རྣལ་འབྱོར།

[Full Size]

རྒྱ་གར་སྐད་དུ། ཤྲཱི་རཀྟ་ཡ་མཱ་སཱ་དྷ་ནཾ། བོད་སྐད་དུ། དཔལ་གཤིན་རྗེ་གཤེད་དམར་པོའི་སྒྲུབ་ཐབས། དཔལ་གཤིན་རྗེ་གཤེད་དམར་པོ་ལ་ཕྱག་འཚལ་ལོ། །བླ་མ་དེ་རྗེས་རྡོ་རྗེ་གཤིན་རྗེ་གཤེད་དམར་པོ། །རང་སྣང་ལུས་འཁྱུད་བདེ་བས་གང་ཞིག་གཞན་དོན་འཇུག །རྡོ་རྗེས་མཚན་བའི་དབྱུག་པ་མི་མགོར་ལྡན་པའི་ཕྱག །ཞལ་གཅིག་འཇིགས་པ་སེལ་ལ་གུས་པས་མགོས་ཕྱག་འཚལ། སྤྱིན་པ་ཚུལ་ཁྲིམས་ལ་སོགས་ལྡན། །བློ་བཟངས་སེམས་ཅན་དོན་རྩེ་གཅིག །བྱམས་སོགས་ཡོན་ཏན་ཡོངས་སུ་རྫོགས། །དད་དང་ཐོས་པས་རྣམ་པར་བརྒྱན། །སྔ་བར་བརྩེ་བའི་བདག་ཉིད་ཀྱིས། །དང་པོར་ཁ་སོགས་དག་བྱས་ནས། །སྐྱེ་བོས་དབེན་སོགས་དུར་ཁྲོད་སོགས། །བདེ་བའི་སྟན་ལ་བརྩམ་པར་བྱ། །རང་གི་སྙིང་གར་པདྨ་བཀོད། །ཤིན་ཏུ་གསལ་བའི་ཉི་མ་བལྟ། །ཡཾ་ཡིག་དབུས་སུ་ཧཱུཾ་

[Full Size]

