དཔལ་རྡོ་རྗེ་འཇིགས་བྱེད་ཀྱི་སྒྲུབ་ཐབས།
ལ་ལི་ཏ།
རྒྱ་གར་སྐད་དུ། ཤྲཱི་བཛྲ་བྷཻ་ར་ཝ་སཱ་དྷ་ན། བོད་སྐད་དུ། དཔལ་རྡོ་རྗེ་འཇིགས་བྱེད་ཀྱི་སྒྲུབ་ཐབས། །དཔལ་གཤིན་རྗེ་གཤེད་ལ་ཕྱག་འཚལ་ལོ། །རྣམ་རྟོག་དྲ་བ་རབ་བསལ་ཞིང༌། །ཡེ་ཤེས་རྒྱ་མཚོ་བློ་མངའ་བའི། །འཇམ་པའི་དབྱངས་ལ་རབ་བཏུད་དེ། །རྡོ་རྗེ་འཇིགས་བྱེད་སྒྲུབ་ཐབས་བཤད། །དང་པོར་རེ་ཞིག་སྔགས་པ་ཡིས། །དུར་ཁྲོད་དང་ནི་ཆུ་ཡི་འགྲམ། །ཤིང་གཅིག་དང་ནི་མཚན་མ་གཅིག །ལམ་གྱི་བཞི་མདོ་རི་བོའི་རྩེ། །ཁང་སྟོང་དང་ནི་མ་མོའི་གནས། །ལྷ་རྣམས་ཡང་དག་རྩོད་པའི་ས། །གྲོང་ཁྱེར་གྲོང་གི་མཐའ་རྣམས་དང༌།། རང་ཉིད་རྗེས་དགའི་གནས་འདུག་ནས། །འཇམ་དབྱངས་ཁྲོ་བོ་བསྒྲུབ་པར་བྱ། །རང་གི་སྙིང་གར་པདྨ་ལ། །ཉི་མ་ལ་གནས་ཡི་གེ་མཆོག །ཐུགས་ཀྱི་བདག་ཉིད་རྣམ་བསྒོམས་ཏེ། །བླ་མ་དང་བཅས་ལྷ་དམིགས་བྱ། །ཡེ་ཤེས་ལས་གཞན་ཚོགས་ཀྱི་ཕྱིར། །ཕྱག་འཚལ་མཆོད་ཅིང་བསྔོ་མཐར་ཐུག །རྣམ་བདུན་བསགས་ནས་དེ་རྗེས་སུ། །ཚངས་པའི་གནས་ནི་བསྒོམ་པར་བྱ། །ཨོཾ་སྭ་བྷཱ་ཝ་ཤུདྡྷཿ་སརྦ་དྷརྨཱཿ་སྭ་བྷཱ་ཝ་ཤུདྡྷོ྅ཧཾ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། སྟོང་པ་ཉིད་དུ་རྣམ་པ་བསྒོམས་ནས། །ཡཾ་རཾ་ཝཾ་ལཾ་ཡི་གེ་ལས། །རླུང་དང་མེ་དང་ཆུ་དང་ནི། །དབང་ཆེན་དཀྱིལ་འཁོར་བསམ་པར་བྱ། །དེར་ནི་ཧཱུཾ་གི་རྣམ་པ་ལས། །རྡོ་རྗེའི་ས་གཞི་ར་བ་དང༌། །དེ་བཞིན་རྡོ་རྗེའི་གུར་དང་ནི། །བླ་རེ་ཡང་ནི་བསམ་པར་བྱ། །དེ་དབུས་གནོད་མཛེས་རྒྱལ་པོ་ནི། །བཀའ་ཡི་འཁོར་ལོ་བསྒོམ་པར་བྱ། །རྩིབས་བཅུ་རབ་འབར་ཅུང་ཟད་སེར། །ཁྲོ་བོ་བཅུ་དང་
