རབ་ཏུ་གནས་པའི་ཆོ་ག་ཞེས་བྱ་བ།
མི་འཇིགས་པའི་ཕྱག།
བུམ་པ་སྟ་གོན་ལ་གནས་པའི་ཆོ་ག
།།རྒྱ་གར་སྐད་དུ། པྲ་ཏིཥྛ་བི་དྷི་ནཱ་མ། བོད་སྐད་དུ། །རབ་ཏུ་གནས་པའི་ཆོ་ག་ཞེས་བྱ་བ། དཔལ་འཇམ་པའི་རྡོ་རྗེ་ལ་ཕྱག་འཚལ་ལོ། །རྣམ་པ་ཀུན་གྱི་མཆོག་ལྡན་པ། །བདེ་བ་ཆེ་ལ་རབ་བཏུད་ནས། །བདག་འདྲའི་བློ་དམན་ཉིད་ལ་ནི། །རབ་གནས་ཆོ་ག་བཤད་པར་བྱ། །རྩ་བའི་ཡན་ལག་རབ་གནས་ལ། །ཕལ་ཆེར་ཁྲུས་སུ་འདོད་པས་ན། །བུམ་པའི་ནང་དུ་ཆོ་ག་ཡིས། །བློ་དང་ལྡན་པས་ཆུ་བ་བསྐྱེད་བྱ། །མི་ནག་ཞབས་མེད་མཆུ་འཕྱང་བ། །ལྔ་དང་བཅུ་དང་བཅུ་དགུའོ། །ལྔ་པོའི་རིམ་པ་འདི་ཡིན་ཏེ། །གསང་བ་འདུས་པར་མངོན་གསུངས་པ། །སངས་རྒྱས་སངས་རྒྱས་སྲས་སོགས་རྣམས། །དེ་རྣམས་ཕྱག་མཚན་ཤེས་པར་བྱ། །དེ་ལས་གཞན་པའི་རིགས་འདི་ཡིན། །ས་གནོན་དང་ནི་བྱང་ཆུབ་མཆོག །མཆོག་སྦྱིན་བསམ་གཏན་སྐྱབས་སྦྱིན་རྣམས། །མི་བསྐྱོད་རྟག་པ་རིན་ཆེན་དང༌། དཔག་མེད་དོན་ཡོད་གྲུབ་རྣམས་ཀྱིའོ། །སངས་རྒྱས་རྣམས་ཀྱི་ཆོས་བཤད་རྒྱ། །བྱང་ཆུབ་མཆོག་གིས་བསྡུས་གྱུར་པའོ། །དེས་ན་རྡོ་རྗེ་གདན་སོགས་ཀྱིས། །མི་བསྐྱོད་སོགས་ཀྱི་རང་བཞིན་ནོ། །ཐམས་ཅད་
ཀྱིས་ནི་པོ་ཏི་བསྣམས། །གསུང་གི་རྡོ་རྗེའི་བདག་ཉིད་གསལ། །རྡོ་རྗེ་ཆོས་སུ་རྟག་ཏུ་བྱ། །དེ་ལ་སོགས་པའི་ཚིག་གིས་ཀྱང༌། །མཆོད་རྟེན་གཙང་ཁང་བྱུར་བུ་དང༌། །མཆོད་རྟེན་གྱི་ནི་བྱེ་བྲག་རྣམས། །རྟག་པ་ཡི་ནི་བདག་ཉིད་དོ། །བྱང་ཆུབ་སེམས་དཔའ་ལ་སོགས་གང༌། །བྱ་བའི་རྒྱུད་ལ་སོགས་དང་མཐུན། །འདུས་པ་ལས་གསུངས་དེ་ཉིད་ཀྱི། །རྒྱལ་སྲས་རྣམས་ཀྱིས་ཡང་དག་བཟུང༌། །སྒྱུ་འཕྲུལ་དྲ་སོགས་བལྟས་ནས་ནི། །དེ་བཞིན་གཞན་གྱི་རིགས་ཀྱི་རིམ། །འདུས་པའི་ཆོ་གར་བྱ་བ་སྟེ། །སླར་ཡང་མི་ཤེས་པ་ཡི་རིགས། །རྡོ་རྗེ་ཐུགས་ཀྱིས་བཟུང་ནས་ནི། །ཕྱག་མཚན་ཉིད་ནི་ཡང་དག་བྲི། །གཙོ་བོའི་མགྲིན་བར་བྲི་བར་བྱ། །ལོགས་སུ་བདེ་གཤེགས་བཞི་ཕྱག་མཚན། །གཅིག་ལ་ཆོ་གའི་རིམ་པས་སོ། །རྡོ་རྗེ་གཟུགས་སོགས་ཕྱག་མཚན་ནི། །དྲུག་པོ་ཅིག་ཅར་དེ་བཞིན་གཅིག །ཁྲོ་བོ་གསུམ་བརྟགས་བགེགས་དགྲ་གཅིག །བཅུ་ཡི་ཕྱོགས་ལ་ལྷ་མོ་བཞི། །དེ་བཞིན་ཕྱག་མཚན་རེ་རེ་ལའོ། །ཁྲོ་བོ་རྣམས་ཀྱང་སོ་སོར་རོ། །ལྷག་མ་རྣམས་ནི་སྔར་བཞིན་བྲི། །སླར་ཡང་བཅུ་དགུའི་ཕྱོགས་ལ་ནི། །གྲངས་ནི་ཇི་བཞིན་བྲི་བར་བྱ། །སླར་ཡང་ཁ་ཅིག་ཉི་ཤུར་འདོད། །ལས་ཀུན་བྱེད་པ་བསྣན་པས་སོ། །མེ་ཏོག་དྲི་ཞིམ་ལྡན་པ་དང༌། །མགྲིན་པ་གོས་ཀྱིས་དཀྲིས་པ་དང༌། །ཅུང་ཟད་ཆུ་ལྡན་ཨ་མྲར་ལྡན། །གོ་རིམས་ཇི་བཞིན་རྣམ་པར་གཞག །གཡོན་དུ་ཨ་མྲ་ལ་སོགས་དགོད། །འདུག་ནས་གཏོར་མ་ཡང་དག་སྦྱིན། །མུ་ཏིག་དངུལ་དང་གསེར་ཞེས་གྲགས། །མུ་མེན་དང་ནི་བྱི་རུ་རྣམས། །ཀཎྜ་ཀ་རི་དཎྜོད་ཉིད། །བྲྀ་ཧ་སྟི་དང་ཀ་རྞི་ཀ །ནས་དང་གྲོ་དང་སོ་བ་དང༌། ཏིལ་དང་སྲན་གྲེའུ་མངོན་པར་བརྗོད། །འབྲུ་ལྔ་དང་ནི་སྨན་ལྔ་དང༌། །རིན་ཆེན་འདི་རྣམས་ཀྱིས་ཁེངས་པ། །རང་གི་ལྷ་ཡི་གཟུགས་ཀྱིས་ནི། །ཆུ་དང་ལྡན་པར་བསྐྱེད་ནས་ནི། །ཀུན་དུ་ཉུང་བའི་ཆུ་བླུགས་ནས། །ཁམ་ཕོར་རྣམ་རྒྱལ་ཞེས་བརྗོད་ལ། །དེ་ནི་བཾ་ལས་བྱུང་བ་ཡི། །རིན་ཆེན་རང་བཞིན་བུམ་སྟེང་གཞག །རྩ་བའི་ཕྱག་མཚན་གྱིས་བསྐྱེད་བའི། །དམ་ཚིག་དཀྱིལ་འཁོར་བདག་ཉིད་ལ། །ཡེ་ཤེས་
དཀྱིལ་འཁོར་བཀུག་ནས་ནི། །ཞབས་བསིལ་ལ་སོགས་རིམ་བཞིན་ནོ། །དམ་ཚིག་དང་ནི་ལྷན་ཅིག་ཏུ། །བྱས་ནས་མཉེས་བྱ་མཆོད་པའོ། །མེ་ཏོག་སྤོས་སོགས་ཕྱི་ཡིས་ཀྱང༌། །རབ་ཏུ་འབད་དེ་ཡང་དག་མཆོད། །དྲིལ་བུ་དཀྲོལ་བྱ་དེ་ཡི་ནི། །བསྟོད་པ་བྱས་ཏེ་བཟླས་བ་བྱ། །གཅིག་ཏུ་གཡོན་བའི་ཁུ་ཚུར་བཅིངས། །རྡོ་རྗེ་མེ་ཏོག་གིས་བཅིངས་ནས། །བུམ་པ་ཆུ་ཡིས་གང་བ་ནི། །ཁམ་ཕོར་སྟེང་དུ་བརྟན་པར་གཞག །དེ་ནས་མཆོད་ཅིང་ཕྱག་བྱས་ནས། །དཀྱིལ་འཁོར་འཁོར་ལོའི་རང་བཞིན་ཉིད། །ཆུ་ཡི་རང་བཞིན་ཉིད་ཀྱིས་གཞག །ཡང་ན་བུམ་པ་ལ་གཞུག་བྱ། །དེ་ལྟར་འདི་དང་གཞན་རྣམས་ཀྱི། །ཐམས་ཅད་སོ་སོར་བྱས་ནས་ནི། །མེ་ཏོག་སྤོས་སོགས་སྦྱིན་བྱས་ནས། །གཏོར་མ་སྔོན་འགྲོ་ཡང་དག་བསྲུང༌། །འདི་ནི་བུམ་པ་སྟ་གོན་ལ་གནས་པའི་ཆོ་གའོ། །
ལྷ་སྟ་གོན་ལ་གནས་པའི་ཆོ་ག
ལྷག་པའི་ལྷ་ཡི་སྦྱོར་བ་ལས། །དོན་གྲུབ་ཆུ་དང་ཟན་རྣམས་ཀྱིས། །ལྷ་རྣམས་རྡུལ་ནི་བྲལ་བར་བྱ། །བ་ཡི་རྣམ་ལྔ་ཤིང་ཤུན་ལྔས། །བྱུགས་ཏེ་ཁྲུས་བྱ་མངོན་བཟླས་ལ། །དྲི་ཞིམ་གཙང་མའི་ཆུ་ཡིས་ནི། །བཀྲུ་བར་རུང་བ་རང་གཟུགས་ཀྱིས། །རི་མོ་ལ་སོགས་མེ་ལོང་ལ། །གང་དུ་ལས་ལ་སྔགས་མེད་པ། །བགེགས་དགྲ་དེ་རུ་སྦྱར་བར་བྱ། །མར་ནག་དྲི་ཞིམ་གྱིས་བྱུགས་ལ། །སྐྱུ་རུ་ར་ཡིས་བཀྲུ་བར་བྱ། །བ་ཡི་རྣམ་ལྔ་སོགས་ཀྱིས་བྱུག །མར་ནག་གིས་ནི་བྱུགས་པ་གང༌། །བཀྲུ་བྱ་སྐྱུ་རུ་ར་ཡིས་ཀྱང༌། །དཱུར་བའི་ཆུན་པོ་དེ་འདོད་དོ། །ཆུ་ཡིས་བཀྲུ་བར་བྱ་བ་སྟེ། །ཡང་ན་བསྒྲུབས་པའི་ཆུ་ཡིས་ཀྱང༌། །དེ་ལ་འདི་ནི་མར་ནག་གི་སྔགས་ཏེ། ཨོཾ་སརྦ་ཏ་ཐཱ་ག་ཏ་ཀཱ་ཡ་བི་ཤོ་དྷ་ནེ་སྭཱ་ཧཱ། །རས་འཇམ་པོ་ཡིས་དབྱི་བར་བྱ། །ཇི་ལྟར་ནུས་པས་གོས་སོགས་སྦྱིན། །ཡེ་ཤེས་སེམས་དཔའི་སྙིང་འོད་ཀྱིས། །ལྷ་རྣམས་བཀུག་ནས་བཞུགས་པར་བྱ། །སངས་རྒྱས་དང་གཞན་དེ་ཡི་སྲས། །བསྟན་པ་ལ་ནི་དགའ་རྣམས་ལའང༌། །ཀུ་ཤའི་ཆུན་པོས་བསང་གཏོར་བྱ། །ཞབས་བསིལ་སོགས་ཀྱིས་དེ་རྣམས་མཆོད། །མཆོད་སོགས་བྱས་ནས་དེ་རྣམས་ལ། །པུས་མོ་བཙུགས་ཏེ་ཡང་དག་གནས། །རྡོ་རྗེ་
