ལེའུ་བདུན་པ། སྔགས་ཀྱི་སྤྱོད་པའི་མཆོག་སྟོན་པར་བྱེད་པའི་གཞུང་གི་འགྲེལ་པ།
ད་ནི་ཏིང་ངེ་འཛིན་ལས་ལངས་པའི་རྣལ་འབྱོར་པས་སྨོན་ལམ་བཏབ་པའི་དེ་མ་ཐག་ཏུ་སྡོམ་པ་བསྐྱང་བའི་ཆོ་ག་གསུངས་པ། དེ་ནས་ཞེས་བྱ་བ་ལ་སོགས་པའོ། །དམ་ཚིག་ཆེན་པོ་རྡོ་རྗེ་འཆང་ཆེན་པོ་དེ་དངོས་པོ་ཐམས་ཅད་ལས་མི་འདའ་བའི་ཕྱིར་རོ། །དེ་ཉིད་འགྱུར་བ་མེད་པའི་ཕྱིར་ན་དེ་ཁོ་ན་ཉིད་དོ། །དེའི་བདག་ཉིད་ཀྱང་སྔགས་ཀྱིས་སྤྱོད་པས་ན་འཇིག་རྟེན་གྱི་སྤྱོད་པ་ལས་གྲོལ་བ་དང༌། ཤེས་པ་དང་སྐྱོབ་པར་ལྡན་པའོ། །ཇི་སྐད་དུ། གང་གང་རྒྱུ་དང་རྐྱེན་ལས་བྱུང༌། །
ཡུལ་དང་དབང་པོ་ཡིན་པར་དགོངས། །ཡིད་དེ་མིན་ཞེས་བསྟན་པ་ཡིན། །ཏྲ་ཞེས་བྱ་བ་སྐྱོབ་པའོ། །ཞེས་པ་ལ་སོགས་པ་གསུངས་སོ། །དེའི་མཆོག་མངོན་པར་བྱང་ཆུབ་པ་བསྟན་པའི་གཞུང་ནི་ལེའུ་སྟེ་དེ་གསུངས་སོ་ཞེས་སོ། །ད་ནི་འདོད་པ་ལྔ་ལ་བརྟེན་པས་བྱང་ཆུབ་ཐོབ་པར་འགྱུར་བ་བསྟན་པ། འདོད་པའི་ལོངས་སྤྱོད་ཅེས་པ་ལ་སོགས་པའོ། །འདོད་པའི་ལོངས་སྤྱོད་ཅེས་པ་ནི་གཟུགས་ལ་སོགས་པ་ཐམས་ཅད་ལའོ། །ཇི་ལྟར་འདོད་པ་ཞེས་པ་ནི། །མི་སྤང་བར་འདོད་ནས། འབྱུང་བའི་རིམ་པས་བརྟེན་ནས་ནི། །ཞེས་སོ། །དེས་ཅི་འགྲུབ་ཅེ་ན། འདི་ལྟ་བུ་ཡི་སྦྱོར་བ་ཡིས། །སངས་རྒྱས་མྱུར་དུ་ཐོབ་པར་འགྱུར། །ཞེས་སོ། །ད་ནི་ཇི་ལྟར་སྤྱོད་པའི་ཐབས་གསུངས་པ། འདོད་པའི་ལོངས་སྤྱོད་ཅེས་པ་ལ་སོགས་པའོ། །རང་གི་ལྷ་ཡི་སྦྱོར་བ་ཡིས། །ཞེས་བྱ་བ་ནི། གཟུགས་ལ་སོགས་པ་རྣམས་བརྟགས་པས་དབེན་པའི་ཕྱིར་ཤས་པ་ཙམ་སྟེ། དེ་ཡང་དང་པོ་ནས་རང་གི་ལྷའི་རང་བཞིན་དུ་གནས་པས་དེ་ལ་བལྟས་ན་གསང་བ་ཆེན་པོའི་མཆོད་པ་སྟེ། ཡིད་དགའ་བར་བྱེད་པའི་ཕྱིར་རོ། །དེས་བདག་དང་གཞན་མཉེས་པར་བྱ་བའི་ཕྱིར་ན་མཆོད་པར་བྱ་ཞེས་སོ། །ད་ནི་མི་མཐུན་པའི་ཕྱིར་བརྟུལ་ཞུགས་ཀྱིས་སློད་མོ་དགག་པ་གསུངས་པ། དཀའ་ཐུབ་དམ་བཅས་ཞེས་བྱ་བ་ལ་སོགས་པ་གསུངས་པའོ། །དཀའ་ཐུབ་ནི་ཕྱི་དང་ནང་གིའོ། །དེ་ཉིད་ལུས་དང་སེམས་ཚི་ཆད་པས་ན་མི་བཟད་པའོ། །དེ་ལ་བརྟེན་ཀྱང་འགྲུབ་པར་མི་འགྱུར་ཞེས་པ་ནི་ཕྱག་རྒྱ་ཆེན་པོའོ། །སློང་མོ་ཟ་ཞིང་མི་བཟླས་ཏེ། །ཞེས་པ་ནི་བྱ་བའི་རྒྱུད་ལས་དགར་བའི་ཕྱིར་རོ། །འོ་ན་བསླང་མི་དགོས་ན་ཅི་བྱ་ཞེ་ན། མ་བསླངས་པ་ཡང་ཆགས་མི་བྱ། །ཞེས་ཏེ་ལུས་གནས་པ་ཙམ་གྱིས་ཆོག་ཤེས་པར་བྱས་ནས་འདོད་པ་ཀུན་ལ་ལྟག་འོག་ལྟར་ལོངས་སྤྱོད་ཅིང་བསྙེན་པ་ལ་སོགས་པའི་ཡན་ལག་མ་ཉམས་པར་བཟླས་པར་བྱའོ་ཞེས་སོ། །དེའི་ཕན་ཡོན་དང་ཉེས་དམིགས་བསྟན་པ། ལུས་དང་ཞེས་པ་ལ་སོགས་པའོ། །གཞན་དུ་ཞེས་པ་ནི་འདིའི་སྦྱོར་བ་ལས་ལོག་ཅིང་རྒྱུན་བཏང་པའོ། །དུས་མིན་འཆི་བའི་ཞེས་པ་ནི་གློ་བུར་དུ་
འཆི་བ་སྟེ། མཁའ་འགྲོ་ལ་སོགས་པས་གསོད་པའོ། །མ་མཐོང་བའི་འབྲས་བུ། དམྱལ་བར་ངེས་པར་བསྲེག་པར་འགྱུར། །ཞེས་སོ། །འདས་པའི་ཡེ་ཤེས་ཅན་ཡང་ལམ་འདིས་གྲོལ་བར་གསུངས་པ། སངས་རྒྱས་ཞེས་བྱ་བ་ལ་སོགས་པའོ། །སྔགས་ཀྱི་སྤྱོད་པའི་མཆོག་རྣམས་ཞེས་བྱ་བ་ནི་འདས་པའི་རིག་པ་འཛིན་པའོ། །ཆོས་མཆོག་མི་གཡོ་ཞེས་པ་ནི་ཟབ་གསལ་གཉིས་སུ་མེད་པའི་ཡེ་ཤེས་སོ། །དེ་མཉེས་པ་ཡང༌། འདོད་པ་ཐམས་ཅད་བསྟེན་པས་སོ། །ཞེས་སོ། །དེ་བས་ཆགས་པའི་ཡེ་ཤེས་ནི་ས་བཅུ་གསུམ་པའོ། །དེ་འདོད་པས་འདོད་པའི་ཡོན་ཏན་བསྟེན་ཏོ། །ཅིའི་ཕྱིར་ཞེ་ན། བྱང་ཆུབ་དཔའ་བོ་ནི་རིགས་ལྔའོ། །དེ་ལ་ཆགས་པར་བྱའོ། །བྱང་ཆུབ་སེམས་དཔའ་ནི་སའི་སྙིང་པོ་ལ་སོགས་པ་སྟེ་མཉེས་པར་བྱའོ་ཞེས་སོ། །དེ་ལྟར་སྤྱོད་ཡུལ་རང་གི་ལྷར་བལྟ་བ་བསྟན་ནས། ད་ནི་དེ་ཉིད་ལྷར་བལྟ་བ་གསུངས་པ། གཟུགས་ལ་ཞེས་པ་ལ་སོགས་པའོ། །གཟུགས་ཞེས་བྱ་བ་ནི་མིག་གི་ཡུལ་ལོ། །རྣམ་གསུམ་ཞེས་པ་ནི་དམན་པ་དང་བར་མ་དང་མཆོག་གོ །དེ་ཤེས་པར་བྱས་ནས་ཞེས་སོ། །མཆོད་པ་དག་གིས་མཉེས་པར་བྱ། །ཞེས་སོ། །སོ་སོ་འམ་གཅིག་ཏུ་ཞེས་པ་ནི་མཆོད་པར་བྱེད་པའོ། །ཇི་ལྟར་ཤེས་པར་བྱ་ཞེ་ན། དེ་ཉིད་བཅོམ་ལྡན་ཞེས་པ་ནི་སྣ་ཚོགས་ཀྱི་ངོ་བོར་སྣང་བའི་ཕྱིར་རོ། །གང་ཞེ་ན། སངས་རྒྱས་རྣམ་པར་སྣང་མཛད་ཀྱི་གཞི་ཞེས་ཏ། དེ་ལྟར་བལྟ་བར་བྱ་ཞེས་སོ། །དེ་བཞིན་དུ་གཞན་ལ་ཡང་སྦྱར་བར་བྱའོ། །སངས་རྒྱས་རིན་ཆེན་འབྱུང་གནས་གཙོ། །ཞེས་པ་ནི་ཆོས་ཀྱི་དབྱིངས་ལས་དོན་ཐམས་ཅད་འབྱུང་བའི་ཕྱིར་ནི་མི་བསྐྱོད་པའོ། །སངས་རྒྱས་འདོད་ཆགས་འཛིན་པའི་གཙོ། །ཞེས་པ་ནི། རྗེས་སུ་ཆགས་པའི་རང་བཞིན་ཡིན་པས་ན་རིན་ཆེན་འབྱུང་ལྡན་ནོ། །སངས་རྒྱས་ཐོགས་མེད་རྡོ་རྗེ་འཛིན། །ཞེས་པ་ནི་རྒྱ་ལ་སོགས་པ་ལ་ཐོགས་པ་མེད་ཅིང་གནས་པ་སྟེ་འོད་དཔག་མེད་དོ། །མི་བསྐྱོད་པ་ཡི་ཚུལ་བརྙེས་པ། །ཞེས་པ་ནི་རྟག་དབང་གིས་དམ་ཚིག་ཏུ་སྤྱིའི་མཚན་ཉིད་དུ་གནས་པ་དེ་བཞིན་ཏེ། འདི་ཡང་སྤྱིའི་ལས་བྱེད་པས་ན་དོན་ཡོད་གྲུབ་པའོ། །
ད་ནི་དོ་དག་ཀྱང་རྡོ་རྗེ་འཆང་ཆེན་པོར་བལྟ་བ་གསུངས་པ། གཟུགས་སྒྲ་ཞེས་པ་ལ་སོགས་པའོ། །གཟུགས་ལ་སོགས་པའི་འདོད་པ་ལ་གོང་མ་ལྟར། རྟག་ཏུ་སེམས་ནི་སྦྱོར་བར་བྱ། །ཞེས་པ་ནི་སྤྱོད་ཡུལ་དེ་དང༌། དེ་རྡོ་རྗེ་འཆང་བར་སྦྱར་ཏེ་དེ་བས་ན། འདི་ནི་སངས་རྒྱས་ཐམས་ཅད་ཀྱི། །གསང་བའི་སྙིང་པོ་བཏུས་པ་ཡིན། །ཞེས་སོ། །ད་ནི་དེ་དག་རང་རང་གི་དག་པ་ལྟ་བ་གསུངས་པ། གཟུགས་སྒྲ་ཞེས་པ་ལ་སོགས་པའོ། །གོང་མ་ལྟར་འདོད་པ་ལྔ། ལྷ་ཉིད་དུ་ནི་རྟག་ཏུ་བསྒོམ། །ཞེས་པ་ནི་གཟུགས་ཀྱི་རྡོ་རྗེ་མ་ལ་སོགས་པའོ། །ཇི་ལྟར་བསྒོམ་ཞེ་ན། ཡང་ན་དེ་ལ་བསྒོམ་པ་ནི་རིགས་ཀྱི་ཚུལ་དུ་རྣམ་པར་བསྒོམས་ཞེས་ཏེ། ཇི་ལྟར་གཟུགས་ལ་སོགས་པ་ལ་རྟག་པ་ལ་སོགས་པ་རིགས་ཕྱེ་ནས་བསྒོམ་པ་དེ་བཞིན་དུ་བསྒོམ་པར་བྱའོ་ཞེས་སོ། །ཇི་སྐད་དུ། གཟུགས་སྒྲ་ལ་སོགས་འདོད་པ་ལ། །བདེ་དང་སྡུག་བསྔལ་བདག་ཉིད་འབྱུང༌། །རྟག་ཏུ་སྙིང་ལས་སྐྱེ་བ་ནི། །འདོད་ཆགས་ཞེ་སྡང་མུན་པ་འབྱུང༌། །འདོད་ཆགས་འདོད་ཆགས་དངོས་རྡོ་རྗེ། །རྡོ་རྗེ་བཞིན་དུ་རིན་ཆེན་འབྱུང༌། །རིན་ཆེན་བཞིན་དུ་དམ་ཚིག་ཤེས། །འདོད་པ་གསུམ་ནི་དམ་ཚིག་འདྲ། །ཞེས་སོ། །ད་ནི་མཚན་མ་ལྔ་པོ་མཐོང་བའི་དེ་མ་ཐག་ཏུ་སྤྲོ་བ་དང་བསྡུ་བའི་སྔོན་མཐོང་