cover

སྡེ་དགེའི་བསྟན་འགྱུར་པོད་ཞེ་བདུན་པ།

རྒྱུད། མི༽

དཔལ་འཛིན། ལ་ལི་ཏ་བཛྲ། མར་མེ་མཛད་བཟང་པོ། ཉིན་མོ་བྱེད་པའི་གྲགས་པ། གྷོ་ཥ་བཛྲ། མི་བསྐྱོད་རྡོ་རྗེ། ཀ་མ་ལ་རཀྵི་ཏ། རྙོག་མེད་རྡོ་རྗེ། རིན་ཆེན་འབྱུང་གནས་ཞི་བ། ཤྲཱི་པཎྜི་ཏ། མར་མེ་མཛད། ཀྲིཥྞ་པཎྜི་ཏ། ནག་པོ། དཱི་པཾ་ཀ་ར། བསོད་སྙོམ་པ། ཀ་ལཱ་པ་མ་ཧཱ། ནག་པོ་པ། རྡོ་རྗེ་བློ། ཀུན་ཏུ་བཟང་པོ། འགྲོ་བཟང་སྙིང་པོ། ཛི་མུ་ད་པཱ་ཏཱ། ནཱ་ག་བོ་དྷི། ཀཱིརྟི། མི་བསྐྱོད་པ། སོ་ན་ཤྲཱི། རྡོ་རྗེ་གྲུབ་པ། གཞོན་ནུ་ཟླ་བ། འཇམ་པའི་དབྱངས། ཤྲཱི་བྷ་དྲ། ཞི་བ་ཡེ་ཤེས། མཉྫུ་ཤྲཱི་ཛྙཱ་ན། དོན་ཡོད་རྡོ་རྗེ། ཀེ་ར་ལི་པ། ཨ་ཤོ་ཀ་སྲཱི། དརྦན་ཨཱ་ཙརྱ། མཉྫུ་བཛྲ། རཏྣ་ཨཱ་ཀ་ར་ཤཱནྟི། ཨ་མོ་གྷ་བཛྲ། ཨ་མོ་གྷ་ཆུང་བ། ལས་ཀྱི་རྒྱལ་པོ། བཻ་རོ་ཙ་ན་རཀྵི་ཏ།

Nitartha Publication

མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །
—རྫོགས་ཆེན་དཔོན་སློབ།

གཤིན་རྗེ་གཤེད་ནག་པོའི་སྒྲུབ་ཐབས་ཞེས་བྱ་བ།
དཔལ་འཛིན།

རྣལ་འབྱོར།


DTG047_Page_0002
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། ཀྲྀཥྞ་ཡ་མཱ་རཱི་སཱ་དྷ་ནཾ་ནཱ་མ། བོད་སྐད་དུ། གཤིན་རྗེ་གཤེད་ནག་པོའི་སྒྲུབ་ཐབས་ཞེས་བྱ་བ། དཔལ་གཤིན་རྗེ་གཤེད་ལ་ཕྱག་འཚལ་ལོ། །བླ་མ་ལ་གུས་དེ་རྗེས་གཤིན་རྗེ་གཤེད་ནག་རྡོ་རྗེ་ལ། །རང་འོད་ཡན་ལག་འདུས་པ་བདེ་བ་རྒྱས་པ་གཞན་གྱི་དོན་འཇུག་པ། །རྡོ་རྗེ་རལ་གྲི་འཁོར་ལོ་ཆུ་སྐྱེས་གྲི་གུག་ཐོད་པའི་ཕྱག །ཞལ་གསུམ་འཇིགས་པའི་འཇིགས་བྱེད་ལ་ནི་སྤྱི་བོས་ཕྱག་འཚལ་ལོ། །གཤིན་རྗེ་གཤེད་ནག་སྒྲུབ་པའི་ཐབས། །དེ་ཉིད་རིག་པ་མངོན་འདོད་པའི། །དབང་ལ་སོགས་པ་ཐོབ་པ་ཉིད། །དེ་ཡི་འདི་ནི་སྒྲུབ་ཐབས་རིམ། །བྱིས་རྣམས་བདེ་བར་རྟོགས་ཕྱིར་དང༌། །མཉམ་པ་དྲན་པར་བྱ་ཆེད་དང༌། །མཆོག་རྣམས་བྱིས་པའི་ངག་ལ་ནི། །མགུ་བྱའི་ཕྱིར་ནི་རྣམ་པར་བྲེ། །སྦྱིན་དང་ཚུལ་ཁྲིམས་ལ་སོགས་ལྡན། །སེམས་ཅན་དོན་ལ་རོ་གཅིག་བློ། །བྱམས་སོགས་ཡོན་ཏན་ཡང་དག་རྫོགས། །དད་དང་ཐོས་པས་རྣམ་པར་བརྒྱན། །ཐོ་རངས་སྙིང་རྗེའི་བདག་ཉིད་ཅན། །


DTG047_Page_0003
[མ་དཔེ་གཟིགས་ན་འདིར་གནོན།]

དང་པོར་གདོང་སོགས་ཁྲུས་བྱས་ནས། །དབེན་པའི་ས་ཕྱོགས་དུར་ཁྲོད་སོགས། །བདེ་བའི་སྟན་ལ་འདུག་ནས་ནི། །བརྩམ་བྱ་རང་སྙིང་པདྨ་སྟེ། །ཟླ་བ་ལ་བལྟ་ཤིན་ཏུ་གསལ། །ཡ་ཡིག་སྔོན་པོའི་འོད་ཟེར་ཅན། །སེམས་ཅན་དོན་ནི་ཕུན་ཚོགས་བྱས། །བླ་མ་རྫོགས་པའི་སངས་རྒྱས་རྣམས། །ནམ་མཁའ་མ་ལུས་ཁྱབ་པར་བསྒོམ། །དེ་རྣམས་དམིགས་ལ་ཕྱག་བྱས་ནས། །ལུས་སྤྲུལ་པ་ཡི་ཆོ་ག་ཡིས། །སེམས་མ་ལ་སོགས་ཀྱིས་མཆོད་ནས། །སྡིག་པ་བཤགས་པའོ། །ལུས་ངག་ཡིད་ཀྱིས་སྡིག་པ་བགྱིས། །དེ་བཞིན་བགྱིད་དུ་སྩལ་བ་དང༌། །མགོན་པོ་རྗེས་སུ་ཡི་རང་གང༌། །དེ་གསུམ་བྱས་པ་བཤགས་པར་བགྱི། །རྫོགས་སངས་རྒྱས་དང་དེ་སྲས་འཕགས། །བསོད་ནམས་ཚོགས་ལ་རྗེས་ཡི་རང༌། །རྫོགས་སངས་རྒྱས་དང་དམ་ཆོས་བཅས། །ཚོགས་ཀྱི་མཆོག་ལ་སྐྱབས་སུ་མཆི། །ཡོན་ཏན་རྒྱ་ཆེན་ཁྱེད་ཅག་ལ། །བདག་གི་ལུས་ནི་དབུལ་བར་བགྱི། །དམ་པའི་ཆོས་ནི་ཐམས་ཅད་དང༌། །སྟོན་པའི་སྒྲ་མཛེས་གནས་གྱུར་ཅིག །རྫོགས་སངས་རྒྱས་དང་དེ་ཡི་སྲས། །སྦྱིན་སོགས་ལས་ཀྱི་ངོ་བོ་ལ། །སྐུ་གསུང་ཡེ་ཤེས་ཐོབ་བྱའི་ཕྱིར། །རབ་


DTG047_Page_0004
[མ་དཔེ་གཟིགས་ན་འདིར་གནོན།]

ཏུ་གུས་པས་གནས་པར་བགྱི། །བྱང་ཆུབ་ཏུ་ནི་སེམས་བསྐྱེད་བགྱི། །སེམས་ཅན་ཀུན་གྱི་དོན་གྱི་ཕྱིར། །གང་ཞིག་བསོད་ནམས་ཚོགས་བསགས་པས། །བྱང་ཆུབ་ཏུ་ནི་བསྔོ་བར་བགྱི། །དཔལ་ལྡན་གཤིན་རྗེ་གཤེད་གྱུར་ནས། །འགྲོ་ལ་ཕན་པ་དག་བྱེད་ཅིང༌། །འདི་ལྟར་སྨོན་ལམ་བཏབ་ནས་ནི། །དེ་ནས་བློ་ཡིས་གཤེགས་སུ་གསོལ། །སྙིང་རྗེས་ཆོ་ག་བཞིན་བལྟས་ནས། །སྣ་ཚོགས་སྟོང་པའི་རྣམ་པར་བསྒོམ། །རང་བཞིན་རྣམས་དང་བྲལ་བའི་ཕྱིར། །རྒྱུ་ཡང་མཚན་མ་མེད་པར་བསྒོམ། །སྤྱོད་དང་བྲལ་བ་ཉིད་ཀྱིས་ནི། །སྨོན་པ་དག་ནི་རྣམ་པར་སྤངས། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། དེ་ལ་སེམས་ནི་བརྟན་བྱས་ནས། །ཨཾ་ཡིག་ལས་བྱུང་ཉི་མ་ལས། །དེར་ནི་ཧཱུཾ་ཡིག་སྔོན་པོའི་མདངས། །འོད་ཟེར་འཕྲོས་པས་ཀུན་ལ་ཁྱབ། །རྡོ་རྗེ་རྩེ་ལྔ་ཐམས་ཅད་དུ། །བསྲུང་བའི་དོན་དུ་བསྒོམ་པར་བྱ། །རྡོ་རྗེ་ས་གཞི་ལྕགས་རི་དང༌། །རབ་གུར་དང་དེ་བཞིན་ནོ། །སངས་རྒྱས་ཞིང་ནི་རྣམ་དག་དོན། །སླར་ཡང་བསམ་གཏན་ཡང་དག་བརྩམ། །དེ་ལ་སྣ་ཚོགས་ཆུ་སྐྱེས་ཟླ། །སཾ་ལས་བྱུང་བའི་རྡོ་རྗེ་ལས། །ཡན་ལག་བཟང་པོ་ཡན་ལག་འབྱུང༌། །ཆོས་འབྱུང་དཀར་པོ་གྲུ་གསུམ་པ། །སྟེང་དུ་གནས་པ་མཁའ་མཉམ་བསམ། །དབུས་སུ་པདྨ་ཟླ་བ་ལ། །སླར་ཡང་དེ་དབུས་དཀྱིལ་འཁོར་ཏེ། །བྷཱུཾ་ཡིག་འཁོར་ལོ་ལས་བསྐྱེད་པ། །རྟག་པའི་ཡན་ལག་ལས་བྱུང་བ། །གྲུ་བཞི་པ་ལ་སྒོ་བཞི་པ། །རྟ་བབས་བཞི་ཡིས་བརྒྱན་པ་དང༌། །དྲ་བ་དྲ་ཕྱེད་ཀྱིས་བརྒྱན་པ། །སྟེགས་བུ་ལྷ་མོས་ལེགས་མཛེས་པ། །སྣ་ཚོགས་རྩེ་མོ་རླུང་གིས་བསྐྱོད། །བ་དན་དྲིལ་བུ་དང་ལྡན་པ། །སྣ་ཚོགས་རྡོ་རྗེས་རྣམ་པར་བརྒྱན། །ཟླ་བ་ཉི་མ་རྒྱལ་བའི་གདན། །ཤར་ནི་དཀར་པོ་ཆེན་པོ་སྟེ། །ལྷོར་ནི་སེར་པོ་ཡང་དག་ལྡན། །ནུབ་ཀྱི་ཆ་ནི་དམར་པོ་སྟེ། །བྱང་ནི་བཙོད་དང་མཚུངས་པའོ། །ཨིནྡྲ་ནཱི་ལའི་འོད་བྱེད་པ། །དབུས་ཀྱི་ས་གཞི་རྣམ་པར་བསམ། །ཕྱོགས་ཀྱི་ཁ་དོག་དབྱེ་བ་འདིས། །སྣ་ཚོགས་རྡོ་རྗེ་བསྒོམ་པར་བྱ། །དེ་བཞིན་གུར་ཡང་བསྒོམ་པར་བྱ། །སོ་སོའི་རྩིག་པ་གོ་རིམས་བཞིན། །རྣམ་པ་ལྔ་ནི་བསྒོམ་བྱས་ནས། །སངས་རྒྱས་གཟུགས་ནི་བསྒོམ་པར་བྱ། །དཔལ་ལྡན་རྣམ་པ་ལྔ་དང་བཅས། །རྡོ་རྗེ་ནག་པོ་སེལ་བྱེད་པ། །སངས་


DTG047_Page_0005
[མ་དཔེ་གཟིགས་ན་འདིར་གནོན།]

རྒྱས་ཀྱི་ནི་གཟུགས་ཞེས་གྲགས། །དེ་ནི་དབྱེ་བས་བསྙད་པར་བྱ། །ལྟེ་བར་སྣ་ཚོགས་པདྨའི་གདན། །ཟླ་བར་དབྱངས་ཡིག་ཉིས་རིམ་དགོད། །དེ་ཡི་ཟླ་བར་ཀ་ཡིག་སོགས། །ཌ་ཌྷ་ད་དྷ་ཡ་ལ་ཡང༌། །བཅུག་ནས་དེ་དག་ཉིད་ལས་གྲུབ། །འདི་དག་འདི་ལྟར་གྲུབ་པ་ནི། །མེ་ལོང་ཡེ་ཤེས་བརྗོད་པར་བྱ། །མཉམ་ཉིད་དེ་དག་གཅིག་པ་ཉིད། །དེ་སྐྱེས་ཧཱུཾ་ནི་སོ་སོར་རྟོག །བྱ་བ་ནན་ཏན་ཡེ་ཤེས་ནི། །དེ་ལས་སྐྱེས་པ་རྡོ་རྗེར་བསྒོམ། །ནོར་བུ་མེ་ཤེལ་འོད་འདྲ་བ། །ས་བོན་བཅས་པའི་འོད་ཟེར་འཕྲོས། །ཨོཾ་བཛྲ་ཨཱཏྨ་ཀོ྅ཧཾ། ཞེས་པས་བདག་ཉིད་ང་རྒྱལ་བྱ། །དེ་སྐྱེས་དཀར་དམར་མདངས་ལྡན་པ། །འོད་ཟེར་མཛེས་པས་འཁྱུད་པའི་ལུས། །ཁྲོ་བོ་སྒེག་གཟུགས་བདེ་བ་ཡིས། །དཀར་དང་སྔོ་དང་དམར་བའི་ཞལ། །གདན་ལ་གཡོན་བརྐྱང་གིས་གནས་པ། །འབར་བའི་རལ་གྲི་རྡོ་རྗེ་གྲི་གུག་གསོར་བའོ། །འཁོར་ལོ་འདམ་སྐྱེས་སྣོད་ནི་འོད་ཟེར་འཕྲོ་བ་ཡི། །ཕྱག་ནི་གཡས་དང་གཡོན་རྣམས་ཀྱིས། །ཆོས་ཀྱི་དབྱིངས་ཀྱི་རང་བཞིན་ནི། །ཡེ་ཤེས་རྡོ་རྗེ་འཛིན་པའི་བདག །རྣམ་པ་ལྔ་ཡི་རང་བཞིན་གང༌། །རྣལ་འབྱོར་ཞེས་ནི་མངོན་པར་བརྗོད། །ཞེས་པ་ནི་རྣལ་འབྱོར་རོ། །

རྗེས་སུ་རྣལ་འབྱོར།


DTG047_Page_0005
[མ་དཔེ་གཟིགས་ན་འདིར་གནོན།]

འདོད་ཆགས་ཆེན་པོས་འདུལ་བ་རུ། །འགྲོ་བ་གསུམ་པོ་ཡང་དག་བལྟས། །རང་སྙིང་ཡེ་ཤེས་འོད་ཟེར་གྱིས། །སྣ་ཚོགས་སངས་རྒྱས་གཟུགས་བྱས་ནས། །རང་གི་ལུས་ལ་ཡང་དག་གཞུག །བདེ་བ་དམ་པ་རྣམ་པའི་གཟུགས། །བདག་གི་ལོངས་སྤྱོད་བསྒོམ་པར་བྱ། །རྟོག་པ་ཐམས་ཅད་ཡང་དག་སྤངས། །སྔགས་མཆོག་དེ་ཉིད་གསུམ་ཞེས་པ། །ཧོཿ་དམར་གཉིས་ཀྱི་ནང་དུ་གཞུག །ཇི་ལྟར་སྐར་མདའ་འཕྲོ་བ་ལྟར། །བྱང་ཆུབ་སེམས་ནི་དེ་བཞིན་གཞུག །སྙིང་རྗེ་ཆགས་པའི་སེམས་ཀྱིས་ནི། །རྡོ་རྗེ་འཛིན་པ་བདག་ཉིད་ཞུ། །བྱམས་སོགས་སེམས་མ་སོགས་རྣམས་ཀྱི། །འཁོར་ལོའི་གཙོ་བོ་སྐུལ་བར་བྱེད། །བཞེངས་ཤིག་གཤིན་རྗེ་རྗེ་བཙུན་སྙིང་རྗེའི་ཁྲོ། །ཁམས་གསུམ་ཐམས་ཅད་པ་ཡི་གཏི་མུག་སོལ། །དེ་བཞིན་བདུད་ལས་རྒྱལ་བར་མཛོད། །བཞེངས་ཤིག་རྗེ་བཙུན་ཐུགས་ནི་གཡེངས་གྱུར་པས། །འཇིག་རྟེན་མགོན་པོ་སྟོང་ཉིད་ཅི་སྟེ་བཞུགས། །བཞེངས་ཤིག་རྗེ་བཙུན་འཇིག་རྟེན་བསོད་ནམས་ཀྱིས། །བྱང་ཆུབ་འདོད་


DTG047_Page_0006
[མ་དཔེ་གཟིགས་ན་འདིར་གནོན།]

པའི་འཇིག་རྟེན་མཉམ་མནན་ནས། །ཅི་ཕྱིར་སྟོང་པ་ཉིད་ལ་སེམས་ཤིང་ཞུགས། །བསྐུལ་ནས་དེ་ནི་ཐིམ་གྱུར་ནས། །དེ་ཡི་རོ་ཡི་རྗེས་སུ་སོང༌། །གླུ་འདི་ཡི་ནི་ངོར་བྱས་ནས། །ཕུན་ཚོགས་ཉམས་འདྲ་ལས་བྱུང་བ། །ཞུ་བ་རྗེས་པ་ལས་སྐྱེས་པ། །མཾ་སྔོན་པོ་ལས་ཉི་དཀྱིལ་འཁོར། །མི་བཟད་ཁྲོ་བཅས་མདོག་སྔོ་བ། །རུས་པའི་རྒྱན་གྱིས་བརྒྱན་པ་སྟེ། །སྨ་ར་རྣོན་པོ་འབར་བའི་རྭ། །རྨིག་པ་རྐོ་བ་འཇིགས་བྱེད་པ། །མ་ཧིཪྵ་དེའི་རྒྱབ་གནས་པ། །རྡོ་རྗེ་སྔོན་པོ་འོད་ཟེར་བཅས། །ས་བོན་འོད་ཟེར་བཅས་པ་ཡིས། །གཤེད་ནག་གཟུགས་ནི་དེ་ཡིས་བྱས། །སྣ་ཚོགས་དག་ལ་ཡང་དག་གཞུག །འཇིགས་བྱེད་ཆེན་པོ་འཇིགས་སུ་རུང༌། །མ་ཧིཪྵར་ནི་རྡོ་རྗེར་བསྒོམ། །དཀྱིལ་འཁོར་དབང་ཕྱུག་བསྒོམ་པར་བྱ། །འཇིག་རྟེན་གསུམ་པོ་བདུད་ཀྱི་འཁོར། །འོད་ཟེར་རྣོན་པོ་འཕྲོ་བས་བསྲེག །མི་བཟད་དྲག་ཤུལ་མུན་པའི་ལུས། །འོད་ཟེར་ལྗགས་ནི་འདྲིལ་བ་པོ། །འབར་བའི་མཆེ་བ་གཙིགས་པའི་བྱད། །རལ་པ་སྨ་ར་གྱེན་དུ་འགྲེང༌། །གཡོན་བརྐྱང་བ་ཡི་ཞབས་ཀྱིས་མནན། །ནག་པོ་རྣམ་པར་མྱོས་བྱེད་པ། །རྩ་བའི་ཞལ་ནི་བུང་ནག་འདྲ། །གཡས་པ་ཟླ་བའི་འོད་བྱེད་པ། །གཡོན་པ་དམར་པོའི་མདངས་སུ་བསྟན། །རྡོ་རྗེའི་རྒྱན་གྱིས་བརྒྱན་པ་སྟེ། །སྦོམ་ཐུང་གསུས་པ་འཕྱང་བ་པོ། །མགོ་བོའི་ཕྲེང་བ་འཕྱང་དང་ལྡན། །གཡས་དང་གཡོན་པའི་ཕྱག་དག་གིས། །གྲི་གུག་དང་ནི་ཐོད་པ་འཛིན། །རང་འོད་ཤེས་རབ་ཡན་ལག་སྦྱོར། །བདེ་བ་འབབ་པ་གཞན་གྱི་དོན། །ལྷག་མ་གཡས་པའི་ཕྱག་དག་གིས། །འབར་བའི་རྡོ་རྗེ་རལ་གྲི་འཛིན། །གཡོན་ན་འཁོར་ལོ་ཆུ་སྐྱེས་འཛིན། །སྦྲུལ་གྱི་དབང་པོས་བརྒྱན་བྱས་ཏེ། །སྔོན་པོ་མཐའ་ཡས་སྦྲུལ་དག་གིས། །རལ་པ་བཅིངས་པ་ཤིན་ཏུ་འཇིགས། །དམར་པོ་འཇོག་པོ་ཀླུ་ཡིས་ནི། །མ་རུངས་པ་ཡི་རྣ་བ་བརྒྱན། །སྣ་ཚོགས་རིགས་ལྡན་དཔུང་རྒྱན་ཏེ། །དུང་སྐྱོང་དག་གི་སྦྲུལ་ཉིད་ནི། །སེར་པོ་གདུ་བུ་འཛིན་པའོ། །པདྨ་དཀར་པོའི་དོ་ཤལ་ཅན། །ལྗང་གུ་ཀརྐོ་ཊ་ཡིས་ནི། །ཚངས་པའི་སྐུད་པ་ཤིན་ཏུ་མཛེས། །བདུད་རྩིའི་ཁ་དོག་འདྲ་བ་ཡི། །ནོར་འཛིན་གྱིས་སྐ་རགས་བྱས། །པདྨའི་རྩ་བ་ཁ་དོག་སྐྱ། །པདྨ་ཆེན་པོས་ཞབས་གདུབ་པོ། །ཐམས་ཅད་ཕུཊ་ཀྱི་སྒྲ་བྱེད་པ། །ལྕེ་གཉིས་དྲག་ཤུལ་མཆེ་བའི་ཕྲེང༌། །འདི་ནི་འཁོར་བ་མྱང་


DTG047_Page_0007
[མ་དཔེ་གཟིགས་ན་འདིར་གནོན།]

འདས་གཟུགས། །གཤིན་རྗེ་སེལ་བར་བྱེད་པའོ། །རྟོག་པ་ཟད་པའི་ཆེད་བསམས་ནས། །སྔགས་ཀྱིས་ཡང་དག་བྱིན་གྱིས་བརླབ། །ཨོཾ་དྷརྨ་དྷཱ་ཏུ་ཛྙཱ་ན་སྭ་བྷཱ་ཝ་ཨཱཏྨ་ཀོ྅ཧཾ། ཞེས་པ་ནི་རྗེས་སུ་རྣལ་འབྱོར་རོ། །

ཤིན་ཏུ་རྣལ་འབྱོར།


DTG047_Page_0007
[མ་དཔེ་གཟིགས་ན་འདིར་གནོན།]

རང་སྙིང་འོད་ཟེར་ལྕགས་ཀྱུ་ཡིས། །མཁའ་ཁྱབ་རྫོགས་པའི་སངས་རྒྱས་རྣམས། །ཐམས་ཅད་བཀུག་ནས་ཞལ་དུ་གཞུག །བདེ་བར་ཕབ་ནས་སྙིང་གར་ཞུ། །རྡོ་རྗེ་ལམ་བྱུང་ཞུ་བ་དེ། །བློ་དང་ལྡན་པས་སྤྲོ་བར་བྱ། །རང་འོད་པདྨའི་ཁོངས་སུ་གནས། །རང་གི་ས་བོན་གཟུགས་སུ་བལྟ། །ས་བོན་ལས་བྱུང་འཁོར་ལོ་ཀུན། །ས་བོན་ཀུན་གྱིས་བྱིན་གྱིས་བརླབ། །འཕྲོ་ཞིང་སྡུད་པའི་འོད་ཟེར་ནི། །མཁས་པས་ཆོ་ག་བཞིན་དུ་བསྒོམ། །ཡ་ཡིག་སྔོན་པོས་དབུས་མ་བསྐྱེད། །དཀྱིལ་འཁོར་ཅན་གྱི་མཚན་ཉིད་གསུངས། །ཤར་དུ་ཀྵེ་ལས་འཁོར་ལོ་གྲུབ། །རྟག་པ་དཀར་པོ་ཕྱག་དྲུག་པ། །འཁོར་ལོ་རལ་གྲི་གཡས་པའི་ཕྱག །གཡོན་ན་རིན་ཆེན་ཆུ་སྐྱེས་འཛིན། །ལྷོར་ནི་མ་ཡི་ཡི་གེ་ལས། །རིན་ཆེན་ལས་སྐྱེས་རིན་ཆེན་འབྱུང༌། །བཙོ་མ་གསེར་གྱི་མདངས་བྱེད་པ། །རིན་ཆེན་རལ་གྲི་གཡས་ན་འཛིན། །གཡོན་ན་འཁོར་ལོ་ཆུ་སྐྱེས་སོ། །ནུབ་ཏུ་འདོད་ཆགས་རྡོ་རྗེ་ཅན། །ས་བོན་མེ་དང་པདྨ་གྲུབ། །པདྨ་རཱ་གའི་འོད་དང་མཉམ། །གཡས་ན་པདྨ་རལ་གྲིའོ། །ནོར་བུ་འཁོར་ལོ་གཡོན་དུ་དགོད། །ད་དང་རལ་གྲི་ལས་བྱུང་བ། །ལྗང་གུ་ཕྲག་དོག་གཤིན་རྗེ་གཤེད། །གཡས་ན་རལ་གྲི་འཁོར་ལོ་བསྣམས། །མཛེས་པའི་ནོར་བུ་པདྨ་གཡོན། །ཐམས་ཅད་ཞེ་སྡང་གཤིན་རྗེ་གཤེད། །ཁྲོ་བོ་གཟུགས་ཀྱི་མཚན་ཉིད་དོ། །དེ་རྣམས་ཀྱི་ནི་རྩ་བའི་ཕྱག །གྲི་གུག་ཐོད་པ་བསྒོམ་པར་བྱ། །གཉིས་མེད་གཉུག་མའི་ཤེས་རབ་དང༌། །ལུས་བདག་མེད་པའི་ངོ་བོ་དང༌། །ཉི་མའི་དཀྱིལ་འཁོར་ལོ་གནས་པ། །རྟག་པ་ཟླ་བའི་དཀྱིལ་འཁོར་ལའོ། །སྣ་ཚོགས་རྡོ་རྗེ་རྩ་བར་གནས། །སེམས་ཅན་དོན་བྱེད་བསྒོམ་པར་བྱ། །ཤར་སྒོར་ཡ་ཡིག་ལས་སྐྱེས་པ། །ཐོ་བ་སྔོན་པོ་ཡི་ནི་གཟུགས། གཡས་ན་ཐོ་བ་རལ་གྲི་འཛིན། །ནོར་བུ་བཟང་པོ་པདྨ་གཡོན། །རྡོ་རྗེ་ཐོར་གྲགས་གཤིན་རྗེ་གཤེད། །ལྷོར་ནི་ཛ་དང་དབྱུག་པ་ལས། །དབྱུག་པ་གཤིན་རྗེ་གཤེད་དཀར་མདངས། །དབྱུག་པ་རལ་གྲི་གཡས་པ་ན། །ཆུ་སྐྱེས་འཁོར་ལོ་གཡོན་པའོ། །ནུབ་ཏུ་པདྨ་གཤིན་རྗེ་གཤེད། །ནི་སྐྱེས་འདོད་


DTG047_Page_0008
[མ་དཔེ་གཟིགས་ན་འདིར་གནོན།]

ཆགས་མཐའ་འཇོམས་གཟུགས། །པདྨ་རལ་གྲི་གཡས་པ་ན། །གཡོན་ན་འཁོར་ལོ་ནོར་བུའོ། །བྱང་དུ་རལ་གྲི་གཤིན་རྗེ་གཤེད། །ར་སྐྱེས་ཕྲ་དོག་མཐའ་འཇོམས་པ། །རལ་གྲི་འཁོར་ལོ་གཡས་པ་ན། །གཡོན་ན་ནོར་བུ་པདྨ་སྟེ། །ཅུང་ཟད་སྔོ་བའི་བྱེ་བྲག་སྟེ། །ཞེས་པ་འཇིགས་པར་བྱེད་པའོ། །སྤྲུལ་ནི་ཐམས་ཅད་པ་ཡི་གཟུགས། །རྣམ་པར་གཙིགས་པའི་གད་རྒྱངས་ཅན། །སྐྲ་སེར་གྱེན་དུ་འགྲེང་བ་སྟེ། །ཉི་མའི་དཀྱིལ་འཁོར་ཡང་དག་ལྡན། །མཆེ་བ་གཙིགས་པ་གད་རྒྱངས་ཆེ། །གྲི་གུག་དང་ནི་ཐོད་པ་འཛིན། །སྣ་ཚོགས་རྡོ་རྗེ་མཚམས་བཞི་ལ། །ཟླ་བ་ལ་གནས་ལྷ་མོ་རྣམས། །ཤར་ལྷོ་མཚམས་ཀྱི་ལྷ་མོ་ནི། །ཛ་སྐྱེས་རྡོ་རྗེ་སེམས་མའོ། །དཀར་མོ་སྒེག་མོ་ཁྲོ་བ་ཆེ། །གཏི་མུག་གཤིན་རྗེ་གཤེད་ཀྱི་གཟུགས། །དེ་ནས་ལྷོ་ནུབ་མཚམས་སུ་ནི། །རྡོ་རྗེ་ཕག་མོ་ས་ལས་སྐྱེས། །ཁྲོ་བོ་ཕག་མོའི་གདོང་ཅན་མ། །ཞེ་སྡང་གཤིན་རྗེ་གཤེད་དང་མཚུངས། །བྱང་དང་ནུབ་ཀྱི་མཚམས་སུ་ནི། །རབ་ཏུ་ཞི་བའི་དབྱངས་ཅན་མ། །དོ་སྐྱེས་ཤིན་ཏུ་དམར་བའི་མདོག །འདོད་ཆགས་གཤིན་རྗེ་མཐར་འཇོམས་གཟུགས། །བྱང་ཤར་གྱི་ནི་མཚམས་སུ་ནི། །གཽ་རཱི་ལྗང་གུ་འཇིགས་སུ་རུང༌། །རུ་སྐྱེས་ཕྲག་དོག་གཤིན་རྗེ་གཤེད། །གཟུགས་དང་མཚན་མ་འཛིན་པའི་མཆོག །སྔོན་པོའི་གཡས་ནི་དཀར་བ་དང༌། །དཀར་པོའི་གཡས་ནི་སྔོ་བ་དང༌། །དེ་གཉིས་ཀྱི་གཡོན་དམར་པོ་སྟེ། །དེ་ལས་གཞན་པ་སྔོ་དཀར་པོ། །དཀྱིལ་འཁོར་གྱི་ནི་མཚམས་བཞི་རུ། །ན་ཡོ་ནི་ར་ཐོད་པའོ། །གྲུབ་ནས་རབ་སྤྲོ་བློ་ལྡན་གྱིས། །ཇི་སྐད་བརྗོད་པའི་རང་སྔགས་ཀྱིས། །ཧྲཱིཿ་ཥྚྲིཿ་ལ་སོགས་པ་སྔགས་ཀྱི་སྒྲས། །དཀྱིལ་འཁོར་གཙོ་བོ་ཡང་དག་བསྐུལ། །སྤྲུལ་པ་མཐའ་ཡས་སྤྲོས་པ་ཡིས། །སེམས་ཅན་དོན་མཆོག་བྱས་ནས་ནི། །རང་གི་ལུས་ལ་ཐམས་ཅད་ཀྱིས། །ཁྲོ་བོ་དཔའ་བོ་ཐམས་ཅད་དགོད། །ཛིན་ཛིཀ་ཅེས་བྱ་བ་འདིས། །ཤར་དུ་གཏི་མུག་མཐར་བྱེད་པ། །རྩིབས་ཀྱི་རྩ་བ་ལ་གནས་པ། །སྣ་ཚོགས་ཆུ་སྐྱེས་ཟླ་བར་དགོད། །རཏྣ་དྷྲྀཀ་ཅེས་བྱ་བ་འདིས། །ལྷོ་རྩིབས་ཆུ་སྐྱེས་ཉི་མ་ལ། །ཕྲ་མ་ཞེས་བྱ་དྲངས་ནས་ནི། །ཆོ་ག་བཞིན་དུ་དགོད་པར་བྱའོ། །ཨཱ་རོ་ལྀཀ་ཅེས་བྱ་བ་འདིས། །འདོད་ཆགས་གཤིན་རྗེ་སེལ་བྱེད་པ། །ནུབ་རྩིབས་འདམ་སྐྱེས་ཉི་མ་


DTG047_Page_0009
[མ་དཔེ་གཟིགས་ན་འདིར་གནོན།]

ལ། །ཆོ་ག་བཞིན་དུ་རྣམ་པར་བསམ། །པཛྙཱ་དྷྲྀཀ་ཅེས་བྱ་བ་འདིས། །ཕྲག་དོག་གཤིན་རྗེ་ཟད་བྱེད་པ། །བྱང་རྩིབས་ཆུ་སྐྱེས་ཉི་མ་ལ། །ཆོ་ག་བཞིན་དུ་དགོད་པར་བྱ། །མུངྒར་དྷྲྀཀ་ཅེས་བྱ་བ་ཡིས། །ཤར་སྒོར་ཆུ་སྐྱེས་ཉི་མ་ལ། །ཐོ་བའི་མཐའ་འཇོམས་ཟ་བྱེད་པ། །བློ་དང་ལྡན་པས་བསམ་པར་བྱ། །དཎྜ་དྷྲྀཀ་པའི་སྔགས་འདི་ཡིས། །ལྷོ་ཡི་སྒོ་རུ་ཡང་དག་གནས། །དབྱུག་པ་གཤིན་རྗེ་འདུལ་དཀའ་བ། །སྣ་ཚོགས་ཆུ་སྐྱེས་ཉི་མར་དགོད། །པདྨ་དྷྲྀཀ་ཅེས་བྱ་བ་འདིས། །པདྨ་གཤིན་རྗེ་གཤེད་འཇོམས་པ། །ནུབ་སྒོར་ཆུ་སྐྱེས་ཉི་མ་ལ། །གཏུམ་པོ་སྟོབས་ཆེན་བསྒོམ་པར་བྱ། །ཁཌྒ་དྷྲྀཀ་ཅེས་བྱ་བ་འདིས། །རལ་གྲི་གཤིན་རྗེ་ཟད་པར་བྱེད། །སྣ་ཚོགས་པདྨ་ཉི་མར་བསམ། །བྱང་དུ་བདུད་ནི་འཇོམས་པའོ། །སྣ་ཚོགས་རྡོ་རྗེའི་མཚམས་བཞི་ལ། །ལྷ་མོ་བསྒོམ་བྱ་དེ་བཞིན་མཆོག །ཤར་ལྷོ་ལྷ་མོ་སེམས་མ་སྟེ། །གཏུམ་མོ་མཛེས་མའི་འོད་ཟེར་ཅན། །མོ་ཧ་ར་ཏི་ཞེས་སྔགས་ཀྱིས། །སྣ་ཚོགས་ཆུ་སྐྱེས་ཟླ་བར་གནས། །དེ་ནས་ལྷོ་ནུབ་རྡོ་རྗེ་མོ། །ཕག་མོ་རིགས་ཀྱི་གཙོ་མོ་སྟེ། །དྭེ་ཥ་ར་ཏི་དེ་ཉིད་འདིས། །པདྨ་ཟླ་བར་མཁས་པས་དགོད། །དེ་ནས་ནུབ་བྱང་མཚམས་སུ་ནི། །ཟླ་བར་དབྱངས་ཅན་དགོད་པར་བྱ། །རཱ་ག་ར་ཏིའི་སྔགས་འདི་ཡིས། །དེ་ནས་བྱང་ཤར་གཽ་རཱི་སྟེ། །བཛྲ་ར་ཏིའི་སྔགས་འདི་ཡིས། །ཟླ་བར་ཨོཾ་གྱིས་མཚན་པའོ། །རྩ་བའི་དཀྱིལ་འཁོར་གྲྭ་བཞི་རུ། །དེ་ཉིད་གསུམ་གྱི་ཐོད་པའོ། །འདི་ལྟར་སྤྲོ་བྱ་དཀྱིལ་འཁོར་བཅས། །བརྟན་པར་བྱས་ནས་བདེ་ལྡན་པ། །སྔོན་གྱི་འཁོར་ལོ་དེར་ཐིམ་པར། །མཉམ་པར་གཞག་པས་བལྟ་བར་བྱ། །འདི་ནི་ཤིན་ཏུ་རྣལ་འབྱོར་རོ། །

རྣལ་འབྱོར་ཆེན་པོ།


DTG047_Page_0009
[མ་དཔེ་གཟིགས་ན་འདིར་གནོན།]

གཤིན་རྗེ་ནག་པོ་འཇོམས་པ་དང༌། །དཀྱིལ་འཁོར་པ་ཡི་རང་བཞིན་གྱིས། །མིག་དང་སྐུ་སོགས་ངོ་བོ་ལ། །ལྷ་རྣམས་བྱིན་གྱིས་བརླབ་པར་བྱ། །ཀྵིཾ་ལས་འཁོར་ལོ་གཏི་མུག་མདངས། །ཅུང་ཟད་ཁྲོ་བོ་མིག་ལ་ནི། །རྡོ་རྗེ་མིག་དགོད་བློ་ལྡན་གྱིས། །རྣ་བར་ཛཾ་ཡིག་རྡོ་རྗེ་ལས། །རྡོ་རྗེ་རྣ་བ་ནག་པོའི་མདངས། །སྣ་རུ་ཁཾ་ཡིག་རིན་ཆེན་འབྱུང༌། །ཕྲ་མ་ཞེས་བསྒྲགས་དང་མཚུངས་པ། །ཟླ་བར་རྡོ་རྗེ་སྣ་ཚོགས་སོ། །ལྕེ་ལ་རཾ་ཞེས་པདྨ་ལས། །རྡོ་རྗེ་ལྕེ་བྱུང་པདྨར་སོང༌། །འདོད་ཆགས་གཤིན་རྗེ་མདངས་ལྡན་པའོ། །ཀཾ་སྐྱེས་


DTG047_Page_0010
[མ་དཔེ་གཟིགས་ན་འདིར་གནོན།]

རལ་གྲི་ལས་བྱུང་བ། །རྡོ་རྗེ་སྐུ་སྟེ་ཟླ་བར་གནས། །ཕྲག་དོག་གཤིན་རྗེ་གཤེད་ཀྱི་གཟུགས། །དཔྲལ་བར་སྐུ་ཡི་ལུས་ཅན་ནོ། །ལྟེ་བའི་སྟེང་དུ་སཾ་ལས་སྐྱེས། །ཐུགས་ཀྱི་རྡོ་རྗེ་དེ་བཞིན་མཆོག །ཁྲོ་བོ་སྒེག་པའི་གཟུགས་ཅན་ནི། །རྡོ་རྗེ་འཛིན་པའི་རྣམ་པར་དགོད། །ཡན་ལག་དྲུག་ལ་དགོང་པ་ནི། །མངོན་ཤེས་སྒྲུབ་པའི་དོན་དུ་བཤད། །སྙིང་གར་ཧཱུཾ་ལས་རྡོ་རྗེ་དབུས། །ཧཱུཾ་གནས་རྡོ་རྗེ་སྔོན་པོའི་མདངས། །ཐུགས་ཀྱི་རྡོ་རྗེ་གཤིན་རྗེ་གཤེད། །ཁ་དོག་ཕྱག་མཚན་ཡང་དག་ལྡན། །མགྲིན་པར་ཨཱཿ་ཡིག་པདྨ་ལས། །སླར་ཡང་པདྨ་ལས་བྱུང་བ། །འདོད་ཆགས་གཤིན་རྗེ་གཤེད་འདྲའི་ལུས། །དཔལ་ལྡན་གསུང་གི་རྡོ་རྗེ་བསམ། །སྤྱི་བོར་ཨོཾ་ལས་འཁོར་ལོ་སྟེ། །ཨོཾ་དང་འཁོར་ལོ་དཀར་པོའི་མདངས། །སྐུ་ཡི་རྡོ་རྗེ་སྐུ་དབང་ཕྱུག །ཕྱག་དང་ཁ་དོག་མཚན་མ་མཆོག །དེ་ཉིད་གསུང་གི་རྡོ་རྗེ་མཆོག །རྫོགས་ནས་ནམ་མཁར་གནས་པ་ཡི། །སངས་རྒྱས་མཆོད་ནས་སྔགས་ཀྱིས་ནི། །དེ་རྣམས་བྱིན་གྱིས་བརླབ་པར་བྱ། །ཨོཾ་སརྦ་ཏ་ཐཱ་ག་ཏ་ཙིཏྟ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཨོཾ་སརྦ་ཏ་ཐཱ་ག་ཏ་ག་ཝཱ་ཀ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཨོཾ་སརྦ་ཏ་ཐཱ་ག་ཏ་ག་ཝཱ་ཀ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། རང་སྙིང་ས་བོན་འོད་ཟེར་གྱིས། །སྣ་ཚོགས་གནས་པའི་སངས་རྒྱས་རྣམས། །སྲད་དང་བཅས་པ་སྤྱན་དྲངས་ནས། །མདུན་དུ་བལྟས་ནས་དེ་རྣམས་ལས། །རྣམ་པར་སྤྲོས་པ་གང་ཡིན་པ། །སེམས་མ་ལ་སོགས་སླར་ཡང་ནི། །ཟླ་མདངས་བུམ་པ་བཟུང་ནས་ནི། །དེ་རྣམས་བཀྲ་ཤིས་ཚིགས་བཅད་དང༌། །དེ་བཞིན་སྙན་པ་གླུ་ཡི་སྒྲས། །དབང་བསྐུར་བར་ནི་བསམ་པར་བྱ། །བདག་དང་གཞན་ཉིད་ཐམས་ཅད་ལ། །སྤྱི་བོར་གཤིན་རྗེ་ནག་པོར་རོ། །རྡོ་རྗེ་ཅན་རྣམས་བདག་སྤྱི་བོར། །རང་སྙིང་ས་བོན་འོད་ཟེར་གྱིས། །ཡེ་ཤེས་འཁོར་ལོ་སྤྱན་དྲངས་ནས། །བདག་མདུན་བལྟས་ནས་ཁྲོ་བོས་ནི། །བགེགས་བསྐྲད་ནས་ནི་བསྲུང་བ་དང༌། །ཨརྒྷ་ཞབས་བསིལ་ལ་སོགས་འབུལ། །ཨོཾ་མུངྒ་ར་ཛཿ་ཞེས་བྱ་བའི་སྔགས་འདིས་དགུག་གོ ། ཨོཾ་དཎྜ་ཧཱུཾ་ཞེས་པ་འདིས་གཞུག་གོ །ཨོཾ་པདྨ་བཾ་ཞེས་པ་འདིས་བཅིང་ངོ༌། །ཨོཾ་ཁཌྒ་ཧོཿ་ཞེས་པ་འདིས་དབང་དུ་བྱའོ། །རང་སྙིང་ས་བོན་འོད་ཟེར་གྱིས། །སངས་རྒྱས་རྣམས་ནི་བཀུག་ནས་གཞུག །སྙིང་གར་ཞུ་བར་བལྟས་ནས་ནི། །རང་སྙིང་པདྨའི་ལྟེ་བ་ལ། །ཟླ་བ་ལས་བྱུང་ལྷ་མོའི་ཚོགས། །སྣ་ཚོགས་མེ་ཏོག་


DTG047_Page_0011
[མ་དཔེ་གཟིགས་ན་འདིར་གནོན།]

ཡོ་བྱད་ཚོགས། །ལག་པའི་འདབ་མས་བཟུང་ནས་ནི། །མཆོད་པའི་གླུ་ནི་ཡིད་འོང་བ། །སྣ་ཚོགས་གར་གྱི་བྱེ་བྲག་དང༌། །བདེ་བ་ཆེན་པོ་སྟེར་བ་ཡི། །འགྱིང་དང་བཅས་པས་མཆོད་པར་བྱ། །ཨེ་མ་ཀྱེ་ཀྱེ་བླ་མ་གཤིན་རྗེ་གཤེད་ནག་པོ། །སྲིན་པོའི་གཟུགས་ཀྱི་རང་བཞིན་གང༌། །ང་ནི་ཁྱོད་མཐོང་བས་འཇིགས་པས། །བླ་མ་ཁྲོ་བའི་རང་བཞིན་ངོར། །ས་སྟེངས་ས་བླ་ས་འོག་རྣམས། །ཁྱོད་ཀྱིས་གར་བྱས་པས་ནི་འདར། །མིག་སྨན་བདར་ནག་ཁྲོ་བོའི་ཡིད། །གར་མཛད་ཁྱོད་ནི་རོ་ལངས་གཟུགས། །གནག་ཅིང་སྦོམ་པ་ཡི་ནི་ཚད། །རྣམ་པ་མང་པོའི་གཟུགས་སྤྲུལ་བྱེད། །རྡོ་རྗེ་དབྱངས་ཅན་འདུད་པར་བྱེད། །ཁྱོད་ནི་གར་མཛོད་བདེ་བ་ཆེ། །ཁྱོད་ནི་ཧྲཱིཿ་ཥྚྲིཿ་སྔགས་ཀྱི་སྒྲས། །ཁམས་གསུམ་པ་ཡི་འཁྲུལ་པ་སོལ། །རྗེ་བཙུན་སྙིང་རྗེ་ཡིས་ནི་ཁྲོ། །ཁྱོད་ནི་འགྲོ་བལྟས་གར་བྱེད་པ། །ཨོཾ་སརྦ་ཏ་ཐཱ་ག་ཏ་པཱུ་ཛ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། བྲག་ཅ་དང་མཚུངས་ཐམས་ཅད་ནི། །སྒྲ་ཡི་གྲོང་རྣམས་རྣམ་བལྟས་ནས། །འཁོར་ལོ་ཅན་ནི་དེ་རྣམས་ཀྱིས། །དེ་བཞིན་གཙོ་བོས་དེ་རྣམས་སོ། །གཏི་མུག་རྡོ་རྗེའི་རང་བཞིན་ཅན། །གཤིན་རྗེ་གཤེད་པོ་ཤིན་ཏུ་འཇིགས། །སྟོན་པ་སངས་རྒྱས་ཀུན་རང་བཞིན། །རྡོ་རྗེ་སྐུ་ལ་ཕྱག་འཚལ་ལོ། །ཕྲ་མོ་རྡོ་རྗེའི་རང་བཞིན་ཁྱོད། །གཤིན་རྗེ་གཤེད་པོ་ཤིན་ཏུ་འཇིགས། །རྡོ་རྗེ་ཐུགས་བཞིན་རབ་གསལ་བ། །རྡོ་རྗེ་རིན་ཆེན་ཕྱག་འཚལ་བསྟོད། །འདོད་ཆགས་རྡོ་རྗེའི་རང་བཞིན་ཁྱོད། །འདོད་ཆགས་ཆོས་ཀྱི་འབྱུང་གནས་གཙོ། །ཐམས་ཅད་དབྱངས་མཆོག་དམ་པ་མཆོག །རྡོ་རྗེ་གསུང་ལ་ཕྱག་འཚལ་བསྟོད། །ཕྲག་དོག་དངོས་པོའི་རང་བཞིན་ཁྱོད། །གཤིན་རྗེ་གཤེད་པོ་ལས་ཀུན་བྱེད། །རྡོ་རྗེ་སྐུ་བཞིན་རབ་གསལ་བ། །ཕྱག་ན་རལ་གྲི་ཕྱག་འཚལ་བསྟོད། །སངས་རྒྱས་ཀུན་གྱི་རང་བཞིན་ཁྱོད། །སངས་རྒྱས་ཐམས་ཅད་གཅིག་ཏུ་སྡུད། །སངས་རྒྱས་ཀུན་དང་མཆོག་གི་མཆོག །དཀྱིལ་འཁོར་དབང་ཕྱུག་ཕྱག་འཚལ་བསྟོད། །ཨ་ཡིག་ལས་བསྐྱེད་དག་པ་ནི། །མགོ་བོ་གསུམ་གྱི་སྟེང་ན་གནས། །པདྨའི་སྣོད་ནི་རབ་རྫོགས་ནས། །དེ་འོག་མེ་ཡི་དཀྱིལ་འཁོར་ནི། །རཾ་ལས་བྱུང་བ་གྲུ་གསུམ་མོ། །དེ་འོག་རླུང་གི་དཀྱིལ་འཁོར་ནི། །ཡཾ་སྐྱེས་སྔོན་པོ་གཞུ་ཡི་དབྱིབས། །གཡོ་བའི་འཕན་གྱིས་མཚན་


DTG047_Page_0012
[མ་དཔེ་གཟིགས་ན་འདིར་གནོན།]

པའོ། །དེ་ལ་མིང་ཡིག་དང་པོ་སྐྱེས། །དེ་ནི་རྣམ་པར་སྣང་མཛད་སོགས། །ད་ཡིག་ལས་སྐྱེས་ཡང་དག་བྱུང༌། །གླང་པོ་ལ་སོགས་ལྔ་པོ་རྣམས། །ཧཱུཾ་སྐྱེས་རྡོ་རྗེའི་ཁ་ཆོད་ཀྱིས། །ད་ཡི་ཁ་བཅད་བསྒོམ་པར་བྱའོ། །རླུང་གིས་བསྐུལ་བའི་མེ་ཡིས་ནི། །དེ་ཡང་ཞུ་བར་རྣམ་པར་བསམ། །རྡོ་རྗེ་མཉམ་པའི་རོར་གྱུར་པ། །ཤིན་ཏུ་དྲི་མེད་དག་པར་བལྟས། །དེར་ནི་ཨོཾ་ཡིག་འོད་ཟེར་གྱིས། །སངས་རྒྱས་ཀུན་བཀུག་ཡེ་ཤེས་གཟུགས། །སྔགས་ཀྱི་གཟུགས་ཀྱིས་རབ་ཏུ་གཞུག །བདུད་རྩི་མཆོག་ལྔ་བལྟས་ནས་ནི། །དེ་ཉིད་གསུམ་གྱི་བྱིན་གྱིས་བརླབ། །དཀྱིལ་འཁོར་བདག་པོ་ཚིམ་པར་བྱ། །ཡི་གེ་ཧཱུཾ་ལས་བྱུང་བ་ཡི། །ལྕེ་ནི་རྡོ་རྗེ་དཀར་པོར་བལྟ། །དེ་ཡི་འོད་ཟེར་སྦུ་གུའི་གཟུགས། །དེ་ཡིས་ཡང་དག་དྲངས་ནས་ནི། །སྣ་ཚོགས་གནས་པའི་སངས་རྒྱས་རྣམས། །དཀྱིལ་འཁོར་པ་ནི་དེ་བཞིན་མཆོད། །སྙིང་གར་ཡེ་ཤེས་འོད་ཟེར་གྱིས། །བཀོད་ནས་རྟོག་པ་ཐམས་ཅད་སྤངས། །ཐོག་མཐའ་དབུས་ཀྱི་བྱེ་བྲག་གིས། །འདིར་ཡང་གཅིག་ཏུ་མི་རིགས་སོ། །རྡུལ་ཕྲན་ཆ་ཤས་མེད་པས་ན། །དུ་མར་ཡང་ནི་རིགས་མ་ཡིན། །གཅིག་དང་དུ་མའི་རང་བཞིན་གང༌། །གང་བྲལ་དེ་ནི་དེ་བཞིན་མིན། །འཁྲུལ་གཟུགས་དེ་ཉིད་མ་ཡིན་པས། །གང་ཕྱིར་འཁྲུལ་བ་གཉིས་ལ་གནས། །མ་འཁྲུལ་རྟག་ཏུ་བསམ་མི་ཁྱབ། །སྤྲོ་དང་བསྡུ་བ་ཡི་ནི་ལས། །སེམས་ཅན་དོན་ལ་རོ་གཅིག་བློ། །འདི་ལས་དེ་ཉིད་གཞན་དུ་མེད། །ཡེ་ཤེས་ཞབས་སོགས་མཆོག་རྣམས་ཀྱིས། །འདི་དག་ཉིད་ནི་གསལ་བར་བཤད། །དཔལ་ལྡན་གསང་བ་འདུས་པ་ལས། །གསུངས་པ་ཅུང་ཟད་བཤད་པར་བྱ། །དངོས་པོ་མེད་ཅིང་བསྒོམ་པ་མེད། །ཁམས་དག་མེད་ཅིང་རྣམ་ཤེས་མེད། །ནམ་མཁའ་དང་ནི་མཐུན་པའི་གནས། །ནམ་མཁའ་བཞིན་དུ་བདག་མེད་པ། །ཆོས་འདི་བདེ་བ་ཆེན་པོ་ཡིན། །ས་ཡང་མེད་ཅིང་ཆུ་ཡང་མེད། །མེ་དང་རླུང་ཡང་ཡོད་མ་ཡིན། །རྡོ་རྗེ་སེམས་དཔའི་སྦྱོར་བ་ཡིས། །སྐྱེ་བ་འདི་ནི་རབ་ཏུ་གནས། །ཐམས་ཅད་དངོས་པོ་དངོས་མེད་བཤད། །དངོས་པོ་མེད་པར་དེ་ཡིས་བསྒྲགས། །རྣལ་འབྱོར་རྣལ་འབྱོར་བར་འབྲེལ་བས། །ཆད་པ་མ་ཡིན་རྟག་པ་མིན། །ཕྱག་དང་ཞབས་དང་ཁ་དོག་མེད། །མཆོག་ཏུ་དགའ་བའི་མཚན་ཉིད་དོ། །དངོས་པོ་ཐམས་ཅད་བདེན་པ་མིན། །ཐོག་མ་བར་དང་མཐའ་སྤངས་པ། །འདི་ལྟར་དཔྱད་ན་


DTG047_Page_0013
[མ་དཔེ་གཟིགས་ན་འདིར་གནོན།]

འཁོར་ལོ་ལ། །དམ་པ་ཡང་དག་རྟོག་པ་སྤངས། །ཕུང་པོ་ཁམས་ནི་བདག་མེད་པ། །བསྒོམ་བྱ་བདེ་བ་དམ་པའི་གཟུགས། །རང་སྙིང་ས་བོན་འོད་ཟེར་གྱིས། །འགྲོ་བ་གཤིན་རྗེ་གཤེད་བྱས་ནས། །སྐུ་གསུང་ཐུགས་ཀྱི་རྡོ་རྗེ་ཅན། །བཀུག་ནས་དེ་ལ་སོང་བར་བསམ། །རྡོ་རྗེ་དྲི་མ་མེད་དང་ཆོས། །ཡེ་ཤེས་ལམ་སྐྱེ་དགོད་པར་བྱ། །དེར་ནི་རང་གི་ས་བོན་རྣམས། །ཡེ་ཤེས་ཧྲཱིཿ་ཥྚྲིཿ་ལ་སོགས་དགོད། །བདེ་བ་དམ་པའི་རྣམ་པ་མཐོང༌། །ཡང་དག་རྟོག་པ་ཐམས་ཅད་སྤངས། །སྤྲོ་དང་བསྡུ་བ་ཡང་དག་རྒྱས། །བདག་ཉིད་མཁས་པས་བཟླས་པ་བརྩམ། །སྐུ་ལ་སོགས་པ་སྤྲོ་དང་བསྡུ། །རིམ་དང་ཅིག་ཅར་དག་ཀྱང་རུང༌། །ཁྲོ་བོའི་ཚོགས་ནི་སྤྲུལ་ལས་བྱ། །འགྲོ་བ་ཧྲཱིཿ་ཥྚྲིཿ་ལ་སོགས་སྒྲ། །ཨོཾ་ཧྲཱིཿ་ཥྚྲྀཿ་ཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་སྭཱ་ཧཱ། འདི་ལྟར་ཆོ་ག་འདི་ཡིས་ནི། །བསྒོམས་ནས་བཟླས་པ་ཐམས་ཅད་བྱ། །ཟས་སོགས་བྱ་བ་ཐམས་ཅད་ནི། །བྱེད་འདོད་བལྟ་བར་བརྩོན་པ་ཡིན། །མཆོད་བསྟོད་བདུད་རྩི་མྱང་བྱས་ནས། །སེམས་ཅན་དོན་ནི་བྱ་བའི་སེམས། །དེ་ཉིད་གསུམ་གྱི་ཆོ་ག་ཡིས། །ཡེ་ཤེས་འཁོར་ལོ་གཤེགས་སུ་གསོལ། །བདག་ལ་བདག་གི་འཁོར་ལོ་ནི། །ཆོ་ག་ཇི་ལྟར་གཞུག་པར་བྱ། །རང་གི་བསོད་ནམས་ཡང་དག་བསགས། །མངོན་པར་བྱང་ཆུབ་ཡང་དག་བསྔོ། །ཨོཾ་ཨཱཿ་ཧཱུཾ་མུཿ་ཞེས་པ་འདིས། །གཤེགས་སུ་གསོལ་བར་བྱའོ། །འདི་ནི་རྣལ་འབྱོར་ཆེན་པོའོ། །ལངས་ནས་རང་གི་བདག་པོ་ཡི། །རྣམ་པའི་ང་རྒྱལ་བྱས་ནས་འགྲོ། །རྣམ་པ་ཐམས་ཅད་དངོས་པོ་ཀུན། །སྔགས་ཀྱི་དངོས་པོ་དེ་བཞིན་དུ། །གཏི་མུག་གཤིན་རྗེ་གཤེད་པོའི་གཟུགས། །བསྒོམས་ནས་བཅག་པ་དག་ཏུ་བྱ། །ཐུན་མཚམས་སུ་ནི་རྣལ་འབྱོར་སོགས། །དང་པོ་རྣལ་འབྱོར་པས་བསྒོམ་བྱ། །ཅུང་ཟད་ཡེ་ཤེས་རྗེས་རྣལ་འབྱོར། །ཤིན་ཏུ་རྣལ་འབྱོར་རྣལ་འབྱོར་ཆེ། །ཡང་དག་ཡེ་ཤེས་དབང་རྣམ་པས། །ཤིན་ཏུ་རྣལ་འབྱོར་རྣལ་འབྱོར་ཆེ། །ཇི་སྐད་གསུངས་པའི་ཆོ་ག་ཡིས། །ཐུན་གཅིག་ལ་ནི་བསམ་གཏན་འདིར། །རྣལ་འབྱོར་པ་ཡི་སྤྲོ་བསྡུ་ལུས། །དེ་ཉིད་གསུམ་བདག་ཡེ་ཤེས་གཟུགས། །རང་ཉིད་གཤིན་རྗེ་གཤེད་པོ་ཡིས། །དབང་བསྐུར་ཆོ་ག་བསམས་པ་དང༌། །བདུད་རྩི་ལྔ་ཡི་ཆོ་ག་ཡིས། །ཟས་ཀྱི་བྱ་བ་བྱ་བ་དང༌། །གཞན་ཡང་


DTG047_Page_0014
[མ་དཔེ་གཟིགས་ན་འདིར་གནོན།]

མཆོད་པའི་རྣམ་རྟོག་གིས། །བདག་དང་ཕ་རོལ་པོ་ཡང་རུང༌། །ཆོ་ག་བཞིན་དུ་རྟག་ཏུ་མཆོད། །དཔལ་ལྡན་གཤིན་རྗེ་གཤེད་གཟུགས་སུ། །མཐོང་བ་ཉིད་ནི་བྱང་ཆུབ་ཆེ། །བདག་གཞན་མཉམ་པར་བྱང་ཆུབ་སྟེ། །གང་ཕྱིར་རང་གི་བདག་པོ་སྦྱོར། །དེ་ལྟར་མིན་ནི་ཇི་ལྟར་འགྱུར། །རྣལ་འབྱོར་པ་ཡི་གྲུབ་པ་མཆོག །ཇི་ལྟར་རྣམ་པ་སྣ་ཚོགས་ཉིད། །དངོས་པོ་གཅིག་ལ་བརྟགས་པ་སྟེ། །གྲོལ་དང་བདེ་དང་སྡུག་བསྔལ་གནས། །སྐྱེ་འགྱུར་ལས་ཀྱི་བྱེ་བྲག་ལས། །རྣམ་པར་མི་རྟོག་པ་བདག་ཉིད་སེམས། །བདེ་བ་དམ་པ་མཐའ་ཡས་གཟུགས། །ཤེས་རབ་ཐབས་ཀྱི་ངོ་བོ་ཉིད། །གང་ཕྱིར་འབྲས་བུ་ནག་པོར་འགྱུར། །སྒྲོལ་འདོད་འཁོར་བའི་རྒྱ་མཚོ་སྐྱེ་དང་འཆི་བར་བཅས་པའི་འཁོར་བ་ཟབ་མོ་འཇིགས། །ཆགས་སྡང་ལ་སོགས་ཆུ་སྲིན་འཁྲུགས་པ་ཤིན་ཏུ་གཡོ་བ་ལྦུ་བ་རྨུགས་གཉིད་སོགས། །དཔལ་ལྡན་གཤིན་རྗེ་གཤེད་པོ་བདེ་བའི་རང་བཞིན་ནོར་ཆེན་སྒྲུབ་ཐབས་བྱས་པ་ཡིས། །ཚིག་གི་སྣང་བ་གྲུབ་བཅས་བདག་གིས་བསོད་ནམས་ཐོབ་པས་འགྲོ་ཀུན་གྲུབ་ཐོབ་ཤོག །ཚིག་གི་སྣང་བ་གྲུབ་པ་ཞེས་བྱ་བའི་སྒྲུབ་ཐབས། སློབ་དཔོན་དཔལ་འཛིན་གྱིས་མཛད་པ་རྫོགས་སོ།། །།པཎྜི་ཏ་དཱ་ན་ཀཱི་རྟི་དང༌། ལོ་ཙཱ་བ་ཚུལ་ཁྲིམས་རྒྱལ་བའི་འགྱུར།། །།

གཤིན་རྗེ་གཤེད་ནག་པོའི་དཀྱིལ་འཁོར་གྱི་སྒྲུབ་ཐབས།
དཔལ་འཛིན།


DTG047_Page_0014
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། ཀྲྀཥྞ་ཡ་མཱ་རི་མཎྜལ་ནོ་པི་ཀ །བོད་སྐད་དུ། གཤིན་རྗེ་གཤེད་ནག་པོའི་དཀྱིལ་འཁོར་གྱི་སྒྲུབ་ཐབས། འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །ཐབས་དང་ཤེས་རབ་རང་བཞིན་གྱི། །དཔལ་ལྡན་གཤིན་གཤེད་དཀྱིལ་འཁོར་གཙོར། །བཏུད་དེ་ཆོ་ག་མདོར་དྲན་པ། །དེ་ཡི་དཀྱིལ་འཁོར་ཆོ་ག་བཤད། །དང་པོ་རྣལ་འབྱོར་པ་འགྲོ་བ་གདོན་པའི་བསམ་པ་ཅན་གྱིས། ཚངས་པའི་གནས་བཞི་ལ་ལ་རང་བཞིན་གྲུབ་པར་བྱ་བའི་ཕྱིར་རམ། །གཞན་ལན་གཉིས་ལན་གསུམ་དུ་གསོལ་བ་འདེབས་པ་དེ་རྗེས་སུ་གཟུང་བའི་ཕྱིར། གལ་ཏེ་དཀྱིལ་འཁོར་བྲི་བར་འདོད་ན། རྣལ་འབྱོར་བཞི་སྔོན་དུ་བྱས་ལ། བསྙེན་པའི་ཆོ་གས་བཅོམ་ལྡན་འདས་གཤིན་རྗེ་གཤེད་ནག་པོའི་སྔགས་འབུམ། གཏི་མུག་གཤིན་རྗེ་གཤེད་ལ་སོགས་པ་གཞན་གྱི་ཁྲི་བཟླས་སོ། །བཅོམ་ལྡན་འདས་ཀྱི་རྗེས་སུ་གནང་བ་མཚན་མ་ཐོབ་པའམ། རང་གི་སེམས་


DTG047_Page_0015
[མ་དཔེ་གཟིགས་ན་འདིར་གནོན།]

དག་པའི་སྒོ་ནས་བྲི་བར་བྱའོ། །དེ་ལ་ཆོ་ག་ཇི་ལྟ་བ་བཞིན་དུ་སྒྲུབ་པའི་དཀྱིལ་འཁོར་གྱི་ཁང་པར་དཀྱིལ་འཁོར་གྱི་ས་སྦྱང་བར་བྱའོ། །གཏོར་མ་སྦྱིན་ཞིང་མཆོད་པ་སྣ་ཚོགས་ཉེ་བར་བྱས་ལ། རྣལ་འབྱོར་བཞི་དང་ལྡན་པའི་གྲོགས་དང་བཅས་པས། །ཨོཾ་བྷུ་ཁཾ་ཞེས་བྱ་བའི་སྔགས་ཀྱིས་ནམ་མཁའི་རང་བཞིན་དུ་བྱའོ། །ཧཱུཾ་ལཾ་ཧཱུཾ་ཞེས་བྱ་བས་ནོར་འཛིན་རྡོ་རྗེའི་རང་བཞིན་དུ་བྱིན་གྱིས་བརླབ་པར་བྱའོ། །ཨོཾ་མེ་དི་ནཱི་བཛྲཱི་བྷ་ཝ་བཛྲ་བནྡྷ་ཧཱུཾ་ཞེས་བྱ་བས་དེ་ཉིད་དུ་རང་བཞིན་གྱིས་དག་པའི་གཤིན་རྗེ་མཐར་བྱེད་ནག་པོའི་གཟུགས་ཀྱིས་རྡོ་རྗེ་དང༌། དྲིལ་བུས་བྲེལ་བའི་ཕྱག་རྒྱ་དང་ལྡན་པ་ལ་གཏི་མུག་གཤིན་རྗེ་གཤེད་ལ་སོགས་པའི་གཟུགས་ཀྱིས། སློབ་མ་བཞི་ལག་པ་ན་རྡོ་རྗེ་དང་དྲིལ་བུ་ཐོགས་པས། གསོལ་བ་གདབ་བོ། །གཤིན་རྗེ་གཤེད་པོ་རབ་འཇིགས་པ། །གཏི་མུག་རྡོ་རྗེའི་ངོ་བོ་ཁྱོད། །སྟོན་པ་སངས་རྒྱས་ཀུན་རང་བཞིན། །རྡོ་རྗེ་སྐུ་ལ་ཕྱག་འཚལ་བསྟོད། །གཤིན་རྗེ་གཤེད་པོ་རབ་འཇིགས་པ། །ཕྲ་མ་རྡོ་རྗེའི་ངོ་བོ་ཁྱོད། །རྡོ་རྗེ་ཐུགས་དང་རབ་མཚུངས་པ། །རྡོ་རྗེ་རིན་ཆེན་ཕྱག་འཚལ་བསྟོད། །འདོད་ཆགས་རྡོ་རྗེའི་ངོ་བོ་ཁྱོད། །འདོད་ཆགས་ཆོས་ཀྱི་འབྱུང་གནས་བརྙེས། །དབྱིངས་མཆོག་ཀུན་གྱི་གཙོ་བོའི་གཙོ། །རྡོ་རྗེ་གསུང་ལ་ཕྱག་འཚལ་བསྟོད། །ཕྲག་དོག་རྡོ་རྗེའི་ངོ་བོ་ཁྱོད། །གཤིན་རྗེ་གཤེད་པོ་ལས་ཀུན་པ། །རྡོ་རྗེ་སྐུ་དང་རབ་ཏུ་མཚུངས། །ཕྱག་ན་རལ་གྲི་ཕྱག་འཚལ་བསྟོད། །སངས་རྒྱས་ཀུན་གྱི་རང་བཞིན་ཁྱོད། །སངས་རྒྱས་ཐམས་ཅད་གཅིག་བསྡུས་པ། །སངས་རྒྱས་ཀུན་མཆོག་གཙོ་བོའི་གཙོ། །དཀྱིལ་འཁོར་གཙོ་ལ་ཕྱག་འཚལ་བསྟོད། །གཤིན་རྗེ་འཇིགས་པའི་དཀྱིལ་འཁོར་འདི། །དཀྱིལ་འཁོར་ཀུན་གྱི་གཙོར་གྱུར་པ། །སྡིག་པ་ཐམས་ཅད་འཇིག་བྱེད་པའི། །མགོན་པོ་དཀྱིལ་འཁོར་བྲི་བར་མཛོད། །དེ་རྣམས་ཀྱིས་དབྱངས་གཅིག་ཏུ་གསོལ་བ་བཏབ་པར་རིག་ནས། སེམས་ཅན་གྱི་ཁམས་མ་ལུས་པ་འདོད་ཆགས་ལ་སོགས་པའི་ཉོན་མོངས་པས་གཟིར་བར་བལྟས་ཏེ། །ཉོན་མོངས་པ་རྣམས་བསལ་བའི་ཕྱིར། ཧཱུཾ་བཛྲོད་ཏིཥྛ་ཞེས་བྱ་བའི་སྔགས་ཀྱིས་རང་གི་རྡོ་རྗེ་གསོར་ལ། ཡི་གེ་མ་ལས་མིག་གཡོན་པ་ཟླ་བ་ཊ་ལས་མིག་གཡས་པ་ཉི་མར་བྱས་པས་དུས་དང་ཕྱོགས་ཀུན་གསལ་བར་བྱས་ནས། རྣལ་འབྱོར་པས་ཁམས་


DTG047_Page_0016
[མ་དཔེ་གཟིགས་ན་འདིར་གནོན།]

གསུམ་མ་ལུས་པ་ལ་བལྟ་ཞིང༌། རྐང་པའི་འོག་ཏུ་སྣ་ཚོགས་རྡོ་རྗེ་འབར་བ་བསྒོམས་ལ། རྡོ་རྗེ་གསོར་བ་ཉིད་ཀྱིས། རྡོ་རྗེ་འགྲོས་ཀྱི་གར་དང༌། འཁོར་ལོའི་ས་བསྐོར་བར་བྱའོ། །མགུར་ན་ཧྲཱིཿ་ཥྚྲྀཿ་ལ་སོགས་པ་སྒྲོགས་པའི་སྒྲས། དཀྱིལ་འཁོར་གྱི་བགགས་གས་སྐྲག་པར་བྱས་ལ། ཉོན་ཅིག་ལྷ་ཚོགས་བགེགས་ཀྱི་ཚོགས། །ལུས་ངག་ཡིད་ལ་གནས་པ་རྣམས། །དཔལ་ལྡན་རྡོ་རྗེ་འཛིན་པ་བདག །སྲུང་བའི་འཁོར་ལོ་སྦྱོར་བ་ཡིས། །རྡོ་རྗེ་ལུས་ནི་མདངས་ལྡན་པས། །ལུས་སོགས་གསུམ་སྐྱེས་འཇིག་པར་བྱེད། །གལ་ཏེ་ང་ལ་འགས་བརྙས་ན། །འདིར་ནི་དེ་གཞོམ་གཞན་དུ་མིན། །རྡོ་རྗེའི་གནས་སུ་འཁོར་ལོ་དང༌། །རིན་པོ་ཆེ་དང༌། པདྨ་དང༌། རལ་གྲི་རབ་ཏུ་བཀོད་ལ་བརྗོད་པར་བྱའོ། །ས་ཡོངས་སུ་གཟུང་བ་བྱས་པའི་རྗེས་ལ། བགེགས་མེད་པར་བྱ་བའི་ཕྱིར་ཕུར་བུས་གདབ་པར་བྱའོ། །དེ་ལ་ཕུར་བུའི་སྔགས་ནི་འདི་ཡིན་ཏེ། ཨོཾ་གྷ་གྷ་གྷཱ་ཏ་ཡ་གྷཱ་ཏ་ཡ། སརྦ་དུཥྚཱ་ན་ཕཊ། ཀཱི་ལ་ཡ་ཀཱི་ལ་ཡ་སརྦ་པཱ་པཾ་ཕཊ། ཧཱུཾ་ཧཱུཾ་ཧཱུཾ་བཛྲ་ཀཱི་ལ་བཛྲ་དྷ་རོ་ཨཱ་ཛྙཱ་ཡ་པ་ཏི། སརྦ་བིགྷྣཱཾ་ཀཱ་ཡ་པཱ་ཀ་ཙིཏྟ་བཛྲ་ཀཱི་ལ་ཡ་ཧཱུཾ་ཕཊ། འོག་དང་སྟེང་དང་ཕྱོགས་མཚམས་ཀྱི་བགེགས་ཐམས་ཅད་རལ་གྲི་གཤིན་རྗེ་གཤེད་ཀྱི་ཕུར་བུས་གདབ་པར་བྱའོ། །དེ་ལྟར་ས་ཡོངས་སུ་གཟུང་བ་བྱས་ཏེ། ས་བགེགས་ཞི་བར་བྱས་པས་མཐོང་ནས། ཕྱོགས་མཚམས་འབར་བའི་འོད་ཀྱིས་མཚམས་བཅད་པ་བྱས་ཏེ། ཕྱི་རོལ་དུ་སའི་ལྷ་མོ་མདོག་སེར་བ། རྒྱན་སྣ་ཚོགས་ཀྱིས་བརྒྱན་པ། ལུས་ཀྱི་ཕྱེད་བྱུང་བ། ཕྱག་གཡས་པ་ཁས་ལེན་པའི་ལག་པ་ལྟ་བུ་གཡོན་ན་བུམ་པ་འཛིན་པ། མེ་ཏོག་དྲི་ཞིམ་པོ་སྣ་ཚོགས་ཀྱིས་མཆོད་ལ་སྟ་གོན་དུ་གནས་པར་བྱའོ། །ལྷ་མོ་ཁྱོད་ནི་དབང་དུ་གྱུར། །སྐྱོབ་པ་སངས་རྒྱས་ཐམས་ཅད་ཀྱི། །ཐེག་པ་སྤྱོད་པའི་ཁྱད་པར་དང༌། །ས་དང་ཕ་རོལ་ཕྱིན་ལའོ། །ཇི་ལྟར་ཤཱཀྱ་སེང་གེ་ཡིས། །བདུད་ཀྱི་སྟོབས་རྣམས་བཅོམ་པ་ལྟར།། བདག་གིས་བདུད་ཀྱི་སྟོབས་བཅོམ་སྟེ། །དཀྱིལ་འཁོར་ཆེན་པོ་བྲི་བར་བྱ། །དེ་ནས་དེ་ཉིད་དུ་ཞུགས་པར་བསམ་པར་བྱ་སྟེ། ས་སྟ་གོན་དུ་གནས་པའོ། །དེ་ནས་ཡང་དེ་ཉིད་ལ་དྲིས་ཉེ་བར་བྱུགས་ལ། མེ་ཏོག་སྣ་ཚོགས་ཀྱིས་དགྲམ་པར་བྱའོ། །ལྷའི་གནས་རྣམས་སུ་ཙནྡན་ལ་སོགས་པའི་མཎྜལ་


DTG047_Page_0017
[མ་དཔེ་གཟིགས་ན་འདིར་གནོན།]

བྱའོ། །དེ་ཉིད་དུ་སྙིང་གའི་ཡེ་ཤེས་ཀྱི་འོད་ཟེར་གྱིས་འཁོར་ལོ་བཀུག་ལ་མཚམས་བཅད་པ་ལ་སོགས་པ་བྱའོ། །མཆོད་པ་དང༌། བསྟོད་པ་དང༌། བདུད་རྩི་མྱང་བ་ལ་སོགས་པ་ཡང་བྱའོ། །དེ་ནས་རྐང་པ་གཡས་པའི་པུས་མོས་ལ་བཙུགས་ལ། ལག་པ་གཡས་པར་སྤོས་སྣོད་ཐོགས་ཏེ། འཁོར་ལོ་རྫོགས་པའི་སངས་རྒྱས་ལ་གསོལ་བ་གདབ་པར་བྱའོ། །བཅོམ་ལྡན་གཤིན་རྗེ་གཤེད་རྡོ་རྗེ། །རིག་པའི་རྒྱལ་པོ་ཕྱག་འཚལ་བསྟོད། །དཀྱིལ་འཁོར་སྙིང་རྗེའི་བདག་ཉིད་ཅན། །མགོན་པོ་བདག་ཉིད་བྲི་བར་འཚལ། །སློབ་མ་ལ་ནི་བརྩེ་ཕྱིར་དང༌། །ཁྱེད་རྣམས་ལ་ཡང་མཆོད་པའི་ཕྱིར། །བདག་ནི་བཅོམ་ལྡན་ཁྱེད་ལ་གུས། །དགྱེས་པར་མཛད་པའི་འོས་ལགས་སོ། །སངས་རྒྱས་རྣམས་ནི་བདག་ལ་དགོངས། །འགྲོ་བའི་འཁོར་ལོ་བྱ་བའི་ཕྱིར། །འབྲས་གནས་བྱང་ཆུབ་སེམས་དཔའ་དང༌། །གཞན་ཡང་གསང་སྔགས་ལྷ་ཉིད་དང༌། །འཇིག་རྟེན་སྐྱོང་དང་འབྱུང་པོ་དང༌། །རྫོགས་སངས་རྒྱས་ཀྱིས་རྗེས་བསྟན་པ། །བསྟན་ལ་དགའ་བའི་སེམས་ཅན་དང༌། །གང་དག་རྡོ་རྗེའི་མིག་ཅན་རྣམས། །རྡོ་རྗེ་འཆང་ཆེན་བདག་མིང་འདི། །གཤིན་རྗེ་གཤེད་ནག་དཀྱིལ་འཁོར་ནི། །འགྲོ་བ་དག་ཕྱིར་བྲི་བར་བགྱི། །ཇི་ལྟར་ནུས་པའི་ཉེར་སྤྱོད་ཀྱིས།། རྗེས་སུ་བརྩེ་བ་ཉེ་བར་སྩོལ། །བདག་དང་སློབ་མར་བཅས་པ་དང༌། །དཀྱིལ་འཁོར་པ་ཡི་གྲོགས་ཀུན་ལ། །ཉེ་བར་མཛད་པར་འོས་པ་ལགས། །དེ་ལྟར་ལན་གསུམ་གྱི་བར་དུ་བྱས་ནས། འཁོར་ལོ་དེ་ཡང་དག་པར་མཆོད་དེ། ནམ་མཁའ་ལ་དགོད་པར་བྱའོ། །དེ་ནས་རྣལ་འབྱོར་པ་ཉི་མ་དང་ཟླ་བའི་མིག་ཅན་ཡི་གེ་ཇ་ལས་དབྱུང་བ་གཏི་མུག་རྡོ་རྗེ་གཤིན་རྗེ་གཤེད་ལ་སོགས་པའི་ས་བོན་ལས་བྱུང་བ། དེའི་ཁ་དོག་ཅན་ཉི་ཤུ་རྩ་ལྔར་དབྱེ་བར་བྱས་ལ། དཀྱིལ་འཁོར་གྱི་ཉིས་འགྱུར་ཙམ་བྱ་སྟེ། སྒོའི་ཉི་ཤུ་ཆ་དྲི་ཞིམ་པ་ལྔས་རྣམ་པར་བྱུགས་པའོ། །སྐུད་པ་འཁལ་བ་རལ་གྲི་གཤིན་རྗེ་གཤེད་དང་ལྷན་ཅིག་སྐུད་པ་བསྒྲིམ་པར་བྱའོ། །འབར་བའི་ལྟ་སྟངས་ཀྱིས་ལྕགས་ཀྱུས་བཀུག་པའི་དེ་བཞིན་གཤེགས་པ་རྣམས་བཅུག་ལ། ཨོཾ་དཱིཔྟ་དྲྀཥྚི་ཨཾ་ཀུ་ཤ་ཛཿ་ཞེས་བྱ་བའི་སྔགས་འདི་དང༌། ཨོཾ་ཨཿ་པྲ་ཡ་ཙྪ་མོ་ཧཱ་ཀཱ་ལཱ་རི་སྭཱ་ཙ་ཀྲ་སཱུ་ཏྲ་ན་ཡ་ཧཱུཾ་ཞེས་བྱ་བའི་བར་དུའོ། །ཞེ་སྡང་དུས་ཀྱི་དགྲ་ལ་གསོལ་བ་


DTG047_Page_0018
[མ་དཔེ་གཟིགས་ན་འདིར་གནོན།]

གདབ་པ། ཨོཾ་ཨཱཿ་ཨ་ནྱོ་ནྱཱ་ནུ་ག་ཏ་སརྦ་དྷརྨཿ་པ་ར་སྦ་ར་ཨ་ནུ་ག་ཏ་སརྦ་དྷརྨཿ་ཨ་ཏྱནྟཱ་ནུ་པྲ་བིཥྚ་སརྦ་དྷརྨཱ་ཧཱུཾ་ཞེས་བརྗོད་དེ། ཐིག་སྐུད་འཛིན་པས་ཡི་གེ་ཛ་ཛ་ཛ་ཞེས་རང་གིས་བསྐུལ་ཞིང་བཏོན་ལ། གཡོན་པའི་ཁུ་ཚུར་གྱིས་ལྟེ་བའི་སྟིང་དུ་ཐིག་སྐུད་བཟུང་སྟེ། ནུབ་ཏུ་འདུག་ལ་ཤར་དུ་མངོན་པར་ཕྱོགས་པ་དང༌། ཤར་དུ་འདུག་སྟེ་ནུབ་ཏུ་མངོན་པར་ཕྱོགས་པ་དང༌། ལྷན་ཅིག་ནམ་མཁའི་ཐིག་གདབ་པར་བྱའོ། །ཡང་འོག་གི་ཐིག་གདབ་པར་བྱ་སྟེ། ཨོཾ་བཛྲ་ས་མ་ཡ་སཱུ་ཏྲ་མཱ་ཏི་ཀྲ་མ་ཧཱུཾ། སེམས་ཅན་རྣམས་ཀྱི་དོན་དུ་ཁྱོད། །ཡང་ནི་དུས་འདིར་གཤེགས་སུ་གསོལ། །ཞེས་བྱ་བ་དང༌། ཐིག་སྐུད་ཀྱི་སྒྲས་ནམ་མཁའ་ལ་བཞུགས་པའི་དེ་བཞིན་གཤེགས་པ་རྣམས་བསྐུལ་ལ། ཤར་དང་ནུབ་ཏུ་ཚངས་ཐིག་གདབ་པར་བྱའོ། །བྱང་དུ་མངོན་པར་ཕྱོགས་པ་དང༌། ལྷོར་མངོན་པར་ཕྱོགས་པས། ལྷོ་དང་བྱང་གི་ཚངས་ཐིག་གདབ་པར་བྱའོ། །མེར་འདུག་ལ་གནོད་སྦྱིན་དུ་བལྟས་པ་དང༌། དབང་ལྡན་དུ་འདུག་ལ་ཡི་དགས་སུ་བལྟས་ཏེ། ཤར་གྱི་རྩ་བའི་ཐིག་གདབ་བོ། །རླུང་གི་ཕྱོགས་སུ་འདུག་ལ། ཡི་དགས་སུ་བལྟས་པ་དང༌། བདེན་བྲལ་དུ་འདུག་ལ་གནོད་སྦྱིན་དུ་བལྟས་ཏེ། ནུབ་ཕྱོགས་ཀྱི་རྩ་བའི་ཐིག་གདབ་བོ། །མེར་འདུག་ལ་ཀླུ་ཕྱོགས་སུ་བལྟས་པ་དང༌། བདེན་བྲལ་དུ་འདུག་སྟེ། དབང་པོར་བལྟས་པས། ལྷོ་ཕྱོགས་ཀྱི་རྩ་བའི་ཐིག་གདབ་བོ། །རླུང་གི་ཕྱོགས་སུ་འདུག་ལ་དབང་པོར་ཕྱོགས་པ་དང༌། དབང་ལྡན་དུ་འདུག་ལ་ཀླུ་ཕྱོགས་སུ་བལྟས་པས། བྱང་ཕྱོགས་ཀྱི་རྩ་བའི་ཐིག་གདབ་བོ། །ཆོ་ག་འདི་ཉིད་ཀྱིས་ཚངས་ཐིག་གི་ཕྱོགས་གཉིས་ཀར་ཐིག་བདུན་བདུན་གདབ་བོ། །རྩ་བའི་ཐིག་གི་ཕྱི་རོལ་གྱི་འགྲམ་དུ། ཐིག་དྲུག་གི་རྒྱབ་ལ་ནི་རྟ་བབས་ཅི་རིགས་པའི་ཐིག་གོ །མཚམས་ཀྱི་ཐིག་གཉིས་ཀྱང་ངོ༌། །ཐིག་དེ་ཉིས་བལྟབ་ཏུ་བྱས་པས་དབང་ལྡན་མཚམས་ནས་བརྩམས་ལ། སྐོར་ཕྱོགས་སུ་འཁོར་ལོའི་རྣམ་པར་རྡོ་རྗེའི་ཕྲེང་བའི་ཐིག་གཉིས་གདབ་བོ། །ཕྱོགས་ཀུན་ཀྱང་མཉམ་པར་མོས་པར་བྱའོ། །འདིར། མཚན་མར་མཐོང་མི་འགྲུབ་བོ། །ཐིག་སྐུད་ཆད་ན་བླ་མ་འཆི། །ཕྱོགས་རྨོངས་འཁྲུལ་ན་སློབ་མའོ། །ལྷག་ཆད་ལས་ནད་འབྱུང་བར་འགྱུར། །གྲུ་བཞི་སྒོ་བཞི་རྟ་བབས་བཞིས་བརྒྱན་པ། །ཐིག་བཞི་དང་མཉམ་པར་ལྡན་


DTG047_Page_0019
[མ་དཔེ་གཟིགས་ན་འདིར་གནོན།]

པ། དོ་ཤལ་དང་སེ་མོ་དོ་དང༌། དར་དབྱངས་ཀྱིས་བརྒྱན་པ། །མཚམས་དང་སྒོ་ཁྱུད་དང༌། འགྲམ་རྣམས་ལ་རྡོ་རྗེར་རིན་ཆེན་གྱིས་མཛེས་པར་བྱས་པའོ། །དེ་ལྟ་བུ་ནི་ཕྱི་རོལ་གྱི་དཀྱིལ་འཁོར་རོ། །ཡང་ནང་གི་དཀྱིལ་འཁོར་གྱི་ཕྱེད་ཆ་གྲུ་བཞི་པའི་སྣ་ཚོགས་རྡོ་རྗེའི་ལྟེ་བ་ལ། རྡོ་རྗེ་ཕྲེང་བས་བསྐོར་བའོ། །དེ་ཉིད་དང་རྗེས་སུ་མཐུན་པའི་སྒོའི་བར་དུའོ། །བླ་དང་ལྡན་པས་རྩེ་མོ་ལྔ་རྣམ་པར་བསམས་ལ། ཡི་གེ་དྷཱིཿ་ལས་ཁྲོ་བོ་བལྟའོ། །སྒོ་ནི་དཀྱིལ་འཁོར་བརྒྱད་ཆ་རུ། །བདག་ཉིད་ཆེན་པོས་ཤེས་པར་བྱ། །ཁ་ཁྱེར་ཆེན་པོ་མ་གཏོགས་པར། །ཤིན་ཏུ་མཛེས་པ་ཡིད་འོང་བའོ། །སྒོ་ཁྱུད་སྒོ་དང་འདྲར་ཤེས་བྱ། །དེ་བཞིན་ལྷ་ཡི་སྣམ་བུ་སྟེ། །རྡོ་རྗེའི་ལྷ་མོར་ཡང་དག་ལྡན། །གླུ་དང་རོལ་མོ་ལ་སོགས་གར། །ཁ་ཁྱེར་སྒོ་ཡི་ཕྱེད་ཡིན་ཏེ། །སྒོ་ཁྱུད་ལ་སོགས་དྲ་བ་དང༌། །དྲ་ཕྱེད་ཉི་མ་ཟླ་བ་དང༌། །མེ་ཏོག་དག་གི་ཕྲེང་བ་ཡང༌། །ཚོན་རྩིའི་སྣམ་བུ་དེ་ཡི་ཕྱེད། །རྩ་བའི་ཐིག་གི་ཕྱི་རོལ་ལོ། །རིན་ཆེན་ཀ་བ་སོགས་སྣམ་བུ། །མཉམ་པའི་ས་ལ་ཚོན་རྩི་སྦྱིན། །རྟ་བབས་སྒོ་ཡི་སུམ་འགྱུར་ཏེ། །བ་དན་དྲིལ་བུར་ལྡན་པ་རྣམས། །དྲིལ་བུར་བཅས་པ་རླུང་བསྐྱོད་པའོ། །བ་དན་ཕྱི་ཡི་མཚམས་ཉིད་དུ། །གཞན་རྣམས་འཁོར་ལོའི་རྗེས་མཐུན་པར། །ཇི་ལྟར་མཛེས་པར་རབ་ཏུ་བརྟག །ཁྲུ་གང་ཉིད་ནི་མཉམ་སྦྱིན་ཞིང༌། །ཇི་སྲིད་ཁྲུ་ནི་སྟོང་གི་བར། །དེ་བཞིན་དུ་ནི་རིམ་འདིས། །སྔ་མ་བཞིན་དུ་མཉམ་པར་ཐིག་བཏབ་ནས། །རིམ་པ་སྔ་མ་བཞིན་དུ་རྡུལ་ཚོན་གྱི་ཆ་དག་བཏེག་ཅིང་བཟུང་ལ་འབར་བའི་ལྟ་སྟངས་ཀྱིས་མངོན་པར་བསྔགས་ཏེ། ཨོཾ་བཛྲ་ཙི་ཏས་མ་ཡ་ཧཱུཾ་ཞེས་བྱ་བས་སོ། །དེ་ནས་རང་བཞིན་གྱིས་དག་པའི་གཤིན་རྗེ་མཐར་བྱེད་ནག་པོའི་རྣལ་འབྱོར་པ། ཀུན་དུ་རྟོག་པ་མ་ལུས་པ་སྤངས་པ། འཁོར་ལོའི་དབུས་སུ་གནས་ཤིང༌། །དབང་ལྡན་གྱི་མཚམས་སུ་བརྟེན་ནས་ལག་པ་གཡོན་པའི་ཁུ་ཚུར་གྱིས་བྲི་བར་བྱ་སྟེ། དཀར་པོ་དང༌། སེར་པོ་དང་དམར་པོ་དང་ལྗང་གུ་སྟེ། ནག་པོ་ནི་ནང་ཉིད་དུའོ། །སྒོའི་ཉི་ཤུ་ཆ་ནི་ཚོན་རྩི་སྟེ། ཀུན་ཀྱང་སྦོམ་པོ་ལ་སོགས་པའི་སྐྱོན་དང་བྲལ་བར་བྲི་བར་བྱའོ། །དེ་ལ་སྤོམ་པོ་བྲིས་ན་ནད་འབྱུང་ངོ༌། ཕྲས་ན་ནི་ནོར་ཉམས་སོ། །མ་སོས་ན་འཁོན་འབྱུང་ངོ༌། །ཆད་ན་ནི་འཆིའོ། །ཚོན་རྩི་རྣམས་ཀྱི་བར་ནི་


DTG047_Page_0020
[མ་དཔེ་གཟིགས་ན་འདིར་གནོན།]

ནས་ཙམ་གྱིས་ཚོད་པར་བྲིའོ། །ཤར་ཕྱོགས་སུ་ནི་དཀར་པོ་ཆེ། །ལྷོ་ཕྱོགས་སེར་པོ་དང་ལྡན་པ། །ནུབ་ཀྱི་ཆ་ནི་དམར་པོའོ། །བྱང་ཕྱོགས་ལྗང་དང་ལྡན་པའོ། །ཨིནྡྲ་ནཱི་ལའི་འོད་ལྡན་པ། །དབུས་ཀྱི་ཆ་ནི་མཉམ་པར་བྲི། །དེ་ལྟར་དཀྱིལ་འཁོར་བྲིས་ནས་སུ། །ལྷའི་གནས་ཐམས་ཅད་དུ་སྣ་ཚོགས་པདྨའོ། །དཀྱིལ་དུ་ཉི་མ་ལ་གནས་པའི་རྡོ་རྗེ་སྔོན་པོ་རྩེ་ལྔ་པ་འབྱེས་པའོ། །ཤར་ཕྱོགས་ཀྱི་རྩེ་མོའི་རྩ་བ་ལ་འཁོར་ལོ་རྩིབས་བརྒྱད་པའོ། །ལྷོ་ཕྱོགས་ཀྱི་རྩིབས་ཀྱི་རྩ་བ་ལ། ཉི་མ་ལ་གནས་པའི་རིན་པོ་ཆེ་ཆ་དགུ་པའོ། །ནུབ་ཕྱོགས་ཀྱི་རྩིབས་ཀྱི་རྩ་བ་ལ། ཉི་མ་ལ་གནས་པའི་པདྨ་དམར་པོ་འདབ་མ་བརྒྱད་པའོ། །བྱང་གི་ཕྱོགས་ཀྱི་རྩིབས་ཀྱི་རྩ་བ་ལ་རལ་གྲི་ལྗང་གུའོ། །སྣ་ཚོགས་རྡོ་རྗེའི་མེ་མཚམས་སུ་འཁོར་ལོའོ། །བདེན་བྲལ་མཚམས་སུ་རྡོ་རྗེའོ། །རླུང་གི་མཚམས་སུ་པདྨའོ། །དབང་ལྡན་མཚམས་སུ་རལ་གྲིའོ། །ཤར་སྒོར་ནི་རྡོ་རྗེ་ཐོ་བ་རྩིབས་ཉི་ཤུ་པའོ། །ལྷོར་སྒོར་ནི་དབྱུག་པ་དཀར་པོའོ། །ནུབ་སྒོར་ནི་པདྨ་དམར་པོའོ། །བྱང་སྒོར་རལ་གྲིའོ། །དཀྱིལ་འཁོར་གྱི་མཚམས་བཞིར་ནི། པདྨའི་སྣོད་བཞི་བྲི་བར་བྱ་སྟེ། རྡུལ་ཚོན་དགྱེ་བའོ། །དེ་ལྟར་ཡོངས་སུ་རྫོགས་པའི་དཀྱིལ་འཁོར་ལ་བལྟས་ལ། སངས་རྒྱས་ཀྱི་དཀྱིལ་འཁོར་གྱི་དབུས་ན་གནས་པའི་རྣལ་འབྱོར་པ་རང་དང་མཚུངས་པའི་ཡན་ལག་དང་ལྡན་པས། སངས་རྒྱས་རྣམས་ཀྱི་བདག་པོ་ཉིད་དུ་གནས་ཏེ། དེའི་སེམས་ཀྱིས་ནམ་མཁའི་ཁམས་ཁྱབ་པར་དཀྱིལ་འཁོར་སྒྲུབ་ཅིང་སྤྲོས་པ་གནས་ཇི་ལྟ་བ་བཞིན་དུ་བཀོད་དེ། མིག་ལ་སོགས་པ་དང༌། ལུས་ལ་སོགས་པ་བྱིན་གྱིས་བརླབ་ཅིང༌། བདག་ཉིད་དབང་བསྐུར་བའི་ཆོ་གས་དབང་བསྐུར་བར་བྱའོ། །ཡེ་ཤེས་ཀྱི་དཀྱིལ་འཁོར་སྤྱན་དྲངས་ལ་ཨརྒྷ་ལ་སོགས་པ་དབུལ་ཞིང་ཁྲོ་བོ་རྣམས་ཀྱིས་དགུག་པ་དང་གཞུག་པ་དང༌། བཅིང་བ་དང༌། དབང་དུ་བྱས་ལ་མཆོད་པ་དང་བསྟོད་པ་དང༌། བདུད་རྩི་མྱོང་བ་ཡང་བྱའོ། །བཟླས་པ་དང་བསྒོམ་པ་དང༌། མཉེས་པ་ཡང་བྱའོ། །ཕྱོགས་སྐྱོང་བ་རྣམས་ལ་ཡང་གཏོར་མ་དང་མཆོད་པ་དབུལ་ཏེ། །བདག་ཉིད་ཀྱིས་དཀྱིལ་འཁོར་བསྐོར་ཞིང་ཕྱག་ཀྱང་བྱ་སྟེ། འདི་ལྟ་བུ་ནི་དཀྱིལ་འཁོར་བསྒྲུབ་པའི་ཐབས་སོ། །དེ་ནས་བུམ་པ་བཅོ་བརྒྱད་གཙོ་བོའི་དཀྱིལ་འཁོར་དུ་བཞག །པདྨའི་སྣོད་


DTG047_Page_0021
[མ་དཔེ་གཟིགས་ན་འདིར་གནོན།]

བཞི་ཡང་གཞག་གོ །ལས་ཐམས་ཅད་ཀྱི་མཚན་མ་གདབ། མགྲིན་པ་གོས་ཀྱིས་དཀྲི། ཙུ་ཏ་ལ་སོགས་པའི་ཁ་རྒྱན་དང་ལྡན་པར་བྱ། རིན་པོ་ཆེ་ལྔ་དང་སྨན་ལྔ་དང༌། འབྲུ་ལྔ་དང་ལྡན་པ་དེ་དག་ཀྱང༌། སྔགས་ལས་བྱུང་བའི་དཀྱིལ་འཁོར་གྱི་འཁོར་ལོའི་རྣམ་པར་བལྟས་ལ། དེ་རྣམས་སུ་ཡེ་ཤེས་ཀྱི་དཀྱིལ་འཁོར་སྤྱན་དྲང་ཞིང༌། ཨརྒྷ་ལ་སོགས་པ་ཕུལ་ཏེ། དགུག་པ་དང་གཞུག་པ་དང༌། བཅིང་བ་དང་དབང་དུ་བྱས་ལ་མཆོད་པ་ལ་སོགས་པ་དབུལ་ལོ། །མེ་ཏོག་གི་ཕྲེང་བ་བཅིངས་པའི་རྡོ་རྗེ་སྟེང་རྣམས་སུ་བཞག་ལ། སྔགས་པ་དེ་སྲིད་འདོད་ཀྱི་བར་དུ་དུས་གསུམ་དུ་བཟླ་ཞིང༌། འཁོར་ལོ་དེ་ཆུ་དེ་ཉིད་ཀྱི་རྣམ་པར་མཐོང་བར་བྱའོ། །དེ་ལྟ་བུ་ནི་བུམ་པ་སྟ་གོན་དུ་གནས་པའི་ཆོ་གའོ། །དེ་ནས་མ་ཚང་བ་ལ་སོགས་པའི་སྐྱོན་ཞི་བར་བྱ་བའི་ཕྱིར་དང༌། ཡོན་བདག་གི་བསོད་ནམས་མངོན་པར་འཕེལ་བར་བྱ་བའི་ཕྱིར་སྦྱིན་སྲེག་བྱའོ། །དེ་ལ་ཞི་བའི་ཐབ་ཁུང་བཞིན་དུ་ལས་ཐམས་ཅད་པའི་ཐབ་ཁུང་བྱ་སྟེ། ཁྲུ་གང་གི་ཚད་ཙམ་ལ། ཟབས་སུ་ཁྲུ་ཕྱེད་བརྐོ་བ་མ་གཏོགས་པ་རྒྱ་དང༌། འཕང་དུ་སོར་བཞི་པའི་ཁ་ཁྱེར་པདྨ་རྒྱས་པའི་རྣམ་པ་ལྟ་བུས་བསྐོར་བའོ། །དེའི་ཕྱི་རོལ་དུ་ཁ་ཁྱེར་སོར་གཉིས་པས་གྲུ་བཞིར་བསྐོར་བར་བྱའོ། །དེའི་མཚམས་ལ་ཟླ་བ་ཕྱེད་པའི་སྟེང་དུ་རྡོ་རྗེ་རྩེ་གསུམ་པའོ། །ཐབ་ཁུང་གི་དཀྱིལ་དུ་སོར་བརྒྱད་ཀྱི་ཚད་ལ་རྩེ་མོ་རྣམས་ལ་སོར་རེ་རེ་ཡོད་པའི་ཞེ་སྡང་རྡོ་རྗེ་རྩེ་ལྔ་པ་བྲིའོ། །ཤར་དང༌། ལྷོ་དང༌། ནུབ་དང༌། བྱང་དུ་འཁོར་ལོ་དང༌། རིན་པོ་ཆེ་དང༌། པདྨ་དང༌། རལ་གྲི་སོར་དྲུག་གི་ཚད་ཙམ་བྲིའོ། །ཚོན་རྩི་དཀར་པོས་སྟེང་དུ་བྲིའོ། །དེ་ནས་རྣལ་འབྱོར་པ་ཁ་ཤར་ཕྱོགས་སུ་བལྟས་ཏེ། བསྲེག་པའི་རྫས་མ་ལུས་པ་གཡས་ངོས་སུ་བཞག་ལ། བསང་གཏོར་གྱི་ཆུའི་སྣོད་ལ་སོགས་པ་གཡོན་ཕྱོགས་སུ་གཞག་གོ །བྲམ་ཟེའི་ཁྱིམ་མམ། དགེ་འདུན་གྱི་གཡོས་ཁང་ནས་མེ་བླངས་ལ། འོ་མ་ཅན་གྱི་ཤིང་རབ་ཏུ་སྦར་བར་བྱ་སྟེ། སྲོག་ཆགས་ལ་གནོད་པ་སྤང་བར་བྱའོ། །དེ་ནས་རྡོ་རྗེ་འཛིན་པ་ཡོངས་སུ་གྱུར་པ་སྔོན་དུ་སོང་བའི་སྣ་ཚོགས་པདྨའི་སྟེང་དུ་རཾ་ལས་བྱུང་བའི་མེ་ལྷ་སྐུ་མདོག་དཀར་པོ་ཞལ་གསུམ་པ་གཉུག་མར་གནས་པའི་རིག་པ་དང༌། གཉིས་སུ་མེད་པའི་སྐུ་ཕྱག་གཡས་ན་སྤྱི་བླུགས་


DTG047_Page_0022
[མ་དཔེ་གཟིགས་ན་འདིར་གནོན།]

བསྣམས་ལ། གཉིས་པ་མི་འཇིགས་པ་སྦྱིན་པ། གཡོན་ན་དབྱིག་གུ་རྩེ་གསུམ་པ་བསྣམས་པ་གཉིས་པ་ན་ཕྲེང་བ་བསྣམས་པ། གཞན་དག་ན་གྲི་གུག་དང་ཐོད་པ་བསྣམས་པ། གཡས་བརྐྱང་བའི་ཞབས་ཀྱིས་གནས་པ། ཁྲོ་བོའི་རྒྱན་གྱིས་བརྒྱན་པ་བསྒོམས་ལ། སྙིང་ག་ན་གནས་པའི་ས་བོན་ལས་ཡེ་ཤེས་ཀྱི་མེ་དགུག་སྟེ། ཨོཾ་ཊ་ཀྐི་ཧཱུཾ་ཛཿ་ཞེས་བྱ་བའི་སྔགས་ཀྱིས་ཀུ་ཤའི་ཆུན་པོས་བསང་གཏོར་ལ་སོགས་པ་དབུལ་ཞིང༌། དམ་ཚིག་འཇུག་པ་དང༌། མཆོད་པ་ལ་སོགས་བྱ་སྟེ། དེའི་ཞལ་དུ་ཡི་གེ་རཾ་བཀོད་ལ་སྲེག་རྫས་བྱུར་བུ་དབུལ་ལོ། །བླུགས་གཟར་དང་དགང་གཟར་གྱི་མཆུ་དང༌། མཆུ་ལ་ཡང་རིམ་པ་བཞིན་བསྒོམས་ཏེ་སྲེག་རྫས་ཐམས་ཅད་དབུལ་ལོ། །ཕྱིས་དེའི་སྙིང་གར་གཤིན་རྗེ་མཐར་བྱེད་ཀྱི་རང་གི་ས་བོན་ལས་བྱུང་བའི་དཀྱིལ་འཁོར་གྱི་འཁོར་ལོ་བསམས་ཏེ། མིག་ལ་སོགས་པ་བྱིན་གྱིས་བརླབ་པ་སྔོན་དུ་འགྲོ་བའི་ཡེ་ཤེས་ཀྱི་དཀྱིལ་འཁོར་སྤྱན་དྲང་བ་ལ་སོགས་པ་བྱས་ལ། མཆོད་པ་ལ་སོགས་པ་དབུལ་ཏེ། དེའི་ཞལ་དུ་ཡི་གེ་རཾ་བསྒོམས་ལ། ཨོཾ་ཨགྣ་ཡེ་སྭཱ་ཧཱ། ཞེས་བྱ་བས། མར་གྱིས་བཀང་བའི་སྲེག་བླུགས་དབུལ་ལོ། །ཨོཾ་སརྦ་པཱ་པ་ད་ཧ་ན་བཛྲ་ཡ་སརྦ་པཱ་པ་ནི་ད་ཧ་སྭཱ་ཧཱ། ཞེས་བྱ་བས་ནི་དཱུར་བའོ། །ཨོཾ་བཛྲ་པུཥྚ་ཡེ་སྭཱ་ཧཱ། ཞེས་བྱ་བས་ནི་འབྲས་མ་གོད་པའོ། །ཨོཾ་སརྦ་སཾ་པ་དེ་སྭཱ་ཧཱ། ཞེས་བྱ་བས་ནི་ཞོའོ། །ཨོཾ་ཨ་ཕྲ་ཏི་ཧ་ཏ་བཛྲཱ་ཡ་སྭཱ་ཧཱ། ཞེས་བྱ་བས་ནི་ཀུ་ཤའོ། །ཨོཾ་པོ་དྷི་བྲི་ཀྵ་ཡ་སྭཱ་ཧཱ། ཞེས་བྱ་བས་ནི་ཨ་ཤྭ་དྠའོ། །ཨོཾ་བཛྲ་ཀུ་བེ་རཱ་ཡ་སྭཱ་ཧཱ། ཞེས་བྱ་བས་ནི་ནྱ་གྲོ་དྷའོ། །ཨོཾ་བཛྲ་ཡཛྙཱ་ཡ་སྭཱ་ཧཱ། ཞེས་བྱ་བས་ནི་ཨུ་དུམྺཱ་རའོ། །ཨོཾ་ས་ཧ་ཀ་རཱ་ཡ་སྭཱ་ཧཱ། ཞེས་བྱ་བས་ནི་ཨ་མྲའོ། །ཤིང་ལས་བྱུང་བ་མ་ཡིན་པའི་སྲེག་རྫས་གཞན་དག་ནི། རང་གི་འདོད་པའི་ལྷ་སྔགས་ཀྱི་མན་ངག་ཇི་ལྟ་བ་བཞིན་དུ་བསྐུལ་བའི་ཚིག་དང་ལྡན་པས། བདུད་རྩིའི་ངོ་བོར་བསྒྲུབས་ལ་བསྲེག་པར་བྱའོ། །དེ་ནས་འཐོར་འཐུང་དང༌། ཞབས་བསིལ་དང༌། མེ་ཏོག་དྲི་ཞིམ་པོ་ལ་སོགས་པ་དང༌། ན་བཟའ་དང༌། སོ་རྩི་དང་བཤོས་རྣམས་ཕུལ་ནས། འདོད་པའི་དངོས་པོ་བླངས་ལ། ཡི་གེ་མུཿའི་མཐའ་ཅན་གྱི་ཡི་གེ་གསུམ་གྱིས་གཤེགས་སུ་གསོལ་ལོ། །རྫས་ལྷག་མ་རྣམས་ཀྱང་སྔར་བཞིན་གྱི་ཆོ་གས་


DTG047_Page_0023
[མ་དཔེ་གཟིགས་ན་འདིར་གནོན།]

མེ་ལ་བསྲེགས་ལ་གཤེགས་སུ་གསོལ་ལོ། །སྦྱིན་སྲེག་གི་དགང་གཟར་ཁྲུ་གང་གི་ཆད་ལ་རྩ་བ་རྡོ་རྗེ་རིན་པོ་ཆེ་དང་ལྡན་པ་སོར་བཞི་བ་སོར་གཉིས་བརྐོས་པ་རྡོ་རྗེ་དང་ལྡན་པ། པདྨའི་འདབ་མ་ལྟ་བུ་འབྱུང་བའི་སྦུབས། མཐེའུ་ཆུང་གི་ཚད་ཙམ་དང་བཅས་པའོ། །བླུགས་གཟར་ནི་སོར་གཉིས་ཙམ་ལ་སོར་གཅིག་བརྐོས་པ། རྡོ་རྗེ་དང་ལྡན་པ། པདྨའི་འདབ་མ་ལྟ་བུ་སྟེ། དགང་གཟར་དང༌། བླུགས་གཟར་རོ། །དེ་ནས་རབ་གནས་ཀྱི་ས་གཞི་གདུགས་དང༌། རྒྱལ་མཚན་དང༌། བ་དན་སྣ་ཚོགས་དང༌། རོལ་མོའི་སྒྲ་སྣ་ཚོགས་ཡིད་དུ་འོང་བ་དང༌། སློབ་དཔོན་ཡང་ཇི་ལྟར་ཚོགས་པའི་རྒྱན་སྣ་ཚོགས་ཀྱིས་བརྒྱན་ལ། སྐུ་གཟུགས་སམ། རི་མོའམ་གླེགས་བམ་མདུན་དུ་བཞག་སྟེ། བསང་གཏོར་དང༌། ཡོན་ཆབ་དང༌། འཐོར་འཐུང་ཕུལ་ལ། ཁུ་ཚུར་གཡོན་པའམ། གཞན་དུ་ཡུངས་ཀར་བླངས་ཏེ། སྐུ་གཟུགས་ལ་སོགས་པ་མདུན་དུ་གཡོན་པའམ། གཞན་གྱིས་ལན་གསུམ་གྱི་བར་དུ་བསྐོར་ཏེ། མེའི་ནང་དུ་བླུགས་ལ། ཨོཾ་སརྦ་པཱ་པ་ད་ཧ་ན་བཛྲ་ཡ་སྭཱ་ཧཱ། ཞེས་བྱ་བའི་སྔགས་ཀྱིས་བཏབ་པའི་ཁམ་ཕོར་གསུམ་གྱིས་བསྐོར་ཞིང་གཡབས་ལ་བསྐུར་རོ། །དེ་ནས་སྙིམ་པས་ཆུ་བླངས་ལ་མེ་དེ་ཉིད་དུ་བླུགས། དེ་ནས་ནམ་མཁའ་ལ་བཞུགས་པའི་དེ་བཞིན་གཤེགས་པ་རྣམས་ལ་ཉེ་བར་སྤྱོད་པའི་མཆོད་པ་རྣམ་པ་ལྔས་ཡང་དག་པར་མཆོད་དེ་རྣམ་པར་རྟོག་པ་ཐམས་ཅད་སྤང་ཞིང་སྤོས་སྣོད་བཟུང་ལ། དེ་བཞིན་གཤེགས་པ་རྣམས་སྟ་གོན་དུ་གནས་པའི་ཕྱིར། དམ་ཚིག་ཅན་ཁྱོད་ཀྱིས་བདག་ལ་དམ་ཚིག་སྩོལ་ཅིག་ཅེས་ལན་གསུམ་དུ་བརྗོད་དེ། ཇི་ལྟར་ཡང་དག་རྫོགས་སངས་ཀུན། །དགའ་ལྡན་གནས་སུ་བཞུགས་ནས་ནི། །ལྷ་མོ་སྒྱུ་མའི་མངལ་འཇུག་པ། །དེ་བཞིན་འདིར་ཡང་བཞུགས་སུ་གསོལ། །མགོན་པོ་འདིར་ནི་རྟག་བཞུགས་ནས། །མེ་ཏོག་ལ་སོགས་འདི་བཞེས་ལ། །མི་འདིའི་དོན་ནི་གཟུང་ཕྱིར་དང༌། །བྱང་ཆུབ་སེམས་ནི་བརྟན་པར་མཛོད། །དེ་ནས་གཏི་མུག་རྡོ་རྗེ་ཞེས་བྱ་བ་ལ་སོགས་པའི་བསྟོད་པ་བྱའོ། །ལྷ་སྟ་གོན་དུ་གནས་ནས་ཐོ་རངས་ཀྱི་དུས་སྐུ་གཟུགས་གོས་སེར་པོས་གཡོགས་ལ། ཁ་ཤར་ཕྱོགས་སུ་བསྟན་ཏེ་ཁྲུས་བྱའོ། །དེ་ལ་རིམ་པ་ནི་འདི་


DTG047_Page_0024
[མ་དཔེ་གཟིགས་ན་འདིར་གནོན།]

ཡིན་ཏེ། བའི་རྣམ་པ་ལྔ་ལ། ཨོཾ་ཧཱུཾ་ཏྲཱཾ་ཧྲཱིཿ་ཨཿ་ཞེས་བྱ་བའི་ས་བོན་གྱིས་མངོན་པར་བསྔགས་པས་བསྐུས་ལ། དེ་ནས་དྲི་ཞིམ་པོའི་སྣུམ་ལ། ཨོཾ་སརྦ་ཏ་ཐཱ་ག་ཏ་ཀཱ་ཡ་བི་ཤོ་དྷ་ནི་སྭཱ་ཧཱ། ཞེས་བྱ་བས་བསྔགས་ཏེ། དཱུར་བའི་ཆང་བུས་བྱུག་པར་བྱའོ། །དེ་ནས་ཤུན་པ་ལྔ་འཁར་བའི་སྣོད་དུ་བཞག་ལ་སྣུམ་ཕྱིའོ། །དེའི་རྗེས་ལ་རྣམ་པར་རྒྱལ་བའི་བུམ་པ་ནས་བརྩམས་ཏེ། བུམ་པ་སོ་སོའི་ཆུས་ཁྲུས་གསོལ་ལོ། །ཇི་ལྟར་བལྟམས་མ་ཐག་ཏུ་ཡང༌། །དེ་བཞིན་གཤེགས་ཀུན་སྐུ་བཀྲུས་ལྟར། །ལྷ་རྫས་ཆུ་ནི་དག་པ་ཡིས། །དེ་བཞིན་བདག་གིས་སྐུ་ཁྲུས་གསོལ། །ཨོཾ་སརྦ་ཏ་ཐཱ་ག་ཏ་ཨབྷི་ཥེ་ཀ་ཏེ་ས་མ་ཡ་ཤྲི་ཡེ་ཧཱུཾ། ཞེས་བྱ་བའི་སྔགས་ཀྱིས་སོ། །དེའི་རྗེས་ལ་ནམ་མཁའ་ལ་ཙ་རྩི་ཀ་ལ་སོགས་པ་རིག་པའི་ཚོགས་རྣམས་བཀུག་ནས། ཡེ་ཤེས་བདུད་རྩིའི་ཆུས་གང་བའི་བུམ་པ་འཛིན་པ་དེ་རྣམས་ཀྱིས་དེ་མངོན་པར་དབང་བསྐུར་བར་བྱའོ། །དེ་ནས་གོས་ཀྱིས་རླན་མེད་པར་ཕྱིས་ལ། དང་པོའི་གནས་སུ་གཞག་གོ །རས་རིས་སམ་གླེགས་བམ་མམ། མཆོད་རྟེན་ཆེན་པོ་རྣམས་ནི་མེ་ལོང་ལ་སྔ་མ་བཞིན་དུ་སྐུ་ཁྲུས་གསོལ་བར་བྱའོ། །དེ་ལྟ་བུ་ནི་ཁྲུས་གསོལ་བའི་རིམ་པའོ། །དེ་ནས་མིག་ལ་སོགས་པ་དང༌། ལུས་ལ་སོགས་པ་བྱིན་གྱིས་བརླབ་ཅིང༌། བདག་ཉིད་དབང་བསྐུར་ལ། རིགས་ཀྱི་གཙོ་བོ་ཅོད་པན་ཉིད་དུ་བཞག་ཅིང༌། ནམ་མཁའ་ལ་གནས་པའི་དེ་བཞིན་གཤེགས་པ་རྣམས་དཀྱིལ་འཁོར་གྱི་འཁོར་ལོའི་རྣམ་པར་དམིགས་ལ། །ཡོན་ཆབ་ལ་སོགས་པ་དབུལ་ཞིང་དམ་ཚིག་ལ་གཞུག་པར་བྱའོ། །གླེགས་བམ་ལ་ནི་ཡི་གེའི་གཟུགས་ཉིད་འགྱུར་བ་ན་བཟའ་དབུལ་ཏེ། ཨོཾ་བཛྲ་བསྟྲ་ཡེ་སྭཱ་ཧཱ། ཞེས་བྱ་བའི་སྔགས་ཀྱིས་སོ། །དེ་ནས་མེ་ཏོག་ལ་སོགས་པ་དབུལ་ཏེ། ཨོཾ་བཛྲ་པུཥྤེ་ཧཱུཾ། ཆུ་དང་ཐང་ལས་སྐྱེས་པ་ཡི། །མེ་ཏོག་གཙོ་བོ་མཆོག་འདི་དག །གུས་པ་མཆོག་གིས་བདག་འབུལ་ན། །ཇི་ལྟར་བདེ་བས་བཞེས་སུ་གསོལ། །ལྷན་ཅིག་སྐྱེས་དང་སྦྱར་བ་ཡི། །བདུག་པའི་དྲི་ཡི་མཆོག་འདི་དག །གུས་པ་མཆོག་གིས་བདག་འབུལ་ན། །ཇི་ལྟར་བདེ་བས་བཞེས་སུ་གསོལ། །ཞུན་མར་འབྲུ་མར་སྣང་བ་འདི། །ལྷ་རྫས་འོད་འབར་མུན་པ་འཇིག །བདག་ཉིད་དང་བས་


DTG047_Page_0025
[མ་དཔེ་གཟིགས་ན་འདིར་གནོན།]

འབུལ་ལགས་ན། །མི་ཤེས་པ་ཀུན་བསལ་དུ་གསོལ། །བཟའ་བཅའ་ཀུན་དང་བཅས་པ་ཡི། །ཁ་དོག་དྲི་དང་རོར་ལྡན་པའི། །བཤོས་གཙང་དམ་པ་བདག་འབུལ་ན། །འདི་དག་ཐམས་ཅད་བཞེས་སུ་གསོལ། །དེ་ལྟར་མངོན་པར་བསྔགས་པའི་མེ་ཏོག་ལ་སོགས་པ་དབུལ་ལོ། །ཕྱི་ནས་སྐུ་གཟུགས་ཀྱི་སྤྱན་དབྱེ་སྟེ། དངུལ་གྱི་སྣོད་ན་ཡོད་པའི་མར་དང༌། སྦྲང་རྩི་གསེར་གྱི་ཐུར་མས་བླངས་ལ། ཨོཾ་བཛྲ་ཙཀྵུ་ས་མནྟ་ཙཀྵུ་བི་ཤོ་དྷ་ནི་སྭཱ་ཧཱ། ཞེས་བྱ་བའི་སྔགས་ཀྱིས་སོ། །དེ་ནས་ལག་པ་གཡས་པས་རྡོ་རྗེ་གསོར་ཞིང་གཡོན་པས་དྲིལ་བུ་དཀྲོལ་ལ། གཏི་མུག་རྡོ་རྗེའི་ངོ་བོ་ཁྱོད། །ཅེས་བྱ་བ་ལ་སོགས་པའི་བསྟོད་པ་བྱ་སྟེ། དེ་ལྟ་བུ་ནི་རབ་གནས་ཀྱི་ཆོ་གའོ། །གང་གི་ཚེ་སྙིང་རྗེ་མཆོག་གི་དབང་དུ་གྱུར་ཅིང་དབང་བསྐུར་ལ་སོགས་པས་སློབ་མ་བསྡུ་བར་འདོད་ན། དེའི་ཚེ་དཀྱིལ་འཁོར་གྱི་གནས་ཀྱི་ཕྱི་རོལ་དུ། རིགས་དང་གཟུགས་དང་ལང་ཚོ་དང༌། དད་པ་དང༌། ཐོས་པ་ལ་སོགས་པ་དང་ལྡན་པ། དོན་དུ་གཉེར་བའི་སློབ་མ་ལག་ཏུ་མེ་ཏོག་ཐོགས་ཏེ་དཀྱིལ་འཁོར་ལ་ཕྱག་བྱས་པ་དང༌། གཞན་ཡོན་ཏན་མེད་པ་ཡང་སངས་རྒྱས་དང༌། ཆོས་དང་དགེ་འདུན་ལ་སྐྱབས་སུ་སོང་བ། དགེ་བ་བཅུའི་ལས་ཀྱི་ལམ་ལ་གནས་པ། ཆོས་བཤད་པས་སྤྲོ་བ་བསྐྱེད་དོ། །རྗེས་སུ་གནང་བ་བཞི་པོའམ། །རང་གི་བསླབ་པ་ལྡན་པའི་འཁོར། །ཐེག་པ་ཆེན་པོའི་བློ་ཅན་ལ། །སངས་རྒྱས་ཡང་དག་ཆོ་ག་གསུངས། །སྔགས་ཀྱི་དངོས་གྲུབ་མཚན་མའམ། འགའ་ཞིག་ཞི་བའི་དཀྱིལ་འཁོར་དང༌། །དེ་བཞིན་བསོད་ནམས་འདོད་ལ་གཞན། །འཇིག་རྟེན་ཕྱི་མ་ཐེག་མཆོག་དང༌། །མང་དུ་འཇིག་རྟེན་ཕ་རོལ་དོན། །བྱས་ནས་དད་ལྡན་བློ་དག་བྱེད། །འཇིག་རྟེན་འདི་ཡི་འབྲས་སྤངས་ནས། །འཇིག་རྟེན་ཕྱི་མའི་འབྲས་འདོང་ལ། །གང་ཕྱིར་འདི་ལ་ཕན་མང་བ། །འདི་མེད་འཇིག་རྟེན་ཕ་རོལ་བ། །དེ་ཕྱིར་འཇིག་རྟེན་གཞན་གྲུབ་ཕྱིར། །ཁྱེད་ཀྱི་བསྟན་པ་ཡིད་ཀྱིས་བགྱིས། །དེ་ལྟར་སྨྲས་ནས་ཞི་བར་འཇུག་པས་རྡོ་རྗེ་དང་པདྨ་དག་པར་བྱས་པ་ལ་གསོལ་བ་གདབ་པོ། །བདག་གི་སྟོན་པ་དགའ་ཆེན་ཁྱོད། །མགོན་པོ་ཆེན་པོ་བདག་འཚལ་ལོ། །བྱང་ཆུབ་ཆེན་པོའི་ལམ་བསྟན་པ། །དམ་ཚིག་དེ་


DTG047_Page_0026
[མ་དཔེ་གཟིགས་ན་འདིར་གནོན།]

ཉིད་བདག་ལ་སྩོལ། །བྱང་ཆུབ་སེམས་ཀྱང་བདག་ལ་སྩོལ། །སངས་རྒྱས་ཆོས་དང་དགེ་འདུན་ཏེ། །སྐྱབས་གསུམ་དག་ཀྱང་བདག་ལ་སྩོལ། །ཐར་པ་ཆེན་པོའི་གྲོང་མཆོག་ཏུ། །མགོན་པོས་བདག་ནི་གཞུག་པར་གསོལ། །ཞེས་ལན་གསུམ་བརྗོད་དེ། གུས་པ་དང་ལྡན་པའི་བླ་མ་ལ་འདི་ལྟར་གཙོར་བྱས་ལ་བརྗོད་དོ། །སྔགས་སྤྱོད་ཚུལ་གྱི་ཆོ་ག་ཡིས། །ཐེག་ཆེན་འདི་ནི་བུ་ཁྱོད་ཤོག །ཁྱོད་ནི་ཐེག་པ་ཆེན་པོའི་སྣོད། །ཁྱོད་ལ་ཡང་དག་བཤད་པར་བྱ། །དུས་གསུམ་འབྱུང་བའི་རྫོགས་སངས་རྒྱས། །སྐུ་གསུང་ཐུགས་ཀྱི་རྡོ་རྗེ་ཅན། །རྡོ་རྗེ་གསང་སྔགས་མཐུ་ཉིད་ཀྱིས། །ཡེ་ཤེས་མཉམ་པ་མེད་པ་བརྙེས། །ཤཱཀྱ་སེང་གེ་སོགས་མཆོག་གིས། །གསང་སྔགས་སྦྱོར་བ་མཉམ་མེད་པས། །གང་གིས་སྟོབས་ཆེན་བདུད་ཀྱི་སྡེ། །ཤིན་ཏུ་འཇིགས་པ་ཆེ་བཅོམ་ནས། །འཇིག་རྟེན་རྗེས་འཇུག་བཀོད་པ་ཡིས། །འཁོར་ལོ་བསྐོར་ནས་མྱ་ངན་འདས། །དེ་ཕྱིར་བུ་ཁྱོད་བློ་ཡིས་འདིར། །ཐམས་ཅད་མཁྱེན་ཉིད་ཐོབ་པར་གྱིས། །ཞེས་གསོལ་བ་འདེབས་པ་ལ་སྨྲས་ནས། བྱང་ཆུབ་ཏུ་སེམས་བསྐྱེད་པ་རྣམས་བསྐྱེད་པའི་ཕྱིར་དང༌། སྐྱེས་པ་རྣམས་ཡང་དག་པར་སྦྱོར་བར་བྱ་བའི་ཕྱིར། དེ་དག་ཤིན་ཏུ་འདོད་པར་བྱས་ལ། དེའི་སྙིང་གར་ཡི་གེ་ཧཱུཾ་ལས་རྡོ་རྗེ། མགྲིན་པ་ཡི་གེ་ཨཱཿ་ལས་པདྨ། སྤྱི་བོར་ཡི་གེ་ཨོཾ་ལས་འཁོར་ལོ། དེ་རྣམས་སུ་ས་བོན་དགོད་པ་ནི་ཧཱུཾ་ཨཱཿ་ཨོཾ་ཞེས་བརྗོད་ལ། དྲི་ཞིམ་པོར་བཅས་པའི་ཆུ་རྡོ་རྗེའི་ཁུ་ཚུར་གྱིས་གཟུང་ནས་མགྲིན་པར་བསྐུའོ། །དེ་ནས་དེ་དག་གི་མགོ་ལ་མེ་ཏོག་སྦྱིན་ནོ། །དྲི་དང་བྱུག་པ་ནི་མདུན་དུའོ། །མར་མེ་མདུན་དུའོ། །ཐམས་ཅད་ལ་ལས་ཐམས་ཅད་པའི་སྔགས་བཟླའོ། །དེ་ནས་ཆགས་པ་ལ་སོགས་པའི་སྐྱོན་དང་བྲལ་བའི་སོ་ཤིང་རྩེ་མོ་མེ་ཏོག་ཅན་སྦྱིན་ནོ། །དེས་ཁ་ཤར་ཕྱོགས་སུ་བལྟས་ཏེ། བཅའ་ཤིང་བ་ལང་གི་པགས་པ་ཙམ་གྱིས་ཕྱོགས་བ་ལང་གི་ལྕི་བས་བྱུགས་པར་དོར་རོ། །དེ་ནས་དེ་ལྷུང་བ་དང་ཞི་བ་ལ་སོགས་པ་གྲུབ་པའི་མཚན་མ་དེ་ལ་བསྟན་པར་བྱའོ། །དེ་ནས་ཆུ་ཁྱོར་བ་གསུམ་གྱིས་ཁ་བཤལ་ཏེ། ཨོཾ་ཧྲཱིཿ་བི་ཤུདྡྷཿ་སརྦ་དྷརྨཱ་པཱ་པ་ནཱི་ཙཱ་སྱ་ཤོ་དྷ་ཡ་སརྦ་བི་ཀལ་པཾ་ཨ་པ་ན་ཡ་ཧཱུཾ་ཞེས་བྱ་བའི་སྔགས་ཀྱིས་སོ། །སྟན་དང་སྔས་སུ་ཀུ་ཤ།


DTG047_Page_0027
[མ་དཔེ་གཟིགས་ན་འདིར་གནོན།]

གདིང་ངོ༌། །དེའི་ཚད་སུམ་འགྱུར་གྱི་སྐུད་པས་བཅིངས་ཏེ། ལས་ཐམས་ཅད་པའི་སྔགས་བཟླས་པས་བསྲུང་ང༌། །དེ་ནས། ཐམས་ཅད་མཁྱེན་ཉིད་འཇིག་རྟེན་དུ། །བརྒྱ་ལ་འབྱུང་ངམ་མི་འབྱུང་འགྱུར། །ཨུ་དུམ་བཱ་རའི་མེ་ཏོག་ཀྱང༌། །རེས་འགའ་རེས་འགའ་འབྱུང་བ་སྲིད། །གསང་སྔགས་ཚུལ་ལ་གནས་པ་ཡང༌། །དེ་བས་ཀྱང་ནི་རྙེད་པར་དཀའ། །གང་གིས་སེམས་ཅན་དཔག་མེད་དོན། །ནུས་པར་མཛད་ལས་འདས་པ་དང༌། །བསྐལ་པ་དུ་མ་དཔག་མེད་དུ། །གང་གིས་སྡིག་པ་སྔོན་བྱས་པ། །དཀྱིལ་འཁོར་འདི་འདྲ་མཐོང་བས་ནི། །དེ་དག་ཐམས་ཅད་ཟད་འགྱུར་བས། །སྔགས་སྤྱོད་ཚུལ་ལ་གནས་པ་དང༌། །མཉམ་པར་གྱུར་བས་གཞན་ཅི་ཡོད། །ཚེ་འདི་ཉིད་ལ་སྔགས་བཟླས་པས། །བླ་མེད་གནས་སུ་འགྲོ་འགྱུར་ཏེ། །སྡུག་བསྔལ་ཐམས་ཅད་འབྱུང་བ་ཡི། །ངན་འགྲོའི་གནས་ནི་དེ་དག་སྤངས། །དེ་དག་ཐམས་ཅད་ཟད་འགྱུར་བས། །དེ་དག་སྤྱོད་པ་མཆོག་འདི་ལ། །བློ་གྲོས་ཤིན་ཏུ་བརྟན་གྱུར་ནས། །ཁྱོད་ནི་དེ་རིང་རྙེད་པ་མཆོག །བདག་ཉིད་ཆེན་པོ་རྙེད་པར་འགྱུར། །གང་གིས་རྒྱལ་བ་ཐམས་ཅད་ནི། །སྲས་དང་བཅས་པས་བསྟན་པ་འདི། །ཁྱོད་ཀྱི་ཀུན་གྱིས་ཡོངས་བཟུང་སྟེ། །གནས་ནས་བདག་ཉིད་ཆེན་པོ་ལ། །གང་གིས་ཁྱོད་ནི་ཐེག་ཆེན་ལས། །འདིར་ནི་འགྲོ་བར་འགྱུར་བ་ཡིན། །ལམ་འདི་མཆོག་སྟེ་དཔལ་དང་ལྡན། །ཐེག་པ་ཆེན་པོ་སྣང་བ་ཆེ། །གང་གིས་ཁྱོད་ནི་འགྲོ་འགྱུར་བས། །དེ་བཞིན་གཤེགས་པ་འབྱུང་བར་འགྱུར། །ཞེས་བསྟན་ནས། ཀུ་ཤ་བཏིང་བ་ལ་བཞག་ལ་རྨི་ལམ་ཅུང་ཞིག་མཐོང་ནའང་ང་ལ་ཐོ་རངས་ཁྱོད་ཀྱིས་ཟློས་ཤིག་ཅེས་བྱ་སྟེ། འདི་ནི་སློབ་མ་སྟ་གོན་དུ་གནས་པའོ། །གལ་ཏེ་མི་དགེ་བའི་མཚན་མ་ཟློས་ན་དེའི་ཚེ། ལས་ཐམས་ཅད་པའི་སྔགས་ཀྱིས་བརྡེག་པར་བྱའོ། །ཡང་ངེས་བསྲུངས་ལ་སྡོམ་པ་འཛིན་དུ་བཅུག་སྟེ། དཀྱིལ་འཁོར་ཕྱིར་མི་ལྡོག་པའི་དབང༌། །གསལ་བ་མགོན་པོས་བདག་ལ་སྩོལ། །དཀྱིལ་འཁོར་ལྷ་དག་བསྟོད་པ་དང༌། །སློབ་དཔོན་གྱི་ནི་ལས་དག་དང༌། །སངས་རྒྱས་ཀུན་གྱི་དམ་ཚིག་དང༌། །གསང་བའི་སྡོམ་པ་བླ་མེད་རྣམས། །སློབ་དཔོན་གྱིས་ནི་བདག་ལ་སྩོལ། །རྟག་ཏུ་སེམས་ཅན་དོན་བགྱིད་


DTG047_Page_0028
[མ་དཔེ་གཟིགས་ན་འདིར་གནོན།]

དོ། །ཞེས་བརྗོད་ནས། བདག་དང་སློབ་མ་འཇུག་པའི་ཆོ་ག་ཡིན་ཏེ། དང་པོ་སློབ་དཔོན་དཀྱིལ་འཁོར་དུ་ཞུགས་ཤིང་དབང་ཐམས་ཅད་རྫོགས་པར་བྱ་སྟེ། རྗེས་སུ་གནང་བ་ཐོབ་ནས། ཡོལ་བའི་ཕྱི་རོལ་དུ་ཡོན་ཕུལ་བའི་སློབ་མ་དབང་བསྐུར་བའི་སྣོད་དུ་གྱུར་པ། རྣམ་པར་སྣད་མཛད་ཀྱི་གཟུགས་སུ་དམིགས་ལ། ཨཱ་ཁཾ་བཱི་ར་ཧཱུཾ་ཞེས་བྱ་བའི་སྔགས་བཟླ་ཞིང་མེ་ཏོག་གི་ཕྲེང་བ་བཟུང་སྟེ། མིག་གཉིས་བཀབ་པ་ལས་ཐམས་ཅད་པའི་སྔགས་ཀྱིས་བཏབ་པའི་ཆུས་བསངས་ཏེ། དཀྱིལ་འཁོར་དུ་གཞུག་པའི་ཕྱིར། །ཁྱོད་གང་ལ་དགའ་བ་ཡིན་ཞེས་དྲིའོ། །དེས་ཀྱང་སྐལ་བཟང་བདག་ནི་བདེ་བ་ཆེན་པོ་ལའོ་ཞེས་བརྗོད་དོ། །དེ་མ་ཐག་ཏུ་ཨོཾ་སརྦ་ཡོ་ག་ཙིཏྟ་ཨུཏྤཱ་ད་ཡཱ་མི་ཞེས་བྱ་བས་རྣལ་འབྱོར་གྱི་སེམས་བསྐྱེད་པར་བྱའོ། །དེ་ནས་མེ་ཏོག་གི་ཕྲེང་བ་དང་བཅས་པའི་རྡོ་རྗེ་སྙིང་གར་བཞག་ལ། ཨོཾ་སུ་ར་ཏེ་ས་མ་ཡ་སྟྭཾ་ཧོ་ཏིཥྛ་བཛྲ་ཡ་ཐཱ་སུ་ཁཾ་ཞེས་བྱའོ། །དེ་ནས་སྔར་བསྟན་པའི་ཡི་གེ་ལྔ་བརྗོད་ཅིང༌། ཡོལ་བའི་ནང་དུ་བཀུག་ལ་འདི་སྐད་ཅེས་བརྗོད་དོ། །དེ་རིང་ཁྱེད་སངས་རྒྱས་ཐམས་ཅད་ཀྱི་རིགས་སུ་ཞུགས་ཀྱིས་དེ་བས་ན་ཡེ་ཤེས་རྡོ་རྗེ་དེ་ངས་བསྐྱེད་པར་བྱའོ། །ཡེ་ཤེས་གང་གིས་དེ་ཁོ་ན་ཉིད་ཀྱི་དངོས་སུ་ཀྱང་འཐོབ་ན། དངོས་གྲུབ་གཞན་ལྟ་སྨོས་ཀྱང་ཅི་དགོས། ཁྱེད་ཀྱིས་དཀྱིལ་འཁོར་མ་མཐོང་བ་རྣམས་ཀྱི་མདུན་དུ་བརྗོད་པར་མི་བྱ་སྟེ། དམ་ཚིག་ཉམས་པར་གྱུར་ཏ་རེ། དེ་ནས་དེའི་སྤྱི་བོར་རྡོ་རྗེ་བཞག་ལ་འདི་སྐད་ཅེས་བརྗོད་དོ། །འདི་ནི་དམ་ཚིག་རྡོ་རྗེ་སྟེ། །གལ་ཏེ་ཁྱོད་ཀྱིས་འདི་འགའ་ལ། །སྨྲས་ན་མགོ་བོ་འགས་པར་འགྱུར། །རྡོ་རྗེ་སེམས་དཔའ་རང་ཉིད་ནི། །དེ་རིང་ཁྱོད་ཀྱི་སྙིང་ལ་གནས། །གལ་ཏེ་ཚུལ་འདི་སྨྲས་ན་ནི། །དེ་ཡི་མོད་ལ་བཀས་ནས་གཤེགས། །ཞེས་བྱ་བ་འདིས་མནའ་བསྒག་གོ །ཙནྡན་དང་གུར་ཀུམ་བསྲེས་པའི་ཆུ་ལ་ཨོཾ་བཛྲ་ཨུ་ད་ཀ་ཋཿ་ཞེས་ལན་བདུན་གྱི་བར་དུ་བཟླས་ལ། འདི་ནི་དམྱལ་བའི་ཆུ་ཡིན་ཏེ། །དམ་ཚིག་ཉམས་ན་སྲེག་པར་བྱེད། །དམ་ཚིག་བསྲུངས་ན་འགྲུབ་འགྱུར་བའི། །རྡོ་རྗེ་བདུད་རྩིའི་ཆུ་འཐུང་ཤིག །ཅེས་བརྗོད་ལ་བླུད་དོ། །དེ་ནས་འདི་སྐད་བརྗོད་དེ། དེ་རིང་ཕན་ཆད་ཁྱོད་ཀྱི་ཕྱག་ན་རྡོ་རྗེ་ང་ཡིན་གྱིས། ངས་གང་སྨྲས་པ་དེ་ཁྱོད་ཀྱིས་བྱ་བ་ཡིན་ནོ། །


DTG047_Page_0029
[མ་དཔེ་གཟིགས་ན་འདིར་གནོན།]

ང་ལ་བརྙས་པར་མ་བྱེད་ཅིག །ཉམ་ང་བ་མ་སྤངས་པར་འཆི་བའི་དུས་བྱས་ནས། དམྱལ་བར་ལྟུང་བར་མ་བྱེད་ཅིག་ཅེས་བརྗོད་དོ། །དེ་ནས་དེ་བཞིན་གཤེགས་པ་ཐམས་ཅད་ཀྱི་བྱིན་བརླབས་ནས། རྡོ་རྗེ་སེམས་དཔའ་བདག་ལ་དབབ་ཏུ་གསོལ། །ཞེས་བརྗོད་དོ། །དེའི་སྤྱི་བོར་ཡི་གེ་བཾ་ལས་བྱུང་བའི་བུམ་པས་མཚན་མ་དཀར་པོ་ཆུའི་དཀྱིལ་འཁོར་ཟླུམ་པོ་དཀྱིལ་དུ་ཧའོ། །སྙིང་གར་ལཾ་ལས་བྱུང་བའི་དབང་ཆེན་གྱི་དཀྱིལ་འཁོར་སེར་པོ་གྲུ་ཞི། རྡོ་རྗེ་རྩེ་གསུམ་པས་མཚམས་སུ་མཚན་པ་དེ་ལ་ཧཱུཾ་ངོ༌། །ལྟེ་བར་རཾ་ལས་བྱུང་བའི་མེའི་དཀྱིལ་འཁོར་གྲུ་གསུམ་པ་དམར་པོ་ཤིན་ཏུ་རྣོ་ཞིང་ཚ་བ་དེ་ལ་ཨཱའོ། །རྐང་པ་འོག་ཏུ་ཡཾ་ལས་བྱུང་བ་རླུང་གི་དཀྱིལ་འཁོར་སྔོན་པོ་གཞུའི་རྣམ་པ་ལྟ་བུ་གཡོ་བའི་བ་དན་ཕྱེད་པས་མཚན་པ་དེ་ལ་ཛྷཻཿ་དྲག་ཅིང་རྣོ་བ་འབར་བའི་ཕུང་པོ་དེ་རླུང་གི་བུམ་པར་བསམས་ལ་ཇི་སྲིད་མེའི་དཀྱིལ་འཁོར་གཞན་གྱི་བར་དུའོ། །དེ་དག་གཡོས་པར་གྱུར་ནས་འབར་ཞིང་བྱུང་བས་དབང་ཆེན་གྱི་དཀྱིལ་འཁོར་ཡང་འབར་བར་གྱུར་ཏོ། །དེ་ནས་ཆུའི་དཀྱིལ་འཁོར་ལས་དག་ཅིང་གཙང་པའི་རྒྱུན་བབ་པས། །ངོམས་ཤིང་ཚིམ་པར་གྱུར་ནས་རླུང་གིས་བཏེག་པ་དང༌། སློབ་མ་དང་རང་འགྱིང་བག་དང་བཅས་པའི་ཁྲོ་བོ་ཆེན་པོ་གཤིན་རྗེ་མཐར་བྱེད་སྐུ་ཤིན་ཏུ་དྲག་པོ་ཅན། ཕྱག་གཡས་པས་རྡོ་རྗེ་གསོར་བ། གཡོན་པས་དྲིལ་བུ་འཁྲོལ་བ་འབེབས་པའི་སྔགས་ཀྱིས་ཕབ་སྟེ། སྤོས་དབུལ་ལོ། །དེའི་སྔགས་ནི་འདི་ཡིན་ཏེ། ཨོཾ་ཧྲཱིཿ་ཥྚྀཿ་ཝི་ཀྲྀ་ཏཱ་ན་ན་ཧཱུཾ་ཕཊ་ཕཊ་ཨཱ་བེ་ཤ་ཡ་སྟྭཾ་བྷ་ཡ་ར་ར་ར་ར་ཙཱ་ལེ་ཧཱུཾ་ཧ་ཨཱ་ཛྷཻཿ་ཕཊ་ཅེས་བྱ་བས་མྱུར་དུ་ཕེབས་པར་འགྱུར་རོ། །དེ་ནས་འདོད་ཆགས་གཤིན་རྗེ་གཤེད་དུ་དེ་མ་ཐག་ཏུ་དམིགས་ལ། དེའི་ལྕེ་ལ་ཡི་གེ་ཨཱཿ་དམར་པོ་བསམས་ཏེ། ཏིཥྛ་བཛྲ་ཞེས་བརྗོད་དོ། །རྡོ་རྗེ་ཆོས་ནི་མགོན་པོ་ཆེ། །འོད་དཔག་མེད་ནི་བདེ་བ་ཆེ། །སྨོས་ཤིག་འདོད་ཆགས་ཆོས་ཆེན་པོ། །དགེ་དང་མི་དགེ་བ་དེ་འདྲི། །བབས་ན་དགེ་དང་མི་དགེ་དེ། །ངག་གི་བརྟན་པ་རྗོད་པར་བྱེད། །སེམས་ནི་བརྟན་ནས་ཁམས་གསུམ་དག །ཤེས་ཤིང་ལུས་ནི་བརྟན་གྱུར་ན། །ནམ་མཁའ་ལ་ཡང་འགྲོ་བར་འགྱུར། །གལ་ཏེ་རིང་དུ་འགྲོ་འགྱུར་ན། །མགོ་བོའི་གཙུག་ཏུ་ལཾ་


DTG047_Page_0030
[མ་དཔེ་གཟིགས་ན་འདིར་གནོན།]

ལས་བྱུང་བའི་དབང་ཆེན་གྱི་དཀྱིལ་འཁོར་སྣ་ཚོགས་རྡོ་རྗེས་ཀུན་ནས་མནན་པར་བསྒོམས་ལ་དེ་རེངས་པར་བྱའོ། །དེ་ལྟ་བུ་ནི་དབབ་པའོ། །དེ་ནས་ཐོགས་པའི་མེ་ཏོག་དེ་དཀྱིལ་འཁོར་དུ་དབུལ་ཞིང་པྲ་ཏཱིཙྪ་བཛྲ་ཧོ་ཞེས་བརྗོད་དོ། །དེ་ལྟར་ལྷ་གང་གི་གནས་མཚན་མ་དང་ཉེ་བར་བབ་པར་གྱུར་ན་དེའི་རིགས་ཡིན་པར་དེ་ལ་བསྟན་པར་བྱའོ། །གནས་མཆོག་ཏུ་བབ་ན་དངོས་གྲུབ་མཆོག་འགྲུབ་པོ། །གནས་དཀྱིལ་དུ་ནི་དངོས་གྲུབ་འབྲིང་ངོ༌། །གནས་སྨད་ཀྱི་ལས་དངོས་གྲུབ་ཐ་མའོ། །དཀྱིལ་འཁོར་གྱི་ཕྱི་རོལ་ཏུ་བབ་ན་དངོས་གྲུབ་མེད་དོ། །གལ་ཏེ་དཀྱིལ་འཁོར་དུ་མ་བབ་ན་དེ་ཡང་འཕང་ངོ། །ལན་གསུམ་འཕངས་ཀྱང་དེ་ཉིད་དུ་མ་བབ་ན་དེ་གཟུང་བར་མི་བྱའོ། །དེ་ནི་མེ་ཏོག་དོར་བའོ། །ཕངས་པའི་ཕྲེང་བ་དེ་བླངས་ཏེ་དེའི་མགོ་ལ་བཅིངས་ལ། སེམས་ཅན་སྟོབས་པོ་ཆེ་འདི་ལོངས་ཤིག་ཅེས་བརྗོད་དོ། །དེ་ནས། ཨོཾ་རྡོ་རྗེ་སེམས་དཔའ་རང་ཉིད་ནི། །དེ་རིང་ཁྱེད་ཀྱི་མིག་འབྱེད་མཛད། །དེ་ལྟར་མིག་ནི་ཐམས་ཅད་འབྱེད། །རྡོ་རྗེ་མིག་ནི་བླ་མེད་པ། །ཞེས་བརྗོད་ནས་གདོད་གཡོགས་དབྱེའོ། །དེ་ནས་དཀྱིལ་འཁོར་གྱི་ལྷ་སོ་སོའི་མིང་བསྟན་པ་སྔོན་དུ་འགྲོ་བས། བྱང་ཕྱོགས་ཀྱི་སྒོ་ནས་བརྩམས་ཏེ། གཙོ་བོའི་བར་དུ་བསྟན་པར་བྱའོ། །དེ་ནི་དཀྱིལ་འཁོར་དུ་འཇུག་པའོ། །དེ་ནས་སངས་རྒྱས་ཆོས་ཆེན་པོ། །རྡོ་རྗེ་སེམས་དཔས་དབང་བསྐུར་ལྟར། །བདག་ཀྱང་མགོན་པོས་དབང་བསྐུར་ཞིང༌། །ཉིད་ཀྱི་མཆོག་ཀྱང་སྩལ་དུ་གསོལ། །ཞེས་བྱ་བས་གསོལ་བ་འདེབས་པ་དང་ལྡན་པའི་སློབ་མ་བཟུང་ལ། རྡོ་རྗེ་ཙ་རྩི་ཀ་ལ་སོགས་པས་བུམ་པས་དབང་བསྐུར་རོ། །རྡོ་རྗེ་ཆེན་པོས་དབང་བསྐུར་བ། །ཁམས་གསུམ་པོ་ཡི་ཕྱག་བྱས་པ། །གསང་གསུམ་པ་ཡི་གནས་བྱུང་བའི། །སངས་རྒྱས་ཀུན་གྱིས་སྦྱིན་པར་བྱ། །ཞེས་བརྗོད་ཅིང་ལས་ཐམས་ཅད་པ་བཟླས་པའི་བུམ་པའི་ཆུ་རྡོ་རྗེ་ཁུ་ཚུར་གྱིས་ཀུན་ནས་གཏོར་ཞིང༌། ཨོཾ་བཛྲ་ཨ་བྷི་ཥིཉྩ་ཞེས་བརྗོད་དོ། སློབ་མ་འཁོར་ལོས་སྒྱུར་བ་བཞིན་དུ་དབང་བསྐུར་རོ། །ཆུའི་དབང་བསྐུར་བའོ། །དེ་ནས་གསེར་རམ་གོས་ལས་བསྒྲུབས་པའི་ཅོད་པན་ཇི་ལྟ་བའི་སྔགས་ཀྱིས་མགོའི་སྟེང་དུ་བཞག་ལ་ནམ་མཁའི་ཁོངས་སུ་གཏོགས་པའི་རང་གི་རིགས་ཀྱི་གཟུགས་སུ་ཅོད་པན་ལ་བཞུགས་སུ་གསོལ་ཏེ་སྦྱིན་པ་ནི་ཅོད་པན་གྱི་


DTG047_Page_0031
[མ་དཔེ་གཟིགས་ན་འདིར་གནོན།]

དབང་བསྐུར་བའོ། །དེའི་རྗེས་ལ་རྡོ་རྗེ་བྱིན་ལ། སངས་རྒྱས་རྡོ་རྗེ་དབང་བསྐུར་བས། །དེ་རིང་ཁྱོད་ནི་དབང་བསྐུར་བྱ། །འདི་དེ་སངས་རྒྱས་ཐམས་ཅད་ཉིད། །རྡོ་རྗེ་ལོང་ཤིག་རབ་འགྲུབ་འགྱུར། །ཞེས་བརྗོད་ཅིང་རྡོ་རྗེ་སྙིང་ག་ལ་སོགས་པར་རེག་ལ་ལག་པ་གཡས་པར་སྦྱིན་པ་ནི་རྡོ་རྗེའི་དབང་བསྐུར་བའོ། །དེ་ནས་ལག་པ་གཡོན་པར་དྲིལ་བུ་བྱིན་ལ། རྡོ་རྗེ་དྲིལ་བུ་དང་ལྡན་པའི་ལག་པ་དག་གིས་འཁྱུད་པ་ལྟར་བྱས་ཏེ། ཨོཾ་བཛྲ་ཨ་དྷི་པ་ཏི་སྟྭཾ་ཨ་བྷི་ཥིཉྩཱ་མི་ཏིཥྛ་བཛྲ་ས་མ་ཡ་སྟྭཾ་ཞེས་བརྗོད་ལ་སྦྱིན་ཏེ། དེ་ནི་དྲིལ་བུའི་དབང་བསྐུར་བའོ། །དེ་ཉིད་ལ་བདག་པོའི་དབང་ཞེས་ཀྱང་བྱའོ། །དེ་ནས་རྡོ་རྗེ་དྲིལ་བུ་སྤྱི་བོར་བཟུང་ལ། ཨོཾ་བཛྲ་སཏྭ་སྟྭཾ་ཨ་བྷི་ཥིཉྩཱ་མི་བཛྲ་ནཱ་མ་ཨ་བྷི་ཥེ་ཀ་ཏ། ཀྱེ་དཔལ་ཆེ་གེ་མོ་རྡོ་རྗེ་ཞེས་བྱ་བ་ལ་སོགས་པས། རིགས་དང་རྗེས་སུ་མཐུན་པའི་མིང་གདགས་སོ། །དབང་འདི་དག་གིས་སྔགས་དང་རྒྱུད་བཤད་པ་དང༌། གསང་སྔགས་སྒྲུབ་པ་ལ་དབང་བར་འགྱུར་རོ། །འདི་ནི་དབང་ལྔ་པ་སྟེ། རྩ་བའི་ཡིན་ནོ། །རྩ་བའི་དབང་ཐམས་ཅད་ལ་ཡང་ཙ་རྩི་ཀ་ལ་སོགས་པའི་བྱ་བ་ཐམས་ཅད་ཡིན་པ་ཉིད་དོ། །དེ་ནས་རྩ་བའི་དབང་མ་ནོས་པས་སློབ་དཔོན་སྡོམ་པ་ཅན། ཀྱེ་སྙིང་རྗེའི་གཏེར་བདག་དང་གཞན་གྱི་དོན་ནུས་པའི་རྡོ་རྗེ་སློབ་དཔོན་གྱི་དབང་དེ་ཁྱེད་ཀྱི་སྐུ་དྲིན་གྱིས་སྩལ་དུ་གསོལ་ཞེས་གསོལ་བ་གདབ་པ་དང་ལྡན་པས་དཀྱིལ་འཁོར་དང་ཉེ་བར་རྡུལ་ཚོན་དམར་པོ་ལས་བྱས་པའི་པདྨ་འདབ་མ་བརྒྱད་པའི་སྟེང་དུ་གོར་སྟན་ལ་བཞག་སྟེ། རྡོ་རྗེ་ཙ་རྩི་ཀ་ལ་སོགས་པས་དབང་བསྐུར་ཞིང་དམ་ཚིག་གསུམ་བཟུང་ངོ༌། །དེ་ལ་དམ་ཚིག་གསུམ་ནི་འདི་ཡིན་ཏེ། ཧཱུཾ་ལས་རྡོ་རྗེ་བསྒོམས་ལ། ཁམས་གསུམ་པ་ཡི་རལ་གྲི་ཆེ། །སངས་རྒྱས་ཀུན་གྱིས་ཕྱག་བྱས་པ། །འདི་ནི་ལས་ཀྱི་རལ་གྲི་མཆོག །དགྲ་རྣམས་ལས་རྒྱལ་བྱ་ཕྱིར་ཟུང༌། །ཞེས་བྱ་བས་དེ་ཁོ་ན་ཉིད་ཀྱི་རྡོ་རྗེ་གཟུང་ངོ༌། །འདི་ནི་རྡོ་རྗེའི་དམ་ཚིག་གོ །དེ་ནས་ཨཱཿ་ལས་བྱུང་བའི་དྲིལ་བུ་ལ་ཤེས་རབ་དང༌། ཐབས་ཀྱི་ངོ་བོ་ཉིད་རྡོ་རྗེ་དང་དྲིལ་བུ་འདིས་འགྲུབ་པར་འགྱུར་གྱིས་ཟུང་ཤིག །བུ་རྡོ་རྗེ་ཁྱོད་ཀྱིས་སློབ་མ་ལ་ཡང་ཟུང་ཤིག་ཅེས་བྱས་ལ། དེའི་ལག་པར་བྱིན་ཏེ། སྲིད་པ་ངོ་བོ་ཉིད་ཀྱིས་དག །ངོ་བོ་


DTG047_Page_0032
[མ་དཔེ་གཟིགས་ན་འདིར་གནོན།]

ཉིད་ཀྱིས་དངོས་མེད་བྱས། །སེམས་ཅན་རང་བཞིན་རྟག་ཏུ་དག །སྲིད་པའི་མཆོག་ནི་བྱེད་པ་ཡིན། །ཞེས་བྱ་བས་དེ་ལ་གདམས་པར་བྱ་སྟེ། འདི་ནི་དྲིལ་བུའི་དམ་ཚིག་གོ །དེ་ནས་ཕྱག་རྒྱའི་དམ་ཚིག་བསྟན་ཏེ། ཡིད་ཀྱི་གཟུགས་ནི་བརྟན་པ་ཉིད། །ཕྱག་རྒྱ་ཡིན་པར་རབ་གྲགས་ཏེ། །འདི་ཡིས་རང་གི་འདོད་ལྷ་ནི། །བདག་ཉིད་ཕྱག་རྒྱ་ཆེན་པོར་གནས། །ཞེས་བྱ་བ་ནི་ཕྱག་རྒྱའི་དམ་ཚིག་གོ །དེ་ནས་དཀྱིལ་འཁོར་གྱི་དེ་ཁོ་ན་ཉིད་དང་ལྷའི་དེ་ཁོ་ན་ཉིད་དང་སློབ་དཔོན་གྱི་ལས་དང་དཀྱིལ་འཁོར་བསྒྲུབ་པ་དང༌། སློབ་དཔོན་འཇུག་པའི་བྱ་བ་བསྟན་པར་བྱའོ། །དེ་ལ་སངས་རྒྱས་དང༌། སངས་རྒྱས་མ་ཡིན་པ་བདག་དེ་ཁོ་ན་ཉིད་དུ་མཉམ་པས་གྲུ་བཞི་པའོ། །ལུས་དང༌། ཚོར་བ་དང་སེམས་དང༌། ཆོས་རྣམས་གཅིག་དང་དུ་མ་དང་བྲལ་བས་གཟུགས་བརྙན་དང་མཚུངས་པ་ཉིད་ལ། དད་པ་རྣམ་པར་དག་པ་ནི་ཤར་ཕྱོགས་ཀྱི་སྒོའོ། །སྐྱེས་པ་དང་མ་སྐྱེས་པའི་མི་དགེ་བའི་ཆོས་སྤང་བ་དང༌། མི་བསྐྱེད་པ་དང༌། སྐྱེས་པ་དང་མ་སྐྱེས་པའི་དགེ་བའི་ཆོས་འཕེལ་ཞིང་རྒྱས་པར་བྱ་བ་དང༌། བསྐྱེད་པའི་ཕྱིར་རྩོམ་པའི་ལས་དང༌། རྟོག་པའི་བདག་ཉིད་ཀྱིས་བརྩོན་འགྲུས་བཞི་པོ་རྣམ་པར་དག་པ་ནི་ལྷོའི་སྒོའོ། །འདུན་པ་དང་བརྩོན་འགྲུས་དང༌། སེམས་དང༌། དཔྱོད་པ་ཞེས་བྱ་བ་རྫུ་འཕྲུལ་གྱི་རྐང་པ་བཞི་དང༌། གང་དྲན་པ་རྣམ་པར་དག་པ་ནི་ནུབ་ཀྱི་སྒོའོ། །དད་པ་དང་བརྩོན་འགྲུས་དང༌། དྲན་པ་དང་ཏིང་ངེ་འཛིན་དང༌། ཤེས་རབ་ཅེས་བྱ་བ་དབང་པོ་ལྔའི་ཏིང་ངེ་འཛིན་རྣམ་པར་དག་པ་ནི་བྱང་གི་སྒོའོ། །རྟོག་པ་དང༌། དཔྱོད་པ་དང། དགའ་བ་དང༌། བདེ་བ་དང་སེམས་རྩེ་གཅིག་པ་ཞེས་བྱ་བ་བསམ་གཏན་དང་པོའི་ཡན་ལག་དང༌། རྟོག་པ་དང་དཔྱོད་པ་སྤངས་པ་བསམ་གཏན་གཉིས་པ་དང༌། དགའ་བ་ཡང་སྤངས་ཤིང་བཏང་སྙོམས་དང༌། དྲན་པ་དང་ལྡན་པས་བསམ་གཏན་གསུམ་པ་དང༌། བཏང་སྙོམས་དང་དྲན་པ་དག་པ་དང༌། སྡུག་བསྔལ་ཡང་མ་ཡིན། བདེ་བ་ཡང་མ་ཡིན་པའི་ཚོར་བ་བསམ་གཏན་བཞི་པ་རྣམ་པར་དག་པ་ནི། རྟ་བབས་བཞིའོ། །དཔའ་བར་འགྲོ་བ་དང༌། ནམ་མཁའ་མཛོད་དང༌། དྲི་མ་མེད་པ་དང༌། སེང་གེ་རྣམ་པར་རོལ་པའི་ཏིང་ངེ་འཛིན་བཞི་པོ་རྣམ་པར་དག་པ་ནི་ཁ་


DTG047_Page_0033
[མ་དཔེ་གཟིགས་ན་འདིར་གནོན།]

ཁྱེར་བཞིའོ། །དོན་དང་ཚིག་དང༌། ངེས་ཚིག་དང༌། སྤོབས་པ་བཞི་དང༌། གཟུངས་བཞི་རྣམ་པར་དག་པ་ནི་ཁ་ཁྱེར་ལ་གནས་པའི་མཆོད་པའི་ལྷ་མོའི་ཚོགས་སོ། །བསམ་པ་ཐམས་ཅད་རྫོགས་པས་ནི་རྒྱན་རྣམ་པ་སྣ་ཚོགས་སོ། །མདོ་དང་དབྱངས་ཀྱིས་བསྙད་པ་དང། ལུང་དུ་བསྟན་པ་དང༌། ཚིགས་སུ་བཅད་པ་དང༌། ཆེད་དུ་བརྗོད་པ་དང༌། གླེང་གཞི་དང༌། སྐྱེས་པའི་རབས་དང༌། ཤིན་ཏུ་རྒྱས་པ་དང༌། རྨད་དུ་བྱུང་བ་གསུང་རབ་ཡན་ལག་དགུ་གདུལ་བྱའི་སྐྱེ་བོ་ལ་བསྟན་པ་རྣམ་པར་དག་པ་ནི། དྲིལ་བུ་དང་གཡེར་ཁའི་སྒྲ་དང་བ་དན་ནོ། །དྲན་པ་དང་ཆོས་རབ་ཏུ་རྣམ་པར་འབྱེད་པ་དང༌། བརྩོན་འགྲུས་དང་དགའ་བ་དང་ཤིན་ཏུ་སྦྱངས་པ་དང༌། ཏིང་ངེ་འཛིན་དང་བཏང་སྙོམས་ཞེས་བྱ་བ་བྱང་ཆུབ་ཀྱི་ཡན་ལག་བདུན་རྣམ་པར་དག་པ་ནི། དྲ་བ་དང་དྲ་བ་བྱེད་པ་དང༌། མེ་ལོང་དང་མེ་ཏོག་གི་ཕྲེང་བ་དང༌། རྔ་ཡབ་འབར་བའོ། །ནང་གཟུགས་མེད་པའི་འདུ་ཤེས་ཀྱིས་ཕྱི་རོལ་གྱི་གཟུགས་སྟོང་པ་ཉིད་དང༌། མཚན་མ་མེད་པ་དང༌། སྨོན་པ་མེད་པའི་རྣམ་པར་མཐོང་བ་ཞེས་བྱ་བ་རྣམ་པར་ཐར་པ་དང་པོ་དང༌། ཕྱི་རོལ་གྱི་གཟུགས་མེད་པའི་འདུ་ཤེས་ཀྱིས་ནང་གི་གཟུགས་དེ་བཞིན་དུ་མཐོང་བ་ཞེས་བྱ་བ་ནི་གཉིས་པ་དང༌། ནང་དང་ཕྱི་རོལ་གྱི་གཟུགས་མེད་པའི་འདུ་ཤེས་ཀྱིས་གཟུགས་རྣམས་མངོན་སུམ་དུ་ཉེ་བར་རྫོགས་པར་བྱས་ཏེ། གནས་པ་ཞེས་བྱ་བ་གསུམ་པ་དང༌། ནམ་མཁའ་མཐའ་ཡས་སྐྱེ་མཆེད་ལ་སྙོམས་པར་འཇུག་པ་བཞི་པ་དང༌། རྣམ་ཤེས་མཐའ་ཡས་སྐྱེ་མཆེད་ལ་སྙོམས་པར་འཇུག་པ་ལྔ་པ་དང༌། ཅི་ཡང་མེད་པའི་སྐྱེ་མཆེད་ལ་སྙོམས་པར་འཇུག་པ་དྲུག་པ་དང༌། འདུ་ཤེས་མེད་འདུ་ཤེས་མེད་མིན་སྐྱེ་མཆེད་ལ་སྙོམས་པར་འཇུག་པ་བདུན་པ་དང༌། འགོག་པའི་སྙོམས་པར་འཇུག་པ་ནི་བརྒྱད་པ་སྟེ། འདི་དག་རྣམས་དག་པ་ནི། སྣ་ཚོགས་རྡོ་རྗེའི་ཟུར་བཞི་དང་ལོགས་བཞིའོ། །རྡོ་རྗེ་ཐེག་པའི་ཆོས་ཀྱི་འཁོར་ལོ་བསྐོར་བ་ནི་སྣ་ཚོགས་རྡོ་རྗེའི་ལྟེ་བའི་སྟེང་གི་རིམ་པ་དང༌། འབྲེལ་པའི་རྡོ་རྗེའི་ཐིག་དང་ཡང་དག་པར་ལྡན་པའོ། །འབྲས་བུ་དབྱེ་བས་འཇིག་ཚོགས་ལ་ལྟ་བའི་རིའི་རྩེ་མོ་ཤིན་ཏུ་མཐོ་བའི་བྱེ་བྲག་གིས་སྣ་ཚོགས་རྡོ་རྗེའི་རྩེ་མོ་ཉི་ཤུའོ། །རྟེན་དང་བརྟེན་པའི་དབྱེ་བས་ས་ལྔ་ནི་ངོས་


DTG047_Page_0034
[མ་དཔེ་གཟིགས་ན་འདིར་གནོན།]

རྣམས་དང་སྟེང་ངོ༌། །གོས་པ་མེད་པའི་ཆོས་གཅིག་དང༌། དུ་མ་ཇི་ལྟར་རིགས་པ་རབ་ཏུ་སྟོན་པ་ནི། ལྷའི་གནས་ཀྱི་སྣ་ཚོགས་པདྨའོ། །བྱང་ཆུབ་ཀྱི་སེམས་ཡོངས་སུ་སྨིན་པར་བྱེད་པས་ཉི་མའི་གདན་དང་ལྡན་པའོ། །བྱང་ཆུབ་ཀྱི་སེམས་ཀྱི་མྱུ་གུ་འཕེལ་བར་བྱེད་པས་ཟླ་བའི་གདན་དང་ལྡན་པའོ། །སྙིང་རྗེའི་བདུད་རྩིས་ཡོངས་སུ་གང་བས་ན་བུམ་པ་བརྒྱད་དོ། །ཆོས་ཀྱི་འོད་ཀྱི་སྒྲོན་མའི་གྲགས་པ་ནི་དྲི་ཞིམ་པའོ། །ཆོས་ཀྱི་ཟས་ནི་བཤོས་གཙང་སྟེ། དེ་ལྟ་བུ་ནི་དཀྱིལ་འཁོར་གྱི་དེ་ཁོ་ན་ཉིད་དོ། །ལྷའི་དེ་ཁོ་ན་ཉིད་བརྗོད་པར་བྱའོ། །དེ་ལ་རྣམ་པར་ཤེས་པའི་ཕུང་པོ་དང༌། ཞེ་སྡང་ཆེན་པོ་ཤིན་ཏུ་རྣམ་པར་དག་པ་དང༌། ཆོས་ཀྱི་དབྱིངས་ཀྱི་ཡེ་ཤེས་ནི་བཅོམ་ལྡན་འདས་སོ། །འགྲོ་བ་ཐམས་ཅད་ཀྱི་ཉོན་མོངས་པ་བསྡུས་པས་གནག་པ་ནི་ནག་པོའོ། །བརྟགས་པའི་ཡོངས་སུ་མྱ་ངན་ལས་འདས་པ་ཉིད་གཤིན་རྗེ་མཐར་བྱེད་པའི་ཕྱིར་གཤིན་རྗེ་གཤེད་དོ། །ཤིན་ཏུ་གདུག་པ་ཅན་དྲག་པོ་ཞི་བས་མི་འདུལ་ལ་ཁྲོ་བོ་ཆེན་པོའོ། །རྣམ་ཐར་སྒོ་གསུམ་རྣམ་པར་དག་པ་ཞལ་གསུམ་མོ། །ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པས་ཕྱག་དྲུག་གོ །སེར་སྣ་ལ་སོགས་པ་འཇིག་པར་མཛད་པས་རྡོ་རྗེ་ལ་སོགས་པ་དྲུག་ཕྱག་ན་བསྣམས་པའོ། །ཞེ་སྡང་གི་ཆའི་ཉེ་བའི་ཉོན་མོངས་པ་འཇིག་པས་སྦྲུལ་གྱིས་བརྒྱན་པའོ། །ཚོགས་གཉིས་ཡོངས་སུ་རྫོགས་པས་རང་དང་མཚུངས་པའི་ཡེ་ཤེས་ལ་འཁྱུད་པའོ། །རྟག་ཏུ་སེམས་ཅན་གྱི་དོན་མཛད་པས་ལྷན་ཅིག་སྐྱེས་པའི་བདེ་བའི་ངོ་བོའོ། །ཆོས་ཀྱི་སྐུ་ཉིད་ཀྱི་ཕྱིར་ལོངས་སྤྱོད་རྫོགས་པ་དང༌། སྤྲུལ་པའི་སྐུ་མཛད་པའོ། །གཟུགས་ཀྱི་ཕུང་པོ་དང་གཏི་མུག་ཆེན་པོ་རྣམ་པར་དག་པ་དང༌། མེ་ལོང་ལྟ་བུའི་ཡེ་ཤེས་ནི་བཅོམ་ལྡན་འདས་གཏི་མུག་གཤིན་རྗེ་གཤེད་དོ། །གཞན་ནི་སྔ་མ་བཞིན་ནོ། །གཏི་མུག་གི་ཆའི་ཉེ་བའི་ཉོན་མོངས་པའི་ཕྲ་མ་ཆེན་པོ་དང༌། ཚོར་བའི་ཕུང་པོ་རྣམ་པར་དག་པ་དང་མཉམ་པ་ཉིད་ཀྱི་ཡེ་ཤེས་ནི་བཅོམ་ལྡན་འདས་ཕྲ་མ་གཤིན་རྗེ་གཤེད་དོ། །ལྷག་མ་ནི་སྔ་མ་བཞིན་ནོ། །ང་རྒྱལ་གྱི་ཆའི་ཉེ་བའི་ཉོན་མོངས་པ་དང༌། འདོད་ཆགས་ཆེན་པོ་དང༌། འདུ་ཤེས་ཀྱི་ཕུང་པོ་རྣམ་པར་དག་པ་དང༌། སོ་སོར་རྟོག་པའི་ཡེ་ཤེས་ནི། བཅོམ་ལྡན་འདས་འདོད་ཆགས་གཤིན་རྗེ་གཤེད་དོ། །འདོད་


DTG047_Page_0035
[མ་དཔེ་གཟིགས་ན་འདིར་གནོན།]

ཆགས་ཀྱི་ཆའི་ཉེ་བའི་ཉོན་མོངས་པ་དང༌། ཕྲག་དོག་ཆེན་པོ་དང༌། འདུ་བྱེད་ཀྱི་ཕུང་པོ་རྣམ་པར་དག་པ་དང༌། བྱ་བ་ནན་ཏན་གྱི་ཡེ་ཤེས་ནི་བཅོམ་ལྡན་འདས་ཕྲག་དོག་གཤིན་རྗེ་གཤེད་དོ། །ཕྲག་དོག་གི་ཆའི་ཉེ་བའི་ཉོན་མོངས་པ་དང༌། འཇིག་ཚོགས་ལ་ལྟ་བ་དང༌། ཤེས་བྱའི་སྒྲིབ་པ་དང༌། ཕུང་པོའི་བདུད་ལ་དད་པ་རྣམ་པར་དག་པ་ནི། བཅོམ་ལྡན་འདས་ཐོབ་གཤིན་རྗེ་གཤེད་དོ། །མི་མཐུན་པའི་ཕྱོགས་ཀྱི་རྗེས་སུ་མཐུན་པའི་ཉེ་བའི་ཉོན་མོངས་པ་དང༌། མཐར་འཛིན་པར་ལྟ་བ་དང༌། འདོད་པའི་སྒྲིབ་པ་དང༌། ཉོན་མོངས་པའི་བདུད་ལ་བརྩོན་འགྲུས་རྣམ་པར་དག་པ་ནི་བཅོམ་ལྡན་འདས་དབྱུག་པ་གཤིན་རྗེ་གཤེད་དོ། །མི་མཐུན་པའི་ཕྱོགས་ཀྱི་རྗེས་སུ་མཐུན་པར་ཉེ་བའི་ཉོན་མོངས་པ་དང༌། ལས་ཀྱི་སྒྲིབ་པ་དང༌། ལྟ་བ་མཆོག་ཏུ་འཛིན་པ་དང༌། འཆི་བདག་གི་བདུད་ལ་དྲན་པ་རྣམ་པར་དག་པ་ནི་བཅོམ་ལྡན་འདས་པ་པདྨ་གཤིན་རྗེ་གཤེད་དོ། །མི་མཐུན་པའི་ཕྱོགས་ཀྱི་རྗེས་སུ་མཐུན་པའི་ཉེ་བའི་ཉོན་མོངས་པ་དང༌། སྐྱེ་བའི་སྒྲིབ་པ་དང༌། ཚུལ་ཁྲིམས་དང༌། བརྟུལ་ཞུགས་མཆོག་ཏུ་འཛིན་པ་དང༌། ལྷའི་བུ་རྣམ་པར་གཡེང་བྱེད་བདུད་ལ་ཏིང་ངེ་འཛིན་རྣམ་པར་དག་པ་ནི་བཅོམ་ལྡན་འདས་རལ་གྲི་གཤིན་རྗེ་གཤེད་དོ། །སའི་ཁམས་དང་ཐབས་ཀྱི་ཕ་རོལ་ཏུ་ཕྱིན་པ་དང༌། བྱམས་པ་ཆེན་པོའི་ངོ་བོ་ཉིད་རྡོ་རྗེ་ཙ་རྩི་ཀའོ། །ཆུའི་ཁམས་དང་སྨོན་ལམ་གྱི་ཕ་རོལ་ཏུ་ཕྱིན་པ་དང༌། སྙིང་རྗེ་ཆེན་པོའི་ངོ་བོ་ནི་རྡོ་རྗེ་ཕག་མོའོ། །མེའི་ཁམས་དང་སྟོབས་ཀྱི་ཕ་རོལ་ཏུ་ཕྱིན་པ་དང༌། དགའ་བ་ཆེན་པོའི་ངོ་བོ་ནི་རྡོ་རྗེ་དབྱངས་ཅན་མའོ། །རླུང་གི་ཁམས་དང༌། ཡེ་ཤེས་ཀྱི་ཕ་རོལ་ཏུ་ཕྱིན་པ་དང༌། བཏང་སྙོམས་ཆེན་པོའི་ངོ་བོ་ནི་རྡོ་རྗེ་གཽ་རཱི་མའོ། །ཕྱི་རོལ་གྱི་གཟུགས་ལ་སོགས་པ་དག་པ་ནི་ཐོད་པ་བཞིའོ། །ནང་དྲི་ཞིམ་པོས་ཀྱང་བཀང་བ་ནི། ཆོས་ཀྱི་དབྱིངས་ཀུན་དུ་འགྲོའོ། །ཕ་རོལ་ཏུ་ཕྱིན་པ་ས་དང་སྦྱར་བ་ཡང་བརྟག་པར་བྱའོ། །སྟོབས་དང་མ་འདྲེས་པ་ལ་སོགས་པ་མ་བྲིས་པ་ནི་གཞུང་མངས་ཀྱིས་དོགས་པས་འཇིགས་པས་སོ། །དེ་ལྟ་བུ་ནི་ལྷའི་དེ་ཁོ་ན་ཉིད་དོ། །དེ་ནས་སློབ་དཔོན་གྱི་ལས་ཏེ་བསྲུང་བའི་དམ་ཚིག་དང༌། བཟའ་བའི་དམ་ཚིག་བསྒྲུབ་པ་རྒྱུད་དེ་དང་དེ་དག་བསྟན་པའོ། །བདག་བསྲུང་བ་ནི་སོ་སོ་འབྲང་


DTG047_Page_0036
[མ་དཔེ་གཟིགས་ན་འདིར་གནོན།]

མའི་དཀྱིལ་འཁོར་དང་སྒྲུབ་ཐབས་བསྟན་པས་སོ། །སློབ་དཔོན་འཇུག་པ་ནི་གཏོར་མ་བྱིན་ཏེ། དེ་ལ་རྣལ་འབྱོར་བཞི་དང་ལྡན་པའི་སློབ་དཔོན་གྱིས་བཅའ་བ་དང༌། མྱང་བ་དང༌། བཏུང་བ་བླང་པ་ལ་སོགས་པ་སྣ་ཚོགས་དང་ལྡན་པ་དྲི་དང༌། ཕྲེང་བ་དང༌། བྱུག་པ་དང༌། ཕྱེ་མ་དང༌། གོས་དང། གདུགས་དང༌། རྒྱལ་མཚན་དང༌། དྲིལ་བུ་ལ་སོགས་པའི་སྒྲ་ཆེན་པོ་ཀུན་རྫོབ་ཏུ་རྫོགས་པ་དང་བཅས་པའི་གཏོར་མ་ཤིང་རྟ་བཀང་བའམ། མ་འབྱོར་ན་ནས་ཀྱི་ཁུར་བའམ། འབྲས་ཆན་ཉུང་ཤས་ཙམ་དང་བཅས་པའི་ཆུ་ཁྱོར་བ་གསུམ་ཙམ་ཡང་རུང་ངོ༌། །དེ་ནས་ཁྲོ་བོ་ཞགས་པ་དང་ལྕགས་ཀྱུ་ལ་སོགས་པ་ཐོགས་པ་སྤྲོས་ཏེ། ཕྱོགས་སྐྱོང་བ་རྣམས་སྙིང་ག་ནས་ལྕགས་ཀྱུས་བཟུང་ཞིང༌། མགྲིན་པ་ཞགས་པས་བཅིངས་ནས་དྲངས་པར་བསམ་མོ། །དེ་ལ་ཨོཾ་ཧྲཱིཿ་ཥྚྲྀཿ་ཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ། སརྦ་དུཥྚཱ་ན་ས་པ་རི་ཝཱ་ར་མཱ་ཀཱཪྵ་ཡ་ཛཿ་ཞེས་བྱ་པས་དབང་པོ་མིག་སྟོང་པ་མདོག་དམར་སེར་གླང་པོ་ཆེའི་སྟེང་ན་འདུག་པ། ལག་པ་གཡས་དང་གཡོན་རྡོ་རྗེ་དང་སྡིགས་མཛུབ་བྱས་པ་བཀུག་ལ་གཞག་གོ །སྔགས་དེ་ཉིད་ཀྱིས་ཉེ་དབང་ནམ་མཁའ་ལྡིང་ལ་ཞོན་པ། རིན་པོ་ཆེའི་ཅོད་པན་ཅན། གཡས་ན་བསྲུབ་ཤིང་དང༌། འཁོར་ལོ། གཡོན་ན་དུང་དང་ནོར་བུ་ཀཽ་སྟུ་བྷ་ཐོགས་པ། དེའི་གཡོན་དུ་ཧ་ཅང་མི་རིང་བར་གཞག་གོ །གཤིན་རྗེ་སྔོན་པོ་མ་ཧེ་ལ་ཞོན་པ་སྐྲ་སེར་པོ་གྱེན་དུ་འབར་བ། ལག་པ་ན་དབྱུག་པ་དང༌། སྡིགས་མཛུབ་ཅན་གཤིན་རྗེའི་ཕྱོགས་སུའོ། །ཆུ་བདག་དཀར་པོ་བྲང་འགྲོ་ལ་ཞོན་པ། ལག་ན་ཀླུ་ཞགས་ཐོགས་པ་ནུབ་ཕྱོགས་སུའོ། །ཀུ་བེ་ར་ནོར་གྱི་སྟེང་ན་འདུག་པ་སེར་པོ་ས་བོན་གྱི་གྲོང་ཁྱེར་དང༌། ནེའུ་ལེ་ལག་ན་ཐོགས་པ་བྱང་ཕྱོགས་སུའོ། །དེ་ཉིད་དུ་སྣ་ཅན་དཀར་པོ་བྱི་བ་ལ་ཞོན་པ་ལག་པ་གཡས་ན་ཕྲེང་བ་དང༌། སྟ་རེ། གཡོན་ན་ལ་ཕུག་དང་ལ་དུ་ཐོགས་པའོ། །དབང་ལྡན་དཀར་པོ་གླང་ལ་ཞོན་པ་རལ་པ་ཅན། མིག་གསུམ་པ་རྩེ་གསུམ་དང༌། ཐོད་པ་ཐོགས་པ་ལག་པ་གཉིས་ཀྱིས་གཽ་རཱི་ལ་འཁྱུད་པ་དང་དབང་ལྡན་ཕྱོགས་སུའོ། །མེ་ལྷ་དམར་པོ་ར་སྐྱེས་ལ་ཞོན་པ། ལག་ན་ཕྲེང་བ་དང་སྤྱི་བླུགས་ཐོགས་པ། མེའི་ཕྱོགས་སུའོ། །སྲིན་པོ་རོ་ལ་ཞོན་པ་གྲི་གུག་དང༌། ཐོད་


DTG047_Page_0037
[མ་དཔེ་གཟིགས་ན་འདིར་གནོན།]

པ་ལག་ན་ཐོགས་པ་ཁྲོ་ཞིང་རྔམ་པ་སྔོན་པོ་བདེན་བྲལ་དུའོ། །རླུང་ལྷ་དུ་བའི་མདོག་ཅན་རི་དགས་ལ་ཞོན་པ་ལག་པ་གཉིས་ཀྱིས་གོས་ཐོགས་པ་རླུང་གི་ཕྱོགས་སུའོ། །ཟླ་བ་དཀར་པོ་ཀུ་མུ་དའི་སྟེང་ན་འདུག་པ་ཀུ་མུ་ད་ལག་ན་ཐོགས་པ་སྟེང་དུའོ། །ཉི་མ་དམར་པོ་ལག་ན་པདྨ་ཐོགས་པ། རྟ་མཆོག་བདུན་ལ་ཞོན་པ་སྟེང་དུའོ། །ཚངས་པ་དམར་པོ་གདོང་བཞི་པ་ལག་ན་ཐལ་བའི་སྣོད་དང༌། མི་འཇིགས་པ་སྦྱིན་པ་དང༌། དབྱུག་པ་དང༌། ཕྲེང་བ་ཐོགས་པ་ཅན་ངང་པ་ལ་ཞོན་པ་ཡང་སྟེང་དུའོ། །སའི་ལྷ་མོ་སེར་མོ་པདྨ་ལ་གནས་པ་གཡོན་ན་བུམ་པ་ཐོགས་པ། གཡས་པ་ཁས་ལེན་པའི་ལག་པ་ཅན་འོག་ཏུའོ། །གཞན་དུ་སེར་པོ་ཡོད། ཐགས་བཟངས་རིས་སྔོན་པོ་ཤིང་རྟ་ལ་ཞོན་པ། ལག་པས་རལ་གྲི་དང་སྡིགས་མཛུབ་ཅན་དེ་ཉིད་དུ་དགོད་དོ། །དེ་དག་ཐམས་ཅད་དགུག་པའི་སྔགས་ལ་སོགས་པ་ནི་སྔ་མ་དེ་ཉིད་དོ། །དེ་ནས་ཡང་རང་གི་སྙིང་ག་ནས་ཁྲོ་བོའི་ཕུར་བུ་མགྲིན་པ་ནས་བཟུང་ནས། ཐོགས་པའི་ཁྲོ་བོ་རྣམས་རྣམ་པར་སྤྲོས་ལ། དེ་དག་གི་སྙིང་ག་དང༌། མགྲིན་པ་དང༌། མགོ་དང༌། རྐང་པའི་བར་དུ་གདབ་པོ། །སྔགས་ནི་ཨོཾ་ཧྲཱིཿ་ཥྚྲྀཿ་ཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་སརྦ་དུ་ཥྜཱ་ནྡྲ་ཨཱ་དི་ས་པ་རི་ཝཱ་ར་ན་ཀཱི་ལ་ཡ་ཧཱུཾ་ཕཊ་ཅེས་བྱའོ། །དེའི་རྗེས་ལ་གྲུབ་པའི་བཅུད་ཀྱིས་ལེན་གྲུབ་པ་བཞིན་དུ་ཀུན་ཀྱང༌། གཤིན་རྗེ་གཤེད་ཀྱི་རྣམ་པར་སྒྲུབ་པའམ། བྱང་ཆུབ་ཀྱི་སེམས་ཁུ་བའི་ངོ་བོར་སྒྲུབ་པོ། །གལ་ཏེ་ཁུ་བའི་ངོ་བོ་ཉིད་ཡིན་ན་དེའི་ཚེ་ས་བོན་དང་ཕྱག་མཚན་གྱི་རིམ་པས་བསྐྱེད་པར་བྱའོ། །དེ་ལ་ཨོཾ་དང་རྡོ་རྗེ་ལས་བྱུང་བའི་དབང་པོ་དམར་སེར་རིན་པོ་ཆེའི་ཅོད་པན་ཅན་ཕྱག་དང་པོ་གཉིས་ན་གྲི་གུག་དང་ཐོད་པ། ལྷག་མ་བཞི་ན་རྡོ་རྗེ་དང༌། རལ་གྲི་དང༌། པདྨ་དང་འཁོར་ལོ་བསྣམས་པ། རི་བོང་ཅན་ལ་བཞུགས་པའོ། །ཧྲཱིཿ་དང་དབྱུག་པ་ལས་གཤིན་རྗེ་སྔོན་པོ་གཡས་དང་གཡོན་པའི་ཞལ་དཀར་པོ་དང་དམར་པོ་གཡས་རྣམས་ནི་གྲི་གུག་དང༌། དབྱུག་པ་དང་རལ་གྲི་དང༌། ཕྱག་གཡོན་རྣམས་ན་ཐོད་པ་དང་པདྨ་དང་འཁོར་ལོ། སྐྲ་སེར་པོ་གྱེན་དུ་འགྲེང་བ། ཉི་མ་ལ་བཞུགས་པ་ཁྲོ་བོའི་གཟུགས་ཅན་ནོ། །ཥྚྲིཿ་དང་ཀླུ་ཞགས་ལས་


DTG047_Page_0038
[མ་དཔེ་གཟིགས་ན་འདིར་གནོན།]

ཆུ་ལྷ་དཀར་པོ་ཞལ་གཡས་དང་གཡོན་སྔོན་པོ་དང༌། དམར་པོ་གཡས་ན་གྲི་གུག་དང་ཀླུ་ཞགས་དང༌། རལ་གྲི། ཕྱག་གཡོན་ན་ཐོད་པ་དང༌། པདྨ་དང༌། འཁོར་ལོ་རིན་པོ་ཆེའི་ཅོད་པན་ཟླ་བ་ལ་བཞུགས་པའོ། །ཝི་དང་ས་བི་ཛ་པཱུ་ར་བོན་གྱི་གྲོང་ཁྱེར་བི་ཛ་པཱུ་ར་ལས་ཀུ་བེ་ར་སེར་པོ་གཡས་དང་གཡོན་པའི་ཞལ་སྔོན་པོ་དང༌། དཀར་པོ་གྲི་གུག་དང༌། ས་བོན་གྱི་གྲོང་ཁྱེར་དང༌། རལ་གྲི་ཕྱག་གཡོན་ན་ཐོད་པ་དང༌། པདྨ་དང༌། འཁོར་ལོ་བསྣམས་པ་རིན་པོ་ཆེའི་ཆོད་པན་ཅན་རི་བོང་ཅན་ལ་བཞུགས་པའོ། །ཀྲྀ་དང་རྩེ་གསུམ་པ་ལས་བིཛ་པཱུ་ར་དབང་ལྡན་དཀར་པོ་ཞལ་གཡས་དང་གཡོན་སྔོན་པོ་དང༌། དམར་པོ་གཡས་ན་གྲི་གུག་དང༌། རྩེ་གསུམ་པ་དང༌། རལ་གྲི་དང༌། ཕྱག་གཡོན་ན་ཐོད་པ་དང༌། ནོར་བུ་དང༌། འཁོར་ལོ་གཽ་རཱི་ལ་འཁྱུད་པ། ཐོད་པའི་ཕྲེང་བ་ཅན་རི་བོང་ཅན་ལ་བཞུགས་པའོ། །ཏ་དང་ཐལ་སྣོད་ལས་མེ་ལྷ་དམར་པོ་ཞལ་གཡས་དང། གཡོན་སྔོན་པོ་དང༌། དཀར་པོ། གཡས་ན་གྲི་གུག་དང་ཐལ་སྣོད་དང་རལ་གྲི། ཕྱག་གཡོན་ན་ཐོད་པ་དང་པདྨ་དང་ནོར་བུ། ཉི་མའི་གདན་ལ་བཞུགས་པའོ། །ཨཱཿ་དང་རྩེ་གསུམ་ལས་བདེན་བྲལ་སྔོན་པོ་ཁྲོ་བོའི་གཟུགས་དང༌། ཞལ་གཡས་དང་གཡོན་དཀར་པོ་དང༌། དམར་པོ་དང༌། གཡས་ན་གྲི་གུག་དང་དབྱུག་པ་དང༌། རལ་གྲི། ཕྱག་གཡོན་ཐོད་པ་དང་པདྨ་དང་འཁོར་ལོ། ཉི་མའི་གདན་ལ་བཞུགས་པའོ། །ན་དང་གོས་ལས་རླུང་ལྷ་དུ་བའི་མདོག་ཅན། ཞལ་གཡས་དང་གཡོན་དཀར་པོ་དང་དམར་པོ། ཕྱག་གཡས་ན་གྲི་གུག་དང་བ་དན་དང་རལ་གྲི། ཕྱག་གཡོན་ན་ཐོད་པ་དང་ནོར་བུ་དང་པདྨ་དང་ཟླ་བ་ལ་བཞུགས་པའོ། །ན་དང་ཀུ་མུ་ད་ལས་ཟླ་བ་མདོག་དཀར་པོ་ཞལ་གཡས་དང་གཡོན་སྔོན་པོ་དང་དམར་པོ། གཡས་གྲི་གུག་དང་ཀུ་མུ་ད་དང་རལ་གྲི། ཕྱག་གཡོན་ན་ཐོད་པ་དང་ནོར་བུ་དང་འཁོར་ལོའོ། ཧཱུཾ་དང་པདྨ་ལས་ཉི་མ་དམར་པོ་ཞལ་གཡས་དང་གཡོན་སྔོན་པོ་དང་དཀར་པོ། གཡས་ན་གྲི་གུག་དང་པདྨ་དང་རལ་གྲི། ཕྱག་གཡོན་ན་ཐོད་པ་དང་ནོར་བུ་དང་འཁོར་ལོ། ཧཱུཾ་དང་ཕྲེང་བ་ལས་ཚངས་པ་དམར་པོ་ཞལ་གཡས་དང་གཡོན་དཀར་པོ་དང་དམར་པོ། ཕྱག་གཡས་ན་གྲི་གུག་


DTG047_Page_0039
[མ་དཔེ་གཟིགས་ན་འདིར་གནོན།]

དང་ཕྲེང་བ་དང༌། རལ་གྲི་།ཕྱག་གཡོན་ན་ཐོད་པ་དང༌། ནོར་བུ་དང༌། པདྨ་ཟླ་བ་ལ་བཞུགས་པའོ། །ཕཊ་དང་པདྨ་ལས། སའི་ལྷ་མོ་སེར་བ། ཞལ་གཡས་དང་གཡོན་སྔོན་པོ་དང་དཀར་བ། གཡས་ན་གྲི་གུག་དང་བུམ་པ་དང་རལ་གྲི། ཕྱག་གཡོན་ན་ཐོད་པ་དང་ནོར་བུ་དང༌། པདྨ་ཟླ་བ་ལ་བཞུགས་པའོ། །ཕཊ་དང་རལ་གྲི་ལས་ཐགས་བཟངས་རིས་སྔོན་པོ། ཞལ་གཡས་དང་གཡོན་དཀར་པོ་དང་དམར་པོ། གཡས་ན་གྲི་གུག་དང༌། རལ་གྲི་དང་རྡོ་རྗེ་དང༌། ཕྱག་གཡོན་ན་ཐོད་པ་དང༌། འཁོར་ལོ་དང་པདྨ་ཉི་མ་ལ་བཞུགས་པའོ། །སྭཱ་དང་དུང་ལས་ཁྱབ་འཇུག་སྔོན་པོ། ཞལ་གཡས་དང༌། གཡོན་དཀར་པོ་དང༌། དམར་པོ། གཡས་གྲི་གུག་དང་དུང་དང་རལ་གྲི། ཕྱག་གཡོན་ན་ཐོད་པ་དང༌། འཁོར་ལོ་དང་པདྨ་ཟླ་བ་ལ་བཞུགས་པའོ། །ཧཱ་དང་དགྲ་སྟ་ལས་སྣ་ཅན་དཀར་པོ། ཞལ་གཡས་དང་གཡོན་སྔོན་པོ་དང༌། དམར་པོ། གཡས་ན་གྲི་གུག་དང་དགྲ་སྟ་དང༌། རལ་གྲི། ཕྱག་གཡོན་ན་ཐོད་པ་དང་འཁོར་ལོ་དང་པདྨ། རི་བོང་ཅན་ལ་བཞུགས་པའི། །དེ་དག་ཐམས་ཅད་ཀྱི་ལྷན་ཅིག་སྐྱེས་པའི་ཤེས་རབ་ནི། སྐུ་དང་གཉིས་སུ་མེད་པར་གྱུར་པ། ཕྱག་དང་པོ་གཉིས་ན་ཐོད་པ་ཐོགས་པ་འཁྱུད་པའི་ཚུལ་གྱིས་འཛིན་པ། གཡོན་བརྐྱང་བའི་ཞབས་ཀྱིས་གནས་པ། སྒྲུབ་པ་པོའི་བསམ་པ་རྫོགས་པར་མཛད་པ། དེ་ལྟ་བུར་བསམས་ལ། དེ་དག་གི་མིག་ལ་སོགས་པ་ལ་ཇི་སྐད་བཤད་པའི་རྡོ་རྗེ་མིག་ལ་སོགས་པ་བསྐྱེད་དོ། །ལུས་ལ་སོགས་པ་ལ་སྐུ་རྡོ་རྗེ་ལ་སོགས་པ་དང༌། ཇི་སྐད་བཤད་པས་དབང་བསྐུར་ལ། ཅོད་པན་ལ་གཤིན་རྗེ་མཐར་བྱེད་བསམས་ཏེ། ཡོན་ཆབ་དང་ཞབས་བསིལ་དང༌། བསང་གཏོར་དབུལ་ལོ། །དེ་ནས་གཏོ་ར་མ་ཐམས་ཅད་བསྟབས་པར་བྱ་སྟེ། བདུད་རྩི་སྒྲུབ་པའི་ཐབས་ཀྱིས་བསྒྲུབས་ལ། དེ་ཉིད་གསུམ་གྱིས་བསྔགས་ཏེ། དེའི་ལྕེའི་སྦྱོར་བ་རྣམ་པར་བསམས་ལ། བདུད་རྩི་དབུལ་ལོ། །སྔགས་ནི་འདི་ཡིན་ཏེ། ཨོཾ་ཨིནྡྲཱ་ཡ་ཧྲཱིཿ། ཡ་མ་ཡཥྚྲྀ། བ་རུ་ཎཱ་ཡ་ཝི། ཀུ་བེ་རཱ་ཡ་ཀྲ་།ཨཱི་ཤཱ་ནཱ་ཡ་ཏ། ཨགྣ་ཡེ་ཨཱ། ནཻ་དྲྀ་ཏ་ཡེ་མ་བཱ་ཡ་བེ་ན། ཙནྡྲཱ་ཡ་ཧཱུཾ། ཨརྐ་ཡ་ཧཱུཾ། བྲཧྨ་ཎེ་ཕཊ། བ་སཱུ་དྷ་རཱ་ཡཻ་ཕཊ། བེ་མ་ཙི་ཏྲ་ཎེ་སྭཱ། སརྦ་བྷཱུ་ཏེ་བྷྱོ་ཧཱ། ཧི་ཧི་ཧཱུཾ་ཧཱུཾ་ཕེཾ་ཕེཾ་


DTG047_Page_0040
[མ་དཔེ་གཟིགས་ན་འདིར་གནོན།]

ཕཊ་ཕཊ་སྭཱ་ཧཱ། དེ་ནས་མེ་ཏོག་དང༌། སྤོས་དང༌། མར་མེ་དང༌། དྲི་དང་བཤོས་གཙང་ལ་སོགས་པ་ཕུལ་ལ། དེ་དག་གིས་ཀྱང་སྒྲུབ་པ་པོ་མངོན་པར་དགའ་བའི་མྱང་བ་ལ་སོགས་པ་ཉེ་བར་ལོངས་སྤྱོད་པར་གྱུར་ཏོ། །དེ་ནས་དེ་དག་ལ་བསྟོད་པ་སྟེ། རྡོ་རྗེ་གསོར་ཞིང་དྲིལ་བུ་དཀྲོལ་ནས། གཏི་མུག་རྡོ་རྗེའི་ངོ་བོ་ཁྱོད། །ཅེས་བྱ་བ་ལ་སོགས་པས་བསྟོད་ནས། མངོན་པར་འདོད་པ་བླངས་ལ་གཤེགས་སུ་གསོལ་ཏེ། ཨོཾ་ཨཱཿ་ཧཱུཾ་ནུཿ་ཞེས་བྱ་བས་སོ། །སྒྲུབ་པ་པོ་དེ་ཇི་ལྟར་འདོད་པ་དེ་དང༌། དེ་སྒྲུབ་ཅིང་མདུན་དུ་རྒྱལ་བར་གྱུར་ཅིག་ཅེས་བྱ་བའི་འགྲོ་བའི་དོན་མཛད་དོ། །འདི་ནི་གཏོར་མའི་དེ་ཁོ་ན་ཉིད་དོ། །དེའི་རྗེས་ལ་སློབ་མ་གཤིན་རྗེ་འདུལ་བའི་གཟུགས་སུ་དམིགས་ལ་རྗེས་སུ་གནང་བ་སྦྱིན་ཏེ། སེམས་ཅན་ཀུན་ལ་ཕན་པའི་ཕྱིར། །འཇིགས་རྟེན་ཀུན་ལ་ཐམས་ཅད་དུ། །ཇི་ལྟར་གདུལ་བྱ་སྣ་ཚོགས་ལ། །ཆོས་ཀྱི་འཁོར་ལོ་བསྐོར་བར་གྱིས། །ཆོས་ཀྱི་གནས་སུ་རྡོ་རྗེ་དང༌། །རིན་པོ་ཆེ་དང་པདྨ་དང༌། །ལས་ཀྱི་སྒྲ་བཅུག་པའི་རིམ་པའི་ཚིགས་སུ་བཅད་པ་ལྔ་ནི་རྗེས་སུ་གནང་བ་སྦྱིན་པའོ། །འདི་དེ་སངས་རྒྱས་ཐམས་ཅད་དེ། །རྡོ་རྗེ་སེམས་དཔའི་ལག་ན་གནས། །ཕྱག་ན་རྡོ་རྗེའི་བརྟུལ་ཞུགས་བརྟན། །ཁྱོད་ཀྱིས་ཀྱང་ནི་རྟག་ཏུ་ཟུང༌། །ཞེས་བྱ་བ་ནི་རྡོ་རྗེ་སྦྱིན་པའོ། །ཨོཾ་སརྦ་ཏ་ཐག་ཏ་སི་དྦྷ་བཛྲས་མ་ཡ་ཏིཥྛ་ཨེ་ཥ་ཏྭཾ་དྷ་ར་ཡཱ་མི་བཛྲ་སཏྭ་ཧི་ཧི་ཧི་ཧི་ཧཱུཾ་ཞེས་སློབ་མ་ལ་བརྟུལ་ཞུགས་སྦྱིན་པའོ། །དེ་ནས་བདག་ཉིད་སངས་རྒྱས་ཀྱི་གཟུགས་སུ་བསམས་ལ། ལག་པ་གཡོན་པའི་ཁུ་ཚུར་གྱིས་ཆོས་གོས་སྙིང་གར་བཟུང་བའི་ཚུལ་དང༌། གཡས་པ་མཆོག་སྦྱིན་པ་བྱས་ལ། ཨོཾ་ཨེ་ཥོ་ཧཾ་བྱཱ་ཀ་རོ་མི་ཏྭཾ། བཛྲ་སཏྭ་ཏ་ཐཱ་ག་ཏཿ། བྷ་བ་དུ་རྒ་ཏི་ཏི་ཏོ་ཨུདྤྲ་ཏྱ། ཨ་ཏྱ་ནྟ་བྷ་བ་ཤུདྡྷ་ཡེ། ཀྱེ་ཆེ་གེ་མོ་ཞེས་བྱ་བ་ཏ་ཐཱ་ག་ཏ་སིདྡྷཿ་ས་མ་ཡ་སྟྭཱཾ་བྷུ་རྦྷུ་ཝ་སྭཿ་ཞེས་ཚིག་འདི་དང་ཕྱག་རྒྱ་འདིས་ལུང་བསྟན་པ་བྱས་པ་དེ། དེ་བཞིན་གཤེགས་པ་ཐམས་ཅད་ཀྱི་དཀྱིལ་འཁོར་དུ་མགྲིན་གཅིག་གིས་བླ་ན་འདིར་ནི་ངས་ཁྱོད་ལུང་བསྟན་ཏེ། །རྡོ་རྗེ་སེམས་དཔའ་དེ་བཞིན་གཤེགས། །སྲིད་དང་ངན་འགྲོ་རྣམས་ལས་བཏོན། །སྲིད་མཐའ་ཤིན་ཏུ་དག་པས། །མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་ཏེ། མངོན་པར་མཐོ་བའི་ཕྱག་རྒྱ་འཛིའི་མཐུ་དང་སྔགས་འདི་ཡི་སྟོབས་ལ་དད་པར་གྱིས་ཤིག་ཅེས་བྱ་པ་སློབ་མ་ལ་བརྗོད་དེ། འདི་ནི་


DTG047_Page_0041
[མ་དཔེ་གཟིགས་ན་འདིར་གནོན།]

ལུང་བསྟན་པའོ། །དེ་ནས་གསང་བ་བརྗོད་པར་བྱ་བ་སྟེ། འདོད་ཆགས་བྲལ་བ་ལྟ་བུའི་སྡིག །གཞན་ནི་ཁམས་གསུམ་ན་མེད་དེ། །དེས་ན་རྟག་ཏུ་ཁྱོད་ཀྱིས་ནི། །འདོད་ཆགས་བྲལ་བར་མི་བྱའོ། །དམ་ཚིག་སྦྱིན་པ་ནི་ཧཱུཾ་ཕཊ་གསང་བ་བརྗོད་པའོ། །དེ་ནས་གསང་བའི་དཀྱིལ་འཁོར་མཆོག །མཐོང་བ་དང་ནི་རེག་པ་ཡིས། །སྡིག་པ་ཀུན་ལས་རྣམ་པར་གྲོལ། །དེ་རིང་ཁྱོད་ནི་གནས་པར་གྱུར། །ཁྱོད་ནི་ཡང་ཡང་མི་འཆི་བས། །དེ་ཕྱིར་བདེ་ཆེན་ཐེག་པ་མཐོང༌། །སྲིད་པའི་སྡུག་བསྔལ་ལས་འདས་པའི། །སྲིད་པ་ཁྱོད་ཀྱིས་ཤིན་ཏུ་འགྲུབ། །རྡོ་རྗེ་ཕྱག་རྒྱ་ཞེས་བྱ་གང༌། །གང་ཞིག་བསྐྱེད་པ་ཙམ་གྱིས་ནི། །སངས་རྒྱས་ཉིད་འཐོབ་ཐེ་ཚོམ་མེད། །བྱང་ཆུབ་སེམས་ནི་གཏང་མི་བྱ། །གང་ཕྱིར་རྡོ་རྗེའི་ཕྱག་རྒྱའི་ཕྱིར། །དམ་པའི་ཆོས་ནི་སྨད་མི་བགྱི། །རྣམ་ཡང་སྤང་བར་མི་བྱའོ། །མ་རིག་པའམ་གཏི་མུག་གིས། །རྟག་ཏུ་སྐུར་པ་མི་གདབ་བོ། །རྡོ་རྗེ་དྲིལ་བུའི་ཕྱག་རྒྱ་ནི། །ནམ་ཡང་གཏང་བར་མི་བྱའོ། །སློབ་དཔོན་བརྙས་པར་མི་བྱ་སྟེ། །དེ་ནི་སངས་རྒྱས་ཀུན་དང་མཉམ། །རང་གི་བདག་ཉིད་མི་སྤང་སྟེ། །དཀའ་ཐུབ་ཀྱིས་ཀྱང་གདུང་མི་བྱ། །ཇི་ལྟར་བདེ་བས་བདེ་བ་བཟུང༌། །འདི་ནི་མ་འོངས་སངས་རྒྱས་ཉིད། །དེ་རིང་དཀྱིལ་འཁོར་སློབ་དཔོན་གྱིས། །ཁྱོད་ཀྱི་སྔགས་དང་རྒྱུད་ཀྱང་ཟུང༌། །སངས་རྒྱས་བྱང་ཆུབ་སེམས་དཔའ་དང༌། །ལྷ་རྣམས་ཀྱིས་ཀྱང་འདོད་པ་ཡིན། །སེམས་ཅན་རྣམས་ལ་སྙིང་བརྩེའི་ཕྱིར། །ཆོ་ག་བཞིན་དུ་ཁྱོད་ཀྱིས་ནི། །འབད་པས་དཀྱིལ་འཁོར་བྲི་བར་བྱ། །སྒྲུབ་པ་པོས་ནི་རྒྱུད་ལ་སྦྱོར། །ཞེས་བྱ་བ་ནི་དབུགས་དབྱུང་བའོ། །འདི་དང་རྗེས་སུ་གནས་པ་བཞི་པོ་ནི། དབང་བསྐུར་བའི་རྗེས་ཐོགས་སམ་དབང་བཞི་པའི་རྗེས་ཐོགས་སུ་ཡང་སྦྱིན་པར་བྱའོ། །སློབ་དཔོན་གྱི་དབང་ཉིད་ལ་ཕྱིར་མི་ལྡོག་པའི་དབང་ཞེས་ཀྱང་བྱ་སྟེ། འདི་ནི་སློབ་དཔོན་གྱི་དབང་བསྐུར་བའོ། །ད་ནི་གོས་ཀྱི་ཡོལ་བ་ལ་སོགས་པས་དབེན་པར་བྱས་པའི་ཕྱོགས་གཅིག་ཏུ་སློབ་མར་ཟིན་པ་མཛེས་པ་གཟུགས་ལ་སོགས་པའི་ཡོན་ཏན་དང་ལྡན་པ་དམ་ཚིག་གི་སྡོམ་པ་ཅན་སྦྱོར་བ་བཞི་ལ་མཁས་པ་རྒྱན་ཐམས་ཅད་ཀྱིས་བརྒྱན་པ། བླ་མ་ལ་གསང་བའི་དབང་གི་དོན་དུ་དབུལ་ལོ། །


DTG047_Page_0042
[མ་དཔེ་གཟིགས་ན་འདིར་གནོན།]

དེ་ནས། །བྱང་ཆུབ་རྡོ་རྗེ་སངས་རྒྱས་རྣམས། །ཇི་ལྟར་མཆོད་ཆེན་སྩོལ་མཛད་པ། །བདག་ལའང་སྲུང་བའི་དོན་གྱི་ཕྱིར། །ནམ་མཁའི་རྡོ་རྗེ་དེང་བདག་སྩོལ། །ཞེས་བྱ་བའམ། གཞན་གྱིས་ཀྱང་གསོལ་བ་གདབ་པོ། །དེ་ནས་བླ་མས་སྦྱོར་བ་བཞི་མངོན་དུ་བྱས་ལ་ཆོས་ཉིད་ཀྱི་པདྨའི་ནང་དུ་རྡོ་རྗེ་ཞུགས་པའི་མཐའ་བསྐྱོད་པས། རང་རིག་པའི་མཐར་ཕྱིན་པ་སྲིན་ལག་དང་མཐེ་བོས་བླངས་ཏེ་སློབ་མའི་ཁ་རུ་བཅུག་ནས། བཏུང་བ་རིན་ཆེན་འདི་དེ་ནི། །རྡོ་རྗེ་ལུས་སུ་རབ་སྒྲུབ་བྱེད། །བུ་ཁྱོད་རྟག་ཏུ་ཤེས་ཀྱིས་ལ། །ཡིད་ལས་བྱུང་བའི་ཆུ་འདི་འཐུང༌། །ཞེས་བྱ་བས་སྦྱིན་ནོ། །དེས་ཀྱང། ཨེ་མ་བདེ་བ་ཆེན་པོ་ཞེས་བརྗོད་ཅིང་མིད་པར་བྱའོ། །དེས་ཀྱང་རང་གི་པདྨའི་ལྷག་མ་ཡང་དེར་གཞུག་པར་བྱ་སྟེ། འདི་ནི་གསང་བའི་དབང་ངོ༌། །དེའི་རྡོ་རྗེ་ལ་དེ་ཉིད་དམ་གཞན་ཡང་རུང༌། །རང་རིག་པའི་ཡེ་ཤེས་མངོན་དུ་བྱ་བའི་ཕྱིར། །སྔར་བསྟན་པའི་ཚིགས་སུ་བཅད་པས་གསོལ་བ་བཏབ་པའི་སློབ་མའི་ལག་པར་དེའི་ལག་པ་གཏད་ལ། མཛེས་པ་འདི་ནི་གཟུང་བ་དང༌། །བསྟོད་བྱ་སངས་རྒྱས་རྣམས་ཀྱིས་བརྟགས། །འཁོར་ལོ་རྗེས་ཆགས་སྦྱོར་བ་ཡིས། །དེ་ཕྱིར་བདེ་བ་དམ་པ་མྱང༌། །ཐབས་གཞན་གྱིས་ནི་སངས་རྒྱས་མིན། །འགྲོ་གསུམ་འདི་དག་དག་པ་སྟེ། །དེ་ཕྱིར་འཁོར་བ་སྤོང་བ་ནི། །ཁྱོད་ནི་ནམ་ཡང་མ་བྱེད་ཅིག །འདི་དེ་སངས་རྒྱས་ཐམས་ཅད་ཀྱི། །རིག་པའི་བརྟུལ་ཞུགས་བླ་ན་མེད། །གླེན་པ་གང་ཞིག་འདས་གྱུར་ན། །དངོས་གྲུབ་མཆོག་ནི་དེ་ལ་མེད། །ཅེས་བརྗོད་ལ་སྦྱིན་ནོ། །དེ་ཡང་གུར་ཀུམ་ལ་སོགས་པས་བྱུགས་ལ་དྲི་ཞིམ་པོའི་མེ་ཏོག་གི་ཕྲེང་བས་བརྒྱན་ཏེ། གོས་དང་བྲལ་བས་ཆུ་སྐྱེས་རབ་ཏུ་རྒྱས་པར་གསལ་བར་སྟོན་ཅིང༌། སློབ་མ་ལ་འདི་སྐད་བརྗོད་དོ། །བུ་ཁྱོད་དགའ་བ་གང་ལ་ཡིན། །དྲི་ཆེན་དྲི་ཆུ་ལ་སོགས་ཟས། །དེ་བཞིན་ཁྲག་དང་ཤུ་ཀྲ་དང༌། །ཤ་དང་བུད་མེད་གུས་དང་གཞན། །དེ་བཞིན་བྷ་གའི་པདྨ་ལ།། འོ་བྱེད་སྨྲོས་ཤིག་བདེ་བ་ཅན། །ཞེས་བརྗོད་པར་བྱའོ། །དེས་ཀྱང༌། ལྷ་མོ་ཅི་ཕྱིར་བདག་མི་སྤྲོ། །དྲི་ཆེན་དྲི་ཆུ་ཁུ་སོགས་འཚལ། །བུད་མེད་ལ་ཡང་རྟག་དད་བགྱིས། །བྷ་ག་ལ་ཡང་འོ་བགྱིད་དོ། །ཞེས་བརྗོད་དོ། །དེ་ནས་དེས། ཨེ་མའོ་བདག་གི་པདྨ་འདི། །བདེ་བ་ཀུན་དང་ཡང་དག་


DTG047_Page_0043
[མ་དཔེ་གཟིགས་ན་འདིར་གནོན།]

ལྡན། །གང་དག་ཆོ་གས་སྟེན་བྱེད་པ། །བདག་ནི་དེ་ཡི་མདུན་ན་གནས། །སངས་རྒྱས་མཉེས་པ་ལ་སོགས་པ། །ཇི་ལྟ་བ་བཞིན་པདྨར་བྱས། །བདེ་ཆེན་རྒྱལ་པོ་རང་ཉིད་ཀྱང༌། །འདི་ཉིད་ལ་ནི་རྟག་ཏུ་བཞུགས། །ཀྱེ་ཐར་པ་བསྟན་ཅིག་ཅེས་བརྗོད་ནས། དེས་ཀྱང་བླ་མའི་མན་ངག་གིས། །རྡོ་རྗེ་དབྱིངས་ཀྱི་དབང་ཕྱུག་མར། །དམིགས་པ་བསྟན་པའི་ཆོ་གའི་བྱེ་བྲག་གིས། །རྣལ་འབྱོར་པས་ནི་ཇི་སྲིད་དུ། བྱང་ཆུབ་སེམས་ནི་འབྱུང་འགྱུར་པ། །དེ་སྲིད་རྒྱུན་མི་འཆད་ཐོབ་པ། །དགའ་བའི་བདེ་ལས་གཞན་ཅི་ཡོད། །དངོས་གྲུབ་ཀུན་གྱི་གཏེར་གྱུར་ཏེ། །བྱང་ཆུབ་སེམས་ནི་འབབ་གྱུར་པས། །ཕུང་པོའི་རྣམ་ཤེས་བརྒྱལ་གྱུར་པ། །སྨད་པས་དངོས་གྲུབ་ག་ལ་ཡོད། །རྡོ་རྗེ་ནམ་མཁའི་ཁམས་སྦྱོར་པས། །དེར་རེག་པ་ལས་ངོ་མཚར་ཆེའི། །བདེ་བ་གང་གང་དེ་ལས་བསྐྱེད། །མཆོག་ཏུ་དགའ་བ་བྱེད་པའོ། །དགའ་བྲལ་གྱི་ནི་དབུས་དག་ཏུ། །ལྟོས་ལ་བསྟན་པ་མཚོན་པར་གྱིས། །པདྨའི་རྡོ་རྗེ་ལ་རྡོ་རྗེའི་བར་ཏ་ཀས་མནན་པའི་གནས་སུ་རྡོ་རྗེ་སྐྱིལ་ཀྲུང་གིས། སེམས་ནོར་བུའི་ནང་དུ་སོང་བས་བལྟས་ལ། གང་གི་ཚེ་ཡེ་ཤེས་སྐྱེས་པ་དེའི་ཚེ། དེའི་གཟུགས་སུ་འགྱུར་ཏེ། འདོད་ཆགས་མ་ཡིན་ཆགས་བྲལ་མིན། །དབུས་ཀྱང་དམིགས་པར་མི་འགྱུར་རོ། །རྣལ་འབྱོར་གང་ཚེ་ཤེས་མིག་གིས། །ཟད་མེད་བདེ་ལ་གནས་པ་ནི། །ཐུན་ནམ་ཡང་ན་ཉིན་མཚན་ནམ། །ཟླ་ཕྱེད་ཟླ་གཅིག་ལོ་དང་ནི། །བསྐལ་པའམ་བསྐལ་པ་སྟང་དག་ཏུ། །ཡེ་ཤེས་མངོན་པར་སྦྱོར་བས་གནས། །དེ་ལྟར་བརྟགས་ནས་ནུས་པ་ཇི་ལྟ་བ་བཞིན་སེམས་པ་བཏང་སྟེ། བཅུད་ཀྱིས་ལེན་གྱིས་རྟོགས་པ་བཟུང་ལ། ཆུ་སྐྱེས་ཀྱི་མཐའ་དེ་ཉིད་དུ་མཐོང་བའི་བྱང་ཆུབ་ཀྱི་སེམས་བླངས་ནས། རོ་མཉམ་པར་གྱུར་པ་ནི་ཤེས་རབ་ཡེ་ཤེས་ཀྱི་དབང་བསྐུར་བའོ། །གལ་ཏེ་འདིར་དབང་ལྔ་དང༌། ཤེས་རབ་ཡེ་ཤེས་ཀྱི་དབང་མ་གསུངས་པར། དང་པོ་རྩ་བའི་དབང་ཡིན་ཏེ། །གཉིས་པར་རལ་གྲི་སྦྱིན་པར་བྱ། །གསུམ་པ་རྡོ་རྗེ་དྲིལ་བུ་སྟེ། །བཞི་པ་ཟླ་བ་བཟའ་བའོ། །བཞི་པོ་དེ་ནི་དབང་ཆེན་ཏེ། །ནག་པོའི་ཞལ་ནས་བྱུང་བ་ཡིན། །ཞེས་རྒྱུད་ལས་གསུངས་པ་མ་ཡིན་ནམ་ཞེ་ན། དབང་ལྔ་པོ་དེ་ཉིད་རྩ་བའི་


DTG047_Page_0044
[མ་དཔེ་གཟིགས་ན་འདིར་གནོན།]

དབང་ཞེས་བྱ་སྟེ། ཐམས་ཅད་དུ་རྡོ་རྗེ་ཙ་རྩི་ཀཱ་ལ་སོགས་པ་རྩ་བའི་དབང་གི་བྱེད་པར་ལྡན་པའི་ཕྱིར་དང༌། འདིས་ཐམས་ཅད་དུ་ལས་རང་དབང་དུ་གཙོ་བོར་གྱུར་པའི་ཕྱིར་རོ། །རྡོ་རྗེའི་དམ་ཚིག་སྦྱིན་པ་ནི་རལ་གྲིའི་དབང་སྟེ། མི་མཐུན་པའི་ཕྱོགས་ཐམས་ཅད་གཅོད་པའི་ཕྱིར་རོ། །ཕྱིར་མི་ལྡོག་པའི་དབང་བསྟན་པ་ཉིད་ཀྱིས་རྡོ་རྗེ་དང༌། དྲིལ་བུ་སྤྱི་བོར་བཞག་པས་རྒྱུད་ལས་ཐུན་མོང་དུ་གསུངས་པའི་བརྟུལ་ཞུགས་དང་ལུང་བསྟན་པ་དང་དབུགས་དབྱུང་བ་བསྟན་པའོ། །ཤེས་རབ་ཡེ་ཤེས་ཀྱི་དབང་གིས་རྡོ་རྗེ་ཕག་མོའི་གཟུགས་སུ་བསྒོམས་ནས། བཙུན་མོ་ཐམས་ཅད་བླང་བར་བྱའོ། །དེ་ནས་བཙུན་མོས་རྡོ་རྗེ་བལྟ། །དེར་ནི་འོ་མ་བསྒྲུབ་པར་བྱ། །རྩེ་གཅིག་སེམས་ཀྱིས་འོ་མ་བསྒོམས། །ཕྱག་རྒྱ་ཆེན་པོར་རབ་བསྒྲུབ་པས། །ཞེས་བྱ་བས་བསྒྲུབས་པ་ཉིད་ནི་བླ་ན་མེད་པའི་འགྲོ་བའི་དོན་མ་ལུས་པའི། སྒྲུབ་པ་བརྟགས་པའི་ངོ་བོ་དང་བྲལ་བས་ཡང་རང་གི་རིག་པ་དང༌། ཐ་མི་དད་པ་ཐུབ་པའི་འཁོར་ལོའི་བདག་ཉིད། ཡིད་བཞིན་ནོར་བུ་ལྟ་བུའི་འོད་འཕྲོ་བ་བསྟན་པའི་རང་བཞིན་སློབ་མ་ལ་སྦྱིན་ནོ་ཞེས་བྱ་བ་འདི་ཡང་སྦྱིན་པའོ། །སློབ་མ་མད་ལ་ཕན་ཡོན་གྱིས་སྤྲོ་བར་བྱ་སྟེ། མཐོ་དང་རེག་པས་མཆོག་ཉིད་ཀྱི། །སྙིང་པོ་མཆོག་གི་དཀྱིལ་འཁོར་ནི། །སྡིག་པ་ཀུན་ལས་རྣམ་གྲོལ་བར། །དེ་རིང་ཁྱོད་ནི་ལེགས་པར་གནས། །ཁྱོད་ལ་ཡང་ཡང་འཆི་བ་མེད། །བདེ་བ་ཆེན་པོའི་ཐེག་པ་འདི། །ཀུན་དུ་བཟང་པོ་ཡིན་པས་ན། །གར་ཡང་མི་འཇིགས་ཁྱོད་རོལ་ཅིག །ཁྱོད་ནི་སྲིད་པའི་སྡུག་བསྔལ་རྒལ།། སྲིད་པ་ཤིན་ཏུ་དག་པའི་ཕྱིར། །རྫོགས་སངས་རྒྱས་པའི་མཆོག་གི་མཆོག །འདི་ནི་རྟག་ཏུ་བསྲུང་བར་གྱིས། །དངོས་གྲུབ་དམ་ཚིག་སྡོམ་པས་ཡིན། །སངས་རྒྱས་ཀུན་དང་མཉམ་པར་གསུངས། །བཀའ་འདི་རྟག་པ་མཆོག་ཡིན་ནོ། །སློབ་དཔོན་ལ་ནི་བརྙས་མི་བྱ། །བདེ་གཤེགས་བཀའ་ལས་འདའ་མི་བྱ། །དེ་བཞིན་ཁྲོས་ནས་དཔུན་ཟླ་ཡི། །སྐྱོན་རྣམས་བསྒྲག་པར་མི་བྱའོ། །སེམས་ཅན་རྣམས་ལ་བྱམས་པའི་སེམས། །ནམ་ཡང་གཏང་བར་མི་བྱའོ། །བྱང་ཆུབ་སེམས་ཀྱང་སྤང་མི་བྱ། །རང་གཞན་ཆོས་ལ་སྨད་མི་བྱ། །སེམས་ཅན་ཡོངས་སུ་མ་སྨིན་ལ། །


DTG047_Page_0045
[མ་དཔེ་གཟིགས་ན་འདིར་གནོན།]

གསང་བ་ཉིད་ནི་བསྒྲག་མི་བྱ། །བདག་ཉིད་སྨད་པར་མི་བྱའོ། །རང་གི་ཆོས་ལ་སྨད་མི་བྱ། །གདུག་པ་བྱམས་པས་རྟག་ཏུ་སྤང༌། །ཆོས་ལ་ཚད་བཟུང་བར་མི་བགྱི། །སེམས་ཅན་དད་པ་ཅན་མི་སླུ། །རྟག་ཏུ་དམ་ཚིག་བསྲུང་བར་བྱ། །ཤེས་རབ་རང་བཞིན་བུད་མེད་རྣམས། །སྐྱོན་འདི་ཞེས་ཀྱང་སྨད་མི་བགྱི། །རྣལ་འབྱོར་སློང་མོས་མི་འཁོར་ཞིང༌། །རྣལ་འབྱོར་ཉིད་ནི་སྤང་མི་བྱ། །རྟག་པར་རྒྱུན་དུ་གསང་སྔགས་བཟླ། །དམ་ཚིག་ལ་སོགས་རྟག་ཏུ་བསྟེན། །དེ་བཞིན་བླ་མའི་དམ་ཚིག་ལ། །གནོད་ན་དཀྱིལ་འཁོར་བྲི་བྱས་ལ། །བདེ་གཤེགས་རྣམས་ལ་སྡིག་པ་བཤགས། །དེ་རིང་སྐྱེ་བ་འབྲས་བུར་བཅས། །དེ་ཕྱིར་འདི་ནི་ལེགས་པར་མནོས། །མི་མཉམ་པ་ཡི་ལྷ་རྣམས་དང༌། །མཉམ་ནས་འགྱུར་པར་ཐེ་ཚོམ་མེད། །སངས་རྒྱས་རྡོ་རྗེར་བཅས་ཀུན་གྱིས། །ཚེ་དང་ལྡན་ཁྱོད་དེང་དབང་བསྐུར། །ཁམས་གསུམ་རྒྱལ་པོ་ཆེན་པོ་སྟེ།། །དེ་རིང་བདག་པོར་རབ་ཏུ་བརྟན། །དེ་རིང་བདུད་ལས་རྣམ་པར་རྒྱལ། །གྲོང་ཁྱེར་མཆོག་ཏུ་རབ་ཏུ་ཞུགས། །དེ་རིང་སངས་རྒྱས་ཉིད་ཐོབ་པར། །གྱུར་པ་འདི་ལ་ཐེ་ཚོམ་མེད། །ཅེས་བྱ་བས་རང་གི་རྡོ་རྗེ་དམ་ཚིག་མི་ཟད་པའི་བདེ་བ་བྱིན་ལ། བསྟེན་ཅིག་འགྲོ་བ་མྱུར་བ་ཡི། །རྡོ་རྗེ་སེམས་དཔའ་བདེ་བས་དིང༌། །རབ་ཏུ་མཚུངས་པར་རྟག་ཏུ་གྱུར། །བླ་མའི་ཞབས་ལ་ཕྱག་འཚལ་ཏེ། སློབ་མ་གུས་པ་གསལ་བ་ཡི། །གསུངས་ཤིག་དེ་བཞིན་བདག་གིས་བགྱི། །གཙོ་བོས་ཇི་ལྟར་བཀའ་སྩལ་བཞིན། །གལ་ཏེ་ཡོད་པར་གྱུར་ན་དེའི་ལག་པ་གཡོན་པའི་སོར་མོ་ཐམས་ཅད་ཀྱིས་བླངས་ལ་སྦྱིན་སྲེག་གིས་ཞི་བར་བྱའོ། །སྲེག་རྫས་གཅིག་གམ་གཉིས་སམ། བདུན་གྱི་བར་གྱིས་སོ། །དེས་ཀྱང་མགུ་བའི་ཡིད་ཀྱིས་ཇི་ལྟར་འབྱོར་པའི་ས་གཞི་དང༌། གླང་པོ་དང༌། རྟ་དང༌། གསེར་དང༌། རྒྱན་དང༌། བུ་དང༌། ཆུང་མ་ལ་སོགས་པའི་འདོད་པའི་དངོས་པོ་འམ། བདག་ཉིད་ཀྱང་དངོས་གྲུབ་ལ་སོགས་པ་བསྒྲུབ་པའི་ཕྱིར་དབུལ་ལོ། །ཡོན་བཟའ་བ་དང༌། རང་དང་གཞན་གྱི་འཁོར་ལོ་མཆོད་པར་བྱའོ། །སྦྱོར་བ་དང་ལྡན་པའི་སློབ་མ་བཟུང་ལ། མཆོག་སྣ་ཚོགས་ཀྱིས་དེ་དག་ཚིམ་པར་བྱས་ཏེ། གཤེགས་སུ་གསོལ་ལོ། །དེ་ནས་མཆོད་པ་དང༌། བསྟོད་


DTG047_Page_0046
[མ་དཔེ་གཟིགས་ན་འདིར་གནོན།]

པ་དང༌། བདུད་རྩི་མྱང་བ་བྱས་ལ་གསོལ་བ་བཏབ་སྟེ། བརྟན་པོས་ལྷའི་ང་རྒྱལ་བྱའོ། །ཆོས་ཐམས་ཅད་ནི་མ་སྐྱེས་པ་སྟེ། ཆོས་ཐམས་ཅད་ནི་དངོས་པོ་མེད་པའོ་ཞེས་བརྗོད་དོ། །རྡོ་རྗེ་རྩེ་མོས་འཁོར་ལོ་གཤེགས་སུ་གསོལ་ལོ། །དེ་ནས་འདོད་པ་ལ་རྡུལ་ཚོན་ཅུང་ཟད་བྱིན་ལ། ཆུ་ཆེན་པོར་གཤེགས་སུ་གསོལ་ལོ། །སྙིང་པོ་གྲོང་དུ་གང་བཅུག་དང༌། །སྦྱིན་སྲེག་འཁོར་ལོའི་ནོར་གང་ཡིན། །དེ་དག་ཐམས་ཅད་སློབ་དཔོན་ནི། །རྡོ་རྗེ་འཆང་མཆོག་བསྐུར་བར་བྱ། །བཟང་པོ་ཞབས་སོགས་ཀྱིས་མཛད་པ། །གསང་བ་འདུས་པའི་ཆོ་གར་གསལ། །འདིར་ནི་གསང་བའི་རླབས་འཁོར་ལོ། །ཆོ་ག་ལ་འབད་ཉིད་ཀྱིས་ངལ། །དེ་ཕྱིར་དབང་པོ་མཆོག་རྣམས་ནི། །སྐྱེ་བོ་བཟང་ལ་བཟོད་པར་གསོལ། །གང་ཕྱིར་རང་ཉིད་དྲན་པའི་ཕྱིར། །དཔལ་ལྡན་གཤིན་གཤེད་དཀྱིལ་འཁོར་གྱི། །ཆོ་ག་སེམས་ཅན་དོན་བསྒྲུབས་བྱས། །དེ་ལས་དགེ་བ་གང་ཐོབ་པ། །རང་གི་ཤེས་ལས་གཞན་མིན་པའི། །ལས་འཇོམས་ཤེས་རབ་དང་ལྡན་པ། །སྤྱོད་ཡུལ་མི་ཤེས་མུན་ཀུན་སེལ། །སྲིད་པ་མི་འཇིགས་སད་བྱེད་པའི། །ལེགས་པའི་ཚོགས་གང་ཐོབ་པ་དེས། །བདག་དང་འགྲོ་བ་བློ་སྟེར་ཤོག །གཤིན་རྗེ་གཤེད་ནག་པོའི་དཀྱིལ་འཁོར་སྒྲུབ་པའི་ཐབས། སློབ་དཔོན་མཁས་པ་དཔལ་འཛིན་གྱིས་མཛད་པ་རྫོགས་སོ།། །།རྒྱ་གར་གྱི་མཁན་པོ་དཱ་ན་ཀཱི་རྟི་དང༌། ལོ་ཙཱ་བ་དགེ་སློང་ཚུལ་ཁྲིམས་རྒྱལ་བས་བསྒྱུར་ཅིང་ཞུས་ཏེ་གཏན་ལ་ཕབ་པ།།

རྡོ་རྗེ་དབྱངས་ཅན་མའི་བསྟོད་པ།
དཔལ་འཛིན།


DTG047_Page_0046
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། བཛྲ་ས་ར་སྭ་ཏཱི་སྟོ་ཏྲ། བོད་སྐད་དུ། རྡོ་རྗེ་དབྱངས་ཅན་མའི་བསྟོད་པ། རྡོ་རྗེ་དབྱངས་ཅན་མ་ལ་ཕྱག་འཚལ་ལོ། །ཤེས་རབ་མངའ་བདག་རྡོ་རྗེ་དབྱངས་ཅན་མ། །ཡང་དག་འམ་སྟོན་བླ་མ་རྗེ་བཙུན་ལ། །དད་ཅིང་མོས་ལ་གུས་པར་ཕྱག་འཚལ་ལོ། །བློ་གྲོས་སྤེལ་ཕྱིར་བསྟོད་པ་ཅུང་ཟད་བྲི། །དཔལ་ལྡན་རྡོ་རྗེ་དབྱངས་ཅན་མ། །རང་དོན་གྲུབ་ནས་གཞན་དོན་ནི། །མཆོག་ཏུ་གཞོལ་མཛད་རྗེ་བཙུན་མ། །དབྱངས་ཅན་དེ་ལ་སྤྱི་བོ་ཡིས། །ཀུན་ནས་དང་པས་ཕྱག་འཚལ་བསྟོད། །ཞལ་གསུམ་རྣམ་ཐར་གསུམ་གྱི་དངོས། །ཕྱག་དྲུག་ཕ་རོལ་ཕྱིན་དྲུག་རྫོགས། །ཞབས་གཉིས་བདེན་གཉིས་


DTG047_Page_0047
[མ་དཔེ་གཟིགས་ན་འདིར་གནོན།]

དོན་རྟོགས་མ། །རྗེ་བཙུན་མ་ལ་ཕྱག་འཚལ་བསྟོད། །ཐུགས་རྗེས་འགྲོ་བ་སྨིན་མཛད་པས། །རྟག་ཏུ་པདྨ་རཱ་གའི་མདོག །དབྱངས་ཅན་དེ་ལ་སྤྱི་བོ་ཡིས། །ཀུན་ནས་དང་པས་ཕྱག་འཚལ་བསྟོད། །འདོད་པའི་འདམ་གྱིས་མ་གོས་པས། །རྟག་ཏུ་ཆུ་སྐྱེས་སྟེང་ན་བཞུགས། །དབྱངས་ཅན་དེ་ལ་སྤྱི་བོ་ཡིས། །ཀུན་ནས་དང་བས་ཕྱག་འཚལ་བསྟོད། །རྩ་བའི་ཞལ་ནི་པདྨ་རཱ་གའི་མདོག །འདོད་ཆགས་རྣམ་དག་གསུང་ལ་ཕྱག་འཚལ་བསྟོད། །གཡས་ཀྱི་ཞལ་ནི་ཨིནྡྲ་ནཱི་ལའི་མདོག །ཞེ་སྡང་རྣམ་དག་ཐུགས་ལ་ཕྱག་འཚལ་བསྟོད། །གཡོན་པའི་ཞལ་ནི་ཀུན་ད་ཟླ་བའི་མདོག །གཏི་མུག་རྣམ་དག་སྐུ་ལ་ཕྱག་འཚལ་བསྟོད། །ཕྱག་དྲུག་གཡས་ཀྱི་དང་པོ་པདྨ་བསྣམས། །མ་ཆགས་འགྲོ་དོན་མཛད་ལ་ཕྱག་འཚལ་བསྟོད། །བར་པ་མ་རིག་གཅོད་མཛད་རལ་གྲི་བསྣམས། །ཤེས་རབ་རྣམ་གསུམ་གསོལ་ལ་ཕྱག་འཚལ་བསྟོད། །ཐ་མ་རྣམ་རྟོག་གཅོད་མཛད་གྲི་གུག་བསྣམས། རྟོག་མེད་ཏིང་འཛིན་གསོལ་ལ་ཕྱག་འཚལ་བསྟོད། །ཕྱག་དྲུག་གཡོན་གྱི་དང་པ་བྷནྡྷ་བསྣམས། །བདག་མེད་དོན་རྟོགས་མངའ་ལ་ཕྱག་འཚལ་བསྟོད། །བར་པ་དབུལ་བ་གཅོད་མཛད་རིན་ཆེན་བསྣམས། །འགྲོ་ཀུན་རེ་འདོད་སྐོང་ལ་ཕྱག་འཚལ་བསྟོད། །ཐ་མ་འཁོར་བ་གཅོད་མཛད་འཁོར་ལོ་བསྣམས། །འཁོར་བ་རྩད་ནས་གཅོད་ལ་ཕྱག་འཚལ་བསྟོད། །མཚན་དང་དཔེ་བྱད་སྐུལ་ཕྱག་འཚལ་བསྟོད། །ཀལ་པིངྐའི་གསུང་ལ་ཕྱག་འཚལ་བསྟོད། །ཤེས་བྱ་ཀུན་མཁྱེན་ཐུགས་ལ་ཕྱག་འཚལ་བསྟོད། །མ་རིག་མུན་སེལ་ཁྱོད་ལ་ཕྱག་འཚལ་བསྟོད། །རྡོ་རྗེ་དབྱངས་ཅན་མའི་བསྟོད་པ་སློབ་དཔོན་དཔལ་འཛིན་གྱིས་མཛད་པ་རྫོགས་སོ།། །།པཎྜི་ཏ་སུ་མ་ཏི་ཀཱི་རྟི་དང༌། ལོ་ཙཱ་བ་མར་དོ་ཆོས་ཀྱི་དབང་ཕྱུག་གིས་བསྒྱུར་བའོ།།

གཤིན་རྗེ་དགྲའི་དཀྱིལ་འཁོར་གྱི་ཆོ་ག་གཤིན་རྗེ་གཤེད་འབྱུང་བ་ཞེས་བྱ་བ།
ལ་ལི་ཏ་བཛྲ།


DTG047_Page_0047
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། །ཡ་མཱ་རི་མཎྜལ་ནོ་པི་ཀ་ཡ་མཱནྟ་ཀོ་ད་ཡ་ནཱ་མ། བོད་སྐད་དུ། གཤིན་རྗེ་དགྲའི་དཀྱིལ་འཁོར་གྱི་ཆོ་ག་གཤིན་རྗེ་གཤེད་འབྱུང་བ་ཞེས་བྱ་བ། དཔལ་རྡོ་རྗེ་ཁྲག་འཐུང་ལ་ཕྱག་འཚལ་ལོ། །རབ་ཏུ་མཛེས་པའི་སྐུ་འབར་ཐུབ་དབང་འོད་ཚོགས་ཅན། །རང་འོད་གཉིས་མེད་འཁྲིལ་ཞིང་དཔེ་བྲལ་བདེ་


DTG047_Page_0048
[མ་དཔེ་གཟིགས་ན་འདིར་གནོན།]

བས་གང༌། །རབ་ཆགས་མཛེས་པས་ལྷ་དང་ཁྲོ་བས་འཁྲུགས་ལྟ་ལ་བློ་མཉམ་འཇུག་མཛད་གཤིན་རྗེ་གཤེད་དེར་མངོན་ཕྱོགས་ཏེ། །།རྒྱུད་རྒྱལ་ཡོན་ཏན་མང་ལྡན་མཁས་པའི་སྤྱོད་ཡུལ་བ། །གཤིན་རྗེ་དགྲ་ཡིད་དོན་ལ་བདག་བློ་བླུན་གྱུར་ཀྱང༌། །ཞལ་གྱི་པདྨ་ལས་རྙེད་དེ་ཡི་རྗེས་འབྲངས་ནས། །དབང་བསྐུར་སྒྲུབ་བཅས་ལོ་འདབ་རྩེ་ཙམ་བྱ་བར་འདོད། །དེ་ལ་དང་པོར་སྔགས་པ་ནི། །རང་ལུས་འཇིག་ནའང་གཞན་དོན་འདོད། །རྙེད་དང་བཀུར་སྟི་ལ་མ་ཆགས། །རྒྱུད་འདིར་གསང་སོགས་དབང་བསྐུར་བས། །རི་བོའི་ཕྱོགས་སོགས་འབྱོར་པ་ཡོད། །ལྗོན་ཤིང་གིས་བཀླུབས་ཡིད་དུ་འོང༌། །སྐྱེ་བོ་འདུས་ནས་རྣམ་བྲལ་ཞིང༌། །དྲིས་བྱུགས་མེ་ཏོག་ལེགས་བཀྲམ་པར། །དང་པོར་གདོང་སོགས་དག་བྱས་ལ། །སྤྲོ་བས་བདེ་བའི་སྟན་འདུག་ནས། །སྙིང་གར་ཟླ་བའི་དཀྱིལ་འཁོར་ལ། །ཡ་སྔོན་འོད་དང་ལྡན་པ་བསམ། །དེ་འོད་ལས་བྱུང་རིགས་ཚོགས་ཀྱིས། །བླ་མ་རྫོགས་སངས་རྒྱས་བཀུག་ནས། །རྣམ་ཐར་གྱི་སྒོ་དག་བྱས་ཏེ། །དག་པར་གྱུར་པས་མངོན་སུམ་བལྟ། །གཤིན་རྗེ་གཤེད་པོར་སྒྲུབ་པ་ཡང༌། །བསོད་ནམས་མེད་པར་མི་འགྲུབ་ལ། །སྦྱིན་སོགས་བསོད་ནམས་བྱ་བ་ཡང༌། །དབུལ་ཕྱིར་བདག་གིས་མི་ནུས་པས། །ཚེ་རབས་སྔོན་ནས་ཚངས་སྤྱོད་བཞི། །འབྲས་བུ་ཡིད་བཞིན་ནོར་བུ་ལྟར། །འགྲོ་བ་ཀུན་གྱི་དོན་བྱེད་པའི། །ཡ་ཉིད་རབ་ཏུ་དྲན་པར་བྱ། །དེ་ལས་བདག་ཉིད་མཱཾ་སྤྲུལ་ཏེ། །ལན་གསུམ་བསྐོར་ཞིང་ཕྱག་འཚལ་བསམ། །དེ་སྤྲུལ་རིག་མའི་ཚོགས་རྣམས་ཀྱིས། །མ་ལུས་མཆོད་པས་མཉེས་པར་བྱ། །ལུས་ངག་ཡིད་ཀྱིས་སྡིག་བགྱིས་དང༌། །བགྱིད་དུ་སྩལ་དང་ཡི་རང་གང༌། །སྒྱུ་མ་སྒྱུ་མ་ལ་སོགས་བཞིན། །ཐུགས་རྗེ་ཅན་རྣམས་མདུན་དུ་འཆགས། །སྔོན་བྱས་མ་ལུས་བཤགས་ནས་ནི། །ཕྱིན་ཆད་དེ་ལ་མི་འཇུག་ཅིང༌། །བྱང་ཆུབ་སྙིང་པོར་གནས་ཀྱི་བར། །མི་དགེ་ཀུན་ལས་ལྡོག་པར་བགྱིད། །སངས་རྒྱས་དེ་སྲས་འཕགས་རྣམས་དང༌། །སྲིད་པ་མཐར་ཕྱིན་དམ་པའི་ཆོས། །སྐྱབས་ཀྱི་དམ་པ་དེ་གསུམ་ལ། །དེང་ཉིད་གུས་པས་སྐྱབས་སུ་མཆི། །རྣམ་རྟོག་རྒྱ་མོས་རབ་བཅིངས་ཤིང༌། །


DTG047_Page_0049
[མ་དཔེ་གཟིགས་ན་འདིར་གནོན།]

འཁོར་བའི་རྒྱ་མཚོར་ནུབ་པ་ཀུན། །བསྒྲལ་ཕྱིར་བདེ་གཤེགས་ཉིད་ཐོབ་པར། །བྱང་ཆུབ་མཆོག་ཏུ་སེམས་བསྐྱེད་དོ། །བདེ་གཤེགས་སྲས་བཅས་འཕགས་སྐྱེས་པོ། །ཀུན་གྱི་དགེ་བ་ཀུན་བསྡུས་ལ། །སེལ་མེད་རབ་ཏུ་ཡི་རང་ཞིང༌། །ལེགས་སོ་ཞེས་ཀྱང་བསྔགས་པར་བྱ། །དུས་གསུམ་བདེ་གཤེགས་སྲས་བཅས་ཀུན། །གཤེགས་ཤིང་གཤེགས་དང་གཤེགས་འགྱུར་བའི། །སྦྱིན་སོགས་ལམ་གྱི་རང་བཞིན་གང༌། །ཅི་ཡོད་སྟོབས་ཀྱིས་ཡང་དག་བསྟེན། །ཡོན་ཏན་རྒྱ་མཚོ་ལྡན་རྣམས་ལ། །བདག་ཉིད་བདག་གིས་དབུལ་ལགས་ཀྱིས། །ཐུགས་རྗེ་མངའ་བ་ཁྱེད་རྣམས་ཀྱིས། །སོ་སོར་ནང་འཁོར་སྤྱོད་དུ་བཞེས། །གང་ཞིག་མྱ་ངན་འདའ་བཞེད་པ། །ཇི་སྲིད་འཁོར་བ་གནས་པར་དུ། །དེ་སྲིད་མྱ་ངན་མི་འདའ་བར། །ཐུགས་རྗེ་ཅན་ལ་གསོལ་བ་འདེབས། །བྱང་ཆུབ་ཤིང་ལ་གཟིགས་རྣམས་ལ། །ཐེག་ཆེན་བདུད་རྩི་རབ་བཤད་པར། །འགྲོ་བའི་ཡབ་ཏུ་གྱུར་རྣམས་ལ། །འཁོར་ལོ་བསྐོར་བར་གསོལ་བ་གང༌། །ལུས་ངག་ཡིད་ཀྱི་དགེ་བ་གང༌། །བགྱིས་པ་མ་ལུས་ཀུན་བསྡུས་ནས། །འགྲོ་བ་ཀུན་གྱི་བདེ་ཆེན་ཉིད། །ཐོབ་པའི་རྗེས་སུ་མཐུན་གྱུར་ཅིག །དེ་ལྟར་བསོད་ནམས་ཚོགས་བསགས་ལ། །གཞན་དོན་ལྷུར་མཛད་ཐུགས་མཉེས་ནས། །རིགས་ཀྱི་བུ་ཁྱོད་ལེགས་སོ་ཞེས། །གཏང་རག་གནང་ནས་མི་སྣང་གྱུར། །རྣམ་རྟོག་རྒྱ་མཚོ་གཏིང་ཟབ་པར། །ཡང་དག་ལྟ་བའི་གྲུ་ཤོར་ཅིང༌། །སྣ་ཚོགས་ལྟ་བས་གཡེངས་རྣམས་ལ། །ཐུགས་རྗེ་ཆེན་པོས་དམིགས་ནས་སུ། །རང་བཞིན་མེད་པས་སྟོང་པ་ཉིད། །རྒྱུ་དང་བྲལ་བས་མཚན་མ་མེད། །རྣམ་རྟོག་མེད་པས་རྣམ་བྲལ་བར། །བྱང་ཆུབ་སེམས་མཆོག་བསྒོམ་པར་བྱ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། སྔགས་འདི་བཟླས་ནས་འགྲོ་ཀུན་གྱི། །ལུས་ངག་ཡིད་རྣམས་ངོ་བོ་གཅིག །སྟོང་ཕྱིར་དེ་རྣམས་བརྟགས་པ་ཙམ། །བརྟགས་པ་ཡིན་ཕྱིར་ལུས་ངག་ཡིད། །ཨོཾ་ཨཱཿ་ཧཱུཾ་ཡིག་གསུམ་བྱས་ལ། །འོད་འབར་ཧོཿ་གཉིས་པར་གནས་པ། །ཟླ་བའི་དཀྱིལ་འཁོར་སྟེང་དུ་


DTG047_Page_0050
[མ་དཔེ་གཟིགས་ན་འདིར་གནོན།]

ནི། །ནམ་མཁའ་ལ་གནས་བསམ་པར་བྱ། །དེ་ལས་ཨཱཿ་ཆད་བྱུང་ཉི་མ། །དེ་དབུས་ཡི་གེ་ཧཱུཾ་མཐིང་ལས། །སྣ་ཚོགས་རྡོ་རྗེ་འོད་འབར་བ། །ལྟེ་བར་ཡི་གེ་ཧཱུཾ་བཅས་བསམ། །དེ་འོད་ཕྱོགས་བཅུར་རབ་འཕྲོས་པས། །འོད་འབར་རྡོ་རྗེའི་གུང་དུ་བསམ། །དེ་དབུས་པདྨ་ཟླ་སྟེངས་སུ། །སཾ་དཀར་ལས་བྱུང་རྡོ་རྗེ་ལས། །ཀུན་བཟང་ཡུམ་བཅས་བསམ་པར་བྱ། །འབྲུ་ལྔས་དེ་ཞུ་ལ་ས་བྱུང་བ། །ཆོས་དབྱིངས་དཀར་པོ་གྲུ་གསུམ་པ། །གྱེན་དུ་གནས་པ་ཕྱོགས་འོད་བསྐོར། །པདྨོ་སྣ་ཚོགས་པཾ་ལས་སྐྱེས། །འདབ་མ་འབུམ་ལྡན་དེ་དབུས་བསམ། །གེ་སར་དབུས་སུ་ཁཾ་ཡིག་ལས། །སྣ་ཚོགས་རྡོ་རྗེ་འོད་ཚོགས་ཅན། །ལྟེ་བར་བྷྲཱུཾ་སེར་ལས་བྱུང་བའི། །རིག་བཅས་རྟག་པ་ལས་བྱུང་བ། །གཞལ་ཡས་ཁང་མཆོག་གྲུ་བཞི་པ། །སྒོ་བཞི་རྟ་བབས་མུ་ཁྱུད་བཅས། །རྡོ་རྗེ་ར་བ་འོད་ཕྲེང་བསྐོར། །དབུས་སུ་རྡོ་རྗེ་རྒྱ་གྲམ་མཛེས། །པདྨ་ཉི་མའི་གདན་ལྡན་བསྒོམ། །གཞིའོ། །།ལྟེ་བའི་གདན་སྟེངས་བསམ་བྱ་བ། །ཨ་དང་ཨཱཿ་མཐར་ཐུག་ཕྲེང་གཉིས། །དེ་ལས་ཟླ་བ་དེ་ཡིས་བརྒྱན། །ཀ་སོགས་དཔེ་བྱད་འོད་ལྡན་པ། །ཟུང་གཅིག་ལས་བྱུང་གཉིས་པ་སྟེ། །དབུས་སུ་འདོད་ཆགས་ཡི་གེ་རཾ། །དེས་བཞུ་འོད་ཀྱི་གོང་བུ་ལས། །དཀར་དམར་ཧཱུཾ་ནི་རབ་ཏུ་བསམ། །དེ་མདོག་རྡོ་རྗེ་དེ་ཡིས་བརྒྱན། །བཛྲོད་ཀོ྅ཧཾ་ང་རྒྱལ་བསྐྱེད། །རྡོ་རྗེ་འཆང་མཆོག་འོད་ཚོགས་ཅན། །ཞལ་གསུམ་སྔོ་དཀར་དམར་བ་ལ། །རྡོ་རྗེ་རལ་གྲི་གཡས་གཉིས་ན། །གཞན་གཉིས་འཁོར་ལོ་པདྨ་འཆང༌། །གྲི་གུག་བནྡྷས་རང་འོད་འཁྱུད། །བདེ་བས་གང་བ་བསམ་པར་བྱ། །རྣམ་པ་ལྔ་ཡི་རང་བཞིན་གང༌། །དེ་ནི་སངས་རྒྱས་ཏྒྯུགྶ་བརྙན་ནོ། །རྣལ་འབྱོར་རོ། །འདོད་ཆགས་ཆེན་པོས་འདུལ་བ་ཡི། །སྣོད་དུ་འཇིག་རྟེན་མཐོང་ནས་སུ། །རང་སྙིང་ལས་བྱུང་འོད་ཟེར་གྱིས། །ཁྱབ་སྟེ་སྣ་ཚོགས་སངས་རྒྱས་བྱས། །བཀུག་ནས་བདག་བཞུགས་པ་ཡི། །བདེ་བ་ཆེན་པོ་ཉིད་དུ་གྱུར། །མཁའ་ལ་གནས་པའི་ཡིག་འབྲུ་ལྔ། །ཇི་ལྟར་སྐར་མངའ་འཕོ་བ་ལྟར། །ཁར་ཐིམ་ཁུ་བར་རབ་འཕྲོས་པས། །རིག་དང་བཅས་པའི་ཀུན་བཟང་ཞུ། །འོད་ཀྱི་གོང་བུར་གྱུར་པ་ལས། །ཐིག་ལེ་ཕྲ་མོ་བཞི་ཆད་དེ། །བྱམས་སོགས་ཙ་རྩི་ཀཱ་སོགས་ཀྱིས། །སྙན་པའི་གླུ་ཡིས་བསྐུལ་བ་བསམ། །རྗེ་བཙུན་ཐུགས་རྗེས་ཁྲོ་བཞེངས་ལ། །གནས་གསུམ་ཀུན་གྱི་གཏི་མུག་སྤོངས། །གཙོ་བོ་བདུད་རྣམས་ཀུན་


DTG047_Page_0051
[མ་དཔེ་གཟིགས་ན་འདིར་གནོན།]

ལས་རྒྱལ། །རྗེ་བཙུན་ཁྲོས་པའི་ཐུགས་ཀྱིས་བཞེངས། །འཇིག་རྟེན་མགྲོན་གཉེར་སྟོང་གནས་ཤིང༌། །རྗེ་བཙུན་འཇིག་རྟེན་བསོད་ནམས་བཞེངས། །ཀྱེ། ཁྱོད་ནི་སྟོང་དམིགས་ཅི་སྟེ་བཞུགས། །འཇིག་རྟེན་བྱང་ཆུབ་རང་བཞིན་མགྲོན། །འདོད་ཆགས་ལ་ནི་དགའ་བ་ཡིས། །ཞུ་བ་ལ་ནི་བསྐུལ་ནས་སུ། །དེ་ཉིད་ལ་ཐིམ་ཡང་སྔོན་གྱུར། །རྡོ་རྗེ་ལས་བྱུང་མི་བསྐྱོད་པ། །གཡས་གཡོན་དཀར་དང་དམར་བ་ལ། །འོད་འབར་མཐིང་ག་སྔོན་མཚུངས་ཕྱག །རྒྱན་ཀུན་བཀླུབས་པའི་སྦྲུལ་གྱིས་བཅིངས། །ཡུམ་ལྡན་ཐུབ་པའི་འོད་ཀྱིས་འཁྲིགས། །འཁོར་དང་མྱ་ངན་འདས་དངོས་ཀྱི། །སྐུ་དེ་བྱང་ཆུབ་སེམས་མཆོག་གོ །ཨོཾ་སྭ་བྷཱ་ཝ་ཨཱཏྨ་ཀོ྅ཧཾ། རྗེས་སུ་རྣལ་འབྱོར་རོ། །གསང་བྱིན་བརླབ་དང་རྗེས་ཆགས་ནི། །རྒྱུད་འདིར་བདག་གིས་མཐོང་མེད་ཀྱང༌། །རྒྱུད་རྒྱལ་དོན་འདིར་མི་འགལ་ཕྱིར། །བྱིན་རླབས་རྗེས་ཆགས་བྱ་བར་འོས། །རང་སྙིང་ས་བོན་འོད་ཟེར་གྱིས། །མཁའ་ཁྱབ་བདེ་གཤེགས་ཀུན་བཀུག་ནས། །རྡོ་རྗེ་ལས་བྱུང་པད་ལྟེ་ལ། །བདེ་བའི་རྒྱུན་དུ་འཕྲོས་པར་བསམ། །དགའ་བའི་ཐིག་ལེ་ས་བོན་ནི། །འོག་ནས་འཆད་པ་ཉིད་དུ་གྱུར། །དེ་ལས་ཐུགས་ཀྱི་ཕྱག་རྒྱ་སྟེ། །དེ་ལས་ཕྱག་རྒྱ་ཆེན་པོར་བལྟ། །སྣོད་ཆེན་བཞི་ཡང་རྫོགས་པ་དང༌། །བློ་ལྡན་ཕྱིར་རོལ་སྤྲོ་བར་བྱ། །ཧྲཱིཿཥྚྀཿ་ལ་སོགས་གསང་སྔགས་ཀྱིས། །ཞེ་སྡང་མཐིང་ག་རྡོ་རྗེ་དང༌། །རལ་གྲི་འཁོར་ལོ་པདྨ་འཆང༌། །སྤྲོས་ནས་སླར་བྱོན་བདག་ལ་ཐིམ། །ཛིན་ཛིཀ་ཅེས་བརྗོད་པ་ཡིས། །གཏི་མུག་དཀར་པོ་འོད་འབར་བ། །འཁོར་ལོ་རལ་གྲི་རིན་ཆེན་པད། །མཁའ་ལས་བཏོན་ནས་ཤར་ཕྱོགས་སུ། །ལྷོ་ཕྱོགས་རྡོ་རྗེའི་རང་ཉིད་ལས།། རཏྣ་དྷྲྀཀ་གིས་སེར་སྣ་ནི། །བཙོ་མ་གསེར་དང་མཚུངས་པའི་མདོག །རིན་ཆེན་རལ་གྲི་འཁོར་ལོ་པད། །ཨཱ་རོ་ལྀཀ་གིས་ནུབ་ཕྱོགས་སུ། །འདོད་ཆགས་བྱུ་རུ་བཅག་འདྲ་བ། །པདྨ་དང་ནི་རལ་གྲི་དང༌། །འཁོར་ལོ་རིན་ཆེན་འཆང་བ་མཆོག །པྲཛྙཱ་དྷྲྀཀ་ཅེས་བྱ་བ་ཡིས། །བྱང་དུ་ཕྲག་དོག་ཆེན་པོ་སྟེ། །སྔོ་བསངས་རལ་གྲི་རྡོ་རྗེ་དང༌། །འཁོར་ལོ་པདྨ་འཛིན་པའོ། །མུངྒར་དྷྲྀཀ་གིས་དེ་བཞིན་ཏེ། །སྔོན་པོ་ཐོ་བ་རལ་གྲི་དང༌། །རིན་ཆེན་པདྨ་འཛིན་པ་ནི། །ཤར་གྱི་སྒོ་རུ་བསམ་པར་བྱ། །དཎྜ་དྷྲྀཀ་ཅེས་བྱ་བ་ཡིས། །བེ་ཅོན་འཛིན་པ་དཀར་བ་སྟེ། །བེ་ཅོན་རལ་གྲི་འཁོར་ལོ་པད། །ལྷོ་ཡི་སྒོ་རུ་


DTG047_Page_0052
[མ་དཔེ་གཟིགས་ན་འདིར་གནོན།]

བསམ་པར་བྱ། །པདྨ་དྷྲྀཀ་གིས་ནུབ་སྒོ་རུ། །པདྨ་རཱ་གའི་མདོག་འདྲ་བ། །པདྨ་རལ་གྲི་རྡོ་རྗེ་དང༌། །རིན་ཆེན་འཛིན་པ་བསམ་པར་བྱ། །ཁཌྒ་དྷྲྀཀ་གིས་བྱང་སྒོ་རུ། །ལྗང་གུ་རལ་གྲི་འཛིན་པ་སྟེ། །རལ་གྲི་རྡོ་རྗེ་འཁོར་ལོ་ཅན། །རིམ་བཞིན་འཆང་བ་འཁྲུགས་པའོ། །དྭེ་ཥ་ར་ཏི་ཞེས་དེ་ཉིད། ཙ་རྩི་ཀཱ་མདོག་དཀར་མོ་ལ། །གཙོ་བོ་དང་མཚུངས་ཕྱག་མཚན་ཅན། །མེ་ཡི་ཕྱོགས་སུ་ལེགས་པར་གཞག །མོ་ཧ་ར་ཏི་ཞེས་པ་ཡིས། །ཕག་མོ་སྐུ་མདོག་སྔོན་མོ་ལ། །རང་གི་གཙོ་བོའི་ཕྱག་རྒྱ་ཅན། །སྤྲོས་ནས་བདེན་བྲལ་གྲྭ་ལའོ། །རཱ་གར་ཏི་ཞེས་སྔགས་ཀྱིས། །དབྱངས་ཅན་མ་ནི་དམར་མོ་ལ། །པདྨ་ལ་སོགས་འཛིན་པའི་ཕྱག །རླུང་མཚམས་ན་ནི་འགྲོ་དོན་མཛད། །བཛྲ་ར་ཏི་ཞེས་པ་ཡིས། །མཛོད་ལྡན་ལྗང་གུ་ཨུཏྤལ་ཅན། །ཕྱི་མ་གཙོ་བོའི་མཚན་འཛིན་མ། །དབང་ལྡན་གྲྭ་རུ་བསམ་པར་བྱ། །གཏི་མུག་གཤིན་རྗེ་ལྷ་མོ་བཞི། །པདྨ་ཟླ་བའི་གདན་ལ་བཞུགས། །ལྷག་མ་པདྨ་ཉི་མ་ལ། །ལྔ་ཕྲག་གཉིས་དང་དྲུག་ཕྱེད་ལྷ། །གྲི་གུག་བནྡྷའི་ཕྱག་ཟུང་ཅིག །མཐུན་པར་རང་གི་རིག་མ་འཁྱུད། །བཞིར་གྱུར་དབུས་སུ་དེ་འོད་བསམ། །སྔོན་པོའི་གཡས་དཀར་གཡོན་པ་དམར། །དཀར་པོའི་གཡས་སྔོ་གཡོན་པ་དམར། །དམར་པོ་སེར་པོ་ལྗང་གུ་ཡི། །གཡས་སྔོ་གཡོན་པ་དཀར་པོ་ཡིན། །རལ་བའི་ཐོར་ཚུགས་འོད་ཕྲེང་ཅན། །མ་ལུས་འཁྲུགས་པ་སྦྲུལ་གྱིས་བརྒྱན། །མེ་མཚམས་ལ་སོགས་བྷནྡྷ་བཞི། །ཟླ་བས་གང་བ་ཨོཾ་གྱིས་མཚན། །པདྨ་ཟླ་བའི་དཀྱིལ་འཁོར་ལ། །དེ་ཉིད་གསུམ་གྱིས་རིམ་བཞིན་གདོན། །རྫོགས་པའི་རྣལ་འབྱོར་རོ། །དཀྱིལ་འཁོར་ལྷ་རྣམས་ཐམས་ཅད་ཀྱི། །མིག་དང་རྣ་བ་སྣ་དང་ལྕེ། །ལུས་ཡིད་སྐྲ་མཚམས་བྲང་རྩེ་རུ། །ཀྵིཾ་ཛི་ཁཾ་གཾ་ཀཾ་སཾ་ལས། །གཏི་མུག་གཤིན་དགྲ་སོགས་རིམ་བཞིན། །རྡོ་རྗེ་ཅན་སོགས་ཁ་དོག་རྒྱ། །མངོན་པར་ཤེས་པའི་དོན་དུ་ནི། །རྡོ་རྗེ་སྐྱེ་མཆེད་རྣམ་པར་བསྒོམ། །སྙིང་མགྲིན་དཔྲལ་བའི་ཟླ་སྟེངས་སུ། །རྡོ་རྗེ་པདྨ་འཁོར་ལོ་ལ། །ཧཱུཾ་ཨཱཿ་ཨོཾ་ཡིག་བཀོད་བྱས་ཏེ། །དེ་ལས་ཕྱག་རྒྱ་དེ་བྱུང་སྐུ། །ཞེ་སྡང་འདོད་ཆགས་གཏི་མུག་དང༌། །འདྲ་བར་ཐུགས་སོགས་བསྒོམ་བྱས་ཏེ། །དེ་དག་ཐམས་ཅད་རང་རང་རྒྱ། །མཚན་མའི་ལྟེ་བར་ཧཱུཾ་ཨཱཿ་ཨོཾ། །དེ་ལས་ཙ་རྩི་ཀཱ་སོགས་སྤྲོ། །མཁར་བཀུག་སངས་རྒྱས་མཉེས་བྱས་ནས། །སྤྱན་དྲངས་ཐུགས་གསུང་སྐུར་


DTG047_Page_0053
[མ་དཔེ་གཟིགས་ན་འདིར་གནོན།]

བཅུག་ལ། །བྱིན་གྱིས་བརླབ་པའི་སྔགས་འདི་བརྗོད། །ཨོཾ་སརྦ་ཏ་ཐཱ་ག་ཏ་ཙིཏྟ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཨོཾ་སརྦ་ཏ་ཐཱ་ག་ཏ་ཝཱ་ཀ་བཛྲ་སྭ་བྷ་ཝ་ཨཱཏྨ་ཀོ྅ཧཾ། ཨོཾ་སརྦ་ཏ་ཐཱ་ག་ཏ་ཀཱ་ཡ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཡེ་ཤེས་སེམས་དཔའི་ཐུགས་ཀ་ཡི། །ས་བོན་ལས་འོད་ལྷ་མོར་སྤྲོ། །ཕྱོགས་བཅུའི་མགོན་པོ་མཆོད་བྱས་ནས། །དབང་བསྐུར་བ་ཡང་བླང་བར་བྱ། །དེ་ནས་དེ་བཞིན་གཤེགས་དག་ལས། །སྤྲུལ་པའི་ཙ་རྩི་ཀ་ལ་སོགས། །ཕྱག་ན་ཡེ་ཤེས་ཆུས་གང་བའི། །བུམ་པ་ཟླ་འོད་ལེགས་ཐོགས་ཏེ། །ཡིད་འོང་བཀྲ་ཤིས་གླུ་ལེན་ཅིང༌། །སིལ་སྙན་སྤོས་ཀྱི་སྤྲིན་དག་དང༌། །དྲི་མེད་དབང་བསྐུར་སྤྲིན་ཕབ་པས། །སོ་སོའི་གཙོ་བོས་དབུ་བརྒྱན་ནོ། །རང་སྙིང་འོད་ཀྱི་ཙ་རྩི་ཀཱ། །བསྐུལ་ནས་དེ་ཡི་ཐུགས་ཀ་ནས། །རང་འདྲ་འཕྲོས་ཏེ་ཁྲོ་མོ་བཀུག །རྡོ་རྗེའི་གུར་སྟེངས་བཞུགས་བསམས་ལ། །ཁྲོ་བོ་རྣམས་ཀྱིས་མངོན་བསྐྲད་དེ། །རྡོ་རྗེའི་ར་བ་བཤིག་བྱས་ནས། །ཞུགས་ཏེ་རང་མདུན་པདྨར་བསམ། །དེ་ནས་སྙིང་འཕྲོས་ཁྲོ་བོ་ཡིས། །ཕུར་བཤིག་ཕྱིར་བརྩིགས་སྙིང་ཞུགས་བསམ། །རང་མདུན་དུང་ཆོས་སོགས་གསུམ་བཞག །མེ་ཏོག་དཀར་ལྡན་དྲི་ཆུས་བཀང༌། །དེ་མདུན་མན་འཇི་གཉིས་སྟེངས་སུ། །གསེར་སོགས་གསོལ་བའི་སྣོད་གཉིས་བཞག །གཡས་ཕྱོགས་དུང་ནི་གསུམ་པ་ལ། །འོག་ནས་འབྱུང་བའི་ཆོ་གས་སུ། །བྱིན་བརླབས་བདུད་རྩི་བཅུ་བྱེད་བླུགས། །ཧྲཱིཿ་ཥྚྲིཿ་ཝི་ཀྲྀའི་སྔགས་བཟླས་ལ། །ཀུ་ཤའི་བམ་པོས་དང་པོའི་ཆུ། །བཟེད་ཞལ་དང་པོར་ལན་གསུམ་གཏོར། །གཉིས་པ་ཆུ་དང་མེ་ཏོག་བཅས། །གཟུང་སྟེ་དེ་ཡི་སྣོད་ཉིད་ལ། །ཕྱོགས་སུ་དུང་ནི་གསུམ་པ་ལ། །ལན་གསུམ་ཉེ་རེག་སྦྱིན་པར་བྱ། །གསུམ་པ་བདུད་རྩི་དང་ལྡན་པས། །གཉིས་པར་མཆོད་ཡོན་ཆུ་ཡང་སྦྱིན། །དེ་ནས་མེ་ཏོག་གཟུང་བྱས་ལ། །ཞབས་བསིལ་ཕྱག་རྒྱ་དང་ལྡན་པས། །དེ་ཡི་སྣོད་ལ་ཞབས་བསིལ་སྦྱིན། །རང་སྙིང་འོད་ཀྱིས་ཐོ་བ་བསྐུལ། །མུངྒར་ཛཿ་ཞེས་བརྗོད་ནས་དགུག །དེ་བཞིན་བེ་ཅོན་བསྐུལ་བ་ཡིས། །དཎྜ་ཧཱུཾ་ཞེས་བརྗོད་ནས་གཞུག །སྙིང་པོས་པདྨ་བསྐུལ་ནས་སུ། །པདྨ་བཾ་ཞེས་བརྗོད་ནས་བཅིང༌། །དེ་བཞིན་རལ་གྲི་འཛིན་བསྐུལ་ཏེ། །ཁཌྒ་ཧོཿ་ཞེས་བརྗོད་མཉེས་བྱ། །རང་སྙིང་ཡེ་ཤེས་འོད་ཟེར་གྱིས། །མཁའ་ཁྱབ་སངས་


DTG047_Page_0054
[མ་དཔེ་གཟིགས་ན་འདིར་གནོན།]

རྒྱས་ཀུན་བཀུག་ནས། །ཁར་ཐིམ་ལུས་ཀྱི་བཅུད་གྱུར་ཏེ། །རྡོ་རྗེ་ལམ་བྱུང་ཤེས་རབ་ཀྱི། །པདྨའི་སྙིང་པོར་རབ་འཕྲོས་ལས། །ལྷ་མོའི་ཚོགས་ནི་མཛེས་གྱུར་ཏེ། །བ་སྤུའི་བུ་ག་ལས་འཕྲོས་ནས། །མེ་ཏོག་སྣ་ཚོགས་མཛེས་རྣམས་ཀྱི། །སྡོང་བུ་ལག་བས་ལེགས་བཟུང་ནས། །སྒེག་དང་བཅས་པས་མཆོད་བྱས་ཏེ། །རབ་སྙན་ཡིད་འཕྲོག་གླུ་དང་ནི། །སྣ་ཚོགས་མཛེས་པའི་གར་གྱིས་སུ། །བདེ་བ་ཆེན་པོ་རབ་ཏུ་སྟེར། །ཀྱེ་ཀྱེ་གཤིན་རྗེ་དགྲ་ནག་པོ། །བླ་མ་སྲིན་པོའི་གཟུགས་རང་བཞིན། །བདག་གིས་ཁྱོད་མཐོང་རྣམ་པར་འཇིགས། །ཁྲོ་བོའི་རང་བཞིན་ཉིད་སྤོངས་ཏེ། །བདག་པོ་ཡིས་ནི་གར་བྱས་པས། །མཐོ་རིས་མི་ཡུལ་ས་འོག་འདིར། །ནག་པོ་ཁྲོ་བོ་ཡིད་ཀྱིས་འཇིགས། །གར་བྱེད་ཁྱོད་ནི་འཇིགས་པ་ཆེ། །ནག་པོ་མིའུ་ཐུང་གཤིན་དགྲ་ནག །གཟུགས་ནི་རྣམ་པ་སྣ་ཚོགས་སྤྲུལ། །རྡོ་རྗེ་དབྱངས་ཅན་མས་ཞུས་པ། །གར་བྱེད་ཁྱོད་ནི་བདེ་བ་ཆེ། །ཧྲཱིཿ་ཥྚྲིཿའི་སྔགས་ཀྱིས་གར་བྱེད་ཁྱོད། །གནས་གསུམ་ཀུན་གྱི་ཐེ་ཚོམ་སྤོངས། །རྗེ་བཙུན་གཤིན་རྗེ་ཁྲོ་བོ་ཁྱོད། །འགྲོ་བ་ཀུན་གྱིས་གར་བྱེད་མཐོང༌། །ཨོཾ་སརྦ་ཏ་ཐཱ་ག་ཏ་པཱུ་ཛ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། སྒྲ་ཡུལ་ཐམས་ཅད་བྲག་ཅ་དང༌། །འདྲ་བར་རབ་ཏུ་བལྟ་བྱས་ཏེ། །རང་ཉིད་ལྷག་པའི་ལྷར་གནས་ལ། །ཡོན་ཏན་ཀུན་ནི་སྒྲོགས་པར་བསམ། །གཏི་མུག་རྡོ་རྗེའི་རང་བཞིན་ཁྱོད། །གཤིན་དགྲ་ནག་པོ་རབ་ཏུ་འཇིགས། །སྟོན་པ་སངས་རྒྱས་ཀུན་གྱི་བདག །མི་འཇིགས་སངས་རྒྱས་ཕྱག་འཚལ་བསྟོད། །སེར་སྣ་རྡོ་རྗེའི་རང་བཞིན་ཁྱོད། །གཤིན་དགྲ་ནག་པོ་ཤིན་ཏུ་འཇིགས། །ཐུགས་ཀྱི་རྡོ་རྗེ་རབ་སྣང་བ། །རིན་ཆེན་རྡོ་རྗེ་ཕྱག་འཚལ་བསྟོད། །འདོད་ཆགས་རྡོ་རྗེའི་རང་བཞིན་ཁྱོད། །གཙོ་བོ་འདོད་ཆགས་ཆོས་འབྱུང་བ། །དབྱངས་ཀུན་གྱི་ནི་མཆོག་གི་མཆོག །གསུང་གི་རྡོ་རྗེ་ཕྱག་འཚལ་བསྟོད། །ཕྲག་དོག་རྡོ་རྗེའི་རང་བཞིན་ཁྱོད། །ཐམས་ཅད་ལས་ཀུན་གཤིན་རྗེའི་དགྲ། །ལས་ཀྱི་རྡོ་རྗེ་རབ་སྣང་བ། །རལ་གྲིའི་ཕྱག་ལ་ཕྱག་འཚལ་བསྟོད། །སངས་རྒྱས་ཀུན་གྱི་རང་བཞིན་ཁྱོད། །སངས་རྒྱས་ཐམས་ཅད་གཅིག་བསྡུས་པ། །སངས་རྒྱས་ཀུན་གྱི་མཆོག་གི་མཆོག །དཀྱིལ་འཁོར་བདག་ལ་ཕྱག་འཚལ་བསྟོད། །ཡཾ་ལས་བྱུང་བ་སྔོན་པོ་ལ། །གཞུ་འདྲའི་བ་དན་མཚན་པ་སྟེ། །ཡཾ་གིས་བྱིན་བརླབས་རླུང་


DTG047_Page_0055
[མ་དཔེ་གཟིགས་ན་འདིར་གནོན།]

དཀྱིལ་འཁོར། །གཡོ་མེད་སྟེང་ན་མེ་ཉིད་ནི། །དམར་པོ་གྲུ་གསུམ་རཾ་ལས་བྱུང༌། །དེ་སྟེང་ཨ་ལས་བ་དན་ནི། །མཚན་ཉིད་ཐམས་ཅད་རྫོགས་པའོ། །དེ་ནང་བདུད་རྩི་རྣམ་ལྔ་ནི། །གཤིན་རྗེ་ལྔ་ཡི་ཡི་གེ་ལས། །ལྕགས་ཀྱུ་ལྔ་ནི་དེ་ཉིད་ཀྱི། །མིང་གི་ཐོག་མའི་ཡི་གེ་ལས། །ཧཱུཾ་དཀར་ལས་བྱུང་རྡོ་རྗེ་ཡིས། །དེ་ལ་ཁ་ནི་བཀབ་པར་བསམ། །མཐོ་གང་སྤགས་པའི་བར་སྣང་ལ། །ཟླ་བའི་སྟེང་དུ་ཨོཾ་དཀར་བསམ། །ཁ་བཀབ་རྡོ་རྗེའི་ལྟེ་བ་ཡིས། །ཧཱུཾ་ལས་འོད་འཕྲོས་པ་དན་བསྐུལ། །དེ་ཡིས་རླུང་བསྐྱོད་དེས་མེ་བསྐུལ། །རྫས་ཀུན་ཞུ་ཞིང་ཁོལ་བ་ལ། །རྡོ་རྗེས་འཁྲུག་ཅིང་ཞུ་གྱུར་པས། །ཤིན་ཏུ་དྲི་མེད་བདག་མཐོང་ནས། །ཨོཾ་ལས་འོད་བྱུང་ཡེ་ཤེས་ཀྱི། །བདུད་རྩི་བསྡུས་ནས་དེར་ཐིམ་པས། །གངས་ཆུ་འདྲ་བར་བསིལ་གྱུར་ཏེ། །ཡི་གེ་གསུམ་བརྗོད་བསྲུངས་ལ་བཞག །གཤིན་རྗེ་གཤེད་ཀྱི་ལྷ་རྣམས་ཀྱི། །ལྗགས་ལ་རྡོ་རྗེ་དཀར་པོ་རེ། །བསམས་ཏེ་དེ་ལས་འོད་ཟེར་ནི། །སྦུ་གུར་གྱུར་པ་རབ་འཕྲོས་ཏེ། །བདུད་རྩིར་ཟུག་ལ་རང་རང་སྔགས། །བརྗོད་པས་སྦུ་གུས་བཏུང་ནས་ཚིམ། །སྙིང་འོད་འཕྲོས་པས་ཕྱོགས་བཅུར་ཁྱབ། །དངོས་ཀུན་གཤིན་རྗེ་དགྲར་བྱས་ནས། །བསྡུས་ཏེ་བདག་ལ་ཐིམ་གྱུར་བས། །བདག་ཉིད་ཡར་ཐིམ་ཐིག་ལེར་གྱུར། །ཐིག་ལེར་འཁོར་ལོ་རྫོགས་པར་བསྐྱེད། །དེ་ཡི་འོད་ཀྱི་ཕྲེང་བ་ཡིས། །བདག་སོགས་ལྷ་རྣམས་བསལ་བྱས་ཏེ། །སྙིང་གར་དཀྱིལ་འཁོར་ཕྲ་གནས་པས། །བརྟན་པར་གྱུར་ནས་སྤྲོ་དང་བསྡུ། །ལས་དང་ཆོས་དང་ཆེན་པོ་དང༌། །གསང་གསུམ་དམ་ཚིག་ཕྱག་རྒྱ་སྟེ། །ཐུགས་གསུང་སྐུ་ཡི་རྡོ་རྗེ་ལ། །རང་རང་ས་བོན་ཐུགས་ཀར་བསམ། །ཡེ་ཤེས་སེམས་དཔའི་ཐུགས་ཀ་རུ། །ཧྲཱིཿ་ཥྚྲྀཿ་ལ་སོགས་གསང་སྔགས་བསམ། །གསང་སྔགས་བཟླས་པས་གནས་བཞི་ནས། །ཁྲོ་བོའི་རྒྱུན་རྣམས་སྤྲོ་བསྡུ་བ། །རིམ་པའམ་ལྷན་ཅིག་བྱ་བར་འདོད། །དབུགས་དབྱུང་འཕྲོ་བར་བསམ་བྱ་སྟེ། །དབུགས་བསྡུ་སྔགས་ཀྱང་བསྡུ་བར་བྱ། །བགྲང་ཕྲེང་དུང་ཆེན་ལ་སོགས་ལ། །བདུད་རྩི་ལྔ་སོགས་མཆོད་བྱས་ནས། གཤིན་རྗེ་དགྲ་ཡི་སྐུར་བསམས་ཏེ། །མཐེ་བོ་ལྕགས་ཀྱུས་དྲང་ཞིང་བཟླས། །རང་སྙིང་དེ་བཞིན་དམིགས་ཉིད་པས། །སེམས་ལ་ཉམས་སུ་ཆུང་འགྱུར་ཞིང༌། །བཟླས་པས་སྐྱོན་ལག་གཡས་ཀྱིས། །བསྒྲིམས་ཏེ་རྡོ་རྗེ་གསོར་


DTG047_Page_0056
[མ་དཔེ་གཟིགས་ན་འདིར་གནོན།]

ནས་ཀྱང༌། །གཡོན་པས་རྡོ་རྗེ་དྲིལ་གསིལ་ཞིང༌། །རྡོ་རྗེ་གླུ་ཚུལ་སྣ་ཚོགས་དང༌། །མཆོད་པ་སྣ་ཚོགས་རྣམས་ཀྱིས་མཆོད། །དཀྱིལ་འཁོར་བཞེངས་ལ་ཡང་བཟླས་སོ། །བདག་ཉིད་གཏོང་བར་འདོད་གྱུར་ན། །འགྲོ་བའི་དོན་ལ་འགྲོ་བསམས་ཏེ། །མཆོད་བསྟོད་བདུད་རྩི་མྱང་བྱས་ལ། །ཡིག་གསུམ་མཐའ་རུ་མུཿ་བཞག་པའི། །སྔགས་ཀྱིས་ཡེ་ཤེས་གཤེགས་པར་བསྐུལ། །ཏིང་ངེ་འཛིན་གྱི་ལྷ་རྣམས་ནི། །ཨོཾ་ཨཱཿ་ཧཱུཾ་མུཿ་བདག་ལ་བསྡུ། །བདག་ཉིད་ཡེ་ཤེས་སེམས་དཔའ་ལ། །ཡེ་ཤེས་སེམས་དཔའ་ཕྱག་རྒྱ་སྟེ། །དེ་ཡང་ཡི་གེ་དེ་སྟོང་བསམ། །བཟོད་པ་གསོལ་དང་གསོལ་བ་གདབ། །བསྔོ་དང་སྨོན་ལམ་གདབ་པར་བྱ། །འདི་ནི་རྣལ་འབྱོར་ཆེན་པོའོ།། །།རང་གི་ལྷ་ཡི་ང་རྒྱལ་གྱིས། །ཡང་དག་ལངས་ལ་སྤྱོད་ལམ་ཀུན། །གཤིན་རྗེ་དགྲ་ཡི་ངོ་བོར་བྱས། །ཟབ་ཅིང་རྒྱ་ཆེའི་རང་བཞིན་ནོ། །ཁ་ཟས་ཅི་ཟ་བདུད་རྩིར་བརླབ། །ཁ་ཡི་ཧོམ་ཁུང་སྲེག་ཁང་དུ། །ལྷ་རྣམས་ཚིམ་བྱ་སྲེག་རྫས་རྣམས། །ལག་པའི་གཟར་བུས་བསྟབ་པར་བྱ། །ཕྱི་ཡི་ཁྲུས་རྣམས་བྱད་པ་ནི། །འགྲོ་བ་རང་བཞིན་དག་བསམས་ལ། །དབང་བསྐུར་བ་ཡི་ཆོ་ག་བཞིན། །ལྷ་མོའི་བུམ་ཆུས་བཀྲུས་པར་བསམ། །ཕྱི་ཐུན་ལ་ཡང་དེ་བཞིན་དུ། །དཀྱིལ་འཁོར་བསྡུ་བའི་བར་དུ་བྱ། །བཟའ་བ་ཟོས་ནས་ཉལ་བའི་ཚེ། །ཤེས་རབ་སྙིང་རྗེར་ལྡན་པས་ཉལ། །ལྡང་བའི་དུས་ན་དཔལ་ལྡན་པའི། །ལྷ་མའི་དབྱངས་ཀྱིས་བསྐུལ་བར་བསམ། །འདི་ལྟར་འདི་ལས་དང་པོ་པའི། །རྣལ་འབྱོར་པ་ཡི་བྱ་བ་ཡིན། །ཡེ་ཤེས་འགའ་སོགས་རྣལ་འབྱོར་བས། །སྦྱོར་བ་རྣམ་གསུམ་རིམ་བཞིན་བྱ། །སྤྱོད་ལམ་དག་གི་ཚེ་ན་ཡང༌། །ལུས་ངག་ཡིད་ཀྱི་བྱ་བ་ཀུན། །ཕྱག་རྒྱ་སྔགས་ཀྱི་བདག་ཉིད་དུ། །བསམས་ཏེ་བྱ་བ་ཀུན་བྱའོ། །དཔའ་མིག་ཅིག་ཅིག་མཐོང་བ་ལ། །བདེ་སྡུག་རྣམ་པར་གྲོལ་འགྱུར་བ། །སེམས་ཉིད་ཁོ་ན་ཡིན་པའི་ཕྱིར། །རྟོག་མེད་སེམས་གནག་ག་ལ་འགྱུར། །སྔོན་དུ་བསྙེན་པ་བྱ་བའི་ཆོ་གའོ།། །། བསྙེན་པས་བགེགས་ཀྱི་ཚོགས་བཅོམ་ལ། །གཞན་གྱི་དོན་ལ་བརྩོན་བྱ་བའང༌། །མཚན་མ་བརྟན་པོ་ཡང་དང་ཡང༌། །མཐོང་ཞིང་གནང་བ་ཐོབ་ནས་བྱ། །ཡིད་དགའ་བ་ཡི་ས་ཕྱོགས་ནི། །ཤར་དང་བྱང་གི་ཆ་ཉིད་དོ། །དབུས་མཐོ་ཤར་དང་བྱང་གཞོལ་བར། །བགེགས་བསྐྲད་ཕུར་བཏབ་གཏོར་མ་སྦྱིན། །


DTG047_Page_0057
[མ་དཔེ་གཟིགས་ན་འདིར་གནོན།]

གསོལ་བཏབ་རྣལ་འབྱོར་གསུམ་བྱས་ནས། །སངས་རྒྱས་ལ་ཡང་གསོལ་བ་གདབ། །མཆོད་ཡོན་ཞབས་བསིལ་ཕུལ་ནས་སུ། །སྦྱིན་སྲེག་གིས་ཀྱང་རབ་ཚིམ་བྱ། །དེ་ནས་མཁའ་ལ་བཀོད་ནས་སུ། །བགེགས་མེད་ས་ནི་ལེགས་བརྐོས་ནས། །སླར་ཡང་ས་ཡིས་རབ་ཏུ་དགོང༌། །སྔོན་དུ་དུས་རིང་བསྙེན་བྱས་པའི། །གཤིན་རྗེ་གཤེད་ཀྱི་སྦྱོར་ལྡན་པས། །དཀྱིལ་འཁོར་ས་ནི་རྫོགས་བྱས་ཏེ། །ཨོཾ་བྷུ་ཁཾ་ཞེས་སྔགས་ཀྱིས་ནི། །མཁའ་ལ་རི་ནི་བསྐྱེད་པར་བྱ། །ཧཱུཾ་ལཾ་ཧཱུཾ་ཞེས་རྡོ་རྗེའི་བདག །ཉིད་དུ་ས་བྱས་དེ་བྱིན་བརླབ། །ཨོཾ་མེ་དི་ནཱི་བཛྲཱི་བྷ་བ་བཛྲ་བནྡྷ་ཧཱུཾ། སྔོན་བཞིན་ལྷ་ཡི་ཏིང་ངེ་འཛིན་ནི། །ས་ཡི་དབུས་སུ་རྣལ་འབྱོར་བཞི། །རིམ་བཞིན་བྱས་ནས་རྫོགས་པ་དང༌། །སངས་རྒྱས་ཀུན་བདག་གཤིན་རྗེ་ནི། །རྡོ་རྗེ་དྲིལ་འཛིན་གཙོ་བོ་ལ། །གྲོགས་པོ་རྡོ་རྗེ་དྲིལ་འཛིན་བཞི། །གཏི་མུག་སོགས་བདག་ལྷན་ཅིག་ཏུ། །སྤྲུལ་པས་དཀྱིལ་འཁོར་གསུམ་ལ་ནི། །མཆོད་ནས་གསོལ་བ་གདབ་པར་བྱ། །དེ་བཞིན་གཤེགས་པ་ཀུན་ཞི་བ། །དེ་བཞིན་གཤེགས་པ་ཀུན་གྱི་གནས། །ཆོས་ཀུན་བདག་མེད་པ་ཡི་མཆོག །དཀྱིལ་འཁོར་དམ་པ་བཤད་དུ་གསོལ། །མཚན་རྣམས་ཐམས་ཅད་ཡང་དག་རྫོགས། །མཚན་མིན་ཐམས་ཅད་ཡང་དག་སྤངས། །ཀུན་དུ་བཟང་པོ་སྐུ་ཡི་མཆོག །དཀྱིལ་འཁོར་དམ་པ་བཤད་དུ་གསོལ། །ཞི་བའི་ཆོས་མཆོག་ཡང་དག་བྱུང༌། །ཡེ་ཤེས་སྤྱོད་པ་རྣམ་སྦྱོང་བ། །ཀུན་དུ་བཟང་པོ་གསུང་གི་མཆོག །དཀྱིལ་འཁོར་དམ་པ་བཤད་དུ་གསོལ། །སེམས་ཅན་ཀུན་གྱི་སེམས་ཆེན་པོ། །རང་བཞིན་དག་པས་དྲི་མ་མེད། །ཀུན་བཟང་ཐུགས་མཆོག་ཁ་ལོ་སྒྱུར། །དཀྱིལ་འཁོར་དམ་པ་བཞད་དུ་གསོལ། །དེ་ནས་གཤིན་རྗེ་གཤེད་ལངས་ཏེ། །མ་དང་ཊ་ཡི་ཡི་གེ་ལས། །གཡས་དང་གཡོན་གྱི་མིག་གཉིས་སུ། །ཉི་མ་དང་ནི་ཟླ་བ་བསམ། །བློ་ཅན་འགྲོ་བ་ཀུན་བལྟས་ནས། །དཀྱིལ་འཁོར་ས་ལ་སྟང་སྟབས་བསྐོར། །རྐང་མཐིལ་ཨ་ལས་རྡོ་རྗེར་བསྒོམ། །གཡས་པས་རྡོ་རྗེ་གསོར་བྱེད་ཅིང༌། །གཡོན་པས་དྲིལ་གསིལ་འགྱིང་བག་ཏུ། །གནས་ཏེ་མཆེ་གཙིགས་ཧཱུཾ་བརྗོད་དོ། །ལྷ་དང་ལྷ་མིན་ལ་སོགས་པ། །གདུག་པའི་ཚོགས་རྣམས་བསྐྲད་པར་བྱ། །ཉོན་ཅིག་བགེགས་ཀྱི་ཚོགས་རྣམས་


DTG047_Page_0058
[མ་དཔེ་གཟིགས་ན་འདིར་གནོན།]

ཀུན། །སྐུ་གསུང་ཐུགས་ལ་གནས་པ་ཡི། །བདག་ནི་དཔལ་ལྡན་རལ་གྲི་འཛིན། །སྲུང་བའི་འཁོར་ལོའི་དོན་བྱེད་པ། །རལ་གྲི་འབར་བའི་གཟུགས་འདི་ཡིས། །གལ་ཏེ་གང་གིས་བདག་ཚིག་འདས། །ལུས་ངག་གསུམ་ལས་སྐྱེས་པ་བཅད། །འཇིག་པར་འགྱུར་བར་གདོན་མི་ཟ། །དེ་ནས་ས་ལ་བསྐོར་བྱས་ཏེ། །མགེགས་མེད་བྱ་ཕྱིར་ཕུར་བུས་གདབ། །ཕུར་བ་སྟོད་ནི་ཁྲོ་བོ་ལ། །སྨད་ནི་རྡོ་རྗེ་རྩེ་གཅིག་པ། །ཕུར་བའི་གསང་སྔགས་བཟླས་པ་ལྔ། །མཚམས་དང་དབུས་སུ་གདབ་པར་བྱ། །འོད་ཟེར་རྣོན་པོ་རབ་འཕྲོ་བས། །ཕྱོགས་བཅུར་ཡང་དག་གནས་པ་ཡི། །བགེགས་ཀྱི་ཕུང་པོ་ཀུན་གཞོམ་མོ། །ཤིན་ཏུ་བགེགས་མེད་རབ་མཐོང་ནས། །མཚམས་བཅས་ཕྱོགས་བཅིང་སྔོན་བཞིན་དུ། །བློ་ཡིས་བྱས་ནས་ས་རྫོགས་ནས། །སྟ་གོན་གནས་པའི་རིམ་བཞིན་བྱ། །བཾ་སེར་ལས་བྱུང་ལྷ་མོ་ནི། །འོད་དང་བཅས་པ་བཀུག་ནས་སུ། །མཆོད་པ་ཕུལ་ནས་གསོལ་བ་གདབ། །སྐྱོབ་པ་སངས་རྒྱས་ཐམས་ཅད་ཀྱི། །སྤྱོད་པའི་ཚུལ་དང་ཁྱད་པར་གྱི། །ས་དང་ཕ་རོལ་ཕྱིན་པ་ལ། །ལྷ་མོ་ཁྱོད་ནི་དཔང་བཙུགས་ཏེ། །ཤཱཀྱ་སེང་གེ་སྐྱོབ་པ་ཡིས། །ཇི་ལྟར་བདུད་ཀྱི་སྡེ་བཅོམ་པ། །དེ་ལྟར་བདག་གིས་བདུད་སྡེ་ལས། །རྒྱལ་བར་བྱས་ཏེ་དཀྱིལ་འཁོར་བྲི། །དྲི་ཞིམ་ཆུ་ཡིས་ས་བྱུགས་ནས། །མེ་ཏོག་མཛེས་པ་སྣ་ཚོགས་དགྲམ། །བདུད་རྩི་དང་ལྡན་དྲི་ཆུ་ཡིས། །ལྷ་རྣམས་མཎྜལ་རབ་ཏུ་བྱ། །དེ་ལ་དཀྱིལ་འཁོར་རང་སྔགས་ཀྱིས། །བཀུག་ལ་མཚམས་སོགས་བཅིང་བྱས་ནས། །མཆོད་བསྟོད་བདུད་རྩི་མྱང་བར་བྱ། །དེ་ནས་བུམ་པའི་སྟ་གོན་ནི། །རིན་ཆེན་བུམ་པ་མི་གནག་པ། །མགྲིན་པ་རས་ཀྱིས་བཅིངས་པ་ལས། །ལྡུམ་བུ་མཆོག་གིས་ཁ་ལ་བརྒྱན། །རིན་ཆེན་སྨན་འབྲུ་སྣ་ལྔ་དང༌། །དྲི་ཆུས་བཀང་བ་མངོན་པར་བསྔགས། །སྣ་ཚོགས་མེ་ཏོག་བརྒྱུས་པ་ཡི། །སྐུད་པའི་རྩེ་མོར་རྡོ་རྗེ་གདགས། །བུམ་ཁར་བཞག་ལ་ལག་པས་བཟུང༌། །རྒྱལ་བའི་དཀྱིལ་འཁོར་གཙོ་ལ་སོགས། །སྔགས་བཟླས་ནས་ནི་མཆོད་ཡོད་འབུལ་། །མེ་ཏོག་དབུལ་དང་སྤོས་སོགས་མཆོད། །དྲི་སོགས་པདྨའི་སྣོད་ལེགས་གཞག །ཉིན་དང་ཚན་མོ་ཐུན་གསུམ་དུ། །གཏོར་མ་སྦྱིན་ཞིང་དེ་བཞིན་བཟླ། །དེ་དག་དཀྱིལ་འཁོར་ཕྱི་རོལ་ལ། །གནས་ནས་རྒྱལ་བ་


DTG047_Page_0059
[མ་དཔེ་གཟིགས་ན་འདིར་གནོན།]

གཙོ་བོ་ཡིས། །དེ་ནས་གཡོན་གྱི་སྣོད་ལ་ཆུ། །བླུགས་ནས་དེ་ཡིས་གཏོར་བས་ན། །བདག་དང་སློབ་མ་ཐམས་ཅད་ཀྱི། །ཆུ་ཡིས་དབང་བསྐུར་གྱུར་བ་ཡིན། །དེ་ནས་རང་གི་ལྕེ་བརླབས་ལ། །གཡས་པས་སྤོར་ཕོར་བཏེག་ནས་སུ། །པུས་མོ་བཙུགས་ནས་བློ་ལྡན་པས། དཀྱིལ་འཁོར་གཙོ་དང་སངས་རྒྱས་ཞུ། །མགོན་པོ་ཞེ་སྡང་གཤིན་རྗེ་ཡི། །རིག་པའི་རྒྱལ་པོ་ཕྱག་འཚལ་བསྟོད། །བདག་གིས་གཤིན་རྗེའི་དཀྱིལ་འཁོར་ནི། །མགོན་པོ་བྲི་བར་འདོད་པ་སྟེ། །སློབ་མ་རྣམས་ལ་ཕན་ཕྱིར་དང༌། །ཁྱེད་རྣམས་ལ་ཡང་མཆོད་པའི་ཕྱིར། །དེ་བས་བཅོམ་ལྡན་གུས་ལྡན་ལ། །བྱིན་གྱིས་བརླབ་པ་མཛད་པར་གསོལ། །སངས་རྒྱས་རྣམས་ནི་བདག་ལ་དགོངས། །འགྲོ་བ་འཁོར་བའི་དོན་བྱེད་རྣམས། །འབྲས་གནས་བྱང་ཆུབ་སེམས་དཔའ་དང༌། །གསང་སྔགས་ཀྱི་ནི་ལྷ་གཞན་དང༌། །འཇིག་རྟེན་སྐྱོང་བའི་ལྷ་རྣམས་དང༌། །འབྱུང་པོ་ཡང་དག་རྫོགས་པ་ཡི། །སངས་རྒྱས་བསྟན་པར་མངོན་དགའ་དང༌། །གང་སུ་ལྷ་ཡི་མིག་ཅན་རྣམས། །ཆེ་གེ་ཞེས་པའི་རྡོ་རྗེ་ཡིས། །དཀྱིལ་འཁོར་གཤིན་རྗེ་ལས་འབྱུང་བ། །ཇི་ལྟར་ཉེ་བར་སྤྱོད་ནུས་པས། །འགྲོ་དག་དོན་དུ་བྲི་བར་བྱ། །སློབ་མ་དང་བཅས་པ་དག་ལ་ནི། །ཐུགས་རྗེས་ཉེ་བར་བཟུང་ནས་སུ། །ཐམས་ཅད་དཀྱིལ་འཁོར་ལ་བཅུག་ནས། །བྱིན་གྱིས་བརླབ་པ་མཛད་དུ་གསོལ། །དེ་ལྟར་སྙན་གསན་ལན་གསུམ་དུ། །བྱས་ནས་གཙོ་ལ་ཡོན་ཆབ་སོགས། །ཕུལ་ནས་བསྲུངས་ཏེ་ཕྱིར་བྱུང་ནས། །སློབ་མ་བརྟགས་པ་གཟུང་བར་བྱ། བྱས་པ་གཟོ་དང་ཁེངས་པ་མེད། རིགས་མདོག་ན་སོར་ལྡན་པ་དང༌། །ཐེག་པ་མཆོག་ལ་མངོན་དགའ་བའོ། །དེ་ལས་བཟློག་པའི་སློབ་མ་ནི། །དམན་པས་སྟ་གོན་གནས་མི་བྱ། །ཚེ་འདིར་འབྲས་བུ་འདོད་པ་ཡིས། །ཕྱི་མའི་ཚེ་ལ་མི་འབྱུང་ངོ༌། །སྐྱེས་བུ་ཚེ་ཕྱི་མར་འདོད་པས། །འདིར་ཡང་འབྲས་བུ་རྒྱས་པར་འགྱུར། །དེ་ལྟར་སློབ་མ་ལ་སྨྲས་ནས། །བློ་ལྡན་རང་གིས་ནང་དུ་འགྲོ། །ཡོན་ཏན་དེ་ལྡན་སློབ་མ་ཡིས། །སྒོ་ནས་གསོལ་བ་གདབ་པར་བྱ། །དགའ་ཆེན་ཁྱོད་བདག་སྟོན་པ་བས། །སློབ་དཔོན་ཁྱོད་ནི་དགོངས་སུ་གསོལ། །བྱང་ཆུབ་ཆེན་པོའི་ཚུལ་བརྟན་པ། །མགོན་པོ་ཆེན་པོ་བདག་ལ་སྩོལ། །དེ་ཉིད་དམ་ཚིག་བདག་ལ་སྩོལ། །བྱང་ཆུབ་སེམས་ཀྱང་བདག་ལ་སྩོལ། །


DTG047_Page_0060
[མ་དཔེ་གཟིགས་ན་འདིར་གནོན།]

སངས་རྒྱས་ཆོས་དང་དགེ་འདུན་ཏེ། །སྐྱབས་གསུམ་དག་ཀྱང་བདག་ལ་སྩོལ། །ཐར་པ་ཆེན་པོའི་གྲོང་ཁྱེར་དུ། །མགོན་པོ་བདག་ནི་འཇུག་པར་བགྱིད། །དེ་སྟར་ལན་གསུམ་བརྗོད་ནུས་པའི། །སློབ་མ་རབ་ཆགས་མཛེས་པ་ལ། །སློབ་དཔོན་རྩེ་གཅིག་ཏུ་བྱས་ལ། །ཚིག་འདིས་གནང་བ་སྦྱིན་པར་བྱ། །འདིར་ཤོག་བུ་འདི་ཐེག་ཆེན་གྱི། །ཆོ་ག་སྔགས་ཀྱི་སྤྱོད་པའི་ཚུལ། །ཁྱོད་ལ་ཡང་དག་བསྟན་པར་བྱ། །ཚུལ་ཆེན་ལ་ཁྱོད་བསྙེན་པ་གྱིས། །རྫོགས་པའི་སངས་རྒྱས་གང་འདས་དང༌། །དེ་བཞིན་གང་དག་མ་བྱོན་དང༌། །ད་ལྟར་བྱུང་བའི་མགོན་པོ་རྣམས། །འགྲོ་ལ་ཕན་ཕྱིར་ཞུགས་པ་ཀུན། །དེ་དག་གིས་ནི་གསང་སྔགས་ཀྱི། །ཆོ་ག་མཆོག་བཟང་འདི་བརྙེས་ནས། །དཔའ་བོས་བྱང་ཆུབ་ཤིང་དྲུང་དུ། །ཐམས་ཅད་མཁྱེན་པ་མཉམ་མེད་བརྙེས། །གསང་སྔགས་ཆོ་ག་མཉམ་མེད་དེ། །ཤཱཀྱ་སེང་གེ་ལ་སོགས་ཀྱིས། །བདུད་སྡེ་ཤིན་ཏུ་མི་བཟད་པའི། །དཔུང་ཆེན་དག་ཀྱང་དེ་ཡིས་བཅོམ། །འཇིག་རྟེན་འཇུག་པར་རབ་ཤེས་ནས། །འཁོར་ལོ་བསྐོར་ནས་མྱ་ངན་འདས། །དེ་བས་ཀུན་མཁྱེན་ཐོབ་བྱའི་ཕྱིར། །བུ་ཡིས་བློ་གྲོས་འདི་གྱེས་ཤིག །དེ་ནས་བཤགས་དང་ཡི་རང་སོགས། །བྱས་ནས་བྱང་ཆུབ་སེམས་བསྐྱེད་ལ། །སྲུང་བ་བྱས་ཏེ་དེ་ནས་ནི། །ཐུགས་གསུང་སྐུ་ཡི་བྱིན་བརླབས་ལ། །ཡི་གེ་གསུམ་དང་ལྡན་པ་དེར། །མཆོད་པ་རྣམས་ཀྱིས་མཆོད་པར་བྱ། །དེ་ནས་ལྷ་ཡི་སྔགས་བཟླས་པའི། །སོ་ཤིང་སོར་ནི་བཅུ་གཉིས་པ། །མེ་ཏོག་རྩེར་ལྡན་སྦྱིན་པར་བྱ། །ཐོ་རངས་ལངས་ནས་ཤར་བལྟས་ཏེ། །ས་ལམ་ལྷུང་ལྕི་བ་ཡིས། །སལ་བ་ཀོ་ཙམ་བྱུགས་ཏེ། །རྩེ་མོ་བཅའ་ཞིང་དེ་རུ་དོར། །ཞིང་དང་རྒྱས་སོགས་གར་གྲུབ་བལྟ། །དེ་ནས་ཁ་བཤལ་ཧུབ་གསུམ་ཆུ། །བྱིན་ལ་སྔགས་འདི་བཟླས་པར་བྱ། །ཨོཾ་ཧྲཱིཿ་བིཤུདྡྷ་དྷརྨཿ་སརྦ་པཱ་པཾ་ནི་ཙ་སྱ་ཤོ་དྷ་ཡ་སརྦ་བི་ཀ་ལ་པཾ་ཨ་པ་ན་ཡ་ཧཱུཾ། གཤིན་རྗེའི་སྔགས་བཟླས་ཀུ་ཤ་ནི། །སྟན་དང་སྔས་སུ་སྦྱིན་པར་བྱ། །མདུད་པ་གསུམ་ལྡན་སྲུང་སྐུད་ནི། །དཔུང་པ་གཡོན་པར་བཅིང་བར་བྱ། །དེ་ནས་སེམས་ཀྱི་སྦུངས་བསྐྱེད་ཕྱིར། །ཟབ་ཅིང་རྒྱ་ཆེའི་ཆོས་བཤད་དེ། །ཐེག་པ་ཆེན་པོ་ཆེར་འབྱུང་བའི། །ལམ་མཆོག་འདི་ནི་དཔལ་དང་ལྡན། །དེ་ཕྱིར་ཁྱོད་རྣམས་དོང་བས་ན། །རང་བྱུང་སྐལ་བ་


DTG047_Page_0061
[མ་དཔེ་གཟིགས་ན་འདིར་གནོན།]

ཆེན་པོ་པ། །ཡོད་དང་མེད་ལས་རྣམ་འདས་ཤིང༌། །ཟབ་མོ་རྟོག་གེ་ཐམས་ཅད་ཀྱིས། །རབ་ཏུ་མི་རྟོགས་གནས་མེད་པ། །སྤྲོས་པ་ཀུན་དང་བྲལ་བ་སྟེ། །སྤྲོས་པ་རྣམས་ཀྱིས་མ་སྤྲོས་པ། །རྒྱུ་དང་ལས་ལས་ཀུན་དུ་བྱུང༌། །ལས་དང་བྱ་བ་སོགས་དང་བྲལ། །བདེན་པ་གཉིས་ལ་གནས་པ་ཡི། །ཐེག་པ་རབ་ཀྱི་མཆོག་འདི་ཡི། །ཚུལ་ལ་གནས་ན་ཐོབ་པར་འགྱུར། །ཀུ་ཤའི་མལ་དུ་ཉལ་བཅུག་ལ། །རྨི་ལམ་མཐོང་བ་དགེ་མི་དགེ། །ཐོ་རང་ས་བདག་ལ་མ་འཛེམ་པར། །སྨྲོས་ཤིག་ཅེས་ནི་བསྒོས་ལ་བཏང༌། །དེ་ནས་སྡོམ་པ་བཟུང་ནས་སུ། །དཀྱིལ་འཁོར་སྦྱོར་བ་བསྒོམ་བྱས་ཏེ། །མཆོད་ཅིང་གསོལ་བ་བཏབ་བྱས་ལ། །ནམ་མཁའ་ལ་ནི་དགོད་པར་བྱ། །ཁ་དོག་ལྔ་ཡི་སྐུད་པ་ལ། །ཡཀྵེ་མ་མེད་བཀོད་དེ། །གཤིན་རྗེ་དགྲ་ལྔའི་སྐུ་རུ་བསམ། །ཞེ་སྡང་གཤིན་རྗེར་བདག་བལྟས་ལ། །ཛ་ལས་བྱུང་བའི་ཉི་ཟླའི་མིག །འབར་མིག་ལྕགས་ཀྱུས་དྲངས་ནས་སུ། །རང་མདོག་སྐུད་པའི་ནང་དུ་ཐིམ། །གཏི་མུག་རལ་གྲི་དང་ལྷན་ཅིག །ཐིག་སྣ་དྲངས་ལ་བསྒྲིལ་བར་བྱ། །ཨ་ནྱོ་ནྱཱ་ནུ་ག་ཏ་སརྦ་དྷརྨཱཿ་པ་ར་སྦ་ར་ཨ་ནུ་པྲ་བིཥྚ་སརྦ་དྷརྨཱ་ཏྱནྟ་ཨ་ནུ་པྲ་བིཥྚ་སརྦ་དྷརྨཱཿ་མཐའ་མ་དཀར་ལྡན་ལག་པ་ཡིས། །གཟུང་ལ་སྔགས་འདི་བཟླས་པར་བྱ། །སམ་ཡ་སཱུ་ཏྲ་མཱ་ཏི་ཀྲ་མ་ཧཱུཾ། རིང་ཐུང་དཀྱིལ་འཁོར་ཉིས་འགྱུར་ལ། །སྦོམ་ཕྲ་སྒོ་ཡི་ཉི་ཤུ་ཆ། །དྲི་ཞིམ་བདུད་རྩི་ལྔ་ཡིས་ནི། །བྱུགས་ནས་བསྲུངས་ལ་སྣོད་གཙང་བཞག །དེ་ལ་མཆོད་པ་རྣམས་ཀྱིས་མཆོད། །དེ་ནས་སྐུད་པ་བསྔགས་བྱས་ལ། །ཛྫ་ཡིག་གསུམ་གྱིས་གཏང་བར་བྱ། །དེས་ཀྱང་ཛྫ་ཡིག་གསུམ་གྱིས་དྲངས། །ལྟེ་བར་ཁུ་ཚུར་གཡོན་གྱིས་བཟུང༌། །ནུབ་ཏུ་གནས་ནས་ཤར་བལྟས་ཏེ། །མཁས་པས་ནམ་མཁར་ཐིག་གདབ་བོ། །ཨོཾ་བཛྲ་ས་མ་ཡ་སཱུ་ཏྲ་མཱ་ཏི་ཀྲ་མ་ཧཱུཾ། སེམས་ཅན་དོན་བྱེད་དུས་དག་ཏུ། །མཁའ་ཁྱབ་པ་ཡི་དེ་བཞིན་གཤེགས། །འདིར་གཤེགས་པ་ཡི་དོན་གྱི་ཕྱིར། །ཐིག་སྐུད་སྒྲ་ཡིས་བསྐུལ་བར་བསམ། །ལྷོ་ནས་བྱང་དུ་ཁ་བལྟས་ཏེ། །ཤར་གྱི་ཐིག་ནི་རབ་ཏུ་གདབ། །དེ་བཞིན་བྱང་ནས་ལྷོར་བལྟས་ཏེ། །ནུབ་ཀྱི་ཕྱོགས་ཀྱི་སྐུད་པ་བརྟག །དེ་ནས་ཤར་དུ་དྲངས་པ་ཡིས། །བྱང་ཕྱོགས་ཀྱི་ནི་ངོས་གདབ་པོ། །ཤར་ནས་བདེན་བྲལ་མཚམས་བལྟས་ཏེ། །ལྷོ་ཡི་ཐིག་ནི་གདབ་པར་བྱ། །དེ་ནས་མེ་ཡི་མཚམས་གནས་ཏེ། །རླུང་གི་མཚམས་སུ་


DTG047_Page_0062
[མ་དཔེ་གཟིགས་ན་འདིར་གནོན།]

གདབ་པར་བྱ། །བདེན་བྲལ་མཚམས་ནས་དབང་ལྡན་དུ། །དྲངས་ཏེ་གྲྭ་ཡི་ཐིག་གདབ་བོ། །དེ་ནས་ཐིག་རྣམས་ཅི་རིགས་པར། །ལྷག་ཆད་མེད་པ་ཉིད་དུ་གདབ། །དེ་ནས་དབུས་སུ་ཕུར་བཏབ་སྟེ། །དེ་ལ་བརྟོད་པའི་སྲད་བུ་ནི། །དཀྱིལ་འཁོར་ཉིས་འགྱུར་དག་གིས་སོ། །རྡོ་རྗེ་ར་བ་ལ་སོགས་བསྐོར། །འདི་ཡི་ཕྱི་ཡི་འཁོར་ལོ་ནི། །གྲུ་བཞི་པ་ལ་སྒོ་བཞི་པ། །རྟ་བབས་བཞི་ཡིས་རབ་ཏུ་མཛེས། །ཁ་ཁྱེར་བཞི་དང་ལྡན་པ་ལ། །རྡོ་རྗེ་དྲིལ་བུ་ལ་སོགས་བརྒྱན། །སྒོ་ཡི་མཚམས་དང་གྲྭ་བཞི་རུ། །ཟླ་ཕྱེད་རྡོ་རྗེ་མཛེས་པར་བྱ། །དེ་ཡི་ནང་གི་འཁོར་ལོ་ནི། །སྣ་ཚོགས་རྡོ་རྗེ་འཇིགས་པ་སྟེ། །རྡོ་རྗེ་ཕྲེང་བས་རབ་མཛེས་པས། །ཀུན་ནས་ཡོངས་སུ་བསྐོར་བར་བྱ། །ཧཱི་ལས་ཉི་མ་ཟླ་བ་དག །མིག་ཏུ་བསམས་ཏེ་ཁྲོ་བོ་ཡིས། །བལྟ་བར་བཅས་པས་ཀུན་བལྟས་ནས། །སྒོ་རྣམས་དག་ནི་ལེགས་བྱ་བ། །སྒོ་ནི་འཁོར་ལོའི་བརྒྱད་ཆར་བྱ། །སྒོ་ཁྱུད་ཆེན་པོ་སྤངས་པ་ཡིན། །སྒོ་ཡི་ཚད་དུ་ཁྱམས་བྱ་སྟེ། །དེ་བཞིན་ལྷ་ཡི་སྣམ་བུའོ། །ཁ་ཁྱེར་སྒོ་ཡི་ཕྱེད་དུ་སྟེ། །འགྲམ་དང་གཤོག་པ་དེ་ཡི་ཚད། །དྲ་བ་དྲ་ཕྱེད་ཉི་ཟླ་དང༌། །རྔ་དང་རྡུང་དཀྲོལ་ལ་སོག་ས་རྒྱན། །དེ་ཕྱེད་ཚོན་སྣ་ལྔ་ཡིས། །རྡོ་རྗེར་བའང་དེ་ཡི་ཚད། །རྟ་བབས་སྒོ་ཡི་སུམ་འགྱུར་ལ། །བ་དན་དྲིལ་བུ་ལ་སོགས་རྒྱན། །རིན་ཆེན་ཀུན་དང་ལྕགས་རྣམས་དང༌། །འབྱུང་ཁུང་དག་གི་ཕྱེ་མ་ལ། །ཡི་གེ་ལྔ་བཀོད་བྱིན་བརླབ་བྱ། །འབར་བར་གྱུར་དང་གསང་སྔགས་བཟླས། །ཨོཾ་བཛྲ་ཙི་ཏྲ་ས་མ་ཡ་ཧཱུཾ། སེམས་ཅན་ཁམས་རྣམས་གྲོལ་མཛད་ཅིང༌། །དེ་ནི་ཆོས་དབྱིངས་རོ་ཡིན་ནོ། །དེ་ལྟར་དཀྱིལ་འཁོར་འདྲི་བའི་ཚེ། །རླུང་ལ་སོགས་པ་བྱུང་གྱུར་ན། །ཁྲོ་བོའི་སྦྱོར་དང་ལྡན་པ་ཡིས། །རླུང་སོགས་བཅིང་བ་ཚུལ་བཞིན་བྱ། །གཤིན་རྗེ་གཤེད་པོ་རྒྱལ་ཀུན་གཙོ། །དཀྱིལ་འཁོར་ཀུན་གྱི་གཙོར་གྱུར་པ། །སྐྱོན་ཀུན་ལས་ནི་རྣམ་གྲོལ་བ། །དེ་ཡི་དབུས་སུ་ལེགས་གནས་ཏེ། །དབང་ལྡན་མཚམས་ནས་མཉམ་པོ་རུ། །བླ་མས་གཡོན་གྱི་ཁུ་ཚུར་གྱིས། །དཀར་དང་སེར་དང་དེ་བཞིན་དམར། །ལྗང་གུ་སྔོན་པོ་དེ་བཞིན་ནོ། །མཉམ་དང་གཡས་སྐོར་ཚད་ལྡན་པར། །དཀྱིལ་འཁོར་རི་མོ་བྲི་བར་བྱ། །མཉམ་པོ་བྲི་བར་རི་མོ་ནི། །སྒོ་ཡི་ཉི་ཤུ་ཆ་ཡིན་ཏེ། །དེ་ལས་སྦོམས་ན་ནད་འབྱུང་ལ། །ཕྲས་ན་ནོར་རྣམས་ཟད་པར་


DTG047_Page_0063
[མ་དཔེ་གཟིགས་ན་འདིར་གནོན།]

འགྱུར། །ཀྱག་ཀྱོག་བྱུང་ན་འཐབ་མོ་འབྱུང༌། །ཆད་ན་སློབ་མ་བླ་མ་འཆི། །གཡས་སྐོར་དུ་ནི་མ་བྲིས་ན། །རྡུལ་ཚོན་གྱི་ནི་དངོས་གྲུབ་ཉམས། །རྡོ་རྗེ་རྩེ་མོ་དཀར་པོའི་ངོས། །གཞན་སེར་བ་ཡི་མདོག་ཡིན་ཏེ། །གཞན་ནི་པདྨ་རཱ་གའི་ངོས། །དེ་བཞིན་མ་ར་ཀ་ཏ་སྟེ། །ནང་དུ་སྔོན་པོར་ཤེས་པར་བྱ། །དེ་ནི་རྡུལ་ཚོན་རིམ་པར་བཤད། །ཤར་གྱི་ཕྱོགས་སུ་དཀར་པོ་སྟེ། །ལྷོ་ཡི་ཕྱོགས་སུ་སེར་པོ་ཡིན། །ནུབ་ཕྱོགས་དམར་པོ་བྱ་བ་སྟེ། །བྱང་ཕྱོགས་ལྗང་གུ་དག་ཏུ་འདོད། །དབུས་མའི་ས་ཡི་ཆ་ཉིད་ནི། །ཨིནྡྲ་ནཱི་ལ་རབ་ཏུ་འབར། །རྟག་ཏུ་ཤེས་རབ་ཐབས་ལྡན་པས། །ཤིན་ཏུ་མཉམ་གཞག་ཡང་དག་བྲི། །ཟླ་བ་ཉི་མའི་གདན་དག་ལ། །རྡོ་རྗེའི་འོད་ཀྱིས་ཀུན་འཁྲིགས་པའི། །རྡོ་རྗེ་དབུས་སུ་ཡང་དག་བྲི། །འཁོར་ལོ་འོད་འབར་རབ་འཇིགས་པའི། །འཁོར་ལོ་ཤར་གྱི་ར་ལ་བྲི། །རིན་ཆེན་འོད་འབར་རབ་འཁྲིགས་པའི། །རིན་ཆེན་ལྷོ་ཡི་ཕྱོགས་སུ་བྲི། །ནུབ་ཏུ་པདྨའི་སྤྲིན་འཁྲིགས་པའི། །པདྨ་དམར་པོ་སྡོང་བུར་བཅས། །རལ་གྲིའི་འོད་ཀྱི་རབ་འཁྲིགས་པའི། །རལ་གྲི་བྱང་གི་ར་ལ་བྲི། །ཐོ་བ་འབར་འོད་གསལ་བ་ནི། །ཤར་གྱི་སྒོ་རུ་བྲི་བར་བྱ། །བེ་ཅོན་འབར་འོད་འཁྲིགས་པ་ཡི། །བེ་ཅོན་ལྷོ་ཡི་སྒོ་རུ་དགོད། །པདྨ་འབར་བ་རབ་འཇིགས་པའི། །འོད་དང་ལྡན་པ་ནུབ་སྒོར་བྲི། །རལ་གྲི་འབར་བའི་སྤྲིན་ལྡན་པ། །བྱང་གི་སྒོ་རུ་བྲི་བར་བྱ། །མེ་མཚམས་ལ་སོགས་གྲྭ་བཞི་རུ། །གོ་རིམས་བཞིན་དུ་འཁོར་ལོ་དང༌། །རྡོ་རྗེ་པདྨ་ཨུཏྤལ། །འོད་དང་ལྡན་པ་བྲི་བར་བྱ། །ཕྱི་ཡི་མེ་མཚམས་ལ་སོགས་པར། །ཟླ་བས་གང་བའི་སྣོད་བཞི་བྲི། །དེ་ལྟར་འཁོར་ལོ་རྫོགས་པ་དང༌། །མཁའ་ལ་བཀོད་པ་ཕབ་བྱས་ལ། །དེ་ནས་སྔོན་བཞིན་ཤེས་རབ་དང༌། །སྦྱོར་བྱས་འཁོར་ལོ་བསྐྱེད་ནས་གདོན། །དེ་ལ་སྤྱན་སོགས་བྱིན་བརླབ་དང༌། །ཐུགས་གསུང་སྐུ་ཡི་རྡོ་རྗེ་དང༌། །དབང་བསྐུར་ལ་སོགས་བྱ་བ་ཡིན། །དེ་ནས་སྔོན་བཞིན་ཡེ་ཤེས་ཀྱི། །འཁོར་ལོ་དགུག་དང་བགེགས་བསྐྲད་སོགས། །བྱས་ལ་སྒོ་བཞིའི་ཁྲོ་བོ་ཡི། །སྔགས་ལ་ཛཿ་སོགས་མཐར་ལྡན་པས། །དགུག་གཞུག་བཅིང་དང་དབང་བྱ་དང༌། །ར་བ་དྲ་བ་ལ་སོགས་བྱ། །དོ་ནས་ལྷ་མོས་སྔོན་བཞིན་མཆོད། །བསྟོད་


DTG047_Page_0064
[མ་དཔེ་གཟིགས་ན་འདིར་གནོན།]

དང་བདུད་རྩི་མྱང་བ་དང༌། །རྡུལ་ཡབ་སྦྲང་ཡབ་བསིལ་ཡབ་དང༌། །ཁམས་དང་སྐྱིད་མོས་ཚལ་དག་དང༌། །གཟིམས་མལ་དང་ནི་གདན་ཁྲི་དང༌། །མྱུར་འགྲོ་རྟ་དང་གླང་པོ་དང༌། །ཡིད་བཞིན་ནོར་བུ་དཔག་བསམ་ཤིང༌། །རྟ་བབ་ས་དང་ནི་བླ་རེ་སོགས། །བཟའ་བཏུང་བྲོ་མཆོག་སྣ་ཚོགས་དང༌། །གླུ་གར་ལ་སོགས་མཐའ་ཡས་མཆོད། །དེ་ནས་ཅི་འབྱོར་གཞན་དག་ལ། །བཟླས་པ་བྱས་ཏེ་མཉེས་པར་བྱ། །བདུད་རྩི་དང་ལྡན་དྲི་ཆུ་ཡིས། །མཎྜལ་ལེགས་པར་བྱས་ནས་སུ། །ཨོཾ་ཧྲཱིཿ་ཥྚྲྀཿ་ཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་སྭཱ་ཧཱ། འབྱུང་པོ་འཁོར་དང་བཅས་པ་ཐམས་ཅད་ཨཾ་ཀུ་ཤ་ཛཿ་ཨོཾ་ཧྲཱིཿ་ཥྚྲྀཿ་ཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་སྭཱ་ཧཱ། འབྱུང་པོ་འཁོར་དང་བཅས་པ་ཐམས་ཅད་ཀཱི་ལ་ཡ་ཧཱུཾ་ཕཊ། དགུག་དང་ཕུར་བུས་གདབ་པ་སྟེ། །དེ་ལྟར་བྱས་པས་འོད་ཉིད་དུ། །གྱུར་ལས་རང་རང་ཡི་གེ་སྟེ། །དེ་ལས་མཚན་མ་དེ་ལས་སྐུ། །ཧྲཱིཿ་ཥྚྲྀཿ་ཝི་ཀྲྀ་རྣམ་བཞི་ནི། །དབང་པོ་གཤིན་རྗེ་ཆུ་ལུས་ངན། །འབྱུང་པོ་མེ་ལྷ་སྲིན་པོ་རླུང༌། །ཏ་ཨཱ་ན་ན་ལས་བྱུང་བའོ། །ཧཱུཾ་ཧཱུཾ་ཕཊ་དང་ཡི་གེ་གསུམ། །ཉི་མ་ཟླ་བ་ཚངས་པའོ། །ཕཊ་དང་སྭཱ་སྟེ་ཡི་གེ་གཉིས། །ས་བདག་དང་ནི་ལྷ་མ་ཡིན། །ཧཱ་ནི་ཁྱབ་འཇུག་ལ་སོགས་སོ། །ཐམས་ཅད་ཞལ་གསུམ་ཉིས་འགྱུར་ཕྱག །དང་པོ་རང་རང་ཕྱག་མཚན་ལ། །ལྷག་མ་བདེ་བར་གཤེགས་དང་མཐུན། །ཞལ་མདོག་རིགས་ཀྱི་གཙོ་བོ་འདྲ། །མིག་སོགས་བརླབ་དང་ལུས་ངག་ཡིད། །དབང་བསྐུར་བ་ཡང་འདྲ་བྱས་ནས། །གཏོར་མ་བདུད་རྩི་བཞིན་བརླབས་ལ། །ལྕེ་ཡང་བརླབས་ཏེ་སྦུབས་ཀྱིས་སུ། །རང་སྔགས་བརྗོད་པས་བརྔུབ་པར་བྱ། །ཨོཾ་ཨིནྡྲཱ་ཡ་ཧྰྲིཿ་ཡ་མ་ཥྛྀཿ་ཝ་རུ་ཎཱ་ཡ་ཝི། གུ་བེ་རཱ་ཡ་ཀྲྀ། ཨཱི་ཤཱ་ནཱ་ཡ་ཏ། ཨགྣ་ཡེ་ཨཱ། ནཻ་རཱྀ་ཏྱ་ཡན། བཱ་ཡ་བེན། ཙནྡྲཱ་ཡ་ཧཱུཾ། ཨརྐ་ཡ་ཧཱུཾ། བྲཧྨ་ཎཱ་ཡ་ཕཊ། བ་སུ་དྷ་རཱ་ཡ་ཕཊ། བེ་མ་ཙི་ཏྲཱ་ཡ་སྭཱ། སརྦ་བྷུ་ཏེ་བྷྱོ་ཧཱ། ཧ་ཧ་ཧ་ཧ་ཧཱུཾ། ཧི་ཧི་ཧི་ཧི་ཧཱུཾ། དེ་ཡིས་ཕྱོགས་སྐྱོང་ཚིམ་བྱས་ནས། །འཐོར་འཐུང་བྱས་པ་ནང་དུ་འགྲོ། །དེ་ནས་དཀྱིལ་འཁོར་ཞལ་བསྲོའི་ཕྱིར། །སྦྱིན་སྲེག་གིས་ནི་ཚིམ་བྱ་སྟེ། །སྦྱིན་སྲེག་ལས་ལས་འབྱུང་བ་ལྟར། །ཞི་དང་རྒྱས་པ་བྱ་བར་འདོད། །དེ་ནས་སློབ་མ་རྣམས་གཞུག་ཕྱིར། །དང་པོར་བདག་ཉིད་འཇུག་པར་བྱ། །བདག་ཉིད་སྐུ་སོགས་བྱིན་བརླབ་ཅིང༌། །སྣང་བ་ཐོབ་


DTG047_Page_0065
[མ་དཔེ་གཟིགས་ན་འདིར་གནོན།]

པར་གྱུར་པ་ཡིས། །སློབ་མ་གཞུག་པའི་དོན་དུ་ནི། །དེ་ཉིད་རབ་ཏུ་བརྗོད་པར་བྱ། །ཨོཾ་ནམ་མཁའ་ལས་བྱུང་མཚན་ལྡན་ཕྱིར། །ཐོག་མ་ཐ་མ་མེད་པའི་མཆོག །སེམས་དཔའ་རྡོ་རྗེ་ཆེ་རང་བཞིན། །རྡོ་རྗེ་སེམས་དཔར་དེང་གྲུབ་མཛོད། །ཀུན་མཆོག་དངོས་གྲུབ་ཆེན་པོ་སྟེ། །དབང་ཕྱུག་ཆེན་པོ་ལྷག་པའི་ལྷ། །རྡོ་རྗེ་འཛིན་པ་ཀུན་གྱི་རྒྱལ། །མི་འགྱུར་མཆོག་ཏུ་བདག་གྲུབ་མཛོད། །ཉེས་པ་མི་མངའ་རྟག་པ་ཁྱོད། །འདོད་ཆགས་ཀུན་གྱི་རྗེས་ཆགས་པ། །འདོད་ཆགས་ཆེན་པོ་དགའ་བ་ཆེ། །བཅོམ་ལྡན་དེ་ཉིད་ཀྱིས་གྲུབ་མཛོད། །ཤིན་ཏུ་དག་པ་ཀུན་གྱི་མཆོག །གདོད་ནས་གྲོལ་བདེ་བཞིན་གཤེགས། །ཀུན་དུ་བཟང་པོ་ཀུན་བདག་ཉིད། །བྱང་ཆུབ་སེམས་དཔར་བདག་གྲུབ་མཛོད། །དངོས་གྲུབ་ཆེན་པོ་ཀུན་གྱི་མཆོག །དབང་ཕྱུག་ཆེན་པོ་ཕྱག་རྒྱའི་མཆོག །གྲུབ་པའི་རྡོ་རྗེ་ཆེར་བསྟོད་པ། །རྡོ་རྗེ་སྙེམས་བདག་བདག་མཛོད་ཅིག །དེ་ནས་བདེན་པའི་བྱིན་རླབས་བརྗོད། །སེམས་ཅན་ཀུན་གྱི་ཡིད་ཁྱབ་ཅིང༌། །སེམས་ཅན་ཀུན་གྱི་སྙིང་ལ་ཞུགས། །སེམས་ཅན་ཀུན་གྱི་ཡབ་གྱུར་ཉིད། །འདོད་ཆགས་དམ་ཚིག་མཆོག་གྱུར་པའི། །མགོན་པོ་བདེན་པ་འདི་ཡིས་ནི། །བདག་ལ་ཁྱེད་ཀྱིས་འདོད་རྫོགས་ཤོག །ཆོས་རྣམས་གཟུགས་བརྙན་ལྟ་བུ་སྟེ། །དག་ཅིང་གསལ་ལ་རྙོག་པ་མེད། །གཟུང་དུ་མེད་ཅིང་བརྗོད་དུ་མེད། །རྒྱུ་དང་ལས་ལས་ཀུན་དུ་བྱུང༌། །དེ་ཉིད་དེ་ཉིད་བསྐྱེད་པ་ནི། །དེ་དག་བདེན་པས་དཀྱིལ་འཁོར་ལ། །གཟུགས་བརྙན་གསལ་བར་སློབ་མ་ནི། །སྡིག་མེད་པར་ནི་ཐམས་ཅད་མཐོང༌། །ཐུན་མོང་སྡོམ་བཟུང་སློབ་མ་ནི། །སྔོན་བཞིན་སྐུ་སོགས་འོད་གསལ་བ། །ཡོལ་བས་བར་དུ་བཅད་ནས་སུ། །ཀུན་བྱེད་བུམ་པའི་ཆུ་ཡིས་སུ། །བཀྲུས་པའི་དར་རས་དམར་པོ་ཡིས། །བུ་སྡུག་དེ་ཡི་ངོ་བཀབ་ལ། །ཁྱོད་སུ་ཞེས་ནི་དྲི་བར་བྱ། །བདག་ནི་སྐལ་ལྡན་ཡིན་ཞེས་སྨྲ། །ཁྱོད་ཅི་དགའ་ཞེས་དྲིས་པ་ལ། །སྐལ་བ་བཟང་ལ་བདག་དགའ་ཞེས། །འཇུག་པ་པོས་ཀྱང་སྨྲ་བར་བྱ། །དེ་ནས་ཕྲེང་བ་སྦྱིན་བྱ་སྟེ། །ཨུ་དུམྺཱ་ར་མནད་ར། །ཡོངས་འདུ་དག་ནི་མ་ལི་ཀ །ཀར་ནི་ཀ་ཡི་ཕྲེང་བ་ནི། །ལེགས་པར་མནོས་ཏེ་བུས་ཟུང་ཤིག །ཨོཾ་ཨཱཿ་ཧཱུཾ། བླ་མ་སློབ་དཔོན་མགོན་རྗེས་སུ། །འབད་པ་ཆེན་པོས་དབང་གི་དོན། །ཇི་ལྟར་སངས་


DTG047_Page_0066
[མ་དཔེ་གཟིགས་ན་འདིར་གནོན།]

རྒྱས་ཆོས་ཆེན་པོས། །རྡོ་རྗེ་སེམས་དཔའ་དབང་བསྐུར་ལྟར། །དེ་བཞིན་བདག་ཀྱང་དབང་བསྐུར་ཏེ། །བདག་ལ་དོན་མཆོག་སྩལ་དུ་གསོལ། །གཙོ་ལ་ཡོན་སོགས་རབ་ཏུ་དབུལ། །གཏང་སེམས་ཡང་དག་བསྐྱེད་པར་བྱ། །དེ་ཡི་སྙིང་གར་རྡོ་རྗེ་ནི། །མེ་ཏོག་བཅས་པའི་སྙིང་པོར་བཞག །། ཨོཾ་སརྦ་ཡོ་ག་ཙིཏྟ། ཨུཏྤཱ་ཡཱ་མི་སུ་ར་ཏ་ས་མ་ཡ་སྟྭཱཾ་ཧོ་སིདྷི་བཛྲ་ཡ་ཐཱ་སུ་ཁཾ། དེ་རིང་ཁྱོད་ལ་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་པར་འགྱུར། །དེ་བཞིན་གཤེགས་པ་ཐམས་ཅད་ཀྱི་དམ་པའི་གསང་ཆེན་འདི། །དཀྱིལ་འཁོར་དུ་མ་ཞུགས་པ་རྣམས་ལ་སྨྲ་བར་མི་བྱའོ། །དད་པ་མེད་པ་ལ་ཡང་མི་རུང་ངོ༌། །ཞེས་བརྗོད་པར་བྱའོ། །ཐོ་སོགས་སྔགས་ཀྱིས་དྲང་བྱ་ཞིང༌། །ཡི་གེ་གསུམ་གྱིས་གཞུག་པར་བྱ། །ནང་དུ་སྡོམ་པ་འཛིན་དུ་གཞུག །དེ་ནས་ཚིག་འདི་བརྗོད་པར་བྱ། །དེ་རིང་ཁྱོད་དེ་བཞིན་གཤེགས་པ་ཐམས་ཅད་ཀྱི་རིགས་ལ་རབ་ཏུ་ཆུད་དོ། །དེ་བས་བདག་གིས་ཁྱོད་ཀྱི་རྡོ་རྗེ་ཡེ་ཤེས་བསྐྱེད་པར་བྱའོ། །ཡེ་ཤེས་གང་གིས་ཁྱོད་ལ་དེ་བཞིན་གཤེགས་པ་ཐམས་ཅད་ཀྱི་དངོས་གྲུབ་ཀྱང་ཐོབ་པར་བྱ་སྟེ། །གཞན་ལྟ་སྨོས་ཀྱང་ཅི་དགོས། །དངོས་གྲུབ་འདི་ནི་ཁྱོད་ཀྱིས་དཀྱིལ་འཁོར་མ་མཐོང་བ་རྣམས་ཀྱི་མདུན་དུ་སྨྲ་བར་མི་བྱའོ། །ཁྱོད་ནི་དམ་ཚིག་ལ་འདའ་བར་མི་རུང་ངོ༌། །དེ་རིང་རྡོ་རྗེ་སེམས་དཔའ་ཉིད། །ཁྱོད་ཀྱི་སྙིང་ལ་ཡང་དག་གནས། །གལ་ཏེ་ཚུལ་འདི་སྨྲས་ན་ནི། །དེ་མ་ཐག་ཏུ་དྲལ་ཏེ་གཤེགས། །ཨོཾ་བཛྲ་ས་ཏྭ་ཧཱུཾ། །པད་གནས་ཡིག་གསུམ་འབར་བ་ཡི། །བདུད་རྩི་ལྔ་ནི་འཐུང་བཅུག་སྟེ། །འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་འདས་ན་སྲེག་པར་བྱེད། །དམ་ཚིག་བསྲུངས་ན་དངོས་གྲུབ་ནི། །རྡོ་རྗེ་བདུད་རྩིའི་ཆུ་འདིས་འགྲུབ། །ཨོཾ་བཛྲོད་ཀ་ཋཿ་དེ་ནས་འདི་སྐད་སྨྲ་བར་བྱའོ། །དེ་རིང་ཕན་ཆད་ཁྱོད་ཀྱི་ཕྱག་ན་རྡོ་རྗེ་ང་ཡིན་གྱིས། །ངས་ཅི་སྨྲས་པའི་བྱ་བ་འདི་ཁྱོད་ཀྱིས་བྱ་དགོས་སོ། །ང་ལ་ཡང་བརྙས་པར་མ་བྱེད་ཅིག །མི་བདེ་བ་མ་སྤངས་པར་ཤི་བའི་དུས་བྱས་ཏེ། དམྱལ་བར་ལྟུང་བར་མ་འགྲོ་ཤིག །དེ་ནས་དེ་ལྟར་སྨྲ་བ་ལ། །སློབ་མས་འདི་ལྟར་སྨྲ་བར་བྱའོ། །དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་ནས། རྡོ་རྗེ་སེམས་དཔའ་བདག་ལ་འབབ་པར་གྱུར་ཅིག །ཅེས་སྨྲ་བར་བྱའོ། །གསོལ་འདེབས་དེ་ཡི་


DTG047_Page_0067
[མ་དཔེ་གཟིགས་ན་འདིར་གནོན།]

གནས་བཞི་རུ། །འབྱུང་ཆེན་བཞི་ཡི་དཀྱིལ་འཁོར་ནི། །ཡི་གེ་བཞི་ལ་དབྱིབས་མདོག་ལྡན། །བ་དན་ལ་སོགས་མཚན་བྱས་པ། །བསམས་ཏེ་རླུང་ལ་སོགས་བསྐྱོད་པ། །རྡོ་བ་དག་ཀྱང་འབབ་གྱུར་ན། །སེམས་ལྡན་འབབ་པ་ཅི་ཞིག་སྨོས། །ཡེ་ཤེས་བབས་ནས་འཕར་གྱུར་ན། །ཏིཥྛ་བཛྲས་བརྟན་པར་བྱ། །ལྕེ་ལ་ཡི་གེ་ཨ་བསམས་ཏེ། དགེ་དང་མི་དགེ་དྲི་བར་བྱ། །དེ་ནས་མིག་གི་སྣང་བ་དྲི། །མེ་ཏོག་འཁོར་ལོ་ལ་དོར་ནས། །པྲ་ཏཱི་ཙྪ་བཛྲ་ཧོ་ཞེས་བརྗོད། །སླར་ཡང་བླངས་ལ་མགོར་བཅིངས་ལ། །པྲ་ཏི་གྲྀཧྣ་ལ་སོགས་བརྗོད། །མཚན་མ་གང་ལ་བབ་པ་སྟེ། །དེ་ནི་དེ་ཡི་ལྷ་རུ་སྦྱིན། །འོད་འབར་ཨོཾ་གཉིས་མིག་ཏུ་བསམ། །རྡོ་རྗེ་སེམས་དཔའ་ཉིད་ཀྱིས་ཁྱོད། །དེ་རིང་ནན་ཏན་མིག་ཕྱེའོ། །བླ་ན་མེད་པའི་རྡོ་རྗེའི་མིག །ཐམས་ཅད་རབ་ཏུ་ཕྱེ་བར་འགྱུར། །བཛྲ་པཱ་ཤ །དཀྱིལ་འཁོར་བཟང་པོ་འདི་ལ་ལྟོས། །ད་ནི་དད་པར་རབ་ཏུ་བསྐྱེད། །སངས་རྒྱས་གདུང་གི་རིགས་སུ་འཁྲུངས། །སྔགས་དང་ཕྱག་རྒྱ་བྱིན་གྱིས་བརླབས། །འགྲོ་བ་ཕུན་ཚོགས་དངོས་གྲུབ་ཀྱང༌། །ཁྱོད་ལ་མངོན་དུ་ཕྱོགས་པར་འགྱུར། །དངོས་གྲུབ་ཐོབ་ཕྱིར་དམ་ཚིག་སྐྱོངས། །གསང་སྔགས་ལ་ཡང་བརྩོན་པར་གྱིས། །རལ་གྲི་གཤིན་དགྲ་ནས་བརྩམས་ནས། །ཇི་སྲིད་གཙོ་བོའི་མཐར་ཐུག་པར། །བསྟན་པའི་དཀྱིལ་འཁོར་འཇུག་པ་ཡིན། །སྤྱི་བོར་ཆུ་ཡིས་གཏོར་བྱ་ཞིང༌། །བཛྲ་ཨ་བྷིཥི་ཉྩ་བརྗོད། །དབུ་རྒྱན་དབང་ཡང་དེ་བཞིན་ཏེ། །དེ་ནས་རྡོ་རྗེ་སྦྱིན་པར་བྱ། །སངས་རྒྱས་ཀུན་གྱི་རྡོ་རྗེའི་དབང༌། །དེ་རིང་ཁྱོད་ལ་སྦྱིན་པར་བྱ། །འདི་དེ་སངས་རྒྱས་ཐམས་ཅད་ཀྱི། །རྡོ་རྗེ་ཟུངས་ཤིག་རབ་གྲུབ་ཕྱིར། །རྡོ་རྗེ་དྲིལ་བུ་འཁྱུད་བྱས་ནས། །བདག་པོའི་དབང་ཡང་བསྐུར་བར་བྱ། །ཨོཾ་བཛྲ་ཨདྷི་པ་ཏི་ཏྭཾ་ཨ་ཕི་ཥིཉྩ་མཱཾ། སྤྱི་བོར་གདབ་ཚུལ་མིང་དབང་བསྐུར། །ཏིཥྛ་བཛྲ་ས་མ་ཡ་སྟྭཾ། ཨོཾ་བཛྲ་ས་ཏྭ་ཏྭཾ་ཨ་བྷི་ཥིཉྩ་མི། །བཛྲ་ནཱ་མ་ཨ་བྷི་ཥེ་ཀ་ཏ། སློབ་དཔོན་གང་དང་གང་དག་གི །ལྷག་པའི་ལྷ་ནི་གང་གང་གི །དེ་ནས་དེ་ཡི་མཚན་དག་ནི། །དཔལ་དང་ཀྱེ་ཡིས་མཛེས་པར་བྱ། །རིག་པའི་དབང་ལྔ་བྱིན་ནས་སུ། །རིག་སྦྱོར་བརྟུལ་ཞུགས་ལུང་བསྟན་དང༌། །དབུགས་དབྱུང་དང་ནི་གསུམ་དུ་འདོད། །ཧཱུཾ་གིས་རྡོ་རྗེ་དེ་བསྐྱེད་ལ། །འདི་ནི་སངས་རྒྱས་ཐམས་ཅད་དེ། །ཕྱག་


DTG047_Page_0068
[མ་དཔེ་གཟིགས་ན་འདིར་གནོན།]

ན་རྡོ་རྗེའི་ལག་ན་འདུག །ཁྱོད་ཀྱིས་རྟག་ཏུ་གཟུང་བར་བྱ། །ཕྱག་ན་རྡོ་རྗེ་བརྟུལ་ཞུགས་བརྟན། །ཨོཾ་སརྦ་ཏ་ཐཱ་ག་ཏ་སིདྡྷི་བཛྲ་ས་མ་ཡ་ཏིཥྛ་མཾ། ཨེ་ཥ་སྟྭཾ་དྷ་ར་ཡཱ་མི་བཛྲ་ས་ཏྭ་ཧི་ཧི་ཧི་ཧི་ཧཱུཾ། ཐོག་མ་ཐ་མ་མེད་པ་ཡི། །རྡོ་རྗེ་སེམས་དཔའ་དགའ་བ་ཆེ། །ཀུན་དུ་བཟང་པོ་ཀུན་བདག་ཉིད། །རྡོ་རྗེ་སྙེམས་བདག་བདག་མཛོད་ཅིག །ཆོས་ཀྱི་དྲིལ་བུ་གཟུང་བར་བྱ། །འདི་དེ་སངས་རྒྱས་ཐམས་ཅད་ཀྱི། །ཤེས་རབ་རྗེས་འགྲོ་བ་ཡི་དབྱངས། །རྟག་པར་ཁྱོད་ཀྱིས་ཀྱང་གཟུང་སྟེ། །རྒྱལ་བ་བྱང་ཆུབ་མཆོག་ཏུ་བཞེད། །ཆོས་ཀྱི་དྲིལ་བུ་དཀྲོལ་བར་བྱ། །སྲིད་པ་རང་བཞིན་གྱིས་དག་ཕྱིར། །རང་བཞིན་གྱིས་ནི་འབྱུང་བར་བྱེད། །རང་བཞིན་དག་པའི་སེམས་དཔའ་མཆོག །སྲིད་པའི་མཆོག་ནི་འགྲུབ་པར་བྱེད། །སྲིད་པའི་བདེ་བ་ཤིན་ཏུ་ཆུང༌། །སྡུག་བསྔལ་ཆེན་པོ་དག་བྱའི་ཕྱིར། །ཤིན་ཏུ་བདེ་བ་དམ་པའི་ཐབས། །དམ་ཚིག་འདི་ནི་རྟག་ཏུ་བསྐྱེད། །འདོད་པའི་ལོངས་སྤྱོད་ཐམས་ཅད་ལ། །ཅི་འདོད་པར་ནི་བསྟན་བཞིན་དུ། །རང་གི་ལྷ་ཡི་སྦྱོར་བ་ཡིས། །བདག་དང་གཞན་ལ་མཆོད་པར་བྱ། །ཇི་སྲིད་འཁོར་བའི་གནས་སུ་ནི། །མཁས་མཆོག་བཞུགས་པར་གྱུར་གྱི་ཚེ། །དེ་སྲིད་མཚུངས་མེད་སེམས་ཅན་དོན། །མྱ་ངན་མི་འདའ་བྱེད་པར་ནུས། །ཤེས་རབ་ཕ་རོལ་ཕྱིན་པའི་ཐབས། །བསོད་ནམས་བྱིན་བརླབས་ཀྱིས་བསྒྲུབས་ལ། །དམ་ཚིག་འདི་ནི་རྟག་ཏུ་བསྐྱེད། །དངོས་གྲུབ་ཐམས་ཅད་ཕུན་སུམ་ཚོགས། །ཕྱག་རྒྱ་ཆེན་པོའི་བརྟུལ་ཞུགས་ནི། །དེ་ཡིས་རབ་ཏུ་སྦྱིན་པར་བྱ། །དེ་ནས་སྡོམ་བཟུང་ཡོན་ཕུལ་ཏེ། །ཕྱག་བྱས་ཚིག་འདིས་གསོལ་བ་གདབ། །བྱང་ཆུབ་རྡོ་རྗེ་སངས་རྒྱས་ལ། །ཇི་ལྟར་མཆོད་ཆེན་བགྱིས་པ་ལྟར། །བདག་ཀྱང་རབ་ཏུ་བསྒྲལ་བའི་ཕྱིར། །ནམ་མཁའི་རྡོ་རྗེ་བདག་ལ་སྩོལ། །འཇུག་སྒོར་པདྨ་འདབ་བརྒྱད་པ། །དར་གྱིས་བཀབ་པར་འདུག་བྱས་ལ། །བཀྲ་ཤིས་ཚིགས་བཅད་གླུ་སྒྲ་དང༌། །རྡོ་རྗེ་དྲིལ་བུ་གསིལ་བ་ཡིས། །སྐྱོབ་པ་ཀུན་གྱིས་མངོན་སུམ་དུ། །ཏིལ་གྱི་གང་བུ་བཞིན་གང་བའི། །རྒྱལ་བས་བུམ་པ་བཟུང་ནས་སུ། །དེ་ཉིད་ལ་ནི་དབང་བསྐུར་བས། །དཀྱིལ་འཁོར་དེ་ཉིད་རིག་པར་བསམ། །ཆུ་དང་དབུ་རྒྱན་སྔོན་བཞིན་ཏེ། །རྡོ་རྗེ་དྲིལ་བུ་ཚིག་འདིས་སྦྱིན། །ཤེས་རབ་ཐབས་ཀྱི་རང་


DTG047_Page_0069
[མ་དཔེ་གཟིགས་ན་འདིར་གནོན།]

བཞིན་དུ། །གྲུབ་པའི་རྡོ་རྗེ་དྲིལ་བུ་འདི། །ཁྱོད་ཀྱིས་དད་པས་རབ་ཟུང་ལ། །རྡོ་རྗེ་ཁྱོད་ཀྱིས་སློབ་མ་བསྡུས། །མིང་ཡང་སྔོན་དང་འདྲ་བར་སྦྱིན། །དེ་ནས་བླ་མས་ཚིག་འདི་བརྗོད། །སངས་རྒྱས་ཀུན་གྱི་རལ་གྲི་ཆེ། །ཁམས་གསུམ་ཀུན་གྱིས་ཕྱག་བྱས་པ། །ལས་ཀྱི་རལ་གྲི་གཅིག་པུ་མཆོག །བདུད་རྣམས་ལས་ནི་རྒྱལ་བཟུང༌། །དཀྱིལ་འཁོར་དེ་བཞིན་ཉིད་བསྟན་པ། །མཉམ་པ་ཉིད་ཕྱིར་གྲུ་བཞི་སྟེ། །ཉེ་བར་བཞག་དང་ཡང་དག་སྤོང༌། །རྫུ་འཕྲུལ་རྐང་པ་དང་དབང་པོ། །གོ་རིམས་བཞིན་དུ་སྒོ་བཞིའོ། །བསམ་གཏན་བཞི་ནི་རྟ་བབས་ཏེ། །ཏིང་ངེ་འཛིན་བཞི་ཁ་ཁྱེར་ཡིན། །དེ་རྟེན་གཟུངས་ཀྱི་རང་བཞིན་ནོ། །འགྲོ་ཀུན་གདུལ་ཕྱིར་ཕྱོགས་སྒོ་ན། །རླུང་གིས་བསྐྱོད་པའི་དྲིལ་སྒྲ་སྒྲོགས། །བྱང་ཆུབ་ཡན་ལག་རྣམ་དག་ཕྱིར། །དྲ་བ་དྲ་ཕྱེད་ལ་སོགས་སྤྲས། །རྣམ་ཐར་བརྒྱད་ལྡན་ཀ་བ་སྟེ། །རྒྱན་བཀོད་བཀྲ་བས་མཛེས་པ་ནི། །བསམ་པ་ཐམས་ཅད་ཡོངས་བསྐོང་ཕྱིར། །སྣ་ཚོགས་ལས་ཀྱི་མཐར་ཐུག་ཕྱིར། །ཕོ་བྲང་སྣ་ཚོགས་རྡོ་རྗེ་འབར། །ཐེག་ཆེན་འཁོར་ལོ་བསྐོར་བའི་ཕྱིར། །རྡོ་རྗེའི་ཕྲེང་བས་ཡོངས་སུ་བསྐོར། །སེམས་ཅན་སེམས་ནི་དགྲོལ་བྱའི་ཕྱིར། །ཚོན་རྣམས་ཡེ་ཤེས་ལྔ་ཡིན་ནོ། །དམ་པའི་ཚོགས་གཉིས་རྫོགས་པའི་ཕྱིར། །བྱང་ཆུབ་སེམས་གང་ཀ་པཱ་ལ། །བདུག་པ་མེ་ཏོག་མར་མེ་དང༌། །བཤོས་དང་བྱུག་པ་ལ་སོགས་ནི། །སྙན་གྲགས་བྱང་ཆུབ་ཡན་ལག་དང༌། །དགའ་དང་ཆོས་ཟས་ལུས་བདེ་ཡིན། །ངོ་ཚ་ཁྲེལ་ཡོད་སྡོམ་པ་ཡིས། །བདེ་བསྐྱེད་དབྱངས་དང་གར་སོགས་ཡིན། །སངས་རྒྱས་བཞུགས་ཕྱིར་གཞལ་ཡས་ཁང༌། །སྙིང་པོ་ལན་ཕྱིར་དཀྱིལ་འཁོར་རོ། །ལྷ་ཡི་དེ་ཉིད་བསྟན་བྱ་བ། །དད་དང་བརྩོན་འགྲུས་དྲན་ཏིང་འཛིན། །སྟོབས་རྣམས་དག་པ་སྒོར་གནས་བཞི། །བྱམས་སོགས་ཚངས་པའི་གནས་པ་བཞི། །རྩ་རྩི་ཀཱ་སོགས་ལྷ་མོ་བཞི། །ཤིན་ཏུ་རྣམ་དག་ལ་སོགས་ལྔ། །ཞེ་སྡང་གཤིན་རྗེ་ལ་སོགས་པའོ། །འཁོར་བས་མ་ཆགས་པདྨ་སྟེ། །ཉི་ཟླ་བྱང་ཆུབ་སེམས་མྱུ་གུ། །གསོ་དང་སྨིན་པར་བྱེད་པའོ། །དེ་ནས་བྱད་དང་ན་སོར་ལྡན། །རི་དགས་ལྟེ་བའི་དྲི་མནམ་དང༌། །གསེར་གྱི་རྣ་ཆ་གཡོ་བ་ཞིག །གཅིག་ཅིག་ལེགས་བཙལ་


DTG047_Page_0070
[མ་དཔེ་གཟིགས་ན་འདིར་གནོན།]

དབུལ་བར་བྱ། །བླ་མས་བཞེས་ཏེ་བྱིན་བརླབས་ལ། །སྦྱོར་བའི་ཆོ་གས་མཉེས་པར་བྱ། །བདེ་བ་མཐེ་བོང་སྲིན་ལག་གིས། །སློབ་མའི་ཁ་རུ་དབབ་པར་བྱ། །བདེ་བའི་བཏུང་བ་རིན་ཆེན་དེ། །བརྟན་པའི་བློ་ཡིས་བཏུང་བར་བྱ། །ཨ་ཧོ་སུ་ཁ་ཞེས་ཀྱང་སྨྲ། །དེ་ནས་བུ་མོ་མིག་ཡངས་མོ། །མཛེས་ཤིང་ནུ་མ་རྒྱས་པ་ཞིག །རང་གི་བུ་ལ་སྦྱིན་པར་བྱ། །མགོ་བོར་ལག་བཞག་གསང་བ་གཏད། །དེ་ཡི་གཟུངས་མ་ལེགས་སྦྱིན་མོ། །དེ་དང་བདེ་བ་མྱང་བར་བྱ། །དེ་ནས་སློབ་དཔོན་ཤེས་རབ་དང༌། །བཅས་པས་དཀྱིལ་འཁོར་ལྷ་དེ་ཉིད། །སློབ་དཔོན་ལས་རྣམས་བསྟན་པར་བྱ། །ཇི་ལྟར་དབང་བསྐུར་ལ་སོགས་འདིས། །སངས་རྒྱས་སོགས་ཀུན་ཐོབ་པ་བཞིན། །བྱང་ཆུབ་སྤྱོད་སོགས་གཞན་དག་དང༌། །འདུལ་སོགས་དགེ་བས་དེ་བཞིན་མིན། །དེ་བས་དམ་ཚིག་བུས་སྲུངས་ཤིག །རྟག་ཏུ་སྡོམ་པ་ཡང་བསྲུང་ངོ༌། །ཤ་ལྔ་བདུད་རྩི་ལྔ་བཟའ་སྟེ། །དེ་ལས་གཞན་པའི་དམ་ཚིག་བསྲུང༌། །དཀོན་མཆོག་གནོད་པ་གསད་བྱ་སྟེ། །བུད་མེད་ཀུན་ཀྱང་སྤྱད་པར་བྱ། །ཕ་རོལ་ནོར་ཡང་བླངས་ནས་སུ། །རྟག་ཏུ་རྫུན་གྱི་ཚིག་ཀྱང་སྨྲ། །རྣལ་འབྱོར་རྒྱུད་ལས་གསུངས་པ། །དེ་ནི་ཆོ་ག་བཞིན་དུ་བསྲུང༌། །དེ་ནས་དེ་བཞིན་གྱུར་ནས། །ལུང་བསྟན་པ་ནི་བྱ་བ་ཡིན། །གཡོན་གྱིས་སྙིང་གར་ཆོས་གོས་གཟུང༌། །གཡས་པ་ཡིས་ནི་མཆོག་སྦྱིན་བྱ། །ཨོཾ། ངས་ཁྱོད་འདི་ལྟར་ལུང་བསྟན་ཡིན། །སྲིད་པའི་ངན་འགྲོ་རྣམས་ལས་བཏོན། །སྲིད་པའི་མཆོག་ཏུ་གྲུབ་པའི་ཕྱིར། །རྡོ་རྗེ་སེམས་དཔའ་དེ་བཞིན་གཤེགས། །ཀྱེ་གཤིན་རྗེ་མཐར་འབྱིན་པ་ནི་བྷུར་བྷུ་བ་སྭཿ་དེ་ལྟར་ལུང་བསྟན་བསྔགས་པ་དེ། །བླ་མེད་ཉིད་དུ་ལུང་བསྟན་ཡིན། །དེ་ནས་དབུགས་དབྱུང་སྦྱིན་བྱ་སྟེ། །གསང་བའི་དཀྱིལ་འཁོར་དམ་པ་ནི། །མཐོང་བ་དད་ནི་ཞུགས་གྱུར་པས། །སྡིག་པ་ཀུན་ལས་ངེས་གྲོལ་ཞིང༌། །ཁྱེད་རྣམས་དེ་ཉིད་ལེགས་པར་གནས། །བདེ་ཆེན་ཐེག་པ་འདི་ལ་ནི། །སླར་འཆི་བ་ནི་ཡོད་མེད་དེ། །མི་ཚུགས་པ་དང་མི་སོང་བས། །ཅིས་ཀྱང་མི་འཇིགས་དགའ་བར་གྱིས། །སྲིད་པ་ཤིན་ཏུ་དག་པའི་ཕྱིར། །སྲིད་པའི་སྡུག་བསྔལ་ལས་ཁྱོད་བཏོན། །སྲིད་པ་ཤིན་ཏུ་གྲུབ་པའི་ཕྱིར། །རྟོག་པ་མཆོག་ཏུ་གྱུར་པ་ཡིས། །དམ་ཚིག་


DTG047_Page_0071
[མ་དཔེ་གཟིགས་ན་འདིར་གནོན།]

སྡོམ་པ་གྲུབ་པ་འདི། །རྟག་ཏུ་ཁྱོད་ཀྱིས་བསྲུང་བར་བྱ། །སངས་རྒྱས་ཀུན་གྱིས་མཐུན་པར་གསུངས། །གང་ཞིག་བསྐྱེད་པ་ཙམ་གྱིས་སུ། །སངས་རྒྱས་ཉིད་དུ་དོགས་མེད་པའི། །བྱང་ཆུབ་སེམས་ནི་བཏང་མི་བྱ། །ཕྱག་ན་རྡོ་རྗེ་གང་ཡིན་པའི། །དེ་ལ་སོགས་པའི་བཀའ་སྩལ་ནི། །ཅི་རིགས་པར་ནི་བརྗོད་པར་བྱ། །དེ་ལྟར་བཀའ་སྩལ་ཐོབ་པ་དང༌། །སློབ་མ་གུས་དང་ལྡན་པ་ཡིས། །བླ་མའི་རྐང་པར་ཕྱག་བྱས་ལ། །ཐམས་ཅད་བསྒྲུབ་པར་ཁས་བླང་ངོ༌། །དེ་ནས་ཞི་བའི་སྦྱིན་སྲེག་ནི། །ཅི་ནུས་པ་ཡང་བྱ་བ་སྟེ། །སློབ་མ་གཡོན་ཕྱོགས་བཞག་ནས་སུ། །དེ་ཡི་སྲིན་ལག་ནས་བཟུང་ལ། །སྦྱིན་སྲེག་བསང་དང་བསྲུང་བ་དང༌། །མེ་ཏོག་བསྡུས་ཏེ་བླ་མ་ལ། །ཕུལ་ལ་མེར་དོར་སྨོན་ལམ་བྱ། །དེ་ལྟར་བྱ་བ་ཀུན་ཟིན་ནས། །དེ་ཉིད་གསུམ་མཐར་མུཿ་ལྡན་པས། །ཡེ་ཤེས་སེམས་དཔའ་གཤེགས་པར་བསྐུལ། །དེ་དང་མཐུན་པར་བསྐྱེད་པར་བསྡུ། །ཐོག་མར་ཨ་ལྡན་གསང་སྔགས་ཀྱིས། །རྡུལ་ཚོན་བསྒྲིམས་ཏེ་བསྡུ་བར་བྱ། །རོལ་མོ་བཅས་པས་སྤྱན་དྲངས་ལ། །ཀཱི་ལི་ཀཱི་ལིས་ཆུ་བོར་དོར། །རྡོ་རྗེའི་སྐམ་ཁས་ཕུར་བུ་གདོན། །རིག་པ་སྤྱན་བཟླས་འོ་མས་བཀྲུ། །བ་ཡི་ལྕི་བས་དཀྱིལ་འཁོར་བྱུག །དེ་སྟེང་དགའ་སྟོན་ལ་སོགས་བྱ། །དཀྱིལ་འཁོར་གྱི་ནི་ཡོ་བྱད་ཀུན། །རྡོ་རྗེ་སློབ་དཔོན་དབང་བར་བཤད། །དེ་ལྟར་བྱ་བ་ལས་དང་པོའི། །རྣལ་འབྱོར་པ་ཡི་བྱ་བ་ཡིན། །གཞན་དག་དབབ་དང་སེམས་ཉིད་ཀྱིས། །བྱས་པ་རྨད་དུ་བྱུང་བ་ཡིན། །དེ་ལྟར་དབང་ཐོབ་སློབ་མ་དེ། །དེང་ཉིད་སློབ་དཔོན་གོ་འཕང་འགྱུར། །དེ་ཡིས་བསྒྲུབ་པ་འབྲས་བཅས་ཕྱིར། །དེས་ནི་བསྒྲུབ་པ་བརྩམ་པར་བྱ། །ལས་ཀྱི་མཐར་ཐུག་རྒྱུད་འདི་རུ། །ཐུན་མོང་མ་ཡིན་འཁོར་ལོ་ནི། །དགོས་པ་མ་ལུས་ཀུན་བྱེད་པ། །དེ་འདིར་བདག་གིས་བྲི་བར་བྱ། །རྣམ་པར་སྣང་མཛད་ལ་སོགས་པས། །ལེགས་བྱུགས་དུར་ཁྲོད་རས་མ་ལ། །དུག་དང་ནིམ་པའི་ཁུ་བ་དང༌། །ཁྲག་དང་དུར་ཁྲོད་སོལ་བ་དང༌། །ད་དུ་ར་སོགས་སྣག་ཚ་དང༌། །རུས་པའི་སྨྱུ་གུས་བྲི་བྱ་བ། །གཅེར་བུ་སྐྲ་བཤིག་གདོང་བསྙེར་ཏེ། །ཁྲོས་པས་ལྷོ་རུ་མངོན་ཕྱོགས་ལ། །སྔགས་བཟླས་རྩེ་གཅིག་པ་ཡིས་བྲི། །ཟླུམ་པོར་བསྐོར་བ་


DTG047_Page_0072
[མ་དཔེ་གཟིགས་ན་འདིར་གནོན།]

གསུམ་བྱ་སྟེ། །དགུ་དང་བཅུ་གཉིས་བཅུ་དྲུག་སྟེ། །ལེ་ཚེ་རྣམས་ནི་བྱས་པ་ལ། །ཡི་གེ་གསང་སྔགས་ས་བོན་བྲི། །དབུས་སུ་ཞེ་སྡང་རྡོ་རྗེ་ཉིད། །ཡང༌། ཤར་དུ་གཏི་མུག་རྡོ་རྗེ་སྟེ། །ལྷོར་ནི་སེར་སྣ་རྡོ་རྗེ་ཡིན། །ནུབ་ཏུ་འདོད་ཆགས་རྡོ་རྗེ་ལ། །བྱང་དུ་ཕྲག་དོག་རྡོ་རྗེའོ། །ཀྵེ་མ་མེ་ད་གཉིས་པ་ཡི། །གཉིས་པའི་ཕྱོགས་བཞིར་ལྷོར་བརྩམས་ནས། །ཤར་གྱི་ཕྱོགས་ལ་ཐུག་གི་བར། །ཁྲོ་བོ་ཡུམ་དང་སྣོད་དག་གི །རེ་རེའི་གོང་མ་མས་རིམ་བཞིན། །དོ་ཡོ་ཡ། མཚམས་ཀྱི་ལེ་ཚེ་བརྒྱད་པོ་ལ། །བདེན་བྲལ་མཚམས་ན་ལྷ་མོ་གཉིས། །རླུང་གནས་མཛོད་ལྡན་མེ་མཚམས་སྣོད། །དབང་ལྡན་ན་ནི་ཐོད་པ་གཉིས། །མེ་མཚམས་ན་ནི་སྒོ་སྲུང་གཉིས། །ཛཱ། ས་རུ་ཎ་ནི་རཙྪ་ནི། །ཀུན་མིང་ཐོག་མ་དབུས་སུ་སྟེ། །ཨ། ལྷོ་རུ་སེར་སྣ་རལ་གྲི་འཛིན། །ནུབ་ཏུ་ཆགས་དང་དབྱངས་ཅན་མ། །བྱང་དུ་ཕྲག་དོག་བདེན་བྲལ་སྣོད། །ཤར་དུ་གཏི་མུག་དང་ཐོ་བ། །མར་མེ་དོ་ཡོ་ཀྵེ་ཡ། །སྔགས་མིང་བསྐུལ་ཚིག་བཅས་པ་དང༌། །ཡི་གེ་གཉིས་པར་མིང་བཅུག་པ། །སྤེལ་ཞིང་སྤེལ་ཞིང་བྲི་བར་བྱ། །དེ་ལྟར་བྲིས་པའི་འཁོར་ལོ་ནི། །ལུགས་དང་ལུགས་མིན་པར་བྱས་ལ། །དོ་ད་ཡོ་ཀྵེ་ཡ་གནས་ལ། །གནས་པ་ཕྱི་ནང་སོ་སོ་ཡི། །ཕྱོགས་མཚམས་བྱེ་བྲག་བཀླག་པ་དང༌། །ཕྱི་ནང་ཐུན་མོང་ཕྱོགས་མཚམས་སུ། །བཀླག་པ་དག་སྟེ་གཉིས་སུ་འདོད། །གནས་པ་སྡེ་ཚན་སོ་སོ་ནི། །གཙོ་བོ་ཁྲོ་བོ་ལྷ་མོ་དང༌། །བནྡྷ་བཞི་རུ་ཤེས་བྱ་སྟེ། །སྡོམ་དང་སོ་སོར་བཀླག་པར་བྱ། །ཡ་ཀྵེ་མ་མེ་ད་པཱཙྪ་ནི་རཱ། །ཛཱ་ས་དོ་རུ་ཎ་ཡོ་ནི་ར། །ཡི་གེ་བཅུ་བདུན་དབང་བྱས་ནས། །རྣམ་པ་དགུ་རུ་བཀླག་པ་ཡིན། །རྩ་བའི་སྔགས་སུ་གདོན་པ་ལ། །ཡི་གེ་སུམ་ཅུ་རྩ་གཉིས་ཀྱང༌། །རྐང་པ་བཞི་རུ་གདོན་པ་དང༌། །སོ་སོར་ཕྱེ་སྟེ་གདོན་པའོ། །ཡ་མ་རཱ་ཛ་ལ་སོགས་པའོ། །དང་པོ་དང་འོག་མཐའ་ལྟག་མཐའ། །གཙོ་བོ་ལྔ་རུ་བསྟན་པ་ཡིན། །དང་པོ་ཐ་མ་ཡི་གེ་བརྒྱད། །གཤིན་རྗེ་དགྲ་ཉིད་ཤེས་པར་བྱ། །ཡ་ཡ་ཡ་ཡ། ཡ་ཡ་ཡ་ཡ། །དང་པོ་མགོ་མཐའ་མཐའ་མའི་ལྟག །སེར་སྣ་རྡོ་རྗེ་ཡིན་པར་འདོད། །མ་མ། དང་པོའི་མཐའ་ལྟག་གཉིས་དང་མགོ །འདོད་ཆགས་རྡོ་རྗེའི་ཡི་གེ་ཡིན། །མེ་མེ། གཉིས་པའི་


DTG047_Page_0073
[མ་དཔེ་གཟིགས་ན་འདིར་གནོན།]

མཐའ་ལྟག་གསུམ་དང་འོག །ཕྲག་དོག་ཉིད་དུ་བསྟན་པ་ཡིན། །དད། གསུམ་པའི་མཐའ་ལྟག་བཞི་དང་འོག །གཏི་མུག་རྡོ་རྗེའི་ཡི་གེ་ཡིན། །ཀྵེ་ཀྵེ། རྐང་པ་དང་པོའི་དབུ་མ་བཞི། །ཁྲོ་བོ་གཅིག་དང་ལྷ་མོ་གསུམ། །རཱ་ཛ་ས་དོ། །རྐང་པ་གཉིས་པའི་དབུ་མ་བཞི། །ལྷ་མོ་གཉིས་དང་ཐོད་པ་གཉིས། །དོ་རུ་ཎ་ཡོ། །རྐང་པ་གསུམ་པའི་དབུ་མ་བཞི། །སྣོད་ཆེན་གསུམ་དང་ཁྲོ་བོ་གཅིག །ཡོ་ནི་རཱ་ཡ། རྐང་པ་བཞི་པའི་དབུ་མ་བཞི། །ཁྲོ་བོ་བཞི་རུ་ཤེས་པར་བྱ། །ཡཙྪ་ནི་རཱ། །འཇུག་པ་དང་ནི་ལྡོག་པ་དང༌། །འཕེལ་དང་འགྲིབ་དང་མུ་བཞི་དང༌། །ཐུན་མོང་དང་ནི་རྣམ་པ་དྲུག །གཅིག་གཉིས་གསུམ་བཞི་གོང་ནས་འཕེལ། །གསུམ་གཉིས་གཅིག་དང་ཟད་མཐར་ཐུག །རཱ་དོ་རུ་ཡོ། ནི་རཱ་ཡཙྪ་ནི་རཱ། ཛཱ་ས་དོ་ན་ཡོ་ཡ། མཐའ་མ་གཅིག་དང་གོང་མ་གསུམ། །འོག་མ་གཉིས་དང་གོང་མ་གཉིས། །འོག་མ་གསུམ་དང་དང་པོ་གཅིག །མ་འདྲེས་བཞི་དང་མུ་བཞིའོ། །འཇུག་དང་ལྡོག་དང་ཐུན་མོང་ནི། །གོང་དུ་བསྟན་པས་ཤེས་བྱ་སྟེ། །འཇུག་ལྡོག་ཕྱོགས་ཀྱི་གཙོ་བོ་ལ། །ཐུན་མོང་ཕྱི་ཡི་ཕྱོགས་ལའོ། །དགུ་དང་བརྒྱད་ཀྱི་ཡི་གེ་ནི། །བཅུ་བདུན་དག་སྟེ་ལྷ་རུ་འདོད། །རེ་རེའང་མགོ་དང་མཐར་ལྡན་པར། །གསང་སྔགས་གདོན་པར་བྱ་བ་ཡིན། །དབུས་ཀྱི་ཕྱོགས་མིན་སྟོང་པ་རུ། །ས་བོན་གཉིས་པར་མིང་སྤེལ་བྲི། །རིམ་པ་གསུམ་པའི་ལེ་ཙེ་ནི། །བཅུ་དྲུག་པ་ལ་བྲི་བྱ་བ། །སྔགས་མིང་བསྐུལ་ཚིག་བཅས་པ་དང༌། །ཡི་གེ་གཉིས་པར་མིང་བཅུག་པ། །སྤེལ་ཞིང་སྤེལ་ཞིང་བྲི་བར་བྱ། །དེ་ལྟར་བྲིས་པའི་འཁོར་ལོ་ནི། །ལུགས་དང་ལུགས་མིན་གཉིས་བྱས་ལ། །སོ་སོར་མཐུན་པར་མགོ་སྤྲད་ལ། །ཏིལ་ཏེ་ཕྱི་རོལ་མར་ཁུས་བྱུག །ཐོད་པ་གཉིས་ནི་ཁ་སྦྱར་བར། །མར་ཁུས་ཁྲག་བླུགས་དེར་བཅུག་ལ། །སྐུད་པ་སྔོན་པོས་ཁྲིས་བདུན་དཀྲི། །དེ་ལ་མེ་ཏོག་ནག་པོ་དང༌། །དུས་སོགས་ནག་པོས་མཆོད་པར་བྱ། །རྒྱལ་པོའི་སྒོ་ཁང་ས་དང་ནི། །གྲོག་ཁྱིམ་ལ་སོགས་ས་དག་ལས། །གཤིན་རྗེའི་དགྲ་ཡི་སྐུ་བྱ་བ། །འཁྲུགས་པ་ཞལ་གཅིག་ཕྱག་གཉིས་པ། །ཁྲུ་གང་ཙམ་གྱི་ཚད་བྱས་ལ། །དེ་ཡི་མདུན་དུ་དཀྱིལ་འཁོར་ནི། །གནག་པ་ཁྲག་གིས་ཆག་ཆག་ཅན། །བྱས་ལ་དེ་སྟེང་སྤོས་ཆེན་དབུལ། །


DTG047_Page_0074
[མ་དཔེ་གཟིགས་ན་འདིར་གནོན།]

དེ་ནས་བདག་གི་གསང་སྔགས་ནི། །བསྐུལ་ཚིག་ལྡན་པར་རབ་ཏུ་བཟླས། །ཁྲོ་བོའི་རྒྱུན་ནི་རྣམ་སྤྲོས་ཏེ། །གཟས་པའི་ལུས་ལས་གོ་ཆ་དང༌། །སྲུང་བ་ཕྲོགས་ནས་བདག་ལ་ཐིམ། །དེ་ནས་དེ་ནི་གོས་མེད་ཅིང༌། །སྡུག་བསྔལ་སྣ་ཚོགས་པས་གཟིར་བསམ། །དེ་བཀུག་མཐར་བྱེད་ལྟོ་བར་གཞུག །ཁྲོ་བོ་གཅན་གཟན་སྣ་ཚོགས་ཀྱིས། །གཤིན་རྗེ་གཤེད་ཀྱི་ལྟོ་བ་ནས། །རྐང་དང་རྒྱུ་མ་ཁྲག་ཚིལ་བུ། །ཕྱོགས་བཅུར་ཁྱེར་ནས་འགྲོ་བར་བསམ། །དེ་ལྟར་བརྟན་པར་གྱུར་པ་དང༌། །ཤིང་གཅིག་དུར་ཁྲོད་ལ་སོགས་པར། །གཤིན་རྗེའི་ལྟོ་བར་བཅུག་ལ་སྦ། །འཁོར་ལོ་དགོས་པ་ཀུན་བྱེད་འདི། །སོ་སོའི་བྱེ་བྲག་ཤེས་བྱས་ལ། །ཞི་སོགས་ལས་རྣམས་ཐམས་ཅད་ནི། །ཇི་ལྟར་མངོན་པར་དགའ་བར་བྱ། །ལ་ལི་བཛྲ་ཞེས་བྱ་ནུས་པ་ཀུན་དང་རྣམ་བྲལ་ཡང༌། །བླ་མའི་རྗེས་འབྲངས་དད་པས་དེ་ཡི་ཕྱོགས་ཙམ་གཟུང་བྱ་སྟེ། །དཀྱིལ་འཁོར་ཆོ་ག་འདི་བྱས་དགེ་བ་དྲི་མེད་གང་ཡིན་པ། །དེ་ཡི་འགྲོ་ཀུན་གཤིན་རྗེ་མ་ལུས་མཐར་ཕྱིན་བྱེད་གྱུར་ཅིག །གཤིན་རྗེ་གཤེད་ཀྱི་དཀྱིལ་འཁོར་གྱི་ཆོ་ག །གཤིན་རྗེ་གཤེད་འབྱུང་བ་ཞེས་བྱ་བ། སློབ་དཔོན་ཆེན་པོ་ལ་ལི་ཏ་བཛྲའི་ཞལ་སྔ་ནས་མཛད་པ་རྫོགས་སོ།། །།རྒྱ་གར་གྱི་མཁན་པོ་ཨ་མོ་གྷ་བཛྲ་དང༌། བོད་ཀྱི་ལོ་ཙཱ་བ་ཅོག་གྲུ་ཤེས་རབ་བླ་མས་བསྒྱུར་ཅིང་ཞུས་ཏེ་གཏན་ལ་ཕབ་པའོ།།

མཆོད་རྟེན་བསྒྲུབ་པའི་ཆོ་ག་མདོར་བསྡུས་པ།
ལ་ལི་ཏ་བཛྲ།


DTG047_Page_0074
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། །བོ་དྷི་ཙིཏྟ་ཙིནྟི་ཏི་ཀ །བོད་སྐད་དུ། མཆོད་རྟེན་བསྒྲུབ་པའི་ཆོ་ག་མདོར་བསྡུས་པ། བཅོམ་ལྡན་འདས་གཤིན་རྗེ་གཤེད་ལ་ཕྱག་འཚལ་ལོ། །དབང་ཐོབ་གཞན་དོན་ལ་དགའ་བས། །དུར་ཁྲོད་ལ་སོགས་དབེན་གནས་སུ། །བྱམས་དང་སྙིང་རྗེ་སྔོན་བཏང་ལ། །ཡོན་ཏན་ཀུན་རྫོགས་མཆོད་རྟེན་གདབ། །དེ་ལ་དང་པོར་བདག་ཉིད་ཀྱིས། །ལས་དང་མཐུན་པའི་ས་བླངས་ལ། །ཁྲུས་དང་རྒྱན་རྣམས་ཅི་རིགས་བགོའོ། །དེ་ནས་རྡོ་རྗེ་རྣམ་བཞི་ཡིས། །ཡང་ན་གར་མོས་ལྷ་ཡང་རུང༌། །བདག་ཉིད་རྫོགས་ནས་འཇིམ་པ་བརྫི། །ཨོཾ་ཧྲཱིཿ་ཥྚྲྀཿ་ཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་ཨཱ་བྲྀ་ཏེ་ཀུ་རུ་སྭཱ་ཧཱ། ཞེས་པས་བརྫིས་འཛིན་རྡོ་རྗེ་བཞི། །གང་བཞིན་ཅི་རིགས་སྤྱན་དྲངས། །མཆོད་བསྟོད་ལས་དང་བསྟུན་ལ་བྱ། །འོད་ཀྱི་གོང་བུར་གྱུར་པ་ལས།།


DTG047_Page_0075
[མ་དཔེ་གཟིགས་ན་འདིར་གནོན།]

འབི་འབི་འོད་ཀྱི་ཐིག་བྲན་ཅན། །གོང་བུར་ཛ་ས་དོ་རུ་བཀོད། །ཡང་ན་ཨོཾ་བཀོད་ཡུམ་གྱི་མཁའ། །འབི་འབིའི་རྡུལ་ཕྲན་རེ་རེ་ལ། །ཡི་གེ་ཡ་ལ་སོགས་པ་བཀོད། །ཐབས་དང་ཤེས་རབ་གཉིས་མེད་གདབ། །སྒྲ་ཡིས་དམ་ཆོས་ལ་སོགས་སྒྲོགས། །མཁའ་འབྱུང་བདེ་གཤེགས་ཀུན་དཔག་མེད། །རྡུལ་རེ་སྐུ་རེ་དེ་ལྟར་བརྟག །མཎྜལ་ལས་མཐུན་རས་དེ་བཞིན། །དང་པོ་སྙིང་པོ་ཕྱག་རྒྱ་དང༌། །ཆེ་གེ་ལས་དང་བསྟུན་པར་གཞུག །དེ་ནས་རྒྱན་དབུལ་སྲོག་འཁོར་རོ། །དར་ཆེན་ཆུ་སྲིན་རྒྱལ་མཚན་གསོལ། །ལེགས་པར་རྫོགས་ནས་གཞན་ཡང་ནི། །དེ་ནས་རང་སྙིང་འོད་ཟེར་གྱིས། །དུས་གསུམ་སངས་རྒྱས་སྤྱན་དྲངས་ལ། །མཆོད་བསྟོད་ལ་སོགས་རྫོགས་བྱས་ལ། །གཉིས་མེད་ཚུལ་དུ་བསྲེ་བར་བྱ། །དེ་ནས་སྙིང་གའི་འོད་ཟེར་གྱིས། །ཙརྩི་ཀཱ་སོགས་ལེགས་པའི་གླུས། །ལྷ་མོ་ཆུ་ཡིས་སྐུ་ཁྲུས་གསོལ། །དེ་ནས་ལས་དང་མཐུན་པ་ཡི། །གསོལ་བ་བཏབ་པས་ཤེས་པར་བྱ། །གདབ་པའི་སྔགས་ནི་ཧྲཱིཿ་ཥྚྲྀའམ། །ནང་གི་ཡི་གེ་བཅུ་བདུན་པའམ། འཁོར་ལོའི་སྔགས་སོགས་སོ་སོ་འམ། །སྡོམ་པ་ལ་ཡང་འགལ་བ་མེད། །རང་རང་ལས་དང་སྦྱར་བའི་སྔགས། །སྡིག་པ་ཞི་བར་བྱ་བ་ཡིས། །སརྦ་པཱ་པ་ཤཱིནྟིཾ་ཀུ་རུ་ཡཾ་ཀུ་རུ་སྭཱ་ཧཱ། ནོར་དང་བསོད་ནམས་རྒྱས་བྱེད་ན། །དབུས་སུ་པཥྚིཾ་ཀུ་རུ་སྭཱ་ཧཱ། དགྲ་ལ་སོགས་པ་དབང་སྡུད་ན། པ་ཤྱཾ་ཀུ་རུ་སྭཱ་ཧཱ། གང་དག་གནོད་བྱེད་གསོད་འདོད་ན། །མཱ་ར་ཡ་ཧཱུཾ་ཕཊ། བསྒྲུབ་བྱ་ངན་བྱེད་པར་འདོད་ན། །བི་དྭེ་ཥ་ཡ་ཕཊ། གནས་ནས་སྤོ་བར་འདོད་པ་ན། །ཨུཙྟས་ཡ་ཕཊ། གང་དག་མནན་པར་བྱ་བར་འདོད་ན། །སྟཾ་བྷ་ཡ་ཧཱུཾ་ལཾ། བསྒྲུབ་བྱ་དགུག་པར་འདོད་པ་ཡིས། །ཨཱ་ཀཪྵ་ཡ་ཛཿ་དེ་ལ་སོགས་པའི་སྦྱོར་བ་ནི། །རྒྱུད་ལས་འབྱུང་བ་བཞིན་དུ་བརྟག །དེ་སྐད་དུ་ཡང༌། ཉེ་བའི་ལས་ནི་གང་གྲུབ་པ། །ཕྱག་རྒྱ་སྙིང་པོ་བྲིས་བཅུག་ན། །གང་བསྒོམས་ཐེ་ཚོམ་མེད་པར་འགྲུབ། །དངོས་གྲུབ་གང་འདོད་སྦྱིན་པར་རེས། །གཞན་ཡང་ནང་གི་སྦྱོར་བ་ནི། །ཏིང་ངེ་འཛིན་ལ་རག་ལས་པ། །གཞན་ནས་བྱུང་བ་ཡང་ཤེས་པར་བྱའོ། །བདག་གི་དགེ་བ་ཅུང་ཟད་འདི། །འགྲོ་བ་གཤིན་རྗེ་གཤེད་གནས་ཐོབ་པར་ཤོག །རྒྱ་གར་གྱི་མཁན་པོ་ལ་ལི་ཏ་བཛྲས་མཛད་པ་རྫོགས་སོ།། །།

སྲུང་བའི་འཁོར་ལོ་སྒྲུབ་པའི་ཐབས།
མར་མེ་མཛད་བཟང་པོ།


DTG047_Page_0076
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། །རཀྵ་སཱ་དྷ་ནོ་པི་ཀ །བོད་སྐད་དུ། །སྲུང་བའི་འཁོར་ལོ་སྒྲུབ་པའི་ཐབས། འཇམ་དཔལ་གཤིན་རྗེ་གཤེད་པོ་ལ་ཕྱག་འཚལ་ལོ། །འཇམ་དཔལ་གཤིན་རྗེ་དགྲ་མགོན་ལ། །ཡང་དང་ཡང་དུ་ཕྱག་བྱས་ལ། །བར་ཆད་ཞི་བར་བྱེད་པ་ཡི། །སྲུང་བ་དམ་པ་བཤད་པར་བྱ། །བསྙེན་པའི་ཆོ་ག་རྫོགས་པ་ཡི། །དེ་ཡིས་བསྒྲུབ་པ་འབྲས་བཅས་ཕྱིར། །ད་ནི་སྲུང་བའི་ལས་རྣམས་བྱ། །རབ་ཏུ་ཤིས་པའི་གནས་མཆོག་ཏུ། །ཁྲུས་བྱས་བྱུག་པ་དྲི་ཞིམ་བྱུག །མཆོག་གི་གོས་བགོ་རྒྱན་རྣམས་གདགས། །བདེ་སྟན་སྐྱིལ་ཀྲུང་ཤར་བལྟས་ལ། །ཕན་པའི་སེམས་དང་བྱམས་པར་ལྡན། །སྤྲོ་བས་འདོད་པའི་ལྷར་བསྐྱེད་དེ། །བསོད་ནམས་ཚོགས་བསགས་གཉིས་མེད་བསྲེ། །མཚན་བཅས་སྔགས་བཟླས་གཏོར་མ་སྦྱིན། །གསར་ཞིང་དགེ་བའི་རས་དག་ལ། །ཙནྡན་ག་པུར་བྱུག་བྱ་སྟེ། །སྐྱེས་བུ་ཞི་བྱེད་གུར་ཀུམ་སྟེ། །བུད་མེད་ལ་ནི་གི་ཝང་ངོ༌། །སེར་བ་ལ་སོགས་ཞི་བྱེད་དང༌། །ནད་དང་གནོད་པ་ཐམས་ཅད་ལ། །གུར་གུམ་དག་གིས་ཡང་དག་བྱ། །དེ་དག་བྲི་བའི་སྨྱུ་གུ་ཡང༌། །གསེར་རམ་དངུལ་ལམ་ཤིས་པར་བྲི། །དེ་དག་བྲི་བའི་རིམ་པ་ཡང༌། །ཕྱི་དྲོ་མཎྜལ་ལེགས་བྱས་ཏེ། །མཆོད་པར་ལྡན་པས་ཡང་དག་བྲི། །བདེན་པ་བདར་ལ་བྲི་བར་བྱ། །ཐིག་ཆེན་བརྒྱད་ནི་ཡང་དག་གདབ། །ཟླུམ་པོར་བསྐོར་བ་གསུམ་བྱས་ཏེ། །ཐ་མ་ཐོང་བས་བསྐོར་བར་བྱ། །ཐིག་ཐུང་རྣམས་ཀྱང་གདབ་བྱ་སྟེ། །དགུ་དང་བཅུ་གཉིས་བཅུ་དྲུག་མིག །དབུས་ཀྱི་རེའུ་མིག་དགུ་པ་ལ། །དབུས་སུ་ཡ་ལ་ཤར་དུ་ཀྵེ། །ལྷོ་རུ་མ་བྲི་ནུབ་ཏུ་མེ། །བྱང་དུ་ད་སྟེ་མཚམས་བཞི་རུ། །རཀྵ་རཀྵ་བར་མིང་གཞུག །རིམ་པ་གཉིས་པ་ཤར་བརྩམས་ནས། །ཡ་ཙ་ནི་ར་ཛ་ས་དོ་རུ། །ཎ་ཡོ་ནི་རཱ། རིམ་པ་གསུམ་པའི་ཤར་བརྩམས་ནས། །ཤར་གྱི་རེའུ་མིག་དང་པོ་ལ། །ཨོཾ་ཧྲཱིཿ་ཥྚྲྀཿ་ཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཆེ་གེ་མོ་རཀྵ་རཀྵ། དེ་འོག་རེའུ་མིག་གཉིས་པ་ལ། །ཆེ་གེ་མོ་རཀྵ་རཀྵ། དེ་ལྟར་རེའུ་མིག་བཅུ་དྲུག་པ། །སྤེལ་ཞིང་སྤེལ་ཞིང་དགོད་པར་བྱ། །དེ་ལྟར་བྲིས་པའི་འཁོར་ལོ་ནི། །ལུགས་དང་ལུགས་མིན་གཉིས་བྱས་ཏེ། །ས་སྐོར་ལུགས་སུ་བྱུང་བ་ལ། །གནམ་སྐོར་དང་ནི་ལུགས་ལས་བཟློག །ཡིག་


DTG047_Page_0077
[མ་དཔེ་གཟིགས་ན་འདིར་གནོན།]

སྔགས་མཐུན་མཐུན་མགོ་སྤྲོད་དེ། །སོ་སོར་མཉམ་པོར་བྲིས་ལ་དྲིལ། །ཁམ་ཕོར་ཡང་དག་གཙང་མའི་ནང༌། །ཕྱི་རོལ་སྤྲ་ཚིལ་དྲིལ་བྱས་ཏེ། །རྩི་མར་སྦྲང་རྩིར་བཅས་པ་གཞུག །བས་བསྐྱེད་སྐུད་པ་དཀར་པོ་ཡིས། །ཁྲིས་བདུན་དག་ཏུ་དཀྲི་བར་བྱ། །མཎྜལ་དཀར་པོ་ཁྲུ་གང་ཚད། །པ་ཡི་རྣམ་ལྔ་དྲི་ཡིས་བྱུག །དེ་སྟེང་ཁམ་ཕོར་ཁ་སྦྱར་བཞག །སྟོང་ཉིད་ངང་ལས་ཐིག་ལེ་སྟེ། །དེ་ལས་ཡིག་འབྲུ་ཕྱག་མཚན་སྐུ། །ཀུན་ཀྱང་ཞལ་གསུམ་ཉིས་འགྱུར་ཕྱག །རང་གི་རིག་བཅས་བདེ་བ་གང༌། །སྐུ་མདོག་ཕྱག་མཚན་རྫོགས་པར་བསྐྱེད། །དབང་བསྐུར་བྱིན་རླབས་ཚུལ་བཞིན་བྱ། །རང་ཉིད་ཧཱུཾ་གི་འོད་ཟེར་གྱིས། །ཡེ་ཤེས་འཁོར་ལོ་རྫོགས་པ་དགུག །ཕྱག་དང་མཆོད་སོགས་སྡོམ་པ་གཟུང༌། །དེ་ནས་གཉིས་མེད་འོད་ཟེར་གྱིས། །དམ་ཚིག་འཁོར་ལོ་གཉིས་མེད་བསྲེ། །ཕྱི་ནང་གསང་བའི་མཆོད་པས་མཆོད། །དེ་ནས་ཐུགས་རྗེ་རྗེས་དྲན་ནས། །བསྲུང་བའི་དོན་དུ་འོད་དུ་ཞུ། །ཐིག་ལེ་དག་ལས་ཡི་གེར་གྱུར། །ལྷ་རྣམས་སྔགས་ཀྱི་གཟུགས་ཀྱི་བཞུགས། །དེ་ལ་བྱིན་རླབས་འདི་དག་བྱ། །སྤྱན་གྱི་ཕྱག་རྒྱ་དང་ལྡན་པའི། །ཧཱུཾ་ཡ་མཱན་ཏ་ཀྲྀཏ་བཛྲ་དྷརྨཱ་ཙཀྵུ་པྲ་བེ་ཤ་ཡ་ཞེས་བརྗོད་དོ། །ཞལ་གྱི་ཕྱག་རྒྱ་ཤེས་པ་ཡིས། །ཨོཾ་ཡ་མཱནྟ་ཀ་དེ་ཝ་ཤོ་དྷ་ཡ་ཏྲཾ་ཕྲ་བེ་ཤ་ཡ་ཕཊ་ཅེས་བརྗོད། །གཙུག་ཏུ་ཕྱག་རྒྱ་རབ་བྱས་ལ། །ཨོཾ་ཡ་མཱནྟ་ཀ་བ། ཆེ་བའི་ཕྱག་རྒྱ་ལྡན་པ་ཡིས། །ཨོཾ་གུ་ཧྱ་གུ་ལཾ། དེ་ནས་མཆོད་དང་བསྟོད་བྱས་ལ། །སྤྲོ་བསྡུ་ལྡན་པས་གསང་སྔགས་བཟླས། །བསྲུང་བའི་དོན་དུ་རབ་ཏུ་སྦྱར། །དེ་ནས་ཁམ་ཕོར་དབྱུང་བྱས་ལ། །སྤྲ་ཚིལ་དག་གིས་དྲིལ་བྱས་ལ། །ཡང་ན་རྒྱ་སྐྱེགས་བསྐུས་བྱས་པའི། །དྲི་དང་བསྲེས་ཏེ་བྱུག་པར་བྱ། །བསྒྲུབ་བྱ་ཁྲུས་བྱ་རྒྱན་བགོ་སྟེ། །དྲིས་བྱུགས་མཎྜལ་སྟེང་བཞག་སྟེ། །བདེན་པ་བདར་ཏེ་སྐྱེས་པ་གཡོན། །དཔའི་མིན་དག་ནི་གཡས་སུ་གདགས། །ཕས་ཀྱི་རྒོལ་བའི་དམག་རྣམས་དང༌། །མེ་དང་ཆུ་དང་ནད་ལ་སོགས། །གང་དག་རླུང་དང་སེར་བ་རྣམས། །བསྲུང་བར་འདོད་པའི་རྣལ་འབྱོར་པས། །ཤིན་ཏུ་གཙང་ཞིང་མཐོན་པོར་ནི། །མཎྜལ་ལེགས་བྱུགས་མེ་ཏོག་དགྲམ། །དེ་ནི་རྒྱལ་མཚན་རྩེ་གདགས། །ཉིན་རེ་དུས་གསུམ་ཡང་དག་མཆོད། །


DTG047_Page_0078
[མ་དཔེ་གཟིགས་ན་འདིར་གནོན།]

བསྐུལ་ཚིག་ལྡན་པས་གསང་སྔགས་བཟླས། །གཏོར་མ་རྒྱུན་དུ་སྦྱིན་པར་བྱ། །སྦྱིན་སྲེག་ཐལ་བ་ཕྱོགས་བཅུར་གཏོར། །འཁོར་ལོ་འདོད་པའི་བསྐུལ་ཚིག་ལྡན། །དེ་དག་རབ་ཏུ་ཞི་བར་འགྱུར། །སྲུང་བ་ཀུན་གྱི་མཆོག་ཡིན་པས། །རྣལ་འབྱོར་པ་ཡིས་འབད་པར་བྱ། །སྲུང་བ་ཀུན་གྱི་ཆོ་ག་དམ་པ་འདི། །སྒྲུབ་པ་པོ་དང་སེམས་ཅན་དོན་དུ་བྱས། །དེ་ཡིས་དགེ་བ་ཅུང་ཟད་གང་ཐོབ་དེས། །འགྲོ་ཀུན་བདུད་བཞི་ཀུན་གྱི་གནོད་པ་བསྲུང་བར་ཤོག །དཔལ་མར་མེ་མཛད་བཟང་པོས་མཛད་པ་རྫོགས་སོ།།

གཤིན་རྗེ་གཤེད་ནག་པོ་ཞེས་བྱ་བའི་སྒྲུབ་པའི་ཐབས།
ཉིན་མོར་བྱེད་པའི་གྲགས་པ།


DTG047_Page_0078
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། ཀྲྀཥྞ་ཡ་མཱ་རི་ནཱ་མ་སཱ་དྷ་ནཾ། བོད་སྐད་དུ། གཤིན་རྗེ་གཤེད་ནག་པོ་ཞེས་བྱ་བའི་སྒྲུབ་པའི་ཐབས། དཔལ་ཁྲོ་བོ་འཇིགས་པ་ཅན་ལ་ཕྱག་འཚལ་ལོ། །དཔལ་ལྡན་འཇམ་པའི་རྡོ་རྗེ་མཆོག །དྲག་ཤུལ་ཆེ་ཞིང་འཇིགས་པར་བྱེད། །ཁྲོ་ཆེན་དེ་ལ་ཕྱག་འཚལ་ཏེ། །དེ་ཡི་སྒྲུབ་པའི་ཐབས་བཤད་བྱ། །དེ་ལ་སྔགས་པ་དབང་དང་དམ་ཚིག་དང་ལྡན་པ། སྙིང་རྗེ་ཆེ་བ། །རྟུལ་ཕོད་པ། ཤེས་རབ་དང་ལྡན་པ་དེས། གནས་དུར་ཁྲོད་ལ་སོགས་པ་ཡིད་དགའ་བའི་གནས་སུ་གནས་ཏེ། བརྟུལ་ཞུགས་མཆོག་སྤྱད་པར་བྱའོ། །བདག་ཉིད་རྫོགས་པའི་ཚུལ་གྱིས་ལྷར་བསྐྱེད་དེ། །སྙིང་གར་ཉི་མའི་སྟེང་དུ་ཧཱུཾ་བསམ་པ། །དེ་ལ་འོད་ཟེར་གྱིས་བསྐུལ་ནས་སྤྱན་དྲངས་ཏེ། བཞུགས་པ་ལ། ཕྱི་ནང་གི་མཆོད་པའི་བྱེ་བྲག་དབུལ། དེ་ནས་སྡིག་པ་བཤགས་པ་དང༌། །རྗེས་སུ་ཡི་རང་བྱ་བ་དང༌། །གསུམ་ལ་སྐྱབས་སུ་འགྲོ་བ་དང༌། །བྱང་ཆུབ་ཏུ་སེམས་བསྐྱེད་པ་དང༌། ཚངས་པའི་གནས་བཞི་བསྒོམས་ནས། དེ་ནས་སྟོང་པ་ཉིད་དུ་བསྒོམ་པར་བྱ་སྟེ། གང་གི་རྣམ་པར་ཡང་མི་བསྒོམ་མོ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭཱ་བྷཱ་ཝ་ཨཱཏྨ་ཀོ྅ཧཾ། དེ་རྗེས་ཧཱུཾ་ལས་འོད་འཕྲོས་པས། །སྡང་བ་ཐམས་ཅད་བསྲེག་པར་བྱ། །བསྡུས་པས་རྡོ་རྗེ་གུར་དུ་གྱུར། །ར་བ་དྲ་བ་བསམ་པར་བྱ། །དེ་ནས་ནམ་མཁའི་དབྱིངས་བསམ་བྱ། །དེ་ཡིས་ནང་དུ་གཞལ་ཡས་ཁང༌། །རྡོ་རྗེ་རྒྱ་གྲམ་ཡང་དག་ལྡན། །རྟ་བབས་བཞི་དང་ལྡན་པར་བསྒོམ། །ཉི་གདན་མ་ཧེ་ཡི་དགས་ཏེ། །རྣམ་པ་ལྔ་པོ་བསྒོམ་པ་ནི། །ཨཱ་ལི་བསྒོམས་པས་ཟླ་བ་སྟེ། །ཀཱ་ལི་བསྒོམས་པས་རྟ་བདུན་ཉིད། །གཉིས་ཀྱི་བར་དུ་ཧཱུཾ་བསམས་ཏེ། །དེ་ནས་རྡོ་རྗེ་རྩེ་ལྔ་པ། །དེ་ལ་སྙིང་


DTG047_Page_0079
[མ་དཔེ་གཟིགས་ན་འདིར་གནོན།]

པོས་ཡང་དག་བརྒྱན། །དེ་ལས་འོད་བྱུང་དོན་བྱས་ནས། །སླར་འདུས་དེ་དག་འོད་དུ་ཞུ། །དེ་ལས་རྡོ་རྗེ་སེམས་དཔའ་ནི། །ཞལ་གསུམ་ཕྱག་ནི་དྲུག་པ་ལ། །གཡས་དཀར་གཡོན་པ་དམར་བ་སྟེ། །རྩ་བའི་ལུས་མདོག་ནག་པོའོ། །རྡོ་རྗེ་རལ་གྲི་གྲི་གུག་གཡས། །འཁོར་ལོ་པདྨ་ཐོད་པ་གཡོན། །རྡོ་རྗེ་རྒྱན་གྱིས་རྣམ་པར་བརྒྱན། །གཡོན་པ་བརྐྱང་བའི་ཞབས་ཀྱིས་གནས། །རང་རིག་ལྡན་པ་རབ་ཏུ་བསྒོམ། །རྡོ་རྗེ་པདྨ་དག་བྱ་སྟེ། །བདེ་གཤེགས་ཐིག་ལེ་ཟླ་བར་གྱུར། །དེ་ལས་ཡཀྵེ་མ་མེ་ད། །ཡ་ཙ་ནི་རཱ་ཛཱ་ས་དོ། །རུ་ཎ་ཡོ་ནི་ར་དག་སྟེ། །སོ་སོའི་ས་བོན་དག་ཏུ་གྱུར། །དེ་ལས་སོ་སོའི་སྐུ་བསྐྱེད་དེ། །སྔགས་ཆེན་གྱིས་ནི་དབྱུང་བར་བྱ། །ཨོཾ་ཧྲཱིཿ་ཥྚྲྀཿ་ཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་སྭཱ་ཧཱ། འཁྲུགས་པ་ཞལ་གསུམ་ཕྱག་དྲུག་སྟེ། །ཁ་དོག་ཨིནྡྲ་ནཱི་ལ་འདྲ། །ལག་ན་རྡོ་རྗེ་ཆེན་པོ་སྟེ། །ཞེ་སྡང་ཆེན་པོའི་དོན་མཛད་ནས། །སླར་འདུས་བདག་ཉིད་ལ་ཐིམ་བྱ། །ཛིན་ཛིཀ་གིས་གཏི་མུག་གཙོ། །ཞལ་གསུམ་ཕྱག་དྲུག་པ་ལ་ཞི། །དངས་པའི་ཆུ་ཟླ་དང་མཚུངས་པའོ། །ལག་ཏུ་འཁོར་ལོ་ཐོགས་པ་དབྱུང༌། །གཏི་མུག་ཆེན་པོའི་དོན་བྱས་ནས། །མདུན་གྱི་ཟླ་དཀྱིལ་དག་ལ་དགོད། །རཏྣ་དྷྲྀཀ་གིས་སེར་སྣའི་བདག །བཙོ་མ་གསེར་མཚུངས་ཕྱག་དྲུག་སྟེ། །རིན་ཆེན་ཐོགས་པ་དབྱུང་བར་བྱ། །སེར་སྣ་དག་བྱས་དོན་ཆེན་བྱས། །གཡས་ཀྱི་ཉི་དཀྱིལ་དག་ལ་བསམ། །ཨཱ་རོ་ལྀ་ཀ་གིས་འདོད་ཆགས་གཙོ། །ཞལ་གསུམ་ཕྱག་དྲུག་པདྨ་འདྲ། །ལག་ན་པདྨ་ཐོགས་པ་དབྱུང༌། །འདོད་ཆགས་ཆེན་པོའི་དོན་བྱས་ཏེ། །གཙོ་བོའི་རྒྱབ་ཏུ་བསམ་པར་བྱ། །པྲ་ཛྙཱ་དྷྲྀཀ་གིས་ཕྲག་དོག་བདག །ཞལ་གསུམ་ཕྱག་དྲུག་མརྒད་མཚུངས། །ཕྱག་ན་རལ་གྲི་ཐོགས་པ་དབྱུང༌། །ཕྲག་དོག་དོན་བྱས་རྡོ་རྗེར་གྱུར། །གཡོན་གྱི་ཉི་དཀྱིལ་དག་ལ་བསམ། །མུད་གར་དྷྲྀཀ་གིས་ཐོ་བ་དྲག །མདོག་གནག་ཕྱག་དྲུག་ཐོ་བ་བསྣམས། །དྲག་པོ་ཆེན་པོའི་དོན་བྱས་ནས། །ཤར་གྱི་སྒོ་ལ་བསམ་པར་བྱ། །དཎྜ་དྷྲྀཀ་གིས་བེ་ཅོན་ཅན། །གསེར་མདོག་ལག་ན་བེ་ཅོན་ཐོགས། །ཁྲོ་བ་ཆེན་པོས་དོན་བྱས་ནས། །ལྷོ་ཡི་ཉི་དཀྱིལ་དག་ལ་བཞུགས། །པདྨ་དྷྲྀཀ་གིས་པདྨོ་སྟེ། །མདོག་དམར་ཞལ་གསུམ་ཕྱག་དྲུག་པ། །པདྨ་ཐོགས་པས་དོན་


DTG047_Page_0080
[མ་དཔེ་གཟིགས་ན་འདིར་གནོན།]

བྱས་ཏེ། །ནུབ་ཀྱི་སྒོར་ནི་བསམ་པར་བྱ། །ཁཌྒ་དྷྲྀཀ་གིས་རལ་གྲི་དབྱུང༌། །ཞལ་གསུམ་ཕྱག་དྲུག་ལྗང་གུའོ། །ཕྱག་ན་རལ་གྲི་ཐོགས་པ་སྟེ། །བྱང་གི་སྒོར་ནི་བསམ་པར་བྱ། །དྭེ་ཥ་ར་ཏི་ས་ཙརྩི་དབྱུང༌། །འཁོར་ལོ་ལག་འཛིན་དཀར་མོ་སྟེ། །བྱམས་པ་ཆེན་པོས་དོན་བྱས་ཏེ། །མེ་ཡི་ཟླ་དཀྱིལ་བསམ་པར་བྱ། །བཛྲ་ཧ་ར་ཏིས་ཕག་མོ་དབྱུང༌། །རྡོ་རྗེ་ལག་འཛིན་ནག་མོ་སྟེ། །སྙིང་རྗེས་དོན་བྱས་སླར་བསྡུས་ལ། །ལྷོ་ནུབ་ཟླ་དཀྱིལ་བསམ་པར་བྱ། །རཱ་ག་ར་ཏིས་དབྱངས་ཅན་དབྱུང༌། །དམར་མོ་ལག་ན་པདྨ་བསྣམས། །དགའ་བ་ཆེན་པོས་དོན་བྱས་ནས། །ནུབ་བྱང་ཟླ་དཀྱིལ་བསམ་པར་བྱ། །བཛྲ་ཏིས་མཛོད་ལྡན་དབྱུང༌། །ལྗང་གུ་ལག་ན་རལ་གྲི་འཛིན། །བཏང་སྙོམས་ཆེན་པོའི་དོན་བྱས་ནས། །བྱང་ཤར་ཟླ་དཀྱིལ་བསམ་པར་བྱ། །བདག་པོའི་ཕྱག་མཚན་འདྲ་བ་ལ། །རང་རྟགས་གང་ཡིན་དང་པོར་སྦྱིན། །ཞལ་མདོག་རིགས་ཀྱིས་ཤེས་པར་བྱ། །ཡང་དག་དོན་གྱི་འོད་དུ་ཞུ། །འོད་ཀྱི་གོང་བུར་དེ་ཉིད་གྱུར། །ཙརྩི་ཀཱ་སོགས་ལེགས་པའི་གླུས། །འོད་ཀྱི་གོང་བུ་སད་པར་བྱེད། །ཀྱེ། རྗེ་བཙུན་སྙིང་རྗེས་ཁྲོ་བཞེངས་ལ། །གནས་གསུམ་ཀུན་གྱི་གཏི་མུག་སྦྱོངས། །བདུད་བཞི་རྣམས་ལས་གཙོ་བོ་རྒྱལ། །ཀྱེ། འཁྲུགས་པའི་སེམས་ཀྱིས་གཙོ་བོ་བཞེངས། །སྟོད་གནས་འཇིག་རྟེན་མགྲོན་གཉེར་ཅི། །འཇིག་རྟེན་སྐུ་མཆོག་རྗེ་བཙུན་བཞེངས། །ཀྱེ། སྟོང་པར་བསམས་ནས་ཅི་སྟེ་བཞུགས། །བྱང་ཆུབ་རང་བཞིན་འཇིག་རྟེན་བཞེངས། །དངོས་རྣམས་སྒྱུ་མར་བསམས་ནས་ནི། །འོད་ལས་ཡི་གེ་ཧཱུཾ་དུ་བཞེངས། །དེ་ལས་གཏུམ་པོ་ཁྲོ་བོའི་གཟུགས། །འཇིགས་བྱེད་གསུས་པ་ཆེ་བ་ཡི། །གཤིན་རྗེ་ནག་པོའི་གཟུགས་སུ་གྱུར། །ཞལ་གསུམ་ཕྱག་དྲུག་གོང་དང་མཐུན། །གྱེན་དུ་སྐྲ་འབར་འཇིགས་པ་ཆེ། །དུམ་དང་དུམ་བུར་རྣམ་པར་བརྒྱན། །ཤིན་ཏུ་ཁྲོས་པའི་སྐུར་བསམས་ཏེ། །བ་སྤུའི་བུ་ག་རྣམས་ལས་ནི། །རང་གི་ཁྲོ་བོ་འཕྲོ་བར་བསམ། །འཇིགས་པའི་མཆེ་བ་གཙིགས་པའི་ཞལ། །ཧ་ཧ་འབྱིན་པས་ཟ་བར་བྱེད། །བསྐལ་པའི་མེ་འབར་ལྟ་བུ་སྟེ། །བདག་ཉིད་དེ་ལྟ་བསམ་པར་བྱ། །དཀྱིལ་འཁོར་གསལ་བར་བསམས་ནས་ནི། །མིག་


DTG047_Page_0081
[མ་དཔེ་གཟིགས་ན་འདིར་གནོན།]

ལ་སོགས་པ་བྱིན་གྱིས་བརླབ། །རྡོ་རྗེ་གསུམ་ནི་གནས་གསུམ་བསྒོམ། །སོ་སོའི་ཐུགས་ལས་འོད་བྱུང་སྟེ། །སྤྱན་དྲངས་མཆོད་པ་ཡང་དག་སྤྲོ། །སོ་སོའི་རིག་པའི་རིམ་པ་དང༌། །སྐུ་གསུང་ཐུགས་ཀྱི་སྔགས་བརྗོད་བྱ། །ཨོཾ་སརྦ་ཏ་ཐཱ་ག་ཏ་ཀཱ་ཡ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཨོཾ་སརྦ་ཏ་ཐཱ་ག་ཏ་བཱ་ག་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཨོཾ་སརྦ་ཏ་ཐཱ་ག་ཏ་ཙིཏྟ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཡེ་ཤེས་སེམས་དཔའ་སྙིང་བསམས་ཏེ། །དེ་ཡི་སྙིང་གར་ཉི་མ་བསམས། །དེ་ལས་ངས་རྒྱལ་ཧེ་རུ་ཀ །དབང་བསྐུར་གཤིན་གཤེད་དབུ་ལ་བསམ། །ཡང་དེ་ལས་འོད་ཟེར་འཕྲོས་པས་བསྐུལ། །ཐོ་བ་ལ་སོགས་བཞི་པོ་ཡིས། །དགུག་དང་གཞུག་དང་བཅིང་བ་དང༌། །དབང་དུ་བྱས་ཏེ་མགུ་བར་བྱའོ། །ཟླ་བ་ཉི་མ་ཆུ་དང་སྨན། །དྲི་ནི་རླུང་མེའི་འཁོར་ལོར་གནས། །དེ་ལ་དཔའ་བོ་འབྲུ་ལྔར་བསམ། །དེ་སྟེང་དུ་ཧཱུཾ་ལས་རྡོ་རྗེ་བསམ། །ཨོཾ་གྱིས་བྱིན་བརླབས་བདུད་རྩིར་བསྒོམ། །དེ་ཉིད་གསུམ་ནི་མངོན་པར་བཟླས། །ལྕེ་དག་པས་ནི་བཏུང་བར་བྱ། །དེ་ནས་འདོད་པའི་ལྷ་མོ་བསྡུ། །བདག་གི་བ་སྤུའི་བུ་ག་ལས། །མཆོད་པ་སྤྲོས་ཏེ་བདག་ཉིད་མཆོད། །དེ་ནས་འཁོར་རྣམས་མཆོད་པར་བྱའོ། །ཨོཾ་སརྦ་ཏ་ཐཱ་ག་ཏ་པཱུ་ཛ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཆོས་རྣམས་ཀུན་གྱིས་དེ་ལ་བསྟོད། །གཏི་མུག་རྡོ་རྗེའི་རང་བཞིན་ཁྱོད། །གཤིན་རྗེ་གཤེད་དེ་འཇིགས་པ་པོ། །སྟོན་པ་སངས་རྒྱས་ཀུན་གྱི་བདག །མགོན་པོ་འཇིགས་བྱེད་ཕྱག་འཚལ་བསྟོད། །སེར་སྣ་རྡོ་རྗེའི་རང་བཞིན་ཁྱོད། །གཤིན་རྗེའི་དགྲར་གྲགས་འཇིགས་པ་པོ། །ཐུགས་ཀྱི་རྡོ་རྗེར་རབ་སྣང་བ། །རིན་ཆེན་རྡོ་རྗེ་ཕྱག་འཚལ་བསྟོད། །འདོད་ཆགས་རྡོ་རྗེའི་རང་བཞིན་ཁྱོད། །མངའ་བདག་འདོད་ཆགས་ལས་བྱུང་བ། །དབྱངས་ཀུན་གྱི་ནི་མཆོག་གི་མཆོག །རྡོ་རྗེ་གསུང་ལ་ཕྱག་འཚལ་བསྟོད། །ཕྲག་དོག་རྡོ་རྗེའི་ངོ་བོ་ཁྱོད། །གཤིན་རྗེ་གཤེད་དེ་ལས་ཀུན་མཛད།། སྐུ་ཡི་རྡོ་རྗེར་རབ་སྣང་བ། །རལ་གྲིའི་ཕྱག་ལ་ཕྱག་འཚལ་བསྟོད། །སངས་རྒྱས་ཀུན་གྱི་རང་བཞིན་ཁྱོད། །སངས་རྒྱས་རྣམས་ནི་ཀུན་བསྡུས་པ། །སངས་རྒྱས་ཀྱི་ནི་མཆོག་གི་མཆོག །དཀྱིལ་འཁོར་བདག་ལ་ཕྱག་འཚལ་ལོ། །དེ་ནས་རྫོགས་པའི་རིམ་པ་བསྒོམ། །རྣལ་འབྱོར་འདི་ལ་རྟག་


DTG047_Page_0082
[མ་དཔེ་གཟིགས་ན་འདིར་གནོན།]

གནས་བྱ། །བསམ་གཏན་མ་ནུས་བཟླས་པ་སྟེ། །བཟླས་པ་བཞི་ལ་རབ་འབད་བྱ། །ཟླ་བ་དྲུག་གིས་མཚན་མ་འབྱུང༌། །དེ་ནས་སྒྲུབ་པ་ཆེན་པོ་བརྩམ། །འཁོར་ལོ་ལ་སོགས་གཞུང་བཞིན་བྱ། །སོ་སོའི་དུས་ལ་གཏད་བྱ་སྟེ། །ཞག་བཞིར་བསྒྲུབས་ན་འདོད་པ་འགྲུབ། །ཨོཾ་ཧྲཱིཿ་ཥྚྀཿ་ཝི་ཀྲྀ་ཏཱྀ་ཏཱ་ན་ན་ཧཱུཾ་ཧཱུཾ་ཕཊ་སྭཱ་ཧཱ། ཨོཾ་ཡཀྵེ་མ་མེད་ཡ་ཙ་ནི་རཱ་ཛ་ས་དོ་རུ་ཎ་ཡོ་ནི་རཱ། ཨོཾ་ཡ་མ་རཱ་ཛ་ས་དོ་མེ་ཡ། ཡ་མེ་དོ་རུ་ཎ་ཡོ་ད་ཡ། ཡ་ད་ཡོ་ནི། ར་ཡ་ཀྵེ། ཡ་ཀྵེ་ཡ་ཙྪ་ནི་རཱ་མ་ཡ། དྲག་པོའི་གསང་སྔགས་མན་ངག་བཞིན། །སོ་སོའི་ལས་དང་སྤེལ་བར་བྱ། །འབྱུང་པོ་ཀུན་གྱི་གཏོར་མ་བཏང༌།། དང་པོ་གཤིན་རྗེའི་དགྲལ་དབུལ། །དེ་ནས་སོ་སོའི་འཁོར་ལ་སྦྱིན། །སྔགས་ཆེན་འདི་ཡིས་དབུལ་བར་བྱ། །ཨོཾ་ཨིནྡྲ་ཡ་ཧྲཱིཿ་ཡ་མ་ཡེ་ཥྚཱྀཿ་ཝ་ར་ཎཱ་ཡ་ཝི། ཀུ་བེ་རཱ་ཡ་ཀྲྀ། ཨཱི་ཤྭ་ནཱ་ཡ་ཏ། ཨགྣ་ཡེ་ཨཱ། ནཻ་རཱི་ཏ་ཡེ་ན། བཱ་ཡ་བེ་ན། ཙནྡྲ་ཡ་ཧཱུཾ་སཱུ་ཪྻ་ཡ་ཧཱུཾ། བྲཧྨ་ཎཱ་ཡ་ཕཊ། བ་སུ་དྷ་རཱ་ཡ་ཕཊ། བེ་མ་ཙི་ཏྲ་ཡེ་སྭཱ། སརྦ་བྷཱུ་ཏེ་བྷྱོ་ཧཱ། ཧ་ཧཱ། ཧི་ཧཱི། ཧཱུཾ་ཧཱུཾ་ཕེཾ་སྭཱ་ཧཱ། སྒྲུབ་པ་ཆེན་པོའི་དུས་སུ་ནི། །སྐུ་གཟུགས་མདུན་དུ་གཞག་པར་བྱ། །མཆོག་གི་ཤ་ལ་སོགས་པ་དབུལ། །མར་མེ་ཆེ་ཡང་རྟག་ཏུ་བཏང༌། །མཆོད་པའི་མཆོག་རྣམས་དབུལ་བར་བྱ། །མ་ཡེངས་པ་ཡི་སེམས་ཀྱིས་དབུལ། །འཇིགས་པའི་སེམས་ནི་མ་ཡིན་ནོ། །སྔགས་པས་དཔའ་བོ་མཆོད་པར་བྱ། །སྤྱོད་ལམ་བྱེད་ན་འདི་ལྟར་བསྒོམ། །དངོས་པོ་ཐམས་ཅད་གཤིན་རྗེར་བསམ། །ཡང་ན་རང་རང་དག་པར་བྱ། །ཡང་ན་རྡོ་རྗེ་སེམས་དཔའ་བསྒོམ། །ལས་ཀྱི་མཐར་ཐུག་འཇམ་དཔལ་མཆོག །རྩོད་པའི་དུས་སུ་བྱུང་བ་འདི། །བསྟན་པ་བསྲུང་བའི་དགོས་པ་དང༌། །ལས་ཀྱི་བྱེ་བྲག་བསྒྲུབ་པ་དང༌། །བློ་དམན་རྣམས་ལ་ཕན་པའི་ཕྱིར། །རྣལ་འབྱོར་བཞི་ཡི་ཚུལ་དུ་བྲིས། །བློ་དམན་དམ་ཚིག་ལ་གནས་པས། །རབ་ཏུ་འབད་དེ་བསྒྲུབ་པར་བྱ། །རྒྱུད་ཀྱི་དོན་མཆོག་བསྡུས་པ་ཡི། །གཤིན་རྗེ་གཤེད་ཀྱི་སྒྲུབ་ཐབས་བྱས། །འདི་ལས་ངལ་བའི་དགེ་བ་གང༌། །ཀུན་གྱིས་འཇམ་དཔལ་མཆོག་ཐོབ་ཤོག །གཤིན་རྗེ་གཤེད་ནག་པོའི་སྒྲུབ་པའི་ཐབས་སློབ་དཔོན་ཉིན་མོར་བྱེད་པའི་གྲགས་པས་མཛད་པ་རྫོགས་སོ།། །།ཞུ་ཆེན་གྱི་ལོ་ཙཱ་བ་


DTG047_Page_0083
[མ་དཔེ་གཟིགས་ན་འདིར་གནོན།]

འགོས་ལྷས་བཙས་ཀྱིས། །རྒྱ་གར་གྱི་དཔེ་ཕྱི་མོ་དང་གཏུགས་ཏེ་གཏན་ལ་ཕབ་པའོ།

གཤིན་རྗེ་གཤེད་ནག་པོའི་སྒྲུབ་པའི་ཐབས།
གྷོ་ཥ་བཛྲ།


DTG047_Page_0083
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། །ཀྲྀཥྞ་ཡ་མཱ་རི་སཱ་དྷ་ནཾ། བོད་སྐད་དུ། །གཤིན་རྗེ་གཤེད་ནག་པོའི་སྒྲུབ་པའི་ཐབས། བཅོམ་ལྡན་འདས་གཤིན་རྗེ་གཤེད་པོ་ལ་ཕྱག་འཚལ་ལོ། །དཔལ་ལྡན་གཤིན་རྗེ་གཤེད་ནག་ལ། །ཕྱག་འཚལ་ནས་ནི་དཔལ་འཛིན་གྱི། །གདམས་པ་ལ་བརྟེན་སྒྲུབ་ཐབས་ནི། །མདོར་བསྡུས་བྱིས་པས་རྟོགས་ཕྱིར་བྲི། །དེ་ལ་སྔགས་པ་ངེས་པར་འགྲོ་བ་ཐམས་ཅད་བསྒྲལ་བར་འདོད་པའི་བློ་དང་ལྡན་པས་དུར་ཁྲོད་ལ་སོགས་པའི་བསམ་གཏན་གྱི་གནས་སམ། གནས་ལ་ལར་ཙནྡན་ལ་སོགས་པས་བྱུགས་ལ། འདོད་ཆགས་ལ་སོགས་པའི་ཉོན་མོངས་པ་དང་ལྡན་པའི་སེམས་ཅན་རྣམས། བསོད་ནམས་ཀྱི་ཚོགས་དང་མི་ལྡན་པས་འཁོར་བ་ལས་བསྒྲལ་བར་མི་ནུས་པས་ན། དང་པོར་བསོད་ནམས་ཀྱི་ཚོགས་བསག་པར་བྱ་བའི་ཕྱིར་བདེ་བའི་སྟན་ལ་འདུག་སྟེ། རང་གི་སྙིང་གར་སྣ་ཚོགས་པདྨ་དང་ཉི་མའི་སྟེང་དུ། ཡ་སྔོན་པོ་འོད་ཟེར་དང་བཅས་པ་བལྟས་ལ། དེའི་འོད་ཟེར་གྱིས་སེམས་ཅན་ཐམས་ཅད་གཤིན་རྗེ་གཤེད་དུ་བྱས་ནས་ཡང་འོད་ཟེར་དེས་བླ་མ་དང་སངས་རྒྱས་ལ་སོགས་པ་མདུན་དུ་སྤྱན་དྲངས་ཏེ། དེ་དག་ལ་མངོན་པར་ཕྱག་བྱས་ལ་ས་བོན་གྱི་འོད་ཟེར་སྔོན་པོ་ལས་བྱུང་བའི་མཆོད་པའི་སྤྲིན་སྣ་ཚོགས་སྒེག་མོ་ལ་སོགས་པ་དང༌། མེ་ཏོག་ལ་སོགས་པའི་ཞེན་པ་དང་བྲལ་བས་ཡང་དག་པར་མཆོད་དོ། །དེ་ནས་སྡིག་པ་བཤགས་ཤིང་བསོད་ནམས་ལ་རྗེས་སུ་ཡི་རང་བ་དང༌། ཡོངས་སུ་བསྔོ་བ་དང༌། གསུམ་ལ་སྐྱབས་སུ་འགྲོ་བ་ལ་སོགས་པ་བྱའོ། །དེ་མ་ཐག་པའི་ཞིང་ལ་ཚད་མེད་པ་བཞི་བསྒོམ་མོ། །དེ་ནས་རྟེན་མུཿ་ཡིས་གཤེགས་སོ། །དེ་ནས་ཡེ་ཤེས་ཀྱི་ཚོགས་ལ་ནན་ཏན་བྱ་སྟེ། སྣ་ཚོགས་སྟོང་པ་ཉིད་དུ་བསྒོམ་ཞིང༌། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་བརྗོད་ལ། དེ་ནས་སྟོང་པའི་བདག་ཉིད་ལས། ཨཾ་ལས་ཉི་མའི་སྟེང་དུ། ཧཱུཾ་ལས་རྡོ་རྗེ་སྔོན་པོ་ཁ་གྱེས་པ་བསྒོམ་པར་བྱའོ། དེ་ལས་བྱུང་བའི་རྡོ་རྗེའི་ཚོགས་ཀྱིས་རྡོ་རྗེའི་ས་གཞི་དང༌། ར་བ་དང་གུར་བསྒོམ་པར་བྱའོ། །


DTG047_Page_0084
[མ་དཔེ་གཟིགས་ན་འདིར་གནོན།]

དེའི་དབུས་སུ་སྐད་ཅིག་གིས་ཆོས་འབྱུང་གྲུ་གསུམ་པ་དཀར་པོའི་ནང་དུ། སྣ་ཚོགས་པདྨ་དང༌། སྣ་ཚོགས་རྡོ་རྗེའི་ལྟེ་བ་ལ་པཾ་ཡོངས་སུ་གྱུར་པ་ལས། སྣ་ཚོགས་པདྨའི་སྟེང་དུ་རཾ་ལས་ཉི་མའི་དཀྱིལ་འཁོར་གྱི་སྟེང་དུ་ཡཾ་ཡིག་ལས་རྡོ་རྗེ་སྔོན་པོ་འོད་ཟེར་བཅས་པ་བསམས་ཏེ། དེའི་འོད་ཀྱིས་ཐོག་མ་མེད་པ་ནས་གྲུབ་པའི་གཤིན་རྗེ་གཤེད་གསལ་བར་བྱས་ནས། སླར་བཀུག་སྟེ། དེ་དག་ཡོངས་སུ་གྱུར་པ་ལས་གཤིན་རྗེ་གཤེད་དུ་བསྒོམ་པར་བྱའོ། །དེ་ཡང་སྐུ་མདོག་ནག་པོ་གཡས་དཀར་ཞིང༌། གཡོན་དམར་བ། རྡོ་རྗེ་རལ་གྲི་དང༌། འཁོར་ལོ་དང་པདྨ་དང༌། གྲི་གུག་དང་ཐོད་པ་བསྣམས་པའི་ཕྱག་དྲུག་པ། མ་ཧེའི་སྟེང་ན་གཡོན་བརྐྱང་བས་བཞུགས་པ། སྤྲུལ་གྱི་རྒྱན་གྱིས་བརྒྱན་པ། མི་མགོ་རློན་པའི་ཕྲེང་བ་འཕྱང་བ། སྟག་གི་པགས་པའི་ཤམ་ཐབས་ཅན། རུས་པའི་རྒྱན་གྱིས་བརྒྱན་པ། དབུ་སྐྲ་དང་སྨ་ར་སེར་པོ་གྱེན་དུ་ལངས་པ། ཞལ་མཆེ་བ་རྣམ་པར་གཙིགས་པ་བསམས་ལ། དེ་ནས་སྤྱི་བོ་དང་མགྲིན་པ་དང་སྙིང་ག་རྣམས་སུ་ཨོཾ་ཨཱཿ་ཧཱུཾ་ཞེས་བྱ་བའི་ཡི་གེ་རྣམས་བསམ་པར་བྱའོ། །དེ་ནས་མིག་ལ་སོགས་པ་སྐྱེ་མཆེད་བྱིན་གྱིས་བརླབ་པར་བྱ་སྟེ། མིག་ཏུ་ཀྵིཾ་ངོ༌། །རྣ་བ་དག་ཏུ་ཛྲིཾ་ངོ༌། །སྣ་ལ། ཁཾ་ངོ༌། །དཔྲལ་བར་ནི་ཀཾ་ངོ༌། །ལྟེ་བར་ནི་སཾ་ངོ༌། །དེ་ནས་སྙིང་གའི་འོད་ཟེར་གྱིས་བསྐུལ་བས་དེ་བཞིན་གཤེགས་པའི་སྤྲུལ་པ་རྡོ་རྗེ་ཙ་རྩི་ཀཱ་ལ་སོགས་པས་བདུད་རྩི་རྣམ་པ་ལྔས་གང་བའི་བུམ་པ་བཟུང་ནས་དབང་བསྐུར་བར་བྱའོ། །དེ་ནས་སྙིང་གའི་འོད་ཟེར་ལྕགས་ཀྱུ་ལྟ་བུས་ཡེ་ཤེས་ཀྱི་རྡོ་རྗེ་མདུན་དུ་བལྟས་ཏེ། དེ་ལ་མཆོད་པ་ལྔས་ཡང་དག་པར་མཆོད་ལ། ཛཿ་ཧཱུཾ་བཾ་ཧོཿ་ཞེས་བརྗོད་པས་དགུག་པ་དང་གཞུག་པ་དང༌། བཅིང་བ་དང་དབང་དུ་བྱ་བའོ། །དེ་ནས་ཆོ་ག་བཞིན་དུ་མཆོད་པར་བྱའོ། །དེ་ནས་བསྒོམས་པས་སྐྱོ་ན་བཟླས་པ་བྱ་སྟེ། ཨོཾ་ཧྲཱིཿ་ཥྚྲཱྀཾཿ་ཝི་ཀྲི་ཏཱ་ན་ན་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ལྡང་བའི་དུས་སུ་ཡང་མཆོད་པ་བྱས་ལ། ཨོཾ་ཨཱཿ་ཧཱུཾ་མུཿ་ཞེས་བྱ་བས་ཡེ་ཤེས་ཀྱི་རྡོ་རྗེ་གཤེགས་སུ་གསོལ་ལོ། །ཐུན་སོ་སོ་ལ་ཇི་ལྟར་རྙེད་པའི་གཏོར་མ་བདུད་རྩི་ལྔའི་ངོ་བོར་སྦྱངས་ལ། སྔགས་འདིས་ཕྱོགས་སྐྱོང་རྣམས་ལ་དབུལ་བར་བྱའོ། །ཨོཾ་ཨིནྡྲཱ་ཡ་ཧཱུཾཿ་ཡ་མཱ་ཡ་ཥྚྲྀཿ་ཝ་ར་ཎཱ་ཡ་ཝི།


DTG047_Page_0085
[མ་དཔེ་གཟིགས་ན་འདིར་གནོན།]

ཀུ་བེ་རུ་ཡ་ཀྲྀ། ཨི་ཤྭ་ནཱ་ཏ། ཨགྣ་ཡེ་ཨཱ། ནཻ་རྀར་ཏ་ཡེ་ན། བཱ་ཡ་བེ་ན། ཨཱརྐ་ཡེ་ཧཱུཾ། ཙནྡྲ་ཡེ་ཧཱུཾ། བྲཧྨ་ཎྀ་ཕཊ། བ་སུ་དྷ་ར་ཡེ་ཕཊ། བེ་མ་ཙི་ཏྲ་ཡེ་སྭཱ། སརྦ་བྷཱུ་ཏེ་བྷྱོ་ཧཱ། ཧ་ཧཱ་ཧི་ཧཱི། ཧཱུཾ་ཧཱུཾ་ཕེཾ་ཕེཾ་སྭཱ་ཧཱ། དེ་ནས་ཟས་ཟ་བའི་ཆེ་ན། བུད་རྩི་རྣམ་པ་ལྔས་སྦྱངས་ལ། དེ་ཉིད་གསུམ་གྱིས་བྱིན་གྱིས་བརླབས་ཏེ། ལྕེ་རྡོ་རྗེའི་སྦྱོར་བས་བཟའ་བར་བྱའོ། །གཤིན་རྗེ་གཤེད་ཀྱི་སྒྲུབ་ཐབས་འདི། །བྱས་པས་དགེ་བ་གང་ཐོབ་པ། །འཇིག་རྟེན་གསུམ་ནི་མ་ལུས་པ། །ནག་པོའི་ལས་འདིས་འདའ་བར་ཤོག །གཤིན་རྗེའི་དགྲ་ནག་པོ་སྒྲུབ་པའི་ཐབས་སློབ་དཔོན་གྷོ་ཥ་བཛྲས་མཛད་པ་རྫོགས་སོ།། །།བལ་པོའི་མཁན་པོ་སུ་མ་ཏི་ཙནྡྲའི་ཞལ་སྔ་ནས་དང༌། བོད་ཀྱི་ལོ་ཙཱ་བ་བནྡེ་ཚོགས་ཆག་ཆུང་བས་བསྒྱུར་ཅིང་ཞུས་ཏེ་གཏན་ལ་ཕབ་པའོ།།

དཔལ་གཤིན་རྗེ་གཤེད་དགྲ་ནག་པོའི་སྒྲུབ་ཐབས་འཁོར་ལོའི་དོན་རྒྱས་པར་བཤད་པ་དང་བཅས་པ།
མི་བསྐྱོད་རྡོ་རྗེ།

སྔོན་དུ་བསྙེན་པ་བྱ་བ།


DTG047_Page_0085
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། །ཤྲཱི་ཀྲྀཥྞ་ཡ་མཱ་རི་སཱ་དྷ་ནཾ། ས་ཙ་ཀྲ་ཨརྠ་བི་སྟ་ར་བྱ་ཁྱཱ། བོད་སྐད་དུ། དཔལ་གཤིན་རྗེའི་གཤེད་དགྲ་ནག་པོའི་སྒྲུབ་ཐབས། འཁོར་ལོའི་དོན་རྒྱས་པར་བཤད་པ་དང་བཅས་པ། བཅོམ་ལྡན་འདས་དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །མཁའ་ལྟར་སྤྲོས་མེད་ཆོས་སྐུ་རྣམ་དག་དངོས། །འགྲོ་མགོན་འཇམ་དབྱངས་ཁྲོ་རྒྱལ་ཕྱག་འཚལ་ཏེ། །གཤིན་རྗེ་གཤེད་པོ་དཔལ་ལྡན་དེ་ཡི་ནི། །སྒྲུབ་པའི་ཐབས་བཟང་འཁོར་ལོ་བཅས་པ་བཤད། །བྱང་ཆུབ་ཀྱི་སེམས་གཉིས་ཤིན་ཏུ་བརྟན་པའི་སྔགས་པས་ཐོ་རངས་ལངས་ཏེ། ལུས་ཀྱི་བྱ་བ་མ་ལུས་པར་བྱས་ལ། སྟན་བདེ་བ་ལ་འདུག་སྟེ། བླ་མ་དང་དཀོན་མཆོག་གསུམ་དང༌། དཔལ་གཤིན་རྗེ་འཇོམས་པ་རྣམས་འོད་ཀྱིས་བསྐུལ་བ་ལ། ཕྱག་འཚལ་བ་ལ་སོགས་པ་བདུན་དང༌། ཚད་མེད་པ་བཞི་དང༌། བྱང་ཆུབ་ཏུ་སེམས་བསྐྱེད་པ་རྣམས་བྱས་ལ་སྟོང་པ་ཉིད་དུ་བསམ་མོ། །དེ་ནས་ཡུད་ཙམ་གྱིས་མ་ཧེའི་སྟེང་དུ་པདྨ་དང་ཉི་མར་བལྟས་ཏེ། དེའི་དབུས་སུ་ཧཱུཾ་ངཾ་ལཾ་གྱི་ས་བོན་གྱུར་པ་ལས་རྡོ་རྗེའོ།། དེ་གྱུར་པ་ལས་གཤིན་རྗེ་འཇོམས་པར་བདག་ཉིད་བསམ་པ་ནི། ཞལ་གསུམ་པ་ཕྱག་དྲུག་པ་མི་བཟད་པའི་ཁྲོ་བོ་སྐུ་མདོག་མཐིང་ག་ཞལ་གཡས་གཡོན་དཀར་བ་དང་དམར་བ། ཕྱག་གཡས་གཡོན་ན་རྡོ་རྗེ་དང༌། རལ་གྲི་དང་གྲི་གུག་དང་འཁོར་ལོ་དང༌། པདྨ་དང་ཐོད་པ་འཛིན་པ། གཡོན་


DTG047_Page_0086
[མ་དཔེ་གཟིགས་ན་འདིར་གནོན།]

བརྐྱང་བས་གནས་པའོ། །དེ་ནས་དེའི་ཕུང་པོ་ལྔ་ནི་གཏི་མུག་གཤིན་རྗེ་གཤེད་ལ་སོགས་པ་ལྔའོ། །ཁམས་བཞི་ནི་ཙ་རྩི་ཀཱ་ལ་སོགས་པ་བཞིའོ། །ལག་པ་གཡས་པའི་དཔུང་པ་དང་གཡོན་པའི་དཔུང་པ་དང་ཁའི་པདྨ་དང༌། གསང་བའི་གནས་རྣམས་ནི་ཐོ་བ་གཤིན་རྗེ་གཤེད་ལ་སོགས་པ་བཞིའོ་ཞེས་མོས་པར་བྱའོ། །དེ་ནས་ཡེ་ཤེས་སེམས་དཔའ་བསྟིམས་ལ། ཡན་ལག་དྲུག་བསམས་ཏེ། དེ་ནས་སྐུ་གསུང་ཐུགས་བྱིན་གྱིས་བརླབས་ལ་དབང་བསྐུར་ཏེ། སྤྱི་བོ་ལ་རྡོ་རྗེ་སེམས་དཔས་བརྒྱན་པར་བྱའོ། །དེ་ནས་སྙིང་གའི་ཡཾ་ལས་སྤྲོ་བ་དང་བསྡུ་བ་སྐྱོ་བར་མ་གྱུར་གྱི་བར་དུ་བྱའོ། །སྐྱོ་བ་ན་ཨོཾ་ཡ་མ་རཱ་ཛ་ས་དོ་མེ་ཡ་ཡ་མེ་དོ་རུ་ཎ་ཡོ་ད་ཡ། ཡ་ད་ཡོ་ནི་ད་ཡ་ཀྵེ་ཡ་ཡ་ཀྵེ་ཡ་ཙྪ་ནི་རཱ་མ་ཡ། ཨོཾ་ཧྲཱིཿ་ཥྚྲྀཿ་ཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཞེས་བཟླས་སོ། །ཡང་ན་རིམ་པས་བཟླས་སོ། །གལ་ཏེ་འཁོར་ལོ་བསྒྲུབ་པར་མི་འདོད་ན་ལས་ཀྱི་སྔགས་འབའ་ཞིག་བཟླས་སོ། །གལ་ཏེ་ལས་ལ་མི་དམིགས་ན་སྙིང་པོའི་སྔགས་འབའ་ཞིག་ཀྱང་བཟླས་ཏེ། ཨོཾ་ཡ་མཱནྟ་ཀ་ཧཱུཾ་སྙིང་པོའོ། །བཟླས་པའི་ཚད་ནི་རེ་རེ་ལ་ཡང་བྱེ་བ་ཕྲག་གསུམ་དང༌། འབུམ་ཕྲག་བཞི་བཟླས་སོ། །དེ་ནས་བཟླས་པས་སྐྱོ་བ་ན། ཡེ་ཤེས་སེམས་དཔའ་ལ་མཆོད་པ་དང༌། བསྟོད་པ་བྱས་ཏེ། གཤེགས་པའམ་སླར་བསྟིམས་ལ། ཡན་ལག་དྲུག་གིས་སྲུང་བ་བྱས་ལ། ཡི་གེ་བརྒྱ་པ་བཟླས་ལ་ལྡང་ངོ༌། །ལངས་ནས་ཀྱང་གསང་སྔགས་སྐུ་ལ་དམིགས་ཤིང་གྲངས་ལ་ཕན་མི་འདོགས་པ་བཟླས་པར་བྱའོ། །དང་པོ་རྣལ་འབྱོར་ལ་འཇུག་པ་ན། ཨོཾ་ཨིནྡྲ་ཡ་ཧྲཱིཿ་ཞེས་བྱ་བ་ལ་སོགས་པས་གཏོར་མ་སྦྱིན་པར་བྱའོ། །དུས་རྟག་ཏུ་བདག་དང་གཞན་ཆུ་ཟླ་ལྟར་གཅིག་དང་དུ་མ་དང་བྲལ་བར་བལྟའོ། །བསྙེན་པ་མ་རྫོགས་ཀྱི་བར་དུ་གནས་གཅིག་ཏུ་སྤྱད་པར་བྱའོ། །འདི་ནི་སྔོན་དུ་བསྙེན་པའི་རིམ་པ་མདོར་བསྟན་པའོ། །

འཁྲུལ་འཁོར་སྒྲུབ་པ།

གཞི་སོགས་གཏན་ལ་དབབ་པ།

གཞི་གཏན་ལ་དབབ་པ།


DTG047_Page_0086
[མ་དཔེ་གཟིགས་ན་འདིར་གནོན།]

དེ་ལྟར་བསྙེན་པར་གྱུར་པའི་སྔགས་པ་འཁྲུལ་འཁོར་བསྒྲུབ་པར་འདོད་པས། འདི་ལྟར་བལྟ་སྟེ། དང་པོ་ཁོ་ནར་འདི་ལ་མངོན་སྤྱོད་བྱ་བར་རིགས་སམ། ཅི་སྟེ་མ་ཡིན་ཞེས་གཞི་གཏན་ལ་དབབ་པར་བྱའོ། །

བྱང་ཆུབ་ཀྱི་སེམས་གཏན་ལ་དབབ་པ།


DTG047_Page_0087
[མ་དཔེ་གཟིགས་ན་འདིར་གནོན།]

དེ་ནས་བྱ་བར་རིགས་པ་ཞིག་ཡིན་ན། འདི་ལྟར་བདག་ནི་དམྱལ་བར་སོང་ཡང་བླའི། །འདི་དམྱལ་བར་མི་འགྲོ་བར་བྱ་ཞིང་དེའི་རྒྱུར་འདི་མྱུར་དུ་གསད་པས། འདིའི་སྡིག་པ་མང་དུ་མི་འཕེལ་བར་བྱའོ་སྙམ་དུ་ཡང་དག་པར་སྙིང་རྗེ་བཅོས་མ་མ་ཡིན་པ་བསྐྱེད་པ་ཡང་དང་ཡང་བྱ་བས་བྱང་ཆུབ་ཀྱི་སེམས་གཏན་ལ་དབབ་པར་བྱའོ། །

གནས་གཏན་ལ་དབབ་པ།


DTG047_Page_0087
[མ་དཔེ་གཟིགས་ན་འདིར་གནོན།]

དེ་ནས་སྒྲུབ་པའི་གནས་ཁྱད་པར་ཅན་དུར་ཁྲོད་དང་ཁང་སྟོང་དང༌། མ་མོ་འདུ་བའི་གནས་དང༌། གནོད་སྦྱིན་འདུ་བའི་ཕུག་དང༌། ཤིང་གཅིག་པའི་དྲུང་ལ་སོགས་པར་འགྲོ་བར་བྱ་སྟེ། འདི་ནི་གནས་གཏན་ལ་དབབ་པའོ། །

ཟླ་གྲོགས་གཏན་ལ་དབབ་པ།


DTG047_Page_0087
[མ་དཔེ་གཟིགས་ན་འདིར་གནོན།]

དེར་ཡང་བདག་གཅིག་པུས་བརྩམས་པ་དང༌། ཡང་ན་གྲོགས་པོ་གསང་ཐུབ་པ། དམ་ཚིག་བསྲུང་བ། འཇིགས་ཤིང་བག་ཚ་བ་མེད་པ། ལག་བཟོ་བ། སྒྲུབ་པ་པོ་ལ་སྙིང་ཉེ་བ། སྟོབས་ཆེ་བ། བློ་དང་ལྡན་པ་བཞི་མན་ཆད་དང་བརྩམས་ཏེ། འདི་ནི་ཟླ་གྲོགས་གཏན་ལ་དབབ་པའོ། །

རྫས་གཏན་ལ་དབབ་པ།


DTG047_Page_0087
[མ་དཔེ་གཟིགས་ན་འདིར་གནོན།]

གནས་དེར་ཤ་ཆེན་པོ་དང་ཚིལ་ཆེན་པོ་ལ་སོགས་པ། གཏོར་མ་དང་ལྷ་བཤོས་སུ་བྱ་བ་དང༌། མེ་ཏོག་ནག་པོའམ་སྔོན་པོ་དང༌། བདུད་རྩི་ལྔ་དང༌། ཁྲག་ཆེན་པོ་དང༌། རྔ་དང་གླིང་བུ་དང༌། དུང་ལ་སོགས་པའི་མཆོད་པའི་ཡོ་བྱད་དང༌། གཤིན་རྗེའི་གཟུགས་ཀྱི་རྒྱུ་དང༌། ལིང་གའི་རྒྱུ་དང༌། །སྣག་ཚ་དང༌། སྨྱུ་གུ་དང༌། དུར་ཁྲོད་ཀྱི་རས་དང༌། ཐོད་པ་དང་སྐུད་པ་ནག་པོ་ལ་སོགས་པ་ཡོ་བྱད་ཐམས་ཅད་དང་ལྡན་པར་བྱས་ཏེ། འདི་ནི་རྫས་གཏན་ལ་དབབ་པའོ། །

འཁོར་ལོ་བྲི་བ་སོགས།

འཁོར་ལོ་བྲི་བ།


DTG047_Page_0087
[མ་དཔེ་གཟིགས་ན་འདིར་གནོན།]

དེ་ནས་འཁོར་ལོ་བྲི་བར་བྱ་སྟེ། གཏོར་མ་བྱིན་ལ་མཆོད་པ་འཇིགས་སུ་རུང་བའི་ཚོགས་ཀྱང་དབུལ་ཏེ། མཎྜལ་རབ་ཏུ་འཐས་པ་ལྕི་བས་བྱུགས་པ་བྱས་ལ། སྔགས་པ་ཁ་ལྷོར་བལྟས་ཏེ། བདག་ཁྲོ་བོར་གསལ་བས་རྩ་བའི་སྔགས་ཟློས་ཤིང་ཐོད་ལ་ཀོར་གྱིས་འཁོར་ལོ་བྲི་བར་བྱ་སྟེ། གནས་སྐབས་འདིར་ཡང་འཁོར་ལོ་བྲི་བ་དང༌། ལིང་ག་བཅའ་བ་དང༌། ག་འུར་གཞུག་པ་དང༌། གའུ་བསྲོ་བ་དང༌། གཤིན་རྗེ་ལ་གཏད་པ་དང༌། ནང་གི་རྣལ་འབྱོར་དང༌། འཁོར་ལོ་བཅའ་བ་དང༌། རྗེས་ཀྱི་རྣལ་འབྱོར་དང༌། སླར་དབྱུང་བའི་ཆོ་ག་བྱ་སྟེ། རྣམ་པ་དགུས་བསྒྲུབ་པར་བྱའོ། །དེ་ལ་འཁོར་ལོ་བྲི་བ་ནི། རི་མོ་ལྔ་བསྐོར་བ་ལས་སྣམ་བུ་བཞི་དང༌། ལྟེ་བ་སྟེ་ལྔར་བྱའོ། །ལྟེ་བ་ལེའུ་ཚེ་དགུ་པའོ། །སྣམ་བུ་དང་པོ་ལེའུ་ཚེ་བཅུ་གཉིས་པ། །གཉིས་པ་བཅུ་དྲུག་པ། གསུམ་པ་དང་བཞི་པ་


DTG047_Page_0088
[མ་དཔེ་གཟིགས་ན་འདིར་གནོན།]

ཕྱལ་བའམ། སུམ་ཅུ་རྩ་གཉིས་པའོ། །དེ་ལ་ལྔ་དང་བཅུ་གཉིས་ལ་རྩ་བའི་སྔགས་དགོད། བཞི་མཚམས་ལ་བསྐུལ་ཚིག །བཅུ་དྲུག་ལ་ཡང་བསྐུལ་ཚིག །ཕྱལ་བ་ནང་ངོས་ལ་ཨཱ་ལི། ཕྱི་ངོས་ལ་ཀཱ་ལི། ཡང་རེའུ་མིག་དང་འདྲ་བར་ཡི་གེ་སུམ་ཅུ་རྩ་གཉིས་གཉིས་ཏེ། ཨཱ་ལི་ཉིས་འགྱུར་དང་ཀཱ་ལི་ལ་ང་ཉ་སྤང་བར་བྱ་བས་སོ། །ཡི་གེ་དག་རི་མོ་ལ་མ་རེག་པར་བྱའོ། །འདི་གཤིན་རྗེའི་ལྟོ་བར་བྲིའོ། །དེ་ནས་ཕྱིའི་འཁོར་ལོ་ལ་དཔེ་བྱས་ཏེ། ནང་གི་འཁོར་ལོ་རོ་རས་ལ་དཀར་རྩིས་བྱུགས་ལ། དུག་དང་ཁྲག་བསྲེས་པའི་སྣག་ཚ་བྱ་རོག་གི་སྒྲོ་སྨྱུག་གིས་བླངས་ཤིང་རྩ་བའི་སྔགས་ཟློས་པས་ཁ་ལྷོར་བལྟས་པས་བྲིས་ཏེ། གཅིག་གཡས་སུ་བསྐོར་རོ། །གཅིག་གཡོན་དུ་བསྐོར་རོ། །ཟིན་པ་དང་ཕྱིའི་འཁོར་ལོ་ནང་གི་འཁོར་ལོ་ལ་ཐིམ་པར་བསམས་ལ་དབྱིའོ། །འདི་ནི་འཁོར་ལོ་བྲི་བའོ། །

ལིང་ག་བཅའ་བ།


DTG047_Page_0088
[མ་དཔེ་གཟིགས་ན་འདིར་གནོན།]

དེ་ནས་རྗེས་ཀྱི་ས་དང༌། ཆུ་འགྲམ་གྱི་ས་དང༌། དུག་དང་ཁྲག་དང་དགྲའི་བཤང་གཅི་བྱས་པའི་ས་དང༌། སྦྲ་ཚིལ་རྣམས་བསྲེས་ལ་ལིངྒ་སོར་བཞི་པར་བྱ། །དེའི་སྙིང་གར་ལས་ཀྱི་སྔགས་ཀྱི་མཇུག་ལ་མིང་རུས་མཱ་ར་ཡ་དང་བཅས་པར་གཞུག་གོ །འདི་ནི་ལོང་ག་བཅའ་བའོ། །

གའུར་གཞུག་པ།


DTG047_Page_0088
[མ་དཔེ་གཟིགས་ན་འདིར་གནོན།]

དེ་ནས་རབས་ཆད་ཀྱི་ཐོད་པའམ། ཆུ་འགྲམ་གྱི་ས་དང༌། དུག་དང་ཁྲག་དང༌། དགྲའི་བཤང་གཅི་བྱས་པའི་ས་དང༌། སྤྲ་ཚིལ་རྣམས་བསྲེས་ལ་ལིངྒ་སོར་བཞི་པར་བྱ། གའུ་གཉིས་ལ་གོང་མ་ལ་མེ་འབར་བ་བྲི། དབུས་སུ་ཕཊ་ཆེ་གེ་མོ་མཱ་ར་ཡ་ཕཊ་ཅེས་པ་བྲིའོ། །འོག་མ་ལ་རླུང་གི་དཀྱིལ་འཁོར་གྱི་དབུས་སུ་སྔགས་སྔ་མ་ལྟར་བྲི། །གའུ་སྟེང་མའི་རྒྱབ་ཏུ་རི་རབ་ལ་དབང་ཆེན་གྱི་དབུས་སུ་རྡོ་རྗེ་རྒྱ་གྲམ་སེར་པོ་བྲི། དེ་ནས་གའུ་གོང་མ་ལ་བུ་ག་སྨྱུག་མ་འབྲིང་པོ་ཤོང་བ་ཅིག་གདོད་དོ། །དེ་ནས་འཁོར་ལོ་གཡོན་དུ་བསྐོར་བ་འོག །གཡས་སུ་བསྐོར་བ་སྟེང༌། དེའི་དབུས་སུ་ལིང་ག་བཅུག་ལ། ལེགས་པར་དྲིལ་ནས་སྐུད་པ་ནག་པོས་བཅིངས་ཏེ་གའུ་ཁ་སྦྱོར་དུ་བཅུག་ལ་གའུ་སྐུད་པ་ནག་པོས་དཀྲིས་ཏེ། གའུའི་བུ་ག་ནས་དུག་སྣ་ཚོགས་པའི་ཕྱེ་མ་དང༌། ཁྲག་བསྲེས་པ་བླུགས་པས་གང་བར་བྱའོ། །འདི་ནི་གའུར་གཞུག་པར་བྱའོ། །

གའུ་བསྲོ་བ།


DTG047_Page_0088
[མ་དཔེ་གཟིགས་ན་འདིར་གནོན།]

དེ་ནས་རྡོ་བ་ཟུར་རྔོམ་པ་ཟུར་གསུམ་དུ་འདུག་པའི་སྒྱེད་བུ་གསུམ་གྱི་ཁར་གའུ་བཞག་ལ། དུག་གི་མེ་ཏོག་འོག་ནས་སྤོར་ལ་དྲོས་པ་ཙམ་དུ་བསྲོས་ཤིག །འདི་ནི་གའུ་བསྲོ་བའོ། །

གཤིན་རྗེ་ལ་གཏད་པ།


DTG047_Page_0089
[མ་དཔེ་གཟིགས་ན་འདིར་གནོན།]

དེ་ནས་ཆུ་འགྲམ་གྱི་སའམ། སྦྲ་ཚིལ་ལས་གཤིན་རྗེའི་རྒྱལ་པོ་གཟུགས་ཁྲུ་གང་བ། རབ་ཏུ་སྤོམ་པ་མིའུ་ཐུང་འདྲ་བ་གསུས་པ་ཆེ་བ། མཆེ་བ་འཆང་བ་མདོག་གནག་པ། །མཆེ་བ་བཞི་པ། ཁྲོ་གཉེར་ཅན། སྐྲ་ཁམ་པ་འཛིངས་ཤིང་ཡེགས་ལ་འཕྱར་བ། ལག་པ་གཡས་ན་དབྱུག་པ་ལྕགས་ལས་བྱས་པ་ཐོགས་པ། གཡོན་ན་སྡིགས་པའི་མཛུབ་མོ་བསྒྲེང་བ་ལ་ཞགས་པ་བཀལ་བ་ཞིག་བྱས་ལ། དེའི་ལྟོ་བར་གའུ་དེ་བཅུག་ལ་སྦ་སྟེ། འདི་ནི་གཤིན་རྗེ་ལ་གཏད་པའོ། །

ནང་གི་རྣལ་འབྱོར།


DTG047_Page_0089
[མ་དཔེ་གཟིགས་ན་འདིར་གནོན།]

ད་ནི་ནང་གི་རྣལ་འབྱོར་བྱ་སྟེ། གཟུགས་དེ་ཁ་ལྷོར་བསྟན། རྣལ་འབྱོར་པ་ཁ་ལྷོར་བལྟས་ཏེ། རུས་སྦལ་གྱི་འདུག་སྟངས་སུ་གནས་པས། ལིང་ག་དེ་དེ་ཉིད་དུ་བསམ། འཁོར་ལོ་གཤིན་རྗེའི་གྲོང་ཁྱེར་དུའོ། །དེ་ལ་རྣམ་ཤེས་བཀུག་ཅིང་བསྟིམས་ལ། བཅིངས་ཏེ་ཡེ་ཤེས་ཀྱི་ལྷ་དང་དཔྲལ་བ་དང༌། ཁོའི་ཉེས་པ་བརྩི་བ་དང༌། རང་གི་དགེ་བའི་སྟངས་བརྩི་བ་བྱས་ལ། དེ་ནས་རང་གི་བ་སྤུའི་བུ་ག་ནས། ཁྲོ་བོ་སྲིན་པོ་འདྲ་བ་གྲངས་མེད་པ་བྱུང་བ་དང༌། དེ་དག་གིས་སྤྲུལ་ཅིང་བསྐུལ་བའི་བྱ་རྒོལ་དང་ཁྱི་དང་སྤྱང་ཀི་དང༌། ཡམ་བུ་རུ་ཥ་རྣམས་ཀྱིས་དེ་གསོད་ཅིང་པགས་པ་བཤུ་བ་དང༌། རྒྱུ་མ་འདྲེན་པ་དང༌། ལུས་གཏུབས་པ་དང༌། མིག་འབྲུ་བ་དང༌། ཀླད་པ་འཐོག་པ་ལ་སོགས་པ་ཏནྟྲ་ནས་འབྱུང་བ་ལྟར་བསམ་ཞིང༌། །གསང་སྔགས་མཱ་ར་ཡ་དང་བཅས་པར་བཟླས་པ་བྱ་སྟེ། དེ་ཡང་རང་གི་སེམས་ཚད་དང་རྟགས་དང༌། བསྙེན་པའི་ཚུལ་ལས་ཉི་མ་གཅིག་ནས་བདུན་གྱི་བར་དུ་བསྒྲིམས་ཏེ་བྱ། ཁྱད་པར་དུ་ནི་ཉིན་གུང་མཚན་གུང་ལ་བྱ་སྟེ། འདི་ནི་ནང་གི་རྣལ་འབྱོར་རོ། །

འཁོར་ལོ་སྦ་བ།


DTG047_Page_0089
[མ་དཔེ་གཟིགས་ན་འདིར་གནོན།]

དེ་ནས་འཁོར་ལོ་སྦ་སྟེ། གནས་དེར་རང་ཉིད་ཁ་ལྷོར་བལྟས་ལ། དོང་ཟུར་གསུམ་པ་ཟབ་རིངས་རབ་ལ་རྒྱར་ཁྲུ་གང་བ་ཅིག་བྲུས་ལ། དེར་གཤིན་རྗེའི་གཟུགས་དེ་ཁ་སྦུ་བ་ལ་མགོ་ལྷོར་བསྟན་ཏེ་གཞག་གོ །དེ་ནས་འབྱུང་པོ་ཐམས་ཅད་ལ་དེ་ཉིད་དུ་དྲག་པོའི་བ་ལིཾ་བྱིན་ལ་ལས་བཅོལ་དཔང་གཟུགས་སོ། །དེ་ནས་དེ་མ་ཐག་ཏུ་བསྒྲུབ་བྱ་ཡ་མའི་གྲོང་ཁྱེར་ན་ཡ་མ་རྣམས་ཀྱིས་བཟུང་སྟེ་གསོད་པར་བསམས་ལ། ཡ་མ་རཱ་ཇ་ལ་བསྐུལ་བ་བྱ་སྟེ།


DTG047_Page_0090
[མ་དཔེ་གཟིགས་ན་འདིར་གནོན།]

བདག་ཤིན་ཏུ་ཁྲོས་ཤིང་ལྷར་གསལ་བས་འདི་སྐད་བསྐུལ་ལོ། །འདི་ནས་ལྷོ་ཡི་ཕྱོགས་རོལ་ན། །དཔག་ཚད་བརྒྱད་ཁྲིའི་ཕ་རོལ་ན། །ཐོད་པ་ལྕགས་ཀྱི་གྲོང་ཁྱེར་ན། །ཡི་དགས་ཀུན་གྱི་སྡེ་དཔོན་པོ། །མ་མོ་ཀུན་གྱི་ཚོགས་རྗེ་བོ། །གསོན་གཤིན་ཀུན་གྱི་ཟམ་ཁ་པ། །གསོན་པོ་བསྐོས་ལ་འདེད་པ་པོ། །ཤི་བ་རྣམས་ཀྱི་གཤིན་བུ་རྗེ། །དགེ་བ་ཅན་གྱི་ལྟང་ས་འཛིན་པ། །སྡིག་པ་ཅན་གྱི་ཆད་པ་མཁན། །ཉེས་ལེགས་ཆོས་བཞིན་གཅོད་པ་པོ། །ཆོས་རྒྱལ་གཤིན་རྗེ་ཞེས་བྱ་བ། །མངོན་ཤེས་རྫུ་འཕྲུལ་མཐུ་རླབས་ཅན། །འཁོར་བཅས་དེང་འདིར་བདག་ལ་དགོངས། །བདག་ནི་རྣལ་འབྱོར་སྒྲུབ་པ་པོ། །འཇམ་དཔལ་གཞོན་ནུའི་ཐུགས་ཀྱི་སྲས། །གཤིན་རྗེ་གཤེད་ཀྱི་རྣལ་འབྱོར་པ། །རྫོགས་པའི་བྱང་ཆུབ་བསྒྲུབ་པའི་ཕྱིར། །བསམ་པ་བྱང་ཆུབ་སེམས་ཀྱིས་བརླན། །རྒྱུར་ནི་ཡེ་ཤེས་རྡོ་རྗེ་འཆང༌། །གཟི་བྱིན་སྐུ་གསུང་ཐུགས་ཀྱིས་བསྐྱེད།། དོན་ནི་འགྲོ་བ་ཡོངས་ཀྱི་དོན། །ལས་ནི་སངས་རྒྱས་ཀུན་གྱི་ལས། །བཀའ་ནི་དཀོན་མཆོག་གསུམ་གྱི་བཀའ། །རྒྱལ་པོ་འཁོར་དང་བཅས་པ་ལ། །དྲག་པོའི་ལས་འདི་གཏད་པར་འདོད། །ཆེ་གེ་ཞེས་བྱའི་གདུག་པ་འདི། །གསོན་ན་འགྲོ་བ་ཡོངས་ལ་གནོད། །དཀོན་མཆོག་གསུམ་ལ་རྣམ་པར་འཚེ། །དམིགས་ཀྱི་རྣལ་འབྱོར་ཡོངས་ལ་སྡང༌། །འདི་དག་མྱུར་དུ་བསྒྲལ་བའི་ཕྱིར། །རྒྱལ་པོ་འཁོར་བཅས་སྤྱན་འདྲེན་ན། །དམ་ཚིག་དབང་གིས་གཤེགས་སུ་གསོལ། །ཨོཾ་ཧྲཱིཿ་ཥྚྲཱྀཿ་ཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཡ་མ་རཱ་ཛ་ས་པ་རི་ཝཱ་ར་ཨཱ་ཀཪྵ་ཡ་ཛཿ་ཞེས་བརྗོད་པས། རང་གི་སྙིང་ག་ནས་འོད་ཟེར་ལྕགས་ཀྱུ་འདྲ་བ་བྱུང་བས། ཡ་མ་རཱ་ཛ་འཁོར་དང་བཅས་པ་གནས་དེར་འོངས་པར་བསམ། དེའི་ཚེ་ཕྱག་རྒྱ་སྦྱར་བ་ནི། ལག་པ་གཡས་པ་ཁུ་ཚུར་བཅངས་ཏེ། མཐེ་བོང་ནང་དུ་བཅུག་ནས་མཛུབ་མོ་ཅུང་ཟད་བསྐྱེད་དེ། གདེངས་ཐབས་སུ་འཕངས་བསྟོད་པ་ནི་བེ་ཅོན་གྱི་ཕྱག་རྒྱ་སྟེ་དེ་སྦྱར་རོ། །ཡ་མ་རཱ་ཛ་ནི་ཇི་ལྟར་གཟུགས་སུ་བྱས་པ་ལ་མ་ཧེ་ཞོན་པ་དེ་དུས་མཚན་དང་བཅས་པ། འཁོར་མ་མོ་དང་ཡ་མའི་སྐྱེས་བུ་མང་པོས་བསྐོར་བའོ། །དེ་ནས་ཕྱག་རྒྱ་བསྟན་ལ། །ཨོཾ་ཧྲཱིཿ་ཥrརྀཿ་ཝི་ཀྲྀ་ཏཱ་ན་ན་ཧཱུཾ་ཕཊ་ཡ་མ་རཱ་ཛ་ས་མ་ཡ་སྟྭཾ་ཞེས་བརྗོད་པས། དེ་དག་གིས་བདག་


DTG047_Page_0091
[མ་དཔེ་གཟིགས་ན་འདིར་གནོན།]

ལ་གླགས་ཚོལ་མི་ནུས་པར་བསམས་ཏེ། ཕྱག་རྒྱ་རྡོ་རྗེ་བསྡམས་པ་ལས་སྲིན་ལག་གཉིས་བརྐྱང་ནས་གཤིབས་ཏེ་བསྒྲེང་པའོ། །དེ་ནས་གདོང་གི་ཡ་མའི་གཟུགས་ལ་མེ་ཏོག་ནག་པོ་གཏོར་ལ། ཡ་མ་རཱ་ཛ་འཁོར་བཅས་པ། །དམ་ཚིག་དབང་གིས་འདིར་བརྟན་བཞུགས། །མཆོད་པ་ཚུལ་བཞིན་བཞེས་ནས་ཀྱང༌། །ཕྲིན་ལས་མཛད་ཕྱིར་ཇི་སྲིད་དུ། །ལས་གྲུབ་པར་དུ་བཞུགས་སུ་གསོལ། །ཡ་མ་རཱ་ཛ་ས་མ་ཡ་སྟྭཾ་ཞེས་བརྗོད་དོ། །དེ་ནས་ལག་པ་གཡས་པས་བེ་ཅོན་གྱི་མུ་དྲ་བཅིང༌། གཡོན་པས་རཀྟ་དང་ཆང་བསྲེས་པས་བཀང་བའི་བྷནྡྷ་ཐོགས་ལ་ཨརྒྷ་དབུལ་ཏེ། ཡ་མ་རཱ་ཛ་འཁོར་དང་བཅས་པ་ལ། ཨརྒྷ་གསོལ་བས་དམར་གྱི་ཨརྒྷ་ཞག་གི་མེ་ཏོག་རྒྱ་མཚོ་ལྟར་མི་ཟད་པ་འབྱུང་བར་གྱུར་ཅིག །ཨོཾ་ཧྲཱིཿ་ཥྚྲྀཿ་ཝི་ཀྲྀ་ཏཱ་ན་ན་ཧཱུཾ་ཕཊ་ཡ་མ་ཪྵ་ཛ་ས་པ་རི་ཝཱ་ར་ཨརྒྷཾ་པྲ་ཏཱི་ཙྪ་ཧོ་ཞེས་པས་སོ། །ཕྱག་རྒྱ་དེ་ཉིད་ལ་གནས་པས། །གཡོན་གྱི་མེ་ཏོག་བླངས་ཏེ་ཡ་མ་རཱ་ཛ་འཁོར་དང་བཅས་པ་ལ་མེ་ཏོག་ཕུལ་བས་མེ་ཏོག་གི་ཁང་པ་བརྩེགས་པ་ཏོག་དང༌། ཁ་བད་དུ་ལྡན་པ་ཀ་བ་བརྒྱད་ཟུག་པ། མེ་ཏོག་གི་བླ་རེ་དང༌། གདུགས་དང༌། ཕྲེང་བས་བརྒྱན་པ། རིན་པོ་ཆེའི་རང་བཞིན་ཅན་འབྱུང་བར་གྱུར་ཅིག །ཨོཾ་ཧྲཱིཿ་ཥྚྲྀཿ་ཝི་ཀྲྀ་ཏཱ་ན་ན་ཧཱུཾ་ཕཊ་བཛྲ་པུཥྤ་པཱུ་ཛ་ས་མ་ཡེ་ཧཱུཾ་ཞེས་པས་སོ། །ཕྱག་རྒྱ་དེ་ཉིད་ལ་གནས་པས། གཡོན་གྱི་བདུག་པ་བླངས་ལ། ཡ་མ་རཱ་ཛ་འཁོར་དང་བཅས་པ་ལ་བདུག་པ་སྣ་ཚོགས་ཕུལ་བས། གཞལ་ཡས་ཁང་གི་མགུལ་དུ་བདུག་པའི་སྤྲིན་བཻ་ཌཱུ་ཪྻའི་མདོག་ལྟ་བུ་རིན་ཆེན་བརྩེགས་པ་འདྲ་བ་འབྱུང་བར་གྱུར་ཅིག །ཨོཾ་ཧྲཱིཿ་ཥྚྲྀཿ་ཝི་ཀྲྀ་ཏཱ་ན་ན་ཧཱུཾ་ཕཊ་བཛྲ་དྷཱུ་པ་པཱུ་ཛ་ས་མ་ཡེ་ཧཱུཾ་ཞེས་པས་སོ། །དེ་བཞིན་དུ་གཡོན་པས་མར་མེ་བླངས་ལ། ཡ་མ་རཱ་ཛ་འཁོར་དང་བཅས་པ་ལ་མར་མེ་ཕུལ་བས། གཞལ་ཡས་ཁང་གི་ཕྱོགས་མཚམས་སུ་མུན་པ་འཇོམས་པ་ནོར་བུའི་འོད་ལ་སོགས་པའི་སྣང་བ་འབྱུང་བར་གྱུར་ཅིག །ཨོཾ་ཧྲཱིཿ་ཥྚྲྀཿ་ཝི་ཀྲྀ་ཏཱ་ན་ན་ཧཱུཾ་ཕཊ་བཛྲ་དཱི་པ་པ་པཱུ་ཛ་ས་མ་ཡེ་ཧཱུཾ་ཞེས་པས་སོ། །དེ་བཞིན་དུ་གཡོན་པས་བྱུག་པ་བླངས་ལ། ཡ་མ་རཱ་ཛ་འཁོར་དང་བཅས་པ་ལ་བྱུག་པ་ཕུལ་བས་ལུས་དང་གནས་ཀྱི་དྲི་མ་ཐམས་ཅད་དག་སྟེ། རེག་ན་བདེ་བའི་རེག་བྱ་དང་དྲི་བསྣམས་བཟོད་པ་དང་ལྡན་པས་


DTG047_Page_0092
[མ་དཔེ་གཟིགས་ན་འདིར་གནོན།]

ཚིམ་པར་གྱུར་ཅིག །ཨོཾ་ཧྲཱིཿ་ཥྚྲྀཿ་ཝི་ཀྲྀ་ཏཱ་ན་ན་ཧཱུཾ་ཕཊ་བཛྲ་གནྡྷ་པཱུ་ཛ་ས་མ་ཡེ་ཧཱུཾ་ཞེས་པས་སོ། །དེ་བཞིན་དུ་གཡོན་པས་བཤོས་བཏེག་ལ། ཡ་མ་རཱ་ཛ་འཁོར་དང་བཅས་པ་ལ་བཤོས་ཕུལ་བས་ཁ་ཟས་དྲི་དང་རོ་དང་ཁ་དོག་ཕུན་སུམ་ཚོགས་པ་དང་ལྡན་པ་དང༌། བདུད་རྩི་དཀར་པོ་དང༌། སེར་པོ་དང༌། དམར་པོ་དང་སྔོན་པོ་དང་བཅས་པ། ཁམ་གྱི་ཟས་ལ་གནས་པ་རྣམས་ཚིམ་པར་བྱེད་པའི་མཐུ་དང་ལྡན་པ་རྣམས་འབྱུང་བར་གྱུར་ཅིག །ཨོཾ་ཧྲཱིཿ་ཥྚྲྀཿ་ཝི་ཀྲྀ་ཏཱ་ན་ན་ཧཱུཾ་ཕཊ་བཛྲ་ནཻ་ཝི་དྱ་པཱ་ཛ་ས་མ་ཡེ་ཧཱུཾ་ཞེས་པས་སོ། །དེ་བཞིན་དུ་གཡོན་པས་བ་ལིཾ་བཏེག་ལ་འདས་མ་ཐག་པའི་ཚིག་རྗེས་ལ། ཨོཾ་ཧྲཱིཿ་ཥྚྲྀཿ་ཝི་ཀྲྀ་ཏཱ་ན་ན་ཧཱུཾ་ཕཊ་མ་ཧཱ་བ་ལིཾ་པཱུ་ཛ་ས་མ་ཡེ་ཧཱུཾ་ཞེས་པས་བ་ལིཾ་དབུལ་ལོ། །དེ་ནས་སིལ་སྙན་སྣ་ཚོགས་བསྒྲགས་ལ་ནམ་མཁའ་མཛོད་ཀྱི་སྔགས་བརྗོད་དོ། །དེ་ནས་ལག་པ་གཡས་པ་དེ་བཞིན་དུ་གནས་པ་ལས་གཡོན་པའི་ཁུ་ཚུར་ཐོད་པའི་ཚུལ་དུ་བྱས་ལ། ཚིགས་སུ་བཅད་པ་འདི་རྣམས་ཀྱིས་བསྐུལ་བར་བྱའོ། །བཅོམ་ལྡན་གཤིན་རྗེ་གཤེད་པོའི་བཀའ། །ཆོས་ཀྱི་རྒྱལ་པོ་དགོངས་སུ་གསོལ། །དེ་རིང་དྲག་པོའི་ཕྲིན་ལས་འདི། །ཁྱེད་ཀྱི་ལས་སུ་འོས་པ་ཡིན། །ལྷ་དང་བཅས་པའི་འཇིག་རྟེན་ན། །ལེགས་ཉེས་ཆོས་བཞིན་གཅོད་པ་ཁྱོད། །གཤིན་རྗེ་གཤེད་ཀྱི་བཀའ་འཁོར་ན། །བཀའ་ཉན་དམ་ཚིག་བསྲུང་བ་ཁྱོད། །ལས་དང་རྐྱེན་གྱིས་འཆི་བ་ལ། །སྲོག་ལ་དབང་བྱེད་བདག་པོ་ཁྱོད། །ད་ཕྱིར་ལས་འདི་ཁྱོད་ལ་གཏད། །ཁྱོད་ཀྱི་འཁོར་འདི་མི་སྲུན་ཏེ། །ཐ་མལ་སེམས་ཅན་ཉེས་མེད་ཅིང༌། །གཞན་གྱིས་བསྐུལ་བར་མ་བྱས་པར། །གློ་བུར་ཕྲད་པ་འཛིན་བྱེད་ན། །ང་ཡིས་གཏད་པའི་ལས་འདི་རྣམས། །འཇམ་དཔལ་གཞོན་ནུའི་བཀའ་བཞིན་དུ། །དམ་ཚིག་ཕྱག་རྒྱ་མིག་ལ་བསྟན། །དམ་ཚིག་སྙིང་པོ་རྣ་བར་བསྒྲགས། །རྡོ་རྗེ་ཐ་ཚིག་སྙིང་ལ་བཞག །དམ་རྫས་མཆོད་པ་ཕུལ་ནས་ཀྱང༌། །དམ་ཚིག་ཕྲིན་ལས་གཉེར་དུ་གཏད། །ལས་འདི་མངོན་དུ་བསྒྲུབ་པའི་རིགས། །ཁྱོད་ཀྱིས་ལས་འདི་མ་བསྒྲུབས་ན། །དཀོན་མཆོག་གསུམ་གྱི་བཀའ་ཡང་བཅག །གཤིན་རྗེ་གཤེད་པོའི་དམ་ཡང་དྲལ། །རང་གི་ཐ་ཚིག་རང་གིས་བསླུས། །དམ་ཚིག་གྲོགས་པོ་བདག་ཅག་གི །རེ་བའི་བསམ་


DTG047_Page_0093
[མ་དཔེ་གཟིགས་ན་འདིར་གནོན།]

པ་གཏིང་ནས་བཅད། །དེ་བས་ལས་འདི་གྲུབ་པར་གྱིས། །ཁྱོད་ཀྱི་འཁོར་གྱི་དཀྱིལ་འཁོར་ན། །ཡ་མ་དཱུ་ཏི་ཞེས་བྱ་བ། །ལག་ན་ལྕགས་ཀྱུ་ནག་པོ་ཐོགས། །གང་ཞིག་གཟུང་བར་འདོད་པ་དེ། །གཡུགས་པ་ཙམ་གྱིས་འཛིན་པར་བྱེད། །ཁྱོད་ལ་གཉེར་དུ་གཏད་པ་ནི། །ཆེ་གེ་ཞེས་བྱའི་ཡུལ་ཁམས་ན། །ཆེ་གེ་མོ་ཞེས་བྱ་བའི་མིང༌། །རུས་ནི་ཆེ་གེ་མོ་ཞེས་བྱ། །འདི་དག་འཁོར་དང་བཅས་པ་ཀུན། །ཁྱོད་ཀྱིས་དེ་རིང་གཟུང་བར་གྱིས། །གཞན་ཡང་འཁོར་གྱི་དཀྱིལ་འཁོར་ན། །ཀཱ་ལ་པཱ་ཤ་ཞེས་བྱ་བ། །ལག་ན་དུས་ཀྱི་ཞགས་པ་ཐོགས། །གང་ཞིག་འཛིན་པར་འདོད་པ་དེ། །བཏབ་པ་ཙམ་གྱིས་འཛིན་པར་བྱེད། །ལྷག་མ་སྔ་མ་བཞིན་ཡིན་ནོ། །གཞན་ཡང་འཁོར་གྱི་དཀྱིལ་འཁོར་ན། །ཡ་མ་དཾཥྚྲྀ་ཞེས་བྱ་བ། །ལག་ན་བེ་ཅོན་ནག་པོ་ཐོགས། །གང་ཞིག་བསད་པར་འདོད་པ་ཀུན། །ཕྱར་བ་ཙམ་གྱིས་འཆི་བར་བྱེད། །ལྷག་མ་སྔ་མ་བཞིན་ཡིན་ནོ། །གཞན་ཡང་འཁོར་གྱི་དཀྱིལ་འཁོར་ན། །ཡམ་དཾཥྚྲི་ཞེས་བྱ་བ། །ཟ་བྱེད་མཆེ་བ་འབར་བ་ཅན། །གང་ཞིག་ཟ་བར་འདོད་པ་དེ། །གཙིགས་པ་ཙམ་གྱིས་ཟ་བར་བྱེད། །ལྷག་མ་སྔ་མ་བཞིན་ཡིན་ནོ། །གཞན་ཡང་འཁོར་གྱི་དཀྱིལ་འཁོར་ན། །ཀཱ་ལ་རཱ་ཏྲི་ལ་སོགས་པའི། །གསོད་པ་མོ་དང་ནག་མོ་དང༌། །ནམ་གྲུ་ཤ་ཀ་ལི་ལ་སོགས། །བུད་མེད་ཚོགས་ཀྱིས་བསྐོར་བ་ནི། །ལ་ལ་ལས་ཀྱི་མེ་ལོང་ཅན། །ལ་ལ་ནད་ཀྱི་རྐྱལ་བ་ཅན། །ལ་ལ་མཚོན་གྱི་དྲུ་གུ་ཅན། །ལ་ལ་བདུད་ཀྱི་ཁྲམ་བམ་ཅན། །ལ་ལ་ཤོད་རྡེའུ་དཀར་ནག་ཅན། །ལ་ལ་ལྕགས་ཀྱི་དྲེའུ་རྟ་ཅན། །ལ་ལ་བོང་བུ་གྭ་པ་ཞོན། །ལ་ལ་རླུང་ནག་འཚུབ་མ་ཞོན། །ལ་ལ་ཆུ་བྱ་ནག་མོ་ཞོན། །ལ་ལ་ནམ་གྱི་གུང་ལ་རྒྱུ། །ལ་ལ་ཆུ་བོའི་གཞུང་ལ་རྒྱུ། །ལ་ལ་ཉི་མའི་ཟེར་ལ་རྒྱུ། །ཀུན་ཀྱང་གཞན་སྲོག་འཕྲོག་པ་སྟེ། །ཁྱེད་ལ་གཉེར་དུ་གཏད་པ་ནི། །ལྷག་མ་སྔ་མ་བཞིན་ཡིན་ནོ། །གཞན་ཡང་འཁོར་གྱི་དཀྱིལ་འཁོར་ན། །ཡ་བ་ཏི་དང་ཕྱྭ་བ་སངས་དང༌། །རྨིག་པ་རལ་པ་དགུ་ལ་སོགས། །ལ་ལ་རྒྱལ་པོའི་ཚུལ་དུ་གནས། །ལ་ལ་བློན་པོའི་ཚུལ་དུ་གནས། །ཁ་ཅིག་དག་ནི་སྡེ་དཔོན་ཚུལ། །ལག་ན་བེ་ཅོན་འཁོར་ལོ་དང༌། །གསལ་ཤིང་ལ་


DTG047_Page_0094
[མ་དཔེ་གཟིགས་ན་འདིར་གནོན།]

སོགས་མཚོན་ཆ་ཐོགས། །སོ་སོའི་སྡེ་དཔོན་མངགས་པ་དང༌། །ཕོ་ཉ་ཕྱག་བརྙན་བཅས་པ་ལ། །འཕྲིན་ལས་མྱུར་དུ་གཏད་པ་ནི། །ཆེ་གེ་ཞེས་བྱའི་ཡུལ་ཁམས་ན། །ཆེ་གེ་མོ་ཞེས་བྱ་བའི་མིང༌། །རུས་ནི་ཆེ་གེ་མོ་ཞེས་བྱ། །འདི་དག་འཁོར་དང་བཅས་པ་ཀུན། །ཁྱོད་ཀྱིས་དེང་འདིར་གཟུང་བར་གྱིས། །ཞེས་བསྐུལ་ཞིང་དམར་གྱི་ཨརྒྷ་ལན་གསུམ་གསུམ་དུ་སྒྲེང་ཞིང༌། གོང་གི་ཨརྒྷའི་སྔགས་བརྗོད་དོ། །དེ་ནས་མནའ་ཆུ་བླུད་པར་བྱ་སྟེ། དྲི་ཆ་གྱི་ནང་དུ་བདུད་རྩི་ལྔ་བླུགས་ལ་ནང་དུ་རྡོ་རྗེ་བཅུག་ལ། ཨོཾ་བཛྲ་ད་ཀ་ཧཱུཾ་ཋ་ཞེས་ཅི་རན་ཅིག་བཟླས་ནས། དེ་ནས་ཡ་མའི་གཟུགས་ཀྱི་ཁར་རྡོ་རྗེ་བཞག་སྟེ། སྟེང་ནས་དྲི་ཆབ་བླུགས་ལ། ཡ་མ་རཱ་ཛ་འཁོར་བཅས་ཀྱི་སྙིང་གར་ཡེ་ཤེས་ཀྱི་རྡོ་རྗེ་འོད་འབར་བ་རེ་རེར་གྱུར་པར་བསམས་ཏེ། འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་འདས་ན་སྲེག་པར་བྱེད། །དམ་ཚིག་བསྲུངས་ན་དངོས་གྲུབ་ནི། །རྡོ་རྗེ་བདུད་རྩི་ཆུ་འདིས་འགྲུབ། །གལ་ཏེ་དམ་ཚིག་འདས་གྱུར་ན། །འཇམ་དཔལ་རྡོ་རྗེ་ཁྲོས་ནས་ཀྱང༌། །སྙིང་ག་ནས་ནི་གཤེགས་པར་འགྱུར། །ཨོཾ་བཛྲོད་ཀ་ཧཱུཾ་ཋཿ་སྔོན་གྱི་ཐ་ཚིག་དྲན་བྱའི་ཕྱིར། །རྡོ་རྗེའི་ཐ་ཚིག་འདི་བསྣན་པས། །མི་ཕྱེད་རྡོ་རྗེའི་དམ་ཚིག་ནི། །ཁྱོད་ཀྱི་སྙིང་ལ་གནས་པར་འགྱུར། །ཨོཾ་བཛྲ་ས་མ་ཡ་ཏིཥྛ་ཞེས་བརྗོད་དེ། །རྡོ་རྗེ་ཡ་མའི་སྙིང་གར་གཏུག་གོ །དེ་ནས་གཟུགས་དེ་སས་རབ་ཏུ་དམ་པར་སྦས་ལ། སུས་ཀྱང་སྦས་པར་མི་ཤེས་པ་དེ་ལྟར་ནན་ཏན་བྱས་ལ། དེའི་སྟེང་དུ་ཁྲོ་བོའི་ཚ་མང་གི་སྟང་སྟབས་བྱས་ལ་རང་གི་གནས་སུ་འགྲོ་སྟེ། འདི་ནི་འཁོར་ལོ་སྦ་བའི་ཚུལ་ལོ། །གང་ཞིག་ཏིང་འཛིན་ཐོབ་པའམ། བཟླས་པའི་མཐུ་ཁྱད་པར་ཅན་ཡོད་པ་དེས་ནི། གའུ་བསྲོ་བ་དང༌། གཤིན་རྗེ་ལ་གཏད་པ་དང༌། འཁོར་ལོ་སྦ་བ་དག་ལ་འབད་པ་དེ་སྙེད་མི་བྱ་སྟེ། འཁོར་ལོ་བྲིས་པ་ལ་ནང་གི་རྣལ་འབྱོར་དང་བཟླས་པ་བྱས་ལ། ཐོད་པར་བཅུག་པ་དེ་ཉིད་སྦས་པས་ཆོག་གི་ལས་ཀྱི་གཤིན་རྗེ་ལ་ཆེད་ཆེར་གཏད་པ་དེ་དག་བྱ་མི་དགོས་སོ། །

རྗེས་ཀྱི་རྣལ་འབྱོར།


DTG047_Page_0094
[མ་དཔེ་གཟིགས་ན་འདིར་གནོན།]

དེ་ནས་རྗེས་ཀྱི་རྣལ་འབྱོར་ནི། འཁོར་ལོ་སྦས་པའི་རྟིང་ལ་རང་གི་གནས་སུ་གསང་སྔགས་རྗེས་སུ་བསྐུལ་ཞིང༌། མ་མོ་དང་གིང་དང༌། ཡ་མའི་སྐྱེས་བུ་རྣམས་ལ་ཡང་གཏོར་མ་བཟང་པོ་བྱིན་ལ་དྲག་ཏུ་བསྐུལ། རང་


DTG047_Page_0095
[མ་དཔེ་གཟིགས་ན་འདིར་གནོན།]

གིས་བསྟེན་ཅིང་གཉེན་པའི་འཇིག་རྟེན་པ་ཡོད་ན་དེའི་ལས་ཀྱི་སྦྱོར་བ་ཡང་བྱ་ཞིང༌། དེ་ཡང་དྲག་ཏུ་བསྐུལ་ཏེ་བཏང༌། བསྲུངས་པ་འདྲེན་པར་དེར་ལྷ་དང་དབྲལ་བ་ཡང་བྱ་སྟེ། འདི་ནི་རྗེས་ཀྱི་རྣལ་འབྱོར་རོ། །

སླར་དབྱུང་བའི་ཆོ་ག


DTG047_Page_0095
[མ་དཔེ་གཟིགས་ན་འདིར་གནོན།]

སླར་དབྱུང་བའི་ཆོ་ག་ནི། ལས་གྲུབ་ན་འཁོར་ལོ་སླར་ཕྱུང་ལ། ཡ་མཱནྟ་ཀ་ལ་མཆོད་པ་བྱས་ལ། ཡ་མ་རཱ་ཛ་ལ་ཡང་མཆོད་པ་སྔ་མ་ལྟར་ཕུལ་ལ། འཁོར་ལོ་འོ་མས་བཀྲུ་ཞིང་སངས་རྒྱས་སྤྱན་གྱི་སྔགས་བཟླས་ཏེ། ལྷ་རྣམས་ལ་བཟོད་པར་གསོལ་ནས། རྫས་རྣམས་ཆུ་ཀླུང་དུ་བཀྲུས་ལ་དེ་ཉིད་དུ་དོར་བར་བྱའོ། །འདི་ནི་འཁོར་ལོའི་དོན་རྣམ་པར་བཤད་པ་ལས། དྲག་པོའི་འཁོར་ལོ་བསྟན་པ་སྟེ། ཞི་བ་ལ་སོགས་པ་ནི། རྟོགས་སླ་བས་བདག་གིས་མ་བཤད་དོ། །

ལས་ཀྱི་སྔགས་ཀྱི་བྱ་བ་མདོར་བསྟན་པ།


DTG047_Page_0095
[མ་དཔེ་གཟིགས་ན་འདིར་གནོན།]

ལས་ཀྱི་སྔགས་ལ་དམིགས་ཤིང༌། རྩ་བའི་སྔགས་མ་བསྙེན་པས་ནི་འཁྲུལ་འཁོར་མི་བྱ་སྟེ། སྦྱིན་སྲེག་དང༌། བཟླས་པ་དང་གཏོར་མ་དག་གིས་ལས་རྣམ་པ་བཅུ་ལ་སོགས་པ་བསྒྲུབ་པར་བྱའོ། །མ་མོའི་གནས་ལ་སོགས་པར་མར་ངོའི་ཉིན་ཕྱེད་ན་སོང་ལ། ཐབ་ཁུང་གྲུ་གསུམ་ཟབས་སུ་སོར་བཅུ་པ་རྒྱར་སོར་ཉི་ཤུ་པ། དབུས་ན་པདྨ་འདབ་བརྒྱད་ལ་རྡོ་རྗེ་རྩེ་ལྔ་པ་སྔོན་པོས་མཚན་པ། མུ་རན་ནང་མ་ལ་ཡང་མཚོན་ཆ། ཕྱི་མ་ལ་ཡང་སྣ་ཚོགས་པའི་མཚོན་ཆ་ཅན་དུ་དྲག་པོའི་ལྷ་དང༌། མེ་ལྷའི་ཞལ་དུ་དྲག་པོའི་སྲེག་རྫས་རྣམས་དབུལ་ལོ། །སྔགས་ཀྱང་དྲག་པོ་མཱ་ར་ཡ་ཕཊ་ཅེས་པ་དང་ལྡན་པས་སོ། །དེ་ཡང་དང་པོར་དྲག་པོའི་ཐབ་ཁུང་བྱས་ལ། དག་པོའི་བུད་ཤིང་བཅེར། ཀུ་ཤ་དགྲམ། །མཆོད་རྫས་དང་སྲེག་རྫས་བཀྲམ་ལ་རང་ཡ་མཱནྟ་ཀར་བསྐྱེད་དོ། །དེ་ནས་ཐབ་ཁུང་དུ་དྲག་པོའི་མེ་སྦར་ལ། མེ་སྦར་མ་ཐག་ཏུ་ཧཱུཾ་ཞེས་བརྗོད་ལ་ཚ་བའི་མར་ཁུ་དགང་གཟར་བདུན་ནམ་གསུམ་དབུལ་བས་མེ་ཆེར་སྦར་རོ། །དེ་མ་ཐག་ཏུ་ཐབ་ཀྱི་དབུས་སུ་ཡི་གེ་རཾ་ནག་པོ་གྱུར་པ་ལས་མེ་ལྷ་མཐིང་ནག་དྲང་སྲོང་རལ་པ་ཅན་ཕྲེང་བ་དང༌། སྤྱི་བླུགས་དང༌། །དབྱུ་གུ་གསུམ་དང༌། མི་འཇིགས་པ་སྦྱིན་པའི་ལག་པ་ཅན་རླུང་གི་མེ་བསམ་མོ། །དེ་ནས་ཨོཾ་ཨེ་ཧྱེ་ཧི་མ་ཧཱ་བྷཱུ་ཏ། དེ་བ་རྀ་ཥྀ་དྭི་ཛ་ས་ཏ་མ་གྲི་ཧི་ཏྭ་ཨ་ཧཱུ་ཏི་ཨ་ཧཱ་རི། ཨསྨིན་ས་ན་ནི་ཧི་ཏོ་བྷ་བཱ་ཞེས་ལན་གསུམ་བརྗོད་པས་ཐབ་


DTG047_Page_0096
[མ་དཔེ་གཟིགས་ན་འདིར་གནོན།]

འགྲམ་གྱི་མཁའ་ལ་བྱོན་པར་བསམ། དེ་ལ་ཨརྒྷ་དང་མཆོད་པ་དབུལ། ཨོཾ་བཛྲ་ཨ་ན་ལ་མ་ཧཱ་བྷཱུ་ཏ་ཛྲྭཱ་ལ་ཡ། སརྦ་དུཥྚཱན་བྷསྨིན་ཀུ་རུ་ཧཱུཾ་ཕཊ། དྲྀ་ཤྱ་ཛཿ་ཧཱུཾ་བཾ་ཧོཿ་ས་མ་ཡ་སྟྭཾ་ཨ་ཧཾ་ཞེས་བརྗོད་པས་ཐབ་ཏུ་བསྐྱེད་པ་ལ་བསྟིམ། དེ་ནས་མེ་ལྷ་ཁྲོས་ཤིང་ཁ་གདངས་པ་ལ་དགང་བླུགས་ལ་སོགས་པ་སྔགས་ཀྱི་མཐར་ཆེ་གེ་མོ་མཱ་ར་ཡ་ཕཊ་དང་ལྡན་པས་རྫས་སུམ་ཆ་ཙམ་ཕུལ་ལ། མེ་ལྷའི་སྙིང་གར་ལྷ་མཆོག་བསྐྱེད། དེ་ནས་ཡེ་ཤེས་སེམས་དཔའ་སྤྱན་དྲངས་ལ་བསྟིམས་ལ་མཆོད་པ་བསྟོད་བྱས་ནས་ཁྲོས་པའི་ཞལ་དུ་རྫས་ཕལ་ཆེར་བསྲེག་གོ །དེ་ནས་ཕྲིན་ལས་ཞུས་ལ། ཡི་གེ་བརྒྱ་པ་བརྗོད་ལ། དེ་ཨོཾ་ཨཱཿ་ཧཱུཾ་མུཿ་ཞེས་པས་སླར་གཤེགས་ནས། དམ་ཚིག་སེམས་དཔའ་བདག་ལ་བསྡུ། རྫས་ལྷག་མ་མེ་ལྷ་ལ་དབུལ་ཏེ། ལས་བཅོལ་ཏེ་བཟོད་པར་གསོལ་ལ་སླར་ཡི་གེ་གསུམ་མུཿའི་མཐའ་ཅན་གྱིས་གཤེགས་སུ་གསོལ་ལ། ཁྲག་གམ་ཆུ་ནག་པོས་མེ་བསད་དོ། །སྲེག་རྫས་ཐ་དད་པའི་སྔགས་དང་ཧོ་མ་གཟར་ལ་སོགས་པ་ནི་འདིར་མ་བཤད་དེ། གཞུང་གཞན་ལས་གསལ་བས་དེར་བལྟའོ། །ཞི་བ་ལ་སོགས་པའི་ཡང་ཅི་རིགས་སུ་སྦྱར་རོ། །འདི་ནི་ལས་ཀྱི་སྔགས་ཀྱི་བྱ་བ་མདོར་བསྟན་པའོ། །

སྙིང་པོའི་སྔགས་ཀྱི་བྱ་བ་མདོར་བསྟན་པ།


DTG047_Page_0096
[མ་དཔེ་གཟིགས་ན་འདིར་གནོན།]

ད་ནི་སྙིང་པོའི་སྔགས་ལ་གནས་པའི་བྱ་བ་བཤད་དེ། སྔོན་བཞིན་དུ་ལྷའི་སྐུ་བསྐྱེད་མ་ཐག་ཏུ། ཨོཾ་དྷརྨ་དྷཱ་ཏུ་སྭ་བྷཱ་བ་ཨཱཏྨ་ཀོ྅ཧཾ་ཞེས་པས་ཆུ་ཟླ་ལྟར་བསམས་ལ། ཡེ་ཤེས་སེམས་དཔའ་བསྟིམ་པ་ནས་དབང་བསྐུར་བའི་ངང་དུ་བྱས་ལ་འགྲོ་བ་དྲུག་ཏུ་འོད་ཟེར་དྲུག་སྤྲོས་པས་རང་རང་ལ་ལྷག་པར་ཤས་ཆེ་བའི་ཉོན་མོངས་པ་དང༌། སྡུག་བསྔལ་བསལ་བར་ཡང་དང་ཡང་དུ་བྱས་ལ། སྐྱོ་ན་གསང་སྔགས་བཟླས་ཏེ། ལྡང་བ་ན་དགེ་བ་བྱང་ཆུབ་ཆེན་པོར་བསྔོས་ལ་ཡན་ལག་དྲུག་གི་སྲུང་བ་བྱས་ལ་ལྡང་ངོ༌། །གཏོར་མ་དང་ཡི་གེ་བརྒྱ་པ་སྔོན་བཞིན་ནོ། །སྣང་བ་རྣམ་པར་དག་པའི་རྫོགས་རིམ་དང་རྟག་ཏུ་ལྡན་པར་བྱའོ། །ནུས་པ་ལྟ་ན་དེ་ཁོ་ན་ཡིད་ལ་བྱེད་པའི་རྫོགས་རིམ་ལ་ཡང་གནས་པར་བྱའོ། །

འཆི་བའི་དུས་སུ་ཡིད་ལ་བྱ་བའི་མན་ངག་བསྟན་པ།


DTG047_Page_0097
[མ་དཔེ་གཟིགས་ན་འདིར་གནོན།]

ད་ནི་རྣམ་པ་གསུམ་ཆར་དང་འབྲེལ་བའི་འཆི་བའི་དུས་སུ་ཡིད་ལ་བྱ་བའི་མན་ངག་བསྟན་པར་བྱ་སྟེ། དེས་དམ་ཚིག་དང་འགལ་བ་ཅི་བྱས་པ་རྣམས་ལེགས་པར་ཡིད་ལ་བྱས་ལ་རབ་ཏུ་འགྱོད་ཅིང་ཕྱིས་མི་བྱ་བའི་བསམ་པས། འགྲོ་བ་ཡུལ་དུ་གྱུར་བ་རྣམས་དང་འདོད་པའི་ལྷ་དང༌། ཆོས་སྐྱོང་བ་རྣམས་ལ་བཤགས་པར་བྱའོ། །དེས་དགེ་བ་ཅི་བྱས་པ་རྣམས་འགྲོ་བའི་དོན་དུ་བྱང་ཆུབ་ཏུ་བསྔོས་ལ་ཤི་མ་ཐག་ཏུ་སངས་རྒྱས་དངོས་སུ་བཞུགས་པའི་ཞིང་དུ་རྫུས་ཏེ་འབྱུང་ཞིང༌། རིགས་དང༌། གཟུགས་དང༌། གྲོགས་དང༌། འཁོར་དང༌། ལོངས་སྤྱོད་དང༌། དད་པ་དང༌། ཤེས་རབ་དང༌། གཉེན་པོ་དང༌། དྲན་པ་ལ་སོགས་པ་ཕུན་སུམ་ཚོགས་པར་གྱུར་ཏེ། འཇུག་པ་བདེ་བ། ལམ་བདེ་བས་ཚོགས་རྣམ་པ་གཉིས་བདེ་བླག་ཏུ་བསགས་ཏེ། མྱུར་དུ་བྱང་ཆུབ་པར་གྱུར་ཅིག་ཅེས་བསྔོ་བར་བྱའོ། །དེ་ནས་འདི་ལྟར་གང་རྡོ་རྗེའི་སྐུ་མངའ་བའི་སངས་རྒྱས་རྣམས་ཀྱང་སྐུ་ཆེད་དུ་འཇིག་ཅིང༌། ཉན་ཐོས་དང་རང་སངས་རྒྱས་ལས་དང་ཉོན་མོངས་པ་དང་བྲལ་བ་རྣམས་ཀྱང་ཆེད་དུ་ལུས་ལ་ཡིད་བྱུང་བས་སྤོང་ན། བདག་གི་ལུས་རྣག་ཅན་མཐོང་བའི་ཆོས་ལ་དངོས་གྲུབ་ཀྱི་སྣོད་དུ་མ་གྱུར་ཅིང༌། བསྲུང་བ་བྱས་པ་ཤ་ཐང་བའི་འདི་ལ་ཅི་ཞིག་ཆགས་སུ་ཡོད་ཅེས་ལུས་དང་སྲོག་ལ་ཆགས་པ་སྤང་བར་བྱའོ། །དེ་ནས་ཡང་དོན་དམ་པ་བྱང་ཆུབ་ཀྱི་སེམས་ལ་དམིགས་ནས་སྐྱེ་བ་དང༌། གནས་པ་དང༌། འཆི་བ་ནམ་མཁའ་ལྟ་བུ་རྒ་བ་དང་ཀུན་དུ་སྐྱོ་བ་ལ་གྲོལ་བ། བློའི་བླང་དོར་དང་འཇིགས་པ་རྣམ་པར་སྤངས་ཤིང༌། འཚོ་བའི་འཇིག་རྟེན་སྨིག་རྒྱུ་ཙམ་དུ་ཤེས་པར་བྱའོ། །དེ་ནས་བདག་གི་ལུས་དང་གནས་དང༌། ལོངས་སྤྱོད་སྒྱུ་མ་ལྟ་བུ་རྣམས། བསམ་པ་ཐག་པ་ནས་སེམས་ཅན་ཐམས་ཅད་ལ་བྱིན་ཅིང༌། དེའི་འོག་ཏུ་རང་གི་ལུས་འདོད་པའི་ལྷའི་སྐུར་རྣམ་པར་བསམས་ཏེ་ཕྱོགས་བཅུ་ཐམས་ཅད་རྣམ་པར་དག་པའི་ཞིང༌། ལྷའི་རྒྱལ་པོ་དང་བསྙེན་བཀུར་གྱི་གནས་ལྟར་ཡིད་དུ་འོང་བར་བསམས་ལ་ལྷག་པའི་ལྷ་ལ་ཡང་དང་ཡང་དུ་ཡིད་གཏད་དེ། ཚོར་བ་ཐམས་ཅད་ཟིལ་གྱིས་མནན་པར་བྱའོ། །དེའི་སྣང་བའི་ཡུལ་དུ་འོང་བ་དང༌། མི་འོང་བའི་མཚན་མ་ཅི་བྱུང་ཡང་དགའ་བ་དང་འཇིགས་པ་མི་བསྐྱེད་ཅིང་དྲི་ཟའི་གྲོང་ཁྱེར་ལྟར་བསམ་མོ། །འདི་ནི་འཆི་བའི་དུས་སུ་ཡིད་ལ་བྱ་བའི་མན་ངག་གོ །གང་ཞིག་བླ་མ་ལ་གུས་སྙིང་རྗེས་རྒྱུད་འཇམ་པས། །ཆོས་ཀུན་སྟོང་བར་ཤེས་ཤིང་ཡུལ་ལ་འདོད་པ་སྤང༌། །


DTG047_Page_0098
[མ་དཔེ་གཟིགས་ན་འདིར་གནོན།]

གཉེན་པོའི་མཐུ་ལྡན་བློ་གྲོས་དྲི་མ་རྣམས་དང་བྲལ། །འགྲོ་བ་སྐྱོབ་བྱེད་གདུགས་དཀར་ལྟ་བུ་དེ་རྣམས་དང༌། །བདག་གི་ཡང་དག་རྟགས་པས་སྨྲས་པའི་གཏམ་ཚུལ་འདི། །མྱུར་དུ་བར་ཆད་མེད་པར་ཉམས་ལེན་བྱེད་བཅས་ཕྲད་གྱུར་ཅིག །ཇི་སྲིད་ས་ལ་འགྲོ་བའི་ལོངས་སྤྱོད་རྣམ་འཕེལ་མ་འགགས་པ། །དེ་སྲིད་གཏམ་འདི་ཉམས་པ་མེད་པར་འགྲོ་དོན་གནས་པར་ཤོག །གཏམ་ཚུལ་འདི་ནི་གསལ་སྨྲས་པས། །འགྲོ་བ་འཇམ་དབྱངས་འདྲར་གྱུར་ཅིག །བདག་དང་ཆོས་ཀུན་སྒྱུ་འདྲ་བར། །མྱུར་རིག་འཇམ་དཔལ་ཉིད་གྱུར་ཅིག །དཔལ་གཤིན་རྗེའི་གཤེད་དགྲ་ནག་པོའི་སྒྲུབ་པའི་ཐབས་འཁོར་ལོའི་དོན་རྒྱས་པར་བཤད་པ་དང་བཅས་པ་སློབ་དཔོན་མི་བསྐྱོད་པའི་རྡོ་རྗེའི་ཞལ་སྔ་ནས་མཛད་པ་འདི་ཡོངས་སུ་རྫོགས་སོ།། །།རྒྱ་གར་གྱི་མཁན་པོ་ཨཱ་ཙཱཪྻ་བི་ནཱ་ཡ་ཙནྡྲ་དང༌། བོད་ཀྱི་ལོ་ཙཱ་བ་དགེ་སློང་ཆོས་ཀྱི་ཤེས་རབ་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།།

གཤིན་རྗེའི་གཤེད་ནག་པོ་སྒྲུབ་པའི་ཐབས།
ཀ་མ་ལ་རཀྵི་ཏ།

རྣལ་འབྱོར།


DTG047_Page_0098
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། ཀྲྀཥྞ་ཡ་མཱ་རི་སཱ་དྷ་ནཾ། བོད་སྐད་དུ། གཤིན་རྗེའི་གཤེད་ནག་པོ་སྒྲུབ་པའི་ཐབས། འཕགས་པ་འཇམ་དཔལ་གཤིན་རྗེའི་གཤེད་ལ་ཕྱག་འཚལ་ལོ། །སྙིང་རྗེས་སེམས་ཅན་ཕན་པ་མཛད་ཅིང་དཔག་བསམ་ཤིང་དང་འདྲ་བ་ཡི། །དཔལ་ལྡན་གཤིན་རྗེའི་གཤེད་ཀྱི་མདངས་འབར་ཆར་སྤྲིན་གཞོན་འདྲ་ཡིད་འོང་བ། །རྟོག་པའི་རླབས་བྲལ་ལྷན་ཅིག་སྐྱེས་པའི་འོ་མ་ལས་འཕྲོས་དེ་ལ་ཕྱག་འཚལ་ནས། །འདི་ཡི་དཀྱིལ་འཁོར་བསྒྲུབ་བྱ་དང་བཅས་དཔལ་ལྡན་བླ་མའི་བཀའ་ཡིས་བཤད་པར་བྱ། །དང་ཕོར་སྔགས་པས་ཕྱི་ནང་གི་རྣམ་པར་གཡོ་བམ་ལུས་པ་ཡོངས་སུ་བཏང་ལ། བློ་དང་ལྡན་ཞིང་སྙིང་རྗེ་དང་ལྡན་པས་རང་གི་སྙིང་གར་ཐུགས་ཀྱི་ས་བོན་གྱི་སྔགས་འོད་ཟེར་གྱི་རིགས་ཀུན་དུ་འཁྲིགས་པ་བལྟས་ལ། འོད་འཕྲོས་པ་དེ་ལས་ཕྱོགས་སྐྱོང་བ་བརྒྱད། ཤིང་བརྒྱད་ཀྱིས་བརྒྱན་ཅིང་དྲག་པོའི་དུར་ཁྲོད་དོ། །དེའི་དཀྱིལ་དུ་འཇིགས་པ་དང་བྲལ་བས་སྟན་བདེ་བ་ལ་ཉེ་བར་འདུག་ལ། སེམས་ཅན་ལ་ཕན་པའི་ཕྱིར་བསམ་གཏན་ལ་སྤྱད་པར་བྱ་སྟེ། ས་བོན་དེ་ལས་འོད་འཕྲོས་པས་རང་གི་བ་སྤུའི་བུ་ག་ལས་ཕྱིར་བྱུང་བའི་ཁ་དོག་


DTG047_Page_0099
[མ་དཔེ་གཟིགས་ན་འདིར་གནོན།]

ལྔ་དང་ལྡན་པའི་འོད་ཀྱིས་བདག་ཉིད་རྣམ་པར་སྦྱང་བར་བྱའོ། །དེ་ཉིད་ཀྱིས་འགྲོ་བ་རིགས་དྲུག་ན་འཁོར་བའི་སེམས་ཅན་སྡུག་བསྔལ་བ་རྣམས་ལ་བལྟས་པས། རྣམ་པར་ཐར་པའི་སྒོ་གསུམ་གྱི་ངོ་བོ་ཉིད་དུ་འགྲོ་བར་བལྟའོ། །དེ་ནས་འོད་ཟེར་དེས་སྤྱན་དྲངས་པའི་བླ་མ་དང་སངས་རྒྱས་དང་བྱང་ཆུབ་སེམས་དཔའ་དང༌། དཔལ་གཤིན་རྗེ་གཤེད་ལ་སོགས་པ་སྤྱན་དྲངས་ཏེ་མདུན་དུ་ཟླ་བའི་གདན་ལ་བཞུགས་པར་བལྟས་ལ། ཕྱག་འཚལ་བ་དང་མཆོད་པ་དང༌། སྡིག་པ་བཤགས་པ་ལ་སོགས་པ་བྱ་སྟེ། རྫོགས་པའི་སངས་རྒྱས་ཐམས་ཅད་ལ་མཆོད་པ་ཆེན་པོ་མཆོད་པར་བགྱིའོ། །རྫོགས་པའི་སངས་རྒྱས་ཐམས་ཅད་ལ་ལུས་དང་ངག་དང་ཡིད་ཀྱིས་ཕྱག་བགྱིའོ། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་བདག་ཉིད་སྡིག་པ་ཐམས་ཅད་སོ་སོར་བཤགས་སོ། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང༌། འཕགས་པ་དང་སོ་སོའི་སྐྱེ་བོ་ཐམས་ཅད་ཀྱི་བསོད་ནམས་ལ་རྗེས་སུ་ཡི་རང་ངོ༌། །སངས་རྒྱས་ཐམས་ཅད་ལ་ཆོས་ཀྱི་འཁོར་ལོ་བསྐོར་བར་བསྐུལ་བར་བགྱིའོ། །ཡོངས་སུ་མྱ་ངན་ལས་འདའ་བར་བཞེད་པའི་སངས་རྒྱས་ཐམས་ཅད་ལ་བསྐལ་པ་མང་པོར་བཞུགས་པར་གསོལ་བ་གདབ་པོ། །མཆོད་པའི་རང་བཞིན་རྣམ་པ་བདུན་ནམ། གཞན་ཡང་གང་ཇི་སྐད་གསུངས་པའི་དགེ་བ་མ་ལུས་པ་དེ་དག་ཐམས་ཅད་རྫོགས་པའི་བྱང་ཆུབ་ཏུ་བསྔོའོ། །དེའི་རྗེས་ལ་གསུམ་ལ་སྐྱབས་སུ་འགྲོ་བ་ནི་སངས་རྒྱས་དང་ཆོས་དང་དགེ་འདུན་ལ་སྐྱབས་སུ་མཆིའོ་ཞེས་འདི་ལྟར་བྱའོ། །དེ་ནས་བྱང་ཆུབ་ཏུ་སེམས་བསྐྱེད་དེ། ཡང་དག་པར་རྫོགས་པའི་བྱང་ཆུབ་ཐོབ་ནས་ཐམས་ཅད་དུ་སེམས་ཅན་གྱི་དོན་ཡངས་པ་བགྱིའོ་ཞེས་སོ། །དེ་ནས་བདག་གི་ལུས་དབུལ་ཏེ་སངས་རྒྱས་དང་བྱང་ཆུབ་སེམས་དཔའ་རྣམས་ལ་བདག་ཉིད་ཀྱི་ལུས་དབུལ་བར་བགྱིའོ། །དེ་ནས་ལམ་གཟུང་བར་བྱ་སྟེ། ཇི་ལྟར་ཡང་བླ་ན་མེད་པའི་ལམ་རྡོ་རྗེ་སེམས་དཔའི་སྙིང་པོ་གཤིན་རྗེའི་གཤེད་བདག་གིས་གཟུང་བར་བགྱིའོ། །དེ་ནས་བྱམས་པ་དང་སྙིང་རྗེ་དང༌། དགའ་བ་དང་བཏང་སྙོམས་ཀྱི་ངོ་བོ་ཚངས་པའི་གནས་བཞི་བསྒོམ་པར་བྱའོ། །དེའི་རྗེས་ལ་དངོས་


DTG047_Page_0100
[མ་དཔེ་གཟིགས་ན་འདིར་གནོན།]

པོ་ཐམས་ཅད་སེམས་ཙམ་གྱི་རང་བཞིན་པས་དངོས་པོ་ངོ་བོ་ཉིད་ཀྱིས་དག་པར་བལྟ་སྟེ། ཨོཾ་སྭ་བྷཱ་ཝ་ཤུདྡྷཿ་སརྦ་དྷརྨཱཿ་སྭ་བྷཱ་བ་ཤུདྡྷོ྅ཧཾ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་སྔགས་འདིས་སྟོང་པ་ཉིད་དུ་བྱིན་གྱིས་བརླབས་ཏེ། འདི་ནི་བསྲུང་བའི་མཆོག་གོ །འདི་ལས་ལྷག་པའི་སྲུང་བའི་དོན་ནི། ཡི་གེ་རེ་ཡོངས་སུ་གྱུར་པའི་ཉི་མ་ལ་གནས་པའི་ཡི་གེ་ཧཱུཾ་ལས་བྱུང་བའི་སྣ་ཚོགས་རྡོ་རྗེ་ལས་སྤྲོས་པའི་རྡོ་རྗེ་ར་བ་དང༌། རྡོ་རྗེ་གུར་དང༌། རྡོ་རྗེ་དུར་ཁྲོད་དང་བཅས་པར་རྡོ་རྗེའི་ས་གཞི་བསྒོམ་མོ། །ཡང་དུར་ཁྲོད་རྣམས་འདི་ལྟར་འབྱུང་སྟེ། རྡོ་རྗེའི་ཕྱོགས་སུ་ཤཱིར་ཥ་སྟེ། །གནོད་སྦྱིན་ལག་གཡས་སྤྱི་བླུགས་དང༌། །གཡོན་ན་ཐོད་པ་ཐོགས་པ་ཡི། །ཙཎྜ་ཞེས་པའི་མདོག་སེར་གནས། །གནོད་སྦྱིན་དཔལ་འཛིན་དམར་པོ་སྟེ། །གཡས་པ་ན་ནི་ཕྲེང་བ་དང༌། །གཡོན་ན་ཐོད་པའི་སྣོད་ཐོགས་ཏེ། །མེན་ཀ་རཾ་ཛ་ཤིང་ལའོ། །གཤིན་རྗེའི་གཤེད་ནི་ཙཱུ་ཏ་ལ། །རྣམ་འཇིགས་ཞེས་བྱའི་མདོག་ནག་པོའི། །གཡས་པ་ན་ནི་དབྱུག་པ་དང༌། །གཡོན་པ་ཆུ་སྐྱེས་སྣོད་ཡིན་ནོ། །བདེན་བྲལ་གཡས་གྲི་གུག་དང༌། །གཡོན་ན་ཆུ་སྐྱེས་སྣོད་ཐོགས་པའི། །སེར་པོ་གོ་ར་ཨནྡྷ་ཀར། །འཁྲི་ཤིང་ལ་མའི་ཤིང་ལའོ། །ཆུ་ནི་མྱ་ངན་མེད་ཤིང་ལ། །འོད་ཀྱི་ཕྲེང་ཅན་མགོ་ཡི་རུས། །དཀར་ཕོ་གཡས་ན་ཀླུ་ཞགས་དང༌། །གཡོན་ན་ཆུ་སྐྱེས་སྣོད་ཐོགས་པའོ། །རླུང་ན་ཀི་ལ་ཀི་ར་བ། །སྔོན་པོ་གཡས་ན་གོས་སྔོན་ཐོགས། །གཡོན་པ་ན་ནི་ཆུ་སྐྱེས་སྣོད། །ཨརྫུ་ན་ཡི་ཤིང་ལ་གནས། །ཀུ་བེ་ར་ན་གྷ་བ་དར། །ལག་པ་གཡས་ན་རྡོ་རྗེ་དང༌། །གཡོན་པ་ན་ནི་པདྨའི་སྣོད། །ཨ་ཤྭད་ཐ་ལ་མནན་ནས་གནས། །གནོད་སྦྱིན་གད་མོ་ཆེར་གྲགས་པ། །དཀར་པོ་གཡས་ན་རྩེ་གསུམ་པ། །གཡོན་པ་ན་ནི་པདྨའི་སྣོད། །དབང་ལྡན་ཤིང་ཆེན་པོ་ལ་གནས། །ཐམས་ཅད་ཤིང་ལས་ལུས་ཕྱེད་བཏོན། །དྲག་ཅིང་འབར་ལ་སྐྲ་དང་ནི། །སྨ་ར་སྨིན་མ་ལྐོག་སྤུ་དང༌། །རྫི་མའང་སེར་པོ་ཁྲོས་པའི་ཞལ། །སྤྱན་གསུམ་དམར་པོ་རབ་འགུལ་བ། །མཆེ་བ་དྲག་ཏུ་གཙིགས་པའོ། །ཤིང་འདི་རྣམས་ཀྱི་རྩ་བ་རུ། །གསལ་ཤིང་གིས་ཕུག་རོ་ཡང་བཞག །ཁ་ཅིག་ལྟུང་བའི་རོ་དག་དང༌། །ཁྱི་དང་བྱ་རྒོད་ཟ་བའོ། །དེ་ལ་ཡང་དག་རོས་མྱོས་པའི། །རྣལ་འབྱོར་པ་དག་གླུ་ལེན་ཏེ། །ལྷན་ཅིག་


DTG047_Page_0101
[མ་དཔེ་གཟིགས་ན་འདིར་གནོན།]

སྐྱེས་ཞེས་འགྲོ་བ་གསུམ། །རྣམ་པར་སྦྱོང་ཞིང་རྣལ་འབྱོར་པས། །བདུད་རྩི་ལྔ་ལྡན་ཐོད་པ་དང༌། །ཆགས་པས་དཔལ་ལ་འདུད་བྱེད་ཅིང༌། །འགྲོ་བ་གསུམ་པོ་ཚིམ་པར་བྱེད། །དེས་ན་རིག་པ་དང་བཅས་པའི་དཔལ་མཆོག་དང་པོ་ལས་བྱུང་བའི་ཆོས་འབྱུང་ཞེས་བྱ་བའི་ཕྱག་རྒྱ་གྲུ་གསུམ་གྱི་ནང་ནམ་མཁའི་ངོ་བོ་ཉིད་ཀྱི་དཀྱིལ་ན་གནས་པའི་སྣ་ཚོགས་པདྨ་དང༌། རྡོ་རྗེ་བསྒོམ་པར་བྱའོ། །དེ་ནས་སྣ་ཚོགས་རྡོ་རྗེའི་ལྟེ་བ་ལ་གནས་པའི་སྣ་ཚོགས་པདྨ་དང༌། ཟླ་བ་ལ་གནས་པའི་ཡི་གེ་བྷྲཱུཾ་ཡོངས་སུ་གྱུར་པ་ལས། འཁོར་ལོ་རྩིབས་བརྒྱད་པ། དེའི་ལྟེ་བ་ལ་ཟླ་བ་ལ་གནས་པའི་ཡི་གེ་བྷྲཱུཾ་ཡོངས་སུ་གྱུར་པའི་རྣམ་པར་སྣང་མཛད་རིག་པ་དང་བཅས་པ་ལས་བྱུང་བའི་སྣ་ཚོགས་པར་སྣང་བའི་ནོར་བུའི་རང་བཞིན་ཁ་དོག་ལྔ་དང་ལྡན་པའི་འོད་འཕྲོ་བས། ཕྱོགས་མཚམས་མ་ལུས་པའི་འཇིག་རྟེན་གྱི་ཁམས་དཔག་ཏུ་མེད་པར་སངས་རྒྱས་ཀྱིས་ཁྱབ་པར་གནས་པ་གྲུ་བཞི་པ་སྒོ་བཞི་པ། ཀ་བ་བརྒྱད་ཀྱིས་ཉེ་བར་བརྒྱན་པ། སེ་མོ་དོ་དང་དོ་ཤལ་དང༌། མེ་ལོང་དང་གོས་དང་ནོར་བུས་རྣམ་པར་བརྒྱན་པ། མཆོད་པའི་ལྷ་མོའི་ཚོགས་ཀྱིས་ཡོངས་སུ་བསྐོར་བའི་གཞལ་ཡས་ཁང་བསྒོམ་པར་བྱའོ། །དེའི་དཀྱིལ་དུ་ཡི་གེ་རེ་ཡོངས་སུ་གྱུར་པ་ལས་ཉི་མའི་དཀྱིལ་འཁོར་བལྟས་ལ། དེའི་སྟེང་དུ་ཡི་གེ་ཧཱུཾ་ཡོངས་སུ་གྱུར་པ་ལས། སྣ་ཚོགས་རྡོ་རྗེ་བསྒོམས་པ་བྱས་ལ། ལྷ་བཅུ་བདུན་གྱི་གདན་སྣ་ཚོགས་པདྨ་བསྒོམ་མོ། །དེའི་ལྟེ་བའི་ཟླ་བའི་དཀྱིལ་འཁོར་ལ་ཤེས་རབ་ཀྱི་ངོ་བོ་ཉིད་ཡི་གེ་ཨ་ལ་སོགས་པ་ཉིས་འགྱུར་དུ་བྱས་པ་བཞུགས་ཏེ། མཚན་སུམ་ཅུ་རྩ་གཉིས་ཀྱིས་བརྒྱན་པར་བལྟའོ། །དེའི་སྟེང་དུ་རེ་ལས་བྱུང་བའི་ཉི་མའི་དཀྱིལ་འཁོར་ལ་ཐབས་ཀྱི་ངོ་བོ་ཉིད་ཉིས་འགྱུར་དུ་བྱས་པ་ལས། ཌ་ཌྷ་ད་དྷ་ཡ་ལ་བསྣན་པའི་ཡི་གེ་ཀ་ལ་སོགས་པ་གསལ་བྱེད་རྣམས་བཅུག་ལ། དཔེ་བྱད་བཟང་པོ་བརྒྱད་ཅུས་བརྒྱན་པར་རྣམ་པར་བསམས་ཏེ། དེ་དག་ཐམས་ཅད་རོ་མཉམ་པར་བྱས་ལ། དེ་གཉིས་ཀའི་ཡང་ནང་དུ་འདུས་པའི་ཧཱུཾ་ལས་བྱུང་བའི་རྡོ་རྗེ་སྔོན་པོ་ལ་གནས་པའི་ཟླ་བའི་གདན་ལ་ཡི་གེ་ཧཱུཾ་རྣམ་པར་བསམས་ལ། དེའི་འོད་ཀྱིས་རེག་པས་བྱོན་པར་


DTG047_Page_0102
[མ་དཔེ་གཟིགས་ན་འདིར་གནོན།]

བཞེད་པའི་ཕྱོགས་བཅུ་ན་བཞུགས་པའི་སངས་རྒྱས་རྣམས་དང་ལྷ་མོ་རྣམས་དེའི་ནང་དུ་བྱོན་པར་བསམས་ལ། དེ་ནས་དེའི་ང་རྒྱལ་སྤང་བར་བྱ་སྟེ། ཨོཾ་སརྦ་ཏ་ཐཱ་ག་ཏ་བཛྲ་སྭ་བྷཱ་བ་ཨཱཏྨ་ཀོ྅ཧཾ་ཞེས་སོ། །དེ་ནས་དེ་ཡོངས་སུ་གྱུར་པ་ལས་རྡོ་རྗེ་སེམས་དཔའ་ཞལ་དང༌། རྒྱན་ཐམས་ཅད་གཤིན་རྗེ་གཤེད་དང་འདྲ་བ་ལ། ལྷན་ཅིག་སྐྱེས་པ་ཙམ་གྱི་རིག་མ་ཅན། སྔོན་པོ་དང་དཀར་པོ་དང་དམར་པོ་སྟེ་ཞལ་གསུམ་པ། གཡས་པའི་ཕྱག་དང་དེ་ལས་གཞན་པའི་ཕྱག་རྣམས་ལ་གོ་རིམས་ཇི་ལྟ་བ་བཞིན་དུ། རྡོ་རྗེ་སྔོན་པོ་འབར་ཞིང་འཕྲོ་བ་དང༌། རལ་གྲི་དང༌། གྲི་གུག་དང༌། འཁོར་ལོ་དང་པདྨ་དང༌། ཐོད་པ་འཛིན་པའོ། །སྐུ་དང་གསུང་དང་ཐུགས་དང་ཡི་ཤེས་སེམས་དཔའ་བྱིན་གྱིས་བརླབས་པ་བསྒོམ་པར་བྱའོ། །དེ་ནས་ས་བོན་གྱི་ལྷ་མོའི་མགོ་དང༌། མགྲིན་པ་དང༌། སྙིང་ག་དང་ལྟེ་བ་དང་གསང་བ་རྣམས་དང༌། ཨོཾ་ཨཱཿ་ཧཱུཾ་སྭཱ་ཧཱ་ཞེས་བྱ་བའི་ཡི་གེ་རྣམས་རིམ་པ་ཇི་ལྟ་བ་བཞིན་དུ་དགོད་པར་བྱ་སྟེ། རིགས་ལྔ་གཅིག་ཏུ་བསྡུས་པས་དགོད་པར་བྱའོ། །དེའི་རྗེས་ལ་ཧཱུཾ་ཨོཾ་ཧཱུཾ་ཨཱཿ་ཞེས་པའི་སྔགས་འདིས་གཉི་གའི་རྡོ་རྗེ་དང་པདྨ་རྣམ་པར་སྦྱང་བར་བྱའོ། །དེའི་རྗེས་ལ་ཡི་གེ་ཧོཿ་དམར་པོ་གཉིས་གཉི་གའི་མཐར་རྣམ་པར་བསྐོར་ལ་དགའ་བ་བརྩམ་པར་བྱའོ། །ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ཎ་བཛྲ་སྭ་བྷཱ་བ་ཨཱཏྨ་ཀོ྅ཧཾ་ཞེས་བྱ་བས་སོ། །དེ་ནས་འདོད་ཆགས་ཆེན་པོ་ངེས་པའི་ཏིང་ངེ་འཛིན་ལ་སྙོམས་པར་ཞུགས་ཏེ། རང་ཡེ་ཤེས་སེམས་དཔའི་སྙིང་པོའི་ས་བོན་གྱི་འོད་ཀྱིས་བཀུག་པའི་རྡོ་རྗེ་ཙ་རྩི་ཀཱ་ལ་སོགས་པའི་ལྷ་མོ་བཞི་དང་ལྡན་པའི་སངས་རྒྱས་ཐམས་ཅད་བདག་གི་ལུས་ཀྱི་ནང་དུ་བསྒོམས་ལ། བདག་ཉིད་ཀྱང་རིག་མ་དང་བཅས་པ། འདོད་ཆགས་ཆེན་པོའི་དབང་གི་ཡི་གེ་གསུམ་དང་ལྡན་པའི་ཁུ་བའི་གཟུགས་སུ་བལྟའོ། །དེ་ནས་རྣམ་པར་དག་པའི་འོད་ཟེར་གྱིས་ཕྱོགས་བཅུར་ཁྱབ་པས། འགྲོ་བ་དྲུག་ན་འཁོར་བའི་སེམས་ཅན་རྣམ་པར་སྦྱངས་ནས། དེའི་ནང་དུ་ཆུད་པར་བསྒོམས་ལ། དེ་ཡང་ཁུ་བའི་གཟུགས་སུ་བལྟ་བར་བྱའོ། །དེ་ནས་ཏིང་ངེ་འཛིན་ལས་བསླང་བའི་ཕྱིར། ལྷ་མོ་བཞིས་ཐུགས་ལ་བསྟོད་པ། །སྙིང་རྗེས་ཁྲོས་པའི་དད་སྒྲོལ་བཞེངས། །ཁམས་གསུམ་


DTG047_Page_0103
[མ་དཔེ་གཟིགས་ན་འདིར་གནོན།]

ཀུན་གྱི་གཏི་མུག་སོལ། །དད་སྒྲོལ་རྩོལ་མེད་མ་བཞུགས་བཞེངས། །བདུད་འདི་དག་ལས་རྒྱལ་བར་མཛོད། །འཇིག་རྟེན་མགོན་པོས་སྟོང་ཉིད་ཅི་སྟེ་བཞུགས། །དང་སྒྲོལ་འཇིག་རྟེན་བསོད་ནམས་ཀྱིས་བཞེངས་ཤིག །བྱང་ཆུབ་འདོད་པའི་འཇིག་རྟེན། མགྲོན་པོས་ནས། །ཇི་ལྟར་སྟོང་པ་ཉིད་ནི་སེམས་པར་བྱེད། །ཅེས་བྱ་བས་བསྟོད་ནས། སྐར་མདའ་འཕོ་བ་བཞིན་དུ་དེ་ཉིད་དུ་ཞུགས་པར་གྱུར་ཏོ། །དེ་ནས་ལྷ་མོ་བཞི་ཡང་ཁུ་བ་དེར་རབ་ཏུ་ཞུགས་པས་ཡི་གེ་གསུམ་དང་ལྡན་པའི་སྔགས་ཀྱིས་རང་བཞིན་གྱིས་ལྷའི་ངོ་བོ་ཉིད་དུ་བཀོད་ལ། གསང་བའི་དཀྱིལ་འཁོར་འབྱུང་བའི་ལྷའི་ས་བོན་བལྟ་སྟེ། ཡཀྵེ་མ་མེད། ཡཙྪ་ནི་རཱ་ཛ་དོ་རུ་ད་ཎ་ཡོ་ནི་རཱ་ཞེས་བྱ་བ་འདི་ལྟ་བུ་མཚམས་བཞི་རུའོ། །དེའི་དཀྱིལ་དུ་མ་ལུས་པ་ལ་རང་གི་ས་བོན་དང་ཕྱག་མཚན་གྱི་ནང་དུ་འདུས་པའི་ནམ་མཁའ་ལ་བཞུགས་པའི་དེ་བཞིན་གཤེགས་པ་དང༌། ལྷ་མོ་མ་ལུས་པ་བྱོན་ནས། བྱང་ཆུབ་ཀྱི་སེམས་ཁུ་བའི་རྣམ་པ་དེར་བཞུགས་ཏེ། དེ་རྣམས་ཞུགས་ནས་ཆོས་ཀྱི་དབྱིངས་ཀྱི་ངོ་བོ་ཉིད་དུ་བསམ་པར་བྱ་སྟེ། ཨོཾ་དྷརྨ་དྷཱ་ཏུ་སྭ་བྷཱ་བ་ཨཱཏྨ་ཀོ྅ཧཾ་ཞེས་བྱའོ། །དེ་ནི་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་དང་ལྡན་པ་སྟེ་འདི་ནི་རྣལ་འབྱོར་རོ། །

རྗེས་ཀྱི་རྣལ་འབྱོར།


DTG047_Page_0103
[མ་དཔེ་གཟིགས་ན་འདིར་གནོན།]

དེའི་རྗེས་ལ་རྡོ་རྗེ་ཙ་རྩི་ཀཱ་ལ་སོགས་པ་ལྷ་མོ་བཞི་པོ་ཚངས་པའི་གནས་བཞིའི་ངོ་བོས་བསྐུལ་བའི་དབང་དུ་བྱས་ནས། དེའི་ཁུ་བ་ལས་བྱུང་བའི་ཉི་མ་ལ་གནས་པའི་ཡི་གེ་ཧཱུཾ་ཡོངས་སུ་གྱུར་པ་ལས་ཨིནྡྲ་ནཱི་ལའི་འོད་ལྟར་འབར་བའི་རྡོ་རྗེའི་ལྟེ་བ་ལ་གནས་པའི་རིགས་ཀྱི་ཡི་གེས་བྱིན་གྱིས་རློབ་ཅིང་འཕྲོ་བ། ཡི་གེ་ཡཾ་ལས་ཡང་དག་པར་བྱུང་བ། ཨིནྡྲ་ནཱི་ལ་ལྟ་བུའི་འོད་ཅན། ཞལ་གསུམ་ཕྱག་དྲུག་པ། རྩ་བ་དང༌། གཡས་པ་དང་གཞན་ལ་རིམ་པ་ཇི་ལྟ་བ་བཞིན་དུ། སྔོན་པོ་དང་དཀར་པོ་དམར་བའི་ཞལ་ཅན། འབར་བ་འཕྲོ་བའི་རྡོ་རྗེ་དང༌། རལ་གྲི་དང༌། གྲི་གུག་དང༌། འཁོར་ལོ་དང་པདྨ་དམར་པོ་དང༌། ཐོད་པ་འཛིན་པ་སྟེ། གཡས་པ་དང་དེ་ལས་གཞན་པ་ལ་རིམ་པ་ཇི་ལྟ་བ་བཞིན་ནོ། །འཇིགས་བྱེད་ཀྱང་འཇིགས་པར་བྱེད་པ། ཐོད་པ་དྲུག་གིས་བསྐོར་བས་མགོ་བརྒྱན་པ། ཕྱོགས་བཅུར་བལྟ་བའི་དམར་ལ་ཟླུམ་པའི་སྤྱན་གསུམ་པ། དགའ་བོ་དང་


DTG047_Page_0104
[མ་དཔེ་གཟིགས་ན་འདིར་གནོན།]

ཉེར་དགས་གྱེན་དུ་འབར་བའི་སྐྲ་བཅིངས་པ། མཆེ་བ་ཅུང་ཟད་གཙིགས་ཤིང་ལྕེ་འདྲིལ་བ་སྨ་ར་དང་སྨིན་མ་སེར་པོ་རྡོ་རྗེས་བརྒྱན་པ། སྟག་གི་པགས་པ་འཛིན་པ། མིའུ་ཐུང་ལྟར་གསུས་པ་ཆེ་བར་འཛིན་པ་བ་སུ་ཀིས་ས་རལ་ཉེ་བར་བརྒྱན་པ། སྟོད་དུ་སེང་གེའི་པགས་པ་བསྣམས་པ། ལུས་ཀྱི་བ་སྤུའི་བུ་ག་ཐམས་ཅད་གྱེན་དུ་གཡས་སུ་འཁྱིལ་ཞིང་འོད་འཕྲོ་བ། རོལ་པ་དང་བཅས་པའི་ལྷན་ཅིག་སྐྱེས་པའི་ཤེས་རབ་དང་གཉིས་སུ་མེད་པའི་སྐུ་ཧྲཱིཿ་ཥྚྲྀཿ་ལ་སོགས་པ་མགུར་ནས་བརྗོད་ཅིང༌། མ་ཧེ་ལ་གནས་པའི་གཤིན་རྗེའི་རྒྱབ་ཏུ་ཉི་མའི་གདན་ལ་གཡོན་བརྐྱང་བའི་ཞབས་ཀྱིས་མནན་པའི་བདག་ཉིད་གཤིན་རྗེ་གཤེད་དུ་བསྒོམ་པར་བྱའོ། དེའི་སྙིང་གར་ཉི་མ་ལ་གནས་པའི་ཡཾ་ལས་བྱུང་བའི་རྡོ་རྗེ་འབར་བའི་ལྟེ་བ་ལ་ཉི་མ་དང༌། དེ་ལ་ས་བོན་ཡཾ་བསྒོམ་ཞིང་ཕྱག་མཚན་དང༌། ས་བོན་ཡོངས་སུ་གྱུར་པ་ལས་ཡེ་ཤེས་སེམས་དཔའ་གཤིན་རྗེ་གཤེད་དང་འདྲ་བའི་སྙིང་གར་ཉི་མ་ལ་གནས་པའི་རྡོ་རྗེའི་ལྟེ་བའི་ཉི་མ་ལ་གནས་པའི་རང་གི་ས་བོན་གྱི་བྱིན་གྱིས་བརླབས་ལ་སྙིང་གར་བསྒོམ་པར་བྱའོ། །རང་གི་ས་བོན་ལས་ཀྱང་འོད་ཟེར་སྤྲོས་ལ་འོད་དེས་སངས་རྒྱས་ཐམས་ཅད་ཀྱི་རང་བཞིན་ཡེ་ཤེས་སེམས་དཔའ་བཀུག་ལ། མདུན་གྱི་ནམ་མཁའ་ལ་བཞུགས་ཏེ། མཆོད་པ་ཐམས་ཅད་ཀྱིས་ཡང་དག་པར་མཆོད་ལ། རང་གི་ཡེ་ཤེས་སེམས་དཔའ་བཅུག་ལ་དེར་བྱིན་གྱིས་བརླབ་པ་ཡང་བྱ་སྟེ། ཨོཾ་དྷརྨ་དྷཱ་ཏུ་སྭ་བྷཱ་ཝ་ཨཱཏྨ་ཀོ྅ཧཾ་ཞེས་པའོ། །དེ་ནས་སྙིང་གའི་འོག་ཏུ་ཟླ་བ་ལ་གནས་པའི་ཧཱུཾ་ལས་བྱུང་བའི་རྡོ་རྗེའི་ལྟེ་བར་ཟླ་བ་དེ་ལས་ས་བོན་རྣམ་པར་བསམས་ཏེ། རང་གི་ཕྱག་མཚན་དང་ས་བོན་ཡོངས་སུ་གྱུར་པ་ལས་ཞེ་སྡང་གཤིན་རྗེ་གཤེད་དང་འདྲ་བ་ལ་གནས་པ་ཕྱག་མཚན་ས་བོན་གྱི་བྱིན་གྱིས་བརླབས་པ། སྙིང་པོ་ཐུགས་རྡོ་རྗེ་རྣམ་པར་བསམ་པར་བྱའོ། །རང་གི་ས་བོན་གྱི་འོད་ཀྱི་ཐུགས་རྡོ་རྗེའི་སངས་རྒྱས་ཐམས་ཅད་བཀུག་ལ་མདུན་དུ་ཟླ་བ་ལ་བཞུགས་ཏེ། ཡང་དག་པར་མཆོད་ནས་རང་གི་ཐུགས་རྡོ་རྗེ་ལ་བཅུག་ལ་བྱིན་གྱིས་བརླབ་པར་བྱ་སྟེ། ཨོཾ་སརྦ་ཏ་ཐཱ་ག་ཏ་ཙིཏྟ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ་ཞེས་སོ། །དེ་བཞིན་དུ་སྐུ་རྡོ་རྗེ་ནི་གཏི་མུག་རྡོ་རྗེ་གཤིན་རྗེ་གཤེད་དང་འདྲ་བའོ། །གསུང་


DTG047_Page_0105
[མ་དཔེ་གཟིགས་ན་འདིར་གནོན།]

རྡོ་རྗེ་ནི་འདོད་ཆགས་གཤིན་རྗེ་གཤེད་དང་འདྲ་བར་རྣམ་པར་བསྒོམས་ལ། སྐུ་རྡོ་རྗེ་དང་གསུང་རྡོ་རྗེའི་སངས་རྒྱས་ཐམས་ཅད་བཀུག་ལ་ཡང་དག་པར་མཆོད་དེ། ནང་དུ་བཞུགས་པ་བྱས་ལ། །དེའི་བྱིན་གྱིས་བརླབ་པ་ཡང་བྱ་སྟེ། ཨོཾ་སརྦ་ཏ་ཐཱ་ག་ཏ་ཀཱ་ཡ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཨོཾ་སརྦ་ཏ་ཐཱ་ག་ཏ་བཱ་ཀ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཨོཾ་སརྦ་ཏ་ཐཱ་ག་ཏ་ཙིཏྟ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་སོ། །དེའི་རྗེས་ལ་མིག་ལ་སོགས་པ་བྱིན་གྱིས་བརླབ་པ་བལྟ་བར་བྱ་སྟེ། མིག་ལ་ཀྵིཾ་གི་ས་བོན་ལས་སའི་སྙིང་པོ། རྣ་བ་ལ་ཛྲིཾ་ལས་ཕྱག་ན་རྡོ་རྗེ། སྣ་ལ་ཁཾ་ལས་ནམ་མཁའི་སྙིང་པོ། ཞལ་དུ་གཾ་ལས་འཇིག་རྟེན་དབང་ཕྱུག །མགོ་ལ་ཀྵཾ་ལས་སྒྲིབ་པ་ཐམས་ཅད་རྣམ་པར་སེལ་བ། སྙིང་གའི་འོག་ཏུ་སཾ་ལས་ཀུན་དུ་བཟང་པོ་སྟེ། སྐྱེ་མཆེད་འདི་རྣམས་ལ་དེ་རྣམས་ཀྱི་པདྨ་དང་ཟླ་བ་ལ་གནས་པ། ཟླ་བའི་སྟེང་དུ་ཕྱག་མཚན་དང་ས་བོན་ཡོངས་སུ་གྱུར་པས་བྱིན་གྱིས་བརླབས་ལ། ཕྱིས་ནས་ཡེ་ཤེས་སེམས་དཔའི་ཐུགས་ཀའི་ས་བོན་ལས་འཕྲོས་པའི་འོད་ཟེར་གྱིས་བཀུག་པའི་དཀྱིལ་འཁོར་གྱི་འཁོར་ལོ་ཐམས་ཅད་མི་བསྐྱོད་པས་གཙོ་བོ་བྱས་པ་རྣམ་པར་བསམས་ལ། དེ་ལས་འཕྲོས་པའི་ལྷ་མོ་ལྔ་རྣམས་ཀྱིས་བདུད་རྩི་ལྔའི་ཁུ་བ་རྣམས་ཀྱིས་བཀང་བའི་བུམ་པའི་ཁ་ནས་འབབ་པས། བདག་ཉིད་ལ་དབང་བསྐུར་ནས། ཅོད་པན་ལ་མི་བསྐྱོད་པ་བལྟ་བར་བྱའོ། །ཡང་རྡོ་རྗེ་སེམས་དཔའ་ཁུ་བའི་གཟུགས་ལས་བྱུང་བའི་གཤིན་རྗེ་གཤེད་བཞིན་དུ་རིག་མ་རང་གི་ངོ་བོ་ཡང་མདུན་དུ་བལྟས་ལ། བསྐྱེད་ཅིང་རང་གི་ལུས་སུ་འདུས་པར་བྱས་ལ། ཨོཾ་ཧཱུཾ་སྭ་ཨཾ་ཧཱ་ཞེས་བྱ་བའི་ཡི་གེ་འདི་རྣམས་མགོ་དང༌། སྙིང་ག་དང་ལྟེ་བ་དང༌། གསང་བ་དང༌། པུས་མོ་རྣམས་ལ་རྣམ་པར་བཀོད་ལ། དེས་རིགས་ལྔ་བསྡུས་པས་བརྒྱན་པར་བྱའོ། །ཨོཾ་ཧཱུཾ་ཧཱུཾ་ཨ་འདིས་ནི་རྡོ་རྗེ་དང༌། པདྨ་རྣམ་པར་སྦྱངས་ལ་གཉི་གའི་མཐར་ཡི་གེ་ཧོཿ་དམར་པོ་གཉི་ག་བཀོད་ལ། ཨོཾ་ཨ་ནུ་རཱ་ག་ཡ་མི་ཞེས་བརྗོད་དེ། བླ་ན་མེད་པའི་བདེ་བ་ལ་མངོན་པར་ཕྱོགས་ནས། དགའ་བ་བརྩམ་པར་བྱ་ཞིང་དེར་བྱིན་གྱིས་བརླབ་པར་བྱ་སྟེ། ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ་ཞེས་པ་ནི་རྗེས་ཀྱི་རྣལ་འབྱོར་རོ། །

ཤིན་ཏུ་རྣལ་འབྱོར།


DTG047_Page_0106
[མ་དཔེ་གཟིགས་ན་འདིར་གནོན།]

དེ་ལྟར་དོན་དམ་པའི་བདེན་པ་ལ་གནས་པའི་རྣལ་འབྱོར་པའི་སྙིང་གའི་ས་བོན་གྱི་འོད་ཀྱིས་བཀུག་པའི་ལྷ་མོ་བཞི་དང་བཅས་པའི་སངས་རྒྱས་ལྔ་རྣམས་རང་གི་ས་བོན་གྱི་ནང་དུ་བསམས་ལ། འདོད་ཆགས་ཆེན་པོའི་དབང་གིས་པདྨའི་ནང་གི་ནོར་བུ་ནས་རང་གི་ལྟེ་བའི་ཟླ་བ་ལ་མངོན་པར་བྱུང་བར་བསམས་ལ། དེའི་རྗེས་ལ་དེའི་འོད་ཟེར་ལས་བྱུང་བའི་ཧཱུཾ་གི་ས་བོན་ལས་ཡང་དག་པར་བྱུང་བའི་མི་བསྐྱོད་པ་གཤིན་རྗེ་གཤེད་དང་འདྲ་བའི་ཡི་གེ་བཅུ་པའི་སྔགས་ཀྱི་ས་བསྐུལ་བ། ཨོཾ་བཛྲ་དྷྲྀཀ་ཅེས་བྱ་བ་འདིས་བཏོན་ནས། སེམས་ཅན་ཐམས་ཅད་ཐ་མལ་པའི་ཞེ་སྡང་གི་རིགས་སུ་ལྟུང་བ་སྐྱོབ་ཅིང་མཆོད་པ་ཆེན་པོ་ཞེ་སྡང་ཆེན་པོའི་རང་གི་བདག་ཉིད་དུ་བསྒོམ་པར་བྱའོ། །དེ་བཞིན་དུ་ཨོཾ་ཛིན་ཀི་ཀ་ཅེས་ཀྵེའི་ས་བོན་ལ་གཏི་མུག་གཤིན་རྗེ་གཤེད་བཏོན་ལ་ཐ་མལ་པའི་གཏི་མུག་གི་རིགས་སུ་ལྟུང་བའི་སེམས་ཅན་རྣམས་མཆོད་པ་ཆེན་པོ་གཏི་མུག་ཆེན་པོའི་རིགས་སུ་རབ་ཏུ་བཀོད་ནས། ཡང་ཕྱིར་འོངས་ནས་སྣ་ཚོགས་རྡོ་རྗེའི་ཤར་གྱི་རྩེ་མོ་ལ་ཟླ་བའི་གདན་ལ་དགོད་པར་བྱ་སྟེ། དཀར་པོ་ཞལ་གསུམ་ཕྱག་དྲུག་པ། རྩ་བའི་ཞལ་དང་ལུས་ཐམས་ཅད་དཀར་པོ། གཡས་ནག་པོ་གཡོན་དམར་པོའོ། །ཕྱག་གཡས་པ་ན་འཁོར་ལོ་དང་རལ་གྲི་དང་གྲི་གུག་འཛིན་པ། གཡོན་ན་རིན་པོ་ཆེ་དང༌། པདྨ་དང་ཐོད་པ་འཛིན་པའོ། །དེ་བཞིན་དུ་ཨོཾ་རཏྣ་དྷྲྀཀ་ཅེས་མའི་ས་བོན་ལས་ཕྲ་མ་གཤིན་རྗེ་གཤེད་བཏོན་ལ། ཕྲ་མའི་རིགས་སུ་ལྟུང་བའི་སེམས་ཅན་རྣམས་མཆོད་པ་ཆེན་པོ་ཕྲ་ཆེན་པོའི་རིགས་སུ་བཀོད་ནས་ཡང་ཕྱིར་ལོག་སྟེ། ལྷོ་ཕྱོགས་སུ་སྣ་ཚོགས་རྡོ་རྗེའི་རྩེ་མོའི་ཉི་མ་ལ་དགོད་པར་བྱ་སྟེ། རྩ་བའི་ཞལ་དང་ལུས་ཐམས་ཅད་སེར་པོ། གཡས་དཀར་པོ་གཡོན་ནག་པོ། དེའི་ཕྱག་གཡས་པ་རྣམས་ལ་རིན་པོ་ཆེ་དང༌། རལ་གྲི་དང་གྲི་གུག་འཛིན་པ། གཡོན་པས་འཁོར་ལོ་དང་པདྨ་དང་ཐོད་པའི་སྣོད་འཛིན་པའོ། །དེ་བཞིན་དུ་ཨོཾ་ཨཱ་རོ་ལྀཀ་ཅེས་མེའི་ས་བོན་ལས་འདོད་ཆགས་གཤིན་རྗེ་གཤེད་བཏོན་ལ་འདོད་ཆགས་ཀྱི་རིགས་སུ་ལྟུང་བའི་སེམས་ཅན་ལ་བལྟས་ཏེ། མཆོད་པ་ཆེན་པོ་འདོད་ཆགས་ཆེན་པོའི་རིགས་སུ་རབ་ཏུ་གནས་པར་བྱས་ནས་ཡང་ཕྱིར་ལོག་སྟེ། ནུབ་ཕྱོགས་སུ་སྣ་ཚོགས་རྡོ་རྗེའི་རྩེ་མོའི་ཉི་མ་ལ་


DTG047_Page_0107
[མ་དཔེ་གཟིགས་ན་འདིར་གནོན།]

དགོད་པར་བྱ་སྟེ། འདོད་ཆགས་གཤིན་རྗེ་གཤེད་དབང་ཆེན་པོ་ཅན་པདྨ་རཱ་གའི་མདངས་དང་ལྡན་པ། ཞལ་གསུམ་ཕྱག་དྲུག་པ། དམར་པོ་རྒྱན་དམར་པོ་ཅན། ཞལ་དང་པོ་དང་ལུས་ཐམས་ཅད་དམར་པོ། གཡས་དཀར་པོ་གཡོན་ནག་པོ། གཡས་ཀྱི་ཕྱག་ན་པདྨ་དམར་པོ་དང༌། རལ་གྲི་དང་གྲི་གུག །གཡོན་ན་འཁོར་ལོ་དང་རིན་པོ་ཆེ་དང༌། ཐོད་པའི་སྣོད་འཛིན་པའོ། །དེ་བཞིན་དུ་ཨོཾ་པྲ་ཛྙཱ་དྷྲྀཀ་ཅེས་དེའི་ས་བོན་ལས་ཕྲག་དོག་གཤིན་རྗེ་གཤེད་བཏོན་ལ། ཕྲ་དོག་ལ་ཞེན་པའི་སེམས་ཅན་རྣམས་མཆོད་པ་ཆེན་པོ་ཕྲག་དོག་ཆེན་པོའི་རིགས་སུ་བཀོད་ནས་ཡང་ཕྱིར་འོངས་ཏེ། བྱང་གི་སྣ་ཚོགས་རྡོ་རྗེའི་རྩེ་མོའི་ཉི་མ་ལ་དགོད་པར་བྱ་སྟེ། ཞལ་གསུམ་ཕྱག་དྲུག་པ། རྩ་བའི་ཞལ་དང་ལུས་ཐམས་ཅད་ལྗང་གུ། མ་ར་ཀ་ཏ་དང་འདྲ་བའི་མདངས་ཅན། གཡས་དཀར་པོ་གཡོན་ནག་པོ། གཡས་ཀྱི་ཕྱག་ན་རལ་གྲི་དང༌། འཁོར་ལོ་དང་གྲི་གུག་འཛིན་པ། གཡོན་པས་ནོར་བུ་དང་པདྨ་དང་ཐོད་པ་འཛིན་པའོ། །དེ་བཞིན་དུ་ཨོཾ་མོ་ཧ་ར་ཏི་བཛྲ་ཙ་རྩི་ཀཱཾ་ཞེས་པ། ཛའི་ས་བོན་ལས་བཏོན་ལ། དེ་བཞིན་དུ་རང་གི་རིགས་སུ་གྱུར་བའི་སེམས་ཅན་རྣམས་ཀྱི་དོན་བྱས་ནས། ཡང་ཕྱིར་ལོག་སྟེ། མེའི་ཕྱོགས་སུ་སྣ་ཚོགས་རྡོ་རྗེ་རྩེ་མོ་གཉིས་ཀྱི་ཟླ་བ་ལ་དགོད་པར་བྱ་སྟེ། གཏི་མུག་གཤིན་རྗེ་གཤེད་དང་འདྲ་བ་ལ་རྒྱན་ཐམས་ཅད་ཀྱིས་བརྒྱན་པ། ཅུང་ཟད་བུད་མེད་ཀྱི་ཆ་བྱད་ཀྱིས་འགྱིང་ཞིང་སྒེག་པའོ། །ཡང་དེ་བཞིན་དུ་སའི་ས་བོན་ལས་བྱུང་བའི་རྡོ་རྗེ་ཕག་མོ་ཞེ་སྡང་གཤིན་རྗེ་གཤེད་དང་འདྲ་བ། དྭེ་ཥ་ར་ཏི་ཞེས་བྱ་བས་ཕྱུང་ནས། དེ་བཞིན་དུ་རང་གི་རིགས་སུ་གྱུར་པའི་སེམས་ཅན་རྣམས་ཀྱི་དོན་བྱས་ནས། ཕྱིར་ལོག་སྟེ། བདེན་བྲལ་གྱི་ཕྱོགས་སུ་སྣ་ཚོགས་རྡོ་རྗེ་རྩེ་མོ་གཉིས་ཀྱི་ཟླ་བ་ལ་དགོད་དོ། །དེ་བཞིན་དུ་རླུང་གི་ཕྱོགས་སུ་དོའི་ས་བོན་ལས་བྱུང་བའི་རྡོ་རྗེ་དབྱངས་ཅན་མ་འདོད་ཆགས་གཤིན་རྗེ་གཤེད་དང་འདྲ་བ། རཱ་ག་ར་ཏི་ཞེས་བྱ་བས་ཕྱུང་ནས་དེ་བཞིན་དུ་རང་གི་རིགས་སུ་གཏོགས་པའི་སེམས་ཅན་རྣམས་ཀྱི་དོན་བྱས་ཏེ། སྣ་ཚོགས་རྡོ་རྗེའི་རྩེ་མོ་གཉིས་ཀྱི་ཟླ་བའི་དཀྱིལ་འཁོར་ལ་དགོད་དོ། །ཡང་དེ་བཞིན་དུ་རུའི་ས་བོན་ལས་བྱུང་བའི་རྡོ་རྗེ་གཽ་རཱི་མ་ཕྲག་དོག་གཤིན་རྗེ་གཤེད་དང་འདྲ་བ་བཛྲ་ར་ཏི་ཞེས་བྱ་བས་བཏོན་ནས་དེ་བཞིན་དུ་རང་གི་


DTG047_Page_0108
[མ་དཔེ་གཟིགས་ན་འདིར་གནོན།]

རིགས་སུ་གཏོགས་པའི་སེམས་ཅན་རྣམས་ཀྱི་དོན་བྱོན་བྱས་ཏེ་སྣ་ཚོགས་རྡོ་རྗེའི་དབང་ལྡན་གྱི་རྩེ་མོ་གཉིས་ལ་ཟླ་བ་ལ་དགོད་དོ། །ཐམས་ཅད་ཀྱང་རང་རང་གི་རིགས་ཀྱི་ཁ་དོག་དང་ཕྱག་མཚན་འཛིན་པའོ། །ཡང་དེ་བཞིན་དུ་འདིར་ཡའི་ས་བོན་ལས་བྱུང་བའི་ཐོ་བ་གཤིན་རྗེ་གཤེད་རྡོ་རྗེ་ཐོ་བ་འཛིན་ཅིང༌། ལྷག་མ་གཤིན་རྗེ་གཤེད་དང་འདྲ་བ། ཕུང་པོའི་བདུད་དང༌། མ་དད་པ་དང༌། ཤེས་བྱའི་སྒྲིབ་པའི་གཉེན་པོར་གྱུར་པ། ཨོཾ་མུངྒ་ར་དྷྲྀཀ་ཅེས་བྱ་བས་བཏོན་ལ། ཤར་ཕྱོགས་ན་གནས་པའི་བགེགས་རྣམས་ཡང་དག་པར་བཏུལ་ཏེ། དེ་བཞིན་དུ་རང་གི་རིགས་སུ་གཏོགས་པ་རྣམས་ཀྱི་དོན་བྱས་ནས། སླར་ལོག་སྟེ་ཤར་ཕྱོགས་ཀྱི་སྣ་ཚོགས་རྡོ་རྗེའི་རྩེ་མོའི་ཉི་མའི་གདན་ལ་དགོད་དོ། །དེ་བཞིན་དུ་འབྱུང་བ་ནི་ཙྪའི་ས་བོན་ལས་བྱུང་བའི་དཀར་པོ་དང༌། ནག་པོ་དང༌། དམར་པོ་སྟེ་ཞལ་གསུམ་པ་རྡོ་རྗེ་དབྱིག་པ་དང༌། རལ་གྲི་དང༌། གྲི་གུག་གཡས་པས་འཛིན་པ། གཡོན་པས་འཁོར་ལོ་དང་རིན་པོ་ཆེ་དང༌། པདྨའི་སྣོད་འཛིན་པ། ལེ་ལོ་དང༌། ཉོན་མོངས་པའི་བདུད་དང༌། མཐར་འཛིན་པའི་ལྟ་བ་དང༌། ཉོན་མོངས་པའི་སྒྲིབ་པའི་གཉེན་པོ་དབྱིག་པ་གཤིན་རྗེ་གཤེད་ཨོཾ་དཎྜ་དྷྲྀཀ་ཅེས་བྱ་བས་ཕྱུང་ལ། ལྷོ་ཕྱོགས་ན་གནས་པའི་བགེགས་བཏུལ་ནས། དེ་ལས་སྤྲོས་པས་སེམས་ཅན་གྱི་དོན་བྱས་ནས། །སྣ་ཚོགས་རྡོ་རྗེའི་རྩེ་མོའི་གདན་ལ་དགོད་དོ། །ཡང་དེ་ལྟ་བུ་ནི་ཡའི་ས་བོན་ལས་བྱུང་བའི་སྐུ་མདོག །དམར་པོ་དང༌། དཀར་པོའི་དང་ནག་པོ་སྟེ། ཞལ་གསུམ་པ། ཕྱག་གཡས་པ་རྣམས་ཀྱིས་པདྨ་དམར་པོ་དང༌། རལ་གྲི་དང་གྲི་གུག་འཛིན་པ། གཡོན་པ་རྣམས་ཀྱིས་འཁོར་ལོ་དང༌། རིན་པོ་ཆེ་དང༌། པདྨའི་སྣོད་འཛིན་པ་སྟེ། བརྗེད་པ་དང་འཆི་བདག་གི་བདུད་དང་ལྟ་བ་ལོག་པ་དང༌། སྐྱེ་བའི་སྒྲིབ་པའི་གཉེན་པོ་པདྨ་གཤིན་རྗེ་གཤེད་པདྨ་དྷྲྀཀ་ཅེས་བྱ་བས་ཕྱུང་ལ། ནུབ་ཕྱོགས་ན་གནས་པའི་བགེགས་བཏུལ་ཏེ། དེ་བཞིན་དུ་འགྲོ་བ་རྣམས་ཀྱི་དོན་བྱས་ནས་སྣ་ཚོགས་རྡོ་རྗེའི་རྩེ་མོའི་ཉི་མའི་གདན་ལ་དགོད་དོ། །དེ་ནས་དེ་བཞིན་དུ་དེ་ལས་བྱུང་བའི་རའི་ས་བོན་ལས་ཡང་དག་པར་བྱུང་བའི་སྐུ་མདོག་ལྗང་གུ། ལྗང་གུ་དང༌། དཀར་པོ་དང་ནག་པོ་སྟེ་ཞལ་གསུམ་པ། རལ་གྲི་དང་


DTG047_Page_0109
[མ་དཔེ་གཟིགས་ན་འདིར་གནོན།]

འཁོར་ལོ་དང་གྲི་གུག་གཡས་པ་རྣམས་ཀྱིས་འཛིན་པ། གཡོན་གྱིས་འཁོར་ལོ་དང་རིན་པོ་ཆེ་དང༌། པདྨ་དང་ཐོད་པའི་སྣོད་འཛིན་པ། རྨུགས་པ་དང་ལྷའི་བུའི་བདུད་དང༌། ལྟ་བ་མཆོག་ཏུ་འཛིན་པ་དང༌། ལས་ཀྱི་སྒྲིབ་པ་རྣམས་ཀྱི་གཉེན་པོར་གྱུར་པ། རལ་གྲི་གཤིན་རྗེ་གཤེད་ཨོཾ་ཁཌྒ་དྷྲྀཀ་ཅེས་བྱ་བས་བཏོན་ལ། བྱང་ཕྱོགས་ན་གནས་པའི་བགེགས་རྣམས་བཏུལ་ནས། དེ་བཞིན་དུ་སེམས་ཅན་གྱི་དོན་བྱས་ཏེ་སྣ་ཚོགས་རྡོ་རྗེའི་རྩེ་མོའི་ཉི་མའི་གདན་ལ་དགོད་དོ། །ཡང་སྣམ་བུ་གཉིས་པའི་མཚམས་བཞིར་ཟླ་བ་ལ་ཕྱིར་རོལ་དང༌། གསང་བའི་མཆོད་པའི་དོན་དུ་དེ་ལས་བྱུང་བའི་དང་ཡོ་དང་ནི་ར་བཞིའི་ས་བོན་ལས་ཡང་དག་པར་བྱུང་བ་རྣམས་ཀྱིས་བདུད་རྩི་ལྔས་ཡོངས་སུ་བཀང་བའི་མིའི་ཐོད་པ་སྟེ། ཤིན་ཏུ་རྣལ་འབྱོར་རོ། །

རྣལ་འབྱོར་ཆེན་པོ།


DTG047_Page_0109
[མ་དཔེ་གཟིགས་ན་འདིར་གནོན།]

འདི་ལྟ་བུར་ཡོངས་སུ་རྫོགས་པའི་དཀྱིལ་འཁོར་ལ་རྣམ་པར་བལྟས་ཏེ། སྙིང་གའི་སྔགས་ལས་སྤྲོས་པའི་འོད་ཟེར་གྱི་ལྕགས་ཀྱུས་ཡེ་ཤེས་ཀྱི་དཀྱིལ་འཁོར་བཀུག་ལ། མདུན་དུ་བཞུགས་སུ་གསོལ་ཏེ། གང་དེ་དང་ལྷན་ཅིག་འོངས་པའི་བགེགས་རྣམས་ནི། སྒོ་སྐྱོང་བ་རྣམས་ཀྱིས་བསྐྲད་དེ་དེ་རྣམས་ཉིད་ནི་སྔགས་བཟླས་པས་སྲུང་བ་བྱས་ལ། ལམ་ལ་སོགས་པ་སྦྱིན་པར་བྱ་སྟེ། དེ་ནི་ཛཿ་ཧཱུཾ་བཾ་ཧོཿ་ཞེས་བྱ་བ་འདིས་བརྗོད་ལ་སྒོ་སྐྱོང་བ་དགུག་པ་དང་གཞུག་པ་དང་བཅིང་བ་དང༌། མཉེས་པ་ལ་སོགས་པ་བྱའོ། །དེ་ནས་རོ་མཉམ་པའི་མཆོད་པས་ཡང་དག་པར་མཆོད་དེ། དཀྱིལ་འཁོར་གྱི་དེ་ཁོ་ན་ཉིད་རབ་ཏུ་བསྒྲུབས་ལ། དེ་བཞིན་དུ་དམ་ཚིག་དང་ཡེ་ཤེས་ཀྱི་དཀྱིལ་འཁོར་དང་བཅས་པ་རོ་མཉམ་པར་གྱུར་པས། རང་གི་བདག་པོ་དང༌། དཀྱིལ་འཁོར་ཐམས་ཅད་ལ་ཡེ་ཤེས་སེམས་དཔའ་དང༌། རྡོ་རྗེ་གསུམ་རྣམས་གསལ་པོར་བལྟའོ། །དེ་ནས་རང་གི་སྙིང་གའི་ས་བོན་ལས་སྤྲོས་པའི་འོད་ཀྱིས་ཕྱོགས་བཅུ་ན་བཞུགས་པའི་མི་བསྐྱོད་པ། དཀྱིལ་འཁོར་དང་བཅས་པ་སྤྱན་དྲངས་པའི་ཐུགས་ཀའི་སྔགས་ལས་བྱུང་བའི་ལྷའི་ཚོགས་ཀྱིས་ལོ་མའི་ཁ་རྒྱན་དང་བཅས་པའི་བུམ་པའི་ཁ་ནས་འབབ་པའི་བྱང་ཆུབ་སེམས་ཀྱི་ཁུ་བས་རང་གི་དཀྱིལ་འཁོར་པ་རྣམས་མངོན་པར་དབང་བསྐུར་བའི་དབུ་ལ་གཤིན་རྗེ་གཤེད་བལྟ་བར་བྱའོ། །དེ་ཡང་གཙོ་བོའི་དབུ་རྒྱན་


DTG047_Page_0110
[མ་དཔེ་གཟིགས་ན་འདིར་གནོན།]

ནི་མི་བསྐྱོད་པའོ། །དེའི་རྗེས་ལ་སྙིང་གའི་སྔགས་ལས་ངེས་པར་བྱུང་བའི་གཟུགས་དང་སྒྲ་ལ་སོགས་པ་རྣམ་པ་སྣ་ཚོགས་ཤིང་ཐ་དད་པས། ནམ་མཁའ་ཁྱབ་པར་མཚོན་ལ་སྙིང་གའི་ས་བོན་གྱི་འོད་ཀྱིས་བཅུག་ལ་ནོར་བུའི་ནང་གི་ལམ་དུ་ཁུ་བར་གྱུར་པ་དེ་བལྟས་ལ། དེ་ནས་འདི་ལྟར་དཔེ་མེད་པའི་འདོད་པའི་ཡོན་ཏན་གྱིས། ནམ་མཁའི་དཀྱིལ་ཁྱབ་པས་ཁྱད་པར་དུ་ལྷག་པ་དང༌། རྡོ་རྗེ་ཙ་རྩི་ཀཱ་ལ་སོགས་པ་བཞིས་གླུ་དང་བཅས་པས་མཆོད་པ་བྱེད་པ་སྟེ། ཡང་དེའི་གླུ་ནི། ཨ། ཀྱེ་ཀྱེ་གཤིན་རྗེ་གཤེད་ནག་པོ། །སྲིན་པོའི་གཟུགས་ཅན་རང་བཞིན་ཁྱོད། །བདག་གིས་མཐོང་ན་ཤིན་ཏུ་འཇིགས། །ཁྲོས་པའི་རང་བཞིན་འདི་མཐོང་མཛོད། །མི་དང་ས་འོག་རྒྱ་མཚོར་བཅས། །ཁྱོད་ཀྱི་གར་གྱིས་གཡོས་པར་མཛོད། །ཨཉྫ་ནག་པོ་བཅག་འདྲ་ཡིས། །ཁྲོ་བོས་རོ་ལངས་བཞིན་གར་མཛོད། །རྣམ་པ་སྣ་ཚོགས་གཟུགས་སྤྲུལ་ཞིང༌། །མདངས་ནག་ཚད་ནི་ཐུང་བ་ལ། །བདེ་ཆེན་ངོ་བོའི་གར་མཛོད་ཅེས། །རྡོ་རྗེ་དབྱངས་ཅན་མ་གསོལ་འདེབས། །ཧྲཱིཿ་ཥྚྲྀཿའི་སྔགས་དང་གར་གྱིས་ཁྱོད། །སྲིད་པ་གསུམ་གྱི་འཁྲུལ་པ་ཆོད། །སྙིང་རྗེ་ཁྲོས་ནས་གར་བྱེད་པ། །འགྲོ་བས་མཐོང་ན་ངོ་མཚོར་འགྱུར། །དེའི་རྗེས་ལ་བྱིན་གྱིས་བརླབ་པར་བྱ་སྟེ། ཨོཾ་སརྦ་ཏ་ཐཱ་ག་ཏ་པཱུ་ཛ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ་ཞེས་པའོ། །དེའི་རྗེས་ལ་བསྟོད་པ་བྱ་སྟེ། གཤིན་རྗེ་གཤེད་པོ་རབ་འཇིགས་པ། །གཏི་མུག་རྡོ་རྗེའི་ངོ་བོ་ཁྱོད། །སྟོན་པ་སངས་རྒྱས་ཀུན་རང་བཞིན། །རྡོ་རྗེའི་སྐུ་ལ་ཕྱག་འཚལ་བསྟོད། །གཤིན་རྗེ་གཤེད་པོ་རབ་འཇིགས་པ། །ཕྲ་མ་རྡོ་རྗེའི་ངོ་བོ་ཁྱོད། །རྡོ་རྗེ་ཐུགས་དང་རབ་མཚུངས་པ། །རྡོ་རྗེ་རིན་ཆེན་ཕྱག་འཚལ་བསྟོད། །འདོད་ཆགས་རྡོ་རྗེའི་ངོ་བོ་ཁྱོད། །འདོད་ཆགས་པདྨའི་འབྱུང་གནས་བརྙེས། །ཉེས་པ་ཀུན་མཆོག་གཙོ་བོའི་གཙོ། །རྡོ་རྗེའི་གསུང་ལ་ཕྱག་འཚལ་བསྟོད། །ཕྲག་དོག་ངོ་བོའི་རང་བཞིན་ཁྱོད། །གཤིན་རྗེ་གཤེད་པོ་ལས་ཀུན་པ། །རྡོ་རྗེའི་སྐུ་དང་རབ་ཏུ་མཚུངས། །ཕྱག་ན་རལ་གྲི་ཕྱག་འཚལ་བསྟོད། །སངས་རྒྱས་ཀུན་གྱི་དངོས་པོ་ཁྱོད། །སངས་རྒྱས་ཐམས་ཅད་གཅིག་བསྡུས་པས། །སངས་རྒྱས་ཀུན་མཆོག་གཙོ་བོའི་གཙོ། །དཀྱིལ་འཁོར་གཙོ་ལ་ཕྱག་འཚལ་བསྟོད། །དེ་ནས་གཡོ་


DTG047_Page_0111
[མ་དཔེ་གཟིགས་ན་འདིར་གནོན།]

བའི་བ་དན་གཉིས་མཐའ་གཉིས་ནས་ཕྱར་བ་ཡཾ་ལས་བྱུང་བ་གཞུའི་རྣམ་པ་ལྟ་བུའི་རླུང་གི་དཀྱིལ་འཁོར་གྱི་སྟེང་དུ། རཾ་ཡོངས་སུ་གྱུར་པ་ལས་གྲུ་གསུམ་པའི་མེའི་དཀྱིལ་འཁོར་མངོན་པར་བལྟས་ནས། དེའི་སྟེང་དུ་ཀཾ་ཡོངས་སུ་གྱུར་པ་ལས་མིའི་མགོ་བོ་གསུམ། དེའི་སྟེང་དུ་ཡི་གེ་ཨ་ཡོངས་སུ་གྱུར་པ་ལས་པདྨའི་སྣོད། དེའི་སྟེང་དུ་སླ་བའི་རྫས་ལྔ། ཨོཾ་ཧཱུཾ་སྭ་ཨཱ་ཧཱ་ཞེས་བྱ་བས་བྱིན་གྱིས་བརླབས་པས་ཁུ་བ་ལྔ་དང་བཅས་པ་བསྒོམས་ལ། འབར་བས་བསྐོལ་བར་བྱའོ། །དེ་ནས་རོ་མཉམ་པར་གྱུར་པ་དེའི་སྟེང་དུ་ཨོཾ་ཨཱཿ་ཧཱུཾ་ཞེས་བྱ་བས་བྱིན་གྱིས་བརླབས་ཕར་བལྟའོ། །དེ་ནས་དེའི་འོད་ཀྱིས་ཟླ་བ་ཞུ་བའི་གཟུགས་སུ་གྱུར་པ་དེ་སངས་རྒྱས་དང༌། བྱང་ཆུབ་སེམས་དཔའ་ཐམས་ཅད་ལ་བསྟན་ནས། དེ་ནས་ཨོཾ་དེའི་འོད་ཀྱིས་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་ཡེ་ཤེས་ཀྱི་བདུད་རྩི་བཀུག་ནས་གཅིག་ཏུ་གྱུར་པར་བསྒོམ་པར་བྱའོ།། དེ་ནས་སྙིང་གར་ཟླ་བའི་དཀྱིལ་འཁོར་ཆེན་པོ་ལ་གཤིན་རྗེ་གཤེད་ཀྱི་དཀྱིལ་འཁོར་རྣམ་པར་བཀོད་དེ། ཨ་ཡོངས་སུ་གྱུར་པ་ལས་པདྨ་དཀར་པོ། དེའི་སྟེང་དུ་ཉི་མ་ལ་གནས་པའི་ཧཱུཾ་ལས་བྱུང་བའི་རྡོ་རྗེ་སྤྲོས་པས། །རྡོ་རྗེའི་རང་བཞིན་གྱི་ལྕེས་མྱང་བས། བདག་ཉིད་འཁོར་ལོ་དང་བཅས་པའི་དངོས་པོ་ཐམས་ཅད་ཚིམ་པར་བྱའོ། །འདི་ལྟར་བྱ་བ་ནི་རྣལ་འབྱོར་ཆེན་པོའོ། །

སྔགས་བཟླས་པ།


DTG047_Page_0111
[མ་དཔེ་གཟིགས་ན་འདིར་གནོན།]

དེ་ནས་བདག་པོས་བསྐུལ་བས་དཀྱིལ་འཁོར་བ་རྣམས་ཀྱིས་ཕྱོགས་བཅུར་སྤྲོས་པས། སེམས་ཅན་གྱི་དོན་བྱེད་པར་བལྟས་ལ་ཡི་གེའི་མཐར་ལུས་ཉེ་བར་བསྡུས་ཏེ། ཡང་སྤྲོ་བ་དང་བསྡུ་བ་རྣལ་འབྱོར་པས། ཨཱ་ལི་དང་ཀཱ་ལི་གཉིས་སུ་མེད་པར་རོ། །དེ་ནས་ཐམས་ཅད་ཀྱི་སྙིང་གར་ཟླ་བ་ལ་རང་རང་གི་ས་བོན་ཡི་གེ་བཀོད་ལ། དེ་ནས་སྤྲོ་ཞིང་སྔགས་བཟླས་ཏེ། ཨོཾ་ཡ་མ་རཱ་ཛ་ས་དོ་མེ་ཡ། ཡ་མེ་དོ་རུ་ཎ་ཡོ་ད་ཡ། ཡ་ད་ཡོ་ནི་ར་ཡ་ཀྵེ་ཡ། ཡ་ཀྵེ་ཡཙྪ་ནི་རཱ་མ་ཡ། ཧཱུཾ་ཧཱུཾ་ཕཊ་ཕཊ་སྭཱ་ཧཱ། འདི་ནི་འབུམ་བཟླས་ན། དངོས་གྲུབ་ཕྲ་མོ་རབ་ཏུ་འགྲུབ་པའོ། །འདི་ནི་ཕྲེང་བའི་སྔགས་སོ། །ཡང་ན་དཀྱིལ་འཁོར་གྱི་བདག་པོའི་ཐུགས་ཀའི་ཟླ་བ་ལ་ཡི་གེ་བཅུ་པའི་སྔགས་བཀོད་ལ་སྔགས་སྤྲོ་ཞིང་བཟླས་པ་བྱ་སྟེ། ཨོཾ་ཧྲཱིཿ་ཥྚྲྀཿ་ཝི་ཀྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་སྭཱ་ཧཱ། འདི་ནི་དཔལ་གཤིན་རྗེ་གཤེད་ནག་པོའི་སྙིང་པོ་སྔགས་ཀྱི་གཙོ་བོ་


DTG047_Page_0112
[མ་དཔེ་གཟིགས་ན་འདིར་གནོན།]

ལས་ཐམས་ཅད་བྱེད་པའོ། །ཡང་ན་ཡི་གེ་དྲུག་པའི་སྔགས་ཏེ། ཨོཾ་ཡ་མཱནྟ་ཀ་ཧཱུཾ་བརྒྱ་བྱིན་ལ་སོགས་པ་ཐམས་ཅད་དྲལ་བའི་སྔགས་ཏེ། སྔགས་རེ་རེ་ཞིང་ཡང་མཐུ་ཆེ་སྟེ། མདོར་ན་ལས་ཐམས་ཅད་བྱེད་དོ་ཞེས་བྱ་བའོ། །དེ་ལ་མི་དང༌། བ་ལང་དང༌། གླང་པོ་ཆེ་དང༌། བོང་བུ་དང༌། རྔ་མོ་དང༌། རྟ་དང༌། ཁྱིའི་རུས་པ་ལ་བཟླས་པའི་ཕྲེང་བ་ཡང་དག་པར་བྱས་ལ་མཉམ་པར་གཞག་པས་བཟླས་པ་བྱའོ། །དེ་ཡང་དལ་བར་མ་ཡིན། དྲག་པར་མ་ཡིན། ཚིག་མི་གསལ་བར་མ་ཡིན། ཡིད་ཀྱིས་བཟླས་པ་མ་ཡིན། །སེམས་གཞན་དུ་མ་ཡིན། རིང་པོ་མ་ཡིན། ཐུང་ངུ་མ་ཡིན། འདི་ལྟ་བུའི་མཚན་ཉིད་ཀྱིས་ཇི་སྲིད་མི་སྐྱོ་བར་མ་གྱུར་པ་དེ་སྲིད་དུ་བཟླས་པ་བྱའོ། །གལ་ཏེ་སྐྱོ་ན་དཀྱིལ་འཁོར་ཡང་དག་པར་མཆོད་དེ། སྔར་གྱི་བསྟོད་པས་ཡང་དག་པར་བསྟོད། ཡེ་ཤེས་ཀྱི་དཀྱིལ་འཁོར་གཤེགས་སུ་གསོལ་བ་ནི། ཡི་གེ་མུཿ་མཐར་བཞག་པའི་ཡི་གེ་གསུམ་གྱི་སྔགས་ཀྱིས་སོ། །དེ་ནས་དམ་ཚིག་གི་དཀྱིལ་འཁོར་ནི་གཞག་པར་བྱའོ། །

སྔགས་བཟླས་པའི་ཆེ་བའི་བདག་ཉིད་དང་གཏོར་མ་ཉེ་བར་བསྟན་པ།


DTG047_Page_0112
[མ་དཔེ་གཟིགས་ན་འདིར་གནོན།]

ད་ནི་སྔགས་བཟླས་པའི་ཆེ་བའི་བདག་ཉིད་དང་གཏོར་མ་ཉེ་བར་བསྟན་པར་བྱའོ། །ཟླ་བའོ་ཅོག་གི་བཅུ་བཞི་ལ། །བདུད་རྩི་ལྔ་དང་ལྡན་པ་ཡི། །ཤ་ལྔ་ཡིས་ནི་བྱུགས་བྱས་ནས། །བཟླས་ན་གྲུབ་པའི་མཆོག་འགྲུབ་བྱད།། གསང་སྔགས་བཟླས་པ་ཁྲི་བྱས་ན། །འབྱུང་པོ་མཉེ་དང་དེ་བཞིན་དུ། །མཁའ་འགྲོ་མ་ནི་སྟོང་བསད་པ། །མཚམས་མེད་ལྔ་པོ་བྱས་པས་ཀྱང༌། །འགྲུབ་པར་འདི་ལ་ཐེ་ཚོམ་མེད། །དགེ་བ་བཅུ་ལ་གོམས་པ་དང༌། །དབང་པོ་ལས་རྒྱལ་བླ་མ་གུས། །ང་རྒྱལ་ཁྲོ་ལས་རྣམ་གྲོལ་བ། །དེ་ཡིས་ངེས་པར་ཆེན་པོར་འགྱུར། །སློང་མོ་བྱེད་ཅིང་བཟླས་མི་བྱ། །ཀུན་དུ་རྒྱུ་ཞིང་མ་ཡིན་ཏེ། །ཡན་ལག་མཉམས་གསང་སྔགས་བ་ཟླ། །གཙོ་བོ་དངོས་དང་དངོས་མེད་བདག །རྟག་ཏུ་དམ་ཚིག་ལ་སོགས་པ་སྟེན། །རྩ་བ་སྦོམ་པོ་བསྲུང་བར་བྱ། །སེམས་ཅན་ཀུན་ལ་རྣལ་འབྱོར་ནི། །རིག་པས་བྱམས་པའི་སེམས་མི་བཏང༌། །སྙིང་རྗེ་མཆོག་གི་དབང་གྱུར་པས། །ཕྱོགས་བཅུར་གཏོར་མ་སྦྱིན་པར་བྱ། །ཉིན་རེའམ་ཡང་ན་ཟླ་རེའམ། །ལོ་ནི་རེ་རེ་དག་ཀྱང་རུང༌། །གཏོར་མ་དྲུག་ཅུ་རྩ་བཞི་སྦྱིན། །དབྱུ་གུ་དྲུག་ཅུ་རྩ་བཞིར་བརྟག །རྟག་ཏུ་བགེགས་རྣམས་ཞི་བྱ་དང༌། །བསོད་ནམས་


DTG047_Page_0113
[མ་དཔེ་གཟིགས་ན་འདིར་གནོན།]

འཕེལ་བར་བྱ་བའི་ཕྱིར། །འབྱུང་པོ་ཀུན་ལ་གཏོར་མ་སྦྱིན། །རྟག་ཏུ་ཆོ་ག་ཇི་བཞིན་དུ། །དཀྱིལ་འཁོར་གྲུ་གསུམ་བྲི་བར་བྱ། །ཆུ་དང་དྲི་ཆེན་བསྲེས་པས་བྱུག །གཤིན་རྗེ་ནོར་བཟང་རྣལ་འབྱོར་གྱིས། །དེ་ལ་ཕྱོགས་སྐྱོད་བ་རྣམས་དགུག །ཡི་གེ་ཨོཾ་གྱིས་ཚངས་པ། ཧྲིཿ་ཡིས་དབང་པོ། ཥྚྲྀཿ་ཡིས་མེ་ལྷ། ཝི་ཡིས་གཤིན་རྗེ། ཀྲྀ་ཡིས་བདེན་བྲལ། ཏཱ་ཡིས་ཆུ་ལྷ། ན་ཡིས་ཁྱབ་འཇུག །ཡང་ན་ཡིས་རླུང༌། ཧཱུཾ་གིས་གནོད་སྦྱིན། ཡང་ཧཱུཾ་གིས་དབང་ལྡན། ཕཊ་ཀྱིས་ཟླ་བ། ཡང་ཕཊ་ཀྱིས་ཉི་མ། སྭཱ་ཡིས་ནོར་འཛིན། །ཏཱ་ཡིས་ཐགས་བཟངས་རིས་སོ། །དེ་བཞིན་དུ་ཡེ་ཤེས་སེམས་དཔའི་ཐུགས་ཀའི་ས་བོན་ལས་འོད་འཕྲོས་པས་ཁམས་གསུམ་ན་གནས་པ་རྣམས་བཀུག་ལ། ཨོཾ་ཨཱཿ་ཧཱུཾ་ཕེཾ་ཕེཾ་ཕཊ་ཕཊ་ཁམས་གསུམ་ཐམས་ཅད་ན་གནས་པའི་ལྷ་ལ་སོགས་པ་རྣམས། ལྷ་རྫས་རྡོ་རྗེ་ཡོངས་སུ་དག་པའི་གཏོར་མ་འདི། གྲྀཧྞ་ཐ་གྲྀཧྞ་ཐ། མ་མ་ཤཱནྟི་དཀུ་རུ་སྭཱ་ཧཱ། གཤིན་རྗེ་གཤེད་ཀྱི་དཀྱིལ་འཁོར་འདི་བཀོད་པ་ལས་བསོད་ནམས་གང་ཐོབ་སྟོན་ཀ་ཡིས། །འོ་མའི་མཚོ་བསྲུབས་ལས་སྐྱེས་ཟླ་བའི་འོད་དང་འདྲ་བ་བདག་གི་ཆུང་ཞིག་གང༌། །དེ་ཡིས་བདག་ནི་གཤིན་རྗེའི་རྒྱལ་པོའི་འདྲ་གནས་ཐོབ་ནས་ནམ་མཁའ་གནས་ཀྱི་བར། །སེམས་ཅན་འགྲོ་བ་དྲུག་ཏུ་འཁོར་བ་མ་ལུས་གཤིན་རྗེ་གཤེད་དུ་བྱེད་པར་ཤོག །དཔལ་ལྡན་ནག་པོའི་སྒྲུབ་ཐབས་བྲིས་པ་འདི། །གཞུང་ལུགས་སྣ་ཚོགས་དག་དང་མངོན་འགལ་བས། །ཡང་དག་གཞན་གྱི་དོན་དུ་འདི་མ་བྱས། །མཐོང་བ་འབའ་ཞིག་ཙམ་ཞིག་བསྟན་པ་ཡིན། །སྦས་པ་གོ་བར་བྱ་ཕྱིར་བྱས་ལས་བསོད་ནམས་གང་ཞིག་བསྒྲུབས་པ་ནི། །ཟླ་བའི་འོད་འདྲ་དེ་ཡིས་འགྲོ་བ་མཐའ་དག་གཤིན་རྗེ་གཤེད་པོར་ཤོག །དཔལ་གཤིན་རྗེ་གཤེད་ནག་པོའི་རྒྱུད་བཞི་བརྒྱ་ལྔ་བཅུ་པ་ལས། མཁས་པ་རྣམས་ཀྱིས་གསོལ་བ་བཏབ་པས། དགེ་སློང་བསོད་སྙོམས་པ་ཀ་མ་ལ་ར་ཀྵི་ཏྲ་ཞེས་བྱ་བས་བསྡུས་པ་རྫོགས་སོ།། །།རྒྱ་གར་གྱི་མཁན་པོ་པཎྜི་ཏ་ཆེན་པོ་དཱི་པཾ་ཀ་ར་ཤྲཱི་ཛྙཱ་ན་དང༌། བོད་ཀྱི་ལོ་ཙཱ་བ་དགེ་སློང་ཚུལ་ཁྲིམས་རྒྱལ་བས་བསྒྱུར་ཅིང་ཞུས་ཏེ་གཏན་ལ་ཕབ་པའོ།།

མཎྜལ་གྱི་ཆོ་ག།
རྙོག་མེད་རྡོ་རྗེ།

བླ་མ་མཎྜལ་གྱི་ཆོ་ག


DTG047_Page_0114
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། མཎྜལ་བི་དྷིཿ་བོད་སྐད་དུ། མཎྜལ་གྱི་ཆོ་ག །སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །མཉམ་པར་གཞག་པས་རྟག་ཏུ་ཡང༌། །བླ་མའི་མཎྜལ་བྱས་ནས་ནི། །ཡི་དམ་ལྷ་ཡི་མཎྜལ་དང༌། །ཀློག་པའི་མཎྜལ་མཆོད་སོགས་བྱ། །ད་ནི་བླ་མའི་མཎྜལ་བྱ། །དེ་ལ་དབུས་སུ་ནི། ཨོཾ་ཧཾ་སུ་མ་ཧཱ་མེ་ར་བེ་ན་མཿ། ཤར་དུ་ནི། ཨོཾ་ཡཾ་པཱུརྦ་བི་དེ་ཧཱ་ཡ་ན་མཿ་ལྷོར་ནི། ཨོཾ་རཾ་ཛམྦུ་དྭཱི་པཱ་ཡ་ན་མཿ། ནུབ་ཏུ་ནི། ཨོཾ་ལཾ་ཨ་པ་ར་གོ་དཱ་ནཱི་ཡེ་ན་མཿ། བྱང་དུ་ནི། ཨོཾ་བཾ་ཨུཏྟ་ར་ཀུ་ར་བེ་ན་མཿ། མེའི་མཚམས་སུ་ནི། ཨོཾ་ཡཿ། ཨུ་པ་དྭཱི་པཱ་ཡ་ན་མཿ། བདེན་བྲལ་དུ་ནི། ཨོཾ་ར།། ཨུ་པ་དྭཱི་པཱ་ཡ་ན་མཿ། རླུང་གི་ཕྱོགས་སུ་ནི། ཨོཾ་ལཿ། ཨུ་པ་དྭཱི་པཱ་ཡ་ན་མཿ། དབང་ལྡན་གྱི་ཕྱོགས་སུ་ནི། ཨོཾ་བཿ། ཨུ་པཱ་དྭཱི་པཱ་ཡ་ན་མཿ། ཡང་དབུས་ཀྱི་ཤར་དུ་ནི། ཨོཾ་ཡ་ག་ཛ་རཏྣཱ་ཡ་ན་མཿ། ལྷོར་ནི། ཨོཾ་ར་པུ་རུ་ཥ་རཏྣཱ་ཡ་ན་མཿ། ནུབ་ཏུ་ནི། ཨོཾ་ལ་ཨ་ཤྭ་རཏྣཱ་ཡ་ན་མཿ། བྱང་དུ་ནི། ཨོཾ་བསྟི་རཏྣི་རཏྣཱ་ཡ་ན་མཿ། མེའི་མཚམས་སུ་ནི། ཨོཾ་ཡཱ་ཁཌྒ་རཏྣཱ་ཡ་ན་མཿ། བདེན་བྲལ་གྱི་ཕྱོགས་སུ་ནི། ཨོཾ་རཱ་ཙ་ཀྲ་རཏྣཱ་ཡ་ན་མཿ། རླུང་གི་ཕྱོགས་སུ་ནི། ཨོཾ་ལཱ་མ་ཧཱ་མ་ཎི་རཏྣཱ་ཡ་ན་མཿ། དབང་ལྡན་གྱི་ཕྱོགས་སུ་ནི། ཨོཾ་བཱ་མ་ཧཱ་ནི་དྷི་བྷྱོ་རཏྣཱ་ཡ་ན་མཿ། འདི་དག་ཐམས་ཅད་ནི་གཟུགས་ཇི་ལྟ་བར་བལྟ་སྟེ། མཆོད་ནས་བླ་མ་མདུན་དུ་བལྟས་ལ། འདི་མཐའ་དག་བླ་མ་ལ་ཕུལ་ནས། མེ་ཏོག་གི་སྙིམ་པ་སྔོན་དུ་འགྲོ་བས་ཕྱག་བྱ་སྟེ། ཨོཾ་ཨཱ། ཡང་དག་པའི་ཡེ་ཤེས་ཀྱི་སྣང་བ་མཛད་པ་དཔལ་ལྡན་བླ་མའི་ཞབས་ཀྱི་པདྨ་ལ་ཕྱག་འཚལ་ལོ། །ཧཱུཾ་གང་གི་སྐུ་དྲིན་འོད་ཀྱིས་གསལ་བྱས་བདག་ཉིད་ཀྱི། །དེ་ཉིད་རིན་ཆེན་ཚོགས་ཀྱི་འོད་ཀྱིས་མུན་བཅོམ་སྟེ། །མཐོང་བ་སྐྱོན་མེད་བདག་རྣམ་རོལ་པས་ལྷག་བལྟ་བ། །བླ་མ་ཉི་མ་དེ་ལ་གུས་པས་ཕྱག་འདི་འཚལ། །ཞེས་བསྟོད་པ་བྱའོ། །བླ་མའི་མཎྜལ་གྱི་ཆོ་གའོ། །

ཀློག་པའི་དཀྱིལ་འཁོར་གྱི་ཆོ་ག


DTG047_Page_0114
[མ་དཔེ་གཟིགས་ན་འདིར་གནོན།]

དང་པོའི་སངས་རྒྱས་ཀྱི་རྒྱུད་ཆེན་པོ་ལས་ཀྱང་གསུངས་པ། རང་གི་ཡི་དམ་གྱི་ལྷའི་སྟེང་དུ་ཀློག་ཁྲིའུ་ལ་སོགས་པ་འཇོག་པ་ནི་བཀག་པའི་ཡང་ཕྱིར་ན། དེ་ཉིད་ལས་གསུངས་པའི་མཎྜལ་གྱི་དཀྱིལ་འཁོར་བརྗོད་དོ། །ཤར་དུ་ཤར་གྱི་ལུས་འཕགས་ཏེ། །ལྷོ་ཡི་ཕྱོགས་སུ་འཛམ་བུའི་གླིང༌། །ནུབ་ཏུ་བ་ལང་སྤྱོད་ཡིན་ཏེ། །བྱང་དུ་བྱང་གི་སྒྲ་མི་སྙན། །དབུས་སུ་རི་རབ་


DTG047_Page_0115
[མ་དཔེ་གཟིགས་ན་འདིར་གནོན།]

མཚམས་རྣམས་སུ། །དེ་གླིང་སྔར་གྱི་སྔགས་ཀྱིས་མཆོད། །དེ་ཡི་སྟེང་དུ་གནས་པ་ཡི། །ཤེས་རབ་ཕ་རོལ་ཕྱིན་པ་སོགས། །ཆོས་ལ་གུས་པས་བཀླག་པར་བྱ། །དེ་ལ་མཆོད་སོགས་བྱས་ནས་ནི། །འདི་ཀུན་ཡང་དག་ཉིད་དུ་སྤྱད། །ཅེས་བྱ་བ་ནི་ཀློག་པའི་དཀྱིལ་འཁོར་གྱི་ཆོ་གའོ། །

ཡི་དམ་ལྷའི་མཎྜལ་གྱི་ཆོ་ག


DTG047_Page_0115
[མ་དཔེ་གཟིགས་ན་འདིར་གནོན།]

ཨོཾ་བཛྲ་མཎྜལ་ལ་མུཿ་ཞེས་བྱ་བ་ནི་མཎྜལ་གཉིས་གཤེགས་སུ་གསོལ་བའོ། །ཡི་དམ་ལྷའི་མཎྜལ་ནི་སོ་སོའི་སྒྲུབ་ཐབས་ཀྱི་གཞུང་ལས་ཤེས་པར་བྱའོ། །སློབ་དཔོན་ཆེན་པོ་དཔལ་རྙོག་མེད་རྡོ་རྗེའི་ཞལ་སྔ་ནས་མཛད་པ་རྫོགས་སོ།། །། རྒྱ་གར་གྱི་མཁན་པོ་ཨ་དུ་ལ་དྷ་ས་དང༌། ལོ་ཙཱ་བ་དགེ་སློང་བློ་ལྡན་ཤེས་རབ་ཀྱིས་བསྒྱུར་བའོ།།

མཎྜལ་གྱི་ཆོ་ག་ཞེས་བྱ་བ།
ཀ་མ་ལ་རཀྵི་ཏ།


DTG047_Page_0115
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། མཎྜལ་བི་དྷི་ནཱ་མ། བོད་སྐད་དུ། མཎྜལ་གྱི་ཆོ་ག་ཞེས་བྱ་བ། མགོན་པོ་འཇམ་པའི་དཔལ་ལ་ཕྱག་འཚལ་ལོ། །མཎྜལ་བསྡུ་ན་རྣམ་གཉིས་ཏེ། །ཡིད་ཀྱིས་བསམས་དང་དངོས་བྱེད་དོ། །དངོས་ལ་རྣམ་པ་བཞིར་གསུངས་ཏེ། །སློབ་དཔོན་ལྷག་པའི་ལྷ་ཉིད་དང༌། །མཆོད་པ་དང་ནི་མཛེས་པའོ། །རྡོ་རྗེ་སློབ་དཔོན་མཎྜལ་ནི། །ཅུང་ཟད་བདག་གིས་བཤད་པར་བྱ། །ས་གཞི་ཆ་མཉམ་ཡིད་འོང་ལ། །བ་ཡི་རྣམ་ལྔས་བྱུག་བྱ་སྟེ། །གུར་གུམ་ལ་སོགས་དྲི་ཡི་ཆུས། །དུས་གསུམ་དག་ཏུ་བྱུག་པར་བྱ། །ཨོཾ་བཛྲ་རེ་ཁེ་ཧཱུཾ། རིན་ཆེན་མཛེས་པའི་འབྲུ་ཉིད་དམ། །མེ་ཏོག་སྲོག་ཆགས་བྲལ་བ་ཡིས། །རྣམ་པ་བཅོ་བརྒྱད་དགྲམ་བྱ་སྟེ། །དང་པོ་འོག་གི་རི་རབ་དང༌། །རང་གི་ཕྱོགས་ནས་བརྩམ་བྱ་སྟེ། །ལུས་འཕགས་ལ་སོགས་གླིང་བཞི་དང༌། །དག་པ་གཡོན་གྱི་གླིང་ཕྲན་བཞི། །བཀྲམ་པའི་ཚུལ་གྱིས་གསལ་བར་བྱ། །ནང་དུ་དེ་བཞིན་རིན་ཆེན་བརྒྱད། །གླིང་བརྒྱད་བཀང་ལ་དབུལ་བར་བྱ། །དེ་ནས་སྟེང་གི་རི་རབ་ནི། །གཞལ་ཡས་གདན་དང་བཅས་བསམས་ཏེ། །བླ་མ་སངས་རྒྱས་སྤྱན་དྲངས་ནས། །གུས་པས་མཎྜལ་དབུལ་བར་བྱ། །ཨོཾ་ཨཱཿ་ཧཱུཾ་མེ་ར་བེ་ན་མཿ། ཨོཾ་ཡ་པུརྦ་བི་དེ་ཧ་ཡེ་ན་མཿ། ཨོཾ་ར་ཛམྦུ་དྭཱི་པཱ་ཡ་ན་མཿ། ཨོཾ་ཝ་ཨུཏྟ་ར་ཀུ་ར་བེ་ན་མཿ། ཨོཾ་ལ་ཨ་པ་ར་གོ་དཱ་ནཱི་ཡ་ན་མཿ། ཨོཾ་ཡ་ཨུ་པ་དྭཱི་པཱ་ཡ་ན་མཿ། ཨོཾ་ར་ཨུ་པ་དྭཱི་པཱ་ཡ་ན་མཿ། ཨོཾ་ཝ་ཨུ་


DTG047_Page_0116
[མ་དཔེ་གཟིགས་ན་འདིར་གནོན།]

པ་དྭྰྸི་པཱ་ཡ་ན་མཿ། ཨོཾ་ལ་ཨུ་པ་དྭཱི་པཱ་ཡ་ན་མཿ། ཨོམ་ཡ་ག་ཛ་རཏྣ་ཡ་ན་མཿ། ཨོཾ་ར་པུ་རུ་ཥ་རཏྣཱ་ཡ་ན་མཿ། ཨོཾ་ལ་ཨ་ཤྭ་རཏྣཱ་ཡ་ན་མཿ། ཨོཾ་ཝ་སྟྲཱི་རཏྣཱ་ཡ་ན་མཿ། ཨོཾ་ཁཌྒ་རཏྣཱ་ཡ་ན་མཿ། ཨོཾ་ར་མ་ཎི་རཏྣ་ཡ་ན་མཿ། ཨོཾ་ཝ་སརྦ་རཏྣཱ་ནི་དྷི་བྷྱོ་ན་མཿ། ཨོཾ་ལ་ཙ་ཀྲ་རཏྣ་དྷ་ནི་བྷྱོ་ན་མཿ། ཨོཾ་ཨཱཿ་ཧཱུཾ་དྷཱ་ར་བེ་ན་མཿ། བཀོད་པ་ཤིན་ཏུ་མཛེས་པ་མཎྜལ་མཆོག །བར་ནི་རོལ་མཚོ་ཕྱི་རོལ་ལྕགས་རིས་བསྐོར། །དགའ་དང་སྤྲོས་པས་བཅས་པའི་མཎྜལ་གང༌། །དེ་ཉིད་སྒྲུབ་པའི་རྣལ་འབྱོར་པ་ཡིས་ནི། །འགྲོ་ལ་ཕན་ཕྱིར་སངས་རྒྱས་འདོད་པ་བློས། །མི་མཐུན་ཕྱོགས་རྣམས་མྱུར་དུ་ཞི་བྱའི་ཕྱིར། །བརྩོན་པའི་སྟོབས་ཀྱིས་དུས་གསུམ་དག་ཏུ་ནི། །བླ་མ་རྡོ་རྗེ་འཛིན་ལ་དབུལ་བར་བྱ། །སངས་རྒྱས་ཀུན་གྱི་གདུང་འཛིན་རྣལ་འབྱོར་པས། །མཉེས་བྱེད་མཎྜལ་བཟང་པོ་འདི་ཕུལ་བས། །མཐོང་དང་མ་མཐོང་ཉེས་པ་ཀུན་སྤངས་ཏེ། །ཐུན་མོང་མཆོག་གི་དངོས་གྲུབ་ཐོབ་འགྱུར་ཞེས། །རྫོགས་སངས་རྒྱས་ཀྱིས་བདེ་མཆོག་རྒྱུད་དུ་བཤད། །དེ་ཕྱིར་འབད་པས་མཎྜལ་དབུལ་བར་བྱ། །བདག་གི་མཎྜལ་བརྩམས་པ་ཡིས། །དགེ་བ་གང་ཐོབ་དེ་དག་གིས། །འགྲོ་ཀུན་བླ་མ་བསྟེན་གྱུར་ཅིང༌། །རྡོ་རྗེ་འཛིན་པའི་ས་ཐོབ་ཤོག །དངོས་ཀྱི་མཎྜལ་རྫོགས་སོ།། །།རྒྱ་གར་གྱི་མཁན་པོ་ཀ་མ་ལ་རཀྵི་ཏས། གཤིན་རྗེ་གཤེད་ཀྱི་རྒྱུད་བཞི་བརྒྱ་ལྔ་བཅུ་པ་ལ་བརྟེན་ནས་མཎྜལ་གྱི་ཆོ་ག་མཛད་པའོ།། །།ལོ་ཙཱ་བ་ཤྲཱི་པྲ་ཛྙཱ་ན་ཀཱི་རྟིས་བསྒྱུར་པའོ།།

གཤིན་རྗེའི་དགྲ་ནག་པོའི་སྒྲུབ་པའི་ཐབས་ཀུ་མུ་དཱ་ཁ་བྱེ་བ་ཞེས་བྱ་བ།
རིན་ཆེན་འབྱུང་གནས་ཞི་བ།


DTG047_Page_0116
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། ཀྲྀཥྞ་ལ་ནཱ་རི་སཱ་དྷ་ན་པྲོ་ཏ་ཕུལ་ལ་ཀུ་མུ་དཱ་ནཱ་མ། བོད་སྐད་དུ། གཤིན་རྗེའི་དགྲ་ནག་པོའི་སྒྲུབ་པའི་ཐབས་ཀུ་མུ་ད་ཁ་བྱེ་བ་ཞེས་བྱ་བ། སངས་རྒྱས་ལ་ཕྱག་འཚལ་ལོ། །འབར་བའི་འོད་ཟེར་ཕྲེང་འཁྲུགས་པས། །འགྲོ་བའི་མུན་སེལ་གཤིན་རྗེའི་དགྲ། །རབ་སྣང་བཙུན་མོ་དགའ་མཛད་ལ། །བཏུད་ནས་དེ་ཡི་སྒྲུབ་ཐབས་བཤད། །དང་པོ་རེ་ཞིག་སྔགས་པས་སྟན་བདེ་བ་ལ་ཉེ་བར་འདུག་སྟེ། རང་གི་སྙིང་གར་ཟླ་བའི་དཀྱིལ་འཁོར་རྣམ་པར་བསམས་ལ། དེའི་སྟེང་དུ་ཡི་གེ་ཡཾ་སྔོན་པོ་བལྟའོ། །དེ་མ་ཐག་ཏུ་བྱམས་པ་དང༌། སྙིང་རྗེ་དང༌། དགའ་བ་དང་བཏང་སྙོམས་རྣམ་པར་བསྒོམས་ཏེ། དེའི་འོག་ཏུ་སྙིང་གའི་ཡི་གེ་ཡཾ་ལས་སྐྱེས་པའི་འོད་ཟེར་


DTG047_Page_0117
[མ་དཔེ་གཟིགས་ན་འདིར་གནོན།]

རྣམས་ཀྱིས། བླ་མ་དང་སངས་རྒྱས་དང༌། བྱང་ཆུབ་སེམས་དཔའ་ཐམས་ཅད་དང༌། དཔལ་གཤིན་རྗེའི་དགྲ་ནམ་མཁའ་ལ་སྣང་བར་བྱས་ལ། དེ་རྣམས་ལ་མངོན་པར་འདུད་པ་དང༌། མཆོད་པ་དང་མདུན་དུ་སྡིག་པ་བཤགས་པ་དང༌། བསོད་ནམས་ལ་རྗེས་སུ་ཡི་རང་བ་དང། དེ་ཡོངས་སུ་བསྔོ་བ་དང༌། གསུམ་ལ་སྐྱབས་སུ་འགྲོ་བ་དང༌། སྨོན་པ་བྱང་ཆུབ་ཀྱི་སེམས་བསྐྱེད་པ་དང༌། རྒྱལ་བའི་ལམ་ལ་བརྟེན་པ་དང༌། འཇུག་པ་བྱང་ཆུབ་ཏུ་སེམས་བསྐྱེད་པ་དང༌། སླར་གཏང་བའི་བར་དུ་བསྒྲུབ་པོ། །དེ་ནས་ཡང་རྣམ་པར་ཐར་པའི་སྒོ་གསུམ་དྲན་པས་སྟོང་པ་ཉིད་བསྒོམས་ལ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་བྱ་བའི་སྔགས་བརྗོད་དེ། འདི་ནི་བསོད་ནམས་དང་ཡེ་ཤེས་ཀྱི་ཚོགས་དཔལ་གཤིན་རྗེའི་དགྲ་སྐྱེད་པར་བྱེད་པའོ། །དེ་བཞིན་དུ་རང་བཞིན་གྱི་ལུས་དང་ངག་དང་ཡིད་དག །ཨོཾ་ཨཱཿ་ཧཱུཾ་ཞེས་པའི་ཡི་གེ་གསུམ་ཕ་དང་མའི་དབུས་ན་གནས་པ་སྟེང་དུ་ཟླ་བ་ལ་གནས་པ་བསམ་མོ། །མདུན་དུ་ཉི་མ་ལ་གནས་པའི་ཧཱུཾ་ནག་པོ་ལས་བྱུང་བའི་རྡོ་རྗེ་ང་པོ་འབར་བ་ལས། རྡོ་རྗེའི་ས་གཞི་དང་དྲ་བ་དང་གུར་རྣམས་བསྒོམ་པར་བྱ་ཞིང༌། བགེགས་མེད་པའི་སེམས་ཀྱིས་དབུས་སུ་སྣ་ཚོགས་པདྨ་དང་ཟླ་བ་ལ་གནས་པའི་རྡོ་རྗེ་སེམས་དཔའ་ཡོངས་སུ་གྱུར་པ་ལས་ཆོས་ཀྱི་འབྱུང་གནས་དབུས་ན་པཾ་ལས་བྱུང་བའི་པདྨ་སྣ་ཚོགས་དང༌། ཁཾ་ལས་བྱུང་བའི་སྣ་ཚོགས་རྡོ་རྗེ་ཅན་བསམས་ཏེ། དེའི་ཟླ་བ་ལ་ཡི་གེ་བྷྲཱུཾ་ལས་བྱུང་བའི་འཁོར་ལོ་རྩིབས་བརྒྱད་པ་ཡི་གེ་བྷྲཱུཾ་གྱིས་བྱིན་གྱིས་བརླབས་པའོ། །དེ་ཡོངས་སུ་གྱུར་པ་ལས་སྐྱེས་པའི་རྣམ་པར་སྣང་མཛད་རིག་མ་དང་བཅས་པའི་ཡན་ལག་ལས་བྱུང་བའི་ཁང་པ་བརྩེགས་པ། གྲུ་བཞི་སྒོ་བཞི་པ། རྟ་བབས་བཞི་དང་ལྡན་པ། དྲ་བ་དང་དྲ་བ་ཕྱེད་པས་མཛེས་པ། སྣ་ཚོགས་པའི་རྒྱན་གནས་པ། སྣ་ཚོགས་རྡོ་རྗེ་ལ་བརྟེན་པའི་སྣ་ཚོགས་པདྨ་ལ་ཟླ་བ་དང་ཉི་མས་མནན་པ་བཅུ་བདུན་གྱིས་མཛེས་པ་རྣམ་པར་བསྒོམ་མོ། །དེའི་དབུས་སུ་ཟླ་བའི་གདན་ལ་གནས་པའི་ཡི་གེ་གསུམ་ལ་གཟིགས་ནས་བྱོན་པའི་སངས་རྒྱས་རྣམས། དབྱངས་བཅུ་དྲུག་དང་ཡ་ར་ལ་ཝ་ཌ་ཌྷ་ལྷག་པའི་གསལ་བྱེད་བཞི་བཅུའི་གཟུགས་ཉིས་འགྱུར་དུ་བྱས་པ་བྱོན་ནས།


DTG047_Page_0118
[མ་དཔེ་གཟིགས་ན་འདིར་གནོན།]

རིམ་པ་བཞིན་འོག་དང་སྟེང་དུ་ཟླ་བ་གཉིས་སུ་གྱུར་པར་བྱ་བ་ནི། མེ་ལོང་ལྟ་བུའི་ཡེ་ཤེས་སོ། །ཟླ་བ་གཉིས་དང་ཡི་གེ་གསུམ་འདྲེས་པས་གང་བའི་ཟླ་བ་གསུམ་དུ་གྱུར་པ་ནི་མཉམ་པ་ཉིད་དོ། །དེ་ཡོངས་སུ་གྱུར་པ་ལས་ཡི་གེ་ཧཱུཾ་དཀར་པོས་མཚན་པའི་རྡོ་རྗེ་བསམས་ཏེ། ཨོཾ་བཛྲ་ཨཱཏྨ་ཀོ྅ཧཾ། ཞེས་ངར་འཛིན་པ་ནི་སོ་སོར་རྟོག་པའོ། །ཡི་གེ་ཧཱུཾ་ལས་བྱུང་བའི་དེ་བཞིན་གཤེགས་པ་རྣམས་ཀྱིས་སེམས་ཅན་ཐམས་ཅད་དེ་བཞིན་གཤེགས་པར་བྱས་ཏེ། ཡི་གེ་ཧཱུཾ་གི་ནང་དུ་སོན་པ་དང༌། ཨོཾ་ཡ་ཐཱ་སརྦ་ཏ་ཐཱ་ག་ཏཱ་ཏ་ཐཱ་ཨ་ཧཾ། ཞེས་ང་རྒྱལ་བྱ་བ་ནི་བྱ་བ་གྲུབ་པའོ། །ཡི་གེ་ཧཱུཾ་ལས་བྱུང་བའི་འོད་ཟེར་རྣམས་ཀྱིས་རྡོ་རྗེ་སེམས་དཔའི་གཟུགས་དང་ལྡན་པའི་དེ་བཞིན་གཤེགས་པ་རྣམས་བསྐུལ་ཏེ། ཧཱུཾ་ལ་ཞུགས་པ་དང་ཧཱུཾ་དང་རྡོ་རྗེར་བཅས་པ་ཡོངས་སུ་གྱུར་པ་ལས་བྱུང་བའི་རྡོ་རྗེ་སེམས་དཔའ་ཁྲོ་བ་སྒེག་པའི་ཉམས་ཅན། གཡས་བརྐྱང་བ། རྩ་བའི་ཞལ་དང་སྐུ་ཐམས་ཅད་དཀར་བ། ཞལ་གཡས་གཡོན་སྔོ་བ་དང་དམར་བ། ཕྱག་དང་པོ་གཡས་དང་གཡོན་གྱིས་གྲི་གུག་དང་ཐོད་པ་འཛིན་པས་རང་དང་འདྲ་བའི་ཤེས་རབ་མ་ལ་འཁྱུད་པ། ཕྱག་ལྷག་མ་རྣམས་ནི་རྡོ་རྗེ་དང་རལ་གྲི་དང༌། འཁོར་ལོ་དང་པདྨ་བསྣམས་པ། དབུ་རྒྱན་དུ་མི་བསྐྱོད་པས་མནན་པ། འདི་ལྟར་བདག་ཉིད་བསྒོམ་པ་ནི་ཆོས་ཀྱི་དབྱིངས་རྣམ་པར་དག་པའོ། །འདི་ནི་དཔལ་གཤིན་རྗེའི་དགྲ་སྒོ་ངར་འཇུག་པ་རབ་ཏུ་བསྒོམ་པའོ། །དེ་ནས་རང་གི་ཡེ་ཤེས་སེམས་དཔའི་ས་བོན་ལས་བྱུང་བའི་འོད་ཟེར་གྱིས་འགྲོ་བ་ཐམས་ཅད་སངས་རྒྱས་སུ་བྱས་པ་དྲངས་ཏེ། རང་གི་ལུས་ལ་གཞུག་གོ །དེའི་འོག་ཏུ་ཡི་གེ་གསུམ་ཕ་དང་མའི་དབུས་ན་གནས་པ་དྲི་ཟའི་སེམས་ཅན་ལྟ་བུར་རང་གི་ཁ་ནས་ཞུགས་ཏེ། བྱང་ཆུབ་ཀྱི་སེམས་ཀྱི་རྣམ་པ་རྡོ་རྗེའི་ལམ་ནས་བྱུང་སྟེ། རང་གི་རིག་མའི་པདྨར་ལྷུང་བ་དང༌། དེ་ལས་བྱུང་བའི་འོད་ཟེར་དམར་པོས་དེ་ལ་རེག་པས་རིག་མ་འདོད་ཆགས་ཆེན་པོས་ཞུ་ཞིང༌། བཅོམ་ལྡན་འདས་ཀྱང་ཞུ་བར་བལྟའོ། །ཞུ་བའི་སྒོ་ང་ལས་བྱུང་བའི་ཙ་རྩི་ཀཱ་ལ་སོགས་པ་བཞི་རང་རང་གི་སྟན་ལ་འཁོད་པས། བཅོམ་ལྡན་འདས་མི་བཞུགས་པར་མཐོང་བས། །ཡིད་མི་དགའ་བས་


DTG047_Page_0119
[མ་དཔེ་གཟིགས་ན་འདིར་གནོན།]

མགྲིན་པ་གཤིབས་ཏེ། སློང་བའི་གླུས་འདི་ལྟར་བསྐུལ་ལོ། །རྗེ་བཙུན་ཐུགས་རྗེས་ཁྲོ་བ་བཞེངས་མཛོད་ལ། །ཇོ་བོ་ད་རིང་བདུད་ལས་རྒྱལ་བའི་ཕྱིར། །སྲིད་གསུམ་ཀུན་གྱི་གཏི་མུག་མཐར་མཛོད་ཅིག །འཇིག་རྟེན་མ་ལུས་ཐུགས་ཀྱི་མགྲོན་པོས་ནས། །སྟོང་པ་ཉིད་དུ་མ་བཞུགས་རྗེ་བཙུན་བཞེངས། །འཇིག་རྟེན་བསོད་ནམས་བྱ་བའི་ཆེད་དུ་ནི། །སྟོང་པ་ཉིད་དུ་མ་བཞུགས་རྗེ་བཙུན་བཞེངས། །བྱང་ཆུབ་དངོས་ལ་འཇིག་རྟེན་མགྲོན་པོས་ན། །ཅིས་ན་བསམ་པ་མི་མངའ་རྗེ་བཙུན་བཞེངས། །དེ་མ་ཐག་ཏུ་ཙ་རྩི་ཀཱ་ལ་སོགས་པ་སྒོ་ང་ལ་ཞུགས་ཤིང་ཞུགས་མ་ཐག་ཏུ། སྒོ་ང་ཡོངས་སུ་གྱུར་པ་ལས། གཤིན་རྗེའི་དགྲ་མ་ཧེའི་སྟེང་ནས་སྣ་ཚོགས་པདྨ་ཉི་མ་ལ་གཡས་བརྐྱང་བས་གནས་པ། ཞལ་གསུམ་ཕྱག་དྲུག་པ། རྩ་བའི་ཞལ་དང་སྐུ་མདོག་མཐིང་ནག །ཞལ་གཡས་དང་གཡོན་དཀར་བ་དང་དམར་བ། ཕྱག་རྣམས་རྡོ་རྗེ་སེམས་དཔའི་མཚན་དང་ལྡན་པ། རུས་པའི་རྒྱན་གྱིས་སྤྲས་པ། འོད་ཟེར་མཐིང་གའི་ཕྲེང་བ་འཁྲུགས་པ། སྨིན་མ་འབར་ཞིང་ཁྲོ་གཉེར་གཙིགས་པ། ཕྱག་དང་ཞབས་ཀྱི་སེན་མོ་རྣོ་བ། གསུས་པ་ཆེ་བ། མིའུ་ཐུང་གི་གཟུགས་ཅན། སྐྲ་ཁམ་པ་གྱེན་དུ་བརྫེས་པ། ཀླུ་ཆེན་པོ་མཐོང་བའི་དུག་ཆེན་ཕུཿ་ཞེས་ཟེར་བ་རྣམས་ཀྱིས་ཡན་ལག་རྣམ་པར་བརྒྱན་པ། འདི་ལྟར་བདག་ཉིད་རྣམ་པར་བསམས་པའི་འོག་ཏུ་བདག་ཉིད་ལ་ཆུའི་ནང་གི་ཟླ་བ་ལྟར་བསྐྱོད་པས། ཨོཾ་དྷརྨ་དྷཱ་ཏུ་སྭ་ཝ་ཨཱཏྨ་ཀོ྅ཧཾ། ཞེས་བཟླས་པར་བྱའོ། །འདི་ནི་དཔལ་གཤིན་རྗེའི་དགྲ་སྒོ་ང་ལས་བྱུང་བའི་སྒྲུབ་པའི་ཐབས་སོ། །དེ་ནས་རང་གི་ས་བོན་ལས་བྱུང་བའི་འོད་ཟེར་གྱིས་སངས་རྒྱས་ཐམས་ཅད་སྤྱན་དྲངས་ཏེ། རང་གི་ཁ་ནས་ཞུགས་པ་དང༌། རྡོ་རྗེའི་ལམ་ནས་སོང་སྟེ། ཤེས་རབ་མའི་པདྨར་གནས་པའི་གོང་བུ་ལས། ཞེས་སྡང་རྡོ་རྗེ་དང༌། གཏི་མུག་རྡོ་རྗེ་དང༌། སེར་སྣ་རྡོ་རྗེ་དང༌། འདོད་ཆགས་རྡོ་རྗེ་དང༌། ཕྲག་དོག་རྡོ་རྗེ་རྣམས་ཡ་དང་ཀྵེ་དང་མ་དང་མེ་དང་ད་རྣམས་ཀྱི་ས་བོན་ལས་སྤྲོ་ཞིང༌། དེ་བཞིན་དུ་གོང་བུ་ལས་བྱུང་བའི་ས་བོན་ཡ་དང་ཙ་དང་ནི་དང་རཱ་དང་ཛ་དང་ས་དང༌། དོ་དང་རུ་རྣམས་ལས་ཐོ་བ་དང༌། བེ་ཅོན་དང༌། པདྨ་དང༌། རལ་གྲི་དང་ཙ་རྩི་ཀཱ་དང༌། ཕག་མོ་དང༌།


DTG047_Page_0120
[མ་དཔེ་གཟིགས་ན་འདིར་གནོན།]

དབྱངས་ཅན་མ་དང༌། མཛོད་ལྡན་མ་རྣམས་དབྱུང་བར་བྱའོ། །ཡང་གོང་བུ་ལས་བྱུང་བའི་ས་བོན། ན་དང་ཡོ་དང་ནི་དང་རཱ་རྣམས་ལས་གྲྭ་བཞིར་ཐོད་པ་བཞི་དབྱུང་བར་བྱའོ། །དེ་ནི་འདི་ལྟར་ས་བོན་ལས་རང་རང་གི་སྟན་གྱི་སྟེང་དུ་རང་རང་གི་རྩ་བའི་མཚན་མ་དེས་མཚན་པ་དབྱུང་ཞིང་དེ་ཡོངས་སུ་གྱུར་པ་ལས་རང་རང་གི་ལུས་སུ་གནས་པའོ། །དེ་ནས་རིམ་པ་བཞིན་དུ། ཨོཾ་ཧྲཱིཿ་ཥྚྲྀཿ་ཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཨོཾ་ཛིན་ཛིཀ །ཨོཾ་རཏྣ་དྷྲྀཀ །ཨོཾ་ཨཱ་རོ་ལྀཀ །ཨོཾ་པྲ་ཛྙཱ་དྷྲྀཀ །ཨོཾ་མུངྒའི་ར་དྷྲྀཀ །ཨོཾ་དཎྜ་དྷྲྀཀ །ཨོཾ་པདྨ་དྷྲྀཀ །ཨོཾ་དྭེ་ཥ་ར་ཏི། ཨོཾ་མོ་ཧ་ར་ཏི། ཨོཾ་རཱ་ག་ར་ཏི། ཨོཾ་བཛྲ་རཱ་ཏི། ཨོཾ་ཨཱཿ་ཧཱུཾ་ཞེས་པའི་སྔགས་རྣམས་ཀྱིས་སྔར་བཤད་པའི་ལྷ་རྣམས་དང༌། ཐོད་པ་བཞི་སྤྲོས་ཏེ། འགྲོ་བའི་དོན་བྱས་ནས། རང་རེའི་སྟན་ལ་ས་བོན་ལས་བྱུང་བའི་ལུས་རྣམས་ལ་ཞུགས་པར་བལྟའོ། །ད་ནི་དེ་དག་གི་གནས་དང་སྟན་དང༌། ཁ་དོག་དང༌། ལག་ཆ་རྣམས་བཤད་པར་བྱ་སྟེ། དབུས་སུ་ནི་ཉི་མ་ལ་ཞེ་སྡང་རྡོ་རྗེ་སྔར་བཤད་པའི་མདོག་དང་ལག་ཆའོ། །སྣ་ཚོགས་རྡོ་རྗེའི་ཤར་ཕྱོགས་སུ་ནི་གཏི་མུག་རྡོ་རྗེ་ཟླ་བ་ལ་གནས་པ་དཀར་པོ། ཞལ་གསུམ་ཕྱག་དྲུག་པ། གཡས་ན་འཁོར་ལོ་དང༌། རལ་གྲི་དང༌། གཡོན་ན་རིན་པོ་ཆེ་དང་པདྨ་ཅན་ནོ། །སྣ་ཚོགས་རྡོ་རྗེའི་ལྷོའི་ཆ་ལ་ནི། ཉི་མ་ལ་གནས་པའི་སེར་སྣ་རྡོ་རྗེ་གསེར་བཙོ་མ་ལྟ་བུ། ཞལ་གསུམ་ཕྱག་དྲུག་པ། གཡས་ན་རིན་པོ་ཆེ་དང་རལ་གྲི་ཅན། གཡོན་དག་ན་འཁོར་ལོ་དང་ཆུ་སྐྱེས་འཛིན་པའོ། །སྣ་ཚོགས་རྡོ་རྗེའི་ནུབ་ཏུ་ཉི་མལ་འདོད་ཆགས་རྡོ་རྗེ་མདོག་དམར་བ། ཞལ་གསུམ་ཕྱག་དྲུག་པ། གཡས་དག་ན་པདྨ་དང་རལ་གྲི་ཅན། གཡོན་དག་གིས་ནོར་བུ་དང་འཁོར་ལོ་ཐོགས་པའོ། །སྣ་ཚོགས་རྡོ་རྗེའི་བྱང་ཕྱོགས་སུ་ཉི་མ་ལ་གནས་པའི་ཕྲག་དོག་རྡོ་རྗེ་སྐུ་མདོག་ལྗང་གུ། ཞལ་གསུམ་ཕྱག་དྲུག་པ། གཡས་དག་ན་རལ་གྲི་དང་འཁོར་ལོ་འཛིན་པ། གཡོན་དག་ན་ནོར་བུ་དང་པདྨ་འཛིན་པའོ། །འདི་རྣམས་ནི་རྩ་བའི་ཞལ་སྐུ་དང་འདྲ་བ། ཞལ་ལྷག་མ་དག་འཆད་པར་བྱེད་པ་ལྟ་བུ། ཕྱག་དང་པོ་གཉིས་ཐོད་པ་གྲི་གུག་དང་བཅས་པ། རང་དང་འདྲ་བའི་ཤེས་རབ་མ་ལ་འཁྱུད་པ་འདུག་སྟངས་དང༌། རྒྱན་ཐམས་ཅད་ཞེ་


DTG047_Page_0121
[མ་དཔེ་གཟིགས་ན་འདིར་གནོན།]

སྡང་རྡོ་རྗེ་དང་འདྲ་བ། སྣ་ཚོགས་པདྨ་ལ་བརྟེན་པའོ། །ཤར་གྱི་སྒོར་རྡོ་རྗེ་ཐོ་བ་མདོག་དཀར་བ། གཡས་དག་ན་ཐོ་བ་དང་རལ་གྲི། །གཡོན་དག་ན་ནོར་བུ་དང་པདྨའོ། །ལྷོར་རྡོ་རྗེ་བེ་ཅོན་མདོག་སེར་པོ། གཡས་དག་ན་བེ་ཅོན་དང་རལ་གྲི། གཡོན་དག་ན་པདྨ་དང་འཁོར་ལོ་འཛིན་པའོ། །ནུབ་ཏུ་རྡོ་རྗེ་པདྨ་མདོག་དམར་བ། གཡས་དག་ན་པདྨ་དང་རལ་གྲི་།གཡོན་དག་ན་ནོར་བུ་དང་འཁོར་ལོ་ཅན་ནོ། །བྱང་གི་སྒོར་རྡོ་རྗེ་རལ་གྲི་མདོག་ལྗང་གུ། གཡས་དག་ན་རལ་གྲི་དང་འཁོར་ལོ་ཅན། གཡོན་དག་ན་ནོར་བུ་དང་པདྨ་ཅན་ནོ། །འདི་རྣམས་ནི་སྣ་ཚོགས་པདྨའི་ཉི་མ་ལ་བཞུགས་པ། ཞལ་རྣམས་འཆད་པར་བྱེད་པ་ལས་རྩ་བའི་ཞལ་རང་རང་གི་སྐུ་དང་འདྲ་བ། དང་པོའི་ཕྱག་ན་གྲི་གུག་དང་ཐོད་པ་འཛིན་པས། རང་དང་འདྲ་བའི་ཤེས་རབ་མ་ལ་འཁྱུད་པ། ཤིན་ཏུ་འཇིགས་པར་བྱེད་པའི་གཟུགས་ཅན་ནོ། །དེ་བཞིན་དུ་སྣ་ཚོགས་རྡོ་རྗེའི་ཤར་ལྷོའི་མཚམས་སུ་རྡོ་རྗེ་ཙ་རྩི་ཀཱ་ཤ་ཆུང་བ་མདོག་དཀར་བ། གཡས་དག་ན་འཁོར་ལོ་དང་རལ་གྲི་དང༌། གཡོན་དག་ན་རིན་པོ་ཆེ་དང་པདྨ་འཛིན་པའོ། །ལྷོ་ནུབ་ཏུ་རྡོ་རྗེ་ཕག་མོ་མདོག་སེར་བ། གཡས་ན་རིན་པོ་ཆེ་དང་རལ་གྲི་འཛིན་པ། གཡོན་དག་ན་འཁོར་ལོ་དང་པདྨ་འཛིན་པའོ། །ནུབ་བྱང་དུ་རྡོ་རྗེ་དབྱངས་ཅན་མ་མདོག་དམར་མོ་གཡས་དག་ན་པདྨ་དང་རལ་གྲི་ཅན། གཡོན་དག་ན་ནོར་བུ་དང་འཁོར་ལོ་འཛིན་པའོ། །བྱང་ཤར་དུ་རྡོ་རྗེ་མཛོད་ལྡན་མ་མདོག་ལྗང་གུ་གཡས་དག་ན་རལ་གྲི་དང་འཁོར་ལོ་ཅན། གཡོན་དག་ན་ནོར་བུ་དང་པདྨ་འཛིན་པའོ། །འདི་རྣམས་ནི་ཤིན་ཏུ་གཏུམ་པའི་གཟུགས་ཅན་མ་སྣ་ཚོགས་པདྨའི་ཟླ་བ་ལ་གནས་ཤིང༌། དང་པོའི་ཕྱག་དག་གིས་གྲི་གུག་དང་ཐོད་པ་འཛིན་ཅིང༌། རང་དང་འདྲ་བའི་ཐབས་རྣམས་ལ་འཁྱུད་པ། གཡོན་བརྐྱང་བས་གནས་པ། ཞལ་གསུམ་པ་ལ་གང་གི་རྩ་བའི་ཞལ་སྔོ་བ་ནི་གཡས་པ་དཀར་བའོ། །གཡོན་པ་དམར་བའོ། །ཡང་གང་གི་རྩ་བའི་ཞལ་དཀར་བ་དེའི་ཞལ་གཡས་སྔོ་བའོ། །གཡོན་པ་དམར་བའོ། །གང་གི་རྩ་བའི་ཞལ་སེར་བ་དེའི་ནི། གཡས་དང་གཡོན་སྔོ་བ་དང་དཀར་བ་སྟེ། ལྗང་གུ་དང་དམར་བ་ཡང་དེ་བཞིན་ནོ། །གྲྭ་བཞིན་གནས་པའི་མིའི་ཐོད་པ་རྣམས་ནི་ཁ་དོག་དཀར་པོ་


DTG047_Page_0122
[མ་དཔེ་གཟིགས་ན་འདིར་གནོན།]

བཅུད་ཀྱིས་བཀང་བའི་པདྨ་སྣ་ཚོགས་པའི་དབུས་སུ་གནས་པའོ། །དེ་ནས་ཡེ་ཤེས་ཀྱི་འཁོར་ལོ་དམ་ཚིག་གི་འཁོར་ལོ་ལ་བསྟིམས་ཏེ། ཐམས་ཅད་ཀྱི་མིག་ལ་སོགས་པ་བྱིན་གྱིས་བརླབས་ལ་དེ་བཞིན་དུ་ཐམས་ཅད་ཀྱི་སྐུ་དང་གསུང་དང་ཐུགས་བྱིན་གྱིས་བརླབས་ནས་ཆོ་ག་ཇི་ལྟ་བས་དབང་བསྐུར་ཏེ། རྗེས་སུ་མཐུན་པར་སྤྱི་བོ་ལ་རྒྱས་གདབ་པར་བྱའོ། །དེ་ནས་མན་ངག་ཇི་ལྟ་བས་མཆོད་པ་དང༌། བསྟོད་པ་དང༌། བདུད་རྩི་མྱང་བའི་བར་དུ་བྱའོ། །དེ་ནས་རང་གི་སྙིང་གའི་ཡེ་ཤེས་སེམས་དཔའི་ཐུགས་ཀར་པདྨ་ལ་གནས་པའི་རྡོ་རྗེ་རྩེ་མོ་ལྔ་པ་གྱེན་དུ་འགྲེང་བ་ཟླ་བ་ལ་གནས་པའོ། །དེའི་ལྟེ་བ་ལ་ཟླ་བའི་དཀྱིལ་འཁོར་རོ། །དེ་ལ་དབུས་སུ་ཡཾ་སྔོན་པོ་ཉིད་དེ། ཨོཾ་ཧྲཱིཿ་ཥྚྲྀཿ་ཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཞེས་པས་བསྐོར་བ་ཡི་གེ་ཤིན་ཏུ་ཕྲ་བས་གནས་པར་བལྟས་ལ། དེ་ལས་བྱུང་བའི་གཤིན་རྗེའི་དགྲ་དབུགས་ལ་ཞོན་པས་འགྲོ་ཞིང་དེ་དང་ལྷན་ཅིག་འཇུག་པ་གསལ་བར་སྤྲོ་བར་བྱའོ། །གང་གི་ཚེ་སྐྱོ་བ་ན། རུས་པའི་རང་བཞིན་གྱི་ཕྲེང་བ་བདུད་རྩི་བཅུས་ལེགས་པར་བྱུགས་པ་བླངས་ལ། རིལ་བུ་རེ་རེ་ཞིང་ཡི་གེ་མེ་ཡོངས་སུ་འགྱུར་བའི་འདོད་ཆགས་གཤིན་རྗེའི་དགྲའི་གཟུགས་སུ་རྣམ་པར་བསམ་པའམ། མིའི་མགོ་བོ་འཕྲལ་དུ་བཅད་པ་ཁྲག་འཛག་པས་ཁྱབ་པར་བསམས་ཏེ། གཡས་པའི་མཐེ་བོ་དང་སྲིན་ལག་གིས་བཟུང་ལ། ཁྲོ་བོའི་བརྗོད་པ་ཁོ་ནས་གསང་སྔགས་བཟླས་པ་བྱའོ། །འདི་ལ་གང་གི་ཚེ་རིམ་གྱིས་ཟློས་པ་དེའི་ཚེ། ས་བོན་ཡཾ་ལས་ཞེ་སྡང་གཤིན་རྗེའི་དགྲ་ལ་སོགས་པ་རེ་རེ་ལྷ་མོ་དང་བཅས་པར་སྤྲོ་བ་དང༌། གསང་སྔགས་རེ་རེའི་ཡོངས་སུ་རྫོགས་པར་བྱའོ། །འོན་ཏེ་ཅིག་ཅར་དུ་ནི་ས་བོན་ཡཾ་ལས་ཀྱང་ཞེ་སྡང་གཤིན་རྗེའི་དགྲ་ནས། ཇི་སྲིད་མཛོད་ལྡན་མ་གཤིན་རྗེའི་དགྲའི་བར་དུ་དུས་གཅིག་ཏུ་སྤྲོ་ཞིང༌། སྔགས་ཀྱང་རེ་རེ་ཡོངས་སུ་རྫོགས་པར་བྱ་སྟེ། ཅིག་ཅར་པའི་ཕྱོགས་ལ་སྐུ་རྡོ་རྗེ་ལ་སོགས་པ་ཡང་ཡེ་ཤེས་སེམས་དཔའི་ས་བོན་དང་ལྷན་ཅིག་སྤྲོ་བའོ། །འདིར་ཡང་ཐོགས་པ་དང༌། ཤིན་ཏུ་མྱུར་བ་དང་ཤིན་ཏུ་གསལ་བ་དང༌། མི་གསལ་བ་དང༌། ཡང་དག་པ་མ་ཡིན་པའི་རྣམ་པར་རྟོག་པ་སྤངས་པའི་སྔགས་པས་ནི་གྲངས་འབུམ་གྱི་ཕྲ་མོའི་དངོས་གྲུབ་ཏུ་འགྱུར་


DTG047_Page_0123
[མ་དཔེ་གཟིགས་ན་འདིར་གནོན།]

རོ། །བྱེ་བས་ནི་མཁའ་ལ་སྤྱོད་པའི་དབང་པོ་ཕྱག་རྒྱ་ཆེན་པོར་གནས་པའོ། །དེ་ནས་བཟླས་པས་ཡིད་སྐྱོ་བ་ན། །ཡེ་ཤེས་འཁོར་ལོ་མདུན་ན་བཞུགས་པ་ལེགས་པར་མཆོད་དེ། བསྟོད་ཅིང་བདུད་རྩི་བཅུ་ཕུལ་ལ། ཨོཾ་ཨཱཿ་ཧཱུཾ་མུཿ་ཞེས་པས་གཤེགས་སུ་གསོལ་བར་བྱའོ། །ཡང་དམ་ཚིག་འཁོར་ལོ་བདག་ཉིད་ཀྱི་ཡཾ་གི་ས་བོན་གྱི་ནང་དུ་བཅུག་ལ། བདག་ཉིད་ཞེ་སྡང་གཤིན་རྗེའི་དགྲའི་ངར་འཛིན་པ་དང་གནས་པར་བྱའོ། །ཐུན་མཚམས་བཞི་པོ་ཐམས་ཅད་དུ་འདི་ལྟར་སྒྲུབ་པ་འདི་ནི། དཔལ་གཤིན་རྗེ་དགྲའི་ལས་རབ་ཏུ་སྒྲུབ་པ། ལས་དང་པོ་པའི་རྣལ་འབྱོར་པའི་བྱ་བའོ། །གཞན་ཡེ་ཤེས་ཅུང་ཟད་བབས་པ་དང༌། ཡེ་ཤེས་ལ་དབང་ཐོབ་པ་དང༌། ཡེ་ཤེས་ལ་ཡང་དག་པར་དབང་ཐོབ་པ་རྣམས་ཀྱིས་བསྒྲུབ་པར་བྱ་བ་ནི་ལེའུ་བཅུ་བདུན་པའི་རྣམ་པར་བཤད་པ་རྒྱ་ཆེར་འགྲེལ་པ་འདིར་ཡང་མ་སྨྲས་སོ། །དེ་བཞིན་དུ་བདུད་རྩི་མྱང་བ་དང༌། གཏོར་མ་སྦྱིན་པ་དག་ཀྱང༌། བདག་གིས་ལེའུ་གསུམ་པ་དང་དྲུག་པའི་རྣམ་པར་བཤད་པའི་སྐབས་སུ་གསལ་བར་བྱས་པ་ཁོ་ནས་ཤེས་སོ། །ཕྱོགས་དབང་ཟླ་བ་ཞེས་གྲགས་པ། །དཔལ་ལྡན་ཆོས་སྐྱོང་དེ་ཡི་བཀས། །གཤིན་རྗེའི་དགྲ་གང་ནག་པོ་ཡི། །སྒྲུབ་ཐབས་ཆོ་ག་རྣམས་གསལ་བ། །ཟླ་བའི་ཟེར་གྱིས་རེག་པ་ཡིས། །ཀུ་མུད་རབ་ཏུ་རྒྱས་འདྲ་བ། །འདི་ནི་རྣམ་སྦྱར་དགེ་གང་དེས། །འགྲོ་རྣམས་འཆི་བདག་ལས་རྒྱལ་གྱུར། །གཤིན་རྗེའི་དགྲ་ནག་པོའི་སྒྲུབ་པའི་ཐབས། །ཀུ་མུ་ད་ཁ་བྱེ་བ་ཞེས་བྱ་བ། སློབ་དཔོན་རིན་ཆེན་འབྱུང་གནས་ཞི་བའི་ཞལ་སྔ་ནས་ཀྱིས་མཛད་པ་རྫོགས་སོ།། །།ཨཱ་ཙཱཪྻ་བི་ན་ཙནྡྲ་དང༌། ལོ་ཙཱ་བ་དགེ་སློང་ཆོས་ཀྱི་ཤེས་རབ་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།།

གཤིན་རྗེ་གཤེད་ནག་པོའི་སྒྲུབ་ཐབས་ཞེས་བྱ་བ།


DTG047_Page_0123
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། ཤྲཱི་ཀྲྀཥྞ་ཡ་མཱ་རི་སཱ་དྷ་ནཾ་ནཱ་མ། བོད་སྐད་དུ། དཔལ་གཤིན་རྗེ་གཤེད་ནག་པོ་སྒྲུབ་པའི་ཐབས་ཞེས་བྱ་བ། དཔལ་གཤིན་རྗེ་གཤེད་ལ་ཕྱག་འཚལ་ལོ། །གུས་པ་ཡིས་ནི་བླ་མ་ཡི། །ཞབས་ཀྱི་པདྨར་ཕྱག་འཚལ་ཏེ། །བླ་མའི་ཞལ་སྔའི་བཀའ་དྲིན་གྱིས། །ནག་པོ་ཞལ་གསུམ་ཕྱག་དྲུག་པའི། །མདོར་བསྡུས་པ་ཡི་སྒྲུབ་ཐབས་བཤད། །དང་པོར་རྣལ་འབྱོར་དབང་ཕྱུག་གིས། །དབེན་


DTG047_Page_0124
[མ་དཔེ་གཟིགས་ན་འདིར་གནོན།]

པའི་གནས་སུ་འདུག་ནས་ནི། །སྟོང་པའི་སེམས་ལ་མཉམ་གཞག་སྟེ། །སྙིང་ག་པདྨ་འདབ་བརྒྱད་བསམ། །དེ་སྟེང་ཉི་མའི་དཀྱིལ་འཁོར་རོ། །དེ་ཡི་སྟེང་དུ་ཧཱུཾ་བསམས་ཏེ། །ཧཱུཾ་ལས་འོད་བྱུང་མདུན་དུ་ནི། །བླ་མ་མཁའ་འགྲོ་བཞུགས་པར་བསམ། །ཕྱག་འཚལ་བ་དང་མཆོད་བྱས་ལ། །སྡིག་བཤགས་ལ་སོགས་ཚོགས་བཅུ་བསག །དེ་ནས་སྙིང་གའི་ཧཱུཾ་ལས་ནི། །འོད་བྱུང་ལུས་ངག་བག་ཆགས་རྣམས། །བསྲེགས་ནས་སྟོང་པ་ཉིད་དུ་བསྒོམ། །དེ་ནི་ཡེ་ཤེས་ཚོགས་ཡིན་ནོ། །སེམས་ནི་ཧཱུཾ་གི་རྣམ་པར་བསམ། །ཧཱུཾ་ལས་རྡོ་རྗེ་རྩེ་ལྔར་གྱུར། །རྡོ་རྗེ་ལས་ནི་སྐུར་བསྐྱེད་དོ། །ཞལ་གསུམ་ཕྱག་དྲུག་སྐུ་མདོག་ནག །གཡས་དཀར་གཡོན་དམར་དབུས་མཐིང་ཞལ། །སྤྱན་གསུམ་མཆེ་བ་གཙིགས་པའི་ཞལ། །དབུ་སྐྲ་ཁམ་ནག་གྱེན་དུ་བརྫེས། །རྡོ་རྗེ་རལ་གྲི་གྲི་གུག་གསུམ། །གཡས་པ་ཡི་ནི་ཕྱག་ན་བསྣམས། །འཁོར་ལོ་པདྨ་ཐོད་པ་གསུམ། །གཡོན་གྱི་ཕྱག་ན་བསྣམས་པ་ཡི། །གཡས་བསྐུམ་གཡོན་བརྐྱང་གསུས་པོ་ཆེ། །ལྷ་མོ་ཕག་མོས་མགུལ་ནས་འཁྱུད། །ཕག་མོ་ཞལ་གཅིག་ཕྱག་གཉིས་མ། །གཡས་པ་གྲི་གུག་བནྡྷ་གཡོན། །གཙོ་བོའི་སྐུ་ལ་འཁྱུད་པའི་ཚུལ། །གཉིས་སུ་མེད་པའི་གནས་སུ་བཞུགས། །མིག་དང་ལུས་སོགས་དབང་པོ་དྲུག །སངས་རྒྱས་དྲུག་ཀྱང་ཡོད་པར་བསམ། །སྐུ་གསུང་ཐུགས་ཀྱང་བྱིན་གྱིས་བརླབ། །སྙིང་གའི་ཧཱུཾ་ལས་འོད་བྱུང་བས། །ཡེ་ཤེས་མཁའ་འགྲོ་སྤྱན་དྲངས་ལ། །ཚིག་གི་དབང་ཡང་བླང་བར་བྱ། །བཅོམ་ལྡན་དེ་བཞིན་གཤེགས་པ་ཀུན། །བཅོམ་ལྡན་མངའ་བདག་ཆེན་པོ་རྣམས། །ཁྱེད་ཀྱིས་བདག་ལ་དབང་བསྐུར་སྩོལ། །དེ་སྐད་བདག་གིས་དབང་བླངས་པས། །ཡེ་ཤེས་བདུད་རྩིའི་ཆུ་རྒྱུན་གྱིས། །བདག་གི་སྤྱི་བོར་དབང་བསྐུར་བར། །རིགས་ལྔ་ཅོད་པན་གྱུར་བར་བསམ། །མཆོད་དང་བསྟོད་དང་བདུད་རྩི་བཟའ། །རྡོ་རྗེའི་བཟླས་པ་བྱ་བ་སྟེ། །བཟླས་པའི་སྔགས་ནི་འདི་ཡིན་ནོ། །ཨོཾ་ཧྲཱིཿ་ཥྚྲྀཿ་ཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་སྭཱ་ཧཱ། །ཐམས་ཅད་གྲུབ་པའི་དོན་དུ་བཟླས། །གཏོར་མའི་སྔགས་ནི་འདི་ཡིན་ནོ། །ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ་ཨཱ་དྱ་ནུ་ཏ་པནྣ་ཏྭཱ་ཏ་ཨོཾ་ཨཱཿ་ཧཱུཾ་ཕཊ་སྭཱ་ཧཱ། བར་ཆད་ཐམས་ཅད་བསྲུང་བའི་ཕྱིར། །དེས་ནི་གཏོར་མ་སྦྱིན་པར་བྱ། །དེས་ནི་


DTG047_Page_0125
[མ་དཔེ་གཟིགས་ན་འདིར་གནོན།]

བསྐྱེད་པའི་རིམ་པའོ། །དེ་ནས་རྣལ་འབྱོར་ངལ་བསོ་བྱ། །སྙིང་གའི་ཧཱུཾ་གི་འོད་ཟེར་གྱིས། །ཁམས་གསུམ་མ་ལུས་ཀུན་ལ་ཁྱབ། །ཀུན་ཀྱང་སངས་རྒྱས་སྐུ་རུ་གྱུར། །གྱུར་པ་ཀུན་ཀྱང་བདག་ལ་བསྡུ། །བདག་ཀྱང་ཧཱུཾ་ལ་བསྡུ་བྱས་ལ། །ཧཱུཾ་ཡང་ཐིག་ལེར་གྱུར་པར་བསྒོམ། །ལྷག་མའི་རྟོག་པ་སྤངས་པ་སྟེ། །ཡང་དག་བདེ་བའི་རྣམ་པའོ། །ཕྱག་མེད་ཞལ་མེད་ཁ་དོག་མེད། །མཆོག་ཏུ་དགའ་བའི་མཚན་ཉིད་དོ། །འདི་བྱས་བསོད་ནམས་གང་ཐོབ་དེས། །སེམས་ཅན་ཐམས་ཅད་སངས་རྒྱས་ཤོག །ནག་པོ་ཞལ་གསུམ་ཕྱག་དྲུག་པའི་མདོར་བསྡུས་པའི་སྒྲུབ་ཐབས་རྫོགས་སོ།།

ཁྲོ་བོའི་རྒྱལ་པོ་གཤིན་རྗེའི་གཤེད་ནག་པོ་དུས་མཐར་ཕྱིན་པའི་སྒྲུབ་ཐབས།
ཤྲཱི་པཎྜི་ཏ།


DTG047_Page_0125
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། ཀྲྀཥྞ་ཡ་མཱ་རི་ཀྲོ་དྷ་རཱ་ཛ་བ་ཏྲ་ས་ར་སཱ་དྷ་ནཾ་ནཱ་མ། བོད་སྐད་དུ། ཁྲོ་བོའི་རྒྱལ་པོ་གཤིན་རྗེའི་གཤེད་ནག་པོ་དུས་མཐར་ཕྱིན་པའི་སྒྲུབ་ཐབས་ཞེས་བྱ་བ། བཅོམ་ལྡན་འདས་གཤིན་རྗེ་གཤེད་ལ་ཕྱག་འཚལ་ལོ། །སྤྲོས་བྲལ་ཐུགས་སུ་ཆུད་བདག་འགྲོ་བ་ཀུན་ཁྱབ་པ། །མ་ལུས་བདུད་འཇོམས་ཐོགས་མེད་ཁྲོ་བོ་ཀུན་གྱི་གཙོ། །པདྨ་རྡོ་རྗེ་སྙོམས་འཇུག་ཞི་བདེ་མཛེས་པས་བསྒྱིངས། །ལོངས་སྤྱོད་རྫོགས་སྐུར་བཞེངས་པའི་སྙིང་པོ་ལ་བཏུད་དེ། །སངས་རྒྱས་ཐུགས་ཀྱི་རྒྱུད་རྒྱལ་འབུམ་པ་ཐུ་བོ་ཆེ། །ན་ད་ཀུ་བེ་ར་ལ་ཡབ་ཀྱིས་རྗེས་གདམས་ཤིང༌། །དེ་ཡིས་དེ་ཉིད་བསྡུས་པའི་བྱང་ཆུབ་སེམས་ཆེན་པོའི། །རྣམ་པར་རྒྱལ་བ་གཤེད་རྒྱུད་ལས་བྱུང་བཤད་པར་བྱ། །འགྲོ་ཀུན་སངས་རྒྱས་སྙིང་པོ་སྟེ། །གཙོ་བོ་མི་ཡང་དད་ལྡན་བརྟན། །རལ་གྲི་པདྨ་སྐྱོན་མེད་གནས། །ཅོད་པན་བརྒྱན་པ་མཐོང་བར་བྱ། །མཐའ་ཡང་མི་གནས་གཙོ་བོ་ལ། །དམིགས་དང་པདྨོས་རྗེས་བཟུང་ནས། །རྒྱལ་པོར་དྲན་པ་བྱས་ནས་ཀྱང༌། །ལྷག་པའི་ལྷ་རྣམས་སྤྱན་དྲང་ངོ༌། །རྣམ་དག་བདུན་གྱིས་སྦྱངས་པ་ལ། །ཚངས་པ་བཞི་ཡི་སེམས་གནས་ནས། །འཕྲོག་པ་མེད་པའི་སྙིང་པོ་ཉིད། །ཐོག་མཐའ་མེད་པ་དམིགས་པར་བྱ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཡི་གེ་གསུམ་གྱི་རང་བཞིན་ནི། །བདེ་གསལ་སྟོང་པའི་རང་བཞིན་ཉིད། །ཐོག་མཐའ་མེད་ནས་སེམས་ཅན་ལ། །གནས་ཕྱིར་རིག་པ་ཉམས་མི་བྱ། །ཧཱུཾ་ལས་རེ་ཕ་བྱུང་ནས་སུ། །ཉི་


DTG047_Page_0126
[མ་དཔེ་གཟིགས་ན་འདིར་གནོན།]

དཀྱིལ་རྡོ་རྗེ་འཁོར་ལོ་བསྒོམ། །དེ་རྗེས་ཧཱུཾ་ལས་ཧཱུཾ་བྱུང་སྟེ། །རྡོ་རྗེ་སེམས་དཔའ་ཆོས་འབྱུང་གནས། །སྐུ་གསུང་ཐུགས་ཀྱི་ཕྱག་རྒྱར་ལྡན། །པདྨ་རྡོ་རྗེས་མཚན་བྱས་པའོ། །གོང་མཚུངས་བྷྲཱུཾ་ལས་གཞལ་ཡས་ཁང༌། །ཨོཾ་ལས་རྟག་པ་སྣ་ཚོགས་མཉམ། །གདན་ནི་རྗེས་མཐུན་གནས་པའོ། །ཨ་ལས་མར་ལྡན་ཉི་མ་ཟླ། །མཉམ་པ་ཧཱུཾ་ལས་རྡོ་རྗེ་སྟེ། །སྐུ་ཡི་གཟི་བརྗིད་བསྡུས་ང་རྒྱལ། །རྒྱུད་གཤེད་རྡོ་རྗེ་འཛིན་པ་བསྒོམ། །ཕབ་པའི་སྦྱོར་ལྡན་བྱང་ཆུབ་སེམས། །ཡོངས་འགྱུར་ཐབས་དང་ཤེས་རབ་སྐུ། །ཡིག་འབྲུ་ལྔ་ཡིས་གང་བ་ལས། །འཕྲོས་པའི་ལྷ་མོས་བསྐུལ་ནས་བཞེངས། །ཆོས་ཀུན་བདག་པོས་བསྒོམ་པར་བྱ། །ཨོཾ་དྷརྨ་དྷཱ་ཏུ་སྭ་བྷཱ་ཝ་ཨཱཏྨ་ཀོ྅ཧཾ། ཡ་ལས་སྐྱེས་པའི་གཤིན་རྗེ་གཤེད། །ཨིནྡྲ་ནཱི་ལའི་མདོག་འདྲ་བ། །གཡས་དཀར་གཡོན་དམར་ཕག་མོས་འཁྲིལ། །མ་ཧེ་སེར་སྐྱ་ལ་བསྐུམ་བརྐྱང༌། །གཡས་པ་གྲི་གུག་གཡོན་ཐོད་པ། །རྡོ་རྗེ་རལ་གྲི་འཁོར་ལོ་པད། །ཐོད་པ་ལྔ་ཡིས་དབུ་བརྒྱན་ཅིང༌། །དབུ་སྐྱེས་གྱེན་འགྲེང་བརྒྱད་ཀྱིས་བརྒྱན། །རློན་པ་ཁྲག་འཛག་ལྔ་བཅུ་འཕྱང༌། །མེ་དཔུང་ནང་ན་གནས་པར་བསྒོམ། །རང་མཚུངས་ཡེ་ཤེས་སེམས་དཔའ་ནི། །ཆོ་ག་གསུམ་དང་ལྡན་པས་སོ། །ཡི་གེ་ལྔ་རྫོགས་དེ་བཞིན་གཤེགས། །རིགས་ཀྱི་མདོག་དང་མཚུན་མར་ལྡན། །སྐུ་ནི་མཐོ་གང་ཚད་ཡིན་ཏེ། །ཕྲ་མོ་ལྔ་ནི་ཚོན་གང་ངོ༌། །སྐུ་གསུམ་རབ་ཏུ་ཐོབ་བྱའི་ཕྱིར། །ལུས་ངག་ཡིད་གསུམ་བྱིན་བརླབ་བྱ། །སྤྱི་གཙུག་རྟག་པའི་རྒྱལ་པོ་སྟེ། །མགྲིན་པར་རྡོ་རྗེ་ཉི་མ་བསྒོམ། །སྙིང་གར་མི་བསྐྱོད་རྡོ་རྗེ་འཆང༌། །ཨོཾ་ཨཱཿ་ཧཱུཾ། མིག་ལ་ས་ཡི་སྙིང་པོ་སྟེ། །རྣ་བ་ལ་ནི་རྡོ་རྗེ་འཛིན། །སྣ་ལ་ནམ་མཁའི་སྙིང་པོ་མཆོག །ལྕེ་ལ་འཇིག་རྟེན་དབང་ཕྱུག་མགོན། །སྒྲིབ་པ་རྣམ་སེལ་ལུས་ལ་དགོད། །ཀུན་དུ་བཟང་པོ་ཡིད་ཀྱིའོ། །ཀྵིཾ་ཛིཾ་ཁཾ་གཾ་ཀཾ་སཾ། །ཆོ་ག་གསུམ་དང་ལྡན་པ་ལ། །ཨོཾ་དང་ཧཱུཾ་གིས་སྤེལ་བར་བྱ། །རྡོ་རྗེ་ལྔ་ནི་མཆོད་བྱས་ལ། །གསོལ་བཏབ་དབང་གིས་མི་བསྐྱོད་འགྱུར། །མི་བཟད་རྡོ་རྗེ་འཁོར་ལོ་ཉིད། །མཆོད་བསྟོད་བྱས་ལ་དགུག་གཞུག་བྱ། །ཨོཾ་བཛྲ་ས་ཏྭ་ས་མ་ཡ། ཙཀྲ་མཎྜལ་དྷཱ་ཏུ་ཛཿ་ཧཱུཾ་བ་ཧོཿ་ས་མ་ཡ་སྟྭཾ་ཨ་ཉ་ཧཾ། ཨ་ལ་


DTG047_Page_0127
[མ་དཔེ་གཟིགས་ན་འདིར་གནོན།]

ལ་ལ་ལ་ཧོ། །ཨ་ཨ་ཨ་ཨ། རྡོ་རྗེ་ནམ་མཁའ་བྱིན་རླབས་ལ། །བསྐྱོད་པས་ལྔ་འགྱུར་བྱང་ཆུབ་སེམས། །མཁའ་ཡི་པདྨར་རྫུས་སྐྱེས་ནས། །ས་དགུར་བསྐྱེད་ལ་རབ་རྒྱས་སྐུ། །བ་སྤུའི་བུ་ག་ཆེ་ནས་སྤྲོ། །སངས་རྒྱས་སྤྲིན་ཡང་རྗེས་བསམས་ནས། །རིགས་ཀྱི་དོན་ཡང་བསྒྲུབ་པར་བྱ། །ཨོཾ་བཛྲ་དྷྲྀཀ་ཡ་ཧཱུཾ། ཨོཾ་ཛིན་ཛིཀ་ཀྵེ་ཧཱུཾ། ཨོཾ་རཏྣ་དྷྲྀཀ་མ་ཧཱུཾ། ཨོཾ་ཨཱ་རོ་ལྀཀ་མེ་ཧཱུཾ། ཨོཾ་པྲ་ཛྙཱ་དྷྲྀཀ་ད་ཧཱུཾ། ཤར་དུ་གཏི་མུག་གཤེད་པོ་སྟེ། །ལྷོ་རུ་ང་རྒྱལ་གཤེད་པོའོ། །ནུབ་ཏུ་འདོད་ཆགས་གཤེད་པོ་སྟེ། །བྱང་དུ་ཕྲག་དོག་གཤེད་པོའོ། །ཤར་ལ་འོད་ཟེར་གཞན་རྣོན་པོ། །དཀར་སེར་དམར་ལྗང་རང་འོད་རིག །རིགས་ཀྱི་བདག་པོའི་ཕྱག་རྒྱ་འཛིན། །གཞན་ནི་གོ་རིམས་སྦྱོར་ཤེས་པའོ། །ཎ་ཡོ་ནཱི་ར་འཕྲོས་པ་ལས། །བྱང་ཆུབ་སེམས་ཀྱིས་རབ་རྒྱས་པའི། །རྩ་རྩི་ཀཱ་སོགས་ལྷ་མོ་ཡིས། །མཆོད་པས་རབ་ཏུ་མཉེས་པར་བྱ། །དེ་ནས་རྡོ་རྗེ་དྲིལ་འཆང་བས། །བསྟོད་པ་ཡང་ནི་ཆེད་དུ་བརྗོད། །དམ་ཚིག་བཟང་པོ་བྱིན་བརླབས་ནས། །རྡོ་རྗེ་ཧཱུཾ་གིས་མྱང་བར་བྱ། །སྤྲོ་བ་ཆེན་པོ་འཇིག་རྟེན་ཁམས། །ཐོག་མ་མེད་པས་བསྡུས་བྱས་ནས། །དུ་མར་བརྩོན་འགྲུས་ལྡན་ཡིད་ཀྱིས། །ཡང་དང་ཡང་དུ་གོམས་པར་བྱ། །རྡོ་རྗེ་སྙིང་གའི་དཀྱིལ་འཁོར་ལ། །ཡིད་སྐྱོབ་བཀོད་ནས་བཟླས་པར་བྱ། །ཨོཾ་ཧྲཱིཿ་ཥྚྲྀཿ་ཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ། རིམ་དང་ཅིག་ཅར་སྦྱོར་བ་ཡི། །སེམས་ཅན་དོན་དུ་བཟླས་པར་བྱ། །ཟླ་བའོ་ཅོག་གི་བཅུ་བཞི་ལ། །དྲི་ཆུས་བྱུགས་པའི་དཀྱིལ་འཁོར་ནི། །གྲུ་གསུམ་ལྡན་ཞིང་མེ་ཏོག་སྤྲས། །མཆོད་པ་བཟང་ལྡན་གཏོར་མས་བཀང༌། །མི་རུས་ལྔ་བཅུ་ཐམ་པ་ལ། །ཁྲག་གི་སྤངས་པའི་མགོ་བོར་བསྒོམ། །རི་ལུ་རེ་ལ་བཤེད་ནག་ཕོས། །བརྒྱན་པ་ཁྲི་ཡི་བར་དུ་བཟླས། །མཆོད་པ་རྣམས་ཀྱིས་མཉེས་བྱས་ལ། །གསོལ་བཏབ་གཏོར་མ་དུར་ཁྲོད་སྦྱིན། །ཨོཾ་ཨིནྡྲཱ་ཡ་ཧྲཱིཿ། ཡ་མ་ཡ་ཥྚྲྀཿ། བ་རུ་ཎཱ་ཡ་ཝི། ཀུ་བེ་རཱ་ཡ་ཀྲྀ། ཨཱི་ཤྭཱ་ནཱ་ཡ་ཏ། ཨགྣ་ཡེ་ཨ། ནཻ་རྲྀ་ཏ་ཡེ་ན། བཱ་ཡེ་བེ་ཡ་ན། ཙནྡྲཱ་ཡ་ཧཱུཾ། སཱུཪྻཱ་ཡ་ཧཱུཾ། བྲཧྨ་ཎཱ་ཡ་ཕཊ། བ་སུ་དྷ་རཱ་ཡ་ཕཊ། བེ་མ་ཙི་ཏྲ་ཡ་སྭཱ། སརྦ་བྷུ་ཏེ་བྷྱོ་ཧཱ། ཧི་ཧི་ཧི་ཧི་ཧཱུཾ། ཕེཾ་ཕེཾ་ཕེཾ་ཕེཾ་ཕཊ་སྭཱ་ཧཱ། གད་མོ་ཆེན་མོ་བརྒྱད་བརྒྱད་ནས། །གནང་བ་བྱིན་ནས་གཤེགས་པར་བསམ། །འདི་ནི་བསྙེན་


DTG047_Page_0128
[མ་དཔེ་གཟིགས་ན་འདིར་གནོན།]

པའི་ཆོ་གའོ། །སྲིད་པ་གསུམ་གྱི་འཁོར་ལོ་ནི། །དབང་པོ་སྐྱེ་མཆེད་སྟོང་པ་ཡི། །ལྕགས་ཀྱི་ཁང་པ་བཅུ་བདུན་གྱི། །རྡོ་རྗེ་སྙིང་པོ་དགོད་པར་བྱ། །ཆུ་ཡི་དཀྱིལ་འཁོར་ཤིང་རྟ་དང༌། །ཅེ་སྤྱང་རྒྱུག་པ་ལྟ་བུའོ། །སྦྱོར་ལྡན་མན་ངག་དམ་པ་ནི། །དམ་པའི་ཞལ་ལས་ཤེས་པར་བྱ། །ལས་དང་རྗེས་མཐུན་འཁོར་ནི། གཞན་དུ་རྒྱ་ཆེར་བཤད་པས་ན། །འདིར་ནི་མང་དུ་མ་སྨོས་སོ། །ཡ་མ་རཱ་ཛ་ས་དོ་མེ་ཡ། ཡ་མེ་དོ་རུ་ཎ་ཡོ་ད་ཡ། ཡ་ད་ཡོ་ནི་ར་ཡ་ཀྵེ་ཡ། ཡཀྵེ་ཡཙྪ་ནི་རཱ་མ་ཡ། ཞི་བའི་མཐར་ནི་སྭཱ་ཧཱ། རྒྱས་དང་དབང་ལ་ཨོཾ་དང་ཧོ། །དྲག་པོ་ཕཊ་ཀྱིས་བརྟན་པར་བྱ། །ཕྲིན་ལས་བཞི་ནི་འགྲུབ་པར་འགྱུར། །རྒྱུད་དང་བསྟན་བཅོས་མཁས་པ་བདག་མིན་ཏེ། །དམ་པ་བླ་མའི་ཞབས་ལ་བརྟེན་ནས་ཆོས་འདི་བྱས། །རྒྱུད་ཀྱི་མངོན་རྟོགས་ངེས་པར་བྱིན་པའི་ཡོན་ཏན་དཔལ། །དང་དང་ཤེས་རབ་སྙིང་རྗེར་བཅས་རྣམས་ངེས་སྒྲོལ་ཤོག །བསྙེན་དང་སྒྲུབ་པའི་ཆོ་གའི་རིམ། །ཟབ་མོའི་སྒྲུབ་པ་རྙེད་དཀའ་བ། །ནོར་བུ་ལྟ་བུའི་གཞུང་འདི་ཡིས། །འགྲོ་ཀུན་གཤིན་རྗེ་གཤེད་ནག་ཤོག །ཁྲོ་བོའི་རྒྱལ་པོ་གཤིན་རྗེ་གཤེད་ནག་པོའི་དུས་མཐར་ཕྱིན་པའི་སྒྲུབ་པའི་ཐབས་ཞེས་བྱ་བ་རྫོགས་སོ།། །།རྒྱ་གར་གྱི་མཁན་པོ་ཤྲཱི་པཎྜི་ཏས་མཛད་པའོ། །རྣལ་འབྱོར་པ་བསོད་སྙོམས་པ་པྲ་ཛྙཱ་ཤྲཱི་ཛྙཱ་ན་ཀཱི་རྟི་ས་རང་འགྱུར་དུ་བསྒྱུར་བའོ།།

གཤིན་རྗེ་གཤེད་ནག་པོའི་སྒྲུབ་ཐབས་ཞེས་བྱ་བ།
མར་མེ་མཛད།


DTG047_Page_0128
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། ཀྲྀཥྞ་ཡ་མཱ་རི་སཱ་དྷ་ནཾ་ནཱ་མ། བོད་སྐད་དུ། གཤིན་རྗེ་གཤེད་ནག་པོའི་སྒྲུབ་ཐབས་ཞེས་བྱ་བ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །རྗེ་བཙུན་རྡོ་རྗེ་སེམས་བདག་སྔགས། །འཇིགས་བྱེད་དཔའ་བོ་དགྲ་ནག་ལ། །བཏུད་དེ་བརྒྱུད་རིམ་ལས་རྙེད་པ། །དངོས་གྲུབ་འབྱུང་ཕྱིར་བཤད་པར་བྱ། །རང་གཟུགས་རྫོགས་པའི་སྙིང་ག་རུ། །ཡ་ཡིག་ལས་ནི་འགྲོ་བར་སྦྱང༌། །བདུན་པོ་ཡིས་ཀྱང་སྦྱང་བྱས་ནས། །ཚངས་པའི་གནས་ལ་གཞག་པར་བྱ། །སྟོང་པའི་སྙིང་པོ་གསལ་བར་བསམ། །བསྲུང་བ་པདྨར་ལྡན་པའི་ནང༌། །ཆུ་སྐྱེས་རི་བོང་ཅན་རྣོན་པོ། །བྱང་ཆུབ་རྒྱུ་ཡི་གཤིན་རྗེ་གཤེད། །རྩ་བའི་ཞལ་གྱི་ཁྱད་པར་ཅན། །ཞུ་བའི་ཐིག་ལེ་གྱི་ཡོན་ཏན་བསམ་བྱས་ནས། །བསོད་ནམས་རྒྱ་ཆེར་རབ་ཏུ་བཟློག་པ་བརྒྱད་ཀྱིས་སྐུ་བརྒྱན་ཅིང༌། །རུས་པས་བརྒྱན་ཅིང་དུམ་བུས་དཔལ་གཤིན་རྗེ་བཤེད། །ཨིནྡྲ་ནཱི་ལ་


DTG047_Page_0129
[མ་དཔེ་གཟིགས་ན་འདིར་གནོན།]

ལྟ་བུ་སྟེ། །གཡས་དང་གཡོན་པ་དཀར་དང་དམར། །ཕག་མོ་དེ་མཚུངས་དམ་འཁྱུད་པ། །གྲི་གུག་ཐོད་པ་རྩ་བའི་ཕྱག །རྡོ་རྗེ་བར་དང་ཐ་མ་གྲི། །གཞན་ན་འཁོར་ལོ་པདྨ་འཛིན། །ཐོད་པ་ལྔ་ཡི་དབུ་རྒྱན་ཅན། །སེར་བརྫེས་སྤྱན་དགུ་བཟློག་ཅིང་འགྱུར། །ལྔ་བཅུའི་དོ་ཤལ་མཉམ་དུ་དཔྱངས། །གདུག་པ་བརྒྱད་ཀྱིས་སྐུ་བརྒྱན་ཅིང༌། །རུས་པས་བརྒྱན་ཅིང་དུམ་བུས་སྒེག །མཚོན་ཆ་བཅུ་གཉིས་འཁྲུག་པར་བསམ། །མ་ཧེ་ལ་བཞུགས་སྲིད་རྩེར་འབར། །སྐུ་གསུང་ཐུགས་དང་སྐྱེ་མཆེད་དང༌། །དབང་དང་བྱིན་རླབས་མཆོད་དང་བསྟོད། །བདུད་རྩི་མྱོང་དང་སྤྲོ་བསྡུ་དང༌། །བཟླས་པའི་རིམ་པའི་མན་ངག་ལས། །ཤེས་པས་དངོས་གྲུབ་འགྲུབ་པར་འགྱུར། །ཨོཾ་ཀཱ་ལ་རཱུ་པ་ཧཱུཾ། ཨོཾ་ཡ་མ་རཱ་ཛ། ས་དོ་མེ་ཡ། ཡ་མེ་དོ་རུ། ཎ་ཡོ་ད་ཡ། ཡ་ད་ཡོ་ནི། ར་ཡ་ཀྵེ་ཡ། ཡཀྵེ་ཡཙྪ། ནི་རཱ་མ་ཡ། ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཨོཾ་ཧྲཱིཿ་ཥྚྲིཿ་ཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་སྭཱ་ཧཱ། དྲུག་པས་གཏོར་མ་བསྙེན་པར་བྱ། །སུམ་ཅུ་བརྒྱད་པས་ཉེ་བར་བསྙེན། །བཅོ་ལྔ་པས་ནི་ཐམས་ཅད་བསྒྲུབ། །ལས་ཀྱི་འཁོར་ལོ་བསྐོར་བར་བྱ། །གཤེད་ནག་རྒྱུད་དང་འབྱུང་བ་ལས། །རྙེད་དེ་སྒྲུབ་ཐབས་འདི་བྲིས་པས། །བློ་ནི་རབ་དག་གྱུར་ནས་ཀྱང༌། །གཤིན་རྗེ་གཤེད་དུ་འགྱུར་བར་ཤོག །གཤིན་རྗེ་གཤེད་ནག་པོའི་སྒྲུབ་ཐབས། སློབ་དཔོན་མཁས་པ་ཆེན་པོ་དཔལ་མར་མེ་མཛད་ཀྱིས་མཛད་པ་རྫོགས་སོ།། །།རྣལ་འབྱོར་པ་པྲཛྙཱ་ཤྲཱི་ཛྙཱ་ན་ཀཱིརྟིས་རང་འགྱུར་དུ་མཛད་དོ།།

གཤིན་རྗེ་གཤེད་རྣམ་པར་སྣང་མཛད་ཀྱི་མངོན་པར་རྟོགས་པ་ཞེས་བྱ་བ།
མར་མེ་མཛད།


DTG047_Page_0129
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། བཻ་རོ་ཙ་ན་ཡ་མཱ་རི་ནོ་པི་ཀ་ནཱ་མ། བོད་སྐད་དུ། གཤིན་རྗེ་གཤེད་རྣམ་པར་སྣང་མཛད་ཀྱི་མངོན་པར་རྟོགས་པར་ཞེས་བྱ་བ། རྡོ་རྗེ་སེམས་དཔའ་ལ་ཕྱག་འཚལ་ལོ། །སངས་རྒྱས་རྡོ་རྗེ་རྟག་པའི་དཔལ། །མེ་ལོང་ཡེ་ཤེས་བྱང་ཆུབ་སེམས། །འོད་གསལ་རྡོ་རྗེ་ཀུན་ཞི་བ། །ཏི་མུག་རྡོ་རྗེ་ལ་ཕྱག་འཚལ། །ས་རྣམས་ཕ་རོལ་བགྲོད་པའི་ལམ། །རྟག་པའི་སྒྲུབ་ཐབས་བཤད་པར་བྱ། །དང་པོར་སྔགས་པས་སྙིང་རྗེ་དྲན་པས་རང་ལུས་རྫོགས་པ་དང༌། །སྙིང་གར་ས་བོན་གསལ་བ་ལས་ནི་དམ་པ་རྣམས་བསམས་ནས། །སངས་རྒྱས་ཆོས་དང་དགེ་འདུན་གསུམ་གྱི་ཡོན་ཏན་བསམ་བྱས་ནས། །བསོད་ནམས་རྒྱ་ཆེར་རབ་ཏུ་རྒྱས་པའི་ཚོགས་རབ་


DTG047_Page_0130
[མ་དཔེ་གཟིགས་ན་འདིར་གནོན།]

བསག་པར་བྱ། །བྱམས་དང་སྙིང་རྗེ་དགའ་དང་བཏང་སྙོམས་ལྡན་པས་སྟོང་པ་བསྒོམ། །སྲུང་བའི་འཁོར་ལོ་བྱས་ནས་པདྨ་ཟླ་བ་རྒྱས་པའི་སྟེང༌། །ཀྵེ་ཡིག་གྱུར་བས་ཆོས་ཀྱི་འཁོར་ལོ་དམར་ཞིང་འོད་འཕྲོ་བ། །བསྡུ་བའི་དེ་ཉིད་ལས་ནི་རྟག་པའི་སྐུར་གྱུར་པ་དེ་ཁྲོ་ལ་སྒེག །རྩ་བའི་ཞལ་དང་གཞན་གཉིས་དཀར་སྔོ་དམར་ཞིང་ཕྱག་དྲུག་ཡུམ་དང་བཅས། །གྲི་གུག་འཁོར་ལོ་རལ་གྲི་པདྨ་རིན་ཆེན་ཆུ་སྐྱེས་རབ་ཏུ་འཁྲུགས། །གླང་ཆེན་སྟག་གི་པགས་པས་སྟོད་དང་སྨད་དཀྲིས་མི་མགོ་རློན་འཛག་པ། །ཐོད་པ་དྲུག་ལྡན་སྐྲ་ནི་དམར་སེར་གྱེན་བརྫེས་སྤྲུལ་བརྒྱད་ཡན་ལག་སྤྲས། །མེ་དཀྱིལ་ན་བཞུགས་ཡེ་ཤེས་སེམས་དཔའ་གསལ་ནས་ཡན་ལག་དྲུག་བྱས་ཏེ། །རླུང་དང་མེ་དང་ཐོད་པ་སྣོད་མཆོག་སྒྲོན་མ་བཅུ་ཡིས་ཁ་བཀབ་ནས། །བསྐྱོད་དང་འབར་བས་གླང་པོ་ལ་སོགས་བཅུར་གྱུར་སྦྱོར་བའི་སེམས་བབ་ནས། །ཨོཾ་ཨཱཿ་ཧཱུཾ། བྱིན་རླབས་རྡོ་རྗེའི་སྦུ་གུས་རབ་དྲངས་མཉེས་བྱས་སྤྲོ་བསྡུས་ཐིམ། །རྡོ་རྗེ་རྟག་པ་རིམ་གྱིས་བསྐྱོད་ལ་རབ་ཐིམ་ནས་ནི་ལྷན་ཅིག་སྐྱེས་པའི་དགའ་བ་བསམ། །ཡོད་དང་མེད་པ་ལས་འདས་སྤྲོས་བྲལ་ནམ་མཁའ་ལྟ་བུའི་བྱང་ཆུབ་སེམས་དྲན་ནས། །རྨི་ལམ་སད་པའི་རྣལ་འབྱོར་ཕུང་པོ་ཁམས་རྣམས་ཀུན་སྤངས་དེ་བཞི་ནས་ནི་ལྡང་བ་བརྩམ། །ཁམས་སོགས་བདེ་བ་ཆེན་པོར་མདོག་གྱུར་གཟུགས་བརྙན་ལྟ་བུར་རབ་རྟོགས་འདི་ནི་རྒྱལ་སྲས་བདག །སྙིག་པོ་ཉི་ཟེར་ལྟ་བུར་རྡོ་རྗེའི་བཟླས་པ་འགྲོ་བ་ཀུན་ལ་ཕན་པར་བྱ་ཕྱིར་དབུས་དུ་བཟླས། །རྣལ་འབྱོར་སྒྱུ་མའི་གཟུགས་ཀྱིས་སྟེང་འོག་ལ་སྤྱོད་འཇིག་རྟེན་དོན་འགྱུར་ཐམས་ཅད་གཤིན་རྗེ་གཤེད་ཐོབ་ཤོག །ཨོཾ་ཛིན་ཛིཀ་མོ་ཧ་ར་ཏི། ཧཱུཾ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། གཤིན་རྗེ་གཤེད་པོ་རབ་འཇིགས་པ། གཏུ་མུག་རྡོ་རྗེའི་ངོ་བོ་ཁྱོད། །སྟོན་པ་སངས་རྒྱས་ཀུན་རང་བཞིན། །རྡོ་རྗེ་མི་འཇིགས་ཕྱག་འཚལ་བསྟོད། །སྒྲུབ་ཐབས་སངས་རྒྱས་ལ་འཇུག་པ། །བསྐྱེད་པ་དང་ནི་རྫོགས་པའི་རིམ། །གོང་མའི་གོ་འཕང་སྟོན་པ་པོ། །སྔགས་རྣམས་སྒྲིབ་པ་རོལ་གྱུར་ཅིག །གཤིན་རྗེ་གཤེད་རྣམ་པར་སྣང་མཛད་ཀྱི་མངོན་རྟོགས་ཞེས་བྱ་བ། རྒྱ་གར་གྱི་མཁན་པོ་མཁས་པར་གྲགས་པ། དཔའ་མར་མེ་མཛད་ཀྱིས་མཛད་པ་རྫོགས་སོ།། །།རྣལ་འབྱོར་པ་པྲཛྙཱ་ཤྲཱི་ཛྙཱ་ན་ཀཱི་རྟིས་རང་འགྱུར་དུ་མཛད་པའོ།།

གཤིན་རྗེ་གཤེད་རིན་ཆེན་འབྱུང་ལྡན་གྱི་སྒྲུབ་ཐབས་ཞེས་བྱ་བ།
མར་མེ་མཛད།


DTG047_Page_0131
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། རཏྣ་སཾ་བྷཱ་ཝ་ཡ་མཱ་རི་སཱ་དྷ་ནཾ་ནཱ་མ། བོད་སྐད་དུ། གཤིན་རྗེ་གཤེད་རིན་ཆེན་འབྱུང་ལྡན་གྱི་སྒྲུབ་ཐབས་ཞེས་བྱ་བ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །གཞན་དོན་ཡིད་བཞིན་འབྱུང་གནས་རིན་པོ་ཆེ། །རེ་འདོད་སྐོང་མཛད་རིན་ཆེན་འབྱུང་གནས་རྒྱལ། །ཀུན་རྟོག་བྲལ་བ་མཉམ་པ་ཉིད་ཡེ་ཤེས། །སེར་སྣ་འཇོམས་མཛད་དེ་ལ་ཕྱག་འཚལ་ཏེ། །ང་རྒྱལ་རབ་རྒྱས་སེར་སྣ་དེ་དོན་དུ། །ཕྲ་མ་མཐར་མཛད་རབ་ཏུ་བཤད་པར་བྱ། །བྱང་ཆུབ་སེམས་དང་ཤེས་རབ་ནི། །སྙོམས་འཇུག་དྲན་པའི་སྔགས་པ་ཡིས། །སྐད་ཅིག་ལྷ་ཡི་རྣལ་འབྱོར་པས། །སྤྲོ་དང་བསྡུ་བ་རབ་ཏུ་བྱ། །བླ་མ་རྗེ་དཔལ་མགོན་པོ་དང༌། །སྡུ་གུ་ལྷ་སོགས་རབ་དམིགས་ཏེ། །ཕྱག་འཚལ་ལ་སོགས་ཁྱད་པར་ནི། །མ་ལུས་ལུས་པ་མེད་པར་བྱ། །སངས་རྒྱས་ཀུན་གྱི་ལམ་གྱུར་པའི། །གོ་རིམས་ཚངས་པའི་གནས་རྣམས་བསྒོམ། །རང་བཞིན་སྟོང་པ་རྐྱེན་གྱིས་ཏེ། །ཡེ་ཤེས་ཚོགས་རབ་བསག་པར་བྱ། །མ་ཡིག་ཧཱུཾ་གིས་སྣ་ཚོགས་ལས། །སྲུང་བའི་འཁོར་ལོ་འབར་བའོ། །ཆུ་སྐྱེས་ཐབས་དང་ཤེས་རབ་སྟེ། །མ་ལས་རིན་ཆེན་ཟུར་བརྒྱད་པ། །སྤྲོ་བསྡུའི་ང་རྒྱལ་གསལ་བར་བྱ། །ཨོཾ་རཏྣ་སཾ་བྷཱ་ཝ་ཨཱཏྨ་ཀོ྅ཧོ། དེ་ལས་གྱུར་པའི་རྡོ་རྗེ་ནི། །བཙོ་མ་གསེར་གྱི་མདངས་མངའ་ཞིང༌། །རང་འོད་དང་མཚུངས་རིག་མར་ལྡན། །ཞལ་གསུམ་གཡས་གཡོན་སྔོ་དང་དཀར། །སྤྱན་དགུ་མཆེ་གཙིགས་ཕྱག་དྲུག་པ། །གྲི་གུག་ཐོགས་པ་རྩ་བའི་ཕྱག །རིན་ཆེན་རལ་གྲི་འཁོར་ལོ་པད། །གཡས་དང་གཡོན་ལ་རིམ་གྱིས་སྦྱར། །དབུ་སྐྲ་སེར་བརྫེས་གདུག་པའི་རྒྱན། །ལྔ་བཅུའི་ཕྲེང་དང་དུར་ཁྲོད་སྤྲས། །འོད་ཟེར་རྣོ་དང་མེ་དཔུང་འབར། །མི་ཕྱེད་རབ་ཏུ་འཁྱུད་པའོ། །ས་བོན་རྫོགས་དང་མིག་ལ་སོགས། །ཀྵིཾ་ཛིཾ་ཁཾ་གཾ་ཀཾ་སཾ་ལས། །རྫོགས་པ་དྲུག་ནི་བྱང་ཆུབ་སེམས། །ཨོཾ་ཨཱཿ་ཧཱུཾ་ལས་སྐུ་གསུང་ཐུགས། །འཕྲོས་པས་རིན་དབང་གཤིན་རྗེ་གཤེད། །རབ་གནས་རང་ཛཿ་ཧཱུཾ་བཾ་ཧོཿ། །རྣམ་འཕྲུལ་མཆོད་པ་བྱང་ཆུབ་སེམས། །བསྟོད་པ་རྒྱུད་རྒྱལ་ཇི་སྙེད་བཞིན། །རླུང་མེ་ཐོད་པ་སྒྲོན་མེ་བཅུ། །བྱིན་རླབས་བདུད་རྩི་མྱངས་ནས་ཀྱང༌། །སྤྲོ་བསྡུ་བྱས་ནས་བཟླས་པ་བརྩམ། །ཨོཾ་རཏྣ་དྷྲྀཀ་དྭེ་ཥ་ར་ཏི།


DTG047_Page_0132
[མ་དཔེ་གཟིགས་ན་འདིར་གནོན།]

ཧཱུཾ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། སྟོང་གི་ནུས་པ་ཁྱད་པར་རྙེད། །མཁའ་འགྲོ་མ་ཡང་དེ་དབང་འགྱུར། །ཁྲི་ཡིས་འབྱུང་པོ་ལས་ཀུན་བྱེད། །བྱེ་བས་རྒྱས་དང་བརླག་འགྱུར་ཏེ། །བྱེ་བ་ལྔ་བཟླས་ཚད་དང་བྲལ། །ཤིན་ཏུ་རབ་ཞི་བསྡུས་པ་ནི། །ཆུ་ཡི་སྙིང་པོ་དེ་བཞིན་དུ། །ཆུར་འགྱུར་རང་གི་གདོས་དང་བྲལ། །དངོས་མེད་མཉམ་པར་བསྒོམ་པར་བྱ། །བདག་གིས་རབ་ཕྱེ་ལ་སོགས་མ་བཤད་དང༌། །བྱང་ཆུབ་ལ་མོས་སྒྲུབ་པོ་འགའ་ཙམ་ལས། །ང་རྒྱལ་གཤིན་རྗེ་གཤེད་ཀྱི་སྒྲུབ་པ་བརྩམས། །འདིར་མོས་རྡོ་རྗེའི་ས་ལ་ཐོགས་མེད་ཤོག །གཤིན་རྗེ་གཤེད་རིན་ཆེན་འབྱུང་ལྡན་གྱི་སྒྲུབ་ཐབས་ཞེས་བྱ་བ། སློབ་དཔོན་ཆེན་པོ་དཔལ་མར་མེ་མཛད་ཀྱིས་མཛད་པ་རྫོགས་སོ།། །།རྣལ་འབྱོར་པ་པྲཛྙཱ་ཤྲཱི་ཛྙཱ་ན་ཀཱི་རྟིས་རང་འགྱུར་དུ་མཛད་པའོ།།

འོད་དཔག་ཏུ་མེད་པའི་སྙིང་པོ་འདོད་ཆགས་གཤིན་རྗེ་གཤེད་སྒྲུབ་པའི་ཐབས་ཞེས་བྱ་བ།
མར་མེ་མཛད།


DTG047_Page_0132
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། ཨ་མི་ཏཱ་བྷཱ་ཧྲྀ་ད་ཡ་རཱ་ག་ཡ་མཱ་རི་སཱ་དྷ་ནཾ་ནཱ་མ། བོད་སྐད་དུ། འོད་དཔག་ཏུ་མེད་པའི་སྙིང་པོ་འདོད་ཆགས་གཤིན་རྗེ་གཤེད་སྒྲུབ་པའི་ཐབས་ཞེས་བྱ་བ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །སྐུ་གསུང་ཐུགས་དབྱེར་མེད་པ་ཡི། །འདོད་ཆགས་ཆེ་ལ་ཕྱག་འཚལ་ཏེ། །གང་ཞིག་མངོན་ཞེན་འཇིགས་བྱེད་པ། །འདོད་ཆགས་རྡོ་རྗེའི་སྒྲུབ་ཐབས་བཤད། །དད་ལྡན་ཤེས་རབ་སྙིང་རྗེ་ཡིས། །དོན་བཅས་གཞན་དོན་གཙོར་འཛིན་པས། །སྦྱིན་པ་ལ་སོགས་ལེགས་སྦྱངས་ཏེ། །ཡིད་སྐྱོབ་སྔགས་འདི་བརྩམ་པར་བྱ། །དང་པོར་སྔགས་པས་ཁྲུས་བྱས་ནས། །ནང་ཚངས་ཅན་གྱི་སྟན་བཏིང་ལ། །རང་གི་སྙིང་ཉིད་བསྐུལ་བར་བྱ། །ཕྱག་འཚལ་ལ་སོགས་འདུས་བྱས་དང༌། །ཐེག་ཆེན་ཆོ་ག་བཞི་དག་དང༌། །སྟོང་པའི་རང་བཞིན་དེ་ཉིད་ཀྱིས། །བདག་རྒྱུད་ཡོངས་སུ་དག་པར་བྱ། །བདུད་རྣམས་ཞི་བར་བྱ་ཕྱིར་དང༌། །སངས་རྒྱས་ཞིང་རྣམས་དག་པའི་ཕྱིར། །བསྲུང་དང་ཆུ་སྐྱེས་བསྒོམ་པར་བྱ། །མཚོན་ཆ་རྒྱས་དང་འོད་ཟེར་སྣ། །པཾ་དང་རཾ་ལས་བྱུང་བ་ཡི། །ཉི་མ་ས་བོན་མེ་ཡིག་ལས། །བཅུ་དྲུག་མདའ་བཅས་ལྔ་འོད་ཟེར། །བསྡུས་ནས་བྱིན་གྱིས་བརླབ་པར་བྱ། །ཨོཾ་ཨ་མི་ཏཱ་བྷཱ་ཧྲྀ་ད་ཡ་རཱ་ག་ཡ་མཱ་རི་ཨཱཏྨ་ཀོ྅ཧཾ། གྱུར་པས་རྡོ་རྗེ་སྣང་མཐའ་ཡས། །པདྨ་རཱ་གའི་མདངས་དང་མཉམ། །གཡས་གཡོན་ཞལ་ནི་སྔོ་དང་དཀར། །རང་རིག་ཡུམ་ནི་ཐབས་དང་


DTG047_Page_0133
[མ་དཔེ་གཟིགས་ན་འདིར་གནོན།]

མཚུངས། །སྟོད་སྨད་སྟོབས་འཇིགས་པགས་པ་གཉིས། །གྲི་གུག་ཐོད་པ་རལ་གྲི་དང༌། །འཁོར་ལོ་རིན་ཆེན་ཤིན་ཏུ་འཁྲུག །སྤྲུལ་དང་རུས་པས་རྣམ་བརྒྱན་པ། །དབུ་སྐྲ་མཛེས་ལ་སྤྱན་མིག་འཁྲུག །མཆེ་གཙིགས་འབར་བའི་མེ་དཔུང་བསྒོམ། །རྡོ་རྗེ་མིག་དང་རྣ་སྣ་ལྕེ། །ལུས་ཡིད་ལ་ནི་ས་སྙིང་སོགས། །རྡོ་རྗེ་ལུས་དང་ངག་ཡིད་ལ། །རྡོ་རྗེ་སྐུ་གསུང་ཐུགས་ལྡན་བསམ། །མི་བསྐྱོད་ལ་ནི་དབང་བླང་སྟེ། །དབུ་ལ་གཤིན་རྗེ་གཤེད་པོ་བསྒོམ། །སྒོ་བཞིའི་སྔགས་ཀྱིས་བཅུག་ནས་ཀྱང༌། །ཙ་རྩི་ཀཱ་སོགས་རྣམ་འཕྲུལ་མཆོད། །གཤིན་རྗེ་གཤེད་པོ་རབ་འཇིགས་པ། །འདོད་ཆགས་རྡོ་རྗེའི་ངོ་བོ་ཁྱོད། །འདོད་ཆགས་ཆོས་ཀྱི་འབྱུང་གནས་བརྙེས། །དབྱངས་མཆོག་གསུང་ལ་ཕྱག་འཚལ་བསྟོད། །ཨོཾ་ཨཱཿ་ཧཱུཾ་གིས་བྱིན་གྱིས་བརླབ། །བདུད་རྩི་མྱངས་ལ་སྤྲོ་བསྡུ་བྱ། །སྔགས་པས་ཇི་སྲིད་མི་སྐྱོའི་བར། །བཟླས་ཞིང་སྤྲོ་བསྡུ་རྒྱས་པར་བྱ། །ཨོཾ་ཨཱ་རོ་ལྀཀ་རཱ་ག་ཏི་ཧཱུཾ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། །ཐམས་ཅད་འདོད་ཆགས་རྗེས་དྲན་ནས། །འདོད་ཆགས་ཆེན་པོར་རབ་དམིགས་ཏེ། །ཚད་མེད་ཡི་གེ་སྤངས་པ་ཡིས། །ཨ་དོན་བསམ་མི་ཁྱབ་པ་བསྒོམ། །སྙིང་རྗེ་སད་པས་ལངས་ནས་ཀྱང༌། །ཕྱག་རྒྱ་བཀྲོལ་ལ་སྤྱོད་ལམ་བྱ། །ཐམས་ཅད་དུ་ནི་ང་རྒྱལ་བདག །སྤངས་ནས་དམ་ཚིག་ཉམས་པ་ཡིན། །བདག་གི་འདོད་ཆགས་རྒྱ་མཚོར་ནུབ་རྣམས་ལ། །འཁོར་བའི་མཚོ་ལ་བདེ་བའི་གྲུ་བཙུགས་ཏེ། །གསུང་གི་དབང་ཕྱུག་སྒྲུབ་ཐབས་འདི་བྱས་པས། །འགྲོ་ཀུན་པདྨ་བཞིན་དུ་དྲི་མེད་ཤོག །འོད་དཔག་ཏུ་མེད་པའི་སྙིང་པོ་འདོད་ཆགས་གཤིན་རྗེ་གཤེད་ཀྱི་སྒྲུབ་ཐབས་ཞེས་བྱ་བ། །སློབ་དཔོན་མར་མེ་མཛད་ཀྱིས་མཛད་པ་རྫོགས་སོ།།

གཤིན་རྗེ་གཤེད་རྡོ་རྗེ་རྣོན་པོ་ཞེས་བྱ་བའི་སྒྲུབ་ཐབས།
མར་མེ་མཛད།


DTG047_Page_0133
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། །བཛྲ་ཏཱི་ཀྵྞ་ཡ་མཱ་རི་སཱ་དྷ་ནཾ་ནཱ་མ། བོད་སྐད་དུ། གཤིན་རྗེ་གཤེད་རྡོ་རྗེ་རྣོན་པོ་ཞེས་བྱ་བའི་སྒྲུབ་ཐབས། །དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །དམ་ཚིག་སེམས་ཅན་དོན་བྱེད་ཅིང༌། །ནན་ཏན་ཡེ་ཤེས་ཕྱིར་མི་ལྡོག །མར་གད་ལྗང་གུའི་མདོག་འདྲ་ལ། །རབ་ཏུ་དང་བས་བཏུད་བྱས་ཏེ། །བརྟུལ་ཞུགས་ཐོགས་པ་མེད་པ་ཡིས། །ལས་ཀྱི་དོན་ཀུན་རབ་འགྲུབ་ཕྱིར། །དགྲ་ནག་རྒྱུད་ལ་ཉེར་བསྟེན་ནས། །ཕྲག་དོག་རྡོ་རྗེའི་སྒྲུབ་ཐབས་བཤད། །དཔལ་ལྡན་གཡོ་སྒྱུ་


DTG047_Page_0134
[མ་དཔེ་གཟིགས་ན་འདིར་གནོན།]

མེད་པ་ཡིས། །བླ་མ་མགོན་ལ་བཏུད་སྦྱངས་ཏེ། །བུམ་སོགས་དབང་ནི་ཐོབ་ནས་ཀྱང༌། །དམ་བཅས་ནས་ནི་བསྒྲུབ་པར་བྱ། །རང་ཉིད་ལྷག་པའི་ལྷར་དམིགས་ཏེ། །སྙིང་གར་རི་བོང་ཅན་གྱི་དཀྱིལ། །དྷྲིཿ་ཡིག་འོད་ཟེར་ལྔ་ལྡན་ལས། །ཞིང་གཉིས་མ་ལུས་སྦྱང་བར་བྱ། །ཁྱད་པར་ཡུལ་ལ་བརྟེན་ནས་ཀྱང༌། །ཕྲ་རབ་ལུས་ཀྱི་ཕྱག་འཚལ་བྱ། །ཙ་རྩི་ལ་སོགས་རྣམ་འཕྲུལ་གྱིས། །ཕྱི་ནང་གསང་བའི་མཆོད་པ་བྱ། །སྡིག་སོགས་དག་པར་བྱས་ནས་ཀྱང༌། །རྗེ་བཙུན་པ་ནི་མཁའ་ལ་གཤེགས། །དོན་དམ་ཀུན་རྫོབ་བྱང་ཆུབ་སེམས། །ཚངས་པའི་གནས་དང་སྟོང་པ་བསྒོམ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཉི་དཀྱིལ་འོད་ཟེར་ལྔ་ལྡན་པའི། །ཧཱུཾ་ལས་སྲུང་བའི་འཁོར་ལོ་བསམ། །པདྨའི་སྟེང་དུ་ཉི་མ་སྟེ། །དྷཱིཿ་ལས་ཨུཏྤལ་རལ་གྲིར་གྱུར། །སྤྲོ་བསྡུས་སྐུ་གསུང་ཐུགས་བཅུག་སྟེ། །གྱུར་པས་ཕྲག་དོག་གཤིན་རྗེ་གཤེད། །མར་གང་ལྗང་གུ་ལྟ་བུར་མཛེས། །སྡོ་དང་དཀར་བ་གཡས་གཡོན་ཞལ། །རང་འདྲ་ཡུམ་ནི་ཅུང་ཟད་སྐེམ། །འཁྱུད་ཅིང་ཡང་དག་མཛེས་པར་ལྡན། །གྲི་གུག་རལ་གྲི་འཁོར་ལོ་དང༌། །ཐོད་པ་རིན་ཆེན་ཆུ་སྐྱེས་འབར། །སྟོང་སྨད་གླང་ཆེན་སྟག་ལྤགས་བསྣམས། །རྟོག་མེད་གོ་ཆ་ཕྲེང་བར་དབྱངས། །གླུ་བརྒྱད་ཕུཊ་སྒྲ་མཆེ་བ་གཙིགས། །མེ་དཀྱིལ་ནང་ན་བཞུགས་པ་ལ། །སྐུ་གསུང་ཐུགས་ལ་རྡོ་རྗེ་གསུམ། །སྐྱེ་མཆེད་དྲུག་ལ་བྱང་ཆུབ་སེམས། །དབང་བསྐུར་སྤྱི་བོར་གཤིན་རྗེ་གཤེད། །སྒོ་བཞིའི་སྔགས་ཀྱི་བྱིན་གྱིས་བརླབས། །རྣམ་འཕྲུལ་མཆོད་པ་བསམ་མི་ཁྱབ། །ཕྲག་དོག་རྡོ་རྗེའི་ངོ་བོ་ཁྱོད། །གཤིན་རྗེ་གཤེད་པོ་ལས་ཀུན་བྱེད། །སྐུ་ཡི་རྡོ་རྗེ་རབ་འདྲ་བ། །རལ་གྲི་ཕྱག་ལ་ཕྱག་འཚལ་བསྟོད། །རླུང་དང་མེས་ནི་པདྨ་སྦྱངས། །ཡེ་ཤེས་ཞུ་བ་གསུམ་བྱིན་བརླབ། །རྡོ་རྗེ་སྦུ་གུས་མཆོད་བྱས་པས། །སངས་རྒྱས་ཐམས་ཅད་མཉེས་པར་འགྱུར། །སྤྲོ་དང་བསྡུ་བའི་རྣལ་འབྱོར་ནི། །ཀུན་རྫོབ་བདེན་པ་བླ་མེད་ཡིན། །ཁབ་ལེན་རྡོ་ཡི་རྣམ་པ་ལྟར། །བདེ་བའི་ཡེ་ཤེས་འཛིན་བྱེད་པ། །ཆོས་ཀུན་རོ་གཅིག་པ་ཡིན་ཏེ། །ནན་ཏན་ཡེ་ཤེས་ཞེས་བྱའོ། །རྒྱུད་རྒྱལ་གསང་བ་འདུས་སོགས་ཀྱི། །དགོངས་པ་བསྐྱེད་དང་རྫོགས་པའི་རིམ། །རྒྱུད་གཞུང་ཐམས་ཅད་འགལ་མེད་འདིས། །འགྲོ་རྣམས་ཉེ་བར་འཚོ་གྱུར་ཅིག །


DTG047_Page_0135
[མ་དཔེ་གཟིགས་ན་འདིར་གནོན།]

གཤིན་རྗེ་གཤེད་རྡོ་རྗེ་རྣོན་པོ་ཞེས་བྱ་བའི་སྒྲུབ་ཐབས། སློབ་དཔོན་ཆེན་པོ་མར་མེ་མཛད་ཀྱིས་མཛད་པ་རྫོགས་སོ།། །།རྣལ་འབྱོར་པ་པྲཛྙཱ་ཤྲཱི་ཛྙཱ་ན་ཀཱི་རྟིས་རང་འགྱུར་དུ་མཛད་པའོ།།

རྡོ་རྗེ་སེམས་མ་བདེ་བའི་སྒྲུབ་ཐབས་ཞེས་བྱ་བ།
མར་མེ་མཛད།


DTG047_Page_0135
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། །བཛྲ་ཙ་རྩི་ཀཱ་སཱ་དྷ་ནཾ་ནཱ་མ། བོད་སྐད་དུ། རྡོ་རྗེ་སེམས་མ་བདེ་བའི་སྒྲུབ་ཐབས་ཞེས་བྱ་བ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །ཐབས་ཀྱི་རྒྱལ་པོ་ལ་འདུད་ཤེས་རབ་གོ་ཆ་ཅན། །བྱམས་པ་རྣམ་པར་དག་པས་སེམས་ཅན་བརྩེ་སྐྱོང་བ། །ཐབས་ཆེན་སང་བའི་མདའ་ཡིས་མ་རིག་སྲོག་གཅོད་ཅིང༌། །གཏི་མུག་རྣམ་པར་དག་པ་ཡེ་ཤེས་ཡུལ་ཅན་ལ། །བཏུད་དེ་ཞེ་སྡང་ཐམས་ཅད་རྣམ་པར་མཐར་བྱེད་ཅིང༌། །སྙིང་པོ་འཁོར་ལོ་བསྒྲུབ་ཕྱིར་རབ་ཏུ་བཤད་པར་བྱ། །དང་པོ་སྔགས་པས་ཐོ་རངས་ཆ། །ཁྲུས་ཀྱི་བུམ་པ་ལེགས་བྱུགས་ནས། །གུར་གུམ་ཆུས་བྱུགས་རྡོ་དག་གིས། །སྒོ་དགུ་ལ་ནི་བརྡེག་པར་བྱ། །དེ་ནས་གོས་སོགས་ཚུལ་བསྡམས་ནས། །ཤུ་ཀྲ་དཀར་པོའི་མཎྜལ་བྱ། །བདག་ཉིད་ལྷ་རུ་གསལ་བ་ཡིས། །རྣམ་དག་བདུན་དང་ཚད་མེད་བཞི། །བྱས་ནས་ཕྱི་ནང་ཆོས་ལ་བལྟ། །སྔགས་རྐྱེན་གྱིས་ནི་རྣམ་ཐར་བསྒོམ། །བདག་བསྲུང་བ་ནི་ཡེ་ཤེས་ལ། །གཞན་བསྲུང་འཁོར་ལོ་ཆེན་པོའོ། །མ་ཆགས་དང་ནི་འོད་ཟེར་བསིལ། །ཛ་ལ་ཆོས་ཀྱིས་འཁོར་ལོ་བསྐོར། །སྤྲོ་བསྡུས་ང་རྒྱལ་བརྩམ་པར་བྱ། །ཨོཾ་བཛྲ་རྩ་རྩི་ཀཱ་ཨཱཏྨ་ཀོ྅ཧཾ། གྱུར་པས་སྐུ་མདོག་དཀར་ལ་ཞི། །ཅུང་ཟད་སྐེམ་ཞིང་ཕྲ་ལ་འཇམ། །དཀར་སྔོ་དམར་བའི་ཞལ་གསུམ་མ། །གྲི་གུག་འཁོར་ལོ་རལ་གྲི་དང༌། །ཐོད་པ་རིན་ཆེན་ཆུ་སྐྱེས་འཛིན། །སྟག་གི་པགས་པས་སྨད་དཀྲིས་ཏེ། །དབུ་སྐྲ་སེར་བརྫེས་ཐོད་པ་ལྔ། །དབུ་རྒྱན་ལྔ་བཅུའི་ཕྲེང་བ་ཅན། །ཞི་ཞིང་སྒེག་པ་མེ་དབུས་དཀྱིལ། །གཡོན་བསྐུམ་གཡས་པ་བརྐྱང་བས་གནས། །རང་སྙིང་ས་བོན་རྫོགས་པ་དང༌། །ཡིག་འབྲུ་གསུམ་ལ་རྡོ་རྗེ་གསུམ། །སྐྱེ་མཆེད་ལ་ནི་རྡོ་རྗེ་དྲུག །རིག་པའི་དབང་བསྐུར་གཤིན་རྗེ་གཤེད། །ཛཿ་ཧཱུཾ་བཾ་ཧོཿ་རབ་ཐིམ་ནས། །བ་སྤུ་བུ་ག་ཆེན་པོའམ། །ཡང་ན་སྙིང་གའི་རྣམ་འཕྲུལ་དང༌། །ཕྱི་ནང་གསང་བའི་མཆོད་པ་བྱ། །ལག་པ་རྡོ་རྗེ་དྲིལ་ལྡན་པས། །རྡོ་རྗེ་ཞི་བ་བྱང་ཆུབ་སེམས། །གཏི་མུག་རྡོ་རྗེ་ཉིད་དབྱེར་མེད། །ཆོས་ཀྱི་


DTG047_Page_0136
[མ་དཔེ་གཟིགས་ན་འདིར་གནོན།]

དབྱིངས་ཀྱི་བདག་ཆེན་པོ། །རྡོ་རྗེ་སེམས་དཔའ་ཕྱག་འཚལ་བསྟོད། །སྤྲོ་དང་བསྡུ་བ་བྱེད་པའམ། །ཇི་སྲིད་མི་སྐྱོའི་བར་དུ་བྱ། །ཞི་རྒྱས་དབང་དང་དྲག་པོ་ཡིས། །ཕྲིན་ལས་མཐུན་པར་གསང་སྔགས་བསྒྲུབ། །ཨོཾ་མོ་ཧ་ར་ཏི་བཛྲ་ཧཱུཾ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། རྡོ་རྗེ་ཚིག་ནི་མི་གསལ་ཞིང༌། །སྔགས་པའི་ཡིད་གསལ་བཟླས་པར་བྱ། །གལ་ཏེ་སྤྲོས་པའི་རྣལ་འབྱོར་གྱིས། །ངལ་བ་གསོ་བ་འདི་ལྟ་སྟེ། །ཆོས་ཀུན་ཞི་བ་རིམ་བཞིན་དུ། །པདྨ་ཆོས་འབྱུང་ལ་ཐིམ་བྱ། །ཆོས་ཀུན་ཡི་གེ་གསུམ་ལྡན་པས། །གོ་རིམས་ཨ་ཡི་སྒྲས་བསྐུལ་ཏེ། །སྐྱེ་མེད་འོད་གསལ་བསྒོམ་པར་བྱ། །གཏི་མུག་རབ་ཏུ་རྨོངས་པའི་མུན་ཆེན་དང༌། །ང་བདག་འཆིང་ཆེན་རབ་ཏུ་གཅད་པའི་ཕྱིར། །རྒྱུད་ཆེན་ལས་བྱུང་བཅོམ་ལྡན་མངོན་སུམ་དུ། །ཐོས་ནས་བྲིས་པའི་གཞུང་འདིས་ཀུན་གྲོལ་ཤོག །རྡོ་རྗེ་སེམས་མ་བདེ་བ་བསྒྲུབ་པའི་ཐབས་ཞེས་བྱ་བ་སློབ་དཔོན་མཁས་པ་ཆེན་པོ་མར་མེ་མཛད་ཀྱིས་མཛད་པ་རྫོགས་སོ།། །།རྣལ་འབྱོར་པ་པྲཛྙཱ་ཤྲཱི་ཛྙཱ་ན་ཀཱི་རྟིས་རང་འགྱུར་དུ་མཛད་པའོ།།

རྡོ་རྗེ་མཁའ་འགྲོ་མ་རྣལ་འབྱོར་མའི་སྒྲུབ་ཐབས་ཞེས་བྱ་བ།
མར་མེ་མཛད།


DTG047_Page_0136
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། བཛྲ་ཌཱ་ཀི་ཡོ་གི་ནི་སཱ་དྷ་ནཾ་ནཱ་མ། བོད་སྐད་དུ། རྡོ་རྗེ་མཁའ་འགྲོ་མ་རྣལ་འབྱོར་མའི་སྒྲུབ་ཐབས་ཞེས་བྱ་བ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །སྐུ་མདོག་རང་བཞིན་རྣམ་དག་བདེ་བ་ལ་སྤྱོད་ཅན། །རྣམ་པར་རྟོག་པ་བྲལ་བས་ཕག་མོའི་ཞལ་མངའ་བ། །བཏུད་དེ་རྡོ་རྗེ་མཁའ་འགྲོ་མ་ནི་རབ་བསྒྲུབ་ཕྱིར། །ལྷན་ཅིག་སྐྱེས་པའི་ཡེ་ཤེས་བདེ་རྙེད་བཤད་པར་བྱ། །སྔགས་པ་ཤེས་རབ་སྙིང་རྗེར་ལྡན། །ས་བོན་ལས་ནི་རྐྱེན་གྱིས་བསྐྱེད། །མྱུ་གུ་རང་གི་ལྷར་ལྡན་པས། །ཚོགས་བསགས་འབྲས་བུ་རྫོགས་པའི་ཕྱིར། །དཀྱིལ་འཁོར་ཆང་གིས་བྱུགས་ནས་ཀྱང༌། །རང་བྱུང་མེ་ཏོག་ཐིག་ལེ་དགོད། །བསྐུས་པའི་མེ་ཏོག་སྔོན་པོ་དགྲམ། །ཕྱག་སོགས་བདག་གིས་ཅི་ནུས་བྱ། །དང་པོ་བྱམས་པ་བསྒོམ་བྱ་སྟེ། །གཉིས་པ་སྙིང་རྗེའི་རྣམ་པ་བསྒོམ། །གསུམ་པ་དགའ་བ་བསྒོམ་བྱ་སྟེ། །གསུམ་གྱི་ཐ་མ་བཏང་སྙོམས་སོ། །ཆོས་ཀུན་སྟོང་པ་ཉིད་དག་ཏུ། །ཤེས་པའི་རྣལ་འབྱོར་རིག་པའི་རྒྱུན། །ཡི་གེ་མ་རུ་གནས་པ་དག ། ཉི་མའི་དཀྱིལ་འཁོར་སྟེང་ཉིད་དུ། །ཐུགས་ཀྱི་ཡི་གེ་བསྲུང་བ་བསམ། །པདྨའི་འོད་ཟེར་བསིལ་བའི་སྟེང༌། །ས་ལ་རྡོ་རྗེ་སྔོན་པོ་སྟེ། །སྤྲོ་བསྡུས་ང་


DTG047_Page_0137
[མ་དཔེ་གཟིགས་ན་འདིར་གནོན།]

རྒྱལ་དྲན་པར་བྱ། །ཨོཾ་དྭེ་ཥ་ར་ཏི་བཛྲ་ཨཱཏྨ་ཀོ྅ཧཾ། གྱུར་པས་རྡོ་རྗེ་ཕག་མོ་སྟེ། །ཨིནྡྲ་ནཱི་ལམཱི་མདོག་འདྲ་བ། །རྩ་བ་ཕག་གདོང་རབ་སྔོ་ཞིང༌། །དེ་ལས་གཞན་པ་དཀར་དང་དམར། །གྲི་གུག་ཐོད་པ་རྩ་བའི་ཕྱག །རྡོ་རྗེ་རལ་གྲི་འཁོར་ལོ་པད། །རིམ་བཞིན་བཀོད་པའི་སྐུ་མཆོག་ནི། །གཡོན་བསྐུམ་གཡས་པ་བརྐྱང་བས་གནས། །དབུ་དང་སྐུ་ནི་དུར་ཁྲོད་དང༌། །ཀླུ་ཡིས་མཛེས་ཤིང་ཕྲེང་བ་ལྡན། །མེ་དཔུང་ནང་ན་གཟི་བརྗིད་ཆེ། །བསྐྱེད་པ་གསུམ་ལ་རྡོ་རྗེ་ཆེ། །དྲུག་ལ་བྱང་ཆུབ་སེམས་དཔའ་དྲུག །རིག་པའི་དབང་བསྐུར་གཤིན་རྗེ་གཤེད། །ཡེ་ཤེས་ཕག་མོས་བྱིན་གྱིས་བརླབ། །མཆོད་པའི་རྣམ་འཕྲུལ་སྙིང་ལས་སྤྲུལ། །མི་བསྐྱོད་རྡོ་རྗེ་ཡེ་ཤེས་ཆེ། །ཞེ་སྡང་བདག་པོ་ཐུགས་དབྱེར་མེད། །མི་ཕྱེད་རྣམ་རྟོག་རབ་གཅོད་པ། །རྡོ་རྗེ་ཕག་མོ་ཁྱོད་ཕྱག་འཚལ། །འཕྲོས་པས་སྙིང་གའི་ས་བོན་ཏེ། །སྦྱངས་པ་རང་ཡིད་དང་བའི་ལྷར། །བྱས་ནས་བསྡུ་བ་དག་ཀྱང་བྱ།། གལ་ཏེ་སྐྱོ་ན་གསང་སྔགས་བཟླས། །ཡེ་ཤེས་སེམས་དཔའི་དཀྱིལ་ཉི་སྟེ། །རྡོ་རྗེ་སྔགས་ནི་འབར་བར་བསམ། །ཨོཾ་དྭེ་ཥ་ར་ཏི་བཛྲ་ཧཱུཾ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། སྟོང་དང་ཁྲི་དང་བྱེ་བར་བཟླས། །སྔགས་པས་དངོས་གྲུབ་ཐོབ་པར་འགྱུར། །རབ་ཏུ་ཞི་བའི་བྱང་ཆུབ་སེམས། །ཡི་གེ་ཁ་དོག་དབྱིབས་ཀྱང་མེད། །རྣམ་པར་རྟོག་པ་ཀུན་སྤངས་པའི། །སྐྱེ་འཇིག་མེད་པ་བསྒོམ་པར་བྱ། །དེ་ལ་རྟེན་ཅིང་འབྲེལ་འབྱུང་སྟེ། །ཕྱག་རྒྱ་བཀྲོལ་ལ་སྤྱོད་ལམ་བྱ། །ཨོཾ་ཨཱཿ་ཧཱུཾ་མུཿ། །བདག་གིས་རྗེ་བཙུན་ཕ་ལ་རྒྱུ་རྙེད་པ། །རྟོག་བྲལ་ཆོས་སྐུ་གཟུགས་སྐུ་སྣང་སྒྲུབ་ཐབས། །ཕག་མོ་རྣལ་འབྱོར་མ་ཡི་སྒྲུབ་ཐབས་བྱས། །འདི་ཡིས་དགེ་ཐོབ་ཐམས་ཅད་གྲོལ་གྱུར་ཤོག །རྡོ་རྗེ་མཁའ་འགྲོ་རྣལ་འབྱོར་མའི་སྒྲུབ་ཐབས་སློབ་དཔོན་མར་མེ་མཛད་ཀྱིས་མཛད་པ་རྫོགས་སོ།།

རྡོ་རྗེ་བདེ་རྒྱས་དབྱངས་ཅན་མའི་སྒྲུབ་ཐབས་ཞེས་བྱ་བ།


DTG047_Page_0137
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། བཛྲ་གཱི་ཏི་སུ་ཁ་ར་ད་སཱ་དྷ་ནཾ་ནཱ་མ། བོད་སྐད་དུ། རྡོ་རྗེ་བདེ་རྒྱས་དབྱངས་ཅན་མའི་སྒྲུབ་ཐབས་ཞེས་བྱ་བ། །དཔལ་རྡོ་རྗེ་སེམས་དཔའ་ཕྱག་འཚལ་ལོ། །ཤེས་རབ་ཕ་རོལ་ཕྱིན་པ་རྒྱལ་བ་ཀུན་གྱི་ཡུམ། །དྲི་མ་མེད་པའི་གསུང་ཆེན་རྡོ་རྗེ་དབྱངས་ཅན་མ། །བཏུད་དེ་སངས་རྒྱས་བདེ་ཆེན་རབ་ཏུ་འཕེལ་བྱའི་ཕྱིར། །གསུང་གི་པདྨ་དྲི་མ་མེད་པའི་སྒྲུབ་ཐབས་བཤད། །ནགས་ཚལ་མི་མེད་དབེན་


DTG047_Page_0138
[མ་དཔེ་གཟིགས་ན་འདིར་གནོན།]

པའི་གནས། །ཉམས་དགའ་བཀྲ་ཤིས་དང་བ་རུ། །འཇམ་པའི་སྟན་ལ་འདུག་ནས་ནི། །ཆུ་བུར་ལྟ་བུའི་ཚུལ་གྱིས་བསྒོམས། །སེམས་ཅན་ཀུན་དོན་ལེགས་བྱས་ནས། །དམ་པའི་འཁོར་ལོ་བསྒོམ་པར་བྱ། །ཕྱག་འཚལ་བསྟོད་དང་བཤགས་པ་དང༌། །རྗེས་སུ་ཡི་རང་བསྐུལ་གསོལ་གདབ། །བསྔོ་དང་སྨོན་ལམ་བཏབ་བྱས་ནས། །ཡིད་ཀྱིས་གཤེགས་གསོལ་ཚད་མེད་བཞི། །སྔོན་འགྲོ་སྟོང་པ་བསྒོམ་པར་བྱ། །སྲུང་བའི་འཁོར་ལོ་འཇིགས་ཆེན་པོ། །མཚོན་ཆ་འཁྲུག་པ་ཤིན་ཏུ་བསྒོམ། །པདྨ་ཟླ་བའི་སྟེང་ཉིད་དུ། །བྱུ་རུ་བཅག་འདྲའི་དོ་དག་ལས། །ཆུ་སྐྱེས་འདབ་བརྒྱད་མཚན་མར་ལྡན། །འཕྲོས་རྣམས་བསྡུ་བ་བྱས་ནས། །རིགས་ཀྱི་འཁོར་ལོ་མ་ལུས་པའོ། །ཨོཾ་བཛྲ་རཱ་ག་ར་ཏི་ཨཱཏྨ་ཀོ྅ཧམ། གྱུར་པས་པདྨ་རཱ་གའི་མདོག །ཞལ་གསུམ་གཡོན་གཡས་གཡོན་སྔོ་དང་དཀར། །ཕྱག་དྲུག་གྲི་གུག་པདྨ་དང༌། །རལ་གྲི་ཐོད་པ་འཁོར་ལོ་དང༌། །ནོར་བུ་ཡིས་ནི་ཤིན་ཏུ་མཛེས། །དབུ་ལ་ཐོད་པ་ལྔས་བསྐོར་ཞིང༌། །རློན་པོ་བརྒྱ་ཕྱེད་ཕྲེང་བར་ལྡན། །རིན་ཆེན་ཀླུང་དང་རུས་པས་སྤྲས། །ཤིན་ཏུ་ཞི་ཞིང་སྒེག་པ་སྟེ། །སྟག་ལྤགས་བསྣམས་ནས་མེ་དཔུང་དཀྱིལ། །གཡོན་བསྐུམ་གཡས་པ་བརྐྱང་པས་གནས། །ཨོཾ་དྷརྨ་དྷཱ་ཏུ་སྭ་བྷ་ཝ་ཨཱཏྨ་ཀོ྅ཧཾ། ཧཱུཾ་ལས་ཐུགས་ཀྱི་རྡོ་རྗེ་སྟེ། །ཨཱཿ་ལས་གསུང་དང་ཨོཾ་ལས་སྐུ། །ཀྵིཾ་ལས་ས་སྙིང་རྡོ་རྗེ་སྙིང་རྗེ་མིག །ཛིཾ་ལས་རྡོ་རྗེ་ཅན་རྣ་བར། །ཁཾ་ལས་ནམ་མཁའི་སྙིང་པོ་སྣར། །གཾ་ལས་འཇིག་རྟེན་དབང་དུ་ཕྱུག་ལྕེར། །ཀཾ་ལས་སྒྲིབ་པ་རྣམ་སེལ་ལུས། །སཾ་ལས་ཀུན་དུ་བཟང་པོ་ཡིད། །རིག་པའི་དབང་བསྐུར་གཤིན་རྗེ་གཤེད། །དགུག་གཞུག་བཅིང་དང་དབང་དུ་བྱ། །མཆོད་པ་བྷ་གའི་བྱང་ཆུབ་སེམས། །རྡོ་རྗེ་གསུང་གི་ཡེ་ཤེས་ཆེ། །པདྨ་ཤེས་རབ་ཕ་རོལ་ཕྱིན། །འདོད་ཆགས་ཆེན་པོ་ཉིད་སྦྱོར་བ། །རྡོ་རྗེ་མཐར་མཛད་ཁྱོད་ལ་བསྟོད། །རྡོ་རྗེ་སྒུ་གུས་བདུད་རྩི་མྱང༌། །ས་བོན་འཕྲོས་པས་འགྲོ་བ་སྦྱང༌། །རྡོ་རྗེ་བཟླས་པ་བརྩམ་པར་བྱ། །ཡིད་གསལ་བ་ནི་མཆོག་ཏུ་གཅེས། །ཨོཾ་བཛྲ་རཱ་ག་ར་ཏི་ཧཱུཾ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། མ་ནིང་རྡོ་རྗེ་བཟླས་ནས་ཀྱང༌། །སྙིང་པོ་ཅན་དངོས་བསྒོམ་པར་བྱ། །འདོད་ཆགས་ཆེན་པོ་སྦྱོར་བ་བཟློག་པའི་ཕྱིར། །བདེ་བ་སེམས་དྲན་སྒྲུབ་ཐབས་འདི་བརྩམས་


DTG047_Page_0139
[མ་དཔེ་གཟིགས་ན་འདིར་གནོན།]

པས། །གཟུང་དང་འཛིན་པའི་དྲི་མ་དག་ནས་ཀྱང༌། །དགའ་བ་རྣམ་དག་སྨོན་ལམ་སྟོབས་འགྱུར་ཤོག །རྡོ་རྗེ་བདེ་རྒྱས་དབྱང་ཅན་མའི་སྒྲུབ་ཐབས་ཞེས་བྱ་བ་རྫོགས་སོ།།

ལས་ཀྱི་རྡོ་རྗེ་གཽ་རཱིའི་སྒྲུབ་ཐབས་ཞེས་བྱ་བ།


DTG047_Page_0139
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། ཀརྨ་བཛྲ་ཎི་གཽ་རཱི་སཱ་དྷ་ནཾ་ནཱ་མ། བོས་སྐད་དུ། ལས་ཀྱི་རྡོ་རྗེ་གཽ་རཱིའི་སྒྲུབ་ཐབས་ཞེས་བྱ་བ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །བཏང་སྙོམས་རྣམ་པར་དག་པ་ཕྱག་རྒྱ་ཆེ། །ཡེ་ཤེས་ཕ་རོལ་ཕྱིན་མ་ལ་ཕྱག་འཚལ། །བརྩོན་འགྲུས་ཐོགས་པ་མེད་པས་སེམས་ཅན་དོན། །འགྲུབ་ཕྱིར་གཽ་རཱིའི་སྒྲུབ་ཐབས་བཤད་པར་བྱ། །ཁྲུས་དང་རྒྱན་དང་གོས་དང་བྱུག་པ་རྣམས། །ཕྱི་ནང་རྣམ་པར་དག་པ་ཤེས་པར་བྱ། །རང་གི་རྣལ་འབྱོར་དམ་པ་མཆོད་ནས་ཀྱང༌། །བདེ་བའི་འཁོར་ལོ་བདག་ལ་གཞུག་པར་བྱ། །ཚད་མེད་བཞི་ལ་རྣལ་འབྱོར་སེམས་གནས་ནས། །ཆོས་ཀུན་སྙིང་པོ་འོད་ཉིད་གསལ་བར་བསྒོམ། །བདག་རྒྱུད་སྐུ་གསུང་ཐུགས་ཀྱི་ཡི་གེ་ནི། །རོ་གཅིག་ཐིག་ལེའི་ངོ་བོ་གྱུར་བ་ལས། །ཆད་པ་ཉི་མའི་སྟེང་གི་རྡོ་རྗེ་ཉིད། །འཕྲོས་པས་སྲུང་བའི་འཁོར་ལོ་གསལ་བར་བྱ། །པདྨ་ཟླ་བའི་སྟེང་དུ་རུ་དག་ལས། །གྱུར་པས་ཨུཏྤལ་རལ་གྲི་ལྗང་མདོག་གི །དཀྱིལ་ནས་འཕྲོས་ཤིང་འདུས་ནས་ང་རྒྱལ་བྱ། །ཨོཾ་བཛྲ་གཽ་རི་སྭ་བྷཱ་ཝ་ཨཱཏྨ་ཀོ྅ཧཾ། གྱུར་པའི་སྐུ་ནི་མ་རྒད་ལྗང་མདོག་སྟེ། །གཡས་དང་གཡོན་པའི་ཞལ་ནི་དཀར་དང་དམར། །གྲི་གུག་རལ་གྲི་འཁོར་ལོ་ཐོད་པ་དང༌། །རིན་ཆེན་ཆུ་སྐྱེས་རྣམས་ཀྱིས་མཛེས་པའི་ཕྱག །དབུ་སྐྲ་གྱེན་འགྲེང་ཐོད་པ་ལྔས་བརྒྱན་ཅིང༌། །ཚངས་པ་བརྒྱ་བྱིན་མགོ་བོ་ལྔ་བཅུས་དབྱངས། །ཀླུ་དང་མརྒད་རུས་པའི་རྒྱན་འཇིགས་པས། །སྟག་ལྤགས་བསྣམས་པའི་ཞབས་ནི་གཡས་བརྐྱང་སྟེ། །གཟི་བརྗིད་མེ་ཡི་དཀྱིལ་ན་ཆེར་འབར་བའི། །སྐུ་གསུང་ཐུགས་དང་སྤྱན་སོགས་བྱིན་བརླབས་ལ། །ཡི་གེ་མཚན་མ་སྐུ་ནི་གང་འདོད་བརྩམ། །སྙིང་གའི་ས་བོན་འཕྲོས་པས་འཁོར་ལོ་བཟང༌། །གསོལ་བཏབ་རིག་པའི་སྐྱེས་བུ་མི་བསྐྱོད་པ། །རྗེས་སུ་མཐུན་པའི་ལྷ་ནི་སྤྱན་དྲངས་ནས། །མཆོད་བསྟོད་མཉེས་པར་བྱས་ནས་རང་ལ་ཐིམ། །མཆོད་པའི་རྣམ་གྲངས་ནམ་མཁའ་རྒྱས་གང་བ། །བྷ་གའི་རྣམ་འཕྲུལ་དག་གིས་ཅི་བདེར་མཆོད། །སྔགས་པ་རྡོ་རྗེ་དྲིལ་བུར་ལྡན་པ་ཡིས། །སྙན་


DTG047_Page_0140
[མ་དཔེ་གཟིགས་ན་འདིར་གནོན།]

པའི་གླུ་དང་ལྡན་པས་མཆོད་པར་བྱ། །རྡོ་རྗེ་ལས་ནི་ཀུན་གྲོལ་བ། །ཕྲག་དོག་རྡོ་རྗེ་དབྱེར་མེད་སྐུ། །ཐམས་ཅད་རྡོ་རྗེ་བཏང་སྙོམས་འདི། །རྡོ་རྗེ་ལས་མ་ཕྱག་འཚལ་བསྟོད། །ཡི་གེ་གསུམ་གྱིས་བྱིན་གྱིས་བརླབས་པའི་རྫས། །རྒྱལ་བ་ཐམས་ཅད་མཆོད་ཐམས་ཅད་མཆོད་བྱ། །སེམས་ཅན་ཐམས་ཅད་རྡོ་རྗེའི་སྐུར་བྱས་ནས། །སྔགས་ཀྱི་འཁོར་ལོ་ཇི་ལྟར་འདོད་པས་བཟླས། །ཨོཾ་བཛྲ་ར་ཏི་ཧཱུཾ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། རྒྱལ་མཚན་ཅན་གྱི་ཁམས་སུ་འོ་མ་སྒྲུབ། །ཐབས་ཀྱི་གཟུགས་ལས་རྟག་ཏུ་དང་འགྱུར་པས། །རྟག་པའི་རྒྱལ་པོ་གཤིན་རྗེ་གཤེད་ནག་ལས། །མཐོང་བའི་སྒྲུབ་ཐབས་བདག་གིས་འདི་བྱས་པས། །འགྲོ་ཀུན་སྤྲོས་བྲལ་ཞི་བ་ལ་གནས་ཏེ། །སངས་རྒྱས་ཡེ་ཤེས་མངོན་དུ་རྟོགས་པར་ཤོག །རྡོ་རྗེ་གཽ་རཱིའི་སྒྲུབ་ཐབས་ཞེས་བྱ་བ་རྫོགས་སོ།།

རྗེ་བཙུན་འཇམ་དཔལ་གཤིན་རྗེ་གཤེད་མཆོད་པའི་ཆོ་གའི་རིམ་པ་ཞེས་བྱ་བ།
ཀྲིཥྞ་པཎྜི་ཏ།


DTG047_Page_0140
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། བྷཊྚཱ་ཀ་མཉྫུ་ཤྲཱི་ཡ་མཱ་རི་པཱུ་ཛ་ཀྲ་མ་བིདྷི་ནཱ་མ། བོད་སྐད་དུ། རྗེ་བཙུན་འཇམ་དཔལ་གཤིན་རྗེ་གཤེད་མཆོད་པའི་ཆོ་གའི་རིམ་པ་ཞེས་བྱ་བ། བླ་མ་རྗེ་བཙུན་དམ་པ་རྣམས་ལ་ཕྱག་འཚལ་ལོ། །ཤེས་རབ་སྙིང་རྗེར་ལྡན་ཞིང་དད་པ་ལེགས་བརྟན་དང༌། །སངས་རྒྱས་སྙིང་པོ་འདོད་ཕྱིར་གང་ཟག་དབང་ཐོབ་པས། །བསྙེན་དང་སྒྲུབ་པའི་རིམ་པ་ཁོང་དུ་ཆུད་བྱས་ནས། །རྗེ་བཙུན་རྣམས་ལ་བཏུད་དེ་རྒྱུད་འདིས་སྦྱང་བར་བྱ། །བདག་ཉིད་དྲན་པ་གཅིག་པའི་འགྲོ་བློར་ལྡན། །བདག་མེད་པ་ལས་བཟློག་ཅིང་འབྱོར་པ་གསུམ་དག་པས། །བསྙེན་དང་སྒྲུབ་ལ་རབ་ཏུ་མཁས་བྱས་ཏེ། །ཉིན་དང་མཚན་མོ་ཐམས་ཅད་གཡེང་མེད་ཚུལ་གྱིས་འབད། །སྐུ་གསུང་ཐུགས་ཀྱི་འཁོར་ལོ་རྡོ་རྗེ་ཅན་བཅས་དང༌། །དྲི་མེད་སྙིང་པོ་མཐར་མཛད་བླ་མ་རྡོ་རྗེ་འཛིན། །དགྲ་ལས་རྒྱལ་བ་གཤིན་རྗེ་གཤེད་ནག་ལྷ་ཡི་ཚོགས། །ཐུགས་རྗེས་ཐུགས་ཆུད་སྤྱན་རས་ཉིད་འཚོ་དགོངས་སུ་གསོལ། །ཆོས་སྐུ་ལོངས་སྤྱོད་རྫོགས་དང་སྤྲུལ་སྐུའི་རང་བཞིན་ཅན། །རྒྱལ་བའི་རང་བཞིན་ཕུང་པོས་སེམས་ཅན་རེ་འདོད་སྐོང༌། །འབྱོར་ལྡན་ཕུན་སུམ་ཚོགས་པས་ནད་གསོས་སྨན་པའི་མཆོག །བླ་མ་མགོན་པོ་དེ་ལ་བདག་ནི་ཕྱག་འཚལ་ལོ། །ཕུང་པོ་ལྔ་ལས་རྒྱལ་ཞིང་ཉོན་མོངས་ལྔ་རྣམས་དག །རང་གཞན་དོན་རྫོགས་གང་ཞིག་ཕག་མོ་ལ་སོགས་འཁྲིལ། །ཡེ་ཤེས་རིགས་མཚུངས་ལྔ་ལྡན་རིན་ཆེན་ལྔ་ཡི་མདོག །རྣམ་མཐར་ཕ་རོལ་


DTG047_Page_0141
[མ་དཔེ་གཟིགས་ན་འདིར་གནོན།]

ཕྱིན་ཞལ་ཕྱག་ལྡན་ཁྱོད་ལ་འདུད། །བདུད་བཞི་ལས་རྒྱལ་ལྟ་བའི་ངེས་སྒྲོལ་བཅོམ་ནས་ཀྱང༌། །དད་སོགས་རྣམ་དག་ཁྲོ་བོའི་རྟགས་སུ་ངེས་འབྱུང་བ། །ཐབས་ཀྱིས་ཕྱག་རྒྱས་སྒྲིབ་པ་ཐམས་ཅད་མཐར་སྤངས་པའི། །འཇིགས་ཤིང་རབ་གཏུམ་ཕྱག་མཚན་རྟགས་ལྡན་ཕྱག་འཚལ་བསྟོད། །ས་ཆུ་མེ་རླུང་འབྱུང་བ་བཞི་ནི་རྣམ་དག་སྐུ། །བྱམས་དང་སྙིང་རྗེ་དགའ་དང་བཏང་སྙོམས་ཉིད། །ཐབས་དང་སྨོན་ལམ་ཡེ་ཤེས་རྫོགས་མཛད་པ། །ཙརྩི་ཕག་མོ་གཽ་རཱིའི་དབྱངས་ལྡན་ཕྱག་འཚལ་བསྟོད། །མཆོད་ཡོན་གདན་མཆོག་ཞབས་བཀྲུ་ལྡན་པ་དང༌། །སྤོས་དང་མེ་ཏོག་མར་མེ་ཞལ་ཟས་ཚོགས། །རོལ་མོའི་སིལ་སྙན་མེ་ཏོག་ཕྲེང་དང་ལྔ་ལྡི་དང༌། །མཆོད་སྡོང་བྱེ་བས་བརྒྱན་པས་རབ་ཏུ་མཆོད་པར་བགྱི། །གཟུགས་སྒྲ་དྲི་རོ་རེག་བྱ་འདོད་པའི་ཡོན་ཏན་ཚོགས། །དུ་མར་སྤྱད་ཀྱང་ཚིམ་པ་མེད་ཅིང་ངོ་མཚར་བ། །ཡིད་ལྡན་སེམས་ཀྱིས་ངལ་བསོ་ཁྱད་པར་གྱུར་པ་རྣམས། །མོས་བློ་དད་པའི་མཐུ་ཡིས་བདེ་གཤེགས་འཁོར་ལོ་མཆོད། །འཁོར་ལོ་རིན་ཆེན་རྟ་དང་གླང་པོ་རབ་མཚན་ལྡན། །རྒྱལ་པོ་བཙུན་མོ་བློན་པོ་མཆོག་ནི་ཞི་ཞིང་མཛེས། །འབྱོར་ལྡན་ཕུན་སུམ་ཚོགས་པ་འཁོར་ལོས་སྒྱུར་བ་ཡི། །ཁྱད་པར་རྫས་ཀྱིས་བདེ་གཤེགས་འཁོར་ལོ་དམ་པ་མཆོད། །གདུགས་དང་ཉེར་ལྡན་དུང་དང་པདྨས་རབ་ཏུ་མཛེས། །གུནྡྷེ་དཔལ་བེའུ་རྒྱལ་མཚན་འཁོར་ལོ་མཛེས་པའི་མཆོག །འཇིག་རྟེན་དག་ན་གྲགས་ཤིང་སྙན་པར་གང་བརྗོད་པའི། །བླ་མེད་རྣམས་ཀྱིས་བདེ་གཤེགས་འཁོར་ལོ་དམ་པ་མཆོད། །དྲི་ཆེན་རྡོ་རྗེ་ཆུར་ལྡན་བྱང་ཆུབ་སེམས་དཀར་དམར་དང་བཅས། །མི་ཤ་རྟ་དང་བ་ལང་གླང་ཆེན་ཁྱི་ཤ་དང༌། །སྒྲོན་མ་ཆེ་དང་ལྡན་པས་དུར་ཁྲོད་མཛེས་བྱས་པས། །རྣམ་པར་རྟོག་བྲལ་བདེ་གཤེགས་འཁོར་ལོ་དམ་པ་མཆོད། །བདེ་གཤེགས་ཁྱེད་ལ་ཇི་སྙེད་གནས་པའི་ཡོན་ཏན་ནི། །བདག་གིས་བསྐལ་པའི་མཐའ་བར་བརྗོད་པས་མི་ལང་བས།། སྐུ་གསུང་ཐུགས་ཀྱི་དཀྱིལ་འཁོར་ནམ་མཁའ་ཙམ་མོས་འདིས། །རྒྱལ་བ་གཅིག་བཞིན་སངས་རྒྱས་འཁོར་ལོ་ཐམས་ཅད་བསྟོད། །འདོད་ཆགས་ཞེ་སྡང་གཏི་མུག་དུག་མང་གིས་བསྐྱེད་ཅིང༌། །ལུས་ངག་ཡིད་གསུམ་སྒོ་རུ་སྨིན་པའི་མི་དགེ་བཅུ། །སོ་སོ་ཐར་དང་བྱང་ཆུབ་སེམས་དང་རིག་པ་


DTG047_Page_0142
[མ་དཔེ་གཟིགས་ན་འདིར་གནོན།]

འཛིན། །ཚུལ་ཁྲིམས་སྡོམ་དང་དམ་ཚིགས་ཉམས་པ་ཇི་སྙེད་བཤགས། །བདག་གིས་བགྱིས་དང་དེ་བཞིན་བགྱིད་དུ་སྩལ། །ཉན་ཐོས་རང་རྒྱལ་ཐེག་པ་ཆེན་པོའི་དགེ་བའི་ཚོགས། །སློབ་དང་མི་སློབ་སེམས་ཀྱིས་གྲོགས་སུ་གང་གྱུར་པ། །འདས་དང་མ་འོངས་ད་ལྟར་དགེ་ལ་རྗེས་ཡི་རང། །སངས་རྒྱས་ཞིང་ལ་བཞུགས་པའི་སྟོན་པ་རྫོགས་སངས་རྒྱས། །གདུལ་བྱའི་སྣང་བར་རབ་ཏུ་ཚིམ་མཛད་ཁྲོ་དང་ཞི། །འགྲོ་བ་མིག་ལྡོངས་ཤེས་རབ་སྨན་གྱིས་གསོལ་བའི་ཕྱིར། །ཆོས་ཀྱི་ཕུང་པོ་བརྒྱད་ཁྲི་བཞི་སྟོང་བསྐོར་བར་བསྐུལ། །རྒྱལ་བ་བཅོམ་ལྡན་མྱ་ངན་འདའ་བར་བཞེད་པ་རྣམས། །ཁྱོད་མི་བཞུགས་ན་འཇིག་རྟེན་འདི་དག་མགོན་མེད་པས། །ནམ་མཁས་གར་ཁྱབ་སེམས་ཅན་ཇི་སྲིད་མཆིས་པ་རུ། །དེ་སྲིད་རྒྱལ་བ་སྲས་དང་བཅས་པ་བཞུགས་སུ་གསོལ། །བདག་གི་ལུས་ངག་ཡིད་ཀྱི་དགེ་བའི་ཚོགས་ཇི་སྙེད། །སྦྱིན་དང་ཚུལ་ཁྲིམས་བསྒོམས་པ་ཉིད་དུ་ངས་བསྡུས་ཏེ། །བདག་གིར་བཟུང་བ་མེད་ཅིང་སེམས་ཅན་ཀུན་དོན་དུ། །དམིགས་པ་མེད་པའི་སེམས་ཀྱིས་ཡོངས་སུ་བསྔོ་བར་བགྱི། །བདག་གིས་རྗེ་བཙུན་རྣམས་ལ་ཤིན་ཏུ་དད་སེམས་ཀྱིས། །སེམས་ཅན་ཀུན་ལ་ཕན་ཕྱིར་བསོད་ནམས་ཡེ་ཤེས་ཚོགས། །འདས་དང་མ་འོངས་ད་ལྟར་གསུམ་དུ་བསྡུས་བྱས་ཏེ། །དཔལ་ལྡན་བླ་མ་རྗེ་བཙུན་མཆོག་གི་ཞབས་དྲུང་ཤོག །ཉོན་མོངས་ཚོགས་རྣམས་དག་ཅིང་སེམས་རྟོགས་ནས། །རྒྱལ་བ་མགོན་པོ་བཅོམ་ལྡན་འདས་ཀྱི་སྐུར་གྱུར་ཤོག །མེ་ཏོག་ཤུ་ཀྲ་ལེན་ཅིང་སྤྲོས་པ་ཉིད་སྤངས་ཏེ། །ཉོན་མོངས་མངལ་དུ་མི་འཇུག་བདེ་བ་ལེན་པར་ཤོག །ཡིད་ཆེས་སེམས་ཀྱིས་ལྷན་ཅིག་སྐྱེས་པ་རྙེད་གྱུར་ཏེ། །འབྱོར་པའི་ནུས་པས་རྡོ་རྗེ་ལྟ་བུའི་ལུས་ཐོབ་ཤོག །ཆོས་རྣམས་རོ་གཅིག་བསམ་མི་ཁྱབ་ཀྱི་རོ་ཐོབ་ནས། །རིག་དང་ཚོགས་ཀྱི་སྤྱོད་པས་སེམས་ཅན་འདུལ་གྱུར་ཅིག །ཞི་རྒྱས་དབང་དང་དྲག་པོའི་ཕྲིན་ལས་ཉེར་ཐོབ་སྟེ། །གདུག་པ་ཅན་རྣམས་གཤིན་རྗེ་གཤེད་ལ་མངོན་གཞོལ་ཤོག །ཐུན་མོང་དངོས་གྲུབ་ཐོགས་པ་མེད་པར་ཐོབ་ནས་ཀྱང༌། །བློ་སྟོབས་དམན་པའི་རྣལ་འབྱོར་དེ་ཉིད་ཀྱིས་འཚོ་ཤོག །ནམ་མཁའ་དང་མཚུངས་བདེ་བ་ཆེན་པོའི་ས་ཐོབ་ནས། །བདག་དང་སེམས་ཅན་གཤིན་རྗེ་གཤེད་པོ་ཉིད་གྲུབ་ཤོག །སྒྲུབ་པོ་དད་


DTG047_Page_0143
[མ་དཔེ་གཟིགས་ན་འདིར་གནོན།]

ལྡན་ལུས་ངག་ཡིད་གསུམ་རབ་སྦྱང་ཕྱིར། །རྗེ་བཙུན་པ་རྣམས་མཆོད་པའི་ཆོ་ག་འདི་བྱས་པས། །ཉོན་མོངས་སྒྲིབ་དང་ཤེས་བྱའི་སྒྲིབ་པ་བྱང་གྱུར་ཏེ། །རྒྱུན་ཆད་མེད་དང་ཕུན་སུམ་ཚོགས་སྐུ་ཐོབ་པར་ཤོག །འགྲོ་བ་ཐིབས་པོ་ཉོན་མོངས་ལམ་ལ་རབ་ཏུ་གཞོལ། །སྡིག་པའི་དབའ་ཀློང་འཁྲུག་པའི་ནང་དུ་རྟག་ཏུ་ཞུགས། །རྣམ་སྨིན་ཆུ་སྲིན་གདུག་པ་ཅན་གྱི་ཁར་ཞུགས་ནས། །གཡེང་བས་ངལ་བ་དོན་མེད་མ་བྱེད་དགེ་བ་སྦྱོངས། །རྗེ་བཙུན་འཇམ་དཔལ་གཤིན་རྗེ་གཤེད་མཆོད་པའི་ཆོ་གའི་རིམ་པ་ཞེས་བྱ་བ། སློབ་དཔོན་ཆེན་པོ་ཀྲྀཥྞ་པཎྜི་ཏས་མཛད་པ་རྫོགས་སོ།། །།

སངས་རྒྱས་གཤིན་རྗེ་གཤེད་ནག་པོ་སྒྲུབ་པའི་ཐབས་ཞེས་བྱ་བ།
ནག་པོ།


DTG047_Page_0143
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། ཀྲྀཥྞ་ཡ་མཱ་རི་བུདྡྷ་སཱ་དྷ་ནཾ་ནཱ་མ། བོད་སྐད་དུ། སངས་རྒྱས་གཤིན་རྗེ་གཤེད་ནག་པོ་སྒྲུབ་པའི་ཐབས་ཞེས་བྱ་བ། འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །བླ་མ་རྗེ་བཙུན་བླ་མེད་དང༌། །སྐུ་གསུམ་མགོན་པོ་གཤེགས་ཉིད་ལས། །བཏུད་དེ་དེ་ཉིད་སྒྲུབ་པའི་ཐབས། །བློ་དམན་བདག་གིས་བཤད་པར་བྱ། །སྔགས་པ་བློ་དང་ལྡན་པ་ཡིས། །སྙིང་རྗེ་ཆེན་པོ་རབ་བསྐྱེད་དེ། །སྐད་ཅིག་དྲན་པས་གསལ་བར་བྱ། །གཉིས་པས་རྫོགས་པ་ཐིག་ལེ་ཆེ། །བཟང་པོ་ཉིད་དང་དཔལ་གྱི་མགོན། །སོ་སོ་ལས་ཀྱང་བཞི་འབྱུང་བྱ། །རྫོགས་དང་རབ་ཏུ་གནས་པ་དང། །མངོན་པར་བཏུད་ལ་མཆོད་བྱས་ཏེ། །ཡ་ཡིག་སྤྲུལ་པའི་ལས་བྱའོ། །བཤགས་དང་རྗེས་སུ་ཡི་རང་དང༌། །བསྐུལ་དང་གསོལ་བ་གདབ་པ་དང༌། །སྐྱབས་སུ་འགྲོ་དང་སེམས་བསྐྱེད་ཆེ། །ལུས་དབུལ་ཡོངས་སུ་བསྔོ་བ་བྱའོ། །སྨོན་ལམ་གདབ་དང་གཤེགས་སུ་གསོལ། །ཚངས་པའི་གནས་བཞི་སྔོན་སོང་བས། །རྣམ་ཐར་གསུམ་གྱི་བདག་ཉིད་བསྒོམ། །ཨོཾ་སྭཱ་བྷཱ་ཤུདྡྷ་དྷརྨཱཿ་བྷཱ་ཝ་ཤུདྡྷོ྅ཧཾ། གནས་དང་དག་པའི་ངོ་བོ་དང༌། །བདེ་བ་བཟང་པོ་འདི་བསྒོམ་བྱ། །ཤཱུ་ནྱ་ཏཱ་ཛྙཱ་ན་བཛྲ་སྭ་བྷ་ཝ་ཨཱཏྨ་ཀོ྅ཧཾ། སྐུ་གསུང་ཐུགས་ཀྱི་བདག་ཉིད་ནི། །ཡི་གེ་གསུམ་གྱི་ངོ་བོར་བལྟ། །དག་པའི་ཐིག་ལེ་ནམ་མཁའ་ཡི། །རྒྱུན་གྱིས་གནས་པའི་ཉི་མ་ཧཱུཾ། །གྱུར་པ་རྡོ་རྗེ་གཞལ་མེད་ཁང༌། །ཟླ་བ་རྡོ་རྗེའི་སྦྱོར་བ་ཡིས། །ཆོས་ཀྱི་འབྱུང་གནས་རྣམ་པར་གནས། །སྣ་ཚོགས་པདྨའི་དཀྱིལ་ཉིད་དུ། །ཟླ་བ་ཡི་གེ་བཅུ་དྲུག་བཅས། །རེ་ཕ་ལས་བྱུང་གཉིས་པ་ལས། །གསལ་བྱེད་ཡི་གེ་ཁོར་ཡུག་བལྟ། །


DTG047_Page_0144
[མ་དཔེ་གཟིགས་ན་འདིར་གནོན།]

རོ་མཉམ་པ་ལ་ས་བོན་ཉིད། །ནོར་བུ་རྡོ་རྗེ་སྤྲོ་དང་བསྡུ། །ང་རྒྱལ་གྱུར་པས་རྡོ་རྗེ་སེམས། །དཀར་དང་གནག་དང་དམར་བའི་ཞལ། །ཤེས་རབ་གཉིས་མེད་སྒེག་དང་སྟངས། །གདུག་དང་དུར་ཁྲོད་རྒྱན་གྱིས་སྤྲས། །གྲི་གུག་ཐོད་པ་རྩ་བའི་ཕྱག །རྡོ་རྗེ་རལ་གྲི་གཡས་ན་བསྣམས། །གཡོན་ན་འཁོར་ལོ་ཆུ་སྐྱེས་སོ། །ས་བོན་འོད་ཀྱི་བདག་ཉིད་དཔལ། །རྗེས་སུ་གྱུར་པས་ཁུ་བར་བལྟ། །སྐུ་གསུང་ཐུགས་ཀྱི་རྡོ་རྗེ་གནས། །ཉི་མ་དམར་པོ་ཡ་གཅིག་བཅས། །གྱུར་པས་རྡོ་རྗེ་སྔོན་པོ་སྟེ། །ས་བོན་འོད་ལས་གཤིན་རྗེ་གཤེད། །ཆར་སྤྲིན་གཞོན་ནུ་ལྟ་བུའི་མདོག །གཡས་པ་ཟླ་བ་ལྟ་བུ་སྟེ། །གཡོན་པ་པདྨ་རཱ་གའི་མདོག །རང་གི་ཡུམ་དང་ལྡན་པའི་སྐུ། །རྩ་བའི་ཕྱག་གིས་འཁྱུད་པའི་སྟངས། །རྡོ་རྗེ་རལ་གྲི་འཁོར་ལོ་དང༌། །པདྨ་འོད་ཟེར་ཆེན་པོ་འབར། །གྲི་གུག་རྡོ་རྗེ་མཚན་པ་དང༌། །ཐོད་པ་བྱང་ཆུབ་སེམས་བཀང་བ། །ཡུམ་དང་མཚུངས་པར་འཛིན་པ་སྟེ། །གཅེར་བུ་རྒྱན་བྲལ་སྐྲ་གྲོལ་བའོ། །སྙོམས་པར་འཇུག་པའི་སྟངས་དང་ལྡན། །བརྒྱ་ཕྱེད་མགོ་བོའི་ཕྲེང་བ་ཅན། །པདྨ་ཟླ་བའི་གདན་སྟེངས་སུ། །མ་ཧེ་ཉི་མ་གནས་པའི་སྟེངས། །རྡོ་རྗེ་གཤེད་པོ་བསྒོམ་པར་བྱ། །སྐུ་གསུང་ཐུགས་དང་ལྡན་པ་ཡིས། །སེམས་དཔའི་རྡོ་རྗེ་བདེ་བར་བསྒོམ། །སྐྱེ་མཆེད་ཟླ་བའི་དཀྱིལ་འཁོར་ཏེ། །སེམས་དཔའི་ཡི་གེ་གསལ་བར་བྱ། །ཀྵིཾ་ཛིཾ་ཁཾ་གཾ་ཀཾ་སཾ། །སྤྱི་གཙུག་མགྲིན་པ་སྙིང་གའི་སྟེང༌། །ཟླ་བ་པདྨ་ཉིད་མའི་དཀྱིལ། །དཀར་དམར་གནག་པའི་ཡི་གེ་དགོང༌། །ཨོཾ་ཨཱཿ་ཧཱུཾ། ས་བོན་ལས་འཕྲོས་གཤིན་རྗེ་གཤེད། །ཡབ་ཡུམ་གཉིས་མེད་སྦྱོར་བ་ཡིས། །བདེ་ཆེན་བྱང་ཆུབ་སེམས་ཀྱི་རྒྱུན། །ཕབ་སྟེ་སྤྱི་གཙུག་བབ་གྱུར་པས། །དྲི་མེད་དག་པས་རྡོ་རྗེ་སེམས། །སྤྲོས་དང་བསྡུས་པས་དེ་ཉིད་དོན། །མཉེས་པར་བྱས་ལ་རྒྱུད་ལ་བསྟིམ། །ངེས་དང་གསལ་དང་བརྟན་པ་དང༌། །ཕབ་ལ་ཐིག་ལེ་ཐིག་ལེ་ཆེ། །བྱེད་པ་སྦྱོར་དང་ཕྲ་མ་དང༌། །གོ་རིམས་ནམ་མཁའི་རྡོ་རྗེའོ། །འདི་ནི་འགྲུབ་མེད་འགྲུབ་པ་མེད། །རང་བཞིན་ཉིད་ནས་རྡོ་རྗེ་སེམས། །རྡོ་རྗེ་ནམ་མཁའི་ཁམས་སྦྱོར་བས། །གཉིས་མེད་ཡེ་ཤེས་ཆོས་ཀྱི་སྐུ། །འདི་ནི་རྣམ་པར་དག་པའོ། །ལྡང་བ་སཱ་ལུའི་འབྲས་ལྟར་དུ། །གནས་པ་རྒྱལ་པོའི་དབང་བསྒྱུར་ཞིང༌། །དབྱིངས་ཀྱི་རྡོ་རྗེ་ཐ་མི་དང༌། །སྦྱོར་བའི་བྱང་ཆུབ་


DTG047_Page_0145
[མ་དཔེ་གཟིགས་ན་འདིར་གནོན།]

སེམས་ཕབ་པས། །ས་སྟེངས་ས་འོག་ས་བླ་ཡི། །གནས་སུ་སྐུ་གསུང་ཐུགས་བསམས་ཏེ། །མ་ཡེངས་དོན་གྲུབ་བཟླས་པར་བྱ། །ཨོཾ་ཀཱ་ལ་རཱུ་པ་ཧཱུཾ། འདིས་ནི་བརྒྱ་བྱིན་ལ་སོགས་པ་བརྒྱལ་བར་བྱེད་པའོ། །ཨོཾ་ཡ་མ་རཱ་ཛ། ས་དོ་མེ་ཡ། ཡ་མེ་དོ་རུ། ཎ་ཡོ་ད་ཡ། ཡ་ད་ཡོ་ནིཿ་ར་ཡ་ཀྵེ་ཡ། ཡ་ཀྵེ་ཡཙྪ་ནི་རཱ་མ་ཡ། ཧུའུཾ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། འདིས་ནི་དངོས་གྲུབ་ཆེན་པོ་ཡང་ཐོབ་པར་འགྱུར་རོ། །ཨོཾ་ཧྲཱིཿ་ཥྚྲྀཿ་ཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་སྭཱ་ཧཱ། འདིས་ནི་ལས་ཐམས་ཅད་འགྲུབ་པོ། །ཧ་ཅང་དྲག་མིན་དལ་བ་མིན། །ཅུང་ཟད་རིང་བ་མ་ཡིན་ཏེ། །ཐུང་དང་མི་གསལ་རྣམས་སྤངས་ཏེ། །ཚིག་གི་བར་དུ་མ་ཆོད་པའི། །ཆེན་པོས་བཟླས་པ་འགྲུབ་པར་འགྱུར། །འདི་ནི་བསྒྲུབ་པའི་དོན་དུ་བྱས། །ལས་ཀུན་བླ་མ་བརྒྱུད་ཤེས་བྱ། །མི་ཤེས་པ་དག་དགྲོལ་བའི་ཕྱིར། །བདག་གིས་རྟོགས་པར་གྱུར་པ་བརྩམས། །འདི་ལས་འབྱུང་བའི་བསོད་ནམས་ཀྱིས། །དཔལ་ལྡན་གཤིན་རྗེ་གཤེད་འགྱུར་ཤོག །སངས་རྒྱས་གཤེན་རྗེ་གཤེད་ནག་པོའི་སྒྲུབ་ཐབས། ནཱ་ད་ཀུ་བེ་ར་ལས་བྱུང་བའི་དོན། ཀུན་ད་ནཀྵེ་རི་ན་བཞུགས་པའི་མཁས་པ་ཆེན་པོ་རྣལ་འབྱོར་པ་ནག་པོ་ཞབས་ཀྱིས་མཛད་པ་རྫོགས་སོ།། །།རྣལ་འབྱོར་པ་པྲཛྙཱ་ཤཱི་ཛྙཱ་ན་ཀཱིརྟིས་རང་འགྱུར་དུ་མཛད་པའོ།།

གཤིན་རྗེ་གཤེད་ནག་པོའི་སྒྲུབ་པའི་ཐབས་ཞེས་བྱ་བ།
ཀ་མ་ལ་རཀྵི་ཏ།


DTG047_Page_0145
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། ཀྲྀཥྞ་ཡ་མཱ་རི་སཱ་དྷ་ནཾ་ནཱ་མ། བོད་སྐད་དུ། གཤིན་རྗེ་གཤེད་ནག་པོའི་སྒྲུབ་པའི་ཐབས་ཞེས་བྱ་བ། མགོན་པོ་གཤིན་རྗེ་གཤེད་ལ་ཕྱག་འཚལ་ལོ། །བླ་མ་ལ་གུས་དེ་རྗེས་ལ། །གཤིན་རྗེ་གཤེད་ནག་རྡོ་རྗེ་ནི། །རང་འོད་ཡན་ལག་འདུས་པ་ཡི། །བདེ་བ་རྒྱས་ལ་ཕྱག་འཚལ་ཏེ། །གཤིན་རྗེ་གཤེད་ནག་སྒྲུབ་པའི་ཐབས། །དེ་ཉིད་བློ་ཡིས་བཤད་པར་བྱ། །བདེ་བའི་སྟན་ལ་འདུག་ནས་ནི། །སྙིང་རྗེས་སྐད་ཅིག་ལྷར་བསྐྱེད་ལ། །སྙིང་གར་པདྨ་ཡ་ཡིག་དགོད། །འོད་འཕྲོས་སྦྱངས་ཏེ་བླ་མ་དགུག །བཀོད་པ་བསམས་ལ་ཕྱག་དང་ནི། །མཆོད་པ་ལ་སོགས་ཚོགས་བསགས་ཏེ། །བློ་ཡིས་མཁའ་ལ་གཤེགས་སུ་གསོལ། །དེ་ནས་ཚངས་པའི་གནས་བཞི་བསྒོམ། །རང་བཞིན་རྣམས་དང་བྲལ་བས་རྒྱུ། །འདི་ལྟར་ཡང་ན་མཚན་མ་ནི། །རྣམ་པར་དཔྱད་པ་མེད་པས་ན། །འདི་ལྟར་སྨོན་


DTG047_Page_0146
[མ་དཔེ་གཟིགས་ན་འདིར་གནོན།]

ལམ་རྣམ་པར་སྤངས། །ཨོཾ་སྭ་བྷཱ་ཝ་ཤུདྡྷཿ་སརྦ་དྷརྨཱཿ་སྭ་བྷཱ་ཝ་ཤུདྡྷོ྅ཧཾ། དེ་ལྟར་བརྟན་པར་བསམས་ནས་ནི། །མ་ཡིག་ལས་བྱུང་ཉི་མ་ལས། །སྣ་ཚོགས་ཧཱུཾ་ལས་རྒྱ་གྲམ་བསམ། །ཧཱུཾ་ལས་འོད་འཕྲོས་ར་བའོ། །དེ་དཀྱིལ་པཾ་ལས་པདྨ་ནི། །དམར་པོའི་སྟེང་དུ་ཟླ་བ་སྟེ། །དེ་ལས་དབྱངས་ཡིག་རྣམ་པར་བསམ། །དེ་སྟེང་རཾ་ལས་ཉི་མ་སྟེ། །གསལ་བྱེད་བཀོད་ལ་གསལ་བར་བྱས། །དེ་ལས་གོང་བུ་ཧཱུཾ་དུ་གྱུར། །དེ་ལས་རྡོ་རྗེ་ཧཱུཾ་ལྡན་བསམ། །དེ་ལས་རྡོ་རྗེ་སེམས་དཔའ་ནི། །ཞལ་གཞན་གཤིན་རྗེ་གཤེད་དང་འདྲ། །རྩ་བའི་ཞལ་ནི་དཀར་བར་བསྒོམ། །ཐུགས་ཀར་ས་བོན་གསལ་བ་ལས། །འོད་འཕྲོས་བཀུག་ལ་ཞལ་ཞུགས་པས། །སྙིང་གར་ཞུ་ནས་ཐིམ་བྱས་ལ། །མཁའ་གསང་སྦྱངས་ལ་གཏོར་མ་བསམ། །ཞུ་བས་སྐར་མདའ་ལམ་ཞུགས་བཞིན། །མཁའ་གསང་ནང་དུ་བབས་གྱུར་པས། །བདག་ཉིད་ཡུམ་དང་བཅས་པ་ཞུ། །དེ་ལས་ཐིག་ལེ་བཞི་འཕྲོས་པས།། ལྷ་མོ་བཞི་ཡིས་བསྐུལ་བར་བསམ། །རྗེ་བཙུན་སྟོང་ཉིད་ལ་བཞེངས་ལ། །ཁམས་གསུམ་ཀུན་གྱི་གཏི་མུག་སེལ། །རྗེ་བཙུན་ཆོས་ཉིད་ལ་བཞེངས་ལ། །སྙིང་རྗེ་སེམས་ཅན་དོན་མཛོད་ཅིག །དེ་རྗེས་དེ་ཡང་ཐིམ་གྱུར་པས། །ཐིག་ལེའི་ངོ་བོར་བལྟ་བྱས་ལ། །ཞུ་བས་ཡོངས་སུ་གྱུར་པ་སྐྱེས།། ཡ་ཡིག་སྔོན་པོ་ཉི་དཀྱིལ་འཁོར། །དེ་ལས་རྡོ་རྗེ་ས་བོན་བཅས། །འོད་འཕྲོས་བསྟིམས་ཏེ་གྱུར་པ་ལས། །བདག་ཉིད་འཇམ་དཔལ་གཤིན་རྗེ་གཤེད། །རྩ་བའི་ཞལ་ནི་སྔོན་པོ་ལ། །གཡས་དཀར་གཡོན་པ་དམར་བ་སྟེ། །རང་གི་ཡུམ་དང་ལྡན་པའི་ལུས། །རྡོ་རྗེ་རལ་གྲི་འཁོར་ལོ་དང༌། །ཆུ་སྐྱེས་གྲི་གུག་ཐོད་པའི་ཕྱག །མ་ཧེ་གདན་བཅས་གསུས་པོ་ཆེ། །གླང་པོ་སྟག་གི་པགས་པ་མནབས། །མཆེ་གཙིགས་སྤྲུལ་གྱི་ཆས་ལྡན་བསྐྱེད། །སེམས་ལྡན་འོད་འཕྲོས་ཡེ་ཤེས་དགུག །ཛཿ་ཧཱུཾ་བཾ་ཧོཿ། དེ་ནས་མིག་དང་རྣ་བ་སྣ། །ལྕེ་དང་ལུས་ཡིད་རྣམས་ལ་ཡང༌། །མངོན་ཤེས་བསྒྲུབ་ཕྱིར་ལྷ་བསྒོམ་བྱ། །ཀྵིཾ་ཛིཾ་ཁཾ་གཾ་ཀཾ་སཾ། །དེ་ནས་སྐུ་གསུང་ཐུགས་གསུམ་ལ། །ཨོཾ་ཨཱཿ་ཧཱུཾ་གསུམ། བཀོད་པ་ལྷ་རུ་དམིགས་པར་བྱ། །དེ་ནས་མེ་ལྷ་སྤྱན་དྲངས་ཏེ། །མཆོད་བཅས་པ་ཡིས་ཡམ་ཤིང་གིས། །སྔགས་པའི་དངོས་གྲུབ་འཇིག་པར་བྱེད། །ཡམ་ཤིང་དབང་དུ་བྱས་པ་ཡི། །སྲེག་རྫས་མཆོད་


DTG047_Page_0147
[མ་དཔེ་གཟིགས་ན་འདིར་གནོན།]

རྫས་རྣམ་པ་ནི། །དཀར་གསུམ་མངར་གསུམ་ཐུག་པ་དང༌། །འབྲས་ཆན་ནས་ཆན་ཅན་གྱི་ཚོགས། །སྨན་གྱི་ཚོགས་ནི་ལ་དུ་དང༌། །དེ་སོགས་རྫས་དང་ཏིལ་དག་ནི། །གཡས་ཀྱི་ཕྱོགས་སུ་གཞག་པར་བྱ། །སྤོས་དང་མེ་ཏོག་མར་མེ་དང༌། །དྲི་དང་ཞལ་ཟས་མཆོད་པའི་ཚོགས།། གཡོན་གྱི་ཕྱོགས་སུ་གཞག་པར་བྱ། །ཀུ་ཤ་ཡོན་ཆབ་གཡས་ཡིན་ཏེ། །མར་དང་རྡོ་རྗེ་དྲིལ་བུ་དང༌། །དགང་གཟར་བླུགས་གཟར་མདུན་དུའོ། །སྲེག་རྫས་མཆོད་རྫས་རིམ་པའོ། །མངོན་པར་རྟོགས་པའི་བྱ་བ་ནི། །དག་པའི་ཁྲུས་བྱས་ལུས་དྲིས་བྱུག །གོས་དང་རྒྱན་ནི་བགོ་བྱ་སྟེ། །ཀུ་ཤ་བདེ་བའི་སྟན་ཉིད་ལ། །ཤར་དུ་ཁ་བལྟས་འདུག་བྱས་ཏེ། །སྙིང་བརྩེ་བ་ཡི་བསམ་པ་ཡིས། །ལས་ཀྱི་བུམ་པ་བྱིན་བརླབས་ནས། །རྫས་རྣམས་དག་པར་བསང་བར་བྱ། །ཨོཾ་ཁཌྒ་དྷྲྀཀ །དེ་ནས་མཆོད་པ་སོ་སོ་ཡི། །ཕྱག་རྒྱ་བཅིང་ཞིང་སྔགས་བཟླས་ཏེ། །ཚུལ་བཞིན་བྱིན་གྱིས་བརླབ་པར་བྱ། །ཨོཾ་ཧྲཱིཿ་ཥྚྲྀཿ་ཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ། མཆོད་ཡོན་ལའོ། །ཨོཾ་བཛྲ་དྷཱུ་པེ་ཨཱཿ་ཧཱུཾ། བདུག་པའིའོ། །ཨོཾ་བཛྲ་པུཥྤེ་ཨཱཿ་ཧཱུཾ། མེ་ཏོག་ལའོ། །ཨོཾ་བཛྲ་དྷཱུ་པེ་ཨཱཿ་ཧཱུཾ། མར་མེ་ལའོ། །ཨོཾ་བཛྲ་གཎྡྷེ་ཨཱཿ་ཧཱུཾ། དྲི་ལའོ། །ཨོཾ་བཛྲ་ནཻ་ཝི་ཏྱེ་ཨཱཿ་ཧཱུཾ། ཞལ་ཟས་ལའོ། །ཨོཾ་བཛྲ་ཤབད་ཨཱཿ་ཧཱུཾ། རོལ་མོ་ལའོ། །དེ་ནས་དངོས་མེད་ངང་ཉིད་ལས། །སྐྱེ་བ་མེད་ལ་པདྨ་ཡི། །གཞལ་ཡས་ཁང་པ་ཆུ་གདན་ཅན། །བསམ་པ་བྲམ་ཟེའི་ཁྱིམ་དང་ནི། །དགེ་འདུན་རྒྱུན་བཞག་མེ་དག་ལས། །བླང་ལ་མེ་ནི་སྤར་བྱས་ཏེ། །བསངས་ལ་གཟི་བསྐྱེད་མེ་པྲ་བརྟག །དེ་ནང་བྱང་ཆུབ་ལྔ་དག་ལས། །གྱུར་པའི་པདྨའི་གདན་སྟེང་དུ། །གྲུ་གསུམ་མེ་ལས་བྱུང་བ་ཡི། །མེ་ལྷ་དཀར་པོ་ཞལ་གསུམ་པ། །རང་གི་རིགས་དང་ལྡན་པའི་ལུས། གཡས་ན་སྤྱི་བླུགས་མི་འཇིགས་སྦྱིན། །གཡོན་ན་དབྱུག་པ་ཕྲེང་བ་འཛིན། །གྲི་གུག་ཐོད་པ་རྩ་བའི་ཕྱག །གཡས་བརྐྱང་བ་ཡི་ཕྱག་གིས་མནན། །ཁྲོ་བོའི་རྒྱན་གྱིས་བརྒྱན་པའོ། །དེ་ནས་ཐུགས་ཀྱི་ས་བོན་ལས། །ཡེ་ཤེས་མེ་ནི་དགུག་པར་བྱ། །ཨོཾ་ཊཱ་ཀྐི་ཧཱུཾ་ཛཿ། བསངས་ལ་དམ་ཚིག་གཞུག་པར་བྱ། །ཨོཾ་མུངྒ་ར་ཛཿ། ཨོཾ་དཎྜ་ཧཱུཾ། ཨོཾ་པདྨ་བཾ། ཨོཾ་ཁཌྒ་ཧོཿ། དེ་ནས་སྐྱེ་མཆེད་སྐུ་གསུང་ཐུགས། །བྱིན་བརླབས་དབང་བསྐུར་མཆོད་པ་འབུལ། །བསྟོད་པ་ཞལ་དུ་རེ་ཕ་བཀོད། སྲེག་རྫས་


DTG047_Page_0148
[མ་དཔེ་གཟིགས་ན་འདིར་གནོན།]

བྱུར་བུར་དབུལ་བར་བྱ། །ཡཀྵེ་མ་མེ་ད། ཡཙྪ་ནི་རཱ་ཛ་ས་རུ། ཎ་ཡོ་ནི་ར། རྡོ་རྗེ་འཁོར་ལོ་རིན་ཆེན་པད། །རལ་གྲི་ཐོ་བ་དབྱུག་པ་དང༌། །པདྨ་དང་ནི་རལ་གྲི་ཆེ། །འཁོར་ལོ་རྡོ་རྗེ་པད་རལ་གྲི། །སོ་སོར་སྔགས་ཀྱིས་ལྷར་བསྐྱེད་བྱ། །དེ་ནས་སྐྱེ་མཆེད་བྱིན་བརླབས་ཏེ། །མིག་ནི་ས་ཡི་སྙིང་པོ་ལ། །རྣ་བ་ཕྱག་ན་རྡོ་རྗེའི་ཚུལ། །སྣ་ནི་ནམ་མཁའི་སྙིང་པོ་དགོད། །ལྕེ་ལ་འཇིག་རྟེན་དབང་བྱུག་བཞག །སྒྲིབ་པ་རྣམ་སེལ་ལུས་ལ་བཤད། །ཡིད་ལ་ཀུན་དུ་བཟང་པོའོ། །ཀྵིཾ་ཛིཾ་གཾ་ཀཾ་སཾ། །ཐུགས་ལ་ཞེ་སྡང་རྡོ་རྗེ་སྟེ། །གསུངས་ལ་འདོད་ཆགས་རྡོ་རྗེ་དགོད། །གཏི་མུག་རྡོ་རྗེ་སྐུ་ལའོ། །ཨོཾ་ཨཱཿ་ཧཱུཾ། དེ་ནས་དབང་བསྐུར་དགུག་གཞུག་བྱ། །གསང་བའི་མཆོད་པས་མཆོད་བྱས་ལ། །རྡོ་རྗེ་དྲིལ་བུ་ལྡན་པ་ཡིས། །གཤིན་རྗེའི་དགྲ་ལ་བསྟོད་པ་བྱ། །དེ་ནས་སྲེག་རྫས་བསངས་ནས་ནི། །བདུད་རྩིའི་ངོ་བོར་བསྒྲུབས་ནས་ཀྱང༌། །བདུད་རྩི་མེ་ལྷའི་ཞལ་ཉིད་དུ། སྲེག་རྫས་རྣམས་ནི་ཕུལ་བར་བྱ། །དཀྱིལ་འཁོར་བཟང་པོ་མཉེས་པར་བྱ། །གཙོ་བོ་ལ་འབུམ་འཁོར་ལ་ཁྲི། །དེ་བཞིན་སྟོང་དང་བརྒྱ་རྩ་བརྒྱད། །ལྔ་བཅུ་ཉི་ཤུ་རྩ་གཅིག་བདུན། །གཙོ་དང་འཁོར་གྱི་བྱེ་བྲག་གིས། །གོ་རིམས་བཞིན་དུ་དབུལ་བར་བྱ། །སོ་སོ་རྩ་བའི་སྔགས་དག་ལ། །གསོལ་བ་གདབ་ལ་དབང་བསྐུར་བས། །རྡོ་རྗེ་འཛིན་པ་སྤྱི་བོར་བལྟ། །དེ་ལས་ས་བོན་ཡི་གེ་ལས། །འཕྲོས་པས་ཡི་གེ་ཉི་མར་བསྡུ། །དེ་ནས་རྡོ་རྗེའི་བཟླས་པ་ནི། །ཞི་རྒྱས་དབང་དང་དྲག་ཚུལ་དུ། །གཏོར་མ་ལྡན་པས་བཟླས་པ་བྱ། །དེ་ནས་ལྡང་བར་བརྩམ་པ་ནི། །སེམས་ཅན་དོན་ལ་སེམས་པ་ཡི། །ཡེ་ཤེས་སེམས་དཔའ་གཤེགས་སུ་གསོལ། །ཨོཾ་ཨཱཿ་ཧཱུཾ་མུཿ། ཡིད་བཞིན་འཁོར་དང་རྡོ་རྗེ་བཟླས། །གཙོ་མོ་ཁྲོ་ཚུལ་ལོ་མ་གཙིགས། །ཕྲ་བའི་ཚུལ་གྱིས་བཟླས་པར་བྱ། །ཨོཾ་ཧྲཱིཿ་ཥྚྲྀཿ་ཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་སྭཱ་ཧཱ། འདིས་ནི་ལས་ཀུན་བྱེད་པ་སྟེ། །འདོད་པ་ཐམས་ཅད་ཡིད་བཞིན་འགྱུར། །ཡཾ་ལས་རླུང་སྟེ་རཾ་ལས་མེ། །ཀཾ་ལས་ཐོད་པ་ཨ་ལས་སྣོད། །འདབ་བརྒྱད་ཤ་ལྔ་བདུད་རྩི་ལྔ། །ཧཱུཾ་ལས་ཁ་དག་བ་ཨོཾ་ཨཱཿ་ཧཱུཾ། །བསམས་ཏེ་མེ་སྦར་ཞུ་བས་བསྡུ། །སྦྱངས་ཏེ་ཨོཾ་ལས་ས་འོད་འཕྲོས་པས། །ཡེ་ཤེས་བཀུག་ལ་བསྟིམ་བྱིན་བརླབ། །སྦུ་གུས་དྲངས་ནས་གསོལ་སྦྱིན་བྱ། །ལྷ་ལ་སོགས་པའི་


DTG047_Page_0149
[མ་དཔེ་གཟིགས་ན་འདིར་གནོན།]

ཚོགས་བཅས་རྣམས། །ལྷ་རྫས་རྡོ་རྗེ་ཡོངས་སུ་དག་པའི་གཏོར་མ་འདི། །གྲྀཧྞ་ཁཱ་ཧི་གྲྀཧྞ་ཁཱ་ཧི་མ་མ་ཤཱནྟི་དཀུ་རུ་སྭཱ་ཧཱ། འགྲོ་འཆག་ཉལ་འདུག་ལ་སོགས་ལ། །དཔའ་བོ་ང་རྒྱལ་བཏང་མི་བྱ། །དངོས་པོ་དངོས་བྲལ་སྐྱེ་དང་བྲལ། །གཡོ་བ་གཡོ་མེད་བདེ་བ་ཅན། །ཐབས་དང་ཤེས་རབ་ལས་འབྱེད་ཅིང༌། །དོན་གསུམ་གཉིས་སུ་མེད་ལ་བཞག །བདག་གི་སྒྲུབ་ཐབས་སྦྱར་བ་འདིས། །འགྲོ་ཀུན་གཤིན་རྗེ་གཤེད་ཐོབ་ཤོག །དཔལ་གཤིན་རྗེ་གཤེད་ནག་པོ་སྒྲུབ་པའི་ཐབས་ཞེས་བྱ་བ། རྒྱ་གར་གྱི་མཁན་པོ་ཆེན་པོ་ཀ་མ་ལ་རཀྵི་ཏས་མཛད་པ་རྫོགས་སོ།། །། རྣལ་འབྱོར་པ་བསོད་སྙོམས་པ་པྲ་ཛྙཱ་ཤྲཱི་ཛྙཱ་ན་ཀཱི་རྟིས་རང་འགྱུར་དུ་མཛད་པའོ།།

ཁྲོ་བོ་ཐོ་བ་གཤིན་རྗེ་གཤེད་ཀྱི་སྒྲུབ་ཐབས་ཞེས་བྱ་བ།
མར་མེ་མཛད།


DTG047_Page_0149
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། མུངྒ་ར་ཀྲོ་དྷ་ཡ་མཱ་རི་སཱ་དྷ་ནཾ་ནཱ་མ། བོད་སྐད་དུ། ཁྲོ་བོ་ཐོ་བ་གཤིན་རྗེ་གཤེད་ཀྱི་སྒྲུབ་ཐབས་ཞེས་བྱ་བ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །ཨིནྡྲ་ནཱི་ལའི་འོད་མངའ་ཞིང༌། །འཇིག་ཚོགས་བདུད་ལས་རྣམ་རྒྱལ་ནི། །མཐར་བྱེད་ཆེ་ལ་ཕྱག་འཚལ་ཏེ། །དེ་ཡི་སྒྲུབ་ཐབས་བཤད་པར་བྱ། །སྐད་ཅིག་ལྷ་ཡི་རྣལ་འབྱོར་གནས། །སྐྱེས་པའི་འོད་ཀྱིས་འགྲོ་བ་སྦྱངས། །འཁོར་ལོ་ཆེན་པོ་སྤྱན་དྲངས་ནས། །རྣམ་དག་དགུ་ཡི་ཚོགས་བསགས་བྱ། །བྱམས་དང་སྙིང་རྗེ་དགའ་བཏང་སྙོམས། །ཚངས་པའི་རྒྱུན་དང་ལྡན་པ་ཡི། །སྟོང་པ་ཆེན་པོ་བསྒོམ་པར་བྱ། །བདུད་ཀྱི་ཕྱོགས་རྣམས་འཇིག་བྱེད་ཕྱིར། །སྲུང་བའི་འཁོར་ལོ་བསྒོམ་པར་བྱ། །ཆུ་སྐྱེས་ཉི་མའི་སྟེང་ཉིད་དུ། །ཡ་ལས་རྡོ་རྗེ་ཐོ་བ་ནི། །རྩེ་མོ་ཉི་ཤུར་ལྡན་པ་ཡི། །ལྟེ་བར་ས་བོན་རབ་བཞག་ནས། །སྤྲོ་བསྡུ་བྱས་ནས་ང་རྒྱལ་བསམ། །ཨོཾ་སརྦ་བུདྡྷ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། གྱུར་པས་ཐོ་བ་གཤིན་རྗེ་གཤེད་དུ་བསྒོམ། །སྐུ་མདོག་སྔོན་པོ་འཇིགས་ཆེན་པོ། །རང་གི་རིག་མས་འཁྱུད་ཅིང་མཛེས། །གཡས་གཡོན་ཞལ་ནི་དཀར་དང་དམར། །གྲི་གུག་ཐོ་བ་རལ་གྲི་དང༌། །ཐོད་པ་འཁོར་ལོ་རིན་ཆེན་མཛེས། །སྟག་གི་པགས་པ་ཤམ་ཐབས་སུ། །མནབས་ཤིང་གཡས་བསྐུམ་གཡོན་བརྐྱང་བ། །ཀླུ་དང་དུར་ཁྲོད་འཁྲུགས་པས་བརྒྱན། །མཆེ་གཙིགས་སྤྱན་དགུར་འཇིགས་པའི་མདངས། །མེ་དཔུང་དཀྱིལ་དུ་གནས་པ་བསྒོམ། །སྐུ་གསུང་ཐུགས་དང་སྐྱེ་མཆེད་


DTG047_Page_0150
[མ་དཔེ་གཟིགས་ན་འདིར་གནོན།]

དྲུག །རྡོ་རྗེ་གསལ་བར་བསྐྱེད་པར་བྱ། །དབང་རྟགས་གཤིན་རྗེ་གཤེད་ཀྱིས་བརྒྱན། །ཡིག་འབྲུ་བཞི་ཡིས་དགུག་གཞུག་བྱ། །བུ་ག་ཆེན་པོ་སྤྲོས་པས་མཆོད། །རྡོ་རྗེ་དྲིལ་བུ་ལྡན་པས་བསྟོད། །ཧཱུཾ་ཧཱུཾ་རྡོ་རྗེ་སྟོབས་པོ་ཆེ། །རབ་འཇིགས་མི་མཐུན་ཟད་མཛད་པ། །རྡོ་རྗེ་སྐུ་དབྱེར་མེད་པའི་ལྷ། །ཐོ་བ་རྡོ་རྗེ་ཕྱག་འཚལ་བསྟོད། །སྒྲོན་མ་འོ་མར་ལྡན་པ་ཡིས། །ཁ་ཡི་བུ་ག་དག་པར་བསམ། །སངས་རྒྱས་རྣམས་ཀྱི་ཐུགས་བསྐུལ་བས། །འགྲོ་བ་མ་ལུས་སྦྱང་བར་བྱ། །སྔགས་ཀྱི་རྒྱལ་པོ་རྗེས་དྲན་པས། །ཁྲི་དང་འབུམ་དུ་བཟླས་པར་བྱ། །ཨོཾ་གུངྒ་ར་དྷྲྀཀ་ཧཱུཾ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཕྱག་རྒྱ་བཀྲོལ་ནས་ངལ་བསོ་བ། །གཅིག་དང་དུ་མ་ལས་གྲོལ་བ། །རང་བཞིན་མེད་པའི་སྙིང་པོ་ཅན། །ཆོས་ཀུན་གྱི་ནི་བདག་པོ་ཅན། །སེམས་ཀྱི་བསྐལ་བར་བསྒོམ་པར་བྱ། །བདག་གིས་རྒྱུད་དང་བླ་མ་ལས། །རྙེད་པའི་དྲིན་འདི་ཐོབ་པ་དེས། །བསྐུལ་ནས་སྒྲུབ་ཐབས་འདི་བྱས་པས། །ཐམས་ཅད་འབྲས་བུ་མངོན་རྙེད་ཤོག །ཁྲོ་བོ་ཐོ་བ་གཤིན་རྗེ་གཤེད་ཀྱིས་གྲུབ་ཐབས་ཞེས་བྱ་བ། རྒྱ་གར་གྱི་མཁན་པོ་མར་མེ་མཛད་ཀྱིས་མཛད་པ་རྫོགས་སོ།།

དབྱུག་པ་གཤིན་རྗེ་གཤེད་རྣམ་པར་འཇོམས་པ་ཞེས་བྱ་བའི་སྒྲུབ་ཐབས།
དཱི་པཾ་ཀ་ར།


DTG047_Page_0150
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། དཎྜ་དྷྲྀཀ་བི་དཱ་ར་ཡ་མཱ་རི་སཱ་དྷ་ནཾ་ནཱ་མ། བོད་སྐད་དུ། དབྱུག་པ་གཤིན་རྗེ་གཤེད་རྣམ་པར་འཇོམས་པ་ཞེས་བྱ་བའི་སྒྲུབ་ཐབས། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །ཐུགས་ཀྱི་དེ་ཉིད་གཙོ་དང་མཚུངས་པ་ཡི། །ལྷ་ནི་བདུད་དགྲ་དབྱུག་པ་གཤིན་རྗེ་གཤེད། །ལས་རྣམས་ཐམས་ཅད་མཐར་མཛེད་ལ་བཏུང་ཏེ། །མཆོག་གི་དངོས་གྲུབ་བསྒྲུབ་ཕྱིར་བཤད་པར་བྱ།། །རང་ལུས་ཕྱག་རྒྱ་ཆེན་པོར་དྲན། །ཐེག་པ་ཆེན་པོའི་བློར་བྱས་ནས། །བླ་མ་རྗེ་བཙུན་རྣམས་ལ་ནི། །བསོད་ནམས་ཚོགས་རབ་བསག་པར་བྱ། །གཉིས་མེད་སངས་རྒྱས་གཉིས་སུ་མེད། །རྐྱེན་སྐྱེས་ཆོགས་ཀུན་ཆུ་ཟླ་འདྲ། །དེ་ཉིད་སྐྱེ་མེད་ཤེས་བྱའི་ཕྱིར། །དག་པའི་སྔགས་ཀྱིས་བསྐུལ་ལ་བསྒོམ། །ཆད་མེད་རྒྱུན་ཆད་མེད་པའི་སེམས། །ནམ་མཁའི་ཐིགས་པ་དེ་ཉིད་ལས། །སྲུང་བའི་འཁོར་ལོ་གདན་བསམས་ཏེ། །ཛ་ལས་དབྱུག་པ་དཀར་དང༌། །སྐུ། །རྩ་ཞལ་དཀར་ལ་སྔོ་དམར་ཞལ། །རང་གི་རིག་མར་མཚུངས་པའི་ལུས། །གྲི་གུག་དབྱུག་པ་རལ་གྲི་དང༌། །ཐོད་པ་འཁོར་ལོ་ཆུ་སྐྱེ་འཛིན།།


DTG047_Page_0151
[མ་དཔེ་གཟིགས་ན་འདིར་གནོན།]

གཡས་བསྐུམ་གཡོན་བརྐྱང་བ་ཡི་ཞབས། །ཆུ་སྐྱེས་འོད་ཟེར་རྣོན་པོ་མནན། །མི་མགོའི་ཕྲེང་དཔྱངས་སྟག་ལྤགས་མནབས། །ཀླུ་དང་རུས་རྒྱན་དབུས་མཛེས་པ། །བསྐྱེད་ལ་ལུས་ངག་ཡིད་གསུམ་དང༌། །སྐྱེ་མཆེད་རྣམས་ལ་འདིས་བྱིན་བརླབ། །ཨོཾ་ཨཱཿ་ཧཱུཾ། ཀྵིཾ་ཇིཾ་ཁཾ་གཾ་ཀཾ་སཾ། །དབང་བསྐུར་ཅོད་པན་མི་བསྐྱོད་བསམ། ཛཿ་ཧཱུཾ་བཾ་ཧོཿ་ས་བྱིན་གྱིས་བརླབ། །བྱང་ཆུབ་སེམས་ཀྱི་སྤྲུལ་པས་མཆོད། །དེ་ནས་རྡོ་རྗེ་དྲིལ་ལྡན་པས། །བསྟོད་པའི་རྒྱལ་པོ་བརྗོད་པར་བྱ། །སངས་རྒྱས་རྡོ་རྗེ་ཀུན་དུ་བཟང༌། །མཉམ་པའི་རྡོ་རྗེ་མི་བསྐྱོད་པ། །རྡོ་རྗེ་གསང་བ་དབྱིངས་ཆེན་པོ། །ཡེ་ཤེས་རྡོ་རྗེ་ཕྱག་འཚལ་བསྟོད། །ཡིག་འབྲུ་གསུམ་གྱིས་བྱིན་བརླབས་པའི། །བདུད་རྩི་རྡོ་རྗེ་ལྕེ་ཡིས་མྱང༌། །སྤྲོ་དང་བསྡུ་བ་བྱས་ནས་ཀྱང༌། །གསང་སྔགས་ཁྲི་རུ་བཟླས་པ་བྱ། །ཨོཾ་བཛྲ་དཎྜ་དྷྲྀཀ་ཧཱུཾ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ས་ཆུ་མེ་རླུང་འབྱུང་བའི་རིམ། །ཡེ་ཤེས་ཐིག་ལེར་བྱས་ནས་ཀྱང༌།། གཟུགས་ནི་སྒྲ་ཉིད་རང་བཞིན་དག །བདག་མེད་སྙིང་པོ་བསྒོམ་པར་བྱ། །མ་རིག་མུན་པ་འཇོམས་བྱེད་སྒྲོན་མའི་མཆོག །བདུད་དགྲ་ཁྲོ་བོའི་རྒྱལ་པོའི་སྒྲུབ་ཐབས་འདིས། །འགྲོ་བའི་འཇིགས་ཆེན་ངེས་དགྲ་བཅོམ་ནས་ཀྱང༌། །ཐམས་ཅད་གཤིན་རྗེ་གཤེད་པོ་ཉིད་མཚུངས་ཤོག །དབྱུག་པ་གཤིན་རྗེ་གཤེད་རྣམ་པར་འཇོམས་པ་ཞེས་བྱ་བའི་སྒྲུབ་ཐབས། སློབ་དཔོན་ཆེན་པོ་དཱི་པཾ་ཀ་རས་མཛད་པ་རྫོགས་སོ།། །།རྣལ་འབྱོར་པ་པྲཛྙཱ་ཤྲཱི་ཛྙཱ་ན་ཀཱི་རྟིས་རང་འགྱུར་དུ་མཛད་པའོ།།

རལ་གྲི་གཤིན་རྗེ་གཤེད་གཏུམ་པོའི་སྒྲུབ་ཐབས་ཞེས་བྱ་བ།


DTG047_Page_0151
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། ཙཎྜ་ཁཌྒ་ཡ་མཱ་རི་སཱ་དྷ་ནཾ་ནཱ་མ། བོད་སྐད་དུ། རལ་གྲི་གཤིན་རྗེ་གཤེད་གཏུམ་པོའི་སྒྲུབ་ཐབས་ཞེས་བྱ་བ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །སྟོང་པ་ཞི་བ་ལས་ནི་རྡོ་རྗེའི་སྐུ། །བདུད་མཐར་མཛད་པ་རབ་ཏུ་གཏུམ་པའི་ཞལ། །སེམས་ཅན་རྗེས་འཛིན་ཐུགས་རྗེ་ཆེན་པོར་ལྡན། །རལ་གྲི་ཆེ་ལ་བཏུད་དེ་བཤད་པར་བྱ། །སྐད་ཅིག་དྲན་པའི་ལྷར་བསྐྱེད་ནས། །དམ་པ་དམིགས་ལ་ཚོགས་བསག་བྱ། །ཚངས་པའི་གནས་བཞི་སྔོན་འགྲོ་བས། །སྟོང་པ་དང་ནི་འཁོར་ལོ་བསྒོམ། །པདྨ་འོད་ཟེར་རྣོན་པོ་སྟེ། །རཾ་ལས་ཤུགས་ཅན་གྱུར་པའི་སྐུ། །མརྒད་ལྗང་གུའི་མདོག་འདྲ་བ། །སྔོ་དང་དཀར་པོ་གཡས་གཡོན་ཞལ།།


DTG047_Page_0152
[མ་དཔེ་གཟིགས་ན་འདིར་གནོན།]

གྲི་གུག་རལ་གྲི་འཁོར་ལོ་དང༌། །ཐོད་པ་རིན་ཆེན་ཆུ་སྐྱེས་འཛིན། །དཔའ་བོའི་རྒྱན་དང་ཀླུ་ཡིས་སྤྲས། །དབུ་སྐྲ་གྱེན་འགྲེང་མེ་དཔུང་དཀྱིལ། །སྟག་ལྤགས་མན་བས་ཤིང་གཡོན་བརྐྱང་བ། །བསྐྱེད་པའི་སྐུ་ལ་འདི་ལྟ་སྟེ། །སྙིང་གར་ཧཱུཾ་ལས་རྡོ་རྗེ་ཐུགས། །མགྲིན་པར་ཨཱཿ་ལས་རྡོ་རྗེ་གསུང། །སྤྱི་བོར་ཨོཾ་ལས་སྐུ་རྡོ་རྗེ། །མཐིང་དམར་དཀར་ཞིང་མཚོན་ཆར་ལྡན། །ས་སྙིང་དཀར་པོ་མིག་ལ་ཀྵིཾ། །རྡོ་རྗེ་འཛིན་སྔོན་རྣ་བར་ཛིཾ། །ནམ་སྙིང་སེར་པོ་སྣ་ལ་ཁཾ། །འཇིག་དབང་དམར་པོ་ལྕེ་ལ་གཾ། །སྒྲིབ་སེལ་ལྗང་གུ་དཔྲལ་བར་ཀཾ། །ཀུན་བཟང་དཀར་པོ་ལྷེན་སྣར་སཾ། །སྤྱན་དྲངས་མཆོད་བསྟོད་བྱིན་རླབས་བྱ། །ཨོཾ་སརྦ་ཏ་ཐཱ་ག་ཏ་ཀཱ་ཡ་ཝཱ་ཀ་ཙིཏྟ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། རྡོ་རྗེ་སེམས་མ་ལ་སོགས་ཀྱིས། །དབང་བསྐུར་སྤྱི་བོ་གཤིན་རྗེ་གཤེད། །སྒོ་བཞིའི་སྔགས་ཀྱིས་འདོད་ལྷ་བསྐུལ། །རང་གི་ལུས་ལ་གཞུག་པར་བྱ། །མུངྒ་རཱ་ཛཿ། དཎྜ་ཧཱུ། པདྨ་པཾ། ཁཌྒ་ཧོཿ། སྙིང་གར་ཡེ་ཤེས་ཞུ་བའི་རྒྱུན། །པ་སྤུའི་ཁུང་ནས་སྤྲུལ་པས་མཆོད། །ཨོཾ་སརྦ་ཏ་ཐཱ་ག་ཏ་པཱུ་ཛ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཧཱུཾ་རྡོ་རྗེ་ལས་ནི་བརྩོན་འགྲུས་ཆེ། །སངས་རྒྱས་རྡོ་རྗེ་བརྟུལ་ཞུགས་འཛིན། །ལས་མཐར་མཛད་པའི་ཐུབ་པ་པོ། །རྡོ་རྗེ་བརྩོན་འགྲུས་ཁྱོད་ཕྱག་འཚལ། །བདུད་རྩི་མྱང་བ་བྱས་ནས་ཀྱང༌། །སྤྲོ་བསྡུ་ལྡན་པས་བཟླས་པར་བྱ། །ཨོཾ་བཛྲ་ཁཌྒྀ་དྷྲ་ཀ་ཧཱུཾ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། འབྱུང་བ་རིམ་གྱིས་ཐིམ་པ་ལ། །ཡི་གེ་གསུམ་དུ་སྦྱངས་ནས་ཀྱང༌། །བདེ་དང་སྡུག་བསྔལ་མི་དམིགས་པའི། །རྡོ་རྗེ་ལྟ་བུའི་ཏིང་འཛིན་བསྒོམ། །བདག་གིས་རྙེད་དང་བཀུར་སྟི་ལ། །མ་བལྟས་སེམས་ཅན་ལ་བརྩེའི་ཕྱིར། །རལ་གྲི་རྡོ་རྗེའི་སྒྲུབ་ཐབས་བྱས། །འདི་ཡིས་དེས་འབྱུང་རྙེད་གྱུར་ཅིག །རལ་གྲི་གཤིན་རྗེ་གཤེད་གཏུམ་པོའི་སྒྲུབ་ཐབས་ཞེས་བྱ་བ་རྫོགས་སོ།།

པདྨ་གཤིན་རྗེ་གཤེད་ཤེས་རབ་བདེ་བ་ཅན་གྱི་སྒྲུབ་ཐབས་ཞེས་བྱ་བ།
དཱི་པཾ་ཀ་ར།


DTG047_Page_0152
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། པྲ་ཛྙཱ་སུ་ཁ་ཡ་པདྨ་ཡ་མཱ་རི་སཱ་དྷ་ནཾ་ནཱ་མ། བོད་སྐད་དུ། པདྨ་གཤིན་རྗེ་གཤེད་ཤེས་རབ་བདེ་བ་ཅན་གྱི་སྒྲུབ་ཐབས་ཞེས་བྱ་བ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །སེམས་ཅན་རྗེས་སུ་དྲན་ལྡན་ཞིང༌། །དེ་འདྲེན་ཐུགས་རྗེའི་རྟགས་མངའ་བ། །མཚོ་སྐྱེས་ཞལ་ལ་ཕྱག་འཚལ་ཏེ། །དེ་ཡི་སྒྲུབ་ཐབས་བཤད་པར་བྱ། །དང་པོར་སྔགས་པས་


DTG047_Page_0153
[མ་དཔེ་གཟིགས་ན་འདིར་གནོན།]

ཁྲུས་བྱས་ནས། །ཀུ་ཤའི་སྟན་ལ་ལེགས་འདུག་སྟེ། །ལུས་ངག་ཡིད་གསུམ་བག་ལྡན་པས། །ཅུང་ཟད་འགྲོ་འོང་ལྡན་པས་བྱ། །རང་གི་ལྷག་པའི་ལྷར་ལྡན་པས། །ཅོད་པན་རྗེ་བཙུན་གཟུང་བར་བྱ། །དེ་ནས་རྗེ་བཙུན་སྤྱན་དྲངས་ཏེ། །སྐྱབས་འགྲོ་བྱང་ཆུབ་སེམས་བསྐྱེད་དེ། །དེ་ནས་མཎྜལ་བསྟར་བ་སྟེ། །མེ་ཏོག་དགྲམ་ཞིང་མཆོད་ཚོགས་བཤམ། །དེ་ནས་སེམས་ཅན་ཀུན་གྱི་ཕྱིར། །བསོད་ནམས་ཚོགས་བསགས་གཤེགས་སུ་གསོལ། །བུ་གཅིག་ལྟར་དྲན་བྱམས་པ་དང༌། །སྡུག་བསྔལ་བྲལ་འདོད་སྙིང་རྗེ་དང༌། །བདེ་བ་ཐོབ་པའི་དགའ་བ་དང༌། །ཕུན་སུམ་ཚོགས་པའི་བཏང་སྙོམས་སོ། །སྙིང་རྗེ་ཐབས་ཀྱི་རང་བཞིན་དང༌། །ལྡན་པའི་སྟོང་པ་བསྒོམ་པར་བྱ། །སྲུང་འཁོར་པདྨ་ཉི་མའི་སྟེང༌། །ནི་ལས་ཆུ་སྐྱེས་གྱུར་པའི་སྐུ། །པདྨ་རཱ་གའི་མདོག་འདྲ་ལ། །གཡས་དང་གཡོན་ནི་སྔོ་དང་དཀར། །གྲི་གུག་ཆུ་སྐྱེས་རལ་གྲི་དང༌། ཐོད་པ་འཁོར་ལོ་རིན་ཆེན་འཛིན། །ཐོད་པ་ལྔ་ཡིས་དབུ་བསྐོར་ཅིང༌། །ཕྲེང་བ་ཀླུ་དང་དུར་ཁྲོད་བརྒྱན། །མེ་དཔུང་སྐྱིལ་ཀྲུང་སྟག་ལྤགས་མནབས། །བསྐྱེད་པ་ཅུང་ཟད་འཇམ་པའི་མདངས། །སྐུ་གསུང་ཐུགས་དང་སྐྱེ་མཆེད་དྲུག །རང་ལུས་ངོ་བོ་བྱིན་གྱིས་བརླབ། །དབང་བསྐུར་རྟགས་དང་ལྡན་པ་ལ། །མཆོད་ལ་བསྟོད་པ་འདིས་མཉེས་བྱ། །ཧཱུཾ་རྡོ་རྗེ་དམ་ཚིག་རྡོ་རྗེ་གསུང༌། །རྡོ་རྗེ་དབྱངས་ནི་ཟབ་མོ་ཆེ། །འདོད་ཆགས་རྡོ་རྗེ་ཉིད་མཚུངས་པ། །སྐྱོན་བྲལ་རྗེ་ལ་ཕྱག་འཚལ་བསྟོད། །བདུད་རྩི་མྱང་ཞིང་སྤྲོ་བསྡུ་བཟླས། །བྱས་ནས་ཕྱག་རྒྱ་བཀྲོལ་པར་བྱ། །ཨོཾ་བཛྲ་པདྨ་དྷྲྀཀ་ཧཱུཾ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། རིག་པའི་ཤེས་རབ་མདའ་དག་གིས། །ལྟོང་ལྡན་འབེན་ལ་ཐུག་པ་ན། །གཅིག་ཀྱང་མི་གནས་བདེ་བ་ཆེ། །བསྒོམ་བྱ་སྒོམ་བྱེད་མེད་པ་ཡི། །རྗེ་བཙུན་གསུང་གི་དྲིན་དག་དང༌། །རྒྱུད་ལས་མཐོང་བ་བྲིས་པ་འདིས། །འགྲོ་ཀུན་དྲི་མ་མེད་པ་ཡི། །སངས་རྒྱས་ལ་གནས་པར་ཤོག །པདྨ་གཤིན་རྗེ་གཤེད་ཤེས་རབ་བདེ་བ་ཅན་གྱི་སྒྲུབ་ཐབས་ཞེས་བྱ་བ། རྒྱ་གར་གྱི་མཁན་པོ་དཱི་པཾ་ཀ་ར་ཞེས་བྱ་བས་མཛད་པ་རྫོགས་སོ།། །།རྣལ་འབྱོར་པ་པྲ་ཛྙཱ་ཤྲཱི་ཛྙཱ་ན་ཀཱི་རྟིས་རང་འགྱུར་དུ་མཛད་པའོ།།

གཤིན་རྗེ་གཤེད་ནག་པོའི་སྒྲུབ་ཐབས་ཀྱི་མཎྜལ་གྱི་ཆོ་ག་ཞེས་བྱ་བ།
བསོད་སྙོམས་པ།


DTG047_Page_0154
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། ཀྲི་ཥྞ་ཡ་མཱ་རི་སཱ་དྷ་ནཱཾ་མཎྜལ་བི་དྷི་ནཱ་མ། བོད་སྐད་དུ། གཤིན་རྗེ་གཤེད་ནག་པོའི་སྒྲུབ་ཐབས་ཀྱི་མཎྜལ་གྱི་ཆོ་ག་ཞེས་བྱ་བ། དཔལ་གཤིན་རྗེ་གཤེད་ལ་ཕྱག་འཚལ་ལོ། །བླ་མ་རྡོ་རྗེ་ཡེ་ཤེས་དང༌། །རྗེ་བཙུན་མགོན་ལ་ཕྱག་འཚལ་ལོ། །དངོས་གྲུབ་སློབ་དཔོན་མཉེས་བྱའི་ཕྱིར། །རྗེ་བཙུན་དཀྱིལ་འཁོར་དམ་པ་ཡི། །ཆོ་ག་བདག་གིས་བཤད་པར་བྱ། །ཡིད་དུ་འོང་བའི་ས་ཕྱོགས་སུ། །ས་གཞི་བཟང་པོ་ཡིད་འོང་ལ། །རིན་ཆེན་སྤོས་ཆུས་ལེགས་བཀྲུས་ཏེ། །མཉམ་པའི་ས་ལ་དྲི་སོགས་སྦྱིན། །མཛེས་པའི་གཞི་ལ་ཐིག་ལེ་བཞག །ཏཱ་མ་ལ་ཡི་འོ་མའམ། །རས་བལ་གཙང་མས་དགོད་པར་བྱ། །སེམས་ཅན་ཀུན་ལ་རྗེས་བརྩེ་བས། །ཕྱི་ནང་ཁྲུས་ལ་གནས་ནས་ཀྱང། །སྐད་ཅིག་བསྐྱེད་ལ་ཚོགས་བསག་བྱ། །སྲུང་དང་ཆོས་འབྱུང་གཞལ་ཡས་ཁང༌། །བསྐྱེད་ལ་དེ་ཡི་ནང་དུ་ནི། །མེ་ཏོག་བཟང་པོ་དགྲམ་པར་བྱ། །ཞེ་སྡང་རྡོ་རྗེ་ལས་བརྩམས་ཏེ། །རལ་གྲི་རྡོ་རྗེ་རབ་ཏུ་བསྐྱེད། །ཚོམ་བུ་རེ་ལ་ལན་བདུན་ཏེ། །བཟླས་པ་པདྨ་ཉི་ཟླའི་སྟེང༌། །བདེ་གཤེགས་སྲས་བཅས་བསམ་པར་བྱ། །ཨོཾ་ཧྲཱིཿ་ཥྚྲྀཿ་ཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཨོཾ་ཛིན་ཛྀ་ཀ །ཨོཾ་རཏྣ་དྷྲཱྀཀ །ཨོཾ་ཨཱ་རོ་ལྀཀ །ཨོཾ་པྲཛྙཱ་དྷྲྀཀ །ཨོཾ་མུདྒ་ར་དྷྲྀཀ །ཨོཾ་དཎྡ་དྷྲྀཀ །ཨོཾ་པདྨ་དྷྲྀཀ །ཨོཾ་ཁཌྒ་དྷྲྀཀ །ཨོཾ་མོ་ཧ་ར་ཏི། ཨོཾ་དྭེ་ཥ་ར་ཏི། ཨོཾ་རཱ་ག་ར་ཏི། ཨོཾ་བཛྲ་ར་ཏི། སོ་སོའི་སྐུ་མདོག་ཕྱག་མཚན་དང༌། །རྒྱན་དང་བཞུགས་པའི་ཕྱག་རྒྱ་རྣམས། །མངོན་པར་རྟོགས་པའི་ཆོ་ག་ལས། །འབྱུང་བ་བཞིན་དུ་གསལ་བར་བསྐྱེད། །ཚོགས་བསགས་དཀྱིལ་འཁོར་བསྟིམ་པ་དང༌། །སྐྱེ་མཆེད་སྐུ་གསུང་ཐུགས་བྱིན་བརླབ། །དབང་བླང་བ་དང་དགུག་གཞུག་བྱ། །མཆོད་བསྟོད་བདུད་རྩི་མྱང་བ་དང༌། །སྤྲོ་བསྡུ་དང་ནི་བཟླས་པ་རྣམས། །རྣལ་འབྱོར་པ་ཡིས་ལེགས་བྱས་ཏེ། །འདོད་པའི་དོན་རྣམས་གསོལ་བ་གདབ། །གཤེགས་དང་བཟོད་པ་གསོལ་བྱས་ཏེ། །དེ་ཉིད་གསུམ་གྱི་ཆོ་ག་ཡིས། །ཡེ་ཤེས་འཁོར་ལོ་གཤེགས་སུ་གསོལ། །དམ་ཚིག་བསྐྱེད་པའི་ལྷ་རྣམས་ནི། །སྙིང་ག་ཉིད་དུ་རྣམ་པར་བསྟིམ། །གཉིས་དོན་དམ་པ་བདེན་པ་ཡི། །ཆོས་ཀྱི་ཚུལ་ལ་གནས་པར་བྱ། །སེམས་ཅན་ཀུན་གྱི་དོན་གྱི་ཕྱིར། །བྱང་ཆུབ་ཏུ་ནི་བསྔོ་བ་དང༌། །སྨོན་ལམ་ཆེན་པོ་གདབ་པར་བྱ། །དེ་ལྟར་ཉིན་མཚན་དུས་དྲུག་ཏུ། །སྙིང་བརྩེ་བརྩོན་པས་དབུལ་བར་བྱ། །གཡེང་བ་རྣམ་པར་


DTG047_Page_0155
[མ་དཔེ་གཟིགས་ན་འདིར་གནོན།]

ཞི་དོན་དུ། །ཚོགས་བསགས་མཎྜལ་ཏིང་འཛིན་ནི། །སྦྱོར་བའི་ཆོ་ག་སྔོན་སོང་བས། །གསེར་དང་པད་ཟླ་རྣམ་བསམས་ཏེ། །གོང་བཞིན་རིམ་པར་དགོད་པར་བྱ། །ཨོཾ་བཛྲ་རེ་ཁེ་ཧཱུཾ། མཎྜལ་ཧཱུཾ། ཨོཾ་བཛྲ་རེ་ཁེ་ཧཱུཾ། པདྨ་མཎྜལ་ཧཱུཾ། ཨོཾ་བཛྲ་རེ་ཁེ་ཧཱུཾ། ཨ་ཙནྡྲ་མཎྜལ་ཧཱུཾ། བསྙེན་པར་བྱ་བའི་གོང་བཞིན་དུ། །གཤེགས་སུ་གསོལ་དང་བསྡུ་བ་མིན། །ཁྱད་པར་བསྡུས་པའི་མཎྜལ་ནི། །ལས་ཀྱི་སྔགས་ཀྱིས་བྱིན་བརླབས་ཏེ། །མཛེས་པའི་སྔགས་ཀྱིས་དགྲམ་པར་བྱ། །རས་སམ་བཟང་པོའི་གཞི་དག་ལ། །ཐིག་ལེ་འབྲུ་སོགས་བཀོད་ནས་ཀྱང༌། །བདེ་གཤེགས་སྲས་བཅས་སྤྱན་དྲངས་ཏེ། །གདན་གྱི་ཚུལ་དུ་དབུལ་བར་བྱ། །ཤིན་ཏུ་བསྡུས་པ་འདི་ལྟ་སྟེ། །ཚོམ་བུ་གཅིག་ལ་མངོན་བརྟེན་ཏེ། །གཞལ་ཡས་ཁང་དུ་དམིགས་ནས་ཀྱང༌། །དེ་ནས་སྤྱན་དྲངས་བཞུགས་སུ་གསོལ། །བསོད་ནམས་ཚོགས་ཀྱིས་རྒྱུད་སྦྱངས་ནས། །གསོལ་བཏབ་བསྔོས་ལ་གཤེགས་སུ་གསོལ། །མ་ཆགས་བརྟེན་པའི་སྙིང་གར་བསྡུ། །སྒྱུ་མའི་བློ་ཡིས་ཟིན་པར་བྱ། །བླ་ན་མེད་པའི་མཎྜལ་ནི། །སྙིང་གའི་པདྨ་རྣམ་དག་ནང༌། །ཡེ་ཤེས་ཆེན་པོའི་ཐིག་ལེ་ནི། །ལྔ་ཕྲག་གཉིས་དང་དྲུག་ཕྱེད་ཀྱི། །ཡིག་འབྲུ་མཆོག་ཏུ་རྣམ་བསམས་ཏེ། །མཚན་དང་རྫོགས་པའི་སྐུར་གྱུར་ནས། །དུས་གསུམ་ཚོགས་ཀྱི་མཆོད་བ་བྱ། །རྟག་ཏུ་བསྡུ་བ་མ་ཡིན་ཏེ། །དུས་མེད་རྟག་ཏུ་བརྩོན་པས་འགྲུབ། །བསམ་གྱིས་མི་ཁྱབ་མཎྜལ་ནི། །ཆོས་ཉིད་ཟུང་དུ་འཇུག་པ་ལས། །རང་གི་དེ་ཉིད་རྣམ་བསམས་པའི། །སྐྱེ་མཆེད་མྱ་ངན་འདས་པའི་གནས། །རྟོག་དང་བྲལ་བའི་དེ་བཞིན་ཉིད། །རྡོ་རྗེ་ལྟ་བུའི་ཕོ་བྲང་ཡིན། །དུས་གསུམ་རྟག་ཏུ་སངས་རྒྱས་ནས། །སྐྱེ་མེད་དེ་བཞིན་ཉིད་ཀྱིས་བདག །ཆགས་སྡང་བྲལ་བས་དབུལ་བར་བྱ། །མཎྜལ་ཀུན་གྱི་མཆོག་ཡིན་ནོ། །བསོད་ནམས་ཚོགས་ཀྱི་མཎྜལ་ལས། །ཡེ་ཤེས་མཎྜལ་རྣམ་པར་སྐྱེ། །དེ་ཕྱིར་ཐབས་ཀྱི་མཎྜལ་ནི། །རྣལ་འབྱོར་བ་ཡིས་དབུལ་བར་བྱ། །ཐུན་མོང་དངོས་གྲུབ་བསྒྲུབ་པ་དང༌། །མཆོག་གི་དངོས་གྲུབ་ཐོབ་བྱའི་ཕྱིར། །བདག་གི་བསམ་པ་བཟང་པོ་ཡིས། །མཎྜལ་བྱས་པའི་དགེ་བ་གང༌། །དེས་ནི་སེམས་ཅན་ཐམས་ཅད་ཀྱིས། །སངས་རྒྱས་ཞིང་ཁམས་དག་ཐོབ་ཤོག །གཤིན་རྗེ་གཤེད་ནག་པོའི་སྒྲུབ་


DTG047_Page_0156
[མ་དཔེ་གཟིགས་ན་འདིར་གནོན།]

ཐབས་ཀྱི་མཎྜལ་གྱི་ཆོ་ག་ཞེས་བྱ་བ་རྫོགས་སོ།། །།ཟངས་གླིང་རྣལ་འབྱོར་ནཱ་ག་པཱུ་ར་ཡིས། །རྣལ་འབྱོར་ཀ་མ་རཀྵི་ཏ་ཉིད་ལ། །གུ་ཚ་རྒྱལ་བུའི་བུ་ཉིད་བཏང་ནས་ཀྱང༌། །ཏ་རུ་པ་རི་དུར་ཁྲོད་ཚལ་ཉིད་དུ། །རྣལ་འབྱོར་འདུས་པའི་ཚོགས་ཀྱི་འཁོར་ལོ་ནང༌། །གསོལ་བཏབ་རྣལ་འབྱོར་རྣམས་ཀྱི་ཞལ་ངོ་རུ། །མཎྜལ་ཆོ་ག་བསོད་སྙོམས་པ་ཡིས་བྱས། །དེང་སང་རྣལ་འབྱོར་ལྟ་སྤྱོད་ལྡན་པ་ཡིས། །དུས་རྣམས་རྟག་ཏུ་མཎྜལ་འབད་པར་རིགས།།

ཆོས་ཀྱི་སྐུའི་སྣང་བའི་ཆོ་ག་ཞེས་བྱ་བ།
ཀ་ལཱ་པ་མ་ཧཱ།


DTG047_Page_0156
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། དྷརྨ་ཀཱ་ཡ་ཀཱི་པཾ་བི་དྷི་ནཱ་མ། བོད་སྐད་དུ། ཆོས་ཀྱི་སྐུའི་སྣང་བའི་ཆོ་ག་ཞེས་བྱ་བ། དཔལ་གཤིན་རྗེ་གཤེད་ལ་ཕྱག་འཚལ་ལོ། །དང་པོ་སྙིང་རྗེའི་བདག་ཉིད་པས། །སྲིད་པའི་བདེ་ལམ་ཆགས་ཤིང༌། །བདག་འཛིན་དག་ལ་རྒྱབ་ཀྱིས་ཕྱོགས། །བདག་འཛིན་ཡོངས་སུ་དོར་བྱས་ཏེ། །བདག་དང་གཞན་དུ་མཉམ་པ་དང༌། །རང་དང་གཞན་གྱིས་བླང་བའི་ཕྱིར། །ཕྱི་ནང་བར་ཆད་སེལ་བའི་མཆོག །ཆོས་སྐུ་རྟེན་མཆོག་གདབ་པའི་ཕྱིར། །གཤིན་རྗེ་གཤེད་ལ་གུས་བཏུད་དེ། །མཆོད་རྟེན་ཆོ་ག་བཤད་པར་བྱ། །ཟུང་དུ་འཇུག་པའི་རྣལ་འབྱོར་པས། །ཡིད་དགའ་བ་ཡི་ས་ཕྱོགས་སུ། །དུར་ཁྲོད་དགོན་པའི་གནས་མཆོག་ཏུ། །བཀྲ་ཤིས་ས་ནི་བཟང་པོ་ལ། །བདུད་རྩི་རྣམ་ལྔས་ལེགས་བྱུགས་ཏེ། །སྤོས་དང་དྲི་ཡི་ཚོགས་རྣམས་དང༌། །གསེར་དང་མུ་ཏིག་བྱི་རུ་སོགས། །རིན་ཆེན་རྣམ་མང་བཅུག་ནས་ཀྱང༌། །ཁྲུས་བྱས་དག་པའི་རྣལ་འབྱོར་པས། །འཇིམ་པའི་གོང་བུ་དྲིལ་ནས་ཀྱང༌། །བདག་ཉིད་ལྷ་རུ་རྣམ་བསྐྱེད་ནས། །བསོད་ནམས་ཡེ་ཤེས་ཚོགས་བསགས་བྱ། །སྲུང་བའི་འཁོར་ལོ་རྫོགས་བྱས་ལ། །ཆོས་ཀྱི་དབྱིངས་ཀྱི་ཁང་པ་དང༌། །གཞལ་ཡས་ཁང་མཆོག་བསྐྱེད་ནས་ནི། །གཞལ་ཡས་ཁང་གི་དབུས་ཉིད་དུ། །སྐྱེ་མེད་སྣང་བ་ལས་བྱུང་བའི། །ཐབས་དང་ཤེས་རབ་གསལ་ལྡན་བསམ། །གྱུར་པས་རོ་མཉམ་ཐིག་ལེའོ། །དེ་ལ་ཐུགས་ཀྱི་ཡི་གེ་སྟེ། །དེ་ནས་ཐུགས་མཆོག་ཉིད་དུ་འགྱུར། །ང་རྒྱལ་སྐུ་གསུང་ཐུགས་བཅུག་སྟེ། །ཞུ་བས་ཆོས་ཀྱི་སྐུ་རུ་གྱུར། །དེ་ཡི་ས་བོན་ཡི་གེ་ལས། །འཕྲོས་པས་གཤིན་རྗེ་གཤེད་བཀུག་སྟེ། །ཞལ་དུ་ཞུགས་ནས་ཞུ་བར་བསམ། །བདག་ཉིད་ཐིག་ལེ་ཆེན་པོར་བལྟ། །ཕྱོགས་བཅུར་ཐིག་ལེ་བཞི་སྤྲོས་པས། །ཙརྩི་


DTG047_Page_0157
[མ་དཔེ་གཟིགས་ན་འདིར་གནོན།]

ཕག་མོའི་དབྱངས་ལྡན་མ། །གཽ་རཱི་ལྷ་མོ་བཞིར་གྱུར་ཏེ། །རྗེ་བཙུན་ཐིག་ལེ་བསྐུལ་བར་བྱ། །རྗེ་བཙུན་བཞེངས་ཤིག་སྙིང་རྗེ་ཁྲོ། །སྲིད་གསུམ་པ་ཡི་མ་རིག་སོལ། །རྗེ་བཙུན་བཞེངས་ཤིག་རྒྱལ་རིགས་བདུད་བཞི་ལས་ནི་རྒྱལ་བའི་སེམས་ནི་གཡེངས། །རྗེ་བཙུན་བཞེངས་ཤིག་འཇིག་རྟེན་སྙན་མནན་སྟོང་པ་ཉིད་ལ་བཞུགས་སམ་ཅི། །ཅི་ཕྱིར་འཇིག་རྟེན་སྙན་མནན་སྟོང་པ་ཉིད་ལ་སེམས་ཏེ་བཞུགས། །བཅོམ་ལྡན་རྒྱལ་པོས་བསྐུལ་ནས་ཀྱང༌། །ལྷ་མོ་ཉིད་ཀྱང་ཐིམ་པར་གྱུར། །དེ་ལ་ཉི་མ་ས་བོན་བཅས། །གྱུར་པས་རྡོ་རྗེ་མཚན་མ་ཅན། །དེ་ལ་གཤིན་རྗེ་གཤེད་མཆོག་སྐུ། །རྟོག་པ་བཞིན་དུ་གསལ་བར་བསམ། །དེ་ལས་མཁའ་གསང་བྱིན་བརླབས་ཏེ། །ཡེ་ཤེས་དཀྱིལ་འཁོར་བཀུག་ནས་ཀྱང༌། །ཞུ་བས་ཁམས་མཆོག་དག་པའི་ནང༌། །ཐིག་ལེ་བཅུ་བདུན་ཉིད་དུ་གྱུར། །དེ་ལས་ས་བོན་གཟུགས་སུ་གྱུར། །ཡ་ཀྵེ་མ་མེ་ད། །ཡ་ཙ་ནི་ར། ཛ་ས་དོ་རུ། ཎ་ཡོ་ནི་རཱ། རྡོ་རྗེ་སྔོ་དང་འཁོར་ལོ་དཀར། །རིན་ཆེན་སེར་དང་པདྨ་དམར། །རལ་གྲིས་ལྗང་གུ་ཐོ་བ་སྔོ། །དབྱུག་པ་གར་གྱི་ཕྱག་རྒྱར་གྱུར། །དེ་ལས་ཡོངས་སུ་རྫོགས་པའི་སྐུ། །དགྲ་ལྔ་ཡུམ་བཞི་བསྒོམ་པར་གྱུར། །མངལ་ནས་སྐྱེ་བའི་ཚུལ་ཉིད་དུ། །སོ་སོ་གནས་སུ་དགོད་པར་བྱ། །དེ་ནས་བདག་གི་སྙིང་གནས། །ས་བོན་དག་ལས་འོད་འཕྲོས་པས། །དཀྱིལ་འཁོར་དག་ལ་ཕོག་གྱུར་ཏེ། །འཁོར་ལོ་འཁོར་བའི་ཚུལ་ཉིད་ཀྱིས། །གསལ་བའི་བཟླས་པ་དབུལ་བར་བྱ། །ཨོཾ་ཧྲཱིཿ་ཥྚྲྀཿ་ཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ན་མོ་བྷ་ག་ཝ་ཏེ་བཻ་རོ་ཙ་ན། པྲ་བྷ་རཱ་ཛཱ་ཡ། ཏ་ཐཱ་ག་ཏཱ་ཡ། ཨ་རྟ་ཏེ་ས་མྱུ་ཀ་སཾ་བུདྡྷཱ་ཡ། ཨོཾ་ཧེ་རུ་ཀ་སུ་ཀྵྨེ། ས་མེ་ས་མ་ཏེ། ས་མ་ཡེ། ས་མ་རོ་བྱེ། ཨ་ན་ལམྦེ་ཏ་རཾ་བེ་ཡ་ཤོ་བ་ཏི། མ་ཧཱ་ཏེ་ཛ། ནིར་ཀུ་ལེ་ནིརྦ་ཎེ། སརྦ་ཏ་ཐཱ་ག་ཏཱ། ཧྲྀ་ད་ཡ་ཨ་དྷིཥྛཱ་ན་ཨ་དྷི་ཥྛཱི་ཏེ་སྭཱ་ཧཱ། གཙོ་བོ་དག་ལ་ཇི་ལྟ་བཞིན། །གཏི་མུག་སོགས་ལ་རིམ་བཞིན་ནོ། །ཨོཾ་ཇི་ན་ཛིཀ །ཨོཾ་རཏྣ་དྷྲྀཀ །ཨོཾ་ཨཱ་རོ་ལྀཀ །ཨོཾ་པྲཛྙཱ་དྷྲྀཀ །ཨོཾ་མུངྒ་ར་དྷྲྀཀ །ཨོཾ་དཎྜ་དྷྲྀཀ །ཨོཾ་པདྨ་དྷྲྀཀ །ཨོཾ་ཁཌྒ་དྷྲྀཀ །ཨོཾ་མོ་ཧ་ར་ཏི། ཨོཾ་དྭེ་ཥ་ར་ཏི། ཨོཾ་རཱ་ག་ར་ཏི། ཨོཾ་བཛྲ་ར་ཏི། ཉི་ཤུ་རྩ་གཅིག་ལྔ་བཅུ་དང༌། །བརྒྱ་དང་བརྒྱ་རྩ་བརྒྱད་དང་ནི། །གཙོ་དང་འཁོར་གྱི་རིམ་པ་ཡིས། །བཟླས་པ་བསྡུ་བའི་ཚུལ་གྱིས་བཞུ། །འོད་ཀྱི་ཕུང་པོར་བསམས་ནས་ནི། །དེ་ནས་སྐོལ་


DTG047_Page_0158
[མ་དཔེ་གཟིགས་ན་འདིར་གནོན།]

ཕོར་གཡས་ཐོགས་ཏེ། །གུ་གུལ་ཨ་ཀར་ནག་ལ་སོགས། །དྲི་ཡི་བདུག་པས་བདུག་པར་བྱ། །དེ་ནས་འོད་ཀྱི་གོང་བུ་ལས། །བཅད་ཅིང་སྐུ་གདུང་གདབ་པར་བྱ། །སྙིང་པོར་འབྲེལ་པའི་རྟེན་འབྲེལ་དག །བཟླས་ཤིང་དཀྱིལ་འཁོར་དབྱུང་བར་བྱ། །བཀོད་པའི་ཚུལ་གྱིས་མཁའ་ལ་བཞག །རྫོགས་ནས་ལྷ་ཡི་དཀྱིལ་འཁོར་ལོ། །སྐྱེ་མཆེད་བྱིན་གྱིས་བརླབ་པ་དང༌། །སྐུ་གསུང་ཐུགས་དང་དེ་བཞིན་ཏེ། །དབང་བསྐུར་དགུག་གཞུག་མཆོད་བསྟོད་དང༌། །བདུད་རྩི་མྱང་གིས་སྨིན་པར་བྱ། །དེ་ནས་གསོལ་བ་གདབ་པ་དང༌། །བཤགས་དང་བསྔོ་བ་བྱས་ནས་ནི། །སྒྱུ་མའི་བློ་ཡིས་ཟིན་པར་བྱ། །དེ་ནས་སྨོན་ལམ་བཏབ་ནས་ནི། །གནས་ཁང་བཟང་པོར་བཞུགས་པར་བྱ། །དུས་རྣམས་ཀུན་དུ་མཆོད་པ་དང༌། །བསྐོར་བ་སོགས་ཀྱིས་མཉེས་པར་བྱ། །ན་མོ་རཏྣ་ཏྲ་ཡཱ་ཡ། །ཡེ་དྷརྨཱ་ཧེ་ཏུ་པྲ་བྷ་ཝཱ། ཧེ་ཏུན་ཏེ་ཥཱན་ཏ་ཐཱ་གཏོ་ཧྱ་བ་ད་ཏ། ཏེ་ཥཱ་ཉྩ་ཡོ་ནི་རོ་དྷ། ཨེ་ཝཾ་ཝཱ་དཱི་མ་ཧཱ་ཤྲ་མ་ཎཿ། གསང་བའི་དཀྱིལ་འཁོར་བཟང་པོ་ལ། །མོས་པའི་བློ་ཡིས་བསྐོར་བར་བྱ། །ན་མོ་བྷ་ག་ཝ་ཏེ། རཏྣ་ཀེ་ཏུ་རཱ་ཛཱ་ཡ། ཏ་ཐཱ་ག་ཏཱ་ཡ། ཨརྷ་ཏེ་སམྱཀ་སཾ་བུདྡྷཱ་ཡ། ཏདྱ་ཐཱ། ཨོཾ་རཏྣེ་རཏྣེ། མ་ཧཱ་རཏྣེ། རདྣེ་བཱི་ཛ་ཡི་སྭཱ་ཧཱ། རྣལ་འབྱོར་སེམས་ལ་གནོད་གྱུར་ན། །ནམ་མཁའ་དག་ལ་གདབ་པར་བྱ། །ཆོ་གའི་རྣམ་པ་གོང་བཞིན་ཏེ། །མཚན་མེད་ཕྱིར་ན་མཆོག་ཡིན་ནོ། །རྐྱེན་རྣམས་ཚོགས་པར་བྱ་བའི་ཕྱིར། །ཆུ་དང་མེ་དང་རླུང་དག་ལ། །བཾ་རཾ་ཡཾ་ནི་རྣམ་བསམས་ཏེ། །འཕྲོས་པས་རྒྱལ་བ་སྲས་བཅས་དག །བསྡུས་ཏེ་ཡིག་འབྲུ་ལ་བསྟིམས་པས། །ཆུ་ལ་དཀར་དང་མེ་ལ་དམར། །རླུང་ལ་ཁྲོ་བོ་སྔོན་པོ་བསམ། །ཞུ་བས་འོད་ཀྱི་ཕུང་པོར་གྱུར། །སྐོལ་ཕོར་ཐོགས་ལ་གདབ་པར་བྱ། །རབ་གནས་བྱ་བ་གོང་བཞིན་ཏེ། །དེ་ལ་ཁྱད་པར་ཡོད་མ་ཡིན། །རྣལ་འབྱོར་བསོད་ནམས་བསགས་པ་དང༌། །བར་ཆོད་མྱུར་དུ་ཞི་བྱའི་ཕྱིར། །བདག་གིས་སྐུ་གདུང་ཆོ་གའི་མཆོག ། མངོན་པར་བརྩམས་པའི་དགེ་བ་འདིས། །ཁམས་གསུམ་སེམས་ཅན་ཐམས་ཅད་ཀྱིས། །རྣལ་འབྱོར་ལམ་ལ་གནས་པ་རྣམས། །སྒོ་གསུམ་སྡིག་པ་དག་གྱུར་ཏེ། །ཆོས་སྐུ་གཉིས་མེད་ཐོབ་པར་ཤོག །རྒྱ་གར་གྱི་མཁན་པོ་ཀ་ལཱ་པ་མ་ཧཱ་ཞེས་བྱ་བས་མཛད་པ་མཆོད་རྟེན་གྱི་ཆོ་ག་རྫོགས་སོ།། །།


DTG047_Page_0159
[མ་དཔེ་གཟིགས་ན་འདིར་གནོན།]

རྣལ་འབྱོར་བསོད་སྙོམས་པ་པྲཛྙཱ་ཤྲཱི་ཛྙཱ་ནས་རང་འགྱུར་དུ་བྱས་པའོ། །སོམ་པུ་རིའི་གཙུག་ལག་ཁང་ཆེན་དུ། །ནག་པོ་ཞབས་ཞེས་བྱ་བའི་རྣལ་འབྱོར་པས། །རྣལ་འབྱོར་ཚེ་འཕོས་དེ་བ་པཱ་ལ་ཡིས། །ཡབ་མཆོག་དྷརྨ་པཱ་ལ་འདས་གྱུར་པའི། །ཆེད་དུ་གསོལ་བཏབ་རྒྱལ་པོའི་ཞལ་ངོ་རུ། །མཆོད་རྟེན་ཆོ་ག་མེ་ཏོག་ཚལ་དུ་མཛད། །སྤྲོས་བཅས་སྤྲོས་མེད་ཚུལ་གྱི་ལམ་མཆོག་འདི། །དེང་སང་རྣལ་འབྱོར་རྣམས་ཀྱིས་གདབ་པར་རིགས།།

གཤིན་རྗེ་གཤེད་རོ་སྲེག་གི་ཆོ་ག་ཞེས་བྱ་བ།
ནག་པོ།


DTG047_Page_0159
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། ཧོ་མ་བི་དྷིཥྚི་ཤ་ཀྲྀཥྞ་ཡ་མཱ་རི་ནཱ་མ། བོད་སྐད་དུ། གཤིན་རྗེ་གཤེད་ཀྱི་རོ་སྲེག་གི་ཆོ་ག་ཞེས་བྱ་བ། །དཔལ་གཤིན་རྗེ་གཤེད་ལ་ཕྱག་འཚལ་ལོ། །སྐུ་གསུང་ཐུགས་ཀྱི་རྡོ་རྗེ་ཅན། །ཟབ་མོ་བཅས་པའི་རྡོ་རྗེ་ནི། །བླ་མེད་སྙིང་པོ་ལ་བཏུད་དེ། །རོ་སྲེག་ཆོ་ག་བཤད་པར་བྱ། །སེམས་ཅན་སངས་རྒྱས་སྙིང་པོ་ཅན། །སངས་རྒྱས་ཉིད་དུ་རབ་སྦྱོར་བའི། །ཐབས་ཀྱི་ཁྱད་པར་རོ་སྲེག་པར། །རྣམ་པ་གཉིས་སུ་ཤེས་བྱ་སྟེ། །བསྒྲུབས་ལ་བསྲེག་པར་བྱ་བ་དང༌། །དུར་ཁྲོད་བསྲེག་པར་བྱ་བའོ། །བསྒྲུབས་ལ་བསྲེག་པ་རྣམ་བཞི་སྟེ། །དང་པོར་ལོངས་སྤྱོད་འཁོར་ལོ་དང༌། །གཉིས་པ་རབ་ཏུ་ཕྱེ་བ་ལ། །གསུམ་པ་ཉེ་བའི་སྒྲུབ་པ་ཉིད། །བཞི་པ་མཆོད་རྟེན་ཆོ་ག་ཡི། །དང་པོ་རོ་ལ་ཁྲུས་བྱས་ནས། །བསྲུང་བའི་ཆོ་ག་རྫོགས་པ་དང༌། །ཕྱི་ཡི་གཏོར་མ་གཏང་བར་བྱ། །དེ་ནས་ཚོགས་བསགས་ནས་བཟུང་སྟེ། །མངོན་པར་རྟོགས་པ་རྫོགས་པ་དང༌། །བཟང་པོའི་ཁྲི་ལ་བཞག་ནས་ཀྱང༌། །རྒྱན་གྱིས་ལེགས་པར་སྤྲས་པ་ལ། །ག་པུར་ལ་སོགས་ཁར་བླུད་ནས། །བདུད་རྩིར་བྱིན་གྱིས་བརླབ་བྱ་སྟེ། །སྙིང་གར་གཟུངས་ཐག་བཏགས་ནས་ཀྱང༌། །རྩ་བའི་སྔགས་ལ་དེ་ཉིད་གསུམ། །སྤེལ་བའི་བཟླས་པ་ཁྲི་ཙམ་བྱ། །དེ་ནས་བྱེ་བྲག་ལས་བྱས་ནས། །ཐོད་པ་ཀླད་པ་དབང་པོ་ལྔ། །སྙིང་སོགས་བཞི་དང་ཉྭ་བཞི་དང༌། །སྣུམ་དང་བདུད་རྩི་ལྔ་དང་གནས། །རྐང་བརྒྱང་སྡེ་བའི་བུ་ག་དགུ། །རྒྱས་པའི་སྲད་བུས་བཅིངས་ནས་ཀྱང༌། །ཤུན་པའི་ནང་དུ་དྲིལ་ལ་བཞག །དེ་ནས་ཚོགས་ཀྱི་མཆོད་པ་ནི། །རྟོག་པ་དང་བཅས་རྟོག་མེད་དང༌། །ཤིན་ཏུ་རྟོག་མེད་ལ་སོགས་ནི། །གང་ཟག་སེམས་ཀྱི་ཁྱད་པར་ཡིན། །དེ་ཡང་རབ་ཏུ་སྦྱར་བ་དང༌། །འདོད་པ་གཞན་ལ་སྤེལ་བ་དང༌། །རྟོག་མེད་རློན་པའི་རོལ་བའོ། །དེ་ནས་ཚོགས་


DTG047_Page_0160
[མ་དཔེ་གཟིགས་ན་འདིར་གནོན།]

ཀྱི་འཁོར་ལོ་ལས། །བྱུང་བའི་བཀྲ་ཤིས་སྨོན་བཏབ་ནས། །ཚེ་ལས་འདས་པའི་དོན་གྱི་ཕྱིར། །བསྔོ་བ་རབ་ཏུ་ཟིན་པར་བྱ། །དེ་ནི་ལོངས་སྤྱོད་འཁོར་ལོའོ། །སྨོན་ལམ་དཀྱིལ་འཁོར་དེ་ཉིད་དང༌། །ལྷ་ཡི་དེ་ཉིད་ལས་སྦྱར་བའི། །ཚེ་ལས་འདས་པའི་དོན་གྱི་ཕྱིར། །རྒྱ་ཆེན་རབ་ཏུ་གདབ་པར་བྱ། །སྦྱང་བ་གསུམ་དུ་ཤེས་བྱ་སྟེ། །དང་པོ་ཐལ་བ་བཏགས་ལ་བཙག །དེ་ནས་དྲི་དང་སྦྱར་བྱ་སྟེ། །ཧྲཱིཿ་ཥྚྲྀཿ་ལ་ནི་ངན་འགྲོ་ཀུན། །སྦྱོང་བར་བྱེད་པའི་སྔགས་བཏགས་ལ། །ཁྲིའམ་སྟོང་དུ་བཟླས་པ་བྱ། །དེ་ནས་མཎྜལ་ངོས་མཉམ་ལ། །བ་ཡི་རྣམ་ལྔས་བྱུགས་ནས་ཀྱང༌། །དྲི་ཞིམ་པ་ཡི་བསྒོས་པའི་ས། །དྲི་ཡིས་ཐིག་ལེ་གདབ་པར་བྱ། །དེ་ནས་སྲོག་ཆགས་མེད་འགྱུར་ཞིང༌། །མཉེན་ཞིང་འཇམ་ལ་དཀར་བའི་ས། །བླངས་ལ་དྲི་ཞིམ་ཆུ་ཡིས་བྲན། །དེ་ནས་ཐལ་བ་དང་བསྲེས་ལ། །འཇིམ་པ་ལེགས་པའི་གོང་བུ་བྱ། །དེ་ནས་སྙིང་གའི་ས་བོན་ལས། །འཕྲོས་པའི་འོད་ཀྱིས་ཚེ་འདས་ནི། །འོག་གི་གནས་ནས་བཀུག་བྱས་ལ། ལུས་ངག་ཡིད་གསུམ་སྦྱང་བ་བྱ། །དེ་ནས་ཧཱུཾ་ཧཱུཾ་ཞེས་བརྗོད་པས། །ཁུ་བའི་ཐིག་ལེར་ཞུ་གྱུར་ཏེ། །ཨ་དཀར་ཐུང་དུ་གསལ་བར་བྱ། །དེ་ལས་འོད་ཟེར་འཕྲོས་པ་ཡིས། །དབྱངས་དང་གསལ་ཡིག་བསྡུ་བར་བྱ། །དེ་ལས་རྡོ་རྗེར་གྱུར་ནས་ཀྱང༌། །ཧཱུཾ་གིས་མཚན་པ་ལས་འཕྲོས་པའི། །ཕྱག་རྒྱའི་ཚོགས་རྣམས་བསྡུ་བར་བྱ། །དེ་ནས་རང་གི་ལྷ་དང་ནི། །ཡང་ན་རྡོ་རྗེ་སེམས་དཔའ་རུ། །བསྐྱེད་ལ་སྐུ་རྣམས་བསྡུ་བར་བྱ། །དེ་ཡང་བྱིན་གྱིས་བརླབ་པ་ནི། །ཨོཾ་སརྦ་ཏ་ཐཱ་ག་ཏཱ་ཀཱ་ཡ་བཛྲ་སྲ་བྷཱ་ཝ་ཨཱཏྨ་ཀོ྅ཧཾ། ཨོཾ་སརྦ་ཏ་ཐཱ་ག་ཏ་ཝཱ་ཀ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཨོཾ་སརྦ་ཏ་ཐཱ་ག་ཏ་ཙཏྟ་བཛྲ་སྭབྷཱ་ཝ་ཨཱཏྨ་ཀོ྅ཧཾ། དེ་ནས་བྱིན་གྱིས་བརླབ་པའི་སྔགས། །ཉི་ཤུ་རྩ་གཅིག་བཟླས་བྱས་ལ། །རྩ་བའི་དཀྱིལ་འཁོར་བསྟིམས་ནས་ཀྱང༌། །འོད་ཀྱི་ཕུང་པོར་བལྟ་བར་བྱ། །དེ་ནས་རྟེན་འབྲེལ་ལྡན་པའི་སྔགས། །བརྗོད་ཅིང་བཏབ་ལ་འཁོར་ལོ་བསྒོམ། །སྔོན་གྱི་མཎྜལ་དྲང་བའི་དཀྱིལ། །དྲི་ཡི་ཐིག་ལེས་བརྒྱན་པ་ལ། །མེ་ཏོག་ཚོམ་བུ་བཀོད་པའི་སྟེང༌། །སྤྱན་དྲངས་ནས་ནི་བཞུགས་སུ་གསོལ། །དེ་ནས་འཁོར་ལོ་རྒྱལ་མཚན་དང༌། །གདུགས་དང་རྒྱལ་མཚན་འཕེན་གྱིས་བརྒྱན། །དེ་ནས་ན་བཟའ་དཀར་པོ་གསོལ། །བཀོད་པ་ཤིན་ཏུ་མཛེས་བྱས་ལ། །སྐྱེ་མཆེད་


DTG047_Page_0161
[མ་དཔེ་གཟིགས་ན་འདིར་གནོན།]

སྐུ་གསུང་ཐུགས་དང་དབང༌། །དགུག་གཞུག་མཆོད་དང་བསྟོད་བྱས་ལ། །བདུད་རྩི་མྱང་དང་སྤྲོ་བསྡུ་བཟླས། །རྫོགས་ནས་བསྔོ་དང་སྨོན་ལམ་བཏབ། །དེ་ནས་གཞལ་ཡས་བཟང་པོའི་ནང༌། །བཞུགས་སུ་གསོལ་ལ་རྟག་ཏུ་མཆོད། །རོ་བསྲེགས་པའི་རུས་པའི་སཱ་ཙྪའི་ཆོ་ག་ཡིན། །གཤིན་རྗེ་གཤེད་ཀྱི་རོ་སྲེག་གི་ཆོ་ག་ཞེས་བྱ་བ་སློབ་དཔོན་ནག་པོ་ཞབས་ཀྱིས་མཛད་པ་རྫོགས་སོ།།

ཚོགས་ཀྱི་འཁོར་ལོའི་ཆོ་ག་ཞེས་བྱ་བ།
ནག་པོ།


DTG047_Page_0161
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། །ག་ཎ་ཙ་ཀྲ་དི་དྷཱི་ནཱ་མ། བོད་སྐད་དུ། ཚོགས་ཀྱི་འཁོར་ལོའི་ཆོ་ག་ཞེས་བྱ་བ། རྗེ་བཙུན་མགོན་ལ་ཕྱག་འཚལ་ལོ། །བསོད་ནམས་ཁྱད་པར་བསགས་པ་དང༌།། དམ་ཚིག་ཉམས་པ་བསྐང་བ་དང༌། །བགེགས་རྣམས་ཉེ་བར་ཞི་བྱའི་ཕྱིར། །བདག་གི་ཚོགས་འཁོར་བཤད་པར་བྱ། །ཡིད་དང་མཐུན་པའི་ས་ཕྱོགས་སུ། །ཚོགས་ཀྱི་ཁང་པ་ཡིད་འོང་བ། །འཁོར་ཁང་རིམ་གསུམ་རན་པར་བརྩིག །དེ་ནས་ཙནྡན་གུར་གུམ་དང༌། །དྲི་ཡི་ཚོགས་ནི་བསྒོས་ནས་ཀྱང༌། ས་གཞི་བཟང་པོ་ལེགས་བྱས་ཏེ། །རྣམ་ལྔས་སྐྱོང་ནུལ་བྱས་ནས་ཀྱང༌། །གཞུང་དང་མཐུན་པའི་མཎྜལ་ལ། །མཛེས་པའི་མེ་ཏོག་ལེགས་བརྐམ་སྟ། །མཆོད་པའི་ཚོགས་རྣམས་ཚང་བར་བསག །འབྱོར་པའི་ཡོ་བྱད་ལྡན་པ་དང༌། །བསྡུ་པར་འོས་པའི་རྣལ་འབྱོར་ཚོགས། །མ་ལུས་པར་ནི་བསྡུས་ནས་ཀྱང༌། །སློབ་དཔོན་ལ་ནི་ཞུ་བ་དབུལ། །ལས་ཀྱི་བུམ་པ་བྱིན་བརླབས་ནས། །མཆོད་པའི་བུམ་པ་བསགས་ནས་ཀྱང༌། །མཛེས་པའི་མེ་ཏོག་ལེགས་བཏང་སྟེ། །ཚིག་འདིས་གསོལ་བ་གདབ་པར་བྱ། །ཁྲོ་བོ་སྔོན་པོ་མཛེས་པ་ཆེ། །ཁྱོད་ནི་དམ་ཚིག་ཡིད་དུ་འོང༌། །ནོར་བུ་རིན་ཆེན་ཆེས་བཅིང་བའི། །དབྱུག་པ་ཕྱག་ན་བསྣམས་པ་སྟེ། །བདག་ནི་འཁོར་བ་ལས་བསྒྲལ་ཕྱིར། །དཔའ་བོས་གང་གིས་གཏོང་དུ་གསོལ། །རྣལ་འབྱོར་མ་ཡི་ཚོགས་དབུས་སུ། །བཟང་པོའི་སྒོ་ནི་རྣམ་པར་དབྱེ། །གསོལ་བ་བཏབ་ན་ནང་བཀུག་སྟེ། ལས་ཀྱི་བུམ་པས་ཆུ་གཏོར་ཏེ། མནའ་ཆུ་བླུད་ལ་གྲལ་ལ་དགོད། །དེ་ནས་རྡོ་རྗེ་སློབ་དཔོན་ལ། །མ་ཏོག་ཕུལ་ཏེ་གསོལ་བ་གདབ། །དེ་ནས་རྣལ་འབྱོར་ཕོ་མོ་ལ། །མེ་ཏོག་གཏོར་ལ་བསྐུལ་བར་བྱ། །དེ་ནས་རྡོ་རྗེ་སློབ་དཔོན་གྱིས། །ལྷར་བསྒོམ་ལྕེ་ལག་བྱིན་གྱིས་བརླབ། །ཕྱག་རྒྱ་བྱིན་བརླབ་མངོན་རྟོགས་བརྗོད། །ཧཱུཾ། ཐོག་མཐའ་མེད་པའི་སེམས་དཔའ་ནི། །


DTG047_Page_0162
[མ་དཔེ་གཟིགས་ན་འདིར་གནོན།]

རྡོ་རྗེ་སེམས་དཔའ་དེ་བཞིན་གཤགས། །ཀུན་དུ་བཟང་པོ་ཀུན་བདག་ཉིད། །རྡོ་རྗེ་སེམས་དཔའ་བདག་པོའི་གཙོ། །ཨོཾ་མ་ཧཱ་བཛྲ་ཧཱུཾ། ཨ། སྲིད་པ་རང་བཞིན་དག་པའི་ཕྱིར། །ངོ་བོ་ཉིད་ཀྱིས་གདོད་ནས་དག །རང་བཞིན་དག་པའི་སེམས་དཔའ་ཡིས། །སྲིད་པ་དམ་པ་མཆོག་ཏུ་བྱེད། །ཨོཾ་ཧྲཱིཿ་ཥྚྲྀཿ་ཝི་ཀྲྀ་ཏཱ་ན་ན་ཧཱུཾ་ཕཊ། ཨོཾ་མ་ཧཱ་བཛྲ་གནྡྷ། དེ་ནས་མཆོད་པའི་ཁྱད་པར་ཚོགས། །དེ་ཉིད་གསུམ་གྱིས་བྱིན་བརླབས་ལ། །སྙིང་གའི་ས་བོན་འཕྲོས་པ་ཡིས། །བླ་མ་རྗེ་བཙུན་མདུན་བསམས་ཏེ། །མཆོད་ཡོན་ཞལ་བསིལ་ཞབས་བཀྲུ་དབུལ། །མཆོད་པའི་ཚོགས་ཀྱིས་རབ་མཆོད་ནས། །ད་ཁོ་ན་ཉིད་བསྟོད་པ་བྱ། །ཨོཾ་ཧྲཱིཿ་ཥྚྲྀཿ་ཝི་ཀྲྀ་ཏཱ་ན་ན་ཧཱུཾ་ཕཊ། ཨོཾ་མ་ཧཱ་བཛྲ་པྲ་ཏཱི་ཙྪ་སྭཱ་ཧཱ། ཨོཾ་བཛྲ་ཧཱུཾ་པེ་ཧཱུཾ། ཨོཾ་ཨཱཿ་ཧཱུཾ། དེ་བཞིན་དུ་པུཥྤེ། དཱི་པེ། གནྡྷེ། ནཻ་ཝི་དྱེ་ཤབྡེ། ཨོཾ་ཨཱཿ་ཧཱུཾ། ཨོཾ་སརྦ་ཏ་ཐཱ་ག་ཏ་པཱུ་ཛ་བཛྲ་སྭཱ་བྷཱ་ཝ་ཨཱཏྨ་ཀོ྅ཧཾ། རྡོ་རྗེ་དྲིལ་བུ་ལྡན་པ་ཡིས། །གཏི་མུག་རྡོ་རྗེའི་ངོ་བོ་ཁྱོད། །གཤིན་རྗེ་གཤེད་པོ་ཤིན་ཏུ་འཇིགས། །སྟོན་པ་སངས་རྒྱས་ཀུན་རང་བཞིན། །རྡོ་རྗེ་མི་འཇིགས་ཕྱག་འཚལ་བསྟོད། །གཤིན་རྗེ་གཤེད་པོ་རབ་འཇིགས་པ། །ང་རྒྱལ་རྡོ་རྗེ་ངོ་བོ་ཁྱོད། །རྡོ་རྗེ་ཐུགས་དང་རབ་མཚུངས་པ། །རིན་ཆེན་རྡོ་རྗེ་ངོ་བོ་ཉིད། །འདོད་ཆགས་རྡོ་རྗེ་གཙོ་བོ་ཁྱོད། །འདོད་ཆགས་ཆོས་ཀྱི་རྣམ་པ་བསྙེམས། །ཐམས་ཅད་དབྱངས་ནི་མཆོག་གི་མཆོག །རྡོ་རྗེ་གསུང་མཆོག་ཕྱག་འཚལ་བསྟོད། །ཕྲག་དོག་རྡོ་རྗེ་ངོ་བོ་ཁྱོད། །གཤིན་རྗེ་གཤེད་པོ་ལས་ཀུན་བྱེད། །སྐུ་ཡི་རྡོ་རྗེ་རབ་འདྲ་བ། །རལ་གྲི་ཕྱག་ལ་ཕྱག་འཚལ་བསྟོད། །སངས་རྒྱས་ཀུན་གྱི་དངོས་པོ་ཁྱོད། །སངས་རྒྱས་ཐམས་ཅད་གཅིག་ཏུ་བསྡུས། །སངས་རྒྱས་ཀུན་མཆོག་གཙོ་བོའི་གཙོ། །དཀྱིལ་འཁོར་གཙོ་ལ་ཕྱག་འཚལ་བསྟོད། །བདག་གི་ཉོན་མོངས་ཚོགས་རྣམས་ལས། །བྱུང་བའི་སྡིག་པའི་ཚོགས་རྣམས་ནི། །རྗེ་བཙུན་འཇམ་དབྱངས་སྤྱན་སྔ་རུ། །དེ་དག་ཐམས་ཅད་བཤགས་པར་བགྱི། །རྫོགས་པའི་སངས་རྒྱས་ཉིད་དང་ནི། །བྱང་ཆུབ་སེམས་དཔའ་དགེ་འདུན་མཆོག །སློབ་སོགས་དགེ་བ་ཐམས་ཅད་ལ། །རྒྱ་ཆེར་བདག་ནི་རྗེས་ཡི་རང༌། །ཁམས་གསུམ་རྣམ་རྟོག་དྲ་བ་ཡིས། །མངོན་པར་གཏིབས་པ་མུན་ནག་ལ། །ཐེག་པ་ཆེན་པོའི་ཡེ་ཤེས་ཆེ། །ཆོས་ཀྱི་སྒྲོན་མེས་འོད་སྣང་མཛོད། །རྫོགས་སངས་འཁོར་བའི་ཆོས་རྣམས་ལས། །ཆོས་སྐུར་མྱ་ངན་འདའ་བཞེད་པ། །འཁོར་བ་


DTG047_Page_0163
[མ་དཔེ་གཟིགས་ན་འདིར་གནོན།]

ཇི་སྲིད་གནས་བར་དུ། །སེམས་ཅན་དོན་མཛད་བཞུགས་སུ་གསོལ། །བསོད་ནམས་ཚོགས་ལས་མངོན་བྱུང་བའི། །དགེ་བའི་བསོད་ནམས་མ་ལུས་ཀུན། །སེམས་ཅན་འཁོར་བ་ལས་སྒྲོལ་ཕྱིར། །ཐམས་ཅད་བྱང་ཆུབ་མཆོག་ཏུ་བསྔོ། །མཆོད་པ་ཉི་ཤུའི་ཚོགས་རྣམས་ཀྱང་དེ་སོགས་རོལ་མོའི་ཚོགས་རྣམས་ནི། །རྣལ་འབྱོར་པ་ཡིས་འབད་པ་ཡི། །རྡོ་རྗེ་ཆེན་པོ་མཆོད་བྱས་ལ། །དེ་ནས་བློ་ཡིས་གཤེགས་སུ་གསོལ། །དེ་ནས་སྟོང་པ་ཉིད་བསྒོམས་ཏེ། །སྙིང་རྗེས་བྱིན་པའི་གསལ་བར་བྱ། །དེ་ནས་སྲུང་བའི་འཁོར་ལོ་ནི། །རྡོ་རྗེ་ས་གཞིར་བ་དང༌། །འབར་བའི་ཁང་པ་དྲག་པོ་ལ། །མཚོན་ཆ་ཚོགས་ཀྱིས་སྤྲས་པར་བསམ། །ནང་དུ་ཆོས་འབྱུང་དཀར་པོ་ནི། །གྲུ་གསུམ་མཚོན་པ་དང་བཅས་པ། །རྡོ་རྗེ་གཞལ་ཡས་ཁང་བསྐྱེད་ལ། །རྣལ་འབྱོར་བཞི་ཡི་ཚུལ་དག་གིས། །དེ་ཉིད་དཀྱིལ་འཁོར་སྨིན་པར་བྱ། །དེ་ནས་བདུད་རྩི་བྱིན་བརླབས་ཏེ། །རྩ་བའི་དཀྱིལ་འཁོར་རིམ་བཞིན་མཆོད། །དེ་ནས་མཐེ་བོང་སྲིན་ལག་གིས། །བླངས་པའི་བདུད་རྩི་བྱུགས་པ་ཡིས། །ཆོས་འབྱུང་གྲུ་གསུམ་དཀར་དམར་བྲི། །དེ་ནས་བདུད་རྩིའི་ཐིག་ལེ་ཡིས། །མཛེས་པའི་མེ་ཏོག་ལེགས་བཀྲམ་སྟེ། །སྐད་ཅིག་བསྐྱེད་དང་དགུག་གཞུག་བྱ། །དེ་ནས་བདུད་རྩི་ཕུལ་ནས་ཀྱང༌། །བདག་ཉིད་ལ་ནི་མཆོད་པར་བྱ། །ཐབས་དང་གསང་བས་བླངས་ནས་ཀྱང༌། །ལྕེ་རྩེ་སྨིན་མཚམས་སྤྱི་བོར་གཏོར། །དེ་ནས་དེ་དག་མི་དམིགས་བསྒོམ། །རྩ་བའི་དཀྱིལ་འཁོར་ཉིད་ལ་ནི། །གསང་བའི་དཀྱིལ་འཁོར་མཆོད་ནས་ཀྱང༌། །བསྟོད་ཅིང་བདུད་རྩི་མྱངས་ནས་ཀྱང༌། །གསལ་བར་དམིགས་ནས་བཞུགས་སུ་གསོལ། །དེ་ནས་ཞིང་སྐྱོང་འཁོར་བཅས་ལ། །གཏོར་མ་རྒྱ་ཆེན་བཏང་བ་ནི། །ཡི་གེ་གསུམ་གྱི་ངོ་བོ་ཡིས། །བསྲེགས་དང་སྦྱངས་དང་གཏོར་བྱས་ལ། །མཎྜལ་བཟང་པོ་ཡིད་འོང་སྟེ། །ཐིག་ལེ་ལེ་ཙེ་དགུ་བྱས་ཏེ། །དབུས་ལ་ཡེ་ཤེས་འཁོར་ལོ་བསམ། །ཕྱོགས་དང་མཚམས་ལ་ཞིང་སྐྱོང་བརྒྱད། །མ་མ་སུམ་ཅུ་རྩ་གཉིས་དང༌། །བཅས་པ་སྤྱན་དྲངས་མཆོད་པ་བྱ། །ཨོཾ། །ཤིང་གཅིག་དང་ནི་དུར་ཁྲོད་དང༌། །རི་བོ་དང་ནི་རི་སུལ་ཕུག །གྲོད་དང་བཞི་མདོ་དེག་དང་ནི། །ཁྱད་པར་དུ་ནི་ཁང་སྟོང་དང༌། །གདོལ་པའི་སྣོད་དང་ཐང་དང་ནི། །


DTG047_Page_0164
[མ་དཔེ་གཟིགས་ན་འདིར་གནོན།]

ཁྱད་པར་དུ་ནི་ཆུ་ལ་གནས། །ནག་པ་དྲག་པོ་དྲག་པོ་ཆེ། །ལྷ་སྦྱིན་མཉམ་དུ་བསྟེན་པ་དང༌། །ནག་པོ་གཙིགས་དང་མི་སྡུག་དྲག །རྒྱ་ལས་འདས་དང་ལོག་འདྲེན་རྣམས། །རྒྱན་བྱད་མོ་དང་དྲག་མོ་དང༌། །མི་སྡུག་མ་དང་ཨུ་མ་དང༌། །རྒྱལ་བ་རྣམ་པར་རྒྱལ་མ་དང༌། །མི་ཐུབ་གཞན་གྱིས་མི་ཐུབ་མ། །ནག་མོ་བཟང་མོ་ནག་ཆེན་པོ། །ནག་སྦོམ་མ་དང་རྣལ་འབྱོར་མ། །དབང་མོ་དང་ནི་ཟླ་བ་མོ། །དྲག་ཏུ་སྡང་དང་འཕྱང་བ་མོ། །འཕྲོག་བྱད་མ་དང་མར་མེ་མ། །འཇིབ་བྱེད་གྲོང་གནས་རྣལ་འབྱོར་མ། །དྲག་པོའི་གཟུགས་དང་དྲག་ཆེན་མོ། །མཆེ་བ་གཙིགས་པའི་ཐོད་ཆེན་མོ། །ཐོད་ཕྲེང་ཕྲེང་ཅན་ཁ་ཊྭཱཾ་མ། །སྤྲུལ་ཆེན་རལ་གྲི་དགྲ་སྟ་ཅན། །རྡོ་རྗེ་དེ་བཞིན་གཞུ་ཅན་མ། །དེ་བཞིན་ཆེན་མོ་མཁའ་འགྲོ་མ། །ལས་ཀུན་རྗེས་སུ་གྲུབ་བྱེད་མ། །སྦྱོར་བའི་དཀྱིལ་འཁོར་རྒྱ་ཆེན་མོ། །དེ་བཞིན་རྡོ་རྗེ་དབང་ཕྱུག་གཙོ། །དེ་བཞིན་གཤེགས་པའི་སྐུ་ཆེ་སྟེ། །རྡུལ་བྱེད་རྣལ་འབྱོར་འབྱིན་པ་མོ། །རྡོ་རྗེ་དབང་མོའི་བཀའ་འདི་ཡིས། །ཐམས་ཅད་མ་ལུས་འདིར་འདུས་ཤིག །ཨོཾ་ཀཀྐ་ཌྷཱ་ན། བབྦན་ན། ཁ་ཁཱ་ཁཱ་ད་ན། སརྦ་དུཥྚཱ་ན། ཧ་ན་ཧ་ན། གྷཱ་ཏ་ཡ་གྷཱ་ཏ་ཡ། ཨ་མོ་ཀ་སྱ་ཧཱུཾ། ཞེས་པས་བཀུག་ལ། པདྨའི་གདན་ལ་གནས་པར་བསམས་ལ། མཆོད་པ་ལྔར་བྱིན་གྱིས་བརླབས་པ་དེ་ཉིད་དབུལ་ཏེ། །སྔགས་དེ་ཉིད་ཀྱི་མཇུག་ལ། ཨ་མུ་ཀ་སྱ་ཤཱནྟི་དཀུ་རུ་ཧཱུཾ་ཧཱུཾ་ཕཊ་སྭཱ་ཧཱ། ཞེས་པས་དབུལ་ཏེ། སོ་སོའི་ལྕེ་ལ་ཧཱུཾ་ལས་རྡོ་རྗེར་བྱིན་གྱིས་བརླབས་པར་བསམས་པའི་སྦུ་གུའི་འོད་ཀྱིས་དྲངས་ཏེ་མཆོད་པར་བསམས་ལ། དེ་ནས་ཆོས་བཤད་དེ། ཆོས་རྣམས་གཟུགས་བརྙན་ལྟ་བུ་སྟེ། །དག་ཅིང་གསལ་ཞེས་བྱ་བ་བརྗོད་ནས། སྨོན་ལམ་བཏབ་སྟེ། སེམས་ཅན་ཐམས་ཅད་སྡིག་མེད་ཅིང༌། །སེམས་ཅན་ཐམས་ཅད་བདེ་གྱུར་ཅིག །གང་གི་ལམ་ནས་འགྲོ་བ་ཡི། །སངས་རྒྱས་ཉིད་དང་ཕྲད་པར་ཤོག །མ་བསྒྲལ་བ་རྣམས་བསྒྲལ་བ་དང༌། །མ་གྲོལ་བ་རྣམས་བདག་གིས་དགྲོལ། །ད་ལྟ་ཉིད་དུ་རྗེས་བརྩེ་བས། །རྣལ་འབྱོར་བསྟན་བཅོས་གནས་ལ་དགོད། །ཅེས་བྱ་བས་བསྔོ་བར་བྱས་གཤེགས་སུ་མི་གསོལ། དེ་ནས་རྣལ་འབྱོར་ཕོ་མོ་ཀུན་ལྷའི་དཀྱིལ་འཁོར་དུ་བལྟས་ལ། དང་པོ་དྲི་ཡིས་མཆོད། དེ་ནས་མེ་ཏོག་


DTG047_Page_0165
[མ་དཔེ་གཟིགས་ན་འདིར་གནོན།]

དང་བདུག་པ་དང་མར་མེ་དང༌། ལྷ་བཤོས་ཀྱི་ཚུལ་བཞིན་དུ་མཆོད་ལ། དེའི་འོག་ཏུ་བདུད་རྩི་དང་བཅས་པའི་ཆང་གིས་མཆོད་དེ། ལག་པ་གཡོན་པས་ཆད་བཟུང་ནས། །གཡས་པས་རྩེ་གསུམ་པ་བྱས་ལ། །ཚིགས་སུ་བཅད་པ་འདིས་སྦྱིན་ཏེ། །ལྟོས་ཤིག་མཛེས་པ་དམ་པའི་ཆོས། །འདི་ལ་ཐེ་ཚོམ་ཡོད་མ་ཡིན། །བྲམ་ཟེ་ཁྱི་དང་གདོལ་པ་གསུམ། །རང་བཞིན་གཅིག་ཏུ་རྟོགས་པར་བཟའ། །ཞེས་བྱ་བས་དྲང་ངོ༌། །ལེན་པ་པོས་བརྗོད་པ། འདོད་ཆགས་དྲི་མ་བྲལ་བ་ཡི། །རིན་ཐང་མེད་ལས་ལེགས་འོངས་ཆོས། །གཟུང་དང་འཛིན་པ་རྣམ་པར་སྤངས། །དེ་ཁོ་ན་ཉིད་བདག་ཕྱག་འཚལ། །ཞེས་པས་པདྨའི་བསྐོར་བ་དང་བཅས་པས་བླང་ངོ༌། །འོག་མ་རྣམས་ལ་དྲང་བ་ལ་འདི་སྐད་བརྗོད། །སྦྱོར་བའི་དུས་ན་དངོས་གྲུབ་ནི། །སྤྱོད་ཀུན་དེ་ཉིད་དེ་བཞིན་དུ། །རྣལ་འབྱོར་པས་ནི་ཀུན་དུ་སྤྱད། །ཇི་ལྟར་བདེ་བར་སྤྱད་པར་བྱ། །ཞེས་བྱ་བ་བརྗོད་ལ་བྲིམ་མོ། །དེའི་འོག་ཏུ་ཤ་ཁུ་དང་གུར་མར་གྱིས་མཆོད། །དེ་ནས་ལྷ་བཤོས་སོ་སོར་དྲངས་ལ། དེ་ནས་ཀུན་གྱིས་ཕུད་བསྡུས་ལ། སློབ་དཔོན་ལ་ཕུལ་ནས། སློབ་དཔོན་གྱིས་ཆ་གཉིས་སུ་བགོས་ཏེ། ཆ་གཅིག་གཡོན་གྱི་ཕྱོགས་སུ་བགོས་ལ་བྱིན་གྱིས་བརླབས་ལ། དཀྱིལ་འཁོར་གྱི་ལྷ་ལ་དབུལ། ཆ་གཅིག་གཡས་སུ་བཞག་ལ། བྱིན་གྱིས་བརླབས་ལ་ཕྱོགས་སྐྱོང་ལ་དབུལ་ཏེ། ཨོཾ་ཨ་ཀཱ་རོ་ཀུ་ཁཾ་ཞེས་པའི་སྔགས་ཀྱིས་མཆོད། དེ་ནས་ཅི་བདེར་རོལ་ཅིང་ལོངས་སྤྱོད། སྐབས་དེར་བཀྲ་ཤིས་བྱའོ། །དེ་ཉིད་ཡང་དག་སྤྱོད་པ་ཡི། །རྣལ་འབྱོར་པ་ནི་ཀུན་ནས་བདག །ཇི་ལྟར་བདེ་བར་བརྗོད་པར་བྱ། །སྒྱུ་མ་ལྟ་བུར་མཛེས་པ་ཡིས། །གཉིས་སྤྲོད་ཀུན་འཁྱུད་སོགས་སྦྱོང་བ། །ལུས་ཅན་དོན་དུ་ཡང་དག་སྤྱད། །དངོས་པོ་བྲལ་ལ་ཕྱག་འཚལ་ལོ། །དེ་ནས་ལྷ་དང་ཕྱོགས་སྐྱོང་ལ་གནང་བ་ནོད་པ་དང༌། །བཛྲ་སཏྭས་བཟོད་པར་གསོལ་བ་བྱས་ཏེ། བཛྲ་མུཿ་ཞེས་པས་གཤེགས་སུ་གསོལ། དམ་ཚིག་གི་ལྷ་སྙིང་གར་བསྡུས་ལ། ཨོཾ་པདྨ་ཀོ་ཤི་ཧཱུཾ་ཞེས་བསྡུའོ། །ཨོཾ་བཛྲ་དྷུ་པེ་གྲིཧྞ་གྩྪ་ཧཱུཾ། ཞེས་བྱ་བས་ཕྱི་རོལ་གྱི་ལྷ་གཤེགས་


DTG047_Page_0166
[མ་དཔེ་གཟིགས་ན་འདིར་གནོན།]

སུ་གསོལ་ལོ། །དེ་ནས་ལྷག་མ་བསྡུས་ཏེ། དེ་ལ་ཡང་གཉིས་ཏེ། རྣལ་འབྱོར་ཕོ་མོའི་ལྷག་མ་ནི་ཕྱི་རོལ་གྱི་ཤ་ཟ་ལ་སོགས་པ་མི་མ་ཡིན་པ་རྣམས་ལ་བཏང་སྟེ། ཕྱི་སྒོར་བཏོན་ལ་བཏང་ངོ༌། །ཁྱིམ་པའི་ལྷག་མ་ནི་ཁྱིམ་པ་དེ་ཉིད་ཀྱི་མི་མ་ཡིན་པ་ལ་བསྔོའོ། །ལྷག་མ་དེ་ལྟ་བུའི་སྐལ་པ་མེད་པ་ལ། སློབ་དཔོན་གྱི་ཁ་ནས་བདུད་རྩིར་བྱས་ལ་སྦྱིན་ནོ། །དེ་ནས་ཡོན་བདག་དང་འཁོར་ལ་བཀྲ་ཤིས་དང་སྨོན་ལམ་གདབ་པོ། །དེ་ནས་གཏོར་སྐྱེལ་དེ་ལོག་པ་དང༌། ཚོགས་ཀྱི་ཁང་སྒོར་མེ་ལོང་དང་དུང་བུད་པ་དཀྲོལ་ཆུ་ཅན་གྱི་ཟན་ནི་མཆོད། དེ་ནས་ནང་དུ་ལོག་ནས་རྣལ་འབྱོར་ཕོ་མོ་ལ་ཡང་དེ་བཞིན་མཆོད་པ་བྱའོ། །མ་འོངས་སྐྱེ་བོའི་ཚོགས་རྣམས་བསགས་པར་འདོད་པ་དང༌། །བསླབ་པའི་ལམ་ལ་ཞུགས་པའི་རྣལ་འབྱོར་པ། །དོན་དུ་དྲི་མེད་ལུང་དང་བླ་མའི་མན་ངག་ལྟར། །མ་ནོར་བཟུང་སྟེ་བདག་དང་གཞན་ལ་ཕན་ཕྱིར་བྲིས་པ་ཡིན། །ཚོགས་ཀྱི་འཁོར་ལོའི་རིམ་པ་སློབ་དཔོན་ནག་པོ་ཞབས་ཀྱིས་མཛད་པ་རྫོགས་སོ།།

གཤིན་རྗེ་གཤེད་ནག་པོའི་ཞི་བའི་སྦྱིན་སྲེག་གི་ཆོ་ག་ཞེས་བྱ་བ།
ནག་པོ།


DTG047_Page_0166
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། །ཀྲྀཥྞ་ཡ་མཱ་རི་ཤཱནྟི་ཧོ་མ་བི་དྷི་ནཱ་མ། བོད་སྐད་དུ། གཤིན་རྗེ་གཤེད་ནག་པོའི་ཞི་བའི་སྦྱིན་སྲེག་གི་ཆོ་ག་ཞེས་བྱ་བ། མགོན་པོ་འཇམ་དཔལ་ལ་ཕྱག་འཚལ་ལོ། །སྐུ་གསུང་ཐུགས་ཀྱི་བདག་ཉིད་ཅན། །ཆར་སྤྲིན་གཞོན་ནུའི་མདོག་འདྲ་བ། །རྟོག་བྲལ་ལྷུན་གྱིས་སྐྱེས་པའི་བདག །གཤིན་རྗེ་གཤེད་ལ་ཕྱག་འཚལ་ཏེ། །སྡིག་པ་ཞི་དང་བསོད་ནམས་འཕེལ། །དབང་དུ་བྱ་དང་ཚར་བཅད་དང༌། །དངོས་གྲུབ་མྱུར་དུ་ཐོབ་བྱའི་ཕྱིར། །བདག་གིས་སྦྱིན་སྲེག་བཤད་པར་བྱ། །བདེ་གཤེགས་ཆོས་ཀྱི་སྐུ་དག་གི །བསྙེན་པ་སྔོན་དུ་སོང་བ་ཡིས། །ཡིད་དགའ་བ་ཡིས་ཕྱོགས་སུ། །བཀྲ་ཤིས་བཟང་པོའི་གཞི་དག་ལ། །མཚན་ཉིད་ལྡན་པའི་ས་སྦྱངས་ནས། །ཚད་དང་ལྡན་པའི་ཐབ་ཁུང་ནི། །རྒྱར་ནི་ཁྲུ་གང་ཟབས་སུ་ཕྱེད། །ཁ་ཁྱེར་སོར་བཞི་དོར་ནས་ཀྱང༌། །དཔངས་དང་རྒྱ་རུ་སོར་བཞི་བརྩིག །ཕྱོགས་ཀྱི་ཐད་ཀར་སོར་གཉིས་ལས། །དྲ་བ་ཟླ་ཚེ་རྡོ་རྗེའི་གཟུགས། །ཁ་དོག་དཀར་པོ་ཉིད་བྱས་ཏེ། །ཙནྡན་དཀར་པོའི་འོ་མས་བྱུགས། །


DTG047_Page_0167
[མ་དཔེ་གཟིགས་ན་འདིར་གནོན།]

མེ་ཏོག་དཀར་པོ་དུས་གསུམ་གཏོར། །ནང་དུ་འདབ་བརྒྱད་དཀར་པོ་བྲི། །འཁོར་ལོ་རྡོ་རྗེ་རིན་ཆེན་དང༌། །པདྨ་རལ་གྲི་ཕྱག་རྒྱ་དགོད། །ནང་དུ་རྡོ་རྗེའི་ཕྲེང་བ་སྟེ། །ཁ་ཁྱེར་མེ་རིས་རྣམ་པར་བསྐོར། །ཐབ་ཀྱི་དབང་དུ་བྱས་པའོ། །བུད་ཤིང་ཚད་ནི་ཁྲུ་གང་ལ། །སྐམ་པ་དང་ནི་རྙིང་པ་དག །རུལ་དང་སྲོག་ཆགས་རྣམ་སྤངས་ཏེ། །ནྱ་གྲོ་དྷ་དང་པཱ་ལ་ཤ་།ཤ་མི་ཏ་དང་དྲི་བཟངས་དང༌། །བྱང་ཆུབ་ཤིང་དང་ཙནྡན་དང༌། །དྲི་ཞིམ་བཟང་པོའི་ཤིང་དེ་དག །ཐབ་ཀྱི་ཁོར་ཁོར་ཡུག་ཏུ། །ཀུ་ཤ་སྔོན་པོ་བཀྲམ་པའི་སྟེང༌། །ཐབ་ཁུང་དམའ་བར་ལེགས་བརྩིགས་ལ། །སྦྲང་རྩི་འོ་མ་དྲི་ཆུས་བྱུག །བུད་ཤིང་དབང་དུ་བྱས་པའོ། །ཡམ་ཤིང་འབྲས་བུ་ཙནྡན་གྱི། །ཤིང་ངམ་དྲི་ཞིམ་ཤིང་དག་ལ། །རྩེ་མོའི་ཆ་ལས་བྱུང་བ་ཡི། །རློན་དང་འདབ་མར་བཅས་པ་སྟེ། །སོར་བཅུའི་ཚད་དུ་མངོན་པར་གསུངས། །དྲི་ཆུ་འོ་མས་སྦགས་ལ་བཞག །རྩེ་གཉིས་གས་དང་ཆག་པ་དང༌། །འབུས་ཟོས་པ་དང་སྲོག་ཆགས་བཅས། །ཤུན་པ་མེད་དང་བརླ་བསྐམས་དང༌། །ཡོ་དང་རུལ་དང་སྦོམ་པ་དང༌། །རིང་ཐུང་ཕྲ་བ་རྣམ་པར་སྤངས། །གདགས་ཡིག་བཏགས་ལ་བསྲེག་པར་བྱ། །བྱེ་བྲག་དང་ནི་སྡེ་ཚན་ནོ། །ན་མཿ་ཤཱནྟི་དཀུ་རུ་སྭཱ་ཧཱ། ཨུ་མ་ཀ་སྱེ་སརྦ་ཏྲེ་ཧ་ཎཾ། སརྦ་བིགྷྣཱ་ན། སརྦ་ཛྭ་ར་ཎཾ། སརྦ་བྱཱ་དྷི་ནཾ། སརྦ་རོ་ག་ནཾ། སརྦ་བིཥ་ནཾ། སརྦ་ཨ་མཾ་ག་ལེ་ནཾ། སརྦ་དུ་ར་ནི་མི་ཏ་ནཾ། སརྦ་པཱ་པཾ་ཀརྨཱ་བ་ར་ཎཾ། ཤཱནྟི་དཀུ་རུ་སྭཱ་ཧཱ། ཏིལ་དང་ཡུངས་ཀར་རྒྱལ་པོ་ནི། །སྡིག་པ་སྦྱང་ཕྱིར་བསྲེག་པར་བྱ། །ཨོཾ་སརྦ་པཱ་པཾ་ད་ཧ་ན་བཛྲཱ་ཡ་ཧཱུཾ་ཕཊ་སྭཱ་ཧཱ། དེ་ནས་མཆོད་བསྟོད་གསོལ་བ་གདབ། །དགང་བླུགས་ཕུལ་ལ་བསྲེག་པར་བྱ། །ཡེ་ཤེས་གཤེགས་ལ་དམ་ཚིག་བསྡུ། །ཨོཾ་ཨཱཿ་ཧུའཾ་མུ།། དེ་ནས་མེ་སྦྱངས་སྲེག་རྫས་ཀྱི། །ལྷག་མ་ཇི་སྙེད་པ་རྣམས་ནི། །མེ་ཡི་ལྷ་ལ་སྔགས་ཀྱིས་དབུལ། །མཆོད་བསྟོད་དགང་བླུགས་བཟོད་གསོལ་བྱ། །ཡེ་ཤེས་མེ་ལྷ་གཤེགས་སུ་གསོལ། །དམ་ཚིག་འབར་བའི་རྣམ་པར་བསྟིམ། །དེ་ནས་བདག་གི་ཕྱག་རྒྱ་ཆེ། །དགྲོལ་དང་ཐུགས་ཀར་བསྡུ་ཚུལ་


DTG047_Page_0168
[མ་དཔེ་གཟིགས་ན་འདིར་གནོན།]

གྱིས། །དམ་ཚིག་རྒྱལ་པོར་གནས་ནས་ཀྱང༌། །ཐབ་ལ་བསྐོར་ཞིང་མེ་ཏོག་དབུལ། །དེ་ནས་གླེགས་བམ་ཀློག་ལ་སོགས། །ཇི་ལྟར་མཐུན་པའི་སྤྱོད་ལམ་བྱ། །སྒྲུབ་ཐབས་མངོན་རྟོགས་འདི་དག་ནི། །དངོས་གྲུབ་ཐོབ་ཕྱིར་བདག་གིས་བརྩམས། །འདི་ཡིས་བསོད་ནམས་གང་ཐོབ་དེས། །ཀུན་གྱི་ཐུན་མོང་མཆོག་ཐོབ་ཤོག །དཔལ་གཤིན་རྗེ་གཤེད་ནག་པོའི་ཞི་བའི་སྦྱིན་སྲེག་གི་ཆོ་ག་རྫོགས་སོ།། །།བླ་མ་ནག་པོའི་ཞབས་ཉིད་ཆེན་པོ་ལ། །གསེར་གླིང་རྣལ་འབྱོར་གུ་ཎ་ཛྙཱ་ན་ཡིས། །བྲམ་ཟེ་ཀརྨ་ཙནྡྲ་བཏང་ནས་ཀྱང༌། །རྣལ་འབྱོར་རྣམས་ཀྱི་ཞལ་ངོར་སྦྱིན་སྲེག་འདི། །དཔལ་མཆོག་རྡོ་རྗེ་གདན་དུ་རྣམ་པར་བརྩམས། །ཐེག་པ་ཆེ་ལ་ཉི་མའི་འོད་བཞིན་མཛེས། །རྣལ་འབྱོར་པ་བསོད་ནམས་པ་པྲ་ཛྙཱ་ཤྲཱི་ཛྙཱ་ན་ཀཱི་རྟིས་རང་འགྱུར་དུ་བྱས་པའོ།།

ཡི་དྭགས་ཐམས་ཅད་རྡོ་རྗེས་བཅིངས་པ།
ནག་པོ་པ།


DTG047_Page_0168
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། སརྦ་པྲེ་ཏ་བཛྲ་པཱ་ཤ་ཀ །བོད་སྐད་དུ། ཡི་དགས་ཐམས་ཅད་རྡོ་རྗེས་བཅིངས་པ། །དཔལ་གཤིན་རྗེ་གཤེད་ལ་ཕྱག་འཚལ་ལོ། །གཤིན་རྗེའི་སློབ་དཔོན་མི་མཆོག་གིས། །བསྙེན་པ་ལས་སྔགས་བསྟན་པ་ནི། །སྦྱོར་བ་རྫོགས་པ་འབུམ་ཚོ་གཅིག །མར་ངོའི་ཚེས་བདུན་ནས་བརྩམས་ཏེ། །དགུ་ཡི་བར་དུ་བཟླས་པ་བྱ། །གཤིན་རྗེ་ཉིད་ཀྱང་འཆིང་འགྱུར་ན། །དེ་ལས་གཞན་པ་སྨོས་ཅི་དགོས། །མཐེབ་སོར་ཉི་ཤུའི་ཚད་ཅན་ནང༌། །རྒྱར་བཅས་གྲུ་གསུམ་སོར་བཅུ་ཟབས། །སོར་གསུམ་ཁ་ཁྱེར་ཕྱིར་བསྐྱེད་པའི། །སོར་གསུམ་རྒྱ་དང་དཔངས་སུ་མཉམ། །དུར་ཁྲོད་སོལ་བས་ནང་བྱུགས་ཏེ། །ཁྲུག་གིས་སོར་གསུམ་གཉིས་ཀྱང་བྱུག ། ལྕགས་ཕྱེ་ཐལ་ཆེན་སོར་རེའི་ཚད། །རབས་ཆད་ནག་པོའི་ཐོད་པ་ལ། །ནང་ཁྲག་དུག་གིས་བྱུགས་ནས་ཀྱང༌། །ཚངས་པའི་བུ་གར་སྐར་ཁུང་གདོང༌། །གསང་ཁུང་ཆེན་པོ་གཅིག་བཏོད་ནས། །ཆོས་འབྱུང་ཁ་སྦྱོར་ལྗང་གུ་ལ། །མུ་ཁྱུད་རྡོ་རྗེ་རབས་བསྐོར། །སྐུ་ཡི་ཡིག་འབྲུ་དྲུག་བཀོད་ལ། །ལྟེ་བར་བསྒྲུབ་བྱ་མིང་དང་བཅས། །འོག་ཏུ་མནན་པའི་རྒྱབ་སྟེགས་སུ། །དུར་ཁྲོད་རོ་ཡི་རས་དག་ལ། །གསེར་གྱི་ས་གཞི་དང་ལྡན་པའི། །རི་རབ་ལྕོག་བརྒྱད་བཀོད་པ་བྲི། །དེ་སྟེངས་སྣ་ཚོགས་རྡོ་རྗེས་མཚན། །ཧཱུཾ་དང་ལཾ་དང་ཧཱུཾ་ཡིག་བྲི། །རེའུ་མིག་ཐག་པ་བཞིས་བརྟོད་


DTG047_Page_0169
[མ་དཔེ་གཟིགས་ན་འདིར་གནོན།]

ལ། །ཚ་བ་རྣམས་དང་ལྕགས་ཕྱེ་སོགས། །འབྲུ་གསུམ་བཟླས་པ་བྱས་ལ་གདབ། །ཨོཾ་ལས་ཆོས་འབྱུང་དཀྱིལ་ཉིད་དུ། །སྤྲུལ་པའི་ཁྲོ་བོས་བཀུག་ལ་གཟུགས། །ས་དང་རི་རབ་རྡོ་རྗེ་དང༌། །བདག་ཉིད་གཤིན་རྗེ་གཤེད་ཀྱིས་མནན། །སྐྲག་ཅིང་གཟིར་ཅིང་འབར་བར་བལྟ། །ཨོཾ་ཀཱ་ལ་རུ་པ་ཧཱུཾ། ཨོཾ་ཧྲཱིཿ་ཥྚྲྀཿ་ཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཨོཾ་ནྲི་མ་ར་ནྲི་མཱ་ར། སྙིང་ཌི་ཤྲི་ཌི་ཤྲི། ཡ་མ་ཁྲག་ཚུལ་བ་བཾ། སི་རི་སི་རི། །རིལ་དཾ་དུཾ་པུ། ནག་པོ་ཏི་པ་ར་ན་ཤག་ནཾ། སྙིང་ལ་ཐོད་པ་པྲ་ཤག་ནཾ། བཛྲ་ཀཱི་ལི་ཀཱི་ལི་ཡ། དེ་ནས་དུར་ཁྲོད་གཡམ་པ་ལ། །དྲི་སོགས་དུག་གིས་བྱུགས་ནས་ཀྱང༌། །རྒྱ་གྲམ་རྡོ་རྗེ་བྲིས་པ་ལ། །དབུས་སུ་ནྲི་དང་རྩེ་མོར་ཛཿ། །བཀོད་པས་ཁད་གབ་མནན་པར་བྱ། །ཐལ་ཆེན་དུག་གི་རྒྱ་ཡང་བྱ། །ཧཱུཾ་ལས་ངག་སེམས་ལས་སྐྱེས་པ་ཡི། །བགེགས་ཀྱི་ཚོགས་རྣམས་ཀུན་ཉོན་ཅིག །ད་ནི་དཔལ་རྡོ་རྗེ་འཆང། །མནན་པའི་འཁོར་ལོ་རབ་སྦྱོར་བ། །རྡོ་རྗེའི་ལུས་ནི་འབར་བ་ཡིས། །གནས་གསུམ་ལས་སྐྱེས་གནོན་པར་བྱེད། །གལ་ཏེ་ཁ་ཅིག་བདག་ལས་འདའ། །འཇིག་པར་འགྱུར་གྱི་གཞན་དུ་མིན། །འཁོར་ལོ་རིན་ཆེན་པདྨ་དང༌། གཞན་དུ་ཡང་ནི་དེ་བཞིན་བརྗོད། །རྡོ་རྗེ་གོམ་པའི་སྟབས་ལྡན་པས། །ཤིན་ཏུ་མནན་པའི་ཚིག་འདི་བརྗོད། །སེམས་ཅན་ལས་དན་སྡིག་ཅན་ཁྱོད། །གཏད་དོ་གཤིན་རྗེའི་ལག་ཏུ་གཏད། །བཅིང་ངོ་རྒྱ་མཚོའི་གཏིང་དུ་བཅིང༌། །མནན་ནོ་རི་རབ་ལྗིད་ཀྱིས་མནན། །སྦྱང་ངོ་འབྱུང་བ་བཞི་ལ་སྦྱངས། །སྦའོ་ཀླུ་རྒྱལ་སྙིང་ལ་སྦ། །འདི་ལས་འདའ་བར་མ་བྱེད་ཅིག །གལ་ཏེ་བྱང་ཆུབ་སེམས་བསྐྱེད་དེ། །ཤཱཀྱ་ཐུབ་པའི་བསྟན་པ་ལ། །དད་པས་མགོན་པོ་མཆོད་སྲིད་ན། །ང་ཡིས་ཁྱོད་ལ་བདེན་པ་བསྟན། །མནན་པའི་རྡོ་རྗེ་སྦྱོར་ཆེན་པོ། །རྣལ་འབྱོར་བར་ཆད་སེལ་བྱེད་པ། །སྟོབས་ཆེན་གཞན་གྱིས་མི་ཐུབ་ཉིད། །མགོན་པོ་དེ་ལ་ཕྱག་འཚལ་བསྟོད། །གཤིན་རྗེ་གཤེད་ནག་པོའི་རྒྱུད་བཞི་བརྒྱ་ལྔ་བཅུ་པ་ནས་ཕྱུང་བ། སློབ་དཔོན་ནག་པོ་ཞབས་ཀྱིས་མཛད་པ་རྫོགས་སོ།། །།རྣལ་འབྱོར་པ་པྲ་ཛྙཱ་ན་ཀཱིརྟིའི་རང་འགྱུར་རོ།། །།

གཤིན་རྗེ་གཤེད་ནག་པོའི་མངོན་པར་རྟོགས་པའི་རིམ་པ།
རྡོ་རྗེ་བློ།

རྣལ་འབྱོར།


DTG047_Page_0170
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། །ཀྲྀཥྞ་ཡ་མཱ་རི་ཡ་བྷི་ས་མ་ཡ་ཀྲ་མ། བོད་སྐད་དུ། གཤིན་རྗེ་གཤེད་ནག་པོའི་མངོན་པར་རྟོགས་པའི་རིམ་པ། བཅོམ་ལྡན་འདས་གཤིན་རྗེ་གཤེད་ལ་ཕྱག་འཚལ་ལོ། །གུས་པས་བླ་མ་དང་ནི་གཤིན་རྗེ་གཤེད་ནག་རྡོ་རྗེ་ནི། །ཉིད་མཚུངས་དང་འདུས་བདེ་བས་ཡོངས་གང་གཞན་གྱི་དོན་འཇུག་པ། །རྡོ་རྗེ་རལ་གྲི་འཁོར་ལོ་ཆུ་སྐྱེས་གྲི་གུག་ཐོད་པ་ཕྱག་ན་བསྣམས། །ཞལ་གསུམ་པ་ལ་འཇིགས་པ་སེལ་མཛད་དེ་ལ་ཕྱག་འཚལ་ལོ། །དུས་དགྲ་ནག་པོ་སྒྲུབ་པ་ཉིད། །གང་ཞིག་འདོད་ནས་དེ་ཉིད་རིག །དབང་བསྐུར་ལ་སོགས་ཐོབ་པ་དག །དེ་ཡི་བསྒོམ་པའི་རིམ་པ་འདི། །བྱིས་པས་བདེ་བར་རྟོགས་ཕྱིར་དང༌། །མཚུངས་པ་རྣམས་ཀྱིས་དྲན་ཕྱིར་དང༌། །གོང་མ་བྱིས་པའི་ཚིག་དག་ལ། །མགུ་བ་བསྐྱེད་ཕྱིར་བྲི་བར་བྱ། །སྦྱིན་དང་ཚུལ་ཁྲིམས་ལ་སོགས་ལྡན། །སེམས་ཅན་དོན་དགའ་བློ་དང་ལྡན། །བྱམས་ལ་སོགས་ཡོན་ཏན་རྫོགས།། དད་དང་ཐོས་པས་རྣམ་བརྒྱན་པས། །དང་པོར་གདོང་ལ་སོགས་བཀྲུ་བ། །སྙིང་རྗེའི་བདག་ཉིད་སྔོན་དུ་བྱ། །དབེན་པའི་གནས་སུ་བརྩམ་བྱ་སྟེ། དུར་ཁྲོད་ལ་སོགས་བདེ་གནས་ལ། །འདུག་ནས་སྙིང་གར་པདྨ་དང༌། །ཤིན་ཏུ་འོད་གསལ་ཟླ་བ་བལྟ། །ཡ་ཡིག་སྔོན་པོ་འོད་མཛེས་པ། །སེམས་ཅན་འབྱོར་པའི་དོན་བྱེད་བལྟ། །ནམ་མཁའི་ཁམས་ནི་ཀུན་གང་བའི། །བླ་མ་དང་ནི་རྫོགས་སངས་བསྒོམ། །ལུས་ཀྱི་བཀོད་པ་བྱས་ནས་ནི། །དེ་རྣམས་དམིགས་ནས་ཕྱག་ཀྱང་བྱ། །ཙཱརྩི་ཀཱ་སོགས་ཀྱིས་མཆོད་པ། །བྱས་ལ་སྡིག་པ་བཤགས་པའང་བྱ། །ལུས་དང་ངག་དང་ཡིད་ཀྱིས་སྡིག་བགྱིས་དང་བགྱིད་དུ་སྩལ་བ་དང༌། །གང་ཡང་རྗེས་སུ་ཡི་རང་བ། །དེ་ནི་མགོན་ལ་དུས་གསུམ་བཤགས། །རྫོགས་སངས་རྒྱས་དང་དེ་ཡི་སྲས། །འཕགས་པ་རྣམས་ཀྱིས་བསགས་པ་ཡི། །བསོད་ནམས་ཀུན་ལ་རྗེས་ཡི་རང༌། །དམ་པའི་ཆོས་དང་ཚོགས་མཆོག་བཅས། །རྫོགས་སངས་རྒྱས་ལ་སྐྱབས་སུ་མཆི། །ཡོན་ཏན་རྒྱ་མཚོ་ཁྱེད་རྣམས་ལ། །བདག་གིས་ལུས་ནི་དབུལ་བར་བགྱི། །དམ་པའི་ཆོས་ཀུན་སྟོན་མཛད་པའི། །སྒྲ་ཡིས་མཛེས་པས་ཁྱེད་བཞུགས་གསོལ། །ཡང་དག་རྫོགས་སངས་སྲས་བཅས་པའི། །སྦྱིན་པ་ལ་སོགས་ངོ་བོ་ལ། །སྐུ་གསུམ་ཡེ་ཤེས་


DTG047_Page_0171
[མ་དཔེ་གཟིགས་ན་འདིར་གནོན།]

ཐོབ་བྱའི་ཕྱིར། །རབ་ཏུ་དགའ་བས་གནས་པར་བགྱི། །སེམས་ཅན་དོན་ཕྱིར་ཡང་དག་རྫོགས། །བྱང་ཆུབ་སེམས་ནི་བསྐྱེད་པར་བགྱི། །དགེ་བ་ཡང་དག་གང་བསགས་པ། །བྱང་ཆུབ་ཏུ་ནི་བསྔོ་བར་བགྱི། །དཔལ་ལྡན་གཤིན་རྗེ་གཤེད་གྱུར་ནས། །བདག་གིས་འགྲོ་ལ་ཕན་བགྱིའོ་ཞེས། །སྨོན་ལམ་དེ་ལྟར་བཏབ་ནས་ནི། །དེ་ནས་བློ་ཡིས་གཤེགས་སུ་གསོལ། །སྙིང་རྗེས་ཆོ་ག་བཞིན་བལྟས་ནས། །སྣ་ཚོགས་སྟོང་པར་རྣམ་པར་བསམ། །ངོ་བོ་ཉིད་དང་བྲལ་བའི་ཕྱིར། །རྒྱུ་ཉིད་ཀྱི་ནི་མཚན་མ་མེད། །རྣམ་པར་རྟོག་པ་སྤངས་པའི་ཕྱིར། །སྨོན་པ་ཉིད་ཀྱང་རྣམ་པར་སྤངས། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། སེམས་ཅན་དེ་བརྟན་པར་བྱས་ནས་ནི། །རཾ་ལས་བྱུང་བའི་ཉི་མ་ལ། །ཧཱུཾ་ལས་བྱུང་བའི་མདོག་སྔོན་པོ། །འོད་ཟེར་འཕྲོ་བས་ཀུན་བསྐོར་བའི། །རྡོ་རྗེ་ཀུན་ནས་རྩེ་ལྔ་པ། །བསྲུང་བའི་དོན་དུ་བསྒོམ་པར་བྱ། །རྡོ་རྗེས་ཡི་དཀྱིལ་འཁོར་དང༌། །རབ་གུར་ཡང་དེ་བཞིན་ནོ། །སངས་རྒྱས་ཞིང་ནི་རྣམ་སྦྱང་ཕྱིར། །ཡང་དག་བསྒོམ་པ་ཡང་བརྩམ་བྱ། །དེ་ལ་སྣ་ཚོགས་པད་ཟླ་བར། །རྡོ་རྗེ་བཟང་པོའི་ལུས་བྱུང་བའི། །ཆོས་འབྱུང་དཀར་པོ་གྲུ་གསུམ་པའོ། །ནང་དུ་སྣ་ཚོགས་པད་རྡོ་རྗེ། །གྱེན་འགྲེང་མཁའ་མཉམ་བསྒོམ་པར་བྱ། །དེ་ནང་དུ་ནི་དཀྱིལ་འཁོར་ཡང༌། །བྷྲཱུཾ་ཡིག་འཁོར་ལོ་ལས་བྱུང་བའི། །རྟག་པའི་ཡན་ལག་ལས་བྱུང་བ། །གྲུ་བཞི་པ་ལ་སྒོ་བཞི་པ། །རྟ་བབས་བཞི་ཡིས་མཛེས་པར་བརྒྱན། །དོ་ཤལ་སེ་མོ་དོ་ཡིས་མཛེས། །བ་དན་རྩེ་མོ་སྣ་ཚོགས་ལ། །རླུང་གིས་བསྐྱོད་པའི་དྲིལ་བུར་ལྡན། །སྣ་ཚོགས་རྡོ་རྗེ་རྣམ་པར་མནན། །ཟླ་བ་ཉི་མ་རྒྱལ་བའི་གདན། །ཤར་གྱི་ཕྱོགས་ནི་དཀར་པོ་ཆེ། །ལྷོ་ཕྱོགས་སེར་པོ་ཡང་དག་ལྡན། །ནུབ་ཀྱི་ཆ་ནི་དམར་པེ་སྟེ། །བྱང་ཕྱོགས་མ་རྒད་ལྟ་བུའོ། །དབང་ལྡན་སྔོན་པོའི་མདོག་འདྲ་བ། །དབུས་ཀྱི་ཆ་ནི་བསྒོམ་པར་བྱ། །འདི་བཞིན་སྣ་ཚོགས་རྡོ་རྗེ་དང༌། །རྩིག་ངོས་སྟེང་གཡོགས་ཀྱང་བསྒོམ་བྱ། །རྣམ་པ་ལྔ་ནི་རྣམ་བསྒོམ་ལ། །སངས་རྒྱས་གཟུགས་ནི་བསྒོམ་པར་བྱ། །དཔལ་ལྡན་རྡོ་རྗེ་འཆང་ཉིད་དེ། །རྣམ་པ་ལྔ་ཡིན་གཤིན་རྗེ་རྣམས། །འཇིགས་བྱེད་སངས་རྒྱས་གཟུགས་ཞེས་གྲགས། །དེ་ཡི་དབྱེ་བ་བཤད་པར་བྱ། །སྣ་ཚོགས་གདན་


DTG047_Page_0172
[མ་དཔེ་གཟིགས་ན་འདིར་གནོན།]

གྱི་ལྟེ་བ་ལ། །པདྨ་ཟླ་བ་དབྱངས་ཡི་གཟུང༌། །དེ་ནས་ཟླ་བ་ཀ་སོགས་པ། །ཌ་ཌྷ་ད་དྷ་ཡ་ལ་ཡང༌། །བསྣན་པ་གཉིས་འགྱུར་ལས་བྱུང་བ། ཟླ་བ་དམར་པོ་བསྒོམ་པར་བྱ། །འདི་དག་ཡོངས་སུ་རྫོགས་པ་ནི། །མེ་ལོང་ལྟ་བུའི་ཡེ་ཤེས་བརྗོད། །དེ་དག་གཅིག་གྱུར་མཉམ་པ་ཉིད། །དེར་སྐྱེས་ཧཱུཾ་ནི་སོ་སོར་རྟོག །བྱ་བ་ནན་ཏན་ལྡན་ཡེ་ཤེས། །དེ་ལས་སྐྱེས་པའི་རྡོ་རྗེའོ། །ཉི་མའི་མདངས་ལྡན་ནོར་བུ་འདྲ། །ས་བོན་དང་བཅས་འོད་ཟེར་འཁྲུག །ཨོཾ་བཛྲ་ཨཱཏྨ་ཀོ྅ཧཾ། ཞེས་བྱ་བས་ང་རྒྱལ་བྱའོ། །དེ་ལས་སྐྱ་རེངས་དང་པོའི་མདོག་ཅན་ཐུབ་པའི་ཚོགས་ཀྱིས་མཛེས་པ་ཉིད་མཚུངས་ཀྱིས་འཁྱུད་སྐུ། །སྒེག་དང་ཁྲོ་བོའི་གཟུགས་ཅན་བདེ་མཆོག་གི་རང་བཞིན་དཀར་དང་སྔོ་དང་དམར་བའི་ཞལ། །གཡོན་བརྐྱང་བ་ཡིས་གནས་པ་འབར་བའི་རལ་གྲི་རྡོ་རྗེ་གྲི་གུག་སོར་མཛད་ཅིང༌། །འཁོར་ལོ་ཆུ་སྐྱེས་སྣོད་ནི་འོད་ཟེར་འཕྲོ་བ་གཡས་དང་གཡོན་པའི་ཕྱག་ན་བསྣམས། །ཆོས་དབྱིངས་ཡེ་ཤེས་ངོ་བོ་ནི། །རྡོ་རྗེ་འཆང་གི་བདག་ཉིད་གང༌། །རྣམ་པ་ལྔ་ཡི་ངོ་བོ་ཉིད། །རྣལ་འབྱོར་ཞེས་ནི་བརྗོད་པ་ཡིན། །འདི་ནི་རྣལ་འབྱོར་རོ། །

རྗེས་སུ་རྣལ་འབྱོར།


DTG047_Page_0172
[མ་དཔེ་གཟིགས་ན་འདིར་གནོན།]

འདོད་ཆགས་ཆེན་པོས་འདུལ་བ་ཡི། །འགྲོ་བ་གསུམ་ལ་གཟིགས་ནས་ཀྱང༌། །རང་སྙིང་ཡེ་ཤེས་འོད་འཕྲོ་བས། །སྣ་ཚོགས་སངས་རྒྱས་གཟུགས་སུ་བྱ། །དགའ་བདེ་དམ་པའི་གཟུགས་ཀྱིས་ནི། །རང་གི་ལུས་ལ་མཉམ་པྲ་གཞུག །ཀུན་རྟོག་ཐམས་ཅད་སྤངས་པ་ཡི། །ལོངས་སྤྱོད་རྫོགས་པར་བདག་ཉིད་བསྒོམ། །དེ་ལྟར་སྔགས་མཆོག་ཡི་གེ་གསུམ། །དམར་པོ་ཧོཿ་གཉིས་ཀྱི་བརྟེན་པ། །ཇི་ལྟར་སྐར་མདའ་འཕོ་བ་བཞིན། །བྱང་ཆུབ་སེམས་ནི་དེ་ནས་གཞུག ། སྙིང་རྗེ་ཆགས་པའི་སེམས་ཉིད་ཀྱིས། །རྡོ་རྗེ་འཆང་ཉིད་རང་ཡང་ཞུ། །ཙཱརྩི་ཀཱ་སོགས་བྱམས་སོགས་པས། །འཁོར་ལོའི་གཙོ་བོ་སྐུལ་བར་བྱེད། །སྙིང་རྗེས་ཁྲོས་པའི་སྒྲོལ་བཞེངས། །ཁམས་གསུམ་ཀུན་གྱི་གཏི་མུག་སོལ། །དད་སྒྲོལ་རྩོལ་མེད་མ་བཞུགས་བཞེངས། །བདུད་འདི་དག་ལས་རྒྱལ་བར་མཛོད། །འཇིག་རྟེན་མགོན་པོས་སྟོང་ཉིད་ཅི་སྟེ་བཞུགས། །དད་དགྲོལ་འཇིག་རྟེན་བསོད་ནམས་ཀྱིས་བཞེངས་ཤིག །བྱང་ཆུབ་འདོད་པའི་འཇིག་རྟེན་མགྲོན་བོས་ནས། །ཇི་ལྟར་སྟོང་པ་ཉིད་ནི་སེམས་པར་བྱེད། །བསྐྱལ་ནས་ཁུ་བ་དེར་ཐིམ་པར། །དེ་ལ་རྗེས་སུ་ཆགས་


DTG047_Page_0173
[མ་དཔེ་གཟིགས་ན་འདིར་གནོན།]

པར་གྱུར། །དེ་ལྟའི་གླུ་ཡི་ངོ་ཉིད་དུ། །དེ་ལ་རྒུད་པ་ལྟར་བསམས་ནས། །ཁུ་བའི་གཟུགས་ནི་ཡོངས་གྱུར་ཏེ། །ཡཾ་སྔོན་ཉི་མ་ལས་བྱུང་བ། །ཁྲོ་བོ་སྔོན་པོ་འཕྲོ་བར་བཅས། །རུས་པའི་རྒྱན་གྱིས་རྣམ་པར་བརྒྱན། །རྭ་རྣོན་འབར་ཞིང་སྤུ་སེར་སྐྱ། །རྨིག་པས་བརྐོ་ཞིང་འཇིགས་སྦྱིན་པའི། །མ་ཧེ་ཡི་ནི་རྒྱབ་གནས་པའི། །རྡོ་རྗེ་སྔོན་པོ་འོད་དང་བཅས། །ས་བོན་བཅས་པ་དེའི་འོད་ཀྱིས། །མ་འོངས་ལས་དགྲ་འཇིགས་བྱས་ནས། །བདག་ཉིད་ལ་ནི་ཡང་དག་ཞུགས། །འཇིགས་པ་ཆེན་པོའང་འཇིགས་བྱེད་པ། །མ་ཧེའི་རྡོ་རྗེ་རྣམ་བསྒོམས་ནས། །དཀྱིལ་འཁོར་གཙོ་བོ་བསྒོམ་པར་བྱ། །འཇིག་རྟེན་གསུམ་གྱི་བདུད་དཀྱིལ་འཁོར། །འོད་ཟེར་དྲག་པོ་སྤྲོས་པས་སྐྲོད། །དྲག་པོ་མུན་འདྲ་གཟུགས་དྲག་པོ། །ལྕེ་འདྲིལ་བ་ལ་འོད་འབྱིན་པ། །སྨ་ར་སྨིན་མ་མགོ་སྐྱེས་སེར། །གཡོན་བརྐྱང་པ་ཡི་གནས་པ་ཡིས། །གཤིན་རྗེ་དྲན་པ་མེད་པར་བྱེད། །རྩ་བའི་ཞལ་ནི་ནག་པོ་སྟེ། །གཡས་པ་ཟླ་བའི་འོད་འདྲ་བ། །གཡོན་པ་ཁྲག་དང་འདྲ་བར་བཤད། །རྡོ་རྗེ་རྒྱན་གྱིས་རྣམ་པར་བརྒྱན། །ཐུང་ཞིང་གསུས་པ་འཕྱང་ལ་སྦོམ། །མགོ་བོའི་ཕྲེང་བས་རྣམ་པར་འཕྱང༌། །གཡས་དང་གཡོན་གྱི་ཕྱག་དག་ལ། །ཐོད་པ་དང་ནི་གྲི་གུག་བསྣམས། །ཉིད་མཚུངས་ཤེས་རབ་ཀྱིས་འཁྱུད་ཅིང༌།། བདེ་བར་སྙོམས་འཇུག་གཞན་དོན་འདོད། །གཡས་པའི་ཕྱག་ནི་ལྷག་མ་ལ། །རྡོ་རྗེ་གྲལ་གྲི་འབར་བ་བསྣམས། །འཁོར་ལོ་ཆུ་སྐྱེས་གཡོན་དག་ལ། །སྤྲུལ་གྱི་དབང་པོས་རྒྱན་དུ་བྱས། །སྤྲུལ་རྒྱན་སྔོན་པོ་དགའ་བོ་ཡིས། །སྐྲ་བཅིངས་ཤིན་ཏུ་འཇིགས་པར་བྱེད། །ཏཀྵ་ཀ་ཀླུ་དམར་པོ་ཡིས་རྣ་ཆ་གདུབ་ཀོར་བྱས་པས་འཇིགས། །རིགས་ལྡན་ཁྲོ་བོ་དཔུང་རྒྱན་ཏེ། །དུང་སྐྱོང་ཞེས་བྱའི་ཀླུ་དེ་ནི། །སེར་པོ་ལག་པའི་གདུ་བུ་བྱས། །པདྨ་དཀར་པོས་དོ་ཤལ་བྱས། ཀརྐོ་ཊ་ནི་ལྗང་གུ་སྟེ། །སེར་རལ་ཁ་རུ་བྱས་པས་མཛེས། །བདུད་རྩིའི་མདོག་དང་འདྲ་བ་ཡི། །ནོར་རྒྱས་བུས་ནི་སྐ་རགས་བྱས། །པདྨའི་རྩ་བ་ལྟར་དཀར་མདོག །པདྨ་ཆེན་པོ་རྐང་གདུབ་ཡིན། །ཀུན་ཀྱང་ཕུཊ་སྒྲ་དྲག་པོ་སྒྲོགས། །ལྕེ་གཉིས་མཆེ་བའི་ཕྲེང་བ་ཅན། །དེ་ལྟར་འཁོར་བ་མྱ་ངན་འདས། །གཤིན་རྗེ་འདུལ་བའི་གཟུགས་སུ་ཤེས། །རྣམ་པར་རྟོག་པ་སྤང་བའི་ཕྱིར། །སྔགས་ཀྱིས་ཡང་དག་བྱིན་གྱིས་བརླབས། །ཨོཾ་དྷརྨ་དྷཱ་ཏུ་སྭ་བྷཱ་བ་ཨཱཏྨ་ཀོ྅ཧཾ། ཞེས་བྱ་བ་ནི་རྗེས་སུ་རྣལ་འབྱོར་རོ། །

ཤིན་ཏུ་རྣལ་འབྱོར།


DTG047_Page_0174
[མ་དཔེ་གཟིགས་ན་འདིར་གནོན།]

རང་སྙིང་ས་བོན་འོད་ཀྱིས་བཀུག །ཡང་དག་རྫོགས་སངས་མཁའ་ཁྱབ་པ། །ཀུན་དུ་ཁ་ནས་གཞུག་པར་བྱ། །བདེ་བ་མྱོང་བས་སྙིང་གར་བཞུ། །བྱས་ནས་བློ་ལྡན་ཁུ་བ་དེ། །རྡོ་རྗེའི་ལམ་ནས་སྤྲོ་བར་བྱ། །ཉིད་མཚུངས་པདྨའི་ནང་དུ་གནས། །ས་བོན་ངོ་བོ་ལྡན་བྱས་ཏེ། །ས་བོན་ལས་བྱུང་འཁོར་ལོ་མཆོག །ས་བོན་ཀུན་གྱི་བྱིན་རླབས་ལ། །མེ་སྟག་ཚོགས་ཀྱིས་གསལ་གྱུར་པ། །བློ་ལྡན་ཆོ་ག་བཞིན་དུ་བསྒོམ། །དཀྱིལ་དུ་ཡཾ་སྔོན་ལས་བྱུང་བ། །བསྟན་པའི་མཚན་ལྡན་འཁོར་ལོ་ཅན། །ཤར་དུ་ཀྵེ་དང་འཁོར་ལོས་བྱུང༌། །རྟག་པ་ཕྲག་དྲུག་དཀར་པོའོ། །གནས་ན་འཁོར་ལོ་རལ་གྲི་ཕྱག །གཡོན་ན་རིན་ཆེན་ཆུ་སྐྱེས་འཛིན། །ལྷ་རུ་མ་དང་རིན་ཆེན་ལས། །བྱུང་བ་རིན་ཆེན་འབྱུང་ལྡན་ཏེ། །བཙོ་མ་གསེར་གྱི་མདོག་འདྲ་བ། །གཡས་ན་རིན་ཆེན་རལ་གྲི་བསྣམས། །ཕྱག་གཡོན་འཁོར་ལོ་ཆུ་སྐྱེས་སོ། །ནུབ་ཏུ་འདོད་ཆགས་རྡོ་རྗེ་ཅན། །མེ་དང་པདྨ་ལས་བྱུང་བ། །པདྨ་རཱ་ག་འདྲ་བའི་མདོག །པདྨ་རལ་གྲི་རིན་ཆེན་དང༌། །འཁོར་ལོ་གཡས་གཡོན་ཕྱག་ན་དགོད། །ད་དང་རལ་གྲི་ལས་བྱུང་བ། །ལྗང་གུ་ཕྲག་དོག་གཤིན་རྗེ་གཤེད། །གཡས་ན་རལ་གྲི་འཁོར་ལོ་བསྣམས། །མཛེས་པ་ནོར་བུ་པདྨ་གཡོན། །ཁྲོ་བོའི་གཟུགས་ཅན་ཐམས་ཅད་ཀྱང༌། །ཞེ་སྡང་གཤིན་རྗེ་མཚན་ཉིད་འདྲ། །དེ་དག་རྩ་བའི་ཕྱག་གཉིས་པ། །གྲི་གུག་དང་ནི་ཐོད་པ་བསམ། །རང་གི་ཤེས་རབ་ལུས་དག་དང༌། །བདེ་བའི་ངོ་བོར་གཉིས་མེད་གྱུར། །ཉི་མའི་དཀྱིལ་འཁོར་མཉམ་པར་གནོན། །རྟག་པ་ཟླ་བའི་དཀྱིལ་འཁོར་ལ། །རྡོ་རྗེ་རྩིབས་ཀྱི་རྩར་གནས་པ། །སེམས་ཅན་དོན་མཛད་བསྒོམ་པར་བྱ། །ཤར་སྒོར་ཡ་དང་ཐོ་བ་ལས། །བྱུང་བ་སྔོན་པོའི་གཟུགས་ཅན་ཏེ། གཡས་ན་ཐོ་བ་རལ་གྲི་འཛིན། །ནོར་བུ་མཆོག་དང་པདྨ་གཡོན། །ཐོ་བ་ཞེ་སྡང་གཤིན་གཤེད་འདྲ། །རྩི་དང་དབྱུག་པ་ལས་བྱུང་ལྷོར། །དབྱུག་པ་གཤིན་གཤེད་མདོག་དཀར་པོའོ། །དབྱུག་པར་རལ་གྲི་པད་འཁོར་ལོ། །ནུབ་ཏུ་པདྨ་གཤིན་རྗེ་གཤེད། ཎི་ལས་འདོད་ཆགས་མཐར་བྱེད་འདྲ། །བྱང་དུ་རལ་གྲི་གཤིན་རྗེ་གཤེད། །ར་ལས་ཕྲག་དོག་མཐར་བྱེད་མཚུངས། །ཆུ་སྐྱེས་སྔོན་པོའི་ཁྱད་པར་གྱིས། །བསྒྱུར་བ་ལྟ་ཆུང་ལ་འཇིགས་བྱིན། །


DTG047_Page_0175
[མ་དཔེ་གཟིགས་ན་འདིར་གནོན།]

ཀུན་ཀྱང་སྦྲུལ་གྱིས་རྣམ་པར་བརྒྱན། །རྣམ་འཇིགས་དགོད་པས་འཇིགས་བྱེད་པ། །སྐྲ་ནི་འབར་ཞིང་གྱེན་དུ་འགྲེང༌། །ཉི་མའི་དཀྱིལ་འཁོར་ལ་གནས་པ། །མཆེ་བ་གཙིགས་ཤིང་འཇིགས་པའི་ཞལ། །གྲི་གུག་ཐོད་པ་འཛིན་པར་མཛད། །སྣ་ཚོགས་རྡོ་རྗེའི་མཚམས་བཞི་རུ། །དེ་བཞིན་ལྷ་མོ་ཟླ་བར་གནས། །ཤར་ལྷོར་ཛ་དང་འཁོར་ལོ་ལས། །ལྷ་མོ་རྡོ་རྗེ་ཙཱ་རྩི་ཀཱ། །སྐེམ་མོ་དཀར་མོ་ཆེར་ཁྲོ་བ། །གཏི་མུག་གཤིན་རྗེ་གཤེད་དང་མཚུངས། །ལྷོ་ནུབ་མཚམས་སུ་ས་དང་ནི། །རྡོ་རྗེ་ལས་བྱུང་རྡོ་རྗེ་ཕག །ཁྲོ་ཞིང་ཕག་གི་གདོང་པ་ཅན། །ཞེ་སྡང་གཤིན་རྗེ་གཤེད་དང་མཚུངས། །ནུབ་དང་བྱང་གི་མཚམས་སུ་ནི། །རབ་ཏུ་ཞི་བའི་དབྱང་ཅན་མ། །དོ་ལས་བྱུང་བ་རབ་ཏུ་དམར། །འདོད་ཆགས་གཤིན་རྗེ་གཤེད་དང་མཚུངས། །བྱང་ཤར་མཚམས་སུ་རུ་ལས་ནི། །གཽ་རཱི་ལྗང་གུ་འཇིགས་བྱེད་མ། །ཕྲག་དོག་གཤིན་རྗེ་གཤེད་དང་མཚུངས། །སྔོན་པོའི་གཡས་པ་དཀར་པོ་སྟེ། །དཀར་པོའི་གཡས་པ་སྔོན་པོ་ཡིན། །དེ་དག་ཞལ་གཡོན་དམར་པོའོ། །གཞན་གྱི་སྔོ་དང་དཀར་བའོ། །མཚམས་བཞིན་ཎ་ཡོ་ནི་རཱ་ལས། །དཀྱིལ་འཁོར་མཚམས་སུ་ཐོད་པའོ། །ཇི་ལྟར་རང་རང་སྔགས་བསྟན་པ། །བསྐྱེད་ལ་བློ་ལྡན་གྱིས་སྤྲོ་བྱ། །ཧྰྲིཿ་ཥྚྲིཿ་ལ་སོགས་སྔགས་སྒྲ་ཡིས། །དཀྱིལ་འཁོར་བདག་པོ་བསྐུལ་བར་བྱ་།སྤྲུལ་པ་དཔག་མེད་སྤྲོས་བྱས་ལ། །སེམས་ཅན་དོན་ནི་མཆོག་བྱས་ནས། །རྣམ་པ་ཀུན་གྱིས་རང་ལུས་ལ། །ཁྲོ་བོ་དཔའ་བོ་གཞུག་པར་བྱ། །ཤར་དུ་ཛི་ནི་ཛིཀ་ཅེས་པས། །རྨོངས་པས་རྨོངས་པ་མཐར་བྱེད་པ། །རྩིབས་རྩའི་སྣ་ཚོགས་པདྨ་དང༌། །ཟླ་བ་ལ་ནི་དེ་བཞིན་བཞག །རཏྣ་དྷྲྀཀ་ཅེས་བྱ་བ་ཡིས། །ལྷོ་རྩིབས་རྩ་བར་པད་ཉི་ལ། །ཕྲ་མ་ཞེས་བྱ་བ་བཀུག་ནས་ནི། །ཆོ་ག་བཞིན་དུ་གཞག་པར་བྱ། །ཨཱ་རོ་ལྀཀ་ཅེས་སྔགས་ཀྱིས། །འདོད་ཆགས་གཤིན་རྗེ་གཤེད་འཇིགས་བྱེད་ལ། །ནུབ་ཏུ་པདྨ་ཉི་མ་ལ། ཆོ་ག་ཡིས་ནི་རྣམ་པར་བསམ། །དེ་ཉིད་པྲཛྙཱ་དྷྲྀཀ་ཅེས་པས། །ཕྲག་དོག་ནག་པོ་འཇིགས་བྱེད་པ། །བྱང་དུ་པདྨ་འོད་རྣོ་ལ། །ཆོ་ག་བཞིན་དུ་གཞག་པར་བྱ། །མུདྒ་ར་དྷྲྀཀ་དེ་ཉིད་ཀྱིས། །ཤར་སྒོ་པདྨ་ཉི་མ་ལ། །ཐོ་བ་མཐར་བྱེད་འཇིགས་བྱེད་པ། །མཁས་པས་ཆོ་ག་བཞིན་དུ་བསམ། །དཎྜ་དྷྲྀཀ་


DTG047_Page_0176
[མ་དཔེ་གཟིགས་ན་འདིར་གནོན།]

ཀྱི་སྔགས་ཀྱིས་ནི། །ལྷོ་ཡི་ཕྱོགས་སྒོར་གནས་པ་ཡི། །དབྱུག་པ་གདུལ་དཀའ་གཤིན་རྗེའི་དགྲ། །སྣ་ཚོགས་པདྨ་ཉི་མར་དགོད། །པདྨ་དྷྲྀཀ་ཅེས་བྱ་བ་འདིས། །པདྨ་གཤིན་རྗེ་གཅོད་བྱེད་པ། །ནུབ་སྒོར་པདྨ་ཉི་མ་ལ། །སྟོབས་ཆེན་ཁྲོ་བོ་བསྒོམ་པར་བྱ། །ཁཌྒ་དྷྲྀཀ་གི་དེ་ཉིད་ཀྱིས། །རལ་གྲི་གཤིན་རྗེ་ཟད་བྱེད་པ། །བྱང་དུ་པདྨ་ཉི་མ་ལ། །བདུད་ཚར་གཅོད་པ་བསམ་པར་བྱ། །སྣ་ཚོགས་རྡོ་རྗེའི་མཚམས་བཞི་རུ། །འདི་ལྟར་ལྷ་མོ་མཆོག་བཞི་བསྒོམ། །ཤར་ལྷོ་མཚམས་ཀྱི་ལྷ་མོ་ནི། །སྐེམ་མོ་ཁྲོ་ལ་འོད་བཟང་མ། །མོ་ཧ་ར་ཏིའི་སྔགས་ཀྱིས་ནི། །སྣ་ཚོགས་པདྨ་ཟླ་བར་གནས། །དེ་ཡི་ནུབ་ཏུ་རིགས་མཆོག་མ། །རྡོ་རྗེ་ཕག་མོ་ཞེས་བྱ་བ། །དྭེ་ཥ་ར་ཏིའི་སྔགས་ཀྱིས་ནི། །པདྨ་ཟླ་བར་མཁས་པས་དགོད། །དེ་ཡི་བྱང་གི་མཚམས་སུ་ནི། །རཱ་ག་ར་ཏིའི་གསང་སྔགས་ཀྱིས། །པདྨ་ཟླ་བར་དབྱངས་ཅན་དགོད། །དེ་ཡི་ཤར་དུ་གཽ་རཱི་མ། །པདྨ་ཟླ་བར་བཛྲ་ར་ཏི་ཡིས། །ཕྱག་འཚལ་བས་ནི་འདི་དག་བརྒྱན། །དཀྱིལ་འཁོར་ཕྱི་ཡི་མཚམས་བཞི་རུ། །དེ་ཉིད་གསུམ་གྱི་ཐོད་པ་སྟེ། །དེ་ལྟར་དཀྱིལ་འཁོར་དམ་པ་སྤྲོ། །བདེ་བ་དང་བཅས་བསྟན་པར་བྱ། །འཁོར་ལོ་སྔ་མ་དེར་ཐིམ་པར། །མཉམ་པར་བཞག་པས་བལྟ་བར་བྱ། །འདི་ནི་ཤིན་ཏུ་རྣལ་འབྱོར་རོ། །

རྣལ་འབྱོར་ཆེན་པོ།


DTG047_Page_0176
[མ་དཔེ་གཟིགས་ན་འདིར་གནོན།]

ནག་པོ་གཤིན་རྗེ་འཇིགས་བྱེད་ཀྱི། །དཀྱིལ་འཁོར་བ་ཡི་ངོ་བོ་ཉིད། །ལུས་དང་མིག་སོགས་ལྷ་རྣམས་ཀྱིས། །མངོན་པར་བྱིན་གྱིས་བརླབ་པར་བྱ། །འཁོར་ལོ་ཀྵིཾ་ལས་གཏི་མུག་མཚུངས། །ཅུང་ཞིག་ཁྲོ་བ་མིག་ལ་སྟེ། །རྡོ་རྗེ་མིག་ནི་མཁས་པས་བསྒོམ། །རྣ་བར་ཛྲཾ་ལས་རྡོ་རྗེ་ལས། །ནག་པོ་རྡོ་རྗེ་དང་མཚུངས་པ། །སྣ་ལ་ཁཾ་དང་རིན་ཆེན་ལས། །ཕྲ་མ་དང་མཚུངས་ཟླ་བ་ལ། །ལྕེ་ལ་གཾ་དང་པདྨ་ལས། །པདྨ་རི་བོང་ཅན་ལ་བསམ། །འདོད་ཆགས་དང་མཚུངས་ཀཾ་རལ་གྲི། །པདྨ་རི་བོང་ཅན་བཞུགས་སྐུ། །རྡོ་རྗེ་ཕྲག་དོག་གཤིན་གཤེད་མཚུངས། །ལུས་ཞེས་བྱ་བ་དཔྲལ་བ་ལའོ། །སཾ་དང་རྡོ་རྗེས་ལྟེ་བའི་སྟེང༌། །རྡོ་རྗེ་འཆང་འདྲ་རྡོ་རྗེའི་ཐུགས། །སྒེག་དང་ཁྲོ་བའི་གཟུགས་ཅན་ནོ། །ཡན་ལག་དྲུག་ལ་དགོད་པ་འདི། །མངོན་ཤེས་དོན་ནི་སྒྲུབ་ཕྱིར་བཤད། །སྙིང་གར་ཧཱུཾ་དང་རྡོ་རྗེ་ལས། །གཤིན་རྗེ་འཇོམས་པའི་ཐུགས་རྡོ་རྗེ། །མདོག་དང་མཚོན་ཆར་ཡང་དག་ལྡན། །མགྲིན་པར་ཨཱཿ་དང་པདྨ་


DTG047_Page_0177
[མ་དཔེ་གཟིགས་ན་འདིར་གནོན།]

ལས། །འདོད་ཆགས་གཤིན་རྗེ་གཤེད་འདྲ་བ། །ངག་གི་རྡོ་རྗེ་བསམ་པར་བྱ། །མགོ་བོར་ཨོཾ་དང་འཁོར་ལོ་ལས། །སྐུ་ཡི་འཁོར་ལོ་འདྲ་བ་ལུས། །ཕྱག་དང་སྐུ་མདོག་མཚོན་ཆས་ལྡན། །རྡོ་རྗེ་སྐུ་མཆོག་དེ་ཉིད་གསུམ། །བསྐྱེད་ལ་ནམ་མཁའི་དཀྱིལ་འཁོར་གནས་པའི། །སངས་རྒྱས་མཆོག་ལ་སྔགས་ཀྱིས་ནི། །བྱིན་གྱིས་བརླབ་པ་དག་ཀྱང་བྱ། །ཨོཾ་སརྦ་ཏ་ཐཱ་ག་ཏ་ཙིཏྟ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཨོཾ་སརྦ་ཏ་ཐཱ་ག་ཏ་ཝཱ་ཀ་བཛྲ་སྭ་བྷཱ་ཨཱཏྨ་ཀོ྅ཧཾ། ཨོཾ་སརྦ་ཏ་ཐཱ་ག་ཏ་ཝཱ་ཀ་བཛྲ་སྭ་བྷཱ་ཨཱཏྨ་ཀོ྅ཧཾ། །རང་སྙིང་ས་བོན་འོད་ཟེར་གྱིས། །ཕྱོགས་བཞུགས་སངས་རྒྱས་སྲ་དང་བཅས། །བཀུག་ནས་མདུན་དུ་བལྟ་བར་བྱ། །དེ་དག་ལས་ནི་སྤྲོས་པ་ཡི། །ཟླ་འདྲ་ཙཱ་རྩི་ཀཱ་སོགས་ཀྱིས། །བཟུང་བའི་བུམ་པ་དག་གིས་ནི། །དེ་དག་བཀྲ་ཤིས་གླུ་ལ་སོགས། །དང་དིར་དབྱངས་ཀྱང་ཡང་བྱས་ལ། །བདག་ཉིད་དམ་ནི་གཞན་དག་ཀྱང༌། །དབང་བསྐུར་བ་ནི་བསམ་པར་བྱ། གཤིན་རྗེ་གཤེད་ནག་མགོ་ལའོ། །བདག་ཉིད་མགོ་ལ་རྡོ་རྗེ་འཆང༌། །རང་སྙིང་ས་བོན་འོད་ཟེར་གྱིས། །ཡེ་ཤེས་འཁོར་ལོ་སྤྱན་དྲངས་ལ། །རང་གི་མདུན་དུ་བལྟ་བར་བྱ། །ཁྲོ་བོས་བགེགས་རྣམས་ཚར་བཅད་བསྲུང༌། །ཡོན་ཆབ་ཞབས་བསིལ་སོགས་ཕུལ་ལ། །ཨོཾ་མུངྒ་ར་ཛཿའི་སྔགས་ཀྱིས་དགུག །ཨོཾ་དཎྜ་ཧཱུཾ་ཞེས་བྱ་བས་གཞུག །ཨོཾ་པདྨ་བཾ་ཞེས་བྱ་བས་བཅིང༌། །ཨོཾ་ཁཌྒ་ཧོཿ་ཞེས་བྱ་བས་མཉེས་པར་བྱའོ། །སྙིང་གའི་ས་བོན་འོད་ཀྱིས་ནི། །སངས་རྒྱས་ཀུན་བཀུག་ཞལ་དུ་གཞུག །སྙིང་གར་ཞུ་བར་བྱས་པར་བལྟ། །རྡོ་རྗེའི་ལམ་ནས་རྗེས་བྱུང་ནས། །རང་གི་རིག་པའི་དབང་དཀྱིལ་དུ། །ཟླ་བ་ལས་བྱུང་ལྷ་མོའི་ཚོགས། །མེ་ཏོག་ཕྲེང་བ་སྣ་ཚོགས་སོགས། །ལག་པའི་སྣོད་དུ་གཟུང་བྱས་པ། །དེ་དག་སྒེག་དང་བཅས་པས་མཆོད། །མཆོད་པའི་གླུ་ནི་ཡིག་འཕྲོག་པ། །བསྒྱུར་པ་རྣམ་པ་སྣ་ཚོགས་པ། །བདེ་བ་ཆེན་པོ་གསལ་བར་བྱེད། །ཨ་ཀྱེ་ཀྱེ་གཤིན་རྗེ་གཤེད་ནག་པོ། །སྲིན་པོའི་གཟུགས་ཅན་རང་བཞིན་ཁྱོད། །བདག་གིས་མཐོང་ན་ཤིན་ཏུ་འཇིགས། །ཁྲོས་པའི་རང་བཞིན་འདི་ཐོང་མཛོད། །མི་དང་ས་འོག་རྒྱ་མཚོར་བཅས། །ཁྱོད་ཀྱི་གར་གྱིས་གཡོས་པར་མཛོད། །ཨཉྫ་ནག་པོ་བཅག་འདྲ་བའི། །ཁྲོ་བོས་རོ་ལངས་


DTG047_Page_0178
[མ་དཔེ་གཟིགས་ན་འདིར་གནོན།]

བཞིན་གར་མཛོད། །རྣམ་པ་སྣ་ཚོགས་གཟུགས་སྤྲུལ་ཅིང༌། །མདངས་གནག་ཚད་ནི་ཐུང་བ་ལ། །བདེ་ཆེན་ངོ་བོས་གར་མཛོད་ཅེས། །རྡོ་རྗེ་དབྱངས་ཅན་མ་གསོལ་འདེབས། །ཧྲཱིཿ་ཥྚིཿ་སྔགས་དང་གར་གྱིས་ཁྱོད། །དྲིད་པ་གསུམ་གྱི་འཁྲུལ་པ་གཅོད། །སྙིང་རྗེ་ཁྲོས་ནས་གར་མཛད་པ། །འགྲོ་བས་མཐོང་ན་ངོ་མཚར་གྱུར། །ཨོཾ་སརྦ་ཏ་ཐཱ་ག་ཏ་པཱུ་ཛ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། སྒྲ་ཡི་ཚིགས་རྣམས་ཐམས་ཅད་ནི། །བྲག་ཅ་འདྲ་བར་བལྟ་བྱས་ནས། །དཀྱིལ་འཁོར་བས་ནི་གཙོ་བོ་བསྟོད། །རེས་ཀྱང་དེ་དག་དེ་བཞིན་ནོ། །གཤིན་རྗེ་གཤེད་པོ་རབ་འཇིགས་པ། །གཏི་མུག་རྡོ་རྗེའི་ངོ་བོ་ཁྱོད། །སྟོན་པ་སངས་རྒྱས་ཀུན་རང་བཞིན། །རྡོ་རྗེ་སྐུ་ལ་ཕྱག་འཚལ་བསྟོད། །ཕྱུང་བར་བསམས་ལ། །ཨོཾ་བཛྲ་ཀཱི་ལ་ཡ་བཛྲ་མུངྒ་ར་ཨཱ་ཀོ་ཊ་ཡ་ཧཱུཾ་ཕཊ་ཅེས་བརྗོད་དོ། །ཨོཾ་བཛྲ་ཨུཏ་ཀཱི་ལ་ཡ་ཞེས་བྱ་བའི་སྔགས་དང་ཕུར་བུ་ཕྱུང་བར་བསམས་པས། །ཕྱོགས་སྐྱོང་བ་ཐམས་ཅད་གཤིན་རྗེ་གཤེད་དུ་གྱུར་པར་བསམས་ཏེ། དེ་རྣམས་ལ་ཨོཾ་ཨིནྡྲ་ཡ་ཧྲཱིཿ་ཡ་མཱ་ཡཥྚིཿ་བ་རུ་ཎཱ་ཡ་ཝི། ཀུ་བེ་རཱ་ཡ་ཀྲྀ། ཨཱི་ཤ་ནཱ་ཡ་ཏ། ཨགྣ་ཡེ་ཨཱ། ནཻ་རྲྀ་ཏཱ་ཡ་ན། བཱ་ཡ་བེ་ཡ་ན། ཙནྡྲཱ་ཡ་ཧཱུཾ་ཨརྐཱ་ཡ་ཧཱུཾ། བྲཧྨ་ཎཱ་ཡ་ཕཊ། བ་སུ་དྷ་ར་ཡེ་ཕཊ། བེ་མ་ཙི་ཏྲཱ་ཡ་སྭཱ། སརྦ་བྷཱུ་ཏེ་བྱོ་ཧཱ། ཧཱ་ཧཱ་ཧཱ་ཧཱི་ཧཱི་ཧཱི་ཧཱུཾ་ཧཱུཾ་ཧཱུཾ་ཕེཾ་ཕེཾ་ཕེཾ་སྭཱ་ཧཱ། ཞེས་བྱ་བའི་སྔགས་ཀྱིས་གཏོར་མ་ཕུལ་ནས། །ཁྱེད་ཀྱིས་བདག་གི་སྨོན་ལམ་ཐམས་ཅད་གྲུབ་པའི་གྲོགས་མཛོད་ཅིག་ཅེས་བརྗོད་ལ། །སརྦ་དེ་བཱ་དི་མུཿ་ཞེས་བརྗོད་པས། །འབྱུང་པོ་ཐམས་ཅད་སླར་བཏང་བར་བསམ་མོ། །དེ་ནས་བདག་གི་དགེ་བ་འདིས་བདག་མྱུར་དུ་འཇམ་དཔལ་གཤིན་རྗེ་གཤེད་ཁྲོ་བོ་ཆེན་པོར་གྱུར་ཅིག་ཅེས་སྨོན་ལམ་བཏབ་ལ། སྔར་བསྐྱེད་པའི་གནས་ལ་སོགས་པ་ཇེ་ཆུང་འདུས་ནས་བདག་ཉིད་ཀྱི་བར་དུ་མི་སྣང་བར་བསམ་པ་གཤེགས་པ་ཆེན་པོ་ཞེས་བྱ་སྟེ། ཨོཾ་མཉྫུ་ཤྲཱི་ས་མ་ཡ། །མ་ནུ་པཱ་ལ་ཡ། །མཉྫྲུ་ཏྭེ་ནོ་པ་ཏིཥྛ་དྲྀ་ཌྷོ་མེ་བྷ་བ། །སུ་ཏུ་ཥྱོ་མེ་བྷ་ཝ། ཨ་ནུ་རཀྟོ་མེ་བྷ་ཝ། སུ་པོ་ཥྱོ་མེ་བྷ་ཝ། སརྦ་སིདྡྷི་མྨེ་པྲ་ཡ་ཙྪ། སརྦ་ཀརྨ་སུ་ཙ་མེ་ཙིཏྟཾ་ཤྲེ་ཡཿ་ཀུ་རུ་ཧཱུཾ། ཧ་ཧ་ཧ་ཧ་ཧོཿ་བྷ་ག་ཝཱ་ན། སརྦ་ཏ་ཐཱ་ཏ། བཛྲ་མཱ་མེ་མུཉྩ། བཛཱི་བྷ་ཝ་མ་ཧཱ་ས་མ་ཡ་ས་ཏྭ་ཨཱཿ་ཞེས་བྱ་བ་བཅོམ་ལྡན་འདས་འཇམ་དཔལ་གྱི་ཡི་གེ་བརྒྱ་པ་བརྗོད་པར་བྱའོ། །དེ་ལྟར་བསྒོམ་པ་


DTG047_Page_0179
[མ་དཔེ་གཟིགས་ན་འདིར་གནོན།]

དང༌། །བཟླས་པའི་བསྙེན་པ་བྱས་ཏེ། ཇི་ལྟ་བ་བཞིན་པའི་ལས་ཀྱི་ཆོ་ག་བྱས་པ་ནི། ཞི་བ་ལ་སོགས་པ་དངོས་གྲུབ་བཅུ་པོ་གང་ཡང་རུང་བ་བ་འགྲུབ་པར་འགྱུར་རོ། །ཕལ་ཆེར་ཟླ་གསང་ནག་རྒྱུད་ལ་བརྟེན་ནས། ཁྲོ་བོ་ཆེན་འཇམ་དཔལ་གཤིན་རྗེ་གཤེད་པོ་ཡི། །སྒྲུབ་ཐབས་ཇི་བཞིན་གཤེད་པོ་ཡི། །སྒྲུབ་ཐབས་ཇི་བཞིན་བྱས་པའི་དགེ་བ་འདིས། བྱས་པའི་དགེ་བ་འདིས། །འགྲོ་ཀུན་མྱུར་དུ་གཤིན་རྗེ་གཤེད་གྱུར་ཅིག །འཇམ་དཔལ་གཤིན་རྗེ་གཤེད་ཁྲོ་བོ་ཆེན་པོའི་སྒྲུབ་ཐབས་སློབ་དཔོན་མཁས་པ་ཆེན་པོ་དཔལ་རྡོ་རྗེའི་བློ་མཛད་པ་རྫོགས་སོ།།

དཔལ་གཤིན་རྗེ་གཤེད་ནག་པོའི་འཁོར་ལོ་བྲི་བའི་ཆོ་ག།


DTG047_Page_0179
[མ་དཔེ་གཟིགས་ན་འདིར་གནོན།]

དཔལ་གཤིན་རྗེ་གཤེད་ནག་པོའི་འཁོར་ལོ་བྲི་བའི་ཆོ་ག་བཞུགས། །བཅོམ་ལྡན་འདས་གཤིན་རྗེ་གཤེད་ལ་ཕྱག་འཚལ་ལོ། །དོན་དམ་ཆོས་སྐུ་ཞི་བ་ཉིད། །གང་འདིར་ཁམས་གསུམ་རྣམ་རྒྱལ་ཏེ། །གཤིན་རྗེའི་སྒྲ་ཞེས་གྲག་པ་ཡི་།འཁོར་ལོ་བསྐོར་བའི་ཆོ་ག་བཤད། །ཡོན་ཏན་ལྡན་པའི་སྔགས་པ་ནི། །ཆོ་ག་བཞིན་དུ་བསྙེན་པ་ཡིས། །དུར་ཁྲོད་དབེན་པ་ལ་སོགས་པར། །མཎྜལ་ཁྲུ་དོའི་ཆད་དུ་བྱ། །དྲི་དང་བ་ཡི་རྣམ་ལྔ་པ་དང༌། །ཉི་ཟླ་སོགས་པར་བྱི་དོར་བྱ། །བ་ལང་ཤ་སོགས་དམ་རྫས་ལྔ། །གཞན་ཡང་ཚོགས་ཀྱི་འཁོར་ལོ་དང༌། །ཕྱི་ནང་མཆོད་པའི་བྱེ་བྲག་གིས། །ལེགས་པར་མཆོད་པ་བྱས་ནས་ནི། །འཁོར་ལོ་བྲི་དང་བཏུ་བ་དང༌། དྲང་དང་བསྲེ་དང་སྔོ་བ་བསམ། །སྔགས་པ་རྣལ་འབྱོར་ལྡན་པ་ཡིས། །ལྷོ་ཡི་ཕྱོགས་སུ་ཁ་བལྟས་ཏེ། །དམ་ཚིག་རྗེས་སུ་དྲན་པ་ཡིས། །ཨོཾ་བཛྲ་ས་མ་ཡ་སྟེ། གསང་སྔགས་འདི་ནི་དྲན་བྱེད་ཅིང༌། །འཁོར་ལོ་བྲི་བ་བརྩམ་པར་བྱ། །དབུས་ན་སོར་ཚད་བཅུ་དྲུག་པར། །ཀུན་དུ་ཟླུམ་པོར་བསྐོར་བ་ནི། །འདི་ཡི་ནང་གི་འཁོར་ལོ་སྟེ། །རིམ་པ་གསུམ་དུ་བསྐོར་བ་ལ། །སྒོ་མེད་ལྕགས་མཁར་བཅུ་དྲུག་བྱ། །འདི་ནི་གཤིན་རྗེའི་གྲོང་ཁྱེར་ཏེ། །སྲིད་པ་གསུམ་གྱི་འཇུག་ས་ཡིན། །དེ་ཡི་ཕྱི་རིམ་མུ་ཁྱུད་གསུམ། །ཀུན་དུ་ལྕགས་རིས་བསྐོར་བ་སྟེ། །མུ་ཁྱུད་དེ་དག་རེ་རེ་ཡང༌། །ཁང་པ་བཅུ་དྲུག་དག་དང་ལྡན། །འགྲོ་བའི་ཆོས་བཞིན་གཅོད་པ་ཡི། །འཁོར་ལོ་འདི་དག་བྲིས་ནས་ན། །ཕྱི་རོལ་མུ་ཁྱུད་ཐ་མ་ལ། །ཡི་གེ་ཀ་སོགས་ད་ཡིག་མཐའ། །ང་ཉ་བསལ་ནས་དགོད་པར་བྱ། །ཡི་གེ་དྷ་སོགས་ཀྵ་ཡིག་མཐའ། །དེ་ཡི་རྗེས་སུ་བྲི་བར་བྱ། །མུ་ཁྱུད་དབུས་མ་དེ་ལ་ནི། །དབྱངས་ཡིག་བཅུ་དྲུག་གཉིས་འགྱུར་དགོད། །བཏུང་དང་དགོད་སོགས་བརྩམ་པ་ན། །མཚན་མ་འདི་དག་


DTG047_Page_0180
[མ་དཔེ་གཟིགས་ན་འདིར་གནོན།]

ཤེས་པར་བྱ། །ཟླ་བ་མིག་དང་ཡོན་ཏན་དང༌། །རིག་བྱེད་མདའ་དང་དབང་པོ་དང༌། །རྒྱ་མཚོ་བཀྲ་ཤིས་གཟའ་དང་ཕྱོགས། །གྲགས་པ་ཉི་མ་ཡན་ལག་ས། །ཚེས་ཞེས་བྱ་བར་རབ་ཏུ་གྲགས། །ཕྱི་རོལ་མུ་ཁྱུད་ཐ་མ་ལ། །ཤར་གྱི་ཆངས་ཐིག་ནས་བརྩམས་ཏེ། །རིམ་མིན་གཟའ་ཅན་ཁང་པ་ནས། །ཡི་གེ་བཀྲ་ཤིས་ཅན་བླངས་ཏེ། ནང་གི་ངོས་ཀྱི་མུ་ཁྱུད་ཀྱི། །ཚངས་པའི་ཐིག་གི་ངོས་དག་ལ། །ཕྱོགས་བཞིར་མིག་གི་ཚད་དུ་སྦྱིན། །རིམ་མིན་ཕྱོགས་ཅན་ཁང་པ་ནས། །ཡི་གེ་མིག་གི་ཚད་བླངས་ཏེ། །ཤར་དུ་དེ་ཡི་གཡས་གཡོན་གཞག །རིམ་མིན་བཀྲ་ཤིས་ཁང་པ་ནས། །དབྱངས་ཡིག་གཉིས་པ་ཅན་བླངས་ནས། །མིག་གི་ཚད་དུ་བྱས་ནས་ནི། །དེ་ཡི་ངོས་ལ་རེ་རེ་གཞག །ཤར་གྱི་ཚང་ཐིག་ནས་བགྲངས་པའི། །རྒྱ་མཚོ་ཅན་གྱི་ཁང་པ་ནས། །དབྱངས་ཡིག་བཅུ་གཅིག་པ་དང་ལྡན། །མིག་གི་ཚང་དུ་བླངས་ནས་ནི། །ལྷོ་ཡི་ངོས་ལ་དེ་བཞིན་སྦྱིན། །ཤར་ནས་རིམ་པ་བཞིན་པ་ཡིད། །ཟླ་བ་ཅན་གྱི་ཁྱིམ་ནས་ནི། །དབྱངས་ཡིག་བཅུ་གསུམ་པ་དང་ལྡན། །ལྷོ་རུ་དེ་ཡི་རྗེས་སྦྱིན་བྱ། །དྷ་ཉིད་དབྱངས་ཡིག་གསལ་བ་ནི། །མིག་གི་ཚད་དུ་བླངས་བྱས་ལ། །སྔོན་བཞིན་དུ་ནུབ་ཀྱི་ཕྱོགས་སུ་སྦྱིན། །ཤར་ནས་བཀྲ་ཤིས་ཁང་པ་ནས། །དབྱངས་ཡིག་བཅུ་གསུམ་པ་དང་ལྡན་མིག་གི་ཚད་དུ་བླངས་ནས་ནི། །ནུབ་ཀྱི་ངོས་སུ་དེ་བཞིན་སྦྱིན། །ཤར་བརྩམས་ཚེས་ཅན་ཁང་པ་ནས། །དབྱངས་ཡིག་བཅུ་གཅིག་དང་ལྡན་པ། །མིག་གི་ཚད་དུ་བླངས་ནས་ནི། །བྱང་གི་ངོས་སུ་དེ་བཞིན་སྦྱིན། །རླུང་གི་ས་བོན་ཞེས་བྱ་བ། །མིག་ཇི་ཚད་བླངས་དེ་རྗེས་སྦྱིན། །མདའ་ཙན་ཁང་པ་ན་གནས་པ། །འོད་ཀྱི་གོང་བུར་བྱས་པ་དང༌། །དེ་ཉིད་ནས་ནི་བགྲང་བ་ཡི། །གཟའ་ཅན་ཁང་པ་ལ་གནས་པ། །དབྱངས་ཡིག་གསུམ་པ་དང་ལྡན་པ་དག །ཟླ་བའི་ཚད་དུ་བླངས་ནས་ནི། །བྱང་ཤར་མཚམས་སུ་རེ་རེ་སྦྱིན། །རྒྱ་མཚོའི་ཁང་པ་ན་གནས་པ། །དབྱངས་ཡིག་གཉིས་པ་དང་ལྡན་པ། །རིམ་མིན་ཡོན་ཏན་ཁང་པ་ནས། །ཟླ་བའི་ཚད་དུ་བཟུང་ནས་ནི། །ཤར་ལྷོ་མཚམས་སུ་དེ་བཞིན་སྦྱིན། །རིམ་མིན་བཀྲ་ཤིས་ཁང་པ་ནས། །དབྱངས་ཡིག་ལྔ་པ་ལྡན་པ་དང༌། །ཡན་ལག་ཅན་གྱི་ཁང་པ་ནས། །ཟླ་བའི་ཚད་དུ་བླངས་ནས་ནི། །ལྷོ་ནུབ་མཚམས་སུ་དེ་བཞིན་སྦྱིན། །


DTG047_Page_0181
[མ་དཔེ་གཟིགས་ན་འདིར་གནོན།]

རིམ་མིན་ཚེས་ཅན་ཁང་པ་ནས། །དབྱངས་ཡིག་གསུམ་པ་ལྡན་པ་དང༌། །རིམ་མིན་བཀྲ་ཤིས་ཁང་པ་ནས། །ཟླ་བའི་ཚད་དུ་བླངས་ནས་ནི། །ནུབ་བྱང་མཚམས་སུ་དེ་བཞིན་སྦྱིན། །དེ་ལྟར་དགོད་པ་བྱས་ནས་ནི། །དེ་ནས་དྲང་བ་བརྩམ་པར་བྱ། །དམ་ཚིག་རྗེས་སུ་དྲན་བྱེད་ཅིང༌། །རྡོ་རྗེ་ཤུགས་དང་ལྡན་པ་ཡིས། །ཤར་གྱི་ཚངས་ཐིག་ངོས་གཉིས་ནས། །ཡི་གེ་ཟུང་ལྡན་དྲངས་ནས་ནི། །དབུས་ཀྱི་ཁང་པར་གཞག་པར་བྱ། །ཕྱོགས་གཞན་ཚངས་ཐིག་ངོས་དག་ནས། །དེ་བཞིན་ཟུང་ལྡན་དངས་ནས་ནི། །དེ་བཞིན་དབུས་ཀྱི་ཁང་པར་གཞག །དེ་ནས་ཤར་གྱི་ཡི་གེ་ཡང༌། །ཟུང་ལྡན་གཉིས་པ་དྲངས་ནས་ནི། །རིམ་པ་གཉིས་པའི་ཁང་པར་གཞག །ཕྱོགས་གཞན་དུ་ཡང་དེ་བཞིན་ནོ། །ཤར་གྱི་ཟུང་ལྡན་གསུམ་པ་ཡང༌། །རིམ་པ་གསུམ་པའི་ཁང་པར་དྲངས། །ཕྱོགས་གཞན་དུ་ཡང་དེ་བཞིན་ནོ། །མཚམས་ཀྱི་ཡི་གེ་ཡ་བྲལ་ནི། །རང་རང་ནང་ནི་མཚམས་སུ་དྲང༌། །དེ་དག་བྱུང་བ་ཁང་སྟོང་དུ། །དབྱངས་ཀྱི་ཡི་གེ་དྲང་བར་བྱ། །དབྱངས་ཀྱི་ཡི་གེའི་གཞི་ལ་ནི། །མིང་གི་ཡི་གེ་དྲང་བར་བྱ། །མིང་གི་ཡི་གེའི་གཞི་ལ་ནི། །སོ་སོའི་ལས་དང་མཐུན་པ་ཡི། །བསྐུལ་བའི་ཡི་གེ་དགོད་པར་བྱ། །བསད་དང་བསྐྲད་དང་དབྱེ་བ་ལ། །ཡི་གེ་ཕཊ་ནི་གཞག་པར་བྱ། །མནན་པ་ལ་ནི་ཡི་གེ་ལཾ། །ཞི་བ་ལ་ནི་ཡི་གེ་ཨོཾ། །རྒྱས་པ་ལ་ནི་ཡི་གེ་སྭཱ། །དབང་ལ་ཧོཿ་ཡིས་བརྒྱན་པ་སྟེ། །དགུག་པ་ལ་ནི་ཡི་གེ་ཛཿ། །དེ་ལ་ལས་ཀྱི་འོད་ཟེར་ནི། །ཞི་ལ་ཆུ་སྟེ་རྒྱས་ལས། །དབང་གི་མེ་སྟེ་དྲག་པོའི་རླུང༌། །དབྱེ་དགུག་བསྐྲད་པ་དྲག་དང་མཐུན། །མནན་པ་དག་གི་རྒྱས་པ་བཞིན། །དྲང་བའི་སྦྱོར་བ་བྱས་ནས་ནི། །བསྲེ་བའི་སྦྱོར་བ་བརྩམ་པར་བྱ། །གཉིས་མེད་སྔགས་དང་ལྡན་པ་ཡིས། །དབུས་ཀྱི་ཡི་གེ་བཀྲ་ཤིས་ལའང༌། །ཟླ་ལྟར་འོད་ཀྱི་གོང་བུར་བྱ། །འོད་ཀྱི་གོང་བུ་དེའི་ནང་དུ། །འདོད་པའི་བསྒྲུབ་བྱ་གཞག་པར་བྱ། །དེ་དཀྱིལ་རང་མིན་དང་པོར་གཞག །ཕྱོགས་ཀྱི་ཁྱིམ་ན་གནས་པ་ཡི། །ཡི་གེ་ཟུར་མ་ཐམས་ཅད་ཀྱང༌། །དེ་ཚེ་འོད་ཀྱི་གོང་བུར་བྱ། །སྔགས་ཀྱི་རྒྱལ་པོ་བཅུ་པ་ཡང༌། །བཅུ་དྲུག་ཁྱིམ་དུ་སྤེལ་ཏེ་བྲི། །བྱིན་རློབ་ཧཱུཾ་ཞེས་བྱ་བ་ཡང༌། །ཁང་པ་བཞི་ལ་ཟུར་རེར་མཛེས། །ཡོངས་སུ་དག་པར་བཀོད་བྱས་ཏེ། །མཆོད་དང་གཏོར་མ་བྱས་ནས་ནི། །སྤྲོ་བ་དག་ནི་བརྩམ་


DTG047_Page_0182
[མ་དཔེ་གཟིགས་ན་འདིར་གནོན།]

པར་བྱ། །ལས་ཀྱི་དབྱེ་བ་ཇི་ལྟ་བར། །འཁོར་ལོའི་རས་ནི་བླང་བྱ་སྟེ། །ཞི་བ་དང་ནི་རྒྱས་པ་ལ། །ཤིན་ཏུ་དགེ་བའི་རས་ལས་བྱ། །དབང་དགུག་སྨད་འཚོང་སྨད་དཀྲིས་སོགས། །བསད་དང་དབྱེ་དང་བསྐྲད་པ་དང༌། །མནན་པ་ལ་ནི་དུར་ཁྲོད་རས། །གི་ཝཾ་གུར་ཀུམ་ཞི་རྒྱས་ལ། །དབང་དང་དགུག་ལ་ཙནྡན་དམར། །མནན་པ་ལ་ནི་ལྡོང་རོས་སོགས། །བསྐྲད་ལ་བྱ་རོག་ཁྲག་གིས་ཏེ། །དབྱེ་ལ་རྟ་དང་མ་ཧེ་སོགས། །བསད་ལ་དུག་ལ་སོགས་པ་བྲི། །དགེ་བའི་ལས་ལ་ཤིང་བཟང་པོ། །དགེ་བ་མིན་ལ་རུས་པ་དང༌། །ལྕགས་ལ་སོགས་པས་བྲི་བར་བྱ། །ཞི་ལ་ཤར་བལྟ་དབང་ལ་ནུབ། །རྒྱས་པ་བྱང་སྟེ་དྲག་པོ་ལྷོ། །གཞན་ཡང་ཅི་རིགས་པར་སྦྱར་བྱ། །ཞི་རྒྱས་དབང་དང་དགུག་པ་ལ། །ས་སྐོར་རིམ་བཞིན་བཀོད་བྱས་ཏེ། །གནམ་སྐོར་དག་ནི་རིམ་ལས་བཟློག །བསད་བསྐྲད་དབྱེ་དང་མནན་པ་ལ། །ས་སྐོར་རིམ་ལ་བཟློག་པ་སྟེ། །གནམ་སྐོར་དག་ནི་རིམ་བཞིན་བྲི། །འདི་ལྟར་ལེགས་པར་མ་བྲིས་ན། །འཁོར་ལོ་རང་ལ་བཟློག་པར་འགྱུར། །དེ་བས་འབད་དེ་ནན་ཏན་བྱ། །རས་ཀྱི་འཁོར་ལོ་ལེགས་ཟིན་ནས། །མཎྜལ་ལ་གནས་འཁོར་ལོ་དེ། །རས་ཀྱི་འཁོར་ལོར་སྤྱན་དྲངས་ཏེ། །རྡོ་རྗེ་བསྡུ་བའི་སྦྱོར་བ་ཡིས། །མཎྜལ་འཁོར་ལོ་བསྡུ་བར་བྱ། །རས་ཀྱི་འཁོར་ལོ་མཆོད་ནས་ནི། །བདེན་པའི་བྱིན་རླབས་དམིགས་པར་བྱ། །ཇི་ལྟར་གསུངས་པའི་ཆོ་ག་བཞིན། །འཁོར་ལོ་སྦ་བ་བྱས་ནས་ནི། །གསང་སྔགས་བཟློག་པ་བརྩམ་པར་བྱ། །ཨོཾ་བཛྲ་ས་མ་ཡ་སྟྭཾ། དམ་ཚིག་གི་སྔགས་སོ། །ཨོཾ་བཛྲ་བེ་ག་རྡོ་རྗེ་ཤུགས་ཀྱི་སྔགས་སོ། །ཨོཾ་ཨ་ས་མེ་ཏྲི་མ་ཧཱ་ས་མ་ཡེ་སྭཱ་ཧཱ། ཡི་གེ་བསྲེ་བའི་སྔགས་སོ། །ཨོཾ་བཛྲ་ས་མ་ན་ཛཿ་ཛཱ། འཁོར་ལོ་སྤོ་བའི་སྔགས་སོ། །ཨོཾ་ཡ་མ་རཱ་ཛ་ས་དོ་མེ་ཡ། ཡ་མེ་དོ་རུ་ཎ་ཡོ་ད་ཡ། ཡ་ད་ཡོ་ནི། ར་ཡ་ཀྵེ་ཡ། ཡཀྵེ་ཡཙྪ་ནི་རཱ་མ་ཡ་ཕཊ་ཕཊ། འདི་ནི་རྩ་བའི་གསང་སྔགས་ཏེ། ལས་ཐམས་ཅད་པའོ། །ཨོཾ་ཧྲཱིཿ་ཥྚྲྀཿ་ཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་སྭཱ་ཧཱ། འདི་ནི་ལས་ཀྱི་སྔགས་ཏེ་ལས་ཐམས་ཅད་པའོ། །ཤཱིནྟཾ་ཀུ་རུ་སྭཱ་ཧཱ། ཞི་བར་བསྐུལ་བའོ། །པུཥྚིཾ་ཀུ་རུ་སྭཱ་ཧཱ། རྒྱས་པར་རོ། །བ་ཤཾ་ཀུ་རུ་སྭཱ་ཧཱ། དབང་གིའོ། །མཱ་ར་ཡ་ཕཊ་གསད་པའིའོ། །བི་དྭེ་ཥ་ཡ་ཕཊ་དབྱེ་བའིའོ། །ཨུཙྪ་ཏ་ཡ་ཕཊ། བསྐྲད་པའིའོ། །སྟྭཾ་བྷ་ཡ་


DTG047_Page_0183
[མ་དཔེ་གཟིགས་ན་འདིར་གནོན།]

ཧཱུཾ་ལཾ་མནན་པའིའོ། །ཨཱ་ཀཪྵ་ཡ་ཧཱུཾ་ཛཿ་དགུག་པའིའོ། །ཨོཾ་མུཿ་སླར་དགྲོལ་བའིའོ། །ཨཱ་ལི་ཀཱ་ལིའི་གྲོང་ཁྱེར་ནི། །གསང་སྔགས་འབྱུང་བ་བརྩམ་པ་སྟེ། །ལས་ཀྱི་བཙོན་ར་དག་ཀྱང་ཡིན། །ཡི་གེ་བཏུ་བ་མེད་ན་ནི། །གསང་སྔགས་སྒྲ་ནི་ལོག་པར་འགྱུར། །ཡི་གེ་ཚད་པར་མ་བཀོད་ན། །གསང་སྔགས་སྒྲ་ནི་ཉམས་པར་འགྱུར། །གསང་སྔགས་བརྡ་ཡིས་མ་བསྟན་ན། །སྔགས་པའི་དངོས་གྲུབ་མེད་པར་འགྱུར། །དྲང་བ་དག་ནི་མ་བྱས་ན། །ཤིན་ཏུ་འཁོར་བར་མི་འགྱུར་རོ། །ཡི་གེ་བསྲེ་བ་མ་བྱས་ན། །ཁང་པ་བཅུ་དྲུག་དོན་མེད་འགྱུར། །བསྐོར་ཕྱོགས་ལོག་ན་དོན་མི་འགྲུབ། །རིག་སྔགས་ཉམས་དང་ལོག་པ་ནི། །ལྷ་མིན་གཡུལ་ལས་ཕམ་པ་དང༌། །དབང་པོའི་དགྲ་བོ་བསད་པ་བཞིན། །འཁོར་ལོ་སྤོ་བ་མ་བྱས་ན། །ཆོ་ག་དག་ནི་ཉམས་པར་འགྱུར། །རྒྱུ་ཡིན་པ་དང་སྦྱོར་བ་དང༌། །དད་པ་བསྟན་པས་འགྲུབ་པར་འགྱུར། །དེ་བས་ནན་ཏན་བསྐྱེད་དེ་བྱ། །དཔལ་གཤིན་རྗེ་གཤེད་ནག་པོའི་འཁོར་ལོ་བྲི་བའི་ཆོ་ག་རྫོགས་སོ།།

གཤིན་རྗེ་དགྲ་ནག་པོ་ཞེས་བྱ་བའི་སྒྲུབ་པའི་ཐབས།
ཀུན་ཏུ་བཟང་པོ།

རྣལ་འབྱོར།


DTG047_Page_0183
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། ཀྲྀཥྞ་ཡ་མཱ་རི་ནཱ་མ་སཱ་དྷ་ན། བོད་སྐད་དུ། གཤིན་རྗེ་དགྲ་ནག་པོ་ཞེས་བྱ་བའི་སྒྲུབ་པའི་ཐབས། དཔལ་ཞེ་སྡང་གཤིན་རྗེ་གཤེད་ལ་ཕྱག་འཚལ་ལོ། །བླ་མ་ལ་གུས་ཕྱག་འཚལ་ནས། །དེ་རྗེས་གཤིན་དགྲ་ནག་རྡོར་ལ། །རང་འོད་ཡན་ལག་བཞུགས་པ་ཡི། །བདེ་བས་གང་བས་གཞན་དོན་མཛད། །རྡོ་རྗེ་རལ་གྲི་འཁོར་ལོ་དང༌། །འདམ་སྐྱེས་གྲི་གུག་ཕྱག་པད་འཛིན། །ཞལ་གསུམ་འཇིགས་པ་ཡང་འཇིགས་མཛད། །དེ་ལ་ཕྱག་འཚལ་སྒྲུབ་ཐབས་བྲི། །གཤིན་དགྲ་ནག་པོའི་སྒྲུབ་ཐབས་འདི། །དེ་ཉིད་བློ་ལྡན་འདོད་པ་ཡིས། །དབང་སོགས་ལ་ནི་ཐོབ་པ་གང༌། །དེ་ཡི་འདི་ནི་བསྒོམ་རིམ་མོ། །བྱིས་པ་རྣམས་ཀྱིས་གོ་བདེ་དང༌། །རང་དྲན་དོན་དུ་བྱས་པ་ཡིན། །མཆོག་རྣམས་ལ་ནི་འགྲུབ་པར་གསུངས། །རབ་དགའ་བས་ནི་བྲི་བར་བྱ། །སྦྱིན་དང་ཚུལ་ཁྲིམས་ལ་སོགས་ལྡན། །བློ་ལེགས་འགྲོ་དོན་རོ་གཅིག་པ། །བྱམས་སོགས་ཡོན་ཏན་ཡང་དག་ལྡན། །དང་ལྡན་ཐོས་པས་བརྒྱན་པ་ཡི། །ཐོག་མར་གདོང་སོགས་དག་བྱས་ནས། །སྔ་དྲོ་གཤིན་རྗེ་བདག་གཉིད་པས། །དབེན་ཡུལ་ལ་ནི་རབ་ཏུ་བརྩམ། །དུར་ཁྲོད་ལ་སོགས་བདེ་


DTG047_Page_0184
[མ་དཔེ་གཟིགས་ན་འདིར་གནོན།]

སྟན་བཞུགས། །རང་སྙིང་པདྨའི་ཟླ་བ་ལ། །ཡ་ཡིག་རྣམ་པ་འོད་ལྡན་དམིགས། །ཁ་དོག་སྔོན་པོ་འགྲོ་དོན་བྱེད། །བླ་མ་དང་ནི་རྫོགས་སངས་རྒྱས། །མ་ལུས་ནམ་མཁའི་འོད་གང་བར། །བསྒོམ་ཞིང་དེ་ནི་ལེགས་དམིགས་ཏེ། །སྐུ་ཚོགས་དེ་ལ་ཕྱག་འཚལ་ནས། །ཙཱརྩི་ལ་སོགས་མཆོད་བྱས་ཏེ། །ལུས་ངག་ཡིད་ཀྱིས་སྡིག་བྱས་གང༌། །བྱས་ཤིང་དེ་བཞིན་ཡི་རང་བ། །མགོན་ལ་ལན་གསུམ་སྨྲས་ཤིང་བཤགས། །འཕགས་པ་རྫོགས་སངས་རྒྱས་སྲས་དང༌། །འདུལ་བའི་བསོད་ནམས་རྗེས་ཡི་རང༌། །ཡང་དག་སངས་རྒྱས་བདག་སྐྱབས་མཆི། །དག་པའི་ཆོས་དང་མཆོག་དགེ་འདུན། །ཁྱོད་ལ་བདག་གི་ལུས་སྦྱིན་ཏེ། །ཡོན་ཏན་རྒྱ་མཚོ་ལ་ཡང་འབུལ། །ཆོས་ནི་ཐམས་ཅད་གནས་པ་ཡིན། །ལེགས་པའི་སྒྲས་ནི་བསྟན་པའོ། །རྫོགས་པ་ཡི་ནི་སངས་རྒྱས་སྐུ། །དེ་ལམ་སྦྱིན་པ་ལ་སོགས་བཞུགས། །སྐུ་གསུམ་ཡེ་ཤེས་ཐོབ་དོན་དུ། །གནད་བས་བདག་གིས་གནས་པ་སྟེ། །སེམས་ཅན་དོན་ནི་བྱེད་པའི་ཕྱིར། །ཡང་དག་བྱང་ཆུབ་སེམས་བསྐྱེད་བྱའོ། །བདག་གིས་བསོད་ནམས་བྱས་པ་གང༌། །ཡང་དག་སངས་རྒྱས་ལ་བསྔོས་ཏེ། །དཔལ་ལྡན་གཤིན་རྗེ་དགྲར་གྱུར་ནས། །བདག་གིས་འགྲོ་བའི་དོན་བྱེད་ཤོག །སྨོན་ལམ་མཆོག་འདི་བྱས་ནས་ནི། །བློ་ལྡན་དེ་རྣམས་གཤེགས་སུ་གསོལ། །སྙིང་རྗེའི་རིམ་པ་མཐོང་ནས་ནི། །སྣ་ཚོགས་སྟོང་པར་རྣམ་དམིགས་ན། །རྒྱུ་ནི་མི་རྟོག་པ་ཡིན་ཏེ། །རང་བཞིན་རྣམ་པར་བྲལ་བའོ། །རྣམ་པར་རྟོག་པ་མེད་པའི་ཕྱིར། །སྨོན་ལམ་དེ་ནི་རྣམ་གཤེགས་བྱའོ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། སེམས་དེ་ཉིད་ནི་དག་བྱས་ནས། །ཨ་ལས་བྱུང་བའི་ཉི་དཀྱིལ་ཏེ། །དེ་ལ་ཧཱུཾ་སྐྱེས་ཁ་དོག་སྔོ། །འོད་ཟེར་འཕྲོས་པས་ཀུན་དུ་ཁྱབ། །བསྲུང་བའི་དོན་དུ་རྡོ་རྗེ་བསྒོམ། །ཀུན་དུ་རྩེ་ནི་ལྔ་ཡིན་ཏེ། །རྡོ་རྗེ་ས་གཞི་དེ་ལས་བྱུང༌། །དེ་བཞིན་གུར་དང་ར་བའོ། །སངས་རྒྱས་ཞིང་དག་དོན་དུ་ནི། །ཡང་དག་བསམ་གཏན་ཀུན་བརྩམས་ཏེ། །དེ་ལ་སྣ་ཚོགས་པད་ཟླ་ལ། །རྟག་རྡོར་ཡན་ལག་ལས་བྱུང་ངོ༌། །དཀར་པོ་གྲུ་གསུམ་ཆོས་དབྱིངས་ཏེ། །དབུས་སུ་སྣ་པད་རྡོ་རྗེའི་གདན། །ནམ་མཁའ་དང་མཉམ་འགྲེང་བ་བསམ། །དཀྱིལ་འཁོར་དབུས་སུ་གནས་པའོ། །བྷྲཱུཾ་


DTG047_Page_0185
[མ་དཔེ་གཟིགས་ན་འདིར་གནོན།]

རྣམས་འཁོར་ལོ་སྟེ་དབུས་སྐྱེས། །དག་པའི་ཡན་ལག་ལས་བྱུང་སྟེ། །ཟུར་བཞི་དང་ནི་སྒོ་བཞི་པ། །རྟ་བབས་བཞིས་ནི་བརྒྱན་པའོ། །དྲ་བ་དྲ་ཕྱེད་ཀྱིས་ནི་སྤྲས། །མཆོད་རྣམས་ལྷ་མོ་ཡང་དག་བརྒྱན། །སྣ་ཚོགས་རྩེ་མོ་རླུང་གིས་འཕྱར། །བ་དན་དང་ནི་དྲིལ་བུ་ལྡན། །སྣ་ཚོགས་རྡོ་རྗེ་ཀུན་དུ་མནན། །ཟླ་བ་ཉི་མ་རྒྱལ་བའི་སྟན། །ཤར་དུ་དཀར་པོ་ཆེན་པོ་སྟེ། །ལྷོ་རུ་སེར་པོ་ཡང་དག་ལྡན། །ནུབ་ཀྱི་ཆ་ནི་དམར་པོ་ཡིན། །བྱང་དུ་ལྗང་གུའི་ཁ་དོག་གོ །ཨིནྡྲ་ནཱི་ལའི་འོད་དང་ལྡན། །དབུས་ཀྱིས་ནི་རྣམ་བསྒོམས་ཏེ། །འདི་ལྟར་ཕྱོགས་ཀྱི་དབྱེ་བ་ཡིས། །སྣ་ཚོགས་རྡོ་རྗེ་བསྒོམ་བྱའོ། །བྲིས་སྐུ་ལ་ཡང་དེ་བཞིན་བསྒོམ། །རབ་ཏུ་གཟུགས་ཀྱི་རིམ་ཇི་བཞིན། །རྣམ་ལྔ་བསམ་པར་བྱས་ནས་ནི། །སངས་རྒྱས་གཟུགས་བརྙན་རྣམ་བསྒོམ་མོ། །རྣམ་ལྔ་དེ་ནི་དཔལ་དང་ལྡན། །དེ་རྗེས་གང་བར་བདུད་སེལ་བྱེད། །དེ་ནི་སངས་རྒྱས་གཟུགས་བརྙན་གྲགས། །དེ་ཕྱིར་དེ་ལ་དེ་གསུངས་སོ། །ལྟེ་བར་སྣ་ཚོགས་པད་ཟླ་ལ། །དབྱངས་ཡིག་ཉིས་སྐོར་དགོད་པར་བྱ། །དེ་ཡིས་ཟླ་བ་རྫོགས་པ་སྟེ། །ཀ་ཡི་ཐོག་མར་ཉིས་སྐོར་བྱ། །ཌ་ཌྷ་ད་དྷ་ཡ་ལ་དྲུག །བསྣན་པས་དེ་རྣམས་རྫོགས་པ་ཡིས། །ཟླ་བ་དམར་པོ་རྣམ་བསྒོམ་བྱ། །དེ་གཉིས་རྫོགས་ལ་ཇི་སྐད་གསུངས། །མེ་ལོང་མཉམ་པ་ཉིད་དུ་བརྗོད། །དེ་དབུས་ཧཱུཾ་སྐྱེས་སོ་སོར་རྟོག །དེ་ལས་གྱུར་པ་རྡོ་རྗེ་སྟེ། །དེ་ནི་བྱ་བ་ནན་ཏན་བརྗོད། །ཉི་མའི་ནོར་བུ་འོད་ཟེར་མཚུངས། །འོད་དང་ས་བོན་ལན་རྡོ་རྗེ། །ཨོཾ་བཛྲ་ཨཱཏྨ་ཀོ྅ཧཾ། ཞེས་བྱ་བས་ང་རྒྱལ་བྱའོ། །དེ་ལ་སྐྱེས་པ་ཁ་དོག་དཀར། །ཐུབ་པའི་མཆོག་གིས་རབ་བརྒྱན་པ། །རང་འོད་ཀྱིས་ལུས་འཁྱུད་པ་སྟེ། །སྒེག་པ་ཁྲོ་བོའི་གཟུགས་ཅན་ནོ། །མཆོག་གི་བདེ་བ་དང་ལྡན་པ། །དཀར་པོ་སྔོན་པོ་དམར་པོའི་ཞལ། །གཡས་བསྐུམ་གཡོན་བརྐྱང་བར་གནས་པ། །འབར་བ་དང་ལྡན་རལ་གྲི་དང༌། །རྡོ་རྗེ་གྲི་གུག་གསོར་བར་བྱེད། །འཁོར་ལོའི་པདྨ་སྐལ་ལྡན་པ། །གཡས་པའི་གཡོན་དུ་ཤིན་ཏུ་ཡང༌། །འོད་ཟེར་འཕྲོ་ཞིང་ཕྱག་གིས་འཛིན། །ཨོཾ་དྷརྨ་དྷཱ་ཏུ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་བྱ་བས་རྣམ་པ་ལྔའི་རང་བཞིན་ལས། །རྣལ་འབྱོར་འདི་ནི་ཡོད་པ་སྟེ། །འདི་རྣལ་འབྱོར་རོ། །

རྗེས་སུ་རྣལ་འབྱོར།


DTG047_Page_0186
[མ་དཔེ་གཟིགས་ན་འདིར་གནོན།]

ཆགས་པ་ཆེ་བས་འདུལ་བ་ཡིས། །འགྲོ་བ་གསུམ་ནི་ཀུན་དུ་དམིགས། །རང་གི་རྣམ་ཤེས་འོད་ཟེར་གྱིས། །སྣ་ཚོགས་སྤྲོས་པ་རྫོགས་སངས་རྒྱས། །རྟག་བདེ་དགའ་བའི་རང་བཞིན་ཅན། །དེ་རྣམས་རང་གི་ལུས་ལ་ཞུགས། །རྟོག་པ་ཐམས་ཅད་རྣམ་སྤངས་བྱ། །བདག་ཉིད་ལོངས་སྤྱོད་རྫོགས་པར་བསྒོམ། །འདི་ནི་དེ་ཉིད་སྔགས་རྩེ་དམར། །ཧོཿ་གཉིས་ཀྱིས་ནི་སྤེལ་བ་སྟེ། །ཇི་ལྟར་སྐར་མ་འཕོ་བ་བཞིན། །བྱང་ཆུབ་སེམས་ནི་དེ་བཞིན་གཞུག །སྙིང་རྗེ་ཆགས་པའི་སེམས་ཀྱིས་ནི། །རྡོར་འཛིན་ཉིད་དུ་འོད་དུ་ཞུ། །བྱམས་པ་ལ་སོགས་ཙརྩི་ཀཱས། །འཁོར་ལོའི་བདག་པོ་སྐུལ་བྱེད་དོ། །སྙིང་རྗེའི་ཁྲོ་བོ་རྗེ་བཙུན་བཞེངས། །གནས་གསུམ་ཀུན་གྱི་གཏི་མུག་སྤོངས། །བདུད་རྣམས་བཞི་ལས་གཙོ་བོ་རྒྱལ། །ཀྱེ་འཁྲུགས་པའི་སེམས་ཀྱིས་རྗེ་བཙུན་བཞེངས། །འཇིག་རྟེན་མགྲོན་གཉེར་སྟོང་བར་བཞུགས། །འཇིག་རྟེན་བསོད་ནམས་རྗེ་བཙུན་བཞེངས། །ཀྱེ་སྟོང་པར་བསམས་ནས་ཅི་སྟེ་བཞུགས། །བྱང་ཆུབ་རང་བཞིན་འཇིག་རྟེན་མགྲོན། །འདིས་ནི་ཞུ་བ་བསྐུལ་བ་སྟེ། །ཆགས་པའི་རྗེས་ཆགས་ཐིམ་པའོ། །འདི་ཡི་གླུ་ཡི་མངོན་པ་ཡིས། །འོད་དུ་ཞུ་བའི་བདེ་སེམས་ནི། །རབ་ཏུ་ཞུ་ཞིང་ཞུ་ལ་སྐྱེས། །ཉི་དཀྱིལ་ལ་ནི་ཡ་སྔོན་ཏེ། །ཁྲོ་བོ་དང་ནི་ཁྲོས་པ་ཅན། །རུས་པའི་རྒྱན་གྱིས་ཡང་དག་བརྒྱན། །སྨིན་མ་རྣོན་པོ་འབར་བ་ཅན། །ཡན་ལག་སྤུ་གྲི་བཞིན་འཇིགས་སྦྱིན། །རྡོ་རྗེ་སྔོན་པོ་འོད་དང་ལྡན། །མ་ཧེའི་རྒྱབ་ཏུ་གནས་པའོ། །དེ་ཡི་ས་བོན་འོད་ཟེར་གྱིས། །ནག་པོ་དགྲ་ཡི་གཟུགས་བྱས་ནས། །སྟོབས་ཆེན་འཇིགས་པའང་འཇིགས་པར་བྱེད། །སྣ་ཚོགས་བདག་ཉིད་མཉམ་པར་བཞུགས། །མ་ཧེའི་རྡོ་རྗེ་བསམས་ནས་ནི། །དཀྱིལ་འཁོར་བདག་པོ་རྣམ་པར་བསྒོམས། །དུག་བཞིན་ཚ་བ་འཕྲོས་པ་ནི། །འཇིག་རྟེན་གསུམ་ཟད་དཀྱིལ་འཁོར་ནི། །མུན་ནག་ལུས་ནི་དྲག་ཤུལ་ཅན། །ལྗགས་འདྲིལ་རབ་ཏུ་འོད་ཟེར་འཕྲོ། །མཆེ་བ་འོད་ཟེར་འཕྲོ་ཞིང་ཞལ། །སྨིན་མ་སྨ་ར་སྐྲ་གྱེན་ཏེ། །གཡས་བསྐུམ་གཡོན་བརྐྱང་ཞབས་ཀྱིས་གནས། །དུས་ནི་མི་དྲན་བྱེད་པའོ། །རྩ་བའི་ཞལ་ནི་བུང་བ་ཆེ། །གཡས་པ་ཤིན་ཏུ་ཟླ་བ་འོད། །གཡོན་པ་དམར་པོ་རབ་ཏུ་གསུངས། །རྡོ་རྗེ་རྒྱན་གྱིས་བརྒྱན་པ་སྟེ། །མི་ཐུང་གསུས་ཆེན་ནག་པོ་


DTG047_Page_0187
[མ་དཔེ་གཟིགས་ན་འདིར་གནོན།]

ཡིན། །མགོ་བོའི་ཕྲེང་བས་དོ་ཤལ་བྱེད། །གཡས་གཡོན་དང་པོའི་ཕྱག་གཉིས་ཀྱིས། །བྷནྡྷ་དང་ནི་གྲི་གུག་འཛིན། །རང་འོད་ཤེས་རབ་ཡང་དག་སྦྱོར། །བདེ་བ་འབབ་ཅིང་གཞན་དོན་བྱེད། །ལྷག་མ་གཡས་པའི་ཕྱག་གཉིས་ཀྱིས། །འབར་བཞིན་རྡོ་རྗེ་རལ་གྲི་འཛིན། །གཡོན་པ་གཉིས་ཀྱི་ཕྱག་གིས་ནི། །པདྨ་དང་ནི་འཁོར་ལོ་འཛིན། །སྤྲུལ་གྱི་རྒྱལ་པོས་རྒྱན་བྱེད་པ། །སྔོན་པོ་གྲངས་མེད་སྤྲུལ་རྒྱན་གྱིས། །ཤིན་ཏུ་འཇིགས་བྱེད་དབུ་སྐྲ་བཅིངས། །དམར་པོ་འཇོག་པོ་གླུ་ཡིས་ནི། །སྟོབས་ཆེན་རྣ་ཆའི་རྣ་རྒྱན་བྱེད། །རིགས་ལྡན་སེར་པོས་དཔུང་རྒྱན་ཏེ།། སེར་པོ་ཡང་ནི་ཕྱག་གདུབ་འཛིན། །ཀླུ་རྒྱལ་དུང་སྐྱོད་ཀླུ་ཡིས་ནི། །ཤིན་ཏུ་དཀར་པོའི་པདྨ་འཛིན། །འཇོག་པོ་ལྗང་གུ་ཀླུ་རྒྱལ་གྱིས། །ལེགས་པར་ཚངས་སྐུད་བྱེད་པ་སྟེ། །ནོར་རྒྱས་ཀླུ་ཡི་རྒྱལ་པོས་ནི། །དེ་ཡི་སྐ་རགས་བྱས་པ་སྟེ། །པདྨ་ཆེན་པོ་ཀླུ་རྒྱལ་གྱིས། །པད་སྐུད་ཁ་དོག་དཀར་པོ་བཞིན། །དེས་ནི་ཞབས་གདུབ་བྱས་པ་སྟེ། །ཐམས་ཅད་ཕུཊ་སྒྲ་དྲག་ཤུལ་ཅན། །མཆེ་གཉིས་སོ་ཕྲེང་ལྕེ་གཉིས་པའོ། །འདི་ནི་འཁོར་བྱང་རང་བཞིན་ཅན། །འདི་ལེགས་གཤིན་རྗེ་གཤེད་པོ་ཡིན། །ཤེས་ནས་རྣམ་རྟོག་མེད་པར་བྱ། །བརླབས་ཤིང་སྔགས་ཀྱིས་མཉམ་བྱའོ། །ཨོཾ་དྷརྨ་དྷཱ་ཏུ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་བྱ་བ་འདིས་ནི་རྗེས་སུ་རྣལ་འབྱོར་རོ། །

ཤིན་ཏུ་རྣལ་འབྱོར།


DTG047_Page_0187
[མ་དཔེ་གཟིགས་ན་འདིར་གནོན།]

རང་སྙིང་འོད་ཟེར་ལྕགས་ཀྱུས་དགུག །མཁའ་ཁྱབ་རྫོགས་པའི་སངས་རྒྱས་ཀུན། །ཐམས་ཅད་དེ་ནི་ཞལ་དུ་གཞུག །བདེ་ཞུགས་འབབ་ཅིང་སྙིང་གར་ཞུ། །བྱས་པས་བློ་ལྡན་རྣལ་འབྱོར་གྱིས། །རྡོར་ལམ་ཁུ་བ་དེ་ཉིད་འཕྲོ། །རང་འོད་པདྨའི་ནང་གནས་པ། །ས་བོན་གཟུགས་ཀྱིས་དམིགས་པར་བྱ། །ས་བོན་འཁོར་ལོ་ཡང་དག་འབྱུང༌། །ས་བོན་རྣམས་ཀྱི་བྱིན་རླབས་ཏེ། །ཚ་ཚ་འཕྲོ་ཞིང་འབར་བ་ཅན། །མཁས་པས་རིམ་པར་བསྒོམ་པ་སྟེ། །གསུངས་པའི་མཚན་ཉིད་ཇི་བཞིན་པ། །ཡ་རྣམས་དབུས་སུ་སྔོན་པོ་བྱུང༌། །དཀྱིལ་འཁོར་བདག་པོ་བཞེངས་པའོ། །ཤར་དུ་ཀྵེ་ཡིས་འཁོར་ལོ་རྫོགས། །རྟག་པ་ཕྱག་དྲུག་དཀར་པོ་སྟེ། །གཡས་པར་འཁོར་ལོ་རལ་གྲི་གནས། །གཡོན་པར་རིན་ཆེན་མཚོ་སྐྱེས་འཛིན། །མ་ཡིས་རྣམ་པས་ལྷོ་ཕྱོགས་སུ། །


DTG047_Page_0188
[མ་དཔེ་གཟིགས་ན་འདིར་གནོན།]

རིན་ཆེན་འབྱུང་གནས་རིན་ཆེན་རྒྱལ། །གསེར་བསྲེགས་དང་ནི་མཚུངས་པའི་མདོག །གཡས་པས་རིན་ཆེན་རལ་གྲི་འཛིན། །གཡོན་པས་འཁོར་ལོ་པདྨ་གནས། །ནུབ་ཏུ་འདོད་ཆགས་རྡོ་རྗེ་སྟེ། །མི་ཡི་ས་བོན་པདྨ་རྫོགས། །པདྨ་རཱ་ག་མཉམ་མཚུངས་པ། །པདྨ་རལ་གྲི་གཡས་པར་གནས། །ནོར་བུ་འཁོར་ལོ་གཡོན་པར་བཀོད། །ས་བོན་ད་ལས་རལ་གྲི་སྐྱེས། །ལྗང་གུ་ཕྲག་དོག་གཤིན་དགྲ་སྟེ། །རལ་གྲི་འཁོར་ལོ་གཡས་པས་འཛིན། །པདྨ་ནོར་བུ་གཡོན་པར་བསྣམས། །ཐམས་ཅད་ཞེ་སྡང་གཤིན་དགྲ་ཡི། །མཚན་ཉིད་ཀྱིས་ནི་ཁྲོ་བོའི་གཟུགས། །རྩ་བའི་ཕྱག་ནི་གཉིས་གཉིས་ཀུན། །གྲི་གུག་བྷནྡྷ་བསྒོམ་བྱ་སྟེ། །རང་གི་ཤེས་རབ་གཉིས་མེད་ལུས། །བདེ་བའི་གཟུགས་ཀྱིས་རང་བཞིན་ཅན། །ཉི་མའི་དཀྱིལ་འཁོར་ཀུན་གནས་པ། །དགེ་བ་ཟླ་བའི་དཀྱིལ་འཁོར་གནས། །སྣ་ཚོགས་རྡོ་རྗེ་རྩིབས་རྩེ་ལ། །སེམས་ཅན་དོན་མཛད་བསྒོམ་པར་བྱ། །ཡ་རྣམས་ཤར་ཕྱོགས་སྒོ་རུ་བྱུང༌། །ཐོ་བ་སྔོན་པོ་རང་བཞིན་ཏེ། །གཡས་པར་རལ་གྲི་ཐོ་བ་འཛིན། །གཡོན་ན་ནོར་བུ་པད་དཀར་གནས། །དེ་ཐོ་ཞེས་ནི་གཤིན་རྗེ་གཤེད། །ཙ་ལས་བྱུང་བ་བེ་ཅོན་ལྷོ་སྒོར་གནས། །བེ་ཅོན་གཤིན་དགྲ་ཁ་དོག་དཀར། །གཡས་པས་བེ་ཅོན་རལ་གྲི་འཛིན། །གཡོན་པས་འདམ་སྐྱེས་འཁོར་ལོ་བསྣམས། །ནུབ་ཏུ་པདྨ་གཤིན་དགྲ་ནི། །དམར་པོ་ཞལ་གསུམ་ཕྱག་དྲུག་སྟེ། །ནི་ལས་སྐྱེས་པ་འདོད་ཆགས་རྒྱལ། །བྱང་དུ་རལ་གྲི་གཤིན་དགྲ་ནི། །ར་ལས་སྐྱེས་པའི་ཆ་བྱད་ནི། །རྒྱལ་པོ་ཕྲག་དོག་དབྱིབས་ཀྱིས་གནས། །ཅུང་ཞིག་སྔོན་པོའི་དབྱེ་བ་ཡིས། །རབ་ཏུ་འཇིགས་བཞིན་བྱས་པ་སྟེ། །ཐམས་ཅད་ཁྲོས་པ་དང་ལྡན་པ། །ཡན་ལག་ལ་འགྲོགས་པ་ཡིས་བརྒྱན། །གཙིགས་པའི་ཞལ་གྱིས་བཞད་པ་སྟེ། །སྐྲ་ནི་སེར་སྐྱ་འབར་ཞིང་འགྲེད། །ཉི་དཀྱིལ་ལ་ནི་ཡང་དག་གནས། །མཆེ་བ་གཙིགས་ཤིང་སྟོབས་ཀྱི་ཞལ། །གྲི་གུག་བྷནྡྷ་འཛིན་པའོ། །སྣ་ཚོགས་རྡོ་རྗེ་གྲྭ་བཞི་རུ། །དེ་བཞིན་ལྷ་མོ་ཟླ་དཀྱིལ་གནས། །ཛ་འཁོར་རྡོ་རྗེ་ཙཱ་རྩི་ཀཱ །ལྷ་མོ་དེ་ནི་ཤར་ལྷོར་གནས། །སྐེམས་མ་དཀར་མོ་ཁྲོ་ཆེན་མ། །གཏི་མུག་གཤིན་དགྲ་རང་བཞིན་བཞུགས། །དེ་ནས་ལྷོ་


DTG047_Page_0189
[མ་དཔེ་གཟིགས་ན་འདིར་གནོན།]

ནུབ་ཕག་མོ་སྟེ། །ས་ལས་རྡོ་རྗེ་སྐྱེས་མ་ཡིན། །ཕག་པའི་གདོང་ཅན་ཁྲོ་ཆེན་མ། །ཞེས་སྡང་གཤིན་དགྲ་འདྲ་བའི་འོད། །རབ་ཏུ་ཞི་བའི་དབྱངས་ཅན་མ། །ནུབ་བྱང་གི་ནི་གྲྭ་རུ་གནས། །དོ་ལས་སྐྱེས་མ་མཆོག་དམར་མདོག །འདོད་ཆགས་གཤིན་དགྲའི་དབྱིབས་ཅན་མ། །བྱང་ཤར་གྲྭ་རུ་ཡང་དག་གནས། །དཀར་མོ་ལྗང་གུ་འཇིགས་བྱེད་མ། །ཕྲག་དོག་གཤིན་དགྲའི་ཕྱག་མཚན་འཛིན། །རུ་ལས་སྐྱེས་པའི་ཕྲག་དོག་དབྱིབས། །སྔོན་པོའི་གཡས་པ་དཀར་པོ་སྟེ། །དཀར་པོའི་གཡས་པ་སྔོན་པོ་ཡིན། །དེ་གཉིས་གཡོན་ཞལ་དམར་པོ་སྟེ། །གཞན་མའི་ཞལ་ནི་དཀར་པོའོ། །ཎ་ཡོ་ནི་ར་གྲྭ་བཞི་རུ། །དཀྱིལ་འཁོར་གྱི་ནི་བྷནྡྷ་སྟེ། །རང་སྔགས་རིག་པ་ཇི་བཞིན་གྱིས། །བློ་ལྡན་རྫོགས་ཤིང་འཕྲོ་བར་བྱ། །ཧཱུཾ་ཧྲཱིཿ་ཥྚྲྀཿ་ལ་སོགས་སྔགས་སྒྲ་ཡིས། །དཀྱིལ་འཁོར་མངའ་བདག་ཡང་དག་བསྐུལ། །གྲངས་མེད་སྤྲུལ་པ་རྣམ་འཕྲོས་ཏེ། །བརྩོན་འགྲུས་སེམས་ཅན་དོན་མཛད་པ། །དངོས་པོ་ཐམས་ཅད་རང་ལུས་ལ། །ཁྲོ་བོའི་དཔའ་བོས་གཞུག་བྱའོ། །ཛིན་ཛིཀ་ཅེས་བྱ་བས་ནི། །ཤར་དུ་གཏི་མུག་གཤིན་དགྲ་སྟེ། །སྣ་ཚོགས་པད་ཟླ་དབྱིབས་རྩེ་རུ། །དེ་ལ་དེ་ནི་གནས་པར་བྱ། །རཏྣ་དྷྲྀཀ་ཅེས་བྱ་བས་ནི། །ལྷོ་ཡི་པདྨའི་ཉི་དཀྱིལ་ལ། །བགེགས་མེད་དོན་དུ་དགུག་པ་སྟེ། །རིམ་པས་དེ་ལ་གཞུག་པར་བྱ། །ཨཱ་རོ་ལྀཀ་ཅེས་བྱ་སྔགས་ཀྱིས། །འདོད་ཆགས་གཤིན་དགྲ་སྐྱོན་མེད་པ། །ནུབ་ཀྱི་སྣ་ཚོགས་པད་ཉི་ལ། །རིམ་པས་དེ་ནི་རྣམ་བསྒོམ་བྱ། །པྲ་ཛྙཱ་དྷྲྀཀ་ནི་དེ་ཉིད་ཀྱིས། །ཕྲག་དོག་དགྲ་ནི་རྣམ་ཟིལ་བྱེད། །བྱང་གི་པདྨོ་རྣོན་པོ་ལ། །དེ་ནི་རིམ་པས་གནས་པར་བསམ། །མུངྒར་དྷྲྀཀ་ནི་དེ་ཉིད་ཀྱིས། །ཤར་ཕྱོགས་སྒོ་རུ་པདྨ་ལ། །ཉི་དཀྱིལ་ལ་ནི་འབར་ཞིང་གནས། །ཐོ་བ་མཐར་བྱེད་མིན་ཞེས་བྱ། །རིམ་པས་མཁས་པས་ཡང་དག་བསམ། །དཎྜ་དྷྲྀཀ་ཅེས་བྱ་སྔགས་ཀྱིས། །ལྷོ་ཡི་སྒོ་རུ་ཡང་དག་གནས། །བེ་ཅོན་གཤིན་དགྲ་མི་བགྲུངས་པ། །སྣ་ཚོགས་པད་ཉི་ཟླ་འོད་བསམ། །པདྨ་དྷྲྀཀ་ཅེས་བྱ་བས་ནི། །པདྨ་དུས་མེད་གཤིན་དགྲ་སྟེ། །ནུབ་སྒོར་འདམ་སྐྱེས་ཉི་དཀྱིལ་ལ། །འཁྲུགས་པ་སྟོབས་ཆེན་བསམ་པར་བྱ། །ཁཌྒ་དྷྲྀཀ་ནི་དེ་ཉིད་


DTG047_Page_0190
[མ་དཔེ་གཟིགས་ན་འདིར་གནོན།]

ཀྱིས། །རལ་གྲི་དེ་ནི་དུས་མེད་པ། །སྣ་ཚོགས་པད་དང་ཉི་དཀྱིལ་ལ། །བདུད་མེད་བྱེད་པ་བྱང་སྒོར་སྒོམ། །སྣ་ཚོགས་རྡོ་རྗེ་གྲྭ་བཞི་རུ། །གཞན་ཡང་དེ་བཞིན་ལྷ་མོ་བསམ། །དྭེ་ཥ་ར་ཏི་ཞེས་སྔགས་ཀྱིས། །ཤར་ལྷོ་མཚམས་ཀྱི་ལྷ་མོ་སྟེ། །ཟླ་བ་དང་ནི་སྣ་ཚོགས་པད། །ཁྲོས་མ་ཙཱ་རྩི་ཡང་དག་གནས། །དེ་ནས་ལྷོ་ནུབ་རྡོ་རྗེ་ཕག །རིགས་ཀྱི་བདག་མོ་ཕག་མོ་སྟེ། །མོ་ཧ་ར་ཏི་དེ་ཉིད་ཀྱིས། །པདྨ་ཟླ་བར་མཁས་པས་བསྒོམ། །དེ་ནས་ནུབ་བྱང་གྲྭ་ཉིད་ལ། །རཱ་ག་ར་ཏི་ཞེས་སྔགས་ཀྱིས། །པད་ཟླ་ལ་ནི་དབྱངས་ཅན་དགོད། །དེ་ནས་བྱང་ཤར་དཀར་མོ་སྟེ། །བཛྲ་ར་ཏི་ཞེས་སྔགས་ཀྱིས། །ཟླ་པད་ལ་ནི་ལྷ་མོ་བསྒོམ། །དཀྱིལ་འཁོར་གྱི་ནི་གྲྭ་བཞི་རུ། །དེ་ཉིད་གསུམ་གྱི་བྷནྡྷ་རྣམས། །འདི་ནི་རྣམ་འཕྲོས་དག་པའི་འཁོར། །དམ་པར་བྱས་ན་བདེ་དང་ལྡན། །གོང་མའི་འཁོར་ལོ་དེ་ཐིམ་སྟེ། །མཉམ་ཉིད་པས་ནི་དམིགས་པ་སྟེ། །འདི་ནི་སྦྱོར་བ་དང་པོའོ། །

རྣལ་འབྱོར་ཆེན་པོ།


DTG047_Page_0190
[མ་དཔེ་གཟིགས་ན་འདིར་གནོན།]

གཤིན་དགྲ་ནག་པོ་དུས་འཇིགས་པས། །དེ་ཡི་རང་བཞིན་དཀྱིལ་ལྷ་རྣམས། །མིག་དང་ལུས་སོགས་རང་བཞིན་ཏེ། །ལྷ་རྣམས་ཀྱིས་ནི་བྱིན་རླབས་བྱ། །གཏུ་མུག་ཀྵིཾ་ལ་འཁོར་ལོ་སྐྱེས། །ཅུང་ཞིག་ཁྲོས་པའི་མིག་ལ་གནས། །རྡོ་རྗེ་མིག་ཡིན་བློ་ལྡན་དམིགས། །རྣ་གཉིས་ཛྲྀ་ལས་རྡོ་རྗེ་བྱུང༌། །རྡོ་རྗེ་རྣ་བ་ཁ་དོག་གནག །དྲི་ལས་ཁཾ་སྐྱེས་རིན་ཆེན་འབྱུང༌། །སེར་སྣ་དེ་ནི་ཟླ་བ་ལ། །རྡོ་རྗེ་དྲི་ནི་དེ་བཞིན་མཆོག །ལྗགས་ལ་གཾ་ལས་པདྨ་བྱུང༌། །འདོད་ཆགས་དྲ་བ་རྡོར་ལྗགས་ཡིན། །ཀཾ་ལས་སྐྱེས་པ་རལ་གྲི་སྟེ། །རི་དགས་མཚན་པའི་རྡོར་ལུས་ཡིན། །ཕྲག་དོག་གཤིན་དགྲ་རང་བཞིན་གཟུགས། །དཔྲལ་བར་ལུས་ཡིན་ཞེས་བྱ་སྟེ། །ལྟེ་སྟེངས་སཾ་ལས་རྡོ་རྗེ་ཡིན། །རྡོ་རྗེ་སེམས་ནི་དེ་བཞིན་མཆོག །སྒེག་པོ་ཁྲོ་བོ་རང་བཞིན་གཟུགས། །རྡོ་རྗེ་འཛིན་པ་དགོད་བྱ་སྟེ། །འདི་ནི་ཡན་ལག་དྲུག་དགོད་པའོ། །མངོན་སུམ་དོན་གྲུབ་ལས་སུ་གསུངས། །སྙིང་གར་ཧཱུཾ་རྡོར་དབུས་སུ་གནས། །ཧཱུཾ་རྡོར་སྔོན་པོ་ལེགས་འོད་ཅན། །གཤིན་དགྲ་དང་འདྲ་ཕྱག་མཚན་མཚུངས། །སེམས་ལ་གནས་པའི་ཐུགས་རྡོར་བསྒོམ། །ཨོ་ལ་གོང་ཨ་ལས་པདྨ་སྐྱེས། །དེ་དབུས་པུཾ་ལས་ཆགས་པ་བྱུང༌། །འདོད་ཆགས་གཤིན་དགྲ་ལྟ་བུའི་ལུས། །དཔལ་ལྡན་


DTG047_Page_0191
[མ་དཔེ་གཟིགས་ན་འདིར་གནོན།]

གསུང་རྡོར་རྣམ་བསྒོམ་བྱ། །སྤྱི་བོར་ཨོཾ་རྣམས་འཁོར་ལོ་དབུས། །དཀར་པོ་གཤིན་འབར་དེ་དབུར་འཁོར། །སྐུ་ཡི་རྡོ་རྗེ་སྐུ་དང་འདྲ། །ཕྱག་དང་ཕྱག་མཚན་ཁ་དོག་མཚུངས། །དེ་ནི་དེ་ཉིད་རྡོར་མཆོག་སྟེ། །རྫོགས་པས་མཁའ་གནས་སངས་རྒྱས་མཆོད། །སྔགས་ཀྱིས་དེ་རྣམས་བྱིན་རླབས་བྱ། །ཨོཾ་སརྦ་ཏ་ཐཱ་ག་ཏ་ཙིཏྟ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཨོཾ་སརྦ་ཏ་ཐཱ་ག་ཏ་ཝཱ་ཀ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཨོཾ་སརྦ་ཏ་ཐཱ་ག་ཏ་ཀཱ་ཡ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། རང་སྙིང་ས་བོན་འོད་ཟེར་གྱིས། །སྲས་དང་བཅས་པའི་སངས་རྒྱས་ཀུན། །སྣ་ཚོགས་ལ་གནས་དགུག་བྱས་པས། །མདུན་དུ་དེ་ནི་བཞུགས་དམིགས་ཏེ། །དེས་ནི་ཡང་དག་སྤྲོས་པ་ཡི། །ཇི་སྲིད་ཙཱ་རྩི་ལ་སོགས་པ། །ཟླ་འོད་མཚུངས་པའི་བུམ་པ་ཡིས། །བཀྲ་ཤིས་ལ་སོགས་གླུ་རྣམས་ཀྱིས། །ཡང་ནི་དབང་བསྐུར་དམིགས་པར་བྱ། །བདག་ཉིད་དང་ནི་ཐམས་ཅད་ལ། །དབང་བསྐུར་བས་ནི་ཅི་བྱུང་སྟེ། །སྤྱི་བོར་གཤིན་དགྲ་ནག་པོ་ཡི། །རྡོར་འཛིན་བདག་ཉིད་དེ་བཞིན་ནོ། །རང་སྙིང་ས་བོན་འོད་ཟེར་གྱིས། །བདག་མདུན་ཡེ་ཤེས་འཁོར་ལོ་དགུག །འཁོར་ལོ་དེ་ནི་དམིགས་ནས་ནི། །ཁྲོ་རྣམས་བགེགས་བསྐྲད་སྲུང་བར་བྱེད། །ཨརྒྷ་བསིལ་ཡབ་ཕུལ་བྱས་ནས། །ཨོཾ་མུངྒ་ར་ཛཿ། །འདི་སྔགས་ཀྱིས་ནི་དགུག་པ་སྟེ། །ཨོཾ་དཎྜ་ཧཱུཾ། འདི་སྔགས་ཀྱིས་ནི་རབ་ཏུ་གཞུག །ཨོཾ་པདྨ་བཾ། སྔགས་འདི་ཡིས་ནི་འཆིང་བ་སྟེ། །ཨོཾ་ཁཌྒ་ཧོཿ་སྔགས་འདི་ཡིས་ནི་དབང་བྱེད་དོ། །རང་སྙིང་ས་བོན་འོད་རྣམས་ཀྱིས། །སངས་རྒྱས་དགུག་ཅིང་གཞུག་པ་སྟེ། །སྙིང་གར་འོད་ཞུ་དམིགས་ནས་ནི། །མ་ལུས་རྡོ་རྗེ་ལམ་ནས་དབྱུང༌། །རང་འོད་རིག་མའི་པདྨ་ལ། །ཟླ་བ་ལས་བྱུང་ལྷ་མོ་རྣམས། །སྣ་ཚོགས་མེ་ཏོག་ལ་སོགས་རྫས། །ཕྱག་གི་ཡལ་གས་དེ་རྣམས་འཛིན། །སྒེག་ལྡན་དེ་ཡི་མཆོད་པ་སྟེ། །ཡིད་འཕྲོག་མཆོད་པའི་གླུ་དང་ནི། །སྣ་ཚོགས་གར་གྱི་བྱེ་བྲག་གིས། །དེས་ནི་བདེ་ཆེན་རབ་ཡིན་ནོ། །ཀྱེ་ཀྱེ་གཤིན་རྗེ་དགྲ་ནག་པོ། །བླ་མ་སྲིན་པོའི་རང་བཞིན་ཅན། །ཁྱོད་མཐོང་བདག་ནི་རྣམ་འཇིགས་ཏེ། །བླ་མ་ཁྲོ་བོའི་རང་བཞིན་སྤོངས། །བདག་པོས་གར་བྱེད་པ་ཡིས་ནི། །སྟེང་རིས་མི་ཡུལ་ས་འོག་འདར། །མིག་སྨན་བཅག་


DTG047_Page_0192
[མ་དཔེ་གཟིགས་ན་འདིར་གནོན།]

བཞིན་ཁྲོས་པའི་ཡིད། །མིག་བགྲུངས་ཁྱོད་ནི་གར་བྱེད་དོ། །མི་ཐུང་ནག་པོ་གཤིན་དགྲ་སྟེ། །གཟུགས་ནི་རྣམ་པ་སྣ་ཚོགས་སྤྲུལ། །རྡོ་རྗེ་དབྱངས་ཅན་བདག་གིས་ཞུས། །བདེ་ཆེན་ཁྱོད་ནི་གར་མཛོད་ཅིག །ཧྲཱིཿ་ཥྚྲྀཿ་སྔགས་ཀྱིས་ཁྱོད་གར་བྱེད། །ཁམས་གསུམ་ཐེ་ཚོམ་མེད་པར་མཛོད། །གཤིན་རྗེ་ཁྲོ་བོ་རྗེ་བཙུན་ཁྱོད། །གར་བྱེད་འགྲོ་བས་མཐོང་བའོ། །ཨོཾ་སརྦ་ཏ་ཐཱ་ག་ཏ་པཱུ་ཛ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཐམས་ཅད་སྒྲ་བརྙན་ལྟ་བུའི་དཔེ། །སྒྲ་ཡུལ་བཞིན་དུ་རྣམ་དམིགས་བྱའོ། །འཁོར་ལོ་ལ་གནས་ལྷ་རྣམས་ཀྱིས། །འཁོར་ལོའི་བདག་པོ་བསྟོད་པ་སྟེ།། གཏི་མུག་རྡོ་རྗེ་རང་བཞིན་ཁྱོད། །གཤིན་དགྲ་བདེ་བ་འཇིགས་པའོ། །སངས་རྒྱས་ཀུན་ལྡན་མགོན་པོ་སྟེ། །འཇིགས་མེད་རྡོ་རྗེ་ཕྱག་འཚལ་བསྟོད། །སེར་སྣ་རྡོ་རྗེ་རང་བཞིན་ཁྱོད། །ཡང་དག་གཤིན་དགྲ་འཇིགས་པ་པོ། །ཐུགས་ཀྱི་རྡོ་རྗེ་རབ་སྣང་བ། །རིན་ཆེན་རྡོ་རྗེ་ཕྱག་འཚལ་བསྟོད། །འདོད་ཆགས་རྡོ་རྗེ་རང་བཞིན་ཁྱོད། །འདོད་ཆགས་རྒྱ་མཚོ་ཆོས་ཀྱི་བདག །ཐམས་ཅད་དབྱངས་ཀྱི་མཆོག་གི་མཆོག །གསུང་གི་རྡོ་རྗེ་ཕྱག་འཚལ་བསྟོད། །ཕྲག་དོག་རྡོ་རྗེ་རང་བཞིན་ཁྱོད། །གཤིན་དགྲ་ལས་ཀུན་ཐམས་ཅད་བྱེད། །སྐུ་ཡི་རྡོ་རྗེ་རབ་སྣང་བ། །རལ་གྲི་ཕྱག་ལ་ཕྱག་འཚལ་བསྟོད། །སངས་རྒྱས་ཀུན་གྱི་རང་བཞིན་ཁྱོད། །སངས་རྒྱས་ཀུན་གཅིག་ཡང་དག་འདུས། །སངས་རྒྱས་ཐམས་ཅད་མཆོག་གི་མཆོག །དཀྱིལ་འཁོར་མངའ་བདག་ཕྱག་འཚལ་བསྟོད། །ཨ་ལས་སྐྱེས་པའི་དག་པད་དེ། །མགོ་གསུམ་སྟེང་དུ་ཡང་དག་གནས། །རྣམ་རྫོགས་དེ་འོག་མེ་དཀྱིལ་འཁོར། །གྲུ་གསུམ་རཾ་བ་ལས་བྱུང་བའོ། །དེ་འོག་རླུང་གི་དཀྱིལ་འཁོར་ཏེ། །གཡོ་བ་སྔོན་པོ་གཞུ་དང་འདྲ། །ཡཾ་ལས་སྐྱེས་པ་བ་དན་དང༌། །དེ་ལ་ཁ་དོག་མིང་དང་གཟུགས། །སྣང་མཛད་ལ་སོགས་གནས་པ་སྟེ། །དེ་ལ་སོགས་པ་ཡང་དག་དབྱུང༌། །རིགས་ངན་ལ་སོགས་རྣམ་པ་ལྔ། །ཧཱུཾ་ལས་རྡོ་རྗེ་རིམ་པ་ཡིས། །དེ་ནི་དགག་པ་བསྒོམ་པར་བྱ། །རླུང་གིས་མེ་ནི་རབ་སྦར་པས། །ཞུ་བཞིན་རྣམ་པར་དམིགས་པ་ཡིན། །རྡོ་རྗེ་རོ་མཉམ་བསྒྱུར་བ་སྟེ། །གཤིན་དགྲ་དྲི་མེད་དམིགས་པའོ། །དེ་ལ་ཨོཾ་


DTG047_Page_0193
[མ་དཔེ་གཟིགས་ན་འདིར་གནོན།]

རྣམས་འོད་ཟེར་གྱིས། །སངས་རྒྱས་ཡེ་ཤེས་རང་བཞིན་དགུག །སྔགས་ཀྱི་གཟུགས་ཀྱིས་རབ་ཏུ་གཞུག །དམིགས་ནས་བདུད་རྩི་ལྔ་མཆོག་སྟེ། །དེ་ཉིད་གསུམ་གྱིས་བྱིན་བརླབས་ནས། །དཀྱིལ་འཁོར་བདག་པོ་ཚིམ་པར་བྱ། །ཞི་བ་རྡོ་རྗེ་ལྕི་ལ་གནས། །ཧཱུཾ་ལས་སྐྱེས་པ་དམིགས་ནས་ནི། །དེ་ལ་སྡུ་གུའི་རྣམ་པ་ཡིས། །དེས་ནི་མཉམ་པར་དགུག་པར་བྱ། །སྣ་ཚོགས་གནས་པའི་རྫོགས་སངས་རྒྱས། །དཀྱིལ་འཁོར་ལྷ་རྣམས་དེ་བཞིན་ནོ། །སྙིང་གའི་འོད་ཟེར་རྣམས་ཀྱིས་ནི། །རྣམ་རྟོག་སྤངས་པས་དམིགས་བྱའོ། །ཐོག་མ་དབུས་མཐའ་དབྱེ་བ་ཡིས། །འདི་ལ་གཅིག་ཏུ་སྦྱོར་མེད་དེ། །རྡུལ་ཕྲན་ཆ་མེད་རྒྱུ་ཡིན་པས། །གྲངས་མེད་དེ་ནི་སྦྱོར་མི་བྱ། །གཅིག་དང་དུ་མའི་རང་བཞིན་གྱིས། །རྣམ་པར་བྲལ་བ་གང་ཡིན་དེ། །དེ་ནི་དེ་བཞིན་དེ་མ་ཡིན། །ཐེ་ཚོམ་དེ་ཉིད་ལས་བྱའོ། །གང་ཕྱིར་ཐེ་ཚོམ་གཉིས་ལ་གནས། །བསམ་མི་ཁྱབ་ལ་ཐེ་ཚོམ་མེད། །སྤྲོ་དང་བསྡུ་བའི་སྐུ་ཡིན་ཏེ། །སེམས་ཅན་རོ་གཅིག་དོན་ལས་བྱུང༌། །གཞན་ནི་རྒྱས་པར་དེ་ཉིད་མེད། །འདི་ནི་གསལ་བར་རབ་ཏུ་གསུངས། །ཡེ་ཤེས་ཞབས་ཀྱི་ཞལ་ནས་བྱུང༌། །དཔལ་ལྡན་གསང་བ་འདུས་པར་གསུངས། །འདི་ལ་བདག་གིས་རྒྱས་མ་སྨྲས། །དངོས་པོའི་བདག་ཉིད་དངོས་པོ་མེད། །ཁམས་མེད་རྣམ་པར་ཤེས་པའང་མེད། །ནམ་མཁའ་ཀུན་མཉམ་གནས་བཞིན་ཏེ། །ནམ་མཁའ་ཇི་བཞིན་བདག་མེད་པ། །འདི་ནི་ཆོས་མཆོག་བདེ་ཆེན་པོ། །ས་མིན་ཆུ་མིན་གཉི་ག་མིན། །མེ་མིན་རླུང་མིན་མཁའ་མིན་ཏེ། །རྡོ་རྗེ་སེམས་དཔའ་རབ་སྦྱོར་བས། །སྐྱེ་བ་འདི་ནི་རབ་གནས་པའི། །དངོས་པོ་ཐམས་ཅད་དངོས་མིན་ཏེ། །དེའི་ཕྱིར་དངོས་མེད་གྲགས་པའོ། །རྣལ་འབྱོར་རྣལ་འབྱོར་གྱིས་ནི་འབྲེལ། །རྟག་དང་ཆད་པ་གཉིས་མིན་ཏེ། །ཞལ་མེད་ཕྱག་མེད་ཁ་དོག་མེད། །མཆོག་གི་དགའ་བའི་མཚན་ཉིད་ལ། །དངོས་པོ་ཐམས་ཅད་ངེས་རྟག་མིན། །ཐོག་མ་དབུས་མཐའ་རྣམ་པར་སྤངས། །དེ་ལྟར་ཕོ་བྲང་ཤེས་གནས་པས། །རྣམ་རྟོག་ཐམས་ཅད་སྤངས་པ་སྟེ། །ཕུང་པོ་ཁམས་དང་བདག་མེད་པར། །དག་


DTG047_Page_0194
[མ་དཔེ་གཟིགས་ན་འདིར་གནོན།]

པའི་བདེ་གཟུགས་བསྒོམ་པའོ། །འགྲོ་བ་གཤིན་རྗེ་གཤེད་བྱས་ནས། །རང་སྙིང་ས་བོན་འོད་རྣམས་ཀྱིས། །དེ་བཀུག་འོང་བར་དམིགས་ནས་ནི། །སྐུ་གསུང་ཐུགས་རྡོར་རང་བཞིན་ཅན། །རྡོ་རྗེའི་རང་བཞིན་ཆོས་ཡིན་ཏེ། །ཡེ་ཤེས་ལས་སྐྱེས་དགོད་པར་བྱ། །དེ་ལ་དེ་ཡིས་བོན་རྣམས། །ཧྲཱིཿ་ཥྚྲྀཿ་ལ་སོགས་ཡེ་ཤེས་འབར། །ལྷག་རྟོག་སྤངས་པས་མཐོང་བ་སྟེ། །དག་པའི་བདེ་བའི་རྣམ་པ་ཅན། །འཕྲོ་བ་འདུས་པས་ཡང་དག་དགང༌། །བདག་ཉིད་མཁས་པས་བསྒོམ་པ་ཡིན། །སྐུ་ལ་སོགས་པར་འཕྲོ་བྱ་སྟེ། །དུས་གཅིག་དང་ནི་རིམ་པ་ཡིས། །ཁྲོ་གཟུགས་སྣ་ཚོགས་སྤྲུལ་པ་བྱེད། །ཧྲཱིཿ་ཥྚྲྀཿ་ལ་སོགས་སྔགས་ཀྱིས་ནི། །འགྲོ་བ་ཐམས་ཅད་བདེ་བྱེད་དོ། །ཨོཾ་ཧྲཱིཿ་ཥྚྲྀཿ་ཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་སྭཱ་ཧཱ། བསམ་གཏན་བྱེད་པའི་རིམ་པ་འདིས། །འབད་ལ་སྔགས་ནི་དེ་བཞིན་བྱ། །གཞན་ཡང་བཟའ་བ་ལ་སོགས་ལས། །བསམ་གཏན་ལྡན་ཞིང་ཐམས་ཅད་བྱའོ། །མཆོད་དང་བསྟོད་དང་བདུད་རྩི་ཟ། །སེམས་ཅན་དོན་བྱེད་ཡིད་ཀྱིས་བྱ། །དེ་ཉིད་གསུམ་གྱི་རིམ་པ་ཡིས། །ཡེ་ཤེས་འཁོར་ལོ་རྣམ་པར་དབྱུང༌། །བདག་གི་འཁོར་ལོ་བདག་ཉིད་ལ། །ཇི་ལྟར་རིམ་པས་གནས་པ་སྟེ། །བདག་གིས་བསོད་ནམས་བྱས་པ་གང༌། །མངོན་པར་བྱང་ཆུབ་ལ་སྨོན་བྱ། །དེ་ནས་སྨོན་ལམ་བྱས་ནས་ནི། །ཨོཾ་ཨཱཿ་ཧཱུཾ་མུཿའི་སྔགས་ཀྱིས་ནི། །ཡེ་ཤེས་འཁོར་ལོ་གཤེགས་སུ་གསོལ། །འདི་ནི་རྣལ་འབྱོར་ཆེན་པོའོ། །རང་བདག་རྣམ་པའི་རང་བཞིན་བཞེངས། །དེ་ཡི་ང་རྒྱལ་ཡང་དག་བྱེད། །འབད་ལ་དངོས་པོ་ཐམས་ཅད་ནི། །དེ་བཞིན་དེ་ཡི་གཟུགས་ངེས་བྱ། །གཏི་མུག་གཤིན་དགྲའི་གཟུགས་ཀྱིས་ནི། །གནས་དང་འགྲོ་བ་བསྒོམ་པའོ། །གསུངས་པའི་དུས་ནི་དེ་རྣམས་ལ། །རྣལ་འབྱོར་རྣལ་འབྱོར་བཞི་བསྒོམས་ཏེ། །དང་པོའི་རྣལ་འབྱོར་རྣལ་འབྱོར་ཆེ། །ཅུང་ཞིག་ཡེ་ཤེས་དེ་རྗེས་སྦྱོར། །སྦྱོར་བདག་ཡང་དག་རྣལ་འབྱོར་ཆེ། །ཡང་དག་ཡེ་ཤེས་དབང་གནས་སོ། །ཇི་ལྟར་གསུངས་པའི་རིམ་པ་གཅིག །དུས་གཅིག་ལ་ནི་སྔགས་བསྒོམ་བྱ། །རྣལ་འབྱོར་ཆེ་ལྡན་རྣལ་འབྱོར་


DTG047_Page_0195
[མ་དཔེ་གཟིགས་ན་འདིར་གནོན།]

པ། །འཕྲོ་དང་འདུ་བའི་ལུས་ཉིད་དོ། །དེ་ཉིད་ཡེ་ཤེས་གཟུགས་ཅན་དག །དེ་ཕྱིར་བདག་ཉིད་གཤིན་རྗེ་གཤེད། །དབང་བསྐུར་རིམ་པ་བསམ་གཏན་གྱིས། །ཁྲུས་དང་བཟའ་བ་ཐམས་ཅད་བྱ། །དེ་བཞིན་བདུད་རྩིའི་རིམ་པ་ཡིས། །གཞན་མཆོད་པ་ལ་རྟོགས་པར་བྱ། །བདག་ཉིད་དང་ནི་གཞན་མ་རྣམས། །རིམ་པ་ལྟར་ནི་རྟག་ཏུ་མཆོད། །དཔལ་ལྡན་གཤིན་དགྲའི་བདག་ཉིད་ཅན། །བྱང་ཆུབ་བསྒོམ་པས་རྟག་ཏུ་དམིགས། །བདག་གཞན་མཉམ་པ་བྱང་ཆུབ་ཡིན། །དེ་ཕྱིར་རང་བདག་སྦྱོར་བ་སྟེ། །དེ་མེད་བདག་ཉིད་བསྒྱུར་འདོད་པ། །རྣལ་འབྱོར་ཆོས་སྒྲུབ་པ་རྙེད་མིན་ནོ། །ཇི་ལྟར་སྣ་ཚོགས་རྣམ་པ་ལ། །དངོས་པོ་གཅིག་ལ་རྟོག་པ་སྟེ། །སྡུག་བསྔལ་བྲལ་ནས་བདེ་བ་སྐྱེ། །ལས་ཀྱི་དབྱེ་བས་དེ་དག་སྐྱེའོ། །བདག་ཉིད་སེམས་ལ་རྣམ་རྟོག་མེད། །དག་པའི་དགའ་བའི་རང་བཞིན་ཅན། །ཐབས་དང་ཤེས་རབ་རང་བཞིན་ལ། །ནག་ཅེས་པ་ནི་དགའ་བའོ། །དེས་ནི་འཁོར་བའི་རྒྱ་མཚོ་ལ། །དེ་སྐྱེས་འཁྲིལ་བས་ཤི་དུས་སུ། །ཟབ་པ་སྟོབས་ཆེན་གཤིན་དགྲ་ནག །དེས་ནི་ཕན་བྱེད་གཞན་མིན་ནོ། །གཤིན་སྒྲུབ་ཞགས་པ་ལྕགས་ཀྱུ་འཛིན། །སྟོབས་ཆེན་འབྱུང་ཚོགས་འཇིགས་མེད་དེ། །དེ་རྣམས་དགུག་ཅིང་ཕུར་པས་གདབ། །དེ་ནི་འཇིགས་ཅན་ཁྲོ་གཟུགས་སོ། །ཨོཾ་ཧྲཱིཿ་ཥྚྲྀཿ་ཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ། འབྱུང་པོ་ཐམས་ཅད་འཁོར་དང་བཅས་པ་དགུག་པ་སྟེ་ཛཿ་ཨོཾ་ཧྲཱིཿ་ཥྚྲྀཿ་ཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ། འབྱུང་པོ་ཐམས་ཅད་འཁོར་དང་བཅས་པ་ཕུར་བུས་གདབ་པ་སྟེ་ཧཱུཾ་ཕཊ། འདིས་ནི་འོང་བར་ཤེས་བྱས་ནས། །རང་གི་ཁ་དོག་བརྒྱན་པ་བརྟག །གཡས་པའི་ཕྱག་ལ་རང་མཚོན་འཛིན། །གཡོན་པའི་ཕྱག་ན་སྣ་ཚོགས་པའོ། །བརྒྱ་བྱིན་གཤིན་རྗེ་དབང་ལྡན་དང༌། །ཧྲཱིཿ་ཥྚྲྀཿ་ཝི་ཀྲྀ་ས་བོན་གྱིས། །དེ་དག་ཐམས་ཅད་རྫོགས་པ་སྟེ། །མེ་དང་བདེན་བྲལ་རླུང་ལྷ་དང༌། །ཧཱུཾ་བྱུང་ལུས་ནི་ཤེས་བྱ་སྟེ། །ཉི་ཟླ་ས་ཡི་འཇིག་རྟེན་ལྷ། །ཧཱུཾ་ཕཊ་ཕཊ་སྭཱ་ཧཱ་ལས་སྐྱེས། །ལྷ་རྣམས་ཐམས་ཅད་ཁྱབ་འཇུག་ལྡན། །འདི་ནི་གཏོར་མའི་དེ་ཉིད་ཀྱིས། །མཉམ་པ་ཐམས་ཅད་ཡང་དག་སྐྱེས། །རིམ་པས་དམིགས་ནས་བྱིན་གྱིས་བརླབ། །དེ་ལ་རིམ་པས་དབང་


DTG047_Page_0196
[མ་དཔེ་གཟིགས་ན་འདིར་གནོན།]

བསྐུར་སྦྱིན། །བདུད་རྩི་ལྔ་ཡི་རིམ་པ་ཡིས། །རཾ་གྱི་ས་བོན་གསེར་དང་མཚུངས། །མཆོད་དང་གཏོར་མ་དེ་རྣམས་དབུལ། །འདི་ནི་གཤིན་རྗེ་དགྲ་ནག་པོའི་སྒྲུབ་ཐབས། སློབ་དཔོན་ཀུན་དུ་བཟང་པོའི་ཞལ་སྔ་ནས་མཛད་པ་རྫོགས་སོ།། །།སློབ་དཔོན་དོན་ཡོད་རྡོ་རྗེ་ཡིས། །ལེགས་པར་གསལ་བྱེད་སྒྲུབ་ཐབས་འདི། །བསྒྱུར་པའི་བསོད་ནམས་གྲངས་མེད་དང༌། །གཞན་ཡང་སྨོན་ལམ་འདི་བཏབ་པས། །རྒྱུ་དང་སྒྲུབ་ཐབས་མི་འབྲལ་ཞིང༌། །དེ་ཡི་མན་ངག་རྗེས་འབྲངས་པས། །བདག་དང་གཞན་དག་སེམས་ཅན་ཀུན། །གཤིན་རྗེ་གཤེད་ཀྱི་ཞལ་མཐོང་ཤོག །

གཤིན་རྗེ་གཤེད་ཀྱི་སྒྲུབ་པའི་ཐབས།
འགྲོ་བཟང་སྙིང་པོ།


DTG047_Page_0196
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། ཡ་མཱ་རི་སཱ་དྷ་ན། བོད་སྐད་དུ། གཤིན་རྗེ་གཤེད་ཀྱི་སྒྲུབ་པའི་ཐབས། །འཕགས་པ་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །དཔལ་ལྡན་མཐར་མཛད་ཐུགས་རྗེའི་རང་བཞིན་ཅན། །འགྲོ་བའི་དོན་དུ་ཕྱི་རོལ་གཏུམ་ཆེན་སྐུ། །མགོན་པོ་གཤིན་རྗེ་གཤེད་ལ་མགོས་བཏུད་དེ། །དེ་ཡི་སྒྲུབ་ཐབས་འདོད་པའི་དོན་དུ་ནི། །སྔགས་པ་དང་པོ་སེམས་ཡོངས་མགུ་བ་དང༌། །བདེ་བའི་སྟན་གནས་འོག་ཏུ་དམ་བཅའ་བྱས། །སྙིང་གར་ཧཱུཾ་བཀོད་པ་ལས་མཆོད་པའི་ཚོགས། །སྣ་ཚོགས་པ་ཡི་མགོན་ལ་མངོན་པར་མཆོད། །དེ་ཡི་སྤྱན་སྔར་སྡིག་པ་བཤགས་ལ་སོགས། །བྱས་ནས་སྟོང་ཉིད་ཡོངས་སུ་བསྒོམས་ནས་ནི། །དང་པོར་རླུང་གི་དཀྱིལ་འཁོར་ཡཾ་ལས་བྱུང༌། །དུ་བའི་མདོག་འདྲ་གཞུ་ཡི་དབྱིབས་ཅན་ལ། །རཾ་གྱི་ས་བོན་ལས་བྱུང་མེ་ཡི་ནི། །དཀྱིལ་འཁོར་གྲུ་གསུམ་མདོག་ཀྱང་དམར་བ་ཡིན། །བཾ་ལས་བྱུང་བའི་ཆུ་ཡི་དཀྱིལ་འཁོར་ནི། །བུམ་པ་འདྲ་ཞིང་དཀར་ལ་ཐུར་ལྟས་པ། །ལཾ་ལས་བྱུང་བའི་དབང་ཆེན་དཀྱིལ་འཁོར་ནི། །ཟུར་བཞི་པ་ལ་ཀུན་ནས་རབ་ཏུ་སེར། །ཧཱུཾ་སུཾ་ཧཱུཾ་ལས་བྱུང་བའི་རི་རབ་ནི། །རི་རྒྱལ་རྩེ་མོ་བརྒྱད་པ་གོ་རིམས་བཞིན། །སྔར་བཤད་རླུང་ལ་སོགས་པའི་དཀྱིལ་འཁོར་རྣམས། །གོང་ནས་གོང་མའི་རིམ་པ་བསམས་ནས་ནི། །དེ་འོག་ཧཱུཾ་ལས་བྱུང་བའི་རྡོ་རྗེའི་ས། །ར་བ་དྲ་བ་དམ་པ་དབུས་ཀྱི་ཆར། །ཨ་ལས་བྱུང་བའི་ཟླ་བའི་དཀྱིལ་འཁོར་གྱིས། །དབུས་ན་བྷཱིཿ་ལས་བྱུང་བའི་འཇམ་རྡོ་རྗེ། །


DTG047_Page_0197
[མ་དཔེ་གཟིགས་ན་འདིར་གནོན།]

དཔའ་བོ་ཕྱག་གཡས་རལ་གྲི་མཛེས་པ་དང༌། །གཞོན་ནུའི་གཡོན་ན་ཐུགས་ཀར་གླེགས་བམ་བསྣམས། །སྐུ་ནི་དམར་སེར་ཟུར་ཕུད་ལྔ་གནག་ཅིང༌། །རྡོ་རྗེ་སྐྱིལ་ཀྲུང་མཆོག་བཅས་ཤིན་ཏུ་ཞི། །བསམས་ལ་སླར་ཡང་དེ་ཡི་ཐུགས་ཟླ་བར། །ཧི་ལས་བྱུང་བའི་ཉི་མ་འཆར་ཀའི་གཟུགས། །ཀུན་ནས་འོད་ཟེར་ནག་པོ་འཕྲོས་པ་ཡིས། །ཁམས་གསུམ་ཁྱབ་ནས་རྒྱལ་བ་བྱང་ཆུབ་སེམས། །ཁྲོ་བོ་རིག་པ་གནས་ན་ལེགས་བཞུགས་རྣམས། །ཡང་དག་བསྐུལ་ཏེ་བཀུག་ནས་ཉི་གཟུགས་ལ། །བཅུག་ལ་དེར་ནི་གཅིག་ཏུ་གྱུར་པ་ན། །སླར་ཡང་ཉི་མ་ཉིད་དུ་གྱུར་པ་ལས། །འོད་ཟེར་དམར་པོ་རབ་ཏུ་རྒྱ་ཆེ་བ། །ཤིན་ཏུ་འབར་བ་སྤྲོས་ནས་དེ་རུ་ནི། །ཧཱུཾ་ལས་བྱུང་བའི་རྡོ་རྗེ་ཁ་གྱེས་གནག །ལྟེ་བར་ཧཱུཾ་བཅས་སྣ་ཚོགས་འོད་འདྲ་བ། །དེ་ལས་རྒྱལ་དང་བྱང་ཆུབ་སེམས་དཔའ་སྤྲོས། །སླར་ཡང་དེ་ཡིས་འགྲོ་བ་དྲུག་ལ་གནས། །སེམས་ཅན་བཏུལ་ཏེ་བྱང་ཆུབ་མཆོག་བཀོད་ནས། །བཀུག་སྟེ་ཐམས་ཅད་རྡོ་རྗེ་ལ་རབ་གཞུག །དེ་འོག་རྡོ་རྗེ་ནཱི་ལ་ཡོངས་སུ་གྱུར་ནས། །གཤིན་རྗེ་གཤེད་པོ་ཞལ་གཅིག་ཕྱག་གཉིས་བསམ། །ཕྱག་གཡས་རྡོ་རྗེའི་དབྱིག་པ་འཕྱར་བ་དང༌། །ཕྱག་གཡོན་སྡིགས་མཛུབ་རྡོ་རྗེ་ཞགས་པ་ཅན། །གཤིན་རྗེ་མ་ཧེའི་སྟེང་ན་གན་རྒྱལ་གནས། །གཡས་བརྐྱང་གནས་པ་ཡིས་ནི་གནོན་པར་མཛད། །མི་ཐུང་ཞལ་ནི་རྣམ་འགྱུར་མཆེ་བ་གཙིགས། །གསུས་ཁྱིམ་ཆེ་ལ་ལྗགས་ནི་རྣམ་པར་རྐྱོང༌། །དབུ་སྐྲ་སྨིན་མ་སྨ་ར་དམར་སེར་ནི། །གྱེན་དུ་བརྫེས་ཤིང་སྤྱན་གཉིས་རྣམ་པར་དམར། །གནག་ཅིང་ཁྲོ་བཅས་གཉེར་མ་དཔྲལ་བར་བསྡུས། །ཕུས་འདེབས་ཀླུ་བརྒྱད་ཀྱིས་ནི་ཡན་ལག་བརྒྱན། །སྟག་ལྤགས་བསྣམས་ཞིང་ཐོད་པའི་རྩེ་བྲན་ཅན། །མགོ་བོའི་ཕྲེང་བའི་དོང་ཤལ་འཕྱང་མཛད་ཅིང༌། །དུས་མཐའི་མེ་ལྟར་འཇིགས་འོད་རྣམ་པར་འབར། །འཇིགས་པར་བྱེད་པའང་འཇིགས་པ་སྐྱེད་པར་མཛད། །གཏུམ་ཞིང་གཤིན་རྗེ་གཤེད་ཚོགས་སངས་རྒྱས་འཕྲོ། །འཇིག་རྟེན་ལྷ་མཆོག་ཚོགས་ཀྱིས་ཕྱག་བྱས་ཤིང༌། །ཧ་ཧ་ར་བཞད་པས་ལྷ་དང་ལྷ་མིན་ཚོགས། །ཀུན་ནས་ཡོངས་སུ་སྐྲག་པར་མཛད་པའོ། །ས་གསུམ་དག་ན་ཡོད་པའི་བདུད་ཀྱི་ཚོགས། །མ་ལུས་


DTG047_Page_0198
[མ་དཔེ་གཟིགས་ན་འདིར་གནོན།]

པ་ཡང་རྣམ་པ་འབྱེར་བར་མཛད། །དེ་ལྟར་བསམ་གཏན་ལ་བརྩོན་གནས་པ་སྟེ། །དོགས་པ་མེད་པར་ཉིན་མཚན་སྔགས་ཟློས་ཤིང༌། །དེ་ཉིད་སྦྱོར་བས་དུར་ཁྲོད་སོགས་པར་གནས། །དམ་ཚིག་རྣམ་དག་ངེས་པར་འགྲུབ་པར་འགྱུར། །དེ་ཡི་སྒྲུབ་ཐབས་འདི་ནི་ལེགས་བྲིས་ལས། །བདག་གིས་བསོད་ནམས་གང་ཐོབ་དེས་འཇིག་རྟེན། །གཤིན་རྗེ་གཤེད་མཉམ་འགྲོ་ཀུན་སྡུག་བསྔལ་ནི། །མི་བཟད་ཚོགས་མཐར་བདུད་ཚོགས་མྱུར་ཟད་ཤོག །གཤིན་རྗེ་གཤེད་ཀྱི་སྒྲུབ་ཐབས་སློབ་དཔོན་འགྲོ་བཟངས་སྙིང་པོས་མཛད་པ་རྫོགས་སོ།། །།རྒྱ་གར་གྱི་མཁན་པོ་དཱི་པ་ཀ་ར་ཤྲཱི་ཛྙཱ་ན་དང༌། །ཞུ་ཆེན་གྱི་ལོ་ཙཱ་བ་དགེ་སློང་རིན་ཆེན་བཟང་པོས་བསྒྱུར་ཅིང་གཏན་ལ་ཕབ་པའོ།།

ནག་པོ་ཞལ་གསུམ་ཕྱག་དྲུག་པའི་སྒྲུབ་ཐབས།
ལ་ལི་ཏ་བཛྲ།


DTG047_Page_0198
[མ་དཔེ་གཟིགས་ན་འདིར་གནོན།]

༈། །ནག་པོ་ཞལ་གསུམ་ཕྱག་དྲུག་པའི་སྒྲུབ་ཐབས་བཞུགས། ༈། །དཔལ་གཤིན་རྗེ་གཤེད་ནག་པོ་ལ་ཕྱག་འཚལ་ལོ། །གུས་པ་ཡིས་ནི་བླ་མ་ཡི། །ཞབས་ཀྱི་པདྨར་ཕྱག་འཚལ་ཏེ། །བླ་མའི་ཞལ་སྔའི་བཀའ་དྲིན་གྱིས། །ནག་པོ་ཞལ་གསུམ་ཕྱག་དྲུག་པའི། །མདོར་བསྡུས་པ་ཡི་སྒྲུབ་ཐབས་བཤད། །དང་པོར་རྣལ་འབྱོར་དབང་ཕྱུག་གིས། །དབེན་པའི་གནས་སུ་འདུག་ནས་ནི། །སྟོང་པའི་སེམས་ལ་མཉམ་གཞག་སྟེ། །སྙིང་གར་པདྨ་འདབ་བརྒྱད་པ། །དེའི་སྟེང་ཉི་མའི་དཀྱིལ་འཁོར་རོ། །དེ་ཡི་སྟེང་དུ་ཧཱུཾ་བསམས་ཏེ། །ཧཱུཾ་ལས་འོད་བྱུང་མདུན་དུ་ནི། །བླ་མ་མཁའ་འགྲོ་བཞུགས་པར་བསམ། །ཕྱག་འཚལ་བ་དང་མཆོད་བྱས་ལ། །སྡིག་བཤགས་ལ་སོགས་ཚོགས་སུ་འགྱུར། །དེ་ནས་སྙིང་གར་ཧཱུཾ་ལས་ནི། །འོད་བྱུང་ལུས་ངག་བག་ཆགས་རྣམས། །བསྲེགས་ནས་སྟོང་པ་ཉིད་དུ་བསྒོམ། །དེ་ནི་ཡེ་ཤེས་ཚོགས་ཡིན་ནོ། །སེམས་ནི་ཧཱུཾ་གི་རྣམ་པར་བསམ། །ཧཱུཾ་ལས་རྡོ་རྗེ་རྩེ་ལྔར་གྱུར། །རྡོ་རྗེ་ལས་ནི་སྐུ་བསྐྱེད་དོ། །ཞལ་གསུམ་ཕྱག་དྲུག་སྐུ་མདོག་གནག །གཡས་དཀར་གཡོན་དམར་དབུས་མཐིང་ཞལ། །སྤྱན་གསུམ་མཆེ་བ་གཙིགས་པའི་ཞལ། །དབུ་སྐྲ་ཁམ་ནག་གྱེན་དུ་བརྫེས། །གྲི་གུག་རྡོ་རྗེ་རལ་གྲི་གསུམ། །གཡས་པའི་ཕྱག་ན་བསྣམས་པ་ཡིན། །བྷནྡྷ་པདྨ་འཁོར་ལོ་གསུམ། །གཡོན་པའི་ཕྱག་ན་བསྣམས་པ་ཡིན། །གཡས་བསྐུམ་གཡོན་བརྐྱང་གསུས་པོ་


DTG047_Page_0199
[མ་དཔེ་གཟིགས་ན་འདིར་གནོན།]

ཆེ། །ལྷ་མོ་ཕག་མོའི་མགུལ་ནས་འཁྱུད། །ཕག་མོ་ཞལ་གཅིག་ཕྱག་གཉིས་མ། །གྲི་གུག་དང་ནི་བྷནྡྷ་གཡོན། །གཙོ་བོའི་མགུལ་ནས་འཁྱུད་པའི་ཚུལ། །གཉིས་སུ་མེད་པའི་གནས་ན་བཞུགས། །མིག་དང་ལུས་སོགས་དབང་པོ་དྲུག །སངས་རྒྱས་དྲུག་ཀྱང་ཡོད་པར་བསམ། །སྐུ་གསུང་ཐུགས་ཀྱིས་བྱིན་གྱིས་བརླབས། །སྙིང་གའི་ཧཱུཾ་ལས་འོད་བྱུང་བསམ། །ཡེ་ཤེས་མཁའ་འགྲོ་སྤྱན་དྲངས་ཏེ། །ཚིག་གི་དབང་ཡང་བླང་བར་བྱ། །བཅོམ་ལྡན་དེ་བཞིན་གཤེགས་པ་ཀུན། །བཅོམ་ལྡན་མངའ་བདག་ཆེན་པོ་རྣམས། །ཁྱོད་ཀྱིས་བདག་ལ་དབང་བསྐུར་གསོལ། །དེ་སྐད་བདག་གིས་དབང་བླངས་པས། །ཡེ་ཤེས་རྡོ་རྗེ་ཆུ་རྒྱུན་གྱིས། །བདག་གི་སྤྱི་བོར་དབང་བསྐུར་བས། །རིགས་ལྔའི་ཅོད་པན་གྱུར་པར་བསམ། །མཆོད་དང་བསྟོད་དང་བདུད་རྩི་བཟའ། །དེ་ནས་བཟླས་པ་བྱ་བ་ནི། །བཟླས་པའི་སྔགས་ནི་འདི་ཡིན་ནོ། །ཨོཾ་ཧྲཱིཿ་ཥྚྲྀཿ་ཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཐམས་ཅད་གྲུབ་པའི་དོན་དུ་བཟླས། །གཏོར་མའི་སྔགས་ནི་འདི་ཡིན་ཏེ། ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ། ཨཱ་དྱ་ནུ་ཏྤནྣ་ཏྭཱ་ཏ་ཨོཾ་ཨཱཿ་ཧཱུཾ་ཕཊ་སྭཱ་ཧཱ། བར་ཆད་ཐམས་ཅད་བསྲུང་བའི་ཕྱིར། །དེས་ནི་གཏོར་མ་སྦྱིན་པར་བྱ། །དེ་ནི་བསྐྱེད་པའི་རིམ་པའོ། །དེ་ནས་རྣལ་འབྱོར་ངལ་བསོ་བྱ། །སྙིང་གའི་ཧཱུཾ་གི་འོད་ཟེར་གྱིས། །ཁམས་གསུམ་མ་ལུས་ཀུན་ལ་ཁྱབ། །ཀུན་ཀྱང་སངས་རྒྱས་སྐུ་རུ་འགྱུར། །གྱུར་པ་ཀུན་ཀྱང་བདག་ལ་བསྡུ། །བདག་ཀྱང་ཧཱུཾ་ལ་བསྡུས་བྱས་ལ། །ཧཱུཾ་ཡང་ཐིག་ལེར་འགྲོ་བར་བསྒོམ། །རྟོག་པ་ཡང་དག་སྤངས་པ་སྟེ། །ཡང་དག་བདེ་བའི་རྣམ་པའོ། །ཕྱག་མེད་ཞལ་མེད་ཁ་དོག་མེད། །མཆོག་ཏུ་དགའ་བའི་མཚན་ཉིད་དོ། །འདི་བྱས་བསོད་ནམས་གང་ཐོབ་པས། །སེམས་ཅན་ཐམས་ཅད་སངས་རྒྱས་ཤོག །ནག་པོ་ཞལ་གསུམ་ཕྱག་དྲུག་པའི་སྒྲུབ་ཐབས། སློབ་དཔོན་ལ་ལི་ཏ་བཛྲ་ས་མཛད་པ་རྫོགས་སོ།།

འོ་མའི་སྒྲུབ་པའི་ཐབས།
ཛི་མུ་ད་པཱ་ཏཱ།


DTG047_Page_0199
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། ཀྵི་ར་སཱ་དྷ་ན། བོད་སྐད་དུ། འོ་མ་སྒྲུབ་པའི་ཐབས། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །རྒྱལ་མཚན་ངོས་ལྡན་དེ་ནས་བལྟ། །དེ་ལ་འོ་མ་རབ་ཏུ་སྒྲུབ། །འོ་མ་གོམས་པའི་སེམས་ཉིད་ཀྱིས། །ཕྱག་


DTG047_Page_0200
[མ་དཔེ་གཟིགས་ན་འདིར་གནོན།]

རྒྱ་ཆེན་པོ་རབ་ཏུ་བསྒྲུབ། །རྡོ་རྗེ་ཕག་མོ་ལ་སོགས་པ་རིགས་སུ་བྱུང་བའི་བུད་མེད་ཕྱི་དང་ནང་གི་ཡོན་ཏན་གྱིས་བརྒྱན་པ། རྣལ་འབྱོར་པ་ཡེ་ཤེས་ཅུང་ཟད་དབང་བས་བཟུང་སྟེ། །ལེགས་པར་འགྲུས་ཤིང་དྲི་ཞིམ་པོས་བྱུགས་ལ་རྒྱན་མ་ལུས་པས་བརྒྱན་ཏེ། དེ་ནས་བདག་མེད་པ་སྔོན་དུ་སོང་བས། ས་བོན་གྱི་ཡི་གེ་ས་དང་རྡོ་རྗེ་ལས་བྱུང་བའི་རྡོ་རྗེ་ཕག་མོར་བསམས་ཏེ། །བདག་ཉིད་ཀྱང་རྡོ་རྗེ་སེམས་དཔར་བྱའོ། །དེ་ནས་རང་གི་ཕྱག་རྒྱའི་ལུས་ལ་དཀྱིལ་འཁོར་ལྔ་བསྒོམས་ཏེ། །དེའི་གསང་བའི་བྷ་ག་ཧྲཱིཿ་ལས་པདྨ་འདབ་མ་བརྒྱད་པའོ། །ལྟེ་བ་བྲུཾ་ལས་མུ་ཏིག་ལྟ་བུའོ། །བདག་ཉིད་ཀྱི་གསང་པ་ཡང་ཧཱུཾ་ལས་རྩེ་ལྔ་པའོ། །ནོར་བུའི་ཡི་གེ་ཨོཾ་ལས་སོ། །ཡི་གེ་ཕཊ་སེར་པོ་བུ་གར་རོ། །དེ་ནས་ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་པས་སྙོམས་པར་འཇུག་སྟེ། སེན་མོས་གདབ་པ་བྱས་ལ། མྱོས་བྱེད་ཀྱི་ལག་པས་ཡང་དང་ཡང་དུ་བྲུད་ཅིང་ལྕེ་རྩེའི་ཐུར་མས་ཡང་ཡང༌། དེ་ནས་ས་གསུམ་གྱི་དབང་ཕྱུག་མ་རྒྱས་པ་ནས་སྔར་བཤད་པའི་སྔགས་ཀྱིས་སྙོམས་པར་ཞུགས་ཏེ། དལ་བུས་དལ་བུས་བསྐྱོད་པ་ན་འོ་མ་འབབ་པར་འགྱུར་རོ། །བབས་པ་ན་ཡི་གེ་ཕཊ་ཀྱིས་བསྡམས་ཏེ། སྣང་བ་མེད་པ་ལ་འཇུག་པར་བྱའོ། །དེ་ལྟར་ཡང་དང་ཡང་འོ་མ་འབབ་པ་གོམས་པས་ནི། །སྐད་ཅིག་ལ་བབ་པ་ན་སྣང་བ་མེད་པ་ལ་སྐད་ཅིག་ལ་འཇུག་པ། དེའི་ཚེ་ཕྱག་རྒྱ་ཆེན་པོའི་དངོས་གྲུབ་ཐོབ་པར་འགྱུར་ཏེ། ཇི་ལྟར་དཔལ་མཁའ་འགྲོ་མ་རྡོ་རྗེ་དྲ་བའི་རྟོག་པ་ལས་གསུངས་པ། ཆུ་རྒྱུས་དྲ་བ་དང་བཅས་ཤིང༌། །ཡན་ལག་ཀུན་ལྡན་པུ་ག་ཅན། །ལུས་དེ་མེད་པར་སྡང་གྱུར་པ། །དེ་ཡི་སྐད་ཅིག་དེ་ལ་ནི། །དགྱེས་པའི་རྡོ་རྗེའི་སྐུ་འཛིན་འགྱུར། །ཞེས་སོ། །འདི་དགྱེས་པའི་རྡོ་རྗེ་ནི་མཚན་པ་སྟེ། །ཕྱག་རྒྱ་ཆེན་པོ་གྲུབ་པའི་ཚུལ་ཐམས་ཅད་འདི་ལྟར་མན་ངག་ལས་ཤེས་སོ། །དོན་འདི་ཉིད་དཔལ་གསང་བ་འདུས་པ་ལ་སོགས་པས་ཀྱང་གསུངས་ཏེ། རྡོ་རྗེ་ཉི་མ་ནུབ་པ་ན། །སྒྲུབ་བ་ཀུན་དུ་བརྩམ་པར་བྱ། །སྐྱ་རེངས་འཆར་བའི་དུས་དག་ཏུ། །འགྲུབ་འགྱུར་འདི་ལ་ཐེ་ཚོམ་མེད། །ཅེས་པ་དང༌། སོར་མོ་དང་ནི་ལྕེའི་ཐུར་མས། །ཡང་ནས་ཡང་དུ་ཅུང་ཟད་བསྐུལ། །རྩ་ནི་རྣམ་པར་རྒྱས་འགྱུར་ཏེ། །མཆོག་གཅིག་པུ་ནི་འབྱུང་བར་འགྱུར། །སྔགས་པས་


DTG047_Page_0201
[མ་དཔེ་གཟིགས་ན་འདིར་གནོན།]

བར་ཆད་མེད་པར་ནི། །སྲ་བ་ཅུང་ཟད་ཅུང་ཟད་བསྐུལ། །ནོར་བུར་གནས་པ་ཡིད་ལས་བྱུང༌། །ཡི་གེ་ཕཊ་ཀྱིས་བསྡམ་པར་བྱ། །བྱང་ཆུབ་སེམས་ནི་མ་ཤོར་ན། །བདེ་བ་དམ་པ་སྐྱེ་བ་སྟེ། །དེ་ཡི་རང་བཞིན་སྤྲོས་པ་ཡིས། །མི་ལུས་ཆད་པ་མེད་པར་སྣང༌། །ཁྱབ་ཅིང་ཞི་ལ་བདེ་བ་ཡིས། །གོ་འཕང་དམ་པ་ངེས་པར་ཐོབ། །བྱང་ཆུབ་སེམས་ནི་ཤི་བ་ནི། །བརྒྱལ་བས་འདིར་ནི་ཐོབ་མ་ཡིན། །ཞེས་སོ། །འདི་ལྟ་བུའི་བྱ་བ་ནི་རྣལ་འབྱོར་པ་ལམ་རྣམ་པ་གཉིས་ལས། ཕོ་ཉའི་ལམ་ལ་དགའ་བ། དེ་ཉིད་ཀྱི་གསུང་དང་ཐུགས་ལ་དབང་ཐོབ་པ། ལས་དང་པོ་པའི་ས་ལས་འདས་པ། ཡེ་ཤེས་ལ་དབང་ཐོབ་པ་དང༌། ཡེ་ཤེས་ལ་ཡང་དག་པར་དབང་ཐོབ་པ་མ་ཡིན་པ། ཡེ་ཤེས་ལ་ཅུང་ཟད་དབང་བས་སྤྱད་པར་བྱའོ། །དེ་ལས་གཞན་པ་ནི་མ་ཡིན་ཏེ། ལས་དང་པོ་པ་ནི་དེས་ཉམས་ལ། གསུམ་པ་དང་བཞི་པ་ནི་དེ་མི་འབད་པའི་ཕྱིར་རོ། །དཔལ་ཀྲྀཥྞ་ཡ་མཱ་རིའི་རྒྱུད་ལས། འོ་མ་སྒྲུབ་པའི་མན་ངག་ཏུ་བྱས་ལ། ཨཱ་ཙཪྻ་ཛི་མུ་ད་བཱ་ཏཱ་ལས་མཛད་པ། འོ་མ་སྒྲུབ་པའི་མན་ངག་རྫོགས་སོ།། །།ཨཱ་ཙཱཪྻ་བཛྲ་པཱ་ཎི་དང༌། ལོ་ཙཱ་བ་དགེ་སློང་ཆོས་ཀྱི་ཤེས་རབ་ཀྱིས་བསྒྱུར་བའོ།

གཤིན་རྗེ་གཤེད་ནག་པོའི་འཁོར་ལོའི་མན་ངག།
ནཱ་ག་བོ་དྷི།


DTG047_Page_0201
[མ་དཔེ་གཟིགས་ན་འདིར་གནོན།]

༈། །གཤིན་རྗེ་གཤེད་ནག་པོའི་འཁོར་ལོའི་མན་ངག་བཞུགས།། འཇམ་དཔལ་གཤིན་རྗེ་གཤེད་ལ་ཕྱག་འཚལ་ལོ། །ལས་གང་བྱེད་ཀྱང་དང་པོ་བསྙེན་པ་ལ་འཇུག་པར་བྱ་སྟེ། དེ་ཡང་གནས་དབེན་པར། རང་ཉིད་རིམ་པ་བཞིན་དུ་ཧཱུཾ་ལ་གཤིན་རྗེའི་རྒྱལ་པོ་གཟུགས་ཁྲོ་བོ་འཇིགས་བྱེད་ཆེན་པོ་ཞལ་གསུམ་པ། ཕྱག་དྲུག་པ། སྐུ་མདོག་སྔོན་པོ། ཞལ་དབུས་མ་སྐུ། དང་མཐུན། གཡས་ཟླ་བ་ལྟ་བུ་དཀར་པོ། གཡོན་པདྨ་དམར་པོ་ལྟ་བུའོ། །ཕྱག་གཡས་དང་པོ་ན་རྡོ་རྗེ། གཉིས་པ་རལ་གྲི། གསུམ་པ་ནི་གྲི་གུག་འཛིན་པའོ། །ཕྱག་གཡོན་གྱི་དང་པོ་ན་འཁོར་ལོ། བར་མ་ན་པདྨ། ཐ་མ་ན་བྷནྡྷའོ། །ཐོད་པ་རློན་པའི་དོ་ཤལ་དང༌། ཐོད་དང་ཐོད་དུམ་གྱི་གདུ་བུ་དང༌། དབུ་རྒྱན་དང༌། མགུལ་དོ་དང༌། རྣ་ཆ་དང༌། སྐ་རགས་དང༌། རྐང་གདུབ་བྱས་ཤིང༌། མ་ཧེའི་སྟེང་ན་ཉི་མའི་གདན་ལ་གཡས་བསྐུམ། གཡོན་བརྐྱང་བས་བཞུགས་པ། གསུས་པ་ཐུར་དུ་བཤལ་བ། ཞལ་གདངས་ཤིང་ལྗགས་འདྲིལ་བ་སྟེ། འཇིགས་པའི་ཚོགས་ཀུན་


DTG047_Page_0202
[མ་དཔེ་གཟིགས་ན་འདིར་གནོན།]

འཇིགས་པར་བྱེད་པ། སྐྲ་ཁམ་སེར་མེ་དཔུང་འབར་བ་ལྟ་བུ་གྱེན་དུ་འཁྱིལ་བ་སྨ་ར་དང་སྨིན་མ་སེར་པོ་དང་ལྡན་ཞིང་མཆེ་བ་གཙིགས་པ། སྤྱན་དམར་པོ་ཤིན་ཏུ་འཇིགས་པར་བཟློག་པ་ཁ་སྤུའི་བུ་ག་ཐམས་ཅད་ནས་མི་བསྐྱོད་པའི་གཟུགས་དཔག་ཏུ་མེད་པ་རྒྱུན་དུ་འཕྲོ་བ། འོད་དང་འོད་ཟེར་དུས་མཐའི་བསྐལ་བའི་མེ་ལྟར་འབར་བ་དང་ལྡན་པ་བསྒོམས་ལ། དེ་ནས་ཨོཾ་ཧྲཱིཿ་ཥྚྲྀཿ་ཝི་ཀྲི་ཏཱ་ན་ན་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཞེས་པ་འཕྲོ་འདུ་དང་བཅས་པའམ། ལྷ་ལ་མ་ཡེངས་པ་ཙམ་གྱིས་ཟློས་ཀྱང་རུང་སྟེ། གྲངས་འབུམ་མམ། མཚན་མ་བཟང་པོ་ཡང་ཡང་མཐོང་བའི་བར་དུ་བཟླས་སོ། །དེ་ནི་བསྙེན་པ་སྟེ། ལས་ཀུན་ལ་དེ་ལྟར་བྱེ་བྲག་མེད་པར་དང་པོར་མཐུན་པར་བྱའོ། །དེ་ལྟར་ལས་སུ་བྱེད་པའི་དུས་སུ་བྱེ་བྲག་ཏུ་བྱ་སྟེ། འདི་ལྟར་ཞི་བར་བྱེད་ན་རང་ལྷའི་གཟུགས་སུ་བསྒྱུར་ཏེ། མདོག་དཀར་པོར་བསྒྱུར་བ་དང༌། བྱམས་པའི་སེམས་དང་ལྡན་པར་བྱས་ལ། བདུད་རྩིའི་རྒྱུད་ལས་འབྱུང་བ་ལྟར་སྔ་དྲོའི་དུས་སུ། ཤིང་ལོའམ་གྲོ་གའི་ཤུན་པ་གསལ། །སྐྱེས་པ་ཞི་བར་བྱེད་པ་གུར་ཀུམ་གྱིས་བྲི། བུད་མེད་ཞི་བར་བྱེད་པའི་གི་ཝང་གིས་བྲི་བ་ནི། འཁོར་ལོ་རིམ་པ་བཞི་བྲིས་ལ། དབུས་ལ་རེ་མིག་དགུ་དགུར་བྱ་སྟེ། །དེ་ཡི་ཕྱི་རིམ་བཅུ་གཉིས་མིག །དེ་ཡི་ཕྱི་རིམ་བཅུ་དྲུག་མིག །ཐ་མ་ཐོད་པས་བསྐོར་བ་བྲི། །དབུས་ཀྱི་རེའུ་མིག་དགུར་དགོད་པ། །དབུས་ཆར་ཡ་དང་ཤར་ཆར་ཀྵེ། །ལྷོ་ཡི་མིག་ལ་མ་བྲིའོ། །ནུབ་མིག་མི་བྲི་ཤར་དུའོ། །དེ་དག་གཡས་སྐོར་དག་ཏུ་འདོད། །དེ་མཚམས་རེའུ་མིག་བཞི་པོ་ལ། །ས་བོན་གཉིས་པར་མིག་བཅུག་ལ། །གཡོན་སྐོར་དུ་ནི་བྲི་བར་བྱ། །ཞི་བའི་ས་བོན་ཨོཾ་སྭཱ་ཧཱ། །རྒྱས་པའི་ས་བོན་བཽ་ཥཊ། རྨོངས་པའི་ས་བོན་ལཾ་ཡིན་ནོ། །དབང་གི་ཧོ་སྟེ་མངོན་སྤྱོད་ཧཱུཾ། ཕོ་དགུག་ཛཿ་ལ་མོ་དགུག་ཧྲཱིཿ། །དེ་ལྟར་བྱེ་བྲག་ཤེས་བྱས་ལ། །མ་ནོར་བར་ནི་ལེགས་པར་བྲི། དེ་ཡི་ཕྱི་མར་འཁོར་ལོ་ནི། །རེའུ་མིག་བཅུ་གཉིས་པ་དེ་ལ། །ཡི་གེ་གཡོན་སྐོར་དུ་བཀོད་པ། །ཤར་གྱི་རེའུ་མི་གནས་བཟུང་བའོ། །ཡ་ཙ་ན་རི། ཛ་ས་དོ་རུ། ཎ་ཡོ་ནི་ར་རྣམས་སོ། །དེ་ཡི་ཕྱི་རིམ་འཁོར་ལོ་ནི། །རེའུ་མིག་བཅུ་དྲུག་པ་དེ་ལ། །ཤར་གྱི་རེའུ་མིག་ནས་བརྩམས་ནས། །གཡས་སྐོར་དུ་ནི་བྲི་བར་བྱ། །


DTG047_Page_0203
[མ་དཔེ་གཟིགས་ན་འདིར་གནོན།]

སྔགས་དང་མིང་དང་བསྐུལ་ཚིག་དང༌། །ལྡན་པར་ཤར་གྱི་རེའུ་མིག་ལའོ། །དེ་ཡི་འོག་མའི་རེའུ་མིག་ལ། །ས་བོན་གཉིས་དང་མིང་བཅུག་བྲི། །དེ་བཞིན་རེའུ་མིག་བཅུ་དྲུག་ལ། །སྤེལ་ཞིང་སྤེལ་ཞིང་བྲ་བར་བྱའོ། །དེ་ལྟར་བྲིས་པའི་འཁོར་ལོ་དེ། །ལུགས་དང་ལུགས་མིན་གཉིས་སུ་བྱ། །ཆུ་ཞིང་མཉམ་པོ་གཉིས་སུ་བྱའོ། །ཁྱད་པར་དུ་ནི་འོག་མ་ལ། །སྔགས་ཀྱི་མཐའ་རུ་ཕཊ་གཞག་གོ །དེ་བཞིན་ཁ་སྦྱར་བྱ་ལུགས་ནི། །སྟེང་འོག་སོ་སོའི་ཡིག་སྔགས་དག །མཐུན་མཐུན་སོ་སོར་མགོ་སྤྲད་སྦྱར། །དེ་ནི་ཟླུམ་པོར་དྲིལ་བྱ་ལ། །དྲག་མིན་དག་ལ་སྤྲ་ཚིལ་གྱིས། །ཕྱི་རོལ་གཡོགས་པ་རབ་བྱས་ལ། །དེ་ནས་ཁམ་ཕོར་མཉམ་པོ་གཉིས། །བྱས་པས་གཅིག་ཏུ་རྩི་མར་དང༌། །སྦྲང་རྩི་བསྲེས་པས་བཀང་བ་ཡི། །ནང་དུ་ཁ་སྦྱར་འཁོར་ལོ་གཞུག །དེ་ནས་ཁམ་ཕོར་གཅིག་གིས་ནི། །སྟེང་ནས་ཁ་ནི་དགབ་པར་བྱའོ། །དེ་ལ་ལས་ཀྱི་མདོག་མཐུན་པའི། །སྐུད་པའི་ཁྲིས་ནི་མདུན་དུ་དཀྲི། །དེ་ནས་རང་ལྷའི་ལས་མཐུན་པའི། །གཟུགས་སུ་རང་ཉིད་རབ་བྱས་ཏེ། །འཁོར་ལོ་ཁ་སྦྱར་སྟེང་དུ་ཡང༌། །དེ་འདྲའི་གཤིན་རྗེ་རུ་བསམས་ལ། །དེ་ལ་མེ་ཏོག་དྲི་ཆབ་མདོག་དང་མཐུན་པ་ཡི། །བདུག་སྤོས་ལ་སོགས་མཆོད་བྱས་ལ། །བསྒྲུང་བྱ་ཟླ་བ་ལ་བཞག་སྟེ། །རང་ཉིད་ཟླ་བའི་རྡོ་རྗེ་ཡིས། །ལྟེ་བའི་ཧཱུཾ་ལས་རང་འདྲ་བའི། །ཁྲོ་བོ་དུ་མ་ཡེ་ཤེས་ཀྱི། །ཆུས་གང་བུམ་པ་ལས་མཐུན་མདོག །འཛིན་པ་སྤྲོས་པ་སླར་བསྡུས་ཏེ། །བསྒྲུབ་བྱའི་སྤྱི་བོར་དབང་བསྐུར་བས། །གང་འདོད་འབྲས་བུ་ཐོབ་བསམས་ལ། །ཐུན་མཚམས་བཞི་ལ་གསང་སྔགས་ནི། །མིང་དང་བསྐུལ་ཚིག་བཅས་པ་བཟློག །དབང་ལ་བྱེ་བྲག་ཏུ་བྱ་བ། །ཙནྡན་དམར་དང་སྲིན་ལག་ཁྲག །རྒྱ་སྐྱེགས་ཁུ་བ་བཙག་ཀྱང་རུང༌། །དམར་པོའི་རྫས་ཀྱིས་བྲི་བར་བྱ། །བུད་མེད་དགུག་ལ་ཁྱད་པར་ནི། །དུར་ཁྲོད་ཀྱི་ནི་རས་མ་ལ། །པདྨའི་རཀྟས་བྲི་བྱ་སྟེ། །བུད་མེད་བྷནྡྷ་ཁ་སྦྱར་གཞུག །རྨོངས་ལ་ཁྱད་པར་དུར་རས་ལ། །ལྡོང་རོས་ཀྱིས་བྲིས་ཁམ་ཕོར་གཞུག །དེ་སྟེང་སུཾ་ལས་རི་རབ་དང༌། །ལཾ་སེར་སྣ་ཚོགས་རྡོ་རྗེ་ཡི། །སྟེང་དུ་ལྷ་བསྐྱེད་ཀུན་ལ་སྦྱར། །རྨོངས་རྒྱས་སེར་པོ་དབང་དགུག་དམར། །དྲག་དང་ཚར་གཅད་


DTG047_Page_0204
[མ་དཔེ་གཟིགས་ན་འདིར་གནོན།]

གནག་གཞི་དཀར། །དེ་ལྟར་ཁ་དོག་བྱེ་བྲག་སྦྱར། །དྲག་པོ་ཁྱད་པར་དབྱེ་བ་ནི། །དུར་ཁྲོད་རས་ལ་འཁོར་ལོ་ནི། །གོང་དང་མཐུན་པར་བྲི་བར་བྱ། །སྣག་ཚ་སྐེ་ཚེ་ཚ་དང་དུག །ནིམ་པ་སྒ་དང་པི་པི་ལིང༌། །ན་ལེ་ཤམ་ཡུངས་ཀར་ནག་དམར། །ཤིང་ནག་ཆན་པོའི་ས་བོན་དང༌། །ཙི་ཏྲ་ཀ་ཡི་ཁུ་བ་དང༌། །སྲིན་ལག་ཁྲག་དང་དུར་ཁྲོད་སོལ། །དེ་རྣམས་རྙེད་ཚད་བསྲེས་པས་བྱ། །སྙུ་གུ་བྱ་རོག་སྒྲོ་རྩེས་བྱ། །དེས་ནི་འཁོར་ལོ་ལེགས་བྲིས་ལ། །ཁ་སྦྱར་དྲིལ་ཏེ་རྒྱུ་རྣམས་ལ། །བྱས་པའི་གཟུགས་བརྙན་སྙིང་གར་གཞུག །དེ་ནས་གཞན་ཡང་རི་རྩེ་ཡི། །ས་ནི་ཤིན་ཏུ་སྐམ་པོ་ལ། །རིགས་ངན་ཁ་ནས་ཆུ་བླངས་སྦྲུ། །སྦྲུས་པའི་འདག་པ་དེ་ལས་ནི། །གཤིན་རྗེའི་རྒྱལ་པོའི་གཟུགས་བྱས་ཏེ། །གཡས་བསྐུམ་གཡོན་བརྐྱང་བགྲད་པ་ལ། །གཡས་པ་ཐོ་བ་ཞགས་པ་གཡོན། །གསུས་པ་ཆེ་ལ་ཐུར་བཤལ་བ། །བྱས་ལ་མདུན་དུ་གཞག་པར་བྱའོ། །མར་ངོའི་ཚེས་བརྒྱད་བཅུ་བཞི་ལ། །ལས་དག་ཉིན་ཕྱེད་ནམ་ཕྱེད་ནའོ། །རང་ཉིད་ཁྲོ་གཟུགས་ཁྲོ་སེམས་ཀྱིས། །ལྷོ་རུ་ཁ་བལྟས་སྟན་པ་དེར་འདུག །དེ་ནས་རང་སྙིང་ཧཱུཾ་ཡིག་ལས། །ཁྲོ་རྒྱལ་མདོག་ནག་ཞལ་གཅིག་པ། །ཕྱག་གཉིས་འཁོར་ལོ་ལྕགས་ཀྱུ་ཐོགས། །མཚོན་ཆ་སྣ་ཚོགས་འཛིན་སྤྲོས་ལ། །བསྒྲུབ་བྱའི་གོ་ཆ་མཚོན་ཆ་ཀུན། །ཕྲོགས་ཏེ་དྲངས་ནས་རང་སྙིང་གི །ས་བོན་ཧཱུཾ་ལ་ཐིམ་པར་བསམ། །ཚུལ་དེས་དེ་ཡི་ཁྱིམ་སྟོང་བསམ། །དེ་ནས་ཡང་ནི་རང་སྙིང་ལས། །གོང་ལྟར་ཁྲོ་བོ་རབ་སྤྲོས་པས། །བསྒྲུབ་བྱ་དྲངས་ནས་སྔགས་པ་ཡིས། །མདུན་དུ་ཁ་དོག་ནག་པོ་རུ། །གཟུགས་བརྙན་ལ་བསྟིམ་གསལ་པོ་རུ། །དེ་ལ་སྣ་ཚོགས་ནད་རྣམས་ཀྱིས། །མནར་བར་བསམ་ཞིང་གཅེར་བུ་དང༌། །རབ་ཏུ་འདར་ཞིང་སེམས་གདུང་དང༌། །ལུས་ནི་ཤིན་ཏུ་སྡུག་བསྔལ་ཞིང༌། །ལུས་ལ་ཤུ་བ་རལ་གྲི་མདའ། །སྟ་རེ་ལ་སོགས་མཚོན་རྣམས་ཀྱིས། །ཚབས་ཆེར་གཟེར་བར་བསམ་པར་བྱའོ། །དེ་ཡང་རླུང་ནག་ཆེས་གཡེངས་པས། །ཤིན་ཏུ་གྲང་བས་འཁྱགས་པར་བསམ། །མེ་ཆེན་རབ་འབར་བས་བསྐོར་ཏེ། །རབ་ཚབས་ཀྱང་གདུང་བར་བསམ། །དེ་ལའང་ཁྱི་དང་སེང་གེ་ཝ། །སྟག་དང་བྱ་རོག་བྱ་རྒོད་དང༌། །མཆུ་རིངས་སོགས་པ་རྔམ་ཚུལ་དུ། །བསྒྲུབ་བྱའི་


DTG047_Page_0205
[མ་དཔེ་གཟིགས་ན་འདིར་གནོན།]

ལུས་དེ་བཟའ་བར་བལྟ། །དེ་ནས་གཟུགས་བརྙན་དེ་ལ་ནི། །ཚེར་མ་རྣོན་པོ་རབ་བླངས་ལ། །བར་མཚམས་མེད་པར་རབ་ཕུག་ལ། །ཚ་བའི་ལྡེ་གུས་རབ་བསྐུས་ལ། །དེ་ནས་གཤིན་རྗེའི་ལྟོ་བར་གཞུག །དེ་གསུས་བསྒྲུབ་བྱ་རབ་བསམས་ལ། །རང་སྙིང་ཁྲོ་བོ་མཚོན་ཐོགས་སྤྲོ། །དེ་ཡིས་གཤིན་རྗེའི་གཟུགས་གནས་པའི། །བསྒྲུབ་བྱ་དེ་བསད་དེའི་ཤ་ཁྲག །ཟོས་འཐུངས་རུས་ཆོག་རྐང་གཞིབས་བསམ། །སྤྲུལ་པ་བྱ་རྒོད་གཟུགས་ཅན་གྱིས། །ནང་ཁྲོལ་ཕྱུང་ཁྱེར་ཁར་སོང་བསམ། །ལས་ངན་བྱེད་དེ་དམྱལ་བར་འགྲོ། །མི་གདུང་བྱ་ཕྱིར་དེ་ཡི་སེམས། །རྒྱལ་བའི་གཟུགས་སུ་རང་སྙིང་གི །འོད་ཀྱིས་བསྡུས་ཏེ་རྒྱལ་བ་ཡི། །ཞིང་སར་ཁྱེར་ནས་བཀོད་པར་བསམ། །དེ་ལྟར་ལས་ཀྱི་ཚུལ་དེ་ཉིད། །སྡིག་པ་ཅན་ལ་དགོངས་པས་གསུངས། །ཡང་ན་གཤིན་རྗེའི་སྒོམ་ལུགས་གཞན། །ཞལ་གཅིག་ཕྱག་གཉིས་གཡས་ཞགས་པ། །གཡོན་པ་སྡིགས་མཛུབ་ལྡན་པ་ལ། །དབུ་རྒྱན་རང་རང་རིགས་བདག་གོ །སོ་སོའི་སྔགས་ཀྱི་དབྱེ་བ་ནི། །གསལ་བར་བྲིས་པ་འདི་ཡིན་ནོ། །ཨོཾ་ཧྲཱིཿ་ཥྚྲིཿ་ཝི་ཀྲི་ཏཱ་ན་ན་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཆེ་གེ་མོ་ཤཱནྟི་དཀུ་རུ་སྭཱ་ཧཱ། འདི་ནི་ལས་ཀྱི་བཟླས་པ་དང༌། །འཁོར་ལོ་རྩིབས་བཅུ་དྲུག་པ་སྤེལ་ལ། །དགོད་པའི་སྔགས། །ཨོཾ་ཧྲཱིཿ་ཥྚྲིཿ་ཝི་ཀྲི་ཏཱ་ན་ན་ཧཱུཾ་ཧཱུཾ་ཕཊ་ཕཊ་བཽ་ཥཊ་ཆེ་གེ་མོ་བུཥྚིཾ་ཀུ་རུ་བཽ་ཥཊ་དང༌། །ཨོཾ་ཧྲཱིཿ་ཥྚྲྀཿ་ཝི་ཀྲི་ཏཱ་ན་ན་ཧཱུཾ་ཧཱུཾ་ཕཊ་ཕཊ། ཧོ་ཆེ་གེ་མོ་ཛཿ་ཛ་ཧྲཱི་ཝ་ཤཾ་ཀུ་རུ་ཧོཿ། ཨོཾ་ཧྲཱིཿ་ཥྚྲྀཿ་ཝི་ཀྲི་ཏཱ་ན་ན་ཧཱུཾ་ཧཱུཾ་ཕཊ་ཕཊ། བཽ་ཥཊ་ཆེ་གེ་མོ་ཤ་ན་ཡ་བ་ཤ་ན་ཡ། ཨོཾ་ཧྲཱིཿ་ཥྚྲྀཿ་ཝི་ཀྲི་ཏཱ་ན་ན་ཧཱུཾ་ཧཱུཾ་ཕཊ་ཕཊ། ཧྲཱིཿ་བུད་མེད་ཆེ་གེ་མོ་ཨཱ་ཀཪྵ་ཡ་ཧྲཱིཿ། ཨོཾ་ཧྲཱིཿ་ཥྚྲྀཿ་ཝི་ཀྲི་ཏཱ་ན་ན་ཧཱུཾ་ཧཱུཾ་ཕཊ་ཕཊ་ཛཿ། སྐྱེས་པ་ཆེ་གོ་མོ་ལ་ཨཱ་ཀཪྵ་ཡ་ཛཿ། ཨོཾ་ཧྲཱིཿ་ཥྚྲྀཿ་ཝི་ཀྲི་ཏཱ་ན་ན་ཧཱུཾ་ཧཱུཾ་ཕཊ་ཕཊ། ལཾ་ཆེ་གེ་མོ་རང་གི་གནས་དང་བཅས་པ། །སྟཾ་བྷ་ཡ་ལཾ། དྲག་པོའི་འཁོར་ལོ་འོག་མའི། །ཨོཾ་ཧྲཱིཿ་ཥྚྲྀཿ་ཝི་ཀྲི་ཏཱ་ན་ན་ཧཱུ་m་ཧཱུཾ་ཕཊ་ཕཊ་ཧཱུཾ་ཆེ་གེ་མོ་མཱ་ར་ཡ་ཕཊ། སྟེང་མའི། ཨོཾ་ཧྲཱི། ཥྚྲྀཿ་ཝི་ཀྲི་ཏཱ་ན་ན་ཧཱུཾ་ཧཱུཾ་ཕཊ་ཕཊ། ཧཱུཾ་ཆེ་གེ་མོ་མཱ་ར་ཡ་ཧཱུཾ། ཨོཾ་ཆེ་གེ་སྭཱ་ཧཱ། །བཽ་ཥཊ་ཆེ་གེ་མོ་བཽ་ཥཊ། ལཾ་ཆེ་གོ་མོ་ལཾ། ཧོ་ཆེ་གེ་མོ་ཧོ། །ཛཿ་ཆེ་གེ་མོ་ཛཿ་ཧྲཱིཿ་ཆེ་གེ་མོ་ཧྲཱིཿ་དབུས་ཀྱི་རེའུ་མིག་གྲྭ་བཞི་དང༌། །གསུམ་པ་བཅུ་དྲུག་པ་ལ་ནི། །སྤེལ་བའི་སྔགས་


DTG047_Page_0206
[མ་དཔེ་གཟིགས་ན་འདིར་གནོན།]

སུ་ཤེས་པར་བྱ། །རིང་པོ་དག་ནི་སྤེལ་བ་སྟེ། །ལས་དུས་བཟླས་པ་དེ་ལྟར་རོ། །གྲུ་བཞི་དང་གསུམ་པའི་ཕྱོགས་བཅུ་དྲུག་སྤེལ་ལོ། །གཤེད་ནག་འཁོར་ལོའི་མན་ངག །སློབ་དཔོན་ཆེན་པོ་ནཱ་ག་བོ་དྷིས་མཛད་པ་རྫོགས་སོ།། །།ལོ་ཙཱ་བ་དགེ་སློང་ཆོས་རབ་ཀྱིས་བསྒྱུར།

སྦྱིན་སྲེག་གི་ཆོ་ག།
ལ་ལི་ཏ་བཛྲ།


DTG047_Page_0206
[མ་དཔེ་གཟིགས་ན་འདིར་གནོན།]

སྦྱིན་སྲེག་གི་ཆོ་ག་བཞུགས། དཔལ་གཤིན་རྗེ་གཤེད་ལ་ཕྱག་འཚལ་ལོ། །སྦྱིན་སྲེག་གི་རིམ་པ་ནི། སའི་ཆོ་ག་དང་སྟ་གོན་དང༌། ཐིག་རྣམས་ཚུལ་བཞིན་བྱས་ལ། ཐབ་ཁུང་ཡང་ལུགས་མཐུན་པར་བྲུས་ཏེ། ས་ནག་པོས་བྱུག་གོ །རྔ་མོ་དང་བོར་བུའི་སྦངས་དང༌། །ཕུབ་མ་དང༌། མེ་ཏོག་ནག་པོ་དྲི་མི་ཞིམ་པས་བྱུགས་ལ། ཤིན་ཏུ་རྩུབ་པ་དང་ཚ་བ་དང་དུར་ཁྲོད་ཀྱི་ཐལ་བས་ཀྱང་བྱུགས་ལ། །ཡམ་ཤིང་ཡང་དེ་ཉིད་ལས་བྱུང་བ། རྩེ་མོ་ཁྲག་དང་དུག་དང་ཡུངས་མར་ལ་སོགས་པ་དང༌། དྲག་པོའི་སྲེག་རྫས་ཇི་ལྟར་འོས་པ་བསག །བདག་ཉིད་ཀྱི་ཆས་གོས་ཀྱང་དུར་རས་དང་གཡང་གཞི་དང་གོས་ནག་ལ་སོགས་པ་བཤམ། དེ་ནས་རྫས་རྣམས་གཡོན་དུ་གཞག །མཆོད་ཡོན་ལ་སོགས་པ་གཡས་སུ་གཞག །དེ་ནས་བདག་ཉིད་སྟན་མེད་ཅིང་སྲ་བ་ལ་རུས་སྦལ་གྱི་འདུག་སྟངས་ཀྱིས་འདུག་ལ། །ཁ་ལྷོར་བལྟས་ཏེ། རྒྱན་ཆ་གྱོན་ཏེ། ཁྲོས་པའི་སེམས་ཀྱིས་སོ་བཅའ་ཞིང་རྣལ་འབྱོར་གཉིས་བྱས་ལ། །རྗེས་སུ་རྣལ་འབྱོར་ལ་རང་འདྲ་གཞུག །རྫོགས་པའི་རྣལ་འབྱོར་བྱ་བ་དེ་ལ། རྣལ་འབྱོར་ཆེན་པོ་རྫོགས་བྱས་ལ། །དེ་ནས་ཐབ་ཡིག་ཨ་ལས་བྱུང་བ་ནག་པོ་འོད་ནག་པོ་འཕྲོ་བ། མཐོང་བ་ཙམ་གྱིས་ཀྱང་གསོད་པར་ནུས་པར་བསམ། ཡོ་བྱད་ཀུན་ཀྱང་ཡ་ཡིས་བྱིན་གྱིས་བརླབས་ལ། རྫས་རེ་རེ་འང་འོད་ནག་པོ་འཕྲོ་བ། གང་གིས་མཐོང་བའམ། རེག་ནའང་གསོད་ཅིང་འཇིགས་པ། ལྷ་རྣམས་ལ་ཕུལ་བས་ཀྱང་ཁྲོ་བ་དང་གཏུམ་པར་འགྱུར་བར་བསམ། ཡི་གེ་བཅུ་བཞི་པས་ཐབ་དང་རྫས་ཀུན་བསངས་ལ། ཐབ་ཏུ་བརྩིག །དེ་ནས་མེ་གཉེར་ཏེ། རིགས་ངན་གྱི་ཁྱིམ་ནས་བྱུང་བ་འམ། རྡོ་དྲུད་པ་ལས་བྱུང་བ། ཡམ་ཤིང་ལ་མེ་སྦར་ཏེ། ཡི་གེ་བཅུ་བཞི་པས་བསངས་ལ་ཐབ་ཏུ་སྦར་དེ་ལ་ཡུངས་མར་གང་ཕུལ་ལ་རླུང་གཡབ་ཀྱིས་གཡབ་ཅིང༌། བཟླས་ཏེ། ཛྭཱ་ལ་རཾ་ཛྭཱ་ལ་རཾ། དེ་ནས་མཚན་མ་བརྟག་པར་བྱ། །ལྟས་བཟང་བ་དང་མེ་ལྷ་བསྐྱེད་དེ་དང་པོར་མངོན་པར་བྱང་ཆུབ་པས་རྡོ་རྗེ་


DTG047_Page_0207
[མ་དཔེ་གཟིགས་ན་འདིར་གནོན།]

སེམས་དཔའ་བསྐྱེད་དེ་འོད་དུ་ཞུ་བའི་གོང་བུ་ལས་ལྷ་མོ་བཞི་ཆད་དེ། དེས་བསྐུལ་བས། རཾ་ནག་པོ་དེ་ལས་བྱུང་བའི་རྡོ་རྗེ་ལས། མེ་ལྷ་འཁྲོས་པས་ཞེས་བྱ་བ་ཞལ་ལ་སོགས་པ་གཙོ་བོ་གཉིས་འདྲ་བ་ཅིག་བསམ། དེ་ནས་ཡེ་ཤེས་ཀྱི་མེ་ལྷ་ཙཱ་རྩི་ཀཱས་དགུག་སྟེ། དད་པ་དང་ནི་དམ་ཚིག་གིས། །ཚུར་གཤེགས་ཚུར་གཤེགས་འབྱུང་པོ་ཆེ། །ལྷ་ཡ་དྲང་སྲོང་བྲམ་ཟེའི་མཆོག །སྲེག་བླུགས་ཞལ་ཟས་བཞེས་སླད་དུ། །འབར་བའི་ནང་དུ་བཞུགས་སུ་གསོལ། །སྔགས་ནི། ཀྲོ་དྷ་ཨགྣེ་ཆེ་གེ་མོ་མཱ་ར་ཡ་ཧཱུཾ་ཕཊ། དེ་ལ་ཞབས་བསིལ་ཕུལ་ལ། ཡི་གེ་བཅུ་བཞི་པའི་གཞུག་ལ། ཨརྒྷཾ་པྲ་ཏཱི་ཙྪ་ཆེ་གེ་མོ་མཱ་ར་ཡ་ཧཱུཾ་ཕཊ་ཅེས་སོ། །ཞབས་བསིལ་ཡང་སྔགས་ཀྱི་མཇུག་ལ། ནི་རི་ཁཾ་ཆེ་གེ་མོ་མཱ་ར་ཡ་ཧཱུཾ་ཕཊ། འཐོར་འཐུང་ཡང་སྔགས་ཀྱི་མཇུག་ལ། པྲ་ཝ་ར་སཏྐཱ་ར་པྲ་ཏཱི་ཙྪ་ཆེ་གེ་མོ་མཱ་ར་ཡ་ཧཱུཾ་ཕཊ་ཅེས་བརྗོད་དོ། །དེ་ནས་སྒོ་བ་གཞིས་དགུག་གཞུག་བྱ། དེ་ནས་མིག་ལ་སོགས་པ་བྱིན་གྱིས་བརླབ་པ་དང༌། ལུས་ངག་སེམས་ཀྱང་བྱིན་གྱིས་བརླབ། །དེ་ནས་དབང་བྱིན། དེ་ནས་ཞབས་བསིལ་ལ་སོགས་པ་དང༌། །རྣམ་པ་ལྔ་དང༌། རང་གི་སྔགས་ཀྱི་མཇུག་ལ་བསྐུལ་ཚིག་དང་བཅས་པས་སོ། །དེ་ནས་མར་དང༌། ཡམ་ཤིང་དེ་ནས་ཏིལ། དེ་ནས་འབྲས། དེ་ནས་དུག་དང༌། །རྫས་ཀུན་ཡི་གེ་བཅུ་བཞི་པའི་མཇུག་ལ་བསྐུལ་ཚིག་དང་བཅས་པས་སོ། །དེ་ནས་མཆོད་དང་བསྟོད། །བདུད་རྩི་མྱང་བ་བྱ། དེ་ནས་ཁ་ལག་བཤལ། དེ་ནས་མེ་ལྷ་མེ་འབར་བའི་རྣམ་པར་འགྱུར་བར་བསམས་ལ། ཡང་ཐབ་དང་རྫས་བསངས་ལ། འབར་བའི་ནང་དུ་དཀྱིལ་འཁོར་རྫོགས་པའི་རྣལ་འབྱོར་གྱི་ཚུལ་དུ་སྟོན་ཏོ། དེའི་མིག་ལ་སོགས་པ་བྱིན་གྱིས་བརླབ་པ་དང༌། ལུས་ལ་སོགས་པ་བྱིན་གྱིས་བརླབས་ཏེ། དབང་བསྐུལ་ལ་ཡེ་ཤེས་འཁོར་ལོ་དགུག་གཞུག་བྱས་ལ་དང་པོ་ཞེ་སྡང་རྡོ་རྗེ་ལ་ཐུན་མོང་གི་མཆོད་པ་བྱས་ལ། དེ་ནས་སྲེག་རྫས་ཀུན་ཡི་གེ་བཅུ་བཞི་པའི་སྔགས་བསྐུལ་ཚིག་དང་བཅས་པས་འབུལ་ཏེ། དེ་ནས་མཆོད་བསྟོད། བདུད་རྩི་མྱང་བ་བྱ། དེ་ནས་ཡང་ཐབ་བསངས་ལ། ཡང་གཏི་མུག་རྡོ་རྗེ་དང༌། དེ་དེ་བཞིན་དུ་རིམ་པས་དབུལ། ཐ་མར་ལིངྒ་ལ་བཀུག་འདྲེན་བྱས་ལ། དེ་ནས་གཏུབ་ཅིང་སྲེག །དེ་ནས་ཡེ་ཤེས་པ་གཤེགས་སུ་གསོལ། དམ་ཚིག་བདག་ལ་བསྡུ། ཡང་


DTG047_Page_0208
[མ་དཔེ་གཟིགས་ན་འདིར་གནོན།]

མེ་ལྷ་བསྐྱེད། སྲེག་རྫས་ལྷག་མ་ཀུན་དབུལ་ཏེ། དེ་ནས་ཁ་ལག་བཤལ། ཡེ་ཤེས་ཀྱི་མེ་ལྷ་གཤེགས། བསྐྱེད་པ་བདག་ལ་བསྡུ། དེ་ནས་བསྔོ་བ་དང་སྨོན་ལམ་བྱ། སྦྱིན་སྲེག་གི་ཆོ་ག་སློབ་དཔོན་ཆེན་པོ་ལ་ལི་ཏ་བཛྲས་མཛད་པ་རྫོགས་སོ།།

འཆི་བདག་ཡི་དགས་རྒྱལ་པོའི་སྒྲུབ་ཐབས།


DTG047_Page_0208
[མ་དཔེ་གཟིགས་ན་འདིར་གནོན།]

འཆི་བདག་ཡི་དགས་རྒྱལ་པོའི་སྒྲུབ་ཐབས་བཞུགས། འཆི་བདག་ཡི་དགས་རྒྱལ་པོ་ནི། །འཆི་བདག་བདུད་ཅེས་བྱ་བ་སྟེ། །འགྲོ་བ་ཀུན་གྱི་ལུས་ཀྱི་བདུད། །ལུས་དང་གྲིབ་མའི་ཚུལ་བཞིན་དུ། །འགྲོ་བ་ཀུན་ལ་སྣང་བ་སྟེ། །ཕུང་པོ་ཉིང་མཚམས་སྦྱོར་བ་པོ། །འཇིགས་པ་དེ་ཡི་གཟུགས་མཐོང་ན། །ཡ་མ་དེ་ཡི་དྲིང་ན་འབྱུང༌། །དེ་ནས་རང་གི་སྲོག་གི་བདུད། །ལྷག་པའི་ཕྱོགས་ན་གནས་པ་སྟེ། །གཙིགས་པ་ཅན་ལ་ཕྱག་འཚལ་ལོ། །དེ་ལ་འཆི་བདག་སྐྱེས་བུའི་གཟུགས། །ཁྲུ་གང་ཡི་དགས་གོས་ལ་བྲི། །ནག་པོ་ཞལ་གཅིག་ཕྱག་གཉིས་པ། འཇིགས་པ་རལ་པ་མཆེ་བཞི་གཙིགས། །རྒྱན་མེད་རུས་པའི་ཕྲེང་བ་ཅན། །གཡས་པ་ཡ་མའི་དབྱུག་པ་འཛིན། །སྡིགས་མཛུབ་ཞགས་པ་གཡོན་ན་བསྣམས། །མ་ཧེ་དག་ལ་གནས་པ་བྲི། །དེ་ལ་རྣལ་འབྱོར་ཆེན་པོ་ཡི། །མདུན་དུ་གནས་ལ་ཞི་གནས་བྱ། །ཡང་ན་སཾ་ས་དྷི་རྣམ་གསུམ་ལས། །ཧཱུཾ་ལས་ནག་པོ་ཆེན་པོ་སྟེ། །ཡི་གེ་བཅུ་གཅིག་བརྗོད་བྱས་ལ། །རས་ལ་བྲིས་པ་བཞིན་དུ་བསྒོམ། །ཨོཾ་ཀཱ་ལ་རཱུ་པ་ཡ་མ་རཱ་ཛ་ཧཱུཾ་ཕཊ། དེ་ནས་བསྙེན་པ་བྱ་བ་གསུངས། །དུར་ཁྲོད་ནགས་ཚལ་སོང་བྱས་ལ། །བཟླས་བརྗོད་བྱས་པའི་ཚུལ་དག་གིས། །ཧ་ཧ་བཞད་ཅིང་འོང་བར་རིགས། །མངོན་དུ་གྱུར་ནས་བ་ལིཾ་སྦྱིན། །དེ་ལ་བསྙེན་པའི་སྙིང་པོ་འདིའོ། །ཨོཾ་ཀཱ་ལ་རཱུ་པ་བྷཱི་མ་ཡཀྵ་ཧཱུཾ། མ་ཧཱ་རོ་ཥ་ཎཾ། ན་ར་སིདྡྷ་ཡེ། སརྦ་བྷཱུ་ཏ་ཨ་དྷི་པ་ཏ་ཡེ། ཡ་མ་རཱ་ཛ་ཡ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཐོག་མ་དབུས་མཐའ་ཡང་དག་ལྡན། བཅུ་བཞི་ཕྱེ་བ་བསྙེན་པ་ཡིན། །རིམ་པ་བཞིན་དུ་མ་བྱེ་བ། །ཉེ་བའི་བསྙེན་པ་ཡིན་པར་ཤེས། །གྲུབ་སྟེ་མངོན་དུ་གྱུར་པ་ན། །ཤ་ཆེན་གཏོར་མ་ཆེན་པོ་སྦྱིན། ཨོཾ་ཀཱ་ལ་རཱུ་པ་ཡ་མ་རཱ་ཛ་ཧཱུཾ་ཨི་དཾ་བ་ལིཾ་གྲྀཧྞ་ཁ་ཁ་ཁཱ་ཧི་ཁཱ་ཧི། ཚོགས་ལ་སོགས་པ་མངོན་དུ་སྦྱིན། །དེ་ལྟར་གྲུབ་ན་ལས་བྱ་སྟེ། །བྷནྦྷ་མཚན་ངན་བཟང་པོ་བཙལ། །དུམ་བུ་གཅིག་གམ་གཉིས་པ་ལ། །དཔྲལ་བའི་ངོས་ནས་ལྟག་པར་དྲང༌། །མི་ཐོད་དག་པ་རོ་རས་ལ། །གནོད་སྦྱིན་བཻ་བ་སྭ་


DTG047_Page_0209
[མ་དཔེ་གཟིགས་ན་འདིར་གནོན།]

ཏཱའི་གཟུགས། །སྣག་ཚ་བྱ་རོག་ཁྲག་དང་ནི། །དུར་ཁྲོད་སོལ་བ་བོང་བུའི་ཆུས། །མི་རྐང་སྙུ་གུས་ལེགས་པར་བྲི། །སྤྱི་བོའི་ངོས་ཀྱི་ཕྱོགས་དག་ལ། །རས་ལ་འཁོར་ལོ་བྲི་བར་བྱ། །རིམ་པ་སྐོར་གསུམ་ལྡན་པ་ལ། །རིམ་པ་གཉིས་པ་དག་ལ་ནི། །རྩིབས་གཉིས་གཉིས་ཀྱི་ཚད་ལ་བྲི། །དེ་ལ་གསང་སྔགས་དགོད་པ་ནི། །མ་མ་ཤ་ཏྲཱུཾ་ཨ་མུ་ཀཾ། འཁོར་ལོ་ལྟེ་བའི་དབུས་སུ་བྲི། །ཤར་ནས་བརྩམས་ནས་འདི་ལྟ་སྟེ། །ཏྲཱ་ས་ཡ་ཏྲཱ་ས་ཡ། །ཨཱ་ཀཌྜྷྱ་ཨཱ་ཀཌྜྷྱ། ཤོ་ཥ་ཡ་ཤོ་ཥ་ཡ། ཧ་ན་ཧ་ན། ད་ཧ་ད་ཧ། པ་ཙ་པ་ཙ། བནྡྷ་བནྡྷ། ཙཱུ་རྞ་ཙཱུ་རྞ། རིམ་པ་ཐ་མ་དག་ལ་ནི། །ཤར་ནས་བརྩམས་ནས་འདི་ལྟར་བྲི། །ཙཀྵ་བཛྲ་གྷོ་ར་བ་ཏྲ་མ་ཀྵེ་ཏྲ་པཱ་ལ་ཡ། ཙྪིནྡྷ་ཙྪིནྡྷ་མི། །བྷིནྡ་བྷིནྡ། ཐཱ་ཀཾ་བཛྲ་བཱ་དྷི། རུ་དྷི་ར་ཨརྒྷ་ས། ཨོཾ་མཱ་ར་ཡ་བཛྲ་ཡེ་སྟཾ་བྷ་ཡ་ཧཱུཾ་ཕཊ། བར་དུ་དགྲ་ཡི་མིང་རུས་བྲི། །རྒྱབ་སྲུབས་དག་ལ་གསང་སྔགས་བྲི། །སྐུད་པ་སྔོན་པོ་ནག་པོ་ཡིས། །ཐོད་པ་དེ་ནི་བསྡམ་པར་བྱ། །རོ་ཤིང་མེ་ལ་བྷནྡྷ་བསྲོ། །དེ་ལ་ཞག་གསུམ་བྱས་ནས་ཀྱང༌། །ལས་ཀྱི་འཆི་བདག་ཁྲུ་གང་ལ། །ཞལ་གཅིག་མཆེ་གཙིགས་ཕྱག་གཉིས་པ། །བདུན་པོར་ས་དང་རྣམ་སྣང་དང༌། །དུར་ཁྲོད་སོལ་བའི་རྒྱུ་དག་ལ། །བོང་བུའི་ཆུ་ཡིས་གཟུགས་བྱས་ཏེ། །དེ་ཡི་སྙིང་གར་ཐོད་པ་གཞུག །འཁོར་ལོ་ལ་བྲིས་སྔགས་བཟླས་ཏེ། །མར་ཚེས་བཅུ་བཞི་དང་བརྒྱད་ལ། །དུར་ཁྲོད་རོ་ཁང་དག་ཏུ་མནན། །དེ་ལྟར་ལས་ནི་རྫོགས་གྱུར་ནས། །གང་ལ་བྱ་བའི་དངོས་པོ་དེ། །རང་གི་བདུད་ཀྱི་དབང་དུ་གྱུར། །འཆི་བདག་ཡི་དགས་རྒྱལ་པོ་དེ། །མ་དྲོས་མཚེ་ཡི་འབྲི་དཀྱིལ་ལ། །རི་ནག་པོ་ཡི་ཕ་མཐའ་སྟེ། །སྤོས་དང་རི་བོའི་བར་དག་ན། །ཆུ་དང་ཞེང་དུ་ཆ་མཉམ་མཚོ། །དེ་འོག་དཔག་ཚད་ལྔ་བརྒྱའི་འོག །འཆི་བདག་ཡི་དགས་རྒྱལ་པོའི་གནས། །འགྲོ་བའི་ལྟག་པའི་ཕྱོགས་ན་གནས། །དེ་ཡི་ཡུམ་དེ་ཙ་མུཎྜཱི། །རབས་ཆད་ཕོ་མོའི་ཐོད་པ་ལ། །ཡ་གཉིས་དག་གི་བར་དུ་ཡང༌། །རོ་རས་དག་ལ་གཟུགས་བྲི་བ། །ཞལ་དང་ཕྱག་ཞབས་སྔོན་བཞིན་བྲི། །དེ་ལ་འཆི་བདག་ཅ་མུཎྜཱི། ནག་མོ་མིག་གསུམ་ཁྲོ་གཉེར་ཅན། །ཁ་གདངས་སྐྲ་བ་རྫེས་ནུ་མ་འཕྱང༌། །གསུས་ཆེན་དུས་འགྲོའི་གོས་གྱོན་མ། །གཡས་ན་ཏྲི་ཤཱུལ་གཡོན་ཐོད་


DTG047_Page_0210
[མ་དཔེ་གཟིགས་ན་འདིར་གནོན།]

པ། །མི་ཡི་ཐོད་པ་དང་སྦྱར་བ། །མི་ཡི་རྒྱུས་པས་བསྡམས་པ་ཡི། །བར་དུ་འཁོར་ལོ་གཞུག་པར་བྱ། །དེ་ལ་འཆི་བདག་འཁོར་ལོ་ནི། །སྔ་མ་བཞིན་དུ་བྲི་བར་བྱ། །དེ་ལ་མ་མོའི་འཁོར་ལོ་ནི། །རས་ལ་འཆི་བདག་ཚུལ་བཞིན་དུ། །རྩིབས་བརྒྱད་གཉིས་དང་ལྡན་པ་ལ། །དབུས་ནས་བརྩམས་ཏེ་དེ་བཞིན་བྲི། །མ་མ་སརྦ་ཤ་ཏྲཱུཾ། ལྟེ་བའི་དབུས་སུ་བྲི་བར་བྱ། །ཤར་ནས་རིམ་པ་འདི་བཞིན་དུ། །ཨ་མུ་ཀ་སྱ། དྷུ་ན་དྷུ་ན། བནྡྷ་བནྡྷ། མ་ཐ་མ་ཐ། པྲ་མ་ཐ་པྲ་མ་ཐ། ཧཱུཾ་ཛྭ་ར་ཛ། ཛ་རི་ན་བྱ། །དྷི་རི་གེ་ནཾ། རིམ་པ་ཐ་མ་དག་ལ་ནི། །ཤར་ནས་བརྩམས་ནས་འདི་ལྟ་སྟེ། །ནི་ག་ན་ཤི་བཾ་ཧཾ་ཡཾ་རི་ཚུ་ས་ཡ། ཨ་བི་ཤ་ཡ། ཛཾ་བཾ་ཧྲྀ་ད་ཡཾ། ཚིནད་མ་དེ་པ་ཤི་གཾ་མཱ་ར་ཡ་ནཱ་ཤ་ཡ་ཧཱུཾ་ཕཊ། འཁོར་ལོ་གཉིས་ཀྱི་བར་དུ་ཡང༌། །གང་ལ་བྱ་བའི་མིང་གཟུགས་གཞུག །བླ་མས་འཆི་བདག་བསམས་བྱས་ཏེ། །སྲོག་གི་སྙིང་པོ་བཟླས་པར་བྱ། །གོས་སྔོན་གྱོན་པ་དེ་བཞིན་དུ། །ཡུམ་མམ་ལས་མཁན་དཔའ་བོ་བཞིན། །ཡུམ་གྱི་སྲོག་སྙིང་བཅུ་པོ་དགོད། །ཨོཾ་ཧྲཱིཿ་ཙ་མུཎྡྷཱི་ཡེ་ཧཱུཾ་ཕཊ་སྭཱ་ཧཱ། །ཡབ་ཡུམ་འཁོར་ལོ་གང་ཡིན་པ། །གོང་གི་ཐོད་པར་གཞུག་པར་བྱ། །ཤི་བའི་སྐྲ་ཡི་སྐུད་པ་ལ། །མི་རྒྱུས་དག་གི་སྐུད་པས་བསྡམས། །མི་ཡི་རྒྱུ་མས་གཟུངས་ཐག་བྱས། །གཙོ་དང་གཟུངས་ཀྱིས་གཟུང་བྱས་ནས། །མཎྜལ་སྟེང་བཞག་བཟླས་པ་བྱ། །འཁོར་ལོ་སྟེང་འོག་ལས་སྔགས་ལ། །གཙོ་དང་གཟུགས་ཀྱི་འབུམ་ཕྲག་བཟླས། །དེ་ནས་བཟླས་པ་རྫོགས་ནས་ཀྱང༌། །དུར་ཁྲོད་ལྷ་ཁང་རོ་ཁང་ངམ། །ལྷ་ཀླུ་དྲག་པོའི་གནས་སུ་མནན། །ལྷ་ལ་སོགས་པ་ཤི་བར་བསྟན། དེ་ཡི་སྒྲུབ་པའི་གནས་རྣམས་ཀྱང༌། །དབེན་པའི་གནས་སུ་བྱས་ནས་ནི། །བླ་མ་ཕ་མ་མཆོད་པ་ཡིན། །གང་བྱུང་ཡང་ནི་བསྒྲལ་བ་ཡིན། །དེ་ཚེ་བསྒྲལ་བ་མ་བྱས་ན། །དེ་ཚེ་རང་ཉིད་འཆི་བར་འགྱུར། །གསང་བ་གཞན་ལ་བསྟན་མི་བྱ། །འཆི་བདག་ཡི་དགས་རྒྱལ་པོའི་སྒྲུབ་ཐབས་རྫོགས་སོ།།

གཤིན་རྗེ་གཤེད་ཀྱི་ལག་པའི་མཆོད་པ།


DTG047_Page_0210
[མ་དཔེ་གཟིགས་ན་འདིར་གནོན།]

བཅོམ་ལྡན་འདས་གཤིན་རྗེ་གཤེད་དམར་པོ་ལ་ཕྱག་འཚལ་ལོ། །ལག་པའི་མཆོད་པ་ནི། ཡང་རང་ཉིད་ཡི་དམ་དུ་བསྒོམས་ལ། ལག་པའི་མཐིལ་ལས་ནི། པདྨ་འདབ་མ་བརྒྱད་པ་བསམས་ལ། དེ་ལ་གཤིན་རྗེའི་ལྷ་ཚོགས་བསམས་ལ། དེ་ལ་དགུག་གཞུག་བྱས་ལ། །དེ་ལ་ལག་


DTG047_Page_0211
[མ་དཔེ་གཟིགས་ན་འདིར་གནོན།]

པ་གཡས་པ་བདག་གི་ཐུགས་ཀ་ནས་བཏོན་ལ། སྲིན་མཐེབ་ཀྱིས་བདུད་རྩི་གཏོར་ཞིང༌། །ཨོཾ་ཨཱཿ་ཧཱུཾ་བརྗོད་པས་ལྷ་མཉེས་པར་བསམ། དེ་ནས་ལྷ་རྣམས་རང་གི་སྤྱི་བོ་ན་མར་ཐིམ་པར་བསམ། ལག་པའི་ཆད་དེ་སྣོད་དུ་གཏིགས་སོ། །ཚོགས་ཀྱི་ཕུད་རྣམས་ལ་གཏོར་མ་བྱ་ཞིང༌། ལྷག་མ་རྣམས་ལ་བདུད་རྩིར་གྱུར་པའི་ཆོ་ག་བྱས་ལ། གཏོར་མ་རྣམས་འབྱུང་པོ་རྣམས་ལ་དབུལ་ལོ། །དེ་ནས་རྣལ་འབྱོར་ཕོ་མོ་རྣམས་རང་རང་གི་ཐུགས་དམ་མཆོད་ཅིང་བསྒོམ་པ་དང༌། བཟླས་པ་བྱས་ནས་ལས་ཀྱི་སློབ་དཔོན་གྱིས་གཟིགས་ཤིག་ལ་སོག་པའི་བ་དན་དང༌། ལྕགས་ཀྱུས་འདྲེན་པར་བྱའོ། །དེ་ནས་ཚོགས་ལ་རོལ་ལོ། །དེའི་བར་དུ་གླེང་མོ་དང༌། འཐབ་རྩོད་དང༌། དྲི་བར་མི་བྱའོ། །འགྲོ་ན་ཕྱག་གསུམ་བཙལ་ལ་ཞུས་ལ་འགྲོའོ། །དེ་ནས་ལྷག་གཏོར་གཏང་ངོ༌། །ལག་པའི་མཆོད་པ་དཱ་ན་ཤཱི་ལས་བསྒྱུར་བ་རྫོགས་སོ།།

གཤིན་རྗེ་གཤེད་ནག་པོའི་དཀྱིལ་འཁོར་གྱི་བསྟོད་པ་ཞེས་བྱ་བ།
ཀཱིརྟི།


DTG047_Page_0211
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། ཀྲྀཥྞ་ཡ་མཱ་རི་མཎྜལ་སྟུ་ཏེ་ནཱ་མ། བོད་སྐད་དུ། གཤིན་རྗེ་གཤེད་ནག་པོའི་དཀྱིལ་འཁོར་གྱི་བསྟོད་པ་ཞེས་བྱ་བ། བཅོམ་ལྡན་འདས་གཤིན་རྗེའི་གཤེད་ནག་པོ་ལ་ཕྱག་འཚལ་ལོ། །ཙཱ་རྩི་ཀཱ་སོགས་བྱམས་སོགས་པས། །འཁོར་ལོའི་གཙོ་བོ་སྐུལ་བར་བྱེད། །རྡོ་རྗེ་གླུ་ཡི་ངོ་ཉིད་དུ། །ཕུན་ཚོགས་ཉམས་འབྲལ་མཐོང་ནས་ནི། །ཁུ་བའི་གཟུགས་ནི་ཡོངས་གྱུར་ནས། །མཾ་སྔོན་ཉི་མ་ལས་བྱུང་བ། །མི་བཟད་ཁྲོ་བཅས་མདོག་སྔོན་པོ། །རུས་པའི་རྒྱན་གྱིས་རྣམ་པར་བརྒྱན། །རྭ་རྣོ་འབར་ཞིང་སྤུ་རེ་སྐྱ། །རྨིག་པས་བརྐོ་ཞིང་འཇིགས་སྦྱིན་པས། །མ་ཧེ་ཡི་ནི་རྒྱབ་གནས་པ། །རྡོ་རྗེ་སྔོན་པོ་འོད་དང་བཅས། །ས་བོན་བཅས་པ་དང་ཉིད་ཀྱིས། །མ་ལུས་དུས་ནི་འཇིགས་བྱས་ནས། །བདག་ཉིད་ལ་ནི་ཡང་དག་བསྡུས། །འཇིགས་ཆེན་པོ་ཡང་འཇིགས་པར་བྱེད། །མ་ཧེ་རྡོ་རྗེའི་རྣལ་འབྱོར་ཏེ། །རྣམ་ཤེས་ཕུང་པོ་རྣམ་དག་ལས། །དཀྱིལ་འཁོར་གཙོ་བོ་གཤིན་རྗེ་གཤེད། །འཇིག་རྟེན་གསུམ་གྱི་བདུད་ཀྱི་འཁོར། །འོད་ཟེར་དྲག་པོ་སྤྲོས་པས་སྐྲོད། །དྲག་པོ་མུན་འདྲའི་གཟུགས་དྲག་པོ། །འགྲོ་བ་ཀུན་གྱི་ཉོན་མོངས་པའི། །དྲི་མ་བསྡུས་པས་ནག་པོ་ཉིད། །རྟག་པའི་འཁོར་བ་མྱ་ངན་འདས། །གཤིན་རྗེ་དེས་འདུལ་གཤིན་རྗེ་གཤེད། །ཞི་བས་མི་འདུལ་


DTG047_Page_0212
[མ་དཔེ་གཟིགས་ན་འདིར་གནོན།]

དེས་འདུལ་བས། །དེས་ན་ཁྲོ་བོ་ཆེན་པོའོ། །ལྕེ་འདྲིལ་བ་ལ་འོད་འབྱིན་པ། །མཆེ་བ་ཤིན་ཏུ་གཙིགས་པ་སྟེ། །སྨིན་མ་སྨ་ར་མགོ་སྐྱེས་སེར། །གཡོན་བརྐྱང་བ་ཡི་གནས་པ་ཡིས། །འཇིག་རྟེན་དྲན་པ་མེད་པར་བྱེད། །རྣམ་པར་ཐར་པའི་སྒོ་གསུམ་ཉིད། །རྣམ་པར་དག་པས་ཞལ་གསུམ་སྟེ། །རྩ་བའི་ཞལ་ནི་ནག་པོ་ཆེ། །གཡས་པ་ཟླ་བའི་འོད་དང་ལྡན། །གཡོན་པ་ཁྲག་དང་རབ་ཏུ་འདྲ། །རྡོ་རྗེ་རྒྱན་གྱི་རྣམ་པར་བརྒྱན། །ཐུང་ཞིང་གསུས་པ་འཕྱང་ལ་སྦོམ། །མགོ་བོའི་ཕྲེང་བས་རྣམ་པར་བརྒྱན། །ཕ་རོལ་ཕྱིན་དྲུག་ཡོངས་སུ་ནི། །རྫོགས་པར་བསྒོམས་པས་ཕྱག་དྲུག་སྟེ། །སེམས་ཅན་དག་ནི་ཐམས་ཅད་ཀྱི། །ཇི་སྙེད་སྡིག་པ་ཡི་ནི་ལས། །དེ་གཅོད་གྲི་གུག་གཡས་པས་བསྣམས། །བདེ་བ་སྐྱོང་བ་ཉིད་ཀྱི་ནི། །གཡོན་གྱི་ཕྱག་ན་ཐོད་པ་བསྣམས། །ཚོགས་གཉིས་རྫོགས་པ་ཉིད་ཀྱི་ནི། །ཉིད་མཚུངས་ཤེས་རབ་ཀྱིས་འཁྱུད་ཅིང༌། །བདེ་བར་འཁྱུད་ཅིང་གཞན་དོན་འདོད་ལྷན་ཅིག་སྐྱེས་པའི་ངོ་བོ་ཉིད། །གཡས་པའི་ཕྱག་གི་ལྷག་མ་ལ། །རྡོ་རྗེས་སེར་སྣ་ལ་སོགས་འཇོམས། །ཉོན་མོངས་དགྲ་རྣམས་རྣམ་འཇོམས་པས། །རལ་གྲི་འབར་བ་བསྣམས་པ་སྟེ། །གཡོན་པའི་ཕྱག་གི་ལྷག་མ་ལ། །གཏུབ་ཅིང་སྦྱོང་བའི་འཁོར་ལོ་དང༌། །སྐྱོན་གྱིས་མ་གོས་ཆུ་སྐྱེས་བསྡམས། །ཞེ་སྡང་ཉོན་མོངས་འཇོམས་མཛད་པས། །སྤྲུལ་གྱི་དབང་པོས་རྒྱན་དུ་བྱས། །ཀླུ་རྒྱལ་སྔོན་པོ་དགའ་བོ་ཡིས། །སྐྲ་བཅིངས་ཤིན་ཏུ་འཇིགས་པར་བྱེད། །ཏཀྵ་ཀ་ཀླུ་དམར་པོ་ཡིས། །རྣ་ཆ་གདུབ་སྐོར་བྱས་པས་འཇིགས། །རིགས་ལྡན་ཁྲ་བོས་དཔུང་རྒྱན་ཏེ། །དུང་སྐྱོང་ཞེས་པའི་ཀླུ་དེ་ནི། །སེར་པོ་ལག་པའི་གདུ་བུར་བྱས། །པདྨ་དཀར་པོས་དོ་ཤལ་བྱས། །ཀརྐོ་ཊ་ནི་ལྗང་གུ་སྟེ། །སེ་རལ་ཁ་རུ་བྱས་པས་མཛེས། །བདུད་རྩི་མདོག་དང་འདྲ་བའི་ཀླུ། །ནོར་རྒྱས་བུས་ནི་སྐ་རགས་བྱས། །པདྨ་ཟླ་བ་ལྟར་དཀར་མདོག །པདྨ་ཆེན་པོ་རྐང་གདུབ་ཡིན། །ཀུན་ཀྱང་ཕུཊ་སྒྲ་དྲག་པོ་སྒྲོགས། །ལྕེ་གཉིས་མཆེ་བའི་ཕྲེང་བ་ཅན། །ཆོས་སྐུའི་རང་བཞིན་ཉིད་ཕྱིར་དུ། །ལོངས་སྤྱོད་རྫོགས་དང་སྤྲུལ་པ་ཡིས། །གཟུགས་སུ་མཛད་པའི་རང་བཞིན་ཏེ། །ཆོས་དབྱིངས་ཡེ་ཤེས་རང་བཞིན་གྱིས། །ཞེ་སྡང་འཇོམས་མཛད་ཕྱག་འཚལ་བསྟོད། །ཤར་དུ་ཀྵེ་དང་


DTG047_Page_0213
[མ་དཔེ་གཟིགས་ན་འདིར་གནོན།]

འཁོར་ལོ་ལས། །གཟུགས་ཀྱི་ཕུང་པོ་རྣམ་དག་པས། །རྟག་པ་ཕྱག་དྲུག་དཀར་པོ་སྟེ། །རྩ་བའི་ཞལ་ནི་དཀར་པོ་ལ། །གཡས་པ་གནག་ཅིང་གཡོན་པ་དམར། །གཡས་པ་འཁོར་ལོ་རལ་གྲི་ཕྱག །གཡོན་པ་རིན་ཆེན་ཆུ་སྐྱེས་འཛིན། །ཟླ་བའི་དཀྱིལ་འཁོར་མཉམ་པར་གནོན། །མེ་ལོང་ལྟ་བུའི་ཡེ་ཤེས་ཀྱིས། །གཏི་མུག་འཇོམས་མཛད་ཕྱག་འཚལ་བསྟོད། །ལྷོ་རུ་མ་དང་རིན་ཆེན་ལས། །ཚོར་བའི་ཕུང་པོ་རྣམ་དག་པས། །བྱུང་བ་ཕྲ་མ་གཤིན་རྗེ་གཤེད། །བཙོ་མ་གསེར་གྱི་མདོག་འདྲ་མ། །རྩ་བའི་ཞལ་ནི་སེར་པོ་སྟེ། །གཡས་པ་གནག་ཅིང་གཡོན་པ་དཀར། །གཡས་ན་རིན་ཆེན་རལ་གྲི་བསྣམས། །གཡོན་ན་འཁོར་ལོ་ཆུ་སྐྱེས་ཉིད། །མཉམ་པ་ཉིད་ཀྱི་ཡེ་ཤེས་ཀྱིས། །ཕྲ་མ་འཇོམས་མཛད་ཕྱག་འཚལ་བསྟོད། །མེ་དང་པདྨ་ལས་བྱུང་བ། །ནུབ་ཏུ་འདོད་ཆགས་རྡོ་རྗེ་ཅན། །འདུ་ཤེས་ཕུང་པོ་རྣམ་དག་ཉིད། །པདྨ་རཱ་ག་འདྲ་བའི་འོད། །རྩ་བའི་ཞལ་ནི་དམར་ལ་གདངས། །གཡས་པ་གནག་ཅིང་གཡོན་པ་དཀར། །གཡས་ན་པདྨ་རལ་གྲི་བསྣམས། །ཕྱག་གཡོན་རིན་ཆེན་འཁོར་ལོ་སྟེ། །སོ་སོར་རྟོག་པའི་ཡེ་ཤེས་ཀྱིས། །འདོད་ཆགས་འཇོམས་མཛད་ཕྱག་འཚལ་བསྟོད། །ད་དང་རལ་གྲི་ལས་བྱུང་བ། །འདུ་བྱེད་ཕུང་པོ་རྣམ་དག་པས། །བྱང་དུ་ཕྲག་དོག་གཤིན་རྗེ་གཤེད། །མརྒད་ཨུཏྤལ་ལྟ་བུའི་འོད། །རྩ་བའི་ཞལ་ནི་ལྗང་གུ་སྟེ། །གཡས་པ་གནག་ཅིང་གཡོན་པ་དཀར། །གཡས་ན་རལ་གྲི་འཁོར་ལོ་བསྣམས། །མཛེས་པའི་ནོར་བུ་པདྨ་ལས། །བྱ་བ་ནན་ཏན་ཡེ་ཤེས་ཀྱིས། །ཕྲག་དོག་འཇོམས་མཛད་ཕྱག་འཚལ་བསྟོད། །ཁྲོ་བོའི་གཟུགས་ཅན་ཐམས་ཅད་ཀྱང༌། །ཞེ་སྡང་གཤིན་རྗེའི་མཚན་ཉིད་མཚུངས། །དེ་དག་པ་ཡི་ཕྱག་གཉིས་ལ། །གྲི་གུག་དང་ནི་ཐོད་པ་བསྣམས། །རང་གི་ཤེས་རབ་ལུས་དག་དང༌། །བདེ་བའི་དངོས་པོ་གཉིས་མེད་རོལ། །ཉི་མའི་དཀྱིལ་འཁོར་མཉམ་པར་གནོན། །རྡོ་རྗེ་རྩིབས་ཀྱི་རྩར་བཞུགས་ཤིང༌། །མྱ་ངན་འདས་པའི་མཐའ་འཇོམས་ཤིང༌། །སེམས་ཅན་དོན་མཛད་ཕྱག་འཚལ་བསྟོད། །ཤར་སྒོར་ཡ་དང་ཐོ་བ་ལས། །བྱུང་བ་སྔོན་པོའི་གཟུགས་ཅན་ཏེ། །འཇིག་ཚོགས་ལྟ་བ་རྣམ་དག་ཉིད། །གཡས་དཀར་གཡོན་དམར་དབུས་


DTG047_Page_0214
[མ་དཔེ་གཟིགས་ན་འདིར་གནོན།]

སྔོན་ཞལ། །གཡས་ན་ཐོ་བ་རལ་གྲི་འཛིན། །ནོར་བུ་མཆོག་དང་པདྨ་གཡོན། །ཐོ་བ་ཞེ་སྡང་གཤིན་རྗེ་གཤེད། །བརྩོན་འགྲུས་སྟོབས་ཀྱི་རང་བཞིན་གྱིས། །ཕུང་པོའི་བདུད་འཇོམས་ཕྱག་འཚལ་བསྟོད། །ཙ་དང་དབྱུག་པ་ལས་བྱུང་ལྷོར། །དབྱུག་པ་གཤིན་རྗེ་གཤེད་མདོག་དཀར། །མཐར་འཛིན་ལྟ་བ་རྣམ་དག་ཉིད། །གཡས་སྔོ་གཡོན་དམར་དབུས་དཀར་ཞལ། །གཡས་ན་དབྱུག་པ་རལ་གྲི་བསྣམས། །ཆུ་སྐྱེས་འཁོར་ལོ་གཡོན་གྱི་ཕྱག །དབང་པོའི་སྟོབས་ཀྱི་རང་བཞིན་གྱིས། །ཉོན་མོངས་བདུད་འཇོམས་ཕྱག་འཚལ་བསྟོད། །ནི་དང་པདྨ་ལས་བྱུང་ནུབ། །པདྨ་གཤིན་རྗེ་གཤེད་ཉིད་ནི། །ལོག་པར་ལྟ་བ་རྣམ་དག་ཉིད། །གཡས་གནག་གཡོ་དཀར་དབུས་ཞལ་དམར། །གཡས་ན་པདྨ་རལ་གྲི་བསྣམས། །ཕྱག་གཡོན་རིན་ཆེན་འཁོར་ལོ་སྟེ། །དྲན་པའི་སྟོབས་ཀྱི་རང་བཞིན་གྱིས། །འཆི་བདག་བདུད་འཇོམས་ཕྱག་འཚལ་བསྟོད། །ར་དང་རལ་གྲི་ལས་བྱུང་བ། །བྱང་དུ་རལ་གྲི་གཤིན་རྗེ་གཤེད། །ལྟ་བ་མཆོག་འཛིན་རྣམ་དག་ཉིད། །གཡས་གནག་གཡོན་དཀར་དབུས་ལྗང་ཞལ། །གཡས་ན་རལ་གྲི་འཁོར་ལོ་བསྣམས། །མཛེས་པའི་ནོར་བུ་པདྨ་གཡོན། །ཏིང་འཛིན་སྟོབས་ཀྱི་རང་བཞིན་གྱིས། །ལྷ་ཡི་བདུད་འཇོམས་ཕྱག་འཚལ་བསྟོད། །ཀུན་ཀྱང་སྤྲུལ་གྱིས་རྣམ་པར་བརྒྱན། །རྣམ་འཇིགས་དགོད་པས་འཇིགས་བྱེད་པ། །སྐྲ་ནི་འབར་བ་གྱེན་དུ་འགྲེང༌། །བསྐལ་བའི་མེ་ལྟར་འབར་ཞིང་འཕྲོ། །ཉི་མའི་དཀྱིལ་འཁོར་ལ་གནས་པ། །མཆེ་བ་གཙིགས་ཤིང་འཇིགས་པའི་ཞལ། །གྲི་གུག་ཐོད་པ་འཛིན་པར་མཛད། །འཁོར་བ་བརྟགས་པའི་མཐའ་འཇོམས་ཤིང༌། །མི་གནས་སྒྲོལ་མཛད་ཕྱག་འཚལ་བསྟོད། །སྣ་ཚོགས་རྡོ་རྗེའི་མཚམས་བཞི་རུ། །ལྷ་མོ་ཟླ་བའི་གདན་ལ་བཞུགས། །ཤར་ལྷོར་ཛ་དང་འཁོར་ལོ་ལས། །ལྷ་མོ་རྡོ་རྗེ་ཙཱ་རྩི་ཀླ། །ས་ཁམས་རྣམ་དག་ཐབས་ཀྱི་བདག །སྒེག་མོ་དཀར་མོ་ཆེར་ཁྲོ་མ། །གཏི་མུག་གཤིན་རྗེ་གཤེད་དང་མཚུངས། །བྱམས་པ་ཆེན་པོའི་ངོ་བོ་ཡིས། །ཉོན་མོངས་སྒྲིབ་འཇོམས་ཕྱག་འཚལ་བསྟོད། །དེ་བཞིན་ལྷོ་རུས་དང་ནི། །རྡོ་རྗེ་ལས་བྱུང་རྡོ་རྗེ་ཕག །ཆུ་ཁམས་རྣམ་དག་སྟོབས་ཀྱི་བདག །ཁྲོ་ཞིང་ཕག་གི་གདོང་པ་ཅན། །ཞེ་སྡང་


DTG047_Page_0215
[མ་དཔེ་གཟིགས་ན་འདིར་གནོན།]

གཤིན་རྗེ་གཤེད་དང་མཚུངས། །སྙིང་རྗེ་ཆེན་པོའི་ངོ་བོ་ཡིས། །ལས་ཀྱི་སྒྲིབ་འཇོམས་ཕྱག་འཚལ་བསྟོད། །ནུབ་དང་བྱང་གི་མཚམས་སུ་ནི། །དོ་སྐྱེས་གཙོ་མོ་རབ་ཏུ་དམར། །མེ་ཁམས་རྣམ་དག་སྨོན་ལམ་བདག །རབ་ཏུ་ཞི་བའི་དབྱངས་ཅན་མ། །འདོད་ཆགས་གཤིན་རྗེ་གཤེད་དང་མཚུངས། །དགའ་བ་ཆེན་པོའི་ངོ་བོ་ཡིས། །ཤེས་བྱའི་སྒྲིབ་འཇོམས་ཕྱག་འཚལ་བསྟོད། །བྱང་དང་ཤར་གྱི་མཚམས་སུ་ནི། །རུ་སྐྱེས་གཽ་རཱི་ལྗང་གུ་མ། །རླུང་ཁམས་རྣམ་དག་ཡེ་ཤེས་བདག །འཇིགས་བྱེད་ཕྲག་དོག་གཤིན་རྗེ་གཤེད། །གཟུགས་དང་མཚན་མ་མཆོག་ཏུ་འཛིན། །བཏང་སྙོམས་ཆེན་པོའི་ངོ་བོ་ཡིས། །སྐྱེ་བའི་སྒྲིབ་འཇོམས་ཕྱག་འཚལ་བསྟོད། །མཐའ་གཉིས་རབ་ཏུ་སྒྲོལ་མཛད་དེ། །རང་རིག་གཙོ་ལ་ཕན་འདོགས་ཤིང༌། །ཐབས་དང་ཤེས་རབ་དབྱེར་མེད་བདག །ལྷ་མོའི་ཚོགས་ལ་ཕྱག་འཚལ་བསྟོད། །མཚམས་བཞིར་ཎ་ཡོ་ནི་ར་ལས། །ཕྱི་རོལ་གཟུགས་རྫོགས་རྣམ་དག་ལས། །དཀྱིལ་འཁོར་དུ་ནི་ཐོད་པ་གནས། །ཆོས་དབྱིངས་ཀུན་དུ་འགྲོ་བའི་ཕྱིར། །བདུད་རྩི་རྣམ་པ་ལྔ་ཡིས་བཀང༌། །དེ་ལྟར་མི་མཐུན་ཚོགས་བཅོམ་ནས། །རབ་ཏུ་རྒྱལ་བའི་རྟགས་མཚན་ཉིད། །ཐོད་པ་བཞི་ཡི་ངོ་བོ་སྟེ། །བདེ་བ་ཆེན་པོ་ཕྱག་འཚལ་བསྟོད། །བསོད་ནམས་ཡེ་ཤེས་ཆེན་པོ་ལས་བྱུང་སྐུ་གསུང་ཡེ་ཤེས་ལྔར་ལྡན་འཇིགས་གཟུགས་ལ། །བདག་ཉིད་དད་པའི་མཐུ་ཡིས་སྐུ་ཡི་ཡོན་ཏན་ཙམ་མཐོང་དད་པའི་དབྱངས་ཀྱིས་བསྟོད་པ་ཡིས། །ཁམས་གསུམ་འཁོར་བའི་རྒྱ་མཚོར་དོང་རྣམས་རྣམ་རྟོག་རླུང་གིས་ཕྱོགས་བཅུར་གཡེངས་པས་སྡུག་བསྔལ་རྣམས། །སྐྱེ་རྒས་ན་འཆི་སྤངས་ནས་འཁོར་བའི་རྒྱ་མཚོ་ལས་རྒལ་བླ་མེད་བྱང་ཆུབ་ཐོབ་པར་ཤོག །སློབ་དཔོན་དཔལ་འཛིན་གྱི་དགོངས་པ་ཉེ་བར་བསྡུས་པ་ལས། །གཤིན་རྗེ་གཤེད་ནག་པོའི་དཀྱིལ་འཁོར་གྱི་བསྟོད་པ། ཨཱ་ཙཱཪྻ་ཀཱི་རྟིའི་ཞལ་སྔ་ནས་མཛད་པ་རྫོགས་སོ།།

རྡོ་རྗེ་འཛིན་པས་གཤིན་རྗེ་གཤེད་པོ་ལ་བསྟོད་པའི་རྒྱུད།


DTG047_Page_0215
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། །ཡ་མཱ་རི་ཏུ་ནོ་ཏནྟ་བཛྲ་དྷྲྀཀ །བོད་སྐད་དུ། རྡོ་རྗེ་འཛིན་པས་གཤིན་རྗེ་གཤེད་པོ་ལ་བསྟོད་པའི་རྒྱུད། བྱང་ཆུབ་སེམས་དཔའ་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །དེ་ནས་འོག་མིན་གྱི་གནས་བཙུན་མོའི་བྷ་ག་


DTG047_Page_0216
[མ་དཔེ་གཟིགས་ན་འདིར་གནོན།]

ལ། །ཁྲོ་བོའི་རྒྱལ་པོ་གཤིན་རྗེ་གཤེད་རང་གི་ཆེ་བ་བསྟོད་ཅིང་བཞུགས་སོ། །དེའི་ཚེ་རྡོ་རྗེ་འཛིན་པས་བཙུན་མོའི་བྷ་ག་རྒྱས་པར་བྱས་ཏེ། གཤིན་རྗེ་གཤེད་པོ་ལ་བསྟོད་པ། །ཧཱུཾ་ཁྲོ་བོའི་རྒྱལ་པོ་ཞེ་སྡང་གཤིན་རྗེ་གཤེད། །རང་བཞིན་སྤྲོས་བྲལ་ཆོས་ཀྱི་དབྱིངས་ལ་གནས། །མཚན་མའི་རྟོག་མེད་རང་བཞིན་ལྷུན་གྱིས་གྲུབ། །འཆི་བདག་སྡང་འཇོམས་ཡེ་ཤེས་གཉིས་མེད་སྐུ། །དྲི་མེད་རྣམ་དག་ཐུགས་རྗེ་ཤུགས་ལས་སྐྱེས། །འབར་བའི་སྐུ་མཆོག་བཅོམ་ལྡན་གཤིན་རྗེ་གཤེད། །ལོངས་སྤྱོད་བདེ་བ་ཆེན་པོ་གཉིས་མེད་འཁྲིལ། །ཁ་སྦྱོར་འདོད་ཆགས་སྐྱོན་གྱིས་མ་གོས་ཤིང༌། །ཐུགས་རྗེའི་ཐབས་ཀྱིས་འགྲོ་བ་འདུལ་མཛད་པ། །དྲག་པོ་འདུལ་ཕྱིར་མི་བཟད་དྲག་པོའི་གཟུགས། །ཁྲོ་བོའི་རྒྱལ་པོ་གཞན་གྱིས་ཁྱོད་མཐོང་ནས། །ངོ་མཚར་རབ་ཏུ་འཇིགས་ཤིང་འབྲོས་པར་འགྱུར། །ཁྱོད་ཀྱི་ཐུགས་ནི་ཞེ་སྡང་འཆི་བདག་འཇོམས། །ཉོན་མོངས་བདུད་མཛད་འགྲོ་བའི་མགོན་པོ་ཁྱོད། །མ་གཡོས་མི་རྟོག་ཆོས་ཀྱི་སྐུ་ལ་གནས། །རྣམ་རྟོག་དྲ་བ་གཅོད་མཛད་གཤིན་རྗེ་གཤེད། །ཞེ་སྡང་ཐུགས་ཀྱི་རིགས་ལ་ཕྱག་འཚལ་ལོ། སྤྲོས་མེད་ཆོས་ཀྱི་དབྱིངས་ལས་མ་གཡོས་ཀྱང༌། །ཞེ་སྡང་དྲག་པོས་གདུལ་ཕྱིར་འབར་བའི་སྐུ། །འཆི་བདག་གཤིན་རྗེ་ཕོ་མོ་གདན་དུ་བཏང༌། །མ་ཧེའི་ཐོག་ན་ཞབས་གཉིས་བརྐྱང་བསྐུམ་བཞུགས། །སྟོབས་ལྡན་མ་ཧེ་དྲག་བརྒྱུག་ལྕགས་རྨིག་ཅན། །ཨོག་ཡུ་འབར་ཞིང་རྭ་རྣོ་ཉི་མའི་གདན། །ཁྱོད་ཀྱི་སྐུ་ནི་ཆར་སྤྲིན་ལྟ་བུ་སྟེ། །ཞལ་གསུམ་པ་ལ་ཕྱག་དྲུག་རྣམ་པར་མཛེས། །མགོ་སྐྱེས་ཁམ་པ་སྨ་ར་གྱེན་དུ་འགྲེང༌། །རིགས་བཞིའི་ཀླུ་དང་ཕྱག་རྒྱ་ལྔ་ཡིས་ནི། །ཁྱོད་ཀྱི་དབུ་ནི་མཛེས་པར་བརྒྱན་པ་ཡིན། །སྨིན་མཚམས་པར་ནི་མཐོང་ནས་ངེས་པར་འཇིགས། །མེ་མདག་ལྟ་བུའི་སྤྱན་དགུ་གྱེན་དུ་བཟློག །གྱེན་འབུད་ཤངས་ནས་ཞེ་སྡང་གདུག་པའི་སྤྲུལ། །ཁྲག་གིས་བརླན་པའི་ཞལ་ནི་ཤིན་ཏུ་བགྲད། །མཆེ་བ་ཟླ་ཚེས་ཟང་ཡག་འབར་བ་གཙིགས། །རྔམ་པའི་ཧཱུཾ་སྒྲོགས་ལྗགས་ནི་གྱེན་དུ་འདྲིལ། །ཤ་ཟའི་མགོ་བཅད་ལུས་ཀྱི་རྒྱན་དུ་ཐོགས། །ང་རྒྱལ་ཀུན་འཕྲོག་མི་ཐུང་འཇིགས་པའི་གཟུགས། །བདུད་བཞི་འཇོམས་མཛད་


DTG047_Page_0217
[མ་དཔེ་གཟིགས་ན་འདིར་གནོན།]

འཁོར་ལོ་འབར་བ་སྟ། །ཤེས་རབ་གཉིས་མེད་རལ་གྲི་ཐབས་ཀྱིས་གདེངས། །ལས་ཀྱི་དབྱུག་པ་དག་གིས་འཆི་བདག་འཇོམས། །ཉོན་མོངས་བསྲེག་མཁས་ཕྱག་གིས་འཁོར་བ་བསྡིགས། །ཉོན་མོངས་གཅོད་མཛད་ཤེས་རབ་དགྲ་སྟ་གདེངས། །ལོག་པར་ལྟ་བ་བདེ་བ་ཆེན་པོར་འཆིང༌། །རིགས་དང་ཤེས་རབ་ཕ་རོལ་ཕྱིན་པར་ལྡན། །གསུས་པ་ཆེ་ལ་ཐུར་དུ་བཤལ་བ་དང༌། །མཚམས་ཐུང་རྔམ་ཆེན་ཁྱོད་ནི་མཐོང་བས་འཇིགས། །གཅན་གཟན་རྒན་པོ་སྟག་གི་ན་བཟས་བརྒྱན། །ཡན་ལག་ལྔ་ནི་ཀླུ་ལྔས་ལེགས་པར་དཀྲིས། །ཟག་པ་མེད་པའི་བདེ་བས་ཀུན་ལ་ཁྱབ། །བསྐལ་བ་འཇིགས་པའི་མེ་ཡི་ནང་ན་བཞུགས། །རབ་ཏུ་མཛེས་པའི་སྐུ་འབར་འོད་ཚོགས་ཅན། །ཐབས་དང་ཤེས་རབ་བདེ་བས་གཉིས་མེད་འཁྲིལ། །རབ་བརྗིད་གཤིན་རྗེ་གཤེད་པོའི་སྐུ་མཐོང་ན། །ཁྲོ་བོའི་རྒྱལ་པོ་གཞན་གྱི་ལག་ཅ་འཆོར། །དུས་གསུམ་སངས་རྒྱས་རྣམས་ཀྱང་ཁྱོད་ལ་བསྟོད། །རྔམ་པའི་འཁོར་ཚོགས་རབ་ཏུ་འཇིགས་མཛད་པ། །འཇམ་དཔལ་གཤིན་རྗེའི་སྐུ་ལ་ཕྱག་འཚལ་བསྟོད། །འཁོར་ལོ་བཞི་ཡི་བདེ་བ་ཁྱོད་ལ་གནས། །དྲི་མེད་རྣམ་དག་གསུང་ནི་ཡང་དག་སྒྲོགས། །ཧྲཱིཿ་ཥྚྲྀ། སྔགས་ཀྱིས་སྲིད་གསུམ་གདུག་པ་འདུལ། །རྡོ་རྗེ་ཕག་མོ་རབ་ཏུ་དགྱེས་མཛད་མ། །ཧ་ཧ་བཞད་པའི་དྲེགས་པས་དགྱེས་མཛད་ཅིང༌། །གདུག་པ་ཟ་བྱེད་རྒྱལ་བའི་གསུང་མཆོག་ལ། །ཕྱོགས་བཅུའི་རྒྱལ་བ་རྣམས་ཀྱིས་མགྲིན་གཅིག་བསྟོད། །རྒྱལ་བ་གསུང་བ་འཁོར་ལོ་རྣམ་པར་དག །མགོན་པོ་གཤིན་རྗེ་གཤེད་ལ་ཕྱག་འཚལ་བསྟོད། །ནམ་མཁའི་མཐའ་དང་མཉམ་པའི་འགྲོ་དོན་མཛད། །ཕྲིན་ལས་ཐོགས་པ་མེད་པ་ཕྱོགས་བཅུར་ཁྱབ། །ལས་ཀྱི་འཁྲུལ་འཁོར་ཁྱོད་ཀྱིས་གཅོད་མཛད་ཅིང༌། །ཕྲིན་ལས་བཞི་ཡི་འཁོར་ལོ་རྫོགས་མཛད་པ། །ཁྲོ་བོའི་རྒྱལ་པོ་ཞེ་སྡང་གཤིན་རྗེ་གཤེད། །སྐུ་གསུང་རྫོགས་མཛད་འཇམ་དཔལ་གཤིན་རྗེ་གཤེད། །གདུག་པ་ཟ་བྱེད་འཇམ་དཔལ་གཤིན་རྗེའི་སྐུ། །ཕྲིན་ལས་མཐར་ཕྱིན་ཁྱོད་ལ་ཕྱག་འཚལ་བསྟོད། །གང་ཞིག་དུས་གསུམ་དག་ཏུ་འདི་དག་གིས། །རྟོག་མེད་གུས་པ་སེམས་ཀྱིས་གང་བསྟོད་པ། །དེ་ནི་རྒྱལ་བ་ཐམས་ཅད་བསྟོད་པས་


DTG047_Page_0218
[མ་དཔེ་གཟིགས་ན་འདིར་གནོན།]

ན། །ཚེ་གཅིག་གིས་ནི་གཤིན་རྗེ་གཤེད་འདྲར་འགྱུར། །རྡོ་རྗེ་འཛིན་པས་གཤིན་རྗེ་གཤེད་པོ་ལ་བསྟོད་པ་ལེའུའི་རྒྱུད་ལས་བསྟོད་པའི་ལེའུའོ། །རྫོགས་སོ།།

དཔལ་རྡོ་རྗེ་འཇིགས་བྱེད་ཀྱི་རྒྱུད་ཀྱི་དཀའ་འགྲེལ།
མི་བསྐྱོད་པ།

ཡན་ལག་དང་པོ། ལེའུའི་གྲངས་ཀྱི་གོ་རིམས་མངོན་པར་བརྗོད་པ།


DTG047_Page_0218
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། ཤྲཱི་བཛྲ་བྷ་ར་བ་ཏནྟྲ་ཊཱི་ཀཱ། བོད་སྐད་དུ། དཔལ་རྡོ་རྗེ་འཇིགས་བྱེད་ཀྱི་རྒྱུད་ཀྱི་དཀའ་འགྲེལ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །བླ་མའི་ཞབས་ལ་དད་པས་བཏུད་ནས་ནི། །དཔལ་ལྡན་གཤིན་རྗེ་གཤེད་ཀྱི་རྟོག་པ་འདིར། །མན་ངག་གང་ཡོད་བདག་ཉིད་དྲན་ཕྱིར་ནི། །དཀའ་བའི་གནས་ཙམ་བདག་གིས་བྲི་བར་བྱ། །བླ་མ་མཆོག་རྣམས་ལེགས་པར་ཡུན་རིངས་དུས་སུ་དཀའ་བས་མཉེས་བྱེད་མི་ནུས་པ། །དབུལ་པོས་གཏེར་ཆེན་ངོ་ཤེས་བརྐོ་བའི་བྱ་བས་ངལ་ཏེ་ཡོངས་སུ་དོར་བ་བཞིན། །དེ་ལྟར་དབུལ་པོ་འདྲ་བའི་བློ་ངན་རང་ལ་འཚེ་བ་དེ་ལ་ལུང་གི་ཚོགས། །ལེགས་བསྲུབས་ལས་བྱུང་མར་གྱི་སྙིང་ཁུ་ལྟ་བུ་སླར་ཡང་བླུད་མི་བྱ། །ཇི་ལྟར་ཞག་གི་རིམ་པས་ཟླ་བའི་ཆ་ཤས་འཕེལ་ཞིང་བཅོ་ལྔར་མཐར་ཐུག་པ། །བཅུ་དྲུག་ནས་བརྩམས་འདྲི་ཞིང་འཕེལ་མེད་མཁས་པའི་འགྲོ་བའི་ཤེས་པ་མངོན་སུམ་ལྟར། །ཡུན་རིངས་བསྙེན་བཀུར་དུས་སུ་དེ་ཡི་སྣོད་ནི་རིམ་གྱིས་བླ་མས་སྦྱར་བྱས་ཏེ། །དང་བརྟན་བསྙེན་བཀུར་བྱས་ལ་བླ་མ་དུས་སུ་བྱིན་གྱིས་མ་བརླབས་དེ་ཉམས་འགྱུར། །དེ་ཕྱིར་སློབ་མ་བློ་གྲོས་དམན་པ་གུས་པར་གནས་ལ་བདག་གིས་ཡིད་དགའ་བས། རྟོག་པ་འདི་ལས་ཅུང་ཟད་སྙིང་པོ་སྦྱིན་ཕྱིར་རབ་ཏུ་བསྡུས་པའི་གཞུང་འདི་དགོད། །དེ་ནས་ཞེས་བྱ་བ་ལ་སོགས་པའི་གཞུང་ལེའུ་བདུན་དུ་བྱས་པའི་རྟོག་པ་འདི་ནི། ལེའུའི་གྲངས་ཀྱི་གོ་རིམས་དང༌། །བསྡུས་པའི་དོན་དང༌། མན་ངག་གི་གནས་བཤད་པ་སྟེ། ཡན་ལག་གསུམ་གྱིས་འཆད་དོ། །དེ་ཡང་འདི་ལྟར་བསྙེན་པ་དང༌། །སྒྲུབ་པ་དང༌། ལས་རབ་འབྱམ་དག་ནི་དབང་བསྐུར་བའི་སྔགས་པས་བྱ་བ་ཡིན་ལ། ལས་དང་པོ་པའི་སྔགས་པས་ནི་ཕལ་ཆེར་རྡུལ་ཚོན་གྱི་དཀྱིལ་འཁོར་དུ་དབང་བསྐུར་བར་རིགས་པས། དང་པོ་ཚིག་ཟུར་གྱིས་དབང་བསྟན་པ་དཀྱིལ་འཁོར་གྱི་ལེའུ་གསུངས་སོ། །དབང་བསྐུར་བའི་སྔགས་པས་ནི་བསྒོམས་པའམ་བཟླས་པས་བསྙེན་པ་བྱེད་པས་ན་དེ་ནས་ནི་ལེའུ་བཞི་པ་གསུངས་པ་དྲང་ངོ༌། །


DTG047_Page_0219
[མ་དཔེ་གཟིགས་ན་འདིར་གནོན།]

བསྒོམ་པ་ཡང་རི་མོའི་དམིགས་པ་ལ་བརྟེན་པར་རིགས་པས་ན་དེ་ནས་ལེའུ་ལྔ་པ་གསུངས་ཏེ། དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོ་རྡོ་རྗེ་དེ་བཞིན་གཤེགས་པ་ཡེ་ཤེས་ཆེན་པོའི་སྟོབས་ཀྱིས་རྣམ་པར་འཕྲུལ་བའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ཕྱག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །ཕྱག་ན་རྡོ་རྗེ་རས་སམ་རྩིག་པ་ལ་སོགས་པ་ལ་གཟུགས་བརྙན་བསྒྲུབས་པ་གང་གིས་གསང་སྔགས་འཆང་རྣམས་ཀྱི་ཡེ་ཤེས་རྫོགས་པར་འགྱུར་ཞིང༌། ཡེ་ཤེས་རྫོགས་པས་སངས་རྒྱས་ཉིད་བདེ་བླག་ཏུ་ཐོབ་པར་འགྱུར་ན། དངོས་གྲུབ་གཞན་ལྟ་སྨོས་ཀྱང་ཅི་དགོས་པའི་གསང་སྔགས་ཀྱི་ཚོགས་རྣམས་ཀྱི་ཏིང་ངེ་འཛིན་གསང་ཆེན་བཤད་བར་བྱ་ཡིས་ཉོན་ཅིག་ཅེས་གསུངས་པ་ལྟ་བུའོ། །དེ་ལྟར་རི་མོ་ལ་བརྟེན་ནས་དམིགས་པ་ཐོབ་པ་དེ་ནི་ཏིང་ངེ་འཛིན་གྱི་ལས་རྣམས་བྱེད་ནུས་པར་འགྱུར་བས། །བསམ་གཏན་ལ་བརྟེན་པའི་ལས་ཀྱི་སྦྱོར་བའི་ལེའུ་བདུན་པ་གསུངས་སོ། །གལ་ཏེ་བཟླས་བརྗོད་ཀྱི་བསྙེན་པ་བྱས་ཀྱང༌། ཏིང་ངེ་འཛིན་མ་ཐོབ་པ་སྲིད་པས་དེ་དག་གི་ཆེད་དུ་ནི་བཟླས་བརྗོད་ལས་བྱུང་བའི་སྦྱིན་སྲེག་གི་བྱ་བ་བསྟན་ཏོ། །གལ་ཏེ་སྦྱིན་སྲེག་གི་ལས་ལ་ཡིད་མི་དགའ་བའམ། །ཚོགས་པ་མི་རྙེད་པ་དག་གི་ཕྱིར་ལེའུ་གཉིས་པ་འཁྲུལ་འཁོར་གྱི་བྱ་བ་བསྟན་ཏོ། །གལ་ཏེ་བསྟེན་པ་བྱས་པའི་སྔགས་པས་ལས་ཕྲན་ཚེགས་དེ་དག་ལ་མི་མོས་ཀྱི། མཆོག་གྲུབ་པར་འདོད་པ་དེ་དག་ལ་ནི་ཡང་ལེའུ་དང་པོའི་མཆོག་བསྒྲུབ་པ་བསྟན་ཏོ། །དེ་ལྟར་བསྙེན་པ་དང༌། སྒྲུབ་པ་དང༌། ལས་རབ་འབྱམ་ཐམས་ཅད་དུ་དགོས་པ་ནི་སྔགས་ཡིན་ལ། སྔགས་དེ་ཡང༌། མ་དག་པས་ནི་དངོས་གྲུབ་མི་བྱེད་དེ། །ཆོ་ག་ཉམས་ཤིང་ཡི་གེ་གུག་སྐྱེད་ཉམས། །མཆོད་པ་མེད་ཅིང་མི་གཙང་བཟླས་བརྗོད་བྱས། །གུག་སྐྱེད་ཡི་གེ་ལྷག་པར་གྱུར་པ་ཡི། །གསང་སྔགས་དངོས་གྲུབ་རྒྱ་ཆེན་མི་སྟེར་རོ། །ཞེས་གསུངས་ཏེ། །དེ་བས་ན་སྔགས་དག་པར་བྱེད་པའི་ཡི་གེ་བཏུ་བའི་ལེའུ་གསུམ་པ་གསུངས་ཏེ། འདི་ནི་ལེའུ་གྲངས་བདུན་གྱི་གོ་རིམ་ས་དང་མཚམས་སྦྱར་བ་མན་ངག་གིས་གསུངས་པའོ། །གཞན་ཡང་སྒྲུབ་པ་པོ་མཆོག་གི་ཕྱིར་ནི་དངོས་གྲུབ་དམ་པ་སྒྲུབ་པའི་ལེའུ་དང་པོ་གསུངས་སོ། །དེས་


DTG047_Page_0220
[མ་དཔེ་གཟིགས་ན་འདིར་གནོན།]

དངོས་གྲུབ་མཆོག་གྲུབ་ན་ལས་ཕྲ་མོ་ལ་འཇུག་སྟེ། འདི་ཉིད་ལས་གལ་ཏེ་སྔགས་པས་གྲུབ་པར་མ་གྱུར་ན་ཡང་ལས་ཕྲ་མོ་ཐམས་ཅད་ངེས་པར་འགྲུབ་པོ་ཞེས་གསུངས་ཏེ། དེའི་ཕྱིར་ལེའུ་གཉིས་པ་གསུངས་སོ། །ལེའུ་གཉིས་པའི་ལས་ངག་ཀྱང་གསང་སྔགས་དག་པ་ལ་བརྟེན་པ་ཡིན་པ་བས་ན་གསང་སྔགས་དག་པའི་ལེའུ་གསུམ་པ་གསུངས་སོ། །དག་པའི་སྔགས་དེ་ཡང་བསྒོམ་པ་དང་ལྡན་པས་བཟླས་པར་བྱ་བ་ཡིན་པས་ན་ལེའུ་བཞི་པ་བསྒོམ་པ་གསུངས་སོ། །བསྒོམ་པ་ཡང་བྲིས་སྐུ་ལ་དམིགས་པར་རེགས་པས་ན། ལེའུ་ལྔ་པ་བྲིས་སྐུའི་ཆོ་ག་གསུངས་སོ། །བྲིས་སྐུ་ལས་དམིགས་པ་ཐོབ་པ་དེ་ནི་ཕྱི་དང་ནང་གི་ལས་རབ་འབྱམ་ལ་དབང་དུ་གྱུར་བས་ན། སྦྱིན་སྲེག་དང་བསམ་གཏན་གྱི་ལས་ཀྱི་ལེའུ་ལྔ་པ་གསུངས་སོ། །དེ་བཞིན་དུ་གོ་རིམས་ངེས་པ་དང་མཚམས་སྦྱར་བ་ནི། །རྣམ་པ་དུ་མར་ཡང་རང་གི་བློ་གྲོས་དྲི་མ་མེད་པས་ཤེས་པར་བྱ་ཡང་རུང་ཞེས་གསུངས་སོ། །ཡན་ལག་དང་པོ་མངོན་པར་བརྗོད་པའོ། །

ཡན་ལག་གཉིས་པ། བསྡུས་པའི་དོན་མངོན་པར་བརྗོད་པ།


DTG047_Page_0220
[མ་དཔེ་གཟིགས་ན་འདིར་གནོན།]

གཉིས་པ་ནི་དེ་ལྟར་ལེའུ་བདུན་པོ་དེ་དག་ལས་ལེའུ་གྲངས་དང་པོས་ནི། སྡུད་པ་པོ་གཞུང་ཡང་དག་པར་བསྡུ་བའི་དམིགས་པ་གང་ཡིན་པ་ཆེ་བའི་བདག་ཉིད་དང་བཅས་པར་བསྟན་པ་དང༌། གནས་ཀྱི་ཚུལ་དང༌། སྔགས་པའི་ཁྱད་པར་དང༌། ལས་རབ་འབྱམ་དང༌། སློབ་དཔོན་གྱི་ཚུལ་དང༌། དཀྱིལ་འཁོར་གྱི་བདག་ཉིད་ཆེ་བ་དང༌། མཆོད་པ་དང༌། ཉེ་བར་སྤྱད་པའི་ཡོ་བྱད་དང༌། སྒྲུབ་པ་པོ་བསྒྲུབ་ཅིང་མཆོད་པ་དང༌། བསྒྲུབ་པའི་ཚུལ་དང༌། དངོས་གྲུབ་བླང་བ་དང༌། དངོས་གྲུབ་ཆེན་པོ་མ་གྲུབ་ན་ཡང་ཕྲ་མོ་འགྲུབ་པར་འགྱུར་བ་རྣམས་བསྟན་པའོ། །ལེའུ་གཉིས་པ་ལས་ནི་ལེའུའི་མཚམས་སྦྱར་བ་དང༌། གསད་བའི་ལས་རྣམ་པ་དྲུག་དང༌། བསྐྲད་པའི་ལས་རྣམ་པ་ལྔ་དང༌། དབྱེ་བའི་ལས་རྣམ་པ་བཞི་དང༌། རིམས་ཀྱིས་གཟུང་བ་དང༌། རེངས་པར་བྱ་བ་དང༌། མནན་པ་དང༌། དབང་དུ་བྱ་བ་དང༌། དགུག་པ་དང༌། སྨྱོ་བར་བྱ་བ་དང༌། མུ་མོ་དབང་དུ་བྱ་བ་དང༌། ཞི་བའི་བྱ་བ་མདོར་བསྟན་པ་དང༌། འཁྲུལ་འཁོར་སྦ་བའི་གནས་དང༌། སྦྱོར་བ་དགྲོལ་བ་དང༌། ལས་དེ་དག་གི་བྱ་བ་གསལ་བར་བྱེད་པ་རྣམས་བསྟན་པ་ཡིན་ནོ། །ལེའུ་གསུམ་པ་ལས་ནི། རྩ་བའི་


DTG047_Page_0221
[མ་དཔེ་གཟིགས་ན་འདིར་གནོན།]

སྔགས་བཏུ་བ་དང༌། ལས་ཀྱི་སྔགས་བཏུབ་དང༌། སྙིང་པོའི་སྔགས་བཏུ་བ་དང༌། དེ་དག་གི་བཟླས་པའི་ཚད་དང༌། ཡི་གེ་བཏུ་བའི་དམ་ཚིག་རྣམས་བཏུ་བ་རྣམས་བསྟན་ཏོ། །ལེའུ་བཞི་པ་ལས་ནི། ལེའུ་མཚམས་སྦྱར་བ་དང༌། བཅས་ཏེ་མངོན་དུ་བྱ་བ་རྣམས་བསྟན་པ་དང༌། གདན་བསམ་པ་དང༌། རྒྱུའི་ལྷ་བསྐྱེད་པ་དང༌། འབྲས་བུའི་ལྷ་བསྐྱེད་པ་དང༌། འབྲས་བུའི་ལྷ་དེའི་གཟུགས་ལ་སོགས་པའི་མཚན་ཉིད་དང༌། བསྙེན་པའི་གནས་དང༌། བཟླས་པའི་ཆོ་ག་དང༌། བཟླས་པ་ལ་སོགས་པའི་མཐུ་དང༌། གནས་དང༌། ཁ་ཟས་དང༌། ལས་གྲུབ་པའི་རྒྱུ་རྣམས་བསྟན་ཏོ། །ལེའུ་ལྔ་པ་ལས་ནི། ལེའུ་མཚམས་སྦྱར་བ་དང༌། བྲིས་སྐུའི་རས་དང༌། འདྲི་མཁན་དང༌། ཡོན་དབུལ་བ་དང༌། གནས་དང༌། མི་གཡེང་བར་བྱ་ཞིང་གསང་བ་དང༌། རི་མོ་ཇི་ལྟ་བར་བྲི་བ་དང༌། བྲིས་སྐུ་དབེན་པར་མཆོད་པ་དང༌། སྐུ་ཡི་སྤྱན་སྔར་བསྙེན་པ་བྱ་བ་དང། །ཕྲེང་བའི་མཚན་ཉིད་དང༌། ཐུན་མཚམས་ངེས་པ་དང༌། བྲིས་སྐུ་སྦ་བ་དང༌། ཁ་ཟས་ཀྱི་ཚུལ་དང༌། བདུག་སྤོས་དང༌། ཆོ་ག་དེ་དག་གིས་མཆོག་འགྲུབ་པར་འགྱུར་བ་རྣམས་བསྟན་ཏོ། །ལེའུ་དྲུག་པ་ལས་ནི། ལེའུའི་མཚམས་སྦྱར་བ་དང༌། སྤྱིར་སྦྱར་བའི་ཆོ་ག་དང༌། གསད་པའི་ལས་གཉིས་དང༌། དབྱེ་བ་དག་དང༌། བསྐྲད་པའི་ལས་བཞི་དང༌། མནན་པ་དང༌། ལས་ཀྱི་དམ་ཚིག་དང༌། བུ་མོ་དབང་དུ་བྱ་བ་དང༌། ཞི་བར་བྱ་བ་དང༌། རྒྱས་པར་བྱ་བ་དང༌། དགུག་པར་བྱ་བ་དང༌། སྨྱོ་བར་བྱ་བ་དང༌། ནོར་ལ་དབང་བསྒྱུར་བ་དང༌། ཡུལ་དབང་དུ་བྱ་བ་དང༌། འབྱོར་བ་བསྐྱེད་པ་དང༌། རྒྱལ་པོ་དབང་དུ་བྱ་བ་དང༌། འཇིག་རྟེན་དབང་དུ་བྱ་བ་དང༌། བུད་མེད་དབང་དུ་བྱ་བ་དང༌། དབང་དུ་བྱ་བའི་མཆོག་དང༌། དགུག་པའི་མཆོག་དང༌། ལས་རབ་འབྱམ་གྱི་དམ་ཚིག་རྣམས་བསྟན་ཏོ། །ལེའུ་བདུན་པ་ལས་ནི། ལེའུའི་མཚམས་སྦྱར་བ་དང༌། གསད་པའི་ལས་དག་དང༌། དབྱེ་བ་དང༌། བསྐྲད་པའི་ལས་དག་དང༌། དགུག་པ་དང༌། དུག་བསལ་བ་དང༌། བུད་མེད་དབང་དུ་བྱ་བ་དང༌། སྐྱེས་བུ་ཆེན་པོ་དབང་དུ་བྱ་བ་དང༌། དམ་ཚིག་རྣམས་བསྟན་ཏོ། །ཡན་ལག་གཉིས་པ་མངོན་པར་བརྗོད་པའོ། །

ཡན་ལག་གསུམ་པ། མན་ངག་གི་གནས་མངོན་པར་བརྗོད་པ།

ལེའུ་དང་པོ། དཀྱིལ་འཁོར་བསྟན་པའི་བཤད་པ།


DTG047_Page_0222
[མ་དཔེ་གཟིགས་ན་འདིར་གནོན།]

ད་ནི་ཡན་ལག་གསུམ་པ་ལ་འཇུག་པར་བྱ་སྟེ། དེ་ནས་ཞེས་བྱ་བ་ནི་བཀྲ་ཤིས་པའམ། དེ་མ་ཐག་པའམ། དབང་དུ་བྱ་བའོ། །སྒྲུབ་པ་སྟེ་ཞེས་བྱ་བ་ནི་ལེའུ་དང་པོ་ནི་སྒྲུབ་པ་འབའ་ཞིག་སྟོན་པ་ཡིན་ལ་རྟོག་པ་རིལ་ཡང་སྒྲུབ་པ་གཙོར་གྱུར་པ་སྟེ། ལས་རབ་འབྱམ་ཡང་སྒྲུབ་པས་བསྡུས་པའོ། །ཐམས་ཅད་ཀྱི་ཞེས་བྱ་བ་ནི་དེ་དག་གི་ནང་ནའོ། །རབ་ཏུ་འཁྲུགས་པ་ཞེས་བྱ་བ་ནི་ལྷག་པའི་བདག་ཉིད་དོ། །འཇིགས་བྱེད་ཅེས་བྱ་བ་ནི་ཕྱི་རོལ་ལོ། །ཡང་ན་རབ་ཏུ་འཁྲུགས་པས་འཇིགས་བྱེད་པའོ། །གང་ཡང་རུང་བའི་གནས་ཞེས་བྱ་བ་ནི་འཆད་པར་བྱེད་པ་རྣམས་ལའོ། །གནས་རྣམས་ཞེས་བྱ་བ་ནི་བསྒྲུབ་པའི་གནས་ངེས་པའོ། །འཐབ་མོའི་གནས་ཞེས་བྱ་བ་ནི་རྒྱལ་པོའི་གཡུལ་འགྱེད་པའི་སའོ། །དབང་བསྐུར་ཐོབ་པ་ཞེས་བྱ་བ་ནི་གཤིན་རྗེ་དགྲ་ནག་པོའི་རྒྱུད་ཅེས་བྱ་བ་རྒྱུད་འདི་ཉིད་དང་རྗེས་སུ་མཐུན་པའི་རྒྱུད་དེ་ལས་འདིར་དབང་བསྐུར་བའི་ཚུལ་དང༌། གཏོར་མ་དང༌། འཁྲུལ་འཁོར་གྱི་བྱ་བ་དང༌། བསྟོད་པ་ལ་སོགས་པ་དྲང་བར་བྱ་སྟེ། དེ་བས་ན་དེ་ལྟར་དབང་བསྐུར་བའི་རྣལ་འབྱོར་པ་དེས་དབང་དུ་བྱ་བ་ལ་སོགས་པ་བསྒྲུབ་སྟེ། ཁ་ཅིག་ནི་རྒྱུད་འདི་ཉིད་ལས་གསུངས་ལ། རལ་གྲི་ལ་སོགས་པ་ཁ་ཅིག་ནི་རྒྱུད་གཞན་གྱི་ལུགས་སུ་བསྒྲུབ་པོ། །དེ་ལྟར་ཡང༌། གང་ཉིད་དུ་ནི་རང་ཉིད་ཀྱི། །ལས་ཀྱི་ཆོ་ག་རྣམས་མེད་པ། །དེ་ནི་སྤྱི་རྒྱུད་ལས་གྲགས་པའི། །ཆོ་ག་མཁས་པས་ཤེས་པར་བྱ། །ཞེས་གསུངས་སོ། །རོ་བསྲེགས་པའི་ཐལ་བས་ཞེས་བྱ་བ་ནི། འདིར་དྲག་ཤུལ་སྤྱད་པ་གཙོ་བོར་གྱུར་བས་ལྷའི་ཆོན་གྱི་གོར་ཐལ་ཕྱེ་བཤད་པ་ཡིན་ལ། དེ་ཉིད་ཀྱིས་རི་མོ་ཡང་གཅིག་ཁོ་ན་ལྔའི་གོར་སྦྱར་རོ། །ཐལ་ཕྱེར་གང་དག་བཤད་པ་ནི། །དེ་དག་ཐམས་ཅད་རི་མོ་གཅིག །ཅེས་གསུངས་པས་སོ། །ཟླུམ་པོ་ཞེས་བྱ་བ་ནི་ནང་གི་རྡོ་རྗེ་ཕྲེང་བས་བསྐོར་བའོ། །སྒོ་རྣམས་གཞན་ནི་གཅད་པར་བྱ། །ཞེས་བྱ་བ་ནི་ལྷོ་ཕྱོགས་ལས་གཞན་པ་གསུམ་གཅད་པ་སྟེ། ཇི་སྐད་དུ། ཆབ་སྒོ་ཆེན་པོ་སྟེགས་བུར་བཅས། །ཅུང་ཟད་གཅིག་ནི་ལྷག་པར་བྱ། །ཆག་སྒོ་གཞན་རྣམས་བཅད་པ་ནི། །ཕྱེ་མ་དཀར་པོ་དག་གིས་སུ། །སྒོ་ཡི་དབུས་ཀྱི་ཆ་དག་ཏུ། །རི་མོ་ཕྲ་མོ་བྲི་བར་བྱ། །ཞེས་གསུངས་པའོ། །རོ་བྲིའོ་ཞེས་བྱ་བ་


DTG047_Page_0223
[མ་དཔེ་གཟིགས་ན་འདིར་གནོན།]

ནི་གདན་ཏེ། །ཇི་སྐད་དུ་གསུངས་པ། དཀྱིལ་འཁོར་དག་གི་ཆོ་ག་ནི། །རྣམ་པ་གསུམ་པོ་མ་ལུས་པར། །ལྷ་རྣམས་ཐམས་ཅད་དགོད་པ་ནི། །རྣམ་པ་གསུམ་དུ་ཤེས་བྱ་སྟེ། །དང་པོར་གཟུགས་སུ་བྲི་བར་བྱ། །གཉིས་པ་ཕྱག་རྒྱའི་གཟུགས་སུ་བྲི། །གསུམ་པ་གནས་དང་སྟན་དག་ཏུ། །བྲི་བའི་ཆོ་ག་ཡོངས་སུ་བསྒྲགས། །ཞེས་སོ། །འོན་ཀྱང་དཔའ་བོ་གཅིག་པའི་དཀྱིལ་འཁོར་དུ་ནི། ཕྱག་མཚན་ཇི་སྙེད་པ་དགོད་པར་བྱ་བ་ཡང་ཡིན་པས་ན། ཤར་དུ་ནི་མགོ་བོ་ཞེས་བྱ་བ་ལ་སོགས་པ་སྨོས་ཏེ། སློབ་མས་མེ་ཏོག་བོར་ན་ནི་སྙིང་པོའི་གནས་དགུ་པོ་གང་དུ་ལྷུང་ཡང་དངོས་གྲུབ་མཆོག་ཏུ་འགྱུར་ཏེ། སྙིང་པོར་མེ་ཏོག་བབ་ན་ནི། །རྟག་ཏུ་དོན་མེད་མི་འགྱུར་བཤད། །ཅེས་གསུངས་པའོ། །བྱང་གི་སྣམ་བུའི་མཚན་མ་ལ་བབ་ན། ཞི་བའི་ལས་འགྲུབ་པོ། །ལྷོར་ནི་ཚར་བཅད་པ་རྣམས་སོ། །ནུབ་ཏུ་ནི་དབང་དུ་བྱ་བ་དང་དགུག་པའོ། །ཤར་དུ་ནི་རྒྱས་པའོ། །རི་མོའི་ཕྱི་རོལ་ལམ་མཚན་མ་གཉིས་ཀྱི་བར་ལན་གསུམ་བབ་ན་དབང་མི་བསྐུར་རོ། །སྒྲུབ་པ་པོས་ནི། རོའི་སྟེང་དུ་བདག་པོའི་ལུགས་མའམ་བྲིས་སྐུའམ། བརྐོས་པའི་སྐུ་བཞུགས་པ། མེ་ཏོག་དོར་བ་བྱས་ལ་བདག་ཉིད་དབང་བསྐུར་ཏེ། དབུས་ཀྱི་ལྷ་གསལ་བའི་གནས་སུ་འདུག་པ་ལས་རྫས་འགྲུབ་པའམ། རྒྱུད་ལས་ཇི་སྐད་གསུངས་པ་ལྟར་མཆོག་སྩོལ་བར་བྱའོ། །ཕྱོགས་ཐམས་ཅད་དུ་ཡང༌། སོགས་པའི་སྒྲས་བསྡུས་པ་གླང་པོ་ཆེའི་པགས་པ་རེ་རེའམ། ཡང་ན་རྐང་ལག་གི་ཆའི་པགས་པ་བྲིའོ། །གཞན་དག་ནི་སོགས་པ་ཞེས་བྱ་བའི་སྒྲས་མཚོན་ཆ་གང་ཡང་རུང་བ་བྲི་བར་འཆད་དོ། །ཐབས་དང་ཤེས་རབ་ཕུལ་དུ་བྱུང་བ་དབྱེར་མེད་པའི་ཚུལ་དུ་འགྱུར་བ་ནི། ཕྱག་གཉིས་གླང་པོ་ཆེའི་པགས་པ་དང་བཅས་པ་ཡིན་ལ། དེ་བཞིན་གཤེགས་པའི་ཐུགས་རྗེ་ཆེན་པོའི་སུམ་ཅུ་གཉིས་ཉིད་ནི། ཕྱག་གི་མཚོན་ཆ་དང་བཅས་པ་ལྷག་མས་སྟོན་པས་ན། མཚོན་ཆ་གཞན་གང་ཡང་རུང༌། བྲི་བ་ནི་མི་འཐད་པ་ཉིད་དོ། །རོ་ལངས་ཆེན་པོ་བརྒྱད་ཅེས་བྱ་བ་ནི་གཅེར་བུ་སྐྲ་གྲོལ་བ་སོ་རྣོ་བ་ནག་པོ་སྲིན་པོ་ལྟ་བུ་གྲི་གུག་དང༌། ཐོད་པ་ཐོགས་པ་རྣམས་སོ། །འདི་དག་ནི་སྒྲུབ་པ་པོའི་གྲོགས་སུ་གྱུར་པ་འདོད་པའི་ལས་འགྲུབ་པའོ། །བཟའ་སྟོན་


DTG047_Page_0224
[མ་དཔེ་གཟིགས་ན་འདིར་གནོན།]

ནི་དཀྱིལ་འཁོར་དུ་འཇུག་པ་ན་ཚོགས་ཀྱི་འཁོར་ལོ་བྱ་བའོ། །སྦྱིན་སྲེག་ནི་འཇུག་པ་ནའོ། །གཏོར་མའི་ལས་ནི་ཞེས་བྱ་བ་སྒྲུབ་པ་པོས་སྲོད་ལ་སྦྱིན་ཏེ། སློབ་མ་དབང་བསྐུར་བ་ལ་ནི་དཀྱིལ་འཁོར་བསྒྲུབ་པར་བྱས་ལའོ། །ཡང་ན་གཉིས་ཀར་ནམ་ཕྱེད་ནའོ། །དབུས་སུ་བསྒྲུབ་བྱ་དམིགས་ལ་ཞེས་བྱ་བ་ནི་སངས་རྒྱས་ཀྱི་བསྟན་པ་ལ་འཁུ་བ་གང་སུ་ཡང་རུང་བ་ཞིག་གདན་དུ་དམིགས་པར་བྱའོ། །གཞན་ཡང་དབུས་སུ་བསྒྲུབ་བྱའི་གཟུགས་སུ་འཁྲུལ་འཁོར་དང་པུ་ཏ་ལངྒི་དང་བཅས་པའི་ཡ་མ་པུ་ཏྲ་ཤ་བཞག་ལའོ། །འདིར་ཞི་བ་དང༌། རྒྱས་པ་ལ་ནི་མདུན་དུའོ། །གཞན་དག་ནི་སྔར་གསུངས་པའི་སྡོམ་གྱི་ལས་མ་ལུས་པ་ལ་འདི་ལྟར་བསྒྲུབ་པར་བྱ་བ་མིན་པས་ན། གསད་པར་བྱ་བ་གདན་དུ་བརྟགས་ཏེ་བཟླས་པ་བྱ་བར་འདོད་དེ། དངོས་གྲུབ་མཆོག་སྒྲུབ་པ་དག་མ་ཡིན་པ་ལ་དཀྱིལ་འཁོར་བྲི་བ་ནི་གང་དུ་ཡང་མི་འགྱུར་བས་ན་དེ་ནི་མི་རིགས་ཏེ། སྔར་བསྟན་པ་ལྟར་ཏིང་ངེ་འཛིན་གྱིས་ནི་རུང་ངོ༌། །ཡི་གེ་བཅུ་པའི་གསང་སྔགས་ཞེས་བྱ་བ་ནི་བྱ་བ་ཐམས་ཅད་ལ་དེ་ཉེ་བར་གནས་པ་སྟེ། རྩ་བའི་སྔགས་ནི་འཁྲུལ་འཁོར་གྱི་བྱ་བ་ཙམ་ལ་གནས་ལ། སྙིང་པོའི་སྔགས་ཀྱང་ལྷ་ཉེ་བར་གྱུར་པ་ཙམ་ལ་གཙོ་བོར་འགྱུར་བས་སོ། །རིག་སྔགས་འཆང་གིས་གསོལ་བ་བཏབ་པ་ཞེས་བྱ་བ་ནི་ཁྲག་ཆེན་པོའི་ཡོན་ཆབ་ཕུལ་ནས་གུས་པར་བྱས་ཏེའོ། །གཞན་ཡང་ཡིད་ལ་གང་འདོད་པ། །ཞེས་བྱ་བ་ནི་རང་གི་སྦྱངས་པ་དང་མཐུན་པ་ཙམ་ལས་གང་འདོད་པ་སྟེ། བསྟོད་དང་བཅས་ནས་མཆོད་ཡོན་རྒྱུན་སྦྲེངས་ནས། །རྩེ་གཅིག་སེམས་ཀྱིས་གདོང་བཏུང་ཕྱག་བྱས་ཏེ། །དད་དང་འབད་པའི་རྗེས་མཐུན་དམ་པ་བླང༌། །དམ་པ་ཐོབ་ན་དགའ་བས་ཕྱག་བྱས་ཏེ། དད་པས་བསྟོད་ནས་མཆོད་ཡོན་ཕུལ་ནས་སུ། །གསང་སྔགས་བརྗོད་ཅིང་སླར་ཡང་གཤེགས་སུ་གསོལ། །ཞེས་ཇི་སྐད་གསུངས་པ་ལྟ་བུའོ། །ལས་ཕྲ་མོ་བྱ་བ་ནི་འཁྲུལ་འཁོར་དང༌། སྦྱིན་སྲེག་དང༌། བསམ་གཏན་གྱིས་བསྒྲུབ་པར་བྱ་བ་འཆད་པར་འགྱུར་བ་རྣམས་སོ། །དཔལ་འཇམ་པའི་མཆོག་ཅེས་བྱ་བ་ནི་རྒྱུད་ཆེན་པོའི་མཚན་དུ་བསྒྲག་གོ །དཔལ་འཛམ་པའི་མཆོག་གིས་བཤད་པའམ། དེའི་ཁྲོ་བོ་དཔལ་རྡོ་རྗེ་འཇིགས་བྱེད་ཆེན་པོ་ཞེས་བཤད་དོ། །འཁོར་


DTG047_Page_0225
[མ་དཔེ་གཟིགས་ན་འདིར་གནོན།]

ལོའི་རྣལ་འབྱོར་ཞེས་བྱ་བ་ནི་བསྒྲུབ་པའི་དཀྱིལ་འཁོར་གྱི་སྦྱོར་བ་བསྟན་པའོ། །སྦྱོར་བའི་རྒྱུད་ཅེས་བྱ་བ་ནི་རྒྱུད་འདིར་ཕྱི་རོལ་གྱི་སྦྱོར་བ་རབ་ཏུ་མང་བས་ནའོ། །དེ་ལྟར་ན་འདི་བྱ་བའི་རྒྱུད་ཅེས་བརྗོད་དོ་ཞེ་ན། བསམ་གཏན་འབའ་ཞིག་གི་བྱ་བ་སྟོན་པའི་ལེའུ་བདུན་པ་འབྱུང་བ་དང། །ཕྱི་རོལ་གྱི་སྤྱོར་བའི་བྱ་བ་ཐམས་ཅད་ལ་ཡང་ཤིན་ཏུ་མཉམ་པར་གཞག་པས་བྱའོ་ཞེས་ནང་གི་རྣལ་འབྱོར་རབ་ཏུ་ཡང་གཅེས་པར་སྟོན་པས་ན། བྱ་བའི་རྒྱུད་ནི་མིན་ཏེ། འོན་ཀྱང་ཕྱི་རོལ་གྱི་སྦྱོར་བ་ཆེན་པོའི་རྣལ་འབྱོར་གྱི་རྒྱུད་དོ། །གཞན་དག་ནི་འདིར་ཡོ་ག་ཞེས་བྱ་བ་ཡུ་ཛིར་མི་འདྲེན་ཏེ། ཡོ་ནི་ཤ་ཉིད་དུ་འདྲེན་ན། དེ་ནི་མ་ཡིན་ཏེ། འདིར་ཡུ་ཛིར་ཉིད་ཤས་ཆེ་བའི་ཡོ་ནི་ཤ་ནི་ལེའུ་བདུན་པ་ཙམ་ལས་མེད་ཅིང༌། ལྷའི་སྐུ་བསྒྲུབ་པ་ལ་ནི་བྱ་བའི་རྒྱུད་ལས་ཡང་ཡོ་ནི་ཤ་ཡོད་པའི་ཕྱིར་རོ། །ལེའུ་དང་པོའི་བཤད་པའོ།། །།

ལེའུ་གཉིས་པ། ལས་ཐམས་ཅད་འགྲུབ་པ་བསྟན་པའི་བཤད་པ།


DTG047_Page_0225
[མ་དཔེ་གཟིགས་ན་འདིར་གནོན།]

དེ་ནས་ཞེས་བྱ་བ་ནི་དང་པོའི་བསྟན་མ་ཐག་ཏུའོ། །དངོས་གྲུབ་ཐམས་ཅད་ཅེས་བྱ་བ་ནི་ཕྲ་མོ་རྣམས་ཏེ། དེ་དག་ནི་དངོས་གྲུབ་ཏུ་བཞག་པ་ཕལ་བ་རྣམས་ཀྱི་ཡིན་ལ། གྲུབ་པ་རྣམས་ཀྱི་ནི་ཕྲིན་ལས་བཞག་པ་ཡིན་པའོ། །སྔོན་དུ་ཇི་ལྟར་བརྗོད་པ་བཞིན། །ཞེས་བྱ་བ་ནི་སྔོན་དུ་དབང་དང་དགུག་དང་ཞེས་བྱ་བ་ལ་སོགས་པས་སོ། །གནོད་མཛེས་ཀྱི་གསང་སྔགས་ཞེས་བྱ་བ་ནི་ཡི་གེ་ཧཱུཾ་བཞི་བའི་སྔགས་སོ། །བཟླས་ཏེ་ཞེས་བྱ་བ་ནི་འཁྲུལ་འཁོར་འདྲི་བ་ན་བསྲུང་བའི་ཕྱིར་ལན་བདུན་ལ་སོགས་པར་རོ། །གཞན་དག་ནི། ཨོཾ་ཕུ་ཕུ་ཕུ་ཧི་ཧི་ཧི། ཞེས་བྱ་བས་བསྲུང་བར་འདོད་དོ། །གང་ཡང་རུང་སྟེ་དེ་བཞིན་གཤེགས་པའི་རིགས་ཀྱི་བསྲུང་བ་ལ་འདི་ཉེ་བར་གནས་པས་སོ། །སྦྱོར་བའི་རྒྱུད་ཀྱི་གཙོ་བོ་ཞེས་བྱ་བ་ནི། ཇི་ལྟར་རྒྱུད་འདི་ནས་ཚར་བཅད་པའི་སྦྱོར་བ་བསྟན་པ་ལྟར། སྦྱོར་བ་རྒྱུད་གཞན་ལས་དེ་ལྟར་ལྷུར་མ་མཛད་པས་ནའོ། །ལྷའི་རྣལ་འབྱོར་ཇི་ལྟ་བ་དང་ལྡན་པའི་རྣལ་འབྱོར་བས་ཞེས་བྱ་བ་ནི། ལྷའི་གཟུགས་ཚུལ་བཞིན་ཡིད་ལ་བྱེད་པས་ཐོབ་པར་བྱའི། གལ་ཏེ་རྣམ་པར་གཡེངས་ན་སྦྱོར་བ་མི་འགྲུབ་སྟེ། བཟླས་བརྗོད་དང་ནི་དཀའ་ཐུབ་ཀུན། །དུས་ནི་དང་པོར་བྱས་གྱུར་ཀྱང༌། །གཞན་སེམས་པ་དང་གཞན་པས་ནི། དེ་དག་ཐམས་ཅད་དོན་མེད་འགྱུར། །ཞེས་གསུངས་པས་


DTG047_Page_0226
[མ་དཔེ་གཟིགས་ན་འདིར་གནོན།]

སོ། །འཁོར་ལོ་རེའུ་ཆ་བཅུ་དྲུག་པ། །ཞེས་བྱ་བ་ནི་རིམ་པ་གསུམ་ལས་རིམ་པ་ཕྱི་རོལ་མའོ། །དེ་བཞིན་དུ་བར་མ་ནི་བཅུ་གཉིས་པའོ། །ནང་མ་ནི་དགུ་པ་སྟེ། དེ་ལྟར་ནི། མཁས་པས་ཆོ་ག་བཞིན་བྲི་བ། །བརྒྱད་དང་བཅུ་གཉིས་བཅུ་དྲུག་ཏུ། །ཞེས་གསུངས་པ་སྟེ། བརྒྱད་ཅེས་བྱ་བ་ནི་རེའུ་མིག་དབུས་མ་དོར་བའོ། །མེ་གཉིས་ཀྱི་དབུས་སུ་བསྒྲུབ་བྱའི་མིང་སྨོས་ཤིང་ཞེས་བྱ་བ་ལ། མེ་ནི་ཡི་གེ་ཕཊ་ཡིན་ཏེ། མེ་དང་འདྲ་བའི་ཕྱིར་ནི་སྲེག་པ་མཐར་ནི་གཞན་ཞེས་གཞན་ལས་བསྟན་ཏོ། །ཇི་ལྟར་སྨོས་ཤེ་ན་ཕཊ་ཨ་མུ་ཀཾ་མཱ་ར་ཡ་ཕཊ་ཅེས་སོ། །རྒྱུད་གཞན་ལས་ཊ་དང་ཕའི་བར་དུ་མིང་བཅུག་སྟེ་ཞེས་གསུངས་པ་ཉིད་འདིར་མེ་གཉིས་ཀྱི་དབུས་སུ་བསྒྲུབ་བྱའི་མིང་སྨོས་པའོ་ཞེས་གཞན་ཁ་ཅིག་འདོད་དོ། །ཡི་གེ་བཅུ་པས་དེ་བསྐོར་ལ་ཞེས་བྱ་བ་ནི། ཨོཾ་ཧྲཱིཿ་ཞེས་བྱ་བ་ལ་སོགས་པ་ཡང་རེའུ་མིག་བཅུ་དྲུག་པའི་རིམ་པ་དེ་ལ་དགོད་པའོ། །འདི་སྐད་བསྟན་ཏེ། ལྷོ་ནས་བརྩམ་པའི་རེའུ་མིག་བརྒྱད་པར་དུ་དོར་བ་ལ། ཨོཾ་ཧྲཱིཿ་ཥྚྲྀཿ་ཝི་ཀྲྀ་ཞེས་པ་ལྔ་དང༌། ཏཱ་ན་ན་ཞེས་པ་གསུམ་གཅིག་ལ་གཞག་པ་དང༌། ཧཱུཾ་ཞེས་པ་དང༌། ཕཊ་ཅེས་པ་བྲིས་ཏེ། བར་བར་དུ་དོར་བ་བརྒྱད་ལ་སྔ་མ་རྣམས་བྲིའོ། །དེ་ནས་བར་མའི་རེའུ་མིག་བཅུ་གཉིས་དང༌། དབུས་ཀྱི་རེའུ་མིག་ལྔ་ལ་ཡི་གེ་བཅུ་བདུན་བྲིས་ཏེ། དབུས་སུ་ཡི་གེ་ཡའོ། །ལྷོར་ནི་མའི་ཡི་གེའོ། །ནུབ་ཏུ་ཡི་གེ་མེའོ། །བྱང་དུ་ནི་ཡི་གེ་དའོ། །ཤར་དུ་ནི་ཡི་གེ་ཀྵེའོ། །མ་དང་འབྲེལ་བའི་རེའུ་མིག་པར་མ་ནས་བསམས་ཏེ། ར་ཛ་ས་དོ། །རུ་ཎ་ཡོ་ནི། ར་ཡཙྪ་ནི་ཞེས་བྱ་བ་རྣམས་བྲིའོ། །དེ་ལྟར་དབུས་སུ་རེའུ་མིག་ཆ་བཞི་མཚམས་སུ་གནས་པ་དེ་དག་ལ་ཅི་ཞིག་བྲི་བར་བྱ་ཞེ་ན། དེའི་ཕྱིར་ཡི་གེ་ཧཱུཾ་བརྒྱད་བྲིའོ་ཞེས་བྱ་བ་གསུངས་ཏེ། འདི་ལྟར་མཚམས་རེ་རེར། ཧཱུཾ་ཨ་མུ་ཀཾ་མཱ་ར་ཡ་ཧཱུཾ་ཞེས་བྲིས་པས་ནི་ཧཱུཾ་བརྒྱད་དུ་འགྱུར་ཏེ་ཇི་སྐད་དུ། བསྒྲུབ་པར་བྱ་བའི་མིང་བཟུང་སྟེ། །ཧཱུཾ་གཉིས་དང་ནི་སྤེལ་ནས་སུ། །ཕྱོགས་བྲལ་སྟོང་པར་གཟུང་བྱས་ཏེ། །དགོས་པ་ཐམས་ཅད་འགྲུབ་པར་བྱེད། ཅེས་གསུངས་པ་ལྟ་བུའོ། །ལྷག་མ་ཕྱི་རོལ་དབྱངས་དང་གསལ་བྱེད་བསྐོར་བ་དང༌། གཤིན་རྗེའི་ལྟེ་བར་གཞག་པ་ལ་སོགས་པ་ནི། འདི་ཉིད་ཆ་མཐུན་པའི་རྒྱུད་ལས་


DTG047_Page_0227
[མ་དཔེ་གཟིགས་ན་འདིར་གནོན།]

ཤེས་པར་བྱའོ་ཞེས་ལྔར་སྨོས་སོ། །ཚ་བའི་མར་ཁུ་ཞེས་བྱ་བ་ནི། སྐེ་ཚེའི་མར་ཁུའམ་ཡུངས་མར་རོ། །ཐོད་པ་གཉིས་ཞེས་བྱ་བ་ནི་དུམ་བུ་བཞི་བ་སྟེ། གསུམ་པ་ཡང་མང་ངོ༌། །བསྲོས་ལ་ཞེས་བྱ་བ་ནི་པུ་ཏ་ལིངྒའི་སྙིང་གའི་འཁྲུལ་འཁོར་དྲོས་པ་ཙམ་དུ་སྟེ། འདིས་དགྲ་བོ་ཚ་བའི་རིམས་ཀྱིས་བཏབ་ནས་འཆི་བར་འགྱུར་ཏེ། རྟེན་ཅིང་འབྲེལ་བར་འབྱུང་བའི་མཐུའི་ཁྱད་པར་བསམ་གྱིས་མི་ཁྱབ་པའི་ཕྱིར་རོ། །ཡི་གེ་བཅུ་བའི་གསང་སྔགས་བཟླས་ནས་ཞེས་བྱ་བ་ནི། ཡི་གེ་སུམ་ཅུ་རྩ་གཉིས་ཟློས་པ་དགག་པའི་ཕྱིར་སྨོས་པ་སྟེ། དེ་ནི་བསྙེན་པ་བྱས་ལ་འཁྲུལ་འཁོར་འདྲི་བའི་ཚེ་བཟླས་པར་བྱའི་གཞན་དུ་མ་ཡིན་པས་སོ། །དུར་ཁྲོད་ཀྱི་མེ་ལ་བསྲོས་ན་ཞེས་བྱ་བ་ནི་དྲོ་བ་ཙམ་སྟེ། ཨ་མུ་ཀ་ཛྲ་ར་བུད་པ་ད་ཡ་ཞེས་བསྐུལ་པ་སྨོས་ཏེ་བཟླས་སོ། །ཡི་གེ་སུམ་ཅུ་རྩ་གཉིས་པའི་སྔགས་སྨོས་ཤིང་ཞེས་བྱ་བ་ནི་སྔར་འཁྲུལ་འཁོར་ལ་རྩ་བའི་སྔགས་བཀོད་པ་མ་གསུངས་པས་དེ་བསྟན་པའོ། །ཡི་གེ་བཅུ་པའི་གསང་སྔགས་དང་ཡང་བསྒྲུབ་བྱའི་མིང་ལྷན་ཅིག་སྨོས་ཏེ་ཞེས་བྱ་བ་ནི་སྔར་ཇི་སྐད་བསྟན་པའི་བསྐུལ་བ་སྨོས་པས་ཆོག་པར་རྟོག་པ་ལས་དགག་སྟེ། ཧཱུཾ་དང་ཕཊ་ཀྱི་དབུས་སུ་ཡང་དེ་བྲིའོ། །དེ་བས་ན་སྔར་བསྟན་པ་ལས་ཁྱད་པར་ཅུང་ཟད་ནི་དེ་ཡིན་ནོ། །སྦས་ན་ཞེས་བྱ་བ་ནི་དོང་ཁྲུ་བཞི་བའི་གཏིང་དུའོ། །གོལ་བར་འགྱུར་རོ་ཞེས་བྱ་བ་ནི་ཐམས་ཅད་དོ། །གནས་ལྔར་ཞེས་བྱ་བ་ནི། རྡོ་རྗེ་ཡི་ནི་ཕུར་བུ་ཡིས། །གཟུགས་བརྙན་གྱི་ནི་གནས་ལྔ་པོ། །དཔྲལ་བ་མགྲིན་པ་སྙིང་ག་དང༌། །དེ་བཞིན་དཔུང་པ་གཉིས་སུ་གདབ། །ཅེས་གསུངས་པའོ། །གཤིན་རྗེའི་གཟུགས་ཞེས་བྱ་བ་ནི་ཚར་བཅད་པ་ཐམས་ཅད་ལའོ། །ཁྱིམ་དུ་ཡང་ནི་འོངས་ནས་ཞེས་བྱ་བ་ལ་སོགས་པས་ནི་ལེགས་པར་མ་བྱས་པའི་རྣལ་འབྱོར་བ་ཡིས་སོ། །ཚུ་ཚུན་ད་རའི་པགས་པ་ཞེས་བྱ་བ་ནི་གསོབ་བཤུས་པའོ། །ཡི་གེ་བཅུ་བའི་གསང་སྔགས་ཞེས་པ་ནི་འཁྲུལ་འཁོར་ཉེ་བར་མཚོན་པའོ། །ས་བླངས་པས་དགང་ཞིང་ཞེས་བྱ་བ་ནི་པུ་ཏ་ལིངྒ་དང༌། སས་དགང་བའོ། །དེའི་སྐྲས་བཅིང་ངོ་ཞེས་བྱ་བ་ནི། པགས་པ་གྲུལ་བ་དང༌། ཡན་ལག་དང་རོ་སྨད་ཀྱི་ཆའོ། །དེ་ནས་བོང་བུའི་ཆུ་ངན་དང༌། དྲི་ཆེན་དུ་སྦྱར་ཏེ་ཞེས་བྱ་


DTG047_Page_0228
[མ་དཔེ་གཟིགས་ན་འདིར་གནོན།]

བ་ནི། ཇི་ལྟར་རྗེས་སུ་གཟུང་བའི་འཁྲུལ་འཁོར་ལ་མར་དང་སྦྲང་རྩི་ལྟ་བུ་སྟེ། ཚར་གཅད་པའི་རི་ལུའོ། །ཁམ་ཕོར་བཞག་ལ་ཞེས་བྱ་བ་ནི་ཐོད་པ་གཉིས་ཀ་ལ་དེས་གླན་ཏེ། པུ་ཏ་ལིངྒ་མི་འགྱུར་བར་དགང་ངོ༌། དེར་སྦྱོར་བ་དེ་བཞག་ནས་ཞེས་བྱ་བ་ནི་པགས་པ་དེའོ། །དེ་གཉིས་ཀྱི་སྙིང་གར་གསང་སྔགས་བཅུག་ནས་ཞེས་བྱ་བ་ནི་འཁྲུལ་འཁོར་ཅན་གྱི་པུ་ཏ་ལིངྒ་གཅིག་གི་སྟེང་དུ་གཅིག་བཞག་ནས་ཞེས་བྱ་བ་ནི་གང་ཡང་རླུང་བའི་སྟེང་དུ་གཞག་གོ །ཡང་ན་འཐབ་པ་ལྟར་གཅིག་གི་སྟེང་དུ་གཅིག་འགྲོ་བར་སྤྲོ་བར་བྱའོ། །གཞན་གཤིན་རྗེའི་སྐྱེས་བུ་ཞེས་བྱ་བ་ནི་ཡི་གེ་ཡ་ལས་འབྱུང་ངོ༌། །སྦྱོར་བ་གཞན་ཡང་ཞེས་བྱ་བ་ནི་འཁྲུལ་འཁོར་ལས་གཞན་པའི་སྦྱོར་བ་སྟེ། ཞར་ལ་བསྟན་པ་ཙམ་ཡིན་གྱི་འདི་གཙོར་མ་གྱུར་པས་སོ། །གྲོ་གའི་ཤུན་པ་ལ་ཞེས་བྱ་བ་ལ་སོགས་པ་ནི་འཁྲུལ་འཁོར་གྱི་སྦྱོར་བ་སྟེ། ཁ་ཅིག་ནི་འདི་ཡང་སྦྱོར་བ་གཞན་དུ་རྟོག་གོ ། འདིར་སྦྱོར་བ་གཞན་ནི་ཞེས་པའི་སྒྲས་ནི་འཁྲུལ་འཁོར་འགེགས་ཀྱི་དོན་ལས་སོ། །གཞན་དག་འདིར་འཁྲུལ་འཁོར་དང་བྲལ་བའི་སྦྱོར་བ་དང་ལས། ཡང་རྗེས་ལ་འཁྲུལ་འཁོར་མནན་ལ། དེའི་གྲོགས་སུ་དེ་དག་གིས་སྦྱོར་གྱི། གཞན་དུན་སྐབས་མ་ཡི་པར་ག་ལ་འབྱུང་ཞེས་འདོད་དོ། །རྒྱལ་མཚན་གྱི་རས་ལ་ཞེས་བྱ་བ་ལ་སོགས་པའི་སྦྱོར་བ་འདི་ནི་སྨྱོ་བར་འགྱུར་བའི་བསྐང་པའི་སྦྱོར་བའོ། །མེ་ཏོག་དམར་པོས་མཆོད་ཅིང་ཞེས་བྱ་བ་འདི་དཔལ་རྡོ་རྗེ་འཇིགས་བྱེད་ཉིད་ལ་སྟེ། མེ་ཏོག་ནི་ཉེ་བར་མཚོན་པ་ཡིན་པས་མཆོད་པ་ཁ་དོག་དམར་པོ་ཡོན་ཆད་དང་བཅས་པ་དབུལ་ལོ། །ཁ་ཅིག་ནི་འཁྲུལ་འཁོར་མཆོད་པར་འདོད་དེ་དེ་ནི་མི་འཐད་དེ། དེས་དོན་དུ་མི་འགྱུར་རོ། །གསང་སྔགས་ཉིད་ལ་མཆོད་པས་དོན་དུ་འགྱུར་བའོ་ཞེ་ན། ཀྱེ་མ་རྒྱལ་པོ་བཞུགས་བཞིན་དུ་སྣ་ཆེན་པོ་ལ་གཏོགས་པ་མཆོད་ལ་ལྟ་ག་ལ་རིགས། དེ་ནི་མི་བརྗོད་དོ། །སེང་ལྡང་གི་མེ་ལ་བསྲོས་ན་ཞེས་བྱ་བ་ནི་གལ་ཏེ་ཞག་བདུན་གྱིས་མ་བྱུང་ན། པུ་ཏ་ལིངྒ་ཐོད་པ་ནས་ཕྱུང་སྟེ་བསྲོའི་དང་པོ་ནས་ནི་མ་ཡིན་ནོ། །ཞག་བདུན་གྱིས་འཆི་བར་འགྱུར་རོ་ཞེས་བྱ་བ་ནི་ཞག་བདུན་དུ་རྫས་སྨྱོ་བ་བཞིན་ནའོ། །གཞན་ཁ་ཅིག་ནི་གལ་ཏེ་སླར་མ་དཀྲོལ་ནའོ་ཞེས་འདོད་དེ། འདི་ནི་ཐང་ཕྲོམ་དང་སྦྱར་བའི་མུ་


DTG047_Page_0229
[མ་དཔེ་གཟིགས་ན་འདིར་གནོན།]

ཟིས་དྲིལ་ལོ། །སྦྱིན་སྲེག་བྱས་ན་ཞེས་བྱ་བ་ནི་རླུང་གི་མེའི་དབུས་སུ་བཞུགས་པའི་བཅོམ་ལྡན་འདས་ལའོ། །བྱ་རོག་དང་འུག་པའི་རུས་པ་ཞེས་བྱ་བ་ནི་བརླའམ་རྗེ་ངར་གྱི་རྐང་ངོ༌། །སྦལ་བའི་ཞེས་བྱ་བ་ནི་སྦྲ་ཚིལ་ལ་བཟོ་བྱས་པའོ། །བུ་མོ་རྨོངས་པར་བྱ་བ་ནི། མྱོས་པར་བྱ་བས་ཅི་དགར་ལོངས་སྤྱད་པར་བྱ་བའི་ཕྱིར་རོ། །སྨྲ་བར་མི་བྱ་སྟེ་ཞེས་བྱ་བ་ལ་སོགས་པ་ནི་བྱིས་པའི་རང་བཞིན་ཅན་དེ་དག་གིས་ཤེས་ནས་ཐུབ་པ་ཆེན་པོའི་དགོངས་པ་ཅི་ཡིན་པ་མི་ཤེས་པར་ལྡང་བ་ལས་དེ་དག་བྱེད་པར་འགྱུར་བ་དེ་དམྱལ་བར་ལྟུང་སྟེ། ཞུ་བའི་རྟིང་ལ་ཟ་བ་ནི། མར་གྱི་སྙིང་ཁུ་སྦྲང་རྩི་དང༌། །ཁ་ར་རྣམས་ནི་བདུད་རྩིའི་བཞིན། །མ་ཞུ་ཟས་ནི་དུག་འགྱུར་རོ། །དེ་བཞིན་རབ་རྒྱས་བདུད་རྩིའི་ཆོས། །དགོངས་པའི་ཚིག་ལ་མི་མཁས་ཤིང༌། །བྱིས་པའི་བློ་དང་ལྡན་རྣམས་ལ། །མི་བཟད་པ་ཡི་དུག་ཏུ་འགྱུར། །ཞེས་གསུངས་སོ། །འོ་ན་འདི་ལས་དགོངས་པ་གང་ཞེ་ན། དེའི་ཕྱིར། དཀོན་མཆོག་གསུམ་ལ་གནས་བྱེད་དང༌། །ཞེས་བྱ་བ་ལ་སོགས་པ་རྒྱས་པར་གསུངས་སོ། །ལེའུ་གཉིས་པའི་བཤད་པའོ།། །།

ལེའུ་གསུམ་པ། སྔགས་བཏུ་བའི་བཤད་པ།


DTG047_Page_0229
[མ་དཔེ་གཟིགས་ན་འདིར་གནོན།]

གཙང་མའི་གནས་ཞེས་བྱ་བ་ནི་དབེན་པ་སྟེ། ཅིས་ཀྱང་དབེན་པ་ནི་ངེས་པར་ཆེས་གཙང་བས་སོ། །གསང་སྔགས་བཏུ་བ་ཞེས་བྱ་བ་ནིས་འཐས་པ་སྐྱང་ནུལ་བྱས་ལ་ཁ་ཊི་ཁས་ལས་དང་པོར་གཞིའི་ཡི་གེ་གོ་གཉིས་པར་བྲིས་ལ་དག་པ་ན་དབྱངས་རྣམས་སྦྱིན་ཞིང༌། དེ་ནས་དག་པ་ན་བྲི་བའམ་བཟླས་པ་བྱའོ། །འབུམ་ཕྲག་གཅིག་ཅེས་བྱ་བ་ནི་ཤིན་ཏུ་མཉམ་པར་གཞག་པས་སོ། །ལས་ཀྱི་སྔགས་ཞེས་བྱ་བས་ནི་ལས་རབ་འབྱམ་ལ་རབ་ཏུ་བསྔགས་པའི་ཕྱིར་དང༌། འཁྲུལ་འཁོར་ཡང་འདིས་རྫོགས་པར་བྱེད་པས་སོ། །འབུམ་ཕྲག་གསུམ་ཞེས་བྱ་བ་ནི་སྔགས་པ་བར་མའི་ཕྱིར་བསྟན་པའོ། །སྙིང་པོའི་གསང་སྔགས་ཞེས་བྱ་བ་ནི་ཕལ་ཆེར་བསྒོམ་པ་ལ་དགའ་བའི་རྣལ་འབྱོར་བ་ལ་བསྟན་པ་ཡིན་པས་ན། འདི་ནི་ཟློས་པ་པོས་ནི་ངེས་པར་སྙིང་གར་བསྒོམ་པར་བྱ་བས་ན་སྙིང་པོ་ཞེས་བྱ་སྟེ། གསང་སྔགས་རྣམས་ནི་བཟླས་པས་ཀྱང་བྱ་བ་དེ་བྱེད་སྲིད་ཀྱི། སྙིང་པ་རྣམས་ནི་ངེས་པར་བསྒོམ་པས་དོན་དེ་རྫོགས་པར་བྱ་བ་ཡིན་ཏེ། དེ་ནས་སྙིང་པོ་ཤེས་པར་ཏིང་ངེ་འཛིན། །གང་དུ་མཚུངས་པར་ལྡན་


DTG047_Page_0230
[མ་དཔེ་གཟིགས་ན་འདིར་གནོན།]

པའི་སེམས། །ཞེས་བཤད་དོ། །ཡི་གེ་འབུམ་ཞེས་བྱ་བ་ལ་ཡི་གེ་ནི་སྙིང་པོའི་ཡི་གེའོ། །འབུམ་ཞེས་བྱ་བ་ནི་ལེ་ལོ་ཅན་རྣམས་གཞུག་པའི་ཕྱིར་རོ། །ཡང་ན་ཡི་གེ་འབྲུ་ཇི་སྙེད་པ་དེ་སྙེད་ཀྱི་འབུམ་ཕྲག་སྟེ། མཁས་པས་གསང་སྔགས་ཡི་གེ་ནི། །བཅོ་ལྔ་མན་ཆད་གྲངས་རྣམས་ལ། །ཡི་གེའི་སྡོམ་ནི་ཇི་སྙེད་པ། །དེ་སྙེད་འབུམ་ཕྲག་བཟླས་བརྗོད་བྱ། །ཞེས་གསུངས་པས་སོ། །གཞན་ཁ་ཅིག་ནི་འདི་ནི་བསྒོམ་པ་བྱང་བར་བྱས་པས། སྒྲ་ཇི་བཞིན་པའི་བཟླས་པར་བརྗོད་དོ། །ལས་དེ་དང་དེ་དག་ཅེས་བྱ་བ་ལ་སོགས་པ་ནི་འདི་ནི་ལས་ཀྱི་སྔགས་ཀྱི་གོར་སྦྱར་དུ་རུང་བར་སྟོན་པའོ། །འོན་ཀྱང་འཁྲུལ་འཁོར་ནི་མ་ཡིན་ནོ། །ལེགས་པར་མཉམ་པར་གཞག་པ་ཞེས་བྱ་བ་ལ་སོགས་པ་ནི། ཇི་ལྟར་རལ་གྲི་འཛིན་པའི་མི་དག་གིས། །ལེགས་པར་མ་བཟུང་ལག་པ་འཆད་པར་འགྱུར། །དེ་བཞིན་སྔགས་ཀྱང་ལེགས་པར་མ་བཟླས་ན། །འབྲས་བུ་མེད་དམ་ཡང་ན་མ་རུངས་འགྱུར། །ཞེས་གསུངས་པའི་གནས་སྐབས་སྤང་པའི་ཕྱིར། ཡི་གེ་བཏུ་བ་རྩོམ་ན། དེའི་ཚེ་སེམས་གཞན་དུ་བྱེད་པ་ནི། རབ་ཏུ་སྨད་དེ། ཁྲུས་བྱེད་པ་དེ་ཡང་བཤང་གཅི་བྱེད་པ་བཞིན་དུ་དེ་དགག་པའི་ཕྱིར་རོ། །ལེའུ་གསུམ་པའི་བཤད་པའོ།། །།

ལེའུ་བཞི་པ། བསྒོམ་པའི་བཤད་པ།


DTG047_Page_0230
[མ་དཔེ་གཟིགས་ན་འདིར་གནོན།]

ཆོས་ཀུན་བདག་མེད་སྔོན་བྱས་ནས། །ཞེས་བྱ་བ་དང༌། ལྷ་ཡི་དམིགས་པ་བྱ་བའོ། །ཞེས་བྱ་བ་ནི་མདོར་བསྟན་པ་སྟེ། དེ་དག་ཉིད་ནི་དང་པོར་རེ་ཞིག་སྭ་བྷཱ་བ་ཤུདྡྷཿ་ཞེས་བྱ་བ་ལ་སོགས་པའི་གསང་སྔགས་བཟླས་ཏེ་ཞེས་བྱ་བ་ལ་སོགས་པས་རྒྱས་པར་བསྟན་ཏོ། །ཆོས་ཐམས་ཅད་ཅེས་བྱ་བ་ནི། ཕུང་པོ་དང༌། ཁམས་དང༌། སྐྱེ་མཆེད་དོ། །དེ་དག་བདག་མེད་པའི་བདག་ཉིད་དུ་བྱས་ནས་ཞེས་བྱ་བ་ནི། གཟུང་བ་དང་འཛིན་པས་དབེན་པ་རང་བཞིན་གྱིས་འོད་གསལ་བར་འགྱུར་བའོ། །དེའི་འོག་ཏུ་དེ་ཉིད་ནམ་མཁའི་དཀྱིལ་དུ་ཡི་གེ་ཡི་སྔོན་པོ་ལས་གྲུབ་པའི་རླུང་གི་དཀྱིལ་འཁོར་དུ་བའི་མདོག་ཅན་དུ་བསམས་ཏེ། འདི་ནི་ཁྲོ་བོ་ཆེན་པོའི་གདན་ཏེ། རྒྱུད་འདི་ནི་མངོན་སྤྱོད་གཙོ་བོར་བྱས་པ་ཡིན་པས་ན། གདུག་པ་རྣམས་རབ་ཏུ་འཐོར་བར་བྱེད་པ་ཡིན་ཏེ། ཕོ་ཉ་ལ་སོགས་བྲན་རྣམས་དང༌། །ཁྲོ་བོའི་མིང་དུ་གང་འདོགས་པ། །ཀུན་དུ་ཐོག་མེད་སྦྱོད་པ་


DTG047_Page_0231
[མ་དཔེ་གཟིགས་ན་འདིར་གནོན།]

རྣམས། །ཀུན་གྱི་དཀྱིལ་འཁོར་མ་དང་རླུང༌། །ཞེས་གསུངས་པས་སོ། །ཟླ་བའི་དཀྱིལ་འཁོར་ཞེས་བྱ་བ་ནི། འཕགས་པ་འཇམ་པའི་དབྱངས་ཀྱི་གདན་ཏེ། དེ་ནི་ཡོངས་སུ་བསྒྱུར་བར་བྱ་བ་ཡིན་ན། སྔ་མ་ནི་བརྟན་པར་གནས་པ་ཡིན་ནོ། །དེའི་སྟེང་དུ་ཡི་གེ་དྷཱིཿ་ལས་ཞེས་བྱ་བ་ལ་སོགས་པ་ལ་འདིར་དན་ནི། དང་པོར་འཇམ་པའི་དཔལ་དེ་ཉིད་ཀྱིས་བདག་ཉིད་ཀྱི་ཞི་བའི་སྐུས་ལྡང་བ་རྣམས་འདུལ་པ་མ་ཡིན་པར་གཟིགས་ཏེ། ཐུགས་ཀར་ཉི་མ་གནས་པར་བྱ་སྟེ། དེའི་འོད་ཟེར་གྱིས་སྡང་བ་རྣམས་བསྡིགས་ཏེ། འོན་ཀྱང་རབ་ཏུ་སྡང་བ་དག་མི་འདུལ་བར་གཟིགས་ནས། ཡང་བདག་ཉིད་དང་ཉི་མར་བཅས་པ། རྡོ་རྗེ་འབར་བར་བྱིན་གྱིས་བརླབས་ཤིང་དེའི་སྤྲུལ་པ་རྣམས་འདུལ་བ་དེ་དག་གི་སྤྱི་བོའི་སྟེང་དུ། གནས་ཏེ་བསྡིགས་པ་ན་ཡང་ཤིན་ཏུ་རབ་ཏུ་སྡང་བ་རྣམས་འདུལ་བ་མ་ཡིན་ནོ། །དེ་ནས་ནི་ཡང་འཇིགས་བྱེད་ཆེན་པོའི་སྐུ་འཛིན་པར་གྱུར་བས། དེ་དག་ཚར་བཅད་དེ། དེ་དག་རྣལ་འབྱོར་པ་དེས་ཀྱང་རྗེས་སུ་སྤྱོད་པ་ཙམ་ཡིན་པས་ན། བསྡུ་བའི་ལྷ་རྣམས་ཀྱང་འདུལ་བ་ཡིན་ལ། ཤིན་ཏུ་རབ་ཏུ་སྡང་བ་དེ་རྣམས་ནི། ཚངས་པ་དང༌། བརྒྱ་བྱིན་དང༌། དབང་ཕྱུག་དང༌། གཞོན་ནུ་རྣམས་གསོལ་བར་མཛད་པ་ཞེས་འཆད་པར་འགྱུར་བའོ། །ཞལ་དགུ་བ་ཞེས་བྱ་བ་ནི། དབུས་དང་དེ་འབྲེལ་པ་ནས་བརྩམས་པའི་གཡས་པ་གསུམ་དང༌། དེ་བཞིན་དུ་གཡོན་པ་གསུམ་དང༌། སྟེང་དང་དེའི་སྟེང་རྣམས་རིམ་པ་བཞིན་དུ་སངས་རྒྱས་ཀྱི་མཐར་གྱིས་གནས་པའི་སྙོམས་པར་འཇུག་པ་དགུའོ། །འཇིག་རྟེན་གསུམ་ཞེས་བྱ་བ་ནི་དེའི་བདག་པོ་སྟེ། རྒྱལ་བར་བྱེད་པ་དང༌། སྦྲང་རྩིར་བྱེད་པ་དང༌། དོན་ཀུན་འགྲུབ་པའོ། །ཞབས་བཅུ་དྲུག་པ་ཞེས་བྱ་བ་ནི་སྟོང་པ་ཉིད་བཅུ་དྲུག་རྣམ་པར་དག་པའོ། །དེ་ཉིད་ཀྱི་ཕྱིར་མི་རོ་ལ་སོགས་པ་བཅུ་དྲུག་ནི་ཕྱི་རོལ་དང་ནང་ལ་སོགས་པའི་དངོས་པོར་འཛིན་པ་བཅུ་དྲུག་གི་མཚན་མར་མཛད་པ་ཡིན་ལ། དེ་དག་སྟོང་པ་ཉིད་བཅུ་དྲུག་གིས་བཅོམ་པ་ཡིན་པའི་ཕྱིར་ཞབས་བཅུ་དྲུག་གིས་བརྫིས་པའོ། །གཅེར་བུའི་སྐུ་ལ་ཞེས་བྱ་བ་ནི་རྣམ་པར་རྟོག་པ་སྤངས་པ་དང༌། ངོ་ཚ་ཤེས་པ་དང༌། ཁྲེལ་ཡོད་པའི་ཕྱིར་གོས་ཡིན་གྱི། རས་ལ་


DTG047_Page_0232
[མ་དཔེ་གཟིགས་ན་འདིར་གནོན།]

སོགས་པས་བཀབ་པ་ནི་བྱིས་པའི་གོས་ཡིན་པར་བསྟན་པའི་ཕྱིར་ཏེ། བྱིས་པ་གོས་རྣམས་གྱོན་ཡང་རྟག་པར་གཅེར། །མཁས་པ་གཅེར་བུར་འདུག་ཀྱང་གོས་དང་བཅས། །ཞེས་བཤད་པས་སོ། །མཚན་འགྲེང་ཞེས་བྱ་བ་ནི་འདི་ལྷ་ཆེན་པོ་དང་འདྲ་བར་བསྟན་པས་དེ་འདུལ་བའི་ཕྱིར་ཏེ། དེ་ནི་ལྷག་པར་ཆགས་པ་ཅན་ཡིན་པས། ལོ་གསུམ་དུ་དཀའ་ཐུབ་བཟློག་མ་དང་གཉིས་ཀྱི་གཉིས་སུ་བདེ་བས་བདེ་བ་མ་ཚིམ་ཞིང་རྟག་ཏུ་མཚན་མ་ལས་སུ་རུང་བའོ་ཞེས་གྲག་གོ །དེ་བས་ན་ཆགས་དང་ལྟ་བ་ཞེ་སྡང་བསྔོ། །ལྷ་ཆེན་ཚངས་པ་ཁྱབ་འཇུག་འདུལ། །ཞེས་བཤད་དོ། །ཟུར་ཕུད་ལྔ་པ་ཞེས་བྱ་བ་ནི་ཡེ་ཤེས་ལྔ་དང་བཅས་པར་སྟོན་པའོ། །ཞལ་ཐམས་ཅད་ཀྱང་སྤྱན་གསུམ་དང་ལྡན་པའོ་ཞེས་བྱ་བ་ནི་སེམས་ཅན་གྱི་ཕྱིར་སྣང་བ་སྟོན་པའི་སྒོ་ཇི་སྙེད་པ་ལས་ཡང་རྣམ་པར་ཐར་པ་གསུམ་གསུམ་ལས་བྱུང་བའི་ཕྱིར་རོ། །ཉི་མའི་དཀྱིལ་འཁོར་ཞེས་བྱ་བ་ནི་ཡི་གེ་ཨ་དམར་པོ་ལས་བྱུང་བའོ། །དེ་ལ་རང་གི་གསང་སྔགས་དམིགས་ལ་ཞེས་བྱ་བ་ནི་དབུས་སུ་ཡཾ་སྔོན་པོའམ་ཧཱུཾ་སྔོན་པོའི་ཡི་གེ་སྟེ། མཐའ་མར་སྔགས་གསུམ་གྱི་ཕྲེང་བ་གཡས་སྐོར་དུ་བསྒོམ་མོ། །གཡེང་བ་མེད་པའི་ཡིད་ཀྱིས་ཞེས་བྱ་བ་ནི་ཐ་ན་སྟོང་པ་ཉིད་ཀྱང་མི་བསམ་སྟེ། རིག་སྔགས་ལྷ་ནི་མ་གཏོགས་པར། །བསྒོམ་པ་མཆོག་ཏུ་གྱུར་པ་ཡང༌། །ཟློས་པས་བཟླས་བརྗོད་བྱེད་པའི་ཚེ། །ཀུན་རྟོག་བཟུང་ནས་མི་བསམ་མོ། །ཞེས་གསུངས་སོ། །བཟླས་བརྗོད་བྱའོ་ཞེས་བྱ་བ་ནི། སྔོན་བཞིན་སྤྲོ་བསྡུ་བྱ་སྟེ་སྐྱོ་ནའོ། །འཐབ་མོའི་གནས་ཞེས་བྱ་བ་ནི་སྔོན་བཞིན་ནོ། །འདིར་ནི་བསྙེན་པའི་གནས་སོ། །ངེས་པ་ཁོ་ན་མ་ཡིན་པས་ན། དུར་ཁྲོད་ལ་སོགས་པ་ཞེས་སྨོས་ཏེ། སྔར་བསྟན་པ་རྣམས་ལས་ཡིད་གང་དགའ་བར་གནས་སོ། །དམ་ཚིག་གི་རྫས་ཞེས་བྱ་བ་ནི་ཤ་ཆེན་པོ་དང་རྡོ་རྗེ་ཆུ་ལ་སོགས་པ་སྟེ། འདི་ནི་རེ་ཞིག་སེམས་སྦྱངས་པས་བྱའོ། །ལེའུ་བཞི་པའི་བཤད་པའོ།། །།

ལེའུ་ལྔ་པ། བྲིས་སྐུའི་ཆོ་གའི་བཤད་པ།


DTG047_Page_0232
[མ་དཔེ་གཟིགས་ན་འདིར་གནོན།]

འཁོར་ལོ་བྲི་བར་བྱའོ་ཞེས་བྱ་བ་ནི། འདི་ནི་མི་མ་ཡིན་པའི་ཚོགས་ཀྱིས་བསྐོར་བའམ། དཀྱིལ་འཁོར་གྱི་ཚུལ་ལས་ཕྱག་རྒྱ་མི་བྲི་བར་རྡོ་རྗེ་ར་བ་ལ་སྒོ་གདོང་པའོ། །ལྷག་པའི་ཡོན་ནི་ཞེས་བྱ་བ་ནི་འདྲི་མཁན་གྱི་ཚད་ལས་རྒལ་བའོ། །སྲིན་པོ་ཞེས་


DTG047_Page_0233
[མ་དཔེ་གཟིགས་ན་འདིར་གནོན།]

བྱ་བ་ལ་སོགས་པ་ནི། དུར་ཁྲོད་ཀྱི་དེ་ཁོ་ན་ཤེས་པར་འགྱུར་རོ། །སྒྲུབ་པ་པོ་ཞེས་བྱ་བ་ནི་ཇི་ལྟར་བསྟན་པ་ལས་ཤ་ཚུགས་ལ་སོགས་པ་རབ་ཏུ་འདྲ་བར་བྲིའོ། །ཤ་ཆེན་པོའི་བདུག་སྤོས་ཕུལ་ཏེ་ཞེས་བྱ་བ་ནི་དང་པོར་སྤྱན་ཕྱེ་ལའོ། །གཞན་ལ་བསྟན་པར་མི་བྱའོ་ཞེས་བྱ་བ་ནི། གླེགས་བམ་དང་ནི་བྲིས་སྐུ་དག །རྨོངས་པ་དག་ལ་བསྟན་བྱས་ན། །ཚེ་འདིར་དངོས་གྲུབ་མི་འབྱུང་སྟེ། །ཚེ་རབས་གཞན་དུའང་དངོས་གྲུབ་མེད། །ཅེས་གསུངས་པས་སོ། །རྟག་ཏུ་ནུབ་མོ་ཟ་བར་བྱའོ། །ཞེས་བྱ་བ་ནི་གཅིག་ཏུའང་གསང་བར་བྱ་བའི་ཕྱིར་མཚན་མོ་མི་ཉལ་ཙམ་ན་དམ་ཚིག་རྫས་དག་ལུས་དུབ་པ་བསལ་བ་ལ་སོགས་པའི་ཕྱིར་བཟའོ། །ཉིན་པར་མིའི་ཤ་ལ་སོགས་པ་བཟའ་བ་ནི། ཡང་དག་པར་རྫོགས་པའི་སངས་རྒྱས་ལ་འགྲོ་བ་སྐུར་པ་སྨྲ་བའི་མཐའ་ལ་ཐུག་པར་འགྱུར་ཞིང་བདག་ཉིད་ཀྱང་ཅེ་སྤྱང་གི་དང་འབྱུང་པོའི་ཁོངས་སུ་འཇུག་པའི་ཕྱིར་རོ། །གང་ཞིག་དངོས་གྲུབ་མཆོག་འདོང་པ། །ཞེས་བྱ་བ་ནི་ངན་པའི་སྤྱོད་པ་འདི་དག་ནི་སེམས་དག་པས་བྱའི་གཞན་དུ་མ་ཡིན་ལ། དངོས་གྲུབ་ཆེན་པོ་རྣམས་ནི་སེམས་དག་པས་ཐོབ་ཀྱི། མི་གཙང་བ་ལོངས་སྤྱོད་པས་ནི་མ་ཡིན་ཏེ། ཕག་ལ་སོགས་པ་བཞིན་ནོ། །སེམས་དག་པ་ནི་འབྲས་སཱ་ལུའི་ཆང་དང༌། མིའི་ཤ་དང༌། བཤད་བའི་དྲི་དང༌། ག་བུར་གྱི་དྲི་དག་ལ་འདོད་པའི་ཡོན་ཏན་དུ་མཉམ་པར་འགྱུར་ཏེ། དེ་བས་ན། གང་དག་དགའ་བ་དེ་དབུལ་ཏེ། འདི་ལྟར་ཆང་དང་དེ་བཞིན་དྲི། །ཇི་ལྟར་བཟའ་བ་དེ་བཞིན་བཤད། །ཇི་ལྟར་དྲི་བཟངས་ག་པུར་དག །དེ་བཞིན་བཤད་པ་ལས་བྱུང་དྲི། །ཞེས་གསུངས་པ་ལྟ་བུའོ། །ལེའུ་ལྔ་པའི་བཤད་པའོ།། །།

ལེའུ་དྲུག་པ། སྦྱིན་སྲེག་གི་ལས་ཀྱི་ཆོ་ག་རྒྱ་ཆེ་བའི་བཤད་པ།


DTG047_Page_0233
[མ་དཔེ་གཟིགས་ན་འདིར་གནོན།]

སྦྱིན་སྲེག་གི་ཆོ་ག་ཞེས་བྱ་བ་ནི། རབ་ཏུ་བསྡུས་པ་བཤད་པར་བྱ། །རྒྱས་པར་འདི་དང་ཆ་མཐུན་པའི་རྒྱུད་ལས་ཤེས་པར་བྱ་ཤིང༌། གཞན་ཡང༌། ཞི་བ་དང་ནི་རྒྱས་པ་དག །ཟླ་བ་ཡར་གྱི་ངོ་ལ་བྱ། །དབང་དང་དྲག་ཤུལ་སྦྱར་སོགས་པ། །ཟླ་བ་མར་གྱི་ངོ་ལ་བརྩམ། །བྱང་དུ་ཁ་བལྟས་ཞི་བ་ལ། །དེ་བཞིན་རྒྱས་པ་ཤར་དུ་བལྟ། །དྲག་པོའི་ལས་ལ་ལྷོ་ཕྱོགས་སུ། །དབང་གི་ལས་ལ་ནུབ་ཏུ་བལྟ། །གསད་པ་ཉིད་ལ་


DTG047_Page_0234
[མ་དཔེ་གཟིགས་ན་འདིར་གནོན།]

མེ་ཕྱོགས་སུ། །དབྱེ་བ་ལ་ནི་སྲིན་པོའི་ཕྱོགས། །གནས་ནས་བསྐྲད་པ་རླུང་ཕྱོགས་སུ། །མནན་པ་ལ་ནི་དབང་ལྡན་ཕྱོགས། །ཞེས་ལ་ཁ་དོག་དཀར་པོ་སྟེ། །རྒྱས་པ་ལ་ནི་སེར་པོར་བྱ། །དབང་དང་དགུག་པ་དག་ལ་དམར། །བསད་པ་ཁ་དོག་ནག་པོའོ། །ཞི་ལ་བྱམས་པའི་སེམས་ཀྱིས་བྱ། །རྒྱས་ལ་དགའ་བའི་སེམས་ཀྱིས་བྱ། །དབང་དང་དགུག་པ་ཆགས་སེམས་ཀྱིས། །བསང་པ་ལ་ནི་ཁྲོ་སེམས་ཀྱིས། །ཞི་བ་སྲོད་ལ་ཕལ་ཆེར་བྱ། །རྒྱས་པ་དེ་བཞིན་སྔ་དྲོ་བྱ། །དབང་དང་མངོན་སྤྱོད་དག་གི་ལས། །ཉི་མ་གུང་དང་ནམ་ཕྱེད་ན། །ཞེས་གསུངས་པ་སྦྱར་རོ། །འབྲུ་མར་གྱི་ཞེས་བྱ་བ་ནི། སྐེ་ཚེའམ་ཡུངས་མར་གྱིས་སོ། །བརྫིས་ཏེ་ཞེས་བྱ་བ་ནི། ཆུ་བོའི་འགྲམ་གཉིས་ཀྱིས་དང༌། བསྒྲུབ་བྱའི་རྐང་རྗེས་ཀྱི་ས་དང་བརྫིས་ཏེ། དགྲའི་པུ་ཏ་ལིངྒ་བྱས་ཏེ། །དེའི་སྙིང་གར་ལས་ཀྱི་སྔགས་བསྐུལ་བ་སྨྲོས་པ་བྲིས་ཏེ། མཚོན་རྣོན་པོས་གཏུབ་ཅིང་བསྲེག་གོ །དུར་ཁྲོད་མེ་ལ་ཞེས་བྱ་བ་ནི། དུར་ཁྲོད་ནས་བྱུང་བའི་མེ་ལའོ། །ཡིད་དུ་མི་འོང་བའི་རླུང་གི་མེ་ཞེས་ནི་མི་བསམ་སྟེ། མངོན་སྤྱོད་ལ་ནི་དུར་ཁྲོད་ལས་བླངས་པའི་མེ་ཞེས་གསུངས་པ་དེ་ཡང༌། རྟོག་པ་དེ་མ་འབྲེལ་པའི་ཕྱིར་རོ། །བས་མཐའ་ཞེས་བྱ་བ་ནི་གང་ནས་གྲོང་གི་དགྲ་ཆེན་པོ་ཡང་མི་ཐོས་པའོ། །སྨོ་ཤ་ཅན་ཞེས་བྱ་བ་ཡང༌། །སྨེ་ཤ་ཅན་ལས་བཙལ་བའི་མེ་སྟེ། །དེ་ལྟ་མ་ཡིན་ན་སྦྱོར་བ་འདི་གཉིས་རང་བཟློག་པའི་ཉེས་པར་ཇི་སྟེ་མི་འགྱུར། བྱ་རོག་ལ་སོགས་པ་ནི་ཟུར་རེ་རེས་འགྲུབ་པས་ནའམ། ཁྱིམ་དུ་འདུག་ནས་ཞེས་བྱ་བ་ནི་འདི་ལྟར་ན་ཡང་གྲུབ་ན་དུར་ཁྲོད་ལ་སོགས་པར་ལྟ་ཅི་སྨོས་པའོ། །རྡོ་རྗེ་འཆང་ཞེས་བྱ་བ་ནི་སྔགས་པ་གང་ཡང་རུང་བ་ལ་དགོངས་པས་གསུངས་པའོ། །རླུང་གི་དཀྱིལ་འཁོར་གྱི་དབུས་སུ་ཞེས་བྱ་བ་ནི། ཐ་བ་ཟླ་བ་ཕྱེད་པ་ལྟ་བུའམ། གྲུ་གསུམ་པའི་དབུས་སུ་དེ་ལྟར་བྲི་བའོ། །གྲུ་བཞི་དཀྱིལ་འཁོར་ཞེས་བྱ་བ་ནི། ཐབ་ཁུང་སེར་པོ་དབང་ཆེན་གྱི་དཀྱིལ་འཁོར་ལྟ་བུའོ། །ལས་དང་མཐུན་པའི་རྣལ་འབྱོར་ཞེས་དམིགས་ཏེ་ཞེས་བྱ་བ་ནི། སྔར་བརྗོད་པ་དང་མེ་ལྷ་དང་ལྷན་ཅིག་པའི་ལྷ་རྣམས་སོ། །བྱི་ལའི་མུ་ཏྲ་དང་སྦྱར་ལ། །ཞེས་བྱ་བ་ནི་རྫས་དེ་དག་རེ་རེ་ནས་བསྲེགས་


DTG047_Page_0235
[མ་དཔེ་གཟིགས་ན་འདིར་གནོན།]

པ་བཀང་པའོ། །ལེགས་པར་མཉམ་པར་གཞག་པར་བྱའོ་ཞེས་བྱ་བ་ནི་སྙིང་རྗེས་རབ་ཏུ་བརླན་པར་བྱའོ། །ཁྲག་གིས་བརྫིས་ཏེ་ཞེས་བྱ་བ་ནི་ཁྲག་སྡིག་མེད་པ་གང་ཡང་རུང་བས་བརྫིས་ལ་བུ་མོའི་གཟུགས་ལ་བརྙན་སྙིང་གར་སྔགས་བསྐུལ་བ་སྨོས་ལ་བཞག་པ་བྱས་ན་དེ་བཅད་ཅིང་བསྲེགས་པའོ། །ཞི་བར་དམིགས་པའི་བདག་ཉིད་ཀྱིས། །ཞེས་བྱ་བ་ནི་ལྷ་དང་མེའི་ལྷ་དང་རྫས་རྣམས་ཁ་དོག་དཀར་པོར་བསམས་ཏེ། གསང་བའི་བདག་པོར་དེ་ལྟར་མེ་ཡི་གཟུགས་ནི་བྱིན་རླབས་ཏེ། བདག་གི་རང་གི་གཟུགས་དང་ནི། །རྫས་ཀྱང་དེ་ཡི་ངོ་བོར་བྱ། །ཞེས་གསུངས་པས་སོ། །མཉམ་པར་གཞག་པའི་ཡིད་ཀྱིས་ཞེས་བྱ་བ་ནི་རིན་པོ་ཆེ་དང༌། ནོར་སྣ་ཚོགས་ཀྱི་ཆར་དབབ་པའི་ཏིང་ངེ་འཛིན་ལའོ། །སྐེ་ཚེ་ལས་ཞེས་བྱ་བ་ནི། སྐེ་ཚེ་བཏགས་པ་ལས་སོ། །བྱ་རྒོད་ཆེན་པོའི་ཚང་ཞེས་བྱ་བ་དེ་ནི་ཅི་བསགས་པའི་ཚད་བྱེ་བྲག་མི་བྱ་བར་རོ། །ནོར་མ་ཡིན་པར་འགྱུར་ཏེ་ཞེས་བྱ་བ་ནི་ཨ་མུ་ཀ་ན་མ་ཏྲ་བྱ་ཨ་ཏྲ་བྱ་ཀུ་རུ་ཞེས་བསྐུལ་པ་སྨོས་པས་སོ། །བཅོམ་ལྡན་འདས་ཀྱི་སྤྱན་སྔར་ཉིད་དུ་ཞེས་བྱ་བ་ནི་དེ་བཞུགས་པའི་གནས་སུ་དེའི་སྤྱན་སྔར་ཏེ། འདི་ནི་གནས་འདིར་བསྟན་པའོ། །ཁྲག་ཅེས་བྱ་བ་ཡང་བ་ལང་ཉིད་ཀྱིའོ། །རྡོ་རྗེ་ཆུ་ནི་རང་གི་མུ་ཏྲའོ། །རྒྱལ་པོའི་ཕོ་བྲང་འཁོར་ཞེས་བྱ་བ་ནི་གཞན་གྱི་ཚོགས་ལྟ་ཅི་སྨོས་ཞེས་བྱ་བའི་ཐ་ཚིག་གོ །བདག་ཉིད་གཅིག་པུ་བྱ་བ་ཡིན། །ཞེས་བྱ་བ་ནི་རྗེས་སུ་མཐུན་པའི་གྲོགས་རྙེད་པར་དཀའ་བའི་ཕྱིར་ཏེ། བྱིས་པས་གྲོགས་སུ་མི་འགྱུར་ཕྱིར། །གཅིག་པུ་སྤྱོད་པ་བྱེད་སླ་བས། །མ་ཏང་དགོན་པའི་གླང་པོ་བཞིན། །སེམས་ཁྲལ་བསྐྱངས་ཏེ་གཅིག་པུར་སྤྱད། །ཅེས་གསུངས་པ་ལྟ་བུའོ། །རྒྱ་ཆེན་པོ་ཞེས་བྱ་བ་ནི་ལས་ཀྱི་རྣམ་གྲངས་མང་པོ་སྟེ། གཞན་ནི་འདིར་ནི་རབ་ཏུ་བསྡུས་པས། རྒྱུད་གཞན་ལ་ལྟོས་པའི་ཕྱིར་རོ། །ལེའུ་དྲུག་པའི་བཤད་པའོ།། །།

ལེའུ་བདུན་པ། བསམ་གཏན་གྱི་ལས་བསྒྲུབ་པ་བརྟག་པའི་བཤད་པ།


DTG047_Page_0235
[མ་དཔེ་གཟིགས་ན་འདིར་གནོན།]

བསྙེན་ཞིང་ཞེས་བྱ་བ་ནི་བསོད་ནམས་དང་ཡེ་ཤེས་སྐྱེས་པས་སོ། །དེ་བས་ན་ངེས་པར་སེམས་ལས་སུ་རུང་བར་སྦྱངས་པ་སྟེ་ངེས་སོ། །བསྒྲུབ་བྱ་ཞེས་བྱ་བ་ལ་སོགས་པ་ནི་ཇི་སྐད་བསྟན་པ་ལ་སྤྱིའུ་ཚུགས་སུ་གནས་པར་རོ། །དཔག་ཚད་བརྒྱ་ཞེས་བྱ་བ་ནི་བྱིས་པ་ལྟ་བུའི་སྒྲུབ་པ་པོ་རྣམས་རིང་བར་གནས་


DTG047_Page_0236
[མ་དཔེ་གཟིགས་ན་འདིར་གནོན།]

པ་ལ་རེ་བ་ཆད་པས་སྒྲུབ་པར་དཀའ་མོད་ཀྱི་ཞེས་པའོ། །སྙིང་གར་ཞེས་བྱ་བ་ནི་མཆོད་སྡོང་ལ་འཇིག་པའི་སྐྱེས་བུའི་ཕྱིར་བལྟ་བ་ལྟར་ལག་པ་གཡས་པ་དག་མཚོན་ཆའི་མཆོག་འཛིན་པར་རོ། །ཨ་ལས་སྒྲུབ་པའི་ཟླ་བའི་དཀྱིལ་འཁོར་ཞེས་བྱ་བ་ནི་བྱི་རཱུ་མདོག་འདྲ་བར་རོ། །ས་གསུམ་ཞེས་བྱ་བ་ནི་ས་འོག་དང་ས་ཡུལ་དང་ས་བླའོ། །དེས་ཀླུ་ལྷག་མ་ཅན་གྱི་གཟུགས་དཀར་པོ་ཞེས་བྱ་བ་ནི་འདི་ཀླུའི་རྒྱལ་པོ་རྒྱ་མཚོ་ཆེན་པོའི་ཕྱག་རྒྱ། དུག་ཐམས་ཅད་སེལ་བ་སྟེ། བདག་ཉིད་ཁ་དོག་དཀར་པོ་ཞི་བར་བསམས་པའི་སྙིང་གར་པཾ་གྱི་ཡི་གེ་དཀར་པོ་ལས་འབྱུང་བའི་པདྨ་དཀར་པོ་འདབ་མ་བརྒྱད་པ་བསྐྱེད་ལ་དེའི་ལྟེ་བར་ཡི་གེ་ཨི་དཀར་པོའོ། །དེ་ལས་ནོར་བུ་མརྐ་ཏ་དཀར་པོ་སྟེ། དེ་ཡོངས་སུ་གྱུར་པ་ལས་ནི། སྦྲུལ་དཀར་པོ་གཉིས་ཕན་ཚུན་མཇུག་མ་འབྲེལ་ཅིང་ལངས་པ་བསྒྱིངས་ཏེ། མིག་རྩ་བསྒྲིམས་ནས་གཅིག་ལ་གཅིག་བསྡིགས་པ་ལྟར་འདུག་པའི་བར་མཇུག་མའི་སྟེང་ནས་རྩེ་མོ་གསུམ་གསུམ་པའི་རྡོ་རྗེ་ཁ་གཉིས་པ་སྒོང་སྐྱེས་ནས་འབྲས་འདྲ་བ་གནས་པ། གཅིག་ལ་གཅིག་བལྟ་ཞིང་ལྕེ་འབྱིན་པ། གཉིས་ཀའི་མགོ་ལ་ཡི་གེ་ཧི་ལྟ་བུའི་ནོར་བུ་འོད་འབར་བ་འཛག་པར་བསམས་ཏེ། དེ་ནས་དེ་གཉིས་ཀྱི་མགོ་བསྒྲུབ་བྱའི་མགོའི་སྟེང་དུ་གནས་པར་བྱ་སྟེ། ནོར་བུའི་ཡི་གེ་ཨི་དང༌། མཆི་མའི་བདུད་རྩིས་སྤྱི་བོ་ནས་དབང་བསྐུར་ནས་ཇི་སྐད་གསུང་པ་དེར་འགྱུར་རོ། །གཞན་ལག་ངར་གཉིས་ཕན་ཚུན་བསྣོལ་ཏེ། དཀྲིས་ལ་ལག་པ་གཉིས་ཀྱི་མཐེ་བོང་མཐེའུ་ཆུང་རྣམས་ལུ་གུ་རྒྱུད་དུ་སྦྲེལ་ནས། སོར་མོ་ལྷག་མ་རྣམས་རྡོ་རྗེའི་མཚན་ཉིད་ལས་སྤྲུལ་མགོ་གདེངས་ཀ་ལྟར་བྱས་ཏེ། ནས་རེ་རེ་ཙམ་དུ་བར་དག་བྱས་པ་འདི། ན་མོ་བཛྲ་པཱ་ཎཱི། ཨོཾ་ཧཱུཾ་ཕཊ་སྭཱ་ཧཱ། ཞེས་བྱ་བས་བྱིན་གྱིས་བརླབས་ཏེ། སྦྲུལ་ཅན་ལ་བསྟན་ན་ཐོགས་པ་མེད་པར་དེའི་དུག་འཇོམས་ཏེ། མི་སྣང་བའི་ཀླུ་དུག་ཅན་རྣམས་ཀྱང་ངོ༌། །མངར་སྣ་གསུམ་གྱི་གཏོར་མ་ཡང་ཕྱག་རྒྱའི་ལྷ་ལ་དབུལ་ལོ། །འདི་ནི་བདག་གི་ཞར་ལ་བཤད་པ་ཡིན་གྱི། གནས་སྐབས་ཀྱི་བྱ་བ་ནི་མ་ཡིན་ནོ། །བཞུ་བ་ནི་ཞེས་བྱ་བ་ནི་ཆགས་པ་ཆེན་པོས་ལུས་བཞུ་བ་ཙམ་དུ་གདུངས་པར་འགྱུར་བའི་དབང་དུ་བྱའི་སྦྱོར་བའོ། །དེ་ཡང་དངོས་སུ་ནི་འཛག་པ་ཉིད་ཞུའོ། །མྱོས་


DTG047_Page_0237
[མ་དཔེ་གཟིགས་ན་འདིར་གནོན།]

པ་ཞེས་བྱ་བ་ནི་ཆགས་པས་སེམས་འཁྲུགས་པར་གྱུར་པའོ། །དེའི་སྙིང་གར་ཞེས་བྱ་བ་ལ་སོགས་པ་ནི་སྦྱོར་བ་གཞན་སྟོན་ཏེ། ཡི་གེ་བཅུ་པའི་གསང་སྔགས་ཞེས་བྱ་བ་ནི་མདོག་དམར་བའོ། །ཡེ་ཤེས་ཀྱི་ཡི་གེའི་གཟུགས་ཞེས་བྱ་བ་བསྒྲུབ་བྱའི་སེམས་ཡི་གེ་དམར་པོ་གྱུར་པའོ། །ཡི་གེ་དེ་ལ་གཞུག་སྟེ་ཞེས་བྱ་བ་ནི་བདག་གིས་སྤྲོས་པ་ལ་སྟེ། དེའི་ཕྱིར་གཅིག་ཏུ་འདྲེས་པར་བསམ་མོ་ཞེས་གསུངས་སོ། །འདི་སྐད་དུ་བཤད་པར་འགྱུར་ཏེ། བདག་ཉིད་ཁ་དོག་དམར་པོ་ལྷ་ཉིད་དུ་འོང་བའི་རྣལ་འབྱོར་གསལ་བར་བསམས་ལ། དེའི་སྙིང་གར་ཡི་གེ་བཅུག་པར་དམར་པོ་ཟླ་བ་དམར་པོས་བསྐོར་བར་བསམས་ལ། དེ་ནས་སྔགས་བསྐུལ་བར་མོས་པས་རྡོ་རྗེའི་བཟླས་པ་བརྗོད་པས། ཡི་གེ་དེ་དག་སྙིང་ག་ནས་བྱུང་སྟེ། བསྒྲུབ་བྱའི་སྙིང་གར་ནས་ཤིང༌། དེ་ཡང་དེ་ཡི་སེམས་ཀྱི་རང་བཞིན་ཡི་གེ་བཅུ་དམར་པོའི་མདོག་ཏུ་གྱུར་ཏེ། ཡང་དེ་དག་འདྲེས་ཏེ། སླར་ཐིག་དེ་དག་གི་སྙིང་གར་ཟླ་བ་དམར་པོའི་ཡི་གེ་ཡང་དམར་པོ་ལ་བསྟིམ་མོ། །འདི་ལྟ་བུའི་རྣལ་འབྱོར་ནི་མཆོག་ཡིན་པས་ན། རྣལ་འབྱོར་འདི་ནི་ཉི་མ་བདུན་ན་འཁོར་ལོས་སྒྱུར་བ་ཡང་དབང་དུ་འགྱུར་ཏེ། ཇི་སྲིད་འཚོའི་བར་དུ་དབང་དུ་འགྱུར་རོ་ཞེས་གསུངས་སོ། །ལས་དེ་དག་ནི་བསམ་གཏན་མ་ཡིན་པས་འགྲུབ་པར་མི་འགྱུར་བས་ན། སྔགས་པ་ཤིན་ཏུ་མཉམ་གཞག་ཅིང༌། །བསམ་གཏན་ལ་ནི་བརྟན་པར་བྱ། །ཞེས་གསུངས་སོ། །རྒྱུད་ཅེས་བྱ་བ་ནི་རྟོག་པ་རྫོགས་པ་གསང་བའོ། །ལྷག་མ་རྣམས་ནི་ཕྱོགས་འགའ་ཞིག་སྦྱིན་པ་ཡང་དགག་པའོ། །སྔགས་ཀྱང་བསྟན་པར་བྱའོ་ཞེས་བྱ་བ་ནི་ཡི་གེར་བྲིས་པ་ཙམ་ཡང་ངོ༌། །རྣལ་འབྱོར་མ་བཟང་ཞེས་བྱ་བ་ནི་ལྷན་ཅིག་སྐྱེས་པའི་རྣལ་འབྱོར་མ་སྟོང་ཕྲག་ཉི་ཤུ་རྩ་ལྔའོ། །མཁའ་འགྲོ་མ་ཞེས་བྱ་བ་ནི་ཞིང་སྲུང་བ་ལ་སོགས་པའོ། །འཁོར་ལོ་ཞེས་བྱ་བ་ནི་དཀྱིལ་འཁོར་དང་འཁྲུལ་འཁོར་དག་འདིར་གཙོ་བོར་གྱུར་པས་སོ། །རྟོག་པ་ཞེས་བྱ་བ་ནི་ཆོ་གའི་ཚོགས་སོ། །ཕྱོགས་གཅིག་པ་ཞེས་བྱ་བ་ནི་ཀུན་ལས་བཏུས་པའི་མན་ངག་གི་ཕྱོགས་གཅིག་ཏུ་བྱས་པའོ། །བཀླགས་པས་འགྲུབ་པ་ཞེས་བྱ་བ་ནི་སྐྱེས་བུ་དམ་པ་རྣམས་ཀྱིས་སོ། །ཡན་ལག་གསུམ་པ་མངོན་པར་བརྗོད་པའོ། །


DTG047_Page_0238
[མ་དཔེ་གཟིགས་ན་འདིར་གནོན།]

བླ་མ་མི་བསྟེན་མན་ངག་གཏམ་བྲལ་བར། །མི་མཁས་དག་ནི་ངེས་པར་མཆོག་ཡིན་ཞེས། །རྒྱུད་དོན་ལོག་པར་འཆད་ཅིང་བྱིས་པ་བསླུ། །དེ་དག་བསླུ་བ་ཤེས་བྱེད་འདི་བྱས་སློབ་མའི་ཕྱིར། །སྦྱོར་བ་རྒྱ་ཆེན་ཇི་སྐད་བླ་མས་སྨྲས་པ་བཞིན། །འོན་ཀྱང་དགེ་འདིས་འགྲོ་བ་ཐུབ་པའི་དབང་པོར་གྱུར། །དཔལ་རྡོ་རྗེ་འཇིགས་བྱེད་ཀྱི་རྒྱུད་ཀྱི་དཀའ་འགྲེལ། །རྡོ་རྗེ་སློབ་དཔོན་མི་བསྐྱོད་པས་མཛད་པ་རྫོགས་སོ།། །།རྒྱ་གར་གྱི་མཁན་པོ་བི་ནཱ་ཡ་ཙནྡྲ་དང༌། ལོ་ཙཱ་བ་དགེ་སློང་ཆོས་ཀྱི་ཤེས་རབ་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།།

དཔལ་རྡོ་རྗེ་འཇིགས་བྱེད་ཀྱི་རྒྱུད་ཀྱི་མདོར་བཤད་པ་ཞེས་བྱ་བ།
སོ་ན་ཤྲཱི།

དང་པོ། དཀྱིལ་འཁོར་བསྟན་པའི་རྟོག་པའི་བཤད་པ།


DTG047_Page_0238
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། ཤྲཱི་བཛྲ་བྷཻ་ར་བ་ཏནྚ་པ་ནེ་ཀ་ར་ནཱ་མ། བོད་སྐད་དུ། དཔལ་རྡོ་རྗེ་འཇིགས་བྱེད་ཀྱི་རྒྱུད་ཀྱི་མདོར་བཤད་པ་ཞེས་བྱ་བ། བཅོམ་ལྡན་འདས་དཔལ་རྡོ་རྗེ་འཇིགས་བྱེད་ལ་ཕྱག་འཚལ་ལོ། །རྡོ་རྗེ་འཇིགས་བྱེད་མགོན་དཔལ་དང༌། །བླ་མའི་ཞབས་པད་ལ་བཏུད་ནས། །བཤད་པའི་རྒྱུད་ཀྱི་རྒྱལ་པོ་དེའི། །མདོར་བཤད་པ་ནི་བདག་གིས་བརྩམས། དེ་ནས་ཞེས་བྱ་བ་ལ་སོགས་པ་ལ་འདིར་དེ་ནས་ཀྱི་སྒྲ་ནི་མ་ཐག་གོ་བར་བྱེད་དོ། །འོན་གལ་ཏེ་དེ་ལྟ་ཡིན་ན། འདི་སྐད་བདག་གིས་ཞེས་བྱ་བའི་དག་པོར་ནས་ཇི་ལྟར་རྒྱུད་ཀྱི་དང་པོ་བསྟན་ཞེ་ན། དེ་ནས་ཞེས་བྱ་བའི་སྒྲ་བསྟན་པས་གཞུང་གི་གྲངས་སྟོང་ཕྲག་བཅོ་བརྒྱད་པའི་འཇམ་དཔལ་གྱི་རྒྱུད་ལས་འཇིགས་བྱེད་ཆེན་པོའི་སྒྲུབ་ཐབས་ཀྱི་དེ་མ་ཐག་ཏུ་འདི་གྲངས་པའི་རྒྱུད་ཡིན་ནོ་ཞེས་བསྒྲུབ་པར་བྱ་བའི་ཕྱིར་རྒྱུད་ཀྱི་དང་པོར་ལྷག་པར་སྦྱར་བ་ཡིན་ནོ། །ཡང་ལྡག་རབ་བཤད་བྱ་ཞེས་བྱ་བ་ལ་ཡང་དག་པའི་དོན་ནི་འདིར་བཟླས་པ་དང་འཁྲུལ་འཁོར་དང་སྦྱིན་སྲེག་དང་བསམ་གཏན་དང་ལས་རྣམས་སོ། །རྡོ་རྗེ་འཇིགས་བྱེད་སྒྲུབ་ཐབས་ཞེས་བྱ་བ་ནི། །རྡོ་རྗེ་སྟོང་པ་ཉིད་རབ་གསུངས། །འཇིགས་བྱེད་ལས་ཀྱི་རྡོ་རྗེ་འདོད། །དེ་ཡི་བདག་ཉིད་འདི་སྒྲུབ་པ། །རྡོ་རྗེ་འཇིགས་བྱེ་སྦྱོར་བས་སོ། །ཞེས་བྱ་བ་སྟོང་པ་ཉིད་དང་རྡོ་རྗེ་ཐ་མི་དད་པ་རྡོ་རྗེ་སེམས་དཔའི་ངོ་བོ་ནི་རྡོ་རྗེ་འཇིགས་བྱེད་དོ། །དེའི་སྒྲུབ་ཐབས་ནི་ལྷ་རྡོ་རྗེ་འཇིགས་བྱེད་ཀྱི་ངོ་བོར་འདིས་སྒྲུབ་པར་བྱེད་པ་ཡིན་ཏེ། དེ་ལྟར་བྱས་ནས་གཞུང་བཀོད་པ་ལས་རྒྱུད་འདིར་དེ་ཉིད་རྒྱུད་དུ་བྱེད་དེ། །བྱེ་བྲག་ཏུ་རྟོགས་པར་བྱེད་པས་སོ། །དྲག་ཤུལ་ཅན་ཞེས་བྱ་བ་ནི་སེམས་མ་རུངས་པའི་ཕྱིར་རོ། །འཇིགས་བྱེད་ཅེས་བྱ་བ་ནི་གཟུགས་མི་


DTG047_Page_0239
[མ་དཔེ་གཟིགས་ན་འདིར་གནོན།]

སྡུག་པའི་ཕྱིར་རོ། །ཤིང་གཅིག་ཅེས་བྱ་བ་ནི་ཤིང་དེའི་གྲི་བ་མ་ལ་ཤིང་གཞན་གྱིས་མི་རིག་པའོ། །དབང་དུ་བྱ་བ་དང་དགུག་པ་དང་གསད་པ་ཞེས་བྱ་བ་ལ་སོགས་པ་ནི་མདོར་བསྟན་པའི་ཚིག་གོ །རྒྱས་པར་བསྟན་པ་ནི་དངོས་གྲུབ་སྣ་ཚོགས་བཤད་པར་བྱའོ། །རོ་བསྲེགས་པའི་ཐལ་བ་ཞེས་བྱ་བའི་ཚོན་ནི་དཀར་བའོ། །ནག་པོ་ནི་རོ་བསྲེགས་པའི་སོལ་བས་སོ། །སེར་པོ་ནི་བ་བླས་སོ། །དམར་པོ་ནི་དུར་ཁྲོད་ཀྱི་སོ་ཕག་གིས་སོ། །ལྗང་གུ་ནི་ནིམ་པ་དང༌། ནི་སུན་དྷ་ར་ལ་སོགས་པའི་ལོ་མས་སོ། །རྡུལ་ཚོན་དེ་རྣམས་ཀྱིས་དཀྱིལ་འཁོར་བྲི་བར་བྱའོ་ཞེས་པར་འབྲེལ་ལོ། །གྲུ་བཞི་པ་ཞེས་བྱ་བ་མི་མཉམ་པ་མེད་པའི་ཕྱིར་རོ། །སྒོ་བཞི་པ་ཞེས་བྱ་བ་ནི་སྟོང་པ་ཉིད་དང༌། མཚན་མ་མེད་པ་དང༌། །སྨོན་པ་མེད་པ་དང༌། མངོན་པར་འདུ་བྱེད་པ་མེད་པ་རྣམས་ཏེ་རྣམ་པར་ཐར་པའི་སྒོ་བཞི་རྣམ་པར་དག་པས་སྒོ་བཞིའོ། །རྟ་བབས་བཞིས་བརྒྱན་ཞེས་པ་ནི་བསམ་གཏན་བཞི་རྣམ་པར་དག་པའོ། །ཆོས་ཐམས་ཅད་སྟོང་པ་ཉིད་དུ་གོ་བར་བྱ་བའི་ཕྱིར་དྲིལ་བུའི་སྒྲ་སྒྲོགས་པའོ། །གསུང་རབ་ཡན་ལག་དགུ་རྣམ་པར་དག་པས་ན་བ་དན་དགུའོ། །འདོད་པའི་ཡོན་ཏན་ལྔ་རྣམ་པར་དག་པས་དྲི་ཞིམ་པོའི་མེ་ཏོག་གི་ཕྲེང་བ་དང་ལྡན་པའོ། །རྡོ་རྗེ་རིན་ཆེན་ཞེས་བྱ་བ་ནི་རྡོ་རྗེ་ནི་སྟོང་པ་ཉིད་དོ། །རིན་ཆེན་ཞེས་བྱ་བ་ནི་བླ་ན་མེད་པའི་དགའ་བས་རྒྱས་པར་བྱེད་པ་ཡིན་པས་ཞེས་བྱ་བ་སྙིང་རྗེ་ཆེན་པོ་སྟེ། དེ་དག་ཐ་མི་དད་པའོ། །ཞེས་མཚོན་པར་བྱ་བའི་དོན་ཏོ། །ཟླ་བ་ཕྱེད་པ་ནི་འཛག་པ་བྱང་ཆུབ་ཀྱི་སེམས་མཚོན་པར་བྱེད་པའོ། །ཐབས་དང་ཤེས་རབ་རྣམ་པར་དག་པས་རྒྱན་ཕྲེང་དང་རྒྱན་ཕྲེང་ཕྱེད་པའོ།། དེ་དབུས་འཁོར་ལོ་བྲི་བྱ་བ། །རེའུ་མིག་དགུ་པ་ཞེས་བྱ་བ་ནི་གོ་སླའོ། །སྒོ་བཞིའི་གྲྭ་རྣམས་སུ་ཡང་ནི་སྒོ་བཞི་རྣམས་ཀྱི་ཉེ་བར་རོ། །རོ་ལངས་ཆེན་པོ་ཞེས་བྱ་བ་ནི་རོ་ལངས་ཏེ། ལག་པ་གཉིས་པ། གདོང་གཅིག་པ་མིག་དམར་བ་གསུམ་ཡོད་པ་སྐྲ་སེར་སྐྱ་གྱེན་དུ་ཕྱོགས་པ་གཅེར་བུ་ཁ་མཆེ་བ་གཙིགས་པ། ཁ་དོག་ནག་པོ་ལག་པ་གཡས་ན་གྲི་གུག་གདེངས་པ། གཡོན་ན་ཁྲག་གིས་བཀང་བའི་ཐོད་པ་འཛིན་པ་རྣམས་སོ། །གཞག་པར་བྱའོ་ཞེས་བྱ་བ་ནི་བྲི་བར་བྱའོ། །མར་ཁུ་ཆེན་པོ་ཞེས་བྱ་བ་ལ་སོགས་པ་ནི་གོ་སླའོ། །སྔར་སྤྱོད་པ་བྱས་པ་ཞེས་བྱ་བ་ནི་བསྙེན་པ་བྱས་པའོ། །ཧ་ཧ་ཞེས་བྱ་ཞིང་ཞེས་


DTG047_Page_0240
[མ་དཔེ་གཟིགས་ན་འདིར་གནོན།]

པ་ནི་གད་མོ་རྣམས་བགད་ཅིང་ངོ༌། །ཤིན་ཏུ་མཉམ་པར་བཞག་སྟེ་ཞེས་པ་ནི་རྡོ་རྗེ་འཇིགས་བྱེད་ཀྱི་རྣལ་འབྱོར་དང་ལྡན་པར་རོ། །དེ་དབུས་བསྒྲུབ་བྱ་ཞེས་བྱ་བ་ནི་མངོན་པར་འདོད་པའི་དངོས་གྲུབ་བོ། །དེའི་སྟེང་དུ་ཞེས་བྱ་བ་ནི་དེ་ལ་ཞོན་པའོ། །ནམ་ཞིག་སྔགས་པས་མ་གྲུབ་ན། །ཞེས་བྱ་བ་ནི་བཅོམ་ལྡན་འདས་མཉེས་ན་ཕྱག་རྒྱ་ཆེན་པོ་འང་སྟེར་བར་བྱེད་དོ། །ནམ་ཞིག་རྣལ་འབྱོར་པ་བསོད་ནམས་མ་ཡིན་པའི་དབང་གིས་མ་གྲུབ་ན། དེའི་ཚེ་ལས་ཕྲན་ཚེགས་རྣམས་ངེས་པར་འགྲུབ་པར་འགྱུར་རོ་ཞེས་དད་པ་ཉེ་བར་འཕེལ་བར་བྱ་བའི་དོན་དུའོ། །འདི་ནི་ཞེས་བྱ་བ་ནི་ཡོངས་སུ་རྫོགས་པའོ། །འཇམ་དཔལ་ཞེས་བྱ་བ་ནི་འཇམ་དཔལ་གྱི་སྤྲུལ་པའོ། །དཀྱིལ་འཁོར་རྒྱས་པར་བསྟན་པ་ཞེས་བྱ་བ་ནི་དཀྱིལ་འཁོར་ཞེས་བྱ་བ་ནི་རྡུལ་ཚོན་གྱི་དཀྱིལ་འཁོར་རོ། །རྟོག་པ་གང་དུ་རྒྱས་པར་བསྟན་པ་དེ་ལ་དེ་སྐད་ཅེས་གསུངས་སོ། །འོ་ན་ཇི་ལྟར་དང་པོ་རྡུལ་ཚོན་གྱི་དཀྱིལ་འཁོར་བསྟན་ཞེ་ན། དབང་མ་བསྐུར་བར་རྒྱུད་དུ་གསུངས་པའི་ལས་མི་བྱ་བ་དང༌། རྒྱུད་ཀྱང་བལྟ་བར་མི་བྱའོ་ཞེས་རྟོགས་པར་བྱ་བའི་ཕྱིར་དང་པོ་ཉིད་དུ་རྡུལ་ཚོན་གྱི་དཀྱིལ་འཁོར་བསྟན་པར་རིགས་སོ། །རྫོགས་སོ་ཞེས་བྱ་བ་ནི་ཡང་དག་པར་ཐོབ་པ་སྟེ་རབ་ཏུ་ཐོབ་པའོ། །འདི་ནི་རྡོ་རྗེ་འཇིགས་བྱེད་ཀྱི་རྣལ་འབྱོར་གྱི་རྒྱུད་ལས་རྟོག་པ་དང་པོའི་བཤད་པའོ།། །།

གཉིས་པ། ལས་ཐམས་ཅད་འགྲུབ་པ་བསྟན་པའི་རྟོག་པའི་བཤད་པ།


DTG047_Page_0240
[མ་དཔེ་གཟིགས་ན་འདིར་གནོན།]

དགོས་པ་མེད་པར་སུ་ཡང་འཇུག་པར་མི་འགྱུར་བ་ཡིན་པས་དགོས་པ་བསྟན་པའི་དོན་དུ། དེ་ནས་ཞེས་བྱ་བ་ལ་སོགས་པ་དངོས་གྲུབ་སྣ་ཚོགས་ཀྱི་རྟོག་པ་གསུངས་པ། ཤིན་ཏུ་མ་རུངས་པའི་སྔགས་པ་ཞེས་བྱ་བ་ནི། བསད་པ་དང་བསྐྲད་པ་དང་དབྱེ་བའི་ལས་གསུམ་པ་ཁྲོས་པའི་སེམས་ཀྱིས་བྱེད་པ་ཡིན་ནོ་ཞེས་བྱ་བ་ནི་ལྷག་མ་ཡིན་ནོ། །མེ་གཉིས་ཀྱི་དབུས་སུ་ཞེས་བྱ་བ་ནི་མེ་ནི་ར་ཡིག་གོ །གང་ལ་རྟོག་ཅེ་ན་མེའི་ས་བོན་ཡིན་པའི་ཕྱིར་ཏེ། རྒྱུ་ལ་འབྲས་བུ་བཏགས་པའི་ཕྱིར་རོ་ཞེས་བྱ་བ་ཁོ་ནར་ཐོབ་པོ། །ཧཱུཾ་བརྒྱད་ཅེས་བྱ་བ་ནི་ཕྱོགས་སུའོ། །ཟུར་རྣམས་སུ་ཡི་གེ་ཕཊ་ཅེས་བྱ་བྱ་བ་ནི་ཕྱོགས་བྲལ་དུ་ཕཊ་ཡིག་བརྒྱད་བྲིའོ་ཞེས་བྱ་བ་དང་འབྲེལ་ཏོ། །མ་ཡིན་ཏེ་རིམས་ཀྱིས་ཐེབས་པར་བྱ་བར་འདོད་ན་ཞེས་བྱ་བ་ནི་གང་གི་ཚེ་རྣལ་འབྱོར་བས་རིམས་ཀྱིས་ཐེབས་པར་བྱ་བར་འདོད་པ་དེའི་ཚེ། ཆོ་ག་འདི་བྱ་སྟེ་མཚོན་གྱིས་བསྣུན་པའམ་སྟེང་ནས་འགེགས་པའི་མིའི་ཐོད་པ་ལ་སེན་རྩིའི་ཁུ་བའམ།


DTG047_Page_0241
[མ་དཔེ་གཟིགས་ན་འདིར་གནོན།]

ས་དཀར་རྡོ་རྒྱུས་ཀྱིས་རིམས་མངོན་པར་བྲིས་ཏེ་དེ་ལ་ཚ་བའི་རིམས་ནི་དམར་པོ་སྐྲ་དམར་ཞིང་གྱེན་དུ་ཕྱོགས་པའོ། །གྲང་བའི་རིམས་ནི་དཀར་པོ་སྐྲ་འཕྱང་བ་ཁྲོ་བ་དང་བཅས་པ་ཞེས་བྱ་བ་ནི་གཉི་ག་ཡང་རྐང་པ་གསུམ་པ་ལག་པ་གསུམ་པ་ཡིན་ནོ། །ཕྱི་ནས་རོ་བསྲེགས་པའི་སོལ་བ་དང་ཐལ་བ་བསྒྲུབ་བྱའི་རྐང་པའི་རྡུལ་དང་ལྷན་ཅིག་ཏུ་བྱས་པས་གཟུགས་བརྙན་འཁྲུལ་འཁོར་འདིར་སྔར་གྱི་ཆོ་ག་ཉིད་ཀྱིས་ལེགས་པར་བྲིས་ལ་དེའི་སྙིང་གར་བཅུག་སྟེ། དུག་དང་ལན་ཚྭ་དང་སྐྱེ་ཚེ་ལ་སོགས་པས་ལེགས་པར་བྱུགས་པ་པདྨ་བྷནྡྷ་གཞན་དུ་གཟུགས་བརྙན་དེ་བཅུག་པ་གཉིས་ཀ་ལ་འདུག་པ་བྱས་ནས་ཐོད་པ་ལ་བྲིས་པ་དེའི་སྟེང་དུ་ཁ་སྦུབ་ཏུ་བཞག་དེ་ནས་དེ་ཡིས་གཟུང་བར་སེམས་ཤིང་མེ་ཐབ་ཀྱི་འོག་ཏུ་བསྲེགས་ཏེ། རྡོ་རྗེ་འཇིགས་བྱེད་ཀྱི་རྣལ་འབྱོར་གྱིས་མཚན་མོ་ཟླ་བ་ལ་བྱས་ན་ངེས་པ་ཁོ་ནར་རིམས་ཀྱིས་འཛིན་པར་འདིར་ཐེ་ཚོམ་མེད་དོ། །བྱ་རོག་གི་ལྷག་མ་ཞེས་བྱ་བ་ནི་བྱ་རོག་གིས་ཡོངས་སུ་ཟོས་པའི་ལྷག་མ་ཡིས་སོ། །བསད་པ་ལ་འཁྲུལ་འཁོར་ལ་ཆེ་གེ་མོ་མཱ་ར་ཡ་ཞེས་སྨོས་ལ་བྲིའོ། །བསྐྲད་པ་ལ་ཆེ་གེ་མོ་ཨུཙྪ་ཏེ་ཞེས་བྱའོ། །དབྱེ་བ་ལ་ཆེ་གེ་མོ་བི་དྭེ་ཥ་ཡ་ཞེས་བྱའོ། །དེ་དག་ལ་སོགས་པས་ལས་དང་རྗེས་སུ་མཐུན་པར་ཐམས་ཅད་ལ་རྟོགས་པར་བྱའོ། །བསད་པ་ལ་གཤིན་རྗེའི་ལྟོ་བར་གནས་པའི་མེའི་དཀྱིལ་འཁོར་དུ་འཁོར་ལོ་བྲིའོ། །དགར་བ་ལ་ནི་རྔ་མོའི་རྒྱབ་ཏུ་གནས་པའི་རླུང་གི་དཀྱིལ་འཁོར་ལའོ། །དྲན་པ་ཞེས་བྱ་བ་ནི་མན་ངག་གིས་ཡི་གེ་ཧའོ། །ཟླ་བ་ཕྱེད་པ་དང་ཐིག་ལེ་དང༌། དབྱངས་ཡིག་དྲུག་པས་བརྒྱན་པ་ཡིན་པར་ཁོང་དུ་ཆུད་པར་བྱའོ། །རེངས་པ་ལ་རི་རབ་ཟུར་བརྒྱད་པས་ཉེ་བར་མཛེས་པའི་དབུས་སོ། །དབང་དུ་བྱ་བ་ལ་བུད་མེད་ཀྱི་ཆོས་ཀྱི་འབྱུང་གནས་ཀྱི་ནང་དུའོ། །དགུག་པ་ལ་རྐང་པ་བརྒྱད་པའི་སེང་གེའི་རྒྱབ་ཏུའོ། །ཞི་བ་ལ་ཟླ་བའོ། །རྒྱས་པ་ལ་ཟླ་བ་སེར་པོའོ། །དབྱེ་བ་ལ་མ་ཧེ་དང་རྟའི་སྙིང་གར་རོ། །ལྐུགས་པར་བྱ་བ་ལ་རའི་སྙིང་གར་རོ། །དེ་དག་ལ་སོགས་པའི་གནས་རྣམས་སུ་ལས་དང་རྗེས་སུ་མཐུན་པར་བྲི་བར་བྱའོ། །ཞི་བར་བྱ་བའི་ཕྱིར་འཁོར་ལོ་དབྱི་བ་ལ། དང་པོར་མཐའི་ཡི་གེ་ཡ། །དབྱི་བྱིན་དང་ནི་གཉི་ག་དང༌། ཕྱིས་ནས་དབུས་ཀྱི་ཡི་གེ་ཡ། །ཡི་གེ་ལྷག་མ་ཅི་བདེ་བར། །འདི་ནི་རྣལ་འབྱོར་གྱི་རྒྱུད་རྡོ་རྗེ་འཇིགས་བྱེད་ལས་རྟོག་པ་གཉིས་པའི་བཤད་པའོ།། །།

གསུམ་པ། སྔགས་བཏུ་བའི་རྟོག་པའི་བཤད་པ།


DTG047_Page_0242
[མ་དཔེ་གཟིགས་ན་འདིར་གནོན།]

རྟོག་པ་གཉིས་པ་གསུངས་པའི་དགོངས་པ་དེ་ཉིད་སྔགས་མེད་པར་འགྲུབ་པར་མི་འགྱུར་བས་སྔགས་ལ་ཐེ་ཚོམ་མེད་པར་བྱ་བའི་དོན་དུ། དེ་ནས་ཞེས་བྱ་བ་ལ་སོགས་པ་སྔགས་བཏུ་བའི་རྟོག་པ་གསུངས་པ། དེ་ནས་ཞེས་བྱ་བ་ལ་སོགས་པ་ནི་གོ་སླའོ། །ཡ་ཡིག་ཕྲ་མ་ཞེས་བྱར་འགྱུར། །ཀྵེ་ཡིག་གཏི་མུག་ཏུ་བརྗོད་དོ། །ཡི་གེ་མ་ནི་ཕྲ་མར་གྲགས། །མེ་ནི་འདོད་ཆགས་དགྲ་གསོད་པའོ། །ཕྲག་དོག་ངོ་བོ་ད་ཡིག་འགྱུར། །ཡཙྪ་ཐོ་བ་དབྱུག་པ་ཉིད། །ནི་ཡིག་ལག་ནི་པདྨ་སྟེ། །རཱ་ཡིག་རལ་གྲི་བསྒྲེང་བའོ། །ཛ་ཡིག་ལྷ་མོ་ཙཱརྩི་ཀཱ། ཕག་མོ་ཡང་ནི་ས་ཡིག་ཉིད། །དོ་ཡིག་དབྱངས་ཅན་མ་རུ་གྲགས། །རུ་ཡིག་རང་བཞིན་གོ་རཱི་ཉིད། །ཎ་ཡོ་ནི་རའི་རང་བཞིན་ཡང༌། །ཐོད་པའི་དུས་ནི་འཇིགས་བྱེད་རྣམས། །ཡི་གེ་བཅུ་བདུན་གྱིས་དེ་དག །ལྷ་བཅུ་བདུན་གྱི་རང་བཞིན་དུ་རྣམ་པར་བསྒོམས་ལ། རང་གི་སྙིང་གའི་ས་བོན་གྱི་འོད་ཟེར་རྣམས་ཀྱིས་གཤིན་རྗེ་དགྲ་ལྷ་བཅུ་བདུན་གྱི་བདག་ཉིད་ཀྱི་ཡེ་ཤེས་ཀྱི་དཀྱིལ་འཁོར་སྤྱན་དྲངས་ལ་མདུན་དུ་རྣམ་པར་བཞུགས་སུ་གསོལ་ལ། མཆོད་ཡོན་ལ་སོགས་པ་ཕུལ་ནས་སྔར་བྲིས་པའི་འཁོར་ལོ་ལ་ཐོ་བ་ལ་སོགས་པའི་རབ་ཏུ་སྦྱོར་བས་བཅུག་ལ། དེ་ནས་ལས་དང་རྗེས་སུ་མཐུན་པར་གསུངས་པའི་རིམ་པས་བདག་ཉིད་རྣམ་པར་བསྒོམས་ལ། སྔགས་ཡོངས་སུ་བཟླས་ཏེ་ལས་རབ་ཏུ་བསྒྲུབ་པར་བྱའོ། །རྣལ་འབྱོར་གྱི་རྒྱུད་རྡོ་རྗེ་འཇིགས་བྱེད་ལས་རྟོག་པ་གསུམ་པའི་བཤད་པའོ།། །།

བཞི་པ། བསྒོམ་པའི་རྟོག་པའི་བཤད་པ།


DTG047_Page_0242
[མ་དཔེ་གཟིགས་ན་འདིར་གནོན།]

དེ་དག་བསྟན་པའི་དགོས་པ་ནི་ལྷའི་དམིགས་པ་མེད་པར་འགྲུབ་པར་མི་འགྱུར་བས་ལྷའི་དམིགས་པའི་དོན་དུ་དེ་ནས་ཞེས་བྱ་བ་ལ་སོགས་པ་སྒྲུབ་ཐབས་ཀྱི་རྟོག་པ་གསུངས་པ། དེ་ནས་ཞེས་བྱ་བ་ནི་སྔས་བཏུ་བའི་དེ་མ་ཐག་ཏུའོ། །རྡོ་རྗེ་འཇིགས་བྱེད་སྒྲུབ་པའི་ཐབས་ཞེས་བྱ་བ་ནི་རྡོ་རྗེ་འཇིགས་བྱེད་དུ་ཐབས་གང་གིས་སྒྲུབ་པར་བྱེད། བདག་ཉིད་དུ་འགྱུར་པར་བྱེད་པ་ནི་དེའི་སྒྲུབ་ཐབས་སོ། །ཡང་དག་རབ་བཤད་བྱ་ཞེས་བྱ་བ་ལ་ཡང་དག་པའི་དོན་ནི་འདིར་བླ་མའི་མན་ངག་གིས་བཤད་པར་བྱའོ། །དེ་ལ་མན་ངག་ནི་འདི་ཡིན་ཏེ། ཆོས་ཐམས་ཅད་བདག་མེད་པ་སྔོན་དུ་སོང་བས་ལྷའི་གཟུགས་སུ་བྱས་ཏེ་ཞེས་བྱ་བ་ནི་ཕྱི་ནས་རྟོགས་པར་བྱའོ། །དང་པོར་རེ་ཞིག་ཅེས་བྱ་བ་ནི་དང་པོར་རོ། །


DTG047_Page_0243
[མ་དཔེ་གཟིགས་ན་འདིར་གནོན།]

དེ་ལ་དགོངས་པ་འདི་ཡིན་ཏེ་དང་པོར་རེ་ཞིག་སྔགས་པས་སྐྱེ་བོ་འགའ་ཞིག་ལ་བརྟེན་ནས་སྟན་བདེ་བ་ལ་འདུག་སྟེ། བདུད་རྩི་ལྔ་ལ་སོགས་པའི་རི་ལུ་ཁར་བཅུག་ལ་རྣལ་འབྱོར་པ་གཅེར་བུ་གཙུག་ཕུད་བཤིག་པ། ཁ་ལྷོར་མངོན་པར་ཕྱོགས་པ་སྟེ། དེ་ནས་རང་གི་སྙིང་གར་ཉི་མ་ལ་གནས་པའི་ས་བོན་གྱི་འོད་རྣམས་ཀྱིས་ཕྱོགས་བཅུའི་འཇིག་རྟེན་གྱི་ཁམས་མངོན་པར་ཁྱབ་སྟེ། སངས་རྒྱས་དང་བྱང་ཆུབ་སེམས་དཔའ་དང༌། ཁྲོ་བོ་ལ་སོགས་པའི་ལྷ་ཚོགས་སྤྱན་དྲངས་ཏེ། མདུན་གྱི་ནམ་མཁའི་ཕྱོགས་སུ་བཞུགས་སུ་གསོལ་ལ། དེ་ནས་སྙིང་གའི་ས་བོན་གྱི་འོད་ཟེར་ལས་བྱུང་བའི་རྡོ་རྗེ་ཙཱ་རྩི་ཀཱ་ལ་སོགས་པའི་ལྷ་མོ་བཞིས་མཆོད་པའི་ཡོ་བྱད་སྣ་ཚོགས་ལག་པའི་པདྨ་ལྟ་བུ་གཟུང་བ་རྣམས་ཀྱིས་ལེགས་པར་མཆོད་དོ། །སྡིག་པ་བཤགས་པ་ལ་སོགས་པ་དང༌། གཤེགས་སུ་གསོལ་བ་བྱས་ནས། དེ་དག་ཐམས་ཅད་བསྒོམས་ལ་ཆོས་ཐམས་ཅད་བདག་མེད་པ་ཞེས་བྱ་བའི་ཚིག་གིས་ཚངས་པའི་གནས་བཞི་བསྒོམས་པ་མཚོན་པའོ། །དེ་ལ་སེམས་ཅན་ཐམས་ཅད་ལ་བུ་གཅིག་པ་ལྟར་སྡུག་པའི་མཚན་ཉིད་ནི་བྱམས་པའོ། །སྡུག་བསྔལ་དང་སྡུག་བསྔལ་གྱི་རྒྱུ་ལས་ཡང་དག་པར་འདོན་པའི་སྙིང་རྗེ་དང༌། བདེ་བ་བརྟན་པ་ཉིད་ཀྱིས་དགའ་བ་དང༌། གཟུང་བ་དང་འཛིན་པའི་རྣམ་པར་རྟོག་པ་ཐམས་ཅད་ལ་བཏང་སྙོམས་སུ་བྱེད་པའི་ཕྱིར་བཏང་སྙོམས་སོ། །དེ་ནས་ཐམས་ཅད་རྟེན་ཅིང་འབྲེལ་བར་འབྱུང་བ་དང༌། མུ་བཞི་དང་བྲལ་བར་རྣམ་པར་བལྟས་ལ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་བྱ་བའི་སྔགས་བརྗོད་ལ་སྔགས་ཀྱི་དོན་མངོན་དུ་བྱེད་ཅིང་བདག་ཉིད་ཁམས་གསུམ་ལ་སྣང་བ་མེད་པར་བྱས་ནས། དེ་ནས་སྨོན་ལམ་གྱི་སྟོབས་ལས་བར་སྣང་ལ་ཡི་གེ་ཨཿ་དམར་པོ་ལས་བྱུང་བའི་ཉི་མའི་སྟེང་དུ་ཧཱུཾ་གི་འོད་ཟེར་ལྔ་འཕྲོ་བ་ཅན་ནོ། དེ་ཡོངས་སུ་གྱུར་པ་ལས་སྣ་ཚོགས་རྡོ་རྗེ། དེ་ཡོངས་སུ་གྱུར་པ་ལས་རྡོ་རྗེ་ར་བ་དང་གུར་དང༌། བླ་རེ་དང༌། ས་གཞི་བསྒོམས་པར་བྱའོ། །དེ་དག་ཐམས་ཅད་བསྒོམས་ལ་ཡང༌། ཡི་གེ་ཡཾ་ལས་རླུང་གི་དཀྱིལ་འཁོར་ཞེས་བྱ་བ་ནི་རྗེས་སུ་ང་རོ་དང་བཅས་པས་སོ། །དྷཱིཿ་ལས་ཞེས་བྱ་བ་ནི་དྷཱིཿ་སེར་པོ་ལས་སོ། །འཛམ་པའི་རྡོ་རྗེ་ཞེས་བྱ་བ་ནི་མགོན་པོ་ཞལ་གཅིག་ཕྱག་གཉིས་པ་ཕྱག་ན་རལ་གྲི་དང་གླེགས་བམ་ཅན། རྡོ་རྗེའི་སྐྱིལ་མོ་ཀྲུང་གི་


DTG047_Page_0244
[མ་དཔེ་གཟིགས་ན་འདིར་གནོན།]

སྦྱོར་བས་རྒྱུའི་རྡོ་རྗེ་འཛིན་པའི་བདག་ཉིད་ཅན་ནོ། །རྒྱུད་དང་རྒྱུད་དུ་གསུངས་པའི་རིམ་པས་འབྲས་བུ་རྡོ་རྗེ་འཆང་གི་ངོ་བོར་བདག་ཉིད་དུར་ཁྲོད་བརྒྱད་ཀྱིས་བརྒྱན་པར་བསྐྱེད་ལ་སྲིད་པ་དང་ཞི་བ་གཉིས་སུ་མེད་པའི་ང་རྒྱལ་མེད་ཅིང༌། ཨོཾ་སྭ་བྷཱ་ཝ་ཤུདྡྷཿ་སརྦ་དྷརྨཱཿ་སཱ་བྷ་ཝ་ཤུདྡྷོ྅ཧཾ། ཞེས་བྱ་བའི་སྔགས་བརྗོད་པར་བྱའོ། །དེ་ནས་མིག་ལ་སོགས་པ་བྱིན་གྱིས་བརླབ་པར་བྱའོ། །དབང་བསྐུར་མི་བསྐྱོད་རྒྱས་གདབ་པ། །དབང་པོ་རྩ་བའི་སྤྱི་བོར་བསྒོམ། །སྒེག་པ་ལ་སོགས་རོ་དང་ལྡན། །ཁྲོ་བོ་གཟུགས་ནི་ཕྱི་རོལ་ལས། །རང་གི་སྙིང་གའི་ས་བོན་གྱི་འོད་ཟེར་ལས་སྣ་ཚོགས་པར་བཞུགས་པའི་སངས་རྒྱས་སྲས་དང་བཅས་པ་རྣམས་སྤྱན་དྲངས་ཏེ་མདུན་དུ་བལྟས་ལ། དེ་རྣམས་ཀྱིས་རྣམ་པར་འཕྲོས་པའོ། །ཙཱ་རྩི་ཀཱ་ལ་སོགས་པ་ཟླ་བ་ལྟ་བུའི་བུམ་པ་བདུད་རྩི་ལྔ་ཡིས་ཡོངས་སུ་གང་བ་གཟུང་བ་དེ་རྣམས་ཀྱིས་བཀྲ་ཤིས་ཀྱི་ཚིགས་སུ་བཅད་པ་སྔོན་དུ་སོང་བས་བདག་ཉིད་ལ་དབང་བསྐུར་བྱེད་པར་བསམས་ནས། རང་གི་སྙིང་གའི་ས་བོན་གྱི་འོད་ཟེར་གྱིས་ཡེ་ཤེས་སེམས་དཔའ་སྤྱན་དྲངས་ལ་མདུན་དུ་བཞུགས་སུ་གསོལ་ཏོ། །མཆོད་ཡོན་དང་ཞབས་བསིལ་ལ་སོགས་པ་ཕུལ་ནས། ཨོཾ་མུངྒར་ཛཿ་ཞེས་བྱ་བའི་སྔགས་ཀྱིས་བཀུག་ལ། ཨོཾ་དཎྜ་ཧཱུཾ་ཞེས་བྱ་བ་འདིས་བཅུག་ཅིང༌། ཨོཾ་པདྨ་པཾ། ཞེས་བྱ་བ་འདིས་བཅིང་ལ། ཨོཾ་ཁཌྒ་ཧོ། ཞེས་བྱ་བ་འདིས་དབང་དུ་བྱ་བའོ། །དེ་ནས་རང་གི་སྙིང་གའི་ས་བོན་ལས་བྱུང་བའི་རྡོ་རྗེ་ཙཱ་རྩི་ཀཱ་ལ་སོགས་པ་རྣམས་ཀྱིས་མཆོད་པའི་ཡོ་བྱད་སྣ་ཚོགས་པ་དག་གིས་མཁས་པས་མཆོད་པར་བྱའོ། །དེ་ནས་འབར་བ་ལ་སོགས་པའི་ཆོ་གས་བསྒྲུབས་པའི་བདུད་རྩི་ལས་ལྕེ་རྡོ་རྗེའི་སྦུ་གུས་དྲངས་ལ་བཟའ་བར་བྱའོ། །བདག་ཉིད་དེའི་ཕྱིར་སྦྱོར་བ་ཉིད། །བདེན་མིན་བརྫུན་པ་མིན་པ་ཉིད། །ལྷ་ཡི་རྣམ་པ་བསྒོམ་པར་བྱ། །དེ་ནས་རྣམ་དག་དྲན་པར་བྱ། །ཐོད་པས་ཐོད་དུ་བྱས་པ་ཞེས་བ་ནི་ཡེ་ཤེས་ལྔའི་རང་བཞིན་ཡིན་པའི་ཕྱིར་རོ། །འཇིགས་སུ་རུང་བ་ཆེན་པོ་ཞེས་བྱ་བ་ནི་བདུད་རྣམས་སྔངས་པར་བྱེད་པའི་ཕྱིར་རོ། །ཐོད་པའི་རྒྱན་གྱིས་བརྒྱན་པ་ཞེས་བྱ་བ་ནི་ཆོས་ཀྱི་དབྱིངས་ནས་བཞེངས་པ་ཡིན་པའི་ཕྱིར་རོ། །ཞབས་བཅུ་དྲུག་ནི་སྟོང་པ་ཉིད་བཅུ་དྲུག་རྣམ་པར་དག་པས་སོ། །གཅེར་བུ་ནི་ཆོས་རྣམས་ཀྱི་སྒྲིབ་པ་ཉིད་གྲོལ་བར་བྱེད་པའི་ཕྱིར་རོ། །མཚན་མ་འགྲེང་བ་ནི་བདེ་བ་ཆེན་


DTG047_Page_0245
[མ་དཔེ་གཟིགས་ན་འདིར་གནོན།]

པོར་རང་བཞིན་གྱིས་སོ། །ཆོས་ཐམས་ཅད་སྟོང་པ་ཉིད་སོ་སོར་བཞག་པའི་ཕྱིར་གཡོན་བརྐྱང་བའི་གོམ་པའོ། །གཏུམ་པ་ཁྲོ་བ་ཡིན་པའི་ཕྱིར་གསུས་པ་ཆེ་བའོ། །སྐྲ་གྱེན་དུ་བརྫེས་པ་ནི་མྱ་ངན་ལས་འདས་པའི་གོ་འཕང་སྟོན་པའི་ཕྱིར་རོ། །ཕེ་ཏའི་སྒྲ་བརྗོད་པ་ནི་སྡང་བ་ལ་སོགས་པ་རྣམས་སྐྲག་པར་བྱེད་པའི་ཕྱིར་རོ། །ཕྱག་སུམ་ཅུ་རྩ་བཞི་ནི་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བཞི་རྣམ་པར་དག་པའོ། །ཡང་དག་པའི་རྩོལ་བ་དང༌། ཡང་དག་པའི་དྲན་པ་དང༌། ཡང་དག་པའི་ཏིང་ངེ་འཛིན་དང༌། བཅོམ་ལྡན་འདས་ཉིད་ཀྱི་སྐུ་གསུང་ཐུགས་ཀྱི་ངོ་བོར་བསྡུས་པའོ། །ཤིན་ཏུ་མཉམ་པར་བཞག་པས་ལུས་དང་ངག་དང་ཡིད་མ་ཡེངས་པས་སོ། །རྟག་ཏུ་ཞེས་བྱ་བ་ནི་དུས་གསུམ་དུའོ། །དེ་ཁོ་ན་ཉིད་ཀྱི་སྦྱོར་བ་ཞེས་བྱ་བ་ནི་བསྒོམ་བྱ་དང་སྡོམ་པ་པོ་དང་སྒོམ་པ་རྣམས་དམིགས་སུ་མེད་པའོ། །གྲི་གུག་ནི་མ་རིག་པ་གཅོད་པའོ། །བྷིནྡི་ཕ་ལ་ནི་གཟུང་བ་དང་འཛིན་པའི་རྣམ་པར་རྟོག་པ་འབྱེད་པའོ། །གཏུན་ཤིང་ནི་དྲན་པ་ཉམས་པ་འཇོམས་པའོ། །ཆུ་གྲི་ནི་སྡིག་པ་གཅོད་པའོ། །རྡོ་རྗེ་རྩེ་གཅིག་པ་ནི་ལུས་ངག་གི་ཉེས་པ་འཇོམས་པའོ། །སྟ་རེ་ནི་སེམས་ཀྱི་མཁྲེགས་པ་གཅོད་པའོ། །མདུང་ནི་ལྟ་བ་ངན་པ་འབིགས་པའོ། །མདའ་ནི་ཀུན་དུ་རྟོག་པའི་ཟུག་རྔུ་འབིགས་པར་བྱེད་པའོ། །ལྕགས་ཀྱུ་ནི་འགུགས་པར་བྱེད་པའི་ཕྱིར་རོ། །མཚོན་ཀ་ཏ་ནི་ལས་ཀྱི་སྒྲིབ་པ་འཇོམས་པར་བྱེད་པའོ། །ཁ་ཊྭཱཾ་ག་ནི་བྱང་ཆུབ་སེམས་ཀྱི་ངོ་བོའོ། །འཁོར་ལོ་ནི་ཆོས་ཀྱི་འཁོར་ལོ་བསྐོར་བའི་ཕྱིར་རོ། །རྡོ་རྗེ་ནི་རོ་ཉམ་པར་འགྱུར་བ་ཡེ་ཤེས་ལྔའི་བདག་ཉིད་དོ། །རྡོ་རྗེ་ཐོ་བ་ནི་སེར་སྣ་འབྱེད་པར་བྱེད་པའོ། །རལ་གྲི་ནི་རལ་གྲི་ལ་སོགས་པའི་དངོས་གྲུབ་སྟེར་བའི་ཕྱིར་རོ། །མཆོག་ཏུ་དགའ་བས་སངས་རྒྱས་ཐམས་ཅད་སྐུལ་བར་བྱེད་པ་ནི་ཌ་མ་རུའོ། །ཁྲག་གིས་བཀང་བའི་ཐོད་པ་ནི་དམ་ཚིག་སྐྱོང་བར་བྱེད་པའོ། །ཚངས་པའི་མགོ་བོ་ནི་སྙིང་རྗེས་འགྲོ་བའི་དོན་མཛད་པའི་ཕྱིར་རོ། །ཕུབ་ནི་བདུད་ལས་རྒྱལ་བའི་ཕྱིར་རོ། །རྐང་པ་ནི་སྒོམ་པ་པོ་ལ་སངས་རྒྱས་ཀྱི་གོ་འཕང་སྟེར་བའི་ཕྱིར་རོ། །ཞགས་པ་ནི་ཡང་དག་པའི་ཡེ་ཤེས་བཅིང་བར་བྱེད་པའོ། །གཞུ་ནི་འཇིག་རྟེན་གསུམ་ལས་རྒྱལ་བའི་ཕྱིར་རོ། །རྒྱུ་མ་ནི་སྟོང་པ་ཉིད་དུ་གོ་བར་བྱེད་པའི་ཕྱིར་རོ། །དྲིལ་བུ་ནི་ཤེས་


DTG047_Page_0246
[མ་དཔེ་གཟིགས་ན་འདིར་གནོན།]

རབ་ཀྱི་ཕ་རོལ་ཏུ་ཕྱིན་པའི་རང་བཞིན་ནོ། །ལག་པ་ནི་ལས་ཐམས་ཅད་བྱེད་པའི་ཕྱིར་རོ། །དུར་ཁྲོད་ཀྱི་རས་ནི་ཆོས་ཐམས་ཅད་བདག་མེད་པ་ལ་མ་རིག་པའི་སྒྲིབ་གཡོགས་འཇོམས་པར་བྱེད་པའོ། །གསལ་ཤིང་གིས་ཕུག་པ་ཞེས་བྱ་བ་ནི་དངོས་པོ་ཐམས་ཅད་སྟོང་པ་ཉིད་དུ་ཕུག་པ་ཡིན་ནོ་ཞེས་རྟོགས་པར་བྱ་བའི་ཕྱིར་རོ། །མེ་ཐབ་ཅེས་བྱ་བ་ནི་ཆོས་ཐམས་ཅད་འོད་གསལ་བ་ཉིད་མཚོན་པར་བྱེད་པའོ། །ཙ་ཤ་ཀ་ནི་སྙིང་རྗེ་བདུད་རྩིས་བཀང་བའོ། །སྡིགས་མཛུབ་ནི་བདུད་རྣམས་ལ་ཐོ་འཚམ་པར་བྱེད་པའི་ཕྱིར་རོ། །འཕན་རྩེ་གསུམ་པ་ནི་ལུས་དང་ངག་དང་ཡིད་རྣམས་ཀྱི་ངོ་བོ་གཅིག་ཏུ་རྟོགས་པར་བྱེད་པའོ། །རླུང་གི་རས་ནི་ཆོས་ཐམས་ཅད་སྒྱུ་མར་མཚོན་པར་བྱེད་པའོ། །གླང་པོ་ཆེའི་པགས་པ་ཞེས་བྱ་བ་ནི་གཏི་མུག་གླང་པོ་ཆེའོ། །ཞབས་གཡས་པ་རྣམས་སུ་མི་ལ་སོགས་པ་བརྒྱད་ནི་དངོས་གྲུབ་ཆེན་པོ་བརྒྱད་རྣམ་པར་དག་པའོ། །ཞབས་གཡོན་པ་རྣམས་སུ་བྱ་རྒོད་ལ་སོགས་པ་བརྒྱད་ནི་དབང་ཕྱུག་ཆེན་པོ་བརྒྱད་རྣམ་པར་དག་པའོ། །ཞལ་དགུ་ནི་ཡན་ལག་དགུའི་ཆོས་སྟོན་པས་སེམས་ཅན་ཡོངས་སུ་སྨིན་པར་བྱེད་པས་ནའོ། །ཁམས་གསུམ་པ་རྣམས་ལ་བདག་ཉིད་ཡིན་པའི་ཕྱིར་མ་ཧེའི་ཞལ་ལོ། །བདེན་པ་གཉིས་རྣམ་པར་དག་པས་རྭ་གཉིས་སོ། །ཕྱག་རྒྱ་ལྔ་ཞེས་བྱ་བ་ནི་དེ་བཞིན་གཤེགས་པའི་ལྔའི་རང་བཞིན་ནོ། །སངས་རྒྱས་ཀྱི་ཆོས་ཀྱིས་སེམས་ཅན་རྣམས་འཚེད་པར་བྱེད་པས་སྟེང་གི་ཞལ་དམར་པོ་ཁྲག་འཛག་པའོ། །འཇམ་དཔལ་གྱི་སྤྲུལ་པ་མཚོན་པའི་ཞལ་དགུ་པ་སེར་པོའོ། །གཞོན་ནུའི་རྒྱན་གྱིས་བརྒྱན་པ་ནི་གཞོན་ནུའི་ངོ་བོའི་ཕྱིར་རོ། །ཟུར་ཕུད་ལྔའི་ཐོད་ཅན་ནི་རྣམ་པ་ལྔ་རྣམ་པར་དག་པས་སོ། །དུས་གསུམ་དུ་གཟིགས་པར་བྱེད་པའི་ཕྱིར་སྤྱན་གསུམ་མོ། །ལྷའི་རྣལ་འབྱོར་ལ་སོགས་པས་དེ་ལྟར་བདག་ཉིད་རྣམ་པར་བལྟས་ལ། ཇི་སྲིད་ཡིད་ནི་མི་སྐྱོ་བར། །དེ་སྲིད་རྣལ་འབྱོར་པས་སྔགས་བཟླ། །སྔགས་ཀྱི་ཡི་གེ་གང་དག་བཟླས་པ་དེ་དག་རང་གི་སྙིང་གར་ཉི་མའི་དཀྱིལ་འཁོར་གྱི་སྟེང་དུ་གཡས་ཕྱོགས་སུ་བསྐོར་བས་ཟླུམ་པོ་བྱས་པ་འོད་ཟེར་དང་བཅས་པ་རྣམས་བལྟ་ཞིང༌། །དབུགས་བྱུང་བ་སྒོའི་བུ་ག་ནས་བྱུང་བ་སྤྲོ་བའི་སྦྱོར་བས་འགྲོ་བའི་དོན་བྱས་ནས། ཡང་བསྡུས་ལ་དབུགས་རྔུབ་པའི་སྣའི་བུག་ནས་བཅུག་ལ་གནས་པའོ་ཞེས་ཡང་དང་ཡང་དུ་ཇི་སྲིད་མི་སྐྱོ་བའི་མཐར་ཐུག་པར་ཆོ་ག་འདི་ཉིད་ཀྱིས་བཟླས་པར་བྱའོ། །དེ་ནས་སྐྱོ་ན་ཆོ་ག་ཇི་ལྟ་བ་བཞིན་དུ་གཏོར་མ་བྱིན་ལ་ཡེ་ཤེས་


DTG047_Page_0247
[མ་དཔེ་གཟིགས་ན་འདིར་གནོན།]

སེམས་དཔའ་གཤེགས་སུ་གསོལ་ལ་ལྷའི་རྣལ་འབྱོར་གྱིས་གནས་པར་བྱའོ། །འདི་ནི་རྣལ་འབྱོར་གྱི་རྒྱུད་ལས་རྡོ་རྗེ་འཇིགས་བྱེད་བསྒོམ་པའི་རྟོག་པ་སྟེ་བཞི་བ་བཤད་པའོ།། །།

ལྔ་པ། བྲིས་སྐུའི་ཆོ་གའི་རྟོག་པའི་བཤད་པ།


DTG047_Page_0247
[མ་དཔེ་གཟིགས་ན་འདིར་གནོན།]

ལྷའི་བསྒོམ་པ་དེ་ཉིད་གསལ་པོར་བྱ་བའི་དོན་དུ་དེ་ནས་ཞེས་བྱ་བ་ལ་སོགས་པ་རས་རིས་ཀྱི་རྟོག་པ་གསུངས་པ། དེ་ནས་ཞེས་བྱ་བ་ལ་སོགས་པ་ནི་གོ་སླའོ། །རྣམ་པར་རྟོག་པ་མེད་པ་ཞེས་བྱ་བ་ནི་དེ་ཁོ་ན་ཉིད་ཤེས་པའོ། །རི་མོ་མཁན་བཟང་པོ་ཞེས་བྱ་བ་ནི་དམ་ཚིག་བསྟེན་པའོ། །གསང་བ་ཞེས་བྱ་བ་ནི་ཏིང་ངེ་འཛིན་མ་འཁྲུལ་བའོ། །བྱང་བ་ཞེས་བྱ་བ་ནི་རི་མོའི་ལས་ལའོ། །དཔའ་བོའི་རིམ་པ་ཞེས་བྱ་བ་ནི་ཆང་དང་ཤ་ལ་ཉེ་བར་རོལ་ཅིང་དགའ་བའི་སེམས་སོ། །དུད་ཆེན་པོ་ཕྲེང་བ་ཞེས་བྱ་བ་ནི་དུང་ཆེན་པོའི་ཕྲེང་བ་སྟེ་དེ་རྣམ་པར་སྦྱང་བར་བྱས་ནས་སོ། །དེ་ལ་འདི་ནི་རྣམ་པར་སྦྱང་བའི་མན་ངག་སྟེ་རི་ལུ་སོ་སོར་ཧཱུཾ་ལས་དཔལ་རྡོ་རྗེ་འཇིག་བྱེད་ཀྱི་རྣམ་པར་བལྟས་ནས་སམ། ཡང་ན་ཁྲག་འཛག་པའི་མི་མགོའི་ཕྲེང་བའི་རང་བཞིན་དུ་རྣམ་པར་བསྒོམ་ལ་གསང་སྔགས་བཟླས་པར་བྱའོ་ཞེས་བྱ་བ་དང་འབྲེལ་ཏོ། །འདི་ནི་རྡོ་རྗེ་འཇིགས་བྱེད་རྣལ་འབྱོར་གྱི་རྒྱུད་ལས་རྟོག་པ་ལྔ་པའི་བཤད་པའོ།། །།

དྲུག་པ། སྦྱིན་སྲེག་གི་ལས་ཀྱི་ཆོ་ག་རྒྱ་ཆེ་བའི་རྟོག་པའི་བཤད་པ།


DTG047_Page_0247
[མ་དཔེ་གཟིགས་ན་འདིར་གནོན།]

སྦྱིན་སྲེག་ལ་རབ་ཆགས་པ་ཡི། །སེམས་ཅན་རྣམས་ལ་ཆོ་ག་མཛད། །ལས་རྣམས་ཐམས་ཅད་རབ་བསྒྲུབ་པར། །དཔལ་ལྡན་རྡོ་རྗེ་སེམས་དཔས་བསྟན། །སྦྱིན་སྲེག་གི་ལས་ཀྱི་ཆོ་ག་ཞེས་བྱ་བ་ནི་གོ་སླའོ། །གང་གིས་བསད་པར་འདོད་ན་ཞེས་བྱ་བ་ནི་གང་གི་ཚེ་བསད་པར་འདོད་པར་ཏེ། རྣལ་འབྱོར་པས་དེའི་ཚེ་དུར་ཁྲོད་དུ་སོང་ནས་བརྟན་པོར། །རྡོ་རྗེ་འཇིགས་བྱེད་ཀྱི་རྣལ་འབྱོར་གྱིས། རོ་བསྲེགས་པའི་མེ་ལ་འཆད་པར་འགྱུར་བའི་རིམ་པས་མེ་ལྷ་ལ་སོགས་པའི་ཞལ་དུ་རྫས་ཀྱི་སྦྱིན་སྲེག་བྱའོ། །ཡང་ན་ཁྱིམ་དུ་གནས་ལ་དབེན་པར་བྱས་ལ་བཅུ་བཞི་ལ་ཟུར་གསུམ་དམར་པོ། སོར་ཉི་ཤུའི་ཚད། སོར་ལྔ་གཉིས་བརྐོས་ལ་རྡོ་རྗེའི་ཕྲེང་བས་བརྒྱན་པའི་མེ་ཐབ་དམར་པོ་བྱས་ནས་འདིར་དུར་ཁྲོད་ཀྱི་མེའམ། གདོལ་པའི་མེའི་དབུས་སུ་པཾ་ལས་བྱུང་བའི་སྣ་ཚོགས་པདྨའི་དབུས་སུ། མེ་གསུམ་པའི་དབུས་རཾ་ལས་བྱུང་བའི་མེ་ལྷ་ཁ་དོག་དཀར་པོ་ཞལ་གསུམ་པ་ཕྱག་དྲུག་པ། ཕྱག་གཡས་ན་ཕྲེང་བ་དང༌། གཞན་གྱིས་མི་འཇིགས་པ་དང༌། གཡོན་པ་དབྱུ་གུ་གསུམ་པ་བསྣམས་པ། གཞན་གྱིས་རིལ་བ་སྤྱི་བླུགས་བསྣམས་པ། གཞན་


DTG047_Page_0248
[མ་དཔེ་གཟིགས་ན་འདིར་གནོན།]

གྱིས་གྲི་གུག་དང་ཐོད་པ་བསྣམས་པའོ། །གཡོན་པ་བརྐྱང་བའི་གོམ་པས་གནས་པ། །ཁྲོ་བོ་རྒྱན་གྱིས་བརྒྱན་པ། དེའི་སྙིང་གར་རང་གི་ས་བོན་གནས། དེ་ནས་ཡེ་ཤེས་ཀྱི་མེ་ལྷ་སྤྱན་དྲངས་ལ། མཆོད་ཡོན་དང་ཞབས་བསིལ་ལ་སོགས་པ་ཕུལ་ནས། དམ་ཚིག་པ་བཅུག་ལ་མཆོད་པ་ལ་སོགས་པ་བྱས་ཏེ། དེའི་ཞལ་དུ་ཡི་གེ་རཾ་བཀོད་ལ་ཅུང་ཟད་དབུལ་བར་བྱ་སྟེ། ཨོམ་ཨགྣ་སེ་སྭཱ་ཧཱ། ཞེས་བྱ་བ་ནི་སྔགས་འདིས་སོ། །དེའི་སྙིང་གར་རྡོ་རྗེ་འཇིགས་བྱེད་བསྟན་པའི་གཟུགས་བསྟན་པའི་རིམ་པ་བསམས་ལ། མིག་ལ་སོགས་པ་བྱིན་གྱིས་བརླབ་པ་སྔོན་དུ་འགྲོ་བས་ཡེ་ཤེས་སེམས་དཔའ་སྤྱན་དྲངས་པ་ལ་སོགས་པ་བྱས་ནས། མཆོད་པ་ལ་སོགས་པ་བྱས་ལ་དེའི་ཞལ་དུ་ཡི་གེ་རཾ་བཀོད་ལ། བདག་ཉིད་རྡོ་རྗེ་འཇིགས་བྱེད་ཁ་དོག་དང་ལྡན་པའི་རྣལ་འབྱོར་དང་ལྡན་པས་སྦྱིན་རྫས་སྲེག་ནས་གསུངས་པ་ལྟར་འགྱུར་རོ། །བསང་དང་བསྐྲད་པ་དང༌། དབྱེ་བ་ལ་སོགས་པ་དྲག་ཤུལ་སྤྱོད་པའི་ལས་རྣམས་ནི་བཅུ་བཞི་ལ་མ་རུངས་པའི་སེམས་ཀྱིས་ཞེས་བྱ་བ་ནི་ཁྱད་པར་རོ། །བསད་པའི་མེ་ཐབ་ཇི་ལྟ་བར་དབྱེ་བའི་ཡང་ངོ༌། །དེ་ནས་བསྐྲད་པར་འདོད་ན་ཞེས་བྱ་བ་ནི་གང་གི་ཚེ་བསྐྲད་པར་འདོད་པ་དེའི་ཚེ། ཁྲུ་དོའི་ཚད་ལ་ཁྲུ་གང་ཙམ་བརྐོས་ལ། རྡོ་རྗེའི་ཕྲེང་བས་བརྒྱན་པ་སྔོན་པོ་སྟེ། དེར་གསུངས་པ་ཡི་རིམ་པ་ཡིས། །ཐམས་ཅད་ལས་ལ་སྦྱིན་སྲེག་བྱའོ། །དེ་ནས་ཞི་བར་འདོད་ན་ཡང་ཞེས་བྱ་བ་ནི། ཡར་ངོ་ཚེས་གཅིག་ལ་ཁྲུ་གང་བའི་ཚད་ལ་ཁྲུ་ཕྱེད་བྲུས་པ་ཟླུམ་པོ་དཀར་པོ་འཁོར་ལོའི་ཕྲེང་བས་བརྒྱན་པའི་མེ་ཐབ་བྱས་ནས་ནད་སོགས་ཞི་བར་བྱ་བར་འདོད་པས་ཞེས་བྱ་བ་ནི་ཞི་བ་དགེ་བའི་སེམས་ཀྱིས་རྡོ་རྗེ་འཇིགས་བྱེད་ཁ་དོག་དཀར་པོའི་རྣལ་འབྱོར་གྱིས་སྔར་བཞིན་དུ་ཐམས་ཅད་མེ་ཐབ་བྱས་ལ། གསུངས་པའི་རྫས་ཀྱིས་སྦྱིན་སྲེག་བྱས་ན་ཞི་བར་འགྱུར་རོ། །དེ་ནས་རྒྱས་པར་འདོད་ན་ཞེས་བྱ་བ་ནི་དེའི་ཚེ་ཟུར་བཞི་པའི་སེར་པོ་ཁྲུ་གཉིས་པའི་ཚད་ལ་ཁྲུ་གང་ཙམ་བྲུས་པ་རིན་པོ་ཆེའི་ཕྲེང་བས་བསྐོར་བའི་སྦྱིན་སྲེག་གི་ཐབ་ཏུ་སྔར་བཞིན་དུ་ཐམས་ཅད་བྱས་ལ་རྡོ་རྗེ་འཇིགས་བྱེད་སེར་པོའི་རྣལ་འབྱོར་གྱིས་ཁ་བྱང་ཅུ་བལྟས་ཏེ་རྒྱས་པའི་སེམས་ཀྱིས་ཟླ་བ་ཉ་ལ་གསུངས་པའི་རྫས་རྣམས་ཀྱིས་སྦྱིན་སྲེག་བྱས་ན་རྒྱས་པར་འགྱུར་རོ། །ཡང་ན་འགུགས་པར་འདོད་ན་ཞེས་བྱ་བ་ནི་གང་གི་ཚེ་


DTG047_Page_0249
[མ་དཔེ་གཟིགས་ན་འདིར་གནོན།]

འགུགས་པར་འདོད་པ་དེའི་ཚེ། བརྒྱད་ལ་སྔར་བཞིན་དུ་ཐབ་ཁུང་བྱས་ལ་སྔར་བཞིན་དུ་ཐམས་ཅད་བྱས་ནས་དེར་རྡོ་རྗེ་འཇིགས་བྱེད་ཁ་དོག་དམར་པོའི་རྣལ་འབྱོར་གྱིས་ཆགས་པའི་སེམས་ཀྱིས་ཁ་ནུབ་ཏུ་བལྟས་ལ་གསུངས་པའི་རྫས་རྣམས་ཀྱིས་སྦྱིན་སྲེག་བྱས་ན་འགུགས་པར་འགྱུར་རོ། །འགུགས་པ་ཇི་ལྟ་བ་དེ་བཞིན་དབང་ལ་ཡང་ངོ༌། །འདི་ནི་རྣལ་འབྱོར་གྱི་རྒྱུད་རྡོ་རྗེ་འཇིགས་བྱེད་ལས་རྟོག་པ་དྲུག་པའི་བཤད་པའོ།། །།

བདུན་པ། བསམ་གཏན་གྱི་ལས་བསྒྲུབ་པ་བརྟག་པའི་རྟོག་པའི་བཤད་པ།


DTG047_Page_0249
[མ་དཔེ་གཟིགས་ན་འདིར་གནོན།]

རྟག་ཏུ་སྔགས་པས་བསམ་གཏན་བསྟན། །གསང་སྔགས་བཟླས་པས་དུབ་གྱུར་པ། །དེ་ལ་ཕན་ཕྱིར་ཀུན་མཁྱེན་གྱིས། །རྟོག་པ་བདུན་པ་གསུངས་པ་ཡིན། །དེ་ལ་ཞེས་བྱ་བ་ལ་སོགས་པ་གོ་སླའོ། །བྱེ་བྲག་ནི་འདི་ཁོ་ན་སྟེ། གལ་ཏེ་སྔགས་པས་གསོད་པར་བྱེད་ན། རང་ཉིད་རྡོ་རྗེ་འཇིགས་བྱེད་རྣལ་འབྱོར་བ་དམིགས་ནས། རང་གི་སྙིང་གར་ཉི་མ་ལ་གནས་པའི་ས་བོན་ལས་ངེས་པར་འབྱུང་བའི་ཁྲོ་བོའི་ཚོགས་དུ་མས་བསྐོར་བའི་སྤྲུལ་པའི་གཟུགས་ཀྱིས་སོང་ནས། བསྒྲུབ་བྱའི་སྙིང་གར་སོང་སྟེ། བསྒྲུབ་བྱའི་སྙིང་གར་བཞུགས་ནས། དེ་བྱིན་གྱིས་རློབ་པར་བྱེད་པའོ། །ལྷ་ལེགས་པར་མཆོད་དེ་གསོལ་བ་གདབ་པར་བྱའོ། །འདི་ནི་རྣམ་པ་འདི་ལྟ་བུའི་ལས་བགྱིད་པ། དེས་པ་ཁོ་ནར་དམྱལ་བར་འཆི་བ་ལགས་ཀྱིས། དེ་བས་འདི་ཡོངས་སུ་བོར་ལ་ཁྱེད་ཅག་གཤེགས་ཤིག ། དེས་ན་དེ་དག་བསྲུང་བ་དང་བཅས་པ་རང་གི་གནས་སུ་བཀུག་ནས་མཆོད་ཡོན་ལ་སོགས་པ་ཕུལ་ལ། རང་གི་ཞལ་གྱི་ལམ་ནས་བཅུག་ལ་སྙིང་གའི་ས་བོན་གྱིས་སྦྱར་བ་དང་ལེགས་པར་མཉེས་པར་བྱས་ལ་གཞག་པར་བྱའོ། །བསྲུང་བའི་ལྷ་བཟུང་ནས་ནམ་མཁའ་ལ་དོང་ངོ༌། །དེ་ནས་བསྒྲུབ་བྱའི་ལུས་སྟོང་པར་བལྟས་ལ་ལས་དེ་དག་བྱའོ། །དཔག་ཚད་བརྒྱར་གནས་པའི་སྐྱེས་བུ་ཡང་བཟུང་སྟེ་ཞེས་པ་ནི། ན་ཚོད་དང་མདོག་དང་མཚན་མ་དང༌། གཟུགས་དང་མིང་རྣམས་ཤེས་པར་བྱས་ལ། བསམ་གཏན་བརྩམ་མོ་ཞེས་བྱ་བར་འབྲེལ་ཏོ། །ལག་ན་ལྕགས་ཀྱུ་དང་ཞགས་པ་འཛིན་པ་ཞེས་བྱ་བ་ནི་ལྕགས་ཀྱུ་ཞགས་པ་འཛིན་པའོ། །གཤིན་རྗེ་གཟུགས་ཅན་ཞེས་བྱ་བ་ནི་པདྨ་གཤིན་རྗེ་གཤེད་ཀྱི་གཟུགས་ཞལ་གཅིག་པ་ཕྱག་གཉིས་པའོ། །མ་ཧེའི་གདོང་གི་སྦྱོར་བ་ཞེས་པ་ནི་མ་ཧེའི་ཞལ་གྱི་རྣལ་འབྱོར་དང་ལྡན་པས་སོ། །པདྨ་འདབ་མ་བརྒྱད་པ་ཞེས་བྱ་བ་ནི་དཀར་པོའོ། །དེའི་ཟེ་འབྲུ་ཧྲཱིཿ་ཡི་


DTG047_Page_0250
[མ་དཔེ་གཟིགས་ན་འདིར་གནོན།]

ས་བོན་བདུད་རྩི་འཛག་པའོ། །དེའི་འདབ་མ་བརྒྱད་ལ་ཨི་དཀར་པོ་བརྒྱད་དོ། །སྤྱི་བོར་ཨ་ལས་བྱ་བ་ནི་ཡི་གེ་ཨ་ཡོངས་སུ་གྱུར་བ་ལས་ཟླ་བའི་དཀྱིལ་འཁོར་ལ་གནས་པའི་ཡི་གེ་ཨ་ལས་བྱ་བར་འབྲེལ་ཏོ། །འདི་ནི་རྣལ་འབྱོར་གྱི་རྒྱུད་ལས་དཔལ་རྡོ་རྗེ་འཇིགས་བྱེད་ལས་རྟོག་པ་བདུན་པའི་བཤད་པའོ།། །།རྡོ་རྗེ་འཇིགས་བྱེད་རྒྱུད་ལ་ནི། །མདོར་བཤད་གསལ་པོ་བྱས་པ་ལས། །བསོད་ནམས་ཐོབ་པ་གང་ཡིན་པས། །དེ་ཡིས་འགྲོ་བ་རྒྱལ་བར་ཤོག །དཔལ་རྡོ་རྗེ་འཇིགས་བྱེད་ཀྱི་རྒྱུད་ཀྱི་མདོར་བཤད་པ། སློབ་དཔོན་སོ་ན་ཤྲཱིས་མཛད་པ་རྫོགས་སོ།། །།མཁས་པ་ཆེན་པོ་ཏ་ཐཱ་ག་ཏའི་ཞལ་ནས་བརྒྱུད་པའོ།

དཔལ་རྡོ་རྗེ་འཇིགས་བྱེད་རྒྱུད་ཀྱི་མདོ་མདོར་བཤད་པ་ཞེས་བྱ་བ།
རྡོ་རྗེ་གྲུབ་པ།

དང་པོ། དཀྱིལ་འཁོར་བསྟན་པའི་རྟོག་པའི་བཤད་པ།


DTG047_Page_0250
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། ཤྲཱི་བཛྲ་བྷཻ་ར་བ་ཏནྟྲ་སཱུ་ཏྲ་བི་ནཱ་མ། བོད་སྐད་དུ། དཔལ་རྡོ་རྗེ་འཇིགས་བྱེད་རྒྱུད་ཀྱི་མདོ་མདོར་བཤད་པ་ཞེས་བྱ་བ། །དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །མགོན་པོ་འཇིགས་བྱེད་དཔལ་ལྡན་བླ་མ་ཡི། །ཞབས་ཀྱི་པདྨ་ལ་ཡང་ཕྱག་འཚལ་ལོ། །དེ་ཡི་རྒྱུད་ཀྱི་རྒྱལ་པོ་བཤད་པ་ནི། །དེ་ཡི་བཀའ་དྲིན་གྱིས་ནི་བྲི་བར་བྱ། །དེ་ནས་ཞེས་བྱ་བ་ལ་སོགས་པ་ལ། དེ་ནས་ཀྱི་སྒྲ་ནི་འདིར་དེ་མ་ཐག་པར་རྟོགས་པར་བྱའོ། །འོ་ན་གལ་ཏེ་དེ་ལྟ་བུ་ཡང་ཇི་ལྟར་རྒྱུད་ཀྱི་དང་པོར་བསྟན་ཞེ་ན། འདི་སྐད་བདག་གིས་ཞེས་བྱ་བ་ལ་སོགས་པ་དང་པོའི་ཚིག་བོར་ཏེ། དེ་ནས་ཞེས་བྱ་བའི་སྒྲ་བསྟན་པ་ནི། འཇམ་དཔལ་གྱི་རྒྱུད་གྲངས་སྟོང་ཕྲག་བཅོ་བརྒྱད་པ་ལས། འཇིགས་བྱེད་ཆེན་པོ་སྒྲུབ་པའི་ཐབས་ཀྱི་རྗེས་ལས་རྒྱུད་འདི་ཕྱུང་བ་སྟེ། དེ་ལྟར་རྟོགས་པར་བྱས་ལ། རྒྱུད་ཀྱི་དང་པོར་སྦྱར་བར་བྱའོ། །ཡང་དེ་ནས་ཀྱི་སྒྲ་ནི་རྟོག་པ་བདུན་པ་མ་ལུས་པའི་སྐབས་སུ་བབ་པའི་དོན་ཏོ། །ཡང་དག་བཤད་ཅེས་བྱ་བ་ནི་ཡང་དག་པའི་དོན་ཏེ་འདིར་བཟླས་པ་དང༌། འཁྲུལ་འཁོར་དང་སྦྱིན་སྲེག་དང༌། བསམ་གཏན་དང༌། ཕྲིན་ལས་དང༌། རྡོ་རྗེ་འཇིགས་བྱེད་ཀྱི་སྒྲུབ་ཐབས་ཞེས་བྱ་བ་ནི། རྡོ་རྗེ་སྟོང་པ་ཉིད་དུ་བརྗོད། །འཇིགས་བྱེད་སྙིང་རྗེར་འདོད་པ་སྟེ། །རྡོ་རྗེ་འཇིགས་བྱེད་སྦྱོར་བ་ལས། །གཉི་ག་དེ་ཡི་བདག་ཉིད་འགྲུབ། །དེ་ལྟར་ན་སྟོང་པ་དང་སྙིང་རྗེ་དབྱེར་མི་ཕྱེད་པའོ། །རྡོ་རྗེ་སེམས་དཔའ་ནི་རྡོ་རྗེ་འཇིགས་བྱེད་དོ། །འདིའི་སྒྲུབ་ཐབས་ནི་སྒྲུབ་པར་བྱེད་པ་སྟེ། གཞུང་གི་ཚོགས་འདི་ཡིས་རྡོ་རྗེ་འཇིགས་བྱེད་ཀྱི་ལྷའི་གཟུགས་འདི་ལྟ་བུར་བྱེད་པའོ། །རྒྱུད་


DTG047_Page_0251
[མ་དཔེ་གཟིགས་ན་འདིར་གནོན།]

ཀྱང་འདི་ཡིན་ཏེ་རྣམ་པར་བཀོད་པ་ལས་བྱུང་བས་ན་དེ་ཉིད་རྒྱུད་དོ། །དྲག་ཤུལ་ཞེས་བྱ་བ་ནི་ཁྲོ་བོའི་ཐུགས་ཉིད་ལས་སོ། །འཇིགས་བྱེད་ཅེས་པ་ནི་རྣམ་པར་འགྱུར་བའི་གཟུགས་ལས་སོ། །ཤིང་གཅིག་ཅེས་བྱ་བ་ནི་ཤིང་གང་ལ་ཤིང་གཞན་གྱི་གྲིབ་མས་མ་ཕོག་པའོ། །དབང་དང་དགུག་པ་དང༌། བསང་བ་ལ་སོགས་པ་ནི་བསྟན་པའོ། །ཉེ་བར་བཤད་པ་ནི་དངོས་གྲུབ་སྣ་ཚོགས་སྒྲུབ་པའི་རྟོག་པ་ལས་བསྟན་ཏོ། །རོ་བསྲེགས་ཐལ་བས་ཞེས་པ་ནི་རྡུལ་ཚོན་དཀར་པོའོ། །དུར་ཁྲོད་ཀྱི་སོལ་བས་ནི་རྡུལ་ཚོན་ནག་པོའོ། །ལྡོང་རོས་ཀྱིས་ནི་སེར་པོའོ། །དུར་ཁྲོད་ཀྱི་སོ་ཕག་གིས་ནི་དམར་པོའོ། །ནིམ་པ་དང༌། ནི་སུན་ད་རའི་ལོ་མ་ལ་སོགས་པས་ནི་ལྗང་གུའོ། །རྡུལ་ཚོན་དེ་རྣམས་ཀྱིས་དཀྱིལ་འཁོར་བྲི་བར་བྱ་ཞེས་པར་འབྲེལ་ཏེ། །གྲུ་བཞི་ཞེས་པ་ནི་མི་མཉམ་པ་མེད་པས་ནའོ། །སྒོ་བཞི་ཞེས་པ་སྟོང་པ་ཉིད་དང་མཚན་མ་མེད་པ་དང༌། སྨོན་པ་མེད་པ་དང༌། མངོན་པར་འདུས་མ་བྱས་པ་སྟེ། རྣམ་པར་ཐར་བའི་སྒོ་བཞི་རྣམ་པར་དག་པའི་སྒོ་རྣམས་སོ། །རྟ་བབས་བཞི་ཡིས་བརྒྱན་ཞེས་པ་ནི་བསམ་གཏན་བཞིའི་རྣམ་པར་དག་པའོ། །དྲིལ་བུའི་སྒྲ་འཁྲོལ་བ་ནི་ཆོས་ཐམས་ཅད་སྟོང་པ་ཉིད་དུ་རྟོགས་པར་བྱེད་པའོ། །བ་དན་དགུ་ནི་གསུང་རབ་ཡན་ལག་དགུའི་རྣམ་པར་དག་པའོ། །དེའི་མེ་ཏོག་གི་ཕྲེང་བ་དྲི་ཞིམ་པོ་ནི་འདོད་པའི་ཡོན་ཏན་ལྔའི་རྣམ་པར་དག་པའོ། །རྡོ་རྗེ་རིན་ཆེན་ཡང་ཞེས་པ་ནི། རྡོ་རྗེ་སྟོང་པ་ཉིད་དོ། །རིན་ཆེན་ཞེས་པ་ནི་བླ་ན་མེད་པའི་དགའ་བ་རྒྱས་པའི་རིན་པོ་ཆེ་སྟེ། སྙིང་རྗེ་ཆེན་པོའོ། །དེ་དག་ནི་གཉིས་སུ་མེད་པ་ཞེས་བྱ་བར་སྟོན་ཏོ། །ཟླ་བ་ཕྱེད་པ་ནི་བྱང་ཆུབ་ཀྱི་སེམས་འཛེག་པའི་རང་བཞིན་དུ་སྟོན་པའོ། །དྲ་བ་དད་དྲ་བ་ཕྱེད་པ་ནི་ཐབས་དང་ཤེས་རབ་རྣམ་པར་དག་པའོ། །དེའི་དབུས་སུ་རེའུ་མིག་དགུ་པ་བྲི་ཞེས་པ་ནི་གོ་སླའོ། །སྒོ་བཞི་རྣམས་སུ་ཞེས་པ་ནི་སྒོ་བཞི་པོ་རྣམས་དང་ཉེ་བ་བསྡུའོ། །རོ་ལངས་ཆེན་པོའི་ཞེས་པ་ནི། རོ་ལངས་ཆེན་པོ་རྣམས་ཏེ། ཕྱག་གཉིས་པ། ཞལ་གཅིག་པ། སྤྱན་གསུམ་འབར་བ། སྐྲ་སེར་པོ་གྱེན་དུ་བརྫེས་པ། གཅེར་བུ་ཞལ་མཆེ་བ་གཙིགས་པ། མདོག་ནག་པོ། ཕྱག་གཡས་ཀྱིས་གྲི་གུག་གསོར་བར་བྱེད་པ། གཡོན་གྱིས་ཁྲག་གིས་བཀང་བའི་ཐོད་པ་འཛིན་པའོ། །གཞག་པར་བྱ་བ་ནི་བྲི་བར་བྱའོ། །མར་ཁུ་ཆེན་པོ་


DTG047_Page_0252
[མ་དཔེ་གཟིགས་ན་འདིར་གནོན།]

ཞེས་བྱ་བ་ལ་སོགས་པ་ནི་གོ་སླའོ། །སྔོན་དུ་བྱས་པ་ཞེས་པ་ནི་སྔོན་དུ་བསྙེན་པ་བྱས་པའོ། །ཧ་ཧ་ཞེས་སྒྲོགས་བྱེད་ཅེས་པ་གད་མོ་བརྒྱད་ཀྱིས་རྣམ་པར་བྱེད་པའོ། །ཤིན་ཏུ་མཉམ་པར་གཞག་ཅེས་པ་ནི་རྡོ་རྗེ་འཇིགས་བྱེད་ཀྱི་རྣལ་འབྱོར་དང་ལྡན་པའོ། །དེའི་དབུས་སུ་བསྒྲུབ་ཅེས་པ་ནི། མངོན་པར་འདོད་པའི་དངོས་གྲུབ་བོ། །དེའི་སྟེང་དུ་ཞེས་པ་ནི་དེ་མནན་པའོ། །གལ་ཏེ་སྔགས་པས་མ་གྲུབ་ན་ཞེས་པ་ནི། བཅོམ་ལྡན་འདས་དགྱེས་ཏེ། ཕྱག་རྒྱ་ཆེན་པོ་སྟེར་བ་ལས་བརྒྱ་ལམ་ན་རྣལ་འབྱོར་པ་བསོད་ནམས་མེད་པའི་དབང་གི་ཆ་ཡིན་པ་དེའི་ཚེ། དམན་པའི་ལས་དེ་ཡིས་གདོན་མི་ཟ་བར་འགྲུབ་བོ། །དེ་དག་གི་དད་པས་བསྐྱེད་པར་བྱ་བའི་དོན་ཏོ། །དེ་དག་ནི་ཞེས་པ་ནི་ཡོངས་སུ་རྫོགས་པའོ། །འཇམ་དཔལ་ཞེས་པ་ནི་འཇམ་དཔལ་གྱི་སྤྲུལ་པའོ། །དཀྱིལ་འཁོར་ངེས་པར་བསྟན་ཞེས་པ་ནི། དཀྱིལ་འཁོར་རྡུལ་ཚོན་གྱི་དཀྱིལ་འཁོར་རོ། །ངེས་པར་བསྟན་པ་ནི་གང་གི་ཚེ་བརྟགས་པ་དེ་དེ་བཞིན་དུ་སྟོན་པའོ། །འོ་ན་ཇི་ལྟར་རྡུལ་ཚོན་གྱི་དཀྱིལ་འཁོར་དང་པོར་བསྟན་ཞེ་ན། དབང་མ་བསྐུར་བར་རྒྱུད་ལས་གསུངས་པའི་ལས་མི་བྱ་ཞིང༌། རྒྱུད་ཉིད་ཀྱང་མཐོང་བར་བྱ་བ་མ་ཡིན་པ་དེ་ལྟར་རྟོག་པར་བྱ་བའི་ཕྱིར་དང༌། དང་པོ་ཉིད་དུ་རྡུལ་ཚོན་གྱི་དཀྱིལ་འཁོར་བསྟན་པ་ནི་རིགས་པའོ། །རྫོགས་སོ་ཞེས་པ་ནི་ཡང་དག་པར་ཐོབ་པ་སྟེ། རབ་ཏུ་ཐོབ་པའོ། །དེ་དག་ནི་རྡོ་རྗེ་འཇིགས་བྱེད་རྣལ་འབྱོར་གྱི་རྒྱུད་ལས་བརྟག་པ་དང་པོའི་བཤད་པའོ།། །།

གཉིས་པ། ལས་ཐམས་ཅད་འགྲུབ་པ་བསྟན་པའི་རྟོག་པའི་བཤད་པ།


DTG047_Page_0252
[མ་དཔེ་གཟིགས་ན་འདིར་གནོན།]

དགོས་པ་མེད་པར་ནི་སུ་ཡང་འཇུག་པར་མི་འགྱུར་བ་འདིས་ན། དགོས་པ་བསྟན་པའི་དོན་དུ། དེ་ནས་ཞེས་བྱ་བ་ལ་སོགས་པའོ། །དངོས་གྲུབ་སྣ་ཚོགས་སྒྲུབ་པའི་རྟོག་པ་གསུངས་སོ། །སྔགས་པས་ཤིན་ཏུ་ཁྲོས་པས་ཞེས་བྱ་བ་ནི། བསད་པ་དང༌། བསྐྲད་པ་དང༌། དབྱེ་བ་དང༌། ལས་གསུམ་སྟེ། ཁྲོས་པའི་སེམས་ཀྱིས་བྱའོ་ཞེས་པ་ལྷག་མའོ། །མེ་གཉིས་ཀྱི་དབུས་སུ་ཞེས་པ་ནི་མེ་ནི་རེ་བའོ། །གང་ལས་ཤེས་ཤེ་ན། མེའི་ས་བོན་ཡིན་པའི་ཕྱིར་ཏེ། རྒྱུ་ལ་འབྲས་བུ་བཏགས་པས་དེ་ཉིད་ཀྱིས་རྙེད་དོ། །ཧཱུཾ་བརྒྱད་ཅེས་བྱ་བ་ནི་ཕྱོགས་རྣམས་སུའོ། །ཟུར་རྣམས་སུ་ཕཊ་ཀྱི་ཡི་གེ་ཞེས་པ་ནི། ཕྱོགས་བྲལ་རྣམས་སུ་ཕཊ་ཀྱི་ཡི་གེ་བརྒྱད་བྲིའོ་ཞེས་འབྲེལ་ཏོ། །ཡང་ན་རིམས་ཀྱིས་ཟིན་པར་འདོད་ན་ཞེས་བྱ་བ་ནི། གང་གི་ཚེ་རྣལ་འབྱོར་བས་རིམས་ཀྱིས་ཟིན་པར་འདོད་པ་


DTG047_Page_0253
[མ་དཔེ་གཟིགས་ན་འདིར་གནོན།]

དེའི་ཚེ་ཆོ་ག་ནི་འདི་ཡིན་ཏེ། མཚོན་གྱིས་ཕོག་པའམ་སྦྱངས་པའི་མིའི་ཐོད་པ་ལ་རྒྱ་སྐྱེགས་ཀྱི་ཁུ་བའམ། རྡོ་རྒྱུས་ཀྱིས་རིམས་མངོན་པར་བྱའོ། །དེ་ལ་ཚ་བའི་རིམས་ནི་དམར་པོ་སྐྲ་གྱེན་དུ་འབར་བའོ། །གྲང་བའི་རིམས་ལ་ཡང་དཀར་པོ་གསུས་པ་ཆེ་བ་སྐྲ་འཕྱང་ཞིང་དུ་བ་ཞེས་པའོ། །གཉིས་ཀ་ཡང་རྐང་པ་གསུམ་པ་ལག་པ་གསུམ་པ་ཞེས་པའོ། །ཕྱི་ནས་རོ་བསྲེགས་པའི་སོལ་བ་དང༌། ས་དང་ཐལ་བ་དང་བསྒྲུབ་བྱའི་རྐང་བའི་རྡུལ་དང་ལྷན་ཅིག་བསྲེགས་པ་ལས་བྱས་པའི་བསྒྲུབ་བྱའི་གཟུགས་བརྙན་གྱི་སྙིང་ག་རུ་སྔར་ཆོ་ག་ཉིད་ཀྱིས་བྲིས་པའི་འཁྲུལ་འཁོར་འདི་གཞུག་པར་བྱ་ཞིང༌། དུག་དང་ཚ་དང་སྐེ་ཚེ་ལ་སོགས་པས་ཀྱང་བྱུགས་ལ། པདྨའི་སྣོད་གཞན་ཞིག་ཏུ་གཟུགས་དེ་གཞུག་པར་བྱའོ། །གཉི་ག་ལ་ཡང་དགུག་ཅིང་གཞུག་པར་བྱས་ནས། བྲིས་པའི་ཐོད་པའི་སྟེང་དུ་ཁ་སྦུབ་ཏུ་སྦྱིན་ནོ། །དེའི་རྗེས་ལ་དེ་ཡིས་གཟུང་བར་བསམ་ཞིང༌། མེ་ཐབ་ཀྱི་འོག་ཏུ་བསྲེགས་ཏེ། རྡོ་རྗེ་འཇིགས་བྱེད་ཀྱི་རྣལ་འབྱོར་བས། མཚན་ཐོག་ཐག་བཟླས་ན་དེས་པ་ཉིད་དུ་རིམས་ཀྱིས་ཟིན་པར་འགྱུར་བར་ཐེ་ཚོམ་མེད་དོ། །བྱ་རོག་གི་ལྷག་མ་ཞེས་པ་ནི་བྱ་རོག་གིས་ཟོས་པའི་ལྷག་མས་སོ། །བསད་པ་ལ་ནི་ཆེ་གེ་མོ་མཱ་ར་ཡ་ཞེས་པས་སྤེལ་བའི་འཁྲུལ་འཁོར་བྲིའོ། །བསྐྲད་པ་ལ་ནི་ཆེ་གེ་མོ་ཨུཙྪ་ཏ་ཡ་ཞེས་སོ། །དབྱེ་བ་ལ་ནི་ཆེ་གེ་མོ་བི་དྭེ་ཥ་ཞེས་པས་སོ། །དེ་ལྟ་བུ་ལ་སོགས་པ་ལས་དང་རྗེས་སུ་མཐུན་པར་ཀུན་ལ་ཤེས་པར་བྱའོ། །བསད་པ་ལ་ནི་གཤིན་རྗེའི་ལྟོ་བ་ལ་གནས་པའི་མེའི་དཀྱིལ་འཁོར་བྲི་བར་བྱའོ། །བསྐྲད་པ་ལ་རྔ་མོའི་རྒྱབ་ཏུ་གནས་པའི་རླུང་གི་དཀྱིལ་འཁོར་ལའོ། །དྲན་པ་ཞེས་བྱ་བ་ནི་ཧ་ཡིག་སྟེ་མན་ངག་ལས་ཧ་ཡིག་ཟླ་ཕྱེད་ཐིག་ལེ་དབྱངས་དྲུག་པས་བརྒྱན་པར་བྱའོ་ཞེས་རྟོགས་པར་བྱའོ། །རེངས་པ་ལ་ནི་རི་རབ་བཅོ་བརྒྱད་ཀྱིས་ཉེ་བར་བརྒྱན་པའི་དབུས་སོ། །དབང་ལ་ནི་བུད་མེད་ཀྱི་ཆོས་འབྱུང་གི་དབུས་སོ། །དགུག་པ་ལ་ནི་རྐང་པ་བརྒྱད་པ་སེང་གེའི་རྒྱབ་ཏུའོ། །ཞི་བ་ལ་ནི་ཟླ་བའོ། །རྒྱས་པ་ནི་ཟླ་བ་སེར་བའོ། །དབྱེ་བ་ནི་མ་ཧེ་དང་སྟག་གཉིས་ཀྱི་སྙིང་གར་རོ། །དེ་ལྟ་བུ་ལ་སོགས་པའི་གནས་རྣམས་ནི་ལས་དང་རྗེས་སུ་མཐུན་པས་བྲི་བར་བྱའོ། །ཞི་བའི་འཁོར་ལོ་བྱ་བ། ཡ་དང་ཐ་མ་ཡ་ཡིག་ནི། །དབྱི་བར་བྱ་སྟེ་ནི་གཉིས་ཀྱང༌། །ཕྱི་ནས་དཀྱིལ་དུ་ཡ་ཡིག་སྟེ། །ཡི་གེ་ལྷག་མ་ཅི་བདེ་བའོ། །དེ་དག་ནི་རྡོ་རྗེ་འཇིགས་བྱེད་ཀྱི་རྣལ་འབྱོར་གྱི་རྒྱུད་ལས་རྟོག་པ་གཉིས་པའི་བཤད་པའོ།། །།

གསུམ་པ། སྔགས་བཏུ་བའི་རྟོག་པའི་བཤད་པ།


DTG047_Page_0254
[མ་དཔེ་གཟིགས་ན་འདིར་གནོན།]

རྟོག་པ་ལས་གསུངས་པའི་དགོངས་པ་དེ་ཉིད་ཀྱང༌། སྔགས་མེད་ན་མི་འགྲུབ་པས། སྔགས་འདི་ལ་ཐེ་ཚོམ་མེད་པའི་དོན་དུ། དེ་ནས་ཞེས་བྱ་བ་ལ་སོགས་པས་སྔགས་བཏུ་བའི་རྟོག་པ་གསུངས་པའོ། །དེ་ནས་ཞེས་བྱ་བ་ནི་གོ་སླའོ། །ཡ་ཡིག་ཞེ་སྡང་ཉིད་དུ་འགྱུར། །ཀྵེ་ཡི་ཡི་གེ་གཏི་མུག་བརྗོད། །མ་ཡིག་ཕྲ་མ་རུ་ནི་གསུངས། །མེ་ནི་འདོད་ཆགས་དགྲ་གསོད་པའོ། །ད་ཡིག་ཕྲག་དོག་ལ་ཡིག་འགྱུར། །ཡཙྪ་ཐོ་བ་དབྱུག་པ་དང༌། །ནི་ཡིག་ཕྱག་ན་པདྨའོ། །རཱ་ཡི་ཡི་གེ་རལ་གྲི་གཙོ། །ཛ་ཡིག་ལྷ་མོ་ཙཱ་རྩི་ཀཱ། ཕག་མོ་ཡང་ནི་ས་ཡིག་སྟེ། །དོ་ལ་དབྱངས་ཅན་མ་རུ་བརྗོད། །རུ་ནི་གཽ་རཱིའི་རང་བཞིན་ཅན། །ཎ་ཡོ་ནི་རའི་རང་བཞིན་ཡང༌། །ཐོད་པ་གཤིན་རྗེ་འཇོམས་པའོ། །ཡི་གེ་བཅུ་བདུན་པོ་དེ་རྣམས་ནི། ལྷ་བཅུ་བདུན་གྱི་རང་བཞིན་དུ་བསམས་པར་བྱས་ལ། རང་གི་སྙིང་གའི་ས་བོན་གྱི་འོད་ཟེར་གྱིས་གཤིན་རྗེ་གཤེད་ཀྱི་ལྷ་བཅུ་བདུན་གྱི་བདག་ཉིད་ཡེ་ཤེས་ཀྱི་དཀྱིལ་འཁོར་ནས་སྤྱན་དྲངས་ཏེ། མདུན་དུ་བཞུགས་པ་ལ་མཆོད་ཡོན་ལ་སོགས་སྦྱིན་ཞིང༌། སྔར་བྲིས་པའི་འཁྲུལ་འཁོར་ལ་ཐོ་བ་ལ་སོགས་པའི་སྦྱོར་བས་རབ་ཏུ་གཞུག་པར་བྱའོ། །ལས་དང་རྗེས་སུ་མཐུན་པར་གསུངས་པའི་རིམ་པས་བདག་ཉིད་བསྒོམ་ཞིང་སྔགས་ཡོངས་སུ་བཟླས་པས་ལས་རབ་ཏུ་བསྒྲུབ་པར་བྱའོ། །དེ་དག་ནི་རྡོ་རྗེ་འཇིགས་བྱེད་རྣལ་འབྱོར་གྱི་རྒྱུད་ལས་རྟོག་པ་གསུམ་པའི་བཤད་པའོ།། །།

བཞི་པ། བསྒོམ་པའི་རྟོག་པའི་བཤད་པ།


DTG047_Page_0254
[མ་དཔེ་གཟིགས་ན་འདིར་གནོན།]

དགོངས་པ་གསུངས་པ་དེ་ཡང་ལྷ་ལ་དམིགས་པ་མེད་ན་མི་འགྲུབ་ཅེས་པས་ལྷ་ལ་དམིགས་པའི་དོན་དུ། དེ་ནས་ཞེས་བྱ་བ་ལ་སོགས་པ་སྒྲུབ་པའི་ཐབས་ཀྱི་རྟོག་པ་གསུངས་སོ། །དེ་ནས་ཞེས་པ་ནི་སྔགས་བཏུ་བའི་རྟོག་པའི་དེ་མ་ཐག་ཏུའོ། །རྡོ་རྗེ་འཇིགས་བྱེད་ཀྱི་སྒྲུབ་ཐབས་ཞེས་པ་ནི། བསྒྲུབ་པར་བྱ་བ་ཡང་བདག་ཉིད་བསྒྲུབ་པར་བྱ་བ་སྟེ། རྡོ་རྗེ་འཇིགས་བྱེད་ཉིད་ཀྱི་ཐབས་དེས་སྒྲུབ་པར་བྱེད་པའོ། །ཡང་དག་རབ་བཤད་ཅེས་བྱ་བ་ནི་ཡང་དག་པའི་དོན་ཏེ། འདིར་བླ་མའི་མན་ངག་ནི་བཤད་པའོ། །དེ་ལ་མན་ངག་ནི་འདི་ཡིན་ཏེ། ཆོས་ཐམས་ཅད་བདག་མེད་པ་སྔོན་དུ་སོང་བས་ལྷ་ལ་དམིགས་པར་བྱའོ་ཞེས་པའི་ཚིག་ཕྱི་ནས་རྟོགས་པར་


DTG047_Page_0255
[མ་དཔེ་གཟིགས་ན་འདིར་གནོན།]

བྱའོ། །དང་པོ་ཁོ་ནས་ཞེས་པ་ཉིད་ཐོག་མར་རོ། །དེ་ལ་དགོངས་པ་ནི་འདི་ཡིན་ཏེ། དང་པོ་ཁོ་ནར་སྔགས་པས་དབེན་པའི་གནས་གང་ཡང་རུང་བར་གནས་ཤིང་སྟན་བདེ་བ་ལ་འདུག་སྟེ། བདུད་རྩི་ལ་སོགས་པ་ཁར་བཅུག་ལ། གཅེར་བུ་སྐྲ་གྲོལ་བ། ལྷོར་མངོན་པར་ཕྱོགས་པར་གྱུར་པས། རང་གི་སྙིང་གར་ཉི་མ་ལ་གནས་པའི་འོད་ཟེར་གྱིས་ཕྱོགས་བཅུའི་འཇིག་རྟེན་དུ་མངོན་པར་ཁྱབ་སྟེ། སངས་རྒྱས་དང་བྱང་ཆུབ་སེམས་དཔའ་དང་ཁྲོ་བོ་ལ་སོགས་པའི་ལྷའི་ཚོགས་བཀུག་ནས། མདུན་གྱི་ནམ་མཁའི་ཕྱོགས་སུ་གནས་པར་བྱས་པ་དང༌། རང་གི་སྙིང་གའི་ས་བོན་གྱི་འོད་ཟེར་ལས་བྱུང་བའི་རྡོ་རྗེ་ཙཱ་རྩི་ཀཱ་ལ་སོགས་པའི་ལྷ་མོ་བཞི་པོ་སྣ་ཚོགས་པ་ལ་སོགས་པའི་མཆོད་རྫས་ལག་པ་དག་གིས་བཟུང་སྟེ། ཡང་དག་པར་མཆོད་པ་དང༌། བཤགས་པ་ལ་སོགས་པ་བྱས་ལ་སླར་གཤེགས་པར་བྱའོ། །དེ་ལྟར་ཐམས་ཅད་རྣམ་བསམ་པ། །དེའི་རྗེས་ལ་ཆོས་ཐམས་ཅད་བདག་མེད་པ་ཞེས་བྱ་བའི་ཚིག་གིས་ཚངས་པའི་གནས་བཞི་བསྒོམ་པར་སྟོན་ཏེ། དེ་ལ་བྱམས་པ་ནི། སེམས་ཅན་ཐམས་ཅད་ལ་བུ་གཅིག་པ་ལྟར་བརྩེ་བའི་མཚན་ཉིད་ཅན་ནོ། །སྙིང་རྗེ་ནི་སྡུག་བསྔལ་དང་སྡུག་བསྔལ་གྱི་རྒྱུ་ལས་ཡང་དག་པར་སྒྲོལ་བར་འདོད་པའོ། །དགའ་བ་ནི་བདེ་བ་དེ་ཉིད་ཀྱིས་བརྟན་པར་འདོད་པའོ། །བཏང་སྙོམས་ནི་གཟུང་བ་དང་འཛིན་པའི་རྣམ་པར་རྟོག་པ་ཐམས་ཅད་ཉེ་བར་བཏང་བ་ལགས་སོ། །དེ་ནས་ཐམས་ཅད་རྟེན་ཅིང་འབྲེལ་བར་འབྱུང་བས་མུ་བཞི་དང་བྲལ་བར་རྣམ་པར་བསམ་པར་བྱས་པ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་པའི་སྔགས་བརྗོད་པས་སྔགས་ཀྱི་དོན་མངོན་དུ་བྱས་ཏེ། བདག་ཉིད་དང་ཁམས་གསུམ་པོ་ཡང་སྣང་བ་མེད་པར་བྱའོ། །དེ་ནས་སྨོན་ལམ་གྱི་སྟོབས་ཀྱིས་བར་སྣང་ལ་ཨ་ཡིག་དམར་པོ་ལས་སྐྱེས་པའི་སྟེང་དུ་ཧཱུཾ་ཡིག་ལས་འོད་ཟེར་ལྔ་སྤྲོས་ལ། དེ་ཡོངས་སུ་གྱུར་བའི་སྣ་ཚོགས་རྡོ་རྗེ་ཡོངས་སུ་གྱུར་པ་ལས། རྡོ་རྗེ་ར་བ་དང༌། གུར་དང༌། བླ་རེ་དང༌། ས་གཞི་ཡང་ཡོངས་སུ་བསྒོམ་པར་བྱའོ། །ཡང་དེ་དག་ཐམས་ཅད་བསྒོམ་པར་བྱ་སྟེ་ཕྱེ་ནས། ཡཾ་ལས་རླུང་གི་དཀྱིལ་འཁོར་ཞེས་པ་ནི་ཐིག་ལེ་དང་ཡང་དག་པར་ལྡན་པའོ། །དྷཱིཿ་ཡིག་ཅེས་པ་སེར་པོའོ། །འཇམ་དཔལ་ཞེས་བྱ་བ་ནི།


DTG047_Page_0256
[མ་དཔེ་གཟིགས་ན་འདིར་གནོན།]

མགོན་པོ་ཞལ་གཅིག་ཕྱག་གཉིས་པ། །རལ་གྲི་པོ་ཏི་ཕྱག་ན་བསྣམས། །རྡོ་རྗེ་སྐྱིལ་ཀྲུང་སྦྱོར་བ་སྟེ། །རྒྱུ་ཡི་རྡོ་རྗེ་འཛིན་པ་བདག་ཉིད། །དེ་ནས་རྒྱུད་ལས་གསུངས་པའི་འཆད་པར་འགྱུར་བའི་རིམ་པས། བདག་ཉིད་དུར་ཁྲོད་བརྒྱད་ཀྱིས་བརྒྱན་པའི། །འབྲས་བུ་ཧེ་རུ་ཀའི་གཟུགས་སུ་བྱས་ལ། སྲིད་པ་དང་ཞི་བ་དབྱེར་མེད་པའི་ང་རྒྱལ་དུ་བྱེད་པ། ཨོཾ་སྭ་བྷཱ་ཝ་ཤུདྡྷཿ་སརྦ་དྷརྨཱཿ་སྭ་བྷཱ་ཝ་ཤུདྡྷོ྅ཧཾ། ཞེས་པའི་སྔགས་བརྗོད་པར་བྱའོ། །དེ་ནས་མིག་ལ་སོགས་པ་བྱིན་གྱིས་བརླབ་པ་དང༌། སྐུ་ལ་སོགས་པ་ཡང་བྱིན་གྱིས་བརླབས་པས་པ་བྱས་ལ། རང་སྙིང་ས་བོན་འོད་ཟེར་གྱིས། །སྣ་ཚོགས་སངས་རྒྱས་སྲས་བཅས་བཞུགས། །བཀུག་ལ་མདུན་དུ་བལྟས་པ་དང༌། །དེ་རྣམས་ལས་སྤྲོས་ཡང་ནི་གང༌། །རྡོ་རྗེ་ཙཱ་རྩི་ཀཱ་ལ་སོགས་པས་བུམ་པ་ཟླ་བ་ལྟ་བུ་བདུད་རྩི་རྣམ་ལྔས་བཀང་བ་བཟུང་སྟེ། དེ་རྣམས་ཀྱིས་བདག་ཉིད་ལ་བཀྲ་ཤིས་ཀྱི་ཚིགས་སུ་བཅད་པ་དང་ཡང་དག་པར་ལྡན་པས་དབང་བསྐུར་བར་རྣམ་པར་བསམ་པར་བྱའོ། །དབང་བསྐུར་བའི་མཐར། མི་བསྐྱོད་ཕྱག་རྒྱ་མགོན་པོ་ཡི། །རྩ་བའི་དབུ་ལ་བསྒོམ་པར་བྱ། །སྒེག་པ་ལ་སོགས་རོ་དང་ལྡན། །ཕྱི་རོལ་དུ་ནི་ཁྲོ་བོའི་གཟུགས། །དེ་ནས་སྙིང་གའི་ས་བོན་གྱི་འོད་ཟེར་གྱིས་ཡེ་ཤེས་སེམས་དཔའ་བཀུག་ཅིང༌། མདུན་དུ་བཞག་པར་བྱས་ལ་མཆོད་ཡོན་དང་ཞབས་བསིལ་ལ་སོགས་མཆོད་པ་དབུལ་ལོ། །དེ་ནས་ཨོཾ་མུངྒ་ར་ཛཿ་ཞེས་པའི་སྔགས་ཀྱིས་དགུག་པ་དང༌། ཨོཾ་དཎྜ་ཧཱུཾ་ཞེས་པས་རབ་ཏུ་གཞུག་པ་དང༌། ཨོཾ་པདྨ་བཾ་ཞེས་པས་རབ་ཏུ་བཅིང་བ་དང༌། ཨོཾ་ཁཌྒ་ཧོཿ་ཞེས་པས་དབང་དུ་བྱ་བ་དང༌། དེ་ནས་རང་གི་སྙིང་གའི་ས་བོན་ལས་བྱུང་བའི་རྡོ་རྗེ་ཙཱ་རྩི་ཀཱ་ལ་སོགས་པ་རྣམས་ཀྱིས་སྣ་ཚོགས་ཀྱི་མཆོད་པའི་རྫས་རྣམས་ཀྱིས་མཁས་པས་མངོན་པར་མཆོད་པར་བྱའོ། །དེ་ནས་བདུད་རྩི་འབར་བ་ལ་སོགས་པའི་ཆོ་གས་བསྒྲུབས་ལ་རྡོ་རྗེ་སྦུ་གུས་དྲང་ཞིང་ལོངས་སྤྱད་པར་བྱའོ། །བདག་ཉིད་ལྷའི་རྣམ་པར་བསྒོམས་ཏེ། དེ་ཉིད་རྣལ་འབྱོར་རོ། །བདེན་མིན་བརྫུན་པ་མ་ཡིན་ཉིད། །དེ་ནས་རྣམ་དག་ཀྱང་དྲན་བྱ། །ཐོད་པས་ཐོད་བྱས་པ་ཞེས་བྱ་བ་ནི། ཡེ་ཤེས་རྣམ་པ་ལྔའི་རང་བཞིན་ནོ། །འཇིགས་སུ་རུང་བའི་ཞེས་བྱ་བ་ནི། བདུད་རྣམས་འཇིགས་པར་བྱེད་པས་སོ། །ཐོད་པའི་རྒྱན་གྱིས་བརྒྱན་ཞེས་བྱ་བ་ནི་ཆོས་ཀྱི་


DTG047_Page_0257
[མ་དཔེ་གཟིགས་ན་འདིར་གནོན།]

དབྱིངས་ལས་སྐྱེས་པའི་ཕྱིར་རོ། །ཞབས་བཅུ་དྲུག་ཅེས་པ་ནི། སྟོང་པ་ཉིད་བཅུ་དྲུག་གི་རྣམ་པར་དག་པའོ། །གཅེར་བུ་ནི་ཆོས་ཐམས་ཅད་སྒྲིབ་པ་མེད་པར་རྟོགས་པའོ། །མཚན་མ་གྱེན་དུ་འགྲེང་བ་ནི། བདེ་བ་ཆེན་པོའི་བདག་ཉིད་དུ་གྱུར་བའི་ཕྱིར་རོ། །ཞབས་གཡོན་བརྐྱང་བ་ནི། ཆོས་ཐམས་ཅད་སྟོང་པ་ཉིད་ཀྱིས་སོ་སོར་ཁྱབ་པའི་ཕྱིར་རོ། །གཏུམ་ཞིང་ཁྲོས་པས་ན་གསུས་པ་ཆེ་བའོ། །སྐྲ་གྱེན་དུ་བརྫེས་པ་ནི་མྱ་ངན་ལས་འདས་པའི་གོ་འཕང་སྟོན་པའོ། །ཕེ་ཏའི་སྒྲ་སྒྲོགས་པ་དང་ལྡན་པ་ནི། མ་རུངས་པ་ལ་སོགས་པ་སྐྲག་པར་བྱེད་པས་ནའོ། །ཕྱག་སུམ་ཅུ་རྩ་བཞི་ནི། བྱང་ཆུབ་ཀྱི་ཕྱོགས་སུམ་ཅུ་རྩ་བཞིའི་རྣམ་པར་དག་པའོ། །ཡང་དག་པའི་རྩོལ་བ་དང༌། ཡང་དག་པའི་དྲན་པ་དང༌། ཡང་དག་པའི་ཏིང་ངེ་འཛིན་གསུམ་ནི། བཅོམ་ལྡན་འདས་ཉིད་ཀྱི་སྐུ་གསུང་ཐུགས་ཀྱི་རང་བཞིན་གྱིས་བསྡུས་པའོ། །ལེགས་པ་དང་མཉམ་པར་བཞག་ཅེས་པ་ནི། ལུས་ངག་ཡིད་གསུམ་རྣམ་པར་གཡེང་བ་མེད་པའོ། །རྟག་ཏུ་ཞེས་པ་ནི་དུས་གསུམ་དུའོ། །དེ་ཁོ་ན་ཉིད་ཀྱི་སྦྱོར་བ་ཞེས་པ་ནི། བསྒོམ་བྱ་དང༌། སྒོམ་པ་པོ་དང༌། བསྒོམ་པ་རྣམས་སུ་མི་དམིགས་པས་སོ། །གྲི་གུག་ནི་མ་རིག་པ་གཅོད་པའོ། །བྷིནྡི་ཕ་ལ་ནི་གཟུང་བ་དང་འཛིན་པའི་རྣམ་པར་རྟོག་པ་འབིགས་པའོ། །གཏུན་ཤིང་ནི་དྲན་པ་ཉམས་པ་འཇོམས་པའོ། །ཆུ་གྲི་ནི་སྲེད་པ་གཅོད་པར་བྱེད་པའོ། །རྡོ་རྗེ་རྩེ་གཅིག་པ་ནི་ལུས་ངག་ཡིད་གསུམ་གྱི་ཉེས་པ་འཇོམས་པའོ། །སྟ་རེ་ནི་སེམས་ཀྱི་སྲ་བའི་བག་ཆགས་འཇོམས་པའོ། །མདུང་ནི་ལྟ་བ་ངན་པ་འབིགས་པའོ། །མངའ་ནི་ཤིན་ཏུ་རྨོངས་པའི་ཟུག་རྔུ་འབིགས་པའོ། །ལྕགས་ཀྱུ་ནི་འགུགས་པར་བྱེད་པའོ། །བེ་དབྱུག་ནི་ལས་ཀྱི་སྒྲུབ་པ་འཇོམས་པའོ། །ཁ་ཊྭཱཾ་ག་ནི་བྱང་ཆུབ་སེམས་ཀྱི་རང་བཞིན་ནོ། །འཁོར་ལོ་ནི་ཆོས་ཀྱི་འཁོར་ལོ་བསྐོར་བ་ལགས་སོ། །རྡོ་རྗེ་ནི་རོ་གཅིག་ཏུ་གྱུར་བའི་ཡེ་ཤེས་ལྔའི་བདག་ཉིད་དོ། །ཐོ་བ་ནི་སེར་སྣ་འཇོམས་པའོ། །རལ་གྲི་ནི་རལ་གྲི་ལ་སོགས་པའི་དངོས་གྲུབ་སྟེར་བའོ། །ཅང་ཏེའུ་ནི་མཆོག་ཏུ་དགའ་བའི་སྒྲས་སངས་རྒྱས་ཐམས་ཅད་སྐུལ་བར་བྱེད་པའོ། །ཐོད་པ་ཁྲག་གིས་གང་བ་ནི། དམ་ཚིག་སྐྱོང་བས་ནའོ། །བྲམ་ཟེའི་མགོ་བོ་ནི་ཐུགས་རྗེ་


DTG047_Page_0258
[མ་དཔེ་གཟིགས་ན་འདིར་གནོན།]

ཆེན་པོས་འགྲོ་བའི་དོན་མཛད་པས་ནའོ། །ཕུབ་ནི་བདུད་ལས་རྣམ་པར་རྒྱལ་བས་ནའོ། །རྐང་བ་ནི་སངས་རྒྱས་ཀྱི་སྐུའི་གོ་འཕང་སྟེར་བས་ནའོ། །ཞགས་པ་ནི་ཡང་དག་པའི་ཡེ་ཤེས་སུ་འཆིང་བའོ། །གཞུ་ནི་འཇིག་རྟེན་གསུམ་ལས་རྒྱལ་བའོ། །རྒྱུ་མས་ནི་སྟོང་པ་ཉིད་ཀྱི་སྙིང་པོ་སོ་སོར་རྟོགས་པའོ། །དྲིལ་བུ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་ངོ་བོའོ། །ལག་པ་ནི་ཕྲིན་ལས་ཐམས་ཅད་མཛད་པས་ནའོ། །དུར་ཁྲོད་ཀྱི་རས་ནི་ཆོས་ཐམས་ཅད་བདག་མེད་པ་ལ་མ་རིག་པའི་སྒྲིབ་གཡོགས་སེལ་བའོ། །གསལ་ཤིང་ལ་བཙུགས་ཞེས་པ་ནི། དངོས་པོ་ཐམས་ཅད་སྟོང་པ་ཉིད་ལ་བཙུགས་པ་ཞེས་སོ་སོར་རྟོགས་པའི་ཕྱིར་རོ། །མེ་ཐབ་ཅེས་པ་ནི་ཆོས་ཐམས་ཅད་འོད་གསལ་བར་སྟོན་པས་ནའོ། །ཐོད་ཚལ་ནི་སྙིང་རྗེའི་བདུད་རྩིས་གང་བའོ། །སྡིགས་མཛུབ་ནི་བདུད་རྣམས་བསྡིགས་པར་མཛད་པའོ། །འཕན་རྩེ་གསུམ་ནི་ལུས་ངག་ཡིད་གསུམ་རང་བཞིན་གཅིག་ཏུ་རྟོག་པའོ། །རླུང་གི་རས་ནི་ཆོས་ཐམས་ཅད་སྒྱུ་མར་སྟོན་པའོ། །གླང་པོའི་པགས་པ་ཞེས་པ་ནི་གཏི་མུག་གླང་པོའིའོ། །གཡས་པའི་ཞབས་ཀྱིས། མི་ལ་སོགས་པ་བརྒྱད་པོ་ནི་དངོས་གྲུབ་ཆེན་པོ་བརྒྱད་པོའི་དག་པས་སོ། །གཡོན་པའི་ཞབས་བརྒྱད་ཀྱིས། བྱ་རྒོད་ལ་སོགས་པ་བརྒྱད་ནི། དབང་ཕྱུག་བརྒྱད་ཀྱི་དག་པས་སོ། །ཞལ་དགུ་པོ་འདི་ལྟ་བུས་ནི། ཡན་ལག་དགུའི་ཆོས་སྟོན་པས་སེམས་ཅན་ཡོངས་སུ་སྨིན་པས་ནའོ། །མ་ཧེའི་གདོང་ནི་ཁམས་གསུམ་གྱི་བདག་པོས་ནའོ། རྭ་གཉིས་ནི་བདེན་པ་གཉིས་ནའོ། །ཕྱག་རྒྱ་ལྔ་རྣམས་ནི་དེ་བཞིན་གཤེགས་པ་ལྔའི་རང་བཞིན་ནོ། །སངས་རྒྱས་ཀྱི་སེམས་ཅན་རྣམས་མཆོད་པར་བྱེད་པས་ན། སྟེང་གི་ཞལ་དམར་པོ་འདི་ལྟ་བུ་ཁྲག་འཛག་པའོ། །ཞལ་དགུ་པ་སེར་བ་ནི་འཇམ་དཔལ་གྱི་སྤྲུལ་པ་སྟོན་པས་ནའོ། །བྱིས་པའི་རྒྱན་གྱིས་བརྒྱན་པ་ནི། གཞོན་ནུའི་གཟུགས་ཀྱི་ཕྱིར་ནའོ། །སྤྱི་བོར་རལ་པ་ལྔ་དང་ལྡན་པ་ནི། །མངོན་པར་བྱང་ཆུབ་པ་ལྔའི་དག་པའོ། །སྤྱན་གསུམ་ནི་དུས་གསུམ་སྟོན་པའོ། །དེ་ལྟར་བལྟས་ཏེ་བདག་ཉིད་ནི། །ལྷ་ཡི་བདག་ཉིད་དེར་གཏད་ནས། །སྔགས་བཟླས་དེ་ཚེ་རྣལ་འབྱོར་པ། །ཡིད་ནི་ཇི་ལྟར་མི་སྐྱོ་བར་རོ། །གང་ཡང་རུང་བའི་སྔགས་ཀྱི་ཡི་གེ་ཉིད་བརྗོད་པ་སྟེ། དེ་ཡང་རང་གི་


DTG047_Page_0259
[མ་དཔེ་གཟིགས་ན་འདིར་གནོན།]

སྙིང་གར་ཉི་མའི་དཀྱིལ་འཁོར་གྱི་སྟེང་དུ་གཡས་སྐོར་དུ་མཎྜལ་གྱི་རྣམ་པར་བལྟས་ལ། སྣ་བུག་ནས་འབྱུང་བའི་རླུང་སྤྲོས་པའི་གཟུགས་ཀྱིས་འགྲོ་བའི་དོན་བྱས་ནས། ཡང་བསྡུས་ཏེ་སྣ་བུག་ནས་འཇུག་པའི་རླུང་གིས་རབ་ཏུ་ཞུགས་ཏེ་དེ་ཉིད་དུ་གནས་པར་རོ། །དེ་ལྟར་ཡང་དང་ཡང་མི་སྐྱོའི་བར་དུ་ཆོ་ག་ཉིད་ཀྱིས་བཟླས་པ་སྟེ། དེ་དག་ནི་བཟླས་པའོ། །དེ་སྐྱོ་བར་གྱུར་ན། ཆོ་ག་ཇི་ལྟ་བར་གཏོར་མ་བྱིན་ལ། ཡེ་ཤེས་སེམས་དཔའ་གཤེགས་སུ་གསོལ་ཏེ། ལྷའི་རྣལ་འབྱོར་དུ་གནས་པར་བྱའོ། །དེ་དག་ནི་རྡོ་རྗེ་འཇིགས་བྱེད་རྣལ་འབྱོར་གྱི་རྒྱུད་ལས་བསྒྲུབ་པའི་རྟོག་པ་སྟེ་བཞི་པའི་བཤད་པའོ།། །།

ལྔ་པ། བྲིས་སྐུའི་ཆོ་གའི་རྟོག་པའི་བཤད་པ།


DTG047_Page_0259
[མ་དཔེ་གཟིགས་ན་འདིར་གནོན།]

དེ་ལྟར་བསྒོམ་པ་གསལ་བའི་དོན་དུ། དེ་ནས་ཞེས་པ་བྲིས་སྐུའི་ཆོ་གའི་རྟོག་པ་གསུངས་པ། དེ་ནས་ཞེས་བྱ་བ་ལ་སོགས་པ་གོ་སླའོ། །རྣམ་པར་རྟོག་པ་མེད་པ་ཅན་ཞེས་པ་ནི། དེ་ཁོ་ན་ཉིད་ཤེས་པའོ། །རི་མོ་མཁན་བཟང་པོ་ཞེས་པ་ནི། དམ་ཚིག་བསྟེན་པའོ། །རྩ་བ་ཞེས་པ་ནི་ཏིང་ངེ་འཛིན་གྱིས་བསྒྲུབ་པའི་སེམས་སོ། །བསྒྲུབ་པས་ཞེས་པ་ནི་རི་མོའི་ལས་ཀྱིས་སོ། །དཔའ་བོའི་རིམ་པ་ཞེས་པ་ནི། ཆང་དང་ཤ་ལ་ཉེ་བར་ལོངས་སྤྱོད་པས། དགའ་བའི་སེམས་ཀྱིས་སོ། །གླེགས་བམ་ལ་ལར་ནི། དཔའ་བོའི་ཚོང་ཞེས་པའི་ཚིག །དེ་ལ་རི་མོ་མཁན་འདོད་པ་དེ་བྱིན་ལ། བྲི་བར་བྱ་ཞེས་འབྲེལ་ཏོ། །ལྷག་མ་ནི་གོ་སླའོ། །དུང་ཆེན་གྱི་ཕྲེང་བ་དེ་རྣམས་དག་པར་བྱ་སྟེ། དེ་ལ་རྣམ་པར་དག་པའི་མན་ངག་ནི་འདི་ཡིན་ཏེ། རྡོག་མ་རེ་རེ་ལ་ཧཱུཾ་ཡིག་ཡོངས་སུ་གྱུར་པ་ལས། དཔལ་རྡོ་རྗེ་འཇིགས་བྱེད་ཆེན་པོའི་ངོ་བོར་བལྟའོ། །ཡང་ན་མིའི་མགོའི་ཁྲག་འཛགས་པའི་ངོ་བོར་བསམས་ཏེ། སྔགས་བཟླས་ཞེས་པ་འབྲེལ་ཏོ། །དེ་དག་རྡོ་རྗེ་འཇིགས་བྱེད་རྣལ་འབྱོར་གྱི་རྒྱུད་ལས་རྟོག་པ་ལྔ་པའི་བཤད་པའོ།། །།

དྲུག་པ། སྦྱིན་སྲེག་གི་ལས་ཀྱི་ཆོ་ག་རྒྱ་ཆེ་བའི་རྟོག་པའི་བཤད་པ།


DTG047_Page_0259
[མ་དཔེ་གཟིགས་ན་འདིར་གནོན།]

སྦྱིན་སྲེག་ལས་ནི་འདོད་རྣམས་ཀྱིས། །སེམས་ཅན་རྣམས་ལ་ཆོ་ག་མཆོག ། རྡོ་རྗེ་སེམས་དཔའ་བསྟན་པ་སྟེ། །ལས་རྣམས་ཐམས་ཅད་རབ་འགྲུབ་པའོ། །སྦྱིན་སྲེག་ལས་ཀྱི་ཆོ་ག་ཞེས་པ་ནི་གོ་སླའོ། །གང་གིས་གསད་པར་འདོད་ན་ཞེས་པ་ནི། གང་ཚེ་རྣལ་འབྱོར་པས་གསད་པར་འདོད་པ་དེའི་ཚེ་དུར་ཁྲོད་དུ་སོང་ལ། གསུངས་པའི་རྡོ་རྗེ་འཇིགས་བྱེད་ཀྱི་རྣལ་


DTG047_Page_0260
[མ་དཔེ་གཟིགས་ན་འདིར་གནོན།]

འབྱོར་གྱིས། དུར་ཁྲོད་ཀྱི་མེ་ལ་འབད་པར་འགྱུར་བའི་རིམ་པས། མེ་ལ་སོགས་པའི་ཞལ་དུ་གསུངས་པའི་རྫས་ཀྱི་སྦྱིན་སྲེག་བྱའོ། །ཡང་ན་བཅུ་བཞི་ལ་ཁྱིམ་དུ་གནས་པ་དང༌། དབེན་པ་བྱས་ལ། ཐབ་ཁུང་གྲུ་གསུམ་དམར་པོ། སོར་ཉི་ཤུའི་ཚད་ལ་ཟབས་སོར་ལྔ་གཉིས་པ་རྡོ་རྗེ་ཕྲེང་བས་བརྒྱན་པར་བྱའོ། །དེར་དུར་ཁྲོད་ཀྱི་མེའམ་གཏུམ་པོའི་མེའི་དབུས་སུ་པཾ་ཡིག་ལས་སྐྱེས་པ་སྣ་ཚོགས་པདྨའི་སྟེང་དུ། མེ་ཉིད་གྲུ་གསུམ་གྱི་དབུས་སུ་རཾ་ལས་སྐྱེས་པའི་མེ་ལྷ་མདོག་ནག་པོ་ཞལ་གསུམ་ཕྱག་དྲུག་པའོ། །གཡས་པའི་ཕྱག་ན་བགྲང་ཕྲེང་དང་གཞན་མི་འཇིགས་པའོ། །གཡོན་པ་ནི་དབྱུ་གུ་གསུམ་པ་འཛིན་པ་དང༌། ལྷག་མ་གཉིས་གྲི་གུག་འཛིན་པའོ། །ཞབས་གཡོན་བརྐྱང་བར་གནས་པའི་ཁྲོ་བོའི་རྒྱན་གྱིས་རྣམ་པར་བརྒྱན་པའོ། དེའི་སྙིང་གར་རཾ་གྱི་ས་བོན་གནས་པ། དེ་ནས་ཡེ་ཤེས་ཀྱི་མེ་ལྷ་དགུག་ལ་མཆོད་ཡོན་དང་ཞབས་བསིལ་ལ་སོགས་པ་ཕུལ་ནས། དམ་ཚིག་ལ་རབ་ཏུ་བཅུག་སྟེ། མཆོད་པ་ལ་སོགས་པ་བྱའོ། །དེའི་ཁ་རུ་རཾ་བཀོད་ལ་ཧ་ཨོཾ་ཨགྣ་ཡེ་སྭཱ་ཧཱ། ཞེས་བྱ་བའི་སྔགས་འདིས་ཅུང་ཟད་བསྲེག་པར་བྱའོ། །ཕྱི་ནས་དེའི་སྙིང་གར་གསུངས་པའི་ཚུལ་གྱིས་རྡོ་རྗེ་འཇིགས་བྱེད་གསུངས་པའི་རིམ་པས་བསམས་ཏེ། མིག་ལ་སོགས་པ་བྱིན་གྱིས་རློབ་པ་སྔོན་དུ་འགྲོ་བ་ཅན་ཡེ་ཤེས་སེམས་དཔའ་དགུག་པ་ལ་སོགས་པ་བྱ་ཞིང༌། མཆོད་པ་ལ་སོགས་པ་བྱའོ། །དེའི་ཁར་ཡང་རེ་ཕ་བསམས་ལ་རང་ཡང་རྡོ་རྗེ་འཇིགས་བྱེད་ནག་པོའི་རྣལ་འབྱོར་གྱི་བདག་ཉིད་རྫས་དེ་དག་གིས་སྦྱིན་སྲེག་བྱ་བ་སྟེ། གསུངས་པར་འགྱུར་བས་སོ། །བསད་པ་དང༌། བསྐྲད་པ་དང༌། དབྱེ་བ་ལ་སོགས་པ་མངོན་སྤྱོད་ཀྱི་ལས་ལ་ནི་ཁྱད་པར་འདི་ཡིན་ཏེ། བཅུ་བཞི་དང་ཁྲོས་པའི་སེམས་སོ། །ཇི་ལྟར་བསད་པའི་ཐབས་སུ་དེ་བཞིན་དུ་དབྱེ་བ་ལ་ཡང་ངོ༌། །དེ་ནས་བསྐྲད་པར་འདོད་པ་ཞེས་པ་ནི། གང་གི་ཚེ་བསྐྲད་པར་འདོད་པ་དེའི་ཚེ། ཐབ་ཁུང་སྔོན་པོ་ཁྲུ་དོའི་ཚད་ལས་ཟབས་སུ་ཁྲུ་གང་ཙམ་གཞུའི་རྣམ་པ་རྡོ་རྗེའི་ཕྲེང་བས་བརྒྱན་པའོ། །དེར་གསུངས་པའི་རིམ་པས་ཐམས་ཅད་བྱས་ཏེ་བསྲེག་པར་བྱ། །ཞེས་བྱའོ། །ཡང་ན་ཞི་བར་བྱེད་པར་འདོད་ན་ཞེས་བྱ་བ་ནི། དེའི་རང་བཞིན་གྱི་ངོ་བོ་


DTG047_Page_0261
[མ་དཔེ་གཟིགས་ན་འདིར་གནོན།]

ཚེས་གཅིག་ལ་ཐབ་ཁུང་བྱ་བ་ཡང་ཟླུམ་ཞིང་དཀར་བ་ཁྲུ་གང་བའི་ཚད་ལ་ཟབས་སུ་ཁྲུ་ཕྱེད་པའོ། །འཁོར་ལོས་བརྒྱན་པའོ། །ཞི་བར་འདོད་པ་ཞེས་པ་ནི། ཞི་བ་སྟེ་དགེ་བའི་སེམས་ཀྱིས་སོ། །རྡོ་རྗེ་འཇིགས་བྱེད་དཀར་པོའི་རྣལ་འབྱོར་གྱིས། མེ་ཐབ་ནི་སྔར་བཞིན་དུ་ཐམས་ཅད་བྱས་ལ། གསུངས་པའི་སྲེག་རྫས་ཀྱིས་སྦྱིན་སྲེག་བྱས་ན་ཞི་བར་འགྱུར་རོ། །དེའི་ཚེ་རྒྱས་པའི་ཐབ་ཁུང་ནི། གྲུ་བཞི་སེར་པོ་ཁྲུ་དོའི་ཚད་ལ་ཟབས་སུ་ཁྲུ་གང་པའི་རིན་པོ་ཆེའི་ཕྲེང་བས་ཡོངས་སུ་བརྒྱན་པའོ། །དེ་སྔར་བཞིན་དུ་ཐམས་ཅད་བྱས་ལ་རྡོ་རྗེ་འཇིགས་བྱེད་སེར་པོའི་རྣལ་འབྱོར་གྱིས་ཁ་བྱང་དུ་བལྟས་ཏེ། ཟླ་བ་ཉ་ལ་རྒྱས་པའི་སེམས་ཀྱིས་སྦྱིན་སྲེག་བྱས་ན་རྒྱས་པར་འགྱུར་རོ། །དེ་ནས་དགུག་པར་འདོད་ན་གང་གི་ཚེ། ཚེས་བརྒྱད་ལ་ཐབ་ཁུང་སྔར་བཞིན་དུ་རླུང་གི་རྣམ་པ་བྱས་ཏེ། ཐམས་ཅད་སྔར་བཞིན་དུ་བྱས་ལ། རྡོ་རྗེ་འཇིགས་བྱེད་དམར་པོའི་རྣལ་འབྱོར་གྱིས། ཆགས་པའི་སེམས་དང་ལྡན་པས་ཁ་ནུབ་ཏུ་བལྟས་ཏེ། གསུངས་པའི་སྲེག་རྫས་ཀྱིས་སྦྱིན་སྲེག་བྱས་ན་ཐེ་ཚོམ་མེད་པར་འགུགས་པར་བྱེད་དོ། །ཇི་ལྟར་འགུགས་པར་བྱེད་པ་དེ་བཞིན་དུ་དབང་ལ་ཡང་ངོ༌། །དེ་དག་ནི་རྡོ་རྗེ་འཇིགས་བྱེད་རྣལ་འབྱོར་གྱི་རྒྱུད་ལས་རྟོག་པ་དྲུག་པའི་བཤད་པའོ།། །།

བདུན་པ། བསམ་གཏན་གྱི་ལས་བསྒྲུབ་པ་བརྟག་པའི་རྟོག་པའི་བཤད་པ།


DTG047_Page_0261
[མ་དཔེ་གཟིགས་ན་འདིར་གནོན།]

གང་གི་ཚེ་སྔགས་པས་བསམ་གཏན་སྔགས་བཟླས་བྱས་པས་དུབ་པ་ན། དེ་ལ་ཕན་ཕྱིར་ཀུན་མཁྱེན་གྱིས། །རྟོག་པ་བདུན་པ་བསྟན་པའོ། །དེ་ནས་ཞེས་བྱ་བ་ནི་གོ་སླའོ། །གལ་ཏེ་སྔགས་པས་གསོད་པར་འདོད་པ་དེའི་ཚེ། བདག་ཉིད་རྡོ་རྗེ་འཇིགས་བྱེད་ཀྱི་རྣལ་འབྱོར་དུ་དམིགས་ལ། རང་གི་སྙིང་གའི་ཉི་མའི་ས་བོན་ལས་བྱུང་བའི་ཁྲོ་བོ་དུ་མའི་ཚོགས་ཀྱིས་བསྐོར་བའི་སྤྲུལ་པའི་གཟུགས་ཀྱིས་སོང་སྟེ། བསྒྲུབ་བྱའི་སྙིང་ལ་རབ་ཏུ་ཞུགས་ནས་དེ་དག་བྱིན་གྱིས་རློབ་པའི་ལྷ་རྣམས་ཡང་དག་པར་མཆོད་ནས་གསོལ་བ་གདབ་སྟེ། འདི་ནི་འདི་ལྟ་བུའི་ལས་བྱེད་པས་ན། གདོན་མི་ཟ་བ་ཉིད་དུ་དམྱལ་བར་འགྲོའོ། །དེའི་ཕྱིར་འདི་ནི་ཁྱེད་རྣམས་ཀྱིས། །ཡོངས་སུ་བཏང་ལ་བྱོན་འཚལ་ལོ། །དེ་ནས་དེ་དག་དང་བཅས་པའི་བསྲུང་བ་ཁྱེར་ནས་རང་གི་གནས་སུ་འོངས་ཏེ། མཆོད་ཡོན་ལ་སོགས་པ་བྱིན་ལ། རང་གི་ཁའི་ལམ་དུ་ཞུགས་ནས། རང་གི་སྙིང་གར་བཀོད་པས་


DTG047_Page_0262
[མ་དཔེ་གཟིགས་ན་འདིར་གནོན།]

མཉེས་ཏེ་གནས་པར་བྱའོ། །བསྲུང་བའི་ལྷ་རྣམས་ནི་ཁྲོ་བོ་རྣམས་ཀྱིས་ཁྱེར་ཏེ་ནམ་མཁའ་ལ་གཤེགས་སོ། །དེ་ནས་སྟོང་པའི་ལུས་སུ་མཐོང་བའི་བསྒྲུབ་བྱ་དེ་ལ་ལས་བྱའོ། །དཔག་ཚད་བརྒྱར་གནས་པའི་སྐྱེ་བོའི་གཟུགས་ཅན་བཟུང་སྟེ་ཞེས་བྱ་བ་ནི། ལོ་དང༌། མདོག་དང༌། མཚན་མ་དང༌། གཟུགས་རྣམས་ཤེས་པར་བྱས་ལ། བསམ་གཏན་བརྩམ་པར་བྱའོ་ཞེས་པར་འབྲེལ་ཏོ། །ལག་ན་ལྕགས་ཀྱུ་ཞགས་པ་ཞེས་བྱ་བ་ནི། ལྕགས་ཀྱུ་དང་ཞགས་པ་འཛིན་པའོ། །གཤིན་རྗེ་གཤེད་ཀྱི་གཟུགས་ཞེས་པ་ནི། ཕྱག་གཉིས་པ། ཞལ་གཅིག་པ་སྟེ། པདྨ་གཤིན་རྗེ་གཤེད་ཀྱི་གཟུགས་སོ། །མ་ཧེའི་གདོང་གི་རྣལ་འབྱོར་དང་ལྡན་པས་སོ། །པདྨ་འདབ་མ་བརྒྱད་པ་ཞེས་པ་ནི། །པདྨ་འདབ་མ་བརྒྱད་པ་དཀར་པོ་སྟེ། །དེའི་ཟེ་འབྲུ་ལ་ཧྲཱིཿ་ཡིག་དཀར་པོ་བདུད་རྩི་འཛག་པའོ། །དེའི་འདབ་མ་བརྒྱད་པ་རྣམས་ལ་ནི་ཨ་ཡིག་དཀར་པོ་བརྒྱད་རྣམས་སོ། །མགོ་ལ་ཨ་དང་ཨ་ཡིག་རྣམས་ཞེས་པ་ནི། ཨ་ཡིག་ཡོངས་སུ་གྱུར་པའི་ཟླ་བའི་དཀྱིལ་འཁོར་ལ། ཨ་ཡིག་གནས་ཞེས་བྱ་བར་འབྲེལ་ཏོ། །དེ་དག་ནི་དཔལ་རྡོ་རྗེ་འཇིགས་བྱེད་རྣལ་འབྱོར་གྱི་རྒྱུད་ལས་རྟོག་པ་བདུན་པའི་བཤད་པའོ།། །།རྡོ་རྗེ་འཇིགས་བྱེད་རྒྱུད་ལས་ནི། །མདོ་མདོར་བཤད་པ་གསལ་བར་བྱས་པ་ཡིས། །བདག་གིས་བསོད་ནམས་གང་ཐོབ་པ། །དེ་ཡིས་འགྲོ་རྣམས་རྒྱལ་བར་ཤོག །དཔལ་རྡོ་རྗེ་འཇིགས་བྱེད་རྣལ་འབྱོར་གྱི་སྐབས་མདོ་མདོར་བཤད་པ་རྫོགས་སོ།། །།སློབ་དཔོན་དཔལ་འཛིན་གྱི་རྗེས་སུ་འབྲངས་བའི་སློབ་དཔོན་དཔལ་ཆེན་པོ་རྡོ་རྗེ་གྲུབ་པས་མཛད་པ་རྫོགས་སོ།

རྡོ་རྗེ་འཇིགས་བྱེད་ཀྱི་རྒྱུད་ཀྱི་དཀའ་འགྲེལ།
གཞོན་ནུ་ཟླ་བ།

དང་པོ། དཀྱིལ་འཁོར་བསྟན་པའི་རྟོག་པའི་དཀའ་འགྲེལ།


DTG047_Page_0262
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། བཛྲ་བྷཻ་ར་བ་ཏནྟྲ་པཉྩི་ཀཱ། བོད་སྐད་དུ། རྡོ་རྗེ་འཇིགས་བྱེད་ཀྱི་རྒྱུད་ཀྱི་དཀའ་འགྲེལ། དཔལ་རྡོ་རྗེ་འཇིགས་བྱེད་ལ་ཕྱག་འཚལ་ལོ། །དཔའ་བོ་རྡོ་རྗེ་འཇིགས་བྱེད་དཔལ་བཏུད་ནས། དཔལ་ལྡན་རྡོ་རྗེ་འཇིགས་བྱེད་ཀྱི། །རྒྱུད་ཀྱི་དགའ་འགྲེལ་ཅུང་ཟད་ནི། །གཞོན་ནུ་ཟླ་བ་ཡིས་ནི་བྱས། །དེ་ནས་ཞེས་བྱ་བ་ལ་སོགས་པ་ནས་ཞེས་པ་ནི་འཇམ་དཔལ་གྱི་རྒྱུད་ཆེན་པོ་ཐམས་ཅད་དང་རྡོ་རྗེ་འཇིགས་བྱེད་ཀྱི་སྒྲུབ་ཐབས་ལས་སོ། །དེ་ནས་ནི་རྗེས་ཐོགས་དང་བཀྲ་ཤིས་ཏེ་བསྟན་བཅོས་ཀྱི་དང་


DTG047_Page_0263
[མ་དཔེ་གཟིགས་ན་འདིར་གནོན།]

པོར་བསྟན་པའོ། །སྒྲུབ་པའི་ཐབས་ཞེས་པ་འདི་ཡང་ཁྱད་པར་དུ་བྱེད། །ཡང་དག་པར་ཞེས་པ་ནི་ཡང་དག་པར་ཕྱེ་ནས་སོ། །རབ་ཅེས་པ་ནི་རབ་ཏུ་བསམས་ནས་སོ། །བཤད་ཅེས་པ་ནི། ཡོངས་བརྗོད་ཡང་དག་རབ་བཤད་བྱ། །ཞེས་བྱའོ། །རྡོ་རྗེ་ནི་ཤེས་རབ་ཉིད་ཀྱི་ཕྱིར་དང། ཐབས་ཉིད་ཀྱི་ཕྱིར་ན་འཇིགས་བྱེད་དོ། །དེ་ཡང་ཤིན་ཏུ་དྲག་པོའི་ལྷ་ཐམས་ཅད་འཇིགས་པ་ཉིད་ཀྱི་ཕྱིར་རོ། །དེ་ཡང་སྙིང་རྗེ་འབྲས་བུ་ཉིད་དེ། གང་དུ་གདུག་པའི་སེམས་ཅན་རྣམས་ལ་སྙིང་རྗེས་འདུལ་མ་ཡིན། །གང་ཕྱིར་ཞི་བའི་ཡོན་ཏན་གྱིས་ནི་འདུལ་བ་མ་ཡིན་ཏེ། དེའི་ཕྱིར་རྡོ་རྗེ་ཅན་དེ་འཇིགས་བྱེད་ཡང་དག་གྱུར། །ཐོད་པའི་ཕྲེང་བས་རྒྱན་བྱས་ཐོད་པ་བསྣམས་པའོ། །ཉི་འོད་ཁྲོས་པའི་རྫིང་བུ་ཆེ། །མཚུངས་པའི་སྐུ་ནི་རྡོ་རྗེ་ཁྲོ། །གངས་ཀྱི་ཁ་བ་བཞིན་དུ་བསིལ། །ཕྱི་རོལ་དྲག་པོས་འགྲོ་བ་སྐྱོངས། །ཞེས་རྡོ་རྗེ་ཅན་གྱིས་གསུངས་སོ། །རྡོ་རྗེ་འཇིགས་བྱེད་ཅེས་པ་ནི་སྟོང་པ་ཉིད་དང་སྙིང་རྗེ་དབྱེར་མེད་པའི་དོན་དམ་པ་བྱང་ཆུབ་ཀྱི་སེམས་ཏེ་བཅོམ་ལྡན་འདས་དཔལ་རྡོ་རྗེ་འཆང་ངོ༌། །དེའི་གྲུབ་པ་ནི་སྒྲུབ་ཐབས་ཏེ་འབྲས་བུའོ། །འདིས་སྒྲུབ་པར་བྱེད་པས་ན་ལམ་ཡང་ངོ༌། །རང་དགའ་འཇིགས་བྱེད་ལ་སོགས་པ་ཐམས་ཅད་ཀུན་ན་ནི་གཞན་རྟོག་ལ་སོགས་པ་ལ་རོལ་པས་ན་ལྷ་ཡིན་ནོ། །དེ་ཀུན་ཀྱང་ཤིན་ཏུ་དྲག་པོ་སྟེ་ཐམས་ཅད་ཟིལ་གྱིས་གནོན་པའོ། །དེ་ནས་འཇིགས་པར་བྱེད་པས་ན་འཇིགས་བྱེད་དོ། དེས་ནི་འདི་ལྟར་སྟོན་ཏེ་འཇིགས་བྱེད་ཅེས་བྱའོ། །ཡང་དག་པའི་གསུང་རབ་ནི་རྗོད་བྱེད་དོ། །དེ་གཉིས་བརྗོད་བྱ་རྗོད་བྱེད་ཀྱི་ངོ་བོ་ནི་འབྲེལ་བའོ། །དངོས་གྲུབ་ནི་དགོས་པའོ། །དེའི་སྒྲུབ་ཐབས་དང་ལམ་ནི་ཐབས་སོ། །དགོས་པའི་དགོས་པ་ནི་ཤིན་ཏུ་དྲག་པོའི་ལྷ་ཐམས་ཅད་འཇིགས་པ་བསྐྱེད་པའོ། །རྡོ་རྗེ་འཇིགས་བྱེད་ཀྱི་སྒྲུབ་ཐབས་ནི་སྒྲུབ་པ་སྟེ། རང་གི་དོན་ཕུན་སུམ་ཚོགས་པའོ། །དེ་ཡང་གཉིས་ཏེ། རྟོག་པ་ཕུན་སུམ་ཚོགས་པ་དང༌། སྤངས་པ་ཕུན་སུམ་ཚོགས་པའོ། །དང་པོ་ནི་ཇི་སྙེད་མངོན་པར་བྱང་ཆུབ་པར་བྱ་བ་བྱང་ཆུབ་པའོ། །གཉིས་པ་ཡང་ཉོན་མོངས་པ་དང་ཤེས་བྱའི་སྒྲིབ་པའི་བག་ཆགས་མ་ལུས་པ་སྤངས་པའོ། །དེའི་ཐབས་ནི་སྒྲུབ་པའི་ཐབས་ཀྱི་ལམ་མོ། །དེའི་


DTG047_Page_0264
[མ་དཔེ་གཟིགས་ན་འདིར་གནོན།]

ཡང་ཐབས་ནི་གསུང་རབ་བོ། །གཞན་གྱི་དོན་ཕུན་སུམ་ཚོགས་པ་ནི་གདུག་པ་ཅན་འཇིགས་པར་བྱེད་པའོ། །དེའི་ཐབས་ནི་སྒྲུབ་ཐབས་སོ། །དེའི་ཡང་ཐབས་ནི་གསུང་རབ་ཉིད་ཡིན་ནོ། །སྡུད་པ་པོ་གང་ཡིན་པའི་ཚིག་ནི་འདི་ཉིད་དུ་རྣམ་པ་མང་པོས་གསུངས་མོད་ཀྱི། འདིར་ནི་གནས་སྐབས་ཡིན་ནོ། །དེ་ལ་ཞེས་བྱ་བ་ལ་སོགས་པ་ལ་དེ་ལ་ཞེས་བྱ་བ་ནི་བཅོམ་ལྡན་འདས་བསྒྲུབ་པར་བྱ་བའི་ཆེད་དུ་ཞེས་བྱ་བའི་དོན་ཏོ། །དང་པོར་ནི་དགོས་པ་བསྒྲུབ་པ་ལ་སོགས་པའོ། །སྔགས་ཞེས་པའི་སྔགས་ཀྱིས་བསྲུང་བར་བྱས་པའོ། །གང་ཡང་གནས་མང་པོའི་མིང་ཡོད་ཀྱང༌། །དེ་ལྟ་ན་ཡང་ལ་ལ་གཅིག་ཏུའོ། །དེ་ལ་ཡང་གང་དང་གང་ང་ནི་མ་ཡིན་ཏེ། འདི་ཉིད་ནི་འཇམ་དཔལ་རྒྱུད་ཆེན་པོར་གསུངས་པའོ། །འོན་ཀྱང་ཡིད་དང་མཐུན་པའི་གནས་སུའོ། །ཡང་ན་དེ་ལ་ཞེས་པ་ནི་འོག་ནས་བཤད་པའི་གནས་མང་པོ་དེ་རྣམས་ཀྱི་ནང་ནས་ཁ་ཅིག་གོ །ཡིད་དང་མཐུན་པའི་གནས་ཞེས་པས་གོ་བར་བྱའོ། །འོག་ནས་འབྱུང་བའི་དབང་དུ་བྱ་བ་ལ་སོགས་པ་ཐམས་ཅད་ནི་དགོས་པའི་ལས་སོ། །དེ་ལ་ཞེས་པ་ནི་དགོས་པའོ། །དེའི་ནི་ཆེད་དུའོ། །ཤིང་གཅིག་ནི་ཤིན་གཞན་གྱི་གྲིབ་མས་མ་རེག་པའོ། །མ་མོའི་ཚངས་པ་མོ་དང༌། ཁྱབ་འཇུག་མོ་དང༌། དྲག་མོ་ལ་སོགས་པའོ། །འཐབ་མོ་ཡིས་ནི་གཡུལ་ངོ་གང་དུ་དམག་མི་མང་པོ་ཤི་བའོ། །འབྱུང་པོ་ནི་ཕྱོགས་སྐྱོང་རྣམ་པར་རྒྱལ་བ་ལ་སོགས་པའོ། །རོ་ལངས་ནི་གང་གིས་རོ་བྱིན་གྱིས་བརླབས་ནས་འགྲུབ་པར་བྱེད་པའོ། །ཤ་ཟ་ནི་སྐྱུགས་པ་ཟས་སུ་ཟ་བ་ལ་སོགས་པའོ། །གནོད་སྦྱིན་ནི་རྣམ་ཐོས་སྲས་ལ་སོགས་པའོ། །སྤྲས་པ་ནི་བརྒྱན་པའོ། །དེ་ལ་ཞེས་པ་ནི་དཀྱིལ་འཁོར་གྲུ་བཞི་པ་དེའི་དབུས་ཀྱི་སྙིང་པོ་སྟེ། རེའུ་མིག་བརྒྱད་དུ་བྱས་པས་དེ་ཡང་རེའུ་མིག་དགུ་རུ་འགྱུར་རོ། །རི་མོ་ཟླུམ་པོ་གཅིག་བྱས་ཏེ། དེའི་དབུས་སུ་ཐད་ཀར་རི་མོ་གཉིས་ཕྲེང་དུ་རི་མོ་གཉིས་བྱའོ། །གལ་ཏེ་སློབ་དཔོན་གཅིག་ཡིན་ན་དེའི་ཚེ་སྒོ་གཅིག་དབྱེ་བ་དང༌། གྲོལ་བ་དང༌། རབ་ཏུ་དབྱེ་བ་དང༌། ཕྱེ་བར་འགྱུར་རོ། །ཤར་དང༌། དབང་ལྡན་དང༌། ལྷོ་དང་མེའོ། །རོའི་སྣོད་ནི་བཏུང་བའི་སྣོད་དོ། །བཞི་པ་ནི་ཟླ་བའི་རྣམ་པའོ། །སྙིང་པོ་འཕར་མ་ནི་རེའུ་མིག་དགུ་པའོ། །དེ་ནས་ཞེས་


DTG047_Page_0265
[མ་དཔེ་གཟིགས་ན་འདིར་གནོན།]

བྱ་བ་ལ་སོགས་པ་ལ་འཁོར་ལོའི་ཕྱི་རོལ་གྱི་འཕར་མའི་ཕྱག་རྒྱ་དང་རྟགས་ནི་གྲི་གུག་ལ་སོགས་པའི་མཚན་མ་ནི་དབང་ལྡན་གྱི་མཚམས་ནས་བཟུང་སྟེ། གཡོན་སྐོར་དུ་མཚམས་དེ་ཉིད་ཐུག་པར་བྲི་བར་བྱའོ། །མཚོན་རྩེ་གཅིག་པ་ནི་ལྕགས་དབྱུག་གི་རྣམ་པ་རྩེ་མོ་རྨ་བྱའི་སྒྲོའི་ཆུན་པོ་དང་ལྡན་པའོ། །རྡོ་རྗེ་རྩེ་གཅིག་པ་ནི་ཕྱེད་མདུང་ངོ༌། །དབྱུག་ཏོ་ནི་དབྱུག་པའོ། །རོ་ལངས་ནི་རོའོ། །བྲི་བར་བྱ་བ་ནི་གཞག་པར་བྱ་བའོ། །སྔགས་ཆེན་པོ་ནི་ཁྱིམ་བྱའོ། །སྔོན་དུ་བྱ་བ་བྱས་པ་ནི། སྔོན་དུ་བསྙེན་པ་བྱས་པའོ། །དེའི་མདུན་ནི་དཀྱིལ་འཁོར་གྱི་མདུན་ནོ། །ཡི་གེ་བཅུ་པ་ནི། ཨོཾ་ཧྲཱིཿ་ཥྚྲྀཿ་ཝི་ཀྲྀ་ཏཱ་ན་ན་ཧཱུཾ་ཕཊ། ཅེས་པས་སོ། །དེ་རྣམས་ནི་ཀུན་ནོ། །བར་ཆད་ནི་གླགས་ཚོལ་བའོ། །སྐྱེས་པ་ནི་རྙེད་པའོ། །དེའི་ཕྱིར་འཇིགས་པ་མེད་པས་སོ། །རིག་པ་ནི་སྒྲུབ་པའོ། །བརྗོད་པ་ནི་མངོན་པར་འདོད་པའི་དངོས་གྲུབ་ཀྱི་ཆེད་དུའོ། །དཔལ་རྡོ་རྗེ་འཇིགས་བྱེད་ཅེས་བྱ་བའི་རྒྱུད་ལས་རྟོག་པ་དང་པོའི་དཀའ་འགྲེལ་ལོ།། །།

གཉིས་པ། ལས་ཐམས་ཅད་འགྲུབ་པ་བསྟན་པའི་རྟོག་པའི་དཀའ་འགྲེལ།


DTG047_Page_0265
[མ་དཔེ་གཟིགས་ན་འདིར་གནོན།]

དེ་ནས་ཞེས་བྱ་བ་ལ་སོགས་པ་ལ་ངེས་པར་མནན་པའི་བསད་པའོ། །བཅུ་དྲུག་ཅེས་བྱ་བ་ལ་དབུས་ནི་མཚམས་བཞི་དོར་ཏེ་བརྩིས་པས་རེའུ་མིག་བཞི་ཟུང་ངོ༌། །དེ་ལ་ཕྱི་རོལ་གྱི་བཅུ་གཉིས་པ་ལ། །ཡ་མ་རཱ་ཛ་ཞེས་བྱ་བ་ལ་སོགས་པ་དགོད་དོ། །འདི་རུ་མཚམས་བཞི་ལ་དགོད་པ་དང་སྤེལ་བར་བྱའོ། །མེ་གཉིས་ནི་གྲུ་གསུམ་ཉིས་བརྩེགས་སོ། །བཞག་པ་ནི་གནས་པར་བྱ་བ་ནས་སོ། །ཉ་ཕྱིས་ནི་ཐོད་པའོ། །ཡ་གཉིས་གཅིག་ཏུ་བྱས་ནས་བརྩིས་པས་ཡི་གེ་སུམ་ཅུ་རྩ་གཅིག་གི་སྔགས་དང་ལྡན་པར་ཞེས་གསུངས་སོ། །གཞན་ཡང་ཞེས་བྱ་བ་ལ་སོགས་པ་ལ། ཨོཾ་ཡ་མ་རཱ་ཛ་ས་དོ་མེ་ཡ། ཡ་མེ་དོ་རུ་ཎ་ཡོ་ད་ཡ། །ཡ་ད་ཡོ་ནི་ར་ཡཀྵེ་ཡ། །ཡཀྵེ་ཡཙྪ་ནི་རཱ་མ་ཡ་ཕཊ་ཕཊ། ཅེས་བྱ་བས་གཤིན་རྗེ་གཤེད་པོའི་སྔགས་གསུངས་པའོ། །དུར་ཁྲོད་ལ་སོགས་པ་ནས་རྒྱལ་པོའི་སྒོའི་བར་གྱི་ས་བླང་བར་བྱའོ། །རྒྱ་མཚོར་འགྲོ་བའི་ཆུ་བོའི་ཕར་རོལ་གཉི་གའི་ཆུ་ངོགས་ཀྱི་སའོ། །གནས་ལྔ་ནི་སྤྱི་བོ་དང༌། དཔྲལ་བ་དང༌། མགྲིན་པ་དང་སྙིང་ག་དང་གསང་བའི་གནས་སུ་མིའི་རུས་པའི་ཕུར་བུས་གདབ་པར་བྱ་སྟེ། །གོང་དུ་གསུངས་པ་དེ་ཉིད་ཀྱིས་སོ། །གྲོག་མཁར་


DTG047_Page_0266
[མ་དཔེ་གཟིགས་ན་འདིར་གནོན།]

གྱིས་བདུན་ཞེས་པ་ནི་གྲོག་མཁར་གྱི་ས་བདུན་གྱི་སའི་རྫས་ནི་དུར་ཁྲོད་ལ་སོགས་པ་ནས་རྒྱལ་པོའི་སྒོ་ཡན་ཆད་ཀྱིས་སོ། །གཞན་ཡང་ཞེས་བྱ་བ་ལ་སོགས་པ་ལ་གང་དུ་བསྒྲུབ་བྱའི་རྐང་པ་ལ་གོས་པར་གྱུར་པའི་རྡུལ་ནི་རྡུལ་ཞིབ་ཚོ་དེ་ལྟར་གཅིག་དང༌། དེའི་ཞེས་བྱ་བ་ནི་པགས་པའོ། །རྡུལ་དང་ཆུ་ངན་དང་ས་རྣམས་ཀྱིས་དགང་བར་བྱའོ། །དེ་སྒྲ་ཉིད་ནི་བསྒྲུབ་བྱའི་སྒྲས་སོ། །དེ་ནས་ཞེས་བྱ་བ་ལ་སོགས་པ་ལ་བྲི་བ་ནི་བྱེད་པའོ། །ཙཎྜ་ལཱི་ནི་གཡུང་མོའོ། །དུར་ནི་དུར་ཁྲོད་དོ། །མིང་ནི་ཆེ་གེ་མོའོ། །དྲན་པ་ནི་དགོས་པའོ། །སྦལ་པ་སྦལ་བའོ། །སྨྱོན་པ་ནི་གནོད་པ་བྱས་པའོ། །རྟོག་པ་གཉིས་པའི་དཀའ་འགྲེལ་ལོ།། །།

གསུམ་པ། སྔགས་བཏུ་བའི་རྟོག་པའི་དཀའ་འགྲེལ།


DTG047_Page_0266
[མ་དཔེ་གཟིགས་ན་འདིར་གནོན།]

དེ་ནས་ཞེས་བྱ་བ་ལ་སོགས་པ་དྲུག་པའི་དང་པོ་ནི་ཡའོ། །ལྔ་པའི་ལྔ་པ་ནི་མའོ། །ཁ་ཅིག་ལས་དང་པོ་ཞེས་བྱ་བའི་གཞུང་ཡང་ཡོད་དོ། །དེ་ལ་གོ་རིམས་བཟློག་ནས་བགྲངས་བའི་ནི་མའོ། །དྲུག་པའི་གཉིས་པ་ནི་མའོ། །དབྱངས་ཀྱི་གཉིས་པ་ནི་ཨེའོ། །གཉིས་པའི་གསུམ་པ་ནི་ཛའོ། །དབྱངས་ཀྱི་གཉིས་པ་ནི་ཨཱའོ། །བདུན་པའི་གསུམ་པ་ནི་སའོ། །གཉིས་པ་ཞེས་བྱ་བའི་གཞུང་ནི་རིམ་པ་བཟློག་པའི་སྭའོ། །བཞི་པའི་གསུམ་པ་ནི་དའོ། །དབྱངས་ཡིག་བཅུ་གསུམ་པ་ནི་ཨོའོ། །ལྔ་པའི་ལྔ་པ་ནི་མའོ། །དབྱངས་ཡིག་བཅུ་གཅིག་པ་ཨེའོ། །དྲུག་པའི་དང་པོ་ནི་ཡའོ། །ཉིས་འགྱུར་ནི་ཡའོ། །ལྔ་པའི་ལྔ་པ་ནི་མའོ། །དབྱངས་ཡིག་བཅུ་གཅིག་པ་ནི་ཨེའོ། །བཞི་པའི་གསུམ་པ་ནི་དའོ། །དབྱངས་ཡིག་བཅུ་གསུམ་པ་ནི་ཨོའོ། །དྲུག་པའི་གཉིས་པ་ནི་རའོ། །དབྱངས་ཡིག་ལྔ་པ་ནི་ཨུའོ། །གསུམ་པའི་ལྔ་པ་ཎའོ། །རླུང་གི་ས་བོན་ནི་ཡའོ། །དབྱངས་ཡིག་བཅུ་གསུམ་པ་ཨོའོ། །བཞི་པའི་གསུམ་པ་དའོ། །རླུང་གི་ས་བོན་ནི་ཡའོ། །དྲུག་པའི་དང་པོ་ནི་ཡའོ། །བཞི་པའི་གསུམ་པ་ནི་དའོ། །རླུང་གི་ས་བོན་ནི་ཡའོ། །དབྱངས་ཡིག་བཅུ་གསུམ་པ་ནི་ཨོའོ། །བཞི་པའི་ལྔ་པ་ནི་ནའོ།། དབྱངས་ཡིག་གསུམ་པ་ནི་ཨིའོ། །མེའི་ས་བོན་ནི་རའོ། །རླུང་གི་ས་བོན་ནི་ཡའོ། །ཡི་གེའི་མཐའ་ནི་ཀྵའོ། །དབྱངས་ཡིག་བཅུ་གཅིག་པ་ནི་ཨེའོ། །ཡི་གེའི་མཐའ་ནི་ཀྵེ་དེ་ཉིད་དོ། །དེ་ཉིད་ཀྱི་རླུང་གི་ས་བོན་ནི་ཡའོ། །དྲུག་པའི་དང་པོ་ནི་ཡའོ། །ཡི་གེའི་མཐར་གནས་པ་ནི་ཀྵའོ། །


DTG047_Page_0267
[མ་དཔེ་གཟིགས་ན་འདིར་གནོན།]

དབྱངས་ཡིག་བཅུ་གཅིག་པ་ནི་ཨེའོ། །རླུང་གི་ས་བོན་ནི་ཡའོ། །གཉིས་པའི་དང་པོ་ནི་ཙའོ། །གཉིས་བགྲང་བ་ནི་ཙའོ། །བཞི་པའི་ལྔ་པ་ནི་ནའོ། །དབྱངས་ཡིག་གསུམ་པ་ཨིའོ། །མེའི་ས་བོན་ནི་རའོ། །དབྱངས་ཡིག་གཉིས་པ་ནི་ཨཱ་ངོ༌། །ལྔ་པའི་ལྔ་པ་ནི་མའོ། །རླུང་གི་ས་བོན་ནི་ཡའོ། །དང་པོ་རྣམ་པར་སྣང་མཛད་ནི་ཨོའོ། །དམ་པའི་དབང་ཕྱུག་ནི་ཟླ་ཚེས་དང་ཐིག་ལེ་གཉིས་སོ། །དེས་ནི་ཨོཾ་མོ། །ལྔ་པའི་གཉིས་པ་ནི་ཕའོ། །གསུམ་པའི་དང་པོ་ནི་ཊའོ། །ལན་གཉིས་ནི་ཕཊ་ཕཊ་ཅེས་བྱའོ་ཞེས་བྱ་བ་ནི་ཕྲེང་བའི་སྔགས་བཏུ་བའོ། །བདུན་པའི་བཞི་པ་ནི་ཧའོ། །དབྱངས་ཡིག་བཞི་པ་ནི་རཱོ། །མེའི་ས་བོན་ནི་རའོ། །བཅུ་དྲུག་མཐའ་ནི་ཐིག་ལེ་གཉིས་སོ། །དེས་ནི་ཧྲཱིཿའོ། །བདུན་པའི་གཉིས་པ་ནི་ཥའོ། །དབྱང་ཡིག་བཞི་པ་ནི་ཨིའོ། །གསུམ་པའི་དང་པོ་ནི་ཊའོ། །མེའི་ས་བོན་ནི་རའོ། །བཅུ་དྲུག་གི་མཐའ་ནི་ཚེག་དྲག་གཉིས་སོ། །དེས་ནི་ཥྚྲྀཿའོ། །དྲུག་པ་ཡ་ར་ལ་ཝ་ཞེས་བྱ་བ་ནི་སྡེ་ཚན་གྱི་ཝྰྸོ། །དབྱངས་ཡིག་གསུམ་པ་ནི་ཨིའོ། །དང་པོའི་དང་པོ་ནི་ཀའོ། །དབྱངས་ཡིག་བདུན་པ་ནི་རྀའོ། །བཞི་པའི་དང་པོ་ནི་ཏའོ། །དབྱངས་ཡིག་གཉིས་པ་ནི་ཨཱའོ། །བཞི་པའི་ལྔ་པ་ནི་ནའོ། །ཉིས་འགྱུར་ནི་ནའོ། །རྣམ་པར་སྣང་མཛད་ནི་ཨོཾ་མོ། །བརྒྱད་པ་ནི་ཧའོ། །དབྱངས་ཡིག་དྲུག་པ་ནི་ཨཱུའོ། །ལྔ་པའི་གཉིས་པ་ནི་ཕའོ། །གསུམ་པའི་དང་པོ་ཊའོ། །ཉེ་བའི་སྙིང་པོ་ཞེས་བྱ་བ་ཡི་གེ་བཅུ་པའི་སྔགས་བཏུ་བའོ། །དྲུག་པའི་དང་པོ་ཡའོ། །ལྔ་པའི་ལྔ་པ་མའོ། །དབྱངས་ཡིག་གཉིས་པ་ཨའོ། །བཞི་པའི་དང་པོ་ནའོ། །ལྔ་པའི་ཐ་མ་ཏའོ། །དང་པོའི་དང་པོ་ཀའོ། །རྣམ་པར་སྣང་མཛད་ཨོཾ་མོ། །དྲན་པའི་མཐའ་ནི་ཟླ་ཚེས་སོ། །སྟོང་པ་ལྷ་ནི་ཐིག་ལེའོ། །ལྔ་པའི་གཉིས་པ་ཕའོ། །གསུམ་པའི་དང་པོ་ཊའོ། །སྙིང་པོ་ཞེས་བྱ་བ་ཡི་གེ་དྲུག་པའི་སྔགས་བཏུ་བའོ། །རྟོག་པ་གསུམ་པ་ཞེས་བྱ་བའི་དཀའ་འགྲེལ་ལོ།། །།

བཞི་པ། བསྒོམ་པའི་རྟོག་པའི་དཀའ་འགྲེལ།


DTG047_Page_0267
[མ་དཔེ་གཟིགས་ན་འདིར་གནོན།]

དེ་ནས་ཞེས་བྱ་བ་ལ་སོགས་པ་ལ་རྣམ་པ་བདུན་གྱིས་བླ་ན་མེད་པའི་མཆོད་པ་བྱས་ནས། ཚངས་པའི་གནས་བསྒོམས་ཏེ། རང་གི་སྙིང་གར་ཉི་མའི་དཀྱིལ་འཁོར་ལ་གནས་པའི་ས་བོན་གྱི་འོད་ཟེར་གྱིས་བགེགས་རྣམས་བསྐྲད་དེ། ཇི་སྐད་གསུངས་པ་བཞིན་དུ་བྱའོ། །རྟོག་པ་བཞི་པ་ཞེས་བྱ་བའི་དཀའ་འགྲེལ་ལོ།། །།

ལྔ་པ། བྲིས་སྐུའི་ཆོ་གའི་རྟོག་པའི་དཀའ་འགྲེལ།


DTG047_Page_0268
[མ་དཔེ་གཟིགས་ན་འདིར་གནོན།]

དེ་ནས་ཞེས་བྱ་བ་ལ་སོགས་པ་ལ། གང་གང་ནས་གཡུལ་དོར་དངོས་སུ་ཤི་བའོ། །དེའི་དཔའ་བོའི་གོས་སོ། །མེ་ཏོག་ནི་ཟླ་མཚན་ནོ། །དེས་གོས་པ་ནི་མེ་ཏོག་གིས་གོས་སུ་བརྗོད་དོ། །གང་གིས་བུ་བཙས་པའི་དུས་སུ་བུད་མེད་ཀྱིས་གྱོན་པའི་བུ་སྐྱེས་པའི་རས་སོ། །རི་མོ་མཁན་བཟང་པོ་ནི་དབང་ཐོབ་པའོ། །རྟོག་པ་ཞེས་བྱ་བ་ནི་བཟའ་བར་བྱ་བ་དང༌། བཟའ་བར་བྱ་བ་མ་ཡིན་པའི་རྣམ་པར་རྟོག་པ་དང་བྲལ་བའོ། །ཁྲོ་བ་མེད་པ་ནི་བྱམས་པའི་སེམས་དང་ལྡན་པའོ། །ཆ་ཕྲ་བར་བྲི་བ་ནི་མཛེས་ཤིང་ཉེས་པའི་སྐྱོན་མེད་པའོ། །བརྩོན་པ་ནི་འབད་པའོ། །དད་པ་ནི་དཀོན་མཆོག་གསུམ་ལ་ཡིད་ཆེས་པའོ། །བརྩེ་བ་ནི་སྒྲུབ་པ་པོ་སྒྲུབ་པར་འདོད་པའོ། །རྙེད་པ་ལ་མི་བལྟ་བ་ནི་འདོད་པ་ཆུང་བའོ། །ཡོན་བྱིན་པ་ནི་རི་མོ་མཁན་གྱིས་ཇི་ཙམ་བརྗོད་པའོ། །རྟོག་པ་ལྔ་པ་ཞེས་བྱ་བའི་དཀའ་འགྲེལ་ལོ།། །།

དྲུག་པ། སྦྱིན་སྲེག་གི་ལས་ཀྱི་ཆོ་ག་རྒྱ་ཆེ་བའི་རྟོག་པའི་དཀའ་འགྲེལ།


DTG047_Page_0268
[མ་དཔེ་གཟིགས་ན་འདིར་གནོན།]

དེ་ནས་ཞེས་བྱ་བ་ལ་སོགས་པ་ལ། རླུང་གི་དཀྱིལ་འཁོར་ནི་ཟླ་གམ་གྱི་རྣམ་པའོ། །ཧོཾ་ཁུང་དེའི་དབུས་སུ་སངས་རྒྱས་ཀྱང་ནི་ཚངས་པ་ཡང་ངོ༌། །རྟོག་པ་དྲུག་པ་ཞེས་བྱ་བའི་དཀའ་འགྲེལ་ལོ།། །།

བདུན་པ། བསམ་གཏན་གྱི་ལས་བསྒྲུབ་པ་བརྟག་པའི་རྟོག་པའི་དཀའ་འགྲེལ།


DTG047_Page_0268
[མ་དཔེ་གཟིགས་ན་འདིར་གནོན།]

དེ་ནས་ཞེས་བྱ་བ་ལ་སོགས་པ་ལ། གསང་བའི་སྣགས་ནི་གཞན་ལ་ནི་བསྟན་པའོ། །རྟོག་པ་བདུན་པ་ཞེས་བྱ་བའི་དཀའ་འགྲེལ་ལོ།། །།འབད་པས་དཀའ་འགྲེལ་བྱས་ཐོབ་པའི། །བསོད་ནམས་གཞོན་ནུ་ཟླ་བ་བཞིན། །དེ་ཡིས་འཇིག་རྟེན་མ་ལུས་པ། །དཔལ་རྡོར་འཇིགས་བྱེད་ཐོབ་པར་ཤོག །སློབ་དཔོན་མཁས་པ་ཆེན་པོ་དཔལ་གཞོན་ནུ་ཟླ་བས་མཛད་པའི་དཔལ་རྡོ་རྗེ་འཇིགས་བྱེད་ཀྱི་རྒྱུད་ཆེན་པོའི་དཀའ་འགྲེལ་རྫོགས་སོ།། །།པཎྜི་ཏ་མཁས་པ་ཆེན་པོ་ཏ་ཐཱ་ག་ཏ་རཀྵི་ཏ་དང༌། ལོ་ཙཱ་བ་དགེ་སློང་བ་རིན་ཆེན་གྲགས་པས་བསྒྱུར་ཅིང་ཞུས་ཏེ་གཏན་ལ་ཕབ་པའོ།།

རྡོ་རྗེ་འཇིགས་བྱེད་ཀྱི་རྒྱུད་ཀྱི་འགྲེལ་པ་རིན་པོ་ཆེའི་ཕྲེང་བ་ཞེས་བྱ་བ།
ནག་པོ་པ།

དང་པོ། དཀྱིལ་འཁོར་བསྟན་པའི་རྟོག་པའི་བཤད་པ།


DTG047_Page_0268
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། བཛྲ་བྷཻ་ར་ཝ་ཏནྟྲ་པཉྩི་ཀཱ་རཏྣ་མཱ་ལཱ་ནཱ་མ། བོད་སྐད་དུ། རྡོ་རྗེ་འཇིགས་བྱེད་ཀྱི་རྒྱུད་ཀྱི་འགྲེལ་པ་རིན་པོ་ཆེའི་ཕྲེང་བ་ཞེས་བྱ་བ། དཔལ་རྡོ་རྗེ་འཇིགས་བྱེད་ལ་ཕྱག་འཚལ་ལོ། །སྟོང་པ་སྙིང་རྗེ་མི་ཕྱེད་པས། །འགྲོ་བའི་འཇིགས་པ་བསེལ་མཛད་པའི། །དཔལ་ལྡན་རྡོ་རྗེ་


DTG047_Page_0269
[མ་དཔེ་གཟིགས་ན་འདིར་གནོན།]

འཇིགས་བྱེད་འཇིགས། །ཁྲོ་རྒྱལ་དེ་ལ་གུས་པས་མཆོད། །དེ་ཡི་ལེའུ་བདུན་དོན་མཆོག་ནི། །སྙིགས་དུས་རྣལ་འབྱོར་པ་རྣམས་ལ། །བདེ་བླག་འགྲོ་ལ་ཕན་སྤྱོད་ཕྱིར། །རིན་ཆེན་ཕྲེང་བས་གསལ་བར་ཕྱེ། །རྒྱུད་ཐམས་ཅད་ནི་ཕུན་སུམ་ཚོགས་པ་ལྔས་སྟོན་ཏེ། ཞེས་ཐེ་ཚོམ་མེད་པ་ནི་འཇམ་དཔལ་གྱི་རྒྱུད་སྟོང་ཕྲག་བཅོ་བརྒྱད་ནས་བྱུང་བ་རྡོ་རྗེ་མཁའ་འགྲོ་མ་རྣམས་ཀྱིས་བྱིན་པ་ཡིན་ཏེ། དོན་ནི་སྟོན་པ་རྡོ་རྗེ་འཆང་ཆེན་པོ་དེ་གནས་རྡོ་རྗེ་ཕག་མོ་ཆོས་ཀྱི་དབྱིངས་བྷ་ག་ལ་བཞུགས་ནས། འཁོར་གཤེད་བཞི་ལ་སོགས་པ་ལ་ཆོས་གསུངས་པ་ཕྱག་ན་རྡོ་རྗེས་བསྡུས་པར་ཤེས་པར་བྱའོ། །འདིར་དེ་ནས་ཀྱི་སྒྲ་ནི་དེ་མ་ཐག་པ་སྟེ། སྔོན་དུ་སོང་བ་བཤད་ནས་དང༌། མ་རྫོགས་པའི་ཆོས་ལེའུ་བདུན་སྟོན་པ་སྟེ། དེ་ཡང་རྗེས་སུ་སྟོན་པ་དང་བཀྲ་ཤིས་པ་མ་རྫོགས་པ་བོས་པ་ཡིན་པར་གོ་བར་བྱའོ། །གཞུང་མཚམས་སྦྱོར་བའི་སྐབས་ལེའུ་དང་པོ་རྒྱུད་ཀྱི་དོན་བསྒྲུབ་པར་བྱ་བ་སྟོན་པའི་ཕྱིར་རོ། །དེ་ནས་ཡང་དག་རབ་བཤད་བྱ། །ཞེས་པ་ནི་དེ་ནས་སྔོན་མའི་རྗེས་སུ་ཡང་དག་པ་བཟད་བ་མཆོག་དང་ཐུན་མོང་གི་དོན་མ་ནོར་བ་ལེའུ་བདུན་པ་བསྙེན་སྒྲུབ་དཀྱིལ་འཁོར་དང་འཁྲུལ་འཁོར་དང་བསམ་གཏན་དང་བཟླས་པ་དང་སྦྱིན་སྲེག་ལ་སོགས་པ་རྣམས་ཚང་ལ་མ་ནོར་བར་སྒྲུབ་པ་པོ་རྣམས་ལ་ལམ་ཉེ་བར་བདེ་བར་རབ་ཏུ་གསལ་བར་ཕྱེ་ནས་གསུངས་པས་བཤད་བྱ་ཞེས་ཞལ་གྱིས་བཞེས་པའོ། །རྡོ་རྗེ་ནི་ཆོས་སྐུ་སྟོང་པ་ཉིད་དང་ཤེས་རབ་སྟོན་པ་ཡིན་ལ། འཇིགས་བྱེད་གཟུགས་སྐུ་ཐུགས་རྗེས་ཐབས་རྣམས་གྲུབ་པར་སྟོན་པའོ། །ཐབས་ཞེས་པ་ནི་འབྲས་བུ་སྟེ། གཞུང་འདིས་རྣལ་འབྱོར་པ་ལ་སྒྲུབ་པའི་ཐབས་སུ་བསྟན་པའོ། །སྒྲུབ་པ་ཞེས་ཐབས་དེས་བདག་གཞན་གྱི་དོན་གྲུབ་པར་བྱེད་པའོ། །ལྷ་རྣམས་ཞེས་པ་རྡོ་རྗེ་འཇིགས་བྱེད་ཀྱིས་ལྷ་རྣམས་དྲག་ཤུལ་དང་བཅས་ཚངས་པ་ལ་སོགས་པ་ཐམས་ཅད་ཀྱང་འཇིགས་ཤིང་དྲག་ཤུལ་བསྐྱེད་པའོ། །དེ་ཡང་སྟོང་པ་ཉིད་དང་སྙིང་རྗེས་འབྲས་བུ་ཆོས་སྐུ་དང་གཟུགས་སྐུ་ཉིད་དེ་གང་གདུག་པ་དང་ལྡན་པའི་སེམས་ཅན་རྣམས་ལ་སྙིང་རྗེས་ཕན་པར་མི་འགྱུར་བས་རྡོ་རྗེ་འཆང་དེས་འཇིགས་པར་མཛད་པ་དེ། སྐུ་ཤིན་ཏུ་འཇིགས་པ་དབུ་


DTG047_Page_0270
[མ་དཔེ་གཟིགས་ན་འདིར་གནོན།]

དང་ཕྱག་དང་མཚན་མ་དང་རྒྱན་དང༌། ན་བཟའ་དང་གདན་དང་ཉི་མའི་འོད་ཟེར་དུས་མཐའི་མེ་ལྟར་དྲག་པོ་མཚུངས་པ་མེད་པའི་ཁྲོ་བོ་ཆེན་པོ་སྙིང་རྗེས་བསྐུལ་བའོ། །དེ་ཡང་ནད་ན་ཁ་བ་ལྟ་བུར་བསིལ། །ཕྱི་རོལ་དྲག་པོས་འགྲོ་ལ་སྐྱོབ། །ཅེས་པས་བསྟན་པའོ། །བཅོམ་ལྡན་འདས་རྡོ་རྗེ་འཆང་དེ་ཉིད་བསྒྲུབ་བྱ་འབྲས་བུའི་རྒྱུད་འདིས་བསྒྲུབ་པར་བྱས་པས་ལམ་བསྒྲུབ་བྱེད་དོ། །རྣལ་འབྱོར་པ་ལ་དངོས་གྲུབ་དགོས་པས་དགོས་པའོ། །དེ་ཡང་རང་བཞིན་གྱི་དོན་ཕུན་སུམ་ཚོགས་པ་གཉིས་ཏེ་སྤངས་པ་ཕུན་སུམ་ཚོགས་པ་ཉོན་མོངས་པ་དང་ཤེས་བྱའི་སྒྲིབ་པ་མ་ལུས་པ་སྤོང་བའོ། །དེ་ཡང་ཐོབ་བྱ་ཕུན་སུམ་ཚོགས་པ་ཐོབ་པ་ལས་ཏེ། མངོན་པར་བྱང་ཆུབ་པས་མངོན་པར་བྱང་ཆུབ་པའོ། །དགོས་པ་དེ་ཡང་ཐབས་རྒྱུད་ལས་བྱུང་བ་ཉིད་སྒྲུབ་ཐབས་སོ། །དགོས་པ་དེའི་དགོས་པ་ནི་གཞན་གྱི་དོན་སུན་སུམ་ཚོགས་པ་སྟེ། བདུད་དང་མུ་སྟེགས་དང༌། ཀླུ་དང༌། གནོད་སྦྱིན་དང༌། དྲག་པོ་དང༌། ཙཎྜི་དང༌། འཇིགས་བྱེད་དྲག་པོ་ལ་སོགས་པ་བསྟན་པ་ལ་གནོད་པ་དང༌། སེམས་ཅན་དང་སློབ་དཔོན་ལ་གནོད་པ་ལ་རྒྱུད་འདིས་བསྒྲུབས་པས་ཕན་འདོགས་པའོ། །རྣལ་འབྱོར་པས་བསྒྲུབས་པས་བདག་དང་གཞན་གྱི་དོན་ཐོབ་པ་དང༌། བརྗོད་པར་བྱ་བ་དང་རྗོད་པར་བྱེད་པ་དེ་ཕན་ཚུན་འབྲེལ་བས་དེ་དང་དེ་ལས་བྱུང་བ་དང༌། བདག་ཉིད་གཅིག་པར་འབྲེལ་པ་བསྟན་པའོ། །དེ་ལ་ཞེས་བྱ་བ་ནི་བརྗོད་བྱ་བ་ལ་སོགས་པ་དེ་འདོད་པ་ལའོ། །དང་པོ་ཞེས་པ་ནི་དགོས་པ་དེ་བསྒྲུབ་པ་རྩོམ་པའི་སྔོན་དུའོ། །སྔགས་པ་ཞེས་པ་ནི་དབང་ཐོབ་ཅིང་སྔགས་ཀྱི་བསྙེན་པ་དང་དཀྱིལ་འཁོར་ལ་སོགས་པ་ཤེས་པའི་རྣལ་འབྱོར་པས་བརྗོད་པའོ། །ཡིད་དུ་འོང་ཞེས་པ་དུར་ཁྲོད་ལ་སོགས་པ་ཡིད་དང་མཐུན་པ་སྤྲོ་བའི་གནས་གཅིག་ཏུ་གནས་པར་བྱའོ། །ཡང་གྲོགས་དང་རྫས་དང་ལྡན་པར་བྱས་ལ་སྡོད་པར་ཤེས་པར་བྱའོ། །དགོས་པ་ཞེས་པ་བདག་དང་གཞན་གྱི་དོན། དབང་ཞེས་པ་ལ་སོགས་པ་ཞི་བ་དང་རྒྱས་པ་དང་དབང་དང་དྲག་པོ་རྣམས། དཀྱིལ་འཁོར་དང་འཁྲུལ་འཁོར་དང་བསམ་གཏན་དང་བཟླས་པ་དང་སྦྱིན་སྲེག་ལ་སོགས་པ་བསྒྲུབ་པའོ། །དུར་ཁྲོད་ཅེས་པ་ནི་བསད་པའི་གནས་རོ་སྐྱེལ་ས་ལ་བྱའོ། །ཆུའི་ངོས་


DTG047_Page_0271
[མ་དཔེ་གཟིགས་ན་འདིར་གནོན།]

ཞེས་པ་ནི་ཆུ་བོའམ་མཚན་གླིང་ཡིན་ཏེ། དེར་གནོད་སྦྱིན་ཕོ་མོ་དང་ཀླུ་ཕོ་མོ་བསྒྲུབ་པར་བྱའོ། །ཤིང་གཅིག་ཅེས་པ་ནི་ཤིང་གཞན་གྱི་གྲིབ་མས་མི་སླེབ་མི་རེག་པའོ། །མཚན་མ་གཅིག་པ་ནི་དབང་ཕྱུག་ཆེན་པོའི་མཚན་མ་ཐང་སྟོང་ལ་ཡོད་པའོ། །བཞི་མདོ་ཞེས་པ་ནི་ལམ་རྒྱ་གྲམ་སྟེ། དེར་རེངས་པའི་གནས་བྱའོ། །དེ་ཡང་གྲོང་དང་རྫས་དང་ལྡན་པར་བྱས་ལ་སྡོད་པར་ཤེས་པར་བྱའོ། །རི་རྩེ་ཞེས་པ་ནི་རི་མཐོ་བའི་སྟེང་དུ་སྟེ་བསྐྲད་པའི་གནས་སོ། །ཁང་སྟོང་ལྷ་ཁང་སྟོང་པ་དངོས་པོ་དེར་བསྙེན་སྒྲུབ་པ་དང༌། རལ་གྲི་དང༌། མིག་སྨན་དང༌། རི་ལུ་དང༌། གསེར་འགྱུར་དང༌། བཅུད་ཀྱིས་ལེན་དང༌། གཏེར་དང་འབྱུང་པོ་དང་རོ་ལངས་བསྒྲུབ་པའི་གནས་སོ། །མ་མོའི་ཁྱིམ་ཞེས་པ་ནི་ལྷ་བརྒྱད་ཀྱི་ཆུང་མ་གང་ན་ཡོད་པའི་བརྟེན་ས་ལ་བྱ་སྟེ། དེར་དབང་དང་དགུག་པ་དང་བསྒྲུབ་པའི་གནས་སོ། །འཐབ་མོའི་ས་ཞེས་པ་ནི་ཕན་ཚུན་འཐབས་པའི་ས་རོ་མང་དུ་ཤི་བའི་ས་སྟེ་དབྱེ་བའི་གནས་སོ། །གྲོང་དམན་ནག་ཁྲོད་ཅེས་པ་ནི་རང་གི་ཁྱིམ་དང་ཤིང་གསེབ་དང་ཤ་ཟ་དང༌། དབང་དུ་བྱ་བ་སྒྲུབ་པའི་གནས་སོ། །དཔལ་རྡོ་རྗེ་འཇིགས་བྱེད་ཆེན་པོར་དབང་བསྐུར་བའི་རྣལ་འབྱོར་བས་ཞེས་པ་ནི། ཡ་ལས་བསྐྱེད་པའི་རྡོ་རྗེ་འཇིགས་བྱེད་ཀྱི་ཧྲཱིཿ་ཥྚྲྀཿ་ཡ་འབུམ། ཀྵེ་མ་ལ་སོགས་ལས་བསྐྱེད་པ། འཁོར་བཅུ་གཉིས་ལ་ཛིན་ཛིཀ་སོགས་ཁྲི་ཁྲིའི་བསྙེན་པ་རྣལ་འབྱོར་བཞི་དང་ལྡན་པས་བསྙེན་པ་བྱས་ལ། སྟ་གོན་དང་དཀྱིལ་འཁོར་བསྒྲུབ་པ་དང་དབང་བཞིའམ་ཅི་རིགས་པ་ཐོབ་པའོ། །རྣལ་འབྱོར་བཞི་ལ་བརྟེན་ནས་བསྙེན་པ་བྱས་པས་དབང་ལ་སོགས་པ་བསྒྲུབ་པ་དང་ལས་ལ་སྦྱར་བའོ། །རལ་གྲི་དང་མིག་སྨན་ཞེས་པ་ལ་སོགས་པ་ནི་ལྷ་དང་སྔགས་དང་རྒྱུད་འདིས་ཁྱད་པར་དུ་བྱས་པའི་བྱ་བ་རྫས་ཐམས་ཅད་རྒྱུད་གཞན་ལས་ཁྱད་པར་མེད་དེ་ཐུན་མོངས་དུ་གོ་བར་བྱའོ། །འབྱུང་པོ་ཞེས་པ་ནི་ཨ་པ་ར་ཛི་ཏའོ། །རོ་ལངས་ཞེས་པ་ནི་རོ་རྨ་མེད་པའི་རིགས་དང་སྟོབས་དང་གཞོན་པ་ལ་སོགས་པ་བྱའོ། །ཤ་ཟ་ཞེས་པ་ནི་སྲིན་པོ་ཙཎྜི་ཀའོ། །གནོད་སྦྱིན་ཞེས་པ་ནི་ཛམྦྷ་ལ་མ་བུའོ། །མོ་ནི་དེའི་ཆུང་མ་དང་ནོར་རྒྱུན་མའོ། །ཀླུ་ནི་ཀླུ་ཆེན་པོ་བརྒྱད་དང་སོག་


DTG047_Page_0272
[མ་དཔེ་གཟིགས་ན་འདིར་གནོན།]

མ་མེད་ལ་སོགས་པའི་ཆར་འབེབས་པ་རྣམས་སོ། །མོ་ཡང་ཀླུ་མོ་བརྒྱད་ལ་སོགས་པའོ། །སོགས་ཞེས་པ་ནི་ཡུལ་གྱི་ཁྱད་པར་གྱིས་གྲོགས་ནུས་པ་རྣམས་སོ། །གཞན་རྣམས་ནི་གོ་སླ་བ་ཉིད་དོ། །དཀྱིལ་འཁོར་བྲི་བར་བྱ་ཞེས་པ་ནི་བསྒྲུབ་པའི་དུས་ཏེ། དུར་ཁྲོད་ཀྱི་ཚོན་གྱིས་བྲི་བ་སྟེ། སའི་ཆོ་ག་དང་ཐིག་སྔོན་དུ་སོང་བར་བྱས་ལ་བྲི་བ་སྟེ། ཐིག་སྐུད་ཡང་རོའི་སྲད་བུས་བྱའོ། །གྲུ་བཞི་ཞེས་བྱ་བ་ནི་མི་མཉམ་པ་མེད་ཅིང་མཉམ་པ་ཉིད་དོ། །སྒོ་བཞི་ཞེས་པ་ནི་སྟོང་པ་ཉིད་དང་མཚན་མ་མེད་པ་དང་སྨོན་པ་མེད་པ་དང༌། མངོན་པར་འདུས་མ་བྱས་པ་ཉིད་རྣམ་པར་དག་པའོ། །རྟ་བབས་བཞི་ཞེས་པ་ནི་བསམ་གཏན་བཞིའི་རང་བཞིན་ནོ། །དྲིལ་བུ་ཞེས་པ་ནི་ཆོས་ཐམས་ཅད་སྟོང་པར་རྟོགས་པའོ། །རལ་གྲི་ཞེས་པ་ནི་རྣམ་པར་ཤེས་པ་བརྒྱད་དག་པའོ། །བ་དན་ཞེས་པ་ནི་གསུང་རབ་ཡན་ལག་དགུ་རྣམ་པར་དག་པའོ། །མེ་ཏོག་ཕྲེང་བ་ཞེས་པ་ནི་འདོད་པའི་ཡོན་ཏན་ལྔ་རྣམ་པར་དག་པར་རོ། །རྡོ་རྗེ་ཞེས་པ་ནི་མི་ཕྱེད་པའོ། རིན་པོ་ཆེ་ཞེས་པ་ནི་བླ་ན་མེད་པའི་དགའ་བ་རྒྱས་པའི་སྙིང་རྗེ་ཆེན་པོའོ། །ཟླ་བ་ཕྱེད་པ་ཞེས་པ་ནི་བྱང་ཆུབ་ཀྱི་སེམས་འཕེལ་བའོ། །དྲ་བ་དྲ་ཕྱེད་དང་ཞེས་པ་ནི་ཐབས་དང་ཤེས་རབ་ཀྱི་སྐྱོབ་པ་རྣམ་པར་དག་པའོ། །དེའི་དབུས་ཞེས་པ་ནི་ལྷའི་ཁང་པའོ། །རེའུ་མིག་དགུ་ཞེས་པ་ནི་ལྷ་དགུའི་གནས་ཏེ་སྣ་ཚོགས་རྡོ་རྗེ་དང་མཚམས་བཞིར་སྣ་ཚོགས་པདྨ་བཞིའོ། །ལྷའི་སྣམ་བུ་དང་རྡོ་རྗེ་ར་བ་དང་སྒོ་རྣམས་ཀྱང་བྲི་ཞིང་ལྷའི་མཚན་མ་དགོད་པའོ། །སྒོ་གཅིག་ཅེས་པ་ནི་སྒྲུབ་པ་པོ་གཅིག་ལས་མེད་ན་གཞན་བཅད་པའོ། །དྲག་པོ་དང་འདི་ཉིད་ཀྱིས་ལྷོའི་སྒོ་གཅིག་ཁོ་ནས་བྱའོ། །དབང་དང་ཞི་བའང་ལྷོའི་སྒོ་ཁོ་ནའོ། །ཡང་རྫོགས་རིམ་གྱི་སྒོ་རྣམ་པར་ཐར་པའི་སྒོ་བཞི་སྟེ། སྒོ་ནི་འགྲོ་དང་འོང་བས་སྒོ་སྟེ། སྟོང་པ་ཉིད་ཀྱི་སྒོར་རྣལ་འབྱོར་བཞི་དབྱིབས་སུ་འཇུག་པ་མངོན་པར་རྟོགས་པའི་དཀྱིལ་འཁོར་གྱི་སྒོར་འགྲོ་བའོ། །གཞན་དུ་མི་འཇུག་མི་འགྲོ་བའོ། །མཚན་མ་མེད་པའི་སྒོར་སྔགས་བཞི་གཞུག་ཅིང་བཟླས་ཐབས་བཞི་རླུང་གི་སྒོར་དཀྱིལ་འཁོར་བཞིར་འོང་བའོ། །སྨོན་པ་མེད་པའི་སྒོ་ཆོས་བཞི་ལྟེ་བར་ཡང༌། རྩ་འདབ་བཅུ་དྲུག་ལ་ཀྵེ་ལ་སོགས་དང་རླུང་དང་མེའི་


DTG047_Page_0273
[མ་དཔེ་གཟིགས་ན་འདིར་གནོན།]

སྦྱོར་བས་འབར་བའི་རྣམ་པ་དང་སྙིང་གར་རྩ་འདབ་བརྒྱད་ལ་ཧི་ལ་སོགས་པ་ལྟེ་བར་ཨོཾ་དང་ཧཱུཾ་ལ་སོགས་པ་འབར་བའི་རྣམ་པ་དང༌། མགྲིན་པར་རྩ་འདབ་བརྒྱད་ལ་ལྟེ་བར་ཨོཾ་ལ་ཡ་ལ་སོགས་པའི་སྙིང་པོ་རྣམས་འབབ་པའི་སྒོ་ནས། སྤྱི་བོར་རྩ་འདབ་བཞི་ལ་ཨོཾ་ཡ་དྷཱིཿ་ཧཱུཾ་ཧཾ་ལྟེ་བར་འབབ་པའི་སྒོར་འཇུག་བདེ་བ་ཆེན་པོར་འོང་བའོ། །མངོན་པར་འདུས་མ་བྱས་པའི་སྒོ་དེ་གསུམ་མི་ཕྱེད་པར་གཅིག་ཏུ་དབྱིབས་དང་སྔགས་དང་ཆོས་རྣམས་ཡོད་པ་མ་ཡིན་མེད་པ་མ་ཡིན་གཉིས་ཀ་མེད་པ་མ་ཡིན་པར་བསྒོམ་པའོ། །དེ་ཡང་རང་རང་སྒོར་འགྲོ་འོང་ལ། གཞན་དང་གཞན་དུ་མི་འགྲོ་མི་འོང་བས་བཅད་པའོ། །འཇུག་པའི་སྒོ་ལ་གཅིག་ལ་གྲོལ་བའི་སྒོ་འོང་བའང་གཅིག་ཁོ་ནས་སོ། །དབུས་སུ་རོ་ལངས་བྲི་ཞེས་པ་ནི་ལྷའི་གདན་མགོ་བོ་གཅིག་ལག་པ་གཉིས་མིག་དམར་བ་སྐྲ་སེར་བ་གྱེན་དུ་བརྫེས་པ་གཅེར་བུ་མདོག་ནག་པ། སོ་དང་མཆེ་བ་གཙིགས་པ། གཡས་རལ་གྲི། གཡོན་ཐོད་པ་ཐོགས་པ་བརྒྱད་དང༌། དབུས་ངོས་སུ་མ་ཧཱ་དེ་བ་དང༌། ཨུ་མ་དེ་བ་བྲིའོ། །གྲྭ་བཞིར་ཐོད་པ་བདུད་རྩིས་གང་བ་བཞི་བུམ་པའི་ཁར་བྲིའོ། །ཤར་དུ་མགོ་བོ་ཞེས་པ་ནི་སྒོ་བཞིར་རོའི་མགོ་དང་ལག་པ་དང་རྒྱུ་མ་དང་རྐང་པ་བྲིའོ། །བྱང་གི་གྲྭར་ཐོད་པ་ཞེས་བྱ་བ་ནི་བྱང་ཤར་གྱི་གྲྭ་ལ་སོགས་པ་གཡས་སྐོར་རོ། །དེ་ནས་དཀྱིལ་འཁོར་ཕྱི་རོལ་ཞེས་པ་ནི་ལྷ་སྣམ་དེ་དབང་ལྡན་གྱི་གནས་ནས་དགོད་པ་གཡས་སྐོར་དུ་དགོད་པའོ། །མཚོན་རྩེ་གཅིག་པ་ཞེས་པ་ནི་ལྕགས་མདུང་རྨ་བྱའི་སྒྲོའི་ཆུན་པོ་དང་ལྡན་པའོ། །རྡོ་རྗེ་རྩེ་གཅིག་པ་ཞེས་པ་ནི་ཕྱེད་མདུང་ངོ། །གཞན་རྣམས་ནི་གོ་སླའོ། །མར་ཁུ་ཆེན་པོ་ཞེས་པ་ནི་མིའི་ཚིལ་བཞུ་བའི་མར་མེའོ། །སྔགས་ཆེན་པོ་ཞེས་པ་ནི་ཁྱིམ་བྱའོ། །ཤིན་ཏུ་མཉམ་པར་གཞག་ཅེས་པ་ནི་ལྷ་དང་སྟོང་པ་ཉིད་དུ་སེམས་བཞག་པ་རྟོག་པ་གཞན་སྤངས་པའོ། །སྦྱིན་སྲེག་དང་གཏོར་མ་ལ་སོགས་ཞེས་པ་ནི་བདག་རྡོ་རྗེ་འཇིགས་བྱེད་ཀྱི་ལྟོ་བར་མེ་འབར་བ་ལ་མེའི་དཀྱིལ་སྙིང་གར་མེ་ལྷ་རྡོ་རྗེ་འཇིགས་བྱེད་བསྐྱེད་ལ་ཡེ་ཤེས་པ་མེ་ལྷ་སྤྱན་དྲངས་པའི་བསྟིམ་ལ། མེ་ལྷའི་ལྗགས་དང་རང་གི་ལྕེ་རྡོ་རྗེའི་སྦུ་གུར་བྱས་ལ་བཟའ་བ་ཀུན་དབུལ་ཞིང་དང་ས་མས་ལྷ་རྣམས་མཉེས། སྙིགས་མ་ཐབ་


DTG047_Page_0274
[མ་དཔེ་གཟིགས་ན་འདིར་གནོན།]

ཁུང་དུ་ཕོ་བས་ཐལ་བར་གྱུར་པར་བསམ་པའོ། །ཤ་དེ་རྣམས་གཏོར་མ་དང་ལྷ་ལ་ཡང་དབུལ་བ་བདུད་རྩིར་བྱིན་གྱིས་བརླབས་པ་མེ་རླུང་གི་སྦྱོར་བ་གཞན་ལྟར་རོ། །ཁྲག་ཆེན་པོས་གདབ་ཅེས་པ་ནི་གོང་གི་དཀྱིལ་འཁོར་བྲི་བའི་ཚེའོ། །ལྷ་བཤོས་ཐམས་ཅད་དབུལ་བར་བྱ། །ཞེས་པ་ནི་བདག་གི་བཟའ་བའི་དུས་གསུངས་པ་དེ་འཇིགས་བྱེད་ཡིན་པ་དང་བདུན་དག་པའི་དུས་དང༌། ཡེ་ཤེས་སེམས་དཔའ་བསྟིམ་པའི་དུས་དང༌། དབང་བསྐུར་བ་དང༌། ལས་འཆོལ་བའི་དུས་ཐམས་ཅད་ལ་བདག་ལྷའི་ང་རྒྱལ་གྱིས་དཔལ་རྡོ་རྗེ་འཇིགས་བྱེད་ལ་དབུལ་བའོ། ཧ་ཧ་ཞེས་པ་ནི་ཧོ་ཧི་ལ་སོགས་པ་བརྒྱད་དེ་ལྟ་བའི་གད་མོ་བརྒྱད་བྱའོ། །བར་ཆད་སེལ་བའི་ཕྱིར་དགོད་པའོ། །མཉམ་པར་གཞག་ཅེས་པ་ནི་ཆོ་གའི་རིམ་པ་ལས་སེམས་གཞན་དུ་མ་ཡེངས་པའོ། །དཀྱིལ་འཁོར་དངོས་གྲུབ་འདོད་པས་འཇུག་པར་བྱ་ཞེས་པ་ནི་ཞི་བ་ལ་སོགས་པ་གང་འདོད་པས་རྣལ་འབྱོར་བཞི་སྒོམ་པ་དང་དབང་བསྐུར་བའི་དུས་དང་འབྲེལ་ཏོ། །ཞིམ་པའི་ཆང་ཞེས་པ་ནི་ཚོགས་ཀྱི་འཁོར་ལོ་དང་དཔའ་བོའི་སྟོན་མོ་དེ་ནས་འདོད་པའི་དངོས་གྲུབ་ལ་དམིགས་ཞེས་པ་ནི་དབང་ནོད་པའི་སློབ་མའི་དུས་དང༌། སློབ་དཔོན་མཆོག་གམ་རང་ལ་མོས་པ་ཡོད་ལ་དཔལ་རྡོ་རྗེ་འཇིགས་བྱེད་ལས་བླང་བའོ། །དེའི་དབུས་སུ་ཞེས་པ་དབང་བསྐུར་བའི་དུས་སུ་ལྷ་བསྒོམ་པ་དང་སྒྲུབ་པའི་དུས་སུ་དངོས་གྲུབ་ནོད་པའོ། །སློབ་མ་ལ་དབང་བསྐུར་བའི་དུས་སུ་སློབ་དཔོན་གྱིས་དབང་ལ་ཁྲོ་བཅས་པ་དང༌། གསང་བའི་དབང་ནོད་པ་དང་ཤེས་རབ་ཡེ་ཤེས་ལ་རྡུལ་ཚོན་སྟེང་ངམ་བསྡུས་ལ་རྡོ་རྗེ་འཇིགས་བྱེད་དང་ལྡན་པས་བསྡད་པའོ། །དེ་ནས་འཇིགས་པ་ཆེན་པོ་ཞེས་པ་ནི་བཅོམ་ལྡན་འདས་བྱོན་པའམ་གཟུགས་དང༌། སྒྲ་དང༌། དྲི་དང༌། རོ་དང༌། རེག་མི་སྡུག་པ་འབྱུང་བའོ། །བར་ཆོད་ནི་སྒྲུབ་པ་པོ་ལ་གནོད་པ་དངོས་གྲུབ་ཀྱི་གེགས་བྱེད་པའོ། །འཇིགས་པ་མ་བྱས་ན་དེའི་རྗེས་ལ་དངོས་གྲུབ་གང་འདོད་སྟེར་བའོ། །རིག་པ་འཛིན་པ་ཞེས་པ་ནི་སྒྲུབ་པའོ། །ཕྲ་མོ་ལས་ཐམས་ཅད་ཅེས་པ་ནི་འཁྲུལ་འཁོར་དང་འབྲེལ་བའི་ལས་སྟོན་པ་རྣམས་གྲུབ་པའོ། །རྣལ་འབྱོར་གྱི་རྒྱུད་ཅེས་པ་ནི་ཕའི་རྒྱུད་སྡེ་ལྔ་ལས་ཕྲིན་ལས་ཀྱི་རྡོ་རྗེ་འཇིགས་བྱེད་ཆེན་པོའི་


DTG047_Page_0275
[མ་དཔེ་གཟིགས་ན་འདིར་གནོན།]

ལེའུ་བདུན་ལས་སྒྲུབ་པའི་དཀྱིལ་འཁོར་བསྟན་པའོ། །དེ་ཡང་བསྙེན་པ་དང་དབང་སྔོན་དུ་སོང་བས་སྒྲུབ་པའོ། །རྟོག་པ་དང་པོ་རྫོགས་སོ་ཞེས་པ་ནི་ལས་སོ་སོ་ལ་རྟོག་དཔྱོད་པའོ། །དང་པོ་ནི་བདུན་པའི་སྔོན་དུ་བདུན་པ་རྫོགས་པ་ནི་དཀྱིལ་འཁོར་གྱི་ཆོ་ག་མ་ལུས་པར་བསྟན་པའོ། །དཔལ་རྡོ་རྗེ་འཇིགས་བྱེད་ཀྱི་རྟོག་པ་དང་པོའི་བཤད་པའོ། །

གཉིས་པ། ལས་ཐམས་ཅད་འགྲུབ་པ་བསྟན་པའི་རྟོག་པའི་བཤད་པ།


DTG047_Page_0275
[མ་དཔེ་གཟིགས་ན་འདིར་གནོན།]

དཀྱིལ་འཁོར་དེ་ཡང་ཅི་སྙམ་པ་ལ་ཞི་བས་མི་འདུལ་བའི་རིགས་མི་དང་མི་མ་ཡིན་པ་ལ་ཕན་པའོ། །དེ་ནས་ཞེས་བྱ་བ་ལ་སོགས་པ་ཕལ་ཆེར་གོ་སླ་བ་ཉིད་དོ། །དུར་ཁྲོད་ཀྱི་རས་ཞེས་པ་ནི་འདི་གྲིར་ཤི་བའི་རོ་དུར་ཁྲོད་དུ་བསྐྱལ་བ་མར་གྱི་ངོའི་ཉི་ཤུ་གཉིས་ལ་བླངས་ལ། ཐལ་ཆེན་དང༌། ས་དཀར་དང༌། བདུད་རྩི་ལྔ་དང་མི་དང་ཁྱི་ལ་སོགས་པའི་ཁྲག་དང༌། དུག་གི་རིགས་སྣ་ཚོགས་དང༌། ཚོན་རྩི་ལྔ་དང་སྦྱར། རྒྱར་ཁྲུ་དོ་ཁ་སྦྱར་བའམ་རྐྱང་པ་བརྒྱངས་ལ། གཤིན་རྗེའི་ལུས་དང་ལྡན་པའི་འཁོར་ལོ་རྟེན་འབྲེལ་འཁོར་ལོ་བཅུ་གཉིས་བྲི་བར་བྱ་ཞིང༌། དབུས་སུ་རེའུ་མིག་བརྒྱད་པ་བྲིའོ། །བཅུ་དྲུག་ཅེས་པ་དགྲ་ནག་ལྟར་ཕྱི་རོལ་དུ་ལས་ཀྱི་སྔགས་ཕྱོགས་དང་ཕྱོགས་བྲལ་དུ་དགོད་ཅིང་དེའི་བར་དུ་མིང་སྤེལ་བར་བྱའོ། །བཅུ་གཉིས་དང་ཕྱོགས་བཞི་དབུས་དང་ལྔ་ལ་རྩ་སྔགས་བཅུ་བདུན་བྲི་ཞིང་མིའི་ས་བོན་བཞི་བསྒྲུབ་བྱའི་ཡང་མིང་བར་དུ་བཅུག་ལ་བྲིའོ། །ལས་སྔགས་ཀྱིས་སྤྱི་བོ་ལ་སོགས་པའི་གནས་རྣམས་སྙིང་པོ་དང་སྤེལ་བ་དགོད་དོ། །ཧཱུཾ་དང་ཕཊ་བརྒྱད་ཀྱང་མགོ་ལྷོར་བྱས་པའི་ཕྱོགས་དང་ཕྱོགས་བྲལ་དུ་བྲིའོ། །མན་ངག་གིས་ལྷའི་གནས་དང་བཅས་པས་འབར་བའི་གཟུགས་དམིགས་པའོ། །རིམས་ཀྱིས་ཟིན་པར་འདོད་ན་ཞེས་པ་ནི་བསྟན་པ་ལ་གནོད་པ་ལ་སོགས་པ་དེ་ལ། རིམས་ན་ནས་འཆི་བའི་ཐབས་རྣལ་འབྱོར་པ་སྙིང་རྗེ་དང་ལྡན་པ་དེས་རིམས་ནད་གཏང་བར་བྱ་བ་སྟེ། དཔྱངས་པ་ལ་སོགས་པའི་གྲིར་ཤི་བའི་ཐོད་པ་ལ་རྒྱ་སྐྱེགས་དང་ཁྲག་ཆེན་པོས་བྱུགས་ལ་རྡོ་རྒྱུས་ཀྱི་འབྲེལ་བར་མགོ་བསྟན་པའི་བསྒྲུབ་བྱ་དེ་ཚ་བའི་རིམས་ཀྱིས་འཆི་བར་འདོད་ན། ལུས་དམར་བ་གྱེན་དུ་འབར་བ་ལུས་རྡུལ་བ་ཚ་བས་རབ་ཏུ་རྒྱས་པ་དབུགས་ཚ་བ་ཅན་བྲི་བར་བྱའོ། །གྲང་བའི་རིམས་གཏང་བར་འདོད་ན། དཀར་བ་གསུས་


DTG047_Page_0276
[མ་དཔེ་གཟིགས་ན་འདིར་གནོན།]

པ་ཆེ་བ་སྐྲ་གྲོལ་བ་འདར་བ་དབུགས་གྲང་བ་ཅན་བྲི་བར་བྱའོ། །གཉིས་ཀ་འདྲ་བར་མགོ་གསུམ་པ་ལག་པ་གསུམ་པ་ཉམ་ཐག་པ་བྲིས་ལ། གཞན་ཡང་དུར་ཁྲོད་ཀྱི་རོ་བསྲེགས་པའི་སོལ་བ་དང༌། ས་དང༌། སོ་ཕག་དང་བསྒྲུབ་བྱ་དེའི་རྐང་རྗེས་དང༌། དྲིན་ཆེན་དྲི་ཆུ་བསྲེས་པས་གཟུགས་བྱས་པའི་སྙིང་གར་སྔགས་ཀྱི་འཁོར་ལོ་ཐོད་པར་བཅུག་ལ། ལྷའི་ང་རྒྱལ་གྱིས་དགུག་གཞུག་བྱ་ཞིང་ཐོད་པ་སྟེང་མ་ལ་ཡང་དེ་ལྟར་བྲིས་པས་དགབ། དུག་དང་སྐྱེ་ཚེ་ལ་སོགས་པས་བྱུག །མར་ནག་དང་རྒྱ་སྐྱེགས་ཀྱིས་བསྐུས་ལ་བསྒྲུབ་བྱ་དེ་སྐྲའི་སྐུད་པས་བཅིངས་ལ། རོ་བསྲེགས་པའི་ཐལ་པའི་འོག་ཏུ་བཞག་ནས་རྡོ་རྗེ་འཇིགས་བྱེད་ཤིན་ཏུ་ཁྲོས་པ་ཅན་དུ་བདག་ཉིད་བསྒོམས་ཏེ། སྔགས་ཚན་གཅིག་བཟླས་ལ་སྦས་ན། ངེས་པར་རིམས་ཀྱིས་འཆིའོ། །སྤེལ་ཏེ་སྔགས་ཡི་གེ་རྣམས་དགོད་པར་བྱ་ཞེས་པ་ནི། སྔོན་དུ་བསྟན་པའི་བཅུ་བདུན་པོ་དེ་ཡང་མཱ་ར་ཡ་ཕཊ་དང༌། ཨུཙྪ་ཏ་ཡ་དང༌། བི་དྭེ་ཥ་ཡ་དང་སྤེལ་ཏེ་བྲི་བ་དང༌། ཕྱིས་བཟླས་པ་དང་ཡང་འབྲེལ་ཏོ། །སྔོན་དུ་བསྟན་པའི་རྫས་ཞེས་པ་ཐལ་ཆེན་དང༌། ས་དཀར་ལ་སོགས་པ་དང༌། བྱ་རོག་གིས་ཟོས་པའི་འཕྲོའི་གཏོར་མ་དང༌། དྲི་ཆེན་གྱི་རོ་རས་ལ་མ་སྤངས་པ་ཡང༌། འཁོར་ལོ་རྐྱང་པ་རྩིབས་བཅུ་དྲུག་ཅེས་བཅུ་གཉིས་ནང་གི་བཞི་དང་བཅས་པ་བྲི་ཞིང༌། བསྒྲུབ་བྱ་སྔར་བྲིས་པ་སྤངས་པ་སྟེ། དེ་ཡང་གསད་པ་ནི་དུར་ཁྲོད་ཉིད། བསྐྲད་པ་ནི་རྔ་མོའི་གཟུགས་རྒྱབ་ཏུ་འཁོར་ལོ་ཅན་བྲིས་པ་ལ་རླུང་གི་འཁོར་ལོ་དང་འོག་གི་བྱ་བ་དང་ལྔ་པར་སྐྲོད་པར་འགྱུར་རོ། །གཞན་ཡང་འོག་དང་སྟེང་གི་འཁོར་ལོ་སྦྱར་ཞིང་བྱ་བ་མན་ངག་ཡིན་ནོ། །ཆུ་ཞེས་པ་ནི་དྲག་ཏུ་མི་འབབ་པར་ངག་རེངས་པའོ། །དབང་ལ་ནི་བུད་མེད་ཀྱི་བྷ་གར་སྦའོ། །དབྱེ་བ་རྟ་དང་མ་ཧེའི་རྒྱབ་ཏུ་བྱའོ། །སྤྱི་བོ་ལས་ཞེས་པ་ནི། དཔྲལ་བ་དང༌། ཁ་དང་སྙིང་ག་དང་གསང་གནས་དང་སྤྱི་བོ་སྔོན་པོ་གཤིན་རྗེའི་གཟུགས་ཞེས་པ་ནི་རབ་ཏུ་གནས་པ་བྱས་ནས་རྟགས་བྱུང་བ་དང་སྦའོ། །པགས་པ་ཞེས་པ་ཁ་ན་མར་བཤུས་པའི་ནང་དུ་དྲི་དང་ཆུ་དང་རྐང་རྗེས་ཀྱིས་བླུགས། ནུབ་བདུན་དུ་སྔགས་དང་ཡུངས་ཀར་བླུགས་ལ་མནན་པ་བྱའོ། །གཞུང་མན་ངག་གིས་ཞི་བ་ལ། དབུས་ཀྱི་ཡ་དབྱི་བ་དང༌། ཟླ་བའི་དཀྱིལ་འཁོར་ལ་


DTG047_Page_0277
[མ་དཔེ་གཟིགས་ན་འདིར་གནོན།]

བསྒྲུབ་བྱ་གཞག་པར་བྱའོ། །རྒྱས་པ་ལ་ཟླ་བ་སེར་པོ་ལ་བཞག་པ་དང་འཁོར་ལོ་ལ་རབ་གནས་བྱ་བའོ། །དཔལ་རྡོ་རྗེ་འཇིགས་བྱེད་ཀྱི་རྟོག་པ་གཉིས་པའི་བཤད་པའོ།། །།

གསུམ་པ། སྔགས་བཏུ་བའི་རྟོག་པའི་བཤད་པ།


DTG047_Page_0277
[མ་དཔེ་གཟིགས་ན་འདིར་གནོན།]

དེ་ནས་ཞེས་པ་ནི་འཁོར་ལོ་དང་སྒྲུབ་པ་ལ་སྔགས་དགོས་ཤིང་སྔགས་ནོར་ན་མི་གྲུབ་པས་སྔགས་བཏུ་བ་བསྟན་ཏེ། དེ་ཡང་ས་གཞི་དྲི་ཞིམ་པོས་བྱུགས་པ་ལ་ཨཱ་ལི་དང་ཀཱ་ལི་བྲི་ཞིང་མཆོད་པས་མཆོད་པ་དང༌། གཏོར་མ་ཡང་གཏང་བར་བྱའོ། །དྲུག་པའི་དང་པོ་ཞེས་པ་པ་ཡིན་ཏེ། དེ་ཡང་ཀའི་སྡེ་ཚན་དང༌། ཙའི་སྡེ་ཚན་དང༌། ཊའི་སྡེ་ཚན་དང༌། ཏའི་སྡེ་ཚན་དང༌། པའི་སྡེ་ཚན་དང༌། ཡའི་སྡེ་ཚན་དང་དྲུག །ཤའི་སྡེ་ཚན་དང་བདུན་དུ་ཕྱེ་བས་ཤེས་པའོ། །ལྔ་པའི་ཞེས་པ་མའོ། །དྲུག་པའི་གཉིས་པ་ཞེས་པ་ནི་རའོ། །དབྱངས་ཡིག་གཉིས་པ་ཞེས་པ་ནི་ཨཱ་རིང་པོ་སྟེ་ར་དང་སྦྱར་བས་རཱ་རིང་པོར་འབོད་པའོ། །གཉིས་པའི་གསུམ་པ་ཞེས་པ་ཛ། དབྱངས་ཡིག་གཉིས་པ་ཞེས་པ་ནི་ཨཱ་རིང་པོ་ཛ་དང་སྦྱར་བས་ཛཱ་རིང་པོའོ། །བདུན་པ་ཞེས་ཤའི་སྡེ་ཚན། གསུམ་པ་ཞེས་པ་ནི་ས། བཞི་པ་ཞེས་པ་ནི་གའི་ཏའི་སྡེ་ཚན། གསུམ་པ་ཞེས་པ་ནི་ད། དབྱངས་ཡིག་བཅུ་གསུམ་ཞེས་པ་ནི་ཨོ་ཐུང་ངུ་དང་སྦྱར་བས་དོ་ཐུང་ངུར་འགྱུར་བའོ། །གཞན་རྣམས་ཀྱང་དེ་ལྟར་ཤེས་པར་འགྱུར་བས་གཞུང་མངས་པས་འཇིགས་བས་མ་བྲིས་པའོ། །འབུམ་དང་སུམ་འབུམ་དང་བདུན་འབུམ་ཞེས་པ་ནི་བསྙེན་པ་དང་སྒྲུབ་པ་དང་ལས་སྦྱོར་གྱི་སྒྲུབ་པ་ཟླ་གཉིས་དང་དྲུག་གིས་འགྲུབ་པར་འགྱུར་ཞིང༌། ཕྱིས་སྙིང་རྗེ་དང་ལྡན་པའི་སེམས་ཀྱིས་ཞག་རེ་དང་ཉིན་རེས་བྱའོ། །དེ་ཡང་ཡ་ཡིག་ཞེ་སྡང་ཉིད་དུ་འགྱུར། །ཀྵེ་ཡི་ཡི་གེ་གཏི་མུག་བརྗོད། །མ་ཡིག་ཕྲ་མ་ཉིད་དུ་འགྱུར། །མེ་ནི་འདོད་ཆགས་གཤིན་རྗེ་འཇོམས། །ད་ཡིག་ཕྲག་དོག་ལས་ཀུན་བྱེད། །ཡ་ཙ་ཐོ་བ་དབྱུག་པ་དང༌། །ནི་ར་པདྨ་རལ་གྲི་གཤེད། །ཛ་ཡིག་ལྷ་མོ་ཙཱ་རྩི་ཀཱ། །ཕག་མོ་ཡུམ་གྱི་ས་ཉིད་དོ། །དེ་ལས་དབྱངས་ཅན་ཡུམ་དུ་གྲུབ། །རུ་ནི་གཽ་རཱིའི་རང་བཞིན་ནོ། །ཎ་ཡོ་ནི་ར་ཐོད་པ་བཞི། །ཡི་གེ་བཅུ་བདུན་ལྷ་བཅུ་བདུན། །ལས་ཀུན་དེ་ཡིས་བྱེད་པར་འགྱུར། །ཞེས་པས་དབང་བསྐུར་བའི་དཀྱིལ་འཁོར་དང༌། བསྙེན་སྒྲུབ་ལ་ལྷ་བཅུ་གསུམ་སྒྲུབ་ཅིང་བསྐུལ་བའོ། །དེ་ཉིད་


DTG047_Page_0278
[མ་དཔེ་གཟིགས་ན་འདིར་གནོན།]

ནས་ཨོཾ་ནི་བརྒྱ་བྱིན། ཧྲཱིཿ་གཤིན་རྗེ། ཥྚྲྀཿ་ལ་སོགས་ཕྱོགས་སྐྱོང་ཡིན། །རྣལ་འབྱོར་པ་ཡིས་ལས་བཅོལ་ལོ། །ཡ་མཱནྟ་ཀས་རང་རིག་བྱེད། །ཅེས་པས་ལྷ་ལ་བསྐུལ་ཞིང༌། ཆོས་སྐྱོང་བསྐུལ་བའི་བྱ་བས་ཆོས་བཤད། ནོར་བྱིན་སྡིགས་པ་དངོས་དང་བསམ་གཏན་གྱིས་གདུག་པ་ཅན་ལ་བྱ་བ་མན་ངག་གོ །དེ་ཡང་རྣལ་འབྱོར་པ་ལྷ་བཅུ་གསུམ་དང༌། སངས་རྒྱས་ཀྱི་འཁོར་ལོ་བཅུ་གསུམ་དང༌། རྡུལ་ཚོན་གྱི་དཀྱིལ་འཁོར་ལྷ་བཅུ་གསུམ་དང༌། འཁྲུལ་འཁོར་ལྷ་བཅུ་གསུམ་གྱིས་དགུག་པ་སོགས་དང༌། བསང་སྦྱང་བྱ་བའོ། །ལས་ཐམས་ཅད་ཅེས་པ་ནི་དེ་ལྟར་ཤེས་པས་བསྙེན་སྒྲུབ་སོང་བས་མཆོག་དང་ཞི་བ་ལ་སོགས་པའི་ལས་ཐམས་ཅད་བྱེད་པའོ། །རྟོག་པ་གསུམ་པའི་བཤད་པའོ། །

བཞི་པ། བསྒོམ་པའི་རྟོག་པའི་བཤད་པ།


DTG047_Page_0278
[མ་དཔེ་གཟིགས་ན་འདིར་གནོན།]

སྔགས་ཀྱིས་འགྲུབ་པ་ལ་ལྷ་ལ་དམིགས་པ་མེད་ན་མི་འགྲུབ་པས་མངོན་པར་རྟོགས་པའི་དོན་དུ། དེ་ནས་ཞེས་བྱ་བ་ལ་སོགས་པ་སྒྲུབ་པའི་ཐབས་གསུངས་པ་ཉིད་དོ།། དེ་ནས་ཞེས་པ་ནི་སྔགས་བཏུས་པ་སོང་བ་དང་ལྷ་བསྒོམ་དགོས་པ་འབྲེལ་ཏོ། །ཡང་དག་རབ་བཤད་བྱ་ཞེས་བྱ་བ་ནི་ཐབས་སོ། །རྡོ་རྗེ་འཇིགས་བྱེད་སྒྲུབ་པའི་ཐབས་ཡང་དག་པར་འཆད་པའོ། །རྡོ་རྗེ་འཇིགས་བྱེད་ཅེས་པ་ནི་བསྒྲུབ་པར་བྱ་བ་ཡིན་ལ། ཐབས་ཡང་དག་སྤར་བཤད་པ་ནི་སྒྲུབ་བྱེད་ཡིན་ནོ། །དེ་ཡང་སྒྲུབ་ཐབས་ཡང་དག་པར་འཆད་པ་སྟེ། བླ་མའི་མན་ངག་གིས་རྣལ་འབྱོར་པས་ཆོས་ཐམས་ཅད་སྟོང་པར་རྟོགས་ཤིང་ལྷ་ལ་དམིགས་པ་གསལ་བས་སྔགས་འགྲུབ་པོ། །མན་ངག་ནི་སྔར་གྱི་གནས་བསྟན་པར་རྫས་དང་གྲོགས་དང་བཅས་པས་དཀྱིལ་འཁོར་བྲི་བ་དང་སྐུ་གཟུགས་དགྲམ་པ་དང་མཆོད་གཏོར་དབུལ་བ་ལ་སོགས་པ་བྱའོ། །དང་པོ་ཁོ་ནར་ཞེས་པ་ནི་དེའི་ཚེ་དང་པོ་སྟེ་གནས་དེར་སྟན་བདེ་བ་ལ་འདུག་སྟེ། བདུད་རྩི་ལྔ་ཡིས་ཁ་དག་པར་བྱས་ལ། གཅེར་བུ་སྐྲ་གྲོལ་བ་ལྷོར་མངོན་པར་ཕོགས་པར་བྱ་སྟེ། སྙིང་གའི་མ་དང་ས་བོན་གྱིས་དྲ་གུར་གྱི་བསྲུང་བས། གནས་དང་སྙིང་རྗེ་ཆེན་པོ་དང་ལྷ་དང་སྟོང་པ་ཉིད་ཀྱི་ཏིང་ངེ་འཛིན་བསྲུང་བས་རྣལ་འབྱོར་པ་ཡང་བསྲུང་བར་འགྱུར་རོ། །སྙིང་གའི་ས་བོན་གྱི་འོད་ཟེར་ལྔ་དང་ལྡན་པའི་འོད་དེ་ཉིད་ཀྱིས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་དུ་ཁྱབ་པས་སངས་རྒྱས་ཐམས་ཅད་


DTG047_Page_0279
[མ་དཔེ་གཟིགས་ན་འདིར་གནོན།]

རིགས་ལྔ་བསྐུལ། འགྲོ་བའི་རྒྱུད་ལྔ་སྦྱངས་ནས། སངས་རྒྱས་དང་བྱང་ཆུབ་སེམས་དཔའ་དང་ཁྲོ་བོ་དང་བླ་མ་ཐམས་ཅད་མདུན་གྱི་ནམ་མཁའ་ལ་དམིགས་ལ། རང་གི་སྙིང་གའི་ས་བོན་ལས་མཆོད་པའི་ལྷ་མོ་སྤྲོས་ལ་རྡོ་རྗེ་ཙཱརྩི་ཀཱ་ལ་སོགས་ཀྱིས་ཕྱི་དང་ནང་དང་དེ་ཁོ་ན་ཉིད་ཀྱི་མཆོད་པས་ཡང་དག་པར་མཆོད་པ་དང༌། སྡིག་པ་བཤགས་པ་ལ་སོགས་པ་རྣམས་བྱས་ལ་ཚངས་པའི་གནས་བཞི་བསྒོམས་ཏེ། སེམས་ཅན་ཐམས་ཅད་ལ་བརྩེ་བས་ཁྱབ་པ་མི་གཏོང་བ་བྱམས་པའི་མཚན་ཉིད། སྡུག་བསྔལ་ལས་སྐྱོབ་པར་འདོད་པའི་སྙིང་རྗེའི་མཚན་ཉིད་དེ། འཁོར་བ་ལས་བསྒྲལ་བར་འདོད་པའི་བདེ་བར་འདོད་པ་དང༌། མི་འབྲལ་བར་འདོད་པ་དགའ་བའི་མཚན་ཉིད་དོ། །ཉེ་རིང་གིས་མི་འབྱེད་ཅིང་ཆོས་བརྒྱད་སྤངས་པ་བཏང་སྙོམས་སུ་ཤེས་པའོ། །དེའི་རྗེས་སུ་ཆོས་གཅིག་དང་དུ་མས་སྟོང་པ་མུ་བཞི་དང་བྲལ་བ་རྟེན་ཅིང་འབྲེལ་བར་འབྱུང་བའི་རང་བཞིན་མ་གྲུབ་པར་རྟོགས་ནས། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ་ཞེས་བརྗོད་ལ། སྔགས་དེའི་དོན་སྟོང་པ་ཉིད་ཀྱི་ཡེ་ཤེས་མི་འགྱུར་བའི་རང་བཞིན་དུ་ནམ་མཁའ་ཁྱབ་པ་རང་གི་བློ་མི་དམིགས་པར་གཞག་གོ །ནམ་མཁའི་དཀྱིལ་དུ་ཡཾ་ཡིག་ལས། །ཞེས་པ་ནི་ཆོས་ཉིད་ལས་སྔོན་དུ་ཚོགས་དང་སྨོན་ལམ་སོང་བའི་མཐུས། ཡཾ་རཾ་བཾ་ལཾ་སུཾ་གྱི་རིམ་པ་ལས་སྔོ་བ་དང་དམར་པོ་དང་དཀར་པོ་དང་སེར་པོའི་ཁ་དོག་ཅན་གྱི་འབྱུང་བ་བཞིའི་དཀྱིལ་འཁོར་གླིང་བཞིར་ཆགས་པའི་དཀྱིལ་དུ་སུཾ་རི་རབ་རིའི་རྒྱལ་པོར་གྱུར་པ་ལྕོག་བཞི་དང་བཅས་པའི་སྟེང་དུ། མ་ལས་ཉི་མའི་དཀྱིལ་འཁོར་དང༌། དེའི་སྟེང་དུ་ཧཱུཾ་ལས་སྣ་ཚོགས་རྡོ་རྗེར་གྱུར་ནས་རྡོ་རྗེའི་ས་གཞི་དང༌། ར་བ་དང༌། གུར་དང༌། བླ་རེ་དག་བསྒོམ་མོ། །དེའི་ནང་དུ་གཞལ་ཡས་ཁང་འཇམ་དཔལ་ཡེ་ཤེས་སེམས་དཔར་གྱུར་པ་ལས། །གྲུ་བཞི་སྒོ་བཞི་དུར་ཁྲོད་དང་བཅས་པ་སྔོན་བཞིན་བསྐྱེད་ལ། དེའི་ནང་དུ་དྷཱིཿ་ཡིག་ལས་ཞེས་པ་ནི་དང་པོའི་སངས་རྒྱས་རྣལ་འབྱོར་དང་རྗེས་སུ་རྣལ་འབྱོར་དང་ཤིན་ཏུ་རྣལ་འབྱོར་དང༌། རྣལ་འབྱོར་ཆེན་པོ་རྣམས་བསྒོམ་པའོ། །ལས་སྦྱོར་གྱི་དུས་སུ་དཔའ་བོ་གཅིག་པ་ནི་དཀྱུས་ཀྱི་གསལ་བ་དེ་ཉིད་དོ། །ཁྱད་པར་ནི་དྷཱིཿ་དང་རལ་གྲི་ལྷ་


DTG047_Page_0280
[མ་དཔེ་གཟིགས་ན་འདིར་གནོན།]

རྣམས་སེར་བའོ། །གཡོན་པོ་ཏི་བསྣམས་པ་ཉིད་བསྒོམ་པའོ། །པདྨ་དང་ཟླ་བ་ལ་རྡོ་རྗེ་སྐྱིལ་མོ་ཀྲུང་དུ་བཞུགས་པའོ། །རྡོ་རྗེ་དེ་ཉིད་ཞལ་དགུ་པ་ཞེས་པ་ནི་འབྲས་བུ་རྡོ་རྗེ་འཆང་རྡོ་རྗེ་འཇིགས་བྱེད་དུ་གྲུབ་པའི་དུས་དེར། །སྲིད་པ་དང་ཞི་བ་དབྱེར་མེད་པ་ཆོས་ཀྱི་དབྱིངས་ཀྱི་རང་བཞིན་དུ་བྱིན་གྱིས་བརླབ་ཅིང་ང་རྒྱལ་དུ་བྱ་བ། ཨོཾ་བཛྲ་དྷརྨ་དྷཱ་ཏུ་སྭ་བྷ་ཝ་ཨཱཏྨ་ཀོ྅ཧཾ། ཞེས་རྫོགས་པའོ། །དེར་ཡང་ཡེ་ཤེས་སེམས་དཔའ་གཞུག་པ་དང༌། སྐྱེ་མཆེད་བྱིན་གྱིས་བརླབ་པ་དང༌། སྐུ་གསུང་ཐུགས་སྒྲུབ་པ་དང༌། དབང་བསྐུར་བ་དང༌། མཆོད་པ་དང༌། བསྟོད་པ་དང་བདུད་རྩི་མྱང་བ་ལ་སོགས་པ་ཡང་མན་ངག་ལས་བྱའོ། །ཞལ་དགུ་ཞེས་པ་ནི་མཐར་གྱིས་སྙོམས་པར་འཇུག་པ་དགུ་སྟེ་སེམས་ཅན་སྨིན་པར་བྱེད་པའོ། །མ་ཧེ་ནི་ལྷ་དྲག་པོ་མ་ཧེའི་གདོང་འདུལ་བའི་ཕྱིར་རོ། །མེ་ལྟར་འབར་བ་ནི་ཐུགས་རྗེས་ཐུགས་བསྐྱེད་པའི་འབྲས་བུ་བདུད་འདུལ་བའོ། །ཁམས་གསུམ་ཟ་བ་ནི་ཆོས་ཐམས་ཅད་སྟོང་པ་ཉིད་དུ་རྟོགས་པའོ། །ཞལ་བརྩེགས་པ་ནི་བདུད་བཞི་པ་བཀོད་བའོ། །ཧ་ཧ་ནི་སེམས་རྟས་པར་བྱེད་དེ་དབུགས་འབྱིན་པའོ། །ལྗགས་འདྲིལ་བ་ནི་དབང་དུ་བྱེད་པའོ། །མི་ཤ་ཞེས་པ་བདེ་བ་ཆེན་པོར་འགྲུབ་པའོ། །སྡིགས་མཛུབ་ཅེས་པ་ནི་མི་ཡངས་པར་འགྲོ་དོན་མཛད་པའོ། །བརྒྱ་བྱིན་ཞེས་པ་བཀའ་ཉན་བྱེད་པའི་རྟགས་སུ་བསྟན་པའོ། །མགོ་བོའི་ཕྲེང་བའི་ཐོད་དེ་ནི་རིགས་ལྔའི་བདག་པོའོ། །ཕཊ་ཀྱི་སྒྲ་ནི་ཐམས་ཅད་བསྡིགས་པའོ། །ཐོད་པའི་ཕྲེང་བ་ནི་དབྱངས་དང་གསལ་བྱེད་ཀྱི་ཡི་གེ་དག་པའོ། །སྤྲུལ་ནི་ཀླུ་ཆེན་པོ་རྣམས་འདུལ་བའོ། །ཞབས་བཅུ་དྲུག་ནི་སྟོང་པ་ཉིད་བཅུ་དྲུག་གོ །གཡོན་བརྐྱང་བ་ནི་འགྲོ་དོན་མཛད་པའོ། །གཅེར་བུ་ནི་ཆོས་ཀྱི་སྐུ་སྤྲོས་པ་དང་བྲལ་བའོ། །མཚན་མ་གྱེན་དུ་འགྲེང་བ་ནི་བདེ་བ་ཆེན་པོའི་སྐུའོ། །སྐྲ་གྱེན་དུ་བརྫེས་པ་ནི་ནང་ན་ཡེ་ཤེས་འབར་ཞིང་ཕྱི་རོལ་དུ་བདུད་བསྡིགས་པར་མཛད་པའོ། །ཕྱག་སུམ་ཅུ་རྩ་བཞི་ནི་བྱང་ཆུབ་ཀྱི་ཕྱོགས་སུམ་ཅུ་རྩ་གཉིས་སོ། །གཉིས་གླང་པོ་ཆེའི་པགས་པ་བཟུང་བ་ནི་གཏི་མུག་དག་ནས་ཆོས་ཀྱི་དབྱིངས་དང་མི་འབྲལ་བ་དང༌། ཐབས་དང་ཤེས་རབ་ཀྱིས་གཞན་ཡང་ཆོས་ཀྱི་དབྱིངས་ལ་སྦྱོར་བའོ། །


DTG047_Page_0281
[མ་དཔེ་གཟིགས་ན་འདིར་གནོན།]

དེ་ཉིད་ཀྱི་རྣལ་འབྱོར་ལ་མཉམ་པར་གཞག་ཅེས་པ་ནི་རྣལ་འབྱོར་ཆེན་པོའི་རིམ་པའོ། །རྡོ་རྗེ་ནི་ཡེ་ཤེས་ལྔའི་ངོ་བོས་ཕས་ཀྱི་དུག་ལྔ་སྦྱོང་བའོ། །རྩེ་གསུམ་ནི་ལུས་ངག་ཡིད་གསུམ་གྱི་ཉེས་པ་འབིགས་པའོ། །གཏུན་ཤིང་ནི་བརྗེད་ངས་པ་འཇོམས་པའོ། །ཆུ་གྲི་ནི་སྲེད་པ་གཅོད་པའོ། །རྩེ་གཅིག་པ་ནི་ཕུང་པོ་གསུམ་འབིགས་པའོ། །སྟ་རེས་འཁོར་བའི་སྐྱེ་རྒ་གཅོད་པའོ། །མདུང་ནི་ཟབ་པའི་དོན་ཆོས་ཐམས་ཅད་སྟོང་པ་ཉིད་དུ་རྟོགས་པའོ། །མདའ་ནི་མ་རིག་པ་འབིགས་པའོ། །ལྕགས་ཀྱུ་ནི་འགྲོ་བ་འདྲེན་པར་བྱེད་པའོ། །ཌ་མ་རུ་ནི་ཆོས་ཀྱི་སྒྲ་སྒྲོགས་པར་བྱེད་པའོ། །ཁ་ཊྭཱཾ་ག་ནི་ལྷ་རྣམས་གསལ་བའོ། །འཁོར་ལོ་ནི་བར་ཆད་ཀྱི་བདུད་བཞི་སེལ་བའོ། །གྲི་གུག་ནི་སྐྱོན་དྲུག་ང་རྒྱལ་ལ་སོགས་པ་གཅོད་པའོ། །ཐོ་བ་ནི་སྟོབས་དང་མི་འཇིགས་པ་དང་ལྡན་པའོ། །རལ་གྲི་ནི་རལ་གྲིའི་དངོས་གྲུབ་དང་ལྡན་པའོ། །དབྱུག་པ་ནི་ལྷ་མ་ཡིན་ཕམ་པར་བྱེད་པའོ། །ཐོད་པ་ཁྲག་གིས་བཀང་བ་ནི་བདེ་བ་ཆེན་པོར་རོལ་པའོ། །བྲམ་ཟེའི་མགོ་བོ་ནི་རྟག་ལྟ་སེལ་བའོ། །ཕུབ་ནི་འགྲོ་བ་རྣམས་སྐྱོབ་པའོ། །རྐང་པ་ནི་རྫུ་འཕྲུལ་གྱི་རྐང་པ་བཞི་དང་ལྡན་པའོ། །ཞགས་པ་ནི་ཐུགས་རྗེ་ཆེན་པོས་ངན་འགྲོ་རྣམས་འདྲེན་པའོ། །གཞུ་ནི་འཇིག་རྟེན་གསུམ་ལས་རྒྱལ་བའི་སྟོང་པ་ཉིད་ཀྱི་ཤེས་རབ་མངའ་བའོ། །རྒྱུ་མ་ནི་མཉམ་པ་ཉིད་ཀྱི་ཡེ་ཤེས་སོ། །དྲིལ་བུ་ནི་སོ་སོར་རྟོག་པའི་ཡེ་ཤེས་སོ། །ལག་པ་ནི་བྱ་བ་ནན་ཏན་གྱི་ཡེ་ཤེས་སོ། །དུར་ཁྲོད་རས་ནི་མེ་ལོང་ལྟ་བུའི་ཡེ་ཤེས་སོ། །གསལ་ཤིང་གིས་ཕུག་པའི་རོ་ནི་ཆོས་ཐམས་ཅད་ངོ་བོ་གཅིག་པའོ། །མེ་ཐབ་ནི་སྣང་བ་གསུམ་གྱིས་འགྲོ་བ་ལ་སྐྱོབ་ཅིང་བདུད་སྲེག་པར་བྱེད་པའོ། །ཐོད་ཚལ་ནི་ཆོས་ཉིད་ཀྱི་སྙིང་རྗེ་མངའ་བས་སོ། །སྡིག་མཛུབ་ནི་བདུད་ལ་བསྡིགས་པའོ། །འཕན་རྩེ་གསུམ་ནི་སྐུ་གསུམ་ངོ་བོ་གཅིག་པའོ། །རླུང་རས་ནི་རྟག་ཆད་ལས་གྲོལ་བའོ། །ཞབས་གཡས་ཀྱི་གདན་རྣམས་ནི་དངོས་གྲུབ་བརྒྱད་བསྒྲུབ་པའོ། །གཡོན་པའི་བྱ་རྒོད་ལ་སོགས་པས་ནི་མཁའ་སྤྱོད་ཀྱི་འགྲོ་བ་སྐྱོབ་པའོ། །རྭ་གཉིས་ནི་བདེན་པ་གཉིས་སོ། །ཞལ་གྱི་མདོག་ནི་རིགས་དྲུག་གི་ངོ་བོའོ། །དམར་བ་ནི་འགྲོ་བ་ལ་


DTG047_Page_0282
[མ་དཔེ་གཟིགས་ན་འདིར་གནོན།]

ཤིན་ཏུ་ཆགས་པའོ། །ཁྲོས་པ་ནི་སྐྱོབ་པའོ། །འཇམ་དཔལ་གྱི་ཞལ་ནི་ངོ་བོ་མི་འགྱུར་བའོ། །གཞོན་པ་ནི་བྱང་ཆུབ་སེམས་དཔའི་སྐུར་བཞུགས་པའོ། །རལ་པ་ལྔ་ནི་ཡེ་ཤེས་ལྔ་དང་ལྡན་པའོ། །སྤྱན་གསུམ་ནི་སྙིང་རྗེ་གསུམ་གྱིས་གཟིགས་པའོ། །དེ་ལྟར་ཤེས་པར་བྱས་ནས་མ་ཡེངས་པའི་སེམས་ཀྱིས་ལྷ་ལ་དམིགས་ལ་སྔགས་བཟླས་པ་ནི། གང་ཡང་རུང་བ་སྙིང་གར་པདྨ་དང་ཉི་མ་ལ་ས་བོན་གྱི་ཡི་གེ་ལ་གཡས་སྐོར་དུ་བཀོད་པ་ལ། སྣ་བུག་གི་རླུང་འབྱུང་བ་ལས་སྤྲོས་པས་སངས་རྒྱས་ཐམས་ཅད་ཀྱི་ཐུགས་དམ་བསྐུལ། སེམས་ཅན་ཐམས་ཅད་ཀྱི་སྒྲིབ་པ་སྦྱངས་ལ་འཇུག་པའི་རླུང་གིས་ཚུར་བསྡུས་ལ་སྔགས་ལ་བསྟིམ་མོ། །མི་སྐྱོའི་བར་དུ་བཟླས་ཤིང་རང་གང་འདོད་བསྒྲུབ་པའོ། །མཚན་མོ་རྒྱུ་ཞེས་པ་ནི་མིས་མ་ཚོར་བར་གསུང་བའི་དོན་ཏོ། །དཔལ་རྡོ་རྗེ་འཇིགས་བྱེད་ཀྱི་རྟོག་པ་བཞི་པའི་བཤད་པའོ།། །།

ལྔ་པ། བྲིས་སྐུའི་ཆོ་གའི་རྟོག་པའི་བཤད་པ།


DTG047_Page_0282
[མ་དཔེ་གཟིགས་ན་འདིར་གནོན།]

ལྷའི་དམིགས་པ་གསལ་བར་བྱ་བ་ལ་རྟེན་བསྒོམ་པར་བྱ་བའི་ཕྱིར། དེ་ནས་ཞེས་བྱ་བ་ལ་སོགས་པས་བཤད་དེ་གཞན་གསལ་བ་ཉིད་དོ། །རི་མོ་མཁན་བཟང་ཞེས་པ་ནི་དབང་ཐོབ་པའོ། །རྟོག་པ་མེད་པ་ཞེས་པ་ནི་ཆོས་ཐམས་ཅད་སྟོང་པར་རྟོགས་པའོ། །མི་ཁྲོ་ཞེས་པ་ནི་སྙིང་རྗེ་དང་ལྡན་པའོ། །གཙང་ཞེས་པ་ནི་དམ་ཚིག་དང་ལྡན་པའོ། །བརྩེ་བ་དང་ལྡན་ཞེས་པ་ནི་རྒྱུ་མེད་སྒྲུབ་པ་པོ་དེ་ལ་ཕན་གདགས་སྙམ་པའོ། །དཔའ་བོའི་ཆོ་གས་བྲི་ཞེས་པ་ནི་གནས་དབེན་པར་མཆོད་པ་དང་གཏོར་མ་དུས་གསུམ་དུ་དབུལ་ཞིང༌། དཔལ་རྡོ་རྗེ་འཇིགས་བྱེད་ཀྱི་རྣལ་འབྱོར་པས་རས་ལ་དཀྱིལ་འཁོར་དུ་བྱིན་གྱིས་བརླབ་པ་དང༌། སྔགས་རྣམས་སྙིང་པོ་ཐུགས་ཀར་བྲི་བ་དང༌། སྔགས་ཞལ་དུ་བྲི་བ་དང༌། རྩ་སྔགས་ལྟེ་བར་དགོད་པ་དང༌། མིག་ལ་སོགས་པའི་སྐྱེ་མཆེད་ལ་ཨོཾ་སརྦ་ཏ་ཐཱ་ག་ཏ་བཛྲ་ཙཀྵུ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་བྱ་བ་ལ་སོགས་པ་དགོད་པ་དང༌། སྐུ་གསུམ་གྱི་སྙིང་པོའང་གནས་གསུམ་དུ་དགོད་དོ། །དབང་བསྐུར་བའི་སྙིང་པོ་སྤྱི་བོར་དགོད་པར་བྱའོ། །ཤིན་ཏུ་མཉམ་པར་ཞེས་པ་ནི་དུས་གསུམ་དུ་ཚོགས་སྔོན་དུ་སོང་བ་ཅན་གྱིས་སྦྱོར་བ་བཞི་རྫོགས་པར་བྱས་ཤིང༌། དུང་ཆེན་པོའི་ཕྲེང་བས་ལས་སྔགས་ལ་མ་ཡེངས་པར་བཟླ་བའོ། །


DTG047_Page_0283
[མ་དཔེ་གཟིགས་ན་འདིར་གནོན།]

ཕྲེང་བ་ཧཱུཾ་གི་གོང་དུ་ཁྲོ་བོ་སྤྲོ་བའི་དམིགས་པས་ཚིག་དང་མ་འདྲེས་པར་བགྲངས་པའོ། །དེའི་ཕྱི་རོལ་དུར་ཁྲོད་ཅེས་པ་ནི་དུར་ཁྲོད་བརྒྱད་བྲི་བ་སྟེ། ཕྱོགས་སྐྱོང་བརྒྱད་དང༌། ལྷ་བརྒྱད་དང༌། ཀླུ་བརྒྱད་དང༌། ཤིང་དང༌། མཆོད་རྟེན་དང༌། སྒྲུབ་པ་པོ་དང༌། ཡི་དགས་དང༌། བྱ་དང་གཅན་གཟན་དང༌། སྦྲུལ་དང༌། རོ་སྣ་ཚོགས་ཤིན་ཏུ་འཇིགས་པས་བསྐོར་བ་བྲིའོ། །གཅེར་བུ་ཞེས་པ་ནི་སྒྲུབ་པ་པོ་རང་ཉིད་བྲི་བའོ། །གནས་གཅིག་ཏུ་ཞེས་པ་བྲི་བ་དང་བསྙེན་སྒྲུབ་ཀྱི་གནས་སྤོར་མི་རུང་བའོ། །བཟའ་བཏུང་ཐམས་ཅད་མཚན་མོ་དང་ཕྱི་དྲོ་ལོངས་སྤྱོད་ཅིང་མང་བར་སྤྱོད་པའོ། །མཆོག་འདོད་ན་ཞེས་པ་ནི་བསྐྱེད་པ་དང་རྫོགས་པའི་རིམ་གྱིས་བྲིས་སྐུ་ལ་མཆོད་ཅིང་བསྒོམ་པར་བྱའོ། །དེ་དང་པོའི་ལེའུ་དང་ཐ་མའི་ལེའུ་འབྲེལ་པར་བྱས་ལ་བསྒོམ་པའོ། །ལ་ལ་བླ་མའི་ངག་ལ་ཡང་ངོ༌། །རྟོག་པ་ལྔ་པའི་རྣམ་པར་བཤད་པའོ།། །།

དྲུག་པ། སྦྱིན་སྲེག་གི་ལས་ཀྱི་ཆོ་ག་རྒྱ་ཆེ་བའི་རྟོག་པའི་བཤད་པ།


DTG047_Page_0283
[མ་དཔེ་གཟིགས་ན་འདིར་གནོན།]

ལས་ཀྱི་ཚོགས་དེ་དག་སྦྱིན་སྲེག་གིས་བསྒྲུབ་ཅིང་གཞུང་བསྡུ་བའི་ཕྱིར། དེ་ཡང་སེམས་ཅན་རྣམས་ལ་ཆོ་གའི་མཆོག །སྦྱིན་སྲེག་བྱེད་པར་འདོད་རྣམས་ལ། །རྡོ་རྗེ་སེམས་དཔའ་ཉིད་ཀྱིས་བསྟན། །གང་འདོད་ལས་རྣམས་འགྲུབ་པའོ། །ཞེས་བྱ་བས་སྦྱིན་སྲེག་གི་ཆོ་ག་བྱ་བ་སྟེ། ཇི་ལྟར་སྔོན་གྱི་རིམ་པ་ཞེས་པ་ནི་དྲག་ལས་སྔོན་དུ་བསྟན་པའི་བསད་པ་ལ་སོགས་པའི་རིམ་པ་ཉིད་དོ། །བསད་པར་འདོད་པ་ཞེས་པ་ནི་ཞི་བས་མི་འདུལ་བའི་མི་དང་མི་མ་ཡིན་པ་དེ་ལ་སྙིང་རྗེ་ཆེན་པོས། བཅོམ་ལྡན་འདས་རྡོ་རྗེ་འཇིགས་བྱེད་ཀྱི་བསྙེན་པ་ནས་སྦྱིན་སྲེག་ལ་སོགས་པའི་རིམ་པས་ཚེ་འདིར་འཕོར་བཅུག་ལ། མ་འོངས་པའི་ལུས་མི་བསྐྱོད་པའི་ཞིང་ཁམས་དག་དེར་སྒྲུབ་སྙམ་པ་དང༌། སྔོན་ལྟར་ཏིང་ངེ་འཛིན་སྦྱང་བར་བྱའོ། །དེ་ཡང་དུར་ཁྲོད་དུ་སོང་སྟེ་ཐབ་ཁུང་གྲུ་གསུམ་ནག་པོ་རྒྱར་སོར་ཉི་ཤུ་སོར་བཅུ་བརྐོས་པར་རྡོ་རྗེ་གདེངས་པའི་ཕྲེང་བས་བསྐོར་ཞིང༌། རཾ་དང་རླུང་གིས་ཀྱང་བསྐོར་ཏེ། དུར་ཁྲོད་ཀྱི་མེའམ་ལྕགས་ལས་བྱུང་བའམ་ཙཎྜ་ལཱིའི་མེ་ལ་དུར་ཁྲོད་ཤིང་གིས་མེ་སྦར་ལ་མེའི་གཟི་བྱིན་མར་མེ་ཆེན་པོས་བསྐྱེད་ཅིང་མེའི་དབུས་སུ་པཾ་ལས་སྣ་ཚོགས་པདྨ་འདབ་མ་བརྒྱད་པ། དེའི་སྟེང་དུ་རཾ་ལས་ཉི་མའི་གདན་ལ་རཾ་ལས་བྱུང་


DTG047_Page_0284
[མ་དཔེ་གཟིགས་ན་འདིར་གནོན།]

བའི་མེའི་ལྷ་སྐུ་མདོག་ནག་པོ་ཞལ་གསུམ་ཕྱག་དྲུག་པ། དབུ་སྐྲ་དང་སྤྱན་དང་ཞལ་ལ་སོགས་པ་ཁྲོས་པ་རུས་པའི་རྒྱན་ཅན། གཡས་རྣམས་སུ་གྲི་གུག་དང་བགྲང་ཕྲེང་དང་མི་འཇིགས་པ་རྣམས་སོ། །གཡོན་རྣམས་སུ་ཐོད་པ་དང་དབྱུ་གུ་རྩེ་གསུམ་དང་རིལ་བ་སྤྱི་བླུགས་སོ། །གཡོན་བརྐྱང་བའི་སྟབས་ཀྱིས་བཞུགས་པ་བསྐྱེད་ལ། ཐུགས་ཀའི་ས་བོན་ལས་མེ་ལྷ་བཀུག་ལ་ཞབས་དང་ཕྱག་དང་ཞལ་བསིལ་བ་དང་མཆོད་པ་རྣམས་བྱས་ལ་དམ་ཚིག་ལ་བཅུག །ལྷ་དེའི་ཁྲ་རཾ་དམིགས་ལ་ཧ་ཧ་ཨོཾ་ཨགྣ་ཡེ་ཞེས་བྱ་བས་རྫས་དང་བསྒྲུབ་བྱའི་མིང་ཅི་རིགས་པར་བསྲེག་གོ །དེ་ནས་དེའི་སྙིང་གར་གོང་གི་དཔལ་རྡོ་རྗེ་འཇིགས་བྱེད་བསྐྱེད་ལ། སྐྱེ་མཆེད་བྱིན་གྱིས་བརླབ་པ་ནས་ཡེ་ཤེས་ནས་དབང་གི་བར་བྱ་བ་བསྒྲུབས་ལ། མཆོད་པ་རྣམས་རིམ་པས་མཆོད་ཅིང་བསྟོད་པ་ལ་སོགས་པ་ཅི་རིགས་པ་ཡང་བྱའོ། །དེའི་ལྟོ་བར་མེའི་དུར་ཁྲོད་ཆེན་པོ་དངོས་པོ་ཐམས་ཅད་སྟོང་པ་ཉིད་དུ་བསྒྲུབ་པ་དང༌། ཞལ་དུ་རཾ་དང་མེ་གྲུ་གསུམ་བརྩེགས་མ་རྐན་གཉིས་ལ་བསྒོམས་ལ། རྫས་དང་བསྒྲུབ་བྱའི་མིང་དང་བཅས་པ་བསྲེགས་པས་གསུངས་པ་ལྟར་འགྱུར་རོ། །ཡང་ན་ཕྱོགས་གཅིག་ཅེས་པ་ནི་རང་གི་ཁྱིམ་གྱི་ལྷོར་ཕྱོགས་པར་བསྟན་པ་ལྟར་བསྲེགས་ནས་ཡང་གསུངས་པ་ལྟར་འགྱུར་རོ། །ཡང་ན་ཁྱིམ་གྱི་ཕྱོགས་ནི་མར་ཚེས་ཟླ་བ་བྲི་བའི་བཅུ་བཞི་ནས་ལས་དེ་འགྲུབ་པའོ། །དེ་ནས་དབྱེ་བར་འདོད་ན་ཞེས་པ་ནི་ཐབ་དང་ལྷ་དང་མེ་ལྷ་རྣམས་བསད་པ་ལྟར་རོ། །དེ་ནས་ཡང་བསྐྲད་པར་འདོད་ན་ཞེས་བ་ནི་ཐབ་ཁུང་ཁྲུ་གང་རྒྱ་དང་དཔངས་སུ་བྱ་ཞིང་ཁ་དོག་སྔོན་པོ་གཞུའི་དབྱིབས་ཅན་དུ་ཐོ་བ་དང་རྡོ་རྗེ་དབྱུག་པའི་ཕྲེང་བས་བསྐོར་བའོ། །མཆོད་པ་དང་རྫས་བསྲེགས་པ་ཡང་བསྐྲད་པའི་སེམས་གཙོར་བྱ་བའོ། །སྐྲོད་པའི་སྦྱིན་སྲེག་དག་དུས་གཅིག་ཡིན་ནོ། །མེ་སྦར་ཞིང་མེ་ལྷ་ལ་སོགས་པ་སེར་པོ་སྔོན་ལྟར་བྱའོ། །ཞལ་དུ་རཾ་བཀོད་ལ་བསྲེགས་པས་གཞན་དུ་མི་འགྱུར་བའོ། །ཞི་བར་འདོད་ན་ཞེས་པ་ནི་ཐབ་ཁུང་ཟླུམ་པོ་ཚད་ལ་སོགས་པ་གཞན་ལྟར་རོ། །དགེ་འདུན་གྱི་མེ་ལ་སོགས་པ་དཀར་པོའོ། །མེ་ལྷ་ཞལ་གཅིག་ཕྱག་གཉིས་པ་ཕྲེང་བ་དང་རིལ་བ་འཛིན་པའོ། །རྒྱས་


DTG047_Page_0285
[མ་དཔེ་གཟིགས་ན་འདིར་གནོན།]

པར་འདོད་ན་ཞེས་པ་རྣལ་འབྱོར་ཉིད་ཚེ་དང་བསོད་ནམས་བུ་དང་འཁོར་མང་བར་འདོད་ན་བྱ་བ་སྟེ། ཐབ་ཁུང་ཁྲུ་དོ་ཁྲུ་གང་གཞན་ལྟར་རོ། །ཁྱིམ་བདག་གི་མེ་དང་ལྷ་སེར་པོ་ལ་སོགས་པའོ། །ཁ་ལྟ་ཕྱོགས་དང་འདུག་སྟངས་དང་ཏིང་ངེ་འཛིན་ལ་སོགས་པ་མ་ཚང་བ་གཞན་ལྟར་ཤེས་པར་བྱའོ། །ཞི་བ་བརྒྱད་དང་བཅུ་བཞི། རྒྱས་པ་བཅོ་ལྔ། དབང་དང་དགུག་པ་ཉི་ཤུ་གཉིས། རེངས་པར་བྱ་བ་སྟོང༌། དྲག་པོ་ཉི་ཤུ་དགུ་ཁོ་ན་ལ་བྱ་བ་མན་ངག་གོ །རྡོ་རྗེ་འཇིགས་བྱེད་ཀྱི་རྟོག་པ་དྲུག་པའི་བཤད་པའོ།། །།

བདུན་པ། བསམ་གཏན་གྱི་ལས་བསྒྲུབ་པ་བརྟག་པའི་རྟོག་པའི་བཤད་པ།


DTG047_Page_0285
[མ་དཔེ་གཟིགས་ན་འདིར་གནོན།]

བྱ་བ་དེ་དག་གིས་དུབ་པ་དང། བྱ་བ་དེ་དག་དོན་ཡོད་པར་བྱ་བའི་ཕྱིར་དེ་ནས་ཞེས་བྱ་བ་ལ་སོགས་པ་གསུངས་ཏེ། བསམ་གཏན་ལ་རག་ལས་པས་ཏིང་ངེ་འཛིན་བསྟན་པའོ། །བསམ་པའི་ཏིང་ངེ་འཛིན་བརྟན་ན་ལས་གོང་འོག་ཐམས་ཅད་འགྲུབ་པའོ། །བསྙེན་པ་སོང་བ་ཞེས་པ་ནི་བསྙེན་སྒྲུབ་སྔོན་དུ་མ་སོང་བར་མི་འགྲུབ་པས་བསྙེན་སྒྲུབ་སྔོན་དུ་སོང་བ་ལས་སྦྱོར་དུ་བསྟན་པའོ། །རེ་ཕ་ཡོངས་སུ་གྱུར་པ་ཞེས་པ་ནི་སྔོན་དུ་བཤད་པའི་བསྒྲུབ་བྱའི་གཟུགས་དེ་གྲུ་གསུམ་བརྩེགས་མ་མེའི་གཟུགས་ནང་ན་ཡོད་པ་དེ་ནི་ལས་དབྱིབས་དང་མདོག་དང་མིང་དུ་བཅས་པ་བསྐྱེད་ལ། དེའི་སྙིང་རིག་པའི་གནས་དེ་མ་རིག་པའི་མུན་པས་བསྒྲིབས་ཤིང་སྡིག་པ་སྣ་ཚོགས་བསྐྱེད་པ་དཀར་ནག་མཚམས་ན་གནས་པ་དང༌། སྦུ་གུས་ལུས་རྣམས་གང་བ་ཅི་ག་མེའི་དཀྱིལ་ཆེ་བ་དྲག་པར་བསྐྱེད་ལ། དེ་ནས་རང་གི་གཟུགས་ལས་ཞེས་པ་ནི་སྙིང་གའི་ས་བོན་ལས་ཕྱོགས་བཅུར་འོད་ལྔ་འཕྲོས་ལ་སངས་རྒྱས་ཐམས་ཅད་བསྐུལ་ཞིང༌། ཐུགས་རྗེ་ལ་གནད་བོར་བར་བྱའོ། །སངས་རྒྱས་ཐམས་ཅད་ཀྱང་ཡི་རང་སྟེ་གནང་བ་བྱིན་པའི་ཐུགས་ཀ་ནས་ས་བོན་རྣམས་སྤྲོས་རང་ལ་བཅུག་ལ། ཁྲོ་བོའི་ཚོགས་ནམ་མཁའ་གང་བ་བ་སྦུའི་བུ་ག་ནས་སྤྲོས་ལ། བསྒྲུབ་བྱ་དེ་བཀུག་མདུན་གྱི་དེ་ལ་བཅུག་སྟེ། སྡིག་ཅན་དེ་ལ་བ་སྦུ་ལྡང་བའི་སྙིང་རྗེ་བསྐྱེད་ལ་ཁྱོད་ལ་ངས་ཟང་ཟིང་དང་སྐྱབས་དང་བྱམས་པ་བསྒོམས་པས། མ་ཉན་པའི་ལས་ཀྱི་རྣམ་སྨིན་འདི་འདྲ་བ་མཐོང་ངམ་ཞེས་བསྒོ་ཞིང་སྨྲས་ལ། དེའི་སྐྱོབ་པའི་སངས་རྒྱས་དང་བྱང་ཆུབ་སེམས་དཔའ་དང་ཡི་དམ་ལྷ་རྣམས་གཤེགས་


DTG047_Page_0286
[མ་དཔེ་གཟིགས་ན་འདིར་གནོན།]

སུ་གསོལ་ལ། བསྲུང་བའི་འཁོར་ལོ་རང་ལ་གཞུག །འཇིག་རྟེན་པ་དེ་རྣམས་བསྐྲད་ལ་སོང་བར་བསམ་ཞིང༌། གཤིན་རྗེའི་ཚོགས་དང་དམྱལ་བའི་སྒྲས་འདར་ཞེས་བྱ་བ་དང་བྲེད་དོ། །ལས་སུ་ཤེས་པར་བྱ་ཞིང་གོང་གི་འཁོར་ལོའི་བྱ་བ་དུར་ཁྲོད་དུ་བྱས་པས་ངེས་པར་འགྲུབ་པའོ། །འདི་དག་ནི་དཀོན་མཆོག་གསུམ་ལ་གནོད་ཅེས་གཞན་ཡུལ་མ་ཡིན་པ་དང༌། སྙིང་རྗེ་ཆེན་པོ་མེད་ན་མི་འགྲུབ་ཅིང་རང་ངན་འགྲོར་འཕེན་པས་བྱ་བ་མ་ཡིན་ནོ། །དཔག་ཚད་བརྒྱ་ནས་ཞེས་པ། དབྱིབས་མདོག་མིང་ལོ་ཡོད་ན་སྔོན་ལྟར་བྱས་པས་འགྲུབ་པོ། །དེ་ནས་དཔྲལ་བར་འདོད་ན་ཞེས་བྱ་བ་ལ་སོགས་པའི་ལས་ཐམས་ཅད་ཏིང་ངེ་འཛིན་ལ་རག་ལས་ཏེ། ཡུལ་རུང་བ་དང་སྙིང་རྗེས་ཟིན་པ་དང་ཐབས་ལ་མཁས་པའི་རྫས་དང་འཁོར་ལོ་དང་སྔགས་དང་སྔོན་དུ་བྱས་པ་ལ་ཏིང་ངེ་འཛིན་གྱིས་རྫས་ཀྱི་རྟེན་ལ་བསྐྱེད་པ་དང༌། བསྒྲུབ་བྱ་དེ་ཉིད་བཅུག་ལ་བྱ་བའི་ཁྲོ་བོ་དང་གཤིན་རྗེ་ལ་སོགས་པ་ལས་དང་སྦྱར་ལ་བྱ་བས་ལས་སྦྱོར་དུ་བསྟན་པར་ཤེས་པར་བྱའོ། །གཞན་གོ་སླའོ། །རང་གི་སྙིང་ག་ཞེས་པ་རྡོ་རྗེ་འཇིགས་བྱེད་ཀྱི་སྙིང་གར་པཾ་ལས་པདྨ་ལས་ཟླ་བའི་ཁར་ཀླུ་བསྐྱེད་ལ། པདྨའི་འདབ་མ་བརྒྱད་ལ་ཨ་བརྒྱད། ཀླུའི་མགོ་བོ་ལ་ཨི། དེའི་འོད་ཟེར་གྱིས་སངས་རྒྱས་ཐམས་ཅད་ཀྱི་བདུད་རྩི་བླངས་ལ་སྙིང་གར་དབབ། ཀླུ་ལ་ཐིམ་ནས་ཡང་བསྒྲུབ་བྱའི་ལུས་ལ་དབབ་ཅིང་ནད་ཞི་བར་བསམ་མོ། །དེ་ནས་བཞུ་བ་ཞེས་པ་དབང་དུ་གྱུར་པའི་བསྒྲུབ་བྱ་ལ་བསྒོམ་པ་གོ་སླའོ། །རྣལ་འབྱོར་པས་ལུས་དུབ་གསོ་བའི་ཆོ་ག་ནི་འཁོར་ལོའི་ལྷ་ཐམས་ཅད་བསྡུས་ལ་རིམ་པས་འདུས་ནས་སྤྱི་བོར་འཇམ་པའི་རྡོ་རྗེའི་ཞལ་དང་ལུས་སུ་བསྡུས་ལ། གནས་རྣམས་སུ་ཡི་གེའི་བཤད་པ་ལྟར་བསྒོམ་སྟེ། ལྟེ་བར་ནི་བཾ་ལས་དཀྱིལ་འཁོར་སྤྱི་བོར་ཧཾ་ལས་ཐུར་དུ་འདུས་པ་ཅན་བསྒོམས་ལ། རླུང་གིས་མེ་སྦར། མེས་ཆུ་བསྐོལ་ཆུས་ས་དྲོས་པའི་རླངས་ཀྱིས་ཧཾ་ལས་བདུད་རྩི་བབས་པས་ལུས་རྒྱས་པར་གྱུར་ནས་ལོ་སྟོང་འཚོ་བར་འགྱུར་རོ། །དེ་ཡང་ས་བོན་དྷཱིཿ་ས་ཡེ་ཤེས་ཀྱི་བདུད་རྩི་དགུག་པ་མན་ངག་ཏུ་ཤེས་པར་བྱའོ། །གཞན་རྣམས་ནི་ཤེས་པར་སླ་བ་ཉིད་དོ། །དཔལ་རྡོ་རྗེ་འཇིགས་བྱེད་ཀྱི་རྟོག་པ་བདུན་པའི་བཤད་པའོ། །དཔལ་རྡོ་རྗེ་འཇིགས་བྱེད་ཀྱི་རྒྱུད་ཀྱི་འགྲེལ་


DTG047_Page_0287
[མ་དཔེ་གཟིགས་ན་འདིར་གནོན།]

པ་རིན་པོ་ཆེའི་ཕྲེང་བ་ཞེས་བྱ་བ། སློབ་དཔོན་ཆེན་པོ་ནག་པོ་པ་ཉིད་ཀྱིས་རྡོ་རྗེ་མཁའ་འགྲོ་མ་ཉིད་ལས་བླངས་ནས་མཛད་པ་རྫོགས་སོ།། །།མཁའ་འགྲོ་མ་ལས་གནང་བ་ཐོབ། །འཇིགས་བྱེད་རྒྱུད་ཀྱི་འགྲེལ་པ་བྱས། །བསོད་ནམས་ཡིད་བཞིན་ནོར་འདྲ་སྟེ། །འགྲོ་ཀུན་རྡོ་རྗེ་འཇིགས་འགྲུབ་ཤོག །རྒྱ་གར་གྱི་མཁན་པོ་ཆེན་པོ་པཎྜི་ཏ་དཔལ་བཻ་རོ་ཙ་ན་རཀྵི་ཏ་དང༌། བོད་ཀྱི་ལོ་ཙཱ་བ་གླན་དར་མ་བློ་གྲོས་ཀྱིས་བསྒྱུར་ཅིང་ཞུས་ནས་གཏན་ལ་ཕབ་པའོ།།

མ་ཧེའི་ཞལ་གྱི་སྒྲུབ་པའི་ཐབས།
དཔལ་འཛིན།


DTG047_Page_0287
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། མ་ཧིཪྵཱ་ནན་ཡ་སཱ་དྷ་ནཾ། བོད་སྐད་དུ། མ་ཧེའི་ཞལ་གྱི་སྒྲུབ་པའི་ཐབས། བཅོམ་ལྡན་འདས་མ་ཧིཪྵཱ་ཞལ་ཅན་ལ་ཕྱག་འཚལ་ལོ། །གུས་པས་བླ་མ་དང་ནི་དེ་རྗེས་གཤིན་རྗེ་གཤེད་པོ་འཇམ་པའི་མཆོག །སྒྱུ་མའི་བདག་ཉིད་ཡན་ལག་བདེ་བས་རྒྱས་པ་གཞན་གྱི་དོན་འཇུག་པ། །གྲི་གུག་ལ་སོགས་མཚན་མ་བསྣམས་ཤིང༌། ཁྲོ་བ་དང་བཅས་མཚུངས་པ་མེད། །ཞལ་དགུ་ཡིས་ནི་འཇིགས་པ་སེལ་བྱེད་དེ་ལ་སྤྱི་བོས་ཕྱག་འཚལ་འདུད། །གཤིན་རྗེ་འཇོམས་པའི་སྒྲུབ་ཐབས་ཀྱིས། །བློ་ལྡན་དེ་ཉིད་འདོད་པ་གང༌། །དབང་བསྐུར་ལ་སོགས་ཐོབ་པ་དག །དེ་ཡི་སྒྲུབ་ཐབས་རིམ་པ་འདི། །བྱིས་པ་རྣམས་ཀྱིས་རྟོགས་ཕྱིར་དང༌། །མཉམ་པས་དྲན་པའི་ཕྱིར་དང་ནི། །མཆོག་རྣམས་བྱིས་པའི་ངག་ལ་ཡང༌། །མགུ་བ་བསྐྱེད་ཕྱིར་བྲི་བར་བྱ། །དེ་ནས་ཡང་དག་རབ་བཤད་བྱ། །རྡོ་རྗེ་འཇིགས་བྱེད་སྒྲུབ་པའི་ཐབས། །ལྷ་ཉིད་དག་ནི་ཐམས་ཅད་ཀུན། །ཤིན་ཏུ་འཇིགས་པར་བྱེད་པའོ། །དེ་ལ་དུར་ཁྲོད་ལ་སོགས་པ་ཡིད་དང་མཐུན་པའི་གནས་ཤིག་ཏུ་གནས་ནས། སྒྲུབ་པའི་ཐབས་བརྩམ་པར་བྱའོ། །དེ་ནས་གནས་ནི་བརྗོད་པར་བྱ་སྟེ། དུར་ཁྲོད་དང་ཆུ་བོའི་དོགས་དང༌། ཤིང་གཅིག་དང༌། རྟགས་གཅིག་པ་དང༌། ལམ་གྱི་གཞི་མདོ་དང༌། རི་བོའི་རྩེ་དང༌། གནས་ཁང་སྟོང་པ་དང༌། མ་མོའི་ཁང་པ་དང༌། ལྷའི་གནས་སམ། གཡུལ་འགྱེད་པའི་སའམ། གྲོང་ཁྱེར་རམ། དགོན་པའམ། གྲོང་ལ་སོགས་པའི་གནས་ནས། འདིར་རྡོ་རྗེ་འཇིགས་བྱེད་ཆེན་པོར་དབང་བསྐུར་བའི་རྣལ་འབྱོར་པས། སྦྱིན་པ་དང༌། ཚུལ་ཁྲིམས་ལ་སོགས་པ་དང་ལྡན་པ། སེམས་ཅན་གྱི་དོན་


DTG047_Page_0288
[མ་དཔེ་གཟིགས་ན་འདིར་གནོན།]

ལ་བརྩོན་པ་བྱམས་པ་ལ་སོགས་པ་དང་ལྡན་པ། དད་པ་དང་ཐོས་པས་རྣམ་པར་བརྒྱན་པ། ཁ་ལ་སོགས་པ་དག་པར་བྱེད་པའི་སྙིང་རྗེ་ཅན་དེ་བདེ་བར་འཇམ་པ་རོ་ལ་སོགས་པའི་སྟེང་དུ་འདུག་སྟེ། རང་གི་སྙིང་གར་པདྨ་ལས་དབྱངས་ཡིག་དང་པོ་ཡོངས་སུ་གྱུར་པ་ལས། ཟླ་བའི་དཀྱིལ་འཁོར་བསམ་མོ། །དེའི་སྟེང་དུ་ཡི་གེ་དྷཱིཿའི་རྣམ་པ་བལྟའོ། །དེ་ནས་དེའི་འོད་ཟེར་རྣམས་ཀྱིས་ཕྱོགས་བཅུ་མཐའ་ཡས་མུ་མེད་པའི་འཇིག་རྟེན་གྱི་ཁམས་དཔག་ཏུ་མེད་པའི་མཐར་ཐུག་པར་གནས་པའི་དེ་བཞིན་གཤེགས་པ་དང༌། བྱང་ཆུབ་སེམས་དཔའ་དང༌། རིག་པའི་ལྷ་མོ་དང༌། ཁྲོ་བོ་ལ་སོགས་པ་རྣམས་བསྐུལ་ཏེ། བཀུག་ནས་མདུན་དུ་ཡང་དག་པར་བཞུགས་པར་བྱས་ལ། བསོད་ནམས་ཀྱི་ཚོགས་འཕེལ་བར་བྱ་བའི་དོན་དུ། མཆོད་པ་དང་སྡིག་པ་བཤགས་པ་དང༌། བསོད་ནམས་ལ་རྗེས་སུ་ཡི་རང་བ་དང༌། བསོད་ནམས་ཡོངས་སུ་བསྔོ་བ་དང༌། གསུམ་ལ་སྐྱབས་སུ་འགྲོ་བ་དང༌། བྱང་ཆུབ་ཏུ་སེམས་བསྐྱེད་པ་དང༌། ལམ་བསྟེན་པ་དང༌། བྱམས་པ་ལ་སོགས་པ་བསྒོམ་པ་ཡང་བྱས་ལ། དེ་ནས་སྟོང་པ་ཉིད་དུ་བལྟ་བར་བྱའོ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། དེ་ནས་སྭ་བྷཱ་ཝ་ཤུདྡྷཿ་སརྦ་དྷརྨཱཿ་སྭ་བྷཱ་ཝ་ཤུདྡྷོ྅ཧཾ། ཞེས་བརྗོད་དོ། །ཆོས་ཐམས་ཅད་བདག་མེད་པའི་རང་བཞིན་དུ་བྱས་པའི་དབུས་སུ། ཡི་གེ་ཡཾ་ལས་རྫོགས་པའི་རླུང་གི་དཀྱིལ་འཁོར་དུ་བའི་རྣམ་པ་ཅན་བསམ་མོ། །དེའི་སྟེང་དུ་དབྱངས་ཡིག་དང་པོ་ལས་རྫོགས་པའི་ཟླ་བའི་དཀྱིལ་འཁོར་བསམ་མོ། །དེའི་སྟེང་དུ་ཡི་གེ་དྷཱིཿ་ལས་འཇམ་དཔལ་འོག་ནས་བཤད་པའི་གཞོན་ནུའི་གཟུགས་ཅན་སྐད་ཅིག་གིས་བསྐྱེད་ལ། དེའི་ཐུགས་ཀར་ཨ་ལས་རྫོགས་པའི་ཉི་མའི་དཀྱིལ་འཁོར་བསམ་ཏེ། དེ་ནས་ཉི་མའི་དཀྱིལ་འཁོར་ལས་འོད་ཟེར་བྱུང་སྟེ། ཕྱོགས་བཅུའི་འཇིག་རྟེན་གྱི་ཁམས་མཐར་ཐུག་པ་ན་གནས་པའི་དེ་བཞིན་གཤེགས་པ་ལ་སོགས་པའི་འོད་ཟེར་གྱིས་བསྐུལ་ནས་བཀུག་སྟེ་ཉི་མའི་དཀྱིལ་འཁོར་དེ་ཉིད་ལ་ཞུགས་པར་བསམ་པར་བྱའོ། །འཇམ་དཔལ་དེ་ཉིད་དང༌། དེ་བཞིན་གཤེགས་པ་ལ་སོགས་པ་དེ་ཉིད་རོ་གཅིག་པར་གྱུར་ཏེ། ཉི་མའི་དཀྱིལ་འཁོར་དུ་བསམ་པར་བྱའོ། །འོད་འབར་


DTG047_Page_0289
[མ་དཔེ་གཟིགས་ན་འདིར་གནོན།]

བ་དཔག་ཚད་བརྒྱ་སྟོང་ཁྱབ་པའི་རྣམ་པར་བསྒོམ་པར་བྱ་སྟེ། དེའི་སྟེང་དུ་ཧཱུཾ་ནག་པོ་ཁ་དོག་རྣམ་པ་ལྔའི་འོད་ཟེར་དང་ལྡན་པ་བལྟས་ལ། དེ་ནས་དེའི་འོད་ཟེར་རྣམས་ཀྱིས་ཁམས་གསལ་བར་བྱས་ནས་ཡང་ཧཱུཾ་དེ་ཉིད་ལ་བསམ་པར་བྱའོ། །དེ་ཉིད་གྱུར་པ་ལས་ཁ་གྱེན་དུ་ཕྱོགས་པའི་རྡོ་རྗེ་ཆེན་པོ་མདོག་ནག་པོ་འོད་ཟེར་འཕྲོ་བ་བསམ་པར་བྱའོ། །དེ་ནས་རྡོ་རྗེ་ཕྲ་མོའི་རྣམ་པ་ཅན་སངས་རྒྱས་དང་བྱང་ཆུབ་སེམས་དཔའ་དང༌། ཁྲོ་བོ་དང་རིག་པའི་ལྷ་མོ་དང་བཅས་པ། ནམ་མཁའི་ཁམས་ན་ཏིལ་གྱི་གང་བུ་བཞིན་ཉི་མ་ལ་གནས་པ་བསམ་པར་བྱའོ། །དེ་ལ་གནས་པ་སངས་རྒྱས་ལ་སོགས་པས་སེམས་ཅན་ཡོངས་སུ་སྨིན་པར་བྱས་ཤིང་གདུལ་བྱ་སོ་སོར་བྱང་ཆུབ་ལ་བཀོད་དེ། ཡང་དེ་དག་ཉིད་དང་ལྷན་ཅིག་ཏུ། སླར་འོངས་ནས། རྡོ་རྗེའི་གཟུགས་ལ་ཞུགས་པའི་རྣམ་པ་ཅན་དུ་བསམ་པར་བྱའོ། །རྡོ་རྗེའི་གཟུགས་དེ་ཉིད་ཞལ་དགུ་པ་མ་ཧེའི་གཟུགས་འཇིག་པའི་དུས་ཀྱི་བསྐལ་བའི་མེ་ལྟ་བུའི་འོད་ཅན་རྡོ་རྗེ་འཇིགས་བྱེད་ཆེན་པོ། ཁམས་གསུམ་ཟ་བར་ནུས་པ། གཙིགས་པའི་ཞལ་ཅན། ཧ་ཧ་ཟེར་ཞིང་ལྕེ་འདྲིལ་བ་རྣམ་པར་བསྒྱུར་བའི་མཐར་འཇིགས་པའི་ཁྲོ་གཉེར་བྱེད་པ། འཇིགས་པའི་སྨིན་མ་དང་སྤྱན་ཅན། འབྲུག་གི་སྒྲ་སྒྲོགས་པ་མིའི་ཁྲག་དང༌། ཞག་དང༌། ཤ་དང༌། ཚིལ་བུ་དང་རྐང་རྣམས་གསོལ་བ། འཇིག་རྟེན་དང་འཇིག་རྟེན་ལས་འདས་པ་ལ་སོགས་པའི་ལྷ་ལ་སྡིགས་མཛུབ་བྱེད་པ། བརྒྱ་བྱིན་དང་ཚངས་པ་དང༌། ཟླ་བ་དང་ཉི་མ་དང༌། གཞོན་ནུ་ནག་པོ་ལ་སོགས་པ་ཁ་ཐུར་དུ་བལྟས་ལ་ཞབས་ཀྱི་འོག་ཏུ་མནན་པ། ཐོད་པ་ལས་བྱས་པའི་ཐོད་ཅན། སྦྲུལ་མཆོད་ཕྱིར་ཐོགས་པ། ཐོད་པའི་ཕྲེང་བའི་རྒྱན་གྱིས་བརྒྱན་པ། ཞབས་བཅུ་དྲུག་པ། གཅེར་བུའི་གཟུགས་ཅན་མཚན་མ་གྱེན་དུ་བསྒྲེང་པ། གཡོན་བརྐྱང་བ་གསུས་པ་འཕྱང་བ། སྐྲ་གྱེན་དུ་བརྫེས་པ། འཇིགས་པར་བྱེད་པ་ཆེན་པོ་ཕེཾ་ཀ་རའི་སྒྲ་འབྱིན་པ། ཕྱག་སུམ་ཅུ་རྩ་བཞི་པ། གླང་པོའི་པགས་པ་རློན་པ་བསྣམས་པ། དཔལ་རྡོ་རྗེ་འཇིགས་བྱེད་ཆེན་པོ་མ་ཧེའི་ཞལ་ཅན། དེ་ལ་ཕྱག་གཡས་ཀྱི་དང་པོ་ན་གྲི་གུག །གཉིས་པ་ན་མཚོན་རྩེ་གཅིག་པ། གསུམ་


DTG047_Page_0290
[མ་དཔེ་གཟིགས་ན་འདིར་གནོན།]

པ་ན་གཏུན་ཤིང༌། བཞི་པ་ན་ཆུ་གྲི། ལྔ་པ་ན་མདུང་ཐུང༌། དྲུག་པ་ན་དགྲ་སྟ། མདུན་པ་ན་མདུང༌། བརྒྱད་པ་ན་མདའ། དགུ་པ་ན་ལྕགས་ཀྱུ། བཅུ་པ་ན་དབྱུག་པ། བཅུ་གཅིག་པ་ན་ཁ་ཊྭཱཾ་ག །བཅུ་གཉིས་པ་ན་འཁོར་ལོ། བཅུ་གསུམ་པ་ན་རྡོ་རྗེ། བཅུ་བཞི་པ་ན་རྡོ་རྗེའི་ཐོ་བ། བཅོ་ལྔ་པ་ན་རལ་གྲི། བཅུ་དྲུག་པ་ན་ཌ་མ་རུའོ། །དེ་བཞིན་དུ་གཡོན་པའི་ཕྱག་དང་པོ་ན་ཐོད་པ། གཉིས་པ་ན་མགོ །གསུམ་པ་ན་ཕུབ། བཞི་པ་ན་རྐང་པ། ལྔ་པ་ན་ཞགས་པ། དྲུག་པ་ན་གཞུ། བདུན་པ་ན་རྒྱུ་མ། བརྒྱད་པ་ན་དྲིལ་བུ། དགུ་པ་ན་ལག་པ། བཅུ་པ་ན་དུར་ཁྲོད་ཀྱི་རས། བཅུ་གཅིག་པ་ན་མདུང་གིས་ཕུག་པའི་སྐྱེས་བུ། བཅུ་གཉིས་པ་ན་མེ་ཐབ། བཅུ་གསུམ་པ་ན་རོའི་སྣོད། བཅུ་བཞི་པ་ན་སྡིགས་མཛུབ། བཅོ་ལྔ་པ་ན་བ་དན་རྩེ་གསུམ་པ། བཅུ་དྲུག་པ་ན་རླུང་གི་རས་སོ། །ཕྱག་གཉིས་དག་གིས་གླང་པོ་ཆེའི་པགས་པ་བསྣམས་པའོ། །དེ་བཞིན་དུ་གཡས་ཀྱི་ཞབས་དང་པོ་ལ་མི། གཉིས་པ་ན་མ་ཧེ། གསུམ་པ་ན་གླང༌། བཞི་པ་ན་བོང་བུ། ལྔ་པ་ན་རྔ་མོ། དྲུག་པ་ན་ཁྱི། བདུན་པ་ན་ལུག །བརྒྱད་པ་ན་ཅེ་སྦྱང་ངོ༌། །གཡོན་གྱི་ཞབས་དང་པོ་ན་བྱ་རྒོད། གཉིས་པ་ན་འུག་པ། གསུམ་པ་ན་བྱ་རོག །བཞི་པ་ན་ནེ་ཙོ། ལྔ་པ་ན་ཁྲ། དྲུག་པ་ན་བྱ་རྒོད་ཆེན་པོ། བདུན་པ་ན་ཁྱིམ་བྱ། བརྒྱད་པ་ན་བཞད་དོ། །དེ་ལ་རྡོ་རྗེ་འཇིགས་བྱེད་ཆེན་པོ། ཞལ་དང་པོ་ནི་མ་ཧེའི་གདོང་ཤིན་ཏུ་གནག་པ། ཤིན་ཏུ་ཁྲོས་པའོ། །རྭའི་གཡས་གསུམ་ནི་ནག་པོ་དང་དམར་པོ་དང་སེར་པོ་སྟེ། ཤིན་ཏུ་ཁྲོས་པ། རྭའི་གཡོན་གྱི་ཞལ་གསུམ་ནི། དཀར་པོ་དང་དུ་བའི་མདོག་དང་ནག་པོ་སྟེ། ཤིན་ཏུ་ཁྲོས་ཤིང་གཙིགས་པའི་ཞལ་རྣམ་པར་བསམ་མོ། །རྭའི་ལོགས་ཀྱི་དབུས་ཀྱི་ཞལ་དམར་པོ་ཤིན་ཏུ་ཁྲོས་པ་ཁྲག་འཛག་པ་བསྒོམ་པར་བྱའོ། །དེའི་སྟེང་གི་ཞལ་ཅུང་ཟད་སེར་བ། ཅུང་ཟད་ཁྲོས་པ་གཞོན་ནུའི་རྒྱན་གྱིས་བརྒྱན་པ། ཟུར་ཕུད་ལྔའི་ཐོད་ཅན། ཞལ་ཐམས་ཅད་ནི་སྤྱན་གསུམ་པར་བསམས་ཏེ། བརྟན་པར་བྱས་ལ། ཤིན་ཏུ་མཉམ་པར་བཞག་པའི་སྔགས་པས། རྟག་ཏུ་དེ་ཉིད་ལ་སྦྱོར་བས་བདག་ཉིད་དཔལ་ཆེན་པོ་མ་ཧིཪྵའི་ཞལ་གྱི་བདག་ཉིད་དོ་ཞེས་བསྒོམ་པར་བྱའོ། །


DTG047_Page_0291
[མ་དཔེ་གཟིགས་ན་འདིར་གནོན།]

བཟླས་པའི་དུས་སུ་རང་གི་སྙིང་གར་ཉི་མའི་དཀྱིལ་འཁོར་རྣམས་བསམས་ཏེ། རང་གི་སྔགས་ཀྱི་ཡི་གེ་འབར་བ་རྣམ་པར་དགོད་དོ། །དེའི་རྗེས་སུ་ཡིད་ནང་དུ་ཆུད་པས་བཟླས་པར་བྱའོ། །དེ་ལ་བཟླས་པའི་སྔགས་ནི་འདི་ཡིན་ཏེ། ཨོཾ་ཧྲཱིཿ་ཥྚྲྀཿ་ཝི་ཀྲྀ་ཏཱ་ན་ན་ཧཱུཾ་ཕཊ། སྙིང་པོའོ། །ཨོཾ་ཡ་མཱནྟ་ཀ་ཧཱུཾ་ཕཊ། ཉེ་བའི་སྙིང་པོའོ། །ཨོཾ་ཡ་མ་རཱ་ཛ། ས་དོ་མེ་ཡ། ཡ་མེ་དོ་རུ། ཎ་ཡོ་ད་ཡ། ཡ་ད་ཡོ་ནི། ར་ཡ་ཀྵེ་ཡ། ཡཀྵེ་ཡཙྪ། ནི་རཱ་མ་ཡ་ཕཊ། ཕྲེང་བའི་སྔགས་སོ། །སྔགས་འདིས་རྣལ་འབྱོར་བའི་ལས་ཐམས་ཅད་ཐོགས་པ་མེད་པར་བྱེད་དོ། །དུར་ཁྲོད་ལ་སོགས་པར་གནས་ཏེ་རྟག་ཏུ་བསྒོམ་པར་བྱའོ། །བདུད་རྩི་རྣམ་པ་ལྔ་བཟའ་བར་བྱ་སྟེ། དེ་ཡིས་བསྒྲུབས་ན་འགྲུབ་པར་འགྱུར་གྱིས་གཞན་དུ་ནི་མ་ཡིན་ནོ། །གཞན་ཡང་སྒྲོན་མ་ཆེན་པོ་ལ་སོགས་པ་བཟའ་ཞིང་ནུབ་མོ་རྒྱུ་ཞིང་འགྲོ་བའི་རྣལ་འབྱོར་བས་རྩ་བའི་སྔགས་འབུམ་བཟླས་པ་བྱའོ། །བཟླས་པ་བྱས་པའི་སྔགས་པས་ལས་ཐམས་ཅད་བྱེད་ཅིང་འགྲུབ་པར་འགྱུར་རོ། །བསམ་གཏན་ལ་བརྟན་པའི་སྔགས་པས་ཤིན་ཏུ་མཉམ་པར་གཞག་པར་བྱའོ། །མ་དད་པ་དང་མི་མོས་པ་དང༌། དཀྱིལ་འཁོར་དུ་མ་ཞུགས་པ་ལ་མི་གཏད་ཅིང་རེས་འགའ་ཡང་རྒྱུད་སྦྱིན་པར་མི་བྱའོ། །སྔགས་ཀྱང་རེས་འགའ་སྦྱིན་པར་མི་བྱའོ། །དཔལ་རྡོ་རྗེ་འཇིགས་བྱེད་ཆེན་པོའི་རྣལ་འབྱོར་དང་བསམ་གཏན་ནི་བརྗོད་པར་མི་བྱའོ། །སྔགས་ཆུང་མ་དང་གཡོག་པོས་མ་ཚོར་བར་རོ། །འདི་ཕྱེད་པར་མི་བྱའོ། །བྲིས་སྐུ་མདུན་དུ་ཡང་མི་བསྟན། བྲིས་སྐུ་གསང་ལ་གཟུང་ངོ༌། །རྒྱུད་འདིའི་སྦྱོར་བ་གང་སུའི་དྲུང་དུ་ཡང་མི་བརྗོད་དོ། །གལ་ཏེ་སྨྲས་ན་དཔལ་རྡོ་རྗེ་འཇིགས་བྱེད་ཆེན་པོ་དང་རྣལ་འབྱོར་མ་རྣམས་ཀྱིས་ཟ་སྟེ་དམ་ཚིག་ཉམས་པའི་ཕྱིར་རོ། །དེའི་ཕྱིར་སྔགས་པས་སུ་ལ་ཡང་སྦྱིན་པར་མི་བྱའོ། །ཡང་ན་དམ་ཚིག་མི་ཕྱེད་པ་རྟོག་པ་དང་བྲལ་བ་ལ་བསྟན་པའི་བརྟུལ་ཞུགས་དཔའ་བོ་དང༌། བླ་མ་ལ་གུས་པ་དུལ་བ་དེ་བཞིན་གཤེགས་པའི་བསྟན་པ་ལ་གཅིག་ཏུ་གནས་པ། སྔགས་སྦེད་པ་དང་ཁྲོ་བ་མེད་པ། སྟེར་བ་ལ་དཔའ་བ། བཟླས་པ་དང༌། བསྒོམ་པ་ལ་དགའ་བ། དཀྱིལ་འཁོར་མཐོང་


DTG047_Page_0292
[མ་དཔེ་གཟིགས་ན་འདིར་གནོན།]

པ། དཔལ་རྡོ་རྗེ་འཇིགས་བྱེད་ཆེན་པོ་ལ་གུས་པ། སྙིང་རྗེ་ཆེན་པོ་ལ་སོགས་པས་ཡིད་རྟོག་པ་དང་བྲལ་བ། ལེགས་པར་བརྟག་པ་ལ་ལེགས་པར་སེམས་པ། དེ་ལྟ་བུའི་སློབ་མ་ལ་དཔལ་རྡོ་རྗེ་འཇིགས་བྱེད་ཆེན་པོའི་སྒྲུབ་ཐབས་སྦྱིན་པར་གཞན་དུ་གལ་ཏེ་སྔགས་པས་སྟེར་ན། སློབ་མ་དང་བཅས་ནས་དམྱལ་བར་འགྲོ་བར་ཐེ་ཚོམ་མེད་དོ། །འཇིག་རྟེན་འདིར་ཡང་འཇིགས་པ་ཆེན་པོ་མྱོང་བར་འགྱུར་རོ། །འཇིག་རྟེན་ཕ་རོལ་ཏུ་ཡང་དམྱལ་བར་འགྲོ་སྟེ། དམ་ཚིག་ཉམས་པའི་ཕྱིར་རོ། །འདོད་ཆགས་ཞེ་སྡང་ལ་སོགས་ཆུ་སྲིད་འཁྲུས་ཤིང་རྨུགས་དང་གཉིད་སོགས་དབུ་བ་ཅན། །འཁོར་བའི་རྒྱ་མཚོ་སྐྱེ་དང་འཆི་བའི་དཔའ་ཀློང་ཟབ་མོ་འཇིགས་པ་ལས་སྒྲོལ་བ། །དཔལ་ལྡན་གཤིན་རྗེ་བདེ་བའི་རང་བཞིན་སྒྲུབ་ཐབས་བྱས་པས་སྐྱེ་འགྲོ་ཀུན། །བདག་འབད་པ་ཡི་བསོད་ནམས་རྙེད་པ་དེས་འདིར་འཇིག་རྟེན་དེ་ཡི་གོ་འཕང་གྲུབ་པར་ཤོག །།དཔལ་རྡོ་རྗེ་འཇིགས་བྱེད་ཆེན་པོའི་རྒྱུད་ཀྱི་སྒྲུབ་ཐབས་སློབ་དཔོན་དཔལ་འཛིན་གྱིས་མཛད་པ་རྫོགས་སོ།། །།རྒྱ་གར་གྱི་མཁན་པོ་རྣམ་པར་སྣང་མཛད་སྲུང་བའི་ཞབས་དང༌། ལོ་ཙཱ་བ་ཁམས་པ་དགེ་སློང་བ་རི་དྷརྨཱ་ཀཱིརྟིས་བསྒྱུར་བའོ།།

རྡོ་རྗེ་འཇིགས་བྱེད་ཞལ་གཅིག་ཕྱག་གཉིས་པའི་སྒྲུབ་པའི་ཐབས།
འཇམ་པའི་དབྱངས།


DTG047_Page_0292
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། བཛྲ་བྷཻ་ར་ཝ་ཨེ་ཀཱ་ན་ན་དྭི་བྷུ་ཛ་སཱ་དྷ་ནཱ་མ། བོད་སྐད་དུ། རྡོ་རྗེ་འཇིགས་བྱེད་ཞལ་གཅིག་ཕྱག་གཉིས་པའི་སྒྲུབ་པའི་ཐབས། །དཔལ་རྡོ་རྗེ་འཇིགས་བྱེད་ལ་ཕྱག་འཚལ་ལོ། །དཔལ་ཡེ་ཤེས་སེམས་དཔའ་ལ་ཕྱག་འཚལ་ལོ། །སྨ་ར་སྨིན་མ་བ་སྦུ་གཟི་མ་དུས་མཐའི་མེ་ལྟར་འབར་ཞིང་ལྗགས་འདྲིལ་བ། །སྤྱན་གསུམ་རྭ་རྣོན་རྣམ་པར་འགྱུར་བའི་འཇིགས་གཟུགས་ཀླུ་བདག་རྒྱན་ཅན་མ་ཧེའི་ཞལ། །གཡོན་བརྐྱང་རབ་ཏུ་ཁྲོས་པ་སྣ་ཚོགས་པདྨ་ཉི་མའི་སྟེང་ན་ཡོངས་གནས་པ། །ཤིན་ཏུ་རྣོ་བའི་གྲི་གུག་ཐོད་པ་འཛིན་པ་མཉམ་མེད་བདེ་བ་སྟེར་ལ་འདུད། །ཕྱག་དང་ཞལ་ནི་སྣ་ཚོགས་པ། །བསྒོམ་པ་རུ་ནི་མི་ནུས་པ། །བསྡུས་པའི་རྡོ་རྗེ་འཇིགས་བྱེད་པ། །སྐྱེ་བོ་ནུས་པ་མི་ལྡན་ཞིང༌། །བློ་དམན་པ་ཡི་ངོ་རུ་ནི། །མདོར་བསྡུས་པ་ཡི་སྒྲུབ་པའི་ཐབས། །ཇི་ལྟར་དེ་ཉིད་


DTG047_Page_0293
[མ་དཔེ་གཟིགས་ན་འདིར་གནོན།]

མོས་པ་ལའང༌། །སྦྱོར་དོན་སྐྱེས་པ་བསྐྱེད་པའི་ཕྱིར། །སངས་རྒྱས་རྒྱུད་དུ་གསུངས་པ་ཡི། །རང་གིས་ཤེས་ན་རབ་ཏུ་འཇུག །གཙོ་བོ་དམ་ཚིག་རབ་ཏུ་བསྟན། །དེའི་ཕྱིར་ན་རྒྱས་པར་བཤད། །སྔགས་པས་རེ་ཞིག་ཐོག་མར་དུར་ཁྲོད་དམ་གཡུལ་ལ་སོགས་པའི་སའམ། ཡིད་དང་མཐུན་པའི་གནས་སུ་སྟན་བདེ་བ་ལ་གནས་ནས། ཞལ་བཞིའི་སྔགས་ཀྱིས་ཕྱོགས་བཞིར་བསྔགས་ཤིང་བྱིན་གྱིས་བརླབ་པ་ནི། ཨོཾ་སུཾ་བྷ་ནི་སུཾ་བྷ་ཧཱུཾ་ཧཱུཾ་ཕཊ། ཨོཾ་གྲྀཧྞ་གྲྀཧྞ་ཧཱུཾ་ཧཱུཾ་ཕཊ། ཨོཾ་གྲྀཧྞ་པ་ཡ་གྲྀཧྞ་པ་ཡ་ཧཱུཾ་ཧཱུཾ་ཕཊ། ཨོཾ་ཨཱ་ན་ཡ་ཧོ། །བྷ་ག་ཝཱ་ན་བཛྲ་ཧཱུཾ་ཧཱུཾ་ཕཊ་ཕཊ་ཅེས་བྱ་བས་སོ། །དེའི་རྗེས་ལ་རང་གི་སྙིང་གའི་ས་བོན་ལས་འོད་ཟེར་སྤྲོས་པས་བླ་མ་དང་སངས་རྒྱས་ལ་སོགས་པ་ནམ་མཁའི་ཕྱོགས་སུ་སྤྱན་དྲངས་ལ། ཡང་དག་པར་མཆོད་དེ། སྡིག་པ་བཤགས་པ་ལ་སོགས་པའི་ཆོ་ག་བྱས་ནས། དེ་ནས་སེམས་ཅན་ཚད་མེད་བའི་སྡུག་བསྔལ་གྱི་རྒྱ་མཚོར་བྱིང་བའི་ཡུལ་ལ་བལྟས་ནས་ཚད་མེད་པ་བཞི་བསྒོམ་པར་བྱ་སྟེ། དེ་ལ་ཕན་པ་དང་བདེ་བ་ཉེ་བར་འདོད་པ་ནི་བྱམས་པའོ། །སྡུག་བསྔལ་གྱི་རྒྱུ་ལས་ཐོན་པར་འདོད་པ་ནི་སྙིང་རྗེའོ། །སེམས་ཅན་སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་ཞིང་བདེ་བ་ལ་སེམས་རངས་པ་ནི་དགའ་བའོ། །དེ་ཁོ་ན་ཉིད་དུ་རོ་གཅིག་པས་རྙེད་པ་དང་མ་རྙེད་པ་ལ་སོགས་པ་འཇིག་རྟེན་གྱི་ཆོས་བརྒྱད་ཀྱིས་མ་གོས་པ་ནི་བཏང་སྙོམས་སོ། །བསྒོམ་པ་ནི་དེའི་གཟུང་བ་དང་འཛིན་པའི་རྣམ་པར་བྱད་པའི་སྔགས་བརྗོད་པར་བྱ་སྟེ། ཨོཾ་སྭ་བྷཱ་ཝ་ཤུདྡྷཿ་སརྦ་དྷརྨཱཿ་སྭ་བྷཱ་ཝ་ཤུདྡྷོ྅ཧཾ། དེའི་རྗེས་ལ་ཆོས་ཐམས་ཅད་རང་བཞིན་མེད་པའི་ངེས་པར་རྣམ་པར་བསྒོམ་པར་བྱ་བ་ནི། སེམས་ཙམ་ཉིད་ཀྱིས་རྣམ་པར་རྟོག་པ་ཙམ་དུ་རྟོགས་ནས་སྔགས་ཀྱི་དོན་མངོན་དུ་བྱ་ཞིང༌། སྟོང་པ་ཉིད་ཀྱི་སྔགས་བརྗོད་པ་ནི། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། དེ་ནས་ཐང་ཅིག་ཙམ་དུ་སྟོང་པ་ཉིད་ལྷག་པར་མོས་ནས་དེའི་རྗེས་ལ་སྟོང་པ་ཉིད་ལས། ཡཾ་ཡིག་དུ་བ་ལས་བྱུང་བ། །རླུང་གི་དཀྱིལ་འཁོར་གཞུའི་དབྱིབས་ཅན། །དེ་སྟེང་ཟླ་བའི་དཀྱིལ་འཁོར་ནི། །ཨ་ཡིག་ས་བོན་ལས་བྱུང་བ། །དེ་ལ་དྷཱིཿ་ཡིག་འོད་འབར་བ། །བསྒོམས་


DTG047_Page_0294
[མ་དཔེ་གཟིགས་ན་འདིར་གནོན།]

ནས་དེ་ཡི་འོད་ཟེར་གྱིས། །བདེ་གཤེགས་རྒྱལ་བ་ཡང་དག་བསྐུལ། །དེ་རྣམས་ཐམས་ཅད་ཡང་དག་འདུས། །འཇམ་དཔལ་དབྱངས་སུ་ཡང་དག་བསྒོམ། །རལ་གྲི་པོ་ཏིས་ཕྱག་བྲེལ་བ། །གངྒཱའི་གསེར་གྱི་འོད་དང་ལྡན། །དེ་ཡི་སྙིང་གར་བསྒོམ་པ་ནི། །ཨ་ལས་ཉི་མའི་དཀྱིལ་འཁོར་རོ། །དེ་ལས་འོད་ཟེར་ཡང་དག་འབྱུང༌། །ཕྱོགས་ནས་རྫོགས་སངས་རྒྱས་བཞུགས་དང༌། །ཁྲོ་བོ་བྱང་ཆུབ་སེམས་དཔར་བཅས། །དེ་བཞིན་རིག་པའི་ལྷ་མོ་ཚོགས། །ཡང་ན་ཉི་མ་དེ་ཉིད་ལ། །བསྐུལ་ནས་ཡང་དག་བཞུགས་པར་འགྱུར། །དེ་ཡང་དུས་གཅིག་འཇམ་པ་ཡི། །ཉི་མའི་དཀྱིལ་འཁོར་དུ་ནི་གྱུར། །རོ་གཅིག་ཏུ་ནི་ཡང་དག་འབྱུང༌། །མཆོག་ཏུ་ཤིན་ཏུ་འོད་གསལ་བའོ། །དཔལ་ཚད་བརྒྱ་རུ་རྣམ་རྒྱས་པས། །འཇིག་རྟེན་གསུམ་ཁོངས་གསལ་བ་དང༌། །བདུད་ཀྱི་ཚོགས་ནི་འཇོམས་པར་བྱེད། །ཡིད་ཀྱིས་བརྟན་པར་བསྒོམ་པར་བྱ། །དེ་ཡི་སྟེང་དུ་ནག་པོ་ཆེ། །ཧཱུཾ་ཡིག་འོད་ཟེར་ལྔ་ལྡན་པ། །དེ་ལས་འོད་ཟེར་ངེས་པར་འབྱུང༌། །དེ་ཉིད་དུ་ནི་ཡང་དག་འདུས། །ཡང་ནི་འོད་ཟེར་ཕྲེང་བ་ཡིས། །འགྲོ་བ་མ་ལུས་སངས་རྒྱས་བྱས། །སངས་རྒྱས་ལྔ་ནི་རབ་འབྱོར་བ། །ཧཱུཾ་གིས་དེ་ཉིད་ལས་སྦྱོར་བྱས། །རྡོ་རྗེ་ཆེན་པོ་རྣམ་བརྩིགས་པ། །རྩེ་དགུའི་འོད་ཟེར་ཤིན་ཏུ་རྣོ། །བསྒོམས་ནས་དེ་ཡི་འོད་ཟེར་གྱིས། །ཕྲ་མོའི་གཟུགས་ཀྱིས་རྒྱལ་བ་སོགས། །ཉི་མ་ཡི་ནི་འོག་ཉིད་དུ། །གཟུགས་བརྙན་འདྲ་བར་ཡང་དག་བལྟ། །དེ་ཡིས་སེམས་ཅན་ཡོངས་སུ་སྨིན། །དེ་ཡིས་ངེས་པར་ཡང་དག་བསྡུ། །རྡོ་རྗེ་གཟུགས་བརྙན་གཟུགས་གཅིག་ཏུ། །བློ་ལྡན་གྱིས་ནི་བཞུགས་པར་བསམ། །དེ་འོག་ཐམས་ཅད་ཡོངས་གྱུར་བ། །བསྐལ་པའི་མེ་ལྟར་བཟོད་དཀའ་བ། །སྐུ་མདོག་ནག་པོ་དྲག་ཆེན་པོ། །འཇིགས་མཛད་ལྗགས་ནི་འདྲིལ་བ་ཡི། །མ་ཧེའི་ཞལ་ནི་སྐུ་ཆེན་པོ། །འཇིག་རྟེན་གསུམ་པོ་ཟ་བར་ནུས། །དཀོན་མཆོག་གསུམ་སོགས་གནོད་པ་ལ། །སྡིགས་མཛུབ་ཀྱིས་ནི་མཆོག་ཏུ་རྒྱལ། །གཞོན་ནུ་གདོང་དྲུག་ལ་སོགས་གསོད། །ལྷ་དང་ལྷ་མིན་བསྡིགས་པར་མཛད། །


DTG047_Page_0295
[མ་དཔེ་གཟིགས་ན་འདིར་གནོན།]

དབང་པོ་ཉེ་དབང་དྲག་དང་ཚངས། །ཧ་ཧའི་སྒྲ་ཡིས་སྐྲག་པར་བྱེད། །བདུད་ཀྱི་དཀྱིལ་འཁོར་རབ་འཇོམས་པ། །གཡོན་བརྐྱང་བ་ཡི་ཞབས་ཀྱིས་གསོད། །ས་འོག་ཏུ་ནི་རབ་ཏུ་གཡོ། །མགོ་བོའི་ཕྲེང་བས་འཕྲོག་ཆེན་པོ། །ཐོད་པའི་ཅོད་པན་གྱིས་ནི་མཛེས། །ཞལ་གྱི་མཆེ་བ་གཙིགས་པ་དང༌། །སྤྱན་གསུམ་དམར་ཞིང་ཟླུམ་པ་ཡིན། །རྭ་རྣོ་སྐྲ་ནི་འབར་བ་བཞིན། །སྨ་ར་སྨིན་མ་རབ་མགྱོགས་འཇིགས། །སྣ་ཚོགས་ཆུ་སྐྱེས་ཉི་མར་གནས། །དབང་པོ་ཡི་ནི་གདེངས་ཀས་བརྒྱན། །ཐུང་ཞིང་ལྟོ་འཕྱང་བརྗིད་པ་ཡིས། །མཚན་མ་གྱེན་འགྲེང་དྲག་དང་བཅས། །གཡས་དང་གཡོན་གྱི་ཕྱག་བསྣམས་པ། །ཐོད་པ་དང་ནི་གྲི་གུག་འཛིན། །སྔགས་པ་ཡིས་ནི་རྟག་ཏུ་བསྒོམ། །དཔལ་ཆེན་རྡོ་རྗེ་འཇིགས་བྱེད་ནི། །ཡང་ན་ཞལ་གསུམ་ཕྱག་དྲུག་བསྒོམས། །ལྷག་མ་མདའ་གཞུ་ཁ་ཊྭཱཾ་ག །ཕྱག་གཉིས་བགེགས་ཀྱི་པགས་པ་འཛིན། །ཞལ་གསུམ་དཀར་དང་དམར་བའོ། །གཡས་དང་གཡོན་གྱི་བསམ་གཏན་ནི། །དྲག་དང་བཞད་དང་འཇིགས་པའོ། །ལྷག་མ་ཀུན་ནི་སྔར་བཞིན་ནོ། །གཤིན་རྗེ་གདུག་པ་མ་ཧེའི་སྟེང༌། དེའི་མདུན་དུ་མགོན་པོ་ནི། །ཅིག་ཅར་དུ་ནི་ཡང་དག་བསྐྱེད། །རྡོ་རྗེ་འཇིགས་བྱེད་དཔའ་བོ་ཡི། །ཕྱག་དང་ཁ་དོག་མཆོག་ཏུ་འདྲ། །སྤྱན་གསུམ་མཆེ་བ་གཙིགས་པ་ཡིས། །རོ་ཡི་སྟེང་ན་ཡང་དག་གནས། །གདུག་པ་ཅན་རྣམས་བསད་པའི་ཕྱིར། །སྙིང་རྗེའི་བདག་ཉིད་ཀྱིས་ནི་བསྒོམ། །དེ་རྗེས་ཡེ་ཤེས་སེམས་དཔའ་དགུག །ཇི་ལྟ་བ་ཡི་ཆོ་གས་གཞུག །མཆོད་ཡོན་ཞབས་བསིལ་ལ་སོགས་སྦྱིན། །དམ་ཚིག་ལ་ནི་ཡང་དག་གཞུག །དེ་ནས་དབང་བསྐུར་ཡང་དག་སྦྱིན། །རིགས་ཀྱི་བདག་པོས་སྤྱི་བོར་བརྒྱན། །མཉམ་པར་བཞག་པས་སྔགས་བཟླས་པས། །མྱུར་དུ་འགྲོ་བའི་དོན་ནི་བྱས། །སྔགས་པ་སྐྱོ་བར་གྱུར་ན་ནི། །ལངས་ནས་བྱ་བ་གཞན་དག་བྱ། །སྨོན་ལམ་དེ་བཞིན་བྱས་ནས་ནི། །རྣལ་འབྱོར་བློ་ལྡན་དེ་ནས་ལངས། །སྔོན་དུ་བསྙེན་པའི་ཆོ་ག་ནི། །སྙིང་རྗེའི་བདག་ཉིད་སྔགས་བཟླས་པས། །མྱུར་དུ་འགྲོ་བའི་དོན་ནི་


DTG047_Page_0296
[མ་དཔེ་གཟིགས་ན་འདིར་གནོན།]

བྱ། །འབུམ་ཕྲག་གསུམ་གྱི་གྲངས་ངེས་པས། །འགྲུབ་པར་འདིར་ནི་ཐེ་ཚོམ་མེད། །དེ་ལ་སྔས་ནི་ཡི་གེ་བཅུ་བ་རྒྱུན་མི་འཆད་པར་ཀུན་དུ་དེ་དྲན་བཟླས་པ་ནི། །རིང་དང་ཐུང་དང་བུལ་བར་མ་ཡིན་བློ་ལྡན་མི་སྨྲར་གྱུར་པས་ཐམས་ཅད་དུ། །དཔལ་ལྡན་རྡོ་རྗེ་འཇིགས་བྱེད་སྔགས་པས་མི་སྤོང་དངོས་གྲུབ་ཀྱི་ནི་གཞི། །ངེས་པར་སེམས་ནི་བརྟན་བྱས་མངོན་པར་འདོད་པ་ཇི་སྲིད་མཚན་མ་མ་བྱུང་བར་དུའོ། །དེ་ནས་རྣལ་འབྱོར་པ་ནི་སྙིང་རྗེའི་མཆོག །ཁྲོ་བོའི་ང་རྒྱལ་ཡིད་ཀྱིས་ནི། །བྱས་ནས་རྡོ་རྗེ་ཅན་གྱིས་བསད། །འཇིགས་བྱེད་བསད་པའི་ལས་ནི་གཙོ། །གཤིན་རྗེའི་གཟུགས་ནི་བྱ་བ་ལ། །གྲོག་མཁར་བདུན་ལས་ཡང་དག་འབྱུང༌། །འཇིགས་བྱེད་རྣལ་འབྱོར་ལྡན་པ་ཡིས། །དུས་སོགས་ཤེས་པས་འདུས་བྱས་པས། །གཅེར་བུ་རལ་གྲི་མི་མགོ་གཟུང༌། །གསུས་པ་ཆེ་ལ་ཞལ་གཅིག་པ། །སྐྲ་སེར་གྱེན་བརྫེས་མིག་དམར་བ། །གདུག་སེམས་ཅན་ནི་འཇིགས་པ་ཡིས། །དེ་ནི་གྲུ་གང་ཙམ་གྱི་ཚད། །མི་ཐོད་ལ་བྲིས་སྙིང་གར་གཞུག །བླ་མའི་མན་ངག་རྟོགས་པ་ཡིས། །དེ་ཡི་སྒྲུབ་ཐབས་ངེས་པར་སྦྱར། །ཁ་སྦྱར་དབྱེ་བར་བྱས་ནས་ནི། །སྲུང་བ་དགུག་པའི་སྦྱོར་བ་དང༌། །ལུས་ནི་སྟོང་པར་གྱུར་པ་ལ། །བསད་ན་དངོས་གྲུབ་མྱུར་དུ་ཐོབ། །གཤིན་རྗེའི་ལུས་ནི་རྫོགས་པ་དང༌། །བསྒྲུབ་བྱ་མདུན་དུ་བྱས་ནས་ནི། །ཉི་མ་བདུན་གྱི་གྲངས་ཀྱིས་ནི། །ཇི་ལྟར་ཆོ་ག་ཐུན་གསུམ་དུ། །བཟླས་དང་སྦྱིན་སྲེག་སོགས་རྫོགས་པས། །མངོན་སུམ་དུ་ནི་མཚན་མ་ཐོབ། །མཚན་ཕྱེད་ཀྱི་ནི་དུས་སུ་བྱ། །མི་མགོ་གསུམ་གྱི་སྟེང་དུ་བསྡུ། །ཁྲོ་བོའི་ང་རྒྱལ་སེམས་ཀྱིས་ནི། །འདི་ལྟར་བརྟན་བྱས་རྣལ་འབྱོར་བ། །གང་བསྟན་དེ་ནི་བྱས་པ་ན། །ཐམས་ཅད་བོར་བར་ངེས་པར་འགྲོ། །གང་ཡང་འདིར་ནི་དམྱལ་བ་ཡང༌། །སྤངས་ནས་བདེ་བ་ཅན་དུ་འགྲོ། །སྔགས་དང་རྒྱུད་ཀྱི་མཐུ་དང་ནི། །བསམ་གཏན་བསམ་བྱ་རྣལ་འབྱོར་བས། །སྡིག་པ་ཆེན་པོ་བྱས་པ་ཡང༌། །དེ་ནི་ཐབས་ཀྱིས་སྦྱིན་པ་ཡིན། །ཉེ་བར་བྱས་པའི་ཐབས་ཡིན་ནོ། །གཞན་དུ་ན་ནི་སྐྱོན་དུ་འགྱུར། །རྡོ་རྗེ་འཇིགས་


DTG047_Page_0297
[མ་དཔེ་གཟིགས་ན་འདིར་གནོན།]

བྱེད་ལས་བསྒྱུར་བས། །གསོལ་བཏབ་པ་ལ་ཐུགས་བརྩེ་ནས། །རིན་ཆེན་རྡོ་རྗེ་ཟླ་བ་ལྟར། །འདི་ཉིད་ལ་གུས་བདག་གིས་བྱས། །ཇི་ལྟར་ཐོབ་པའི་དགེ་བ་དེས། །བདེ་བ་བསྒྲུབ་པའི་སྒྲུབ་ཐབས་ནི། །ཆུ་རྒྱུན་འདོད་པའི་སེམས་ཅན་ནི། །དེ་ནི་རྡོ་རྗེ་འཇིགས་བྱེད་ཤོག །འཇམ་པའི་དབྱངས་ཀྱིས་རབ་མཛད་པ། །ཕྱག་གཉིས་པའི་སྒྲུབ་ཐབས་རྫོགས་སོ།། །།རྒྱ་གར་གྱི་མཁན་པོ་ཨཱ་ཙཪྻ་ཨ་ནནྟ་དང༌། བོད་ཀྱི་ལོ་ཙཱ་བ་དགེ་སློང་རྡོ་རྗེ་གྲགས་ཀྱིས་བསྒྱུར་བའོ།།

དཔལ་རྡོ་རྗེ་འཇིགས་བྱེད་ཀྱི་སྒྲུབ་པའི་ཐབས་མདོར་བསྡུས་པ།
ཤྲཱི་བྷ་དྲ།


DTG047_Page_0297
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། ཤྲཱི་བཛྲ་བྷཻ་ར་བ་སཱ་དྷ་ན་ནོ་པི་ཀ་སཾ་ཀྵིཔྟ། བོད་སྐད་དུ། དཔལ་རྡོ་རྗེ་འཇིགས་བྱེད་ཀྱི་སྒྲུབ་པའི་ཐབས་མདོར་བསྡུས་པ། འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །དཔལ་ལྡན་གང་ཞིག་སྔོན་བསྒོམས་པས། །དངོས་གྲུབ་མྱུར་དུ་ཐོབ་འགྱུར་བའི། །རྡོ་རྗེ་ཅན་ལ་གུས་བཏུད་ནས། །དེ་ཡི་སྒྲུབ་ཐབས་ཆོ་ག་བཤད། །དེ་ལ་རེ་ཞིག་དཔལ་རྡོ་རྗེ་འཇིགས་བྱེད་ཀྱི་རྒྱུད་ལས་ཇི་སྐད་གསུངས་པའི་དབང་བསྐུར་བ་ཕུན་སུམ་ཚོགས་པ་ལ་སོགས་པའི་མཚན་ཉིད་དང་ལྡན་པའི་སྔགས་པས། དུར་ཁྲོད་ལ་སོགས་པའི་གནས་ཡིད་དུ་འོང་བ་རྣམས་སུ་གནས་ལ། སྟན་བདེ་བ་ལ་འདུག་སྟེ། ཐེ་ཚོམ་ལ་སོགས་པའི་དོགས་པ་བསལ་ནས་འབད་པས་བསྒྲུབ་པར་བྱའོ། །དེའི་ཆོ་ག་ནི་འདི་ཡིན་ཏེ། དང་པོ་ཁོ་ནར་བདག་མེད་པ་བསྒོམས་པས་ནང་གི་བདག་ཉིད་ཅན་གྱི་ཁྲུས་བྱས་ལ། རང་གི་སྙིང་གར་ཡི་གེ་རཾ་ཡོངས་སུ་གྱུར་པ་ལས་ཉི་མའི་དཀྱིལ་འཁོར་དེའི་སྟེང་དུ། ཧཱུཾ་ཡོངས་སུ་གྱུར་བ་ལས་བྱུང་བའི་ཁྲོ་བོའི་རྡོ་རྗེ། དེའི་དབུས་སུ་ཡང་ཧཱུཾ་ཁ་དོག་ནག་པོ་འོད་ཟེར་སྣ་ཚོགས་འཕྲོ་བ་བསམས་ལ། དེའི་སྣང་བས་ཕྱོགས་བཅུ་དུས་གསུམ་གྱི་དེ་བཞིན་གཤེགས་པ་རྣམས་སྤྱན་དྲངས་ཏེ། མཆོད་པ་སྣ་ཚོགས་ཀྱིས་མཆོད་པར་བྱའོ། །དེ་ནས་སྡིག་པ་བཤགས་པ་དང༌། བསོད་ནམས་ལ་རྗེས་སུ་ཡི་རང་བ་དང༌། དཀོན་མཆོག་གསུམ་ལ་སྐྱབས་སུ་འགྲོ་བ་དང༌། བྱང་ཆུབ་ཏུ་སེམས་བསྐྱེད་པ་དང༌། ལམ་ལ་གནས་པ་དང༌། བདག་ཉིད་དབུལ་བ་དང༌། ཡོངས་སུ་བསྔོ་


DTG047_Page_0298
[མ་དཔེ་གཟིགས་ན་འདིར་གནོན།]

པ་རྣམས་བྱས་ལ། །ཚངས་པའི་གནས་བཞི་བསྒོམ་པར་བྱའོ། །དེ་ནས་ཆོས་ཐམས་ཅད་རང་བཞིན་གྱིས་རྣམ་པར་དག་པའི་སྟོང་པ་ཉིད་དུ་བསྒོམ་ཞིང་དེ་བརྟན་པའི་སྔགས་འདི་བརྗོད་པར་བྱའོ། །ཨོཾ་སྭ་བྷཱ་ཝ་ཤུདྡྷཿ་སརྦ་དྷརྨཱཿ་སྭ་བྷཱ་ཝ་ཤུདྡྷོ྅ཧཾ། དེ་ལྟར་སྟོང་པ་ཉིད་བསྒོམས་ནས་ཡི་གེ་ཡཾ་ཡོངས་སུ་གྱུར་པ་ལས་རླུང་གི་དཀྱིལ་འཁོར་གཞུ་ལྟ་བུ་ཁ་དོག་ནག་པོ་བ་དན་གྱིས་མཚན་པ་བསམས་ལ། དེའི་སྟེང་དུ་རཾ་ལས་བྱུང་བའི་ཉི་མའི་དཀྱིལ་འཁོར། དེའི་དབུས་སུ་ཧཱུཾ་ཡོངས་སུ་གྱུར་པ་ལས་ཁྲོ་བོའི་རྡོ་རྗེ། དེ་ལས་རྡོ་རྗེའི་ས་གཞི་དང༌། ར་བ་དང་བླ་རེ་དང། གུར་ལ་སོགས་པ་བསྒོམས་ཏེ། ཐམས་ཅད་རྡོ་རྗེའི་རང་བཞིན་གྱི་དབུས་སུ་ཨ་ཡོངས་སུ་གྱུར་པ་ལས་ཟླ་བའི་དཀྱིལ་འཁོར། དེའི་དབུས་སུ་ཡི་གེ་དྷཱིཿ་ཡོངས་སུ་གྱུར་པ་ལས་རལ་གྲི། རལ་གྲིའི་དབུས་སུ་ཡི་གེ་དྷཱིཿ་དེ་དག་ཐམས་ཅད་ཡོངས་སུ་གྱུར་པ་ལས་བཅོམ་ལྡན་འདས་འཇམ་དཔལ་གཞོན་ནུར་གྱུར་པ་སྐུ་མདོག་གསེར་བཙོ་མ་ལྟ་བུ་ཞལ་གཅིག་ཕྱག་གཉིས་དང་ལྡན་པ། ཕྱག་གཡས་པས་ཤེས་རབ་ཀྱི་རལ་གྲི་དཔུང་པའི་ཐད་ཀར་འཛིན་པ། གཡོན་པས་གླེགས་བམ་ཐུགས་ཀར་བསྣམས་པ། གཞོན་ནུ་རྒྱན་ཐམས་ཅད་ཀྱིས་བརྒྱན་པ། མཚན་བཟང་པོ་སུམ་ཅུ་རྩ་གཉིས་དང་དཔེ་བྱད་བཟང་པོ་བརྒྱད་ཅུས་བརྒྱན་པ། རལ་པ་དང་ཐོར་ཚུགས་ཅན་ནོ། །དེའི་སྙིང་གར་ཡི་གེ་མཾ་ཡོངས་སུ་གྱུར་པ་ལས་ཉི་མའི་དཀྱིལ་འཁོར། དེ་ལས་བྱུང་བའི་འོད་ཟེར་གྱིས་ཕྱོགས་བཅུ་དུས་གསུམ་གྱི་དེ་བཞིན་གཤེགས་པ་ཐམས་ཅད་དང༌། བྱང་ཆུབ་སེམས་དཔའ་དང༌། རིག་པའི་ལྷ་མོ་དང༌། ཁྲོ་བོ་ལ་སོགས་པ་ཐམས་ཅད་བཀུག་ལ། གཞུག་པར་བྱའོ། །དེ་ནས་དེ་བཞིན་གཤེགས་པ་ལ་སོགས་པ་དང༌། རང་འཇམ་དཔལ་གྱི་གཟུགས་སུ་སྣང་བ་དང་བཅས་པ་ཐམས་ཅད་ཉི་མའི་དཀྱིལ་འཁོར་ལ་ཐིམ་པར་གྱུར་ཏེ། སླར་འོད་ཟེར་ཆེར་འཕྲོས་པ་ལས་དཔག་ཚད་བྱེ་བ་བརྒྱ་སྟོང་དུ་ཁྱབ་པས་འགྲོ་བའི་དོན་བྱས་ནས། དེ་བཞིན་གཤེགས་པ་ལ་སོགས་པ་བཀུག་སྟེ། གཅིག་ཏུ་བསྡུས་པ་ལས། ཡི་གེ་ཧཱུཾ་ཁ་དོག་ནག་པོ་འོད་


DTG047_Page_0299
[མ་དཔེ་གཟིགས་ན་འདིར་གནོན།]

ཟེར་སྣ་ཚོགས་དང་ལྡན་པ་བསམས་ཏེ། དེ་ལས་ཀྱང་འོད་ཟེར་བྱུང་བས་སྔ་མ་བཞིན་དུ་བྱས་ཏེ། སླར་ཞུགས་པས་ཁྲོ་བོའི་རྡོ་རྗེ། དེ་ལས་རྡོ་རྗེ་ཕྲ་མོའི་གཟུགས་སྤྲོས་པས་སངས་རྒྱས་དང་བྱང་ཆུབ་སེམས་དཔའ་དང༌། རིག་པའི་ལྷ་མོ་དང་ཁྲོ་བོ་ལ་སོགས་པ་སྤྲོས་ཏེ། ནམ་མཁའི་ཁམས་གང་བར་བྱས་ནས་སེམས་ཅན་གྱི་དོན་བྱས་ཏེ། སེམས་ཅན་ཐམས་ཅད་ཀྱིས་དཔལ་རྡོ་རྗེ་འཇིགས་བྱེད་ཉིད་ཐོབ་པར་བྱས་ནས་སླར་བསྡུས་ཏེ། དེ་དག་ཐམས་ཅད་ཡོངས་སུ་གྱུར་པ་ལས་བཅོམ་ལྡན་འདས་དཔལ་རྡོ་རྗེ་འཇིགས་བྱེད་ཀྱི་དཀྱིལ་འཁོར་འཁོར་ལོ་དང་བཅས་པ། དུར་ཁྲོད་བརྒྱད་ཀྱིས་བརྒྱན་པ་བསམས་པ་ནི། །གྲུ་བཞི་པ་ལ་སྒོ་བཞི་པ། །རྟ་བབས་བཞི་དང་ཡང་དག་ལྡན། །དྲིལ་བུ་དར་གྱི་འཕན་ལ་སོགས། །མེ་ཏོག་ཕྲེང་དང་ཡང་དག་ལྡན། །སྒོ་རྣམས་ཀྱི་ནི་ཐམས་ཅད་ཀྱི། །སྒོ་ཁྱུད་ཀྱི་ནི་གནས་སུ་ཡང༌། །ཟླ་ཕྱེད་རྡོ་རྗེ་རིན་ཆེན་ནོ། །དེའི་དབུས་ཀྱི་དཀྱིལ་འཁོར་ནི། །རེའུ་མིག་བརྒྱད་པ་འདྲ་བ་ལ། །ཞེས་གསུངས་པའི་རིམ་པས་གཞལ་ཡས་ཁང་དེ་ལྟ་བུའི་རྣམ་པ་ཅན་བསམས་ཏེ། དེའི་དབུས་ཀྱི་ལྟེ་བ་ལ་དཔལ་རྡོ་རྗེ་འཇིགས་བྱེད་ཞལ་དགུ་པ། ཕྱག་སུམ་ཅུ་རྩ་བཞི་པ། ཞབས་བཅུ་དྲུག་དང་ལྡན་པ། འཇིགས་པ་རྣམས་ཀྱང་འཇིགས་པར་བྱེད་པ། ཧ་ཧ་ཞེས་བཞད་ཅིང་ལྕེ་འདྲིལ་བ། སྤྱན་བགྲད་པ། འཇིགས་པའི་མེ་ལྟར་འོད་འཕྲོ་བ། མིའི་ཤ་དང་ཞག་དང་ཁྲག་ལ་དགྱེས་པ། ཐོད་པའི་ཕྲེང་བས་བརྒྱན་པ། མིའི་རུས་པའི་ཕྲེང་བ་ཅན། ཕཊ་ཅེས་བྱ་བའི་སྒྲས་སེམས་ཅན་ཐམས་ཅད་སྐྲག་པར་བྱེད་པ། ཕྱག་དང་པོ་གཉིས་ཀྱིས་གླང་པོ་ཆེའི་པགས་པ་གོས་སུ་བསྣམས་པ། ལྷག་མ་རྣམས་ལ་གོ་རིམས་བཞིན་དུ་གྲི་གུག་དང༌། མཚོན་རྩེ་གཅིག་པ་དང༌། ཐག་མདུང་དང༌། གཏུན་ཤིང་དང༌། ཆུ་གྲི་དང༌། ཤག་གླང་དང༌། སྟ་རེ་དང༌། མདའ་དང༌། ལྕགས་ཀྱུ་དང༌། དབྱུག་ཏོ་དང༌། ཁ་ཊྭཱཾ་ག་དང༌། འཁོར་ལོ་དང༌། རྡོ་རྗེ་དང༌། རྡོ་རྗེ་ཐོ་བ་དང༌། རལ་གྲི་དང༌། ཅང་ཏེའུའོ། །གཡོན་པ་རྣམས་ནི་ཀ་པཱ་ལ་དང༌། མགོ་བོ་དང༌།


DTG047_Page_0300
[མ་དཔེ་གཟིགས་ན་འདིར་གནོན།]

ཕུབ་ཆུང་དང༌། རྐང་པ་དང༌། ཞགས་པ་དང༌། གཞུ་དང༌། རྒྱུ་མ་དང༌། དྲིལ་བུ་དང༌། ལག་པ་དང༌། དུར་ཁྲོད་ཀྱི་རས་དང༌། གསལ་ཤིང་དང༌། མེ་ཐབ་དང༌། ཐོད་ཚལ་དང༌། སྡིགས་མཛུབ་དང༌། འཕན་དང༌། རླུང་གི་རས་རྣམས་སོ། །ཞབས་གཡས་པ་རྣམས་ཀྱིས་ནི། མི་དང༌། མ་ཧེ་དང༌། གླང་དང༌། བོང་བུ་དང༌། རྔ་མོ་དང༌། ཁྱི་དང༌། ལུག་དང༌། ཝ་རྣམས་སོ། །གཡོན་པའི་ཞབས་རྣམས་ཀྱིས་ནི། །བྱ་རྒོད་དང༌། བྱ་རོག་དང༌། ནེ་ཙོ་དང༌། སེང་གེ་དང༌། ཁྲ་དང༌། བྱ་ཆེན་པོ་དང༌། སྲིན་བྱ་དང༌། ཁྲུང་ཁྲུང་རྣམས་མནན་པར་བསམ་པར་བྱའོ། །ཞལ་དང་པོ་མ་ཧེའི་གདོང་ཅན་ནག་པོ། རྭ་གཡས་ཕྱོགས་ཀྱི་ཞལ་གསུམ་ལ། དང་པོ་སྔོན་པོ་གཉིས་པ་དམར་པོ། གསུམ་པ་སེར་པོའོ། །རྭ་གཡོན་ཕྱོགས་ཀྱི་ཞལ་གསུམ་ལ་དང་པོ་དཀར་པོ། གཉིས་པ་དུད་ཀ །གསུམ་པ་ནག་པོའོ། །རྭ་གཉིས་ཀྱི་དབུས་ཀྱི་ཞལ་དམར་པོ་ཁྲོ་བ་དང་བཅས་པའོ། །སྟེང་གི་ཞལ་ཁ་དོག་སེར་པོ་ཅུང་ཟད་ཁྲོ་བ། གཞོན་པའི་ཆ་ལུགས་ཅན། ཟུར་ཕུད་ལྔ་དང་ལྡན་པ་སྟེ། ཞལ་རེ་རེ་ཞིང་ཡང་སྤྱན་གསུམ་གསུམ་དང་ལྡན་པའོ། །ཕྱི་རོལ་དུ་ནི་དུར་ཁྲོད་བརྒྱད་དང་ལྡན་པ་ལ། ཤར་ཕྱོགས་སུ་ནི་གཏུམ་དྲག་ཅེས་བྱ་བའི་དུར་ཁྲོད་ལ་ནཱ་ག་གེ་སར་གྱི་ཤིང་ལ་གནས་པའི་ལྷའི་ཚོགས་ལ་སོགས་པ་དགོད་པར་བྱའོ། །ལྷོ་ཕྱོགས་སུ་ནི་ཤིན་ཏུ་དགོད་པ་ཞེས་བྱ་བའི་དུར་ཁྲོད་ལ་པླཀྵའི་ཤིང་ལ་གནས་པའི་གཤིན་རྗེའི་སྡེ་དཔོན་ཆེན་པོ་དགོད་དོ། །ནུབ་ཕྱོགས་སུ་ནི་གོ་ར་ཨནྟ་ཀ་ར་ཞེས་བྱ་བའི་དུར་ཁྲོད་ལ་ཨ་ཤྭདྠ་ལ་གནས་པའི་སྤྲིན་གྱི་རྒྱལ་པོ་རྣམས་ཡོངས་སུ་དགོད་དོ། །བྱང་ཕྱོགས་སུ་ནི་ཀི་ལི་ཀི་ལ་ཞེས་བྱ་བའི་དུར་ཁྲོད་ལ་ཤིང་པ་ཏ་ལ་ལ་གནས་པའི་གནོད་སྦྱིན་གྱི་གཟུགས་ཅན་བསམ་པར་བྱའོ། །མེའི་ཕྱོགས་སུ་ནི་བི་བི་ཤ་ན་ཞེས་བྱ་བའི་དུར་ཁྲོད་ལ་ཤིང་ཨ་ཁརྫུན་ལ་གནས་པའི་དྲང་སྲོང་གི་ཚོགས་བསྒོམ་པར་བྱའོ། །བདེན་བྲལ་གྱི་མཚམས་སུ་ནི་འབར་བའི་རིགས་ཞེས་བྱ་བའི་དུར་ཁྲོད་ལ་ཤིང་པ་ཏ་ལ་ལ་གནས་པའི་སྲིན་པོ་ལ་སོགས་པ་དགོད་པར་བྱའོ། །རླུང་གི་མཚམས་


DTG047_Page_0301
[མ་དཔེ་གཟིགས་ན་འདིར་གནོན།]

སུ་ནི་དམྱལ་བ་ལ་སོགས་པ་ཞེས་བྱ་བའི་དུར་ཁྲོད་ལ་ཤིང་ཨུ་དུམྺཱ་ར་ལ་གནས་པའི་རླུང་གི་བདག་པོ་དང་བཅས་པ་རྣམས་དགོད་པར་བྱའོ། །དབང་ལྡན་གྱི་མཚམས་སུ་ནི་དབྱིབས་ཅན་ཞེས་བྱ་བའི་དུར་ཁྲོད་ལ་ཤིང་ཨ་མྲ་ལ་གནས་པའི་ཡི་དགས་ཀྱི་ཚོགས་བསྒོམ་པར་བྱའོ། །གཞན་ཡང་དུར་ཁྲོད་བརྒྱད་ན་བྱ་ཤ་ཟ་བ་སྣ་ཚོགས་དང༌། གཅན་གཟན་སྣ་ཚོགས་པ་དང༌། མིའི་རོ་སྣ་ཚོགས་པ་དང༌། རོ་ལངས་དང་སྲིན་པོ་དང་འདྲེ་ལ་སོགས་པ་སྣ་ཚོགས་བསྒོམ་པར་བྱའོ། །དེ་ལྟར་དུར་ཁྲོད་ཀྱི་དབུས་སུ་ཆུད་པའི་གཞལ་ཡས་ཁང་རྡོ་རྗེ་འཇིགས་བྱེད་དང་བཅས་པ་སྐད་ཅིག་གིས་བསྒོམས་ལ། རང་གི་སྙིང་གར་རྡོ་རྗེའི་ལྟེ་བ་ལ་གནས་པའི་ཡི་གེ་ཧཱུཾ་གི་འོད་ཟེར་གྱིས་རང་བཞིན་གྱི་དཀྱིལ་འཁོར་ན་གནས་པའི་རྡོ་རྗེ་འཇིགས་བྱེད་ཀྱི་སྐུ་བསྐུལ་ཏེ། རིན་པོ་ཆེ་ལ་སོགས་པའི་བུམ་པ་ཕྱག་གིས་བསྣམས་པས་དབང་བསྐུར་བས། མི་བསྐྱོད་པ་ཅོད་པན་དུ་བསམས་ཏེ། དེ་ཉིད་སླར་རང་གི་ལུས་ལ་ཞུགས་པས་སྙིང་གར་ཡེ་ཤེས་སེམས་དཔའ་བསམས་ལ། དེའི་སྙིང་གར་ཏིང་ངེ་འཛིན་སེམས་དཔའ་བསྒོམ་པར་བྱའོ། །དེ་ལྟར་རང་ཉིད་རྡོ་རྗེ་འཇིགས་བྱེད་དུ་བསྒོམས་ལ། སྔགས་ཀྱི་བཟླས་པ་བྱ་སྟེ། ཨོཾ་ཡ་མ་རཱ་ཛ། ས་དོ་མེ་ཡ། ཡ་མེ་དོ་རུ། ཎ་ཡོ་ད་ཡ། ཡ་དེ་ཡོ་ནི་ར་ཡ་ཀྵེ་ཡ། ཡཀྵེ་ཡཙྪ་ནི་རཱ་མ་ཡ་ཧཱུཾ་ཕཊ་ཕཊ། རྩ་བའི་སྔགས་སོ། །ཨོཾ་ཧྲཱིཿ་ཥྚྲྀཿ་ཝི་ཀྲྀ་ཏཱ་ན་ན་ཧཱུཾ་ཕཊ། ལས་ཀྱི་སྔས་སོ། །ཨོཾ་ཡ་མཱནྟ་ཀ་ཧཱུཾ་ཕཊ། སྙིང་པོའོ། །སྙིང་གར་ཉི་མའི་དཀྱིལ་འཁོར་ལ་སྔགས་ཀྱི་ཡི་གེ་དེ་རྣམས་ལས་གང་ཡང་རུང་བ་བསམས་ཏེ། སྤྲོ་བ་དང་བསྡུ་བ་བྱའོ། །སྔགས་ཀྱི་ཡི་གེའི་འོད་ཟེར་ལས་ཁྲོ་བོ་སྣ་ཚོགས་པ་དང༌། བྱ་སྣ་ཚོགས་པ་དང༌། འདྲེ་དང་སྲིན་པོ་ལ་སོགས་པ་དང༌། ཤིན་ཏུ་འཇིགས་སུ་རུང་བ་རྣམས་སྤྲོས་ཏེ། བསྒྲུབ་པར་བྱ་བའི་ཤ་དང༌། རུས་པ་དང༌། ཁྲག་དང་ཆུ་སེར་རྣམས་ཟ་ཞིང་འཐུང་བ་དང༌། འཇིབ་པར་བསམ་པར་བྱའོ། །དེ་ལྟར་བསྒོམ་པ་དང་བཟླས་པ་ལས་ལྡང་བར་འདོད་ན་གཏོར་མ་གཏང་བར་བྱ་སྟེ། དྲུག་ཅུ་


DTG047_Page_0302
[མ་དཔེ་གཟིགས་ན་འདིར་གནོན།]

པའི་འབྲས་ཆན་དང༌། ཤ་དང་ཉ་དང་ཁྲག་དང་སྒོག་པ་དང༌། ཆང་དང་བཅས་པའི་གཏོར་མ་བདུད་རྩི་ལྔ་དང་བཅས་པའམ། །ཡང་རྒྱུད་ལས་གསུངས་པའི་ཤ་ས་ཚོགས་པས་བདུད་རྩིར་བྱིན་གྱིས་བརླབས་ཏེ། སྔགས་འདིས་དབུལ་བར་བྱའོ། །ཨོཾ་ཀཱ་ལ་རཱུ་པ་སརྦ་དུཥྚ་ས་ཏྭ་ད་མ་ཀ་མ་ཧཱ་བྷཱུ་ཏ་ཨ་དྷི་པ་ཏི་ཨི་དཾ་པ་ལིཾ་གྲྀཧྞ་གྲྀཧྞཱ་པ་ཡ་མ་མ་ཤ་ཏྲཱུཾ་མཱ་ར་ཡ་ཧཱུཾ་ཕཊ། ཅེས་པ་ནི་གཏོར་མའི་སྔགས་སོ། །དེ་ནས་ལངས་པའི་དུས་སུ་ཡང་རྡོ་རྗེ་འཇིགས་བྱེད་ཀྱི་ང་རྒྱལ་གྱིས་གནས་པར་བྱའོ། །དེ་ལྟར་རྣམ་པར་བསྡུས་པ་ལས་བྱུང་བའི། །དགེ་བ་དེས་ནི་སེམས་ཅན་མ་ལུས་ཀུན། །འཕགས་པ་འཇམ་དཔལ་ཁྲོས་པ་ལས་བྱུང་བའི། །རྡོ་རྗེ་འཇིགས་བྱེད་དེ་དང་འདྲ་བར་ཤོག །དཔལ་རྡོ་རྗེ་འཇིགས་བྱེད་ཀྱི་སྒྲུབ་པའི་ཐབས་མདོར་བསྡུས་པ། སློབ་དཔོན་ཆེན་པོ་ཤྲཱི་བྷ་དྲས་མཛད་པ་རྫོགས་སོ།། །།

དཔལ་རྡོ་རྗེ་འཇིགས་བྱེད་ཀྱི་བསྙེན་པའི་ཆོ་ག
ཞི་བ་ཡེ་ཤེས།


DTG047_Page_0302
[མ་དཔེ་གཟིགས་ན་འདིར་གནོན།]

དཔལ་རྡོ་རྗེ་འཇིགས་བྱེད་ཆེན་པོ་ལ་ཕྱག་འཚལ་ལོ། །གང་གིས་བསྙེན་སྒྲུབ་ལས་རྣམས་སྦྱོར་འདོད་པས། །དེ་རྣམས་དགོས་པར་བཅས་པ་ཤེས་དོན་དུ། །དེ་ཡི་མཚན་ཉིད་བདེ་བར་འདིར་ནི་བསྟན་པར་བྱ། ཇི་སྲིད་ཏིང་ངེ་འཛིན་སྔགས་དང་མཆོད་པར་ལྡན་པ་ཡིས། །ལྷ་ཉེ་རྩེ་གཅིག་མཚན་མ་ཐོབ་པ་བསྙེན་པར་གསུངས། །རྟགས་ཐོབ་གྱུར་ནས་དབེན་པར་སོང་སྟེ་གླལ་དང་སྦྲིད་པ་དང༌། གཉིད་སྤངས་བརྟུལ་ཞུགས་བཅས་པས་ལེགས་བསྒྲུབ་པའོ། །བསྒྲུབས་པས་གདུལ་བྱའི་རང་བཞིན་སྣ་ཚོགས་བཟླས་པ་ལ། །ཞི་བ་ལ་སོགས་ཐབས་ཀྱི་འབྱོར་པ་ལས་སུ་གསུངས། །དེ་ལ་ལས་གྲུབ་པ་ཡི་རྒྱུ་གསུམ་སྟེ། །རྩེ་གཅིག་པ་ཐོབ་པས་ཆོས་ལ་དབང་སྒྱུར་བ་དང༌། སྔགས་གྲུབ་པས་ངག་དབེན་པ་ཐོབ་པ་དང༌། དམ་ལ་གནས་པས་དམ་ཚིག་ཅན་སྟོང་གྲོགས་བྱེད་པའོ། །དངོས་གྲུབ་འགྲུབ་པའི་རྒྱུ་ནི། དད་པ་མི་ལྡོག་པ་དང༌། ཤེས་རབ་ཀྱིས་ཐེ་ཚོམ་མི་ཟ་བ་དང༌། སེམས་རྩེ་གཅིག་པ་དང་ཤིན་ཏུ་གསལ་བ་རྣམས་སོ། །འཇིག་རྟེན་དང་འཇིག་རྟེན་ལས་འདས་པ་གང་བསྒྲུབ་ཀྱང་ཐ་མལ་


DTG047_Page_0303
[མ་དཔེ་གཟིགས་ན་འདིར་གནོན།]

པའི་ཆགས་སྡང་ནི་བར་ཆོད་ཀྱི་སྒྲིབ་པ་ཆེན་པོ་ཡིན་ནོ། །དབང་དང་དམ་ཚིག་མེད་ན་འདི་དང་ཕ་རོལ་ཏུ་སྡུག་བསྔལ་འབྱུང་ངོ༌། །ཇི་སྐད་བཤད་པའི་ཡོན་ཏན་བླངས་ལ་སྐྱོན་སྤངས་ཏེ། ལྷ་ཡི་བསྙེན་པ་ནི་དང་པོར་ཁྲུས་བྱས་ལ་སྟན་བདེ་བ་ལ་འདུག་སྟེ། མཎྜལ་བྱི་དོར་བྱས་ལ་མེ་ཏོག་གི་གཅལ་བཀྲམ། སྐུ་གཟུགས་མདུན་དུ་བཞག་ལ། བསོད་ནམས་ཀྱི་ཚོགས་ཡན་ལག་བདུན་གྱི་སྒོ་ནས་བྱང་ཆུབ་ཀྱི་སེམས་བསྐྱེད་དེ། སྙིང་གའི་པདྨར་ཉི་མ་ལ་གནས་པའི་སེམས་དཔའི་འོད་ཟེར་གྱིས་དཔལ་འཇམ་པའི་རྡོ་རྗེ་འོག་ནས་འབྱུང་བ་ལྟ་བུ་སྤྱན་དྲངས་ཏེ། མདུན་གྱི་ནམ་མཁའ་ལ་བཞུགས་པ་ལ་འདི་ལྟར་ཡན་ལག་བདུན་གྱི་སྨོན་ལམ་བྱའོ། །མཆོད་པ་བླ་ན་མེད་པ་ཀུན་དུ་བཟང་པོའི་མཆོད་སྤྲིན་འདོད་ཡོན་གྱི་ཆར་དག་པའི་སེམས་ཀྱིས་སྤྲུལ་ནས་འབུལ་ན། ཐུགས་རྗེ་ཆེན་པོའི་དབང་གིས་བཞེས་སུ་གསོལ། ན་མོ་དུས་གསུམ་གྱི་དེ་བཞིན་གཤེགས་པ་ཐུགས་ཀྱི་གཟུགས་བརྙན་སྐུ་ཡི་སྤྲུལ་པ་གསུང་གི་དབང་ཕྱུག །དཔལ་འཇམ་པའི་རྡོ་རྗེ་ལ་སོགས་པ་ཕྱོགས་བཅུ་ན་བཞུགས་སོ་འཚལ་ལ། བདག་ལུས་ངག་ཡིད་ཀྱི་སྒོ་ནས་ཕྱག་འཚལ་ཞིང་སྐྱབས་སུ་མཆིའོ། །གཞན་ཡང་བདག་གིས་ཐོག་མ་མེད་པའི་དུས་ན་དུག་གསུམ་གྱི་དབང་གིས་སྡིག་པ་མི་དགེ་བ་ཅི་བགྱིས་པ་རྣམས་སོ་སོར་བཤགས་ཤིང་སླན་ཆད་སྡོམ་པར་བགྱིད་དོ། །ཕྱོགས་བཅུའི་འཕགས་པ་རྣམས་དང་འགྲོ་བ་དག་གི་བསོད་ནམས་ཀྱི་ཚོགས་བསྐྱེད་དོ་འཚལ་ལ་རྗེས་སུ་ཡི་རང་བར་བགྱིད་དོ། །སྟོན་པ་འཇིག་རྟེན་གྱི་སྒྲོན་མ་བསྐུལ་བའི་ས་ལས་བཞེས་པ་གང་དག་བཞུགས་སོ་འཚལ་དེ་དག་ལ་ཆོས་ཀྱི་འཁོར་ལོ་བསྐོར་བར་བསྐུལ་ལོ། །བདེ་བར་གཤེགས་པ་གང་དག་འདུལ་བའི་དུས་ལ་མ་བབ་པ་ལོག་པར་ལྟ་བ་རྣམས་སུན་དབྱུང་བའི་ཕྱིར། ཐབས་ཀྱིས་མྱ་ངན་ལས་འདའ་བར་བཞེད་པ་རྣམས་ལ་འཁོར་བ་ཇི་སྲིད་པར་དོན་མཛད་པར་གསོལ་བ་འདེབས་སོ། །དགེ་བའི་རྩ་བ་དེ་དག་དང་གཞན་ཡང་བདག་དང་འགྲོ་བ་ཀུན་གྱིས་བགྱིས་སོ་འཚལ་


DTG047_Page_0304
[མ་དཔེ་གཟིགས་ན་འདིར་གནོན།]

གྱི་དགེ་བའི་རྩ་བ་ཐམས་ཅད་ཀྱང་བླ་ན་མེད་པའི་བྱང་ཆུབ་ཏུ་བསྔོ་བར་བགྱིའོ། །ཇི་ལྟར་དུས་གསུམ་གྱི་སངས་རྒྱས་རྣམས་ཀྱི་ཐུགས་བྱང་ཆུབ་མཆོག་ཏུ་བསྐྱེད་པ་ཕུང་པོ་དང་ཁམས་དང་སྐྱེ་མཆེད་དང་བྲལ་བ་གཟུང་བ་དང་འཛིན་པའི་རྣམ་པ་སྤངས་པ། ཆོས་བདག་མེད་པ་མཉམ་པ་ཉིད་རང་གི་སེམས་གདོད་མ་ནས་མ་སྐྱེས་པ། སྟོང་པ་ཉིད་ཀྱི་རང་བཞིན་དུ་ཐུགས་བསྐྱེད་པ་དེ་ལྟར་བདག་གིས་ཀྱང་སེམས་བསྐྱེད་པར་བགྱིའོ། །བདག་གིས་འཕགས་པ་རྣམས་ལ་ལུས་ཕུལ་ཏེ་སེམས་ཅན་འཁོར་བའི་རྒྱ་མཚོ་ན་གནས་པ་རྣམས་བསྒྲལ་བའི་ཆེད་དུ་བཅོམ་ལྡན་འདས་འཇམ་པའི་རྡོ་རྗེ་བསྒྲུབས་ཏེ། སེམས་ཅན་རྣམས་མྱ་ངན་ལས་འདའ་བར་བགྱིའོ། །དེ་ནས་ཚད་མེད་པ་བཞིས་སེམས་དག་པར་བྱའོ། །ད་ནི་ཡེ་ཤེས་ཀྱི་ཚོགས་སུ་གྱུར་པ་སྟོང་པ་ཉིད་བསྒོམ་པར་བྱ་སྟེ། སྣང་བའི་ཆོས་ཐམས་ཅད་ནི་སེམས་ཉིད་འཁྲུལ་པ་ཙམ་སྟེ་གུད་ན་མེད་དོ། །སེམས་ནི་སྒྱུ་མ་ལྟ་བུར་རང་བཞིན་མེད་པ་སྟེ། དེ་ནས་ཆོས་ཐམས་ཅད་རང་བཞིན་མེད་པའོ་ཞེས་ཤེས་པར་བྱས་ལ་གསང་སྔགས་འདིས་སྟོང་པ་ཉིད་ཀྱི་ང་རྒྱལ་བྱའོ། །ཨོཾ་སྭ་བྷཱ་ཝ་བི་ཤུདྡྷཱཿ་སརྦ་དྷརྨཱཿ་སྭ་བྷཱ་ཝ་བི་ཤུདྡྷོ྅ཧཾ། ཞེས་པས་ཐམས་ཅད་དག་པའོ། །དེ་ནས་ཡཾ་ལས་རླུང་གི་དཀྱིལ་འཁོར་དུ་གྱུར་པའི་སྟེང་དུ། ཨ་དང་པོ་ལས་ཟླ་བར་གྱུར་པ། དེའི་སྟེང་དུ་དྷཱིཿ་འོད་དུ་ཞུ་བ་ལས་རལ་གྲི། རལ་གྲིའི་ལྟེ་བ་ལ་ཡི་གེ་དྷཱིཿ་གསེར་བཙོ་མའི་ཁ་དོག་ལྟ་བུ་ལས་ཡོངས་སུ་གྱུར་པའི་འཇམ་པའི་རྡོ་རྗེ་མདོག་སེར་པོ་ཨུཏྤལ་བསྣམས་ཤིང་མཆོག་སྦྱིན་གྱི་ཕྱག་རྒྱ་ཅན། གཞོན་ནུ་ཟུར་ཕུད་ཅན་མཛེས་པའི་རྒྱན་གྱིས་བརྒྱན་པར་བསྒོམ། དེའི་ཐུགས་ཀར་ཨ་གཉིས་པ་ལས་གྲུབ་པའི་ཉི་མའི་དཀྱིལ་འཁོར་འབར་བའི་ཕྲེང་བ་ཅན་དུ་བསམས་ཏེ། དེའི་འོད་ཀྱིས་ཕྱོགས་བཅུའི་སངས་རྒྱས་སྲས་དང་བཅས་པ་རྣམས་བསྐུལ་ནས། སླར་ཞུགས་པས་འཇམ་པའི་རྡོ་རྗེ་ཉིད་དང་སངས་རྒྱས་རྣམས་སུ་བཅས་ཏེ་ཉི་མའི་དཀྱིལ་འཁོར་ལ་ཐིམ་པས་ཤིན་ཏུ་གཟི་བྱིན་དང་ལྡན་པར་གྱུར་ཏེ། འོད་ཟེར་འབར་བས་ཀུན་དུ་ཁྱབ་ཅིང་འཕྲོ་བར་བསྒོམ་མོ། །དེའི་སྟེང་དུ་ཧཱུཾ་ནག་པོའོ། །འོད་ཟེར་ལྔ་འཕྲོ་བས་དོན་


DTG047_Page_0305
[མ་དཔེ་གཟིགས་ན་འདིར་གནོན།]

བྱས་ཏེ་སླར་བསྡུས་པའི་སྦྱོར་བས་ཁྲོ་བོའི་རྡོ་རྗེ་རབ་ཏུ་འཕྲོ་བ་ཅན་དུ་གྱུར་ཏེ། དོན་གྱི་བྱ་བ་བྱས་ནས་རྒྱལ་བ་སྲས་དང་བཅས་པ་སྤྱན་དྲངས་ནས་རྡོ་རྗེ་དེ་ཉིད་ལ་བཞུགས་པས་སྐུ་གསུང་ཐུགས་རྡོ་རྗེ་དབྱིངས་ཉིད་དང་ལྡན་པར་གྱུར་ཏེ། དེ་ཉིད་བཅོམ་ལྡན་འདས་དཔལ་རྡོ་རྗེ་འཇིགས་བྱེད་ཆེན་པོའི་གཟུགས་སུ་གྱུར་པར་བྱའོ། །འདི་ལྟ་སྟེ་སྐུ་བསྐལ་པ་མེ་དཔུང་འབར་བའི་དཀྱིལ་ན་བཞུགས་ཤིང༌། ཞལ་ཁྲོ་གཉེར་སྨིན་མ་འགྱུར་བ། མེ་འབར་བ་རྡོ་རྗེ་རྟ་གད་ཆེན་པོ་འབྱིན་ཅིང་ལྕེ་འཇིབ་པ། ཕེ་སྐད་ཆེན་པོ་གནམ་དུ་འདོན་ཅིང་འཇིག་རྟེན་གསུམ་གྱི་བདག་པོའི་ཁྲག་གསོལ་ཞིང༌། འཇིག་རྟེན་དང་འཇིག་རྟེན་ལས་འདས་པའི་ལྷ་ཐམས་ཅད་བསྡིགས་པ། སྐུ་གཅེར་པུ་ཐོད་པས་བརྒྱན་པ། མཚན་མ་འགྲེང་བ། གསུས་ཁྱིམ་ཆེ་བ། མ་ཧེའི་གདོང་ཆེན་པོ་སྟེ། འདི་དབུ་དགུ་པ་ཕྱག་སུམ་ཅུ་རྩ་བཞི་པ། ཞབས་བཅུ་དྲུག་པ་གཡོན་བརྐྱང་བའི་སྟབས་ཀྱིས་བཞུགས་པ། ཞལ་གཡས་དང་པོ་སྔོན་པོ། གཉིས་པ་དམར་པོ། གསུམ་པ་སེར་པོ་སྟེ། དེ་གསུམ་ནི་གཡས་པའོ། །གཡོན་པའི་ཞལ་གསུམ་ནི་དཀར་པོ་དང༌། དུད་ཀ་དང༌། ནག་པོ་ཁྲོས་པ་སྟེ། དེ་གསུམ་ནི་ལྗགས་འདྲིལ་བའོ། །རྩ་བའི་ཞལ་མ་ཧེ་ནག་པོ་ཁ་གདངས་པ་སྟེ་ལྕེ་འདྲིལ་བའོ། །རྭ་གཉིས་ཀྱི་དབུས་ཀྱི་ཞལ་དམར་པོ་འཇིགས་པ་སྟེ་ཞལ་ནས་ཁྲག་འཛག་པའོ། །སྟེང་གི་ཞལ་སེར་པོ་ཅུང་ཟད་ཁྲོ་བ་གཞོན་ནུའི་ཚུལ་ཅན་གཙུག་ཕུད་ལྔ་པ་སྟེ། ཐམས་ཅད་ཀྱང་སྤྱན་གསུམ་པའོ། །ཕྱག་གཡས་གཡོན་གྱི་དང་པོས་གླང་པོ་ཆེའི་པགས་པ་བརྒྱངས་ཏེ་འཛིན་པའོ། །གཡས་པ་གཞན་ནི་རིམ་པ་བཞིན་དུ་གྲི་དང༌། བི་ཏི་པ་ལ་དང༌། གཏུན་ཤིང་དང༌། ཆུ་གྲི་དང༌། ཆུ་གྲི་བཟང་པོ་དང༌། སྟ་རེ་དང༌། མདུང་དང༌། མདའ་དང༌། ལྕགས་ཀྱུ་དང༌། དབྱུག་ཏོ་དང༌། ཁ་ཊྭཱཾ་ག་དང༌། འཁོར་ལོ་དང༌། རྡོ་རྗེ་དང༌། རྡོ་རྗེ་ཐོ་བ་དང༌། རལ་གྲི་དང༌། རྗེ་ཆུང་དང་དེ་རྣམས་བསྣམས་པའོ། །ཕྱག་གཡོན་ན་ཐོད་པ་དང༌། ཚངས་པའི་མགོ་བོ་དང༌། ཕུབ་ཆུང་དང༌། མིའི་རྐང་པ་དང༌། ཞགས་པ་དང༌། གཞུ་དང༌། རྒྱུ་མ་དང༌། དྲིལ་བུ་དང༌། ལག་པ་དང༌། དུར་ཁྲོད་ཀྱི་


DTG047_Page_0306
[མ་དཔེ་གཟིགས་ན་འདིར་གནོན།]