བཅས་པ་བསམ། །གནོད་མཛེས་ལ་སོགས་ཁྲོ་བོའི་ཚོགས། །སྣ་ཚོགས་པདྨ་ཉི་ཟླ་ལ། །གཡོན་བརྐྱང་ཞབས་ཀྱིས་ཡང་དག་གནས། །ཞལ་གསུམ་ཕྱག་དྲུག་དང་པོ་ཡི། །ཕྱག་གཉིས་རང་གི་ཤེས་རབ་འཁྱུད། །འདི་ལྟ་བུ་ཡི་འཁོར་ལོ་འདི། །རྡོ་རྗེ་འབར་བའི་སྤྲིན་ལྟ་བུས།། བགེགས་ཀྱི་ཚོགས་རྣམས་རབ་ཏུ་འཇོམས། །གནོད་མཛེས་དང་ནི་གཤིན་རྗེ་གཤེད། །གཞན་གྱིས་མི་ཐུབ་རྟ་མགྲིན་དང༌། །བདུད་རྩི་འཁྱིལ་རྣམས་དབུས་དང་ནི། །ཤར་ལ་སོགས་པའི་ཕྱོགས་སུ་བསམ། །འདོད་པ་དབྱུག་པ་སྟོབས་མི་གཡོ། །བྱིན་ཟ་ལ་སོགས་མཚམས་སུའོ། །གཙུག་ཏོར་རྡོ་རྗེ་ས་འོག་ནི། །དེ་བཞིན་སྟེང་དང་འོག་ཏུ་བསམ། །དབུས་དང་ཤར་དང་ལྷོ་དང་ནུབ། །དེ་བཞིན་སྟེང་གི་ཁྲོ་བོ་རྣམས། །མཐིང་དང་དཀར་པོ་དམར་པོ་དང༌། །དེ་ལྟར་སྔོན་པོ་དཀར་དང་དམར། །དཀར་པོ་མཐིང་ག་དམར་པོ་དང༌། །དེ་བཞིན་དམར་དང་མཐིང་ག་དཀར། །སེར་ལྗང་མཐིང་ག་དཀར་པོ་ནི། །གནོད་སྦྱིན་བདེན་བྲལ་རླུང་གི་ཕྱོགས། །མདོག་རྣམས་དབང་པོའི་ཕྱོགས་ལྟར་ཏེ། །དེ་བཞིན་བྱིན་ཟ་དབང་ལྡན་དང༌། །འོག་རྣམས་དབུས་མ་ཇི་ལྟ་བུའི། །རྡོ་རྗེ་ཐོ་བ་བེ་ཅོན་དང༌། །དེ་བཞིན་པདྨ་རྡོ་རྗེ་དང༌། །ལྕགས་ཀྱུ་དབྱུག་པ་དཔལ་རྩེ་དང༌། །རལ་གྲི་འཁོར་ལོ་རྡོ་རྗེ་རྣམས། །གཡས་ཀྱི་དང་པོའི་རིམ་བཞིན་དུའོ། །དེ་བཞིན་གཡོན་པ་རལ་གྲི་སྟེ། །མི་གཡོ་བ་ལ་རྡོ་རྗེའོ། །གཡས་གཡོན་པར་མ་ཐམས་ཅད་ལ། །རིན་པོ་ཆེ་དང་པདྨས་སྦྲེལ། །བདག་པོའི་གཡས་གཡོན་ཐ་མར་ནི། །ལྕགས་ཀྱུ་དང་ནི་ཞགས་པའོ། །དེ་བཞིན་དུ་ནི་རྟ་མགྲིན་ལ། །པདྨའི་གནས་སུ་འཁོར་ལོའོ། །གནོད་མཛེས་ལ་སོགས་ཐམས་ཅད་ལ། །ཐུགས་ཀྱི་བདག་པོས་རྒྱས་བཏབ་སྟེ། །གཤིན་རྗེ་གཤེད་དང་རྟ་མགྲིན་ལ། །དེ་བཞིན་སྐུ་དང་གསུང་གིས་སོ། །དེ་ནས་བདག་པོ་ཡོངས་གྱུར་ནས། །རྡོ་རྗེ་སེམས་དཔའ་བསམ་བྱས་ཏེ། །དཀར་དང་མཐིང་ག་དམར་པོའི་ཞལ། །ཕྱག་དྲུག་དང་པོས་རིག་མ་འཁྱུད། །ལྷག་མ་རྡོ་རྗེ་རལ་གྲི་དང༌། །རིན་ཆེན་པདྨ་འཛིན་པའོ། །དེ་ནས་ཆོས་ཀྱི་འབྱུང་གནས་ནི། །མདོག་དཀར་གྱེན་བསྒྲེང་གཟུགས་ཅན་ལ། །ཆུ་སྐྱེས་སྣ་ཚོགས་རྡོ་རྗེ་ཡིས། །རྣམ་པར་རྒྱལ་བ་མཁས་པས་བསྒོམ། །དེར་ནི་བྷྲཱུཾ་དང་འཁོར་ལོའོ། །རྡོ་རྗེ་འཆང་དང་འདྲ་བ་ཡི། །རྟག་པའི་རྒྱལ་
པོ་བསམ་པ་ནི། །རྡོ་རྗེ་ལ་གནས་འཁོར་ལོའོ། །དེ་ལས་བྱུང་བའི་གཞལ་ཡས་ཁང༌། །གྲུ་བཞི་པ་ལ་སྒོ་བཞི་པ། །རྟ་བབས་བཞི་ཡིས་རྣམ་པར་མཛེས། །དྲིལ་བུ་འཕན་བཅིང་ལ་སོགས་དང༌། །མེ་ཏོག་ཕྲེང་བས་རབ་ཏུ་བརྒྱན། །གྲྭ་རྣམས་དང་ནི་ཐམས་ཅད་དང༌། །སྒོ་ཁྱུད་དག་གི་གནས་སུ་ཡང༌།། རྡོ་རྗེ་རིན་པོ་ཆེ་ཡིས་བརྒྱན། །དེ་བཞིན་ཟླ་བ་ཕྱེད་པས་སོ། །དེ་ཡི་དབུས་སུ་འཁོར་ལོ་ནི། །རེའུ་མིག་དགུ་པ་ཟླུམ་པོ་སྟེ། །སྒོ་གཅིག་དག་ནི་བཞག་ནས་ནི། །ལྷག་མའི་སྒོ་ནི་གཅད་པར་བྱ། །སྒོ་བཞི་དང་ནི་མཚམས་རྣམས་སུ། །ཡི་དགས་ཆེན་པོ་དགོད་པར་བྱ། །དེ་དབུས་དབྱངས་ཡིག་དང་པོ་ལས། །བྱུང་བའི་ཟླ་བའི་དཀྱིལ་འཁོར་བསམ། །དེར་ནི་དྷཱིཿ་ལས་གྱུར་པ་ཡི། །འཇམ་དཔལ་གཞོན་ནུ་བསམ་པ་ནི། །གཞོན་ནུའི་རྒྱན་གྱིས་རྣམ་པར་བརྒྱན། །ཞལ་གཅིག་པ་ལ་ཕྱག་གཉིས་ཏེ། །ཅུང་ཟད་སེར་པོ་ཕྱག་གཡས་ན། །རལ་གྲི་གཡོན་གླེགས་བམ་བསྣམས། །དེ་ཡི་ཐུགས་ཀར་དབྱངས་ཡིག་ནི། །བཅུ་དྲུག་པ་ལས་བྱུང་བ་ཡི། །ཉི་མའི་དཀྱིལ་འཁོར་རྣམ་བསམས་ནས། །དེ་ཡི་འོད་ཀྱིས་ཕྱོགས་བཅུ་ན། །བཞུགས་པའི་བདེ་གཤེགས་སྲས་བཅས་དང༌། །རིག་པའི་ལྷ་མོ་ཁྲོ་བོའི་ཚོགས། །སྤྱན་དྲངས་འཇམ་དཔལ་དང་བཅས་པ། །སངས་རྒྱས་ཚོགས་ཀུན་རབ་བཞུགས་པས། །འོད་ཟེར་དྲུག་པོས་ཁྱབ་པ་ཡི། །ཉི་མའི་དཀྱིལ་འཁོར་བསམ་པར་བྱ། །དེ་སྟེང་ཁ་དོག་དཀར་པོ་ཧཱུཾ། །འོད་ཟེར་ལྔ་དང་ལྡན་པ་བསམ། །དེ་ཡི་འོད་ཀྱིས་སངས་རྒྱས་ཚོགས། །སྔོན་བཞིན་སྤྱན་དྲངས་རབ་བཅུག་ནས། །རྡོ་རྗེ་ཆེན་པོ་རྣམ་པར་བསྒོམ། །དེ་ཡི་འོད་ཟེར་ལས་བྱུང་བའི། །སངས་རྒྱས་སྲས་བཅས་ཁྲོ་བོ་དང༌། །རིག་པའི་ལྷ་མོ་ལ་སོགས་པས། །ནམ་མཁའི་ཁམས་ཀུན་ཁྱབ་པར་བསམ། །འགྲོ་ཀུན་བྱང་ཆུབ་ལ་བཀོད་དེ། །དེ་རྣམས་དང་བཅས་རྡོ་རྗེ་ལ། །བཅུག་པས་བདག་ཉིད་བཅོམ་ལྡན་འདས། །འཇིགས་བྱེད་སྐུ་མདོག་ནག་པོར་བསམ། །ཞལ་དགུ་ཕྱག་ནི་སུམ་ཅུ་བཞི། །བཅུ་དྲུག་ཞབས་ལ་གཡོན་བརྐྱང་བ། །གཅེར་བུ་མཚན་མ་གྱེན་དུ་འགྲེང༌། །ལྗགས་བརྐྱང་གད་མོ་རྣམ་པར་སྒྲོག །སྤྱན་གསུམ་དཔྲལ་བའི་ཁྲོ་གཉེར་ཅན། །བསྐལ་པའི་མེ་ལྟར་འོད་འབར་ཞིང༌། །ཐོད་པས་བརྒྱན་ཞིང་ཕེཾ་གྱི་སྒྲ། །སྒྲོགས་
ཤིང་འཇིགས་པ་བསྡིགས་པར་མཛད། །གསུས་པ་ཆེ་ཞིང་སྐྲ་བརྫེས་པ། །དང་པོའི་ཞལ་ནི་མ་ཧེའི་སྟེ། །ཁ་དོག་ནག་པོ་ཅུང་ཟད་ཁྲོ། །གཡས་ཀྱི་རྭ་ཡི་ཞལ་གསུམ་ནི། །དང་པོ་མཐིང་ག་གཡས་དམར་པོ། །གཡོན་སེར་ཤིན་ཏུ་ཁྲོ་བའོ། །དེ་བཞིན་གཡོན་གྱི་རྩ་བའི་ཞལ། །དཀར་པོ་དུད་ཀ་དེ་བཞིན་དུ། །ནག་པོ་ཤིན་ཏུ་ཁྲོས་པ་ཡིས། །རྭ་གཉིས་དབུས་སུ་ཞལ་དམར་པོ། །འཇིགས་བྱེད་ཞལ་ནས་ཁྲག་འཛག་བསམ། །དེ་སྟེང་འཇམ་དཔལ་གཞོན་ནུའི་ཞལ། །སེར་བ་ཅུང་ཟད་ཁྲོ་བ་སྟེ། །ཟུར་ཕུད་ལྔ་པ་གཞོན་ནུ་ཡི། །རྒྱན་གྱིས་ལེགས་པར་རྣམ་པར་བརྒྱན། །ཞལ་རྣམས་ཀུན་ཀྱང་སྤྱན་གསུམ་པོ། །གཡས་གཡོན་དང་པོའི་ཕྱག་གཉིས་ཀྱིས། །གླང་ཆེན་པགས་པ་རློན་པ་བསྣམས། །གྲི་གུག་བྷིནྡི་པཱ་ལ་དང༌། །གཏུན་ཤིང་ཆུ་གྲི་དེ་བཞིན་དུ། །ཀརྞ་ཡ་དང་སྟ་རེ་དང༌། །མདུང་དང་མདའ་དང་ལྕགས་ཀྱུ་དང༌། །དབྱུག་པ་ཁ་ཊྭཱཾ་འཁོར་ལོ་དང༌། །རྡོ་རྗེ་རྡོ་རྗེ་ཐོ་བ་དང༌། །རལ་གྲི་རྔེའུ་ཆུང་གཡས་པ་ཡི། །ཕྱག་མཚན་རྣམས་ནི་རིམ་བཞིན་བསམ། །དེ་བཞིན་གཡོན