ཡིག་ནི། །དམར་པོ་འོད་ཟེར་འཕྲོ་བའོ། །དེ་ཡི་འོད་ཀྱིས་སྤྱན་དྲངས་པའི། རང་ལྷག་ལྷ་ཡི་དཀྱིལ་འཁོར་དང༌། །རྡོ་རྗེ་འཆང་བདག་རྣམ་པ་ཅན། །བླ་མ་སངས་རྒྱས་དེ་ཡི་སྲས། །ཁམས་གསུམ་གནས་པའི་སེམས་ཅན་ཡང༌། །དཀྱིལ་འཁོར་པ་ཡི་རང་བཞིན་ཅན། །དམིགས་ནས་དེ་དག་རྣམས་ལ་ཕྱག །ལུས་ཀྱི་ཚོགས་ཀྱིས་རྣམ་པར་བརྩོན། །ཙརྩི་ཀཱ་ལ་སོགས་པ་ཡིས། །མཆོད་པ་བྱས་ལ་སྡིག་པ་བཤགས། །ལུས་དང་ངག་དང་ཡིད་ཀྱི་སྡིག །བགྱིད་དང་དེ་བཞིན་བགྱིད་སྩལ་གང༌། །གང་ཡང་རྗེས་སུ་ཡི་རང་བ། །དེ་དག་དུས་གསུམ་མགོན་ལ་བཤགས། །རྫོགས་སངས་རྒྱས་དང་དེ་ཡི་སྲས། །འཕགས་རྣམས་དགེ་ཚོགས་རྗེས་ཡི་རང༌། །རྫོགས་པའི་སངས་རྒྱས་དམ་པའི་ཆོས། །ཚོགས་ཀྱི་མཆོག་བཅས་སྐྱབས་སུ་མཆི། །ཡོན་ཏན་རྒྱ་མཚོ་ཁྱེད་རྣམས་ལ། །རང་གི་ལུས་ནི་དབུལ་བར་བགྱི། །དམ་པའི་ཆོས་ཀུན་སྟོན་པ་ཡི། །སྒྲ་དབྱངས་མཛེས་པས་བཞུགས་སུ་གསོལ། །ཡང་དག་རྫོགས་པའི་སངས་རྒྱས་དང༌། །དེ་སྲས་ལམ་གྱུར་སྤྱིན་སོགས་ཚུལ། །སྐུ་གསུམ་ཡེ་ཤེས་ཐོབ་བྱའི་ཕྱིར། །རབ་ཏུ་དང་བས་བསྟེན་པར་བགྱི། །སེམས་ཅན་རྣམས་ཀྱི་དོན་བསྒྲུབ་ཕྱིར། །རྫོགས་པའི་བྱང་ཆུབ་སེམས་བསྐྱེད་བགྱི། །བསོད་ནམས་ཀུན་ནས་གང་བསགས་པ། །རྫོགས་པའི་བྱང་ཆུབ་ཕྱིར་བསྔོའོ། །དཔལ་ལྡན་གཤིན་རྗེ་མཐར་བྱེད་དུ། གྱུར་ནས་བདག་གིས་འགྲོ་ཕན་བགྱི། །སྨོན་ལམ་འདི་ནི་བྱས་ནས་སུ། །བློ་ཡིས་དེ་རྣམས་གཤེགས་དེ་ནས། །བརྩེ་བས་ཆོ་ག་བཞིན་བལྟས་ཏེ། །སྣ་ཚོགས་སྟོང་པར་རྣམ་པར་བསམ། །རང་བཞིན་དང་བྲལ་སྟོང་པ་སྟེ། །རྒྱུ་ཡིས་ཀྱང་ནི་མཚན་མ་མེད། །རྣམ་པར་རྟོག་དང་བྲལ་ཉིད་ཀྱིས། །སྨོན་པ་རྣམ་པར་སྤངས་པའོ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། བརྟན་པར་བྱས་ནས་སེམས་དེ་ནི། །ཨཾ་ཡིག་ལས་བྱུང་ཉི་མ་དེར། །ཧཱུཾ་ལས་བྱུང་བའི་རྡོ་རྗེ་སྟེ། །ཀུན་ནས་སྔོན་པོ་རྩེ་ལྔ་པ། །འོད་ཟེར་འཕྲོ་བས་ཀུན་ནས་འཁྲིགས། །བསྲུང་བའི་དོན་དུ་བསྒོམ་པར་བྱ། །རྡོ་རྗེས་ས་གཞི་ཁོར་ཡུག་དང༌། །ར་བ་གུར་ནི་དེ་བཞིན་དུ། །སངས་རྒྱས་ཞིང་ནི་རྣམ་དག་ཕྱིར། །

[Full Size]

