འཇམ་དཔལ་ཡེ་ཤེས་སེམས་དཔའི་རིན་པོ་ཆེའི་ཕྱག་རྒྱ་དྲི་མ་མེད་པའི་ཆོ་ག་ཞེས་བྱ་བ།
གཉིས་མེད་རྡོ་རྗེ།
― DTG049_Page_0186 ―
[མ་དཔེ་གཟིགས་ན་འདིར་གནོན།]
རྒྱ་གར་སྐད་དུ། ཛྙཱ་ན་སཏྭ་མཉྫུ་ཤྲཱི་ན་བི་མ་ལ་རཏྣ་མུ་དྲ་བི་དྷི་ནཱ་མ། བོད་སྐད་དུ། འཇམ་དཔལ་ཡེ་ཤེས་སེམས་དཔའི་རིན་པོ་ཆེའི་ཕྱག་རྒྱ་དྲི་མ་མེད་པའི་ཆོ་ག་ཞེས་བྱ་བ། འཕགས་པ་འཇམ་དཔལ་ཡེ་ཤེས་སེམས་དཔའ་ཆེན་པོ་ལ་ཕྱག་འཚལ་ལོ། །བདག་བློ་ཡངས་ལྡན་ཆོ་ག་རྫོགས་པ་དང༌། །དྲིན་ལྡན་མ་ཉེས་གཤིན་བྱང་ཆུབ་སེམས་དཔའ་དེས། །རྩོད་དུས་རྐྱེན་དབང་ཤེས་རབ་ཉམ་ཆུང་ལ། །རྒྱུད་ཀྱི་རིན་ཆེན་ཕྱག་རྒྱ་བཏུད་དེ་བཤད། །སྙིང་རྗེ་ཆེ་དང་ཆེན་པོར་ལྡན། །བརྩེ་བས་དོན་བྱེད་སྐྱོ་བ་མེད། །སྤོབས་པ་ཆེ་ཞིང་ཕན་བློར་ལྡན། །ངང་ཚུལ་བཟང་ཞིང་སྐྱོ་བར་བཟོད། །ཤེས་རབ་ཆེ་ཞིང་ནུས་པ་ཡོད། །རྩོད་
― DTG049_Page_0187 ―
[མ་དཔེ་གཟིགས་ན་འདིར་གནོན།]
དང་ཚིག་གི་སྦྱོར་སྡེབ་མཁས། །དཔའ་ཞིང་རྟུལ་ཕོད་བརྩོན་འགྲུས་ཆེ། །བཀས་བསྒོ་བ་ལ་དྲིད་མི་འཇོག །དད་དང་ཤེས་རབ་གཙོ་བོར་གནས། །བླ་མའི་བརྒྱུད་ཐབས་སྲོག་བཞིན་སྲུང༌། །ཡིད་ལ་མི་བྱེད་དོན་བསྟན་ན། །པདྨའི་མདངས་འཕྲོ་གནས་ལས་ལྡོག །དམ་ཚིག་གསུམ་ནི་མིག་བཞིན་དུ། །སྲུང་བྱེད་རིན་ཆེན་ཕྱག་རྒྱའི་སྣོད། །དེ་ལ་འཇམ་དཔལ་ཡེ་ཤེས་སེམས་དཔའི་མཚན་ཐོས་པ་ཙམ་གྱིས་ཡིད་ལ་མོས་པར་འགྱུར་བའི་སྐྱེས་བུ་དེས་ནི་གྲུབ་པའི་ཚེགས་ཆུང་དུས་བདག་གིས་བྱེད་པར་འགྱུར་རོ། །དེ་ཡང་བསམ་གཏན་གྱི་ཁང་པར་ཡིད་དུ་འོང་བའི་རས་རིས་ཀྱི་མདུན་དུ་གླེགས་བམ་རབ་ཏུ་གནས་པར་བྱས་ཏེ་བཞག་ལ། དེ་དང་ཉེ་བར་ཙནྡན་དཀར་པོས་བྱུགས་པའི་མཎྜལ་ཁྲུ་གང་བ་གྲུབ་བཞི་པའི་སྟེང་དུ་མེ་ཏོག་གི་ཚོམ་བུས་མཆོད་ལ། ཙནྡན་གྱི་བདར་བུ་དང༌། མེ་ཏོག་དཀར་པོ་སྙིམ་པ་གང་ཐོགས་ཏེ། འཕགས་པ་འཇམ་དཔལ་ཡེ་ཤེས་སེམས་དཔའ་ལ་ཕྱག་འཚལ་ལོ། །ཡེ་ཤེས་སེམས་དཔའ་ཆེན་པོ་མཆོག་ཉིད་ལ་ཕྱག་འཚལ་ལོ། །མཚན་གྱི་འཁོར་ལོ་ཐམས་ཅད་ལ་ཕྱག་འཚལ་ལོ། །བདག་གི་རྣམ་པར་ཤེས་པའི་ཚོགས་ཐམས་ཅད་དང་ཡང་དག་པའི་དོན་གྱི་རྣལ་འབྱོར་དུ་མཛད་དུ་གསོལ་ཞེས་ལན་ཉི་ཤུ་རྩ་གཅིག་ཏུ་བརྗོད་ལ། མེ་ཏོག་དཀར་པོའི་ཕྲེད་བ་མགོ་ལ་བཅིངས་ཏེ། ཙནྡན་སེན་རྩེ་དང༌། ཏིལ་མར་ལ་བདར་བའི་ཆུ་མིག་ལ་བྱུགས་ལ། རྨི་ལམ་བརྟག་པའི་ལྟས་ཀྱང་ཤེས་པར་བྱའོ། །དེ་ནས་ཐོ་རངས་ཅི་རིགས་པའི་རྣལ་འབྱོར་དུ་གནས་ཏེ། སློབ་མ་རྟགས་དང་རྨི་ལམ་གྱིས་ཤེས་པར་ཡོ་བྱད་ཀྱིས་སྤྲས་ནས་ཉེ་བ་དང་ལྷའི་མཎྜལ་དང༌། སེམས་བསྐྱེད་པ་རིན་པོ་ཆེའི་ཕྱག་རྒྱའི་ཡོན་ཕུལ་ཏེ། ཚུལ་དང་མཐུན་པའི་གནས་ལ། ཨོཾ་ཀྱེ་ཀྱེ་ཀྱེ་ཡེ་ཤེས་སེམས་དང་ཞི་བ་རབ་མཛེས་སྐུ། །ཁྱོད་ཐུགས་བསྐྱེད་པ་འགྲོ་ལ་སྨན་པའི་གཙོ། །འཁོར་ལོའི་ཕྱག་རྒྱས་གཏི་མུག་དྲལ་མཛད་ཅིང༌། །མེ་ལོང་ལྟ་བུའི་མཚན་བསྟོད་ཐུགས་ཆུད་ལྟར། །སེམས་བསྐྱེད་ལ་མོས་བདེ་གཤེགས་རིགས་འགྱུར་དག །འགྲོ་བ་རྣམས་ཀྱི་སྐུ་ཡི་གདུལ་བྱའི་ཕྱིར། །བདེ་གཤེགས་རིགས་ཀྱི་སེམས་བསྐྱེད་གཟུང་བར་བགྱི། །དཀྱིལ་འཁོར་འཁོར་ལོ་བདག་བྱིན་བརླབ་ཏུ་གསོལ། །ཞེས་ལན་གསུམ་དང་གསུམ་གསུམ་དུ་བརྗོད་པ་ནི་དབང་པོ་དང་ཤེས་པའི་བྱེ་བྲག་གིས་ཤེས་
― DTG049_Page_0188 ―
[མ་དཔེ་གཟིགས་ན་འདིར་གནོན།]
པར་བྱའོ། །ཕྱག་རྒྱའི་བྱེ་བྲག་ནི་མན་ངག་གིས་སོ། །དེ་ནས་ཚེས་གཅིག་ནས་ཉེ་བར་བཟུང་སྟེ། རྣལ་འབྱོར་བས་རང་གི་སྤྱོད་བ་བཅུ་ལ་ཞུགས་ནས། ལྷའི་བསྒྲུབ་པ་ལྡན་པའི་མཆན་ཡང་དག་པར་བརྗོད་པའི་བསྙེན་པ་ཇི་སྲིད་སྤྲོའི་པར་བྱའོ། །ཐུན་མཚམས་དང་གློ་བུར་གྱི་ལས་ནི་མཁས་པ་དག་གིས་ཅི་རིགས་པར་སྦྱར་རོ། །པཎྜི་ཏ་དང༌། རྒྱལ་པོ་དང༌། བློན་པོ་ཆེན་པོ་དང༌། དམག་དཔོན་དང༌། བྲམ་ཟེ་སྒོ་བ་དང་གྲོང་དུ་འཇུག་པ་དང༌། དོན་གཉེར་བ་ལ་སོགས་པའི་ཚོགས་ན་གནས་པ་རྣམས་ཀྱིས་ནི་དྲན་པ་གཅིག་པའི་བྱིན་གྱིས་བརླབས་པ་ཙམ་ལ་ཅི་རིགས་པས་བསྟོད་དེ། བདག་དང་འགྲོ་བ་སྦྱང་ཙམ་བྱའོ། །ཚེ་ལ་སོགས་པའི་སྦྱོར་བ་འཕེལ་བ་དང༌། །འདིར་གསུངས་ཡོན་ཏན་རྣམས་ནི་འགྲུབ་པར་འགྱུར། །ལྷ་དང་མི་ཡི་མཆོག་གྱུར་གཙོ་བོ་བཞིན། །ལོ་ཀ་དག་ལས་ལྷག་པའི་གནས་སུ་འགྲོ། །མུན་ནག་མཐུག་པོ་དག་གིས་དཀྲིས་པ་རྣམས། །ཟད་འགྱུར་དྲི་མ་མེད་པའི་འོད་ཟེར་སྤུང༌། །པདྨའི་རྩ་བར་རྩི་ཡིས་མཆོག་གནས་གང༌། །གྷ་ཏྲ་ཤིང་གི་འདབ་མས་ལེན་བཞིན་དུ། །བསྐལ་པའི་གྲངས་ལ་རག་ལས་མི་འགྱུར་བར། །མི་ཡི་ཚེ་འདི་ཉིད་ཀྱིས་འདོད་བཞིན་ཐོབ། །ཡང་དག་མཚན་འདིའི་སྒོ་ལ་དད་པ་གང༌། །དེ་ཡི་མཚམས་མེད་ལྔ་ཡང་སྐད་ཅིག་དེས། །དག་ན་འདོན་དང་ཀློག་པ་སྨོས་ཅི་དགོས། །རི་ཁྲོད་མགོན་པོ་ལས་ཐོབ་པའི། །རྒྱུད་ཀྱི་རིན་ཆེན་ཕྱག་རྒྱ་འདི། །སྒྱུ་འཕྲུལ་དྲ་བའི་ཏིང་ངེ་འཛིན། །སྐྱེ་བའི་རིམ་འབྱུང་བྱམས་པས་བྱས། །རིགས་གང་རིགས་ཀྱི་ལྷ་ལས་ནི། །དངོས་གྲུབ་ཐོགས་མེད་ཐོབ་གྱུར་ཅིག །ནམ་མཁས་གར་ཁྱབ་ལོ་ཀ་འགྲོ་བ་རྣམས། མ་རིག་ཕྱག་རྒྱས་རབ་ཏུ་བཅིངས་གྱུར་པ། །བློ་གྲོས་ཆེན་པོའི་ཕྱག་རྒྱས་བཅད་ནས་ཀྱང༌། །འཇམ་དཔལ་ཡེ་ཤེས་སེམས་དཔའི་ཞབས་གྲུབ་ཤོག །འཕགས་པ་འཇམ་དཔལ་ཡེ་ཤེས་སེམས་དཔའ་རིན་པོ་ཆེའི་ཕྱག་རྒྱ་དྲི་མ་མེད་པའི་ཆོ་ག་ཞེས་བྱ་བ་རྒྱ་གར་གྱི་མཁན་པོ་དཔལ་ལྡན་གཉིས་སུ་མེད་པའི་རྡོ་རྗེས་མཛད་པ་རྫོགས་སོ།། །།རྣལ་འབྱོར་པ་བསོད་སྙོམས་པ་པྲཛྙཱ་ཤྲཱི་ཛྙཱ་ན་ཀཱི་རྟིས་རང་འགྱུར་དུ་མཛད་པའོ།། །།
| 