རས་དང༌། རྩང་ཆེན་གྱིས་ཕུག་པའི་རོ་དང༌། མེ་ཐབ་དང་ཐོད་ཚལ་དང༌། །སྡིགས་མཛུབ་དང༌། འཕན་རྩེ་གསུམ་པ་དང༌། རླུང་གིས་ཕྱར་བའི་རས་དང་དེ་རྣམས་བསྣམས་པའོ། །ཞབས་གཡས་པ་བརྒྱད་ཀྱིས་མི་དང་མ་ཧེ་དང༌། གླང་དང༌། བོང་བུ་དང༌། རྔ་མོ་དང༌། ཁྱི་དང༌། ལུག་དང། ཝ་དང་དེ་རྣམས་བརྫིས་པའོ། །གཡོན་པས་བྱ་རྒོད་དང༌། འུག་པ་དང༌། བྱ་རོག་དང༌། སེང་གེ་དང༌། བྱ་རྒོད་ཆེན་པོ་དང༌། ཁྲ་དང༌། ནེ་ཙོ་དང༌། རི་སྐེགས་དང་དེ་རྣམས་བརྫིས་པའོ། །དེའི་ཐུགས་ཀར་ཡེ་ཤེས་སེམས་དཔས་མཚོན་པ། སྐུ་གསུང་ཐུགས་བྱིན་གྱིས་བརླབས་པ། མི་འཁྲུགས་པས་དབང་བསྐུར་བའོ། །དེ་ནས་ཨེ་ཡཾ་རཾ་ཁཾ་ལཾ་སུཾ་བྷྲཱུཾ། ཞེས་བརྗོད་འབྱུང་བ་ཆེན་པོ་བཞིའི་དཀྱིལ་འཁོར་གྱི་སྟེང་ན་གཞལ་ཡས་ཁང་གྲུ་བཞི་སྒོ་ཁྱུད་དང་ལྡན་པ། དུར་ཁྲོད་འབར་བའི་ཀློང་ན་གནས་པ་ཅིག་བསྒོམ་མོ། །དཀྱིལ་འཁོར་གྱི་དབུས་ན་རོ་ཆེན་པོའི་སྟེང་དུ་ཇི་སྐད་སྨོས་པའི་སེམས་ཅན་རྣམས་ཀྱི་གདན་ལ། བཅོམ་ལྡན་འདས་དཔལ་རྡོ་རྗེ་འཇིགས་བྱེད་ཆེན་པོ་བདག་དང་མཐུན་པར་བསྐྱེད་དོ། །གྲྭ་བཞི་རུ་མཆོད་པའི་ལྷ་མོ་བཞི་དང༌། སྒོ་བཞིར་སྒོ་མ་བཞི་ཁྲོ་བོའི་ཆ་བྱད་ཅན་ཡི་གེ་ཡ་ལས་བསྐྱེད་དོ། །དེའི་ཕྱི་རོལ་དུ་ལས་ཀྱི་གཤིན་རྗེ་ཕོ་མོ་མཁའ་འགྲོ་མ་དང་འབྱུང་པོའི་ཚོགས་བསྐྱེད་པར་བསྒོམ་སྟེ། དེའི་ལྷོ་ཕྱོགས་ཀྱི་སྒོར་བཅོམ་ལྡན་འདས་ཀྱི་མདུན་དུ་བདག་དམ་ཚིག་སེམས་པར་གནས་པར་བསྒོམ་མོ། །དེ་ལྟར་གསལ་བ་དང་ལྕགས་ཀྱུའི་ཕྱག་རྒྱ་བཅས་པའི་ཏིང་ངེ་འཛིན་དང་ལྡན་པས་སྤྱན་དྲངས་ཏེ། འཇམ་དཔལ་རང་བཞིན་ཆོས་རྣམས་ཀུན་གྱི་དངོས། །གནས་མེད་འགྲོ་འོང་བྲལ་བ་ནམ་མཁའ་བཞིན། །དུས་ཀྱི་ཁམས་བཞིན་ཐུགས་རྗེས་འགྲོ་འོང་བྲལ། །སྤྲུལ་པའི་འགྲོ་དང་བྲལ་བ་གཟུགས་བརྙན་བཞིན། །འགྲོ་དང་འོང་བའི་མཚན་ཉིད་མི་མངའ་ཡང༌།། ཆུ་ཟླ་བཞིན་དུ་དམིགས་དེར་སྣང་བའོ། །དེང་འདིར་སྤྱན་འདྲེན་གཤེགས་སུ་གསོལ་བའི་ལྷ། །སངས་རྒྱས་ཀུན་གྱི་རང་བཞིན་འཇམ་པའི་དབྱངས། །གདུག་པ་འདུལ་བྱེད་འཇིགས་བྱེད་གཤིན་རྗེ་གཤེད། །ཡེ་ཤེས་ཐུགས་ལས་སྤྲུལ་པའི་ལྷ་མོས་བསྐོར། །ལས་བྱེད་


DTG047_Page_0307
[མ་དཔེ་གཟིགས་ན་འདིར་གནོན།]

སྤྲུལ་པ་གཤིན་རྗེ་འཁོར་དང་བཅས། །འདིར་གཤེགས་བརྟན་པར་བདག་ལ་དགོངས་སུ་གསོལ། །ཨོཾ་ཧྲཱིཿ་བྷོ་བྷོ་མ་ཧཱ་ཀྲོ་དྷ་ཨཱ་གྩྪ་ཨསྨ་ཏ་པཱུ་ཛ་པྲ་ཏི་གྲྀཧྞ་པྲ་སཱ་དྷཾ་མེ་དྷཱིཿ་མཾ་ཀུ་རུ་སྭཱ་ཧཱ། ཞེས་པས་གཉིས་སུ་མེད་པར་བྱའོ། །གཉིས་མེད་ཐུན་མོང་མ་ཡིན་ཁྱབ་པའི་སྐུ། །ཀུན་ལ་སྙོམས་མཛད་རྒྱལ་བ་ཀུན་གྱི་ཡབ། །ཆོས་ཀྱི་དབྱིངས་གྱུར་རྒྱལ་བ་ཀུན་གྱི་ཡུམ། །ཡེ་ཤེས་སེམས་དཔའ་རྒྱལ་བ་ཀུན་གྱི་སྲས། །ཕྱག་འཚལ་འཇམ་དཔལ་དཔལ་གྱུར་རྫོགས་པ་ཁྱོད། །ཆོས་ཀྱི་སྐུ་ལ་བྱམས་སྡང་མི་མངའ་ཡང༌། །སྲིད་གསུམ་གདུག་པ་མ་ལུས་འདུལ་བའི་ཕྱིར། །ཐུགས་རྗེའི་ཐབས་ཀྱིས་ཁྲོ་རྒྱལ་སྐུར་བསྟན་པ། །འཇིགས་བྱེད་གཤིན་རྗེ་གཤེད་ལ་ཕྱག་འཚལ་ལོ། །དུས་གསུམ་སངས་རྒྱས་ཀུན་གྱི་ཡེ་ཤེས་ནི། །ཆོས་རྣམས་ཀུན་དང་རང་བཞིན་དབྱེར་མེད་དེ། །སྒྲུབ་མཆོག་བདག་གིས་སེམས་ཀྱང་དེ་ལགས་པས། །དེ་མཚོན་དོན་ཕྱིར་རྟགས་ཀྱི་སྐུར་བསྟན་པ། །ཐུགས་ལ་གནས་པའི་ཡེ་ཤེས་འཕྲོ་བའི་རྒྱ། །ཡེ་ཤེས་སེམས་དཔའི་སྐུ་ལ་ཕྱག་འཚལ་ལོ། །བདེ་གཤེགས་རྣམས་ཀྱི་ཡོན་ཏན་རྨད་པོ་ཆེ། །བསམ་འདས་བརྗོད་བྲལ་དཔག་གིས་མི་ལང་ཡང༌། །མི་ཕྱེད་རྡོ་རྗེ་གསུམ་དུ་འདུས་བསྟན་པ། །སྐུ་གསུང་ཐུགས་ཀྱི་ལྷ་ལ་ཕྱག་འཚལ་ལོ། །བདེ་གཤེགས་པ་ཐམས་ཅད་མཉམ་ཉིད་ཆོས་ཀྱི་སྐུ། །རང་བཞིན་རྣམ་དག་རིགས་རྒྱུད་མི་མངའ་ཡང༌། །རྣལ་འབྱོར་གྲུབ་པ་མཚོན་ཕྱིར་རྒྱས་བཏབ་པ། །དབུ་རྒྱན་རྡོ་རྗེ་མཚོན་ལ་ཕྱག་འཚལ་ལོ། །ཡེ་ཤེས་སྣང་མེད་ཆགས་པའི་རྡུལ་བྲལ་ཞིང༌། །འདོད་པ་ཁམས་ཀྱི་སེམས་ཅན་འདུལ་སླད་དུ། །ཐབས་ལ་མཁས་པའི་འདོད་ཡོན་གཟུགས་སུ་སྤྲུལ། །མཆོད་པའི་ལྷ་མོའི་ཚོགས་ལ་ཕྱག་འཚལ་ལོ། །ཆོས་ཉིད་སྤྲོས་བྲལ་དབྱིངས་ཀྱི་ཕོ་བྲང་དུ། །གཟུང་འཛིན་བྲལ་བའི་ཡེ་ཤེས་ཟློས་འཇུག་ཕྱིར། །འཁྲུལ་བའི་བགེགས་ཚོགས་གདུལ་བའི་སྐུར་བསྟན་པ། །གཞལ་ཡས་སྒོ་སྐྱོང་བཞི་ལ་ཕྱག་འཚལ་ལོ། །བཅོམ་ལྡན་རྡོ་རྗེ་ཆོས་རྗེ་འཇམ་དབྱངས་སྤྱན་ལམ་དུ། །བདུད་འདུལ་བསྟན་པ་བསྲུང་བར་ཞལ་འཆེས་པ། །ལས་ཀྱི་གཤིན་


DTG047_Page_0308
[མ་དཔེ་གཟིགས་ན་འདིར་གནོན།]

རྗེ་མང་པོ་མཁའ་འགྲོ་མ། །འབྱུང་པོ་རོ་ལངས་ཅི་བགྱི་བཀའ་ཉན་ཚོགས། །ཕྱི་ནང་སྐྱོང་བའི་དམ་ཅན་མ་ལུས་ལ། །བདག་ནི་རེ་བའི་སེམས་ཀྱིས་འདུད་ཅིང་མཆིས། །འདི་ནི་ཕྱག་འཚལ་བའོ། །རྒྱལ་བ་རྣམས་ནི་གཙང་གྱུར་ཅིང༌། །སྨེ་བའི་རྟོག་པ་མི་མངའ་ཡང༌། །སྲི་ཞུ་ཚུལ་གྱིས་ཡོན་ཆབ་འདི། །བདེ་གཤེགས་རྣམས་ལ་སྐུ་ཁྲུས་གསོལ། །ཨོཾ་ཧྲཱིཿ་ཥྚྲྀཿ་ཧ་ཨརྒྷའིའོ། །ཨོཾ་ཧཱུཾ་ཕཊ་ཕཊ་བསང་གཏོར་གྱིའོ། །རྒྱལ་བ་རྣམས་ནི་ཡོན་ཏན་མཆོག་གི་སྐུ། །ཚུལ་ཁྲིམས་རྣམ་པར་དག་པའི་དྲི་ངད་ལྡན། །བྱང་ཆུབ་ཡན་ལག་བརྒྱད་པ་མེ་ཏོག་མཛེས། །མ་རིག་མུན་པ་བྲལ་བ་ཡེ་ཤེས་གསོལ། །ནོར་བདུན་ཡོན་ཏན་ཆོག་ཤེས་བདུད་རྩི་ཟས། །ཡེ་ཤེས་ཕོ་བྲང་མཚན་གྱི་མེ་ཏོག་སྤོས། །སྒྱུ་མའི་ཆོས་ལ་ཡེ་ཤེས་དབང་སྒྱུར་ཞིང༌། །རང་བཞིན་རྣམ་དག་རིགས་རྒྱུད་མི་མངའ་ཡང༌། །བདག་ཅག་སྲི་ཞུ་གུས་པའི་ཚུལ་གྱིས་སུ། །དྲི་དང་བདུག་པ་མེ་ཏོག་མར་མེ་བཤོས། །དག་ཅིང་གཙང་མར་བཤམས་ཏེ་ཕུལ་བ་འདིས། །བསོད་ནམས་ཡན་ལག་ཡོངས་སུ་རྫོགས་གྱུར་ཅིག །ཨོཾ་ཧྲཱིཿ་ཥྚྲྀཿ་ཝི་ཀྲྀ་ཏཱ་དུ་ཥྚ་ས་ཏྭ་ད་མ་ཀ་གཿ་དྲིའིའོ། །ཨོཾ་ཀུ་མཱ་ར་རཱུ་པི་ཎི་ཛྫཿ་ཧཱུཾ་ཕཊ་མེ་ཏོག་གིའོ། །ཨོཾ་ཧྲིཿ་ཧཿ་ཧཿ་ཧེ་ཧེ་ཕཊ་བདུག་པའིའོ། །ཨོཾ་དཱིཔྟ་ལོ་ཙ་ན་བི་ཀྲྀ་ཏ་ཨཱ་ན་ན་མ་ཧཱ་ཨཊྚཱཊྚ་ཧ་ས་ན་དི་ནི་དཱིཔྟ་དཱིཔྟཱ་ཡ་སྭཱ་ཧཱ། མར་མེའིའོ། །ཨོཾ་ཀའ་ལ་རཱུ་པ་སཏྭ་ད་མ་ཀ་ནཻ་བི་དྱེ་པཱུ་ཛ་ཡ་སྭཱ་ཧཱ། བཤོས་གཙང་གིའོ། །འདི་ནི་མཆོད་པ་དབུལ་བའོ། །ཧཱུཾ། འཇམ་དཔལ་མཁའ་ལ་འབྱུང་བའི་གསེར་མདོག་ཅན། །འཇམ་དཔལ་ཐུགས་ལས་ཆོས་ཀུན་རང་བཞིན་གསལ། །འཇམ་དཔལ་གསུང་གི་དབང་ཕྱུག་འཇམ་པའི་དབྱངས། །འཇམ་དཔལ་བདག་ནི་རེ་བའི་སེམས་ཅན་གྱིས་འདུད། །ཐུགས་མཆོག་འཇམ་པའི་ངང་ལས་མ་གཡོས་ཀྱང༌། །ཐུགས་རྗེས་གདུག་པ་མ་ལུས་འདུལ་བའི་ཕྱིར། །གཤིན་རྗེ་འཇིགས་བྱེད་ཆེན་པོའི་སྐུར་སྟོན་པ། །མི་བཟད་དུས་མཐའི་བསྐལ་བའི་མེ་ལྟར་འབར། །ཞལ་གདངས་ཁྲོ་གཉེར་སྨིན་མ་གློག་སྟོང་འགྱུ། །སྤྱན་བགྲད་མཆེ་བ་གཙིགས་པ་རབ་ཏུ་འབར། །རྡོ་རྗེ་རྟ་གད་དྲག་པོ་ཧ་ཧར་བཞད། །མཁའ་


DTG047_Page_0309
[མ་དཔེ་གཟིགས་ན་འདིར་གནོན།]

འགྲོ་གདུག་པའི་ཕེཾ་སྐད་གནམ་དུ་སྒྲོགས། །ཁྲོས་པའི་སྟབས་ཆེན་བརྡབས་པས་ཁམས་གསུམ་གནོན། །སྡིགས་མཛུབ་གནམ་དུ་བསྒྲེང་ཞིང་ལྷ་ཆེན་འདུལ། །ལྗགས་འདྲིལ་ཚེམས་ཆེན་གཙིགས་ཤིང་ཁྲག་གིས་མྱོས། །ལྷ་དང་བཅས་པའི་འཇིག་རྟེན་ཞལ་དུ་གསོལ། །གླང་ཆེན་ཀོ་རློན་ཐོད་པའི་ཕྲེང་བ་ཞགས། །གཅེར་བུ་འཇིགས་བྱེད་དབང་ཕྱུག་ཆེན་པོའི་ཚུལ། །འཇིགས་བྱེད་མ་ཧེ་ཁྲོས་པའི་ཞལ་གདངས་ཤིང༌། །ཞལ་དགུ་འབར་བར་སྲིད་པ་ཟ་ཞིང་རྔུབ། །འགྲོ་བ་སྣ་ཚོགས་འདུལ་བའི་ཕྱག་རྒྱ་འབར། །བདུད་རིས་གནོན་པའི་ཞབས་ནི་བརྐྱང་བསྐུམ་མཛད། །འཇིགས་བྱེད་ཆེན་པོའི་སྐུ་ལ་རྟག་ཏུ་འདུད། །དབུ་དགུ་འབར་བའི་དཀྱིལ་འཁོར་ནས། །གཡས་ཀྱི་ཞལ་གསུམ་བགྲད་པ་ནི། །མཐིང་ག་དམར་དང་སེར་བའི་ཞལ། །གཡོན་པའི་ཞལ་གསུམ་གདངས་པ་ནི། །དཀར་དང་དུད་ཀ་ནག་པོའི་ཞལ། །དབུས་ཀྱི་ཞལ་གསུམ་འབར་བ་ནི། །ཁྲོ་དང་ཆགས་དང་ཞི་བའི་ཚུལ། །ཕྱག་རྒྱ་འོད་ཟེར་འབར་བ་ལས། །གཡས་ཀྱི་ཕྱག་རྒྱ་བཅུ་དྲུག་ནི། །རྡེག་ཅིང་འཇོམས་པའི་མཚོན་ཆ་གདེངས། །གཡོན་གྱི་ཕྱག་རྒྱ་བཅུ་དྲུག་ནི། །རོ་སྟོབས་པ་ཡི་མཚན་མས་མཛེས། །བརྗིད་གནོན་ཞབས་ཀྱི་ཕྱག་རྒྱ་ལས། །གཡས་ཀྱི་ཞབས་བརྒྱད་བསྐུམ་པ་ནི། །དྲེགས་པའི་ལྷ་བརྒྱད་ཐབས་ཀྱིས་གནོན། །གཡོན་གྱི་ཞབས་བརྒྱད་བརྐྱང་པ་ནི། །དྲེགས་པའི་ལྷ་མོ་བརྒྱད་ལ་རོལ། །འདོད་ཆགས་ཆེན་པོ་འདུལ་བའི་ཕྱིར།། རྟག་ཏུ་ལིངྒ་རྒྱས་པའི་ཚུལ། །དྲག་པོའི་ཚུལ་གྱིས་ཞེ་སྡང་འདུལ། །གདུལ་སྐུ་ཁྱོད་ལ་ཕྱག་འཚལ་ལོ། །དུར་ཁྲོད་ཆེན་པོའི་དཀྱིལ་འཁོར་ནས། །བདུད་དང་གཤིན་རྗེ་ཐབས་ཀྱིས་འདུལ། །མ་མོ་མཁའ་འགྲོ་དབང་དུ་སྡུད། །དབང་སྡུད་ཁྱོད་ལ་ཕྱག་འཚལ་ལོ། །དབང་ཕྱུག་ཆེན་པོའི་དཀྱིལ་འཁོར་ནས། །དབང་མེད་དད་པས་འདུས་པ་དང༌། །ཡེ་ཤེས་སྤྲུལ་པའི་འཁོར་གྱིས་བསྐོར། །འཁོར་བཅས་ཁྱོད་ལ་ཕྱག་འཚལ་ལོ། །ཡེ་ཤེས་ཐུགས་ཀྱི་དཀྱིལ་འཁོར་ནས། །ཇི་ལྟ་བུར་ནི་སྤྲུལ་གྱུར་ནས། །རྣམ་དག་དབྱིངས་ལས་མ་


DTG047_Page_0310
[མ་དཔེ་གཟིགས་ན་འདིར་གནོན།]

གཡོས་ཏེ། མཉམ་ཉིད་ཁྱོད་ལ་ཕྱག་འཚལ་ལོ། །ཡོན་ཆབ་དང་རོལ་མོའི་རྫས་ཀྱིས་ཀྱང་མཉེས་པར་བྱ་སྟེ། འདི་ནི་བསྟོད་པའོ། །དེ་ནས་ཁ་ཟས་ཅི་འབྱོར་བའི་གཏོར་མ་རཾ་གྱིས་སྦྱངས་ཏེ། ཨ་ལས་བདུད་རྩི་ཆེན་པོར་གྱུར་པའི་འོད་ཟེར་ལས་འདོད་ཡོན་ཇི་ལྟ་བར་མོས་པ་བཞིན་དུ་འབྱུང་བར་བསམས་ཏེ་སྔགས་འདིས་འགྲོ་བ་ཀུན་དང་འཁོར་དུ་བསྡུས་པ་རྣམས་ལ་སྦྱིན། །ཨོཾ་ཀཱ་ལ་རཱུ་པ་སརྦ་དུ་ཥྚ་སཏྭ་ད་མ་ཀ་མ་ཧཱུ་བྷཱུ་ཏ་ཨ་དྷི་པ་ཏི་ཨི་མཾ་བ་ལིཾ་གྲྀཧྣ་གྲིཧྣཱ་པ་ཡ་སྭཱ་ཧཱ། ཞེས་ལན་གསུམ་དུ་བརྗོད་དེ་དབུལ་ལོ། །དེ་ནས་བདག་ཉིད་སྙིང་གར་མ་ལས་ཉི་མའི་དཀྱིལ་འཁོར་ལ་བཟླས་པའི་ཡི་གེ་བསམས་ཏེ། བཅོམ་ལྡན་འདས་ཀྱི་ཐུགས་ཀར་ཡང་དེ་བཞིན་དུ་དམིགས་ལ་བདག་ལས་ཡི་གེ་འཕྲོས་པས་ལྷའི་ཐུགས་དམ་བསྐུལ། བདག་ལ་ཐིམ་པས་དངོས་གྲུབ་ཀྱི་དབྱིག་དམ་པ་ཐོབ་པར་འགྱུར་ཏེ། མགལ་མེའི་འཁོར་ལོ་ལྟར་རྒྱུན་མ་ཆད་པར་བྱའོ། །གཏོང་བར་འདོད་པ་དང་མཆོད་པར་བྱ་སྟེ། མཐོལ་བཤགས་བྱས་ཏེ་བཟོད་པར་གསོལ་ནས་ཡེ་ཤེས་ཀྱི་ལྷ་སླར་གཤེགས་སུ་གསོལ། སྤྲོས་མེད་མཁའ་ལྟར་ཁྱབ་པའི་སྐུ་མཆོག་ནི། །མི་གནས་ཕྱིར་ན་གཤེགས་པ་མི་མངའ་ཡང༌། །སྲི་ཞུའི་ཚུལ་གྱིས་གཤེགས་སུ་གསོལ་བ་འདིས། །བདག་དང་གཞན་བཅས་སྒྲིབ་པ་བྱང་གྱུར་ཅིག །ཨོཾ་ཛ་ཡ་ཛ་ཡ་སུ་ཛ་ཡ་བི་ཤྭ་རཱུ་པ་དྷ་རི་གྩྪ་གྩྪ་སྭ་བྷཱ་ཝ་ནཾ་ཀྲྀ་ཏཾ་ཏེ་ན་ཏ་ཐཱ་ག་ཏཾ་ཤྩ། སརྦ་བུདྡྷ་ཤྩ། བི་སརྫ་ཡ་མ་མ་ཀ་ཪྻཾ་ཀུ་རུ་སྭཱ་ཧཱ། དེ་ནས་དམ་ཚིག་གི་ལྷ་བདག་ལ་བསྡུ་ལུས་བསྲུང་བ་ཡང་བྱའོ། །དཔལ་རྡོ་རྗེ་འཇིགས་བྱེད་ཀྱི་བསྙེན་པའི་ཆོ་གའོ། །རྫོགས་སོ།།

སྒྲུབ་པའི་ཆོ་ག།
ཞི་བ་ཡེ་ཤེས།


DTG047_Page_0310
[མ་དཔེ་གཟིགས་ན་འདིར་གནོན།]

།།ཡི་དམ་བཅས་པ་རྫོགས་པ་དང༌། །ཏིང་ངེ་འཛིན་རྩེ་གཅིག་གྱུར་པའམ། །མཚན་མ་བརྟན་པོ་ཐོབ་པ་ན། །དབེན་པའི་གནས་སུ་སོང་ནས་ནི། །སྔགས་ཀྱི་བརྟུལ་ཞུགས་སྤྱད་པར་བྱ། །སྐུ་གཟུགས་སམ་ནི་མཚན་མ་ལ། །ཏིང་འཛིན་སྤྲོ་བསྡུ་གསལ་བར་བྱ། །སྒྲུབ་རྫས་ལ་ཡང་དེ་བཞིན་ཏེ། །བརྐྱང་བསྐུམ་ཙམ་ཡང་སྤངས་ནས་ནི། །སེམས་ནི་ཅུང་ཟད་ཉམས་མི་བྱ། །ནམ་ཞིག་མཚན་མ་བྱུང་བ་ན། །ཐེ་ཚོམ་མེད་པས་དངོས་གྲུབ་བླང༌། །འདི་ལྟ་སྟེ་བསྙེན་པས་རྟགས་བྱུང་


DTG047_Page_0311
[མ་དཔེ་གཟིགས་ན་འདིར་གནོན།]

བ་དང་སྒྲུབ་པ་བརྩམ་པར་བྱ་སྟེ། ཤིན་ཏུ་དབེན་པའི་གནས་སུ་མཎྜལ་བྱ་སྟེ། དེར་ལྷའི་རྟེན་བཞུགས་སུ་གསོལ་ཏེ། མཆོད་པའི་རྫས་དང་དངོས་གྲུབ་ཀྱི་རྫས་ཀྱང་གཞག་གོ །ཡང་མཆོད་པ་གཞན་ཡང་བཤམས་ལ། དང་པོ་བསྙེན་པའི་དུས་ཇི་ལྟ་བ་བཞིན་མཆོད་ནས། དེ་ནས་བདག་དམ་ཚིག་སེམས་དཔར་གསལ་བའི་ཐུགས་ཀ་ནས་ཡི་གེའི་འོད་ཟེར་འཕྲོས་པས། ཕྱོགས་བཅུའི་སངས་རྒྱས་སྤྱན་དྲངས་ནས་སྐུའམ་མཚན་མ་ལ་བསྟིམ་སྟེ། ནམ་སྐུ་འཛུམ་པའམ་མེ་ཏོག་འབར་བའམ། བདུག་པ་དྲི་དང་ལྡན་པའམ་རྫས་ཁོལ་བ་དང༌། དྲོ་བ་དང་དུད་པ་འཐུལ་བ་ན་བརྟན་པའི་སེམས་ཀྱིས་ཐེ་ཚོམ་མེད་པར་མཆོད་པའི་ས་ལྷ་ལ་ཕུལ་ཏེ། ལག་པ་གཡས་ཀྱིས་བླངས་ལ་ཐུགས་ཀར་བསྟིམ། དངོས་གྲུབ་ཀྱི་རྫས་ལག་པ་གཡོན་གྱིས་བླངས་ལ་གཏད་དོ། ཐེ་ཚོམ་སྐྱེས་ན་བར་ཆད་དུ་འགྱུར་རོ། །། འདི་ནི་སྒྲུབ་པ་སྟེ་དངོས་གྲུབ་བླང་བའི་ཐབས་སོ། །དེ་ཕན་ཆད་བརྫུན་དང༌། མ་ཐོས་པའི་ཆོས་མངོན་དུ་འགྱུར་ཏེ། རིག་པ་འཛིན་པའི་ས་ལ་གནས་ནས། འགྲོ་བ་ཇི་ལྟར་འདུལ་བ་བཞིན་དུ་ལས་རྣམ་པ་བཞི་ཐོགས་པ་མེད་དོ། །མཚན་མ་ཇི་ལྟ་བ་བཞིན་མ་བྱུང་ན་ཡང༌། འཇིག་རྟེན་ན་ཚེ་རིང༌། ལོབས་སྐྱེན། ལས་རྣམ་པ་བཞི་འགྲུབ་པོ། །གཞན་དུ་སྐལ་པ་བཟང་པོར་སྦྱོར་རོ། །དེ་ལ་གནས་གསུངས་པ་ནི། རྣམ་པ་སྣ་ཚོགས་རི་དགོན་དང༌། །ཆུ་ཀླུང་འབབ་ཆུ་རྣམས་དང་ནི། །དུར་ཁྲོད་དབེན་ཞིང་ཉམས་དགའ་བར། །སྒྲུབ་པ་དག་ནི་བརྩམ་པར་བྱ། །དེ་ལ་བརྟུལ་ཞུགས་ནི། སྐྱེ་བོ་མེད་པའི་ནགས་ཚལ་དུ། །སྔགས་པས་ལྷ་ཡི་བརྟུལ་ཞུགས་སྤྱད། །ཟས་ལ་གཙང་སྨེ་མི་ལྟ་ཞིང༌། །ཡུལ་ལ་བཟང་ངན་བྱེད་མི་བྱ། །ཏིང་ངེ་འཛིན་ལས་མི་ཉམས་ཤིང༌། །ཕྱག་རྒྱ་བཅའ་བའམ་བཟུང་བ་ནི། །ལྷར་བཅས་འཇིག་རྟེན་ཕྱག་མི་བཙལ། །གླང་པོ་ལ་ཡང་ལམ་མི་གཟུར། །རྐང་པ་བྲག་རིར་ཐོགས་མེད་འགྲོ། །ཁ་ནས་གསང་སྔགས་རྒྱལ་པོ་ཟློས། །འདི་ནི་སྔགས་ཀྱི་བརྟུལ་ཞུགས་བསྟན། །དེ་ལ་མཚན་མ་བཞག་པ་ནི། །མཎྜལ་བྱི་དོར་བྱས་པ་ལ། །ལུགས་མ་རི་མོ་ལ་སོགས་


DTG047_Page_0312
[མ་དཔེ་གཟིགས་ན་འདིར་གནོན།]

དང༌། །དེ་བཞིན་བེ་ཅོན་རལ་གྲི་དང༌། །ཏྲི་ཤཱུལ་འཁོར་ལོ་ལ་སོགས་པ། །མཚན་མ་ལེགས་བྱས་མདུན་དུ་གཞག །དེ་ལ་མཆོད་རྫས་ནི། མེ་ཏོག་བདུག་པ་མར་མེ་དྲི། །བཤོས་དང་མཆོད་ཡོན་སོགས་པ་དང༌། །བཟའ་དང་བཅའ་བར་སྦྱར་བ་ཡི། །གཏོར་མ་སྣ་ཚོགས་གཞག་པར་བྱ། །དེ་ལ་དངོས་གྲུབ་ཀྱི་རྫས་ནི། བ་སེར་བ་ཡི་མར་གསར་དང༌། །སྦྲང་རྩི་ཁ་རར་བཅས་པ་དག །ཟ་མ་ཏོག་གམ་པ་རུར་གཞག །དེ་ལ་དམ་ཚིག་གི་ཏིང་ངེ་འཛིན་ནི། བདག་ཉིད་འཇམ་པའི་རྡོ་རྗེར་གསལ། །ཐུགས་ཀའི་ཉི་མའི་སྙིང་པོ་ལ། །བཟླས་པའི་ཡིག་འབྲུ་བསམ་པ་ནི། །ཆུ་ཟླ་དག་གམ་གཟུགས་བརྙན་བཞིན། །གཅིག་དང་དུ་མ་བྲལ་པར་བསྒོམ། །དེ་ལ་འཕྲོ་དང་འདུ་བ་ནི། ཆུ་རླབས་དག་གམ་ཉི་ཟེར་བཞིན། །འོད་ཟེར་འཕྲོས་པའི་སྦྱོར་བ་ལས། །སངས་རྒྱས་ཀུན་གྱི་སྐུ་གསུང་ཐུགས། །འོད་ཟེར་ཚུལ་དུ་བསྡུས་ནས་ནི། །མཚན་མའམ་དངོས་གྲུབ་རྟེན་ལ་བསྟིམ། །དེ་ལ་དངོས་གྲུབ་ཀྱི་རྟགས་ནི། སྐུ་གཟུགས་འཛུམ་དང་མཚན་མ་འབར། །མར་ནི་གོལ་བ་མཆོག་ཏུ་བཤད། །དུད་པ་འཐུལ་བ་འབྲིང་ཡིན་ཏེ། །དྲོ་བ་དག་ནི་ཐ་མའོ། །དེ་ལ་དངོས་གྲུབ་བླང་བའི་ཐབས་ནི། དང་པོར་མཆོད་རྫས་ལྷ་ལ་དབུལ། །དེ་ནས་སྒྲུབ་རྫས་བདག་ཉིད་བཏུང༌། །དེ་ལ་དངོས་གྲུབ་ཀྱི་གེགས་ནི། སེམས་གཡེངས་པའམ་རྨུགས་དང་ཉིད། །དངས་པ་བར་ཆད་འགྱུར་བའམ། །ཐེ་ཚོམ་སྐྱེས་ན་དངོས་གྲུབ་མེད། །དེ་ལ་གྲུབ་པའི་དུས་ནི། བསྙེན་པའི་རྫོགས་གྱུར་ཕྱིན་ཆད་ནི། །ཟླ་བ་དྲུག་གིས་འགྲུབ་པར་བཤད། །གལ་ཏེ་གྲུབ་པར་མ་གྱུར་ན། །དེ་བཞིན་ལན་གསུམ་བརྩམ་པར་བྱ། །དེས་ཀྱང་གྲུབ་པར་མ་གྱུར་ན། །དྲག་ཤུལ་ཚུལ་བཞིན་ཞག་བདུན་བསྒྲུབ། །དེ་ལས་ཕྱིར་འབད་མེད་པར་བཤད། །དེ་ལ་དྲག་ཤུལ་གྱི་ཏིང་ངེ་འཛིན་ནི་འདི་ཡིན་ཏེ། ཀྱོ་བ་རྡོ་རྗེ་འབར་བ་ནི། །གནམ་ལྕགས་ཞུན་མ་འདྲ་བ་དག །རང་གི་སྙིང་ལས་འོད་འཕྲོས་ཏེ། །ཀྱོ་བ་ཡེ་ཤེས་ཐུགས་ནས་དྲངས། །རྡོ་རྗེ་འབར་བས་དབབ་བྱས་ནས། །ཡང་དང་ཡང་དུ་གཞུག་པར་བྱ། །སྒྲུབ་པའི་ཆོ་ག་སློབ་དཔོན་ཞི་བའི་ཡེ་ཤེས་ཀྱིས་མཛད་པ་རྫོགས་སོ།།

དཔལ་རྡོ་རྗེ་འཇིགས་བྱེད་ཀྱི་རྟོག་པ་ལས་འཁོར་ལོ་བསྐོར་བའི་ལས་དྲག་པོ་ཕྱོགས་གཅིག་པ།
ཞི་བ་ཡེ་ཤེས།


DTG047_Page_0313
[མ་དཔེ་གཟིགས་ན་འདིར་གནོན།]

དཔལ་འཇམ་པའི་རྡོ་རྗེ་ལ་ཕྱག་འཚལ་ལོ། །གང་ཞིག་ལས་ལ་སྦྱོར་བར་འདོད་པས། སྒྲུབ་ཆེན་དངོས་གྲུབ་ཐོབ་པའམ། ཏིང་ངེ་འཛིན་ལས་སུ་ཡང་རུང་བའམ། །སྔགས་གྲུབ་པས་སྦྱར་རོ་ཞེས་གསུངས་སོ། །དེ་ལ་གནས་ནི་དུར་ཁྲོད་དང༌། ཤིང་གཅིག་གི་དྲུང་དང༌། ལམ་བཞི་མདོ་ལ་སོགས་པ་སྟེ། འབྱུང་པོ་གནས་པའི་སར་བྱའོ། །དུས་ནི་ཉི་ཤུ་གཉིས་ནས་གནམ་སྟོང་ལ་བྱའོ། །དེ་ལ་དང་པོ་གཏོར་མ་དང༌། །གཙང་བའི་མཆོད་པ་དག་གིས་འཕགས་པ་དང་མཁའ་འགྲོ་མ་དག་ཚིམ་པར་བྱས་ལ། ས་ཕྱོགས་དེའི་གདོན་དེ་མཆོད་སྦྱིན་གྱིས་མགུ་བར་བྱས་ལ། བདེན་པ་བདར་ཞིང་སྟོང་གྲོགས་ཀྱིས་ཤིག་པར་བསྒོ། ཞི་བའི་སྦྱིན་སྲེག་བྱའོ། །དེ་ནས་འཁོར་ལོ་བྲི་བར་བྱ་སྟེ། རང་གི་ལྷའི་ཏིང་ངེ་འཛིན་དང་ལྡན་པས་གཅེར་བུ་ཁ་ལྷོ་ཕྱོགས་སུ་བལྟས་ཏེ་བྲི་བར་བྱའོ། །འདི་ལྟར་དུར་ཁྲོད་ཀྱི་རས་ལ་དུག་དང༌། ཁྲག་དང༌། སྐེ་ཚེ་དང༌། ནིམ་པ་དང༌། ད་དུ་རའི་ཁུ་བ་དང༌། བྱ་རོག་གིས་ཟོས་པའི་ལྷག་མ་དང༌། དྲི་ཆེན་དང༌། ཐལ་ཆེན་གྱིས་བྱུགས་ཏེ་རས་ལེགས་པར་སྦྱངས་ལ། གོང་གི་རྫས་དང་རོའི་སོལ་བས་སྣག་ཚ་བྱས་ཏེ། བྱ་རོག་གི་སྒྲོ་རྩས་འཁོར་ལོ་བྲི་བར་བྱའོ། །དེ་ལ་འཁོར་ལོའི་རིམ་པ་གསུམ་ལ་དབུས་སུ་ཡ་བརྒྱད་བྲིས་ལ། དེ་ལ་རིམ་པ་གཉིས་པ་ཡན་ཆད་ཡི་གེ་གསུམ་ཅུ་རྩ་གཉིས་པས་བསྐོར་ལ། དབུས་སུ་ཡ་དང་ཡའི་བར་དུ་བསྒྲུབ་བྱའི་མིང་བྲིའོ། །རིམ་པ་ཐ་མ་ལ་ཡི་གེ་བཅུ་པ་དང་བསྒྲུབ་བྱའི་མིང་སྤེལ་ཏེ་བྲིའོ། །དེའི་ཕྱི་རོལ་དུ་ཡི་གེ་ཕྲེང་བ་བྲིའོ། །ཕྱོགས་མཚམས་སུ་ཧཱུཾ་བརྒྱད་བྲིའོ། །གྲྭ་བཞིར་ཕཊ་བྲིའོ། །དེའི་དུས་སུ་དམ་ཚིག་གི་སྔགས་དང་ཕྱག་རྒྱས་བྲིས་ཏེ། ཟིན་པ་དང་ལྷ་ལ་ཕྱག་བྱས་ནས་བཀའ་བདེན་པར་གྱུར་ཅིག་བྱའོ། །དེ་ནས་གྲོག་མཁར་གྱི་ས་དང༌། ཆུ་འགྲམ་གཉིས་ཀྱི་ས་དང༌། རྒྱལ་པོའི་དྲི་ཆེན་དང༌། དུར་ཁྲོད་ཀྱི་སོལ་བ་ཉིན་མཚན་གྱི་གུང་ལ་དྲི་ཆུས་སྤྲུས་ཏེ། བསྒྲུབ་བྱའི་གཟུགས་སོར་བརྒྱད་པ་ཅིག་བྱས་ལ། དེའི་སྙིང་གར་གོང་གི་འཁོར་ལོ་དྲིལ་ཏེ་གཞུག་གོ །དེ་ནས་བསྒྲུབ་བྱ་


DTG047_Page_0314
[མ་དཔེ་གཟིགས་ན་འདིར་གནོན།]

དགུག་པའི་སྦྱོར་བས་བཀུག་སྟེ། བསྒྲུབ་བྱའི་གཟུགས་ལ་ཕབ་ལ། གནས་ལྔར་མི་རུས་ཀྱི་ཕུར་པ་བརྡེག་ཅིང་ཚིགས་ཐམས་ཅད་ཚེར་མ་རྣོན་པོས་དགང་ངོ༌། །དེ་ལ་དགུག་པ་ནི། ལྷའི་ཏིང་ངེ་འཛིན་ལ་གནས་པས་མདུན་དུ་ཡཾ་ལས་རླུང་གི་དཀྱིལ་འཁོར་དུ་གྱུར་པའི་སྟེང་ན་ཟླ་བའི་གདན་སྟེང་ན་གནས་པའི་གཤིན་རྗེ་ལག་ན་ལྕགས་ཀྱུ་དང༌། ཞགས་པ་ཐོགས་པ་ཞིག་བསམས་ཏེ། དེ་ལ་ཆེ་གེ་མོ་ཁུག་ལ་ཤོག་ཅེས་བསྐུལ་ཏེ། སྔགས་ཀྱི་མཇུག་ལ་ཆེ་གེ་མོ་ཨཱ་ཀཪྵ་ཡ་ཧཱུཾ་ཕཊ་ཅེས་བཟླས་ཏེ་གཟུགས་ལ་བསྟིམས་ཏེ། དེ་ནས་ཕུར་བུ་འདེབས་པའི་དུས་སུ། གཤིན་རྗེ་ལག་ན་མཚོན་ཆ་སྣ་ཚོགས་ཐོགས་པ། བརྡེག་ཅིང་ཟ་བ་དང༌། གཅན་གཟན་གྱི་ཚོགས་ཀྱིས་ཟ་ཞིང་འཐོབ་པར་བསམས་ཏེ། སྔགས་ཀྱི་མཇུག་ལ་ཆེ་གེ་མོ་མཱ་ར་ཡ་ཕཊ་ཅེས་བཟླས་སོ། །དེ་ནས་ལིངྒ་དེ་ཐོད་པ་ཁ་སྦྱར་གྱི་ནང་དུ་གཞུག་པར་བྱ་སྟེ། འདི་ལྟར་ཐོད་པ་འོག་མའི་རྒྱབ་ཏུ་རླུང་གི་མཎྜལ་བྲིའོ། །ནང་དུ་པདྨ་འདབ་བརྒྱད་ལ་དབབ་པའི་སྙིང་པོ་བྲིའོ། །ཐོད་པ་གོང་མའི་ནང་དུ་མེའི་མཎྜལ་བྲིའོ། །རྒྱབ་ཏུ་དབང་ཆེན་རི་རབ་དང་བཅས་པ་བྲིའོ། །དེའི་ནང་དུ་ལིངྒ་བཅུག་ལ་སྐུད་པ་ནག་པོས་དཀྲིས་ནས་མཎྜལ་གྲུ་གསུམ་ནག་པོའི་སྟེང་དུ། དུག་ཤིང་གི་འདབ་མ་ལ་དྲོ་བར་གྱུར་པ་ཙམ་དུ་བསྲོ་ཞིང་སྔགས་ལ་སྦྱར་བར་བྱའོ། །དེ་ལ་ཉི་མ་དང་པོ། ཨོཾ་ཡ་མ་རཱ་ཛ་ས་དོ་མེ་ཡ་ཆེ་གེ་མོ་བྷ་མ་ཡ་ཀུ་རུ་ཧཱུཾ་ཕཊ་ཅེས་ཁྲི་ཕྲག་གཅིག་བཟླས་ཏེ། དེ་བཞིན་དུ་ཉི་མ་བཞིའི་བར་དུ་སྔགས་དང་བསྐུལ་བར་བྱས་ཏེ། ཇི་ལྟ་བ་བཞིན་དུ་བཟླས་པ་བྱའོ། །དམིགས་པ་ནི་ཕོ་ཉའི་ཚོགས་ཀྱིས་བསྒྲུབ་བྱ་བཀུག་སྟེ། གའུའི་ནང་དུ་ཆུད་པར་བྱས་ནས། དེར་སྔགས་ཀྱི་དཔལ་གྱིས་བསྲེགས་ཏེ། ཤ་ཁྲག་བསྐམས། རྣམ་ཤེས་བྲལ་ཏེ། རུས་པ་ཐལ་བ་བརྡུང་བར་འདུག་པར་བསམ་མོ། །དེའི་དུས་སུ་ལས་མཁན་དག་གིས་དུས་གསུམ་དུ་གཏོར་མ་དང་ཚོགས་དང་མཆོད་པ་བྱས་ཏེ། དམ་ལ་གནས་པའི་གཤིན་རྗེ་དང༌། མ་མོ་མཁའ་འགྲོ་མ་ཡང་བསྐུལ་ཞིང་ཕྲིན་ལས་བཅོལ་ལོ། །གནས་བདུན་གྲོག་མཁར་གྱིས་བླངས་ལ། གཤིན་རྗེའི་མི་ཁྲུ་གང་པའི་ཚད་ལ་


DTG047_Page_0315
[མ་དཔེ་གཟིགས་ན་འདིར་གནོན།]

མཆེ་བ་གཙིགས་པ། མདོག་སྔོན་ནག་ལག་ན་རལ་གྲི་དང་གཡོན་པ་ཞགས་པ་དང་སྡིགས་མཛུབ་བྱེད་པ། གཅེར་བུ་སྐྲ་ལྷུག་པར་འདུག་པ་བྱས་ལ། དེའི་སྙིང་གར་གའུ་བཅུག་ལ། གནམ་སྟོང་གི་ནམ་ཕྱེད་ན་དུར་ཁྲོད་ཀྱི་ཐབ་ཏུ་གཏིང་རིང་བྲུས་ཏེ། དེར་བཞག་ལ་གཤིན་རྗེ་སྤྱན་དྲངས་ཏེ་གཟུགས་ལ་བསྟིམས་ནས། གཏོར་མ་དང་མཆོད་པས་དག་པར་བྱས་ལ། དེ་ནས་མགོ་ལྷོར་བསྟན་ལ། ཁྲ་སྦུབ་ཏུ་བཞག་ལ་བདེན་པ་བདར་དཔང་དུ་བཙུགས་ལ་གཤིན་རྗེ་ལ་གཏད་ལ་གཞག་གོ །དེ་ནས་རང་གི་ཁྱིམ་དུ་འོངས་ནས་ཀྱང་གསང་སྔགས་ཀྱི་རྗེས་སུ་བསྐུལ་བར་བྱའོ། །དཔལ་རྡོ་རྗེ་འཇིགས་བྱེད་ཀྱི་རྟོག་པ་ལས་འཁོར་ལོ་བསྐོར་བའི་ལས་དྲག་པོ་ཕྱོགས་གཅིག་པ། སློབ་དཔོན་ཞི་བའི་ཡེ་ཤེས་ཀྱིས་མཛད་པ་རྫོགས་སོ།།

རྡོ་རྗེ་འཇིགས་བྱེད་ཀྱི་སྒྲུབ་ཐབས།
མཉྫུ་ཤྲཱི་ཛྙཱ་ན།


DTG047_Page_0315
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། བཛྲ་བྷཻ་ར་ཝ་སཱ་དྷ་ན། བོད་སྐད་དུ། རྡོ་རྗེ་འཇིགས་བྱེད་ཀྱི་སྒྲུབ་ཐབས། དཔལ་རྡོ་རྗེ་འཇིགས་བྱེད་མ་ཧེའི་གདོང་པ་ཅན་ལ་ཕྱག་འཚལ་ལོ། །བཅོམ་ལྡན་འཇིག་པའི་དུས་ཀྱི་མེ་ལྟར་འབར། །དྲག་པོའི་དྲག་པོ་དེ་ལ་ཕྱག་འཚལ་ནས། །ལས་རྣམས་ཐམས་ཅད་རབ་སྒྲུབ་ཕྱིར། །མ་ཧེ་དགོང་ཅན་སྒྲུབ་ཐབས་ཅུང་ཞིག་བྲི། །ཡིད་དང་མཐུན་ཞིང་དབེན་པའི་གནས་དག་ཏུ། །ངང་གིས་བདེ་བའི་སྟན་ལ་འདུག་ནས་ནི། །མ་ཧེའི་གདོང་ཅན་སྐད་ཅིག་རྣལ་འབྱོར་པས། །ལྷ་དང་བླ་མ་མཉེས་བྱས་དེ་འོག་ཏུ། །སྟོང་པ་མ་ཡིན་མི་སྟོང་པ་ཡང་མིན། །སེམས་ཉིད་སྤྲོས་དང་བྲལ་བ་རྣམ་པར་བསྒོམ། །ཡཾ་ལས་རླུང་དཀྱིལ་རཾ་ལས་བསྐལ་མེ་འབར། །དེ་ལས་ཧཱུཾ་འཕྲོས་རྡོ་རྗེའི་རང་བཞིན་ནོ། །ཨ་ལས་ཟླ་བ་རྒྱས་པའི་སྟེང་ཉིད་དུ། །དྷཱིཿ་ལས་འཇམ་དཔལ་གཞོན་ནུ་བསྐྱེད་པར་བྱ། །དེ་ཡི་ཐུགས་ཀར་ཉི་མའི་དཀྱིལ་འཁོར་བསམ། །དེ་སྟེང་ཧཱུཾ་ཡིག་ནག་པོ་འབར་བ་བལྟ། །དེ་ནས་ཐམས་ཅད་ཡོངས་གྱུར་རྡོ་རྗེ་སྟེ། །དེ་ཡོངས་གྱུར་ལས་བཅོམ་ལྡན་མ་ཧེའི་ཞལ། །དབྱར་གྱི་ཆར་སྤྲིན་ནག་པོ་ལྟ་བུའི་མདོག །སྐུ་ལས་མེ་འབར་ཁམས་གསུམ་སྐྲག་པར་བྱེད། །ཁྲོས་པས་དུར་ཁྲོད་ཐོད་པའི་དོ་ཤལ་བྱས། །ཞལ་གཅིག་མ་ཧེ་ནག་པོ་རྒོད་པའི་ཞལ། །རྭ་བྲག་གཞོན་ནུའི་ཞལ་གྱིས་


DTG047_Page_0316
[མ་དཔེ་གཟིགས་ན་འདིར་གནོན།]

རྣམ་པར་མཛེས། །ཕྱག་གཡས་རྡོ་རྗེ་གདེངས་སམ་གྲི་གུག་འཛིན། །ཕྱག་གཡོན་ཐོད་པ་ཁྲག་གིས་བཀང་བའོ། །ཞབས་གཉིས་གྱད་ཀྱི་དོར་སྟབས་རོ་ཡི་སྟེང༌། །མ་ཧེ་ནག་པོའི་སྟེང་དུ་རྣམ་པར་བསམ། །མངོན་སུམ་འདྲ་བར་རྣམ་པར་གསལ་བ་དང༌། །སྙིང་གར་ཉི་མ་འབར་ཏེ་ཧཱུཾ་ཡིག་གོ །དེ་ལས་ཡེ་ཤེས་དགུག་གཞུག་དབང་བསྐུར་བྱ། །དེ་ནས་དེ་ཉིད་སྐར་མའི་ཚོགས་འདྲས་བསྐོར། །ཡེངས་པ་མེད་པར་རྟག་ཏུ་བཟླས་པ་བྱ། ཨོཾ་ཧྲཱིཾཿ་ཥྲྀཿ་ཝི་ཀྲྀ་ཀྲ་ཏཱ་ན་ན་ཧཱུཾ་ཕཊ། འདི་ནི་སྔགས་ཀྱི་རྒྱལ་པོ་སྟེ། །མ་བྱུང་འབྱུང་བར་མི་འགྱུར་རོ། །འབུམ་ཕྲག་གསུམ་དུ་བཟླས་པ་བྱ། །དེ་ཡིས་ལས་རྣམས་ཐམས་ཅད་འགྲུབ། །གལ་ཏེ་ལྡང་བར་འདོད་པ་ན། །ཡེ་ཤེས་མ་ཧེའི་ཞལ་ལ་ནི། །མཆོད་ཅིང་བསྟོད་ལ་ལྡང་བར་བྱ། །མ་ཧེའི་སྦྱོར་བས་རྣམ་པར་རྒྱུ། །ཤིན་ཏུ་རྟོགས་དཀའི་རྒྱུད་ལས་ནི། །ལས་རྣམས་ཐམས་ཅད་སྦྱོར་བའི་ལྷ། །ཞལ་གཅིག་ཕྱག་གཉིས་བདག་གིས་བྲིས། །བློ་དམན་རྣམས་ལ་ཕན་ཕྱིར་རོ། །དགེ་བ་ཅུང་ཟད་ཐོབ་པ་དེས། །བདག་དང་འདི་ལ་མོས་པ་རྣམས། །ནད་དང་འཇིགས་སོགས་རབ་བཅོམ་ནས། །མྱུར་དུ་འཇིགས་བྱེད་ཆེན་པོར་ཤོག །སློབ་དཔོན་མཉྫུ་ཤྲཱི་ཛྙཱ་ནས་མཛད་པ། ཞང་འོར་སྟོན་པ་ཤེས་རབ་བསོད་ནམས་ཀྱིས་བསྒྱུར་བ་རྫོགས་སོ།།

དཔལ་རྡོ་རྗེ་འཇིགས་བྱེད་སྒྲུབ་པའི་ཐབས་དང་ལས་བྱ་བའི་ཆོ་ག་སེམས་དཔའ་བསྡུས་པ།
དོན་ཡོད་རྡོ་རྗེ།

སྒྲུབ་པའི་ཐབས་ཀྱི་ཆོ་ག


DTG047_Page_0316
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། ཤྲཱི་བཛྲ་བྷཻ་ར་ཝ་སཱ་དྷ་ན་ཀརྨ་ཨུ་པ་ཙ་ར་སཏྭ་སཾ་གྲ་ཧ། བོད་སྐད་དུ། དཔལ་རྡོ་རྗེ་འཇིགས་བྱེད་སྒྲུབ་པའི་ཐབས་དང་ལས་བྱ་བའི་ཆོ་ག་སེམས་དཔའ་བསྡུས་པ། བཅོམ་ལྡན་འདས་འཇམ་དཔལ་གཤིན་རྗེ་གཤེད་པོ་ལ་ཕྱག་འཚལ་ལོ། །རྒྱལ་བའི་དབང་པོ་འཇམ་པའི་དབྱངས། །མགོན་པོ་དཔལ་ལ་ཕྱག་འཚལ་ལོ། །འཇིག་རྟེན་རྣམས་ལ་ཕན་པའི་ཕྱིར། །དེ་ཡི་སྒྲུབ་ཐབས་བཤད་པར་བྱ། །ངོ་བོ་ཉིད་མེད་སྐུ་མངའ་ཞིང༌། །སྒྱུ་མའི་གཟུགས་ཅན་འབྱུང་གནས་ཆེ། །སངས་རྒྱས་རྣམས་ནི་སྤྲུལ་པ་ཡི། །སྲས་པོ་ཐུ་བོར་རབ་ཏུ་གྲགས། །བཅོམ་ལྡན་མགོན་པོ་དེ་ཉིད་མཁྱེན། །དཔལ་ལྡན་ཁྱབ་བདག་ལས་ཀྱི་བདག །ཡིད་བཞིན་ནོར་བུ་ཆེན་པོ་ལྟར། །ཇི་ལྟར་འདོད་པའི་སྐུར་སྟོན་མཛད། །དང་པོར་རེ་ཞིག་རྣལ་འབྱོར་པས། །རང་ཡིད་དགའ་བའི་


DTG047_Page_0317
[མ་དཔེ་གཟིགས་ན་འདིར་གནོན།]

གནས་བཙལ་ཏེ། །རི་དང་ནགས་ཚལ་ཕུག་རྣམས་དང༌། །ཆུ་འགྲམ་དག་དང་མདོ་རྣམས་དང༌། །རྒྱ་མཚོ་ཆེ་དང་ཉམས་དགའ་དང༌། །ཤིང་གཅིག་དང་ནི་དུར་ཁྲོད་རྣམས། །གནས་ཀྱི་བྱེ་བྲག་བསྟན་མོད་ཀྱི། །ཇི་ལྟར་དགའ་བའི་གནས་རྣམས་སུ། །འདི་དེར་སྦྱོར་བ་བྱས་པ་ཡིས། །འདོད་པ་རྣམས་ཀྱི་འབྲས་བུ་འབྱིན། །དེར་ནི་བདེ་ཞིང་རྒྱ་ཆེ་བའི། །སྟན་ལ་རྣམ་པར་འདུག་ནས་ནི། །སྦྱོར་བ་འདི་ནི་བསམ་པར་བྱ། །སྙིང་གའི་མཁའ་དཀྱིལ་པདྨ་ཡི། །དབུས་སུ་ཉི་མའི་དཀྱིལ་འཁོར་བསམ། །དེ་དབུས་དེ་ཉིད་དམ་པ་ནི། །ཡེ་ཤེས་ལྔ་ཡི་བདག་ཉིད་དགེ །འོད་ཟེར་སྣ་སོགས་འབར་བའི་བདག །ཐམས་ཅད་ཀུན་དུ་སྤྲོ་བར་བྱ། །སེམས་ཙམ་དུ་ནི་གནས་ནས་ནི། །བྱང་ཆུབ་སེམས་ཀྱི་སྡོམ་པ་བཟུང༌། །དེ་ནས་སྔོན་དུ་བརྗོད་པའི་ཡི་གེ་ཧཱུཾ་ལས་འོད་ཟེར་འཕྲོས་པས་ནམ་མཁའི་ཁམས་ཐམས་ཅད་དུ་རྡོ་རྗེ་འཇིགས་བྱེད་ཀྱི་ལྷའི་དཀྱིལ་འཁོར་གྱིས་གང་བར་བསམས་ཏེ། བྱ་སྣ་ཚོགས་ལ་ཞོན་པ། གཞོན་ནུ་སངས་རྒྱས་ཀྱི་རྒྱན་ཐམས་ཅད་ཀྱིས་བརྒྱན་པ། བཅོམ་ལྡན་འདས་དེ་རྣམས་ལ་མཆོད་པའི་ཕྱིར་རང་གི་སྙིང་གར་ཡི་གེ་མུཾ་བསམ་པར་བྱ་སྟེ། དེ་ནས་ལྷ་མོ་དྲུག་ལྟ་བུའི་འོད་ཟེར་འཕྲོས་པས་ཕྱོགས་བཅུའི་དེ་བཞིན་གཤེགས་པ་རྣམས་སྤྱན་དྲངས་ནས། ཛཿ་ཧཱུཾ་བཾ་ཧོཿ་ཞེས་བརྗོད་པས་མཉེས་པ་ལ་ཐུག་པར་བྱ་སྟེ། ཡང་རང་གི་སྙིང་གནས་ལྷ་མོའི་འོད་ཟེར་འཕྲོས་པས་ཕྱག་བྱས་ཏེ། དེ་ནས་མཆོད་པ་དང་སྡིག་པ་བཤགས་པ་དང༌། ཕྱིས་མི་བྱེད་པར་དམ་བཅའ་བ་དང༌། བསོད་ནམས་ཀྱི་ཕྱིར་རྗེས་སུ་ཡི་རང་བ་དང༌། བསོད་ནམས་ཡོངས་སུ་བསྔོ་བ་དང༌། དེ་བཞིན་གཤེགས་པ་རྣམས་ལ་མྱ་ངན་ལས་མི་འདའ་བར་གསོལ་བ་དང༌། ཆོས་ཀྱི་འཁོར་ལོ་བསྐོར་བར་བསྐུལ་བའི་ཡན་ལག་བདུན་དང་ལྡན་པའི་སྨོན་ལམ་བྱའོ། །དེ་ནས། དཀོན་མཆོག་གསུམ་ལ་ཕྱག་འཚལ་ལོ། །ཞེས་པའི་ཚིག་བཅད་བརྗོད་དོ། །དེ་ནས་དེ་བཞིན་གཤེགས་པའི་བཀའ་བཞིན་དུ་ཚངས་པའི་གནས་བཞི་བསྒོམ་པར་བྱ་སྟེ། དང་པོ་བྱམས་པ་བསྒོམ་པར་བྱ། །གཉིས་པ་སྙིང་རྗེ་བསྒོམ་པར་བྱ། །གསུམ་པ་དགའ་བ་བསྒོམ་པ་སྟེ། །ཀུན་གྱི་ཐ་མར་བཏང་སྙོམས་སོ། །སེམས་ཅན་ལ་ཕན་པའི་


DTG047_Page_0318
[མ་དཔེ་གཟིགས་ན་འདིར་གནོན།]

བསམ་པ་ནི་བྱམས་པའོ། །ཕ་རོལ་གྱི་གནོད་པ་སེལ་བ་ནི་སྙིང་རྗེའོ། །ཕ་རོལ་གྱི་དོན་ཐོབ་པ་ལ་དགའ་བ་ནི་དགའ་བའོ། །ཕ་རོལ་གྱི་གནོད་པ་ལ་བཏང་སྙོམས་སུ་བྱེད་པ་ནི་བཏང་སྙོམས་སོ། །དེ་ནས་སྔགས་པས་སྟོང་པ་ཉིད་བསྒོམ་པར་བྱ་སྟེ། ཆོས་ཐམས་ཅད་སྟོང་པ་ཉིད་གཟུང་པ་དང་འཛིན་པ་རྣམ་པར་སྤངས་པ་བདག་ཉིད་ཀྱང་དེ་ལྟ་བུའི་ངོ་བོ་ཉིད་དུ་བསྒོམས་ཏེ། སྔགས་འདི་བརྗོད་པར་བྱའོ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཨོཾ་སྭ་བྷཱ་ཝ་ཤུདྡྷཿ་སརྦ་དྷརྨཱཿ་སྭ་བྷཱ་ཝ་ཤུདྡོ྅ཧཾ། དེ་ནས་ཆོས་ཐམས་ཅད་སྟོང་པ་ཉིད་ནམ་མཁའ་ལྟ་བུ་ལས། །ནམ་མཁའི་དཀྱིལ་དུ་ཡི་གེ་ཡཾ་ལས་རླུང་གི་དཀྱིལ་འཁོར་བསམས་ཏེ། གཞུ་ལྟ་བུ་ཁ་དོག་སྔོན་པོ། རྒྱལ་མཚན་གྱིས་མཚན་པ། དུ་བའི་འོད་ཟེར་གྱིས་རྣམ་པར་འཁྲིགས་པའོ། །དེའི་སྟེང་དུ་ཡི་གེ་རཾ་ལས་མེའི་དཀྱིལ་འཁོར་གྲུ་གསུམ་པ་ཁ་དོག་དམར་པོ་འབར་བའི་ཕྲེང་བས་ཀུན་དུ་འཁྲིགས་པ། རྡོ་རྗེའི་རྒྱན་གྱིས་བརྒྱན་པ། ཉི་མ་ཕྱེད་པའི་འོད་ལྟ་བུའོ། །དེའི་སྟེང་དུ་བཾ་ལས་ཆུའི་དཀྱིལ་འཁོར་ཟླུམ་པོ་ཁབ་ལྟ་བུ་འོད་ཟེར་དཀར་པོས་ཀུན་དུ་འཁྲིགས་པ་བུམ་པའི་རྒྱན་གྱིས་བརྒྱན་པའོ། །དེའི་སྟེང་དུ་ཡི་གེ་ལཾ་ལས་སའི་དཀྱིལ་འཁོར་གྲུ་བཞི་པ། ཁ་དོག་སེར་པོ་རྡོ་རྗེས་མཚན་པ། འོད་ཟེར་སེར་པོ་ཀུན་དུ་འཁྲིགས་པའོ། །དེའི་སྟེང་དུ་ཡི་གེ་སུཾ་ལས་རི་རབ་རིན་པོ་ཆེ་སྣ་བདུན་གྱི་རང་བཞིན་ར་བརྒྱད་ཀྱིས་ཉེ་བར་མཛེས་པ། འོད་ཟེར་སྣ་ཚོགས་ཀུན་དུ་འཁྲིགས་པའོ། །དེའི་སྟེང་དུ་ཡི་གེ་བཾ་ལས་སྣ་ཚོགས་པདྨ། དེའི་སྟེང་དུ་རཾ་ལས་ཉི་མའི་དཀྱིལ་འཁོར། དེའི་སྟེང་དུ་ཡི་གེ་ཧཱུཾ་ཡོངས་སུ་གྱུར་པ་ལས་སྣ་ཚོགས་རྡོ་རྗེ། དེའི་འོད་ཟེར་ལས་རྡོ་རྗེའི་ར་བ་དང༌། རྡོ་རྗེའི་གུར་དང༌། རྡོ་རྗེའི་བླ་རེ་དང༌། མདའི་དྲ་བ་དང༌། ཕྱི་རོལ་མེ་འབར་བས་བསྐོར་བའོ། །ཨོཾ་མེ་དི་ནཱི་བ་དྲི་བྷ་ཝ་བཛྲ་བནྡྷ་ཧཱུཾ། ཨོཾ་བཛྲ་པྲཱ་ཀཱ་ར་ཧཱུཾ་བཾ་ཧཱུཾ། ཨོཾ་བཛྲ་པཉྫ་ར་ཧཱུཾ་ཡཾ་ཧཱུཾ་ཨོཾ་བཛྲ་བི་ཏཱ་ན་ཧཱུཾ་ཁཾ་ཧཱུཾ། ཨོཾ་བཛྲ་ས་ར་ཛཱ་ལ་ཏྲཾ་སཾ་ཏྲཾ། ཨོཾ་བཛྲ་ཛྭ་ལ་ཨ་ན་ལཱརྐ་ཧཱུཾ་ཧཱུཾ་ཧཱུཾ། དེ་ནས་དཔལ་གཤིན་རྗེ་གཤེད་ཀྱི་བཀའི་འཁོར་ལོ་རྩིབས་བརྒྱད་པ་འོད་འབར་བ། དེའི་སྟེང་དུ་ཐམས་ཅད་དུ་པདྨ། དེའི་སྟེང་དུ་ཉི་མ། དེའི་སྟེང་དུ་འཇིག་རྟེན་སྐྱོང་བའི་རོ། དབུས་ཀྱི་པདྨའི་དཀྱིལ་འཁོར་གྱི་སྟེང་དུ་ཨཱ་ལི་ཀཱ་ལི། ཨཱ་ལི་ཀཱ་ལི་ལས་ཟླ་བ་དང་ཉི་མ།


DTG047_Page_0319
[མ་དཔེ་གཟིགས་ན་འདིར་གནོན།]

དེའི་དབུས་སུ་ཡི་གེ་བཾ་དང་ཧཱུཾ་ལས་རྡོ་རྗེ་ཐོ་བ་བྲི། དེའི་ཆང་ཟུངས་ལ་བཾ་དང་ཧཱུཾ་གིས་མཚན་པ། དེ་རྣམས་གཅིག་ཏུ་གྱུར་པ་ལས་གཤིན་རྗེ་གཤེད་པོའི་སྐུ་ཡོངས་སུ་རྫོགས་པ་སྟེ། ཁ་དོག་ནག་པོ་ཆེར་ཁྲོས་པ། །འཇིགས་པ་དག་ཀྱང་འཇིགས་པར་བྱེད་པ། །རྡོ་རྗེ་རོ་ལངས་མ་ལ་འཁྱུད་པ། ཞལ་དྲུག་པ། ཕྱག་དྲུག་པ། ཞབས་གཉིས་པ། བཅོམ་ལྡན་འདས་ཇི་ལྟ་བ་དེ་བཞིན་དུ་བཅོམ་ལྡན་འདས་མའོ། ཕྱག་གཡས་ཀྱི་དང་པོ་ན་རྡོ་རྗེ་ཐོ་བ། གཉིས་པ་ན་འཁོར་ལོ། གསུམ་པ་ན་བེ་ཅོན་དཀར་པོ། ཕྱག་གཡོན་གྱི་དང་པོ་ན་པདྨ། གཉིས་པ་ན་རིན་པོ་ཆེ། གསུམ་པ་ན་རལ་གྲི། ཞལ་དང་པོ་མཐིང་ག །གཡས་དམར་པོ། གཡོན་དཀར་པོ། །གཡས་གཉིས་པ་ལྗང་གུ། གཡོན་གཉིས་པ་སེར་པོ། སྟེང་གི་ཞལ་གནམ་ཞལ་གདངས་པའོ། །མ་ཧེ་ལ་བཅིབས་པ། ཞབས་གཡོན་བརྐྱང་བའི་སྟབས་ཀྱིས་རྭ་ཕྲག་བརྫིས་པ། མ་ཧེའི་རྐང་པས་བདུད་བཞིའི་རོ་བརྫིས་པའོ། །དེ་ནས་ཡབ་ཡུམ་སྦྱོར་བ་ལས་ཕྱོགས་སྐྱོང་བའི་གཤིན་རྗེ་བརྒྱད་ཕོ་ཉའི་གཟུགས་འཛིན་པ། ཤར་ཕྱོགས་སུ་ཡ་བ་ཏི། ལྷོ་ཕྱོགས་སུ་གཤིན་རྗེ་ཆོས་ཀྱི་རྒྱལ་པོ། ནུབ་ཕྱོགས་སུ་ཏེལ་པ། བྱང་ཕྱོགས་སུ་གླང་མགོ་ཅན། དབང་ལྡན་གྱི་མཚམས་སུ་རལ་པ་ཚར་དགུ་།རླུང་གི་ཕྱོགས་སུ་སྨྲིག་པ། བདེན་བྲལ་གྱི་ཕྱོགས་སུ་ཕྱ་སངས། མེའི་ཕྱོགས་སུ་མིག་དམར། གཤིན་རྗེ་ཆེན་པོ་བརྒྱད་པོ་འདི་རྣམས་ལས་ཇི་ལྟ་བ་ཁ་དོག་དང༌། དབྱིབས་དེ་ལྟར་བསྒོམ། དེ་ནས་བདག་གི་བ་སྦུའི་བུ་ག་ནས་འོད་ཟེར་སྟོད་ཁྲོ་བོ་སྨད་ཕུར་པའི་རྩེ་མོ་འདྲ་བའི་གཟུགས་ཕྱོགས་བཅུར་འཕྲོས་ཏེ། དེ་བཞིན་གཤེགས་པ་རྣམས་སྤྱན་དྲངས་ནས་སྤྱི་བོར་བཞུགས། དེ་བཞིན་དུ་སྤྲོ་བསྡུ་བྱེད་ཅིང་གསང་སྔགས་བཟླས་བརྗོད་བྱའོ། །ཨོཾ་ཧྰྲིཿ་ཥྚྰྲྀཿ་ཝི་ཀྲྀ་ཏཱ་ན་ན་ཧཱུཾ་ཧཱུཾ་སརྦ་ཤ་ཏྰྲུ་ནཱ་ཤ་ཡ་སྟཾ་བྷ་ཡ་ཕཊ་ཕཊ་སྭཱ་ཧཱ། སྙིང་པོའི་གསང་སྔགས་སོ། །ཨོཾ་ཧྰྲི་ཀའ་ལ་རཱུ་པ་ཧཱུཾ་ཁཾ། ཉེ་བའི་སྙིང་པོའི་སྔགས་སོ། །ཨོཾ་ཧྰྲི་ཀྲུཾ་བྲུཾ་ཏྲུཾ་ཛུཾ་ཧཱུཾ་གཾ། སྙིང་པོ་དམ་པའོ། །ཨོཾ་ཧྰྲིཿ་ཧ་པོ་མ་ཧཱ་ཀྲོ་དྷ་ཨཱ་གྩྪ་ཨ་སྨ་ཏ་པཱུ་ཛ་པྲ་ཏི་གྲྀཧྞ་པྲ་སཱ་དྷ་མེ་ཧྰྲི་མན་ཀུ་རུ་སྰྭ་ཧཱ། སྤྱན་དྲང་བའོ། །ཨོཾ་ཧྰྲིཿ་ཥྚྰྲྀཿ་ཨཿ་ཨརྒྷའིའོ། །ཨོཾ་ཧཱུཾ་ཧཱུཾ་ཕཊ་ཕཊ། བསང་


DTG047_Page_0320
[མ་དཔེ་གཟིགས་ན་འདིར་གནོན།]

གཏོར་གྱིའོ། །ཨོཾ་ཝི་ཀྲྀ་ཏཱ་ན་ན་ཏྭ་ད་མ་ཀ་ཀཿ་གཿ་གཿ་དྲིའིའོ། །ཨོཾ་ཀུ་མཱ་ར་རཱུ་པི་ཎི་ཛཿ་ཛཿ་ཧཱུཾ་ཧ། མེ་ཏོག་གིའོ། །ཨོཾ་ཧྰྲིཿ་ཧ་ཧ་ཧེ་ཕཊ་ཕཊ། བདུག་པའིའོ། །ཨོཾ་ཀཱ་ལ་རཱུ་པ་སརྦ་ས་ཏྭ་ད་མ་ཀ་མ་བྷཱུ་ཏ་པ་ཏི། ཨིཾ་དཾ་བ་ལིཾ་གྲྀཧྞ་གྲྀཧྞ་པ་ཡ་སྭཱ་ཧཱ། གཏོར་མའི་སྔགས་སོ། །ཨོཾ་དཱིདྷ་ལོ་ཙ་ན་ཝི་ཀྲྀ་ཏཱ་ན་ན། མ་ཧཱ་ཨཊྚཱ་ཊྚཱ་ཧ་ས་ན་དི་ནི་དཱི་པཏཱ་ཡ་སྭཱ་ཧཱ། མར་མེའི་སྔགས་སོ། །ཨོཾ་ཛ་ཡ་ཛ་ཡ། བི་ཤྭ་རཱུ་པ་དྷ་རི། གྩྪ་གྩྪ་སྭ་བྷཱ་ཝ་ནཾ་ཀྲྀ་ཏ་ཏེ། ཏ་ཐཱ་ག་ཏཱ་ནཱཾ། སརྦ་བྷཱུ་ཏ་སྭ་པི་སརྫ་ཡ་མ་མ་ཀཱ་ཪྻཾ་ཀུ་རུ་སྭཱ་ཧཱ། སླར་གཤེགས་སུ་གསོལ་བའི་སྔགས་སོ། །གཤིན་རྗེ་ནག་པོ་བཀའི་འཁོར་ལོ་མཆོད་པའི་ཆོ་གའོ།། །།དེ་ནས་དཀྱིལ་འཁོར་བསྒོམ་པར་བྱ་སྟེ། སྔོན་གྱི་བཀའི་འཁོར་ལོའི་བདག་པོ་དེ་ཡོངས་སུ་གྱུར་པ་ལས་གཞལ་ཡས་ཁང་དུ་གྱུར་ཏེ། གྲུ་བཞི་པ་ལ་སྒོ་བཞི་པ། །ཏྭཱ་ར་ཎ་བཞིས་བརྒྱན་པ། མདོར་ན་བྱང་ཆུབ་ཀྱི་ཕྱོགས་སུམ་ཅུ་རྩ་བདུན་གྱི་བདག་ཉིད་སྒོ་རྣམས་དང་གྲྭ་རྣམས་སུ་རྡོ་རྗེ་རིན་པོ་ཆེས་རྣམ་པར་བརྒྱན་པ། དྲ་བ་དང་དྲ་བ་ཕྱེད་པ། ཟླ་བ་ཕྱེད་པས་བརྒྱན་པ། དེའི་དབུས་སུ་པདྨ་དང་ཉི་མ་དང་ཟླ་བའི་དཀྱིལ་འཁོར། གྲྭ་རྣམས་དང་སྒོ་རྣམས་སུ་ཡང་པདྨ་དང་ཉི་མ་དང་ཟླ་བའི་དཀྱིལ་འཁོར་རོ། །དབུས་སུ་པདྨའི་གདན་སྟེངས་སུ་ཨཱ་ལི་ཀཱ་ལི་ལས་ཡོངས་སུ་གྱུར་པའི་ཟླ་བ་དང་ཉི་མའི་སྟེང་དུ་ཧཱུཾ་ལས་བྱུང་བའི་རྡོ་རྗེ། དེ་རྣམས་ཡོངས་སུ་གྱུར་པ་ལས། རྡོ་རྗེ་འཇིགས་བྱེད་ཆེན་པོ་ཁ་དོག་ནག་པོ། དྲག་པོ་ཆེན་པོ། འཇིགས་པ་དག་ཀྱང་འཇིགས་པར་བྱེད་པ། རྐང་པའི་སྟབས་ཀྱིས་ས་གཞི་གནོན་པར་བྱེད་པ། ལྷ་དང་ལྷ་མིན་རྣམས་ལ་སྡིགས་མཛུབ་མཛད་པ། ཞལ་དགུ་པ། ཞབས་བཅུ་དྲུག་པ། ཕྱག་སུམ་ཅུ་སོ་བཞི་པ། མ་ཧེའི་མགོ་ཅན། བསྐལ་པའི་མེ་འབར་བ་ལྟ་བུའི་མཆེ་བ་རྣམ་པར་གཙིགས་པ། ལྕེ་འཇིབ་པར་མཛད་པ། ཆེར་འཁྲུག་པ། ལྷ་དང་ལྷ་མ་ཡིན་རྣམས་གསོལ་བར་མཛད་པ། དབུ་སྐྲ་ཁམ་བ་གྱེན་དུ་བརྫེས་པ། དྲག་པོ་ཆེན་པོ། གཡོན་བརྐྱང་པའི་སྟབས་སུ་གནས་པ། མཚན་མ་འགྲེང་བ་གསུས་ཁྱིམ་ཆེ་བ། ཞལ་དང་པོ་མ་ཧེའི་ཞལ་འཇིགས་པ། ལྕེ་འཇིབ་པའོ། །རྭ་གཡས་པ་ལ་གནས་པའི་ཞལ་དང་པོ་མཐིང་ག །གཉིས་པ་དམར་པོ། གསུམ་པ་སེར་པོ་ཅུང་ཟད་ཁྲོས་


DTG047_Page_0321
[མ་དཔེ་གཟིགས་ན་འདིར་གནོན།]

པའོ། །རྭ་གཡོན་པ་ལ་གནས་པའི་ཞལ་དང་པོ་དཀར་པོ། གཉིས་པ་དུད་ཀ །གསུམ་པ་ནག་པོ་ཁྲོས་པའོ། །རྭ་བྲག་ལ་གནས་པའི་ཞལ་དམར་པོ་འཇིགས་པར་བྱེད་པ། ཁྲག་འཛག་པ། གཉིས་པའི་ཞལ་སེར་པོ། གཞོན་ནུའི་རྒྱན་གྱིས་བརྒྱན་པ། ཟུར་ཕུད་ལྔ་པ་རལ་པའི་ཐོར་ཚུགས་ཅན། ཕྱག་དང་པོ་གཉིས་ཀྱིས་གླང་པོ་ཆེའི་པགས་པ་བརྐྱངས་ཏེ་འཛིན་པ། ཕྱག་གཞན་གཡས་ཀྱི་དང་པོ་ན་གྲི་གུག །གཉིས་པ་ནི་བྷིནྡི་པཱ་ལ། གསུམ་པ་ན་གཏུན་ཤིང༌། བཞི་པ་ན་ཆུ་གྲི། ལྔ་པ་ན་ཀ་ན་ཡ། དྲུག་པ་ན་དགྲ་སྟ། བདུན་པ་ན་མདུང༌། བརྒྱད་པ་ན་མངའ། དགུ་པ་ན་ལྕགས་ཀྱུ། བཅུ་པ་ན་བེ་ཅོན། བཅུ་གཅིག་པ་ན་ཁ་ཊྭཱཾ་ག །བཅུ་གཉིས་པ་ན་འཁོར་ལོ། །བཅུ་གསུམ་པ་ན་རྡོ་རྗེ། བཅུ་བཞི་པ་ན་རྡོ་རྗེའི་ཐོ་བ། བཅོ་ལྔ་པ་ན་རལ་གྲི། བཅུ་དྲུག་པ་ན་རྡེ་ཆུང་ངོ༌། །གཡོན་དང་པོ་ན་ཐོད་པ། གཉིས་པ་ན་ཚངས་པའི་མགོ་བོ། །གསུམ་པ་ན་ཕུང༌། བཞི་པ་ན་མིའི་རྐང་པ། ལྔ་པ་ན་ཞགས་པ། དྲུག་པ་ན་གཞུ། བདུན་པ་ན་མིའི་རྒྱུ་མ། བརྒྱད་པ་ན་དྲིལ་བུ། དགུ་པ་ན་མིའི་ལག་པ། བཅུ་པ་ན་དུར་ཁྲོད་ཀྱི་རས། བཅུ་གཅིག་པ་ན་སུ་ལ་བི་ན། བཅུ་གཉིས་པ་ན་མེ་འབར་བ། བཅུ་གསུམ་པ་ན་ཐོད་ཚལ། བཅུ་བཞི་པ་ན་སྡིགས་མཛུབ། བཅོ་ལྔ་པ་ན་བ་དན། བཅུ་དྲུག་པ་ན་རླུང་གི་རས་སོ། །ཞབས་གཡས་ཀྱི་དང་པོས་མི་མནན་པའོ། །གཉིས་པས་མ་ཧེ་མནན་པའོ། །གསུམ་པས་གླང་ངོ༌། །བཞི་པས་བོང་བུའོ། །ལྔ་པས་རྔ་མོའོ། །དྲུག་པས་ཁྱིའོ། །བདུན་པས་ལུག་གོ །བརྒྱད་པས་ཕག་གོ །གཡོན་གྱི་དང་པོས་བྱ་རྒོད་བརྫིས་པའོ། །གཉིས་པས་འུག་པ། གསུམ་པས་བྱ་རོག །བཞི་པས་སེང་གེ། ལྔ་པས་ཁྲ། དྲུག་པས་ནམ་མཁའ་ལྡིང༌། བདུན་པས་ནེ་ཙོ། །བརྒྱད་པས་ཁྲུང་ཁྲུང་ངོ༌། །མགོ་བོ་བརྒྱ་ལྔ་བཅུའི་ཕྲེང་བས་བརྒྱན་པ། ཕྱག་རྒྱ་ལྔ་ཡིས་རྣམ་པར་མཛེས་པ། ཐོད་པའི་ཕྲེང་བ་ཅན་ནོ། །གྲྭ་རྣམས་དང་སྒོ་རྣམས་སུ་བགེགས་བརྒྱད་ཞབས་ཀྱིས་མནན་པའི་ལྷ་མོ་བརྒྱད་དེ། བྱ་རྒོད་དང༌། འུག་པ་དང༌། ཁྲ་དང༌། བྱ་རོག་དང༌། སྐྱར་མོ་དང༌། མཐིང་རིལ་དང༌། ཀ་ཀ་དང༌། རྨ་བྱ་དང་འདི་རྣམས་རིམ་པ་བཞིན་བརྫིས་པའི་ལྷ་མོ་གཤིན་རྗེའི་ཕོ་ཉ་མོ་དང་གཤིན་


DTG047_Page_0322
[མ་དཔེ་གཟིགས་ན་འདིར་གནོན།]

རྗེའི་མཆེ་བ་མོ་དང༌། བེ་ཅོན་ནག་མོ་དང༌། དུས་མཚན་དང༌། རྡོ་རྗེའི་ལྕགས་ཀྱུ་མ་དང༌། གཤིན་རྗེ་ཞགས་པ་མོ་དང༌། གཤིན་རྗེ་ལུ་གུ་རྒྱུད་དང༌། གཤིན་རྗེ་འབེབས་མ་རྣམས་ཏེ། འདི་རྣམས་ཀུན་ཀྱང་ཞལ་གཅིག་ཕྱག་གཉིས་པ་སྐྲ་ལྷུག་པར་འདུག་པ། གཅེར་བུ་ལྕེ་འཇིབ་མ། མཆེ་བ་གཙིགས་པ། གདུག་པ་ཐམས་ཅད་འགུགས་པ། ལས་ཐམས་ཅད་ཚུལ་བཞིན་དུ་མཛད་པ། ཁ་དོག་ནག་པོ། ཕྱག་ན་ཐོད་པ་དང་གྲི་བསྣམས་པ་ཤ་སྟག་གོ །ལྷ་མོ་འདི་རྣམས་ཀྱང་གནས་སོ་སོའི་གདན་སྟེངས་ན། བཅོམ་ལྡན་འདས་ཇི་ལྟ་བ་བཞིན་རང་གི་ས་བོན་ལས་སྐད་ཅིག་མའི་ཏིང་ངེ་འཛིན་གྱིས་བསྐྱེད་པར་བྱའོ། །བཅོམ་ལྡན་འདས་ཀྱི་མདུན་དུ་དམ་རྫས་སྣ་ཚོགས་པས་ཡོངས་སུ་གང་བའི་ཐོད་པ་བསམ་མོ། །དཀྱིལ་འཁོར་གྱི་ཕྱི་རོལ་དུ་བཀའི་འཁོར་ལོར་སྔོན་དུ་བརྗོད་པའི་ཕྱོགས་སྐྱོང་བའི་གཤིན་རྗེ་ཆེན་པོ་བརྒྱད་ཕོ་ཉའི་གཟུགས་འཛིན་པར་བསྒོམ་མོ། །དེའི་ཕྱི་རོལ་དུ་དུར་ཁྲོད་ཆེན་པོ་བརྒྱད་ལ། བྱ་སྣ་ཚོགས་ཀྱིས་བརྒྱན་པ། ལྷ་དང༌། ཀླུ་དང༌། གནོད་སྦྱིན་དང༌། དྲི་ཟ་དང༌། ལྷ་མ་ཡིན་དང༌། ནམ་མཁའ་ལྡིང་དང༌། མི་འམ་ཅི་དང༌། ལྟོ་འཕྱེ་ཆེན་པོ་ལ་སོགས་པ་རྣམས་དང༌། གཞན་ཡང་མཁའ་འགྲོ་མ་དང༌། མ་མོ་དང༌། འབྱུང་པོའི་ཚོགས་རྣམས་ཧ་ཧ་ཞེས་དྲག་ཏུ་དགོད་ཅིང་རྣམ་པར་གཙེ་བ། འདི་ལྟ་བུར་རྣལ་འབྱོར་པ་བདག་ཉིད་ཀྱིས་རྡོ་རྗེ་འཇིགས་བྱེད་ཀྱི་སྐུར་བསྒོམ་པར་བྱའོ། །རྩེ་གཅིག་པའི་སེམས་དང་དད་པས་རྣལ་འབྱོར་ལ་མཉམ་པར་བཞག་ན་དངོས་གྲུབ་ཆེན་པོ་བརྒྱད་དུ་ཡང་འགྱུར་ན། དངོས་གྲུབ་ཕྲ་མོ་ལྟ་ཅི་སྨོས། དེ་ནས་བདག་གི་སྙིང་གའི་པདྨའི་སྟེང་དུ། ཉི་མའི་དཀྱིལ་འཁོར་ལས་ཡི་གེ་ཧཱུཾ་ཡོངས་སུ་གྱུར་པའི་རྡོ་རྗེ་དེའི་བུམ་པ་ལ་ཉི་མའི་དཀྱིལ་འཁོར་ལ་ཧཱུཾ་གིས་མཚན་པའོ། །ཧཱུཾ་དེ་ལས་ཡེ་ཤེས་ལྔའི་འོད་ཟེར་ཕྱོགས་བཅུར་འཕྲོས་པས། ཕྱོགས་བཅུའི་དེ་བཞིན་གཤེགས་པ་རྣམས་སྤྱན་དྲངས་ཏེ། སྔོན་དུ་བརྗོད་པའི་གསང་སྔགས་བརྗོད་དོ། །སྤྱན་དྲངས་པའི་དེ་བཞིན་གཤེགས་པ་དེ་རྣམས་ལ་ཡོན་ཆབ་དང་བསང་གཏོར་ལ་སོགས་པའི་གསང་སྔགས་ཀྱིས་སྔོན་བཞིན་དུ་ཡོན་ཆབ་ཕུལ་ནས་མཉེས་པར་བྱས་ཏེ། དབང་བསྐུར་བའི་དོན་དུ་དེ་བཞིན་གཤེགས་


DTG047_Page_0323
[མ་དཔེ་གཟིགས་ན་འདིར་གནོན།]

པ་དེ་རྣམས་ཀྱིས་ཡི་གེ་བཅུ་ལས་ཡོངས་སུ་གྱུར་པའི་བུམ་པ་དེ་ཁོ་ན་བཅུའི་ངོ་བོས་དབང་བསྐུར་བར་བྱའོ། །དེ་ལ་གསོལ་བ་གདབ་པ་ནི། དེ་བཞིན་གཤེགས་པ་རྣམས་ཀྱིས་བདག་ལ་དབང་བསྐུར་དུ་གསོལ། དེ་ལ་དེ་བཞིན་གཤེགས་པ་རྣམས་ཀྱིས་འདི་སྐད་དུ། སངས་རྒྱས་རྣམས་ནི་ཐམས་ཅད་ཀྱིས། །སྐྱེ་བས་ཐོབ་པའི་དབང་བསྐུར་བ། །ཇི་ལྟར་ཇི་བཞིན་བདག་གིས་ནི། །དག་པ་ལྷ་ཡི་ཆུས་དབང་བསྐུར། །ཞེས་གསུངས་ཏེ། དབང་བསྐུར་བས་དེ་མ་ཐག་ཏུ་མི་བསྐྱོད་པས་དབུ་བརྒྱན་པར་བསམ་མོ། །ལྷ་མོ་བརྒྱད་ལ་འཇམ་པའི་དབྱངས་ཀྱིས་དབུ་བརྒྱན་པའོ། །ཕྱོགས་སྐྱོང་བའི་གཤིན་རྗེ་བརྒྱད་ལ་དཔལ་གཤིན་རྗེ་གཤེད་ཀྱིས་དབུ་བརྒྱན་པའོ། །འདི་ལྟར་རྡོ་རྗེ་འཇིགས་བྱེད་ལ་སོགས་པ་རྣམས་མིག་ལ་སོགས་པ་སྐྱེ་མཆེད་བྱིན་གྱིས་བརླབ་པ་སྐུ་གསུང་ཐུགས་ཀྱི་ལྷ་དང་ཡེ་ཤེས་སེམས་དཔས་མཚོན་པའོ། །དེ་ལྟར་བསྒོམ་པ་དང་མཆོད་པ་དང༌། དབང་བསྐུར་བ་རྫོགས་ནས་བསྙེན་པའི་བཟླས་བརྗོད་བྱ་སྟེ། དེ་ལ་འདི་ནི་རྩ་བའི་སྙིང་པོ་སྟེ། ཨོཾ་ཡ་མ་རཱ་ཛ་ས་དོ་མེ་ཡ། ཡ་མེ་དོ་རུ་ཎ་ཡོ་ད་ཡ། ཡ་ད་ཡོ་ནི་ར་ཡ་ཀྵེ་ཡ། ཡ་ཀྵེ་ཡཙྪ་ནི་རཱ་མ་ཡ། ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཡི་གེ་སུམ་ཅུ་རྩ་གཉིས་པ་འདི་ནི་འབུམ་ཕྲག་གཅིག་སྔོན་དུ་བསྙེན་པ་བྱས་ཏེ། ཕྱིས་ལས་ལ་སྦྱར་བར་བྱའོ། །སྙིང་པོའི་གསང་སྔགས་ནི། ཨོཾ་ཧྰྲིཿ་ཥྚྰྲྀཿ་ཝི་ཀྲྀ་ཏཱ་ན་ན་ཧཱུཾ་ཕཊ། ཡི་གེ་བཅུ་པ་འདི་ནི་འབུམ་ཕྲག་གསུམ་སྔོན་དུ་བསྙེན་པ་བྱས་ན་ལས་ཐམས་ཅད་བྱེད་དོ། །ཨོཾ་ཡ་མཱནྟ་ཀ་ཧཱུཾ་ཕཊ། ཡི་གེ་བདུན་པ་འདི་ནི་ཡི་གེ་རེ་རེ་ལ་འབུམ་ཕྲག་རེ་རེ་བཟླས་ན་ལས་ཐམས་ཅད་བྱེད་དོ། །ཨོཾ་ཧྲཱིཿ་ཥྚྰྲྀཿ་ཝི་ཀྲྀ་ཏཱ་ན་ན་ཧཱུཾ་སརྦ་ཤ་ཏྰྲུཾ་ནཱ་ཤཡ་སྟཾ་བྷ་ཡ་ཕཊ་ཕཊ་སྭཱ་ཧཱ། སྙིང་པོའི་སྔགས་འདི་འབུམ་ཕྲག་བཅུ་བཟླས་ན་ལས་ཐམས་ཅད་བྱེད་དོ། །ཨོཾ་ཧྰྲིཿ་ཀཱ་ལ་རཱུ་པ་ཧཱུཾ་ཁཾ། ཉེ་བའི་སྙིང་པོ་འདིའི་ཡི་གེ་རེ་རེ་ལ་འབུམ་ཕྲག་རེ་རེ་བཟླས་ན་ལས་ཐམས་ཅད་བྱེད་དོ། །ཨོཾ་ཧྰྲིཿ་ཀྲུཾ་བྲུཾ་ཏྲུཾ་ཛུཾ་ཧཱུཾ་གཾ། སྙིང་པོ་དམ་པ་འདི་ནི་ཡི་གེ་རེ་རེ་ལ་འབུམ་ཕྲག་རེ་རེ་བཟླས་ན་ལས་ཐམས་ཅད་བྱེད་དོ། །ཨོཾ་མཉྫུ་གྷོ་ཥ་ཧྰྲིཿ་ཛཿ་འབུམ་ཕྲག་གཅིག་བཟླས་ན་ལས་ཐམས་ཅད་བྱེད་དོ། །ཨོཾ་ཨ་ཀྲོ་དྷེ་ཀ་ཡ་མཱནྟ་ཀ་ཧ་ན་མ་ཐ་བྷཉྫ་ཧཱུཾ་ཕཊ། ཡི་གེ་བཅུ་བདུན་པའི་སྙིང་པོའོ། །


DTG047_Page_0324
[མ་དཔེ་གཟིགས་ན་འདིར་གནོན།]

བསྙེན་པའི་དུས་སུ་དུས་གསུམ་དུ་གཏོར་མ་དབུལ་བའི་སྔགས་ནི། ཨོཾ་ཀཱ་ལ་རཱུ་པ་སརྦ་སཏྭ་ད་མ་ཀ་མ་ཧཱ་བྷུ་ཏ་པ་ཏི་ཨི་དི་བ་ལིཾ་གྲྀཧྞ་གྲྀཧྞ་པ་ཡ་སྭཱ་ཧཱ། གཞན་ཡང་ཅི་འབྱོར་བའི་མཆོད་པས་མཆོད་པར་བྱའོ། །

ལས་བྱ་བའི་ཆོ་ག


DTG047_Page_0324
[མ་དཔེ་གཟིགས་ན་འདིར་གནོན།]

དེ་ནས་མཚན་མ་ཐོབ་པ་དང༌། ཇི་ལྟར་འདོད་པའི་ལས་ལ་སྦྱར་བར་བྱ་སྟེ། དབང་དང་དགུག་པ་དང༌། བསྐྲད་པ་དང༌། གསད་པ་དང༌། དབྱེ་བ་དང༌། མནན་པ་དང༌། རལ་གྲི་དང༌། མིག་རྣོན་དང༌། རིལ་བུ་དང༌། ཁུ་བ་ར་ས་ཡ་ན་དང༌། ནོར་དང༌། འབྱོར་པ་དང༌། འབྱུང་པོ་དང༌། ཡི་དགས་དང༌། རོ་ལངས་དང༌། གནོད་སྦྱིན་དང༌། སྲིན་པོ་དང༌། ཤ་ཟ་དང༌། གནོད་སྦྱིན་མོ་དང༌། ཀླུ་ལ་སོགས་པ་ཆོ་ག་བཞིན་སྔགས་པས་བསྒྲུབ་པར་བྱའོ། །དེ་ལ་ལས་ཀྱི་དུས་སུ་གཏོར་མ་དང་སྦྱིན་སྲེག་བྱའོ། །ཉི་མ་དང་པོ་ལ་རྡོ་རྗེ་འཇིགས་བྱེད་འཁོར་དང་བཅས་པའི་གཏོར་མ་དབུལ་བར་བྱའོ། །ཉི་མ་གཉིས་པ་ལ་གཤིན་རྗེ་གཤེད་བཀའི་འཁོར་ལོའི་གཏོར་མ་དབུལ་བར་བྱའོ། །ཉི་མ་གསུམ་པ་ལ་གཤིན་རྗེ་ཆོས་ཀྱི་རྒྱལ་པོ་ལ་སོགས་པ་ཕོ་ཉའི་ཚོགས་ཀྱི་གཏོར་མ་དབུལ་བར་བྱའོ། །དེ་ནས་ཉི་མ་བཞི་པ་ལ་དུར་ཁྲོད་ཀྱི་རས་བཙལ་ཏེ། དེ་ཡང་དཔའ་བོ་གཡུལ་དུ་མཚོན་གྱིས་བསད་པའི་རས་ཀྱང་རུང་སྟེ། དེ་ལ་མིའི་ཁྲག་གིས་བྱུགས་ཏེ། དེ་ནས་གྲོ་ལ་སོགས་པའི་ཕྱེས་ལེགས་པར་བྱུགས། དེ་ནས་རོའི་སྐུད་པས་འཁོར་ལོའི་ཐིག་གདབ་སྟེ། ཐིག་བཞི་བཏབ་པས་རེའུ་མིག་དགུ་པའི་ཐིག་སྐོར་གསུམ་གྱིས་བསྐོར་བ། དབུས་སུ་རེའུ་མིག་དགུ་པ། གཉིས་པ་རེའུ་མིག་བཅུ་གཉིས་པ། གསུམ་པ་རེའུ་མིག་བཅུ་དྲུག་པའོ། །དེ་ལ་སྣག་ཚའི་རྒྱུ་ནི་བ་ཏོ་ལིའི་འབྲས་བུ་དང༌། ནིམ་པའི་འབྲས་བུ་དང༌། དུག་གི་ལོ་མ་དང༌། རོ་བསྲེགས་པའི་སོལ་བ་རྣམས་བསྲེས་ཏེ། འཁོར་ལོ་བྲི་བར་བྱའོ། །དེ་རྣམས་མ་རྙེད་ན་བསམ་པར་བྱའོ། །དེ་ལ་བྲི་བའི་ཕྱག་རྒྱ་ནི། ལག་པ་གཉིས་ཐལ་མོ་སྦྱར་ཏེ། །གུང་མོ་གཉིས་རྩི་སྤྲད་དེ། སྲིན་ལག་གཉིས་ཚིགས་བཅག །མཐེའུ་ཆུང་དེ་བཞིན་དུ་སྦྱར་ཏེ། མཛུབ་མོ་གཉིས་བཀུག །མཐེ་བོ་གཉིས་མཉམ་པར་སྦྱར་བ་ནི་དམ་ཚིག་གི་ཕྱག་རྒྱ་སྟེ་དེས་བྲི་བར་བྱའོ། །དེའི་དམ་ཚིག་གི་སྙིང་པོའོ། །ཨོཾ་ཧྰྲིཿ་ཥྚྰྲྀཿ་ཝི་ཀྲྀ་ཏཱ་ན་ན་མ་མ་ཤ་ཏྰྲུཾ་མཱ་ར་ཡ་ནཱ་ཤ་ཡ་སྟཾ་བྷ་ཡ་བནྡྷ་ཡ་ཧཱུཾ་ཧཱུཾ་ཕཊ་ཕཊ།


DTG047_Page_0325
[མ་དཔེ་གཟིགས་ན་འདིར་གནོན།]

གཤིན་རྗེ་གཤེད་པོའི་དམ་ཚིག་གི་ཕྱག་རྒྱ་དང་སྔགས་དེ་བཟླས་ཤིང་བྲི་བར་བྱའོ། །དེ་བྲི་བའི་སྨྱུ་གུའི་རྒྱུ་ནི་བྱ་རོག་དང༌། འུག་པའི་སྒྲོ་རྩས་བྲི། གོང་མའི་རྫས་མ་རྙེད་ན་མི་ཁྲག་དང༌། ར་དང༌། ཁྱིའི་ཁྲག་གསུམ་གྱིས་བྲི་བར་བྱའོ། །ཡ་དང་ཡའི་བར་དུ་མིང་དང་རུས་བྲི་བར་བྱའོ། །ཕྱི་རོལ་དུ་སྒྲའི་ཡི་གེ་བཅུ་དྲུག་བྲི་བར་བྱའོ། །རིམ་པ་གཉིས་པ་ལ་ཧཱུཾ་དང་ཕཊ་ཀྱིས་མིང་རུས་སྤེལ་ཏེ་བྲི་བར་བྱའོ། །ཡ་དང་ཡའི་བར་དུ་བྲི་བ་དབུས་ཀྱི་ལྟེ་བ་ལའོ། །གདུག་པའི་ཡི་གེ་ཐམས་ཅད་ཀྱང་བྲི་བར་བྱའོ། །ཇི་ལྟར་གོང་མའི་གནས་དེར་ཧཱུཾ་དང་ཕཊ་བྲི་བར་བྱའོ། །འཁོར་ལོ་དེ་ཉིད་དུ་ཆུད་པའི་གཤིན་རྗེ་གཤེད་པོ་ཡང་བྲི་བར་བྱའོ། །གཞན་ཡང་འཁོར་ལོ་གཉིས་བ་སྐོར་ཕྱོགས་མ་ཡིན་པར་བྱ་སྟེ། དེ་གཉིས་ཁ་སྦྱར་ཏེ། ཁམ་ཕོར་ཁ་སྦྱར་དུ་བཅུག་ལ་སྐུད་པ་ནག་པོས་དཀྲི་བར་བྱའོ། །དེ་ནས་བྱིན་གྱིས་བརླབ་པར་བྱ་སྟེ། མིག་གི་ཕྱག་རྒྱ་བཅས་ལ་ཧཱུཾ་ཡ་མཱནྟ་ཀྲྀ་ཏ་བཛྲ་དྷརྨཱ་ཙཀྵུ་པྲ་བེ་ཤ་ཡ་ན་ཞེས་བརྗོད་དོ། །ཞལ་གྱི་ཕྱག་རྒྱ་བཅས་ལ། ཨོཾ་ཡ་མཱནྟ་ཀ་དེ་བ་ཤོ་ད་ཡ་ཏྲཾ་པྲ་བེ་ཤ་ཡ་ཕཊ། གཙུག་ཏོར་གྱི་ཕྱག་རྒྱ་བཅས་ལ། ཨོཾ་ཡ་མཱནྟ་ཀ་བཛྲ་ཧྰྲིཿ་མཆེ་བའི་ཕྱག་རྒྱ་བཅིངས་ལ། ཨོཾ་བཛྲ་གུ་ཧྱ་གུ་ཧ་ལཾ། དེ་ནས་མཆོད་པ་དང་བསྟོད་པ་བྱས་ལ། བསྒོམ་པ་དང་ལྡན་པས་གསང་སྔགས་བཟླས་བརྗོད་བྱའོ། །ཉི་མ་དང་པོ་ལ་ཡ་མ་རཱ་ཛ་ས་དོ་མེ་ཡ་ཆེ་གེ་མོ་བྷྲ་མ་ཎཾ་ཀུ་རུ་ཧཱུཾ་ཕཊ། ཉི་མ་གཉིས་པ་ལ་ཡ་མེ་དོ་རུ་ཎ་ཡོ་ད་ཆེ་གེ་མོ་རཀྟཾ་ཚ་ཌྷ་བ་ན་ཡ་ཧཱུཾ་ཕཊ། ཉི་མ་གསུམ་པ་ལ་ཡ་ད་ཡོ་ནི་ར་ཡཀྵེ་ཡ་ཆེ་གེ་མོ་མུ་རྩ་པཱ་ཡ་ཧཱུཾ་ཕཊ། ཉི་མ་བཞི་པ་ལ་ཡཀྵེ་ཡཙྪ་ནི་རཱ་མ་ཡ་ཆེ་གེ་མོ་མཱ་ར་ཡ་ཧཱུཾ་ཕཊ། དེ་ནས་ཉི་མ་བཞིས་མ་གྲུབ་ན། མཆོད་པ་དང་གཏོར་མ་དང་སྦྱིན་སྲེག་བྱས་ལ་གསང་སྔགས་ཁྲི་ཕྲག་བཞི་བཟླས་ནས་སྔོན་གྱི་ལས་ལ་སྦྱར་བར་བྱའོ། །དེ་ནས་ཁམ་ཕོར་དེ་དུར་ཁྲོད་ཀྱི་མེས་ནིམ་པའི་ཤིང་ལ་སྦར་ཏེ་བསྲོ་བར་བྱའོ། །དེ་ནས་ཁམ་ཕོར་ཁ་སྦྱར་དུར་ཁྲོད་དུ་སྦ་བར་བྱའོ། །རལ་པ་ཚར་དགུ་དང༌། མིག་དམར་དང༌། གཤིན་རྗེ་མཚན་མོ་ནག་མོ་དང༌། དུས་མཚན་རྣམས་ཁྱད་པར་དུ་གསོད་པའི་ལས་བྱེད་པས་དེ་རྣམས་ལ་ལྷག་པར་གཏད་དོ། །གླང་མགོ་ཅན་དང༌། སྨྲིག་པ་དང༌། གཤིན་རྗེ་ཕོ་ཉ་མོ་དང༌། གཤིན་རྗེ་


DTG047_Page_0326
[མ་དཔེ་གཟིགས་ན་འདིར་གནོན།]

མཆེ་བ་མོ་རྣམས་ནི་བསྒྲུབ་བྱ་མྱོས་པའི་ལས་བྱེད་པ་ལ་ཤིས་སོ། །གཤིན་རྗེ་ཏེལ་པ་དང༌། ཆོས་ཀྱི་རྒྱལ་པོ་དང༌། གཤིན་རྗེ་ལྕགས་ཀྱུ་མ་དང༌། གཤིན་རྗེ་ཞགས་པ་མ་རྣམས་ནི་བསྒྲུབ་བྱ་ཁྲག་སྐྱུག་ཏུ་གཞུག་པའི་ལས་ལ་ཤིས་སོ། །ཡ་བ་ཏི་དང༌། ཕྱ་སངས་དང༌། གཤིན་རྗེ་ལུ་གུ་རྒྱུད་མ་དང༌། གཤིན་རྗེ་འབེབས་མ་རྣམས་ནི་བསྒྲུབ་བྱ་འཁོར་དུ་གཞུག་པའི་ལས་ལ་ཤིས་སོ། །རྣལ་འབྱོར་པས་འདི་རྣམས་ཀྱི་སྦྱོར་བས་གཏོར་མ་དང༌། མཆོད་པ་དང༌། སྔོན་དུ་བསྙེན་པ་དང༌། ལས་ཀྱི་གཉེ་གཏད་པ་ཐམས་ཅད་བྱའོ། །འདི་ནི་དྲག་པོའི་ལས་ཀྱི་ཆོ་གའོ།། །། དེ་ནས་མཛའ་སྡེ་དབྱེ་བར་འདོད་པས་བྱ་རོག་དང་འུག་པའི་སྒྲོ་ལ་བྲམ་ཟེའི་སྐྲ་དང་མུ་སྟེགས་ཀྱི་སྐྲས་དཀྲིས་ཏེ་ད་དུ་རའི་ཤིང་ལ་བསྲེག་པར་བྱའོ། །དེ་ནས་ཐལ་བ་དེ་བླང་ནས་བསྒྲུབ་བྱའི་ཉལ་སར་སྦས་ཏེ། དུས་མཚན་མ་ལ་ལས་བཅོལ་ན་འབྱེ་བར་འགྱུར་རོ། །འདི་ནི་དབྱེ་བའི་ཆོ་གའོ།། །།དེ་ནས་བསྒྲུབ་བྱ་དེ་དག་འཐབ་པར་འདོད་ན། དུག་དང་ཁྲག་ལ་སོགས་པའི་རྫས་ཀྱིས་བསྒྲུབ་བྱའི་མིང་དང་སྤེལ་བའི་སྔགས་དུར་ཁྲོད་ཀྱི་རས་ལ་བྲིས་ཏེ། ནེའི་ལེའི་སྤུ་དང་སྤྲུལ་གྱི་པགས་པ་རྣམས་ཀྱིས་དྲིལ་ཏེ། མར་མེ་བྱས་ན་གང་གི་མཐོང་བ་དེ་དག་འཐབ་པར་འགྱུར་རོ། །འཐབ་པའི་ཆོ་གའོ།། །།གཞན་ཡང་གསད་པར་འདོད་ན། བཤང་གཅི་ལས་དགྲའི་གཟུགས་བརྙན་བྱས་ཏེ། མིའི་རུས་ཕྱེས་བསྐུས་ཏེ། རྡོ་རྗེ་འཇིགས་བྱེད་ཀྱི་སྦྱོར་བས་ནམ་ཕྱེད་ན་གཅེར་བུར་བྱུང་སྟེ། སྐྲ་བཤིག་ནས་དུར་ཁྲོད་ཀྱི་རོ་བསྲེགས་པའི་མེ་ལ་ཁ་ལྷོ་ཕྱོགས་སུ་བལྟས་ཏེ། བསྒྲུབ་བྱའི་མིང་དང་གསང་སྔགས་སྤེལ་ཏེ་གཟུགས་བརྙན་དེ་དུམ་བུར་བཅད་ཅིང་བསྲེགས་ན་མྱུར་དུ་འཆིའོ། །འདིའི་སྦྱོར་བ་ནི་སྔ་མ་བཞིན་ནོ། །དེ་ནས་རྣལ་འབྱོར་པས་མནན་པར་འདོད་པས། གཤིན་རྗེ་གཤེད་ཀྱི་འཁོར་ལོ་རྡོའམ་རས་ལ་ཡུང་བའམ་ལྡོང་རོས་ཀྱིས་གསང་སྔགས་དང་མིང་སྤེལ་ཏེ་བྲིས་པས་དེ་གནོན་པར་འགྱུར་རོ། །གཞན་ཡང་གསད་པར་འདོད་ན། དུར་ཁྲོད་ཀྱི་རས་ལ་དུག་ལ་སོགས་པའི་རྫས་ཀྱིས་གཤིན་རྗེའི་འཁོར་ལོ་མིང་དང་སྔགས་སྤེལ་ཏེ་བྲིས་ལ། བདག་ཉིད་ཏིལ་ཆེན་པོས་ལུས་བྱུགས་ཏེ། དྲི་ཆེན་པོས་གདུག་པའི་གཟུགས་


DTG047_Page_0327
[མ་དཔེ་གཟིགས་ན་འདིར་གནོན།]

བརྙན་བྱས་ཏེ། དེའི་སྙིང་གར་འཁོར་ལོ་བཅུག་ནས། དུར་ཁྲོད་དུ་རོ་བསྲེགས་པའི་ཤིང་གི་མི་ལ་དུམ་བུར་གཏུབ་ཅིང་བསྲེགས་ན་འཆི་བར་འགྱུར་རོ། །ལྷའི་སྦྱོར་བ་ནི་སྔ་མ་བཞིན་ནོ། །དེ་ནས་སྨྱོ་བར་འདོད། །ད་དུ་རའི་འབྲས་བུ་དང་ཤ་ཆེན་དང་སྲིན་གྱིས་ཟོས་པའི་ཕྱེ་མ་རྣམས་ལ་ལྷའི་སྦྱོར་བས་གསང་སྔགས་བཟླས་ཏེ། བཟའ་བ་དང་བཏུང་བའི་ནང་དུ་བླུགས་ཏེ། དགྲ་ལ་བླུད་ན་སྐད་ཅིག་གིས་སྨྱོ་བར་འགྱུར་རོ། །ཞག་བདུན་གྱིས་འཆི་བར་འགྱུར་རོ། །དེ་ནས་དབང་དུ་བྱ་བར་འདོད་ན། སྲིན་བུ་བ་ལ་མིག་གི་བྲུས་པའི་ས་དང༌། གུར་ཀུམ་དང༌། གོ་རོ་ཙ་ན་རྣམས་བསྲེས་ཏེ། གཟུགས་བརྙན་སོར་བཅུ་དྲུག་པ་བྱས་ཏེ། དེ་ནས་གོ་རོ་ཙ་ན་དང༌། སྲིན་ལག་གི་ཁྲག་གིས་གྲོ་གའི་ཤུན་པ་ལ་འཁོར་ལོ་བྲིས་ཏེ། གཟུགས་བརྙན་གྱི་སྙིང་གར་ཅུག་ནས་མེ་ཏོག་དམར་པོས་དུས་སུ་མཆོད་ཅིང་རྡོ་རྗེ་འཇིགས་བྱེད་ཀྱི་སྦྱོར་བས་ནུབ་ཏུ་ཁ་བལྟས་ཏེ། ཡི་གེ་བཅུ་པའི་སྔགས་བཟླས་ན་དབང་དུ་འགྱུར་རོ། །འདིས་བརྒྱ་བྱིན་ཡང་དབང་དུ་འདུས་ན། གང་སྐྱེ་འགྲོ་ཕྲ་མོ་ལྟ་ཅི་སྨོས། དེ་ནས་དགུག་པར་འདོད་ན། ཐོད་པ་གཉིས་ཁ་སྦྱར་ཏེ། དེར་འཁོར་ལོ་བཅུག་སྟེ། ཁདྷི་རའི་ཤིང་ལ་མེ་སྦར་ཏེ་བསྲོའོ། །བསྒྲུབ་བྱའི་མིང་དང་སྤེལ་ཏེ་གཡང་སྔགས་བཟླས་ན་རླུང་གི་ཤུགས་ཀྱིས་འགུགས་པར་འགྱུར་རོ། །དེ་ནས་བསྐྲད་པར་འདོད་ན་ཁྱི་དང༌། སྦལ་པ་དང༌། རུས་སྦལ་རྣམས་ཀྱི་ཤ་དང༌། བྱི་བའི་ཁྲག་དང་རྔ་མོའི་སྤངས་རྣམས་ཀྱིས་ནིམ་པའི་ཤིང་ལ་མེ་སྦར་ཏེ། རླུང་གི་དཀྱིལ་འཁོར་གྱི་དབུས་སུ་སྦྱིན་སྲེག་བྱས་ཏེ། བསྒྲུབ་བྱའི་མིང་དང་སྤེལ་བའི་གསང་སྔགས་བཟླས་བརྗོད་བྱས་ན་སྐྲོད་པར་འགྱུར་རོ། །དེ་ནས་བུ་མོ་མནན་པར་འདོད་ན། ཚེར་མ་དང་དུག་དང༌། སྐེ་ཚེ་རྣམས་རང་གི་ཁྲག་གིས་སྤྲུས་ཏེ་སྟོང་དུ་སྦྱིན་སྲེག་བྱས་ན་བུ་མོ་གནོན་པར་འགྱུར་རོ། །ཡི་གེ་བཅུ་པའི་གསང་སྔགས་ཀྱི་བཟླས་པ་བརྗོད་བྱས་ན་ཐེ་ཚོམ་མེད་དོ། །དེ་ནས་ཞི་བར་བྱ་བར་འདོད་ན་མར་དང༌། སྦྲང་རྩི་དང༌། འོ་མ་དང༌། རྩྭ་ཀུ་ཤ་རྣམས་ཤིང་པ་ལ་ཤའི་མེ་ལ་ཁ་ཤར་ཕྱོགས་སུ་བླས་ཏེ་བཟླས་བརྗོད་བརྒྱ་རྩ་བརྒྱད་བྱས་ན་གཡུལ་ཐམས་ཅད་ཞི་བར་འགྱུར་རོ། །དེ་ནས་རྒྱས་པར་བྱ་བར་འདོད་ན། ཏིལ་དང༌། ནས་དང༌། འབྲས་


DTG047_Page_0328
[མ་དཔེ་གཟིགས་ན་འདིར་གནོན།]

དང༌། །མར་རྣམས་ཀྱིས་ཤིང་ཨུདུམྺཱ་རའི་མེ་ལ་ཁ་དོག་སེར་པོའི་ལྷའི་རྣལ་འབྱོར་དང་ལྡན་པས་ཁ་བྱང་ཕྱོགས་སུ་བལྟས་ལ། དུས་གསུམ་དུ་ལན་སྟོང་དུ་སྦྱིན་སྲེག་བྱས་ན་རྒྱས་པར་འགྱུར་རོ། །ལས་འདི་རྣམས་ནི་རྩེ་གཅིག་པའི་སེམས་ཀྱིས་བྱའོ། །མཉམ་པར་མ་བཞག་པའི་སེམས་ཀྱིས་བྱས་ན་འགྲུབ་པར་མི་འགྱུར་ཞིང་ལྟུང་བར་འགྱུར་རོ། །དེ་བས་ན་རྣལ་འབྱོར་འགའ་ཞིག་གིས་དུར་ཁྲོད་ལ་སོགས་པར་སྟོང་སྟེ། རྡོ་རྗེ་འཇིགས་བྱེད་ཀྱི་སྦྱོར་བས་དུས་ཀུན་དུ་བྱའོ། །ལས་གང་བྱེད་པའི་དུས་སུ་བསྒྲུབ་བྱའི་མིང་དང་བསྐུལ་བ་དང་བཅས་ཏེ་བཟླས་པར་བྱའོ། །དེ་ལ་གསང་སྔགས་ནི། ཡི་གེ་གསུམ་ཅུ་རྩ་གཉིས་ལ་སོགས་ཏེ། ཐམས་ཅད་ལ་སོ་སོར་ཇི་ལྟ་བ་བཞིན་དུ་སྔགས་བཟླས་སོ། །དེ་ལ་བསད་པའི་དུས་སུ་བདག་ཉིད་རྡོ་རྗེ་འཇིགས་བྱེད་ཀྱི་སྦྱོར་བས་འོད་ཟེར་སྔོན་དུ་བརྗོད་པ་ཕོ་ཉའི་ཚོགས་ལྟ་བུ་སྤྲོས་ཏེ། དེ་རྣམས་ཀྱིས་བསྒྲུབ་བྱའི་ཚེ་དང་རྣམ་པར་ཤེས་པ་རྣམས་བཀུག་སྟེ། འཁོར་ལོའི་དབུས་སུ་བསྟིམས་ནས་གསང་སྔགས་ཀྱི་འོད་ཟེར་གྱིས། ཚེ་དང༌། རྣམ་པར་ཤེས་པ་དང༌། ཤ་ཁྲག་དང་བྲལ་བར་བྱ་སྟེ། ཀེང་རུས་འབའ་ཞིག་གནས་པར་བསམ་པར་བྱའོ། །བསྐྲད་པ་དང༌། མནན་པ་ལ་སོགས་པ་ལ་ཡང༌། དེ་ལྟ་བུའི་སྦྱོར་བས་བྱའོ། །དེ་ལ་དགུག་པ་དང༌། དབང་ལ་སོགས་པ་ལ་ནི་བདག་ཉིད་ཁ་དོག་དམར་པོའི་སྦྱོར་བས་བསྒོམ་པར་བྱའོ། །ཞི་བ་ལ་ནི་ཁ་དོག་དཀར་པོ་བསྒོམ་པར་བྱའོ། །ལས་ཐམས་ཅད་ལ་ཡང་ལྷའི་སྦྱོར་བ་ནི་རྡོ་རྗེ་འཇིགས་བྱེད་ཀྱི་སྦྱོར་བས་བྱའོ། །དེ་ནས་གཞན་ཡང་ནང་གི་སྦྱོར་བཅུད་ཟད་བརྗོད་པར་བྱའོ། །དེ་ལ་ལུས་ཀྱི་སྨད་ནི་དོན་ཡོད་གྲུབ་པའི་བདག་ཉིད་དུ་བལྟ་བར་བྱའོ། །དེའི་སྟེང་དུ་གྲུ་གསུམ་གྱི་གནས་ནི་སྣང་བ་མཐའ་ཡས་ཀྱི་བདག་ཉིད་དུ་བལྟའོ། །དེའི་སྟེང་དུ་ལྟ་བ་ནི་མི་བསྐྱོད་པའི་བདག་ཉིད་དུ་བལྟའོ། །དེའི་སྟེང་དུ་བྲང་ནི་རིན་ཆེན་འབྱུང་ལྡན་གྱི་བདག་ཉིད་དུ་བལྟའོ། །སྨིན་མཚམས་ནི་རྣམ་པར་སྣང་མཛད་ཀྱི་བདག་ཉིད་དུ་བལྟ་བར་བྱའོ། །དེའི་སྟེང་དུ་པདྨ་འདབ་མ་སུམ་ཅུ་རྩ་གཉིས། དེའི་སྟེང་དུ་ཟླ་བའི་དཀྱིལ་འཁོར་རོ། །དེའི་སྟེང་དུ་མི་འཆི་བ་ཁ་སྦུབ་པ་ལས་རྟག་ཏུ་བདུད་རྩི་འཛག་པར་བལྟའོ། །ལྟེ་བའི་དཀྱིལ་འཁོར་ལ་པདྨ་འདབ་


DTG047_Page_0329
[མ་དཔེ་གཟིགས་ན་འདིར་གནོན།]

མ་དྲུག་ཅུ་རྩ་བཞིའོ། །དེའི་དབུས་སུ་ཉི་མའི་དཀྱིལ་འཁོར། །དེའི་དཀྱིལ་དུ་དང་པོའི་ཡི་གེ་བལྟ་བར་བྱ་སྟེ། རྟག་ཏུ་ཡེ་ཤེས་ཀྱི་མེ་གྱེན་དུ་འབར་བའོ། །དེའི་སྟེང་དུ་སྙིང་གར་པདྨ་འདབ་མ་བརྒྱད་པ། དེའི་དབུས་སུ་ཉི་མའི་དཀྱིལ་འཁོར་ལ་ས་བོན་དགུས་ཡོངས་སུ་གང་བའི་དབུས་ཀྱི་ཧཱུཾ་གི་དཀྱིལ་ན་ཟླ་བའི་དཀྱིལ་འཁོར། དེའི་དཀྱིལ་དུ་ཡི་གེ་མུཾ་ཡོངས་སུ་གྱུར་པའི་འཇམ་པའི་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་བདག་ཉིད་བསམ་པར་བྱའོ། །དེའི་སྟེང་དུ་མགུལ་བར་པདྨ་འདབ་མ་བཅུ་དྲུག་པ། དེའི་དབུས་སུ་ཉི་མའི་དཀྱིལ་འཁོར། དེའི་སྟེང་དུ་པདྨ་དམར་པོ་འདབ་མ་བརྒྱད་པ། དེའི་དབུས་སུ་ཡི་གེ་ཨ་དམར་པོ། དེའི་འདབ་མ་ལ་གཟུགས་ཀྱི་རྡོ་རྗེ་ལ་མ་སོགས་པའི་ལྷ་མོ་བརྒྱད་ཀྱི་ས་བོན། དེ་བཞིན་གཤེགས་པ་ཐམས་ཅད་ཀྱི་ཡང་དག་པའི་ཡེ་ཤེས་ཀྱི་ལོངས་སྤྱོད་ཉམས་སུ་མྱོང་བའི་བདག་ཉིད་བསམ་མོ། །འདི་ལྟ་བུར་རྡོ་རྗེ་འཇིགས་བྱེད་དུ་བསྒོམས་པའི་སྤྱི་གཙུག་ཏུ་མི་བསྐྱོད་པ། སྙིང་གར་ཡེ་ཤེས་སེམས་དཔའ་དང་སྐུ་གསུང་ཐུགས་ཀྱི་རྡོ་རྗེ་དང་ལྡན་པར་རྟག་ཏུ་བསྒོམ་མོ། །ཇི་ལྟར་འདོད་པའི་དངོས་གྲུབ་ཏུ་འགྱུར་རོ། །སྐད་ཅིག་ཀྱང་སྣ་ཚོགས་པའི་སེམས་མི་བསྐྱེད་དེ། འཇིག་རྟེན་འདི་དང་གཞན་དུ་ཡང་འདི་ལས་གཞན་པའི་ཐབས་མེད་དོ། །དེ་བས་ན་དངོས་གྲུབ་ཀྱི་ཕྱིར་དང༌། བསད་པའི་ཕྱིར་དང་ཟླ་བ་དྲུག་ཏུ་འདིའི་བསམ་གཏན་བྱའོ། །བསམ་པ་ཐམས་ཅད་ཡོངས་སུ་སྤངས་ཏེ་ཟླ་བ་ཕྱེད་དུ་བརྟག་པར་བྱའོ། །འདི་ཡི་དགེ་བས་ཀུན་མཐོང་སྟེ། །བདག་ཀྱང་གནོད་པ་ལས་རྒྱལ་ནས། །ནད་དང་གནོད་པ་འཆི་བ་དང༌། །རྒ་བའི་རླབས་ཆེན་འཁྲུགས་པ་ལས། །འགྲོ་བའི་རྒྱ་མཚོ་སྒྲོལ་བར་ཤོག །དཔལ་རྡོ་རྗེ་འཇིགས་བྱེད་ཀྱི་སྒྲུབ་ཐབས། ཨཱ་ཙཱ་ཪྻ་དོན་ཡོད་རྡོ་རྗེས་མཛད་པ་རྫོགས།། །།ཉིད་ཀྱི་རང་འགྱུར་རོ། །རྒྱ་གར་གྱི་མཁན་པོ་མཉྫུ་ཤྲཱི་ཛྙཱ་ན་དང༌། བོད་ཀྱི་ལོ་ཙཱ་བ་རོང་ཟོམ་ཆོས་ཀྱི་བཟང་པོས་བསྒྱུར་ཅིང༌། སླར་ཡང་ཕྱུག་མཚམས་དབང་ཕྱུག་རྒྱལ་པོས་བསྒྱུར་ཅིང་གཏན་ལ་ཡང་དག་པར་ཕབ་པའོ།།

དཀྱིལ་འཁོར་གྱི་ཆོ་ག།
དོན་ཡོད་པ།

བསྙེན་པའི་རིམ་པ།


DTG047_Page_0330
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། མཎྜལ་བི་དྷིཿ་།བོད་སྐད་དུ། དཀྱིལ་འཁོར་གྱི་ཆོ་ག །དཔལ་གཤིན་རྗེ་གཤེད་པོ་ལ་ཕྱག་འཚལ་ལོ། །དད་པ་དང་ལྡན་པ། དམ་ཚིག་དང་རང་གི་བརྟུལ་ཞུགས་བསྲུང་བ། རྣམ་པར་རྟོག་པ་མེད་ཅིང་རྒྱུད་གཅིག་པ། བླ་མ་དང་རྡོ་རྗེ་འཇིགས་བྱེད་ལ་མོས་པའི་ཡོན་ཏན་དང་ལྡན་པའི་སློབ་མས། དང་པོར་དཀྱིལ་འཁོར་དང་ཚོགས་ཀྱི་མཆོད་པ་ཆེན་པོ་བྱས་ནས། བླ་མ་ལ་གསོལ་བ་གདབ་པར་བྱའོ། །དེ་ནས་བླ་མ་ཁྲོ་བ་མེད་པ། སྔགས་དང་རྒྱུད་ལ་མཁས་པ། ཐོས་པའི་ཕ་རོལ་ཏུ་སོན་པ། རྒྱུད་འདིར་དབང་ཐོབ་པ། དམ་ཚིག་དང༌། སྡོམ་པ་ལ་གནས་པ་དེས། དཀྱིལ་འཁོར་གྱི་ལྷ་རྣམས་བསྐྱེད་པ་དང༌། མཉེས་པ་ལ་ཐུག་པ་བྱས་ནས་ཡི་གེ་བཅུ་པའི་སྙིང་པོ་འབུམ་ཕྲག་གཅིག་ཏུ་བཟླས་པ་བྱ་སྟེ། དང་པོའི་བསྙེན་པའོ། །

ས་བླང་བའི་རིམ་པ།


DTG047_Page_0330
[མ་དཔེ་གཟིགས་ན་འདིར་གནོན།]

དེ་ནས་རྒྱུད་ལས། དུར་ཁྲོད་ཆུ་བུའི་འགྲམ་དག་དང༌། །ཤིང་གཅིག་དྲུང་དང་མཚན་མ་གཅིག །ལམ་གྱི་བཞི་མདོའི་རི་བོའི་སྟེང༌། །ཁང་སྟོང་དང་ནི་མ་མོའི་གནས། །ལྷ་གནས་འཐབ་མོའི་གནས་དག་དང༌། །གྲོང་འདབ་དང་ནི་ནགས་ཀྱི་ཁྲོད། །ཅེས་གསུངས་པའི་གནས་གང་ཡང་རུང་བར་སོང་ནས་བདུད་རྩི་འཁྱིལ་བའི་སྔགས་བཟླས་པའི་ཆུས་གཏོར་ཏེ། དེར་དཀྱིལ་འཁོར་གྱི་ལྷ་རྣམས་བསམ་པར་བྱས་ནས་མཆོད་པ་དང་གཏོར་མ་བྱ་སྟེ། སའི་ལྷ་མོ་ལ་བསླང་བ་ནི། སྐྱོབ་པ་སངས་རྒྱས་ཐམས་ཅད་ཀྱི། །སྤྱོད་པའི་ཚུལ་དང་ཁྱད་པར་དང། །ས་དང་ཕ་རོལ་ཕྱིན་པ་ལ། །ལྷ་མོ་ཁྱོད་ནི་དཔང་དུ་གྱུར། །སྐྱོབ་པ་ཤཱཀྱ་སེང་གེ་ཡིས། །ཇི་ལྟར་བདུད་ཀྱི་ཚོགས་བཅོམ་པ། །དེ་ལྟར་བདག་གིས་བདུད་བཅོམ་ནས། །བདག་ནི་དཀྱིལ་འཁོར་འདྲི་བར་བྱེད། །ཅེས་བརྗོད་ནས་ཐལ་མོ་ས་ལ་བརྡབ་པས། སའི་ལྷ་མོ་སྐུ་ཕྱེད་ཙམ་ས་ལས་འཐོན་པ་དང༌། སེམས་ཅན་གྱི་དོན་དུ་དཀྱིལ་འཁོར་བྱེད་པས་བདག་ལས་བྱིན་ཅིག་ཅེས་བརྗོད་པ་ལས། ཁྱོད་དཀྱིལ་འཁོར་གྱི་བདག་པོ་ཡིན་པས། དཀྱིལ་འཁོར་གྱིས་ཤིག་ཅེས་བརྗོད་ནས། སླར་ཡང་ས་ལ་ཐིམ་པར་བསམ་མོ། །ས་བླང་པའི་རིམ་པའོ།། །།

ས་བཟུང་བའི་རིམ་པ།


DTG047_Page_0330
[མ་དཔེ་གཟིགས་ན་འདིར་གནོན།]

དེ་ནས་བདུད་རྩི་འཁྱིལ་བའི་རྣལ་འབྱོར་དུ་བྱས་ཏེ། སའི་ལྷ་མོ་ནམ་མཁར་གཤེགས་པར་བསམས་ལ་ས་བརྐོ་སྟེ། སའི་རོ་ལྔ་བསལ་ལ། དེར་རིན་པོ་ཆེ་ལྔ་དང་འབྲུ་ལྔ་དང་ལྡན་པའི་བུམ་པ་བཅུག་ལ་རང་གི་སས་དགང་ངོ༌། །དེ་ནས་དཀྱིལ་འཁོར་གྱི་ས་ཉིས་འགྱུར་དུ་སྤོས་ཀྱིས་ཆག་ཆག་དང༌། བའི་རྣམ་


DTG047_Page_0331
[མ་དཔེ་གཟིགས་ན་འདིར་གནོན།]

ལྔས་བྱུག་པར་བྱའོ། །དེ་ནས་རྡོ་རྗེ་སློབ་དཔོན་གྱིས་དཀྱིལ་འཁོར་གྱི་དབུས་སུ་འདུག་ནས། སྟོང་པ་ཉིད་སྔོན་དུ་འགྲོ་བའི་ལྷའི་ང་རྒྱལ་བྱས་ཏེ། ས་གཞི་ཐམས་ཅད་སྟོང་པའི་རང་བཞིན་ལས། ཧཱུཾ་ལས་རྡོ་རྗེའི་ས་གཞིར་བསྒོམས་ནས་དེའི་དབུས་སུ་རང་གི་ལྷག་པའི་ལྷའི་ང་རྒྱལ་དུ་གནས་པར་བྱས་ལ། སློབ་མ་ལྷའི་ང་རྒྱལ་ཅན་དག་གིས་དཀྱིལ་འཁོར་བྲི་བར་གསོལ་བ་གདབ་པར་བྱས་ནས། རྡོ་རྗེ་སློབ་དཔོན་གྱིས་མིག་ཏུ་མ་ལས་གྲུབ་པའི་ཉི་མ་འབར་བ་དང༌། ཨ་ལས་གྲུབ་པའི་ཟླ་བ་འོད་ཟེར་དང་ལྡན་པ་བསམ། རྐང་པའི་འོག་ཏུ་ཧཱུཾ་ལས་རྡོ་རྗེ་རྒྱ་གྲམ་འོད་འབར་བ་བསྒོམས་ནས། ལངས་ཏེ་བྱང་ཤར་གྱི་མཚམས་ནས་བསྐོར་བ་བྱས་ཏེ་རྡོ་རྗེའི་ལྟ་བ་དང༌། རྡོ་རྗེའི་འགྲོས་ཀྱིས་བགེགས་གཞོམ་པར་བྱའོ། །དེ་ནས་ཡང་དཀྱིལ་འཁོར་གྱི་དབུས་སུ་འདུག་ནས། གཤིན་རྗེ་གཤེད་ཀྱི་ང་རྒྱལ་དུ་བྱས་ཏེ། དེའི་སྙིང་གར་གནས་པའི་ས་བོན་ལས་བྱུང་བའི་ཁྲོ་བོའི་ཕུར་པ་བསྐྱེད་ནས་བདག་གིས་སྐེ་ནས་བཟུང་བས་ཕྱོགས་བཅུའི་བགེགས་དག་ལ་གདབ་པར་བྱའོ། །ཨོཾ་གྷ་གྷ་གྷཱ་ཏ་ཡ་གྷཱ་ཏ་ཡ། སརྦ་དུ་ཥྚྰྲ་ན་ཕཊ་ཕཊ། ཀཱི་ལ་ཡ་ཀཱི་ཡ་ལ་ཡ་སརྦ་པཱ་པཾ་ཕཊ་ཕཊ། ཧཱུཾ་ཧཱུཾ་ཧཱུཾ་བཛྲ་ཀཱི་ལ་ཡ། བཛྲ་དྷ་རོད་ཨཱ་ཛྙཱ་པ་ཡ་ཏི། ཀཱ་ཡ་ཝཱ་ཀ་ཙིཏྟ་བཛྲ་ཀཱི་ལ་ཡ་ཧཱུཾ་ཕཊ། ཅེས་བདུད་རྩི་འཁྱིལ་བའི་སྔགས་ཀྱིས་གདབ་པར་བྱའོ། །ས་བཟུང་བའི་རིམ་པའོ།། །།

ལྷ་གནས་པའི་རིམ་པ།


DTG047_Page_0331
[མ་དཔེ་གཟིགས་ན་འདིར་གནོན།]

དེ་ནས་དཀྱིལ་འཁོར་གྱི་དབུས་སུ། ཁྲུ་གང་བའི་དཀྱིལ་འཁོར་ཟླུམ་པོར་བྱས་ནས། །ལྷའི་གྲངས་དང་མཉམ་པའི་ཐིག་ལེ་དྲི་དང་ལྡན་པར་བྱ་སྟེ། མེ་ཏོག་རེ་དབུས་སུ་བཞག་པ་གདན་དུ་དབུལ་བར་བྱས་ནས། འཁོར་ལོའི་རང་བཞིན་བསྐྱེད་པ་དང༌། དང་པོ་བསྙེན་པའི་དུས་ན་སྤྱན་དྲངས་པའི་ལྷ་རྣམས་མདུན་གྱི་ནམ་མཁའ་ལ་བཞུགས་པ་རྣམས་དེར་སྤྱན་དྲངས་ཏེ། མཆོད་པ་དང་བསྟོད་པ་བྱས་ཏེ། མཁྱེན་པར་གསོལ་བ་ནི། བཅོམ་ལྡན་འཇམ་དཔལ་རྡོ་རྗེ་ནི། །རིག་སྔགས་བདག་པོ་ཕྱག་འཚལ་བསྟོད། །སྙིང་རྗེ་ཡིད་ཀྱིས་དཀྱིལ་འཁོར་བྲི། །དེ་ཕྱིར་བྱིན་རླབས་གནང་བར་མཛོད། །དགོངས་ཤིག་སངས་རྒྱས་སྡེ་དང་ཚོགས། གང་གཞན་སྔགས་ཀྱི་ལྷ་ཚོགས་དང༌། །ལྷ་རྣམས་བསྟན་ལ་མངོན་དགའ་བའི། །དཀྱིལ་འཁོར་བྱིན་རླབས་དངོས་གྲུབ་མཛོད། །ཅེས་ལན་གསུམ་བརྗོད་དེ་ལྷ་གནས་པའི་རིམ་པའོ། །

བུམ་པ་གནས་པའི་རིམ་པ།


DTG047_Page_0332
[མ་དཔེ་གཟིགས་ན་འདིར་གནོན།]

དེ་ནས་དངུལ་ལམ་གསེར་གྱི་བུམ་པ་ཁ་དོག་དཀར་པོར་བསྒྱུར་བ་ལྷའི་གྲངས་དང་མཉམ་པ་སྟེ་དགུ་དང༌། ལས་བྱེད་པ་དང་བཅུ་པོ་དེ་དག་ཚང་བར་བྱས་ལ། དགུ་ལ་སྣ་ཚོགས་པདྨའི་སྟེང་དུ་རང་གི་མཚན་མ་བྲི་བར་བྱའོ། །ལས་བྱེད་པའི་བུམ་པར་པདྨའི་ལྷ་ལ་སྣ་ཚོགས་རྡོ་རྗེ་བྲི་བར་བྱའོ། །གཙོ་བོའི་བུམ་པར་འབྲུ་ལྔ་དང༌། རིན་པོ་ཆེ་སྣ་ལྔ་དང༌། སྨན་ལྔ་དང༌། དྲི་ཆབ་བཟང་པོས་དགང་བར་བྱའོ། །གཞན་དག་ཏུ་ཡང་དྲིའི་ཆུས་དགང་བར་བྱའོ། །མགུལ་ཆིངས་ཉིས་རིམ་བྱའོ། །ཤིང་བཟང་པོའི་ལོ་མས་ཁ་རྒྱན་བྱའོ། །དེ་ནས་གཙོ་བོའི་བུམ་པར་པདྨའི་སྟེང་དུ་ཆོ་ག་གསུམ་པ་ལས་གཙོ་བོའི་སྐུ་བསྐྱེད། ཕྱག་རྒྱ་བཞི་དང་ལྡན་པར་བྱ། ཡེ་ཤེས་ཀྱི་གཙོ་བོ་བཀུག་ལ་གཞུག །མཆོད་པ་དང་བསྟོད་པ་བཟླས་པ་བྱ། དེ་ནས་སྙིང་གའི་ས་བོན་ལས་བྱུང་བའི་འོད་ཟེར་གྱིས་བཀུག་པའི་སངས་རྒྱས་དང་བཅས་པ་བདུད་རྩི་ཆུའི་རང་བཞིན་དུ་ཞུ་བར་བྱའོ། །དེ་ནས་བུམ་པ་གཞན་དུ་ཡང་དེ་བཞིན་དུ་བསྐྱེད་པ་དང༌། གཞུག་པ་དང༌། མཆོད་པ་དང༌། ཞུ་བར་བྱས་ཏེ་གཞག་གོ །ལས་བྱེད་པའི་བུམ་པར་པདྨའི་སྟེང་དུ་བསྐྱེད་པའི་ལས་ཐམས་ཅད་པའི་ཁྲོ་བོ་བསྐྱེད་པ་དང༌། གཞུག་པ་དང༌། མཆོད་པ་ཡན་ཆད་བྱས་ནས་བཟླས་པ་བྱས་ལ་ཞུ་བར་མི་བྱ་སྟེ། དེ་ནས་བུམ་པ་དེ་དག་རང་གི་ཁང་པར་སྦ་བར་བྱ་སྟེ། བུམ་པ་གནས་པའི་རིམ་པའོ།། །།

སློབ་མ་གནས་པའི་རིམ་པ།


DTG047_Page_0332
[མ་དཔེ་གཟིགས་ན་འདིར་གནོན།]

དེ་ནས་སློབ་མ་ཤར་ངོས་སུ་མཎྜལ་བྱ་སྟེ། དེར་འདུག་ནས། རྡོ་རྗེ་སློབ་དཔོན་གྱི་གཙོ་བོའི་ང་རྒྱལ་བྱས་པ་ལ་གསོལ་བ་གདབ་པ། སྟོན་པ་ཁྱོད་ལ་བདག་དགའོ། །སློབ་དཔོན་ཁྱོད་ནི་དགོངས་སུ་གསོལ། །བྱང་ཆུབ་ཆེན་པོའི་ཚུལ་ཆེན་ནི། །མགོན་པོ་ཆེན་པོ་བདག་འཚལ་ལོ། །དེ་ཉིད་དམ་ཚིག་རིམ་པ་དང༌། །བྱང་ཆུབ་སེམས་ཀྱང་བདག་ལ་སྩོལ། །གསུམ་པ་སྐྱབས་སུ་འགྲོ་བ་སྩོལ། །ཐར་པ་ཆེན་པོའི་གྲོང་ཁྱེར་དུ། །མགོན་པས་བདག་ནི་གཞུག་པར་མཛོད། །ཅེས་གསོལ་བ་གདབ་བོ། །དེ་ནས་རྡོ་རྗེ་སློབ་དཔོན་གྱིས་སློབ་མའི་ལག་པ་ནས་བཟུང་སྟེ། བུ་གཅིག་འདིར་ཤོག་ཐེག་ཆེན་གྱི། །ཆོ་ག་སྔགས་ཀྱི་སྤྱོད་པའི་ཚུལ། །ཁྱོད་ལ་ཡང་དག་བསྟན་པར་བྱ། །ཁྱོད་ཀྱིས་ཚུལ་ཆེན་རྙེད་པར་གྱིས། །དུས་གསུམ་


DTG047_Page_0333
[མ་དཔེ་གཟིགས་ན་འདིར་གནོན།]

སངས་རྒྱས་འབྱུང་བ་ནི། །སྐུ་གསུང་ཐུགས་ཀྱི་རྡོ་རྗེ་ཅན། །དཔག་མེད་ཡེ་ཤེས་ཐོབ་པ་ནི། །རྡོ་རྗེ་གསང་སྔགས་སྨོས་པ་ནི། །གང་ཞིག་མཉམ་མེད་སྔགས་སྦྱོར་བས། །ཤཱཀྱ་སེང་གེ་སྐྱོབ་པ་ཡིས། །དྲག་པོ་བདུད་ཀྱི་སྡེ་བཅོམ་ནས། །འཇིག་རྟེན་མཐུན་པར་ཆོས་ཀྱི་ནི། །འཁོར་ལོ་བསྐོར་ནས་མྱ་ངན་འདས། །དེ་ཕྱིར་བློ་ལྡན་བུ་ཁྱོད་ཀྱིས། །ཐམས་ཅད་མཁྱེན་པའི་དོན་ཐོབ་ཀྱིས། །ཞེས་བརྗོད་དོ། །དེ་ནས་བྱ་བའི་རྒྱུད་ལ་སོགས་པ་དང་ཐུན་མོང་གི་སྡོམ་པ་དང༌། རྣལ་འབྱོར་གྱི་རྒྱུད་བླ་ན་མེད་པའི་ཕས་ཕམ་པ་བཅུ་བཞི་དང༌། སྡོམ་པ་སྦོམ་པོ་དྲུག་ལ་སོགས་པ་དག་ཀྱང་དགོད་པར་བྱའོ། །དེ་ནས་སློབ་མའི་གནས་གསུམ་དྲིའི་ཐིག་ལེ་རེ་རེ་བྱས་ཏེ། རྡོ་རྗེ་དང༌། འཁོར་ལོ་དང༌། པདྨ་དག་བསྐྱེད་ལ། དེ་དག་གི་ལྟེ་བར་ས་བོན་གསུམ་བསམ་ཞིང༌། ཨོཾ་ཨཱཿ་ཧཱུཾ་ཞེས་པས་གནས་གསུམ་དུ་རྡོ་རྗེ་གཞག་པར་བྱའོ། །དེ་ནས་སོ་ཤིང་མེ་ཏོག་གི་ཕྲེང་བ་ཅན་བདུད་རྩི་འཁྱིལ་བའི་སྔགས་ཀྱིས་བཏབ་པ་སྦྱིན་པར་བྱས་ནས། སློབ་མས་རང་གི་སོའི་རྩ་བ་དག་བྲུད་ནས། དཀྱིལ་འཁོར་གྱི་སྟེང་དུ་དོར་ཏེ། ཞི་བ་ལ་སོགས་པའི་ལས་དང་དངོས་གྲུབ་ཀྱི་རྟགས་དག་ཤེས་པར་བྱའོ། །སྲུང་སྐུད་ལ་བདུད་རྩི་འཁྱིལ་བའི་སྔགས་ཀྱིས་མདུད་པ་པོར་ཏེ། དཔུང་པ་གཡོན་པར་གདགས་པར་བྱའོ། །དེ་ནས་ཀུ་ཤ་ལས་ཐམས་ཅད་པའི་སྔགས་ཀྱིས་བཏབ་པ་བྱིན་ལ་སྔས་སུ་བྱས། ཤར་ལྷོའི་མཚམས་སུ་མགོ་བསྟན་ཞིང་ཉལ། རྨི་ལམ་གྱི་ལྟས་བརྟག་པར་བྱའོ། །སློབ་མ་གནས་པའི་རིམ་པའོ།། །།

དམ་ཚིག་གི་སྐུད་པའི་རིམ་པ།


DTG047_Page_0333
[མ་དཔེ་གཟིགས་ན་འདིར་གནོན།]

དེ་ནས་ནང་པར་སྔར་སྤྱན་དྲངས་པའི་སྔགས་ཀྱིས་དེ་བཞིན་གཤེགས་པ་རྣམས་མདུན་གྱི་ནམ་མཁའ་ལ་གཤེགས་སུ་གསོལ་ནས་ཐིག་གི་ལས་བྱ་སྟེ། ཚོན་སྣ་ལྔའི་སྐུད་པས་སོ་སོར་བསྐལ་པ་ལ། སྟོང་པ་ཉིད་སྔོན་དུ་འགྲོ་བས་ཡི་གེ་ལྔ་ལས་བྱུང་བར་བསམ། དེ་ནས་དེ་དག་གཅིག་ཏུ་བསྒྲིལ་ལ་དྲི་དང་བདུད་རྩི་ལྔ་བླུགས། གཡས་གཡོན་དང་དབུས་སུ། ཨོཾ་ཨཱཿ་ཧཱུཾ་རིམ་པར་བཀོད་དེ། དམ་ཚིག་གི་སྐུད་པའི་རིམ་པའོ།། །།

ཡེ་ཤེས་ཀྱི་སྐུད་པའི་རིམ་པ།


DTG047_Page_0333
[མ་དཔེ་གཟིགས་ན་འདིར་གནོན།]

དེ་ནས་མདུན་གྱི་ནམ་མཁའ་ལ་བཞུགས་པའི་རིགས་ལྔའི་ཐུགས་གནས་ཡེ་ཤེས་ཀྱི་སྐུད་པ་འོད་དུ་འབར་བ་བསམས་ཏེ། རང་གི་མིག་གཉིས་སུ་ཉི་མ་བསམས་ལ་དེའི་སྟེང་དུ་ཛཿ་དམར་པོ་བསམ། དེ་


DTG047_Page_0334
[མ་དཔེ་གཟིགས་ན་འདིར་གནོན།]

ནས་མིག་གི་རྫི་མ་ལྷེབ་ལྷེབ་བྱེད་པས་ཡེ་ཤེས་ཀྱི་སྐུད་པ་ཛཿས་དྲངས་ནས་དམ་ཚིག་གི་སྐུད་པར་གཞུག །དེ་ནས་མཆོད་པ་ལྔ་དབུལ་ལོ། །ཡེ་ཤེས་ཀྱི་སྐུད་པའི་རིམ་པའོ།། །།

ཐིག་གི་རིམ་པ།


DTG047_Page_0334
[མ་དཔེ་གཟིགས་ན་འདིར་གནོན།]

དེ་ནས་མཆོད་པ་དང་གཏོར་མ་བྱས་ཏེ། བསྐུལ་བ་དང་བཅས་ཏེ་བསྒྲིལ་བར་བྱའོ། །དེ་ནས་རྡོ་རྗེ་སློབ་དཔོན་ནུབ་ཏུ་འདུག་ནས། རྡོ་རྗེ་ཁུ་ཚུར་གཡོན་པས་བཟུང་ལ། གཙོ་བོར་བསྒོམས་པའི་ལྟེ་བར་ཁུ་ཚུར་བཞག་ལ། ཛ་ཛ་ཛ་གསུམ་གྱིས་སློབ་མའི་ལག་མཐིལ་དུ་གཡས་པས་དྲངས་ཏེ་བྱིན་ལ་ཚངས་ཐིག་དང་པོ་གདབ། ཨོཾ་བཛྲ་ས་མ་ཡ་སཱུ་ཏྲ་མ་ཏི་ཀྲ་མ་ཧཱུཾ། ཞེས་གྱེན་དུ་བཏབ་པའི་སྒྲས་དེ་བཞིན་གཤེགས་པ་དག་འགྲོ་བའི་དོན་གྱི་དུས་ལ་བབ་པར་བསྐུལ། དེ་ནས་ཚངས་ཐིག་གཉིས་པ་ཡང་དེ་བཞིན་དུ་གདབ་པར་བྱའོ། །དེ་ནས་ཁ་དོག་གཅིག་པའི་སྐུད་པ་ལས་ཐམས་ཅད་པར་བྱིན་གྱིས་བརླབས་པས་སའི་ཐིག་བཏབ་ལ། ཐིག་དེའི་སྟེང་དུ་ཡེ་ཤེས་ལྔའི་ཐིག་བཏབ་ལ། སྔ་མའི་ཐིག་བྱིན་གྱིས་བརླབ་པར་བྱའོ། །དེ་ནས་ཡེ་ཤེས་ཀྱི་ཐིག་ལ་མཆོད་པ་བྱས་སླར་ཡང་གཤེགས་སུ་གསོལ་ལོ། །དེ་ནས་ལས་ཀྱི་ཐིག་ནི། དང་པོར་ས་ལ་ཚངས་ཐིག་དང་པོ་བཏབ་ལ། དེར་བྱ་རོག་རྗེས་གཉིས་བྲིའོ། །དེ་ནས་གཉིས་པ་བཏབ་སྟེ། ཟུར་བཞིར་བྱ་རོག་རྗེས་བྲི་སྟེ། དང་པོར་ཀུན་གྱི་ཐིག་ཤར་དུ་གདབ། དེ་ནས་ནུབ། དེ་ནས་བྱང༌། དེ་ནས་ལྷོར་གདབ་བོ། །དེ་ནས་མེ་དང་རླུང་གི་གྲྭར། དེ་ནས་བདེན་བྲལ་དང་དབང་ལྡན་གྱི་གྲྭར་གདབ་བོ། །དེ་ནས་ཤར་གྱི་ཚངས་པའི་ཐིག་ནས་ལྷོར་ཚངས་པའི་ཐིག་གི་སྣར་གདབ་བོ། །དེ་ནས་དེ་བཞིན་དུ་ལྷོ་ནས་ནུབ་ཏུ། དེ་ནས་ཡང་བྱང༌། བྱང་ནས་ཀྱང་ཤར་གྱི་ཚངས་ཐིག་ཏུ་གདབ་བོ། །དེ་ནས་ནང་གི་བྱ་རྗེས་བཞིར་ཐིག་བཞག་ནས། ནང་གི་ངོས་བཞིར་བཏབ་པས་ནི་ཕོ་བྲང་དང༌། སྒོ་དང༌། རྟ་བབས་ཀྱི་སྣམ་བུར་གསལ་བར་འགྱུར་རོ། །དེ་ནས་སྣམ་བུ་བཞི་པོ་དེ་རེ་རེ་ལ་སྣམ་བུ་བཞི་བཞིར་བགོས་ཏེ། ཆ་ཆེན་པོ་བཅུ་དྲུག་ཏུ་བྱའོ། །དེ་རེ་རེ་ལ་ཡང་ཆ་ཆུང་བཞི་བཞིར་བགོ་བར་བྱའོ། །ཐིག་དེ་དག་གི་ཆ་རྣམ་པར་བགོས་ཏེ། དབུས་ཀྱི་ཕོ་བྲང་ཟླུམ་པོ་དང་གྲྭ་དང་སྒོ་ལ་སོགས་པ་ཀུན་ཆར་བགོ་བར་བྱ་སྟེ། ཐིག་གི་རིམ་པའོ།། །།

དཀྱིལ་འཁོར་བྲི་བའི་རིམ་པ།


DTG047_Page_0334
[མ་དཔེ་གཟིགས་ན་འདིར་གནོན།]

དེ་ནས་ཚོན་སྣ་ལྔ་རིམ་པར་བཞག་སྟེ། སྟོང་པ་ཉིད་སྔོན་དུ་འགྲོ་བས་ཡི་གེ་ལྔ་ལས་བསྐྱེད་དེ། དྲི་དང་བདུད་རྩིས་བསང༌། དེ་ནས་སྔ་མ་བཞིན་


DTG047_Page_0335
[མ་དཔེ་གཟིགས་ན་འདིར་གནོན།]

དུ་ཡེ་ཤེས་ཀྱི་ཚོན་མིག་གི་ཚོན་ལ་བསྟིམ་སྟེ། ཨོཾ་བཛྲ་ཙི་ཏྲ་ས་མ་ཡ་སྟྭཾ། ཞེས་བཟླས། དེ་ནས་བྱང་ཤར་མཚམས་སུ་དཀར་བ་དང་ནང་ནས་དྲངས་ཏེ་མཛུབ་གང་བླ་མའི་ལག་པ་གཡོན་པས་བྲིས་ལ་ཆོས་ཀྱི་དབྱིངས་དེ་དག་པས་ན། སེམས་ཅན་ཁམས་ནི་རབ་སྒྲོལ་བྱེད། །རྒྱལ་བ་འཇམ་དཔལ་རྡོ་རྗེ་ཉིད། །དེ་བཞིན་གཤེགས་པ་ཀུན་གྱི་གནས། །ཞེས་བརྗོད་ནས་ཟངས་གཞོང་ལ་སོགས་པས་དགབ་པར་བྱའོ། །དེ་ནས་དབུས་ནས་བྲི་བར་བྱ་སྟེ། རྒྱུད་ཉིད་ལས་ཇི་སྐད་གསུངས་པ་ནི། ནམ་ཕྱེད་ཀྱི་ནི་དུས་དག་ཏུ། །མ་ཧེའི་གདོང་གི་སྦྱོར་ལྡན་པས། །གཅེར་བུ་སྐྲ་ནི་ལྷུག་པར་བྱས། །དུར་ཁྲོད་སོལ་བ་ལ་སོགས་པས། །དཀྱིལ་འཁོར་དག་ནི་བྲི་བར་བྱ། །གྲུ་བཞི་པ་དང་སྒོ་བཞི་པ། །རྟ་བབས་བཞི་དང་ཡང་དག་ལྡན། །དྲིལ་བུ་དང་ནི་འཕན་ལ་སོགས། །མེ་ཏོག་ཕྲེང་བ་རྣམས་ཀྱིས་བརྒྱན། །གྲྭ་རྣམས་དང་ནི་སྒོ་ཁྱུད་དང༌། །རྡོ་རྗེ་རིན་ཆེན་སྤྲས་པ་དང༌། །དེ་བཞིན་ཟླ་བ་ཕྱེད་པའོ།། དེ་དབུས་འཁོར་ལོ་བྲི་བ་ནི། །རེ་མིག་དགུ་པ་ཟླུམ་པོ་སྟེ། །སྒོ་གཅིག་དག་ཏུ་འདུག་ནས་སུ། །གཞན་གྱི་སྒོ་རྣམས་གཅད་པར་བྱ། །ཞེས་གསུངས་པ་དེ་བཞིན་དུ་བྲི་བར་བྱ་སྟེ། དབུས་ལྟེ་བ་ཟླུམ་པོ་རེ་མིག་དགུ་པ། དེའི་ཕྱིར་གྲུ་བཞི་པ་སྒོ་བཞི་པ། རྟ་བབས་དང་བཅས་པ། རྡོ་རྗེའི་ཕྲེང་བ་དང༌། མེའི་ཕྲེང་བ་དང༌། པདྨའི་ཕྲེང་བ་བྱའོ། །མཚན་མ་བྲི་བར་དགོད་པ་ཡང་དེའི་དབུས་སུ་རོ་བྲི་བར་བྱའོ། །ཤར་དུ་མགོ་བོ། ལྷོར་ལག་པ། ནུབ་ཏུ་རྒྱུ་མ། བྱང་དུ་རྐང་པ། ཤར་གྱི་གྲྭར་ཀ་པཱ་ལ། ལྷོའི་གྲྭར་ཐོད་པའི་དུམ་བུ། །ནུབ་ཀྱི་གྲྭར་དུར་ཁྲོད་ཀྱི་རས། བྱང་གི་གྲྭར་མདུང་གི་ཕུག་པའི་སྐྱེས་བུའོ། །འདི་དག་ནང་གི་མཚན་མ་སྟེ། དེ་ནས་ཕྱི་རོལ་ཕྱག་རྒྱ་དགོད། ཤར་གྱི་སྣམ་བུར་ནི་གྲི་གུག་དང༌། བྷི་ཏི་པཱ་ལ་དང༌། རྩེ་གསུམ་དང༌། ཆུ་གྲི་དང༌། གཏུན་ཤིང་དང༌། ལྕགས་ཀྱུ་ལ་སོགས་པ་བྲི་བར་བྱའོ། །ལྷོའི་སྣམ་བུ་ལ་སྟ་རེ་དང༌། མདའ་དང༌། དབྱུག་ཏོ་དང༌། ཁ་ཊྭཱཾ་ག་དང༌། འཁོར་ལོ་དང༌། རྡོ་རྗེ་ཞགས་པ་ལ་སོགས་པ་བྲི་བར་བྱའོ། །ནུབ་ཏུ་ནི་རྡོ་རྗེ་དང༌། ཅང་ཏེའུ་དང༌། ཕུབ་དང༌། གཞུ་དང༌། དྲིལ་བུ་དང༌། རླུང་གིས་བསྐྱོད་པའི་རས་ལ་སོགས་པ་བྲི་བར་བྱའོ། །བྱང་དུ་ནི་སྡིགས་མཛུབ་དང༌། འཕན་རྩེ་གསུམ་པ་དང༌། གླང་པོའི་པགས་པ་དང༌། རྡོ་རྗེའི་


DTG047_Page_0336
[མ་དཔེ་གཟིགས་ན་འདིར་གནོན།]

ཐོ་བ་དང༌། མདུང་དང༌། མེ་ཐབ་ལ་སོགས་བྲི་བར་བྱའོ་ཞེས་གསུངས་པ་བཞིན་བྲི་བར་བྱའོ། །ཁྱད་པར་དུ་ནི་སྒོ་བཞི་དང༌། གྲྭ་བཞིར་སྣ་ཚོགས་པདྨའི་སྟེང་དུ་གྲི་གུག་བྲི་བར་བྱའོ། །དབུས་སུ་ཡང་རོའི་སྟེང་དུ་པདྨའི་སྟེང་དུ་གྲི་གུག་བྲི་བར་བྱའོ། །དཀྱིལ་འཁོར་བྲི་བའི་རིམ་པའོ།། །།

མཆོད་རྫས་ཀྱི་རིམ་པ།


DTG047_Page_0336
[མ་དཔེ་གཟིགས་ན་འདིར་གནོན།]

དེ་ནས་བུམ་པ་དགོད་དེ། གཙོ་བོའི་དབུས་སུ་བཞག །གཞན་དགུ་ལས། ལས་ཀྱི་བུམ་པ་བྱང་ཤར་དུ་བཞག་སྟེ། ཁྱོད་ཀྱིས་བགེགས་བསྲུང་བར་གྱིས་ཤིག་ཅེས་བརྗོད་ནས། བིགྷྣཱ་ཏ་ཀྲྀ་ཏ་བཟླས་སོ། །གཞན་བརྒྱད་ནི། །དང་པོ་ལྷ་མོ་བསྒོམ་པ་དེའི་ས་ཕྱོགས་སྒོ་དང་གྲྭ་བཞིར་གཞག་གོ །དེ་ནས་མཆོད་རྫས་ནི་མི་དང༌། བོང་བུ་དང༌། རྔ་མོ་དང༌། ཁྱི་དང༌། ཅེ་སྤྱང་དང༌། མ་ཧེ་དང༌། གླང་པོ་ལ་སོགས་པ་དང༌། གཞན་ཡང་བ་རྒོད་དང༌། འུག་པ་དང༌། ཁྲ་དང༌། བྱ་རོག་དང༌། ཆུ་སྐྱར་དང༌། ཐིང་རིལ་དང༌། རྨ་བྱ་དང༌། ནེ་ཙོ་ལ་སོགས་པའི་ཤ་ལས་བྱས་པའི་ལྷ་བཤོས་བརྒྱད་ཕྱོགས་མཚམས་སུ་གཞག །ཚིལ་ཆེན་པོའི་མར་ཁུའི་མར་མེ་བརྒྱད་ཀྱང་དེ་བཞིན་དུ་གཞག །སྒོ་བཞི་དང་གྲྭ་བཞིར་ཁྲག་སྣ་ཚོགས་པའི་དམར་གྱི་ཨརྒྷ་ཐོད་པ་བརྒྱད་གང་བ་གཞག་པར་བྱའོ། །མ་ཧཱ་མཾ་སའི་དྷཱུ་པེ་དང༌། མེ་ཏོག་གི་སྣོད་བརྒྱད་དག་ཀྱང་ཕྱོགས་མཚམས་སུ་གཞག་པར་བྱའོ། །སློབ་མ་དཀྱིལ་འཁོར་དུ་འཇུག་པའི་དུས་ན་གྲངས་དང་མཐུན་པའི་གཏོར་མ་དང༌། གཞན་ཡང་ལྷ་རྣམས་ལ་དབུལ་བའི་ཚོགས་ཀྱི་རྫས་དང༌། བདུད་རྩི་ལྔ་དང༌། རས་ཟུང་དང་བཅས་པ་ཡང་བཞག་སྟེ། མཆོད་རྫས་ཀྱི་རིམ་པའོ།། །།

མཆོད་པའི་རིམ་པ།


DTG047_Page_0336
[མ་དཔེ་གཟིགས་ན་འདིར་གནོན།]

དེ་ནས་རྡོ་རྗེ་སློབ་དཔོན་གྱིས་དཀྱིལ་འཁོར་གྱི་ཆ་རྐྱེན་ཐམས་ཅད་ཕུན་སུམ་ཚོགས་པར་ཤེས་ནས། རང་གི་ལྷའི་རྣལ་འབྱོར་ལ་འཇུག་པར་བྱ་སྟེ། དང་པོ་གནོད་མཛེས་ཀྱིས་བགེགས་བསལ་བའི་སྦྱོར་བ་སྔོན་དུ་བྱས་ནས་དེ་ནས་བླ་མའི་མཆོད་པ་དང༌། སྟོང་པ་ཉིད་དང༌། བསོད་ནམས་དང་ཡེ་ཤེས་ཀྱི་ཡན་ལག་བསྒོམ་པ་དང༌། འབྱུང་བ་རིམ་པ་བརྩེགས་དང་གཞལ་ཡས་ཁང་ལ་སོགས་པ་བསྒོམ་པ་དང༌། དམ་ཚིག་གི་འཁོར་ལོ་བསྐྱེད་པ་དང༌། ཡེ་ཤེས་ཀྱི་འཁོར་ལོ་སྤྱན་དྲངས་པ་ལ་མཉེས་པར་བྱ་བ་དང༌། མཐར་སྙིང་གར་བསྡུ་བ་བྱས་ནས། སྦྱང་བ་དང༌། འབར་བ་དང༌། རྟོགས་པས་ནང་དུ་ཡོངས་སུ་ཚིམ་པར་བྱས་ཏེ། ཕྱིའི་སྦྱིན་སྲེག་གིས་ཀྱང་


DTG047_Page_0337
[མ་དཔེ་གཟིགས་ན་འདིར་གནོན།]

མཆོད་ནས། དེ་ནས་སྟོང་པ་ཉིད་བསྒོམ་པ་སྔོན་དུ་འགྲོ་བས་དཀྱིལ་འཁོར་དུ་གཞུག་པའི་ཕྱིར་རྡོ་རྗེ་སློབ་དཔོན་གྱིས་བསྒོམ་པར་བྱ་སྟེ། ཡེ་ཤེས་ཀྱི་འཁོར་ལོ་དང་འདྲེས་པར་གྱུར་ནས། བསང་གཏོར་དང༌། མཆོད་པ་ལྔ་དང༌། བདུད་རྩི་ལྔ་དང༌། རས་ཟུང་ཐམས་ཅད་ཀྱང་དབུལ་བར་བྱའོ། །མཆོད་པའི་རིམ་པའོ།། །།

མནའ་ཆུ་བླུད་པའི་རིམ་པ།


DTG047_Page_0337
[མ་དཔེ་གཟིགས་ན་འདིར་གནོན།]

དེ་ནས་སློབ་མ་ཕྱི་རོལ་དུ་གནས་པ་དེའི་དྲུང་དུ་བླ་མས་ལས་ཀྱི་བུམ་པ་ཁྱེར་ཏེ། བིགྷྣཱ་ཏ་ཀྲྀ་ཏ་ཅེས་བརྗོད་ཅིང་ཕྱིན་ཏེ། དེ་རྣམས་པར་སྣང་མཛད་དུ་བྱིན་གྱིས་བརླབས་ནས། ཨ་ཁཾ་བཱི་ར་ཧཱུཾ། ཞེས་པས་མེ་ཏོག་གི་ཕྲེང་བ་ལེན་དུ་གཞུག་གོ ། དེ་ནས་དར་དམར་པོ་མ་རྨས་པས་མིག་དགབ་པར་བྱས་ལ་ཆུས་གཏོར་རོ། །དེ་ནས་ཡོལ་བའི་ཕྱི་རོལ་དུ་བཀུག་ལ་དྲི་བར་བྱ་སྟེ། ཀྱེ་དེ་ན་གནས་པའི་དེ་སུ་ཞིག་ཅེས་བྱའོ། །སྐལ་བ་བཟང་པོ་བདག་ལགས་སོ་ཞེས་སོ། །དེ་ནས་བྱང་ཆུབ་ཏུ་སེམས་བསྐྱེད་པར་བྱས་ཏེ། ཨོཾ་བོ་དྷི་ཙིཏྟ་ཨུཏྤཱ་ད་ཡཱ་མི། ཞེས་བརྗོད་ནས་ཡོལ་བའི་ནང་དུ་བཀུག་པ་ལ་འདི་བརྗོད་དོ། །དུས་འདི་ཉིད་དུ་ཁྱོད་ཉིད་ནི། །སངས་རྒྱས་རིགས་སུ་ཆུད་པས་ན། །ང་ཡིས་ཡེ་ཤེས་རྡོ་རྗེ་སྦྱིན། །དེས་ན་སངས་རྒྱས་འགྲུབ་པར་གསུངས། །གང་ཞིག་འདི་ཉིད་མ་མཐོང་བའི། །མདུན་དུ་སྨྲ་བར་སྨྲ་བར་མ་བྱེད་ཅིག །བག་མེད་སྨྲས་ཉམས་པར་འགྱུར། །དེ་བས་ནན་ཏན་གནས་པར་བྱའོ། །ཞེས་སྙིང་གར་རྡོ་རྗེ་བཟུང་ལ་སྨྲ་བར་བྱའོ། །དེ་ནས་རྡོ་རྗེ་སྤྱི་བོར་བཞག་ལ། གཏམ་འདི་སྨྲ་བར་མ་བྱེད་ཅིག །གལ་ཏེ་གཞན་ལ་སྨྲས་གྱུར་ན། །ཀླད་པ་ཚལ་བ་བདུན་དུ་འགས། །དེ་ནས་ཙནྡན་དང༌། གུར་ཀུམ་ལ་སོགས་པ་དང༌། བདུད་རྩི་ལྔ་བསྲེས་པའི་ཆུ་ལག་པར་བྱིན་ཏེ། འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་ཉམས་ན་སྲེག་པར་བྱེད། །དམ་ཚིག་བསྲུང་ན་དངོས་གྲུབ་ཐོབ། །འཐུང་ཞིག་རྡོ་རྗེ་བདུད་རྩི་འཐུང༌། །ཨོཾ་བཛྲ་ཨ་མྲྀ་ཏ་ཧཱུཾ་ཞེས་དམ་བདར་རོ། །དེའི་རྗེས་ལ་དམ་ཚིག་ཐུན་མོང་མ་ཡིན་པ་འདི་སྨྲ་བར་བྱ་སྟེ། དུས་འདི་ཉིད་ནས་བུ་ཁྱོད་ཀྱི། རྡོ་རྗེ་འཛིན་པ་ང་ཡིན་ཏེ། །ང་ཡིས་ཇི་ལྟར་བཀའ་སྩལ་ཏེ། །ཁྱོད་ཀྱིས་སྐྱོ་བ་མེད་པར་གྱིས། །གང་ཡང་ང་ལ་མ་མོས་མིན། །དེ་བཞིན་མོས་པར་མ་བྱས་ན། །བདུད་ཀྱིས་བཅོམ་ནས་དམྱལ་བར་འགྲོ། །དེ་བས་དམ་ཚིག་གནས་པར་གྱིས། །མནའ་ཆུ་བླུད་པའི་རིམ་པའོ།། །།

མེ་ཏོག་ལྟས་ཀྱི་རིམ་པ།


DTG047_Page_0338
[མ་དཔེ་གཟིགས་ན་འདིར་གནོན།]

དེ་ནས་སློབ་མ་འོད་དཔག་ཏུ་མེད་པར་བསྒོམ་པ་ལ་སོགས་པའི་རིམ་པས་གཞན་ནས་བསྟན་པས་དབབ་པར་བྱའོ། །དེ་ནས། ཇི་ལྟར་བསོད་ནམས་ཇི་བཞིན་ལྷའི། །རིགས་ཀྱི་བྱེ་བྲག་འདི་ལ་ཡང༌། །རིགས་ཀྱི་ནང་ན་འདི་བཟང་ངོ༌། །དེ་ཡི་དངོས་གྲུབ་འདིར་བྱུང་ནས། །དེ་ཡི་བསོད་ནམས་འདིར་འབྱུང་བ། །དེ་འདྲའི་དཀྱིལ་འཁོར་འདི་ལའོ། །ཞེས་སྨྲས་ནས། པྲ་ཏཱིཙྪ་བཛྲ་ཧོ་ཞེས་ལན་གསུམ་བརྗོད་དེ་དོར་རོ། །ལྷ་གང་ལ་བབས་པ་དང༌། ལུས་ཀྱི་སྟོད་སྨད་ལ་སོགས་པའི་བྱེ་བྲག་ལས་དངོས་གྲུབ་བཟང་ངན་དག་འབྱུང་པར་ཤེས་པར་བྱ་སྟེ། མེ་ཏོག་ལྟས་ཀྱི་རིམ་པའོ། །

དཀྱིལ་འཁོར་དུ་གཞུག་པའི་རིམ་པ།


DTG047_Page_0338
[མ་དཔེ་གཟིགས་ན་འདིར་གནོན།]

དེ་ནས། རྡོ་རྗེ་འཛིན་པས་དེ་རིང་ཉིད། །ཁྱོད་ནི་ཡེ་ཤེས་མིག་ཕྱེ་སྟེ། །དེ་བཞིན་ཐམས་ཅད་མཐོང་བར་གྱིས། །ཨོཾ་ཛྙཱ་ཙཀྵུ་པྲ་བེ་ཤ་ཕཊ། དེས་བྲྗོདྣས་རང་གསལ་བའི་སྒོ་ནས་གཙོ་བོ་ལ་ཐུང་པར་བསྟན་ཏེ། དཀྱིལ་འཁོར་དུ་གཞུག་པའི་རིམ་པའོ། །

དབང་བསྐུར་བའི་རིམ་པ།


DTG047_Page_0338
[མ་དཔེ་གཟིགས་ན་འདིར་གནོན།]

དེ་ནས་དཀྱིལ་འཁོར་གྱི་བུམ་པ་དག་ཆུ་གཅིག་ཏུ་བྱས་ཏེ། དེས་སློབ་མའི་སྤྱི་བོ་ནས་དབང་བསྐུར་བ་སྦྱིན་ཏེ། ཨོཾ་བཛྲ་ཨ་བྷི་ཥིཉྩཱ་མི། ཞེས་སྤྱི་བོར་ཆུ་བླུགས་པས། རིགས་ཀྱི་བདག་པོ་མི་བསྐྱོད་པས་མགོ་བརྒྱན་པར་བསམ་མོ། །དེ་ནས་དབུ་རྒྱན་སྟོང་པ་ཉིད་མངོན་དུ་བྱས་ནས། ཨོཾ་ཧཱུཾ་ཨཱྀཾ་ཛྲཱཾ་ཁཾ་ལྔ་ལས་རིགས་ལྔ་བསྐྱེད་དེ། དེ་བཞིན་གཤེགས་པ་ལྔ་པོ་དག་དེར་གཞུག་པར་བྱས་ནས་སློབ་མའི་མགོ་ལ་བཞག་ནས། ཨོཾ་རཏྣ་ཀུ་ལ་མུ་ཀུ་ཊ་ཨ་བྷི་ཥིཉྩཱ་མི། ཞེས་བརྗོད་དོ། །དབུ་རྒྱན་གྱི་དབང་བསྐུར་བའོ། །དེ་ནས་རྡོ་རྗེ་སྟོང་པ་ཉིད་ལས་པཾ་ལས་འོད་དཔག་ཏུ་མེད་པར་བསྐྱེད་ནས་འོད་དཔག་ཏུ་མེད་པར་བཅུག་ལ། དེ་གྱུར་པ་ལས་རྡོ་རྗེར་གྱུར་པས་དབང་བསྐུར་བར་བྱ་སྟེ། ཨོཾ་བཛྲ་ཨ་བྷི་ཥི་ཉྩཱ་མིས་ལག་པ་གཡས་པར་རྡོ་རྗེ་སྦྱིན་ནོ། །དེ་ནས་དྲིལ་བུ་ཡང་སྔ་མ་བཞིན། །ཨ་མོ་གྷ་སིདྡྷིར་བསྐྱེད་པ་དང༌། གཞུག་པ་བྱས་ཏེ་གྱུར་པས་དབང་སྦྱིན་ཏེ། ལག་པ་གཡོན་པར་དྲིལ་བུ་སྦྱིན་པར་བྱ་སྟེ། ཨོཾ་བཛྲ་ཨ་དྷི་པ་ཏི་ཨ་དྷི་ཥིཉྩཱ་མི་ཞེས་བདག་པོའི་དབང་སྦྱིན་ནོ། །དེ་ནས་རྡོ་རྗེ་དང་དྲིལ་བུ་གཉིས་སློབ་མའི་སྤྱི་བོར་བསྣོལ་ཏེ་བཟུང་ལ། མིང་གི་དབང་རྣམ་པར་སྣང་མཛད་ཀྱི་རང་བཞིན་ཆོས་ཀྱི་དབྱིངས་རྣམ་པར་དག་པའི་རང་བཞིན་བདག་


DTG047_Page_0339
[མ་དཔེ་གཟིགས་ན་འདིར་གནོན།]

ཉིད་སྦྱིན་པར་བྱ་སྟེ། བཛྲ་ནཱ་མ་ཨ་བྷི་ཥིཉྩ། ཞེས་པས་སྦྱིན་ཏེ། ཀྱེ་དཔལ་ཆེ་གེ་མོ་ཞེས་ལྷ་གང་ལ་བབ་པའི་ཞབས་ཀྱིས་མཚན་པའི་མིང་གི་དབང་སྦྱིན་ནོ། །དབང་ལྔ་པོ་འདི་ནི་རིགས་ལྔའི་དབང་ངོ༌། །དེ་ནས་སློབ་དཔོན་གྱི་དབང་སྦྱིན་པར་བྱ་སྟེ། བདག་དང་གཞན་གྱི་དོན་བྱེད་པ་ནི་རྡོ་རྗེ་སློབ་དཔོན་གྱི་དབང་ཡིན་ཏེ། ཐུགས་རྗེའི་བདག་པོས་སྩལ་དུ་གསོལ་ཞེས་ཞུའོ། །དེ་ནས་ཧཱུཾ་ལས་རྡོ་རྗེར་བསྒོམས་ཏེ། ཐོག་མ་ཐ་མ་མེད་སེམས་དཔའི། །རྡོ་རྗེ་སེམས་དཔའ་དགའ་བ་ཆེ། །ཀུན་དུ་བཟང་པོ་ཐུགས་ཀྱི་བདག །རྡོ་རྗེ་སྙིང་པོ་ཐུགས་ཀྱི་གཙོ། །ཞེས་བརྗོད་ནས་སྦྱིན་ནོ། །དེ་ནས་ཨ་ལས་དྲིལ་བུ་བསྐྱེད་དེ། འདི་ནི་སངས་རྒྱས་ཐམས་ཅད་ཀྱི། །ཤེས་རབ་དབྱངས་ཀྱི་རྗེས་འགྲོར་འདོད། །རྟག་པར་ཁྱོད་ཀྱིས་བཟུང་བ་ཡིན། །རྒྱལ་བའི་བྱང་ཆུབ་མཆོད་པར་གྱིས། །ཞེས་ལག་པ་གཡོན་པར་སྦྱིན་ནོ། །སྲིད་པའི་ཚིག་དག་བརྗོད་དེ་དེས་དཀྲོལ་ལོ། །དེ་ནས་སློབ་མ་ཡི་དམ་གྱི་ལྷའི་སྐུ་ཕྱག་རྒྱ་བསྒོམ་པ་བྱིན་ཏེ་སྐུའི་དབང་སྦྱིན་ནོ། །དེ་ནས་གཞལ་ཡས་ཁང་གི་རྣམ་པར་དག་པ་དང་ལྷའི་རྣམ་པར་དག་པ་བཤད་ནས། དེ་ནས་གནང་པ་སྦྱིན་ཏེ། འཇིག་རྟེན་ཁམས་ནི་མ་ལུས་པར། །ཇི་ལྟར་འདུལ་བའི་འཁོར་ལོ་བསྐོར། །ཞེས་སོ། །དེ་ནས་བརྟུལ་ཞུགས་སྦྱིན་པར་བྱ་སྟེ། འདི་དེ་སངས་རྒྱས་ཐམས་ཅད་ཀྱི། །རྡོ་རྗེ་སེམས་དཔའི་ཕྱག་ན་གནས། །རྟག་པར་ཁྱོད་ཀྱིས་གཟུང་བར་གྱིས། །ཕྱག་ན་རྡོ་རྗེའི་བརྟུལ་ཞུགས་ཡིན། །རྡོ་རྗེ་བྱིན་ནས་བརྟུལ་ཞུགས་བརྟན་པའོ། །དེ་ནས་སློབ་དཔོན་སངས་རྒྱས་ཀྱི་སྐུར་བསྐྱེད་དེ། བླ་གོས་ཀྱི་མཐའ་མ་གཡོན་པས་བཟུང་བའི་ཁུ་ཚུར་སྙིང་གར་བཟུང་བས། གཡས་པ་མཆོག་སྦྱིན་དུ་བྱས་ལ་ལུང་བསྟན་པར་བྱ་སྟེ། སངས་རྒྱས་དང་བྱང་ཆུབ་སེམས་དཔའ་དང་འཕགས་པ་རྣམས་ཀྱིས་མགྲིན་གཅིག་ཏུ། རྡོ་རྗེ་འཛིན་པ་ལུང་བསྟན་གྱིས། །སྔགས་ཀྱི་དངོས་གྲུབ་དང་བར་གྱིས། །ཞེས་ལུང་བསྟན་པ་སྦྱིན་པར་བྱའོ། །དེ་ནས་སྐྱབས་སྦྱིན་བྱས་ཏེ། འདོད་ཆགས་བྲལ་བ་ལྟ་བུ་ཡི། །ཁམས་གསུམ་ན་ཡང་སྡིག་མེད་དེ། །དེ་བས་འདོད་ལ་ཆགས་བྲལ་བས། །ཁྱོད་ཀྱིས་ནམ་ཡང་མ་བྱེད་ཅིག །བདེ་ཆེན་ཐེག་པ་འདི་ལ་ནི། །ཕྱི་ནས་ཤི་བ་ཡོད་མེད་དེ། །སྡུག་བསྔལ་སྲིད་ལ་མྱ་ངན་འདས། །སྲིད་པ་བརྟན་


DTG047_Page_0340
[མ་དཔེ་གཟིགས་ན་འདིར་གནོན།]

དུ་དངོས་གྲུབ་འགྱུར། །རང་བ་དག་ཡོངས་སུ་དོར་ནས་ནི། །དཀའ་ཐུབ་སྤྱད་པར་མི་བྱ་སྟེ། །ཇི་ལྟར་བདེ་བར་བཟུང་ནས་ནི། །སངས་རྒྱས་དངོས་གྲུབ་ཐོབ་པར་འགྱུར། །དེ་ལྟར་སློབ་དཔོན་དཀྱིལ་འཁོར་ནི། །སྔགས་དང་རྒྱུད་ཀྱི་ཕྲིན་ལས་ཅན། །སངས་རྒྱས་དང་ནི་བྱང་ཆུབ་སེམས། །སྙིང་རྗེའི་དབང་གིས་སེམས་ཅན་དོན། །ཁྱོད་ཀྱིས་དཀྱིལ་འཁོར་ཆོ་ག་དག །བརྩོན་པར་བྲི་དང་རྒྱུད་ལ་ནི། །ཉན་དང་བསྒྲུབ་པ་དག་ཏུ་གྱིས། །ཞེས་སྐྱབས་སྦྱིན་ནོ། །དབང་དེ་ལྟར་རྫོགས་ནས། དཀྱིལ་འཁོར་དང༌། སློབ་དཔོན་ལ་སྒྲ་དང༌། རོལ་མོའི་བྱེ་བྲག་གིས་བསྐོར་བ་དང༌། །མཆོད་པ་བྱས་ནས། དཀྱིལ་འཁོར་གྱི་ལྷ་རྣམས་རང་གི་སྙིང་གར་བཀོད་པ་བྱས་ནས། ནང་གི་སྦྱིན་སྲེག་གིས་ཚིམ་པར་བྱའོ། །གཏོར་མ་ཡང་བྱའོ། །དེ་ནས་གསང་བ་དང༌། ཤེས་རབ་དང་ཡེ་ཤེས་ཀྱི་དབང་བསྐུར་བ་ནི། བླ་མའི་ཞལ་ལས་ཤེས་པར་བྱའོ། །དཔལ་འཇམ་པའི་རྡོ་རྗེ་ཞེས་བྱ་བའི་དཀྱིལ་འཁོར་གྱི་ཆོ་ག་སློབ་དཔོན་ཆེན་པོ་དཔལ་དོན་ཡོད་པའི་ཞབས་ཀྱིས་མཛད་པ་རྫོགས་སོ།། །།པཎྜི་ཏ་དེ་ཉིད་དང༌། ལོ་ཙཱ་བ་རྡོ་རྗེ་གྲགས་ཀྱིས་བསྒྱུར་བའོ།།

དཔལ་རྡོ་རྗེ་འཇིགས་བྱེད་ཆེན་པོའི་གསད་པའི་འཁོར་ལོ་ཞེས་བྱ་བ།
ལ་ལི་ཏ།


DTG047_Page_0340
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། མ་ཧཱ་ཤྲཱི་བྷཻ་ར་ཝ་བཛྲ་ཙཀྲ་མཱ་ར་ཎ་ནཱ་མ། བོད་སྐད་དུ། དཔལ་རྡོ་རྗེ་འཇིགས་བྱེད་ཆེན་པོའི་གསད་པའི་འཁོར་ལོ་ཞེས་བྱ་བ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །ཤེས་བྱ་བ་ལ་སོགས་སྒྲིབ་སྤངས་ཤིང༌། །མཚན་ཉིད་ཐམས་ཅད་ཐུགས་སུ་ཆུད། །ཤིན་ཏུ་ཁྲོས་པའི་ཚུལ་བསྟན་པས། །གདུག་པ་འཇོམས་ལ་ཕྱག་འཚལ་ལོ། །དཀོན་མཆོག་ལ་གནོད་བླ་མ་སྨོད། །དམ་ཚིག་ལ་སྡང་སེམས་ཅན་འཚེ། །ཐེག་པ་ཆེན་པོ་སུན་འབྱིན་པ། །སྔགས་དང་རྒྱུད་ལ་གཤེ་བ་དག །རྗེས་སུ་བཟུང་ནས་བསྒྲལ་བའི་ཕྱིར། །གསད་པའི་འཁོར་ལོ་གསལ་བར་བྱས། །སྔོན་དུ་བསྙེན་པ་རྫོགས་ནས་གསད་པའི་ལས་ལ་འཇུག་པར་བྱ་སྟེ། གཞན་དུ་ནི་མ་ཡིན་ནོ། །རྣལ་འབྱོར་པ་དབང་རྣམས་དང་ལྡན་ཞིང༌། དམ་ཚིག་མ་ཉམས་པ་རྣམ་པར་རྟོག་པ་མེད་པའི་བརྟུལ་ཞུགས་བརྟན་པ། གཙང་ཞིང་བླ་མ་ལ་གུས་པ་དུལ་བ། བསྟན་པ་ལ་གཅིག་ཏུ་གནས་པ། བརྩོན་འགྲུས་དང་ལྡན་པས། དུར་ཁྲོད་ཆེན་པོར་གནས་ཏེ། དེ་བཞིན་གཤེགས་


DTG047_Page_0341
[མ་དཔེ་གཟིགས་ན་འདིར་གནོན།]

པ་ལ་མཆོད་པ་ལ་སོགས་པ་རྫོགས་པར་བྱས་ལ། རང་བཞིན་གྱིས་དག་པའི་སྔགས་དེ་ཆོས་ཐམས་ཅད་བདག་མེད་པར་བསྒོམ་པར་བྱའོ། །དེ་ནས་ཡཾ་ལས་བྱུང་བའི་སྟེང་དུ། དེར་དྷཱིཿ་ལས་འཇམ་དཔལ་བསྐྱེད་བ་རྒྱུའོ། །དེའི་ཐུགས་ཀར་ཉི་མའི་དཀྱིལ་འཁོར་ལས་རྡོ་རྗེ་འཇིགས་བྱེད་ཆེན་པོ་ཇི་ལྟ་བ་བཞིན་དུ་བསྐྱེད་པ་ནི་འབྲས་བུའོ། །དེ་ལ་ཡེ་ཤེས་ཀྱི་འཁོར་ལོ་བཀུག་སྟེ། སེམས་དཔའ་གསུམ་དང་ལྡན་པར་ཡོད་ན་དུ་བརྟགས་པས། སྔགས་རྣམས་ཡན་ལག་མ་ཉམས་པར་བཟླས་པས་ཚད་དང་ལྡན་པར་བྱའོ། །འདིར་གསད་པའི་འཁོར་ལོའི་ལས་བརྩམ་པར་བྱའོ། །དེ་ཅིའི་ཕྱིར་ཞེ་ན། དེའི་སྦྱོར་བ་གཙོ་བོ་ཡིན་པས་ན་དེ་ཉིད་བསྟན་ཏོ། །དེ་ལ་མར་གྱི་ལ་ཡིད་བརྟན་པར་གྱུར་ཅིང༌། སྔགས་ཚད་དང་ལྡན་པའི་རྣལ་འབྱོར་པས། དུར་ཁྲོད་ཀྱི་རས་དང༌། དུག་དང༌། སྐེ་ཚེ་དང༌། ལན་ཚྭ་དང༌། ནི་མ་བ་དང༌། སྨྱོ་བྱེད་དང༌། བྱ་རོག་གིས་ཟོས་པའི་ལྷག་མ་དང༌། རྣམ་པར་སྣང་མཛད་དང༌། མ་དུ་ལུང་གའི་འབྲས་བུ་དང༌། དཀར་རྩི་དང༌། བག་ཕྱེ་དང༌། མི་རུས་ཀྱི་ཕྱེ་མ་དང༌། རོ་བསྲེགས་པའི་སོལ་བ་དང༌། དུར་ཁྲོད་ཀྱི་ཐལ་བ་དང༌། རོའི་སྐུད་པ་དང༌། རོའི་སྐྲ་དང༌། བྱ་རོག་གི་གུད་རུ་དང༌། རབས་ཆད་ཀྱི་ཐོད་པ་དང༌། དུར་ཁྲོད་དང༌། ལམ་གྱི་བཞི་མདོ་དང༌། ཤིང་རྐང་གཅིག་དང༌། ཆུ་ངོགས་གཉིས་དང༌། ལིངྒ་གཅིག་པ་དང༌། གྲོག་མཁར་གྱི་ས་དང༌། རྒྱལ་པོའི་སྒོའི་ས་དང༌། མིའི་རུས་པའི་ཕུར་པ་དང༌། ཤིང་གདུག་པ་ཅན་གྱི་ཚེར་མ་རྣོན་པོ་རྣམས། རྟེན་ཅིང་འབྲེལ་བར་འབྱུང་བའི་ནུས་པ་དང་ལྡན་པའི་ཕྱིར་འཚོགས་པར་བྱའོ། །རྣལ་འབྱོར་པ་མ་ཧེའི་གདོང་གི་སྦྱོར་བ་དང་ལྡན་པས། ཁ་ལྷོ་ཕྱོགས་སུ་བལྟས་ཏེ། གསང་སྔགས་ཀྱིས་རྫས་ལ་བཟླས་ཏེ། དུར་ཁྲོད་ཀྱི་རས་ལ་དཀར་རྩི་དང༌། བག་ཕྱེ་ལས་གཞི་བླངས་ལ། དུག་དང༌། སྐེ་ཚེ་དང༌། ལན་ཚྭ་དང༌། ནིམ་པ་དང༌། སྨྱོ་བྱེད་དང༌། བྱ་རོག་གིས་ཟོས་པའི་ལྷག་མ་དང༌། རྣམ་པར་སྣང་མཛད་དང༌། དུར་ཁྲོད་ཀྱི་ཐལ་བ་དང༌། མ་དུ་ལུང་གའི་འབྲས་བུ་རྣམས་ལ་སྦྱངས་ཏེ་བྱུགས་ལ་བརྐྱང་ངོ༌། །དེ་ནས་ཁྲུ་ཕྱེད་པའི་རས་ལ། རྡོ་རྗེ་འཇིགས་བྱེད་ཆེན་པོའི་འཁོར་ལོ་རེ་མིག་བཅུ་དྲུག་པ་བྲི་བར་བྱའོ། །ཏེ་ལོའི་སླུད་


DTG047_Page_0342
[མ་དཔེ་གཟིགས་ན་འདིར་གནོན།]

བུར་དང་པོ་གཉིས་ཕྱེད་དུ་གདབ་པོ། །དེའི་འོག་ཏུ་གཉིས་པོ་མཚམས་སུ་གདབ་པོ། །དེའི་རྟིང་ལ་གཞི་ལ་ཐ་མར་གདབ་པའི་དང་པོ་གཉིས་ཀྱིས་ངོས་སུ་རེ་རེ་བོར་ལ་གདབ། དེ་ལ་བསྐོར་བ་གསུམ་བྱ་སྟེ། དང་པོ་ཕྱེད་ལ་བསྐོར་བས་ལེའུ་ཙེ་དགུར་བྱའོ། །བར་པ་དེའི་ཕྱེད་ལ་བསྐོར་བས། རེ་མིག་བཅུ་གཉིས་བྱའོ། །ཐ་མ་དང་པོའི་མཐའ་བསྐོར་ཏེ་གཅིག་ཏུ་བྱའོ། །རྫས་ཀྱི་འཁོར་ལོ་དེ་ལ་སྔགས་ཀྱི་འཁོར་ལོ་དགོད་པ་ནི། སྡེ་ཚན་བརྒྱད་དང༌། གཅིག་པས་སྔགས་རྣམས་ཤེས་པར་བྱས་ལ་བྲིའོ། །མ་དུ་ལུང་གའི་དུག་དང༌། ནིམ་པ་དང༌། རོ་བསྲེགས་པའི་ཐལ་བ་རྣམས་ལ་སྦྱར་ལ། སྣག་ཚ་བྱས་ཏེ། བྱ་རོག་གི་གཤོག་པའི་གུང་རུས་བྲི་བར་བྱའོ། །བྲི་བར་བྱས་པའི་ཕྱག་རྒྱ་དང་སྔགས་ནི། གཤིན་རྗེ་གཤེད་པོའི་དམ་ཚིག་གི་ཕྱག་རྒྱ་དང་སྔགས་ཀྱིས་བྱའོ། །ལག་པ་གཉིས་ཐལ་མོ་སྦྱར་ལ། གུང་མོ་གཉིས་རྩེ་སྤྲད་དེ། སྲིན་ལག་གཉིས་བསྣོལ། མཐེའུ་ཆུང་གཉིས་དེ་བཞིན་དུ་སྦྱར་ཏེ། མཛུབ་མོ་གཉིས་དགུག །མཐེ་བོང་གཉིས་མཉམ་པར་སྦྱར་བར་བྱའོ། །ཨོཾ་ཧྲཱིཿ་ཥྚྲྀཿ་ཝི་ཀྲྀ་ཏཱ་ན་ན་མ་མ་ཤ་ཏྲཱུཾ་མཱ་ར་ཡ། ཧཱུཾ་ཧཱུཾ་ཕཊ་ཕཊ། དེ་ལ་རེ་མིག་བཅུ་དྲུག་པ་ལ། ཡི་གེ་འབྲུ་སུམ་ཅུ་གཉིས་པ་དང༌། བསྒྲུབ་བྱའི་མིང་སྤེལ་ཏེ་དགོད་པར་བྱའོ། །དང་པོ་ལ་དབུས་སུ་རླུང་གི་ས་བོན་གཞག། དེའི་མདུན་དུ་དྲུག་པའི་ལྔ་པ་དགོད། གཡས་སུ་དྲུག་པའི་ལྔ་པ་ལ། དང་པོའི་བཅུ་གཅིག་པ་སྟེང་དུ་སྦྱར་ལ་དགོད། རྒྱབ་ཏུ་ལྔ་པའི་གསུམ་པ་གཞག །གཡོན་དུ་ཡི་གེ་གཅིག་པ་ལ། །དང་པོའི་བཅུ་གཅིག་པ་སྟེང་དུ་སྦྱར་ལ་གཞག་གོ །གཉིས་པའི་དང་པོ་ལ། མེའི་ས་བོན་ལ་དང་པོའི་གཉིས་པ་འོག་ཏུ་སྦྱར་ལ་དགོད། །གཉིས་པ་ལ། གསུམ་པའི་གསུམ་པ་ལ་དང་པོའི་འོག་ཏུ་སྦྱར་ལ་གཞག །གསུམ་པ་ལ་བརྒྱད་པའི་གསུམ་པ་དགོད། བཞི་པ་ལ་ལྔ་པའི་གསུམ་པ་ལ། དང་པོའི་བཅུ་པ་སྟེང་དུ་སྦྱར་ལ་དགོད། །ལྔ་པ་ལ་བདུན་པའི་གཉིས་པ་ལ་དང་པོའི་ལྔ་པ་འོག་ཏུ་སྦྱར་ལ་དགོད། དྲུག་པ་ལ་བཞི་པའི་ལྔ་པ་དགོད། བདུན་པ་ལ་བདུན་པའི་དང་པོ་ལ་དང་བཅུ་གསུམ་པ་སྟེང་དུ་སྦྱར་ལ་དགོད། བརྒྱད་པ་ལ་ལྔ་བའི་ལྔ་པ་དང་པོའི་གསུམ་པའི་སྟེང་དུ་སྦྱར་ལ་དགོད། །དགུ་པ་ལ་བདུན་པའི་གཉིས་པ་དགོད། བཅུ་པ་ལ་རླུང་གི་ས་བོན་གཞག །བཅུ་གཅིག་པ་ལ་གསུམ་


DTG047_Page_0343
[མ་དཔེ་གཟིགས་ན་འདིར་གནོན།]

པའི་དང་པོ་ཉིས་བརྩེགས་དགོད། བཅུ་གཉིས་པ་ལྔ་པའི་ལྔ་པ་ལ་དང་པོའི་གསུམ་པ་སྟེང་དུ་སྦྱར་ལ་གཞག །ནང་གི་བར་གྱི་སྟོང་པ་ལ་རཾ་གཉིས་ཀྱི་བར་དུ་བསྒྲུབ་བྱའི་མིང་གཞུག་གོ །ཐ་མ་ལ་ཡི་གེ་བཅུ་པའི་སྔགས་ཇི་ལྟ་བ་བཞིན་ཤེས་པས་མིང་དང་སྤེལ་ཏེ་བསྐོར་བར་བྱའོ། །ཧཱུཾ་བརྒྱད་ཀྱིས་བསྐོར་རོ། །དེ་ལྟར་བྲིས་ནས་ཁྲོ་བོ་ཆེན་པོའི་ཏིང་ངེ་འཛིན་དང་སྤྲུལ་པར་ལྡན་པས། བསྒྲུབ་བྱ་ལྷ་དང་དབྲལ་བ་མན་ངག་ཇི་ལྟ་བ་བཞིན་བྱས་ནས། བསྒྲུབ་བྱ་རླུང་གི་དཀྱིལ་འཁོར་ལ་བཞག་ནས་ཨོཾ་ཡ་མ་རཱ་ཛ་ས་དོ་མེ་ཡ། ཡ་མེ་དོ་རུ་ཎ་ཡོ་ད་ཡ། ཡ་ད་ཡོ་ནི་ར་ཡ་ཀྵེ་ཡ། ཡཀྵེ་ཡ་ཙ་ནི་རཱ་མ་ཡ། ཨཱ་ཀཪྵ་ཡ་ཛཿ་ཧཱུཾ་ཧཱུཾ་ཕཊ་ཕཊ། ཡང་ན་ཡི་གེ་བཅུ་པ་དང་སྤེལ་བར་བྱའོ། །དེ་ལྟར་བརྗོད་པས་འོད་ཟེར་ལྕགས་ཀྱུ་ལྟ་བུས་སྙིང་ག་ནས་བཟུང་ནས་འོངས་ཏེ། འཁོར་ལོ་ལ་གཞུག་པར་བྱའོ། །གཞུག་པ་གསལ་བར་གྱུར་ནས་དྲིལ་ཏེ། དུར་ཁྲོད་ལ་སོགས་པའི་བདུན་པོ་དང༌། རྣམ་པར་སྣང་མཛད་དང༌། རྡོ་རྗེ་ཆུ་དང༌། དུར་ཁྲོད་ཀྱི་སོལ་བ་རྣམས་ཀྱིས་བསྒྲུབ་བྱའི་གཟུགས་བརྙན་སོར་བརྒྱད་པའི་ཚད་བྱས་ལ། དེའི་སྙིང་གར་འཁོར་ལོ་གཞུག་པར་བྱའོ། །ཕུར་བུ་གནས་ལྔར་བཏབ་ཅིང༌། ཚིགས་ཐམས་ཅད་དུ་ཚེར་མ་རྣོན་པོས་གདབ་པོ། །དེ་ནས་ཐོད་པ་གཉིས་ཀྱི་ནང་དུ་བཅུག་ལ། སྐྲའི་སྐུད་པས་དཀྲིས་ཏེ། སྔགས་ཀྱི་འཁོར་ལོ་རྣམ་པ་གཉིས་ཀྱིས། མན་ངག་ཇི་ལྟ་བའི་རིམ་པ་བཞིན་དུ་རྣལ་འབྱོར་བཞིའམ། གཅིག་གང་ཡང་རུང་བས་རིམ་པ་བཞིན་དུ་གསད་པར་བྱའོ། །དེའི་གསང་སྔགས་ནི། གོང་གི་བསྟན་པ་དང༌། མཱ་ར་ཡ་སྤེལ་པ་ཡིན་ནོ། །དེ་ནས་ས་བདུན་པོ་དེ་དག་ལ། གཤིན་རྗེའི་གཟུགས་ཁྲུ་གང་བའི་ཚད་ལ་ཞལ་རྣམ་པར་བསྒྱུར་བ་དང༌། ཕྱག་གཉིས་པ་ཞལ་གཅིག་པ། ཕྱག་ན་རལ་གྲི་དང༌། ཞགས་བསྡིགས་མཛུབ་ཅན། གཅེར་བུ་སྐྲ་གྲོལ་པར་གྱུར་པའོ། །དེའི་ཐུགས་ཀར་ཐོད་པ་བཅུག་སྟེ། ནམ་ཕྱེད་ནའམ། ཉི་མ་ཕྱེད་དུར་ཁྲོད་དུ་ཤིན་ཏུ་རིང་བར་བརྐོས་ཏེ། དེར་ལས་ཀྱི་གཤིན་རྗེའི་དམ་ཚིག་སེམས་དཔའ་བསྐྱེད་ལ། དེ་ལ་ཡེ་ཤེས་སེམས་དཔའ་བཅུག་སྟེ། གཉིས་སུ་མེད་པར་བྱས་ཏེ། མཆོད་པ་དང་གཏོར་མ་བཏང་བས་མཉེས་པར་བྱས་ནས་མགོ་ལྷོ་ཕྱོགས་སུ་ཁ་འོག་ཏུ་


DTG047_Page_0344
[མ་དཔེ་གཟིགས་ན་འདིར་གནོན།]

བསྟན་ལ། གོང་དུ་བསྟན་པའི་སྔགས་དང་སྟཾ་བྷ་ན་ཡ་སྤེལ་བས་མནན་པར་བྱའོ། །ཁྱིམ་དུ་ལོག་སྟེ་ཤིན་ཏུ་ཁྲོས་པའི་སེམས་དང་ལྡན་པས། ཡི་གེ་བཅུ་པའི་སྔགས་བཟླས་ན། གདོན་མི་ཟ་བར་འཆི་བར་འགྱུར་རོ། །སྤུང་སྟེ་བཀྲུས་ན་གྲོལ་བར་འགྱུར་རོ། །བསྟན་པ་བསྲུང་ཕྱིར་གསད་པ་ཡི། །འཁོར་ལོ་ལས་ཀྱི་རིམ་པ་ཞིག །བྱས་པའི་དགེ་བ་ཅུང་ཟད་དེས། །འགྲོ་རྣམས་འཁོར་བ་ལས་བརྒལ་ནས། ཁྲོ་ཆེན་དེ་ཉིད་ཐོབ་པར་ཤོག །ལ་ལི་ཏས་མཛད་པ་རྫོགས་སོ།།

དཔལ་དེ་ཁོ་ན་ཉིད་གྲུབ་པ།
ཀེ་ར་ལི་པ།


DTG047_Page_0344
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། ཤྲཱི་ཏཏྟྭ་སིདྡྷི། བོད་སྐད་དུ། དཔལ་དེ་ཁོ་ན་ཉིད་གྲུབ་པ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །སངས་རྒྱས་བྱང་ཆུབ་རྡོ་རྗེ་ནི། །ཚེ་འདིས་འགྲུབ་ཀྱི་གཞན་དུ་མིན། །ལུས་དང་ངག་ཡིད་ལེགས་གནས་པ། །མེད་པར་འགྲུབ་པར་མི་འགྱུར་རོ། །འདོད་པའི་ལོངས་སྤྱོད་རྒྱུན་མི་འཆད། །མེད་ན་དེ་ཡང་འགྲུབ་མི་འགྱུར། །དེ་ཡང་ཇི་ལྟར་འདོད་པ་བསྟེན། །གཉིས་མེད་ཡེ་ཤེས་དག་པ་ལས། །དེ་ལྟར་མིན་ན་ལོག་པར་ལྟུང༌། །དེ་ནས་སྡུག་བསྔལ་བརྒྱུད་མར་འབྱུང༌། །དེ་ཕྱིར་སྔགས་ཀྱིས་བྱིན་བརླབས་པའི། །མཁས་པ་དག་པས་སྔོན་འགྲོ་སྤྱད། །ཇི་ལྟར་ཆུ་ཡི་ཐིགས་པ་ནི། །རྒྱ་མཚོར་བབས་ན་ལན་ཚྭར་འགྱུར། །ལན་ཚྭ་འོ་མའི་མཚོར་ཞུགས་ནས། །དེ་ཉིད་སླར་ཡང་བདུད་རྩིར་འགྱུར། །ཇི་ལྟར་དུག་སྤྲུལ་དེ་ཉིད་ཤེས། །ནུས་པ་འཕྲོག་པར་བྱེད་ནུས་མེད། །དེ་ཉིད་རྒྱུད་གཞན་དག་ལ་ནི། །ལྔ་པོའི་གནས་སྐབས་ལས་མི་འདའ། །གཞན་ཡང་འདོད་པས་ཟིལ་ནོན་ན། །འདོད་པ་ཉིད་ནི་སྨན་ཡིན་ནོ། །ཇི་ལྟར་དུག་གིས་གདུངས་པ་ལ། །དྲུག་ཉིད་སྨན་དུ་ཆེ་བ་ཡིན། །ཇི་ལྟར་མེ་ཡིས་ཚིག་ལ་མེ། །ཚེར་མས་ཟུག་ལ་ཚེར་མ་ཉིད། །དེ་བཞིན་ཉོན་མོངས་ཀྱིས་ཉེན་ན། །ཉོན་མོངས་ཉིད་ནི་བདུད་རྩིར་ཆེ། །དཔེར་ན་དུག་གི་དེ་ཉིད་ཤེས། །དུག་ཟོས་ཀྱང་ནི་གནོད་མི་འགྱུར། །དེ་བཞིན་ཡུལ་གྱི་དེ་ཉིད་ཤེས། །འདོད་པ་སྤྱད་པས་གནོད་པ་མེད། །ཇི་ལྟར་འཇམ་གྱི་པདྨ་ནི། །འདམ་ལ་གནས་ཀྱང་དེས་མི་གོས། །དེ་ཉིད་རིག་པས་རྟག་ཏུ་ནི། །འདོད་པ་རོལ་པས་སྤྱད་པར་བྱ། །དེ་ཕྱིར་ཀུན་ནས་དོགས་མེད་པར། །ཁྱད་པར་དུ་ནི་ལོངས་སྤྱོད་འགྱུར། །འདོད་པ་ལྔ་ལ་བརྟེན་


DTG047_Page_0345
[མ་དཔེ་གཟིགས་ན་འདིར་གནོན།]

བྱས་ན། །དངོས་གྲུབ་མྱུར་དུ་ངེས་ཐོབ་འགྱུར། །དཀའ་ཐུབ་བརྟུལ་ཞུགས་སྨྱུང་བ་ཡིས། །ཁམས་རྣམས་སྐམས་པར་འགྱུར་པ་ཡིན། །སྐམས་པས་སྡུག་བསྔལ་འགྱུར་བ་སྟེ། །སྡུག་བསྔལ་གྱིས་ནི་སེམས་གཡེངས་འགྱུར། །གཡེངས་པས་བྱང་ཆུབ་གཞན་དུ་འགྱུར། །དེ་ཕྱིར་དངོས་གྲུབ་མཆོག་གཉེར་ན། །དཀའ་ཐུབ་བརྟུལ་ཞུགས་སྤྱད་མི་བྱ། །ཇི་ལྟར་བདེ་བས་དེ་བཞིན་གནོས། །བདེ་བ་སྤངས་ན་དངོས་གྲུབ་མེད། །དེ་བས་ཡིད་འོང་གནས་སུ་ནི། །ཉམས་དགའི་བུ་མོ་བཅུ་གཉིས་མ། །ཡིད་འོངས་མིག་གི་དཀྱུས་རིང་མ། །གཟུགས་དང་ལང་ཚོས་རྣམ་པར་མཛེས། །བརྟན་ཞིང་མི་གཡོ་དམ་ཚིག་ཅན། །འདམ་ལས་སྐྱེས་པའི་དྲི་འབབ་མ། །ཆགས་པ་ཆེན་པོའི་རོས་རོལ་པ། །མཆོག་ཏུ་མཁས་ཤིང་སྒེག་པ་དང༌། །ཉམས་དང་ལྡན་པའི་རྣལ་འབྱོར་པས། །རང་ཉིད་འཁོར་ལོའི་དབུས་སུ་གནས། །དམ་ཚིག་ཅན་ནི་རྒྱུད་དག་པའི། །ནང་དུ་ཉིན་མཚན་འདུ་བར་བྱ།། སྤུ་ལྡང་འདར་ཞིང་ཆེར་འདར་ལ། །འཛུམ་དང་དགོད་དང་རབ་ཏུ་དགོད། །མྱོས་པ་དང་ནི་བཅས་པ་ཡི། །འབེབས་པ་རྣམ་པ་བདུན་དུ་བཤད། །རེངས་དང་མྱོས་དང་འགྱུར་བ་སྟེ། །རོལ་དང་ཡུར་དད་ཤིན་ཏུ་འཕེལ། །རྐང་པ་འདོར་དང་ལག་པ་བསྒྱུར། །ཕྱག་རྒྱ་མཚན་མ་ལྟ་སྟངས་དང༌། །སྔགས་དང་རྒོད་དང་དྲག་པོ་སོགས། །ཀི་ལི་ཀི་ལི་ཕྲེང་སྒྲོགས་བྱེད། །རོལ་པ་དཔའ་བོ་རྣམ་པར་ཉེད། །ས་བསྐྱོད་ཅ་ཅོའི་བྱེ་བྲག་ལྡན། །བརྒྱལ་བ་རབ་ཞི་དུ་བས་རྟོགས། །བྱམས་ཤིང་དགའ་བ་རྒྱ་མཚོ་ནི། །བདེ་བའི་རྟགས་ལས་སྐྱེས་པའི་འོད། །ངོ་བོ་ཉིད་ཀྱིས་གསལ་བའི་ཡིད། །གཉིས་མེད་རྣམ་པར་གསལ་བ་ཡི། །རྫུ་འཕྲུལ་མངོན་ཤེས་དག་དང་ལྡན། །དེ་ལྟར་བདེན་དོན་རབ་ཞི་བའི། །བྱེ་བྲག་བཅུ་གཉིས་དག་གིས་མཛེས། །ཨེ་ཡི་ཆ་བྱད་བཟང་པོ་གང༌། །དབུས་སུ་ཝཾ་གྱིས་རྣམ་པར་བརྒྱན། །བདེ་བ་ཀུན་གྱི་གནས་ཡིན་ཏེ། སངས་རྒྱས་རིན་ཆེན་ཟ་མ་ཏོག །དེར་ནི་དགའ་བ་སྐྱེ་འགྱུར་ཏེ། །སྐད་ཅིག་དབྱེ་བས་ཕྱེ་བ་ནི། །དགའ་བའི་གྲངས་ཀྱི་རིམ་པ་ཡིས། །དེ་དག་སོ་སོར་གསལ་བར་བྱས། །སྟོང་ཉིད་གསུམ་གྱིས་ཉམས་སྦྱར་བས། །ཐམས་ཅད་སྟོང་ཉིད་རབ་ཏུ་གསལ། །དེ་ཉིད་གསལ་བས་དག་པ་ནི། །མཆོག་གི་གོ་འཕང་དེ་གསལ་འགྱུར། །དེ་ཕྱིར་


DTG047_Page_0346
[མ་དཔེ་གཟིགས་ན་འདིར་གནོན།]

མི་གཡོ་ཕྲ་བའི་ཡིད། །ལྡན་པའི་རྣལ་འབྱོར་བས་མཚོན་བྱ། །ཇི་སྲིད་གསལ་བར་མ་གྱུར་པ། །དེ་སྲིད་སྒོམ་པ་ལ་འཇུག་བྱ། །རབ་ཏུ་གསལ་བ་ཐོབ་ནས་ནི། །རང་དགའི་གཟུགས་སུ་སྐྱེ་བར་འགྱུར། །དེར་ནི་སྐད་ཅིག་མ་བཞི་དང༌། །དེ་བཞིན་དུ་ནི་དགའ་བ་བཞི། །དེ་ལ་སྣ་ཚོགས་སྐད་ཅིག་དང། །རྣམ་པར་སྨིན་པ་རྣམ་པར་ཉེད། །མཚན་ཉིད་མེད་པར་བརྗོད་པ་ཡི། །བྱེ་བྲག་མཁས་པས་ཤེས་པར་བྱ། །སྣ་ཚོགས་དུ་མའི་རྣམ་པ་ཅན། །འཁྱུད་དང་འོ་བྱེད་ལ་སོགས་པའོ། །རྣམ་སྨིན་དེ་ལས་གྱུར་པ་སྟེ། །བདག་གི་བདེ་བ་ལ་དཔྱོད་མཛེས། །རྣམ་ཉེད་དཔྱོད་པའི་བདག་ཉིད་དེ། །བདག་གི་བདེ་བ་ལ་དཔྱོད་མཛེས། །དེ་དག་ལས་གཞན་མཚན་ཉིད་བྲལ། །དགའ་བ་དང་པོ་མཆོག་དགའ་དང༌། །དགའ་བྲལ་ལ་སོགས་ལྷན་ཅིག་སྐྱེས། །དགའ་བའི་བདེ་བ་ཅུང་ཟད་བ་དེ། །མཆོག་ཏུ་དགའ་བ་དེ་བས་ལྷག །དགའ་བྲལ་ཆགས་པ་བྲལ་སྟེ། །ལྷན་ཅིག་སྐྱེས་པ་དེ་དག་སྤངས། །བརྒྱལ་དང་ཕྱི་མོ་ཕྱེད་ཙམ་དང༌། །ཕྱི་མོ་ཞེས་བྱ་སྐད་ཅིག་གསུམ། །དམ་པའི་བདེ་བ་རྣམ་པར་རོལ། །དབྱེ་བས་ལྷན་ཅིག་སྐྱེས་པ་ཤེས། །བརྒྱལ་བ་ཀུན་ནས་ཡེ་ཤེས་མེད། །ཅུང་ཟད་ཤེས་པ་ཕྱི་མོའི་ཕྱེད། །རྣམ་པ་ཀུན་གྱི་མཆོག་ལྡན་པའི། །ཡེ་ཤེས་ཕྱི་མོ་ཉིད་དུ་འགྱུར། །དེ་ཕྱིར་དེ་ཉིད་ཡེ་ཤེས་ནི། །གཉིས་མེད་ཡེ་ཤེས་རབ་ཏུ་གསལ། །དེ་ལ་ཆགས་དང་ཆགས་བྲལ་མེད། །གཉི་ག་མ་ཡིན་སྟོང་ཉིད་མིན། །ཀུན་མིན་ཐམས་ཅད་མིན་པ་མིན། །ཡང་ན་ཐམས་ཅད་རྣམ་པར་ཐིམ། །ཇི་ལྟར་ཆར་གྱི་རྒྱུ་སྣ་ཚོགས། །རོ་གཟུགས་དུ་མ་གཞན་ཡིན་ཀྱང༌། །སྣོད་གཅིག་ཏུ་ནི་ཞུགས་པ་ན། །ཞུ་ནས་རོ་གཅིག་ཉིད་དུ་འགྱུར། །དེ་བཞིན་ཡེ་ཤེས་བདེ་ཆེན་པོ། །རྣམ་པར་ངོ་བོ་ཉིད་ཀྱིས་གསལ། །གཉིས་མེད་རྣམ་པའི་རྣལ་འབྱོར་གྱིས། །ཆོས་ཀུན་རྣམ་པར་བཅོམ་པས་ན། །ཡེ་ཤེས་རྒྱུན་འབབ་གཏོང་བའི་བློ། །མཁས་པས་དེ་ལྟ་བུ་ཉིད་མཚོན།། ཡི་གཡོ་སྒྲིབ་བྲལ་ཕྲ་བ་ཡི། །ཐིག་ལེའི་གཟུགས་ཅན་རྟོག་པ་མེད། །ཐོག་མཐའ་མེད་པའི་དེ་ཉིད་ནི། །མ་བྱུང་མ་བྱས་མཆོག་ཡིན་ནོ། །སྐྱེ་བོ་ཆོས་རྣམས་ཐམས་ཅད་ཀྱི། །གཞི་ནི་དེ་ཉིད་ཉིད་ཡིན་ནོ། །སངས་རྒྱས་བྱང་ཆུབ་སེམས་དཔའ་དང༌། །རྣལ་འབྱོར་པ་ཡི་དེ་ཉིད་ལ། །མཐོང་བ་


DTG047_Page_0347
[མ་དཔེ་གཟིགས་ན་འདིར་གནོན།]

དེ་ཉིད་མ་མཐོང་པ། །དེ་ལ་ཕྱི་རོལ་ཅི་ཞིག་བསམ། །དེ་ཕྱིར་འཁྲུལ་བའི་མཆོད་པ་སོགས། །ཕྱི་རོལ་པ་ཡིས་ཅི་བྱར་ཡོད། །ཐམས་ཅད་སྤངས་ནས་དེ་ཉིད་བསྒོམ། །ཐམས་ཅད་འདི་ལས་འགྲུབ་པར་འགྱུར། །ཨཱ་ལི་ཀཱ་ལི་མཉམ་སྦྱོར་ལས། །གང་ཚེ་ནོར་བུར་ཆུད་པ་ན། །མན་ངག་གིས་ནི་རླུང་བཟུང་སྟེ། །དེ་ཚེ་ཡེ་ཤེས་མཐོང་བས་འགྲུབ། །བསྐལ་པ་མཐའ་ཡས་བར་དུ་ནི། །དེར་ནི་འདོད་པ་ཡང་དག་གནས། །འོད་གསལ་བ་ཡི་གནས་ཐོབ་ནས། །སེམས་ཅན་ཀུན་གྱིས་ཕྱག་བྱས་པའི། །ཐ་མལ་སྣང་བའི་རྣལ་འབྱོར་གྱིས། །བཞི་པའི་དེ་ཉིད་ལ་བརྟེན་བྱ། །སྔོན་དུ་གོམས་བྱེད་རྣལ་འབྱོར་པས། །དེས་ནི་མྱུར་དུ་འགྲུབ་པར་འགྱུར། །རྒྱུ་ལ་འབྲས་བུའི་རྒྱས་གདབ་ཅིང༌། །འབྲས་བུ་ལ་ཡང་རྒྱུས་རྒྱས་གདབ། །རྒྱུ་འབྲས་གཅིག་ཏུ་རྒྱས་བཏབ་པས། །ཕྱག་རྒྱ་ཆེན་པོ་སྐྱེ་བར་འགྱུར། །མཚན་མོ་སྣང་བའི་ཆ་སྟེ་གསལ་བའི་ཉི་མའི་འོད་ཟེར་འགྱེད་པ་སྣང་བ་མཆེད་པ་ཡིན། །མཚམས་ནི་སྣང་བ་ཐོབ་པ་རང་གི་རང་བཞིན་རྣམས་ཀྱིས་ལན་ཅིག་མིན་པར་འགྲོ། །མཚན་ཉིད་ཉིན་པར་མིན་པ་མཚམས་མིན་གན་ཞིག་རང་བཞིན་རྣམས་དང་རྣམ་བྲལ་བ། །དེ་ནི་བྱང་ཆུབ་ཡིན་པར་བླ་མ་མཆོག་བཤད་རྣལ་འབྱོར་པ་ཉིད་ཡུལ། །ཇི་ལྟར་ཕྱི་རོལ་དེ་བཞིན་ནང༌། །ཇི་ལྟར་ནང་བཞིན་ཕྱི་རོལ་ཏེ། །གཉིས་སུ་མེད་པའི་རྣལ་འབྱོར་འདིས། །སྒྲུབ་པ་རུ་ནི་རིགས་པ་ཡིན། །སློབ་དཔོན་ཆེན་པོ་ཀེ་ར་ལི་པས་མཛད་པ་དེ་ཁོ་ན་ཉིད་གྲུབ་པ་རྫོགས་སོ།།

དཔལ་རྡོ་རྗེ་འཇིགས་བྱེད་ཀྱི་དམ་ཚིག་ལ་འཇུག་པའི་དཀྱིལ་འཁོར་གྱི་ཆོ་ག།
ལ་ལི་ཏ་བཛྲ།

སྔོན་དུ་བསྙེན་པའི་ཆོ་ག


DTG047_Page_0347
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། ཤྲཱི་བཛྲ་བྷཻ་ར་ཝ་ས་མ་ཡ་མཎྜལ་བི་དྷིཿ། བོད་སྐད་དུ། དཔལ་རྡོ་རྗེ་འཇིགས་བྱེད་ཀྱི་དམ་ཚིག་ལ་འཇུག་པའི་དཀྱིལ་འཁོར་གྱི་ཆོ་ག །འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །ཐོག་མར་ངེས་པར་རིམ་པར་བརྒྱུད་པ་དང༌། །དེ་ཁོ་ན་ཉིད་བཅུ་ལ་སོགས་པའི་ཡོན་ཏན་དང་ལྡན་པའི་བླ་མ་ལ། ཐེག་པ་ཆེན་པོར་རིགས་ངེས་ཤིང་དད་པ་དང་ལྡན་པའི་སློབ་མས། གོ་འཕང་མཆོག་ཐོབ་པར་འདོད་པའི་དོན་དུ། ཡང་དང་ཡང་དུ་གསོལ་བ་བཏབ་པ་དང༌། བཀྲ་ཤིས་པའི་གནས་དང༌། དུས་དེར་རྗེས་སུ་གཟུང་བར་བྱས་ནས། །བླ་མ་ལ་མཆོད་པ་རྒྱ་ཆེན་པོ་དང་བཅས་པས། དཔལ་རྡོ་རྗེ་འཇིགས་བྱེད་མཉེས་པར་བྱ་བའི་དོན་དུ། གནང་བ་རབ་འབྲིང་ཐ་མ་གང་ཡང་


DTG047_Page_0348
[མ་དཔེ་གཟིགས་ན་འདིར་གནོན།]

རུང་བ་ཐོབ་པ་དེས། སློབ་མ་རྣམས་ཀྱང་ཇི་ལྟ་བ་བཞིན་སྦྱང་བ་བྱས་ལ། སྦྱིན་སྲེག་ལ་སོགས་པའི་ཡོ་བྱད་རྣམས་ཚུལ་བཞིན་དུ་ཚོགས་པར་གྱུར་པ་ནི། སྔོན་དུ་བསྙེན་པའི་ཆོ་གའོ། །

ས་ཡོངས་སུ་གཟུང་བའི་ཆོ་ག


DTG047_Page_0348
[མ་དཔེ་གཟིགས་ན་འདིར་གནོན།]

དེ་ནས་ཇི་སྐད་དུ་གསུངས་པའི་གནས་སུ་སེམས་དཔའ་དང་བཅས་པས། ལས་ཐམས་ཅད་པའི་ཆུས་བསང་གཏོར་བྱས་ལ། དེར་དཀྱིལ་འཁོར་གྱི་འཁོར་ལོ་བསྒོམས་ཤིང་མཆོད་ནས་གཏོར་མ་བཏང་པའི་བར་དུ་བྱ་སྟེ། དེ་ནས་སའི་ལྷ་མོ་ལས་བླང་བ་ལ་སོགས་པ་བྱས་ལ། དེ་ནས་བདུད་རྩི་འཁྱིལ་པའི་ཏིང་ངེ་འཛིན་ལ་གནས་པས། གང་ལ་དམིགས་པའི་ས་དེ་ལ་ཚོན་ཐག་དང༌། ཕུར་བུས་བསྐོར་ཏེ་ཇི་ལྟ་བར་བརྐོ་ཞིང་སྦྱངས་ནས། མཎྜལ་བའི་ཀོ་བ་ཙམ་པ་བྱས་ལ། ཅི་རིགས་པའི་ས་གཏེར་གཞུག་ཅིང་བའི་རྣམ་ལྔ་སྤོས་དང་བཅས་པས་འཐས་པར་བཅགས་ཏེ། རྒྱན་གྱིས་བརྒྱན་པ་དང༌། མཆོད་པའི་ཡོ་བྱད་ཀུན་བཀྲམ་ལ། རྒྱན་ཆ་དང་བཅས་པའི་སློབ་དཔོན་དེས། མཎྜལ་གྱི་སྟེང་དུ་རྣལ་འབྱོར་རྫོགས་པར་བསྒོམས་པའི་རྗེས་ལ། ས་གཞི་ཐམས་ཅད་སྟོང་པའི་ངང་ལས་བྱུང་བའི་སྣ་ཚོགས་རྡོ་རྗེ་རྒྱ་གྲམ་འབར་བར་གྱུར་པར་མཐོང་བ་དང་སློབ་མ་ལྷ་མོ་བཞིའི་ཏིང་ངེ་འཛིན་ལ་གནས་པས། ཕྱོགས་བཞི་ནས་དཀྱིལ་འཁོར་བྱིན་གྱིས་རློབ་པའི་དོན་དུ་བཞེངས་པར་གསོལ་བ་བཏབ་པའི་རྗེས་ལ། རྡོ་རྗེ་སློབ་དཔོན་དེ་མཉམ་པར་བཞག་པ་ལས་ལངས་ཏེ། མིག་གཉིས་སུ་མ་དང་ཨ་ལས་ཉི་མ་དང་ཟླ་བ་གསལ་བར་བྱས་ཏེ། དེ་དག་གི་འོད་ཟེར་གྱིས་འཇིག་རྟེན་གྱི་ཁམས་ཐམས་ཅད་ཟིལ་གྱིས་གནོན་པར་བསྒོམས་ཏེ། རྐང་པ་གཉིས་ཧཾ་ལས་རྡོ་རྗེ་རྒྱ་གྲམ་འབར་བར་བསམ་སྟེ། དབང་ལྡན་མཚམས་ནས་གཡས་ཕྱོགས་སུ་བསྐོར་བ་ལན་གསུམ་གསུམ་ཙམ་དུ་བསྐོར་ཞིང༌། ཧཱུཾ་བཞི་པ་དང་བཅས་པས་འབྱུང་པོ་ཀུན་ལ་འཇིགས་པ་སྦྱིན་པར་བྱ་སྟེ། དེ་ནས་དཀྱིལ་འཁོར་གྱི་སྟེང་དུ་འཇིགས་པ་ཆེན་པོས་གནས་ཏེ། ཕྱོགས་ཀུན་དུ་རྣམ་པར་བལྟ་བའི་གར་རྣམས་བྱས་ལ། དེ་ཉིད་དུ་འདུག་ནས་ནན་ཏན་དུ་བགེགས་བྱེད་པར་འདོད་པ་རྣམས་གཞོམ་པར་འདོད་པའི་དོན་དུ། བདག་ཉིད་ཀྱི་སྙིང་གནས་ངེས་པར་འཕྲོས་པའི་ཁྲོ་བོ་བདུད་རྩི་འཁྱིལ་པ་ལྔ་བཏོན་པའི་ཕུར་པ་ལ་སྟོད་ཁྲོ་བོར་གྱུར་པ་དག །དཀྱིལ་འཁོར་དེའི་དབུས་དང་གྲྭ་བཞིར་གདབ་སྟེ། དེའང་གཡས་པས་ཐོ་བ་གཡོན་པས་ཕུར་པ་བཟུང་སྟེ། ཕྱོགས་སྐྱོང་བཅུ་ལ།


DTG047_Page_0349
[མ་དཔེ་གཟིགས་ན་འདིར་གནོན།]

བཏབ་ཅིང༌། ཐལ་ཕྱིན་པར་གྱུར་པར་དམིགས་ཏེ། ཨོཾ་གྷ་གྷ་གྷཱ་ཏ་ཡ་གྷཱ་ཏ་ཡ། །སརྦ་དུཥྚཱ་ན་ཕཊ་ཕཊ། ཀཱི་ལ་ཡ་ཀཱི་ལ་ཡ། སརྦ་པཱ་པཾ་ཕཊ་ཕཊ། ཧཱུཾ་བཛྲ་ཀཱི་ལ་ཡ་སརྦ་བིགྷྣཱ་ན། བཛྲ་དྷ་ར་ཨཱ་ཛྙཱ་པ་ཡ་ཏི་ཀཱ་ཡ་ཝཱ་ཀ་ཙིཏྟ་བཛྲ་ཀཱི་ལ་ཡ་ཧཱུཾ་ཕཊ། ཅེས་པས་གདབ་པར་བྱའོ། །བདུད་རྩི་འཁྱིལ་པའི་སྔགས་ལ་སོགས་པས་ཀྱང་ཚར་གཅད་པའོ། །ས་ཡོངས་སུ་གཟུང་བའི་ཆོ་གའོ།། །།

ལྷ་ལྷག་པར་གནས་པའི་ཆོ་ག


DTG047_Page_0349
[མ་དཔེ་གཟིགས་ན་འདིར་གནོན།]

དེའི་རྗེས་ལ་སྟན་ལ་ལེགས་པར་འདུག་ནས། གཡས་པའི་རྩེ་གསུམ་ཕྱག་རྒྱས་ནི། །ས་ལ་བསྣུན་པ་ཙམ་གྱི་ཚེ། །པདྨ་དང་བཅས་ལྷ་མོ་ནི། །ལྟེ་བ་ཡན་ཆད་འཐོན་པ་ལ། །ཐལ་སྦྱར་བཀའ་ཉན་ཚུལ་བསྒོམས་ནས། །མཆོད་ཅིང་གསོལ་གདབ་བཀའ་བསྒོ་ནས། །གནང་བ་བྱིན་ཏེ་ས་དེར་ཐིམ། །དེ་ནས་མཎྜལ་དེ་དབུས་སུ། །དྲི་ཡིས་བྱུགས་པའི་མཎྜལ་གྲུ་བཞི་པ་ཅིག་བྱས་ཏེ། མེ་ཏོག་གི་ཚོམ་བུ་བྱའོ། །དེ་བཞིན་དྲིའི་ཐིག་ལེ་རེ་རེ་དང༌། མེ་ཏོག་གི་ཚོམ་བུ་ལྷའི་གྲངས་དང་མཉམ་པ་དགོད་པར་བྱའོ། །ཤྲཱི་བཛྲ་བྷཻ་ར་ཝ་ཨ་དྷི་ཥྛ་ན། ཞེས་པས་བསྙེན་པར་གྱུར་བའི་དཀྱིལ་འཁོར་དེ་ཉིད་འདིར་བརྟན་པར་གྱུར་པར་བལྟའོ། །དེ་ནས་རང་བཞིན་གྱི་དཀྱིལ་འཁོར་སྤྱན་དྲངས་ཏེ། །དེ་ཉིད་དུ་དབྱེར་མེད་པར་བཞུགས་པ་ལ་མཆོད་པ་དང་བསྟོད་པའི་སྒོ་ནས་གསོལ་བ་གདབ་སྟེ། བཅོམ་ལྡན་འཇམ་པའི་རྡོ་རྗེ་དང༌། །རིག་སྔགས་རྒྱལ་ལ་ཕྱག་འཚལ་ལོ། །བདག་གིས་གཤིན་རྗེ་གཤེད་དཀྱིལ་འཁོར། །མགོན་པོ་བདག་ནི་འདྲི་བར་འཚལ། །སློབ་མ་རྣམས་ལ་ཕན་ཕྱིར་དང༌། །ཁྱེད་རྣམས་ལ་ཡང་མཆོད་པའི་ཕྱིར། །བཅོམ་ལྡན་བདག་ནི་གུས་པ་ལ། བྱིན་གྱིས་རློབས་པར་མཛད་དུ་གསོལ། །སངས་རྒྱས་ཐམས་ཅད་བདག་ལ་དགོངས། །འཁོར་ལོས་འགྲོ་བའི་དོན་མཛད་དང༌། །འབྲས་གནས་བྱང་ཆུབ་སེམས་དཔའ་དང༌། །གསང་སྔགས་ཀྱི་ནི་ལྷ་གཞན་དང༌། །འཇིག་རྟེན་སྐྱོང་བའི་ལྷ་རྣམས་དང༌། །འབྱུང་པོ་ཡང་དག་རྫོགས་པ་ཡི། །སངས་རྒྱས་བསྟན་ལ་མངོན་དགའ་བའི། །གང་སུ་ལྷ་ཡི་མིག་ཅན་ཀུན། །ཆེ་གེ་ཞེས་པའི་རྡོ་རྗེ་ཡིས། །གཤིན་རྗེའི་དཀྱིལ་འཁོར་ལས་བྱུང་བའི། །ཇི་ལྟར་ཉེ་བར་སྤྱོད་ནུས་པ། །འགྲོ་རྣམས་དོན་དུ་བྲི་བར་བྱ། །བདག་དང་སློབ་མར་བཅས་པ་ཀུན། །ཐུགས་རྗེས་ཉེ་བར་བཟུང་ནས་ནི། །ཐམས་ཅད་དཀྱིལ་འཁོར་ལ་བཞུགས་ཕྱིར། །


DTG047_Page_0350
[མ་དཔེ་གཟིགས་ན་འདིར་གནོན།]

བྱིན་གྱིས་རློབ་པར་མཛད་དུ་གསོལ། །བདུག་སྤོས་རོལ་མོ་བཅས་པ་ཡིས། །ཀུན་གྱིས་པུས་བཙུགས་གསོལ་བ་གདབ། །དེ་དག་གིས་ཀྱང་རྗེས་གནང་བ། །འགྲོ་མགོན་སྐྱོབས་གནས་ཡིན་པར་བསྒོ། །དྲིས་ལན་ཚུལ་དུ་མཆོད་བསྟོད་བྱའོ། །ལྷ་ལྷག་པར་གནས་པའི་ཆོ་གའོ།། །།

བུམ་པ་ལྷག་པར་གནས་པའི་ཆོ་ག


DTG047_Page_0350
[མ་དཔེ་གཟིགས་ན་འདིར་གནོན།]

དེ་ནས་རིན་པོ་ཆེའི་བུམ་པ་ཚད་དང་དབྱིབས་ཀྱིས་མཛེས་པ་དྲུག་གམ། །བཅུ་གཉིས་ལ་སོགས་པ་ལ་དཀར་པོར་བསྒྱུར་ཞིང༌། སྣ་ཚོགས་པདྨའི་སྟེང་དུ་རིགས་སོ་སོའི་ཕྱག་རྒྱ་བྲིས་ཏེ། ལས་ཐམས་ཅད་པ་ལ་རྡོ་རྗེ་རྒྱ་གྲམ་བྲིའོ། །སྙིང་པོའི་འབྲུ་ལྔ་དང༌། རིན་པོ་ཆེ་དང༌། སྨན་དང༌། དྲི་དང༌། སྙིང་པོ་རྣམས་ཀྱིས་དགང་བར་བྱ་ཞིང༌། སྤོས་རྣམས་དང་བཅས་པས་བཀང་ལ་མགུལ་ཆིངས་དང༌། མེ་ཏོག་གི་ཕྲེང་བ་དང༌། ཁ་རྒྱན་དང༌། གཟུངས་ཐག་རྡོ་རྗེ་ལ་བཏགས་པ་དང་བཅས་པ། ཡོལ་བ་བྱས་ལ། དེ་དག་མི་དམིགས་པ་ལས། རིན་པོ་ཆེ་ལས་གྲུབ་པའི་གཞལ་ཡས་ཁང་བའི་ནང་དུ། པདྨའི་སྡོང་པོའི་སྟེང་དུ་ཉི་ཟླའོ། །དེའི་སྟེང་དུ་ཆོ་ག་གསུམ་ལས་གཙོ་བོའི་སྐུ་བསྐྱེད་ལ། ཡེ་ཤེས་སེམས་དཔའ་བསྒྲུབས་ཏེ། མཆོད་ཅིང་བསྟོད་ནས། བཟླས་པ་བྱ་སྟེ། བརྒྱ་རྩ་བརྒྱད་ལ་སོགས་པ་ཅི་རིགས་པར་བཟླས་པའི་རྗེས་ལ། མཆོད་ཡོན་ལ་ཡི་གེ་བརྒྱ་པ་ཅི་རིགས་པ་བཟླས་པའི་ཆུས་རེག་པའི་ཚེ་ན་ཞུ་བའི་ཐིག་ལེའི་རང་བཞིན་དུ་བལྟའོ། །བུམ་པ་ཀུན་ལའང་དེ་བཞིན་དུ་སྦྱར་ཞིང༌། ལས་ཐམས་ཅད་པ་ནི་པདྨའི་སྟེང་དུ་བསྐྱེད་པར་བྱའོ། །བུམ་པ་ལྷག་པར་གནས་པའི་ཆོ་གའོ། །

སློབ་མ་ལྷག་པར་གནས་པའི་ཆོ་ག


DTG047_Page_0350
[མ་དཔེ་གཟིགས་ན་འདིར་གནོན།]

དེ་ནས་ཤར་ཕྱོགས་སུ་མཎྜལ་བྱ་སྟེ། སློབ་མས་སློབ་དཔོན་ལ་ཉེ་བར་ལོངས་སྤྱོད་པ་རྣམས་ཀྱིས་མཆོད་པར་བྱ་སྟེ། ཡང་སློབ་མ་ལ་སྐྱབས་སུ་འགྲོ་བ་ལ་སོགས་པ་བྱིན་པ་དེས་སློབ་དཔོན་ལ་གསོལ་བ་གདབ་སྟེ། དགའ་ཆེན་ཁྱོད་བདག་སྟོན་པ་སྟེ། །སློབ་དཔོན་ཁྱོད་ནི་དགོངས་སུ་གསོལ། །བྱང་ཆུབ་ཆེན་པོའི་ཚུལ་བསྟན་པའི། །མགོན་པོ་ཆེན་པོ་བདག་ལ་གསོལ། །དམ་ཚིག་དེ་ཉིད་བདག་ལ་སྩོལ། །བྱང་ཆུབ་སེམས་ཀྱང་བདག་ལ་སྩོལ། །སངས་རྒྱས་ཆོས་དང་དགེ་འདུན་ཏེ། །སྐྱབས་གསུམ་དག་ཀྱང་བདག་ལ་སྩོལ། །ཐར་པ་ཆེན་པོའི་གྲོང་མཆོག་ཏུ། །མགོན་པོ་བདག་ནི་འཇུག་པར་འཚལ། །ཞེས་ལན་གསུམ་གསོལ་བ་བཏབ་པའི་རྗེས་ལ། དེ་ནས་རྡོ་རྗེ་སློབ་དཔོན་དེས་སློབ་མ་རྣམས་སྤྲོ་


DTG047_Page_0351
[མ་དཔེ་གཟིགས་ན་འདིར་གནོན།]

བ་བསྐྱེད་པར་བྱ་བ་ནི། འཇིག་རྟེན་འདིར་ནི་ཀུན་མཁྱེན་རྣམས། །ཨུ་དུམྺཱ་རའི་མེ་ཏོག་ལྟར། །བརྒྱ་ལམ་ན་ནི་རེས་འགའ་ཞིག །འབྱུང་འགྱུར་ཡང་ནི་མི་འབྱུང་སྟེ། །གསང་སྔགས་སྤྱོད་པའི་ཆོ་ག་རྣམས། །དེ་བས་ཆེས་ཆེར་དཀོན་པ་སྟེ། །དེ་ལྟར་ཡིད་བཞིན་ནོར་བུའི་མཆོག ། དེད་དཔོན་བཟང་དང་བཅས་པས་བླང༌། །གལ་ཏེ་བག་མེད་གང་གྱུར་ན། །དུཿ་ཁ་རྒྱ་མཚོ་སྐྱེད་པར་བྱེད། །ཅེས་བརྗོད་ཅིང༌། དེ་ནས་གསང་སྔགས་ཀྱི་ཆེ་བའི་ཡོན་ཏན་ཉེ་བར་བརྗོད་པ་ནི། བུ་ཚུར་ཐེག་པ་ཆེན་པོ་ཡི། །གསང་སྔགས་སྤྱོད་པའི་ཆོ་ག་རྣམས། །ཁྱོད་ལ་ཡང་དག་བསྟན་པར་བྱ། །ཁྱོད་ཀྱིས་ཚུལ་ཆེན་བརྟེན་པར་བྱོས། །རྫོགས་པའི་སངས་རྒྱས་གང་འདས་དང༌། དེ་བཞིན་གང་དག་མ་བྱོན་དང༌། ད་ལྟར་བྱུང་བའི་རྫོགས་སངས་རྒྱས། །འགྲོ་ལ་ཕན་ཕྱིར་བཞུགས་པ་རྣམས། །དེ་དག་གིས་ཀྱང་གསང་སྔགས་ཀྱི། །ཆོ་ག་བཟང་པོ་འདི་རྙེད་ནས། །དཔའ་བོས་བྱང་ཆུབ་ཤིང་དྲུང་དུ། །ཐམས་ཅད་མཁྱེན་པ་ཚད་མེད་བརྙེས། །གསང་སྔགས་ཆོ་ག་མཉམ་མེད་དེས། །ཤཱཀྱ་སེང་གེ་ལ་སོགས་ཀྱིས། །བདུད་སྡེ་ཤིན་ཏུ་མི་བཟད་པའི། །དཔུང་ཆེན་དག་ཀྱང་དེ་ཡིས་བཅོམ། །འཁོར་ལོ་བསྐོར་ནས་མྱ་ངན་འདས། །དེ་བས་ཀུན་མཁྱེན་ཐོབ་བྱའི་ཕྱིར། །བུ་ཡིས་བློ་གྲོས་འདི་གྱིས་ཤིག །ཅེས་ལན་གསུམ་དུ་བརྗོད་ཅིང༌། ཆོ་ག་ཇི་ལྟ་བ་བཞིན་དུ་རྒྱུན་བཤགས་དང༌། །བྱང་ཆུབ་མཆོག་ཏུ་སེམས་བསྐྱེད་པར་བྱས་ལ། དེའི་ཆོ་ག་ནི་སློབ་མའི་ལུས་ལ། འབྱུང་བ་བཞིའི་འཁྲུལ་འཁོར་གྱིས་འོད་ཀྱི་གོང་བུ་དེ་ལས་ཡི་གེ་འབྲུ་གསུམ་དུ་གསལ་བ་དང༌། སྣ་གཡས་གཡོན་གང་ནས་རྒྱུ་བའི་རླུང་གིས་བསྡུས་ཏེ། ཐུགས་ཀ་ནས་གསང་བའི་གནས་ནས་བཏོན་ཏེ། མདུན་དུ་རྡོ་རྗེ་སེམས་དཔར་གྱུར་པ་དེ་ལ། སྐུ་གསུང་ཐུགས་རྡོ་རྗེར་གྱུར་པར་བྱིན་གྱིས་བརླབས་ལ། མཆོད་པ་རྣམས་ཕུལ་ཏེ། རང་གི་རིགས་ཀྱི་སྔགས་བརྒྱ་རྩ་བརྒྱད་ཟློས་སུ་གཞུག་གོ །དེ་ནས་བྱ་བའི་རྒྱུད་ལ་སོགས་པའི་སྡོམ་པ་དང༌། དམ་ཚིག་ལ་སོགས་པ་ཅི་རིགས་པ་དབོག་ཅིང༌། དགག་པ་དད་གནང་བ་ལ་སོགས་པའི་བྱེ་བག་དང༌། ཉེས་དམིགས་ཀུན་ཀྱང་བསྒྲག་པར་བྱའོ། །དེ་ནས་སོ་ཤིང་སྦྱིན་ཞིང་དག་པ་བརྗོད་པར་བྱ་སྟེ། ཨོཾ་ཧྲཱིཿ་བིདྡྷ་དྷརྨཱ་སརྦ་པཱ་པཾ་ནི་ཙཱ་སྱ་བི་ཤོདྷ་ཡ་སརྦ་པི་ཀ་ལྤ་ན་


DTG047_Page_0352
[མ་དཔེ་གཟིགས་ན་འདིར་གནོན།]

པཱ་པཾ་ཨ་པ་ནཱ་ཡ་ཧཱུཾ། ཞེས་ཀུན་ལ་མངོན་པར་བྱིན་གྱིས་བརླབ་པར་བྱའོ། །སྲུང་སྐུད་ལ་རིགས་ཀྱི་སྙིང་པོ་བཟླས་པར་རིག་པར་བྱའོ། །ཀུ་ཤའི་ཆུན་པོ་ལ་སྔས་དང་སྟན་ལ་ཡང་དག་པར་བསྔགས་ལ་ཡང་སྦྱིན་ཏེ། བྱ་བ་གཞན་གྱིས་བློ་མ་ཡེངས་པར། སྙིང་པོའི་དོན་དཔལ་གཤིན་རྗེ་གཤེད་པོ་འབའ་ཞིག་ལ་སེམས་པར་གྱིས་ཤིག་ཅེས་པ་དང༌། དེ་ནས་བསྒོ་བ་བྱས་ལ་ཅི་བདེ་བར་གནས་སོ། །མདུན་གྱི་དཀྱིལ་འཁོར་ཐབས་ཤེས་རབ་ཀྱི་རང་བཞིན་དུ་གནས་པར་བསམ་མོ། །སློབ་མ་ལྷག་པར་གནས་པའི་ཆོ་གའོ། །

དཀྱིལ་འཁོར་བྲི་བའི་རིམ་པ།


DTG047_Page_0352
[མ་དཔེ་གཟིགས་ན་འདིར་གནོན།]

དེ་ནས་སྔ་དྲོའི་དུས་ཀྱི་ཚེ་ན། རྣལ་འབྱོར་དང་བཅས་པའི་སྔགས་པས། སྔར་གྱི་དཀྱིལ་འཁོར་མངོན་སུམ་དུ་གསལ་བ་དེ་ལ་ཡང་དག་པར་མཆོད་ནས། བར་སྣང་ལ་གནས་པར་བལྟས་ལ། མཎྜལ་ལ་བྱི་དོར་བྱས་ཏེ། དེ་ནས་ཐིག་སྐུད་ནི། དོག་པ་ལྔ་དབུས་དང༌། ཕྱོགས་བཞིར་བཀོད། དང་པོར་མི་དམིགས་པར་བྱའོ། །དེ་ནས་ཡིག་འབྲུ་ལྔ་དང་ཕྱག་མཚན་ལྔ་ཡོངས་སུ་གྱུར་པ་ལས་རིགས་ལྔར་གྲུབ་པ་ལ། ཡེ་ཤེས་སེམས་དཔས་བྱིན་གྱིས་བརླབ་ཅིང༌། མཆོད་པས་མཆོད་ཅིང༌། སླར་སྐུད་པར་གནས་པ་དེ་ལ་བསྒྲིལ་བར་བྱ་སྟེ། ཛའི་སྒྲ་ལས་བྱུང་བའི་སྒྲུབ་པའི་གྲོགས་ལ་སྐུད་པའི་སྣ་གཏད་དེ། རང་གི་སོར་མོ་ལྔའི་བར་ནས་སྐུད་པ་ལྔ་བཀོད་ལ། ཨ་ནྱོ་ནྱ་ཨ་ནུ་ག་ཏ་སརྦ་དྷརྨཱ་པ་ར་སྦ་ར་ཨ་ནུ་པྲ་བིཥྚ་སརྦ་དྷརྨཱ་ཨ་ཏྱནྟ་ཨ་ནུ་པྲ་བིཥྚ་སརྦ་དྷརྨཱ་བཛྲ་སི་དྡྷི་ཧཱུཾ་ཨཿ་ཞེས་པས་སོར་མོ་བཅུའི་བར་དུ་བསྒྲིལ་བར་བྱ་སྟེ། དེ་ལྟར་ལེགས་པར་གྲུབ་པའི་ཐིག་སྐུ་དེ་ལ། ཨོཾ་བཛྲ་ས་མ་ཡ་སཱུ་ཏྲ་མ་ཏི་ཀྲ་མ་ཧཱུཾ། ཞེས་བཟླ་ཞིང་དྲི་དང་སྤོས་ཀྱིས་བསྒོས་པ་དེ་ལ་ཇི་ལྟ་བ་བཞིན་དུ་མཆོད་པར་བྱ་སྟེ། དེ་ནས་སློབ་དཔོན་གྱིས་སྔགས་དང་བཅས་པས་ཐིག་སྐུད་བསྡོགས་ཏེ། ཛའི་སྒྲ་དང་བཅས་པས་ཐིག་སྣ་གཏད་དེ། རང་བཞིན་གྱི་དཀྱིལ་འཁོར་དུ་གསལ་བར་དམིགས་ཏེ། དེ་ནས་སློབ་དཔོན་ལྷོ་ནས་བྱང་དུ་བལྟས་ཏེ་ཐིག་གཅིག་གདབ་བོ། །དེ་ནས་ལྷོ་ནས་བྱང་དུ་བལྟས་ཏེ་ཤར་གྱི་ཁ་ཁྱེར་གྱི་ཐིག་གདབ་བོ། །དེ་བཞིན་དུ་བྱང་དང་ལྷོར་བལྟས་ཏེ་ནུབ་ཀྱི་ཁ་ཁྱེར་གྱི་ཐིག་གོ །དེ་བཞིན་དུ་ནུབ་དང་ཤར་དུ་བལྟས་པས་བྱང་གི་ཁ་ཁྱེར་གྱི་ཐིག་གོ །དེ་ནས་ནུབ་དང་ཤར་དུ་བལྟས་པས་ལྷོའི་ཁ་ཁྱེར་གྱི་ཐིག་གདབ་པོ། །དེ་ནས་མེ་དང་རླུང་གི་མཚམས་སུ་གནས་པ་དང༌། སྲིན་པོ་དང་དབང་ལྡན་དུ་


DTG047_Page_0353
[མ་དཔེ་གཟིགས་ན་འདིར་གནོན།]

གནས་པས་མཚམས་ཀྱི་ཐིག་གདབ་བོ། །དེ་ནས་ཆ་ཆེན་བཅུ་དྲུག་ཏུ་ཕྱེ་བ་ལས། ཆ་ཕྲན་རྣམས་ཇི་ལྟར་རིག་པར་གདབ་བོ། །དེ་ནས་བསྐོར་ཐིག་གི་གྲངས་ངེས་པར་བྱའོ། །བཅུ་དྲུག་གི་ཕྱི་རོལ་ཏུ་ལྷག་པར་ཡང་ཡོངས་སུ་ཤེས་པར་བྱའོ། །དེ་ནས་ཚོན་རྩིའི་ཆོ་ག་ནི། དཀར་པོ། སེར་པོ། དམར་པོ། ལྗང་གུ་མཐིང་ག་རྣམས་ཐོད་པའི་ནང་དུ་སོ་སོར་བཀོད་ལ། ཡེ་ཤེས་ལྔར་གསལ་བ་ལ་མཆོད་ཅིང༌། སླར་ཚོན་རྩི་ཡོངས་སུ་གྱུར་བ་ལ་བྱིན་གྱིས་བརླབ་པའི་སྔགས་ནི། ཨོཾ་བཛྲ་ས་མ་ཡ་ཧཱུཾ། ཞེས་པས་ཡེ་ཤེས་ལྔའི་རང་བཞིན་དུ་བལྟས་ལ། བྱང་ཤར་མཚམས་སུ་རེ་ཁཱ་ལྔ་བྲིའོ། །དེ་ནས་ཐོད་པ་བཀབ་ལ་རྐང་པའི་འོག་ཏུ་མནན་ཏེ། ཆོས་དབྱིངས་འདི་ནི་རྣམ་པར་དག །སེམས་ཅན་ཁམས་རྣམས་རབ་སྒྲོལ་བྱེད། །རྒྱལ་བ་འཇམ་མགོན་རྡོ་རྗེ་འཛིན། །དེ་བཞིན་གཤེགས་པ་ཀུན་གྱི་གནས། །ཞེས་བརྗོད་ཅིང་ཚོམ་བུ་བཏབ་ལ། དེ་ནས་ཕུར་བའི་ཤུལ་དགང་ངོ༌། །དེ་ནས་ཡང་རྒྱུད་ནས་ཇི་སྐད་གསུངས་པ་ལྟར་དུ་དབུས་ནས་བརྩམས་ནས་ཀྱང༌། གོ་རིམས་མ་ནོར་བར་བྲི་བར་བྱ་བ་ནི། མཚན་མོ་ཕྱེད་ནི་དུས་དག་སྟེ། །མ་ཧེ་གདོང་གི་སྦྱོར་ལྡན་པས། །གཅེར་བུ་སྐྲ་གྲོལ་བདུད་རྩིས་བྱུག །དུར་ཁྲོད་སོལ་བ་རུས་ཕྱེ་སོགས། །སྣ་ཚོགས་ལྡན་པའི་ཆོན་རྣམས་ཀྱིས། །དཀྱིལ་འཁོར་མཛེས་པར་བྲི་བར་བྱའོ། །གྲུ་བཞི་པ་ལ་སྒོ་བཞི་པ། །རྟ་བབས་བཞི་དང་དྲ་བས་བརྒྱན། །དྲིལ་བུ་དྲིལ་བུ་གཡེར་ཀའི་ཕྱེད། །ཉི་མ་ཟླ་བ་རིན་ཆེན་ཕྲེང༌། །རིན་ཆེན་གདུང་དང་མཛེས་པའི་ཐོག །ཏོག་གིས་བརྒྱན་ཞིང་འོད་ཟེར་སྤྲིན། །ངོས་རྣམས་འདོད་པའི་ཡོན་ཏན་ལྔས། །མཛེས་པར་བལྟམས་ཤིང་འཁྲིགས་པར་སྤྲས། །མེ་ཏོག་ཕྲེང་བ་སྣ་ཚོགས་དང༌། །རིན་ཆེན་རྒྱལ་མཚན་ལ་སོགས་བརྒྱད། །གྲུ་རྣམས་ཀུན་དུ་བསྒྲེངས་པས་བརྒྱན། །ས་གཞི་རྡོ་རྗེ་རྒྱ་གྲམ་འབར། །དེ་ཡི་ལྟེ་བའི་དཀྱིལ་དུ་ནི། །འཁོར་ལོའི་མཆོག་གི་རྣམ་པ་ལ། །ཟླུམ་པོ་རེ་མིག་དགུ་པ་སྟེ། །ཐོད་པ་སྐམ་རློན་ཕྲེང་གིས་བརྒྱན། །བར་ཁྱམས་གྲུ་ཆད་སྒོ་བཞི་མཛེས། །སྒོ་གཅིག་ཏུ་ནི་འདུག་ནས་ནི། །སྒོ་གཞན་ཡོངས་སུ་གཅད་པར་བྱའོ། །ཞེས་གསུངས་པས་ན། དེ་བཞིན་དུ་ཡང་དབུས་ནི་ཟླུམ་པོ་ལ་རེ་མིག་དགུ་པའོ། །དེའི་ཕྱི་རོལ་སྣ་ཚོགས་རྡོ་རྗེ་རྒྱ་གྲམ་ལ་རྩེ་མོས་སྒོའི་ནང་དུ་སླེབས་


DTG047_Page_0354
[མ་དཔེ་གཟིགས་ན་འདིར་གནོན།]

བ་ལ། རའི་མཐའ་མེ་ཟླུམ་བསྐོར་འོད་ཟེར་བཅས་པ་ནི་ཅི་རིགས་སུ་བྱའོ། །མཚན་མ་དངོས་སུ་དགོད་པར་བྱ་བ་ནི། དབུས་སུ་རོ་མགོ་ལྷོར་བསྟན་པའོ། །བར་ཁྱམས་ལ་ཤར་དུ་མགོ་བོ། ལྷོར་ལག་པ། ནུབ་ཏུ་རྒྱུ་མ། བྱང་དུ་རྐང་པའོ། །ཤར་གྱི་གྲྭར་ཐོད་པ་ཁྲག་གིས་བཀང་བ། ལྷོའི་གྲྭར་ཐོད་ཚལ་གྱི་ཕྲེང་བ། ནུབ་ཀྱི་གྲྭར་དུར་ཁྲོད་ཀྱི་རས་ཏེ་ཞིང་ལྤགས་བརྒྱངས་པ། བྱང་གི་གྲྭར་གསལ་ཤིང་ལ་བཙུགས་པའི་མི་སྟེ། འདི་དག་ནི་ནང་གི་མཚན་མ་དག་ཡིན་ལ། དེ་ནས་ཕྱི་རོལ་གྱི་ཕྱག་རྒྱ་དགོད་དེ་ཤར་གྱི་སྣམ་བུ་ལ་ནི་གྲི་གུག་དང༌། །མཚོན་རྩེ་གཅིག་པ་དང༌། གཏུན་ཤིང་དང༌། ཆུ་གྲི་དང༌། རྡོ་རྗེ་རྩེ་གཅིག་པ་དང༌། ལྕགས་ཀྱུ་ལ་སོགས་པ་བྲིའོ། །ལྷོ་ཕྱོགས་ཀྱི་སྣམ་བུ་ལ་སྟ་རེ་དང༌། མདའ་དང༌། ཁ་ཊྲཱཾ་ག་དང༌། དབྱུག་ཏོ་དང༌། འཁོར་ལོ་དང༌། རྡོ་རྗེའི་ཞགས་པ་ལ་སོགས་པ་བྲིའོ། །ནུབ་ཕྱོགས་ཀྱི་སྣམ་བུ་ལ་རྡོ་རྗེ་དང༌། རྡེའུ་ཆུང་དང༌། ཕུབ་པ་དང༌། གཞུ་དང༌། དྲིལ་བུ་དང༌། རླུག་གིས་འཕྱར་བའི་རས་ལ་སོགས་པ་བྲིའོ། །བྱང་ཕྱོགས་ཀྱི་སྣམ་བུ་ལ། སྡིགས་མཛུབ་དང༌། འཕན་རྩེ་གསུམ་པ་དང༌། གླང་པོ་ཆེའི་པགས་པ་དང༌། རྡོ་རྗེའི་ཐོ་བ་དང༌། མདུང་དང༌། རྡོ་རྗེའི་མེ་ཐབ་ལ་སོས་པ་བྲིའོ། །ཁྱད་པར་དུ་སྒོ་བཞི་དང་གྲྭ་བཞིར་རོ་ལངས་མ་རུངས་པའི་ཆ་བྱད་ཅན་རེ་རེ་དགོད་དོ། །དབུས་ཀྱི་རོ་ལངས་ཀྱི་སྟེང་དུ་སྣ་ཚོགས་ཀྱི་པདྨ་ལ་གྲི་གུག་གམ། རལ་གྲི་འབར་བས་མཚན་པ་བཀོད་དོ། །དཀྱིལ་འཁོར་བྲི་བའི་རིམ་པའོ། །

དཀྱིལ་འཁོར་བརྒྱན་པར་བྱས་པའི་རིམ་པ།


DTG047_Page_0354
[མ་དཔེ་གཟིགས་ན་འདིར་གནོན།]

དེ་ནས་བུམ་པ་དགོད་དེ། གཙོ་བོའི་བུམ་པ་དབུས་སུ་དགོད་དོ། །གཞན་དགུ་དང་ལས་བུམ་དང་བཅས་པ་བྱང་ཤར་དུ་བཞག་ལ་བིགྷྣཱན་ཏ་ཀྲྀ་ཏ་ལ་བསྲུང་བའི་ལས་བཅོལ་ལོ། །དེ་ནས་མཆོད་པའི་ཡོ་བྱད་དགོད་པ་ནི། སྤྱིར་ཤ་དང་ཁྲག་ཐམས་ཅད་གཙོ་བོར་གསུངས་སོ། །མཆོད་པ་རྣམས་ནི་བཤམ་པ་དང༌། གྲངས་དང༌། གོ་རིམས་ནི་ཇི་ལྟར་གསུངས་པ་བཞིན་ནོ། །མར་མེ་ཆེན་པོ་བརྒྱད་ནི། ཕྱོགས་མཚམས་བརྒྱད་དུ་དགོད་པ་ལ་སོགས་པ་དང༌། སྒོ་བཞི་དང་གྲྭ་བཞིར་ནི་ཤ་ཁྲག་སྣ་ཚོགས་པས་བཀང་བའི་ཐོད་པ་ཆེན་པོའི་གཏོར་མ་བརྒྱད་དང༌། གཞན་ཅི་རིགས་པར་བཤམས་པའི་ཚོགས་ཀྱི་ཡོ་བྱད་རྣམས་དང༌། འདོད་པའི་ཡོན་ཏན་ལྔའི་ཡོ་བྱད་དེ། གོས་ཟུང་དུ་སྦྱར་བ་ལ་སོགས་པ་དང༌། རྒྱན་གྱི་ཡོ་བྱད་ནི།


DTG047_Page_0355
[མ་དཔེ་གཟིགས་ན་འདིར་གནོན།]

བླ་རེ་དང༌། འཕན་དང༌། གདུགས་དང༌། ཡོལ་བ་ལ་སོགས་པ་དང༌། བསྲུང་བའི་ཡོ་བྱད་ནི་གྲི་ཕུར་དང༌། མདའ་བོ་ཆེ་དང༌། སྒོ་མཚམས་མ་ལ་སོགས་པ་དང༌། སྒྲུབ་པའི་ཡོ་བྱད་ནི་རྣལ་འབྱོར་དུ་འདུས་པ་རྣམས་ནི། ཏིང་ངེ་འཛིན་གཅིག་ཏུ་གྱུར་པའམ། མ་གྱུར་བའང་རུང་སྟེ། མཉམ་པར་འཇོག་ནུས་པ་རྣམས་ཏེ། དེ་དག་གིས་ནི་དཀྱིལ་འཁོར་བརྒྱན་པར་བྱས་པའི་རིམ་པའོ། །

དཀྱིལ་འཁོར་འཇུག་ཅིང་དབང་བསྐུར་བའི་ཆོ་ག


DTG047_Page_0355
[མ་དཔེ་གཟིགས་ན་འདིར་གནོན།]

དེ་ནས་རྡོ་རྗེ་སློབ་དཔོན་གྱིས་རྡོ་རྗེ་དང་དྲིལ་བུ་འཛིན་ཅིང༌། འབར་བའི་ལྟ་བ་དང་བཅས་པས་དཀྱིལ་འཁོར་ལ་བསྐོར་བ་བྱ་ཞིང༌། ནོར་བ་རྣམས་བཅོས་པར་བྱའོ། །སྲུང་བའི་འཁོར་ལོས་བྱིན་གྱིས་བརླབ་པར་རིག་པར་བྱའོ། །དེ་ནས་ལྷོའི་སྒོར་སྟན་ལ་འདུག་ནས། སེམས་མཉམ་པར་བཞག་པས། ཆོ་ག་ཇི་ལྟ་བ་བཞིན་དུ་དམ་ཚིག་སེམས་དཔའི་འཁོར་ལོར་སྤྲུལ་ལ། བར་སྣང་ལ་གནས་པ་དེ་ཡང་འབར་བའི་ལྟ་བ་དང༌། ཡི་གེ་ཇའི་སྦྱོར་བས། ཤྲཱི་བཛྲ་བྷཻ་ར་བ་མ་ཧཱ་མཎྜལ་ཨཱ་བེ་ཤ་ཡ་ཨ་ཨ་ཞེས་པས་གཉིས་སུ་མེད་པར་གྱུར་པར་མཐོང་ནས། སྐྱེ་མཆེད་དྲུག་དང༌། སྐུ་གསུང་ཐུགས་རྡོ་རྗེའི་རང་བཞིན་དུ་སྒྲུབ་སྟེ། དེ་ནས་ཡེ་ཤེས་ཀྱི་འཁོར་ལོ་སྤྱན་དྲང་ཞིང༌། དབྱེར་མེད་པར་གྱུར་བའི་ཚེ་ན། སངས་རྒྱས་ཐམས་ཅད་ཀྱིས་དབང་བསྐུར་བར་རིག་པར་བྱའོ། །དེ་ནས་བློ་ལྡན་སློབ་མ་གང༌། །དཀྱིལ་འཁོར་མངོན་དུ་གྱུར་འདོད་པས། །མཆོད་པ་ཀུན་གྱི་མཆོག་གྱུར་པའི། །བླ་མ་མཆོད་ལ་བརྩོན་བྱ་སྟེ། །དད་པས་རང་དང་ལོངས་སྤྱོད་བཅས། །ཇི་ལྟར་འབྱོར་ཞིང་ཡིད་འཐད་ཀུན། །རྗེ་བཙུན་ཞབས་ལ་བཏུད་དེ་འབུལ། །དེ་ནས་སྙིང་པོ་བྱང་ཆུབ་པར། །ཞབས་ཀྱི་པདྨ་ལ་བཏུད་ཅིང༌། །ཐེག་མཆོག་བསྲུང་བར་བསྐུལ་འདེབས་ཤིང༌། །འགྲོ་བའི་མུན་སེལ་སྒྲོན་མེ་སྤྲོ། །དེ་ནས་རྡོ་རྗེ་སློབ་དཔོན་དེས། །རང་རིག་པའི་རྒྱལ་པོར་ངེས་པར་མཐོང་ནས། སྐྱེ་མཆེད་དྲུག་དང་ལུས་ངག་ཡིད་རྡོ་རྗེར་བྱིན་གྱིས་རློབ་ཅིང༌། ཡེ་ཤེས་ཀྱི་འཁོར་ལོར་བྱིན་གྱིས་བརླབས་ཏེ། དབང་བསྐུར་བར་འདོད་པས། བསང་གཏོར་སྔོན་དུ་འགྲོ་བས། མཆོད་ཡོན་དང་སྐུ་ཁྲུས་གསོལ་ཏེ། བདུག་སྤོས་ལ་སོགས་པའི་མཆོད་པའི་བྱེ་བྲག་དུ་མ་དང༌། འདོད་པའི་ཡོན་ཏན་ལྔ་དང༌། སྤྱང་བ་དང༌། སྦར་ཞིང་རྟོགས་པར་བྱ་བའི་བདུད་རྩིའི་རོས་ནི་སངས་རྒྱས་ཐམས་ཅད་ལ་ཡང་དག་པར་མཆོད་ནས། དེ་བཞིན་དུ་འཇིག་རྟེན་པ་དག་ལ་ཡང་རྒྱ་ཆེ་བར་མཆོད་


DTG047_Page_0356
[མ་དཔེ་གཟིགས་ན་འདིར་གནོན།]

པར་བྱས་ནས། དེ་དག་སྒྱུ་མའི་རྣམ་པར་ཤེས་པར་འགྱུར་བ་དང༌། རང་གི་རྟོག་པ་ལས་ཇི་སྐད་དུ་གསུངས་པ་ལྟར་དུ་ཞི་བ་དང་རྒྱས་པའི་སྤྱིན་སྲེག་གིས་ཀྱང་དོན་ཐམས་ཅད་སྒྲུབ་པར་གསུངས་སོ། །དེ་ནས་སློབ་མ་དབང་བསྐུར་ཕྱིར། །འཁོར་ལོས་སྒྱུར་རྒྱལ་སྦྱར་བས་འཇུག །བདག་ཉིད་གནང་བ་ཐོབ་གྱུར་ནས། །གཞན་དོན་མཆོག་འགྱུར་ཐེ་ཚོམ་མེད། །དེ་ནས་ཡང་སློབ་མས་དབང་བསྐུར་བའི་དོན་དུ། སློབ་དཔོན་ལ་གསོལ་བ་གདབ་སྟེ། ཀུན་མཁྱེན་ཡེ་ཤེས་ཕུང་པོ་ཅན། །སྲིད་པའི་འཁོར་ལོ་རྣམ་སྦྱོང་བའི། །ཇི་ལྟར་བཤད་པའི་རིན་ཆེན་ལྟར། །གཙོ་བོས་བདག་ལ་བཀའ་དྲིན་སྩོལ། །ཁྱོད་ཞབས་པདྨ་སྤངས་ནས་ནི། །མགོན་པོ་གཞན་ལ་སྐྱབས་མ་མཆིས། །འགྲོ་བའི་མགོན་པོ་ཐུབ་ཆེན་གྱིས། །བློ་མཆོག་བདག་ལ་གནང་བར་མཛོད། །དེ་ནས་ཡང་ཕྱོགས་བཞི་ནས་གསོལ་བ་གདབ་པ་ནི། དེ་བཞིན་གཤེགས་པ་ཀུན་ཞི་བ། །དེ་བཞིན་གཤེགས་པ་ཀུན་གྱི་གནས། །ཆོས་ཀུན་བདག་མེད་པ་ཡི་མཆོག །དཀྱིལ་འཁོར་དམ་པ་བཤད་དུ་གསོལ། །མཚན་རྣམས་ཐམས་ཅད་ཡང་དག་རྫོགས། །མཚན་མིན་ཐམས་ཅད་ཡང་དག་སྤངས། །ཀུན་དུ་བཟང་པོ་སྐུ་ཡི་མཆོག །དཀྱིལ་འཁོར་དམ་པ་ཞི་བ་ཆོས་མཆོག་ཡང་དག་འབྱུང༌། །ཡེ་ཤེས་སྤྱོད་པ་རྣམ་སྦྱོང་བ། །ཀུན་དུ་བཟང་པོ་གསུང་གི་མཆོག །དཀྱིལ་འཁོར་སེམས་ཅན་ཀུན་གྱི་སེམས་ཆེན་པོ། །རང་བཞིན་དག་པ་དྲི་མ་མེད། །ཀུན་བཟང་ཐུགས་མཆོག་ཁ་ལོས་སྒྱུར། །དཀྱིལ་འཁོར་དེ་ནས་རིགས་ལྔའི་སྡོམ་པ་དང༌། དམ་ཚིག་རྣམས་དབོག་ཅིང༌། དེ་དག་གི་སྔོན་དུ་རྒྱུན་བཤགས་ལ་སོགས་པས་ལེགས་པར་སྦྱངས་ན། སློབ་དཔོན་ཡོལ་བའི་ནང་དུ་གནས་ལ། ལས་ཀྱི་རྡོ་རྗེས་ཕྱི་རོལ་དུ་ལས་ཐམས་ཅད་པའི་བུམ་པ་དེས་ཅི་རིགས་སུ་བསྐུ་ཞིང༌། གོས་དམར་པོས་གདོང་པ་གཡོགས་ཏེ། རྣམ་པར་སྣང་མཛད་དུ་བསྐྱེད་དེ། ཨ་ཁཾ་བཱི་ར་ཧཱུཾ། ཞེས་མེ་ཏོག་གི་ཕྲེང་བ་སྙིམ་པར་གཏད་ལ། རྡོ་རྗེ་ནས་འཛིན་དུ་བཅུག་སྟེ། བསླབ་བྱ་དང་བཅས་པ་ཡོལ་བའི་རྩར་ཕྱིན་པ་དང༌། ཞལ་བཞི་པ་དང༌། ཏ་ཀྲྀ་ཏ་བཞིའི་སྔགས་དང་བཅས་པས། བགེགས་ཀྱི་ཚོགས་ཀུན་བསྐྲད་དེ། ཁྱོད་ནི་གང་ཞིག་ཅིལ་དགའ། །ཞེས་བསྒོ་བ་དང་དད་པས་ལེགས་པར་བསྒྲུབས་པ་སྟེ། སྐལ་པ་བཟང་ལ་བདག་དགའོ། །ཞེས་སྨྲ་བར་གྱུར་པ་


DTG047_Page_0357
[མ་དཔེ་གཟིགས་ན་འདིར་གནོན།]

དང། དེ་ལ་བྱང་ཆུབ་མཆོག་ཏུ་སེམས་བསྐྱེད་པར་བྱ་སྟེ། ཡོལ་བའི་ནང་དུ་འོང་བ་ན། བོ་དྷི་ཙིཏྟ་ཨུཏྤཱ་ད་ཡཱ་མི། ཞེས་བརྗོད་དོ། །དེའི་སྙིང་གར་རྡོ་རྗེ་དང་བདུད་རྩིར་བཅས་པས་རྒྱས་བཏབ་སྟེ། དེ་རིང་ཁྱོད་ལ་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབ་པར་འགྱུར་ཏེ། དེ་བཞིན་གཤེགས་པ་ཐམས་ཅད་ཀྱི་གསང་བ་དམ་པ་དེ་ཁོ་ན་ཉིད་ཀྱི་གནས་ཆེན་པོ་འདི་ནི། ཕྱིན་ཅི་མ་ལོག་པར་བསྟན་པར་བྱ་སྟེ། གང་དག་ཁྱོད་ཀྱི་དཀྱིལ་འཁོར་དུ་མ་ཞུགས་པ་རྣམས་ལ་སྨྲ་བར་མི་བྱ་སྟེ། དད་པ་ཆུང་བ་དག་དང༌། ཡོངས་སུ་མ་སྨིན་པ་རྣམས་ལ་སྨྲ་བར་མི་རིགས་སོ། །གལ་ཏེ་བག་མེད་པར་སྨྲས་ན་མགོ་འགས་པར་འགྱུར་རོ། །དེ་ནས་ཡི་གེ་གསུམ་གྱིས་གནས་གསུམ་དུ་བྱིན་གྱིས་བརླབ་ཅིང༌། རྡོ་རྗེ་དང་བཅས་པའི་བདུད་རྩིའི་ཐིག་ལེ་བྱ་ཞིང༌། ཉི་ཟླ་ཁ་སྦྱར་རེ་རེ་བཀོད་པར་བསྒོམས་ནས། དེ་ནས་ཡང་འདི་སྐད་དུ་བསྒོ་སྟེ། དེང་ནས་ཁྱོད་དེ་བཞིན་གཤེགས་པ་ཐམས་ཅད་ཀྱི་རིགས་སུ་ཆུད་པ་ཡིན་པར་ཤེས་པར་བྱོས་ཤིག །དེ་ལྟ་བས་ན། ངས་ཁྱོད་ལ་ཡེ་ཤེས་ཆེན་པོའི་རྡོ་རྗེ་ངེས་པར་བསྐྱེད་པར་བྱའོ། །ཡེ་ཤེས་གང་གིས་ཁྱོད་ལ་དེ་བཞིན་གཤེགས་པ་ཐམས་ཅད་ཀྱི་དངོས་གྲུབ་ཀྱང་འགྲུབ་པར་འགྱུར་ཏེ་དངོས་གྲུབ་གཞན་ལྟ་ཅི་སྨོས། འདི་དག་ནི་དཀྱིལ་འཁོར་ཆེན་པོ་མ་མཐོང་བ་དག་གི་དྲུང་དུ་བརྗོད་པར་མི་བྱ་སྟེ། དམ་ཚིག་ཉམས་པར་གྱུར་ཏ་རེའོ། །རྡོ་རྗེ་སེམས་དཔའ་འང་དེང་ཁྱོད་ཀྱིས། །སྙིང་ལ་ཡང་དག་གནས་པར་བྱས། །གལ་ཏེ་ཚུལ་འདི་སྨྲས་གྱུར་ན། །དེ་མ་ཐག་ཏུ་དྲལ་ཏེ་གཤེགས། །ཨོཾ་བཛྲ་ས་ཏྭ་ཧཱུཾ། དེ་ནས་པདྨའི་སྣོད་དུ་བསྒྲུབ་པའི་འཆི་མེད་དེ་ལས་རྡོ་རྗེ་བླངས་ཏེ། དེའི་ལྕེ་ལ་བཞག་སྟེ། འདི་ནི་རྡོ་རྗེའི་བདུད་རྩིའི་ཆུ། །དམ་ཚིག་འདས་ན་སྲེག་པར་བྱེད། །དམ་ཚིག་བསྲུངས་ན་དངོས་གྲུབ་ཀུན། །རྡོ་རྗེ་བདུད་རྩིའི་ཆུ་འདིས་འགྲུབ། །ཨོཾ་བཛྲ་ཨ་མྲྀ་ཏ་ཨུ་ད་ཀ་ཋཿ་དེ་རིང་ཕན་ཆད་ཁྱོད་ཀྱི་ཕྱག་ན་རྡོ་རྗེ་ང་ཡིན་པས་ངས་ཇི་ལྟར་བསྒོ་བའི་དགེ་བའི་ལས་རྣམས་ཁྱོད་ཀྱིས་བྱ་དགོས་པས། ང་ལ་བརྙས་པར་འགྱུར་བའི་ལས་དག་མ་བྱེད་ཅིག །ཇི་ལྟར་དུ་མི་བདེ་བ་དག་མ་སྤངས་པར་ཚེའི་དུས་བྱས་ནས། སེམས་ཅན་དམྱལ་བར་གྱུར་ཏ་རེའོ། །དེ་ནས་ཡང་སློབ་མས་འདི་སྐད་དུ་གསོལ་བ་གདབ་པར་བྱ་སྟེ། བདག་ནི་དེ་ནས་བཟུང་ནས་དེ་བཞིན་གཤེགས་ཐམས་ཅད་ཀྱིས་བྱིན་གྱིས་བརླབས་ནས། རྡོ་རྗེ་སེམས་དཔའ་


DTG047_Page_0358
[མ་དཔེ་གཟིགས་ན་འདིར་གནོན།]

བདག་ལ་འབབ་པར་གྱུར་ཅིག །ཅེས་བརྗོད་ལ། བྱིན་རླབས་རྒྱུད་ལྡན་བླ་མས་ནི། །རྡོ་རྗེ་སློབ་མ་བྱིན་བརླབ་ཕྱིར། །སློབ་མའི་ལུས་དང་རྟེན་འབྲེལ་རྫས། །ཐུགས་ཀྱི་བྱིན་རླབས་དཀྱིལ་འཁོར་གྱིས། །གསུང་གི་རྡོ་རྗེའི་རྣལ་འབྱོར་དེས། །སེམས་ནི་བྱིན་གྱིས་བརླབས་ཅམ་གྱིས།།གཡོ་ཞིང་རྟོགས་ཐོབ་གང་ཡིན་པ། །སྟོབས་སུ་གྱུར་ཕྱིར་ཀུན་གྱིས་ཀྱང༌། །རོལ་མོའི་སྒྲར་བཅས་རྟོགས་པ་བསྐྱེད། །བརྟན་པའི་ཆོ་ག་ཅི་རིགས་སྤྱད། །དེ་ལས་ཤེས་པ་བརྟན་གྱུར་ནས། །ཁ་དོག་ལ་སོགས་སྣང་བ་བྲིའོ། །དེ་ནས་ལས་ཀྱི་རྡོ་རྗེ་དང་བཅས་པས་བསྟོད་པའི་ཚིགས་སུ་བཅད་པ་དང༌། དཀྱིལ་འཁོར་ཆེན་པོ་ལ་བསྐོར་བ་བྱས་ནས། ནུབ་ཀྱི་སྒོ་ནས་ཤར་དུ་བལྟ་བས། མེ་ཏོག་གི་ཕྲེང་བ་དེ་དཀྱིལ་འཁོར་ཆེན་པོར་དོར་བར་བྱ་སྟེ། མ་ཧཱ་པཱུ་ཛྱ་པྲ་ཏཱིཙྪ་བཛྲ་ཧོ་ཞེས་བརྗོད་དེ། སླར་ཡང་བླངས་ཏེ། གཙུག་ཕུད་དུ་བཅིངས་ལ། པྲ་ཏི་གྲྀཧྞ་བཛྲ་ཧོཿ་གང་ལ་བབ་པའི་ལྷ་དེ་ཉིད་ཡི་དམ་ལྷ་རུ་བསྐྱེད་ཅིང་དབོག་གོ །དེ་ནས་མིག་གཉིས་ཨོཾ་དུ་བསམ། །འོད་འཕྲོག་ཁམས་གསུམ་དག་པར་མཐོང༌། །རྡོ་རྗེ་སེམས་དཔའ་དེང་ཁྱོད་ཀྱི། །མིག་འབྱེད་པ་ལ་བརྩོན་པར་བྱ། །རྡོ་རྗེའི་མིག་ནི་བླ་ན་མེད། །ཡེ་ཤེས་མཆོག་ཏུ་གལ་བར་བྱེད། །ཧེ་བཛྲ་པཱ་ཤ །གདོང་གཡོགས་བཀྲོལ་ཏེ། ཨོཾ་བཛྲ་ཙྐྵུ་མ་ཧཱ་མཎྜལ་པྲ་བེ་ཤ་ཡ་ཕཊ། ཆོས་རྣམས་གཟུགས་བརྙན་ལྟ་བུའི་དངོས། །དག་ཅིང་གསལ་ལ་མ་རྙོགས་པར། །གང་རྟོག་ཞིང་ཁམས་རྣམ་དག་མཆོག་བླ་ན་མེད་པའི་གནས་མཆོག་ཡིན། །རྡོ་རྗེ་ཐུགས་རྗེའི་རྒྱུན་གནས་པས། །སྤྲུལ་པའི་དཀྱིལ་འཁོར་རྒྱུན་མི་འཆད། །བདེན་པའི་བྱིན་གྱི་རླབས་ཀྱིས་མཐོང༌། །ཕུན་སུམ་ཚིགས་ཀུན་འདིས་གྲུབ་འགྱུར། །དངོས་གྲུབ་སྒྲུབ་ཕྱིར་དམ་ཚིག་སྐྱོང༌། །གསང་སྔགས་དོན་ལ་བརྩོན་པར་གྱིས། །ཤར་སོགས་སྒོ་བཞི་ནས་བརྩམས་ཏེ། །ཇི་སྲིད་གཙོ་ཚོགས་རིམ་པར་བསྟན། །དེར་རྗེས་རྣལ་འབྱོར་ཐམས་ཅད་ཀྱིས། །མགྲིན་གཅིག་ཏུ་ནི་སྔགས་པ་ཡིས། །བཀྲ་ཤིས་གླུ་དབྱངས་དུ་མར་བཅས། །བུམ་པ་བླངས་ཏེ་དབང་བསྐུར་བྱའོ། །ཇི་ལྟར་བལྟམས་པའི་དུས་ཀྱི་ཚེ། །ལྷ་རྣམས་ཀུན་གྱིས་དབང་བསྐུར་ལྟར། །དེ་ལྟར་དེ་བཞིན་གཤེགས་ཀུན་གྱིས། །རིགས་ཀྱི་བུ་ཁྱོད་དབང་བསྐུར་བྱའོ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ཤྲཱི་ས་མ་ཡེ་ཧཱུཾ། ཨ་ཁཾ་བཱི་ར་ཧཱུཾ་


DTG047_Page_0359
[མ་དཔེ་གཟིགས་ན་འདིར་གནོན།]

ཞེས་པ་ཆོ་ག་གསུམ་ལས་རིགས་ལྔའི་སྐུར་གསལ་བས། སྔ་མ་བཞིན་དུ་དབང་བསྐུར་བྱ་སྟེ། སངས་རྒྱས་ཀུན་དངོས་ཅོད་པན་དབང༌། །རྫོགས་སངས་རྒྱས་ཉིད་རབ་བསྒྲུབ་ཕྱིར། །ཅོད་པན་མཆོག་གི་དབང་བསྐུར་བས། །འཁོར་ལོས་སྒྱུར་རྒྱལ་མགོན་དབང་བསྐུར། །ཨོཾ་ལཱཾ་མཱཾ་པཱཾ་ཏཱཾ་ཧཱུཾ། རཏྣ་མུ་ཀུ་ཊ་ཨ་བྷི་ཥིཉྩ་ཧཱུཾ། རྡོ་རྗེ་འདི་ནི་རྡོ་རྗེ་ཆེ། །སངས་རྒྱས་ཀུན་གྱི་བྱིན་གྱིས་བརླབས། །སངས་རྒྱས་ཀུན་དུ་རབ་བསྒྲུབ་ཕྱིར། །རྡོ་རྗེ་མཆོག་གིས་དབང་བསྐུར་བྱའོ། །ཨོཾ་སརྦ་ཏ་ཐཱ་ག་ཏ་མ་ཧཱ་ཤཱུ་ནྱ་ཏཱ་ཛྙཱ་ན་བཛྲ་ཨ་བྷི་ཥིཉྩ་མི། ཆོས་ཀྱི་དྲིལ་བུ་བླ་མེད་དོན། །སྟོང་ཉིད་ཡེ་ཤེས་སྒྲ་སྒྲོགས་པའི། །ཐམས་ཅད་སྟོང་ཉིད་དོན་སྟོན་པའི། །དྲིལ་བུའི་དབང་བསྐུར་བླ་ན་མེད། །ཨོཾ་སརྦ་ཏ་ཐཱ་ག་ཏ་ཤབྷ་པ་ཏ་ལེ་དྷརྨ་དྷཱ་ཏུ་ཨ་བྷི་ཥེ་ཀ་ཏ་ཤྲཱི་ས་མ་ཡེ་ཧཱུཾ། དེ་ནས་རྟག་པ་ཆེན་པོའི་དོན། །མཉམ་ཉིད་བདེ་བ་ཆེན་པོའི་སྐུར། །རྡོ་རྗེའི་རྒྱལ་པོ་བྱིན་གྱིས་བརླབས། །ངེས་པར་མ་ཡེངས་རྒྱུན་དུ་བསྒོམས། །ཨོཾ་བཛྲ་ཨ་དྷི་པ་ཏི་སྟྭཾ། ཨོཾ་བཛྲ་ཨ་བྷི་ཥིཉྩ་མཾ། ཏིཥྛ་བཛྲ་ས་མ་ཡ་ཧཱུཾ། ཨོཾ་བཛྲ་སཏྭ་སྟྭཾ། བཛྲ་ཨ་བྷི་ཥེ་ཀ་ཏ་ཤྲཱིས་མ་ཡ་ཧཱུཾ། ལྷག་པའི་ལྷ་ནི་གང་གང་གི །དེ་དང་དེ་ཡི་མཚོན་བྱེད་བརྡ། །ཤྲཱི་ཡི་སྒྲ་ཡིས་མཛེས་བྱས་མིང༌། །མ་འོང་ས་ཞིང་དུ་ལུང་སྟོན་འགྱུར། །བརྟུལ་ཞུགས་དབུགས་ཕྱུང་ལུང་བསྟན་པས།། ཆོ་གའི་རྗེས་འགྲོར་གསུངས་པ་སྟེ། །བརྟུལ་ཞུགས་སྐུ་གསུང་ཐུགས་ཡིན་ཏེ། །ཕྱག་རྒྱ་གསུམ་གྱི་ཐུགས་རྒྱས་གདབ། །ཕྱག་རྒྱ་ཆེན་པོར་གང་གྱུར་པ། །རྡོ་རྗེ་དྲིལ་བུ་བྱིན་རླབས་གཏད། །ཨོཾ་སརྦ་ཏ་ཐཱ་ག་ཏ་སིདྡྷི་བཛྲ་ཏིཥྛ་ཨེ་ཥ་སྟྭཾ་དྷ་ར་ཡ་མི་ཧི་ཧི་ཧི་ཧི་ཧོ་ཧཱུཾ་ཨོཾ། ཐོག་མཐའ་མེད་པའི་སེམས་དཔའ་ནི། །རྡོ་རྗེ་སེམས་དཔའ་དགའ་བ་ཆེ། །ཀུན་དུ་བཟང་པོ་ཀུན་བདག་ཉིད། །རྡོ་རྗེ་བདག་སྙེམས་བདག་མཛོད་ཅིག །ཧོཿ་ཆོས་ཀྱི་དྲིལ་བུ་གཟུང་བར་བྱའོ། །འདི་དེ་སངས་རྒྱས་ཐམས་ཅད་ཀྱི། །ཤེས་རབ་དབྱངས་ཀྱི་རྗེས་འགྲོ་བའི། །རྟག་ཏུ་ཁྱོད་ཀྱིས་གཟུང་བྱ་སྟེ། །བྱང་ཆུབ་མཆོག་ཏུ་རྒྱལ་བས་གསུངས། །ཆོས་ཀྱི་དྲིལ་བུ་དཀྲོལ་བར་བྱའོ། །སྲིད་པ་རང་བཞིན་གྱིས་དག་ཕྱིར། །ངོ་བོ་ཉིད་ཀྱིས་སྲིད་བྲལ་བྱས། །རང་བཞིན་དག་པའི་སེམས་དཔའ་མཆོག །སྲིད་པ་མཆོག་ཏུ་སྒྲུབ་པར་བྱེད། །འཁོར་བའི་བདེ་བ་ཤིན་ཏུ་ཆུང༌། །དུཿ་ཁ་ཆེན་པོ་དག་བྱའི་ཕྱིར། །མཆོག་ཏུ་བདེ་


DTG047_Page_0360
[མ་དཔེ་གཟིགས་ན་འདིར་གནོན།]

བ་དམ་པའི་ཐབས། །དམ་ཚིག་འདི་དག་རྟག་ཏུ་སྐྱོངས། །འདོད་པའི་ལོངས་སྤྱོད་ཐམས་ཅད་ལ། །ཇི་ལྟར་བདེ་བ་བརྟེན་བཞིན་དུ། །རང་གི་ལྷ་ཡི་སྦྱོར་བ་ཡིས། །བདག་དང་གཞན་ལ་མཆོད་པར་བྱའོ། །ཇི་སྲིད་འཁོར་བའི་གནས་མཆོག་ཏུ། །ཐབས་མཁས་མཆོག་ཆེན་བཞུགས་པའི་ཚེ། །དེ་སྲིད་མཚུངས་མེད་སེམས་ཅན་དོན། །མྱ་ངན་མི་འདའ་བྱེད་པར་ནུས། །ཤེས་རབ་ཕ་རོལ་ཕྱིན་མཆོག་ཐབས། །བསོད་ནམས་བྱིན་རླབས་ཀྱིས་བསྒྲུབས་པའི། །དམ་ཚིག་འདི་དག་རྟག་ཏུ་བསྲུངས། །དངོས་གྲུབ་ཐམས་ཅད་ཕུན་སུམ་ཚོགས། །ཕྱག་རྒྱ་ཆེན་པོའི་བརྟུལ་ཞུགས་མཆོག །སངས་རྒྱས་ཀུན་གྱི་གནང་བ་སྦྱིན། །དེ་ནས་བདུད་དཔུང་འཇོམས་བྱེད་མཆོག །འབར་བ་ཆེན་པོའི་སྐུ་དབང་བསྐུར། །གྲི་གུག་ལ་སོགས་ཕྱག་མཚན་བསྣམས། །ཡི་གེ་བཅུ་པའི་གསང་སྔགས་མཆོག །མངོན་པར་བཟླས་ཤིང་རིམ་གྱིས་གཏད། །སྟོད་གཡོགས་སྨད་གཡོགས་དག་ལ་ཡང༌། །ཉེ་བའི་སྙིང་པོས་བྱིན་བརླབས་ལ། །ཐེག་ཆེན་དོན་ལྡན་དབང་བསྐུར་ཏེ། །སྦྲུལ་སོགས་ཐོད་པའི་ཕྲེང་བ་ལ། །ཕྲེང་བའི་སྔགས་ཀྱིས་བྱིན་བརླབས་ལ། །ལོངས་སྤྱོད་རྫོགས་སྐུར་དབང་བསྐུར་རོ། །གསུང་གི་བརྟུལ་ཞུགས་བརྟན་པ་ནི། །གསང་སྔགས་སྒྲུབ་དང་ཉན་པ་དང༌། དམ་ཚིག་རྗེས་གནང་མཆོད་པ་གནང། །ལས་བཞི་གྲུབ་ཆེན་བརྒྱད་སྒྲུབ་གནང༌། །ཆོ་ག་ཇི་བཞིན་རྒྱས་པར་གཏད། །དེ་ནས་རྡོ་རྗེ་སློབ་དཔོན་མཆོག །འཁོར་ལོས་སྒྱུར་བར་དབང་བསྐུར་ཏེ། །པདྨའམ་སེང་གེའི་ཁྲི་སྟིང་དུ། །རྒྱལ་པོར་དབང་བསྐུར་དོན་ཕྱིར་གཞག །སྟེང་ནས་རིན་ཆེན་གདུགས་དཀར་དབུབ། །དེས་ཀྱང་ཇི་བཞིན་གསོལ་བ་གདབ། །བྱང་ཆུབ་རྡོ་རྗེ་སངས་རྒྱས་ལ། །ཇི་ལྟར་མཆོད་ཆེན་གསོལ་བཏབ་ལྟར། །བདག་ཀྱང་ངེས་པར་གྲོལ་བའི་ཕྱིར། །ནམ་མཁའི་རྡོ་རྗེ་དེང་བདག་སྩོལ། །དེ་ཡི་རྗེས་ལ་རྣལ་འབྱོར་བའི། །ཚོགས་ཀྱི་སྔགས་བཅས་བཀྲ་ཤིས་དང༌། །བུམ་པ་ལ་སོགས་ཀྱིས་དབང་བསྐུར། །ཁྱད་པར་དུ་ཡང་རྡོ་རྗེའི་མིང༌། །ཀུན་གྱི་བཀྲ་ཤིས་བརྗོད་ནས་ནི། །དབང་རྣམས་ཇི་ལྟ་བར་ཡང་བསྐུར། །ཀུན་གྱིས་ཚིག་ཏུ་རྗོད་བྱེད་པ། །ཨོཾ་ནམ་མཁའ་ལས་བྱུང་མཚན་ལྡན་ཕྱིར། །ཐོག་མ་ཐ་མ་མེད་པའི་མཆོག །རྡོ་རྗེ་སེམས་དཔའ་ཆེ་རང་བཞིན། །སེམས་དཔའི་མཆོག་ཏུ་དེང་གྲུབ་མཛོད། །ཀུན་མཆོག་


DTG047_Page_0361
[མ་དཔེ་གཟིགས་ན་འདིར་གནོན།]

དངོས་གྲུབ་ཆེན་པོ་སྟེ། །དབང་ཕྱུག་ཆེན་པོ་ལྷག་པའི་ལྷ། །རྡོ་རྗེ་འཛིན་པ་ཀུན་གྱི་རྒྱལ། །མི་འགྱུར་མཆོག་ཏུ་གྲུབ་པར་མཛོད། །ཉེས་པ་མི་མངའ་རྟག་པ་ཁྱོད། །འདོད་ཆགས་ཀུན་གྱི་རྗེས་ཆགས་པ། །འདོད་ཆགས་ཆེན་པོ་དགའ་བ་ཆེ། །བཅོམ་ལྡན་དེ་ཉིད་གྲུབ་པར་མཛོད།། ཤིན་ཏུ་དག་པ་ཀུན་གྱི་མཆོག །གདོང་ནས་གྲོལ་བ་དེ་བཞིན་གཤེགས། །ཀུན་དུ་བཟང་པོ་ཀུན་བདག་ཉིད། །བྱང་ཆུབ་མཆོག་ཏུ་བདག་གྲུབ་མཛོད། །དངོས་གྲུབ་ཆེན་པོ་ཀུན་གྱི་མཆོག །རྒྱལ་བ་བདག་ཉིད་ཆེ་རང་བཞིན། །གྲུབ་པའི་རྡོ་རྗེ་ཆེར་བསྟོད་པ། །རྡོ་རྗེ་སྙེམས་ཚུལ་བདག་མཛོད་ཅིག། དེ་ནས་གཞལ་ཡས་ཁང་པ་དང༌། །ལྷ་ཡི་མཚན་ཉིད་རྣམ་དག་ལམ། །མྱ་ངན་འདས་དང་འཁོར་བའི་དངོས། །མ་བཅོས་དོན་དམ་རང་བཞིན་མཆོག །སྐལ་བཟང་དེ་ལ་གསལ་བར་བསྟན། །དམ་ཚིག་མཆོག་ཏུ་གྲུབ་པར་བྱེད། །དེ་ནས་དབེན་ཞིང་བདེར་གནས་པས། །ཚོགས་ཀྱི་མཆོད་པ་ལ་སོགས་ཀུན། །ཉེ་བར་སྟ་གོན་གནས་བྱས་ཏེ། །རང་བཞིན་དག་ཅིང་སྦྱངས་པས་མཛེས། །ཆོས་ཀུན་མཚན་ཉིད་བཤད་པ་དེས། །ནམ་གྱི་གུང་ལ་མཉམ་སྦྱར་ནས། །སངས་རྒྱས་ཀུན་གྱིས་བྱིན་བརླབས་པའི། །དྲི་མེད་བདུད་རྩིར་བྱིན་བརླབས་པའི། །ལྕེ་ཡི་པད་སྟེང་རྡོ་རྗེའི་རྩེར། །བདེ་བ་ཆེན་པོའི་སྙིང་པོར་སྦྱིན། །ངག་གི་སྒྲར་བཅས་དམ་ཚིག་བསྒྲགས། །དེ་ནས་རིགས་དང་རྒྱུད་སྦྱངས་ལ། །བརྡ་དང་གར་ལ་སོགས་པ་ཡིས། །ནམ་ཕྱེད་དུས་སུ་བུམ་དབང་བསྐུར། །ཕྱི་རོལ་སྦྱོར་བ་དག་པ་དང༌། །རྩ་གནས་རླུང་གི་སྦྱོར་བ་མཁས། །བདེ་བ་ཆེ་ལ་ལྷག་པར་དང༌། །དེ་ལ་སྒྱུ་མའི་དཀྱིལ་འཁོར་དུ། །ཡེ་ཤེས་རྟོགས་ཕྱིར་དབང་བསྐུར་མཆོག །བག་ཡངས་ཉམ་ང་བློས་ཐོངས་ཚེ། །སྐད་ཅིག་སྐད་ཅིག་དབྱེར་མེད་པར། །བདེ་བ་ཆེན་པོའི་བདག་ཉིད་སད། །མ་ནིང་མཁན་པོ་སྒྲ་མཁན་དང༌། །ཚད་མ་རྟོག་གེའི་སྤྱོད་ཡུལ་མིན། །དགག་ཅིང་སྒྲུབ་ལས་འདས་པས་ན། །བརྗོད་བྲལ་ལྷན་ཅིག་སྐྱེས་དགར་གསུངས། །འདི་དག་བདེ་བར་སྐྱོང་བྱེད་རྣམས། །བསླབ་བཞི་འདུལ་སྒོམ་དམ་ཚིག་ཀུན། །ངེས་པར་བསྲུང་ཕྱིར་སེམས་བདག་ཉིད། །བྱང་ཆུབ་མཆོག་ཏུ་རྒྱལ་བ་བཞེད། །དཀོན་མཆོག་གསུམ་གྱི་དགྲ་བསད་ཅིང༌། །འདོད་ལ་ངེས་པར་ཆགས་ཕྱིར་སྤྱད། །


DTG047_Page_0362
[མ་དཔེ་གཟིགས་ན་འདིར་གནོན།]

གཞན་གྱི་ལོངས་སྤྱོད་བག་མེད་བླངས། །དངོས་གྲུབ་བརྫུན་སོགས་སྒྱུ་མར་སྨྲ། །ཚོགས་དྲུག་བདེ་ཆེན་ལོངས་སྤྱོད་སྤྱད། །གྲུབ་པ་ལྔ་དང་ལྕགས་ཀྱུ་ལྔ། །ལོངས་སྤྱོད་ལྔ་སོགས་རྒྱུན་དུ་སྤྱད། །རྟག་ཏུ་སེམས་ལས་དངོས་གྲུབ་བསྒྲུབས། །དུས་གསུམ་རྟག་པའི་སྐུ་རུ་གནས། །དེ་ལྟར་དེ་བཞིན་གཤེགས་གྱུར་ནས། །སངས་རྒྱས་སྲས་སུ་ལུང་བསྟན་ཏེ། །བུ་ལ་སྟོན་པའི་ཕྱག་མཚན་བསྐོན། །གཡས་པ་སྐྱབས་སྦྱིན་གཡོན་མཉམ་གཞག །སེམས་ཅན་དོན་སྒྲུབ་ཚུལ་དུ་ལངས། །དེ་ལ་མགྲིན་ཅིག་ཚིག་འདི་བརྗོད། །ཨོཾ་ངས་ཁྱོད་འདི་ལྟར་ལུང་བསྟན་ཏེ། །སྲིད་པའི་དན་འགྲོ་རྣམས་ལས་བཏོན། །སྲིད་པ་མཆོག་ཏུ་བསྒྲུབ་པའི་ཕྱིར། །རྡོ་རྗེ་སེམས་དཔའ་དེ་བཞིན་གཤེགས། །ཨོཾ་ཡ་མཱནྟ་ཀྲྀཏ་ཧཱུཾ་མཾ་བྷུར་བྷུ་ཝ་སྭཿ། དེ་ནས་དབུགས་དབྱུང་སྦྱིན་བྱ་སྟེ། །དེ་རིང་ཁྱོད་བདག་ལེགས་པར་རྙེད། །མི་ཡི་སྲིད་པ་དོན་དང་བཅས། །སངས་རྒྱས་ཀུན་གྱི་རིགས་སུ་སྐྱེས། །སེམས་ཉིད་རང་བྱུང་བ་ཡི་གཏེར། །ཕུན་སུམ་ཚོགས་པའི་ཉེ་བ་གནས། །གསང་སྔགས་མཉམ་མེད་སེམས་ལས་གྲུབ། །ཟག་པ་མེད་པའི་དཀྱིལ་འཁོར་ཆེ། །མཐོང་བའམ་ནི་ཞུགས་གྱུར་པས། །སྡིག་པ་ཀུན་ལས་རྣམ་པར་གྲོལ། །བྱང་ཆུབ་སེམས་མཆོག་རྨད་བྱུང་རྙེད། །འགྲོ་བ་ཀུན་གྱི་སྐྱབས་གནས་མཆོག །བདུད་བཞི་འཇོམས་ཤིང་དུཿ་ཁ་ཡི། །སྐྱེ་རྒ་ན་འཆི་འཇིག་པར་བྱེད། །སྲིད་པའི་ངོ་བོ་ཉིད་དག་པའི། །ཕྱག་ན་རྡོ་རྗེ་དེང་གྱུར་ཏོ། །དེ་ནས་དེའི་སེམས་ཀྱི་མཚན་ཉིད་བསྟན་པར་བྱ་སྟེ། བྱང་ཆུབ་ཆེན་པའི་རྒྱུར་གནས་པའི། །མདོར་ན་ཕུང་པོ་ལྔ་རྣམས་ནི། །སངས་རྒྱས་ལྔར་ནི་རབ་ཏུ་གྲགས། །སྐྱེ་མཆེད་ཁམས་རྣམས་མང་པོ་ཀུན། །ལྷ་དང་ལྷ་མོའི་དཀྱིལ་འཁོར་མཆོག །ཡེ་ནས་རང་བྱུང་ཡེ་ཤེས་ཆེའོ། །བདག་ཉིད་ཆེན་པོ་རྟག་པའི་ལྷ། །མ་བསྒྲུབས་རྡོ་རྗེ་སེམས་དཔར་གནས། །དེ་ནས་བློ་ལྡན་སློབ་མ་ཡིས། །བདག་ཉིད་མཆོག་ཏུ་གྱུར་ཤེས་ནས། །བླ་མ་ལ་ནི་འབྱོར་པའི་མཆོག །ཅི་ནུས་དད་པས་དབུལ་བར་བྱའོ། །དེ་ནས་ཚོགས་ཀྱིས་མཆོད་པ་དང༌། །ཞི་བའི་སྦྱིན་སྲེག་བརྒྱའམ་སྟོང༌། །འབྱུང་པོ་ཀུན་ལ་གཏོར་མས་མཆོད་།སྐྱེ་བོ་གཞན་ཡང་མགུ་བྱ་ཡི། །ལོངས་སྤྱོད་ཅི་རིགས་མཁས་པས་སྦྱིན། །དེ་ནས་བཟོད་གསོལ་


DTG047_Page_0363
[མ་དཔེ་གཟིགས་ན་འདིར་གནོན།]

བཤགས་པ་དང༌། །ཡེ་ཤེས་དཀྱིལ་འཁོར་གཤེགས་སུ་གསོལ། །རྡུལ་ཚོན་མཚན་མ་ཀུན་བསྡུས་ཏེ། །བསྔོ་བདག་བྱས་ཆུ་བོར་དོར། །བླ་མ་མཉེས་བྱས་ཅི་རིགས་གཤེགས། །མཐར་ནི་དམ་ཚིག་མཆོག་གིས་བསྟན། །བདག་གཞན་དོན་རྣམས་རབ་བསྒྲུབ་ཕྱིར། །རྟག་ཏུ་བདེ་བའི་མཆོག་གནས་པས། །རང་གི་དམ་ཚིག་བསྲུང་བར་གྱིས། །དཔལ་རྡོ་རྗེ་འཇིགས་བྱེད་ཀྱི་དམ་ཚིག་སྒྲུབ་པར་བྱེད་པའི་ཆོ་ག །དངོས་གྲུབ་མཉེས་པའི་སློབ་དཔོན་ཆེན་པོ་དཔལ་ལ་ལི་ཏ་བཛྲའི་ཞལ་སྔ་ནས་མཛད་པ་རྫོགས་སོ།། །།གྲུབ་པ་བརྙེས་པའི་པཎྜི་ཏ་ཆེན་པོ་ཨ་མོ་གྷ་བཛྲ་དང༌། །ལོ་ཙཱ་བ་མར་པ་དགེ་བསྙེན་ཆོས་འབར་གྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།།

རྡོ་རྗེའི་ཚིག་རྣམ་པར་དབྱེ་བ་ཞེས་བྱ་བ།
དཔལ་འཛིན།


DTG047_Page_0363
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། བཛྲ་པ་ད་བི་བྷེ་ད་ནཱ་མ། བོད་སྐད་དུ། །རྡོ་རྗེའི་ཚིག་རྣམ་པར་དབྱེ་བ་ཞེས་བྱ་བ། གང་ཞིག་ཁྲོ་བ་ལས་རྒྱལ་ལེགས་པ་དུ་མ་འབྱུང་བའི་གནས། །དུཿ་ཁ་ཆེ་འཇོམས་བདེ་བ་རབ་རྒྱས་བདེ་ཆེན་མ་ཧེའི་ཞལ། །ཆགས་ལས་རྣམ་རྒྱལ་ཆགས་བྲལ་རབ་འཇོམས་མཚན་མ་ལེགས་བསྒྲེངས་པའི། །བཅོམ་ལྡན་འཇིགས་མཛད་ཧེ་རུ་ཀ་ལ་ཀུན་ནས་གུས་ཕྱག་འཚལ། །གང་ཞིག་ཁམས་ཀྱི་སྙིང་པོ་བདེ་བ་འཛིན་བྱེད་དགེ་སློང་ཆེན་པོ་ཡིན་ཕྱིར་དམ་ཚིག་སྡོམ་པས་བརྒྱན། །རྒས་པའི་འཇིགས་བྲལ་རྣམ་པར་མཛེས་ལྡན་གཟུགས་བཟང་དྲི་མེད་གཟི་འོད་རབ་རྒྱས་ཡུན་རིང་བདེ་བར་འཚོ། །རྡོ་རྗེའི་སྐུ་ཐོབ་མཚན་དཔེས་རབ་བརྒྱན་ལྷ་དང་ལྷ་མིན་གནོད་སྤྱི་གདེངས་ཀ་མཁའ་འགྲོ་དབང་དུ་བསྡུ། །རྒྱལ་བའི་ཐུགས་མཐོང་དམྱལ་བའི་འཇིགས་འཇོམས་དེ་ཡི་མདུན་ན་རྡོ་རྗེ་འཆང་གནས་གཤིན་རྗེའི་གྲོང་ལས་རིང༌། །བྱང་ཆུབ་སེམས་ཉམས་མཁའ་འགྲོའི་གྲོང་ཁྱེར་བྱེ་པ་འཇིགས་འགྱུར་ལྷ་དང་བླ་མ་སྒྲུབ་ལ་སྤྱན་མི་བལྟ། །བདེ་བ་སྤངས་ཕྱིར་ཚུལ་ཁྲིམས་འཆལ་གྱུར་དམ་ཚིག་ལས་འདས་ཐུབ་དབང་བསླུས་པས་དམྱལ་བའི་དུཿ་ཁ་མྱོང༌། །གཟི་འོད་རབ་ཟད་རྒྱུད་ལས་ཉེར་གཟིར་ཕྲིན་ལས་ཉམས་ཤིང་དངོས་གྲུབ་རིང་གྱུར་རྒས་དང་འཆི་བས་འཇོམས། །ལྟུང་བའི་བདེ་བས་ཡེ་ཤེས་མི་མཐོང་འདོད་ཆགས་དབང་གྱུར་རྣལ་འབྱོར་ལམ་མིན་ཚེ་འདིར་འབྲས་བུ་འགག །སོ་སོའི་སྐྱེ་བོ་ཉམས་ཕྱིར་འབྲས་ཆང་ཟག་དང་དོན་མེད་ཚངས་སྤྱོད་སྐམས་གྱུར་དོན་


DTG047_Page_0364
[མ་དཔེ་གཟིགས་ན་འདིར་གནོན།]

ཆུང་གླ་རྩི་ངན། །རྣལ་འབྱོར་ཐབས་དང་ལྡན་པའི་ཐིག་ལེ་དོན་ལྡན་འགྱུར་ཏེ་མཛངས་པའི་ནོར་ཡིན་ཡོན་ཏན་རབ་ཏུ་འཕེལ། །སྦྱོར་ལམ་ལ་ནི་ཡུན་རིངས་འབད་ཀྱང་སྐད་ཅིག་གིས་ཉམས་ལོ་ཟླའི་འབྲས་བུ་སེར་བས་འཇོམས་པ་ལྟར། །རྫས་དང་ལམ་ཁ་ཁ་ཟས་འཁྲུལ་འཁོར་རླུང་དང་དམིགས་པས་རང་ལུས་སྣ་ཚོགས་འདི་འཕེལ་བྱ། །ཚད་མེད་སྙིང་རྗེ་རབ་རྒྱས་སྐྱབས་འགྲོ་སེམས་བསྐྱེད་རྒྱ་ཆེན་སེམས་དཔའ་གསུམ་ལྡན་སྔོན་དུ་སྟོ་བར་སྒོམ། །རྐང་པ་རྡོ་རྗེ་སྐྱིལ་ཀྲུང་ལག་གཉིས་མཉམ་གཞག་ལུས་བསྲང་མགྲིན་པ་དགུག་ཅིང་དཔུང་མགོ་ལེགས་པར་བརྐྱང༌། །སྣ་རྩེར་མིག་གཏད་ཕྱིར་ལ་རླུང་བུད་ནང་དུ་བསྡུ་དང་བསྐྱར་ཏེ་དགང་ཞིང་མཇུག་ཏུ་གྱེན་ལ་འཕང་རོ་རྐྱང༌། །མི་ཕྱེད་ཕྲ་གཟུགས་བརྟན་འཛིན་རྟོག་མེད་གང་བའི་དབུས་དེར་འབར་བའི་ཨ་ཐུང་ལ་སེལ་བྱ། །མེ་དང་ཉི་མ་ལན་ཚྭ་སྤངས་ལ་མཐུན་པའི་ཟས་བརྟེན་ཐོག་མར་རང་ལུས་བསྒོམ་བྱ་དགེ་བ་བསྔོ། །ཚ་ཞིང་གཟེར་ཟུག་འཐེམས་འཆུས་ལྷགས་པས་ལུས་དང་རྩ་ཡིན་སྟོང་དང་བུག་པ་རླུང་མེ་ཆུ་ས་སྒོམ། ནམ་མཁར་སྡིགས་མཛུབ་རྡོ་རྗེ་རོལ་པ་སེང་གེ་རྣམ་གྲོལ་བརྐྱང་བསྐུམ་རོལ་སྟབས་རི་བོང་གྱད་འཛིན་དང༌། །ཀ་ར་ན་ཏེ་འཁྲུལ་འཁོར་འདི་དྲུག་མདུན་རྒྱབ་གཡས་གཡོན་རྡོ་རྗེ་གར་བྱ་དྲག་པོའི་རླུང་གི་བུ། །སྟེང་དང་འོག་ཏུ་བལྟ་ཞིང་འདུག་སྟེ་བརྩོན་པས་འབད་ན་རྩ་ཡི་སྟོབས་རྒྱས་ལུས་ཀྱི་ནད་རྣམས་འཇོམས། །དབུག་རྔམ་རྒོད་འགག་བཟློག་འཚུབ་གཏོར་བ་རླུང་དང་ངག་སྟེ་གཡས་གཡོན་མདུན་རྒྱབ་སྟེང་འོག་བུག་པ་སྒོམ། །སྟག་མོའི་སྐྱུག་སྟངས་སྤྲུལ་གྱི་བྱ་བ་བསྙེངས་དང་རྒོད་ཀྱི་ལྡིང་ཐབས་རི་བོང་མཆོག་འགྲོས་རྨ་བྱའི་མཇིང་སྐོར་དང༌། །སེང་གེའི་སྤྲུག་སྟངས་འཁྲུལ་འཁོར་འདི་དྲུག་ཧ་རིངས་ཧི་ཐུང་ཧཱུཾ་ཞེས་དྲག་པའི་རླུང་དང་བཅས་ཏེ་བུ། །དེས་ནི་བཟློག་འཚུབ་གཏོར་བའི་སྐྱོན་སྤོང་རླུང་གི་སྟོབས་རྒྱས་ངག་གི་ནད་རྣམས་འཇོམས་པར་བྱེད། །འབྱོངས་འདུས་ལྟེངས་པ་ཡིད་ཀྱི་སྐྱོན་ནི་ཉམས་ཤིང་སྐམ་གྱུར་ཆག་དང་ཟུག་རྡུ་སྐྱེས་པ་ཐིག་ལེའི་གགས། །སེམས་ནི་བསྡུས་ཕྱིར་ཧཱུཾ་གྱུར་སླར་ཞུགས་དབུ་མར་ཐིམ་སྟེ་གསང་ཞིང་འཕང་བྱ་གང་འདོད་ཡིད་ལ་བསམ། །གུ་གུལ་ཡུངས་ཀར་ཐལ་ཆེན་གྲི་ཁྲག་དུག་དང་རུས་པ་


DTG047_Page_0365
[མ་དཔེ་གཟིགས་ན་འདིར་གནོན།]

སྤྲང་མར་གཅན་གཟན་པགས་པ་ཚ་བ་གསུམ། །འཁྲུལ་འཁོར་དྲུག་དང་རྫས་སྔགས་དམིགས་པ་གཟུང་བཟློག་དགྲམ་སྟེ་ཐིག་ལེའི་སྟོབས་རྒྱས་ཡིད་ཀྱི་ནད་རྣམས་འཇོམས། །མེ་ཕྲེང་སྡོང་པོ་གཙུབ་ཤིང་འཁོར་ལོ་སུམ་འགྱུར་ཀུན་ཁྱབ་མེ་ཡི་དཀྱིལ་འཁོར་དྲོད་ཀྱི་བོགས་སུ་འགྱུར། །རླུང་གི་གཞུ་ཡིས་མེ་ཡི་མདའ་འཕངས་ཧཾ་གི་འབེན་བཅོམ་ལྟེ་བའི་སྙོམས་འཇུག་ཡིད་འཕྲོག་པདྨ་དང༌། །སྟེང་འོག་རླུང་གི་འཁོར་ལོ་ཁ་སྦྱོར་འོག་མ་འབྱེད་འཛུམ་ཡིད་ཀྱི་རིག་མ་བདེ་སྟོང་བོགས་སུ་འགྱུར། །པདྨའི་ཕྲེང་བ་ཏིལ་གྱི་མར་མེ་མཐིང་གི་རྒྱ་མཚོ་རླུང་གི་པ་དན་གསལ་བའི་བོགས་སུ་འགྱུར། །ལག་པའི་ཕྱག་རྒྱས་རིགས་ལྔའི་འཁོར་ལོ་གསང་བའི་རྡོ་རྗེ་ཞི་བས་གསོར་ཏེ་དཀར་བསིལ་རི་བོང་དབབ། །འོག་རླུང་འཐེན་ཞིང་སྒོ་གཅིག་བསྡམས་ཏེ་གླིང་བཞི་བསྡུས་ནས་རིག་བྱེད་སོར་མོས་ལམ་གཉིས་མཚམས་སུ་མནན། །ཡིད་ཀྱི་ཕྱག་རྒྱ་ཡིད་འོང་ལ་སེམས་སྙོམས་འཇུག་ཏིང་འཛིན་གཡོས་པས་བདེ་སྟོང་དགའ་བ་དང་པོའོ། །མཆོག་གི་གཉེན་པོ་རྩོལ་བ་དོར་ལ་དབང་པོ་བཟློག་ཅིང་ལམ་གཅིག་གླིང་བཞི་རྩོལ་མེད་མགྲིན་པ་དགུག །སྟེང་དང་འོག་ལ་རླུང་ལ་འདོར་ལེན་བྱ་ཞིང་ཆགས་པས་མི་འཕྲོགས་ཏིང་ངེ་འཛིན་རོ་མྱང་ཧཾ་ལ་གཏད། །རྡོ་རྗེ་ཁུ་ཚུར་གླིང་བཞི་བསྡུ་ཞིང་ངན་འགྲོའི་ལམ་དག་རྒྱ་མཚོ་རི་རབ་ལ་སྦྱར་ལྷུན་པོ་དགུག །རོ་འཛིན་ཉི་ཟླ་སྟེང་ཕྱོགས་ཐུར་སེལ་གྱེན་ལ་འདྲེན་ཅིང་སེམས་དང་ཐེག་ལེ་ནམ་མཁའི་དབུས་སུ་གཏད། །ལྷ་དབང་ལྷུན་པོ་གླང་པོ་སྣར་འཛིན་རྣམ་འགྱིང་རོལ་པ་རྡོ་རྗེ་གཙུག་ཏོར་བརྒྱད་ཀྱི་འཛིན་སྟངས་དང༌། །རྩེ་གསུམ་གདེངས་ཀ་འདི་དྲུག་ཧི་ཀ་དང་ཧཱུཾ་གྱིས་སྟེང་འོག་རླུང་གཟུང་དྲག་ཏུ་འཐེན་པས་བདུན་གྱིས་འདྲོངས། །སྤྲུགས་པ་གར་དང་སེང་གེ་རྣམ་རོལ་རྣམ་འགྱིང་གཞོན་ནུ་ཀུན་སྤྱོད་ལྷ་མོའི་རོལ་སྟབས་ཀྱིས། །ལྡང་དང་འདུག་ཅིང་ཐམས་ཅད་བསྐྱོད་པས་སྣ་ཚོགས་ལུས་སྤྲུག་རབ་ཏུ་གསིག་ཅིང་སྐྱིལ་ཀྲུང་གདན་ལ་འཕགས། །རླུང་དང་བཅས་པས་རོ་སྟོད་རོ་སྨད་མགོ་དང་དབང་པོ་ཡན་ལག་བཞི་སྟེ་གང་འདོད་རྣམས་སུ་དགྲམ། །ཐིག་ལེ་ཀུན་ཁྱབ་ཡེ་ཤེས་བདེ་ཆེན་རོས་གང་བསྒོམས་པས་བཞི་པའི་དགའ་བ་རྡོ་རྗེ་འཆང་དུ་འགྱུར། །སྒྲུབ་འདོད་སློབ་མ་ཐེག་ཆེན་རིགས་གྱུར་གསང་སྔགས་ལ་མོས་བླ་མ་བཟང་འཛིན་


DTG047_Page_0366
[མ་དཔེ་གཟིགས་ན་འདིར་གནོན།]