དྲིལ་བུ་གཡོན་དུ་འཛིན། །སྤོས་ཕོར་གཡས་སུ་གཟུང་བར་བྱ། །བཅོམ་ལྡན་འཇམ་པའི་རྡོ་རྗེ་ཁྱོད། །རིག་པའི་རྒྱལ་པོ་ཕྱག་འཚལ་བསྟོད། །བཅོམ་ལྡན་སྙིང་རྗེའི་དག་ཉིད་ཅན། །བདག་ནི་རབ་གནས་བགྱི་བར་འཚལ། །སློབ་མ་ལ་ནི་བརྩེ་དོན་དང༌། །ཁྱེད་རྣམས་ལ་ཡང་མཆོད་པའི་ཆེད། །སེམས་ཅན་བསོད་ནམས་འཕེལ་དོན་དང༌། །བྱང་ཆུབ་སེམས་ནི་སྤེལ་དོན་དུ། །བཅོམ་ལྡན་བདག་ལ་ཐུགས་བརྩེ་བས། །བཀའ་དྲིན་གྱིས་ནི་བསྐྱབ་པའི་རིགས། །སངས་རྒྱས་རྣམས་ནི་བདག་ལ་དགོངས། །བྱང་ཆུབ་སེམས་སོགས་རང་བཞིན་རྣམས། །བསྟན་ལ་མངོན་པར་དགའ་བ་གཞན། །གང་དག་རྡོ་རྗེའི་མིག་ཅན་རྣམས། །རྡོ་རྗེ་འཆང་ཆེན་ཆེ་གེ་བདག །རབ་གནས་ཆེ་གེ་མོ་འདི་ཡང༌། །བདག་གིས་བགྱི་བས་ཁྱེད་རྣམས་ཀྱིས། །བྱིན་གྱིས་བརླབ་ནི་བགྱི་བར་རིགས། །ཏིང་འཛིན་གསུམ་དང་ལྡན་པ་ཡིས། །ལུགས་སྐུ་ལ་སོགས་བསྐྱེད་པར་བྱ། །འདབ་མ་དང་བཅས་ཆུ་ཡིས་ནི། །མཉམ་པར་བཞག་པས་ཁྲུས་བྱས་ནས། །མཆོད་པ་སྔོན་འགྲོ་དེ་ཡིས་ནི། །སྔགས་ཀྱིས་མངོན་པར་བསྔགས་པར་བྱ། །ཕྱག་བྱས་མཆོད་པ་སོགས་བྱས་ནས། །སླར་ཡང་ཉེ་བར་སྤྱོད་པ་ལྔ། །ནད་པར་བྱོན་པར་བཞེད་པ་ཡིས། །ཡེ་ཤེས་འཁོར་ལོ་གཤེགས་སུ་གསོལ། །འདི་ནི་ལྷ་སྟ་གོན་ལ་གནས་པའི་ཆོ་གའོ། །
རབ་གནས་ཀྱི་ཆོ་ག
ནང་པར་སྟ་གོན་བྱ་བ་ལ། །རྡུལ་བྲལ་ལ་སོགས་བྱས་ནས་ནི། །སངས་རྒྱས་ལ་སོགས་སྔར་བཀུག་ནས། །ཞབས་བསིལ་བྱས་ཏེ་མཆོད་པར་བྱ། །སྤོས་ཕོར་བཟུང་ནས་བུས་བཙུགས་ཏེ། །ཚིགས་བཅད་སྔོན་གསུངས་བརྗོད་པར་བྱ། །བགྱི་བའི་ཚིག་ནི་བོར་ནས་ནི། །བགྱིད་པར་འཚལ་ཞེས་བརྗོད་པར་བྱ། །ཏིང་འཛིན་གསུམ་ལ་སྦྱར་བྱས་ནས། །མཉམ་པར་གཞག་པས་བསམ་པར་བྱ། །བུམ་པས་ཁྲུས་བྱ་མང་པོ་ཡིས། །བཀྲ་ཤིས་སྒྲ་ནི་སྔོན་འགྲོ་བས། །དེ་ལ་འདི་ནི་ཁྲུས་ཀྱི་སྔགས་ཏེ། ཇི་ལྟར་བལྟམས་མ་ཐག་ཏུ་ནི། །དེ་བཞིན་གཤེགས་ཀུན་ཁྲུས་གསོལ་ལྟར། །ལྷ་རྫས་ཆུ་ནི་དག་པ་ཡིས། །དེ་བཞིན་བདག་གིས་ཁྲུས་
གསོལ་ལོ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཥྲི་ཡེ་ཧཱུཾ། གོས་སོགས་རང་རང་སྔགས་ཀྱིས་ནི། །མཉམ་པར་བཞག་པས་བརྟན་པར་བྱ། །ཡང་ན་རང་གི་སྔགས་ཀྱིས་སྦྱིན། །ལྷག་པར་བཟླས་ནས་གཙོ་ལ་འདུད། །དེ་ལ་འདི་རྣམས་ན་རང་རང་གི་སྔགས་ཏེ། ཨོཾ་བཛྲ་པཱ་ས་སེ་སྭཱ་ཧཱ། ཨོཾ་བཛྲ་དྷཱུ་པེ་སྭཱ་ཧཱ། ཨོཾ་བཛྲ་དཱི་པེ་ཧཱུཾ། ཨོཾ་བཛྲ་ནཻ་བི་དྷྱེ་ཧཱུཾ། ཨོཾ་བཛྲ་གནྦྷེ་ཧཱུཾ། ཨོཾ་བཛྲ་སརྦ་ཨཱ་བ་ར་ཎ་བི་ཤོདྷ་ནེ་སྭཱ་ཧཱ། སྣོད་ནི་གསེར་གྱི་རང་བཞིན་ནམ། །དངུལ་གྱི་རང་བཞིན་མཉམ་བཞག་པས། །བགེགས་དགྲའི་སྔགས་ཀྱིས་ཡང་དག་བསྒྲུབ། །མར་དང་སྦྲང་རྩིས་བྱུགས་པ་ཡི། །གསེར་གྱི་ཐུར་མས་མིག་དབྱེ་སྟེ། །ཡང་ན་བསམ་གཏན་དག་གིས་བྱ། །སྦྱིན་སྲེག་མེས་བསྒྲུབས་ཟས་ཀྱིས་ནི། །དེ་མ་ཐག་ཏུ་གསོལ་བར་བྱ། །དེ་ལ་འདི་ནི་མིག་གཉིས་དབྱེ་བའི་སྔགས་ཏེ། ཨོཾ་ཙཀྵུ་ཙཀྵུ་ས་མནྟ་ཙུཀྵུ་བི་ཤོ་དྷ་སྭཱ་ཧཱ། ཨོཾ་དཱི་བེ་ཨནྣེ་ས་མཱ་དྷི་དྷྱཱ་ན་པྲཱི་ན་ནི་སྭཱ་ཧཱ། འདི་ལྟར་རྫོགས་པའི་སངས་རྒྱས་ཀུན། །དགའ་ལྡན་གནས་སུ་རབ་བཞུགས་ནས། ལྷ་མོ་སྒྱུ་མའི་ལྷུམས་ཞུགས་ལྟར། །དེ་བཞིན་འདིར་ཡང་བཞུགས་སུ་གསོལ། །མགོན་པོ་རྟག་ཏུ་འདིར་བཞུགས་ལ། །མེ་ཏོག་ལ་སོགས་འདི་བཞེས་མཛོད། །ཆེ་གེ་མོ་ཡི་དོན་གྱི་ཕྱིར། །བྱང་ཆུབ་སེམས་ནི་འཕེལ་བར་མཛོད། །ཨོཾ་སུ་པྲ་ཏིཥྛ་བཛྲ་སྭཱ་ཧཱ། །སྨད་དང་སྙིང་ག་མགྲིན་པ་རུ། །རྡོ་རྗེ་གསོར་བས་དེ་རྣམས་ལ། །ལན་གསུམ་བསྐོར་ནས་གཞག་པར་བྱ། །ལྷ་རྣམས་བརྟན་པར་འདོད་པ་ཡིས། །འཆད་པར་འདོད་པས་ཚིགས་བཅད་གདོན། །བློ་གྲོས་བརྟན་པས་བསམ་པར་བྱ། །མཚང་ལྷག་པའི་ཆོ་ག་རྣམས། །པུས་མོ་བཙུགས་ནས་བཟོད་པར་གསོལ། །འདི་ནི་རབ་གནས་ཀྱི་ཆོ་གའོ།། །།
སྦྱིན་སྲེག་གི་ཆོ་ག
དེ་ལ་འདི་ནི་སྦྱིན་སྲེག་གི་ཆོ་ག་སྟེ། གཡོན་དུ་མེ་ཏོག་དཀར་པོ་དང༌། །ལྡན་པའི་དུང་སོགས་ཆུ་དང་ལྡན། །རང་གི་ལྷག་པའི་ལྷ་ཡི་བཟླས། །ཡང་ན་བགེགས་ཀྱི་དགྲ་ཡི་སྔགས། །ལས་ཀུན་བྱེད་པ་བཟླས་ནས་ཀྱང༌། །ཀུ་ཤའི་ཆུན་པོ་ལྡན་པ་ཡིས། །སྣོད་ནི་དེ་རུ་གཞག་པར་བྱ། །བསང་གཏོར་ལ་སོགས་དགོས་དོན་དུ། །ཡོན་ཆབ་ལ་སོགས་སྦྱིན་པའི་
ཕྱིར། །མནྫི་ལ་སོགས་གཞན་རྣམས་ལ། །གཡས་ཕྱོགས་སུ་ནི་པན་ཤ་།བླག་ཤ་དང་ནི་ཨུ་དུམ་ཝཱ་དང༌། །ཙནྡན་ཨ་རྐ་བྷ་ཏཱ་རྣམས། །ཡལ་ག་བེ་ཡི་ཀངྐ་དང༌། །ཨ་བྷ་ས་མི་གཾ་བྷ་རི། །ཨ་བ་མརྒ་ཨ་ཤྭདྠ། །བྱང་ཆུབ་ཤིང་ལས་བྱུང་བ་རྣམས། །རློན་པ་དྲང་ཞིང་རྩེ་གཅིག་པ། །སྲིན་བུ་སོགས་ཀྱིས་མ་ཟོས་པ། །མཐེ་ཆུང་གི་ནི་མཐོ་གང་ལ། །དྲི་ཞིམ་ཆུ་ཡིས་ཁྲུས་བྱས་ལ། །མར་བྱུགས་ཏིལ་དང་དཱུར་བ་བཟང༌། །མ་ཆག་པ་ཡི་འབྲས་རྣམས་ཀྱང༌། །ཞོ་ཟན་ཀུ་ཤ་སོ་བ་དང༌། །ནས་དང་གྲོ་དང་མོན་སྲན་གྲེ། །སྲན་གྲེའུ་འབྲས་ཡོས་དེ་བཞིན་གཞན། །སྦྲང་རྩིའོ་མ་ལ་སོགས་སྲིད། །རིམ་པ་བཞིན་དུ་བཞག་ནས་ནི། །ཏིང་འཛིན་གསུམ་དག་རྣལ་འབྱོར་པས། །ཞི་བའི་གཏོར་མ་བྱིན་ནས་ནི། །སྦྱིན་སྲེག་ལས་ནི་ཡང་དག་བརྩམ། །མཐོ་གང་གཏིང་དུ་བརྐོས་བྱས་ནས། །ཁྲུ་གང་འཁོར་ལོ་ཟླུམ་པོ་ལ། །བདེ་གཤེགས་བཞི་ཡི་ཕྱག་མཚན་དང༌། །བདག་པོའི་ཕྱག་མཚན་དབུས་སུའོ། །དེ་བཞིན་དབུས་སུ་བགེགས་ཀྱི་དགྲ། །ལས་ཀུན་བྱེད་པའི་ཕྱག་མཚན་ནོ། །པདྨ་རབ་ཏུ་རྒྱས་འདྲ་བ། །ངོས་བཞི་སོར་བཞི་པོར་ནས་ནི། །དེ་ཡི་ཚད་ཀྱང་ཁ་ཁྱེར་ལ། །པདྨའི་ཕྲེང་བས་བསྐོར་བར་བྱ། །རྡོ་རྗེ་ཕྲེང་བ་ཡོངས་བརྩིགས་པས། །ཕྱི་རོལ་ཁ་ཁྱེར་ཀུན་དུ་བསྐོར། །འོག་གི་ཕྱག་མཚན་ཕྱི་རོལ་དུ། །རྡོ་རྗེ་ཕྲེང་བ་གང་སྨྲ་བ། །དེ་རྣམས་ཕྱག་མཚན་གཞན་དག་གི །རྩ་བའི་ཕྱག་མཚན་ལས་ཅུང་ཟད། །དེ་བཞིན་དུ་ཡང་བཟང་ཞབས་ཀྱིས། །སོར་ནི་བརྒྱད་དང་གཅིག་གི་ཚད། །མཆུ་དང་རྔམས་སུ་རྩ་བ་ཡི། །ཕྱག་མཚན་ཤིན་ཏུ་བརྟན་པས་ན། །དེ་བཞིན་དུ་ནི་གཞན་དག་ཀྱང༌། །འདི་ནི་རིག་པས་བརྟག་པར་འདོད། །ཡང་ན་བདག་པོའི་འབྲས་བུ་ནི། །ཆེ་ལ་གཞན་ནི་དམན་པ་ཡི། །ཕྱག་མཚན་ཞེས་སུ་བརྗོད་པ་ནི། །རི་མོའི་དཀྱིལ་འཁོར་ཇི་ལྟར་མཉམ། །ཕྱག་མཚན་རྣམས་ཀྱི་བརྒལ་བ་འདི། །ལན་ནི་ཇི་ལྟར་འདེབས་པར་བྱེད། །དེར་ཡང་མཁས་པས་མི་མཉམ་པར། །སྐྱེས་བུ་དམ་པས་འདོད་མ་ཡིན། །ཕྱི་རོལ་རྡོ་རྗེ་འཕྲོ་བ་ཡིས། །
བསྐོར་པ་འདི་ནི་འགལ་ཏེ། དེ་རྣམས་ཕྱག་མཚན་ལ་ལྟོས་ནས། །དེ་བཞིན་ཕྱི་རོལ་བསྒྲལ་འདོད་ན། །འབྲས་བུ་མེད་ཅིང་དཀའ་བ་སྐྱེ། །བློ་ལྡན་ཇི་ལྟར་ཉེ་བར་བརྟེན། །ལུང་དང་རིགས་པས་སྒྲུབ་བྱེད་པ། །ཕྱོགས་འདི་ལ་ནི་ཡོད་མ་ཡིན། །སྐྱོན་ཡང་ཅུང་ཟད་བྱིན་པ་སྟེ། །རྒྱ་ཆེ་མང་པོས་ཅི་ཞིག་བྱ། །དེ་ལྟར་བསྟན་པའི་ཐབ་ཁུང་དུ། །སྔགས་ཀྱིས་སྦར་བའི་མེ་ལ་ནི། །འབར་བའི་ཆེད་དུ་མར་ནི་བླུགས། །དེ་ལ་འདིར་ནི་མེ་སྦར་བའི་སྔགས་ཏེ། ཨོཾ་ཛྭ་ལ་ཛྭ་ལ་ཧཱུཾ་ཧཱུཾ། ཤར་ཕྱོགས་ཁ་བསྟན་ཀུ་ཤ་རྣམས། །གཡས་སྐོར་གྱིས་ནི་སྦྱིན་པར་བྱ། །རེ་རེ་ནས་ནི་ཤར་ཕྱོགས་རྩེ། །ཐབ་ཁུང་ཀུ་ཤས་དགབ་པར་བྱ། །ཐབ་ཁུང་བདག་མེད་པར་དམིགས་ནས། །རཾ་ལས་བྱུང་བའི་སེར་སྐྱ་སེར། །གཡས་གཡོན་ཞལ་ནི་གང་དང་དཀར། །ལུས་ཐུང་ཞལ་ནི་སེར་པོ་སྟེ། །ཤེས་རབ་ལས་འཁྱུད་རལ་པ་འགྲེང༌། །རིལ་བ་དབྱུག་པ་གཡོན་པ་ན། །གཡས་པ་སྐྱབས་སྦྱིན་ཕྲེང་བ་སྟེ། །པདྨར་རཾ་སྐྱེས་མེ་དཀྱིལ་འཁོར། །ཞི་བ་ལ་སོགས་ཆ་བྱད་ཅན། །རྫས་ཀྱི་རྗེས་མཐུན་མེ་རུ་བསམ། །མེ་མཚམས་ནས་ནི་ཡེ་ཤེས་མེ། །མིག་གསུམ་ཊ་ཀྐིས་དགུག་པར་བྱ། །ཡང་ན་དེ་ཡི་རང་སྔགས་ཀྱིས། །བསང་གཏོར་ལ་སོགས་བརྩམ་པར་བྱ། །དེ་ལ་འདི་ནི་མེའི་སྔགས་ཏེ། ཨོཾ་ཨེ་ཧྱེ་ཧི་མ་ཧཱ་བྷུ་ཏ་ངེ་བ་རྀ་ཥི་དྭི་ཇ་སད་ཏ་མ་གྲྀ་ཧི་ཏྭ་ཨ་ཧུ་ཏི་སྭཱ་ཧཱ་རཾ། ཨ་སྨིན་སནྣི་ཧི་ཏོ་བྷ་བ། ཀུ་ཤའི་ཆུན་པོས་བསང་གཏོར་རོ། །ལན་གསུམ་བར་དུ་ཆུ་རུ་གཞུག །དེ་བཞིན་ཆོ་གའི་རིམ་པ་ཡིས། །སླར་ཡང་ཞབས་བསིལ་སྦྱིན་པར་བྱ། །དེ་བཞིན་ཆུ་ཡི་མཆོད་ཡོན་སྦྱིན། །མེ་ཏོག་དང་བཅས་ལན་གསུམ་དུ། །མཛུབ་མོ་མཐེ་བོང་ཁ་གཉིས་ནི། །དང་པོ་མཐའ་རུ་མོས་པ་ཡིས། །རྣལ་འབྱོར་ཇི་ལྟར་ཞབས་སོགས་ལ། །བློ་ཡིས་ཞབས་བསིལ་སོགས་བརྟག་བྱ། །ཀུན་དུ་ལུས་ལ་བསང་གཏོར་སྦྱིན། །ཞབས་བསིལ་ནི་གཉིས་ལ་ཡང༌། །བློ་ཡིས་ཞབས་བསིལ་ཞལ་དུ་སྟེ། །སྤྱི་བོར་ཡོན་ཆབ་དབུལ་བ་བྱ། །དེ་ལ་འདི་ནི་མཆོད་པའི་རིམ། །མེ་ཏོག་སྤྱི་བོར་མར་མེ་སོགས། །མདུན་དུ་དྲི་ཞིམ་བྲང་དུའོ། །དམ་
ཚིག་དང་ནི་ཡེ་ཤེས་མེ། །འོ་མ་ཆུ་སྦྱིན་སླར་ཡང་གཅིག །བསང་གཏོར་ལ་སོགས་ཆོ་ག་ཡིས། །ཆོ་ག་འདིས་ནི་སྦྱིན་སྲེག་བྱ། ཆང་གཟུངས་འཚམ་པར་སྦོམ་པ་སྟེ། །རིང་དུ་ཁྲུ་གང་སོར་དྲུག་པ། །རིན་ཆེན་རྡོ་རྗེ་ཡུ་བར་བཅས། །སོར་མོ་བཞི་ནི་ཁ་ཁྱེར་ལ། །སོར་གཉིས་བརྐོས་ལ་རྡོ་རྗེ་སྟེ། །རྡོ་རྗེ་ཅན་གྱི་སོར་མོ་བཞི། །བརྐོས་ཏེ་ཆུ་སྐྱེས་འདབ་མ་ལ། །མཐའ་རུ་ཇི་ལྟར་མཛེས་པས་མཛེས། །དགང་གཟར་ལས་ནི་མཐེ་ཆུང་ཚད། །རོ་ནི་རྒྱུ་བའི་བུ་གར་ལྡན། །རྡོ་རྗེ་དཔངས་སུ་ཇི་ལྟར་ཐོས། །རིམ་བརྩེ་ལྔ་རྩེ་གསུམ་པ། །བླུགས་གཟར་པདྨའི་འདབ་རྣམས་ལ། །སོར་གཅིག་བརྐོས་པས་རྡོ་རྗེ་འཛིན། །སོར་གཉིས་སྔར་བཞིན་ཡུ་བ་ལ། །རིན་ཆེན་རྡོ་རྗེ་རྩེ་རྡོ་རྗེ། །དགང་གཟར་སྦྱིན་སྲེག་ཤིང་རང་བཞིན། །བླུགས་གཟར་དེ་བཞིན་ནི་མ་རང་བཞིན། །ཟངས་སོགས་རྫས་ལས་ཡང་དག་བྱུང༌། །རང་ཉིད་སྔགས་ལས་བསྐྱེད་པའོ། །པུས་མོ་གཉིས་ཀྱི་ནང་ངོས་སུ། །ལག་གཡོན་སྟེང་བསྟན་དགང་གཟར་དུ། །མར་གྱིས་གང་བ་ཡང་དག་བླུགས། །གཡས་པའི་འོག་ཏུ་ཧ་བསྟན་པས། །བླུགས་གཟར་དགང་གཟར་ལ་བསྐྱོན་ལ། སྟེང་དུ་བལྟས་པ་མར་གྱིས་དགང། །ལྷ་ཡི་གཟུགས་སུ་བསྐྱེད་པ་ཡིས། །རཾ་ཡིག་ཚངས་ཞལ་དགོད་པར་བྱ། །ཡོན་བདག་ནུས་པས་ལན་བདུན་ནམ། །ལན་གསུམ་དག་ཏུ་མཁས་པ་ཡིས། །དགང་གཟར་ལ་ནི་བསྐོར་བྱས་ནས། །དགང་བླུགས་རབ་ཏུ་སྦྱིན་པར་བྱ། །དེ་ལ་འདི་ནི་སྔགས་ཏེ། ཨོཾ་ཨ་གན་ཡེ་ཨཱ་འདི་བྱ་ཨཱ་དཱི་བྱ་ཨ་བི་ཥ་ཨ་བི་ཥ་མ་ཧཱ་ཤྲི་ཡེ་བྱ་ཀ་བྱ་ཨཱ་བཱ་ན་ཡེ་སྭཱ་ཧཱ། །དགེ་དང་མེ་དགེའི་མཚན་མ་རྣམས། །བློ་དང་ལྡན་པས་བརྟག་པར་བྱ། །དགེ་བའི་འོད་ཟེར་བསྒྲིལ་འབར་བ། །བརྒྱ་སྦྱིན་གཞུ་ལྟར་ཡོངས་སྟོན་པ། །མདོག་སོགས་དེ་དང་དེ་སྦྱོར་བ། །ལས་ཀྱི་རྗེས་སུ་མཐུན་པས་སྟོན། །གང་ཚེ་མཚན་མ་མ་མཐོང་ན། །ཡང་ནི་བགེགས་དགྲའི་བཟླས་པ་བྱ། །རབ་ཏུ་ལེགས་པར་ཞབས་བསིལ་སོགས། །བྱས་ནས་མེ་ཏོག་སོགས་ཀྱིས་མཆོད། །དགང་བླུགས་སྦྱིན་བྱ་དེ་བཞིན་དུ། །ཡམ་ཤིང་སོགས་ཀྱིས་
