའོ། །དེ་ཙམ་ཅུང་ཟད་དབྱེ་བ་སྟེ། །རྒྱས་པར་དབྱེ་ན་གྲངས་མེད་དོ། །བསྡུས་པའི་རྩ་བ་ཡི་གེ་གསུམ། །གསུངས་པ་སྐུ་གསུང་ཐུགས་ཞེས་གསུངས། །ཆེད་ནི་གདུལ་བྱ་རྒྱ་མཚོ་སྙེད། །བརྗོད་མི་ལང་བའི་དོན་དུ་གསུངས། །བསྡུས་ན་སྐྱེ་བོ་འདོད་ཆགས་ཅན། །འདོད་ཁམས་དབང་དུ་གསུངས་པ་ཡིན། །བྱེད་པ་པོ་ནི་རྡོ་རྗེ་སེམས། །སངས་རྒྱས་དྲུག་པ་དེ་ཁོ་ན། །ཚད་ནི་དཔལ་ལྡན་གསང་འདུས་ཀྱི། །ལེའུ་དང་ཆོ་ག་དུམ་བུ་དང༌། །རིམ་པ་བཤད་པ་རྣམ་པ་བཞི། །ལེའུ་ནི་རྣམ་པ་བཅུ་བདུན་ཏེ། །ཆོ་ག་ཉི་ཤུར་མཁས་པས་བཤད། །དུམ་བུ་ཕྱི་མའི་རྒྱུད་དང་ནི། །བཤད་པའི་རྒྱུད་རྣམས་གྲགས་པ་ཡིན། །བསྐྱེད་དང་རྫོགས་པའི་སྒྲུབ་
ཐབས་དང༌། །སྲིད་པ་སྐྱེ་འཆིའི་རིམ་པ་ཡི། །དབྱེ་བ་བརྗོད་པ་རིམ་པ་ཡིན། །ཐུན་མོང་མཆོག་དང་རྣམ་བཞི་ལས། །བདག་གཞན་དོན་བྱས་དགོས་པའོ། །རྒྱུད་གཞན་ལ་ཡང་དེ་བཞིན་ནོ། །མཐའ་རྣམ་དྲུག་ཅེས་བྱ་བ་ཡང༌། །དགོངས་དང་དགོངས་མིན་དྲང་དང་ངེས། །ཇི་བཞིན་སྒྲ་དང་སྒྲ་མིན་ནོ། །འདོད་ཆགས་མ་ཡིན་ཆགས་བྲལ་མིན། །དབུ་མར་མི་དམིགས་ལ་སོགས་པའི། །རྡོ་རྗེའི་ཚིག་ནི་དགོངས་བཤད་པའོ། །སྟོང་པ་བདག་མེད་འོད་གསལ་བ། །ཞེས་སོགས་ཚིག་ནི་དགོངས་པ་མིན། །ག་པུར་ཙནྡྣ་རྡོ་རྗེ་པད། །ཅེས་སོགས་ཚིག་ནི་དྲང་བའི་དོན། །ཁུ་བ་ཁྲག་དང་བཙུན་མོ་སོགས། །རྡོ་རྗེའི་ཚིག་ནི་ངེས་པའི་དོན། །དཀྱིལ་འཁོར་མཆོད་སྦྱིན་ལ་སོགས་པ། །དོན་གསལ་གསུངས་པ་ཇི་བཞིན་སྒྲ། །ཀོ་ཊ་ཀྵ་སོགས་ཇི་བཞིན་མིན། །དེ་ཙམ་ཞིག་ནི་བརྡ་རྒྱུད་རྒྱན། །བརྡ་ཡིས་མཚོན་ནས་དོན་ལ་ནི། །འཇུག་བྱེད་དེ་ཡང་ཐབས་ཀྱི་རྒྱུད། །དོན་ནི་རིགས་པ་བཞིར་བཤད་པ། །རྒྱུད་དང་གླེང་གཞི་ངེས་ཚིག་རྒྱུ། །ཆགས་བྲལ་ཆགས་བཅས་དབང་དུའོ། །མི་ཡི་སྐྱེ་འཁྲུངས་འཐད་པ་སྒྲུབ། །ཁྱིམ་ནས་བྱུང་བ་བྱ་བ་མེད། །འདུལ་དང་སྡོམ་པ་ལ་ལྟོས་པའོ། །ཆོས་སྤྱོད་ཆོས་ཉིད་འབྲས་བུ་འབྱུང༌། །ཆགས་བྲལ་རིགས་པ་བཞིར་འདོད་དོ། །ཕུང་པོ་ལྔ་དང་འབྱུང་བ་ལྔ། །དབང་པོ་ལྔ་དང་ཉོན་མོངས་ལྔ། །རིགས་ལྔའི་སངས་རྒྱས་ལྔ་རུ་འདོད། །རྡོ་རྗེ་འཛིན་འགྱུར་བྱ་བ་བྱེད། །ལྟོས་པ་རང་གི་མཚན་མ་ལའོ། །སྤྲོས་བཅས་ལ་སོགས་སྤྱོད་པ་ཡི། །ཆོ་ཉིད་ཀྱིས་ནི་འབྲས་འབྱུང་བ། །ཆགས་བཅས་རིགས་པ་བཞིར་འདོད་དོ། །བཤད་གཞི་ཡིག་དོན་སྤྱི་ཡི་དོན། །སྦས་པའི་དོན་དང་མཐར་ཐུག་པའོ། །སྒྲ་ཡི་བཀོད་པ་བསྟན་བཅོས་བཞིན། །དོན་གྱིས་བཀོད་པའི་ཡི་གེའི་དོན། །ཚིག་གཅིག་འབྲས་བུ་བསྙེན་མཐོང་བ། །ཡུལ་རིང་འཇུག་པའི་བློ་བཟློག་སྟེ། །འབྲས་དོན་གཞན་དོན་བསྐྱེད་རིམ་ལ། །སྦྱོར་བ་དང་པོ་ལ་སོགས་པ། །རྒྱས་བཤད་དོན་ནི་སྤྱི་ཡི་དོན། །ཆགས་བཅས་སྤྱོད་པ་དོན་ཡོད་དང༌། །ཀུན་རྫོབ་