བའི་དོན་རྗེས་སུ་དྲན་པ་གསུངས་པ། སངས་རྒྱས་ཞེས་བྱ་བ་ལ་སོགས་པའོ། །སངས་རྒྱས་ནི་རྣམ་པར་སྣང་མཛད་དོ། །དེའི་རྗེས་སུ་དྲན་པ་དྲུག་པ་ནི་སྤྲོ་བ་ལས་གསལ་བར་རོ། །སྦྱོར་བ་ཞེས་པ་ནི་ཐབས་དང་ཤེས་རབ་གཉིས་སུ་མེད་པར་རོ། །ཆོས་ནི་ཞེས་པ་ནི་འོད་དཔག་ཏུ་མེད་པས་སོ། །རྡོ་རྗེ་ཞེས་པ་ནི་མི་བསྐྱོད་པའོ། །དེ་རྣམས་ཀྱི་སྐུ་དང་གསུང་དང་ཐུགས་རྣམས་བསྒོམ་པའོ། །རིགས་ནི་ཞེས་པ་ནི་གཉིས་དང༌། འཁོར་ལོ་ཅན་གཞན་རྣམས་སོ། །ཁྲོ་བོ་ཞེས་པ་ནི་གཤིན་རྗེ་གཤེད་པོ་ལ་སོགས་པའོ། །ལྷའི་ཞེས་པ་རྣམ་པ་གཞན་རྣམས་སོ། །དེ་རྣམས། བསྒོམས་ན་བྱང་ཆུབ་ཐོབ་པར་འགྱུར། །ཞེས་ཕན་ཡོན་ནོ། །ད་ནི་དབང་བསྐུར་བའི་དེ་མ་ཐག་ཏུ་རིག་མ་བྱིན་གྱིས་བརླབ་པའི་ཆོ་ག་གསུངས་པ། །བུད་མེད་
ཅེས་པ་ལ་སོགས་པའོ། །རབ་ཏུ་མདངས་བཟང་ཞེས་པ་ནི་རིགས་ཀྱི་ཕྱག་རྒྱ་ཡིད་དུ་འོང་བའོ། །ལོ་གྲངས་བཅུ་དྲུག་ཅེས་པ་ནི་སྟོང་པ་ཉིད་དག་པའོ། །བྱིན་གྱི་རླབས་ཀྱིས་གནས་གསུམ་གྱི། །ཞེས་བྱ་བ་ནི་བར་མའི་སྒྲུབ་པ་གསུངས་པའོ། །དེ་དང་ལྷན་ཅིག་ཏུ། དབེན་པར་མཆོད་པ་རབ་ཏུ་བརྩམ། །ཞེས་སོ། །དེ་བཞིན་གཤེགས་པའི་བཙུན་མོའི་མཆོག །སྤྱན་ལ་སོགས་པ་བསྒོམ་པར་བྱ། །ཞེས་པ་ནི་རྟག་པ་ལ་སོགས་པའི་རྣལ་འབྱོར་པས་ཟླ་བ་གཉིས་ལ་སོགས་པའི་རིམ་པས་དེ་དང་འདྲ་བར་བསྒོམས་ནས་ཡན་ལག་གཞན་ཡང་རྟོགས་པར་བྱའོ། །དེ་ནས། དབང་པོ་གཉིས་ནི་མཉམ་སྦྱོར་བས། །སངས་རྒྱས་དངོས་གྲུབ་ཐོབ་པར་འགྱུར་རོ། །རིགས་ལྔས་ཁྱབ་པར་བྱས་པའི་དེ་མ་ཐག་ཏུ་གསང་བའི་གནས་བྱིན་གྱིས་བརླབ་པ་གསུངས་པ། ཡི་གེ་ཧཱུཾ་ཞེས་པ་ལ་སོགས་པའོ། །ཡི་གེ་ཧཱུཾ་ཞེས་པ་ནི་རྡོ་རྗེ་དང་པདྨ་གཉིས་རྫོགས་པར་བྱའོ། །ཨོཾ་གྱིས་ནོར་བུའི་ཆ་བསྐྱེད་པའོ། །ཨ་ཡིས་པདྨའི་གེ་སར་བསྐྱེད་པའོ། །ཕཊ་ཀྱིས་གཉིས་ཀྱི་ལམ་དུ་གནས་པའོ། །དེ་བརྟགས་པས་འོད་ཟེར་ལྔ་དང་ལྡན་པའི་པདྨ་དང་རྡོ་རྗེ་བསྒོམ་པར་བྱའོ། །ད་ནི་རྗེས་སུ་ཆགས་པའི་དེ་མ་ཐག་ཏུ་དེ་བཞིན་གཤེགས་པ་ཐམས་ཅད་བསྡུས་པའི་ངོ་བོ་ཟླ་བར་ཞུ་བའི་ཆོ་ག་གསུངས་པ། འབར་བཅས་ཞེས་བྱ་བ་ལ་སོགས་པའོ། །དེ་ཡང་འོད་ཟེར་འབར་བ་དང་བཅས་པ་ཟླ་བའི་འོད་བཞིན་དུ་དཀར་བ་དེ་ཉིད། ཡིད་དུ་འོང་བ་བསྒོམ་པར་བྱ། །ཞེས་པ་ནི་ཡིད་ཚིམ་པར་བྱེད་པ་སྟེ། དེའི་དུས་སུ་ཡེ་ཤེས་དང་ཤེས་བྱའི་ཆ་རྣམས་ཟད་པའི་ཕྱིར་རོ། །གོང་དུ་བསྟན་པའི་རྗེས་སུ་དྲན་པ་དྲུག་རྣམ་པ་བཅུ་དྲུག་ཏུ་དབྱེ་བ་གསུངས་པ། སངས་རྒྱས་རྗེས་དྲན་ཞེས་པ་ལ་སོགས་པ་གསུངས་པའོ། །དེ་ལ་སངས་རྒྱས་རྗེས་སུ་དྲན་པ་ཇི་ལྟར་བསྒོམ་ཞེ་ན་ཞེས་པ་ནི་གཞུང་རྒྱས་པར་བྱ་བའི་དྲི་བ་སྟེ་རང་ཉིད་ཀྱིས་སོ། །བྷ་ག་ཞེས་པ་ནི་པདྨའོ། །ལིངྒ་ཞེས་པ་ནི་རྡོ་རྗེའོ། །དེ་གཞག་པ་ནི་འདུས་པ་ལས་སངས་རྒྱས་ཞེས་བྱ་སྟེ། འཁོར་ལོའི་ལྟེ་བ་ལ་གནས་པའི་རྣམ་པར་སྣང་མཛད་ཀྱི་དཀྱིལ་འཁོར་བསྒོམ་པར་བྱའོ། །དེ་ལ་བརྟེན་ནས་བ་སྤུའི་བུ་ག་རྣམས་ཏེ།
དེའི་ཐིག་ལེ་ལས་བ་སྤུའི་བུ་གར་འཐོན་ཏེ། མཁས་པས་སངས་རྒྱས་སྤྲིན་རྣམས་སྤྲོ། །ཞེས་པ་ནི་སངས་རྒྱས་ཀྱི་གཟུགས་སྤྲོ་བར་བྱ་བ་ལས་སྔོན་གྱི་ཆ་ལུགས་ལ་སོགས་པའི་དྲན་པ་སྐྱེ་བ་སྟེ་འདིས་ནི་འོད་འབྱུང་བར་ངེས་སོ། །དེ་ལ་དམ་ཚིག་ལ་སོགས་པ་གཞན་ཡང་དྲན་པར་བྱ་སྟེ་འདི་ནི་ཀུན་ལ་སྦྱར་བར་བྱའོ། །རྡོ་རྗེ་སེམས་དཔའ་ཞེས་པ་ནི་གཉིས་སོ། །རིགས་ཀྱི་ཞེས་པ་ནི་འཁོར་ལོ་དང་ལྡན་པའི་ལྷ་མོར་ཡང་གཟུང་ངོ༌། །བདག་གི་རྡོ་རྗེ་པདྨར་སྦྱར། །དབང་པོ་གཉིས་ནི་མཉམ་སྦྱོར་ཏེ། །ཞེས་པ་ནི་རྗེས་སུ་ཆགས་པའི་ཡན་ལག་གོ །རང་གི་ཁུ་བའི་ཐིགས་པ་ཡིས། །ཞེས་བྱ་བ་ནི་ཟླ་བ་ཞུ་བའི་ཆོ་ག་རྗེས་སུ་དྲན་པར་བྱ་སྟེ། དེས་སངས་རྒྱས་དང་རྡོ་རྗེ་སེམས་དཔའ་བསྐྱེད་པའོ། །མཉེས་པའི་ཕྱིར་ན་མཆོད་པའོ། །དེ་ལས་ཕྱེ་བ་ནི་དཀྱིལ་འཁོར་རྗེས་སུ་དྲན་པའོ། །དེ་ལ་ཇི་ལྟར་བསྒོམ་ཞེ་ན། གོང་མ་ལྟར་དབང་པོ་གཉིས་མཉམ་པར་གཞག་སྟེ། སྦྱོར་བ་ལ་མཁས་པས་རང་གི་ཁུ་བ་དག་དབྱུང་ཞེས་བྱའོ། །དེ་ཅིའི་ཕྱིར་དབྱུང་ཞེ་ན། དཀྱིལ་འཁོར་དཀྱིལ་འཁོར་ཚུལ་