་གྱི་ཕྱག་རྣམས་ནི། །ཐོད་པ་དང་ནི་མགོ་བོ་དང༌། །དེ་བཞིན་དུ་ནི་རྐང་པ་དང༌། །ཕུབ་དང་དེ་བཞིན་ཞགས་པ་གཞུ། །རྒྱུ་མ་དྲིལ་བུ་མིའི་ལག་པ། །དེ་བཞིན་དུར་ཁྲོད་རས་དང་ནི། །རྩེ་གསུམ་མཚོན་གཙུག་སྐྱེས་བུ་དང༌། །མེ་སྣོད་ཐོད་པའི་དུམ་བུ་དང༌། །སྡིགས་མཛུབ་རྩེ་གསུམ་པ་དན་དང༌། །རླུང་གི་རས་རྣམས་རིམ་བཞིན་བསྣམས། །མི་དང་མ་ཧེ་གླང་དང་ནི། །བོང་བུ་རྔ་མོ་དེ་བཞིན་ཁྱི། །ཐུག་རེ་ཅེ་སྤྱང་གཡས་པ་ཡི། །ཞབས་རྣམས་ཀྱིས་ནི་རིམ་པས་མནན། །དེ་བཞིན་གཡོན་པའི་ཞབས་རྣམས་ཀྱིས། །བྱ་རྒོད་འུག་པ་བྱ་རོག་དང༌། །ནེ་ཙོ་ཁྲ་དང་ནམ་མཁའ་ལྡིང༌། །ཁྱིམ་བྱ་བཞད་རྣམས་རིམ་བཞིན་མནན། །དེ་ནས་དབང་བསྐུར་སྐྱེ་མཆེད་དག །བྱིན་གྱིས་བརླབ་ཅིང་ལུས་ལ་སོགས། སྐུ་གསུང་ཐུགས་ཀྱི་རྡོ་རྗེ་བསྒོམ། །དེ་བཞིན་ཡེ་ཤེས་སེམས་དཔར་བསམ། །དེ་ནས་བློ་དང་ལྡན་པ་ཡིས། །རྡོ་རྗེ་འཇིགས་བྱེད་ཆེན་པོ་ནི། །སྤྱན་དྲངས་ཡོན་ཆབ་ལ་སོགས་པས། །རིམ་བཞིན་མཆོད་པས་མཉེས་པར་བྱ། །ཨོཾ་ཧྲཱིཿ་ཧ་བྷོ་མ་ཧཱ་ཀྲོ་དྷ་ཨཱ་གྩྪ། ཨ་སྨཏ་པཱུ་ཛ་པྲ་ཏི་གྲྀཧྞ་ཏུ་པྲ་སཱདྷ། མེ་དྷི་མཾ་ཀུ་རུ་སྭཱ་ཧཱ། སྤྱན་དྲང་བའི་སྔགས་སོ། །ཨོཾ་ཧྲཱིཿ་ཥྚྲྀཿ་ཨ།
མཆོད་ཡོན་གྱི་སྔགས་སོ། །ཨོཾ་ཧཱུཾ་ཧཱུཾ་ཕཊ་ཕཊ། ཞབས་བསིལ་བའི་སྔགས་སོ། །ཨོཾ་ཝི་ཀྲྀ་ཏཱ་ན་ན་དུཥྚཱཾ་སཏྭ་ད་མ་ཀ་གཿ་གཿ་དྲིའི་སྔགས་སོ། །ཨོཾ་ཀུ་མཱ་ར་རཱུ་པི་ཎི་ཛ་ཛ་ཧཱུཾ་ཧ། མེ་ཏོག་གི་སྔགས་སོ། །ཨོཾ་ཧྲཱིཿ་ཧ་ཧོ་ཕཊ། བདུག་པའི་སྔགས་སོ། །ཨོཾ་དཱིཔྟ་ལོ་ཙ་ནེ་བི་ཀྲྀ་ཏཱ་ན་ན་མ་ཧཱ་ཨཊྚ་ཧ་ས་ན་དི་ནི་དཱིཔྟཱ་ཡ་སྭཱ་ཧཱ། མར་མེའི་སྔགས་སོ། །ཨོཾ་བཛྲ་ནཻ་ཝི་དྱེ་ཨཱཿ་ཧཱུཾ་སྭཱ་ཧཱ། ལྷ་བཤོས་ཀྱི་སྔགས་སོ། །ཨོཾ་ཀཱ་ལ་རཱུ་པ་སརྦ་སཏྭ་ད་མ་ཀ་མ་ཧཱ་བྷཱུ་ཏ་པ་ཏི་ཨི་དཾ་པ་ལིཾ་གྲྀཧྞ་གྲྀཧྞ་པ་ཡ་སྭཱ་ཧཱ། གཏོར་མའི་སྔགས་སོ། །དེ་ནས་ཡང་དག་སྔགས་བཟླས་བྱ། །བཟླས་དུས་རང་གི་སྙིང་གར་ནི། །ཉི་མའི་དཀྱིལ་འཁོར་རྣམ་བསམས་ཏེ། །རང་གི་གསང་སྔགས་རྣམ་བཀོད་བྱ། །དེ་རྗེས་མ་ཡེངས་སེམས་ཀྱིས་ནི། །འབར་བའི་གསང་སྔགས་བཟླས་པར་བྱ། །ཨོཾ་ཡ་མ་རཱ་ཛ། ས་དོ་མེ་ཡེ། ཡ་མེ་དོ་རུ། ཎ་ཡོ་ད་ཡ། ཡ་ད་ཡོ་ནི། ར་ཡ་ཀྵེ་ཡ། ཡཀྵེ་ཡཙྪ། ནི་རཱ་མ་ཡ། ཧཱུཾ་ཧཱུཾ་ཕཊ་ཕཊ། འདི་ནི་འཇམ་དཔལ་ཞེས་བྱ་བའི། །རྡོ་རྗེ་འཇིགས་བྱེད་ཆེན་པོའི་མཆོག །འཁོར་ལོ་མ་ཧེའི་ཞལ་ན་ནི། །རྩ་བའི་སྔགས་ཀྱིས་ལས་ཀུན་བྱེད། །གསང་སྔགས་འབུམ་དུ་བཟླས་པ་ཡིས། །ལས་རྣམས་ཐམས་ཅད་བྱེད་པར་འགྱུར། །ཨོཾ་ཧྲཱིཿ་ཥྚྲྀཿ་ཝི་ཀྲྀ་ཏཱ་ན་ན་ཧཱུཾ་ཕཊ། འདི་ནི་གསང་སྔགས་རྒྱལ་པོ་སྟེ། །མ་ཧེའི་ཞལ་གྱི་སྦྱོར་བ་ཡིས། །ལས་རྣམས་ཀུན་ནི་བྱེད་པའོ། །འབུམ་ཕྲག་གསུམ་ནི་བཟླས་ནས་སུ། །ལས་རྣམས་ཐམས་ཅད་རབ་ཏུ་བྱ། །ཨོཾ་ཡ་མཱནྟ་ཀ་ཧཱུཾ་ཕཊ། འདི་ནི་མ་ཧེའི་གདོང་ཅན་གྱི། །སྙིང་པོའི་སྔགས་སུ་རབ་ཏུ་གྲགས། །ཡི་གེ་རེ་ལ་འབུམ་བཟླས་ན། །ལས་རྣམས་ཐམས་ཅད་རབ་ཏུ་འགྲུབ། །ཁམས་གསུམ་ལ་ནི་གང་དང་གང། །ཤིན་ཏུ་མཉམ་གཞག་རབ་ཏུ་གྲུབ། །དེ་ནས་བཟླས་པ་བཏང་འདོད་ན། །སྤྱན་དྲངས་ཁྲོ་བོ་གཤེགས་སུ་གསོལ། །ཨོཾ་ཛ་ཡ་ཛ་ཡ་སུ་ཛ་ཡ་བི་ཤྭ་རཱུ་པ་དྷ་རི། གྩྪ་གྩྪ་སྭ་སྠཱ་ནཾ། ཀྲྀ་ཏྭཾ་ཏེ་ན་ཏ་ཐཱ་གྩྪ་སརྦ་བུདྡྷ་ཤྩ་བི་སརྫ་ཡ་མ་མ་ཀཪྻཾ་ཀུ་རུ་སྭཱ་ཧཱ། གཤེགས་སུ་གསོལ་བའི་སྔགས་སོ། །གང་གཞན་ལྷག་པའི་སེམས་མེད་ཀྱང༌། །བརྩེ་བའི་སྟོབས་ཀྱིས་འདི་བྲིས་པའོ། །བསོད་ནམས་དེ་ཡིས་འགྲོ་བ་རྣམས། །འཇམ་དཔལ་དབྱངས་དང་མཚུངས་པར་ཤོག །དཔལ་རྡོ་རྗེ་འཇིགས་བྱེད་ཀྱི་སྒྲུབ་ཐབས་རྫོགས་སོ།། །།གྲུབ་པའི་སློབ་དཔོན་ལ་ལི་ཏས་མཛད་པའོ།། །།