དཔལ་རྡོ་རྗེ་འཇིགས་བྱེད་ཀྱི་རྒྱུད་ཀྱི་མདོར་བཤད་པ་ཞེས་བྱ་བ།
སོ་ན་ཤྲཱི།
དང་པོ། དཀྱིལ་འཁོར་བསྟན་པའི་རྟོག་པའི་བཤད་པ།
རྒྱ་གར་སྐད་དུ། ཤྲཱི་བཛྲ་བྷཻ་ར་བ་ཏནྚ་པ་ནེ་ཀ་ར་ནཱ་མ། བོད་སྐད་དུ། དཔལ་རྡོ་རྗེ་འཇིགས་བྱེད་ཀྱི་རྒྱུད་ཀྱི་མདོར་བཤད་པ་ཞེས་བྱ་བ། བཅོམ་ལྡན་འདས་དཔལ་རྡོ་རྗེ་འཇིགས་བྱེད་ལ་ཕྱག་འཚལ་ལོ། །རྡོ་རྗེ་འཇིགས་བྱེད་མགོན་དཔལ་དང༌། །བླ་མའི་ཞབས་པད་ལ་བཏུད་ནས། །བཤད་པའི་རྒྱུད་ཀྱི་རྒྱལ་པོ་དེའི། །མདོར་བཤད་པ་ནི་བདག་གིས་བརྩམས། དེ་ནས་ཞེས་བྱ་བ་ལ་སོགས་པ་ལ་འདིར་དེ་ནས་ཀྱི་སྒྲ་ནི་མ་ཐག་གོ་བར་བྱེད་དོ། །འོན་གལ་ཏེ་དེ་ལྟ་ཡིན་ན། འདི་སྐད་བདག་གིས་ཞེས་བྱ་བའི་དག་པོར་ནས་ཇི་ལྟར་རྒྱུད་ཀྱི་དང་པོ་བསྟན་ཞེ་ན། དེ་ནས་ཞེས་བྱ་བའི་སྒྲ་བསྟན་པས་གཞུང་གི་གྲངས་སྟོང་ཕྲག་བཅོ་བརྒྱད་པའི་འཇམ་དཔལ་གྱི་རྒྱུད་ལས་འཇིགས་བྱེད་ཆེན་པོའི་སྒྲུབ་ཐབས་ཀྱི་དེ་མ་ཐག་ཏུ་འདི་གྲངས་པའི་རྒྱུད་ཡིན་ནོ་ཞེས་བསྒྲུབ་པར་བྱ་བའི་ཕྱིར་རྒྱུད་ཀྱི་དང་པོར་ལྷག་པར་སྦྱར་བ་ཡིན་ནོ། །ཡང་ལྡག་རབ་བཤད་བྱ་ཞེས་བྱ་བ་ལ་ཡང་དག་པའི་དོན་ནི་འདིར་བཟླས་པ་དང་འཁྲུལ་འཁོར་དང་སྦྱིན་སྲེག་དང་བསམ་གཏན་དང་ལས་རྣམས་སོ། །རྡོ་རྗེ་འཇིགས་བྱེད་སྒྲུབ་ཐབས་ཞེས་བྱ་བ་ནི། །རྡོ་རྗེ་སྟོང་པ་ཉིད་རབ་གསུངས། །འཇིགས་བྱེད་ལས་ཀྱི་རྡོ་རྗེ་འདོད། །དེ་ཡི་བདག་ཉིད་འདི་སྒྲུབ་པ། །རྡོ་རྗེ་འཇིགས་བྱེ་སྦྱོར་བས་སོ། །ཞེས་བྱ་བ་སྟོང་པ་ཉིད་དང་རྡོ་རྗེ་ཐ་མི་དད་པ་རྡོ་རྗེ་སེམས་དཔའི་ངོ་བོ་ནི་རྡོ་རྗེ་འཇིགས་བྱེད་དོ། །དེའི་སྒྲུབ་ཐབས་ནི་ལྷ་རྡོ་རྗེ་འཇིགས་བྱེད་ཀྱི་ངོ་བོར་འདིས་སྒྲུབ་པར་བྱེད་པ་ཡིན་ཏེ། དེ་ལྟར་བྱས་ནས་གཞུང་བཀོད་པ་ལས་རྒྱུད་འདིར་དེ་ཉིད་རྒྱུད་དུ་བྱེད་དེ། །བྱེ་བྲག་ཏུ་རྟོགས་པར་བྱེད་པས་སོ། །དྲག་ཤུལ་ཅན་ཞེས་བྱ་བ་ནི་སེམས་མ་རུངས་པའི་ཕྱིར་རོ། །འཇིགས་བྱེད་ཅེས་བྱ་བ་ནི་གཟུགས་མི་
སྡུག་པའི་ཕྱིར་རོ། །ཤིང་གཅིག་ཅེས་བྱ་བ་ནི་ཤིང་དེའི་གྲི་བ་མ་ལ་ཤིང་གཞན་གྱིས་མི་རིག་པའོ། །དབང་དུ་བྱ་བ་དང་དགུག་པ་དང་གསད་པ་ཞེས་བྱ་བ་ལ་སོགས་པ་ནི་མདོར་བསྟན་པའི་ཚིག་གོ །རྒྱས་པར་བསྟན་པ་ནི་དངོས་གྲུབ་སྣ་ཚོགས་བཤད་པར་བྱའོ། །རོ་བསྲེགས་པའི་ཐལ་བ་ཞེས་བྱ་བའི་ཚོན་ནི་དཀར་བའོ། །ནག་པོ་ནི་རོ་བསྲེགས་པའི་སོལ་བས་སོ། །སེར་པོ་ནི་བ་བླས་སོ། །དམར་པོ་ནི་དུར་ཁྲོད་ཀྱི་སོ་ཕག་གིས་སོ། །ལྗང་གུ་ནི་ནིམ་པ་དང༌། ནི་སུན་དྷ་ར་ལ་སོགས་པའི་ལོ་མས་སོ། །རྡུལ་ཚོན་དེ་རྣམས་ཀྱིས་དཀྱིལ་འཁོར་བྲི་བར་བྱའོ་ཞེས་པར་འབྲེལ་ལོ། །གྲུ་བཞི་པ་ཞེས་བྱ་བ་མི་མཉམ་པ་མེད་པའི་ཕྱིར་རོ། །སྒོ་བཞི་པ་ཞེས་བྱ་བ་ནི་སྟོང་པ་ཉིད་དང༌། མཚན་མ་མེད་པ་དང༌། །སྨོན་པ་མེད་པ་དང༌། མངོན་པར་འདུ་བྱེད་པ་མེད་པ་རྣམས་ཏེ་རྣམ་པར་ཐར་པའི་སྒོ་བཞི་རྣམ་པར་དག་པས་སྒོ་བཞིའོ། །རྟ་བབས་བཞིས་བརྒྱན་ཞེས་པ་ནི་བསམ་གཏན་བཞི་རྣམ་པར་དག་པའོ། །ཆོས་ཐམས་ཅད་སྟོང་པ་ཉིད་དུ་གོ་བར་བྱ་བའི་ཕྱིར་དྲིལ་བུའི་སྒྲ་སྒྲོགས་པའོ། །གསུང་རབ་ཡན་ལག་དགུ་རྣམ་པར་དག་པས་ན་བ་དན་དགུའོ། །འདོད་པའི་ཡོན་ཏན་ལྔ་རྣམ་པར་དག་པས་དྲི་ཞིམ་པོའི་མེ་ཏོག་གི་ཕྲེང་བ་དང་ལྡན་པའོ། །རྡོ་རྗེ་རིན་ཆེན་ཞེས་བྱ་བ་ནི་རྡོ་རྗེ་ནི་སྟོང་པ་ཉིད་དོ། །རིན་ཆེན་ཞེས་བྱ་བ་ནི་བླ་ན་མེད་པའི་དགའ་བས་རྒྱས་པར་བྱེད་པ་ཡིན་པས་ཞེས་བྱ་བ་སྙིང་རྗེ་ཆེན་པོ་སྟེ། དེ་དག་ཐ་མི་དད་པའོ། །ཞེས་མཚོན་པར་བྱ་བའི་དོན་ཏོ། །ཟླ་བ་ཕྱེད་པ་ནི་འཛག་པ་བྱང་ཆུབ་ཀྱི་སེམས་མཚོན་པར་བྱེད་པའོ། །ཐབས་དང་ཤེས་རབ་རྣམ་པར་དག་པས་རྒྱན་ཕྲེང་དང་རྒྱན་ཕྲེང་ཕྱེད་པའོ།། དེ་དབུས་འཁོར་ལོ་བྲི་བྱ་བ། །རེའུ་མིག་དགུ་པ་ཞེས་བྱ་བ་ནི་གོ་སླའོ། །སྒོ་བཞིའི་གྲྭ་རྣམས་སུ་ཡང་ནི་སྒོ་བཞི་རྣམས་ཀྱི་ཉེ་བར་རོ། །རོ་ལངས་ཆེན་པོ་ཞེས་བྱ་བ་ནི་རོ་ལངས་ཏེ། ལག་པ་གཉིས་པ། གདོང་གཅིག་པ་མིག་དམར་བ་གསུམ་ཡོད་པ་སྐྲ་སེར་སྐྱ་གྱེན་དུ་ཕྱོགས་པ་གཅེར་བུ་ཁ་མཆེ་བ་གཙིགས་པ། ཁ་དོག་ནག་པོ་ལག་པ་གཡས་ན་གྲི་གུག་གདེངས་པ། གཡོན་ན་ཁྲག་གིས་བཀང་བའི་ཐོད་པ་འཛིན་པ་རྣམས་སོ། །གཞག་པར་བྱའོ་ཞེས་བྱ་བ་ནི་བྲི་བར་བྱའོ། །མར་ཁུ་ཆེན་པོ་ཞེས་བྱ་བ་ལ་སོགས་པ་ནི་གོ་སླའོ། །སྔར་སྤྱོད་པ་བྱས་པ་ཞེས་བྱ་བ་ནི་བསྙེན་པ་བྱས་པའོ། །ཧ་ཧ་ཞེས་བྱ་ཞིང་ཞེས་
པ་ནི་གད་མོ་རྣམས་བགད་ཅིང་ངོ༌། །ཤིན་ཏུ་མཉམ་པར་བཞག་སྟེ་ཞེས་པ་ནི་རྡོ་རྗེ་འཇིགས་བྱེད་ཀྱི་རྣལ་འབྱོར་དང་ལྡན་པར་རོ། །དེ་དབུས་བསྒྲུབ་བྱ་ཞེས་བྱ་བ་ནི་མངོན་པར་འདོད་པའི་དངོས་གྲུབ་བོ། །དེའི་སྟེང་དུ་ཞེས་བྱ་བ་ནི་དེ་ལ་ཞོན་པའོ། །ནམ་ཞིག་སྔགས་པས་མ་གྲུབ་ན། །ཞེས་བྱ་བ་ནི་བཅོམ་ལྡན་འདས་མཉེས་ན་ཕྱག་རྒྱ་ཆེན་པོ་འང་སྟེར་བར་བྱེད་དོ། །ནམ་ཞིག་རྣལ་འབྱོར་པ་བསོད་ནམས་མ་ཡིན་པའི་དབང་གིས་མ་གྲུབ་ན། དེའི་ཚེ་ལས་ཕྲན་ཚེགས་རྣམས་ངེས་པར་འགྲུབ་པར་འགྱུར་རོ་ཞེས་དད་པ་ཉེ་བར་འཕེལ་བར་བྱ་བའི་དོན་དུའོ། །འདི་ནི་ཞེས་བྱ་བ་ནི་ཡོངས་སུ་རྫོགས་པའོ། །འཇམ་དཔལ་ཞེས་བྱ་བ་ནི་འཇམ་དཔལ་གྱི་སྤྲུལ་པའོ། །དཀྱིལ་འཁོར་རྒྱས་པར་བསྟན་པ་ཞེས་བྱ་བ་ནི་དཀྱིལ་འཁོར་ཞེས་བྱ་བ་ནི་རྡུལ་ཚོན་གྱི་དཀྱིལ་འཁོར་རོ། །རྟོག་པ་གང་དུ་རྒྱས་པར་བསྟན་པ་དེ་ལ་དེ་སྐད་ཅེས་གསུངས་སོ། །འོ་ན་ཇི་ལྟར་དང་པོ་རྡུལ་ཚོན་གྱི་དཀྱིལ་འཁོར་བསྟན་ཞེ་ན། དབང་མ་བསྐུར་བར་རྒྱུད་དུ་གསུངས་པའི་ལས་མི་བྱ་བ་དང༌། རྒྱུད་ཀྱང་བལྟ་བར་མི་བྱའོ་ཞེས་རྟོགས་པར་བྱ་བའི་ཕྱིར་དང་པོ་ཉིད་དུ་རྡུལ་ཚོན་གྱི་དཀྱིལ་འཁོར་བསྟན་པར་རིགས་སོ། །རྫོགས་སོ་ཞེས་བྱ་བ་ནི་ཡང་དག་པར་ཐོབ་པ་སྟེ་རབ་ཏུ་ཐོབ་པའོ། །འདི་ནི་རྡོ་རྗེ་འཇིགས་བྱེད་ཀྱི་རྣལ་འབྱོར་གྱི་རྒྱུད་ལས་རྟོག་པ་དང་པོའི་བཤད་པའོ།། །།
གཉིས་པ། ལས་ཐམས་ཅད་འགྲུབ་པ་བསྟན་པའི་རྟོག་པའི་བཤད་པ།
དགོས་པ་མེད་པར་སུ་ཡང་འཇུག་པར་མི་འགྱུར་བ་ཡིན་པས་དགོས་པ་བསྟན་པའི་དོན་དུ། དེ་ནས་ཞེས་བྱ་བ་ལ་སོགས་པ་དངོས་གྲུབ་སྣ་ཚོགས་ཀྱི་རྟོག་པ་གསུངས་པ། ཤིན་ཏུ་མ་རུངས་པའི་སྔགས་པ་ཞེས་བྱ་བ་ནི། བསད་པ་དང་བསྐྲད་པ་དང་དབྱེ་བའི་ལས་གསུམ་པ་ཁྲོས་པའི་སེམས་ཀྱིས་བྱེད་པ་ཡིན་ནོ་ཞེས་བྱ་བ་ནི་ལྷག་མ་ཡིན་ནོ། །མེ་གཉིས་ཀྱི་དབུས་སུ་ཞེས་བྱ་བ་ནི་མེ་ནི་ར་ཡིག་གོ །གང་ལ་རྟོག་ཅེ་ན་མེའི་ས་བོན་ཡིན་པའི་ཕྱིར་ཏེ། རྒྱུ་ལ་འབྲས་བུ་བཏགས་པའི་ཕྱིར་རོ་ཞེས་བྱ་བ་ཁོ་ནར་ཐོབ་པོ། །ཧཱུཾ་བརྒྱད་ཅེས་བྱ་བ་ནི་ཕྱོགས་སུའོ། །ཟུར་རྣམས་སུ་ཡི་གེ་ཕཊ་ཅེས་བྱ་བྱ་བ་ནི་ཕྱོགས་བྲལ་དུ་ཕཊ་ཡིག་བརྒྱད་བྲིའོ་ཞེས་བྱ་བ་དང་འབྲེལ་ཏོ། །མ་ཡིན་ཏེ་རིམས་ཀྱིས་ཐེབས་པར་བྱ་བར་འདོད་ན་ཞེས་བྱ་བ་ནི་གང་གི་ཚེ་རྣལ་འབྱོར་བས་རིམས་ཀྱིས་ཐེབས་པར་བྱ་བར་འདོད་པ་དེའི་ཚེ། ཆོ་ག་འདི་བྱ་སྟེ་མཚོན་གྱིས་བསྣུན་པའམ་སྟེང་ནས་འགེགས་པའི་མིའི་ཐོད་པ་ལ་སེན་རྩིའི་ཁུ་བའམ།
ས་དཀར་རྡོ་རྒྱུས་ཀྱིས་རིམས་མངོན་པར་བྲིས་ཏེ་དེ་ལ་ཚ་བའི་རིམས་ནི་དམར་པོ་སྐྲ་དམར་ཞིང་གྱེན་དུ་ཕྱོགས་པའོ། །གྲང་བའི་རིམས་ནི་དཀར་པོ་སྐྲ་འཕྱང་བ་ཁྲོ་བ་དང་བཅས་པ་ཞེས་བྱ་བ་ནི་གཉི་ག་ཡང་རྐང་པ་གསུམ་པ་ལག་པ་གསུམ་པ་ཡིན་ནོ། །ཕྱི་ནས་རོ་བསྲེགས་པའི་སོལ་བ་དང་ཐལ་བ་བསྒྲུབ་བྱའི་རྐང་པའི་རྡུལ་དང་ལྷན་ཅིག་ཏུ་བྱས་པས་གཟུགས་བརྙན་འཁྲུལ་འཁོར་འདིར་སྔར་གྱི་ཆོ་ག་ཉིད་ཀྱིས་ལེགས་པར་བྲིས་ལ་དེའི་སྙིང་གར་བཅུག་སྟེ། དུག་དང་ལན་ཚྭ་དང་སྐྱེ་ཚེ་ལ་སོགས་པས་ལེགས་པར་བྱུགས་པ་པདྨ་བྷནྡྷ་གཞན་དུ་གཟུགས་བརྙན་དེ་བཅུག་པ་གཉིས་ཀ་ལ་འདུག་པ་བྱས་ནས་ཐོད་པ་ལ་བྲིས་པ་དེའི་སྟེང་དུ་ཁ་སྦུབ་ཏུ་བཞག་དེ་ནས་དེ་ཡིས་གཟུང་བར་སེམས་ཤིང་མེ་ཐབ་ཀྱི་འོག་ཏུ་བསྲེགས་ཏེ། རྡོ་རྗེ་འཇིགས་བྱེད་ཀྱི་རྣལ་འབྱོར་གྱིས་མཚན་མོ་ཟླ་བ་ལ་བྱས་ན་ངེས་པ་ཁོ་ནར་རིམས་ཀྱིས་འཛིན་པར་འདིར་ཐེ་ཚོམ་མེད་དོ། །བྱ་རོག་གི་ལྷག་མ་ཞེས་བྱ་བ་ནི་བྱ་རོག་གིས་ཡོངས་སུ་ཟོས་པའི་ལྷག་མ་ཡིས་སོ། །བསད་པ་ལ་འཁྲུལ་འཁོར་ལ་ཆེ་གེ་མོ་མཱ་ར་ཡ་ཞེས་སྨོས་ལ་བྲིའོ། །བསྐྲད་པ་ལ་ཆེ་གེ་མོ་ཨུཙྪ་ཏེ་ཞེས་བྱའོ། །དབྱེ་བ་ལ་ཆེ་གེ་མོ་བི་དྭེ་ཥ་ཡ་ཞེས་བྱའོ། །དེ་དག་ལ་སོགས་པས་ལས་དང་རྗེས་སུ་མཐུན་པར་ཐམས་ཅད་ལ་རྟོགས་པར་བྱའོ། །བསད་པ་ལ་གཤིན་རྗེའི་ལྟོ་བར་གནས་པའི་མེའི་དཀྱིལ་འཁོར་དུ་འཁོར་ལོ་བྲིའོ། །དགར་བ་ལ་ནི་རྔ་མོའི་རྒྱབ་ཏུ་གནས་པའི་རླུང་གི་དཀྱིལ་འཁོར་ལའོ། །དྲན་པ་ཞེས་བྱ་བ་ནི་མན་ངག་གིས་ཡི་གེ་ཧའོ། །ཟླ་བ་ཕྱེད་པ་དང་ཐིག་ལེ་དང༌། དབྱངས་ཡིག་དྲུག་པས་བརྒྱན་པ་ཡིན་པར་ཁོང་དུ་ཆུད་པར་བྱའོ། །རེངས་པ་ལ་རི་རབ་ཟུར་བརྒྱད་པས་ཉེ་བར་མཛེས་པའི་དབུས་སོ། །དབང་དུ་བྱ་བ་ལ་བུད་མེད་ཀྱི་ཆོས་ཀྱི་འབྱུང་གནས་ཀྱི་ནང་དུའོ། །དགུག་པ་ལ་རྐང་པ་བརྒྱད་པའི་སེང་གེའི་རྒྱབ་ཏུའོ། །ཞི་བ་ལ་ཟླ་བའོ། །རྒྱས་པ་ལ་ཟླ་བ་སེར་པོའོ། །དབྱེ་བ་ལ་མ་ཧེ་དང་རྟའི་སྙིང་གར་རོ། །ལྐུགས་པར་བྱ་བ་ལ་རའི་སྙིང་གར་རོ། །དེ་དག་ལ་སོགས་པའི་གནས་རྣམས་སུ་ལས་དང་རྗེས་སུ་མཐུན་པར་བྲི་བར་བྱའོ། །ཞི་བར་བྱ་བའི་ཕྱིར་འཁོར་ལོ་དབྱི་བ་ལ། དང་པོར་མཐའི་ཡི་གེ་ཡ། །དབྱི་བྱིན་དང་ནི་གཉི་ག་དང༌། ཕྱིས་ནས་དབུས་ཀྱི་ཡི་གེ་ཡ། །ཡི་གེ་ལྷག་མ་ཅི་བདེ་བར། །འདི་ནི་རྣལ་འབྱོར་གྱི་རྒྱུད་རྡོ་རྗེ་འཇིགས་བྱེད་ལས་རྟོག་པ་གཉིས་པའི་བཤད་པའོ།། །།
གསུམ་པ། སྔགས་བཏུ་བའི་རྟོག་པའི་བཤད་པ།
རྟོག་པ་གཉིས་པ་གསུངས་པའི་དགོངས་པ་དེ་ཉིད་སྔགས་མེད་པར་འགྲུབ་པར་མི་འགྱུར་བས་སྔགས་ལ་ཐེ་ཚོམ་མེད་པར་བྱ་བའི་དོན་དུ། དེ་ནས་ཞེས་བྱ་བ་ལ་སོགས་པ་སྔགས་བཏུ་བའི་རྟོག་པ་གསུངས་པ། དེ་ནས་ཞེས་བྱ་བ་ལ་སོགས་པ་ནི་གོ་སླའོ། །ཡ་ཡིག་ཕྲ་མ་ཞེས་བྱར་འགྱུར། །ཀྵེ་ཡིག་གཏི་མུག་ཏུ་བརྗོད་དོ། །ཡི་གེ་མ་ནི་ཕྲ་མར་གྲགས། །མེ་ནི་འདོད་ཆགས་དགྲ་གསོད་པའོ། །ཕྲག་དོག་ངོ་བོ་ད་ཡིག་འགྱུར། །ཡཙྪ་ཐོ་བ་དབྱུག་པ་ཉིད། །ནི་ཡིག་ལག་ནི་པདྨ་སྟེ། །རཱ་ཡིག་རལ་གྲི་བསྒྲེང་བའོ། །ཛ་ཡིག་ལྷ་མོ་ཙཱརྩི་ཀཱ། ཕག་མོ་ཡང་ནི་ས་ཡིག་ཉིད། །དོ་ཡིག་དབྱངས་ཅན་མ་རུ་གྲགས། །རུ་ཡིག་རང་བཞིན་གོ་རཱི་ཉིད། །ཎ་ཡོ་ནི་རའི་རང་བཞིན་ཡང༌། །ཐོད་པའི་དུས་ནི་འཇིགས་བྱེད་རྣམས། །ཡི་གེ་བཅུ་བདུན་གྱིས་དེ་དག །ལྷ་བཅུ་བདུན་གྱི་རང་བཞིན་དུ་རྣམ་པར་བསྒོམས་ལ། རང་གི་སྙིང་གའི་ས་བོན་གྱི་འོད་ཟེར་རྣམས་ཀྱིས་གཤིན་རྗེ་དགྲ་ལྷ་བཅུ་བདུན་གྱི་བདག་ཉིད་ཀྱི་ཡེ་ཤེས་ཀྱི་དཀྱིལ་འཁོར་སྤྱན་དྲངས་ལ་མདུན་དུ་རྣམ་པར་བཞུགས་སུ་གསོལ་ལ། མཆོད་ཡོན་ལ་སོགས་པ་ཕུལ་ནས་སྔར་བྲིས་པའི་འཁོར་ལོ་ལ་ཐོ་བ་ལ་སོགས་པའི་རབ་ཏུ་སྦྱོར་བས་བཅུག་ལ། དེ་ནས་ལས་དང་རྗེས་སུ་མཐུན་པར་གསུངས་པའི་རིམ་པས་བདག་ཉིད་རྣམ་པར་བསྒོམས་ལ། སྔགས་ཡོངས་སུ་བཟླས་ཏེ་ལས་རབ་ཏུ་བསྒྲུབ་པར་བྱའོ། །རྣལ་འབྱོར་གྱི་རྒྱུད་རྡོ་རྗེ་འཇིགས་བྱེད་ལས་རྟོག་པ་གསུམ་པའི་བཤད་པའོ།། །།
བཞི་པ། བསྒོམ་པའི་རྟོག་པའི་བཤད་པ།