སྦྱིན་སྲེག་བྱ། །སླར་ཡང་འཐོར་འཐུད་ལ་སོགས་པ། །མེ་ཡི་ཕུང་པོ་ལ་བྱས་ནས། རང་གི་ལྷག་པའི་ལྷར་དམིགས་ཏེ། །འདི་ཡི་སྔགས་ནི་བཟླས་པར་བྱ། །མཆོད་ཡོན་ཞབས་བསིལ་སོགས་བྱས་ནས། །མཆོད་ཡོན་དམ་པ་སྔོན་འགྲོ་བས། །དེ་ལ་དགང་བླུགས་སྦྱིན་པར་བྱ། །བདུད་རྩིར་བྱས་པའི་མར་གྱིས་ནི། སྔོན་དུ་བསམས་ཤིང་བསྲེག་པར་བྱ། །རེ་མོས་གཉིས་ནི་སྦྱིན་བྱས་ལ། །མཐེ་བོང་སྲིན་ལག་ཁ་ཡིས་ནི། །བླངས་པ་མར་གྱི་རྩི་བླུགས་པ། །བླུགས་གཟར་གྱིས་ནི་མར་བསྲེག་བྱ། །འབྲུ་ཡང་དེ་ཉིད་ཀྱིས་དབུལ་བྱ། །མེད་ན་ལག་པ་ཉིད་ཀྱིས་བྱ། །དགང་བླུགས་དག་ནི་སྦྱིན་པར་བྱ། །བསྲེག་བྱ་འབྲུ་རྣམས་རང་གི་ནི། །སྔགས་ཀྱིས་བུད་ཤིང་དེ་བཞིན་དུ། །ཁ་ཅིག་གཞན་གྱི་སྔགས་ཀྱིས་ཀྱང༌། །གཞན་རི་རང་གིས་དབུལ་བར་བྱ། །དེ་ལ་འདི་རྣམས་ནི་གཞན་གྱི་སྔགས་ཏེ། ཨོཾ་བཛྲ་ཨགྣ་ཡེ་སྭཱ་ཧཱ། །མར་གྱིའོ། །ཨོཾ་བཛྲ་ཨ་ཛཱ་ལཱ་ཡ་སྭཱ་ཧཱ། ཨུ་དུམྺཱ་རིའི་འོ། །ཨོཾ་བོ་དྷི་བྲྀ་ཀྵ་ཡེ་སྭཱ་ཧཱ། །བྱང་ཆུབ་ཀྱི་ཤིང་གིའོ། །ཨོཾ་བཛྲ་ལ་ཏཱ་ཡ་སྭཱ་ཧཱ། །པ་ལ་ཤའི་འོ།།ཨོཾ་བཛྲ་ཀུ་བེ་རཱ་ཡ་སྭཱ་ཧཱ། །ཉ་གྲོ་དྷའི་འོ། །ཨོཾ་བཛྲ་སཱ་ཧ་ཀ་རཱ་ཡ་སྭཱ་ཧཱ། །ཨ་མྲའི་འོ། །ཨོཾ་ཨ་པྲ་ཏི་ཧ་ཏ་བཛྲཱ་ཡ་སྭཱ་ཧཱ། །ཀུ་ཤ་རྣམས་ཀྱིའོ། །ཨོཾ་མ་ཧཱ་བེ་གཱ་ཡ་སྭཱཧཱ། །ནས་ཀྱིའོ། །ཨོཾ་བཛྲ་བི་ཛཱ་ཡ་སྭཱ་ཧཱ། །ཨོ་བའི་འོ། །ཨོམ་བཛྲ་གྷསྨ་རི་སྭཱ་ཧཱ། །གྲོའིའོ།། ཨོཾ་སརྦ་བཱ་བཾ་ད་ཧ་ན་བཛྲཱ་ཡ་སརྦ་པཱ་པཾ་ད་ཧ་སྭཱ་ཧཱ། །ཏིལ་གྱིའོ། །ཨོཾ་མ་ཧཱ་བ་ལཱ་ཡ་སྭཱ་ཧཱ། མོན་སྲན་གྲེའུའིའོ། །ཨོཾ་བཛྲ་ཨཱ་ཡུ་ཥེ་སྭཱ་ཧཱ། དཱུར་བའི་འོ། །ཨོཾ་བཛྲ་པུཥྚ་ཡེ་སྭཱ་ཧཱ། འབྲས་མ་ཆག་བའི་འོ། །ཨོཾ་བཛྲ་སཾ་པ་དེ་སྭཱ་ཧཱ། ཞོ་ཟན་གྱིའོ། །བསང་གཏོར་འཐོར་འཐུང་ལ་སོགས་པ། །བྱས་ནས་སྔར་བཞིན་མཐའ་རུ་ནི། །སྔགས་ཀྱི་ཡན་ལག་མ་ཉམས་བཟླས། །ལས་ནི་ཇི་ལྟར་ནང་བཅུག་ལ། །ང་ལ་བསོ་ནས་ནི་སླར་སྦྱིན་བྱ། །དགང་བླུགས་ཇི་ལྟར་ཡོད་ཀྱི་བར། །མེད་ན་ཡང་དག་རྫོགས་པ་ཡི། །མཐའ་རུ་ཡང་དག་དགང་བླུགས་ད་བུལ། །འཐོར་འཐུང་དྲི་ཞིམ་མེ་སོ་རྩི། །མེ་ཏོག་སྤོས་དང་གོས་གསར་པ། །ཕུལ་ནས་བདུག་
སྤོས་དྲིལ་བུ་དཀྲོལ། །སྒྲ་ཡིས་མཆོད་པ་བྱས་ནས་ནི། །ཡོན་ཕུལ་ནས་ནི་སློབ་མ་ཡི། །གཡས་ཀྱི་མཐེ་བོ་གཡོན་པ་ཡི། །མཐེ་ཆུང་ནས་ནི་བཟུང་བྱས་ནས། །རང་གི་གང་བླངས་སྦྱིན་པར་བྱ། །གལ་ཏེ་གྲུབ་ནས་རྒྱལ་པོ་སོགས། །དགེ་པའི། །ཆེད་དུ་བསྔོ་བར་བྱ། །ཡོངས་རྫོགས་དགང་བླུགས་སྔོན་ལྟ་བུར། །འཐོར་འཐུང་ལ་སོགས་བྱས་ནས་ནི། །ཡོན་ཕུན་ནས་ནི་སློབ་མ་ཡི། །སེམས་ནི་མཉན་པར་བཞག་ནས