སོ་སོར་སྡུད་པའི་ཡན་ལག― DTG044_Page_0573 ―
[མ་དཔེ་གཟིགས་ན་འདིར་གནོན།]
རྒྱ་གར་སྐད་དུ། ཥ་ཌ་ཨཾ་ག་ཡོ་ག་ནཱ་མ། བོད་སྐད་དུ། སྦྱོར་བ་ཡན་ལག་དྲུག་པ་ཞེས་བྱ་བ། འཇམ་པའི་རྡོ་རྗེ་ལ་ཕྱག་འཚལ་ལོ། །ཀུན་དུ་བཟང་པོ་ཞེས་བྱ་བ་ནི་བསྐྱེད་རྫོགས་རྣམ་པ་གཉིས་ཏེ། དེ་ལ་ཐིག་ལེ་དང་ཕྲ་མོའི་སྦྱོར་བ་ནི་རྫོགས་པའི་རིམ་པ་སྟེ་གོང་མ་ནི་བསྐྱེད་པའི་རིམ་པའོ། །བསྐྱེད་པ་དང་རྫོགས་པའི་རིམ་པ་འདི་གཉིས་རིག་པས་གྲུབ་པའི་ཡན་ལག་དྲུག་པའི་གོ་ ― DTG044_Page_0574 ―
[མ་དཔེ་གཟིགས་ན་འདིར་གནོན།]
རིམས་ཁོ་ནས་བསྒོམ་སྟེ། གཞན་དུ་ན་ཡང་དག་པའི་གྲུབ་པ་མི་འཐོབ་བོ་ཞེས་གསུངས་པ་ཡང་རྒྱུད་ཕྱི་མ་ལས། བསྙེན་པ་ཡན་ལག་དྲུག་གིས་ནི། །གྲུབ་པ་མཆོག་ནི་བྱས་ནས་སུ། །བསྒྲུབ་པར་བྱ་ཡིས་གཞན་དུ་ནི། །དངོས་གྲུབ་མཆོག་ཏུ་འབྱུང་མི་འགྱུར། །སོ་སོར་སྡུད་དང་བསམ་གཏན་དང༌། །སྲོག་རྩོལ་དེ་བཞིན་འཛིན་པ་དང༌། །རྗེས་སུ་དྲན་དང་ཏིང་ངེ་འཛིན། །སྦྱོར་བ་ཡན་ལག་དྲུག་ཏུ་འདོད། །ཅེས་སོ། །དེ་ལ་མིག་ལ་སོགས་པའི་འགྲེལ་པ་ཅན་རྣམ་པར་ཤེས་པ་ལྔའོ། །དེ་རྣམས་གཟུགས་ལ་སོགས་པའི་ཡུལ་རྣམས་ལ་སོ་སོར་སྡུད་པ་ནི་བཀུག་ནས་ཡང་དག་པར་དུལ་བར་བྱེད་པ་གང་ཡིན་པ་དེ་སོ་སོར་སྡུད་པའོ། །ཡང་ན་ལྷ་ཉིད་ཀྱི་ཚུལ་དུ་ཡུལ་གཟུང་བ་ནི་སོ་སོར་སྡུད་པའོ། ། |