དེ་དག་བསྟན་པའི་དགོས་པ་ནི་ལྷའི་དམིགས་པ་མེད་པར་འགྲུབ་པར་མི་འགྱུར་བས་ལྷའི་དམིགས་པའི་དོན་དུ་དེ་ནས་ཞེས་བྱ་བ་ལ་སོགས་པ་སྒྲུབ་ཐབས་ཀྱི་རྟོག་པ་གསུངས་པ། དེ་ནས་ཞེས་བྱ་བ་ནི་སྔས་བཏུ་བའི་དེ་མ་ཐག་ཏུའོ། །རྡོ་རྗེ་འཇིགས་བྱེད་སྒྲུབ་པའི་ཐབས་ཞེས་བྱ་བ་ནི་རྡོ་རྗེ་འཇིགས་བྱེད་དུ་ཐབས་གང་གིས་སྒྲུབ་པར་བྱེད། བདག་ཉིད་དུ་འགྱུར་པར་བྱེད་པ་ནི་དེའི་སྒྲུབ་ཐབས་སོ། །ཡང་དག་རབ་བཤད་བྱ་ཞེས་བྱ་བ་ལ་ཡང་དག་པའི་དོན་ནི་འདིར་བླ་མའི་མན་ངག་གིས་བཤད་པར་བྱའོ། །དེ་ལ་མན་ངག་ནི་འདི་ཡིན་ཏེ། ཆོས་ཐམས་ཅད་བདག་མེད་པ་སྔོན་དུ་སོང་བས་ལྷའི་གཟུགས་སུ་བྱས་ཏེ་ཞེས་བྱ་བ་ནི་ཕྱི་ནས་རྟོགས་པར་བྱའོ། །དང་པོར་རེ་ཞིག་ཅེས་བྱ་བ་ནི་དང་པོར་རོ། །
དེ་ལ་དགོངས་པ་འདི་ཡིན་ཏེ་དང་པོར་རེ་ཞིག་སྔགས་པས་སྐྱེ་བོ་འགའ་ཞིག་ལ་བརྟེན་ནས་སྟན་བདེ་བ་ལ་འདུག་སྟེ། བདུད་རྩི་ལྔ་ལ་སོགས་པའི་རི་ལུ་ཁར་བཅུག་ལ་རྣལ་འབྱོར་པ་གཅེར་བུ་གཙུག་ཕུད་བཤིག་པ། ཁ་ལྷོར་མངོན་པར་ཕྱོགས་པ་སྟེ། དེ་ནས་རང་གི་སྙིང་གར་ཉི་མ་ལ་གནས་པའི་ས་བོན་གྱི་འོད་རྣམས་ཀྱིས་ཕྱོགས་བཅུའི་འཇིག་རྟེན་གྱི་ཁམས་མངོན་པར་ཁྱབ་སྟེ། སངས་རྒྱས་དང་བྱང་ཆུབ་སེམས་དཔའ་དང༌། ཁྲོ་བོ་ལ་སོགས་པའི་ལྷ་ཚོགས་སྤྱན་དྲངས་ཏེ། མདུན་གྱི་ནམ་མཁའི་ཕྱོགས་སུ་བཞུགས་སུ་གསོལ་ལ། དེ་ནས་སྙིང་གའི་ས་བོན་གྱི་འོད་ཟེར་ལས་བྱུང་བའི་རྡོ་རྗེ་ཙཱ་རྩི་ཀཱ་ལ་སོགས་པའི་ལྷ་མོ་བཞིས་མཆོད་པའི་ཡོ་བྱད་སྣ་ཚོགས་ལག་པའི་པདྨ་ལྟ་བུ་གཟུང་བ་རྣམས་ཀྱིས་ལེགས་པར་མཆོད་དོ། །སྡིག་པ་བཤགས་པ་ལ་སོགས་པ་དང༌། གཤེགས་སུ་གསོལ་བ་བྱས་ནས། དེ་དག་ཐམས་ཅད་བསྒོམས་ལ་ཆོས་ཐམས་ཅད་བདག་མེད་པ་ཞེས་བྱ་བའི་ཚིག་གིས་ཚངས་པའི་གནས་བཞི་བསྒོམས་པ་མཚོན་པའོ། །དེ་ལ་སེམས་ཅན་ཐམས་ཅད་ལ་བུ་གཅིག་པ་ལྟར་སྡུག་པའི་མཚན་ཉིད་ནི་བྱམས་པའོ། །སྡུག་བསྔལ་དང་སྡུག་བསྔལ་གྱི་རྒྱུ་ལས་ཡང་དག་པར་འདོན་པའི་སྙིང་རྗེ་དང༌། བདེ་བ་བརྟན་པ་ཉིད་ཀྱིས་དགའ་བ་དང༌། གཟུང་བ་དང་འཛིན་པའི་རྣམ་པར་རྟོག་པ་ཐམས་ཅད་ལ་བཏང་སྙོམས་སུ་བྱེད་པའི་ཕྱིར་བཏང་སྙོམས་སོ། །དེ་ནས་ཐམས་ཅད་རྟེན་ཅིང་འབྲེལ་བར་འབྱུང་བ་དང༌། མུ་བཞི་དང་བྲལ་བར་རྣམ་པར་བལྟས་ལ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་བྱ་བའི་སྔགས་བརྗོད་ལ་སྔགས་ཀྱི་དོན་མངོན་དུ་བྱེད་ཅིང་བདག་ཉིད་ཁམས་གསུམ་ལ་སྣང་བ་མེད་པར་བྱས་ནས། དེ་ནས་སྨོན་ལམ་གྱི་སྟོབས་ལས་བར་སྣང་ལ་ཡི་གེ་ཨཿ་དམར་པོ་ལས་བྱུང་བའི་ཉི་མའི་སྟེང་དུ་ཧཱུཾ་གི་འོད་ཟེར་ལྔ་འཕྲོ་བ་ཅན་ནོ། དེ་ཡོངས་སུ་གྱུར་པ་ལས་སྣ་ཚོགས་རྡོ་རྗེ། དེ་ཡོངས་སུ་གྱུར་པ་ལས་རྡོ་རྗེ་ར་བ་དང་གུར་དང༌། བླ་རེ་དང༌། ས་གཞི་བསྒོམས་པར་བྱའོ། །དེ་དག་ཐམས་ཅད་བསྒོམས་ལ་ཡང༌། ཡི་གེ་ཡཾ་ལས་རླུང་གི་དཀྱིལ་འཁོར་ཞེས་བྱ་བ་ནི་རྗེས་སུ་ང་རོ་དང་བཅས་པས་སོ། །དྷཱིཿ་ལས་ཞེས་བྱ་བ་ནི་དྷཱིཿ་སེར་པོ་ལས་སོ། །འཛམ་པའི་རྡོ་རྗེ་ཞེས་བྱ་བ་ནི་མགོན་པོ་ཞལ་གཅིག་ཕྱག་གཉིས་པ་ཕྱག་ན་རལ་གྲི་དང་གླེགས་བམ་ཅན། རྡོ་རྗེའི་སྐྱིལ་མོ་ཀྲུང་གི་
སྦྱོར་བས་རྒྱུའི་རྡོ་རྗེ་འཛིན་པའི་བདག་ཉིད་ཅན་ནོ། །རྒྱུད་དང་རྒྱུད་དུ་གསུངས་པའི་རིམ་པས་འབྲས་བུ་རྡོ་རྗེ་འཆང་གི་ངོ་བོར་བདག་ཉིད་དུར་ཁྲོད་བརྒྱད་ཀྱིས་བརྒྱན་པར་བསྐྱེད་ལ་སྲིད་པ་དང་ཞི་བ་གཉིས་སུ་མེད་པའི་ང་རྒྱལ་མེད་ཅིང༌། ཨོཾ་སྭ་བྷཱ་ཝ་ཤུདྡྷཿ་སརྦ་དྷརྨཱཿ་སཱ་བྷ་ཝ་ཤུདྡྷོ྅ཧཾ། ཞེས་བྱ་བའི་སྔགས་བརྗོད་པར་བྱའོ། །དེ་ནས་མིག་ལ་སོགས་པ་བྱིན་གྱིས་བརླབ་པར་བྱའོ། །དབང་བསྐུར་མི་བསྐྱོད་རྒྱས་གདབ་པ། །དབང་པོ་རྩ་བའི་སྤྱི་བོར་བསྒོམ། །སྒེག་པ་ལ་སོགས་རོ་དང་ལྡན། །ཁྲོ་བོ་གཟུགས་ནི་ཕྱི་རོལ་ལས། །རང་གི་སྙིང