ཤ་ཟ་པཱི་ལུའི་སྒྲུབ་ཐབས།
ཤེས་རབ་སྐྱོང་།
― DTG048_Page_0313 ―
[མ་དཔེ་གཟིགས་ན་འདིར་གནོན།]
རྒྱ་གར་སྐད་དུ། པི་ཤཱ་ཙ་པི་ལུ་པ་ཡ་སཱ་དྷ་ནཾ། བོད་སྐད་དུ། ཤ་ཟ་པི་ལུའི་སྒྲུབ་ཐབས། ན་མོ་བྷ་ག་ཝ་ཏེ་པི་ལུ་པ་ཡ་པི་ཤཱ་ཙེ་ས་ཁ་བྱུངྒ་ཏེ་ས་མེ་ཀ་མ་ན་པྲ་ཡཙྪཾ་ཏུ། ཏདྱ་ཐཱ། ཧཱུཾ་ལུ་ཧཱུཾ་ལུ་པི་ཤཱ་ཙ་པ་ར་བ་ར། བ་ར་ད་བ་ར་ད། ཙུ་ལུ་ཙུ་ལུ། ཙུ་ཊུ་ཙུ་ཊུ་ན་མཿསྭཱ་ཧཱ། ཞེས་སོ། །དེ་ནས་ཚེས་བཅུ་བཞི་ལ་ཉིན་མཚན་དུ་སྨྱུང་གནས་བྱས་ལ། ཚོན་རྩི་མ་འདྲེས་པ་སྣོད་སར་པའི་ནང་དུ་བཞག་ལ་པིར་གྱིས་བྲི་བར་བྱ་བ་ནི། བྱང་ཆུབ་ཀྱི་ཤིང་གི་འོག་ཏུ་སྐྲ་གྱེན་དུ་ལངས་པ། །ཅེར་བུ་མདོག་ལྗང་གུ་མི་སྡུག་པ་མིག་དམར་པོ། ལག་པ་གཡས་པ་མཆོག་སྤྱིན་གྱི་ཕྱག་རྒྱ་བྱས་པ། གཡོན་པས་བྱང་ཆུབ་ཀྱི་ཤིང་ལ་འཇུས་པ། དེའི་མིག་གཉིས་རང་གི་ཁྲག་གིས་ཕྱེ་ལ། དེའི་མདུན་དུ་རྩྭ་ཀུ་ཤའི་མདུན་དུ་བརྗོད་པའམ། ཡང་ན་གཞན་ཡང་རུང་སྟེ་གཅེར་བུར་བྱས་ལ། འབུམ་ཕྲག་གཅིག་བསྙེན་པ་བསྐྱལ་ཏེ། དེ་ནས་ཡུངས་ཀར་སྟོང་ཕྲག་བརྒྱད་ལ་རྡོག་པོ་རེ་ལ་སྔགས་ལན་རེ་བཟླས་པས་སྙིང་གར་བརྒྱབ་པས་སྟོང་ཚོ་བརྒྱད་རྫོགས་པའི་རྗེས་ལ་ཚེས་བཅུ་བཞི་ལ་གཏོར་མ་ཆེན་པོ་དབུལ་ཞིང་མཆོད་པ་ཆེན་པོ་བྱའོ། །དེ་ནས་མི་སྡུག་པའི་གཟུགས་ཅན་ནམ། ཡང་ན་དྲི་ཞིམ་པོས་བྱུགས་ནས་འོང་བར་འགྱུར་རོ། །དེ་ལ་འཇིགས་པར་མི་བྱའོ། །པི་ལུ་པ་ལ་ཞེས་པའི་གྲོགས་པོ་ཁམས་བདེ་འམ་ཞེས་དྲིས་ཏེ། མེ་ཏོག་དཀར་པོ་དང་ཙནྡན་དཀར་པོ་བསྲེས་པས་མཆོད་ཡོན་དབུལ་ལོ། །དེ་ནས་ཁོ་ན་རེ་བདག་གིས་ཅི་བགྱི་ཞེས་ཟེར་ན། ང་ཅི་ཟེར་ན་གྱིས་ཤིག་ཅེས་སྨྲའོ། །དེ་བཞིན་དུ་བགྱིའོ་ཞེས་ཟེར་ནས་མི་སྣང་བར་འགྱུར་རོ། །དེ་ནས་གང་བསྒོ་བ་བྱེད་པ་དང༌། མཚན་མོ་དཔག་ཚད་བརྒྱ་ནས་ཀྱང་བུད་མེད་འགུགས་པ་དང༌། ཕར་སྐྱེལ་བ་དང༌། གྲུབ་པའི་དངུལ་ཆུ་དང༌། བཅུད་ལེན་དང༌། འདོད་པའི་རྫས་དང༌། བརྒྱགས་ཀྱང་སྟེར་རོ། །སྡུག་པའི་དུས་སུ་དྲན་པར་བྱས་ན་ཕྲག་པ་ལ་ཁུར་ནས་གར་འདོད་པ་དེར་སྐྱེལ་ལོ། །ཕན་པ་དང་
― DTG048_Page_0313 ―
[མ་དཔེ་གཟིགས་ན་འདིར་གནོན།]
གནོད་པ་ཡང་བཤད་དོ། །ཁྱད་པར་དུ་ལན་གཉིས་ལན་གསུམ་དུ་བསྒྲུབས་ན་བྲམ་ཟེ་བསད་ཀྱང་དེས་པར་འགྲུབ་བོ། །པི་ལུ་པ་ཞེས་བྱ་བའི་སྒྲུབ་ཐབས་རྫོགས་སོ།།
| 