སླར་ཡང་བསམ་གཏན་བརྩམ་པར་བྱ། །དེར་ནི་སྣ་ཚོགས་པད་ཟླ་ལ། །སཾ་བྱུང་རྡོ་རྗེ་བཟང་པོ་ཡི། །ཡན་ལག་ཆོས་འབྱུང་ཟུར་གསུམ་དཀར། །སྣ་ཚོགས་པདྨ་རྡོ་རྗེ་དང༌། །སོན་ཅིང་གྱེན་དུ་གནས་བསྒོམ་དེའི། །དབུས་སུ་སླར་ཡང་དཀྱིལ་འཁོར་ནི། །བྷྲཱུཾ་ཡིག་འཁོར་ལོ་ལས་སྐྱེས་པ། །རྟག་པའི་ཡན་ལག་ཡང་དག་བྱུང༌། །གྲུ་བཞི་པ་ལ་སྒོ་བཞི་པ། །རྟ་བབས་བཞི་ཡིས་རྣམ་པར་བརྒྱན། །དྲ་བ་དྲ་ཕྱེད་ཀྱིས་སྤྲས་ཤིང༌། །སྟེགས་བུ་ལྷ་མོས་མཛེས་བྱས་པ། །སྣ་ཚོགས་རྩེ་མོ་རླུང་གིས་བསྐྱོད། །བ་དན་དྲིལ་བུ་དང་ལྡན་པ། །སྣ་ཚོགས་རྡོ་རྗེ་མཉམ་པར་མནན། །ཟླ་བ་ཉི་མ་རྒྱལ་བའི་གདན། །ཤར་ཕྱོགས་སུ་ནི་དཀར་པོ་ཆེ། །ལྷོར་ནི་སེར་པོ་ཡང་དག་ལྡན། །ནུབ་ཀྱི་ཆ་ནི་དམར་པོ་སྟེ། །བྱང་ནི་ལྗང་གུ་ཡང་དག་མཚུངས། །དབང་སྔོན་འོད་འབར་རྣམ་པར་ནི། །དབུས་ཀྱིས་གཞི་རྣམ་བསྒོམ་བྱ། །ཕྱོགས་ཀྱི་ཁ་དོག་དབྱེ་བ་འདིས། །སྣ་ཚོགས་རྡོ་རྗེའང་བསྒོམ་པར་བྱ། །ཐོག་ཀྱང་དེ་བཞིན་བསམ་བྱ་ཞིང༌། །རྩིག་པ་སོ་སོ་གོ་རིམས་བཞིན། །རྣམ་པ་ལྔ་ནི་རྣམ་བསྒོམས་ནས། །སངས་རྒྱས་སྐུ་ནི་རྣམ་པར་བསྒོམ། །རྣམ་པ་ལྔ་དེས་དཔལ་ལྡན་ནི། །རྡོ་རྗེ་གཤིན་རྗེ་འཇོམས་མཛད་པ། །སངས་རྒྱས་སྐུ་ཞེས་བྱ་བར་གྲགས། །དེ་ཡང་དབྱེ་བས་བརྗོད་པར་བྱ། །སྣ་ཚོགས་རྡོ་རྗེའི་ལྟེ་བ་ལ། །པདྨ་ཉི་མ་དབྱངས་ཟུང་དགོད། །དེ་ཡིས་ཟླ་བ་ཀ་ཡིག་སོགས། །ཌ་ཌྷ་ད་དྷ་ཡ་ལ་ཡང༌། །སྤེལ་ཏེ་ཟུང་དེས་རྫོགས་པ་ཡི། །ཟླ་བ་དམར་པོ་བསྒོམ་པར་བྱ། །འདི་དག་ཁོ་ན་རྫོགས་པ་ནི། །མེ་ལོང་ལྟ་བུའི་ཡེ་ཤེས་བརྗོད། །མཉམ་པ་ཉིད་ནི་དེ་གཅིག་ཉིད། །སོ་སོར་ཀུན་རྟོག་དེ་བྱུང་ཧཱུཾ། །བྱ་བ་གྲུབ་པའི་ཡེ་ཤེས་ནི། །དེ་ལས་བྱུང་བའི་རྣམ་པར་བསམ། །རྡོ་རྗེ་དབྱུག་པ་དབྱུག་པ་ཆེ། །མི་མགོ་སེར་པོས་རྣམ་པར་བརྒྱན། །ནོར་བུ་མེ་ཤེལ་ལྟ་བུ་ཡི། །འོད་ཟེར་འཁྲུག་པའི་ས་བོན་བཅས། །ཨོཾ་བཛྲ་དཎྜ་ཨཱཏྨ་ཀོ྅ཧཾ། ཞེས་པས་ང་རྒྱལ་བྱའོ། །དེ་ལས་བྱུང་བ་དཀར་པོའི་ཉི་འོད་སྣང་བ་ཐུབ་མཆོག་འོད་འཕྲོ་རང་སྣང་གིས་སྐུ་འཁྱུད། །སྒེག་པའི་ཁྲོ་བོའི་ཚུལ་ཅན་མཆོག་ཏུ་བདེ་བའི་རང་བཞིན་རྡོ་རྗེ་འཆང་གི་མཚན་འཆང་བ། །གཡོན་བརྐྱང་གདན་

[Full Size]

བཞུགས་འབར་བའི་རྡོ་རྗེ་དང་ལྡན་མི་མགོ་སོ་སོར་མཚན་པའི་དབྱུག་པ་ཐོགས། །གཏུམ་པོ་བདུད་རྩིའི་ཚོགས་ཀྱི་ཁུ་བས་ཡོངས་སུ་གང་བའི་པདྨའི་སྣོད་ནི་བསྣམས་པའོ། །ཆོས་ཀྱི་དབྱིངས་ཀྱི་རང་བཞིན་གྱི། །ཡེ་ཤེས་རྡོ་རྗེ་འཛིན་བདག་ཉིད། །རྣམ་པ་ལྔ་ཡི་རང་བཞིན་གང༌། །རྣལ་འབྱོར་ཞེས་ནི་མངོན་པར་བརྗོད། །འདི་ནི་རྣལ་འབྱོར་རོ། །