་གའི་ས་བོན་གྱི་འོད་ཟེར་ལས་སྣ་ཚོགས་པར་བཞུགས་པའི་སངས་རྒྱས་སྲས་དང་བཅས་པ་རྣམས་སྤྱན་དྲངས་ཏེ་མདུན་དུ་བལྟས་ལ། དེ་རྣམས་ཀྱིས་རྣམ་པར་འཕྲོས་པའོ། །ཙཱ་རྩི་ཀཱ་ལ་སོགས་པ་ཟླ་བ་ལྟ་བུའི་བུམ་པ་བདུད་རྩི་ལྔ་ཡིས་ཡོངས་སུ་གང་བ་གཟུང་བ་དེ་རྣམས་ཀྱིས་བཀྲ་ཤིས་ཀྱི་ཚིགས་སུ་བཅད་པ་སྔོན་དུ་སོང་བས་བདག་ཉིད་ལ་དབང་བསྐུར་བྱེད་པར་བསམས་ནས། རང་གི་སྙིང་གའི་ས་བོན་གྱི་འོད་ཟེར་གྱིས་ཡེ་ཤེས་སེམས་དཔའ་སྤྱན་དྲངས་ལ་མདུན་དུ་བཞུགས་སུ་གསོལ་ཏོ། །མཆོད་ཡོན་དང་ཞབས་བསིལ་ལ་སོགས་པ་ཕུལ་ནས། ཨོཾ་མུངྒར་ཛཿ་ཞེས་བྱ་བའི་སྔགས་ཀྱིས་བཀུག་ལ། ཨོཾ་དཎྜ་ཧཱུཾ་ཞེས་བྱ་བ་འདིས་བཅུག་ཅིང༌། ཨོཾ་པདྨ་པཾ། ཞེས་བྱ་བ་འདིས་བཅིང་ལ། ཨོཾ་ཁཌྒ་ཧོ། ཞེས་བྱ་བ་འདིས་དབང་དུ་བྱ་བའོ། །དེ་ནས་རང་གི་སྙིང་གའི་ས་བོན་ལས་བྱུང་བའི་རྡོ་རྗེ་ཙཱ་རྩི་ཀཱ་ལ་སོགས་པ་རྣམས་ཀྱིས་མཆོད་པའི་ཡོ་བྱད་སྣ་ཚོགས་པ་དག་གིས་མཁས་པས་མཆོད་པར་བྱའོ། །དེ་ནས་འབར་བ་ལ་སོགས་པའི་ཆོ་གས་བསྒྲུབས་པའི་བདུད་རྩི་ལས་ལྕེ་རྡོ་རྗེའི་སྦུ་གུས་དྲངས་ལ་བཟའ་བར་བྱའོ། །བདག་ཉིད་དེའི་ཕྱིར་སྦྱོར་བ་ཉིད། །བདེན་མིན་བརྫུན་པ་མིན་པ་ཉིད། །ལྷ་ཡི་རྣམ་པ་བསྒོམ་པར་བྱ། །དེ་ནས་རྣམ་དག་དྲན་པར་བྱ། །ཐོད་པས་ཐོད་དུ་བྱས་པ་ཞེས་བ་ནི་ཡེ་ཤེས་ལྔའི་རང་བཞིན་ཡིན་པའི་ཕྱིར་རོ། །འཇིགས་སུ་རུང་བ་ཆེན་པོ་ཞེས་བྱ་བ་ནི་བདུད་རྣམས་སྔངས་པར་བྱེད་པའི་ཕྱིར་རོ། །ཐོད་པའི་རྒྱན་གྱིས་བརྒྱན་པ་ཞེས་བྱ་བ་ནི་ཆོས་ཀྱི་དབྱིངས་ནས་བཞེངས་པ་ཡིན་པའི་ཕྱིར་རོ། །ཞབས་བཅུ་དྲུག་ནི་སྟོང་པ་ཉིད་བཅུ་དྲུག་རྣམ་པར་དག་པས་སོ། །གཅེར་བུ་ནི་ཆོས་རྣམས་ཀྱི་སྒྲིབ་པ་ཉིད་གྲོལ་བར་བྱེད་པའི་ཕྱིར་རོ། །མཚན་མ་འགྲེང་བ་ནི་བདེ་བ་ཆེན་
པོར་རང་བཞིན་གྱིས་སོ། །ཆོས་ཐམས་ཅད་སྟོང་པ་ཉིད་སོ་སོར་བཞག་པའི་ཕྱིར་གཡོན་བརྐྱང་བའི་གོམ་པའོ། །གཏུམ་པ་ཁྲོ་བ་ཡིན་པའི་ཕྱིར་གསུས་པ་ཆེ་བའོ། །སྐྲ་གྱེན་དུ་བརྫེས་པ་ནི་མྱ་ངན་ལས་འདས་པའི་གོ་འཕང་སྟོན་པའི་ཕྱིར་རོ། །ཕེ་ཏའི་སྒྲ་བརྗོད་པ་ནི་སྡང་བ་ལ་སོགས་པ་རྣམས་སྐྲག་པར་བྱེད་པའི་ཕྱིར་རོ། །ཕྱག་སུམ་ཅུ་རྩ་བཞི་ནི་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བཞི་རྣམ་པར་དག་པའོ། །ཡང་དག་པའི་རྩོལ་བ་དང༌། ཡང་དག་པའི་དྲན་པ་དང༌། ཡང་དག་པའི་ཏིང་ངེ་འཛིན་དང༌། བཅོམ་ལྡན་འདས་ཉིད་ཀྱི་སྐུ་གསུང་ཐུགས་ཀྱི་ངོ་བོར་བསྡུས་པའོ། །ཤིན་ཏུ་མཉམ་པར་བཞག་པས་ལུས་དང་ངག་དང་ཡིད་མ་ཡེངས་པས་སོ། །རྟག་ཏུ་ཞེས་བྱ་བ་ནི་དུས་གསུམ་དུའོ། །དེ་ཁོ་ན་ཉིད་ཀྱི་སྦྱོར་བ་ཞེས་བྱ་བ་ནི་བསྒོམ་བྱ་དང་སྡོམ་པ་པོ་དང་སྒོམ་པ་རྣམས་དམིགས་སུ་མེད་པའོ། །གྲི་གུག་ནི་མ་རིག་པ་གཅོད་པའོ། །བྷིནྡི་ཕ་ལ་ནི་གཟུང་བ་དང་འཛིན་པའི་རྣམ་པར་རྟོག་པ་འབྱེད་པའོ། །གཏུན་ཤིང་ནི་དྲན་པ་ཉམས་པ་འཇོམས་པའོ། །ཆུ་གྲི་ནི་སྡིག་པ་གཅོད་པའོ། །རྡོ་རྗེ་རྩེ་གཅིག་པ་ནི་ལུས་ངག་གི་ཉེས་པ་འཇོམས་པའོ། །སྟ་རེ་ནི་སེམས་ཀྱི་མཁྲེགས་པ་གཅོད་པའོ། །མདུང་ནི་ལྟ་བ་ངན་པ་འབིགས་པའོ། །མདའ་ནི་ཀུན་དུ་རྟོག་པའི་ཟུག་རྔུ་འབིགས་པར་བྱེད་པའོ། །ལྕགས་ཀྱུ་ནི་འགུགས་པར་བྱེད་པའི་ཕྱིར་རོ། །མཚོན་ཀ་ཏ་ནི་ལས་ཀྱི་སྒྲིབ་པ་འཇོམས་པར་བྱེད་པའོ། །ཁ་ཊྭཱཾ་ག་ནི་བྱང་ཆུབ་སེམས་ཀྱི་ངོ་བོའོ། །འཁོར་ལོ་ནི་ཆོས་ཀྱི་འཁོར་ལོ་བསྐོར་བའི་ཕྱིར་རོ། །རྡོ་རྗེ་ནི་རོ་ཉམ་པར་འགྱུར་བ་ཡེ་ཤེས་ལྔའི་བདག་ཉིད་དོ། །རྡོ་རྗེ་ཐོ་བ་ནི་སེར་སྣ་འབྱེད་པར་བྱེད་པའོ། །རལ་གྲི་ནི་རལ་གྲི་ལ་སོགས་པའི་དངོས་གྲུབ་སྟེར་བའི་ཕྱིར་རོ། །མཆོག་ཏུ་དགའ་བས་སངས་རྒྱས་ཐམས་ཅད་སྐུལ་བར་བྱེད་པ་ནི་ཌ་མ་རུའོ། །ཁྲག་གིས་བཀང་བའི་ཐོད་པ་ནི་དམ་ཚིག་སྐྱོང་བར་བྱེད་པའོ། །ཚངས་པའི་མགོ་བོ་ནི་སྙིང་རྗེས་འགྲོ་བའི་དོན་མཛད་པའི་ཕྱིར་རོ། །ཕུབ་ནི་བདུད་ལས་རྒྱལ་བའི་ཕྱིར་རོ། །རྐང་པ་ནི་སྒོམ་པ་པོ་ལ་སངས་རྒྱས་ཀྱི་གོ་འཕང་སྟེར་བའི་ཕྱིར་རོ། །ཞགས་པ་ནི་ཡང་དག་པའི་ཡེ་ཤེས་བཅིང་བར་བྱེད་པའོ། །གཞུ་ནི་འཇིག་རྟེན་གསུམ་ལས་རྒྱལ་བའི་ཕྱིར་རོ། །རྒྱུ་མ་ནི་སྟོང་པ་ཉིད་དུ་གོ་བར་བྱེད་པའི་ཕྱིར་རོ། །དྲིལ་བུ་ནི་ཤེས་
རབ་ཀྱི་ཕ་རོལ་ཏུ་ཕྱིན་པའི་རང་བཞིན་ནོ། །ལག་པ་ནི་ལས་ཐམས་ཅད་བྱེད་པའི་ཕྱིར་རོ། །དུར་ཁྲོད་ཀྱི་རས་ནི་ཆོས་ཐམས་ཅད་བདག་མེད་པ་ལ་མ་རིག་པའི་སྒྲིབ་གཡོགས་འཇོམས་པར་བྱེད་པའོ། །གསལ་ཤིང་གིས་ཕུག་པ་ཞེས་བྱ་བ་ནི་དངོས་པོ་ཐམས་ཅད་སྟོང་པ་ཉིད་དུ་ཕུག་པ་ཡིན་ནོ་ཞེས་རྟོགས་པར་བྱ་བའི་ཕྱིར་རོ། །མེ་ཐབ་ཅེས་བྱ་བ་ནི་ཆོས་ཐམས་ཅད་འོད་གསལ་བ་ཉིད་མཚོན་པར་བྱེད་པའོ། །ཙ་ཤ་ཀ་ནི་སྙིང་རྗེ་བདུད་རྩིས་བཀང་བའོ། །སྡིགས་མཛུབ་ནི་བདུད་རྣམས་ལ་ཐོ་འཚམ་པར་བྱེད་པའི་ཕྱིར་རོ། །འཕན་རྩེ་གསུམ་པ་ནི་ལུས་དང་ངག་དང་ཡིད་རྣམས་ཀྱི་ངོ་བོ་གཅིག་ཏུ་རྟོགས་པར་བྱེད་པའོ། །རླུང་གི་རས་ནི་ཆོས་ཐམས་ཅད་སྒྱུ་མར་མཚོན་པར་བྱེད་པའོ། །གླང་པོ་ཆེའི་པགས་པ་ཞེས་བྱ་བ་ནི་གཏི་མུག་གླང་པོ་ཆེའོ། །ཞབས་གཡས་པ་རྣམས་སུ་མི་ལ་སོགས་པ་བརྒྱད་ནི་དངོས་གྲུབ་ཆེན་པོ་བརྒྱད་རྣམ་པར་དག་པའོ། །ཞབས་གཡོན་པ་རྣམས་སུ་བྱ་རྒོད་ལ་སོགས་པ་བརྒྱད་ནི་དབང་ཕྱུག་ཆེན་པོ་བརྒྱད་རྣམ་པར་དག་པའོ། །ཞལ་དགུ་ནི་ཡན་ལག་དགུའི་ཆོས་སྟོན་པས་སེམས་ཅན་ཡོངས་སུ་སྨིན་པར་བྱེད་པས་ནའོ། །ཁམས་གསུམ་པ་རྣམས་ལ་བདག་ཉིད་ཡིན་པའི་ཕྱིར་མ་ཧེའི་ཞལ་ལོ། །བདེན་པ་གཉིས་རྣམ་པར་དག་པས་རྭ་གཉིས་སོ། །ཕྱག་རྒྱ་ལྔ་ཞེས་བྱ་བ་ནི་དེ་བཞིན་གཤེགས་པའི་ལྔའི་རང་བཞིན་ནོ། །སངས་རྒྱས་ཀྱི་ཆོས་ཀྱིས་སེམས་ཅན་རྣམས་འཚེད་པར་བྱེད་པས་སྟེང་གི་ཞལ་དམར་པོ་ཁྲག་འཛག་པའོ། །འཇམ་དཔལ་གྱི་སྤྲུལ་པ་མཚོན་པའི་ཞལ་དགུ་པ་སེར་པོའོ། །གཞོན་ནུའི་རྒྱན་གྱིས་བརྒྱན་པ་ནི་གཞོན་ནུའི་ངོ་བོའི་ཕྱིར་རོ། །ཟུར་ཕུད་ལྔའི་ཐོད་ཅན་ནི་རྣམ་པ་ལྔ་རྣམ་པར་དག་པས་སོ། །དུས་གསུམ་དུ་གཟིགས་པར་བྱེད་པའི་ཕྱིར་སྤྱན་གསུམ་མོ། །ལྷའི་རྣལ་འབྱོར་ལ་སོགས་པས་དེ་ལྟར་བདག་ཉིད་རྣམ་པར་བལྟས་ལ། ཇི་སྲིད་ཡིད་ནི་མི་སྐྱོ་བར། །དེ་སྲིད་རྣལ་འབྱོར་པས་སྔགས་བཟླ། །སྔགས་ཀྱི་ཡི་གེ་གང་དག་བཟླས་པ་དེ་དག་རང་གི་སྙིང་གར་ཉི་མའི་དཀྱིལ་འཁོར་གྱི་སྟེང་དུ་གཡས་ཕྱོགས་སུ་བསྐོར་བས་ཟླུམ་པོ་བྱས་པ་འོད་ཟེར་དང་བཅས་པ་རྣམས་བལྟ་ཞིང༌། །དབུགས་བྱུང་བ་སྒོའི་བུ་ག་ནས་བྱུང་བ་སྤྲོ་བའི་སྦྱོར་བས་འགྲོ་བའི་དོན་བྱས་ནས། ཡང་བསྡུས་ལ་དབུགས་རྔུབ་པའི་སྣའི་བུག་ནས་བཅུག་ལ་གནས་པའོ་ཞེས་ཡང་དང་ཡང་དུ་ཇི་སྲིད་མི་སྐྱོ་བའི་མཐར་ཐུག་པར་ཆོ་ག་འདི་ཉིད་ཀྱིས་བཟླས་པར་བྱའོ། །དེ་ནས་སྐྱོ་ན་ཆོ་ག་ཇི་ལྟ་བ་བཞིན་དུ་གཏོར་མ་བྱིན་ལ་ཡེ་ཤེས་
སེམས་དཔའ་གཤེགས་སུ་གསོལ་ལ་ལྷའི་རྣལ་འབྱོར་གྱིས་གནས་པར་བྱའོ། །འདི་ནི་རྣལ་འབྱོར་གྱི་རྒྱུད་ལས་རྡོ་རྗེ་འཇིགས་བྱེད་བསྒོམ་པའི་རྟོག་པ་སྟེ་བཞི་བ་བཤད་པའོ།། །།
ལྔ་པ། བྲིས་སྐུའི་ཆོ་གའི་རྟོག་པའི་བཤད་པ།
