འཕགས་པ་སྤྱན་རས་གཟིགས་འཇིག་རྟེན་དབང་ཕྱུག་སྒྲུབ་པའི་ཐབས།
མར་མེ་མཛད་ཡེ་ཤེས།
― DTG044_Page_0462 ―
[མ་དཔེ་གཟིགས་ན་འདིར་གནོན།]
རྒྱ་གར་སྐད་དུ། ཨཱཪྻཱ་ཝ་ལོ་ཀ་ཏེ་ཤྭ་ར་སཱ་དྷ་ནཾ། བོད་སྐད་དུ། འཕགས་པ་སྤྱན་རས་གཟིགས་འཇིག་རྟེན་དབང་ཕྱུག་སྒྲུབ་པའི་ཐབས། འཇིག་རྟེན་མགོན་པོ་ལ་ཕྱག་འཚལ་ལོ། །གང་ཐུགས་ཐུགས་རྗེའི་དབང་གྱུར་ཏེ། །རྟག་ཏུ་གཞན་གྱི་དོན་མཛད་པ། །འཇིག་རྟེན་མགོན་ལ་ཕྱག་འཚལ་ཏེ། དེ་ཡི་སྒྲུབ་ཐབས་བྲི་བར་བྱ། །བྱང་ཆུབ་ཏུ་ནི་སེམས་བསྐྱེད་ཅིང༌། །དད་དང་སྙིང་རྗེར་ལྡན་པ་དང༌། །བླ་མ་ལ་གུས་གཏོང་སེམས་ལྡན། །བདེན་པར་སྨྲ་ཞིང་བརྩོན་ལྡན་པས། །ཡིད་དང་རྗེས་སུ་མཐུན་གནས་
― DTG044_Page_0463 ―
[མ་དཔེ་གཟིགས་ན་འདིར་གནོན།]
སུ། །བདེ་བའི་སྟ་ན་ལ་འདུག་ནས་ཀྱང༌། །སྔོན་དུ་བྱ་བ་རྣམས་བྱས་ལ། །འཇིག་རྟེན་མགོན་པོ་བསྒྲུབ་པར་བྱ། །དང་པོ་བདག་ཉིད་ཀྱི་སྙིང་གར་ཨ་ལས་རི་བོང་ཅན་བསམས་ལ། དེའི་སྟེང་དུ་ས་བོན་གྱི་ཡི་གེ་བསམས་ཏེ། དེ་ལས་འོད་འཕྲོས་པས་འཇིག་རྟེན་མགོན་པོ་སྤྱན་དྲངས་ཏེ། ཕྱག་ལ་སོགས་པ་ཡན་ལག་བདུན་པ་བྱའོ། །དེ་ནས་གསུམ་ལ་སྐྱབས་སུ་འགྲོ་བ་དང་སེམས་བསྐྱེད་པ་བྱས་ལ་སྙིང་རྗེ་ཆེན་པོ་བསྒོམ་པར་བྱའོ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭཱ་བྷཱ་ཝ་ཨཱཏྨ་ཀོ྅ཧཾ། ཞེས་བརྗོད་དོ། །དེས་དངོས་པོ་ཐམས་ཅད་གཟུང་བ་དང་འཛིན་པ་གཉིས་སུ་མེད་པ་སྟོང་པ་ཉིད་དུ་བསྒོམ་པར་བྱའོ། །དེ་ནས་རང་གི་སེམས་ཉིད་བཾ་ལས་པདྨ་འདབ་མ་བརྒྱད་པར་བསམས་ཏེ། དེའི་སྟེང་དུ་ཨ་ལས་ཟླ་བའི་དཀྱིལ་འཁོར་རོ། །དེའི་དབུས་སུ་ཡང་ས་བོན་གྱི་ཡི་གེ་དེ་ཉིད་དོ། །དེ་ལས་འོད་འཕྲོས་འགྲོ་བ་རྣམས་དག་པར་བྱས་ནས་དེ་ཉིད་དུ་བསྡུ་བར་བྱའོ། །དེ་ཡོངས་སུ་གྱུར་བ་ལས་བདག་ཉིད་འཇིག་རྟེན་མགོན་པོ་སྐུ་མདོག་དམར་པོ། ཞལ་གསུམ་པ། དམར་པོ་དང༌། དཀར་པོ་དང༌། སྔོན་པོར་སྣང་བ་དང༌། ཕྱག་དྲུག་པ་གཡས་གཡོན་དང་པོ་གཉིས་སྙོམ་པར་འཇུག་པའི་ཕྱག་རྒྱ་ཅན། གཡས་ཀྱི་གཉིས་པ་དང༌། གསུམ་པ་ན་པདྨ་དང་རལ་གྲི་བསྣམས་པ། གཡོན་གྱི་གཉིས་པ་དང༌། གསུམ་པ་ན་རིན་པོ་ཆེ་དང་འཁོར་ལོ་བསྣམས་པའོ། །དེའི་ཐུགས་ཀར་ཡེ་ཤེས་སེམས་དཔའ་རང་དང་འདྲ་བའི་ཆ་ཕྲ་བའོ། །དེའི་ཐུགས་ཀར་རི་བོང་ཅན་ལ་ས་བོན་གྱི་ཡི་གེའོ། །དེ་ལས་འོད་འཕྲོས་ཏེ། ཡེ་ཤེས་པ་རང་བཞིན་གྱི་གནས་ནས་སྤྱན་དྲངས་ལ་མཆོད་པ་བྱས་ལ། ཛཿཧཱུཾ་བཾ་ཧོཿ། ཞེས་བརྗོད་དེ། རང་ལ་དགུག་པ་དང༌། གཞུག་པ་དང༌། བཅིང་བ་དང༌། མཉེས་པར་བྱའོ། དེ་ནས་གནས་གསུམ་དུ་ཡི་གེ་གསུམ་བསམས་ལ། སྐུ་གསུང་ཐུགས་བྱིན་གྱིས་བརླབ་པར་བྱའོ། །ཡང་ས་བོན་ལས་འོད་འཕྲོས་ཏེ། སངས་རྒྱས་ལྔ་སྤྱན་དྲངས་ལ་མཆོད་པ་བྱས་ལ། མགོན་པོ་དེ་བཞིན་གཤེགས་པ་ཀུན་གྱིས། །བདག་ལ་དབང་བསྐུར་མཛད་
― DTG044_Page_0464 ―
[མ་དཔེ་གཟིགས་ན་འདིར་གནོན།]
དུ་གསོལ། །ཞེས་གསོལ་བ་གང་བ་ཅིང༌། དེས་དབང་བསྐུར་བར་བསམ་ཞིང་རིགས་ཀྱི་བདག་པོས་རྒྱས་གདབ་པོ། དེ་ཉིད་རྣམ་པར་གསལ་བར་བསྒོམ་པར་བྱའོ། །ཡང་འབྱུང་བ་རླུང་ལས་གྲུབ་པའི་པདྨ་ཙ་ན་ཀའི་ཚད་ཙམ་སྟེང་གི་སྣའི་རྩེ་མོར་རེག་པའི་མཚན་མ་དང༌། གཟུགས་ཀྱི་མཚན་མ་བྱུང་བའི་བར་དུ་བསྒོམ་པར་བྱའོ། །ཡང་ས་བོན་གྱི་ཡི་གེ་དེ་ལས་དེའི་སྐུ་རྣམས་སྤྲོ་ཞིང་བསྡུ་བར་བྱའོ། །དེ་ནས་སྤྲོ་བར་གྱུར་ན་ཡེ་ཤེས་སེམས་དཔའི་ཐུགས་ཀའི་ས་བོན་ལ། ཨོཾ་ཨཱཿཨོཾ་མ་ནི་པདྨེ་ཧཱུཾ་ཧཱུཾ་ཧྲཱིཿ་སྭཱ་ཧཱ། ཞེས་བྱ་བ་གཡོན་སྐོར་དུ་བཀོད་དེ། མན་ངག་ཇི་ལྟ་བ་བཞིན་དུ་བསྒོམ་པར་བྱའོ། །དེ་ནས་ལྡང་བར་འདོད་ན་ཡེ་ཤེས་སེམས་དཔའ་ཕྱུང་ལ་མཆོད་པ་བྱས་ཏེ། གང་ཡང་བདག་བློ་གཏི་མུག་པས། །འདིར་ནི་བྱ་མིན་གང་བྱས་པ། །གང་ཡང་ལུས་ཅན་སྐྱབས་གྱུར་པ། །མགོན་པོ་ཁྱོད་ནི་བཟོད་པར་མཛོད། །ཅེས་གསོལ་བ་གདབ་པར་བྱའོ། །རྟག་ཏུ་གཞན་གྱི་དོན་མཛད་པ། །འཇིག་རྟེན་དབང་ཕྱུག་གྲུབ་པ་ནི། །དགེ་བ་དེ་ཡིས་ཐོབ་གྱུར་ཅིག །འགྲོ་བས་ཀྱང་ནི་དེ་ཐོབ་ཤོག །ཅེས་བྱ་བས་སྨོན་ལམ་གདབ་པར་བྱའོ། །དེ་ནས། ཨོཾ་ཨཱཿཧཱུཾཿམུ། ཞེས་པས་གཤེགས་སུ་གསོལ་ལོ། །འབྱུང་བ་ཐམས་ཅད་ལ་ཡང་བྱ། །མདུན་དུ་ཆོས་འབྱུང་པད་ཟླ་ཅན། །བསམས་ལ་ས་བོན་འོད་ཟེར་གྱིས། །འབྱུང་པོ་ཐམས་ཅད་བཀུག་ནས་ནི། །རང་འདོད་ལྷ་ཡི་རྣམ་པར་བྱ། །གཏོར་མ་སྦྱང་བའི་རིམ་པ་ནི། །ཡཾ་བྱུང་རླུང་ལས་རཾ་བྱུང་མེ། །ཨ་ལས་བྱུང་བའི་པད་སྣོད་དུ། །མུ་བི་ར་ཤུ་མ་ལས་བྱུང་བ་ཡི། །རྡོ་རྗེ་ཆུ་སོགས་རྫས་རྣམས་བསང༌། །སྦྱང་བ་ལ་སོགས་རྣམ་བྱས་ནས། །དེ་རུ་ཡི་གེ་ཧྲཱིཿབྐོད་དེ། །ཡེ་ཤེས་བདུད་རྩི་བཀུག་བྱས་ལ། །ཧཱུཾ་ལས་བྱུང་བའི་རྡོ་རྗེས་དཀྲུགས། །སྔགས་འདིས་བྱིན་གྱིས་བརླབས་ཏེ་འབུལ། ཨོཾ་ཨ་ཀཱ་རོ་མུ་ཁཾ་སརྦྦ་དྷརྨྨཱ་ཎཱཾ་ཨཱ་དྱ་ནུཏྤནྣ་ཏྭཱ་ཏ་ཨོཾ་ཨཱཿཧཱུཾ་ཕཊ། ཅེས་ལམ་བདུན་ནམ་གསུམ་བཟླས་ཡ་དབུལ་བར་བྱའོ། །དེ་ནས་དེ་རྣམས་ཚིམ་པས་གཉིས་སུ་མེད་པའི་བདེ་བ་ཆེན་པོའི་ཏིང་ངེ་འཛིན་ཐོབ་པར་བསམས་ལ། ཨོཾ་ཨཱཿཧཱུཾ་མུཿས་གཤེགས་
― DTG044_Page_0465 ―
[མ་དཔེ་གཟིགས་ན་འདིར་གནོན།]
སུ་གསོལ་བར་བྱའོ། །ཟས་ལ་ཉེ་བར་སྤྱོད་དུས་སུ་སྔ་མའི་ཏིང་ངེ་འཛིན་དེ་ཉིད་ཀྱིས་ཁ་ཟས་སྔ་མ་བཞིན་སྦྱངས་ལ། སྙིང་གར་རང་གི་ཧ་བསམས་ལ། །ནང་གི་སྦྱིན་སྲེག་བསམ་ལྡན་པས། །ཟས་ལ་ཉེ་བར་སྤྱད་པར་བྱ། །དེ་ནས་མཆོད་རྟེན་ལ་སོགས་ཀྱི། །དགེ་བའི་ལས་ལ་འབད་པར་བྱ། །ཉལ་བའི་དུས་སུ་བདག་ཉིད་ཀྱི། །སྙིང་གའི་ས་བོན་དེ་ཉིད་དུ། །བརྟན་དང་གཡོ་བ་ཀུན་བསྡུས་ཏེ། །བདག་ཉིད་ཀྱང་ནི་དེར་བསྡུས་ལ། །སྟོང་ཉིད་ཏིང་འཛིན་ལ་གནས་བྱ། །ནང་པར་ལངས་ནས་སྔ་མ་བཞིན། །སྒྲུབ་བ་ལ་ནི་འཇུག་པར་བྱ། །ཁྲུས་ནི་རང་ལ་དབང་བསྐུར་བསམ། །དཔལ་ལྡན་འདུས་པའི་རྗེས་འབྲངས་ཏེ། །འཇིག་རྟེན་དབང་པོ་སྒྲུབ་པའི་ཐབས། །མར་མེ་མཛད་དཔལ་ཡེ་ཤེས་ཀྱིས། །མན་ངག་མདོར་བསྡུས་འདིར་བཤད་ཡིན། །འཇིག་རྟེན་མགོན་པོ་སྒྲུབ་པའི་ཐབས་སློབ་དཔོན་ཆེན་པོ་དཔལ་མར་མེ་མཛད་ཡེ་ཤེས་ཀྱིས་མཛད་པ་རྫོགས་སོ།།
| 