དུ་བྱ། །ཞེས་པ་ནི་ཆོ་ག་ལྷག་མ་དྲན་པའོ། །སྐུ་རྗེས་སུ་དྲན་པ་ནི། སྤྲུལ་པའི་སྐུས་དག་པའི་རྡོ་རྗེས་མཚན་པ་སྟེ། དེ་ཇི་ལྟར་བསྒོམ་ཞེ་ན། སངས་རྒྱས་ཀུན་གྱི་ཞེས་པ་ནི་དེ་བཞིན་གཤེགས་པ་རྣམས་སོ། །དེ་རྣམས་ཀྱི་སྐུ་གང་ཡིན་པ་དེ་ནི། ཕུང་པོ་ལྔ་ཡིས་རབ་ཏུ་རྒྱས། །ཞེས་བྱ་བ་ནི། ཡོངས་སུ་དག་པའི་གཟུགས་ལ་སོགས་པས་གང་བའོ། །དེའི་རྟགས་སངས་རྒྱས་སྐུའི་རང་བཞིན་ཏེ་སྐུ་རྡོ་རྗེའོ། །བདག་ཀྱང་དེ་དང་འདྲ་བར་འགྱུར། །ཞེས་པ་ནི་གོང་དུ་བསྒོམས་པ་ལྟ་བུར་སྨོན་པའོ། །དེ་བཞིན་དུ་གཞན་ལ་ཡང་སྦྱར་བར་བྱའོ། །རྡོ་རྗེ་ཆོས་ཀྱི་གསུང་གང་ཡིན་པ་དེ་ཇི་ལྟ་བུ་ཞེ་ན། གསུང་ངེས་ཚིག་ཕུན་སུམ་ཚོགས་ཏེ། ངེས་པའི་ཚིག་ཕུན་སུམ་ཚོགས་པ་སྨྲ་བ་ལ་མཁས་པ་ཞེས་བྱའོ། །དེའི་ངོ་བོ་ནི་བདག་གི་ཚིག་ཀྱང་དེ་འདྲ་སྟེ་ཐ་དད་པ་མ་ཡིན་པའོ། །དེའི་རྟགས་ཆོས་འཛིན་པ་སྟེ་གསུང་རྡོ་རྗེ་དང་འདྲ་བར་འགྱུར་ཞེས་སྨོན་པའོ། །གསང་བའི་དབང་པོ་ནི་རྡོ་རྗེ་འཛིན་པའོ། །རིག་མ་དང་ལྡན་པས་ན་བློ་
ལྡན་པའོ། །དེའི་ཀུན་དུ་བཟང་པོའི་ཐུགས་གང་ཡིན་པའི་རྟགས་ནི་རྡོ་རྗེ་འཛིན་པ་ལྟ་བུ་ཞེས་པ་ནི་ཐུགས་རྡོ་རྗེའོ། །བདག་གི་སེམས་ཀྱང་དེ་འདྲ་བར་འགྱུར་ཞེས་སྨོན་པའོ། །ཐུགས་ཀྱི་རང་བཞིན་ནི་ཀུན་ལ་ཁྱབ་པའི་ཕྱིར་དེ་ལས་ཕྱེ་བ་ནི་སེམས་ཅན་རྗེས་སུ་དྲན་པའོ། །དེ་ཇི་ལྟར་བསྒོམ་ཞེ་ན། སེམས་ཅན་གྱི་ཞེས་པ་ནི་བཞིས་བསྡུས་པ་རྣམས་སོ། །དེ་རྣམས་ཀྱི་སེམས་གང་ཡིན་པ་ནི་རྡོ་རྗེ་གསུམ་གྱིས་མཚན་པ་སྟེ་རྒྱས་བཏབ་པའོ། །རྒྱས་བཏབ་པས་སངས་རྒྱས་ཐམས་ཅད་ཀྱང་ངོ༌། །དེ་བས་ན། སྤྱོད་པ་མཁའ་དང་མཚུངས་པར་འགྱུར།། ཞེས་པ་ནི་དེ་རྣམས་ཀྱི་སྤྱོད་པ་ནི་དམིགས་པ་མེད་པས་ན་ནམ་མཁའ་དང་འདྲ་སྟེ་དེ་དང་བདག་མཚུངས་པར་གྱུར་ཅིག་པའོ། །སྔགས་ཐམས་ཅད་ཅེས་པ་ནི་ཧཱུཾ་དང་གང་ཡང་རུང་བའོ། །དེའི་སྤྱིའི་གཟུགས་ནི་བསྐྱེད་པའི་སྐུ་གཉིས་སོ། །སྐུ་དང་གསུང་དང་ཐུགས་ནི་དེས་མཚན་པའོ། །དེ་རྗེས་སུ་དྲན་པ་ཇི་ལྟར་