ལྷའི་བསྒོམ་པ་དེ་ཉིད་གསལ་པོར་བྱ་བའི་དོན་དུ་དེ་ནས་ཞེས་བྱ་བ་ལ་སོགས་པ་རས་རིས་ཀྱི་རྟོག་པ་གསུངས་པ། དེ་ནས་ཞེས་བྱ་བ་ལ་སོགས་པ་ནི་གོ་སླའོ། །རྣམ་པར་རྟོག་པ་མེད་པ་ཞེས་བྱ་བ་ནི་དེ་ཁོ་ན་ཉིད་ཤེས་པའོ། །རི་མོ་མཁན་བཟང་པོ་ཞེས་བྱ་བ་ནི་དམ་ཚིག་བསྟེན་པའོ། །གསང་བ་ཞེས་བྱ་བ་ནི་ཏིང་ངེ་འཛིན་མ་འཁྲུལ་བའོ། །བྱང་བ་ཞེས་བྱ་བ་ནི་རི་མོའི་ལས་ལའོ། །དཔའ་བོའི་རིམ་པ་ཞེས་བྱ་བ་ནི་ཆང་དང་ཤ་ལ་ཉེ་བར་རོལ་ཅིང་དགའ་བའི་སེམས་སོ། །དུད་ཆེན་པོ་ཕྲེང་བ་ཞེས་བྱ་བ་ནི་དུང་ཆེན་པོའི་ཕྲེང་བ་སྟེ་དེ་རྣམ་པར་སྦྱང་བར་བྱས་ནས་སོ། །དེ་ལ་འདི་ནི་རྣམ་པར་སྦྱང་བའི་མན་ངག་སྟེ་རི་ལུ་སོ་སོར་ཧཱུཾ་ལས་དཔལ་རྡོ་རྗེ་འཇིག་བྱེད་ཀྱི་རྣམ་པར་བལྟས་ནས་སམ། ཡང་ན་ཁྲག་འཛག་པའི་མི་མགོའི་ཕྲེང་བའི་རང་བཞིན་དུ་རྣམ་པར་བསྒོམ་ལ་གསང་སྔགས་བཟླས་པར་བྱའོ་ཞེས་བྱ་བ་དང་འབྲེལ་ཏོ། །འདི་ནི་རྡོ་རྗེ་འཇིགས་བྱེད་རྣལ་འབྱོར་གྱི་རྒྱུད་ལས་རྟོག་པ་ལྔ་པའི་བཤད་པའོ།། །།
དྲུག་པ། སྦྱིན་སྲེག་གི་ལས་ཀྱི་ཆོ་ག་རྒྱ་ཆེ་བའི་རྟོག་པའི་བཤད་པ།
སྦྱིན་སྲེག་ལ་རབ་ཆགས་པ་ཡི། །སེམས་ཅན་རྣམས་ལ་ཆོ་ག་མཛད། །ལས་རྣམས་ཐམས་ཅད་རབ་བསྒྲུབ་པར། །དཔལ་ལྡན་རྡོ་རྗེ་སེམས་དཔས་བསྟན། །སྦྱིན་སྲེག་གི་ལས་ཀྱི་ཆོ་ག་ཞེས་བྱ་བ་ནི་གོ་སླའོ། །གང་གིས་བསད་པར་འདོད་ན་ཞེས་བྱ་བ་ནི་གང་གི་ཚེ་བསད་པར་འདོད་པར་ཏེ། རྣལ་འབྱོར་པས་དེའི་ཚེ་དུར་ཁྲོད་དུ་སོང་ནས་བརྟན་པོར། །རྡོ་རྗེ་འཇིགས་བྱེད་ཀྱི་རྣལ་འབྱོར་གྱིས། རོ་བསྲེགས་པའི་མེ་ལ་འཆད་པར་འགྱུར་བའི་རིམ་པས་མེ་ལྷ་ལ་སོགས་པའི་ཞལ་དུ་རྫས་ཀྱི་སྦྱིན་སྲེག་བྱའོ། །ཡང་ན་ཁྱིམ་དུ་གནས་ལ་དབེན་པར་བྱས་ལ་བཅུ་བཞི་ལ་ཟུར་གསུམ་དམར་པོ། སོར་ཉི་ཤུའི་ཚད། སོར་ལྔ་གཉིས་བརྐོས་ལ་རྡོ་རྗེའི་ཕྲེང་བས་བརྒྱན་པའི་མེ་ཐབ་དམར་པོ་བྱས་ནས་འདིར་དུར་ཁྲོད་ཀྱི་མེའམ། གདོལ་པའི་མེའི་དབུས་སུ་པཾ་ལས་བྱུང་བའི་སྣ་ཚོགས་པདྨའི་དབུས་སུ། མེ་གསུམ་པའི་དབུས་རཾ་ལས་བྱུང་བའི་མེ་ལྷ་ཁ་དོག་དཀར་པོ་ཞལ་གསུམ་པ་ཕྱག་དྲུག་པ། ཕྱག་གཡས་ན་ཕྲེང་བ་དང༌། གཞན་གྱིས་མི་འཇིགས་པ་དང༌། གཡོན་པ་དབྱུ་གུ་གསུམ་པ་བསྣམས་པ། གཞན་གྱིས་རིལ་བ་སྤྱི་བླུགས་བསྣམས་པ། གཞན་
གྱིས་གྲི་གུག་དང་ཐོད་པ་བསྣམས་པའོ། །གཡོན་པ་བརྐྱང་བའི་གོམ་པས་གནས་པ། །ཁྲོ་བོ་རྒྱན་གྱིས་བརྒྱན་པ། དེའི་སྙིང་གར་རང་གི་ས་བོན་གནས། དེ་ནས་ཡེ་ཤེས་ཀྱི་མེ་ལྷ་སྤྱན་དྲངས་ལ། མཆོད་ཡོན་དང་ཞབས་བསིལ་ལ་སོགས་པ་ཕུལ་ནས། དམ་ཚིག་པ་བཅུག་ལ་མཆོད་པ་ལ་སོགས་པ་བྱས་ཏེ། དེའི་ཞལ་དུ་ཡི་གེ་རཾ་བཀོད་ལ་ཅུང་ཟད་དབུལ་བར་བྱ་སྟེ། ཨོམ་ཨགྣ་སེ་སྭཱ་ཧཱ། ཞེས་བྱ་བ་ནི་སྔགས་འདིས་སོ། །དེའི་སྙིང་གར་རྡོ་རྗེ་འཇིགས་བྱེད་བསྟན་པའི་གཟུགས་བསྟན་པའི་རིམ་པ་བསམས་ལ། མིག་ལ་སོགས་པ་བྱིན་གྱིས་བརླབ་པ་སྔོན་དུ་འགྲོ་བས་ཡེ་ཤེས་སེམས་དཔའ་སྤྱན་དྲངས་པ་ལ་སོགས་པ་བྱས་ནས། མཆོད་པ་ལ་སོགས་པ་བྱས་ལ་དེའི་ཞལ་དུ་ཡི་གེ་རཾ་བཀོད་ལ། བདག་ཉིད་རྡོ་རྗེ་འཇིགས་བྱེད་ཁ་དོག་དང་ལྡན་པའི་རྣལ་འབྱོར་དང་ལྡན་པས་སྦྱིན་རྫས་སྲེག་ནས་གསུངས་པ་ལྟར་འགྱུར་རོ། །བསང་དང་བསྐྲད་པ་དང༌། དབྱེ་བ་ལ་སོགས་པ་དྲག་ཤུལ་སྤྱོད་པའི་ལས་རྣམས་ནི་བཅུ་བཞི་ལ་མ་རུངས་པའི་སེམས་ཀྱིས་ཞེས་བྱ་བ་ནི་ཁྱད་པར་རོ། །བསད་པའི་མེ་ཐབ་ཇི་ལྟ་བར་དབྱེ་བའི་ཡང་ངོ༌། །དེ་ནས་བསྐྲད་པར་འདོད་ན་ཞེས་བྱ་བ་ནི་གང་གི་ཚེ་བསྐྲད་པར་འདོད་པ་དེའི་ཚེ། ཁྲུ་དོའི་ཚད་ལ་ཁྲུ་གང་ཙམ་བརྐོས་ལ། རྡོ་རྗེའི་ཕྲེང་བས་བརྒྱན་པ་སྔོན་པོ་སྟེ། དེར་གསུངས་པ་ཡི་རིམ་པ་ཡིས། །ཐམས་ཅད་ལས་ལ་སྦྱིན་སྲེག་བྱའོ། །དེ་ནས་ཞི་བར་འདོད་ན་ཡང་ཞེས་བྱ་བ་ནི། ཡར་ངོ་ཚེས་གཅིག་ལ་ཁྲུ་གང་བའི་ཚད་ལ་ཁྲུ་ཕྱེད་བྲུས་པ་ཟླུམ་པོ་དཀར་པོ་འཁོར་ལོའི་ཕྲེང་བས་བརྒྱན་པའི་མེ་ཐབ་བྱས་ནས་ནད་སོགས་ཞི་བར་བྱ་བར་འདོད་པས་ཞེས་བྱ་བ་ནི་ཞི་བ་དགེ་བའི་སེམས་ཀྱིས་རྡོ་རྗེ་འཇིགས་བྱེད་ཁ་དོག་དཀར་པོའི་རྣལ་འབྱོར་གྱིས་སྔར་བཞིན་དུ་ཐམས་ཅད