གནོད་སྦྱིན་ན་ཌ་ཕོ་མོའི་སྒྲུབ་ཐབས།
ཤེས་རབ་སྐྱོང་།
རྒྱ་གར་སྐད་དུ། ཡཀྵ་ན་ཌ་ན་ཌཱི་སཱ་དྷ་ནཾ། བོད་སྐད་དུ། གནོད་སྤྱིན་ན་ཌ་ཕོ་མོའི་སྒྲུབ་ཐབས། ན་མོ་བཻ་ཤྲ་ཝརྞ་སུ་ཏ་ཡ་ན་ཊ་ཀུ་བེ་རཱ་ཡ་དཱི་བྱ་མི་མཱ་ན་ཙི་ར་ཏ་ཡ་ཡེ་མ་མཱ་ལ་ཀུ་ཎ་ར་ལ་ཤ་རི་ཏ་ཡ། ཡཀྵ་ས་བནྡི་ཏ་ཡ་ཏྭཱཾ་བྷ་ག་ཝཱན། ཨ་ཝརྟ་ཡེ་ཥྱ་མེ། ཏདྱ་ཐཱ། མ་ཎི་མ་ཎི། ཀུཊྚ་ཀུཊྚ། ཀུ་ཀུ་ཀུ་ཀུ། པ་ར་པ་ར། པཱུ་ར་པཱུ་ར། ཀུ་པ་ར་ཀུ་པ་ར། ན་ཌ་ཀུ་བེ་རཱ་དི་བྱ་བི་མཱ་ན་ཀུ་ཎ་ལི་ཀུ་བི་ཀུ་བི་སྭཱ་ཧཱ། བྱང་ཆུབ་ཀྱི་ཤིང་དམ་གང་ཡང་རུང་བའི་ཤིང་ལེབ་བམ། གང་གི་
ཆོ་གས་གནོད་སྤྱིན་མོ་ཞལ་གཅིག་ཕྱག་གཉིས་མ་མདོག་ལྗང་གུ་མི་སྡུག་པ་མཆེ་བ་གཙིགས་པ་རྒྱན་ཐམས་ཅད་ཀྱིས་བརྒྱན་པ། ཕྱག་གཡོན་གྱིས་ཐོད་པ་ཁྲག་གིས་བཀང་བ་འཛིན་བ། གཡས་མཆོག་སྤྱིན་གྱི་ཕྱག་རྒྱ་བྱས་པ། །བྱང་ཆུབ་ཀྱི་ཤིང་གི་སྡོང་པོ་ལ་བརྟེན་ནས་གནས་པ་བྲི་ལ་བསམ། དེའི་མདུན་དུ་སྔར་གྱི་ཆོ་གས་རིག་པ་སྟོང་ཕྲག་བརྒྱད་ཅུང་མ་ལོངས་པ་ཅིག་བཟླས་ཏེ། དེ་ནས་ཉའི་ནུབ་མོ་སྟོང་ཕྲག་བརྒྱད་རྫོགས་པར་བྱས་པས་གནོད་སྤྱིན་མོ་མདུན་དུ་གནས་པར་འགྱུར་རོ། །དེ་ལ་དཀར་གྱི་མཆོད་ཡོན་དབུལ་ལོ། །དེ་ནས་མོ་འདི་སྐད་སྨྲ་བར་འགྱུར་ཏེ། བདག་གིས་ཅི་བགྱི་ཞེས་ཟེར་ཏེ། དེ་ལ་བདག་ལ་རིག་པ་འཛིན་པ་གྲུབ་པར་གྱིས་ལ། ཁྱོད་ཀྱང་ངའི་བུད་མེད་གྱིས་ཤིག་ཅེས་བརྗོད་དོ། །མོ་ན་རེ་དེ་ལྟར་བགྱིའོ་ཞེས་ཟེར་ནས་མི་སྣང་བར་འགྱུར་རོ། །དེའི་རྗེས་ནས་མཚན་མོ་རྒྱན་ཀུན་གྱིས་བརྒྱན་ནས་འོང་བར་འགྱུར་རོ། །དེ་དང་བཅས་པས་བདག་རིག་འཛིན་དུ་འགྱུར་ཞིང་གནོད་སྤྱིན་གྱི་སྟོབས་དང་ལྡན་པར་ཡང་འགྱུར་རོ། །གནོད་སྤྱིན་མོ་དེ་དང་རྩེ་ཞིང༌། རོལ་བས་གནས་པར་ཡང་འགྱུར་རོ། །རང་གང་དུ་འགྲོ་བར་འདོད་པ་དེར་འགྲོ་བར་འགྱུར་རོ། །ལོ་སྟོང་ཕྲག་ལྔ་འཚོ་བར་འགྱུར་རོ། །ལས་སྟོང་ཚོ་ཙམ་བྱེད་པའི་རིག་པ་འདིའོ། །གནོད་སྤྱིན་སྒྲུབ་པར་འདོད་ན་སྐྱེས་པའི་གཟུགས་སུ་བྲིས་ལ་སྔར་བཞིན་དུ་དགུག་པ་ལ་སོགས་པ་བྱས་ལ་བསྒྲུབ་པར་བྱའོ། །དེས་གྲུབ་ནས་གནོད་སྤྱིན་ཁོལ་པོ་ལྟ་བུར་འགྱུར་རོ། །ཨོཾ་ན་ཌེ་བི་ཎ་ཌེ་དྷ་ཎི་སྭཱ་ཧཱ། ཞེས་པ་འདི་ལ་བསྙེན་པ་འབུམ་ཕྲག་གཅིག་བཟླས་ལ། དེ་ནས་ཉའི་ཉིན་པར་ཁང་པ་དབེན་པར་མུན་པ་ཤིན་ཏུ་གནག་པ་ཅིག་ཏུ་འདུག་སྟེ་བཟླས་པ་བྱས་པས། ནམ་ཕྱེད་དམ་ཐོ་རངས་ཀྱི་དུས་སུ་འོང་བར་འགྱུར་རོ། །མ་འམ་སྲིང་མོ་འམ་ཆུང་མར་གྱུར་ཏེ། གང་ཡིད་ལ་འདོད་པ་ཐམས་ཅད་སྟེར་བར་འགྱུར་རོ། །གནོད་སྤྱིན་ན་ཌ་ཕོ་མོའི་སྒྲུབ་ཐབས་རྫོགས་སོ།། །།