གཞི་སོགས་གཏན་ལ་དབབ་པ།

གཞི་གཏན་ལ་དབབ་པ།

[Full Size]

དེ་ལྟར་བསྙེན་པར་གྱུར་པའི་སྔགས་པ་འཁྲུལ་འཁོར་བསྒྲུབ་པར་འདོད་པས། འདི་ལྟར་བལྟ་སྟེ། དང་པོ་ཁོ་ནར་འདི་ལ་མངོན་སྤྱོད་བྱ་བར་རིགས་སམ། ཅི་སྟེ་མ་ཡིན་ཞེས་གཞི་གཏན་ལ་དབབ་པར་བྱའོ། །

བྱང་ཆུབ་ཀྱི་སེམས་གཏན་ལ་དབབ་པ།

[Full Size]

དེ་ནས་བྱ་བར་རིགས་པ་ཞིག་ཡིན་ན། འདི་ལྟར་བདག་ནི་དམྱལ་བར་སོང་ཡང་བླའི། །འདི་དམྱལ་བར་མི་འགྲོ་བར་བྱ་ཞིང་དེའི་རྒྱུར་འདི་མྱུར་དུ་གསད་པས། འདིའི་སྡིག་པ་མང་དུ་མི་འཕེལ་བར་བྱའོ་སྙམ་དུ་ཡང་དག་པར་སྙིང་རྗེ་བཅོས་མ་མ་ཡིན་པ་བསྐྱེད་པ་ཡང་དང་ཡང་བྱ་བས་བྱང་ཆུབ་ཀྱི་སེམས་གཏན་ལ་དབབ་པར་བྱའོ། །

གནས་གཏན་ལ་དབབ་པ།

[Full Size]

དེ་ནས་སྒྲུབ་པའི་གནས་ཁྱད་པར་ཅན་དུར་ཁྲོད་དང་ཁང་སྟོང་དང༌། མ་མོ་འདུ་བའི་གནས་དང༌། གནོད་སྦྱིན་འདུ་བའི་ཕུག་དང༌། ཤིང་གཅིག་པའི་དྲུང་ལ་སོགས་པར་འགྲོ་བར་བྱ་སྟེ། འདི་ནི་གནས་གཏན་ལ་དབབ་པའོ། །

ཟླ་གྲོགས་གཏན་ལ་དབབ་པ།

[Full Size]

དེར་ཡང་བདག་གཅིག་པུས་བརྩམས་པ་དང༌། ཡང་ན་གྲོགས་པོ་གསང་ཐུབ་པ། དམ་ཚིག་བསྲུང་བ། འཇིགས་ཤིང་བག་ཚ་བ་མེད་པ། ལག་བཟོ་བ། སྒྲུབ་པ་པོ་ལ་སྙིང་ཉེ་བ། སྟོབས་ཆེ་བ། བློ་དང་ལྡན་པ་བཞི་མན་ཆད་དང་བརྩམས་ཏེ། འདི་ནི་ཟླ་གྲོགས་གཏན་ལ་དབབ་པའོ། །

རྫས་གཏན་ལ་དབབ་པ།

[Full Size]

གནས་དེར་ཤ་ཆེན་པོ་དང་ཚིལ་ཆེན་པོ་ལ་སོགས་པ། གཏོར་མ་དང་ལྷ་བཤོས་སུ་བྱ་བ་དང༌། མེ་ཏོག་ནག་པོའམ་སྔོན་པོ་དང༌། བདུད་རྩི་ལྔ་དང༌། ཁྲག་ཆེན་པོ་དང༌། རྔ་དང་གླིང་བུ་དང༌། དུང་ལ་སོགས་པའི་མཆོད་པའི་ཡོ་བྱད་དང༌། གཤིན་རྗེའི་གཟུགས་ཀྱི་རྒྱུ་དང༌། ལིང་གའི་རྒྱུ་དང༌། །སྣག་ཚ་དང༌། སྨྱུ་གུ་དང༌། དུར་ཁྲོད་ཀྱི་རས་དང༌། ཐོད་པ་དང་སྐུད་པ་ནག་པོ་ལ་སོགས་པ་ཡོ་བྱད་ཐམས་ཅད་དང་ལྡན་པར་བྱས་ཏེ། འདི་ནི་རྫས་གཏན་ལ་དབབ་པའོ། །