ཐར་པ་འདོད་རྣམས་ཀྱིས། །དང་པོའི་དོན་དུ་རྣམ་བདུན་དབང་སྦྱིན་མཆོག་དབང་བསྐུར་ལ་སློབ་མ་སྨིན་བྱས་སྐལ་ལྡན་ཉིད་དུ་སྒྲུབས། །བླ་མ་ལ་གུས་བློ་བཟང་ལང་ཚོ་བརྩོན་བཅས་གྱུར་ན་གདམས་པ་མཆོག་སྦྱིན་དམ་ཚིག་དོན་དུ་བསྟན། །རྣལ་འབྱོར་རྟོག་བྲལ་དཀར་པོ་མི་ཉམས་ཏིང་འཛིན་རྒྱས་བྱེད་ཀུན་མཁྱེན་ཐོབ་ཕྱིར་ཐབས་དང་ལྡན་པས་བྱ། །གང་ཞིག་དཀར་པོ་མི་འདོར་རྣལ་འབྱོར་བས་ནི་རྒྱལ་པའི་བདེ་བ་སྒྲུབ་ཅིང་ཕོ་ཉའི་ལམ། །དཔལ་ལྡན་འདུས་པ་མ་ལུས་རྒྱུད་དུ་ཐུབ་དབང་རྣམས་ཀྱིས་ཡང་དག་ལམ་དུ་ཐབས་འདི་ལེགས་པར་གསུངས། །སྒྲུབ་པོ་ལང་ཚོས་ལུས་དང་རྩ་བཟངས་བརྩོན་བཅས་བློ་གྲོས་བཟང་ལྡན་དབང་གིས་རྣམ་པར་སྨིན། །གསུམ་པའི་དབང་ཐོབ་སྔགས་དང་རྒྱུད་ཀྱི་ཕ་རོལ་སོན་ཅིང་བླ་མའི་ལུང་གིས་སྒྲུབ་དང་སྐྱོན་སེལ་མཁས། །དབང་གི་ཡེ་ཤེས་མངོན་དུ་བྱས་ཏེ་རྩ་དང་རླུང་འབྱོངས་ཐིག་ལེ་ལ་དབང་གཉེན་པོ་འཛིན་ནུས་ཤིང༌། །དབང་དང་དཀྱིལ་འཁོར་ལྷ་སྔགས་རྫོགས་རིམ་ཐབས་ལམ་མཐར་ཕྱིན་སེམས་ཉིད་ངེས་རྟོགས་ས་བཅུ་མངོན་དུ་འགྱུར། །དཔལ་ལྡན་རྒྱུད་མཆོག་རྒྱ་ཆེན་བླ་མའི་མན་ངག་རབ་ཟབ་རྣམས་ལས་དྲི་མེད་བདུད་རྩིའི་བཅུད་བབས་པས། །ཐབས་ལམ་མན་ངག་རྡོ་རྗེའི་ཚིག་འབྱེད་མེ་ཏོག་ཕྲེང་འཛིན་སྦས་པའི་གནད་འདི་དོན་ཡོད་རྡོ་རྗེས་ཕྱེ། །དེ་ཡི་དགེ་བ་མཐའ་ཡས་རྒྱ་ཆེན་མི་ཉུང་དེས་ནི་བདེ་ཆེན་དབུས་སུ་ལྷན་ཅིག་སྐྱེས་པས་རབ་ཏུ་འཁྱུད་གྱུར་ཅིག །འགྲོ་བ་ཀུན་གྱི་བསྐལ་པའི་ལམ་ཆེན་ཚེ་འདིར་བགྲོད་དེ་རྡོ་རྗེ་འཆང་དབང་སྔོན་དུ་བྱེད་པར་ཤོག །རྒྱུད་དང་མན་ངག་ཐམས་ཅད་ཀྱི་དོན་ཕྱོགས་གཅིག་ཏུ་བསྡེབས་མཚན་མ་གྱེན་འགྲེང་ཐིག་ལེའི་འཁྲུལ་འཁོར་གྱི་མན་ངག །རྡོ་རྗེའི་ཚིག་རྣམ་པར་དབྱེ་བ་ཞེས་བྱ་བ། རྒྱ་གར་ཤར་ཕྱོགས་ཀྱི་པཎྜི་ཏ་ཨ་མོ་གྷ་བཛྲས་མཛད་པ་རྫོགས་སོ།།

རྡོ་རྗེ་ཙཱ་རྩི་ཀཱའི་ལས་སྒྲུབ་པའི་ཐབས།
དཔལ་འཛིན།


DTG047_Page_0366
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། །བཛྲ་ཙཱ་རྩི་ཀཱ་ཀརྨ་སཱ་དྷ་ནཱཾ། བོད་སྐད་དུ། རྡོ་རྗེ་ཙཱ་རྩི་ཀཱའི་ལས་སྒྲུབ་པའི་ཐབས། བཅོམ་ལྡན་འདས་གཤིན་རྗེ་གཤེད་དམར་པོ་ལ་ཕྱག་འཚལ་ལོ། །བརྟུལ་ཞུགས་དང་ལྡན་པའི་སྒྲུབ་པ་པོས། དུར་ཁྲོད་དུ་ཕྱིན་ལ་དབེན་པར་བྱ་སྟེ། ཞག་བདུན་དུ་བསྒྲུབ་པར་བྱའོ། །མདུན་དུ་མཎྜལ་མདའ་གང་གི་ཚད་ཀྱི་གྲུ་བཞི་པ། །དབུས་སུ་སོར་ཉི་ཤུ་བའི་


DTG047_Page_0367
[མ་དཔེ་གཟིགས་ན་འདིར་གནོན།]

ཐབ་ཁུང་བརྐོ་ཞིང༌། སྟེང་དུ་ཁ་ཁྱེར་བརྩིག་པར་བྱའོ། །དེ་ལ་དུར་ཁྲོད་ཀྱི་སོལ་བས་བྱུག །དེའི་གྲྭ་ལྷ་སྦྱིན་གྱི་ཕྱོགས་སུ་བསྟན། ལྕགས་ལས་བྱས་པའི་རྡོ་རྗེ་རྩེ་གཅིག་པ་སོར་བཅུ་གཉིས་པ་མདུན་དུ་དགོད། འབྲས་ཕྱེ་དང་ལྷ་སྦྱིན་གྱི་རྫས་ལ་བརྟག་པ་བྱས་ལ། ཨ་རྒའི་ལོ་མ་ལ་རིགས་དང་མིང་བྲིས་ལ། སྙིང་གར་བཅུག་ལ། བྷི་ཀུའི་སྲད་བུས་བཏགས་ཏེ་མགོ་བོར་བཅིང༌། དེའི་སྟེང་དུ་མན་ཇིའི་སྟེང་དུ། ཀོ་ཤ་ཀ་པཱ་ལར། ཤ་ཁྲག་གམ། གཏོར་མ་གཞག་གོ །དེ་ལྟར་གཏོར་མ་རྒྱུན་དུ་བཏང་ངོ༌། །དེ་ནས་བདག་ཉིད་གཤིན་རྗེའི་གཤེད་དམར་པོ་རྣལ་འབྱོར་དང་ལྡན་པས། མདུན་གྱི་ཟུར་དེར། དཔལ་ལྷ་མོ་ཙཎྜི་ཀ་ཞལ་གཅིག་ཕྱག་གཉིས་པ། སྐུ་མདོག་དམར་ནག །གཡས་གྲི་གུག །གཡོན་ཐོད་པ་ཁྲག་གིས་བཀང་བ་བསྣམས་པ། བདག་གི་བཀའ་ལུང་ཉན་པར་བསྒོམས་ལ། དམ་ཚིག་གི་རྫས་ཕུལ་བས་མཉེས་པར་བྱའོ། །ཨོཾ་ཤྲཱི་ཡ་མཱནྟ་བཛྲ། ཙཎྜི་ཀ །རཀྟ་ཛ་ཊི། ཨ་མུ་ཀཾ། ཀ་པ་ཏྲི་ཡན་ཏྲི་པ་ན་ཏྲི། ཀ་བིད་ཏྲཱི། མ་ཧཱ་ནི་ཏྲི། ཀ་ལ་ན་ཏྲི། པི་ཙོ་ཀ་ཡ། མ་ཙུ་ཁོ། །ཨུ་ལ་ཙ་ཙུ་ཏྲི། ཁ་ན་ཨུ་མ་ཙོ། །ཁོ་ལ་ན་ཙོ། །བཛྲ་ཙ་མུཎྜི་ཧཱུཾ། པཱུ་ཙ་ཨུ་ཨ་ཁ་མུཎྜི། ཨི་ཙི་མི་ཙི། ཕུ་ལ་ཨུ་མ་ཙི། ཁོ་ཁུ་ལི། མི་ལི་ཙུ་པ་ཙ་རོ། །ཙ་མུ་ཎཌི། ཀ་ར་ཡི་ཀ་ར། །སརྦ་དུཥྚཱ་ན། ཨ་མུ་ཀཾ །མཱ་ར་ཡ་ཕཊ། ཨི་མཾ་བ་ལིཾ། རཀྟ་ཙིཏྟ། ཁ་ཁ། ཁཱ་ཧི་ཁཱ་ཧི། སརྦ་དུ་ཥྚཱན། ཨ་མུ་ཀཾ། མཱ་ར་ཡ་ཕཊ། ཅེས་པ་དང༌། སྐབས་སུ་དྲག་པོའི་རྫས་ཀྱི་སྦྱིན་སྲེག་གིས་ལྷ་སྦྱིན་ལ་བརྡེག་པར་བྱའོ། །དཀྱིལ་འཁོར་དུ་སྲོག་ཆགས་མུན་ཊོ་ཀ་ལ་དར་སྒྲ་སྒྲོགས་པ་དང༌། རཀྟ་ས་མུ་དྲ་བྱུང་བ་དང༌། རྡོ་རྗེ་རྩེ་གཅིག་པས་ལྷ་སྦྱིན་ལ་བརྡུང་བ་དང་གདབ་པར་བྱའོ། །ལྷ་སྦྱིན་ཡི་དགས་དང༌། མིང་ལ་སོགས་པ་ཐབ་ཁུང་དུ་སྦྱིན་སྲེག་བྱའོ། །གཏོར་མ་ཡང་ལྷ་སྦྱིན་གྱི་ཕྱོགས་སུ་དོར་རོ། །དེས་མ་གྲུབ་ན་ལན་གཉིས་གསུམ་དུ་བསྒྲུབ་པར་བྱའོ། །དེས་ཀྱང་ལས་མི་བྱེད་ན། དཔལ་རྡོ་རྗེ་ཙ་ཎྜི་ཀ་སྔོན་གྱི་ཐུགས་དམ་དྲན་དུ་གཞུག་པའི་མན་ངག་བྱ་སྟེ། གནད་ལ་དབབ་པས། མནའ་བསྐྱལ་བའི་དམ་ཚིག་དྲན་པའི་ཕྱིར་རོ། །དེ་ལྟར་བྱས་ན་སྒྲུབ་པ་པོའི་བསམ་པ་འགྲུབ་པར་འགྱུར་རོ། །རྡོ་རྗེ་ཙཎྜི་ཀའི་ལས་སྒྲུབ་པའི་ཐབས་


DTG047_Page_0368
[མ་དཔེ་གཟིགས་ན་འདིར་གནོན།]

སློབ་དཔོན་ཆེན་པོ་བྲམ་ཟེ་དཔལ་འཛིན་གྱིས་མཛད་པ་རྫོགས་སོ།། །།རྒྱ་གར་གྱི་པཎྜི་ཏ་རྒྱལ་སྲས་བི་བྷཱུ་ཏི་ཙཎྜིའི་ཞལ་སྔ་ནས། གློ་བོ་ལོ་ཙཱ་བ་དགེ་སློང་ཤེས་རབ་རིན་ཆེན་གྱིས་ཆོས་ཀྱི་རྒྱལ་པོའི་ཕོ་བྲང་སྐུ་མཁར་ཉི་གཟུངས་སུ་བསྒྱུར་བའོ།།

རྡོ་རྗེ་འཇིགས་བྱེད་ཀྱི་སྒྲུབ་ཐབས་ཞེས་བྱ་བ།
ཨ་ཤོ་ཀ་སྲཱི།


DTG047_Page_0368
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། བཛྲ་བྷཻ་ར་ཝ་སཱདྷ་ནཱ་མ། བོད་སྐད་དུ། རྡོ་རྗེ་འཇིགས་བྱེད་ཀྱི་སྒྲུབ་ཐབས་ཞེས་བྱ་བ། འཇམ་པའི་རྡོ་རྗེ་ལ་ཕྱག་འཚལ་ལོ། །རབ་ཏུ་ཁྲོས་ཤིང་གདུག་པ་འདུལ། །མ་ལུས་ལོག་པའི་བདུད་འདུལ་བ། །ཞལ་དང་ཕྱག་དྲུག་མཚོན་ཆ་འཛིན། །མ་ཧེ་ཞལ་ལ་ཕྱག་འཚལ་ཏེ། དེ་ཡི་སྒྲུབ་པའི་རིམ་པ་ཞིག །བདག་གིས་དྲན་ནས་བརྩམ་པར་བྱ། །དང་པོར་ཡིད་དང་མཐུན་པའི་གནས་སུ་བདག་ཉིད་ཁྲུས་བྱས་ཏེ་སྟན་བདེ་བ་ལ་འདུག་ནས། ཨོཾ་བཛྲ་བྷཱཻ་ར་བཛྭ་ལ་ཛྭ་ལ་ཧཱུཾ། ཞེས་པས་ལུས་བསྲུངས་ནས། བླ་མ་དཀོན་མཆོག་ལ་མཆོད་པ་རྣམས་ཀྱིས་ཡང་དག་པར་མཆོད་ནས་སྡིག་པ་བཤགས་པ་ལ་སོགས་པ་བྱའོ། །ཨོཾ་ཨ་བྷ་བཱ་སྭ་བྷ་ཝ་བི་ཤུདྡྷ་བཛྲ་ཙ་ཀྲ་ཨ་ཨ་ཨཾ་ཨ། ཞེས་བྱ་བས་སྟོང་བ་ཉིད་བསྒོམ་མོ། །དེ་ནས་བདག་ཉིད་ཡི་གེ་ཨར་གནས་པ་ལས་དེའི་འོད་སེར་གྱིས་ཚངས་པ་དང་བརྒྱ་བྱིན་གྱི་སྟེང་དུ་ཨ་ཞུ་བ་ལས་ཨུཏྤལ་འཁོར་ལོས་མཚན་པ་དེ་ཞུབ་ལས་བཅོམ་ལྡན་འདས་འཇམ་པའི་རྡོ་རྗེ་ཞེས་བྱ་བ་སྐུ་མདོག་མཐིང་ནག་གཡས་ན་རྡོ་རྗེ་གཡོན་ན་ཨུཏྤལ་འཛིན་པ། གཞོན་ནུའི་ཆ་ལུགས་ལ་རྒྱན་གྱིས་བརྒྱན་པ་བསམ་མོ། །དེའི་ཐུགས་ཀ་ནས་ཉི་མ་ལ་ཧཱུཾ་གནས་པ་ཅན་དུ་བསམས་ཏེ། ཧཱུཾ་ཞེས་བྱ་བའི་སྒྲ་རྒྱུན་མི་འཆད་པར་བྱུང་བས་ཕྱོགས་བཅུའི་སངས་རྒྱས་ཐམས་ཅད་མཆོད། །ཚུར་ཧཱུཾ་ལ་ཐིམ་པས། ཞེ་སྡང་གི་སྐུར་གྱུར་པ་ནི། ཞལ་དྲུག་ཕྱག་རྣམ་པ་དྲུག་དང་ལྡན་པ། སྟོབས་ཆེ་བ། མ་ཧེའི་ཞལ་ཅན། སྐུ་མདོག་མཐིང་ནག །མི་མགོ་བརྒྱའི་དོ་ཤལ་ཅན། ཞབས་བརྐྱང་བསྐུམ་དུ་བཞུགས་པ། ཕྱག་དྲུག་གཡས་གཡོན་གྱི་དང་པོ་ཀེང་རུས་ཀྱི་དབྱུག་པ་དང་རྡོ་རྗེ་བསྣམས་པ། གཡས་གཡོན་གྱི་བར་པ་ན་མདའ་གཞུ་དང་རལ་གྲི། ཐ་མ་ན་སྣ་ཚོགས་རྡོ་རྗེ་དང་མདུང་བསྣམས་པའོ། །དེ་ལས་ཚད་མེད་པ་བཞིའི་ཁྲོ་བོ་འཕྲོ་བ་ཅན་ནོ། །ཞབས་བཞི་བརྐྱང་བསྐུམ་དུ་བཞུགས་པ་བསྒོམ། དེའི་ཐུགས་ཀར་ཉི་མའི་སྟེང་དུ་ཧཱུཾ་བསམས་ལ། སྤྱན་དྲང་བ་ལ་སོགས་པ་རྫོགས་པ་དང་གསང་སྔགས་བཟླས་པ་


DTG047_Page_0369
[མ་དཔེ་གཟིགས་ན་འདིར་གནོན།]

ནི། ཨོཾ་ཧྲཱིཿ་ཥྚྲྀཿ་ཝི་ཀྲྀ་ཏཱ་ན་ན་ཧཱུཾ་ཧཱུཾ། ཞེས་པ་འམ། ཨོཾ་དུཿ་ཁ་ཚེ་ད་ཧཱུཾ་ཧཱུཾ། ཞེས་པ་བཟླས་པར་བྱའོ། །དེ་ནས་མཚན་གྱི་སྒོ་ནས་བསྟོད་དོ། །གཏོར་མ་བཏང་ནས་གཤེགས་སུ་གསོལ་ཏེ་ལྡང་བར་བྱའོ། །བདག་གིས་དགེ་བ་འདི་བྱས་པས། །བླ་མེད་བྱང་ཆུབ་ཐོབ་པར་ཤོག །རྡོ་རྗེ་འཇིགས་བྱེད་ཀྱི་སྒྲུབ་ཐབས་སློབ་དཔོན་ཨ་ཤོ་ཀ་ཤྲཱིས་མཛད་པ་རྫོགས་སོ།། །།པཎྜི་ཏ་དྷརྨཱ་ཤྲཱི་མི་ཏྲ་དང༌། ལོ་ཙཱ་བ་ཆོས་ཀྱི་བཟང་པོས་བསྒྱུར་བའོ།།

དཔལ་རྡོ་རྗེ་ཕག་མོའི་སྒྲུབ་ཐབས།
དཔལ་འཛིན།


DTG047_Page_0369
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། ཤྲཱི་བཛྲ་བཱ་རཱ་ཧཱི་སཱ་དྷ་ནཾ། བོད་སྐད་དུ། དཔལ་རྡོ་རྗེ་ཕག་མོའི་སྒྲུབ་ཐབས། དཔལ་གཤིན་རྗེ་གཤེད་དམར་པོ་ལ་ཕྱག་འཚལ་ལོ། །གང་ཞིག་སྒྲུབ་པ་པོས་གདུག་པ་ཅན་རྣམས་སངས་རྒྱས་ཀྱི་བསྟན་པ་ལ་གཞུག་པའི་ཕྱིར། སྐལ་བ་དང་ལྡན་པའི་སྒྲུབ་པ་པོས་དབེན་པའི་གནས་སུ་སོང་སྟེ། སྟན་བདེ་བ་ལ་འདུག་ནས། མཆོད་པ་དང་གཏོར་མ་སྔོན་དུ་སོང་བས། རྡོ་རྗེ་ཕག་མོ་བསྒོམ་པར་བྱའོ། །ཞལ་གཅིག་ཕྱག་གཉིས་མ་སྐུ་མདོག་དམར་མོ། ཕྱག་གཡོན་ཐོད་པ་ཁྲག་གིས་གང་བ་ཐུགས་ཀར་འཛིན་པ། དེའི་སྟེང་དུ་གཡས་གྲི་གུག་འཇོག་པ། པདྨ་དང་ཟླ་བའི་སྟེང་དུ་གཡོན་བརྐྱང་བས་བཞུགས་པ། གཡས་བསྐུམ་པས་དེའི་བྱིན་པའི་སྟེང་དུ་རེག་པའི་བརྐྱང་བསྐུམ་གྱིས་བཞུགས་པ། སྤྱན་གསུམ་པ། དབུ་སྐྲ་གྲོལ་བ་ཅུང་ཟད་ཁྲོ་བའི་རྣམ་པ་ཅན། རུས་པའི་རྒྱན་གྱིས་བརྒྱན་པ། གར་གྱི་རོ་དང་ལྡན་པ་བསྒོམ་མོ། །དེའི་སྙིང་གའི་ཆུ་སྐྱེས་ལས་ཟླ་བའི་སྟེང་དུ་ཧྲཱིཿ་དམར་པོ་བལྟའོ། །ཆུ་སྐྱེས་འདབ་མ་བརྒྱད་པ་ཁ་ཕྱེ་བ་ལ། ཨཱ་ལི་བཅུ་དྲུག་འདབ་མ་རེ་རེ་ལ་གཉིས་གཉིས་མདུན་ནས་བརྩམས་ཏེ། གཡས་སྐོར་དུ་མགོ་གྱེན་དུ་བསྟན་པ་མདོག་དམར་པོ་བསམས་ལ། ཇི་སྲིད་མི་སྐྱོའི་བར་དུ་བསྒོམ་པར་བྱའོ། །དེ་ནས་སྔགས་བཟླས་པར་བྱ་སྟེ། ཨོཾ་ཨ་ཨཱ།ཨི་ཨཱི། ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽ། ཨཾ་ཨཿ་ཧྲཱིཿ་སྭཱ་ཧཱ། ཞེས་འབུམ་ཕྲག་ཉི་ཤུ་རྩ་གཅིག་པའི་སེམས་ཀྱིས་བཟླས་སོ། །དེའི་མན་ངག་ནི། རང་གི་སྙིང་གའི་ཧཱུཾ་ཧྲཱིཿ་ལས་འོད་ཟེར་འཕྲོས་ཏེ་སོང་བས་བསྒྲུབ་བྱའི་སྙིང་ལ་ཕོག །བདག་ལ་མ་དད་པའི་དྲི་མ་ཕྱིར་བསལ་ཏེ། གུས་པའི་སེམས་གསལ་བར་སྐྱེས་པར་བསམ། དེ་ནས་བསྒྲུབ་བྱ་དེའི་སྙིང་


DTG047_Page_0370
[མ་དཔེ་གཟིགས་ན་འདིར་གནོན།]

གར་སྔགས་ཀྱི་དབྱངས་ཀྱི་ཡི་གེ་བསམས་ལ། བདག་གི་སྙིང་གནས་སྣ་བུག་གཡས་ནས་ཧྲཱིཿ་ཐོན་ཏེ། སྣ་བུག་གཡོན་ནས་ཞུགས་ཏེ། སྙིང་གའི་དབྱངས་ཡིག་དང་རང་གི་སྙིང་གའི་ཡིག་འབྲུ་ལ་བསིལ་ལ་བདེ་བ་བསམ་ཁོའི་སྙིང་གའི་ཡིག་འབྲུ་རྣམས་དང༌། མིང་ཡིག་དང་པོ་སྐོམ་དུངས་དུངས་པར་བསམ་མོ། །ཧྲཱིཿ་ལ་ཐིམ་པས་སྐོམ་པའི་གདུང་བསེལ་བ་དང༌། བདེ་བ་སྐྱེས་པ་དེ་གཞིབས་ནས། ཡང་སྙིང་གར་བསྡུས་པ་ལ་འོག་གི་ཚིགས་བཅད་ཀྱི་དོན་དྲན་པར་བྱའོ། །དེ་ལྟར་ཞག་བདུན་གྱི་མཐར་མཚན་ཐོག་ཐག་བྱའོ། །དེས་འགྲུབ་པར་འགྱུར་རོ། །ཡང་རང་ཁ་ནུབ་ཏུ་བསྟན་པའི་མདུན་དུ་མེ་ལོང་ལ་དྲིས་བྱུགས་ཏེ། སིནྡྷུ་ར་བཀྲམ་ལ། དེ་ལ་པདྨ་འདབ་མ་བཞི་པ་ལྟེ་བ་དང་བཅས་པ་བྲིས་ཏེ། ལྟེ་བར་ཧྲཱིཿ་ཤར་དང་ལྷོ་དང་ནུབ་དང་བྱང་དུ་ཡཾ་རཾ་བཾ་ལཾ་རིམ་པ་བཞིན་བཀོད་པ་དང༌། ཇི་ལྟར་འབྱོར་པའི་མཆོད་པ་དང༌། ནམ་མཁའ་ལ་ཡི་གེ་ལྔ་བྲིས་པ་ལྟ་བུ་སྟེ། ནག་པོ་དང་དམར་པོ་དང༌། དཀར་པོ་དང༌། སེར་པོའི་རྣམ་པར་བསམས་ལ། མེ་ལོང་གི་ཡི་གེ་རྣམས་ལ་བསྟིམ། ཡི་གེའི་རྣམ་པ་ཅན་གྱི་མཁའ་འགྲོ་མ་རྣམ་པ་ལྔ་ལ་སྔགས་དེ་ཉིད་བརྗོད་ཅིང༌། མེ་ཏོག་དམར་པོ་དང༌། ཆང་གི་མཆོད་པ་བྱའོ། །དེ་ནས་ཕྲེང་བ་དམར་པོ་བཟུང་སྟེ། ཡཾ་རཾ་བཾ་ལཾ་ཧྲཱིཿ་ཞེས་བཟླས་སོ། །ལྟེ་བའི་ཡི་གེ་ལས་འོད་ཀྱི་ཕྲེང་བ་སྤྲོས་ཏེ། མདུན་གྱི་སྔགས་ལ་ཐིམ་པ་ལ་སོགས་པ་སྤྲོ་བ་དང་བསྡུ་བའི་རྣམ་པ་བྱའོ། །དེ་ལྟར་ས་ཡ་ཕྲག་གཉིས་བཟླས་སོ། །དེ་ནས་ཉའི་ནུབ་མོ་མཚན་ཐོག་ཐག་བྱའོ། །དེ་ནི་བསྙེན་པ་བྱ་བའོ། །དེ་ནས་རང་བྱུང་གི་མེ་ཏོག་སིནྡྷུ་ར་དང་བཅས་པའི་མཎྜལ་སྔར་བཞིན་བཀྲམ་སྟེ། ཤར་ལ་སོགས་པའི་ཡིག་འབྲུ་ཡཾ་ལ་སོགས་པ་བཀོད་ལ། སྔ་མ་ལྟར་ཡི་གེ་ལ་བསྟིམ། མཆོད་པ་རྒྱ་ཆེན་པོ་བྱ་ཞིང༌། སྔགས་བཟླས་པས། ཆུ་སྐྱེས་ཀྱི་ཧྲཱིཿ་ལས་འོད་འཕྲོས་ཏེ་བསྒྲུབ་བྱ་མདུན་དུ་བཀུག་སྟེ། འགྱེལ་བ་དང༌། ཡང་ཧྲཱིཿའི་འོད་ཟེར་དམར་པོའི་སྙིང་གར་ཐིམ་པས། དམར་ཁྲིག་སྟེ་ཁེངས་ནས་མྱོས་ཏེ། བདག་ལ་ཆགས་པས་བརྒྱལ་བར་བསམས་ལ། ཧྲཱིཿ་ལ་ཐིམ་པ་དང༌། ཡི་གེ་སྔགས་རྣམས་རྣམ་པར་ཡངས། །སྒྲ་དང་ཐིག་ལེ་སེམས་ཀྱང་མེད། །འདི་ནི་བདེ་བ་ཆེན་པོའི་མཆོག །བདག་དང་གཞན་དུ་ཡོད་མ་ཡིན། །ཞེས་


DTG047_Page_0371
[མ་དཔེ་གཟིགས་ན་འདིར་གནོན།]

བརྗོད་དོ། །དེ་ལྟར་ཞག་བདུན་གྱིས་འགྲུབ་པར་འགྱུར་རོ། །རྡོ་རྗེ་ཕག་མོའི་སྒྲུབ་ཐབས་གྲུབ་ཐོབ་ཀྱི་འཁོར་ལོས་སྒྱུར་བའི་སློབ་དཔོན་དཔལ་འཛིན་གྱིས་མཛད་པ་རྫོགས་སོ།། །།རྒྱ་གར་གྱི་པཎྜི་ཏ་ཆེན་པོ་རྒྱལ་བའི་སྲས་བི་བྷཱུ་ཏི་ཙནྡྲའི་ཞལ་སྔ་ནས། དཔལ་ཆོས་ཀྱི་དབྱིངས་ཀྱི་གཙུག་ལག་ཁང་རང་བྱུང་དུ་མཛད་པ་ལས་གློ་བོ་ལོ་ཙཱ་བ་དགེ་སློང་ཤེས་རབ་རིན་ཆེན་གྱིས་ཞུས་ཏེ་གཏན་ལ་ཕབ་པའོ།།

དཔལ་རྡོ་རྗེ་དབྱངས་ཅན་མའི་སྒྲུབ་ཐབས་ཞེས་བྱ་བ།
དཔལ་འཛིན།


DTG047_Page_0371
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། ཤྲཱི་བཛྲ་སཱ་ར་སྭ་ཏི་སཱ་དྷ་ནཾ་ནཱ་མ། བོད་སྐད་དུ། དཔལ་རྡོ་རྗེ་དབྱངས་ཅན་མའི་སྒྲུབ་ཐབས་ཞེས་བྱ་བ། དཔལ་གཤིན་རྗེ་གཤེད་ལ་ཕྱག་འཚལ་ལོ། །ཟླ་བ་ལྟར་གསལ་བློ་ངན་བསྲེག །དུག་འཇོམས་གཞན་དབང་བྱེད་མར་གྲགས། །བདེ་བ་ཕུན་སུམ་ཚོགས་སྟེར་མ། དཔལ་ལྡན་མ་ལ་གུས་ཕྱག་འཚལ། །དུར་ཁྲོད་ལ་སོགས་པ་ཡིད་དང་མཐུན་པའི་གནས་སུ་དམ་ཚིག་ལ་སོགས་པ་དང་ལྡན་པའི་སྔགས་པས་སྔ་བར་ལངས་ཏེ། མཎྜལ་བྱུག་པ་ལ་སོགས་པ་བྱས་ཏེ། སྟན་བདེ་བ་ལ་འདུག་པར་བྱའོ། །རང་གི་སྙིང་གའི་ཆུ་སྐྱེས་ལ་ཨ་ལས་སྐྱེས་པའི་ཟླ་བའི་དཀྱིལ་འཁོར་བལྟའོ། །དེའི་སྟེང་དུ་ཧྲཱིཿ་དཀར་པོའི་འོད་ཟེར་གྱིས་ནམ་མཁར་བླ་མ་དང་རྡོ་རྗེ་དབྱངས་ཅན་མ་ལ་སོགས་པ་ཡང་དག་པར་བལྟས་ལ། སྙིང་གའི་ས་བོན་ལས་ཨ་འཐོན་པའི་ལྷ་མོ་རྣམས་ཀྱིས་མཆོད་ཡོན་ལ་སོགས་པས་ཡང་དག་པར་མཆོད་ནས། སྡིག་པ་ལ་སོགས་པ་བཤགས་པར་བྱའོ། །ཡང་བྱམས་པ་ལ་སོགས་པ་ཡང་བསྒོམ་པར་བྱ་བ་ཉིད་དོ། །སྟོང་པ་ཉིད་ཀྱི་ཡེ་ཤེས་རྟོགས་པར་བྱ་བའི་ཕྱིར། ཨོཾ་སྭ་བྷཱ་བ་ཤུདྡྷཿ་སརྦ་དྷརྨཱཿ་སྭ་བྷཱ་བ་ཤུདྡྷོ྅ཧཾ། ཞེས་བྱ་བས་ཆོས་ཐམས་ཅད་རྨི་ལམ་ལྟ་བུར་རང་གི་རིག་པས་ཤེས་པར་བྱའོ། །ཡང་སྙིང་གའི་ས་བོན་གྱིས་བསྡུས་ཏེ་དམིགས་པ་མེད་པར་བྱའོ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་ང་རྒྱལ་བྱའོ། །དེ་ནས་སྔོན་གྱི་སྨོན་ལམ་རྗེས་སུ་དྲན་པས་རང་གི་སེམས་བཾ་གྱི་རྣམ་པ། དེ་ཡོངས་སུ་གྱུར་པ་ལས་པདྨ་དམར་པོ། དེའི་སྟེང་དུ་ཨ་ལས་སྐྱེས་པའི་ཟླ་བའི་དཀྱིལ་འཁོར་ལ་ཡི་གེ་ཧྲཱིཿ་དཀར་པོ་བལྟའོ། །དེ་ལས་འོད་ཟེར་འཕྲོས་ཤིང་བསྡུས་ཏེ་ཡོངས་སུ་གྱུར་པ་ལས། བདག་ཉིད་རྡོ་རྗེ་དབྱངས་ཅན་མ་སྟོན་ཀའི་ཟླ་བ་


DTG047_Page_0372
[མ་དཔེ་གཟིགས་ན་འདིར་གནོན།]

ལྟར་དཀར་བ་པདྨ་དཀར་པོ་དང་ཟླ་བའི་སྟེང་ན་གཡས་བརྐྱང་གིས་བཞུགས་པ། ཕྱག་གཡས་རྡོ་རྗེ་གྲི་གུག་བསྣམས་པས་རྨོངས་པའི་དྲ་བ་གཅོད་པར་མཛད་མ། གཡོན་པ་བདུད་བཞིའི་ཁྲག་གིས་གང་བའི་ཐོད་པ་བསྣམས་པ་སྤྱན་གསུམ་དམར་ལ་ཟླུམ་པ། ལོ་བཅུ་དྲུག་གི་ཆ་བྱང་ཅན། ཅུང་ཟད་མཆེ་བ་གཙིགས་པའི་ཞལ། དབུ་སྐྲ་ཕྱེད་གྲོལ་ཞིང༌། ཕྱེད་འཁྱིལ་བ། མེ་ཏོག་གི་ཐོད་ཅན། ཅོད་པན་རྡོ་རྗེ་ཐོད་ཅན་གྱིས་བརྒྱུས་པས་མཛེས་པ། འཁོར་ལོ་དང་རྣ་ཆ་དང༌། མགུལ་རྒྱན་དང༌། གདུ་བུ་དང༌། འོག་པག་གིས་བརྒྱན་པ། སུམ་ཁུགས་སུ་འཁྱོག་ཅིང་སྤྱོད་པའི་བ་དན་གྱིས་དགྱེས་པ། རུས་རྒྱུ་མ་ལ་བརྒྱུས་པའི་མི་མགོ་རློན་པ་ཁྲག་དང་བཅས་པའི་ཕྲེང་བ་འཆང་བ། གཅེར་བུ་བསྐལ་པའི་མེ་ལྟར་གཟི་བརྗིད་འབར་བ། སྒེག་པ་ལ་སོགས་པའི་ཉམས་ཅན། མེ་ལོང་གི་གཟུགས་བརྙན་དང་མཚུངས་པ། སྤྲུལ་པ་སྣ་ཚོགས་ཀྱིས་འགྲོ་བའི་དོན་ལ་བརྩོན་པ། ཐུགས་ཀར་པདྨ་དམར་པོ་ལ་ཟླ་བའི་སྟེང་དུ་ཧྲཱིཿ་དཀར་པོ་བསྒོམ་པར་བྱའོ། །དེ་ནས་བདག་གི་ཐུགས་ཀའི་ས་བོན་གྱི་འོད་ཟེར་གྱིས་ཡང་དག་པར་བསྐུལ་བའི་ལྷ་མོ་མདུན་གྱི་ནམ་མཁའ་ལ་འདུག་སྟེ། མཆོད་ནས་བདག་ཉིད་ལ་གཞུག་པར་བྱའོ། །ཡང་ས་བོན་དེས་བསྐུལ་བའི་མི་བསྐྱོད་པ་ལ་སོགས་པའི་དེ་བཞིན་གཤེགས་པ་མདུན་དུ་སྤྱན་དྲངས་ནས་དབང་བསྐུར་བར་བྱའོ། །སྤྱི་བོར་སྣ་ཚོགས་པདྨ་དང་ཉི་མ་ལ་གནས་པའི་འོད་དཔག་མེད་ཀྱིས་རྒྱས་གདབ་པར་བྱའོ། །དེ་ནས་མཆོད་པ་རྣམས་ཀྱིས་བདག་ཉིད་ལ་ཡང་མཆོད་པར་བྱ་སྟེ། བདུད་རྩི་མྱང་བར་བྱའོ། །དེ་བཅོམ་ལྡན་འདས་རྡོ་རྗེ་དབྱངས་ཅན་མ་ཉིད་དོ་ཞེས་ང་རྒྱལ་བརྟན་པར་བྱའོ། །ཡང་རང་གི་སྙིང་གར་པདྨ་དམར་པོ་དང༌། ཟླ་བའི་དཀྱིལ་འཁོར་ལ་ཧྲཱིཿ་བསྒོམས་ཏེ། དེ་ལས་སྔགས་ཀྱི་ཕྲེང་བ་དཀར་པོ་ཞལ་ནས་འཐོན་པ་དེའི་འོད་ཟེར་གྱིས། འཇིག་རྟེན་དང་འཇིག་རྟེན་ལས་འདས་པའི་ཤེས་རབ་དང་ཡེ་ཤེས་དང་ཡོན་ཏན་གྱི་ཚོགས་དང༌། སྔགས་དང་སྨན་དང་ནོར་བུ་དང་བསྟན་བཅོས་དང་སྒྱུ་རྩལ་ལ་སོགས་པའི་ནུས་པ་དང་སྟོབས་རྣམས་བླངས་ཏེ་སྙིང་ག་ནས་འཇུག་ཅིང༌། བདག་དང་གཞན་གྱི་མི་ཤེས་པའི་མུན་པ་དང༌། རྨོངས་པའི་མུན་པ་ཐམས་ཅད་བསྲེག་


DTG047_Page_0373
[མ་དཔེ་གཟིགས་ན་འདིར་གནོན།]

པའི་བདག་ཉིད་དུ་བསྒོམ་པར་བྱ་སྟེ། དེ་ལྟར་ཇི་སྲིད་འདོད་ཀྱི་བར་དུ་བསྒོམས་ཏེ། སྤྲོ་བ་དང་བསྡུ་བའི་རྣལ་འབྱོར་གྱིས་མྱུར་བ་ལ་སོགས་པའི་སྐྱོན་རྣམས་དང་བྲལ་བས་སྔགས་བཟླས་པར་བྱས་ཏེ། སྔགས་ནི་འདིའོ། །ལྡང་བར་འདོད་ན་སྔགས་ཀྱི་ཕྲེང་བ་ཧྲཱིཿ་ཡིག་ལ་བསྟིམས་ལ་མཆོད་པ་དང༌། གསོལ་བ་གདབ་སྟེ་ཡི་གེ་བརྒྱ་པ་བརྗོད་ཅིང༌། བསོད་ནམས་ཡོངས་སུ་བསྔོས་ཏེ། ལྷ་མོའི་ང་རྒྱལ་གྱིས་ཇི་ལྟར་བདེ་བར་གནས་པར་བྱའོ། །ཐུན་གཞན་ལ་ཡང་ཐམས་ཅད་དེ་བཞིན་དུ་བྱའོ། །མཚན་ཕྱེད་ཀྱི་ཐུན་ལ་ཡང་ཐམས་ཅད་དེ་བཞིན་དུ་བྱས་ནས། སེང་གེའི་ཉལ་སྟབས་ཀྱིས་ལྷ་དང་བླ་མ་ཡིད་ལ་བྱེད་ཅིང་ཉལ་བར་བྱའོ། །བློ་བརྟན་པོས་འབུམ་ཕྲག་བཅུ་བཟླས་ན་འགྲུབ་པར་ཐེ་ཚོམ་མེད་དོ། །བསྟན་བཅོས་ཐམས་ཅད་ཤེས་པར་འགྱུར་རོ། །སྒྱུ་རྩལ་ཐམས་ཅད་ལ་མཁས་པར་འགྱུར་རོ། །སྨྲ་མཁས་པར་འགྱུར་བ་དང༌། འཁོར་གྱིས་ཀྱང་ཟིལ་གྱིས་མི་ནོན་པ་དང༌། འཇིགས་པ་མེད་པ་དང༌། ཡིད་གཞུངས་པར་འགྱུར་རོ། །བློ་གྲོས་ཕྲ་བ་དང༌། བློ་གྲོས་ཞིབ་པར་འགྱུར་རོ། །སྔགས་གྲུབ་པ་ལས་ཐོད་ལེ་སྐོར་ལ་སྔགས་བཏབ་སྟེ། གང་ལ་བྱིན་པ་དེ་བློ་དང་ལྡན་པར་འགྱུར་རོ། །ཡང་དག་པའི་ལྟ་བ་རྟོགས་པར་འགྱུར་རོ། །ཐབས་ཤེས་རབ་ཟུང་འཇུག་གི་ཡེ་ཤེས་ཕྱག་རྒྱ་ཆེན་པོ་མངོན་དུ་འགྱུར་རོ། །དུག་གི་གནོད་པ་ཞི་བར་འགྱུར་རོ། །ཟས་བདུད་རྩིར་འགྱུར་རོ། །མཁའ་འགྲོ་མ་ལ་སོགས་པ་ཐམས་ཅད་དབང་དུ་འགྱུར་རོ། །དུག་སྤྲུལ་ལ་སོགས་པས་ཉེ་བར་མི་ནུས་སོ། །འདིས་ཉེ་བར་གཙེས་པ་གཞན་རྣམས་ལ་ཡང་ཕན་པར་འགྱུར་རོ། །དཔལ་རྡོ་རྗེ་དབྱངས་ཅན་མའི་སྒྲུབ་ཐབས། གྲུབ་ཐོབ་ཀྱི་འཁོར་ལོས་སྒྱུར་བའི་སློབ་དཔོན་དཔལ་འཛིན་གྱིས་མཛད་པ་རྫོགས་སོ།། །།རྒྱ་གར་གྱི་པཎྜི་ཏ་ཆེན་པོ་རྒྱལ་བའི་སྲས་དཔལ་བི་བྷཱུ་ཏི་ཙནྡྲ་དང༌། གློ་བོ་ལོ་ཙཱ་བ་དགེ་སློང་ཤེས་རབ་རིན་ཆེན་གྱིས་ཆོས་ཀྱི་རྒྱལ་པོའི་ཕོ་བྲང་སྐུ་མཁར་ཉི་གཟུངས་སུ་བསྒྱུར་ཏེ་གཏན་ལ་ཕབ་པའོ།། རྡོ་རྗེ་དཀར་མོའི་སྒྲུབ་ཐབས།

རྡོ་རྗེ་དཀར་མོའི་རྗེས་སུ་འཛིན་པའི་སྒྲུབ་ཐབས་ཞེས་བྱ་བ།
དཔལ་འཛིན།


DTG047_Page_0374
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། བཛྲ་གཽ་རཱི་ཨ་ནུ་གྲ་ཧ་སཱ་དྷ་ནཾ་ནཱ་མ། བོད་སྐད་དུ། རྡོ་རྗེ་དཀར་མོའི་རྗེས་སུ་འཛིན་པའི་སྒྲུབ་ཐབས་ཞེས་བྱ་བ། དཔལ་གཤིན་རྗེ་གཤེད་ལ་ཕྱག་འཚལ་ལོ། །རྡོ་རྗེ་དཀར་མོ་སྒྲུབ་པར་འདོད་པའི་སྔགས་པས། ཡིད་དང་མཐུན་པའི་གནས་སུ་སྟན་བདེ་བ་ལ་འདུག་སྟེ། སེམས་ཅན་ཐམས་ཅད་ལ་བརྩེ་བ་ཆེན་པོས་ཕྱག་འཚལ་བ་ལ་སོགས་པ་ནས། བཏང་སྙོམས་ཀྱི་བར་དུ་བསྒོམ་པར་བྱའོ། །དེ་ནས་སྟོང་པ་ཉིད་སྔོན་དུ་བྱས་པའི་རྗེས་ལ། སྣ་ཚོགས་པདྨ་དང་ཟླ་བའི་སྟེང་དུ། རུའི་ཡི་གེ་སེར་པོ་དང་རལ་གྲི་ལས་སྐུ་མདོག་གསེར་དང་མཚུངས་སོ། །ཞལ་གསུམ་ཕྱག་དྲུག་མ་རྩ་བ་དང་གཡས་དང་གཡོན་གྱི་ཞལ། སེར་པོ་དང་དམར་པོ་དང་དཀར་པོའོ། །གཡས་པ་ན་རལ་གྲི་དང༌། རྡོ་རྗེ་དང༌། གྲི་གུག་གོ །གཡོན་པ་ན་འཁོར་ལོ་དང༌། པདྨ་དང༌། ཐོད་པ་བསྣམས་པའོ། །སྤྱན་གསུམ་མ། མགོ་བོའི་ཕྲེང་བའི་ཅོད་པན་དང༌། མི་མགོ་ལྔ་བཅུའི་དོ་ཤལ་འཕྱང་བ། ཕྱག་རྒྱ་ལྔ་དང་ལྡན་པ། སྒེག་པ་ལ་སོགས་པའི་རོ་དང་ལྡན་པ། གཡོན་བརྐྱང་དང༌། ཟླ་བ་ལ་རུ་ཡིག་སེར་པོའོ། །རྩ་སྔགས་ནི། ཨོཾ་གཾ་བྷི་ར་བཛྲ་ཀརྟི་ཏ་གྷ་གྷ་ཧཱུཾ། རཀྟ་ཤོ་ཎི་ཏྀ་པྲ་ཡེ། གཽ་རི་ཡི་བིགྷ་ན་ཛ་ཧྰྲིཿ་ཞེས་འབུམ་ཕྲག་གཅིག་རྩེ་གཅིག་པས་བཟླས་སོ། །དེ་ནས་ལས་ཉེ་བར་བསྒྲུབ་པའི་ཕྱིར་སྔོན་དུ་བསྙེན་པ་མཚན་མ་ཐོབ་ཀྱི་བར་དུ་བྱའོ། །དེས་གྲུབ་ལ་སྔགས་ཀྱིས་བསྒྲུབ་པར་བྱའོ། །དེ་ནས་བླ་གབ་མེད་པའི་གནས་སུ་དཀྱིལ་འཁོར་བཞེངས་པར་བྱ་སྟེ། པདྨ་འདབ་མ་བརྒྱད་པའི་ལྟེ་བ་དང་བཅས་པའི་གཞལ་མེད་ཁང་པའོ། །འདབ་མ་བརྒྱད་པ་ལ་ཀླུ་ཆེན་པོ་བརྒྱད་ཀྱི་མཇུག་མས་མནན་པའི་རྩང་ཀེ་ཏུའི་གཟུགས་ར་ཡིག་ལས་སྐྱེས་པ་བྲི་བར་བྱའོ། །དེའི་ཕྱག་གཡས་ན་ཀླུའི་ཞགས་པ། གཡོན་ན་ཤཀྟི་བསྣམས་པའོ། །དེའི་སྟེང་དུ་དཔལ་རྡོ་རྗེ་གཽ་རཱི་མ་སྔ་མ་ལྟ་བུས་མནན་པའོ། །དེར་མཆོད་པ་དང་གཏོར་མ་ལ་སོགས་པ་བཤམས་ཏེ། སློབ་དཔོན་བདག་ཉིད་གྲོགས་དང་བཅས་པས་བཅོམ་ལྡན་འདས་གཤིན་རྗེ་གཤེད་དམར་པོའི་དཀྱིལ་འཁོར་བསྒོམས་པ་ལ་བརྟེན་པས། མ་རུངས་པའི་སེམས་ཀྱིས་སྔགས་བཟླས་པར་བྱའོ། །ཨོཾ་བྷི་ཤི་མུ་ཏ་ཙེ་དུ་མ་མ་ཤ་ལཱ་ཀ་ལ་ཛ་ལ་ཏི་ཨ་ཛི་ཏེ་སྭཱ་ཧཱ། ཏདྱ་ཐཱ། ཙ་ཙ་ཙ། ཙི་ཙཎྜ། ཙི་ཙཎྜ། བཛྲ་ཥེ་ལ་ཥ་ལ་ཏེ་སྭཱ་ཧཱ། ཨོཾ་ལི་དུ་ལ་ཛམ་ཀ་སྭཱ་ཧཱ། སྔགས་གསུམ་པོ་དེ་སྟོང་ཕྲག་བཞི་བཟླས་པས་སོ། །


DTG047_Page_0375
[མ་དཔེ་གཟིགས་ན་འདིར་གནོན།]

ཨོཾ་པ་ཤ་མི་གི་ཊུ་མ་ཤ་ཛ་ཏི་ཨ་ཛི་ཏེ་སྭཱ་ཧཱ། བརྒྱད་ཀྱིས་ལྷག་པའི་བརྒྱ་ཕྲག་གཅིག་བཟླས་པར་བྱའོ། །ཡང་སྔགས་དེ་གཉིས་ཀྱི་རིམ་པ་ཡིན་པས་བཟླས་པར་བྱའོ། །དེ་ལྟར་གཉིས་ཀྱིས་མཚན་མ་ཐོབ་ཀྱི་བར་དུ་བྱེད་པ་སྟེ་སྔོན་དུ་བསྙེན་པ་བྱས་པར་འགྱུར་རོ། །འཁོར་ལོ་ལ་མངོན་དུ་ཕྱོགས་པས། རྐང་པ་ཆུའི་ནང་དུ་བཅུག་སྟེ། རྩ་བའི་སྔགས་དང་སྙིང་པོ་དང༌། ལས་ཀྱི་སྔས་རྣམས་གཅིག་པ་བཟླས་པར་བྱའོ། །ཡུངས་ཀར་གྱིས་བགེགས་བསྐྲད་པར་བྱའོ། །ཡུལ་བརྟ་བར་བྱ་བའི་ཕྱིར་ཞིང་སྐྱོང་རྣམས་ལ་གཏོར་མ་རྒྱ་ཆེར་བྱའོ། །གལ་ཏེ་ཞག་གསུམ་གྱི་བར་དུ་ཆར་མི་ཕེབས་ན་དེའི་ཚེ་ཁམ་ཕོར་དུ་ཀླུའི་གཟུགས་བརྙན་སྔགས་སྙིང་གར་བཞག་པ་གཞུག་སྟེ། དེ་ལ་མཆོད་ནས་ཁ་སྦྱར་ལ་བྱང་ནུབ་ཀྱི་ཕྱོགས་སུ་དྲག་པོའི་ཐབ་ཁུང་དུ་བཅུག་སྟེ། འོག་གི་རླུང་གི་དཀྱིལ་འཁོར་དུ་བཏང་བས་རླུང་ཆེར་གཡོས་ནས་མེ་འབར་ནས་ཆུ་བསྲོས་ཏེ། ཀླུ་ཆེན་པོ་རྣམས་ཀྱི་དུག་རླངས་པ་དང༌། རྒྱ་མཚོའི་རླངས་པ་བྱུང་བས་བར་སྣང་དུ་སྤྲིན་ཆར་དུ་ལྟེ་བར་བབས་པར་བསམ་མོ། །གལ་ཏེ་དེ་ལྟར་བྱས་ཀྱང་ཞག་ལྔའི་བར་དུ་ཆར་མི་ཕེབས་ན། དེའི་ཚེ་ཀེ་ཏུ་ལ་དྲག་པོར་བསྡིགས་པར་བྱའོ། །རྡོ་རྗེ་དང་དོན་གྲུབ་ཀྱིས་བསྣུན་པ་དང་བཅས་པས། ཨོཾ་ཧ་ན་ཧ་ན་བཛྲ་ས་མ་ཡ་ཧཱུཾ་ཞེས་དམ་ཚིག་བརྗོད་ནས། ཨོཾ་པ་ཤ་མི་ཀེ་ཏུ་རུ་མི་ཤི་ཀ་ཛ་ལ་ཏི་ཨོཾ་བཛྲ་ལ་ཏེ་སྭཱ་ཧཱ། ཨོཾ་བྷི་ན་དྷ་ར་ར་ཧཱུཾ་མ་ཧཱ་ཀྲོ་དྷ་པཱ་ད་ཥཱ་ལ་ཏེ་སྭཱ་ཧཱ། ཨོཾ་ཀེ་ཏུ་ཡཀྵ་ཛ་ལ་རེ་ཀཱི་ལི་ཀཱི་ལ་ཡ་སརྦ་སྭཱ་ཧཱ། །བྲི་བཟླས་པར་བྱའོ། །དེ་ནས་དམ་བཅས་པ་རྗེས་སུ་དྲན་ནས་ཆར་ངེས་པར་འབེབས་པར་འགྱུར་རོ། །དཔལ་རྡོ་རྗེ་དཀར་མོའི་སྒྲུབ་ཐབས། གྲུབ་ཐོབ་ཀྱི་འཁོར་ལོས་སྒྱུར་བའི་སློབ་དཔོན་དཔལ་འཛིན་གྱིས་མཛད་པ་རྫོགས་སོ།། །རྒྱ་གར་གྱི་པཎྜི་ཏ་རྒྱལ་སྲས་དཔལ་བི་བྷཱུ་ཏི་ཙནྡྲ་དང༌། གློ་བོ་ལོ་ཙཱ་བ་དགེ་སློང་ཤེས་རབ་རིན་ཆེན་གྱིས་ཆོས་ཀྱི་རྒྱལ་པོའི་ཁབ་སྐུ་མཁར་ཉིད་གཟུངས་སུ་བསྒྱུར་ཅིང་ཞུས་ཏེ་གཏན་ཕབ་པའོ།། །

ལས་ཀྱི་གཤིན་རྗེའི་མཆོད་པའི་ཆོ་ག།
དརྦན་ཨཱ་ཙཪྱ།


DTG047_Page_0375
[མ་དཔེ་གཟིགས་ན་འདིར་གནོན།]

།ལས་ཀྱི་གཤིན་རྗེའི་མཆོད་པའི་ཆོ་ག་བཞུགས་སོ། བཅོམ་ལྡན་འདས་ཞེ་སྡང་གཤིན་རྗེ་གཤེད་ལ་ཕྱག་འཚལ་ལོ། །རང་གཞན་བར་ཆད་ཞི་བ་དང༌། །དངོས་གྲུབ་མཐར་ཕྱིན་བྱ་བའི་ཕྱིར། །ལས་ཀྱི་གཤིན་རྗེ་


DTG047_Page_0376
[མ་དཔེ་གཟིགས་ན་འདིར་གནོན།]

འཁོར་བཅས་ཀྱི། །མཆོད་པའི་ཆོ་ག་འདི་ལྟར་བྱ། །རྣལ་འབྱོར་ལྡན་པས་མདུན་བསྐྱེད་མཆོད། །རི་རབ་བང་རིམ་བཞི་པ་ཡི། །རྩེ་ལ་ཆོས་ཀྱི་རྒྱལ་པོ་ནི། །ནག་པོ་ཞལ་གཅིག་ཕྱག་གཉིས་པ། །པདྨ་ཉིན་བྱེད་མ་ཧེའི་སྟེང༌། །གཡས་བསྐུམ་གཡོན་བརྐྱང་རོལ་པས་བཞུགས། །རྡོ་རྗེ་ཐོད་དབྱུག་སྦྲུལ་ཞགས་འཛིན། །དར་དང་སྟག་ལྤགས་ན་བཟའ་གསོལ། །སྦྲུལ་དང་རུས་པའི་རྒྱན་གྱིས་བརྒྱན། །ཞལ་གདངས་མཆེ་གཙིགས་ཁྲོ་གཉེར་བསྡུས། །སྤྱན་གསུམ་དྲག་པོའི་མེ་སྟག་འཕྲོ། །སྐྲ་སེར་སྨ་ར་གྱེན་དུ་འཛིངས། །རྔམ་གཙིགས་གཏུམ་པོ་མི་སྡུག་པ། །མཆན་ཁུང་གཡོན་ན་ཙ་མུཎྜ། །རྣམ་དག་རྩེ་གསུམ་འཛིན་པ་བསྐྱེད། །དེ་ཡི་ཕྱི་རིམ་སྟེག་བུ་ལ། །ཡ་མ་རཱ་ཛ་སྐྱོད་བྱེད་འབར། །མ་རུ་ཙེ་དང་རལ་དགུ་ལྡན། །དེད་དཔོན་མངགས་པ་ཕོ་ཉའི་ཚུལ། །འཁོར་དབྱུག་པདྨ་རལ་གྲི་རྣམས། །ཐམས་ཅད་རྡོ་རྗེས་མཚན་པ་འཛིན། །གཡས་སུ་ཡ་མ་དྷུ་ཏི་དང༌། །ཀཱ་ལ་པ་ཤ་དཎྜི་ནག །ཡ་མ་དཾ་ཥྚྲི་ལྕགས་ཀྱུ་དང༌། །ཞགས་པ་བེ་ཅོན་མཆེ་བ་རྣམས་། །འཁོར་ལོས་མཚན་པ་ཕྱག་ན་བསྣམས། །གཡོན་དུ་ཀཱ་ལ་ར་ཏྲི་དང༌། །གསོད་མ་ནག་མོ་ཆེན་མོ་དང༌། །ནམ་གྲུ་ཤ་ཀ་ལི་ལ་སོགས། །མེ་ལོང་ནད་རྐྱལ་དྲུ་བུ་དང༌། །ཁྲམ་ཤིང་པདྨས་མཚན་པ་འཛིན། །གཡོན་ན་ཤོ་རྡེ་དཀར་ནག་གོ །སྡོ་དཀར་དམར་བའི་ཁ་དོག་ཅན། །ཆ་ལུགས་གཙོ་བོ་བཞིན་དུ་བསྐྱེད། །དེ་ཡི་ཕྱི་རོལ་སྟེགས་བུ་ལ། །ཕྱོགས་བཞིར་རྒྱལ་པོ་ཆེན་པོ་བཞི། །གཡས་གཡོན་གཟའ་བརྐྱང་ཀླུ་ཆེན་བརྒྱད། །དེ་ཡི་ཕྱི་རིམ་སྟེགས་བུ་ལ།། ཕྱོགས་སྐྱོང་བཅུ་དང་སྡེ་བརྒྱད་དང༌། །རྒྱུ་སྐར་ཉི་ཤུ་རྩ་བརྒྱད་རྣམས། །རང་རང་གཟུགས་སམ་གཙོ་བོ་བཞིན། །འབྱུང་པོ་ཀུན་གྱིས་བསྐོར་བ་བསྐྱེད། །གནས་གསུམ་བྱིན་བརླབས་དབྱིངས་ནས་དགུག །དབང་བསྐུར་རྡོ་རྗེ་སེམས་དཔའི་རྒྱ། །ཚོགས་དང་གཏོར་མའི་མཆོད་པ་དང༌། །གུར་ཕོད་དང་ངར་གླུད་དང༌། །ནམ་མཁའ་བ་དན་མདའ་དང་འཕང༌། །སྲོག་ཆགས་སྣ་ཚོགས་ངུར་བ་དང༌། །རིན་ཆེན་ལྔ་དང་འབྲས་བུ་དང༌། །གླིང་དང་གླིང་ཕྲན་ལ་སོགས་པས། །མཆོད་དང་བསྟོད་པ་ལས་བཅོལ་བྱ། །འཇིག་རྟེན་རང་གི་འདོད་པ་དང༌། །མཐུན་པའི་ལས་ཀུན་


DTG047_Page_0377
[མ་དཔེ་གཟིགས་ན་འདིར་གནོན།]

བཀའ་བཞིན་བསྒྲུབ། །གངས་རིའི་ཁྲོད་ན་རྒྱལ་པོའི་བུ། །སྦྱིན་བདག་ཆེན་པོའི་བཞེད་པ་བཞིན། །བོད་ཀྱི་ལུགས་དང་མཐུན་པ་འདི། །འགྲོ་ལ་ཕན་པའི་ཆེད་དུ་བསྒྲུབས། །བླ་མའི་ལུང་དང་མི་འགལ་ཞིང༌། །གདུལ་བྱའི་བློ་དང་མཐུན་པ་ཡི། །མན་ངག་ལྷ་ཡི་རྗེས་གནང་ནས། །བྷངྒ་ལ་ལས་བརྗོད་པ་ཡིན། །རྒྱ་གར་ཤར་ཕྱོགས་ཀྱི་པཎྜི་ཏ་དརྦན་ཨཱ་ཙཪྻས་མཛད་པ་རྫོགས་སོ།། །།པཎྜི་ཏ་དེ་ཉིད་དང༌། ལོ་ཙཱ་བ་ཞེ་སྡང་རྡོ་རྗེས་དག་པར་བསྒྱུར་བའོ།།

དཔལ་རྡོ་རྗེ་འཇིགས་བྱེད་ཀྱི་སྒྲུབ་པའི་ཐབས་ཞེས་བྱ་བ།
མཉྫུ་བཛྲ།


DTG047_Page_0377
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། ཤྲཱི་བཛྲ་བྷཻ་ར་བ་སཱ་དྷ་ནཾ་ནཱ་མ། །བོད་སྐད་དུ། དཔལ་རྡོ་རྗེ་འཇིགས་བྱེད་ཀྱི་སྒྲུབ་པའི་ཐབས་ཞེས་བྱ་བ། བཅོམ་ལྡན་འདས་དཔལ་འཇིགས་བྱེད་མ་ཧེའི་གདོང་པ་ཅན་ལ་ཕྱག་འཚལ་ལོ། །བཅོམ་ལྡན་སྐུ་མཆོག་ཇིག་དུས་མེ་ལྟར་འབར། །རྡོ་རྗེ་འཇིགས་པར་བྱེད་ལ་ཕྱག་འཚལ་ཏེ། །དེ་ཡིས་ལས་རྣམས་རབ་ཏུ་སྒྲུབ་པའི་ཕྱིར། །མ་ཧེའི་གདོང་གི་སྙིང་པོའི་སྒྲུབ་ཐབས་བྲི། །ཡིད་དང་མཐུན་ཞིང་དབེན་པའི་གནས་དག་ཏུ། །དང་པོར་བདེ་བའི་སྟན་ལ་འདུག་ནས་ནི། །མ་ཧེའི་གདོང་ཅན་སྐད་ཅིག་རྣལ་འབྱོར་པས། །ལྷ་དང་བླ་མ་མཉེས་བྱས་དེ་རྗེས་ལ། །སྟོང་པ་མ་ཡིན་མི་སྟོང་མ་ཡིན་པ། །སེམས་ཉིད་སྤྲོས་དང་བྲལ་བ་རྣམ་པར་བསྒོམ། །ཡཾ་ལས་རླུང་སྟེ་རཾ་ལས་བསྐལ་མེ་འབར། །དེ་ནས་ཧཱུཾ་སྤྲོས་རྡོ་རྗེའི་རང་བཞིན་ནམ། །ཨ་ལས་ཟླ་བ་རྒྱས་པའི་སྟེང་ཉིད་དུ། །དྷཱིཿ་ལས་འཇམ་དཔལ་གཞོན་ནུ་བསྐྱེད་པར་བྱ། །ཐུགས་ཀར་ཉི་མའི་དཀྱིལ་འཁོར་རྣམས་བསམས་ལ། །དེ་སྟེངས་ཧཱུཾ་ཡིག་ནག་པོ་འབར་བ་བལྟ། །དེ་ཉིད་ཡོངས་སུ་གྱུར་པ་རྡོ་རྗེ་གདེངས། །ཐམས་ཅད་ཡོངས་གྱུར་བཅོམ་ལྡན་མ་ཧེའི་ཞལ། །སྐུ་མདོག་སྔོ་ནག་ཆར་སྤྲིན་ལྟ་བུར་འཇིགས། །སྐུ་ལས་མེ་འབར་ཁམས་གསུམ་སྲེག་པར་བྱེད། །ཁྲོ་བོ་དུར་ཁྲོད་ཐོད་པའི་དོ་ཤལ་བྱས། །གཞལ་གཅིག་མ་ཧེ་ནག་པོ་རྒོད་པའི་ཞལ། །རྭ་གཉིས་པར་དུ་གཞོན་ནུའི་ཞལ་གྱིས་བརྒྱན། །ཕྱག་གཡས་རྡོ་རྗེ་གདེངས་པའི་གྲི་གུག་འཛིན། །གཡོན་པ་ཐོད་པ་ཁྲག་གིས་བཀང་བ་བསྣམས། །ཞབས་གཉིས་གྱད་ཀྱི་དོར་སྟབས་རོ་ཡི་གདན། །མ་ཧེའི་ནག་པོའི་སྟེང་དུ་རྣམ་པར་བསམ། །མངོན་སུམ་བཞིན་དུ་


DTG047_Page_0378
[མ་དཔེ་གཟིགས་ན་འདིར་གནོན།]

གསལ་བར་གྱུར་པ་དང༌། །སྙིང་གར་ཉི་ལ་ཧཱུཾ་ཡིག་འབར་བར་བསམ། །དེ་ལ་དགུག་དང་བཅིང་བ་ལ་སོགས་བྱ། །དེ་ནས་དེ་ཉིད་སྐར་མའི་ཚོགས་འདྲས་བསྐོར། །གཡེང་བ་མེད་པར་རྟག་ཏུ་བཟླས་པ་བྱ། །ཨོཾ་ཧྲཱིཿ་ཥྚྲྀཿ་ཝི་ཀྲྀ་ཏཱ་ན་ན་ཧཱུཾ་ཕཊ། འདི་ནི་སྔགས་ཀྱི་རྒྱལ་པོ་སྟེ། །མ་བྱུང་འབྱུང་བར་མི་འགྱུར་རོ། །འབུམ་ཕྲག་གསུམ་དུ་བཟླས་པ་བྱ། །དེ་ཡིས་ལས་རྣམས་ཐམས་ཅད་འགྲུབ། །གལ་ཏེ་ལྡང་བར་འདོད་པ་ན། །ཡེ་ཤེས་མ་ཧེའི་ཞལ་ལ་ནི། །མཆོད་ཅིང་བསྟོད་པ་ལྡང་བར་བྱ། །མ་ཧེའི་སྦྱོར་བ་རྣམ་པར་རྒྱུ། །ཤིན་ཏུ་རྟོགས་དཀའི་རྒྱུད་ལས་ནི། །ལས་རྣམས་ཐམས་ཅད་སྦྱོར་བའི་ལྷ། །ཞལ་གཅིག་ཕྱག་གཉིས་གདམས་པ་འདི། །བློ་དམན་རྣམས་ལ་ཕན་ཕྱིར་བཀོད། །དགེ་བ་ཅུང་ཟད་ཐོབ་པ་དེས། །བདག་དང་འདི་ལ་མོས་པ་རྣམས། །ནད་དང་འཇིགས་སོགས་རབ་བཅོམ་ནས། །མྱུར་དུ་འཇིགས་བྱེད་ཆེན་པོར་ཤོག །དཔལ་རྡོ་རྗེ་འཇིགས་བྱེད་མ་ཧེའི་གདོང་ཅན་དཔའ་བོ་གཅིག་པའི་སྒྲུབ་ཐབས། སློབ་དཔོན་མཉྫུ་བཛྲས་མཛད་པ་རྫོགས་སོ།། །།བལ་པོའི་པཎྜི་ཏ་བྷ་རོ་ཕྱག་རྡུམ་དང༌། བོད་ཀྱི་ལོ་ཙཱ་བ་རྡོ་རྗེ་གྲགས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།།

རྡོ་རྗེ་འཇིགས་བྱེད་ཀྱི་ཚོགས་ཀྱི་འཁོར་ལོ་ཞེས་བྱ་བ།
རཏྣ་ཨཱ་ཀ་ར་ཤཱནྟི།


DTG047_Page_0378
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། །བཛྲ་བྷཻ་ར་བ་བ། ཎ་ཙ་ཀྲ་ནཱ་མ། བོད་སྐད་དུ། རྡོ་རྗེ་འཇིགས་བྱེད་ཀྱི་ཚོགས་ཀྱི་འཁོར་ལོ་ཞེས་བྱ་བ། འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །དངོས་དང་དངོས་མེད་བདག་ཉིད་གཙོ། །དང་པོར་རྡོ་རྗེ་སེམས་ལ་ཕྱག་འཚལ་ནས། །འདོད་པ་ཐམས་ཅད་རབ་སྩོལ་བ། །ཚོགས་ཀྱི་འཁོར་ལོ་བདག་གིས་བཤད། །སྔགས་པ་མཆོག་ཏུ་རྟོག་མེད་པས། །དུས་ཀུན་དུ་ནི་མཉམ་པར་གཞག །རྒྱུད་ཀུན་གྱི་ནི་རྗེས་འབྲང་ཤེས། །དེ་ཉིད་བཅུ་ནི་མཆོག་ཏུ་རིག །ཟབ་ཅིང་རྒྱ་ཆེ་ཆོས་རྣམས་ལ། །ཡིད་ནི་དལ་བར་གྱུར་བ་དང༌། །ང་རྒྱལ་མེད་པའི་སློབ་མ་རྣམས། །ལེགས་པར་ཐོས་འདོད་དང་རྣམས་ལ། །ཚོགས་ཀྱི་ལྷ་ནི་ཡོངས་རྫོགས་པས། །འདོད་ཡོན་ལྔ་ཡི་འབྲས་བུ་སྟེར། །དབེན་ཞིང་ཉམས་དགའི་ཁང་པ་རུ། །དེར་ནི་རང་གིས་མཆོད་པ་བརྩམ། །རྣལ་འབྱོར་རྒན་པའི་རིམ་པ་ཡིས། །ཕྱག་དང་མཆོད་པ་བྱ་བར་གྲགས། །ཡང་ན་ཡོན་ཏན་ཆེ་


DTG047_Page_0379
[མ་དཔེ་གཟིགས་ན་འདིར་གནོན།]

བའམ། །མགྲོན་པོ་ཡིན་ཕྱིར་གུས་པ་དང༌། །ཁྲུས་དང་དྲི་ཞིམ་གོས་དང་ནི། །མེ་ཏོག་ཕྲེང་བས་བརྒྱན་པ་དང༌། །མཆོད་ཡོན་བདུག་པ་ཅི་ནུས་པས། །ཚོགས་ཀྱི་འཁོར་ལོ་བརྩམ་པར་བྱ། །ལས་ཀྱི་རྡོ་རྗེ་མཉམ་བཞག་པས། །འདི་དག་ལ་ནི་བསང་གཏོར་བྱ། །མཛོད་སྤུ་སྤྱི་བོར་ཐལ་སྦྱར་ནས། །ཡན་ལག་བརྒྱད་ཀྱིས་ཕྱག་བྱའོ། །རིན་ཆེན་སྣོད་སོགས་གཏོར་མ་གཞག །རྒྱལ་བ་འཇིག་རྟེན་འདས་ལ་དབུལ། །འཇིག་རྟེན་པ་དང་སྔགས་ལྷ་ལ། །དེ་ཉིད་རིག་པས་མཆོད་པ་བརྩམ། །རྒྱུད་ཀྱི་དགོངས་པའི་སྦྱོར་བ་ཡིས། །པདྨའི་སྣོད་དུ་བདུད་རྩི་ཆེ། །ལྕགས་ཀྱུ་བཅུ་ནི་ཡང་དག་བཟླས། །དེ་དག་ཐམས་ཅད་ཚིམ་པར་བྱ། །ཐུན་མོང་ཀུན་གྱི་མཆོད་པ་དང༌། །ཀུན་ལ་གསང་བ་མཆོག་གི་མཆོད། །བདེ་བ་ཆེན་པོའི་གོ་འཕང་གནས། །ཚོགས་ཀྱི་གཙོ་བོ་འཇུག་པར་བྱ། །བུ་མོ་དལ་བ་ཚང་ཞིང་ཞལ་གྱི་པདྨའི་མགོ་བོ་སྨད། །ཡོན་ཏན་ཆེན་པོ་ཤིན་ཏུ་རྒྱས་ཤིང་དེ་ཉིད་ཡང་དག་རིག་པར་རུང་བ་ཉིད། །སེམས་ཀྱི་རྣམ་རྟོག་བྲལ་ཞིང་རྒྱན་རྣམས་ཀུན་དང་ལྡན། །ནུ་མ་གཉིས་ནི་མཆོག་ཏུ་རྒྱས་པས་བདུད་རྩིའི་སྣོད་ནི་དེ་ཡིས་འབུལ། །རང་བྱུང་ཡེ་ཤེས་མེ་འབར་བས། །འོད་འཕྲོ་གདན་གྱི་ལུས་འབུད་ཅིང༌། །ཁར་ནི་དེ་ཉིད་སྦྱིན་སྲེག་ཕྱིར། །རོ་ལ་སོགས་པ་དབབ་པར་བྱ། །དེ་ནས་སྙིང་གའི་ཟླ་དཀྱིལ་སར། །ཐིག་ལེའི་ལྷ་ནི་མངའ་བདག་ཆེ། །ཡང་ན་རང་གི་འདོད་སོགས་ལྷ། །འཁོར་ལོ་རྒྱན་གྱིས་བརྒྱན་པའོ། །མིང་མེད་ཐིག་ལེས་ཐིག་ལེ་སྟེ། །དེ་ཉིད་བསྲུང་བསྲུབས་འོད་ཟེར་ཅན། །ལྕེ་ཡི་རྩེ་ལ་ཉུང་ཟད་དགོད། །བདུད་རྩིའི་རྒྱུན་གྱིས་ཚིམ་བྱའོ། །ལྟེ་བའི་འཁོར་ལོ་ནཱ་ད་ལས། །བྱུང་བས་དེ་ཡི་རོ་བཀུག་ནས། །ལན་གསུམ་དུ་ནི་འཐུངས་ནས་སུ། །རྣལ་འབྱོར་པ་དེ་བདེ་བར་གནས། །བི་མུ་མ་ར་ཤུ་ད་ཧ་ན་གོ་ཀུ་པཉྩ་ཀཾ །རྒྱུད་དང་རྒྱུད་གཞན་བརྗོད་པ་ཡི། །གཞན་ཡང་བདུད་རྩི་ཆེན་པོ་རྣམས། །བར་སྣང་དུ་ནི་གནས་པ་ལ། །ཀུན་ལ་མཛུབ་གཏོར་བྱིན་པར་བྱ། །དཔའ་བོས་དཔའ་བོའི་ལྷ་དང་ནི། །ལྷ་མོ་ཀུན་གྱི་ཚོགས་ལ་གསལ། །ལྕགས་ཀྱུ་བཅུ་ཡི་དེ་ཉིད་ནི། །ཐོགས་ནས་སྦྱིན་བདག་སེམས་དག་ཕྱིར། །ཇི་ལྟར་རིགས་པར་རྟོགས་ནས་ནི། །ཕྱི་རོལ་ལྷ་ལ་དབུལ་


DTG047_Page_0380
[མ་དཔེ་གཟིགས་ན་འདིར་གནོན།]

བར་བྱ། །སེམས་ཅན་རྣམས་ལ་སངས་རྒྱས་ཉིད། །ཀུན་གྱི་སྙིང་རྗེའི་སྟོབས་ཀྱིས་བསྒྲུབ། །རྡོ་རྗེ་དྲིལ་བུ་ལྡན་པས་བསྟོད། །འཁོར་ལོས་སྒྱུར་ལ་བསྟོད་པར་བྱ། །སྒེག་པའི་ཚུལ་གྱིས་སྟེར་བ་དང༌། །མཆོད་རྫས་ཀྱི་ནི་སྣོད་དག་རྣམས། །སོ་སོའམ་ཀུན་ལ་གཅིག་ཏུའོ། །དག་དང་མ་དག་སྤྱད་མི་བྱ། །ཇི་ལྟར་འདོད་པའི་བཟའ་དང་བཏུང་བ་རྣམས། །མཆོད་པ་སྣ་ཚོགས་མང་པོ་ཡིས། །རྡོ་རྗེ་ཅན་གྱིས་མཆོད་པ་ཡིན། །ཅི་བདེ་ཇི་ལྟར་འདོད་པར་གསོལ། །དེ་ལྟར་སེང་གེ་བཞིན་དུ་དོགས་མེད་རྟོགས་བྲལ་བས། །སྲིད་ཞིའི་གོ་འཕང་དེ་ཉིད་གནས་པས་བདེ་བར་ལྡན། །རང་གི་ཡིད་འོང་ཀེ་ཤི་ཀ་ལ་སོགས་པའི་གླུ། །རྒྱལ་བ་མ་ལུས་ཚོགས་ལ་གར་གྱིས་ཀྱང་ནི་མཆོད་པར་བྱ། །སྣོད་ནི་གང་གིས་ལག་པར་གཞག །གར་གྱི་ལག་པས་གཟུང་བར་བྱ། །མི་ཤེས་པའམ་རྨོངས་པ་ཡིས། །སྨོད་པར་གྱུར་ན་ཆད་པ་ཐོབ། །ལུས་ངག་ཡིད་ཀྱི་ལས་ཀྱིས་ནི། །ལ་ལ་དུལ་བར་མ་གྱུར་ན། །ཆད་པས་དེ་ནི་ཞི་བའི་ཕྱིར། །དེ་ཡིས་ཇི་ལྟར་རིགས་པར་བརྟག །ལག་པ་གཉིས་ཀྱི་ཕྱག་རྒྱ་ཡིས། །དེ་ཉིད་གཙོ་བོའི་ཆོ་ག་བཞིན། །ཕན་ཚུན་དུ་ནི་ཚིམ་པར་བྱ། །སྒེག་དང་རྩེ་བའི་རོ་ཡིས་བདེ། །ཟབ་དང་རྒྱ་ཆེའི་གཏམ་བརྗོད་ཅིང༌། །དེ་ཉིད་བརྩོན་པས་མཆོད་པར་བྱ། །གླུ་དང་རྔ་སོགས་གར་གྱིས་ནི། །ཐབས་དང་ཤེས་རབ་བདེ་བའི་མཆོག །ཕན་ཚུན་དུ་ནི་མཉམ་པར་གུས། །དམ་ཚིག་ཉན་པར་ཤིན་ཏུ་འདོད། །ཕ་རོལ་ཕྱིན་བཅུ་སྦྱོར་བ་ཡིས། །བརྟུལ་ཞུགས་ཅན་གྱིས་མཆོད་སྦྱིན་བྱ། །འགྲོ་བར་འདོད་པས་ཐལ་སྦྱར་ནས། །སྔོན་དུ་བཟོད་གསོལ་འགྲོ་བར་བྱ། །བྱ་བ་བྱས་ནས་བློ་ལྡན་གྱིས། །དེ་ནས་ཕྱག་བྱས་འཇུག་པར་བྱ། །རྟག་ཏུ་རྣལ་འབྱོར་བདག་ཉིད་དང༌། །རྟག་ཏུ་དེ་ཉིད་ལམ་ལ་ཞུགས། །རྟག་ཏུ་འདུལ་བར་ལྡན་པ་ཡིན། །ཚོགས་ཀྱི་འཁོར་ལོ་རྟག་ཏུ་བྱ། །སྦྱིན་པའི་ཟས་སྦྱིན་པ་རྣམས་ལ། །ཕྱག་རྒྱ་ཐུན་མོང་དུ་ནི་བརྗོད། །དེ་ཕྱིར་གྲོལ་བར་འདོད་པ་ཡིས། །བདག་དང་གཞན་ལ་མཆོད་པར་བྱ། །ཇི་སྲིད་རང་གི་བདེ་འདོད་པས། །འདི་ཉིད་རོལ་དང་སྒེག་པ་ཡིས། །དེ་སྲིད་ཕྱག་རྒྱན་ལྷན་ཅིག་ཏུ། །གཉུག་མ་འདི་ཡིས་མཆོད་པར་བྱ། །མིག་ལ་སོགས་པའི་ཐབས་ཆེན་གྱིས། །


DTG047_Page_0381
[མ་དཔེ་གཟིགས་ན་འདིར་གནོན།]

གཟུགས་སོགས་རྡོ་རྗེ་མ་ཡི་ཚོགས། །རྣམ་ཤེས་རྣམས་ཀྱི་བདེ་ཆེན་པོ། །ཕྱི་རོལ་གྱི་ནི་རྟག་ཏུ་འཇུག །རྡོ་རྗེ་པདྨའི་འོད་ཟེར་གྱིས། །ཟླ་བའི་འོད་ཟེར་དཀར་པོ་འདྲ། །རྒྱལ་བའི་ཚོགས་ཀྱི་འོད་ཟེར་འབྱུང་བས་རང་བཞིན་མེད་པར་རང་བཞིན་ཅན། །ཤིན་ཏུ་བདེ་བ་མཆོག་ཏུ་འཕགས་པས་ཡིད་དུ་འོང་བའི་ཤེས་རབ་བཀའ་ཉན་ལས། །དག་པའི་ལྕེ་ཡིས་ལེན་བྱེད་སེམས་ཅན་དེ་ནི་རྡོ་རྗེ་སེམས། །དེ་ནས་གཤེགས་གསོལ་ཐོབ་པ་ན། །བཀྲ་ཤིས་ཀླུ་དང་ལྷ་ཀུན་ལ། །ཚོགས་ཀྱི་འཁོར་ལོ་མངོན་བྱས་ནས། །ཡོན་བདག་མགོ་ལ་མེ་ཏོག་གཞག །བཀྲ་ཤིས་བརྗོད་ལ་སྡོམ་པ་སྦྱར། །འབྱུང་པོ་ཐམས་ཅད་སངས་རྒྱས་སུ། །བླ་ན་མེད་པར་སྨོན་ལམ་གདབ། །ལྷག་མའི་གཏོར་མས་ཚིམ་པར་བྱ། །གཏོར་མ་ཆེན་པོ་ཡང་དག་བསྡུས། །ཆོས་བདག་ཡེ་ཤེས་གྱུར་ནས་ནི། །བློ་དང་ལྡན་པས་དགེ་ལ་སྦྱར། །མཐོ་གང་ཙམ་གྱི་མཐོ་བ་རུ། །རྒྱལ་བ་ཆོས་ཀྱི་གཞི་བསམ་བྱ། །དེ་ལས་བདུད་རྩི་རྒྱུན་འཛག་པ། །རང་ཉིད་ལ་ནི་བསམ་པར་བྱ། །ཡུངས་ཀར་ཙམ་གྱི་ཕྲ་བ་ནི། །རྡོ་རྗེ་ཅན་གྱི་མཚན་མ་སྟེ། །རྡོ་རྗེ་རྩེའམ་སྣ་རྩེར་བསམ། །བརྟན་པར་གྱུར་ནས་སྤྲོ་བར་བྱ། །སྙིང་གའི་དཀྱིལ་ནི་ནམ་མཁའ་ལ། །ཟླ་བའི་དཀྱིལ་འཁོར་རྫོགས་པ་སྟེ། །དེར་ནི་ཆོས་ཀྱི་འབྱུང་གནས་གནས། །ཕྲ་མོའི་རྡོ་རྗེ་རྟག་ཏུ་དྲན། །རྡོ་རྗེ་ལ་སོགས་རོ་དང་ལྡན། །ཡིད་ཀྱི་རང་བཞིན་རྣམ་ཐར་གསུམ། །རྣམ་པ་ཀུན་གྱི་དོན་དག་ལ། །འགྱུར་བ་མེད་པའི་བདེ་བ་ཆེ། །ཐབས་དང་ཤེས་རབ་རྣལ་འབྱོར་དག །ལས་ཀུན་ལ་ནི་ཐམས་ཅད་དུ། །ཡང་དག་བྱང་ཆུབ་ལེགས་སེམས་གཟུགས། །དེ་ཉིད་བརྩོན་པས་བསམ་པར་བྱ། །སྔགས་ནི་སྲོག་གི་ཡི་གེ་བཟླས། །ཐིག་ལེའི་རང་བཞིན་འོད་གསལ་བ། །ཆོས་དང་ཆོས་མིན་ལས་གྲོལ་བ། །རྟག་ཏུ་ཡོངས་སུ་བསྒོམ་པར་བྱ། །དེ་ཡིས་དུས་སམ་ཐམས་ཅད་དུ། །གྲོལ་བའི་ལམ་ལ་བརྩོན་པ་ཡིས། །རྟག་པའི་དུས་སུ་བསྒོམ་བྱས་ན། །དེ་ཡིས་གྲོལ་ཐོབ་ཕུན་སུམ་ཚོགས། །འགྲོ་བ་རྣམས་ཀྱི་བསམ་པ་སྦྱིན་པ་ལ་སོགས་ཀུན་གྱིས་མྱུར་དུ་ཡོངས་རྫོགས་ནས། །བདག་མེད་རྡོ་རྗེ་ལ་སོགས་


DTG047_Page_0382
[མ་དཔེ་གཟིགས་ན་འདིར་གནོན།]

ཀྱིས་ནི་རྣམ་རྟོག་རྨོངས་པའི་གྲོང་ཁྱེར་ཐམས་ཅད་བརྟག་བྱས་ནས། །རྒྱལ་བའི་འཁོར་ལོ་གང་ཞིག་བསྐོར་བས་བླ་མའི་ཡེ་ཤེས་འཆར་ཞིང་ཐར་པ་སྟེར་བྱེད་པ། །འཕགས་པ་དེ་ཡི་ཐུགས་རྗེ་ཆེན་པོས་ནད་རྣམས་རྟག་པར་ཤིན་ཏུ་གྲོལ་བར་བྱེད། །ཟབ་པའི་ཚོགས་ཀྱིས་ཡོན་ཏན་གཏེར་ལྡན་པས། །རྣམ་པར་རྟོག་པའི་རྟོག་པ་ལས་རྒྱལ་ཉོན་མོངས་སྤངས་པ་ཡི། །བག་ཆགས་བཅས་པའི་གནས་ལས་གྲོལ་ཞིང་རྣམ་གྲོལ་བའི། །དངོས་དང་དངོས་མེད་རྣམ་གྲོལ་རྣལ་འབྱོར་པ་ལ་ཕྱག་འཚལ་ལོ། །ཡན་ལག་རྒྱན་རྣམས་ཀྱིས་ནི་རྣམ་པར་བརྒྱན་པ་ཡི། །ནམ་མཁའ་ཟླ་བའི་འོད་ཟེར་ཆ་ནི་རྣམ་པ་སྣ་ཚོགས་བྱེད་པ་གང༌། །ཤེས་རབ་ཚོགས་ཀྱི་བདག་ཉིད་ལ་ནི་ཕྱག་འཚལ་འདུད། །འཇིག་རྟེན་འཇིག་རྟེན་འདས་བཅས་བླ་མའི་འཁོར་ལོ་ཅན། །བསྒོམ་བྱ་རྣམ་པར་བསྒོམས་པས་འགྲོ་བ་གྲོལ་བའི་ཕྱིར། །གང་ཞིག་ཕན་པའི་བསམ་པས་འདིར་ནི་དཀྱིལ་འཁོར་བྱེད་པ་ཡི། །ཚོགས་ཀྱི་འཁོར་ལོ་བྱེད་པ་དེ་ལ་ཕྱག་འཚལ་འདུད། །སེམས་ཅན་ཐམས་ཅད་ལ་གནས་དྲི་མེད་དངོས་པོ་ཡི། །བསྒོམས་པས་གསལ་བར་གྱུར་པའི་བདེ་ཆེན་བསྡུས་པ་ལ། །ཕྱག་རྒྱ་དང་བཅས་བྱེད་པ་དེ་ལ་ཕྱག་འཚལ་ལོ། །དཔལ་ལྡན་རྡོ་རྗེ་འཇིགས་བྱེད་ཀྱི་ཚོགས་ཀྱི་འཁོར་ལོ། སློབ་དཔོན་རཏྣ་ཨཱ་ཀ་ར་ཤཱནྟིས་མཛད་པ་རྫོགས་སོ།། །།རྒྱ་གར་གྱི་མཁན་པོ་འདི་པཾ་ཀ་ར་རཀྵི་ཏ་དང༌། ལོ་ཙཱ་བ་དགེ་སློང་རྡོ་རྗེ་གྲགས་ཀྱིས་བསྒྱུར་བའོ།།

ཙྪུ་ཙྪུནྡ་རའི་རྟོག་པ།


DTG047_Page_0382
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། ཙྪུ་ཙྪུནྡ་ར་ཀལྤ། བོད་སྐད་དུ། ཙྪུ་ཙྪུནྡ་རའི་རྟོག་པ། བཅོམ་ལྡན་འདས་གཤིན་རྗེ་གཤེད་ལ་ཕྱག་འཚལ་ལོ། །དེ་ནས་ཙྪུ་ཙྪུནྡ་རའི་ཆོ་ག་ཞི་བ་མོ་བཤད་པར་བྱ་སྟེ། ཨོཾ་རུ་དྲོ་ཡ་མ་ཧེ་ཤྭ་ར་ཡོ་ག་པྲ་ཤཱ་ལ་ཡ། ཡོ་ག་སིདྡྷི་མ། ད་དཱ་ཧི་མེ་སྭཱ་ཧཱ། ཧཱུཾ་ཧཱུཾ་ཧཿ་ད་ཧ་ད་ཧ། པ་ཙ་པ་ཙ། ཨུ་རྡེ་ཡ་ཧཱུཾ་ཕཊ། རིག་སྔགས་འདིའི་བྱ་བའི་ཆོ་ག་ནི། ཉིན་མཚན་དུ་ནི་མི་ཉལ་བར་དྲི་དང་མེ་ཏོག་དང་བདུག་སྤོས་ཕུལ་ནས་གཏོར་མ་བཏང་སྟེ། །སྟོང་ཕྲག་བརྒྱད་བཟླས་ན་འགྲུབ་པར་འགྱུར་རོ། །དེ་ནས་ལས་རྣམས་སུ་གྱུར་པ་ནི་ཙྪུ་ཙྪུནྡ་ར་ཤི་བ་བླངས་ལ། པགས་པ་དང་རུས་པ་དང་ཤ་དང་སྤུ་རྣམས་ཕྱེ་མར་བཏགས་ཏེ། སྟོང་


DTG047_Page_0383
[མ་དཔེ་གཟིགས་ན་འདིར་གནོན།]

ཕྲག་གཉིས་བཟླས་ནས་ཕྱེ་མ་དེས་དཔྲལ་བ་ལ་བསྐུས་ན་བདག་ཉིད་དགྲ་ཡིས་མི་མཐོང་ངོ༌། །ཨོཾ་མ་མ་ཧུ་ཡ་ཏི། ཕྱེ་མ་དེས་ལག་པ་ལ་བསྐུས་ནས་གང་ལ་རེག་པ་དེ་དབང་དུ་འགྱུར་རོ། །ཕྱེ་མ་དེ་ཉིད་རྐང་པ་ལ་བསྐུས་ན་དཔག་ཚད་བརྒྱ་སྟོང་དུ་ཕྱིན་ནས་ལྡོག་གོ །ཕྱེ་མ་དེ་ཉིད་ཀྱིས་དགྲའི་སྒོ་ལོགས་ལ་བསྐུས་ནས་ཁྱིམ་གྱི་སྒོར་སྟོང་ཕྲག་བརྒྱད་བཟླས་ན་སྐྲོད་པར་བྱེད་དོ། །ཕྱེ་མ་དེ་དང་དུར་ཁྲོད་ཀྱིས་དགྲ་བོའི་སྒོ་རྩར་བཅད་ཅིང་སྦས་ན་དགྲ་བོའི་རིགས་རྣམས་འཇོམས་པར་འགྱུར་རོ། །ཡང་ན་དགྲ་བོའི་རིགས་སྐྲོད་པར་འདོད་ན། ཙྪུ་ཙྪུནྡ་རའི་པགས་པ་བླངས་ལ་སྟོང་ཕྲག་བརྒྱད་ཡོངས་སུ་བཟླས་ནས་གཅིན་ཤུལ་གྱི་སས་བཀད་ནས་སྐུད་པ་སྔོན་པོས་བཅིངས་ཏེ་ནམ་མཁར་བཏགས་ན་གཅིན་འགགས་པར་འགྱུར་རོ། །བཀྲོལ་ན་ཐར་རོ། །ཙྪུ་ཙྪུནྡ་རའི་པགས་པ་ཕྱེ་མར་བཏགས་ནས་ལྷ་ཆེན་པོའི་མདུན་དུ་སྟོང་ཕྲག་བརྒྱད་བཟླས་ལ། ཡང་དྲི་དང་མེ་ཏོག་དང་བདུག་སྤོས་དང༌། གཏོར་མ་བཏང་སྟེ། སླར་ཡང་སྟོང་ཕྲག་བརྒྱད་བཟླས་ན་དེ་ནས་འགྲུབ་པར་འགྱུར་རོ། །ཕྱེ་མ་དེ་སྣའི་རྩེ་མོར་བསྐུས་ན་སྐྱེ་འགྲོ་ཐམས་ཅད་སྡུད་པར་འགྱུར་རོ། །མགོ་བོར་བཞག་ན་དགྲ་ཐམས་ཅད་དང་འགྱེད་པའི་ལེན་ཐེབས་པར་འགྱུར་རོ། །ཕྱེ་མ་དེ་ཉིད་རང་གི་སྙིང་གར་བསྐུས་ནས་གལ་ཏེ་དགྲ་ལ་བསྟན་ན་སྙིང་ངན་པར་འགྱུར་རོ། །སཱ་ལུའི་ཕྱེ་མ་ལས་གཟུགས་བྱས་ནས་ཕྱེ་མ་དེས་བསྐུས་ན་དགྲ་བོ་དེ་རེངས་པར་འགྱུར་རོ། །སཱ་ལུའི་ཕྱེ་མ་ལས་གཟུགས་བྱས་ཏེ་ཕྱེ་མ་དེས་བསྐུས་ན་མ་ཛེས་ཐེབས་པར་འགྱུར་རོ། །དུར་ཁྲོད་ཀྱི་ཐལ་བ་དང་བཅས་པས་དགྲའི་ཚོགས་ལ་གཏོར་ན་གང་གིས་མནན་པ་དང་མཐོང་བ་དེ་དག་ནད་ཀྱིས་ཐེབས་པར་འགྱུར་རོ། །ཕྱེ་མ་དེ་ལན་སྟོང་བཟླས་ན་གང་གང་གི་མགོ་བོར་བླུགས་པ་དེ་དབང་དུ་འགྱུར་རོ། །ཕྱེ་མ་དེ་ཐོད་པ་དང་ལྷན་ཅིག་ཏུ་སྒོ་གླེགས་སུ་བཞག་ན་དགྲ་བོ་དབྱེ་བར་འགྱུར་རོ། །ཕྱེ་མ་དེས་བུད་མེད་ཀྱི་ལག་པ་ལ་བསྐུས་ན་བུད་མེད་དེ་འཆི་བར་འགྱུར་རོ། །ཕྱེ་མ་དེ་གང་གི་སྒོར་སྦས་ན་སྐྲོད་པར་འགྱུར་རོ། །ཕྱེ་མ་དེ་དང་ཤ་ཆེན་པོ་བསྲེས་ནས་གང་གི་བཏུང་བར་བྱིན་ན། ཉི་མ་བདུན་ན་འཆིའོ། །ཕྱེ་མ་དེ་དག་བཤད་པ་དང་བསྲེས་ནས་དགྲ་ལ་བྱིན་ན། དགྲ་བོ་བཀྲེས་པ་


DTG047_Page_0384
[མ་དཔེ་གཟིགས་ན་འདིར་གནོན།]

དང། གཞང་འབྲུམ་དང་ཚད་པས་ཐེབས་ནས་ཕྱི་ནས་ནི་རང་ཉིད་དགའ་བར་འགྱུར་རོ། །ཙྪུ་ཙྪུནྡ་རའི་རུས་པ་བླངས་ནས་གང་གི་ཁྱིམ་དུ་སྦས་ན་འཆིའོ། །ཙྪུ་ཙྪུནྡ་རའི་ཤ་དང་ཉའི་ཞག་དང་བཅས་པས་ལྷ་ལ་མཆོད་པ་བྱས་ནས། དུར་ཁྲོད་དུ་ཐོད་པའི་སྟེང་དུ་འདུག་ལ་ཐོད་པ་བཟུང་ལ་བཟླས་པ་བྱ་སྟེ། ཡང་དུར་ཁྲོད་ཀྱི་ཐལ་བ་ལ་ལན་སྟོང་དུ་བླུགས་ཤིང་སྦྱིན་སྲེག་བྱས་ན་འགྲུབ་པར་འགྱུར་ཏེ། ཕྱེ་མ་དེ་ཚ་བ་གསུམ་དང་བསྲེས་པས་ལས་སུ་འགྱུར་བ་ནི། གང་གི་ཁྱིམ་དུ་བཞག་ན་དེ་ལ་མེའི་ཚ་བ་འབྱུང་བར་འགྱུར་རོ། །ཕྱེ་མ་དེ་སྐེ་ཚེ་དང་བསྲེས་པས་ཀྱང་ལས་དེ་ཉིད་དུ་འགྲུབ་པར་འགྱུར་རོ། །ཕྱེ་མ་དེ་དུར་ཁྲོད་ཀྱི་ས་ལས་གཟུགས་བྱས་ཏེ་སྒོ་རྩར་སྦས་ན་འཕྲལ་ནས་འཕྲལ་དུ་ན་ཚ་དང་གསོད་པར་འགྱུར་རོ། །ཕྱེ་མ་དེ་དང་ལན་ཚྭར་བསྲེས་ནས་གང་ལ་བརྡེགས་པ་དེ་དབང་དུ་འགྱུར་རོ། །ཕྱེ་མ་དེ་ཡུངས་ཀར་དང་བསྲེས་ནས་རྒྱལ་པོའི་སྒོ་ལ་གཏོར་ན། རྒྱལ་པོ་དེ་དབང་དུ་འགྱུར་རོ། །གང་གིས་མནན་པ་དེ་དག་ཐམས་ཅད་ཀྱང་དབང་དུ་འགྱུར་རོ། །ཁམ་ཕོར་སོ་མ་བཏང་བ་ལ་ཕ་ཝང་བྲུན་གྱིས་བྱུགས་ལ། དགྲའི་དྲི་ཆེན་དྲི་ཆུ་དྲོད་མ་ཡལ་བ་ལ་བཀབ་ན། དྲི་ཆེན་དྲི་ཆུ་འགག་གོ །ཕྱུང་ན་སླར་འཚོའོ། །ཙྪུ་ཙྪུནྡ་རའི་རྟོག་པ་རྫོགས་སོ།། །།བྷ་རོ་ཕྱག་རྡུམ་གྱི་ཕྱག་དཔེ་ལས། རྭ་རྡོ་རྗེ་གྲགས་ཀྱིས་ཕྱིས་བསྒྱུར་བའོ།།

རྡོ་རྗེ་འཇིགས་བྱེད་ཆེན་པོའི་སྦྱིན་སྲེག་གི་ཆོ་ག་ཞེས་བྱ་བ།
ཨ་མོ་གྷ་བཛྲ།

སྔོན་དུ་བསྙེན་པ།


DTG047_Page_0384
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། མ་ཧཱ་བཛྲ་བྷཻ་ར་བ་ཧོ་མ་བི་དྷི་ནཱ་མ། བོད་སྐད་དུ། རྡོ་རྗེ་འཇིགས་བྱེད་ཆེན་པོའི་སྦྱིན་སྲེག་གི་ཆོ་ག་ཞེས་བྱ་བ། དཔལ་རྡོ་རྗེ་འཇིགས་བྱེད་ལ་ཕྱག་འཚལ་ལོ། །བགེགས་རྣམས་མ་ལུས་འཇོམས་མཛད་པའི། །དཔལ་ལྡན་རྡོ་རྗེ་འཇིགས་བྱེད་ལ། །ཀུན་ནས་དང་བས་ཕྱག་འཚལ་ཏེ། །དེ་ཡི་སྦྱིན་སྲེག་ཆོ་ག་བཤད། །གང་ཡང་རྒྱུད་རྣམས་ཐམས་ཅད་དུ། །སྦྱིན་སྲེག་ཆོ་ག་མེད་པ་ལ། །དངོས་གྲུབ་འབྱུང་བར་མི་འགྱུར་ཏེ། །དེ་བས་སྦྱིན་སྲེག་ལ་འཇུག་བྱ། །དེ་ལ་སྦྱིན་སྲེག་གི་རིམ་པ་ནི་སློབ་དཔོན་དབང་བསྐུར་བ་དང་ལྡན་པ། །སྙིང་རྗེ་ཆེ་བ། བརྩོན་འགྲུས་དང་ལྡན་པ། བླ་མ་ལ་གུས་པ་དེས་དུར་ཁྲོད་ལ་སོགས་པ་རྒྱུད་ལས་གསུངས་པའི་གནས་ཡིད་དུ་འོང་བར་ལྷའི་ང་རྒྱལ་གྱིས་གནས་ལ་སྔགས་ཀྱི་བཟླས་པ་བྱ་སྟེ། སྔོན་དུ་བསྟེན་པ་བྱའོ། །

ཐབ་ཀྱི་དབང་དུ་བྱས་པ།


DTG047_Page_0385
[མ་དཔེ་གཟིགས་ན་འདིར་གནོན།]

ཐབ་ཀྱི་ཚུལ་ནི་གཉིས་ཏེ། རོ་བསྲེགས་པའི་སའམ། ཡང་ན་ཁྱིམ་གྱི་ཕྱོགས་གཅིག་ཏུ་ཐབ་བྱའོ། །ཁྱིམ་དུ་ཐབ་བྱ་བ་ནི་གྲུ་གསུམ་པ་རྒྱར་ཁྲུ་གང་དཔངས་སུ་དེའི་ཕྱེད་ལ་ཁ་ཁྱེར་སོར་གསུམ་པས་ཀུན་ནས་བསྐོར་བ། རོ་བསྲེགས་པའི་ཐལ་བ་དང༌། སོལ་བས་ཁ་དོག་ནག་པོར་བྱས་ལ། ཁྲོ་བོའི་རྡོ་རྗེས་མཚན་པ། དྲི་ཆེན་དང་བོང་བུ་དང༌། རྔ་མོའི་རྟུག་པས་བྱུགས་པས་བསད་པ་ལ་སོགས་པའི་ལས་བསྒྲུབ་པར་བྱའོ། །ཐབ་ཀྱི་དབང་དུ་བྱས་པའོ། །

རྫས་དགྲམ་པའི་རིམ་པ།


DTG047_Page_0385
[མ་དཔེ་གཟིགས་ན་འདིར་གནོན།]

རོ་བསྲེགས་པའི་སའམ། ཐབ་ཁང་དུ་རྫས་གཞག་པ་ནི་མཆོད་པའི་རྫས་མེ་ཏོག་ནག་པོ་དྲི་མི་ཞིམ་པ་དང༌། ཤའམ། ཁྲག་གི་དྲི་སྤོས་དང༌། མེ་མར་ཆེན་པོའི་མར་མེ་དང༌། དྲི་ཆུའི་དྲི་ཆབ་དང༌། མི་ལ་སོགས་ཤའི་ལྷ་བཤོས་དང༌། ཁྲག་དང༌། ཞག་དང༌། ཚིལ་དང་བཅས་པའི་མཆོད་ཡོན་ལ་སོགས་པའི་ཆུ་སྣོད་རྣམས་ནི་རང་གི་གཡོན་དུ་གཞག་པར་བྱའོ། །མིའི་རུས་པ་དང༌། དྲི་ཆེན་དང༌། བོང་བུ་དང༌། རྔ་མོའི་རྟུག་པ་དང་ཤིང་ཚེར་མ་ཅན་དང༌། དུར་ཁྲོད་ཀྱི་ཡམ་ཤིང་དང༌། ཚ་བའི་མར་ནག་དང༌། སྐྲ་དང་སེན་མོ་ལ་སོགས་པའི་སྲེག་རྫས་རྣམས་ནི་གཡས་ཕྱོགས་སུ་གཞག་པར་བྱའོ། །རྫས་དགྲམ་པའི་རིམ་པའོ། །

རྫས་བྱིན་གྱིས་བརླབ་པའི་རིམ་པ།


DTG047_Page_0385
[མ་དཔེ་གཟིགས་ན་འདིར་གནོན།]

དེ་ནས་སྒྲུབ་ཐབས་ལས་གསུངས་པའི་རིམ་པས་རང་ལྷའི་རྣལ་འབྱོར་བྱས་ལ་མཆོད་རྫས་དང༌། སྲེག་རྫས་ཐམས་ཅད་བྱིན་གྱིས་བརླབ་པར་བྱ་སྟེ། །ཨོཾ་ཧྲཱིཿ་ཥྚྲྀཿ་ཨ་ཞེས་པས་མཆོད་ཡོན་ལན་གསུམ་མམ་བདུན་གྱི་བར་དུ་མངོན་པར་བཟླས་ལ་གཞུག་པར་བྱའོ། །དེ་བཞིན་དུ་ཨོཾ་ཧཱུཾ་ཧཱུཾ་ཕཊ་ཕཊ་ཅེས་བྱ་བས་བསང་གཏོར་བྱ་བ་དང། ཨོཾ་ཀུ་མཱ་ར་རཱུ་པི་ཎི་ཛ་ཛ་ཞེས་བྱ་བས་མེ་ཏོག་དང༌། ཨོཾ་ཧྲཱིཿ་ཧ་ཧ་ཧེ་ཕཊ་ཕཊ། ཅེས་བྱ་བས་བདུག་སྤོས་དང༌། ཨོཾ་དཱིཔྟ་ལོ་ཙ་ནི་ཝི་ཀྲྀ་ཏཱ་ན་ན་མ་ཧཱ་ཨཊྚ་ཧ་ས་ནི་དཱིཔྟ་དཱིཔྟཱ་ཡ་སྭཱ་ཧཱ། ཞེས་བྱ་བས་མར་མེ་དང༌། ཨོཾ་ཝི་ཀྲྀ་ཏཱ་ན་ན་དུཥྚ་ས་ཏྭ་དཱ་མ་ཀ་གཿ་གཿ་དྲིའོ། །ཨོཾ་ཀཱ་ལ་རཱུ་པ་སརྦ་སཏྭ་ད་མ་ཀ་མ་ཧཱ་བྷཱུ་ཏ་བ་ཏི་ཨི་དཾ་བ་ལིཾ་གྲྀཧྞ་གྲྀཧྞཱ་པ་ཡ་སྭཱ་ཧཱ། ཞེས་བྱ་བས་ལྷ་བཤོས་ཀྱི་སྟེ། དེ་ཁོ་ན་ཉིད་ཀྱིས་གཏོར་མ་ལ་ཡང་མངོན་པར་བསྔགས་ལ། གོང་དུ་གསུངས་པའི་བསང་གཏོར་གྱིས་རྫས་ཐམས་ཅད་དང༌། ཐབ་ཁུང་ལ་སྒོས་པ་ལ་བསང་གཏོར་བྱའོ། །རྫས་བྱིན་གྱིས་བརླབ་པའི་རིམ་པའོ། །

མེ་སྦར་བ།


DTG047_Page_0386
[མ་དཔེ་གཟིགས་ན་འདིར་གནོན།]

དེ་ནས་བུད་ཤིང་དང་མེ་བླང་བར་བྱ་སྟེ། བུད་ཤིང་ནི་རོ་བསྲེགས་པའི་མགལ་དུམ་མམ། ཤིང་ཚེར་མ་ཅན་གྱི་རྩ་བའི་ཆ་ལས་བྱུང་བའོ། །ཤིང་ཚེར་མ་ཅན་ནི། ནིམ་པ་དང༌། སེང་ལྡེང་དང༌། ཀོ་བི་ད་ར་དང༌། བ་ལ་ད་ཀ་ལ་སོགས་པའོ། །དེ་ལ་མེ་ཡང་རོ་བསྲེགས་པའི་སའམ། གདོལ་པའམ། སྨེ་ཤ་ཅན་ནམ། རྡོ་ལས་བྱུང་བ་ཡང་རུང་སྟེ། རབ་ཏུ་སྦར་བར་བྱའོ། །བུད་ཤིང་དང་མེ་གཉེར་བའི་དབང་དུ་བྱས་པའོ། །དེ་ནས་ཇི་ལྟ་བ་བཞིན་དུ་བསང་གཏོར་བྱས་ནས་མེ་སྦར་བར་བྱ་སྟེ། ཨོཾ་ཛྭ་ལ་ཛྭ་ལ་ཧཱུཾ་ཧཱུཾ་ཕཊ་ཕཊ་ཅེས་པས་མངོན་པར་བསྔགས་ལ། འོག་ཏུ་ཡང་ཡི་གེ་ཡཾ་ཡོངས་སུ་གྱུར་པ་ལས་གཞུ་ལྟ་བུས་སྤོར་བར་བྱེད་པར་བསམ་མོ། །མེ་སྦར་བའོ། །

མེ་ལྷའི་དབང་དུ་བྱས་པ།


DTG047_Page_0386
[མ་དཔེ་གཟིགས་ན་འདིར་གནོན།]

དེ་ནས་ཧཱུཾ་གིས་ཐབ་ཁུང་བསྐྱེད་ལ། དམ་ཚིག་གི་མེ་ལྷ་འདི་ལྟར་བསྐྱེད་པར་བྱ་སྟེ། ཛ་ལས་ཉི་མའི་དཀྱིལ་འཁོར། དེའི་སྟེང་དུ་རཾ་ཡོངས་སུ་གྱུར་པ་ལས་མེའི་དཀྱིལ་འཁོར་གྲུ་གསུམ་པ། ཨོཾ་ཨཱཿ་ཧཱུཾ་གིས་འཁོར་ལོ་དང༌། པདྨ་དང༌། རྡོ་རྗེས་མཚན་པའོ། །དེ་ཡོངས་སུ་གྱུར་པ་ལས། ཁྲོ་བོའི་མེ་ལྷ་ཤིན་ཏུ་དྲག་ཅིང་ཁྲོ་བར་བྱེད་པ། འཇིགས་པ་དག་ཀྱང་ཤིན་ཏུ་འཇིགས་པར་བྱེད་པའོ། །སྐྲ་ཁམ་པ་གྱེན་དུ་འབར་བ་འོད་ཟེར་བརྒྱ་སྟོང་དུ་མས་བརྒྱན་པ་ཞལ་གསུམ་པ། ཕྱག་དྲུག་དང་ལྡན་པ། རྩ་བའི་ཞལ་ནག་པོ། གཡས་པ་དཀར་བ། གཡོན་པ་དམར་བ། ཕྱག་གཡས་ན་རྡོ་རྗེ་དང༌། སྤྱི་བླུགས་དང༌། སྐྱབས་སྦྱིན་ནོ། །ཕྱག་གཡོན་པ་རྣམས་ལ་དྲིལ་བུ་དང༌། དབྱུག་པ་དང༌། བགྲང་ཕྲེང་རྣམས་འཛིན་པར་བསྒོམ་པར་བྱའོ། །སྔགས་འདིས་གཉུག་མར་གནས་པའི་མེ་ལྷེ་སྤྱན་དྲང་བར་བྱ་སྟེ། ཨོཾ་ཨེ་ཧྱེ་ཧི་མ་ཧཱ་བྷའུ་ཏ་དེ་ཝ་རྀ་ཥི་སཏྭ་མ་ཨ་ཧུ་ཏི་ར་སྨིན་སནྣི་ཧི་ཏོ་བྷ་ཝ་ཀྲོ་དྷ་ཨགྣེ་མ་མ་ཤ་ཏྲཱུཾ་མཱ་ར་ཡ་ཕཊ་ཕཊ་ཅེས་པས་ཐབ་ཀྱི་གཡས་ཕྱོགས་སུ་བཞག་ལ་དགུག་པ་དང༌། གཞུག་པ་དང༌། བཅིང་བ་དང༌། དབང་དུ་བྱ་བ་དང༌། ཁྲིས་ཀྱི་ཆོ་གས་ཁྲུས་བྱས་ཏེ། ཐབ་ཀྱི་དབུས་སུ་བསམ་པར་བྱའོ། །མེ་ལྷའི་དབང་དུ་བྱས་པའོ། །

འཇིག་རྟེན་པའི་མེ་ལྷ་མཆོད་པའི་རིམ་པ།


DTG047_Page_0386
[མ་དཔེ་གཟིགས་ན་འདིར་གནོན།]

དེ་ནས་མཆོད་ཡོན་ལ་སོགས་པའི་མཆོད་པ་རྣམས་དབུལ་བར་བྱ་སྟེ། གོང་ནས་གསུངས་པའི་རིམ་པས་མཆོད་པ་ཐམས་ཅད་ཀྱིས་ཡང་དག་པར་མཆོད་ནས། དགང་བླུགས་གསུམ་མམ་བདུན་ཡུངས་


DTG047_Page_0387
[མ་དཔེ་གཟིགས་ན་འདིར་གནོན།]

མར་དང་བཅས་པས་ཞལ་ཤིན་ཏུ་གདངས་པར་དབུལ་བར་བྱའོ། །དེའི་སྔགས་ནི་འདི་ཡིན་ཏ། ཨོཾ་ཨ་ན་ལ་མ་ཧཱ་བྷཱུ་ཏ་ཛྭ་ལ་ཡ་སརྦ་བྷསྨིཾ་ཀུ་རུ་སརྦ་དུཥྚ་མ་ན་ཆེ་གེ་མོ་མཱ་ར་ཡ་ཧཱུཾ་ཕཊ་ཅེས་བྱ་བས་དབུལ་བར་བྱའོ། །དེ་ནས་སྲེག་བླུགས་དབུལ་བར་བྱ་སྟེ། ཤིང་ཚེར་མ་ཅན་གྱི་ཡམ་ཤིང་སོར་དྲུག་པ་ཁ་དོག་ནག་པོ་དང་ཡུངས་མར་ལ་སོགས་པའི་རྫས་རྣམས་ལ་སྔགས་འདི་བཟླས་ཏེ་གསད་པའི་ལས་བྱའོ། །ཨོཾ་ཧྲཱིཿ་ཥྚྲྀཿ་ཝི་ཀྲྀ་ཏྲཱ་ན་ན་མ་མ་ཤ་ཏྲཱུཾ་མཱ་ར་ཡ་ཧཱུཾ་ཕཊ་ཅེས་གསད་པར་བྱའོ། །བྷི་དེ་ཤ་ཡ་ཞེས་པ་ནི་དགར་བའོ། །ཨུཙྪ་ཊ་ཡ་ཞེས་པ་ནི་བསྐྲད་པའོ། །མོ་ཧ་ན་ཞེས་པ་ནི་རྨོངས་པའོ། །སྟཾ་བྷ་ཡ་ཞེས་པ་ནི་རེངས་པའོ། །ཨུནྨ་ན་ད་ཞེས་པ་ནི་སྨྱོ་བའོ། །ཨཱ་ཀཪྵ་ཡ་ཛཿ་ཞེས་པ་ནི་དགུག་པའོ། །རཥྚ་པ་ད་ཤ་ཡ་ཞེས་པ་ནི་གྲོང་ཁྱེར་དཀྲུག་པའོ། །ཝ་ཤིཾ་ཀུ་རུ་ཞེས་པ་ནི་དབང་དུ་བྱ་བའོ། །དེ་དག་རྩ་བའི་སྔགས་སམ། སྙིང་པོའམ། ཉེ་བའི་སྙིང་པོའམ། གང་ཡང་རུང་བར་བསྔགས་ལ་མིང་སྤེལ་ལ། ལས་ཐམས་ཅད་བསྒྲུབ་པར་བྱ་ཞིང་ཐ་མ་ཡང་དགང་བླུགས་གསུམ་མམ། ཡང་ན་བདུན་ཕུལ་ལ་མཆོད་པ་ནི་མེ་ལྷ་མཆོད་པའི་ཆོ་ག་སྟེ། འཇིག་རྟེན་པའི་མེ་ལྷ་མཆོད་པའི་རིམ་པའོ། །

འཇིག་རྟེན་ལས་འདས་པའི་མེ་ལྷ་བསྐྱེད་པའི་ཆོ་ག


DTG047_Page_0387
[མ་དཔེ་གཟིགས་ན་འདིར་གནོན།]

དེ་ནས་མེ་ལྷ་དེའི་སྙིང་གར་ཡང་རུང་སྟེ། བཅོམ་ལྡན་འདས་རྡོ་རྗེ་འཇིགས་བྱེད་ཇི་སྐད་དུ་བཤད་པའི་སྐུ་མདོག་དང་ཕྱག་མཚན་དུ་ལྡན་པ་བསྒོམ་པ་ནི་ཉི་མའི་དཀྱིལ་འཁོར་ལ་གནས་པའི་ཡི་གེ་ཧཱུཾ་ཡོངས་སུ་གྱུར་པ་ལས་ཞལ་དགུ་པ། ཞབས་བཅུ་དྲུག་པ། ཕྱག་སུམ་ཅུ་རྩ་བཞི་དང་ལྡན་པའོ། །རྩ་བའི་ཞལ་མ་ཧེའི་གདོང་ཅན་ནོ། །རྭ་གཡས་པའི་ཕྱོགས་ཀྱི་ཞལ་གསུམ་ནི་སྔོན་པོ་དང༌། དམར་པོ་དང་སེར་པོ་ཤིན་ཏུ་ཁྲོས་པར་བྱའོ། །རྭ་གཡོན་པའི་ཕྱོགས་ཀྱི་ཞལ་གསུམ་ནི་དཀར་པོ་དང༌། ནག་པོ་དང༌། དུད་ཀའོ། །རྭ་གཉིས་ཀྱི་བར་གྱི་ཞལ་ནི་དམར་པོ། དེའི་སྟེང་གི་ཞལ་ནི་སེར་བ་ཅུང་ཟད་ཙམ་ཁྲོ་བ་དང་བཅས་པར་བསམ་པར་བྱའོ། །ཕྱག་གཡས་པ་རྣམས་ལ་གྲི་གུག་དང༌། ཐག་མདུང་དང༌། གཏུན་ཤིང་དང༌། གཏུབ་མཚོན་དང༌། རྡོ་རྗེ་རྩེ་གཅིག་པ་དང༌། སྟ་རེ་དང༌། མདའ་དང༌། ལྕགས་ཀྱུ་དང༌། དབྱུག་ཏོ་དང༌། ཁ་ཊྭཱཾ་ག་དང༌། འཁོར་ལོ་དང༌། རྡོ་རྗེ་ཐོ་བ་དང༌།


DTG047_Page_0388
[མ་དཔེ་གཟིགས་ན་འདིར་གནོན།]

རལ་གྲི་དང༌། ཅང་ཏེའུ་བསྣམས་པའོ། །ཕྱག་གཡོན་པ་རྣམས་ལ་ནི་ཐོད་པ་དང༌། ཨ་ཀོ་ཙེ་དང༌། ཕུབ་དང༌། རྐང་པ་དང༌། ཞགས་པ་དང༌། གཞུ་དང༌། རྒྱུ་མ་དང༌། དྲིལ་བུ་དང༌། ལག་པ་དང༌། དུར་ཁྲོད་ཀྱི་རས་དང༌། གསལ་ཤིང་དང༌། མེ་ཐབ་དང༌། ཚོད་ཚལ་དང༌། སྡིགས་མཛུབ་དང། འཕན་རྩེ་གསུམ་དང༌། རླུང་གི་རས་རྣམས་སོ། །ཕྱག་དང་པོ་གཉིས་ཀྱིས་ནི་གླང་པོ་ཆེའི་པགས་པ་འཛིན་པ་བསམ་པར་བྱའོ། །ཞབས་གཡས་པ་རྣམས་ཀྱིས་ནི་མི་དང༌། མ་ཧེ་དང༌། བོང་བུ་དང༌། རྔ་མོ་དང༌། གླང་དང༌། ཁྱི་དང༌། ལུག་དང༌། ཝ་རྣམས་མནན་པའོ། །ཞབས་གཡོན་པ་རྣམས་ཀྱིས་ནི་བྱ་རྒོད་དང༌། འུག་པ་དང༌། བྱ་རོག་དང༌། སེང་གེ་དང༌། ཁྲ་དང༌། བྱེ་ཆེན་དང༌། སྲིན་བྱ་དང༌། ཁྲུང་ཁྲུང་རྣམས་མནན་པར་བསྒོམ་པར་བྱའོ། །དེ་ནས་སྔགས་འདིས་ཡེ་ཤེས་སེམས་དཔའ་སྤྱན་དྲངས་པར་བྱ་སྟེ། ཨོཾ་ཧྲཱིཿ་བྷོ་བྷོ་མ་ཧཱ་ཀྲོ་དྷ་ཨཱ་གྩྪ་ཡ་ཨཱ་གྩྪ་ཡཱ་སྨ་ད་པཱུ་ཛ་པྲ་ཏི་གྲྀཧྞ་པྲ་སཱ་དྷ་མེ་དྷི་མན་ཀུ་རུ་ཤ་ཏྲཱུཾ་མཱ་ར་ཡ་ཧཱུཾ་ཕཊ། དེ་ནས་གསང་གཏོར་བྱས་ལ་དགུག་པ་དང༌། གཞུག་པ་དང༌། བཅིང་བ་དང༌། གཉིས་སུ་མེད་པར་བྱ་སྟེ། འཇིག་རྟེན་ལས་འདས་པའི་མེ་ལྷ་བསྐྱེད་པའི་ཆོ་གའོ། །

འཇིག་རྟེན་ལས་འདས་པའི་མེ་ལྷ་མཆོད་པ།


DTG047_Page_0388
[མ་དཔེ་གཟིགས་ན་འདིར་གནོན།]

དེ་ནས་གོང་མ་བཞིན་དུ་མཆོད་ཡོན་ལ་སོགས་པའི་མཆོད་པ་བྱ་སྟེ། དགང་བླུགས་དབུལ་བར་བྱའོ། །དེ་ནས་ཡམ་ཤིང་ལ་སོགས་པ་འབར་བའི་རྫས་རྣམས་ནི་བསྒྲུབ་བྱའི་རུས་པ་ཡིན་པར་བསམས་ཏ། འོད་འབར་བ་ལ་བསྲེག་པར་བསམ་པར་བྱའོ། །མར་ལ་སོགས་པ་ཞུ་བའི་རྫས་ནི་བསྒྲུབ་བྱའི་ཁྲག་ཡིན་པར་བསམས་ཏེ་ཞལ་དུ་དབུལ་བར་བྱའོ། །དྲི་ཆེན་ལ་སོགས་པའི་རྫས་ནི་ཤ་ཆེན་ཡིན་པར་བསམས་ཏེ་ཕྱག་ཏུ་དབུལ་བར་བྱའོ། །དེའི་རིམ་པ་ནི་འདི་ཡིན་ཏེ། ཐོག་མར་དུག་དང༌། ཁྲག་དང༌། སྐེ་ཚེ་དང༌། ལན་ཚྭ་དང༌། ནི་མ་པ་དང༌། ད་དུ་ར་དང་བཅས་པའི་ཡུངས་མར་གྱི་དགང་བླུགས་སོ། །དེ་ནས་སྲེག་བླུགས་ཀྱི་རིམ་པ་ནི་ཡམ་ཤིང་དང༌། མར་ནག་དང༌། ཁྲག་དང༌། དྲི་ཆེན་དང༌། དྲི་ཆུ་དང༌། མི་རུས་ཀྱི་ཕྱེ་མ་དང༌། དུག་དང༌། སྐེ་ཚེ་དང༌། ལན་ཚྭ་དང༌། བོང་བུ་དང༌། རྔ་མོའི་སྦངས་ལ་སོགས་པ་རྣམས་ལས་ལིངྒ་བྱས་ལ། དེ་ལ་བསྒྲུབ་བྱ་བསྒོམས་ལ་གྲི་གུག་གིས་གཏུབ་ཏེ་དཔལ་རྡོ་རྗེ་འཇིགས་བྱེད་ལ་དབུལ་བར་བྱའོ། །དེ་ནས་དགང་བླུགས་


DTG047_Page_0389
[མ་དཔེ་གཟིགས་ན་འདིར་གནོན།]

གསུམ་མ་མ་བདུན་ཕུལ་ལ་མཆོད་པ་ལྔས་ཡང་དག་པར་མཆོད་དེ། དགང་བླུགས་ཀྱི་དུས་སུ་ནི་གང་འདོད་པའི་དངོས་གྲུབ་བླང་ཞིང་མེ་ཏོག་ནག་པོ་ལས་བསྒྲུབ་པར་བྱའོ། །འཇིག་རྟེན་ལས་འདས་པའི་མེ་ལྷ་མཆོད་པའོ། །

ལས་རྣམས་སོ་སོར་བསྒྲུབ་པ།


DTG047_Page_0389
[མ་དཔེ་གཟིགས་ན་འདིར་གནོན།]

དེ་ནས་དེ་ཁོ་ན་ཉིད་ལས་བསྒྲུབ་པར་བྱ་སྟེ། བསད་པ་ལ་ནི་དུག་དང༌། ཁྲག་དང༌། སྐེ་ཚེ་དང༌། ལན་ཚྭ་དང༌། ནིམ་པ་དང༌། ད་དུ་ར་རྣམས་བསྲེས་ལ་སྔགས་དང་སྤེལ་ནས་བསྲེག་པའོ། །དཔྲལ་བ་ནི་བྱ་རོག་དང༌། འུག་པ་དང༌། ཡང་སྦྲུལ་དང༌། སྲེ་མོང་གི་ཤའམ། པགས་པས་སོ། །བསྐྲད་པ་ལ་ནི་བྱ་རོག་གི་ཤའམ། རྔ་མོའི་སྤངས་དང༌། ཆང་རྣམས་ལྷན་ཅིག་བསྲེས་པའོ། །རྨོངས་པ་ནི་ལྡོངས་རོས་དང༌། ཡུང་བ་དང༌། ལྡོང་རོས་དམར་པོ་དང༌། གོ་རོ་ཙ་ན་རྣམས་སྦྱར་བར་བྱའོ། །རེངས་པ་ལ་བ་བླ་དང༌། ཡུང་བ་དང༌། ལྡོང་རོས་དང༌། གི་ཝང་དང་བཅས་པས་བྱའོ། །སྨྱོ་བར་བྱ་བ་ལ་ནི་སྲིན་བྱའི་ཚང་དང༌། ཤ་ཆེན་དང་གཉིས་ཀྱིས་བྱའོ། །གྲོང་ཁྱེར་དཀྲུག་པ་ལ་ནི་ཁྱི་དང༌། སྦལ་པ་དང༌། རུས་སྦལ་གྱི་ཤ་དང༌། རྔ་མོ་མོ་གཤམ་གྱི་སྤངས་དང༌། བྱི་ལའི་ཁྲག་རྣམས་ཆ་བསྙམས་ཏེ་སྦྱར་བའི་རི་ལུ་བྱས་ལ་ཡི་གེ་བཅུ་པའི་སྔགས་བཟླས་པས་སོ། །རྒྱལ་པོ་དབང་དུ་བྱ་བ་ལ་ནི་རྟའི་ཤ་དྲི་ཆེན་དང་གཉིས་མཉམ་པོར་སྦྱར་བས་སོ། །ཐ་མལ་པ་དབང་དུ་བྱ་བ་ལ་ནི་གླང་པོ་ཆེའི་ཤ་བྱང་ཆུབ་ཀྱི་སེམས་དང་བཅས་པས་སོ། །བུད་མེད་དབང་དུ་བྱ་བ་ལ་ནི་ཉའི་ཤ་དང་ཆང་རྣམས་བསྲེས་པས་སོ། །དགུག་པ་ལ་ནི་བདུད་རྩི་རྣམ་པ་ལྔས་སོ། །ལས་རྣམས་སོ་སོར་བསྒྲུབ་པའོ། །

ཡེ་ཤེས་ཀྱི་ལྷ་གཤེགས་སུ་གསོལ་བ།


DTG047_Page_0389
[མ་དཔེ་གཟིགས་ན་འདིར་གནོན།]

དེ་ལྟར་ལས་རྣམས་བསྒྲུབས་ཟིན་ནས་ནི་དགང་བླུགས་ཕུལ་ལ་མཆོད་པ་རྣམས་ཀྱིས་མཆོད་དེ་སྔགས་འདིས་གཤེགས་སུ་གསོལ་བར་བྱ་སྟེ། ཨོཾ་ཛ་ཡ་ཛ་ཡ་སུ་ཛ་ཡ་བི་ཤྭ་རཱུ་པ་དྷ་རི་གྩྪ་གྩྪ་སྭསྠཱ། ནཾ་ཀྲྀ་ཏ་ཏེ་ཏ་ཐཱ་ག་ཏ་ན་མཿ། སརྦ་བྷཱུ་ཏ་བི་སརྫ་ཡ་མ་མ་ཀཪྻཾ་ཀུ་རུ་སྭཱ་ཧཱ། གཤེགས་སུ་གསོལ་བའི་སྔགས་སོ། །ཡེ་ཤེས་ཀྱི་ལྷ་གཤེགས་སུ་གསོལ་བའོ། །

འཇིག་རྟེན་པའི་མེ་ལྷ་གཤེགས་སུ་གསོལ་བ།


DTG047_Page_0389
[མ་དཔེ་གཟིགས་ན་འདིར་གནོན།]

དེ་ནས་རྫས་ལྷག་མ་རྣམས་མེ་ལྷ་ལ་ཕུལ་ལ་གཉུག་མར་གནས་པའི་མེ་ལྷ་འདིར་གཤེགས་སུ་གསོལ་བར་བྱ་སྟེ། ཨོཾ་ཁྱོད་ཀྱིས་འགྲོ་བའི་དོན་ཀུན་མཛད། །དངོས་གྲུབ་ཇི་བཞིན་


DTG047_Page_0390
[མ་དཔེ་གཟིགས་ན་འདིར་གནོན།]

སྩལ་ལགས་ཀྱིས། །སངས་རྒྱས་ཡུལ་དུ་གཤེགས་སུ་གསོལ། །སླར་ཡང་གཤེགས་པར་མཛད་དུ་གསོལ། །ཞེས་བརྗོད་པར་བྱའོ། །འཇིག་རྟེན་པའི་མེ་ལྷ་གཤེགས་སུ་གསོལ་བའོ། །དམ་ཚིག་བསྡུས་ཏེ་དེ་ནས་ཉ་དང་ཤ་རྣམ་པ་སྣ་ཚོགས་དང་བཅས་པའི་གཏོར་མ་དཔལ་གཤིན་རྗེ་གཤེད་འཁོར་དང་བཅས་པ་ལ་བྱིན་ནས་གཡོན་ཕྱོགས་ནས་ལན་གསུམ་བསྐོར་བ་བྱས་ཏེ་གནས་པར་བྱའོ། །དེ་ལྟར་དེ་རྣམས་བྱས་ལས་བྱུང་བ་ཡི། །དགེ་བ་གང་དེས་འགྲོ་བ་ཐམས་ཅད་ཀུན། །སྡིག་དང་བྲལ་ཞིང་དགེ་བ་རབ་འཕེལ་ནས། །དཔལ་ལྡན་འཇིགས་བྱེད་དེ་དང་འདྲ་བར་ཤོག །དཔལ་རྡོ་རྗེ་འཇིགས་བྱེད་ཀྱི་དྲག་པོའི་སྦྱིན་སྲེག་གི་ཆོ་ག་ཨ་མོ་གྷ་བཛྲ་ས་མཛད་པ་རྫོགས་སོ།། །།རྭ་རྡོ་རྗེ་གྲགས་ཀྱིས་བསྒྱུར་བའོ།།

དཔལ་རྡོ་རྗེ་འཇིགས་བྱེད་ཀྱི་སྒྲུབ་ཐབས།
ལ་ལི་ཏ་བཛྲ།


DTG047_Page_0390
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། ཤྲཱི་བཛྲ་བྷཻ་ར་བ་སཱ་དྷ་ནཾ་ནོ་པིཀྵ། བོད་སྐད་དུ། དཔལ་རྡོ་རྗེ་འཇིགས་བྱེད་ཀྱི་སྒྲུབ་ཐབས། དཔལ་རྡོ་རྗེ་འཇིགས་བྱེད་ལ་ཕྱག་འཚལ་ལོ། །གཟུགས་མཆོག་རབ་ཏུ་དྲག་པོ་ཆེ། །དཔའ་བོ་མཆོག་གི་སྤྱོད་ཡུལ་ཅན། །གདུལ་དཀའ་འདུལ་བའི་དོན་མཛད་པ། །རྡོ་རྗེ་འཇིགས་བྱེད་ཕྱག་འཚལ་ནས། །སྒྲུབ་པའི་ཐབས་ནི་ཡང་དག་པར། །བདག་གིས་ངེས་པར་བརྗོད་པར་བྱ། །རྟོགས་དགའི་རྒྱུད་རྟོག་ལ་བཏུད་ནས། །རིམ་པ་འདི་ལ་འཇུག་པར་བྱ། །ཕུན་སུམ་ཚོགས་སོགས་མཚན་ཉིད་ཅན། །བླ་མ་དང་པོ་མཉེས་པར་བྱ། །རྡོ་རྗེ་འཇིགས་བྱེད་མཆོག་གི་དོན། །ཐམས་ཅད་སློབ་མར་དེ་བཞིན་ཏེ། །དུས་ཀུན་དུ་ནི་སྙིང་རྗེ་བ། །ལུས་ཅན་ཀུན་ལ་བསྒོམ་པར་བྱ། །སྔགས་པས་ཐོག་མར་ལངས་ནས་ནི། །ཅི་བདེ་བར་ནི་བསྒོམ་པར་བྱ། །དང་པོ་དུར་ཁྲོད་ཆུ་འགྲམ་མམ། །ཤིང་གཅིག་གམ་ནི་མཚན་གཅིག་གནས། །བཞི་མདོ་འམ་ནི་རི་བོ་ཡི། །རྩེ་མོ་དང་ནི་ཁང་སྟོང་གནས། །མ་མོའི་ཁྱིམ་མམ་ཡང་ཐོག་མཛེས། །ལྷ་ཡི་ཁང་པ་དག་ཏུ་དང༌། །འཐབ་མོའི་ས་དང་གྲོང་ཁྱེར་སྟོང༌། །ཡིད་དུ་འོང་བའི་གྲོང་དག་ཏུ། །འབོལ་བའི་སྟེང་སོགས་ལ་འདུག་ནས། །ཐང་ཀ་ལ་སོགས་གཟུགས་གཞན་བསྒོམ། །མཆོད་དང་བདུད་རྩི་ལ་སོགས་ཀྱིས། །ཞི་བ་ལ་སོགས་


DTG047_Page_0391
[མ་དཔེ་གཟིགས་ན་འདིར་གནོན།]

ཁྱད་པར་རྣམས། །ཤ་རྣམས་ཀུན་གྱི་གཏོར་མ་ནི། །འབྱུང་པོ་ལ་སོགས་འཇིགས་ལ་སྦྱིན། །དང་པོར་ལྷ་ལ་བཟོད་པར་གསོལ། །ཞིང་སྐྱོང་ལ་སོགས་ཐམས་ཅད་གཤེགས། །སྙིང་གར་ཟླ་བ་ཉི་དཀྱིལ་གནས། །ཡི་གེ་ཧཱུཾ་ནི་འབར་བའི་མཆོག །དེ་ལ་འོད་ཀྱི་ཕྲེང་འཕྲོ་བས། །འཇིགས་བྱེད་ལ་སོགས་བཀུག་ནས་ནི། །ལྷ་རྣམས་ལག་ན་ཐོགས་པ་ཡི། །མཆོད་པ་རྣམས་ཀྱིས་ལེགས་པར་མཆོད། །དེ་ཡིས་བཅོམ་ལྡན་འདས་རྣམས་དགྱེས། །འཁོར་རྣམས་ལ་ཡང་ལྷན་ཅིག་དབུལ། །སྡིག་པ་རྣམས་ནི་བཤགས་པར་བྱ། །སྐྱེས་ཤིང་བྱུང་བ་རྣམས་ནི་བསལ། །མི་བྱེད་པར་ནི་སྤྱན་སྔར་བརྗོད། །དེ་བཞིན་བསོད་ནམས་རྗེས་ཡི་རང༌། །བདག་གིས་བདེ་འགྲོ་ཡོངས་སུ་བསྔོ། །དཀོན་མཆོག་གསུམ་ལ་སྐྱབས་སུ་འགྲོ། །སེམས་ཅན་ཐམས་ཅད་བདག་གིས་བསྒྲལ། །བྱང་ཆུབ་གནས་ལ་དགོད་པར་བགྱི། །བྱང་ཆུབ་སེམས་ནི་ཡང་དག་བསྐྱེད། །ཚད་མེད་བཞི་ཡི་ཁང་བཟང་ལམ། །མཆོད་པ་བདུན་ནི་རབ་ཏུ་བྱ། །གཙོ་བོ་མཁའ་ལ་བཞུགས་སུ་གསོལ། །ལྷ་དང་ཆོས་རྣམས་ཐམས་ཅད་ཀུན། །བདག་མེད་པར་ནི་བསམ་པར་བྱ། །དང་པོར་སྔགས་འདི་བརྗོད་པ་ཡིས། །དེ་བཞིན་བདག་མེད་དྲན་པར་བྱ། །ཨོཾ་སྭ་བྷཱ་ཝ་ཤུདྡྷཿ་སརྦ་དྷརྨཱཿ་སྭ་བྷ་ཝ་ཤུདྡྷོ྅ཧཾ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། འདི་ཡིས་ཆོས་རྣམས་ཐམས་ཅད་དང༌། །བདག་ཉིད་སྟོང་པར་རྣམ་པར་བསམ། །སེམས་ཅན་བླ་མེད་བྱ་བའི་ཕྱིར། །སྔོན་གྱི་སྨོན་ལམ་དྲན་པར་བྱ། །སྟོང་ལས་ཡི་གེ་ཡཾ་དུ་གྱུར། །རླུང་གི་དཀྱིལ་འཁོར་རྣམ་པར་བསམ། །དུ་བའི་མདོག་ཅན་རྡོ་རྗེའི་གདན། །དེ་དབུས་ཡི་གེ་ཨ་ལས་ཟླ། །དེ་ཡི་སྟེང་དུ་ཡི་གེ་དྷཱིཿ། །འཇམ་དཔལ་གཞོན་ནུ་ཡི་ནི་གཟུགས། །དེ་ཡིས་སྙིང་གར་རྣམ་བསམ་པ། །ཡི་གེ་ཨཱཿ་ལས་ཉི་དཀྱིལ་འཁོར། །བདག་དང་ཉི་མ་གཅིག་ཏུ་གྱུར། །དེ་ལས་འོད་ཟེར་རྣམ་པར་འཕྲོ། །དེ་རྩེར་འོད་ཟེར་རྣམ་འཕྲོ་བ། །འཇམ་དཔལ་གཟུགས་ནི་བསམ་མི་ཁྱབ། །རྡོ་རྗེ་རལ་གྲི་གཡས་ན་འཛིན། །གཡོན་པ་ན་ནི་སྡིགས་མཛུབ་ཀྱང༌། །བགེགས་དང་བར་ཆོད་ཡང་དག་གསོད། །སླར་


DTG047_Page_0392
[མ་དཔེ་གཟིགས་ན་འདིར་གནོན།]

འདུས་དེ་ཡི་དཀྱིལ་དུ་ཐིམ། །སླར་ཡང་འོད་ཟེར་སྤྲོས་པ་ཡིས། །ཕྱོགས་བཅུ་པོར་ནི་ཡོངས་སུ་གནས། །དེ་བཞིན་གཤེགས་དང་བྱང་ཆུབ་སེམས། །རིག་པ་འཛིན་དང་ལྷ་ཡི་ཚོགས། །ཁྲོ་བོ་ལ་སོགས་དེ་དག་ཀུན། །སླར་འདུས་ཉི་མར་རྣམ་པར་ཐིམ། །དེ་བཞིན་གཤེགས་དང་འཇམ་པའི་དཔལ། །རིག་པ་འཛིན་དང་ལྷ་ཡི་ཚོགས། །ཉི་མར་གཅིག་ཏུ་གྱུར་པར་བསམ། །གདུག་པ་ཆེན་པོའི་འོད་འབར་བས། །དཔག་ཚད་དག་ནི་སྟོང་ཕྲག་བརྒྱར། །ཐམས་ཅད་ཁྱབ་པར་རབ་ཏུ་གནས། །དེ་ཡི་དབུས་སུ་གཞལ་ཡས་བསམ། །ཟུར་བཞི་པ་ལ་སྒོ་བཞི་པ། །རྟ་བབས་བཞི་ཡིས་མཛེས་པ་དང༌། །བ་དན་དྲིལ་བུ་ལ་སོགས་དང༌། །ཕྲེང་བ་ལ་སོགས་རྣམས་ཀྱིས་སྤྲས། །སྒོ་ཁྱུད་ཀྱི་ནི་ཕུག་དག་ཏུ། །རྡོ་རྗེ་རིན་ཆེན་སོགས་ཀྱིས་སྤྲས། །འཁོར་ལོ་ཉིས་བརྩེགས་ཡང་དག་བསམ། །ལྔ་བཅུར་གཅིག་གིས་མ་ཚད་དག ། པདྨ་ཟླ་བ་ཡང་དག་གནས། །དེ་དག་སྟེང་ན་ཉི་དཀྱིལ་འཁོར། །ཐམས་ཅད་མཆོག་ཏུ་བསྲེག་པ་ཡི། །མེ་ལྕེ་འབར་བའི་འོད་ཟེར་ཅན། །དེ་ལ་རིམ་པ་བཞིན་དུ་ཡང༌། །ལྔ་བཅུར་གཅིག་གིས་མ་ཚད་བའི། །ལྷ་རྣམས་དེ་དཀྱིལ་རོ་སྟེང་བསམ། །ཤར་དང་ལྷོ་དང་ནུབ་དང་ནི། །བྱང་དང་དབུས་སུ་གོ་རིམས་བཞིན། །མགོ་དང་ལག་པ་རྒྱུ་མ་རྐང༌། །མེ་སོགས་གྲྭ་བཞི་དག་ཏུ་ཡང༌། །དེ་བཞིན་ཐོད་པ་ཐོད་ཚལ་པ། །དུར་ཁྲོད་ཀྱི་ནི་རས་ཀྱང་གཞག །སྐྱེས་བུ་གསལ་ཤིང་བཙུགས་པ་གཞག །དེ་བཞིན་དུ་ཡང་ཕྱག་རྒྱའི་མིང༌། །ཤར་ལ་སོགས་པའི་སྣམ་བུ་བཞིར། །གྲི་དང་མཚོན་ནི་རྩེ་གཅིག་དང༌། །གཏུན་ཤིང་དང་ནི་ཆུ་གྲི་དང༌། །རྩེ་གཅིག་ལྕགས་ཀྱུ་མ་ཧེ་དང༌། །བ་ལང་ལྷན་ཅིག་ཤར་དུ་བརྒྱད། །སྟ་རེ་མདའ་དང་དབྱུག་ཏོ་དང༌། །ཁ་ཊྭཱཾ་འཁོར་ལོ་དེ་བཞིན་ཞགས། །ཕག་དང་བོང་བུ་ལྷོ་ཕྱོགས་ཀྱི། །སྣམ་བུ་ལ་ནི་རིམ་པ་བཞིན། །རྡོ་རྗེ་ཆུང་དང་ནི་ཕུབ། །གཞུ་དང་དྲིལ་བུ་རླུང་གི་རས། །རྔ་མོ་ཁྱི་ནི་ནུབ་ཕྱོགས་ཀྱི། །སྣམ་བུ་ལ་ནི་དེ་བཞིན་བྲི། །སྡིགས་མཛུབ་དང་ནི་འཕན་རྩེ་གསུམ། །གླང་ཆེན་ལྤགས་དང་ཐོ་བ་དང༌། །མདུང་དང་མེ་ཡི་ཐབ་དང་ནི། །ལུག་དང་སྤྱང་གི་ལྷན་ཅིག་བརྒྱད། །བྱང་དུ་རྟག་ཏུ་བསམ་པར་བྱ། །སྒོ་ཡི་


DTG047_Page_0393
[མ་དཔེ་གཟིགས་ན་འདིར་གནོན།]

ཕྱོགས་སུ་གཞག་པ་ནི། །ཤར་གྱི་སྒོ་རུ་བྱ་རྒོད་གཞག །ལྷོ་ཡི་སྒོ་རུ་འུག་པ་གཞག །ནུབ་ཏུ་བྱ་རོག་སེང་གེ་ཡང༌། །བྱང་དུ་རྣམ་པར་བསམ་པར་བྱ། །མེ་གྲྭ་ཁྱུང་ནི་ལེགས་པར་གཞག །བདེན་བྲལ་དུ་ནི་ཁྲ་གཞག་གོ །རླུང་གི་གནས་སུ་རི་སྐེགས་ཏེ། །དབང་ལྡན་དུ་ནི་དེ་བཞིན་བཞད། །ཐམས་ཅད་དེ་བཞིན་རྣམ་པར་དགོད། །ཟླ་བའི་གཟུགས་སུ་བསམ་པར་བྱ། །དབུས་ཀྱི་ཟླ་བར་ཡི་གེ་དྷཱིཿ། །སྔོན་གྱི་འཇམ་པའི་གཟུགས་འདྲ་བར། །གཏི་མུག་བརྫུན་དང་ཆགས་ཕྲག་དོག །ཤར་སོགས་ལེའུ་ཚེ་བཞི་ལའོ། །མེ་ཡི་གྲྭ་སོགས་རྣམ་བསམ་པ། །སེམས་མ་རྡོ་རྗེ་དེ་བཞིན་དུ། །རིན་ཆེན་རྡོར་མ་བསྒོམ་པར་བྱ། །ཆོས་ཀྱི་རྡོར་མ་དེ་བཞིན་ཏེ། །ལས་ཀྱི་རྡོར་མ་རྣམ་བསམ་བྱ། །རྡོ་རྗེ་རྣོན་པོ་རྡོ་རལ་གྲི། །བྱམས་པ་དང་ནི་འཇམ་དཔལ་གཞག །ཡེ་ཤེས་སྐུ་དང་ངག་དབང་ཕྱུག །ཟླ་བའི་འོད་དང་ཡེ་ཤེས་མཚོ། །ཤར་དུ་བརྒྱད་པོ་དེ་དག་གཞག །ལྷོ་ཕྱོགས་སུ་ནི་གཞག་བྱ་བ། །རྡོ་རྗེ་སྣ་ཚོགས་རྡོར་གནོན་སྦྱིན། །རྡོ་རྗེ་ཁུ་ཚུར་རྡོ་རྗེ་ཆོས། །རྡོ་རྗེ་སྲུང་བ་རྣོན་རྡོ་རྗེ། །རྡོ་རྗེ་རྒྱུ་དང་དྲ་བའི་འོད། །ནུབ་ཕྱོགས་དེ་བཞིན་བརྒྱད་གཞག་པ། །རྡོ་རྗེ་སྨྲ་བ་རྡོ་རྗེ་སེམས། །རྡོ་རྗེ་རྒྱལ་པོ་རྡོ་རྗེ་ཆགས། །རྡོ་རྗེ་ལེགས་དང་རྡོར་རིན་ཆེན། །ཉི་མའི་འོད་དང་རྡོར་ཉི་མ། །བྱང་དུ་ཡང་ནི་བརྗོད་བྱ་བ། །རྡོ་རྗེ་དཔལ་དང་རྡོ་རྗེ་བཞད། །སྤོས་ཀྱི་གླང་པོ་ཡེ་ཤེས་རྟོག །ཐམས་ཅད་ཐབས་ཀྱིས་འགྲོ་མིང་དང༌། །རྒྱ་མཚོའི་བློ་གྲོས་ལེགས་པར་གཞག །བློ་གྲོས་མི་ཟད་བསྒོམ་པར་བྱ། །བདུད་རྩི་འོད་དང་བརྒྱད་གཞག་གོ །ཤར་ལ་སོགས་པའི་སྒོ་བཞི་རུ། །རྡོ་རྗེ་ལྕགས་ཀྱུ་རྡོ་རྗེ་ཞགས། །རྡོ་རྗེ་ལྕགས་སྒྲོག་རྡོ་རྗེ་དྲིལ། །རིམ་པ་བཞིན་དུ་བསྒོམ་པར་བྱ། །མེ་ལ་སོགས་པའི་གྲྭ་རུ་ཡང༌། །རྡོ་རྗེ་གནོད་མཛེས་གཙུག་ཏོར་དང༌། །རྡོ་རྗེ་ཧཱུཾ་མཛད་དེ་བཞིན་དུ། །རྡོ་རྗེ་གཞན་གྱིས་མི་ཐུབ་པའོ། །ཤར་གྱི་ཕྱོགས་པ་ཐམས་ཅད་གནག །དེ་བཞིན་ལྷོ་བ་ཐམས་ཅད་སེར། །མུན་པ་ཐམས་ཅད་དམར་པོ་ཡིན། །བྱང་ནི་ཐམས་ཅད་ལྗང་གུ་ཡིན། །འདི་དག་ས་བོན་ཡི་གེ་ནི། །ཨོཾ་ཨཱཾ་ཛྲཱིཾ་ཁཾ། སཾ་རཾ་དྷཾ་ཀཾ །བཾ་ཁཾ་མེཾ་མཾ། ཛྙཱཾ་བཾ་ཙཾ་ཛྙཱཾ། བིཾ་ཡཾ་མཱུཾ་དྷཾ། རཾ་ཏཾ་ཧཾ་ཛཱཾ། བྷཾ་བཾ་རཱཾ་རཾ། སཱཾ་


DTG047_Page_0394
[མ་དཔེ་གཟིགས་ན་འདིར་གནོན།]

རཾ་སཱུཾ་བཾ། ཀཾ་ཧཾ་གཾ་ཛྙཱཾ། སཾ་སཱཾ་ཨཾ་ཨཾ་ཨཾ་པྲཾ་སྤོཾ་གྷཾ། སུཾ་ཨུཾ་ཧཱུཾ་ཨ་ཞེས་པའོ། །དེ་ནས་ཡི་གེ་ཨ་སོགས་ནི། །ཡི་གེ་ཧ་ཡི་མཐར་ཐུག་པ། །འདི་དག་ཐམས་ཅད་ཡོངས་གྱུར་ལས། །གོང་གི་ལྷ་རུ་རྣམ་བསམ་བྱ། །ཡང་ནི་དེ་བཞིན་ཀུན་ལ་ཡང༌། །ཡི་གེ་ཨ་ལས་ཉི་དཀྱིལ་འཁོར། །དེ་བཞིན་ཉི་མའི་དཀྱིལ་འཁོར་ལས། །འོད་ཟེར་དག་ནི་རྣམ་འཕྲོས་པས། །ཕྱོགས་བཅུ་ཀུན་དུ་བཞུགས་པ་ཡི། །དེ་བཞིན་གཤེགས་དག་ཡང་དག་བསྐུལ། །ཐམས་ཅད་དགྱེས་བྱས་སླར་ཡང་ནི། །བསྡུས་ནས་ཉི་མ་དག་ལ་ཐིམ། །དེ་ལ་ཞུགས་པ་བརྟན་པར་བསྒོམ། །རྣམ་པར་རྟོག་པ་ཐམས་ཅད་བསལ། །དེ་ཡིས་རང་བཞིན་དག་པའི་མིང༌། །འོད་གསལ་བ་ཡི་ཏིང་ངེ་འཛིན། །དེ་ལ་ཡང་ནི་འཇམ་དཔལ་སོགས། །དེ་བཞིན་གཤེགས་པ་ལ་སོགས་ཀུན། །གཙོ་ལ་བསྐོར་ནས་ལྷན་ཅིག་ཏུ། །དེ་བཞིན་དུ་ནི་ཐིམ་ནས་ཀྱང༌། །ཉི་མའི་དཀྱིལ་འཁོར་དུ་བསམ་བྱ། །འོད་ཟེར་འབར་བའི་གཟུགས་ཅན་ནོ། །དེ་ཡི་དཀྱིལ་དུ་གཙོ་སོགས་ཀྱི། །ས་བོན་ཡི་གེ་རྣམ་བསམ་བྱ། །ཡི་གེ་ཧཱུཾ་ནི་གཙོ་བོ་སྦྱིན། །སྙིང་པོ་ཐམས་ཅད་ཉི་མ་ལ། །ཨོཾ་ཧྲཱིཿ་ཥྚྲྀཿ་ཝི་ཀྲྀ་ཏཱ་ན་ན། གཏི་མུག་སོགས་ཀྱི་དཀྱིལ་འཁོར་ལོ། །ཡཀྵེ་ཡཙྪ་ནི་རཱ་མ་ཡ། ཤར་དུ་ཡང་དག་བསམ་པར་བྱ། །ཡ་མ་རཱ་ཛ་ས་དོ་མེ་ཡ། །དེ་བཞིན་ལྷོ་ཡི་ཕྱོགས་སུ་གནས། །ཡ་མེ་དོ་རུ་ཎ་ཡོ་ད་ཡ། ནུབ་ཕྱོགས་སྣམ་བུ་ལ་ནི་སྦྱིན། །ཡ་ད་ཡོ་ནི་ར་ཡ་ཀྵེ་ཡ། བྱང་དུ་ལྷ་དེ་གཞག་པར་བྱ། །ཡང་མཱནྟ་ཀ་སྒོ་བཞི་རུ། །ཤར་ལ་སོགས་པ་རྣམ་བསམ་བྱ། །ཨོཾ་ཨོཾ་ཨོཾ་ཨོཾ་མེ་ལ་སོགས་པའི་གྲྭ་བཞི་རུ། །ཐམས་ཅད་འོད་ཟེར་ལྔ་རང་བཞིན། །དབུས་སོགས་ཤར་ཕྱོགས་དཀྲ་པོ་ཡིན། སེར་པོ་དམར་ལྗང་གུའི་མདོག །ལྷོ་དང་ནུབ་དང་བྱང་ཡིན་ནོ། །དེ་བཞིན་ཐམས་ཅད་འོད་ཟེར་ནི། །རྣམ་པར་འཕྲོ་བར་བསམ་པར་བྱ། །སྔོན་བརྗོད་དེ་བཞིན་གཤེགས་ལ་སོགས། །སླར་ཡང་བསྡུས་ནས་གཞུག་པར་བྱ། །དབུས་ཀྱི་ཡི་གེ་ལས་ཁྲོ་བོའོ། །རྡོ་རྗེ་ཆེན་པོ་ཁ་དོག་གནག །འོད་ཟེར་འགྱེད་པར་རྣམ་བསམ་བྱ། །དེ་བཞིན་རྡོ་རྗེ་ཕྲ་མོའི་གཟུགས། །སངས་རྒྱས་བྱང་ཆུབ་སེམས་ཁྲོ་བོ། །རིག་པའི་ལྷ་མོ་ནམ་མཁའི་སྟེང༌། །ཏིལ་གྱི་གང་བུ་བཞིན་གང་བར། །


DTG047_Page_0395
[མ་དཔེ་གཟིགས་ན་འདིར་གནོན།]

གནས་པར་བསམ་པར་བྱ་བ་ཡིན། །དེ་བཞིན་སངས་རྒྱས་ལ་སོགས་པས། །སེམས་ཅན་ཡོངས་སུ་སྨིན་པར་ཡང༌། །བཏུལ་ནས་བྱང་ཆུབ་ལ་གཞག་སྟེ། །ཡང་བསྡུས་འོངས་ཏེ་རྡོ་རྗེ་ལ། །ཐིམ་པར་རྣམ་པར་བསམ་པར་བྱའོ། །འཁོར་གནས་པ་བྱས་པ་ནི། །སྔོན་དུ་བརྗོད་པའི་མགོ་སོགས་བརྒྱ། །འོད་ལྟར་ཁ་དོག་ཁྱད་པར་སྦྱར། །འོད་ཟེར་རང་བཞིན་རྣམ་བསམ་བྱ། །སོ་སོ་རིགས་ཀྱི་ལྷ་བཞིན་དུ། །ནམ་མཁའི་སྟེང་དུ་གནས་པ་ནི། །ཏིལ་གྱི་གང་བུ་བཞིན་ཉི་མའི། །གདན་ལ་མངོན་པར་གནས་པར་བསྒོམ། །དེ་ཡིས་འགྲོ་དོན་བྱས་ན་ཡང༌། །འོངས་ནས་རང་ལ་གཞུག་པར་བྱ། །སླར་ཡང་ཉི་མའི་དཀྱིལ་འཁོར་ལ། །ཐམས་ཅད་འོག་ཏུ་རང་གནས་སུ། །རང་མཚན་ལྷན་ཅིག་ཡོངས་སུ་གྱུར། །གཙོ་བོ་ལ་ནི་བསྐོར་ནས་གནས། །མྱུར་བ་ཉིད་དུ་སྐུ་རུ་རྫོགས། །ཧྲཱིཿ་ཥྚྲིཿ་བརྗོད་པའི་རང་བཞིན་ཅན། །གཙོ་བོ་བསྟན་པ་དེ་བཞིན་འདིར། །སྒྲུབ་པ་པོས་ནི་དེ་བཞིན་བསྒོམ། །དེ་ནི་རྡོ་རྗེ་ཡི་ནི་གཟུགས། །ཞལ་དགུ་པ་ནི་རྟག་ཏུ་དྲག །མ་ཧེ་ཡི་ནི་གཟུགས་ཅན་ཏེ། །འཇིག་པའི་མེ་དང་མཉམ་པའི་འོད། །ཐམས་ཅད་དྲག་པོའི་བདག་ཉིད་གཟུགས། །དཔལ་ཆེན་རྡོ་རྗེ་འཇིགས་བྱེད་དོ། །ཁམས་གསུམ་པོ་ནི་ཟ་བར་ནུས། །རྣམ་པར་གཙིགས་པའི་ཞལ་བགྲད་པ། །ལྗགས་འདྲིལ་བ་ནི་གཟི་བརྗིད་ཆེ། །རྡོ་རྗེ་མེ་དང་མཉམ་པར་འཕྲོ། །རྣམ་པར་གཙིགས་པ་དྲག་པོར་གཙིགས། །ཁྲོ་གཉེར་ཞལ་བགྲད་སྨིན་བགྲེང་སྤྱན། །འཇིག་པ་ཆེན་པོའི་དུས་དང་མཉམ། །འབྲུག་གི་སྒྲ་དང་རྟག་ཏུ་མཚུངས། །མི་ཡི་ཁྲག་དང་རྐང་དང་ཞག །ཚིལ་བུ་ཀླད་པ་ཟ་རང་བཞིན། །འཇིག་རྟེན་འཇིག་རྟེན་འདས་སོགས་པའི། །ལྷ་ལ་བསྡིགས་པར་བྱེད་པའི་གཙོ། །བརྒྱ་བྱིན་ཚངས་དབང་བིཥྞུ་དང༌། །གཞོན་ནུ་བི་ནཱ་ཡ་ཀ་སོགས། །ཐམས་ཅད་ཡང་ནི་གསོལ་བར་བྱེད། །ཐོད་པ་ཡིས་ནི་ཐོད་དུ་བྱས། །ལྷ་ལ་འཇིགས་པ་ཆེན་པོར་བྱེད། །ཕེཾ་གྱི་སྒྲ་ནི་སྒྲོགས་པ་ཡིན། །ཤིན་ཏུ་ཁྲོས་པ་ཡི་ནི་གཟུགས། །ཐོད་པའི་འཕྱང་འཕྲུལ་དག་གིས་བརྒྱན། །ཁམ་པ་ཤིན་ཏུ་ཡང་དག་བརྫེས། །གཅེར་བུ་ཞབས་ནི་བཅུ་དྲུག་སྟེ། །གཡོན་པའི་ཞབས་ཀུན་བརྐྱང་བ་ཡིན། །འདར་ཞིང་


DTG047_Page_0396
[མ་དཔེ་གཟིགས་ན་འདིར་གནོན།]

གཡོ་བར་ཡང་དག་སྦྱོར། །འཇིགས་པ་ཆེན་པོ་ཡི་ནི་སྐུ། །ཐམས་ཅད་འབར་བ་གྱེན་དུ་བརྫེས། །ཕྱག་ནི་སུམ་ཅུ་རྩ་བཞི་སྟེ། །གཉིས་ཀྱིས་གླང་པོའི་པགས་རློན་འཛིན། །གཡས་ཀྱི་དང་པོ་གྲི་གུག་འཆང༌། །གཉིས་པ་རྡོ་རྗེ་རྩེ་གཅིག་པ། །གསུམ་པ་གཏུན་ཤིང་དེ་བཞིན་ནོ། །བཞི་པ་ལྔ་པ་དྲུག་པ་ནི། །ཆུ་གྲི་རྩེ་གཅིག་སྟ་རེའོ། །བདུན་པ་མདུད་རྩེ་བརྒྱད་པ་ན། །མདའ་སྟེ་དགུ་པ་ལྕགས་ཀྱུའོ། །དེ་བཞིན་བཅུ་པ་དབྱུག་ཏོའོ། །བཅུ་གཅིག་པ་ན་ཁ་ཊྲཱཾ་ག །དེ་བཞིན་བཅུ་གཉིས་འཁོར་ལོའོ། །བཅུ་གསུམ་པ་ནི་རྡོ་རྗེ་སྟེ། །བཅུ་བཞི་པ་ན་ཐོ་བའོ། །བཅོ་ལྔ་པ་ན་རལ་གྲི་སྟེ། །བཅུ་དྲུག་པ་ན་རྡེའུ་ཆུང་ངོ༌། །གཡོན་པའི་དང་པོ་ཐོད་པ་སྟེ། །གཉིས་པ་ན་ནི་མགོ་བོའོ། །གསུམ་པ་ཕུབ་སྟེ་བཞི་པ་རྐང༌། །ལྔ་པ་དེ་བཞིན་ཞགས་པའོ། །དྲུག་པ་གཞུ་སྟེ་བདུན་རྒྱུ་མ། །བརྒྱད་པ་དྲིལ་བུ་དགུ་ནི་ལག །བཅུ་པ་ན་ནི་དུར་ཁྲོད་རས། །བཅུ་གཅིག་སྐྱེས་བུ་གསལ་ཤིང་བཙུགས། །བཅུ་གཉིས་པ་ན་མེ་ཐབ་བོ། །བཅུ་གསུམ་པ་ན་ཐོད་ཚལ་ཏེ། །བཅུ་བཞི་པ་ན་སྡིགས་མཛུབ་བོ། །བཅོ་ལྔ་པ་ན་འཕན་རྩེ་གསུམ། །བཅུ་དྲུག་པ་ན་རླུང་གི་རས། །རིམ་བཞིན་བསྒོམ་སྟེ་གཞན་ཡང་ནི། །གཡས་ཀྱི་རྐང་པ་དང་པོས་ནི། །གཉིས་པ་ཡི་ནི་མ་ཧེའོ། །གསུམ་པ་ཡིས་ནི་བ་ལང་སྟེ། །བཞི་པས་དེ་བཞིན་བོང་བུའོ། །ལྔ་བས་རྔ་མོ་དྲུག་པས་ཁྱི། །བདུན་པས་ལུག་སྟེ་བརྒྱད་སྤྱང་ཀི །གཡས་ཀྱི་རྐང་པས་དེ་དག་ཞོན། །གཡོན་གྱི་རྐང་པ་དང་པོ་ཡིས། །བྱ་རྒོད་གཉིས་པས་འུག་པའོ། །གསུམ་པས་བྱ་རོག་བཞི་པས་སེང༌། །ལྔ་ཁྱུང་སྟེ་དྲུག་པས་ཁྲ། །དེ་བཞིན་བདུན་པས་རི་སྐེགས་ཏེ། །བརྒྱད་པ་ཡིས་ནི་བཞད་ཡིན་ནོ། །རིམ་པ་བཞིན་དུ་ཞོན་པའོ། །དཔལ་ཆེན་རྡོ་རྗེ་འཇིགས་བྱེད་ཞལ། །དང་པོ་མ་ཧེའི་གདོང་པ་སྟེ། །ནག་པོ་ཁྲོ་བ་གཡས་པ་ཡི། །རྭ་རྩ་ན་ནི་ཞལ་གསུམ་སྟེ། །གཡས་ཀྱི་དང་པོའི་ཞལ་ནི་སྔོ། །དེ་ཡི་གཡས་དམར་སེར་པོ་དང༌། །གཡོན་པའི་རྭ་རྩའི་ཞལ་གསུམ་ནི། །དཀར་དང་དུད་ཀ་ནག་པོའོ། །ཐམས་ཅད་ཤིན་ཏུ་ཁྲོས་པ་སྟེ། །ཞལ་གཙིགས་པར་ནི་རྣམ་པར་བསམ། །རྭ་གཉིས་ཀྱི་ནི་དབུས་མའི་ཞལ། །བརྒྱད་པ་ཡིན་ཏེ་དམར་པོའོ། །ཞལ་


DTG047_Page_0397
[མ་དཔེ་གཟིགས་ན་འདིར་གནོན།]

། །ནས་ཁྲག་རྣམས་འཛག་པ་ནི། །ཤིན་ཏུ་དེ་བཞིན་བསྒོམ་པར་བྱ། །དེ་ཡི་སྟེང་དུ་ཀུན་བཟང་གི །ཞལ་ནི་ཅུང་ཟད་སེར་བའོ། །ཅུང་ཟད་ཙམ་ནི་ཁྲོ་བའི་གཟུགས། །གཞོན་ནུའི་རྒྱན་གྱིས་བརྒྱན་པའོ། །གཙུག་ཕུད་ལྔ་ཡི་རྩེ་མོ་ཅན། །དགུ་པ་ཡིན་ཏེ་དུས་ཀུན་དུའོ། །ཞལ་རྣམས་ཐམས་ཅད་སྤྱན་གསུམ་པར། །བདག་ཉིད་དེ་བཞིན་བསྒོམ་པར་བྱ། །འཁོར་གྱི་ཚུལ་རྣམས་ཐམས་ཅད་ཀྱི། །མིང་དང་གཟུགས་ལ་སོགས་པ་བརྗོད། །ཤར་གྱི་མིང་ནི་རྡོ་རྗེ་མགོ །ལྷོ་ཡི་རྡོ་རྗེ་ལག་པའོ། །ནུབ་ཀྱི་རྡོ་རྗེ་རྒྱུ་མ་སྟེ། །བྱང་ནི་རྡོ་རྗེ་རྐང་པའོ། །མེ་གྲྭའི་རྡོ་རྗེ་ཐོད་པ་མོ། །བདེན་བྲལ་རྡོ་རྗེ་ཐོད་ཚལ་མ། །རླུང་དུ་དུར་ཁྲོད་རས་མའོ། །དབང་ལྡན་མདུང་རྩེར་བསྐྱོན་པའོ། །ཕྱི་རིམ་ཤར་ཕྱོགས་སྣམ་བུ་ལ། །དེ་བཞིན་རིམ་པར་བསྒོམ་བྱ་བ། །རྡོ་རྗེ་གྲི་དང་རྡོ་རྩེ་གཅིག །དེ་བཞིན་རྡོ་རྗེ་གཏུན་ཤིང་དང༌། །རྡོ་རྗེ་ཆུ་གྲི་མཚོན་རྩེ་གཅིག །རྡོ་རྗེ་ལྕགས་ཀྱུ་དེ་བཞིན་གཞན། །རྡོ་རྗེ་མ་ཧེ་རྡོ་རྗེ་བ། ཤར་ན་གནས་པ་བརྒྱད་ཀྱིའོ། །སྣམ་བུ་དང་པོར་ཤེས་པར་བྱ། །ལྷོ་ཡི་རྡོ་རྗེ་སྟ་རེ་དང༌། །རྡོ་རྗེ་མདའ་དང་རྡོ་རྗེ་དབྱུག །རྡོ་རྗེ་ཁ་ཊྭཱཾ་དེ་བཞིན་ཏེ། །རྡོ་རྗེ་འཁོར་ལོ་རྡོ་རྗེ་ཞགས། །དེ་བཞིན་རྡོ་རྗེ་ཕག་པ་ཡང༌། །རྡོ་རྗེ་བོང་བུ་བརྒྱད་པའོ། །ནུབ་ཏུ་རྡོ་རྗེ་རྡོ་རྡེའུ། །རྡོ་རྗེ་ཕུབ་དང་རྡོ་རྗེ་གཞུ། །རྡོ་རྗེ་དྲིལ་བུ་དེ་ནས་ཡང༌། །རྡོ་རྗེ་རླུང་གི་རས་ཡིན་ནོ། །དེ་བཞིན་རྡོ་རྗེ་རྔ་མོར་ཤེས། །རྡོ་རྗེ་ཁྱི་ནི་བརྒྱད་པའོ། །བྱང་གི་རྡོ་རྗེ་སྡིགས་མཛུབ་དང༌། །རྡོ་རྗེ་འཕན་རྩེ་གསུམ་པ་དང༌། །རྡོ་རྗེ་གླང་པགས་རྡོ་ཐོ་བ། །རྡོ་རྗེ་མདུང་དང་རྡོར་མེ་ཐབ། །རྡོ་རྗེ་ལུག་ནི་དེ་བཞིན་ཏེ། །རྡོ་རྗེ་སྤྱང་གི་བརྒྱད་པའོ། །གནས་བཞི་རུ་ནི་བསྒོམ་པར་བྱ། །ཤར་སྒོ་སྐྱོང་བ་བྱ་རྒོད་དོ། །ལྷོ་ཡི་སྐྱོང་བ་འུག་པ་སྟེ། །ནུབ་ཀྱི་སྐྱོང་བར་བྱ་རོག་གོ །བྱང་གི་སྐྱོང་བ་སེང་ཡིན་ནོ། །མེ་གྲྭར་ཁྱུང་ནི་ལེགས་པར་གཞག །བདེན་བྲལ་གྱི་ནི་ཁྲ་ཡིན་ནོ། །དེ་བཞིན་རླུང་གི་རི་སྐེགས་བསྲུང༌། །དབང་ལྡན་བསྲུང་བ་བཞད་ཡིན་ནོ། །མིང་གི་ཐོག་མ་ཀུན་རྡོ་རྗེ། །དང་པོ་གཟུགས་མདོག་ནག་པོར་བརྗོད། །དེ་རྣམས་ཁ་དོག་གཅིག་ཡིན་ཏེ། །ཕྱག་གཉིས་པ་ལ་ཞལ་གཅིག་པའོ། །རང་གི་མིང་བཞིན་ཕྱག་མཚན་འཛིན། །གཡས་བསྐུམ་ཞབས་ཀྱིས་བརྟན་པར་བཞུགས། །


DTG047_Page_0398
[མ་དཔེ་གཟིགས་ན་འདིར་གནོན།]

ཐམས་ཅད་རོ་ཡི་གདན་ལ་བཞུགས། །སྤྱན་གསུམ་པ་ནི་ཆེར་དྲག་པ། །དབུ་སྐྲ་ཁམ་པ་འབར་བའོ། །ཐམས་ཅད་ཐོད་པས་བརྒྱན་པ་སྟེ། །བཅོམ་ལྡན་འདས་ཀྱི་ཞལ་དུ་བལྟ། །ཆེར་འཁྲུགས་པ་ནི་བཞད་པའི་ཞལ། །ཞལ་ནས་ཕེཾ་གྱི་སྒྲ་སྒྲོགས་འཕྲོ། །བཅོམ་ལྡན་དེ་བཞིན་ཐམས་ཅད་ཀྱང༌། །དེ་བཞིན་གཅེར་བུ་མཚན་གྱེན་འགྲེང༌། །ལྷ་རྣམས་ཐམས་ཅད་ལ་མཚུངས་པར། །རང་གི་ས་བོན་སྙིང་གར་དགོད། །དེ་ལས་སྤྲུལ་བའི་འོད་འཕྲོ་བས། །ཡེ་ཤེས་འཁོར་ལོ་སྤྱན་དྲང་ངོ༌། །ཛཿ་ཧཱུཾ་བཾ་ཧོཿའི་ཡི་གེས་དགུག །གཞུག་དང་བཅིང་དང་མཉེས་པར་བྱ། །སྔགས་པ་ཡང་ནི་གཅིག་པུ་ནི། །དབང་བསྐུར་བ་ཡང་བསྒོམ་པར་བྱ། །མཆོད་པ་སྣ་ཚོགས་མཆོད་པར་བྱ། །བདག་གིས་ཐམས་ཅད་བསྟོད་པར་བྱ། །མི་ཡི་ཤ་ལ་སོགས་པ་དང༌། །ཁྲག་གིས་ཀྱང་ནི་མཆོད་པར་བྱ། །འདི་ཡི་དཀྱིལ་འཁོར་རྫོགས་པ་ནི། །སྙིང་རྗེས་འཁྲུགས་པའི་ཏིང་འཛིན་གྱིས། །དྲག་པོའི་ལས་ཀྱི་དོན་དུ་ནི། །སྔགས་བཟླས་དེ་བཞིན་དྲན་པར་བྱ། །བརྙས་པའི་སེམས་ཅན་གདུལ་བར་བྱ། །ཐམས་ཅད་རྗེས་སུ་མཐུན་པར་བྱ། །ཨོཾ་ཧྲཱིཿ་ཥྚྲྀཿ་ཝི་ཀྲྀ་ཏཱ་ན་ན་ཧཱུཾ་ཕཊ། ཅེས་པ་ཉེ་བའི་སྙིང་པོའི་སྔགས། །ཨོཾ་ཡ་མཱནྟ་ཀ་ཧཱུཾ་ཕཊ། ཅེས་པ་ཡང་ནི་སྙིང་པོའི་སྔགས། །ཨོཾ་ཡ་མ་རཱ་ཛ་ས་དོ་མེ་ཡ། ཡ་མེ་དོ་རུ་ཎ་ཡོ་ད་ཡ། །ཡ་ད་ཡོ་ནི་ར་ཡ་ཀྵེ་ཡ། ཡཀྵེ་ཡཙྪ་ནི་རཱ་མ་ཡ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཞེས་པ་དག་ནི་རྩ་སྔགས་སོ། །འདི་རྣམས་དེ་ནི་གང་འདོན་པར། །སྔགས་བཟླས་པར་ནི་དེ་བཞིན་བྱ། །ཡི་གེ་འབར་བར་བསྒོམས་པ་ཡིས། །དངོས་གྲུབ་དག་ནི་མྱུར་བ་ཡིན། །ཐམས་ཅད་ལ་ནི་དབང་བསྒྱུར་བར། །སྙིང་གར་ཉི་མ་རྣམ་བསམ་བྱ། །ཐམས་ཅད་ཀྱིས་ནི་འཁོར་བར་ཡང༌། །མ་ཧེའི་གདོང་གི་སྙིང་གར་དགོད། །སྙིང་པོའི་སྔགས་སོགས་དང་པོར་ནི། །སྔགས་གསུམ་བཟླས་པ་ཡང་དག་སྦྱར། །དེ་བཞིན་སྔགས་ནི་སོ་སོར་བཟླས། །སྒྲུབ་པ་པོས་ནི་གང་འདོད་བྱ། །སྙིང་པོ་ལ་སོགས་བརྟན་གནས་པ། །ལྷ་རྣམས་ལ་ཡང་དེ་བཞིན་དགོད། །ཤ་རྣམས་ཐམས་ཅད་ཟ་བ་ན། །དང་པོར་མ་ཧེའི་གདོང་ལ་དབུལ། །གཏོར་མ་འབྱུང་པོ་ཐམས་ཅད་ལ། །སྔགས་བཟླས་པས་ནི་སྦྱིན་པར་བྱ། །


DTG047_Page_0399
[མ་དཔེ་གཟིགས་ན་འདིར་གནོན།]

ཨོཾ་བྷཱུ་ཙ་ར་ཎཾ། ཡ་པཱ་ཏཱ་ལ་ཙ་རཱ་ཡ། མཾ་ཁེ་ཙ་རཱ་ཡ། ཏ་པཱུ་རྦ་ནི་གཱ་ནཾ། ཀ་དཀྵི་ཎ་དཱི་གཱ་ཡཱ། ཧཱུཾ་པ་ཤྩི་མཱཾ་མཱཾ། ཕཊ་ཨུཏྟ་ར་དྷཱི་གཱ་ཡ། ཨོཾ་ཧྲཱིཿ་ཡཥྚྲིཿ་པཱ་ཝི་ཀྵི་ཀྲྀ་ཀོ། །ཏཱ་ན་ན་དེ། ཧཱུཾ་བྷྱོ་ཕཊ་སརྦ་བྷཱུ་ཏེ་བྷྱཿ་རྩ་བའི་སྔགས་ཀྱིས་བྱིན་བརླབ་བྱ། །བརྟན་པ་རུ་ནི་བསྒོམ་པ་ཡིས། །འདི་ཡིས་ཐམས་ཅད་རྫོགས་པར་བྱ། །ཏིང་ངེ་འཛིན་ནི་བསྒྲུབ་པའི་མིང༌། །སྒྲིབ་པ་ཐམས་ཅད་སེལ་བའོ། །དུས་གསུམ་དུ་ནི་དེ་ལྟར་བསྒྲུབ། །རྒྱུན་དུ་བརྟན་པར་བསྒྲུབ་པར་བྱ། །ཐམས་ཅད་ལས་ནི་གང་བྱེད་པ། །བདག་ཉིད་མ་ཧེའི་ཞལ་གྱིས་སོ། །ཏིང་འཛིན་གསུམ་ནི་སེམས་ཀྱིས་བྱ། །འཁྲུགས་པའི་འབར་བའི་སེམས་ཀྱིས་སྦྱོར། །སེམས་ཅན་མཐུན་དང་མི་མཐུན་དག །ཡིད་ཀྱིས་བྱ་བ་རབ་ཏུ་བྱ། །བདག་གིས་བྱང་ཆུབ་ཏུ་རབ་གདུལ། །སེམས་ཅན་མཉམ་པར་ཡང་དག་བྱུང༌། །དམ་པའི་དོན་དུ་རྣམ་དག་པ། །དུས་ནི་དཔའ་བོ་ཆེན་པོའི་གཟུགས། །ཞལ་བརྒྱད་ཐུན་ཚོད་བརྒྱད་ཡིན་ནོ། །ཞལ་དགུ་ཐུན་ཚོད་སྤྱི་ཡིན་ནོ། །ཕྱག་དང་ཞབས་གཉིས་ཟླ་བ་དང༌། །ཟླ་བ་ཕྱེད་དང་ཡང་དག་སྦྱོར། །བཞོན་པ་བཅུ་དྲུག་དུས་དང་ནི། །ཟླ་བ་ཡི་ནི་ཞག་ཏུ་ཤེས། །ཞལ་ནི་གཟའ་དགུ་དག་ཏུ་ཤེས། །ཕྱག་ནི་རྒྱུ་སྐར་དག་དང་སྦྱར། །ཞབས་ནི་འཕོ་བ་བཅུ་གཉིས་དང༌། །དུས་བཞི་ཡང་ནི་དེ་བཞིན་ནོ། །མཚོན་ཆ་རྣམས་ནི་སྟོང་པ་དང༌། །སྙིང་རྗེ་དག་ནི་བཅུ་དྲུག་གཉིས། །གླང་ཆེན་པགས་པ་བགེགས་ཆེན་ཏེ། །དྲག་པོའི་གཟུགས་ནི་སྡུག་བསྔལ་ཆེ། །སེལ་བར་བྱེད་པའི་གཙོ་བོའོ། །ཁ་དོག་ནག་པོ་བྱམས་པ་ཆེ། །ཐོད་པའི་རྒྱན་ནི་མི་འགྱུར་བའོ། །དཀྱིལ་འཁོར་ལྷ་ནི་ཐམས་ཅད་དག །རང་བཞིན་འབྱུང་བའི་དུས་དག་གོ །སྔགས་གསུམ་དག་པ་སྐུ་གསུམ་མོ། །ལྷ་རྣམས་ཉིད་ནི་རང་མིང་ནི། །དང་པོར་ཨོཾ་དང་ཧཱུཾ་ཕཊ་མཐའ། །ཐོད་པར་བཏུང་བའི་དུས་དག་གོ །དཀྱིལ་འཁོར་བྱང་ཆུབ་ཕྱོགས་ཡིན་ནོ། །ཞོན་པས་རི་སནྟི་ཀ །མདོག་སོགས་དེ་བཞིན་གཤེགས་པ་སྟེ། །དག་པ་ཐམས་ཅད་ཤེས་པའོ། །འདི་ནི་དག་པ་ཅུང་ཟད་ཙམ། །འཇམ་དཔལ་རྒྱུད་ན་རྒྱས་པ་ཡིན། །བདག་གིས་སྒྲུབ་ཐབས་འདི་བྱས་པས། །བསོད་ནམས་དེ་ནི་གང་རྙེད་པ། །དེ་ཡིས་འཇིག་རྟེན་བསོད་ནམས་ཤོག །བདག་གི་སྡུག་བསྔལ་བྲལ་གྱུར་


DTG047_Page_0400
[མ་དཔེ་གཟིགས་ན་འདིར་གནོན།]

ཅིག །དཔལ་གྱི་སྒྲུབ་ཐབས་འདི་བསྡུས་པ། །རྡོ་རྗེ་འཇིགས་བྱེད་རྟོག་པ་ནི། །སུམ་བརྒྱ་པ་སྟེ་འཇམ་དཔལ་གྱི། །རྒྱུད་ལས་ཅུང་ཟད་ཙམ་ཞིག་ཕྱུང༌། །མ་ཚང་ལྷག་པ་གང་ཡིན་པ། །བདག་ལ་ལེགས་པར་བཟོད་པར་མཛོད། །སྔོན་དུ་བདག་གིས་གང་ལས་མཐོང༌། །དེ་ནི་མཉེས་པར་བྱ་བ་ཙམ། །དཔལ་རྡོ་རྗེ་འཇིགས་བྱེད་ཀྱི་སྒྲུབ་པའི་ཐབས་སློབ་དཔོན་ལ་ལི་ཏ་བཛྲའི་ཞབས་ཀྱིས་མཛད་པ་རྫོགས་སོ།། །།རྒྱ་གར་གྱི་མཁན་པོ་པྲཛྙཱ་ཤྲཱི་དེ་བ་དང༌། བོད་ཀྱི་ལོ་ཙཱ་བ་ཅོག་གྲུ་བནྡེ་ཤེས་རབ་བླ་མས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། །།

དཔལ་རྡོ་རྗེ་འཇིགས་བྱེད་ཀྱི་སྒྲུབ་ཐབས།
ལ་ལི་ཏ།


DTG047_Page_0400
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། ཤྲཱི་བཛྲ་བྷཻ་ར་ཝ་སཱ་དྷ་ན། བོད་སྐད་དུ། དཔལ་རྡོ་རྗེ་འཇིགས་བྱེད་ཀྱི་སྒྲུབ་ཐབས། །དཔལ་གཤིན་རྗེ་གཤེད་ལ་ཕྱག་འཚལ་ལོ། །རྣམ་རྟོག་དྲ་བ་རབ་བསལ་ཞིང༌། །ཡེ་ཤེས་རྒྱ་མཚོ་བློ་མངའ་བའི། །འཇམ་པའི་དབྱངས་ལ་རབ་བཏུད་དེ། །རྡོ་རྗེ་འཇིགས་བྱེད་སྒྲུབ་ཐབས་བཤད། །དང་པོར་རེ་ཞིག་སྔགས་པ་ཡིས། །དུར་ཁྲོད་དང་ནི་ཆུ་ཡི་འགྲམ། །ཤིང་གཅིག་དང་ནི་མཚན་མ་གཅིག །ལམ་གྱི་བཞི་མདོ་རི་བོའི་རྩེ། །ཁང་སྟོང་དང་ནི་མ་མོའི་གནས། །ལྷ་རྣམས་ཡང་དག་རྩོད་པའི་ས། །གྲོང་ཁྱེར་གྲོང་གི་མཐའ་རྣམས་དང༌།། རང་ཉིད་རྗེས་དགའི་གནས་འདུག་ནས། །འཇམ་དབྱངས་ཁྲོ་བོ་བསྒྲུབ་པར་བྱ། །རང་གི་སྙིང་གར་པདྨ་ལ། །ཉི་མ་ལ་གནས་ཡི་གེ་མཆོག །ཐུགས་ཀྱི་བདག་ཉིད་རྣམ་བསྒོམས་ཏེ། །བླ་མ་དང་བཅས་ལྷ་དམིགས་བྱ། །ཡེ་ཤེས་ལས་གཞན་ཚོགས་ཀྱི་ཕྱིར། །ཕྱག་འཚལ་མཆོད་ཅིང་བསྔོ་མཐར་ཐུག །རྣམ་བདུན་བསགས་ནས་དེ་རྗེས་སུ། །ཚངས་པའི་གནས་ནི་བསྒོམ་པར་བྱ། །ཨོཾ་སྭ་བྷཱ་ཝ་ཤུདྡྷཿ་སརྦ་དྷརྨཱཿ་སྭ་བྷཱ་ཝ་ཤུདྡྷོ྅ཧཾ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། སྟོང་པ་ཉིད་དུ་རྣམ་པ་བསྒོམས་ནས། །ཡཾ་རཾ་ཝཾ་ལཾ་ཡི་གེ་ལས། །རླུང་དང་མེ་དང་ཆུ་དང་ནི། །དབང་ཆེན་དཀྱིལ་འཁོར་བསམ་པར་བྱ། །དེར་ནི་ཧཱུཾ་གི་རྣམ་པ་ལས། །རྡོ་རྗེའི་ས་གཞི་ར་བ་དང༌། །དེ་བཞིན་རྡོ་རྗེའི་གུར་དང་ནི། །བླ་རེ་ཡང་ནི་བསམ་པར་བྱ། །དེ་དབུས་གནོད་མཛེས་རྒྱལ་པོ་ནི། །བཀའ་ཡི་འཁོར་ལོ་བསྒོམ་པར་བྱ། །རྩིབས་བཅུ་རབ་འབར་ཅུང་ཟད་སེར། །ཁྲོ་བོ་བཅུ་དང་


DTG047_Page_0401
[མ་དཔེ་གཟིགས་ན་འདིར་གནོན།]

བཅས་པ་བསམ། །གནོད་མཛེས་ལ་སོགས་ཁྲོ་བོའི་ཚོགས། །སྣ་ཚོགས་པདྨ་ཉི་ཟླ་ལ། །གཡོན་བརྐྱང་ཞབས་ཀྱིས་ཡང་དག་གནས། །ཞལ་གསུམ་ཕྱག་དྲུག་དང་པོ་ཡི། །ཕྱག་གཉིས་རང་གི་ཤེས་རབ་འཁྱུད། །འདི་ལྟ་བུ་ཡི་འཁོར་ལོ་འདི། །རྡོ་རྗེ་འབར་བའི་སྤྲིན་ལྟ་བུས།། བགེགས་ཀྱི་ཚོགས་རྣམས་རབ་ཏུ་འཇོམས། །གནོད་མཛེས་དང་ནི་གཤིན་རྗེ་གཤེད། །གཞན་གྱིས་མི་ཐུབ་རྟ་མགྲིན་དང༌། །བདུད་རྩི་འཁྱིལ་རྣམས་དབུས་དང་ནི། །ཤར་ལ་སོགས་པའི་ཕྱོགས་སུ་བསམ། །འདོད་པ་དབྱུག་པ་སྟོབས་མི་གཡོ། །བྱིན་ཟ་ལ་སོགས་མཚམས་སུའོ། །གཙུག་ཏོར་རྡོ་རྗེ་ས་འོག་ནི། །དེ་བཞིན་སྟེང་དང་འོག་ཏུ་བསམ། །དབུས་དང་ཤར་དང་ལྷོ་དང་ནུབ། །དེ་བཞིན་སྟེང་གི་ཁྲོ་བོ་རྣམས། །མཐིང་དང་དཀར་པོ་དམར་པོ་དང༌། །དེ་ལྟར་སྔོན་པོ་དཀར་དང་དམར། །དཀར་པོ་མཐིང་ག་དམར་པོ་དང༌། །དེ་བཞིན་དམར་དང་མཐིང་ག་དཀར། །སེར་ལྗང་མཐིང་ག་དཀར་པོ་ནི། །གནོད་སྦྱིན་བདེན་བྲལ་རླུང་གི་ཕྱོགས། །མདོག་རྣམས་དབང་པོའི་ཕྱོགས་ལྟར་ཏེ། །དེ་བཞིན་བྱིན་ཟ་དབང་ལྡན་དང༌། །འོག་རྣམས་དབུས་མ་ཇི་ལྟ་བུའི། །རྡོ་རྗེ་ཐོ་བ་བེ་ཅོན་དང༌། །དེ་བཞིན་པདྨ་རྡོ་རྗེ་དང༌། །ལྕགས་ཀྱུ་དབྱུག་པ་དཔལ་རྩེ་དང༌། །རལ་གྲི་འཁོར་ལོ་རྡོ་རྗེ་རྣམས། །གཡས་ཀྱི་དང་པོའི་རིམ་བཞིན་དུའོ། །དེ་བཞིན་གཡོན་པ་རལ་གྲི་སྟེ། །མི་གཡོ་བ་ལ་རྡོ་རྗེའོ། །གཡས་གཡོན་པར་མ་ཐམས་ཅད་ལ། །རིན་པོ་ཆེ་དང་པདྨས་སྦྲེལ། །བདག་པོའི་གཡས་གཡོན་ཐ་མར་ནི། །ལྕགས་ཀྱུ་དང་ནི་ཞགས་པའོ། །དེ་བཞིན་དུ་ནི་རྟ་མགྲིན་ལ། །པདྨའི་གནས་སུ་འཁོར་ལོའོ། །གནོད་མཛེས་ལ་སོགས་ཐམས་ཅད་ལ། །ཐུགས་ཀྱི་བདག་པོས་རྒྱས་བཏབ་སྟེ། །གཤིན་རྗེ་གཤེད་དང་རྟ་མགྲིན་ལ། །དེ་བཞིན་སྐུ་དང་གསུང་གིས་སོ། །དེ་ནས་བདག་པོ་ཡོངས་གྱུར་ནས། །རྡོ་རྗེ་སེམས་དཔའ་བསམ་བྱས་ཏེ། །དཀར་དང་མཐིང་ག་དམར་པོའི་ཞལ། །ཕྱག་དྲུག་དང་པོས་རིག་མ་འཁྱུད། །ལྷག་མ་རྡོ་རྗེ་རལ་གྲི་དང༌། །རིན་ཆེན་པདྨ་འཛིན་པའོ། །དེ་ནས་ཆོས་ཀྱི་འབྱུང་གནས་ནི། །མདོག་དཀར་གྱེན་བསྒྲེང་གཟུགས་ཅན་ལ། །ཆུ་སྐྱེས་སྣ་ཚོགས་རྡོ་རྗེ་ཡིས། །རྣམ་པར་རྒྱལ་བ་མཁས་པས་བསྒོམ། །དེར་ནི་བྷྲཱུཾ་དང་འཁོར་ལོའོ། །རྡོ་རྗེ་འཆང་དང་འདྲ་བ་ཡི། །རྟག་པའི་རྒྱལ་


DTG047_Page_0402
[མ་དཔེ་གཟིགས་ན་འདིར་གནོན།]

པོ་བསམ་པ་ནི། །རྡོ་རྗེ་ལ་གནས་འཁོར་ལོའོ། །དེ་ལས་བྱུང་བའི་གཞལ་ཡས་ཁང༌། །གྲུ་བཞི་པ་ལ་སྒོ་བཞི་པ། །རྟ་བབས་བཞི་ཡིས་རྣམ་པར་མཛེས། །དྲིལ་བུ་འཕན་བཅིང་ལ་སོགས་དང༌། །མེ་ཏོག་ཕྲེང་བས་རབ་ཏུ་བརྒྱན། །གྲྭ་རྣམས་དང་ནི་ཐམས་ཅད་དང༌། །སྒོ་ཁྱུད་དག་གི་གནས་སུ་ཡང༌།། རྡོ་རྗེ་རིན་པོ་ཆེ་ཡིས་བརྒྱན། །དེ་བཞིན་ཟླ་བ་ཕྱེད་པས་སོ། །དེ་ཡི་དབུས་སུ་འཁོར་ལོ་ནི། །རེའུ་མིག་དགུ་པ་ཟླུམ་པོ་སྟེ། །སྒོ་གཅིག་དག་ནི་བཞག་ནས་ནི། །ལྷག་མའི་སྒོ་ནི་གཅད་པར་བྱ། །སྒོ་བཞི་དང་ནི་མཚམས་རྣམས་སུ། །ཡི་དགས་ཆེན་པོ་དགོད་པར་བྱ། །དེ་དབུས་དབྱངས་ཡིག་དང་པོ་ལས། །བྱུང་བའི་ཟླ་བའི་དཀྱིལ་འཁོར་བསམ། །དེར་ནི་དྷཱིཿ་ལས་གྱུར་པ་ཡི། །འཇམ་དཔལ་གཞོན་ནུ་བསམ་པ་ནི། །གཞོན་ནུའི་རྒྱན་གྱིས་རྣམ་པར་བརྒྱན། །ཞལ་གཅིག་པ་ལ་ཕྱག་གཉིས་ཏེ། །ཅུང་ཟད་སེར་པོ་ཕྱག་གཡས་ན། །རལ་གྲི་གཡོན་གླེགས་བམ་བསྣམས། །དེ་ཡི་ཐུགས་ཀར་དབྱངས་ཡིག་ནི། །བཅུ་དྲུག་པ་ལས་བྱུང་བ་ཡི། །ཉི་མའི་དཀྱིལ་འཁོར་རྣམ་བསམས་ནས། །དེ་ཡི་འོད་ཀྱིས་ཕྱོགས་བཅུ་ན། །བཞུགས་པའི་བདེ་གཤེགས་སྲས་བཅས་དང༌། །རིག་པའི་ལྷ་མོ་ཁྲོ་བོའི་ཚོགས། །སྤྱན་དྲངས་འཇམ་དཔལ་དང་བཅས་པ། །སངས་རྒྱས་ཚོགས་ཀུན་རབ་བཞུགས་པས། །འོད་ཟེར་དྲུག་པོས་ཁྱབ་པ་ཡི། །ཉི་མའི་དཀྱིལ་འཁོར་བསམ་པར་བྱ། །དེ་སྟེང་ཁ་དོག་དཀར་པོ་ཧཱུཾ། །འོད་ཟེར་ལྔ་དང་ལྡན་པ་བསམ། །དེ་ཡི་འོད་ཀྱིས་སངས་རྒྱས་ཚོགས། །སྔོན་བཞིན་སྤྱན་དྲངས་རབ་བཅུག་ནས། །རྡོ་རྗེ་ཆེན་པོ་རྣམ་པར་བསྒོམ། །དེ་ཡི་འོད་ཟེར་ལས་བྱུང་བའི། །སངས་རྒྱས་སྲས་བཅས་ཁྲོ་བོ་དང༌། །རིག་པའི་ལྷ་མོ་ལ་སོགས་པས། །ནམ་མཁའི་ཁམས་ཀུན་ཁྱབ་པར་བསམ། །འགྲོ་ཀུན་བྱང་ཆུབ་ལ་བཀོད་དེ། །དེ་རྣམས་དང་བཅས་རྡོ་རྗེ་ལ། །བཅུག་པས་བདག་ཉིད་བཅོམ་ལྡན་འདས། །འཇིགས་བྱེད་སྐུ་མདོག་ནག་པོར་བསམ། །ཞལ་དགུ་ཕྱག་ནི་སུམ་ཅུ་བཞི། །བཅུ་དྲུག་ཞབས་ལ་གཡོན་བརྐྱང་བ། །གཅེར་བུ་མཚན་མ་གྱེན་དུ་འགྲེང༌། །ལྗགས་བརྐྱང་གད་མོ་རྣམ་པར་སྒྲོག །སྤྱན་གསུམ་དཔྲལ་བའི་ཁྲོ་གཉེར་ཅན། །བསྐལ་པའི་མེ་ལྟར་འོད་འབར་ཞིང༌། །ཐོད་པས་བརྒྱན་ཞིང་ཕེཾ་གྱི་སྒྲ། །སྒྲོགས་


DTG047_Page_0403
[མ་དཔེ་གཟིགས་ན་འདིར་གནོན།]

ཤིང་འཇིགས་པ་བསྡིགས་པར་མཛད། །གསུས་པ་ཆེ་ཞིང་སྐྲ་བརྫེས་པ། །དང་པོའི་ཞལ་ནི་མ་ཧེའི་སྟེ། །ཁ་དོག་ནག་པོ་ཅུང་ཟད་ཁྲོ། །གཡས་ཀྱི་རྭ་ཡི་ཞལ་གསུམ་ནི། །དང་པོ་མཐིང་ག་གཡས་དམར་པོ། །གཡོན་སེར་ཤིན་ཏུ་ཁྲོ་བའོ། །དེ་བཞིན་གཡོན་གྱི་རྩ་བའི་ཞལ། །དཀར་པོ་དུད་ཀ་དེ་བཞིན་དུ། །ནག་པོ་ཤིན་ཏུ་ཁྲོས་པ་ཡིས། །རྭ་གཉིས་དབུས་སུ་ཞལ་དམར་པོ། །འཇིགས་བྱེད་ཞལ་ནས་ཁྲག་འཛག་བསམ། །དེ་སྟེང་འཇམ་དཔལ་གཞོན་ནུའི་ཞལ། །སེར་བ་ཅུང་ཟད་ཁྲོ་བ་སྟེ། །ཟུར་ཕུད་ལྔ་པ་གཞོན་ནུ་ཡི། །རྒྱན་གྱིས་ལེགས་པར་རྣམ་པར་བརྒྱན། །ཞལ་རྣམས་ཀུན་ཀྱང་སྤྱན་གསུམ་པོ། །གཡས་གཡོན་དང་པོའི་ཕྱག་གཉིས་ཀྱིས། །གླང་ཆེན་པགས་པ་རློན་པ་བསྣམས། །གྲི་གུག་བྷིནྡི་པཱ་ལ་དང༌། །གཏུན་ཤིང་ཆུ་གྲི་དེ་བཞིན་དུ། །ཀརྞ་ཡ་དང་སྟ་རེ་དང༌། །མདུང་དང་མདའ་དང་ལྕགས་ཀྱུ་དང༌། །དབྱུག་པ་ཁ་ཊྭཱཾ་འཁོར་ལོ་དང༌། །རྡོ་རྗེ་རྡོ་རྗེ་ཐོ་བ་དང༌། །རལ་གྲི་རྔེའུ་ཆུང་གཡས་པ་ཡི། །ཕྱག་མཚན་རྣམས་ནི་རིམ་བཞིན་བསམ། །དེ་བཞིན་གཡོན་གྱི་ཕྱག་རྣམས་ནི། །ཐོད་པ་དང་ནི་མགོ་བོ་དང༌། །དེ་བཞིན་དུ་ནི་རྐང་པ་དང༌། །ཕུབ་དང་དེ་བཞིན་ཞགས་པ་གཞུ། །རྒྱུ་མ་དྲིལ་བུ་མིའི་ལག་པ། །དེ་བཞིན་དུར་ཁྲོད་རས་དང་ནི། །རྩེ་གསུམ་མཚོན་གཙུག་སྐྱེས་བུ་དང༌། །མེ་སྣོད་ཐོད་པའི་དུམ་བུ་དང༌། །སྡིགས་མཛུབ་རྩེ་གསུམ་པ་དན་དང༌། །རླུང་གི་རས་རྣམས་རིམ་བཞིན་བསྣམས། །མི་དང་མ་ཧེ་གླང་དང་ནི། །བོང་བུ་རྔ་མོ་དེ་བཞིན་ཁྱི། །ཐུག་རེ་ཅེ་སྤྱང་གཡས་པ་ཡི། །ཞབས་རྣམས་ཀྱིས་ནི་རིམ་པས་མནན། །དེ་བཞིན་གཡོན་པའི་ཞབས་རྣམས་ཀྱིས། །བྱ་རྒོད་འུག་པ་བྱ་རོག་དང༌། །ནེ་ཙོ་ཁྲ་དང་ནམ་མཁའ་ལྡིང༌། །ཁྱིམ་བྱ་བཞད་རྣམས་རིམ་བཞིན་མནན། །དེ་ནས་དབང་བསྐུར་སྐྱེ་མཆེད་དག །བྱིན་གྱིས་བརླབ་ཅིང་ལུས་ལ་སོགས། སྐུ་གསུང་ཐུགས་ཀྱི་རྡོ་རྗེ་བསྒོམ། །དེ་བཞིན་ཡེ་ཤེས་སེམས་དཔར་བསམ། །དེ་ནས་བློ་དང་ལྡན་པ་ཡིས། །རྡོ་རྗེ་འཇིགས་བྱེད་ཆེན་པོ་ནི། །སྤྱན་དྲངས་ཡོན་ཆབ་ལ་སོགས་པས། །རིམ་བཞིན་མཆོད་པས་མཉེས་པར་བྱ། །ཨོཾ་ཧྲཱིཿ་ཧ་བྷོ་མ་ཧཱ་ཀྲོ་དྷ་ཨཱ་གྩྪ། ཨ་སྨཏ་པཱུ་ཛ་པྲ་ཏི་གྲྀཧྞ་ཏུ་པྲ་སཱདྷ། མེ་དྷི་མཾ་ཀུ་རུ་སྭཱ་ཧཱ། སྤྱན་དྲང་བའི་སྔགས་སོ། །ཨོཾ་ཧྲཱིཿ་ཥྚྲྀཿ་ཨ།


DTG047_Page_0404
[མ་དཔེ་གཟིགས་ན་འདིར་གནོན།]

མཆོད་ཡོན་གྱི་སྔགས་སོ། །ཨོཾ་ཧཱུཾ་ཧཱུཾ་ཕཊ་ཕཊ། ཞབས་བསིལ་བའི་སྔགས་སོ། །ཨོཾ་ཝི་ཀྲྀ་ཏཱ་ན་ན་དུཥྚཱཾ་སཏྭ་ད་མ་ཀ་གཿ་གཿ་དྲིའི་སྔགས་སོ། །ཨོཾ་ཀུ་མཱ་ར་རཱུ་པི་ཎི་ཛ་ཛ་ཧཱུཾ་ཧ། མེ་ཏོག་གི་སྔགས་སོ། །ཨོཾ་ཧྲཱིཿ་ཧ་ཧོ་ཕཊ། བདུག་པའི་སྔགས་སོ། །ཨོཾ་དཱིཔྟ་ལོ་ཙ་ནེ་བི་ཀྲྀ་ཏཱ་ན་ན་མ་ཧཱ་ཨཊྚ་ཧ་ས་ན་དི་ནི་དཱིཔྟཱ་ཡ་སྭཱ་ཧཱ། མར་མེའི་སྔགས་སོ། །ཨོཾ་བཛྲ་ནཻ་ཝི་དྱེ་ཨཱཿ་ཧཱུཾ་སྭཱ་ཧཱ། ལྷ་བཤོས་ཀྱི་སྔགས་སོ། །ཨོཾ་ཀཱ་ལ་རཱུ་པ་སརྦ་སཏྭ་ད་མ་ཀ་མ་ཧཱ་བྷཱུ་ཏ་པ་ཏི་ཨི་དཾ་པ་ལིཾ་གྲྀཧྞ་གྲྀཧྞ་པ་ཡ་སྭཱ་ཧཱ། གཏོར་མའི་སྔགས་སོ། །དེ་ནས་ཡང་དག་སྔགས་བཟླས་བྱ། །བཟླས་དུས་རང་གི་སྙིང་གར་ནི། །ཉི་མའི་དཀྱིལ་འཁོར་རྣམ་བསམས་ཏེ། །རང་གི་གསང་སྔགས་རྣམ་བཀོད་བྱ། །དེ་རྗེས་མ་ཡེངས་སེམས་ཀྱིས་ནི། །འབར་བའི་གསང་སྔགས་བཟླས་པར་བྱ། །ཨོཾ་ཡ་མ་རཱ་ཛ། ས་དོ་མེ་ཡེ། ཡ་མེ་དོ་རུ། ཎ་ཡོ་ད་ཡ། ཡ་ད་ཡོ་ནི། ར་ཡ་ཀྵེ་ཡ། ཡཀྵེ་ཡཙྪ། ནི་རཱ་མ་ཡ། ཧཱུཾ་ཧཱུཾ་ཕཊ་ཕཊ། འདི་ནི་འཇམ་དཔལ་ཞེས་བྱ་བའི། །རྡོ་རྗེ་འཇིགས་བྱེད་ཆེན་པོའི་མཆོག །འཁོར་ལོ་མ་ཧེའི་ཞལ་ན་ནི། །རྩ་བའི་སྔགས་ཀྱིས་ལས་ཀུན་བྱེད། །གསང་སྔགས་འབུམ་དུ་བཟླས་པ་ཡིས། །ལས་རྣམས་ཐམས་ཅད་བྱེད་པར་འགྱུར། །ཨོཾ་ཧྲཱིཿ་ཥྚྲྀཿ་ཝི་ཀྲྀ་ཏཱ་ན་ན་ཧཱུཾ་ཕཊ། འདི་ནི་གསང་སྔགས་རྒྱལ་པོ་སྟེ། །མ་ཧེའི་ཞལ་གྱི་སྦྱོར་བ་ཡིས། །ལས་རྣམས་ཀུན་ནི་བྱེད་པའོ། །འབུམ་ཕྲག་གསུམ་ནི་བཟླས་ནས་སུ། །ལས་རྣམས་ཐམས་ཅད་རབ་ཏུ་བྱ། །ཨོཾ་ཡ་མཱནྟ་ཀ་ཧཱུཾ་ཕཊ། འདི་ནི་མ་ཧེའི་གདོང་ཅན་གྱི། །སྙིང་པོའི་སྔགས་སུ་རབ་ཏུ་གྲགས། །ཡི་གེ་རེ་ལ་འབུམ་བཟླས་ན། །ལས་རྣམས་ཐམས་ཅད་རབ་ཏུ་འགྲུབ། །ཁམས་གསུམ་ལ་ནི་གང་དང་གང། །ཤིན་ཏུ་མཉམ་གཞག་རབ་ཏུ་གྲུབ། །དེ་ནས་བཟླས་པ་བཏང་འདོད་ན། །སྤྱན་དྲངས་ཁྲོ་བོ་གཤེགས་སུ་གསོལ། །ཨོཾ་ཛ་ཡ་ཛ་ཡ་སུ་ཛ་ཡ་བི་ཤྭ་རཱུ་པ་དྷ་རི། གྩྪ་གྩྪ་སྭ་སྠཱ་ནཾ། ཀྲྀ་ཏྭཾ་ཏེ་ན་ཏ་ཐཱ་གྩྪ་སརྦ་བུདྡྷ་ཤྩ་བི་སརྫ་ཡ་མ་མ་ཀཪྻཾ་ཀུ་རུ་སྭཱ་ཧཱ། གཤེགས་སུ་གསོལ་བའི་སྔགས་སོ། །གང་གཞན་ལྷག་པའི་སེམས་མེད་ཀྱང༌། །བརྩེ་བའི་སྟོབས་ཀྱིས་འདི་བྲིས་པའོ། །བསོད་ནམས་དེ་ཡིས་འགྲོ་བ་རྣམས། །འཇམ་དཔལ་དབྱངས་དང་མཚུངས་པར་ཤོག །དཔལ་རྡོ་རྗེ་འཇིགས་བྱེད་ཀྱི་སྒྲུབ་ཐབས་རྫོགས་སོ།། །།གྲུབ་པའི་སློབ་དཔོན་ལ་ལི་ཏས་མཛད་པའོ།། །།

དཔལ་རྡོ་རྗེ་འཇིགས་བྱེད་ཀྱི་གཏོར་མའི་ཆོ་ག།
ལ་ལི་ཏ་བཛྲ།


DTG047_Page_0405
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། ཤྲཱི་བཛྲ་བྷཻ་ར་ཝ་བ་ལིཾ་བི་དྷིཿ། བོད་སྐད་དུ། དཔལ་རྡོ་རྗེ་འཇིགས་བྱེད་ཀྱི་གཏོར་མའི་ཆོ་ག །དཔལ་རྡོ་རྗེ་འཇིགས་བྱེད་ཁྲོས་པའི་རྒྱལ་པོ་ལ་ཕྱག་འཚལ་ལོ། །གདོད་ནས་དག་པའི་རང་བཞིན་གྱིས། །རྡོ་རྗེ་འཇིགས་བྱེད་ཕྱག་འཚལ་འདུད། །བར་ཆད་ཞི་ཕྱིར་གཏོར་མ་ནི། །འབད་དེ་ཡང་དག་བཤད་པར་བྱ། །དཔལ་ལྡན་རྡོ་རྗེ་འཇིགས་བྱེད་ཀྱི། །གཏོར་མ་བྱེད་པར་འདོད་པ་ཡིས། །བདུད་རྩི་ལྔ་ལ་སོགས་པ་ཡི། །རྫས་ཀྱི་གཏོར་མ་བཤམ་པར་བྱ། །སྒྲུབ་པོ་ལྷ་ཕྱོགས་ཁ་བལྟས་ལ། །སྐད་ཅིག་ཙམ་གྱིས་འཇིགས་པར་བསྐྱེད། །མདུན་དུ་ཡཾ་དང་རཾ་ལས་ནི། །རླུང་དང་མེ་ཡི་དབྱིབས་ཅན་བསྐྱེད། །དེ་ཡི་སྟེང་དུ་སྒྱེད་གསུམ་བསམ། །དེ་སྟེང་ཨ་ལས་ཐོད་པའི་སྣོད། །ནང་དུ་ཤ་ལྔ་བདུད་རྩི་ལྔ། །སྐད་ཅིག་ཙམ་གྱིས་བསམ་པར་བྱ། །སྟེང་དུ་ཨོཾ་ཨཱཿ་ཧཱུཾ་ཡིག་རྣམས། །གོ་རིམས་ཇི་བཞིན་བསམ་པར་བྱ། །འོད་སྤྲོས་སྐུ་སོགས་རིམ་བཀུག་ལ། །རིམ་པ་བཞིན་དུ་བསྟིམ་པ་དང༌། །དེ་ཉིད་གསུམ་ནི་བརྗོད་པ་ཡིས། །གཏོར་མ་དག་པར་བསྒོམ་པར་བྱ། །དེ་ནས་རང་གི་སྙིང་གའི་ཧཱུཾ། །འོད་སྤྲོས་རྡོ་རྗེ་འཇིགས་བྱེད་སོགས། །ལྷ་རྣམས་སྤྱན་དྲངས་མདུན་དུ་བསམ། །ཧཱུཾ་བརྗོད་ལྕེ་ནི་བྱིན་གྱིས་བརླབ། །ཨོཾ་ཧྲཱིཿ་ཥྚྲྀཿ་ཝི་ཀྲྀ་ཏཱ་ན་ན་ཧཱུཾ་ཕཊ། བཛྲ་བྷཻ་ར་ཝ་ཨ་དྷི་པ་ཏི། ཨི་མཾ་བ་ལིཾ། ཁ་ཁ་ཁཱ་ཧི་ཁཱ་ཧི་ཧཱུཾ་ཕཊ་སྭཱ་ཧཱ། ཞེས་པས་དབུལ་བའི་སྔགས་བརྗོད་བྱ། །དེ་རྣམས་གསོལ་བར་བསམས་ནས་ནི། །ལས་ཀྱི་བྱེ་བྲག་ཕྲིན་ལས་བཅོལ། །ཅི་འདོད་པ་ཡི་དངོས་གྲུབ་བླང༌། །ཁྱད་པར་དྲག་པོ་བཅོལ་བ་ནི། །བླ་མ་སྨོད་པར་བྱེད་པ་དང༌། །དཀོན་མཆོག་གསུམ་ལ་གནོད་བྱེད་དང༌། །བསྟན་པ་ལ་གནོད་བྱེད་པ་དང༌། །སེམས་ཅན་ཀུན་ལ་གནོད་བྱེད་དང༌། །སྔགས་རྒྱུད་ལ་གནོད་བྱེད་པའི་མི། །འདི་རྣམས་ཁྱེད་ཀྱིས་གསད་དུ་གསོལ། །ཞེས་པས་ཕྲིན་ལས་བཅོལ་ལོ། །དེ་ནས་གནང་བ་བྱིན་པར་བསམ། །དེ་ནས་ཡི་གེ་བརྒྱ་པ་བརྗོད། །ཨོཾ་ཨཱཿ་ཧཱུཾ་མུཿ་ས་མགྲོན་རྣམས་ནི། །རང་བཞིན་གནས་སུ་གཤེགས་སུ་གསོལ། །དེ་ལྟར་བྱས་པའི་ཕན་ཡོན་ནི། །བར་དུ་གཅོད་པ་ཞི་བ་དང༌། །མི་མཐུན་ཕྱོགས་རྣམས་འཇོམས་པ་དང༌། །དངོས་གྲུབ་དམ་པ་ཐོབ་པར་གྱུར། །གཞན་ཡང་རབ་ཏུ་སྦྱོར་བ་ན། །ནད་དང་དགྲ་ལ་སོགས་པ་ཡི། །ཚར་གཅོད་རྗེས་གཟུང་ཐམས་ཅད་ནི། །དེ་མ་


DTG047_Page_0406
[མ་དཔེ་གཟིགས་ན་འདིར་གནོན།]

ཐག་ཏུ་འགྲུབ་པར་འགྱུར། །རྡོ་རྗེ་འཇིགས་བྱེད་གཏོར་མ་ཡི། །ཆོ་ག་ཕུན་སུམ་ཚོགས་པ་བརྩམས། །གང་ཡོད་བསོད་ནམས་དེ་ཡིས་ནི། །སེམས་ཅན་མ་ལུས་དགྲ་ལས་རྒྱལ་བར་ཤོག །སློབ་དཔོན་ཆེན་པོ་ལ་ལི་ཏ་བཛྲས་མཛད་པ་རྫོགས་སོ།། །།

བྷཻ་ར་བའི་ཞི་བའི་བྱ་བ་བདུན་པ།
ཨ་མོ་གྷ་ཆུང་བ།

དང་པོ། མཆོད་སྦྱིན་བྱ་བའི་ཆོ་ག


DTG047_Page_0406
[མ་དཔེ་གཟིགས་ན་འདིར་གནོན།]

དཔལ་རྡོ་རྗེ་འཇིགས་བྱེད་ལ་ཕྱག་འཚལ་ལོ། །ཞི་བའི་ལས་ཀྱི་བྱ་བ་བདུན་བཤད་པར་བྱ་སྟེ། །དེ་ལ་དང་པོ་མཆོད་སྦྱིན་བྱ་སྟེ། དེ་ལ་བཀྲ་ཤིས་པའི་གནས་སུ་མཎྜལ་བྱི་དོར་བྱ་སྟེ། མེ་ཏོག་དང་བདུག་པ་དང༌། མར་མེ་དང༌། དྲི་དང་ལྷ་བཤོས་རྣམས་རབ་ཏུ་གཙང་མར་བྱ། ཁ་ཟས་བཟང་པོའི་སྦྱིན་གཏོར་ཇི་ལྟར་འབྱོར་པ་དང་འཕགས་མ་སོ་སོར་འབྲང་མ་ལ་སོགས་པའི་མདོ་བཀླག་པ་དང༌། ཇི་ལྟར་ནུས་པ་རྣམས་བྱ་སྟེ། མི་རྣམས་ལ་ཡང་ཁ་ཟས་ཀྱིས་དགའ་བར་བྱས་ནས། ཁྱད་པར་དུ་ཡང་བླ་མ་དང་མཁན་པོ་ལ་ཡོན་ཕུལ་ཏེ། སྨོན་ལམ་གདབ་པར་བྱའོ། །མཆོད་སྦྱིན་བྱ་བའི་ཆོ་ག་སྟེ་དང་པོའོ།། །།

གཉིས་པ། གཏོར་མའི་ལས།


DTG047_Page_0406
[མ་དཔེ་གཟིགས་ན་འདིར་གནོན།]

དེ་ནས་གཏོར་མའི་ལས་བཤད་དེ། དེ་ནས་ཉི་མ་གཉིས་པ་ལ་མེ་ཏོག་ལ་སོགས་པ་དང༌། ཁ་ཟས་བཟང་པོའི་གཏོར་མ་དུ་འབྱོར་པ་དང༌། འབྲས་ཆན་དཀར་པོ་དང༌། རྡུལ་ཕྱེ་དང་དཀར་གསུམ་སྦྱར་བའི་ལས་ཀྱི་གཏོར་མ་ཆ་གཅིག་དང་བཤམས་ཏེ། སྔགས་པས་ཆས་གོས་གྱོན་ལ་ཀུ་ཤའི་སྟེང་དུ་འདུག་ལ་ཁ་ཤར་དུ་བལྟས་ཏེ། བྱམས་པའི་སེམས་དང༌། ཞི་བའི་ལྟ་སྟངས་དང་ལྡན་པས་གཏོར་མ་སྦྱིན་པར་བྱའོ། །དེ་ལ་དང་པོར་སྔགས་པས། ཨོཾ་སྭ་བྷཱ་ཝ་ཤུདྡྷཿ་སརྦ་དྷ་རྨཿ་སྭ་བྷཱ་ཝ་ཤུདྡྷོ྅ཧཾ། ཞེས་བརྗོད་དེ། ཆོས་ཐམས་ཅད་བདག་མེད་པ་མངོན་དུ་བྱའོ། །དེ་ནས་ནམ་མཁའི་དཀྱིལ་དུ། ཡཾ་ལས་རླུང་གི་དཀྱིལ་འཁོར་ཟླ་གམ་དུ་བསྐྱེད་དེ། ཨ་ལས་ཟླ་བའི་དཀྱིལ་འཁོར་དུ་བསམས་ནས། །དེ་ལ་ཡི་གེ་དྷཱིཿ་ལས་འཇམ་དཔལ་གཞོན་ནུའི་སྐུ་དཀར་པོ་ཨུཏྤལ་སྔོན་པོ་བསྣམས་པ་ཅིག་བསྐྱེད་དོ། །དེའི་ཐུགས་ཀར་ཨ་ལས་ཟླ་བའི་དཀྱིལ་འཁོར་བསྐྱེད་དོ། །དེའི་འོད་ཟེར་གྱིས་ཕྱོགས་བཅུའི་རྒྱལ་བ་སྲས་དང་བཅས་པ་རྣམས་བཀུག་ནས། དེ་ཉིད་དུ་ཞུགས་པས་ཐམས་ཅད་ཉི་མའི་དཀྱིལ་འཁོར་ཉིད་དུ་འགྱུར་བར་བྱའོ། །དེའི་སྟེང་དུ་ཧཱུཾ་ལས་རྡོ་རྗེ་འབར་བར་འགྱུར་ཏེ། དེ་ལས་འོད་འཕྲོས་དཔལ་རྡོ་རྗེ་འཇིགས་བྱེད་བསྐྱེད་དོ། །ཚུལ་ཞི་བ་ཁ་དོག་དཀར་པོ་བསྐྱེད་དོ། །ལུས་དང་འོད་ཀྱི་ཚུལ་དུ་གཞལ་


DTG047_Page_0407
[མ་དཔེ་གཟིགས་ན་འདིར་གནོན།]

ཡས་ཁང་བསྐྱེད་དོ། །ལྕགས་ཀྱུའི་ཕྱག་རྒྱ་བཅས་ལ་སྔགས་འདིས་སྤྱན་དྲང་ངོ༌། །ཨོཾ་ཧྲཱིཿ་བྷོ་བྷོ་མ་ཧཱ་ཀྲོ་དྷ་ཨཱ་གྩྪ་ཨཱ་གྩྪ་ཨ་སྨ་ཏ་པཱུ་ཛ་པྲ་ཏི་གྲྀཧྞནྟུ་པྲ་སཱ་དྷཾ་མེ་དྷི་མཾ་ཀུ་རུ་སྭཱ་ཧཱ། ཞེས་སྤྱན་དྲངས་ལ། ཨོཾ་ཧཱུཾ་ཧཱུཾ་ཕཊ་ཕཊ་ཅེས་བསང་གཏོར་བྱས་ནས་མཆོད་པ་དབུལ་བར་བྱའོ། །ཨོཾ་ཧྲཱིཿ་ཥྚྲྀཿ་ཨ་ཞེས་པ་ན་ཨརྒྷཾ་གྱིའོ། །ཨོཾ་ཝི་ཀྲྀ་ཏཱ་ན་ན་སརྦ་དུཥྚྲ་སཏྭ་ད་མ་ཀ་གཿ་གཿ་དྲིའིའོ། །ཨོཾ་ཀུ་མཱ་རཱུ་པི་ཎི་ཛ་ཛ་ཧཱུཾ། མེ་ཏོག་གིའོ། །ཨོཾ་ཧྲཱིཿ་ཧ་ཧ་ཧེ་ཧེ་བདུག་པའོ། །ཨོཾ་དཱིབྟ་ལོ་ཙ་ནེ་པི་ཀྲྀ་ཏ་ཨ་ན་ན་མ་ཧཱ་ཨཊྚཱ་ཊྚ་ཧ་ས་ན་དི་དཱིཔྟཱ་ཡ་སྭཱ་ཧཱ། མར་མེའིའོ། །ལྷ་བཤོས་ཀྱང་ཡོན་ཆབ་ཀྱིས་འབུལ་ལོ། །དེ་ནས་ཡེ་ཤེས་སྦྱིན་གཏོར་གྱི་ཡེ་ཤེས་བདུད་རྩིའི་འོད་ཟེར་ལས་འདས་པའི་ཡོན་ཏན་ལྔར་གྱུར་པར་དམིགས་ཏེ་འབྱུང་པོའི་ཆོགས་རྣམས་ལ་སྔགས་འདིས་སྦྱིན་པར་བྱའོ། །ཨོཾ་ཀཱ་ལ་རཱུ་པ་སརྦ་སཏྭ། ད་མ་ཀ་མ་ཧཱ་ཀཱ་མ་བྷཱ་ཏ་ཨ་དྷི་པ་ཏི། ཨི་དཾ་པ་ལིཾ། གྲྀཧྞ་གྲྀཧྞ་པ་ཡ་སྭཱ་ཧཱ། ཞེས་བདུན་ནམ་ཉེར་གཅིག་གིས་བཟླས་ནས་སྦྱིན་ནོ། །དེ་ནས་ལས་ཀྱི་གཏོར་མ་ལ། ཨོཾ་ཧྲཱིཿ་ཥྚྲྀཿ་ཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ། ཆེ་གེ་མོ་ཤཱནྟིཾ་ཀུ་རུ་སྭཱ་ཧཱ། ཞེས་བཟླས་ཤིང་ཕྱོགས་བཅུར་གཏོར་བས། བདག་གི་སྙིང་གའི་ཡི་གེ་དང༌། གཏོར་མ་ལས་འོད་དཀར་པོ་འཕྲོས་པས་བསྒྲུབ་བྱའི་ལུས་ངག་ཡིད་གསུམ་ལ་ཐིམ་པས་དེ་དག་ཐམས་ཅད་བྱམས་པ་དང༌། སྙིང་རྗེ་ཕྱོགས་མེད་པར་གྱུར་པར་བྱའོ། །འདི་ལྟ་བུ་ནི་ཇི་ལྟར་འགྱུར་བར་བྱས་ན་གཏོར་མའི་ལས་ཡིན་ཏེ་གཉིས་པའོ།། །།

གསུམ་པ། བཟླས་པའི་ལས།


DTG047_Page_0407
[མ་དཔེ་གཟིགས་ན་འདིར་གནོན།]

དེ་ནས་བཟླས་པའི་ལས་བཤད་དེ། ཉི་མ་གསུམ་པ་ལ་བཟླས་པ་བྱ་བ་ནི། དང་པོར་བདག་ཉིད་དཔལ་འཇིགས་བྱེད་ཆེན་པོར་བསྐྱེད་དེ། མཆོད་པའི་ཆོ་ག་དང་སྦྱིན་གཏོར་བསྔོས་ཏེ། བདག་གི་སྙིང་གར་ཨ་ལས་ཉི་མའི་དཀྱིལ་འཁོར་གྱི་སྟེང་དུ་བཟླས་པའི་ཡི་གེ་རྣམས་དམིགས་ལ་རྡོ་རྗེའི་ལྕེ་དང་ལྡན་པས་སྔགས་བཟླས་པས་ཡི་གེ་ཡེ་ཤེས་ཀྱི་འོད་ཟེར་གྱིས། བསྒྲུབ་བྱའི་ལུས་དང་སེམས་ལ་ཐིམ་པས་དེ་དག་བྱང་ཆུབ་སེམས་དང་ལྡན་པར་བསམ་མོ།། དེ་ལ་སྔགས་ནི་འདི་ཡིན་ཏེ། ཨོཾ་ཡ་མ་རཱ་ཛ་ས་དོ་མེ་ཡ། ཡ་མེ་དོ་རུ་ཎ་ཡོ་ད་ཡ། ཡ་ད་ཡོ་ནི་ར་ཡ་ཀྵེ་ཡ། ཡཀྵེ་ཡཙྪ་ནི་རཱ་མ་ཡ། ཆེ་གེ་མོ་ཤཱནྟིཾ་ཀུ་རུ་སྭཱ་ཧཱ། ཞེས་བྱ་བས་ནི་རྩ་བའི་སྔགས་སོ། །ཨོཾ་ཧྲཱྀཿ་ཥྚྲྀཿ་ཝི་ཀྲྀ་ཏཱ་ན་ན་ཧཱུཾ་ཆེ་གེ་མོ་ཤཱནྟིཾ་ཀུ་རུ་སྭཱ་ཧཱ། ཞེས་བྱ་བ་ནི་ལས་ཀྱི་སྔགས་ཏེ། དེ་དག་


DTG047_Page_0408
[མ་དཔེ་གཟིགས་ན་འདིར་གནོན།]

བཟླས་པར་བྱའོ། །དེའི་དུས་སུ་ཡང་ཆོས་གོས་དང་འདུག་སྟངས་ལ་སོགས་པ་ནི་སྔ་མ་བཞིན་ཏེ། ཐམས་ཅད་དུ་ཡང་ཤིན་ཏུ་ཤེས་པར་བྱའོ། །བཟླས་པའི་ལས་ཏེ་གསུམ་པའོ།། །།

བཞི་པ། ཞི་བའི་སྦྱིན་སྲེག་གི་ལས།


DTG047_Page_0408
[མ་དཔེ་གཟིགས་ན་འདིར་གནོན།]

ད་ནི་སྦྱིན་སྲེག་གི་ལས་བཤད་དེ། དེ་ལ་ཉི་མ་བཞི་པ་ལ་སྦྱིན་སྲེག་གི་ལས་བྱ་བ་ནི། དང་པོར་བཀྲ་ཤིས་པའི་གནས་སུ་སྦྱིན་སྲེག་གི་མཎྜལ་བྱ་སྟེ། དེ་ལ་བདག་ཉིད་དཔལ་རྡོ་རྗེ་འཇིགས་བྱེད་ཀྱི་ཏིང་ངེ་འཛིན་དང་ལྡན་པའི་རྣལ་འབྱོར་བས་ཁ་ཤར་དུ་བལྟས་ཏེ། འདུག་ནས་སའི་བདག་པོ་ལ་གཏོར་མ་བྱིན་ཏེ། དེ་ནས་ཧཱུཾ་རབ་ཏུ་འབར་བས་ས་གཞིའི་སྐྱོན་ཐམས་ཅད་དག་པར་བྱའོ། །དེ་ནས་ཐབ་བུང་བརྩིགས་ཏེ། དེ་ཡང་རྒྱར་ཁྲུ་གང་བ་ལ་དཔངས་ཟབས་སུ་ཁྲུ་ཕྱེད་པ་ཀུན་ནས་ཟླུམ་པོར་བསྐོར་ཏེ། སོར་བཞི་དོར་བའི་ཕྱི་རོལ་དུ་ཁ་ཁྱེར་སོར་བརྒྱད་པ་བྱའོ། །དེའི་དབུས་སུ་རྡོ་རྗེ་དཀར་པོ་སྲིད་དུ་སོར་བརྒྱད་པ། རྔམས་སུ་སོར་བཞི་པ་བྱས་ཏེ་གཞག །ཐབ་ཁུང་གི་ནང་ས་ཚོན་དཀར་པོས་བཀང་ལ་ཁ་ཁྱེར་གྱི་རྩར་མེ་རི་བཏང༌། སྟེང་དུ་རྡོ་རྗེ་དཀར་པོས་བསྐོར། དེའི་ཕྱི་རོལ་དུ་འོད་ཟེར་དཀར་པོས་བསྐོར་ཏེ། ཐབ་ཀྱི་མཚན་ཉིད་དོ། །དེ་ནས་རྫས་བསོག་སྟེ། བུད་ཤིང་དཀར་པོ་མཐོ་གང་ཚད་ལ་ཙནྡན་དཀར་པོ་དང་འོ་མས་སྦྱངས་ཏེ་གཞག །མཆོད་སྦྱིན་གྱི་ཤིང་མཛུབ་གང་གི་ཚད་ལ་འདབ་མ་དང་བཅས་པའི་རྩེ་མོ་ལས་བཅད་པ་སྔ་མ་བཞིན་དུ་ཆུ་གཙང་ལ་སྦང༌། གཞན་ཡང་དཀར་གསུམ་མངར་གསུམ་དང༌། འབྲུ་སྣ་ཚོགས་དང༌། ཀུ་ཤ་དང་ཡོན་ཆབ་རྣམས་གཡས་སུ་གཞག །མེ་ཏོག་ལ་སོགས་པའི་མཆོད་པ་ལྔ་དང༌། བསང་གཏོར་དྲི་ཆབ་དང༌། ཞལ་བསིལ་བའི་ཆུ་གཙང་རྣམས་གཡོན་དུ་གཞག །མར་གསར་བ་ཞུ་བའི་ཁུ་བ་དང༌། དགང་གཟར་བླུགས་གཟར་རྣམས་མདུན་དུ་གཞག་གོ །རྫས་བསགས་པའོ། །དེ་ནས་སྔགས་པས་ཆས་གོས་དཀར་པོ་དང་ལྡན་པར་བྱ་སྟེ། རབ་ཏུ་དང་བའི་ཡིད་དང་ལྡན་པས་ཀུ་ཤའི་སྟེང་བུ་སེམས་དཔའི་སྐྱིལ་ཀྲུང་གི་ཁ་ཤར་དུ་བལྟས་ཏེ། འདུག་ལ་ཞི་བའི་ལྟ་སྟངས་དང་ལྡན་པར་བྱའོ། །སྔགས་པས་འདུག་པའི་རིམ་པའོ། །དེ་ནས་ཐབ་ཁུང་གི་ཁོ་ར་ཁོར་ཡུག་ཏུ་ཙནྡན་དཀར་པོའི་ཆུས་གཏོར་ཏེ། བཏབ་ཀྱི་ནང་དུ་ཤིང་མགོ་མཇུག་མ་ལོག་པར་རྩེ་མོ་གྱེན་དུ་བསྟན་ཏོ། །ཀུན་ནས་ཟླུམ་


DTG047_Page_0409
[མ་དཔེ་གཟིགས་ན་འདིར་གནོན།]

པོར་རབ་བརྩིག་གི །ཤིང་བརྩིག་པའོ། །དེ་ནས་ཀུ་ཤ་ལ་ཨ་མྲྀ་ཏེ་ཀུཎྜ་ལི། སརྦ་བིགྷྣཱཾ་ནཱ་ཤ་ཡ་ཧཱུཾ་ཕཊ། ཅེས་བྱ་བའི་ལས་ཐམས་ཅད་པའི་སྔགས་འདིས་བསང་གཏོར་བྱས་ནས་ཐབ་ཀྱི་ཁོར་ཡུག་ཏུ་རྩེ་མོ་ཕྱིར་བསྟན་ཏེ་བཤམ་པར་བྱའོ། །ཀུ་ཤ་དགྲམ་པའི་རིམ་པའོ། །དེ་ནས་རང་ལྷའི་རྣལ་འབྱོར་བསྒོམ་པར་བྱའོ། །རེ་ཞིག་དང་པོར་ཨོཾ་སྭ་བྷཱ་ཝ་ཤུདྡྷཿ་སརྦ་དྷརྨཱཿ་སྭ་བྷཱ་ཝ་ཤུདྡྷོ྅ཧཾ། ཞེས་བརྗོད་པས་ཆོས་ཐམས་ཅད་སྟོང་ཞིང་བདག་མེད་པར་བསྒོམ། དེ་ལྟར་སྟོང་པའི་ངང་ལས་འོག་ཕྱོགས་སུ་ཡི་གེ་ཡཾ་ལས་རླུང་གི་དཀྱིལ་འཁོར་དུ་གྱུར། དེའི་སྟེང་དུ་ཟླ་བའི་དཀྱིལ་འཁོར་གྱི་སྟེང་དུ་ཡི་གེ་དྷཱིཿ་ལས་འཇམ་དཔལ་གཞོན་ནུར་བསྐྱེད་པར་བྱའོ། །དེའི་ཐུགས་ཀར་ཨཱ་རིང་པོ་ཉི་མའི་དཀྱིལ་འཁོར་བསམ་སྟེ། དེའི་འོད་ཀྱིས་རྒྱལ་བ་སྲས་དང་བཅས་པ་སྤྱན་དྲངས་ཏེ་སླར་འདུས་པ་ཐམས་ཅད་ཉི་མའི་དཀྱིལ་འཁོར་དུ་གྱུར་བར་བྱའོ། །དེའི་སྟེང་དུ་ཧཱུཾ་གི་འཕྲོ་འདུ་ལས་རྡོ་རྗེ་དཀར་པོར་གྱུར་ཏེ། དེ་ལས་འཕྲོ་འདུ་ལས་དཔལ་རྡོ་རྗེ་འཇིགས་བྱེད་སྐུ་མདོག་དཀར་པོ་ཞི་བའི་ཚུལ་ཅན་བསམས་ཏེ། ཐབ་ཀྱི་ནང་དུ་བྷྲཱུཾ་ལས་གཞལ་ཡས་ཁང་དུ་གྱུར་པར་བསམ་མོ། །ལྷའི་རྣལ་འབྱོར་གྱི་རིམ་པའོ། །དེ་ནས་མེ་སྦར་ཏེ་ཤིང་དཀར་པོ་ལས་བྱུང་བའི་གཙུབ་ཤིང་གི། མེའམ། བྲམ་ཟེའི་ཁྱིམ་ནས་མེ་བླངས་མ་ཐག་ཏུ་བླུགས་ནས་རླུང་ཡབ་ཀྱིས་གཡབས་ཏེ་སྦར་རོ། །ལས་ཐམས་ཅད་པས་བསང་གཏོར་བྱས་ནས། ཐབ་ཀྱི་ནང་དུ་རྡོ་རྗེ་ལས་མེ་ལྷ་དཀར་པོ་ཚུལ་ཞི་བ་དྲང་སྲོང་གི་ཆ་བྱད་ཅན། ཚངས་པའི་སྐུད་པ་དཀར་པོ་དང་ལྡན་པ་ཕྱག་ན་དབྱུག་པ་དང་བགྲང་ཕྲེང་དང་སྐྱབས་སྦྱིན་དང༌། གུནྡྷེ་བསྣམས་པ་ཅིག་བསྐྱེད་དོ། །དེ་ནས་བདག་གི་ཐུགས་ཀ་ནས་འོད་འཕྲོས་པས་ཤར་ལྷོ་མཚམས་ནས་ཡེ་ཤེས་ཀྱི་མེ་ལྷ་ཚུལ་སྔ་མ་དང་མཐུན་པ་ཅིག་སྤྱན་དྲང་བར་བྱ་སྟེ། ཨོཾ་པཱ་པ་ཨཧྣི་ཨ་ཀ་ཙ་མ་མ་ཤྰྣྟིཾ་ཀུ་རུ་སྭཱ་ཧཱ། ཞེས་བརྗོད་ཅིང་རླུང་ཡབ་ཀྱིས་གཡབས་པས་ཤར་ལྷོའི་མཚམས་སུ་འབྱོན་པར་བསམས་ལ་ཆུ་གཙང་དབུལ་ལོ། །ཨོཾ་ཨགྣ་ཡེ་ཨཱ་གྩྪ་ཨཱ་གྩྪ་ཨོཾ་ཨགྣ་ཡེ་སྭཱ་ཧཱ། ཞེས་ཕུལ་བས་ཕྱག་ཞལ་བསིལ་བར་བྱའོ། །དེ་ནས་ཡོན་ཆབ་དང་ཨགྣ་ཡེ་སྭཱ་ཧཱ། ཞེས་བྱ་བས་ཕུལ་ནས་ས་མ་ཡ་སྟྭཾ་ཞེས་བྱ་བས་དམ་ཚིག་གི་མེ་


DTG047_Page_0410
[མ་དཔེ་གཟིགས་ན་འདིར་གནོན།]

ལྷ་དང་གཉིས་སུ་མེད་པར་བཞུགས་པར་བསམ་མོ། །དེ་ནས་ལས་ཐམས་ཅད་པས་བསང་གཏོར་བྱས་ལ་སྔ་མ་བཞིན་དུ་དབུལ་ལོ། །དེ་ནས་མཆོད་པ་ལྔ་དབུལ་ལོ། །ཨོཾ་ཨགྣ་ཡེ་དེ་ཝ་ཏ་བཛྲ་བུཥྤེ་ཧཱུཾ། ཞེས་པས་མེ་ཏོག་དབུལ་ལོ། །ཨོཾ་ཨགྣ་ཡེ་བཛྲ་དྷཱུ་པེ་ཧཱུཾ། ཞེས་པས་བདུག་པོས་ཤངས་ལ་དབུལ་ལོ། །ཨོཾ་ཨགྣ་ཡེ་དེ་ཝ་ཏ་བཛྲ་ཨཱ་ལོ་ཀེ་ཨཱཿ་ཧཱུཾ་ཞེས་པས་མར་མེ་མདུན་དུ་དབུལ་ལོ། །ཨོཾ་ཨགྣ་ཡེ་དེ་བ་ཏ་བཛྲ་གནྡྷེ། ཞེས་དྲི་ཆབ་ཐུགས་ཀར་དབུལ་ལ། །ཨོཾ་ཨགྣ་ཡེ་དེ་ཝ་ཏ་ནཻ་ཝ་དྱེ། ཞེས་པས་བཤོས་གཙང་ཞལ་དུ་དབུལ་ལོ། །ཨོཾ་ཨགྣ་ཡེ་དེ་བ་ཏ་བཛྲ་ཞེས་པས་སྔ་མ་བཞིན་དུ་ཞལ་བསིལ་ཞལ་དུ་དབུལ་ལོ། །དེ་ནས་སྲེག་རྫས་རྣམས་ལ་བསང་གཏོར་བྱས་ཏེ། དང་པོར་མར་གྱིས་བླུགས་གཟར་བཀང་སྟེ། ན་མཿ་ས་མནྟ་བུདྡྷ་ནཱཾ་ཨགྣ་ཡེ་སྭཱ་ཧཱ། བདུན་ནམ་ཉི་ཤུ་རྩ་གཅིག་གམ། བརྒྱ་རྩ་བརྒྱད་དུ་དབུལ་ལོ། །དེ་ནས་ཏིལ་དང་མར་བསྲེས་ཏེ། ཨོཾ་སརྦ་ད་ཧ་ན་བཛྲ་སྭཱ་ཧཱ་ཞེས་དེ་བཞིན་དུ་དབུལ་ལོ། །དེ་ནས་དཱུར་བ་རེ་རེ་ནས་མར་ལ་བསྙུགས་ལ། ཨོཾ་བཛྲ་ཨཱཿ་ཡུ་ཥེ་སྭཱ་ཧཱ། ཞེས་དབུལ་ལོ། །དེ་ནས་འབྲས་ལ་སོགས་པའི་འབྲུ་རྣམས་མར་ལ་བཅུག་སྟེ། བཛྲ་པུཥྚ་ཡེ་སྭཱ་ཧཱ། ཞེས་དབུལ་ལོ། །དེ་ནས་ཀུ་ཤ་དང༌། མཆོད་སྤྲིན་གྱི་ཤིང་རྣམས་རེ་རེ་རྩེ་མོ་མར་ལ་བསྙུགས་ཤིང་དབུལ་ཏེ། ཨོཾ་ཨ་པྲ་ཏི་ཧ་ཏ་བཛྲཱ་ཡ་སྭཱ་ཧཱ། ཞེས་དབུལ་ལོ། །དེ་ནས་ཡོན་ཆབ་ལ། ཨོཾ་པྲ་ཝ་ར་སཏྐཱ་ར། ཨརྒྷཾ་པྲ་ཏཱི་ཙྪ་སྭཱ་ཧཱ། ཧཱུཾ་ཞེས་དབུལ་ལོ། །དེ་ནས་རྡོ་རྗེ་དྲིལ་བུ་བླངས་ཏེ་ཚིགས་སུ་བཅད་པ་འདི་བརྗོད་དོ། །སྲིད་པ་རང་བཞིན་གྱིས་དག་ཕྱིར། །ངོ་བོ་ཉིད་ཀྱིས་དག་པར་བྱེད། །རང་བཞིན་དག་པའི་སེམས་ཅན་རྣམས། །དམ་པ་སྲིད་པའི་བྱེད་པའོ། །བརྗོད་དེ། ཨོཾ་ཀཱ་པ་ཀ་ཨགྣ་ཡེ་མ་མ་ཤཱནྟིཾ་ཀུ་རུ་སྭཱ་ཧཱ། ཞེས་བརྗོད་ཅིང་ཐབ་ཏུ་གཏོར་རོ། །ཕྲིན་ལས་བཅོལ་ཏེ་མེ་ལྷ་ཉིད་མེ་འབར་བའི་རང་བཞིན་དུ་གྱུར་བར་བྱའོ། །དེ་ལ་བྷི་ཏ་ཧོ་ཐབ་ལ་བསྐོར་བ་ལན་གསུམ་དུ་བྱའོ། །ཕྱག་ཀྱང་བྱའོ། །དེ་ནས་ལས་ཐམས་ཅད་པས་མེ་བསང་གཏོར་བྱས་ཏེ་ཐབ་ཀྱི་དབུས་སུ་དཔལ་རྡོ་རྗེ་འཇིགས་བྱེད་རང་དང་འདྲ་བར་སྔོན་གྱི་རིམ་པས་བསྐྱེད་པས་རང་གི་སྙིང་གའི་ས་བོན་གྱི་འོད་ཟེར་གྱིས་ཡེ་ཤེས་ཀྱི་འཇིགས་བྱེད་སྤྱན་དྲང་བར་བྱ་


DTG047_Page_0411
[མ་དཔེ་གཟིགས་ན་འདིར་གནོན།]

སྟེ། ཨོཾ་ཧྲཱིཿ་བྷོ་བྷོ་མ་ཧཱ་ཀྲོ་དྷ། ཨཱ་གྩྪ་ཨཱ་གྩྪ་ཨ་སྨ་ཏ་པཱུ་ཛ་པྲ་ཏི་གྲྀཧྣ་པྲ་སཱ་དྷཾ་མེ་དྷཱིཿ་མཾ་ཀུ་རུ་སྭཱ་ཧཱ། ཞེས་པས་སྤྱན་དྲངས་ལ། ཨོཾ་ཧཱུཾ་ཧཱུཾ་ཕཊ་ཕཊ་ཕྱག་དང་ཞབས་བསིལ་གསོལ་ནས། མཆོད་པ་དབུལ་བར་བྱའོ། །ཨོཾ་ཧྲཱི། ཥྚྲྀཿ་ཨ་ཨརྒྷའིའོ། །ཨོཾ་ཀུ་མཱ་ར་རཱུ་པི་ཎ་ཛཿ་ཛཿ་ཧཱུཾ། མེ་ཏོག་གིའོ། །ཨོཾ་ཧྲཱིཿ་ཧ་ཧ་ཧེ་ཧེ་ཕཊ། བདུག་པའོ། །ཨོཾ་དཱིཔྟ་ལོ་ཙ་ནེ་པེ་ཀྲྀ་ཏ་ཨཱ་ན་ན་མ་ཧཱ་ཨཊྚཱ་ཊྚ་ཧ་ས་ན་དི་ནི་དཱི་པྟཱ་ཡ་སྭཱ་ཧཱ། མར་མེའོ། །ཨོཾ་ཝ་ཀྲྀ་ཏཱ་ན་ན་དུཥྚ་སཏྭ་ད་མ་ཀ་གཿ་གཿ་དྲིའོ། །ཨོཾ་ཧྲཱིཿ་ཥྚྲྀཿ་ཧཿ་བཤོས་གཙང་གིའོ། །དེ་ནས་སྲེག་རྫས་རྣམས་དབུལ་བར་བྱ་སྟེ། དེ་ལ་དང་པོར་མར་ལས་དགང་བླུགས་བརྒྱ་རྩ་བརྒྱད་དུ་དབུལ་བར་བྱ་སྟེ། ཨོཾ་ཧྲཱིཿ་ཥྚྲྀཿ་ཝི་ཀྲྀ་ཏཱ་ན་ན་ཧཱུཾ་ཆེ་གེ་མོ་ཤཱནྟྀཾ་ཀུ་རུ་སྭཱ་ཧཱ། ཞེས་དབུལ་ཏེ། དེ་ནས་ཡམ་ཤིང་ལ་སོགས་པའི་རྫས་ཐམ་ཅད་ལ་སྔགས་འདི་ཉིད་ཀྱིས་བརྒྱ་རྩ་བརྒྱད་དབུལ་ལོ། །དེ་ནས་རྡོ་རྗེ་དྲིལ་བུ་ལག་ཏུ་བླངས་ལ། སྲིད་པ་རང་བཞིན་དག་པའི་ཚིག་བརྗོད་དེ། ཡུངས་ཀར་ལ་སྔགས་འདི་ཉིད་ཀྱིས་བཟླས་ཏེ་ཕྲིན་ལས་བཅོལ་ལ་བསྐོར་བ་བྱའོ། །དེ་ནས་རྫས་ལྷག་མ་ཐམས་ཅད་མེ་ལྷ་ལ་དབུལ་ཏེ་གསང་སྔགས་འདིས་སླར་གཤེགས་སུ་གསོལ་ལོ། །ཨོཾ་ཛ་ཡ་ཛ་ཡ་སུ་ཛ་ཡ་བི་ཤྭ་རཱུ་པ་དྷ་རི་ཎི་གྩྪ་གྩྪ་སྭ་སྠཱ་ན་ཀྲྀ་ཏཾ་ཏེ་ན། ཏ་ཐཱ་ག་ཏ་ནཱཾ་སརྦ་བུདྡྷ་ཤྩ་བི་སརྫ་ཡ་མ་མ་ཀཱ་ཪྻཾ་ཀུ་རུ་སྭཱ་ཧཱ། ཞེས་བརྗོད་དེ། ཨོཾ་མུཿ་ཞེས་བརྗོད་པས་ཏིང་ངེ་འཛིན་བསྡུས་ཏེ་ཐབ་ཁུང་སྦས་ཏེ་གཞག་གོ །ཞི་བའི་སྦྱིན་སྲེག་གི་ཆོ་ག་སྟེ་བཞི་བའོ།། །།

ལྔ་པ། ཞི་བའི་འཁོར་ལོའི་ལས།


DTG047_Page_0411
[མ་དཔེ་གཟིགས་ན་འདིར་གནོན།]

དེ་ནི་ཞི་བའི་འཁོར་ལོའི་ལས་བཤད་དེ། དེ་ནས་ཉི་མ་གཉིས་པ་ལ། བྲམ་བྲེ་ལ་སོགས་པ་དགེ་བའི་རས་བླངས་ལ། གུར་གུར་དང་གི་ཝང་གིས་གཤིན་རྗེའི་འཁོར་ལོ་ལེ་ཚེ་བཅུ་དྲུག་པ། ཕྱི་རོལ་དུ་མུ་ཁྱུད་གསུམ་གྱིས་བསྐོར་བ་བྲིས་ཏེ། མུ་ཁྱུད་ཕྱི་རོལ་ལ་ཨོཾ་ཡིག་གི་ཕྲེང་བ་བྲི། མུ་ཁྱུད་པར་པ་ལ་ཀ་ཡིག་གི་ཕྲེང་བ་བྲིའོ། །ལེ་ཚེ་བཅུ་དྲུག་དབུས་དང་བཅུ་བདུན་དུ་ཡི་གེ་སུམ་ཅུ་རྩ་གཉིས་ཀྱི་འཁོར་ལོ་བྲིའོ། །དབུས་ཀྱི་ཡའི་ནང་དུ་ཆེ་གེ་མོ་ཤཱནྟིཾ་ཀུ་རུ་ཞེས་པ་ཡང་བྲིའོ། །དེའི་ཕྱི་རོལ་ལེ་ཚེ་ལ་སོགས་པ་ལ་ཧཱུཾ་རེ་རེ་སྤེལ་ལ་བྲིའོ། །དེའི་ཕྱི་རོལ་གྱི་ལེ་ཚེ་བཅུ་གཉིས་པ་ལ་ཡི་གེ་བཅུ་བའི་སྔགས་དང་སྤེལ་ཏེ་བྲིའོ། །དེ་ལྟར་བྲིས་ནས་སྤྱན་དྲངས་པ་དང༌། མཆོད་པ་དབུལ་


DTG047_Page_0412
[མ་དཔེ་གཟིགས་ན་འདིར་གནོན།]

བར་བྱ་སྟེ། བདེན་པའི་བྱིན་རླབས་དམིགས་པར་བྱའོ། །དེ་ལྟ་བུ་གཉིས་བྱ། ལྟོ་སྦྱར་གྱི་ནང་དུ་གཞག་པར་བྱའོ། །དེ་ཡང་ས་སྐོར་རིམ་པ་བཞིན་དུ་བྲི། གནམ་སྐོར་ལྡོག་སྟེ་བྲིའོ། །དེ་ལ་མཎྜལ་དཀར་པོ་བྱ་སྟེ། དེའི་སྟེང་དུ་བཞག་ལ་ཐལ་བ་དཀར་པོས་དཀྲིས་ཏེ། མེ་ཏོག་དཀར་པོ་གཏོར་ནས། བདག་ཉིད་དཀར་པོའི་ཆས་གོས་དང་ལྡན་པས་ཁ་ཤར་དུ་བལྟས་ཏེ། དཔལ་གཤིན་རྗེ་འཇིགས་བྱེད་ཀྱི་ཏིང་ངེ་འཛིན་དང་ལྡན་པས་དང་བའི་སེམས་ཀྱིས་གསང་སྔགས་བཟླས་པར་བྱའོ། །དེ་ལ་གསང་སྔགས་ནི། ཨོཾ་ཡ་མ་རཱ་ཛ་ས་དོ་མེ་ཡ། ཡ་མེ་དོ་རུ་ཎ་ཡོ་ད་ཡ། ཡ་ད་ཡོ་ནི་ར་ཡ་ཀྵེ་ཡ། ཡཀྵེ་ཡཙྪ་ནི་རཱ་མ་ཡ་ཆེ་གེ་ཤཱནྟིཾ་ཀུ་རུ་སྭཱ་ཧཱ། ཞེས་པ་ནི་སྔགས་སོ། །ཨོཾ་ཧྲཱིཿ་ཥྚྲིཿ་ཝི་ཀྲྀ་ཏཱ་ན་ན་ཧཱུཾ་ཧཱུཾ་ཆེ་གེ་མོ་ཤཱནྟིཾ་ཀུ་རུ་སྭཱ་ཧཱ། ཞེས་པ་འདི་ནི་ལས་ཀྱི་སྔགས་ཏེ། འདི་དག་བཟླས་པར་བྱའོ། །དེ་ནས་གསངས་སྔགས་བརྗོད་པ་དང༌། འཁོར་ལོ་དེ་ཁྱིམ་གང་ཞི་བར་བྱེད་པའི་གནས་སམ། བཀྲ་ཤིས་གསང་པའི་གནས་སུ་སྦ་བར་བྱས་ན་ཞི་བར་འགྱུར་རོ། །འདི་ཡང་ཞི་བ་ཉིད་གཅོར་བསྒྲུབ་པའི་དུས་ན་ཉི་མ་བཞི་པ་ཡིན་ལ། གཞན་གྲངས་ཙམ་ཡིན། ཉིན་གཅིག་གིས་ཡིན་ནོ། །ཞི་བའི་འཁོར་ལོའི་ལས་ཀྱི་རིམ་པ་སྟེ་ལྔ་བའོ།། །།

དྲུག་པ། ཞི་བའི་བསམ་གཏན་གྱི་ལས།


DTG047_Page_0412
[མ་དཔེ་གཟིགས་ན་འདིར་གནོན།]

ད་ནི་ཞི་བའི་བསམ་གཏན་གྱི་ལས་བཤད་པར་བྱ་སྟེ། འདི་ཡང་སྔ་མ་བཞིན་དུ་ཉི་མ་དྲུག་པ་ལ་ཆས་གོས་དཀར་བ་དང་ལྡན་པས་ཁ་ཤར་དུ་བལྟས་ཏེ། འདུག་ནས་དཔལ་རྡོ་རྗེ་འཇིགས་བྱེད་ཀྱི་ཏིང་ངེ་འཛིན་དུ་བྱས་ཏེ། དེའི་ཐུགས་ཀར་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་པདྨ་དཀར་པོ་འདབ་མ་བརྒྱད་པ་གེ་སར་ལ་པདྨ་ཡི་གེ་ཨ་དཀར་པོ་དང་ལྡན་པར་བསམ་མོ། །མདུན་དུ་ཟླ་བའི་དཀྱིལ་འཁོར་གྱི་སྟེང་དུ་བསྒྲུབ་བྱ་བསམས་ཏེ། དེ་ནས་ཐུགས་ཀའི་ཨ་ལས་ཡེ་ཤེས་ཀྱི་བདུད་རྩིའི་འོད་ཟེར་གྱི་འཕྲོས་པས་བསྒྲུབ་བྱའི་ལུས་ངག་ཡིད་ལ་ཐིམ་སྟེ། དེ་ལ་ལུས་ངག་ཡིད་གསུམ་གྱི་སྐྱོན་ཐམས་ཅད་བྱང་ནས། བྱང་ཆུབ་ཀྱི་སེམས་དང་ལྡན་པར་བསམ་མོ། །ཞི་བའི་བསམ་གཏན་གྱི་ལས་ཀྱི་རིམ་པ་སྟེ་དྲུག་པའོ།། །།

བདུན་པ། ལས་ཀྱི་ལྷག་ཆད་བསྐང་བ།


DTG047_Page_0412
[མ་དཔེ་གཟིགས་ན་འདིར་གནོན།]

དེ་ནས་ཉི་མ་བདུན་པ་ལ་ལས་ཀྱི་ལྷག་ཆད་ཁ་བསྐང་བར་བྱ་སྟེ། གཏོར་མ་དང་སྦྱིན་སྲེག་གི་བྱ་བ་དང༌། སོ་སོར་བཤགས་པའི་མདོ་གདོན་པ་དང༌། སྡིག་པ་བཤགས་ཤིང་སྨོན་ལམ་གདབ་པར་བྱའོ། །བྷཻ་ར་བའི་ཞི་བའི་བྱ་བ་བདུན་པ། པཎྜཱི་ཏ་ཨ་མོ་གྷ་ཆུང་བས་མཛད་པ་རྫོགས་སོ།།

དྲག་པོའི་བྱ་བ་བདུན་པ།
ཨམོགྷ་ཆུང་བ།

དང་པོ། མཆོད་སྦྱིན་བྱ་བའི་ཆོ་ག


DTG047_Page_0413
[མ་དཔེ་གཟིགས་ན་འདིར་གནོན།]

དཔལ་རྡོ་རྗེ་འཇིགས་བྱེད་ལ་ཕྱག་འཚལ་ལོ། །དྲག་པོའི་ལས་ཀྱི་བྱ་བ་བདུན་བཤད་པར་བྱ་སྟེ། དེ་ལ་དང་པོར་མཆོད་སྦྱིན་བྱ་སྟེ། འཕགས་པ་མཆོད་པ་དང༌། འགྲོ་བ་ལ་སྦྱིན་གཏོང་བཏང་བ་དང༌། བླ་མ་ལ་སོགས་པ་སྤྱན་དྲངས་ཏེ། ཇི་ལྟར་འབྱོར་བའི་ཡོན་ཏན་ཕུལ་ནས། བཀའི་གནང་བ་དང༌། སྨོན་ལམ་ནོད་པར་བྱའོ། །མཆོད་སྦྱིན་བྱ་བའི་ཆོ་ག་སྟེ་དང་པའོ།། །།

གཉིས་པ། དྲག་པོའི་གཏོར་མའི་ལས།


DTG047_Page_0413
[མ་དཔེ་གཟིགས་ན་འདིར་གནོན།]

ད་ནི་གཏོར་མའི་ལས་བཤད་དེ། དེ་ནས་ཉི་མ་གཉིས་པ་ལ་མེ་ཏོག་ནག་པོ་དང༌། ཤ་ཆེན་པོའི་བདུག་སྤོས་དང༌། ཏིལ་ཆེན་པོའི་མར་མེ་དང༌། བདུད་རྩི་རྣམ་ལྔ་དང་ལྡན་པའི་དྲི་ཆབ་དང༌། བཤོས་གཙང་ཀྱང་མི་ལ་སོགས་པའི་གདོང་པ་ཅན་གྱི་ཤ་དང༌། རྟ་དང་བོང་བུ་དང༌། རྔ་མོ་ལ་སོགས་པ་ཕྱུགས་སྣ་ཚོགས་ཀྱི་ཤ་དང༌། ཁྱི་དང་ཝ་ལ་སོགས་པ་གཅན་གཟན་སྣ་ཚོགས་ཀྱི་ཤ་དང༌། གང་ན་བྱ་རྒོད་དང་འུག་པ་ལ་སོགས་ཏེ། འདབ་ཆགས་སྣ་ཚོགས་ཀྱི་ཤ་ལས་བྱས་པའི་བཤོས་གཙང་དང༌། གཏོར་མ་དུ་འབྱོར་བ་བྱའོ། །གཞན་ལས་ཀྱི་གཏོར་མ་ཆ་གཅིག་འབྲུ་ནག་པོ་དུག་སྣ་ཚོགས་དང༌། མི་དང་ཁྱི་དང་རའི་ཁྲག་དང༌། ལྕགས་ཕྱེ་དང༌། རྡོ་ཕྱེ་དང། སྐྱེ་ཚེ་དང༌། ལན་ཚྭ་དང་སྦྱར་བ་དག་ཀྱང་གཞག་གོ །དེ་ནས་སྔགས་པ་བདག་ཉིད་ཆས་གོས་ནག་པོ་གོན་ནས་ཁ་ལྷོ་ཕྱོགས་སུ་བལྟས་ཏེ། ལྷའི་ཏིང་ངེ་འཛིན་ཁྲོ་བོར་བསྒོམ་པ་མ་གཏོགས་པ་མཆོད་པའི་རང་བཞིན་ལས་བདུན་བཞིན་བསྒོམ་པར་བྱའོ། །དེ་ལ་རེ་ཞིག་དང་པོར་ཨོཾ་སྭ་བྷཱ་ཝ་ཤུདྷཿ་སརྦ་དྷརྨཱཿ་སྭ་བྷཱ་ཝ་ཤུདྡྷོ྅ཧཾ། ཞེས་བརྗོད་དེ། ཆོས་ཐམས་ཅད་བདག་མེད་པའི་བདག་ཉིད་དུ་བསྒོམ་པར་བྱའོ། །དེ་ནས་ནམ་མཁའི་དཀྱིལ་དུ་ཡི་གེ་ཡཾ་ལས་གྲུབ་པ་རླུང་གི་དཀྱིལ་འཁོར་དུ་གྱུར་བའི་སྟེང་དུ་ཡི་གེ་ཨ་ལས་ཟླ་བའི་དཀྱིལ་འཁོར་དུ་བསམས་ཏེ། དེའི་སྟེང་དུ་ཡི་གེ་ལཾ་ལས་འཇམ་དཔལ་གཞོན་ནུ་སྐུ་མདོག་སེར་པོ་ཨུཏྤལ་བསྣམས་པ་ཞིག་ཏུ་བསྐྱེད་དོ། །དེའི་ཐུགས་ཀར་ཨཱ་རིང་པོ་ལས་ཉི་མའི་དཀྱིལ་འཁོར་བསྐྱེད་དེ། དེའི་འོད་ཟེར་གྱིས་ཕྱོགས་བཅུ་མཐའ་ཡས་པའི་རྒྱལ་བ་སྲས་དང་བཅས་པ་སྤྱན་དྲངས་ནས། སླར་དེ་ཉིད་ལ་ཞུགས་པས་ཐམས་ཅད་


DTG047_Page_0414
[མ་དཔེ་གཟིགས་ན་འདིར་གནོན།]

ཀྱང་ཉི་མའི་དཀྱིལ་འཁོར་འོད་ཟེར་འབར་བས་དཔག་ཚད་བརྒྱ་སྟོང་དུ་ཁྱབ་པར་བསམ་མོ། །དེའི་སྟེང་དུ་ཧཱུཾ་ནག་པོ་འོད་ཟེར་ལྔ་དང་ལྡན་པ་འཕྲོས་པས་སྔ་མ་བཞིན་དུ་དེ་ཉིད་ལ་ཞུགས་པས། རྡོ་རྗེ་ཆེན་པོ་ཁ་གདེངས་པ་འོད་ཟེར་འཕྲོ་བ་ཅིག་ཏུ་གྱུར་ཏེ། སྐུ་མདོག་བསྡུས་པ་སྦྱོར་བས་འཇིགས་བྱེད་ཆེན་པོའི་སྐུར་གྱུར་པར་བྱ་སྟེ། འདི་ལྟར་འཇིགས་བྱེད་ཆེན་པོ་ཞལ་དགུ་བ། ཕྱག་སུམ་ཅུ་རྩ་བཞི་པ། ཞབས་བཅུ་དྲུག་པ། སྐུ་ལས་བསྐལ་པའི་མེ་འབར་བ། ཞལ་ནས་འཇིགས་པ་ཆེན་པོའི་ཕེཾ་སྐད་གནམ་དུ་འདོན་ཅིང༌། བསྐལ་བའི་འབྲུག་ལྟ་བུའི་གདངས་སྐད་ཅན། རྐང་པའི་སྟབས་ཀྱིས་ས་གཞི་གནོན་པ། མི་མགོའི་ཕྲེང་བ་དང་ཐོད་པའི་དབུ་རྒྱན་ཅན་གཅེར་བུ་མཚན་མ་གྱེན་དུ་བགྲེང་བ། ཞལ་དགུ་ལ་མ་ཧེ་དང༌། གཡས་ཀྱི་ཞལ་གསུམ་ནི་མཐིང་ག་དང༌། དམར་པོ་དང་སེར་པོ་སྟེ་ཁྲོས་པའོ། །གཡོན་པའི་ཞལ་གསུམ་ནི་དཀར་པོ་དང༌། དུ་དཀར་དང་ནག་པོའོ། །རྭ་གཉིས་ཀྱི་དབུས་ཀྱི་ཞལ་དམར་པོའོ། །དེའི་སྟེང་དུ་ཀུན་དུ་བཟང་པོ་སེར་བའོ། །ཕྱག་གཡས་པ་ན་ཀཱ་རྟ་རི་དང༌། བྷི་ཏི་པ་ལ་དང་གཏུན་ཤིང་དང༌། ཆུ་གྲི་དང་ཀ་ན་ཡ་དང༌། སྟ་རེ་དང་མདུང་དང༌། མདའ་དང་ལྕགས་ཀྱུ་དང༌། དབྱུག་ཏོ་དང༌། ཁ་ཊྲཱཾ་ག་དང་འཁོར་ལོ་དང་རྡོ་རྗེ་དང༌། རྡོ་རྗེ་ཐོ་བ་དང་རལ་གྲི་དང་རྗེ་ཆུང་བསྣམས་པའོ། །ཕྱག་གཡོན་ན་པཱ་ལ་དང་མགོ་བོ་དང༌། ཕུབ་དང་རྐང་པ་དང༌། ཞགས་པ་དང་གཞུ་དང༌། རྒྱུ་མ་དང་དྲིལ་བུ་དང༌། ལག་པ་དང་དུར་ཁྲོད་ཀྱི་རས་དང༌། དཔལ་རྩེས་ཕུག་པའི་སྐྱེས་བུ་དང༌། མེ་ཐབ་དང་ཐོད་ཚལ་དང༌། སྡིག་མཛུབ་དང༌། བ་དན་ལྕེ་གསུམ་པ་དང༌། རླུང་གི་རས་བསྣམས་པ། ཕྱག་གཉིས་གླང་པོ་ཆེའི་ལྤགས་རློན་འཛིན་པའོ། །གཡས་ཀྱི་ཞབས་རྣམས་ཀྱིས་མི་དང་མ་ཧེ་དང༌། ཁྱུ་མཆོག་དང་བོང་བུ་དང་རྔ་མོ་དང་ཁྱི་དང༌། ལུག་དང་ཝ་རྣམས་བརྫིས་པའོ། །གཡོན་གྱི་ཞབས་རྣམས་ཀྱིས་བྱ་རྒོད་དང་འུག་པ་དང༌། བྱ་རོག་དང་སུ་ཀར་དང༌། ཁྲ་དང༌། བྱ་རྒོད་ཆེན་པོ་དང༌། མ་དྲི་དང༌། བཞད་རྣམས་བརྫིས་པ་སྟེ། དེ་ལྟ་བུ་བསམ་མ། །དེ་ནས་བདག་གི་སྙིང་གའི་འོད་ཟེར་གྱིས་ཡེ་ཤེས་ཀྱི་གནས་ནས་སྤྱན་དྲང་བར་བྱ་སྟེ། ཨོཾ་ཧྲཱིཿ་བྷོ་བྷོ་མ་ཧཱ་མ་ཧཱ་ཀྲོ་དྷ་ཨཱ་གྩྪ་གྩྪ། ཨ་སྨ་ཏྭ་པཱུ་ཛ་པྲ་ཏི་ཏི་གྲྀཧྞཱ་


DTG047_Page_0415
[མ་དཔེ་གཟིགས་ན་འདིར་གནོན།]

པྲ་སཱ་དྷཾ། མེ་དྷཱིཿ་མཾ་ཀུ་རུ་སྭཱ་ཧཱ། ཞེས་སྤྱན་དྲངས་ཏེ། མངོན་སུམ་དུ་དམིགས་ལ། ཨོཾ་ཧཱུཾ་ཧཱུཾ་ཕཊ་ཕཊ་ཅེས་བྱ་བས་བདུད་རྩི་ལྔ་དང་ལྡན་པའི་ཆུས་སྐུ་ཁྲུས་གསོལ་ལོ། །དེ་ནས་དམར་གྱི་ཨརྒྷ་དབུལ་ལོ། །ཨོཾ་ཧྲཱིཿ་ཥྚྲིཿ་ཧ་ཞེས་སོ། །དེ་ནས་མེ་ཏོག་ལ་སོགས་པ་དབུལ་ཏེ། ཨོཾ་ཀུ་མཱ་ར་རཱུ་པི་ཎི་ཛིཿ་ཛཿ་ཧཱུཾ་ཧོ་ཞེས་བརྗོད་དེ། མེ་ཏོག་ནག་པོ་འབུལ་ལོ། །ཨོཾ་ཧྲཱིཿ་ཧ་ཧ་ཧེ་ཧེ་ཕཊ་ཅེས་ཤ་ཆེན་པོ་བདུག་སྤོས་དབུལ་ལོ། །ཨོཾ་དཱིཔྟ་ལོ་ཙ་ནི་ཝི་ཀྲྀ་ཏཱ་ན་ན་མ་ཧཱ་ཨཊྚཱ་ཊྚ་ཧཱ་ས་ན་དི་ནི་དཱིཔྟ་དཱིཔྟཱ་ཡ་སྭཱ་ཧཱ། ཞེས་ཏིལ་ཆེན་པོའི་མར་མེ་དབུལ་ལོ། །ཨ་ཧྲཱིཿ་ཧ་ཧ་ཧེ་ཧེ་ཕཊ་ཕཊ་ཅེས་སྣ་ཚོགས་ཀྱིས་བཤོས་གཙང་དབུལ་ལོ། །ཨོཾ་ཝི་ཀྲྀ་ཏཱ་ན་ན་དུཥྚ་སཏྭ་ད་མ་ཀ་གཿ་གཿ་ཞེས་བདུད་རྩི་ལ་ལྡན་པའི་དྲི་ཆབ་དབུལ་ལོ། །མཉེས་པར་བསམ་མོ། །དེ་ནས་བདག་གི་འཁོར་ཡུག་ཐམས་ཅད་དུ། །གཤིན་རྗེ་དང་རོ་ལངས་དང༌། མཁའ་འགྲོ་མ་དང་ཕོ་ཉ་མོ་ལ་སོགས་པས་ཡོངས་སུ་གང་བར་དམིགས་ལ། གསང་སྔགས་འདིས་གཏོར་མ་སྦྱིན་ནོ། །ཨོཾ་ཀཱ་ལ་རཱུ་པ་སརྦྦ་སཏྭ་ད་མ་ཀ་མ་ཧཱ་བྷཱུ་ཏ་པ་ཏི་ཨི་དཾ་བ་ལིཾ་གྲྀཧྞ་གྲྀཧྞཱ་པ་སྭཱ་ཧཱ། ཞེས་སྦྱིན་ནོ། །དེ་ནས་ལས་ཀྱི་གཏོར་མ་ལ། ཨོཾ་ཧྲཱིཿ་ཥྚྲིཿ་ཝི་ཀྲི་ཏཱ་ན་ན་སརྦ་ཤ་ཏྲཱུཾ་ནཱ་ཤ་ཡ་སྟཾ་བྷ་ཡ་ཧཱུཾ་ཕཊ་ཅེས་བརྗོད་ཅིང་བསྒྲུབ་བྱ་སྔོན་དུ་དམིགས་ནས་དེ་ལ་གཏོར་མ་ཞིང་དེས་ཟོས་པར་དམིགས་ལ་གཏོར་མ་དང༌། སྔགས་ཀྱི་འོད་ཟེར་ཡང་དུད་པ་འདྲ་བ་ལ་འོང་སྔོན་དམར་དུ་འཁྱུད་པ། དུག་གི་རང་བཞིན་དུ་གྱུར་པ་དེ་ལ་ཐིམ་པས། ཤ་རུལ་པ་བཞིན་བསམ་ཞིང་གཏོར་མ་གཏང་བར་བྱའོ། །དྲག་པོའི་གཏོར་མའི་ལས་ཏེ་གཉིས་པའོ།། །།

གསུམ་པ། དྲག་པོའི་བཟླས་པའི་ལས།


DTG047_Page_0415
[མ་དཔེ་གཟིགས་ན་འདིར་གནོན།]

ད་ནི་དྲག་པོའི་བཟླས་པའི་ལས་བཤད་དོ། །དང་པོར་རྡོ་རྗེ་འཇིགས་བྱེད་ཀྱི་སྦྱོར་བ་ཇི་ལྟར་སྔོན་དུ་བརྗོད་པ་བཞིན་དམིགས་ཏེ། མེ་ཏོག་ལ་སོགས་པའི་མཆོད་པ་ལྔ་དང༌། སྦྱིན་གཏོང་སྦྱིན་ནས་བཟླས་པ་ལ་འཇུག་པར་བྱའོ། །དེར་བདག་ཉིད་རྡོ་རྗེ་འཇིགས་བྱེད་སྔོན་དུ་བརྗོད་པའི་རིམ་པས་བསྐྱེད་པའི་སྙིང་གར་ཨཱ་རིང་པོ་ལས་ཉི་མའི་དཀྱིལ་འཁོར་དུ་གྱུར་བའི་སྟེང་དུ་བཟླས་པའི་ཡི་གེ་བསྒོམ་པར། དེ་ལས་འོད་ཟེར་མེ་སྔོ་ནག་ཏུ་འབར་བ་རླུང་ནག་པོས་རབ་ཏུ་བུས་པ་འདྲ་བ། རབ་ཏུ་རྣོ་བ་ལྕགས་ཀྱི་ཕ་བོང་ཡང་སྐད་ཅིག་ཙམ་གྱིས་མེད་པར་བྱེད་པ་རབ་ཏུ་འཕྲོ་བ་བསྒོམ་མོ། །དེས་བསྒྲུབ་པར་


DTG047_Page_0416
[མ་དཔེ་གཟིགས་ན་འདིར་གནོན།]

བྱ་བ་བདག་གི་མདུན་ན་མདངས་བྲལ་བ་ལྷ་དང་བྲལ་བ་གོས་མེད་པ་གཅེར་བུ་སྐྲ་ལྷུག་པར་འདུག་པ། ཡན་ལག་ཐམས་ཅད་གནམ་ལྕགས་འབར་བས་བཅིངས་པ། རྨ་དང་ཤུ་བའི་ཕྲེང་བས་རྒྱུས་པ། དེ་ལྟ་བུ་བསམས་ནས། དེའི་ལུས་ཐལ་བའི་ཕུང་པོ་བཞིན་དུ་བསྲེགས་ཏེ། སེམས་མར་མེ་ཆུས་བསད་པ་བཞིན་བསམ་ཞིང་གསང་སྔགས་བརྗོད་པར་བྱའོ། །དེ་ལ་གསང་སྔགས་འདིའོ། །ཨོཾ་ཡ་མ་རཱ་ཛ་ས་དོ་མེ་ཡ། ཡ་མེ་དོ་རུ་ཎ་ཡོ་ད་ཡ། ཡ་ད་ཡོ་ནི་ར་ཡ་ཀྵེ་ཡ། ཡཀྵེ་ཡ་ཙྪ་ནི་རཱ་མ་ཡ། ཆེ་གེ་མོ་མཱ་ར་ཡ་ཕཊ་ཕཊ། འདི་ནི་རྩ་བྸི་སྔགས་ཏེ། ལས་ཐམས་ཅད་པའོ། །ཨོཾ་ཧྲཱིཿ་ཥྚྲྀཿ་ཝི་ཀྲྀ་ཏཱ་ན་ན་ཆེ་གེ་མོ་མཱ་ར་ཡ་ཧཱུཾ་ཕཊ། འདི་ནི་ལས་ཀྱི་སྔགས་ཏེ། ལས་ཐམས་ཅད་པའོ། །བཟླས་པ་བརྗོད་ནས་ཡང་མཆོད་པ་ཕུལ་ལ། མི་དམིགས་པའི་དབྱིངས་སུ་བསྡུ་བར་བྱའོ། །འདི་དག་ཞིང་ཆེན་གྱི་སྟེང་ན་འདུག་སྟེ། ཁ་ལྷོ་ཕྱོགས་སུ་བལྟས་ནས་ལུས་དྲི་ཆེན་གྱིས་བྱུགས་ཏེ། མིག་ཚུགས་སྡང་མིག་མི་འགྱུར་བར་བསྒྲུབ་པར་བྱ་སྔོན་དུ་དམིགས་པ་ལྟ་ཞིང་མ་ཧེ་ཁྲོས་པ་བཞིན་དུ་འདུག་སྟེ། དུང་ཆེན་པོའི་ཕྲེང་བ་ཐོགས་ཏེ། ཆས་གོས་ནག་པོ་གོན་ནས་གསང་སྔགས་བཟླས་པར་བའོ། །དྲག་པོའི་བཟླས་པའི་ལས་ཏེ་གསུམ་པའོ།། །།

བཞི་པ། དྲག་པོའི་སྦྱིན་སྲེག་གི་ལས།

ས་སྦྱང་བའི་རིམ་པ།


DTG047_Page_0416
[མ་དཔེ་གཟིགས་ན་འདིར་གནོན།]

ད་ནི་དྲག་པོའི་སྦྱིན་སྲེག་གི་ལས་བཤད་དེ། དུར་ཁྲོད་དམ་ལམ་གྱི་བཞི་མདོའམ་ཤིང་རྐང་གཅིག་གི་དྲུང་ངམ། འཐབ་མོའི་གནས་ལ་སོགས་པར་མར་གྱི་ངོ་བོ་ནམ་བྱེད་ན་སོང་སྟེ། དང་པོར་སྦྱང་བར་བྱའོ། །རེ་ཞིག་དང་པོར་ལྷའི་ཏིང་ངེ་འཛིན་དང་ལྡན་པས་གཏོར་མ་བསྔོས་ཏེ། བཀའ་བསྒོ་བར་བྱའོ། །དེ་ནས་ཡི་གེ་ཧཱུཾ་རབ་ཏུ་འབར་བའི་འོད་ཟེར་གྱིས་ས་སྐྱོན་ཐམས་ཅད་དག་པར་བསམ་ཞིང་ས་སྦྱང་བའི་རིམ་པའོ། །

ཐབ་བརྩིག་པའི་རིམ་པ།


DTG047_Page_0416
[མ་དཔེ་གཟིགས་ན་འདིར་གནོན།]

དེ་ནས་ཐབ་བརྩིག་པར་བྱ་སྟེ། ཐབ་ཁུང་གྲུ་གསུམ་ཁྲུ་གང་པ་ཟབས་སུ་ཁྲུ་ཕྱེད་པར་བགོས་ཏེ། ཁ་ཁྱེར་སོང་བཞི་པར་བྱས་ལ། དབུས་སུ་རྡོ་རྗེ་ནག་པོ་འབར་སོར་བརྒྱད་པ་གཅིག་དགོད། ནང་འཁོར་ཡུག་ཏུ་དུར་ཁྲོད་ཀྱི་སོལ་བ་དང༌། ཐལ་ཆེན་དང་རཀྟ་བསྲེས་ཏེ་བྱུག །ཁ་ཁྱེར་རྡོ་རྗེ་ར་བ་དང༌། མི་ཐོད་ཀྱིས་བསྐོར། ཁོར་ཡུག་ཏུ་སྔོ་ནག་གི་ཕྲེང་བས་བསྐོར་རོ། །ཐབ་བརྩིག་པའི་རིམ་པའོ། །

རྫས་བསག་པའི་རིམ་པ།


DTG047_Page_0417
[མ་དཔེ་གཟིགས་ན་འདིར་གནོན།]

དེ་ནས་སྲེག་རྫས་བསོགས་ཏེ་མེ་ཏོག་ནག་པོ་ལ་སོགས་པའི་སྔོན་དུ་བསོགས་པའི་མཆོད་པ་ལྔ་དང༌། བདུད་རྩི་རྣམ་པ་ལྔ་དང་ལྡན་པའི་བསང་གཏོར་དང༌། དུར་ཁྲོད་ཀྱི་མགུལ་དུམ་གྱི་བུང་ཤིང་དང༌། ཤིང་གདུག་པ་ཚེར་མ་ཅན་གྱི་རྩ་བ་ལས་བྱས་པའི་ཤཀ་ཏེའུ་སོར་བཞི་པ་ལ་ཡོན་པར་བཞོགས་པ་དང༌། ཁྲག་དང་ཐལ་ཆེན་དང་ཚ་བའི་རྫས་ཀྱི་ནང་དུ་སྤངས་ལ། འབྲུ་ཚྭ་བ་ནག་པོ་ལས་བྱུང་བའི་མར་ཁུ་དང༌། མི་རུས་དང་དྲི་ཆེན་དང༌། བོང་བུའི་རྟུགས་པ་དང༌། ཚེར་མ་དང་སྐྲ་དང་སེན་མོ་རྣམས་མར་ནག་པོ་དང་སྦྱར་ཏེ་བསག་གོ །རྫས་བསག་པའི་རིམ་པའོ། །

མེ་ལྷ་མཆོད་པའི་རིམ་པ།


DTG047_Page_0417
[མ་དཔེ་གཟིགས་ན་འདིར་གནོན།]

དེ་ནས་སྔགས་པས་ཆས་གོས་ནག་པོ་དང་ལྡན་པས། ཁ་ལྷོ་ཕྱོགས་སུ་བལྟས་ཏེ། དུར་ཁྲོད་ཀྱི་མགལ་དུམ་གྱི་ཤིང་གིས་ཐབ་ཁུང་གྲུ་གསུམ་དུ་བརྩིགས་སོ། །རཀྟ་དང་ཚ་བའི་མར་གྱིས་ཀྱང་བྲན་པར་བྱའོ། །ཤིང་གི་བརྩིག་པའི་རིམ་པའོ།། །།དེ་ནས་སྔགས་པ་བདག་ཉིད་དཔལ་རྡོ་རྗེ་འཇིགས་བྱེད་ཀྱི་ཏིང་ངེ་འཛིན་སྔོན་དུ་བརྗོད་པའི་རིམ་པ་བཞིན་དུ་ཞུགས་ཏེ། རིགས་ངན་གྱི་མེའམ། རྡོ་རྗེ་ནག་པོ་ལས་བྱུང་བའི་མེ་བླངས་ཏེ་རླུང་ཡབ་ཀྱིས་སྦར་བར་བྱའོ། །དེའི་དབུས་སུ་རཾ་ནག་པོ་ལས་མེ་ལྷ་མདོག་ནག་པོ་མེ་གྲུ་གསུམ་གྱི་སྟེང་ན་འདུག་པ་ཞལ་གཅིག་ཕྱག་བཞི་པ། མིག་གསུམ་པ། སྐྲ་གྱེན་དུ་བརྫེས་པ། རླུང་ནག་པོ་འཐུབ་པའི་ནང་དུ་བཞུགས་པ། ལུས་ལས་མེ་ནག་པོ་འཕྲོ་བ། ཚངས་སྐུད་ནག་པོ་ཅན། ཕྱག་ན་རྡོ་རྗེ་དང་བགྲང་ཕྲེང་དང་དབྱུག་པ་དང་གུནྡྷེ་བསྣམས་པ་བཞི་བསྐྱེད་དོ། །ལྕགས་ཀྱུའི་ཕྱག་རྒྱ་བཅིངས་ལ། ཨོཾ་ཀྲོ་དྷ་ཨགྣ་ཡེ་ཨ། དེ་ནས་བདག་གི་ཐུགས་ཀ་ནས་འོད་ཟེར་ལྕགས་ཀྱུ་དང་འདྲ་བ་འཕྲོས་ཏེ། ཡེ་ཤེས་ཀྱི་མེ་ལྷ་དེ་དང་འདྲ་བ་ཅིག་སྤྱན་དྲངས་ལ། ཤར་ལྷོ་མཚམས་སུ་གཞུག་པར་བྱ་སྟེ། ལྕགས་ཀྱུའི་ཕྱག་རྒྱ་བཅངས་ལ། ཨོཾ་ཀྲོ་དྷ་ཨགྣ་ཡེ་ཨཱ་གྩྪ་མ་མ་སརྦ་ཤ་ཏྲཱུཾ་མཱ་ར་ཡ་ཧཱུཾ་ཕཊ། ཅེས་བརྗོད་པས་ཞལ་བསིལ་གསོལ་ནས། དམ་ཚིག་གི་མེ་ལྷ་དང་གཉིས་སུ་མེད་པར་གཞུག་པར་བྱའོ། །དེ་ནས་མེ་ཏོག་ལ་སོགས་པའི་མཆོད་པ་ལྔ་དབུལ་ཏེ། ཨོཾ་ཀྲོ་དྷ་ཨགྣ་ཡེ་བཛྲ་གནྡྷེ་ཧཱུཾ་དྲིའོ། །ཨོཾ་ཀྲོ་དྷ་ཨགྣ་ཡེ་བཛྲ་ནཻ་བི་དྱེ་ཧཱུཾ། བཤོས་གཙང་གིའོ། །དེ་ནས་སྲེག་རྫས་རྣམས་


DTG047_Page_0418
[མ་དཔེ་གཟིགས་ན་འདིར་གནོན།]

དབུལ་ཞིང༌། ཨོཾ་ཀྲོ་དྷ་ཨགྣ་ཡེ་མ་མ་སརྦ་ཤ་ཏྲཱུཾ་མ་ར་ཡ་ཧཱུཾ་ཕཊ། ཅེས་བྱ་བའི་སྔགས་ཀྱིས་བརྒྱ་རྩ་བརྒྱད་དུ་སྦྱིན་སྲེག་བྱའོ། །དེ་ནས་ཡུངས་ཀར་ཐབ་ཏུ་གཏོར་ལ་གསང་སྔགས་དེ་ཉིད་ཀྱིས་ཕྲིན་ལས་བཅོལ་ལོ། །དེ་ནས་རྡོ་རྗེ་དྲིལ་བུ་བླངས་ཏེ། ཚིགས་སུ་བཅད་པ་འདི་བརྗོད་དོ། །སྲིད་པ་རང་བཞིན་གྱིས་དག་ཕྱིར། །ངོ་བོ་ཉིད་ཀྱིས་དག་པར་བྱེད། །རང་བཞིན་དག་པའི་སེམས་དཔའ་རྣམས། །དག་པའི་སྲིད་པ་བྱེད་པའོ། །ཞེས་བརྗོད་ནས་མེ་ཐབ་ལན་གསུམ་བསྐོར་བར་བྱའོ། །མེ་ལྷ་མཆོད་པའི་རིམ་པའོ།། །།

དྲག་པོའི་སྦྱིན་སྲེག་གི་ལས་དངོས།


DTG047_Page_0418
[མ་དཔེ་གཟིགས་ན་འདིར་གནོན།]

དེ་ནས་མེ་ལྷ་དེ་མེ་འབར་བའི་རང་བཞིན་དུ་གྱུར་པར་བསམས་ཏེ། དེའི་དཀྱིལ་དུ་ཡི་གེ་ཧཱུཾ་ནག་པོ་ལས་དཔལ་རྡོ་རྗེ་འཇིགས་བྱེད་རབ་ཏུ་འཁྲུགས་པ་ཞལ་རབ་ཏུ་གདངས། གྲུ་གསུམ་དུ་འདུག་པ། སྐུ་དང་ཞལ་གསུམ་དུ་མེ་སྨུག་ནག་འབར་བ་ཅིག་ཆུ་བསམ་མོ། །དེ་ནས་བདག་གི་སྙིང་ནས་འོད་ཟེར་ལྕགས་ཀྱུ་འདྲ་བ་འཕྲོས་པས། ཡེ་ཤེས་ཀྱི་དཔལ་རྡོ་རྗེ་འཇིགས་བྱེད་སྤྱན་དྲངས་ཏེ། ལྕགས་ཀྱུའི་ཕྱག་རྒྱ་བཅངས་ལ། ཨོཾ་ཧྲཱིཿ་བྷོ་བྷོ་མ་ཧཱ་ཀྲོ་དྷ་ཨཱ་གྩྪ་ཨཱ་གྩྪ་པཱུ་ཛ་པྲ་ཏི་གྲྀཧྞཱ་པྲ་ས་དྷ་མེ་དྷཱི་མཾ་ཀུ་རུ་སྭཱ་ཧཱ། ཞེས་བརྗོད་པས་ཐབ་ཀྱི་དཀྱིལ་དུ་གཉིས་སུ་མེད་པར་བསམ་པར་བྱའོ། །དེ་ནས་བདུད་རྩི་ལྔ་དང་ལྡན་པའི་ཞལ་བསིལ་དབུལ་ཏེ། ཨོཾ་ཧཱུཾ་ཧཱུཾ་ཕཊ་ཕཊ་ཅེས་སྐུ་ཁྲུས་གསོལ་ཏེ། ཨོཾ་ཧྲཱིཿ་ཥྚྲྀཿ་ཨ་ཞེས་དམར་གྱི་ཨརྒྷ་ཕུལ་ནས། དེ་ནས་མཆོད་པ་རྣམ་ལྔ་དབུལ་ཏེ། ཨོཾ་ཀུ་མཱ་རཱ་རུ་པི་ཎི་ཛཿ་ཛཿ་ཧཱུཾ་ཧ། མེ་ཏོག་ནག་པོའིའོ། །གཏོར་རོ། ཨོཾ་ཧྲཱིཿ་ཧ་ཧ་ཧེ་ཧེ་ཕཊ་ཕཊ། ཤེ་ཆེན་པོའི་བདུག་པའིའོ། །ཨོཾ་དཱིཔྟ་ལོ་ཙྪ་ནི་ཝི་ཀྲྀ་ཏཱ་ན་ན་མ་ཧཱ་ཨཊྚ་ཊྚ་ཧཱ་ས་ན་དི་ནི་དཱིཔྟ་དཱིཔྟཱ་ལ་སྭཱ་ཧཱ། ཏིལ་ཆེན་པོའི་མར་མེའོ། །ཝི་ཀྲྀ་ཏཱ་ན་ན་དུཥྚ་སཏྭ་མ་ཀ་གཿ་གཿ་བདུད་རྩི་ལྔ་དང་སྦྱར་བའི་དྲིའོ། །དེ་ནས་ཤ་ལ་སོགས་པའི་བཤོས་གཙང་དབུལ། ཨོཾ་ཧྲཱིཿ་ཥྚྲྀཿ་ཡེ་དེ་ནས་མར་ལ་སོགས་པའི་སྲེག་རྫས་དབུལ་བར་བྱ་སྟེ། ཨོཾ་ཧྲཱིཿ་ཥྚྀཿ་ཝི་ཀྲྀ་ཏཱ་ན་ན་ཧཱུཾ། ཆེ་གེ་མོ་མཱ་ར་ཡ་ཕཊ། ཅེས་བརྒྱ་རྩ་བརྒྱད་དབུལ་བར་བྱའོ། །ཡོངས་ཀར་ལ་སྔགས་དེ་ཉིད་ཀྱིས་བཟླས་ཏེ་ཕྲིན་ལས་བཅོལ་ལོ། །དེ་ནས་རྡོ་རྗེ་དྲིལ་བུ་བླངས་ཏེ། ཚིགས་སུ་བཅད་པ་འདིས་བསྟོད་པ། །སྲིད་པའི་རང་བཞིན་གྱིས་དག་ཕྱིར། །ངོ་བོ་ཉིད་ཀྱིས་


DTG047_Page_0419
[མ་དཔེ་གཟིགས་ན་འདིར་གནོན།]

དག་པར་བྱེད། །རང་བཞིན་དག་པའི་སེམས་དཔའ་རྣམས། །དམ་པའི་སྲིད་པ་བྱེད་པའོ། །ཞེས་བྱ་བ་དང༌། ཆོས་སྐུ་ངོ་བོ་ཉིད་ཀྱི་ཐུགས། །སངས་རྒྱས་རྣམས་ཀྱི་རང་བཞིན་སྐུ། །ཆོས་ཉིད་འཇམ་པ་གསུང་གི་བདག །གདོད་ནས་གྲོལ་བའི་རང་བཞིན་ཏེ། །བློ་གྲོས་ཆེན་པོའི་བདག་ཉིད་ལ། །གུས་པས་མཆོད་དེ་བསྟོད་ཕྱག་འཚལ། །སྙིང་རྗེ་ཆེན་པོའི་ཐུགས་ལྡན་པས། །འཇིགས་བྱེད་ཆེན་པོའི་ཚུལ་སྟོན་པ། །རྔམ་པའི་གསུང་ནི་འཇིགས་པ་ལ། །མི་འཇིགས་སེམས་ཀྱིས་རབ་ཏུ་གུས། །ཞེས་བསྟོད་ནས། དེ་ནས་སྲེག་རྫས་ལྷག་མ་རྣམས་མེ་ལྷ་ལ་ཕུལ་ནས། བསྐོར་བར་བྱ་སྟེ། གསང་སྔགས་འདིས་གཤེགས་སུ་གསོལ་ལོ། །ཨོཾ་ཛ་ཡ་ཛ་ཡ་སུ་ཛ་ཡ། བི་ཤྭ་རཱུ་པ་དྷ་རི་ཎི་གྩྪ་སྭ་སྠཱ་ནཾ་ཀྲི་ཏཾ་ཏེ་ན། ཏ་ཐཱ་ག་ཏ་ན། སརྦ་བྷུ་ཏཥྩ་བི་སཛྲ་ཡ། མ་མ་ཀཱ་ཪྻཾ་ཀུ་རུ་སྭཱ་ཧཱ། དེ་ནས་ཨོཾ་མུཿ་ཞེས་པས་ཏིང་ངེ་འཛིན་བསྡུས་ཏེ། ཐབ་ཁུང་ལེགས་པར་སྦས་ཏེ་གཞག་གོ །དྲག་པོའི་སྲིན་སྲེག་གི་ལས་ཏེ་བཞི་པའོ།། །།

ལྔ་པ། དྲག་པོའི་འཁོར་ལོའི་ལས།


DTG047_Page_0419
[མ་དཔེ་གཟིགས་ན་འདིར་གནོན།]

དེ་ནས་དྲག་པོའི་འཁོར་ལོའི་ལས་བྱས་ཏེ། དུར་ཁྲོད་ཀྱི་རས་ལ་དུག་དང་ཁྲག་དང༌། སྐེ་ཚེ་དང་ལན་ཚྭ་དང་དྲི་ཆེན་ལ་སོགས་པའི་བདུག་པའི་རྫས་ཀྱིས་ལེགས་པར་བྱུགས་ལ་སྣག་ཚ་ཡང་རྫས་དེ་རྣམས་དང༌། ཤིང་ད་དུ་ར་དང༌། ཀ་ན་ཀའི་ཁུ་བ་དང༌། དུར་ཁྲོད་ཀྱི་སོལ་བ་སྦྱར་ཏེ་བྱའོ། །བདག་ཉིད་ཁ་ལྷོར་བལྟས་ཏེ་ལྷའི་རྣལ་འབྱོར་དང་ལྡན་པས་འཁོར་ལོ་བྲི་སྟེ། དབུས་སུ་ལེ་ཚེ་བཅུ་དྲུག་དང༌། མུ་ཁྱུད་གསུམ་གྱིས་བསྐོར་བ། མུ་ཁྱུད་དེ་དག་རེ་རེ་ལ་ཡང༌། རེ་མིག་སུམ་ཅུ་རྩ་གཉིས་དང་ལྡན་པར་བྲིའོ། །དེ་ལ་ཡི་གེ་དགོད་པ་ནི་དབུས་སུ་ཡ་ཆེན་པོ་ཅིག་བྲིས་ཏེ། དེའི་ནང་དུ་གང་ལ་བྱ་བའི་མིང་བསྐུལ་ཚིག་ཅན་གྱིས་བསྐོར། དེའི་དབུས་སུ་མིང་གི་ཡི་གེ་དང་པོ་བྲིའོ། །དེ་ནས་རིམ་པ་གཉིས་པ་ལ་ཕྱོགས་བཞིར་མར་མེ་དཀྵེ་བཞི་བྲི། དེ་ནས་རིམ་པ་གསུམ་པ་ལ། རཱ་ཛ་ས་དོ་རུ་ཎ་ཡོ་ནི་རཱ་ཡ་ཙ་ནི། འདི་རྣམས་བྲིའོ། །ཕྱག་རྒྱ་བེ་ཅོན་བཅས་ཏེ་བྱ་རོག་གི་སྒྲོའམ་རུས་ཆེན་བྲི་བར་བྱའོ། །ཡི་གེ་བཅུ་པའི་གསང་སྔགས་དྲན་པར་བྱའོ། །མུ་ཁྱུད་ཀྱི་ཡི་གེ་ནི་དང་པོར་དབྱངས་ཡིག་ལན་གཉིས་དགོད། མུ་ཁྱུད་པར་མ་ལ་ཀ་ཡིག་དང༌། ང་ཉ་བོར་བ་སུམ་ཅུ་རྩ་


DTG047_Page_0420
[མ་དཔེ་གཟིགས་ན་འདིར་གནོན།]

གཉིས་དགོད། ཐ་མ་ལ་ཕཊ་ཤ་སྟག་དགོད་དོ། །དབུས་ཀྱི་རིམ་པ་གཉིས་པ་ལམ་ལ་སོགས་པ་ཡི་གེ་བཞིའི་གཡས་གཡོན་དུ་ཧཱུཾ་རེ་རེ་དང་སྤེལ། དེའི་ཕྱི་རིམ་དུ་ར་ལ་སོགས་པའི་ཡི་གེ་བཅུ་གཉིས་ཀྱི་གནས་སུ་ཡི་གེ་བཅུ་གཉིས་པ་དང་བསྒྲུབ་བྱའི་མིང་སྤེལ་ཏེ་བྲིའོ། །དེ་ལྟ་བུའི་འཁོར་ལོ་གཉིས་བྲིས་ཏེ། དེ་ཡང་ས་སྐོར་ལོག་པར་བྲི། གནམ་སྐོར་རིམ་པ་བཞིན་བྲི། དེ་ཡང་གཤིན་རྗེའི་ལྟོ་བར་ཚུད་པར་བྲིའོ། །དེ་ནས་མཆོད་པ་དབུལ་ཏེ། བདེ་བའི་བྱིན་རླབས་དམིགས་པར་བྱས་ནས། དེ་དག་ཁ་སྦྱར་ཏེ་ཐོད་པའམ་ཁམ་ཕོར་སར་པའི་གའུ་ཁ་སྦྱར་དུ་གཞག་གོ །གའུ་འོག་མའི་ནང་དུ་རླུང་གི་དཀྱིལ་འཁོར་ལ། ཨོཾ་ཆེ་གེ་མོ་ཨཱ་བེ་ཤ་ཨ་ཨ་ཞེས་བྲི། རྒྱབ་ཏུ་སྣ་ཚོགས་རྡོ་རྗེ་བྲི། གོང་མའི་ནང་དུ་མེའི་དཀྱིལ་འཁོར་རཾ་གྱིས་མཚན་པ་བྲི། རྒྱབ་ཏུ་རི་རབ་འཁོར་དང་བཅས་པ་རྩེ་བརྒྱད་ཀྱིས་མཚན་པ། དབུས་སུ་སྣ་ཚོགས་རྡོ་རྗེས་མཚན་པ་བྲིའོ། །གའུ་གཉིས་ཀྱི་བར་དུ་སྒོ་ཅུང་ཟད་ཅིག་བྱ་སྟེ་བཞག་ལ། ཕྱིས་གའུ་མདར་རམ་ཞུགས་པ་མཐོང་ནས་ཁ་གཅད། སྐུད་པ་ནག་པོས་དཀྲིས་ཤིང་བཏག་ནས་མན་འཇིའི་སྟེང་དུ་བཞག་སྟེ། དུག་སྣ་ཚོགས་ཀྱི་མེ་ལ་ཚ་བར་གྱུར་པ་ཙམ་དུ་བསྲོས་ཤིང་ལྷའི་རྣལ་འབྱོར་དང་ལྡན་པས་ཁ་ལྷོར་བལྟས་ཏེ་གསང་སྔགས་བཟླས་པར་བྱའོ། །དེ་ལ་དང་པོར་སྔོན་དུ་བརྗོད་པ་བཞིན་དུ། སྔོན་དུ་དཔལ་རྡོ་རྗེ་འཇིགས་བྱེད་ཆེན་པོར་བསྐྱེད་ལ་སྤྱན་དྲང་བ་དང༌། མཆོད་པ་དང་གཏོར་མ་བསྔོ་བ་སྔ་མ་བཞིན་བྱས་ནས། སྐུད་པ་ལག་པས་བཟུང་ནས་དུང་ཆེན་པོའི་ཕྲེང་བ་ཐོགས་ཏེ་བཟླས་པར་བྱའོ། །དམིགས་པ་ནི་བདག་གི་གསང་སྔགས་དང༌། འཁོར་ལོའི་སྔགས་ལས་འོད་ཟེར་དུག་གི་མི་ནག་པོ་འཕྲོས། བསྒྲུབ་བྱ་དེ་ན་གནས་པ་བསྲེས་ཏེ། དུར་ཁྲོད་ཀྱི་ཐལ་ཆེན་ལྟར་གྱུར་ཅིང༌། དེའི་སེམས་ཆུས་མར་མེ་གསད་པ་ལྟར་གྱུར་པར་བསམ་མོ། །དེ་ཡང་ཉི་མ་དང་པོ་ལ། ཨོཾ་ཡ་མ་ར་ཛ་ས་དོ་མེ་ཡ། ཆེ་གེ་མོ་པྲ་མ་ཡ་ཀུ་རུ་ཧཱུཾ་ཕཊ། ཅེས་པར་ཆད་མེད་པར་ཁྲི་ཕྲག་གཅིག་བཟླས་སོ། །ཉི་མ་གཉིས་པ་ལ། ཡ་མེ་དོ་རུ་ཎ་ཡོ་ད་ཡ་ཆེ་གེ་མོ་རཀྟ་ཙརྤ་ཡ་ཧཱུཾ་ཕཊ། ཅེས་ཁྲི་ཕྲག་གཅིག་གོ །གསུམ་པ་ལ་ཡ་ང་ཡོ་ནི་ར་ཡཀྵེ་ཡ་ཆེ་གེ་མོ་མུརྩུ་པ་ཡ་ཧཱུཾ་ཕཊ། ཅེས་ཁྲི་ཕྲག།


DTG047_Page_0421
[མ་དཔེ་གཟིགས་ན་འདིར་གནོན།]

གཅིག་གོ །བཞི་པ་ལ་ཡཀྵེ་ཡཙྪ་ནི་རཱ་མ་ཡ། ཆེ་གེ་མོ་མཱ་ར་ཡ་ཧཱུཾ་ཕཊ། ཅེས་ཁྲི་ཕྲག་གཅིག་གོ །སྒྲུབ་པའི་གྲོགས་མཆོག་གིས་དུས་གསུམ་དུ་མཆོད་པ་དང་གཏོར་མ་སྦྱིན་པར་བྱའོ། །དེ་ནས་ཉི་མ་བཞི་པའི་མཚན་ཕྱེད་ན་དུར་ཁྲོད་དམ། འབྱུང་པོ་དྲག་པོ་གནས་པའི་སར་ཁྲུ་གང་བརྐོས་ཏེ་སྦས་ནས་གཤིན་རྗེ་ལ་གཏད་དོ། །དེའི་སྦྱོར་བ་ནི་འདི་ཡིན་ཏེ། གྲོག་མཁར་གྱི་ས་ལས་གཤིན་རྗེའི་མི་ཁྲུ་གང་གི་ཚད་ལ། ཁ་ཅིག་ལག་ན་རལ་གྲི་དང་ཞགས་པ་ཐོག་པ་ཅིག་བྱ་སྟེ། དེའི་ལྟོ་བར་གའུ་བཅུག་ནས་དེ་ལ་གཏོར་མ་དང༌། དམར་གྱི་ཨརྒྷཱ་བྱིན་ཏེ་འདི་སྐད་ཅེས་བསྒོའོ། །ཆོས་ཀྱི་རྒྱལ་པོ་ཁྱོད་ཀྱིས་ལྟ་ན་སྲིད་པ་གསུམ་གྱི་སེམས་ཅན་མི་གནས་པ་མེད་དོ། །དེང་དཀོན་མཆོག་མཆོག་གསུམ་གྱི་བཀས། སེམས་ཅན་འདི་ཟུང་ཤིག །སེམས་ཅན་འདི་ནི་དུས་གསུམ་གྱི་རྒྱལ་བ་རྣམས་ཀྱི་བསྟན་པ་འཇིག་པར་བྱེད་པས། འཇིག་རྟེན་དུ་ཐར་པའི་ལམ་ནི་འགེགས་ཤིང༌། ངན་འགྲོའི་ལམ་འབྱེད་པ་སྟེ། དེ་བས་འདི་ཁྱོད་ཀྱིས་ཟུང་ཤིག །དེ་ལ་བཅོམ་ལྡན་འདས་འཇམ་དཔལ་གཞོན་ནུ་དང༌། དཔལ་རྡོ་རྗེ་འཇིགས་བྱེད་ཀྱང་དགྱེས་པར་འགྱུར་རོ་ཞེས་བརྗོད་དོ། །དེ་དང་དེར་ཁ་སྦུབ་ཏུ་མགོ་བོ་ལྷོ་ཕྱོགས་སུ་བསྟན་ཏེ་སྦ་བར་བྱའོ། །དེ་ནས་རང་གི་གནས་སུ་འོངས་ཏེ། གསང་སྔགས་རྗེས་སུ་བསྐུལ་བར་བྱའོ། །ལས་གྲུབ་པ་དང་དེ་ནས་ཕྱུང་སྟེ། འོ་མ་དང་ཆུས་བཀྲུས་ཏེ་མཆོད་པ་གཙང་མས་བཤགས་པ་དང༌། བཟོད་པར་གསོལ་ཏེ་བཏང་ངོ༌། །ལས་ཀྱི་སྐབས་འདིར་ཆས་གོས་ནག་པོ་དང༌། ཁྲོ་བོའི་ལྟ་སྟངས་དང༌། ཁྲོས་པའི་ཡིད་དང༌། དབུགས་འབུད་པ་ལ་སོགས་པ་དང་ལྡན་པར་བྱའོ། །དྲག་པོའི་འཁོར་ལོའི་ལས་རྫོགས་སོ།།

དྲུག་པ། དྲག་པོའི་བསམ་གཏན་གྱི་ལས།


DTG047_Page_0421
[མ་དཔེ་གཟིགས་ན་འདིར་གནོན།]

ད་ནི་དྲག་པོའི་བསམ་གཏན་གྱི་ལས་བཤད་དེ། དེ་ལ་དང་པོ་དཔལ་རྡོ་རྗེ་འཇིགས་བྱེད་ཆེན་པོ་སྔ་མ་བཞིན་དུ་བསྐྱེད་དེ། མཆོད་པ་དང་གཏོར་མ་བསྔོས་ཏེ། སྔོན་དུ་བསྒྲུབ་བྱ་རླུང་ནག་པོའི་སྟེང་ན། མེ་སྨུག་ནག་འབར་བའི་དཀྱིལ་ན་གོས་དང་བྲལ་བ། ལྷ་དང་བྲལ་བ། ཡན་ལག་ལྕགས་ཀྱིས་ཐག་པས་བཅིངས་པ། སྐྲ་ནག་པ་མེས་བསྲེགས་པ་བཞིན་དུ་གནས་པ་ལ། བདག་གི་ཐུགས་ཀ་ནས་སྲིན་པོ་


DTG047_Page_0422
[མ་དཔེ་གཟིགས་ན་འདིར་གནོན།]

རབ་ཏུ་རྔམ་པ་དང༌། ཁྲ་དང་འུག་པ་ལ་སོགས་པ་དང༌། ཝ་དང༌། ཅེ་སྦྱང་ལ་སོགས་པ་ཟ་ཞིང༌། རྒྱུ་མ་དང༌། ནང་ཁྲོལ་ནམ་མཁའ་ལ་ཀུན་དུ་ཁྱེར་བར་བསྒོམས་ན་འཆི་བར་འགྱུར་རོ། །བསམ་གཏན་གྱི་ལས་རྫོགས་སོ།། །།

ལས་ཀྱི་ལྷག་ཆད་ཁ་བསྐང་བ།


DTG047_Page_0422
[མ་དཔེ་གཟིགས་ན་འདིར་གནོན།]

དེ་ནས་ལས་ཀྱི་ཁ་བསྐང་བར་བྱས་ཏེ། མཆོད་པ་དང་སྦྱིན་སྲེག་དང་སོ་སོར་བཤགས་པའི་མདོ་གདོན་པ་དང༌། སྨོན་ལམ་གདབ་བོ། །དཔལ་རྡོ་རྗེ་འཇིགས་བྱེད་ཀྱི་དྲག་པོའི་ལས་ཀྱི་བྱ་བ་བདུན་པ་དང༌། རམ་པ་བཞིན་དུ་བྱ་བའི་ཆོ་ག །དཔལ་ཨུ་རྒྱན་ཡུལ་དུ་འདུག་པ། དྲེགས་པ་ཅན་འདུལ་བའི་ཐབས་ཉི་ཚེ་བ། བྱང་ཆུབ་ཀྱི་སེམས་དང་ལྡན་པས། བསྒྲུབ་པར་བྱའོ།། །།རྫོགས་སྷོ།། །།དེ་ནས་གཞན་ཡང་བཤད་པ་ནི། །ལས་ཀྱི་གྲོགས་ཀྱིས་བྱེད་པ་སྟེ། །ཞི་བའི་ལས་ནི་ཟླ་བ་ཡིན། །རྒྱས་པ་དེ་བཞིན་མིག་ཏུ་བསྒྲགས། །དབྱེ་བ་ཡོན་ཏན་ཞེས་བྱ་སྟེ། །དབང་དུ་བྱ་བ་རིག་བྱེད་ཡིན། །དགུག་པ་ཡིད་ལས་དེ་བཞིན་མདའ། །བསྐྲད་དང་མནན་པ་དབང་པོ་བཞིན། །མནན་པའི་རྗེས་སུ་འབྲང་བ་ཡིས། །གསད་པའི་ལས་ནི་རྒྱ་མཚོར་འདོད། །ལས་རྣམས་དེ་དག་རེ་རེ་ཡང༌། །འཕགས་ཚོགས་མཆོད་སྦྱིན་དང་པོ་སྟེ། །ཉི་མ་གཉིས་པར་གཏོར་མ་སྦྱིན། །གསུམ་པ་བཟླས་པ་རྣམ་པར་འབད། །བཞི་པ་སྦྱིན་སྲེག་འཆང་བར་བྱ། །ལྔ་པ་ལས་ཀྱི་འཁོར་ལོ་བསྐོར། །དྲུག་པ་བསམ་གཏན་རྩེ་གཅིག་བྱ། །བདུན་པ་ལས་ཀྱི་ལྷག་ཆད་བསྐང༌། །གྲངས་ཀྱི་ལས་ལ་ཁྱད་པར་དུ། །ལས་ཀྱི་གཙོར་ནི་གང་བསྒྲུབ་དེའི། །འཁོར་ལོ་སྐོར་བ་ཉི་མ་བཞི། །ལས་ཀྱི་བྱེ་བྲག་འདི་ཤེས་ན། །ཞི་བས་འཇིགས་པ་བརྒྱད་ལས་སྐྱོབ། །རྒྱས་པས་ཡོན་ཏན་དྲུག་དང་འབྱོར། །དབང་གིས་མོས་པ་རྣམས་བཞིར་བསྒྱུར། །དབྱེ་བས་གསང་སྡེ་བརྒྱད་དང་འབྱེད། །མནན་པས་དབང་པོ་དྲུག་འཆིང་བྱེད། །གཞན་ཡང་ཇི་ལྟར་དེ་བཞིན་དུ། །སྔགས་དང་རྫས་ཀྱི་སྦྱོར་བ་ལ། །དཔྱད་ན་དངོས་གྲུབ་མི་འགྲུབ་སྟེ། །གལ་ཏེ་ཡིད་གཉིས་ཟ་གྱུར་ཏམ། །བསམ་པར་འགྱུར་རམ་དད་པ་ཉམས། །དེ་ཚེ་དངོས་གྲུབ་ཉེ་བ་ཡང༌། །ཕྱིར་བཟློག་འགྱུར་བར་གདོན་མི་ཟ། །དད་པ་བརྟན་པར་བསྒྲུབས་པས་ན། །ནམ་མཁའ་མེད་པར་གྱུར་ན་ཡང༌། །སྔགས་ཀྱི་དངོས་གྲུབ་མེད་མེད་སྲིད། །


DTG047_Page_0423
[མ་དཔེ་གཟིགས་ན་འདིར་གནོན།]

ལྷ་དང་དྲང་སྲོང་གིས་བཤད་པའི། །རིག་སྔགས་སླུ་བ་མི་སྲིད་ན། །འདོད་ཆགས་བྲལ་བ་བཤད་པ་ཡིས། །གསང་སྔགས་སྦྱོར་བས་སླུ་བ་ནི། །མ་བྱུང་འབྱུང་བར་མི་འགྱུར་རོ། །ཆོས་ཉིད་བསམ་གྱིས་མི་ཁྱབ་པའི། །དོན་ལ་ཐེ་ཚོམ་མེད་པ་ཡིས། །མཁས་པ་ལ་ནི་དངོས་གྲུབ་ཉེ། །རྟོག་ཅིང་དཔྱོད་པའི་རྟོག་གེ་པ། །དེ་ལ་བསྒྲུབ་པའི་དངོས་གྲུབ་རིང༌། །མན་ངག་དམ་པ་བསྟན་བྱས་ཀྱང༌། །སློབ་མ་ཡིད་གཉིས་ཟ་གྱུར་ན། །དེ་ལ་དངོས་གྲུབ་རིང་བར་བཤད། །བླ་མས་མན་ངག་སྦས་བྱས་ཀྱང༌། །སློབ་མ་ཡིད་གཉིས་མི་ཟ་ཞིང༌། །བླ་མའི་མན་ངག་དམ་པ་ཞེས། །གཅེས་སྤྲས་བྱས་ན་འགྲུབ་པར་ངེས། །དེ་ཡི་ཕྱིར་ན་སྔགས་པ་ཡིས། །རང་གི་ཡིད་གཉིས་སྤང་བའི་ཕྱིར། །བླ་མ་མཉེས་པར་བྱ་བ་གཅེས། །རང་གི་ཡིད་པས་ནུས་མཐུ་ཆེ། །གསང་སྟེ་བརྗོད་པས་བར་ཆད་མེད། །ཡོན་ཏན་ཕུལ་བ་བྱས་པས་ནི། །རང་སེམས་རིན་ཆེན་རྣམ་གཉིས་འགྱུར། །རིན་ཆེན་གཉིས་ལས་གྲུབ་པར་འབྱུང༌། །དཀོན་པར་གྱུར་ན་སྔགས་པ་བརྗོད། །བསྔགས་ན་ཡོན་ཏན་འབྱུང་འགྱུར་ཏེ། །བསྔགས་པ་དག་ནི་མ་བྱས་ན། །ཇི་ལྟར་ཡིད་བཞིན་ནོར་བུ་ཡང༌། །གང་གིས་བསྔགས་པ་མ་བྱས་ན། །དེ་ལ་འདོད་ན་མི་སྟེར་རོ། །དད་པ་སངས་རྒྱས་དད་པ་ཆོས། །དད་པ་དགེ་འདུན་དད་པ་མ། །དད་པ་བླ་མ་དད་པ་ཕ། །དད་པ་ལམ་ཆེན་དད་པ་གྲུ། །དད་པ་ཡིད་བཞིན་ནོར་བུ་སྟེ། །དད་པ་གསང་སྔགས་དངོས་གྲུབ་ཉིད། །དད་པ་བསོད་ནམས་ནོར་ཡིན་ཏེ། །དེ་ཡི་ཕྱིར་ན་སྔགས་པ་ཡིས། །རང་སེམས་དད་པ་བསྐྱེད་པའི་ཕྱིར། །གཞན་ལ་གུས་པས་མཆོག་ཏུ་བསྐུར། །རྫོགས་སོ།།

དམ་རྫས་རྨད་དུ་བསྒྱུར་ཏེ་བསྟན་པའི་ཆོ་ག།
འདི་གོང་ནས་ཆོས་ཚན་གཉིས་མེད་པས་རྟག་དཔྱད་བྱེད་དགོས་་་་་་་་་་་་་་་་་་་་་་་་་་་


DTG047_Page_0423
[མ་དཔེ་གཟིགས་ན་འདིར་གནོན།]

དེ་ནས་གཞན་ཡང་བཤད་པར་བྱ། །སྔགས་པས་རྟག་ཏུ་བསྟེན་པ་ནི། །རུས་སྦལ་འོ་མ་ཞེས་བྱ་བ། །དེ་བཞིན་འོད་ཀྱི་ལོ་མ་དང༌། །འཇིམ་པ་སྐམ་པོ་ཉིད་དང་ནི། །དེ་བཞིན་མེ་ཡི་ཁུ་བ་དང༌། །སྒྲ་སྣང་གི་ནི་རྫས་དག་དང༌། །འདི་རྣམས་རྟག་ཏུ་སྦྱར་ན་ནི། །རང་བཞིན་གྱིས་ནི་ནད་མེད་ཅིང༌། །ཚེ་རིང་དབང་པོ་རྒྱས་པ་དང༌། །རྟག་ཏུ་ལང་ཚོ་དར་ལ་བབ། །ལྷ་རྣམས་ཀུན་གྱིས་བྱིན་གྱིས་རློབས། །འདི་ལ་སྤྱད་པར་མི་བྱ་སྟེ། །


DTG047_Page_0424
[མ་དཔེ་གཟིགས་ན་འདིར་གནོན།]

ཡང་ན་ཉི་མའི་སྦུ་གུས་བཏུང༌། །ཏིང་འཛིན་སྔགས་ཀྱིས་བྱིན་བརླབས་ན། །ལས་ཀྱི་རྣམ་སྨིན་སྦྱོང་བར་བྱེད། །རིག་པ་འཛིན་པའི་ས་ལ་གནས། །དེ་བཞིན་ཆོ་ག་བཞིན་དུ་བསྟེན། །ཆོས་གཅིག་སྐྱ་རེངས་ཤར་བ་ནི། །སྣོད་ལ་མ་རེག་རུས་སྦལ་ཞོ། །དྲོད་མ་ཡལ་བར་བཏུང་བ་འམ། །ཡང་ན་ཉི་མའི་སྦུ་གུས་བཏུང༌། །མར་གྱི་ངོ་ཡི་ཚེས་གཅིག་ལ། །འོད་ཀྱི་ལོ་མ་བཙལ་ནས་ནི། །དེ་ཉིད་ནས་ནི་གཟུང་བར་བྱ། །ཞག་གསུམ་ཆུ་ཡི་ཆར་པ་གཏང༌། །འོ་མ་དེ་བཅད་བཟའ་བར་བྱ། །ཡང་ན་ཉི་མའི་སྦུ་གུས་བཏུང༌། །འཇིམ་པ་སྐམ་པོ་སྦྱར་ནས་ནི། །ཞག་གསུམ་ཆུ་ཡི་ནང་དུ་སྦང༌། །དེ་བླངས་ནས་ནི་ཡང་སྐམས་ནས། །ཕྱེ་མ་བྱི་ལའི་སྤར་ཚད་རེ། །བ་ཡི་འོ་མ་དང་སྦྱར་ནས། །སྔགས་པས་རྟག་ཏུ་བཏུང་བར་བྱ། །མེ་ཡི་སྔོན་པོ་སེར་པོ་ནི། །ས་ཡི་མར་གྱིས་དྲིལ་ནས་ནི། །ཁ་སྦྱར་སྦྱོར་དང་ལྡན་བྱས་ནས། །མེ་ཆུ་ས་ཡིས་བཙིར་ནས་ནི། །བཏུང་བའམ་ཉི་མའི་སྦུ་གུས་བཏུང༌། །ལན་ཚྭ་བྲལ་བ་དག་ལ་ནི། །ཞག་གསུམ་འཆི་བའི་སྒྲ་བརྙན་རྫས། །ནམ་གྱི་དུས་ལ་སྔགས་པས་བླངས། །ཆ་གསུམ་སྣོད་དུ་ཞག་གསུམ་གཞག །ཁ་ཡི་ཆ་ནི་བྱུག་པ་སྟེ། །དབུས་མའི་ཆ་ནི་བདུད་རྩི་ཉིད། །རྩ་བའི་ཆ་ནི་དོར་བ་སྟི། །འདི་རྣམས་སོ་སོར་བསྟན་པ་ན། །ཐ་མལ་འབྲས་བུ་གསུམ་གྱི་ཕྱེ། །བྱི་ལའི་སྦར་ཚད་དེ་དང་སྦྱར། །མ་སྦྱར་ན་ཡང་ཉེས་པ་མེད། །ཚོགས་པར་བསྟན་ནས་བཟླ་བར་བྱ། །རེ་རེ་བསྟེན་ཡང་ཉེས་པ་མེད། །དམ་རྫས་རྨད་དུ་བསྒྱུར་ཏེ་བསྟན་པའི་ཆོ་ག་རྫོགས་སོ།། །།

གཏམ་རྒྱུད་ཀྱི་རྟོག་པ།


DTG047_Page_0424
[མ་དཔེ་གཟིགས་ན་འདིར་གནོན།]

དཔལ་རྡོ་རྗེ་འཇིགས་བྱེད་ལ་ཕྱག་འཚལ་ལོ། །དེ་ནས་ཡང་དག་བཤད་བྱ་བ། །བཅོམ་ལྡན་ཉིད་ཀྱི་སྐུ་གསུང་ཐུགས། །རྡོ་རྗེ་རྣམས་ལས་བྱུང་བ་ཡི། །རྡོ་རྗེ་འཇིགས་བྱེད་ཆེན་པོ་ཡིས། །ལྷོ་ཕྱོགས་རྒྱ་མཚོ་ཕ་རྒྱལ་ནས། །དེ་ནས་གཤིན་རྗེའི་གྲོང་ཁྱེར་ནི། །ག་ལ་བ་ཡི་གནས་སུ་བྱོན།། མི་བཟད་ཞབས་ནི་བཅུ་དྲུག་གི །ལྕགས་མཁར་སྒོ་མེད་བཅུ་དྲུག་བརྫིས། །ཡེ་ཤེས་རྩེ་གཅིག་མཚན་མ་ཡི། །དབུས་ཀྱི་ལྕགས་མཁར་ཆེན་པོ་བརྫིས། །དེ་ཚེ་བདུད་ཆེན་ལས་རྒྱལ་ནས། །ཧ་ཧ་ཧི་ཧི་སྒྲ་སྒྲོགས་པ། །ཆོས་ཀྱི་རྒྱལ་པོ་ལ་སོགས་པ། །གཟིར་བཞིན་དུ་ནི་རབ་སྨྲས་པ། །དཔའ་