ལམ་གྱུར་དོན་ཡོད་དང༌། །སྣང་གསུམ་རྟོགས་པས་དོན་ཡོད་པའི། །མི་བསྟན་སྦས་དོན་རྣམ་པ་གསུམ། །ཡང་དག་དོན་ཉིད་སྟོན་པ་དང༌། །དོན་དམ་ལ་བདེན་གཉིས་མེད་ཐོབ། །འོད་གསལ་བ་དང་ཟུང་འཇུག་སྟེ། །མཐར་ཐུག་པ་ནི་ཡིན་པར་གསུངས། །སྒྱུ་མའི་དཔེར་བྱས་བཅུ་གཉིས་ཀྱིས། །ཀུན་རྫོབ་ངེས་པར་ཤེས་པར་བྱ། །ཐམས་ཅད་སྟོང་པ་འོད་གསལ་བ། །དོན་དམ་དུ་ནི་གང་བསྟན་པ། །རྫོགས་བ་སྒྲུབ་པར་བྱེད་པ་སྟེ། །དོན་གྱི་རྒྱུད་དུ་བསྟན་པ་ཡིན། །འབྲས་བུའི་རྒྱུད་ནི་རྣམ་པ་གསུམ། །ཐུན་མོང་མཆོག་དང་གཉི་ག་ཡི། །འབྲས་བུར་རྒྱལ་བ་དམ་པས་གསུངས། །ཐུན་མོང་གྲུབ་པ་བརྒྱད་ལ་སོགས། །བསྐྱེད་པའི་རིམ་བའི་ནུས་པ་ཡིན། །མཆོག་ནི་སངས་རྒྱས་གོ་འཕང་སྟེ། །རྫོགས་པའི་རིམ་པའི་འབྲས་བུ་ཡིན། །ཟུང་འཇུག་རིམ་པ་མཐར་ཕྱིན་ན། །གཉི་གའི་དངོས་གྲུབ་རྫོགས་པ་ཡིན། །ཐུན་མོང་ཐོབ་ལ་མཆོག་མ་ཡིན། །མཆོག་ལ་ཐུན་མོང་ཡོད་མ་ཡིན། །རྡོ་རྗེ་འཆང་བའི་གོ་འཕང་ནི། །དེ་དག་གཉིས་སུ་ཡོད་མ་ཡིན། །རྣལ་འབྱོར་བླ་མའི་རྒྱུད་འཛིན་པས། །འབྲས་བུ་རྒྱུ་ལ་རག་ལས་ཏེ། །ས་བོན་ལྟ་བུ་ཡིན་པས་ན། །རྒྱུ་ཡི་གང་ཟག་རྣམ་པ་ལྔ། སྤང་བླང་བྱེ་བྲག་ཤེས་པར་བྱ། །དེ་ནས་རིམ་པར་དབང་བླངས་ཏེ། །ཐབས་ཀྱི་རྒྱུད་ལ་འཇུག་པར་བྱ། །དང་པོ་ཉན་པའི་ཤེས་རབ་ཀྱིས། །ཚིག་གི་རྒྱུད་ལ་ཐོས་པ་བསྐྱེད། །དེ་ནས་བསམས་པའི་ཤེས་རབ་ཀྱིས། །ཚིག་དང་དོན་དུ་འབྲེལ་པ་བསླབ། །དེ་ནས་བསྒོམ་པའི་བློ་རྩལ་གྱིས། །དང་པོར་བསྐྱེད་པའི་རིམ་པ་བསླབ། །དེ་རྗེས་རྫོགས་པ་མཐར་དབྱུང་སྟེ། །ཁ་སྤུབས་རྡོལ་དང་དུག་ཅན་གྱི། །སྐྱོན་རྣམས་སྤངས་ཏེ་རྒྱུན་གནས་ན། །ཆུ་ལུད་རྐྱེན་གྱིས་འབྲས་བསྐྱེད་བཞིན། །འབྲས་བུ་མངོན་གྱུར་ཐེ་ཚོམ་མེད། །རྒྱུད་གསུམ་རྒྱན་བདུན་སྦྱོར་བའི་ལྡེ་མིག་གིས། །གསང་འདུས་ལ་སོགས་རྒྱུད་ཀྱི་སྒོ་ཕྱེ་ནས། །ཀུན་ལ་དགོས་པའི་འབྲས་བུ་རིན་པོ་ཆེ། །རྣལ་འབྱོར་རྣམས་ཀྱི་རྒྱུད་ལ་ཐོབ་པར་ཤོག །རྒྱན་བདུན་རྣམ་པར་དགྲོལ་བ་ཞེས་བྱ་བ། ཨ་ཙཱ་ཪྻ་ཤྲདྡྷཱ་ག་ར་ཝ་རྨས་མཛད་པ་རྫོགས་སོ།། །།པཎྜི་ཏ་དེ་ཉིད་དང༌། ཞུ་ཆེན་གྱི་ལོ་ཙཱ་བ་དགེ་སློང་རིན་ཆེན་བཟང་པོས་བསྒྱུར་བའོ།། །།