་སུ། །སྙིང་གར་མེ་ཏོག་ཐལ་མོ་སྦྱར། །ཉུང་སོགས་ཉེས་པ་ཞི་དོན་དུ། །བཟོད་པར་གསོལ་ཞེས་བརྗོད་པར་བྱ། །ཇི་སྲིད་མ་ཚང་ལྷག་པ་རྣམས། །བདག་གིས་རྨོངས་པ་བློ་བགྱིས་པ། །གང་ཕྱིར་ལུས་ཅན་སྐྱབས་གྱུར་པ། །མགོན་པོ་ཁྱེད་ཀྱིས་དེ་བཟོད་མཛོད། །མ་ཚོགས་བ་དང་མི་ཤེས་པ། །ནུས་པ་མེད་ལ་སོགས་པ་རང་བཞིན། །མ་ཚང་བ་དང་གཞན་བྱས་གང༌། །དེ་དག་ཐམས་ཅད་བཟོད་པར་རིགས། །བཟོད་གསོལ་ཕྱག་འཚལ་བྱས་རྗེས་ལ། །རང་གི་མངོན་པར་འདོད་བ་བླང༌། །རྡོ་རྗེ་སེམས་ཞེས་བཟླས་བ་བྱ། །མང་པོ་ཡང་ནི་ཡི་གེ་བརྒྱ་པའི་སྔགས་ཏེ། །ཨོཾ་བཛྲ་ས་ཏྭ་ས་མ་ཡ། །མ་ནུ་པཱ་ལ་ཡ། །བཛྲ་ས་ཏྭ་ཏྱེ་ནོ་བ་ཏིཥྛ་དྲྀ་ཌྷོ་མེ་བྷ་བ། །སུ་ཏོ་ཥྱོ་མེ་བྷ་བ། །ཨ་ནུ་རཀྟོ་མེ་བྷ་བ། །སརྦ་སིདྡྷམྨེ་པྲ་ཡ་ཙྪ་སརྦ་ཀརྨ་སུ་ཙ་མེ་ཙིཏྟཾ་ཤྲེ་ཡཿ་ཀུ་རུ་ཧཱུཾ། ཧ་ཧ་ཧ་ཧ་ཧོ་བྷ་ག་བཱན་སརྦ་ཏ་ཐཱ་ག་ཏ་བཛྲ་མཱ་མེ་མུཉྩ། བཛྲཱི་བྷ་བ་མ་ཧཱ་ས་མ་ཡ་ས་ཏྭ་ཨཿ་ཨི་ཏོ་བ་སརྦ་ས་ཏྭྰྲྠ། སིདྡྷི་དང་ཐཱ་ཡ་བཏ་སུ་ག་གཙྪ་དྷྭ་བུདྡྷ་བི་ཥ་ཡཾ་པུ་ན་རཱ་ག་མ་ན་ཡ་ཏུ། བརྗོད་ནས་རང་གི་སྔགས་ཀྱིས་ནི། །ཡི་གེའི་ནང་དུ་བཅུག་ནས་སུ། །སྔགས་ཀྱིས་རང་བདག་མགོན་པོ་ནི། །སྔགས་པས་བློ་ཡིས་གཤེགས་སུ་གསོལ། །དེ་ལྟར་མེ་ཡི་དེ་བཞིན་ཀུན། །བསང་གཏོར་ལ་སོགས་བྱས་ནས་ནི། །དེ་ལ་དགང་བླུགས་སྦྱིན་བྱས་ནས། །ཡམ་ཤིང་དེ་བཞིན་སྤྱིན་སྲེག་བྱ། །དེ་བཞིན་འདི་ཡིས་ཞབས་བསིལ་སོགས། །ཇི་སྲིད་ནམ་བཟའ་དབུལ་བྱས་ནས། །བཟོད་གསོལ་གསོལ་བ་གདབ་བྱས་ནས། །སྔ་མ་བཞིན་དུ་གཤེགས་སུ་གསོལ། །རྣལ་འབྱོར་བདག་ཉིད་མཉམ་བཞག་བས། །མེལ་
འོ་མ་བསྒྲུབས་བྱས་ན། །ལྷ་རྣམས་ལ་ཕུལ་ལྷག་མ་ནི། །ཕྲུ་བ་འདོད་པས་བགོ་བར་བྱ། །དི་རིང་ཕལ་ཆེར་རིགས་དམ་པ། །རན་པར་འདོད་པ་ཡོད་པ་ནི། །དེས་ན་འདི་བརྩམས་མགོན་པོ་རྣམས། །ཐུབ་པའི་རྩེ་མོ་དེ་བཟོད་མཛོད། །རྒྱུད་རྣམས་མང་པོ་གང་རིག་པ། །རབ་གནས་བློ་ནི་ཕ་རོལ་སོ་ན། །འདི་དག་བྱིས་བས་བསྟན་པས་ན། །ཉེས་ལྡན་བདག་ལ་བཟོད་པར་མཛོད། །རབ་གནས་ཆོ་ག་བཟང་པོ་འདི། །རང་ཏུ་རྒྱས་པར་ཡོད་མོ་ཀྱང༌། །དམན་པས་དེ་ཉིད་མི་རྟོགས་པས། །དེས་ན་བདག་གིས་འདི་རུ་བརྩམས། །འདི་ནི་མདོར་བསྡུས་ཡང་དག་རྫོགས། །རབ་གནས་ཆོ་ག་གོ་རིམས་མཛེས། །འདི་བྱས་བསོད་ནམས་གང་ཐོབ་པས། །འགྲོ་བ་བྱང་ཆུབ་ལ་གནས་གྱུར། །རྨོངས་པ་རྗེས་བཟུང་ལས་བྱུང་པའི། །བསོད་ནམས་ཅུང་ཟད་བསྒོམས་པ་ན། །དཔལ་ལྡན་མཁས་པ་མི་འཇིགས་པའི། །ཕྱག་གིས་ཆོ་ག་སྡེ་པ་སྤྱོར་བྱས། །པཎྜི་ཏ་མི་འཇིགས་པའི་ཕྱག་གིས་མཛད་པ། །རབ་གནས་ཀྱི་ཆོ་ག་མདོར་བསྡུས་པ་རྫོགས་སོ།།