སྒྲུབ་པའི་ཆོ་ག།
ཞི་བ་ཡེ་ཤེས།
།།ཡི་དམ་བཅས་པ་རྫོགས་པ་དང༌། །ཏིང་ངེ་འཛིན་རྩེ་གཅིག་གྱུར་པའམ། །མཚན་མ་བརྟན་པོ་ཐོབ་པ་ན། །དབེན་པའི་གནས་སུ་སོང་ནས་ནི། །སྔགས་ཀྱི་བརྟུལ་ཞུགས་སྤྱད་པར་བྱ། །སྐུ་གཟུགས་སམ་ནི་མཚན་མ་ལ། །ཏིང་འཛིན་སྤྲོ་བསྡུ་གསལ་བར་བྱ། །སྒྲུབ་རྫས་ལ་ཡང་དེ་བཞིན་ཏེ། །བརྐྱང་བསྐུམ་ཙམ་ཡང་སྤངས་ནས་ནི། །སེམས་ནི་ཅུང་ཟད་ཉམས་མི་བྱ། །ནམ་ཞིག་མཚན་མ་བྱུང་བ་ན། །ཐེ་ཚོམ་མེད་པས་དངོས་གྲུབ་བླང༌། །འདི་ལྟ་སྟེ་བསྙེན་པས་རྟགས་བྱུང་
བ་དང་སྒྲུབ་པ་བརྩམ་པར་བྱ་སྟེ། ཤིན་ཏུ་དབེན་པའི་གནས་སུ་མཎྜལ་བྱ་སྟེ། དེར་ལྷའི་རྟེན་བཞུགས་སུ་གསོལ་ཏེ། མཆོད་པའི་རྫས་དང་དངོས་གྲུབ་ཀྱི་རྫས་ཀྱང་གཞག་གོ །ཡང་མཆོད་པ་གཞན་ཡང་བཤམས་ལ། དང་པོ་བསྙེན་པའི་དུས་ཇི་ལྟ་བ་བཞིན་མཆོད་ནས། དེ་ནས་བདག་དམ་ཚིག་སེམས་དཔར་གསལ་བའི་ཐུགས་ཀ་ནས་ཡི་གེའི་འོད་ཟེར་འཕྲོས་པས། ཕྱོགས་བཅུའི་སངས་རྒྱས་སྤྱན་དྲངས་ནས་སྐུའམ་མཚན་མ་ལ་བསྟིམ་སྟེ། ནམ་སྐུ་འཛུམ་པའམ་མེ་ཏོག་འབར་བའམ། བདུག་པ་དྲི་དང་ལྡན་པའམ་རྫས་ཁོལ་བ་དང༌། དྲོ་བ་དང་དུད་པ་འཐུལ་བ་ན་བརྟན་པའི་སེམས་ཀྱིས་ཐེ་ཚོམ་མེད་པར་མཆོད་པའི་ས་ལྷ་ལ་ཕུལ་ཏེ། ལག་པ་གཡས་ཀྱིས་བླངས་ལ་ཐུགས་ཀར་བསྟིམ། དངོས་གྲུབ་ཀྱི་རྫས་ལག་པ་གཡོན་གྱིས་བླངས་ལ་གཏད་དོ། ཐེ་ཚོམ་སྐྱེས་ན་བར་ཆད་དུ་འགྱུར་རོ། །། འདི་ནི་སྒྲུབ་པ་སྟེ་དངོས་གྲུབ་བླང་བའི་ཐབས་སོ། །དེ་ཕན་ཆད་བརྫུན་དང༌། མ་ཐོས་པའི་ཆོས་མངོན་དུ་འགྱུར་ཏེ། རིག་པ་འཛིན་པའི་ས་ལ་གནས་ནས། འགྲོ་བ་ཇི་ལྟར་འདུལ་བ་བཞིན་དུ་ལས་རྣམ་པ་བཞི་ཐོགས་པ་མེད་དོ། །མཚན་མ་ཇི་ལྟ་བ་བཞིན་མ་བྱུང་ན་ཡང༌། འཇིག་རྟེན་ན་ཚེ་རིང༌། ལོབས་སྐྱེན། ལས་རྣམ་པ་བཞི་འགྲུབ་པོ། །གཞན་དུ་སྐལ་པ་བཟང་པོར་སྦྱོར་རོ། །དེ་ལ་གནས་གསུངས་པ་ནི། རྣམ་པ་སྣ་ཚོགས་རི་དགོན་དང༌། །ཆུ་ཀླུང་འབབ་ཆུ་རྣམས་དང་ནི། །དུར་ཁྲོད་དབེན་ཞིང་ཉམས་དགའ་བར། །སྒྲུབ་པ་དག་ནི་བརྩམ་པར་བྱ། །དེ་ལ་བརྟུལ་ཞུགས་ནི། སྐྱེ་བོ་མེད་པའི་ནགས་ཚལ་དུ། །སྔགས་པས་ལྷ་ཡི་བརྟུལ་ཞུགས་སྤྱད། །ཟས་ལ་གཙང་སྨེ་མི་ལྟ་ཞིང༌། །ཡུལ་ལ་བཟང་ངན་བྱེད་མི་བྱ། །ཏིང་ངེ་འཛིན་ལས་མི་ཉམས་ཤིང༌། །ཕྱག་རྒྱ་བཅའ་བའམ་བཟུང་བ་ནི། །ལྷར་བཅས་འཇིག་རྟེན་ཕྱག་མི་བཙལ། །གླང་པོ་ལ་ཡང་ལམ་མི་གཟུར། །རྐང་པ་བྲག་རིར་ཐོགས་མེད་འགྲོ། །ཁ་ནས་གསང་སྔགས་རྒྱལ་པོ་ཟློས། །འདི་ནི་སྔགས་ཀྱི་བརྟུལ་ཞུགས་བསྟན། །དེ་ལ་མཚན་མ་བཞག་པ་ནི། །མཎྜལ་བྱི་དོར་བྱས་པ་ལ། །ལུགས་མ་རི་མོ་ལ་སོགས་
དང༌། །དེ་བཞིན་བེ་ཅོན་རལ་གྲི་དང༌། །ཏྲི་ཤཱུལ་འཁོར་ལོ་ལ་སོགས་པ། །མཚན་མ་ལེགས་བྱས་མདུན་དུ་གཞག །དེ་ལ་མཆོད་རྫས་ནི། མེ་ཏོག་བདུག་པ་མར་མེ་དྲི། །བཤོས་དང་མཆོད་ཡོན་སོགས་པ་དང༌། །བཟའ་དང་བཅའ་བར་སྦྱར་བ་ཡི། །གཏོར་མ་སྣ་ཚོགས་གཞག་པར་བྱ། །དེ་ལ་དངོས་གྲུབ་ཀྱི་རྫས་ནི། བ་སེར་བ་ཡི་མར་གསར་དང༌། །སྦྲང་རྩི་ཁ་རར་བཅས་པ་དག །ཟ་མ་ཏོག་གམ་པ་རུར་གཞག །དེ་ལ་དམ་ཚིག་གི་ཏིང་ངེ་འཛིན་ནི། བདག་ཉིད་འཇམ་པའི་རྡོ་རྗེར་གསལ། །ཐུགས་ཀའི་ཉི་མའི་སྙིང་པོ་ལ། །བཟླས་པའི་ཡིག་འབྲུ་བསམ་པ་ནི། །ཆུ་ཟླ་དག་གམ་གཟུགས་བརྙན་བཞིན། །གཅིག་དང་དུ་མ་བྲལ་པར་བསྒོམ། །དེ་ལ་འཕྲོ་དང་འདུ་བ་ནི། ཆུ་རླབས་དག་གམ་ཉི་ཟེར་བཞིན། །འོད་ཟེར་འཕྲོས་པའི་སྦྱོར་བ་ལས། །སངས་རྒྱས་ཀུན་གྱི་སྐུ་གསུང་ཐུགས། །འོད་ཟེར་ཚུལ་དུ་བསྡུས་ནས་ནི། །མཚན་མའམ་དངོས་གྲུབ་རྟེན་ལ་བསྟིམ། །དེ་ལ་དངོས་གྲུབ་ཀྱི་རྟགས་ནི། སྐུ་གཟུགས་འཛུམ་དང་མཚན་མ་འབར། །མར་ནི་གོལ་བ་མཆོག་ཏུ་བཤད། །དུད་པ་འཐུལ་བ་འབྲིང་ཡིན་ཏེ། །དྲོ་བ་དག་ནི་ཐ་མའོ། །དེ་ལ་དངོས་གྲུབ་བླང་བའི་ཐབས་ནི། དང་པོར་མཆོད་རྫས་ལྷ་ལ་དབུལ། །དེ་ནས་སྒྲུབ་རྫས་བདག་ཉིད་བཏུང༌། །དེ་ལ་དངོས་གྲུབ་ཀྱི་གེགས་ནི། སེམས་གཡེངས་པའམ་རྨུགས་དང་ཉིད། །དངས་པ་བར་ཆད་འགྱུར་བའམ། །ཐེ་ཚོམ་སྐྱེས་ན་དངོས་གྲུབ་མེད། །དེ་ལ་གྲུབ་པའི་དུས་ནི། བསྙེན་པའི་རྫོགས་གྱུར་ཕྱིན་ཆད་ནི། །ཟླ་བ་དྲུག་གིས་འགྲུབ་པར་བཤད། །གལ་ཏེ་གྲུབ་པར་མ་གྱུར་ན། །དེ་བཞིན་ལན་གསུམ་བརྩམ་པར་བྱ། །དེས་ཀྱང་གྲུབ་པར་མ་གྱུར་ན། །དྲག་ཤུལ་ཚུལ་བཞིན་ཞག་བདུན་བསྒྲུབ། །དེ་ལས་ཕྱིར་འབད་མེད་པར་བཤད། །དེ་ལ་དྲག་ཤུལ་གྱི་ཏིང་ངེ་འཛིན་ནི་འདི་ཡིན་ཏེ། ཀྱོ་བ་རྡོ་རྗེ་འབར་བ་ནི། །གནམ་ལྕགས་ཞུན་མ་འདྲ་བ་དག །རང་གི་སྙིང་ལས་འོད་འཕྲོས་ཏེ། །ཀྱོ་བ་ཡེ་ཤེས་ཐུགས་ནས་དྲངས། །རྡོ་རྗེ་འབར་བས་དབབ་བྱས་ནས། །ཡང་དང་ཡང་དུ་གཞུག་པར་བྱ། །སྒྲུབ་པའི་ཆོ་ག་སློབ་དཔོན་ཞི་བའི་ཡེ་ཤེས་ཀྱིས་མཛད་པ་རྫོགས་སོ།།