DTG047_Page_0425
[མ་དཔེ་གཟིགས་ན་འདིར་གནོན།]

བོ་ཆེན་པོ་ག་ལ་ཅི། །དཔའ་བོའི་དགོངས་པ་བདག་གིས་བགྱི། །བདག་ཅག་སྲོག་ལ་སྙིང་པོ་རྣམས། །ཚུལ་བཞིན་འབུམ་གྱིས་དཔའ་བོ་བཞེས། །ལྷ་མ་ཡིན་སྡེ་བརྒྱད་ཀྱི་སྲོག་གི་ཡང་སྙིང་ཕུལ་བ་ནི། །གཤིན་རྗེའི་ཡ་ཕུལ་མ་མོས་མ། །སྲིན་པོས་ར་ཕུལ་གནོད་སྦྱིན་ཀྵེ། །མི་ཡིས་ན་ཕུལ་ས་བདག་སྭ། །བཙན་གྱིས་ཙ་ཕུལ་བདུད་ཀྱིས་ད། །དེ་རྣམས་གཅིག་ཏུ་དྲིལ་བ་ནི། །བྲན་དུ་ཡང་ནི་ཁས་བླངས་སོ། །གཏན་ཚིགས་ཆེན་པོ་དེ་ཡི་ཕྱིར། །ཡེ་ཤེས་ལྷ་ཡིས་དགོངས་པ་དང༌། །བསྙེན་པ་ཉམས་འོག་རབ་ཆུད་ནས། །ལྷ་ཡི་བསྙེན་པ་རབ་ཆུད་ནས། །སྔོན་གྱི་ཐུགས་དམ་ལས་མི་འདའ། །མི་འགྲུབ་པ་ནི་མི་སྲིད་དོ། །ཨོཾ་ཡ་མ་རཱ་ཛཿ་ས་དོ་མེ་ཡ། ཡ་མེ་དོ་རུ། ཎ་ཡོ་ད་ཡ། ཡ་ད་ཡོ་ནི་ར་ཡ་ཀྵེ་ཡ། ཡ་ཀྵེ་ཙྪ་ནི་རཱ་མ་ཡ། ཧཱུཾ་ཧཱུཾ་ཕཊ་ཕཊ། དེ་སྐད་སྨྲས་པ་དང༌། རྡོ་རྗེ་འཇིགས་བྱེད་ཆེན་པོ་ཡིས། །ཆོས་ཀྱི་རྒྱལ་པོ་ལ་སོགས་པ། །གཤིན་རྗེའི་ཕོ་ཉ་ལ་སོགས་ཀུན། །སྒྲོལ་བའི་གིང་དུ་བྱིན་གྱིས་བརླབས། །མ་དང་སྲིང་མོ་བུ་མོ་དང༌། །འཁོར་བཅས་ཀུན་ལ་བཀའ་བསྒོ་བ། །ལྔ་བརྒྱ་དུས་ཀྱི་ཐ་མ་ལ། །ང་ཡི་བསྟན་པ་འབྱུང་བའི་ཚེ། །རྣལ་འབྱོར་རིག་འཛིན་ལྡན་པ་ལ། །བཀའ་བསྒོ་བ་ཡི་ལས་རྣམས་ཚུལ་བཞིན་གྱིས། །ཞེས་བྱས་དམ་བཅས་པ་དང༌། མནན་བཞིན་དུ་མནན་པོར་རོ། །གཏམ་རྒྱུད་ཀྱི་རྟོགས་པ་རྫོགས་སོ།།

དཔལ་རྡོ་རྗེ་འཇིགས་བྱེད་ཀྱི་ཕྱག་མཚན་གྱི་རྣམ་པར་དག་པ་ཞེས་བྱ་བ།
ཏ་ཐཱ་ག་ཏ་རཀྵི་ཏ།


DTG047_Page_0425
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། ཤྲི་བཛྲ་བྷཻ་ར་བ་པཱ་ནི་ན་ཨ་པ་ན་ཤུདྡྷ་ནཱ་མ། བོད་སྐད་དུ། དཔལ་རྡོ་རྗེ་འཇིགས་བྱེད་ཀྱི་ཕྱག་མཚན་གྱི་རྣམ་པར་དག་པ་ཞེས་བྱ་བ། བཅོམ་ལྡན་འདས་འཇིག་རྟེན་དབང་ཕྱུག་སེང་གེའི་སྒྲ་ལ་ཕྱག་འཚལ་ལོ། །མ་རིག་པ་གཅོད་པས་གྲི་གུག །གཟུང་འཛིན་གྱི་རྣམ་པར་རྟོག་པ་འཇོམས་པས་རྡོ་རྗེ་རྩེ་གཅིག་པ། དྲན་པའི་ཉོན་མོངས་པ་འཇོམས་པར་བྱེད་པས་གཏུན་ཤིང༌། སྲེད་པ་གཅོད་པར་བྱེད་པས་ཆུ་གྲིའོ། །ལུས་ངག་གི་ཉེས་པ་འཇོམས་པས་རྡོ་རྗེ་རྩེ་གཅིག་པའོ། །ཕྲག་དོག་འཇོམས་པས་སྟ་རེའོ། །ལྟ་བ་ངན་པ་འཇོམས་པས་མདུང་ངོ༌། །དབང་གི་ལས་བྱེད་པས་མདའོ། །འགུགས་པས་ལྕགས་ཀྱུའོ། །ལས་ཀྱི་སྒྲིབ་པ་འཇོམས་པར་བྱེད་པས་དབྱུག་ཏོའོ། །ཁ་ཏྭཱཾ་ག་ནི་བྱང་ཆུབ་སེམས་ཀྱི་ངོ་བོ་ཉིད་དོ། །ཤེས་བྱའི་


DTG047_Page_0426
[མ་དཔེ་གཟིགས་ན་འདིར་གནོན།]

སྒྲིབ་པ་གཅོད་པ་ནི་འཁོར་ལོའོ། །ཡེ་ཤེས་ལྔ་རོ་མ་ཉམས་པར་གྱུར་པས་བདག་ཉིད་རྡོ་རྗེའོ། །མི་ཤེས་པའི་སྒྲིབ་པ་འཇོམས་པས་རྡོ་རྗེ་ཐོ་བའོ། །རལ་གྲིའི་དངོས་གྲུབ་སྟེར་བས་ན་རལ་གྲིའོ། །མཆོག་ཏུ་དགའ་བའི་སྒྲས་སངས་རྒྱས་ཐམས་ཅད་ཡང་དག་པར་བསྐུལ་བས་ཅང་ཏེའུའོ། །བདེ་བ་ཆེན་པོ་དང་སྙིང་རྗེ་ཆེན་པོའི་རང་བཞིན་ནི་སྣ་ཚོགས་ཀྱིས་བཀང་བའི་ཐོད་པའོ། །སྒྲིབ་པ་ཐམས་ཅད་འཇོམས་པས་ཚངས་པའི་མགོ་བོའོ། །བདུད་ལས་རྒྱལ་བའི་རང་བཞིན་གྱི་ཕུབ་པོ། །སེམས་ཅན་ཐམས་ཅད་དང་ཆོས་ཐམས་ཅད་དུ་རྟོགས་པའི་རང་བཞིན་མེད་པས་རྐང་པའོ། །ཡང་དག་པའི་ཡེ་ཤེས་འཆིང་བས་ཞགས་པའོ། །འཇིག་རྟེན་གསུམ་ལས་རྒྱལ་བས་ན་གཞུའོ། །སྟོང་པ་ཉིད་ཀྱིས་ན་རྒྱུ་མའོ། །ཤེས་རབ་ཀྱི་ཕ་རོལ་ཏུ་ཕྱིན་པ་ནི་དྲིལ་བུའོ། །ཆོས་ཐམས་ཅད་བྱེད་པ་པོ་ཉིད་ཀྱིས་ལག་པའོ། །ཆོས་ཐམས་ཅད་བདག་མེད་པ་ཉིད་ཀྱིས་ན་དུར་ཁྲོད་ཀྱི་རས་སོ། །ཆོས་ཐམས་ཅད་སྟོང་པ་ཉིད་ཀྱིས་ཕུག་པ་ཉིད་ཀྱིས་སྐྱེས་བུ་གསལ་ཤིང་ལ་བཙུགས་པའོ། །ཆོས་ཐམས་ཅད་འོད་གསལ་བ་ཉིད་ཀྱིས་ན་མེ་ཐབ་བོ། །དམ་ཚིག་དག་པ་ཉིད་ཀྱིས་ན་ཐོད་པ་བཏུང་བས་བཀང་བའོ། །བདུད་རྣམས་བསྡིགས་པ་ཉིད་ཀྱིས་སྡིགས་མཛུབ་བོ། །སྐུ་གསུང་ཐུགས་རྣམས་རོ་གཅིག་པ་ཉིད་ཀྱིས་འཕན་རྩེ་གསུམ་པའི། །ཆོས་ཐམས་ཅད་འོད་གསལ་སྒྱུ་མ་ལྟ་བུ་ཉིད་ཀྱིས་ན་རླུང་གིས་བསྐྱོད་པའི་བ་དན་ནོ། །རྨོངས་པའི་གླང་པོ་དྲལ་བས་ན། གླང་པོའི་པགས་པའོ། །ཞབས་གཡས་ཀྱི་གདན་བརྒྱད་ནི་དངོས་གྲུབ་ཆེན་པོ་བརྒྱད་རྣམས་པར་དག་པའོ། །མིག་སྨན་རི་ལུ། རལ་གྲི་གསེར་འགྱུར། བཅུད་ལེན་རྐང་བྱུག །སོ་འོག །ཕྱག་རྒྱ་ཆེན་པོའོ། །ཞབས་གཡོན་རྣམས་ཀྱི་གདན་ནི་བྱ་རྒོད་ལ་སོགས་པ་བརྒྱད་ནི་དབང་ཕྱུག་བརྒྱད་རྣམ་པར་དག་པ་སྟེ། འདོད་པ་རྨོངས་པ། །ཁྲོ་བ་སེར་སྣ། འཇིགས་པ་གྲགས་གཙང་སྨྲེ། ངོ་ཚ་བ་ཕྲ་མ། ཁམས་གསུམ་གྱི་མངའ་བདག་ཉིད་ཀྱིས་མ་ཧེའི་གདོང་པ་ཅན་ནོ། །རྭ་གཉིས་ཀྱིས་བདེན་པ་གཉིས་རྣམ་པར་དག་པའོ། །མཁས་པ་ཆེན་པོ་ཏ་ཐཱ་ག་ཏ་རཀྵི་ཏས་མཛད་པའོ། །ཨུ་ཏོ་བོ་པ་ཏི་དང༌། བོད་ཀྱི་ལོ་ཙཱ་བ་མལ་གྱོ་བློ་གྲོས་ཀྱིས་བསྒྱུར་བ་རྫོགས་སོ།། །།

དཔལ་རྡོ་རྗེ་འཇིགས་བྱེད་ཆེན་པོའི་སྒྲུབ་ཐབས།
ཛྙཱ་ནཱ་ཀཱ་ར།


DTG047_Page_0427
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། ཤྲཱི་བཛྲ་མ་ཧཱ་བྷཻ་ར་བ་སཱ་དྷ་ན། བོད་སྐད་དུ། དཔལ་རྡོ་རྗེ་འཇིགས་བྱེད་ཆེན་པོའི་སྒྲུབ་ཐབས། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །མུན་ནག་ལྟ་བུའི་སྐུ་འཛིན་ཞིང༌། །ཉི་མ་འབུམ་གྱི་གཟི་བརྗིད་ཅན། །གདུག་པའི་མཚོན་ཆ་སྣ་ཚོགས་བསྣམས། །བདུད་དགྲ་ཁྱོད་ལ་ཕྱག་འཚལ་ལོ། །བདེ་གཤེགས་བཀའ་ནི་བསྲུང་བ་དང༌། །གདུག་པ་གདུལ་བར་བྱ་བ་དང༌། །ཐར་པ་ཐོབ་པར་བྱ་བའི་ཕྱིར། །སྒྲུབ་ཐབས་འདི་ནི་བརྩམ་པར་བྱ། །དུར་ཁྲོད་དང་ནི་ཆུ་བོའི་འགྲམ། །ཤིང་གཅིག་དང་ནི་མཚན་གཅིག་སོགས། །དབང་དང་དགུག་སོགས་གནས་དེར་བྱ། །དང་པོར་རང་སྙིང་ཟླ་བ་ལ། །རང་གི་ས་བོན་བསམ་པར་བྱ། །འོད་ཟེར་བླ་མར་རང་ལྷ་རྣམས། །གསལ་བྱས་ཕྱག་འཚལ་མཆོད་སོགས་བྱ། །ཚང་བའི་བཞི་ཡི་བསམ་གཏན་ནི། །བྱམས་པས་དགྲ་ཟུན་མཉམ་པོར་དམིགས། །སྙིང་རྗེས་སྡུག་བསྔལ་བྲལ་བར་བསྒོམ། །དགའ་བས་ཐར་པ་ཐོབ་པར་དགའ། །བཏང་སྙོམས་ཡལ་བར་མི་འདོར་རོ། །དེ་ནས་སྟོང་པའི་བྱང་ཆུབ་བསྒོམ། །ར་བ་དྲ་བ་སྦྱོར་བར་བྱ། །མ་ཡི་བུ་ལས་སྐྱེས་པ་ལ། །སེམས་ཀྱི་ས་བོན་བསམ་པར་བྱ། །སྣ་ཚོགས་རྡོ་རྗེ་བསམ་གཏན་བྱ། །དེ་སྟེང་ཧཱུཾ་ལས་གསལ་སྤྲོས་པས། །གདུང་རྣམས་བགེགས་ནི་སེལ་བྱེད་པ། །རྡོ་རྗེ་ར་དང་བླ་རེ་ནི། །སྔགས་འདི་ཡིས་ནི་བསྒོམ་པར་བྱ། །ཨོཾ་སུམ་བྷ་ནི་སུ་མ་བྷ་ཧཱུཾ་ཕཊ། གྲྀཧྞ་གྲྀཧྣ་ཧཱུཾ་ཕཊ། གྲྀཧྞ་པ་ཡ་གྲྀཧྞ་པ་ཡ་ཧཱུཾ་ཕཊ། ཨོཾ་ཨཱ་ན་ཡ་ཧོཿ་བྷ་ག་བཱ་ན་བདྱ་རཱ་ཛ་ཧཱུཾ་ཕཊ། རྡོ་རྗེའི་ས་ལ་ནམ་མཁའ་ནི། །བྷ་གའི་དབྱིངས་སུ་བསྒོམ་པར་བྱ། །དབུས་སུ་ཡཾ་རཾ་བཾ་དང་ལཾ། །འབྱུང་བ་བཞི་ཡི་དཀྱིལ་འཁོར་རོ། །དེ་སྟེང་སུཾ་ལས་རི་བོ་སྟེ། །བྷྲཱུཾ་ལས་གཟུགས་ཀྱི་བདག་པོ་བསྒོམ། །དེ་ཡོངས་གྱུར་ལས་གཞལ་མེད་ཁང༌། །གྲུ་བཞི་པ་ལ་སྒོ་བཞི་པ། །རྟ་བབས་བཞི་དང་ལྡན་པ་ལ། །།དྲ་བ་དྲ་བ་ཕྱེད་པ་དང༌། །ཀ་བ་བརྒྱད་ཀྱིས་ཡང་དག་སྤྲས། །ཕྱི་རོལ་དུར་ཁྲོད་བརྒྱད་ཀྱིས་བསྐོར། །ཤིང་བརྒྱད་ཀྱིས་ཀྱང་མཛེས་པར་བྱས། །ཚིག་པ་དང་ནི་མ་ཚིག་པ། །དུམ་བུར་གྱུར་དང་མ་གྱུར་པ། །འཇིགས་པར་བྱེད་དང་འཇིགས་པ་དང༌། །ཅང་ཆེན་བཙུགས་དང་ཤིང་ལ་སྦྱངས། །


DTG047_Page_0428
[མ་དཔེ་གཟིགས་ན་འདིར་གནོན།]

བནྡྷ་པུ་ཏ་ལི་ལ་སོགས། །ཤིང་བརྒྱད་ལ་ནི་གནས་པའོ། །སྲིན་པོ་རོ་ལངས་མཁའ་འགྲོའི་ཚོགས། །ཤ་ཟའི་གདོན་ཅན་བརྒྱད་པོ་ནི། །བྱ་རོག་འུག་པ་ཚོགས་ཀྱིས་བསྐོར། །གཞལ་ཡས་ཁང་གི་དབུས་སུ་ནི། །དང་པོའི་ཡི་གེ་སོགས་པ་ལ། །ཟླ་བས་བརྒྱན་པའི་ཆུ་སྐྱེས་བསམ། །དབུས་སུ་བཞི་པའི་བཞི་ཕ་ལ། །དབྱངས་ཡིག་བཞི་པས་བརྒྱན་པ་བསམ། །དེ་ལ་རལ་གྲིར་གྱུར་པ་དང༌། །རལ་གྲི་ལྟེ་བར་དེ་ཉིད་བསམ། །དེ་ཡོངས་གྱུར་པས་འཇམ་དཔལ་བསམས། །གུར་ཀུམ་མདོག་ནི་གཞོན་ཚུལ་ཅན། །རལ་གྲི་གཡས་ལ་ཨུཏྤལ་གཡོན། རྒྱན་རྣམས་ཀུན་གྱིས་རབ་མཛེས་པ། །སེམས་དཔའི་སྐྱིལ་མོ་ཀྲུང་གིས་བཞུགས། །དེ་ལྟར་བྱང་ཆུབ་ལྔ་བསྐྱེད་ནས། །མ་ལས་བསྐྱེད་པའི་ཉི་མ་ནི། །དེ་ཡི་སྙིང་གར་བསྒོམ་པར་བྱ། །དེ་ལས་འོད་འཕྲོས་ཕྱོགས་བཅུ་ཡི། །རྒྱལ་བ་སྲས་དང་བཅས་པ་རྣམས། །རིག་པའི་ལྷ་མོ་ཁྲོ་ཚོགས་ཀུན། །སྤྱན་དྲངས་ཉི་མ་ལ་བཞུགས་བསམས། །དེ་ནས་འཇམ་དཔལ་དེ་ཉིད་དང༌། །དེ་བཞིན་གཤེགས་ཀུན་གཅིག་ཏུ་གྱུར། །འོད་ཀྱི་གོང་བུ་དེ་ལས་ནི། །འབར་བ་དཔག་ཚད་བརྒྱད་སྟོང་ཁྱབ། །དེ་གྱུར་སེམས་ཀྱི་ས་བོན་ལས། །འོད་ཟེར་ལྔ་ལྡན་ཁ་དོག་ནག་འོད་ཟེར་སྤྲོ་དང་བསྡུ་བ་བྱ། །དེ་གྱུར་རྡོ་རྗེ་གདེངས་པ་ནི། །ཁ་དོག་ནག་པོར་གྱུར་པར་བསམ། །དེ་ལས་འོད་འཕྲོས་སངས་རྒྱས་དང༌། །རྒྱལ་སྲས་གཙོ་བོ་ལ་སོགས་ཀྱིས། །ནམ་མཁའི་ཁམས་ཀུན་གང་བ་ནི། །ཉི་མའི་དཀྱིལ་འཁོར་ལ་གནས་བསམས། །སེམས་ཅན་ཁམས་ནི་རྣམས་སྦྱངས་ནས། །སླར་བྱོན་རྡོ་རྗེའི་གཟུགས་ལ་ཞུགས། །རྡོ་རྗེ་ཆེན་པོ་ཡོངས་གྱུར་ནས། །རྡོ་རྗེ་འཇིགས་བྱེད་ཆེན་པོའི་གཟུགས། །མ་ཧེའི་གདོང་ཅན་ཞལ་དགུ་པ། །ཕྱག་ནི་སུམ་ཅུ་རྩ་བཞི་ཕུག །གཡོན་བརྐྱང་གཡས་བསྐུམ་བརྒྱད་གཉིས་ཞབས། །ཕཊ་ཀྱི་སྒྲ་ཅན་གསུས་པ་འཕྱང༌། །སྤྱི་གཙུག་ཐོད་པའི་ཕྲེང་བས་བརྒྱན། །སྟག་གི་པགས་པས་སྨད་དཀྲིས་ཤིང༌། །ཀླུ་བརྒྱད་ཀྱིས་ནི་རྒྱན་དུ་བྱས། །འཇིགས་པའི་དུས་ཀྱི་མེ་ལྟ་འབར། །ཧ་ཧ་ཞེས་དགོད་ལྗགས་བསྐྱོད་ཅིང༌། །འཇིགས་པའི་ཁྲོ་གཉེར་མེ་ལྷར་འབར། །འཇིགས་པའི་སྤྱན་ནི་ཉི་


DTG047_Page_0429
[མ་དཔེ་གཟིགས་ན་འདིར་གནོན།]

ཤུ་བདུན། །ཚངས་པ་བརྒྱ་བྱིན་ཚོགས་ཟ་བ། །རྩ་ཞལ་མ་ཧེའི་གདོང་ཅན་ཁྲོ། །རྭ་ཡི་བར་ན་གནས་པའི་ཞལ། །དམར་པོ་འཇིགས་བྱེད་ཁྲག་འཛག་པ། །སྟེང་ཞལ་སེར་པོ་ཅུང་ཟད་ཁྲོ། །རལ་པ་ཟུར་ཕུད་ལྔ་དང་ལྡན། །གཞོན་ནུའི་ཆ་ལུགས་འཆང་བ་པོ། །གཡས་པའི་རྭ་ལ་བརྟེན་པའི་ཞལ། །དང་པོ་མཐིང་ག་འཇིགས་པར་བྱེད། །གཉིས་པ་མདོག་དམར་ཁྲོ་བོའི་ཞལ། །གསུམ་པ་སེར་པོ་ཅུང་ཟད་ཁྲོ། །གཡོན་པའི་རྭ་ལ་བརྟེན་པའི་ཞལ། །དང་པོ་དཀར་པོ་རྨོངས་པར་བྱེད། །གཉིས་པ་དུད་ཀ་ཁྲོ་བོའི་ཞལ། །གསུམ་པ་ནག་པོ་ལྗགས་དྲིལ་བ། །གཡས་གཡོན་གཉིས་ཀྱིས་གླང་པོ་ཆེའི། །པགས་པ་བརྒྱངས་ཏེ་འཛིན་པའོ། །གཡས་པའི་ཕྱག་གིས་རིམ་པ་བཞིན། །ཀར་ཏ་རི་དང་བྷི་ཎྜི་པ་ལ་དང༌། །གཏུན་ཤིང་ཆུ་གྲི་ཀ་ཎ་ཡ། །སྟ་རེ་མདུང་དང་མདའ་དང་ནི། །ལྕགས་ཀྱུ་དབྱུག་ཏོ་ཁ་ཊྭཱཾ་ག །འཁོར་ལོ་རྡོ་རྗེ་ཐོབ་དང༌། །རལ་གྲི་དང་ནི་ཅང་ཏེའུ་འཛིན། །གཡོན་པའི་ཕྱག་གིས་གོ་རིམས་བཞིན། །ཐོད་པ་ཚངས་པའི་མགོ་བོ་དང༌། །ཕུབ་ཆུང་རྐང་པ་ཞགས་པ་དང༌། །གཞུ་དང་རྒྱུ་མ་དྲིལ་བུ་དང༌། །ལག་པ་མི་ལྤགས་རྩེ་གསུམ་མེ་ཡི་ཐབ། །ཐོད་ཚལ་སྡིགས་མཛུབ་བ་དན་རླུང་རས་འཛིན། །གཡས་ཀྱི་ཞབས་ཀྱིས་གོ་རིམས་བཞིན། །མི་དང་མ་ཧེ་གླང་བོང་དང༌། །རྔ་མོ་ཁྱི་ལུག་ཝ་བརྒྱད་མནན། །གཡོན་པའི་ཞབས་ཀྱི་གོ་རིམས་བཞིན། །བྱ་རྒོད་འུག་པ་བྱ་རོག་དང༌། །སེང་གེ་ཁྲ་དང་བྱ་རྒོད་ཆེན་པོ་དང༌། །ནེ་ཙོ་ཀྲུང་ཀྲུང་བརྒྱད་པོ་མནན། །འཇམ་དཔལ་ཡེ་ཤེས་སེམས་དཔའ་ནི། །ཞལ་གཅིག་ཕྱག་གཉིས་སྐུ་མདོག་སེར། །རང་གི་སྙིང་གར་བཞུགས་པ་ཡི། །སྙིང་ལ་ཉི་མའི་ལྟེ་བ་ལས། །འོད་འཕྲོས་དགྲ་མགོན་སྤྱན་དྲངས་ཏེ། །རྡོ་རྗེ་བསྡུ་བཅིངས་བྱས་ནས་ནི། །གསང་སྔགས་འདི་ཡང་བརྗོད་པར་བྱ། །ཨོཾ་ཨེ་ཧྱ་ཧི་བྷ་ག་བཱན། ཡ་མཱནྟ་ཀ་ཨཱ་གྩྪ་ཡ། ཨོཾ་ས་མཱ་ཛ་ཧཱུཾ། མདུན་དུ་བྱོན་པར་མོས་ནས་ནི། །རང་གི་སྔགས་བཏབ་མཆོད་མ། །སྤོས་དང་མེ་ཏོག་བྱུག་པ་དང༌། །མར་མེ་ལ་སོགས་མཆོད་བསྟོད་བྱ། །ཨོཾ་ཡ་མཱནྟ་ཀ་ཨརྒྷཾ་པྲ་ཏཱིཙྪ་ཧཱུཾ་སྭཱ་ཧཱ། ཨོཾ་བཛྲ་དྷཱུ་པེ་ཧཱུཾ། ཨོཾ་བཛྲ་པུཥྤེ་ཧཱུཾ། ཨོཾ་བཛྲ་གནྡྷེ་ཧཱུཾ། ཨོཾ་བཛྲ་དཱི་པེ་ཧཱུཾ། ཨོཾ་བཛྲ་ནཻ་བིདྱེ་ཧཱུཾ། སྙིང་པོའི་


DTG047_Page_0430
[མ་དཔེ་གཟིགས་ན་འདིར་གནོན།]

མཇུག་ལ་བཏགས་ལ་དབུལ། །ཛཿ་ཧཱུཾ་བཾ་ཧོཿ་ཞེས་བརྗོད་ཅིང༌། །དགུག་ཅིང་གཞུག་ལ་དབང་དུ་བྱ། །གཤིན་རྗེ་གཤེད་པོའི་ང་རྒྱལ་བྱ། །མིག་དང་རྣ་བ་སྣ་དང་ལྕེ། །ལུས་དང་དེ་བཞིན་ཡིད་རྣམས་ལ། །ས་སྙིང་ཕྱག་ན་རྡོ་རྗེ་དང༌། །ནམ་མཁའི་སྙིང་པོ་སྤྱན་རས་གཟིགས། །སྒྲིབ་ཀུན་སེལ་དང་ཀུན་དུ་བཟང༌། །མིང་གི་ཡི་གེ་དང་པོ་བསྐྱེད། །རྡོ་རྗེ་གསུམ་ནི་གནས་གསུམ་བསམ། །ཨོཾ་ཨཱཿ་ཧཱུཾ། རང་སྙིང་ས་བོན་ལས་འོད་འཕྲོ། །བདེ་གཤེགས་རྣམས་ནི་སྤྱན་དྲངས་མཆོད། །བདུད་རྩི་ལྔས་གང་བུམ་པ་ཡིས། །སྤྱི་བོར་བླུགས་ནས་དབང་བསྐུར་བྱ། །རྣམ་པར་སྣང་མཛད་ཕྱག་རྒྱ་ཆེ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཡཾ་དང་རཾ་བསྐྱེད་རླུང་མེའི་སྟེང༌། །ཐོད་པ་ཨ་ལས་བསྐྱེད་པ་ཡིན། །ནང་ན་བདུད་རྩི་ལྔས་གང་བ། །ཧཱུཾ་ཞེས་པས་ནི་དག་པར་བསམ། །ཨཱཿ་ཡིས་རྟོགས་བྱ་ཨོཾ་གྱིས་བར། །ལུས་ཀྱི་དཀྱིལ་འཁོར་མཉེས་པར་བསམས། །རྡོ་རྗེ་ལྕེ་ཡིས་འཇིབ་པར་བསམ། །འཁོར་བཅས་འཁོར་ལོ་འདུས་པ་ཡིས། །སྟོང་པའི་སྒྲ་བརྙན་ཚུལ་དུ་བྱ། །སྔགས་ཀྱི་བཟླས་པ་བྱ་བ་ནི། །སྙིང་གར་ཉི་མའི་དཀྱིལ་འཁོར་ལ། །རྩ་བའི་སྙིང་པོ་ཉེ་སྙིང་བསམ། །དུས་བཞི་ཡི་ནི་སྦྱོར་བ་ཡིས། །གཡེང་བ་མེད་པར་བསམ་གཏན་བྱ། །སྐབས་སུ་སྟོན་མོ་བཟའ་བར་བྱ། །ལྷ་རྣམས་མཉེས་པར་བྱ་བའི་རིམ་པའོ།། །།སྔགས་པ་གཞན་ལ་ཕན་བརྩོན་པས། །དབང་དད་དགུག་དང་བསད་པ་དང༌། །བསྐྲད་དང་དབྱེ་བ་རྨོངས་ལ་སོགས། །རྒྱུད་ལས་བྱུང་བ་བཞིན་དུ་བྱ། །དེ་ལས་འདིར་ནི་དྲག་པོའི་ལས། །འཁོར་ལོའི་ལས་དང་སྦྱིན་སྲེག་དང༌། །བསམ་གཏན་གྱི་ནི་སྦྱོར་བ་རྣམས། །ལས་འདི་དག་གིས་བརྩམ་པར་བྱ། །བླ་མ་སྨོད་སོགས་དམ་ཚིག་མེད། །ཐེག་པ་ཆེན་པོ་སྨོད་པ་དང༌། །སྔགས་ཀྱི་རྒྱུད་ལ་འཕྱ་བ་དང༌། །བསད་དང་བསྐྲད་དམ་རིངས་པར་བྱེད། །སྙིང་རྗེ་ཡིས་ནི་ངན་སོང་ལས། །བཟློག་པར་བྱ་བ་གཞན་ལས་མིན། །སྔགས་པས་སྔོན་དུ་བསྙེན་པ་ནི། །བྱེ་བ་བཟླས་ནས་ལས་རྣམས་བརྩམས། །ཡང་ན་མཚན་མ་ཐོབ་ནས་བྱ། །གཞན་དུ་བྱས་ན་འཇིག་རྟེན་བཅས། །དཀྱིལ་འཁོར་བྲིས་སྐུ་མདུན་དུ་ནི། །དང་


DTG047_Page_0431
[མ་དཔེ་གཟིགས་ན་འདིར་གནོན།]

པོར་མཆོད་པ་བྱས་ནས་ནི། །སྣང་མཛད་ཀྱིས་ནི་ལུས་ལ་བྱུགས། །ཞིམ་པའི་ཆང་ནི་བཏུང་བར་བྱ། །སྐྲ་བཤིག་གཅེར་བུ་བྱས་ནས་ནི། །ནམ་ཕྱེད་ཌ་མ་རུ་དཀྲོལ་བྱ། །བརྐྱང་བསྐུམ་ཚུལ་དུ་གནས་ནས་ཀྱང༌། །ལྷ་ཡི་ང་རྒྱལ་ལྡན་པ་ཡིས། །ཧ་ཧ་ཞེས་དགོད་རྩེ་གཅིག་པས། །མ་ཡེངས་པ་ཡིས་གསང་སྔགས་བཟླས། །དེ་ནས་འཇིགས་པ་ཆེན་པོ་སྐྱེ། །སྔགས་པས་འཇིགས་པར་མི་བྱའོ། །འཇིགས་པར་གྱུར་ན་བར་ཆད་འགྱུར། །དེས་ན་འཇིགས་པར་མི་བྱའོ། །དངོས་གྲུབ་གང་འདོད་ཅེས་གསུངས་པ། །ཡིད་ལ་གང་འདོད་གསོལ་བ་གདབ། །དེ་ནས་ལས་རྣམས་བརྩམ་པར་བྱ། །མར་གྱི་ངོ་ལ་སྔགས་པ་ཡིས། །དུར་ཁྲོད་རས་ནི་བླངས་ནས་སུ། །དག་པར་བཀྲུས་ཏེ་བརྐྱང་བར་བྱ། །སུམ་པའི་སྦྱོར་བས་མཚམས་བཅད་ནས། །ཝ་ཡིས་རྟོགས་པའི་ལྷག་མ་ལ། །སྣང་མཛད་དུར་ཁྲོད་ཐལ་བ་དང༌། །འབྲས་བུ་ཐུག་བཅས་པར་རང་ལ་བྱུགས། །བརྒྱངས་ནས་མདུན་དུ་བཞག་ནས་ནི། །སྐྲ་བཤིག་གཅེར་བུར་བྱུང་ནས་སུ། །ལྷོ་ཕྱོགས་སུ་ནི་ཁ་བལྟས་ལ། །མ་ཧེའི་གདོང་གི་སྦྱོར་བ་ཡིས། །རས་དང་སྣག་ཚའི་རྫས་རྣམས་ལ། །ལག་པ་རེག་ནས་གསང་སྔགས་ནི། །འབུམ་ཕྲག་གཉིས་སུ་བཟླས་པ་བྱ། །ཉི་མ་ཕྱེད་ནས་བཟུང་ནས་སུ། །འཁོར་ལོ་བྲི་བར་བརྩམ་པར་བྱ། །བྱ་རོག་སྒྲོ་རྩའི་སྙུ་གུ་ཡིས། །བཅུ་དྲུག་རྩིབས་ཅན་གཉིས་བྱས་ཏེ། །གཡས་དང་གཡོན་སྐོར་ཚུལ་གྱིས་ནི། །སུམ་ཅུ་གཉིས་དང་བཅུ་པས་བསྐོར། །བགེགས་དགྲའི་སྦྱོར་བས་དེ་ལྟར་བྲི། །བདག་ལས་སྤྲུལ་པའི་ཁྲོ་བོ་ཡིས། །བསྒྲུབ་བྱ་ལྷ་དང་བྲལ་ནས་ནི། །རྣམ་ཤེས་བསྡུས་ལ་འཁོར་ལོར་གཞུག །ཞུགས་པར་གྱུར་ནས་འཁོར་ལོ་དྲིལ། །ཐོད་པ་གཉིས་ཀྱི་བར་དུ་གཞུག །ཤི་བའི་སྐྲ་ཡི་སྐུད་པས་དཀྲི། །རོ་བསྲེགས་སར་ནི་བསྲེག་ཤིང་གིས། །མེ་སྦར་ནས་ནི་ཐོད་པ་བསྲོ། །སྔགས་པས་འགྲེང་སྟེ་རྐང་གཡོན་གྱིས། །མནན་ནས་ཡི་གེ་བཅུ་པ་བཟླས། །རོ་བསྲེགས་ལ་སོགས་ས་འོག་གཞུག །རིམ་གྱིས་ཐེབས་ནས་འཆི་བར་འགྱུར། །ཡང་ན་ལས་འདི་བརྩམ་པར་བྱ། །བསྙེན་པ་ལ་སོགས་སྔར་བཞིན་བྱ། །དུར་ཁྲོད་གཞི་མདོ་ཤིང་གཅིག་དྲུང༌། །སྔགས་


DTG047_Page_0432
[མ་དཔེ་གཟིགས་ན་འདིར་གནོན།]

པས་གནས་ནས་ལས་འདི་བྱ། །གྲོག་མཁར་ཆུ་འགྲམ་གཉིས་ཀྱི་ས། །སྣང་མཛད་མི་བསྐྱོད་རུས་ཕྱེ་དང༌། །ཕུབ་མ་དུར་ཁྲོད་སོལ་བ་ལ། །བསྒྲུབ་བྱའི་གཟུགས་བརྙན་སོར་བརྒྱད་བྱ། །སྙིང་ག་ལྟེ་བ་གསང་བ་དང༌། །ལྐོག་མ་དང་ནི་སྨིན་མཚམས་སུ། །ནི་རང་སུ་ཡི་ཕུར་བུས་གདབ། །ཚིགས་རྣམས་ཚེར་མ་རྣོན་པོས་དགང༌། །ཐོད་པ་གཉིས་ཀྱི་དབུས་སུ་གཞུག །གནས་བདུན་གྲོག་མཁར་ས་དང་དུར་ཁྲོད་ཐལ་བ་ལ། །གཤིན་རྗེའི་སྐྱེས་བུ་ཁྲུ་གང་ཙམ་ལ་ཞལ་གཅིག་པ། །མཆེ་བ་གཙིགས་པ་ཕྱག་གཉིས་རལ་གྲི་སྡིགས་མཛུབ་ཞགས། །གཅེར་བུ་སྐྲ་གྲོལ་དེ་ཡི་ཐུགས་ཀར་ཐོད་པ་གཞུག །མར་གྱི་བརྒྱད་དང་བཅུ་བཞི་ཡི། །རོ་བསྲེགས་དུར་ཁྲོད་ས་དག་ལ། །ཁ་སྦུབ་བཟློག་ལ་ལྷོ་རུ་ཁ་བསྟན་འཕྲེད་ཉལ་གཞག །ཁྱིམ་དུ་འོངས་ནས་ཁྲོས་ནས་ཡི་གེ་བཅུ་པ་བཟླས། །ཞག་གསུམ་གྱིས་ནི་འཆི་བར་འགྱུར། །ཕྱུང་ནས་འོ་མས་བཀྲུས་ན་འཚོ།། འཁོར་ལོའི་རིམ་པ་ཕྱེ་བའོ། །ལས་དེ་བྱེད་པའི་དུས་སུ་ནི། །བསམ་གཏན་གྱིས་ནི་འདི་ལྟར་བྱ། །འཁོར་ལོ་མེད་ཀྱང་འགྲུབ་པར་འགྱུར། །གང་ལ་བྱ་བའི་བསྒྲུབ་བྱ་སྟེ། །ར་ལས་བསྐྱེད་པའི་དཀྱིལ་འཁོར་དུ། །སྐྲ་བཤིག་གཅེར་བུ་བྱས་ནས་ནི། །ཏིལ་མར་གྱིས་ནི་ལུས་བསྐུས་ནས། །འདར་ཞིང་མདུན་ན་འདུག་པར་བསམ། །ལུས་ལས་སྤྲུལ་པའི་ཁྲོ་བོ་ཡིས། །བསྒྲུབ་བྱ་བཅད་ཅིང་བཅོམ་ནས་ནི། །ལྷ་རྣམས་དག་གིས་ལུས་ལ་བཟའ། །སླར་ཡང་ཁྲོ་བོར་གྱུར་ནས་སྤྲོ། །རལ་གྲི་དབྱུག་པ་གཏུན་ཤིང་དང༌། །འཁོར་ལོ་ཏྲི་ཤཱུ་ལ་སོགས་པས། །དུམ་བུར་བཅད་ཅིང་གཏུབ་པ་དང༌། །ཟ་ཤིང་ཁྲག་རྣམས་འཐུང་བར་བསམ། །གཤིན་རྗེ་ཡིས་ནི་ཟོས་པར་བསམ། །གཞན་ཡང་སྲིན་པོ་སྣ་ཚོགས་དང༌། །ཀང་ཀ་བྱ་རྒོད་འུག་པ་དང༌། །སྟག་དང་སེང་གེ་ཝ་དང་ཁྱི། །དེ་རྣམས་ཀྱིས་ཀྱང་ཟོས་པར་བསམ། །བསྟོད་པ་སྣ་ཚོགས་བྱས་ནས་སུ། །ཚིག་གིས་ཀྱང་ནི་འདི་སྐད་བསྒོ། །དཀོན་མཆོག་གསུམ་ལ་སྨོད་པ་དང༌། །དགེ་འདུན་འདུ་བའི་སྒོ་འཕྲོགས་པ། །དམ་ཚིག་འཇིགས་པར་བྱེད་པ་དང༌། །སྐྱེ་བོ་ཡོངས་ལ་འཚེ་བ་འདི། །ངན་སོང་གསུམ་དུ་ངེས་པར་འགྲོ། །ཐུགས་རྗེས་སྒྲོལ་བའི་དུས་ལ་བབ། །ངན་སོང་གསུམ་གྱི་


DTG047_Page_0433
[མ་དཔེ་གཟིགས་ན་འདིར་གནོན།]

སྡུག་བསྔལ་དང༌། །ནད་དང་གནོད་པའི་སྡུག་བསྔལ་གྱིས། །ཚེ་འདི་ཉིད་ལ་བྲལ་བར་མཛོད། །བསམ་གཏན་གྱི་རིམ་པ་ཕྱེ་བའོ། །བླ་མའི་ཞལ་གྱི་བཀའ་དྲིན་གྱིས། །འདི་བྱས་བསོང་ནམས་གང་ཐོབ་པ། །འགྲོ་རྣམས་གཤིན་རྗེ་གཤེད་ལྟ་བུ། །འཁོར་བ་ལས་ནི་ཐར་པར་ཤོག།། །།སློབ་དཔོན་ཛྙཱ་ནཱ་ཀཱ་རས་མཛད་པ་རྫོགས་སོ།། །།ཟླ་བའི་འོད་ཟེར་གྱིས་བསྒྱུར་བའོ།།

དཔལ་རྡོ་རྗེ་འཇིགས་བྱེད་བསྟོད་པ།


DTG047_Page_0433
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། ཤྲཱི་བཛྲ་བྷཻ་ར་བ་སྟུ་ཏི། བོད་སྐད་དུ། དཔལ་རྡོ་རྗེ་འཇིགས་བྱེད་ཀྱི་བསྟོད་ག་དཔལ་རྡོ་རྗེ་འཇིགས་བྱེད་ལ་ཕྱག་འཚལ་ལོ། །ཧཱུཾ་འཇམ་དཔལ་མཁའ་ལས་བྱུང་བའི་གསེར་མདོག་ཅན། །འཇམ་དཔལ་ཐུགས་ལ་ཆོས་ཀུན་རང་བཞིན་གསལ། །འཇམ་དཔལ་གསུང་གི་དབང་ཕྱུག་འཇམ་དཔལ་དབྱངས། །འཇམ་དཔལ་བདག་ནི་རེ་བའི་སེམས་ཀྱིས་འདུད། །ཐུགས་མཆོག་འཇམ་པའི་ངང་ལས་མ་གཡོས་ཀྱང༌། །ཐུགས་རྗེས་གདུག་པ་འདུལ་ཕྱིར་གཤིན་རྗེའི་གཤེད། །འཇིགས་བྱེད་ཆེན་པོ་འཇིགས་པའི་ཆར་བསྟན་ནས། །མི་བཟད་དུས་མཐའི་བསྐལ་པའི་མེ་ལྟར་འབར། །ཞལ་གདངས་ཁྲོ་གཉེར་སྨིན་མ་གློག་ལྟར་འགྱུར། །སྤྱན་བགྲད་མཆེ་བ་གཙིགས་ཤིང་རབ་ཏུ་འབར། །རྡོ་རྗེའི་རྟ་གད་དྲག་པོ་ཧ་ཧར་བཞད། །མཁའ་འགྲོ་སྡུད་པའི་ཕེཾ་སྐད་གནམ་དུ་འདོན། །ཁྲོས་པའི་ཞབས་ཆེན་བརྡབས་པས་ཁམས་གསུམ་གནོན། །སྡིགས་མཛུབ་གནམ་དུ་བསྒྲེངས་ཤིང་ལྷ་ཆེན་འདུལ། །ལྗགས་འདྲིལ་ཚེམས་ཆེན་གཙིགས་ཤིང་ཁྲག་གིས་མྱོས། །ལྷ་དང་བཅས་པའི་འཇིག་རྟེན་ཞལ་དུ་གསོལ། །གླང་ཆེན་ཀོ་རློན་ཐོད་པའི་ཕྲེང་བ་ཞགས། །གཅེར་བུ་འཇིགས་བྱེད་དབང་ཕྱུག་ཆེན་པོའི་ཚུལ། །འཇིགས་བྱེད་མ་ཧེ་ཁྲོས་པའི་ཞལ་གདངས་ཤིང༌། །ཞལ་དགུ་འབར་བས་སྲིད་པ་ཟད་པར་རྔུབ། །འགྲོ་བ་སྣ་ཚོགས་འདུལ་བའི་ཕྱག་རྒྱ་འབར། །བདུད་བཞི་གནོན་པའི་ཞབས་ནི་བརྐྱང་བསྐུམ་གནས། །འཇིགས་བྱེད་ཆེན་པོའི་སྐུ་ལ་རྟག་ཏུ་འདུད། །དབུ་དགུ་འབར་བའི་དཀྱིལ་འཁོར་ནས། །གཡས་ཀྱི་ཞལ་གསུམ་བགྲད་པ་ནི། །མཐིང་ག་དམར་དང་སེར་བའི་ཞལ། །གཡོན་གྱི་ཞལ་གསུམ་གདངས་པ་ནི། །དཀར་དང་དུད་ཀ་


DTG047_Page_0434
[མ་དཔེ་གཟིགས་ན་འདིར་གནོན།]

གནག་པའི་ཞལ། །དབུས་ཀྱི་ཞལ་གསུམ་འབར་བ་ནི། །ཁྲོ་དང་ཆགས་དང་ཞི་བའི་ཚུལ། །ཕྱག་རྒྱ་འོད་ཟེར་འབར་བ་ལས། །གཡས་ཀྱི་ཕྱག་མཚན་བཅུ་དྲུག་ནི། །རྡེག་ཅིང་འཇོམས་པས་མཚོན་ཆ་གདེངས། །གཡོན་གྱི་ཕྱག་མཚན་བཅུ་དྲུག་ནི། །རོལ་ཅིང་སྟོབས་པའི་མཚན་མས་མཛེས། །བརྗིད་རྔམ་ཞབས་ཀྱི་ཚམ་ངམ་ལས། །གཡས་ཀྱི་ཞབས་བརྒྱད་བསྐུམ་པ་ནི། །དྲེགས་པའི་ལྷ་བརྒྱད་ཐབས་ཀྱིས་འདུལ། །གཡོན་གྱི་ཞབས་བརྒྱད་བརྐྱང་བ་ནི། །དྲེགས་པའི་ལྷ་མོ་བརྒྱད་ལ་རོལ། །འདོད་ཆགས་ཆེན་པོ་གདུལ་བའི་ཕྱིར། །རྟག་ཏུ་ལིངྒ་རྒྱས་པའི་ཚུལ། །དྲག་པོའི་ཚུལ་གྱིས་ཞེ་སྡང་འདུལ། །འདུལ་སྐུ་ཁྱོད་ལ་ཕྱག་འཚལ་ལོ། །དུར་ཁྲོད་ཆེན་པོའི་དཀྱིལ་འཁོར་ནས། །བདུད་དང་གཤིན་རྗེ་ཐབས་ཀྱིས་འདུལ། །མ་མོ་མཁའ་འགྲོ་དབང་དུ་སྡུད། །དབང་སྡུད་ཁྱོད་ལ་ཕྱག་འཚལ་ལོ། །དབང་ཕྱུག་ཆེན་པོའི་དཀྱིལ་འཁོར་ནས། །དབང་མེད་དད་པས་འདུས་པ་དང༌། །ཡེ་ཤེས་སྤྲུལ་པའི་འཁོར་གྱིས་བསྐོར། །འཁོར་བཅས་ཁྱོད་ལ་ཕྱག་འཚལ་ལོ། །ཡེ་ཤེས་ཐུགས་ཀྱི་དཀྱིལ་འཁོར་ནས། །ཇི་ལྟ་བུར་ནི་སྤྲུལ་གྱུར་ཀྱང༌། །རྣམ་དག་དབྱིངས་ལས་མ་གཡོས་པའི། །མཉམ་ཉིད་སྐུ་ལ་ཕྱག་འཚལ་ལོ། །རྫོགས་སོ།།

དེ་ཉིད་ལྔ་པའི་བསྟོད་པ།


DTG047_Page_0434
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། པཉྩ་ཏ་ཏ་སྟོ་ཏྲ། བོད་སྐད་དུ། དེ་ཉིད་ལྔ་པའི་བསྟོད་པ། དཔལ་རྡོ་རྗེ་འཇིགས་བྱེད་ལ་ཕྱག་འཚལ་ལོ། །ཧཱུཾ་ཆོས་དབྱིངས་མ་བཅོས་མཁྱེན་པའི་ཐུགས། །འཇམ་དཔལ་རྒྱུ་ཡི་བྱང་སེམས་སྐུ། །ཨུཏྤལ་རལ་གྲི་རབ་བསྣམས་ཤིང༌། །ཟུར་ཕུ་ང་ལྔ་ལྡན་གུར་གུམ་མདོག །ཟླ་གདན་ལ་བཞུགས་ཡེ་ཤེས་ཀྱི། །སྐུ་མཆོག་ཁྱོད་ལ་ཕྱག་འཚལ་ལོ། །ཉི་མའི་དཀྱིལ་འཁོར་བདུད་འཇོམས་ལ། །སངས་རྒྱས་སྲས་བཅས་འདྲེན་པ་ཡི། །འཇམ་དབྱངས་ཐུགས་ཁྲོས་ཧཱུཾ་ནག་པོ། །དངོས་གྲུབ་ཁྱོད་ལ་ཕྱག་འཚལ་ལོ། །རྡོ་རྗེ་ཁྲོས་པས་སྲིད་གསུམ་སྦྱོར། །སྤྲོ་ཞིང་བསྡུས་པས་མ་ཧེའི་ཞལ། །ལྗགས་འདྲིལ་ཕེཾ་གྱི་འབྲུག་སྒྲ་སྒྲོགས། །ཧཱུཾ་ཥྚྲྀཿའི་གསུང་འཇིགས་ལ་ཕྱག་འཚལ། །དབུ་དགུ་སུམ་ཅུ་རྩ་


DTG047_Page_0435
[མ་དཔེ་གཟིགས་ན་འདིར་གནོན།]

བཞི་ཕྱག །བཅུ་དྲུག་ཞབས་ཅན་དཔའ་བོ་ཆེ། །མིག་སྨན་བདར་འདྲའི་སྐུ་མཆོག་ནི། །འཇིགས་དུས་མེ་འདྲའི་གཤིན་རྗེ་གཤེད། །གནག་དང་དམར་དང་སེར་ཞལ་དབུས། །དཀར་དང་དུད་མདོག་གནག་ཞལ་གཡོན། །སྔོ་དང་དམར་དང་སེར་ཞལ་གཡས། །ཞལ་དགུས་སྲིད་གསུམ་གསོལ་བ་པོ། །གྲི་གུག་རྩེ་གཅིག་གཏུན་ཤིང་དང༌། །ཆུ་གྲི་རྡོ་རྗེ་དགྲ་སྟ་མདུང༌། །མདའ་དང་ལྕགས་ཀྱུ་དབྱུག་ཏོ་དང༌། །ཁ་ཊྭཱཾ་འཁོར་ལོ་རྡོ་རྗེ་དང༌། །ཐོད་པ་རལ་གྲི་ཌ་མ་རུ། །གཡས་པའི་ཕྱག་ན་བསྣམས་པའོ། །ཐོད་པ་མགོ་བོ་ཕུབ་དང་རྐང༌། །ཞགས་པ་གཞུ་དང་རྒྱུ་མ་དང༌། །དྲིལ་བུ་ལག་པ་དུར་རས་དང༌། །གསལ་ཤིང་ཕུབ་དང་མེ་ཐབ་དང༌། །རོ་སྣོད་སྡིགས་མཛུབ་བ་དན་དང༌། །རླུང་རས་ཕྱག་གཡོན་བསྣམས་པའོ། །གཉིས་ནི་གླང་ཆེན་ཀོ་རློན་གོན། །མི་དང་མ་ཧེ་གླང་དང་ནི། །བོང་བུ་རྔ་མོ་ཁྱི་དང་ལུག །ཅེ་སྦྱང་གཡས་ཀྱིས་ཞབས་བརྒྱད་གནོན། །བྱ་རྒོད་འུག་པ་བྱ་རོག་དང༌། །སེང་གེ་ཁྲ་དང་གོ་བོ་དང༌། །སྔགས་ཅན་བཞད་བྱ་བརྒྱད་པོ་ལ། །གཡོན་ཞབས་འཇིགས་ལ་ཕྱག་འཚལ་ལོ། །མཉམ་ཉིད་མི་གཡོ་དུར་ཁྲོད་རྗེ། །ལྟུང་བའི་ལྷ་གཉིས་སྡིག་པའི་སྐུ། །སྡིགས་མཛུབ་དྲག་པོས་གདུལ་དཀའ་འདུལ། །གོ་བཟློག་མནན་ནས་རབ་ཏུ་གསོལ། །ལིངྒ་ལངས་ཤིང་རྟོག་པ་སྤངས། །དཔའ་བོ་གནས་ན་གཉིས་མེད་རོལ། །ལྷ་མིན་ཀུན་སོགས་དབང་པོས་བཏུད། །མུན་སེལ་ཐུགས་ཀྱི་མངོན་གྱུར་པ། །རྣམ་རྟོག་གཤིན་རྗེ་འདྲ་བ་རྣམས། །ཉིད་རོལ་པ་ཡི་རྣམ་རྟོག་གིས། །གར་མཁན་རལ་གྲི་འབར་བ་ཡིས། །གཉུག་མའི་གནས་ལ་འགོད་པའོ། །འཇམ་དབྱངས་ཡེ་ཤེས་སྙིང་རྗེ་ཁྲོ། །ཨེ་མ་སྲིད་གསུམ་གདུག་པ་སེལ། །བུ་ལ་མ་བྱམས་གཤེ་བ་ལྟར། །བཅོས་མའི་ཁྲོ་བྱང་ཁྱོད་ཕྱག་འཚལ། །དེ་ཉིད་ལྔ་པའི་བསྟོད་པ་རྫོགས་སོ།།

དཔལ་རྡོ་རྗེ་འཇིགས་བྱེད་ཀྱི་བསྟོད་པ།


DTG047_Page_0435
[མ་དཔེ་གཟིགས་ན་འདིར་གནོན།]

ན་མོ་བཛྲ་བྷཻ་ར་བཱ་ཡ། སྟོང་ཉིད་ལས་བྱུང་ནམ་མཁའི་དབྱིངས་ན་བཞུགས། །འཇམ་དཔལ་ཐུགས་རྗེ་ཁྲོས་པའི་རྡོ་རྗེ་འཇིགས་བྱེད་ནི། །དུར་ཁྲོད་བརྒྱད་ཀྱིས་བསྐོར་ཞིང་གར་དགུའི་ཉམས་དང་ལྡན། །ཁྲོ་རྒྱལ་དུས་མཐའི་མེ་ལྟར་འབར་ལ་


DTG047_Page_0436
[མ་དཔེ་གཟིགས་ན་འདིར་གནོན།]

ཕྱག་འཚལ་ལོ། །ཞལ་དགུ་ཕྱག་ནི་སུམ་ཅུ་རྩ་བཞི་ཞབས་བཅུ་དྲུག །མཐིང་ནག་མིའུ་ཐུང་གཟུགས་ཅན་གཅེར་བུ་མ་ཧེའི་ཞལ། །ཕེཾ་དང་ཧ་ཧ་ཧི་ཧི་དྲག་པོའི་སྒྲ་དང་ལྡན། །མི་འགྱུར་འཇམ་དཔལ་བདེ་ཆན་ཁྱོད་ལ་ཕྱག་འཚལ་བསྟོད། །དྲག་པོའི་སྟོབས་ཀྱིས་བདུད་བཞི་འཇོམས་མཛད་གཤིན་རྗེའི་གཤེད། །གྲུབ་ཆེན་བརྒྱད་ཀྱི་དབུགས་འབྱིན་སྐྱེ་མཆེད་མཆོག་སྦྱིན་མཛེས། །སེམས་ཅན་རེ་སྐོང་ལས་མཛད་བྱམས་པ་ཐུགས་རྗེ་ཅན། །ཟག་མེད་པ་དེ་རྒྱས་མཉམ་མཆོག་ཁྱོད་ལ་ཕྱག་འཚལ་ལོ།།

དཔལ་རྡོ་རྗེ་འཇིགས་བྱེད་ཀྱི་བསྟོད་པ།
དོན་ཡོད་རྡོ་རྗེ།


DTG047_Page_0436
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། ཤྲཱི་བཛྲ་བྷཻ་ར་བ་སྟུ་ཏི། བོད་སྐད་དུ། དཔལ་རྡོ་རྗེ་འཇིགས་བྱེད་ཀྱི་བསྟོད་པ། དཔལ་རྡོ་རྗེ་འཇིགས་བྱེད་ལ་ཕྱག་འཚལ་ལོ། །མི་ཐུང་སྒེག་པོ་སྤྲིན་འདྲའི་མདོག །འོད་ཟེར་བྱེ་བ་འཕྲོས་པས་བཞེངས། །མཚན་མ་འགྲེང་བ་མ་ཧེའི་ཞལ། །གཉིས་མེད་སྦྱོར་བས་ཁྱོད་རྒྱལ་མཛད། །བྱོལ་སོང་མ་ལུས་ཐམས་ཅད་ཀུན། །བཅུ་དྲུག་ཞབས་ཀྱིས་ཐམས་ཅད་མནན། །བརྐྱང་བསྐུམ་ཞབས་ནི་བརྗིད་པར་གནས། །སྟོབས་ལྡན་ཁྱོད་ལ་ཕྱག་འཚལ་ལོ། །གླང་པོའི་པགས་པ་ཕྱག་གཉིས་འཛིན། །གཡས་ཀྱི་དད་པོ་གྲི་གུག་སྟེ། །གཉིས་པས་མཚོན་རྩེ་གཅིག་པ་འཛིན། །གསུམ་པའི་ཕྱག་གིས་གཏུན་ཤིང་བསྣམས། །བཞི་པ་ཆུ་གྲི་བཟང་པོ་འཛིན། །ལྔ་པ་རྡོ་རྗེ་རྩེ་གཅིག་བསྣམས། །དྲུག་པའི་ཕྱག་གིས་སྟ་རེ་འཛིན། །བདུན་པའི་ཕྱག་གིས་མདུང་འཛིན་ཏེ། །བརྒྱད་པའི་ཕྱག་གིས་མདའ་འཛིན་ཏོ། །དགུ་པ་འགུགས་དོན་ལྕགས་ཀྱུ་འཛིན། །བཅུ་པ་ཁྱབ་འཇུག་དབྱུག་ཏོ་བསྣམས། །བཅུ་གཅིག་རྟོག་འཇོམས་ཁ་ཊྭཱཾ་ག །ཆོས་འཁོར་བསྐོར་བ་བཅུ་གཉིས་པ། །བཅུ་གསུམ་ཡེ་ཤེས་རྡོ་རྗེ་འཛིན། །བཅུ་བཞི་བརྡུངས་དོན་ཐོབ་བསྣམས། །བཅོ་ལྔ་དགྲ་གསོད་རལ་གྲི་འཛིན། །བཅུ་དྲུག་ཅང་ཏེའུ་གཉིས་མེད་བརྡུང༌། །དེ་ལྟར་འཛིན་ལ་ཕྱག་འཚལ་བསྟོད། །གཡོན་གྱི་དང་པོས་ཐོད་པ་འཛིན། །གཡོན་གྱི་གཉིས་པས་ཚངས་མགོ་བསྣམས། །གསུམ་པ་ཤེས་རབ་ཕུབ་འཛིན་ཏེ། །བཞི་པ་བསྒྲུབ་བྱའི་རྐང་པ་འཛིན། །ལྔ་པ་བཅིང་དོན་ཞགས་པ་འཛིན། །དྲུག་པ་གཞུ་འཛིན་ཐབས་ཀྱི་དོན། །བདུན་པ་ཉོན་མོངས་རྒྱུ་མ་འཛིན། །བརྒྱད་པ་ཤེས་རབ་དྲིལ།


DTG047_Page_0437
[མ་དཔེ་གཟིགས་ན་འདིར་གནོན།]

བུ་འཁྲོལ། །དགུ་པ་རྡེག་དོན་ལག་པ་འཛིན། །བཅུ་པ་བྲི་དོན་དུར་ཁྲོད་རས། །བཅུ་གཅིག་གསལ་ཤིང་ཉོན་མོངས་འབུགས། །བཅུ་གཉིས་སྲེག་དོན་མེ་ཐབ་འཛིན། །བཅུ་གསུམ་པ་ན་ཐོད་ཚལ་འཛིན། །བཅུ་བཞི་སྡིགས་མཛུབ་བསྡིགས་པར་མཛོད། །བཅོ་ལྔ་འཕན་བསྣམས་དུག་གསུམ་འཇོམས། །བསྒྲུབ་བྱ་རླུང་བསྐུར་བཅུ་དྲུག་རས། །གཡོན་པས་འཛིན་ལ་ཕྱག་འཚལ་བསྟོད། །དུར་ཁྲོད་ཆེན་པོའི་དཀྱིལ་འཁོར་ན། །སྣ་ཚོགས་པདྨ་ཉི་མའི་གདན། །གཞལ་ཡས་མེ་དཔུང་དཀྱིལ་ན་བཞུགས། །འཇིགས་མཛད་སྐུ་ལ་ཕྱག་འཚལ་བསྟོད། །བརྒྱ་ཕྱེད་མགོ་བོའི་དོ་ཤལ་ཅན། །དབུ་རྒྱན་ཐོད་པ་ལྔ་ལྔས་བརྒྱན། །དབུ་སྐྲ་སེར་པོ་གྱེན་དུ་འབར། །ཞལ་དགུ་པ་ལ་ཕྱག་འཚལ་བསྟོད། །སྤྱན་བཟློག་ཉི་ཤུ་རྩ་བདུན་དམར། །ལྗགས་འདྲིལ་ཞལ་ནས་ཧ་ཧར་བཤད། །མཚན་དང་དཔེ་བྱད་ཡང་དག་ལྡན།། མ་ཧེའི་ཞལ་ལ་ཕྱག་འཚལ་བསྟོད། །འདི་ནི་བསྟོད་པའི་དམ་པ་ཡིན། །རྣལ་འབྱོར་ཀུན་གྱིས་རྙེད་དཀའ་བ། །འོད་འབྱུང་དད་ཅིང་གུས་པས་ཞུས། །དོན་ཡོད་རྡོ་རྗེ་མཁས་པས་བྱས། །འདི་བྱས་པ་ཡི་དགེ་བ་ཡིས། །ཀུན་གྱིས་འཇིགས་བྱེད་ཞལ་མཐོང་ཤོག །དཔལ་རྡོ་རྗེ་འཇིགས་བྱེད་ཀྱི་བསྟོད་པ་པཎྜི་ཏ་དོན་ཡོད་རྡོ་རྗེས་མཛད་པ་རྫོགས་སོ།། །།པཎྜི་ཏ་དེ་ཉིད་དང༌། ཞང་ལོ་ཙཱ་བ་ཤེས་རབ་བླ་མས་བསྒྱུར་བའོ།།

འཇམ་དཔལ་འཇིགས་བྱེད་ཀྱི་མཚན་གྱི་བསྟོད་པ།
ལས་ཀྱི་རྒྱལ་པོ།


DTG047_Page_0437
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། བཛྲ་ཤྲཱི་བྷཻ་ར་བ་ནཱ་མ་སྟུ་ཏི། །བོད་སྐད་དུ། འཇམ་དཔལ་འཇིགས་བྱེད་མཚན་གྱི་བསྟོད་པ། དཔལ་རྡོ་རྗེ་འཇིགས་བྱེད་ལ་ཕྱག་འཚལ་ལོ། །ཨ་ལ་ལ་ཧོ་འཇིགས་བྱེད་འཇིགས་པའི་གཟུགས། །རྔམ་བྱེད་རྒྱལ་པོ་འཇིགས་པའི་རོལ་ཐབས་ཅན། །དུར་ཁྲོད་གནས་ན་རོལ་སྐུའི་ཆ་ལུགས་ལྡན། །ཚངས་ཆེན་ཁྱབ་མཇུག་གཞོན་ནུ་ལྷ་ཚོགས་དང༌། །དབང་ཕྱུག་ཐགས་བཟངས་རིས་རྣམས་མ་ལུས་ཞལ་དུ་གསོ། །ཁྲོས་མཛད་རྔམ་ཁྲོ་རུ་ལུ་རུ་ལུ་སྟེ། །ཐོད་པ་དབུ་མར་ཁྲག་བཅས་ཞལ་དུ་གསོལ། །ཆེ་ཕྲན་མང་པོའི་ཟར་བུས་མགྲིན་ཞུགས་བརྒྱན། །གླང་པོ་ཆེ་ཡི་པགས་པའི་ན་བཟའ་ཅན། །ཞལ་དགུ་ཁྲོས་གཙིགས་འཇམ་


DTG047_Page_0438
[མ་དཔེ་གཟིགས་ན་འདིར་གནོན།]

དཔལ་ཆོས་ཀྱི་སྐུ། །མ་ཧེའི་ཞལ་འཛིན་བྱོལ་སོང་སྐྲག་མཛད་ཅིང༌། །རྭ་མདོག་ཨིནྡྲ་ནཱི་ལའི་འོད་འཕྲོ་ཞིང༌། །ཧཱུཾ་དང་ཆེམ་དང་སྒྲ་ཆེན་འཇིགས་པར་སྒྲོགས། །ཞལ་ནས་ལྗགས་འདྲིལ་ཧེ་ཧེ་ཧེ་ཧེ་ཛཱ། །སྟོན་ཀའི་ཆར་སྤྲིན་གཞོན་ནུ་འཇིགས་པའི་ཞལ། །ནམ་མཁའི་ཨཱཉྩའི་མདོག་འདྲ་སྔོན་པོར་སྣང༌། །པད་དང་པདྨ་རཱ་གའི་མདོག་འདྲ་གཉིས། །གསེར་བསྲགས་དང་མཚུངས་ཆེ་བའི་ཡོན་ཏན་ལྡན། །ཤེལ་དང་དུང་འདྲ་ཟླ་བ་ཞི་བའི་ཚུལ། །སྲེ་ཡ་ཀ་ལྟར་དུང་ཁ་རབ་ཏུ་དྲག །དགུ་པ་བཞིན་ཁྲོས་བྱིས་པའི་རྒྱན་གྱིས་བརྒྱན། །ཐོད་པ་ལྔ་བཅུ་སེ་རལ་ཁར་བསྣམས་པ། །རྐང་ཚིལ་ཁྲག་དང་ཞག་བཅས་གློ་སྙིང་གསོལ། །སྲི་ཀ་དུཥྜཱ་ན་ཧཱུཾ་ན་མ་ར་ན། ཤཱིརྟཱཾ་པུཥྚ་མ་ཧཱ་མ་ར་ཛ། ལས་རྣམས་མ་ལུས་རྫོགས་པ་མཐར་ཕྱིན་པས། །སེམས་ཅན་ཁམས་རྣམས་མ་ལུས་ཀུན་དོན་མཛོད། །གྲི་གུག་ལ་སོགས་པ་རྫོགས་པའི་མཚན་མར་ལྡན། །དབུ་མགོ་ཆེན་པོའི་ཚོགས་ནི་གྱེན་དུ་སྒྲེང༌། །ཡན་ལག་རགས་པའི་ལྟོ་ནི་ཐུར་དུ་བཤལ། །ཛཱ་ཛཱ་ཀི་ཀི་ཧཱུཾ་ཧཱུཾ་ཧ་ལ་ཧ། ཧ་ཧ་ཡ་ཡ་མ་མ་ར་ར་ཞེས། ཙ་ཚ་ལས་རྣམས་མ་ལུས་ཀུན་མཛད་པ། །སློབ་དཔོན་སྐུར་དང་དེ་ཡི་དཀོར་ཁྱེད་དང༌། །ཀུན་ལ་གནོད་བྱེད་དམ་བསྐུར་བ་དང༌། །དམ་ཚིག་དག་ལ་མི་གནས་སྒྲོལ་བར་བྱེད། །རྡོ་རྗེ་ཐོད་དབྱིག་འཇིགས་པའི་སྒྲ་དང་ལྡན། །མི་དང་མ་ཧེ་ལ་སོགས་པ་དེ་བཞིན་བྱ་རོག་འུག །བྱ་རྒོད་ཞབས་ཀྱིས་གནོན་པའི་སྐུ་ཙ་ར་བཞུགས། །ཧལ་མགྲིན་བཟང་མར་ཁུ་ཆེན་པོ་གསོལ། །ཨ་ཤྭ་ད་ལ་སོགས་ཤིང་དབུས་དགྱེས་པར་གསོལ། །སྤྱང་ཀི་ཀངྒ་འབར་བ་ཅེ་སྤྱང་དང༌། །བྱ་རོག་ཁྲ་དང་མ་ཧཱ་རུ་ལུ་ནི། །གདུག་པ་ཅན་རྣམས་མ་ལུས་ཤ་ཟ་བའི། །ཚོགས་ཀྱི་ཕྱོགས་ནི་དེ་བཞིན་སྤྲིན་ལྟར་གཏིབས། །དེ་འདྲའི་དབུས་ཀྱི་གཞལ་ཡས་ཁང་པ་ན། །ཚུལ་དུ་བཞུགས་པས་སེམས་ཅན་འགྲོ་དོན་མཛད། །རོལ་མཛད་ཐུགས་རྗེས་སྤྲུལ་ལ་ཕྱག་འཚལ་ལོ། །གདུག་པ་ཞལ་དུ་གསོལ་ལ་ཕྱག་འཚལ་ལོ། །ལས་རྣམས་མཐར་ཕྱིན་མཛད་ལ་ཕྱག་འཚལ་ལོ། །ཁྲོ་ཚོགས་འཇིགས་པའི་སྐུ་ལ་ཕྱག་འཚལ་ལོ། །ཨུཏྤལ་སྔོ་འདྲའི་སྐུ་ལ་ཕྱག་འཚལ་ལོ། །ཉི་མ་བརྒྱ་ཡི་གཟི་ལྡན་ཕྱག་འཚལ་ལོ། །


DTG047_Page_0439
[མ་དཔེ་གཟིགས་ན་འདིར་གནོན།]

འགའ་ཞིག་མཚན་ནི་འཛིན་ཞིང་བསྟོད་པ་དང༌། །དེ་ཡི་ཡོན་ཏན་ཕྱོགས་ཙམ་བཟུང་ནས་ཀྱང༌། །ཡིད་ལ་གནས་ཀྱི་གཞན་དུ་མི་སྨྲ་ན། །དངོས་གྲུབ་སྟེར་ཞིང་ལས་རྣམས་མ་ལུས་འགུགས། །འཇམ་དཔལ་འཇིགས་བྱེད་མཚན་གྱི་བསྟོད་པ། སློབ་དཔོན་ལས་ཀྱི་རྒྱལ་པོས་མཛད་པ་རྫོགས་སོ།།

དཔལ་རྡོ་རྗེ་འཇིགས་བྱེད་ཀྱི་སྒྲུབ་པའི་ཐབས་རྡོ་རྗེ་འོད་ཅེས་བྱ་བ།
བཻ་རོ་ཙ་ན་རཀྵི་ཏ།


DTG047_Page_0439
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། ཤྲཱི་བཛྲ་བྷཻ་ར་ཝ་བཛྲ་པྲ་ཀ་ར་སཱ་དྷ་ནཱ་མ། བོད་སྐད་དུ། དཔལ་རྡོ་རྗེ་འཇིགས་བྱེད་ཀྱི་སྒྲུབ་པའི་ཐབས་རྡོ་རྗེའི་འོད་ཅེས་བྱ་བ། འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །ཟབ་ཅིང་རྒྱ་ཆེ་འཇིགས་པ་འཇིགས་མཛད་པའི། །སྙིང་རྗེས་ཁྲོས་པའི་འཁོར་ལོ་ལ་བཏུད་དེ། །དེ་ཉིད་ཐོབ་ཕྱིར་སྙིང་རྗེས་འགྲོ་རྣམས་ལ། །མི་ཕྱེད་གསལ་བའི་སྒྲུབ་ཐབས་ཆོ་ག་བྲི། །འདི་ཉིད་དབང་ཐོབ་བློ་གྲོས་གསལ། །གནང་བ་ཐོབ་ཅིང་བརྟུལ་ཞུགས་ནུས། །འགྲོ་བའི་དོན་ལ་རབ་བརྩོན་པས། །དུར་ཁྲོད་ལ་སོགས་གནས་སུ་བསྒྲུབ། །བྲིས་སྐུར་བ་གནས་ལེགས་ལྡན་ལ། །ཤ་ཆེན་མར་ཆེན་མཆོད་གཏོར་དབུལ། །རིག་མ་ལན་ཅིག་དཔའ་བའམ། །ཡང་ན་གཅིག་པུས་བསྙེན་བསྒྲུབ་བྱ། །མཆོད་སྦྱིན་རྒྱ་ཆེན་སེམས་བསྐྱེད་ཅིང༌། །དབང་དང་ཚོགས་སྟོན་སྨོན་ལམ་གདབ། །བདུད་རྩིས་ཁྲུས་གསོལ་ཁྲོ་བོ་བཅུའི། །སྔགས་ཀྱིས་གནས་བདག་རྣལ་འབྱོར་སྲུང༌། །སྙིང་གར་པཾ་དང་རེ་ཕ་དང༌། །ཐུགས་མཆོག་ས་བོན་རིམ་པ་ལས། །པདྨ་ཉི་མ་རྡོ་རྗེ་ཆེ། །ས་བོན་མཆོག་ལས་འོད་ལྔ་སྤྲོ། །རིགས་རིགས་བསྐུལ་དང་སྦྱང་བྱས་ནས། །རྒྱལ་བ་འཇིགས་བྱེད་བླ་མ་བལྟ། །བཀོད་པས་ཕྱག་བྱས་སྤྲོས་པས་མཆོད། །སྡིགས་པ་འགྱོད་བཤགས་སླན་ཆད་བསྡམས། །ཡི་རང་སྐྱབས་དང་སེམས་བསྐྱེད་ཅིང༌། །བསྐུལ་དང་གསོལ་རྣམས་རྒྱས་གདབ་སྔོ། །བྱམས་དང་སྙིང་རྗེ་དགའ་བ་དང༌། །བཏང་སྙོམས་བཞི་ལ་ནན་ཏན་བསྒོ། །རང་རང་གནས་དང་བྲིས་སྐུ་ལ། །སྤྱན་དྲངས་ལྷ་སོགས་གཤེགས་སུ་གསོལ། །དེ་ནས་ཕྱི་དང་ནང་གི་ཆོས། །ཐམས་ཅད་དེ་བཞིན་ཉིད་ཡིན་ཅིང༌། །སྭ་བྷཱ་ཝ་ཡིས་རྗེས་སུ་བརྗོད། །སྟོང་པ་ཉིད་ལ་ཤིན་ཏུ་གཞག །དེ་ནས་སྔོན་གྱི་སྨོན་ལམ་དྲན། །ཆོས་ཉིད་


DTG047_Page_0440
[མ་དཔེ་གཟིགས་ན་འདིར་གནོན།]

དེ་ལས་ཡི་གེ་ཡཾ། །རཾ་དང་ཧཱུཾ་ནི་སྔོ་དམར་ནག །དེ་དག་སོ་སོར་གྱུར་པ་ལས། །རླུང་དང་ཉི་མའི་དཀྱིལ་འཁོར་དང༌། །རྡོ་རྗེ་ས་གཞི་ར་བ་གུར། །བློ་དང་ལྡན་པས་བསྲུང་བ་ནི། །ནམ་མཁའ་མཉམ་པ་རབ་ཏུ་བསྒོམ། །དེ་ཡི་དབུས་སུ་པཾ་བསམ་ཞིང༌། །དང་པོའི་དབྱངས་ཡིག་དྷཱིཿ་དག་ལས། །སྣ་ཚོགས་པདྨ་ཟླ་བ་དང༌། །དྷཱི་ལས་འཇམ་དཔལ་ཡེ་ཤེས་སྐུ། །བཙོ་མ་གསེར་མདོག་མཆོག་གི་ཕྱག །རྡོ་རྗེ་སྐྱིལ་ཀྲུང་རིན་ཆེན་སྤྲས། །མཐོན་མཐིང་ཟུར་ཕུད་ལྔ་དང་ལྡན། །སྐུ་ཡི་རིགས་ཀྱི་བདག་པོ་བསྒོམ། །ཐུགས་ཀར་རིམ་པར་གནས་པ་ཡི། །འོད་ཟེར་སྤྲོ་དང་བསྡུས་པ་ལས། །རྣམ་པར་སྣང་མཛད་ཉིད་དུ་གྱུར། །མཚན་དང་དཔེ་བྱད་ཉིད་ཀྱིས་བརྒྱན། །དེ་ཡི་ཁྱད་པར་གྱུར་པ་ལས། །གཞལ་ཡས་ཕྱི་ནང་བཅས་པར་བསྒོམ། །གྲུ་བཞི་པ་ལ་སྒོ་བཞི་པ། །རྟ་བབས་བཞི་དང་ཡང་དག་ལྡན། །དྲིལ་བུ་རལ་གྲི་འཕན་ལ་སོགས། །མེ་ཏོག་ཕྲེང་བས་རྣམ་པར་བརྒྱན། །སྒོ་དང་སྒོ་ཁྱུད་འགྲམ་རྣམས་སུ། །རྡོ་རྗེ་རིན་ཆེན་གྱིས་སྤྲས་པའི། །ཟླ་བ་ཕྱེད་པ་དེ་བཞིན་ནོ། །འདོད་ཡོན་མཆོད་པའི་ལྷ་མོ་རྣམས། །དུར་ཁྲོད་བརྒྱད་དང་བཅས་པ་སྟེ། །ཤར་ནི་གཏུམ་དྲག་དག་ཏུ་གྲགས། །དེ་བཞིན་ལྷོ་ནུབ་བྱང་གི་རིམ། །ཧ་ཧ་དགོད་དང་དཔལ་གྱི་ནགས། །ཀི་ལི་ཀི་ལིར་ཤེས་པར་བྱ། །མེ་ལ་སོགས་པའི་རིམ་པ་ཡིས། །ཚང་ཚིང་ཅན་དང་འབར་བའི་འོད། །འཇིགས་སྡེ་དང་ནི་མུན་པ་ཅན། །དེ་ཡི་རིམ་པས་བརྒྱ་བྱིན་དང༌། །གཤིན་རྗེ་ཆུ་ལྷ་གནོད་སྦྱིན་དང༌། །མེ་ལྷ་སྲིན་པོ་རླུང་ལྷ་དང༌། །འབྱུང་པོའི་བདག་པོ་དང་བརྒྱད་དོ། །ཤར་གྱི་ལྷ་དབང་དཀར་པོ་སྟེ། །རྡོ་རྗེ་འཛིན་པ་གླང་པོ་ཞོན། །ལྷོ་ཡི་གཤིན་རྗེ་ཁ་དོག་ནག །དབྱུག་པ་འཛིན་ལ་མ་ཧེ་ཞོན། །ནུབ་ཀྱི་ཆུ་ལྷ་དམར་སྐྱའི་མདོག །སྤྲུལ་གྱི་ཞགས་འཛིན་ཆུ་སྲིན་ཞོན། །བྱང་གི་གནོད་སྦྱིན་རྟ་ཡི་ཁྲི། །ཁ་དོག་སེར་པོ་བུམ་པ་འཛིན། །མེ་ལྷ་དམར་པོ་དབྱུ་གུ་སྟེ། །དྲང་སྲོང་ཆ་བྱད་ར་ལ་ཞོན། །སྲིན་པོ་ནག་པོ་གྲི་གུག་ལག །མི་རོ་མི་ཡི་ཁྲི་ལ་གནས། །རླུང་ལྷ་ལྗང་གུ་བ་དན་འཕྱར། །ཤ་བ་ཞོན་པ་དག་དང་ལྡན། །འབྱུང་པོའི་བདག་པོ་ཐལ་བའི་མདོག །རྩེ་གསུམ་ཁྱུ་


DTG047_Page_0441
[མ་དཔེ་གཟིགས་ན་འདིར་གནོན།]

མཆོག་ཞོན་པར་བཅས། །འདི་དག་ཐམས་ཅད་ཕྱེད་སྐྱིལ་ཀྲུང༌། །རལ་པའི་ཐོར་ཚུགས་མིག་གསུམ་པ། །ཁྲོ་བོའི་བརྗིད་ལྡན་སྤྲུལ་དུར་ཁྲོད། །བརྒྱན་ཞིང་ཆུང་མ་བུ་འཁོར་བཅས། །ཆུ་ལྷ་གཅིག་པུ་སྤུ་ལ་མགོ་དང༌། །བཅས་པ་རྣལ་འབྱོར་རྣམས་ཀྱིས་བསྒོམ། །ཀླུ་ཤིང་ཨ་མྲའི་ཤིང་དང་ཏཱ་ལའི་ཤིང༌། །ཨརྫུ་ན་དང་པ་ལ་ཤ་།ཨུ་དུམྺཱ་ར་བྱང་ཆུབ་ཤིང༌། །ཤིང་གི་ཞིང་སྐྱོང་བརྒྱད་པོ་ཡང༌། །ཕྱོགས་སྐྱོང་ཁ་དོག་རྒྱན་དེ་བཞིན། །གླང་པོ་མ་ཧེ་གདན་གྱི་མདོག །གཡས་པ་གྲི་གུག་ཐོད་པ་གཡོན། །རྣལ་འབྱོར་པ་རྣམས་བསྒྲུབ་པའོ། །དྲི་ཟ་གཤིན་རྗེ་ཕྱོགས་ཀྱི་གདོན། །ཤ་ཟ་ཡི་དགས་རོ་ལངས་གཞན། །བྱ་དང་གཅན་གཟན་སྤྲུལ་དག་དང༌། །རོ་ལངས་དུམ་བུ་ཚིག་དང་རུས། །མཆོད་རྟེན་ཅེ་སྤྱང་ཟ་རུ་བརྒྱུག །ཕྱོགས་ཀྱི་རིམ་པས་སྟེང་དག་ན། །ཚངས་པ་དབང་པོ་ཁྱབ་འཇུག་དྲག །ཚོགས་བདག་སྟོབས་བཟངས་སྨིན་དྲུག་བུ། །ལེགས་ལྡན་ཉི་ཟླ་ལྷ་ཡི་ཚོགས། །སེར་པོ་དཀར་པོ་སྨུག་པོ་ནག །སེར་སྐྱ་སྔོ་སྐྱ་དམར་སྐྱ་ནག །བུམ་པ་རྡོ་རྗེ་འཁོར་ལོ་དང༌། །རྩེ་གསུམ་མདའ་གཞུ་རལ་གྲི་ཕུབ། །མདུང་དང་གྲི་གུག་འཛིན་པ་ཡིས། །ཆུང་མ་བུ་དང་བཅས་པ་བསྒོམ། །ཆུ་བརྒྱང་སྤྲིན་བརྒྱད་པར་དག་ན། །འོག་གི་ས་བདག་ལྷ་མོ་ཕག །ཀླུ་བརྒྱད་ཤར་ལ་སོགས་རིམ་པར། །སྟོབས་ཀྱི་རྒྱུ་དང་དུང་སྐྱོང་དང༌། །མཐའ་ཡས་ནོར་རྒྱས་འཇོག་པོ་དང༌། །རིགས་ལྡན་པདྨ་པདྨ་ཆེ། །ལྗང་དང་སེར་དང་སྔོ་དང་དམར། །དཀར་པོ་སེར་པོ་དམར་དང་དཀར། །སྤྲུལ་གྱི་གདེངས་ཀ་ཞགས་པ་དང༌། །རང་རང་ཆུང་མ་བུ་འཁོར་བཅས། །ཐམས་ཅད་རྡོ་རྗེའི་མིག་ཅན་ཏེ། །རྒྱལ་བའི་བཀའ་ཉན་བསྟན་པ་བསྲུང༌། །སྒྲུབ་པ་པོ་སྲུང་ཕྱི་བཞིན་འབྲང༌། །ཤ་ཁྲག་དྲག་པོའི་ལས་ལ་དགའ། །གཞལ་ཡས་དེ་ཡི་ནང་དག་ཏུ། །སྣ་ཚོགས་རྡོ་རྗེའི་ར་བ་བསྒོམ། །ཤར་ནི་དཀར་པོ་ལྷོ་སེར་པོ། །ནུབ་ནི་དམར་པོ་བྱང་ལྗང་གུ། །ཆེན་པོ་དབུས་ནི་སྔོན་པོ་སྟེ། །ཨཱ་ལི་ཀཱ་ལི་ཟླ་བ་ཉི། །དྷཱིཿ་དང་རལ་གྲི་སྤྲོས་བསྡུས་ནས། །གཅིག་ཏུ་གྱུར་ནས་འཇམ་པའི་དཔལ། །དང་པོའི་སངས་རྒྱས་དུས་གསུམ་སྐུ། །མདོག་


DTG047_Page_0442
[མ་དཔེ་གཟིགས་ན་འདིར་གནོན།]

དཀར་ཕྱག་གཉིས་སྤྱན་གསུམ་ཞི། །རིགས་ལྔའི་ཟུར་ཕུད་མཐོན་མཐིང་ལྔ། །ཕྱག་རྒྱ་ལྔ་ནི་རིན་ཆེན་བརྒྱན། །རྡོ་རྗེ་གཡས་ལ་དྲིལ་བུ་གཡོན། །རྡོ་རྗེ་སྐྱིལ་མོ་ཀྲུང་བཅས་ལ། །སྣ་ཚོགས་རྡོ་རྗེ་པདྨར་བཞུགས། །སངས་རྒྱས་རྣམས་དང་ཕན་ཚུན་གཟིགས། །སྙིང་གར་པད་ཟླ་དྷཱིཿ་བལྟས་ལ། །རིགས་རིགས་བསྐུལ་སྦྱང་འོད་ལྔར་བྱས། །རྣལ་འབྱོར་དང་པོ་ཉིད་དེར་གསལ། །ཞི་བས་སྦྱངས་དང་སྨན་བྱས་ནས། །ཐམས་ཅད་དྷཱིཿ་ཡིག་ཆོས་ཉིད་ཞུགས། །དྲག་པོའི་རིགས་ཅན་ལ་བརྩེ་བས། །ཕྱོགས་བཅུའི་རྒྱལ་བ་སྔགས་ཀྱིས་བསྐུལ། །ཚད་མེད་བཞི་ཡི་ལྷ་མོ་བཞིས། །ཙཱ་རྩི་སོགས་ཀྱི་གླུ་ཡིས་བསྐུལ། །ཐུགས་རྗེས་ཁྲོས་པའི་དད་སྒྲོལ་ཁྱོད་བཞེངས་ཤིག །ཁམས་གསུམ་ཀུན་གྱི་གཏི་མུག་རབ་ཏུ་སོལ། །དད་སྒྲོལ་བརྩོན་བསྐྱེད་སྟོང་པ་ཉིད་ལས་བཞེངས། །བདུད་བཞི་དག་ལས་ཤིན་ཏུ་རྒྱལ་མཛད་པ། །འཇིག་རྟེན་མགོན་པོ་སྟོང་ཉིད་ཅི་སྟེ་བཞུགས། །དད་སྒྲོལ་འཇིག་རྟེན་མགོན་མཛད་ད་བཞེངས་ཤིག །བྱང་ཆུབ་དགོད་པར་སེམས་ཅན་མགྲོན་པོས་ནས། །ཅི་ལྟར་སྟོང་པ་ཉིད་ལ་ཞུགས་པ་ཅི། །གླུ་ཡི་སྒྲ་ཡིས་དེ་ཉིད་གསུམ། །ཧོ་གཉིས་བཅས་པ་དེར་ཐིམ་སྟེ། །འགྲོ་བའི་དཀྱིལ་འཁོར་སྒྱུ་མར་མཐོང༌། །འགྲོ་ལ་ཆགས་པས་ཁུ་བར་གྱུར། །ཧཱུཾ་སྔོན་ཉི་མ་ལ་གནས་པ། །རྡོ་རྗེ་སྔོན་པོ་ཁྲོ་བོ་བསྐྱེད། །ཁྲོ་བོ་སྔོན་པོ་རུས་པའི་རྒྱན། །སྦོམ་ཐུང་གསུས་པ་འཕྱང་བ་ཡི། །མུན་པ་ལྟ་བུར་འཇིགས་པའི་ཞལ། །དཀར་དང་དམར་བ་གཡས་དང་གཡོན། །གྱེན་སྐྱེས་སྨ་ར་སེར་པོ་འབར། །ལྗགས་འདྲིལ་མཆེ་བ་རབ་ཏུ་གཙིགས། །གཡོན་བརྐྱང་བ་ཡིས་གཤིན་རྗེ་བརྫིས། །ཤེས་རབ་དང་བཅས་གཞན་དོན་བྱེད། །གྲི་གུག་རྡོ་རྗེ་རལ་གྲི་གཡས། །ཐོད་པ་འཁོར་ལོ་ཆུ་སྐྱེས་གཡོན། །ཡུམ་ནི་ཞལ་གཅིག་ཕྱག་གཉིས་འཁྱུད། །མཐའ་ཡས་སྔོན་པོ་ཏཀྵ་དཀར། །སྐྲ་བཅིངས་རྣ་ཆ་མགུལ་དུ་འཕྱང༌། །རིགས་ལྡན་ཁྲ་བོ་དཔུང་བའི་རྒྱན། །དུང་སྐྱོང་སེར་པོ་ལག་པའི་གདུགས། །པདྨ་དཀར་པོ་དོ་ཤལ་བྱས། །ཀརྐོ་ཊ་ལྗང་སེ་རལ་ཁ། །ནོར་རྒྱས་དཀར་པོ་སྐ་རགས་དང༌། །


DTG047_Page_0443
[མ་དཔེ་གཟིགས་ན་འདིར་གནོན།]

པདྨ་ཆེན་པོ་རྐང་གདུབ་རྐང༌། །ལྕེ་དང་མཆེ་བ་གཉིས་ལྡན་པ། །ཕུད་ཕུད་སྒྲ་སྒྲོགས་འཇིགས་བྱེད་པ། །མགོ་བོ་བརྒྱ་ཕྱེད་ཕྲེང་བ་འཕྱང༌། །རྭ་རྣོ་རྨིག་པ་རྣོ་བ་དང༌། །སྤུ་སེར་འབར་བ་འཇིགས་པ་ཡིས། །མ་ཧེ་གཤིན་རྗེ་ཕོ་མོ་ཡིས། །སྟེང་དུ་འཇིགས་བྱེད་ལེགས་བསྒོམས་ལ། །ཆོས་དབྱིངས་དག་ཏུ་ཆོས་ཀུན་བསྒོམས། །ཨོཾ་དྷརྨཱ་དྷཱ་ཏུ་སྭ་བྷཱ་ཝ་ཨཱཏྨ་ཀོ྅ཧཾ། དེ་ལྟར་རྗེས་ཀྱི་རྣལ་འབྱོར་རོ། །སྙིང་གའི་ཧཱུཾ་དེ་ཡ་གྱུར་ཏེ། །དེ་ཡི་འོད་ཀྱིས་ཕྱོགས་བཅུ་ཡི། །རྒྱལ་བ་ཡུམ་བཅས་དགའ་བར་གྱུར། །བདེ་བར་ཞུ་ནས་རང་ལ་ཞུ། །ཧཱུཾ་ལས་རྡོ་རྗེ་པཾ་པདྨ། །ཨོཾ་ལས་རྡོ་རྗེ་རྩེ་མོ་དང༌། །པདྨའི་ཟེ་འབྲུ་བྱིན་གྱིས་བརླབས། །རྗེས་སུ་ཆགས་པས་མཁའ་གསང་དུ། །ཐིག་ལེ་ཡི་གེ་དང་བཅས་ལ། །གཞལ་ཡས་ལྷ་རྣམས་ལེགས་པར་བསྐྱེད། །གཞལ་ཡས་དབུས་སུ་ཡ་ཉིད་ལས། །གཙོ་བོ་རང་ཉིད་ལྟ་བུ་བསྒོམ། །ཤར་དུ་ཀྵེ་དང་འཁོར་ལོ་ལས། །གཏི་མུག་རྡོ་རྗེ་དཀར་པོ་སྟེ། །གྲི་གུག་འཁོར་ལོ་རལ་གྲི་གཡས། །ཐོད་པ་རིན་ཆེན་ཆུ་སྐྱེས་གཡོན། །ལྷོ་རུ་མ་དང་རིན་ཆེན་ལས། །ཕྲ་མ་རྡོ་རྗེ་གསེར་གྱི་མདོག །གྲི་གུག་རིན་ཆེན་རལ་གྲི་གཡས། །ཐོད་པ་འཁོར་ལོ་ཆུ་སྐྱེས་གཡོན། །ནུབ་ཏུ་མེ་དང་པདྨ་ལས། །འདོད་ཆགས་རྡོ་རྗེ་རཱ་གའི་མདོག །གྲི་གུག་པདྨ་རལ་གྲི་གཡས། །ཐོད་པ་འཁོར་ལོ་རིན་ཆེན་གཡོན། །བྱང་དུ་ད་དང་རལ་གྲི་ལས། །ཕྲག་དོག་རྡོ་རྗེ་མར་ཀཏ་མཚུངས། །གྲི་གུག་རལ་གྲི་འཁོར་ལོ་གཡས། །ཐོད་པ་རིན་ཆེན་པདྨ་གཡོན། །ཁྲོ་བོའི་གཟུགས་ནི་ཐམས་ཅད་འཇིགས། །རྡོ་རྗེ་སྣ་ཚོགས་རྩ་བ་བཞིར། །ཉི་མའི་གད་ན་ལ་གཡོན་བརྐྱང་བཞུགས། །གཏི་མུག་རྡོ་རྗེ་ཟླ་བ་ལ། །གཏི་མུག་སེལ་བ་ཉིད་ཀྱི་ཕྱིར། །ཤེས་རབ་ཆ་ཡིས་དེ་བཞིན་དུ། །རྡོ་རྗེ་རཱ་ཡི་མཚམས་བཞི་རུ། །ཟླ་བའི་གདན་ལ་ལྷ་མོ་བཞི། །ཤར་ལྷོར་ཛཱ་དང་འཁོར་ལོ་ལས། །རྡོ་རྗེ་ཙཱ་རྩི་གཏི་མུག་མཚུངས། །ལྷོ་རུ་ས་དང་རྡོ་རྗེ་ལས། །རྡོ་རྗེ་ཕག་མོ་གཙོ་བོ་འདྲ། །ནུབ་བྱང་དོ་དང་པདྨ་ལས། །འདོད་ཆགས་རྡོ་རྗེ་ལྟ་བུར་བསྒོམ། །བྱང་ཤར་རུ་དང་རལ་གྲི་ལས། །ཕྲག་དོག་གཤེད་དང་འདྲ་བར་བསྒོམ། །སྒོ་བཞིར་


DTG047_Page_0444
[མ་དཔེ་གཟིགས་ན་འདིར་གནོན།]

ཉི་མའི་དཀྱིལ་འཁོར་ལ། །ཁྲོ་བོ་བཞི་ནི་རིམ་པས་བསྐྱེད། །ཤར་སྒོར་ཡ་དང་ཐོ་བ་ལས། །ཐོ་བ་གཤེད་ནི་བདག་པོ་མཚུངས། །གཡས་ན་ཐོ་བ་རལ་གྲི་འཛིན། །རིན་པོ་ཆེ་དང་པདྨ་གཡོན། །ལྷོ་སྒོར་ཙྪ་དང་དབྱུག་པ་ལས། །དབྱུག་པ་གཤེད་མདོག་གཏི་མུག་འདྲ། །དབྱུག་པ་རལ་གྲི་གཡས་ན་འཛིན། །པདྨ་འཁོར་ལོ་ཕྱག་གཡོན་ན། །ནུབ་སྒོར་ནི་དད་པདྨ་ལས། །པདྨ་གཤེད་ནི་འདོད་ཆགས་མཚུངས། །པདྨ་རལ་གྲི་གཡས་ན་འཛིན། །རིན་ཆེན་འཁོར་ལོ་ཕྱག་གཡོན་ན། །བྱང་སྒོར་རླུང་དང་རལ་གྲི་ལས། །རལ་གྲི་གཤེད་ནི་ལྗང་གུ་སྟེ། །ཞལ་དང་རྒྱན་ནི་ཕྲག་དོག་མཚུངས། །རལ་གྲི་དང་ནི་འཁོར་ལོ་གཡས། །རིན་ཆེན་དང་ནི་པདྨ་གཡོན། །གྲི་གུག་ཐོད་པ་རང་རིག་འཁྱུད། །སྐྲ་སེར་སྨ་ར་སྨིན་མ་འབར། །ཞལ་བཞད་མཆེ་བ་རྣམ་པར་གཙིགས། །གཙོ་བོ་ལྟ་བུ་སྤྲུལ་གྱིས་བརྒྱན། །སྔོན་པོའི་གཡས་དཀར་དམར་པོ་གཡོན། །དཀར་པོའི་གཡས་སྔོ་གཡོན་དམར་ལ། །དམར་པོ་གཡས་སྔོ་གཡོན་པ་དཀར། །སེར་ལྗང་གཡས་ནག་གཡོན་དཀར་ཞལ། །ཟུར་བཞི་ན་ཡོ་ནི་རཱ་ལས། །བདུད་རྩི་དང་ལྡན་ཐོད་པ་བཞི། །ལེགས་པར་བསྒྲུབས་ནས་དབྱུང་བ་ནི། །གཙོ་བོ་རང་རང་སྔགས་ཀྱིས་དབྱུང༌། །ཧཱུཾ་ཥྚྲྀཿའི་སྔགས་ཀྱིས་གཙོ་བོ་དབྱུང༌། །རིགས་ཀྱིས་ཞེ་སྡང་ལས་བྱ་སྟེ། །ཁྲོ་བོར་འདུས་ནས་ཞལ་དགུར་གྱུར། །གཙོ་བོ་བདག་ལ་གཞུག་པར་བྱ། །ཛིན་ཛིཀ་བརྗོད་གཏི་མུག་གཤེད། །གཏི་མུག་ལས་བྱས་ཤར་ཕྱོགས་ཀྱི། །རྡོ་རྗེ་རྩིབས་ཀྱི་རྩ་བར་གཞག །ཟླ་བའི་གདན་ལ་གནས་པའོ། །རཏྣ་དྷྲྀཀ་གིས་ཕྲ་མ་ནི། །ང་རྒྱལ་སྦྱངས་ནས་ལྷོ་རུ་དགོད། །ཨཱ་རོ་ལྀཀ་བརྗོད་འདོད་ཆགས་གཤེད། །ནུབ་ཏུ་པད་ཉི་དག་ལ་དགོད། །པྲཛྙཱ་དྷྲྀཀ་གིས་ཕྲག་དོག་གཤེད། །ཕྲག་དོག་ལས་བྱས་བྱང་ཉིད་བཞུགས། །མོ་ཧ་ར་ནི་བརྗོད་པ་ཡིས། །ཙཱ་རྩི་སྒེག་མོ་འོད་བཟངས་མ། །ཤར་ལྷོར་རྡོ་རྗེའི་མཚམས་སུ་བསྒོམས། །རང་གི་རིགས་ཀྱི་ལས་བྱེད་མ། །དྭེ་ཥ་ར་ཏི་ལྷོ་ནུབ་ཀྱི། །མཚམས་སུ་རྡོ་རྗེ་ཕག་མོ་བསྒོམ། །ནུབ་བྱང་མཚམས་སུ་དབྱངས་ཅན་མ། །རཱ་ག་ར་ཏིའི་སྔགས་ཀྱིས་


DTG047_Page_0445
[མ་དཔེ་གཟིགས་ན་འདིར་གནོན།]

དབྱུང། །བཛྲ་ར་ཏི་ས་གཽ་རཱི་མ། །བྱང་ཤར་རྡོ་རྗེའི་མཚམས་སུ་བསྒོམས། །ཐམས་ཅད་ཕྱག་འཚལ་བ་དང་ལྡན། །ལྷ་མོ་པདྨ་ཟླ་བའི་གདན། །རིགས་ཀྱི་ཕྱག་མཚན་དག་གིས་བསྐྱེད། །རང་རིགས་བསྐུལ་སྦྱང་བྱས་ལ་གཞུག །དེ་ཉིད་གསུམ་གྱིས་ཐོད་པ་དབྱུང༌། །ཟུར་བཞི་བདེ་བ་བདུད་རྩིར་ལྡན། །མུངྒ་ར་དྷྲྀཀ་གིས་ཐོ་བ་གཤེད། །ལས་བྱས་ཤར་སྒོར་པད་ཉི་བསྒོམ། །དཎྜ་དྷྲྀཀ་གིས་དབྱུག་པ་གཤེད། །ལྷོ་ཡི་སྒོ་རུ་དེ་བཞིན་གཞག །པདྨ་དྷྲྀཀ་གིས་ནུབ་སྒོ་རུ། །པདྨ་གཤེད་ནི་བསྒོམ་པར་བྱ། །ཁངྒ་དྷྲྀཀ་གིས་རལ་གྲི་གཤེད། །བྱང་གི་སྒོ་རུ་བསྒོམ་པར་བྱ། །དཀྱིལ་འཁོར་དག་ལ་མཉམ་པར་བལྟ། །འདི་ནི་ཤིན་ཏུ་རྣལ་འབྱོར་རོ། །གཤིན་རྗེ་གཤེད་ནག་འཇིགས་བྱེད་ཀྱིས། །དཀྱིལ་འཁོར་ལྷ་རྣམས་མིག་ལ་སོགས། །ཀྵིཾ། ཛཾ། ཁཾ། གཾ། ཀཾ། སཾ་གིས། ལྷ་རྣམས་དག་ཏུ་བྱིན་གྱིས་བརླབ། །པདྨ་ཟླ་བའི་དཀྱིལ་འཁོར་ལ། །འཁོར་ལོ་རྡོ་རྗེ་རིན་ཆེན་པད། །རལ་གྲི་རྡོ་རྗེ་ས་སྙིང་དང༌། །ཕྱག་ན་རྡོ་རྗེ་མཁའ་སྙིང་པོ། །སྤྱན་རས་གཟིགས་མགོན་སྒྲིབ་པ་སེལ། །ཀུན་དུ་བཟང་པོ་བསྒོམ་པར་བྱ། །ཕྱག་ན་རྡོ་རྗེ་ཀུན་དུ་བཟང༌། །ཐུགས་ཀྱི་རྡོ་རྗེ་འདྲ་བར་བསྒོམ། མིག་ནི་གཏི་མུག་སྣ་ཕྲ་མ། །ལྕེ་ལ་འདོད་ཆགས་ལུས་ཕྲག་དོག །གཤེད་པོ་འདྲ་བར་གོ་ཆ་བྱ། །ཁྲོ་བོ་སྒེག་པའི་གཟུགས་ཅན་ནོ། །སྙིང་གར་ཧཱུཾ་ནག་ཨཱཿ་དམར་ཁ། །མགོ་བོར་ཨོཾ་ནི་དཀར་པོ་བསྒོམ། །རྡོ་རྗེ་པདྨ་འཁོར་ལོ་ལས། །སྐུ་གསུང་རྡོ་རྗེ་སྤྲོ་བསྡུ་བསྒོམ། །ཨོཾ་སརྦ་ཏ་ཐཱ་ག་ཏཙིཏྟ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཨོཾ་སརྦ་ཏ་ཐཱ་ག་ཏ་ཝཱཀ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཨོཾ་སརྦ་ཏ་ཐཱ་ག་ཏ་ཀཱ་ཡ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། རང་སྙིང་ས་བོན་འོད་ཟེར་གྱིས། །ཕྱོགས་བཅུའི་སངས་རྒྱས་ཀུན་བཀུག་ནས། །མདུན་དུ་དམིགས་ལ་མཆོད་པས་མཆོད། །ཨོཾ་སརྦ་ཏ་ཐཱ་ག་ཏ་ཨ་བྷི་ཥིཉྩ་མཱི་བརྗོད་པས། ཙཱ་རྩི་སོགས་ཀྱིས་བཀྲ་ཤིས་གླུ། །བདུད་རྩི་བུམ་པས་བཀྲུས་པ་དང༌། །གཙོ་བོས་དབང་བསྐུར་གཙོ་བོ་ལ། །རྡོ་རྗེ་འཆང་ཉིད་ཅོད་པན་ཏེ། །འཁོར་ལོ་པ་ལ་གཤིན་རྗེ་གཤེད། །ཅོད་པན་དག་དང་ལྡན་པར་བསྒོམ། །རང་སྙིང་


DTG047_Page_0446
[མ་དཔེ་གཟིགས་ན་འདིར་གནོན།]

ས་བོན་འོད་ཟེར་གྱིས། །ཡེ་ཤེས་འཁོར་ལོ་སྤྱན་དྲངས་ལ། །ཁྲོ་བོས་བགེགས་བསྐྲད་མཆོད་བྱས་ལ། །སྒོ་བ་བཞི་ཡིས་གཉིས་མེད་བསྲེ། །སངས་རྒྱས་ཐམས་ཅད་ས་བོན་གྱིས། །ཞལ་ཞུགས་ཞུ་པས་རྡོ་རྗེའི་ལམ། །པདྨར་དབྱུང་དང་ཕྱུང་བ་ལས། །ལྷ་མོ་སྣ་ཚོགས་མེད་ཏོག་སོགས། །ཕྱི་ཡི་མཆོད་པས་མཛེས་པར་མཆོད། །ཙཱ་རྩི་སོགས་ཀྱིས་བདུད་རྩི་དང༌། །ཤ་ལྔས་ཚིམ་པར་བྱ་བ་དང༌། །རང་རིག་གཉིས་པས་གཉིས་མེད་མཆོད། །ཨོཾ་སརྦ་ཏ་ཐཱ་ག་ཏ་པཱུ་ཛ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། བྲག་ཅ་ལྟ་བུ་ཕུལ་བ་དེ། །སྒྲ་བརྙན་ཉིད་དུ་རང་ལ་ཐིམ། །དེ་བཞིན་བསྟོད་པས་ལེགས་པར་བསྟོད། །གཤིན་རྗེ་གཤེད་པོ་རབ་འཇིགས་པ། །གཏི་མུག་རྡོ་རྗེའི་ངོ་བོ་ཁྱོད། །སྟོན་པ་སངས་རྒྱས་ཀུན་རང་བཞིན། །རྡོ་རྗེའི་སྐུ་ལ་ཕྱག་འཚལ་བསྟོད། །གཤིན་རྗེ་གཤེད་པོ་རབ་འཇིགས་པ། །ཕྲ་མ་རྡོ་རྗེའི་ངོ་བོ་ཁྱོད། །རྡོ་རྗེ་ཐུགས་དང་རབ་མཚུངས་པ། །རིན་ཆེན་རྡོ་རྗེ་ཕྱག་འཚལ་བསྟོད། །འདོད་ཆགས་རྡོ་རྗེའི་ངོ་བོ་ཁྱོད། །འདོད་ཆགས་པདྨའི་འབྱུང་གནས་མཉམ། །དབྱངས་མཆོག་ཀུན་གྱི་གཙོ་བོའི་གཙོ། །རྡོ་རྗེ་གསུང་ལ་ཕྱག་འཚལ་བསྟོད། །ཕྲག་དོག་རྡོ་རྗེའི་ངོ་བོ་ཁྱོད། །གཤིན་རྗེ་གཤེད་པོ་ལས་ཀུན་བྱེད། །རྡོ་རྗེ་སྐུ་དང་རབ་ཏུ་མཚུངས། །ཕྱག་ན་རྡོ་རྗེ་ཕྱག་འཚལ་བསྟོད། །སངས་རྒྱས་ཀུན་གྱི་ངོ་བོ་ཁྱོད། །སངས་རྒྱས་ཐམས་ཅད་གཅིག་བསྡུས་པ། །སངས་རྒྱས་ཀུན་མཆོག་གཙོ་བོའི་གཙོ། །དཀྱིལ་འཁོར་གཙོ་ལ་ཕྱག་འཚལ་བསྟོད། །དེ་ལྟར་བསྟོད་ནས་ལྷ་རྣམས་སྤྲོ། །འགྲོ་བ་སྦྱངས་ནས་འཁོར་ལོར་གཞུག །འཁོར་ལོ་ལེགས་བསྡུས་ཕུང་པོ་ཁམས། །སྐྱེ་མཆེད་ཡན་ལག་རང་བཞིན་ཤེས། །རྣལ་འབྱོར་ཆེན་པོ་ཞེས་བྱ་བ། །རྣལ་འབྱོར་ཡེ་ཤེས་བརྟན་པར་བསྒོམ། །དེར་བསྡུ་བའམ་ཤར་སྒོ་ལྷོ། །ནུབ་བྱང་ལྷ་མོ་རིམ་པས་བསྡུ། །ཞལ་དགུ་རྡོ་རྗེ་རྩེ་མོ་རུ། །འཁོར་ལོ་བསྒོམ་དང་རྩ་བ་དག །ལྟེ་བ་སྙིང་ག་དེ་བཞིན་བསྒོམ། །དེ་ནས་གནས་ཀྱི་འཁོར་ལོ་ནི། །བསྐྱེད་པ་རྣལ་འབྱོར་ཆེན་པོ་བྱ། །དེ་བརྟན་ཡ་མཱནྟ་ཀ་ཉིད། །ཞལ་གསུམ་རྗེས་ཀྱི་རྣལ་འབྱོར་སྐུར། །སྒོམ་པ་རྡོ་རྗེ་རྩེ་དང་རྩ། །ལྟེ་བ་སྙིང་ག་རྣལ་


DTG047_Page_0447
[མ་དཔེ་གཟིགས་ན་འདིར་གནོན།]

འབྱོར་ཆེ། །དེ་རྗེས་འཇམ་དཔལ་ཡེ་ཤེས་ཉིད། །དང་པོ་སངས་རྒྱས་གྱུར་པ་ནི། །རྡོ་རྗེ་རྩེ་མོ་རྩ་བར་བསྒོམ། །ལྟེ་བ་སྙིང་ག་དེ་བཞིན་བསྒོམ། །དེ་ནས་གནས་ཀྱི་རིམ་པ་ལས། །རཾ་བཾ་ལཾ་ཡཾ་རིམ་པར་དགོད། །ལུས་གློད་ངག་བསྡམས་ཡིད་བཅིངས་ལ། འབར་ལ་བསྲོས་པས་དབབ་པར་བྱ། །བབས་པས་ཞི་དང་སྙིང་གར་གནས། །དབང་བཞིའི་རིམ་པས་ཐིག་ལེ་དྲངས། །བདེ་བ་མི་རྟོག་སྟོང་ཉིད་ལ། །རྣལ་འབྱོར་མཆོག་འདོད་པ་ཡིས་བསྒོམ། །དེ་ཡང་དམིགས་ནས་སྤྲོ་དང་བསྡུ། །གསལ་དང་བརྟན་པ་སྤྲོ་བྱ་ཞིང༌། །འདུས་པ་དེ་ལ་རྒྱུན་དུ་གཞག །སེམས་མེད་སེམས་ཀྱི་འོད་གསལ་མཐོང༌། །མཐོང་བའི་རྟོག་པ་ཡོངས་མིན་ཏེ། །ཀུན་རྫོབ་ཉམས་ལ་རིགས་པས་སྨྲས། །རྗེས་ལ་ཕྱི་དང་ནང་གི་ཆོས། །ཡང་དག་དཔྱད་པས་གྲུབ་པ་མེད། །ཕྱི་རོལ་རྡུལ་ལས་གྲུབ་པ་སྟེ། །དྲུག་ཅུ་དྲུག་ཏུ་གོ་གཅིག་ཕྱིར། །དཔྱད་པས་ཕྲ་རབ་གྲུབ་པ་མེད། །ཕྱི་རོལ་སྒྱུ་མ་དགག་མི་བྱ། །ནང་ལ་བདག་དང་གཞན་གཉིས་ཀྱང༌། །གྲུབ་དང་མ་གྲུབ་དཔྱད་པ་ཡིས། །བདག་མེད་གཞན་ཡང་རྟགས་པ་དང༌། །མི་རྟག་པ་ཡིས་བདེན་པ་དང༌། །གཉིས་དང་གཉིས་མེད་དེ་ལས་གཞན། །རིགས་པས་རབ་ཏུ་མི་གནས་སོ། །དེ་བས་ཆོས་རྣམས་རྣམ་པར་དག །ཆོས་སྐུ་གཟུགས་སྐུ་ཐ་དད་མེད། །བསྐྱེད་དང་རྫོགས་པའི་རིམ་པ་གཉིས། །འཇུག་དང་ལྡང་བའི་རིགས་ཤེས་བྱ། །དེ་ལྟར་རྟོག་པས་རྣལ་འབྱོར་པས། །དུ་བ་མར་མེ་ཟླ་ཉི་ཡི། །རྟགས་རྣམས་རིམ་པས་ངེས་པར་འབྱུང༌། །དེ་ཡིས་རྡོ་རྗེའི་སྐུ་འགྲུབ་བོ། །སྐྱོན་པད་ཟླ་བ་ཉི་མ་ལ། །དྷཱིཿ་དང་ཧཱུཾ་དང་ཉི་མ་དང༌། །འཁོར་ལོ་བརྒྱད་ཀྱི་རྩིབས་དང་སྟེང༌། །ཉི་སྟེང་སྙིང་པོ་ལས་སྔགས་དང༌། །རྩ་བའི་སྙིང་པོས་བསྐོར་བ་ལ། །རང་གི་རྒྱུ་བ་ཤེས་པ་ཡིས། །ཞི་རྒྱས་དབང་དྲག་གང་འདོད་པ། །བསམ་གཏན་སོགས་ཀྱིས་རིམ་པས་བཟླ། །དེ་ནས་སྔགས་ཀྱི་བསྙེན་པ་ནི། །ཞེ་སྡང་ཅན་དག་འདུལ་བ་ལ། །ཡ་མཱནྟ་ཀའི་ཏིང་འཛིན་གྱིས། །སྙིང་གར་ཉི་མ་ཧཱུཾ་བཀོད་དེ། །སྤྲོ་བསྡུ་སྔགས་ཀྱི་ཡི་གེས་བསྐོར། །བདུན་འབུམ་སྙིང་པོ་ཨོཾ་


DTG047_Page_0448
[མ་དཔེ་གཟིགས་ན་འདིར་གནོན།]

དང་པོ། །ཡཱ་མཱནྟ་ཀ་ཧཱུཾ་ཕཊ་བཟླས། །ཏིང་འཛིན་མཆོད་གཏོར་བཅས་པའོ། །དེས་ཀྱང་འདུལ་བར་མ་གྱུར་ནས། །དེ་ནས་ཞལ་དགུ་འཇིགས་བྱེད་དེ། །ཧྲཱིཿ་ཥྚྲྀཿ་སྤྲོ་བསྡུ་ཤེས་བྱས་ལ། །ལས་སྔགས་རྒྱལ་པོ་སུམ་འབུམ་བཟླས། །དེས་ཀྱང་ཁྱབ་པར་མ་གྱུར་པས། །ལྷ་ནི་བཅུ་བདུན་གསལ་བ་ཡིས། །རྩ་སྔགས་བཅུ་བདུན་སྤྲོ་དང་བསྡུ། །འབུམ་ཕྲག་གཅིག་ནི་བཟླས་པར་བྱ། །དེ་ནས་བསྒྲུབ་པ་བྱ་བ་ནི། །དཀྱིལ་འཁོར་གསུམ་གྱི་དང་པོ་ནི། །མར་ཚེས་གཉིས་ལ་དུར་ཁྲོད་རས། །ཁྲུ་དོ་ཁ་སྦྱོར་ལྡན་པ་བླང༌། །ཐལ་ཆེན་ས་དཀར་བདུད་རྩི་ལྔ། །ཁྲག་ལྔ་དུག་ལྔ་བདུད་རྩི་ལྔ། །ཁ་བ་ལྔ་དང་ཚ་བ་ལྔ། །རས་བརྒྱད་ལེགས་པར་སྦྱར་བྱས་ནས། །བྱ་རོག་སྒྲོ་དང་མི་རུས་ལ། །སྙུ་གུ་བྱས་ལ་བྲི་བ་ནི། །གཤིན་རྗེ་ཕོ་མོ་འཇིགས་ལྡན་པའི། །རྟེན་འབྲེལ་འཁོར་བའི་འཁོར་ལོ་བྲི། །གསུམ་དུ་བསྐོར་ལ་ཕྱི་རིམ་ལ། །རེ་མིག་འཁོར་ལོ་བཅུ་དྲུག་བྱ། །ཕྱོགས་མཚམས་བརྒྱད་ལ་ལུས་ཀྱི་སྔགས། །ཧྲཱིཿ་ཥྚྲྀཿ་མིང་དང་སྤེལ་བ་དགོད། །བར་མ་མེ་རི་མིག་བཅུ་གཉིས། །ཧཱུཾ་ཕཊ་བསྒྲུབ་བྱར་བཅས་པ་བྲི། །བར་མ་རེ་མིག་བཅུ་གཉིས་ལ། །རཱ་ཛཱ་ས་དོ་རུ་ཎ་ཡོ། །ནི་ར་ཡཙྪ་ནི་རྣམས་བྲི། །ནང་མ་བརྒྱད་ལ་ཕྱོགས་བཞི་རུ། །མ་མེ་ད་ཀྵེ་དབུས་སུ་ཡ། །མཚམས་ཀྱི་ཁ་སྟོང་བཞི་ལ་ཡང༌། །བསྒྲུབ་བྱ་དག་ལ་སྔགས་རྣམས་དགོད། །མགོ་བོ་ཕྱི་རུ་ཕྱོགས་པར་བྱ། །སྤྱི་བོ་དཔུང་མགོ་གཡས་གཡོན་དང༌། །བརླ་གཡས་དག་དང་གཡོན་པ་ལྔ། །མདོམས་དང་རྐང་མཐིལ་སྙིང་པོ་དགོད། །མཚོག་མར་ཨོཾ་ཧྲཱིཿ་ལག་གཡས་ལ། །ཥྚྲྀཿ་ཝི་རྐང་མཐིལ་གཡས་པ་ལ། །ཀྲྀ་ཏཱ་ན་ན་རྐང་མཐིལ་གཡོན། །ཧཱུཾ་ཕཊ་ལག་མཐིལ་གཡོན་དུའོ། །མེ་དང་ཧཱུཾ་ཕཊ་མིང་དང་སྤེལ། །བསྒྲུབ་བྱ་མཚམས་བཞིར་བྲི་བ་ནི། །ཕྱོགས་ཀྱི་ཧཱུཾ་དང་ཕཊ་བརྒྱད་དགོད། །ཛ་དང་ཡས་ཀྱང་བསྐོར་བར་བྱ། །རྩ་བའི་སྙིང་པོ་སོ་གཉིས་ཀྱང༌། །བཅུ་བདུན་ལུས་ལ་བསྐོར་བས་འགྲུབ། །ཡ་ནི་སྙིང་གར་སྤྱི་བོར་ཀྵེ། །ལྟེ་བར་མ་དང་ཁ་ལ་མེ། །ད་ནི་ལྕེ་དང་ཁ་ལ་དགོད། །དཔུང་པ་གཡས་དང་གཡོན་གཉིས་ལ། །ཡ་ཙྪ་དེ་བཞིན་


DTG047_Page_0449
[མ་དཔེ་གཟིགས་ན་འདིར་གནོན།]

རྐང་གཉིས་ལ། །ནི་ར་རིམ་པས་དགོད་པར་བྱ། །ཛཱ་ནི་ས་སྟེང་དཔྲལ་བར་དགོད། །ས་ནི་ཆུ་སྟེ་ལྟེ་བར་བྲི། །ངོ་ནི་མེ་སྟེ་མགྲིན་པ་ཉིད། །རུ་ནི་རླུང་སྟེ་བརླ་སྟེ་མདོམས་སུ། །ལྷ་མོ་ཡུམ་ནི་གཡོན་པར་དགོད། །ན་ཡོ་ནི་ར་མིག་རྣ་སྣ། །ལྕེ་དང་བཞི་ལ་མཁས་པས་དགོད།། རྒྱུ་དང་འབྲས་བུའི་བྱེ་བྲག་ཡིན། །དེ་ལྟར་རེ་མིག་དགུ་པ་ཡི། །དཀྱིལ་འཁོར་རྒྱུད་ལས་ལྷག་མེད་བྲི། །ཆག་ཆག་ཁྲག་ཆེན་དུར་ཁྲོད་ཚོན། །ལྷ་ནི་བཅུ་གསུམ་དཀྱིལ་འཁོར་ཡང༌། །དེ་འདྲ་གཞུག་ཅིང་བཀའ་བསྒོའོ། །མཆོད་གཏོར་བཟང་བ་སྒྲོན་མ་ལྔ། །ས་བདུན་རྒྱུ་ལས་གཤིན་རྗེའི་གཟུགས། །ཁྲུ་གང་ཤིན་ཏུ་འཇིགས་པར་བྱ། །འཁོར་ལོ་དང་བཅས་ལྷོ་སྒོར་གཞག །རྒྱུད་ལྟར་བྱས་ལ་རབ་གནས་ནི། །རླུང་ཆེའི་ནང་དུ་རླུང་མེ་དང༌། །ཡ་དང་རལ་གྲི་ལས་སྐྱེས་པ། །དེ་འདྲ་གཞུག་ཅིང་བཀའ་བསྒོའོ། །སྣ་ཚོགས་མཚོན་ཆ་འཁོར་ན་གནས། ལྟོ་བ་སྲིད་གསུམ་ཕྱོགས་སྐྱོང་དང༌། །གཤིན་རྗེ་ཕོ་མོ་ལས་བྱེད་རྣམས། །རྒྱུ་རྐྱེན་འབྲས་བུ་ཤེས་པར་བསྒོམ། །ས་བདུན་འཁོར་ལོའི་རྫས་རྣམས་ལ། །དེ་ཡི་བདུད་རྩི་རྗེས་དང་བསྲེ། །གཟུགས་བརྙན་སོར་བརྒྱད་བྱ་བ་དང༌། །འཁོར་ལོ་ཡི་གེ་སྔར་ལྟར་དགོད། །ལྷོ་སྒོར་གཤིན་རྗེའི་མདུན་དུ་ཡང༌། །ཐོད་པ་གསུམ་ལ་ཁ་སྦྱོར་གཞག །དེ་ལྟར་བྲི་བའི་རྣལ་འབྱོར་བ། །སྐྲ་གྲོལ་གཅེར་བུ་བདུད་རྩིས་བྱུགས། །ལྷོ་ཕྱོགས་མ་ཧེ་ཞལ་ལྟར་སྦྱར། །མཆོད་གཏོར་གསོལ་བ་གདབ་པ་ཤིས། །དེ་ནས་རྣལ་འབྱོར་བཞི་རྫོགས་ནས། །ཡ་མཱནྟ་ཀར་བསྒྱུར་བྱས་ལ། །སྙིང་གའི་ཉི་མ་ཧཱུཾ་འོད་ཀྱིས། །རྒྱལ་བ་སྲས་བཅས་ཁྲོ་བོ་རྣམས། །བསྐུལ་ཏེ་བསྒྲུབ་བྱའི་ཡེ་ཤེས་དང༌། །བསྲུང་བ་རང་གི་སྙིང་གར་གཞུག །རང་བཞིན་དབང་དང་གཟི་བྱིན་བསྐྱེད། །དེ་ཡི་འཇིག་རྟེན་ལྷ་དག་ཀུན། །ཆོས་སྐྱོང་རྣམས་དང་བྲལ་བར་བྱ། །ཟླ་བ་ཕྱེད་དུ་བདུན་འབུམ་བྱ། །འཁོར་ལོའི་གཟུགས་ལ་གཞུག་པ་སྟེ། །ཁུགས་ནས་འཁོར་ལོའི་ལས་ཤིས་སོ། །ཟླ་བ་ཕྱེད་དུ་རྣལ་འབྱོར་པ། །རེ་མིག་དགུ་པའི་དཀྱིལ་འཁོར་དུ། །ལྷོ་ནས་ཞུགས་ཤིང་ལྷོ་རུ་བལྟ། །སྙིང་གའི་སྙིང་པོ་སྤྲོས་པ་ཡིས། །ལས་ཀྱི་གཤིན་


DTG047_Page_0450
[མ་དཔེ་གཟིགས་ན་འདིར་གནོན།]

རྗེའི་ལྟོ་བར་དཀྲུགས། །གཤིན་རྗེ་བཀའ་བསྒོ་ཕྱོགས་སྐྱོང་དང༌། །གཤིན་རྗེའི་ཚོགས་རྣམས་མདག་པ་ཡིས། །ཨོཾ་དང་ཧྲཱིཿ་ཥྚྲྀཿ་ཝི་ཀྲྀ་སོགས། །སྟེང་དང་ཤར་ལྷོ་ནུབ་བྱང་གི །ཕྱོགས་སྐྱོང་བསྐུལ་བས་ཁྱབ་འཇུག་སོགས། །བསྒྲུབ་བྱའི་རྣམ་ཤེས་རེག་བྱ་འདྲེན། །བསྒྲུབ་བྱའི་སེམས་དང་རེག་བྱ་སྐྱོང༌། །དེ་ནས་འཕོ་ལ་རིངས་པ་ཡིས། །གཤིན་རྗེའི་ལྟོ་བར་དེ་ནས་འོང༌། །བརྒྱ་བྱིན་སྤྲུལ་པ་འཁོར་ཚོགས་ཀྱིས། །གཟུགས་ཕུང་མིག་གི་ཁམས་བཅས་དཀྲུགས། །གཤིན་རྗེས་ཚོར་བ་སྣ་ཚོགས་དཀྲུགས། །ཀླུ་ཡིས་འདུ་ཤེས་སྣ་ཁམས་དཀྲུགས། །གནོད་སྦྱིན་འདུ་བྱེད་ལྕེ་ཚོགས་རྣམས། །དཀྲུགས་པས་སྐྱོ་ནས་ལྟོ་བར་ཡོད། །སྟེང་འོག་མཚམས་བཞི་དེ་བཞིན་དུ། །སྲོག་གཅོད་ཤ་ཟ་ཁྲག་འཐུང་ཞིང༌། །མདངས་འཕྲོག་དབུགས་ལེན་པར་ཡང་བྱེད། །ལུས་ལྕི་ལ་སོགས་འབྱུང་བ་རྒུད། །རྣམ་ཤེས་འཕོ་བའི་ལས་བྱེད་ཅིང༌། །གཤིན་རྗེའི་ལྟོ་བར་འགུགས་པར་བྱེད། །འབུམ་ཕྲག་གསུམ་གྱིས་དབུགས་གཞུག་པ། །ཧྲཱི་ཥྲྀཿ་བཅུ་པའི་ལས་ཡིན་ནོ། །དེ་ནས་འཁོར་ལོ་ཁ་སྦྱར་དུ། །བསྒྲུབ་བྱ་འཁོར་ལོའི་ཁང་སྟོང་གཞག །ཐོད་པ་ཁ་སྦྱར་ནང་བཅུག་ལ། །བཅུ་གསུམ་དཀྱིལ་འཁོར་དབུས་སུ་གཞག །རྣལ་འབྱོར་བཞི་རྫོགས་རྩ་བའི་སྔགས། །གཙོ་བོ་ཐུགས་ཀ་འཁོར་དེ་བཞིན། །བཀོད་པ་བལྟས་པས་སྔགས་དང་ལྷས། །དཀྱིལ་འཁོར་འདི་དང་གཞན་བསྐུལ་ལོ། །སྤྲུལ་པས་གཞན་བསྐུལ་རིགས་རིགས་ཀྱི། །བསྒྲུབ་བྱའི་ཡི་གེ་རྩ་དང་ནི། །བདུད་རྩི་བཅུ་དང་སེམས་བླངས་ལ། །དཀྱིལ་འཁོར་ལྷ་ལ་དབང་བསྐུར་ཞིང༌། །ལྷར་བསྒྲུབ་དཀྱིལ་འཁོར་རྫོགས་པར་བྱ། །ཟླ་གཅིག་ཉི་མ་བཞི་རུ་བཅད། །བཞི་ཚད་བདུན་དང་ཞག་གཉིས་ཏེ། །དང་པོར་གསོལ་གདབ་ཐ་མར་བཤགས། །པྲ་མ་ཡ་ཧཱུཾ་ཕཊ་དང་ནི། །རཀྟ་ཙ་ར་པ་ཡ་དང༌། །མུར་ཙ་པ་ཙ་པ་ཡ་དང༌། །དུ་མ་སྦ་སརྦ་མཱ་ར་ཡ། །རིམ་པས་སྔགས་དང་མིང་སྤེལ་བཟླས། །འབུམ་གྱིས་ངེས་པར་འགྲུབ་པར་འགྱུར། །མཚན་མོ་ཧྲཱྀཿ་ཥྚྀཿའི་སྦྱོར་བ་ནི། །གོང་དུ་བསྟན་པ་དེ་ཉིད་དོ། །ལས་ལ་ཆོས་


DTG047_Page_0451
[མ་དཔེ་གཟིགས་ན་འདིར་གནོན།]

སྐྱོང་གཤིན་རྗེ་དང༌། །ཁྲོ་བོ་རྣམས་ནི་དེ་བཞིན་བསྐུལ། །སྒྲུབ་པ་པོ་ཡང་སྐྲ་གྲོལ་ཞིང༌། །གཅེར་བུ་བདུད་རྩི་ལྔས་བྱུགས་ལ། །ལྷོ་སྒོར་ལྷོ་རུ་ཕྱོགས་པ་ཡིས། །གཡོན་བརྐྱང་ཌ་མ་རུ་དཀྲོལ་ལོ། །ཧ་ཧ་ཞེས་པའི་སྒྲུབ་པ་པོ། །གསུམ་མམ་དཔའ་བརྩོན་རང་ཉིད་བསྒྲུབ། །ཡ་མ་མེ་དཀྵེ་ལྔ་ཡིས། །ཞེ་སྡང་ལ་སོགས་ལས་སྐྱེས་པའི། །སྤྲུལ་མགོ་གླང་མགོ་བྱ་ཡི་མགོ །འབྲུག་མགོ་ཕག་གི་མགོ་བོ་ཅན། །གཤིན་རྗེའི་རྒྱལ་པོ་ལྔ་བསྐུལ་བ། །སྐྱེ་རྒ་ན་འཆིའི་འཁོར་ལོ་བསྐོར། །ཡཙྪ་ནི་ར་ཤན་པ་བཞི། །གསོད་བཤུ་གཅོད་དང་ཟ་བར་བྱེད། །ཛཱ་ས་དོ་རུ་དྲག་མོ་བཞི། །གཤིན་རྗེའི་རྒྱལ་པོའི་ཆུང་མ་རྣམས། །འཇུ་སྐེམས་བསྲེག་ཅིང་གཏོར་བ་ཡི། །ཤན་པ་བཞི་ཡི་ཆུང་མ་སྟེ། །ལེགས་ཉེས་བལྟ་ཞིང་དུར་ཁྲོད་ཉུལ། །དེ་ཡི་འཁོར་ན་ཞེ་སྡང་ཅན། །གསོད་དང་ཤ་ལ་ཤིན་ཏུ་དགའ། །མི་སྡུག་གཟུགས་ཅན་མཚོན་ཆ་ཐོགས། །བཀའ་བསྐུལ་རིམ་པས་བསྒྲུབ་བྱ་ལ། །བརྩེ་བའི་ཚུལ་གྱིས་རླུང་ཤུགས་ཀྱིས། །གཤིན་རྗེའི་ལྟོ་བར་བཅུག་པར་བསམ། །སོ་སོར་དྲིལ་བར་བསྟོད་པར་བྱ། །སྙིང་རྗེས་ཁྲོ་ལ་བསྒྲལ་བསམ་ཞིང༌། །རང་ཉིད་འཇིགས་བྱེད་ཉིད་ཡིན་ཞིང༌། །སེམས་སྟོབས་བསྐྱེད་ལ་བསྟོད་པར་བྱ། །དུས་གསུམ་རྒྱལ་བ་ཐམས་ཅད་ཀྱིས། །བཀའ་ཡི་འཁོར་ལོ་རབ་ཏུ་བསྐོར། །བདུད་དང་མུ་སྟེགས་ལྷ་མིན་བཅོམ། །གཤིན་རྗེ་འཇོམས་ལ་ཕྱག་འཚལ་བསྟོད། །ཆོས་ཉིད་ལ་བཞེངས་ཡེ་ཤེས་སྐུ། །དང་པོའི་སངས་རྒྱས་འཇམ་པའི་དཔལ། །མངོན་བྱང་ཡེ་ཤེས་ལོངས་སྤྱོད་རྫོགས། །ཡ་མཱནྟ་ཀ་ཕྱག་འཚལ་བསྟོད། །སངས་རྒྱས་ཐམས་ཅད་རིགས་བསྡུས་པ། །རྡོ་རྗེ་སེམས་དཔའ་རིགས་ཀྱི་གཙོ། །ཞེ་སྡང་འཇོམས་མཛད་གཤིན་རྗེ་གཤེད། །ཁྲོ་རྒྱལ་ཁྱོད་ལ་ཕྱག་འཚལ་བསྟོད། །དུས་གསུམ་སངས་རྒྱས་སྐུ་གསུང་ཐུགས། །གཡས་དཀར་གཡོན་དམར་དབུས་མཐིང་ཁྲོས། །ཕྱག་དྲུག་མཚོན་ཆས་བདུད་རྣམས་འཇོམས། །ལྷ་མཆོག་ཁྱོད་ལ་ཕྱག་འཚལ་བསྟོད། །གདུག་པ་འདུལ་


DTG047_Page_0452
[མ་དཔེ་གཟིགས་ན་འདིར་གནོན།]

ཕྱིར་ཁྲོ་བོར་བཞེངས། །བྱམས་པའི་སྟོབས་ཀྱིས་སྐུ་མདོག་ནག །ཁྲོས་པས་དབུ་སྐྲ་ཁམ་སེར་འབར། །རྡོ་རྗེ་འཇིགས་བྱེད་ཕྱག་འཚལ་བསྟོད། །ཞལ་དགུ་ཁམས་གསུམ་ས་དགུ་མནན། །མཐར་གྱིས་སྙོམས་པར་འཇུག་པ་དགུ། །བསྟན་ཕྱིར་ཞལ་མདོག་སོ་སོར་བསྟན། །མགོན་པོ་ཁྱོད་ལ་ཕྱག་འཚལ་བསྟོད། །ཐུགས་རྗེ་སྤྱན་དམར་རྩ་བདུན་འབར། །བཞད་དང་ཁྲོ་དང་ཕཊ་ཀྱི་སྒྲ། །ཧ་ཧ་ཧཱུཾ་ཧཱུཾ་ཞལ་རྣམས་འགྱུར། །འཇིགས་བྱེད་ཁྱོད་ལ་ཕྱག་འཚལ་བསྟོད། །ཐབས་དང་ཤེས་རབ་ཕྱག་གཉིས་ནི། །འགྲོ་བ་སྐྱོད་ཕྱིར་གླང་པགས་འཛིན། །ཕྱག་གཞན་སུམ་ཅུ་རྩ་གཉིས་ནི། །བྱང་ཆུབ་ཕྱོགས་ལས་རྣམ་པར་སྤྲུལ། །གཡས་ཀྱི་རྡོ་རྗེ་ལ་སོགས་པས། །ཐམས་ཅད་གསོད་པར་མཛད་པ་པོ། །གཡོན་པའི་ཐོད་པ་ལ་སོགས་པས། །ཐམས་ཅད་ཟིལ་གྱིས་གནོན་པར་མཛད། །ཕྱག་དང་ཕྱག་མཚན་ནམ་མཁའ་གང། །གར་མཛད་ཁྱོད་ལ་ཕྱག་འཚལ་བསྟོད། །སྦྲུལ་ནག་ཚངས་སྐུད་དུར་ཁྲོད་རྒྱན། །ཤ་ཁྲག་ཚིལ་ཞག་རྐང་ལ་དགྱེས། །དུར་ཁྲོད་བདག་པོ་ཕྱག་འཚལ་བསྟོད། །ཡེ་ཤེས་མེ་ཆེན་འབར་ཞིང་འཕྲོ། །བདེ་ཆེན་མཚན་མ་གྱེན་དུ་འགྲེང༌། །མ་ཧེའི་གདོང་ཅན་ཡུམ་དང་བཅས། །བདེ་ཆེན་སྐུ་ལ་ཕྱག་འཚལ་བསྟོད། །སྟོང་པ་བཅུ་དྲུག་ཞབས་རྣམས་ཀྱི། །ལྷ་རྣམས་མི་དང་བྱོལ་སོང་གི །གཙོ་བོ་ཀུན་མནན་གཡོན་བརྐྱང་ཞབས། །རྟག་ཆད་སེལ་ལ་ཕྱག་འཚལ་བསྟོད། །འཁོར་བའི་སེམས་ཅན་བསྒྲལ་བའི་ཕྱིར། །ཐུགས་རྗེའི་ཐུགས་ནི་རབ་ཏུ་ཁྲོས། །གཤིན་རྗེ་གཤེད་ཀྱི་འཁོར་ལོ་སྤྲུལ། །འཇིགས་བྱེད་ཚོགས་ལ་ཕྱག་འཚལ་བསྟོད། །འགྲོ་བ་ཞེ་སྡང་གཟིར་གཟིགས་ནས། །འགྲོ་བའི་ཞེ་སྡང་ཞི་བྱའི་ཕྱིར། །བཅོམ་ལྡན་ཞེ་སྡང་གཤེད་དུ་བྱོན། །ཞེ་སྡང་གཤེད་ལ་ཕྱག་འཚལ་བསྟོད། །འགྲོ་བ་གཏི་མུག་བསྒྲིབས་གཟིགས་ནས། །འགྲོ་བའི་གཏི་མུག་བསལ་བྱའི་ཕྱིར། །གཏི་མུག་གཤིན་རྗེ་གཤེད་དུ་བཞེངས། །གཏི་མུག་རྡོ་རྗེ་འཇོམས་ལ་ཕྱག་འཚལ་བསྟོད། །འགྲོ་བ་ང་རྒྱལ་མནན་ལ་གཟིགས། །འགྲོ་བའི་ང་རྒྱལ་ཞི་བྱའི་ཕྱིར། །ཕྲ་མ་


DTG047_Page_0453
[མ་དཔེ་གཟིགས་ན་འདིར་གནོན།]

གཤིན་རྗེ་གཤེད་དུ་སྦྲུལ། །ཕྲ་མ་འཇིགས་བྱེད་ཕྱག་འཚལ་བསྟོད། །འགྲོ་ཀུན་འདོད་ཆགས་གསུངས་གཟིགས་ནས། །འགྲོ་བའི་འདོད་ཆགས་སྦྱང་བའི་ཕྱིར། །འདོད་ཆགས་གཤིན་རྗེ་གཤེད་དུ་བྱོན། །འདོད་ཆགས་འཇོམས་ལ་ཕྱག་འཚལ་བསྟོད། །འགྲོ་བ་ཕྲག་དོག་བཅིངས་མཐོང་ནས། །འགྲོ་བའི་ཕྲག་དོག་སྒྲོལ་བྱའི་ཕྱིར། །ཕྲག་དོག་གཤིན་རྗེ་གཤེད་དུ་བྱིན། །ཕྲག་དོག་འཇོམས་ལ་ཕྱག་འཚལ་བསྟོད། །ཁྱེད་ཀྱི་ཐུགས་རྗེ་དུས་ད་ཡིན། །བསྟན་པ་ཉམས་བྱེད་སྡིག་ཅན་རྣམས། །ཚེ་སྲོག་ལས་ངན་དུས་དེ་སྒྲོལ། །རྣམ་ཤེས་མི་བསྐྱོད་གནས་སུ་འཕོངས། །ཞེ་སྡང་ཆེན་པོའི་དུས་ལ་བབ། །སྡིག་ཅན་ཞེ་སྡང་རྣམ་ཤེས་སྒྲོལ། །གཏི་མུག་ཆེན་པོའི་དུས་ལ་བབ། །སྡིག་ཅན་གཏི་མུག་གཟུགས་ཕུང་སྒྲོལ། །ང་རྒྱལ་ཆེན་པོའི་དུས་ལ་བབ། །སྡིག་ཅན་ང་རྒྱལ་ཚོར་བ་ཆོམ། །འདོད་ཆགས་ཆེན་པོའི་དུས་ད་ཡིན། །སྡིག་ཅན་འདོད་ཆགས་འདུ་ཤེས་ཞིག །ཕྲག་དོག་ཆེན་པོའི་དུས་ད་ཡིན། །སྡིག་ཅན་ཕྲག་དོག་འདུ་བྱེད་ཕྲོལ། །བཀའ་ལས་འདས་སོ་དམ་ལས་འགལ། །བསྟན་པ་འཇིག་གོ་སྡིག་ལས་བྱེད། །ཀུན་ལ་གནོད་དོ་སེམས་ཅན་འཚེ། །སློན་དཔོན་སྨད་དོ་སློབ་དཔོན་འཁུ། །སྡིག་ཅན་འདི་ལ་ཐུགས་རྗེས་གཟིགས། །འདི་ལ་ཐུགས་རྗེས་མ་བསྒྲལ་ན། །སངས་རྒྱས་རྣམས་ཀྱིས་སེམས་ཅན་བསླུས། །ཁྲོ་བོ་རྣམས་ཀྱང་རང་ལ་ཁྲོ། །དེ་བས་སྡིག་ཅན་ཐུགས་རྗེས་སྒྲོལ། །ལུས་དང་རྣམ་ཤེས་སོ་སོར་ཕྱེ། །ལུས་དང་སྡིག་ལས་འདི་སྒྲོལ་ལོ། །རྣམ་ཤེས་དགེ་བ་མི་བསྐྱོད་མཛོད། །བདག་ཉིད་རྡོ་རྗེ་འཇིགས་བྱེད་བཀའ། །བསྟན་པ་བསྲུང་ཕྱིར་དཀྱིལ་འཁོར་ལྷ། །འཁོར་གྱི་ཆོས་སྐྱོང་གཤིན་རྗེ་རྣམས། །ཁྱེད་ལ་དྲག་པོའི་ལས་བཅོལ་ལོ། །ཨོཾ་རྡོ་རྗེ་འཇིགས་བྱེད་ཆེན་པོ་ཡི། །དཀྱིལ་འཁོར་སྟེང་དུ་བདག་འབོད་པས། །སྟེང་དུ་ཕྱོགས་སྐྱོང་ལྷ་རྣམས་ནི། །གཟའ་དང་རྒྱུ་སྐར་རྒྱལ་ཆེན་བཞི། །གཙོ་འཁོར་ཆུང་མ་བུ་དང་གཡོག །བཅས་པ་རྣམས་ལ་བདག་འབོད་པས། །བདག་ལ་དོན་ཆེན་


DTG047_Page_0454
[མ་དཔེ་གཟིགས་ན་འདིར་གནོན།]

གཞན་མེད་ན། །བདག་ནི་སངས་རྒྱས་བསྟན་ལ་དགའ། །ཁྱེད་ནི་སངས་རྒྱས་བསྟན་པ་བསྲུང༌། །སངས་རྒྱས་བསྟན་པ་ཞིག་ལ་ཁང༌། །ཁྱེད་ཀྱིས་རྒྱལ་བ་མི་བརྗེད་དམ། །དམ་བཅས་བཀའ་འདི་མ་སླུ་བར། །བདག་གིས་ཕྱོགས་སྐྱོང་ཁྱེད་བསྐུལ་གྱིས། །སྡིག་ཅན་ཉམས་པ་མྱུར་དུ་སོད། །ཨོཾ་གྱིས་བོད་ཀྱིས་ལྷ་ཆེན་བརྒྱད། །ཚོགས་དང་བཅས་པ་མྱུར་དུ་སོད། །ཨོཾ་ཧྲཱིཿ་ཥྚྲྀཿ་ཝི་ཀྲྀ་ཏྭ་ན་ན་ཧཱུཾ་ཕཊ། ཨོཾ་མ་ཧེ་ཤྭ་ར་དེ་བ་ཨིནྡྲ་བྲཧྨ་རུ་དྲི་ཧཱུཾ། ག་ན་བྷི་རི་ཏི་ཀརྟི་མ་ཧཱ་ཀཱ་ལ་ཆེ་གེ་མོ་མཱ་ར་ཡ་ཧཱུཾ་ཕཊ། རྡོ་རྗེ་འཇིགས་བྱེད་དཀྱིལ་འཁོར་གྱི། །ཤར་གྱི་དུར་ཁྲོད་གཏུམ་དྲག་ན། །ཤར་ཕྱོགས་སྐྱོང་བར་དམ་བཅས་པའི། །དྲི་ཟ་བསྐོར་བའི་བརྒྱ་བྱིན་ནི། །ལུས་མདོག་དཀར་པོ་གླང་པོ་ཞོན། །གཡས་ན་རྡོ་རྗེ་དྲིལ་བུ་གཡོན། །དུར་ཁྲོད་རིན་ཆེན་རྒྱན་དང་ལྡན། །ཆུང་མ་བུ་དང་བྲན་གཡོག་འཁོར། །རྣལ་འབྱོར་བདག་ནི་ཁྱེད་འབོད་པས། །ཁྱེད་ལ་དོན་ཆེན་གཞན་དོན་མིན། །བདག་ནི་སངས་རྒྱས་བསྟན་ལ་དད། །ཁྱེད་ནི་སངས་རྒྱས་བསྟན་པ་སྲུང༌། །སངས་རྒྱས་བསྟན་པ་ཞིག་ལ་ཁད། །བསྟན་པ་འཇིག་པ་ཆེ་གེ་མོ། །ཧྲཱིཿ་ཡིས་འབོད་ཀྱིས་བརྒྱ་བྱིན་ལྷ། །སངས་རྒྱས་བཀའ་ལས་ཁྱེད་མ་འདའ། །མཆོད་གཏོར་སྦྱིན་པ་ཆུང་མ་གསན། །འཁོར་གྱི་ཕོ་ཉ་ལས་ལ་བསྐུལ། །བསྟན་པ་འཇིག་པའི་ལས་ལ་འདི། །ཞགས་པ་ཅན་གྱིས་མགུལ་ནས་ཆིངས། །ལྕགས་ཀྱུ་ཅན་གྱིས་སྙིང་ནས་དྲོངས། །ལྕགས་སྒྲོག་ཅན་གྱིས་འདི་བསྡོམས་ལ། །ལས་ཀྱི་རླུང་གིས་རྒྱབ་ནས་ཕུལ། །ལས་ཀྱི་གཤིན་རྗེས་མདུན་ནས་བསུ། །སྟོབས་ཆེན་རྣམས་ཀྱིས་འདི་ཁུག་ཅིག །དམིགས་པའི་རྟེན་ལ་ཐིམ་པར་གྱིས། །གཤིན་རྗེ་ལྟོ་བའི་འཁོར་ལོར་ཆུག །མཚོན་ཆ་དུ་མའི་ཆར་ཕོབ་ལ། །སྡིག་ཅན་འདི་ཡི་ཚེ་སྲོག་ཆོད། །སྲོག་ལ་དབང་བས་འདི་སྲོག་ཆོད། །དབུགས་ལ་དབང་བས་འདི་དབུགས་ཕྲོགས། །ཤ་ཟ་རྣམས་ཀྱིས་འདི་ཤ་ཟོ། །སྡིག་ཅན་འདི་ཡི་པགས་པ་དང༌། །ཁྲག་དང་ཞག་དང་ཚིལ་དང་རྐང༌། །རང་རང་དབང་པོས་སོ་སོར་ཁྱེར། །གཏད་དང་ཁས་བླངས་བསྟན་པ་སྲུང༌།


DTG047_Page_0455
[མ་དཔེ་གཟིགས་ན་འདིར་གནོན།]

ཨོཾ་ཧྲཱིཿ་ཥྚྲྀཿ་ཝི་ཀྲྀ་ཏཱ་ནཱ་ན་ན་ཨིནད་ཡེ་ཧྲཱིཿ་ཆེ་གེ་མོ་མཱ་ར་ཡ་ཧཱུཾ་ཕཊ། རྡོ་རྗེ་འཇིགས་བྱེད་དཀྱིལ་འཁོར་གྱི། །ལྷོ་ཡི་དུར་ཁྲོད་ཧ་ཧ་དགོད། །ལྷོ་ཕྱོགས་སྐྱོང་བར་དམ་བཅས་པ། །གཤིན་རྗེས་བསྐོར་བའི་གཤིན་རྗེ་ནི། །ལུས་མདོག་ནག་པོ་མ་ཧེ་ཞོན། །གཡས་ན་དབྱུག་པ་ཞགས་པ་གཡོན། །དུར་ཁྲོད་རིན་ཆེན་རྒྱན་གྱིས་བརྒྱན། །ཆུང་མ་བུ་དང་བྲན་གཡོག་འཁོར། །རྣལ་འབྱོར་བདག་ནི་ཁྱེད་འབོད་པས། །ཁྱེད་ལ་དོན་ཆེན་གཞན་ཡོད་མིན། །བདག་ནི་སངས་རྒྱས་བསྟན་ལ་དད། །ཁྱེད་ནི་སངས་རྒྱས་བསྟན་པ་སྲུང༌། །སངས་རྒྱས་བསྟན་པ་ཞིག་ལ་ཁང༌། །བསྟན་པ་འཇིགས་པའི་ཆེ་གེ་མོ། །ཨོཾ་ཧྲཱིཿ་ཥྚྲྀཿ་ཝི་ཀྲྀ་ཏཱ་ན་ན་ཧཱུཾ་ཕཊ། ཥྚཱྀ་ཡིས་འབོད་པ་གཤིན་རྗེ་སོགས། །རིམ་པར་བསྐུལ་པར་ཤེས་པར་བྱ། །ཨོཾ་ཧྲཱིཿ་ཥྚྲྀཿ་ཝི་ཀྲྀ་ཏཱ་ན་ན་ཡ་མ་ཡེ་ཥྚྲི་ཆེ་གེ་མོ་མཱ་ར་ཡ་ཧཱུཾ་ཕཊ། དེ་ནས་སྔགས་ཀྱིས་གནད་ལ་དབབ། །བཅུ་པ་ཕྱོགས་སྐྱོང་སྤེལ་བས་བཟླ། །གཟུགས་ལ་དུག་ཚོན་ཕུར་བ་ལྔས། །གནས་པར་གདབ་པ་མན་ངག་ཡིན། །རྡོ་རྗེ་འཇིགས་བྱེད་དཀྱིལ་འཁོར་གྱི། །འོག་ཕྱོགས་སྐྱོང་བར་དམ་བཅས་པའི། །ས་ཡི་ལྷ་མོ་ཀླུ་ཆེན་བརྒྱད། །རྡོ་རྗེ་མིག་ཅན་དཀར་པོའི་ཕྱོགས། །གཙོ་བོའི་ཆུང་མ་བུ་དང་འཁོར། །ལུས་མདོག་ཕྱག་མཚན་རང་རང་རྟགས། །ཨ་དང་ཕུཿ་ཡིས་འབོད་པ་དང༌། །ལས་ཀུན་འཁོར་ལ་བཅོལ་བར་བྱ། །ཨོཾ་ཧྲཱིཿ་ཥྚྲྀཿ་ཝི་ཀྲྀ་ཏཱ་ན་ན་ཧཱུཾ་ནཱ་ག་ཕུ་ཕ་ཕུཾ་ཕེཾ་ཕི་ཕི་པོ་ཆེ་གེ་མོ་མཱ་ར་ཡ་ཧཱུཾ་ཕཊ། ཁྲོ་བོ་མཚོན་ཆ་དཔག་མེད་ཀྱིས། །སྡིག་ཅན་འདི་ལ་རྣམ་པར་གཟིར། །རྡོ་རྗེ་ཞག་ཞགས་པས་མགུལ་ནས་བཟུང༌། །རྡོ་རྗེ་ལྕགས་ཀྱུས་སྙིང་ནས་དྲོངས། །རྡོ་རྗེ་ལྕགས་སྒྲོག་དམ་དུ་ཆིངས། །རྡོ་རྗེ་མཚོན་གྱིས་རྣམ་པར་ཆོམ། །འཁོར་ལོ་འབར་བས་རབ་ཏུ་ཁྲོས། །ཐོ་བ་དབྱུག་པས་རྡུལ་དུ་བརྡུངས། །མདའ་དང་མདུང་གིས་ཐལ་ཕྱུང་ཕུག །གྲི་གུག་དགྲ་སྟས་ལྷུ་ཟུག་ཕྲོལ། །རལ་གྲི་ཆུ་གྲིས་དུམ་བུར་གཏུབ། །མེ་རླུང་ལས་ཀྱིས་རྣམ་པར་གཏོར། །རྒྱལ་བའི་བཀའ་ཡིན་ཁྲོ་བོ་ལས། །འཁོར་གྱི་ཕོ་ཉའི་དུས་ལ་བབ། །སྡིག་ཅན་འདི་ལ་སྙིང་རྗེ་མེད། །ཁྲོ་བོ་རྣམས་ཀྱི་ཐུགས་


DTG047_Page_0456
[མ་དཔེ་གཟིགས་ན་འདིར་གནོན།]

རྗེ་ཡིས། །འཁོར་གྱིས་བསད་པའི་སྡིག་ཅན་འདི། །མི་བསྐྱོད་བཞིན་དུ་འདི་བསྐྱོལ་ལ། །རྒྱལ་བའི་སྲས་སུ་འདི་བསྒྲུབས་ཤིག །རྒྱལ་བའི་ཐུགས་དམ་དེས་མཐར་ཕྱིན། །རྡོ་རྗེ་འཇིགས་བྱེད་ལས་བྱེད་པ། །ཡ་ཡི་ལས་བྱེད་ཡ་མ་ཡ། །ཡ་ཡིས་འབོད་དོ་ཁྱོད་བསྐུལ་ལོ། །ལས་ཀྱི་གཤིན་རྗེ་ཁྱོད་བསྐུལ་ལོ། །ཁྲོ་བོ་སྦྲུལ་གྱི་གདེངས་ཀ་ཅན། །ཁམས་གསུམ་ཁྱོད་ཀྱི་ལྷ་མ་ལྟོ་ན་འཁོར། །སྐྱེ་རྒ་ན་འཆིའི་འཁོར་ལོ་བསྐོར། །བསྟན་པ་འཇིག་པའི་སྡིག་ཅན་འདི། །གཡས་ཀྱི་གྲི་ཡིས་སྲོག་སྙིང་ཆོད། །མྱུར་དུ་འཆི་བའི་ལས་ལ་སྦྱོར། །གཡོན་གྱི་ཐོད་པ་སྙིང་གར་སྦྱོར། །ཁ་རུ་བརྡུངས་ཤིག་ཁཱ་ཧི་པ། །ཙིཏྟ་རཀྟ་མར་ཁཱ་ཧི། །སྡིག་ཅན་ཙིཏྟ་རཀྟ་ཁཱ་ཧི། །ལས་ཀྱི་གཤིན་རྗེ་དེས་སྤྲུལ་པའི། །དུར་ཁྲོད་བདག་པོ་གཤིན་རྗེ་གཤེད། །ནག་པོ་གེལ་བག་རལ་གྲི་ཞགས། །ཁྱོད་ཀྱི་ལྟོ་བར་སྐྱེ་འགྲོ་འགྲོ། །སྡིག་ཅན་འདི་ཡི་ཚེ་སྲོག་ཆུག །ཞགས་པས་ཟུང་ལ་རལ་གྲིས་གཏུབས། །སྡིག་ཅན་སྲོག་རྩ་མ་ར་རྦད། །ཕྲ་མ་རྡོ་རྗེའི་ལས་བྱེད་པ། །མ་ཡི་ལས་བྱེད་མ་རུ་རྩེ། །མ་ཡིས་འབོད་དོ་ཁྱོད་བསྐུལ་ལོ། །སྲོག་གི་བདག་པོ་མ་རུ་རྩེ། །གླང་མགོ་གཤིན་རྗེ་ཡ་བ་ཏི། །སྐྱེ་འགྲོ་ཁྱོད་ཀྱིས་ལྟེ་རྩ་གཅོད། །གཡས་ཀྱི་གྲི་ཡིས་ལྟེ་རྩ་ཆོད། །མྱུར་དུ་འཆི་བའི་ལས་ལ་སྦྱོར། །གཡོན་གྱི་ཐོད་པར་ལྟེ་ཁྲག་སྤྱོས། །ཁ་རུ་བརྡུངས་ཤིག་ཁཱ་ཧི་པི། །པཱི་ཏ་རཀྟ་མ་ར་ཁཱ་ཧི། །སྡིག་ཅན་ན་ག་རཀྟ་ཁཱ་ཧི། །འདོད་ཆགས་རྡོ་རྗེའི་ལས་བྱེད་པ། །མེ་ཡིས་ལས་བྱེད་སྨོན་བྱེད་དེ། །མེ་ཡིས་འབོད་དོ་ཁྱོད་བསྐུལ་ལོ། །མདངས་ཀྱི་བདག་པོ་བྱ་མགོ་ཅན། །མྱོས་བྱེད་གཤིན་རྗེ་པི་པ་ཏྲ། །སྐྱེ་འགྲོ་ཁྱོད་ཀྱིས་མགྲིན་རྩ་ཆོད། །གཡས་ཀྱི་མདའ་ཡིས་མགྲིན་རྩ་ཆོད། །མྱུར་དུ་འཆི་བའི་ལས་ལ་སྦྱོར། །གཡོན་པ་ཐོད་པར་མགྲིན་ཁྲག་སྤྱོས། །ཁ་རུ་བརྔུབས་ཤིག་ཁཱ་ཧི་པི། །མགྲིན་པ་རཀྟ་མ་ར་ཁཱ་ཧི། །སྡིག་ཅན་མགྲིན་པར་རཀྟ་ཁཱ་ཧི། །ཁྲག་དོག་རྡོ་རྗེའི་ལས་བྱེད་པ། །ང་ཡིས་ལས་བྱེད་བུམ་བུ་རྫི། །ང་ཡིས་འབོད་དོ་ཁྱོད་བསྐུལ་ལོ། །དབུགས་ཀྱི་


DTG047_Page_0457
[མ་དཔེ་གཟིགས་ན་འདིར་གནོན།]

བདག་པོ་བུམ་བུ་རྫི། །འབྲུག་མགོ་གཤིན་རྗེ་ཀུ་བེ་ར། །སྐྱེ་འགྲོ་ཡོངས་ཀྱི་བླ་དབུགས་གཅོད། །གཡས་ཀྱི་དགྲ་སྟས་བླ་དབུགས་ཆོད། །འཆི་བའི་ལས་ལ་མྱུར་དུ་སྦྱོར། །གཡོན་གྱི་ཐོད་པས་བླ་ཁྲག་སྤྱོས། །ཁ་རུ་བརྔུབས་ཤིག་ཁཱ་ཧི་པི། །པཱི་ཏ་རཀྟ་མཱ་ར་ཁཱ་ཧི། །སྡིག་ཅན་པཱི་ཏ་རཀྟ་ཁཱ་ཧི། །གཏི་མུག་རྡོ་རྗེ་ལས་བྱེད་པ། །ཀྵེ་ཡི་ལས་བྱེད་པཻ་སྭ་ཏཱ། །ཀྵེ་ཡིས་འབོད་དོ་ཁྱོད་བསྐུལ་ལོ། །ཚེ་ཡི་བདག་པོ་བཻ་སྭ་ཏཱ། །ཕག་མགོ་གཤིན་རྗེ་ཀྵེ་པ་ལ། །སྐྱེ་འགྲོའི་ཚེ་རྣམས་ཁྱོད་ཀྱིས་ཕྱུང༌། །གཡས་པའི་དབྱུག་པས་ཚེ་བརྡུངས་ཤིག །འཆི་བའི་ལས་ལ་མྱུར་དུ་སྦྱོར། །གཡོན་གྱི་ཐོད་པས་བླ་ཁྲག་སྤྱོས། །ཁ་རུ་བརྡུངས་ཤིག་ཁ་རུ་པི། །མུན་དྷ་རཀྟ་མ་ར་ཁཱ་ཧི། །སྡིག་ཅན་མུན་དྷ་རཀྟ་ཁཱ་ཧི། །རྡོ་རྗེ་ཐོབ་པའི་ལས་བྱེད་པ། །ཡ་ཡི་ལས་བྱེད་ཡ་མ་ར། །ཡ་ཡིས་འབོད་དོ་ཁྱོད་བསྐུལ་ལོ། །གསོད་བྱེད་བདག་པོ་ཕྱྭ་སངས་ནི། །ཤ་བའི་མགོ་ཅན་གཤིན་རྗེ་དྲག །སྐྱེ་འགྲོ་ཁྱོད་ཀྱིས་གསོད་པར་བྱེད། །གཡས་ཀྱི་གྲི་ཡིས་ཚེ་སྲོག་གཅོད། །གཡོན་གྱི་ཞགས་པས་དམ་དུ་བསྡོམས། །རྡོ་རྗེ་དབྱུག་པའི་ལས་བྱེད་པ། །ཙའི་ལས་བྱད་ཙ་ར་ན། །རྩྩ་ཡིས་འབོད་དོ་ཁྱོད་བསྐུལ་ལོ། །བཤུ་བྱེད་བདག་པོ་ཏེ་ལ་བ་སྟེ། །ཅེ་སྦྱང་མགོ་ཅན་གཤིན་རྗེ་རྣོ། །སྐྱེ་འགྲོ་ཁྱོད་ཀྱིས་བཤའ་བར་བྱེད། །གཡས་ཀྱི་གྲི་ཡིས་ལྤགས་བཤུས་ལ། །གཡོན་གྱི་ཞགས་པས་དམ་དུ་བསྡོམས། །རྡོ་རྗེ་པདྨའི་ལས་བྱེད་པ། །ནི་ཡི་ལས་བྱེད་ཡ་མ་ནི། །ནི་ཡིས་འབོད་དོ་ཁྱོད་བསྐུལ་ལོ། །གཅོད་བྱེད་བདག་པོ་རྨིག་པ་ནི། །རྨིག་པའི་མགོ་ཅན་གཏུམ་པོ་མགྱོགས། །སྐྱེ་འགྲོ་ཁྱོད་ཀྱིས་གཏུབས་པར་བྱེད། །གཡས་ཀྱི་དགྲ་སྟས་རབ་ཏུ་ཆོད། །གཡོན་གྱི་འཁོར་ལོས་རབ་ཏུ་ཕྱེ། །རྡོ་རྗེ་རལ་གྲིའི་ལས་བྱེད་པ། །རཱ་ཡི་ལས་བྱེད་རལ་ཚར་དགུ། །རཱ་ཡིས་འབོད་དོ་ཁྱེད་བསྐུལ་ལོ། །ཟ་བྱེད་བདག་པོ་རཱ་ཧུ་ལ། །ཆུ་སྲིན་མགོ་ཅན་གཤིན་རྗེ་འཇིགས། །སྐྱེ་འགྲོ་ཁྱོད་ཀྱིས་ཟ་བར་བྱེད། །གཡས་ཀྱི་འཁོར་ལོས་དུམ་བུར་གཏུབས། །


DTG047_Page_0458
[མ་དཔེ་གཟིགས་ན་འདིར་གནོན།]

གཡོན་གྱི་ལྕགས་ཀྱུས་རབ་ཏུ་གཟུང༌། །རྡོ་རྗེ་འཇིགས་བྱེད་དཀྱིལ་འཁོར་གྱི། །ལས་བྱེད་རྣམས་ཀྱི་ཆུང་མ་བརྒྱད། །དམར་མོ་ཁྲག་གི་རལ་པ་ཅན། །གྲི་གུག་ཐོད་པས་ལག་གཉིས་འབྲེལ། །ལས་ཀྱི་གཤིན་རྗེའི་ཆུང་མ་ཡིན། །ཁམས་གསུམ་སྐྱེ་འགྲོ་ལྟོ་བར་ཆུག །གཅོད་ཅིང་ཤ་ཁྲག་ཟ་ལ་དགའ། །འཁོར་ལོ་བསྐོར་ཅིག་གཤིན་རྗེའི་ཡུམ། །ཛཱ་ས་དོ་རུ་ཡི་ལས་བྱེད་མ། །ཙཱ་རྩི་ཕག་མོ་དབྱངས་ཅན་མ། །གཽ་རཱི་བཞི་ཡི་བཀའ་ཉན་མ། །དུས་བཞི་འབྱུང་བའི་ལྷ་མོ་བཞི། །ཤ་ཁྲག་དྲོད་དང་དབུགས་ལ་གཏེང། །ཛཱ་ས་དོ་རུས་ཁྱེད་འབོད་ཀྱིས། །སྡིག་ཅན་འདི་ཡི་ཤ་ཁྲག་དྲོངས། །དབུགས་འདི་ཁྱོད་ཀྱིས་མྱུར་དུ་ཕྲོལ། །སྒོ་བའི་ཕོ་ཉ་བཀའ་ཉན་ཅིང༌། །ན་ཡོ་ན་རའི་ལས་བྱེད་མ། །ཟུང་ཤིག་ཆིངས་ཤིག་རབ་ཏུ་བསྡོམས། །འཁོར་ལོར་གནོན་པའི་ལས་ཀྱིས་ཤིག ། དུས་ལ་བབ་པོ་ཙན་ཏྲ་ཛ། །བཀའ་ལས་མ་འདའ་ས་མ་ཡ། །རྣལ་འབྱོར་མ་བསླུ་དཀར་མ་དཀར། །བསྟན་པ་སྲུངས་ཤིག་དར་མ་དཔལ། །ཡ་མ་མེ་ད་ཀྵེ་ཆེ་གེ་མོ་མཱ་ར་ཡ་རྦད་རྦད། ཡ་ཛཱ་ནི་ར་ཆེ་གེ་མོ་མཱ་ར་ཡ་ཁཱ་ཧི་ཁཱ་ཧི། ཛཱ་ས་དོ་རུ་ཆེ་གེ་མོ་མཱ་ར་ཡ་ཛྭ་ལ་ཛྭ་ལ། ཎ་ཡོ་ནི་རཱ་ཆེ་གེ་མོ་མཱ་ར་ཡ་ཛྫ། གཤིན་རྗེའི་ལྟོ་བར་འཁོར་ལོ་བསྐོར། །གཤིན་རྗེ་འཁོར་གྱི་ཕོ་ཉའི་ཚོགས། །བྱ་དང་སྤྲུལ་དང་གཅན་གཟན་ཁྱི། །ཤ་ཟན་ཐམས་ཅད་མྱུར་དུ་རྒྱུག །སྡིག་ཅན་འདི་ལ་རྣམ་པར་རོལ། །རང་རང་པགས་པ་ཤ་དང་ཁྲག །ཞག་དང་ཚིལ་དང་རྐང་མར་རུས། །དབང་པོ་དོན་སྙིང་སྐལ་ཁཱ་ཧི། །དེ་ནས་ལས་ལ་སྦྱར་བ་ནི། །རྒྱལ་པོ་གཏུམ་པོ་ཙཎྜ་ལཱི། །འཁོར་ལོ་ཐོད་པ་ཁ་སྦྱར་གཞུག །ལྷོ་སྒོར་ཐོད་པ་སྒྱེད་སྟེང་གཞག །སྲིད་པ་གསུམ་གྱི་སེམས་ཅན་རྣམས། །དབང་མེད་སྐྱེ་འཆིའི་ལས་ལ་བསྐུལ། །མཚོན་ཆ་སྣ་ཚོགས་འཛིན་པ་ཡི། །ལས་ཀྱི་གཤིན་རྗེ་ཕོ་མོ་བསྐྱེད། །ཡ་ཡིས་དགུག་གཞུག་བཅིང་པ་དང༌། །གཉིས་མེད་གཤིན་རྗེའི་ལྟོ་བ་དཀྲུག །ཁྲུ་གང་གཤིན་རྗེའི་བསྐྱེད་སོགས་ཡང༌། །དེ་ལྟར་ལས་མཁན་དགུ་སོགས་བྱ། །བསྒྲུབ་བྱ་


DTG047_Page_0459
[མ་དཔེ་གཟིགས་ན་འདིར་གནོན།]

ནྲྀ་ལས་འཁོར་ལོ་དང༌། །གཟུགས་ལ་བསྐྱེད་དང་དགུག་སོགས་བསྟིམ། །ཁྲོ་བོ་ཆོས་སྐྱོང་བཀའ་བསྒོ་ཞིང༌། །སྙིང་པོ་བདུན་འབུམ་བཟླ་བ་དང༌། །ཤ་ཆེན་ཁྲག་ཆེན་གཏོར་མ་བཟང༌། །བསྒྲུབ་བྱ་སྐྱབས་མེད་ཁྲོ་བོས་བསྒྲལ། །དེ་ནས་ཉི་མ་ལྔར་ཕྱེ་ལ། །ཉིན་མོ་སོ་སོ་མཚན་མོ་དྲིལ། །ལས་སྔགས་རྩ་སྔགས་སོ་སོ་ལ། །སུམ་འབུམ་འབུམ་ཕྲག་དག་ཏུ་བཟླས། །སྔགས་ཀྱི་ལྷ་རྣམས་སོ་སོར་བསྐུལ། །རྡོ་རྗེ་འཇིགས་བྱེད་སྔགས་བརྗོད་པས། །གཏི་མུག་གཤིན་རྗེ་གཤེད་སོགས་རྣམས། །ཛིན་ཛིཀ་སྒྲོགས་ཕྱོགས་སྐྱོང་བསྐུལ། །ཁྲོ་བོས་གཤིན་རྗེ་དེད་ཅིང་བསྐུལ། །བསྒྲུབ་བྱའི་སྐེ་ནས་འཁོར་ལོས་ལུས། །སོ་སོར་བླང་དང་སོ་སོར་ཁྱེར། །ཤ་དང་ཁྲག་སོགས་སྦྱིན་པའི་རྒྱུ། །ཕུང་པོ་ཁམས་སོགས་ལྷར་བྱ་ཞིང༌། །སེམས་ནི་མི་བསྐྱོད་ཞིང་དུ་འཕང༌། །ཁྲོ་བོ་ཕྱོགས་སྐྱོང་གཤིན་རྗེ་ཡི། །གཡོན་གྱི་མཚོན་ཆས་འགུགས་བྱེད་ཅིང༌། །གཡས་ཀྱི་མཚོན་ཆས་གསོད་པར་བསམ། །སྙིང་རྗེས་ཁྲོས་པའི་ལས་ལ་བསྐུལ། །དེ་ནས་སྦྱིན་སྲེག་མནན་པ་སྟེ། །ཕ་མེས་བསྐྱལ་བའི་དུར་ཁྲོད་དུ། །འཁོར་ལོ་གཤིན་རྗེས་མནན་པ་སྤ། །ཐབ་ཁུང་ནང་དུ་གྲུ་གསུམ་བྱ། །ཁྲུ་ཕྱེད་བརྐོ་ཞིང་རྫས་ངན་བྱུག །དུར་གྱི་ཤིང་ལ་དུར་ཁྲོད་མེས། །སྤར་ལ་མེ་ལྷ་གཤིན་རྗེ་དང༌། །རྡོ་རྗེ་འཇིགས་བྱེད་བསྐྱེད་སོགས་བྱ། །རྡོ་རྗེ་འཇིགས་བྱེད་སྦྱོར་བ་ཡིས། །གཟུགས་བརྙན་མི་རུས་ཕྱེ་མ་དང༌། དེ་ཡི་རྗེས་དང་སྐྲ་སེན་དང༌། །རྣམ་སྣང་ཆུ་དང་བཅས་པ་རྣམས། །ནམ་ཕྱེད་དག་ནས་ནམ་ཕྱེད་བསྲེག །ཚུ་ཚུན་དྷ་རའི་པགས་པ་རུ། །རྣམ་སྣང་ཆུ་ཡི་སྦྱོར་བ་ནི། །བླ་མའི་ངག་ལ་ལེགས་བླངས་ལ། །གནས་སུ་སྦས་ན་ངེས་པར་འགྲུབ། །དེ་ནས་རྟགས་སམ་ངེས་འཕོས་ནས། །བསྒྲུབ་བྱ་དེ་ལ་དབང་བསྐུར་ཞིང༌། །བསྐྱེད་དང་རྫོགས་པའི་ཆོ་ག་ཡིས། །མི་བསྐྱོད་ཞིང་དུ་ངེས་པར་སྐྱེ། །རྒྱལ་བའི་ཐུགས་རྗེས་གནང་བ་ལ། །རྣལ་འབྱོར་པ་དེ་འགྲོ་དོན་འགྲུབ། །རྒྱལ་བས་བདེན་པར་གསུངས་པ་དང༌། །བདག་གིས་བརྒྱུད་པའི་མན་


DTG047_Page_0460
[མ་དཔེ་གཟིགས་ན་འདིར་གནོན།]

ངག་མཐོང༌། །ཏིང་ངེ་འཛིན་མ་གསང་སྔགས་མཆོད། །ཡང་ན་རྫས་མ་ཚོགས་པ་ཡིན། །འོན་ཀྱང་ཞེ་སྡང་ཁོ་ན་དང༌། །དམ་ཚིག་ཉམས་པ་དག་ཀྱང་སྲིད། །ཙཎྜ་ལཱི་ཡིས་མཚོན་བསྣུན་ལ། །ལས་ཀྱི་གཤིན་རྗེའི་འཁོར་ལོ་བསྐྱེད། །གནས་སུ་ཡི་གེ་དགོད་པ་དང༌། །ལྟོ་པར་འཁོར་ལོ་བྲི་བར་བྱ། །མཚན་མོ་སྔགས་ཀུན་གཅིག་ཏུ་བཟླ། །ཉིན་མོ་སོ་སོར་ཕྱེ་ལ་བཟླས། །རྡོ་རྗེ་འཇིགས་བྱེད་བྲིས་སྐུ་ལ། །སྒྲོན་མ་ཆེན་པོའི་མཆོད་པ་འབུལ། །སྤྲོ་བསྡུས་བསྐུལ་དོན་སྔ་མ་བཞིན། །ཟླ་བ་ཕྱེད་ཀྱིས་དེ་ངེས་འགྲུབ། །དེ་ནས་དེ་ཡི་པགས་པ་བཤུ། །ལྷ་ཡི་གནས་ཀྱི་ཤ་རྣམས་ཀུན། །བཟུང་ནས་རྗེས་ལ་ལས་ཀུན་ལ། །འཁོར་ལོ་ལྷ་ཡི་སྦྱོར་བ་ཡིས། །ཞི་དང་རྒྱས་པ་དབང་ལ་སོགས། །རྡོ་རྗེ་འཇིགས་བྱེད་འཁོར་ལོས་བསྒྲུབ། །མཆོད་དང་གཏོར་མ་རྒྱ་ཆེན་དང༌། །སྙིང་རྗེ་ཁོ་ནས་བསྒྲུབ་པར་བྱ། །རྗེས་ཐོབ་མཉམ་པར་བཞག་པས་འགྲུབ། །བསྐྱེད་དང་རྫོགས་དང་གཉིས་མེད་པའི། །བསམ་གཏན་བཟླས་པ་སྤྲོ་བསྡུ་ཡིས། །རྟག་ཏུ་བསྙེན་པ་བྱ་བ་ཡིན། །དེས་ཀྱང་གྲུབ་པར་མ་གྱུར་ཞིང༌། །མཚན་མ་རྨི་ལམ་རྟགས་རྣམས་མེད། །འཁྲུགས་དང་ནོར་བ་བྱུང་བ་དག །དམ་ཚིག་ཉམས་པ་ཡིན་པས་སྦྱང༌། །དབང་བསྐུར་ཚོགས་ཀྱི་མཆོད་པ་དག །སྔོན་གྱི་སློབ་དཔོན་དེ་ཉིད་དམ། །གྲུབ་ཐོབ་སྒྲུབ་པ་རྟག་ཏུ་བྱེད། །དེ་མཉེས་བྱས་ལ་ཞུ་བ་བྱ། །རྡོ་རྗེ་འཇིགས་བྱེད་རྒྱུད་ཉིད་ཀྱི། །ཆོ་ག་ཤེས་པས་དབང་བསྐུར་རོ། །དེ་ནས་ཆོ་གའི་རིམ་པ་ཡིས། །འཇམ་དཔལ་རྣལ་འབྱོར་གསལ་བ་ལ། །ཡེ་ཤེས་སེམས་དཔའ་གཞུག་པ་དང༌། །སྐྱེ་མཆེད་བྱིན་རླབས་དབང་བསྐུར་ལ། །མི་བསྐྱོད་ཅོད་པན་ལྡན་པ་ཡི། །སྙིང་གར་ཟླ་དཀྱིལ་ཡི་གེ་དྷཱི། །སྭཱ་ཧཱ་ཕྱོགས་བཞིར་བཟླ། །སྔགས་དབྱིངས་ཆོས་ལ་སྤྲོ་བསྡུ་བསམ། །རྗེས་ལ་མཆོད་གཏོར་བཟླས་པ་འབད། །གཉིད་དང་ལེ་ལོའི་བར་ཆད་སྤང༌། །ཞག་དྲུག་ཟླ་དྲུག་ལོ་དྲུག་ཏུ། །བསྙེན་པའི་ཆོ་ག་དཔའ་བས་བྱ། །ཐུན་གཅིག་ཞག་གཅིག་ཟླ་བ་ལོ། །ཚེ་གཅིག་བསྐལ་བར་དཀའ་མིན་བསྒྲུབ། །


DTG047_Page_0461
[མ་དཔེ་གཟིགས་ན་འདིར་གནོན།]

ལམ་མཆོག་འདི་ནི་ཡུན་རིང་མིན། །དམ་ཚིག་སྙིང་རྗེ་ཐབས་དང་ལྡན། །ཟླ་དྲུག་ནང་དུ་རྟགས་མཐོང་བས། །རྒྱལ་བ་མཉེས་བྱེད་མངོན་སྤྱོད་སྤྱད། །དེ་རྗེས་རྗེས་ཐོབ་འགྲོ་བ་ལ། །ཕན་ཕྱིར་འཁོར་ལོའི་ལས་ལ་འཇུག །ཕྱི་རོལ་པ་དག་བསྟན་ལ་གནོད། །རང་རིག་དམ་ཚིག་ཉམས་པ་དག །མཆོད་དང་གཏོར་མ་བཟླས་ལ་བརྩོན། །བསྲུངས་པ་དག་གིས་འགྱངས་པ་ལ། །ངག་མནན་བཟློག་པའི་འཁོར་ལོ་བྱ། །འཁོར་ལོས་སྔགས་སྦྱོར་རིམ་པ་དང༌། །རྫས་དང་ཏིང་འཛིན་རིམ་པ་དང༌། །བསྙེན་སྒྲུབ་ལས་སྦྱོང་ཟླ་དྲུག་གིས། །རྒྱུད་ལྟར་འཁོར་ལོ་སྦས་པས་འགྲུབ། །དེ་ལས་ཁྱད་པར་རྣལ་འབྱོར་པས། །མནན་དང་བཟློག་པའི་ཆོ་ག་ནི། །སྔོན་དུ་བསྙེན་དང་རྟག་ཏུ་བསྒོམ། །གཞན་དུ་རྒྱལ་བའི་བཀའ་ལས་འདས། །མར་ཚེ་བརྒྱད་ལ་བྲི་བ་ནི། །རས་དག་སྔོན་ལྟར་རྫས་ཀྱིས་བརྒྱད། །ཡུང་བ་བ་བླས་ཁ་བསྒྱུར་བའི། །སྔོན་གྱི་རྫས་ཀྱིས་འཁོར་ལོ་བྲི། །འཁོར་ལོའི་ཡི་གེ་དབྲི་དང་བསྣན། །ལས་ཀྱི་བྱེ་བྲག་ཤེས་པ་ཡིས། །མ་ར་སྟམྦྷ་བཅུ་བའི་མཐར། །པྲ་མ་ར་ཡ་སྟམྦྷ་ཡ་ལཾ། །མཁས་པས་ཡ་མ་བཞི་ཡི་མཐར། །ཁང་སྟོང་བཞི་ལ་ལིངྒ་བསྐོར། །དེ་བཞིན་སྤེལ་མ་ཞག་ལྔ་བཟླ། དང་པོ་ཞག་ལ་བསྙེན་པ་དང༌། །ཐ་མ་ལྐུགས་པའི་ཆུ་ལ་མནན། །ཞག་བདུན་དག་གིས་རེས་པར་གནོན། །ཡང་ན་མི་འཇིགས་བསྲུང་བ་ནི། །རྟག་པར་བསྒོམ་པ་དེ་ཉིད་མཆོག །འཁོར་ལོ་འཇམ་པའི་རྡོ་རྗེར་བསྐྱེད། །དེ་ཉིད་གསུམ་གྱི་སྤྲོ་བསྡུས་བསྲུང༌། །བྱ་མིན་ཉལ་པའི་ས་མིན་སྤངས། །ཤར་དུ་ཕྱོགས་ཤིང་གསུམ་ལ་སྐྱབས། སྐྱབས། །རྟེན་འབྲེལ་མཐུ་ཡང་ཐབས་ཡིན་པས། །བྲམ་ཟེ་སྲིད་བསྲུང་ལས་བྱུང་རས། །ཚེས་བརྒྱད་དག་ལ་འབས་ཆུས་བརྒྱད། །ཙནྡན་དཀར་པོ་ཏིལ་དཀར་དང༌། །གུ་གུལ་དཀར་པོས་ལེགས་བྱས་ལ། །གུར་ཀུམ་གི་ཝང་ལེགས་སྦྱར་བས། །བཅུ་བཞིའི་སྔ་དྲོ་བྲི་བ་ནི། །བཅུ་གཉིས་སོར་ནི་ཟླུམ་པོར་བསྐོར། །ཕྱི་རོལ་རྡོ་རྗེ་ར་བ་ལ། །མེ་རི་ཧཱུཾ་དང་རབ་ཏུ་ལྡན། །དེ་ནས་ཆ་མཉམ་བཞི་རུ་བསྐོར། །ཕྱི་རོལ་འཁོར་ལ་སུམ་ཅུ་གཉིས། །རྩ་སྔགས་འཁོར་ལོའི་རྩེ་མོར་དགོད། །


DTG047_Page_0462
[མ་དཔེ་གཟིགས་ན་འདིར་གནོན།]

རྩ་བར་ཨོཾ་ནི་དྲུག་ཅུ་བཞི། །བསྲུང་བའི་མིང་ནི་མཐའ་རྟེན་བྲི། །རྩིབས་མཚན་ཧཱུཾ་ཕཊ་མཐའ་བརྟེན་པའི། །པར་ཆོད་དག་གིས་མིང་དག་བྲི། །རེ་མིག་ཀཱ་ལི་དག་གིས་དགང༌། །དེ་ནས་འཁོར་ལོ་བཅུ་དྲུག་ལ། །ཧྲཱིཿ་སོགས་བརྒྱད་ནི་བརྒྱད་པོར་བྲི། །བརྒྱད་ལ་མིང་དང་བསྲུང་བར་བཅས། །སྔར་བཞིན་རྩ་བར་ཨོཾ་གྱིས་བརྟེན། །མཚན་ལ་ཕཊ་བརྟེན་གཞན་དག་བྲི། །རེ་མིག་དག་ལ་ཨཱ་ལི་ཡིན། །དེ་བར་བརྒྱད་ལ་སྙིང་པོ་ནི། །ཨ་ཐུང་བསྣན་པས་བརྒྱད་བྲིའོ། །རྩ་བར་ཨ་བརྟེན་བསྲུང་བ་གཞག །མཚན་མར་ཧཱུཾ་ཕཊ་གཞན་བསྣན་ནོ། །དེ་ནས་དྷཱིཿ་དབུས་གཞག་པ་ཡི། །ཕྱོགས་བཞིར་ཨོ་དྷཱིཿ་སྭཱ་ཧཱ་དགོད། །སྟོང་པ་བཞི་ལ་མིང་བཅས་བསྲུང༌། །ཨོཾ་གཉིས་ཧྲཱིཿ་ཀྵེ་ཤར་ཡིན་ལ། །ད་མེ་མ་ནི་བྱང་ནུབ་ལྷོ། །སྲོང་ལ་མཎྜལ་ལེགས་བྱུགས་ལ། །མེ་ཏོག་ནག་པོ་བཅུ་བདུན་དགོད། །དེ་སྟེང་བཞག་ལ་རྣལ་འབྱོར་བཞི། །རྫོགས་ནས་གཏོར་མ་བཏང་དང་བཅོལ། །བཟླས་པ་སྤྲོ་བསྡུ་ཡི་གེ་དང༌། །བཅས་པའི་ཕྱག་མཚན་སྣ་ཚོགས་དང༌། །རྡོ་རྗེ་ས་གཞི་ར་བ་གུར། །རྟག་ཏུ་དེ་ནང་གནས་པ་གདགས། །ཡང་ན་རྟག་ཏུ་མཆོད་པར་བྱ། །མགུལ་ལམ་གཙུག་དང་དཔུང་གཡོན་གདགས། །ཁྲོ་བོ་ཁྲོས་ཀྱང་འཇིགས་མི་ནུས། །ཕྱིར་བཟློག་འཁོར་ལོ་འདོད་ན་ཡང༌། །སྔོན་བཞིན་རྣལ་འབྱོར་བཞིས་བསྐྱེད་དམ། །རྒྱུད་ལས་མྱུར་དང་སྐད་ཅིག་ལས། །རྣལ་འབྱོར་གསལ་བས་འགྲུབ་པ་པོ། །སྟོང་དང་སྙིང་རྗེ་མེ་རི་དང༌། །དྲ་གུར་ལྡན་པས་བདུད་བཞི་བཟློག །དེ་ནས་འཁོར་ལོ་སོ་བཞི་ནི། །སྟེང་དུ་ཨོཾ་ལས་ལྷ་ཆེན་དགུ། །རྩ་སྔགས་རྣམས་ལ་གཤིན་རྗེ་བརྒྱད། །ལས་མཁན་བརྒྱད་དང་ཕོ་ཉ་བརྒྱད། །ཤན་པ་བརྒྱད་ནི་བསྐྱེད་པ་སྟེ། །དཀྱིལ་འཁོར་རང་ལྷའི་མངག་པས་བཟློག །ཧཱུཾ་ལས་རྡོ་རྗེའི་མིག་ཅན་རིགས། །ཕཊ་ལས་འོག་ཏུ་ཀླུ་ཆེན་བརྒྱད། །རྩ་སྔགས་བདུན་བཟླས་བཟློག་པར་བསམ། །དེ་ནས་འཁོར་ལོ་རྩིབས་བཅུ་ལ། །སྟེང་འོག་ཕྱོགས་སྐྱོང་བསྐྱེད་པ་དང༌། །དེ་ནང་དྲུག་ལས་སྙིང་པོ་ལས། །གཤིན་རྗེ་དྲུག་ནི་


DTG047_Page_0463
[མ་དཔེ་གཟིགས་ན་འདིར་གནོན།]

ཕ་སྐྱེད་པ་དང༌། །དེ་བཞིན་རང་བཞིན་རེ་རེ་གཞུག །གཉིས་མེད་གྱུར་པ་ལས་བཅོལ་བ། །སོ་སོ་ལུས་བོང་ལྗང་གུའི་མདོག །གཡས་ཀུན་འཁོར་ལོ་འཛིན་པ་དང༌། །གཡོན་ཀུན་སྡིགས་མཛུབ་བྱེད་པ་ཡིས། །ཕས་ཀྱི་འབྱུང་པོ་བཟློག་བསམ་པ། །སྙིང་གར་ཡེ་ཤེས་སེམས་དཔའ་ནི། །འཇམ་དཔལ་ཏིང་འཛིན་སྤྲོ་བསྡུ་བཟླས། །བདུན་བརྗོད་སྐུ་ཡི་རིགས་རྣམས་གཞུག །ཡེ་ཤེས་གཤིན་རྗེ་གཤེད་བསམས་ནས། །ཡ་མཱནྟ་ཀ་བདུན་བརྗོད་ལ། །གསུང་རིགས་ཐམས་ཅད་བསྐུལ་ཞིང་གཞུག །དམ་ཚིག་འཇིགས་བྱེད་གསལ་བ་ཡིས། །ཧྲཱིཿ་ཥྚྲྀཿ་བདུན་བརྗོད་ཐུགས་རིགས་གཞུག །བཅུ་གསུམ་ཡོན་ཏན་རྩ་སྔགས་བརྗོད། །བདུན་གྱིས་རྒྱལ་བ་ཐམས་ཅད་གཞུག །དེ་བཞིན་བདུན་བདུན་ནང་རིམ་དུ། །ཕྱི་ནས་བརྗོད་པས་བཟློག་པའོ། །སེམས་ནི་ཏིང་ངེ་འཛིན་དྷཱིཿ་ལ་སྦ། །བདག་ནི་ཡེ་ཤེས་ཨཱཿ་ལ་སྦ། །ལུས་ནི་དམ་ཚིག་ཨོཾ་ལ་སྦ། །རྡོ་རྗེ་བཟླས་པ་ལྡན་པས་ཞལ། །ཡང་ན་ཕོ་མོ་མ་ནོར་བའི། །ཐོད་པར་འཁོར་ལོ་བྲི་བ་ནི། །རྫས་དུས་སྔོན་བཞིན་ལེགས་བྲིས་ལ། །མཱ་རའི་གནས་སུ་སྟམྦྷ་གཞག །སྟེང་གི་ཐོད་པའི་སྤྱི་རྡོལ་ལ། །ལིངྒ་ཚོན་ལྔས་བཏགས་པ་དྲང༌། །སྔགས་གསུམ་ཐ་མར་སྟམྦྷ་བཏགས། །དྷཱིཿ་སྭཱ་ཧཱ་ཡིས་བསྲུང་བར་བྱ། །ཞག་གམ་ཐུན་མམ་ཟླ་བ་རུ། །ཐུན་གཅིག་དུས་གསུམ་དག་ཏུ་བྲ་བ། །ནོན་པའི་རྟགས་དག་ངེས་པ་དང༌། །བ་བླ་ཡུང་བས་གཡམ་ནག་ལ། །ནང་དུ་སྣ་ཚོགས་རྡོ་རྗེ་དང༌།། ཕྱི་རུ་རི་རབ་བྲིས་པ་ཡིས། །མི་འབབ་མཚོ་རུ་མནན་པ་བྱ། །བ་བླ་ཡུད་པ་ལྡོང་རོས་དང༌། །གི་ཝང་དག་གིས་ཐབ་ཁུང་ནི། །ཁྲུ་གང་གྲུ་བཞི་བར་བྱུགས་ལ། །སྐྱེ་རབ་དུར་ཁྲོད་ཤིང་དང་ནི། །སེང་ལྡེང་གླང་པོ་ཆེ་ཡི་སྤངས། །རྒྱལ་པོའི་མེ་སྔར་མེ་ལྷ་སེར། །འཇིགས་བྱེད་བསྐྱེད་སོགས་གསལ་བ་ལ། །བ་བླ་ཡུངས་ཀར་ཡུང་བ་དང༌། །གླང་པོ་ཆེ་ཡི་ཤ་བསྲེགས་པ། །བྱང་དུ་ཕྱོགས་པའི་མིང་དང་བསྲེག །ཞག་བདུན་བསྲེགས་ན་རྡོ་རྗེ་འཛིན། །གནོད་ཅིང་རེངས་པའི་སྦྱོར་བའོ། །ཡང་ན་པྲ་བ་ནག་དང་དམར། །ཆོ་ག་སྔོན་མས་


DTG047_Page_0464
[མ་དཔེ་གཟིགས་ན་འདིར་གནོན།]

དེ་བཞིན་མནན། །དམ་ཚིག་བསྐང་བའི་ཆོ་ག་ཡིས། །བསྲུང་བ་ཤིན་ཏུ་བསྡུས་ཏེ་བཟང༌། །སྟོང་དང་སྙིང་རྗེ་ཁོ་ན་ཡིས། །བསྲུང་བ་མཆོག་གིས་སངས་རྒྱས་འགྲུབ། །སྔགས་རྣམས་རྒྱུན་དུ་བཟླ་བ་དང༌། །དགེ་གཞན་གཏོར་མ་དག་ལ་བརྩོན། །དམ་ཚིག་བླ་མས་ལེགས་བསྐྱངས་ན། །བར་ཆོད་ཐམས་ཅད་བཟློག་པར་འགྱུར། །ལས་ཀུན་སྔོན་དུ་བསྙེན་པ་ནི། །ཟླ་གཉིས་བསྒྲུབ་པ་ཞག་བདུན་དང༌། །ལས་སྦྱོར་ཞག་རེ་སྦྱོར་དགོས་པ། །སྒྲུབ་པ་པོ་ཡིས་ཤེས་པར་བྱ། །བསྐྲད་པ་རྒྱལ་མཚན་རས་བླངས་ལ། །སྔོན་གྱི་རྫས་ཀྱིས་འཁོར་ལོ་བྱ། །སྔགས་སྤེལ་ལིངྒ་ཤེས་པས་དགོད། །དགུག་གཞུག་རིམ་པ་ཞག་བདུན་བསྒྲུབ། །ས་བདུན་དག་ལ་རྟ་དང་ནི། །བསྒྲུབ་བྱ་ཞོན་པའི་གཟུགས་བྱས་ཏེ། །རླུང་གི་དཀྱིལ་འཁོར་སྟེང་ལྷོ་ཕྱོགས། །ཉི་མའི་ཉིན་མོ་ཙཎྜ་ལཱི། །ལུས་ལ་སྐེ་ཚེའི་མར་བྱུགས་ནས། །ནིམ་པའི་ཤིང་ལ་ངེས་འཛེག་པའི། །ཐོད་པར་ཉི་ཕྱེད་སྦུ་མ་དེ་བཞར། །བྱ་རོག་ཚང་བསྲེག་ཐལ་བ་དང༌། །དུར་ཁྲོད་ཐལ་བ་བསྲེས་པ་ནི། །དེ་ཡི་མགོ་ལ་བླུགས་ཤིང་བྱུག །རྒྱལ་མཚན་རས་བསྲེགས་ཐལ་བ་དང༌། །བསྲེས་པ་དེ་ཡིས་རྐང་ལ་བསྐུ། །དུར་ཁྲོད་སོལ་བ་བྱ་རོག་ཁྲག །བྱ་རོག་རུས་པས་ཤིང་ཤུན་ལ། །རླུང་གི་དཀྱིལ་འཁོར་བྲིས་བྱས་ལ། །དེ་ཡི་དཀྱིལ་དུ་བསྒྲུབ་བྱ་ཡི། །ལིངྒ་མིང་སྔགས་སྤེལ་བ་བྲི། །བྱ་རོག་དག་གམ་ས་བདུན་ལས། །བྱས་པའི་མགུལ་དུ་དེ་བཏགས་ཏེ། །ལྷོ་རུ་ཕྱོགས་པས་དེ་སྔོན་གཞག །ས་བདུན་སྦྲུས་ལས་གཤིན་རྗེ་ནི། །དབྱུག་ཐོགས་དེ་ཡི་རྒྱབ་ནས་འདེད། །དགུག་གཞུག་གསལ་བས་སྒྲུབ་པ་ཡི། །རྟགས་བྱུང་ཞག་བདུན་ལོན་པ་དང༌། །འཁོར་ལོ་གཤིན་རྗེའི་ལྟོ་བར་གཞག །ལིངྒ་བསྒྲུབ་བྱའི་སྙིང་གར་སྦ། །ནིམ་བའི་ཤིང་གཅིག་རྩ་བ་རུ། །ལྷོ་རུ་ཕྱོགས་པས་བསྐྱལ་བར་བསྒྲོད། །དེ་ནས་སྦྱིན་སྲེག་བྱ་བ་ནི། །རླུང་གི་ཐབ་ཁུང་དབུས་སུ་ནི། །ནིམ་པ་འབྲས་བུ་བྱ་རོག་ཚང༌། །ད་དུ་ར་ཤིང་དུར་ཁྲོད་ཤིང༌། །དུར་ཁྲོད་ཤིང་གིས་མེ་སྦར་ལ། །མེ་ལྷ་ལྗང་གུ་བསྐྱེད་པ་དང༌། །


DTG047_Page_0465
[མ་དཔེ་གཟིགས་ན་འདིར་གནོན།]

འཇིགས་བྱེད་བསྐྱེད་སོགས་གསལ་བ་ན། །གཅེར་བུ་སྐྲ་གྲོལ་ལྷོར་ཕྱོགས་པས། །བྱ་རོག་ཁྱིམ་བྱ་སྦལ་བ་ཁྱི། །ཤ་དང་རྔ་མོའི་རྟུག་པ་ཆང༌། །བྱི་ལའི་ཁྲག་གིས་སྦུས་ལ་བསྲེག །ཡི་གེ་བཅུ་པ་གཙོར་བྱས་ལ། །མིང་དང་བཅས་པས་གྲུབ་པ་ཡིན། །ཞག་བདུན་བྱས་ན་གྲོང་ཁྱེར་སྐྲོད། །སྐྱོ་བར་བྱ་བ་སྐྲོད་དང་མཚུངས། །ཤ་ཆེན་ད་དུ་རོ་འབྲས་བསྲེག །དབྱེ་བའི་སྦྱོར་བ་བསྟན་པ་ནི། །བྲམ་ཟེ་མ་བི་མ་ཧེ་རྟ། །བྱ་རོག་འུག་པ་ནི་ལེ་སྦྲུལ། །ཁྲག་གིས་འཁོར་ལོ་བརྒྱད་དག་བྲི། །མཁས་པས་སྔགས་དགོད་སྤེལ་པས་བཟླས། །བྲམ་ཟེ་རིགས་ངན་ཐོད་པར་གཞག །ས་བདུན་དག་ལ་མ་ཧེ་རྟ། །གཟུགས་ལ་ཤིང་ཤུན་ལིངྒ་སྦ། །སྒྲོ་གཉིས་རུས་པ་གཉིས་ལ་ནི། །བཅུ་བའི་སྔགས་སྤེལ་བྲི་བ་དང༌། །སྒྲོ་གཉིས་བཅིངས་ལ་པགས་པར་གཞུག །ནིམ་པའི་ཤིང་གི་སྟེང་དུ་གཞག །ས་བདུན་རྒྱུ་ལས་བསྒྲུབ་བྱ་བ། །མ་ཧེ་རྟ་ལ་བསྐྱོན་བྱས་ནས། །ད་དུ་ར་ཡི་ཐལ་བ་དང༌། །ཚེར་མས་བཅུ་པའི་སྔགས་བཟླའོ། །ལས་སྦྱོར་ལིངྒ་བསྒྲུབ་བྱ་སྦ། །ཆུ་འགྲམ་འཐབ་སར་སྦ་ཞིང་བསྐྱལ། །དེ་ནས་ཆུ་དང་མེ་ཡི་ཐབ། །ཚེར་མ་འོ་མ་ཅན་གྱི་ཤིང༌། །དུར་ཁྲོད་ཤིང་དང་འགས་ཕུབ་ལ། །དུར་ཁྲོད་གཏུམ་པོའི་མེ་སྤར་ཏེ། །ལྷ་ནི་དམར་ནག་བསྐྱེད་པ་དང༌། །རྡོ་རྗེ་འཇིགས་བྱེད་བསྐྱེད་པ་ལ། །མ་ཧེ་རྟ་དང་བྱ་རོག་འུག །རྨ་བྱ་སྦྲུལ་གྱི་ཤ་བསྲེག་བྱ། །ཡི་གེ་བཅུ་པ་མིང་སྤེལ་བས། །རྡོ་རྗེ་འཛིན་པ་རྣམས་ཀྱང་འབྱེད། །དེ་ནས་དབང་དང་དགུག་པ་བསྟན། །གུར་ཀུམ་གི་ཝང་སྲིན་ལག་ཁྲག །འཁོར་ལོ་བརྒྱད་དག་ཟི་བར་བྱ། །ཐོད་པ་གཉིས་ལ་འཁོར་ལོ་བྲི། །འཁོར་ལོ་དགུག་གཞུག་དྲིལ་ལ་གཞུག །གུར་ཀུམ་གི་ཝང་སྲིན་ལག་ཁྲག །ས་བདུན་སྦྲུས་ལ་བསྒྲུབ་བྱ་ཡི། །སོར་མོ་བཅུ་དྲུག་གཟུགས་བརྙན་ལ། །ཤ་ཁྲག་གི་ཝང་གུར་ཀུམ་གྱིས། །གྲོ་གའི་འཁོར་ལོ་སྙིང་གར་གཞུག །མེ་ཏོག་སྤོས་ཕོར་དུས་གསུམ་མཆོད། །ནུབ་ཏུ་ཕྱོགས་པས་རྩ་སྔགས་བཟླ། །སེང་ལྡེང་མེ་ལ་ཐོད་པ་བསྲོ། །བཅུ་པའི་སྙིང་པོ་ལས་སྦྱོར་བྱ། །འགྱང་


DTG047_Page_0466
[མ་དཔེ་གཟིགས་ན་འདིར་གནོན།]

ན་དུར་ཁྲོད་རྫས་འཁོར་ལོ། །གསད་པའི་འཁོར་ལོ་སྔགས་བྱེ་བ། །རོ་བསྲེག་སོལ་བ་སྦྲ་ཚིལ་དང༌། །ཚ་བ་གསུམ་དང་རྫས་གཞན་ལ། །བསྒྲུབ་བྱ་མཐོ་གང་ཁ་སོ་གཙིགས། །འཁོར་ལོ་སྙིང་གར་བཅུ་ག་བྱས་ལ། །གཡོན་བརྐྱང་མ་ཧེ་ཞལ་སྦྱར་བས། །མནན་ལ་ཡི་གེ་བཅུ་པས་དགུག །སྦྱིན་སྲེག་ཐབ་ཁུང་ཟླ་གམ་དུ། །ཙནྡན་དམར་པོ་གུར་ཀུམ་དང༌། །གི་ཝང་སྲིན་ལག་ཁྲག་གིས་བྱུག །སེང་ལྡེང་མེ་ལ་ལྷ་གཉིས་དམར། །སྐེ་ཚེའི་གཟུགས་རྟེན་ཉ་དང་ཆང༌། །ཏིལ་དང་འབྲས་ཀྱི་ཚེར་མ་དུག །བདུད་རྩི་ལྔ་དང་ཁྲག་སྦྲུས་ལ། །ནུབ་ཏུ་ཕྱོགས་པས་དུས་གསུམ་དུ། །བརྒྱ་རྩ་བརྒྱད་ནི་ཞག་བདུན་བྱ། །ཤ་ལྔ་རྣམ་སྣང་རྡོ་རྗེའི་ཆུ། །ཆང་དང་བསྲེས་ན་རྒྱལ་པོ་སོགས། །ཐམས་ཅད་དབང་དུ་འགྱུར་བ་ཡིན། །ཡི་གེ་བཅུ་པའི་སྦྱོར་བས་བྱ། །རྒྱས་པར་འདོད་ལ་རྒྱས་པའི་ལས། །སྒྲུབ་པ་པོ་ཡིས་འདི་ལྟར་བྱ། །རྒྱལ་པོ་ཁྱིམ་བདག་རས་བླངས་ལ། །གུར་གུམ་གི་ཝང་ཙནྡན་གྱིས། །འཁོར་ལོ་བརྒྱངས་ལ་བྲི་བར་བྱ། །སྲ་བ་གྲུ་བཞི་སེར་པོར་སྦ། །སྲད་བུ་སེར་པོས་རྒྱ་གྲམ་དཀྲི། །མཎྜལ་སེར་པོའི་སྟེང་དུ་གཞག །བྱང་དུ་ཕྱོགས་པས་བསམ་གཏན་སྔགས། །རྡོ་རྗེ་འཇིགས་བྱེད་སྦྱོར་བས་བྱ། །མེ་ཏོག་སེར་པོས་དུས་གསུམ་མཆོད། །ཕྲ་མ་གཤིན་རྗེ་གཤེད་མཉམ་པའི། །རྒྱས་པའི་ལས་ནི་གང་འདོད་པ། །རྣལ་འབྱོར་བ་ཡིས་འགྲུབ་པར་འགྱུར། །སྦྱིན་སྲེག་རྒྱས་པའི་ཐབ་ཁུང་དུ། །ཨུ་དུམྺཱ་རའི་ཤིང་ལ་མེ། །སྤར་ལ་ལྷ་གཉིས་སེར་པོར་བསྐྱེད། །ཏིལ་ནས་མར་དང༌། འབྲས་ཞོ་དག །བྱང་དུ་བལྟས་པས་སྟོང་དུ་བསྲེག །གང་འདོད་པ་དེ་རྒྱས་པར་འགྱུར། །སྔགས་དང་མིང་དུ་བཅས་བསྲེགས་ན། །གང་འདོད་རྒྱས་པར་འགྱུར་བའོ། །ཞི་བའི་ལས་དག་འདི་ལྟར་བྱ། །སྟོང་དང་སྙིང་རྗེ་འཇིགས་བྱེད་ལྡན། །ཙནྡན་ཏིལ་དཀར་གུར་གུམ་དང༌། །གི་ཝང་གོ་རོ་ཙ་ན་ཡིས། །འཁོར་ལོ་བརྒྱད་དང་ཡི་གེ་དགོད། །སྲ་བ་ཟླུམ་པོ་དཀར་པོ་སྦ། །སྲད་བུ་དཀར་པོས་དཀྲི་བྱས་ལ། །མཎྜལ་དཀར་པོའི་སྟེང་བཞག་སྟེ། །ཤར་དུ་ཕྱོགས་པས་ཞི་བས་བསྒྲུབ། །


DTG047_Page_0467
[མ་དཔེ་གཟིགས་ན་འདིར་གནོན།]

མེ་ཏོག་དཀར་པོས་དུས་གསུམ་མཆོད། །སྦྱིན་སྲེག་ཐབ་ཁུང་ཟླུམ་པོ་རུ། །བ་ལ་ཤ་ལ་མེ་སྦར་ལ། །མེ་ལྷ་རྡོ་རྗེ་འཇིགས་བྱེད་དཀར། །བསྐྱེད་དང་དགུག་སོགས་ལེགས་པར་མཆོད། །ཤར་དུ་ཁ་བལྟས་ཏིལ་དང་མར། །སྦྲང་རྩི་འོ་མ་དཱུར་བ་དག ། དུས་གསུམ་དག་ཏུ་ཞག་བདུན་བསྲེག །བདག་དང་གཞན་གྱི་བར་ཆད་ཞི། །ལས་གཞན་ཀུན་དང་སྦོགས་པ་ནི། །འཁོར་ལོའི་རྫས་དང་སྦྱོར་བས་དབྱེ། །མན་ངག་བརྒྱུད་པ་བླ་མ་བསྟེན། །རྫས་དང་དམ་ཚིག་ཏིང་འཛིན་གསལ། །སྔགས་ལ་གུས་ན་འགྲུབ་པ་ལས། །མ་གསང་གཞན་དུ་མི་འགྲུབ་པོ། །ཐམས་ཅད་རྫས་དང་འཁོར་ལོ་དང༌། །བསམ་གཏན་སྔགས་ལ་བརྩོན་པ་དང༌། །བསྙེན་པ་བརྟུལ་ཞུགས་དཔའ་བ་དང༌། །བླ་མ་ལ་གུས་གསང་ན་འགྲུབ། །དེ་ལས་གཞན་པས་མི་འགྲུབ་པས། །རྒྱུད་ལྟར་སྣོད་བཏགས་འབད་པ་གསང། །མ་གསང་སྣོད་ངན་ལ་བཤད་པས། །སློབ་དཔོན་འདི་དང་ཕྱི་མར་བརླག །རྒྱུད་དོན་བླ་མ་ལ་བརྟེན་ནས། །མོས་པས་འདི་བྱས་མཁས་པས་བཀོད། །སྒྲ་ནོར་དོན་ལོག་ཉེས་པ་རྣམས། །རྡོ་རྗེ་འཇིགས་བྱེད་ཆོས་སྐྱོང་བཤགས། །རྒྱུད་དང་གདམས་ངག་ལ་བརྟེན་ཏེ། །འགྲོ་ལ་བསམས་ནས་སྒྲུབ་ཐབས་བྲིས། །འདི་ལས་དགེ་བ་ཅི་ཐོབ་པས། །བདག་གཞན་རྡོ་རྗེའི་སྐུ་ཐོབ་ཤོག །དཔལ་རྡོ་རྗེ་འཇིགས་བྱེད་ཀྱི་སྒྲུབ་པའི་ཐབས་རྡོ་རྗེ་འོད་ཅེས་བྱ་བ། སློབ་དཔོན་ཆེན་པོ་བཻ་རོ་ཙ་ན་རཀྵི་ཏས་མཛད་པ་རྫོགས་སོ།། །། མཁས་པ་ཆེན་པོ་བཻ་རོ་ཙ་ན་རཀྵི་ཏ་དེ་ཉིད་དང༌། ལོ་ཙཱ་བ་གླན་དར་མ་མ་ཏིས་བསྒྱུར་ཅིང་ཞུས་ཏེ་གཏན་ལ་ཕབ་པ།།

དཔལ་རྡོ་རྗེ་འཇིགས་བྱེད་ཀྱི་དཀྱིལ་འཁོར་གྱི་ཆོ་ག་གསལ་བ་ཞེས་བྱ་བ།
བཻ་རོ་ཙ་ན་རཀྵི་ཏ།


DTG047_Page_0467
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། ཤྲཱི་བཛྲ་བྷཻ་ར་ཝ་བཛྲ་མཎྜལ་པྲ་ཀ་བི་དྷི་ནཱ་མ། བོད་སྐད་དུ། དཔལ་རྡོ་རྗེ་འཇིགས་བྱེད་ཀྱི་དཀྱིལ་འཁོར་གྱི་ཆོ་ག་གསལ་བ་ཞེས་བྱ་བ། དཔལ་རྡོ་རྗེ་འཇིགས་བྱེད་ཆེན་པོ་ལ་ཕྱག་འཚལ་ལོ། །ནམ་མཁའ་ལྟ་བུར་དངོས་བདག་མེད། །དུས་མཐའི་འོད་ལྟར་ལྷ་རྣམས་འབར། །ཤེས་རབ་ཐབས་འདྲེས་གཉིས་སུ་མེད། །རྡོ་རྗེ་འཇིགས་བྱེད་ཕྱག་འཚལ་ནས། །དེ་ཉིད་


DTG047_Page_0468
[མ་དཔེ་གཟིགས་ན་འདིར་གནོན།]

ཐོབ་འདོད་རིགས་ཅན་ལ། །དེ་ཡི་དཀྱིལ་འཁོར་ཆོ་ག་བཤད། །བརྒྱུད་པའི་རིམ་འོངས་མན་ངག་ཐོབ། །རྒྱུད་སྡེ་ཤེས་ཤིང་ཆོ་ག་མཁས། །དམ་ཚིག་ལ་གནས་བྱིན་རླབས་ཡོད། །སྦྱིན་སོགས་སྙིང་རྗེ་སློབ་མ་འཛིན། །གནོད་སྦྱིན་རིགས་འདུས་བསྟན་ལ་གུས། །དེ་ནི་བཀའ་ཡང་སློབ་དཔོན་རིགས། །གཟུང་བར་བྱ་བའི་སློབ་མ་ནི། །དད་གུས་སྙིང་རྗེ་ཤེས་རབ་ཡོད། །དགེ་སྡིག་པ་རྣམ་སྨིན་འབྲས་བུ་ཤེས། །སྡོམ་གནས་དུལ་ཤིང་ཁྲོ་བ་སྤངས། །བརྟུལ་ཞུགས་དཔའ་པོད་སེམས་སྟོབས་བརྩོན། །སེམས་གཅིག་དོན་མེད་བསྒྲུབ་པ་འདོད། །ཟབ་དང་རྒྱ་ཆེ་འཛིན་ལ་གནས། །དེ་ལས་གཞན་པ་འདིར་མི་གཟུང༌། །དུར་ཁྲོད་ལ་སོགས་དབེན་བསྡད་དེ། །མཎྜལ་མཆོད་གཏོར་རྫས་བསགས་ལ། །སྡོམ་དང་སྔགས་ཀྱིས་སློབ་མ་བསྲུང༌། །རྣལ་འབྱོར་བཞི་གནས་འབུམ་ཁྲི་སྟོང༌། །སྙིང་པོ་ལས་དང་རྩ་སྔགས་བཟླས། །ཆོས་སྐྱོང་བསྙེན་པ་རྟགས་མཚན་གྲངས། །བསྙེན་པ་གྲུབ་ནས་སྟ་གོན་ཏེ། །དབྱིབས་སྔགས་ཆོས་དང་ལྡན་པ་ཡིས། །ཕྱོགས་དང་དབྱིབས་དང་ཁ་དོག་ལ། །བཙལ་དང་བརྟག་པ་དག་ཏུ་བྱ། །དཀར་དང་ཟླུམ་དང་ཤར་ལ་སོགས། །འབོལ་སྣུམ་གྱོང་དང་ཡང་བ་ཡིས། །རྙེད་ལེགས་སླང་དང་དབྲོག་པར་བྱ། །ཡང་ན་རིན་གྱིས་ཉོ་ཡང་རུང༌། །ལྷ་མོ་དབང་གསོལ་རྣལ་འབྱོར་བཞིས། །སྟོང་ཉིད་དྲ་གུར་རྡོ་རྗེའི་གདན། །ཨོཾ་བྷཱུ་ཁཾ་གིས་ཆོས་ཉིད་མཁའ། །ཧཱུཾ་ལཾ་ཧཱུཾ་སོགས་འབྱུང་བའི་རིམ། །བཛྲ་མེ་དེའི་སྔགས་བརྗོད་ཅིང། །རཀྵ་རཀྵས་རྡོ་རྗེས་བསྲུང༌། །ས་རོ་དབྱུང་ཞིང་སྦྱང་བར་བྱ། །སྐྱོབ་པ་སངས་རྒྱས་ཐམས་ཅད་ཀྱི། །ས་དང་ཕ་རོལ་ཕྱིན་པ་དང༌། །སྤྱོད་པའི་ཚུལ་དང་ཁྱད་པར་ནི། །ལྷ་མོ་ཁྱོད་ནི་དབང་དུ་གྱུར། །བརྗོད་ལ་ལྷ་མོ་མཁའ་ལ་བཏེག །བདུད་རྩི་ཁྲག་ཆེན་པ་ཡི་དྲི། །སོར་བཞི་མཐོ་གང་གྲུ་བཞིར་བརྩིགས། །སློབ་དཔོན་ཁྲུས་བྱས་དྲི་ཞིམ་དང༌། །བདུད་རྩི་ལྔས་བྱུག་དུར་ཁྲོད་ཀྱི། །ཕྱག་རྒྱ་ལྔས་བརྒྱན་ཅོད་པན་དང༌། །སྟོད་སྨད་གོས་ལྡན་གདན་ལ་བསྡད། །རྡོ་རྗེ་དྲིལ་བུ་སྙིང་རྗེས་བཟུང༌། །འགྲོ་བ་བསྒྲལ་ཕྱིར་དཀྱིལ་འཁོར་


DTG047_Page_0469
[མ་དཔེ་གཟིགས་ན་འདིར་གནོན།]

འཇུག །རྣལ་འབྱོར་ཆེན་པོས་གནས་པ་ལ། །དྲིས་བརྒྱན་རྡོ་རྗེ་དྲིལ་བུ་འཛིན། །སློབ་མ་བཞི་ཡིས་གསོལ་བ་གདབ། །འགྲོ་ཀུན་གཏི་མུག་མནན་མཐོང་ནས། །འགྲོ་བའི་གཏི་མུག་བསལ་བའི་ཕྱིར། །བཅོམ་ལྡན་གཏི་མུག་གཤེད་དུ་བྱོན། །གཏི་མུག་འཇིགས་བྱེད་ཕྱག་འཚལ་བཞེངས། །འགྲོ་ཀུན་ང་རྒྱལ་གྱིས་མནན་གྱིས། །འགྲོ་ཀུན་ང་རྒྱལ་ཞི་བྱའི་ཕྱིར། །བཅོམ་ལྡན་ཕྲ་མ་གཤེད་དུ་བྱོན། །ཕྲ་མ་འཇིགས་བྱེད་ཕྱག་འཚལ་བཞེངས། །འགྲོ་ཀུན་འདོད་ཆགས་གཟིར་གཟིགས་ནས། །བཅོམ་ལྡན་འདོད་ཆགས་གཤེད་དུ་བྱོན། །འགྲོ་བའི་འདོད་ཆགས་སྦྱང་བའི་ཕྱིར། །འདོད་ཆགས་འཇིགས་བྱེད་ཕྱག་འཚལ་ལོ། །འགྲོ་ཀུན་ཕྲག་དོག་བཅིངས་མཐོང་ནས། །འགྲོ་བའི་ཕྲག་དོག་བསྒྲལ་བའི་ཕྱིར། །བཅོམ་ལྡན་ཕྲག་དོག་གཤེད་དུ་མཛད། །ཕྲག་དོག་འཇིགས་བྱེད་ཕྱག་འཚལ་བཞེངས། །འགྲོ་ཀུན་ཞེ་སྡང་གིས་གཟིར་གཟིགས། །འགྲོ་བའི་ཞེ་སྡང་སྦྱང་བའི་ཕྱིར། །བཅོམ་ལྡན་ཞེ་སྡང་གཤེད་དུ་སྦྲུལ། །ཞེ་སྡང་འཇིགས་མཛད་ཕྱག་འཚལ་བཞེངས། །རྡོ་རྗེ་འཇིགས་བྱེད་དཀྱིལ་འཁོར་ནི། །དཀྱིལ་འཁོར་ཀུན་གྱི་མངོན་གྱུར་པ། །སྡིག་པ་ཐམས་ཅད་ཉམས་བྱེད་ཅིང༌། །འདོད་པ་ཀུན་འབྱུང་མགོན་པོར་བྲི། །གསོལ་བའི་སྒྲ་དེ་བྲག་ཅ་ལྟར། །གསལ་ནས་ཆོས་ཉིད་དག་ལ་བཞེངས། །སྙིང་རྗེ་ཆེན་པོས་འགྲོ་བ་ཀུན། །དུག་ལྔའི་གནས་ནས་བསྒྲལ་བསམས་ལ། །ཧཱུཾ་ཧཱུཾ་བཛྲ་ཨུཏྟི་ཥྛ། །བརྗོད་ལ་རྡོ་རྗེ་གསོར་བས་བཞེངས། །ཊ་དང་མ་ལས་རྡོ་རྗེའི་སྤྱན། །གཡས་དང་གཡོན་གྱིས་ཁམས་གསུམ་བལྟ། །སངས་རྒྱས་ཀུན་བསྐུལ་བགེགས་བསྐྲད་བསམ། །རྐང་ལས་ཧཱུཾ་འོད་རྡོ་རྗེའི་ས། །རྡོ་རྗེ་འཁོར་ལོ་རིན་ཆེན་པད། །རལ་གྲི་ར་བ་གཡས་བརྐྱང་སོགས། །གར་དང་བཅས་པས་ལན་གསུམ་དུ། །དཀྱིལ་འཁོར་བསྐོར་ལ་བསྲུང་བ་བྱ། །ཧཱུཾ་ང་ནི་དཔལ་ལྡན་སྙིང་རྗེའི་སྟོབས། །སྲུང་བའི་འཁོར་ལོ་རབ་སྦྱོར་བྱེད། །ཉོན་ཅིག་བགེགས་རྣམས་ཀུན་ཉོན་ཅིག་།ལུས་ངག་ཡིད་ལ་གནོད་པ་ཀུན། །ལྷ་ཀླུ་གནོད་སྦྱིན་ལ་སོགས་ཁྱེད། །དེ་རིང་གཞན་དུ་འགྲོ་བར་གྱིས། །གལ་ཏེ་མི་འགྲོ་འདུག་གྱུར་ན། །རྡོ་རྗེ་འབར་བའི་ལུས་ལྡན་པའི། །རྡོ་རྗེ་འདི་ཡིས་བགེགས་བྱེད་ཀུན། །ལུས་ངག་ཡིད་གསུམ་དགས་པར་བྱའོ། །དེ་ནས་གནོད་མཛེས་སྔགས་ཀྱིས་


DTG047_Page_0470
[མ་དཔེ་གཟིགས་ན་འདིར་གནོན།]

བསྲུང། །གྷ་གྷཱ་ཏ་ཡིས་ཕུར་པས་གདབ། །མཆོད་དང་གཏོར་མས་ཁྲོ་བོ་མཆོད། །བདག་དང་སློབ་མ་བསྲུང་བར་གསོལ། །ལྷ་མོ་དམིགས་ནས་མཆོད་པས་མཆོད། །སྐྱོབ་པ་ཤཱཀྱ་སེང་གེ་ཡིས། །དྲག་པོ་ཆེན་པོ་བདུད་ཀྱི་སྡེ། །སྟོབས་ཆེན་དག་ཀྱང་དེ་ལྟར་བཅོམ། །དེ་ལྟར་བདག་གིས་བདུད་ལས་ནི། །རྒྱལ་བར་བྱས་ཏེ་དཀྱིལ་འཁོར་བྲི། །ལྷ་མོ་ཁྱོད་ཀྱིས་དབང་མཛོད་ཅིག །ལྷ་མོ་སླར་ཐིམ་ས་སྟ་གོན། །དེ་ནས་ལྷ་གནས་བདུད་རྩིའི་དྲིས། །ཐིག་ལེ་མེ་ཏོག་ཚོམ་བུ་བྱ། །ལྷ་བསྐྱེད་དགུག་གཞུག་བཅིང་དགྱེས་ལ། །ཕྱི་ནང་གསང་བའི་མཆོད་པ་དང༌། །བསྟོད་དང་སྙིང་པོ་ཅི་ནུས་པས། །མཉེས་པར་བྱས་ལ་གསོལ་བ་གདབ། །པུས་མོའི་ལྷ་ང་པདྨ་ལ། །གཡས་བཙུགས་གཡས་པས་སྤོས་ཐོགས་ཏེ། །བཅོམ་ལྡན་གཤིན་རྗེ་འཇིགས་རྡོ་རྗེ། །རིག་པའི་རྒྱལ་པོ་ཕྱག་འཚལ་ལོ། །སློབ་མ་རྣམས་ལ་བརྩེ་ཕྱིར་དང༌། །བཅོམ་ལྡན་ཁྱེད་ལ་མཆོད་པའི་ཕྱིར། །དཀྱིལ་འཁོར་སྙིང་རྗེའི་བདག་ཉིད་ཅན། །མགོན་པོ་བདག་ནི་འདྲི་བགྱིད་ཅིང༌། །བདག་ཉིད་ཁྱེད་ལ་གུས་པས་མཆོད། །བཅོམ་ལྡན་བཀའ་དྲིན་གནང་བར་འོས། །འཁོར་ལོ་འགྲོ་བའི་དོན་མཛད་པའི། །སངས་རྒྱས་ཐམས་ཅད་བདག་ལ་དགོངས། །འབྲས་གནས་བྱང་ཆུབ་སེམས་དཔའ་དང༌། །གཞན་ཡང་སྔགས་ལ་གནས་པའི་ལྷ། །འཇིག་རྟེན་སྐྱོང་བའི་འབྱུང་པོ་རྣམས། །སངས་རྒྱས་བསྟན་ལ་དགའ་བ་ཡི། །རྡོ་རྗེ་མིག་དང་ལྡན་པ་རྣམས། །དེ་རིང་རྡོ་རྗེ་འཛིན་མིན་བདག །རྡོ་རྗེ་འཇིགས་བྱེད་དཀྱིལ་འཁོར་འདི། །འགྲོ་ལ་ཕན་ཕྱིར་བྲི་བར་བྱེད། །ཇི་ལྟར་ནུས་པའི་ཉེར་སྤྱོད་ཀྱིས། །རྗེས་སུ་བརྩེ་ཕྱིར་ཉེ་བར་གསོལ། །བདག་དང་སློབ་མར་བཅས་པ་དང༌། །དཀྱིལ་འཁོར་གྱི་ནི་གྲོགས་ཀུན་ལ། །བསྲུང་དང་ཉེ་བར་སྐྱོབ་པ་ནི། །ཁྱེད་ཀྱིས་བྱ་བར་འོས་ལགས་སོ། །དེ་ལྟར་ལན་གསུམ་བརྗོད་པ་ནི། །དཀྱིལ་འཁོར་སྟ་གོན་མཁའ་ལ་བཏེག །དེ་ནས་ནག་པོ་ནོག་རྩ་བ་སྤངས། །གསེར་སོགས་རིན་ཆེན་ས་ཡང་རུང༌། །ལྟོ་ཡངས་མགྲིན་རིང་མཆུ་འཕྱང་བ། །བཅོ་བརྒྱད་རང་རང་མཚན་མས་གདབ། །རིན་ཆེན་ལྔ་དང་སྨན་ལྔ་དང༌། །ཙུ་ཏའི་ཁ་རྒྱས་གོས་ཀྱིས་དཀྲི། །ལྷ་བསྐྱེད་དགུག་གཞུག་མཆོད་བསྟོད་བཟླ། །ཞུ་ཕ་བདུད་རྩིའི་ཆུ་ཡིས་དགང༌། །མེ་ཏོག་ཕྲེང་བ་ཨརྒྷའི་སྣོད། །རྡོ་རྗེ་དང་བཅས་ཀུ་ཤའི་


DTG047_Page_0471
[མ་དཔེ་གཟིགས་ན་འདིར་གནོན།]

གདན། །ལྷ་གནས་དག་གམ་རིམ་པས་གཞག །སྐབས་དེར་རུང་བའི་སློབ་མ་དག །ཁྲུས་དང་མཎྜལ་མཆོད་པ་དག །མེ་ཏོག་ལས་བཟུང་གུས་པས་ནི། །དཀྱིལ་འཁོར་ཕྱི་སྒོར་བསྡད་པར་བྱ། །དངོས་གྲུབ་འདོད་པས་དད་པ་ཡིས། །འཇིག་རྟེན་ཕ་རོལ་ལ་དམིགས་ཏེ། །རྡོ་རྗེ་འཇིགས་བྱེད་བསྒྲུབ་པར་བྱ། །འཇིག་རྟེན་འདི་དམིགས་མཆོག་མི་འགྲུབ། །དེ་ལྟར་སྤྲོ་བ་བསྐྱེད་ནས་ནི། །དད་པ་བསྐྱེད་པའི་སློབ་མ་ལ། །ཆོ་ག་ཇི་བཞིན་སེམས་བསྐྱེད་ཅིང༌། །ཚིག་འདི་དག་གིས་ལན་གསུམ་བརླབ། །དཀོན་མཆོག་གསུམ་ལ་ཕྱག་འཚལ་ལོ། །དཀོན་མཆོག་གསུམ་ལ་སྐྱབས་སུ་མཆི། །སྡིག་པ་མི་དགེ་སོ་སོར་བཤགས། །འགྲོ་སོགས་དགེ་ལ་རྗེས་ཡི་རང༌། །སངས་རྒྱས་བྱང་ཆུབ་ཡིད་ཀྱིས་གཟུང༌། །བྱང་ཆུབ་མཆོག་གི་སེམས་ནི་བསྐྱེད་པར་བགྱི། །སེམས་ཅན་མ་ལུས་བདག་གིས་མགྲོན་དུ་གཉེར། །བྱང་ཆུབ་སྤྱོད་མཆོག་ཡིད་འོང་སྤྱད་པར་བགྱི། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །འགྲོ་བ་ཐམས་ཅད་བདག་གིས་བསྒྲལ། །དེ་ནས་གུས་པས་སློབ་དཔོན་ལ། །ཚིག་འདིས་ལན་གསུམ་གསོལ་བ་གདབ། །དཔའ་ཆེན་ཁྱོད་བདག་སྟོན་པ་པོ། །སློབ་དཔོན་ཁྱེད་ནི་དགོངས་སུ་གསོལ། །བྱང་ཆུབ་ཆེན་པོའི་ཚུལ་བསྟན་པའི། །དམ་ཚིག་དེ་ཉིད་བདག་ལ་གསོལ། །བྱང་ཆུབ་སེམས་ནི་བདག་ལ་གསོལ། །སངས་རྒྱས་ཆོས་དང་དགེ་འདུན་ཏེ། །མཆོག་གསུམ་པོ་ཡང་བདག་ལ་གསོལ། །ཐར་པ་ཆེན་པོའི་གྲོང་མཆོག་ཏུ། །མགོན་པོ་བདག་ཉིད་འཇུག་པར་བྱ། །བུ་ཚུར་ཤོག་ཅིག་ཐེག་ཆེན་ལ། །སྔགས་སྤྱོད་པ་ཡི་མཆོག་འདི་ནི། །ཁྱོད་ལ་ཡང་དག་བཤད་པར་བྱ། །ཁྱོད་ནི་ཐེག་ཆེན་སྣོད་ཡིན་ནོ། །དུས་གསུམ་སངས་རྒྱས་ཐམས་ཅད་ཀུན། །སྐུ་གསུང་ཐུགས་ཀྱི་རྡོ་རྗེ་ཅན། །རྡོ་རྗེ་གསང་སྔགས་མཐུ་ཡིས་ནི། །ཡེ་ཤེས་མཉམ་མེད་ཡང་དག་མཉེས། །ཤཱཀྱ་སེང་གེ་སོགས་མཆོག་གིས། །གསང་སྔགས་མཉམ་མེད་མཐུ་ཡིས་ནི། །འཇིགས་པ་ཆེན་པོ་བདུད་ཀྱི་སྡེ། །སྟོབས་ཆེན་དག་ཀྱང་དེས་བཅོམ་ནས། །འཇིག་རྟེན་རྗེས་


DTG047_Page_0472
[མ་དཔེ་གཟིགས་ན་འདིར་གནོན།]

སུ་གཤེགས་ནས་ཀྱང༌། །འཁོར་ལོ་བསྐོར་ནས་མྱ་ངན་འདས། །དེ་བས་ཀུན་མཁྱེན་ཐོབ་བྱའི་ཕྱིར། །བུ་ཡིས་བློ་གྲོས་འདི་གྱིས་ཤིག །དེ་དོན་བཤད་ནས་མཁའ་གསང་ནས། །བྱིན་རླབས་དབྱུང་བ་རྣམ་སྣང་དམིགས། །གནས་གསུམ་བྱིན་རླབས་མཆོད་པ་བྱ། །གསང་སྔགས་མཆོག་ཏུ་དེར་སེམས་བསྐྱེད། །ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པ། །བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་པར་བགྱི། །སངས་རྒྱས་ཆོས་དང་དགེ་འདུན་ཏེ། །མཆོག་གསུམ་པ་ལ་སྐྱབས་སུ་འཆི། །རྡོ་རྗེ་དྲིལ་བུ་ཕྱག་རྒྱ་ཡང༌། །གསུམ་བདག་ཉིད་དུ་གཟུང་བར་བགྱི། །སློབ་དཔོན་དག་ཀྱང་གཟུང་བར་བགྱི། །རིན་ཆེན་རིགས་མཆོག་ཆེན་པོ་ལ། །ཉིན་རེ་བཞིན་ནམ་དུས་དྲུག་ཏུ། །ཆོས་དང་ཟང་ཟིང་མི་འཇིགས་བྱམས། །སྦྱིན་པ་རྣམ་བཞི་རྟག་ཏུ་སྦྱིན། །བྱང་ཆུབ་ཆེན་པོའི་ཚུལ་བསྟན་པའི། །པདྨའི་རིགས་མཆོག་ཆེན་པོ་ལ། །ཕྱི་ནང་གསང་བའི་ཐེག་པ་གསུམ། །དམ་པའི་ཆོས་ཀྱང་མ་ལུས་བཟུང༌། །ལས་ཀྱི་རིགས་མཆོག་ཆེན་པོ་ལ། །སྡོམ་པ་ཐམས་ཅད་ལྡན་པར་ནི། །ཡང་དག་ཉིད་དུ་གནས་པར་བགྱི། །མཆོད་པའི་ལས་ཀྱང་ཅི་ནུས་བགྱི། །སྡོམ་པ་ཡི་ནི་ཚུལ་ཁྲིམས་དང༌། །དགེ་བའི་ཆོས་ནི་བསྡུ་བ་དང༌། །སེམས་ཅན་དོན་བྱའི་ཚུལ་ཁྲིམས་གསུམ། །དེ་ནས་བདག་གིས་གཟུང་བར་བགྱི། །སེམས་ཅན་ཀུན་གྱི་དོན་གྱི་ཕྱིར། །བདག་གིས་སྡོམ་པ་མ་ལུས་བཟུང༌། །མ་གྲོལ་བ་རྣམས་དགྲོལ་བར་བགྱི། །མ་བསྐལ་བ་རྣམས་བསྒྲལ་བར་བགྱི། །དབུགས་མ་ཕྱིན་པ་དབུགས་དབྱུང་ཞིང༌། །སེམས་ཅན་མྱ་ངན་འདས་ལ་དགོད། །སྐྱོན་སྤངས་རྩེ་མོ་ཆ་ལས་བྱུང༌། །བཅུ་གཉིས་སོར་བཅས་མེ་ཏོག་བཅས། །བ་ཡི་པགས་པ་ཙམ་གྱིས་བྱུག ། ཤར་བལྟས་དོར་ལ་ཞི་སོགས་བརྟག །ངག་གི་ཉེས་པ་སྦྱང་བའི་ཕྱིར། །དྲི་ཆུས་སྐྱོར་ཆུ་སྦྱིན་པར་བྱ། །ཨོཾ་ཧྲཱིཿ་བི་ཤུདྡྷ་སརྦ་དྷརྨཱཿ་པཱ་པཱ་ནི་ཙ་སྱ་བི་ཤོ་ཤ་ཡ་སརྦ་བི་ཀ་ལྦཱ་ན་ཨ་པ་ན་ཡ་ཧཱུཾ། ལས་དང་རྩ་བའི་སྔགས་བརྗོད་པའི། །ཀུ་ཤ་སྔས་དང་སྟན་དུ་སྦྱིན། །ལུས་ཚད་


DTG047_Page_0473
[མ་དཔེ་གཟིགས་ན་འདིར་གནོན།]

གསུམ་སྒྲིལ་ལས་སྔགས་ཀྱིས། །མདུད་པ་ལྷ་དང་བསྲུང་བ་གདགས། །བར་ཆད་སྡིག་པ་ཞི་བྱའི་ཕྱིར། །ཞི་བའམ་མན་ངག་སྦྱིན་སྲེག་བྱ། །དེ་ནས་སྤྲོ་བའི་ཆོས་བཤད་བྱ། །གཏོར་མ་བཏང་ཞིང་མཆོད་བསྟོད་བཟླ། །ཐམས་ཅད་མཁྱེན་པ་འཇིག་རྟེན་དུ།། འབྱུང་འགྱུར་ཡང་ནི་མི་འབྱུང་སྲིད། །ཨུ་དུམྺཱ་རའི་མེ་ཏོག་བཞིན། །བརྒྱ་ལམ་ནའམ་རེས་འགའ་བྱུང༌། །གསང་སྔགས་སྤྱོད་པའི་མཆོག་འདི་ནི། །དེ་བས་ཀྱང་ནི་རྙེད་པར་དཀའ། །གང་ཕྱིར་སེམས་ཅན་མཉམ་མེད་དོན། །བླ་ན་མེད་པ་བྱེད་པར་ནུས། །བསྐལ་བ་དཔག་ཏུ་མེད་པ་རུ། །གང་གིས་མཚམས་མེད་སྡིག་བྱས་པ། །དཀྱིལ་འཁོར་འདི་འདྲ་མཐོང་བ་ཡིས། །སྡིག་པ་ཐམས་ཅད་ཟད་པར་བྱེད། །གྲགས་པ་མཐའ་ཡས་སྔགས་སྤྱོད་པའི། །ཚུལ་ལ་གནས་ན་སྨོས་ཅི་དགོས། །སྐྱོབ་པའི་གསང་སྔགས་བཟླས་ན་ནི། །གོ་འཕང་བླ་ན་མེད་པར་འགྱུར། །གང་གིས་སྔགས་སྤྱོད་མཆོག་འདི་ལ། །བློ་གྲོས་ཤིན་ཏུ་དྲི་མེད་ན། །སྡུག་བསྔལ་ཐམས་ཅད་འབྱུང་བ་ཡི། །ངན་འགྲོ་ཐམས་ཅད་འདིས་སྤོང་ངོ༌། །བདག་ཉིད་ཆེན་པོ་ཁྱེད་རྣམས་ཀྱིས། །རྙེད་པ་མཉམ་མེད་དེ་རིང་རྙེད། །གང་ཕྱིར་རྒྱལ་བ་སྲས་བཅས་ཀྱིས། །བསྟན་པ་འདི་ལ་ཁྱེད་རྣམས་བསྲུང༌། །ཐེག་མཆོག་འདིར་ནི་ཁྱེད་རྣམས་ཀུན། །ལེགས་པ་ཉིད་དུ་འགྲོ་བར་འགྱུར། །ཐེག་པ་ཆེན་པོ་ཆེར་འབྱུང་བ། །ལས་མཆོག་འདི་ནི་དཔལ་དང་ལྡན། །ཁྱེད་རྣམས་འདི་རུ་འགྲོ་བཞིན་པར། །དེ་བཞིན་གཤེགས་པ་ཉིད་དུ་འགྱུར། །དེ་ནས་སློབ་མ་སེམས་སྤྲོ་བས། །མཎྜལ་མེ་ཏོག་ལེགས་སུ་དབུལ། །འདོད་པས་སེང་གེ་བཞིན་དུ་ཉལ། །ལས་སྔགས་བཟླས་ཤིང་བླ་མས་བསྲུང༌། །ནམ་ལངས་ཁྲུས་དང་མཎྜལ་བྱ། །རྨི་ལམ་བཟླ་ཞིང་ངན་ན་བཟློག །དེ་ནས་ཁ་དོག་ལྔ་ལྡན་པའི། །ཐིག་སྐུད་གསར་པ་ཉི་ཤུའི་ཆ། །ཉིས་འགྱུར་ཞེ་སྡང་རྡོ་རྗེ་དང༌། །གཏི་མུག་གཤེད་དུ་དམིགས་པས་བསྒྲིལ། །འབར་བའི་ལྟ་སྟངས་ལྕགས་ཀྱུ་དང༌། །ཡིད་ཀྱིས་རིགས་ལྔ་གཞུག་པར་བྱ། །ཨོཾ་དཱིཔྟ་དྲྀ་ཥྚི་ཨཾ་ཀུ་ཤི་ཛཿ་མཆོད་ལ་གསོལ་བ་གདབ་པར་བྱ། །ཨོཾ་ཨཱཿ་པྲ་


DTG047_Page_0474
[མ་དཔེ་གཟིགས་ན་འདིར་གནོན།]

ཡ་ཙྪ་མོ་ཧ་ཀཱི་ལ་རེ་སྭཱ་ཙ་ཀྲ་སཱུ་ཏྲ་ཎཱ་ཡ་ཧཱུཾ། སློབ་དཔོན་སློབ་མས་ཐིག་བཟུང་སྟེ། །ནུབ་དང་ཤར་བསྡད་ཐིག་གདབ་པོ། །ཡེ་ཤེས་གཞལ་ཡས་གསལ་བར་གདབ། །སྔགས་འདིས་སངས་རྒྱས་ཐམས་ཅད་བསྐུལ། །ཨོཾ་ཨ་ནྱོ་ནྱ་ནུ་ག་ཏཿ་སརྦ་དྷརྨཱཿ་པ་ར་སྦ་ར་ཎཾ། ཨ་ནུ་ག་ཏཿ་སརྦ་དྷརྨཱཾ། ཨ་ཏྱནྟཱ་ནུ་པྲ་བིཥྚ་སརྦ་དྷརྨཱཾ་ཧཱུཾ། དེ་སྐད་བརྗོད་ལ་ཛ་ཏྲ་བརྗོད། །ཤར་དུ་དྲངས་ལ་རྫོགས་པར་གདབ། །དེ་ནས་དམ་ཚིག་ཐིག་གདབ་པ། །སློབ་དཔོན་རྗེས་སུ་སློབ་མ་འབྲང༌། །ཆ་གར་བོར་ལ་ཤར་ལྷོར་ནུབ། །བྱང་ཕྱོགས་འདྲི་མ་ཞིང་ཐིག་བཞི་གདབ། །ཚངས་ཐིག་གཉིས་གདབ་དཀྱིལ་འཁོར་གདབ། །དཀྱིལ་འཁོར་ཐིག་གི་ཕྱི་ནང་དུ། །བདུན་བདུན་བཏབ་པ་བོར་ལ་གཉིས། །ཉི་འོད་རྡོ་རྗེ་པདྨ་ཕྲེང༌། །ཕོ་བྲང་དབང་ལྡན་མཚམས་ནས་བཀོད། །དེ་ནས་དུར་ཁྲོད་རིན་ཆེན་ས། །ནག་དཀར་སེར་དམར་ལྗང་གུ་ལྔ། །པདྨར་བཞག་ལ་ལྷ་སྐྱེད་ཅིང༌། །དགུག་གཞུག་མཆོད་ལ་ཚོན་དུ་གྱུར། །ཕྱག་རྒྱ་ཏིང་འཛིན་གསང་སྔགས་བརྗོད། །ཨོཾ་བཛྲ་ཙི་ཏྲ་ས་མ་ཡ་ཧཱུཾ། ཁུ་ཚུར་གཡོན་པ་དབང་ལྡན་དུ། །དཀར་སེར་དམར་ལྗང་ནག་པོར་བྲི། །སྦོམ་ཕྲ་སྒོ་ཡི་ཉི་ཤུ་ཆ། །སྦོམ་ཕྲ་གཡས་གཡོན་ཆད་པ་ལ། །ཆད་དང་ནོར་ཉམས་འཐབ་དང་འཆི། །ཐོད་པས་བཀབ་ལ་བསྲུང་བའོ། །དཀྱིལ་འཁོར་ནང་གི་ཐིག་གཉིས་ལ། །ཕོ་བྲང་ནག་པོ་འཇིགས་བྱེད་དངོས། །བཞི་ལ་སྣ་ཚོགས་རྡོ་རྗེ་བྱ། །ཕྱེད་ལ་རྡོ་རྗེའི་ཕྲེང་བ་ནག །ཕྱེད་དང་གཉིས་ལ་སྣམ་བུ་རིགས། །ལྷ་ཡི་ཕྱག་མཚན་བྲི་བར་བྱ། །ཕྱི་རོལ་ཆ་གཉིས་སྒོ་བཞི་རིགས། །གཅིག་ནི་ཡ་ཕུབས་ཕྱེད་བརྩིགས་པ། །དེ་ཡི་ཕྱེད་ནི་ནམ་མཁའ་སྟོང༌། །བཞི་ལ་རྟ་བབས་ཆོས་འཁོར་གདུགས། །ཆ་གཉིས་བརྩིགས་པ་འདོད་ཡོན་བྱེད། །དྲ་བ་ཆ་གཉིས་མདའ་ཡབ་ཕྱེད། །མཚམས་དང་སྒོ་ཁྱུད་འགྲམ་རྣམས་སུ། །རྡོ་རྗེ་རིན་ཆེན་ཟླ་ཕྱེད་མཛེས། །བུམ་པ་དོ་ཤལ་དྲིལ་བུ་རས། །འཕན་དང་བུམ་པ་སྣ་ཚོགས་མཛེས། །གྲུ་བཞི་སྒོ་བཞི་རྟ་བབས་བཞི། །ཐིག་བཞི་དག་ཀྱང་ཡང་དག་ལྡན། །ཤར་ནི་དཀར་པོ་ཆེན་པོ་སྟེ། །ལྷོ་ནུབ་ནུབ་བྱང་སེར་དམར་ལྗང༌། །དབུས་སུ་


DTG047_Page_0475
[མ་དཔེ་གཟིགས་ན་འདིར་གནོན།]

རྡོ་རྗེ་འཁོར་ལོ་ཤར། །ལྷོ་རུ་རིན་ཆེན་པདྨ་ནུབ། །བྱང་དུ་རལ་གྲི་འཁོར་ལོ་མེ། །བདེན་བྲལ་རྡོ་རྗེ་པདྨ་རླུང༌། །དབང་ལྡན་ཨུཏྤལ་ཐོ་བ་ཤར། །ལྷོ་སྒོར་པདྨ་དབྱུག་པ་ནུབ། །བྱང་སྒོར་རལ་གྲི་ཉི་ཟླ་ལ། །ལྷ་ཡི་མདོག་གི་མཆན་མ་དགོད། །མེ་འོད་དམར་པོ་ཕྲེང་བ་ནག །པདྨ་སྣ་ཚོགས་ཕྲེང་བས་བསྐོར། །གདུགས་དང་བླ་རེ་བ་དན་འཕན། །འདོད་པ་ལྔ་ཡི་མཆོད་པ་དགྲམ། །བུམ་པ་ཕྱོགས་སམ་ལ་ཡིས་དགོད། །གཏོར་མ་རྒྱ་ཆེན་དག་ཀྱང་བཤམ། །དེ་ནས་སློབ་དཔོན་རྒྱན་སྤྲས་པས། །དཀྱིལ་འཁོར་རྣལ་འབྱོར་བཞི་རུ་བསྒྲུབ། །བསྒྲུབས་ནས་ཕྱིར་དབྱུང་ཤར་སྒོ་ནས། །སློབ་དཔོན་འཇུག་ཅིང་དབང་བླངས་ལ། །གནང་བ་ཐོབ་ནས་སློབ་མ་རྣམས། །དཀྱིལ་འཁོར་འཇུག་དང་དབང་གནང་སྦྱིན། །ཁྲུས་བྱས་མཎྜལ་སེམས་དད་པས། །ཁང་པའི་ཕྱི་རོལ་དག་ཏུ་གཞག །མཁའ་གསང་ནས་དབྱུང་རྣམ་སྣང་གཟུགས། །བསྲུང་དང་གསང་སྔགས་ཟློས་སུ་གཞུག །ལྷ་ལ་ཕྱི་ནང་མཆོད་དང་བསྟོད། །སློབ་དཔོན་དེ་ཉིད་དེར་རོལ་བྱ། །དེ་ནས་ལྷ་ལ་གསོལ་བ་ནི། །སློབ་མ་འཇུག་དང་དབང་བསྐུར་ཕྱིར། །འདོད་ཆགས་ཆེན་པོ་འབྱུང་བ་ཡི། །འཁོར་ལོ་གཟུགས་བརྙན་ལྟ་བུ་སྟེ། །བདག་གིས་མཐོང་ནས་སློབ་མ་རྣམས། །གཞུག་ཕྱིར་ཁྱེད་ལ་གསོལ་བ་འདེབས། །ནམ་མཁའ་ལས་བྱུང་མཚན་ལྡན་ཕྱིར། །ཐོག་མ་ཐ་མ་མེད་པའི་མཆོག །རྡོ་རྗེ་སེམས་དཔའ་ཆེ་རང་བཞིན། །རྡོ་རྗེ་འཇིགས་བྱེད་བདག་གྲུབ་མཛོད། །དངོས་གྲུབ་ཆེན་པོ་ཀུན་གྱི་མཆོག །དབང་ཕྱུག་ཆེན་པོ་ལྷག་པའི་ལྷ། །རྡོ་རྗེ་འཛིན་པ་ཀུན་གྱི་རྒྱལ། །མི་འགྱུར་མཆོག་ཏུ་བདག་གྲུབ་མཛོད། །ཉེས་པའི་སྐྱོན་བྲལ་ཡོན་ཏན་ལྡན། །འདོད་ཆགས་ཀུན་གྱིས་རྗེས་སུ་ཆགས། །འདོད་ཆགས་ཆེན་པོ་དགའ་བ་ཆེ། །བཅོམ་ལྡན་དེ་ཉིད་ཀྱིས་བསྒྲུབ་མཛོད། །ཤིན་ཏུ་དག་པ་ཀུན་གྱི་མཆོག །གདོད་ནས་གྲོལ་བ་དེ་བཞིན་གཤེགས། །ཀུན་དུ་བཟང་པོ་ཀུན་གྱི་བདག །བྱང་ཆུབ་སེམས་དཔར་བདག་གྲུབ་མཛོད། །ཀུན་གྱི་མཆོག་གྱུར་དངོས་གྲུབ་ཆེ། །དབང་ཕྱུག་ཆེན་པོ་ཕྱག་རྒྱའི་ལྷ། །


DTG047_Page_0476
[མ་དཔེ་གཟིགས་ན་འདིར་གནོན།]

རྡོ་རྗེ་དངོས་གྲུབ་ཆེན་པོ་མཆོག །ཕྱག་ན་རྡོ་རྗེར་བདག་གྲུབ་མཛོད། །སེམས་ཅན་ཀུན་གྱི་ཡིད་ལ་ཁྱབ། །སེམས་ཅན་ཀུན་གྱི་ཡིད་ལ་གནས། །སེམས་ཅན་ཀུན་གྱི་ཡབ་ཉིད་དེ། །འདོད་ཆགས་བདེ་བའི་དམ་ཚིག་མཆོག །བདག་དང་སློབ་མར་བཅས་པ་ལ། །མཆོད་དང་ཐུན་མོང་དངོས་གྲུབ་གསོལ། །སློབ་མ་གདོང་གཡོགས་བུམ་ཆུས་བསང༌། །ཨ་ཁཾ་བཱི་ར་ཧཱུཾ་ཟློས་གཞུག །གདོང་གཡོགས་བཅིང་ཞིང་མེ་ཏོག་དང༌། །རྡོ་རྗེ་གཏད་པས་སེམས་བསྐྱེད་བྱ། །སརྦ་ཡོ་ག་ཙིཏྟ་ཨུཏྤཱ་ད་ཡཱ་མི། ཨོཾ་སུ་ར་ཏེ་ས་མ་ཡ་སྟྭཾ་ཧོ་སིདྡྷི་བཛྲ་ཡ་ཐཱ་སུ་ཁཾ། རིགས་ཀྱི་བུ་ཁྱོད་གང་ལ་དགའ། །སྐལ་བཟངས་བདག་ནི་བདེ་ཆེན་ལའོ། །ཐོག་མ་མེད་ཞག་འཁོར་བ་ནས། །དེང་འདིར་ཡན་ཆད་སྡིག་བགྱིས་དང༌། །བགྱིད་དུ་སྩལ་དང་ཡི་རང་བཤགས། །གཙོ་བོ་སླན་ཆད་མི་བགྱིད་སྡོམ། །གང་ཡང་རྒྱལ་བ་སྲས་བཅས་དང༌། །འགྲོ་བའི་ལེགས་བྱས་དགེ་བ་ལ། །དེ་དག་ཀུན་ལ་ཡི་རང་ནས། །ཐམས་ཅད་བྱང་ཆུབ་ཕྱིར་བསྔོའོ། །སངས་རྒྱས་ཆོས་དང་དགེ་འདུན་ལ། །བསམ་པ་ཐག་པས་བྱང་ཆུབ་པར། །འགྲོ་བའི་སྡུག་བསྔལ་བསལ་བའི་ཕྱིར། །དེ་ནས་སྐྱབས་སུ་མཆི་བར་བགྱི། །བྱང་ཆུབ་སེམས་གཉིས་བསྐྱེད་ནས་ནི། །འགྲོ་བ་དེང་ནས་མགྲོན་པོས་ནས། །བདག་སངས་རྒྱས་ནས་འགྲོ་བ་ཀུན། །སྲིད་པའི་མཚོ་ལས་བསྒྲལ་བར་བགྱི། །དེད་ནས་ཁང་པའི་ནང་དུ་གཞུག །དེ་རིང་སངས་རྒྱས་ཐམས་ཅད་ཀྱི། །རིགས་སུ་བུ་ཁྱོད་ཞུགས་པས་ན། །ཡེ་ཤེས་རྡོ་རྗེ་ངས་བསྐྱེད་བྱ། །ཡེ་ཤེས་རྡོ་རྗེ་མཆོག་ཐོབ་ན། །དངོས་གྲུབ་གཞན་ལྟ་སྨོས་ཅི་དགོས། །ཁྱོད་ཀྱིས་དཀྱིལ་འཁོར་མ་མཐོང་བ། །རྣམས་ལ་སྨྲས་ན་དམ་ཚིག་ཉམས། །རྡོ་རྗེ་མེ་ཏོག་མགོར་བཞག་སྟེ། །འདི་ནི་སྐུ་ཡི་རྡོ་རྗེ་སྟེ། །དམ་ཚིག་སྐུ་ཡི་དངོས་གྲུབ་ཐོབ། །དམ་ཚིག་དངོས་གྲུབ་འདི་སྨྲས་ན། །ཁྱོད་ཀྱི་མགོ་བོ་འགས་པར་འགྱུར། །རྡོ་རྗེ་སེམས་དཔའ་དེང་ཁྱོད་ཀྱི། །


DTG047_Page_0477
[མ་དཔེ་གཟིགས་ན་འདིར་གནོན།]

སྙིང་ལ་ཡང་དག་ཞུགས་པ་སྟེ། །གལ་ཏེ་ཚུལ་འདི་སྨྲས་ན་ནི། །དེ་མ་ཐག་ཏུ་དྲལ་ཏེ་གཤེགས། །འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་ཉམས་ན་སྲེག་པར་བྱེད། །དམ་ཚིག་བསྲུངས་ན་དངོས་གྲུབ་ཐོབ། །འཐུང་ཞིང་རྡོ་རྗེའི་ཆུ་འཐུང་ཞིག །ཨོཾ་བཛྲ་ཨ་མྲྀ་ཏ་ཨུ་ད་ཀྲཿ་:་བརྗོད་པས་རྡོ་རྗེ་དྲི་ཆུ་བླུད། །ཡང་ན་རྡོ་རྗེ་སྤྱིར་བཞག་ལ། །དེང་ནས་བཟུང་སྟེ་ཁྱོད་ཉིད་ཀྱིས། །རྡོ་རྗེ་འཇིགས་བྱེད་ད་ཡིན་པས། །བརྙས་པར་མ་བྱེད་བསྒོ་བ་ཉོན། །བརྙས་དང་མ་མཉེས་བྱས་ན་ནི། །ཉམ་ང་མ་སྤངས་དུས་བྱས་ནས། །རྡོ་རྗེ་དམྱལ་བར་འགྲོ་བར་འགྱུར། །རྒྱུད་སྡེ་མཁས་དང་བྱས་པ་མང༌། །དཀྱིལ་འཁོར་མན་ངག་ཐོབ་པར་བྱ། །དེ་ནས་མཎྜལ་མེ་ཏོག་ཡོན། །ཕུལ་ལ་དབབ་པའི་གསོལ་བ་གདབ། །དེ་བཞིན་གཤེགས་པ་ཐམས་ཅད་ཀྱིས། །རྡོ་རྗེ་དབབ་པར་མཛད་དུ་གསོལ། །བརྗོད་ལ་རྩེ་གཅིག་པ་ཡི་སེམས། །སྐྱིལ་ཀྲུང་ཅོག་གཙོག་པོར་བསྡད་ལ། །སྤྱི་བོ་སྙིང་ག་ལྟེ་བ་རྐང༌། །བྷཾ་ལཾ་རཾ་ཡཾ་དྷཻཾ་དག་ལས། །ཆུ་དང་ས་དང་མེ་དང་རླུང༌། །དཀྱིལ་འཁོར་བཞི་བསྐྱེད་ཛྙཻཾ་གིས་བསྐུལ། །བསྐྱོད་པར་བསྐུལ་དང་རླངས་པ་ཞུ། །བདུད་རྩི་འབབ་ཅིང་ཡེ་ཤེས་སྐྱེ། །བབས་པར་བསམས་ནས་བསྐུལ་བར་བྱ། །རྡོ་རྗེ་གསོར་ཞིང་དྲིལ་བུ་དགྲོལ། །ཨོཾ་ཧྲཱིཿ་ཥྚྲྀཿ་ཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་ཨཱ་བེ་ཤ་ཡ་སྟོ་བ་ཡ་ར་ར་ར་ཙ་ལ་ཡ་ཧཱུཾ་ཧཱ་ཛྷཻཾ་ཕཊ། ལུས་ངག་ཡིད་ནི་གང་ཕེབས་ལ། །གཏི་མུག་གཤེད་སོགས་གཙོ་ཆེར་དབར། །ངག་ལ་ཨ་དམར་སྨྲ་རུ་གཞུག །ལུས་ལ་ཏིཥྛ་བཛྲ་དང༌། །ལམ་དང་དབང་གིས་བརྟན་པར་བྱ། །ཡེ་ཤེས་ལྷ་རྣམས་དེ་ལ་དབང༌། །དེ་ལྟར་ཕེབས་པ་དམ་པའོ། །དཀྱིལ་འཁོར་ལན་གསུམ་བསྐོར་བར་བྱ། །ལྷོ་ཡི་སྒོ་ནས་འཇུག་པར་བྱ། །སངས་རྒྱས་གནས་འདིར་སློབ་མ་རྣམས། །ད་ལྟ་ཡང་དག་ཉིད་དུ་གཞུག །ལྷ་རྣམས་གང་གི་རིགས་ཡིན་དང༌། །དངོས་གྲུབ་གང་ཡིན་འབབ་པར་ཤོག །པྲ་ཏཱིཙྪ་ཧོ་བརྗོད་པས་དབུལ། །མེ་ཏོག་གར་བབས་རིགས་ཀྱི་ལྷ། །ཞི་སོགས་ལས་ཀྱང་དེ་ཡིས་ཤེས། །གཙུག་ཏོར་སྤྱན་ཐུགས་མཆོག་འགྲུབ་ཅིང༌། །སྐུ་གཞན་འཁོར་རྣམས་ཐུན་མོང་དོ། །དཀྱིལ་འཁོར་རེ་ཁཱ་གང་ཉེའི་རིགས། །ཕྱི་རོལ་བྱུང་བ་ལན་གསུམ་བསྐྱར། །དེས་ཀྱང་མ་བབ་དབང་མི་བསྐུར། །དེ་ནས་སྣང་བ་དྲིལ་བར་བྱ། །ལྷ་ཡི་རིགས་དང་མཐུན་པ་འགྲུབ། །མིག་ལ་


DTG047_Page_0478
[མ་དཔེ་གཟིགས་ན་འདིར་གནོན།]

ཨོཾ་བསྒོམ་ཡེ་ཤེས་སྤྱན། །རྡོ་རྗེ་སེམས་དཔའ་དབྱེ་བར་བསམ། །རྡོ་རྗེ་འཇིགས་བྱེད་དེང་ཁྱོད་ཀྱི། །མིག་ནི་ཡང་དག་འབྱེད་པར་བྱེད། །རྡོ་རྗེ་མིག་ནི་བླ་མེད་པ། །ཕྱེ་བས་ཐམས་ཅད་མཐོང་བར་ཤོག །གདོང་གཡོགས་བཀྲོལ་ལ་དཀྱིལ་འཁོར་བསྟན། །དཀྱིལ་འཁོར་བཟང་པོ་འདི་ལ་ལྟོས། །མཐོང་ནས་དད་པ་རབ་ཏུ་བསྐྱེད། །ཁྱོད་ནི་འཇིགས་བྱེད་རིགས་སུ་སྐྱེས། །སྔགས་དང་ཕྱག་རྒྱས་བྱིན་གྱིས་བརླབས། །ཐོ་བ་རྡོ་རྗེ་འཇིགས་བྱེད་ནས། །ཞེ་སྡང་འཇིགས་བྱེད་བར་དུ་བསྟན། །སློབ་དཔོན་ལྷ་ལ་ཕྱག་གསུམ་བྱ། །དཀྱིལ་འཁོར་གཞུག་པའི་ཆོ་ག་སྟེ། །ཉོན་མོངས་སྒྲིབ་པ་བྱང་བར་བསྟན། །དེ་ནས་སློབ་མ་དབང་ཐོབ་ཕྱིར། །རིན་ཆེན་བང་མཛོད་བུ་སྨད་བཅས། །རང་གི་ལུས་ངག་ཡིད་གསུམ་ཡང༌། །དད་གུས་དགའ་བས་དབུལ་བར་བྱ། །གདུགས་དང་བླ་རེ་བ་དན་སོགས། །མཆོད་པ་དག་དང་རྒྱན་བཟང་ངམ། །དུར་ཁྲོད་ཀྱིས་ལེགས་བརྒྱན་ལ། །ལྷོ་སྒོར་བསྲུང་བར་ཤེས་པར་བྱ། །བྱང་ཆུབ་རྡོ་རྗེས་སངས་རྒྱས་ལ། །ཇི་ལྟར་མཆོད་ཆེན་སྩལ་བ་ལྟར། །བདག་ཀྱང་རབ་ཏུ་སྐྱོབ་པའི་ཕྱིར། །ནམ་མཁར་རྡོ་རྗེ་དེང་བདག་སྩོལ། །ལན་གསུམ་དེ་བརྗོད་གསོལ་བ་གདབ། །དེ་ལྟར་དབང་བསྐུར་ཡོན་རྣམས་དབུལ། །དེ་ནས་སློབ་མ་རྣལ་འབྱོར་བཞིས། །བསྐྱེད་ལ་དབང་བསྐུར་ལྷ་མོ་དང༌། །རྡོ་རྗེ་འཇིགས་བྱེད་སློབ་དཔོན་ཉིད། །རིག་པའི་དབང་ལྔ་བསྐུར་བར་བྱ། །བཀྲ་ཤིས་སྒྲ་བརྗོད་བཀྲ་ཤིས་པར། །རྡོ་རྗེ་འཇིགས་བྱེད་མཁའ་འགྲོས་བྱེད། །གསང་བ་གསུམ་ནས་བྱུང་བ་ཡི། །ཁམས་གསུམ་ཀུན་གྱིས་ཕྱག་བྱས་ལ། །སངས་རྒྱས་རྣམས་ཀྱིས་དབང་བསྐུར་བ། །རྡོ་རྗེ་ཆུ་ཡིས་བུམ་དབང་བསྐུར། །ཨོཾ་བཛྲ་ཀ་ལ་ཤ་ཨ་བྷི་ཥིཉྩ་མཱཾ། ལས་བུམ་ཁྲུས་བྱ་རྣམ་རྒྱལ་དབང༌། །རིགས་ཀྱི་སྤྲོ་བསྡུ་ཤེས་བྱ་ལ། །ཆུ་དང་འབྲེལ་བས་དེ་བཞིན་ཀུན། །གསེར་སོགས་ཐོར་ཚུགས་ཅོད་པན་དབང༌། །སངས་རྒྱས་ཀུན་གྱིས་ཕྱག་བྱས་པ། །རིགས་ལྔའི་དབང་བསྐུར་དག་པ་འདི། །སྤྱི་གཙུག་རྒྱལ་བར་དབང་བསྐུར་བྱ། །ཨོཾ་སརྦ་ཏ་ཐཱ་ག་ཏ་རཏྣ་པ་ཏྲ་ལ་ཨ་བྷི་ཥིཉྩ་མཱཾ། །རྡོ་རྗེ་འདི་ནི་རྡོ་རྗེ་ཆེ། །རྡོ་རྗེ་འཇིགས་བྱེད་རྡོ་རྗེའི་དབང༌། །སངས་རྒྱས་རྡོ་རྗེ་དབང་ཆེན་འདི། །ཡང་དག་ཁྱོད་ལ་བསྐུར་བར་བྱ། །ཨོཾ་བཛྲ་ཨ་དྷི་པ་ཏི་སྟྭཾ་ཨ་བྷི་ཥིཉྩཱ་མི་ཏིཥྛ་བཛྲ་ས་མ་ཡ་སྟྭཾ། ཆོས་


DTG047_Page_0479
[མ་དཔེ་གཟིགས་ན་འདིར་གནོན།]

རྣམས་རྣམ་དག་རྣམ་པར་ཐར། །ཤེས་རབ་ཕ་རོལ་ཕྱིན་གཉིས་མེད། །སངས་རྒྱས་ཀུན་གྱིས་བྱིན་བརླབས་པ། །དྲིལ་བུས་དབང་བསྐུར་ཆེན་པོ་ལོང༌། །ཨོཾ་བཛྲ་སརྦ་ཏ་ཐཱ་ག་ཏ་བཛྲ་གྷཎྚ་ཨ་བྷི་ཥིཉྩ་མཱཾ། དེ་ནས་རྡོ་རྗེ་ལྡན་པའི་ལག །སྤྱི་བོར་བཞག་པས་མིང་དབང་སྦྱིན། །དངོས་པོ་གང་དང་གང་སྣང་བ། །དེ་དེ་རྡོ་རྗེ་འཇིགས་བྱེད་ཉིད། །ཆོས་རྣམས་རང་བཞིན་ཉིད་ཀྱིས་དག །སངས་རྒྱས་ཡེ་ཤེས་རང་སྣང་བའི། །ཨོཾ་བཛྲ་སཏྭ་ནཱ་མ་ཨ་བྷི་ཥྀཉྩ་མཱཾ། རྡོ་རྗེ་ཆེ་གེ་མོ་བརྗོད་དོ། །རིག་པའི་དབང་ལྔ་ལྷ་མོས་བསྐུར། །ཡེ་ཤེས་ལྷ་ལྔ་ཆོས་ཉན་རིག །ཉན་དང་བསྒྲུབ་པ་ཀུན་ལ་དབང་དེས་ན་རིག་པའི་དབང་ཐོབ་པོ། །དེ་ནས་སློབ་དཔོན་དབང་དོན་དུ། །ཡོན་དབུལ་གསོལ་བ་གདབ་པར་བྱ། །དཀྱིལ་འཁོར་ཕྱིར་མི་ལྡོག་པའི་དབང༌། །སློབ་དཔོན་དབང་བསྐུར་བདག་ལ་སྩོལ། །དཀྱིལ་འཁོར་ལྷ་ཡི་དེ་ཉིད་དང༌། །སློབ་དཔོན་གྱི་ནི་ལས་དག་དང༌། །སངས་རྒྱས་རྣམས་ཀྱི་དམ་ཚིག་དང༌། །གསང་བ་མཆོག་གི་སྡོམ་པ་རྣམས། །སེམས་ཅན་ཀུན་དོན་བྱ་བའི་ཕྱིར། །རྡོ་རྗེ་སློབ་དཔོན་བདག་ལ་གསོལ། །དེ་ནས་ལྷོ་སྒོར་གདན་དང་ཁྲི། །ཆོ་ག་ཤེས་བྱ་སློབ་མ་གཞག །བགེགས་བསལ་རྒྱན་བཟང་དུར་ཁྲོད་བརྒྱན། །སློབ་དཔོན་མི་ལྡོག་དབང་སྦྱིན་ནོ། །ལག་གཡས་རྡོ་རྗེ་བསྐྱེད་ནས་ནི། །དེ་ནས་རྡོ་རྗེ་སྦྱིན་པར་བྱ། །ཐོག་མཐའ་མེད་པའི་རྡོ་རྗེ་ནི། །རྡོ་རྗེ་སེམས་དཔའ་ཆེ་རང་བཞིན། །ཀུན་དུ་བཟང་པོ་ཀུན་གྱི་བདག །རྡོ་རྗེ་འཇིགས་བྱེད་དག་པའི་བདག །ཨོཾ་བཛྲ་མ་ཧཱ་ཧཱུཾ། དེ་བཞིན་གཡོན་པར་དྲིལ་བུ་སྦྱིན། །སྲིད་པ་ངོ་བོ་ཉིད་ཀྱིས་དག ། ངོ་བོ་ཉིད་ཀྱིས་དངོས་མེད་བྱས། །རང་བཞིན་དག་པའི་སེམས་དཔའ་ཡིས། །དག་པའི་སྲིད་པ་གྲུབ་པར་བྱེད། །ཨོཾ་ཨ་བཛྲ་གྷཎྜ་ཨ། རང་འདྲའི་དམ་ཚིག་ཕྱག་རྒྱ་ནི། །དམ་ཚིག་ཕྱག་རྒྱ་དེ་བསྟན་པ། །རང་ཉིད་གཟུགས་ནི་བརྟན་པར་བྱ། །འདི་ནི་རང་གི་འདོད་པའི་ལྷ། །དམ་ཚིག་ཕྱག་རྒྱར་གྲགས་ཤིང་གནས། །ཤེས་རབ་བཅུ་དྲུག་ལོན་པ་ལ། །རྡོ་རྗེ་དྲིལ་བུ་མཉམ་ལྡན་པའི། །ལག་པ་གཉིས་ཀྱིས་ཡང་དག་འཁྱུད། །སློབ་དཔོན་དབང་དུ་བསྐུར་བར་བྱ། །བརྗོད་ལ་དེ་དོན་དེ་ལ་བསྟན། །དེ་ལྟར་མི་ལྡོག་དབང་བསྟན་ནས། །དེ་ནི་དཀྱིལ་འཁོར་དེ་ཉིད་བསྟན། །དྲན་པ་བཞི་དང་


DTG047_Page_0480
[མ་དཔེ་གཟིགས་ན་འདིར་གནོན།]

སྤོང་བ་བཞི། །རྐང་པ་དབང་པོ་ཤར་སྒོ་སོགས། །བསམ་གཏན་བཞི་ནི་རྟ་བབས་ཡིན། །ཏིང་འཛིན་རྣམས་ནི་ཁ་ཁྱེར་བཞི། །གཟུངས་སྒོ་དག་ནི་ལྷ་མོའི་ཚོགས། །ཚོགས་གཉིས་རྫོགས་ཕྱིར་རྒྱན་སྣ་ཚོགས། །གསུང་རབ་ཡན་ལག་འཕན་དྲིལ་སོགས། །བྱང་ཆུབ་ཡན་ལག་བདུན་རྣམས་ནི། །དྲ་བ་དྲ་ཕྱེད་མེ་ལོང་སོགས། །ཡེ་ཤེས་ལྔ་ལྡན་དཀར་སོགས་ཕྱོགས། །མ་འདྲེས་ཡེ་ཤེས་ལྷ་སྣམ་བཞི། །ཆོས་ཀྱི་འཁོར་ལོ་རྡོ་རྗེ་ཕྲེང༌། །སྣ་ཚོགས་རྡོ་རྗེ་རིགས་ལྔར་འདུལ། །ཉེས་པས་མ་གོས་སྣ་ཚོགས་པད། །བདུད་རྣམས་བསྲེགས་པས་ཡེ་ཤེས་ཉི། །ཉོན་མོངས་སེལ་ཕྱིར་ཟླ་བའི་གདན། །སྙིང་རྗེས་བརླན་ཕྱིར་བུམ་པ་བརྒྱད། །བདེ་ཆེན་སྤྱོད་པས་མཆོད་པའི་ཚོགས། །དུར་ཁྲོད་གདན་གྱིས་གཤིན་རྗེ་འཇོམས། །ཕྱག་འཚལ་གདུག་པ་འདུལ་བ་པོ། །རྣམ་ཤེས་ཞེ་སྡང་ཆོས་ཀྱི་དབྱིངས། །ཡེ་ཤེས་རྡོ་རྗེ་འཇིགས་བྱེད་ཉིད། །ཞལ་དགུ་རྣམ་ཐར་གྱིས་འཇུག་པ། །དབུས་ཞལ་གསུམ་ནི་སྐུ་གསུམ་པ། །གཡས་གསུམ་ཐབས་ཀྱི་སྐུ་གསུང་ཐུགས། །གཡོན་པ་ཤེས་རབ་རྣམ་ཐར་གསུམ། །རྭ་གཉིས་ཐབས་དང་ཤེས་རབ་ལ། །མ་ཧེ་དྲེགས་པའི་བདུད་རྣམས་འདུལ། །སྤྱན་གསུམ་དམར་བ་སྙིང་རྗེ་གསུམ། །བྱམས་པ་ནག་པོ་དག་པ་རགས། །ཁྲོ་བ་བདུད་འདུལ་སྦྲུལ་གྱིས་ཀླུབས། །ཀླུས་བརྒྱན་གཤིན་རྗེ་གར་དགུས་ལྡན། །བྱང་ཆུབ་ཕྱོགས་ཆོས་སོ་གཉིས་ཕྱག །ཕྱག་མཚན་ལྷ་མིན་འདུལ་བྱེད་པའི། །ཉེ་དབང་སུམ་ཅུ་རྩ་གཉིས་གཙོ། །གཅེར་བུ་ཆོས་སྐུ་མཚན་འགྲེང་བ། །བདེ་བ་ཆེན་པོ་སྐུ་ཡི་རྟགས། །ཕྱག་གཉིས་གླང་པོའི་པགས་པ་ནི། །ཐུགས་རྗེ་ཐབས་ཀྱིས་འགྲོ་བ་སྐྱོབ། །སྟོང་པ་བཅུ་དྲུག་ཞབས་བཅུ་དྲུག །ཞེ་སྡང་གཏི་མུག་འདོད་ཆགས་རིམས། །འདུལ་ཕྱིར་ལྷ་དང་མི་སོགས་བྱ། །དབུ་སྐྲ་ནང་གི་ཡེ་ཤེས་འབར། །གཟུགས་སོགས་ཕུང་པོ་གཏི་མུག་སོགས། །ཡེ་ཤེས་བཞི་ཡིས་གཞན་གཤེད་བཞི། །ཞལ་གསུམ་རྣམ་ཐར་ངོ་བོ་སྟེ། །མདོག་གིས་ཞི་སོགས་ཕྱག་མཚན་ཡང༌། །རིགས་རིགས་ལས་དང་མཐུན་པ་དག །ཉེ་བའི་ཉོན་མོངས་འབྱུང་བ་བཞི། །བྱམས་སོགས་ཙཱ་རྩི་ལ་སོགས་སོ། །མདོག་ཞལ་ཕྱག་མཚན་སྔོན་དང་འདྲ། །བདེ་ཆེན་


DTG047_Page_0481
[མ་དཔེ་གཟིགས་ན་འདིར་གནོན།]

ལོངས་སྤྱོད་ཐོད་པ་བཞི། །ཐོ་བ་ལ་སོགས་སྒོ་བ་བཞི། །སྐྱེ་རྒ་ན་འཆི་སྡུག་བསྔལ་བཞི། །སྒྲིབ་བཞི་ལྟ་བཞི་འཇོམས་པར་བྱེད། །བདུད་བཞི་བསྡིགས་པར་བྱེད་པ་དང༌། །མདོག་ཞལ་ཕྱག་དྲུག་སྦྱིན་སོགས་དྲུག །དེ་ལྟར་ལྷ་ཡི་དེ་ཉིད་དོ། །དེ་ནས་མཚན་ལྡན་དབང་ཐོབ་ཅིང་རིགས་དང་མོས་པ་ལྡན་པ་ལ། །རྣལ་འབྱོར་བསྒྲུབ་ཅིང་དབང་བསྐུར་བ། །བླ་མ་དག་ལས་འདིར་བླང་བྱ། །ཤེས་རབ་ཡེ་ཤེས་བཞི་པ་ཡང༌། །སློབ་མ་བཟང་ལ་སྦྱིན་པར་བྱ། །དེ་ནས་སློབ་དཔོན་ལས་ཀུན་བསྟེན། །ལྷོ་སྒོ་ལ་སོགས་ཕྱོགས་བཞི་རུ། །རིན་ཆེན་པདྨ་རྡོ་རྗེ་དང༌། །འཁོར་ལོའི་གདན་ལ་དེ་བཞག་ལ། །སེམས་ཅན་ཀུན་ལ་ཕན་པའི་ཕྱིར། །སེམས་ཅན་ཀུན་ལ་ཐམས་ཅད་དུ། །ཇི་ལྟ་ཇི་ལྟར་འདུལ་འགྱུར་བ། །རིན་ཆེན་ཆོས་ཀྱི་འཁོར་ལོ་བསྐོར། །རིན་ཆེན་གནས་སུ་པདྨ་སོགས། །སྨྲས་ལ་རྗེས་སུ་གནང་བ་སྦྱིན། །དེ་ནས་རྡོ་རྗེའི་བརྟུལ་ཞུགས་དབང༌།། སྔོན་བཞིན་རྡོ་རྗེ་དྲིལ་བུ་སྦྱིན། །ཨོཾ་སརྦ་ཏ་ཐཱ་ག་ཏ་བཛྲ་སཏྭ་ས་མ་ཡེ་ཏིཥྛ་ཨེ་ཥ་སྟྭཾ། དྷ་ར་ཡཱ་མི་ཧི་ཧི་ཧི་ཧི་ཧེ་ཧཱུཾ། དེ་རིང་སངས་རྒྱས་ཐམས་ཅད་ཀྱི། །རྡོ་རྗེ་སེམས་དཔའི་ལག་ན་གནས། །ཕྱག་ན་རྡོ་རྗེའི་བརྟུལ་ཞུགས་བརྟན། །ཁྱོད་ཀྱིས་རྟག་ཏུ་བཟུང་བར་གྱིས། །འདི་ནི་སངས་རྒྱས་ཐམས་ཅད་ཀྱི། །ཤེས་རབ་དབྱངས་ཀྱི་རྗེས་སུ་འགྲོ། །རྒྱལ་བས་བྱང་ཆུབ་མཆོག་ཏུ་བཞེད། །ཁྱོད་ཀྱིས་ཀྱང་ནི་བཟུང་བར་གྱིས། །རྣལ་འབྱོར་སྣོད་དང་ཁ་ཊྭཱཾ་ག །ཚངས་པའི་སྐུད་ཐོགས་རྣལ་འབྱོར་སྦྱིན། །དེ་ནས་དཀྱིལ་འཁོར་དབུས་གནས་ལ། །གཡོན་པས་ཆོས་གོས་སྙིང་གར་བཟུང༌། །གཡས་པས་མཆོག་སྦྱིན་ཕྱག་རྒྱ་ཡིས། །སངས་རྒྱས་དང་བཅས་འདི་སྐད་བསྒྲགས། །ཨོཾ་ཤོ་ཏཾ་བྱ་ཀ་རོ་མི་ཏ་བཛྲ་ས་ཏྭ་ཏ་ཐཱ་ག་ཏ་བྷ་ཝ་དུར་ཁ་ཏི་ཏོ་ཨུ་ཏ་ཏི་ཏྱ་ཨ་ཏ་ཏ་ན་དྷ་བྷ་ཝ་སིདྡྷ་ཡེ་ཀྱེ་ཆེ་གེ་མོ་ཞེས་བྱ་བ་ཏ་ཐཱ་ག་ཏ་སཏྭ་ས་མ་ཡ་སྟྭཾ་བྷུ་ར་བྷུ་ཝ་སྭཿ་ཕྱག་རྒྱ་སྔགས་འདིའི་མཐུ་ཡིས་ནི། །ཕྱོགས་བཅུའི་སངས་རྒྱས་ཐམས་ཅད་ཀྱི། །ཁྱོད་ནི་རྫོགས་པའི་བྱང་ཆུབ་ཏུ། །མགྲིན་གཅིག་ཏུ་ནི་ལུང་སྟོན་འགྱུར། །དེ་ནས་དབུགས་དབྱུང་དམ་ཚིག་སྦྱིན། །འདོད་ཆགས་བྲལ་བ་ལྟ་བུ་ཡི། །ཁམས་གསུམ་ན་ནི་སྡིག་མེད་པས།།


DTG047_Page_0482
[མ་དཔེ་གཟིགས་ན་འདིར་གནོན།]

དེ་བས་འདོད་ལ་ཆགས་བྲལ་བར། །ཁྱོད་ཀྱིས་ནམ་ཡང་མེ་བྱའོ། །མ་ཧཱ་ས་མ་ཡ་ཧ་ན་ཧཱུཾ་ཕཊ། དེ་ནི་གསང་བ་བརྗོད་པའོ། །མཆོག་ཏུ་གསང་བའི་དཀྱིལ་འཁོར་འདིར། །མཐོང་དང་ཞུགས་པས་དབང་བསྐུར་བས། །སྡིག་པ་ཀུན་ལས་རྣམ་གྲོལ་ནས། །ཁྱོད་ནི་དགེ་བ་ཉིད་དུ་གནས། །གང་ཕྱིར་བདེ་ཆེན་ཐེག་ཆེན་འདིར། །ཡང་ཡང་འཆི་བ་ཡོད་པ་མིན། །གཟུང་དང་བཅིང་བར་མི་ནུས་པས། །འཇིགས་མེད་དག་པར་འགྲོ་དོན་གྱིས། །སྲིད་པ་ཤིན་ཏུ་དག་པས་ན། །ཁྱོད་ནི་སྲིད་པ་སྡུག་བསྔལ་བཟློག །རྡོ་རྗེ་ཕྱག་རྒྱ་བྱ་བ་འདི། །གང་ཞིག་སྐྱེས་པ་ཙམ་གྱིས་ནི། །སངས་རྒྱས་ཉིད་འཐོབ་ཐེ་ཚོམ་མེད། །བྱང་ཆུབ་སེམས་ནི་གཏང་མི་བྱ། །དམ་པའི་ཆོས་ཀྱང་མི་སྤང་ཞིང༌། །སྨད་པར་བྱ་བ་མ་ཡིན་ནོ། །མི་ཤེས་པའམ་རྨོངས་པ་ལ། །འདི་ནི་སྨྲ་བར་མི་བྱའོ། །རྡོ་རྗེ་དྲིལ་བུ་ཕྱག་རྒྱ་དག །ནམ་ཡང་གཏང་བར་མི་བྱའོ། །སློབ་དཔོན་དག་ཀྱང་མི་སྤང་སྟེ། །འདི་ནི་སངས་རྒྱས་ཀུན་དང་མཉམ། །རང་གི་དེ་ཉིད་མི་སྤང་ཞིང༌། །དཀའ་ཐུབ་ཀྱིས་ཀྱང་གདུང་མི་བྱ། །ཇི་ལྟར་བདེ་བས་བདེ་བཟུང་ནས། །འདི་ནི་མ་འོངས་རྫོགས་སངས་རྒྱས། །དེ་ནས་དབུགས་ནི་ཕྱུང་ནས་ཀྱང༌། །གཏོར་མ་དུར་ཁྲོད་དག་ཏུ་བསྐྱལ། །དེ་ལས་གཏོར་མ་སྦྱང་བ་ནི། །མི་དང་བོང་བུ་རྔ་མོ་སོགས། །ཤ་ཁྲག་ནས་འབྲས་ཆན་ཁུར་བ། །ཆང་དང་དྲི་རོ་རྣམ་ལྡན་རྣམས། །བཅུའམ་བཅུ་གཅིག་དབུལ་བ་ཡང༌། །རྡོ་རྗེ་དྲིལ་བཟུང་སློབ་དཔོན་གྱིས། །དེ་ཉིད་གསུམ་བརྗོད་སྟོང་པར་བསམ། །ཡཾ་རཾ་ཨ་ཨ་ཨོཾ་ཨཱཿ་ཧཱུཾ། མས་ཡར་རིམ་པས་དེ་དག་ཀུན། །སྔོ་དམར་དཀར་འོད་དམར་དང་ལྡན། །དཀར་ནག་རིམ་པས་བསྒོམ་པར་བྱ། །དེ་ཉིད་གསུམ་བརྗོད་རང་ས་བོན། །ཧཱུཾ་གི་འོད་དང་བཅས་པ་བསྒོམ། །ཡཾ་ལས་བ་དན་གྱིས་མཚན་པའི། །རླུང་གི་དཀྱིལ་འཁོར་གཞུ་དབྱིབས་སྔོ། །རཾ་ལས་རཾ་ལྡན་གྲུ་གསུམ་དམར། །ཨ་གཅིག་སྐྱེད་པོ་མགོ་རློན་གསུམ། །གཅིག་ནི་བདུད་རྩིའི་སྣོད་གྱུར་པ། །ཧཱུཾ་དང་བི་མུ་ཤུ་ར་དང༌། །ད་ཧ་གོ་ཀུན་ན་རྣམས་ཀྱང༌། །ཕྱོགས་མཚམས་ཤ་ལྔ་བདུད་རྩི་ལྔ། །ས་བོན་བལྟས་ལ་གསལ་བ་དང༌། །ཨོཾ་དང་ཨཱཿ་ཧཱུཾ་


DTG047_Page_0483
[མ་དཔེ་གཟིགས་ན་འདིར་གནོན།]

གསུམ་བརྗོད་ལ། །ས་བོན་རྣམས་ལས་བདུད་རྩིར་གྱུར། །ཕྱོགས་པོ་ལ་ཐུག་པས་ཨ་ཟླ་བ། །དེར་ལྟུང་ཧཱུཾ་དེ་གྱུར་རྡོ་རྗེ། །གྱུར་པས་བདུད་རྩི་འབར་སྤྱང་བྱ། །རྡོ་རྗེའི་ལྟེ་བར་ཟླ་བ་ཧཱུཾ། །ཨོཾ་གྱི་འོད་དང་བཅས་པ་ཡིས། །ཡེ་ཤེས་བདུད་རྩི་དེར་དབབ་བྱ། །རང་ཉིད་འཁོར་ལོའི་ལྷ་རྣམས་དང༌། །དཀྱིལ་འཁོར་ལྷ་རྣམས་བདུད་རྩི་མྱང༌། །དེ་ནས་ཕྱོགས་སྐྱོང་ཕྱོགས་ཕྱོགས་སུ། །ཡོད་པ་དེ་དག་གསལ་བར་བསམ། །ཤར་དུ་བརྒྱ་བྱིན་དཀར་པོ་ནི། །གཡས་ན་རྡོ་རྗེ་དྲིལ་བུ་གཡོན། །ཡུམ་བཅས་དུར་ཁྲོད་རིན་ཆེན་བརྒྱན། །གླང་པོ་དཀར་པོ་ཞོན་པ་ཅིག །གཡས་སུ་ཚངས་པ་སེར་པོ་སྟེ། །འཁོར་ལོ་མཆན་མ་གཡས་དང་གཡོན། །གཡོན་ན་སྟོབས་རྒྱུ་ལྗང་གུ་དང༌། །ཞིང་སྐྱོང་གླང་པོའི་མགོ་བོ་ཅན། །ལྷོ་རུ་གཤིན་རྗེ་ནག་པོ་སྟེ། །དབྱུག་པ་ཞགས་པ་མ་ཧེ་ཞོན། །གཡས་སུ་ཉེ་དབང་སེར་པོ་ནི། །རལ་གྲི་བ་དན་གཡས་དང་གཡོན། །གཡོན་དུ་དུང་སྐྱོང་སེར་པོ་དང༌། །ཞིང་སྐྱོང་ནག་པོ་མ་ཧེའི་གདོང༌། །ནུབ་ཏུ་ཆུ་ལྷ་དམར་པོ་སྟེ། །ཆུ་སྲིན་སྦྲུལ་ཞགས་ཆུ་སྲིན་ཞོན། །གཡས་སུ་ཁྱབ་འཇུག་སྨུག་པོ་སྟེ། །འཁོར་ལོ་སྦྲུལ་ཞགས་གཡས་དང་གཡོན། །གཡོན་དུ་མཐའ་ཡས་སྔོན་པོ་དང༌། ཞིང་སྐྱོང་ཆུ་སྲིན་གདོང་ཅན་དམར། །བྱང་དུ་གནོད་སྦྱིན་ནོར་སྦྱིན་སེར། །ཤིང་ཐོག་ནེ་ལེ་རྟ་དཀར་ཞོན། །གཡས་ན་དབང་ཕྱུག་ཆེན་པོ་སྔོ། །རྩེ་གསུམ་པདྨ་གཡས་དང་གཡོན། །གཡོན་ན་ནོར་རྒྱས་དམར་པོ་དང༌། །ཞིང་སྐྱོང་རྟ་ཡི་གདོང་ཅན་ལྗང༌། །དབང་ལྡན་འབྱུང་པོའི་བདག་པོ་དཀར། །རྩེ་གསུམ་ཞགས་པ་ཁྱུ་མཆོག་ཞོན། །གཡས་ན་སྨིན་དྲུག་བུ་ནི་སྔོ། །མདའ་གཞུ་གཉིས་ནི་གཡས་དང་གཡོན། །གཡོན་ན་འཇོག་པོ་དཀར་པོ་དང༌། །ཞིང་སྐྱོང་ཁྱུ་མཆོག་དཀར་པོ་ཅན། །མེ་རུ་མེ་ལྷ་དམར་པོ་སྟེ། །ཕྲེང་བ་སྤྱི་བླུགས་ར་ཡི་ཁྲི། །གཡས་ན་ཚོགས་བདག་དཀར་པོ་སྟེ། །དབྱུ་གུ་པདྨ་གཡས་དང་གཡོན། །གཡོན་ན་རིགས་ལྡན་སེར་པོ་དང༌། །ཞིང་སྐྱོང་ར་ཡི་མགོ་ཅན་དམར། །བདེན་བྲལ་སྲིན་པོ་དམར་པོ་སྟེ། །གྲི་དང་ཐོད་པ་མིའི་ཁྲི། །གཡས་ན་སྟོབས་བཟངས་དམར་པོ་སྟེ། །གཡས་ན་རལ་གྲི་


DTG047_Page_0484
[མ་དཔེ་གཟིགས་ན་འདིར་གནོན།]

གཡོན་ན་ཕུག །གཡོན་ན་པདྨ་དམར་པོ་དང༌། །ཞིང་སྐྱོང་སྲིན་པོའི་མགོ་ཅན་དམར། །རླུང་དུ་རླུང་ལྷ་སྔོན་པོ་ནི། །བ་དན་ཞགས་པ་ཤ་བ་ཞོན། །གཡས་ན་ལེགས་ལྡན་ནག་པོ་སྟེ། །གཡས་ན་གྲི་གུག་གཡོན་པ་དུང༌། །གཡོན་ན་པདྨ་ཆེན་པོ་དཀར། །ཞིང་སྐྱོང་ཤ་བའི་མགོ་བོ་ཅན། །འདི་དག་ཐམས་ཅད་རུས་པ་དང༌། །རིན་པོ་ཆེའི་རྒྱན་གྱིས་བརྒྱན། །ཆུང་མ་བུ་དང་འཁོར་གཡོག་བཅས། །སྣ་ཚོགས་གཟུགས་དང་མཚན་ལྡན་བསྒོམ། །ལྷ་ལ་ལྷ་ཡི་འཁོར་དང་ལྡན། །ལྷ་མིན་མིན་ནི་ཕྱོགས་སྐྱོང་འཁོར། །ཀླུ་ལ་ངན་འགྲོ་གསུམ་པོའི་འཁོར། །བསམ་ཞིང་ཕྱག་རྒྱ་བཞིས་འཇུག་གོ །སྙིང་རྗེས་བསྒྲལ་དང་མཆོད་པས་བྱམས། །བྱམས་པའི་སྦྱིན་པར་འདི་བཤད་དོ། །དེ་ཀུན་རང་རང་ཡིད་དགའ་བས། །སྙོམས་འཇུག་ཚུལ་དུ་བསྲུབས་པས་ན། །ཐམས་ཅད་བདུད་རྩིའི་གཟུགས་སུ་གྱུར། །ཨོཾ་ཧྲཱིཿ་འཁོར་ལོ་ཕྱག་མཚན་ལས། །ཤར་དུ་རྣམ་པར་སྣང་མཛད་རིགས། །ཐམས་ཅད་གཏི་མུག་རྡོ་རྗེ་ཡི། །གཤིན་རྗེ་གཤེད་ལྟར་བསྒོམ་པ་ནི། །དཀར་པོ་གཡས་གཡོན་ནག་དང་དམར། །གྲི་གུག་ཐོད་པ་རྩ་བའི་ཕྱག །ཀུན་གྱི་ཕྱག་མཚན་ཡིན་པར་ཤེས། །འཁོར་ལོ་རལ་གྲི་གཡས་ན་འཛིན། །ནོར་བུ་པདྨ་གཡོན་ནའོ། །ལྷོ་རུ་ཥྷྀཿདང་རིན་ཆེན་ལས། །ཕྲ་མ་རྡོ་རྗེ་འཇིགས་པར་བྱེད། །སེར་པོ་ནག་དཀར་གཡས་གཡོན་ཞལ། །རིན་ཆེན་རལ་གྲི་གཡས་ན་འཛིན། །པདྨ་འཁོར་ལོ་གཡོན་པ་ན། །ནུབ་ཏུ་ཝི་དང་པདྨ་ལས། །འདོད་ཆགས་རྡོ་རྗེ་འཇིགས་བྱེད་དམར། །ནག་དང་དཀར་བ་གཡས་དང་གཡོན། །པདྨ་རལ་གྲི་གཡས་པར་འཛིན། །རིན་ཆེན་འཁོར་ལོ་གཡོན་པ་ན། །བྱང་དུ་ཀྲྀ་དང་རལ་གྲི་ལས། །ཕྲག་དོག་འཇིགས་བྱེད་ལྗང་གུ་སྟེ། །རལ་གྲི་སྣ་ཚོགས་རྡོ་རྗེ་གཡས། །པདྨ་འཁོར་ལོ་གཡོན་ན་འཛིན། །ནག་དང་དཀར་བ་གཡས་དང་གཡོན།། ཏཱ་ན་ན་ཧཱུཾ་ཧཱུཾ་ཕཊ། ཕཊ་དང་སྭཱ་ཧཱ་ས་བོན་རྣམས། །རལ་གྲི་འཁོར་ལོ་གོང་བཞིན་རིམ། །འབྱུང་པོ་མེ་ལྷ་འཁོར་བཅས་རྣམས། །གཏི་མུག་གཤེད་སོགས་མདོག་ཅན་ནོ། །ཧཱུཾ་གཉིས་ཕཊ་གཅིག་ཉི་ཟླ་སོགས། །གཏི་མུག་གཤེད་པོ་ལྟ་བུའོ། །ཕཊ་དང་སྭཱ་ཧཱ་ལྷ་མོ་དང༌། །


DTG047_Page_0485
[མ་དཔེ་གཟིགས་ན་འདིར་གནོན།]

ས་བདག་ཁྱབ་བྱེད་འོག་ཕྱོགས་སྐྱོང༌། །རྡོ་རྗེ་ཞེ་སྡང་འཇིགས་དང་མཚུངས། །དཀར་དང་དམར་པོ་གཡས་དང་གཡོན། །རྡོ་རྗེ་རལ་གྲི་གཡས་གཉིས་ན། །པདྨ་འཁོར་ལོ་གཡོན་པར་འཛིན། །ཐམས་ཅད་ཡུམ་བཅས་ཉི་ཟླ་དང༌། །རྡོ་རྗེ་འཁོར་ལོ་པདྨའི་གདན།། དུར་ཁྲོད་སྦྲུལ་གྱི་རྒྱན་གྱིས་བརྒྱན། །ཡེ་ཤེས་དགུག་གཞུག་བཅིང་དང་དགྱེས། །སྐུ་གསུམ་བྱིན་གྱིས་བརླབས་དབང་བསྐུར། །ཀུན་གྱི་ལྕེ་ནི་རྡོ་རྗེར་བསྒོམ། །མི་འཇིགས་པ་ཡི་སྦྱིན་པའོ། །བདུད་རྩི་མྱང་བྱ་ཆོས་ཉིད་དང༌། །བདེ་བ་ཆེན་པོ་རྟོགས་པར་བསྒོམ། །མེ་ཏོག་སྤོས་དང་མར་མེ་དྲི། །ཞལ་ཟས་སྒྲ་དང་རོལ་མོ་དབུལ། །ཨོཾ་ཨིནྡྲ་ཡེ་སྭཱ་ཧཱ། ཧྰྲིཿ་ཡ་ཡེ་སྭཱ་ཧཱ། ཥྚྲྀཿ་ཝ་རུ་ཎ་ཡེ་སྭཱ་ཧཱ། ཝི་ཀུ་བེ་རེ་ཡེ་སྭཱ་ཧཱ། ཀྲྀ་ཨཱི་ཤ་ན་ཡེ་སྭཱ་ཧཱ། ཏཱ་ཨགྣ་ཡེ་སྭཱ་ཧཱ། ན་ནཻ་རཱྀ་ཏི་ཡེ་སྭཱ་ཧཱ། ན་བཱ་ཡ་བ་ཡེ་སྭཱ་ཧཱ། ཧཱུཾ་ཙྣྡྲ་ཡེ་སྭཱ་ཧཱ། ཧཱུཾ་ཨ་ཀ་ཡེ་སྭཱ་ཧཱ། ཕཊ་བཻ་མ་ཙི་ཏྲེ་ནེ་སྭཱ་ཧཱ། སརྦ་བྷུ་ཏེ་བྷྱོ་སྭཱ་སྭཱ་ཧཱ། ཧ་ཧ། ཧི་ཧི། ཧུ་ཧུ། ཧེ་ཧེ། ཧོ་ཧོ། ཕེཾ་ཕེཾ་ཕེཾ་ཕཊ་སྭཱ་ཧཱ། འདི་ནི་ཟང་ཟིང་སྦྱིན་པའོ། །དེ་ནས་རྡོ་རྗེ་དྲིལ་བཟུང་ལ། །གཏི་མུག་རྡོ་རྗེ་ངོ་བོ་ཁྱོད། །གཤིན་རྗེ་གཤེད་པོར་འཇིགས་པ། །སྟོན་པ་སངས་རྒྱས་ཀུན་རང་བཞིན། །རྡོ་རྗེ་སྐུ་ལ་ཕྱག་འཚལ་བསྟོད། །གཤིན་རྗེ་གཤེད་པོ་རབ་འཇིགས་པ། །ཕྲ་མ་རྡོ་རྗེའི་ངོ་བོ་ཁྱོད། །རྡོ་རྗེ་ཐུགས་དང་རབ་མཚུངས་པ། །རིན་ཆེན་རྡོ་རྗེ་ཕྱག་འཚལ་བསྟོད། །འདོད་ཆགས་ཆོས་ལས་ཡང་དག་འབྱུང༌། །འདོད་ཆགས་རྡོ་རྗེ་ངོ་བོ་ཁྱོད། །དབྱངས་མཆོག་ཀུན་གྱི་གཙོ་བོའི་གཙོ། །རྡོ་རྗེ་གསུང་ལ་ཕྱག་འཚལ་བསྟོད། །ཕྲག་དོག་རྡོ་རྗེའི་ངོ་བོ་ཁྱོད། །གཤིན་རྗེ་གཤེད་པོ་ལས་ཀུན་བྱེད། །རྡོ་རྗེ་སྐུ་དང་རབ་མཚུངས་པ། །ཕྱག་ན་རལ་གྲི་ཕྱག་འཚལ་བསྟོད། །སངས་རྒྱས་ཀུན་གྱི་རང་བཞིན་ཁྱོད། །སངས་རྒྱས་ཐམས་ཅད་གཅིག་སྡུད་པ། །སངས་རྒྱས་ཀུན་ཐུགས་མཆོག་གི་གཙོ། །དཀྱིལ་འཁོར་གཙོལ་ཕྱག་འཚལ་བསྟོད། །ཨ་ཡི་སྒོ་ཅན་སྔགས་བརྗོད་ལ། །འདོད་པའི་ལས་ནི་གསོལ་བ་དང༌། །སྨོན་ལམ་རྒྱ་ཆེན་གདབ་བྱས་ལ། །གཏོར་མ་དུར་ཁྲོད་སོགས་སུ་བསྐྱལ། །ཆོས་ཀྱི་སྦྱིན་པར་གྱུར་པའོ། །དེ་ནས་


DTG047_Page_0486
[མ་དཔེ་གཟིགས་ན་འདིར་གནོན།]

དཀྱིལ་འཁོར་ཕྱོགས་བཞི་རུ། །ཁྲུ་གང་ཁྲུ་དོ་ཡར་ཁྲུ་གང༌། །སོར་མོ་ཉི་ཤུ་བཞི་སོགས་རྒྱ། །ཕྱེད་ཕྱེད་ཟབས་སུ་དབྱིབས་རིམ་བརྐོ། །སོར་བཞི་བརྒྱད་གསུམ་ཕྱེད་གཉིས་དག །བསྐོར་དང་བརྩིགས་པའི་རིམ་པས་ཤེས། །རྡོ་རྗེ་རིན་ཆེན་པདྨ་གྲི། །ཕྲེང་བ་ཟུར་བཞི་དག་ཏུ་དགོད། །ཙནྡན་གུར་ཀུམ་པ་ལ་ཤ །དྲི་མི་ཞིམ་པས་ཁ་དོག་བྱུག །ཞི་སོགས་ཕྱག་མཚན་ལྷ་ཡིས་དགོད། །མེ་ཏོག་དཀར་སེར་དམར་ནག་དགོད། །དགོན་པའི་བ་ལྕི་པ་ལ་ཤ །ཨུ་དུམྺཱ་ར་ཨ་ཤྭདྠ། །ཙནྡན་དུར་ཁྲོད་ནིམ་པའི་ཤིང༌། །ཞི་སོགས་བུད་ཤིང་རིམ་པ་བཞིན། །ལས་ཀུན་ཐབ་ཁུང་ཞི་དང་མཐུན། །པདྨའི་དབྱིབས་ཅན་རྡོ་རྗེའི་ཕྲེང༌། །ཟླ་ཕྱེད་རྡོ་རྗེ་ཟུར་བཞིར་དགོད། །ལྷ་ཡི་མཚན་མ་དེ་བཞིན་ནོ། །ཞི་ལ་ཏིལ་སོགས་རྒྱས་ལ་ཞོ། །དབང་ལ་མེ་ཏོག་དམར་པོ་བྱ། །གསད་པ་ལན་ཚྭ་སྐེ་ཚེ་དུག །མར་ལ་སོགས་པས་རྫས་རྣམས་དབུལ། །ཐབ་བསང་མེ་ཞི་རབ་ཏུ་སྦར། །བྲམ་ཟེ་རྒྱལ་པོ་རྗེའི་རིགས་དང༌། །གདོལ་པ་ཞི་སོགས་རིམ་པས་བླང༌། །མེ་ལྷ་ལས་དང་མཐུན་པར་ནི། །རཾ་དང་དབྱུ་གུ་རྩེ་གསུམ་ལས། །ཞལ་གསུམ་གཡས་གཡོན་རིགས་དང་མཚུངས། །དབྱུ་གུ་ཕྲེང་བ་མཆོག་སྦྱིན་གཡས། །གུནྡྷེ་པདྨ་ཐོད་པ་ཅན། །གསུས་པ་ཆེ་བ་བསྐྱེད་བྱས་ལ། །ཤར་ལྷོའི་སྤྱན་དྲངས་གཉིས་མེད་བྱ། །མཆོད་པ་ལྔ་དང་ལེགས་པར་བསྟོད། །སྲེག་རྫས་བདུན་ནམ་རྩ་གཅིག་བརྒྱ། །ཕུལ་ལ་མེ་ལྷ་གནས་སུ་གཤེགས། །མེ་ལྷ་གཞལ་ཡས་ལྷ་བསྐྱེད་ལ། །ཡེ་ཤེས་དགུག་ལ་སོགས་པ་ཡི། །རྣལ་འབྱོར་ཆེན་པོ་རབ་ཏུ་བྱ། །ཕྱི་ནང་གསང་བའི་མཆོད་པ་དབུལ། །བསྟོད་པ་སྔགས་ཀྱིས་རྫས་ཀུན་བསྲེག །ཨོཾ་ཨགྣ་ཡེ་སྭཱ་ཧཱ། མར་གྱིའོ། །ཨོཾ་སརྦ་པཱ་བཾ་ཧ་ན་ད་ཧ་ན་བཛྲཱ་ཡ་ཆེ་གེ་མོ་སརྦ་ཤཱིནྟཾ་ཀུ་རུ་སྭཱ་ཧཱ། ཏིལ་གྱི་སྔགས་སོ། །ཨོཾ་བཛྲ་པུཥྚ་ཡེ་སྭཱ་ཧཱ། འབྲས་ཀྱིའོ། །ཨོཾ་བཛྲ་བི་ཛ་ཡེ་སྭཱ་ཧཱ། སོ་བའིའོ། །ཨོཾ་མ་ཧཱ་བེ་ག་ཡེ་སྭཱ་ཧཱ། ཨོཾ་མ་ཧཱ་བ་ལ་ཡེ་སྭཱ་ཧཱ། ནས་དང་སྲན་མའིའོ། །ཨོཾ་བཛྲ་ཨཱ་ཨུཿ་ཥེ་སྭཱ་ཧཱ། དཱུར་བའིའོ། །ཨོཾ་ཨ་པྲ་ཏི་ཧ་ཏ་བཛྲཱ་ཡ་སྭཱ་ཧཱ། ཀུ་ཤའིའོ། །ཨོཾ་བཛྲ་ཨགྣ་ཡེ་སྭཱ་ཧཱ། ཨུ་


DTG047_Page_0487
[མ་དཔེ་གཟིགས་ན་འདིར་གནོན།]

དུམྺཱ་རའིའོ། །ཨོཾ་བཛྲ་བོ་དྷི་པྲྀཥྐ་ཡེ་སྭཱ་ཧཱ། བྱང་ཆུབ་ཤིང་གིའོ། །ཨོཾ་བཛྲ་ལ་ཏ་ཡེ་སྭཱ་ཧཱ། །པལཀྵའི་འོ། །ཨོཾ་བཛྲ་ཀུ་བེ་ར་ཡ་སྭཱ་ཧཱ། ནྱ་གྲོ་དྷའིའོ། །ཨོཾ་བཛྲ་དྷཾ་ད་ཡེ་སྭཱ་ཧཱ། འོ་མའིའོ། །ཨོཾ་བཛྲ་དྷ་ཧི་ཡེ་སྭཱ་ཧཱ། ཞིའིའོ། །བརྒྱ་སོགས་ཕུལ་ལ་བསྟོད་ལ་གཤེགས། །གལ་ཏེ་དྲག་པོའི་ལས་འདོད་ན། །ས་བདུན་བཟུང་ལ་དུག་ལྔ་དང༌། །བདུད་རྩི་ལྔ་དང་ཁྲག་ལྔ་དང༌། །ཁ་བ་ལྔ་དང་ཚ་བ་ལྔ། །སྤྲུས་ལ་གཟུགས་དང་མིང་སྤེལ་ལ། །དུར་ཁྲོད་ནང་དུ་སུར་མེས་བསྲེག །དུར་ཁྲོད་ཤིང་ལ་མེ་སྦར་ལ། །དྲག་པོའི་མེ་ལ་རང་ལ་བསྡུ། །མན་ངག་ཡོད་པས་བསྲེགས་ན་འགྲུབ། །ནམ་ཕྱེད་འཇིགས་བྱེད་སྦྱོར་བས་བྱ། །ཐལ་བ་གཟུགས་བརྙན་དེ་ཉིད་དུ། །མནན་པ་བྱས་པས་གདོན་མི་ཟ། །ཁྲུ་གང་གསེར་དངུལ་ཟངས་ལྕགས་ལ། །ཡུ་བ་ཁྲུ་གང་བ་ཡི་སྣོད། །སོར་དྲུག་རྡོ་རྗེ་རིན་ཆེན་བཅས། །སོར་གཉིས་ཟབས་སུ་རྡོ་རྗེ་ལྡན། །རྡོ་རྗེ་སྦུ་གུར་རོ་རྣམས་དབྱུང༌། །མཐེ་ཆུང་ཤོང་བའི་བུ་གའོ། །བླུགས་གཟར་རིང་ཐུང་དེ་ཡི་ཚད། །རྩེ་སོར་བཞི་ནི་པད་འདབ་འདྲ། །སོར་གཉིས་ཟབ་ཅན་རྡོ་རྗེར་ལྡན། །དེ་ཡིས་ཐམས་ཅད་དགང་གཟར་དག །ཕྱི་ནས་མེ་ལྷ་ལྷག་པར་མཆོད། །སྨོན་ལམ་ཤིས་པ་ལ་སོགས་པའི། །ཆོ་ག་ཆོ་ག་ཤེས་པས་བྱ། །ཡི་གེ་བརྒྱ་པ་ལྷ་གཤེགས་ལ། །ཐབ་དང་ཐལ་བ་ལེགས་པར་གཤེགས། །སློབ་དཔོན་འབྱོར་བ་འདོད་པ་ཡིས། །རབ་ཏུ་གནས་པ་འདོད་ན་ཡང༌། །དཀྱིལ་འཁོར་སྦྱིན་སྲེག་སྦྱོར་ཤེས་པ། །གདུགས་དང་བླ་རེ་མཆོད་སོགས་དགྲམ། །སློབ་དཔོན་ཁྲུས་བྱས་དྲི་ཞིམ་ལུས། །ཕྱག་རྒྱ་ལྔས་བརྒྱན་རྡོར་དྲིལ་བཟུང༌། །སུམ་ཆའི་གདན་ལ་ལེགས་བཞུགས་ལ། །སྐུ་གསུམ་མཆོད་རྟེན་གླེགས་བསམ་དག །རི་མོར་གཟུགས་སམ་ནུབ་བཞུགས་ལ། །ཤར་དུ་ཞལ་ནི་གཟིགས་པར་ཤིས། །བསང་གཏོར་ཡོན་ཆབ་འཐོར་འཐུང་དབུལ། །སྲ་བ་སར་པར་གུ་གུ་ལ་བསྲེག །དེ་ལ་ཏིལ་དང་བསང་གཏོར་གྱིས། །ལན་གསུམ་བསྐོར་ལ་དོར་ལ་བསྐྱུར། །ཨོཾ་ཧཱུཾ་ཧྲི་ཧྲི་ཨ་ཞེས་བསྐུ། །དེ་ནས་དྲི་ཞིམ་དཱུར་བས་བསྐུ། །ཨོཾ་སརྦ་ཏ་ཐཱ་ག་ཏ་ཀཱ་ཡ་བི་ཤོ་དྷ་ནི་སྭཱ་ཧཱ། ཞེས་བརྗོད་པ་བསྐུལ་ལོ། །


DTG047_Page_0488
[མ་དཔེ་གཟིགས་ན་འདིར་གནོན།]

དེ་ནས་ཤུན་པ་ལྔས་བཀྲུ་སྟེ། །ཨོཾ་སྭ་བྷཱ་ཝ་བ་ཤུདྡྷོ྅ཧཾ། ཞེས་པས་བཀྲུའོ། །དེ་ནས་ལས་ཀྱི་བུམ་པས་བཀྲུ། །ཇི་ལྟར་བལྟམས་པ་ཙམ་གྱིས་ཀྱང༌། །དེ་བཞིན་གཤེགས་ཀུན་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་གཤེགས་ཉིད་ཁྲུས་གསོལ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ས་མ་ཡ་ཤྲི་ཡེ་ཧཱུཾ། རི་མོ་མེ་ལོང་ནང་དུ་བཀྲུ། །གནས་གསུམ་བྱིན་རླབས་མཆོད་དང་བསྟོད། །བཀྲ་ཤིས་ཚིག་བདུན་དགེ་བར་བརྗོད། །སྙན་གསན་ཕབ་ལ་སྟ་གོན་བཞུགས། །ན་བཟའ་སེར་པོ་རྟེན་ལ་གསོལ། །བཟླས་པ་གཏོར་མ་ཅི་ནུས་བྱ། །ཐོ་རང་སྐྱ་རེངས་བྱུང་བ་དང༌། །སྔོན་བཞིན་སློབ་དཔོན་རྣལ་འབྱོར་ལྡན། །སྔོན་གྱི་རིམ་པས་སྐུ་ཁྲུས་གསོལ། །མཆོད་རྟེན་གཟུགས་དང་གླེགས་བམ་རྣམས། །སྐུ་གསུམ་དག་གམ་རིགས་ལྔའམ། །ཐུགས་དང་སྐུ་དང་གསུང་གི་ལྷ། །རྣལ་འབྱོར་བཞི་ཡིས་ལེགས་བསྐྱེད་ལ། །རིམ་པར་དབང་བསྐུར་རབ་ཏུ་གནས། །གླེགས་བམ་འོད་དཔག་མེད་གྱུར་ནས། །དེ་ཡང་གང་ཡིན་དེ་ཉིད་གྱུར། །སྔགས་འདིས་ན་བཟའ་གསོལ་བར་བྱ། །ཨོཾ་བཛྲ་བཱ་ས་སེ་སྭཱ་ཧཱ། མཆོད་བསྟོད་སྨོན་ལམ་བཀྲ་ཤིས་བྱ། །ཞི་བའི་སྦྱིན་སྲེག་ཤིན་ཏུ་ཤིས། །ད་ནས་རྡུལ་སྣོད་དག་ཏུ་ནི། །འོ་མ་མར་དང་སྦྲང་རྩི་ཡིས། །གསེར་གྱི་ཐུར་མས་སྤྱན་དབྱེ་སྟེ། །ཨོཾ་ཙཀྵུ་སམནྟ་ཙཀྵུ་བི་ཤོ་དྷ་ནི་བཛྲ་སྭཱ་ཧཱ། དེ་ནས་གོང་གི་གསོལ་བསྟོད་བྱ། །འགྲོ་ཀུན་གཏི་མུག་གཟིར་མཐོང་ནས། །ཞེས་པས་གསོལ་བ་གདབ་པའོ། །གཏི་མུག་རྡོ་རྗེའི་ངོ་བོ་ཁྱོད། །དེ་ལ་སོགས་པས་བསྟོད་པ་བྱ། །བཅོམ་ལྡན་གཤིན་རྗེ་འཇིགས་རྡོ་རྗེ། །རིག་པའི་རྒྱལ་པོ་ཕྱག་འཚལ་བསྟོད། །སློབ་མ་ཡོན་བདག་བརྩེ་ཕྱིར་དང༌། །བཅོམ་ལྡན་ཁྱོད་ལ་མཆོད་པའི་ཕྱིར། །ལྷ་ཁྱོད་སྙིང་རྗེའི་བདག་ཉིད་ཅན། །མགོན་པོ་བདག་ཉིད་རབ་གནས་བགྱི། །བདག་ཉིད་ཁྱེད་ལ་གུས་མཆོད་པས། །བཅོམ་ལྡན་བཀའ་དྲིན་གནང་བར་འོས། །འཁོར་ལོ་འགྲོ་བའི་དོན་མཛད་པའི། །གསང་སྔགས་ལྷ་རྣམས་བདག་ལ་དགོངས། །འབྲས་གནས་བྱང་ཆུབ་སེམས་དཔའ་དང༌། །སངས་རྒྱས་ཐམས་ཅད་བདག་ལ་དགོངས། །གཞན་ཡང་སྔགས་ལ་གནས་པའི་ལྷ། །འཇིག་རྟེན་སྐྱོང་བའི་འབྱུང་པོ་རྣམས། །སངས་རྒྱས་བསྟན་ལ་


DTG047_Page_0489
[མ་དཔེ་གཟིགས་ན་འདིར་གནོན།]

དགའ་བ་ཡི། །རྡོ་རྗེའི་མིག་དང་ལྡན་པ་རྣམས། །དེ་རིང་རྡོ་རྗེ་སློབ་དཔོན་བདག །རྡོ་རྗེ་འཇིགས་བྱེད་རབ་གནས་འདི། །སློབ་མ་འདི་ཡི་ཚོགས་བསགས་བྱེད། །ཇི་ལྟར་ནུས་པའི་ཉེར་སྤྱོད་ཀྱིས། །རྗེས་སུ་བརྩེ་བས་ཉེ་བར་གསོལ། །བདག་དང་སློབ་མར་བཅས་པ་དང༌། །རབ་གནས་བྱས་པའི་རྟེན་འདི་ལ། །བསྲུང་དང་ཉེ་བར་བསྐྱབ་པ་ནི། །ཁྱེད་ཀྱིས་བྱ་བར་འོས་པ་ལགས། །ལན་གསུམ་དུ་ནི་བརྗོད་པར་བྱ། །སྟ་གོན་དུས་སུ་མི་བསྒྱུར་བར། །དེ་སྲིད་སྲོད་ལ་ལན་གསུམ་བརྗོད། །ཡི་གེ་བརྒྱ་པ་རང་སྙིང་གིས། །རབ་ཏུ་གནས་ལ་བརྟེན་པར་བྱའོ། །སྔོན་བཞིན་གཏོར་མ་སྦྱངས་ལ་དབུལ། །དེ་ནས་སློབ་དཔོན་སློབ་མ་ཡིས། །མཎྜལ་ལེགས་གཤེགས་པ་ཡིས་བྱུག །བུམ་པ་ལ་སོགས་པ་ལྷ་ཀུན་གཤེགས། །ཡང་ན་སློབ་དཔོན་རྟེན་དེར་བསྲེ། །དེ་ལ་མཎྜལ་མཆོད་པ་བྱ། །ཡིད་དམ་ལྷ་དང་ཆོས་སྐྱོང་ལ། །བསམ་གཏན་ནོར་འཁྲུལ་རྫས་མ་ཚོགས། །ཉེས་པ་ཐམས་ཅད་བཟོད་པར་གསོལ། །དགེ་བ་ཅི་ཙམ་ཡོད་པ་ཀུན། །འགྲོ་བ་བསྒྲལ་ཕྱིར་རབ་ཏུ་བསྔོ། །དགེ་བའི་ལས་འདི་རྣམས་བྱས་པས། །སངས་རྒྱས་ཀུན་དང་བླ་མ་དང༌། །རྡོ་རྗེ་འཇིགས་བྱེད་བདག་བསྲུངས་ཏེ། །འགྲོ་བའི་བདུད་བཞི་ཞི་བྱེད་ཤོག །དེ་ནས་སློབ་དཔོན་སློབ་མ་ཡིས། །མཎྜལ་ལེགས་གཤེགས་པ་ཡིས་བྱུག །བུམ་པ་ལ་སོགས་ལྷ་ཀུན་གཤེགས། །ཡང་ན་སློབ་དཔོན་རྟེན་དང་དེར་བསྲེ། །ལ་ལི་བཛྲ་གྲགས་པ་ཡི། །ནག་པོ་ཆེན་པོ་བརྒྱུད་པའི་རིམ། །འཇིགས་བྱེད་དཀྱིལ་འཁོར་ཆོག ། ཡི། །ལྷག་ཆད་འཁྲུལ་བ་མཁས་བཟོད་མཛོད། །ཡི་དམ་ལྷ་དང་རྡོ་རྗེ་མཁའ་འགྲོས་བསྲུངས། །བདག་གིས་ལུས་ངག་ངལ་བས་འདི་བྲིས་པའི། །དགེ་བ་དྲི་མེད་རྒྱ་ཆེན་ཐོབ་པ་དེས། །འགྲོ་བ་རྡོ་རྗེ་འཇིགས་བྱེད་ཐོབ་པར་ཤོག །རྒྱ་གར་གྱི་མཁན་པོ་པཎྚི་ཏ་བཻ་རོ་ཙ་ན་རཀྵི་ཏས་མཛད་པ། དཔལ་རྡོ་རྗེ་འཇིགས་བྱེད་ཀྱི་དཀྱིལ་འཁོར་གྱི་ཆོ་ག་རྫོགས་སོ།། །།པཎྜི་ཏ་བཻ་རོ་ཙ་ན་དེ་ཉིད་དང༌། ལོ་ཙཱ་བ་གླན་དར་མ་བློ་གྲོས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་ཕའོ།། །།