་མེ་ཐབ་བྱས་ལ། གསུངས་པའི་རྫས་ཀྱིས་སྦྱིན་སྲེག་བྱས་ན་ཞི་བར་འགྱུར་རོ། །དེ་ནས་རྒྱས་པར་འདོད་ན་ཞེས་བྱ་བ་ནི་དེའི་ཚེ་ཟུར་བཞི་པའི་སེར་པོ་ཁྲུ་གཉིས་པའི་ཚད་ལ་ཁྲུ་གང་ཙམ་བྲུས་པ་རིན་པོ་ཆེའི་ཕྲེང་བས་བསྐོར་བའི་སྦྱིན་སྲེག་གི་ཐབ་ཏུ་སྔར་བཞིན་དུ་ཐམས་ཅད་བྱས་ལ་རྡོ་རྗེ་འཇིགས་བྱེད་སེར་པོའི་རྣལ་འབྱོར་གྱིས་ཁ་བྱང་ཅུ་བལྟས་ཏེ་རྒྱས་པའི་སེམས་ཀྱིས་ཟླ་བ་ཉ་ལ་གསུངས་པའི་རྫས་རྣམས་ཀྱིས་སྦྱིན་སྲེག་བྱས་ན་རྒྱས་པར་འགྱུར་རོ། །ཡང་ན་འགུགས་པར་འདོད་ན་ཞེས་བྱ་བ་ནི་གང་གི་ཚེ་
འགུགས་པར་འདོད་པ་དེའི་ཚེ། བརྒྱད་ལ་སྔར་བཞིན་དུ་ཐབ་ཁུང་བྱས་ལ་སྔར་བཞིན་དུ་ཐམས་ཅད་བྱས་ནས་དེར་རྡོ་རྗེ་འཇིགས་བྱེད་ཁ་དོག་དམར་པོའི་རྣལ་འབྱོར་གྱིས་ཆགས་པའི་སེམས་ཀྱིས་ཁ་ནུབ་ཏུ་བལྟས་ལ་གསུངས་པའི་རྫས་རྣམས་ཀྱིས་སྦྱིན་སྲེག་བྱས་ན་འགུགས་པར་འགྱུར་རོ། །འགུགས་པ་ཇི་ལྟ་བ་དེ་བཞིན་དབང་ལ་ཡང་ངོ༌། །འདི་ནི་རྣལ་འབྱོར་གྱི་རྒྱུད་རྡོ་རྗེ་འཇིགས་བྱེད་ལས་རྟོག་པ་དྲུག་པའི་བཤད་པའོ།། །།
བདུན་པ། བསམ་གཏན་གྱི་ལས་བསྒྲུབ་པ་བརྟག་པའི་རྟོག་པའི་བཤད་པ།
རྟག་ཏུ་སྔགས་པས་བསམ་གཏན་བསྟན། །གསང་སྔགས་བཟླས་པས་དུབ་གྱུར་པ། །དེ་ལ་ཕན་ཕྱིར་ཀུན་མཁྱེན་གྱིས། །རྟོག་པ་བདུན་པ་གསུངས་པ་ཡིན། །དེ་ལ་ཞེས་བྱ་བ་ལ་སོགས་པ་གོ་སླའོ། །བྱེ་བྲག་ནི་འདི་ཁོ་ན་སྟེ། གལ་ཏེ་སྔགས་པས་གསོད་པར་བྱེད་ན། རང་ཉིད་རྡོ་རྗེ་འཇིགས་བྱེད་རྣལ་འབྱོར་བ་དམིགས་ནས། རང་གི་སྙིང་གར་ཉི་མ་ལ་གནས་པའི་ས་བོན་ལས་ངེས་པར་འབྱུང་བའི་ཁྲོ་བོའི་ཚོགས་དུ་མས་བསྐོར་བའི་སྤྲུལ་པའི་གཟུགས་ཀྱིས་སོང་ནས། བསྒྲུབ་བྱའི་སྙིང་གར་སོང་སྟེ། བསྒྲུབ་བྱའི་སྙིང་གར་བཞུགས་ནས། དེ་བྱིན་གྱིས་རློབ་པར་བྱེད་པའོ། །ལྷ་ལེགས་པར་མཆོད་དེ་གསོལ་བ་གདབ་པར་བྱའོ། །འདི་ནི་རྣམ་པ་འདི་ལྟ་བུའི་ལས་བགྱིད་པ། དེས་པ་ཁོ་ནར་དམྱལ་བར་འཆི་བ་ལགས་ཀྱིས། དེ་བས་འདི་ཡོངས་སུ་བོར་ལ་ཁྱེད་ཅག་གཤེགས་ཤིག ། དེས་ན་དེ་དག་བསྲུང་བ་དང་བཅས་པ་རང་གི་གནས་སུ་བཀུག་ནས་མཆོད་ཡོན་ལ་སོགས་པ་ཕུལ་ལ། རང་གི་ཞལ་གྱི་ལམ་ནས་བཅུག་ལ་སྙིང་གའི་ས་བོན་གྱིས་སྦྱར་བ་དང་ལེགས་པར་མཉེས་པར་བྱས་ལ་གཞག་པར་བྱའོ། །བསྲུང་བའི་ལྷ་བཟུང་ནས་ནམ་མཁའ་ལ་དོང་ངོ༌། །དེ་ནས་བསྒྲུབ་བྱའི་ལུས་སྟོང་པར་བལྟས་ལ་ལས་དེ་དག་བྱའོ། །དཔག་ཚད་བརྒྱར་གནས་པའི་སྐྱེས་བུ་ཡང་བཟུང་སྟེ་ཞེས་པ་ནི། ན་ཚོད་དང་མདོག་དང་མཚན་མ་དང༌། གཟུགས་དང་མིང་རྣམས་ཤེས་པར་བྱས་ལ། བསམ་གཏན་བརྩམ་མོ་ཞེས་བྱ་བར་འབྲེལ་ཏོ། །ལག་ན་ལྕགས་ཀྱུ་དང་ཞགས་པ་འཛིན་པ་ཞེས་བྱ་བ་ནི་ལྕགས་ཀྱུ་ཞགས་པ་འཛིན་པའོ། །གཤིན་རྗེ་གཟུགས་ཅན་ཞེས་བྱ་བ་ནི་པདྨ་གཤིན་རྗེ་གཤེད་ཀྱི་གཟུགས་ཞལ་གཅིག་པ་ཕྱག་གཉིས་པའོ། །མ་ཧེའི་གདོང་གི་སྦྱོར་བ་ཞེས་པ་ནི་མ་ཧེའི་ཞལ་གྱི་རྣལ་འབྱོར་དང་ལྡན་པས་སོ། །པདྨ་འདབ་མ་བརྒྱད་པ་ཞེས་བྱ་བ་ནི་དཀར་པོའོ། །དེའི་ཟེ་འབྲུ་ཧྲཱིཿ་ཡི་
ས་བོན་བདུད་རྩི་འཛག་པའོ། །དེའི་འདབ་མ་བརྒྱད་ལ་ཨི་དཀར་པོ་བརྒྱད་དོ། །སྤྱི་བོར་ཨ་ལས་བྱ་བ་ནི་ཡི་གེ་ཨ་ཡོངས་སུ་གྱུར་བ་ལས་ཟླ་བའི་དཀྱིལ་འཁོར་ལ་གནས་པའི་ཡི་གེ་ཨ་ལས་བྱ་བར་འབྲེལ་ཏོ། །འདི་ནི་རྣལ་འབྱོར་གྱི་རྒྱུད་ལས་དཔལ་རྡོ་རྗེ་འཇིགས་བྱེད་ལས་རྟོག་པ་བདུན་པའི་བཤད་པའོ།། །།རྡོ་རྗེ་འཇིགས་བྱེད་རྒྱུད་ལ་ནི། །མདོར་བཤད་གསལ་པོ་བྱས་པ་ལས། །བསོད་ནམས་ཐོབ་པ་གང་ཡིན་པས། །དེ་ཡིས་འགྲོ་བ་རྒྱལ་བར་ཤོག །དཔལ་རྡོ་རྗེ་འཇིགས་བྱེད་ཀྱི་རྒྱུད་ཀྱི་མདོར་བཤད་པ། སློབ་དཔོན་སོ་ན་ཤྲཱིས་མཛད་པ་རྫོགས་སོ།། །།མཁས་པ་ཆེན་པོ་ཏ་ཐཱ་ག་ཏའི་ཞལ་ནས་བརྒྱུད་པའོ།