བསྒོམ་ཞེ་ན། སྔགས་ཀྱི་རྡོ་རྗེ་སྐུ་གང་ཡིན། །ཞེས་པ་ནི་དང་པོའི་མགོན་པོ་དང་ཆུང་ངུའི་འབྲས་བུ་བཞིའི་སྐུ་སྟེ་སྔགས་ལས་བྱུང་བའི་ཕྱིར་རོ། །ངག་གིས་ཞེས་པ་ནི་ཚིགས་བཅད་དང་སྔགས་ཀྱིས་སོ། །སྐུ་ལ་རྣམ་བསྒོམས་པས་ཞེས་པ་ནི་རྒྱས་བཏབ་ནས་བྱིན་གྱིས་བརླབས་པའི་སྐུ་དེ་དང་འདྲ་བར་འགྱུར་ཞེས་པའོ། །དེ་གང་ཞེ་ན། སྔགས་ཀྱིས་འཛིན་པ་ལྟ་བུར་འགྱུར། །ཞེས་ཏེ་སྔགས་རྣམས་ཀྱི་དོན་འདི་ལྟ་སྟེ། །དེ་འཛིན་པའི་རྟེན་དུ་གྱུར་ཅིག་ཅེས་སྨོན་པའོ། །གོང་གི་དམ་ཚིག་རྗེས་སུ་དྲན་པ་ལས་དབྱེ་བ་ནི་དམ་ཚིག་རྗེས་སུ་དྲན་པའོ། །དེ་ལ་དམ་ཚིག་ཅེས་པ་ནི་རིག་མའོ། །དེ་ལས་ཁུ་བ་དབྱུང་བ་ཆོ་ག་བཞིན་དུ་འབྲས་བུ་འདོད་པའི་རྣལ་འབྱོར་པས་བཏུང་བར་བྱའོ། །དེ་བདུད་རྩིས་མཉེས་པར་བྱ་བ་དྲན་པའོ། །དེ་བཞིན་གཤེགས་པའི་སྡེ་བསད་ན། །ཞེས་པ་ནི་ཐམས་ཅད་མཉམ་པ་ཉིད་དུ་བྱས་པའོ། །དངོས་གྲུབ་ཤིན་ཏུ་ཞེས་པ་ནི་ཆོས་ཀྱི་སྐུ་སྟེ་དེ་ཐོབ་པར་འགྱུར་ཞེས་སོ། །ཤེས་རབ་ནི་སྦྱོར་བ་ལས་བྱུང་བའོ། །དེའི་ཕ་རོལ་ཏུ་ཕྱིན་པ་ནི་དེ་བཞིན་ཉིད་དོ། །མི་འདའ་བས་ན་དམ་ཚིག་སྟེ། །དེ་རྗེས་སུ་དྲན་པ་ཇི་ལྟར་བསྒོམ་
ཞེ་ན། རང་བཞིན་གྱིས་ནི་འོད་གསལ་མཆོག །ཅེས་པ་ནི་གཟོད་མ་ནས་དག་པ་སྟེ། བྱེད་པས་ནི་མ་ཡིན་ནོ། །ཐམས་ཅད་ནི་ཆོས་དེ་ཉིད་དོ། །མ་སྐྱེས་ཞེས་བྱ་བ་ནི་ཀུན་བརྟགས་ཀྱིས་སོ། །ཟག་པ་མེད་པ་ཞེས་པ་ནི་འདོད་ཆགས་ལ་སོགས་པ་མེད་པའོ། །བྱང་ཆུབ་མེད་ཅིང་མངོན་རྟོགས་མེད། །དབྱིངས་ཀྱང་མེད་ཅིང་འབྱུང་བའང་མེད། །ཅེས་པ་ནི་རང་བཞིན་གྱིས་འོད་གསལ་བའི་སེམས་དེ་ལས་མི་བྱེད་པའི་ཕྱིར་རོ། །འདི་ནི་ཐུན་མོང་གི་བྱང་ཆུབ་ཀྱི་སེམས་དྲན་པའོ། །མ་སྐྱེས་པ་ཤེས་པ་ནི་དེ་བཞིན་ཉིད་དེ་འཇའ་ཚོན་ལྟ་བུ་མི་འགོག་པའོ། །དེ་རྗེས་སུ་དྲན་པ་ཇི་ལྟར་བསྒོམ་ཞེ་ན། རང་བཞིན་གྱིས་ནི་འོད་གསལ་བ། །ཞེས་པ་ནི་གོང་མ་ལྟར་རོ། །མཚན་མ་མེད་པ་ཞེས་པ་ནི་ཤེས་བྱའི་ངོ་བོ་ཉིད་དོ། །དེ་ཁོ་ན་བཞིན་དུ་གནས་པས་ན་མི་འགྱུར་བ་ནམ་མཁའ་བཞིན་ནོ། །གཉིས་མེད་ཅེས་པ་ནི་ཟབ་མོའོ། །གཉིས་སུ་མེད་མིན་ཞེས་བ་ནི་གསལ་བའོ། །དེ་ཉིད་བརྟན་པར་ཟློས་པའོ། །ཤིན་ཏུ་དྲི་མེད་ནམ་མཁའ་བཞིན། །ཞེས་སོ། །དེ་གཉིས་སུ་མེད་པའི་ངོ་བོ་དྲན་པའོ། །ཞེ་སྡང་གི་རིགས་ལ་སོགས་པ་ནི་མི་བསྐྱོད་པ་ལ་སོགས་པའོ། །དེའི་མཆོད་པ་ནི་མཱ་མ་ཀཱི་ལ་སོགས་པ་སྟེ། དེ་རྗེས་སུ་དྲན་པ་ཇི་ལྟར་བསྒོམ་ཞེ་ན། བུད་མེད་སེམས་ནི་རབ་བརྟན་པ། །ཞེས་པ་ནི་ལེགས་པར་བསླབས་ཤིང་ལྡོག་པ་མེད་པའོ། །དེ་ཡང་འཁོར་ལོ་ལྡོག་པས་ན་ལོ་གྲངས་བཅུ་གཉིས་ལོན་པའོ། །རིགས་ཀྱི་སྦྱོར་བ་རབ་བསྒོམས་ཏེ། །ཞེས་པ་ནི་གོང་མ་ལྟར་རང་གི་རིགས་ཀྱི་བུ་མོས་པར་མའི་བསྙེན་སྒྲུབ་བཞིས་བྱིན་གྱིས་བརླབས་ལ། བདག་གི་ཁུ་བ་མཆོད་པ་དྲན་པར་བྱ་བ་ལ་དེ་སྐད་ཅེས་བྱའོ། །དེ་རྣམས་ཀྱང་བཅུ་དྲུག་དང༌། བཅུ་གཅིག་དང༌། བརྒྱད་དུ་ཤེས་པར་བྱའོ། །ད་ནི་རིམ་པ་གཉིས་ལ་གཞོལ་བའི་ཕན་ཡོན་གཉིས་གསུངས་པ། འདིས་ནི་ཞེས་པ་ལ་སོགས་པའོ། །དེ་བཞིན་གཤེགས་པའི་སྐུ་ཞེས་པ་ནི་སྐུ་རྡོ་རྗེའི་རང་བཞིན་མཚན་དང་དཔེ་བྱད་ཀྱིས་ཡང་དག་པར་བརྒྱན་པའི་སྐུའོ། །རྡོ་རྗེ་འཛིན་པའི་ཐུགས་དང་ཞེས་པ་ནི་ཐུགས་རྡོ་རྗེའི་རང་བཞིན་ཡེ་ཤེས་དཔག་ཏུ་མེད་པ་བསགས་པའི་ཐུགས་སོ།།
ཆོས་འཛིན་མཆོག་གི་གསུང་དག་ཀྱང༌། །ཞེས་པ་ནི་གསུང་རྡོ་རྗེའི་རང་བཞིན་ཏེ། ཟབ་ཅིང་སྙན་པ་ལ་སོགས་པའི་དབྱངས་ཀྱིས་འགྲོ་བ་སོ་སོའི་ཡིད་ཚིམ་བར་བྱེད་པའོ། །ཚེ་འདི་ཉིད་ལ་ཐོབ་པར་འགྱུར། །ཞེས་པ་ནི་ཉིན་མཚན་དུ་སྦྱོར་བ་མི་ཞན་པ་སྟེ་གཞན་ནི་མ་གཏོགས་སོ། །སྐུ་དང་གསུང་དང་ཐུགས་ཀྱང་འགྲུབ། །ཅེས་པ་ནི་དེ་དང་འདྲ་བ་སྟེ་རིགས་འཛིན་པའོ། །གཞན་ཕྲ་མོ་ཞེས་པ་ནི་མི་སྣང་བ་ལ་སོགས་པ་དང་ལས་ཀྱི་ཁྱད་པར་རོ། །རྡོ་རྗེ་གསུམ་ནི་གང་དུ་ཡང་མི་ཕྱེད་པ་སྟེ། དེ་ལྟར་འོག་གི་རིམ་པ་བསྒོམ་པས་ན། བཟླས་པ་ཙམ་གྱིས་ཤེས་པ་ནི་བར་མའི་རིམ་པས་སོ། །གཞན་ནི་བཤད་ཟིན་ཏོ། །ལེའུ་བདུན་པའི་འགྲེལ་པའོ།། །།